སྔ་འགྱུར་བཀའ་མའི་ཆོས་སྡེའི་གླེགས་བམ་དོན་བཞི་པ།གླེགས་བམ། ཕུ༽སློབ་དཔོན་པདྨ། སྒེག་རྡོར། སེང་གེ་འོད། ཤེས་རབ་འོད།
སི་ཁྲོན་མི་རིགས་དཔེ་བསྐྲུན་ཁང་།
མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།
མགོ་བརྗོད།
རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི། ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།
ཐུགས་རྗེ་ཆེ་ཞུ།
ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།
མ་མོ་གསང་བ་ལས་ཀྱི་ཐིག་ལེ། སློབ་དཔོན་པདྨ།
མ་མོ་གསང་བ་ལས་ཀྱི་ཐིག་ལེ་ཞེས་བྱ་བ་བཞུགས་སོ། །སློབ་དཔོན་པདྨ་སཾ་བྷ་བའི་ཐུགས་དམ་མངའ་བདག་བཙད་པོ་ལ་གནང་བའོ། །འདི་ལ་གསུམ་སྟེ། ཀླད། གཞུང་། མཇུག་གོ། །གཞུང་ལ་གསུམ། གཞི། ལམ། འབྲས་སོ། །མཇུག་ལ་གཉིས་ཏེ། ལུང་བསྟན་པ་དང་། མཚན་བསྟན་པའོ། །དཔལ་དཀྱིལ་འཁོར་གྱི་གཙོ་བོ་བཅོམ་ལྡན་འདས། ལྡན་ཆེན་པོ་ཀུན་ཏུ་བཟང་པོ་ཧེ་རུ་ཀ་དང་། མཁའ་འགྲོའི་མ་ཚོམ་བུ་ཚོགས་བཅས་ལ། །སྒོ་གསུམ་གུས་པས་རྣམ་པར་བཏུད་དེ་མཇལ་འདྲེན་ཡེ་ཤེས་ཀྱི་ཕྱག་འཚལ་ལོ། །མཁའ་དགུ་དབྱིངས་དང་ཡེ་ཤེས་ཀློང་དགུ་དབྱེར་མེད་དུ་གནས་པའི། །མཁའ་འགྲོ་མའི་ཚོགས་ཀྱི་རྣམ་གྲངས་དྲུག་ཅུ་རྩ་བརྒྱད་ཀྱི། །གཙོ་མོ་ར་གྱུར་པ་ཡུལ་སྲིད་པ་བདེ་འགྲོའི་སྤྱི་དོན་གཏན་ལ་དབབ་པ་ལ་གསུམ་ཐུགས། །གནས་ལུགས་གཞི་དང་། ཐབས་ལམ། དང་མངོན་འབྲས་བུ། གྱུར་པའོ། །གནས་ལུགས་ནི་བྱང་ཆུབ་སྙིང་པོ་དོན། །ཡིན་ཏེ། སངས་རྒྱས་དུས་གསུམ་གྱི། སེམས་ཅན་ཁམས་གསུམ། གཉིས་མེད་ཀྱི་ལམ་པ་རྣམས་ཀྱི་ཡུམ། །དུ་གྱུར་པས། བདེ་དབྱིངས་དང་ཡེ་ཤེས་གཉིས་སུ་མེད་པའི་སྲས། ཆེན་རང་བྱུང་གི་ཡེ་ཤེས་འབྱུང་སྤྲོས་བ་ཐམས་ཅད་དང་བྲལ་བའི་དོན་དེ། བའི་གནས་ཡིན་བསམ་མོ། །མ་མོ་ཐུགས་ཀྱི་ཐེག་ལེ་ཞེས་སུ་བཤད། །གཉིས་པ་ཐབས་ནི་ལམ་ཡིན་རྣམ་གསུམ་ཏེ། །སྒོམ་གྱི་སྔོན་འགྲོ་དང་། དངོས་གཞི་དང་རྗེས་ཤེས་སོ། །སྔོན་འགྲོ་ལ་སྤྱི་དང་ཁྱད་པར་གཉིས་སུ་བསྟན། ཏེ། །སྤྱི་ནི་ཕྱི་བུམ་དབང་དང་། ནང་དམ་རྫས་ཀྱི་དབང་དང་། གསང་བ་ཤེས་རབ་ཡེ་ཤེས་ཀྱི། ཡི། །དབང་རྣམས་སྔོན་དུ་རྫོགས་པར་ཐོབ་པའོ། །ཁྱད་པར་གྱི་སྔོན་འགྲོ་ལ། འཁོར་ལོ་རྣམ་པ་གཉིས་ཀྱིས་བསྟན། ཏེ། །བསྲུང་བ་དང་ནི་རྣམ་རྟོག་སྦྱང་བའོ། །ཕྱི་ནང་གསར་བའི་བར་ཆད་བསྲུང་བ་མཚམས་ཀྱི་འཁོར་ལོ་ནི། །ཐབས་དང་ཚད་དང་དགོས་ཆེད་དོ། །ཐབས་ནི་རང་གི་ལུས་དང་སེམས་ལ། །གནས་པའི་རྩ། ཁྲག །དྲོད། དབུགས། རྣམ་པར་ཤེས་པའི་དྭངས་མ་རྣམ་པ་ལྔ། །རིགས་ཀྱི་ཁྲོ་མོ་ལྔར་གསལ་བར་བསྒོམ་སྟེ། །དེ་ལྟར་གསང་བར་གྱུར་པ་དང་། ཕར་འགྲོ་བ་དང་ཚུར་འོང་བ་དང་འགྲོ་འོང་མེད་པར་གནས་པའི་ཐབས་ཀྱིས་བར་ཆད་བསྲུང་བར་བྱའོ། །ཚད་ནི་ཐུན་དང་བརྟན་པ་ཐོབ་པའི་ཚད་གཉིས་ཡིན་སྟེ། །ཐུན་དང་པོ་ནི་རབ་འབྲིང་ཐ་མ་ཡིས། །བཅུ་དྲུག་བརྒྱད་དང་བཞི་བར་བསྒོམ། །གྱི་ཚད། བརྟན་པ་ཐོབ་པའི་ཚད་ནི། གསལ་བ་གསུམ་དང་ལྡན་པ་ཡིན་ཏེ། །གཟུགས་སུ་སྣང་བ་ཐམས་ཅད་སྐུར་གསལ་བ་དང་སྒྲ་གྲགས་པ་ཐམས་ཅད་གསུང་དུ་གསལ་བ་དང་སེམས་ཏིང་ངེ་འཛིན་གྱི་དཀྱིལ་འཁོར་དུ་གསལ་བའོ། །དགོས་ཆེད་ནི་ཕྱི་སྣང་བ་དང་། ནང་ཕུང་པོ་དང་། གསང་བ་རྣམ་པར་རྟོག་པ་ཡི། །བར་ཆད་གསུམ་པོ་ལས་གྲོལ་བར་བཤད། །རྣམ་རྟོག་སྦྱང་བར་བྱ་བའི་འཁོར་ལོའང་། །གསུམ་སྟེ། ཐབས་དང་ཚད་དང་དགོས་པ་སྟེ། །ཐབས་ཀྱི་ཕྱི་སྣང་བ་དང་། ནང་ཕུང་པོ་དང་། གསང་བ་རིག་པ་ཡི། །རིག་པའི་རྩལ་སྦྱོང་རྣམ་པ་གསུམ་གྱིས། །ཕྱི་ནང་གསང་བའོ་དངོས་པོ་གསུམ་ལ་ཞེན་པ་ཡི། །རྣམ་རྟོག་ཕྲ་རག་ཐམས་ཅད་ཆོས་ཀྱི་དབྱིངས་སུ་སྦྱང་། །ཚད་ནི་ཐུན་གྱི་ཚད་དང་བརྟན་པ་ཐོབ་པ་གཉིས་ཡིན་སྟེ། །ཐུན་ནི་རྣལ་འབྱོར་པ་རབ་འབྲིང་ཐ་མ་ཡིས། །བསྲུང་བའི་གོ་ཆ་བཞིན་ཏུ་བསྒོམ། །རབ་བཞི་འབྲིང་བརྒྱད་ཐ་མ་བཅུ་དྲུག་ཏུ་བྱས་ལ། བརྟན་པ་ཐོབ་པའི་ཚད་ནི་ཕྱི་ནང་གསང་བ་ཡི། །རྟོག་པ་གསུམ་གྱི་མཐའ་ལས་འགྲོལ་བ་ཡིན། །དགོས་ཆེད་ནི་རྣལ་འབྱོར་པའི་ཉམས་ཆག་ཐམས་ཅད་སྐོང་བ་དང་། །བླ་མ་དང་ཡི་དམ་ཡི་བྱིན་རླབས་རང་གི་རྒྱུད་ལ་འཇུག་པའོ། །གཏུམ་མོ་དངོས་གཞི་བསྒོམ་པའི་རིམ་པ་ནི། །སྤྱི་དོན་གསུམ་གྱིས་བསྟན་ཏེ། དང་པོ་རླུང་སེམས་བྲིད་པར་བྱ་བ། དང་བར་དུ་རླུང་སེམས་གཞུན་པ་དང་། །ཐ་མ་གཏུམ་མོ་ལམ་དུ་བསླང་བའོ། །དང་པོ་རླུང་སེམས་བྲིད་པ་བྱ་བ་ལ་རྣམ་གཉིས་ལས། །བྲིད་པ་རླུང་ནི་ཟས་བཅུད་ཅན་དང་སྤྱོད་ལམ་དལ་བ་དང་། །འོག་རླུང་ལྟེ་བར་འཇམ་པར་གཟུང་བའི་ཐབས་ཀྱིས་བྲིད་པ་སྟེ། །རྟགས་རབ་འབྲིང་ཐ་མ་གསུམ་འཆར་བའོ། །སེམས་ཉིད་བྲིད་པ་ནི། གོ་ཆ་དང་པོ་ཚད་དང་བཅས་པ་དང་། །བར་པ་དང་ཐ་མ་ཚད་དང་བཅས་པ་དག་གིས་སོ། །བར་དུ་རླུང་སེམས་གཞུན་པ་ལ་རྣམ་གཉིས་ཏེ། །རྩ་རླུང་གནད་ལ་དབབ་པ་དང་། །རིག་པ་ལམ་དུ་གཞུག་པའོ། །རྩ་རླུང་གནད་ལ་དབབ་པ་ལ ། ཐབས་དང་ཚད་དང་ནི། གནད་ལ་ཕེབས་པའི་དགོས་པ་དག་གིས་ཤེས་པར་བྱ། །དེ་ལས་དང་པོ་རྩ་རླུང་གནད་ལ་དབབ་པའི་ཐབས་ནི་གསུམ་སྟེ། ལུས་དང་རྩ་དང་རླུང་། །གནད་ལ་དབབ་པར་དང་པོ་ལུས་གནད་ལ་དབབ་པ་ལ་བདུན་གྱིས་བསྟན་པ་སྟེ། དྲོད་ལ་བདེ་བ་བསྐྱེད་པ་ནི་རྐང་པ་རྡོ་རྗེའི་སྐྱིལ་ཀྲུང་དུ་བྱས། ལག་པས་དྲོད་ཀྱི་མེ་ལོང་བསྡམས་པས་དྲོད་བསྐྱེད་པ་དང་། །རླུང་སོགས་གཞུག་པ་ནི་འཁོར་ལོ་ཉི་ཤུ་རྩ་བརྒྱད་གནད་ལ་དབབ་པ་དང་། དར་ཡུག་ནམ་མཁའི་མཐོངས་སུ་བསྟན་པ་དང་། ཟླ་བ་དལ་བསྐོར་བའི་ཐབས་དང་རླུང་ཐམས་ཅད་རང་སོར་ཚུད་པར་བྱེད་པ་ཡིན། མི་རྟོག་བསྐྱེད། །པ་ནི་དཔག་བསམ་ཤིང་གི་ལོ་མ་དགུག་པ་དང་། འདོད་ཆགས་ཀྱི་རྩ་གནད་ལ་བོར་བ་དང་། ཉི་ཟླ་རི་བོའི་རྩེ་ལ་མནན་པས་སྐྱེ་པ་ཡིན། དྲོད་དང་བདེ་བ་མྱུར་བར་བྱེད་པའི་ལུས་གནད་ནི་དང་པོར་བསྡམས། བར་དུ་སྤྲུག །ཐ་མར་སྒྲིམས་པའི་ཐབས། དང་རླུང་ནད་གཞོམ་པ་དང་ནི་དཔུང་མགོ་དྲངས་པོར་ཚིགས་དཀྲུག །ཡུལ་ལྗངས་བཀྲུག །ལུས་བྱིང་དུ་བསྒུལ་ཞིང་བརྡེག་པའི་ཐབས། དྲོད་དང་བདེ་བ་གསལ་བར་བྱེད་པ་ལུས་ཀྱི་ནི་ཐབས་དེ་རྣམས་ཐམས་ཅད་ཀྱིས་སོ། །གནད། །གཉིས་པ་རྩ་གནད་ལ་དབབ་པ་ལ་བཞི་ལས། དང་པོ་འཁོར་ལོ་དྲུག་བརྩེགས་ༀ་དང་། ཨཱཿདང་། ཧཱུྃ་དང་། ཀྵ་དང་། རྂ་དང་། ཡྂ་གི་འཁོར་ལོའི་སྲོག་ཤིང་གསུམ། །ནི་རོ་མ་དང་རྐྱང་མ་དང་ཀུན་དར་མའོ། །དེའང་རོ་མ་ལ་ཆོས་དྲུག་དང་ལྡན་ཏེ། དབྱིབས་སྤྲུལ་གྱི་ཕྲུ་གུ་ལྟ་བུ་རྩ་བ་ཟླུམ་པ། སྐེད་པ་བགས་ཀྱིས་ལྡིར་བ། རྩེ་མོ་ཕྲ་བའོ། །སྦོམ་ཕྲ་ནི་རྟ་རྔ་སུམ་སྒྲིབ་ཙམ་མོ། །གནས་ནི་སྒལ་ཚིག་པའི་སྟེ་ཀུན་དར་མའི་གཡས་ན་གནས་སོ། །རྟེན་ནི་དྲི་ཆུ་དང་ཞེ་སྡང་གི་རྟེན་བྱེད་དོ། །ལས་ནི་ཡེ་ཤེས་ཀྱི་སྒོ་འཆར་བར་བྱེད་པའོ། །རྐྱང་མའི་དབྱིབས་དང་སྦོམ་ཕྲ་ནི་གོང་མ་དང་མཐུན་ནོ། །ཁ་ཅིག་ནི་སྨུག་ལ་དབལ་དམར་བའོ། །གནས་ནི་སྒལ་ཚིགས་པའི་སྟེ་ཀུན་དར་མའི་གཡོན་ན་གནས་སོ། །རྟེན་ནི་རཀྟ་དང་འདོད་ཆགས་ཀྱི་རྟེན་བྱེད་དོ། །ལས་ནི་དབྱིབས་ཀྱི་དོན་གསལ་བར་བྱེད་དོ། །ཀུན་དར་མའི་དབྱིབས་ནི་རག་དུང་གྱེན་དུ་བསླང་བར་ལྟར་གནས་སོ། །ཁ་དོག་སྨུག་ལ་དབལ་མཐིང་པའོ། །སྦོམ་ཕྲ་ནི་རྟ་རྔ་རྐྱང་མ་ཙམ་མོ། །གནས་ནི་རོ་རྐྱང་གཉིས་ཀྱི་དབུས་ན་གནས་སོ། །རྟེན་གྱི་བྱང་སེམས་དང་གཏི་མུག་གི་རྟེན་བྱེད་དོ། །ལས་ནི་དབྱིངས་དང་ཡེ་ཤེས་གཉིས་སུ་མེད་པའི་དོན་གསལ་བར་བྱེད་དོ། །ལྗོན་པའི་ཚུལ་གྱིས་རྒྱས་པ་ནི་ཙཀྲ་དྲུག་གི་རྩ་འདབ་ཡིན་ཏེ། གདུགས་དང་ཡུ་བ་དང་འཁོར་ལོ་དང་ཉི་མའི་འོད་ཟེར་དང་དྲག་པའི་ཨེ་ཁུང་དང་། འོད་མའི་གཞུ་བདུངས་པ་ལྟ་བུའི་རྣམ་པ་དང་ལྡན་པ་ཡིན། སྟེ། །སྡོང་པོ་དང་ཡལ་ག་དང་ལོ་མ་དང་མེ་ཏོག་གི་ཚུལ་ལོ། །ཡན་མན་གཉིས་སུ་ཟུག་པ་ཡིས། །ཞེས་པ་ནི་རོ་མ་དང་རྐྱང་མའི་ཡར་སྣ་སྨིན་མའི་ནང་ཟུར་གཉིས་ལ་བྱ་རོག་སྡེར་མོ་ལྟར་ཟུག་གོ། །མར་སྣ་མེ་རླུང་གཉིས་ཀྱི་མཚམས་སུ་འདམ་གྱི་ཕུར་པ་ལྟར་ཟུག་གོ། །ཀུན་དར་མའི་ཡར་སྣ་སྨིན་མཚམས་སུ་པདྨ་ཁ་འབུས་པ་བཞིན་ཟུག་གོ། །མར་སྣ་རོ་རྐྱང་གཉིས་དང་འབྲེལ་ནས་ཡོད་དོ། །རྩ་དེ་རྣམས་ཀྱིས་ལུས་ཀྱི་རྟེན་བྱེད། སྲོག་གི་ཟུངས་འཛིན་པས་རྩ་གནད་ལ་དབབ་པའི་དེ་ཁོ་ན་ཉིད་དོ། །དང་པོ་རླུང་གནད་ལ་དབབ་པ་ལ་བཞི་ལས། དང་པོ་རླུང་དབང་དུ་བྱེད་པ་ལ་གཉིས་ཏེ། སྟེང་རླུང་དབང་དུ་བྱ་བ་དང་། འོག་རླུང་དབང་དུ་བྱ་བའོ། །སྟེང་རླུང་ལ་གཉིས་ཏེ། རླུང་སྦྱང་བ་དང་། རླུང་བུམ་པར་གཞུག་པའོ། །སྦྱང་བ་ནི་ཕྱིར་འགྲོ་ཚད་དུ་བཏང་། ནང་དུ་འདྲོངས་ཚད་དུ་དྲང་ངོ་། །བུམ་པར་གཞུག་པ་ནི་གཞི་འཛིན་པར་བྱེད་པའི་ལྟོ་བ་རུ་འབྱུང་འཇུག་མེད་པར་ཐུབ་ཐང་དུ་གཟུང་བའོ། །འོག་རླུང་ལའང་གཉིས་ཏེ། རླུང་སྦྱང་བ་དང་། བུམ་པར་གཞུག་པའོ། །སྦྱང་བ་ནི་ཨ་ལོང་ནས་ལྟེ་བའི་བར་དུ་འགྲོ་ལྡོག་བྱེད་པའོ། །བུམ་པར་གཞུག་པ་ནི་དྲོད་ཀྱི་མེ་ལོང་གིས་སྟེང་དུ་རྩོལ་བ་བསྐྱེད་ལ་ཐུབ་ཚད་བཟུང་བར་བྱའོ། །དང་གཉིས་པ་རྒྱས་པར་བྱ་བ་ལ་གསུམ་སྟེ། རོ་མ་ལ་བཙུད་ལ་ཡེ་ཤེས་ཆེན་པོའི་སྣང་བ་རྒྱས་པར་བྱེད་པ་དང་། རྐྱང་མ་ལ་བཙུད་ལ་བདེ་བ་ཆེན་པོའི་སྟོང་ཉིད་རྒྱས་པ་བྱ་བ་དང་། ཀུན་དར་མ་ལ་བཙུད་ལ་གཉིས་སུ་མེད་པའི་ཆོས་ཉིད་རྒྱས་པར་བྱ་བའོ། །རྩ་རོ་མ་ལ་རླུང་བཟུང་བ་ནི་སྣ་བུག་གཡས་པ་ནས་རླུང་རྒྱུ་བའི་དུས་སུ་འོག་རླུང་བཛྲ་བོ་ཏི་ས་མ་ལ་ཡ་ཧཱུཾ་གིས་དྲག་པོར་བཟུང་། སྟེང་རླུང་རྡོ་རྗེ་རི་རབ་ཀྱི་སྦྱོར་བས་འཇམ་པར་གཟུང་། རླུང་དེ་གཉིས་གཞི་འཛིན་པའི་ལྟེ་བར་ཁ་སྤྲད་ལ་ཅུང་ཞིག་བསྒོམ། དེ་ནས་ཁམས་གསེང་ལ་དྲོད་ཀྱི་མེ་ལོང་གི་སྟེང་དུ་ཕབ་ལ་བསྒོམ། དེ་ནས་ཁམས་གསེང་ལ་མེ་རླུང་བརྩིགས་པའི་ཙཀྲ་ལ་ཕབ་ལ་བསྒོམ། དེ་ནས་རླུང་སེམས་འདུས་པའི་རང་བཞིན་འོད་དཀར་པོའི་ཐིག་ལེ་སྲན་མའི་གའུ་ཙམ་དུ་གྱུར་ནས། རྩ་རོ་མའི་ནང་ན་ཡར་རྩེ་ཆི་ལི་ལི་སོང་བས། རྩ་དེ་སྦྲུལ་གྱི་ཕྲུ་གུ་འོ་མས་གསོས་པ་བཞིན་ཏུ་དཀར་ལྡང་གིས་སོང་ནས། ཕྱི་ནང་དང་སྒྲིབ་གཡོགས་མེད་པར་གསལ་དྭངས་གིས་སོང་བར་བསྒོམ་མོ། །རྩ་རྐྱང་མ་ལ་རླུང་གཟུང་བ་ནི། རླུང་སྣ་བུག་གཡོན་ནས་རྒྱུ་བའི་དུས་སུ། འོག་རླུང་བཛྲ་ཀྲོ་ཏི་ཤཱ་རི་ག་བ་ད་མ་རྒྱ་ཧཱུྃ་གིས་དྲག་པོར་བཟུང་། སྟེང་རླུང་པདྨ་འཐུམས་ཀྱི་སྦྱོར་བས་འཇམ་པར་གཟུང་། རླུང་དེ་གཉིས་གཞི་འཛིན་པའི་ལྟེ་བར་ཁ་སྦྱར་ལ་ཅུང་ཞིག་བསྒོམ། དེ་ནས་ཁམས་གསེང་ལ་དྲོད་ཀྱི་མེ་ལོང་གི་སྟེང་དུ་ཕབ་ལ་བསྒོམ་མོ། །དེ་ནས་ཁམས་གསེང་ལ་མེ་རླུང་བརྩེགས་པའི་འཁོར་ལོ་ལ་ཕབ་ལ་བསྒོམ། དེ་ནས་རླུང་སེམས་འདུས་པའི་རང་བཞིན་འོད་དམར་པོའི་ཐིག་ལེ་སྲན་མའི་གའུ་ཙམ་དུ་གྱུར་ནས་རྩ་རྐྱང་མའི་ནང་ན་ཡར་རྩེག་ཆི་ལི་ལི་སོང་བས། རྩ་དེ་དར་དཀར་གྱི་སྐུད་པ་མཚལ་ཆུ་ནས་དྲངས་པ་བཞིན་དུ་དམར་ལྡང་གིས་སོང་ནས། ཕྱི་ནང་དང་སྒྲིབ་གཡོགས་མེད་པར་དྭངས་སང་གིས་སོང་བར་བསྒོམ། རྩ་ཀུན་དར་མ་ལ་རླུང་གཟུང་བ་ནི། རླུང་སྣ་བུག་གཉིས་ནས་རྒྱུ་བའི་དུས་སུ། འོག་རླུང་ཧཱུྃ་གཏུམ་ཆོད་ཀྱི་དྲག་པོར་བཟུང་། སྟེང་རླུང་ཧཱུྃ་ནས་འདྲེན་གྱིས་འཇམ་པར་གཟུང་། རླུང་དེ་གྲ་གཞི་འཛིན་པའི་ལྟེ་བར་ཁ་སྤྲད་ལ་ཅུང་ཞིག་བསྒོམ། དེ་ནས་ཁམས་གསེང་ལ་དྲོད་ཀྱི་མེ་ལོང་གི་སྟེང་དུ་ཕབ་ལ་བསྒོམ། དེ་ནས་ཁམས་གསེང་ལ་མེ་རླུང་བརྩེགས་པའི་འཁོར་ལོར་བབ་པ་བསྒོམ། དེ་ནས་རླུང་སེམས་འདུས་པའི་རང་བཞིན་འོད་དཀར་དམར་མཐིང་གསུམ་འདྲེས་པའི་ཐིག་ལེ་སྲན་མའི་གའུ་ཙམ་དུ་གྱུར་ནས། རྩ་ཀུན་དར་མ་ན་ཡར་ལ་རྩེག་ཆི་ལི་ལི་སོང་བས། རྩ་དེ་བྱི་རང་ཀྱི་རྒྱུ་མ་དངུལ་ཆུས་བཀང་བ་ལྟར་ཅི་དྲག་ལ་གདབ། དྲོད་དང་བདེ་བ་མྱུར་དུ་སྐྱེ། རླུང་གི་ནད་དུ་མི་འགྱུར་བའི་དགོས་པ་ཡོད་དོ། །རྒྱས་མ་ཐེབས་ན། དེ་ལས་ཟློག་པའི་སྐྱོན་ཏུ་འགྱུར་རོ། །པ་དང་། །གསུམ་པ་རླུང་ཞི་བར་བྱེད་པ་ལ་གསུམ་སྟེ། རབ་ཚངས་པའི་བུ་གའི་སྦྱོར་བ་ཞི་བར་བྱ་བ་དང་། ཐ་མ་ན་གློད་པའི་སྦྱོར་བས་ཞི་བར་བྱའོ། །རབ་ནི་དང་པོ་རླུང་སེམས་གཉིས་སུ་མེད་པར་དྲིལ་ལ་དྭངས་སྙིགས་འབྱེད་པའི་འཁོར་ལོར་ཐུབ་ཐང་གིས་མནན། དེ་མི་ཐུབ་པར་གཟོ་ཙམ་ན་རྩོལ་བ་དྲག་པོ་ལུས་གཅུ་བ་དང་བསིག་པ་དང་རྔུབ་པའི་སྦྱོར་པ་བྱ། དེས་ཀྱང་མི་ཐུབ་པར་གཟོ་ཙམ་ན། ཚངས་པའི་བུ་ག་ནས་ཡར་ལ་རླུང་སྔོ་བ་མྱུར་བ་ཚ་བའི་ངད་དང་བཅས་པ་ཆི་ལི་ལི་སོང་བས་ཞི་བར་བསྒོམ། འབྲིང་ནི་གོང་མ་ལྟར་བྱས་ལ་མི་ཐུབ་པར་གཟོ་ཙམ་ན་བ་སྤུའི་བུ་ག་ཐམས་ཅད་ནས་གོང་མ་ལྟར་སོང་བས་ཞི་བར་བསྒོམ། ཐ་མ་ནི་གོང་མ་ལྟར་བྱས་ལ་མི་ཐུབ་པར་གཟོ་ཙམ་ན། ན་སའི་སྒོ་གློང་ལ་བཞི་ཆ་དང་ཕྱེད་དང་སུམ་གཉིས་ཙམ་ཁ་ཕྲི་ལ་བསྒོམས་པས། ཡར་སྐྱེ་མར་བྲི་རིམ་པར་ཤེས་པར་བྱའོ། །དང་བཞི་པ་རླུང་དྲག་པོ་ཡིས། །ཚར་བཅད་པ་ནི་སེང་གེ་རྣམ་རོལ་གྱི་ཕྱག་རྒྱས་རླུང་གི་སྒོ་བཀག་ལ་ཙཀྲ་དྲུག་དང་པོར་ཚིགས་ཐམས་ཅད་དུ་རྣམ་ཤེས་རླུང་དང་སྦྲགས་ལ་དྲང་། དེ་ལྟར་ཐུབ་ཚད་དུ་བཟུང་པས་འཁོར་ལོ་སོར་ཚིགས་ཀུན་ཏུ་རྩེག་ཅི་ལི་ལི་སོང་བར་བསྒོམ། ལུས་ལ་ན་ཚ་ལ་སོགས་པ་ཡོད་པར་ཡང་རྣམ་ཤེས་རླུང་ཞོན་དྲངས་ལ་བ་སྤུའི་བུ་ག་ནས་ཡར་ལ་ནད་ཀྱི་རླངས་པ་ཕྱུ་རུ་རུ་སོང་བར་བསྒོམ་མོ། །འོག་རླུང་དྲང་བ་དང་སྟེང་རླུང་མནན་པ་དང་བར་རླུང་དཀྲུགས་པ་དང་། །གསུམ་ནི་རླུང་སེམས་སྦྱོར་བ་གསུམ་དང་ལྡན་པ་སྟེ་གནད་བཞི་ཀུན་ལ་འཇུག་པལ་ཡིན་ནོ། །རླུང་གི་འགགས་དང་བྲལ་བ་ནི་ལུས་ལ་བཀུ་མཉེ་འཐགས་པར་བྱ། སྣ་སྒོར་རྒོད་བཞིན་དུ་བུད་རླུང་འཇམ་རིང་དུ་མནན་ལ་གཡས་དང་གཡོན་དུ་གཞུན་སྒལ་ཚིགས་ལེགས་པར་བསྲང་ལ་རླུང་ཕྱིར་དྲག་ཏུ་འཕང་བར་བྱས། ཙཀྲ་བཞི་ལ་བླ་མ་བསྒོམ་པ་ནི། རླུང་གི་གནད། །ཆག་ཚད་ལ་གཉིས་ཏེ། ཐུན་གྱི་ཚད་དང་བརྟན་པ་ཐོབ་པའི་ཚད་སྟེ། །ཐུན་ནི་རབ་འབྲིང་ཐ་མ་ལས། །ཐུན་གསུམ་དང་ཐུན་དྲུག་དང་ཐུན་དགུ་བར་བསྒོམ། །བརྟེན་པ་ཐོབ་པའི་ཚད་ལ་བཞི་སྟེ། ལུས་སྣུམ་པ་དང་མཉེན་པ་དང་། འཇམ་པ་དང་། །ལུས་ལ་གོས་ཀྱི་འཁྲི་བ་ཆོད་པའོ། །དགོས་ཆེད་ནི་ལུས་ཀྱི་དྲོད་དང་སེམས་ཀྱི་དྲོད། །ཐ་མ་ལ་རིམ་གྱིས་སྐྱེ་བ་དང་རྣལ་འབྱོར་པ་རབ་ལ་ཅིག་ཆར་དག་ཏུ་སྐྱེ། །བས་སོ། །རིག་པ་ལམ་དུ་གཞུག་པ་ལ་གསུམ་ལས། དང་པོ་བྱིང་བ་གསེང་བ་ནི། རླུང་སེམས་གཅིག་ཏུ་དྲི་ལ་རྩ་ཀུན་དར་མ་ནས་ཡར་ལ་དཀར་ཆི་ལི་ལི་དྲངས་ལ་ཚངས་པའི་བུ་ག་ནས་ཡར་བཏོན་ལ་ཤེས་པ་ནམ་མཁའི་མཐོངས་སུ་བཞག །གཉིས་པ་རྒོད་པ་དགུག་པ་ནི། མེ་རླུང་འདུས་པའི་འཁོར་ལོ་ལོན་གཏུམ་མོ་སྤར་ཏེ་ཀྵ་དང་ཧཱུྃ་ལ་སོགས་པ་ཞུ་ནས་འཁོར་ལོ་བཞིའི་རྟོག་པ་ཆོས་ཉིད་དུ་སྦྱངས་ལ་བདེ་སྟོང་གི་ངང་ལ་ཕྲིལ་གྱིས་བསྒོམ་མོ། །དང་། །གསུམ་པ་ལྐུགས་པའི་སྐྱོན་རྣམས་བསལ་བ་ནི་གནས་ལུགས་ངོ་མ་ཟིན་ན་སྣང་བ་ལ་སྟོང་པས་རྒྱས་གདབ། སྟོང་པ་ལ་སྣང་བས་རྒྱས་གདབ་ལ་གཉིས་མེད་ཀྱི་དོན་འབྱོངས་བར། བྱས་ལ། །སེམས་དཔའི་ལྟ་སྟངས་ཀྱིས་སྣང་སྟོང་གཉིད་མེད་ཀྱི་དགོངས་པ་གསལ་གདབ་བོ། །བདེ་བ་བསྒོམ་པ་ནི་ཐིག་ལེ་འབར་འཛག་གི་གཏུམ་མོ་ཡིན། གསལ་བ་བསྒོམ་བ་ནི་འཁོར་ལོའི་འོད་འབར་གྱི་གཏུམ་མོ་ཡིན། མི་རྟོག་པ་བསྒོམ་པ་ནི་བདེ་གསལ་གཉིས་ལ་རྒྱས་འདེབས། པ། །འི་གཏུམ་མོ་ཡིན། བདེ་གསལ་མི་རྟོག་པ་གསུམ་འདྲེས་པའི་ངང་ལས་གཞན་དུ་མ་གཡོས་མཉམ་པར་བཞག །བ་ནི་རིག་པ་ལམ་དུ་གཟུད་པའོ། །གཏུམ་མོ་ལམ་དུ་བསླང་བ་ནི། །དོན་གསུམ་སྟེ། ལམ་དུ་སློང་བའི་ཐབས་དང་ལམ་དུ་སློངས་པའི་ཚད་དང་ལམ་དུ་སློངས་པའི་དགོས་ཆེད་དོ། །དེ་ལ་དང་པོ་ལམ་དུ་སློང་བའི་ཐབས་ཀྱི་གནད་ཁ། རླུང་གི་འཁོར་ལོ་ནས། །ཡི་གེ་ཡཾ་ལས་ཡེ་ཤེས་རླུང་ལྔ་སྐྱེ་བ། རྡོ་རྗེའི་ཆད་པ་ལྡན་པ། ཁ་ཐོད་ཁའི་མཆོག་མ་དང་ལྡན་པའི་གཞུ་དྲག་ཏུ་བདུངས་ཏེ། །གཞུ་དེ་ལ་རླུང་གི་འོད་ཟེར་ཕྱོགས་བཅུར་འཕྲོ་བ་དེས་སུམ་མདོའི་མེའི་འཁོར་ལོའི་རྃ་ལས། ཤེས་རབ་ཡེ་ཤེས་མེའི་མདེའུ་ལས། །འི་རང་བཞིན་གསལ་བ་བརྟན་པ་མྱུར་བ་ཕྱི་ནང་མེད་པ་དེ་ལ་ཡེ་ཤེས་ཀྱི་མེ་དམར་སེར་དུ་འཕྲོ་བ་རྣམ་པར་རྟོག་པ་ཐམས་ཅད་འཇོམས་པར་བྱེད་པའི་ཆོས་དང་ལྡན་པ། སྣང་བའི་རྫས་སུ་གྲུབ་ལ། རྟོག་པའི་རྫས་སུ་མ་གྲུབ་པ་རང་བཞིན་དག་པའི་བདེ་བ་ཆེན་པོ་ནི། སྤྲོས་པའི་སྟོང་གསལ་མེའི་ཐིག་ལེ་དགུ་པོ་དེ་རྣམས་ཡི་གེ་ཀྵཿལས་གྱེན་ཏུ་འཕང་། །ངོ་། །འཕངས་པས་ཡི་གེ་ཀྵའི་འཁོར་ལོ་འོད་ཀྱི་རང་བཞིན་དུ་བཞུ་ནས་ཡར་འབར་ཞིང་མར་འཛག་པར་བསྒོམ། དེ་ནས་ཧཱུྃ་དང་ཨཱཿདང་ༀ་གྱི་འཁོར་ལོ་ལའང་དེ་བཞིན་དུ་འབར་འཛག་བྱའོ། །གཉིས་པ་ལམ་དུ་སློངས་པའི་ཆག་ཚད་ལ་གཉིས་ཏེ། ཐུན་གྱི་ཚད་དང་བརྟན་པའོ། །ཐོབ་པའི་ཚད་དེ། ཐུན་ནི་རབ་འབྲིང་ཐ་མ་སྟེ། །དྲུག་དང་བཞི་དང་གཉིས་པར་བསྒོམ། །བརྟན་པ་ཐོབ་པའི་ཚད་ནི། ལས་དང་ཡེ་ཤེས་ཀྱི། །གཏུམ་མོ་ལུས་དང་སེམས་ལ་འབར་པའོ། །གསུམ་པ་ལམ་དུ་སློངས་པའི་དགོས་ཆེད་ནི་དཀྱིལ་འཁོར་གྱི་གཙོ་བོ་དཔལ་ཆེན་པོ་དང་ལྡན་པའི་རིགས་ལྔ་ཡེ་ཤེས་ལྔ་ཡི། །མཁའ་འགྲོའི་མ་མོའི་ཚོམ་བུ་ཚོགས་ཀྱི་དཀྱིལ་འཁོར་དུ། །བཅས་པའི་ངོ་བོ་ཡེ་གདོད་མ་ཉིད་ནས་ལྷུན་གྲུབ་ཏུ་གནས་པའི་དོན། །དེ་ཉིད་རང་ལ་རྟོགས་པ་མངོན་གྱུར་དུ་འབར་བར་བྱེད་པའོ། །སྒོམ་པ་དག་གི་རྗེས་ཤིས་ནི་བསྒོམ་པའི་ཐུན་ཚོད་ཅིག་དག་ཏུ། །ཆེད་འཛིན་གྱི་རྟོག་པ་དང་བྲལ་བའི་བདེ་བ་ཡེ་ཤེས་རང་སྣང་གི་འཁོར་ལོ་མ་འགགས་པའི་གསལ་བ་རྩ་དང་རླུང་དང་བདེ་བ་ཙམ་དུའང་མི་རྟོག་པའི། །ངང་ལ་རིག་པ། མཉམ་པར་གཞག་པར་བྱས་ནས་ནི། །ཕྱི་ནང་གསང་བའི། སྤྱོད་ཡུལ་ཀུན་དང་སྒོམ་དུ་བསྲེ་བར་བྱ། །འོ། །གསུམ་པ་གཏུམ་མོ་མངོན་དུ་གྱུར་པའི་འབྲས་བུ་ནི། །བདག་དོན་དང་གཞན་དོན་ལྷུན་གྱིས་གྲུབ་པ་སྟེ། །དོན་དམ་ངེས་པའི་སྐུ་ལྔ་དང་གསུང་ལྔ་དང་ཐུགས། །ལྔ་དང་ཡོན་ཏན་ལྔ་དང་། ཡོན་ཏན་ལྔ་དང་། ཕྲིན་ལས་རྣམ་པ་ལྔ། །སྟེ་ཉི་ཤུ་རྩ་ལྔ་པོ་དེ་རྣམས། རིག་པ་བྱང་ཆུབ་སེམས་ཀྱི་བདེ་ཀློང་དུ། །གཅིག་ཏུ་འཁྱིལ་བ་སྤྲོས་པ་དང་བྲལ་བ་ནི་བདག་གི་དོན། །ཏོ། །ཀུན་བཟང་ཧེ་རུ་ཀ་ཡི་ཐུགས་སྤྲོས་པ་དང་བྲལ་བའི་ངང་ལས་ནི། །བདག་དོན་ཐུགས་རྗེ་ཆེན་པོ་སྤྲུལ་པའི་ཡི་གེ་ཧཱུྃ་དུ་ཤར། །ནས། ཧཱུྃ་གིས་འགྲོ་བ་རིགས་དྲུག་གི་སེམས་ཅན་ཐམས་ཅད་གྱི། །ཡུལ་ལྔ་དབང་པོ་ལྔའི་བག་ཆགས་ཀུན་གཞི་ལ་བཞག་ནས་ཡོད་པ་དེ་སྦྱོང་བར་བྱེད་པ་གཞན་གྱི་དོན། །ཏོ། །ཡེ་ཤེས་ཀྱི་མཁའ་འགྲོ་མ་དང་མ་མོའི་ཚོགས་སུ་གྱུར་པ་དེ་དག །ཐམས་ཅད་ཀྱི། །ཕྱི་ནང་གསང་བའི་རྒྱུད་ཆེན་རྒྱ་མཚོ་ལྟར་དཔག་པར་དཀའ་བ་མཐའ་ཡས་པར་བཞུགས་པའི། །དགོངས་པ་ཀུན་བསམ་གཏན་གྱི་མན་ངག་འདི་ལ་འདུས་པའི་ཕྱིར། གསང་བའི་བཅུད། །དུ་གྱུར་པའི་མན་ངག་འདི་རིག་པ་བྱང་ཆུབ་སེམས་ཀྱི་གཏེར་དུ་སྦ། །འོ་ཞེས་ཀུ་མཱ་ར་ལ་གདམས་སོ། །རྒྱ་གར་གྱི་ཡུལ་དུར་ཁྲོད་ཆེན་པོ་བརྒྱད་ཀྱི་ནང་ནས་བསིལ་བའི་ཚལ་གྱི་བྲག་ཕུག་དུ། ཨུ་རྒྱན་གྱི་མཁན་པོ་ཆེན་པོ་པདྨ་འབྱུང་གནས་ལ། དཔལ་ལྡན་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་དངོས་སུ་ལུང་བསྟན་པའི་དགོངས་ཉམས། འདི་ནི་ཕྱི་རབས་ཀྱི་རྣལ་འབྱོར་པ་རྣམས་ཀྱིས་ཡིད་བཞིན་ནོར་བུ་རིན་པོ་ཆེ་ཉིད་དོ། །མཁའ་འགྲོ་མའི་སྙན་བརྒྱུད་བསམ་གཏན་སྒྲོན་མ་ཞེས་བྱ་བ་རྫོགས་སོ།། ༈ །།ཆོས་འདི་ལ་བཞི་སྟེ། མཚན་དང་། ཕྱག་དང་། གཞུང་དང་། མཇུག་གོ། །མཚན་ལ་གཉིས་ཏེ། རྒྱ་གར་གྱི་མཚན་དང་། བོད་ཀྱི་མཚན་ནོ། །གཞུང་ལ་གསུམ་སྟེ། ཤེས་ཆོས་རྣམས། པར་བྱ་བའི་ཡུལ་དང་། ཉམས་སུ་བླང་བའི་ཐབས་དང་། མངོན་དུ་གྱུར་པའི་འབྲས་བུའོ། །ཉམས་སུ་བླང་བའི་ཐབས་ལ་དྲུག་སྟེ། གནས་རྒྱལ་བའི། ལུགས་ངོ་སྤྲོད་པ་དང་། འཕྲོད་ངོ་བོ་ཉིད། པའི་རྟགས་དང་། ཚད་དང་། རིག་པ་བཞག་དབྱིངས་ཀྱི། ཐབས་དང་། ཉམས་དང་། དེ་ཐོག་ཏུ་གནས་སུ་མ་བཏུབ་ན་བཅོས་ཐབས་བསྟན་པའོ། །ཉམས་ལ་གསུམ་སྟེ། དབྱིངས་ཀུན་ཏུ་བཟང་རིགས་དང་། མོའི་ཉམས་དང་། ཡེ་ཤེས་ཀུན་ཏུ་དབྱིངས་ཀྱི། བཟང་པོའི་ཉམས་དང་། དབྱིངས་ཡེ་ཤེས་དབྱེར་མེད་བདེ་བ་བདེ་གསལ། ཆེན་པོའི་ཉམས་སོ། །འབྲས་བུ་ལ་གཉིས། རྣམ་གྲངས་སུ་ཀུན་དང་། དབྱེ་བ་དང་ངོ་བོ་ཉིད་དུ་བསྡུ་ཚུལ་ལོ། །མཇུག་གི་དོན་ལ་གཉིས། ཟུང་ཅིག་བླང་དོར། པར་གདམས་པ་དང་། དགེ་ཆོས་དབྱིངས། བ་བསྔོ་བའོ། །བསྡུས་དོན། ཨཐྎ།། །།
རྒྱུད་ཀྱི་རྒྱལ་པོ་ཆེན་པོ་དཔལ་གསང་བའི་སྙིང་པོའི་འགྲེལ་པ། སྒེད་རྡོར།
མ ཧཱ རཱ ཛ ཏ ནྟྲ ཤྲཱི གུ ཧྱ ག རྦྷ ནཱ མ ཊཱི ཀཱ སྟི།
རྒྱུད་ཀྱི་རྒྱལ་པོ་ཆེན་པོ་དཔལ་གསང་བའི་སྙིང་པོའི་འགྲེལ་པ་ཞེས་བྱ་བ་བཞུགས།
རྒྱ་གར་སྐད་དུ། མ་ཧཱ་རཱ་ཛ་ཏནྟྲ་ཤྲཱི་གུ་ཧྱ་གརྦྷ་ནཱ་མ་ཊཱི་ཀ །བོད་སྐད་དུ། རྒྱུད་ཀྱི་རྒྱལ་པོ་ཆེན་པོ་དཔལ་གསང་བའི་སྙིང་པོའི་འགྲེལ་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དུས་གསུམ་ཀུན་གྱི་བདག་ཉིད་ཆེ། །བྱེད་པ་རྡོ་རྗེ་དཀྱིལ་འཁོར་གཙོ། །དགོས་པ་མཐའ་དག་གཏེར་གྱུར་པ། །ཀུན་བཟང་ཡིད་ལའང་ཕྱག་འཚལ་ལོ། །སྟོན་པ་གཉིས་ལ་མཆོད་བྱས་ནས། །དངོས་གསུམ་གསལ་བྱེད་གཅིག་གི་གཏེར། །རྣམ་གྲངས་གསུམ་བཞིས་མཚོན་པའི་རྒྱུད། །མཐར་ལམ་མདོ་ཙམ་དབྱེ་བར་བྱ། །དེ་ལ་སྤྱིར་གསང་སྔགས་ཀྱི་རྒྱུད་མཐའ་དག་རྒྱུད་གསུམ་གྱི་དབྱེ་བས་བཤད་དེ། ཐུགས་ཀྱི་ཐིགས་པ་ལས། རང་བཞིན་བདེར་གཤེགས་གདུལ་བྱ་ཡི། །སྣང་བ་གསུམ་གྱི་ངོ་བོ་ལ། །རྒྱུད་ཀྱི་དབྱེ་བ་རྣམ་པར་བཞག །གཅིག་ལ་གསུམ་གྱི་ངོ་བོ་ཡང་། །འཁྲུལ་པའི་སྣང་བས་གསུམ་དུ་འགྱུར། །དེས་ན་སྣང་བ་བཞི་དག་ཏུ། །ལུང་རིགས་ཀུན་ལས་གསལ་བར་བཤད། །ཅེས་འབྱུང་བས། རང་རིག་པ་ཐམས་ཅད་དུ་རྩལ་མ་འགགས་པ་ནི་རང་བཞིན་གྱི་སྣང་བ་སྟེ། ཐམས་ཅད་དུ་འབྲེལ་ཅིང་ཐམས་ཅད་ཚང་བའི་ཕྱིར། རང་བཞིན་གྱི་རྒྱུད་དུ་གསུངས་ལ། དེ་ངེས་པར་སྟོན་པ་ཡང་། བློའི་རིམ་པ་བྱེ་བྲག་ཏུ་སྣང་བ་རྣམས་ནི། གདུལ་བྱའི་སྣང་བ་སྟེ། རྗེས་སུ་མཐུན་ཅིང་ཐམས་ཅད་དུ་འགྲོ་བའི་ཕྱིར་ལམ་གྱི་རྒྱུད་དོ། །དེས་མཐར་ཐུག་པ་ནི་བྲལ་བ་དང་ཐོབ་པ་མེད་པའི་ངོ་བོ་ཉིད་དུ་ལྷུན་གྱིས་གྲུབ་པས་ཐམས་ཅད་རྫོགས་པ་ནི། དེ་བཞིན་གཤེགས་པའི་སྣང་བ་སྟེ། རྗེས་སུ་སྙེགས་པའི་ཕྱིར་འབྲས་བུའི་རྒྱུད་དེ། དེ་དག་ངོ་བོ་གཅིག་པ་ལ། རིམ་པར་སྣང་བ་ནི་ཀུན་ཏུ་བརྟགས་པ་སྣ་ཚོགས་ཀྱིས་བསྒྲིབས་པ་དང་། སངས་པ་དང་ཕྱེ་བ་གང་ཡིན་པ་ནི། འཁྲུལ་པའི་སྣང་བར་གསུངས་པའི་ཕྱིར། ཞོར་ལ་བཤད་པས་བཞིར་ཕྱེ་བར་འགྱུར་རོ། །དེ་ལ་རང་བཞིན་གྱི་སྣང་བ་ནི་གཞུང་ཉིད་ལས། ཀུན་གཞི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །ཞེས་འབྱུང་བས། རང་རིག་པའི་ལུགས་ཀྱིས། ཅིར་སྣང་བ་དེ་ཉིད་རང་རིག་པ་ཉིད་ཀྱི་ཕྱིར་ཡོན་ཏན་ཚང་ཞིང་གཉིས་ཀྱང་སྐབས་ལས་འབྲེལ་བ་རྒྱུད་དེ། ཞོར་ལ་བཤད་པའི་ཉེས་པ་ལྔ་ཡིས་བསྒྲིབས་པས། གཉིས་ལ་རག་ལུས་པར་སྣང་ངོ་། །ལྔ་གང་ཡིན་སྙམ་པ་ལ། རྒྱུ་རྐྱེན་བྱེད་པོ་ངོ་བོ་དང་། །དེ་ཡི་ཉེས་པ་རྒྱལ་བས་གསུངས། །ཞེས་འབྱུང་བ་སྟེ། གཞུང་ལས། མ་རིག་རྟོག་པའི་གཟུང་འཛིན་གྱིས། །ཞེས་པ་དང་། རང་གི་རྣམ་རྟོག་ལས་ཀྱིས་སྤྲུལ། །ཅེས་པ་དང་། མ་བཅོས་རྒྱུན་གྱི་སྐད་ཅིག་མ། །དེ་ཡིས་མ་བྱས་གང་ཡང་མེད། །ཅེས་པ་དང་། སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །དེ་ཡང་། བདག་དང་བདག་གི་གཞན་རྣམས་ནི། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པའང་ཡོད་མ་ཡིན། །ཅེས་འབྱུང་ངོ་། །ཉེས་པ་ཡང་། ཆོས་རྣམས་ཡེ་ནས་དག་གྱུར་ཀྱང་། །ཕྱིན་ཅི་ལོག་གི་བློ་ལོག་ནས། །ལོག་རྟོག་གནས་དག་ལོངས་སྤྱོད་དང་། །མ་རིག་འཁྲུལ་འཁོར་བསམ་མི་ཁྱབ། །ཡང་། སེམས་ཅན་མ་ལུས་ཐམས་ཅད་ལ། །ཡེ་ཤེས་ལྔ་ཡིས་ཀུན་ཁྱབ་ཀྱང་། །རང་གི་རྣམ་རྟོག་བསྒྲིབས་བྱས་ནས། །ཡེ་ཤེས་ལྔ་ཡི་དོན་མ་མཐོང་། །ཞེས་གསུངས་སོ། །དེའི་ཕྱིར་ལམ་གྱིས་རང་གི་ངོ་བོ་ཉིད་མངོན་དུ་བྱས་པ་ལ། འབྲས་བུར་འདོགས་ཀྱང་། ངོ་བོ་ཉིད་གཅིག་སྟེ། རང་བཞིན་ནི་ཐམས་ཅད་ཀྱི་གདགས་གཞིར་གྱུར་པའི་ཕྱིར། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཚད་བཞིས་ཕབ་པའི་དོན་ཡིན་ཏེ། །དག་པ་རྣམ་གསུམ་ཚུལ་གནས་ཤིང་། །འབྲུ་ལྔར་འདུས་པའི་ཐབས་ཆེན་དེ། །འགྲོ་བ་ཀུན་ལ་རང་བཞིན་གནས། །ཞེས་གསུངས་སོ། །གཉིས་པ་ནི་གཞི་དག་ལམ་གྱི་ཉེས་པ་གཉིས་ཟད་པ་གང་ཡིན་པ་སྟེ། དེས་སྣང་བའི་ཕྱིར་འབྲས་བུ་ཞེའོ། །དེ་ཡང་རང་བཞིན་གྱི་བྱིན་གྱིས་བརླབས་ཀྱིས་འབྲེལ་པ་དང་། བདག་དང་གཞན་གྱི་དགོས་པ་ཕུན་སུམ་ཚོགས་པའི་ཕྱིར་རྒྱུད་དོ། །དེ་ལ་གཉིས་སུ་འགྲེལ་ཏེ། དེ་ལ་ངོ་བོ་ནི་མཚན་ནི་འདི་འདྲར་བརྗོད་པར་དཀའ་ན་ཡང་། རྨོངས་པ་རྣམས་ཀྱི་དོན་དུ། ཉི་ཤུ་རྩ་ལྔར་བསྡུ་བ་མཛད་དོ། །དེ་ཐོབ་པའི་ཚུལ་ནི་ལམ་གྱི་གཏན་ཚིགས་དང་རྩོལ་བས་ཉེས་པ་གཉིས་ཟད་པའི་དུས་ན་རང་སྣང་བ་ལ་འདོགས་པའི་ཕྱིར། གཞུང་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་པ་དང་། ཡང་རྒྱུ་འབྲས་ཡེ་ནས་དབྱེར་མེད་སྔ་ཕྱི་མ་ཡིན་པས། །འབྲས་བུ་ལམ་དུ་གྱུར་ནས་དུས་གཅིག་མཉམ་པར་སྦྱོར། །ཞེས་པ་ལ་སོགས་པ་གསུངས་སོ། །གསུམ་པ་ནི་དེ་དག་ཤེས་པ་དང་། གྲུབ་པར་བྱེད་པ་ལས་བཏགས་ཏེ། དེ་ཡང་བློའི་བྱེ་བྲག་གིས་ཐ་དད་པར་སྣང་བ་ཁོ་ནའོ། །དེ་ལ་དོན་དྲུག་སྟེ། ངོ་བོ་ངེས་ཚིག་དགོས་ཆེད་དང་། །འབྱུང་ཚུལ་གཉེར་བཤད་ཐབས་ཀྱིས་དབྱེ། །ཞེས་པས། ངོ་བོ་ལ་གསུམ་སྟེ། ཕྱག་ན་རྡོ་རྗེ་དབང་བསྐུར་བ་ལ་སོགས་པ་བྱ་བའི་རྒྱུད་དང་། དེ་ཁོ་ན་ཉིད་བསྡུས་པ་ལ་སོགས་པ་ཐུབ་པའི་རྒྱུད་དང་། ཐབས་ཀྱི་ཐེག་པའི་རྒྱུད་དོ། །དེ་ལ་ཡང་གསུམ་སྟེ། དཔལ་གསང་བ་འདུས་པ་ལ་སོགས་པ་ཐབས་ཀྱི་རྒྱུད་དང་། དཔལ་བདེ་མཆོག་ལ་སོགས་པ་ཤེས་རབ་ཀྱི་རྒྱུད་དང་། དཔལ་བུདྡྷ་འབྱུང་བ་ལ་སོགས་པ་མ་ནིང་གི་རྒྱུད་དོ། །དེ་ལ་དཔལ་གསང་བའི་སྙིང་པོ་འདི་ནི་ཐམས་ཅད་ཀྱི་དོན་དང་རྒྱུ་འབྲས་ཚང་བར་འབྱུང་བའི་ཕྱིར། རྒྱུད་ཐམས་ཅད་ཀྱི་སྤྱི་ཡིན་པར་གསུངས་སོ། །ངེས་ཚིག་ནི། རང་བཞིན་འབྲས་བུ་རྣམ་གཉིས་ལས། །ཤེས་ཐོབ་བཏགས་པའི་ངེས་ཚིག་གཉིས། །རྒྱུ་རྐྱེན་ཐབས་འབྲེལ་དགོས་རྫོགས་ཕྱིར། །རང་གི་ངེས་ཚིག་བཞི་རུ་འགྱུར། །ཞེས་པ་གོ་སླའོ། །དགོས་ཆེད་ནི། རང་བཞིན་གྱི་རྒྱུད་མི་འགྱུར་བའི་ཡོངས་སུ་གྲུབ་པ་སྟེ། ལམ་གྱི་རྒྱུད་གསུམ་གྱིས་ཕྱིན་ཅི་མ་ལོག་པར་བྱ་བ་དང་། འབྲས་བུའི་རྒྱུད་མངོན་དུ་སྣང་བར་བྱེད་པའི་ཕྱིར་རོ། །འབྱུང་ཚུལ་ནི། དྲུག་པའི་སྟོན་པ་ལྷུན་གྱིས་གྲུབ་པའི་ཐབས་དང་། སྨོན་ལམ་གྱིས་གོ་ཕྱེ་ནས། ལེའུ་དང་པོར་རྒྱུ་སྣང་བར་མཛད། གཉིས་པར་རྐྱེན་སྦྱར། གསུམ་པར་ཐུན་མོང་བཅས་གཞིའི་སྟོན་པ་དྲུག་སྣང་བར་མཛད་དེ། དུས་མཚུངས་པར་ཐ་དད་པའི་རྒྱུད་རྣམས་འབྱུང་བའོ། །གཉེར་ནི་ཡོངས་སུ་གྲུབ་པ་གཉིས་དང་། ཐ་མལ་པའི་བློ་བྲོད་པ་བསྐྱེད་པའི་ཕྱིར་འབྲས་བུའི་ཆོས་རྣམས་ཀྱི་མཚན་ཉིད་བརྗོད་པའོ། །རྒྱུད་ཀྱི་བཤད་པའི་ཐབས་ནི། གདུལ་བྱ་དབང་པོ་རབ་འབྲིང་ཐ་མའི་དོན་དུ་དོན་གསུམ་མོ། །དེ་ལ་རབ་ཀྱི་དོན་དུ་མཚན་བཤད་པ་ཡང་འདིར་གསུམ་སྟེ། རྒྱུད་དང་དཀྱིལ་འཁོར་སྐྱེས་བུའི་མཚན་ཐུན་མོང་དུ་བཏགས་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བའོ། །ཆེ་བ་ལས་བཏགས་པ་ནི། ལུང་གི་སྤྱིའོ། །དོན་གྱི་ངོ་བོ་ལས་བཏགས་པ་ནི། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་བྱ་བ་སྟེ། དེ་ལ་གསང་བ་ལ་གསུམ་སྟེ། རང་བཞིན་དང་། སྦས་པ་དང་། གབ་པའོ། །དེ་ལ་རང་བཞིན་གྱིས་གསང་བ་ནི། གཞུང་ཉིད་ལས། ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མི་ལས་ཤིན་ཏུ་གསང་། །ཞེས་འབྱུང་སྟེ། ཡེ་ནས་གསང་བ་ནི། གཉིས་སུ་མེད་པ་རང་བྱུང་གི་ཡེ་ཤེས་ཡོན་ཏན་རིལ་ལྷུན་གྱིས་གྲུབ་པ་དེ། རང་ཆས་སུ་ཡོད་ཀྱང་མ་ཤེས་པ་ཁོ་ན་ལ་བྱའོ། །རང་བཞིན་གྱིས་གསང་བ་ནི། དེ་ཉིད་རང་སྣང་བའི་དངོས་པོ་རིལ་མི་ཟད་པ་རྒྱན་གྱི་འཁོར་ལོར་རང་རྒྱུད་དུ་གནས་པ། བརྟགས་པས་བསྒྲིབས་པའོ། །ངོ་བོས་གསང་བ་ནི། རང་བཞིན་གྱི་རྒྱུད་ཀྱི་ངོ་བོ་ཉིད། ཡུལ་སེམས་རྒྱུ་འབྲས་དང་། བདེན་པ་གཉིས་པོ་ལས་གྲོལ་བ་དེ། རང་སྣང་བའི་ཕྱིར་རང་གི་ངོ་བོ་ཉིད་ཡུལ་དུ་བྱ་བར་མ་དམིགས་པ་ཁོ་ནའོ། །ཤིན་ཏུ་གསང་བ་ནི། འབྲས་བུའི་རྒྱུད་བསྒྲུབ་པར་བྱ་བ་སྟེ། གུད་ན་མེད་ཀྱང་། ཉོན་མོངས་པ་དང་། ཤེས་བྱ་དང་། ལྟ་པའི་སྒྲིབ་པས་གཞན་དུ་ཚོལ་ཡང་། རང་རིག་པ་ལ་སྣང་བ་ཁོ་ནའོ། །སྦས་པའི་གསང་བ་ནི། སྤྱོད་པའི་ཁྱད་པར་ལྔ་གསུམ་དང་། ཏན་གན་དང་བྱ་བ་མེད་པ་ལ་སོགས་པ། ལྟ་སྤྱོད་འབྲེལ་པ་དང་། འཇུག་པར་གསུངས་པ་དེ་དག །སྔགས་ཀྱི་མན་ངག་མེད་པ་དང་། སྒྲ་བཞིན་སྤྱོད་པ་རྣམས་ཀྱིས་སྤྱད་ན། ཤིན་ཏུ་ཉེས་པ་ཆེ་བས། བརྡར་སྦས་ནས་བསྟན་དགོས་པ་སྟེ། གཞུང་ལས་ཀྱང་། ཁ་ཅིག་ལྟ་བ་མཉམ་གནས་ཀྱང་། །ཞེས་པ་ལ་སོགས་པ་དང་། མཉམ་པའི་དོན་ཉིད་མ་རྟོགས་པར། །ཞེས་པ་ལ་སོགས་པའི་དོན་གྱིས། གསང་ཕྱིར་བརྡ་དག་སྣ་ཚོགས་གསུངས། །ཞེས་པ་འབྱུང་བའོ། །གབ་པའི་གསང་བ་ནི། རྒྱུད་ཀྱི་དོན་ཕུན་སུམ་ཚོགས་པ་དང་། རང་བཞིན་གྱི་དོན་རྣམས་འཁྲུལ་པ་དང་། རས་ཆོད་པ་རྣམས་ལ་གབ་པ་དེ་དང་དེ། ཚད་མ་གཉིས་ཀྱི་བདག་པོས་འབྱིན་པའོ། །སྙིང་པོ་ཞེས་བྱ་བ་ལ་གསུམ་སྟེ། དེ་ལ་ཐེག་པ་ཐམས་ཅད་འབྱུང་བའི་སྙིང་པོ་ནི། བྱིན་གྱིས་བརླབས་ཀྱིས་བསྟན་པ་སྟེ། གདུལ་བྱ་ལས་ཐ་མའི་དོན་དུ་རྒྱུད་འདི་བསྟན་པའི་མཛད་པས་གོ་ཕྱེད་ནས། ཐམས་ཅད་ཀྱང་འབྱུང་བ་སྟེ། གཞུང་ལས། འདུལ་བ་མདོ་སྡེ་ཆོས་མངོན་དང་། །ཞེས་པ་ནས། འབེབས་པར་མཐར་ཐུག་པའོ། །ཐེག་པ་ཀུན་གྱི་འབྲས་བུའི་སྙིང་པོ་ནི། སྒོ་ཀུན་ནས་བསྒྲུབ་པའི་མཐའ། རང་བཞིན་གསང་བའི་སྙིང་པོ་འདི་མངོན་དུ་བྱེད་པའི་ཕྱིར། གཞུང་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་པ་ལ་སོགས་པས་སྟོན་པའོ། །ཆོས་ཐམས་ཅད་ཀྱི་དོན་གྱི་སྙིང་པོ་ཡིན་པ་ནི། །གཏན་ཚིགས་ཀྱི་སྒོ་གང་ནས་སྨྲས་ཀྱང་། མཐར་ཐུག་པ་དེ་བཞིན་གཤེགས་པའི་སྤྱོད་ཡུལ་ནི། རྟོག་ཚོགས་སུ་བཏགས་པ་རིལ། སྐུ་དང་ཡེ་ཤེས་བཞི་བཅུ་གཉིས་སུ་སངས་རྒྱས་པས་འཁོར་བ་ཀར་དག་པ་སྟེ། གཞུང་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པ་འཁྲུལ་པ་ཡིན། །ཅེས་པ་དང་། ཡང་། དེ་བཞིན་གཤེགས་པ་ཐམས་ཅད་ལ། །གསང་བའི་འདི་ལས་གཞན་མི་མངའ། །ཞེས་གསུངས་སོ། །དེ་ཁོ་ན་ཉིད་ཅེས་བྱ་བ་ལ་གསུམ་སྟེ། རྒྱུ་འབྲས་གཉིས་སུ་མེད་པ་ལ། །དེ་ཉིད་ངོ་བོ་སྐབས་ཀྱིས་གསུམ། །ཞེས་པས། རྟོག་ཚོགས་རིལ་རང་རིག་པ་ལས་མི་གཞན་པའི་ཕྱིར། སྣང་སྟོང་གཉིས་དང་བྲལ་བའི་ཡེ་ཤེས་ཀྱི་དཀྱིལ་འཁོར་ལ། བློ་མ་བཅོས་པར་བཞག་པ་ནི། མ་བཅོས་པའི་དེ་ཁོ་ན་ཉིད་དེ། སྐབས་ཀྱི་རྒྱུ་ཞེས་འདོགས་སོ། །དེ་ཉིད་ཡེ་ཤེས་ཀྱི་ཕྱག་རྒྱ་མང་པོར་རང་སྣང་བར་མངོན་སུམ་དུ་བྱུང་བ་ནི། མ་ནོར་བའི་དེ་ཁོ་ན་ཉིད་དེ། སྤྲོས་པ་ལ་ཞེན་པ་རྣམས་འབྲས་བུ་ཞེས་བཏགས་སོ། །དེ་དག་ཀྱང་མངོན་པར་ཞེན་པ་དག་གི་སྐབས་ལས་གཞན་མ་ཡིན་པ་ནི། གཞན་མ་ཡིན་པའི་དེ་ཁོ་ན་ཉིད་དེ། དབྱེ་བ་མ་གྲུབ་པས་རྒྱུ་འབྲས་གཉིས་སུ་མེད་པའི་དེ་ཁོ་ན་ཉིད་དོ་ཞེས་བྱའོ། །ངེས་པའོ་ཞེས་བྱ་བ་ནི། གཞི་དང་ལམ་དང་ངོ་བོ་ཡིས། །ངེས་པ་རྣམ་པ་གསུམ་དུ་བཤད། །ཅེས་པས། རྒྱུད་ཀྱི་གཞི་ནི། རང་བཞིན་གསང་བའི་སྙིང་པོ་སྟེ། རང་བཞིན་གྱིས་ངེས་པའོ། །དེ་འདིར་ངེས་པར་སྟོན་པའི་ཕྱིར། གཞུང་ལས། སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་གསུངས་སོ། །འདིའི་ལུགས་ཀྱིས་འབྲས་བུ་ཉིད་ངེས་པའི་ལམ་དུ་བྱེད་པའི་ཕྱིར། ཡང་། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཅེས་གསུངས་སོ། །འདི་རང་གི་ངོ་བོས་དེ་བཞིན་གཤེགས་པའི་དགོངས་པ་མངོན་དུ་སྟོན་པའི་ཕྱིར། རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཅེས་གསུངས་པས། དོན་གཉིས་ལས། སྐལ་བ་དང་ལྡན་པའི་ལས་ཅན་ལ་ངེས་པའི་དོན་དུ་གསུངས་པའོ། །སྤྲོས་པ་ལ་དགའ་བ་དབང་པོ་འབྲིང་གི་དོན་དུ་རྒྱུད་ཀྱི་དོན་རྣམ་པར་ཕྱེ་བ་ལ་དོན་རྣམ་པ་ལྔ་སྟེ། རྒྱུད་ཀྱི་རྒྱུ་དང་། རྐྱེན་དང་། ཡོངས་སུ་ཤེས་པར་བྱ་བ་དང་། དགོས་འབྲེལ་དང་། ཡོངས་སུ་གཏད་པའོ། །དེ་ལ་རྒྱུད་འབྱུང་བའི་རྒྱུ་གླེང་གཞི་ཕུན་སུམ་ཚོགས་པ་ལ་རྣམ་པ་གཉིས་ཏེ། ཐུན་མོང་དང་། ཐུན་མོང་མ་ཡིན་པའོ། །ཐུན་མོང་གི་གླེང་གཞི་ལ་གཉིས་ཏེ། ཁྱད་པར་དང་། བསྟན་པའི་སྤྱིའི་གླིང་གཞིའོ། །ཁྱད་པར་གྱི་གླེང་གཞི་ལ་དྲུག་གོ། །དེ་ལ་སྟོན་པ་ལ་ངོ་བོ་དང་། རང་བཞིན་དང་། འཆད་པའི་སྐྱེས་བུའོ། །གནས་ལ་རང་བཞིན་དང་། གཞལ་ཡས་ཁང་གདན་དང་རྒྱན་དུ་བཅས་པའི་མཚན་ཉིད་དོ། །འཁོར་ལ་རང་བཞིན་གཉིས་སུ་མེད་པའི་འཁོར་དང་། རིག་པ་ཁྱད་པར་ཅན་གྱི་འཁོར་དང་། ཚད་དང་མདོག་གོ། །དུས་དང་། སྡུད་པ་དང་། བསྟན་པའོ། །བསྟན་པ་སྤྱིའི་གླེང་གཞི་ལ། རྒྱུ་དང་། ངོ་བོའོ། ངོ་བོ་ལ་སྟོན་པ་དང་། ཞིང་ཁམས་དང་། མཛད་པ་དང་། གདུལ་བྱ་དང་། དེ་དག་གི་བསྟན་པའོ། །རྒྱུ་འབྱུང་བའི་རྐྱེན་གླེང་བསླང་བ་ལ་གཉིས་ཏེ། ཐུན་མོང་མ་ཡིན་གླེང་བསླང་བ་འཁོར་ལ་དབང་གཉིས་ཀྱི་སྐབས་ཕྱེ་བ་དང་། ཐུན་མོང་དུ་གླེང་བསླང་བ་བསྟན་པ་མཐའ་དག་བཤད་པར་ཞུས་པ་དང་གནང་བའོ། །རྒྱུད་རང་གི་ངོ་བོ་ཡོངས་སུ་ཤེས་པར་བྱ་བའི་དངོས་པོ་ལ་བདུན་གྱིས་དབྱེ་སྟེ། ལྟ་སྤྱོད་དཀྱིལ་འཁོར་དབང་དམ་དང་། །ཕྲིན་ལས་བསྒྲུབ་པའི་ལམ་རིམ་གྱིས། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པས་སྟོན་ཏེ། དེ་ལ་ལྟ་བ་གཏན་ཚིགས་དང་། ངོ་བོའོ། །སྤྱོད་པ་ལ། ཤེས་རབ་དང་མཐུན་པའི་སྤྱོད་པ་དང་། ཐབས་དང་མཐུན་པའི་སྤྱོད་པ་དང་། ཕྱོགས་གཅིག་པའི་སྤྱོད་པ་དང་། ཚོགས་ཀྱི་སྤྱོད་པའོ། །དཀྱིལ་འཁོར་ནི་གཞུང་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་དང་། །ཏིང་འཛིན་ལྷག་པའི་དཀྱིལ་འཁོར་ལྔ། །བྱང་ཆུབ་སེམས་དང་ཚོགས་མཆོག་བསྟན། །ཅེས་པའོ། །དེ་ལ་རང་བཞིན་ལ། རང་བཞིན་ཉིད་ཀྱི་དཀྱིལ་འཁོར་དང་། །རང་བཞིན་ལྷུན་གྱིས་གྲུབ་པའོ། །ལྷུན་གྱིས་གྲུབ་པའི་དཀྱིལ་འཁོར་ལ་ཞི་ཁྲོ་གཉིས་སོ། །དེ་རེ་རེ་ལ་ཡང་སྐུ་གསུང་ཐུགས་ཏེ་དྲུག་པའོ། །ལྷག་པའི་ཏིང་ངེ་འཛིན་གྱི་དཀྱིལ་འཁོར་ལ་ཡང་དྲུག་རྗེས་སུ་མཐུན་ནོ། །ལྷག་པ་གཟུགས་བརྙན་གྱི་དཀྱིལ་འཁོར་ལ། ས་གཞི་སྙོམས་པ་དང་། ཚད་དང་། ཐིག་དང་། བྲི་བ་དང་། ཚོན་དང་། དབྱེ་བ་དང་། རབ་གནས་དང་། སྦྱིན་སྲེག་དང་། དེར་འཇུག་པ་དང་། བྱས་ནས་ཞུགས་པའི་ཡོན་ཏན་དང་བཅུའོ། །ཚོགས་ཀྱི་དཀྱིལ་འཁོར་ལ་ཞི་ཁྲོ་གཉིས་སོ། །དཀྱིལ་འཁོར་གྱི་ངེས་ཚིག་ནི་རྒྱས་པ་ནས་གསལ་ལོ། །དམ་ཚིག་ལ་རང་བཞིན་དང་། ཆེ་བ་དང་། རྣམས་གྲངས་དང་། སྐྱོན་དང་། ཡོན་ཏན་ནོ། །དབང་ལ་ངོ་བོ་དང་། བསྐུར་བའི་རིམ་པ་དང་། བསྐུར་ཐབས་དང་། སྐྱོན་དང་། ཡོན་ཏན་ནོ། །ཕྲིན་ལས་ལ། ལྷག་པ་ཧོམ་གྱི་ལས་དང་། ལྷག་པ་རྫས་ཀྱི་ལས་དང་། ལུ་གུ་རྒྱུད་ཀྱི་ལས་དང་། ཡོན་ཏན་ནོ། །བསྒྲུབ་པའི་ཐབས་ལམ་གྱི་རིམ་པ་ལ་གཉིས་ཏེ། བསྐྱེད་པའི་རིམ་པ་ཏིང་ངེ་འཛིན་ལྔའི་སྒོ་ནས་རིམ་པར་འཇུག་པ་དང་། རྫོགས་པའི་རིམ་པ་ཆོས་ཐམས་ཅད་དག་པ་གསུམ་དང་མཉམ་པ་རྣམ་ལྔའི་ངང་དུ་སངས་རྒྱས་པ་དེ་རྟོགས་པ་བཞིའི་ལམ་གྱིས་ཡིད་ཆེས་ཏེ། དེ་ལ་མཚན་ཉིད་གསུམ་དང་དགོས་འབྲེལ་གྱིས་ལམ་མཚོན་ནས། བསྙེན་སྒྲུབ་བཞིས་དོན་མཐར་ཕྱུང་སྟེ། བདུད་བཞི་ཡང་བཏུལ་བས། འབྲས་བུ་ལྷུན་གྱིས་གྲུབ་པར་འཇུག་གོ། །དགོས་འབྲེལ་ནི་ཐུན་མོང་དང་ཐུན་མོང་མིན་པའི་ཚུལ་གྱིས་གཉིས་ཏེ། དེ་ཡང་། བརྗོད་འབྲེལ་དགོས་དང་ཡང་དགོས་པའི། །རྒྱུད་ཀྱི་ཡན་ལག་བཞི་རུ་འགྱུར། །ཞེས་པས། ཐུན་མོང་ལམ་གྱི་རྒྱུད་ནི་རྗོད་པར་བྱེད་པའོ། །རྒྱུད་གཉིས་ནི་བརྗོད་བྱའོ། །གླེང་གཞི་ཚོགས་ནས་གླེང་བསླང་བ་ནི་ཐབས་དེ་ལས་རྒྱུད་འདི་སྣང་བ་ནི་ངེས་པར་འབྱུང་བའོ། །ལམ་གཉིས་ནི་རྒྱུ། མི་ཟད་པ་རྒྱན་གྱི་འཁོར་ལོ་ནི་འབྲས་བུའོ། །རྒྱུད་ཀྱི་དངོས་པོ་བདུན་ནི་དགོས་པའོ། །མི་ཟད་པ་རྒྱན་གྱི་འཁོར་ལོ་ནི་དགོས་པའི་ཡང་དགོས་པའོ། །ཐུན་མོང་མ་ཡིན་པར་ནི། ཐིག་ལེ་ཆེན་པོ་ཐབས་དང་བཅས་པ་ནི་རྗོད་པར་བྱེད་པའོ། །ཐིག་ལེ་བཅུ་དྲུག་གི་བདེ་བ་ནི་བརྗོད་པར་བྱ་བའོ། །བྱེད་པ་སྡོམ་པ་རླུང་དང་བཅས་པ་ནི་ཐབས་སོ། །དེས་རང་བཞིན་གསང་བའི་སྙིང་པོ་མྱོང་བ་ནི་ཐབས་ལས་བྱུང་བའོ། །ཐིག་ལེ་བཞི་བཅུ་རྩ་གཉིས་ནི་རྒྱུའོ། །ཡེ་ཤེས་བཞི་བཅུ་རྩ་གཉིས་མངོན་དུ་ཤར་བ་ནི་འབྲས་བུའོ། །སེམས་ལྔ་རྒྱུན་དུ་བསྐྱེད་པ་ནི་དགོས་པའོ། །བཅུ་དྲུག་ཆ་ལ་རྫོགས་པའི་ཡེ་ཤེས་ཆེན་པོ་ནི་དགོས་པའི་ཡང་དགོས་པའོ། །རྒྱུད་ཡོངས་སུ་གཏད་པ་ལ་གཉིས་ཏེ། དེ་ལ་གདམས་པ་ནི་རང་བཞིན་གསང་བའི་སྙིང་པོ་ལ། རྩོལ་བ་རིལ་བྲལ་བར་གདམས་པའོ། །གཏད་པ་ལ་གཉིས་ཏེ། སྡུད་པ་པོ་ལ་ཟུངས་ལ་སྤྲོས་ཤིག་པ་དང་། རྣལ་འབྱོར་པ་ལ་ཡོན་ཏན་བརྗོད་དུ་ཟུངས་ཤིག་པའོ། །ས་གཅོད་ཀྱི་གྲངས་དེ་དག་དཀྱུས་ཀྱི་ཐད་ཀར་ངོ་སྤྲད་ནས་སྟོན་ཏོ། །དབང་པོ་ཐ་མའི་དོན་དུ། གསང་སྔགས་སྤྱིའི་རྒྱུད་ཀྱི་བཤད་ཐབས་བཅུ་ཡིས་འབྲུ་གཉེར་དབྱེའོ། །དེ་ལ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་བྱ་བ་ནི། སྡུད་པ་པོས་ཚིག་གཉེར་བ་དེའི་ཚེ་རང་གི་སྟོན་པ་ལ་མཆོད་པའོ། །འདི་སྐད་བཤད་པའི་དུས་ན། ཞེས་བྱ་བ་ནི། ཐུན་མོང་མ་ཡིན་པའི་གླེང་གཞི་སྟེ། གཞུང་གཞན་ལས་ཁྱད་པར་དུ་གྱུར་པའི་ཕྱིར། སྒྱུ་འཕྲུལ་ཐལ་བའི་རྒྱུད་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །བྃ་དབྱིབས་ཐིག་ལེར་བཅས་སྟོན་པའོ། །མ་ད་མ་ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལ། །གསལ་བར་གོ་བར་བཤད་པར་འདོད། །པ་སྒྲ་དོན་དམ་ངེས་པའི་རྒྱུད། །ཡ་ན་ཐེག་ཆེན་འདི་ཡིན་ནོ། །དུས་ནི་བསམ་གྱིས་མི་ཁྱབ་དུས། །ནཱ་མ་དེ་མིང་ཞེས་བྱའོ། །ཞེས་འབྱུང་ངོ་། །དེ་ལ་ཉེ་བར་མཚོན་པ་ནི་གནས་ཏེ། ཁྱམས་དང་། སྒོ་དང་། བྱའི་གདོང་དང་། ཟ་མ་ཏོག་རྣམས། དྲག་རྒྱས་ཞི་དབང་དུ་གནས་པ་ནི། སངས་རྒྱས་རིལ་གྱི་བཞུགས་གནས་སུ་གསུངས་སོ། །གུ་ཧྱ་བཛྲ་དབུར་རྫོགས་པའི་ཐིག་ལེ་དང་བཅས་པ་ནི་མ་ལུས་པའི་བྱེད་པ་པོའི་ཕྱིར་སྟོན་པའོ། །མ་ནི་མ་ད་ན་སྡོམ་བྱེད་དེ་སེམས་ལྔ་པ་གླེང་བསླང་བའི་ལས་ཀྱིས་མ་ནུ་ནི་ཡིད་དེ། རྣམ་པར་ཤེས་པའི་རྒྱལ་པོ་དང་། རྡོ་རྗེ་མཐོང་བ་ལ་སོགས་པས་ཕྱིན་ཅི་མ་ལོག་པར་གོ་བ་ནི་བརྗོད་པ་དང་འདྲ་བའི་ཕྱིར། འཁོར་ལ་བཤད་དོ་བར་ཐ་སྙད་དུ་འདོགས་སོ། །གོ་བ་ཉིད་གང་སྙམ་པ་ལ། པ་ར་མཱརྠ་ནི་དོན་དམ་པ་བྱང་ཆུབ་ཀྱི་སེམས་ཏེ། སེམས་ལྔའི་ཐ་མ་སྐད་ཅིག་མ་བཅུ་དྲུག་པའི་བྱང་ཆུབ་སེམས་མཐས་མ་རེག་པ་ནི། མ་ཧཱ་ཡ་ན་ནི་ཐེག་པ་ཆེན་པོ་སྟེ། རྒྱུད་འདིའོ། །དེའི་དུས་ནི་གཅིག་ཏུ་བརྗོད་དུ་མེད་པས་ན། བསམ་གྱིས་མི་ཁྱབ་པའི་དུས་ཞེས་བྱ་བར་ཐ་སྙད་དུ་འདོགས་སོ། །དེ་ནི་གདུལ་བྱ་ལས་ཐ་མ་པ་རྣམས་ཀྱི་དོན་གྱི་ཕྱིར། ཐུན་མོང་མ་ཡིན་པའི་གླེང་གཞིའོ། །ད་ནི་ཐུན་མོང་གི་གླེང་གཞི་སྟོན་པའི་རང་བཞིན་ཏེ། རྒྱལ་བ་དྲུག་པའི་ཡོན་ཏན་མཐའ་ཡས་པ་ཡང་མདོར་བདུན་དུ་བསྡུ་སྟེ། དེ་བཞིན་གཤེགས་པ་ཞེས་བྱ་བ་ནི། གཉིས་སུ་མེད་པའི་རིག་པ་རང་བྱུང་གི་ཡེ་ཤེས་ཏེ། མ་བཅོས་པར་རིལ་ལྷུན་གྱིས་གྲུབ་པའི་ཕྱིར། དེ་བཞིན་ཉིད་དོ། །དེར་སོན་པ་ནི་ངོ་བ་ཉིད་དུ་གྱུར་པས། གཉིས་དང་བྲལ་བའི་ཕྱིར། དེ་བཞིན་ཉིད་དུ་གཤེགས་པ་ཡང་། །སྣ་ཚོགས་ཞེན་ལས་གྲོལ་བར་ཟད། །ཅེའོ། །ཡང་དག་པར་རྫོགས་པ་ཞེ་བྱ་བ་ནི། གཉིས་སུ་མེད་པའི་བྱང་ཆུབ་ཀྱི་སེམས་ནི་རིལ་ངོ་བོར་གྱུར་པས། སྤང་བྱ་མི་དམིགས་པའི་ཕྱིར་ཡང་དག་པའོ། །དེ་ཉིད་ཀྱི་ཕྱིར་ཐམས་ཅད་འབྲས་བུར་རང་སྣང་བར་ཡང་བཞུགས་སོ། །སངས་རྒྱས་ཞེས་བྱ་བ་ནི། ས་པ་ལ་སོགས་པའི་ལྟ་བ་ངན་པ་ཐམས་ཅད་དང་བྲལ་བའི་ཡེ་ཤེས་མཐའ་དབུས་མེད་པར་བརྡལ་བས་ཡེ་ཤེས་བླ་མའི་ས་མངོན་དུ་བྱས་པའོ། །བཅོམ་ལྡན་འདས་ཞེས་བྱ་བ་ནི། ཉོན་མོངས་པ་ལ་སོགས་པ། མི་མཐུན་པ་ཉིད་རང་རིག་ཏུ་གསལ་བས། དེ་དག་འབྲས་བུར་མངའ་མཛད་ཀྱང་། ངོ་བོ་ཉིད་འདི་འདྲ་མི་རྙེད་པས་སྤྱོད་ཡུལ་དུ་བྱར་མེད་པའི་ཕྱིར་རོ། །ལོངས་སྤྱོད་ཆེན་པོ་ཞེས་བྱ་བ་ནི། ཐམས་ཅད་ཀྱི་རོ་མྱོང་ཡང་། བདག་ཉིད་ཆེན་པོའི་ཕྱིར། སྤྱོད་ཡུལ་དང་བྲལ་བས་གཞན་ལས་ཁྱད་པར་དུ་གྱུར་པས་སྐུ་ཆེན་པོའོ། །ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད། ཅེས་བྱ་བ་ནི། ཐ་སྙད་གཉིས་ཀྱིས་བསྡུས་པའི་དེ་བཞིན་གཤེགས་པ་རིལ་གྱི་ཡོན་ཏན་བརྗོད་པ་ལས་འདས་པའང་མདོར་ཉི་ཤུ་རྩ་ལྔར་བསྡུས་ཏེ། དེ་དག་ཡང་དག་པར་རྫོགས་པའི་ཕྱིར། རྒྱལ་བ་དྲུག་པའི་ཁྱད་པར་ལས་སྣང་བས། སངས་རྒྱས་ཀུན་གྱི་སྤྱིའི་གཟུགས་ཅན་དང་། རིགས་ཐམས་ཅད་ཀྱི་བདག་པོ་ཞེས་ཐ་སྙད་དུ་འདོགས་སོ། །མ་ལུས་མི་ལུས་ལུས་པ་མེད་པ་ཐམས་ཅད་དང་། སོ་སོ་མ་ཡིན་ཐ་མི་དང་དབྱེར་མེད་པའི་རང་བཞིན་ཏེ། ཞེས་བྱ་བ་ནི། དུས་གསུམ་གྱིས་བསྡུས་པའི་སེམས་ཅན་དང་། ཆོས་ཐམས་ཅད་དང་བསྡུ་བ་ནི་སུ་ཞིག་སྙམ་པ་ལ། དྲུག་པའི་དེ་བཞིན་གཤེགས་པ་སྟེ། དེ་དག་རིག་པ་སྒྱུ་མའི་ཕྱིར་དང་། སེམས་ཉིད་དུ་མ་སྐྱེས་པ་དང་། བདེན་པ་གཉིས་ཀྱི་ཐ་སྙད་ལས་འདས་པར་གཅིག་པ་སྟེ། ཀུན་ཀྱང་དེ་དང་འདྲ་བའི་ཕྱིར་གཉིས་སུ་མེད་པ་དང་། སྙིང་རྗེ་ཆེན་པོ་ཞེས་བྱ་བ་ཁོ་ནའོ། །དེའི་གནས་གང་སྙམ་པ་ལ། འོག་མིན་གྱི་གནས་མཐའ་དང་དབུས་མེད་པ་ན། ཞེས་བྱ་བ་ནི་རང་བཞིན་བསྟན་ཏེ། དེ་ཡང་། གཙང་མའི་རིས་དག་སྤངས་པ་ཡི། །འོག་མིན་ཆེན་པོའི་གནས་མཆོག་ན། །རིགས་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམ་སྤངས་པ། །སངས་རྒྱས་ཀུན་གྱི་སྤྱི་གཟུགས་ཏེ། །གདོད་ནས་ཐེག་མཆོག་མཛོད་ཉིད་ཕྱིར། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་འབྱུང་བས། ཡུལ་ཁྱད་པར་ཅན་དེ་ནི་རང་རིག་པ་ཁོ་ནའི་ཕྱིར་མཐའ་དབུས་དང་བྲལ་བའོ། །གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཞེས་བྱ་བ་ནི། འོག་གི་འཁོར་ལོ་ཆེན་པོ་ནི་ཡེ་ཤེས་ཀྱི་ཕྱིར། གདུལ་བྱའི་སྣང་བས་ཚད་གཟུང་དུ་མེད་དེ། དེ་ཡང་ཡེ་ཤེས་ལྔའི་རྩལ་རང་སྣང་བའི་ཕྱིར། ཕན་ཚུན་དུ་གསལ་བའོ། །གཞན་གྱི་རྒྱུ་ཅི་སྙམ་པ་ལ། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། ཞེས་བྱ་བ་ནི་གནས་ཀྱི་རྒྱུ་ཡང་རང་རིག་པ་ཉིད་ཁ་དོག་དང་། དབྱིབས་སུ་སྣང་བ་ནི་ཐ་སྙད་དུ་རིན་པོ་ཆེ་སྟེ། ལས་ཀྱང་མི་འདོད་པ་མ་ཡིན་ནོ། །རྒྱ་ཕྱོགས་བཅུར་ཡོངས་སུ་མ་ཆད་པ། ཞེས་བྱ་བ་ནི། རང་བཞིན་ཏེ་རྒྱུའི་ཕྱིར་ཡེ་ཤེས་ཉིད་མཐའ་ཀུན་དང་བྲལ་བ་ནི་དེ་བཞིན་གཤེགས་པའི་སྣང་བར་འགྱུར་རོ། །དེའི་ཕྱིར་ཕྱལ་བར་འགྱུར་རོ་སྙམ་པ་ལ། ཡོན་ཏན་དཔག་ཏུ་མེད་པར་རྒྱས་པའི་ཕྱིར་གྲུ་བཞིར་གྱུར་པ། ཞེས་གསུངས་ཏེ། ཡེ་ཤེས་ཀྱི་ཕྱིར་འབྲས་བུའི་ཆོས་རིལ་ལྷུན་གྱིས་གྲུབ་པ་དེ་ཉེ་བར་མཚོན་པའོ། །ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། ཞེས་བྱ་བ་ནི། གང་རྟོགས་པའི་ཡེ་ཤེས་ནི་བྱེ་བྲག་མངོན་དུ་སྣང་བས། དེ་ཉིད་ཀྱི་རྩལ་གློ་འབུར་བཞིར་སྣང་བ་ནི། ཁ་དོག་གིས་རྒྱན་ལྟ་བུར་མཛེས་པའོ། །རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་བ། ཞེས་བྱ་བ་ནི། ཟླུམ་པོར་མཐོ་བ་ཉིད། རང་རིག་པ་ཉིད་ཞིང་ཁམས་ཐམས་ཅད་དུ་སྣང་བས། ཐམས་ཅད་རང་རིག་ཏུ་གྱུར་པ་ནི། གང་དུའང་མི་གནས་པའི་ཡེ་ཤེས་ཆེན་པོ་སྟེ། སྣང་བ་གཉིས་ལས་མ་འདས་པའོ། །ཡེ་ཤེས་བསམ་གྱིས་མི་ཁྱབ་པའི་ཡེ་ཤེས་རིན་པོ་ཆེའི་དབྱིབས་དང་། ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པ། ཞེས་བྱ་བ་ནི། ཡེ་ཤེས་ཀྱི་ལས་ཀྱི་སྐབས་ལས་བྱེ་བྲག་བསམ་གྱིས་མི་ཁྱབ་པར་སྣང་བ་ཉིད། སྣ་ཚོགས་ཀྱི་དབྱིབས་དང་འོད་ཟེར་དང་། སྤྲུལ་པའི་རྣམ་པ་བལྟ་བས་མི་ངོམས་པར་རྫོགས་པར་སྣང་ངོ་། །སྤགས་པ། ཚད་དཔག་ཏུ་མེད་པ་ཞེས་བྱ་བ་ནི། ལམ་གཞན་ལས་འདི་འཕར་བ་དང་། འདི་ཉིད་ཐུག་པ་མེད་པའི་ཕྱིར་སྒོ་ལ་སོགས་པའི་རིམ་པ་དང་། བུམ་པ་སངས་རྒྱས་ཀྱི་སྤྱི་གཙུག་ལྟ་བུར་གནས་པའོ། །ཡེ་ཤེས་རིན་པོ་ཆེ་སྣ་ཚོགས་ཞེས་པ་ནས། བཀླུབས་པའི་མཐར་ཐུག་པ་ནི། ཡེ་ཤེས་ཆེན་པོ་སྣང་སྟོང་གཉིས་སུ་མེད་པ་ཉིད་ཐུགས་རྗེ་དང་སྤྲུལ་པ་རྒྱུན་དང་ལྡན་པ་དང་། བདེན་པ་གཉིས་མི་ཕྱེད་པ་དང་། ཐབས་སྣ་ཚོགས་མ་འདྲེས་པ་དང་། གང་ཡང་མ་སྤངས་པའི་ལོངས་སྤྱོད་ཆེན་པོའི་ཕྱིར། རྒྱན་དེ་དག་གིས་མཛེས་པ་ཡང་འཁྲིགས་པ་དང་འདུས་མ་བྱས་ཏེ། ཡེ་ཤེས་ཀྱི་ཕྱིར་ཕྱི་ནང་མེད་པར་གསལ་བ་ནི། གསེར་གྱི་སྦུ་གུ་ར་རིན་པོ་ཆེའི་ཟེའུ་བཅུག་པ་ལྟ་བུའོ། །རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་ཁྱུད་ཅན། ཞེས་བྱ་བ་ནི། ཡེ་ཤེས་ཆེན་པོ་མཐའ་ཀུན་དང་བྲལ་བ། རང་གི་མཚན་ཉིད་མེད་པ་ལ་འབྲས་བུ་རིལ་ཚང་བས་འདོད་པ་དང་བྲལ་བ་ཉིད་ཅིར་ཡང་སྣང་བའི་ཕྱིར། སྟོང་པ་ཉིད་ལ་སོགས་པའི་སྒོ་བཞི་མ་འདྲེས་ལ། ཡོངས་སུ་རྫོགས་པར་རྟོགས་པ་ནི། ཨ་ཏི་ཡོ་གར་འཇུག་གོ། །ཞེས་ཐ་སྙད་དུ་འདོགས་པས་སྒོ་བཞི་ཁ་དོག་གིས་གསལ་བའོ། །རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཞེས་བྱ་བ་ནི། འདས་མ་ཐག་པ་ཉིད་ཐེག་པ་བརྒྱད་ལ་སྦྱངས་པ་ལས་སྣང་བའི་ཕྱིར་ཉེ་བར་མཚོན་པ། ཞབས་དང་མ་ཆགས་ཟ་ར་ཚགས། །སྣ་འཕྱང་ཆུན་འཕྱང་ཕྲེང་བ་དང་། །སྣ་ཚོགས་ཁྱུང་མགོ་རིམ་པ་འཁྲིགས། །ཤེའོ། །ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། ཞེས་བྱ་བ་ནི། རང་རིག་པ་ནི། བདག་ཉིད་ཆེན་པོའི་ཕྱིར་བསལ་བར་བྱ་བ་མི་དམིགས་པས། མཐའ་དབུས་མེད་པ་ལ་ཕྱི་ནང་ཡང་པར་མི་འགྱུར་བ་ནི། དེ་བཞིན་གཤེགས་པའི་སྣང་བ་སྟེ། རང་བཞིན་ནོ་ཞེས་བྱ་བའོ། །མི་འཇིགས་པ་སེང་གེ་ཞེས་པ་ནས། གདན་ལ་ཞེས་པའི་མཐར་ཐུག་པ་ནི། ཡེ་ཤེས་ཆེན་པོ་མངོན་དུ་བྱས་པའི་རིག་པ་ནི་འབྲས་བུའི་ཆོས་བཞི་དང་། བཅུ་གཉིས་གཉིས་དང་། ཐམས་ཅད་མཁྱེན་པ་ཉིད་རྫོགས་པས། ཡང་དག་པར་རྫོགས་པའི་སངས་རྒྱས་སུ་བསྟན་ཅིང་ངེས་པར་བྱས་པ་ཡང་ཐེག་པ་བརྒྱད་ཀྱིས་ངེས་པར་འབྱུང་བའི་ཕྱིར། སེང་གེ་ལ་སོགས་པ་སྨོན་ལམ་གྱིས་བྱང་ཆུབ་སེམས་དཔའ་གཅིག་ཀྱང་བརྒྱད་བརྒྱད་དོ། །རང་བཞིན་གྱིས་འོད་གསལ་བ་ཉི་ཟླའི་དཀྱིལ་འཁོར་དང་། ཞེས་བྱ་བ་ནི་རང་རིག་པ་ཅིར་ཡང་མ་སྐྱེས་པ་ཉིད་ཀུན་ཏུ་སྣང་བས། ཐབས་དང་ཤེས་རབ་གཉིས་སུ་མེད་པའི་ཕྱིར་ཉི་ཟླ་བརྩེགས་མ་སྟེ། ཐིག་ལེ་ཆེན་པོ་དང་ས་བོན་ནི། ཐམས་ཅད་ཀྱི་བྱེད་པ་པོའི་ཕྱིར་བདག་པོ་དང་རྡོ་རྗེ་སྟེ། དབུས་ན་ཟླ་བ་བླར་གནས་སོ། །གོས་པ་མེད་པ་པདྨ་རིན་པོ་ཆེའི་གདན་ལ། ཞེས་བྱ་བ་ནི། སྣང་སྟོང་གཉིས་དང་བྲལ་བའི་རིག་པ་ནི་གང་དུ་ཡང་མ་ངེས་པས་ཅིས་ཀྱང་མ་གོས་པ་དང་། ཅི་བྱས་ཅི་སྣང་བ་རིལ་གཞན་དུ་མི་གཡོ་བར་བྱེད་པའི་དཔེ་རིན་པོ་ཆེ་ཆུ་དྭངས་ལྟ་བུ་དེ་ཉིད་ཡོན་ཏན་དུ་སྣང་བའི་ཕྱིར། རིན་པོ་ཆེ་སྣ་ཚོགས་ཀྱི་ཁྲི་ཀ་བས་བཏེགས་པའི། གདུང་རེ་རེ་ལ་མཛོད་བདུན་བདུན་ཏེ། དེས་པདྨ་སྣ་ཚོགས་བཏེགས་པའོ། །དེ་དག་ནི་གདུལ་བྱའི་སྣང་བས་གཉིས་སུ་ཡང་འགྱུར་ཏེ། ཐལ་བའི་རྒྱུད་ལས། བཅུད་འདུས་ཐིག་ལེ་ཆེན་པོ་ཉིད། །སྣང་དང་སྟོང་པ་སོགས་པ། །བརྗོད་བྱ་མ་ལུས་རྫོགས་པར་སྣང་། །རྟོག་ཚོགས་སངས་རྒྱས་བཞི་བཅུ་ལྔ། །སྣང་བས་ཕྱི་ཕྱིར་གཉིས་སུ་མེད། །དེ་གནས་པདྨ་རིམ་གསུམ་པོ། །གཉིས་གསུམ་བརྒྱད་ཀྱི་ཁྱད་པར་ཅན། །ཐ་མ་གནས་དང་ཡོན་ཏན་གྱིས། །མངོན་པར་མཐོ་བས་འོག་མིན་ཏེ། །ལས་དང་བཅུད་ཀྱིས་མཐའ་བྲལ་བ། །ཡེ་ཤེས་བཞི་ལ་དཔག་མི་རིག །དགོས་པ་འབྱུང་ལྡན་རིན་པོ་ཆེ། །ཡེ་ཤེས་ལྔ་ཡི་འཁོོར་ལོས་བསྐོར། །སངས་རྒྱས་ངོ་བོ་སྣོད་བཅུད་ཀྱིས། །སྤྱི་བོ་ཤིན་ཏུ་འཁྱིལ་བར་གནས། །ཡུངས་ཀར་སོར་གྱིས་སྤགས་པ་ནི། །ས་ཡ་བཅུ་གསུམ་བདེ་བས་བརྒྱན། །འདོད་ཡོན་ཁྱད་པར་ཅན་གྱིས་མཛེས། །གང་ཡང་བདེ་བྱེད་ཕྱི་ནང་བྲལ། །བདེ་བ་ཆེན་པོའི་རོ་ཉིད་ལའང་། །འབྲས་བུའི་ཆོས་ཀུན་རྫོགས་པར་ལྡན། །བྱང་ཆུབ་མཆོག་ཏུ་ཉི་ཟླ་ཤར། །དེ་ཉིད་བཞུགས་གནས་ཡིན་པར་བཤད། །ཅེས་འབྱུང་ངོ་། །སྒོ་ལ་སོགས་པ་ཇི་ལ་བུ་སྙམ་པ་ལ། རྒྱས་པའི་རྒྱུད་ལས། ནུབ་ཕྱོགས་འོག་མིན་གནས་མཆོག་ཏུ། །མ་ཆགས་པདྨའི་གདན་བཏིང་བ། །དུས་གསུམ་རྒྱལ་བ་བཞུགས་པའི་གནས། །རྣམ་པར་ཐར་པའི་སྒོ་བཞི་ལ། །ཕྱག་རྒྱ་བཞི་དང་ངེས་པར་ལྡན། །དབང་དང་སྐལ་མེད་གསང་བའི་ཕྱིར། །ནང་གཏན་ཕྱི་རིམ་ལྕགས་དང་ལྡན། །ཅེས་གསུངས་ཏེ། བླ་མས་འཆད་པར་འགྱུར་རོ། །སྐུ་མདུན་དང་རྒྱབ་མེད་པར། ཐམས་ཅད་དུ་ཞལ་ཐལ་ལེ་བར་གསལ་ཞིང་། ཞེས་བྱ་བ་ནི། སྟོན་པའི་ངོ་བོ་དང་སྐྱེ་བུའི་མཚན་ཉིད་ཐུན་མོང་དུ་བསྟན་ཏོ། །དྲུག་པ་ལ་སོགས་པའི་དེ་བཞིན་གཤེགས་པ་ནི། ཡེ་ཤེས་ཁོ་ནའི་ཕྱིར། གདུལ་བྱའི་སྣང་བ་ལྟར་མ་ཡིན་ཏེ། ཐམས་ཅད་དུ་ཡང་ཞལ་ལོ། །མཚན་དང་དཔེ་བྱད་དང་ལྡན་པ་ཞེས་བྱ་བ་ནི། འཁོར་ལོ་ལ་སོགས་པ་ཐུན་མོང་པའི་ཆོས་དེ་ཉིད་ཡོན་ཏན་ཕྲིན་ལས་ཀྱི་བྱེ་བྲག་སུམ་ཅུ་གཉིས་དང་། ཡེ་ཤེས་ཀྱི་ཁྱད་པར་བརྒྱད་ཅུར་སྣང་པའི་ཕྱིར། གང་ཡང་མ་སྤངས་པའོ། །ཞེས་བྱ་བ་ཁོ་ནའོ། །བསམ་གྱིས་མི་ཁྱབ་པ་ཐམས་ཅད་དུ། སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ་ཞེས་བྱ་བ་ནི། ཁྱབ་པ་དང་རྫོགས་པའི་ཕྱིར། མཐའ་ཡས་པའི་གདུལ་བྱའི་ངོ་ལ་ཞི་ཁྲོ་ལ་སོགས་པའི་སྐུ་གསུང་ཐུགས་ཀྱི་མཛད་པ་གང་ཡང་མ་ངེས་པར་སྣང་བའོ། །ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པ་ཞེས་བྱ་བ་ནི། བདེ་བ་ཆེན་པོའི་སྤྱོད་པས་གདུལ་བའི་ཕྱིར། རྡོ་རྗེའི་སྐྱིལ་མོ་ལ་ཤེས་རབ་ཀྱིས་འཁྱུད་པ་དང་། རྩེ་མོ་སྤྲད་པའི་བདེ་བ་ལ་རྒྱུ་འབྲས་རིལ་མཉམ་པར་རྫོགས་པའི་ཕྱིར་མི་འགྱུར་བར་བཞུགས་སོ། །ཡེ་ཤེས་དྲུག་གི་ཕྱག་ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན་ཞེས་བྱ་བ་ནི། དེ་བཞིན་ཉིད་ཡེ་ཤེས་སུ་རང་སྣང་བ་ནི། ཡུལ་ཤིན་ཏུ་རྣམ་པར་དག་པས་མིང་གསུམ་དང་ལྡན་ཏེ། ཐུན་མོང་དང་ཐུན་མོང་མིན་པའི་བཞི་དང་ལྔ་རྫོགས་པའི་རྩལ་ཉིད་ཅིར་ཡང་མི་འགོག་པས། དོན་མཛད་པའི་ཕྱིར། རྡོ་རྗེ་ལ་སོགས་པ་འོད་ཟེར་དང་བཅས་པ་འཛིན་པའོ། །སྐུ་གསུང་ཐུགས་བསམ་གྱི་མི་ཁྱབ་པའི་དབུ་གསུམ་དང་ལྡན་པ་ཞེས་བྱ་བ་ནི། རྣམ་པར་ཐར་པ་གསུམ་ཆུབ་པའི་རིག་པ་ནི། སྐུ་གསུང་ཐུགས་སུ་རང་སྣང་བ་སྟེ། དེ་གཅིག་ཀྱང་གསུམ་གསུམ་ལ་སོགས་པའི་ཕྱིར། གྲངས་དང་བྲལ་བ་ཡང་གདུལ་བྱའི་སྣང་བས་གསུམ་ཁོ་ནའོ། །དེ་དག་གདུལ་བྱའི་སྣང་བས་གཉིས་སུ་འགྱུར་ཏེ། ཐལ་བའི་རྒྱུད་ལས། བཅུད་ལྔ་ཡེ་ཤེས་ཁོ་ནའི་ཕྱིར། །དྭངས་སྙིགས་མེད་པར་ཀུན་ཏུ་གསལ། །སྒྲ་དབྱངས་གསུང་གི་གནས་བཞི་ཡི། །དབྱེ་བས་གསུམ་གསུམ་ངོ་གཉིས་དང་། །བཞི་བཅུ་གཉིས་སུ་འགྱུར་བ་ཡིན། །ས་ཡ་བཅུ་གསུམ་ལ་སོགས་པར། །སྐྱེ་འགག་གནས་པའི་ངོ་བོ་ཡང་། །རྟེན་ཅན་ཇི་བཞིན་རྟེན་དེ་བཞིན། །ཉི་ཟླ་ཐབས་དང་ཤེས་རབ་ཀྱི། །རོ་གཉིས་མཉམ་པར་དུས་གསུམ་བཞུགས། །དྭངས་མའི་ཐིག་ལེ་ཆེན་པོ་ཡི། །བདེ་བས་དངོས་པོའང་ཡེ་ཤེས་སྣང་། །ཞེས་འབྱུང་ངོ་། །འཕྲོ་ཚོལ་བ་ནི་གང་ཞེ་ན། ལྡན་པ་ཞེས་བྱ་བ་སྟེ། ཐུན་མོང་དུ་བསྟན་པའོ། །བཅོམ་ལྡན་འདས་དེ་བཞིན་གཤེགས་པ་ཞེས་པ་ནས། འདུ་བྱེད་ཀྱི་རྒྱལ་པོའི་བར་དུ་ནི། སྐྱེ་བུ་དང་རང་བཞིན་གཉིས་སུ་མེད་པའི་འཁོར་ཏེ། མཚན་ཐུན་མོང་བ་གཉིས་ནི་སྔར་ཐལ་ཏེ། ཀུན་གཞི་ལ་སོགས་པ་དང་རྟོག་པ་ལྔ་སྨོས་པ་ནི་རང་བཞིན་ཡིན་པ་དང་། ཐུན་མོང་མ་ཡ ིན་པའི་ཕྱིར་སྨོས་པ་སྟེ། དེ་དག་ཀར་དག་པར་ཆུད་པ་ལ། རྡོ་རྗེ་འཛིན་པ་ལ་སོགས་པར་རང་སྣང་བའི་ཕྱིར་རོ། །རང་བཞིན་ལས་ཁྱད་པར་མངོན་དུ་བྱས་པ་དང་། ཟག་པ་མེད་པའི་ལོངས་སྤྱོད་ཡོངས་སུ་རྫོགས་པའི་ཕྱིར་ན་རྒྱལ་པོ་ཞེས་བྱའོ། །དེ་དག་ཀུན་ཀྱང་མཐིང་ག་དང་། དཀར་པོ་དང་། སེར་པོ་དང་། ལེ་བརྒན་དང་། ལྗང་གུའི་མདོག་ཏུ་འཚེར་བ་ཞེས་བྱ་བ་ནི། རང་བཞིན་ལས་འདས་པ འི་ཕྱིར་སྨོས་ཏེ། ཡེ་ཤེས་ཀྱི་རྩལ་མ་འདྲེས་པ་ཉིད་ཅིར་ཡང་སྣང་བས་བལྟ་བས་མི་ངོམས་པའོ། །དེ་དག་གདུལ་བྱའི་སྣང་བས་གཉིས་སུ་འགྱུར་ཏེ། ཐལ་བའི་རྒྱུད་ལས། མཚན་ཉིད་ཀུན་བཅོམ་བདེ་ཆེན་པོ། །རང་གི་ངོ་བོ་མ་གྲུབ་པས། །རང་བཞིན་ལྷན་ཅིག་སྐྱེས་པའི་ཕྱིར། །བཅོམ་ལྡན་དེ་བཞིན་བཤེགས་ཞེས་བྱ། །གཟུགས་སོགས་ལྷག་པའི་ཐིག་ལེ་ནི། །ལས་དང་ཡོན་ཏན་སྔོན་ལྡན་ཕྱིར། །རིགས་ཀྱི་རྒྱལ་པོ་ཉིད་དུ་བརྗོད། །བཅུད་ལྔ་ཁུ་བའི་ཐིག་ལེ་ནི། །རྒྱུ་དང་གནས་ཀྱི་ཁ་དོག་ལྡན། །རོ་དང་ལས་ཀྱང་དེ་བཞིན་ཏེ། །རང་གི་མཚན་ཉིད་ཀུན་ཏུ་སྣང་། །ཞེས་འབྱུང་ངོ་། །བཙུན་མོ་ཞེས་པ་ནས། སོགས་ཞེས་པའི་བར་དུ་ནི། གང་ཞིག་སྤྱད་པར་བྱ་བ་ནི་བཙུན་མོ་སྟེ། དེ་དག་ཡོན་ཏན་གྱི་རྩལ་ཁྱད་པར་དུ་གྱུར་པས་སོ། །ནམ་མཁའ་ལ་སོགས་པ་སྨོས་པ་རྗེས་སུ་མཐུན་ཏེ། རྒྱུར་གྱུར་བ་ནི་སྐབས་ཀྱིས་དབྱིངས་སོ། །བསྡུ་བ་ནི་ཚོགས་དང་མཐུན་པ་སྟེ། རྒྱུད་འདི་ཐམས་ཅད་དུ་ཁས་ལེན་པའི་ཕྱིར། བུད་མེད་ཀྱི་དཀྱིལ་ན་གསུང་བརྗོད་པ་མེད་པར་བཞུགས་སོ། །ཆོས་ཀྱི་དབྱིངས་ཞེས་པ་ནས། བཞུགས་པའི་བར་ནི། དཔེས་འཁོར་གྱི་ཚད་སྟོན་པ་སྟེ། རང་བཞིན་མངོན་དུ་བྱས་པ་དང་བདག་ཉིད་ཆེན་པོའི་ཕྱིན། སེལ་མེད་པ་ནི་ཚད་ཁོ་ནའོ་ཞེས་བྱའོ། །དེ་དག་ཡང་ཐལ་བའི་རྒྱུད་ལས། མཁའ་སོགས་ནང་གི་འབྱུང་ལས་སྣང་། །ཡེ་ཤེས་འབྱུང་ལྔའི་ལས་དག་གིས། །སྐྱེད་ཕྱིར་དབྱིངས་སུ་བརྗོད་པ་སྟེ། །བཙུན་མོའི་དངོས་པོར་དེ་འདོད་དོ། །ཐིག་ལེ་སྣོད་ཀྱི་ཁྱད་པར་གྱིས། །ཏིལ་གང་ལྟ་བུར་མཁའ་གང་བ། །དཀྱིལ་འཁོར་ཚོགས་ཆེན་བརྗོད་མི་ལང་། །ཞེས་འབྱུང་ངོ་། །དེ་ནས་བྱང་ཆུབ་ཆེན་པོ་ཞེས་པ་ནས། མྱོང་པར་བྱ་བ་ཞེས་པའི་བར་དུ་ནི། རིག་པ་ཁྱད་པར་གྱི་འཁོར་ཏེ། གདུལ་བྱ་ལས་མཐར་ཐུག་པ་ནི་དྲུག་པའི་སངས་རྒྱས་ཀྱི་ཞིང་དུ་འགྱུར་ཏེ། དེ་དག་ས་གཞན་ལས་ཁྱད་པར་གྱུར་པས་ཆེན་པོ་སྟེ། ལྟ་བའི་སྒྲིབ་པ་འཇོམས་པའི་ཕྱིར། ལས་ཀྱི་རྡོ་རྗེའོ། །མིག་ལ་སོགས་པ་སྨོས་པ་རྗེས་སུ་མཐུན་ཏེ། སའི་སྙིང་པོ་དང་། ནམ་མཁའི་སྙིང་པོ་དང་། སྤྱན་རས་གཟིགས་དང་། ཕྱག་ན་རྡོ་རྗེ་དེ་དག །ལཱ་སྱ་དང་། མཱ་ལེ་དང་། གླུ་དང་གར་དང་ལྡན་པར་བཞུགས་སོ། །བྱང་ཆུབ་ཆེན་པོ་རྡོ་རྗེ་མཐོང་བྱེད་ཅེས་པ་ནས། མ་བྱོན་པ་བྱ་བའི་བར་དུ་གཞན་ནི་བཤད་ཟིན་ཏེ། དུས་ནི་དབང་པོ་དྭངས་མའི་ལས་ཀྱིས་ཡུལ་སྣང་བའི་གོ་འབྱེད་པའི་ཕྱིར། དེ་དག་ཐབས་དང་ཤེས་རབ་ཏུ་སྨོས་སོ། །དེ་དག་ཀྱང་བྱམས་པ་དང་། སྒྲིབ་སེལ་དང་། ཀུན་ཏུ་བཟང་པོ་དང་། འཇམ་དཔལ་རྣམས། སྤོས་མ་དང་། མེ་ཏོག་དང་། མར་མེ་དང་། བསིལ་བྱེད་མར་ལྡན་པའོ། །ཡང་ཐལ་བའི་རྒྱུད་ལས། མིག་སོགས་རང་གི་ཐིག་ལེ་ནི། །ལས་དང་ངོ་བོ་འབྲས་བུའི་ཕྱིར། །སེམས་དཔའ་ཆེན་པོ་ཉིད་དུ་བརྗོད། །ཉེས་ཟད་བྱེད་ཕྱིར་རྡོ་རྗེ་སྟེ། །རང་གི་གནས་ཀྱིས་ཕྱེ་བའོ། །གཟུགས་སོགས་ནང་ཉིད་ཕྱིར་སྣང་སྟེ། །རང་གི་རྩ་བཅུད་བཅས་པ་ལས། །བདེ་བ་བསྐྱེད་པའི་བཙུན་མོའོ། །དུས་ནི་རླུང་གིས་གོ་ཕྱེ་སྟེ། །བྱམས་པ་ལ་སོགས་ཡེ་ཤེས་བཞི། །དེ་བདེ་རིམ་པས་སྐྱེ་བ་ཡང་། །ཏིང་འཛིན་དབང་དུ་ངེས་པར་གསུངས། །ཞེས་འབྱུང་ངོ་། །འཇོམས་པ་ཆེན་པོ་རྡོ་རྗེ་རེག་པ་ཞེས་པ་ནས། བཞུགས་སོ་ཞེས་པའི་བར་དུ་ནི། སྐུ་གསུང་ཐུགས་ཀྱི་ཕྲིན་ལས་ཁོ་ནའི་ཕྱིར་ཏེ། གནོད་སྦྱིན་ལ་སོགས་པ་ལས་ཁྱད་པར་དུ་གྱུར་པའོ། །ལུས་ཀྱི་རེག་པ་ལ་སོགས་པ་ནི་གསང་བའི་ཁམས་ཏེ། གཞན་ཡང་དོར་བ་མ་ཡིན་ནོ། །རྟག་པ་ལ་སོགས་པ་ནི། དངོས་པོ་རྣམས་ལ་ཕྱིན་ཅ ི་ལོག་པར་འཛིན་པའི་ཕྱིར་འབྲེལ་པ་སྟེ། སྨོས་པ་ནི། རྗེས་སུ་མཐུན་པ་དང་། དེ་དག་མི་གནས་པར་བྱེད་པའི་ཕྱིར་རོ། །དེ་དག་ཀྱང་གཤིན་རྗེ་གཤེད་དང་། སྟོབས་པོ་ཆེ་དང་། རྟའི་རྒྱལ་པོ་དང་། བདུད་རྩི་འཁྱིལ་བ་རྣམས་ཡུམ་དང་འཁྲིལ་བར་རྔམ་པར་ཞལ་ཕྱིར་བལྟས་པའོ། །གཉིས་སུ་མེད་པར་བཞུགས་སོ། །ཞེས་བྱ་བ་ནི། རང་བཞིན་དང་། ཐུན་མོང་མིན་པ་དང་། བདག་ཉིད་ཆེན་པོ་དང་། གནས་ཀྱི་ཕྱིར་བཞག་པའོ། །ཐལ་བའི་རྒྱུད་ལས། གསང་ཡུལ་དབང་པོ་རྣམས་ཤེས་རེག །ལུས་ཀྱི་ཆོས་བཞི་འདུས་སྤྱད་པས། །མ་ལུས་འཇོམས་ཕྱིར་ཁྲོ་བོ་སྟེ། །མཚན་ཉིད་ལས་ཀྱིས་ཕྱེ་བ་ཡིན། །གསང་གསུམ་ཐབས་ཀྱི་སྤྱོད་པ་ཉིད། །རྟག་སོགས་མཚན་མ་ལས་སྐྱེད་ཕྱིར། །བཙུན་མོ་ཞེས་སུ་བསྟན་པ་སྟེ། །ལས་ཀྱི་སྐབས་ཀྱིས་མི་གནས་པའོ། །ཞེས་འབྱུང་ངོ་། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་། གཉིས་སུ་མེད་པ འི་གསང་བའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་ཅེས་བྱ་བ་ནི། འདི་ནས་མར་གླེང་གཞི་བསྡུས་པ་སྟོན་ཏེ། ཐབས་དང་ཤེས་རབ་འབྱོར་པའི་བདེ་བ་ཆེན་པོ་ལ། འབྲས་བུ་རིལ་ལྷུན་གྱིས་གྲུབ་པ་ནི། དཀའ་བའི་ཕྱིར་ཐུན་མོང་མ་ཡིན་པས་གསང་བའི་དཀྱིལ་འཁོར་ཏེ། དེ་བཞིན་གཤེགས་པ་དེ་དག་གི་ངོ་བོ་ནི་སྣང་བ་གསུམ་མི་ཕྱེད་པའོ། །དེ་ཉེ་བར་མཚོན་པ་ནི་འོག་ནས་སྟོན་པའོ། །སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཞེས་བྱ་བ་ནི། ལྔའི་ངོ་བོ་ནི་རིགས་ལྔ་སྟེ། དེ་དག་གཅིག་དང་དུ་མ་དང་བྲལ་བས་མི་ཕྱེད་པས་རྡོ་རྗེ་སྟེ་སྟོན་པའི་ངོ་བོ་ཡང་ཡིན་ལ། གདུལ་བྱའི་སྣང་བས་འཆད་པའི་སྐྱེས་བུ་ནི། རིགས་ལྔ་ཁོ་ནའི་ཕྱིར་རྡོ་རྗེ་སྟེ། དེ་ལས་མངོན་དུ་སྣང་བ་ལས་ཕྱུང་ངོ་། །ཨེ་ཨེ་མ་ཨེ་མའོ་ཞེས་བྱ་བ་ནི། སྟོན་པ་དང་། གནས་དང་། འཁོར་ཁྱད་པར་དུ་གྱུར་པ་ལ་ངམ་པ་སྟེ། རང་རིག་པ་ཉིད་གསུམ་གྱི་ཁྱད་པར་དུ་སྣང་བ་ལ་ངམ་པ་གསུམ་མོ། །དེ་བཞིན་ཉིད་ཀྱི་དབྱིངས་ཉིད་ཅེས་བྱ་བ་ནི། གནས་ཀྱི་རང་བཞིན་སྟོན་ཏེ། དེ་ཡང་སེམས་ཉིད་ལྷུན་གྱིས་གྲུབ་པའི་དེ་བཞིན་ཉིད་དང་། མཉམ་པ་ཉིད་ཀྱི་དབྱིངས་སུ་ཡེ་ནས་གནས་པའོ། །དབང་སྒྱུར་ཞེས་བྱ་བ་ནི། སྟོན་པའི་ངོ་བོ་སྟེ། དེ་ཡང་དོན་གོང་མ་དེ་ཡིད་བྱེད་པ་པོ་རང་བྱུང་གི་ཡེ་ཤེས་ཀྱིས་རྟོགས་པར་མངའ་མཛད་པའོ། །ཡེ་ཤེས་དཀྱིལ་འཁོར་ཐུགས་རྗེའི་ངང་། །ཞེས་བྱ་བ་ནི། སྟོན་པའི་རང་བཞིན་ཏེ། དེ་ཡང་རྟོགས་པའི་རིག་པ་ཉིད་ཡེ་ཤེས་ལྔར་གསལ་བའི་བྱེ་བྲག་རྣམས་ལས་འབྲས་བུའི་ཆོས་རིལ་དུ་སྣང་ལ་དུས་གསུམ་གྱི་ཆོས་ཀུན་ཏུ་རྒྱ་མ་ཆད་པས། ཐུགས་རྗེས་འབྲེལ་པའོ། །རང་སྣང་བ་ཉིད་ཅེས་བྱ་བ་ནི། གནས་ཀྱི་ངོ་བོ་སྟོན་ཏེ། དེ་རྟོགས་པའི་རིག་པ་ལ་འབྲས་བུ་སྐུ་དང་ཡེ་ཤེས་ཐམས་ཅད་རྫོགས་པ་ཉིད་རྩལ་མ་འགགས་པར་རང་སྣང་བ་ནི་གྲུ་བཞི་གློ་འབུར་དང་དབྱིབས་དང་ཁ་དོག་སྣ་ཚོགས་སུ་སྣང་བའོ། །ཏིང་འཛིན་ཞེས་བྱ་བ་ནི། སྒོ་བཞི་སྟེ། དེ་ཡང་སྟོང་པ་ཉིད་ལ་སོགས་པའི་ཏིང་ངེ་འཛིན་བཞིའི་སྒོ་ནས་འཇུག་པས། སྒོ་བཞིར་བསྒོམ་པ་ཡང་། ཐེག་པ་བརྒྱད་ཀྱི་སྒོ་ནས་མཚོན་དགོས་པའི་ཕྱིར་ཏེ། དེའི་གཟུགས་བརྙན་ནི་རྟ་བབས་བརྒྱད་དོ། །སྒྱུ་མ་རྣམ་དག་གསལ་བ་ནི། ཞེས་བྱ་བ་ནི་གདན་ཏེ་རྟོགས་པའི་རིག་པ་སྒྱུ་མ་ཉིད་སྟོབས་ལ་སོགས་པ་འབྲས་བུའི་ཆོས་སུ་སྣང་བས་སེང་གེ་ལ་སོགས་པར་བསྒོམ་པའོ། །རྣམ་དག་ནི་ཐམས་ཅད་རང་རིག་པའི་ཕྱིར་སྤྱད་ཀྱང་མི་གོས་པས་པདྨར་གྱུར་པའོ། །གསལ་བ་ཞེས་བྱ་བ་ནི། མ་སྐྱེས་པའི་ཡེ་ཤེས་ཉིད་ཐབས་དང་ཤེས་རབ་ཏུ་གསལ་བས་ཉི་ཟླར་བསྒོམ་པའོ། །དེར་ཅི་ཞིག་བསྒོམ་སྙམ་པ་ལ། སྐུ་གསུང་ཐུགས་དང་ཡོན་ཏན་ཕྲིན་ལས་ཞེས་གསུངས་ཏེ། སྐྱེས་བུ་དང་འཁོར་ཏེ། ཕུང་པོ་དང་འབྱུང་བ་ཀར་དག་པ་རིགས་ལྔ་ཡབ་ཡུམ་དུ་བསྒོམ་པའོ། །སེལ་མེད་པ་ཞེས་བྱ་བ་ནི། འཁོར་གྱི་ཚད་དེ། དེ་ཡང་ཕུང་པོ་དང་འབྱུང་བས་རིལ་བསྡུས་པ་ཐམས་ཅད་ཀྱང་སྐུ་དང་ཡེ་ཤེས་ཀྱི་ངོ་བོར་གྱུར་པས་ཁྱབ་པ་ནི་ཏིལ་གྱི་གང་བུ་ལྟར་སྤྱོད་ཡུལ་ཡོངས་སུ་དག་པ་ཁོ་ནའོ། །ཡོན་ཏན་ཡིད་བཞིན་རིན་པོ་ཆེ། །ཞེས་བྱ་བ་ནི། སྐུ་མདོག་སྟེ་ཕྱག་རྒྱ་ཆེན་པོར་གསལ་བ་དེ་དག་ཐབས་མ་འདྲེས་པར་དོན་མཛད་པའི་ཕྱིར། རིན་པོ་ཆེ་ཚོན་ཤེལ་དུ་བཅུག་པ་ལྟར་གསལ་བར་བསྒོམ་པའོ། །མི་ཟད་པར་ལྡན་རྒྱན་གྱི་འཁོར་ལོ་ཞེས་བྱ་བ་ནི། རིག་པ་ཁྱད་པར་ཅན་གྱི་འཁོར་ཏེ། དེ་ཡང་དེ་དག་ཕྱེ་བ་ཁམས་ལ་སོགས་པའི་ཐ་སྙད་རིལ་སྐུ་དང་ཡེ་ཤེས་ཀྱི་དཀྱིལ་འཁོར་དུ་གྱུར་པ་ནི། རྒྱས་པར་ཕྱེ་བ། གྲངས་ལས་འདས་པས། བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་བྱ་བ་ཁོ་ནའོ། །རྡོ་རྗེ་མཆོག་གི་གནས་ཉིད་དོ། །ཞེས་བྱ་བ་ནི། གླེང་གཞིའི་ངེས་ཚིག་སྟེ། དེ་ཡང་རྡོ་རྗེ་ཐེག་པའི་རྒྱུད་ཀྱི་མཆོག་གི་གནས་ནི་གསུམ་པོ་ཚོགས་པ་ལས་འབྱུང་ཡང་། སྐུ་གསུང་ཐུགས་ཀྱི་རྡོ་རྗེའི་འབྲས་བུ་ནི། ཚིག་བཞིས་མཚོན་པའི་ཏིང་ངེ་འཛིན་ལས་བྱུང་བའི་ཕྱིར་རོ། །རྡོ་རྗེ་གསང་བའི་ཚིག་ཏུའོ། །ཞེས་བྱ་བ་ནི་སྣང་བ་གསུམ་མི་ཕྱེད་པ་ནི་རྡོ་རྗེ་སྟེ། ཉམས་སུ་ལེན་པ་དཀའ་བ་དེ་མཚོན་པའོ། །གླེང་གཞིའི་ལེའུ་ཞེས་བྱ་བ་ནི། གླེང་བ་ནི་བརྗོད་པ་སྟེ། བྱ་བ་དང་བྱེད་པ་གཉིས་ཀྱི་རྩ་བ་ནི་སྟོན་པ་ལ་སོགས་པ་ཚོགས་པ་ཁོ་ནའོ། །ལེའུ་དང་པོ་མདོར་བཀྲོལ་བའོ།། །།དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ། ཞེས་བྱ་བ་ནི། དེ་མ་ཐག་པར་སྐབས་འབྱེད་པ་སྟེ། རྒྱུ་བསྟན་ནས་རྒྱུད་ཀྱི་རྐྱེན་གཉིས་ལས། ཐུན་མོང་མ་ཡིན་པའི་གླེང་བསླང་བ་གསང་བའི་དབང་སྟོན་པའི་ཕྱིར་རོ། །ཡིད་ནི་སྐབས་ཀྱིས་རྟོག་པ་དང་ཡེ་ཤེས་ཀྱི་བདག་ཉིད་ཀྱི་ཕྱིར་འཁོར་བ་དང་མྱ་ངན་ལས་འདས་པ་གཉིས་ཀའི་བྱེད་པ་པོའོ། །དེ་ཡང་ལྟོས་པའི་ཀུན་ཏུ་བརྟགས་པ་ཅན་རྣམས་ཀྱིས་ཡིད་རྒྱུ་རྐྱེན་ལས་སྣང་བར་འདོད་པ་ལས་ཁྱད་པར་དུ་གྱུར་པས་རྡོ་རྗེ་ཡིད་དེ། གང་འདུས་མ་བྱས་པས་སྐྱེ་འཇིག་དང་བྲལ་བའི་ཕྱིར་རོ། །དེ་ཉིད་མ་བཙལ་བར་རང་སྣང་བས། ཐམས་ཅད་ཀྱང་ཡེ་ཤེས་ཁོ་ན་བས་སྤང་བྱ་མི་དམིགས་པའི་ཕྱིར་ཀུན་ཏུ་བཟང་པོའོ། །དེ་ཉིད་དྲུག་པར་སྣང་བས་དོན་ལས་མཚན་བཏགས་པའོ། །ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེས། ཞེས་བྱ་བ་ནི། བྱེད་པ་པོའི་ཕྱིར་གང་བྱས་པ་རིལ་གྱི་རང་བཞིན་རང་རིག་པའི་ཡེ་ཤེས་སུ་ཚུལ་གཅིག་ལ། དེ་ལས་སྣང་བའི་རྒྱལ་བ་རིལ་ཡང་དྲུག་པར་ཚུལ་གཅིག་པས། མི་ཕྱེད་པ་ནི་སྐུ་གསུང་ཐུགས་རྡོ་རྗེའི་བདག་པོའོ། །བཙུན་མོ་བྱ་བ་མོ་ཆོས་ཀུན་ཏུ་བཟང་མོ་ལ་འཇུག་པར་གྱུར་ཏོ། །ཞེས་བྱ་བ་ནི། ཡོངས་སུ་ཤེས་པར་བྱ་བ་ཉིད་ནི། འདུས་བྱས་པ་དང་འདུས་མ་བྱས་པའི་ཆོས་རིལ་སེམས་ཉིད་ཀྱི་ཕྱིར་སྤང་བྱ་མི་དམིགས་པ་ཉིད་རང་སྣང་བ་ནི་ཕྱག་རྒྱ་ཆེན་པོའི་གཟུངས་ཏེ། དེ་ལ་དེ་སྐད་ཅེས་བྱའོ། །སྙོམས་པར་འཇུག་པ་ནི། གདུལ་བྱའི་སྣང་བའོ། །ཞུགས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་མ་ལུས་པ་ཐམས་ཅད་གཅིག་གི་རང་བཞིན་དུ་དབྱེར་མེད་པས་ཞེས་བྱ་བ་ནི། འབྱུང་བར་མ་ངེས་པའི་དེ་བཞིན་གཤེགས་པ་ནི་འགྲོ་བ་རིལ་ཡང་འགྱུར་བས་ཐམས་ཅད་ཀྱང་ལྷན་ཅིག་སྐྱེས་པའི་ཡེ་ཤེས་སུ་གསལ་བ་ལ། གཉིས་པ་མི་སྣང་བའི་ཕྱིར། དེ་བཞིན་གཤེགས་པ་ཉིད་ལ་ཉིད་ཆེད་དུ་བརྗོད་པ་འདི་བརྗོད་དོ། །ཞེས་གསུངས་ཏེ། བརྗོད་པ་དང་འདྲའོ་ཞེས་བྱའོ། །ཨེ་མའོ་ཞེས་བྱ་བ་ནི། ངམ་པ་སྟེ་འདོད་ཆགས་ཀྱི་སྒོ་ནས་སྤྱོད་ཡུལ་ཡོངས་སུ་དག་པའི་ཕྱིར་རོ། །མྱོང་བ་ཉིད་ལ་ངམ་པ་སྟེ་དེ་དག་གང་ཡིན་སྙམ་པ་ལ། རྡོ་རྗེ་ཕུང་པོའི་ཡན་ལག་ནི། །ཞེས་པ་ལ་སོགས་པ་གསུངས་ཏེ། ལྔ་ཕུང་གི་རྒྱུ་ནི་རང་རིག་པའི་ཡེ་ཤེས་རྡོ་རྗེའོ། །རྐྱེན་ནི་ༀ་དང་མཱུཾ་དུ་འབྲེལ་བའི་རྡོ་རྗེ་དྲིལ་བུའི་ས་བོན་ནོ། །རྒྱུ་རྐྱེན་གཉིས་ཀྱི་ཕྱིར། ངོ་བོ་ཉིད་སྣང་སྟོང་མི་ཕྱེད་པའི་རྡོ་རྗེ་སྟེ། དེ་དག་རང་གི་ཡན་ལག་བརྒྱད་ཅུ་དང་བཅས་པ་ཉིད། རྫོགས་པའི་སངས་རྒྱས་ལྔ་རུ་གྲགས། །ཞེས་བྱ་བ་ནི། སྤྱིར་སངས་རྒྱས་དང་ཡང་དག་པ་རྫོགས་པའི་སངས་རྒྱས་ལས། སྐུ་གསུམ་ཐོབ་པ་དང་། སྐུ་ལྔར་ལྷུན་གྱིས་གྲུབ་པའོ། །དེ་ནི་ལམ་འདིས་འབྲས་བུ་མཐར་ཕྱིན་པའི་ཕྱིར་རོ། །གྲགས་པ་ནི་གསལ་བའོ། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཅེས་བྱ་བ་ནི། སྐྱེ་མཆེད་དང་ཁམས་ནི། མིག་ལ་སོགས་པ་བཅོ་ལྔའོ། །རྣམས་ཀྱི་སྒྲ་ནི་དུས་བཞི་དང་། ཕྱིན་ཅི་ལོག་བཞི་དང་། རེག་པ་དག་གོ། །དེ་དག་རིག་པ་རང་སྣང་བས་རྡོ་རྗེའི་ཕྱིར་སེམས་དཔའ་དང་སེམས་མ་བཅུ་དྲུག་གོ། །ཁྲོ་བོ་ཡང་འདུལ་བའི་སྐབས་ཀྱིས་སེམས་དཔའ་དང་སེམས་མའོ། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །ཞེས་བྱ་བ་ནི། ནང་གི་དྭངས་མ་ཡེ་ཤེས་ཀྱི་འབྱུང་བ་ཉིད་བརྟགས་པའི་དབང་གིས་ནམ་མཁས་འཕངས་པར་སྣང་བ་དེ་དག་རང་རིག་གི་ཕྱིར་སྣང་སྟོང་གཉིས་སུ་མེད་པའི་ཡེ་ཤེས་སོ། །དེ་དག་ལས་ཀྱི་ཡུམ་ཁོ་ནའོ། །སྲིད་གསུམ་ཡེ་ནས་སངས་རྒྱས་ཞིང་། །ཞེས་བྱ་བ་ནི། ཁམས་གསུམ་གྱིས་བསྡུས་པ་རིལ་ཆགས་པ་དང་གནས་པ་དང་འཇིག་པར་སྣང་བ་དེ་དག་ཀྱང་། རང་རིག་གི་ཕྱིར། སྐུ་གསུམ་གྱི་ངོ་བོ་ཉིད་དུ་གྱུར་པའི་ཕྱིར། ཞིང་ཁམས་ཡོངས་སུ་དག་པའོ། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་བྱ་བ་ནི། དེ་དག་གིས་མཚོན་ནས་ཆོས་ཇི་སྙེད་པ་ཡང་། མིང་དང་། ལས་དང་། དངོས་པོ་དང་། མཚན་ཉིད་ཐ་སྙད་བཞིར་བསྡུས་པ་རིལ། རང་རིག་གི་ཕྱིར་སྐུ་དང་ཡེ་ཤེས་སུ་ཀར་དག་པས། བརྟགས་པའི་ཐ་སྙད་དེ་དག །དངོས་པོ་རྣམས་ཀྱི་ངོ་བོ་ཉིད་ལ་བཙལ་ན། དེ་བཞིན་གཤེགས་པའི་སྤྱན་གྱིས་ཀྱང་མི་གཟིགས་པས། སངས་རྒྱས་ཉིད་ལས་གཞན་པའི་ཆོས། །བཙལ་ཀྱང་རྒྱལ་བས་མི་བརྙེས་སོ། །ཞེས་གསུངས་སོ། །ཐལ་བའི་རྒྱུད་ལས་ཀྱང་། ཐབས་ལམ་བདེ་བའི་གཉེར་དག་གིས། །བརྟགས་པས་རང་གི་རྟོག་པ་ཟློག །དངོས་པོ་རྣམས་ཀྱི་ངོ་བོ་ལ། །བཟློག་བྱ་ངས་ཀྱང་མ་གཟིགས་སོ། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་མཉེས་པར་གྱུར་ཏོ། །ཞེས་བྱ་བ་ནི། རང་བཞིན་གཉིས་སུ་མེད་པའི་འཁོར་རྣམས་སོ། །དེ་ནས་ཞེས་པ་ནས། བཟང་པོ་དང་ཞེས་པའི་བར་དུ་ནི་གོ་སླའོ། །གཉིས་སུ་མེད་པར་གྱུར་ནས། ཞེས་བྱ་བ་ནི། ཐིག་ལེ་གཉིས་སུ་མེད་པ་སྟེ། དགོངས་པ་ཡང་བསྡུའོ། །ཡབ་ཡུམ་གྱི་ལས་དང་མྱོང་བ་དང་། ཚིག་འདི་དག་ཡི་གེ་སྔ་ཕྱི་ཡོད་ཀྱང་དུས་མཉམ་པར་གསུངས་སོ། །ཀྱེ་མའོ་ཞེས་པ་ནི་འབོད་པ་དང་ངམ་པ་སྟེ། བདེན་པ་གཞན་ལ་བསྟན་པའི་ཕྱིར་རོ། །གཅིག་ནི་རྗེས་སུ་མཐུན་ནོ། །ཕྱོགས་བཅུ་སྟོང་ཁམས་ཡེ་ནས་དབེན། །ཞེས་བྱ་བ་ནི། ཀུན་གཞི་ཉིད་ཐ་སྙད་གཉིས་ཀྱིས་བསྡུས་པའི་དོན་དང་སེམས་ཅན་དུ་སྣང་བས་དེ་དག་ཉིད་ཀུན་གཞི་མ་སྐྱེས་པའི་ཡེ་ཤེས་ཀྱི་ཕྱིར་ཆོས་ཀྱི་སྐུ་སྟེ། དེ་ལ་བཅུ་དང་གསུམ་ལ་སོགས་པའི་ཐ་སྙད་ཐམས་ཅད་དང་གདོད་ནས་སྟོང་པ་ཁོ་ནའོ། །སྲིད་པ་གསུམ་ཉིད་དག་པའི་ཞིང་། །ཞེས་པ་བཤད་ཟིན་ཏོ། །སྙིགས་མ་ལྔ་ཉིད་བདེ་ལྡན་གནས། །ཞེས་བྱ་བ་ནི། དུས་དང་སེམས་ཅན་དང་ཚེ་དང་ལས་དང་ཉོན་མོངས་པ་རྣམས་ཐ་མ་པའི་ཕྱིར་སྙིགས་མའོ། །དེ་ཉིད་བརྟགས་པའི་ཕྱིར་གློ་བུར་བ་ཡིན་པས། རང་བཞིན་ཉིད་ནི་མྱོང་བ་ཡང་མི་དམིགས་པས་བདེ་བ་ཆེན་པོའི་རོལ་པ་ཁོ་ནའོ། །ཕུང་པོ་ལྔ་ཉིད་མངོན་སངས་རྒྱས། །ཞེས་པ་བཤད་ཟིན་ཏོ། །ཐམས་ཅད་མཆོག་གི་སྙིང་པོ་ལས། །ཞེས་བྱ་བ་ནི། བཤད་པའི་དངོས་པོ་བཞིས་བསྡུས་པ་རིལ་ཡོན་ཏན་དུ་བསྟན་པ་ནི་འབྲས་བུའི་མཆོག་སྟེ། བསྒྲུབ་བྱའི་སྙིང་པོའོ། །གཞན་དུ་རྒྱལ་བའི་ཞེས་པ་ནས། །མི་བརྙེས་སོ། །ཞེས་པའི་བར་དུ་ནི་གོ་སླ་སྟེ། ཆོས་བཞི་པོའི་རང་བཞིན་ལས་འབྲས་བུ་གུད་ནས་མི་རྙེད་པའི་ཕྱིར་རོ། །ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །ཞེས་བྱ་བ་ནི། སྙོམས་པར་ཞུགས་པའི་འབྲས་བུ་དེ་འཁོར་རྣམས་ལ་བྱིན་ཡང་ཉིད་ལ་གསལ་བ་ཉིད་གཞན་ལ་མི་སྣང་བའི་ཕྱིར་ངེས་ཚིག་ཏུ་འགྱུར་རོ། །དེ་ནས་དེ་བཞིན་གཤེགས་པ་གཉིས་སུ་མེད་པའི་བདག་ཉིད་ཆེན་པོ། ཞེས་བྱ་བ་ནི། ཐམས་ཅད་མཁྱེན་པའི་དབང་དང་། ཤིན་ཏུ་བརྟན་པའི་དབང་གིས་ལས་ཐུན་མོང་དུ་སྟོན་ཏེ། གཉིས་སུ་མེད་པ་ནི་ཐིག་ལེ་སྟེ། དགོངས་པ་ཡང་མི་འདོད་པ་མ་ཡིན་ནོ། །སྔོན་ནས་སྙོམས་པར་ཞུགས་པས་མངའ་མཛད་པའི་ཕྱིར་བདག་པོའོ། །ཡེ་ནས་སངས་རྒྱས་པའི་སེམས་ཡེ་ཤེས་སུ་བསྐྱེད་པ་འདི་ཞེས་བྱ་བ་ནི། དེའི་དངོས་པོ་ཉིད་ཡབ་ཡུམ་གཉིས་ཀྱིས་མཁྱེན་པ་གང་ཡིན་པ་དེའོ། །དེ་ལ་འཁོར་གྱི་སེམས། རང་བཞིན་ལྷན་ཅིག་སྐྱེས་པའི་ཡེ་ཤེས་སུ་སྣང་བར་བྱ་བ་ཡང་རིམ་པ་ལྔ་ཡི་བསྐྱེད་པར་བྱ་བའི་ཐབས་ཀྱི་རིམ་པ་འདི་ཞེས་བྱ་བ་ཁོ་ནའོ་ཞེས་བྱའོ། །དེ་ལ་སེམས་ལྔ་ནི་བཀའ་ཚད་མ་ལས། གཡོ་དང་སྨོན་པ་ལ་སོགས་པ་ལྔས་འབྲས་བུ་མཐར་ཕྱིན་པར་གསུངས་པ་དེ་དག །སྐབས་འདིར་རྒྱས་པ་ལས། འཇིག་དང་ལྡང་དང་གནས་དང་སྨོན་པ་ཡི། །གཡོ་དང་འགྲོ་འོང་འཇུག་དང་བདེ་གནས་པ། །གསང་བའི་དབང་པོ་པདྨས་ཐོབ་པར་འགྱུར། །ཞེས་འབྱུང་བས། ཐབས་ཀྱི་རིམ་པས་སེམས་ལྔ་རྫོགས་པར་སྟོན་ཏེ། ཨེ་མའོ་ངོ་མཚར་རྨད་ཀྱི་ཆོས། །ཞེས་བྱ་བ་ནི། ངམ་པ་སྟེ་སྤྱིར་འགྲེའོ། །གང་ལ་ངོ་མཚར་ཆེ་ཞེ་ན། འདོད་ཆགས་ཀྱི་སྤྱོད་པ་ཉིད། བཀའ་ཚད་མ་ལས་རྨད་དུ་བྱུང་བའི་བྱང་ཆུབ་སེམས་ལྔར་སྣང་བ་ནི། ཐབས་ཀྱི་ཐེག་པ་ཆེན་པོའི་ཆོས་སོ། །རྫོགས་པའི་སངས་རྒྱས་ཀུན་གྱི་གསང་། །ཞེས་བྱ་བ་ནི། འདོད་ཆགས་ཀྱི་བྱང་ཆུབ་ནི། དྲུག་པའི་སངས་རྒྱས་ཀྱི་རྒྱུ་དང་ངོ་བོ་ཉིད་ཀྱི་ཕྱིར་ཕལ་གྱི་སྤྱོད་ཡུལ་མ་ཡིན་པའོ། །སྐྱེ་བ་མེད་ལས་ཐམས་ཅད་སྐྱེས། །ཞེས་བྱ་བ་ནི། གཡོ་ལྡང་གི་བྱང་ཆུབ་སེམས་ཏེ། ཐིག་ལེ་རང་གི་གནས་དང་ལམ་ནས་ལྡང་བའི་ཚེ་བདེ་བ་མཉམ་དུ་གཡོ་བའི་ཕྱིར་རོ། །རང་བཞིན་གྱི་ཡེ་ཤེས་ནི་སྐྱེ་འཇིག་སྨོན་འཇུག་རིལ་དང་བྲལ་བ་སྟེ། དེ་ནི་གཞི་དང་བསྒྲུབ་བྱ་སྟེ། །ལྔའི་སྤྱིར་ཤེས་པར་བྱའོ། །སྐྱེས་པ་ཉིད་ན་སྐྱེ་བ་མེད། །ཅེས་བྱ་བ་ནི། དེའི་རོ་ཡང་རང་བཞིན་ལས་མ་འདས་པའི་ཕྱིར་རོ། །ཨེ་མའོ་ཞེས་པ་ལ་སོགས་པ་གཞན་ནི་བཤད་ཟིན་ཏོ། །འགག་པ་མེད་ལས་ཐམས་ཅད་འགག །ཅེས་བྱ་བ་ནི། འཇིག་པ་དང་འཇུག་པར་བྱང་ཆུབ་སེམས་ཏེ། ས་བཅུ་དྲུག་པ་ནི་ཕྱི་མ་ཕྱི་མ་ལ་ཐིག་ལེ་འཇུག་པའི་ཚེ། སྔ་མའི་འདོད་ཆགས་ཀྱི་རོ་འགག་པའི་ཕྱིར་རོ། །འགག་པ་ཉིད་ན་འགག་པ་མེད། །ཅེས་བྱ་བ་ནི། ཡེ་ཤེས་ཀྱི་རོ་ནི་སྐད་ཅིག་མའི་རྒྱུན་དུ་འཕེལ་བའི་ཕྱིར། མི་འགག་པ་ཁོ་ནའོ། །གནས་པ་མེད་ལས་ཐམས་ཅད་གནས། །ཞེས་བྱ་བ་ནི། གནས་པ་བྱང་ཆུབ་སེམས་ཏེ། ཐིག་ལེ་བཅུ་དྲུག་གི་ཡེ་ཤེས་ལ་གནས་པ་མེད་པའི་ཚུལ་གྱིས་གནས་པའི་ཕྱིར་རོ། །གནས་པ་ཉིད་ན་གནས་པ་མེད། །ཅེས་བྱ་བ་ནི། ཡེ་ཤེས་ཉིད་རང་སྣང་བའི་ཕྱིར། ཡུལ་དང་བྲལ་བས་གནས་བཅའ་རུ་མེད་འབྲས་བུ་ལ་ལམ་དུ་བྱེད་པའི་ཕྱིར་རོ། །དམིགས་པ་མེད་ལས་ཐམས་ཅད་དམིགས། །ཞེས་བྱ་བ་ནི། སྨོན་པ་བྱང་ཆུབ་སེམས་ཏེ། ཡེ་ཤེས་སྔ་མ་ལ་གནས་བཞིན་དུ་སའི་དབང་གིས་ཕྱི་མ་འདོད་པ་ཁོ་ནའོ། །དམིགས་པ་ཉིད་ན་དམིགས་པ་མེད། །ཅེས་བྱ་བ་ནི། སྐྱེད་དུ་ཐལ་བ་ཉིད་ཀྱང་། རང་རིག་པའི་ཕྱིར་རྐྱེན་ཙམ་སྟེ། གཞན་ནས་ཐོབ་པ་མེད་པའི་ཕྱིར་རོ། །འགྲོ་འོང་མེད་ལས་འགྲོ་དང་འོང་། །ཞེས་བྱ་བ་ནི། འཇུག་པ་བྱང་ཆུབ་སེམས་ཏེ། ངང་ལ་ཐུན་མོང་གི་ལམ་དུ་འཇུག་པ་ནི། འགྲོ་བའོ། །ཐེག་པ་ཆེན་པོའི་ལུགས་ཀྱིས་རྒྱུ་འབྲས་བཟློག་པ་ནི་འོང་བ་ཞེས་བྱ་བ་ཁོ་ནའོ། །འགྲོ་འོང་ཉིད་ན་འགྲོ་འོང་མེད། །ཅེས་བྱ་བ་ནི། ལམ་འདིས་འབྲས་བུ་མངོན་དུ་བྱེད་དེ། སྔོན་གྱི་གནས་རྗེས་སུ་དྲན་པའི་མངོན་པར་ཤེས་པའི་ཕྱིར་དང་། གང་དུ་ཡང་ཕྱིན་པ་མེད་པ་ཁོ་ནའོ། །ཞེས་བྱའོ། །སེམས་འདི་དག་ས་གཅིག་ལ་ཡང་ཚང་བའི་ཕྱིར། དུས་གཅིག་ཏུ་སྐྱེ་བར་འགྱུར་བའི་ཕྱིར། ཅིག་ཅར་འཇུག་པའི་ལམ་ཞེས་བྱའོ། །ཞེས་བརྗོད་པས། ཞེས་བྱ་བ་ནི། ཐབས་ལྔ་པོ་དེས་ཞེས་བྱའོ། །དེ་ནས་དེ་བཞིན་གཤེགས་པ་ཐམས་ཅད་དང་། བཙུན་མོའི་ཚོགས་ཐམས་ཅད་ཀྱང་མཉེས་པས་ཁྱབ་པར་གྱུར་ཏོ། །ཞེས་བྱ་བ་ནི། སེམས་བསྐྱེད་པའི་ཐབས་ལྔའི་སྒོ་ནས་མ་འོངས་པའི་དེ་བཞིན་གཤེགས་པ། སེམས་དཔའ་དང་སེམས་མ་རིལ་གྱིས་ཕུན་སུམ་ཚོགས་པ་ལྔ་ལྷུན་གྱིས་གྲུབ་སྟེ། རང་བཞིན་གསང་བའི་སྙིང་པོ་མངོན་དུ་བྱས་ནས། སྐུ་དང་ཡེ་ཤེས་བཞི་བཅུ་རྩ་ལྔ་མཐར་ཕྱིན་ནས་རྡོ་རྗེ་གསང་བའི་གྲལ་དུ་འཁོད་པ་ནི་དགྱེས་པ་ཆེན་པོའི་ཕྱིར། རྒྱས་པའི་རྒྱུད་ལས། དཀྱིལ་འཁོར་བཞི་བཅུ་རྩ་གཉིས་དང་། །ཕུན་སུམ་ཚོགས་པའི་ལྷུན་གྲུབ་རྣམས། །གསང་དབང་མཆོག་གིས་འབྱིན་པར་བྱེད། །ཅེས་འབྱུང་ངོ་། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་བཅས་པས། ཆེད་དུ་བརྗོད་པ་འདི་བརྗོད་དོ། །ཞེས་བྱ་བ་ནི། འདི་ནས་མར་ཐུན་མོང་གི་གླེང་བསླང་བ་བསྟན་པ་མཐའ་དག་བཤད་པར་ཞུས་པ་སྟོན་ཏེ། འབྲས་བུ་མཐར་ཕྱིན་པའི་དེ་བཞིན་གཤེགས་པས་སོ། །ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་བྱ་བ་ནི། བཤད་ཟིན་ཏེ། རང་བཞིན་གསང་བའི་སྙིང་པོ་འབྲས་བུ་ཁྱད་པར་ཅན་འདི་ལྟ་བུ། གསང་བ་བཞིས་ཆོད་པའི་ཕྱིར། རྡོ་རྗེ་འཛིན་པའི་ཞལ་དང་དབང་མ་མཐོང་མ་ཐོབ་པས་མངོན་དུ་བྱེད་མི་ནུས་པས་ལམ་སྟེགས་གཞན་ལ་བློ་སྦྱངས་པ་སྟོན་པའི་ཕྱིར། ལམ་གྱི་རྒྱུད་དང་ཐུན་མོང་བའི་ཆོས་རྣམས་བཤད་དུ་གསོལ་ཞེས་ཞུས་པའོ། །ཞེས་བརྗོད་པས། དེ་བཞིན་གཤེགས་པ་ཐམས་ཅད་དང་ཆོས་ཐམས་ཅད་ཡེ་ནས་སངས་རྒྱས་པའི་ངོ་བོ་ཉིད་དུ་གཅིག་པའི་མཚན་ཉིད་ཡིན་པས་དབྱེར་མེད་ནའང་། ཞེས་བྱ་བ་ནི། འདི་ནས་མར་སྣང་བ་སྟོན་ཏེ། དེ་བཞིན་གཤེགས་པ་སྨོས་པའི་ཕྱིར་ཆོས་ནི་འབྲས་བུ་མ་གཏོགས་པ་སྟེ། རང་བཞིན་དང་། མཚན་ཉིད་དང་། འཁྲུལ་པ་དང་། ལམ་དང་། ཐ་སྙད་ཀྱིས་བསྡུས་པའོ། །དེ་དག་རིལ་སེམས་ཉིད་པས་མཐའ་དང་བྲལ་བའི་རིག་པ་བརྡལ་ཁྱབ་ཆེན་པོའི་ངོ་བོར་གཅིག་པ་སྟེ། ཡང་དག་པའི་ཆོས་ཀྱི་སྐུའི་མཚན་ཉིད་ཡིན་པས། རང་གི་ངོ་བོ་ཅིར་ཡང་མི་གཡོ་བའི་ཕྱིར་རོ། །འགྲོ་བའི་རྣམ་པར་རྟོག་པ་མ་རིག་པ་ལས། འགྲོ་བ་ལྔའི་རིས་བསམ་གྱིས་མི་ཁྱབ་པར་སྨིན་པ་ལ། ཞེས་བྱ་བ་ནི། འགྲོ་བ་ནི་ལྔ་སྟེ། དེའི་ཕྱིར་ལས་དང་ཉོན་མོངས་པ་ཡང་ལྔའོ། །དེ་དག་གི་རྩ་བ་ནི་མ་རིག་པ་གཉིས་ཁོ་ན་ལས་བྱུང་བས་དེ་ལ་དེ་སྐད་ཅེས་བྱའོ། །དེ་དག་ནང་རིས་ནི་མང་སྟེ། ཁམས་གསུམ་གྱི་ལྷ་ཡང་ཉི་ཤུ་རྩ་བདུན་ལ་སོགས་པའི་ཕྱིར་རོ། །ཐུགས་རྗེ་ཆེན་པོ་སངས་རྒྱས་ཀྱི་ཡེ་ཤེས་ཆེན་པོ་སྐྱེས་ནས། ཞེས་བྱ་བ་ནི། སྤྲོས་པ་དང་བྲལ་བའི་རིག་པ་ཐམས་ཅད་དུ་མཉམ་པར་ཁྱབ་པ་ནི་ཐུགས་རྗེ་ཆེན་པོའོ། །དེ་ཉིད་གང་དག་གསང་བ་བཞིས་ཆོད་དེ། ཉམ་ཐག་པ་དང་གཞན་དུ་ཚོལ་བ་དེ་དག་ལ་ཡང་སྣང་ངོ་། །ཐམས་ཅད་མཁྱེན་པའི་ཡེ་ཤེས་ནི་བྱང་ཆུབ་སེམས་དཔའ་ལས་ཁྱད་པར་དུ་གྱུར་པས་ཆེན་པའོ། །དེ་དག་སྐྱེས་པ་ནི་གདུལ་བྱའི་སྣང་བར་འདོད་དོ། །ཨེ་མ་ཧོ་བདེ་གཤེགས་སྙིང་པོ་ལས། །ཞེས་བྱ་བ་ནི། གཅིག་ལ་གཉིས་ལ་སོགས་པར་འཁྲུལ་པ་ནི་ངོ་མཚར་ཏེ། དེ་བཞིན་ཉིད་ལ་སྤྲོས་པའི་ཟུག་རྔུ་མེད་པས་བདེ་བ་སྟེ་བཤད་ཟིན་ཏོ། །སྙིང་པོ་ནི་གཉིས་ཏེ། ཀུན་གཞི་གཉིས་སོ། །དེ་ལ་སྦྱོར་བ་ནི་སྣང་བར་བྱེད་པའི་གོ་འབྱེད་པས་སོ། །གཞི་ནི་འབྲས་བུ་ཐམས་ཅད་ལྷུན་གྱིས་གྲུབ་པའི་ཕྱིར། དེ་བཞིན་གཤེགས་པའི་ཆོས་ཐམས་ཅད་ཀྱི་ངོ་བོ་ཉིད་ཀྱི་ཕྱིར་རོ། །དེ་དག་རང་གི་ངོ་བོ་མ་ཤེས་པ་ནི་ལྷན་ཅིག་སྐྱེས་པའི་མ་རིག་པ་སྟེ། དེ་གཞིར་གྱུར་པ་ལས་ཤེའོ། །རང་གི་རྣམ་རྟོག་ལས་ཀྱིས་སྤྲུལ། །ཞེས་བྱ་བ་ནི། རྒྱུ་དེས་སྦྱོར་བ་ལ་བདག་ཏུ་གཟུང་བས་ནི་རང་གི་རྣམ་པར་རྟོག་པ་སྟེ། དེ་ལ་ཀུན་ཏུ་བརྟགས་པའི་ཉོན་མོངས་པ་སྐྱེས་པས། དེ་ལ་ལས་སྣ་ཚོགས་སྤྱད་པས་གློ་བུར་དུ་སྣང་བའི་ཕྱིར་སྤྲུལ་པའོ། །དེ་ཉིད་ཇི་ལྟ་བུ་སྙམ་པ་ལ། སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །ཞེས་བྱ་བ་ནི་གོ་སླ་སྟེ། སྡུག་བསྔལ་ནི་ལས་དང་ཉོན་མོངས་པའོ། །བདག་དང་བདག་གིར་སོ་སོར་འཛིན། །ཞེས་བྱ་བ་ནི་བཤད་པ་ཉིད་ལ་སྟེ། དེས་ཡང་འཁོར་ཏེ། ཉམ་ཐག་གོ། །དེ་སུས་བྱས་སྙམ་པ་ལ། སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །ཞེས་བྱ་བ་ནི། བྱེད་པ་པོ་ལྟ་བུ་དང་ཞབས་པ་དང་དགྲ་བོ་ལྟ་བུ་གསུམ་ནི་ངང་གིས་མེད་དོ། །འོ་ན་གང་གིས་ཉེས་སྙམ་པ་ལ། རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །ཞེས་གསུངས་ཏེ། བཤད་པའི་རྒྱུ་རྐྱེན་གྱིས་དེ་དག་ཏུ་སྣང་བ་ནི། དཔེར་ན་ཐང་ཕྲོམ་གྱི་འབྲས་བུ་ཟོས་པའི་མིས། ནམ་མཁའ་ལ་གཟུགས་སྣ་ཚོགས་མཐོང་ནས་མདུད་པ་བྱས་པ་ལྟ་བུའི་ཕྱིར་རོ། །བཅིང་མེད་རྣམ་པར་གྲོལ་མེད་པའི། །ཞེས་བྱ་བ་ནི། ལུང་ལས། བཅིང་བྱ་འཆིང་བྱེད་བཅིངས་པ་པོ། །བདག་འཛིན་སེམས་ཅན་སྡུག་བསྔལ་དངོས། །ཐམས་ཅད་སེམས་ཀྱི་ངོ་བོའི་ཕྱིར། །བདག་འཛིན་ཞེས་བྱའི་མིང་ཡང་མེད། །དེས་ན་གཉིས་པོའང་མེད་པ་ལ། །གྲོལ་བ་པོ་ཡང་ཡོད་མ་ཡིན། །ཞེས་འབྱུང་སྟེ། དེ་ནི་གོ་སླའོ། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་བྱ་བ་ནི། ཐམས་ཅད་རང་རིག་པའི་ཡེ་ཤེས་སུ་བརྡལ་བ་ནི་བདག་ལ་སོགས་པ། རང་བཞིན་གྱིས་སྟོང་པ་ཉིད་སྐུ་དང་ཡེ་ཤེས་སུ་གསལ་བར་སངས་རྒྱས་ཀྱིས་ཆུད་པ་དང་། ངོ་བོ་ཉིད་ཀྱི་ཕྱིར་རོ། །དེ་ངེས་པར་མཚོན་པའི་གསང་བའི་སྙིང་པོ་འདི་ཉིད་བཤད་པར་དགྱེས་པའི་ཚུལ་དྲུག་མཛད་པ་དང་། འདིའི་ལམ་སྟེགས་ཀྱི་ཐེག་པ་གཞན་བསྟན་པའི་ཕྱིར་སྤྲུལ་པ་དྲུག་ལ་སོགས་སྤྲོས་པས། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་གསུངས་སོ། །དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་ཆེད་དུ་གླེང་ངོ་། །ཞེས་བྱ་བ་ནི། དབང་རྫོགས་པའི་རིལ་དྲུག་པ་ཉིད་དུ་གྱུར་པའི་ཕྱིར་རོ། །དོན་དམ་པ་དང་ཀུན་རྫོབ་ཀྱི་བྱང་ཆུབ་ཀྱི་སེམས་ཡེ་ཤེས་སུ་བསྐྱེད་པ་ཞེས་བྱ་བ་ནི། རང་གི་ངོ་བོས་ཐམས་ཅད་དུ་ཡང་མི་ཕྱེད་པ་ནི་དོན་དམ་པ་སྟེ། སྐབས་ཀྱི་རང་བཞིན་དང་། ཡེ་ཤེས་དང་། འབྲས་བུ་དོན་དམ་པའོ། །དེ་དག་གསལ་བས་ཐ་དད་ཀྱང་ངོ་བོ་གཅིག་གོ། །དེ་ཉིད་སེམས་ལྔའི་རིམ་པས་ཕྱིན་ཅི་མ་ལོག་པ་ལས་སྣང་ལ། གདུལ་བྱའི་དབང་གིས་ཐ་དད་དུ་སྣང་བ་ནི་ཀུན་རྫོབ་སྟེ། རྒྱུ་རྐྱེན་དང་ལྟོས་པ་ལས་སྣང་བ་སྟེ། ངོ་བོ་བཤད་ཟིན་ཏོ། །ལེའུ་གཉིས་པ་མདོར་བཀྲོལ་བའོ།། །།དེ་ནས་བསྟན་པ་སྤྱིའི་གླེང་གཞི་བསྟན་པའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ལས་ཞེས་བྱ་བ་ལ་སོགས་པ་གསུངས་ཏེ། རྒྱུད་དུམ་བུར་གྱུར་ཀྱང་རིམ་པ་མ་ནོར་བ་ཁོ་ནའི་ཕྱིར། དེ་ནས་ཞེས་བྱའོ། །དྲུག་པའི་སྟོན་པ་ནི་སངས་རྒྱས་ཀུན་གྱི་སྤྱི་གཟུགས་ཅན་གྱི་ཕྱིར་རིལ་དུ་ཡང་འགལ་བ་མེད་དོ། །ཐུགས་རྗེ་ཆེན་པོའི་བྱིན་གྱིས་བརླབས་ཞེས་བྱ་བ་ནི། སྤྲོས་པ་དང་བྲལ་བའི་རང་བྱུང་གི་ཡེ་ཤེས་ནི་དངོས་པོ་རིལ་ལ་ཁྱབ་པའི་ཕྱིར། ཐམས་ཅད་རང་བྱུང་གི་ཡེ་ཤེས་སུ་ལྷུན་གྱིས་གྲུབ་པ་ཉིད་གདུལ་བྱའི་སྣང་བ་ཅིར་ཡང་མི་འགག་པས། དེ་ལ་དེ་སྐད་ཅེས་བྱའོ། །རིག་པའི་སྐྱེ་བུ་ཐུབ་པ་དྲུག །ཅེས་བྱ་བ་ནི། གཞན་དག་ལས། རང་གི་ལུས་ངག་ཡིད་རྡོ་རྗེ། །མི་ཕྱེད་པ་ཡི་ངོ་བོ་སྟེ། །རིག་དང་བཅས་པར་ལྡན་པ་ནི། །རིག་པའི་སྐྱེས་བུ་ཞེས་སུ་བཤད། །ཅེས་པ་གོ་སློའོ། །དེ་དག་ཀྱང་སྐུ་སྟག་དང་སྤྲེའུ་ལ་སོགས་པ་ལྟར་མི་མཛད་པ་དང་། ཅ་ཅོ་སྤངས་པ་དང་། མཉམ་པར་མ་བཞག་པ་མི་མངའ་བའི་ཕྱིར་ཐུབ་པ་སྟེ། ལས་ཀྱང་མི་འདོད་པ་མ་ཡིན་ནོ། །གྲངས་ནི་གདུལ་བྱའི་ངོར་ངེས་པ་ཁོ་ནའོ་ཞེས་བྱའོ། །དེ་དག་གི་གཞི་གང་ལས་སྙམ་པ་ལ། །དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །ཞེས་བྱ་བ་ནི། སྔགས་ཀྱི་ལུགས་ཀྱི་ཐབས་དང་ཤེས་རབ་གཉིས་སུ་མེད་པའི་བྱང་ཆུབ་སེམས་ནི་ཡོངས་སུ་རྫོགས་པའི་རྒྱུར་གསུངས་སོ། །དེ་ཡང་མ་གཡོས་པར་བཀོད་པ་ནི་ཟླ་བ་དང་ཆུ་ཟླ་ལྟ་བུའི་ཕྱིར། འཐོན་ཅེས་ཐ་སྙད་དུ་འདོགས་སོ། །དེ་དག་གང་དུ་ཅི་མཛད་སྙམ་པ་ལ། འཐོན་ནས་ཀྱང་ལས་ཀྱི་དབང་གིས་སྣྲེལ་གཞི་དང་ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར་ཐུབ་པ་ཆེན་པོ་བཅོམ་ལྡན་འདས་རེ་རེས་ཞེས་བྱ་བ་ནི། ལས་མི་མཐུན་པས་སྣང་བའི་གནས་རིས་སོ་སོར་དྲུག་ཏུ་སྣང་བའི་ཕྱིར། འཇིག་རྟེན་དྲུག་ཁོ་ན་སྟེ། དེ་ཡང་དྲུག་པ་ནི་ལོངས་སྤྱོད་རྫོགས་པའི་ཕྱིར་ཞིང་ཁམས་མུ་མེད་ལ་སྤྲུལ་པའི་ཞིང་ངེས་པ་ནི་གདུལ་བྱའི་སྣང་བས་ཐུན་མོང་མཐུན་པར་བཀོད་དེ། རིལ་ཡང་བདག་ཉིད་ལས་རྒྱ་མ་ཆད་དོ། །ཞེས་བྱ་བ་ཁོ་ནའོ། །འདུལ་བ་རྣམ་པ་བཞིས་འགྲོ་བ་ལྔའི་དོན་མཛད་དེ། ཞེས་བྱ་བ་ནི། གྲངས་ནི་དཀྱུས་ལས་གསལ་ཏོ། །འགྲོ་བ་ལྔ་ནི་བསྡུས་པ་སྟེ་དྲུག་ཁོ་ནའོ། །དེ་ལ་སྐུས་འདུལ་བ་བསྟན་པའི་ཕྱིར། བལྟམས་པ་དང་། ཞེས་པ་ནས། ལ་སོགས་པར་མཐར་ཐུག་པ་ནི། དྲངས་པས་དགའ་ལྡན་ནས་བབས་པར་ཟེར་བ་ནི། བདེན་མོད་ཀྱི་བྱང་ཆུབ་སེམས་དཔའ་དབང་ཐོབ་པས་མཐར་ཕྱིན་པའི་ཕྱིར་འགལ་བ་མེད་དེ་ལེའུ་ཀླད་ནས་འབྱུང་ཁུངས་སྨོས་པའོ། །མཐུན་པར་བསྟན་པའི་ཕྱིར། ལྷུམས་སུ་ཞུགས་པ་དང་། བཤུང་བ་སྤང་བའི་ཕྱིར་མཆན་ཁུང་ནས་བལྟམས་པ་དང་། རོལ་རྩེད་མཛད་པ་དང་། ཁབ་བཞེས་པ་དང་། གཞན་ནི་གོ་སླའོ། །བསྡུ་བ་ནི་སྦྱངས་ཏེ་སྐུ་གདུང་ཆ་བརྒྱད་དུ་བགོས་པའོ། །ཐུགས་ཀྱིས་འདུལ་བ་གང་ཡིན་སྙམ་པ་ལ། དུས་བཞི་ཀུན་ཏུ་མཁྱེན་པ་དང་། ཞེས་པ་ལ་སོགས་པ་གསུངས་ཏེ། སྔོན་གྱི་གནས་ལ་སོགས་པ་མཁྱེན་པའོ། །ཐམས་ཅད་ཀྱི་སེམས་ཀྱི་རྒྱུད་ཀུན་ཏུ་མཁྱེན་པ་དང་། ཞེས་བྱ་བ་ནི། ཕ་རོལ་གྱི་སེམས་ཀྱི་ཉོན་མོངས་པ་དང་། རྟོག་པ་རིལ་བདག་ལས་མི་གཞན་པའི་ཕྱིར་མཁྱེན་པའོ། །རྫུ་འཕྲུལ་གྱི་སྤྱན་དང་སྙན་ཞེས་བྱ་བ་ནི། ལྷའི་མིག་དང་རྣ་བ་སྟེ་གོ་སླའོ། །རྫུ་འཕྲུལ་གྱི་ཆོ་ག་ནི། རྫུ་འཕྲུལ་གྱི་བྱ་བ་ཤེས་པ་སྟེ། མི་མཐུན་པ་བརྒྱད་ལ་སོགས་པར་སྟོན་པའོ། །ཟག་པ་མེད་པ་ཀུན་ཏུ་བཟང་པོའི་སྤྱོད་པ་རྫོགས་པ། ཞེས་བྱ་བ་ནི། དེ་དག་འཇིག་རྟེན་པ་ལ་ཡོད་པ་འཛིན་པའི་ཕྱིར་ཟག་པར་འགྱུར་ལ། འདིར་ཐམས་ཅད་ཀྱང་གསལ་ལ། བདག་ཉིད་ཀྱི་ཕྱིར་མི་འཛིན་པས་མ་སྤངས་ལ་བྲལ་བའི་ཕྱིར་རོ། །བསམ་གྱིས་མི་ཁྱབ་པས་འདུལ་བ་བསྟན་པའི་ཕྱིར། ཀུན་ཏུ་སྐུ་བསམ་གྱིས་མི་ཁྱབ་པ་དང་། ཀུན་ཏུ་ཐུགས་བསམ་གྱིས་མི་ཁྱབ་པ་དང་། ཀུན་ཏུ་ཞལ་བསམ་གྱིས་མི་ཁྱབ་པ་དང་། ཀུན་ཏུ་གསུང་བསམ་གྱིས་མི་ཁྱབ་པ་དང་ལྡན་པ། ཞེས་བྱ་བ་ནི། དུས་དང་གདུལ་བྱ་གང་ཡང་མ་བཀོལ་བར། དེ་དག་གི་ངོ་ལ་ཁྲོ་བོ་དང་ཕྲ་མེན་ལ་སོགས་པ་སྐུ་གསུང་ཐུགས་ཀྱི་དངོས་པོ་དང་མཛད་པ་གང་དུ་ཡང་མ་ངེས་ཏེ། ཐམས་ཅད་དུ་སྣང་བས། གཞན་དག་ལས། རེས་འགའ་ཞི་ལ་རེས་འགའ་དྲག །རེས་འགའ་གདོན་ཆེན་བགེགས་མཛད་དེ། །དེ་ལ་སོགས་ཏེ་མཐའ་ཡས་མཆོག །རི་དང་སྐྱེ་བོ་ཐམས་ཅད་དོ། །ཞེའོ། །གྲངས་མེད་པ་ཕྱོགས་བཅུར་སྣང་བར་གྱུར་ཏོ། །ཞེས་བྱ་བ་ནི། གདུལ་བྱའི་སྣང་བ་དང་ལྷུན་གྱིས་གྲུབ་པའི་རོལ་པ་མི་འགག་པ་ཁོ་ནའི་ཕྱིར། དེ་དག་ལ་ཡང་སྤྲུལ་ཟེར་བ་ནི་ཁ་བཀང་བའོ། །གསུང་གིས་འདུལ་བ་བསྟན་པའི་ཕྱིར། །ཐམས་ཅད་ཀྱང་འདི་ལྟ་སྟེ་འདུལ་བའི་དབང་གིས་ཞེས་བྱ་བ་ནས་མར་ནི་གོ་སླའོ། །དེ་དག་གི་དགོས་ཆེད་ནི་ཅི། སྤྲོས་ན་ནི་དུ་ཡོད་སྙམ་པ་ལ། མ་རིག་པའི་རྣམ་པར་རྟོག་པ་ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར་ཆོས་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། །གསུང་བར་འགྱུར་རོ། །ཞེས་གསུངས་ཏེ། རྩ་བ་མ་རིག་པ་གཉིས་ལས་གྱུར་པའི་ཉོན་མོངས་པ་དང་རྟོག་པ་དེ་དག་གི་རྩ་བ་ནི་དུག་གསུམ་དང་ངར་བཟུང་བ་ལས་གཞན་ལ་འདོགས་པའི་ཕྱིར་བསྡུ་བས་གཅིག་སྟེ། བཞི་ལ་ནང་རིས་སུ་གཅིག་ཀྱང་ཉི་ཁྲི་ཆིག་སྟོང་སྟེ། དེ་དག་གང་གིས་དག་པར་བྱེད་པ་ནི་གཉེན་པོ་སྟེ། དེ་ཡང་སྤོང་བ་དང་། སྦྱོང་བ་དང་། དབང་དུ་བྱེད་པའི་ཕྱིར་རོ། །དེ་བས་ན་ཆོས་ནི་ཕྲག་གསུམ་དུ་ཡང་སྣང་ངོ་། །དེ་ལྟར་དུས་གསུམ་གྱི་སངས་རྒྱས་ཀྱི་ས་མཐུན་པར་བསྟན་པ་ཁོ་ནའོ་ཞེས་བྱའོ། །གཉེན་པོ་ཇི་ལྟ་བུ་སྙམ་པ་ལ། དེ་དག་ཀྱང་གཟུང་བ་དང་འཛིན་པའི་ཕྱི་ནང་གི་རྟེན་ཅིང་འབྲེལ་བར་འབྱུང་བ་ཞེས་པ་དང་། ལས་དང་ལས་ཀྱི་འབྲས་བུ་ཆུད་མི་ཟ་བ་དང་། ཞེས་བྱ་བ་ནི། དགེ་བ་བཅུས་ལྷ་དང་མིར་ངེས་པར་འབྱུང་བས་མི་དགེ་བ་བཅུ་སྤོང་བ་དང་། རྡུལ་ལས་སྤྱོད་ཡུལ་ངེས་པར་ཡོད་པས་འཛིན་པ་འགོག་པས། གཉི་ག་ཡང་སྤོང་བའི་ཉན་ཐོས་དང་། ཕྱི་ནང་གི་རྟེན་འབྲེལ་ངེས་པར་ཡོད་པའི་ཕྱིར། ཉོན་མོངས་པ་འགོག་པས་སྤོང་བའི་རང་རྒྱལ་བ་དང་། དེ་དག་ནི་གཉེན་པོ་གཅིག་གོ། །འཛིན་པ་འཁྲུལ་པ་ལས་འདོགས་པ་དང་། ཞེས་བྱ་བ་ནི། སེམས་འཁྲུལ་པའི་རྟོག་པ་ལས་གུད་དུ་ཡུལ་མེད་པའི་ཕྱིར་ཕན་ཚུན་མ་སྐྱེས་པར་ཤེས་ན། ཉོན་མོངས་པ་ཆོས་ཉིད་དུ་རྒྱུད་སྦྱོང་བ་དང་། ལས་དང་ལས་ཀྱི་འབྲས་བུས་མི་གོས། ཞེས་བྱ་བ་ནི། ཉོན་མོངས་པ་རྣམས་སེམས་ཉིད་སྣང་བའི་ཕྱིར། སེམས་ལྷར་སྣང་བའི་དུས་ན་སྤང་བྱ་མེད་པ་དང་། ཞེན་པ་དགག་པའི་ཀྲི་ཡ་དང་ཡོ་ག་པ་ཁོ་ནའོ། །གོས་པར་མི་འགྱུར། གོས་སུ་མེད་པར་སྟོན་པའི་མཐར་ཐུག་གོ། །ཞེས་བྱ་བ་ནི། བདག་ཉིད་ཀྱི་ཕྱིར་ཉོན་མོངས་པ་ཉིད་ཡེ་ཤེས་སུ་ཤེས་པ་ནི་མཐུན་པ་དང་གཉེན་པོ་མེད་དེ། སྤྱད་པ་ཉིད་ཡོན་ཏན་དུ་སྣང་བའི་ཐབས་ཀྱི་ཐེག་པ་ནི་རྒྱུ་འབྲས་གཉིས་སུ་སྣང་བ་དང་བྲལ་བ་ཁོ་ནའོ་ཞེས་བྱའོ། །དེ་དག་འབྱུང་བ་ནི་གསང་བའི་སྙིང་པོའི་ལམ་ཡོངས་སུ་སྦྱངས་པའི་ཕྱིར་དང་། བྱིན་གྱིས་བརླབས་ཀྱི་ཕྱིར་བསྟན་ཏོ། །དེ་ཡན་ཆད་དུ་རྒྱུ་རྐྱེན་ཚང་ནས། གསུམ་པའི་དང་པོ་ལྟ་བ་བསྟན་པའི་ཕྱིར། དེ་ནས་དེ་བཞིན་གཤེགས་པ་ལ་སོགས་པ་གསུངས་ཏེ། གོ་སླའོ། །ཇི་སྙེད་འཇིག་རྟེན་འཁྲུལ་པའི་ཆོས། །ཞེས་བྱ་བ་ནི། འདི་ནས་མར་ལ་འཁྲུལ་བའི་སྣང་བའི་རྒྱུ་རྐྱེན་ངོ་བོ་གསུམ་སྟོན་ཏེ། སྣོད་བཅུད་མཐའ་ཡས་པའི་རིས་སུ་སྣང་བ་ནི་བློ་འཁྲུལ་པ་ཁོ་ནའི་ཕྱིར་རོ། །དེའི་རྒྱུ་ཅི་སྙམ་པ་ལ། མ་རིག་རྟོག་པའི་གཟུང་འཛིན་གྱིས། །ཞེས་གསུངས་ཏེ། སེམས་ཉིད་རང་བཞིན་གྱིས་འོད་གསལ་བ་ཡིན་ཡང་ངེས་པའི་ཤེས་པ་མ་སྐྱེས་པ་ནི། ལྷན་ཅིག་སྐྱེས་པའི་མ་རིག་པའོ། །དེས་ན་ང་རུ་བལྟ་བ་ལས་ཉོན་མོངས་པ་དང་ལས་དང་ཡུལ་སེམས་གཞན་དུ་སྣང་བ་ནི་རྐྱེན་ཁོ་ནའོ། །ཕྱི་ནང་རྟེན་འབྲེལ་གཉིས་སུ་འཁོར། །མི་མཐུན་བདེ་སྡུག་མྱོང་བར་འགྱུར། །ཞེས་བྱ་བ་ནི། དེས་ན་སྣོད་བཅུད་དངོས་སུ་སྣང་བས་འདིར་འབྱུང་ཞིང་སྣང་བ་ནི་འབྲས་བུ་ཁོ་ནའོ། །རང་བཞིན་ཉིད་ལས་ཉམས་པ་མེད། ཅེས་བྱ་བ་ནི། ཤེས་ན་སྤང་བྱ་མི་དམིགས་པ་ནི། རང་བཞིན་གྱི་སྣང་བ་སྟེ། ཆོས་དེ་དག་གི་རང་བཞིན་ནི། སེམས་ཉིད་ཀྱི་ཕྱིར་སྐུ་དང་ཡེ་ཤེས་ཁོ་ན་ལས་འགྱུར་བ་མེད་དོ། །ཞེས་བྱ་བ་ཁོ་ནའོ། །དེ་ངེས་པར་མཚོན་པར་བྱ་བའི་ཕྱིར། ཡང་དག་སྒྱུ་མའི་ཚུལ་གཉིས་སུ། །ཞེས་པ་ལ་སོགས་པ་གསུངས་ཏེ། ཡང་དག་སྒྱུ་མ་ནི་ངེས་པ་བདེན་པ་གཉིས་སོ། །ཚུལ་ནི་རྗེས་སུ་འཇུག་པ་ཏེ། མདོ་སྡེ་པ་ལྟར་གཉིས་སུ་ཕྱེ་ན་ཞེས་བྱའོ། །བདག་དང་བདག་གི་གཞན་མེད་དེ། །ཞེས་བྱ་བ་ནི། མ་རིག་པའི་ང་དང་མྱོང་བའི་ཕུང་པོ་དང་ཡུལ་སྣ་ཚོགས་སུ་སྣང་བ་དག་མ་གྲུབ་སྟེ། ཇི་ལྟར་ཞེ་ན། སེམས་ཉིད་ཆོས་གསུམ་དུ་སྣང་བས་གཞན་དུ་མ་གྲུབ་པ་ནི་དོན་དམ་པའི་ཚུལ་ལོ། །དེ་དག་སེམས་ཉིད་ཀྱི་ཕྱིར་ཡེ་ཤེས་རང་སྣང་བས་མ་འགག་པ་ནི་ཀུན་རྫོབ་ཀྱི་ཚུལ་ལོ། །དེ་གཉིས་ལ་དེ་དག་མ་གྲུབ་པ་ཁོ་ནའོ། །དེ་ནི་ལྷག་པའི་མཉམ་པ་གཉིས་སོ། །རྣམ་དག་དབྱིངས་ཉིད་ཚུལ་གཅིག་གོ། །ཞེས་བྱ་བ་ནི། དབྱེར་མེད་པར་མཉམ་པ་སྟེ། བཤད་པ་ལྟར་ཤེས་ནས་དེ་ལའང་མི་གནས་པ་ནི། མཐའ་གཉིས་དག་པས་དབྱིངས་གཉིས་ལས་མཉམ་པ་ཉིད་ཀྱི་དབྱིངས་ཞེས་བྱ་སྟེ། སྣང་སྟོང་གཉིས་སུ་མེད་པའི་བདེན་པ་གཉིས་ཚུལ་གཅིག་པ་ཁོ་ནའོ། །ཞེས་བྱའོ། །འོ་ན་འཁྲུལ་པའི་སྣང་བར་ཡང་མེད་དོ་སྙམ་པ་ལ། བདག་དང་བདག་གི་གཞན་རྣམས་ནི། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པའང་ཡོད་མ་ཡིན། །ཞེས་གསུངས་ཏེ། ཆོས་གསུམ་པོ་སེམས་ཉིད་ལས་མི་གཞན་བཞིན་དུ། རང་རྒྱུད་ཀྱི་རིས་སུ་སྣང་བ་ནི་འཁྲུལ་པའི་སྣང་བའོ། །དེ་ཙམ་ནི་མི་འགལ་ལ་དེ་ལས་གཞན་པའི་རྫས་རྡུལ་ཙམ་དང་། རང་རྒྱུད་ཀྱི་སྐད་ཅིག་མ་གཟུགས་མེད་པ་ནི་ངང་གིས་མེད་པ་ཁོ་ནའོ། །ལོག་རྟོག་ཉིད་ལ་ཉིད་སྤྱོད་དེ། །གཞན་དུ་གཡོ་བ་ཅི་ཡང་མེད། །ཅེས་བྱ་བ་ནི། སྣང་སྤྱོད་འདི་ནི་རྟོག་པ་བརྟས་པ་སྔ་མ་ལ་ཕྱི་མས་རྒྱུད་མཐུན་པར་སྤྱོད་ཀྱི། སེམས་ཉིད་ཆོས་གསུམ་གྱི་རིས་སུ་གྱུར་པ་མེད་དོ། །ཞེས་གསུངས་སོ། །དེ་བས་ན་ལོག་རྟོག་ཙམ་ནི་ངེས་པར་ཡོད་དེ་སྙམ་པ་ལ། ལོག་རྟོག་རྒྱུ་འབྲས་རྒྱུན་ཉིད་ཀྱང་། །གཞི་རྩ་མེད་དབྱིངས་སྐད་ཅིག་མ། །ཞེས་བྱ་བ་ནི། རྒྱུ་གཅིག་པར་རྟོགས་པ་སྟེ། མ་རིག་པའི་བདག་དང་། ཞེས་པ་སྣང་བ་ཆོས་སྣ་ཚོགས་ཀྱང་། སྐད་ཅིག་མའི་ཕྱིར་བཤད་པ་གསུམ་གྱི་རྗེས་སུ་མཐུན་ཏེ། ཇི་ལྟར་ཞེ་ན། ཕྱི་མོ་ནས་རང་གི་ངོ་བོ་མ་གྲུབ་སྟེ། སེམས་ཉིད་ཁོ་ནའི་ཕྱིར་སྣང་སྟོང་མི་ཕྱེད་པ་ནི་བཤད་པའི་དབྱིངས་སོ། །དེ་ལ་ལོག་རྟོག་སྐད་ཅིག་གི་རྒྱུན་མ་གྲུབ་པར་རིལ་སེམས་སུ་གཅིག་པ་ཁོ་ནའོ། །རྣམ་པར་དག་པའི་དབྱིངས་ཉིད་ཚུལ། །ཉིད་ལ་དབང་སྒྱུར་ཉིད་སྤྱོད་ཕྱིར། །ཞེས་བྱ་བ་ནི། འདི་ནས་མར་ཡིག་འབྲུའི་ཚུལ་དང་དག་པ་གསུམ་སྟོན་ཏེ། བཤད་པ་ལྟར་ལོག་རྟོག་གི་རྒྱུན་དག་སྟེ། རང་གི་ངོ་བོས་སེམས་སུ་འོད་གསལ་བས་མ་སྐྱེས་པའི་ཕྱིར། ཨ་ལྟ་བུའོ། །རྒྱུན་མེད་པར་རང་རིག་པ་ཉིད་ཅིར་ཡང་སྣང་བ་ནི་མ་བཅོས་པའི་སྐད་ཅིག་མ་སྟེ། ཡེ་ཤེས་ཁོ་ནའི་ཕྱིར་སྣང་ཞིང་སྤྱོད་ཀྱང་གཉིས་སུ་བྱ་བ་མེད་པ་ནི། ཐེག་པ་ཆེན་པོའི་གཏན་ཚིགས་སོ། །མ་སྐྱེས་པ་ཉིད་ཡེ་ཤེས་སུ་གསལ་བས་རྒྱན་ལྟ་བུའོ། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །ཅེས་བྱ་བ་ནི། བཤད་པའི་བྱིན་གྱིས་བརླབས་ཀྱིས་ཕུང་པོ་དང་འབྱུང་བ་དང་བསླད་པའི་རྣམ་པར་ཤེས་པ་གསུམ་སོ་སོ་བ་ངང་གིས་དག་སྟེ། གཉིས་སུ་མེད་པར་གསལ་བ་ནི། རིགས་ལྔ་ཡབ་ཡུམ་དང་། ཡེ་ཤེས་ལྔར་གདོད་ནས་ལྷུན་གྱིས་གྲུབ་པས་རྡོ་རྗེ་ཐེག་པ་ཞེས་བྱ་བ་ཁོ་ནའོ། །དེ་ནི་ཡི་གེ་རྫོགས་པ་ལྟ་བུ་སྟེ། དག་པ་གསུམ་དུ་ཡང་འདོགས་སོ། །ཐེག་པ་བཞིའི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་བྱ་བ་ནི། བཤད་པ་གཞན་ནི་གཞུང་མ་ནོར་ན་ངན་སོང་དང་འཁོར་བ་དང་མཐའ་གཉིས་ལས་ངེས་པར་འབྱུང་ལ། འདས་མ་ཐག་པར་སྟོན་པ་ནི། དོན་མཐར་ཐུག་པའི་ཕྱིར་འབྲས་བུ་ཁོ་ནའོ། །ཡང་དག་རྟོགས་པས་རབ་བརྟགས་ན། །རང་བཞིན་མེད་ལས་ཅིར་ཡང་འགྲུབ། །ཅེས་བྱ་བ་ནི། དོན་དམ་པ་གསུམ་མངོན་དུ་བྱས་པའི་བློ་ཅན་ལ་སྤྱོད་ཡུལ་དང་བྲལ་བར་མི་སྣང་བ་ཅི་ཡང་མེད་པའི་ཕྱིར། མཐོང་བ་མེད་པའི་ཚུལ་གྱིས་མཐོང་བ་ཞེས་པ་དང་། རྣམ་རྟོག་མི་མངའ་ཅིར་ཡང་ས་ལེར་མཁྱེན། །ཞེས་པ་ཁོ་ནའོ། །སངས་རྒྱས་མྱ་ངན་ཡོངས་མི་འདའ། །ཞེས་པའི་ཚིགས་བཅད་གཅིག་གི་དོན་ནི་བཤད་པ་ལྟར་ལྷུན་གྱིས་གྲུབ་པ་ལ། སྟོན་པ་འབྱུང་འཇིག་དང་། བསྟན་པ་དར་ནུབ་མེད་དེ་ངོ་བོ་ཉིད་ཀྱིས་རྟག་པ་ཁོ་ནའོ། །མཚན་མ་བཞིར་སྣང་བ་ནི། དམན་པ་རྣམས་ཀྱི་ཕྱིར་ཏེ། གདུལ་བྱའི་སྣང་བ་ཁོ་ནའོ། །སྣང་བ་དེའི་ངོ་བོ་དང་། གཞི་བསྟན་པའི་ཕྱིར། འདུལ་བ་མདོ་སྡེ་ཆོས་མངོན་དང་། །ཞེས་པ་ལ་སོགས་པ་ནི་གོ་སླ་སྟེ། རྒྱུད་འདིའི་རྒྱུ་རྐྱེན་ཚང་བའི་བྱིན་གྱིས་བརླབས་ལས། སྡེ་སྣོད་གསུམ་དང་། སྔགས་ཕྱི་པ་གསུམ་དང་། སྐུ་གསུང་ཐུགས་ཀྱི་རྒྱུད་རྣམས་ཀྱི་སྟོན་པ་དྲུག་དང་། བསམ་གྱིས་མི་ཁྱབ་པས་འདུལ་བའི་སྟོན་པ་རྣམས་འཐོན་ནས། དུས་མཉམ་དུ་གསུངས་ཤིང་གཏན་ལ་ཕབ་པའི་ཕྱིར་རོ། །དེ་ལྟར་ན་དེ་དག་སོ་སོར་ངེས་སོ་སྙམ་པ་ལ། ཆོས་རྣམས་མིང་ཏུ་བཏགས་པ་ཙམ། །སྟོན་པ་དོན་དམ་མཐུན་ཕྱོགས་སུ། །མིང་དང་ཚིག་ཏུ་བཏགས་ནས་བསྟན། །སྟོན་མིང་ཚིག་ལ་དངོས་པོ་མེད། །ཅེས་གསུངས་སོ། །ཆོས་ཐམས་ཅད་རང་བཞིན་གྱི་ངོ་བོས་སྟོན་པའི་ཕྱིར། སྣང་བ་གཉིས་ཁོ་ནའི་ངོ་བོར་བརྟགས་པ་ཙམ་མོ། །དེ་ལྟར་མ་གྲུབ་པའི་རྗེས་སུ་ཐེག་པ་སོ་སོའི་ལྟ་སྤྱོད་བསྒྲུབ་པ་ལ་སོགས་པ་རིལ་ཡང་གདུལ་བྱའི་ངོ་བོ་ཙམ་སྟེ། རང་གི་ངོ་བོ་ཉིད་དང་། གྲངས་ནི་གྲུབ་པ་དང་ངེས་པ་མེད་དོ། །ཞེས་བྱ་བ་ཁོ་ནའོ། །དེ་དག་ཀྱང་གདུལ་བྱའི་སྣང་བས་གཉིས་སུ་འགྱུར་ཏེ། ཐལ་བའི་རྒྱུད་ལས། ཐིག་ལེ་ཟུང་འཇུག་བདེ་བ་ནི། སེམས་མཐའ་ལྡོག་པས་གོ་ཕྱེ་ནས། །དཀྱིལ་འཁོར་དྲུག་གི་ཡུལ་རྣམས་སུ། །སྤྲུལ་པའི་ཐིག་ལེ་རང་ཤར་བའི། །སྣང་བའི་མཛད་པ་བསམ་མི་ཁྱབ། །ཆགས་སོགས་ཉོན་མོངས་ལས་རྟོག་རིལ། །གདུལ་ཕྱིར་སྤྲུལ་པ་ཞེས་སུ་བཤད། །སྒྲ་དབྱངས་གསུང་གི་བསྟན་པ་རྣམས། །ངེས་པར་གྲགས་པ་ཁོ་ན་ཉིད། །ཕུང་སོགས་རྟོག་པའི་འཇིག་རྟེན་ཀུན། །ལོག་རྟོག་སྒྱུ་མ་སྣང་ཙམ་ལས། །ཉི་ཟླ་བདེན་གཉིས་ལས་གཉིས་ཀྱིས། །མ་སྐྱེས་མཉམ་ལ་གནས་འགྱུར་ཞིང་། །ཕུང་སོགས་ལྷ་ཡི་དཀྱིལ་འཁོར་དུ། །རང་སྣང་རང་རིག་མངོན་སུམ་གསལ། །དུས་གསུམ་དུ་ཡང་མི་འགྱུར་ཕྱིར། །ཐེག་འདི་ཐབས་དང་རྡོ་རྗེར་བཤད། །ཅེས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཅེས་པ་ལ་སོགས་པ་ནི་རྗེས་སུ་མཐུན་ནོ། །ཨ་ཧོ་ཞེས་བྱ་བ་ནི། བཤད་པའི་དངོས་པོ་གཉིས་གཏན་ཚིགས་གསུམ་གྱིས་ངོ་བོར་གཅིག་པར་གྲུབ་པས་མཉེས་པའི་ཕྱིར་རོ། །སྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། །རྒྱུད་དྲུག་སྐྱེ་འགག་ལུས་དང་ལོངས་སྤྱོད་དང་། །གནས་དང་སྡུག་བསྔལ་འཁྲུལ་འཁོར་ལ་སོགས་པ། །ལོག་རྟོག་ཉིད་ལས་གཞན་དུ་ཅི་ཡང་མེད། །ཅེས་བྱ་བ་ནི། བཤད་པའི་མ་རིག་པའི་བདག་དང་། ཉོན་མོངས་པ་ལ་སོགས་རང་སྣང་བའི་འགྲོ་བ་དྲུག་གི་སྤྱོད་ཡུལ་རིལ་རང་རྒྱུད་དུ་ལྟ་བའི་ལོག་རྟོག་གི་རྒྱུན་ཁོ་ནའི་ཕྱིར་འཁྲུལ་པའི་སྣང་བ་ཞེས་བྱ་བ་ཁོ་ནའོ། །སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་སྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་བྱ་བ་ནི། འདས་མ་ཐག་པ་ཉིད་གསང་སྔགས་ཀྱི་གཏན་ཚིགས་གསུམ་པོས་གཞལ་བའི་དུས་ན། ལོག་རྟོག་གི་རྒྱུན་ལས་འདས་ཏེ་མཉམ་པའི་དབྱིངས་ཉིད་ཡེ་ཤེས་སུ་གསལ་བ་ནི། ཡེ་ཤེས་ཉིད་ལ་ཉིད་སྤྱོད་པས་ཤེས་བྱ་དང་ཤེས་བྱེད་ངང་གིས་མེད་ལ། རང་སྣང་གི་ཡེ་ཤེས་ནི་ཡོན་ཏན་ཐམས་ཅད་ལྷུན་གྱིས་གྲུབ་པ་ལས་འདུལ་བ་བཞིའི་དེ་བཞིན་གཤེགས་པ་རིལ་ཞིང་ཁམས་དང་མཛད་སྤྱོད་དུ་བཅས་པར། རང་སྣང་བ་ནི་སྐབས་ཀྱི་སྣང་བ་གཉིས་ཁོ་ནའོ་ཞེས་གསུངས་སོ། །ཐུབ་པ་དྲུག་གི་སྤྲུལ་པ་གྲངས་མེད་པ་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པ་ཡང་དེ་དག་ཏུ་འདུས་པར་དེ་བཞིན་གཤེགས་པ་ཉིད་ཀྱི་མཁྱེན་ཏོ། །ཞེས་བྱ་བ་ནི། འདས་མ་ཐག་པ་ཉིད་གོ་སླ་སྟེ། དེ་དག་ཏུ་ལེའུ་རིལ་འདུས་པ་གོ་སླའོ། །ཆོས་ཐམས་ཅད་གཏན་ལ་ཕབ་པ་ཞེས་བྱ་བ་ནི། ཐེག་པ་དགུའི་ཆོས་རིལ་གསང་བའི་སྙིང་པོའི་བྱིན་བརླབས་ཀྱིས་གཏན་ལ་ཕབ་ལ། དངོས་པོ་གཉིས་ཀྱིས་བསྡུས་པ་རིལ་སྣང་བ་གཉིས་ལས་ཀྱང་འདས་ཏེ། གཅིག་ཁོ་ནར་གཏན་ཚིགས་གསུམ་གྱིས་ཕབ་བོ་ཞེས་བྱ་ཁོ་ནའོ། །ཞེས་བྱ་བའོ། །ལེའུ་གསུམ་པ་མདོར་བཤད་པའོ།། །།དེ་ནས་དེ་བཞིན་གཤེགས་པ་ཐམས་ཅད་དགོངས་པ་གཅིག་ཏུ་གྱུར་ནས། ཞེས་བྱ་བ་ནི། དྲུག་པའི་དེ་བཞིན་གཤེགས་པ་ནི། གཅིག་དང་དུ་མར་བྲལ་བའི་ཕྱིར། །ཐམས་ཅད་དུའང་འགལ་བ་མེད་དེ། །དེ་ཉིད་གསུང་ལྔ་ལྷུན་གྱིས་གྲུབ་པར་རང་སྣང་བ་ལས་མི་གཡོ་བ་ནི་དགོངས་པ་སྟེ། གྱུར་པ་ནི་གདུལ་བྱའི་སྣང་བའོ། །དེ་ཉིད་བསྟན་པའི་ཕྱིར། མཉམ་པ་ཆེན་པོའི་ཚུལ་རྡོ་རྗེའི་དབྱིངས་སུ་ཆོས་ཐམས་ཅད་ཡེ་ནས་སངས་རྒྱས་པའི་ཏིང་ངེ་འཛིན་ལས་མི་གཡོ་བར། ཞེས་བྱ་བ་ནི། སྣང་སྟོང་གཉིས་སུ་མེད་པ་ནི། བདེན་པ་གཉིས་ཀྱི་མཉམ་པ་ལ་ལྟོས་པས་ཆེན་པོ་སྟེ། དེའི་ངོ་བོ་ནི། དངོས་པོ་གཉིས་ཀྱིས་བསྡུས་པ་རིལ་སེམས་ཉིད་དུ་མ་སྐྱེས་པ་སྟེ་སྐུ་དང་ཡེ་ཤེས་སུ་གསལ་བར་རང་སྣང་བ་ཉིད་དྲུག་པའི་ངོ་བོ་སྟེ། བསྒོམ་བྱ་སྒོམ་བྱེད་གཉིས་ལས་འདས་པས་ཏིང་ངེ་འཛིན་ཞེས་བ་ཁོ་ནའོ། །ཆོས་ཐམས་ཅད་མིང་ཙམ་དུ་གནས་པའི་ཡི་གེ་ཕྲེང་བའི་འཁོར་ལོ་ཞེས་བྱ་བ་ནི། དངོས་པོ་རྣམས་ནི་ངོ་བོ་ཉིད་མེད་པ་ཁོ་ནའི་ཕྱིར། མིང་ཙམ་ལ་དེ་ནི་ཡི་གེ་ཁོ་ནའོ། །ཡི་གེའི་རྒྱུན་ཉིད་གསུང་གི་འཁོར་ལོ་སྟེ། སྐུ་ལ་སོགས་པ་བཞི་ཡང་ལྷུན་གྱིས་གྲུབ་པ་ལས་རང་སྣང་བའོ། །དེ་དག་ནི་འདི་ལྟ་སྟེ། ཨ། ཀ་ཁ་ག་གྷ་ང་ཞེས་པ་ནས། ཕྱུང་བས། ཞེས་པའི་བར་ནི། དེ་དག་རང་སྣང་བ་སྟེ། གནས་དང་རྐྱེན་ནི་མགུར་དང་། ལྗགས་ཀྱི་དཀྱིལ་དང་རྩེ་མོ་དང་། ཞལ་གྱི་སྒྲོས་དང་། སྟ་ཟུར་ལ་སོགས་པའོ། །དེ་དག་ཀྱང་དག་གདུལ་བྱའི་སྣང་བས་གཉིས་སུ་འགྱུར་ཏེ། ཐལ་བའི་རྒྱུད་ལས། རང་སྣང་སྐུ་ཡི་འཁོར་ལོ་ལ། །རང་བཞིན་གསུང་གི་དཀྱིལ་འཁོར་ཉིད། །གཡས་དང་གཡོན་གྱི་དབྱེ་བ་ཡིས། །སྡེ་ཚན་བརྒྱད་དང་བྱེད་པ་དང་། །ཁྱབ་འཇུག་གསུམ་ཡང་དེ་བཞིན་ཏེ། །རིམ་པར་བཀོད་པ་རང་སྣང་བས། །འཇིག་རྟེན་འདས་དང་མ་འདས་པའི། །ཇི་སྙེད་བསྒྱུར་བའི་སྒྲ་རྣམས་འབྱུང་། །རྒྱལ་བ་བཞི་བཅུ་རྩ་ལྔ་ཡི། །ངོ་བོ་ཉིད་དུའང་ངེས་པས་ན། །ཁུ་བ་རྩ་ཡི་གཟུགས་དག་གིས། །སྐུ་གསུང་ཐུགས་དང་ཡེ་ཤེས་ལྔར། །མ་བརྩལ་ལྷུན་གྱིས་གྲུབ་པའོ། །ཞེས་གསུངས་སོ། །འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་གཡོས་ནས། ཆོས་ཐམས་ཅད་མིང་གི་མཚན་ཉིད་ཙམ་དུ་གྱུར་ཏོ། །ཞེས་བྱ་བ་ནི། ཡི་གེའི་མཐུས་ཆོ་འཕྲུལ་རྣམ་པ་དྲུག་ཏུ་སྣང་ལ། བཤད་པ་བཞིན་དངོས་པོ་རིལ་མིང་དང་ཡི་གེ་ཁོ་ནའི་ཕྱིར། ངོ་བོ་ཉིད་བསྟན་དུ་མེད་པར་སྣང་ངོ་། །གཞན་ཡང་འཆད་པ་བཞིན་འཁོར་ལོར་གསལ་བར་གྱུར་པའི་དུས་སུ་ལུས་ཀྱི་དངོས་པོ་རིལ་གཡོ་ཞིང་དེས་མཚོན་པ་ཐམས་ཅད་ཀྱང་མིང་གིས་བསྡུས་པ་ཙམ་སྟེ། སྒྱུ་མར་མངོན་དུ་གྱུར་པ་ཁོ་ནའོ། །ཞེས་བྱ་བ་ཁོ་ནའོ། །ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །ཅེས་བྱ་བ་ནི། ལམ་གྱི་དབང་དུ་གསུངས་ཏེ། ཨ་ནི་ཨའོ། །དཀར་བ་ནི་བྱང་ཆུབ་སེམས་ཀྱི་ཕྱིར་རོ། །གནས་ནི་བསྐྱེད་རིམ་ལ་ངེས་པར་སྙིང་གར་ཏེ། ཏིང་ངེ་འཛིན་བརྟན་ནས་སྤྲོས་ལ་དེས་ཁམས་གསུམ་རིམ་ཡང་སེམས་ཀྱི་ངོ་བོ་ཉིད་དུ་བརླབ་པར་སྣང་བའོ། །རྫོགས་པའི་རིམ་པ་ལ་ནི་ལྟེ་བ་ཉིད་དུ་སྟེ། ཏིང་ངེ་འཛིན་རྗེས་སུ་མཐུན་པས་ལུས་ཀྱི་རྩ་མ་ལུས་པའི་བདེ་བ་ཆེན་པོ་བསྐྱེད་དེ་བསྡུ་བ་ལས་འདས་པ་ནི། ཡེ་ཤེས་རྡོ་རྗེའི་ངོ་བོ་ཉིད་དང་། ཉེ་བར་ལེན་པའི་ཡང་རྒྱུའོ། །དེ་བཞིན་དུ་ཀ་ལ་སོགས་པ་ཀུན་ལ་ཡང་འཇུག་པ་ནི་ཡོངས་སུ་རྫོགས་པའི་རྒྱུའི་ཕྱིར། དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །ཞེས་གསུངས་སོ། །ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེ་ཕྲེང་བ་ཉིད་ལ་གནས། །ཞེས་བྱ་བ་ལ་སོགས་པ་ནི་རང་བཞིན་གནས་པའི་ཕྱིར་དབྱིབས་དང་ཁ་དོག་ཉིད་བདེ་བ་ཆེན་པོའི་ཡེ་ཤེས་སུ་གསལ་བས་བརྗོད་དུ་མེད་པའི་ཕྱིར་མཐའ་གསུམ་ལས་འདས་པས་ཆོས་ཀྱི་སྐུ་ཁོ་ནའོ། །དེས་ན་དེ་ཉིད་རང་སྣང་བའི་ཡི་གེ་ཀུན་དང་། དེས་མཚོན་པའི་དངོས་པོར་རིལ་ཡང་རྗེས་སུ་མཐུན་པར་ཤེས་ན། སངས་རྒྱས་ཀྱི་ཆོས་སྐུ་གཞན་ན་མེད་པའོ་ཞེས་བྱའོ། །ལོངས་སྤྱོད་ཀྱི་སྐུ་བསྟན་པའི་ཕྱིར། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཞེས་གསུངས་ཏེ། ཨའི་བདེ་བ་མ་འགགས་པ་ཡི་གེ་བཞི་བཅུ་ཞེ་གཉིས་སུ་རང་སྣང་བའི་ཕྱིར་རྟ་རྔ་བརྒྱ་ཤས་ཀྱི་སྒྲའི་ཡེ་ཤེས་སྐད་ཅིག་མའི་བདེ་བ་ཇི་ལྟ་བར་ཕུང་པོ་ལ་སོགས་པ་རིལ་དེ་ལྟར་མངའ་མཛད་པས་ལོངས་སྤྱོད་རྫོགས་པའི་སྐུ་ཁོ་ནའོ། །ཨེ་མའོ་ངོ་མཚར་ཡ་མཚན་གྱི། །འཕྲུལ་ཆེན་བཞི་བཅུ་རྩ་ལྔའི་མིང་། །ཚིག་རྣམས་ལ་ལུས་འཛིན་པའི་གནས། །སྣ་ཚོགས་དོན་ཆེན་སྨྲ་ཞིང་སྟོན། །ཞེས་བྱ་བ་ནི། སྤྲུལ་པའི་སྐུར་སྟོན་ཏེ། མིང་དང་ལས་དང་རང་བཞིན་ལ་ངམ་པ་གསུམ་མོ། །ཡི་གེའི་མིང་རྣམས་ཀྱིས། ཚིག་ཐམས་ཅད་སྡུད་ལ། ཚིག་གིས་ཐ་སྙད་མ་ལུས་པ་བརྡའ་སྤྲོས་པས། མིང་གི་ལས་ཡིན་ཏེ། གསུང་ཁོ་ནའོ། །དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །ཞེས་བྱ་བ་ནི། སེམས་ཉིད་ཡི་གེ་རང་སྣང་བའི་ཕྱིར་བདེ་བ་ཆེན་པོའི་རིག་པ་ལས་གཞན་མེད་པས་མཐའ་གསུམ་ལས་འདས་པའི་ཕྱིར། ཡུལ་དང་བྲལ་བས་ཐུགས་ཁོ་ནའོ། །དབྱིབས་དང་ཁ་དོག་མིང་ཚོགས་ཀྱི། །རོལ་པ་ཅིར་ཡང་སྤྲུལ་ཅིང་སྟོན། །ཞེས་བྱ་བ་ནི། རང་བཞིན་དེ་ལྟ་བུའི་ཕྱིར། ཡི་གེ་དེ་ལས་ཕུང་པོ་དང་རིགས་ལ་སོགས་པ་ཐམས་ཅད་དུ་སྣང་ཞིང་ཀུན་ཏུ་གྱུར་པས་ན་སྐུའི་ལས་ཁོ་ནའོ། །བཤད་པ་དེ་དག་ཡོངས་སུ་རྫོགས་པའི་ཕྱིར། །ཕྱོགས་བཅུ་དུས་བཞིར་གཤེགས་པ་ཡི། །ཡེ་ཤེས་སེམས་དཔའི་སྐུ་གསུང་ཐུགས། །དཀྱིལ་འཁོར་བཞི་བཅུ་རྩ་ལྔ་ཉིད། །ཡི་གེ་མགོ་ནས་ཀྵ་ལ་རྫོགས། །ཞེས་གསུངས་སོ། །སེམས་ཀྱི་རང་བཞིན་ཡི་གེ་སྟེ། །ཡི་གེ་དངོས་པོ་ཡོད་མ་ཡིན། །ཞེས་བྱ་བ་ནི། སེམས་དང་ཡིད་དང་རྣམ་པར་ཤེས་པ་དང་། འཇུག་པའི་རྣམ་པར་ཤེས་པ་བཞི་ནི་ཨ་ལ་སོགས་པ་བཞིར་ངེས་པར་གནས་ལ། དེ་དག་རེ་རེའི་རྩལ་ཡང་ཡི་གེ་དུ་མར་རང་སྣང་བས་ཡི་གེའི་ངོ་བོ་ཉིད་མེད་པ་ཁོ་ནའོ། །དེ་ལྟ་བས་ན་སེམས་ཀྱི་ངོ་བོ་ཡི་གེ་རྣམས་ནི་སྣང་སྟོང་གཉིས་སུ་མེད་པའི་ཕྱིར། དམིགས་པ་དང་བྲལ་བས་རང་རིག་པ་ཁོ་ན་སྟེ། དཀྱིལ་འཁོར་ལ་སོགས་པ་གང་དུ་ཡང་མི་འགག་པར་སྣང་བའི་ཕྱིར། དམིགས་མེད་དེ་ཉིད་སྣ་ཚོགས་པའི། །སྐུ་གསུང་ཐུགས་ཀྱི་འཁོར་ལོ་ཆེ། །ཞེས་གསུངས་སོ། །སྐུ་གསུང་ཐུགས་ནི་ངོ་མཚར་གྱི། །ཡ་མཚན་འཕྲུལ་ཆེན་རབ་འགུགས་པའོ། །དབྱིངས་ལ་དབྱིངས་ཀྱིས་བྲིས་པ་སྟེ། །ཡི་གེ་ཞེས་ནི་དེ་ཕྱིར་བརྗོད། །ཅེས་བྱ་བ་ནི་ལས་དང་རྒྱུ་ཡིས་མིང་དོན་ལས་བཏགས་པ་སྟེ། བཤད་པའི་ཡོན་ཏན་རིལ་རང་རིག་པའི་མངོན་སུམ་དུ་སྟོན་པའི་ཡི་གེ་ཉིད། ཚུལ་ཇི་ལྟར་སྣང་ཞེ་ན། གང་ཕུང་པོ་ལ་སོགས་པ་སེམས་ཉིད་ཀྱི་ངོ་བོ་ཉིད་ལས་མི་གཞན་པ་ནི་གསུམ་པ་ཁོ་ནར་འགྱུར་ལ། དེ་དག་ཉིད་རང་སྣང་བའི་བདེ་བ་ཆེན་པོ་ནི། བཤད་པ་བཞིན་དུ་སྣ་ཚོགས་སུ་ཡང་གསལ་བའི་ཕྱིར་གཉིས་པ་སྟེ། དེ་ཡང་རང་སྣང་བའི་ཕྱིར་གཞན་གྱིས་བྱས་པར་ཐལ་བ་མེད་དོ། །མགོ་ནི་མ་ནོར་ལམ་ཡིན་ཏེ། །ཏིག་ནི་ཤེས་རབ་མིང་དུ་སྨྲ། །ཤད་ནི་ཐབས་ཆེན་ཚིགས་སུ་གཅོད། །ཅེས་བྱ་བ་ནི་རིམ་པ་བཟློག་སྟེ་ལུས་ཀར་དག་པ་ཐབས་ཀྱི་ངོ་བོ་སྐུ་སྟེ། དེ་ཉིད་ཡི་གེ་རྣམས་ཚིགས་སུ་གཅོད་པའི་ཤད་དུ་སྣང་ངོ་། །ཏིག་གིས་བྱེ་བྲག་ཕྱེ་ནས་མིང་སྟོན་པས་ངག་ཀར་དག་པ་གསུང་སྟེ། ཤེས་རབ་བོ། །ཡི་གེ་སྦྲུལ་ལྟ་བུས་ཐམས་ཅད་ཀྱི་མགོ་འདྲེན་པ་ཉིད་པས་ཐབས་དང་ཤེས་རབ་གཉིས་སུ་མེད་པ་སྟེ། ཡང་དག་པའི་ལམ་མོ་ཞེས་བྱའོ། །ཨ་ནི་སྐྱེ་མེད་དེ་བཞིན་ཉིད། །ཅེས་བྱ་བ་ནི། ཆོས་ཀྱི་ཁམས་རིལ་སེམས་ཉིད་པས་སོ་སོར་མ་སྐྱེས་པ་ནི་བླ་དྭགས་སུ་དེ་བཞིན་ཉིད་ཅེས་བྱ་སྟེ། དེ་ཉིད་ངེས་པར་ཨར་སྣང་སྟེ། དེའི་ཕྱིར་ཐམས་ཅད་ཀྱང་ལྷུན་གྱིས་གྲུབ་པས་ཀུན་ཏུ་བཟང་མོ་ཞེས་བྱ་སྟེ། གང་དུ་ཡང་མ་ངེས་པར་ཐམས་ཅད་སྣང་བ་ཁོ་ནའོ། །ཋ་ནི་སྒྱུ་འཕྲུལ་རྡོ་རྗེ་ཉིད། །ཅེས་བྱ་བ་ལ་སོགས་པ་ནི་ལྔ་ཕུང་སྒྱུ་མ་ལྟ་བུ་སེམས་ཉིད་ཡིན་པས་ཡེ་ཤེས་སུ་རང་སྣང་བ་ནི་དམིགས་པ་མེད་པར་སྣ་ཚོགས་སུ་སྣང་བའི་ཕྱིར། སྐབས་ཀྱི་ཡི་གེ་ལྔ་སྟེ། དེ་དག་ལ་རྡོ་རྗེ་སེམས་དཔའ་ལ་སོགས་པར་ཐ་སྙད་དུ་འདོགས་སོ། །ཐ་ནི་དྲྭ་བས་མངོན་རྫོགས་ཉིད། །ཅེས་བྱ་བ་ལ་སོགས་པ་ནི། དྭངས་མ་ཡེ་ཤེས་ཀྱི་འབྱུང་བ་ལྔ་ནི་ནམ་མཁའ་ལ་སོགས་པ་ཀུན་ཏུ་སྣང་ཞིང་རིལ་ཡང་ཐ་མི་དད་པར་སྡུད་པས་ཐམས་ཅད་སེམས་ཉིད་དུ་རང་སྣང་བ་ནི་ཡི་གེ་ལྔ་སྟེ། ཀུན་ཏུ་བཟང་མོ་ལ་སོགས་པ་ཁོ་ནའོ། །ཞེས་བྱའོ། །ཀ་ནི་སྤྱན་གྱི་ཐུགས་ཀྱི་མཆོག །ཅེས་བྱ་བ་ལ་སོགས་པ་ནི། རྣམ་ཤེས་བཞི་པོ་ཉིད་རིག་པ་ཁོ་ནའི་ཕྱིར་ཐུགས་ཏེ། དེའི་ཕྱིར་ཡི་གེ་བཞི་པོ་ཉིད་སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། སྤྱན་རས་གཟིགས་དང་བཞིའོ་ཞེའོ། །ང་ནི་ཐུགས་ཀྱང་འཇིག་བྱེད་པའོ། །ཞེས་བྱ་བ་ནི། ལུས་ཀྱི་འབྲས་བུ་ཤེས་པའི་ངོ་བོ་གསང་བའི་རྣམ་པར་ཤེས་པའི་ལས་ཀྱིས་དེ་དག་ལ་ཡང་མི་གནས་པར་བྱེད་པའི་ཕྱིར་ཁྲོ་བོ་སྟེ། གཤིན་རྗེ་གཤེད་པོ་ཞེས་བྱའོ། །ཙ་ནི་སྤྱན་གྱི་སྐུ་ཡི་མཆོག །ཅེས་བྱ་བ་ལ་སོགས་པ་ནི་ཡུལ་བཞི་ལ་རྣམ་ཤེས་བརྟེན་པའི་ཕྱིར་སྐུར་འགལ་བ་མེད་དེ། བཤད་པ་བཞིན་སེམ་མ་ལཱ་སྱ་ལ་སོགས་པ་བཞིའོ་ཞེའོ། །ཉ་ནི་སྐུ་ཡང་འཇིག་བྱེད་པའོ། །ཞེས་བྱ་བ་ནི། ལུས་ཀྱི་ཡུལ་གསང་བའི་པདྨའི་ལས་རྗེས་སུ་མཐུན་ཏེ་རང་བཞིན་བཤད་པ་བཞིན་པས། ཉ་ནི་སྟོབས་པོ་ཆེའོ། །པ་ནི་སྤྱན་གྱི་གསུང་གི་མཆོག །ཅེས་བྱ་བ་ལ་སོགས་པ་ནི། དབང་པོ་རྣམས་ནི་ཡུལ་དང་ཤེས་པ་རྣམས་ཕྱི་ནང་གི་ཚུལ་གྱིས་བརྡའ་སྤྲོད་པར་བྱེད་པས་གསུང་སྟེ། བཤད་པ་བཞིན་པས། བྱམས་པ་ལ་སོགས་པ་ཁོ་ནའོ། །མ་ནི་གསུང་ཡང་འཇིག་བྱེད་པའོ། །ཞེས་བྱ་བ་ནི། གསང་བའི་དབང་པོ་སྟེ། རྗེས་སུ་མཐུན་པའི་ཕྱིར་རོ། །ཡ་ནི་སྐྱེ་བ་རྣམ་པར་དག །ཅེས་བྱ་བ་ལ་སོགས་པ་ནི། དུས་བཞི་ཁོ་ན་སྟེ། འདས་པ་གོ་འབྱེད་པ་དང་། ད་ལྟར་གནས་པ་དང་། རྒྱུ་རྐྱེན་འདུ་དགོས་པའི་ཕྱིར་མི་རྟག་པ་ཉིད་དང་། ངོ་བོ་ཉིད་འདི་འ དྲར་བསྟན་དུ་མེད་པ་རྣམས་ནི་མ་ནིང་གི་ཡི་གེ་བཞིར་སྣང་སྟེ་དྷཱུ་པེ་ལ་སོགས་པའོ། །ཤ་ནི་རྟག་པ་དག་པ་སྟེ། །ཞེས་བྱ་བ་ལ་སོགས་པ་ནི། གསང་བའི་ཁམས་གསུམ་འདུས་ནས། ཨོ་ལྟར་སྣང་བའི་དུས་ན་རྟག་ཆད་བདག་མཚན་ངང་གི་སྟོང་པ་ཉིད་དེ། དེ་ཡང་ངོ་བོར་ཉིད་ཀྱིས་མ་གྲུབ་པ་ཉིད་ཡི་གེ་བཞི་སྟེ། སྒོ་མ་བཞིའོ། །ཀྵ་ནི་ཡེ་ཤེས་ཐུགས་ཀྱི་ཐུགས། །ཞེས་བྱ་བ་ནི། རྣམ་ཤེས་ལྔའི་ཡུལ་རིལ་ཀྱང་ཡིད་ཁོ་ནས་གཅོད་པའི་ཕྱིར་བརྩེགས་པ་སྟེ། ཡིད་རང་བྱུང་གི་ཡེ་ཤེས་རྒྱུ་རྐྱེན་ལ་སོགས་པའི་ཆ་ཤས་རིལ་ཟད་པས། ཀྵ་ཡ་ཞེས་བྱ་བ་སྟེ། ཐམས་ཅད་ཀྱང་དེ་བཞིན་པར་བྱེད་པས་ཀུན་ཏུ་བཟང་པོའོ། །ཨི་ནི་རྡུལ་སྙེད་ལྷ་རྣམས་སུ། །ཞེས་བྱ་བ་ལ་སོགས་པ་ནི། ཐོག་མ་མེད་པ་ཅན་གྱི་གཉིས་ཀྱི་བག་ཆགས་དྲུག་པོ་ནང་རིས་སུ་གྲངས་ལས་འདས་པ་རིལ་ཡང་སེམས་ཉིད་ཁོ་ན་བས་ཡེ་ཤེས་དྲུག་གི་ངོ་བོ་ཉིད་དུ་གསལ་བ་ནི་ཡི་གེ་དྲུག་ཁོ་ན་སྟེ། ཐུབ་པ་དྲུག་གོ། །ཨོ་ནི་ཐམས་ཅད་འཇིག་པར་བྱེད། །ཨ་ནི་ཐམས་ཅད་ཞིག་པ་ཡིན། །ཞེས་བྱ་བ་ནི། གསང་བའི་ཁམས་གསུམ་འདུས་པ་ཉིད་དུ་བདེ་བ་སྐྱེས་པའི་དུས་ན། ཁམས་བཅོ་བརྒྱད་དང་། ཕྱིན་ཅི་ལོག་བཞི་ལ་སོགས་པ་རིལ་མཐུ་ཉམས་པར་འགྱུར་ལ། ངེས་པར་གཅད་པའི་དུས་ན་བདེ་བ་ཉིད་ལས་ཀྱང་འདས་ཏེ། བརྗོད་པ་དང་བྲལ་བ་ཉིད་ཡེ་ཤེས་ལྔ་སྟེ། བདུད་རྩི་འཁྱིལ་བའོ་ཞེས་བྱའོ། །དེ་དག་ཉིད་ཀྱི་ཕྱིར། ཡི་གེ་འཁོར་ལོ་ཚོགས་ཆེན་འདིས། །སྐུ་གསུང་ཐུགས་ཀྱི་ཕྲེང་བ་བསྡུས། །ཞེས་གསུངས་སོ། །དེ་ནས་ཞེས་པ་ལ་སོགས་པ་ནི་གོ་སླའོ། །ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །ཞེས་བྱ་བ་ནི། ཉི་ཟླ་འབྱོར་པ་ནི་གཉིས་སུ་མེད་པའི་བྱང་ཆུབ་སེམས་ཞེས་བྱའོ། །དེ་ཉིད་སྤྲིན་ལྟ་བུར་འཁོར་ལོ་བཞི་ལ་སོགས་པ་ཀུན་ཏུ་ཁྱབ་པ་ཉིད་ཡི་གེའི་ཚོགས་སུ་རང་སྣང་བས། འདུས་མ་བྱས་པ་ནི་ཡོངས་སུ་རྫོགས་པའི་རྒྱུ་ཁོ་ན་སྟེ། རང་བཞིན་གྱིས་གནས་པའི་ཕྱིར་རང་བཞིན་གསུང་གི་དཀྱིལ་འཁོར་ཉིད་དོ། །སྒྲུབ་པ་པོས་ཀྱང་རྗེས་སུ་མཐུན་པར་རྒྱུ་མ་ནོར་བ་རྩ་བའི་སྔགས་ལས། ཏིང་ངེ་འཛིན་ནམ་ཐབས་ཀྱིས་བཀོད་པ་ནི་རྐྱེན་ཁོ་ནའོ། །དེས་ཅི་ཞིག་འོང་སྙམ་པ་ལ། འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །ཞེས་བྱ་བ་ནི། སྐུ་གསུང་ཐུགས་ཀྱི་ཕྱག་རྒྱ་རྨད་དུ་བྱུང་བ་རང་རིག་པའི་མངོན་སུམ་པ་ནི། སངས་རྒྱས་བཞི་བཅུ་གཉིས་སོ། །དེ་དག་བསྒྲུབ་པའི་དབང་དུ་འདུས་བྱས་ཉིད་དུ་བརྗོད་ཀྱང་། ངོ་བོ་ཉིད་ནི་དུས་གསུམ་དུ་མི་ཕྱེད་པས་རྡོ་རྗེའི་དཀྱིལ་འཁོར་ཉིད་དོ། །འདའ་བར་མི་མཛད་དབང་མེད་རྒྱུ་རྐྱེན་ཚོགས་པའི་མཐུ་ཆེན་ཡིན། །ཞེས་བྱ་བ་ནི་མི་འདའ་བའི་ཕྱིར་དམ་ཚིག་སྟེ། ཡོངས་སུ་རྫོགས་པའི་རྒྱུ་ལ། ལས་སམ་ཏིང་ངེ་འཛིན་གྱིས་ལྷན་ཅིག་བྱས་པས་སྨིན་པར་སྣང་བ་ནི། གདུལ་བྱའི་སྣང་བ་སྟེ། རང་སྣང་བ་ཉིད་མཐུ་ཆེན་པོའོ། །དེ་བཞིན་གཤེགས་པ་ཐམས་ཅད་ཡི་གེའི་འཁོར་ལོར་གྱུར་ཏོ། །ཞེས་བྱ་བ་ནི། རང་བཞིན་གྱི་དཀྱིལ་འཁོར་གཉིས་ཀྱིས་བསྡུས་པ་རིལ། ཡི་གེ་བཞི་བཅུ་རྩ་ལྔར་འདུས་ཤིང་། དེ་དག་ཉིད་དེའི་ངོ་བོ་བས་དེ་ལ་དེ་སྐད་ཅེས་བྱའོ། །ཡི་གེ་ཕྲེང་བའི་འཁོར་ལོ་བཀོད་པ་ཞེས་བྱ་བ་ནི། གསུང་གི་དཀྱིལ་འཁོར་གྱི་རིམ་པ་དང་། ལས་དང་། ཡོན་ཏན་དང་། མཚན་ཉིད་དང་། ངོ་བོ་ཐ་དད་པར་སྣང་བའི་ཕྱི་རོ། །ལེའུ་བཞི་པ་མདོར་བཤད་པའོ།། །།དེ་ནས་ཡི་གེ་འཁོར་ལོ་སྤྲིན་བཀོད་པ་ལས་སྒྱུ་འཕྲུལ་རྣམ་པར་འཕྲོ་བ་ཞེས་བྱ་བ་ནི། ཏིང་ངེ་འཛིན་གྱིས་ཡི་གེ་བཀོད་པའི་མཐུ་ལས་ལྷའི་དཀྱིལ་འཁོར་དང་། ལས་དང་དངོས་གྲུབ་གསུམ་ལ་སོགས་པར་སྣང་བ་རྣམས་ནི་འཕྲོ་བ་ཞེས་བྱ་བ་སྟེ། གདུལ་བྱའི་སྣང་བ་ཁོ་ནར་སྟོན་ཏེ་ཞེས་བྱའོ། །དེ་ཉིད་ཀྱི་ཕྱིར་བསྐྱེད་པའི་རིམ་པའི་དབང་དུ་རྒྱུད་ཀྱི་རིམ་པ་སྤངས་ཏེ། མན་ངག་གི་རིམ་པ་ལ་འཇུག་པར་བྱའོ། །དེ་ལ་འགྲུབ་པའི་རྒྱུ་བསྟན་པའི་ཕྱིར། སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འགྲུབ་འགྱུར་མི་ལྡན་དོན་མེད་བརླག །ཅེས་གསུངས་ཏེ། སྟོན་པའི་རང་བཞིན་ཅན་གྱི་བླ་མ་ཡང་དག་པ། སྒོ་གསུམ་ནས་མཉེས་པར་བྱས་ནས། དབང་རིམ་པར་ཐོབ་པར་བྱ་བ་དང་། བརྩོན་འགྲུས་ཀྱིས་མངོན་དུ་བྱ་བའི་སྒོ་གསུམ་གྱི་སྤྱོད་ལམ་ཡོངས་སུ་སྦྱངས་པ་དང་། འཆད་པ་བཞིན་ལྟ་བ་ཡོངས་སུ་དག་པར་བྱ་བ་དང་། བཅོ་ལྔ་པོ་ལ་སོགས་པའི་དམ་ཚིག་ཡོངས་སུ་དག་པར་བྱ་བ་དང་། ཕྱག་རྒྱ་ཆེན་པོ་དང་སྔགས་ཀྱི་ཡན་ལག་རྣམས་མ་ཉམས་པར་ལྡན་པ་དང་། གནས་ཁང་དང་ལོངས་སྤྱོད་བཞི་པོ་དག་ཚང་བར་མི་ལྡན་པར་བསྒྲུབས་ཀྱང་ཆད་པའི་གནས་སུ་འགྱུར་བའི་ཕྱིར་དེ་དག་ངེས་པར་རྫོགས་པར་བྱའོ་ཞེས་གསུངས་སོ། །གཉིས་པ་ལྟ་བ་བསྟན་པའི་ཕྱིར། གང་གིས་དམིགས་མེད་མི་ཤེས་པ། །དེ་ཡིས་ཆོས་ཀྱི་དབྱིངས་མི་ཤེས། །ཞེས་གསུངས་ཏེ། གང་ནི་སྐལ་བ་དམན་ཞིང་བླ་མའི་མན་ངག་གིས་མ་ཟིན་པ་དག་གོ། །སེམས་ཉིད་ནི་ཅི་ཡང་མ་ཡིན་པའི་ཕྱིར། མིང་གི་མཚོན་པ་ཞིག་ཡིད་ལ་བྱེད་པ་རྣམས་ནི་དམིགས་པ་ཅན་ཞེས་བྱའོ། །དེ་དག་ནི་འོ་མ་འདོད་པ་རྭ་ལ་འཇོ་བ་ལྟ་བུའོ། །དེ་ཕྱིར་དངོས་དང་དངོས་མེད་པ། །འཇིག་པས་དམིགས་མེད་ཤེས་པར་གྱིས། །ཞེས་བྱ་བ་ནི། གཏན་ཚིགས་སྔར་ཐལ་ཏེ། ཡེ་ཤེས་ནི་རྒྱུ་རྐྱེན་ལས་འདས་པ་ཁོ་ནའི་ཕྱིར། འཇིག་པ་ལ་མི་ལྟོས་ཏེ། དངོས་པོ་རིལ་སེམས་ཉིད་དུ་འཇིག་ལ། དེ་ཉིད་ཡེ་ཤེས་སུ་གསལ་བས་སྟོང་པ་ཉིད་ཀྱང་འཇིག་སྟེ། སེམས་ཀྱི་ཡེ་ཤེས་ནི་འཆད་པ་བཞིན་པས་ངང་གིས་དམིས་སུ་མེད་པའོ་ཞེས་བྱའོ། །དེ་ཉིད་ཅིའི་ཕྱིར་སྙམ་པ་ལ། གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིག་རྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཞེས་བྱ་བ་ནི། སེམས་ཉིད་ཕྱི་མོའི་རྒྱུ་རྐྱེན་དང་བྲལ་བའི་ཕྱིར། རང་བྱུང་གི་ཡེ་ཤེས་ཏེ། དེ་ནི་ངོ་བོ་ཉིད་མ་གྲུབ་པས་སེམས་ཅན་གྱི་མཚན་མ་གསུམ་དང་། སྒོ་ང་ལྟ་བུ་དང་། འགྲོ་བ་དྲུག་དང་། གཟུགས་ཀྱི་མཚན་མ་གཉིས་དང་རྟེན་པར་བྱ་བ་དང་། བྱེད་པའི་གནས་ལ་སོགས་པ་གང་གི་ངོ་བོ་ཉིད་དུ་ཡང་གདོད་ནས་མ་གྲུབ་པས་དེ་བཞིན་ཉིད་ཅེས་བྱའོ། །དེ་ཉིད་མུ་མཐའ་བྲལ་ཞིང་ཐམས་ཅད་ཀྱི་འབྱུང་གནས་པས་མཉམ་པའི་དབྱིངས་ཏེ། དེ་ཉིད་རང་རིག་པ་ཁོ་ནར་གསལ་བས་མིང་ཡེ་ཤེས་གཉིས་སུ་ཡང་འདོགས་སོ། །དེའི་ཕྱིར་དེ་ཉིད་རང་བཞིན་དང་། ཏིང་ངེ་འཛིན་དང་། ལྷག་པའི་ཕྱག་རྒྱ་གསུམ་དང་ཡང་མི་འགགས་པར་སྣང་བའི་ཕྱིར། ཐབས་ཀྱི་ཕྱག་རྒྱ་ཀུན་གྱི་རྒྱུ། །ཞེས་གསུངས་སོ། །གསུམ་པ་དེ་ལ་བསྒོམ་དགོས་པར་བསྟན་པའི་ཕྱིར། དངོས་རྣམས་ཉིད་ནི་དངོས་མེད་པར། །རྟོགས་པའི་དབང་སྒྱུར་ཏིང་འཛིན་ཡིན། །ཞེས་གསུངས་ཏེ། བཤད་པ་ལྟར་དངོས་པོ་རིལ་སེམས་ཉིད་ཁོ་ནར་གསལ་ལ། སེམས་ཉིད་བཤད་པ་ལྟར་མ་གྲུབ་བཞིན་པས། དངོས་པོ་རྣམས་གང་དུ་ཡང་གྲུབ་མ་མྱོང་བར་ཤེས་ནས། དེ་ཉིད་ལས་མ་ཡེངས་པའི་བཏང་སྙོམས་ནི་ཤིན་ཏུ་གཅེས་པར་གསུངས་སོ། །བཞི་པ་བསྒོམ་པའི་ཐབས་བསྟན་པའི་ཕྱིར། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །ཞེས་གསུངས་ཏེ། གང་བཤད་པ་ལྟར་ཤེས་པ་དེས་ཤེའོ། །འཁྲུལ་པའི་ཡུལ་སྣ་ཚོགས་ཀྱིས་གཡེངས་པའི་སེམས་ནི། དཔེར་ན་གླང་པོ་ཆེ་རྒུན་ཆང་གིས་མྱོས་པ་ལྟ་བུ་སྟེ། དེ་དག་འདུལ་བ་ནི་ཞི་གནས་ལྟ་བུ་མ་ཡིན་ཏེ། ལྟ་བའི་རྗེས་སུ་ཅིར་ཡང་མི་དམིགས་པ་ནི་མཉམ་པར་བཞག་པ་ཞེས་བྱ་སྟེ། དབུས་ལས་ཀྱང་འདས་པའི་ཕྱིར་རོ། །གཞི་ཇི་བཞིན་པར་མིང་གཉིས་སུ་ཕེབས་པ་ནི་ཐུལ་བ་སྟེ། དེ་བཞིན་ཉིད་ཀྱི་ཏིང་ངེ་འཛིན་ཞེས་ཐ་སྙད་དུ་འདོགས་སོ། །ཞེས་བྱའོ། །ལྔ་པ་དེ་ཉིད་ཐམས་ཅད་དུ་སྣང་བར་བསྟན་པའི་ཕྱིར། རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཞེས་གསུངས་ཏེ། གཅིག་ནི་བཤད་ཟིན་ཏོ། །དེ་ལྟ་བུ་ལས་ཕྱག་རྒྱ་གསུམ་པོ་དང་འཁྲུལ་པའི་ཆོས་རིལ་ཡང་སྣང་བས་ཐམས་ཅད་ཀྱི་རྩ་བ་སྟེ། དེ་དག་དེ་ཉིད་དུ་གཉིས་མེད་པར་ཤེས་པ་ནི། གཉིས་སུ་མེད་པའི་སྙིང་རྗེའོ། །ཐམས་ཅད་ལས་འདིར་སྐབས་ཀྱི་ཡི་གེ་ཨ་རུ་སྣང་བ་ལས། རིན་པོ་ཆེ་ལྟར་དྲན་པ་ཙམ་གྱིས་ཡི་གེ་ཕྲེང་བ་ཡང་འབྱུང་ལ། དེ་དག་ནམ་མཁའ་ཁྱབ་པར་སྤྲོ་བ་དང་བསྡུ་བའང་བྱའོ། །ཞེས་བྱའོ། །དྲུག་པ་དེ་ལས་དཀྱིལ་འཁོར་བསྐྱེད་པ་བསྟན་པའི་ཕྱིར། ཐབས་ལས་ཐབས་བྱུང་ཐབས་བསམ་ཡས། །ཐ་དད་མིན་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱའི་མཆོག །ཅེས་གསུངས་ཏེ། རང་རིག་པ་ཉིད་ཡི་གེ་ཨར་སྣང་བ་ནི་རྩ་བའི་ཐབས་ཞེས་བྱའོ། །དེ་ལས་གཞལ་ཡས་ཁང་གདན་དང་བཅས་པར་སྣང་བ་ནི་གཞིའི་ཐབས་སོ། །དེ་དག་ཏུ་ལྷའི་དཀྱིལ་འཁོར་བཀོད་པ་ནི་བསམ་གྱིས་མི་ཁྱབ་པའི་ཐབས་ཞེས་བྱའོ། །དེ་དག་ཀྱང་རང་རིག་པ་ཁོ་ན་ཡིན་པ་ལས། དམན་པའི་བློ་ལ་ཐ་དད་དུ་སྣང་བའི་ལྷ་རྣམས་དང་གནས་དེ་དག་འདུས་མ་བྱས་ཏེ། བསམ་གྱིས་མི་ཁྱབ་པའི་ཡེ་ཤེས་སུ་རང་སྣང་བས། ཡེ་ཤེས་ལ་ཡེ་ཤེས་རོལ་པ་སྟེ་བརྟགས་པ་དང་རྒྱུ་རྐྱེན་གཞན་གྱི་དབང་ལས་འདས་པ་ཁོ་ནའོ། །དེ་ནི་སྤྱོད་ཡུལ་ཡོངས་སུ་དག་པས། འཁོར་བ་དང་ལམ་གྱི་གཡང་ས་གཉིས་དང་བྲལ་བས་ཅི་བདེར་མནོས་ཤིང་ཅེས་བྱའོ། །བདུན་པ་དེ་ཉིད་ཀར་དག་པས་བླང་དོར་བྲལ་བར་བསྟན་པའི་ཕྱིར། དེ་ཉིད་ཡེ་ཤེས་རང་སྣང་བའི། །མིང་ཚིག་གཟུགས་སོགས་ཡིད་བཞིན་གྱིས། །མུན་ལ་སྣང་འབྱུང་ཇི་བཞིན་དུ། །འགྱུར་བ་གསེར་འགྱུར་སྨན་གྱི་ཚུལ། །ཞེས་གསུངས་ཏེ། ཐབས་གསུམ་པོ་ཉིད་ཅི་ཞིག་ལས་སྣང་ཞེ་ན། གདོད་མ་ནས་སེམས་ཀྱི་ཡེ་ཤེས་རང་སྣང་བའི་འཁོར་ལོའི་ཡི་གེ་དང་། ཕུང་པོ་ལ་སོགས་པ་ཁམས་གསུམ་རིལ་སེམས་ཉིད་ཀྱི་ཕྱིར་ཅིར་ཡང་སྣང་བས། དེ་དག་ཐབས་གསུམ་དུ་ཏིང་ངེ་འཛིན་གྱིས་དབང་སྒྱུར་ཡང་བླང་བ་དང་དོར་བ་མེད་པ་ནི་ངེས་པར་དཔེ་གསུམ་གྱིས་མཚོན་ཏེ་གོ་སླ་བས་མ་བཤད་དོ། །བརྒྱད་པ་དེ་དག་ལ་འདྲིས་པར་བསྒོམ་པའི་ཕྱིར། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་གསུངས་ཏེ། དེ་དག་ལས་ཕྲ་མོ་དང་སྣང་བ་རྣམ་པར་འབྱེད་པའི་ཏིང་ངེ་འཛིན་གྱིས་ཕྱག་རྒྱ་ཆེན་པོར་སྔགས་ཀྱི་ཡན་ལག་ལྔ་དང་ལྡན་པར་གསལ་བ་ལ་ཡུལ་གྱིས་མི་འཕྲོགས་པ་ལས་དངོས་གྲུབ་རྣམ་གཉིས་ངེས་པར་འབྱུང་བས། བརྟན་པ་གནས་པ་ཁོ་ནར་བྱའོ་ཞེའོ། །དགུ་པ་དེའི་ཐུན་མོང་གི་དངོས་གྲུབ་བསྟན་པའི་ཕྱིར། བདུད་རྩིར་འགྱུར་ཞིང་འབྱུང་བ་དང་། །ཞེས་བྱ་བ་ནས། ཏིང་འཛིན་འདི་ཡིས་བྱེད་པར་འགྱུར། །ཞེས་པའི་བར་དུ་གསུངས་ཏེ། དུག་ལས་བདུད་རྩིར་བསྒྱུར་བ་ལ་སོགས་པ་དངོས་པོ་ཐམས་ཅད་ཕན་ཚུན་མི་མཐུན་པར་བསྒྱུར་བ་དང་། དངོས་པོ་ཁྱད་པར་དུ་གྱུར་བར་བྱས་པ་ལ་སོགས་པས་སེམས་ཅན་གྱི་བསམ་པ་ཡོངས་སུ་སྐོང་བ་སྟེ། ཐམས་ཅད་ཀྱང་བདག་ལས་མི་གཞན་པར་ཤེས་ནས་སྟོབས་སུ་གྱུར་པའི་ཕྱིར་རོ། །དེ་དག་ཏིང་ངེ་འཛིན་གཉིས་ཀྱི་སྐབས་སུ་ཤས་ཀྱིས་ནུས་སོ་ཞེས་བྱའོ། །བཅུ་པ་མཆོག་གི་དངོས་གྲུབ་བསྟན་པའི་ཕྱིར། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་གསུངས་ཏེ། གང་ཕུང་པོ་ལ་སོགས་པ་ལྷའི་དཀྱིལ་འཁོར་བཞི་བཅུ་གཉིས་སུ་རང་རིག་པ་མངོན་སུམ་དུ་གསལ་བས་ཁམས་གསུམ་རིལ་ལྷའི་ཚོགས་སུ་གསལ་ཡང་། སྤྱོད་ཡུལ་དང་བྲལ་བས་ཡི་གེ་འཁོར་ལོ་ཚོགས་ཆེན་གྱི་ས་སྟེ། འབྲས་བུ་ལུས་པ་མེད་པ་ཁོ་ནའོ་ཞེས་བྱའོ། །བཅུ་གཅིག་པ་དེ་ཉིད་རྒྱས་པར་བསྟན་པའི་ཕྱིར། དུས་གསུམ་རྒྱལ་བས་ཐུགས་ཆུད་པའི། །དངོས་གྲུབ་མཆོག་གི་སྙིང་པོ་ནི། །ཟད་པའི་དུས་མེད་ཡིད་བཞིན་མཛོད། །འཕེལ་འགྲིབ་མེད་པར་འབྱུང་བ་སྟེ། །དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །ཞེས་གསུངས་ཏེ། བཤད་པ་བཞིན་དུ་དངོས་པོ་ཐམས་ཅད་སྐུ་དང་ཡེ་ཤེས་སུ་གསལ་བ་ནི། རྒྱལ་བ་མ་ལུས་པའི་ངོ་བོ་ཉིད་དང་། ལྟ་བ་དང་། དངོས་གྲུབ་གསུམ་ག་ཡིན་པའི་ཕྱིར། གཞན་དག་ལས། བྱང་ཆུབ་སེམས་ཀྱི་དོན་རྟོགས་པས། །སངས་རྒྱས་ཀུན་གྱི་ཉིང་ཤ་ཅན། །ང་ནི་སངས་རྒྱས་ཀུན་གྱི་དུར། །དུར་ཁྲོད་ཆེན་པོ་ང་ཉིད་ཡིན། །ཞེས་འབྱུང་ངོ་། །དེ་ཉིད་ངོ་བོ་གཅིག་ཏུ་མ་གྲུབ་པར་གདུལ་བྱ་ལ་སྣ་ཚོགས་སུ་སྣང་ཞིང་འགྱུར་ཡང་འཕེལ་བ་དང་འགྲིབ་པ་མེད་དེ། ངོ་བོ་ཉིད་ཀྱིས་རྟག་པ་ཞེས་བྱའོ། །དེ་ནས་དེ་བཞིན་གཤེགས་པ ཐམས་ཅད་གཟིགས་མོས་མཉེས་པར་གྱུར་ཏོ། །ཞེས་བྱ་བ་ནི། ཏིང་ངེ་འཛིན་གྱི་མཐུ་ལས་སྣ་ཚོགས་སུ་སྣང་བ་རིལ་བདག་ཉིད་ཀྱི་ཕྱིར་མ་བལྟས་པར་གསལ་བ་ནི་གཟིགས་མོ་སྟེ། མི་ཕྱེད་པ་ནི་གཉིས་སུ་མེད་པའི་མཆོད་པ་ཞེས་བྱའོ། །སྒྱུ་འཕྲུལ་དྲྭ་བ་སྒྲུབ་པའི་ཏིང་ངེ་འཛིན་ཞེས་བྱ་བ་ནི། ལྷའི་དཀྱིལ་འཁོར་གྱི་ཏིང་ངེ་འཛིན་གཉིས་ཀྱིས་མཐུས་ལས་དང་དངོས་གྲུབ་མ་ལུས་པ་འགྲུབ་པ་སྟེ། ལེའུ་ལྔ་པ་བཤད་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་རང་བཞིན་གཅིག་དང་དུ་མ་མེད་པའི་བདག་ཉིད་ཐམས་ཅད་ཀྱིས། ཞེས་བྱ་བ་ནི། དེ་བཞིན་གཤེགས་པར་མ་ཟད། ཆོས་ཐམས་ཅད་རང་རིག་པར་གསལ་བས། མ་འདྲེས་ལ་ཡོངས་སུ་རྫོགས་པའི་ཕྱིར་གཅིག་དང་དུ་མ་བྲལ་བ་ཁོ་ནའོ། །གང་དེ་ཉིད་མངོན་དུ་བྱས་པ་ནི་བདག་ཉིད་ཆེན་པོ་སྟེ། ཐམས་ཅད་ཀྱི་ངོ་བོ་ཉིད་དེ་ལྟར་མཚུངས་པར་བཞུགས་སོ། །ཞེས་བྱའོ། །འཇིག་རྟེན་དྲུག་གི་ཕྱོགས་བཅུ་ཐམས་ཅད་ལ་ཉིད་ཀྱི་ཆེ་བའི་དཀྱིལ་འཁོར་དབྱུང་བར་བཞེད་ནས་ཞེས་བྱ་བ་ནི། ཁམས་གསུམ་གྱི་ཕྱོགས་དབུས་ཐམས་ཅད་དུ་རིག་པར་རང་སྣང་བས་རིལ་ཡང་ཡེ་ཤེས་ལྔའི་དཀྱིལ་འཁོར་དུ་གདལ་བ་ནི་དེ་བཞིན་གཤེགས་པ་ཉིད་ཀྱི་ངོ་བོ་ཡང་ཡིན་ལ་དེ་ཉིད་གསལ་བར་བསྟན་པར་དགོངས་པ་མངོན་དུ་བཞག་པ་ནི། བཞེད་པ་ཞེས་ཐ་སྙད་དུ་འདོགས་སོ། །དེ་ཉིད་བསྟན་པའི་ཕྱིར། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་སྟུན་གྱིས་གྲུབ། །ཅེས་བྱ་བ་ནི། རང་རིག་པ་ཉིད་ཕྱོགས་དབུས་ཀྱིས་བསྡུས་པ་ཐམས་ཅད་དུ་རང་སྣང་བའི་ཕྱིར། དེ་དག་དེའི་ངོ་བོ་ཉིད་དུ་གསལ་ལ་མི་རྟོག་པ་དང་། ཐམས་ཅད་དེའི་ངོ་བོར་གཅིག་པ་དང་། མ་འདྲེས་པ་དང་། ཡོངས་སུ་རྫོགས་པས་བྱ་བ་མེད་པ་དང་། མཐའ་ཐམས་ཅད་ལས་འདས་པའི་ཕྱིར་ཡེ་ཤེས་ལྔའི་དཀྱིལ་འཁོར་ཉིད་དེ། དེའི་ངོ་བོ་བློས་གཞལ་བ་ལས་འདས་པར་གནས་པ་ནི་རྫོགས་པ་ཆེན་པོ་ཞེས་བྱ་བ་སྟེ། རང་བཞིན་གསང་བའི་སྙིང་པོའོ། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །ཅེས་བྱ་བ་ནི། གང་གིས་དེ་མངོན་དུ་བྱས་པའི་དུས་ན། སྣང་སྤྱོད་ཐམས་ཅད་ཡེ་ཤེས་ལྔ་ལས་མི་འདའ་བས་ཞིང་དང་སྤྱོད་ཡུལ་ཡོངས་སུ་དག་པ་སྟེ་ཆེ་བའི་ཏིང་ངེ་འཛིན་གྱི་དཀྱིལ་འཁོར་ཕྱུང་བ་ཞེས་བྱའོ། །དེའི་རྩལ་མི་འགག་པ་དང་། མི་ལྕོགས་པ་རྣམས་ཀྱི་ཕྱིར་ཡང་གསུངས་པ། འཁོར་ལོ་རྩིབས་བཞི་མུ་ཁྱུད་བཅས། །ཞེས་བྱ་བ་ལ་སོགས་པའི་ཚིག་གོ་སླ་སྟེ། ལེའུ་ལྔ་པ་ཏིང་ངེ་འཛིན་གསུམ་གྱི་རྗེས་སུ་གཞི་ཡི་ཐབས་འདི་ལྟར་མངོན་དུ་བྱ་བ་སྟེ། དེ་ལ་ལྷ་བཞི་བཅུ་རྩ་གཉིས་ཀྱི་ཆ་བྱད་ཅན་གྱི་སྤྲུལ་པའི་འཕྲོ་འདུས་བརྒྱན་པའོ། །དེར་ཅི་ཞིག་སྙམ་པ་ལ། སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་གསུངས་ཏེ། རང་བྱུང་གི་ཡེ་ཤེས་ལ་འབྲས་བུའི་ཆོས་ལྔ་ལྷུན་གྱིས་རྫོགས་པ། དེས་ཐམས་ཅད་ཀྱང་ཚིམ་པར་བྱེད་པ་ཉིད་སེམས་ཅན་ཆེན་པོ་ལྔ་དང་རིན་པོ་ཆེའི་ཁྲི་སྣ་ཚོགས་སུ་མཛེས་པ་བརྟན་པས་འདེགས་པ་ནི། གཞན་གྱི་གདན་ལས་སྤགས་པས་ཆེ་བའོ། །དེ་དག་ལ་སོགས་པར་དགོད་པ་ནི། ཐབས་དང་ཤེས་རབ་སྤྱོད་པའི་གདན་སུམ་བརྩེགས་ཏེ། ཐམས་ཅད་རང་རིག་པར་གསལ་བ་ནི་གང་ལ་སྤྱད་ཀྱང་མི་གོས་པས་འབྲས་བུར་གྱུར་པའི་ཕྱིར་རོ། །དེ་དག་ལ་ཅི་ཞིག་བཞུགས་སྙམ་པ་ལ། གདན་ལ་རྫོགས་དང་སེམས་དཔའི་ཚུལ། །ཞེས་གསུངས་ཏེ། གཙོ་བོ་ལྔ་ནི་རྫོགས་པའི་སྐྱིལ་མོའོ། །ཡུལ་ལྔ་ནི་བརྟུལ་ཞུགས་ཀྱི་སྐྱིལ་མོའོ། །སེམས་དཔའ་རྣམས་ནི་མཛད་པ་ཡོངས་སུ་མ་རྫོགས་པས་འབབ་པའི་ཚུལ་ལོ། །སེམས་མ་རྣམས་བཞུགས་ཚུལ་གྱིས་འཁྱུད་པའོ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །ཞེས་བྱ་བ་ནི། ལྟེ་བ་དང་རྩིབས་ལ་རིགས་ལྔ་དང་། རྩིབས་མཆན་ལ་ཐུགས་ཀྱི་སེམས་དཔའ་བཞི་སྟེ། རིམ་པ་ནི་ཡི་གེའི་དབང་དུ་གསུངས་པ་སྟེ། གྲལ་ནི་ལུགས་སུ་མཐུན་པ་ཁོ་ནའོ། །གྲུ་ཆད་ལ་ནི་མཐོང་བྱེད་དང་། །ཞེས་པ་ལ་སོགས་པ་ནི་གོ་སླ་ཏེ་རིམ་པ་ཡང་རྗེས་སུ་མཐུན་ནོ། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །ཞེས་བྱ་བ་ནི། སྡུད་པའི་དོན་གྱིས་འདིར་བརྒྱད་ཁོ་ན་སྟེ། ཕྱོགས་མཚམས་སུ་མཉམ་པར་བཞུགས་པའོ། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །ཞེས་བྱ་བ་ནི། རྔམ་པའི་ཚུལ་གྱིས་ཞལ་ཕྱིར་བལྟས་པའོ། །དེ་དག་གི་ཕྱག་མཚན་ནི་ཅི་དང་ཅི་ཞིག་སྙམ་པ་ལ། རྡོ་རྗེ་འཁོར་ལོ་རིན་པོ་ཆེ། །ཞེས་བྱ་བ་ལ་སོགས་པ་གསུངས་ཏེ། འཛིན་པའི་རིམ་པ་ནི། སྒྱུ་འཕྲུལ་རྡོ་རྗེ་ལས། རྡོ་རྗེ་འཁོར་ལོ་རལ་གྲི་འབར། །དྲིལ་བུ་པདྨ་རིན་པོ་ཆེ། །རྡོ་རྗེ་འཛིན་པའི་རིམ་པའོ། །གཞན་གང་གནས་སུ་རྡོ་རྗེ་ཤེས། །དང་པོ་ཐུགས་དང་གཡོན་འཁྱུད་པའོ། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་ཆེ། །ཨུཏྤལ་ཀླུ་ཤིང་པོ་ཏི་སྙེ། །གཟུགས་མཛེས་རིན་ཆེན་ཕྲེང་བ་དང་། །པི་ཝང་གར་བསྒྱུར་སྤོས་མེ་དང་། །པུཥྤེ་མེ་ཏོག་མར་མེ་དང་། །བྱུག་པ་གཙོ་བོའི་རིམ་ཞེས་བྱ། །ནྲྀ་མགོ་རྡོ་རྗེ་ཐོད་རྒྱ་གྲམ། །ལྕགས་ཀྱུ་ཞགས་པ་སྥོ་ཊ་ཧོཿ འོད་འཕྲོ་མཉམ་བཞག་རྡོ་རྗེ་ཐལ། །ཡེ་ཤེས་རྩེ་ལྔ་ཆོས་ཁམས་དྲིལ། །ཐུགས་ལ་བསྟེན་པ་ཉིད་དུའང་གསུང་། །ཐུབ་ཆེན་ངེས་པར་ཕྱག་གཉིས་ཤེས། །གསེག་པར་གོ་མཚོན་པི་ཝང་རྡེབས། །སྒྲོམ་སྟོབས་པུ་ཏི་ཆོས་འཆད་ཚུལ། །མེ་དཔུང་བུམ་པར་ཤེས་པར་བྱའོ། །ཞེའོ། །དེ་དག་གི་སྐུ་མདོག་ཅི་ཞིག་སྙམ་པ་ལ། མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །ཞེས་གསུངས་ཏེ། མཚམས་ཀྱི་སེམས་དཔའ་དང་ཁྲོ་བོ་ལ་སོགས་པའི་ཕྱིར་ན་ཉི་ཤུ་རྩ་ལྔར་ཡང་གསལ་ལོ། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །ཞེས་བྱ་བ་ནི། སྒེག་པའི་ཚུལ་གྱིས་ཐབས་དང་ཤེས་རབ་སྙོམས་པར་ཞུགས་ཀྱང་། སྐུ་དང་ཡན་ལག་མཉེན་པའི་ཕྱིར། དྲང་ཞིང་སོ་སོར་མ་འདྲེས་པར་གསལ་ལོ། །ཞེས་བྱ་བའོ། །གསལ་འཚེར་ལྷུན་སྟུག་གཟི་བྱིན་ལྡན། །ཞེས་བྱ་བ་ནི། མཚན་དང་དཔེ་བྱད་ཡོངས་སུ་རྫོགས་པས་ཤིན་ཏུ་བརྗིད་པའི་ཕྱིར། ཐམས་ཅད་ཀྱང་ཟིལ་གྱིས་གནོན་པའོ། །འོད་ཟེར་འཕྲོ་བའི་ཚོགས་ཆེན་པོ། །ཞེས་བྱ་བ་ནི། གསལ་ལ་རྣོ་བའི་ཕྱིར་ཏེ། དེ་ཡང་དཀར་པོ་དང་། དམར་པོ་དང་། སེར་པོ་དང་། སྔོན་པོ་དང་། བཙོད་ཁ་དང་། ཤེལ་དང་དངུལ་གྱི་མདོག་ལྟ་བུ་དང་དྲུག་གོ། །དེ་དག་ནང་རིས་སུ་གཅིག་ཀྱང་དབྱེ་བ་སྟེ། དེ་དག་གི་གནས་བསྡུས་པ་མ་ཡིན་གྱི། འདིར་བ་སྤུ་རེ་རེ་ནས་བྱེ་བ་ཕྲག་དྲུག་དྲུག་ཕྱོགས་བཅུར་འཕྲོ་བའི་སྣང་བས་ཁྱབ་པར་བྱེད་པ་ནི་ཚོགས་ཆེན་པོ་ཞེས་བྱའོ། །འབར་བའི་ཕྲེང་བས་འཁྲིགས་པ་སྟེ། ཞེས་བྱ་བ་ནི། ཁྲོ་བོ་དང་ཁྲོ་མོའི་མེ་དཔུང་སྟེ་རྡོ་རྗེ་རྩེ་ལྔ་པར་འཁྱིལ་བའོ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་བྱ་བ་ནི། རང་བཞིན་གྱི་རྗེས་སུ་ལྷག་པ་ཏིང་ངེ་འཛིན་གྱི་དཀྱིལ་འཁོར་ཡང་དབྱིངས་ཀྱི་མཐས་ཀླས་པར་དེ་དག་གི་ངོ་བོ་ཉིད་དུ་གསལ་བ་ལས། གདུལ་བྱ་རང་གི་སྣང་བས། གོ་ཕྱེ་ནས་སྣ་ཚོགས་སུ་སྣང་བས། དོན་བྱ་བར་བསྒོམ་པར་ཁོ་ནའོ། །ཞེས་བྱའོ། །རང་བཞིན་སྐུའི་དཀྱིལ་འཁོར་གྱི་མཚན་ཉིད་དང་། ཕྲིན་ལས་དང་། དེ་གྲུབ་པའི་ཚུལ་བསྟན་པའི་ཕྱིར། ཕྱོགས་བཅུ་དུས་བཞི་མངོན་རྫོགས་པའི། །སྐུ་ཡི་ཕྱག་རྒྱ་ཆེན་མཆོག་ནི། །དེ་བཞིན་དབྱིངས་ལས་མ་གཡོས་ཀྱང་། །ཡང་དག་ཐར་པའི་གཟུགས་སྐུ་དང་། །འགྲོ་བ་མ་ལུས་གདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །ཞེས་པ་ནི་ཡང་དག་པར་རྫོགས་པའི་ཟུང་འཇུག་གི་སྐུ་ནི་སྐུ་ལྔ་ལྷུན་གྱིས་གྲུབ་པས། སྐུ་ཕྱག་རྒྱ་ཆེན་པོ་ལས་ཁྱད་པར་དུ་གྱུར་པའི་ཕྱིར་མཆོག་ཁོ་ནའོ། །དེ་དག་གང་ཞེ་ན་ཅིར་སྣང་ཡང་སེམས་ཉིད་ཁོ་ནའི་ཕྱིར་སྣང་སྟོང་གཉིས་སུ་མེད་པ་ནི་ཆོས་སྐུ་ཉིད་དེ། རྒྱས་པ་ལས། འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །ཅེས་གསུངས་པས། དེ་ནི་དེ་བཞིན་ཉིད་ཀྱི་ཡང་ཡེ་ཤེས་སོ། །དེས་མ་བརྩལ་བ་ནི་མ་གཡོས་པའོ། །རྩོལ་བ་ལས་གྲོལ་བར་སྟོན་པ་ནི་ཡང་དག་པའི་ཐར་པ་སྟེ། ལོངས་སྤྱོད་ཆེན་པོའི་སྐུ་དང་། འགྲོ་བ་དྲུག་དང་མཐུན་པར་བསྟན་པ་ནི་སྤྲུལ་པ་སྟེ་བསམ་གྱིས་མི་ཁྱབ་པས་འདུལ་བ་རྣམས་སུ་སྣང་ངོ་། །ཞེས་བྱའོ། །སྟོན་ཉིད་སྒྱུ་མ་མིག་ཡོར་ཚུལ། །ཞེས་བྱ་བ་ནི། དེ་དག་ཀྱང་ལྷུན་གྱིས་གྲུབ་པའི་རྒྱུ་དང་། ལས་ཀྱི་རྐྱེན་གྱིས་སྣང་བ་ཁོ་ན་ལས། རང་རྒྱུད་དུ་སྣང་བ་རྣམས་ནི་འཁྲུལ་པའོ། །ཞེས་བྱ་བའི་ཐ་ཚིག་གོ། །འོ་ན་ངོ་བོ་ཉིད་ཇི་ལྟ་བུ་ཞེ་ན། ཚུལ་ཉིད་དབྱིངས་ལས་གཡོས་པ་མེད། །ཅེས་གསུངས་ཏེ། དཔེ་དེ་ཉིད་ཀྱི་ཕྱིར་སྣ་ཚོགས་སུ་སྣང་བ་ཉིད་ན་སེམས་ཀྱི་དབྱིངས་ཉིད་ཁོ་ན་བས་བདེན་པ་གཉིས་སུ་མི་ཕྱེད་པས་རྡོ་རྗེའི་སྐུའོ། །འོ་ན་ངོ་བོ་ཉིད་མེད་པ་ཉིད་སྣ་ཚོགས་སུ་སྣང་བས་རྩོལ་བས་བྱས་སོ་བར་དོགས་པ་ལ། མ་གཡོས་བཞིན་དུ་སྣ་ཚོགས་པ། །དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ཀྱིས་མ་བཅོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་གསུངས་ཏེ། ཐམས་ཅད་མ་བརྩལ་བར་ལྷུན་གྱིས་གྲུབ་པ་ནི། མངོན་པར་བྱང་ཆུབ་པའི་སྐུ་སྟེ། །དེ་ཡང་རིམ་པ་མཐུན་པར་སྣང་བ་ནི་ལས་ཁོ་ནའོ་ཞེས་བྱའོ། །དཔེར་ན་མེ་ལོང་ཆུ་ཟླ་བཞིན། །ཞེས་བྱ་བ་ནི། དེ་དག་མ་གཡོས་པར་ཀུན་ཏུ་སྣང་བ་ནི་མེ་ལོང་དང་བཞིན་གྱི་ཚུལ་ལོ། །འགྲོ་འོང་མེད་པར་ཀུན་ཏུ་ཁྱབ་པ་ནི་ཆུ་ཟླའི་དཔེས་སྟོན་ཏོ། །ཞེས་བྱ་བའོ། །དེ་ཚེ་འགྲོ་དྲུག་ཐམས་ཅད་ལ། །སྡིག་སྤོང་གཟུགས་སུ་རྣམ་པར་བསྟན། །དགེ་ཚུལ་རྣམས་ལ་དགྲ་བཅོམ་གཟུགས། །རང་རྒྱལ་རྣམས་ལ་བསེ་རུའི་ཚུལ། །ཞེས་བྱ་བ་ནི་གོ་སླའོ། །གཞན་ཡང་ཐེག་མཆོག་རིམ་པ་བཞིན། །ཞེས་བྱ་བ་ནི། མོས་པས་སྤྱོད་པ་ལ་སྤྲུལ་པའི་སྐུ་ཉིད་དོ། །ཀྲི་ཡ་ལ་སོགས་པ་སོ་སོའི་སྟོན་པ་རྣམས་ཀྱང་དེ་བཞིན་དུ་སྣང་ངོ་། །འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །ཞེས་བྱ་བ་ནི། འོག་མིན་ཆེན་པོའི་ལོངས་སྤྱོད་ཀྱི་སྐུ་ནི་སྤྲུལ་པའི་དེ་བཞིན་གཤེགས་པ་ལྟར་ཚིག་གི་གསུང་གིས་མི་སྟོན་ཏེ། གཞན་དག་ལས། དེ་བཞིན་གཤེགས་པ་ལ་ལ་ནི་སྤྱན་ཕྱེ་བས་ཆོས་སྟོན་ཏོ། །ལ་ལ་ནི་བཙུམ་པས་སྟོན་ཏོ། །ལ་ལ་ཕྱག་བརྐྱང་བས་སྟོན་ཏོ། །ལ་ལ་ནི་བསྐུམ་པས་སྟོན་ཏོ། །ལ་ལ་ནི་བཙུན་མོ་དང་བཅས་པ་སྟོན་ཏོ། །ལ་ལ་ནི་བཙུན་མོ་མེད་པས་སྟོན་ཏོ་ཞེས་འབྱུང་བ་ལྟ་བུའོ། །ཞེས་བྱའོ། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །ཞེས་བྱ་བ་ནི་གོ་སླའོ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །ཞེས་བྱ་བ་ནི། དེ་བཞིན་གཤེགས་པའི་ཡེ་ཤེས་ཀྱི་སྐུ་ནི་གཅིག་ཏུ་མ་གྲུབ་པས་ཐམས་ཅད་དུ་སྣང་བའི་ཕྱིར་སྒྱུ་མ་ལས་འདས་པ་ཁོ་ནའོ། །དེ་དག་དེ་ལྟར་མ་གྱུར་པ་ནི་ངོས་ཟིན་པའོ། །དེ་བཞིན་གཤེགས་པའི་ཡེ་ཤེས་ཐབས་ཀྱི་ལུས་ནི་ཐིག་ལེ་ཆེན་པོ་གནས་ན་བཞུགས་པས་ཐམས་ཅད་ཀྱང་ཡེ་ཤེས་ཆེན་པོར་བྱིན་གྱིས་རློབ་པ་སྟེ། དེ་དག་གི་ལམ་མི་མཐུན་པ་ནི་འོ་མ་འདོད་པས་རྭ་ལ་བཞོས་པ་ལྟར་ཤེས་བའི་ཕྱིར་རོ། །དེ་ནས་ས་བཅུ་རིམ་གྱིས་འབྱང་། །ཞེས་བྱ་བ་ནི། ས་བཅུ་པ་རྣམས་ནི་སངས་རྒྱས་ཀྱི་ས་ལ་ངེ་པར་དབང་ཁོ་ནས་འགྲོ་སྟེ། ལང་ཀའི་མདོ་ལས། བློ་གྲོས་ཆེན་པོ་བྱིན་གྱིས་བརླབས་གཉིས་ཀྱིས་བྱིན་གྱིས་བརླབས་པའི་བྱང་ཆུབ་སེམས་དཔའ་དག །དེ་བཞིན་གཤེགས་པའི་ཞབས་ལ་གཏུག་ཅིང་དྲི་བ་ཡོངས་སུ་འདྲིའོ། །གཉིས་གང་ཞེ་ན། ཏིང་ངེ་འཛིན་གྱི་བྱིན་གྱིས་བརླབས་དང་སྐུ་དང་ཞལ་དང་ཕྱག་གིས་དབང་བསྐུར་བའི་བྱིན་གྱི་བརླབས་སོ། །དེ་ལ་བྱང་ཆུབ་སེམས་དཔའི་ས་དང་པོ་པ་ལ་སངས་རྒྱས་ཀྱིས་ཏིང་ངེ་འཛིན་གྱིས་བྱིན་གྱི་བརླབས་ནས། བྱང་ཆུབ་སེམས་དཔའི་ཏིང་ངེ་འཛིན་ཐེག་པ་ཆེན་པོ་རབ་ཏུ་སྣང་བ་ཞེས་བྱ་བ་ལ་འཇུག་སྟེ། ཞུགས་མ་ཐག་ཏུ་ཕྱོགས་བཅུའི་དེ་བཞིན་གཤེགས་པ་རྣམས་ཀྱི་ཞལ་སྟོན་ཏོ། །ཞེའོ། །ཡང་སའི་མི་མཐུན་པའི་ཕྱོགས་རྟོགས་པར་ཁོང་དུ་ཆུད་དེ། ཆོས་ཀྱི་སྤྲིན་གྱིས་ཐོབ་བོ། །དེ་ལ་དེ་བཞིན་གཤེགས་པའི་ཞལ་དང་ཕྱག་གིས་དབང་བསྐུར་རོ། །ཞེས་འབྱུང་ངོ་། །དེ་ལྟར་བཅུ་པ་དག་དབང་རིམ་པར་ཁོང་དུ་ཆུད་ནས་སྤང་བྱ་རྣམས་ཀྱང་དེ་བཞིན་དུ་འདག་པ་ཁོ་ནའོ། །དེའི་རྗེས་སུ་ཀུན་ཏུ་འོད་ཀྱིས་ངེས་པར་སྣང་བའི་ཕྱིར། བླ་མེད་བྱང་ཆུབ་ཡང་དག་འཐོབ། །ཅེས་གསུངས་སོ། །དེ་ཉིད་དུ་མདོ་སྡེ་པའི་སྐུ་གསུམ་བསྟན་པའི་ཕྱིར། ཆོས་སྐུ་དཔག་མེད་བརྗོད་དུ་མེད། །ལོངས་སྐུ་ཟད་མེད་རིན་ཆེན་གཏེར། །སྤྲུལ་པ་བྱེ་བ་བསམ་མི་ཁྱབ། །ཅེས་གསུངས་ཏེ་གོ་སླའོ། །དེ་ལས་ཀྱང་སྔགས་ཀྱི་ས་གཉིས་བསྟན་པའི་ཕྱིར་དུ། ཐབས་དང་ཤེས་རབ་ས་ཡི་མཆོག །ཅེས་བྱ་བ་ནི། དེའི་ཚེ་སྙིང་རྗེ་ཆེན་པོ་མངོན་དུ་བྱས་པས་ཐམས་ཅད་དུ་སྣང་ཡང་། བདག་ཉིད་ཆེན་པོའི་ཕྱིར་མི་དམིགས་པས་ཅིས་ཀྱང་གོས་པ་མེད་པའི་ས་ནི་ལྟོས་ནས་མཆོག་ཁོ་ནའོ། །དེ་ཉིད་དུ་ཡི་གེ་འཁོར་ལོའི་ས་བསྟན་པའི་ཕྱིར། མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་ཏུ་མཎྜ་ལ། །ཚོགས་ཆེན་གཉིས་ཀྱང་རྫོགས་པར་རོལ། །ཞེས་བྱ་བ་ནི། ཡེ་ཤེས་བཞིའི་བྱིན་བརླབས་ཡེ་ཤེས་བཅུ་དྲུག་དང་། ཡུལ་བཅུ་དྲུག་གི་བྱིན་བརླབས་སེམས་དཔའ་དང་སེམས་མ་སུམ་ཅུ་རྩ་གཉིས་དང་། ཡེ་ཤེས་ལྔའི་བྱིན་བརླབས་རིགས་བརྒྱད་ཅུ་ལ་སོགས་པ་ལྷུན་གྱིས་གྲུབ་པར་རང་སྣང་བ་དང་། སྤྱོད་ཡུལ་རིལ་བདག་ལས་མི་གཞན་པའི་དཀྱིལ་འཁོར་དུ་སྣང་བ་དག་ནི། ཚོགས་གཉིས་ལྷུན་གྱིས་གྲུབ་པ་ཁོ་ནའོ། །དེའི་ཡོན་ཏན་བགྲང་བར་མི་ནུས་པའི་ཕྱིར། དེ་ལ་སོགས་པ་བསམ་ཡས་མཆོག །ཅེས་གསུངས་སོ། །དེ་ལ་སྔགས་ཀྱི་ལུགས་སུ་སྐུ་ལྔ་ལྷུན་གྱིས་གྲུབ་པར་བསྟན་པའི་ཕྱིར། སྐྱེ་ཤི་མེད་པའི་གཡུང་དྲུང་སྐུ། །ཞེས་བྱ་བ་ནི། ཆོས་ཀྱི་སྐུ་ནི་བཤད་པ་བཞིན་པས་སྐད་ཅིག་མའི་སྐྱེ་འཇིག་དང་བྲལ་བ་ཁོ་ནའོ། །ཉོན་མོངས་ཀུན་གྱི་ཞིང་དུ་གནས། །ཟད་མེད་རིན་ཆེན་གཏེར་དུ་འགྱུར། །ཞེས་བྱ་བ་ནི། ལོངས་སྤྱོད་ཆེན་པོའི་སྐུ་ནི་གང་ཡང་མ་སྤངས་པ་ཁོ་ན་ལས་ཉོན་མོངས་པ་སྦྱོང་བའི་སྤྲུལ་པ་མི་ཟད་པའི་འབྱུང་ཁུངས་ཡིན་པའོ། །རྡོ་རྗེ་རིག་པ་འཛིན་པའི་སྐུ། །ཞེས་བྱ་བ་ནི། གང་དུ་ཡང་རིག་པར་གསལ་བས་སྣང་སྟོང་གཉིས་སུ་མི་ཕྱེད་པ་ནི་རྡོ་རྗེའོ། །འཛིན་པའི་ནི་འཆང་བ་སྟེ། རང་གི་རིག་པ་དེ་ལྟར་ལྡན་པ་ནི་རྡོ་རྗེའི་སྐུ་ཁོ་ནའོ། །ཐམས་ཅད་དབྱེར་མེད་མཉམ་པའི་སྐུ། །ཞེས་བྱ་བ་ནི། ཕུང་པོ་ལ་སོགས་པ་རིལ་རིག་པར་མཉམ་པ་ནི་ཐམས་ཅད་ཀྱང་བདག་ཉིད་ཆེན་པོའི་སྐུ་དང་ཡེ་ཤེས་སུ་གསལ་བས་མངོན་པར་བྱང་ཆུབ་པའི་སྐུའོ། །ཐམས་ཅད་མཁྱེན་པའི་ཡེ་ཤེས་སྐུ། །ཞེས་བྱ་བ་ནི། སྤྲུལ་པའི་སྐུ་ནི་གདུལ་བྱ་ཐམས་ཅད་ཀྱི་འདུལ་བའི་དུས་དང་གང་ལྟར་འཚམས་པ་མི་འདའ་བ་དང་། མ་འདྲེས་པ་ཁོ་ནར་སྣང་བའི་ཕྱིར་རོ། །དེ་དག་གི་ཕྱིར་ན། དེ་ཚེ་སྐུ་ལྔ་ཀུན་ཀྱང་རྫོགས། །ཞེས་གསུངས་སོ། །འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པ་ཐམས་ཅད་དུ། དཀྱིལ་འཁོར་བརྗོད་ཀྱིས་མི་ལང་བ་ཞིང་གི་རྡུལ་སྙེད་དུ་གསལ་བར་གྱུར་ཏོ། །ཞེས་བྱ་བ་ནི། གོ་སླ་སྟེ་ཆེ་བའི་དཀྱིལ་འཁོར་མངོན་དུ་ཕྱུང་བའི་ཕྱིར་དང་སྐུའི་རོལ་པ་ཡོངས་སུ་བསྟན་པའི་ཕྱིར་རོ། །དམིགས་བྱ་དམིགས་བྱེད་མི་དམིགས་དཔག་མེད་བསམ་མི་ཁྱབ། །ཡེ་ཤེས་རང་རིག་དཀྱིལ་འཁོར་སྣ་ཚོགས་བརྗོད་མི་ལང་། །ཞེས་བྱ་བ་ནི། སྣོད་བཅུད་རིལ་སེམས་ཀྱི་ཡེ་ཤེས་སུ་གསལ་བའི་དུས་ན། དབྱིངས་དང་ཡེ་ཤེས་གཉིས་ཀྱི་ཐ་སྙད་ལས་ཀྱང་འདས་ཏེ། སྤྱོད་ཡུལ་དང་བྲལ་བར་གསལ་བ་ནི། རྫོགས་པ་ཆེན་པོའི་ཏིང་ངེ་འཛིན་གྱི་དཀྱིལ་འཁོར་ཞེས་བྱའོ། །དེ་ལ་སྐུ་དང་ཡེ་ཤེས་རིལ་ལྷུན་གྱིས་གྲུབ་པ་ཉིད་རིག་པའི་རྒྱལ་པོས་རང་དབང་སྒྱུར་ཏེ། ཡེ་ཤེས་ཀྱི་རོལ་པ་ལྷག་པའི་ཏིང་ངེ་འཛིན་གྱི་དཀྱིལ་འཁོར་སྣ་ཚོགས་སུ་རང་སྣང་བ་ཉིད་བདག་ཉིད་ཆེན་པོའི་དཀྱིལ་འཁོར་དུ་གསལ་བས་སྤྱོད་ཡུལ་ཡོངས་སུ་དག་པའི་ཕྱིར། དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་གསུངས་སོ། །མཉམ་དང་མི་མཉམ་ཀུན་ཁྱབ་ཁྱབ་མེད་ཁྱབ་པའི་དབྱིངས། །ཞེས་བྱ་བ་ནི། དྲུག་པའི་སྐུའི་རོལ་པ་ནི་གདུལ་བྱ་དག་པ་དང་མ་དག་པ་རིལ་ལ་ཁྱབ་པར་དོན་མཛད་ཙམ་ན་དེ་དག་གི་དེ་བཞིན་ཉིད་ལས་མ་གྱུར་པའི་ཕྱིར། སྣང་སྟོང་གཉིས་སུ་སོང་བ་མེད་པ་ཁོ་ནའོ། །དེ་དག་ཅིའི་ཕྱིར་སྙམ་པ་ལ། ཡེ་ནས་ཀུན་གསལ་དཀྱིལ་འཁོར་རྣམས་འཕྲོ་སྤྲོས་པ་མེད། །ཅེས་གསུངས་ཏེ། དངོས་པོ་ཀུན་གྱི་རང་བཞིན་གདོད་ནས་སྐུ་ལྔའི་དཀྱིལ་འཁོར་དུ་གསལ་བ་ལས། དེ་བཞིན་ཉིད་དུ་གཤེགས་པ་དང་ཡང་དག་པར་རྫོགས་པ་ཉིད་ཀྱི་ཕྱིར་གཉིས་སུ་མེད་པར་ལྷུན་གྱིས་གྲུབ་སྟེ་དེ་ཉིད་རང་སྣང་བ་ནི་འཕྲོ་ཞེས་ཐ་སྙད་དུ་འདོགས་སོ། །དེ་དག་ལས་ཀྱི་རིམ་པ་ཇི་ལྟ་བར་སྣང་ཡང་། རང་རྒྱུད་པར་བྱུང་བ་མེད་པ་ཁོ་ནའོ་ཞེས་བྱའོ། །དཀྱིལ་འཁོར་སྤྲོས་པ་ཞེས་བྱ་བ་ནི། ཏིང་ངེ་འཛིན་གྱི་དཀྱིལ་འཁོར་དང་། ལྷག་པ་ཏིང་ངེ་འཛིན་གྱི་དཀྱིལ་འཁོར་དང་། རང་བཞིན་སྐུའི་དཀྱིལ་འཁོར་དེ་དག་གི་ངོ་བོ་དང་མཚན་ཉིད་དང་། ཕྲིན་ལས་ཡོངས་སུ་བཤད་པའོ། །ལེའུ་དྲུག་པའོ།། །།ད་ནི་ལྷག་པ་ཏིང་ངེ་འཛིན་གསུང་གི་དཀྱིལ་འཁོར་གསལ་བར་བསྟན་པའི་ཕྱིར། དེ་ནས་དེ་བཞིན་གཤེགས་པ་ཞེས་བྱ་བ་ལ་སོགས་པ་གསུངས་སོ། །བྷྲཱུྃ་བི་ཤྭ་བི་ཤུདྡྷེ། ཞེས་བྱ་བ་ནི། འདིས་གཞིའི་ཐབས་གཞལ་ཡས་ཁང་ཡོངས་སུ་སྣང་བར་བྱེད་པའོ། །དེ་ཡང་སྒྱུ་འཕྲུལ་ཐལ་བའི་རྒྱུད་ལས། བྷྲཱུཾ་དབྱིབས་བྷ་གར་སྣ་ཚོགས་འདུས། །ལས་དང་ངོ་བོ་དག་པ་ཉིད། །སངས་རྒྱས་རིན་ཆེན་ཟ་མ་ཏོག །བྱིན་རླབས་སྐྱོབ་ཕྱིར་སྔགས་སུ་བརྗོད། །ཅེས་བྱའོ། །ཧཱུྃ་བཛྲ་དྷྲྀཀ྄ །ཅེས་བྱ་བ་ལ་སོགས་པ་ནི་རིགས་ལྔ་བསྐྱེད་པའི་སྔགས་སོ། །དེ་ཡང་ཐལ་བའི་རྒྱུད་ལས། ཙིཏྟ་ཁ་ལྔའི་ཤི་ར་ལ། །རྡོ་རྗེ་རྒྱལ་བ་རིན་ཆེན་ཆོས། །ཤེས་རབ་རིགས་ལྡན་བཅུད་ཀྱི་གཟུགས། །ངེས་པར་འཛིན་པ་གསང་བའི་སྔགས། །ཤེའོ། །མཱུཾ་དྷཱ་ཏཱི་ཤྭ་རཱི། ཞེས་པ་ལ་སོགས་པ་ནི་ཡུམ་ལྔའི་སྔགས་སོ། །དེ་ཡང་དེ་ཉིད་ལས། དེ་ཉིད་དྭངས་མའི་ཡེ་ཤེས་ལྔ། །མ་རིག་གཉིས་སོགས་བཞི་པོ་དང་། །མི་ཕྱེད་ཕྲག་དོག་རྡོ་རྗེའི་སྔགས། །དབྱིངས་སུ་སྐྱོབ་པས་དགའ་མར་བརྗོད། །ཅེའོ། །ཀྵཱིཾ་ཧི་རཱ་ཛ་ཡ། ཞེས་བྱ་བ་ལ་སོགས་པ་ནི་ཐུགས་ཀྱི་སེམས་དཔའ་བཞིའི་སྔགས་སོ། །ཧཱུྃ་ལཱ་སྱ་ས་མ་ཡ་སྟཱཾ། ཞེས་བྱ་བ་ལ་སོགས་པ་ནི་དེ་དག་གི་ཡུམ་བཞིའི་སྔགས་ཏེ། ཡང་། ལས་ཀྱི་བདེ་བས་སྒེག་པ་ནི། །ཆགས་པའི་དམ་ཚིག་དུས་ཡིན་ནོ། །སླར་ཡང་ལན་གྱིས་འབྲེལ་བ་ནི། །གཉིས་ཀ་དགྱེས་པའི་མཆོག་ཏུ་བཤད། །ཧ་དང་སི་ཡི་བདེ་སྒྲ་དག །བདག་གིས་ཆགས་པ་ཐོབ་པའོ། །ཤིན་ཏུ་བསྐྱོད་པའི་བདེ་བ་ཉིད། །ཀུན་ནས་བསྐྱོད་པས་རླུང་ཞེས་བྱ། །ཞེའོ། །མཻ་དྷཱ་ར་ཎི་སྭཱ་ཧཱ། ཞེས་བྱ་བ་ལ་སོགས་པ་ནི། གསུང་ནི་བྱང་ཆུབ་སེམས་དཔའི་བཞིའི་སྔགས་སོ། །ཛཿདྷཱུ་བེ་པྲ་བེ་ཤ །ཞེས་བྱ་བ་ལ་སོགས་པ་ནི། ཡང་། གཉིས་འདྲེས་འཛིན་པ་ཞེས་བྱ་སྟེ། །དེ་ཉིད་ཕྱེ་བ་ལས་བྱུང་བའོ། །མེ་ཏོག་བསྡུས་པའི་ངོ་བོ་ཉིད། །བདག་པོའི་ཞལ་དུ་ཐིམ་པར་བཤད། །ཤིན་ཏུ་བསྡམས་པའི་རིམ་ལས་བྱུང་། །གསལ་བའི་ཡེ་ཤེས་བདེ་བ་ཆེ། །ཀུན་གསལ་བརྗོད་དང་འདྲ་བའི་སྒྲ། །གཉིས་མེད་ཐུགས་སུ་ཤེས་པར་བྱ། །ཞེའོ། །ཧཱུཾ་ཡ་མཱནྟ་ཀྲྀཏ་ཕཊ། ཅེས་བྱ་བ་ལ་སོགས་པ་ནི་ཁྲོ་བ་ཡབ་ཡུམ་བརྒྱད་ཀྱི་སྔགས་སོ། །ཧཱུཾ་ཧཱུཾ་ཧཱུཾ་བཛྲ་ཙིཏྟ་ཨཱོཾ། ཨ་ཨ་ཨ་བཛྲཱི་བྷ་དྲ་ས་མནྟ་ཨཿ ཞེས་བྱ་བ་ནི། བྱེད་པ་པོ་ཡབ་ཡུམ་གྱི་སྔགས་ཏེ། ཡང་། རྣམ་ཤེས་གསུམ་འདས་རྡོ་རྗེ་ནི། །ཡེ་ཤེས་ལྔ་རྫོགས་ཐུགས་ཉིད་དོ། །དབྱིངས་གསུམ་རྣམ་དག་འདུས་མ་བྱས། །ཀུན་ཏུའང་དེ་བཞིན་གནས་བྱེད་པའོ། །ཞེའོ། །ༀ་མུ་ནེ་ཀྲཱེཾ་སྭཱ་ཧཱ། ཞེས་བྱ་བ་ལ་སོགས་པ་ནི་སྤྲུལ་པ་རྣམས་ཀྱི་སྔགས་ཏེ། ཡང་། ས་བོན་ཟུང་གསུམ་དེ་བདེ་བ། །དེས་སྐྱེས་རང་རིག་གྱུར་པ་ཡིས། །གཉིས་བྱུང་འདུལ་བས་ཐུབ་པར་གསུངས། །ཤེའོ། །ༀ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿས་མ་ཡ་སྟྭཾ། ཞེས་བྱ་བ་ནི། རང་བཞིན་གྱི་དཀྱིལ་འཁོར་ལ་དམ་ཚིག་བསྐུར་ཏེ་སྙན་གསན་དབབ་པའོ། །ཛཿཧཱུཾ་བྃ་ཧོཿ ཞེས་བྱ་བ་ནི། རིམ་པར་སྤྱན་དྲངས་ཏེ་གུར་གྱི་སྟེང་དུ་བཞུགས་པ་ཁོ་ནའོ། །ༀ་བཛྲ་ས་མ་ཡ་ༀ། ཞེས་བྱ་བ་ལ་སོགས་པ་ནི། ཕུང་པོ་ལ་སོགས་པའི་ངོ་བོ་ཉིད་སྐུ་དང་ཡེ་ཤེས་ཉེར་ལྔར་ཤེས་པའི་དུས་ན་ཐམས་ཅད་ཀྱང་གཉིས་སུ་མེད་པར་གསལ་བ་ནི། དེ་བཞིན་གཤེགས་པ་ཐམས་ཅད་ཀྱི་རྩ་བར་གྱུར་པའི་ཕྱིར། དཀྱིལ་འཁོར་ཐམས་ཅད་དུ་ཞུགས་པ་ཁོ་ནའོ། །དེ་ཉིད་དུ་གྱུར་པ་ནན་ཏན་གྱིས་བྱིན་གྱིས་བརླབས་པར་བསྐུལ་བའི་ཕྱིར། ༀ། ཡེ་ཤེས་རྒྱ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་གསུངས་སོ། །ༀ་བཛྲ་ས་མ་ཡ་ཧཱུྃ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧོཿ ཞེས་བྱ་བ་ནི། རང་བཞིན་ཡེ་ཤེས་སུ་གཅིག་པར་བྱིན་གྱིས་བརླབས་པའི་དུས་ལ་བབས་པས་དེ་བདག་ལ་གསལ་བར་མཛོད་ཅིག་ཅེས་བྱ་བ་ཁོ་ནའོ། །ཛཿཧཱུྃ་བྃ་ཧོཿ ཞེས་བྱ་བ་ནི། རིམ་པས་བདག་གི་དཀྱིལ་འཁོར་ལ་ཞུགས་པའོ། །ཞེས་བརྗོད་པས་གསུང་གི་དཀྱིལ་འདི་དག་གིས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཁྱབ་པར་གྲགས་སོ། །ཞེས་བྱ་བ་ནི། འཇིག་རྟེན་དྲུག་གི་ལུས་ལ་སྔགས་ཉིད་གནས་པ་ལས་ལྷའི་དཀྱིལ་འཁོར་དང་། ལས་དང་དངོས་གྲུབ་རིལ་དུ་སྣང་བ་དེ་ཉིད་གསལ་བར་བྱས་པའོ། །དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་དང་བྱ་བ་མོ་གཉིས་སུ་མེད་པའི་དཀྱིལ་འཁོར་ལ་ཐིམ་པར་མཛད་དོ། །ཞེས་བྱ་བ་ནི། ལྷག་པའི་ཏིང་ངེ་འཛིན་གྱི་དཀྱིལ་འཁོར་གྱི་ལྷ་ཐམས་ཅད་ལ། རང་བཞིན་ལྷུན་གྱིས་གྲུབ་པའི་ཐབས་དང་ཤེས་རབ་གཉིས་སུ་མེད་པའི་རྒྱུད་ཁོ་ནས་དབང་བསྐུར་བར་བྱ་བའི་ཕྱིར་རོ། །བདག་ཉིད་ཆེན་པོའི་ཡེ་ཤེས་དང་བྱིན་བསྡུ་བ་ཞེས་བྱ་བ་ནི། ཏིང་ངེ་འཛིན་གྱི་དཀྱིལ་འཁོར་གྱི་ཡན་ལག་གི་ལྷ་རྣམས་ནི། ཡེ་ཤེས་ལྔའི་རྒྱུན་དང་། སྐུ་གསུང་ཐུགས་ཀྱི་བྱིན་བབ་པ་ལས་བྱུང་བས་དེ་ཉིད་དུ་ང་རྒྱལ་བྱེད་པའི་ཕྱིར་རོ། །ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ ཞེས་བྱ་བ་ལ་སོགས་པ་ནི། ཐལ་བ་ལས། མི་བསྐྱོད་བྱེད་པོ་ཡུམ་དང་བཅས། །རྡོ་རྗེ་འཛིན་པའི་ཕྱག་རྒྱར་ལྡན། །བྱམས་པ་ས་སྙིང་དེ་བཞིན་ནོ། །གཞན་དག་རང་གི་ཕྱག་རྒྱ་སྟེ། །གཤིན་རྗེ་གཤེད་ལ་རྟག་པར་བཤད། །ཐུབ་ཆེན་རྡོ་རྗེ་འཛིན་འཆང་བ། །ཟླ་དང་བྲལ་་བས་དཔའ་བོ་ཆེ། །ཞེས་འབྱུང་བ་ཁོ་ནའོ། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅་ཧཾཿ ཞེས་བྱ་བ་ལ་སོགས་པ་ནི། ཡང་། གནས་གསུམ་ཁྱབ་འཇུག་ཡི་གེ་ལས། །འོད་ཟེར་འཕྲོ་བའི་ཚོགས་ཆེན་པོས། །ཁམས་གསུམ་བྱིན་རླབས་གཟི་བྱིན་བསྡུས། །རང་བཞིན་རྡོ་རྗེ་གསུམ་གནས་པ། །རྒྱུ་གཉིས་ཚུལ་གྱིས་རང་སྣང་བའོ། །ཞེས་འབྱུང་ངོ་། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅་ཧཾཿ ༀ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅་ཧཾཿ ཞེས་བྱ་བ་ནི། ཡང་། ལྟེ་བ་རྣམ་གཉིས་ཟླ་བ་ལ། །སྔོ་ལྗང་ཡི་གེ་སྭཱ་ཧཱ་ཉིད། །རྗེས་མཐུན་འོད་ཀྱི་ཡོན་ཏན་ལས། །ཡན་ལག་རྫོགས་པའི་གཟི་བྱིན་ལྡན། །ཞེས་འབྱུང་ངོ་། །ཞེས་བརྗོད་པས་ཐིམ་པར་གྱུར། གསལ་བར་གྱུར། འབར་བར་གྱུར་ཏོ། །ཞེས་བྱ་བ་ནི། ཡེ་ཤེས་རྒྱུན་དུ་འབབ་པ་གཉིས་སུ་མེད་པ་དང་། རྡོ་རྗེ་གསུམ་མངོན་དུ་སྣང་བ་དང་། ཡན་ལག་གཉིས་ཀྱི་གཟི་བྱིན་དང་ལྡན་པ་ཁོ་ནའི་ཕྱིར་རོ། །དེ་ནས་རང་བཞིན་གསུང་གི་དཀྱིལ་འཁོར་གྱི་གྲངས་དང་ལས་དང་མཚན་ཉིད་བསྟན་པའི་ཕྱིར། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསུང་། །སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འབྱུང་། །ཞེས་བྱ་བ་ལ་སོགས་པ་གསུངས་ཏེ། དྲུག་པའི་དོན་གྱི་གསུང་ནི། བརྗོད་བྱའི་ངོ་བོ་ཉིད་གུད་ན་འདི་འདྲར་གྲུབ་པ་མེད་པའི་ཕྱིར། ཡི་གེའི་སྒྲ་ཐམས་ཅད་ལས་འདས་ཏེ། བརྗོད་པ་དང་བྲལ་བ་ཉིད་བསམ་བརྗོད་མ་ལུས་པའི་གཞིར་གནས་པར་གསུངས་པའོ། །གསུང་གཅིག་དཀྱིལ་འཁོར་ཡན་ལག་ནི། བསམ་གྱིས་མི་ཁྱབ་ཀུན་ཏུ་ཁྱབ། །སྒྲ་དང་མིང་ཚིག་སོ་སོར་གྲགས། །ཐམས་ཅད་གསུང་གི་ཕྱག་རྒྱའི་མཆོག །ཅེས་བྱ་བ་ནི། ཚིག་གི་གསུངས་སྟེ། དེ་བཞིན་གཤེགས་པའི་དོན་གྱི་གསུང་ཉིད་བརྗོད་བྱ་ཐམས་ཅད་དུ་སྣང་བའི་ཕྱིར། དེ་དག་མཚོན་པར་བྱེད་པའི་ཡན་ལག་ཚིག་གི་གསུང་། གྲངས་ལས་འདས་པར་སྣང་བ་ཐམས་ཅད་ཀྱང་དོན་རེ་མཚོན་པ་ལས་མི་འདའ་བའི་ཕྱིར། དེ་བཞིན་གཤེགས་པའི་གསུང་ཉིད་དོ། །ཞེས་བྱ་བའི་ཐ་ཚིག་གོ། །དེ་ནས་མིང་གསུམ་གྱིས་མཚོན་པའི་རྡོ་རྗེའི་གསུང་གསལ་བར་བསྟན་པའི་ཕྱིར། རྒྱུད་མཆོག་སྒྱུ་འཕྲུལ་དྲྭ་བ་ལས། །བདེ་ལྡན་གསུང་གི་དོན་འབྱུང་བའང་། །ཐམས་ཅད་པདྨའི་ངང་གྱུར་ན། །གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཞེས་བྱ་བ་ལ་སོགས་པ་གསུངས་ཏེ། གསང་བའི་སྙིང་པོ་བདེ་བ་ཆེན་པོའི་གསུང་ནི། འཇིག་རྟེན་དང་འདས་པའི་སྒྲ་ཐམས་ཅད་སེམས་ཉིད་ཁོ་ནའི་ཕྱིར། སོ་སོར་འཛིན་པ་མེད་ན། ཅི་སྣང་ཅི་སྲིད་བརྗོད་ཀྱང་གོས་པ་མེད་པས་ཤིན་ཏུ་ཡངས་པའི་ཕྱིར་བདེ་བ་ཆེན་པོའི་གསུང་ཞེས་བྱ་བའོ། །དེ་ཉིད་ལས་མིང་གཉིས་ཀྱི་དོན་བསྟན་པའི་ཕྱིར། ཐེག་པ་མཐོན་དམན་ཐམས་ཅད་དང་། །ལོག་འགྲོ་མ་ལུས་ཐམས་ཅད་སྐད། །བྱང་ཆུབ་རྡོ་རྗེའི་གསུང་དུ་བསྡུས། །བསྡུས་ཉིད་ཕྱོགས་བཅུར་རྣམ་པར་གྲགས། །གྲགས་ཉིད་མ་ཆགས་ངང་དུ་གསུངས། །གསུངས་པ་ཉིད་ན་བརྗོད་དུ་མེད། །ཅེས་བྱ་བ་ནི། དེ་བཞིན་གཤེགས་པའི་བསྟན་པ་དང་། སེམས་ཅན་གྱི་སྒྲ་རིལ། སེམས་ཉིད་པས་བདག་ཉིད་ཀྱི་གསུང་དུ་གསལ་བ་ནི་མངོན་པར་བྱང་ཆུབ་པའི་གསུང་ཞེས་བྱ་བའོ། །དེ་ཉིད་དུ་གྲགས་སྟོང་གཉིས་སུ་མེད་པས་མཐའ་གཉིས་སུ་མི་ཕྱེད་པའི་ཕྱིར་རྡོ་རྗེའི་གསུང་ཞེས་བྱའོ། །ཚངས་པའི་གསུང་བསྟན་པའི་ཕྱིར། བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་མཇལ། །དཔེར་ན་དེ་བཞིན་སྤྲིད་སངས་བཞིན། །གསུང་གཅིག་སྒྲ་ཡིས་ཐམས་ཅད་གོ། །འདི་ནི་གསུང་མཆོག་རྒྱལ་པོ་ཡིན། །ཐེག་པ་མཐོན་དམན་ཐམས་ཅད་ཀྱང་། །དེ་བཞིན་ཉིད་ལས་མ་གསུངས་ཏེ། །འདུས་བའི་ཐབས་སུ་སོ་སོར་ཐོས། །ཞེས་བྱ་བ་ལ་སོགས་པ་གསུངས་ཏེ། དོན་གྱི་གསུང་ལས་ཚིག་གི་གསུང་རྣམས་གདུལ་བྱ་ལ་སོ་སོར་སྣང་བ་ནི། སྟོན་པས་དེ་བཞིན་ཉིད་འབའ་ཞིག་གསུངས་ན། དེ་ཉིད་ལ་སྒྲའི་བྱེ་བྲག་རིལ་རྫོགས་པའི་ཕྱིར་གདུལ་བྱའི་བསམ་པ་ཇི་ལྟར་སོ་སོར་ཐོས་པ་ནི། དཔེར་ན་བཅོམ་ལྡན་ཤཱཀྱ་ཐུབ་པས་སྤྲིད་པ་སངས་པ་ལྟ་བུ་སྟེ། མདོ་སྡེ་ལས་ཀྱང་། ཀ་དཱིནྱ། ངས་ནི་གཟུགས་ཀྱི་དེ་བཞིན་ཉིད་འབའ་ཞིག་གསུངས་ན། ལ་ལས་ནི་གཟུགས་སྟོང་ཞེས་བྱ་བར་ཐོས་སོ། །ལ་ལས་ནི་གཟུགས་མི་སྟོང་ཞེས་བྱ་བ་ཐོས་སོ། །ལ་ལས་ནི་གཟུགས་བདེ་ཞེས་བྱ་བར་ཐོས་སོ། །ལ་ལས་ནི་གཟུགས་སྡུག་བསྔལ་ཞེས་བྱ་བར་ཐོས་སོ། །ཞེས་བྱ་བ་ལ་སོགས་པར་འབྱུང་བའི་ཕྱིར་རོ། །འོ་ན་སྤྲུལ་པའི་སྐུ་ལྟར་སྐུ་གཞན་ཡང་གསུང་གཅིག་གིས་ངེས་པར་གསུང་ངོ་སྙམ་པ་ལ། ཇི་ལྟར་གསུང་རབ་ཀུན་བརྗོད་ཀྱང་། །དེ་བཞིན་ཉིད་ཀྱིས་གསུངས་པ་མེད། །ཅེས་གསུངས་ཏེ། ལོངས་སྤྱོད་ཀྱིས་སྟོན་པའི་ཆོས་རྣམས་ཀྱང་ཚིག་ཏུ་སྣང་མོད་ཀྱི། དེ་བཞིན་གཤེགས་པས་གསུངས་པ་མེད་པ་ཁོ་ནའོ། །འོ་ན་ཅིའི་ཕྱིར་སྣང་སྙམ་པ་ལ་མིང་གསུམ་པ་ནི་རིག་པའི་གསུང་མངའ་བར་བསྟན་པའི་ཕྱིར། ཡི་གེ་མེད་དང་རིག་པའི་གསུང་། །ལྗགས་ཀྱི་རྩེ་མོར་མ་ཕྱུང་ཡང་། །ཐུགས་རྗེ་གསུང་གི་བྱིན་རླབས་ཀྱིས། །འགྲོ་དོན་སྣ་ཚོགས་སོ་སོར་གསལ། །གསལ་ཉིད་གསུང་གི་རྡོ་རྗེའི་མཆོག །ཅེས་གསུངས་ཏེ། རིག་པའི་གསུང་ནི་རིག་པ་ཁོ་ནའི་ཕྱིར། ཡི་གེ་དང་བྲལ་བ་ཉིད་པས་སྒྲས་བརྗོད་དུ་མེད་པའོ། །ཐུགས་རིག་པ་ཉིད་སྤྲོས་པ་དང་བྲལ་བ་དེ་ཐམས་ཅད་དུ་ཁྱབ་པས་ཆོས་ཐམས་ཅད་དང་སྒྲ་རིལ་བདག་ཉིད་དུ་ལྷུན་གྱིས་གྲུབ་པའི་བྱིན་རླབས་ནི་ཅིར་ཡང་མི་འགགས་པས་གདུལ་བྱའི་བསམ་པ་བཞིན་སོ་སོར་བརྡའ་དུས་གཅིག་ཏུ་སྤྲོད་པར་བྱེད་པ་ནི། དྲུག་པའི་གསུང་དུ་འགྱུར་རོ། །ཞེས་བྱ་བའོ། །དེ་བཞིན་གསུང་གི་འགྲོ་དོན་རྣམས། །དེ་བཞིན་ངང་ལས་མ་གཡོས་ཀྱང་། །དཔེར་ན་བྲག་ཆའི་སྒྲ་བཞིན་ནོ། །ཞེས་བྱ་བ་ནི། བཤད་པ་ཉིད་ཀྱི་ཕྱིར། ཚིག་སོ་སོར་བརྗོད་པ་མེད་བཞིན་དུ་བརྗོད་པར་སྣང་བ་ནི། དཔེར་ན་བྲག་ཆའི་སྒྲ་ནི་རང་གིས་བོས་པ་ལྟར་ཐོས་ཀྱང་བྲག་གིས་སྨྲས་པ་མེད་པ་ལྟ་བུའོ། །གསང་བའི་སྙིང་པོ་དེ་ཁོ་ན་ཉིད་ཅེས་པ་ནི་གོ་སླའོ། །དཀྱིལ་འཁོར་བསྡུས་པ་དང་གསང་སྔགས་ཀྱི་ལེའུ་ཞེས་བྱ་བ་ནི། གསུང་གི་དཀྱིལ་འཁོར་ཇི་སྙེད་པ་ཡང་གསུང་ལྔ་ཁོ་ནར་བསྡུས་པའི་ལྔའི་ངོ་བོ་དང་ལས་དང་གཞལ་ཡས་ཁང་དང་། ལྷ་རྣམས་ཀྱི་སྔགས་ཀྱི་ངོ་བོ་དང་ལས་རྣམས་བཤད་པའི་ལེའུ་སྟེ་བདུན་པའོ།། །།ཕྱག་རྒྱ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པར་གསུངས་ཏེ། ཡན་ལག་ཐམས་ཅད་དཀྱིལ་འཁོར་དུ་ལྷུན་གྱིས་གྲུབ་པར་བྱིན་གྱིས་རློབ་པ་ཞེས་བྱ་བ་ནི། ཡན་ལག་ནི་གཉིས་ཁོ་ན་སྟེ། ལུས་ཀྱི་ཡན་ལག་མགོ་ལ་སོགས་པ་དང་། རྟོག་པའི་ཡན་ལག་ཕུང་པོ་དང་། ཁམས་ལ་སོགས་པའོ། །དེ་དག་རིགས་ལྔ་ལ་སོགས་པའི་དཀྱིལ་འཁོར་དུ་ཡེ་ནས་གནས་པ་ནི་རང་བཞིན་གྱི་ཕྱག་རྒྱ་ཡིན་ཏེ། རྒྱས་པའི་རྒྱུད་ལས། རང་བཞིན་ཕྱག་རྒྱ་ཆེན་པོ་ནི། །ཕྱི་ནང་སྣོད་བཅུད་ཐམས་ཅད་ཀུན། །རིགས་ལྔ་བདེར་གཤེགས་ཡབ་ཡུམ་གྱི། །ཕྱག་རྒྱ་ཆེན་པོའི་ངང་དུ་གནས། །ཞེས་འབྱུང་ངོ་། །དེ་དག་དེ་ལྟར་གང་གིས་ཤེས་པ་ནི་ལྟ་བའི་ཕྱག་རྒྱའོ། །དེ་ལྟར་རིགས་ནས་ཏིང་ངེ་འཛིན་གྱིས་བརྟན་པར་བྱས་པ་ལས་མ་བརྩལ་བར་ཐམས་ཅད་དུ་སྣང་བ་ནི་ལྷུན་གྱིས་གྲུབ་པ་སྟེ། དེ་ལྟར་བསྒོམས་པ་ནི་ཏིང་ངེ་འཛིན་གྱི་ཕྱག་རྒྱ་ཞེས་བྱའོ། །དེ་ལས་ཕྱག་རྒྱ་གསུམ་ཐུན་མོང་དུ་བསྟན་པའི་ཕྱིར། སྒྱུ་འཕྲུལ་དྲྭ་བས་མངོན་རྫོགས་པ། །ཐམས་ཅད་བྱང་ཆུབ་མཆོག་གི་རྒྱ། །ཞེས་གསུངས་ཏེ། རྟོག་ཚོགས་ཐམས་ཅད་སྒྱུ་འཕྲུལ་དྲྭ་བའི་དཀྱིལ་འཁོར་དུ་ཡེ་ནས་གསལ་བར་རྫོགས་པའི་ཕྱིར། ཅི་སྣང་བ་རིལ་དཀྱིལ་འཁོར་གྱི་ངོ་བོ་ཉིད་ལས་འདའ་བ་མེད་པ་ནི། རང་བཞིན་གྱི་ཕྱག་རྒྱའོ། །དེ་ཉིད་རྟོགས་པས་དེ་ལྟར་གྱུར་པ་ནི་ལྟ་བའི་ཕྱག་རྒྱའོ། །དེ་དག་མངོན་དུ་གྱུར་པས་ཐམས་ཅད་རིག་དྲུག་ལ་སོགས་པར་རང་སྣང་བ་ནི་ལྷག་པའི་ཕྱག་རྒྱའོ། །དེ་དག་ནི་ཕྱག་རྒྱའི་མཆོག་ཁོ་ནའོ། །དེ་དག་གཞུང་གང་གིས་སྟོན་སྙམ་པ་ལ། གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །ཞེས་གསུངས་སོ། །ལྷག་པ་ཏིང་ངེ་འཛིན་གྱི་ཕྱག་རྒྱ་འབྱུང་བའི་རྒྱུ་གཉིས་བསྟན་པའི་ཕྱིར། མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ཞེས་གསུངས་ཏེ། ལག་པ་གཡས་གཡོན་ཉིད་རྡོ་རྗེ་དང་རིན་པོ་ཆེའི་རིགས་ཀྱི་རང་བཞིན་ཁོ་ནའི་གུང་མོ་དང་མཛུབ་མོ་དང་མཐེ་བོང་དང་སྲིན་ལག་དང་མཐེའུ་ཆུང་རྣམ་ལ་གཡས་པར་ཉི་མ་གཡོན་པར་ཟླ་བའི་དཀྱིལ་འཁོར་སྲན་མ་ཙམ་བསྒོམས་ལ། གཡས་སུ་ཧཱུྃ་དང་གཡོན་དུ་མཱུཾ་ལ་སོགས་པ་བཀོད་པ་ནི་སོ་སོའི་ཕྱག་རྒྱ་འབྱུང་བའི་རྒྱུ་ཁོ་ནའོ། །དེ་དག་སོར་མོ་ཐད་ཀར་སྦྱར་བ་ནི་དངོས་གྲུབ་བླང་བའི་ཕྱག་རྒྱ་འབྱུང་བའི་རྒྱུ་ཁོ་ནའོ། །ༀ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །ཞེས་བྱ་བ་ནི། དངོས་གྲུབ་བླང་བའི་ཕྱག་རྒྱ་སྟེ། རྒྱུ་དེ་ཉིད་ལས་གཡས་ཀྱི་གུང་མོ་དང་། གཡོན་གྱི་མཛུབ་མོ་སྤྲད་དོ། །གཞན་ཡང་སོ་སོར་སྤྲད་པ་ནི་རིགས་ལྔའི་དངོས་གྲུབ་བླང་བའི་ཕྱག་རྒྱའོ། །དེ་དག་ཀྱང་གདུལ་བྱའི་སྣང་བས་གཉིས་སུ་འགྱུར་ཏེ། སྒྱུ་འཕྲུལ་ཐལ་བའི་རྒྱུད་ལས། མི་བསྐྱོད་རྡོ་རྗེ་རྩེ་ལྔ་པ། །ཉི་ཟླའི་ཐིག་ལེ་ཡི་གེ་དངོས། །རིན་ཆེན་པར་བུའི་ཉི་ལྔ་ཡང་། །ཟླ་བའི་ཐིག་ལེ་ཡི་གེ་ཉིད། །ཐིག་ལེ་ཐབས་ཤེས་ལྔ་གཉིས་རྣམས། །ཕྲད་པའི་དུས་ལས་རང་སྣང་བའི། །ཕྱག་རྒྱ་ཆེན་པོའི་དངོས་གྲུབ་འབྱུང་། །དབྱིངས་དང་ཡེ་ཤེས་བདག་པོ་ཉིད། །ༀ་དང་མཱུཾ་དུ་རང་བཞིན་གནས། །རྭ་དང་འདབ་མའི་ཐིག་ལེ་རྣམས། །རང་གི་གནས་ཀྱིས་བསྣོལ་མར་འགྱུར། །རབ་ཏུའང་འདྲེས་པར་གྱུར་པ་ལས། །རྒྱལ་བའི་ཡེ་ཤེས་བདེ་ཆེན་པོ། །མྱོང་ཕྱིར་ཐོབ་པ་ཞེས་སུ་གསུངས། །ཞེས་འབྱུང་ངོ་། །འབྲུ་བཞི་སྦས་ནས་ཐུགས་ཀར་བཀན། །ཧཱུྃ་བསྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཞེས་བྱ་བ་ལ་སོགས་པས་ལྷག་པ་ཏིང་ངེ་ཛིན་གྱི་ཕྱག་རྒྱ་བསྟན་ཏེ། གཡས་པ་གནོད་སྦྱིན་གྱི་ཁུ་ཚུར་ལས་གུང་མོ་བསྒྲེང་བའི་རྒྱབ་ཐུགས་ཀར་གཏད་ལ་རྩེ་མོའི་ཧཱུྃ་ཉིད་རྡོ་རྗེ་རྩེ་ལྔ་པར་གྱུར་པ་ནི། བཅིང་བ་དང་བསམ་པ་གཉིས་ཀའི་དམ་ཚིག་གི་ཕྱག་རྒྱའོ། །གཡོན་པའི་ཟླ་བའི་ཡི་གེ་རྣམས་བཤད་པའི་ཁུ་ཚུར་དུ་བྱས་པ་དྲིལ་བུ་དང་བཅས་པ་ཡུམ་ལ་འཁྱུད་ནས་དཀུར་བརྟེན་པ་ནི། བཅིང་པ་དང་བསམ་པ་གཉིས་ཀ་ལས་ཀྱི་ཕྱག་རྒྱ་སྟེ། དེས་ཐབས་དང་ཤེས་རབ་འཁྲིལ་བར་སྦྱོར་བ་བྱེད་པའི་ཕྱིར་རོ། །འབྲུ་བཞི་སྦས་ནས་ཐུགས་ཀར་བཀན། །མཱུྃ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཞེས་བྱ་བ་ནི་རྗེས་སུ་མཐུན་ཏེ་གོ་སླའོ། །མཱུཾ་ཉིད་དྲིལ་བུ་སྒྲ་དང་བཅས་པར་གྱུར་པ་ནི། ཡུམ་གྱི་དམ་ཚིག་གི་ཕྱག་རྒྱ་གཉིས་སོ། །གཡས་ཀྱི་སོར་མོ་བསྣོལ་མར་ཡབ་ལ་འཁྱུད་པ་ནི་ལས་ཀྱི་ཕྱག་རྒྱ་གཉིས་སོ། །རིག་བཞིའང་དེ་བཞིན་དུ་ཤེས་པར་བྱའོ། །ཨུཏྤལ་ཀླུ་ཤིང་ལ་སོགས་མཚན། །ཞེས་བྱ་བ་ལ་སོགས་པ་ནི། སེམས་དཔའ་དང་སེམས་མ་དང་སྒོ་བ་ཡབ་ཡུམ་རྣམས་ཀྱི་ཕྱག་རྒྱ་གཉིས་པོ་སྟེ། སོར་མོ་བཞི་བཞི་ལ་ཉི་ཟླའི་སྟེང་དུ་ཡབ་ཡུམ་སོ་སོར་ཡི་གེ་བཞི་བཞི་བཀོད་དེ་བཅའ་ལུགས་དང་ཏིང་ངེ་འཛིན་ནི་རྗེས་སུ་མཐུན་པ་ཁོ་ནའི་ཕྱིར་ན། ལས་ལ་འཁྲིལ་ཞིང་ཆོས་ལ་བརྟེན། །དབུ་རྣམས་འབྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །ཞེས་གསུངས་ཏེ། ཀུན་ཀྱང་འཛུམ་པ་དང་བཅས་པས་ཕན་ཚུན་བལྟ་ཞིང་འཁྱུད་པ་ཁོ་ནའོ། །དེ་དག་ཀྱང་གདུལ་བྱའི་སྣང་བས་གཉིས་སུ་འགྱུར་ཏེ། ཐལ་བའི་རྒྱུད་ལས། ཐིག་ལེ་བཞི་བསྡུས་གཅིག་ཏུ་འགྱུར། །རླུང་གིས་བསྡུས་པ་བཀན་པར་བརྗོད། །ཞལ་གྱི་ལམ་དག་གང་རྒྱས་པ། །ཕྱག་རྒྱ་འབར་བ་ཞེས་པའི་སྒྲ། །ཟླ་བ་ཉི་མས་བསྒྲིབས་པ་ཡི། །ཆུ་སྐྱེས་རབ་ཏུ་རྒྱས་པ་ནི། །དྲིལ་བུ་སྒྲ་དང་ལྡན་པའོ། །ཕྱེད་ཆུད་ཚུལ་གྱིས་གར་སྤྱོད་པ། །ལྟུང་བ་མེད་ཕྱིར་བརྟན་པར་བཤད། །ཟླ་བའི་ཐིག་ལེ་རྗེས་མཐུན་པར། །དྲིལ་བུ་ཕྱེད་ཀྱིས་འབྱོར་དགྱེས་པ། །མཐའ་གཉིས་གནོན་པའི་བྱང་ཆུབ་སེམས། །ཕྱག་རྒྱ་ཆེན་པོར་འདི་བརྗོད་དོ། །ཞེས་འབྱུང་ངོ་། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཡིན་ནོ། །ཞེས་བྱ་བ་ནི་ལེའུ་དྲུག་པར་བཤད་ཟིན་ཏོ། །དེ་དག་གཞན་ཀུན་ལྟར་ཕན་ཚུན་འཁྱུད་པར་མ་གསུངས་པའི་ཕྱིར་རོ། །ཡུམ་ནི་དམིགས་མེད་ཅེས་གསུངས་སོ། །འོ་ན་རྒྱུད་འདིའི་གཞུང་དུ་མི་འགྱུར་རོ་སྙམ་པ་ལ། ཆོས་ཀྱི་དབྱིངས་ཞེས་གསུངས་ཏེ། གང་ཡང་རང་བཞིན་མ་སྐྱེས་པ་ཉིད་དབྱིངས་ཁོ་ན་སྟེ། ཡུམ་ཉིད་པས་གང་དུ་ཡང་བྲལ་བ་མེད་པའི་ཕྱིར། སྣང་བ་མི་འགོག་ཐབས་ཡིན་ཏེ། །རང་བཞིན་མེད་པས་ཤེས་རབ་ཡིན། །ཞེའོ། །ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་འགྱུར་མཉམ་རྫོགས་པདྨ་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །ཅེས་བྱ་བ་ནི། ཀུན་ཏུ་བཟང་པོ་ནི་མཉམ་པ་ལས་སོར་མོ་ཀུན་ཏུ་འོད་འཕྲོས་པའོ། །ཡུམ་གྱི་ཕྱག་རྒྱ་མ་ངེས་ཏེ། མཉམ་པ་ལས་མཐེ་བོང་རྩེ་སྤྲད་དེ་པདྨོ་ལྟར་བྱས་པ་དང་། གཉིས་ནི་གོ་སླའོ། །དེ་ལས་ཆོས་ཁམས་དྲིལ་བུ་ཐུགས་ཀར་བརྟེན་ཞེས་ཀྱང་ཟེར་ཏེ། ཆོས་ཉིད་ཅིར་ཡང་སྣང་བའི་ཕྱིར་མ་ངེས་པའོ། །ལྟ་བའི་ཕྱག་རྒྱ་བསྟན་པའི་ཕྱིར། །ཕྱག་རྒྱ་ཆེན་པོའི་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཞེས་གསུངས་ཏེ། ཕུང་པོ་ལ་སོགས་པ་རིལ་ལྷ་ཡབ་ཡུམ་གྱི་སྐུ་གསུང་ཐུགས་ཀྱི་ཕྱག་རྒྱ་ཡིན་པ་སྟེ། སྣང་ལ་མི་འཛིན་པར་གསལ་བའི་དུས་ན། སྒོ་གསུམ་གྱིས་ཅི་བྱས་པ་དང་། མ་བྱས་པ་ཀུན་སྐུ་གསུང་ཐུགས་ལས་འདའ་བ་མེད་པར་གནས་པ་ནི་ཕྱག་རྒྱའི་མཆོག་གོ། །ཡན་ལག་བཞི་བཅུ་རྩ་གཉིས་ལྡན། །ཞེས་བྱ་བ་ལ་སོགས་པ་ནི། ཡན་ལག་གཉིས་པ་བྱིན་གྱིས་རློབ་པ་སྟོན་ཏེ། བདག་ཏུ་ལྟ་བའི་ཡན་ལག་རྟོག་པ་རྣམས་ཟུང་ཅིག་ལ་ཡང་བཞི་བཅུ་གཉིས་གཉིས་ཡོད་པའི་ཕྱིར། མི་བསྐྱོད་པ་ཡབ་ཡུམ་གྱི་རྟོག་པའི་གནས་སུ་ཡབ་ལ་ཡབ་རྣམས་དང་། ཡུམ་ལ་ཡུམ་རྣམས་དང་ཡབ་ལ་ཐུབ་པ་རྣམས་གསལ་བར་བཀོད་དེ་བསྒོམ་པ་ནི་ལྡན་པ་ཞེས་བྱ་བ་སྟེ་དེ་ནི་ཐབས་ཁོ་ནའོ། །དེ་ཉིད་ཡན་ལག་སྤྲོས་བདག་སྟེ། །ཞེས་བྱ་བ་ནི། ཡབ་ལག་བཞི་བཅུ་པོ་དེ་དག་ཉིད་ཁོ་ན་དང་མཚུངས་པའི་ཡེ་ཤེས་སེམས་དཔའ་རེ་རེ་སྙིང་ལ་ངེས་པར་གནས་ཏེ་ཤེས་རབ་བོ། །བདག་སྟེ་ཞེས་བྱ་བ་ནི་བཤད་པའི་ལྷ་རྣམས་དང་། འཆད་པའི་རྡོ་རྗེ་གསུམ་གྱི་ལྷ་རྣམས་ལ་རིགས་ཀྱི་བདག་ཉིད་ལྔ་ལྔས་དབང་བསྐུར་བས་བདག་པོའི་རིག་སོ་སོར་མཚོན་པ་ཁོ་ནའོ། །དེ་དག་ནི་ཡེ་ཤེས་ཀྱི་དཀྱིལ་འཁོར་སྟོང་ཁོ་ནའོ། །བཞི་བཅུ་རྩ་གཉིས་གསུམ་འཕྲོར་འགྱུར། །ཞེས་བྱ་བ་ནི། བཀོད་པ་བཞི་བཅུ་རྩ་གཉིས་ལ། རྡོ་རྗེ་གསུམ་གསུམ་འཕྲོ་བའོ། །དེ་ལྟར་ལྡན་པའི་གཙོ་མཆོག་གིས། །ཞེས་བྱ་བ་ནི། གཙོ་བོ་ཡབ་ཡུམ་ལ་ཡེ་ཤེས་ཀྱི་དཀྱིལ་འཁོར་སྟོང་། ཐབས་དང་ཤེས་རབ་བརྒྱད་ཅུ། མི་ཟད་པ་རྒྱན་གྱི་འཁོར་ལོའི་ལྷ་བརྒྱ་ཉི་ཤུ་དེ་དག་མངོན་དུ་གསལ་བ་ནི་རྣལ་འབྱོར་གྱི་མཆོག་གོ། །དེ་ལས་གཞན་ཡང་བསྒོམ་པའི་ཕྱིར། །རྒྱལ་བ་རྒྱལ་མཆོག་དེ་བཞིན་དུ། །ཞེས་གསུངས་ཏེ། རྒྱལ་བ་རིགས་བཞིའོ། །ཀུན་ཏུ་བཟང་པོ་ནི་རིགས་ཀྱི་བདག་པོའི་ཕྱིར་མཆོག་སྟེ། ཡབ་ཡུམ་བཅུ་ལའང་དེ་བཞིན་བསྒོམ་མོ། །ཞེས་བྱ་བའོ། །བཅུ་གཉིས་དྲུག་གི་འོད་འཕྲོ་འབར། །ཞེས་བྱ་བ་ནི། ཡབ་ཡུམ་བཅུ་གཉིས་ཕྲག་གཉིས་ཀྱི་སེམས་དཔའ་དང་སྒོ་བ་རྣམས་ལའང་དེ་ལྟར་གསལ་ལ་ཐུབ་དྲུག་རེ་རེ་ལ་ཡང་དེ་ལྟར་གསལ་བ་ནི་སྣང་བ་རྣམ་པར་འབྱེད་པའི་ཏིང་ངེ་འཛིན་ཞེས་བྱའོ། །དེ་ལ་སོགས་ཏེ་བསམ་མི་ཁྱབ། །ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཞེས་བྱ་བ་ནི། དེ་དག་ལས་སུ་རུང་ནས་དངོས་པོ་རིལ་དཀྱིལ་འཁོར་དུ་མ་གྱུར་པ་མེད་པ་དེས་གདུལ་བྱ་མ་ལུས་པའི་རེ་བ་སྐོང་བར་བྱེད་པའོ། །འོ་ན་གཞི་དེའི་ཕྱིར་དཀྱིལ་འཁོར་ཁོ་ནས་དོན་བྱེད་དོ་སྙམ་པ་ལ། ཐེག་པ་མཐོན་དམན་ཐམས་ཅད་དང་། །ཕྱིན་ཅི་ལོག་རྣམས་བསམ་ཡས་དང་། །ཞི་ཁྲོའི་ཚོགས་ཆེན་ཐམས་ཅད་ལ། །སོ་སོར་མཐུན་བྱས་ཀུན་ཏུ་སྣང་། །ཞེས་གསུངས་ཏེ། རྟག་ཆད་ལ་སོགས་པ་སོ་སོར་སྟོན་པ་རྣམས་དང་ལྷ་རྣམས་དང་བདུད་དང་སྲིན་པོ་ལ་སོགས་པ་གང་ལ་མོས་པ་ལྟར་སྣང་བས་གཅིག་ཏུ་མ་ངེས་པའི་ཕྱིར། ས་གསུམ་ཐམས་ཅད་ཀུན་ཏུ་ནི། །སེམས་དཔའ་ཆེན་པོ་སྟོན་བྱེད་པ། །རེས་འགའ་བྱང་ཆུབ་རེས་འགའ་ལྷུམས། །རེས་འགའ་ཞི་ལ་རེས་འགའ་དྲག །རེས་འགའ་གདོན་ཆེན་བགེགས་མཛད་དེ། །དེ་ལ་སོགས་པ་མཐའ་ཡས་མཆོག །རི་དང་སྐྱེ་བོ་ཐམས་ཅད་དོ། །ཞེས་འབྱུང་ངོ་། །དེ་དག་ཀྱང་རྩོལ་བས་བྱེད་པ་མ་ཡིན་ཏེ། །ལྷུན་གྱིས་གྲུབ་པ་ཉིད་ཀུན་ཏུ་སྣང་བའི་ཕྱིར། དཔེར་ན་གར་མཁན་ཉིད་འདྲ་བ། །ལུས་ལས་མ་བཀོད་སྣ་ཚོགས་སྟོན། །ཞེས་གསུངས་སོ། །ཕྱག་རྒྱའི་རྣམ་གྲངས་བསྟན་པའི་ཕྱིར། མདོར་ན་ཕྱག་རྒྱ་ཐམས་ཅད་ནི། །འདི་ཞེས་གཅིག་ཅེས་བརྗོད་དུ་མེད། །གཉིས་དང་གསུམ་དུ་རྣམ་པར་འཕྲོ། །བསྐྱོད་དང་སྤྲོ་བའང་དེ་བཞིན་ཉིད། །ཅེས་བྱ་བ་ནི། ཕྱག་རྒྱ་རིལ་ཚིག་གིས་མདོར་བསྡུ་ན། ལུས་ཀྱི་ཡན་ལག་གི་ཕྱག་རྒྱ་བསྐྱོད་པ་ཀུན་ཡང་བྱ་བ་མོ་ཡི་ཕྱག་རྒྱ་ལྟར་གཅིག་ཏུ་ངེས་པ་མེད་དེ། ཞབས་གཉིས་དབུ་ཕྱག་གསུམ་སྟེ། ལྔ་ལ་ཏིང་ངེ་འཛིན་གྱི་ཕྱག་རྒྱ་ལྔ་བཅུར་ཡང་འགྱུར་རོ། །རྟོག་པའི་ཡན་ལག་སྤྲོ་བའི་ཕྱག་རྒྱ་ལ་ཡང་སྐུ་གསུང་ཐུགས་གསུམ་དང་ཐབས་དང་ཤེས་རབ་བརྒྱད་ཅུ་དང་། ཡེ་ཤེས་ཀྱི་ཕྱག་རྒྱ་སྟོང་ལ་སོགས་པར་འཕྲོ་བས་ཕྱག་རྒྱའི་གྲངས་ནི་མ་ངེས་པ་ཁོ་ནའོ་ཞེས་བྱའོ། །མདོར་ན་བསྒུལ་བསྐྱོད་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །གནས་ཉིད་མི་གནས་གནས་པའང་མིན། །དེ་སྐད་དག་མཆོག་ཉིད་ཀྱིས་བཤད། །ཅེས་བྱ་བ་ནི། གྲངས་དེ་ལྟ་བུས་མཚོན་ནས་ཕྱག་རྒྱ་བརྗོད་ཀྱིས་མི་ལང་བ་རྣམས་ཀྱང་ཚིག་གིས་མདོར་བསྡུ་ན། རང་བཞིན་གྱི་ཕྱག་རྒྱ་ལྟ་བའི་ཕྱག་རྒྱས་མངོན་དུ་བྱས། ལྷག་པ་ཏིང་ངེ་འཛིན་གྱི་ཕྱག་རྒྱ་གསལ་བར་བསྒོམ་པའི་དུས་ན། ཅིར་སྣང་ཅི་བྱས་པ་ཐམས་ཅད་བདག་ཉིད་ཆེན་པོའི་སྐུ་གསུང་ཐུགས་ཁོ་ན་ལས་མི་འདའ་བར་གནས་ལ། དེ་ཙམ་དུ་ཡང་བློས་འཛིན་པ་མེད་པར་གནས་ན། ཕྱག་རྒྱ་ལྷུན་གྱིས་གྲུབ་པར་བྱིན་གྱིས་བརླབས་པ་ཞེས་བྱ་བ་ཁོ་ནའོ། །ཞེས་གསུངས་སོ། །དེ་དག་ཉིད་ཁོ་ནའི་ཕྱིར། ཡན་ལག་ཐམས་ཅད་དཀྱིལ་འཁོར་དུ་བྱིན་གྱིས་བརླབས་ནས་ཕྱག་རྒྱ་སྤྲོས་པ་ཞེས་གསུངས་པའོ། །ལེའུ་བརྒྱད་པ་མདོར་བཤད་པའོ།། །།དེའི་རྗེས་སུ་ལྷག་པ་གཟུགས་བརྙན་གྱི་དཀྱིལ་འཁོར་རྒྱས་པར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དགྱེས་པ་ཆེན་པོའི་ཞེས་བྱ་བ་ནི། ཐུན་མོང་གི་དགའ་བ་དང་། འཇིག་རྟེན་པའི་དགའ་བ་དང་། དགའ་བའི་དགའ་བ་དག་སྟེ། དེ་དག་ནི་འདོད་པ་ཉེ་བར་སྤྱོད་པ་དང་། བསམ་གཏན་བཞི་དང་། མཐོང་ལམ་པ་རྣམས་ཀྱི་ཕྱིར་སྨོས་པ་སྟེ། དེ་བཞིན་གཤེགས་པའི་བསམ་གྱིས་མི་ཁྱབ་པའི་དགྱེས་པ་ནི་ལྟོས་པ་ཙམ་མ་ཡིན་གྱི་ངོ་བོས་ཀྱང་ཆེ་བ་སྟེ། མཚན་དོན་གྱི་སྐབས་ལས་བརྟགས་པའོ། །རྡོ་རྗེ་གསང་བའི་དམ་ཚིག་བཀོད་པ་ཞེས་བྱ་བ་ནི། རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་སྐུ་གསུང་ཐུགས་ཀྱི་ཕྱག་རྒྱ་ཐམས་ཅད་ཡེ་ཤེས་རྡོ་རྗེའི་ངོ་བོར་ལྷུན་གྱིས་གྲུབ་པ་དེ་ཕལ་གྱི་ཡུལ་དུ་མ་གྱུར་པས་དེ་མཚོན་ཅིང་སྦྱོར་བ་ལས་མི་འདའ་བ་ནི་ལྷག་པ་གཟུགས་བརྙན་གྱི་དཀྱིལ་འཁོར་ཏེ། དེ་དག་གི་ལས་ཀྱི་རིམ་པ་དང་། ཚད་དང་། ངོ་བོ་དང་། འཇུག་པ་དང་། ཞུགས་ནས་བསྒྲུབ་པ་དང་། འབྲས་བུའི་བར་རྣམས་གསལ་བར་སྟོན་པ་ནི་རྒྱུར་ཉེ་བར་གནས་པ་ཁོ་ནའོ། །གཞན་དོན་ཉེ་བར་སྟོན་པའི་ལེའུ་འདི་ཡང་རྒྱུད་ཀྱིི་རིམ་པ་རིང་དུ་སྤངས་ནས་མན་ངག་གི་རིམ་པ་ལ་འཇུག་པར་བྱ་བ་སྟེ། ཤིན་ཏུ་ཕྲ་བའི་དམ་ཚིག་མཆོག །ཅེས་བྱ་བ་ནི། ཉེ་བར་སྟོན་པ་ཉིད་ཀྱང་ཤིན་ཏུ་ཕྲ་བའི་དཀྱིལ་འཁོར་རོ། །འོག་ནས། ཤིན་ཏུ་ཕྲ་ལ་སྦྱངས་པ་ཡིས། །བསམ་ཡས་དག་ལའང་དེ་བཞིན་བྱ། །ཞེས་པའི་ཕྱིར། འདི་ནི་ཟུར་གཉིས་པ་ཁོ་ན་སྟེ། གཞན་དོན་ཉེ་བར་བྱེད་པའི་བླ་མས་ཏིང་ངེ་འཛིན་རྣམ་པ་གསུམ་ལ་བློ་སྦྱངས་ཏེ་རྒྱས་པ་ལས་འབྱུང་བའི་ཕྲ་བའི་དཀྱིལ་འཁོར་ལ་གོམས་ནས་བཟླས་པ་རྫོགས་པ་བྱ་བ་ལས་མི་འདའ་བ་ཁོ་ནའོ། །ཞེས་བྱ་བའོ། །དེ་ནས་གནས་བཟང་པོ་རུ། སའི་ཆོ་ག་བྱ་བའི་ཕྱིར། ཡང་ན་ས་གཞི་རབ་མཉམ་ལ། །ཞེས་གསུངས་སོ། །ས་བཙལ་བ་དང་། བསླང་བ་དང་། བརྟག་པ་དང་། སྦྱང་བ་དང་། བསྲུང་བ་རྣམས་མངོན་པར་རྟོགས་པ་ནས་འབྱུང་བ་ལྟར་སྦྱར་བར་བྱའོ། །དེ་ནས་དཀྱིལ་འཁོར་རྒྱས་འབྲིང་གི་ཚད་བསྟན་པའི་ཕྱིར། དཀྱིལ་འཁོར་ཁྲུ་གང་ཚད་དུ་བྱ། །ཡང་ན་ལུས་གང་ཚད་དུ་སྟེ། །ཡང་ན་ལུས་ནི་གསུམ་གྱི་ཚད། །ཅེས་གསུངས་ཏེ། སྒྱུ་འཕྲུལ་བསྡུས་པའི་དཀྱིལ་འཁོར་ནི་སྟངས་དཔྱལ་གཉིས་པ་སྟེ། དེ་ལ་ཁྲུ་གང་ངམ་བཞི་པར་བྱ་སྟེ། གཉིས་པ་ནི་བཟོའི་སྦྱོར་བའི་ཕྱིར་རོ། །འབྲིང་གི་དཀྱིལ་འཁོར་ནི་བཞི་བཅུ་རྩ་གཉིས་ཏེ། དེ་ལ་ལུས་གསུམ་པ་ཁྲུ་བཅུ་གཉིས་སམ་གཞན་ཡང་། ཡང་ན་ཁྲུ་ནི་བཅུ་དྲུག་དང་། །ཞེས་བྱ་བ་དང་། གཉིས་སོ། །ཉི་ཤུའམ་ཉི་ཤུ་རྩ་ལྔར་བྱ། །ཞེས་བྱ་བ་ནི། རྒྱས་པའི་དཀྱིལ་འཁོར་གྱི་ཚད་གཉིས་སོ། །དེ་དག་ལས་ལྷག་པ་ཏིང་ངེ་འཛིན་གྱི་གཟུགས་བརྙན་བསྟན་པ འི་ཕྱིར། ཡང་ན་རྒྱང་གྲགས་དཔག་ཚད་དམ། །ནམ་མཁའི་དབྱིངས་ནི་བསམ་ཡས་པར། །སངས་རྒྱས་དཀྱིལ་འཁོར་སྣ་ཚོགས་བསྒོམ། །ཞེས་གསུངས་ཏེ། དེ་ཡང་སྒྱུ་འཕྲུལ་རྡོ་རྗེ་ལས། སློབ་དཔོན་མཐར་ཉེའི་ལམ་གནས་པས། །རྒྱང་གྲགས་དཔག་ཚད་ལ་སོགས་པར། །རྡོ་རྗེའི་ཐིག་ཚད་དོར་ཙམ་གྱིས། །ཕྱག་རྒྱའི་དཀྱིལ་འཁོར་གསལ་ལྡན་པ། །དཀྱིལ་འཁོར་སྣ་ཚོགས་མཆོག་ཏུ་གསུངས། །ཞེས་འབྱུང་བ་ནི་མཆོག་གི་ཡང་མཆོག་གི་དཀྱིལ་འཁོར་ཏེ། སློབ་བུ་ལས་དག་པ་རྣམས་ཀྱི་ཕྱིར་རོ། །དེ་དག་གང་བྱེད་ཀྱང་ལས་དང་བྱ་བས་སྦྱངས་ནས་ས་བསྲུང་བ་ལ་སྦྱར་བའི་ཕྱིར། འབྲུ་ལྔ་སྤོས་ལྔ་རིན་ཆེན་ལྔ། །སྙིང་པོ་ལྔ་དང་སྨན་ལྔ་དང་། །བདུད་རྩི་ལྔ་ནི་རབ་མཉམ་ལ། །རིག་པས་ཐིག་ནི་གདབ་པར་བྱ། །ཞེས་གསུངས་ཏེ། ཕུང་པོ་ལྔ་དག་པ་སྐུ་ལྔ་ཐོབ་པར་བྱ་བའི་ཕྱིར་འབྲུ་ལྔ་དང་། དབང་པོ་ལྔ་དག་པ་ཕྲིན་ལས་ལྔ་ཐོབ་པར་བྱ་བའི་ཕྱིར་སྤོས་ལྔ་དང་། ཡུལ་ལྔ་དག་པ་ཡོན་ཏན་ལྔ་ཐོབ་པར་བྱ་བའི་ཕྱིར་རིན་པོ་ཆེ་ལྔ་དང་། རྣམ་ཤེས་ལྔ་དག་པས་ཡེ་ཤེས་ལྔ་ཐོབ་པར་བྱ་བའི་ཕྱིར་སྙིང་པོ་དང་། འདོད་ཡོན་ལྔ་དག་པ་གསུང་ལྔ་ཐོབ་བར་བྱ་བའི་ཕྱིར་སྨན་ལྔ་དང་། ཁམས་ལྔ་དག་པ་རིགས་ལྔ་ཐོབ་པར་བྱ་བའི་ཕྱིར་བདུད་རྩི་ལྔ་སྟེ། དེ་དག་ཆ་མཉམ་པའི་འཇིམ་པའི་ལྡེ་གུ་གླང་ཀོ་ཙམ་དུ་བྱུགས་ལ། དེར་ས་བསྲུང་བ་བྱའོ། །དེ་ནས་རིག་པ་མ་ཡེངས་པས་ཐིག་གདབ་པར་བྱ་སྟེ། དེའི་ཕྱིར། ཕུར་བུ་སྲད་བུ་ཚོན་ཕྱེ་དང་། །གོས་རྒྱན་མཛེས་པ་ཡིད་འོང་གྲོགས། །ཐིག་གདབ་ཆོ་ག་ཕུན་སུམ་ཚོགས། །མཁས་ལྡན་ཆེན་པོས་བསྒྲིམས་ཏེ་བྱ། །ཞེས་བྱ་བ་གསུངས་ཏེ། རྒྱུ་པདྨའི་རྒྱུས་པའམ་རས་ལས་མཚན་ལྡན་བཅུ་དྲུག་མས་བཀལ་བའི་སྐུད་པ་ཁ་དོག་གསུམ་ལ་དགུ་བསྒྲིག་དམ་ཚིག་གི་ཐིག་སྟེ། རིང་ཐུང་མཎྜལ་འཁོར་ཁྱུད་ཙམ་པ་སྟེ། སྐུ་གསུང་ཐུགས་ཀྱི་བྱེ་བྲག་ཏུ་བྱིན་གྱིས་བརླབས་པ་ཐོགས་ཏེ། བཅུ་དྲུག་མ་རྒྱན་གྱི་མཛེས་པ་དང་། གཉིས་ཀྱིས་དྲངས་ཏེ། རྟ་བབས་བརྒྱད་ཀྱི་མཛེས་པར་གདབ་བོ། །དེ་ནས་ཡེ་ཤེས་ཀྱི་ཐིག །ཁ་དོག་སྣ་ལྔ་ལ་རེ་རེ་ཡང་ལྔ་ལྔའོ། །ཡེ་ཤེས་ཉི་ཤུ་རྩ་ལྔར་བྱིན་གྱིས་བརླབས་པ་སྟེ། ཡབ་ཡུམ་གཉིས་ཀྱི་ཕྱག་རྒྱར་གསལ་བའི་བྱང་ཆུབ་སེམས་ཡེ་ཤེས་སུ་དྲངས་པས་བཏབ་པས་དམ་ཚིག་གི་ཐིག་ཐམས་ཅད་སྐུ་གསུང་ཐུགས་གཅིག་ཀྱང་ཡེ་ཤེས་ལྔ་ལྔར་གསལ་བས་སྐུ་དང་ཡེ་ཤེས་ཀྱི་གཞལ་ཡས་སུ་གསལ་བ་ཁོ་ནའོ། །དེ་ནས་ས་བཟུང་བའི་ཆོ་ག་བྱས་ནས། སྐུད་པ་དང་རྡུལ་ཚོན་ཇི་ལྟར་བྱིན་གྱིས་བརླབ་སྙམ་པ་ལ། རིགས་ཀྱི་དཀྱིལ་འཁོར་ལྔ་རྣམས་བསྒོམ། །ཞེས་གསུངས་ཏེ། ཚོན་སྣ་རེ་རེ་ཡང་ཡི་གེ་འབྲུ་ལྔ་རེ་རེ་ཡང་ཁ་དོག་ནང་རིས་སུ་ལྔ་ལྔ་སྟེ། ཉི་ཤུ་རྩ་ལྔ་འཕྲོས་འདུས་པ་ལས་ཡེ་ཤེས་ཉི་ཤུ་རྩ་ལྔ་དྲངས་ཤིང་བསྟིམས་ནས་ཡེ་ཤེས་ཀྱི་རིན་པོ་ཆེ་ཉི་ཤུ་རྩ་ལྔ་ཁོ་ནར་གྱུར་པར་བྱའོ། །དེ་ལྟར་ཚོན་ཉི་ཤུ་རྩ་ལྔའི་དགོས་པ་ཅི་སྙམ་པ་ལ། མ་མཐོང་རྨོངས་ལ་བསྟན་ཕྱིར་མཚོན། །ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །འདུལ་བའི་ཆོ་ག་བཞིན་དུ་དགྱེ། །ཞེས་གསུངས་ཏེ། སེམས་ཉིད་ཡེ་ཤེས་ཉི་ཤུ་རྩ་ལྔར་གདོད་ནས་གནས་པ་དེ་མཚོན་པར་བྱ་བའི་ཕྱིར། རྒྱས་པའི་རྒྱུད་ལས། སེམས་ཅན་མ་ལུས་ཐམས་ཅད་ལ། །ཡེ་ཤེས་ལྔ་ཡིས་ཀུན་ཁྱབ་ཀྱང་། །རང་གི་རྣམ་རྟོག་བསྒྲིབས་བྱས་ནས། །ཡེ་ཤེས་ལྔ་ཡི་དོན་མ་མཐོང་། །དེ་ལྟར་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོར་བསྟན། །ཞེས་གསུངས་སོ། །དེ་ལྟ་བུའི་བྲི་བ་ཡང་རྒྱས་འབྲིང་བསྡུས་པ་གསུམ་ནི་སློབ་བུ་གང་ལ་དད་པ་བཞིན་བྲི་བའོ་ཞེས་བྱའོ། །དེ་དག་གི་དབྱིབས་ཇི་ལྟར་བྲི་སྙམ་པ་ལས། ལྟེ་བ་རྩིབས་དང་ལྡན་པ་ཡི། །རྩིབས་བཞི་འཁོར་ལོ་མྱུ་ཁྱུད་བཅས། །གྲུ་ཆད་བཞི་དང་གྲུ་བཞི་པ། །བར་ཁྱམས་སྒོ་ཁྱུད་ལྡན་པར་བྱ། །ཞེས་གསུངས་པ་གོ་སླ་སྟེ། རྒྱས་པ་ལ་ནི། གཞི་ཚད་མེད་པའི་འཁོར་ལོའི་སྟེང་དུ་འཁོར་ལོ་ལྔ་སྟེ། འཁོར་ལོ་དྲུག་པའོ། །འབྲིང་པོ་ནི་དཀྱུས་བཞིན་ཏེ་གྲུ་ཆད་ལ་སོགས་པ་ནི་གཉི་ག་ལ་མཐུན་ནོ། །བསྡུས་པ་ནི་བར་ཁྱམས་སྤངས་པ་སྟེ། རྟ་བབས་བརྒྱད་ནི་ཐམས་ཅད་ལ་ཡང་བྲི་བར་བྱའོ། །དེ་དག་ཏུ་ལྷ་རྣམས་ཇི་ལྟར་དགོད་སྙམ་པ་ལ། སྐུ་གསུང་ཐུགས་ལྡན་གཟུགས་ཀྱང་དགོད། །ཅེས་གསུངས་ཏེ། ཁྲུ་གང་ལ་སོགས་པ་ལ་ཙཀླི་དགོད་པ་ནི་སྐུའི་དཀྱིལ་འཁོར་རོ། །སྙིང་པོའམ་ཏ་ཐཱ་སོགས་བཀོད་པ་ནི་གསུང་གི་དཀྱིལ་འཁོར་རོ། །ཕྱག་རྒྱ་བཀོད་པ་ནི་ཐུགས་ཀྱི་དཀྱིལ་འཁོར་རོ། །དེ་དག་གི་རྒྱན་ཇི་ལྟར་བྲི་སྙམ་པ་ལ། བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་བཏུང་དང་བྲོ་བས་བསྐོར། །ཞེས་གསུངས་ཏེ། ཁ་དོག་སྣ་ཚོགས་བྲིས་པའི་རས་ཀྱི་བླ་འཕན་ལ་སོགས་པ་དང་། རིན་པོ་ཆེའི་ཕྲེང་བ་སྣ་ཚོགས་དང་། ཆུན་འབྱང་དང་རོལ་མོ་སྣ་ཚོགས་དང་། བཟའ་བཏུང་སྣ་ཚོགས་ཀྱིས་བསྐོར་རོ་ཞེས་གསུངས་སོ། །དེ་དག་གི་རབ་གནས་བསྟན་པའི་ཕྱིར། ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པ། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཞེས་གསུངས་ཏེ་གཟུགས་བརྙན་གསུམ་གྱི་ཕྱག་རྒྱ་དང་། གཞལ་ཡས་ཁང་གིས་མཚོན་པའི་ཆོས་ཐམས་ཅད། སེམས་ཉིད་ལས་དངོས་པོ་གཞན་མེད་པའི་ཕྱིར། ཅིར་སྣང་ཡང་མིག་ཡོར་ལྟ་བུར་རང་གི་ངོ་བོ་ཉིད་མེད་ལ་སེམས་ཉིད་ཇི་ལྟ་བུའི་ངོ་བོར་ཡང་དམིགས་སུ་མེད་པ་ནམ་མཁའ་ལྟ་བུའི་ཕྱིར་བློ་ཡང་ནམ་མཁའ་ལྟར་མི་དམིགས་པར་རང་གསལ་བར་འདུག་གོ། །དེ་ལ་ཤུ་ནྱ་ཏཱ་ཞེས་བྱ་བའི་སྔགས་ཀྱི་ང་རྒྱལ་བྱའོ། །དེ་ལས་རོལ་མོ་ལྟ་བུའི་ཏིང་ངེ་འཛིན་གྱིས་སྣ་ཚོགས་སུ་བསྐྱེད་པར་བསྟན་པའི་ཕྱིར། ཏིང་འཛིན་རོལ་མོ་མཐའ་ཡས་མཆོག །ཡི་གེའམ་གདན་ནམ་སྙིང་པོའམ། །ཕྱག་རྒྱའམ་སྐུ་གསུང་ཐུགས་ལྡན་པར། །བྱིན་བརླབས་ཡ་མཚན་རྨད་པོ་ཆེ། །འགྲུབ་འགྱུར་སངས་རྒྱས་ཀུན་གྱི་དམ། །ཞེས་གསུངས་ཏེ། དཔེར་ན་རོལ་མོ་ནི་གཞི་མ་ངེས་པ་ལ་ལས་ཐབས་ཀྱིས་དྲངས་ནས་སྣ་ཚོགས་སུ་སྣང་བ་བཞིན་དུ། བཤད་པའི་མི་རྟོག་པའི་ཡེ་ཤེས་ལས། ཡེ་ཤེས་སྐད་ཅིག་མའི་ཏིང་ངེ་འཛིན་གྱིས་རང་དབང་སྒྱུར་ནས་འབྱུང་བའི་དཀྱིལ་འཁོར་དང་བཅས་པའི་གཞལ་ཡས་ཁང་གདན་དང་བཅས་པར་རང་སྣང་ལ། དེ་དག་ཏུ་སྔར་བཀོད་པའི་ཧཱུྃ་མཱུྃ་ལ་སོགས་པའི་སྙིང་པོའམ་ཏ་ཐཱ་ལ་སོགས་པའི་གསུང་གི་དཀྱིལ་འཁོར་དང་གདན་ལ་ཙཀླི་བཀོད་པ་ནི་སྐུའི་དཀྱིལ་འཁོར་དང་ཕྱག་རྒྱ་ཐུགས་ཀྱི་དཀྱིལ་འཁོར་གང་ཡིན་ཡང་། དེ་ཉིད་སྐུ་གསུང་ཐུགས་གསུམ་གསུམ་དང་ལྡན་པའི་ལྷར་བྱིན་གྱིས་བརླབས་ནས། ལྷུན་གྱིས་གྲུབ་པའི་དཀྱིལ་འཁོར་ཡང་དྲངས་ཏེ། བསྟིམས་ནས་འདོད་པ་ཡོངས་སུ་གྲུབ་པར་གྱུར་ཏེ། རང་བཞིན་གཉིས་དང་ཏིང་ངེ་འཛིན་དང་གསུམ་ཚོགས་པའི་ཕྱིར་རོ། །འོ་ན་གཞན་དུ་ཚོལ་ལམ་སྙམ་པ་ལ། ས་ལ་སོགས་པ་ཕྱག་རྒྱར་བྱས། །རྣམ་གྲོལ་རིམ་པར་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཞེས་གསུངས་ཏེ། འབྱུང་བ་དང་དེ་ལས་གྱུར་པ་ལ། སྐུ་གསུང་ཐུགས་ཀྱི་ཕྱག་རྒྱའི་དབྱིབས་བྱས་པ་ཙམ་གྱི་ཀྱང་། རྒྱུ་དང་སེམས་ཀྱི་རིམ་པས་སྡུག་བསྔལ་ལས་རིམ་པར་གྲོལ་བར་འགྱུར་ན་སྟོང་པ་ཉིད་དང་། རོལ་མོ་ལྟ་བུའི་ཏིང་ངེ་འཛིན་གཉིས་ཀྱིས་ལྷར་སྦྱངས་ཏེ། བྱིན་གྱིས་བརླབས་ཀྱང་འདུས་པ་དེ་ནི་དེ་བཞིན་གཤེགས་པའི་སྐུ་གསུང་ཐུགས་ཀྱི་དཀྱིལ་འཁོར་ཁོ་ནའོ། །དེའི་བྱིན་བརླབས་གཞུག་པའི་རབ་ཏུ་གནས་པ་བསྟན་པའི་ཕྱིར། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པས་དམ་ཚིག་མཆོག །ཅེས་གསུངས་ཏེ། ཕྱོགས་བཅུ་དང་དུས་བཞིས་བསྡུས་པའི་སངས་རྒྱས་ཀྱི་དཀྱིལ་འཁོར་རིམ་གྱི་བདག་ཉིད་ནི། བྱང་ཆུབ་སེམས་རང་བྱུང་གི་ཡེ་ཤེས་ཁོ་ན་ཡིན་ལ། དེའི་ངོ་བོ་ཉིད་ནི་ཅིར་ཡང་མི་དམིགས་པའི་སྟོང་པ་ཉིད་ཀྱི་ཡེ་ཤེས་ལ་ཡེ་ཤེས་ལྔ་ལྷུན་གྱིས་གྲུབ་པའི་དཀྱིལ་འཁོར་རོ། །དེ་ཉིད་གཅིག་ཀྱང་ཡེ་ཤེས་ལྔ་ལྔ་ལ་སོགས་པ་གསལ་བ་ལས་དཀྱིལ་འཁོར་ཐམས་ཅད་དུ་རང་སྣང་བ་དེ་ལས་སྤྱན་དྲངས་ནས་བསྟིམ་མོ། །དེ་ཡང་གུད་ན་མེད་དེ། སེམས་རང་སྣང་བའི་ཕུང་པོ་ལ་སོགས་པ་རྣམས། རིག་པ་རང་སྣང་བའི་སྐུ་དང་ཡེ་ཤེས་སུ་དབྱེར་མེད་པ་དེ་ལ། ཕྱག་རྒྱ་བཞིས་བསྟིམ་ནས་གཉིས་སུ་མེད་པར་གྱུར་པ་དེ་ལ། རྐྱེན་འཇུག་པའི་མཚན་ཉིད་ཀྱིས་ཉམས་སུ་ལོན་པར་བསྒོམས་པས། དེ་ལ་དཀྱིལ་རིལ་གྱི་ཡོན་ཏན་རྫོགས་པའི་ཕྱིར། ཅི་འདོད་པ་ཡོངས་སུ་འགྲུབ་པར་འགྱུར་རོ། །ཞེས་བྱ་བའོ། །དེ་ལ་ཕྱི་དང་ནང་གི་མཆོད་པ་བྱ་དགོས་པའི་ཕྱིར་རོ། །གླུ་ཚིག་བྲོ་གར་རོལ་མོ་ཡི། །སྤྲིན་ཕུང་ཚོགས་ཀྱིས་རབ་ཏུ་མཆོད། །ཡུམ་དང་འཇོ་མ་སེམས་མ་ཡིས། །ཇི་ལྟར་འདོད་པའི་ལས་བཞིན་མཆོད། །ཅེས་གསུངས་ཏེ། ཕྱིའི་མཆོད་པ་ལྔ་དང་བླ་འཕན་རོལ་མོ་རྣམས་དང་ནང་གི་དམ་རྫས་རྣམས་དང་། བྲོ་གར་བཅུ་དྲུག་གི་གླུ་ཡེ་ཤེས་ཀྱི་མཆོད་པ་སྟེ། གསང་བའི་ཡུམ་དང་སེམས་མ་བརྒྱད་དང་། སྒོ་མ་བཞི་པོ་དག་ཀྱང་ནམ་མཁའི་ཁམས་བཀང་ལ་དབུལ་ལོ། །དེ་དག་གི་བསམ་པ་དང་བསྐུལ་བ་ནི། ལས་གང་འདོད་པའི་སྐབས་ཀྱིས་བྱེད་པའོ་ཞེས་བྱ་བ་ཁོ་ནའོ། །དེ་དག་ལས་ལྷག་པ་ཏིང་ངེ་འཛིན་གྱི་མཆོད་པ་དང་། གསང་བའི་མཆོད་པར་བསྟན་པའི་ཕྱིར། མཆོད་པའི་ཕྱག་རྒྱ་ཆེན་པོ་ནི། །ཞེས་བྱ་བ་ལ་སོགས་པ་གསུངས་ཏེ། སྤྱི་གང་གིས་མཉེས་པ་ནི་མཆོད་པའི་མཆོག་སྟེ། འདོད་པ་ལྔས་རིག་པ་ཚིམ་པར་བྱེད་པ་དེ་དག་མ་སྤངས་པར་སེམས་ཉིད་དུ་ཤེས་པར་ཁྱད་པར་དུ་བྱ་སྟེ། གཉིས་སུ་མེད་པའི་ངོ་བོར་ཕུལ་བ་ནི་མཆོད་པའི་མཆོག་གནས་སུ་སྟོབས་པའོ། །དེ་དག་གི་ངོ་བོ་ནི། འཇིག་རྟེན་ཐམས་ཅད་སངས་རྒྱས་ཀྱི་ཞིང་དག་པར་བྱིན་གྱིས་བརླབ་པ་དང་། རིལ་ལ་སོགས་པ་ཐམས་ཅད་རིན་པོ་ཆེའི་ཕུང་པོར་རང་བརླབ་པ་དང་། ཆུ་ཐམས་ཅད་རིན་པོ་ཆེའི་རྫིང་བུ་སྣ་ཚོགས་པའི་བང་རིམ་དང་ལྡན་པར་བརླབ་པ་དང་། སོ་སོའི་གནས་ཁང་ཐམས་ཅད་རིན་པོ་ཆེའི་ཁང་པ་སྣ་ཚོགས་སུ་བརླབ་པ་དང་། རྩི་ཤིང་ཐམས་ཅད་རིན་པོ་ཆེའི་དཔག་བསམ་གྱི་ཤིང་སྣ་ཚོགས་སུ་བྱིན་གྱིས་བརླབ་པ་དང་། སྒྲ་སྐད་ཐམས་ཅད་བསྟོད་ཚིག་དང་ཆོས་ཀྱི་སྒྲ་སྣ་ཚོགས་སུ་གྲགས་པ་དང་། གོས་ཐམས་ཅད་ལྷབ་ལྷུབ་སྣ་ཚོགས་སུ་བྱིན་གྱིས་བརླབ་པ་དང་། རིན་པོ་ཆེ་ཐམས་ཅད་ཕྲེང་བ་ལ་སོགས་པ་སྣ་ཚོགས་སུ་བརླབ་པ་དང་། སོ་སོའི་ལོངས་སྤྱོད་ཐམས་ཅད་བདུད་རྩིའི་ལོངས་སྤྱོད་སྣ་ཚོགས་སུ་བརླབ་པ་དང་། འགྲོ་བ་རྣམས་ཀྱང་ལྷ་དང་ལྷ་མོ་རྒྱན་གྱིས་ཁྱད་པར་དུ་མཛེས་ཤིང་མཆོད་རྫས་སྣ་ཚོགས་ཐོགས་པ་དང་། དེ་དག་གི་དཀྱིལ་འཁོར་ཐམས་ཅད་ལ་སྟོབས་པར་བྱའོ། །དེ་དག་དབུལ་བའི་ཚུལ་ནི། སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །ཞེས་གསུངས་ཏེ། རྣལ་འབྱོར་པའི་བློའི་རིམ་པ་ལྟར། ཚིག་གི་རིམ་པ་ལྟར་རམ། སྐད་ཅིག་གིས་ཆོས་ཉིད་ལ་ཆོས་ཉིད་ཐིམ་པའི་ཚུལ་དུ་འབུལ་ལོ་ཞེས་བྱ་བའོ། །གསང་བའི་མཆོད་པ་བསྟན་པའི་ཕྱིར། །གསལ་ལྡན་མའམ་བྱིན་བརླབས་ལ། །སྟོང་གསུམ་ཡུངས་འབྲུར་གཞུག་ཚུལ་དུ། །དབྱིངས་ནས་དཀྱིལ་འཁོར་སྤྱན་དྲངས་མཆོད། །མཉེས་ནས་གྲུབ་པའི་དམ་ཚིག་མཆོག །ཅེས་གསུངས་ཏེ། མཆོད་པའི་ཡུམ་ཡང་ཤེས་རབ་དང་ལྡན་པས་རང་གིས་བསྒོམས་པའམ ། གཙོ་བོས་བརླབས་ནས་སྣ་རྩེར་ཡུངས་འབྲུ་ཙམ་གྱིས་གཞལ་ཡས་སུ་ལྷ་ཚང་བར་བཀོད་དེ། རང་བཞིན་གྱི་དཀྱིལ་འཁོར་སྤྱན་དྲངས་བསྟིམ་སྟེ། རོལ་པའི་བདེ་བ་ཇི་ལྟར་མྱོང་བ་ལྟར་ཐམས་ཅད་མཉེས་པ་དང་ཚིམ་པར་འགྱུར་རོ། །དེ་དག་གཉིས་སུ་ཡང་འགྱུར་ཏེ། ཐལ་བའི་རྒྱུད་ལས། ཤེས་རབ་ཐབས་ཀྱི་རྩ་གནས་སུ། །དྲྭ་བའི་ཐིག་ལེ་ཡི་གེ་ཉིད། །སྒྱུ་འཕྲུལ་དཀྱིལ་འཁོར་གཉིས་སུ་བརླབ། །བྷ་ག་འདུས་པའི་ཡུངས་འབྲུ་རུ། །ཁམས་གསུམ་འགྲོ་རྣམས་བསྡུ་བྱ་སྟེ། །རྟོག་ཚོགས་དཀྱིལ་འཁོར་མངོན་དུ་བྱ། །ཕྱོགས་དུས་དཀྱིལ་འཁོར་སྤྱན་དྲངས་ཏེ། །རིག་པས་སོ་སོའི་གནས་སུ་བསྟིམ། །བསྐྱོད་པའི་ཧ་སིའི་སྒྲས་བསྐུལ་བའི། །བདག་ཉིད་ཆེན་པོ་ལྔ་ཡི་རྒྱུན། །སྟེང་སྒོ་ནས་འབྱུང་བདེ་བའི་བཅུད། །སོ་སོའི་བཞི་བཅུ་གཉིས་ལ་ཐིམ། །ཀུན་ནས་བདེ་བའི་ཡེ་ཤེས་ཆེ། །རྒྱལ་བ་མཉེས་པའི་མཆོག་ཏུ་གསུངས། །བཅོ་བརྒྱད་ཕྲག་གཉིས་བུམ་པ་དང་། །དྲུག་གཉིས་གཟེར་གྱིས་སྦྱངས་ནས་ནི། །དབང་སྒྱུར་བྱིན་བརླབས་བདེ་ཐོབ་པ། །ཐེག་པ་ཆེན་པོར་དབུགས་ཕྱུང་བའོ། །ཞེས་འབྱུང་བའོ། །དེ་ལྟ་བུའི་རབ་གནས་ཀྱི་དུས་སུ་སྦྱིན་སྲེག་བྱ་བ་བསྟན་པའི་ཕྱིར། དབྱིབས་དང་ཁ་དོག་མཚན་ལྡན་པར། །ཞལ་དུ་གྱུར་པའི་མེ་བོས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཞེས་གསུངས་ཏེ། རྒྱས་པའི་རྒྱུད་ལས། ཕྲིན་ལས་བཞི་ལ་ཧོམ་ཐབ་བརྒྱད་བསྟན་པ་ལས། འདིར་གནས་སྐབས་ཀྱིས་རྒྱས་པའི་ཐབ་གྲུ་བཞིའམ། རིན་པོ་ཆེ་ཟུར་བརྒྱད་དུ་བྱས་ཏེ། ཁ་དོག་སེར་པོ་བང་རིམ་དང་སྒྲོམ་དང་རྡོ་རྗེ་ཞགས་པས་བསྐོར་བའོ། །དེ་ཉིད་ཁོ་ནའི་གཞལ་ཡས་ཁང་བསྒོམས་ཏེ། མེ་ལྷ་སེར་པོ་སྒྲོམ་ཐོགས་པར་བསྐྱེད་པ་དང་། དྲངས་ནས་མཆོད་དེ། ལྟོ་བར་ཡང་རྒྱས་པའི་དཀྱིལ་འཁོར་བསྐྱེད་པ་དང་དྲངས་ནས་བདུད་རྩི་ལ་སོགས་པས་མཆོད་དེ་འདོད་དོན་གསོལ་བར་བྱའོ། །ཁྲོ་བོའི་དཀྱིལ་འཁོར་དེ་བཞིན་ཏེ། །ཤིན་ཏུ་ཕྲ་ལ་སྦྱངས་པ་ཡིས། །བསམ་ཡས་དག་ལའང་དེ་བཞིན་བྱ། །རིག་པས་དཔག་པ་ཙམ་དུའོ། །ཞེས་བྱ་བ་ནི། ཁྲོ་བོ་ལ་སོགས་པའི་དཀྱིལ་འཁོར་བྱེད་ན་ཡང་ལས་དང་སྦྱིན་སྲེག་རྗེས་སུ་མཐུན་ནོ་ཞེས་བྱ་བའོ། །དཔག་ཚད་ལ་སོགས་པ་མཆོག་གི་དཀྱིལ་འཁོར་ལ་ཡང་དེ་ལྟར་བྱའོ། །ཞེས་བྱ་བའི་ཐ་ཚིག་གོ། །དེ་ལྟར་མཆོད་པ་རྫོགས་ནས་དཀྱིལ་འཁོར་དུ་འཇུག་པ་བསྟན་པའི་ཕྱིར། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་བུ་གཞུག་པར་བྱ། །ཞེས་གསུངས་ཏེ། བཤད་པའི་ལས་རྣམས་རྫོགས་ནས་སློབ་དཔོན་ཁྲུས་གོས་དང་ལྡན་པས་ཤར་སྒོར་གུས་པར་འདུག་སྟེ། ལེའུ་བདུན་པར་བཤད་པ་ལྟར་ཞུགས་པ་ནི། རིག་པས་ཞུགས་པ་ཁོ་ནའོ། །དེ་ནས་སློབ་བུ་རྣམས་ཁྲུས་བྱས། གདོང་གཡོགས། བྲི་བ་བྱས། ལུས་དབུལ། བྱིན་གྱིས་བརླབས། དམ་ཚིག་དབོག །ནན་ཆགས་བྱ། དམ་ཚིག་བསྒྲག །མེ་ཏོག་དོར། ལྷ་དབབ། མིག་དབྱེ། དཀྱིལ་འཁོར་ངོ་བསྟན་པར་བྱའོ། །དེ་ལྟར་ཞུགས་པའི་ཕན་ཡོན་དང་། ཡི་དམ་ལྷ་མི་སྤོང་བར་གདམས་པ་བསྟན་པའི་ཕྱིར། བདེ་བ་ཆེན་པོའི་དཀྱིལ་འཁོར་ལ། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་ཞུགས་ན། །འདོད་པའི་ཡིད་འོང་མཉམ་པར་འགྱུར། །ཞེས་བྱ་བ་ནི། རིགས་ལྔ་ཐབས་དང་ཤེས་རབ་འབྲེལ་པ་ནི་བདེ་བ་ཆེན་པོ་ཁོ་ནའོ། །དེ་དག་ལྷག་པ་གཟུགས་བརྙན་གྱི་སྐབས་སུ། བསྡུས་པ་ལ་ནི་སྟངས་དཔྱལ་གཉིས་སོ། །རྒྱས་པ་དང་འབྲིང་ལ་ནི་ལྔ་པ་སྟེ། དེ་དག་ཏུ་བཤད་པ་བཞིན་ཞུགས་པའི་ཡོན་ཏན་ནི། སྔོན་འོག་མིན་དུ་ཞུགས་པ་དང་མཉམ་པར་སྟོན་ཏེ། གཞན་དག་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་མངོན་དུ་མཐོང་བ་ཡི། །བསོད་ནམས་རྟག་པ་གང་ཡིན་ལ། །ཕྱིས་བྱས་པའང་དེ་བཞིན་ནོ། །ཞེས་འབྱུང་ངོ་། །དེ་ལྟར་ཞུགས་ནས་ཕོག་པའི་ལྷ་བསྒྲུབ་དགོས་པའི་ཕྱིར། སྐལ་བ་མཉམ་པའི་ཡེ་ཤེས་དེ། །གཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་བར་འགྱུར། །ཞེས་གསུངས་ཏེ། བདག་གི་རང་བཞིན་ཡང་སྐུ་གསུང་ཐུགས་རྡོ་རྗེར་ལྷུན་གྱིས་གྲུབ་པ་ལ་ནི་ཁྱད་པར་མེད་པ་ཁོ་ནའོ། །ཡིན་མོད་ཀྱི་རྟོག་པས་སྒྲིབ་པ་དེ་བསལ་བའི་ཐབས་ནི། ལེའུ་ལྔ་པོ་ལྟར་ཏིང་ངེ་འཛིན་མྱུར་དུ་འགྲུབ་པའི་ཕྱིར། རྩ་བའི་དམ་ཚིག་གཉིས་སུ་བསྣན་ནས་གསུངས་པས་བསྒྲུབ་པ་ལ་ནན་ཏན་ཆེ་བར་བྱའོ། །ཞེས་གསུངས་པའོ། །དེ་ནས་དབང་ཐོབ་པའི་རྒྱུ་ཡོན་དབུལ་བ་བསྟན་པའི་ཕྱིར། དེ་ནས་རིགས་ཀྱི་བུ་མཆོག་དེས། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །ཞེས་གསུངས་ཏེ། རང་གི་ལྷ་དེ་བཞིན་གཤེགས་པའི་རིགས་ལ་རྒྱལ་སྲིད་དབུལ་ལོ། །རྡོ་རྗེའི་རིགས་ལ་རང་ལུས་དབུལ་ལོ། །པདྨའི་རིགས་ལ་བུ་དང་ཆུང་མ་དབུལ་ལོ། །རིན་པོ་ཆེའི་རིགས་ལ་དེ་ཉིད་དོ། །ལས་ཀྱི་རིགས་ལ་རང་ལ་གཅེས་པ་དབུལ་ལོ། །བདག་པོའི་རིགས་ལ་བླ་མའི་ཐུགས་དང་ཅི་འཐད་པ་དབུལ་ལོ། །དེའི་ཡོན་ཏན་ཅི་ཞིག་སྙམ་པ་ལ། དབང་ཕྱུགས་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་པ་ཐམས་ཅད་དག་པར་འགྱུར། །ཞེས་གསུངས་པ་གོ་སླ་སྟེ། བླ་མ་མཉེས་པས་ཐུན་མོང་དང་ཐུན་མོང་མིན་པའི་སྡིག་པ་སྦྱང་བའི་ཕྱིར། ཡོན་ལ་སེར་སྣ་སྤང་ངོ་ཞེས་བྱ་བའོ། །དེ་ནས་དབང་བསྐུར་བའི་རིམ་པ་བསྟན་པའི་ཕྱིར། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་བསྐུར་བར་བྱ། །སྙིང་རྗེ་ཆུད་མ་ཟོས་པར་ཟུང་། །ཞེས་གསུངས་ཏེ། ཐེག་པ་འདི་ལ་དད་པ་རྣམས་ལ་ཕན་པའི་དབང་བཅུས་འདི་དང་ཕྱི་མར་ཕན་གདགས་པའོ། །བདག་དོན་གྱི་བརྩོན་པ་ཅན་ལ་ཉན་བསྒོམ་གྱི་དབང་གཉིས་པོ་སྦྱིན་ནོ། །གཞན་དོན་གྱི་བརྩོན་པ་ཅན་ལ་ནུས་པའི་དབང་གསུམ་པོ་བསྐུར་རོ། །བརྟུལ་ཞུགས་ནི་རབ་འབྲིང་ཐ་གསུམ་སྟེ། སྤྱོད་པའི་བརྟུལ་ཞུགས་དང་། རིག་པའི་བརྟུལ་ཞུགས་དང་། མཉམ་པའི་བརྟུལ་ཞུགས་སོ། །དེ་ཡི་དབང་ཡང་གསུམ་སྟེ། དམ་རྫས་ཀུན་ལ་སྤྱོད་པའི་དབང་དང་། རང་རིག་ཐམས་ཅད་མཁྱེན་པའི་དབང་དང་། ཤིན་ཏུ་བརྟན་པའི་དབང་དང་གསུམ་རིམ་པས་སྦྱིན་ཏེ། སྐས་ཀྱི་གདངས་ལྟར་འཛེག་ནས། བར་མ་དོར་མི་འདོར་རོ། །ཞེས་བྱ་བའི་ཐ་ཚིག་གོ། །བདག་པོའི་ཡོན་ཏན་དང་། བརྟུལ་ཞུགས་དབང་དུ་དཀྱིལ་འཁོར་གསུངས་པ། ཤིན་ཏུ་ཕྲ་བའི་དམ་ཚིག་མཆོག །ཕྱག་རྒྱ་ཆེན་པོའི་ཕྱག་མཐིལ་དུ། །ཐུགས་ཀྱི་དཀྱིལ་འཁོར་དམ་པ་དེ། །སོར་ནི་བཞི་ཡི་ཚད་དུ་བྱ། །ཞེས་གསུངས་ཏེ། ཉིད་ཀྱི་མཉམ་པའི་ཕྱག་རྒྱའི་སྟེང་དུ་ཕྲ་བའི་དཀྱིལ་འཁོར་དགོད་དོ། །གཞན་དུ་ན། ཐལ་བའི་རྒྱུད་ནས། ཕྱག་རྒྱ་ཆེན་པོ་ནམ་མཁའི་དབྱིངས། །སོར་བཞིའི་ཚད་དུ་རང་བཞིན་གནས། །བདེ་བའི་ཡེ་ཤེས་ཐུགས་དཀྱིལ་འཁོར། །ཁ་དོག་དབྱིབས་དང་ལྡན་པར་བྱ། །ཐབས་ཀྱི་རབ་གནས་ཆོ་གར་ལྡན། །འཇུག་པ་བོས་ཀྱང་གསོ་བ་གདབ། །ཅེས་འབྱུང་ངོ་། །དེའི་ཕྱག་རྒྱ་དགོད་པ་གང་ཞིག་སྙམ་པ་ལ། སེན་ཟླུམ་ཙམ་གྱི་ཉི་ཟླ་ལ། །ཙ་ནའི་འབྲུ་ཙམ་པདྨོའི་གདན། །ཡུངས་འབྲུ་ཙམ་གྱི་ཡི་གེ་ལས། །ཕྱག་རྒྱ་ཏིལ་འབྲུ་ཙམ་དུ་བྲི། །ཞེས་གསུངས་ཏེ། ཡི་གེ་ཡུངས་འབྲུ་ཙམ་ལས་སྐུ་ནས་འབྲུ་ཙམ་དགོད་པ་དང་། ཡི་གེ་ཏིལ་འབྲུ་ཙམ་ལ་སྐུ་ཡུངས་འབྲུ་ཙམ་དགོད་པའོ། །དེ་ལ་དཀྱིལ་འཁོར་གཞན་ལྟར་ཟླ་མེད་དམ་སྙམ་པ་ལ། ཡང་ན་ཐལ་མོ་རབ་བསྣོལ་ནས། །ཕྱག་རྒྱ་ཆེན་པོའི་ཕང་དུ་ནི། །དཀྱིལ་འཁོར་མཛུབ་གང་ཚད་དུ་ཡང་། །མཁས་པས་ཆོ་ག་བཞིན་དུ་བྱ། །ཞེས་གསུངས་ཏེ། དེ་ནི་ཐལ་བའི་རྒྱུད་ལས། ཐལ་མོ་ཞེས་བྱ་རྡེབ་པའི་སྒྲ། །དབང་པོའི་ཡུལ་དུ་རབ་སྦྱོར་བས། །ཕྱག་རྒྱ་ཆེན་པོ་ནམ་མཁའི་དབྱིངས། །བརྟུལ་ཞུགས་གཉིས་ཀྱིས་པང་དུ་བླང་། །རྡོ་རྗེ་མཛུབ་མོའི་རྩེ་དག་ཏུ། །ཏིལ་འབྲུ་ནམ་མཁའི་གཞལ་ཡས་སུ། །རི་རབ་ཙམ་གྱི་ཕྱག་རྒྱ་དགོད། །ཐབས་ཀྱི་ཆོ་ག་རབ་གནས་དང་། །གསང་བའི་སྦྱིན་སྲེག་ལུགས་སུ་དབུལ། །ཞེས་འབྱུང་སྟེ། དེ་དག་གི་ལས་རིམ་ནི་བླ་མས་འཆད་པར་འགྱུར་ཏེ། དབང་གཉིས་རྫོགས་པར་བསྐུར་རོ། །དེ་ལྟར་དབང་ཐོབ་ནས་བསྐྱེད་པའི་རིམ་པ་ལེའུ་ལྔ་པ་ལ་སོགས་པ་ལྟར་ཏིང་ངེ་འཛིན་བཞི་ལ་གནས་པར་བྱ་བའི་ཕྱིར། ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །ཞེས་གསུངས་ཏེ། ཏིང་ངེ་འཛིན་དང་པོ་གཉིས་ཀྱི་སྐབས་སུ་ཤེས་རབ་དང་མཐུན་པའི་སྤྱོད་པ་དང་། ཐབས་དང་མཐུན་པའི་སྤྱོད་པ་གཉིས་དང་ཡང་ལྡན་པར་བྱས་ནས། དེ་ནས་སྐུ་གསུང་ཐུགས་ཀྱི་ཆོ་ག་གསུམ་གྱིས་སྐུ་བསྐྱེད་དེ། ཕྲ་མོའི་ཏིང་ངེ་འཛིན་གྱི་སྐབས་སུ་ཕྱོགས་གཅིག་པའི་སྤྱོད་པས་བློ་སྦྱངས་པ་ནི་རྫོགས་པ་ཞེས་བྱའོ། །ཡིད་སྐྱོབ་པ་དང་བྱིན་གྱིས་བརླབས་ཀྱིས་ཕྱིར་སྔགས་ཏེ་ལྷའོ། །དེ་ཉིད་ལུས་ཀྱི་ཡན་ལག་མགོ་བོ་ལ་སོགས་པ་ལ་ཕྱག་རྒྱ་ལྔ་བཅུ་ཐམ་པ། རྒྱས་པའི་རྒྱུད་བཞིན་དུ་དགོད་པ་དང་། རྟོག་པའི་ཡན་ལག་ཕུང་པོ་ལ་སོགས་པ་དཀྱིལ་འཁོར་བཞི་བཅུ་རྩ་གཉིས་སུ་སྣང་བ་རྣམ་པར་འབྱེད་པ་དང་། དེ་ཉིད་ཀྱི་ཡན་ལག་གཅིག་ལ་ཡང་དེ་དག་ཚང་བར་དགོད་པ་དང་། དེ་དག་ལ་ཡང་རྡོ་རྗེ་གསུམ་བསྒོམ་པ་དང་། དབང་བསྐུར་བའི་ཡན་ལག་དང་ལྔ་རྫོགས་ཏེ་སྣང་བ་རྣམ་པར་འབྱེད་པ་ལ་དབང་ཐོབ་ནས། བཟའ་བཏུང་དང་སྒྲའི་རོལ་མོ་དང་བྲོ་གར་དང་། གོས་རྒྱན་དང་། ཨ་ལི་མ་རྣམས། འཁོར་ཁང་གི་གནས་སུ་ཚུད་པར་བྱས་ཏེ། ཚོགས་ཀྱི་སྤྱོད་པས་བསྒྲུབ་བོ་ཞེས་བྱ་བ་ཁོ་ནའོ། །དེས་འགྲུབ་པའི་དུས་དང་། དངོས་གྲུབ་བསྟན་པའི་ཕྱིར། མ་ཉམས་འཇུག་ལ་རབ་བརྩོན་པས། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །ཅེས་གསུངས་ཏེ། གོང་མ་ལས་ལྟ་བ་དང་དམ་ཚིག་མ་ཉམས་པར་བརྩོན་པ་ལ་གནས་ན། ཟླ་བ་དྲུག་ནས་བཅུ་དྲུག་གི་བར་གྱིས་ཚེ་ལ་དབང་བའི་རིག་འཛིན་ཐོབ་པར་འགྱུར་ཏེ། དེ་ནི་ལུས་མི་འདོར་བའི་ཕྱིར་རིག་འཛིན་གྱི་མཆོག་གྲུབ་པའོ། །དེ་ཉིད་ཁོ་ནའམ་སྙམ་པ་ལ། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཞེས་གསུངས་ཏེ། རྒྱས་པའི་རྒྱུད་ལས། ཚེ་ནི་བཅུ་དང་དྲུག་པ་ཡི། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་ས། །ཞེས་འབྱུང་བས། བློ་དང་བརྩོན་འགྲུས་ཀྱི་ཤུགས་ཆེ་ཆུང་གིས་ལོ་བརྒྱ་ནས་བརྒྱ་ཕྲག་བཅུ་དྲུག་གི་བར་དུ་བསྣུར་ཞིང་ཐ་མ་ཡང་དེས་སྐུ་ལྔ་མངོན་དུ་གྲུབ་པའོ། །འགྲུབ་པའི་ཚུལ་ནི་ཇི་ལྟར་བུ་ཡིན་ཞེ་ན། ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཅེས་གསུངས་ཏེ། སྒྲུབ་པ་པོའི་རང་རིག་པའི་ངོ་ལ། སངས་རྒྱས་ཀྱི་ཡེ་ཤེས་ཀྱི་ཡོན་ཏན་བརྗོད་པ་ལས་འདས་པར་སྣང་བ་ཡང་། གཉིས་སུ་མེད་པའི་ཚུལ་གྱིས་སྣང་བས་ཉིད་ལ་ཉིད་ཅེས་གསུངས་སོ། །གཞན་དུ་ན་བདེ་འདུས་ཡེ་ཤེས་ཐིག་ལེ་ལས། མཐའ་ཡས་ཡེ་ཤེས་རང་སྣང་བ། །མ་བརྩལ་ལྷུན་གྲུབ་རིག་འཛིན་མཆོག །ཅེས་པས་ལྷུན་གྱིས་གྲུབ་པའི་རིག་འཛིན་ཞེས་བྱའོ། །ཕྱོགས་བཅུ་དུས་བཞི་མངོན་རྫོགས་པའི། །ཞེས་བྱ་བ་ལ་སོགས་པ་ནི། ཆོས་ཀྱི་དབྱིངས་ཀྱི་མཐའ་ཀླས་པའི་དེ་བཞིན་གཤེགས་པ་ཐམས་ཅད་ཀྱི་ཞིང་ཁམས་གསུམ་དང་གཞལ་ཡས་ཁང་དང་། སྐུ་གསུང་ཐུགས་ཡོན་ཏན་ཕྲིན་ལས་ཉི་ཤུ་རྩ་ལྔ་ལ་སོགས་པ་རིལ་དུས་གཅིག་ཏུ་གསལ་བར་སྣང་ནས། དེ་དག་གི་རིག་པའི་གསུང་གིས་བསྔགས་པ་དང་། ཆོས་སྟོན་པ་དང་། དབང་བསྐུར་བ་ཐོབ་སྟེ། བསམ་ཡས་ལྷུན་གྱིས་གྲུབ་པའི་ཏིང་ངེ་འཛིན་མངོན་དུ་བྱས་པ་ནི། རང་བྱུང་གི་ཡེ་ཤེས་དང་། རིག་པའི་ཡེ་ཤེས་དང་། ལྷུན་གྱིས་གྲུབ་པའི་ཡེ་ཤེས་གསུམ་ཚུལ་གཅིག་ཏུ་གྱུར་པས་མཐུན་པ་ཞེས་བྱ་བ་ཁོ་ན་སྟེ། དེའི་ཕྱིར་རང་སྣང་བའོ་ཞེས་གསུངས་སོ། །རང་སྣང་བའི་ཚུལ་ཇི་ལྟ་བུ་སྙམ་པ་ལ། དཔེས་བསྟན་པའི་ཕྱིར། དཔག་བསམ་ཤིང་དང་ཡིད་བཞིན་གྱི། །ཞེས་བྱ་བ་ལ་སོགས་པ་གསུངས་ཏེ། དཔེ་ནི་གོ་སླའོ། །ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་བྱ་བ་ནི། གཞི་ཅི་ཡང་མ་ཡིན་པ་ལས། ཉི་ཤུ་རྩ་ལྔ་ལ་སོགས་པ་མཐའ་ཡས་པར་རང་བྱུང་གི་ཡེ་ཤེས་རང་སྣང་བ་ནི་རྨད་དུ་བྱུང་བ་སྟེ། དེ་དག་བཀུག་པ་དང་བགྲོད་པ་དང་། རྒྱུ་རྐྱེན་གྱིས་མ་བྱས་པར་ཕུང་པོ་ལ་སོགས་པ་སྐུ་གསུང་ཐུགས་ཀྱི་ཕྱག་རྒྱར་གསལ་བ་དེ་རང་རིག་པར་རྒྱུན་དུ་བསྒོམས་པ་ལས་རྒྱུ་འབྲས་གཉིས་སུ་མེད་པར་རང་བྱུང་བའོ། །དེ་ནི་རྒྱུན་ལ་བྱུང་བའི་ཕྱིར། །རྒྱུ་རྐྱེན་ལས་སྐྱེས་སོ་བར་དོགས་པ་ལ། །ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཡེ་ཤེས་ལ་ནི་ཡེ་ཤེས་རོལ། །ཞེས་གསུངས་ཏེ། ཐམས་ཅད་བདག་ཉིད་ཁོ་ནའི་ཕྱིར། གང་དུའང་མི་དམིགས་པར་རང་གསལ་བ་ནི་མཉམ་པ་ཉིད་ཀྱི་དབྱིངས་ཏེ་ཐེག་པ་ཆེན་པོའི་དེ་བཞིན་ཉིད་དོ། །དེ་ཉིད་གདོད་ནས་ཐམས་ཅད་ལྷུན་གྱིས་གྲུབ་པ་ཉིད་རང་སྣང་བ་སྟེ། གྱུར་པ་ནི་གདུལ་བྱའི་བླ་དྭགས་སོ། །དེ་བས་ན་ལྷུན་གྱིས་གྲུབ་པའི་ཡེ་ཤེས་ཉིད་བསམ་གྱིས་མི་ཁྱབ་པའི་ཡེ་ཤེས་སུ་རང་སྣང་བ་དེ་ལ་རོལ་ཞེས་བྱ་བ་ཁོ་ནའོ། །དེ་དག་མཚན་མར་གྱུར་རོ་བར་དོགས་པ་ལ། ཡེ་ཤེས་རོལ་པ་ཉིད་ཀྱང་གསོག །ཅེས་གསུངས་ཏེ། དེའི་ངོ་བོ་ཉིད་ནི་ཅིར་ཡང་བཟུང་དུ་མེད་པ་ཁོ་ནའོ། །འོ་ན་དེས་དོན་བསྟན་པར་མི་ནུས་སོ་སྙམ་པ་ལ། རྒྱལ་བ་མངོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །བྱ་བྱེད་ནུས་པའི་གཟི་བྱིན་གྱིས། །སྒྱུ་མ་རྡོ་རྗེ་བཙན་པོའི་མཆོག །ཅེས་གསུངས་ཏེ། འགྲོ་བ་དྲུག་ལ་སྣང་བའི་སྤྲུལ་པའི་སྐུ་དང་། དེ་དག་སྟོན་པའི་ལོངས་སྤྱོད་ཀྱི་སྐུའི་སངས་རྒྱས་ཐམས་ཅད་ཀྱང་བཤད་པའི་ཚིགས་སུ་བཅད་པ་གཉིས་ཀྱི་ཚུལ་ཁོ་ན་བས། སྐུ་གསུང་ཐུགས་ཀྱི་གཟི་བྱིན་དང་། སྒྱུ་མའི་རོལ་པས་ཅིར་ཡང་དོན་བྱེད་ཙམ་ན། རང་གི་ངོ་བོ་ཉིད་ནི་འདུས་མ་བྱས་པ་དང་། མི་ཕྱེད་པའི་ཕྱིར་སྐྱེ་འཇིག་མེད་པས། རྡོ་རྗེའི་སྐུ་སྟེ་ཁྱད་པར་དུ་འཕགས་པ་ཁོ་ནའོ་ཞེས་བྱ་བའོ། །མཐར་ཕྱིན་པ་དེ་དག་གི་ངོ་བོ་ཉིད་བསྟན་པའི་ཕྱིར། གཅིག་དང་དུ་མ་བྲལ་བ་ཡིས། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་གསུངས་ཏེ། གཅིག་གི་ངོ་བོ་ལ་ཡང་ཐམས་ཅད་བདག་ཉིད་ཆེན་པོར་གྱུར་པའི་ཕྱིར། ཕན་ཚུན་མ་ཡིན་པའི་ཚུལ་གྱིས་གསལ་བ་དང་། དེ་ཉིད་ཀྱི་ཚུལ་གྱིས་ཐབས་རྣམས་ནི་མ་འདྲེས་པར་སྣང་བའི་ཕྱིར། རྒྱས་པའི་རྒྱུད་ལས། ཐབས་ཆེན་མ་འདྲེས་རྣམ་པར་ཐར་པ་ཡི། །དམིགས་མེད་བདེར་གཤེགས་ཉིད་དབྱིངས་ཐུགས་ཆུད་པས། །དུས་བཞི་རྒྱལ་བ་ཀུན་དང་མཉམ་པར་འུབ། །ཅེས་གསུངས་སོ། །དེ་ལ་ཡོད་པ་དང་མེད་པ་དང་དབུས་དང་། དྲན་རྟོག་རྟག་ཆད་སྐྱེ་འགག་འགྲོ་འོང་ལ་སོགས་པ་ཐམས་ཅད་ལས་འདས་པའི་ཕྱིར། ངོ་བོ་ཉིད་བསྟན་དུ་མེད་པར་ཐམས་ཅད་ལྷུན་གྱིས་གྲུབ་པར་རང་སྣང་བའི་རང་བྱུང་གི་དེ་བཞིན་ཉིད་དེ་མངོན་དུ་བྱས་པའི་ཕྱིར་དེ་བཞིན་ཉིད་དུ་གཤེགས་པའོ། །ཡང་དག་པར་རྫོགས་པའོ། །དེ་ནི་གནས་བྱ་གནས་བྱེད་གཉིས་མེད་པས་ཐམས་ཅད་དུ་རང་སྣང་བའོ་ཞེས་བྱ་བའོ། །འོ་ན་གཉིས་སུ་བྱ་བ་མེད་པས་གདུལ་བྱ་མི་གཟིགས་སོ་བར་དོགས་པ་ལ། ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་གསུངས་ཏེ། ཐམས་ཅད་དུ་ཐམས་ཅད་ཀྱང་རང་རིག་པ་ཁོ་ནའི་ཕྱིར་གཉིས་སུ་མེད་པ་ལ། གཉིས་སུ་རྟོག་པ་ནི་ལོག་རྟོག་སྟེ། དེའི་རྒྱུན་གྱི་དེ་ཉིད་དུ་སྣང་བ་ནི། ཀུན་ཏུ་བརྟགས་པ་སྟེ་གློ་བུར་བའོ། །གང་དེ་ལས་ལོག་པ་ནི་དག་པ་སྟེ། དེ་བཞིན་གཤེགས་པའོ། །དག་པའི་ཕྱིར་འགྲོ་བ་རིལ་རང་རིག་པ་ལས་མི་གཞན་པར་གསལ་བས། ཐམས་ཅད་ཟིན་པ་དང་ཁྱབ་པ་དང་། གཉིས་སུ་མི་རྟོག་པའི་གཏན་ཚིགས་གསུམ་གྲུབ་པའི་ཕྱིར་ཞེས་བྱ་སྟེ། དེ་ཁོ་ན་ཐེག་པ་མཆོག་གི་ལུགས་ཀྱི་ཐུགས་རྗེའོ། །དེ་ཕྱིར་རྟོག་པ་མེད་པར་གསལ་བ་ཁོ་ནའོ། །ཞེས་བྱའོ། །ལེའུ་དགུ་པ་མན་ངག་གི་རིམ་པར་བཤད་པའོ།། །།དབང་བསྐུར་བ་སྟོན་ཏེ། བཤད་པའི་རྗེས་སུ་ཉེ་བར་འཇུག་པའི་ཕྱིར། རྒྱལ་པོ་སྦྱིན་པ་ཞེས་གསུངས་ཏེ། ཆེ་བ་ཐམས་ཅད་ཐོབ་པ་དང་། ཐམས་ཅད་ལ་དབང་སྒྱུར་པའི་ཕྱིར། རྒྱལ་པོ་ཞེས་བྱ་སྟེ། དོན་ཡང་རྗེས་སུ་མཐུན་པའི་ཕྱིར་དབང་ཕྱུག་ཅེས་ཀྱང་བྱའོ། །དེ་ཉིད་དོན་གཉིས་ཀྱི་ཕྱིར་ངེས་པའི་ཚིག་ཏུ་ཡང་འགྱུར་རོ། །དེ་ལྟ་བུ་སྣོད་གསུམ་པོ་ལ་ཐོབ་པར་བྱེད་པའི་ཕྱིར། སྦྱིན་པ་ཞེས་བྱའོ། །བརྟུལ་ཞུགས་ཅན་གྱི་དབང་བསྟན་པའི་ཕྱིར། ཤེས་རབ་ཐབས་ཀྱི་ཕྱག་རྒྱ་ལས། །བདེ་བའི་འབྲུ་ཚོགས་གསལ་བའི་རྒྱུན། །རྡོ་རྗེའི་ལམ་ནས་པདྨོར་འཁྱིལ། །རྩེ་ནས་བསྟིམ་ཞིང་དཀྱིལ་འཁོར་བསྒྱུར། །ཞེས་གསུངས་ཏེ། དེ་ནི་བདག་གིས་མི་ནུས་ཀྱང་། །ཐལ་བའི་རྒྱུད་ལས། མི་བསྐྱོད་ཡབ་ཡུམ་རོལ་པ་ཡིས། །བདེ་བ་གསལ་ཞིང་མི་དམིགས་པ། །ཤེས་རབ་ཐབས་ཀྱི་ཕྱག་རྒྱའོ། །རྡོ་རྗེ་ཡེ་ཤེས་ཧཱུྃ་ཚོགས་ཀྱིས། །པདྨོའི་ཡེ་ཤེས་བསྡུས་འཁྱིལ་བའི། །ཡུངས་ཀར་ཚད་ཙམ་རྡོ་རྗེ་སེམས། །རྩེ་ནས་རྩེ་རུ་བྱིན་པ་ཡི། །རང་བཞིན་ཆོས་ཁམས་དཀྱིལ་འཁོར་གྱི། །ས་བོན་ཟུང་གསུམ་གཉིད་དང་བཅས། །གནས་ངན་ལེན་པ་གསུམ་སྦྱངས་ཏེ། །དམིགས་མེད་སེམས་ཀྱི་ཡེ་ཤེས་ལྔ། །གསལ་བས་ས་བོན་ཚིག་པ་བཞིན། །མི་སྐྱེ་ཐབས་ཀྱི་དབུགས་ཕྱུང་བའོ། །དེ་ལས་གཞན་ཡང་བཤད་བྱ་བ། །རྗེས་སུ་འཇུག་པའི་ཕྱག་རྒྱ་ཉིད། །ཟིལ་པའི་ཐིག་ལེ་སྔོན་ལམ་བཞིན། །བཅུ་དྲུག་ཕྱེད་ཕྱེད་ཐིག་ལེ་གཅིག །ཕན་ཚུན་དགོད་པའི་སྟོབས་ཀྱིས་བསྟིམ། །བདེ་བ་གཉིས་པོའི་ངོ་བོ་ཉིད། །གསུམ་པའི་ཡེ་ཤེས་དཀྱིལ་འཁོར་དུ། །གསལ་བར་ཤར་བར་གྱུར་པའི་སྒྲ། །རང་བཞིན་འོད་གསལ་དཀྱིལ་འཁོར་རོ། །དེ་ལས་གཞན་ཡང་བཤད་བྱ་བ། །རྡོ་རྗེ་ཉི་མ་ཐབས་ཀྱི་རྒྱ། །ཕུང་སོགས་ཕྱག་རྒྱ་ཚོགས་དང་ལྡན། །དེ་ཟླ་བསིལ་བྱེད་ཤེས་རབ་དངོས། །དུས་གཅིག་རོ་མཉམ་ཐིག་ལེ་ཆེ། །སུམ་ཅུ་རྩ་གཉིས་མཚན་རྫོགས་ཤིང་། །ཟླ་བའི་ཡེ་ཤེ་ལྔ་བཅུ་དྲུག །དཔེ་བྱད་ལ་སོགས་དཔག་ཏུ་མེད། །སེམས་ཤེས་མངོན་པར་ཤེས་དང་ལྡན། །སེམས་མཐའ་འགྲོ་འོང་རྫུ་འཕྲུལ་ཤེས། །གནས་ནས་ལོག་པ་ཐིམ་པའི་སྒྲས། །མཐའ་གཉིས་མ་གོས་པདྨའི་སྤྱན། །སྤྲུལ་པའི་གནས་ནས་བཀྱེ་བ་ཡིས། །བཞི་བཅུ་ལྔ་སོགས་མཐའ་ཡས་ཀུན། །རང་བཞིན་ཉིད་ལས་རང་གསལ་བའི། །བཅུ་གསུམ་ཡི་གེ་འཁོར་ལོར་བརྗོད། །ཅེས་འབྱུང་བ་ཁོ་ནའོ། །ཉན་བྱེད་འཁོར་ལོའི་གཞལ་ཡས་སུ། །ཞེས་བྱ་བ་ལ་སོགས་པ་ནི་བདག་དོན་གྱི་ནུས་དབང་སྟོན་ཏེ། རྣ་བ་གཉིས་ཀྱི་རྩའི་ནང་ན་བཅུད་འདུས་པའི་ཐིག་ལེ་ཤིན་ཏུ་དྭངས་པ་གནས་པ་ལས། རྩ་ནི་འཁོར་ལོའི་གཞལ་ཡས་ཁང་སྒོ་དང་བཅས་པར་བསྒོམ། ཐིག་ལེ་ཏྲཱྃ་ཟུང་ལྔར་གྱུར་པ་ལས་ཆོ་གས་རིན་པོ་ཆེའི་དཀྱིལ་འཁོར་ཡབ་ཡུམ་བཅུ་སྒོ་བ་ཡབ་ཡུམ་དང་བཅས་པར་སྐྱེད་པ་འཕྲོ་འདུ་ལས་འོད་དུ་གྱུར་པས་སློབ་བུ་རིན་ཆེན་འབྱུང་ལྡན་དུ་བྱས་པ་ལ་པོ་ཏི་གཏད་ཏེ། ཏྲཱཾ། གསང་བ་གསང་ཆེན་གསང་མཆོག་གང་། །ཞེས་བྱ་བ་ལ་སོགས་པ་བརྗོད་དེ་དབང་བསྐུར་རོ། །གསལ་བའི་འཁོར་ལོའི་གཞལ་ཡས་སུ། །ཞེས་བྱ་བ་ལ་སོགས་པ་ནི་རྗེས་སུ་མཐུན་ཏེ། སྙིང་ལ་ཡི་དམ་གྱི་ལྷ་གང་ཡིན་པའི་རིགས་སུ་བསྐྱེད་པ་སྟེ་ཕྲེང་བ་སྦྱིན་ནོ། །ལག་པའི་འཁོར་ལོའི་གཞལ་ཡས་སུ། །ཞེས་བྱ་བ་ལ་སོགས་པ་ནི། གཞན་དོན་ནུས་པ་ཕྲིན་ལས་ཀྱི་དབང་སྟེ། སྦྱོར་བ་ནི་རྗེས་སུ་མཐུན་ཏེ། ལག་པའི་རྩ་གཉིས་ལ་ལས་ཀྱི་རིགས་བསྒོམ་མོ། །རྫས་རྡོ་རྗེ་རྒྱ་གྲམ་སྦྱིན་ནོ། །སྨྲ་བྱེད་འཁོར་ལོའི་གཞལ་ཡས་སུ། །ཞེས་བྱ་བ་ནི་འཆད་པའི་དབང་སྟེ་པདྨའི་རིགས་བསྒོམ་པ་སྟེ། འཁོར་ལོ་སྦྱིན་ནོ། །བསྐྱོད་ཆེན་འཁོར་ལོའི་གཞལ་ཡས་སུ། །ཞེས་བྱ་བ་ལ་སོགས་པ་ནི་དབང་ཕྱུག་རྒྱལ་པོ་ཆེན་པོའི་དབང་སྟེ། ཡན་ལག་མགོ་བོའི་དབང་པོ་ལྔ་ལ་ༀ་ཟུང་ལྔ། ལག་པ་གཡས་ཀྱི་སོར་མོ་ལྔ་ལ་ཧཱུྃ་ཟུང་ལྔ། དེ་བཞིན་དུ་གཡོན་པ་ལ་ཏྲཱྃ། རྐང་པ་གཡོན་གྱི་སོར་མོ་ལ་ཧྲཱིཿ གཡས་ལ་ཧཱ། ལུས་ཀྱི་ཕྱོགས་མཚམས་སུ་ཧཱུྃ་ཟུང་བཅུའོ། །དེ་དག་ལས་ཚོམ་བུ་ལྔ་དང་། ཁྲོ་བོ་ཁྲོ་མོ་རྣམས་བསྐྱེད་པ་ཡོངས་སུ་གྱུར་པ་ལས། ཀུན་ཏུ་བཟང་པོར་གྱུར་པ་ལ། རྡོ་རྗེ་དང་དྲིལ་བུ་གཏད་དེ། ཚིགས་བཅད་བརྗོད་དོ། །དབང་མ་ཐོབ་པའི་སྐྱོན་བསྟན་པའི་ཕྱིར། སློབ་དཔོན་མཉེས་པར་མ་བྱས་ཤིང་། །ཞེས་བྱ་བ་ལ་སོགས་པ་གསུངས་ཏེ། གོ་སླའོ། །དང་པོ་ཕན་པའི་དབང་བསྟན་པའི་ཕྱིར། དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡིས་དབང་བསྐུར་ན། །ཞེས་གསུངས་ཏེ། དངོས་སུ་བསྐུར་བ་ནི་གོ་བསླའོ། །དེ་ཡང་ཐལ་བའི་རྒྱུད་ལས། ཁམས་བཅུད་བདེ་བའི་ལམ་གཉིས་དང་། །དབུ་མ་བཅུད་མདུད་མཚན་ལྡན་པ། །དྲྭ་བའི་རྩ་དང་དབང་པོ་དང་། །ཕུང་སོགས་ཡེ་ཤེས་བདེ་འཁོར་ལོ། །ཧཱུྃ་གིས་བདེ་བ་ཡེ་ཤེས་བཅས། །ཚོགས་བརྒྱད་རང་བཞིན་ཡེ་ཤེས་ལྔ། །སྔགས་རྫས་དགོངས་པ་གང་བསླད་པ། །ཀུན་ནས་ལྡན་ཞིང་སྐྱོབ་པ་ཡིས། །སྡུག་བསྔལ་ལས་གྲོལ་རིགས་སུ་ངེས། །ཞེས་འབྱུང་བའི་ཕྱིར། ཕན་པའི་དབང་བཅུ་པོ་ཁོ་ནའོ། །དུས་འདི་ཕྱི་ཆད་རྒྱལ་བའི་སྲས། །ཞེས་བྱ་བ་ལ་སོགས་པ་ནི་གོ་སླ་སྟེ། དབང་གི་ཡོན་ཏན་ཐུན་མོང་དུ་ལྷ་དང་མིར་སྐྱེས་ན་ཡང་དབང་པོར་འགྱུར་ལ། ནུས་པའི་དབང་པོ་ཐོབ་ནས་ཐར་པའི་ལམ་སྟོན་པའི་བདག་པོར་འགྱུར་རོ། །ཟབ་མོའི་དབང་ཐོབ་པ་ནི། རིགས་ཀྱི་བདག་པོ་རྡོ་རྗེ་འཛིན་པ་ཉིད་དུ་ངེས་སོ། །ཞེས་བྱ་བའོ། །ལེའུ་བཅུ་པ་མདོར་བཤད་པའོ།། །།དེ་ནས་ཏིང་ངེ་འཛིན་བཞི་པ་ལ་གནས་པ་རྣམས་ཀྱི་དོན་དུ། ཚོགས་ཀྱི་དཀྱིལ་འཁོར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །རྒྱལ་པོ་སྒྱུར་བ་ཞེས་བྱ་བ་ནི་སྒྱུ་འཕྲུལ་དྲྭ་བ་ཞེས་བྱ་བ་ཉིད་ལེའུ་བཞི་པར་ཡབ་ཡུམ་ཁོ་ན་ལ་བྱ་བའི་ཕྱིར། ཚོགས་ཀྱི་དཀྱིལ་འཁོར་ཀྱི་སྐབས་འདིར་ཡབ་ཡུམ་བདུན་ཅུ་ལ་སོགས་པའི་ཕྱག་རྒྱ་འབྲེལ་པ་ནི་སྒྱུ་འཕྲུལ་དྲྭ་བའི་ཡང་རྒྱལ་པོའོ། །དེ་དག་གི་དུས་སུ་ལོངས་སྤྱོད་ཐམས་ཅད་དང་ལྡན་པ་ཡང་རྒྱལ་པོ་ཞེས་བྱའོ། །འདུས་པ་དེ་དག་རྟོགས་པ་རྣམ་པ་བཞིས་ཐམས་ཅད་ཀྱང་སྐུ་དང་ཡེ་ཤེས་ཁོ་ནར་གསལ་བའི་ཕྱིར་སྤྱོད་ཡུལ་ཡོངས་སུ་དག་པ་ནི་སྒྱུར་བ་ཞེས་བྱ་བའོ། །དེ་ལྟ་བུའི་དོན་སྟོན་པའི་དགོངས་པ་མངོན་དུ་སྣང་ངོ་། །ཞེས་བྱ་བའི་ཐ་ཚིག་སྟེ་གདུལ་བྱའི་སྣང་བའོ། །རྒྱུ་གཅིག་པ་དང་ཡིག་འབྲུའི་ཚུལ། །ཞེས་བྱ་བ་ལ་སོགས་པ་ནི། ལྟ་བའི་གཏན་ཚིག་སྟོན་ཏེ། རྒྱུ་རང་བྱུང་་གི་ཡེ་ཤེས་རང་སྣང་བ་ནི་སྐུ་དང་ཡེ་ཤེས་ཏེ། དེ་དག་ནི་མྱ་ངན་ལས་འདས་པའི་ངོ་བོའོ། །རྒྱུ་མ་རིག་པ་དང་ལོག་རྟོག་གི་རྒྱུན་ལས་འཁོར་བའི་ཆོས་སུ་སྣང་ངོ་། །དེ་གཉིས་ནི་གསལ་བས་ཐ་དད་ཀྱང་ངོ་བོ་ཉིད་གཅིག་པ་སྟེ། འཁོར་བའི་རྒྱུ་གཉིས་པོ་ཉིད་རྒྱལ་པོའི་ཕྲུ་གུ་ལྟར་ལས་ནོར་ཡང་རང་གི་ངོ་བོ་མི་འགྱུར་བར་བསྟན་པའི་ཕྱིར། རྒྱས་པའི་རྒྱུད་ལས། གཏི་མུག་ཅེས་ནི་བརྗོད་པ་ཡང་། །མ་རིག་མིང་གི་རྣམ་གྲངས་ཏེ། །གཉིས་མེད་དོན་གཅིག་ཡིན་པར་བཤ ད་། །ཅེས་པ་དང་། ཡང་། ཕྱིན་ཅི་ལོག་ཉིད་ཡང་དག་སྟེ། །མ་རིག་པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་འབྱུང་བས། ལོག་རྟོག་ཉིད་དུའང་རིག་པ་རང་སྣང་བའི་ཕྱིར། རང་བྱུང་གི་ཡེ་ཤེས་ཁོ་ན་བས་དེའི་ངོ་བོ་བསྟན་དུ་མེད་པ་ནི་མཉམ་པའི་དབྱིངས་སུ་གསལ་བས་ཐམས་ཅད་ཀྱི་རྒྱུ་གཅིག་པ་ཁོ་ནའོ། །ཡིག་འབྲུ་ནི་ༀ་སྟེ། རྒྱུ་ཉིད་ཀྱི་ཕྱིར་ཐམས་ཅད་སེམས་ཉིད་ལས་གང་ཡང་མ་གྲུབ་པ་དང་། སེམས་ཉིད་ཅི་ཡང་མ་སྐྱེས་པ་ནི་ཨ་སྟེ་གསུང་གི་རང་བཞིན་ནོ། །ངོ་བོ་ཉིད་གཅིག་ཏུ་མ་གྲུབ་པ་དང་། རིག་པ་ཅིར་ཡང་སྣང་བ་ནི་ཨ་ལ་ན་རོ་སྣང་བ་སྟེ། སྐུའི་རང་བཞིན་ནོ། །དེ་དག་ཚིག་ལ་སྔ་ཕྱིར་སྣང་ཡང་དོན་གཅིག་པར་རྟོགས་པའི་རིག་པ་ཉིད་ཡེ་ཤེས་ལྔར་གསལ་བ་ནི། ༀ་སྟེ་ཐུགས་ཁོ་ནའོ། །ཡི་གེ་གཅིག་ལ་གསུམ་གྱིས་མཚོན་ནས་ཕུང་པོ་ལ་སོགས་པ་ཐམས་ཅད་སྐུ་གསུང་ཐུགས་སུ་སངས་རྒྱས་པར་བྱིན་གྱིས་བརླབས་པའི་ཕྱིར། བྱིན་གྱིས་བརླབས་དང་། ཞེས་གསུངས་སོ། །མངོན་སུམ་པར། ཞེས་བྱ་བ་ནི། མངོན་སུམ་བཞི་ལས། འདིར་བལྟ་བྱ་ལྟ་བྱེད་གཉིས་སུ་མེད་པས་རང་རིག་པའི་མངོན་སུམ་མོ། །དེས་ཐམས་ཅད་བཤད་པའི་རྗེས་སུ་དག་པའི་ཕྱིར། རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་གསུངས་སོ། །ཡན་ལག་དབང་པོ་རྣམ་ཤེས་ཀུན། །རྣམ་སྨིན་ༀ་དུ་ཤེས་པར་བྱ། །ཞེས་བྱ་བ་ནི། འདི་ནས་མར་སྤྱོད་པའི་ཏིང་ངེ་འཛིན་བསྟན་ཏེ། འདི་དག་ཏུ་རང་རིག་པ་ཉིད་སྣང་བར་ཤེས་པས། རབ་འབྲིང་ཐ་མར་མི་སྣང་གི། བདག་ཉིད་དུ་གསལ་བ་ནི་ཡེ་ཤེས་ལྔའི་ངོ་བོ་བས། ༀ་ཞེས་བརྡར་བསྟན་ཏོ། །དེ་ལས་ཞི་ཁྲོའི་ཚོགས་ཀྱི་དཀྱིལ་འཁོར་གཉིས་ཀྱི་སྐབས་སུ་རྣམ་པར་འབྱེད་པའི་ཏིང་ངེ་འཛིན་གཙོ་བས་རིགས་ལྔར་བསྒོམ་ཡང་མི་འགལ་བའི་ཕྱིར། རྫོགས་པའི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་བའི་དཀྱིལ་འཁོར་བསྒོམ། །ཞེས་གསུངས་སོ། །གཟུགས་སྒྲ་དྲི་རོ་རེག་རྣམས་ལ། །རྣམ་སྨིན་མཱུྃ་དུ་ཤེས་པར་བྱ། །ཞེས་བྱ་བ་ནི། རྒྱུ་ཉིད་ཀྱིས་འབྲས་བུ་ཡང་བདག་ལས་མི་གཞན་པའི་ཕྱིར། གང་དུ་ཡང་སྣང་བ་མེད་པར་གསལ་བ་ནི་མཉམ་པ་ཉིད་ཀྱི་དབྱིངས་ཏེ་མཱུྃ་ཞེས་བྱ་བའོ། །གཞན་ནི་རྗེས་སུ་མཐུན་ནོ། །ཚོགས་ཀྱི་ཡོ་བྱད་བཞི་བྱིན་གྱིས་བརླབས་པའི་ཕྱིར། གོས་རྒྱན་བཟའ་བཏུང་གླུ་ཚིག་དང་། །བྲོ་གར་ཚོགས་ཀྱི་སྤྲིན་ཕུང་ལ། །ཧཱུྃ་དུ་ཤེས་པས་རབ་སྤྱད་ན། །ངོ་མཚར་འབྱུང་བའི་དཀྱིལ་འཁོར་མཉེས། །ཞེས་གསུངས་པ་གཞན་ནི་གོ་སླ་སྟེ། བྲོ་གར་ནི་རིགས་སོ་སོའི་བྲོ་གར། རྒྱས་པའི་རྒྱུད་ལས། ལེའུ་གཅིག་གིས་བསྟན་ཏོ། །དེ་དག་རབ་ཏུ་མང་པོར་སྤྱོད་པའི་ཕྱིར། ཚོགས་དང་སྤྲིན་ཞེས་བྱའོ། །དེ་ཀུན་རང་རིག་ཏུ་ཤེས་ནས་སྤྱད་ན། སྤྱོད་བཞིན་མ་ཆགས་པ་ཆུ་ལ་ཉ་དང་། ནམ་མཁའ་ལ་བྱ་ལྟ་བུའི་ཚུལ་གྱིས་མི་གོས་པར། ཚོགས་གཉིས་སུ་འབྱུང་བ་ནི་ངོ་མཚར་རོ། །ཞེས་བྱ་བ་སྟེ། བདག་ཉིད་ཆེན་པོའི་མཆོད་པ་ཁོ་ནའོ། །ཡོ་བྱད་ལྔ་པ་བྱིན་གྱིས་བརླབ་པ་བསྟན་པའི་ཕྱིར། ལྷ་མོ་ཀླུ་མོ་རིགས་ངན་མོ། །ཞེས་བྱ་བ་ལ་སོགས་པ་གསུངས་ཏེ། འདི་དག་ནི་ནུས་པས་དངོས་སུ་དགུག་པ་ཡང་ཡིན་ལ། ལོ་གྲངས་གསུམ་དང་མཚན་རབ་འབྲིང་དང་། ཟླ་བ་དང་། ཉི་མར་ལྡན་པ་དང་མི་ལྡན་པ་གསུམ་དང་། སྦྱོར་བའི་ཐབས་བདག་བདེ་བ་དང་། གཞན་བདེ་བ་དང་། གཉིས་བདེ་བ་རྣམས་ཁོ་ནའོ། །དབྱེའམ་ཡང་ན་མི་དབྱེ་པར། །ཞེས་བྱ་བ་ནི། རང་གི་ཐབས་དང་སྦྱར་རོ། །ཞེས་བྱ་བའོ། །བསྙེན་པ་དང་ནི་ཉེ་བསྙེན་པ། །བསྒྲུབ་པ་དང་ནི་བསྒྲུབ་ཆེན་པོས། །ཞེས་བྱ་བ་ནི། འདི་དག་ལམ་གྱི་རིམ་པར་སྦྱར་བ་ནི། བསྙེན་པ་ནི་ཏིང་ངེ་འཛིན་གོང་མ་གཉིས་ཀྱིས་བྱང་ཆུབ་སེམས་གཉིས་ཉམས་སུ་ལོན་པའོ། །ཉེ་བའི་བསྙེན་པ་ནི། ཏིང་ངེ་འཛིན་འོག་མ་གཉིས་མངོན་དུ་བྱས་པའོ། །སྒྲུབ་པ་ནི་ཡོ་བྱད་ལྔས་ཚོགས་བསྒྲུབ་པའོ། །སྒྲུབ་པ་ཆེན་པོ་ནི་དེའི་དུས་སུ་ཨཱ་ལི་ཀཱ་ལི་ཉམས་སུ་ལེན་པ་སྟེ། དེ་ལ་བསྙེན་སྒྲུབ་བཞི་ཁོ་ན་ཏེ། ཨཱ་ལི་ཕྱག་རྒྱ་རྙེད་ནས་ཆོས་གསུམ་གྱིས་བརྟན་པར་བྱས་པ་ནི་བསྙེན་པའོ། །ཡོ་བྱད་བཞི་དང་འདོད་པའི་ཆོས་ཀྱིས་བདེ་བ་རྒྱས་པར་བྱས་པ་ནི། ཉེ་བའི་བསྙེན་པའོ། །སྙོམས་པར་ཞུགས་པ་ནི་སྒྲུབ་པའོ། །ཉི་ཟླ་རྡོ་རྗེའི་ལྕེས་ལེན་པ་ནི་སྒྲུབ་པ་ཆེན་པོའོ། །དེ་ཉིད་གསལ་བར་བསྟན་པའི་ཕྱིར། ཡུམ་གྱི་པདྨའི་དཀྱིལ་འཁོར་དུ། །ཞེས་བྱ་བ་ལ་སོགས་པ་གསུངས་ཏེ། ལེའུ་དགུ་པར་བཤད་ཟིན་ཏོ། །བསྒྲུབས་པའི་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེའི་ལྕེ་ཡིས་བླང་། །ཞེས་པ་ནི། བསྒྲུབས་པ་ལས་བྱུང་བའི་ཕྱིར་བསྒྲུབས་པའོ། །སྙིང་པོ་ནི་ཉི་ཟླའི་ཐིག་ལེ་གཅིག་སྟེ་ཡོན་ཏན་ཐམས་ཅད་སྙིང་པོའོ། །དེའི་ཕྱིར་ཡེ་ཤེས་ལྔའི་དཀྱིལ་འཁོར་དུ་གསལ་བ་ཁོ་ནའོ། །རྡོ་རྗེ་ཉིད་ལྕེ་བས་དེ་ལ་དེ་སྐད་ཅེས་བྱའོ། །བླང་བ་ནི་བཅུ་པར་བཤད་ཟིན་ཏོ། །ཐ་མལ་པ་རྣམས་ཀྱི་དབང་དུ་ལྕེ་ལ་རྡོ་རྗེ་བསྒོམས་པ་ནི་རྡོ་རྗེ་ལྕེ་སྟེ། དེས་བླངས་པའི་ཡོན་ཏན་ནི། མཁའ་འགྲོ་གསལ་འབར་ཚེ་ལ་སོགས། །ཞེས་བྱ་བའོ། །སྔ་མའི་ཡོན་ཏན་ནི། ཡིད་བཞིན་སྤྲིན་གྱི་བདག་པོར་འགྱུར། །ཞེས་གསུངས་སོ། །དེ་དག་གི་ཐུགས་རྗེ་རྨད་དུ་བྱུང་བའི་སྤྱོད་པ་བསྟན་པའི་ཕྱིར། ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་སྟེང་དུ་མཁས་པས་བཞག །ཅེས་བྱ་བ་ལ་སོགས་པ་གསུངས་ཏེ། ཞིང་གཉིས་ལས་འདིར་ཐུགས་རྗེའི་ཞིང་སྟེ། ཞིང་བཅུའོ། །དེ་ལ་བརྒྱད་ནི་མཆོག་གོ། །ངན་སོང་གསུམ་པོ་ནི་ཕྲ་བའོ། །དེ་དག་ཨེའི་སྟེང་དུ་ཉི་ཟླ་བསམས་ཏེ། བདག་ཉིད་ཊཱ་ཱཀིའི་ཏིང་ངེ་འཛིན་ལས་མ་ཡེངས་པས། འཁོར་བ་རིལ་དུ་བཟློག་པར་མནན་པ་ནི་མཁས་པས་བཞག་པ་ཁོ་ནའོ། །གཞན་དུ་ན་ཉི་ཟླ་གཉིས་ཀྱིས་རྣམ་པར་ཤེས་པ་ལ་དབང་བསྐུར་བའོ། །ང་རྒྱལ་ལག་གི་འདུ་བྱེད་བསྒོམ། །ཧཱུྃ་དུ་གྱུར་པས་རྣམ་པ་དག །དབྱིངས་སུ་ཐིམ་ནས་ཕྱག་རྒྱ་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་བསྒོམ། །ཞེས་བྱ་བ་ནི། གིང་ཉིད་ལྷའི་ཏིང་ངེ་འཛིན་མ་ཉམས་པའི་སོར་མོ་ཡི་གེ་ལྔའི་འོད་ཟེར་གྱིས་ས་བོན་དྲུག་པོ་སྦྱངས་ནས། སེམས་མི་ཤིགས་པའི་ཐིག་ལེ་ཉིད་ཧཱུྃ་དཀར་པོར་བྱས་པ་དྲངས་ཏེ། བདག་གི་ཤངས་ནས་རིམ་པར་བརྒྱུད་ནས། མཁའ་ལ་བབས་ཏེ། བྱང་ཆུབ་སེམས་ཀྱི་བསྟིམས་ནས་ཆོ་ག་གསུམ་གྱིས་རྡོ་རྗེ་སེམས་དཔའི་སྐུར་གྱུར། དེ་ཉིད་ཉོན་མོངས་པ་ལྔ་གནས་སུ་དག་པའི་འོད་ཟེར་སྣ་ལྔ་དང་ལྡན་པའི་སྤྱི་བོར་རིགས་ཀྱི་བདག་པོ་ཚོན་གང་བསྒོམ་པ་ནི་འཁོར་བ་ལས་མངོན་པར་རྒྱལ་བའི་ཕྱིར་ཏེ་དེ་ལ་དེ་སྐད་ཅེས་བྱའོ། །ངོ་མཚར་ངན་འགྲོ་ཐར་པའི་ཐབས། །ཞེས་བྱ་བ་ནི། ངན་པར་འགྲོ་བ་དང་སོང་བ་རིལ་ལ་རང་གིས་བསགས་པ་མེད་ན། ཐར་པའི་ཐབས་འདི་ལས་གཞན་མེད་པའི་ཕྱིར་རོ། །འོ་ན་དེས་མི་སྒྲིབ་བམ་སྙམ་པ་ལ་ཤེས་རབ་ཀྱིས་མི་གོས་པར་བསྟན་པའི་ཕྱིར། ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་གསུངས་ཏེ། དེ་དག་ཉིད་རིལ་གྱི་རང་བཞིན་སྣང་བ་ནི། དེ་བཞིན་ཉིད་ཁོ་ནའོ། །དེ་ལས་རང་གི་ལོག་རྟོག་གི་རྒྱུ་རྐྱེན་འདུས་པ་ཙམ་སྣང་བ་སྒྱུ་མ་ལྟ་བུའོ། །དེ་ལ་ངོ་བོ་ཉིད་ཡོད་པར་མཐོང་བ་ནི་ཐོ་ཡོར་ལ་མི་རུ་འདུ་ཤེས་པ་ལྟ་བུ་སྟེ། འདི་དག་ལྟར་ཤེས་ན་བསད་བ་མེད་པས་འདུ་ཤེས་མི་འཇུག་པ་ཁོ་ནའོ། །དེ་དག་ལ་སོགས་པའི་ལྟ་བའི་གཏན་ཚིགས་བསྟན་པའི་ཕྱིར། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་བྱ་བ་ལ་སོགས་པ་གསུངས་ཏེ། བཤད་པ་བཞིན་དུ་རྒྱུ་ཉིད་ནས་དག་པའི་ཕྱིར་ཐམས་ཅད་ཀྱང་རང་རིག་པ་ཁོ་ནར་གསལ་བ་ནི། སྐུ་དང་ཡེ་ཤེས་ཤ་སྟག་པས། འབྱུང་བ་ལྔའི་ངོ་བོ་རིགས་ཀྱི་ཡུམ་ལྔར་དག་པ་དང་། ཕུང་པོ་ལྔ་རིགས་ལྔར་དག་པ་དང་། རྣམ་པར་ཤེས་པ་བརྒྱད་ཡེ་ཤེས་ལྔར་དག་པ་ལ་འཁོར་བ་ངང་གིས་མེད་པའི་ཕྱིར་རོ། །མཉམ་གཉིས་ལྷག་པའི་མཉམ་གཉིས་ཀྱིས། །ཞེས་བྱ་བ་ནི། ཆོས་ཐམས་ཅད་བདེན་པ་གཉིས་སུ་མཉམ་པ་ནི། མདོ་སྡེ་དག་དང་ཡང་མཐུན་ལ། ལྷག་པའི་མཉམ་པ་གཉིས་ནི་གསུམ་པའི་སྐབས་སུ་བཤད་དོ། །རྒྱུད་ཀྱི་རང་གཞུང་ནི་དག་པའི་སྐབས་ལས་ཤེས་པར་བྱའོ། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་བྱ་བ་ནི། དངོས་པོ་རྣམས་གཏན་ཚིགས་གསུམ་གྱིས་གཞལ་བས་འཁྲུལ་པའི་སྣང་བ་དག་པ་ཉིད་ཀྱིས་དངོས་པོ་རྣམས་ཀྱི་དེ་ཁོ་ན་ཉིད་ནི། སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་དག་པར་གནས་པ་སྟེ། ངོ་བོ་ཉིད་ཀྱི་ཞིང་ཁམས་ཞེས་བྱ་བ་ཁོ་ནའོ། །བྱེད་སྤྱོད་ཚོགས་ཆེན་གཉིས་གྱུར་ནས། །ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ཅེས་བྱ་བ་ནི། སྒྲུབ་པ་པོ་སྟོན་ཏེ། ལྟ་སྤྱོད་ཏིང་འཛིན་འཁྲུགས་པར་བྱའོ། །དེ་ཡང་དང་པོ་དབང་རིམ་པར་ནོས་ནས། དེ་ནས་གཏན་ཚིགས་གསུམ་གྱིས་དངོས་པོའི་དེ་ཁོ་ན་ཉིད་ངོ་ཤེས་པར་བྱས་ལ། དེ་ནས་ཏིང་ངེ་འཛིན་རྣམ་པ་བཞི་ལ་རིམ་པས་སེམས་སྦྱངས་ཏེ། སྣང་བ་རྣམ་པར་འབྱེད་པ་ལ་དབང་ཐོབ་པའི་ཕོ་མོ་བདུན་ཅུའམ། བཞི་བཅུ་རྩ་དྲུག་གམ། བཅོ་བརྒྱད་ཀྱིས། འཁོར་ཁང་སུམ་རིམ་དུ་ཡོ་བྱད་ལྔ་བསགས་ཏེ་ཚོགས་བསྒྲུབས་ན། རིགས་འཛིན་གསུམ་དང་མཐར་སྐུ་ལྔ་ཡང་འགྲུབ་བོ། །ཞེས་བྱ་བའོ། །ཚོགས་ཀྱི་དཀྱིལ་འཁོར་གྱི་ངོ་བོ་སྟོན་པའི་ཕྱིར། ལྔ་དང་ལྔ་ཡི་སྦྱོར་བ་ཡིས། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་རྣམ་པ ར་བསྒོམ། །ཞེས་སོགས་གསུངས་ཏེ། ལྷ་སོ་སོ་ཐོག་མ་ནས་བསྒོམ་པའམ། བསྒྱུར་ཏེ་བསྒོམ་པའི་ཕོ་མོ་བཅུ་དབུས་སུ་རྡོ་རྗེའི་རིགས་ཡབ་ཡུམ་བཅུ་རུ་དགོད་དོ། །དེ་ལྟར་ཕྱོགས་བཞིར་རིགས་བཞི་ཡབ་ཡུམ་བཞི་བཅུའོ། །དེའི་ཕྱི་རིམ་དུ་ཁྲོ་བོ་ཡམ་ཡུམ་ཉི་ཤུའོ། །ཚོམ་བུ་གསུམ་པ་བསྟན་པའི་ཕྱིར། དེ་བཞིན་རིགས་དང་རྡོ་རྗེའི་རིགས། །བྱ་བ་ལ་སོགས་པ་གསུངས་ཏེ། །ཁྲོ་བོ་ཡབ་ཡུམ་བཅུ་དྲུག་གོ། །ཚོམ་བུ་གཅིག་པ་བསྟན་པའི་ཕྱིར། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཅེས་བྱ་བ་ལ་སོགས་པ་གསུངས་ཏེ། རིགས་ལྔ་ནི་རྡོ་རྗེའི་རིགས་སུ་འདུས་པས། རྡོ་རྗེའི་རིགས་ནི་དཀྱིལ་འཁོར་གྱི་སྐབས་ཀྱིས་རིགས་ཀྱི་གཙོ་བོ་ཁོ་ནའོ། །གཅིག་དང་ཐ་དད་ལས་གྲོལ་བས་རིགས་འགྱུར་ཡང་། ཡེ་ཤེས་མི་འགྱུར་བའི་ཕྱིར། ཐུགས་ཐམས་ཅད་ཡེ་ཤེས་ལྔར་འདུས་ལ། ལྔ་ཡང་སྟོང་པ་ཉིད་ཁོ་ནར་འདུས་པས་དེ་ནི་ཐམས་ཅད་ཀྱི་མཆོག་གོ། །གཞན་ནི་གོ་སླའོ། །ཁྲོ་བོ་ཁྲོ་མོ་བརྒྱད་དོ། །ཁྲོ་བོ་ཁྲོ་མོ་ཚོགས་ཆེན་པོ། །ཕོ་ཉ་ཕྱག་བརྙན་བཀའ་ཉན་ཚོགས། །ཅི་བགྱི་ལ་སོགས་ཚོགས་རྣམས་ཀྱིས། །དངོས་གྲུབ་ལས་རྣམས་རྫོགས་པར་བྱེད། །ཅེས་བྱ་བ་ནི། ཁྲོ་བོ་ཁྲོ་མོ་ཚོགས་ཀྱི་དཀྱིལ་འཁོར་བསྒྲུབ་ན། ཁྲོ་བོ་ཡབ་ཡུམ་བཅུ་དབུས་སུ་དགོད། དེ་བཞིན་དུ་རིམ་པས་གནས་ཡུལ་སྒོ་མ་ཉི་ཤུ་དང་། ཅི་བགྱི་ཞེས་ལས་སྒྲུབ་པའི་དབང་ཕྱུག་མ་ཉི་ཤུ་རྩ་བརྒྱད་དང་། བསྡུས་པའི་ཁྲོ་བོ་ཁྲོ་མོ་ཉི་ཤུ་སྟེ། ཕོ་མོ་བདུན་ཅུ་རྩ་བརྒྱད་ཀྱིས་བསྒྲུབས་ན་ལས་དང་དངོས་གྲུབ་གཉི་ག་ཡང་འགྲུབ་བོ་ཞེས་བྱ་བའི་ཐ་ཚིག་གོ། །རྣལ་འབྱོར་སྔགས་འཆང་དངོས་གྲུབ་ནི། །ཞེས་བྱ་བ་ལ་སོགས་པ་ན ི། ཚོགས་ཀྱི་ལྟ་སྤྱོད་འབྲེལ་བ་དང་། རྫོགས་པའི་རིམ་པའི་ལམ་གཉིས་ཐུན་མོང་དུ་བསྟན་ཏོ། །རྣལ་འབྱོར་ནི་རྣམ་པ་གསུམ་སྟེ། རང་བཞིན་དང་། ལམ་དང་། ལྷུན་གྱིས་གྲུབ་པའོ། །ལམ་ལ་སྤྱིར་གཉིས་ཏེ། ཕྱག་རྒྱའི་རྣལ་འབྱོར་དང་། ཡེ་ཤེས་ཀྱི་རྣལ་འབྱོར་རོ། །དེ་ལ་རྒྱུད་འདི་ནི་དེ་གཉིས་མི་ཕྱེད་པ་ཁོ་ནའོ། །སྔགས་ལ་གཉིས་ཏེ། ཡིད་སྐྱོབ་པ་དང་། བྱིན་གྱིས་བརླབས་ཆེན་པོའི་ཕྱིར་རོ། །འཆང་བ་ལ་གཉིས་ཏེ། རྣལ་འབྱོར་གྱི་མངོན་སུམ་ནི་འཆང་བའོ། །རང་རིག་པའི་མངོན་སུམ་དུ་ཤིན་ཏུ་འཆང་བའོ། །དངོས་གྲུབ་ཀྱང་གཉིས་ཏེ། ཐུན་མོང་དང་མཆོག་སྟེ། ཞར་ལས་འབྱུང་བའི་ཕྱིར་སྨོས་པའོ། །མཉམ་རྫོགས་ལྷུན་གྲུབ་ངང་གནས་ཤིང་། །ཞེས་བྱ་བ་ནི། རྒྱས་པའི་རྒྱུད་ལས། ཐབས་ཀྱི་ཐེག་པའི་ལྟ་བ་ནི། །བླ་མེད་ཐེག་པ་ལས་འཕགས་པའི། །དོན་དམ་དུ་ནི་དཀོར་བདུན་ནོ། །ཀུན་རྫོབ་ཏུ་ནི་མཉམ་རྫོགས་སོ། །ཞེས་འབྱུང་བས། རང་རིག་པ་ཉིད་དངོས་པོ་ཐམས་ཅད་དུ་རང་སྣང་བས་དངོས་པོ་གཉི་ག་རང་རིག་པའི་སྐུ་དང་ཡེ་ཤེས་སུ་གསལ་བར་མཉམ་པ་ལ་འབྲས་བུ་ལུས་པ་མེད་པ་ནི་རྫོགས་པ་ཁོ་ནའོ། །ངང་ལ་གཉིས་ཏེ། སྐྱེ་བ་མེད་པའི་ངང་ནི། སྤྲོས་པ་བརྒྱད་དང་བྲལ་བ་ཁོ་ནའོ། །ལྷུན་གྱིས་གྲུབ་པའི་ངང་ནི། དངོས་པོ་ཐམས་ཅད་སེམས་ཉིད་ཁོ་ནའི་ཕྱིར་ཅི་ཡང་མ་ཡིན་པ་ཉིད་ལ་ཡོན་ཏན་རིལ་ལྷུན་གྱིས་གྲུབ་པར་གནས་པའོ། །དེ་དག་ནི་རང་བཞིན་གྱི་རྣལ་འབྱོར་ཏེ། དེ་ལྟར་ཤེས་པ་ནི་རྒྱུའི་མཚན་ཉིད་དེ། དགོས་པ་དང་བསྙེན་པའོ། །གང་གིས་དེ་ལ་གནས་པར་བྱར་མེད་པའི་ཚུལ་གྱིས་གནས་པ་ནི། སྔགས་འཆང་བ་ལམ་གྱི་རྣལ་འབྱོར་ཏེ། རྐྱེན་འཇུག་པའི་མཚན་ཉིད་དོ། །སྤྱོད་པ་ཅི་ལའང་ཐོགས་མེད་པ། །ཞེས་བྱ་བ་ནི། དེ་དག་གི་སྤྱོད་པ་ནི་གང་ཡང་མ་བཀག་པ་ཁོ་ན་སྟེ། ལྟ་བ་ཀླུང་དུ་བྱེད་པ་དང་། སྤྱོད་པ་མི་གོས་པའི་ཕྱིར་ཏེ། གང་ཡང་བྱ་བ་དང་བྱེད་པ་དང་། བྱས་པར་ཡིན་ལ་བྱེད་པ་དང་། ཐོགས་པ་དང་བཅས་པའོ། །དེ་གསུམ་དུ་མི་འཛིན་པ་ནི་ཐོགས་པ་མེད་པ་སྟེ། བྱིས་པ་བཞིན་དུ་སྤྱོད་དོ་ཞེས་བྱ་བ་ཁོ་ནའོ། །དེ་དག་ཅིའི་ཕྱིར་སྙམ་པ་ལ། ཐམས་ཅད་ཡེ་ནས་དབྱེར་མེད་པའོ། །ཞེས་གསུངས་ཏེ། དངོས་པོ་ཐམས་ཅད་ནི་གདོད་ནས་སྣང་སྟོང་གཉིས་སུ་དབྱེ་རུ་མེད་པ་ཁོ་ནའི་ཕྱིར་རོ་ཞེས་བྱ་བའོ། །དེ་ལྟར་ལྟ་སྤྱོད་གཉིས་དང་ལྡན་པ་ནི། འཇུག་པ་ཉམས་སུ་ལོན་པས། འབྲེལ་པ་དང་ཉེ་བའི་བསྙེན་པ་སྟེ། གཟུངས་ཀྱི་རྒྱལ་པོ་དང་འདུ་འབྲལ་མེད་པར་བསྒྲུབ་པའོ། །དེ་ཉིད་མངོན་དུ་བྱས་པ་ནི་བསྒྲུབ་པ་ཆེན་པོའི་འབྲས་བུའི་མཚན་ཉིད་དེ། དགོས་པའི་ཡང་དགོས་པའོ། །ཞེས་བྱ་བའོ། །རྡོ་རྗེའི་རིགས་སུ་ཐམས་ཅད་དཀྱིལ། །ཞེས་བྱ་བ་ལ་སོགས་པ་ནི། ཚོགས་ཀྱི་དཀྱིལ་འཁོར་གྱི་བསྒྲུབ་པའི་ཐབས་ལས་འདིས་ནི་ཚོམ་བུ་གཅིག་པའི་སྒྲུབ་ཐབས་སྟོན་ཏེ། རྡོ་རྗེའི་རིགས་སུ་རིགས་བཞི་པོ་འདུས་པའི་ཕྱིར། དཀྱིལ་ཞེས་བྱ་བ་ཁོ་ནའོ། །སྤྱིར་བདག་པོའི་རིགས་ཀྱང་བླ་དྭགས་སུ་རྡོ་རྗེ་སྟེ། རིགས་ལྔ་ཆར་ལྷུན་གྱིས་གྲུབ་པས་མི་ཕྱེད་པའི་ཕྱིར་རོ། །དེ་བས་ན་ལེའུ་དང་པོ་ལ་སོགས་པ་ལས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཞེས་འབྱུང་ངོ་། །འོད་ཟེར་འཕྲོ་བ་རབ་ཏུ་བསྒོམ། །ཆགས་མེད་ཚུལ་གྱིས་བསྟིམ་པར་བྱ། །ཞེས་བྱ་བ་ནི། ཚོམ་བུ་གཅིག་པའི་ལྷ་ཡན་ལག་གི་ལྷ་རྣམས་དང་བཅས་པར་བསྒོམས་ཏེ། ཡོ་བྱད་ལྔ་ལ་སྤྱོད་ཙམ་ན་ཐོགས་པ་མེད་པས་འདུ་ཤེས་དང་བྲལ་བས་བྱས་པའི་ངོ་བོ་མེད་པ་ནི་ཐིམ་པ་ཞེས་བྱ་བ་ཁོ་ནའོ། །གཉིས་མེད་གྱུར་ན ས་ཕྱག་རྒྱ་ཆེ། །ཞེས་བྱ་བ་ནི། ཡོ་བྱད་བཞི་པོ་ལྟ་སྤྱོད་གཉིས་སུ་མེད་པས་སྐུ་ཕྱག་རྒྱ་ཆེན་པོའི་རིག་འཛིན་ཐོབ་པའོ། །ཡོ་བྱད་ལྔ་པ་ཉི་ཟླ་གཉིས་སུ་མེད་པས་ནི་ཐབས་དང་ཤེས་རབ་ཀྱི་ཕྱག་རྒྱ་ཆེན་པོའི་དངོས་གྲུབ་སྟེ་ལྷུན་གྱིས་གྲུབ་པའི་རིག་འཛིན་ཐོབ་བོ། །ཡང་ན་སྐུ་གསུང་ཐུགས་ཉིད་དེ། །ཞེས་བྱ་བ་ལ་སོགས་པ་ནི། ཆོས་ཐམས་ཅད་སྐུ་གསུང་ཐུགས་སུ་འདུས་པའི་ཕྱིར། ཚོམ་བུ་གསུམ་པའི་སྒྲུབ་ཐབས་སྟོན་ཏེ། རྗེས་སུ་མཐུན་ནོ། །རྡོ་རྗེ་རིགས་སུ་སྐྱེ་བའི་གནས། །ཞེས་བྱ་བ་ནི་དེ་བཞིན་གཤེགས་པའི་དཀྱིལ་འཁོར་ཐམས་ཅད་སྐུ་གསུང་ཐུགས་ཁོ་ནར་འདུས་ལ། དེ་དག་མི་ཕྱེད་པ་ནི་རྡོ་རྗེ་ཞེས་བླ་དྭགས་སུ་བརྗོད་པའོ། །སྔགས་འཆང་དངོས་གྲུབ་ཡང་དག་ནི། །ཞེས་བྱ་བ་ལ་སོགས་པ་ནི། ཚོམ་བུ་ལྔའི་སྒྲུབ་ཐབས་ཏེ། རྗེས་སུ་མཐུན་ནོ། །དངོས་གྲུབ་མཆོག་གི་སྙིང་པོ་འགྲུབ། །ཅེས་བྱ་བ་ནི། སྐུ་ལྔ་ནི་དངོས་གྲུབ་ཀྱི་མཆོག་སྟེ། དེ་དག་ལྷུན་གྱིས་གྲུབ་པའི་རིག་འཛིན་ལས་འབྱུང་བའི་ཕྱིར་རོ། །རྣལ་འབྱོར་ཐབས་དང་ཤེས་རབ་ཀྱིས། །དེ་བཞིན་གཤེགས་དང་ཡུམ་དུ་བསྒོམ། །སེམས་དཔའ་སེམས་མ་ཉིད་དུ་བསྒོམ། །ཞེས་བྱ་བ་ནི། སྒྱུ་འཕྲུལ་བསྡུས་པའི་དཀྱིལ་འཁོར་ཏེ། སྒོ་བ་ཡབ་ཡུམ་བརྒྱད་དེ་ལྷ་བཅོ་བརྒྱད་དོ། །དབུས་ཀྱི་གཙོ་བོ་ནི་རིགས་དྲུག་པོ་གང་ཡང་རུང་བ་དེ་མ་ངེས་པའོ། །འདི་ནི་ཚོགས་ཀྱི་དཀྱིལ་འཁོར་དང་གཟུགས་བརྙན་གྱི་དཀྱིལ་འཁོར་ཀུན་ལའང་སྦྱར་བར་བྱའོ། །སོ་སོའི་སྔགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །ཞེས་བྱ་བ་ནི། དཀྱིལ་འཁོར་དུ་སྣང་ཡང་ཏིང་ངེ་འཛིན་དང་། ཕྱག་རྒྱ་དང་། སྔགས་རང་མ་འདྲེས་པ་ཁོ་ནའོ། །ཞེས་བྱ་བའོ། །གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །ཞེས་བྱ་བ་ནི། ཤིན་ཏུ་དབེན་པའི་ས་ཕྱོགས་སུ། འཁོར་ཁང་སུམ་རིམ་དྲི་ཞིམ་པ་ཡངས་པ་རྒྱན་གྱིས་སྤྲས་པ་བྱས་ལ། དེར་ལོངས་སྤྱོད་ལྔ་ལ་འཇོལ་ཉོག་ཏུ་སྤྱོད་པ་ནི་ཅི་བདེ་ཞེས་བྱའོ། །དེའི་དུས་སུ་དམ་ཚིག་མ་ཉམས་པ་དང་། ལྟ་སྤྱོད་དང་། ཏིང་ངེ་འཛིན་དུ་འབྲེལ་བས་བསྒྲུབ་བོ་ཞེས་བྱ་བའི་ཐ་ཚིག་གོ། །དང་པོ་དམ་ནོས་བཞིན་དུ་བྱ། །ཞེས་བྱ་བ་ནི། ཚོམ་བུའི་གྲངས་དང་། ཨཱ་ལིའི་སྤྱོད་པ་དང་། དམ་ཚིག་ནི། དམ་ཇི་ལྟར་བཅས་པ་ལས་མི་འདའ་བ་ཁོ་ནའོ། །ཞེས་བྱ་བའོ། །དཀྱིལ་འཁོར་འདིས་མཐར་གཏུགས་པའི་ཕྱིར། ལ་ལ་དག་དུས་སུ་སྨྲ་བ་ནི་དོན་མེད་པ་ཁོ་ནའོ། །ལེ་ལོ་སྒྱིད་སྙོམས་མེད་པ་ཡིས། །ཐེ་ཚོམ་མེད་པར་བསྒྲུབ་བྱས་ན། །ཞེས་བྱ་བ་ནི། སོམ་ཉི་ནི་འབྲས་བུ་མ་ལུས་པའི་གེགས་ཁོ་ནའི་ཕྱིར་རོ། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་ཐོབ། །ཅེས་བྱ་བ་ནི། ཚོགས་ཀྱི་དཀྱིལ་འཁོར་གསུམ་དུ་དཀྱིལ་འཁོར་མཐའ་དག་འདུས་ཏེ། མི་ཕྱེད་པའི་ཕྱིར་གཅིག་དང་དུ་མ་དང་བྲལ་བས་གྲུབ་པ་ཁོ་ནའོ། །སྒྲུབ་པའི་ཞག་དང་ཚེས་གྲངས་ནི། །རྒྱུད་ལས་སྨོས་པ་བཞིན་དུ་བཤད། །ཅེས་བྱ་བ་ནི། འགྲུབ་པའི་དུས་ཞག་སུམ་ཅུ་ཕྲག་དྲུག་ལ་སོགས་པ་ནི་འདི་ཉིད་ཀྱི་དགུ་པ་ལས་གསུངས་ལ། སྐར་མ་དང་ཚེས་བཟང་པོ་ལ་འཇུག་པ་ནི་རྒྱུད་གཞན་ལས་གསུངས་པ་ལྟར་བྱའོ། །ཞེས་བྱ་བ་ཁོ་ནའོ། །ཚོགས་ཀྱི་དཀྱིལ་འཁོར་ཞེ་བྱ་བ་ནི། སྒྱུ་འཕྲུལ་རྡོ་རྗེ་ལས། སྐྱེ་བོ་མཛའ་བ་ཀུན་ཚོགས་པ། །རྣལ་འབྱོར་འདུས་པའི་ཚོགས་ཞེས་བྱ། །འབྱོར་པའི་ལོངས་སྤྱོད་ཚང་བ་ནི། །བདེ་བའི་ལོངས་སྤྱོད་ཚོགས་སུ་བཤད། །ལྷ་དང་དམ་ཅན་ཀུན་ཀྱང་འདུས། །འདུས་པ་ཆེན་པོའི་ཚོགས་སུ་གསུང་། །ཐམས་ཅད་སྤྱོད་ལ་མི་འཛིན་པས། །ཚོགས་གཉིས་རྒྱུན་དུ་རྫོགས་བྱེད་པས། །ཚོགས་ཆེན་པོ་རུ་ངེས་པར་བཤད། །ཅེས་གསུངས་སོ། །དཀྱིལ་འཁོར་ནི། རྒྱས་པའི་རྒྱུད་ནས། རྡོ་རྗེ་སེམས་དཔའ་དཀྱིལ་ཉིད་དེ། །རིགས་བཞི་ལྷ་དང་ལྷ་མོ་འཁོར། །ཡང་ན་འདས་པ་དཀྱིལ་ཉིད་དེ། །འཇིག་རྟེན་སྣ་ཚོགས་འཁོར་ཡིན་ནོ། །ཞེས་གསུངས་སོ། །ལེའུ་བཅུ་གཅིག་པ་མདོར་བཤད་པའོ།། །།དེ་ནས་དཀྱིལ་འཁོར་དེ་དག་ཉེ་བར་སྒྲུབ་པའི་ཐབས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །རོལ་མོའི་སྤྲིན་རྣམ་པར་འཕྲོས་ཏེ། རྒྱན་བཀོད་པ་ཞེས་བྱ་བ་ནི། རོལ་མོ་ནི་གཞི་མ་ངེས་པ་ལས་སྣ་ཚོགས་སུ་སྣང་བས་ཐམས་ཅད་ཀྱང་ཚིམ་པར་བྱེད་པ་སྟེ། འདིར་ཡོ་བྱད་ལྔ་ལ་སོགས་པ་ཐམས་ཅད་དུ། རིག་པ་རང་སྣང་བར་ཤེས་ནས་དེ་ལ་སྣ་ཚོགས་སུ་སྤྱོད་པ་ཉིད་ཡེ་ཤེས་ཀྱི་རོལ་པ་སྟེ། དེ་དག་འཁོར་བ་དང་མྱ་ངན་ལས་འདས་པ་གཉིས་སུ་མེད་པར་གྲུབ་པའི་ཐབས་སུ་མཛེས་པ་དང་། གཉིས་སུ་མེད་པའི་རྒྱན་ཁོ་ནའོ། །སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །ཞེས་བྱ་བ་ནི། ངེས་པར་ཚོགས་སྒྲུབ་པ་རྣམས་ཀྱིས། རྒྱུད་འདིའི་གཞུང་གི་ཚོགས་ཀྱི་དཀྱིལ་འཁོར་རྣམ་པ་གསུམ་པོ་གང་ཡང་རུང་བ་ལ་བློ་སྦྱངས་ཏེ། སྣང་བ་རྣམ་པར་འབྱེད་པའི་ཏིང་ངེ་འཛིན་ཐོབ་པ་དེས་བསྒྲུབ་བོ་ཞེས་བྱ་བའོ། །ཡོ་བྱད་ལྔ་སྤྱད་པའི་སོ་སོའི་ཡོན་ཏན་བསྟན་པའི་ཕྱིར། བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །ཞེས་བྱ་བ་ནི། སྒྱུ་འཕྲུལ་རྒྱས་པའི་རྒྱུད་ཀྱི་བཞུགས་གནས་ཀྱི་ལེའུ་བཞིན་གནས་ཁང་དང་། ས་ཕྱོགས་རྡོ་རྗེའི་གཞི་ལ་རིན་པོ་ཆེས་སྤྲས་པར་བརླབས། དེ་ནས་ཡན་ལག་ལྔ་ལ་དཀྱིལ་འཁོར་ལྔ་བཀོད་པ་དང་། ཡན་ལག་ཀུན་གསལ་བར་བྱས་ནས་ལུས་རྒྱན་གྱིས་བརྒྱན་ཏེ། བྲོ་སྟབས་དང་། ལག་གི་གར་སྟབས་སྣ་ཚོགས་དང་། གླུ་ཚིག་རྒྱས་པ་ལས་འབྱུང་བ་ལ་སོགས་པ་སྣ་ཚོགས་བླངས་པའི་དུས་ན། དབུ་ཡི་དཀྱིལ་འཁོར་བསྒུལ་བསྐྱོད་པས། །སངས་རྒྱས་ཞིང་ཁམས་མ་ལུས་གཡོ། །ཞེས་བྱ་བ་ལ་སོགས་པ་བཞིན་དུ་སྤྲུལ་པའི་འཕྲོ་འདུ་དང་བཅས་པའི་བྲོ་གར་བྱས་པའི་ཡོན་ཏན་ནི། རི་བྲག་དང་ས་ལ་འཛུལ་ཞིང་རྐང་འོག་གི་ཕྱག་རྒྱ་མོ་རྣམས་སྤྱོད་པ་དང་། མཁའ་ལ་འགྲོ་ཞིང་ལྷ་དང་། གནོད་སྦྱིན་མོ་རྣམས་སྤྱོད་ཅིང་ཐམས་ཅད་འཁོལ་བར་བྱེད་དོ། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །ཞེས་བྱ་བ་ནི། ཐམས་ཅད་ཀྱང་རང་རིག་པ་ཁོ་ན་བས་སྐུ་གསུང་ཐུགས་ལས་འདའ་བ་མེད་པའི་ཕྱིར་ཕྱག་རྒྱ་སྟེ། དེས་རྒྱུའི་ཏིང་ངེ་འཛིན་ཁོ་ནའི་ཕྱིར། གདུལ་བྱ་སོ་སོ་ལ་ཆོས་སོ་སོར་སྟོན་པར་འགྱུར་རོ། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །ཅེས་བྱ་བ་ནི། ཆས་གོས་ལྔ་དང་རིན་པོ་ཆེ་སྣ་ཚོགས་ཀྱི་ལོངས་སྤྱོད་རྫོགས་པའི་ཆ་ལུགས་ཁོ་ན་དང་། ཁྲོ་བོར་བསྒྲུབ་ན་རུས་པའི་རྒྱན་ལྔ་ལ་སོགས་པ་དེས། ལུས་ཤིན་ཏུ་སྤགས་པའི་གཟི་བྱིན་གྱིས། ཐམས་ཅད་ཀྱང་ཟིལ་གྱིས་མནན་ནས་སེང་གེ་ལྟ་བུར་གནས་པ་ཁོ་ནའོ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཅེས་བྱ་བ་ནི། དམ་རྫས་ལྔས་གཞི་བྱས་པའི་ལོངས་སྤྱོད་སྣ་ཚོགས་འདོད་པའི་ལྷ་མོར་བརླབས་ནས་མཆོད་པས་ནི། སྐུ་རིན་པོ་ཆེའི་ཚོན་ཤེལ་དུ་བཅུག་པ་ལྟ་བུ་དང་། བདུད་རྩིའི་བཅུད་ཟད་པ་མེད་པས་ཐམས་ཅད་ཚིམ་པར་བྱེད་པ་ཁོ་ནའོ། །ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཞེས་བྱ་བ་ནི། བརྡར་བསྟན་པ་ཐབས་དང་ཤེས་རབ་ཁོ་ན་སྟེ། སྙོམས་པར་འཇུག་པ་ནི་བཤད་ཟིན་ཏོ། །དེས་ནི་ལས་དང་དངོས་གྲུབ་ཅི་འདོད་པ་རིལ་བསམ་པ་ཡོངས་སུ་སྐོང་བ་ཁོ་ནའོ། །ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་བྱ་བ་ནི། མཚན་ཉིད་རྣམ་པ་གསུམ་གྱིས་ལམ་གཉིས་ཀའི་རིམ་པ་ཐུན་མོང་དུ་སྟོན་ཏེ། རྟོགས་པ་རྣམ་བཞིས་མཉམ་རྫོགས་ཀྱི་དོན་ཉམས་སུ་ལོན་པ་ནི་ཤེས་པའི་མཚན་ཉིད་དེ་རྒྱུ་ཁོ་ནའོ། །དེ་ནས་ལྷུན་གྱིས་གྲུབ་པའི་ངང་ལ་གནས་ཏེ་ཅི་ལའང་ཐོགས་པ་མེད་པར་སྤྱོད་པ་ནི། ལྟ་སྤྱོད་མགོ་འབྱོར་བས་འཇུག་པའི་མཚན་ཉིད་དེ། རྐྱེན་ཞེས་བླ་དྭགས་ཙམ་སྟེ་དེ་ནི་འཇིགས་པ་ལས་ཐར་བ་ཁོ་ནའོ། །དེ་ལ་རྒྱུན་དུ་གོམས་པའི་མཐུ་ཅན་དུ་གྱུར་པས་ལྷུན་གྱིས་གྲུབ་པའི་རིག་འཛིན་འབྱུང་ལ་མ་རག་པར་གནས་པ་ནི། རང་གི་ངོ་བོ་ཡོངས་སུ་སྨིན་པ་དང་། དེ་ཉིད་འབྲས་བུ་ཉེ་བར་ལེན་པའི་ཕྱིར། འབྲས་བུའི་མཚན་ཉིད་དོ། །དེ་ལ་ཕྱག་རྒྱའི་རྣལ་འབྱོར་ནི། སོ་སོའི་རིགས་འཛིན་པ་ཁོ་ནའོ། །དེ་ལ་རྣམ་པར་སྨིན་པ་དང་། ཕྱག་རྒྱ་ཆེན་པོའི་རིག་འཛིན་གཉིས་སོ། །གཞན་དག་གི་སྤྱིར་ནི་གང་ཏིང་ངེ་འཛིན་རིག་པ་ཡུལ་གྱིས་མི་འཕྲོག་པ་ཉིད་རིག་པ་ཟིན་པའི་ཕྱིར། རིག་པ་འཛིན་པ་སྟེ། དེ་དག་ཡིད་ལ་བྱེད་པ་སྤངས་པ་ནི་ཐེག་པ་ཆེན་པོ་པར་བརྗོད་པ་སྟེ། བརྟགས་པ་དང་སྤྱིའི་མཚན་ཉིད་དང་། །གཞན་གྱི་དབང་ལས་ཡོངས་སུ་གྲོལ་བའི་ཕྱིར་རོ། །དེ་ཉིད་ལྟར་ན་ཅིག་ཤོས་ཀྱི་ལམ་དུ་ཞུགས་པ་སྟེ། ཚེ་ལ་དབང་ཐོབ་པ་ལ་སོགས་པ་གསུམ་པོ་ནི་ལུས་འདི་ཉིད་མི་སྤོང་བ་ཁོ་ནའོ། །གཞན་གྱི་ལུགས་ཀྱི་ཕྱག་རྒྱ་ཆེན་པོ་པ་དག་ལམ་འདིར་མི་ཆུད་པ་ནི། སྒྱུ་འཕྲུལ་རྡོ་རྗེ་ལས། བྱང་ཆུབ་ཕྱག་རྒྱ་ཆ་ལུགས་སྐུ། །མཚན་དང་དཔེ་བྱད་ལ་སོགས་པའི། །ཆ་ལུགས་མངོན་དུ་བྱུང་ན་ཡང་། །ཞི་བ་དེ་ཉིད་མཐོང་བ་མིན། །ཞེས་གསུངས་སོ། །གོང་མ་དེ་དག་ནི་ཕྱོགས་བཅུའི་དཀྱིལ་འཁོར་མ་ལུས་པས་དབང་བསྐུར་ཞིང་ལུང་སྟོན་པ་ཁོ་ནའོ། །མི་དང་ལྷ་དང་ཚངས་པ་ཡི། །སྐྱེེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཞེས་བྱ་བ་ནི། འདོད་པ་དང་གཟུགས་ན་སྤྱོད་པའི་ལྷ་དང་མིའི་དབང་པོ་དངོས་སུ་གྲུབ་པ་དང་། རང་དབང་དུ་འགྲོ་བ་ཡང་ཡོད་པ་དེ་དག་ཏུ་སྣང་ཡང་ས་དང་པོ་དང་བརྒྱད་པ་དང་། བཅུ་པ་དག་དང་། སྐལ་བ་མཉམ་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཕ་རོལ་ཕྱིན་པ་ཀུན་ཏུ་རྫོགས། །ཐབས་དང་ཤེས་རབ་ཐབས་ཀྱི་མཆོག །ཤེས་རབ་མཆོག་གི་མཆོག་གྱུར་པའི། །ཞེས་བྱ་བ་ནི། ཁྱད་པར་གྱི་སའི་ཕྱིར་གསུངས་པ་སྟེ། འཇུག་པའི་མཚན་ཉིད་དུ་སྦྱོར་བའི་ཕྱིར། ཐམས་ཅད་ཀྱང་ཚོགས་སུ་གྱུར་པས་ཕ་རོལ་ཏུ་ཕྱིན་པ་རིལ་ལ་རྒྱུན་དུ་ཞུགས་པ་ཁོ་ནའོ། །རྒྱུན་དང་མཉམ་པའི་ངང་ལ་གནས་པ་ནི་མཐོང་བ་དང་བསྒོམ་པའི་ལམ་གཉིས་ཀྱང་ཡོངས་སུ་རྫོགས་པའོ། །གང་དུ་ནུས་པའི་མཐུ་དང་ལྡན་པ་ནི་ཐམས་ཅད་ཀྱི་དབང་དང་ལུང་ཆེན་པོ་ཐོབ་པའི་ཕྱིར་མཐར་ཕྱིན་པ་ཁོ་ནའོ། །ནུས་པའི་མཐུས་གོ་ཕྱེ་བ་ནི། རིག་པ་ཉིད་ཁྱབ་པའི་ཕྱིར་ཀུན་ཏུ་འོད་ཅེས་བྱ་བའོ། །ཐབས་ནི་རང་སྣང་བའི་ཕྱིར་གང་ཡང་མ་འགགས་པ་སྟེ། མ་ལུས་པ་ལ་ལོངས་སྤྱོད་ཀྱང་ཤེས་རབ་ཀྱི་དབང་གིས་མ་གོས་པ་ནི་པདྨ་འདམ་གྱི་ནང་ནས་མ་གོས་པ་ལྟ་བུའི་ཕྱིར། ཐབས་མཁས་པའོ་ཞེས་བྱ་བ་ཁོ་ནའོ། །གང་མི་དམིགས་པའི་ཤེས་རབ་ནི། ཤེས་རབ་གསུམ་གྱི་མཆོག་སྟེ། དེ་ཉིད་རང་སྣང་བའི་ཕྱིར། ཐམས་ཅད་ཀྱང་བདག་ཉིད་ཆེན་པོའི་སྐུ་དང་ཡེ་ཤེས་སུ་གསལ་བས་ཡུལ་གྱི་ཐ་སྙད་དུ་བྲལ་བར་རིལ་མཁྱེན་པ་ནི་མཆོག་ཁོ་ན་སྟེ། ཡི་གེ་འཁོར་ལོ་ཞེས་བྱའོ། །དེ་དག་མངོན་དུ་བྱས་པ་ནི་འབྲས་བུའི་མཚན་ཉིད་དེ། གཞི་གཅིག་ལ་སྐབས་ཀྱི་མཚན་ཉིད་ཐ་སྙད་ཙམ་གྱི་ཕྱིར་མིང་ཐོབ་པ་ཁོ་ནའོ། །དེ་དག་རྫོགས་པའི་ཕྱིར། ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་རྫོགས། །ཞེས་གསུངས་སོ། །མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་བསྒོམ། །རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་པར་ནི་བསྒོམ་པར་འགྱུར། །ཞེས་བྱ་བ་ནི། རྫོགས་པའི་ལམ་དང་། ཉེ་བའི་ལྷ་བསྒོམ་པ་རྣམས་ཀྱི་དབང་དུ་གསུངས་པ་སྟེ། ཐམས་ཅད་ཀྱི་ངོ་བོ་ཉིད་གཅིག་དང་དུ་མ་བྲལ་བ་ཁོ་ནའི་ཕྱིར་རོ། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །ཞེས་བྱ་བ་ནི། ལམ་གཉིས་ཀྱི་གཞི་ཐུན་མོང་དུ་བསྟན་པ་སྟེ། སངས་རྒྱས་ཞེས་ཐ་སྙད་པ་རྣམས་ནི་ལུགས་གཞན་ལྟར་རྙེད་པ་དག་སྲིད་ཀྱི། ཡང་དག་པར་རྫོགས་པའི་སངས་རྒྱས་ནི་གདུལ་བྱའི་དབང་གིས་བཏགས་སུ་ཟིན་ཀྱང་། ངོ་བོ་ཉིད་བསྟན་པར་དཀའ་བའི་ཕྱིར་གཞན་དུ་མི་རྙེད་པ་ཁོ་ནའོ། །འོ་ན་དེ་ནི་རྒྱ་ཆད་དོ་བར་དོགས་པ་ལ། སེམས་ཉིད་རྫོགས་པའི་སངས་རྒྱས་ཏེ། །ཞེས་བྱ་བ་སྟེ། རྒྱུ་ཉིད་ནས་ཁམས་གསུམ་སེམས་ཉིད་དུ་ཤེས་པ་ནི་གང་ཡང་མ་སྤངས་པར་སྐུ་དང་ཡེ་ཤེས་སུ་གྱུར་པ་ཉིད། བདག་ཉིད་ལས་ཅིའམ་མི་དམིགས་པ་ནི། རྙེད་པ་དང་གནས་པ་གཉིས་ཀ་མ་བརྩལ་བར་གྲུབ་པའི་ཕྱིར། སྒྱུ་འཕྲུལ་རྡོ་རྗེ་ལས། རང་བཞིན་གནས་ཕྱིར་གཞན་ནས་འོང་པ་མེད། །ཞེན་པ་ལོག་པས་བདག་ཞལ་བདག་གིས་མཐོང་། །ཞེས་བྱ་བའི་ཕྱིར། སངས་རྒྱས་གཞན་དུ་མ་ཚོལ་ཅིག །ཅེས་གསུངས་སོ། །དཀྱིལ་འཁོར་ཀུན་ཏུ་རབ་སྦྱོར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་བྱ་བ་ནི། རྒྱས་པའི་རྒྱུད་ལས། ཕྱོགས་བཅུ་རྒྱལ་བའི་དཀྱིལ་འཁོར་མ་ལུས་པ། །ངེས་པའི་དོན་བཀྲོལ་བཞི་བཅུ་རྩ་ལྔར་འདུས། །ཞེས་འབྱུང་བའི་ཕྱིར་ཡང་ཡིན་ལ། ཅིག་ཤོས་ཀྱི་ལམ་པ་དག་གི་ཡང་ཕྱིར་ཏེ། མ་ནིང་གིས་རྒྱུད་ལས། དཀྱིལ་འཁོར་དཀྱིལ་འཁོར་ཞེས་བྱ་བ། །བྱང་ཆུབ་སེམས་ལས་མ་ཡེངས་ན། །དཀྱིལ་འཁོར་སྙིང་པོར་ལྷུན་གྲུབ་པས། །ཐམས་ཅད་དུས་གཅིག་བསྒོོམ་པར་འགྱུར། །ཞེས་འབྱུང་བའི་ཕྱིར་རོ། །ཆོ་ག་ལྷག་གམ་མ་ཚང་ནའང་། །སྐྱོན་ཉིད་དག་སྟེ་ཉེས་པ་མེད། །ཅེས་བྱ་བ་ནི། ལ་ལ་དག་རྣལ་འབྱོར་གསལ་བ་རྣམས་ཚིག་གཙོར་མི་བྱེད་པའོ་ཞེས་ཟེར་རོ། །ལུགས་ཉིད་ནི་བཤད་པའི་རྗེས་སུ་འཇུག་པ་སྟེ། ཆོ་ག་ནི་ལྔའོ། །ལྷག་པ་ནི་ལྷག་པ་སྟེ། ཐོད་རྒལ་གྱི་ཏིང་ངེ་འཛིན་ལྟ་བུ། ཐམས་ཅད་ལ་ཡང་མི་དམིགས་བའི་ཚུལ་གྱིས་སློབ་པའོ། །ཆད་པ་ནི་མ་ཚང་བ་སྟེ། སེམས་མེད་པའི་ཏིང་ངེ་འཛིན་ནི། རང་གི་ངོ་བོ་ཉིད་ཀྱང་མི་དམིགས་ན། གཞན་ལྟ་ཅི་སྨོས་པ་སྟེ། གང་ཡང་སྐྱོན་མེད་པ་ཁོ་ནའི་ཕྱིར་ཡང་ཞེས་བྱ་བའོ། །གང་ཞིག་གང་ལ་གནོད་པར་འགྱུར་བ་ནི་སྐྱོན་ཏེ། བཤད་པ་རྣམས་ཁོ་ནའོ། །དེ་དག་གིས་མི་གནོད་པ་ནི་དག་པ་སྟེ། ཡོན་ཏན་ཉིད་དུའང་འགྱུར་པའོ། །ཞེས་བྱ་བའི་ཐ་ཚིག་གོ། །རོལ་མོའི་སྤྲིན་གྱིས་མཉེས་པར་གྱུར་ཏོ། །ཞེས་བྱ་བ་ནི། རོལ་མོ་ནི་བཤད་ཟིན་ཏོ། །ལོངས་སྤྱོད་ལྔའི་ཚོགས་ལ་སྤྱོད་པ་དེ་དག་གིས་རྒྱུ་འབྲས་གཉིས་སུ་མེད་པར་ལོངས་སྤྱོད་རྫོགས་པ་ཆེན་པོའི་རྒྱན་ཉིད་དུ་གསལ་བས། གཉིས་སུ་མེད་པའི་མཆོད་པ་གནས་སུ་སྟོབས་པ་ཁོ་ནར་བཞུགས་སོ་ཞེས་བྱ་བ་ཁོ་ནའོ། །ཚོགས་བསྒྲུབ་པའི་ལེའུ་ཞེས་བྱ་བ་ནི། ཚོགས་ནི་བཤད་ཟིན་ཏོ། །བསྒྲུབ་པ་ནི་ལུགས་གཞན་དུ་གང་དག་གིས་གང་ཞིག་གཉེར་བའི་རྩོལ་བ་ཁོ་ན་སྟེ། འདིར་ནི་རྒྱས་པའི་རྒྱུ་ལས། རྒྱུ་འབྲས་ཡེ་ནས་དབྱེར་མེད་སྔ་ཕྱི་མ་ཡིན་པས། །འབྲས་བུ་ལམ་དུ་གྱུར་ནས་དུས་གཅིག་མཉམ་པར་སྦྱོར། །ཞེས་གསུངས་པས། འཇུག་པ་ཉམས་སུ་ལེན་པ་ཙམ་ལ་ཐ་སྙད་དུ་འདོག་པའི་ཕྱིར། མཚན་ཉིད་གསུམ་དུ་བཏགས་པའོ། །ལེའུ་བཅུ་གཉིས་པ་མདོར་བཤད་པའོ།། །།དེ་ནས་དེ་བཞིན་གཤེགས་པ་ཕྱོགས་བཅུ་དུས་བཞིའི་སྐུ་གསུང་ཐུགས་རྡོ་རྗེའི་དཀྱིལ་འཁོར་ཐམས་ཅད་གཅིག་ཏུ་འདུས་ནས། ཞེས་བྱ་བ་ནི། ཕྱོགས་བཅུ་དུས་བཞིས་བསྡུས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་དཀྱིལ་འཁོར་རིལ་ནི་སེམས་ཉིད་རང་སྣང་བའི་ཕྱིར། རིག་པ་ཁོ་ནར་མི་ཕྱེད་པས་བླ་དྭགས་སུ་རྡོ་རྗེ་སྟེ། དེ་ཉིད་གཅིག་ཏུ་འདུས་པ་ཞེས་བྱ་བ་ཁོ་ནའོ། །དེ་དག་ལེའུ་འདིར་མངོན་དུ་སྟོན་པའི་བརྡའ་སྟེ། དེ་ཉིད་བསྟན་པས་ཐམས་ཅད་ཀྱི་དགོངས་པ་རྫོགས་པར་འགྱུར་བའི་ཕྱིར། འོག་ནས། རྒྱལ་བའི་དཀྱིལ་འཁོར་མ་ལུས་པ། །འདི་ལས་གསང་བའི་ངེས་དོན་མེད། །ཅེའོ། །དེའི་ཕྱིར་ཚོགས་པར་སྨྲ་བ་ནི་དོན་མེད་ཀྱང་། བདག་ཉིད་ཆེན་པོའི་ཕྱིར། སྒྲ་ཙམ་ནི་འགལ་བ་མེད་དོ། །དེ་ཉིད་ཉེ་བར་བསྟན་པའི་ཕྱིར། ཆོས་ཐམས་ཅད་ཡེ་ནས་རྫོགས་པ་ཆེན་པོར་ལྷུན་གྱིས་གྲུབ་པའི་དམ་ཚིག་ཤིན་ཏུ་གསང་བའི་སྙིང་པོའི་སྤྲིན་བཀོད་པ་ཞེས་གསུངས་ཏེ། དངོས་པོ་གཉིས་ཀྱིས་བསྡུས་པ་ཐམས་ཅད། ཀ་ཉིད་ནས་རང་རིག་པ་ཁོ་ནའི་ཕྱིར་ཐམས་ཅད་མ་འགགས་ལ། གཞན་དུ་མ་སྐྱེས་པར་བདག་ཉིད་དུ་གསལ་བས། སྐུ་གསུང་ཐུགས་ཁོ་ན་ལས། གཞན་པ་མེད་པ་ནི་རྫོགས་པ་ཆེན་པོའོ། །དེ་ལ་ལྟོས་པའི་ཀུན་བརྟགས་པ་རྣམས་ཀྱིས་རྒྱུན་རྐྱེན་གྱི་རྣམ་པ་བརྗོད་ཀྱང་། དེ་ཉིད་རང་བྱུང་གི་ཡེ་ཤེས་ཉིད་པས། རྒྱུ་རྐྱེན་མེད་པར་རང་སྣང་བ་ལས་འདའ་མི་སྲིད་པའི་ཕྱིར། ལྷུན་གྱིས་གྲུབ་པའི་དམ་ཚིག་ཅེས་བྱའོ། །དེ་ནི་རང་བཞིན་གསང་བའི་སྙིང་པོ་ཉིད་དེ། ཕལ་གྱི་ཡུལ་མ་ཡིན་པའི་ཕྱིར། རྒྱས་པའི་རྒྱུད་ལས། དེ་བཞིན་གཤེགས་པའི་སྤྱོད་ཡུལ་ཏེ། །སྐྱེས་བུ་བློ་རྩལ་རབ་ཀྱིས་རྟོགས། །ཤེའོ། །དེ་ལ་མཚོན་པར་བྱེད་པའི་སྒོ་དང་། མྱོང་བའི་ཐབས་དང་། མངོན་དུ་བྱས་པའི་ཡོན་ཏན་མང་པོ་སྤྱི་ཙམ་དུ་ཕྱེ་ནས་སྟོན་པའི་དགོངས་པ་ཉེ་བར་སྣང་བ་སྟེ་གདུལ་བྱའི་སྣང་བའོ། །དེ་ལ་མཚོན་པའི་སྒོ་བསྟན་པའི་ཕྱིར། མ་རྟོགས་པ་དང་ལོག་པར་རྟོགས། །ཞེས་བྱ་བ་ནི། ཅི་ཡང་མ་རྟོགས་པ་ནི་འཇིག་རྟེན་ཕྱལ་པ་སྟེ། སྣང་བ་དང་པོ་ལས་གོལ་བའི་ཕྱིར་ཞེན་པས་གོལ་པ་ཞེས་བྱའོ། །རྟག་ཆད་གཉིས་ནི་ལོག་པར་རྟོགས་པ་སྟེ། ཕྱོགས་ལས་གོལ་བའོ། །དབུགས་འབྱིན་པའི་ཐེག་པ་བསྟན་པའི་ཕྱིར། ཕྱོགས་རྟོགས་ཡང་དག་ཉིད་མ་རྟོགས། །ཞེས་གསུངས་ཏེ་ཉན་ཐོས་དང་རང་རྒྱལ་ནི་ཕྱོགས་ཙམ་རྟོགས་པའོ། །རྣམ་པར་རིག་པ་ནི་ཕྱོགས་གཅིག་རྟོགས་པའོ། །དབུ་མ་པ་ནི་དངོས་པོ་རྣམས་ཀྱི་དེ་ཁོ་ན་ཉིད་དོན་དམ་པ་གསུམ་གྱི་ངོ་བོར་གནས་པ་ལ་བདེན་པ་གཉིས་མི་ཕྱེད་པ་དེ་མངོན་དུ་མ་བྱས་པའི་ཕྱིར། ཡང་དག་ཉིད་མ་རྟོགས་པ་ཁོ་ནའོ། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཞེས་བྱ་བ་ནི། ཡང་དག་པར་བསྟན་མོད་ཀྱི་སྤྱོད་པས་སྒོ་གསུམ་འདུལ་བ་ཀྲི་ཡ་དང་། སྤྱོད་པ་བས་ནང་གི་རྣལ་འབྱོར་གཙོ་བྱེད་པ་ཡོ་ག་དང་། ཕལ་ལ་མེད་པའི་ལྟ་སྤྱོད་ལ་གནས་པས་གསང་བ་སྟེ། ནང་པ་གཉིས་པོ་དང་། དངོས་པོ་ཐམས་ཅད་ཀྱི་རང་བཞིན་འབྲས་བུར་གནས་ཀྱང་། བརྟགས་པ་ལ་ཞེན་པའི་རིམ་པ་སྣ་ཚོགས་ཀྱི་བསྒྲིབ་པ་ཙམ་དུ་སྟོན་པ་ཨ་ཏི་ཡོ་གའོ། །དེ་རྣམས་ཀྱི་ཐ་སྙད་ཀྱི་སྒོ་བསྟན་པའི་ཕྱིར། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་གསུངས་ཏེ། ཨའི་ནཱ་ད་ལས་སྣང་བའི་ཕྱིར། སྒྲའི་ཡི་གེ་སུམ་ཅུ་བཞིའོ། །ཨ་ཉིད་ཀྱི་སྒྲ་ལས་བཏགས་པ་དབྱངས་ཡིག་བཅུ་གཉིས་སོ། །གཉིས་ལས་སྣང་བ་ནི་མ་ནིང་བཞིའོ། །དེ་དག་ལ་བརྟེན་ནས་བྱུང་བའི་ཚིག་ཚོགས་རྒྱ་མཚོས་མཚོན་ནས། ཐེག་པ་གཞན་དག་སྣང་བ་ནི་ལམ་ཁོ་ནའི་ཕྱིར་རོ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་པ་རྒྱུད་འདི་ནི། རང་བཞིན་གསང་བའི་སྙིང་པོ་ཁོང་ནས་བཏགས་པས་གབ་པ་ནི་སྟོན་པས་འབྱིན་ལ། ལམ་གྱི་རྒྱུད་འདི་ལ་སྦས་པ་རྣམས། རྡོ་རྗེ་སློབ་དཔོན་གྱིས་འབྱིན་པས་ལུང་ཡོད་ཀྱང་། མཆོག་ཏུ་ལེའུ་འདི་བླ་མ་ལ་ཐུག་ཅིག་པ་ཁོ་ནའོ། །དཀྱིལ་འཁོར་ལྡན་པའི་དཀྱིལ་འཁོར་གྱིས། །ཞེས་བྱ་བ་ལ་སོགས་པ་ནི་ཕྱི་རོལ་ཏུ་བསྐྱེད་པའི་རིམ་པའི་དབང་དུ་བཤད་པ་ནི། རང་བཞིན་གྱི་དཀྱིལ་འཁོར་ངོ་ཤེས་ནས། དེའི་བློས་སྟོང་པ་ཉིད་ཀྱི་ཏིང་ངེ་འཛིན་གྱི་སྐབས་སུ་ཏིང་ངེ་འཛིན་གྱི་དཀྱིལ་འཁོར་བསྒོམ། དེ་ནས་སྒྱུ་མའི་ཏིང་ངེ་འཛིན་གྱི་སྐབས་སུ་གཟུགས་བརྙན་གྱི་དཀྱིལ་འཁོར་མ་བྲིས་པར་གསལ་བར་བྱས། དེ་ནས་ཕྲ་མོའི་སྐབས་སུ་ཁམས་གསུམ་ཡེ་ཤེས་སྒྱུ་མ་ཉིད་ཧཱུཾ་དུ་བསྡུས་ཏེ། ལྷག་པའི་ཏིང་ངེ་འཛིན་གྱི་དཀྱིལ་འཁོར་དུ་བསྒོམ་པའི་དུས་ན། ཐུགས་ཀར་ཡེ་ཤེས་སེམས་དཔའ་དང་། དབང་བསྐུར་བྱིན་གྱིས་བརླབས་པ་རབ་ཏུ་བསྟན་ནས། སྣང་བ་རྣམ་པར་འབྱེད་པའི་སྐབས་སུ། ཕུང་པོ་ལ་སོགས་པ་ལྷག་པའི་ཏིང་ངེ་འཛིན་གྱི་དཀྱིལ་འཁོར་དུ་གསལ་བའི་ཡན་ལག་རྣམས་ཡོངས་སུ་རྫོགས་པས། སྤྱོད་ཡུལ་ཡོངས་སུ་དག་པར་བསྒོམ་པའོ། །དེ་ནས་ཚོགས་བསྒྲུབ་པའི་དུས་སུ་ལོངས་སྤྱོད་ལྔ་ལ་མ་ཆགས་པའི་ཐབས་ཀྱིས་རོལ་པས་ཅི་བྱས་ཀྱང་། བག་ཆགས་སུ་མི་འགྱུར་ཏེ། ཚོགས་གཉིས་ཀྱི་རྒྱུན་ལ་གནས་པས་རྒྱུ་ཉིད་ལས་འབྲས་བུ་མི་གཞན་པར་རང་སྣང་བས་ས་བཅུ་གསུམ་པར་ཕྱིན་ནས། སྣང་སྟོང་མི་ཕྱེད་པ་ཟུང་འཇུག་གི་སྐུ་ཐོབ་པའི་དུས་ན་བདག་ཞལ་བདག་གིས་མཐོང་སྟེ། ཐམས་ཅད་བདག་ཉིད་དུ་དབང་སྒྱུར་ཏེ། དཀྱིལ་འཁོར་མ་ལུས་པ་དུས་གཅིག་ཏུ་རང་སྣང་བས། གདུལ་བྱ་གང་ཡང་མི་འདོར་རོ། །ཞེས་སྟོན་ཏེ། སྒྲ་ལ་མི་དགའ་བས་འབྲུ་ཞིབ་ཏུ་མ་བཅོམ་མོ། །དེ་ལས་ནང་དུ་རྫོགས་པའི་བསྐྱེད་པའི་རིམ་པ་བཤད་པ། ཡིད་ཀུན་ཏུ་བཟང་པོའི་ཐིག་ལེའི་མན་ངག་བསྟན་པའི་ཕྱིར། དཀྱིལ་འཁོར་ལྡན་པའི་དཀྱིལ་འཁོར་གྱིས། །ཞེས་བྱ་བ་ལ་སོགས་པ་གསུངས་ཏེ། ནང་གི་དཀྱིལ་འཁོར་རིན་པོ་ཆེའི་སྒྲོམ་ན་དྭངས་མ་ཆེན་པོ་ལྔ་རང་སྣང་བ་ནི་ཡུམ་ལྔའི་དཀྱིལ་འཁོར་གྱི་ངོ་བོ་ཉིད་དེ། དེ་དག་གི་ལས་མི་མཐུན་པ་ལྔ་ཡིས་ཐམས་ཅད་བདེ་བ་ཆེན་པོར་སྣང་བར་བྱེད་པས་གཉིས་པ་ཁོ་ནར་བརྗོད་ཀྱང་དེ་ཉིད་བདག་པོ་ལྟ་བུ་མ་ཡིན་གྱི། རྒྱལ་བའི་སྐུ་ལྟར་གཉི་ག་ལས་མ་འདས་པའི་ཕྱིར་བྱེད་པ་པོ་ཉིད་དུ་འགལ་བ་མེད་དོ། །དཀྱིལ་འཁོར་ལ་ནི་དཀྱིལ་འཁོར་བསྒོམ། །ཞེས་བྱ་བ་ནི། དེ་དག་ཉིད་གཞལ་ཡས་ཁང་གི་ཕྱིར་བདུན་པ་སྟེ། སྙིང་པོ་ཉིད་དང་གཅིག་དང་དུ་མར་བྲལ་བའི་ཚུལ་གྱི་ཐབས་དང་ཤེས་རབ་གཉིས་སུ་མེད་པ་ཉིད་དེ། ངོ་བོ་ཉིད་ཀུནྡ་ལྟ་བུ་ལས་འོད་སྣ་ཚོགས་ཀྱི་བྱིན་ཅིའང་མ་ངེས་པར་ཅིར་ཡང་སྣང་བས་བརྟག་ཏུ་མེད་པར་རང་གསལ་བས་གསུམ་པར་ཡང་འགྱུར་ཏེ། དངོས་པོ་ག སུམ་དུ་གྱུར་པ་མེད་པ་ནི། རང་རིག་པའི་མངོན་སུམ་ཡིན་པས་བསྒོམ་པའི་མཆོག་གོ། །དེའི་དགོས་པ་ཅི་ཞིག་སྙམ་པ་ལ། དཀྱིལ་འཁོར་དཀྱིལ་འཁོར་ལས་བྱུང་བའི། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །ཅེས་གསུངས་ཏེ། དེ་དག་ཡེ་ཤེས་དྲུག་གི་དཀྱིལ་འཁོར་དུ་རང་སྣང་བར་གནས་པ་ནི་མི་འགྱུར་བ་ཡོངས་སུ་གྲུབ་པ་ལ། བཤད་པ་ལྟར་ཕྱིན་ཅི་མ་ལོག་པར་ཡོངས་སུ་གྲུབ་པས་མ་འདྲེས་ལ་ཡོངས་སུ་རྫོགས་པར་གསལ་བ་དེ་བསྟན་ནས་དེའི་འོད་ཀྱིས་རྩ་བཞིའི་སྐུ་གསུང་ཐུགས་ཀྱི་ཡི་གེ་བསྐུལ། དེ་དག་གི་འོད་ཀྱིས་ས་བོན་དྲུག་དང་ཉིད་སྦྱངས་ནས་རྣམ་པར་ཤེས་པ་བག་ཆགས་དག་པ། ཡེ་ཤེས་ཀྱི་འོད་སྙིང་པོ་ལ་འདུས་པས། འབྱུང་བ་ལྔ་རིམ་པར་བསྡུས་ནས། ཐིག་ལེ་ཉིད་ཀྱང་ངོ་བོ་ཉིད་མ་དམིགས་ཏེ། མཐའ་ཐམས་ཅད་དང་བྲལ་བའི་ཡེ་ཤེས་ལྔར་རང་གསལ་བ་ནི་གོང་ན་མེད་པའི་ཕྱིར་དཀྱིལ་འཁོར་གྱི་མཆོག་གོ། །དེ་དག་ལྔ་པར་བཞག་མོད་ཀྱི་རང་སྣང་བས་རྐྱེན་ཙམ་སྟེ། རྒྱུ་འབྲས་བུ་ཐལ་བ་མེད་དོ། །དཀྱིལ་འཁོར་གཉིས་པ་ཀུན་ཏུ་བཟང་མོའི་ཐིག་ལེའི་མན་ངག་བསྟན་པའི་ཕྱིར། གསང་བའི་ཐིག་ལེ་དཀྱིལ་འཁོར་དབྱིངས། །ཞེས་བྱ་བ་ལ་སོགས་པ་གསུངས་ཏེ། གསང་བའི་ལྟེ་བ་ན། དབྱིངས་ཕྱུག་མ་ལྔའི་ཐིག་ལེ་ཡེ་ཤེས་ལྔའི་དཀྱིལ་འཁོར་དུ་གསལ་བ་དེ་ནི། ཨའི་ཕྱིར་དང་། ཐམས་ཅད་ཀྱི་རྒྱུའི་ཕྱིར་དབྱིངས་ཁོ་ནའོ། །དེའི་ཕྱིར། འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་ཏེ། །ཞེས་བྱ་བ་ལ་སོགས་པ་གསུངས་ཏེ། དེའི་དྭངས་མ་ལྔའི་ཕྲ་རགས་ལས་རིགས་ལྔ་ཡབ་ཡུམ་དུ་རང་སྣང་བའོ། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིག་པ་རྣམས། །ཞེས་བྱ་བ་ནི། དེའི་ཡན་ལག་གི་ཡི་གེ་རྣམས་ཀྱིས་མཚོན་པའི་དངོས་པོ་རྣམས་ཀྱང་རྡོ་རྗེའི་སྐྱེ་མཆེད་དུ་གསལ་བར་བྱེད་ལ། དེ་ཡིས་ཐམས་ཅད་ཀྱང་ཕྱག་རྒྱའི་དཀྱིལ་འཁོར་དུ་སྣང་བར་བྱེད་པས། སྤྱོད་ཡུལ་ཡོངས་སུ་དག་པའི་ཕྱིར། །ཀུན་ཏུ་བཟང་པོའི་དཀྱིལ་འཁོར་ལ། །ཞེས་གསུངས་སོ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔས་བལྟ་ཞིང་། །ཞེས་བྱ་བ་ནི། དངོས་པོ་ཐམས་ཅད་ཀྱང་ཡིད་རང་བྱུང་གི་ཡེ་ཤེས་ཁོ་ནའི་ཕྱིར། བདག་ཉིད་ཆེན་པོ་ཞེས་བྱ་བ་སྟེ། དེ་ཡང་དཀྱིལ་འཁོར་དང་པོར་ཁྱད་པར་གྱི་ཆོ་གས་ཁྱད་པར་དུ་བྱས་པའི་ཕྱིར། ལྷག་པ་ཞེས་བྱ་སྟེ། དེ་ཉིད་ཡེ་ཤེས་ལྔར་གྲུབ་ཟིན་ཏོ། །དེ་ཡང་ཡི་གེ་ལ་དང་ས་གཉིས་ཀྱིས་གསུམ་པ་དང་། གཉིས་པ་ལྟ་བུར་འདོགས་མོད་ཀྱང་། གནས་དང་ལས་ཀྱིས་ཐ་དད་ཀྱང་ངོ་བོ་ཐ་མི་དད་པས་ཡེ་ཤེས་ཀྱི་ལྟ་བ་ནི། མཐོང་བ་མེད་པའི་ཚུལ་གྱིས་མཐོང་བ་ཁོ་ནའོ། །དེ་ལྟར་མ་གྱུར་པ་ནི་ཐེག་པ་ཆེན་པོའི་ཏིང་ངེ་འཛིན་ལས་ཉམས་པའོ། །དེ་ཉིད་ལས་བདེ་བ་ཐོབ་པའི་དུས་ན། ཡིད་ཀྱི་རྒྱུན་ཡང་བསྡུས་ཏེ་ཀུན་གཞི་རང་གི་ངོ་བོ་ཉིད་ཀྱང་མ་དམིགས་ནས་མཐའ་ཐམས་ཅད་དང་བྲལ་བར་རང་གསལ་བ་ནི། ཀུན་གཞི་ཀུན་ཏུ་བཟང་མོའི་ངོ་བོ་ཉིད་རྙེད་པ་ཁོ་ནའོ། །དཀྱིལ་འཁོར་གསུམ་པ་སྦྱོར་བ་དག་པའི་མན་ངག་བསྟན་པའི་ཕྱིར། སྙིང་པོ་ཐིག་ལེ་མཉམ་སྦྱོར་བས། །ཞེས་བྱ་བ་སོགས་པ་ནི། གོང་མ་ལས་སྒྲ་ཙམ་སྣང་བ་ལས་ཀྱང་ཐིག་ལེར་བྱུང་བའོ། །དེ་དག་གི་འོད་ཟེར་གྱེན་དུ་སོང་བའི་ལོངས་སྤྱོད་ཀྱི་ཐིག་ལེ་ལ་ཕོག་པ་ནི་སྦྱོར་བ་དག་པའི་མན་ངག་གོ། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པ་འབུལ། །ཞེས་པ་ནི། དེ་ཡོངས་སུ་གྱུར་པས་རོ་དྲུག་གི་བདེ་བ་ཡེ་ཤེས་དྲུག་ཏུ་གསལ་བས་ཚིམ་པར་བྱེད་པ་ནི་རོལ་མོའི་མཆོག་སྟེ། དེ་ཉིད་མྱོང་པ་མེད་པའི་ཚུལ་གྱིས་མྱོང་བ་ནི་མཆོད་པ་གནས་སུ་སྟོབས་པས་ཐམས་ཅད་ཀྱང་སྤྱོད་ལ་མི་འཛིན་པར་གྱུར་ཏོ། །འཁོར་ལོ་བཞི་པ་ཁྱབ་བརྡལ་ཆེན་པོའི་མན་ངག་བསྟན་པའི་ཕྱིར། ཟག་པ་མེད་པའི་བསོད་ནམས་ཀྱིས། །ཞེས་བྱ་བ་ལ་སོགས་པ་གསུངས་ཏེ། བཤད་པ་ཉིད་ཀྱི་རོལ་དྲུག་ལ་སོགས་པ་ཐམས་ཅད་ཀྱིས་བག་ཆགས་སུ་མི་འགྱུར་བའི་ཕྱིར་རོ། །ཡེ་ཤེས་སྒྱུ་མར་རང་སྣང་བ། །ཞེས་བྱ་བ་ནི། དེ་ཉིད་སྐད་ཅིག་མའི་ཕྱིར་གཉིས་པར་ཡང་འགྱུར་ལ། སྒྱུ་མ་ཡང་འདོགས་སོ། །དེའི་ཕྱིར་ཡེ་ཤེས་དེ་ཉིད་འོད་ཟེར་དྲུག་ཏུ་འབར་ནས་གྱེན་དུ་འགྲོའོ། །རོལ་མོའི་དཀྱིལ་འཁོར་མཐའ་ཡས་མཆོག །ཅེས་བྱ་བ་ནི། དེ་ཡིས་འཁོར་ལོ་ཆེན་པོའི་ཐིག་ལེ་བཞུ་ནས། བཞི་བཅུ་རྩ་ལྔ་ལ་སོགས་པ་ཐམས་ཅད་དུ་ཐིམ་པས། ཕུང་པོ་ལ་སོགས་པ་ཐམས་ཅད་སྐུ་དང་ཡེ་ཤེས་སུ་སྣང་བར་བྱེད་དོ། །ཞེས་བྱ་བའོ། །དེ་ཅིའི་ཕྱིར་སྙམ་པ་ལ། གསང་བའི་ཐིག་ལེ་ཉིད་ཀྱི་དབྱིངས། །ཞེས་གསུངས་ཏེ། ཐིག་ལེ་དེ་ཉིད་བདེ་བ་ཆེན་པོའི་ངོ་བོ་ཉིད་དུ་གནས་ཀྱང་རྟོགས་པར་དཀའ་བ་ལས། བདེ་བ་ཆེན་པོའི་རྒྱུན་གྱི་རྒྱུར་གྱུར་པའོ། །དེ་ཉིད་ལས་དང་ངོ་བོ་གཉི་གས་བདེ་བ་ཆེན་པོའི་ཕྱིར། དེ་ནི་སངས་རྒྱས་ཀུན་གྱི་དངོས། །ཞེས་གསུངས་སོ། །དེ་ཉིད་ཀྱི་ཡོན་ཏན་བསྟན་པའི་ཕྱིར། ཕྱོགས་བཅུ་དུས་བཞིར་མངོན་རྫོགས་པའི། །སྐུ་གསུང་ཡོན་ཏན་ཕྲིན་ལས་ཐུགས། །མ་ལུས་བདག་ཉིད་ཞལ་མཐོང་བ། །ཞེས་གསུངས་ཏེ། བཤད་པ་བཞིན་ཉམས་སུ་མྱོང་བ་ནི་དཀྱིལ་འཁོར་ཐམས་ཅད་ཀྱི་ཞལ་མཐོང་བ་སྟེ། དེ་ཡང་བདག་ཞལ་བདག་གིས་མཐོང་བ་ཞེས་བྱའོ། །དེ་དག་ལས་རྫོགས་པའི་རྫོགས་པར་ཐབས་ཀྱིས་བཤད་པ། དཀྱིལ་འཁོར་ལྡན་པའི་དཀྱིལ་འཁོར་གྱིས། །ཞེས་བྱ་བ་ལ་སོགས་པ་གསུངས་པ་ནི། རང་བཞིན་ཉིད་ཀྱི་དཀྱིལ་འཁོར་དང་། ནང་དང་བྱང་ཆུབ་སེམས་ཀྱི་དཀྱིལ་འཁོར་གྱི་དོན་ངོ་བོར་གོ་བ་དེས། དཀྱིལ་འཁོར་བཞི་པོར་བདེ་བའི་ཡེ་ཤེས་ཀྱི་བདེ་བའི་རོ་བསྐྱེད་ལ། དེ་ནས་ཐབས་དང་ཤེས་རབ་ཀྱི་དཀྱིལ་འཁོར་གཉིས་སུ་བྱིན་གྱིས་བརླབས་ཏེ་རོལ་པ་ལས། ཟླ་བའི་དཀྱིལ་འཁོར་ནོར་བུར་སྣང་བའི་དུས་ན། ཡེ་ཤེས་ལྔའི་དཀྱིལ་འཁོར་དུ་སྣང་བ་ནི་རང་བཞིན་གྱི་འོད་གསལ་བས། ཐབས་ཉིད་ཤེས་རབ་ཏུ་སྦྱོར་བའོ། །དེའི་ཚེ་ཉི་མའི་དཀྱིལ་འཁོར་ལ་ཐམས་ཅད་ཀྱི་བཅུད་འདུས་པའི་ཕྱིར། མ་ལུས་པའི་རྒྱུར་གྱུར་པས། ཐབས་མཁས་པས་ཟིན་ན་ཕུང་པོ་ལ་སོགས་པ་ཐམས་ཅད་ཀྱང་དཀྱིལ་འཁོར་དུ་ལྷུན་གྱིས་གྲུབ་པར་བྱིན་གྱིས་རློབ་པ་བྱེད་པའི་མཐུ་དང་ལྡན་པ། དེ་ཟེ་འབྲུའི་རྩེར་སྣང་བ་ནི་ཤེས་རབ་ཉིད་ཐབས་སུ་སྦྱོར་བའོ། །ཟླ་བའི་རོ་མ་ཉམས་ཤིང་དམིགས་པ་མི་འགྱུར་པས་དུས་གཅིག་ཏུ་བསྲེས་པས། མཐའ་གཉིས་ལས་གྲོལ་བའི་རོ་ཐོབ་ནས་རླུང་ལ་སོགས་པའི་གར་ཐབས་ཆེན་པོས་ས་བཅུ་དྲུག་གི་རིམ་པ་ཟློག་ནས། རང་བཞིན་ཉིད་ཀྱི་དཀྱིལ་འཁོར་ལ་དེ་བཞིན་ཉིད་དུ་གཤེགས་པའི་ཚེ། ཐམས་ཅད་ཀྱང་སྣང་བ་གཉིས་སུ་གནས་པའི་ཕྱོགས་གཅིག་ཟད་ནས་གཅིག་ལ་ཐབས་ཀྱིས་ངེས་པ་པོས་ངེས་པར་བྱས་པས་སྣང་ལ་མི་འཛིན་པས། བྱང་པ་དང་ཆུབ་པ་དུས་གཅིག་ཏུ་གྱུར་ཏེ། རང་རང་གི་བདེ་བའི་ཡེ་ཤེས་ལས་སྐུ་དང་ཡེ་ཤེས་བསམ་གྱིས་མི་ཁྱབ་པར་སྣང་ཡང་ཉི་ཟླ་གཉིས་སུ་མེད་པའི་རོ་ལས་མ་འདས་པའི་ཕྱིར། བདེན་པ་གཉིས་སུ་མི་ཕྱེད་པའི་ཟུང་འཇུག་གི་སྐུ་ལྔ་ལྷུན་གྱིས་གྲུབ་པར་རང་རིག་པའི་མངོན་སུམ་དུ་བྱས་པ་ནི། མཐོང་བ་མེད་པའི་ཚུལ་གྱིས་བདག་ཞལ་བདག་གིས་མཐོང་བ་ཞེས་བྱའོ། །དེ་དག་གི་ཡོན་ཏན་བསྟན་པའི་ཕྱིར། དབང་སྒྱུར་མཆོག་ཉིད་དམ་པ་ཡིན། །ཞེས་གསུངས་ཏེ། རྣམ་པར་བཤད་པའི་རྗེས་སུ་ལས་དང་དངོས་གྲུབ་ཐམས་ཅད་ལ་རང་དབང་དུ་བྱེད་པ་ནི་རིག་པའི་རྒྱལ་པོ་རང་དབང་ཐོབ་པའོ། །དཀྱིལ་འཁོར་ལ་གནས་དཀྱིལ་འཁོར་ཉིད། །རྫོགས་པའི་དཀྱིལ་འཁོར་ལྷུན་གྱིས་གྲུབ། །རྒྱན་དུ་དཀྱིལ་འཁོར་མ་ལུས་ཐོགས། །ཞེས་བྱ་བ་ནི། ལྷག་པ་ཏིང་ངེ་འཛིན་གྱི་དཀྱིལ་འཁོར་དང་། བྱང་ཆུབ་སེམས་ཀྱི་དཀྱིལ་འཁོར་ལ་བློ་བརྟན་པས། རང་བཞིན་ཉིད་ཀྱི་དཀྱིལ་འཁོར་ཉིད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་རང་སྣང་བར་གྱུར་པས། དཀྱིལ་འཁོར་བདུན་གྱིས་བསྡུས་པ་ཐམས་ཅད་མ་འདྲེས་ལ་ཡོངས་སུ་རྫོགས་པར་སྣང་ངོ་། །ཞེས་བྱ་བ་ཁོ་ནའོ། །འོ་ན་ཐམས་ཅད་དཀྱིལ་འཁོར་དུ་སྣང་བས་ཐུགས་རྗེ་འགག་པར་དོགས་པ་ལ། རྫོགས་པའི་དཀྱིལ་འཁོར་མཉམ་སྦྱོར་ལས། །ཐུགས་རྗེའི་དཀྱིལ་འཁོར་ཡོངས་ཀྱིས་འབྱུང་། །ཞེས་གསུངས་ཏེ། བཤད་པ་བཞིན་དཀྱིལ་འཁོར་གཉིས་བདག་ཏུ་མཉམ་པར་སྦྱོར་བས། འགྲོ་བ་དྲུག་བདག་ལས་མི་གཞན་པ་ཉིད་ཐུགས་རྗེ་ཆེན་པོ་ཡིན་པའི་ཕྱིར་དུས་གནས་ཐམས་ཅ ད་ནི་མ་འདྲེས་ལ་ཡོངས་སུ་རྫོགས་པར་གསལ་བས་ཐམས་ཅད་ཀྱི་མཛད་པ་གང་ཡང་མི་འགོག་པ་ཁོ་ནའོ། །དེའི་ཕྱིར། ཕྱོགས་དུས་དཀྱིལ་འཁོར་འདུལ་བའི་མགོན། །ཞེས་གསུངས་ཏེ། དུས་གསུམ་གྱིས་བསྡུས་པའི་དཀྱིལ་འཁོར་ཐམས་ཅད་དུ་རང་སྣང་བས་གདུལ་བྱ་གང་ཡང་མི་འདོར་རོ། །ཞེས་བྱའོ། །དེ་དག་གི་རྟོག་པ་མི་མངའ་འམ་སྙམ་པ་ལ། སྒྱུ་མའི་དཀྱིལ་འཁོར་སྒྲོལ་བ་ཡིས། །བྱ་བྱེད་མེད་པར་དཀྱིལ་འཁོར་སྤྱོད། །ཅེས་གསུངས་ཏེ། དཔེར་ན་སྒྱུ་མ་མཁན་གྱིས་བྱས་པ་ཉིད་ནི། ལོ་རྒྱུས་ཤེས་པས་དངོས་པོར་མི་རྟོག་སྟེ། འདུ་ཤེས་མེད་དོ། །དེ་དག་ཀྱང་ཐམས་ཅད་སེམས་ཉིད་དུ་ཤེས་པས་དེ་བཞིན་པ་ཁོ་ནའི་ཕྱི་དངོས་པོ་གསུམ་དུ་མི་རྟོག་པར་མཛད་པ་རིལ་མི་འགག་པ་ཁོ་ནའོ། །དེ་དག་བྱས་པ་མ་ཡིན་པར་བསྟན་པའི་ཕྱིར། ཡེ་ཤེས་རྫོགས་པའི་དཀྱིལ་འཁོར་ལ། །ཞེས་བྱ་བ་ལ་སོགས་པ་གསུངས་ཏེ། རང་བྱུང་གི་ཡེ་ཤེས་ལ་འབྲས་བུ་རིལ་རྫོགས་པ་ནི། རྫོགས་པ་ཆེན་པོའི་དཀྱིལ་འཁོར་རོ། །དེ་དག་ཡོད་མོད་ཀྱི་ཞེན་པ་ཟློག་པར་དཀའ་བའི་ཕྱིར། ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་གསུངས་ཏེ། ཤེས་རབ་གསུམ་གྱི་བཤད་པའི་མན་ངག་གསུམ་པོ་ལ་གནས་པས་ཞེན་པ་ལོག་པའི་དུས་ན། རང་བྱུང་གི་ཡེ་ཤེས་ཀྱི་དཀྱིལ་འཁོར་རང་རིག་པའི་མངོན་སུམ་དུ་གསལ་བ་ཉིད་ལ། རང་བཞིན་གྱིས་གྲུབ་པའི་དཀྱིལ་འཁོར་དུ་འདོགས་པའི་ཕྱིར་བྱས་པ་མ་ཡིན་པ་ཁོ་ནའོ། །འདི་ནི་སངས་རྒྱས་ཐམས་ཅད་ཀྱི། །འདའ་བར་མི་མཛད་དམ་ཚིག་མཆོག །ཅེས་བྱ་བ་ནི། ལམ་འདི་མ་ཐོབ་པར་ལམ་གཞན་གྱིས་སངས་མི་རྒྱ་བའི་ཕྱིར་དང་། ཐམས་ཅད་ཀྱི་ངོ་བོ་ཉིད་འདི་ལས་མི་འདའ་བའི་ཕྱིར་རོ། །ཐེག་པའི་འདིའི་ཡོན་ཏན་བསྟན་པའི་ཕྱིར། གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་སུ་དགོངས་པར་འགྱུར། །ཞེས་བྱ་བ་ལ་སོགས་པ་གསུངས་ཏེ། སྡིག་པའི་གྲོགས་པོ་མ་བསྟེན་པས། བློ་ཕྱིན་ཅི་མ་ལོག་པ་དག་རྒྱུད་འདི་ལ་མོས་པ་ཙམ་གྱིས་ཀྱང་སངས་རྒྱས་མ་ལུས་པས་དུས་ཀུན་ཏུ་ཐུགས་ཀྱི་སྲས་སུ་དགོངས་པར་མ་དོར་མི་འདོར་རོ། །ཞེས་བྱ་བའོ། །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །ཞེས་བྱ་བ་ནི་གོ་སླ་སྟེ། དཀྱིལ་འཁོར་ཐམས་ཅད་ལ་མཆོད་ཅིང་བསྒྲུབས་པས་རང་བཞིན་གསང་བའི་སྙིང་པོ་ཉམས་སུ་མྱོང་བར་གྱུར་ཏོ། །ཞེས་བྱ་བའོ། །དེ་ཇི་ལྟར་ཞེ་ན། འཇིག་རྟེན་དྲུག་གི་ཕྱོགས་བཅུ་ན། །འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་པ། །བསྙེན་ནས་སྐུ་ལྔ་ལྷུན་གྱིས་རྫོགས། །ཞེས་བྱ་བ་ནི་གོ་སླ་སྟེ། དུས་གཉིས་ཀྱིས་བསྡུས་པའི་སངས་རྒྱས་རིལ་གྱིས། དཀའ་བ་མང་པོ་སྤྱད་ཀྱང་མཐར་མ་ཕྱིན་པ་དེ་དག་གསང་བའི་སྙིང་པོའི་ལམ་འདི་རྙེད་ནས་གཟོད་ཡང་དག་པའི་སངས་རྒྱས་སུ་འགྱུར་བ་ཁོ་ནའི་ཕྱིར། འབྱུང་དང་མ་འོངས་ཐམས་ཅད་ཀྱང་། །འདི་ཡིས་ལྷུན་གྱིས་གྲུབ་པར་འགྱུར། །ཞེས་གསུངས་ཏེ། དུས་གཉིས་ཀྱིས་བསྡུས་པའི་རྒྱལ་བ་རྣམས་ཀྱང་འདི་ལ་བརྟེན་དགོས་སོ། །ཞེས་བྱ་བའོ། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་བྱ་བ་ནི། རང་བཞིན་གསང་བའི་སྙིང་པོ་ཉིད་ལ། མཚན་ཉིད་གསུམ་དུ་བཏགས་ཀྱང་། ངོ་བོ་གཅིག་པ་ཁོ་ནའོ། །ཞེས་བྱ་བའོ། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་བརྙེས་སོ། །ཞེས་བྱ་བ་ནི་གོ་སླ་སྟེ། དགོངས་པ་ཡང་འདི་ཡིན་ལ་ལམ་དང་རང་བཞིན་གཉིས་ཀ་ཡང་འདི་ལས་མི་འདའ་བའི་ཕྱིར། ཀུན་གྱི་ཕྱག་རྒྱ་ཆེན་པོའི་མཆོག །ཅེས་གསུངས་སོ། །འདི་སུས་བཟུང་སྙམ་པ་ལ། ཐོས་བསམ་བསྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུང་། །ཞེས་གསུངས་ཏེ། དངོས་པོ་ཐམས་ཅད་ཀྱི་དེ་ཁོ་ན་ཉིད་ཤེས་པ་ནི་ཤེས་རབ་ཀྱི་མིག་གོ། །སྦྱིན་པའི་སྣོད། བསྟན་པ་ནི། སྣོད་ལྡན་ངང ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །ཞེས་གསུངས་ཏེ། ཤེས་རབ་དང་སྙིང་རྗེ་དང་ནོགས་ཐུབ་པ་ནི་སྣོད་དང་ལྡན་པའོ། །ཅིས་ཀྱང་མི་འཁྲུགས་པ་ནི་ངང་བཟང་བའོ། །སྐྱེ་བོ་རྣམས་ཀྱི་སྤྱོད་པ་ལས་ལོག་པ་ནི་ཚུལ་ཤིས་པའོ། །བློ་མི་འགྱུར་བ་ནི་བརྟན་པའོ། །གཞན་དུ་ནམ་ཡང་སྦྱིན་མི་བྱ། །ཞེས་བྱ་བ་ནི་གོང་མ་རྣམས་ལས་ཟློག་པ་སྟེ། དེ་དག་ལ་ནི་སྙིང་འབྱིན་པའི་ཉེན་དང་བསྡོས་ཏེ་གསང་ངོ་། །ཞེའོ། །གལ་ཏེ་གསང་མ་ཐུབ་པའི་ཉེས་པ་ནི། །རྨོངས་ལ་འཕྱར་བས་གལ་ཏེ་བྱིན། །དུས་མིན་པར་ནི་སྲོག་ཟད་ནས། །བསྲེགས་དང་སྦྲེབས་ལ་ཡུན་རིང་གནས། །ཞེས་གསུངས་ཏེ། བསྐལ་པ་ཆེན་པོ་གསུམ་དུ་དམྱལ་བར་གནས་པའོ། །དེ་ལས་ཐོན་ནས་ཀྱང་བསྐལ་པ་གཉིས་སུ་ཡི་དྭགས་སུ་གནས་སོ། །དེ་ནས་ཀྱང་སངས་རྒྱས་ཀྱི་སྒྲ་ཐོས་པར་དཀའོ་ཞེས་འབྱུང་ངོ་། །ཤིན་ཏུ་གསང་བའི་མན་ངག་གི་སྙིང་པོ་ཞེས་བྱ་བ་ནི། སྣོད་དཀོན་ཞིང་གསང་མ་ཐུབ་ན་ཉེན་ཆེ་བའི་ཕྱིར། ཤིན་ཏུ་གསང་དགོས་ལ། སྣོད་དང་ལྡན་པ་རྙེད་ན་ཚེགས་ཆུང་ངུས་དགོས་པ་མཐའ་དག་འགྲུབ་པའི་ཕྱིར། མན་ངག་གི་སྙིང་པོའོ། །ལེའུ་བཅུ་གསུམ་པའི་རྣམ་གྲངས་བཤད་པའོ།། །།དེ་ནས་གླུ་རྒྱན་གྱི་ཡེ་ཤེས་ཀྱི་མཆོད་པ་བསྟན་པའི་ཕྱིར། དེ་ནས་དེ་བཞིན་གཤེགས་པ་ཐམས་ཅད། ཉིད་ཀྱི་དཀྱིལ་འཁོར་ལ་དགྱེས་པ་ཆེན་པོའི་གླུ་འདི་བླངས་སོ། །ཞེས་བྱ་བ་ནི། ཐམས་ཅད་ཀྱི་བདག་ཉིད་བཞི་བཅུ་རྩ་གཉིས་ཡིན་ལ། གླུ་ལྔ་བསྡུས་པ་དང་བཅས་པར་ཐམས་ཅད་འདུས་པའི་ཕྱིར་རོ། །ཐམས་ཅད་ཀྱི་ངོ་བོ་ཉིད་གླུ་ཡིས་མཚོན་པ་ལྟར་བཞུགས་པ་གསལ་བར་སྣང་བ་ཉིད་དགྱེས་པ་སྟེ། གདུལ་བྱའི་སྣང་བ་ཡིན་གྱི་རྐྱེན་གྱིས་བསྐུལ་བ་ལྟ་བུ་མ་ཡིན་ནོ། །དང་པོར་ཐམས་ཅད་ཀྱི་སྐུ་ལྔ་ལ་བསྟོད་པ་བསྟན་པའི་ཕྱིར། ༀ། ཕྱོགས་བཅུ་དུས་བཞི་རྫོགས་པ་ཡི། །ཞེས་བྱ་བ་ལ་སོགས་པ་གསུངས་ཏེ། ཐམས་ཅད་ཀྱང་གཅིག་ལ་ལྷུན་གྱིས་རྫོགས་པ་ནི་མངོན་པར་བྱང་ཆུབ་པའི་སྐུའོ། །ཡེ་ཤེས་དཀྱིལ་འཁོར་ཐིག་ལེ་ཆེ། །ཞེས་བྱ་བ་ནི། ཡེ་ཤེས་ལྔ་ནི་རྣམ་པར་མི་རྟོག་པའི་ཡེ་ཤེས་ཆེན་པོར་གསལ་ལ། དེ་ཉིད་ཁྱབ་གདལ་ཆེན་པོར་གནས་པ་ནི་ཆོས་ཀྱི་སྐུའོ། །བསོད་ནམས་དཀྱིལ་འཁོར་ཞེས་བྱ་བ་ནི། གང་ཡང་མ་སྤངས་པའི་ཟག་པ་མེད་པའི་བསོད་ནམས་རང་སྣང་བ་ནི་ལོངས་སྤྱོད་ཆེན་པོའི་སྐུ་ཁོ་ནའོ། །སྐུ་ཡི་ཚོགས། ཞེས་བྱ་བ་ནི། ཐམས་ཅད་ཀྱི་ངོ་ལ་ཐམས་ཅད་ཀྱི་སྐུ་ཅིར་ཡང་སྣང་བའི་ཕྱིར་སྤྲུལ་པའི་སྐུ་ཁོ་ནའོ། །སྣང་སྟོང་ཐིག་ལེ་ཀུན་ཏུ་རྫོགས་ཧོཿ ཞེས་བྱ་བ་ནི། སྣང་སྟོང་གཉིས་སུ་མི་ཕྱེད་པའི་ཕྱིར་རྡོ་རྗེའི་སྐུ་ཁོ་ནའོ། །ༀ་དང་ཧོཿཞེས་བྱ་བ་ནི། ཨཱོཾ་གྱི་ཡི་གེ་ལྔས་ཡེ་ཤེས་ལྔ་མཚོན་པར་མགོ་འདྲེན་པ་དང་། དེ་ལྟར་བསྟོད་ནས་མཉེས་པར་གྱུར་པ་ནི་ཧོཿཞེས་བྱ་སྟེ། ཀུན་ལ་མཐུན་པར་ཤེས་པར་བྱའོ། །གསུང་ལྔ་ལ་བསྟོད་པའི་ཕྱིར། ༀ། རྡོ་རྗེ་བསོད་ནམས་ཞེས་བྱ་བ་ནི། བསོད་ནམས་ཀྱི་ངོ་བོ་སྒྲ་ཐམས་ཅད་མ་སྤངས་པར་རང་སྣང་བའི་ཕྱིར་ཚིག་གི་གསུངས་ངོ་། །ཐིག་ལེ་ཆེ། ཞེས་བྱ་བ་ནི། སྤྲོས་པ་མེད་པ་ལ་བརྗོད་དུ་མེད་པའི་ཕྱིར་དོན་གྱི་གསུང་ངོ་། །རྡོ་རྗེ་ཡེ་ཤེས་དཀྱིལ་འཁོར་ལྡན། །ཞེས་བྱ་བ་ནི། མ་བརྗོད་པར་ཡེ་ཤེས་ཀྱི་རིག་པ་སྣ་ཚོགས་ཀྱིས་ཐམས་ཅད་གསལ་བར་བརྡའ་སྤྲོད་པའི་ཕྱིར་རིག་པའི་གསུང་ངོ་། །རྡོ་རྗེ་སྒྲ་ཆེན་མཐའ་ཡས་པ། །ཞེས་བྱ་བ་ནི། སྒྲ་གཅིག་ཡན་ལག་མང་པོར་གྲགས་པའི་ཕྱིར་ཚངས་པའི་གསུང་ངོ་། །རྡོ་རྗེ་རྒྱལ་པོ་ཐིག་ལེ་ཆེ་ཧོཿ ཞེས་བྱ་བ་ནི། ཚིག་མེད་པ་ཉིད་བརྗོད་པ་དང་འདྲ་བར་གསལ་བ་ནི། གསུང་གི་རབ་ཡིན་པའི་ཕྱིར་ཡི་གེ་མེད་པའི་གསུང་ངོ་། །ༀ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཞེས་བྱ་བ་ནི། ཐུགས་ལྔ་ལ་བསྟོད་པ་སྟེ། སྟོང་པ་ཉིད་དང་། སོ་སོར་རྟོག་པ་དང་། མེ་ལོང་ལྟ་བུ་དང་། མཉམ་པ་ཉིད་དང་། བྱ་བ་གྲུབ་པ་ཞེས་བྱ་བའི་ཡེ་ཤེས་ལྔ་པོ་ཉིད་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔ་རྫོགས་ལ། དེ་ལས་མ་བརྩལ་བར་སྐུ་ལ་སོགས་པར་རང་སྣང་བའི་ཕྱིར། ཡེ་ནས་ལྷུན་རྫོགས་ཀུན་ཏུ་བཟང་། །ཞེས་གསུངས་སོ། །འདུས་པའི་ཚོགས་ཆེན་ཐིག་ལེ་ཆེ་ཧོཿ ཞེས་བྱ་བ་ནི། དེ་བས་ན་ལྔ་གཉིས་པོ་དེ་དག་རྒྱུ་ནས་ཐ་མི་དད་པའི་ཕྱིར་གནས་སྐབས་ཀྱི་སྣང་བ་ཁོ་ནའོ། །ༀ། མི་དམིགས་སྒྱུ་འཕྲུལ་མཉམ་པའི་དབྱིངས། །ཞེས་བྱ་བ་ལ་སོགས་པ་ནི། ཡོན་ཏན་ལྔ་བསྟོད་པ་སྟེ། མི་དམིགས་པའི་རིག་པ་ཉིད་སྒྱུ་འཕྲུལ་སྣ་ཚོགས་སུ་རང་སྣང་བས་སྣང་སྟོང་གཉིས་སུ་མེད་པ་མཉམ་པ་ཉིད་ཀྱི་དབྱིངས་ལ་ཕྱི་ནང་དང་རྒྱ་ཆེ་ཆུང་གཞལ་དུ་མེད་པའི་གཞལ་ཡས་ཁང་ངོ་། །མཐའ་ཡས་ཀུན་ནས་ཞེས་བྱ་བ་ནི། དྲུག་པའི་ཞིང་ལ་མཐའ་ཐུག་པ་མེད་པའི་ཕྱིར་ཞིང་ཁམས་སོ། །སྣ་ཚོགས་སྤྲོ། ཞེས་བྱ་བ་ནི་འོད་ཟེར་རོ། །མཐའ་ཡས་ཀུན་ནས་ལྷུན་གྱིས་ཐིམ། །ཞེས་བྱ་བ་ནི། མཐའ་ཡས་པའི་འདོད་ཡོན་རིལ་མྱོང་བ་མེད་པའི་ཚུལ་གྱིས་མྱོང་བའི་ཕྱིར། ལོངས་སྤྱོད་ཁོ་ནའོ། །སྣ་ཚོགས་སྐུ་གསུང་ཐུགས་ཆེན་པོ་ཧོཿ །ཞེས་བྱ་བ་ནི། སྟོབས་དང་མི་འཇིགས་པ་ལ་སོགས་པ་ཉིད་སེང་ཁྲི་ལ་སོགས་པར་རང་སྣང་བའི་ཕྱིར་དེ་དག་སྐུ་གསུང་ཐུགས་ལས་མི་གཞན་པ་སྟེ། གདན་ཁྲི་རྣམས་སོ། །ༀ། ཕྱོགས་བཅུ་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པའི་རྡུལ་ཕྲན་བསམ་ཡས་ཀྱིས། །ཞེས་བྱ་བ་ནི། ཕྲིན་ལས་ལྔ་ལ་བསྟོད་པ་སྟེ། །ཞིང་ཁམས་མཐའ་ཡས་པ་རྣམས་ནི་དག་པ་དང་། མ་དག་པ་དང་། བར་མ་གསུམ་དུ་འདུས་སོ། །ཕྲིན་ལས་མཐའ་ཡས་པ་ནི། ཞི་རྒྱས་དབང་དྲག་ཏུ་འདུས་སོ། །སྤྲུལ་པ་མཐའ་ཡས་པ་ནི། ཞི་བ་དང་ཁྲོ་བོ་སྣ་ཚོགས་ཀྱི་ཚུལ་ཞེས་བྱ་བར་འདུས་སོ། །སྐད་ཅིག་ཡུད་ལ་ལྷུན་གྱིས་གྲུབ། །ཅེས་བྱ་བ་ནི། དེ་དག་གིས་དེ་དག་ཏུ་ཡུད་ཙམ་ལ་སོང་བ་མེད་པར་ཁྱབ་ནས། དེ་དག་བྱ་བ་རྫོགས་པའི་སྐད་ཅིག་གིས་མ་བརྩལ་བར་ཟིན་པའི་ཕྱིར། ལྷུན་གྱིས་གྲུབ་པའི་ཕྲིན་ལས་དང་ལྔའོ། །ཞེས་བྱ་བ་ཁོ་ནའོ། །ༀ། ཐམས་ཅད་མ་ལུས་སྐུ་གསུང་ཐུགས། །ཞེས་བྱ་བ་ནི། དེ་དག་གིས་མཚོན་ནས་དངོས་པོ་གཉིས་ཀྱིས་བསྡུས་པ་རིལ་ཡང་། སྐུ་གསུང་ཐུགས་ཡོན་ཏན་ཕྲིན་ལས་ལྔར་གནས་པའོ། །ཞེས་བྱའོ། །སྐུ་གསུང་ཐུགས་ཀྱི་བདག་ཉིད་ཆེ། །ཞེས་བྱ་བ་ནི། གངས་ཆེན་པོ་མཚོ་ལྔ་ཡང་དེ་དག་ལྔའི་ངོ་བོ་ཁོ་ནའི་ཕྱིར་རོ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །ཅེས་བྱ་བ་ནི། གངས་ཆེན་པོ་མཚོ་ལྔ་ཡང་དེ་དག་གི་ངོ་བོ་ཉིད་ཁོ་ནའི་ཕྱིར་རོ། །སྐུ་གསུང་ཐུགས་ཀྱི་ཐིག་ལེ་ཆེ། །ཞེས་བྱ་བ་ནི། དེ་དག་ཉིད་ཀྱང་ཕན་ཚུན་ཐ་མི་དད་པའི་ཕྱིར་རོ། །མཉེས་པ་ཞེས་བྱ་བ་ནི་བཤད་ཟིན་ཏོ། །ལེའུ་བཅུ་བཞི་པ་ཁོང་ཁྲོལ་དུ་བཤད་པའོ།། །།དེ་ནས་ཁྲོ་བའི་དཀྱིལ་འཁོར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། སྤྱིར་རྒྱུད་འདི་ལ་དཀྱིལ་འཁོར་རྣམ་པ་བདུན་ལས། ལྷག་པའི་དཀྱིལ་འཁོར་རྣམ་པ་ཉིད་དང་། ཚོགས་ཀྱི་དཀྱིལ་འཁོར་དང་། རང་བཞིན་ལྷུན་གྱིས་གྲུབ་པའི་དཀྱིལ་འཁོར་རྣམས་ལ། ཞི་ཁྲོོ་གཉིས་གཉིས་སུ་སྟོན་པ་ལས། དེ་ཡན་ཆད་དུ་ཞི་བའི་དཀྱིལ་འཁོར་རྣམས་དང་། ཁྲོ་བོའི་ཚོགས་དང་། ལྷག་པ་གཟུགས་བརྙན་ཟུར་ཙམ་བསྟན་ནས། འདི་ནས་མར་ཁྲོ་བོའི་དཀྱིལ་འཁོར་ལས། ལེའུ་འདིས་ཁྲོ་བོ་རང་བཞིན་གྱི་དཀྱིལ་འཁོར་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་བདག་པོ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ནི་རིགས་ལྔ་རུ་འདུས་ལ། རིགས་ལྔའིབདག་པོ་ནི་རྒྱལ་བ་དྲུག་པའོ། །སངས་རྒྱས་ཐམས་ཅད་ཀྱི་ངོ་བོ་ཉིད་ཀྱིས་ཞེས་བྱ་བ་ནི་ཞི་ཁྲོའི་སངས་རྒྱས་ཀྱི་དཀྱིལ་འཁོར་ཐམས་ཅད་གཅིག་དང་དུ་མར་བྲལ་བའི་ཚུལ་གྱིས་ལྷུན་གྱིས་གྲུབ་པས། དྲུག་པ་ནི་ཐམས་ཅད་ཀྱི་ངོ་བོ་ཉིད་ཁོ་ན་སྟེ། སངས་རྒྱས་ཀུན་གྱི་སྤྱི་གཟུགས་ཅན། །ཞེས་བྱའོ། །དེ་བས་ན་ཁྲོ་བོར་ཡང་སྣང་བའི་ཕྱིར། །ཁྲོ་བོའི་དཀྱིལ་འཁོར་དུ་མངོན་པར་འདུ་མཛད་དེ། ཞེས་གསུངས་ཏེ། ཁྲོ་བོ་ལ་རྣམ་པ་གསུམ་སྟེ། དེ་ལ་ཤེས་རབ་ཆེན་པོའི་ཁྲོ་བོ་ནི། སྒྱུ་འཕྲུལ་རྡོ་རྗེ་ལས། ཡང་དག་ཤེས་རབ་ཆེན་པོ་ནི། མཚན་མ་འཇོམས་ཕྱིར་ཁྲོ་བོའི་མཆོག །ཅེའོ། །ཡེ་ཤེས་ཆེན་པོའི་ཁྲོ་བོ་ནི། རྒྱས་པའི་རྒྱུད་ལས། རང་རིག་ཡེ་ཤེས་རྒྱལ་པོ་ཡིས། །ཕྱོགས་བཅུའི་ཁམས་རྣམས་དབང་བསྡུས་ནས། །ཀུན་ཀྱང་མི་དམིགས་དབྱིངས་སུ་ཐིམ། །ཐམས་ཅད་ཁྲོ་བོའི་ཚོགས་སུ་འགྱུར། །ཞེའོ། ཕྱག་རྒྱ་ཆེན་པོའི་ཁྲོ་བོ་ནི། འོག་ནས་འཆད་པ་སྟེ། འདི་དག་འདུལ་བྱའི་ངོ་ལ་སྣང་ཡང་། རྩོལ་བར་ཐལ་བ་མེད་དོ། །དེ་ཅིའི་ཕྱིར་ཞེ་ན། ཞེས་བྱ་བ་ནི། གཏན་ཚིགས་ཀྱི་དྲི་བས་དགོས་པ་ཚོལ་བ་སྟེ། གང་སྙམ་པ་ལ། བདག་ཏུ་རྨོངས་པ་ཞེས་བྱ་བ་ལ་སོགས་པ་གསུངས་ཏེ་ཀུན་ཏུ་བརྟགས་པ་ལས་བྱུང་བའི་མ་རིག་པ་ལས་སྣ་ཚོགས་སུ་སྣང་བའོ། །བརྟགས་པ་ལ་མངོན་པར་ཞེན་པ་ཞེས་བྱ་བ་ནི། ཀུན་བརྟགས་གཉིས་ལ་ཞེན་པ་སྟེ། སྤྱིའི་མཚན་ཉིད་ལ་རང་གི་མཚན་ཉིད་དུ་མཐོང་བའོ། །ཡང་དག་པའི་ལམ་དང་བྲལ་བ་ཞེས་བྱ་བ་ནི། ལུང་ལ་མན་ངག་གིས་ཟིན་པའི་བསྐྱེད་རྫོགས་རྣམ་པ་གཉིས་ཁོ་ན་སྟེ། གང་ལ་དེ་དག་མེད་པའོ། །དག་ཅེས་བྱ་བ་ནི། ངོ་བོ་སྟོན་པ་སྟེ། སྔོན་བསྐལ་པ་དང་པོ་ལ་བྱུང་བའི་དགེ་སློང་ནག་པོའོ། །དེ་ཅི་ཞིག་སྙམ་པ་ལ། གབ་པའི་གསང་བ་མ་རྟོགས་པར་ཞེས་བྱ་བ་ནི། རང་བཞིན་གསང་བའི་སྙིང་པོའོ། །སྦས་པའི་གསང་བ་ལ་མངོན་པར་འཆེལ་ནས་ཞེས་བྱ་བ་ནི། ལམ་གྱི་རྒྱུད་ལས་འབྱུང་བའི་ཏན་གན་ལ་སོགས་པ་སྒྲ་ཇི་བཞིན་པར་བཟུང་ནས་རྒྱུན་དུ་སྤྱོད་པའོ། །རྒྱུ་དང་འབྲས་བུ་ལ་རྨོངས་པ་ཞེས་བྱ་བ་ནི། མི་དགེ་བའི་རྣམ་པར་སྨིན་པ་མི་ཤེས་པའོ། །སྲིད་པའི་ས་བོན་རྩུབ་མོས་ཞེས་བྱ་བ་ནི། ལས་ངན་པ་དང་ཉོན་མོངས་པ་རང་ཀ་མའི་བག་ཆགས་རྣམས་སོ། །མཚམས་མེད་པ་ཞེས་བྱ་བ་ནི་སྡུག་བསྔལ་བར་མི་འཆད་པའོ། །རབ་ཏུ་ཚ་བ། ཞེས་བྱ་བ་ལ་སོགས་པ་ནི་གོ་སླ་སྟེ། བརྒྱད་ཅེས་བྱ་བ་ནི། ཡང་སོས་དང་། ཐིག་ནག་དང་། སྡུད་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། དམྱལ་བ་ཆེན་པོ་དང་། རབ་ཏུ་ཚ་བ་དང་། མནར་མེད་པའོ། །ཤིན་ཏུ་གྲང་བ་བརྒྱད་ཅེས་བྱ་བ་ནི། ཆུ་བུར་ཅན་དང་། ཆུ་བུར་རྡོལ་བ་དང་། སོ་ཐམ་ཐམ་དང་། ཨ་ཆུ་ཆུ་དང་། ཀྱི་ཧུད་ཟེར་བ་དང་། ཨུཏྤལ་ལྟར་གས་པ་དང་། པདྨ་ལྟར་གས་པ་དང་། གས་པ་ཆེན་པོའོ། །འཇིག་རྟེན་གྱི་ཁམས་བརྒྱུད་ཅིང་ཞེས་བྱ་བ་ནི། གནས་འཇིག་ན་ཡང་སྐད་ཅིག་ཁ་གཞན་དུ་འཕོ་བའོ། །དེ་ནས་རྣམ་པར་སྨིན་པ་དེ་ཟད་པ་དང་། ཞེས་བྱ་བ་ནི། གསོད་པ་དང་། བརྡེག་པ་དང་། རང་ཀ་མའི་ཕྲིན་ལས་དང་། གདུག་པ་དང་། དམ་ཚིག་ཅན་ལ་ངན་དུ་སེམས་པ་དང་། ཆེ་བས་དྲེགས་པ་ལ་སོགས་པའི་རྣམ་པར་སྨིན་པའི་འབྲས་བུའོ། །ཡི་དྭགས་ཞེས་བྱ་བ་ལ་སོགས་པ་ནི་གོ་སླ་སྟེ། འདོད་པའི་དངོས་པོ་རྣམས་ཡིད་དུ་མི་འོང་བ་ཞེས་བྱ་བ་ནི། ཅི་ཡང་ངན་སྐྱུགས་སུ་མཐོང་བ་སྟེ། ཕྱིའི་སྒྲིབ་པ་ཅན་ཞེས་བྱའོ། །གདུག་ཅིང་རྩུབ་པའི་དངོས་པོ་ཞེས་བྱ་བ་ནི། ཅི་ཟོས་པ་ཁྲོ་ཆུ་དང་། ལྕགས་ཚན་དུ་གྱུར་པ་སྟེ། མེ་ལྕེའི་འཁོར་ལོ་ཅན་ཞེས་བྱའོ། །ཡོད་མེད་པར་འགྱུར་ཞེས་བྱ་བ་ཡང་ཕྱིའི་སྒྲིབ་པ་ཅན་ཏེ། བཟའ་བར་མཐོང་ནས་བགྲོད་པས་མེད་པའོ། །ལུས་དང་ཡན་ལག་དང་དབང་པོ་མི་འཚམས་པ་ཞེས་བྱ་བ་ནི། མགོ་ལུས་རི་བོ་ཙམ་ལ་ཁ་ཁབ་མིག་ཙམ་པ་སྟེ། ནང་གི་སྒྲིབ་པ་ཅན་ཞེས་བྱའོ། །དེ་ནས་ལས་ཀྱི་སྒྲིབ་པ་རྩུབ་མོའི་རྣམ་པར་སྨིན་པ་ཞེ་བྱ་བ་ནི། ནོར་ཟས་ལ་བརྐམ་པ་དང་། འཇུངས་པ་དང་། བརྣབ་སེམས་དང་། མཆོད་པའི་ལོངས་སྤྱོད་ལ་རྔམ་པ་དང་། གསོག་འཇོག་བྱས་པ་ལ་སོགས་པའི་རྣམ་པར་སྨིན་པའོ། །སྔོན་གྱི་སྲིད་པས་མཚམས་སྦྱར་ནས་ཞེས་བྱ་བ་ནི་སྔོན་ཁྲོ་བོ་དབུ་ཕྱག་མང་པོ་དང་། ཕྲ་མེན་ལ་སོགས་པར་ཡིད་ལ་བྱས་ནས་ལས་རླངས་པོ་བྱས་པའི་རྒྱུ་མཐུན་པའི་འབྲས་བུའོ། །ཡི་དྭགས་ཀྱི་སྲིན་པོ་ཆེན་པོ་ཞེས་བྱ་བ་ལ་སོགས་པ་ནི་བདུད་རང་གི་ངོ་བོ་སྟེ་གོ་སླའོ། །ང་རོ་དང་དྲི་དང་ཞེས་བྱ་བ་ལ་སོགས་པ་ནི་དེའི་ལས་ཀྱི་སྦྱོར་བ་ཐམས་ཅད་ལ་གནོད་པའོ། །དེ་སྔོན་བསྟེན་པའི་སྟོབས་ཞེས་བྱ་བ་ནི། སྔོན་ཐེག་པ་ཆེན་པོར་སེམས་བསྐྱེད་ནས་ཕྱོགས་སུ་སྤྱོད་པའོ། །ཐུགས་རྗེས་འདུལ་བར་གྱུར་ཏེ་ཞེས་བྱ་བ་ནི། མངོན་སྤྱོད་ཀྱི་དུས་ལ་བབ་པའོ། །དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲྭ་བ་ཞེས་བྱ་བ་ལ་སོགས་པ། བདུད་བཏུལ་བའི་གླེང་གཞི་རང་གི་ངོ་བོ་ལ་དོན་གསུམ་སྟེ། ཆོ་འཕྲུལ་རྨད་དུ་བྱུང་བ་དང་། དཀྱིལ་འཁོར་རྨད་དུ་བྱུང་བ་དང་། ཕྲིན་ལས་རྨད་དུ་བྱུང་བའོ། །དེ་ལ་ཆོ་འཕྲུལ་རྨད་དུ་བྱུང་བ་ལ་དོན་རྣམ་པ་དྲུག་ལས། འདི་ནི་ཏིང་ངེ་འཛིན་གྱི་ཆོ་འཕྲུལ་ཏེ། རྡོ་རྗེ་བཀོད་པ་ཞི་བའི་དཀྱིལ་འཁོར་རྣམས་ཀྱིས་ཞེས་བྱ་བའོ། །རྡོ་རྗེ་བདག་པོ་ཞེས་བྱ་བ་ནི་རིགས་ཀྱི་བདག་པོ་སྟེ་ཀུན་ཏུ་བཟང་པོའོ། །ཁྲོ་བོའི་རྒྱལ་པོ་དཀྱིལ་འཁོར་གྱི་སྤྲིན་ཆེན་པོ་ཞེས་བྱ་བ་ནི། ཁྲོ་བོའི་དཀྱིལ་འཁོར་ཐམས་ཅད་ཀྱི་རྩ་བ། རིགས་ལྔའི་ཧེ་རུ་ཀའི་ཡང་རྒྱལ་པོའི་ཆེ་མཆོག་གི་སྐུར་སྣང་བར་བྱེད་པའི་ཏིང་ངེ་འཛིན་དེ་ལ་དེ་སྐད་ཅེས་བྱའོ། །འདི་ནས་མར་དཀྱིལ་འཁོར་ལ་བཞི་ལས། ཆེ་མཆོག་ལོངས་སྤྱོད་ཆེན་པོའི་དཀྱིལ་འཁོར་བསྟན་ཏེ། དེ་བཞིན་ཉིད་ཀྱི་དབྱིངས་ནས། ཁྲོ་མོ་དབང་ཕྱུག་ཆེན་མོ་མངོན་དུ་ཕྱུང་སྟེ་ཞེས་བྱ་བ་ནི། ཨ་ནི་སྐྱེ་མེད་དེ་བཞིན་ཉིད། །ཅེས་གསུངས་པའི་ཕྱིར། དེ་བཞིན་ཉིད་ནི་ཀུན་ཏུ་བཟང་མོ་ཉིད་ཁོ་ན་སྟེ། དེ་ཉིད་ཁྲོ་མོར་རང་སྣང་བའོ། །གཞན་ནི་གོ་སླའོ། །གཉིས་སུ་མེད་པར་འཁྲིལ་བའི་དགྱེས་པས་ཐིམ་ནས་ཞེས་བྱ་བ་ནི། ལ་ལའི་གཞུང་གིས་སྐུ་ཉིད་ཡོངས་སུ་གྱུར་པའི་བྱང་ཆུབ་སེམས་ལས་ཁྲོ་བོ་སྤྲོས་ནས་ཕྱིས་འཁོར་དུ་སྣང་བར་ཡང་འཆད་དོ། །འདིར་ཉི་ཟླ་གཉིས་སུ་མེད་པ་ནི་ཐིམ་པ་ཞེས་བྱའོ། །དེ་ཉིད་དཀྱིལ་འཁོར་ཐམས་ཅད་ཀྱི་རྒྱུའི་ཕྱིར། བྱང་ཆུབ་སེམས་ཀྱི་སྤྲིན་ལས་ཞེས་གསུངས་སོ། །ཧཱུྃ་ཧཱུྃ་ཧཱུྃ་ཞེས་བྱ་བ་ལ་སོགས་པ་ནི་ཀུན་བརྗོད་པའི་ཆོ་འཕྲུལ་ལོ། །ཞེས་བརྗོད་པས་འཇིག་རྟེན་དྲུག་གི་ཕྱོགས་བཅུ་ཞེས་པ་ལ་སོགས་པ་ནི། སྤྲུལ་པ་རྫུ་འཕྲུལ་གྱི་ཆོ་འཕྲུལ་ལོ། །འཇིག་རྟེན་དྲུག་གི་ཕྱོགས་བཅུ་ཐམས་ཅད་ཅེས་བྱ་བ་ལ་སོགས་པ་ནི། བྱིན་གྱིས་བརླབས་ཀྱི་ཆོ་འཕྲུལ་ལོ། །འཇིག་རྟེན་དྲུག་གི་ཕྱོགས་བཅུ་སྟོང་ཁམས་ཐམས་ཅད་ཅེས་བྱ་བ་ལ་སོགས་པ་ནི། ཆོས་སྣང་བའི་ཆོ་འཕྲུལ་ལོ། །དབང་ཆེ་བ་ཞེས་བྱ་བ་ནི་མ་ཧཱ་དེ་བའོ། །གཟི་བརྗིད་ཆེ་བ་ཚངས་པའོ། །མཐུ་ཆེ་བ་ཁྱབ་འཇུག་གོ། །བརྒྱལ་རབ་ཏུ་བརྒྱལ་ཀུན་ཏུ་བརྒྱལ་བར་གྱུར་ཏོ་ཞེས་བྱ་བ་ནི། ཁམས་འཁྲུགས་ནས་ལུས་འགྱེལ་ཏེ་སེམས་མྱོས་པར་གྱུར་པའོ། །ལ་ལའི་གཞུང་གི་སྐབས་འདིར་ཁམས་གསུམ་དུར་ཁྲོད་ཀྱི་གཞལ་ཡས་ཁང་དུ་བརླབས་ཏེ་དྲེགས་པ་རྣམས་གདན་དུ་མཛད་པར་སྟོན་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཞེས་བྱ་བ་ལ་སོགས་པ་ནི། སྤྲུལ་པ་ཆེན་པོའི་དཀྱིལ་འཁོར་སྟོན་ཏོ། །དུར་ཁྲོད་ཀྱི་བདག་པོ་དྲེགས་པ་ཁྱོ་ཤུག་ཅེས་བྱ་བ་ནི། རུ་དྲ་ཕོ་མོའོ། །ཁྲོ་བའི་དཀྱིལ་འཁོར་གྱི་སྤྲིན་ཕུང་ཞེས་བྱ་བ་ནི། དང་པོ་བྱང་ཆུབ་སེམས་ཡེ་ཤེས་ལྔའི་ཁྱད་པར་ལས་འཕྲོས་པ་སྟེ་སླར་ཡང་རིགས་བཞིན་དུ་འདུས་པའོ། །དེ་ནས་དྲེགས་པ་ཆེན་པོ་ལ་སོགས་པ་གཏུམ་པའི་སེམས་ཀྱིས་ཞེས་བྱ་བ་ལ་སོགས་པ་ནི། ཕྲིན་ལས་རྨད་དུ་བྱུང་བ་ལ་གཉིས་ལས། ཕྲིན་ལས་ཀྱི་ངོ་བོ་སྟེ། འབྲུ་ནི་གོ་སླའོ། །དབུ་དགུ་ཕྱག་བཅོ་བརྒྱད་ཅེས་བྱ་བ་ནི། ཧེ་རུ་ཀ་དགུ་ཀློང་རྔམ་པའི་ཞལ་དུ་གསོལ་བ་དང་། སྒྲོལ་བྱེད་ཀྱི་གིང་བཅོ་བརྒྱད་ཀྱི་ཕྱག་གིས་སྒྲོལ་བའི་ཕྱིར་རོ། །ཧཱུྃ་ཧཱུྃ་ཧཱུྃ་ནི་སྡུད་པའོ། །ཧ་ཧ་ཧ་ནི་རྔམ་པའི་ཕྱིར་རོ། །ཁ་ཁ་ཁཱ་ཧི་ནི་གསོལ་བའི་ཕྱིར་རོ། །སྙིང་ཕྱུང་བ་ནི་སེམས་རྩད་ནས་གཅོད་པའི་ཕྱིར་རོ། །དབང་པོ་ཕྱུང་བ་ནི་སྒོ་དགག་པའི་ཕྱིར་རོ། །ནང་ཁྲོལ་དྲངས་བ་ནི་མངོན་པར་ཞེན་པ་དག་པར་བྱ་བའི་ཕྱིར་རོ། །ཡན་ལག་བཅད་པ་ནི་ལས་ངན་པ་གཅོད་པའི་ཕྱིར་རོ། །ཁྲག་འཐུངས་པ་ནི་འདོད་ཆགས་ཟད་པའི་ཕྱིར་རོ། །རུས་པ་འཆོས་པ་ནི་ཞེ་སྡང་དག་པའི་ཕྱིར་རོ། །དེ་ནས་ཧཱུྃ་ཧཱུྃ་ཞེས་པ་ལ་སོགས་པ་ནི། འཁོར་སྡུད་པའི་ཆོ་འཕྲུལ་ལ་གཉིས་ལས། སྡུད་པའི་ཆོ་འཕྲུལ་ནི། ཕྱོགས་བཅུ་འཇིག་རྟེན་གྱི་ཁམས་ནམ་མཁའ་དང་བཅས་པ་ཡུངས་འབྲུ་གཅིག་ཙམ་དུ་ཚུད་པར་བསྡུས་སོ། །ཞེས་བྱ་བ་ནི། དྲེགས་པ་རྣམས་ཀྱི་རྣམ་པར་ཤེས་པ་ཧཱུྃ་དུ་བསྡུས་པ་སྟེ། རྒྱུ་དེས་ཆོས་ཐམས་ཅད་སེམས་སུ་གཅིག་པར་མཐོང་བའོ། །གཞན་ནི་གོ་སླའོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཞེས་བྱ་བ་ལ་སོགས་པ་ནི། ཡོངས་སུ་རྫོགས་པའི་དཀྱིལ་འཁོར་སྟོན་ཏེ། འདུལ་བའི་ཐབས་ཀྱིས་ཡང་རིགས་ལྔའི་འཇིགས་བྱེད་ཆེན་པོར་སྣང་བར་བྱས་ཞེས་བྱ་བ་ནི། ཆེ་མཆོག་གི་སྐུ་ཉིད་མ་མོ་རྣམས་ཀྱི་ངོ་ལ་རིགས་ལྔར་སྣང་བ་སྟེ། གཉིས་ཀྱི་ཕྱིར་ཡང་ཞེས་བྱའོ། །དེ་དག་ཀུན་ཀྱང་དགྱེས་པས་རོལ་པ་ཞེས་བྱ་བ་ལ་སོགས་པ་ནི། འཁོར་སྡུད་པའི་ཆོ་འཕྲུལ་གྱི་བྱ་བའོ། །འབྲུ་ནི་གོ་སླའོ། །དེ་ནས་དགྱེས་ཏེ་ཧ་ཧ་ཞེས་བརྗོད་པས། ཞེས་བྱ་བ་ལ་སོགས་པ་ནི། ངོ་མཚར་ཚོགས་ཀྱི་དཀྱིལ་འཁོར་སྟོན་ཏོ། །དཀར་མོ་ཞེས་བྱ་བ་ནི་ཞི་བའི་ལས་ཀྱི་ཕྱིར་རོ། །རྐུན་མོ་ནི་དབང་གི་ཕྱིར་རོ། །རྨོངས་མོ་ནི་ཞི་བའི་ལས་ཀྱི་ཕྱིར་རོ། །ཐལ་བྱེད་ནི་དྲག་པོའི་ལས་ཀྱི་ཕྱིར་རོ། །སྦོས་མོ་ནི་ཡོན་ཏན་གྱིས་རྒྱས་པའི་ཕྱིར་རོ། །གཏུམ་མོ་ནི་དྲག་པོའི་ཕྱིར་རོ། །སྨེ་ཤ་ཅན་ནི་གང་ཡང་གྲུབ་པའི་ཕྱིར་རོ། །མ་ཚོགས་མ་ནི་འཕེལ་བར་བྱེད་པའི་ཕྱིར་རོ། །ངོ་མཚར་དང་ཆས་ཞེས་བྱ་བ་ནི་རྔམ་ཞིང་ངམ་པའི་ཕྱིར་རོ། །སེང་གདོང་ནི་ཐམས་ཅད་ཟིལ་གྱིས་གནོན་པའི་ཕྱིར་རོ། །སྟག་གདོང་ནི་དཔའ་བརྟུལ་གྱིས་ལས་དྲག་པོའི་ཕྱིར་རོ། །ཝ་ནི་ཐབས་མཁས་པས་ཕུང་པོའི་བདུད་དག་པའི་ཕྱིར་རོ། །ཁྱི་གདོང་ནི་ལྷའི་བུའི་བདུད་འཇོམས་པའི་ཕྱིར་རོ། །བཞད་གདོང་ནི་ཤེས་བྱ་ལ་ཐོགས་པ་མེད་པའི་ཕྱིར་རོ། །དུར་བྱ་ནི་འཁོར་བ་དང་དུ་ལེན་པའི་ཕྱིར་རོ། །འུག་གདོང་ནི་གདུལ་བྱ་ཕྲ་བ་ཡང་མི་འདོར་པའི་ཕྱིར་རོ། །རྡོ་རྗེ་སྲིང་འགྲོ་མ་ནི་རྟ་གདོང་མ་སྟེ་འཁོར་བ་མི་གཏོང་བའི་ཕྱིར་རོ། །གདོང་མོ་ནི་ཕག་གི་གདོང་པ་སྟེ་ཕྲིན་ལས་གདོང་ཚུགས་སུ་བྱེད་པའི་ཕྱིར་རོ། །འཇིག་རྟེན་མ་ནི་དྲེད་གདོང་མ་སྟེ་ཐམས་ཅད་སྲེག་པར་བྱེད་པའི་ཕྱིར་རོ། །རོ་ལངས་མ་ནི་སྤྱང་གདོང་མ་སྟེ་ཁམས་གསུམ་སླར་འཚོ་མ་ཞེས་བྱའོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཞེས་བྱ་བ་ལ་སོགས་པ་ནི། ཕྲིན་ལས་ཀྱི་འབྲས་བུ་ལ་གཉིས་ལས་དྲེགས་པ་རྣམས་གནས་སྟོབས་པའོ། །བདུད་རྩི་འབྱུང་བ་ཞེས་བྱ་བ་ནི་དྲི་ཆེན་ནོ། །ༀ་བཛྲ་མ་ཧཱ་ཨ་མྲྀ་ཏ་ཞེས་བྱ་བ་ནི། རྡོ་རྗེ་བདུད་རྩི་ཆེན་པོ་སྟེ། གཅིག་ཀྱང་ལྔ་ལྔ་དང་ལྡན་པའོ། །མ་ཧཱ་ཀྲོ་དྷ་ཞེས་བྱ་བ་ནི། ཁྲོ་བོ་ཆེན་པོ་སྟེ་འོག་ནས་འབྱུང་བའི་སྨེ་བརྩེགས་སོ། །ཨཾ་ཨཾ་ཨཾ་ཞེས་བྱ་བ་ནི། ལན་གསུམ་བྱིན་ནས་དབང་བསྐུར་བ་ཁོ་ནའོ། །སྐུ་འབར་བ་ཆེན་པོའི་དཀྱིལ་འཁོར་ན་བཞུགས་པར་མཐོང་ངོ་། །ཞེས་བྱ་བ་ནི། བསམ་ཡས་ལྷུན་གྱིས་གྲུབ་པའི་ཏིང་ངེ་འཛིན་ལྟར་མཐོང་བའོ། །སོ་སོར་སྣང་བས་དུས་གཅིག་ཏུ་བཏུལ་བར་གྱུར་ཏོ། །ཞེས་བྱ་བ་ནི། སྤྲུལ་པ་རྡུལ་ཕྲན་གྲངས་མེད་ཀྱི། །སྐད་ཅིག་ཡུད་ལ་ལྷུན་གྱིས་གྲུབ། །ཅེས་བྱ་བ་སྟེ། ཐ་དད་པར་སྣང་བས་དོན་གྲུབ་པའོ། །དེ་ནས་དེ་དག་གི་ཆུང་མའི་ཚོགས་རྣམས་དང་ཞེས་བྱ་བ་ལ་སོགས་པ་ནི་ཕྲིན་ལས་རྨད་དུ་བྱུང་བའི་འབྲས་བུ་ལ་གཉིས་ལས་འཁོར་དམ་ལ་བཏགས་ཏེ་བསྟན་པ་ཡུན་དུ་གནས་པར་བྱས་པའོ། །ལེའུ་བཅོ་ལྔ་པའི་དཀའ་བ་བཤད་པའོ།། །།དེ་དག་གི་ལྷག་པའི་ཏིང་ངེ་འཛིན་གསུང་གི་དཀྱིལ་འཁོར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དམ་ཚིག་གིས་གྲུབ་པར་བྱ་བའི་ཕྱིར། ཞེས་བྱ་བ་ནི། གསུང་གི་དམ་ཚིག་ནི་གསང་སྔགས་རྣམས་སོ། །ཡེ་ཤེས་རྔམ་པ་ཞེས་བྱ་བ་ནི་ཤིན་ཏུ་རྔམ་པའི་ང་རོ་དང་ཆས་པར་གྲགས་པའོ། །ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་ཞེས་བྱ་བ་ནི་ཉིད་ཀྱི་སྙིང་པོའོ། །མ་ཧཱ་ཙཎྜ་ནི་གཏུམ་པོ་ཆེན་པོའོ། །སརྦ་དུཥྚཱན་ནི་སྡང་བ་ཐམས་ཅད་དོ། །ཏ་ཀ་ཧ་ན་ནི་གཏོགས་ཤིག་རྒྱོབ་ཅིག་པའོ། །ད་ཧ་པ་ཙ་ནི་ཚོས་ཤིག་ཆོམས་ཤིག་པའོ། །ཧཱུཾ་ཧཱུཾ་ཧཱུཾ་ཕཊ་ཅེས་བྱ་བ་ནི། སྡུས་ལ་སོད་ཅིག་པ་སྟེ། དེ་དག་གི་ཕྱིར་རྩ་བ་ལས་དང་བཅས་པའི་སྔགས་ཁོ་ནའོ། །གཞན་ནི་གོ་སླའོ། །བྷྱོ་རྣམས་ནི་མ་མོ་རྣམས་ཀྱི་རྩ་བའི་སྙིང་པོ་སྟེ། བསྐྱེད་པ་དང་བཟླས་པ་ནི་མིང་ཉིད་ཀྱིས་གྲུབ་པའི་ཕྱིར། བཤད་པ་ཉིད་དབྲལ་སྐད་དུ་གསལ་བའོ། །རུ་ལུ་རུ་ལུ་ཧཱུཾ་བྷྱོ་ཞེས་བྱ་བ་ནི། སྙན་གསན་གསོལ་བའི་སྔགས་སོ། །ཨེ་ཧྱེ་ཧི་ཨཱ་ན་ཞེས་བྱ་བ་ནི་བསྐུལ་བའོ། །ཛཿཧཱུཾ་བྃ་ཧོཿ ཞེས་བྱ་བ་ནི་རིམ་པར་སྤྱན་དྲངས་ནས་ནམ་མཁའ་ལ་བཞུགས་པའོ། །རཾ་ཞེས་བྱ་བ་ནི། དངོས་སུ་མེད་དཔུང་གཉིས་འདྲེས་པ་སྟེ། ཤེས་རབ་ཀྱིས་འབྱོར་པའི་ཕྱིར་རོ། །ༀ་བཛྲ་ཀྲོ་དྷ་ས་མ་ཡ་ཧཱུྃ་ཞེས་བྱ་བ་ནི། རིག་པའི་མེ་ཏོག་དོར་བ་སྟེ། ཡེ་ཤེས་སུ་གཅིག་པར་གསལ་བའོ། །ༀ། ཁྲོ་ལ་ཁྲོས་པས་ཞི་མཛད་པ། །ཞེས་བྱ་བ་ལ་སོགས་པ་ནི། བསྐུལ་བ་སྟེ་བསྐུལ་བའི་ས་ལ་བཞེངས་པའི་ཕྱིར་རོ། །ༀ་བཛྲ་ཀྲོ་དྷ་ས་མ་ཡ་སྟཾ། ༀ་བཛྲ་ཀྲོ་དྷ་ས་མ་ཧོཿ ༀ་བཛྲ་ཀྲོ་དྷ་ས་མ་ཡ་ཕཊ། ཅེས་བྱ་བ་ནི། དམ་ཚིག་བསྐུལ་བས་དགྱེས་ནས་དྲག་པོའི་ཡིག་འབྲུ་མང་པོས་སྣོད་དག་པར་མཛད་པའོ། །དེ་ནས་ཕྱིར་མཆོད་པ་དབུལ་བའི་ཕྱིར། ཨ་ལི་ཨུ་ལི་ཏཱ་ལི་ཏ་བཱ་ལི་ཞེས་བྱ་བ་ནི། བཟའ་བ་དང་། བཏུང་བ་དང་། འབྲས་བུ་རྣམས་དང་། བཅའ་བ་སྣ་ཚོགས་སྤྲོས་ལ་དབུལ་ལོ། །དེ་དག་གང་ལ་སྙམ་པ་ལ། དཾཥྚ་ཞེས་བྱ་བ་ནི། མཆེ་བ་ཅན་གྱི་ཏེ་ཧེ་རུ་ཀ་རྣམས་སོ། །གོ་ནཱ་ར་དྲི་ཞེས་བྱ་བ་ནི་ཡོན་ཏན་དྲག་མོ་སྟེ་ཁྲོ་མོ་ཉི་ཤུའོ། །ཁ་རཾ་ཡོ་གི་ནཱི་ཞེས་བྱ་བ་ནི་ཞལ་འབར་བའི་རྣལ་འབྱོར་མ་སྟེ་མ་མོ་རྣམས་སོ། །ཁཱ་ཧི་ཞེས་པ་ནི་གསོལ་ཅིག་ཅེས་པའོ། །དེས་མཉེས་པའི་ཕྱིར་ཧོཿ ཞེས་བྱའོ། །ཧཱུཾ་ཧ་ཧེ་ཕཊ། ཅེས་བྱ་བ་ནི་དམ་ཚིག་གི་དཀྱིལ་འཁོར་ལ་རིམ་པར་ཐིམ་པའོ། །ཚིག་རབ་ཏུ་ཚིག་ཀུན་ཏུ་ཚིག་གོ། །ཞེས་བྱ་བ་ནི། ལས་ཀྱི་སྔགས་རྣམས་ཀྱི་མཐུ་བསྟན་པའོ། །འབར། རབ་ཏུ་འབར། ཀུན་ཏུ་འབར། ཞེས་བྱ་བ་ནི། བསྐྱེད་པའི་སྔགས་རྣམས་ཀྱིས་ཐམས་ཅད་ཀྱང་ལྷར་གྱུར་པ་ཁོ་ནའོ། །ཐམས་ཅད་དུ་འབར་བའི་དཀྱིལ་འཁོར་གྱི་ཚོགས་ཀྱིས་གང་། རབ་ཏུ་གང་། ཀུན་ཏུ་གང་བར་གྱུར་ཏོ། །ཞེས་བྱ་བ་ནི། བསྟིམ་པའི་སྔགས་རྣམས་ཀྱིས་ཡེ་ཤེས་ཀྱི་དཀྱིལ་འཁོར་དང་དམ་ཚིག་གི་དཀྱིལ་འཁོར་གཉིས་སུ་མེད་པའི་ཡོན་ཏན་གྱིས་ཀུན་ཏུ་རྒྱས་པར་གྱུར་པའོ། །ལེའུ་བཅུ་དྲུག་པ་མདོར་བཤད་པའོ།། །།དེ་ནས་ལྷག་པ་ཏིང་ངེ་འཛིན་སྐུ་དང་ཐུགས་ཀྱི་དཀྱིལ་འཁོར་བཤད་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །འབར་བའི་དཀྱིལ་འཁོར་རྩིབས་བཞི་པ། །ཞེས་བྱ་བ་ལ་སོགས་པ་ནི། བཞུགས་གནས་བསྟན་པ་སྟེ། འདི་ཡང་ཏིང་ངེ་འཛིན་གྱི་རིམ་པ་ལྔ་པ་དང་རྗེས་སུ་མཐུན་པར་སྦྱར་རོ། །རྒྱུའི་ཏིང་ངེ་འཛིན་ཧཱུྃ་ལས་དུར་ཁྲོད་ཀྱི་འབྱུང་བ་ལྔ་བསྐྱེད་ནས། དེའི་སྟེང་དུ་བྷྲཱུྃ་སྨུག་ནག་ལས་དུར་ཁྲོད་ཀྱི་གཞལ་ཡས་ཁང་འདི་དག་ལྷར་བསྐྱེད་པ་སྟེ་གོ་སླའོ། །འབར་བའི་བར་ཁྱམས་གཉིས་ཀྱིས་མཛེས། །ཞེས་བྱ་བ་ནི། བཤད་པའི་རྒྱུད་ཀྱི་སྤོར་མའི་ས་དགོས་སོ་ཞེ་ན། ཕྲ་མེན་མ་དང་དབང་ཕྱུག་མའི་ཁྱམས་སུ་འགལ་བ་མེད་པའོ། །ཐོད་སྦྲུལ་སྣ་ཚོགས་ཉི་མས་བརྗིད། །ཅེས་པ་ནི། ཐོད་པ་སྣ་ཚོགས་ཀྱི་རྩིག་པ་དང་། དེ་དག་ཉིད་ཀྱི་བད་ལ་སྦྲུལ་ཆེན་གྱི་ཞགས་པས་མགུལ་དུ་དྲངས་པའོ། །དེ་དག་གི་བར་ནས་ཉི་མའི་དཀྱིལ་འཁོར་གྱི་འོད་ཟེར་འགྱེད་པས་ཐམས་ཅད་དུ་སྣང་བར་བྱེད་པའོ། །འབར་བའི་འཕྲོ་བ་མང་པོ་འཁྲུག །ཅེས་བྱ་བ་ནི། ཕྱི་ནང་ཀུན་ནས་རྡོ་རྗེའི་མེ་དཔུང་འབར་བ་ལས་མེའི་ཁྲོ་བོ་མང་པོ་འཕྲོ་འདུ་བྱེད་པའོ། །དེའི་གདན་བསྟན་པའི་ཕྱིར། ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྦར་བས་ནི། །ཞེས་གསུངས་ཏེ། གཏི་མུ་དང་། ང་རྒྱལ་དང་། འདོད་ཆགས་དང་། ཕྲག་དོག་དང་། ཁོང་ཁྲོ་རྣམས་གནས་སུ་དག་པར་ཁོང་དུ་ཆུད་ནས་དེ་དག་གི་སྒོ་ནས་ཕྲིན་ལས་མཛད་པའི་ཕྱིར་འདི་དག་མནན་པའོ། །དབང་ཕྱུག་ལྷ་ཆེན་ལ་སོགས་བཟུང་། །ཞེས་བྱ་བ་ནི། བསྡུ་བ་ནི་བཅོ་ལྔ་པར་བཤད་དེ། དྲེགས་པ་རྣམས་ཕྲིན་ལས་ནན་ཏུར་དུ་བསྟན་པར་བྱ་བའི་ཕྱིར་སྦར་བས་གཟུང་བའོ། །སྨུག་ནས་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །ཞེས་བྱ་བ་ནི། སྐུ་མདོག་རྣམས་བསྟན་པ་སྟེ། ལས་ཐམས་ཅད་གཞི་དྲག་པོ་ཁོ་ནས་མཛད་པའི་ཕྱི་ནག་པོར་སྨོས་སོ། །དབུ་གསུམ་ཕྱག་དྲུག་ཞབས་བཞིར་བགྲད། །ཅེས་བྱ་བ་ནི། རྣམ་པར་ཐར་པ་གསུམ་དང་། ཡེ་ཤེས་དྲུག་དང་། རྫུ་འཕྲུལ་གྱི་རྐང་པ་བཞི་དང་ལྡན་པའི་ཕྱིར་རོ། །ཀོ་རློན་གོས་ནི་སྣ་ཚོགས་གྱོན། །ཞེས་བྱ་བ་ནི། ཐབས་མཁས་ཕྲིན་ལས་ཀྱི་གོས་དང་། ཁྱབ་པ་ཐུགས་རྗེའི་གོས་དང་། ཕྱི་ནང་གསང་བ་སྡུད་པའི་གོས་ཁོ་ན་སྟེ། ཞིང་གི་གཡང་གཞི་དང་། གླང་པོ་དང་། སྟག་གི་པགས་པ་ཁོ་ནའོ། །རྔམ་པའི་སྒྲ་ཆེན་འཇིགས་པར་སྒྲོགས། །ཞེས་བྱ་བ་ནི། གཤེ་ཞིང་མྱུར་བར་བཞད་པའོ། །སྦྲུལ་དང་ཐོད་ཕྲེང་ཉི་མར་བཅས། །ཞེས་བྱ་བ་ནི། སྦྲུལ་གྱི་ཆས་བརྒྱད་དང་། ཐོད་པ་ཚར་གསུམ་དང་། དབུ་ལ་ཉི་མའི་དཀྱིལ་འཁོར་འོད་ཟེར་བྱེ་བ་འགྱེད་པའོ། །སྟོང་གི་འཇིག་རྟེན་འཁོར་ཡུག་བཅས། །ཞེས་བྱ་བ་ལ་སོགས་པ་ནི། ལྷག་པ་ཏིང་ངེ་འཛིན་ཐུགས་ཀྱི་དཀྱིལ་འཁོར་སྟོན་ཏེ། འདི་དག་རྒྱས་པ་ལས་ཀྱང་གསུངས་ན། སྒྱུ་འཕྲུལ་རྡོ་རྗེ་ལས། རྡོ་རྗེ་རྡོ་རྗེ་དྲིལ་བུ་དང་། འཇིག་རྟེན་ཁོར་ཡུག་བཅས་པ་འདེགས། །དེ་བཞིན་འཁོར་ལོ་དགྲ་སྟྭ་དང་། །ཁ་ཊྭཱཾ་རབ་ཏུ་འཁྲོལ་བའོ། །ནོར་བུ་རིན་ཆེན་རྒྱུ་ཞགས་དང་། །རྡོ་རྗེ་དགྲ་སྟྭ་རབ་ཏུ་རྡེབས། །ཆགས་མཆོག་པདྨ་ཆེན་པོ་དང་། །དྲིལ་བུ་ལྔའི་སྒྲ་སྒྲོགས་པའོ། །ལས་ནི་རལ་གྲི་གཤོལ་ཆེན་དང་། །འཇིག་རྟེན་རྒྱང་མར་འཕེན་པ་སྟེ། །བར་ན་རྡོ་རྗེ་དུང་མར་འཁྲུག །ཏིར་ཆེན་པོར་བརྡེབས་པའོ། །ཞེས་འབྱུང་བའོ། །བཙུན་མོ་འཇིགས་པའི་ཚོགས་དང་འཁྲིལ། །ཞེས་བྱ་བ་ལ་སོགས་པ་ནི་གོ་སླའོ། །འབར་བའི་དཀྱིལ་འཁོར་གྱིས་ཀུན་ཏུ་གང་བར་གྱུར་ཏོ་ཞེས་བྱ་བ་ནི། མཚོན་པ་སྟེ་གདུལ་བྱའི་སྣང་བའོ། །ལེའུ་བཅུ་བདུན་པ་མདོར་བཤད་པའོ།། །།དེ་ནས་དེ་དག་གི་མཆོད་པ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །མཉེས་པའི་མཆོད་པ་ཞེས་བྱ་བ་ནི། རྨད་དུ་བྱུང་བའི་མཆོད་པ་བཞིའོ། །དེ་ལ་མཆོད་སྦྱིན་དམ་པ་ནི། །ཞེས་བྱ་བ་ནི། དེ་བཞིན་གཤེགས་པ་དང་མ་མོ་རྣམས་ཀྱི་ཕྱིར། ངེས་ཚིག་གང་ཞེ་ན། དུག་གསུམ་གྱི་མཆོད་པས་སྐྱབས་ཆེན་པོ་ཐོབ་པའི་ཕྱིར། དམ་པ་ཞེས་བྱ་བ་ཁོ་ནའོ། །དེ་གང་ཞིག་སྙམ་པ་ལ། ཐོག་མར་བདག་ཉིད་རྟོགས་གོམས་བསྒྲལ། །ཞེས་བྱ་བ་ལ་སོགས་པ་སྟེ། འདི་ནི་སྒྲོལ་བ་པོ་སྟེ། དང་པོ་རྟོགས་པ་རྣམ་པ་བཞིས་བཤད་པ་བཞིན་དུ་ཁོང་དུ་ཆུད་ནས་ཏིང་ངེ་འཛིན་བརྟན་པའི་སྟོབས་དང་ལྡན་པ་ནི། བདག་ཉིད་བསྒྲལ་བའོ། །སྒྲོལ་བའི་ལྟ་བ་བསྟན་པའི་ཕྱིར། དེ་ནས་གཉིས་མེད་བློ་ཡིས་ནི། །ཞེས་གསུངས་ཏེ། གང་གིས་བཤད་པ་བཞིན་དུ་གྲུབ་པ་ནི། ཐམས་ཅད་ཀྱང་བདག་ཉིད་ལས་མི་གཞན་པར་མཐོང་བར་འགྱུར་རོ། །བསྒྲལ་བྱ་བསྟན་པའི་ཕྱིར། བློ་ངན་འཇིག་རྟེན་སྙིང་རེ་རྗེ། །ཞེས་བྱ་བ་གསུངས་ཏེ། ཞིང་བཅུ་དག་ནི་རྒྱུ་འབྲས་མི་ཤིས་པའི་ཕྱིར་བློ་ངན་དག་སྟེ། དེ་དག་གི་ལས་རྣམས་ཀྱིས་ཡུན་དུ་འཁོར་བའི་ཕྱིར། གཏན་དུ་འཇིག་རྟེན་པ་ཁོ་ན་སྟེ། སྙིང་རྗེས་ཟིན་པར་བྱ་བའི་ཞིང་ངོ་། །བསྒྲལ་བའི་ཐབས་དང་གནས་བསྟན་པའི་ཕྱིར། གཉིས་སུ་མེད་པར་བསྒྲལ་བར་བྱ། །ཞེས་གསུངས་ཏེ། ཐབས་ནི་དགུ་པའི་སྐབས་སུ་བཤད་ཟིན་ཏོ། །གནས་ནི་འོག་མིན་དུ་འཕངས་ནས། རྡོ་རྗེ་འཛིན་པ་ཡབ་ཡུམ་ཐབས་ཤེས་རབ་གཉིས་སུ་མེད་པའི་བྱང་ཆུབ་སེམས་ཀྱི་དབང་བསྐུར་ནས་རིགས་ངེས་པར་བྱའོ་ཞེས་བྱའོ། །ག་ནའི་མཆོད་པ་བསྟན་པའི་ཕྱིར། འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱའོ། །ཞེས་གསུངས་ཏེ། ཐབས་དང་ཤེས་རབ་འཁྲིལ་བའི་མཆོད་པ་ནི། དོན་གསུམ་འགྲུབ་པའི་ཕྱིར་མཆོད་པ་ཆེན་པོའོ། །དེ་ཉིད་བྱང་ཆུབ་སེམས་དུས་མཉམ་པར་སྦྱོར་བ་ཁོ་ནའོ། །དེ་དག་གི་ཐབས་ནི་དགུ་པར་བཤད་ཟིན་ཏོ། །དམ་རྫས་རྨད་དུ་བྱུང་བའི་མཆོད་པ་བསྟན་པའི་ཕྱིར། མཉམ་པའི་གྲུབ་རྫས་ཆེན་པོ་དག །ཞེས་བྱ་བ་ལ་སོགས་པ་གསུངས་ཏེ། མཉམ་པ་ནི་རང་བཞིན་དང་། ལས་ཀྱི་ཕྱིར་རོ། །དེ་དག་གྲུབ་པ་བཞི་དང་ལྡན་ཏེ། ཆོས་ཉིད་རང་བཞིན་གྱིས་གྲུབ་པ་དང་། ཆོས་ཅན་རང་གི་ངོ་བོས་གྲུབ་པ་དང་། མཐུས་གྲུབ་པ་དང་། བྱིན་གྱིས་བརླབས་ཀྱིས་གྲུབ་པ་དང་བཞིའོ། །དེའང་ཐལ་བའི་རྒྱུད་ལས། དངོས་པོ་མ་ལུས་སེམས་ཉིད་ཕྱིར། །མཚན་ཉིད་བྲལ་བ་ཆོས་ཀྱི་དབྱིངས། །རང་བཞིན་བདེ་བའི་ཡེ་ཤེས་ལྔ། །བྱེད་པ་མེད་པར་རང་སྣང་བའོ། །ཤེས་རབ་ཏིང་འཛིན་ཐབས་དག་གིས། །ནུས་མཐུ་ངེས་པར་འབྱུང་བར་འགྱུར། །འདི་ལྟའི་ལམ་ལ་གང་གནས་པ། །ཕྱོགས་དུས་ཀུན་ནས་བྱིན་གྱིས་རློབ། །ཅེས་འབྱུང་བ་ཁོ་ནའི་ཕྱིར་རོ། །མཆོད་པའི་གནས་བསྟན་པའི་ཕྱིར། བདག་དང་མཉམ་པའི་ཚོགས་ལ་དབུལ། །ཞེས་གསུངས་ཏེ། གང་དང་གང་དག་དེ་དག་ཏུ་མཉམ་པ་ནི། འཁོར་གསུམ་ཡོངས་སུ་དག་པའི་ཕྱིར། །མཆོད་པ་གནས་སུ་སྟོབས་པ་ཁོ་ནའོ། །ལོངས་སྤྱོད་རྒྱན་གྱི་མཆོད་པ་བསྟན་པའི་ཕྱིར། །བཟའ་དང་བཅའ་དང་བཏུང་དང་བགོ། །ཞེས་བྱ་བ་ལ་སོགས་པ་གསུངས་ཏེ། འདི་དག་ཚོགས་ཀྱི་ལེའུ་རུ་བཤད་ཟིན་ཏོ། །དེ་དག་གི་ཡོན་ཏན་བསྟན་པའི་ཕྱིར། ཕྱོགས་བཅུ་དུས་བཞིར་གཤེགས་པ་ཡི། །བདེ་གཤེགས་ཡོན་ཏན་རྨད་པོ་ཆེ། །གཞན་ནས་ཡོད་འོང་མ་ཡིན་ཏེ། །ལྷ་སྲིན་ལ་སོགས་སྨོས་ཅི་དགོས། །ཞེས་གསུངས་པ་གོ་སླའོ། །གང་ཡང་བདག་ཉིད་ཆེན་པོའི་མཆོད་པར་གྱུར་པའི་ཚད་བསྟན་པའི་ཕྱིར། རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོར་རྫོགས་འགྱུར་ཞིང་། །གསལ་བ་ཡིད་གཉིས་མེད་པས་ན། །དཀྱིལ་འཁོར་ཆེན་པོར་འབར་བར་འགྱུར། །ཞེས་གསུངས་ཏེ། དཀྱིལ་འཁོར་ཆེན་པོ་གསུམ་རིལ་བདག་ཉིད་ཆེན་པོའི་དཀྱིལ་འཁོར་དུ་གསལ་བ་ནི། དཀྱིལ་འཁོར་ཆེན་པོ་ཞེས་བྱ་བ་སྟེ། དེས་ན་ཐམས་ཅད་རིག་པའི་རྒྱལ་པོ་རང་དབང་དུ་བསྒྱུར་བའི་ཕྱིར་རོ། །ལེའུ་བཅོ་བརྒྱད་པ་མདོར་བཤད་པའོ།། །།དེའི་རྗེས་སུ་དམ་ཚིག་བསྟན་པའི་ཕྱིར། དེ་ནས་བཅོམ་ལྡན་འདས་དགྱེས་པ་ཆེན་པོས། སྔགས་འཆང་རྣམས་དོན་ཡོད་པར་བྱ་བའི་ཕྱིར། ཞེས་གསུངས་ཏེ། སྔགས་འཆང་བ་ནི་བཤད་ཟིན་ཏོ། །ཐེག་པ་ཆེན་པོའི་དམ་ཚིག་ནི། ལམ་དང་འབྲས་བུ་གཉི་གར་འགྱུར་བའི་ཕྱིར། དམ་ཚིག་རྣམས་ཀྱི་ཐུན་མོང་གི་འབྲས་བུ་ལ་བརྟེན་ནས། རྒྱུད་ཀྱི་ཤེས་པར་བྱ་བའི་དངོས་པོ་རྣམས་ཉེ་བར་བསྒྲུབ་པར་བྱ་བའི་ཕྱིར། གཞི་དམ་ཚིག་གིས་གཟུང་བ་ཁོ་ནའོ། །དམ་ཚིག་ཆེན་པོ་ཞེས་བྱ་བ་ནི། ཐེག་པ་ཆེན་པོའི་ལུགས་འདི། དམ་ཚིག་ཐམས་ཅད་ལས་སྤགས་པའི་ཕྱིར་རོ། །དམ་ཚིག་གི་ཆེ་བ་བསྟན་པའི་ཕྱིར། བླ་མེད་ཐེག་པར་རབ་ངེས་ན། །ཞེས་བྱ་བ་ལ་སོགས་པ་གསུངས་ཏེ། ཐེག་པ་འདི་ལམ་དང་འབྲས་བུ་གཉིས་ཀྱི་གོང་ན་གཞན་མེད་པའི་ཕྱིར། བླ་ན་མེད་པའི་ཐེག་པའོ། །འདིའི་གཞུང་གི་དམ་ཚིག་བཅོ་ལྔ་ཉམས་སུ་ལོན་པ་ནི་ངེས་པ་ཞེས་བྱའོ། །ཉོན་མོངས་འདོད་ལྔ་ཀུན་སྤྱད་ཀྱང་། །བྱས་ལ་མི་སོགས་ཚོགས་འགྱུར་ཏེ། །ཞེས་བྱ་བ་ནི། ཀུན་ཞེས་བྱ་བའི་དོན་གྱིས་མི་དགེ་བ་བཅུ་དང་། མཚམས་མེད་པ་ལ་སོགས་པ་ཁོ་ན་སྟེ། དེ་དག་སྤྱོད་བཞིན་མི་འཛིན་པའི་ཕྱིར་རོ། །དེར་མ་ཟད། ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་བྱ་བ་ནི། སྡོམ་པ་དང་ཚུལ་ཁྲིམས་རྣམས་ཀྱི་རྩ་བ་བཞི་ནི། འཆད་པར་འགྱུར་བའི་ཕྱིར་རྫོགས་ལ་ཡན་ལག་ཐམས་ཅད་ནི་རྣམ་པ་གསུམ་དུ་འདུས་ཏེ། དེ་དག་འདིར་ནི་དམ་ཚིག་འདི་དག་ལ་གནས་པའི་དུས་ན་ལས་དང་ཉོན་མོངས་པ་རིལ་སྤྱད་ཀྱང་མི་འཛིན་པས་ཅིའང་བྱས་པ་མེད་པ་ནི་སྡོམ་པའི་ཚུལ་ཁྲིམས་སོ། །གཞན་དོན་དུ་འགྱུར་ན་སྲོག་གཅོད་པ་ལ་སོགས་པ་གང་ཡང་མི་འདོད་པ་ནི་དོན་བྱེད་པའི་ཚུལ་ཁྲིམས་སོ། །སྒོ་གསུམ་ཕྱག་རྒྱ་ཆེན་པོ་ལས་མི་ཉམས་པ་ནི། དགེ་བ་ཆོས་སྡུད་པའི་ཚུལ་ཁྲིམ་ཞེས་བྱ་བ་ཁོ་ནའི་ཕྱིར། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་གསུངས་སོ། །ཡོད་མེད་དབུས་མའང་མི་དམིགས་ཤིང་། །ཞེས་བྱ་བ་ལ་སོགས་པ་འདི་དག་ཚུལ་ཁྲིམས་དང་སྡོམ་པའི་རྩ་བ་བཞི་འདུས་ཤིང་དག་པར་སྟོན་ཏེ། དམ་ཚིག་གི་སྤྱོད་པར་ཡང་འགྱུར་རོ། །བདག་གཞན་གཉི་ག་སེམས་ཉིད་དུ་གསལ་བ་ནི་ཡོད་མེད་དབུས་དང་གསུམ་ལས་འདས་པའི་ཕྱིར། དོན་དམ་པར་མཉམ་པ་ཁོ་ནའོ། །སྒྱུ་མ་མིག་ཡོར་ལྟ་བུའི་ཚུལ། །ཞེས་བྱ་བ་ནི། ཀུན་རྫོབ་ཏུ་ལོག་རྟོག་གི་རྒྱུ་རྐྱེན་འདུས་པ་ཙམ་ཉིད་གཉིས་སུ་སྣང་བ་ལ་རང་རྒྱུད་པར་བརྟགས་པ་དེ་དག་ཐོ་ཡོར་ལ་མི་ལྟ་བུར་མ་གྲུབ་པར་ཤེས་པའི་ཕྱིར། སྲོག་དང་སྐྱེས་བུ་ལོག་རྟོག་ཙམ། །ཞེས་གསུངས་ཏེ། དེ་ལྟར་རིག་པ་ལ་གཅད་བྱ་གཅོད་བྱེད་གཉིས་ཀ་ནས་དག་པའི་ཕྱིར། ཅི་བཅད་ཀྱང་འདུ་ཤེས་མེད་པས་བཅད་པ་མེད་པ་ནི། སྲོག་གི་སྡོམ་པ་འདུས་ལ་དག་པའི་ཕྱིར། །སྲོག་མེད་སྲོག་ཀྱང་གཅད་དུ་མེད། །ཅེས་གསུངས་སོ། །བདེན་པ་གཉིས་ཀ་དབྱེར་མེད་པས། །ཞེས་བྱ་བ་ལ་སོགས་པ་ནི། མ་བྱིན་པར་ལེན་པ་སྟོན་ཏེ། བདེན་པ་གཉིས་ལས་བདག་གཞན་མི་ཕྱེད་པ་སྟེ། འབྲུ་ནི་སྔར་གྲུབ་པའོ། །འཕྲུལ་དགའི་ཚུལ་ཏེ་ཐ་དད་མིན། །ཞེས་བྱ་བ་ནི་འཕྲུལ་དགའི་ལྷ་རྣམས་ནི་ལོངས་སྤྱོད་རང་ལས་སྤྲུལ་ཅིང་ལེན་པའོ། །དེ་བཞིན་དུ་རང་རིག་པ་ཉིད་ཐམས་ཅད་དུ་རང་སྣང་བས་སྣང་ཡང་གཉིས་སུ་མ་གྲུབ་པར་རིག་པ་ལ། རྫས་དང་བདག་པོ་གཉི་ག་བདག་ལས་མི་གཞན་པའི་ཕྱིར་ཅི་བླངས་ཀྱང་བདག་ཉིད་ལས་འདའ་བ་མེད་པས། གཞན་དང་མ་བྱིན་མེད་པའི་ཕྱིར། །བླངས་མེད་ཐམས་ཅད་ཉིད་ཀྱི་དབྱིངས། །ཞེས་གསུངས་ཏེ། སྡོམ་པ་འདུས་ལ་དག་པའོ། །རྫུན་གྱི་སྡོམ་པ་བསྟན་པའི་ཕྱིར། །ཆོས་རྣམས་སྒྱུ་མ་ལྟ་བུ་དང་། །ཞེས་བྱ་བ་ལ་སོགས་པ་གསུངས་ཏེ། ཕྱི་དང་ནང་གི་དངོས་པོ་རྣམས་ལོག་རྟོག་གི་རྒྱུ་རྐྱེན་འདུས་པ་ཙམ་ཁོ་ནའི་ཕྱིར་ངོ་བོ་ཉིད་མེད་བཞིན་དུ། བརྟགས་པ་རང་གི་ངོ་བོ་ཉིད་དུ་སྣང་བ་ནི་ངོ་བོ་ཉིད་ཀྱི་རྫུན་ཞེས་བྱའོ། །མིང་དང་ཚིག་ཏུ་བཏགས་པ་རྫུན། །ཞེས་བྱ་བ་ནི་ཞེན་པ་ཉིད་སྣང་བ་དེ་དག་ལ་མིང་སྣ་ཚོགས་སུ་བཏགས་ནས་མིང་ཙམ་ལ་བདེན་པར་སྤྱོད་པ་ནི་རྗེས་སུ་སྤྱོད་པའི་རྫུན་ཞེས་བྱའོ། །དེ་དག་ལས་ཀྱང་འགལ་བ་ནི་ལོག་པའི་རྫུན་ཞེས་བྱའོ། །དེ་དག་གསུམ་གཡུལ་གྱི་གཞི་མ་གྲུབ་པའི་ཕྱིར། རྫུན་ཉིད་ལ་ནི་རྫུན་སྤྱོད་དེ། །རྫུན་ཞེས་བཏགས་ཙམ་ཡོད་མ་ཡིན། །ཞེས་གསུངས་ཏེ། དེ་ལྟར་ཤེས་ནས་སྨྲས་ཀྱང་མི་གོས་པ་ནི་སྡོམ་པ་འདུས་ལ་དག་པའོ། །མ་ཆགས་པ་ལ་ཆགས་པ་དང་། །ཞེས་བྱ་བ་ནི། དངོས་པོ་ཐམས་ཅད་སེམས་ཉིད་རང་སྣང་བས་ཡུལ་སེམས་གཉིས་སུ་མེད་པར་གསལ་བར་ནི་མ་ཆགས་པའི་ཡེ་ཤེས་ཉིད་ཁོ་ནའོ། །དེ་ལ་གཉིས་སུ་ཞེན་པ་ནི་ལོག་པའི་འདོད་ཆགས་ཏེ། དེའི་དུས་ཉིད་ན་སེམས་ཉིད་དུ་ཤེས་པ་དང་ཐབས་ཀྱིས་ཟིན་པ་ནི་རོ་དེ་ཉིད་ཡེ་ཤེས་སུ་གསལ་བས་གོས་པ་མེད་པའི་ཕྱིར། ཆགས་པ་ཉིད་ན་ཆགས་པ་མེད། །དེ་ཉིད་ཚངས་མཆོག་རྒྱལ་པོ་སྟེ། །ཞེས་གསུངས་སོ། །ཤིན་ཏུ་ཆགས་པ་ཆེན་པོ་ཡིན། །ཞེས་བྱ་བ་ནི། དེ་བཞིན་གཤེགས་པའི་ངོ་བོ་ཉིད་དེ་ཐམས་ཅད་ཀྱང་དབྱེར་མེད་པའི་ཕྱིར་སྡོམ་པ་འདུས་ལ་དག་པའོ། །བླ་མེད་མི་སྤང་བླ་མ་བཀུར། །ཞེ་བྱ་བ་ལ་སོགས་པ་ནི་དམ་ཚིག་གི་རྣམས་གྲངས་ལ་གཉིས་ལས། འདི་ནས་མར་མདོར་བསྟན་པ་སྟོན་ཏེ། བླ་ན་མེད་པ་ནི་བྱང་ཆུབ་སེམས་ཏེ། ཐེག་པ་ཆེན་པོའི་གཞུང་གིས་ཡི་དམ་གྱི་ལྷའི་སྐུ་ཕྱག་རྒྱ་སྣང་སྟོང་གཉིས་སུ་མེད་པ་ཁོ་ན་སྟེ། ངོ་བོ་ཉིད་དང་ལམ་གོང་ན་གཞན་མེད་པའི་ཕྱིར་རོ། །བླ་མ་ནི་རྡོ་རྗེ་སློབ་དཔོན་ཏེ། དེ་ལ་རྣམ་པ་ལྔ་སྟེ། འདྲེན་པ་དང་། དམ་ཚིག་འབོགས་ཤིང་དབང་བསྐུར་བ་དང་། ཉམས་ཆག་སྐོང་བ་དང་། ཤེས་རྒྱུད་འགྲོལ་བ་དང་། མན་ངག་དང་ལུང་འབོགས་པའོ། །བཀུར་བ་ནི་སྒོ་གསུམ་ཟོལ་མེད་པ་དང་། མཉེས་པར་རྩལ་དབྱུང་བ་ཁོ་ནའོ། །སྔགས་ནི་གསུམ་མོ། །ཕྱག་རྒྱ་ནི་བཞིའོ། །རྒྱུན་ནི་བརྩོན་པ་རབ་འབྲིང་དང་། གོམས་པ་ཆེ་ཆུང་གིས་དུས་ཀྱི་རྒྱུན་གསུམ་དང་། སྐད་ཅིག་མའི་བར་དུ་རྒྱུན་མི་གཅོད་པའོ། །ཡང་དག་ལམ་དུ་ཞུགས་ལ་བྱམས། །ཞེས་བྱ་བ་ནི། བསྐྱེད་རྫོགས་རྣམ་པ་གཉིས་ལ་ཞུགས་པ་རྣམས་ནི་རྡོ་རྗེའི་སྤུན་ནོ། །དེ་ལ་ཉེ་བ་དང་རིང་བ་དང་འདྲེས་པའོ། །དེ་དག་ལ་སྒོམ་གསུམ་གྱིས་ཕན་པའི་རྩལ་འབྱིན་པ་ནི་བྱམས་པའོ། ། གསང་བའི་དོན་ཕྱིར་སྨྲ་མི་བྱ། །ཞེས་བྱ་བ་ནི་གསང་བ་བཅུ་སྟེ། སྤྱིར་གསང་བཞི། བར་གསང་བཞི། གསང་བར་འོས་པ་དང་། གཉེར་གཏད་པའོ། །དེ་དག་བདག་གི་དོན་དང་། གཞན་གྱི་དོན་དང་། ཆོས་ཀྱི་དོན་དང་། གྲོགས་པོའི་དོན་དང་བཞིན་པོ་ཁོ་ནར་འགྱུར་བར་བྱ་བའི་ཕྱིར། དམ་མེད་པ་དང་། དམ་ཉམས་པ་དང་། དམ་མ་འདྲེས་པ་དང་། འདྲེས་པ་དག་ལ་ཡང་། སྐབས་ཀྱིས་གསང་བ་སྟེ། ཚིག་དང་སྤྱོད་ལམ་ཡན་ཆོད་ཀྱིས་སྦ་བ་ཁོ་ནའོ། །འདི་ནི་རྩ་བ་ལྔ་རྣམས་ཏེ། །ཞེས་བྱ་བ་ནི། ལྔ་པོ་དེ་དག་ནི་ལམ་དང་འབྲས་བུའི་ཡོན་ཏན་རིལ་གྱི་གཞིར་གྱུར་པའི་ཕྱིར་རོ། །བསྒྲུབ་དང་བསྲུང་བའི་དམ་ཚིག་མཆོག །ཅེས་བྱ་བ་ནི། གཉིས་ནི་བསྒྲུབ་པའི་དམ་ཚིག་གོ། །གསུམ་ནི་བསྲུང་བའོ། །ཡན་ལག་གི་དམ་ཚིག་བསྟན་པའི་ཕྱིར། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །ཞེས་བྱ་བ་ལ་སོགས་པ་གསུངས་ཏེ། སྤྱིར་ཡང་དག་པའི་དུག་ལྔ་དང་། ལོག་པའི་དུག་ལྔ་གཉིས་སུ་རྒྱས་པའི་རྒྱུད་ལས་གསུངས་ཏེ། དེ་ལ་ལོག་པའི་དུག་ལྔ་ཉིད་རང་དང་སྤྱིའི་མཚན་ཉིད། གཏན་ཚིགས་ཀྱིས་རང་རིག་པ་ཉིད་དུ་ཉམས་སུ་ལོན་ན་སྐུ་གསུང་ཐུགས་ཁོ་ན་ལས་སྤང་བྱ་གང་ཡང་མི་དམིགས་པའི་ཕྱིར་རོ། །ཡང་དག་པའི་དུག་ལྔ་ལ་གནས་པ་ནི། ཐེག་པ་ཆེན་པོའི་ལྟ་སྤྱོད་དམ་ཚིག་རིལ་རྫོགས་པར་འགྱུར་བའི་ཕྱིར་མི་སྤང་བ་ཁོ་ནའོ། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་དོར་རོ། །ཞེ་བྱ་བ་ནི། དམ་རྫས་ལྔ་པོ་ཉིད། བཤད་པའི་གྲུབ་པ་བཞི་པོ་དེ་དག་གི་ཕྱིར་དང་དུ་བླང་བ་སྟེ། དེས་གཙང་རྨེའི་རྟོག་པ་སྦྱངས་པ་དང་། ཐུན་མོངས་གི་ཡོན་ཏན་གཉིས་ཀྱིའང་ཕྱིར་ཏེ། དེ་དག་རྒྱུན་ཏུ་སྤྱད་པར་བྱ་བའོ། །ཡན་ལག་བཅུ་ཡི་དམ་ཚིག་སྟེ། །ཞེས་བྱ་བ་ནི། རྩ་བ་ལྔ་དག་མ་ཉམས་པ་ལས་འདི་དག་འབྱུང་ཞིང་སྒྲུབ་པའི་གྲོགས་ཆེར་བྱེད་པའི་ཕྱིར་རོ། །ཡེ་ནས་དག་མཉམ་རྟོགས་པས་སྤྱད། །ཅེས་བྱ་བ་ནི། དངོས་པོ་ཐམས་ཅད་དག་པ་གསུམ་དང་མཉམ་པ་བཞིའི་ངོ་བོར་གནས་པ་དེ་དག་རྟོགས་པས་སྤྱད་པ་དང་། རྟོགས་པར་འདོད་པས་སྤྱད་པ་སྟེ། གོ་རིམ་བཞིན་དུ་ཤེས་པར་བྱའོ། །བསྲུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིགས་མེད་འགྱུར། །ཞེས་བྱ་བ་ལ་སོགས་པ་ནི། ཕྱེ་བའི་དམ་ཚིག་བསྟན་པ་སྟེ། རྩ་བ་ལྔ་པོ་ཉམས་ན་མི་དང་ལྷའི་རིགས་ཀྱང་མེད་པར་འགྱུར་ན་ཐེག་པ་ཆེན་པོའི་རིགས་ལྟ་སྨོས་ཀྱང་ཅི་དགོས་ཏེ། རྨངས་མེད་པར་འགྱུར་བའི་ཕྱིར་རོ། །མི་སྤང་མི་དོར་ལྔ་གཉིས་ནི། །ཡན་ལག་དམ་ཚིག་འདའ་དཀའོ། །ཞེས་བྱ་བ་ནི། ལོག་པའི་དུག་ལྔ་སྤོང་བ་ནི་ཉན་ཐོས་ལྟ་བུར་གྱུར་པ་སྟེ། ལམ་ནོར་བས་ལྟ་བའི་ཀློང་ལས་ཉམས་སོ། །ཡང་དག་པའི་དུག་ལྔ་སྤོང་བ་ནི། དོན་གཉིས་མི་འགྲུབ་སྟེ། བྱིན་གྱི་རླབས་མེད་པར་འགྱུར་རོ། །དམ་རྫས་ལྔ་སྤོང་བ་ནི། ཀྲི་ཡ་པ་ལྟར་གྱུར་པས་ལྟ་བ་དང་སྤྱོད་པ་མ་འབྲེལ་ཏེ་ཐེག་པ་འདིར་མི་ཆུད་པ་ཁོ་ནའི་ཕྱིར་རོ། །མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་འགྱུར་བས། །ཞེས་བྱ་བ་ནི། རྣམ་གྲངས་ལས་རྩ་བ་ལ་གཉིས་སུ་ཕྱེ་བའི་རྩ་བ་ཆེན་པོ་མཉམ་པ་ཉིད་ཀྱི་དམ་ཚིག་སྟེ། དངོས་པོ་ཐམས་ཅད་ཀྱི་རང་བཞིན་བདེན་པ་གསུམ་དུ་མཉམ་པ་ལ། ཤེས་རབ་དང་། ཏིང་ངེ་འཛིན་གྱི་སྦྱོར་བའི་དུས་ན་གང་ཡང་བདག་ཉིད་ཆེན་པོ་ལས་མི་འདའ་བ་ནི། མཉམ་པ་ཉིད་ཀྱི་དམ་ཚིག་ཁོ་ནའི་ཕྱིར། རྒྱས་པའི་རྒྱུད་ལས། དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །ཞེས་གསུངས་སོ། །འདིའི་འབྲས་བུ་ནི་གང་ཡང་མ་སྤངས་པར་ཀུན་ཏུ་བཟང་པོ་དབྱེ་བ་མེད་པའི་ས་ནོན་པར་གྱུར་པ་ཁོ་ནའོ། །འདས་ནས་སངས་རྒྱས་མ་ཡིན་ནོ། །ཞེས་བྱ་བ་ནི། དེ་ཉིད་ཉམས་པའི་སྐྱོན་བསྟན་པ་སྟེ། དེ་བཞིན་གཤེགས་པ་ཡང་འདི་ཡི་ངོ་བོ་ཉིད་ལས། མི་འདའ་བས་བཞུགས་པའི་ཕྱིར། གང་ཞིག་བདག་ཉིད་ཆེན་པོ་ལས་གཞན་པར་མཐོང་བ་དང་སྤྱོད་པ་ནི། སངས་རྒྱས་ཀྱི་ངོ་བོ་ཉིད་ལས་ཉམས་པ་ཁོ་ནའོ། །རྩ་བ་ཉམས་པའི་འཆལ་བ་དག །གསོ་ལ་ཉེ་བར་མི་བརྩོན་དང་། །ཞེས་བྱ་བ་ནི། རྩ་བ་ལྔ་པོ་ཀུན་ཉམས་པ་ནི་འཆལ་བ་ཞེས་བྱའོ། །དེ་དག་ཀྱང་སྐུ་གསུང་ཐུགས་སུ་འདུས་སོ། །སློབ་དཔོན་དང་སྤུན་ལ་ཉམས་ན་འབྱོར་བ་ལ་སོགས་པས་གནས་སུ་གསོའོ། །བླ་ན་མེད་པའི་སྔགས་དང་། ཕྱག་རྒྱ་ཉམས་ན་བསྒྲུབ་པ་ཆེན་པོ་ལན་གསུམ་གྱིས་བཤགས་ནས་བཟླས་པ་སོགས་ཀྱིས་གསོའོ། །གསང་བ་ཐུགས་ཀྱི་དམ་ཚིག་ཉམས་པ་ནི། ཤེས་རབ་དང་ཏིང་ངེ་འཛིན་གྱིས་གསོའོ། །དེ་ལྟར་མྱུར་དུ་མི་གསོ་བ་ནི། འོ་མ་རུལ་བ་དང་འདྲ་བས། དམ་ཅན་ཐམས་ཅད་ཀྱིས་བར་ཆད་དུ་འགྱུར་བས། ལུང་པ་གཅིག་གི་ཆུ་ལ་ཡང་མི་བཏུང་བའི་ཕྱིར། སྐད་ཅིག་ཡུད་ཙམ་སྨྲ་མ་བྱེད། །ཉམས་གྱུར་ཉེས་པ་བརྗོད་མི་ལང་། །ཞེས་གསུངས་སོ། །རྩ་བའི་དམ་ཚིག་ཉམས་གྱུར་ན། །བསྒྲུབ་པ་ཐམས་ཅད་ལོག་པར་འགྱུར། །ཞེས་བྱ་བ་ལ་སོགས་པ་ནི། ཉམས་པའི་སྐྱོན་རྣམས་བསྟན་པ་སྟེ། རྩ་བ་ལྔ་པོ་ཉམས་ན། ལས་ཅི་བརྩམས་པའི་རིལ་ལ་ནུས་མཐུ་མེད་ཅིང་། བར་ཆོད་མང་བས་གང་ཡང་དོན་མེད་པར་འགྱུར་ཞིང་ཕྱི་མར་ཡིད་དུ་མི་འོང་བའི་སྡུག་བསྔལ་སྣ་ཚོགས་འབྱུང་ངོ་། །ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྷུང་། །ཞེས་བྱ་བ་ནི། ཡན་ལག་གཉིས་ཉམས་ན། ཉན་ཐོས་དང་ཀྲི་ཡ་པ་ལྟར་འགྱུར་བས་སྔགས་ཀྱི་གཞུང་གི་བསྟན་པའི་ཐུན་མོང་དང་མཆོག་གི་འབྲས་བུ་མེད་ལ། དེ་དག་གཏན་ཚིགས་གསུམ་དང་དགོས་ཆེད་གསུམ་གྱིས་མི་སྤྱོད་པར་ལོག་པར་སྤྱོད་པ་རྣམས་ངན་སོང་དུ་ལྟུང་བར་འགྱུར་བ་ཁོ་ནའོ། །དམ་ཚིག་རྣམས་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །ཞེས་བྱ་བ་ནི། དམ་ཚིག་གི་རང་བཞིན་བསྟན་པ་སྟེ། རྩ་བ་དང་ཡན་ལག་རྣམས་ཀྱི་རང་བཞིན་ནི། ལྟ་སྤྱོད་གཉིས་མི་ཕྱེད་པ་དང་། རང་བཞིན་དང་། ལམ་དང་། འབྲས་བུ་གསུམ་ཡང་མི་ཕྱེད་པའི་ཕྱིར་རྡོ་རྗེ་ཞེས་བྱ་སྟེ། དེ་དག་ནི་དུས་གསུམ་གྱི་སངས་རྒྱས་ཀུན་གྱི་ལམ་དང་ངོ་བོ་ཉིད་ཁོ་ནའི་ཕྱིར་རོ། །རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་བྱ་བ་ལ་སོགས་པ་ནི། རྣམ་གྲངས་ལ་གཉིས་ལས་རྒྱས་པར་བསྟན་པ་སྟེ། སྤྱིར་དམ་ཚིག་རྒྱས་འབྲིང་རྣམ་པ་གསུམ་ལ་རེ་རེ་ལ་ཡང་གསུམ་གསུམ་སྟེ་དགུར་ཕྱེ་བ་ལས་འདིར་ནི་འབྲིང་གི་འབྲིང་སུམ་བརྒྱ་དྲུག་ཅུར་ཕྱེ་བ་སྟེ། ཚིག་མང་དུ་དོགས་པ་དང་། ཕྲ་རྒྱས་འབྱེད་པ་ལས་གསལ་བས་འདིར་མ་བྲིས་སོ། །རྒྱས་པ་ཡང་ཟུར་ཙམ་བསྟན་པའི་ཕྱིར། དམ་ཚིག་འདི་ནི་རྨད་པོ་ཆེ། །ཞེས་བྱ་བ་ལ་སོགས་པ་གསུངས་ཏེ། ཐེག་པ་ཆེན་པོའི་དམ་ཚིག་རྣམས་ནི། འཁོར་ལོས་སྒྱུར་བའི་རྒྱལ་པོའི་ཁྲིམས་དང་འདྲ་སྟེ། གདུལ་བྱའི་དབང་གི་རྒྱ་ཆད་པ་མེད་པའི་ཕྱིར་རོ། །དེ་ཉིད་ཉེ་བར་བསྟན་པའི་ཕྱིར། འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པའི། །རྟོག་འདུལ་དམ་ཚིག་དེ་སྙེད་འཕྲོ། །ཞེས་གསུངས་ཏེ། འདུལ་བ་ནི་གཉེན་པོས་འདུལ་བ་དང་། སྦྱངས་པས་འདུལ་བ་དང་། བསྒྱུར་བས་འདུལ་བ་དང་། དག་པས་འདུལ་བ་དང་། ངོ་ཤེས་པས་འདུལ་བ་ལ་སོགས་པའོ། །དེ་དག་གི་ཕྱིར་རྣམ་གྲངས་མ་ངེས་པ་ཁོ་ནའོ། །གཞན་ཡང་རྒྱལ་མཆོག་ཀུན་བཟང་གི། །ཞེས་བྱ་བ་ལ་སོགས་པ་ནི། བསྲུང་བའི་ཡོན་ཏན་བསྟན་པ་སྟེ། མཉམ་རྫོགས་ཀྱི་ཡོན་ཏན་ལས་གཞན་པར་གྱུར་པ་ནི། ཡང་ཞེས་བྱ་བ་སྟེ། དམ་ཚིག་བཅོ་ལྔ་པོ་མ་ཉམས་པ་ནི། གང་དུ་བྱུང་ཞེ་ན། རིགས་ཀྱི་བདག་པོ་ནི་རྒྱལ་བའི་མཆོག་སྟེ་དངོས་ཀུན་ཏུ་བཟང་པོའོ། །དེའི་ངོ་བོ་ཉིད་ཇི་ལྟར་ཞེ་ན། ཐམས་ཅད་མ་ལུས་ཕྱག་རྒྱ་ཡི། །བསྒྲུབ་མེད་དམ་པ་མ་ལུས་འགྲུབ། །ཞེས་གསུངས་ཏེ། དངོས་པོ་གཉིས་ཀྱིས་བསྡུས་པ་རིལ་སྐུ་གསུང་ཐུགས་ཀྱི་ཕྱག་རྒྱར་ཡེ་ནས་ལྷུན་གྱིས་གྲུབ་པས་སྤང་བ་དང་བླང་བ་མེད་པ་ནི་འབྲས་བུ་དམ་པ་སྟེ། ཀུན་ཏུ་བཟང་པོའི་ཡོན་ཏན་རིལ་ལྷུན་གྱིས་གྲུབ་པའོ། །དེའི་ཡོན་ཏན་བརྗོད་པ་ལས་འདས་པའི་ཕྱིར། དེ་ལ་སོགས་པ་མཐའ་ཡས་མཆོག །ཅེས་གསུངས་སོ། །རྒྱལ་བའི་རིགས་མཆོག་འཛིན་པ་དེ། །ཞེས་བྱ་བ་ལ་སོགས་པ་ནི། ཡོན་ཏན་ཉེ་བར་མདོར་བསྟན་པ་སྟེ། དམ་ཚིག་འདི་དག་ལྟ་སྤྱོད་ཚང་བར་འབྱོར་བ་ནི། སར་ཆུད་པའི་རིགས་འཛིན་ནོ། །རྒྱུན་དུ་གནས་པ་ནི་ས་ལ་གནས་པའོ། །སྟོབས་སུ་གྱུར་པ་ནི་སར་ཡོངས་སུ་སྨིན་པའི་ཕྱིར་རོ། །འཇིག་རྟེན་གཙོ་དང་འཁོར་གྱིས་བསྐུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །ཅེས་བྱ་བ་ནི། བསྒྲུབ་པ་པོ་དེ་ལ་སྡེ་བརྒྱད་གཡོག་དང་བཅས་པས། དགོས་པ་བསྒྲུབ་པ་དང་། སངས་རྒྱས་དང་བྱང་ཆུབ་སེམས་དཔའ་རིལ་གྱིས་དགོངས་ཤིང་བྱིན་གྱིས་རློབ་པར་འགྱུར་བ་ཁོ་ནའོ། །བདེ་གཤེགས་ཉིད་ཀྱི་ཡུལ་ལ་ཞུགས། །ཞེས་བྱ་བ་ནི། བཅོ་ལྔ་པོ་ཉིད་དེ་བཞིན་གཤེགས་པའི་ངོ་བོའི་ཕྱིར་རོ། །འཇིགས་མེད་ཀུན་ཏུ་བཟང་པོར་སྦྱོར། །ཞེས་བྱ་བ་ནི། དེ་ཕན་ཆད་ཅི་སྤྱད་ཀྱང་ལྟུང་བའི་དོགས་པ་མེད་དེ་སྤྱོད་ཡུལ་ཡོངས་སུ་དག་པའི་ཕྱིར་རོ། །ཇི་བཞིན་ཉིད་དང་འདུལ་བའི་ཐབས། །ཞེས་བྱ་བ་ནི་ཆོས་ཐམས་ཅད་ཀྱི་ཇི་བཞིན་པ་དེ་ཉིད་མངོན་དུ་བྱེད་པའི་དམ་ཚིག་ཆེན་པོ་ཉིད་དང་འདུལ་བའི་ཐབས་བཅོ་ལྔ་པོ་ལ་སོགས་པ་ཐམས་ཅད་མ་བརྩལ་བར་ལྷུན་གྱིས་གྲུབ་པའི་ཕྱིར། ཇི་སྙེད་སྡོམ་པ་བསམ་ཡས་པ། །མ་ལུས་རྣམ་དག་ལྷུན་གྱིས་གྲུབ། །ཅེས་གསུངས་སོ། །ཉམས་ན་བསྐང་བས་རྫོགས་པ་དང་། །དེ་ལ་སོགས་པ་མཐའ་ཡས་མཆོག །ཅེས་བྱ་བ་ནི། སྤྱིར་དམ་ཚིག་རྣམས་ལས་མ་ལོག་ན་ཉམས་པ་རྣམས་བསྐངས་པས་ཀྱང་སྐོངས་སོ་ཞེས་བྱའོ། །དེ་ནས་དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་འདུལ་བར་གྱུར་ཏོ། །ཞེས་བྱ་བ་ནི། དམ་ཚིག་གི་རང་བཞིན་གྱི་ཕྱིར་དང་། རྒྱལ་བ་ཉིད་ཀྱང་འདི་དག་ལས་མི་འདའ་ན་གཞན་ལྟ་ཅི་སྨོས་ཞེས་བྱ་བའི་ཐ་ཚིག་གོ། །ལེའུ་བཅུ་དགུ་པ་མདོར་བཤད་པའོ།། །།དེ་ནས་ཕྲིན་ལས་བསྟན་པའི་ཕྱིར། ལྷུན་གྱིས་གྲུབ་པའི་དམ་ཚིག་བྱིན་གྱིས་རློབ་པ་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་ཉིད་ལ་ཕྲིན་ལས་རྣམ་བཞི་རང་བཞིན་གྱིས་ལྷུན་གྱིས་གྲུབ་པར་གནས་པ་སྟེ། ཆོ་ག་བཞི་ཡིས་བསྐུལ་བས་མངོན་དུ་སྣང་བར་བྱེད་པ་ནི་བྱིན་གྱིས་རློབ་པ་ཞེས་བྱའོ། །ཨེ་ཡི་ཚོགས་ཀྱི་དཀྱིལ་འཁོར་མཆོག །ཅེས་བྱ་བ་ལ་སོགས་པ་འདི་དག་ཀྱང་། རིམ་པ་མན་ངག་གིས་བསྡེབས་ཏེ། དང་པོར། བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །ཞེས་བྱ་བ་ལ་སོགས་པའི་དོན་གྱིས། བསྒྲུབ་བྱ་དག་པ་ལ་སོགས་པའི་དམ་རྫས་ལྔའམ། ཤ་དང་ཉ་ཤ་དང་བུ་རམ་དང་ཏིལ་དང་སྦྲང་ལ་སོགས་པ་རྣམས་ལ་ལིང་ག་བཅས་ལ། ཤོག་བུའམ་གྲོ་ག་ལ་མིང་རུས་བྲིས་ལ་གླན་ཏེ། ཐོད་པའི་ནང་དུ་གཞུག་གོ། །དེ་ནས་སྔགས་མཁན་ལས་རྣམ་བཞི་རང་གི་ཕྱོགས་སུ་ཁ་བལྟས་ལ། ཨེའི་ཚོགས་ཀྱི་དཀྱིལ་འཁོར་མཆོག །ཅེས་བྱ་བ་ལ་སོགས་པའི་ཕྱིར། ལས་སོ་སོའི་དཀྱིལ་འཁོར་གསལ་བར་བསྐྱེད་དེ་ལྷ་རྣམས་ལས་ལ་ངེས་པར་བཙུད་ནས། དེ་ནས། བཀུག་ནས་རྡོ་རྗེ་ཕུར་པས་གདབ། །ཅེས་བྱ་བ་ལ་སོགས་པའི་ཕྱིར། །ཕོ་ཉ་རྣམས་ཀྱིས་བ ཀུག་ནས་ལིངྒ་ལ་བསྟིམས་ཏེ། ཕྱག་རྒྱ་བཞིས་བཅིངས་ནས་མངོན་དུ་བྱས་ལ་བཞག་གོ། །དེ་ལ་རྒྱུ་དང་དབྱིབས་སོ་སོའི་ཕུར་པ་རྣམས་རིགས་སོ་སོའི་ཀཱི་ལ་ཡར་བྱིན་གྱིས་བརླབས་ལ་གནས་བདུན་ལ་སོགས་པ་ལ་བཏབ་ལ་གཟིར་རོ། །དེ་ནས། རྡུལ་དུ་བྱས་ཏེ་ཚོགས་ལ་དབུལ། །ཞེས་བྱ་བའི་དོན་གྱིས། བསམ་པ་དང་བཅས་པས་རལ་གྲིས་གཏུབས་ལ། འབར་བ་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །ཞེས་བྱ་བ་ལ་སོགས་པའི་དོན་གྱིས། རིགས་སོ་སོའི་དཀྱིལ་འཁོར་བསམ་ཡས་པ་མངོན་སུམ་དུ་དམིགས་ནས་རྟོད་ཅིང་ཟོས་པར་དབུལ་ལོ། །དེ་དག་བརླག་པ་དང་། འདུས་པ་ལ་སོགས་པའི་བསམ་པས་ཕྱེ་ནས་ཕུལ་ན། མི་གནོད་ཅིང་འདོད་པ་བཞིན་འགྱུར་རོ། །དེ་དག་ནི་ལྷག་པ་རྫས་ཀྱི་སྒོ་ནས་ལས་བྱ་བའོ། །རྡོ་རྗེ་ལུ་གུ་རྒྱུད་ཀྱི་ལས་བྱ་བ་ནི། སྒྲུབ་པ་པོ་ཡབ་ཡུམ་རྣམས་སྲིན་ལག་ལུ་གུ་རྒྱུད་དུ་སྦྲེལ་པའི་དབུས་སུ་ལིངྒ་བཞག་ལ། ཨེ་རཾ་བཾ་རཾ་མཾ་རཾ་ཡཾ་རཾ་ཞེས་བྱ་བའི་སྔགས་ཀྱིས་སོ་སོའི་གཞལ་ཡས་ཁང་མེ་དཔུང་དང་བཅས་པར་བསམ། དེའི་ནང་དུ་ལྷ་སོ་སོའི་དཀྱིལ་འཁོར་དུ་བདག་ཉིད་བྱིན་གྱིས་བརླབས་ལ། དེ་ནས་རྒྱས་པ་ལས་འབྱུང་བ་ལྟར་ཚིགས་སུ་བཅད་པས་བསྐུལ་ཏེ། སྟངས་སྟབས་ཀྱིས་སྤྲུལ་པ་རྣམས་སྤྲོས་པས་ཁམས་གསུམ་སྤྲུགས་ནས་བསྲུང་བ་དང་ཕྲལ་ཏེ་བཀུག་ནས་ལིངྒ་ལ་མངོན་དུ་གནས་པ་ལ། གནས་གསུམ་ནས་འོད་ཟེར་བྱུང་བ་ཐིམ་ནས་བསམ་པས་དབང་བསྒྱུར་ནས་ཇི་ལྟར་འདོད་པ་འགྲུབ་པ་སྟེ། དྲག་པོས་ནི་སངས་རྒྱས་ཀྱི་སྐུ་ཡང་འཇིག་པ་དང་། འཚིག་པར་གྱུར་ན་གཞན་ལྟ་ཅི་སྨོས་ཞེས་གསུངས་སོ། །དབང་གིས་ནི་དབང་གི་རྒྱལ་པོ་པདྨ་གར་དབང་དང་ཕྱག་ན་རྡོ་རྗེ་ཡང་དབང་དུ་འདུ་ན་གཞན་ལྟ་ཅི་སྨོས་ཞེས་གསུངས་སོ། །རྒྱས་པས་ནི་ཡོན་ཏན་གྱིས་ནམ་མཁའ་ཡང་ཁེངས་པར་འགྱུར་རོ། །ཞེས་གསུངས་སོ། །ཞི་བས་ནི་ཁྲོ་བོའི་ལས་ཀྱི་སྦྱོར་བ་ཡང་ཞུ་བར་བྱེད་དོ་ཞེས་གསུངས་ཏེ། འབྲུ་ནི་གོ་སླ་བས་སོ་སོར་མ་བཤད་དོ། །སླས་དང་བྱི་མོ་བྲན་མོའི་ཚོགས། །ཞེས་བྱ་བ་ལ་སོགས་པ་ནི། དེ་དག་གིས་དུས་སུ་འཁོར་རྣམས་བསྐུལ་ལ་ལས་ལ་མངགས་པ་སྟེ་གོ་སླའོ། །ཁྲོ་བོ་སྒྲུབ་པའི་ལས་ཀྱི་གཙོ་བོ་ནི་འདི་ཡིན་ནོ། །ཞེས་བྱ་བ་ནི། ཁྲོ་བོ་ཚོགས་ཀྱི་དཀྱིལ་འཁོར་བསྒྲུབ་པའི་དུས་སུ་ལས་བཞི་བྱ་བའི་མཆོག་ནི་བྲོ་གར་གྱིས་འགྲུབ་པའོ་ཞེས་བྱ་བའོ། །ཁྲག་འཐུང་ཆེན་པོ་ལ་སོགས་པའི། །ཞེས་བྱ་བ་ལ་སོགས་པ་ནི། རྡོ་རྗེ་ལུ་གུ་རྒྱུད་ཀྱི་ལས་ལ་སོགས་པའི་དུས་སུ། བདག་ཅག་ལྷ་རུ་བྱིན་གྱིས་བརླབས། ཁམས་གསུམ་རིལ་ཡང་དེ་ལས་མི་གཞན་བར་བྱས་ཏེ། རྐང་པའི་བྲོ་སྟབས་དང་། ལག་པ་ཡང་གཡེང་བ་དང་། སུམྦྷ་ནི་ཞེས་བྱ་བའི་གླུ་ང་རོ་དང་བཅས་པ་བྱ་བས་ནི། ཐམས་ཅད་ཐམས་ཅད་ཅི་འདོད་པར། །ཐམས་ཅད་ཐམས་ཅད་བྱེད་པ་ཡིན། །ཞེས་བྱ་བ་ནི། ལས་དང་དངོས་གྲུབ་ཅི་འདོད་པ་གྲུབ་པར་འགྱུར་རོ། །མཛོད་ལྡན་ཆེན་མོ་ཞེས་བྱ་བ་ནི་ཀོའུ་རཱི་ལ་སོགས་པ་སྟེ་དབང་དང་ཅི་འདོད་པ་རྒྱས་པར་བྱེད་དོ། །སྦོས་མོ་ཆེན་པོ་ནི་པུཀྐ་སི་ལ་སོགས་པ་སྟེ། ཞི་བ་དང་མངོན་སྤྱོད་ཀྱི་ལས་བྱེད་དོ། །གཞན་ནི་གོ་སླའོ། །ལྗོན་པ་དང་ནི་ལྕུག་ཕྲན་ཚལ། །ཞེས་བྱ་བ་ལ་སོགས་པ་ནི། ལས་རྣམ་བཞིའི་ཡུམ་སྟེ་སྒྱུ་འཕྲུལ་རྡོ་རྗེ་ལས། དཀར་མོ་བོང་ཆུང་སྐད་ཆེ་ལ། །བཞིན་ལུས་གཙུག་ཕུད་གཡས་སུ་འཁྱིལ། །ཡན་ལག་ཕྲ་འཇམ་སྐད་གསལ་ཅིང་། །རླུང་ཁར་ལྕི་བས་ཞི་བ་བྱ། །ཟླ་དང་ཡན་ལག་མང་བ་དང་། །ཕྲ་ཞིང་བཤད་ལ་གཟབས་སུ་རིང་། །བཞིན་ལུས་སེར་ཞིང་གྲུབ་བཞིར་གནས། །རྣ་འཕྱང་ཤ་དང་ནུ་མ་རྒྱས། །འཕེལ་བའི་དུས་སུ་འདི་དག་གཟུང་། །བཞིན་མདོག་པད་འདྲ་སོག་ཁ་ལ། །སྨིན་དཀྱུས་རིང་ལ་སྟོད་སྨད་ཕྱེད། །ལུས་དང་ཆུ་རླུང་དྲི་ཞིམ་ཞིང་། །བདེ་བ་ལྡན་ཞིང་ཡལ་ག་མེད། །འདི་ནི་སྡུད་པའི་མཆོག་ཏུ་འགྱུར། །ནག་མོ་གྲུ་གསུམ་རྩིད་མགོ་མ། །ཁྲོ་གཉེར་བྱིས་པའི་ལུས་ལྡན་ཞིང་། །གཏུམ་ཞིང་བརླང་ཚིག་འཛེམ་བག་མེད། །གཙང་རྨེའི་རྟོག་བྲལ་གསོད་པར་བཤད། །ཞེས་འབྱུང་ངོ་། །དང་བས་དགའ་བས་ཆགས་པས་དང་། །ཁྲོས་པས་ཀཱ་ལི་རབ་ཏུ་བྱ། །ཞེས་བྱ་བ་ནི། ལས་རྣམ་བཞིའི་བསམ་པ་སྟེ། །ཆོས་ཐམས་ཅད་དང་ཡིད་དུ་མི་འོང་བའི་དངོས་པོ་རྣམས། རང་བཞིན་གྱིས་མི་གནས་པ་དང་། སྦྱོར་བས་དྭངས་པར་འགྱུར་བ་ཁོ་ན་དང་། ཡོན་ཏན་གྱི་དངོས་པོ་རྣམས་རང་བཞིན་གྱིས་གནས་པ་དང་མངོན་དུ་འཕེལ་བའོ། །བསྒྲུབ་བྱ་སེམས་ཉིད་ལས་མི་གཞན་པ་དང་། མངོན་སུམ་དུ་ཞེན་པའོ། ། སེམས་རབ་ཏུ་འཁྲུགས་ཤིང་འཇིག་པར་མོས་པའི་སེམས་ཀྱིས་ལས་ལ་སྦྱོར་བའོ། །དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་ཀྱིས་སྦྱོང་བར་གྱུར་ཏོ། །ཞེས་བྱ་བ་ནི། ཆེ་བའི་ཚད་དུ་ཡང་འགྱུར་ལ། དུས་ཕྱི་མ་གཉིས་ཀྱི་དེ་བཞིན་གཤེགས་པ་རྣམས་ལ། སྔ་མ་གཉིས་ཀྱི་དེ་བཞིན་གཤེགས་པའི་ཕྲིན་ལས་ཀྱིས་རྒྱུད་དག་པར་སྦྱོང་བར་གྱུར་ཏོ། །ཞེས་བྱ་བ་ཁོ་ནའོ། །ལེའུ་ཉི་ཤུ་པ་ཁོང་ཁྲོལ་དུ་བཤད་པའོ།། །།དེ་ནས་ཁྲོ་བོའི་དཀྱིལ་འཁོར་ལ་བསྟོད་པ་བསྟན་པའི་ཕྱིར། ཚོགས་ཀྱི་དཀྱིལ་འཁོར་གྱིས་ཤིན་ཏུ་རྔམ་པའི་མདངས་ཀྱིས་གླུ་འདི་བླངས་སོ། །ཞེས་གསུངས་ཏེ། རབ་ཏུ་རྔམ་པའི་ཁྲོ་བོའི་རང་བཞིན་གྱི་དཀྱིལ་འཁོར་རྣམས་ཞལ་ཁྲོ་ཚུལ་ལྡན་པའི་འཛུམ་པ་དང་བཅས་པ་ནི་རྔམ་པའི་དྭངས་ཞེས་བྱ་བ་སྟེ། ང་རོ་དང་བཅས་པ་བསྟོད་པའོ། །དང་པོ་སྐུ་ལ་བསྟོད་པ་བསྟན་པའི་ཕྱིར། ཧཱུྃ། གཏུམ་ཆེན་དུས་མཐའི་མེ་ལྟར་འབར། །ཞེས་བྱ་བ་ལ་སོགས་པ་གསུངས་ཏེ། ཧཱུྃ་ནི་གླུ་ཉིད་ཡེ་ཤེས་ཀྱི་རྒྱན་གྱི་ཕྱིར། མགོ་དྲངས་པའོ། །རྔམ་པའི་ཚེམས་གཏུམ་པ་དང་། འབར་བའི་སྐུ་གཏུམ་པ་དང་། ཕྲིན་ལས་དྲག་ཤུལ་མཛད་པའི་ཕྱག་གཏུམ་པའི་ཕྱིར་ཆེན་པོ་སྟེ། དེ་ལྟ་བུའི་སྐུ་ལ་བཟོད་པ་དཀའ་བའི་མེ་དཔུང་བསྐལ་པའི་མེ་ལྟར་འཁྲུགས་པའོ། །འོད་ཟེར་ཉི་མ་འབུམ་གྱི་གཟི། །ཞེས་བྱ་བ་ནི། མུན་པ་སེལ་བའི་འོད་ཟེར་གསལ་བ་དང་། ཐབས་མཁས་པའི་འོད་ཟེར་མང་བ་དང་། ཐུགས་རྗེ་ཆེན་པོའི་འོད་ཟེར་གྱིས་ཁྱབ་པ་སྟེ། དེ་དག་ཉི་མ་འབུམ་དུས་གཅིག་ཏུ་ཤར་བའི་འོད་ལྟ་བུས་ཐམས་ཅད་ཟིལ་གྱིས་གནོན་པའོ། །ཁྲོ་གཉེར་གློག་སྟོང་འགྱུ་བ་བཞིན། །ཞེས་བྱ་བ་ནི། དབང་དུ་སྡུད་པའི་ཁྲོ་གཉེར་བསྡུས་པ་དང་། ཟིལ་གྱིས་གནོན་པའི་ཁྲོ་གཉེར་འགྲེང་བ་དང་། ཐབས་མཁས་པའི་ཁྲོ་གཉེར་སྣ་ཚོགས་སུ་གཡོ་བ་དེ་དག་གློག་སྟོང་ལྟ་བུར་འཁྱུག་པའོ། །མཆེ་བ་ཟངས་ཡག་ཟ་བྱེད་ཆེ་ཧོཿ ཞེས་བྱ་བ་ནི། སྐྱེ་ཤི་རྩད་ནས་གཅོད་པའི་མཆེ་བ་དཀར་བ་དང་། གདུག་པ་ཟ་བྱེད་ཀྱི་མཆེ་བ་རྩ་དམར་བ་དང་། རྔམ་པའི་ཆེ་བ་རབ་ཏུ་རྣོ་བའོ། །ཧོཿནི་དེ་དག་གིས་མཉེས་པའི་དོན་ཏོ། །གསུང་ལ་བསྟོད་པ། ཧཱུྃ། རྔམ་པའི་ང་རོ་འབྲུག་སྟོང་ལྡིར། །ཞེས་བྱ་བ་ནི། གསུང་རྔམ་པར་སྒྲོགས་པ་དྲག་པོའི་དབྱངས་འཇིགས་པར་དྲག་པའོ། །གཏུག་ཆེམ་རི་རབ་འབུམ་སྙིལ་སྐད། །ཅེས་བྱ་བ་ནི། ལྷ་གཤེགས་པའི་གཏུག་ཆེམ་དང་། ཕྲིན་ལས་མཛད་པའི་གཏུག་ཆེམ་དང་། སྤྲུལ་པ་འཁྲུག་པའི་གཏུག་ཆེམ་མོ། །ཨ་ལ་ཧ་ལའི་གད་རྒྱངས་ཆེ། །ཞེས་བྱ་བ་ནི། རྔམ་པའི་གད་མོ་ཨ་ལ། གཏུམ་པའི་གད་མོ་ཧ་ལ། དགྱེས་པའི་གད་མོ་ཧ་ཧའོ། །སྤྱུགས་པའི་འཐོར་རླུང་གཡེང་བ་ཆེ་ཧོཿ ཞེས་བྱ་བ་ནི། འཁོར་སྡུད་པའི་སྤྱུགས་པ་དང་། གདུག་པ་འདུལ་བའི་སྤྱུགས་པ་དང་། བྱིན་འབེབས་པའི་སྤྱུགས་པ་སྟེ། དེ་དག་ལས་འཐོར་རླུང་ཆེན་པོ་ཕྱུང་བས་ཁམས་གསུམ་གཡེངས་པར་བྱེད་དོ། །ཐུགས་ལ་བསྟོད་པའི་ཕྱིར། ཧཱུཾ། ཁྲོ་བོ་ཤེས་རབ་འོད་པོ་ཆེ། །ཞེས་བྱ་བ་ནི། ཁྲོ་བོ་ཉིད་ཤེས་རབ་ཀྱི་ངོ་བོ་སྟེ། ལྟ་ངན་རིལ་མི་དམིགས་པར་བྱེད་པའི་ཕྱིར་དེ་ཅིས་ཀྱང་མ་སྒྲིབ་པར་གསལ་བའོ། །ཡེ་ཤེས་དཀྱིལ་འཁོར་ཀུན་ཏུ་གསལ། །ཞེས་བྱ་བ་ནི། ཡེ་ཤེས་ལྔ་ཡིས་ཤེས་བྱ་མ་ལུས་པར་མཁྱེན་པའི་ཕྱིར་རོ། །རྡོ་རྗེ་ལྟ་བུའི་ཡེ་ཤེས་ཀྱིས་སྣང་བ་ཐམས་ཅད་ཀྱང་ཉིད་ལས་མི་གཞན་པར་སྦྱོང་བའི་ཕྱིར། འབར་བའི་ཡེ་ཤེས་ཀུན་ཏུ་འཇོམས། །ཞེས་གསུངས་སོ། །སྣ་ཚོགས་ཡེ་ཤེས་ཐིག་ལེ་ཆེ་ཧོཿ ཞེས་བྱ་བ་ནི། ཡེ་ཤེས་ཆེན་པོའི་བཅོ་བརྒྱད་ལ་སོགས་པ་རྩིས་ལས་འདས་པ་རྣམས་ཐ་དད་དུ་གསལ་བ་ཀུན་ཀྱང་མི་གནས་པའི་ཡེ་ཤེས་ཆེན་པོར་རོ་གཅིག་པར་བསྟོན་པའོ། །ཧཱུྃ། ཁྲོ་བོ་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །ཞེས་བྱ་བ་ནི། ཡོན་ཏན་ལ་བསྟོད་པ་སྟེ། དཀྱིལ་འཁོར་འདི་དག་གི་ཡོན་ཏན་གྱི་ཚོགས་མང་པོ་ལས། ཁྲོ་བོའི་དཀྱིལ་འཁོར་སོ་སོའི་སྤྲུལ་པ་དང་བཅས་པ་བསམ་ཡས་པར་གདུལ་བྱ་ཐ་དད་ལ་སྣང་བར་མཛད་པའོ། །དེ་དག་མི་ཟད་པའི་ཕྱིར། དཀྱིལ་འཁོར་ཡིད་བཞིན་འབྱུང་བའི་གཏེར། །ཞེས་གསུངས་སོ། །སྣ་ཚོགས་ཁྲོས་པའི་ཐིག་ལེ་ཆེ་ཧོཿ ཞེས་བྱ་བ་ནི། ཡོན་ཏན་སྣ་ཚོགས་དང་བཅས་པའི་ཁྲོ་བོ་རྣམས་ཡེ་ཤེས་ཆེན་པོའི་ཁྲོ་བོར་རོ་གཅིག་པའོ། །ཕྲིན་ལས་ལ་བསྟོད་པའི་ཕྱིར། ཧཱུཾ། བདུད་ཀུན་གྱི་ནི་བདག་ཆེན་པོ། བདུད་ཀྱི་བདུད་སྡེ་བདུད་རྣམས་འཇོམས། །ཞེས་བྱ་བ་ནི། བདུད་བཞི་མ་ལུས་མ་སྤངས་པར་དབང་དུ་བྱེད་པ་ནི་བདག་ཉིད་ཆེན་པོ་སྟེ། དེའི་ཕྱིར་རུ་ཏྲ་སྡེ་དང་བཅས་པ་བསྒྲལ་ཞིང་གནས་སྤར་ནས་ཕྱིར་རོལ་ཏུ་ཕམ་པར་སྣང་བ་ནི་བཅོམ་པ་ཞེས་བྱའོ། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ་ཧོཿ ཞེས་བྱ་བ་ནི། ཐམས་ཅད་ཀྱང་སྡིགས་པར་སྣང་བའི་མཛད་པ་རིལ། ཡེ་ཤེས་ཀྱི་མཛད་པ་ཉིད་ལས་མ་གཡོས་པར་རང་སྣང་བའི་ཕྱིར་རོ། །ཧཱུཾ། རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་འབར་བ་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོཿ ཞེས་བྱ་བ་ནི། དེ་དག་གི་འཇུག་བསྡུས་ནས་བསྟོད་པ་སྟེ། ཁྲོ་བོ་རྣམས་ནི་མི་ཕྱེད་པ་དང་འཇོམས་པའི་ཕྱིར་རྡོ་རྗེ་ཁོ་ན་སྟེ། དེ་དག་གི་ཕྱིར་དཔེ་བཞི་ལྟ་བུར་སྣང་བའོ། །དེ་ལས་དུར་ཁྲོད་ཀྱི་འབྱུང་བ་བཞི་པོ་ཡང་ཡེ་ཤེས་རྡོ་རྗེའི་ངོ་བོར་བསྟོད་པ་ཡང་ཞར་ལ་བཤད་པའོ། །ལེའུ་ཉེར་གཅིག་པ་མདོར་བཤད་པའོ།། །།དེ་ནས་རྒྱུད་གཉིས་ཡོངས་སུ་གཏད་ཅིང་མི་ནུབ་པར་གཟུང་བ་བསྟན་པའི་ཕྱིར། དེ་ནས་བཅོམ་ལྡན་འདས་དགྱེས་པ་ཆེན་པོས་དེ་བཞིན་གཤེགས་པ་ཉིད་ལ་སྔགས་ཀྱི་རྒྱལ་པོ་བརྟན་པར་གཟུང་བ་འདི་ཆེད་དུ་བརྗོད་དོ། །ཞེས་བྱ་བ་ལ་སོགས་པ་གསུངས་ཏེ། ཐམས་ཅད་ཀྱང་ཉིད་ལས་མ ི་གཞན་པ་ཉིད་དང་། ཡོངས་སུ་རྫོགས་པར་ཆུད་པའི་ཕྱིར་གང་ལ་ཡང་འགལ་བ་མེད་པ་ཁོ་ནའོ། །རྒྱུད་གཉིས་ནི་ངོ་བོ་དང་ཡོན་ཏན་བཤད་པ་རྣམས་ཀྱི་དོན་གྱིས། རྒྱལ་པོ་ཁོ་ན་སྟེ། དེ་དག་གཞན་དུ་མི་འགྱུར་བར་བྱ་བ་དང་། གཟུང་བས་མི་ནུབ་པ་ནི་བརྟན་པ་ཞེས་བྱ་བ་ཁོ་ནའོ། །ཡོངས་སུ་གཏད་པ་ལ་གཉིས་ལས་གདམས་པ་བསྟན་པའི་ཕྱིར། ཀྱེ་ཀྱེ་ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་གསུངས་ཏེ། ཉིད་ལས་མི་གཞན་པའི་ཕྱིར་གུས་པས་བོས་པ་སྟེ། ད་ལྟར་དང་མ་འོངས་པའི་དེ་བཞིན་གཤེགས་པ་རྣམས་ལའོ། །ཐ་སྙད་གཉིས་ཀྱིས་བསྡུས་པ་རིལ་གྱིས་རང་བཞིན་ཉིད་ནི། བུདྡྷ་བཞི་བཅུ་རྩ་ལྔའི་སྐུ་དང་ཡེ་ཤེས་སུ་གདོད་ནས་གནས་པ་ནི་རང་བཞིན་གསང་བའི་སྙིང་པོའི་ངོ་བོ་ཉིད་དེ། ངེས་པའི་ལུང་ཁོ་ནའོ། །དེ་ནི་རང་བཞིན་གྱིས་གནས་པ་སྟེ་མི་འགྱུར་པར་གདམས་པའོ། །ད་ནི་ལམ་གྱི་རྒྱུད་ཡོངས་སུ་གཏད་པ་བསྟན་ཏེ། དེ་དག་གི་དགོས་པ་བསྟན་པའི་ཕྱིར། གཟུང་འཛིན་སྤྲོས་ལ་འཆེ་བ་ཡིས། །རྣམ་རྟོག་ཞགས་པས་སོ་སོར་འཛིན། །ཞེས་བྱ་བ་ནི། ཡིན་མོད་ཀྱི་མ་རིག་པའི་བདག་ལས་བྱུང་བའི་གཟུང་འཛིན་གྱི་ཀུན་བརྟགས་གཉིས་ལ་ཐོག་མ་མེད་པ་ནས་གོམས་པའི་འཛིན་པས་བཅིངས་བ་དག་བདག་ཉིད་ངོ་མི་ཤེས་པ་དག་ཞེན་པ་གྲོལ་བ་ཉིད་ཀྱིས་མཉམ་དུ་ཐར་པར་འགྱུར་བའི་ཕྱིར་ལམ་གྱི་རྒྱུད་རྣམས་གསུངས་པའོ། །འོ་ན་ལམ་དུ་མ་ནི་དགོས་པ་མེད་དོ་བར་དོགས་པ་ལ། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །ཞེས་གསུངས་ཏེ། རང་བཞིན་གསང་བའི་སྙིང་པོ་ནི་ཤིན་ཏུ་ཟབ་པས་ཕལ་གྱི་ཡུལ་མ་ཡིན་ཡང་ལམ་རིམ་པར་སྦྱངས་པ་རྣམས་ཀྱིས་མྱོང་དུ་རུང་བའི་ཕྱིར། ལམ་མཐའ་ཡས་པ་ཡང་འདི་ཉིད་ཀྱི་ཁྱད་པར་ལས་སྣང་བར་བྱས་པ་ཁོ་ནའོ། །ཞེ་བྱ་བའོ། །ཡོངས་སུ་གཏད་པ་ལ་རྣམ་པ་གཉིས་ལས། སྡུད་པ་པོ་ལ་རྒྱུད་ཀྱི་མཚན་ཉིད་བརྗོད་ནས་གཏད་པ་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །ཞེས་བྱ་བ་ལ་སོགས་པ་གསུངས་ཏེ། རྒྱལ་བ་ཐམས་ཅད་ཀྱི་ངོ་བོ་ཉིད་དང་དགོངས་པ་ཕྱིན་ཅི་མ་ལོག་པར་མངོན་དུ་སྟོན་པ། རང་བཞིན་གྱི་རྒྱུད་འདི་ཡིན་པའི་ཕྱིར་རོ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་བྱ་བ་ནི། དེ་ལྟ་བུའི་རང་བཞིན་གསང་བའི་སྙིང་པོའི་ངོ་བོ་ཉིད་ཅི་འདྲ་བ་སྒྲོ་སྐུར་མེད་པ་ཕྱིན་ཅི་མ་ལོག་པར་སྟོན་པ་ནི། གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་བྱ་བ་ལམ་གྱི་རྒྱུད་འདི་ཁོ་ན་སྟེ། ཤེས་བྱའི་མིང་ཤེས་བྱེད་ལ་བཏགས་པའི་ཕྱིར་རོ། །རང་བཞིན་གྱི་རྒྱུད་ནི་ཅིག་ཤོས་རིལ་གྱི་འབྱུང་ཁུངས་སུ་གྱུར་པ་ལས་འདི་ཉིད་མངོན་དུ་སྣང་བ་ནི་ཕྱུང་བ་ཞེས་བྱ་སྟེ། ངེས་པའི་ལུང་ལས་ཕྱུང་བའི་ཕྱིར་མངོན་དུ་ཕྱུང་བའི་ལུང་ངོ་། །དེ་ལྟ་བུའི་ཕྱིར་སྡུད་པ་པོས་ཟུངས་ཤིག་པར་གཏད་པའོ། །སྒྲུབ་པ་པོ་ལ་མི་ནུབ་པར་གཟུང་བར་གཏད་པ་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །ཞེས་བྱ་བ་ལ་སོགས་པ་གསུངས་ཏེ། རྒྱུད་འདི་རིགས་ཐམས་ཅད་ཀྱི་བདག་པོའི་གསུང་དུ་ཕྱུང་བ་ནི་གསུང་གི་ཕྱག་རྒྱའོ། །འདིས་མཚོན་པ་དང་འདིའི་ངོ་བོ་ཉིད་དང་འདི་ལས་མི་འདའ་བའི་ཕྱིར་རོ། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་བྱ་བ་ནི། བཤད་པ་ཉིད་ཀྱི་ཁྱིར་རྒྱུད་འདི་ཉམས་སུ་ལོན་ནས་མི་ནུབ་པར་སྒྲོགས་པ་ནི་སྟོན་པ་ཉིད་དང་ཁྱད་པ་མེད་པའི་ཕྱིར། དབང་ལྔ་ཡང་ཡོངས་སུ་རྫོགས་པས་ནུས་པ་ཆེན་པོ་དང་ལྡན་པའོ་ཞེས་བྱ་བའོ། །དེ་དག་གི་ཕྱིར། དེ་ནི་ངེས་པར་ལུང་བསྟན་ཏེ། སྲས་ནི་ཐུགས་ལས་སྐྱེས་པ་ཡིན། །ཞེས་གསུངས་ཏེ། རང་རིག་པ་ཕྱིན་ཅི་མ་ལོག་པར་རྟོགས་པའི་ཕྱིར་རོ། །ལུང་བསྟན་པ་གང་སྙམ་པ་ལ། ས་རབ་རིག་པ་འཛིན་ལ་གནས། །ཞེས་གསུངས་ཏེ། སྒྱུ་འཕྲུལ་རྡོ་རྗེ་ལས། རང་རིག་ཡེ་ཤེས་རྒྱུད་དོན་ཕྱིར། །རང་སྣང་རིག་པས་མངོན་བྱས་པས། །རིག་འཛིན་མཆོག་སྟེ་ལྷུན་གྲུབ་པའོ། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱང་སེམས་པས་བསྐྱེད་དུ་མེད། །བདེར་གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུར་ལུང་ཐོབ་པའོ། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་དབྱེར་མེད་པར་དགྱེས་ནས་ཞེས་བྱ་བ་ནི། དུས་གསུམ་གྱི་རྒྱལ་བ་རིལ་ཡང་བདེ་བ་ཆེན་པོར་གཅིག་པར་སྣང་བ་ནི་བསམ་གྱིས་མི་ཁྱབ་པའི་དགྱེས་པ་ཞེས་བྱའོ། །དུས་བཞི་མཉམ་པ་ཉིད་ཀྱི་དབྱིངས་སྐུ་གསུང་ཐུགས་ཀྱི་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །ཞེས་བྱ་བ་ནི། དུས་བཞིས་བསྡུས་པ་རིལ་རང་རིག་པ་ཁོ་ན་ལས་གཞན་མེད་ཅིང་དེ་ཉིད་ངོ་བོ་མ་གྲུབ་པར་ཐམས་ཅད་དུ་མ་འགགས་པར་རང་སྣང་བ་ནི་སྣང་སྟོང་གཉིས་སུ་མི་ཕྱེད་པས་མ་བརྩལ་བའི་སྐུ་གསུང་ཐུགས་ཁོ་ནའོ། །དེ་དག་གི་ངོ་བོ་ཉིད་ནི་བརྗོད་པ་ལས་འདས་པས་མཐའ་ཡས་པ་ཡེ་ཤེས་ཀྱི་ཕྱག་རྒྱ་སྟེ། སེལ་མེད་པ་ཤ་སྟག་གིས་ཡོངས་སུ་གང་བ་ནི་ཏིལ་གྱི་གང་ལྟ་བུ་ལྟར་ཆོས་ཀྱི་དབྱིངས་ཀྱི་མཐའ་ཀླས་པར་བརྡལ་བ་སྟེ་དེ་དག་ཀྱང་། ཤིན་ཏུ་མཛེས་པ་དང་། ངོ་བོ་ཉིད་བརྗོད་པར་དཀའ་བས་ལྟ་བས་མི་ངོམས་པ་དང་། ཐམས་ཅད་དུ་ཅིར་ཡང་སྣང་བའི་ཕྱིར། རང་རིག་པའི་རྒྱན་ཁོ་ན་སྟེ། ཕན་ཚུན་རིང་དུ་སྤངས་པ་ཁོ་ནའོ། །ཐམས་ཅད་ཀྱང་དེ་ལྟ་བུའི་ངོ་བོར་གནས་པ་མེད་པའི་ཚུལ་གྱིས་གནས་པ་ནི་བཞུགས་པ་སྟེ། འདི་དག་གི་ངོ་བོ་ཉིད་དང་། དགོངས་པ་ནི་བཞེངས་པ་དང་། བཞུགས་པ་ནམ་དུ་ཡང་མི་དམིགས་པས། རྟག་པ་རྣམ་པ་གསུམ་ལས་ངོ་བོ་ཉིད་ཀྱིས་རྟག་པའོ་ཞེས་ལུང་དུ་མ་ལས་གསུངས་སོ། །འཕགས་པ་རྟོག་པའི་རྒྱལ་པོ་ཞེས་བྱ་བ་ནི། ཤེས་བྱ་དང་། ཐབས་དང་། དུས་དང་། འབྲས་བུ་ལ་སོགས་པ་ལུགས་གཞན་ལས་ཁྱད་པར་དུ་འཕགས་པའོ། །ངོ་བོ་ཉིད་དང་། འཁྲུལ་པ་དང་། ལོག་པ་དང་། རྣམ་པ་དང་། ཡང་དག་པའི་རྟོག་པ་ལ་སོགས་པ་ལས་འདི་དག་ནི། ཡང་དག་པ་ལ་ངེས་པར་བྱེད་པའི་ཕྱིར་ཡང་དག་པའི་རྟོག་པའོ། །དེའི་ཕྱིར་རྒྱལ་པོ་ཞེས་བྱའོ། །གཞན་ནི་གོ་སླའོ། །འཁོར་ལོ་བསྐོར་བ་དེ་དག་གི་འབྲས་བུའི་མཆོག་ཅེས་བྱ་བ་ནི་བསྟན་པ་རྣམས་ནི་བསྐོར་བ་དང་། འཁོར་བ་དང་གཅོད་པའི་ཕྱིར་འཁོར་ལོ་སྟེ་མང་པོར་སྤྲོས་པ་དེ་དག་གི་འབྲས་བུ་ནི་འདིར་འདུ་བ་སྟེ་འབྲས་རྣམས་ལས་ཀྱང་འབྲས་བུར་བགྲོད་པའི་ཕྱིར་མཆོག་གོ། །མཉེས་པ་དང་ཡོངས་སུ་གཟུང་བ་ཞེས་བྱ་བ་ནི་མཛད་པ་ཡོངས་སུ་རྫོགས་པས་ཐམས་ཅད་ཀྱང་དབྱེར་མེད་པར་དགྱེས་པའི་ཕྱིར་རོ། །ལེའུ་ཉི་ཤུ་གཉིས་པ་མན་ངག་གི་རིམ་པས་བཤད་པའོ།། །།བསོད་ནམས་ཚོགས་ལྡན་སེམས་ཉིད་རང་སྣང་རང་བྱུང་ལྷུན་རྫོགས་ཉིད་སྣང་ཡང་། སྣང་རྐྱེན་དགོས་ལྡན་ནོར་བུས་མཚོན་བྱེད་སྒྲོ་བྲལ་ལུང་གིས་མངོན་འབྱིན་དང་། །སྣོད་གཞན་སྦས་བཞག་རང་སྒྲིབ་རྡུལ་གཡོགས་ངན་རྟོག་རིགས་ངན་མིང་ལས་པ། །མཚོན་ཤེལ་སྤར་ཁབ་རྣ་བརྒྱུད་ཉམས་བཀྲོལ་རང་ལྟས་དོན་གསལ་ཀུན་རྟོགས་ཤོག །འཕགས་པ་དཔལ་གསང་བའི་སྙིང་པོའི་འགྲེལ་པ་རིན་པོ་ཆེ་སྤར་ཁབ་ཅེས་བྱ་བ་རྫོགས་སོ།། །།སྒྱུ་འཕྲུལ་དྲྭ་བ་ལས་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི། རྩ་བའི་རྒྱུད་དཔལ་གསང་བའི་སྙིང་པོའི་འགྲེལ་པ་རིན་པོ་ཆེའི་སྤར་ཁབ་ཞེས་བྱ་བ། རྒྱ་གར་ན་ལེནྡྲའི་པཎྜི་ཏ་ཆེ་བའི་ཡོན་ཏན་དཔག་ཏུ་མེད་པས་བརྒྱན་པ། སྒེག་པ་རྡོ་རྗེས་མཛད་པའི་རྒྱ་ཆེར་འགྲེལ་དུ་གྲགས་པ་འདི་ཉིད། སྐད་གཉིས་སྨྲ་བ་ལོ་ཙཱ་བ་རིན་ཆེན་མཆོག་གིས་ལེགས་པར་བསྒྱུར་ནས། རྒྱལ་པོ་ཁྲི་སྲོང་ལྡེ་བཙན་གྱི་སྐུ་རིང་ལ་དར་ཞིང་རྒྱས་པར་མཛད་པའོ།། །།
གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ།
གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་བཞུགས་སོ། །རྒྱ་གར་སྐད་དུ། གུ་ཧྱ་མནྟ་བཛྲ་ཡཱ་ན་ཨཱུ་པ་དེ་ཤ་པ་ཐཿཀྲ་མ་རཏྣ་བི་ཨཱུ་ཧ་ནཱ་མ། བོད་སྐད་དུ། གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་ཞེས་བྱ་བ། དཔལ་གྱི་དཔལ་དཔལ་རྡོ་རྗེ་སེམས་དཔལ་ལ་ཕྱག་འཚལ་ལོ། །དཔལ་གྱི་དཔལ་གསུམ་ཉིད་ལྡན་རྡོ་རྗེ་ལྟ་བུ་ཡེ་ཤེས་འདུས་མ་བྱས། །མ་བཙལ་ལྔ་རྫོགས་རྐྱེན་བྲལ་མི་ཤིག་དབྱིངས་ཉིད་ཡེ་ཤེས་འདུ་འབྲལ་མེད། །ལྔ་ཡིས་གྲུབ་ཉིད་གཉིས་མེད་ངང་གསལ་མི་གཡོ་མི་སེམས་སེམས་ཆེན་པོ། །འཕྲིན་ལས་བཞི་བཅོམ་དཔའ་བོ་རིན་ཉིད་ལྷ་ཡི་ལྷ་ལ་གཉིས་མེད་མོས། །གསང་བའི་བདག་པོ་མངོན་གཤེགས་ནས། །ལྷ་ཀླུ་གནོད་སྦྱིན་སྲིན་པོ་དང་། །མི་ལས་སྐལ་ལྡན་འདུས་པ་ལ། །དབང་པོས་ཇི་ལྟར་ལུང་བསྟན་དུས། །རྒྱལ་བུ་རིགས་ཅན་ལྟས་ཤར་ནས། །འབྲེལ་པས་སྣང་ལ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་གྲུབ། །བསྟན་པའི་དངོས་གྲུབ་དེ་ནས་ཐོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་རུ་འགྲུབ། །སྨོན་པའི་ལྷ་དང་དེ་རུ་མཇལ། །དེ་ནས་རྡོ་རྗེ་གདན་སྟེང་གི །འཛམ་གླིང་ཤར་གྱི་ཕྱོགས་མཚམས་སུ། །ཕོ་བྲང་དམ་པ་རིན་ཆེན་ནང་། །བཀྲ་ཤིས་དམ་པའི་ཁང་བུ་རུ། །ཀུ་ཀུ་ར་ཛེནྡྲ་བྷཱུ་ཏི། །སིདྷ་ཨུ་པ་རཱ་ཛ་དང་། །སྲས་མོ་གོ་མ་ས་ལ་སོགས། །སྒྱུ་འཕྲུལ་དྲ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །དེ་ཕྱིར་སངས་རྒྱས་མཚན་ཐོབ་ངས། །དམ་པའི་རིགས་ཅན་དྲ་མ་དང་། །དེ་རྗེས་མ་འོངས་སྐལ་ལྡན་ཕྱིར། །སྟོང་ཕྲག་བརྒྱ་པའི་རྒྱུད་དག་ལས། །གཤེགས་ཤུལ་ལམ་མཆོག་འདི་བསྡུས་ཏེ། །སྙིགས་མའི་རྒྱུད་དྲག་དུས་ཀྱི་ཚེ། །དུས་ཀྱིས་འདུལ་ཕྱིར་བསྟན་པར་བྱ། །སྤྱན་བཟང་འགྲོ་མཐུ་མེད་པ་ཡི། །དམིགས་བུ་བྲལ་བའི་ཉམས་སྟོར་བས། །བགྲོད་ཅིང་ཕྱིན་པར་མི་ནུས་བཞིན། །རྩིང་པོ་དམུ་རྒོད་རང་ཉམས་ཀྱིས། །གསང་བའི་སྙིང་པོར་མི་འགྱུར་ཏེ། །བུལ་ཤིང་མེ་ཏོག་འབྲས་བཞིན་འགྱུར། །དེ་བས་བླ་མ་ལུང་བཞིན་བཀུར། །བརྟག་སྤྱོད་ཞེ་གཅོད་བཟོད་བྱས་ཏེ། །མཐོང་བའི་གདུང་བ་ཁུར་མི་བལྟ། །དེ་ཀུན་ཡུན་གྱི་དོན་དུ་བཟོད། །དཀའ་བས་བསྟེན་ན་རྡོ་རྗེ་རྒྱལ། །ཉམས་ཀྱིས་གནང་བ་ཐོབ་འགྱུར་ཏེ། །དེ་ཚེ་རྒྱུད་ཆེན་གཞུང་བཞིན་ཡོན། །ཕུལ་ན་ཐུགས་ཀྱི་ཉིང་ཁུ་སྟེར། །དེ་ཡིས་བཞོན་པ་བཟང་འགྲོ་བཞིན། །གསང་བའི་རྫུ་འཕྲུལ་སྟོབས་ཞོན་པས། །མཐོང་འཇུག་མཐར་ཕྱིན་བཞི་བགྲོད་ནས། །ཡེ་ཤེས་སྙིང་པོའི་གནས་སུ་ཕྱིན། །དེ་བས་རྡོ་རྗེ་གཉེར་ལྡན་པས། །རྒྱང་དྲུང་སེམས་པྲ་མཁའ་འགྲོ་ཡིས། །གསང་སྔགས་ལྟས་སྟོན་སྤྱོ་བ་ཡིས། །ཅི་ནས་བརྟགས་ཏེ་བཟང་ལྡན་ན། །མི་ལྡོག་བརྟན་བྱས་རྟས་པ་ཡི། །སློབ་བུ་གང་ཡིན་ལག་ཏུ་གཏད། །ངན་པའི་ལྟས་མཐོང་མངོན་ཤེས་པས། །འདོད་པ་ཕྲ་མོའི་རྒྱུར་བྱེད་དང་། །ཁེ་དང་གྲགས་པ་ཆེ་བའི་རྒྱུར། །བྱེད་ཅིང་བཅུད་ཆེན་འཛག་དང་འབོ། །མི་ཆགས་མ་རུངས་བྱེད་པ་དང་། །ཟང་ཟིང་མཐའ་གཏོང་དབུས་འཆིང་དང་། །གཡོན་ཅན་ངོ་དགའ་ལྟག་སྤྲད་སྐུར། །ལྐོག་ན་རང་དགའ་བྱེད་པ་དང་། །ངག་ལ་རིགས་ངེས་བསམ་མི་ངེས། །བུད་མེད་འདོད་པ་ཕྱལ་བ་དང་། །མུན་ལྐོག་འཕྲོད་པར་འདོད་སྤྱོད་སྙེག །ཕོ་མོ་ཏནྟྲ་མ་བསྔགས་ལ། །བསྐལ་པར་གྲིབ་བཞིན་འཁོར་འགྱུར་ཡང་། །ཐུགས་ཀྱི་བདེ་བར་སྤྲོ་མི་བྱ། །འཚལ་པར་སྐུ་བསྟན་གཅན་འཕྲང་སྦྱིན། །དེ་མིན་བེའུ་སྤྲེལ་གཡང་བསྒྱུར་བཞིན། །འདོད་ཁེས་ཕྲོགས་ཤིང་གཅམ་འཕྱལ་བས། །མ་རྟོགས་སྤྲོས་ན་དུར་ཁྲོད་གླིང་། །བརྒྱད་ཀྱི་མཁའ་འགྲོ་བཞིན་འདུས་ནས། །ཤ་ཟ་སྲོག་ལ་འབེབས་ཤིང་ལྟུང་། །དེ་ལྟར་བརྟགས་པའི་སྐལ་ལྡན་ཕྱིར། །རང་བཞིན་ཡེ་ཤེས་རང་གནས་དང་། །དེ་མཐོང་དེར་འཇུག་རྣལ་འབྱོར་བཞི། །བར་ཆད་མེད་སྒྲུབ་རྣམ་པར་སྨིན། །དབང་བསྒྱུར་ཕྱག་རྒྱ་ལྷུན་གྲུབ་ལམ། །མངོན་བྱས་རིམ་པ་བརྗོད་པར་བྱ། །དེ་ལ་དང་པོ་ཉིད་སྤྲོས་པ། །དེ་ཉིད་དེ་ཡིས་ཤེས་བྱ་བ། །ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །འཁོར་བ་སེམས་ཕྱིར་བདག་མེད་པས། །དེ་ཕྱིར་དེ་བཞིན་གཤེགས་བསམ་ཡས། །འཁོར་བའི་རང་བཞིན་མི་དམིགས་ཕྱིར། །མྱ་ངན་འདས་པ་ཡོད་མ་ཡིན། །དེ་ལྟར་རིགས་དང་རྒྱུད་མེད་པས། །བྱང་ཆུབ་མཆོག་གི་ངོ་བོ་ལ། །སོ་སོའི་རང་བཞིན་ངེས་ཞེ་ན། །ཡང་དག་ལམ་གྱིས་བཅོས་སུ་མེད། །ཡང་དག་གཤེགས་དང་ལོག་རྟོག་གཉིས། །ངོ་བོ་ཉིད་ཀྱིས་གནས་གྱུར་ན། །དེ་ལ་བཅོས་ཤིང་སྒྱུར་དུ་མེད། །མཆིང་བུ་རིན་ཆེན་བཞིན་མི་རིགས། །དེ་བས་དེ་ལྟའང་འདི་བཞིན་པས། །མ་རིག་ལོག་རྟོག་ཞགས་པའི་རྒྱུ། །ལས་དང་ཉོན་མོངས་བརྒྱད་རྐྱེན་གྱིས། །བཅུ་གཉིས་འཁོར་ལོས་གནས་སུ་བསྐྱར། །རྟེན་དང་འདོད་པ་ཐ་དད་པའི། །བདེ་སྡུག་གདུང་བས་ཉམ་ཐག་བྲལ། །བརྩོམ་མེད་བཞི་དུས་ཀུན་ཏུ་ཉམས། །རང་བཞིན་ཉིད་ལས་ཉམས་པ་མེད། །དེ་ལྟའང་རྒྱལ་པོའི་ཕྲུག་གུ་འཁྱམས། །དེ་བཞིན་རིགས་ལ་འགྱུར་མེད་པས། །ཤུལ་དོན་རང་ལས་གཞན་མིན་ཕྱིར། །འཕྲུལ་དགའི་ཚུལ་དེ་གཞན་ལས་མིན། །དེ་ཡང་རྣམ་གསུམ་གནས་ཚུལ་བཞག །འབྲུ་ལྔར་གནས་པའི་ཐབས་ཆེན་པོ། །འགྲོ་བ་ཀུན་ལ་རང་བཞིན་གནས། །དཀྱིལ་འཁོར་བཞི་དང་སྲོག་ཤིང་གསུམ། །གནས་ན་ཀཱ་ལིའི་སྒྲ་དབྱངས་ལྡན། །ཨེ་ཝཾ་མ་ཡ་མཁའ་ལྡན་དང་། །སྙིང་པོ་རླུང་སྒྲོམ་གནས་ན་ཡོད། །དེ་ཡིས་ཏནྟྲ་འབྱིན་པར་སྐྱེད། །དེ་དོན་དེ་ན་ཆོས་ཉིད་དང་། །ཡེ་ཤེས་ཡོན་ཏན་ལས་ཉིད་དངོས། །རྣལ་འབྱོར་ལམ་རིམ་རང་བཞིན་ལྡན། །སྣོད་ཀྱི་འོད་དབྱིངས་འཕྲིན་ལས་བཞི། །ཐིག་ལེ་བསྙེན་སྒྲུབ་རང་བཞིན་ལྡན། །པ་བཞི་བརྒྱད་ཤིང་མཎྜ་ལ། །རཾ་ཡཾ་གཡས་གཡོན་སྦྱིན་སྲེག་ལྡན། །གནས་བཞི་འབྱུང་བའང་ལས་བཞི་སྟེ། །གསང་བའི་མཁའ་ལ་ལས་བཞི་ལྡན། །གནས་རྟེན་རྩ་དང་ཐིག་ལེ་ལ། །བཅུ་དབང་ལྔ་གསུམ་དབང་རྣམས་ལྡན། །གསང་བ་ནང་གི་འདོད་ཡོན་དང་། །དམ་རྫས་ལྔ་ལྡན་མཆོད་པ་སྟེ། །དེ་དག་རང་གནས་མི་འདའ་བར། །རང་བཞིན་གནས་པའི་ས་མ་ཡ། །རང་བཞིན་ཕྱི་ནང་གསང་བ་ཡི། །འདུ་བྱེད་སྤྱོད་པ་ངང་གིས་གནས། །ཆགས་པས་ཁམས་འགྲུབ་ཅིག་ཤོས་ཀྱིས། །རང་བཞིན་ཡེ་ཤེས་འགྲུབ་བྱེད་པའོ། །རྡོ་རྗེ་ཕུང་པོའི་ཡན་ལག་ཀུན། །རྫོགས་པའི་སངས་རྒྱས་ལྔར་གྲགས་སོགས། །དངོས་ཀུན་ཆགས་དང་ནང་ཚུལ་གྱི། །ལས་དང་ངོ་བོས་འབྲས་བུར་གནས། །ཆུ་ཟླ་སྒྱུ་མ་སྤྲུལ་པ་བཞིན། །ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅི་ཡང་འགྱུར་ཞིང་ཅིར་ཡང་འགྲུབ། །བར་མ་ལམ་དང་འབྲས་བུ་རྣམས། །གང་ཡང་རིགས་རྒྱུད་རྟག་མིན་པས། །སེམས་ཕྱིར་ཀུན་ཀྱང་དེ་དེ་ངང་། །གཟུགས་གཉིས་མཚན་གསུམ་ཡོད་དང་མེད། །གནས་རིགས་སྡེ་ཆ་ཡོད་མིན་རྫོགས། །གཉིས་ཡུལ་བྲལ་བཞིན་དེ་ལྡན་པའི། །དོན་མཆོག་ལྔ་འབྲས་ཡེ་ཤེས་དབྱིངས། །བདུན་དང་གསུམ་ཕྱིར་དོན་དམ་པ། །དཔག་བསམ་ཤིང་དང་རིན་ཆེན་ལྟར། །དེ་ཀུན་ངོ་བོ་ཉིད་རྒྱུར་གནས། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །རང་བཞིན་ངང་གིས་དེ་ལྟར་གནས། །དེ་ལས་གཞན་པའི་ཐོབ་བྱ་མེད། །ཀུན་ཀྱང་སྨིན་ཟིན་བགྲོད་པ་མེད། །དེ་ཉིད་ལམ་གྱིའང་ངོ་བོ་སྟེ། །འཇུག་གནས་འབྱིན་པས་ཕྱེ་བ་ཡིན། །ཕྱོགས་བཅུ་མ་ལུས་ཐམས་ཅད་ལ། །རང་བྱུང་ཆེན་པོས་ཀུན་ཏུ་ཁྱབ། །རང་བྱུང་དེ་ཉིད་དངོས་མེད་པས། །ཀུན་གྱི་ཕྱག་རྒྱའི་རྒྱུ་ཡིན་ཕྱིར། །དེ་ལྟ་བུ་ཡི་ངང་དུ་ངེས། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །མིང་གྲངས་མེད་པའི་རྒྱུ་ཉིད་དང་། །ཡོངས་སུ་རྫོགས་པ་ཞེས་ཀྱང་བརྗོད། །གསུམ་པ་དངོས་པོར་ཞེན་པ་ཡི། །མྱ་ངན་འདས་དང་འཁོར་བའི་ཆོས། །ཡེ་ནས་རིགས་རྒྱུད་རྟག་མིན་པས། །སོ་སོའི་གཟུགས་སྒྲ་དྲི་རོ་རེག །ཆོས་ཀྱི་བྱེ་བྲག་ཐ་སྙད་ཀུན། །འཇའ་སྣང་མཁའ་ལྟར་མ་འདྲེས་གཅིག །འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་བའང་རྡོ་རྗེ་ཉིད། །རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའང་། །དེ་མིན་ཞེན་པ་དགྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཡུལ་དང་ཤེས་པར་སྣང་བ་ཡང་། །རང་བྱུང་ཡེ་ཤེས་རང་སྣང་ཟད། །རྒྱུ་འབྲས་སྣང་ཡང་གཉིས་པ་མེད། །ཕྱི་ནང་གསལ་བའང་ནང་ཉིད་དང་། །དེ་ལྟར་ཡེ་ཤེས་རང་གནས་པ། །ལམ་དང་འབྲས་བུ་ཀུན་དངོས་པས། །འབྲེལ་བ་བདག་ཕྱིར་ཐབས་ཆེན་པོས། །མངོན་བྱེད་རང་ལས་བྱུང་བར་ཟད། །ཡེ་ཤེས་རང་ལ་གནས་པའི་ལེའུ་སྟེ་དང་པའོ། ༈ །ལྷུན་གྲུབ་ངང་ལ་ཕྱག་བཙལ་ནས། །དང་པོ་ལམ་མཆོག་བཤད་པར་བྱ། །གང་དག་རང་གནས་མཐོང་འདོད་དགོས། །དུས་སྣོད་རྒྱུ་རྐྱེན་ཐབས་གྲངས་དངོས། །སྤྱོད་ཡོན་དྲོད་རྟགས་ཚད་དང་སྐྱོན། །ཡན་ལག་སྤྲོས་པའི་རྩ་བར་གཞག །བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པ། །བླུན་པོ་མུན་སྤྲུལ་བློ་ཅན་དེ། །ལོང་བའི་གྲོང་ཆེན་ཆེན་པོར་འགྲོ། །དེ་བས་མ་རིག་ལིང་ཏོག་མིག །ལྡོངས་པ་རྡོ་རྗེ་ཐུར་མ་མཁན། །མཉེས་ཐོབ་སྔོན་བྱས་གཞུང་ཐོས་པས། །སྤྱན་དབྱེ་དཀྱིལ་འཁོར་མཐོང་བྱ་དགོས། །དེ་ཡང་རང་བཞིན་སྦྱངས་པ་ཡིས། །སྣོད་དུ་གྱུར་པས་ཉེ་རིང་ཕྱིར། །རིམ་དང་ཅིག་ཅར་བཞི་ཆ་ཡིས། །ཕྱེ་བས་རྣལ་འབྱོར་ཆེན་པོར་འཇུག །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་འདིར་འཇུག་ཕྱིར། །རིང་བའང་རིམ་དང་ཅིག་ཅར་བའོ། །སྔ་མའང་ཏནྟྲ་གཞུང་ཉིད་ལས། །ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཐེག་པ་བཞི་ཡིན་ངེས་འབྱུང་ལ། །ཐེག་པ་གཅིག་གིས་འབྲས་བུར་གནས། །ལམ་སྟེགས་སྔོན་དུ་རྫོགས་པར་སྦྱོར། །དེ་ཕྱིར་མ་ངེས་རིགས་མཆོག་ནས། །མུན་པའི་ཤེས་པ་པ་དེ་ཉིད། །རང་བཞིན་རྒྱུ་ཡིས་སྨྱུང་བར་གནས། །ཕལ་པའི་སེམས་བརྒྱད་མཐར་གནས་ཚེ། །སྙིང་པོ་རང་བཞིན་མཚུངས་པ་དང་། །བཤེས་གཉེན་མགོན་ལས་ལུང་གཉིས་ཐོབ། །ཡོན་ཏན་མཐོང་དང་སྐྱོན་མཐོང་དང་། །དེ་ཡིས་སྐྱོ་རྨོངས་བྲོད་དང་བ། །གཉིས་པའི་རྒྱུ་རུ་གསུངས་པ་ཡིན། །དེ་བདག་གསང་སོགས་དམིགས་པ་སྟེ། །སྐད་ཅིག་འཕེལ་བ་དེ་མ་ཐག །དྲུག་ལས་རྩྭ་མེ་བཞིན་གཡོས་ཏེ། །བཞི་ཡི་ཐེག་པ་དང་པོར་ཞོགས། །དེ་ནས་རིམ་གྱིས་བགྲོད་བྱས་ཏེ། །རྒྱུ་ནས་རྐྱེན་གྱིས་འཕར་བྱས་ཏེ། །རྣལ་འབྱོར་རྒྱུད་ལ་གནས་པ་ལ། །འདི་སྟོན་མགོན་ལ་ལུང་ཐོས་པས། །དེ་ཇི་བཞིན་དུ་གཉིས་དྲང་བཞིས། །མཆོག་གི་གཡོ་བའི་སེམས་འབྱུང་འགྱུར། །གཞི་དེས་ཁོང་དུ་ཆུད་སྨོས་པས། །ལྷག་པའི་གཟུགས་བརྙན་འཇུག་པར་བྱེད། །མཆོག་གི་དམ་ཚིག་དེ་རུ་བྱིན། །རིགས་ངེས་གྱུར་ལ་ཕན་པ་བཅུ། །ནུས་པ་གཉིས་ཀྱི་བྱིན་བརླབས་བཞག །རང་གི་སྤྱན་མཆོག་འབྱེད་ལ་བརྩོན། །རྒྱུ་ཡིས་དཀྱིལ་འཁོར་མཐོང་བྱའིི་ཕྱིར། །ཐོས་བསམ་དམ་པ་ལེན་པར་བྱེད། །ཁ་ཅིག་དུས་མཐའི་ཅིག་ཅར་བ། །བསྐལ་པ་རྡུལ་སྙེད་སྔོན་སོང་བས། །ཐུན་མོང་དེ་སྙེད་སྦྱངས་པའི་མཐའ། །སྒྱུ་འཕྲུལ་དྲ་བའི་དོན་ཞུགས་པའང་། །སྔར་སྦྱངས་འདི་ཚེ་ངེས་འབྱུང་བ། །རིམ་གྱིས་སྦྱངས་ལ་ཅིག་ཅར་བགྲོད། །ལ་ལ་དབང་པོ་རྣོན་པོ་དག །ཐེག་པ་ཆེན་པོ་གཉིས་འཇུག་སྟེ། །མ་སྦྱངས་གྲུབ་པ་གསུམ་ཕྱིར་གྱིས། །མཐོ་བརྟན་མྱུར་རྣོ་རྒྱ་ཆེ་ཡངས། །ཟབ་ཡོད་རྒྱུ་ཡི་གང་ཟག་དེ། །ཉིད་དང་རྐྱེན་དང་དེ་རིམ་པས། །ཕྱེ་བས་རྒྱུ་འབྲས་ཆེན་པོ་རྣམས། །མ་ངེས་འཇུག་དང་འདི་ཉིད་དུའོ། །དེ་དེའང་རང་སེམས་བརྟན་པའི་དངོས། །བཤེས་གཉེན་རྣམས་དང་ངོ་བོས་འབྲེལ། །དེ་ལྡན་བྱ་བྱེད་སྣོད་བཅུད་དུ། །ཆེན་པོའི་ལུང་དང་འབྲེལ་བ་དང་། །མགོན་དང་བྱ་བྱེད་ཐུགས་རྗེས་འབྲེལ། །དེ་ཕྱིར་མཆོག་ལུང་རྡོ་རྗེ་རྣམས། །དང་མཇལ་བྱེད་ཕྱིར་རྒྱུ་རྐྱེན་དྲུག །ལྡན་པས་མ་ངེས་འཇུག་པ་ནི། །དབང་པོ་ཇི་བཞིན་མོས་རྐྱེན་གྱིས། །རྒྱུའམ་བྱ་བའམ་གཉིས་ཀའམ། །རྣལ་འབྱོར་ཐེག་པར་སྦྱོར་བར་བྱེད། །དེ་ནས་དེ་བཞིན་འདིར་འཇུག་པའང་། །སྔོན་བཞིན་གཡོ་སྨོས་འཇུག་སེམས་སྦྱོར། །གནས་པས་མཐར་ཕྱིན་བྱེད་པ་ནི། །ལྟོས་པས་རིང་བའི་དུས་ཉིད་དོ། །མེ་ངེས་ས་ནས་འབྲེལ་རྒྱུ་རྐྱེན། །ལྡན་པས་རྣལ་འབྱོར་མཆོག་སྦྱོར་བ། །མུན་པའི་ཟེར་ཚུལ་རྩྭ་མེ་ལྟར། །གཡོ་སྨོན་འཇུག་པ་སྔོན་བཞིན་ཏེ། །བདུད་ལྡན་པའང་ཏནྟྲ་ཡི། །གཞུང་གི་ངང་ཚུལ་རང་བཞིན་སོགས། །སྣོད་ཡོན་ལྡན་པས་བསླབ་པ་ལ། །གནས་པའི་དཀྱིལ་འཁོར་ཆེན་པོ་རུ། །འཇུག་པ་བཞི་ཡི་ཡན་ལག་མཆོག །དང་པོ་ཆེ་དུ་གཉེར་བར་བྱེད། །གང་དེ་ཐོས་པས་འཚོལ་བའི་ཚེ། །རྒྱུ་གཉིས་རྐྱེན་གྱིས་བཟོད་ཐོབ་དང་། །རང་བཞིན་ངང་གིས་བཟོད་ཐོབ་པས། །རེ་སྨོན་སེམས་ཀྱིས་ཉན་བརྩོན་སྦྱར། །གང་དག་མཉན་བསམ་ཤེས་རབ་ཆེ། །ཉན་ཅིང་ཐོས་འཛིན་བསམ་པ་དང་། །བསམ་པའི་ཚེ་ནའང་རྟོག་དཔྱོད་པ། །གཉིས་པོ་འདི་དག་ཤེས་པའི་རྒྱུ། །མཁན་པོ་ལུང་དང་མན་ངག་བཅས། །ལྷན་ཅིག་བྱེད་པའི་རྐྱེན་དུ་འདོད། །རང་བཞིན་བདུན་དང་མཚུངས་ལྡན་པ། །ཅིག་ཤོད་རྒྱུ་རུ་ངེས་པ་ཡིན། །དེ་ལྟར་ལྡན་པས་སྤྱན་འཚོལ་ཚེ། །གཏན་ཚིགས་རྣམས་ཀྱིས་རྨལ་བྱས་ཏེ། །ནོར་བའི་ཤེས་རབ་དམིགས་བསམ་ནས། །མ་ནོར་དམིགས་ནས་བླང་བར་བྱ། །གཞི་དང་གཏན་ཚིགས་གྲུབ་པའི་དོན། །རྣམ་གསུམ་སྔ་མའི་གཞི་རུ་གཞག །ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུང་ལྔ་བསྟན་པས་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །དེ་ཉིད་དངོས་ལྔ་ཚུལ་དང་ཚིག །བརྗོད་པས་ལྔས་མཚོན་འབྱུང་བའི་གཞི། །དེ་ལས་གཏན་ཚིགས་དངོས་ལྔ་ཡིས། །བརྡའ་སྤྲོད་རྗེས་སུ་འཇུག་བསྟན་པའང་། །བསྲེགས་བཅད་བརྡར་བའི་གསེར་བཞིན་དུ། །དངོས་ལྔས་ལེགས་པར་བརྟགས་ཏེ་དབབ། །དེ་ཡང་ཡོངས་སུ་བརྟག་གཞི་ནི། །དབང་པོ་ཡུལ་དུ་སྣང་བ་ཀུན། །ཡུལ་རྣམས་ཡོད་པ་མ་ཡིན་ཏེ། །ཀུན་གཞིའི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་བས། །འཁོར་དང་འདས་དངོས་ཞེན་སྣང་བརྟག །འཇིག་རྟེན་འདི་ན་ཅི་ཡོད་པ། །མིང་དང་མཚན་མར་འཛིན་པ་ཡི། །ལོག་རྟོག་སོ་སོ་རང་སྤྱི་མཚན། །ཇི་ལྟར་གནས་པ་དཔྱད་པར་བྱ། །དངོས་གཉིས་ཞེན་དངོས་དུས་གསུམ་ཆོས། །སྐད་ཅིག་གཅིག་ལ་ཀུན་རྫོགས་ཕྱིར། །དེ་དངོས་མཐོང་བས་ཡང་དག་པར། །རིག་བཞིན་ཀུན་ཀྱང་དེ་ལྟར་ཤེས། །ཀུན་བརྟགས་ཤེས་པ་བར་མར་འགྱུར། །སྤྱི་ཡུལ་ལུས་མེད་གྲིབ་མ་བཞིན། །མེད་པས་མི་བཏུབ་རང་ཉིད་ལ། །མི་བཏུབ་མཛུབ་མོ་བཞིན་དོགས་པ། །གཉེན་པོ་མེད་པས་དག་མིན་ཅིང་། །བར་མིའི་ཡུལ་ཕྱིར་ངེས་ཚིག་འགྲུབ། །དེ་ལྟར་ལྔ་ཡིས་དེ་དེ་ལ། །དེ་དེའི་རང་བཞིན་བརྟག་བྱ་བའང་། །རྟོགས་དང་ལྡན་པའི་བློ་རྣམས་ལ། །དངོས་པོ་སྣ་ཚོགས་སེམས་གསང་སྔགས། །ངེས་ལུང་ཡིན་ཕྱིར་ཆོས་ཚུར་སྟོན། །བརྗོད་དང་འདྲ་བར་བརྡའ་སྤྲོད་པས། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཡང་ནི་ས་གནས་མིག་ལྡན་ལ། །རང་བཞིན་ཤུགས་ཀྱིས་སྐྱེ་མེད་དོན། །མ་བཙལ་ངང་གིས་སྣང་བྱེད་པས། །བརྗོད་མེད་དེ་ཉིད་བརྗོད་དང་འདྲ། །གང་དག་གཟུགས་དང་རྣལ་འབྱོར་གྱིས། །མཐོང་ཐོས་ལ་སོགས་རང་བཞིན་བརྡའ། །དཔའ་བོའི་བརྡའ་དང་དགོངས་པ་དང་། །རང་གི་ཏིང་འཛིན་གྱིས་བརྡའ་སྤྲོད། །དཔེར་ན་ས་འོག་གསེར་རླངས་དང་། །མེ་ལོང་ཉི་མའི་ངང་བཞིན་དུ། །ཀུན་ཀྱང་རིག་ཕྱིར་རང་བཞིན་དྲོད། །རང་བཞིན་ངང་གིས་བརྗོད་འདྲར་སྣང་། །ཀུན་ཀྱང་བྲག་ཅའི་རང་བཞིན་ཕྱིར། །གྲག་སྟོང་དབྱེར་མེད་རྡོ་རྗེའི་གསུང་། །སྒྲ་ཐོས་ཉིད་ཀྱིས་དེ་ཉིད་དུ། །སོ་སོར་མ་བརྟགས་འཇལ་བར་བྱེད། །སོ་སོའི་སྐད་དུ་བརྡའ་སྤྲོད་ལྟར། །ཚིག་དབྱངས་མེས་པོའི་ངག་ལྟ་བུ། །མོས་སྤྱོད་གྲོལ་བཞིན་བརྗོད་པ་ཡིས། །བརྡའ་སྤྲོད་ཡོངས་སུ་གྲོལ་བར་བྱེད། །དང་པོའི་རྒྱུད་ལ་ཐ་དད་ཕྱིར། །གང་མོས་གྲོལ་བ་ཡོད་མོད་ཀྱང་། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་དམ་འགྲུབ་བྱེད་ཕྱིར། །མི་དམིགས་ངང་ལས་དམིགས་པ་ཡི། །ཆོ་འཕྲུལ་ཚིག་གིས་མཚོན་པར་བྱ། །གསུང་ལྔ་ཐོས་པ་ལྔ་ཚུལ་ཡང་། །རྗེས་སུ་ཚིག་གིས་མཚོན་པར་བྱ། །ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་དྲང་ཚིག །འདོད་རྐྱེན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཐམས་ཅད་གསང་སྔགས་ངོ་བོ་ཕྱིར། །མཐའ་དང་དབུས་མེད་དེ་བཞིན་ཉིད། །དབྱེར་མེད་ངང་དུ་གནས་པ་ལ། །ཡེ་ཤེས་རྟོགས་པའི་དོན་བྱའི་ཕྱིར། །ཕྱོགས་དང་དབུས་སུ་གནས་པར་བྱ། །ཀུན་ལ་དེ་ལྟར་སྦྱོར་བར་གྱིས། །ཡེ་གེ་ཚིག་དང་སྒྲ་སྤངས་པའི། །བརྗོད་མེད་ངང་དུ་གནས་པ་ནི། །གསུང་ཉིད་རང་བཞིན་མེད་པ་ཡི། །ཆོས་རྣམས་ཐམས་ཅད་ཡེ་ཤེས་དག །ཐམས་ཅད་ཐུགས་སུ་གྱུར་པས་ན། །སྒྲ་དང་ཚིག་ལ་གནས་པ་མེད། །འདས་དང་མ་འདས་ཐམས་ཅད་ཀུན། །ཡང་དག་ཤེས་པར་རབ་བརྟགས་ན། །རང་བཞིན་མེད་ལས་ཅིར་ཡང་སྣང་། །སྣང་བ་ཉིད་ན་དབྱིངས་ཡིན་ཏེ། །དེ་ལྟར་རྟོགས་པའི་ཡེ་ཤེས་ནི། །ཀུན་ལ་དབང་སྒྱུར་རང་དབང་ཅན། །ཐམས་ཅད་ཚིག་གི་སྒྲ་ལྟར་གནས། །འདི་ནི་ཡེ་ཤེས་གསུང་མཆོག་ཡིན། །ཆོས་རྣམས་བསམ་གྱིས་མི་ཁྱབ་སྟེ། །མཐའ་དང་དབུས་མེད་ཀུན་ཏུ་ཁྱབ། །ཁྱབ་དང་ཁྱབ་མེད་རྡོ་རྗེའི་སྐུ། །སྒྲ་སྐད་སྣ་ཚོགས་གྲག་པ་ཡང་། །དངོས་པོ་མེད་ལས་དངོས་པོའི་སྒྲ། །ཇི་ལྟར་པི་ཝང་ལག་ཐོགས་ན། །སྒྲ་ནི་སྣ་ཚོགས་འབྱུང་འགྱུར་ཡང་། །དངོས་པོ་མེད་དེ་དེ་བཞིན་ཉིད། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །མེ་ལོང་བཞིན་དུ་སྐུ་ལ་སྣང་། །ཆོས་རྣམས་མ་ལུས་ཐམས་ཅད་ཀུན། །མིང་དང་ཚིག་ཏུ་བཏགས་ནས་བསྟན། །ཇི་སྙེད་མང་པོའི་དོན་བརྗོད་ཀྱང་། །རྡོ་རྗེའི་གསུང་ལ་སྤྲོས་པ་མེད། །སྤྲོས་མེད་དེ་ཉིད་སྣ་ཚོགས་པ། །ཀུན་ལ་བརྡའ་འཇལ་ཡེ་ཤེས་གསུང་། །སྒྲ་དང་མིང་ཚིག་ཀུན་ལས་འདས། །ཐམས་ཅད་པདྨ་ཆགས་མེད་པའོ། །དབང་པོ་རྣམ་གཉིས་བསྲུངས་པ་ཡི། །མཁའ་ལ་ཉི་ཟླ་དུས་གཅིག་འཆར། །མི་འཇིག་ཚུལ་དུ་ཟིལ་མནན་མཐོང་། །དེ་ཕྱིར་གཏན་ཚིགས་ལས་ལ་བརྗོད། །དེ་ལྟ་མོད་ཀྱང་བསྡུ་ན་གཉིས། །བཞི་རྗེས་མི་དཔྱོད་གཅིག་རྗེས་དཔྱོད། །རྣམ་གཉིས་ཚུལ་གྱིས་མཐོང་བྱེད་པ། །དབང་པོ་གཉིས་དང་མཐུན་སྦྱོར་བའོ། །དེ་ལ་སྔ་མར་གོ་བྱ་བའང་། །སེམས་ཅན་མ་ལུས་ཐམས་ཅད་ཀུན། །ཡེ་ནས་བྱང་ཆུབ་སྙིང་པོར་གནས། །དེ་ཕྱིར་དཔྱད་པའི་བྱ་བྱེད་མེད། །ཚིག་དང་ཡི་གེས་མི་མཚོན་ཏེ། །སངས་རྒྱས་ཀྱིས་ཀྱང་རྙེད་པར་དཀའ། །རྒྱལ་བའི་སྲས་པོ་ཅང་མི་གསུང་། །མ་གསུངས་པ་ཉིད་རྒྱ་ཆེར་བཤད། །བཤད་དང་ཉན་པ་གཉིས་ཀ་མེད། །དཔྱོད་པ་ཞུགས་ན་རྟོག་པའི་གཞི། །རྟོག་པ་ཞུ་ན་དམིགས་པའི་རྟེན། །དམིགས་པ་ཞུགས་ན་འཛིན་པའི་གཟུགས། །འཛིན་པས་ཟིན་ཕྱིར་གྲོལ་མི་འགྱུར། །དེ་བས་གསེར་ལྟ་གསེར་བཞིན་དུ། །བདག་ཕྱེར་བྱ་བྱེད་མི་དམིགས་པས། །རྟོག་དཔྱོད་དམིགས་འཛིན་མི་འཚོལ་པར། །དེ་བརྗོད་ཉིད་ཀྱིས་དེ་ཉིད་མཐོང་། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །བཅིངས་མེད་རྣམ་པར་གྲོལ་མེད་པས། །གྲོལ་བར་མི་འདོད་བཅིངས་དང་བྲལ། །སོ་སོར་གང་ལའང་རྟོག་མེད་པས། །སོ་སོར་སྣང་བ་ཀུན་རྟོགས་ཕྱིར། །བརྟགས་པ་མེད་པའི་བླ་དྭགས་ཡིན། །ཁ་ཅིག་ཕྱི་མར་གོ་བྱེད་པ། །བརྗོད་པའི་དངོས་པོའི་སྤྱོད་ཡུལ་ལ། །སོ་སོར་རྟོག་པའི་གཏན་ཚིགས་རྐྱེན། །དོ་དང་མཐུན་དང་མི་མཐུན་པའོ། །ཕྱི་མ་མི་མཐུན་མཚོན་བྱེད་ལྟར། །ཆོས་ཀུན་མཐའ་ལས་འདས་པ་ལ། །མཐའ་རྣམ་གང་ཡང་དོར་མེད་པས། །འདི་ལྟར་འདིའོ་ཞེས་བསྟན་མེད། །རང་གི་ངོ་བོ་བསྟན་པར་བཀའ། །འོན་ཀྱང་ཡིན་མིན་འཛིན་དགྲོལ་ཕྱིར། །མདོར་ན་ཇི་ལྟར་བརྟགས་བསམས་བཞིན། །འགྱུར་བས་ཀུན་གྱི་ངོ་བོར་སྣང་། །དེ་མཚོན་ཅི་ཡང་ཡིན་པའི་ཕྱིར། །སེམས་ཆོས་ཅི་ཡང་མ་ཡིན་ནོ། །དེ་ཕྱིར་མི་ཡིན་ཀུན་ཡིན་པས། ཅི་ཡང་ཡིན་ནོ་ལྷུན་གྱིས་གྲུབ། །མཐའ་ཀུན་ཕྱོགས་སུ་མ་ཆད་ཕྱིན། །མཐའ་དང་བྲལ་ཕྱིར་མ་བྲལ་བའོ། །གང་ཡང་མ་སྤངས་མི་ལྡན་པས། །མ་བྲལ་ཕྱིན་ན་བྲལ་ཞེས་བྱ། །ངོ་བོས་ཕེབས་བས་རྒྱས་པར་འགྱུར། །ཅིག་ཤོས་མཐུན་པར་སྟོན་པ་ཡང་། །བྱེ་བྲག་བསྡུས་པ་ཀུན་ཁྱབ་གསུམ། །དེ་ལྡན་རྣམ་པ་བསམ་ཡས་པ། །ཆ་ཙམ་བརྗོད་པ་འདི་ལྟ་མོང་། །ཆོས་རྣམས་ཡོང་གིས་དག་པ་ཡི། །རྣམ་བཞིའི་ཚུལ་གྱིས་དོན་རྟོགས་མངོན། །སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པ འི་མཉམ་གཉིས་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཉིད་ལ་དབང་སྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །འདས་དང་མ་འདས་ཐམས་ཅད་ཀུན། །ཡང་དག་ཤེས་པས་རབ་བརྟགས་ན། །རང་བཞིན་མེད་ལས་ཅིར་ཡང་སྣང་། །སྣང་བ་ཉིད་ན་དབྱིངས་ཉིད་ཡིན། །གཤེགས་སྐུ་སྒྱུ་མར་སྣང་བ་དང་། །ལོག་རྟོག་སྒྱུ་མར་སྣང་བ་གཉིས། །གཞི་རྩ་མེད་དེ་རང་བཞིན་སྟོང་། །རིགས་དང་རྒྱུད་དུ་བརྟག་ཏུ་མེད། །རིགས་དང་ཁ་དོག་དབྱིངས་མེད་ལས། །ཕྱི་ནང་སྣོད་བཅུད་ཐམས་ཅད་སྣང་། །སྣང་བ་ཉ ིད་ན་ཆོས་ཀྱི་སྐུ། །ཅིར་ཡང་འགྱུར་ཞིང་ཐམས་ཅད་འགྲུབ། །ཉོན་མོངས་རང་དང་སྤྱི་བསྟན་པ། །མཚན་ཉིད་མ་ནོར་དོན་རྟོགས་ན། །རྣམ་པར་བྱང་བའི་ལམ་དུ་འགྱུར། །དེ་ཕྱིར་རང་སྤྱིའི་གཏན་ཚིགས་གཅེས། །མཐའ་དང་དབུས་མེད་དུ་མར་བྲལ། །གང་ཡང་མ་ཡིན་དེ་བཞིན་ཉིད། །དབྱེར་མེད་པ་ཡི་ཚུལ་རྟོགས་ཕྱིར། །མཐའ་དང་བྲལ་བའང་དེ་བཞིན་ནོ། །འབྱུང་བ་ཆེན་པོ་ལྔ་རྣམས་ལ། །རང་བཞིན་མེད་བར་གཞིག་པའི་ཕྱིར། །གཅིག་ལའང་ལྔ་ལྔར་དབྱེ་བྱ་ཞིང་། མུཾ་གི་དབྱིངས་སུ་བསྟིམ་བར་བྱ། །མུཾ་ཉིད་སྨྲ་བསམ་ཡུལ་ལས་འདས། །ནམ་མཁའ་གཟུང་དུ་མེད་པ་ལྟར། །སྣང་སྲིད་ཐམས་ཅད་དེ་དང་འདྲ། །བརྟེན་ས་མཉེན་བཀྲུ་གཟུང་མེད་རླུང་། །གསལ་སྲེག་མེ་ལྟར་ཤེས་པར་བྱ། །དེ་བཞིན་ཕུང་པོ་དབང་ཡུལ་ལྔ། །ཉོན་མོངས་ཁ་དོག་ཕྱོགས་སོགས་པ། །དོན་དང་ངོ་བོ་གཅིག་མ་འདྲེས། །དེ་ཕྱིར་དེ་ཡིས་མཚོན་རྟོགས་བྱེད། །གཏན་ཚིགས་གཏན་ཚིགས་བརྗོད་པ་རྣམས། །བསྒྲུབ་བྱ་གང་ཡིན་ཤེས་དོན་ལ། །ངེས་ཚིག་ངོ་བོ་མཚན་ཉིད་སོགས། །གང་ནས་འབེབས་ཀྱང་རྒྱས་པར་བྱ། །ཐམས་ཅད་འཇིག་བྱེད་དམ་ཚིག་དང་། །ཤེས་པའི་དམ་ཚིག་ལྡན་པར་བྱ། །ཐམས་ཅད་མ་ལུས་དོན་འབྱུང་བ། །ཚིག་གིས་མཚོན་ལས་གུད་ན་མེད། །སྒྲ་ཉིད་དོན་གྱི་དངོས་པོ་མིན། །དོན་ཉིད་སྒྲ་ལས་གུད་ན་མེད། །མིང་ཚིག་སྒྲ་ལ་མི་བརྟན་པར། །བློ་ཡི་གཏིང་དུ་གོ་བར་བྱོས། །གསུམ་བཞི་ལུས་དོན་བརྗོད་བྱ་བ། །སྔགས་མཆོག་བླ་ན་མེད་པ་ནི། །མཚན་མ་ཀུན་ཏུ་བརྟག་པར་པར། །མཉམ་པའི་ངང་དུ་ཐམས་ཅད་ཤེས། །ཀུན་ཀྱང་མཉམ་པ་ཉིད་ཡིན་པས། །འཇིག་རྟེན་འདས་དང་འཇིག་རྟེན་པའི། །སོ་སོའི་ལྟ་བ་བརྗོད་མི་བྱ། དགག་ཅིང་བླང་བར་བྱ་བ་མིན། །སྤྱིར་ནི་ལོག་རྟོག་བསམ་ཡས་པ། །ཡེ་ནས་ཡོད་པ་མ་ཡིན་ཏེ། །སོ་སོའི་འཛིན་རྟོག་བག་ཆགས་ཀྱི། །གཟུང་འཛིན་དྲ་བས་བསྒྲིབས་གྱུར་ཏེ། །ཅི་ཡང་མིན་ལས་ཅིར་ཡང་སྣང་། །བྱང་ཆུབ་སྙིང་པོའི་གཞི་ལས་གོལ། །བདེན་མིན་མ་གྲོལ་བཅིངས་པ་དང་། །དུས་དགྲས་འཇོམས་བསླུལ་མི་རྟག་དང་། །འཕགས་ལམ་བྲལ་དང་བཙོན་རར་ཆུད། །སྡུག་བསྔལ་མི་འཇིལ་དགུ་ཕྱིར་འཁྲུལ། །དེ་བས་མཉམ་ཉིད་མ་རྟོགས་པས། །དུག་ལྔ་འཇོལ་སྤྱོད་རྒྱུད་ལྔར་འཁོར། །དགེ་བཅུ་དག་ལ་གཙོར་ལེན་ཅིང་། །དགེ་དང་མི་དགེ་མི་མཉམ་པས། །ལྷ་དང་མི་ཡི་སྐྱེ་གནས་ཏེ། མཉམ་ཉིད་མ་རྟོགས་འདོད་ཁམས་འཁོར། །མཉམ་པའི་དོན་ཉིད་མ་རྟོགས་ཤིང་། །ཚད་མེད་བཞི་དང་བསམ་གཏན་བཞི། །རིམ་པར་སོ་སོར་བདག་འཛིན་ཅིང་། །གཟུགས་རྣམས་ཀུན་ལ་བདག་ཏུ་རྟོག །འདི་ནི་ཚངས་གནས་རིམ་པར་སྐྱེ། །མཉམ་དང་གཟུགས་མེད་མ་རྟོགས་ནས། །མིང་བཞི་མེད་པར་མ་ཤེས་ཏེ། །སྐྱེ་མཆེད་བཞི་ལ་གནས་གྱུར་ན། །སྲིད་པའི་རྩེ་མོ་ས་རུ་སྐྱེ། །རྟག་ཆད་གཉིས་ཀར་གང་གི་བློ་ཞེན་ན། །དོན་གྱི་སྙིང་པོ་ཉིད་ལས་གོལ་བར་གཟུངས། །ས་དགུ་དག་པའི་ཡེ་ཤེས་ནི། ས་དགུ་མ་སྤངས་གནས་སུ་བཅོམ། །གཉིས་མེད་མ་རྟོགས་ཐམས་ཅད་ལ། །བདེན་བཞིའི་དངོས་པོ་ཡོད་ལྟ་ཞིང་། །སྤོང་དང་མི་སྤང་བྱེད་གྱུར་ན། །འདི་ནི་ཉན་ཐོས་ས་པ་ཡིན། །ལས་དང་ཉོན་མོངས་ཐམས་ཅད་ལ། །མཉམ་པའི་དོན་དུ་མི་ཤེས་ཤིང་། །རྟེན་འབྲེལ་རྒྱུ་འབྲས་ཡོད་འཛིན་ན། །འདི་ནི་རང་སངས་རྒྱས་ཀྱི་ས། །མཉམ་པའི་དོན་ཉིད་མི་ཤེས་ཤིང་། །ཀུན་རྫོབ་དོན་དམ་གཉིས་འབྱེད་ལ། །ཆོས་དང་གང་ཟག་བདག་མེད་ན། །འདི་ནི་བྱང་ཆུབ་ས་པ་ཡིན། །བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་དེ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོ་ནི། །རྣམ་པར་བྱ་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །མཉམ་པ་ཉིད་ལས་མ་གཡོས་བཞིན། །ཐབས་ཀྱི་ཕྱག་རྒྱ་ཆེན་པོར་སྟོན། །ཐབས་དང་ཤེས་རབ་རྣམ་པར་དག །ཐམས་ཅད་དག་ཅེས་བྱ་བ་ཡང་། །དངོས་པོ་བསལ་དག་མ་ཡིན་ཏེ། །སྣང་སྦྱོར་ཉིད་ན་རྣམ་པར་དག །དེ་ཕྱིར་ཀུན་རྫོབ་རྫུན་མི་བལྟ། གཉིས་མེད་མཉམ་པར་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོན་ཀུན་རྫོབ་ལྷ། །ངེས་བསྒོམ་བྱ་བ་ལས་ཀྱི་ས། །ལྷུན་འགྲུབ་མཉམ་པ་མ་མཐོང་བས། །ཆོས་ཀུན་རྣམ་དག་ཡེ་ཤེས་ཀྱི། །བྱིན་བརླབས་རྡོ་རྗེ་དབྱིངས་སྤྲུལ་པ། །བླང་དོར་འབྱེད་པ་རྣལ་འབྱོར་སའོ། །ཆོས་རྣམས་མ་ལུས་ཐམས་ཅད་ལ། །བྱ་ལམ་ནམ་མཁའ་གཅོད་བཞིན་གྱིས། །འཛིན་ཆགས་མ་ལུས་ཐམས་ཅད་ཀུན། །མཁའ་ལ་རླུང་ཆེན་འཕྱོ་བ་བཞིན། །ཡིད་ཀྱི་རྟོག་ཆགས་མ་ལུས་པ། །ཆུ་ལ་ཉ་ཆེན་འཕྱོ་བ་ལྟར། །རྣལ་འབྱོར་ལྟ་བ་དེ་ལྟར་ལྟོས། །དེ་ལྟར་དངོས་བརྟགས་དམིགས་ཕྱེ་ནས། །མ་ནོར་དོན་གྱི་གྲུབ་མཐའ་ནི། །ཐེག་པ་མཐོ་དམན་ཐམས་ཅད་དང་། །འཇིག་རྟེན་ལྟ་བ་ཐམས་ཅད་ཀུན། །ཡེ་ཤེས་ཆེན་པོས་རབ་བརྟགས་ན། །རང་བཞིན་མེད་ལས་ཅིར་ཡང་སྣང་། །རང་བཞིན་དབྱིངས་ལས་ཉམས་པ་མེད། །མཉམ་པའི་དོན་ཉིད་ཇི་ལྟ་བུ། །མཉམ་ཉིད་རང་བཞིན་གང་ཡང་མིན། །ཀུན་ཡིན་ངོ་བོ་འདི་འདྲར་མེད། །མཉམ་དང་རྟོག་པ་གང་ཡང་མེད། །བྱང་ཆུབ་སེམས་ཞེས་བརྗོད་པ་ནི། །གང་ནས་མ་འོངས་གར་མི་འགྲོ། །རྟོག་མེད་རང་རིག་ཁོ་ན་ཙམ། །སངས་རྒྱས་སེམས་ཅན་སེམས་ལ་གནས། །བྱང་ཆུབ་སེམས་རྣམས་ཐམས་ཅད་ནི། །ཤིན་ཏུ་བརྟག་དཀའ་གཏིང་ཟབ་པས། །མ་དམིགས་མི་དམིགས་དམིགས་སུ་མེད། །སེམས་ཉིད་དེ་ནི་ཇི་ལྟ་བུ། །བྱང་ཆུབ་དེ་ནི་སེམས་ཡིན་ནོ། །སེམས་དང་བྱང་ཆུབ་དབྱེར་མེད་པས། །སེམས་ཅན་མ་ལུས་ཐམས་ཅད་དང་། །དུས་གསུམ་ཆོས་རྣམས་ཐམས་ཅད་ཡིན། །ཡོད་ལས་བཙལ་ན་སྒྲོ་བཏགས་ཏེ། །སྒྲོ་འདོགས་བརྒྱད་དུ་ལྟུང་བར་འགྱུར། །མེད་ལས་བཙལ་ན་སྐུར་བཏབ་སྟེ། །སྐུར་པ་བཅུ་ཡི་གནས་སུ་ལྟུང་། །ཡོད་མེད་གཉིས་ལས་བཙལ་བྱས་ན། །དེ་སྙེད་ལུང་དུ་མ་བསྟན་འགྱུར། །དེ་ཕྱིར་ནམ་མཁའ་ཡོད་མེད་ཅེས། །བླུན་པོ་རྣམས་ནི་རྩོད་པར་བྱེད། །མཁས་པས་ནམ་མཁའི་རང་བཞིན་ལ། །མེད་པར་མི་འཛིན་ཡོད་མི་འཛིན། །སེམས་ཉིད་ཡོད་མེད་ཀུན་ངོ་བོ། །སྒྲ་ཙམ་བརྗོད་རུང་དོན་ཉིད་ཀྱི། །ངོ་བོ་འདི་ཞེས་བསྟན་དཀའ་ལ། །ཡོད་དང་མེད་ཅེས་ཅི་བྱར་ཡོད། །སེམས་ཉིད་ཡེ་ནས་སངས་རྒྱས་ལ། །དེ་ནི་ལྟ་བ་བཟློག་པའི་ཕྱིར། །གཉིས་མེད་མཉམ་དང་སངས་རྒྱས་དང་། །བདག་ཉིད་ལྷུན་གྲུབ་ཆོས་དབྱིངས་དག །བྱང་ཆུབ་ཆོས་ཉིད་སྟོང་བསམ་འདས། །དེ་བཞིན་ཉིད་དང་སྐྱེ་འགག་མེད། །མཐའ་བྲལ་འདས་དང་གྲོལ་སོགས་སུ། །བླ་དྭགས་ཙམ་དུ་བརྗོད་པ་ཡིན། །ཡེ་ནས་ཚིག་དངོས་ཚིག་ལམ་ཆད། །སེམས་ཉིད་དེ་ཀུན་རང་བཞིན་ལ། །དེ་དག་སྒྲར་བརྗོད་བསྙད་ཅི་ཡོད། །བསྟན་བརྟག་དཀའ་བར་རྒྱལ་བས་གསུངས། །མ་ཆགས་པདྨ་འདྲ་བ་ཡི། །ཡེ་ཤེས་ཅན་གྱི་སྤྱོད་ཡུལ་ཏེ། །ཀུན་དང་ཐུན་མོང་དེ་མ་ཡིན། །དེ་བཞིན་གཤེགས་པའི་སྤྱོད་ཡུན་ཏེ། །སྐྱེས་བུ་བློ་རྩ་རབ་ཀྱིས་རྟོགས། །དེ་ཕྱིར་བློ་ཅན་རྣམས་ཀྱི་བརྩོན། །ཤེས་པའི་མཚན་ཉིད་དངོས་མིང་གྲངས། །ངོ་བོ་རིམ་པས་ཕྱེ་བ་ཡིན། །སྔ་མ་ཁ་ཅིག་མངོན་སུམ་ལ། །དྲུག་གམ་བརྒྱད་ཉིད་གནས་འབྱུང་ཕྱིར། །ཤེས་རབ་དབང་དྲུག་ཚུལ་ནས་བརྗོད། །ངེས་པར་མ་ནོར་མཐོང་བ་ཡང་། །ཡེ་ཤེས་ལྔ་རུ་གསལ་བའི་ཕྱིར། །བརྒྱད་ཀྱི་ངོ་བོ་དེ་ཉིད་དེ། །ལྔ་དང་དམིགས་བྱེད་མེད་པའི་ཕྱིར། །དེ་བས་ཡུལ་མེད་རང་གསལ་བའོ། །དབྱིགས་དང་རིག་པ་གཉིས་མེད་པར། །དེ་བཞིན་ཉིད་དུ་རྡོ་རྗེའི་རིག །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་དེར་སྣང་ངོ་། །ཡང་ཤིང་རྒྱ་ཆེ་ལྷུན་གྲུབ་ནི། །ཕྱི་ནང་སྣོད་བཅུད་ཡེ་ནས་དག །དོན་རྟོགས་ཉིད་ཀྱང་དབྱིངས་ཉིད་ཡིན། །འདི་ནི་རྡོ་རྗེ་མཉམ་ཡིན་ནོ། །ཤེས་དང་སྤྱོད་ཡུལ་གཉིས་མེད་པས། །ཐམས་ཅད་མ་ལུས་གཅིག་པའི་ངང་། །མ་འདྲེས་ཡོངས་རྫོགས་གསལ་སྟོང་གཟུགས། །ལྟ་དང་ལྟ་བར་བྱ་མེད་པར། །ཕྱོགས་བཅུའི་ཞིང་ཁམས་ཐམས་ཅད་མཐོང་། །གང་དུའང་མ་མཐོང་སྤྱན་གྱི་མཆོག །ཁྱབ་གསལ་རང་བཞིན་གོ་བའི་སྒྲ། །ཐོས་པ་མེད་པར་ཐོས་པའི་ཕུལ། །དང་བས་ཚིམ་བྱེད་ཆོས་ཀྱི་དྲི། །སྣོམ་བྱེད་མེད་པར་ཚོར་བའི་ཤངས། །དོན་བཅུད་ཉམས་སུ་མྱོང་བའི་རོ། །མྱོང་བའི་བྱེ་བྱེད་མེད་ཉིད་མྱོང་། །ཡང་དག་དོན་ལ་རེག་པ་ཉིད། །རེག་པ་ཀུན་དངོས་རེག་དང་བྲལ། །ཆོས་ཁམས་སྣ་ཚོགས་ཀུན་མཁྱེན་པ། །རང་རིག་རྒྱལ་པོ་རང་སྣང་ངོ་། །དེ་བས་བདག་འཛིན་རང་གསལ་བ། །བདག་བཅས་བདག་དང་བྲལ་བའི་ཡིད། །དོན་དང་སེམས་ཅན་རྟོག་མེད་གསལ། །རང་བྱུང་ཡེ་ཤེས་ཐམས་ཅད་མཁྱེན། །ཡང་ནི་རིམ་པས་དོན་གྲངས་བརྗོད། །དོན་དམ་ཀུན་རྫོབ་གཉིས་མེད་མཐོང་། །མངོན་བྱས་རིམ་པས་རྟོགས་གོ་རིམ། །རྣམ་བཞིའི་ལམ་དང་སྒོ་བཞི་དང་། །བསྙེན་སྒྲུབ་ལམ་གྲངས་ཉམས་གཡོ་ཐོབ། །གོམས་བརྟན་མཐར་ཕྱིན་རིམ་པར་འབར། །མཉམ་ཉིད་ངང་ལས་མི་སྐྲག་པས། །མངོན་བྱས་ངེས་པའི་ཤེས་རབ་དང་། །རྣམ་པ་ཀུན་ལྡན་སྟོང་ཆེན་མཐོང་། །རང་རིགས་ཡེ་ཤེས་སྙིང་རྗེར་གཟིགས། །ཕྱག་རྒྱ་གཅིག་སྐུ་འབྲས་བུར་བལྟ། །ཐམས་ཅད་གསལ་བའི་ལྟ་བ་དང་། །བར་ཆད་མེད་པའི་ཚོགས་ཆེན་མཐོང་། །དབང་སྒྱུར་མཉམ་ཉིད་མི་གཡོ་བ། །ཡེ་ཤེས་ཀུན་མཁྱེན་ལྟ་བ་དགུ །ཐོས་བསམ་སོ་སོར་རྟོག་གོམས་དང་། །རྣལ་འབྱོར་རིམ་པའི་རྒྱུ་ལས་སྐྱེས། །དེ་བས་ཤེས་རབ་གསུམ་ལ་འབོད། །རྒྱུད་དོན་གཟུངས་ཀྱི་ཟིན་པ་ནི། །དམ་ཚིག་དམ་ཚིག་ཅེས་བྱ་བ། །རང་གི་ལྟ་བ་དམ་ཚིག་ཡིན། སྡོམ་པ་རྣམ་པ་བཅུ་གསུམ་དང་། །སྤྱི་ཡི་དམ་ཚིག་མཐའ་ཡས་པ། །ཐིག་ལེ་ཆེན་པོའི་ངང་དུ་གསལ། །ཇི་ལྟ་སྤྱོད་ཀྱང་སྡོམ་མི་འདའ། །སྤྱོད་པ་རྣམ་པ་གཉིས་པོ་ཡང་། །ཐིག་ལེ་ཆེན་པོའི་ངང་དུ་ངེས། །ཅི་ལའང་མི་གནས་ཀུན་ལ་སྤྱོད། །སྤྱོད་པར་བྱེད་དང་སྤྱད་མེད་མཐོང་། །བྱ་བྱེད་མེད་པའི་ཚུལ་གྱིས་སུ། །ཀུན་ལ་ཐོགས་པ་མེད་པར་སྤྱོད། །བཞི་ཡི་ལས་དང་གཅིག་པུ་ཡང་། །ཐིག་ལེ་ཆེན་པོའི་ངང་དུ་གསལ། །མཆོད་པའི་རྒྱན་དང་ལོངས་སྤྱོད་ཀུན། །རིག་པ་བྱང་ཆུབ་སེམས་ཆེན་པ། །ཆོ་འཕྲུལ་ཆེན་པོའི་ངང་དུ་འདུས། །ཕུལ་བ་མེད་པར་ཐམས་ཅད་མཉེས། །གཞལ་ཡས་ཁང་དང་དཀྱིལ་འཁོར་དང་། །ཁྲོ་ཚོགས་འདུ་འཕྲོ་མང་པོ་ཡང་། །སེམས་ཀྱི་ཆོ་འཕྲུལ་ཆེན་པོ་ཡིན། །དེ་བས་རྣམ་བདུན་རིག་པའི་ངང་། །ཆོས་རྣམས་མ་ལུས་ཐམས་ཅད་ཀུན། །རང་བཞིན་ངང་གིས་བདག་ཉིད་ཕྱིར། །དབང་ལྔ་མ་བཙལ་ལྷུན་གྱིས་རྫོགས། །བཅོ་བརྒྱད་རང་རིག་ཆོ་འཕྲུལ་སྣང་། །ཨེ་མའོ་མ་བསྒྲུབས་གྲུབ་ཆེན་པོ། །གྲུབ་པ་ཆེན་པོ་ཡེ་ཤེས་ཆེ། །དོན་དུ་གཉེར་བའི་རྣམ་གྲངས་ཀུན། །རང་རིག་བྱང་ཆུབ་སེམས་ཆེན་པོ། །ཏིང་འཛིན་ལྟ་བའི་བྱེ་བྲག་ཀུན། །རང་རིག་སྣང་ཕྱིར་ཆུ་བུར་དང་། །ནམ་མཁའ་ལྟ་བུའི་རང་བཞིན་པས། །རང་རིག་ཡེ་ཤེས་ཉིད་ལས་མིན། །སྔགས་དང་ཕྱག་རྒྱའང་སེམས་ཉིད་ཕྱིར། །བྲག་ཅ་ཆུ་ཟླ་འདྲར་ཤེས་ན། །འཆིང་བརྗོད་ལས་ཉིད་མྱ་ངན་འདས། །དེ་བས་བྱ་བྱེད་མཉམ་ཉིད་རྟོགས། །ལྟ་བ་ལྟ་བ་གཙོར་བརྗོད་མོད། །དོན་དུ་ཤེས་རབ་ཀུན་མཉམ་ཉིད། །དེད་དཔོན་རིན་ཆེན་ཇི་བཞིན་དུ། །གདོད་ཐའི་བྱེ་བྲག་འདིར་ཤེས་དགོས། །ཤེས་རབ་རྟོགས་པ་གཉེར་ཆུབ་ཚེ། །བདག་དང་གཞན་ཕྱིར་བྱ་བ་རྣམས། །ཤེས་པའི་གཞི་ལ་ཀུན་ཀྱང་སྤྱོད། །ཐོས་བསམ་བཅུ་སྤྱོད་ཆེད་དུ་གཉེར། །འདི་ཡང་རྒྱལ་པོའི་ས་ཁམས་དང་། །སྟོབས་ཅན་རྩལ་སྒྱིད་དྲག་ཞན་དང་། །མཁའ་ཡུལ་ཆེ་ཆུང་ཇི་ལྟ་བ། །གཞི་གཅིག་སྟོབས་ཀྱིས་ཁྱད་པར་འགྱུར། །ཡེ་ནས་དབྱིངས་སུ་རོ་གཅིག་པས། །དེ་ལ་ང་དང་བདག་མ་རྟོག །རང་བཞིན་རྣམ་པར་དག་པ་ལ། །གཙང་དང་དམེ་བའི་བློ་མ་བྱེད། །ཐམས་ཅད་བདེ་གཤེགས་སྙིང་པོ་བས། །རྐྱེན་གྱི་རྡུལ་གྱིས་གལ་ལ་འགོ །ཤེས་རབ་མཆོག་གིས་དེ་ལྟར་རྟོགས། །མ་ལུས་ཀུན་འདུས་དབྱིངས་ཤེས་བྱོས། །དེ་བས་ཤེས་པར་བྱ་བ་རྣམས། །དམ་ཚིག་སྡོམ་བའི་ངོ་བོར་བྱེད། །བདག་དང་གཞན་གྱི་གཙོར་བྱེད་ཀྱི། །དང་པོའི་སྡོམ་པ་ཀུན་ཀྱང་སློབ། །ཤེས་རབ་ཆེན་པོའི་སྦྱིན་སྲེག་གིས། །སྲིད་གསུམ་སྲེག་པའི་མི་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །རཾད། ཀུན་ཀྱང་ཆོད་ཉིད་ངང་དུ་བསྒྲལ། །གདོད་མཐར་ལམ་གཉེར་སྤྲོས་གཅོད་ཅིང་། །གྲུབ་པ་བགྲོད་ནས་འཇུག་པ་ཡང་། །བདག་གཞན་ཆོས་ཕྱིར་དམ་བཅས་པས། །བདག་ཉིད་ལ་ཡང་གཞན་དོན་རྫོགས། །དེ་བས་བྱིས་པ་མི་མཚུངས་ཏེ། །ཀུན་ལམ་སྐབས་ལས་ཤེས་པར་བྱ། །གང་ཞིག་འདི་འདྲར་མཐོང་རྟོགས་པ། །དངོས་གྲུབ་མཆོག་གི་སྙིང་པོ་ནི། །ཆུ་སྲིན་ཕྱག་རྒྱ་ཇི་བཞིན་དུ། །དང་པོ་དོན་རྟོགས་མཐའ་མི་གཏོང་། །སྤྱོད་ཡུལ་ཀུན་ཏུ་ཚད་དཔག་མེད། །ཀུན་ནས་ཉོན་མོངས་སྤྱོད་པའང་གྲོལ། །ཐུན་མོང་ལམ་གཉིས་དེ་བཞིན་པས། །རྣམ་སྨིན་གཉིས་མེད་ཚོགས་གཉིས་རྫོགས། །གང་གིས་དེ་ལྟར་རྟོགས་གྱུར་པས། །སྒྲོ་སྐུར་མཐའ་གསུམ་ལས་གྲོལ་ཏེ། །འཇུག་པའི་དོན་རྣམས་འབྱིན་པར་བྱེད། །དེ་བས་བདག་གཞན་ཆོས་དོན་རྫོགས། །རྒྱ་ཆེ་ཟབ་ཡངས་ཤེས་རབ་མྱུར། །ཟབ་པའི་དོན་རྟོགས་མི་ལྡོག་བདེ། །ང་དང་བདག་མེད་ཡངས་པ་བདེ། །བརྩོན་པས་རྟོགས་པ་ལྷུན་བྱེད་ན། །དབང་ཐོབ་བདེན་མཐོང་མཚན་མཐོང་ཞིང་། །རྩ་བའི་དྲོད་ལས་ཡན་ལག་ཀུན། །ཤུགས་ཀྱིས་འབྱུང་བར་ཐེ་ཚོམ་མེད། །དེ་ལ་མཚན་མ་འབྱུང་བ་ནི། །སྟོབས་ཀྱིས་རྟོགས་པའི་ཀླུང་ལྡན་ལ། །འཕོ་འགྱུར་མཐོང་ཡང་འཇིགས་མེད་ཅིང་། །འཁྲུལ་པའི་ཁམས་ལ་སྐྱོ་བ་མེད། །གྲུབ་པའི་གནས་ལ་མི་སྨོས་ཏེ། །འདོད་པའི་ལོངས་སྤྱོད་མཉམ་པར་སྦྱོར། །སྡུག་བསྔལ་ཉོན་མོངས་བཟོད་ཆེན་ཏེ། །ལས་རྣམས་གང་ལའང་ཁུར་མི་བལྟ། །ཏནྟྲའི་ལུགས་དང་འགལ་མེད་སྤྱོད། །ཐ་མལ་སྤྱོད་པས་ལྷག་པར་འགྱུར། །སྤྱོད་པ་རྒྱུན་གྱི་ཚོགས་གཉིས་རྫོགས། །མདོ་སྨོས་ཐ་དད་བརྗོད་མི་ལང་། །རྒྱ་མཚོ་དྭངས་བའི་གཟུགས་བརྙན་ལྟར། །སྒྲ་བརྟན་ཡིན་ལ་བྱེད་མིན་པར། །རང་རིག་མངོན་སུམ་དམིགས་བྲལ་བར། །རང་གསལ་གསུམ་དྲལ་མི་བསྒྲུལ་བར། །ངེས་པར་གདེང་དུ་གང་བྱས་པ། །ཐོས་བསམ་བརྟན་པའི་ལྟ་མཐར་ཕྱིན། །འོན་ཀྱང་ས་དང་ས་ཡི་རིམ། །དབང་པོ་དང་བའི་སྤྱོད་ཡུལ་ལ། །ཉི་རིང་དྲུང་བཞིན་སྟོབས་འཕེལ་བས། །རྒྱུ་རྐྱེན་གོང་འོག་འབྲས་བུར་འབྲེལ། གསལ་བའི་བྱེ་བྲག་རིམ་པར་འགྲོ། །དེ་ཆས་སྐབས་མིང་བརྗོད་དངོས་གཅིག །གོང་གི་དོན་ལྟར་མ་རྟོགས་པའི། །བློ་ངན་མཉམ་པར་ཁུངས་ཕྱུང་ནས། །མ་རྟོགས་ལེ་ལོ་སྙོམས་ལས་བྱས། །དོན་མ་གྲུབ་པར་ངན་སོང་འགྲོ། །སེམས་ཀྱི་མཉམ་པ་མ་རྟོགས་ན། །ཚིག་གི་མཉམ་པས་འཚང་མི་རྒྱ། །དེ་བས་དོན་ཚིག་ལྡན་པར་བྱོས། །འོན་ཀྱང་ཐེ་ཚོམ་མེད་པར་འགྲུབ། །སྤྱན་བཟང་ལམ་ཞུགས་ཇི་བཞིན་དུ། །ལམ་ཀུན་ཟག་ཅིང་འཆིང་བའི་རྒྱུ། །དོན་དུ་མི་འགྱུར་ཕྱིར་ན་བརླག །དེ་བས་དོན་ལ་འགྲུབ་པར་གྱིས། །དེ་ལྟར་དོན་མཐོང་གང་དང་གང་དག་གིས། །གཞན་དུ་མི་བསམ་དེ་ལ་འདྲིས་པར་བྱ། །སྐྱེས་བུ་དམ་པ་མཆོག་འདོད་པས། །དེ་ལ་རྟག་འགྲུས་གསལ་བར་གྱིས། །ལམ་ཤེས་ལམ་འཇུག་ཇི་བཞིན་དུ། །འཇུག་པ་རྣམས་དང་རྒྱུ་འབྲས་ཚུལ། །རང་གནས་མཐོང་བའི་ལེའུ་སྟེ་གཉིས་པའོ། ༈ །བདག་ཉིད་དང་ཆེན་རྟོགས་པས་མོས། །དེ་རྗེས་གོམས་བྱེད་བཤད་པར་བྱ། །སྔ་མ་ལྔ་མ་གང་དང་གང་། །ཕྱི་མ་ཕྱི་མའི་ཐབས་དང་རྒྱུ། །དེ་བཞིན་ཕྱི་མ་ཕྱི་མ་གང་། །སྔ་མ་སྔ་མ་ལས་བྱུང་འབྲས། །དེ་ལྟར་རྒྱུ་འབྲས་ཐབས་འབྲེལ་བ། །སྲིད་པ་འཁོར་ལོའི་ཚུར་བཞིན་དུ། །དབང་པོ་བརྩོན་འགྲུས་བཟང་ངན་གྱིས། །རྣམ་པར་དབྱེ་བའི་ལུས་གཉིས་བསྟན། །སྲིད་པ་རྫོགས་པར་སྨིས་ཚུལ་དུ། །ལྷག་པའི་གདེང་ལྡན་སྐྱེས་བུ་ཡིས། །སྒོམ་པ་རྣམ་བཞི་ཟུང་ལྡན་པར། །གདོང་མ་ཉིད་ནས་གོམས་པར་བྱེད། །ཐིག་ལེ་ཆེན་པོའི་ངང་ཉིད་ལ། །སྒོམ་པ་རྣམ་གསུམ་དུས་གཅིག་རྫོགས། །དེ་ནི་དེ་བཞིན་ཉིད་ཀྱི་དབྱིངས། །དེ་ནི་ཀུན་ཏུ་སྣང་གི་ངང་། །དེ་ནི་རྒྱུ་ཡི་རིམ་པར་ལྡན། །ཚོགས་བརྒྱད་ཡེ་ཤེས་ལྔར་རྟོག་པས། །ཏིང་ངེ་འཛིན་གྱིས་དབང་བསྒྱུར་ནས། །ཡེ་ཤེས་ལྔ་རུ་གསལ་བ་ཉིད། །ཐུགས་ཀྱི་ཕྱག་རྒྱ་ཆེན་པོའོ། །མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་འགྱུར་བས། །འདས་ན་སངས་རྒྱས་མ་ཡིན་ནོ། །ཡང་ན་དམ་ཚིག་འདི་ལྟ་བུ། །ཇི་ལྟར་སྤྱོད་ཀྱང་སྡོམ་མི་འདའ། །བྱེད་སྤྱོད་ཚོགས་ཆེན་གཉིས་སུ་འགྱུར། །འགྲོ་དང་འདུག་དང་ཉལ་བ་ན། །མ་ཉམས་དེ་ཡི་དབྱིངས་སུ་གནས། །ཤེས་རབ་མཆོག་གིས་རྟག་ཏུ་སྤྱོད། །དབྱིངས་ཉིད་ལ་ནི་ཉིད་སྤྱོད་ཕྱིར། །དབྱིངས་ཉིད་མཆོག་གི་གནས་ལ་སྤྱོད། །དེ་ཉིད་མི་གནས་མྱ་ངན་འདའ། །རྟོགས་པའི་ཡེ་ཤེས་ཡིད་བཞིན་གཏེར། །ཐམས་ཅད་ལ་ཡང་མེ་ལོང་བཞིན། །བལྟས་ཀྱང་གཟུགས་བརྙན་མི་སྣང་ངོ་། །ཤེས་རྒྱུད་ཅི་ཡིན་གང་གིས་ངོ་ཤེས་ཤིང་། །བྱ་བྱེད་ལས་འཕགས་གྱིན་འདར་འདུག་བྱེད་པ། །གང་ཞིང་བློ་ལ་སྤྱོད་པས་བྱང་ཆུབ་འཆོར། །རྣམ་པར་དག་པའི་གཡུང་དྲུང་སངས་རྒྱས་ལ། །ཐམས་ཅད་ཡེ་ནས་མཉམ་པར་རྣམ་དག་ཅིང་། །མི་རྟོག་སལ་ལེར་གནས་ལ་རྟོག་པ་མཛད། །བསྙད་དུ་མེད་པས་སྣ་ཚོགས་འབྱུང་བ་ཡིན། ། བདག་མེད་བདག་ཆེན་ཐམས་ཅད་འབྱུང་བའི་གཏེར། །མ་བཀག་པ་ལས་རྒྱུ་ཞིང་འབྱུང་མེད་པའི། །རྣམ་རྟོག་ཉིད་ན་ཡེ་ཤེས་རང་བཞིན་ཏེ། །རྣམ་གསུམ་སྣོང་ཞིང་སྟོང་ཉིད་པས། །རྣམ་རྟོག་མི་སྐྱེ་ཡེ་ཤེས་བརྗོད་དུ་མེད། །ཐམས་ཅད་སེམས་ཀྱི་ངང་སྟེ་སེམས་ཞེས་གདགས་སུ་མེད། །མ་བཅོས་ལྷུན་གནས་ཡེ་ནས་བྱང་ཆུབ་ཅིང་། །ཐོབ་རྒྱུ་མེད་པས་ཡེ་ནས་བདེ་གཤེགས་ཡིན། །ནམ་མཁར་བཟུང་བས་སྤྲིན་གྱིས་ཁེབས་པར་འགྱུར། །ནམ་མཁའ་མེད་པར་གང་གིས་ཤེས་པ་ནི། །སྤྲིན་ཞིག་འབྱུང་ཞིག་ཁེབས་པར་མི་སྲིད་བཞིན། །སྒོམ་པའི་སེམས་ཀྱང་དེ་ལྟར་ཕལ་བར་བྱ། །མ་བཅོས་ལྷུན་མཉམ་ཇི་བཞིན་ངང་གཞག་དང་། །རྒྱུ་འབྲས་ལྷུན་གྱིས་གྲུབ་པའི་དཀྱིལ་འཁོར་འགྱུར། །དེ་བཞིན་ཉིད་ལ་གནས་བཅས་ན། །ཉོན་མོངས་སྡུག་བསྔལ་མི་འབྱུང་སྟེ། །རྟག་ཏུ་བདེ་གནས་བྱང་ཆུབ་ཉིད། །མཚན་དང་དཔེ་བྱད་ཀུན་དང་ལྡན། །སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་གཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོ། །དང་པོ་ལམ་ལ་རྟེན་བྱེད་པས། །དེ་བཞིན་ཉིད་དུ་གོམས་བྱ་བ། །སྔོན་དགོས་ཐབས་དང་ངོ་བོ་དང་། །མི་མཐུན་བཅོས་ཉམས་སྤྱོད་དམ་ཚིག །དྲོད་རྟགས་མཚན་ཡོན་འདའ་ཀ་མ། །རང་གི་འབྲས་བུས་རྫོགས་པར་འགྱུར། །སྐྱེས་བུ་སེང་གེ་བཞིན་རྒྱུ་བས། །སྔོན་དུ་རི་མོར་རིམ་པ་རྫོགས། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་ཏིང་འཛིན་ཤེས་རབ་དང་། །བྱང་ཆུབ་སེམས་དང་སྙིང་རྗེ་ལྡན། །ལྷག་པའི་ཡོ་བྱད་ལྔ་རྫོགས་བྱ། །དེ་ནས་མ་ཡི་སེམས་ལྡན་པས། །གནས་དྲུག་ཐར་བར་དགོད་དམ་བཅའ། །ཚངས་པའི་གནས་བཞི་སྔོན་སོང་བས། །ཡིད་འོང་སྐྱོན་མེད་ས་བཙལ་བསླང། །རན་བྱས་བྱི་དོར་ལྡན་བྱས་བསྲུང་། །པི་པར་སྟན་དང་ལྡན་པར་བྱ། །བར་ཆད་བསལ་ཞིང་ལམ་རྫོགས་ཕྱིར། །ཚོགས་དང་སྦྱིན་སྲེག་དཔུང་ཚོགས་འབད། །ཕྱི་ནང་འབྲེལ་ཆགས་ཐམས་ཅད་ཀུན། །གཞན་ཕྱིར་དུར་ཀུན་སེམས་ཀྱིས་དོར། །ཁམས་དང་ཏིང་འཛིན་རྐྱེན་བསྡུས་ལ། །བར་ཆད་བསྲུང་བ་སྔོན་རྫོགས་ནས། །ལོངས་སྤྱོད་རིགས་མའང་ལྡན་བྱས་ལ། །འཚེ་བ་བཟློག་པ་ཉེར་རྫོགས་གཞག ། ཐུན་མོང་སྤྱི་ཡི་སྔོན་རྫོགས་ནས། །མཆོད་རྟེན་ཉེ་བའི་གཟུགས་བརྙན་བཞུགས། །ཡན་ལག་བརྒྱད་པའི་ཚུལ་བཟུང་ནས། །ཡོངས་གྱུར་ཐིམ་བྱས་རྗེས་ལ་འཇུག །དག་པ་རྣམ་གསུམ་མ་ནོར་ཞིང་། །རང་རིག་རྒྱལ་པོ་གོམས་པ་ཡིས། །བྱང་ཆུབ་མཆོག་འདི་རྙེད་པར་འགྱུར། །དེ་ཕྱིར་མཐོང་རྗེས་དེ་བཞིན་ཉིད། །སྙིང་རྗེ་འབྱུང་བའི་གཞི་རུ་གཞག །གོ་རིམ་འབྱུང་བའང་དེ་བཞིན་ངེས། །གང་དག་སྐལ་ལྡན་ཅུང་དམན་པས། །གཞན་སེལ་ཕྱིར་དང་དོན་གཉེར་ཕྱིར། །འཇུག་པའང་སྔ་མ་གཉིས་དོན་དུ། །མ་རིག་འཁྲུལ་པའི་འདམ་དབྱིངས་སུ། །ཡེ་ཤེས་སྒྲོན་མའི་མདའ་འཕངས་ནས། །གཏི་མུག་མུན་པ་རྣམ་བསལ་ཏེ། །རང་བཞིན་འོད་གསལ་བདེ་བའི་མཆོག །མདོར་ན་སྒྲིབ་ཚོགས་མུན་སྣང་ཚུལ། །ཆོས་དབྱིངས་མཁའ་དཀྱིལ་ཡངས་པ་ལ། །ཤེས་རབ་མྱུར་དུ་དོན་འགྲོ་བ། །འགྲོ་མེད་འོང་མེད་མི་གནས་པ། །བྱང་ཆུབ་སེམས་མཆོག་ཨ་རབ་བདེ། །མུན་སྣང་དུག་རྩིའི་ཚུལ་བཞིན་དུ། །རྟོག་པའི་དབང་སྒྱུར་ཏིང་འཛིན་ཡིན། །དོན་དུ་གཉེར་བ་གང་དག་ཀུན། །ཏིང་འཛིན་འདི་ཡིས་བྱེད་པར་འགྱུར། །གལ་ཏེ་རྣལ་འབྱོར་འདི་མེད་ན། །རྒྱ་མཚོའི་འཇིང་གི་ཕ་བོང་ལྟར། །བསྐལ་པར་ལམ་ལ་བཙལ་བྱས་ཀྱང་། །དོན་མེད་སྙིང་པོ་བསྐམས་པ་ཡིན། །དེ་ཕྱིར་ལྷག་མ་ཆ་བསྙམས་པའི། །བདེ་ལྡན་བྲོད་པས་ཆོས་བདུན་ཚུལ། །ལྡན་བྱས་རྗེ་བཙུན་རྣམ་སྣང་བཞིན། །འཛིན་རྩོལ་མེད་པའི་སེམས་ཀྱི་འཇུག །དེ་ཡང་གདམས་ངག་ཤེས་རབ་ཀྱི། །སྟོབས་ཀྱིས་གཞག་པས་གོམས་པས་བྱེད། །སྔོན་བརྗོད་བུ་དེས་དབེན་པའི་སར། །རིན་ཆེན་ལྷབ་ལྷུབ་ལོངས་སྤྱོད་ཀྱིས། །མཉེས་བྱས་བུ་དེ་པང་དུ་བཞག །བགེགས་བསྐྲད་སྦུབས་མཆུས་ཤིབ་བུར་བསྟིམ། །དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་མི་དམིགས་དབྱིངས་བསྒོམ་བྱ། །ཕྱི་མ་སྤྱི་བླུགས་མཐོང་རྗེས་གཞག །བདག་དང་བདག་གི་གཞན་རྣམས་ནི། །ཤིན་ཏུ་མི་དམིགས་དབྱིངས་སུ་བསྒོམ། །རང་རིག་ཉིད་ལ་གནས་པ་ནི། །སུས་ཀྱང་མ་བྱས་རང་བྱུང་སྟེ། །ཐམས་ཅད་དེ་བཞིན་ཉིད་དུ་སྦྱོར། །གཉིས་མེད་དབྱིངས་ཀྱི་ངང་དུ་ཐིམ། །རང་བྱུང་ཡེ་ཤེས་དཀྱིལ་འཁོར་གྱིས། །མ་ལུས་དེ་བཞིན་ཉིད་དུ་སྡུད། །སྡུག་དང་མི་སྡུག་གཉིས་ཀ་མིན། །ཡང་དག་ཁོ་ན་ཉིད་དུའོ། །བསྒོམ་བྱ་སྒོམ་བྱེད་མ་སྐྱེས་ན། །ཆོས་ཉིད་བསྒོམ་པར་བྱ་བའང་མེད། །དོན་དམ་བསྒོམ་པར་བྱ་མེད་པས། །གང་ལའང་མི་འཇུག་ཞུགས་པའི་མཆོག །བསམ་བྱ་བསམ་པར་མི་བྱ་སྟེ། །མི་བསམ་པར་ཡང་ཡོང་མི་བསམ། །གང་ལ་རྣམ་པར་མི་སེམས་པ། །དེ་ནི་རང་རིག་མཉམ་ཉིད་དོ། །བྱང་ཆུབ་སེམས་ཀྱི་དེ་བཞིན་ཉིད། །ཤིན་ཏུ་མི་དམིགས་བརྟག་དཀའ་བ། །ཡངས་ལ་རྒྱ་ཆེ་གཏིང་ཟབ་པས། །ཤེས་རབ་ཟབ་པས་རྟོགས་འགྱུར་ཏེ། །གང་ནས་མ་འོངས་གར་མི་འགྲོ། །འགྲོ་དང་འོང་བར་བྱ་བར་མིན། །ཤིན་ཏུ་བརྟག་དཀའ་མི་དམིགས་པས། །མཐའ་དང་དབུས་ཀྱང་བརྟག་ཏུ་མེད། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་དེར་སྣང་ངོ་། །དབྱིངས་དང་དབྱིངས་ཀྱི་ཡེ་ཤེས་ཀྱང་། །རང་རིག་ཁོ་ན་ཙམ་དུ་ཟད། །གང་ཞིག་དམིགས་ནས་འཇུག་པ་ནི། །དེ་སྲིད་འཇིག་རྟེན་རྒྱང་ཕན་པ། །འཇུག་མེད་སངས་རྒྱས་ཡིན་པར་ནི། །དབང་པོ་ཉིད་དང་ཀུན་གྱིས་གསུངས། །ངེས་པར་བསམ་ཞིང་དམིགས་ཡོད་ན། །ཕྲ་རབ་འཐེན་ཐག་འཛུད་ལྟ་བུས། །དེ་བཞིན་ཉིད་དེ་མི་མཐོང་སྟེ། །འཐེན་ཐག་འཛུད་བས་མཁའ་བཞིན་ནོ། །རྣལ་འབྱོར་མཉམ་པ་དེ་བཞིན་ཉིད། །ངོ་བོ་བཞིན་དུ་གྲངས་འཇུག་ཅིང་། །ངེས་ཚིག་རྣམ་པར་འབྱུང་བ་ཡིན། །དེ་བས་ཀུན་ལ་འབྱོར་བར་གྱིས། །ཆེན་པོ་དམན་པས་མཐའ་བསལ་བའི། །མ་སྐྱེས་དེ་བཞིན་ཉིད་སྟོང་པ། །གདོད་སྟོང་སྟོང་པའི་ཐ་སྙད་བྲལ། །སྤྲོས་པ་བརྒྱད་བྲལ་འདོད་མ་ཡིན། །གང་གིས་རང་སེམས་མཐའ་དྲི་མ། །མེད་པའི་དེ་བཞིན་དག་པ་ཉིད། །རྣལ་འབྱོར་མཚན་མེད་དེ་བཞིན་ཉིད། །གཉིས་མེད་ལྷུན་མཉམ་དེ་བཞིན་ཉིད། །གྲངས་བཞིའི་རིམ་པ་ཐ་མ་ཉིད། །བྱིན་རླབས་ཡོན་ཏན་ངོ་བོས་བླ། །བླ་མའང་སྐབས་མིང་མཉམ་ཉིད་དང་། །ལྷུན་གྲུབ་མཐའ་བྲལ་ཐ་སྙད་མེད། །སྟོང་ཆེན་མ་སྐྱེས་ཆོས་དབྱིངས་སོགས། །ཡོན་ཏན་ཆ་རེ་བརྗོད་པར་ཟད། །དེ་རེའང་སྐབས་ཀྱི་ངོ་བོ་དང་། །མིང་དོན་ངེས་ཚིག་བརྗོད་པ་ཡང་། །གཏན་ཚིག་ཡན་ལག་དུ་ལྡན་པ། །རྣམ་གསུམ་ཕྲུགས་པར་འབྱུང་བ་ཡིན། །ལྷག་པའི་དོན་མཆོག་གང་ཡིན་པ། །དངོས་རྣམས་ཉིད་ན་དངོས་མེད་པས། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཉིད་རང་གསལ་མི་གཡོ་བ། །ཞི་གནས་ལྷག་མཐོང་ཟུང་དུ་འབྲེལ། །ཐམས་ཅད་ཤེས་རབ་དབྱིངས་ཉིད་དེ། །དབྱིངས་ལ་དབྱིངས་ནི་རྣམ་པར་སྦྱར། །ཤེས་རབ་དབྱིངས་ཉིད་སྦྱོར་བ་ཡིས། །བྱང་ཆུབ་རྡོ་རྗེ་ཐིག་ལེ་ཡིན། །དེ་ཡང་སོ་སོར་རྟོག་སྒོམ་དང་། །མི་དམིགས་ཤིན་ཏུ་མི་དམིགས་དང་། །རྗེས་སུ་མི་དམིགས་རིམ་པ་ཡིས། །མི་གནས་མི་རྟོག་རློམ་སེམས་མེད། །རང་བཞིན་ངང་གིས་བདག་མེད་པས། །བྱ་བྱེད་གཉིས་ཀ་མི་དམིགས་ཕྱིར། །མཁའ་ལྟར་འདུ་བྱེད་ཀུན་བྲལ་བ། །བསམ་མེད་འདུག་ལ་སྒོམ་ཞེས་བརྗོད། །འདུ་ཤེས་གང་དུའང་མ་ཞུགས་ན། །འདོད་ཆགས་མེད་པས་འདུ་འབྲལ་མེད། །དེ་ལྟར་དེ་ལྟར་མཉམ་བཞག་ཚེ། །གནས་དང་སྤྱོད་ལམ་སྒྲིབ་པ་རྣམས། །ནོར་བར་ཟིན་ནས་མི་འཕྲོག་པར། །བྱ་ཕྱིར་མདོ་ཙམ་བརྗོད་པར་བྱ། །དམིགས་པ་བརྗེད་དང་བྱིང་རྒོད་དྲག་།རྩོལ་དང་མི་རྩོལ་བྱེད་པ་དང་། །དོགས་པ་ལོག་པ་བཅུ་གཅིག་དང་། །ཐུན་མོང་བདུན་ཏེ་བཅོ་བརྒྱད་དོ། །དེ་བཞིན་གཡེང་བ་རྣམ་དྲུག་སྟེ། །ངོ་བོས་གཡེང་བ་རྣམ་ཤེས་ལྔ། །ཕྱི་རོལ་ཡུལ་ལྔར་འཕྲོ་བས་གཡེང་། །བྱིང་རྒོད་རོ་མྱོང་ནང་ཡིན་ཏེ། །གཞན་ཕྱིར་དགེ་སྦྱོར་མཚན་མའོ། །སྙོམས་འཇུག་གཞན་ནམ་ཐེག་པ་གཞན། །དེ་ཡི་ལུགས་ལ་སེམས་འཕྲོ་ཡིད། །ངའོ་སྙོམ་པས་སྙོམས་འཇུག་པ། །གནས་ངན་ལེན་པར་ཐེ་ཚོམ་མེད། །དྲན་འབྱུང་རྗེས་སུ་འབྲང་བ་དང་། །འགོག་དང་ཐེག་ཟུག་ཕྱལ་བ་དང་། །ཆེད་དུ་གསུམ་འཆོས་ཡིད་ལ་བྱེད། །མྱོང་དང་འདུ་ཤེས་གནས་དམིགས་དང་། །སྡུད་དང་མངོན་བྱེད་རེ་བ་མང་། །སྒྲིབ་པ་ལྔ་བཅུ་རྩ་ཡན་ལག །འཇིག་རྟེན་དང་པོའི་བསམ་གཏན་བཞི། །སྙོམས་འཇུག་བཞིར་གོལ་ས་དགུ་སྟེ། །ཐེར་ཟུག་ཆད་པ་ཕྱིན་ཅིང་ལོག །བྱ་བ་མང་ལ་འབྱུང་སྐྱེན་ཞིང་། །ངང་ཐུང་འཁྲུག་དང་དུ་གཤང་ཐོས། །འཁོར་ཞིང་ཁ་དོག་མཐོང་བ་ན། །ཁམས་ལས་གྱུར་པའི་ཆ་ཡང་ཤེས། །དེ་ཡིས་འགྲོ་ཉལ་འདུག་སྡོད་དང་། །ལོངས་སྤྱོད་ཚེ་ནའང་རྣལ་འབྱོར་བྲལ། །ཡེ་ཚེ་དུར་རྐུན་ཉ་གླང་གཉིད། །བརྐམ་ཆགས་ཚོང་སེམས་སྤྲེ་སྤྱོད་སྐྱོན། །དེ་ལྟར་ཤེས་པའི་རྣལ་འབྱོར་པས། །སྤོང་བའི་འདུ་བྱེད་བརྒྱད་བརྟེན་པའམ། །སོ་སོར་ཅུང་ཟད་བལྟ་བྱའམ། །ཡང་ན་རང་བྱུང་རང་ཞིར་བྱ། །ཇི་ལྟར་བྱིན་པ་ཤེད་མ་བྱེད། །བྱ་བྱེད་མང་པོས་གཡེང་བར་གནས། །བྱ་བྱེད་མང་པོ་བདག་མེད་པར། །ཏིང་ངེ་འཛིན་གྱིས་དབང་བསྒྱུར་ནས། །མཚན་མ་མཉམ་པའི་དབྱིངས་སུ་མནན། །དགག་དང་སྒྲུབ་པ་ག་ལ་ཡིན། །ཅུང་ཟད་ཁམས་ཀྱི་ཆ་ཉམས་པས། །མི་གསལ་མཐོང་དང་མི་འཇུག་སོགས། །ཟིན་ནས་སྤྱོད་ལམ་དགའ་བརྟེན་དང་། །མཐུན་པའི་ཆོ་གས་གསོ་བར་བྱ། །སྤྱོད་ལམ་རྣལ་དུ་མ་འབྱོར་པས། །སོ་མཐས་ཆོད་ནས་དོར་བྱ་ཞིང་། །དྲན་པའི་ཐག་པས་བསྡམས་བྱས་ཏེ། །རྣམ་པ་ཀུན་ཏུ་ཉམས་མི་བྱ། །དེ་ལྟར་ནོགས་བརྩོན་ཡུན་རིང་བར། །གནས་པའི་གདོད་མཐར་འཕེལ་བ་ཡང་། །གཡོ་ཐོབ་གོམས་བརྟན་མཐར་ཕྱིན་པ། །མུ་ལྔས་ཡོངས་སུ་རྫོགས་པར་འགྱུར། །གང་དག་གཟར་བོའི་ཆུར་གནས་ཚེ། །ཀུན་བརྟགས་གོམས་པའི་རྫ་མཁན་གྱིས། །མི་སྡོད་འགྲོ་བས་སྐྱོ་བར་བྱེད། །དེ་ཚེ་མགོ་ལ་མེ་འབར་བཞིན། །ཅུང་ཟད་ཡོད་ལ་དེ་དག་ཉུང་། །དེ་ཚེ་དལ་བུས་འབྱུང་འཇུག་བསྲིང་། །དེ་གོམས་ཆེད་དུ་བྱེད་སོགས་ན། །བཏང་སྙོམས་དང་པོ་བླང་བར་བྱ། །རི་བོ་ལྟ་བུར་མི་བསྒུལ་བ། །ཐུན་ཀྱང་ནུས་ནས་སུན་མི་བྱ། །རོ་མྱོང་དོར་བས་དེ་མཐར་ཕྱིན། །ཤུགས་སྣང་མཐོང་ལ་དགའ་བྲོད་མེད། །གཉིས་པ་བར་འགའ་འཆོར་ཐོབ་ལ། །ཁམས་དང་འཆོར་རྒྱུ་བརྟགས་གསོ་དོར། །ཤིན་ཏུ་ཡོན་རིང་བརྩོན་པ་ཡིས། །གོང་ནས་གོང་དུ་འཕེལ་བར་འགྱུར། །བདག་དང་གཞན་ཕྱིར་བྱ་བ་ཀུན། །སློབ་གཡོ་ནས་བཟུང་ལྔ་བའི་བར། །རྣམ་པར་རྟོག་མེད་ཚུལ་གྱིས་ནི། །ཐམས་ཅད་ཀུན་ལ་ཆགས་མེད་རོལ། །སྤྱོད་དགུ་དོར་བའི་གཅིག་ཆ་ཡང་། །མི་དམིགས་མཐུན་པར་སྤྱོད་ཅེས་བྱ། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ལོངས་སྤྱོད་མེད་ལས་ཐམས་ཅད་སྤྱོད། །སྤྱོད་པ་ཉིད་ན་སྤྱོད་མེད་ལས། །ཉམས་པ་མེད་སྤྱོད་ཆགས་མི་བྱ། །མི་འགོག་མི་འཛིན་ཚོགས་གཉིས་ལྡན། །བདག་ཕྱིར་ཀུན་ལ་མི་དམིགས་པར། །རྣལ་འབྱོར་མྱུར་ཐོབ་ཐེ་ཚོམ་མེད། །འགྲོ་ཉལ་འདུག་སྡོང་ལོངས་སྤྱོད་ཚེ། །དེ་ལྟར་སྤྱོད་པས་ཆོས་ཉིད་དུ། །བྱིན་བརླབས་སྒྲོལ་བས་ཅིག་ཤོས་ཏེ། །གང་ཡང་གཞན་ཕྱིར་སེམས་པས་རྫོགས། །གཞུང་ལས་གྲགས་པའི་སྤྱོད་པ་རྣམས། །སྐྱེ་བོ་ཀུན་གྱིས་སྤྱོད་གསུངས་པས། །མོས་སློབ་ཅི་སྨོས་རྐྱེན་མཐོང་བ། །དེ་དག་ཤེས་སྒོམ་གཞི་ལ་སྤྱོད། །ཤེས་འཇུག་ཀུན་ཀྱང་གཞན་དོན་དུ། །ལས་བཞི་སྤྱོད་ཅིང་སྒྲུབ་དབང་ཚེ། །ལས་ཀུན་སྤྱོད་ཅིག་ཆས་བསྒོམས་ནས། །སྤྲོས་པའི་འཁོར་ལོ་མོས་བསྒོམ་ཞིང་། །རང་བཞིན་ཕབ་རྫོགས་མཆོད་བསྙེན་ནས། །ནུས་པའི་བྱིན་ལྡན་རྫོགས་པར་བྱེད། །དེ་ཚེ་སྡོམ་པ་ཐམས་ཅད་ཀུན། །མོས་སློབ་མི་གཏོང་བསྲུང་མོད་ཀྱང་། །ཁྱབ་པར་ཏིང་འཛིན་དམ་ཚིག་ལྡན། །དམ་ཚིག་དམ་ཚིག་ཅེས་བྱ་བ། །ལོགས་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །མི་གཏོང་ཕྱིར་ཡང་དམ་ཞེས་བྱ། །གཟུགས་སུ་གྱུར་པས་དམ་ཞེས་བྱ། །སྔར་ལྡན་དེ་ཡང་འདིར་གོམས་བྱེད། །དེ་བས་རང་སེམས་རྟོགས་བྱས་ཏེ། ལེ་ལོ་གཡེང་བ་ཡོངས་སྤངས་ལ། །ང་དང་བདག་མེད་མཉམ་པར་བསུང་། །དེ་བཞིན་ཉིད་ལས་འདའ་མི་བྱེད། །དེ་བཞིན་ཉིད་ལྡན་དམ་པ་སྟེ། །དེ་ལས་འདས་ན་འཚིག་པར་གྱུར། །སྔ་མ་སྔར་མར་རྫོགས་བྱས་པས། །གོང་མ་གོང་མའི་རྒྱུད་ལྡན་པས། །ཡོངས་སུ་འཕར་གྱི་མངོན་སྤྱོད་མིན། །འཕར་བས་སྤྱོད་ཀུན་མངོན་དུ་རྒྱུ། །དེ་བས་སོ་སོའི་ལྟ་གཞི་ལས། །སྤྱོད་སོགས་ཁྱད་པར་མཁའ་ཡུལ་འདྲ། །ཞིང་ཁམས་དབང་པོའི་ས་ཁམས་བཞིན། །སྟོབས་ནི་སྟོབས་ལྡན་རྩལ་སྒྱེད་འདྲའོ། །དེ་ལྟར་བྱ་བྱེད་མེད་བསྲིངས་ན། །ལུས་ངག་སེམས་ལ་དྲོད་འབྱུང་སྟེ། །བཟོད་པ་ཕྲ་མོ་ཐོབ་པ་དང་། །འགྱུར་བའི་དབུགས་ལ་དབང་ཐོབ་དང་། །དོན་ལ་རྣལ་དུ་ཕེབས་པ་ནི། །ངེས་པར་དྲོད་གསུམ་མྱོང་བའོ། །གཞན་དུ་ཕྱི་རོལ་རྡུལ་ཕྲན་དང་། །ཟླ་ཚེས་ལ་སོགས་མཚན་མ་མཐོང་། །རིག་པ་ཀླུངས་སུ་འབབ་པ་དང་། །འདོད་པའི་ཡུལ་ལ་མི་འཕྲོ་ཞིང་། །འཕྲོ་འགྱུར་དག་ལ་ཉམ་མི་ང་། །ཕྱི་ནང་ཆགས་ཡུལ་ཞེན་པ་ཆུང་། །སྔ་བས་སྤངས་པ་ཉམས་སུ་འབྱུང་། །གཞན་ཡུལ་ཐུགས་རྗེས་སེམས་འཕྲོག་དང་། །ཆོས་བརྒྱད་མཉམ་སོགས་ཕལ་ཆེར་འབྱུང་། །དེ་ཡང་གཡོ་ཐོབ་བརྟན་རིམ་གྱིས། །ཀུན་ཏུ་འཁོར་བར་འབྱུང་བ་ཡིན། །གུ་ལྗོ་མིན་པའི་རིགས་དེ་ལ། །ཕ་མས་ཁྱིམ་ཐབ་ལྷས་བསྟན་ན། །བྲོད་པས་བསུ་ཞིང་ཟང་ཟིན་དག །དོན་དུ་གཉེར་ལ་བརྩོན་པར་བྱེད། །དེ་བཞིན་རྣལ་འབྱོར་བདེ་འཚོལ་བ། །དྲོད་རྟོགས་མཐོང་བའི་ཚུལ་གྱིས། །ཤིན་ཏུ་ལམ་ལ་བརྩོལ་བྱེད་འགྱུར། །དེ་ཕྱིར་འདི་དག་རྗེས་སུ་བསྟན། །ཕྱི་མའང་ལམ་གྱི་སྟོབས་ཆ་ལས། །རྟགས་མངོན་ཆོ་འཕྲུལ་སྣང་བར་འགྱུར། །དེ་ལ་སྔ་མ་ཕྱི་ནང་སྟེ། །ཕྱི་རོལ་ཟད་པར་སྐྱེ་མཆེད་དངོས། །མཐོང་དང་པདྨའི་འོད་སོགས་མཐོང་། །ནང་དུ་བཟོད་ཐོབ་བྱེ་བྲག་དང་། །ཆུ་ལྔ་རྒྱུན་ལམ་བགས་ཀྱིས་བཅད། །མི་འཕྲོག་མྱོས་སྐྲག་དགའ་བྲོད་མེད། །ཤུགས་སྣང་བརྒྱད་པོ་མཐོང་བའང་འབྱུང་། །བཅོ་བརྒྱད་བདུད་ཡུལ་ཆ་ཡང་འབྱུང་། །མངོན་པར་ཤེས་པ་རྣམ་པ་དྲུག །ལམ་གྱི་ཟག་པ་ཡོད་མེད་པ། །སྔོན་ལ་དམིགས་པའི་མངོན་ཤེས་དང་། །ཡོངས་སུ་རྫོགས་པའི་མངོན་ཤེས་དང་། །བར་ཆད་མེད་པའི་མངོན་ཤེས་སོ། །དམིགས་པ་འགའ་དང་འཕེལ་བ་དང་། །ཉི་ཤུ་ལྔ་རྫོགས་ཡུལ་ཁམས་མཐོང་། །གླིང་གྲངས་མཐོང་ཐོས་རིམ་པས་ཕྱེ། །ཕྱི་མ་སྟོང་གསུམ་བརྒྱ་ཡུལ་དང་། །སྟོང་གསུམ་སྟོང་སོགས་ཡུལ་འགྱུར་སོགས། །སྟོང་གསུམ་སྟོང་ཕྲག་བཅུ་རྡུལ་སྙེད། །གྲངས་མེད་བརྒྱ་སྟོང་ཕྲག་བཅུའི་རྡུལ། །དེ་སྙེད་ཡུལ་གྱུར་རྒྱལ་བ་དང་། །མཉམ་པས་ཕྱེ་བས་ལམ་རྫོགས་ཡིན། །དེ་བས་རྒྱུ་ཡི་སེམས་དཔའ་དང་། །སྐལ་མཉམ་ཕྱིར་ན་བརྗོད་པའི་ཚུལ། །ཤེས་པའི་ཁྱད་པར་དགོངས་པ་ཡི། །གཞི་ཡིས་ཕྱེ་བས་རྒྱུ་འབྲས་ངེས། །འདི་ཚེ་རྫུ་འཕྲུལ་རྗེས་བསྟན་དང་། །ཆོས་སྣང་ཀུན་བརྗོད་ཅིག་ཅར་ལ། །རྫོགས་ཀྱི་འདི་ཚེ་འབྱུང་བའི་རྒྱུ། །ཉམས་མཐར་བཞི་ཆ་འབྱུང་སྲིད་དོ། །རྣལ་འབྱོར་གནས་པའི་རྨི་ལམ་ཡང་། །གཅེར་བུར་བྱུང་ཞིང་དྲི་མ་དག །བྱང་ཆུབ་ཆེན་པོའི་མཆོད་རྟེན་མཐོང་། །དམ་པ་མཆོད་དང་དམ་པ་ཡིས། །སྲས་དང་སྤུན་དགོངས་བྱིན་རློབ་ཕྱིར། །རྨི་ལམ་མཚན་མར་བླ་མ་མགོན། །སྣང་བས་དབང་བསྐུར་བྱིན་རླབས་སོགས། །ལམ་དུ་འཛུག་པ་ལྔ་བྱེད་ཅིང་། །བར་ཆད་ལེགས་ཉེས་བརྩོན་ལུང་སྟོན། །དེ་ཡང་བདུད་དང་ཆ་དབྱེ་སྟེ། །བྱིན་རློབ་ལུང་བསྟན་ལྟར་སྣང་བ། །འབྱུང་བས་ཉེས་བྱེད་བདུད་འབྱུང་ཕྱིར། །བདུད་དང་ཆ་བརྟག་ཀུན་ཏུ་གཅེས། །བར་ཆད་བསལ་ཕྱིར་དེ་དག་ཀུན། །བླ་མ་ཉིད་ལས་གཞན་དུ་མིན། །དེ་བཞིན་ཉིད་དུ་མཐོང་གོམས་ན། །དགེ་དང་མི་དགེ་གཉིས་སུ་མེད། །རྣམ་རྟོག་མཚན་མར་ཡང་མི་འཛིན། །རང་བཞིན་ཡེ་ནས་འོད་གསལ་བའི། །དགེ་སྡིག་མེད་པས་ཤིན་ཏུ་བདེ། །བདེ་དང་མི་བདེ་གཉིས་མེད་པས། །ཡེ་ཤེས་ཆགས་མེད་རྣམ་པར་དག །ཐམས་ཅད་དབྱེར་མེད་ཡེ་ཤེས་ཡིན། །སེམས་ཉིད་དང་བས་ཨ་རབ་བདེ། །ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བཞི་བློ་མ་འཛིན། །ཐམས་ཆད་ཆོས་ཉིད་རོ་གཅིག་པས། །གཉིས་སུ་མེད་པས་ཤིན་ཏུ་བདེ། །ཤེས་རབ་ཆུང་ཆེ་ཏིང་འཛིན་གྱིས། །ཐམས་ཅད་མ་ནོར་གཞུང་ལུགས་བཞིན། །འཁོར་བ་མ་སྤངས་སྡུག་བསྔལ་མེད། །གཉིས་མེད་ཚིམ་པས་ཨ་རབ་བདེ། །ཐམས་ཅད་མ་ལུས་གཅིག་པའི་ངང་། །ལྟ་དང་བལྟ་བ་གཉིས་ཀ་མེད། །ཡེ་ཤེས་སྒྲོན་མ་སྒྲེང་བས་ནི། །ཕྱོགས་བཅུའི་ཞིང་ཁམས་ཐམས་ཅད་མཐོང་། །འདི་དང་ཕ་རོལ་གཉིས་མེད་ཕྱིར། །འགྲོ་དང་འོང་བར་བྱ་བ་མིན། །ཡན་ལག་སྟོབས་ཆེན་མ་མཆོངས་པར། །ཕྱོགས་བཅུའི་སྟོང་ཁམས་ཐམས་ཅད་མནན། །འདི་ཚེ་སྤྱོད་ཡུལ་འགྱུར་མཐོང་ན། །གཡེང་བསལ་སྟོང་ཉིད་ངང་ལ་འདུག །དྲན་པས་ལས་ཀྱི་རྒྱུན་བཅད་དེ། །འདོད་ཁམས་ལྷ་མིའི་ཐེག་ཆེན་སྦྱོར། །ཡང་ན་གསང་བའི་གསེར་སྦྲོམ་དུ ། །ཚོན་གང་འོད་དང་ཟླ་བའི་ཧཱུཾ། །རིང་པོར་བརྩེགས་པའི་དམིགས་ཐོབ་ནས། །རླུང་གི་འཕྲོ་འདུས་འོད་བརྡལ་འདུག །སྣང་སྟོང་དབྱེར་མེད་རྣལ་འབྱོར་མཐའ། །མངོན་བྱས་ལྷག་པའི་ཆོས་སྐུར་སྦྱོར། །འབྲས་བུ་ཉིད་ལ་ལམ་ཕྱིར་ཏེ། །ཕྱོགས་མཐུན་བརྗོད་ཀྱི་རིགས་མ་ཡིན། །སྟོང་པ་ཆེན་པོའི་རྣལ་འབྱོར་བསྟན་པའི་ལེའུ་སྟེ་གསུམ་པའོ། ༈ །ཆོས་ཀྱི་སྐུ་ལ་ཕྱག་བཙལ་ཏེ། །སྙིང་རྗེ་ཆེན་པོའི་རྣལ་འབྱོར་བཤད། །རྗེས་སུ་མཐུན་པའི་ལུས་ཉིད་ཀྱི། །ཡན་ལག་སྒོ་ནས་ཤེས་པར་གྱིས། །སྔོན་སྟོང་གོམས་པའི་རྣལ་འབྱོར་པས། །ཁམས་གསུམ་ཐུགས་རྗེས་གཟུང་བའི་ཕྱིར། །ཡན་ལག་བརྒྱད་སྔོན་བཞིན་བྱས་ནས། །ཡེ་ཤེས་སྒྱུ་མའི་སྙིང་རྗེ་བསྒོམ། །བདག་གཉིས་དྲི་མ་བསལ་བ་དང་། །སྟོང་པའི་མདུད་པ་བཤིག་པ་དང་། །གདུལ་བྱ་ས་ལ་དགོད་པ་དང་། །ཕྱག་རྒྱ་གཅིག་པའི་རྒྱུར་བྱ་ཞིང་། །རྣལ་འབྱོར་འདི་ཉིད་གཉེར་བ་དང་། །བདེན་པ་གཉིས་སུ་མི་གཏང་ཕྱིར། །རྣལ་འབྱོར་འདི་ལ་གནས་བྱས་ཏེ། འཇུག་པའི་ཐུན་མཚམས་དུས་ཀྱིས་བྱ། །གང་གི་ཁམས་གསུམ་འདས་པའི་ཆོས། །ཐུགས་རྗེ་ཆེན་པོའི་ཡེ་ཤེས་སུ། །མཐོང་ཐོས་མྱོང་རེག་ཚོར་བའམ། །སོ་སོར་བརྟག་རྒྱུའམ་རྗེས་ལས་ཐོབ། །དེ་ཡི་མ་ལུས་ཆོས་སོ་ཅོག །སྙིང་པོ་ཡོད་པ་མ་ཡིན་ཏེ། །སྒྱུ་མ་མིག་ཡོར་སྤྲུལ་པ་དང་། །སྨིག་རྒྱུ་འཇའ་ཚོན་ཆུ་ཟླའི་ཚུལ། །བདག་དང་འགྲོ་བ་ངོ་བོས་གཅིག །བསལ་དང་བརྟགས་པས་ཐ་དད་ཕྱིར། །གཅིག་དང་ཐ་དད་གཉིས་མེད་པས། །བྱ་མེད་བྱ་བའི་འགོད་མེད་པར། །མཐོང་བ་མ་ཤོར་ཙམ་དུ་བྱ། །རྗེས་སམ་རྟོག་དཔྱོད་སྔོན་འགྲོས་བྱ། །དེ་བས་གཉིས་གོམས་རྒྱུ་གོམས་པས། །དྲན་པ་སྤྱི་བླུགས་ཡེ་ཤེས་གསལ། །སྔོན་དུ་བཏང་བ་གང་ཡང་མེད། །ནམ་མཁས་ནམ་མཁའ་ཇི་བཞིན་དུ། །ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པས། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཐམས་ཅད་ཐབས་ཀྱི་མཚན་ཉིད་དེ། །ཐབས་ལ་ཐབས་ནི་རྣམ་པར་སྦྱོར། །ཐབས་ཆེན་ཐབས་ལས་བྱུང་བ་ཡི། །དེ་ནི་བྱང་ཆུབ་རྡོ་རྗེ་མཆོག །ཐམས་ཅད་དུ་ནི་ཡེ་ཤེས་གསལ། །ཡེ་ཤེས་མ་ཡིན་ཆོས་ཡོད་མིན། །གདུང་འདྲར་མ་བསྒྲལ་དུས་གཅིག་བསྒྲལ། །གསོད་ཆེན་སྙིང་རྗེའི་རང་བཞིན་ཏེ། །མི་འབྱེད་ཕན་རྫོགས་བྱམས་ཆེན་པོ། །མི་འགྱོད་དགའ་མཆོག་འབྲལ་མེད་སྙོམས། །ཚངས་པའི་རྒྱུ་བཞི་དུས་གཅིག་རྫོགས། །མངོན་པར་གདུང་བ་དེ་ལ་མེད། །དེ་ཕྱིར་རྒྱུ་རྐྱེན་འབྲས་བུ་དང་། །དུས་དང་རང་བཞིན་འཁྲུལ་བ་དང་། །ཚུལ་གྱིས་ཉམས་དང་ངོ་བོ་དང་། །བཙོན་ར་ལྟ་བུ་བརྒྱད་ལ་དམིགས། །དེ་ཡིས་གཅིག་ཤོས་བཞི་འབྱུང་བ། །ཕ་རོལ་ཕྱིན་དང་མཚུངས་མ་ཡིན། །དེ་དག་ངོ་བོ་ཉིད་བསྟན་པའང་། །ངོ་བོ་བཞིན་དུ་གྲངས་འཇུག་སྟེ། །དོན་དང་རྣལ་འབྱོར་ངོ་བོ་ཡིས། །ཕྱེ་བས་ཟུང་འགྱུར་ངས་ཚིག་འབྱུང་། །དེ་ལ་ལོག་རྟོག་སྒྱུ་མ་ནི། །ཆོས་དང་བདག་དང་དངོས་པོ་རྣམས། །ངོ་བོ་ཡོད་ལ་སོགས་བརྟགས་པས། །རྟོག་པ་སྒྱུ་མའི་ཀླུང་དུ་གྱུར། །སྐྱེས་དང་མི་བདེན་སླུ་བས་འགྲུབ། །རྟེན་ཅིང་འབྲེལ་བ་ཤིང་རྟ་བཞིན། །འཇིག་རྟེན་རྣམ་རྟོག་གཟུགས་བརྙན་ཕྱིར། །སྒྱུ་མ་ལྟ་བུར་རྐྱེན་ལས་སྐྱེས། །འཕྲལ་སྣང་བྱ་བ་ཀུན་ཀྱང་བྱེད། རྟོག་ཅན་རྣམས་ལ་མཐུན་པར་ཚད། གཟུགས་བརྙན་འདྲ་ཕྱིར་བརྟགས་པས་དབེན། །དེ་ཕྱིར་ཐམས་ཅད་རྫུན་པ་ཙམ། །མིང་ལས་དངོས་མེད་འདོད་མ་ཡིན། །ཡང་དག་ཉིད་དུ་གྲགས་སོ་ཅོག །གཉིས་སྣང་ཉིད་ན་མ་དམིགས་པས། །སེམས་ཕྱིར་ཅིར་སྣང་རྒྱུ་མེད་ཤར། །སྣང་ལ་ངོ་བོ་ངེས་མེད་ཅིང་། །ཇི་ལྟར་བལྟས་པར་སྣང་བ་དང་། །སྣང་བཞིན་ཐེར་ཟུག་ཆད་དང་བྲལ། །རྒྱལ་བའི་སྐུ་ཡང་མ་སྐྱེས་པར། །རིག་པའི་ཡེ་ཤེས་སྒྱུ་མར་ཤར། །ཁམས་གསུམ་པའང་དེ་བཞིན་པས། །ཐབས་ཆེན་སྒྱུ་མ་ཀུན་ངོ་བོ། །ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱང་གསོབ། །རྒྱལ་བ་མངོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །རྒྱུ་རྐྱེན་རག་ལུས་མེད་པའི་ཕྱིར། །སྒྱུ་མ་རྡོ་རྗེ་བཙན་པོ་མཆོག །འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་པའང་རྡོ་རྗེ་ཉིད། །ཡིན་ཕྱིར་ངོ་བོས་ཐ་དད་མིན། །དམན་བ་སྣང་བར་གོམས་བྱེད་ཙམ། །འགྲོ་ལ་སེམས་རྒྱུད་གཉིས་མི་འཆར། །རྒྱུད་གཅིག་མ་སྐྱེས་མ་འགགས་པས། །གཟུང་འཛིན་བྲལ་བའི་རང་རིག་ཉིད། །ཡེ་ཤེས་སྒྱུ་མར་མི་གཡོ་གསལ། །ཆུ་དང་ཟླ་བ་ཇི་བཞིན་དུ། །མཚུངས་པར་གསལ་བ་ངོ་བོར་བརྗོད། །སེམས་ལས་མ་གཏོགས་ཆོས་མེད་ཕྱིར། །ཡེ་ཤེས་སྒྱུ་མ་གཞན་ན་མེད། །སྒྱུ་མ་ཉིད་ཀྱི་ཆགས་བྲལ་བ། །ཐ་སྙད་ཙམ་དུ་བསྒོམ་ཞེས་བྱ། །མི་མཐུན་སྒྲིབ་པའི་དམིགས་གཟུང་བ། རྒྱུ་དང་ངོ་བོའི་ཉེས་པ་ནི། །མ་གོམས་པ་དང་འགྲུབ་བྱེད་པས། །མེ་དང་དུ་བའི་ཚུལ་བཞིན་དུ། །བདག་ཏུ་འཛིན་པ་རྣམ་གཉིས་ཀྱིས། །ཏིང་འཛིན་སྒྲུབ་པ་འབྱུང་བར་བྱེད། །སྔོན་དུ་ཇི་བཞིན་ཉིད་བསྟན་མོད། །མཚམས་སྦྱོར་སྙིང་རྗེ་གཡུང་མི་པས། །བརྗོད་ཀུན་འབྲིང་དང་ཉུང་བར་འབྱུང་། །རྐྱེན་སྤངས་གོམས་པས་ཐ་མལ་དཀོན། །འོན་ཀྱང་འདི་ཉིད་འཕྲོ་སྡུད་དང་། །མ་ངེས་ས་ཕྱོགས་མཁར་བཅས་མཐོང་། །ཟད་པར་མཐོང་དང་མ་ངེས་མདོག །མེ་ཆུ་རླུང་སའི་ཆ་འཁྲུལ་བས། །མི་གསལ་མདོག་མཐོང་ཁམས་འཁྲུལ་བལྟ། །ས་གཡོས་མཐོང་བའང་ཆ་དབྱེའོ། །སྤྲིན་དང་ལིང་ཏོག་མུན་པ་བཞིན། །གང་དེ་གཞུང་ལས་གྲགས་པའི་སྐྱོན། །ཕྲ་རགས་ཆ་ཡིས་སྒྱུ་མའི་དོན། །མི་གསལ་ཤིན་ཏུ་བུལ་བར་བྱེད། །སྔོན་བཞིན་རྟོག་པའི་ནད་བཅོས་པ། །ཤེས་བཞིན་སོ་མཐས་ཆོད་པར་བྱ། །དེ་ལྟར་གྱུར་ན་རྐུན་པོའི་ཚུལ། །མ་བསལ་རང་བཞིན་དང་བར་འགྱུར། །རྣམ་རྟོག་མཚན་མ་ཅི་སྐྱེས་ཀྱང་། །ཡེ་ཤེས་སྒྱུ་མ་རང་སྣང་ཕྱིར། །ཆགས་སྡང་རེ་དོགས་མི་འབྱུང་སྟེ། །ཡེ་ཤེས་སྒྱུ་མ་གཞན་དུ་མིན། །དེ་ལྟར་མ་ལྡན་གང་དག་གིས། །ཚོར་ན་ལོ་རྒྱུས་དཔྱད་པས་ཞི། །ཡང་ན་རྟོག་པའི་གནས་ཡུལ་བལྟ། །དེ་མཐོང་མུན་པ་རྣམ་དག་སངས། །འདོད་མིན་ཁ་དོག་མཐོང་བ་ན། །འབྱུང་བ་བཞི་ཡི་གཉེན་པོས་གཞིལ། །སྔོན་བཞིན་སྔར་འབྲངས་ཕྱིས་སྔོན་བྱེད། །ད་ལྟ་རང་བཞིན་རྐྱེན་གྱིས་འགྱེས། །ཚོར་ན་ཐོག་ཐའི་ཉེས་བསམ་སྟེ། །སྐྱོ་བ་བསྐྱེད་ལ་དོར་དྲན་བཅིང་། །གང་དུ་ཐིམ་ན་ཁྲུས་འཆག་བསང་། །བྲོད་པས་འཇུག་ཅིང་གཟེངས་བསྟོད་བྱ། །དེ་ལྟར་དེ་ལྟར་བརྩོན་གྱུར་པའི། །སྐབས་སུ་ཡེ་ཤེས་རྣལ་འབྱོར་ཉིད། །འཕེལ་བའང་གཡོ་ཐོབ་གོམས་པ་དང་། །བརྟན་མཐར་འགྲོ་བ་ངོ་བོ་ལ། །མེད་ཀྱང་རབ་རིབ་དག་ཆས་བརྗོད། །འབོ་འགྱེས་ཐིམ་པ་རླུང་དྲག་ཆུ། །ཅུང་ཟད་ཐུན་གྱི་སུམ་ཆར་ཡོད། །བཞི་ཆ་ལྔ་ཆར་དེ་མེད་ཐོབ། །ཐུན་རྐྱང་ནུས་ཤིང་གསལ་ལྡན་པ། །ཆུ་ཀླུང་དལ་འབབ་ཚུལ་བཞིན་ནོ། །སྒོ་རྟེན་རྫས་ལྟར་རྟོག་རླུང་གིས། །མི་བསྒུལ་གཞི་ལ་གནས་པའོ། །དབང་པོའི་མངོན་སུམ་གང་བྱས་པ། །བསྐྱེད་དུ་བྱར་མེད་ཕྱིར་མཐའོ། །སྙིང་རྗེ་ཆེན་པོའི་རྣལ་འབྱོར་པས། །སྲིད་གསུམ་སྒྱུ་མ་འདྲ་བར་ནི། །རྫོགས་པའི་བྱང་ཆུབ་མཁས་པས་ཤེས། །འགྲོ་བའི་ཆེད་དུ་གོ་བགོས་ཏེ། །འགྲོ་བ་དེ་ལྟར་སྔ་ནས་ཤེས། །ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །རྗེས་སུ་འཇུག་པའང་དེ་བཞིན་ཤེས། །དེ་བཞིན་ཉིད་དབྱིངས་སྣ་ཚོགས་མང་པོའི་ཐབས་སུ་སྣང་། །ཐབས་ཉིད་སྒྱུ་མ་མིག་ཡོར་ཆུ་ཟླ་གཟུགས་བརྙན་བཞིན། །དེ་ཉིད་རང་རིག་ཡེ་ཤེས་ཆགས་མེད་སྣ་ཚོགས་སྣང་། །ཐབས་དང་ཤེས་རབ་ལྡན་པ་མཆོག་གི་གནས་གྱུར་པས། །ཇི་ལྟར་སྤྱད་ཀྱང་ཟད་མེད་གཉིས་འགྲུབ་སྒྲིབ་མི་འགྱུར། །ཤེས་རབ་ཐབས་ཆེན་མཆོག་ལ་ཡེ་ནས་རོལ་པ་ཡིན། །བྱང་ཆུབ་སེམས་སུ་རྒྱུ་གཅིག་པས། །རྩ་བ་སྙིང་རྗེ་ཆེན་པོ་འབྱུང་། །སངས་རྒྱས་སེམས་ཅན་གཅིག་རྟོགས་ན། །སྙིང་རྗེ་ཆེན་པོ་སྐྱེས་ཤེས་བྱ། །བརྡལ་ཆེན་བློ་ནི་ཀུན་ཏུ་སྣང་། །ཐབས་ཆེན་ཀུན་མཛད་འོད་གསལ་བྱམས། །ཐམས་ཅད་དགྱེས་མཛད་དབྱིངས་མ་གདུང་། །སེམས་ཅན་མ་ལུས་ཐམས་ཅད་ལ། །སྙིང་རྗེའི་ཐག་པ་མ་ཆད་པར། །ཉོན་མོངས་ལས་ལས་སྒྲོལ་བྱེད་ཅིང་། །བྱམས་པ་དག་གིས་མཉེས་པར་གྱིས། །དེ་བཞིན་འཁོར་བའི་བརྩོན་ར་ལ། །སྙིང་རྗེའི་ཞགས་པ་ཆེར་བརྐྱང་ནས། །ཉོན་མོངས་འདམ་ནས་འདྲེན་པར་བྱེད། །སྙིང་རྗེ་ཆེན་པོ་སྐྱོ་མ་བྱེད། །དེ་བཞིན་སྐྱེ་བོ་ཕལ་རྣམས་ལ། །ལས་ཀྱི་སྒྲིབ་པས་མི་གོས་ཤིང་། །ཐམས་ཅད་མངོན་པར་སངས་རྒྱས་པར། །དགའ་བ་དག་ལ་འགྱོད་མ་བྱེད། །སེམས་ཅན་ང་དང་བདག་མེད་ལ། །ཐུགས་རྗེས་གཉིས་རྟོག་མི་འབྱེད་དེ། །བུ་གཅིག་འདྲ་བར་བློ་གཞག་བྱ། །ཐམས་ཅད་དྲི་མ་མེད་པར་བྱ། །སྔོན་རྫོགས་རྐྱེན་འཕྲད་སྔོན་བཞིན་ཏེ། །རྣལ་འབྱོར་ཉིད་ལ་གཞན་དོན་རྫོགས། །དམིགས་པ་བདུན་གཉིས་གདུལ་བྱ་དང་། །ངོ་བོ་ལས་དང་ཕན་ཡོན་གྱིས། །ཕྱོགས་གཏན་མེད་དེ་ཐུན་མོང་གི །ཆེན་པོ་དག་ལས་བླར་འགྱུར་ཡིན། །བདག་ཕྱིར་སྤྱོད་ཡུལ་ཐམས་ཅད་ཀུན། །ཡེ་ཤེས་སྒྱུ་མ་རང་སྣང་ཕྱིར། །ཕྱི་ནང་སྒྲིབ་མེད་གསལ་བའི་ངང་། །ཡེ་ཤེས་བློ་བརྟན་ཤིན་ཏུ་བདེ། །ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བའི་བློ་མ་བྱེད། །ཐམས་ཅད་ཡེ་ཤེས་རོ་གཅིག་པས། །གཉིས་སུ་མེད་པས་ཤིན་ཏུ་བདེ། །དེ་བས་སྤྱད་དང་མི་སྤང་ལེན། །འདོད་ཡོན་ལྔ་སོགས་ཡེ་ཤེས་རོལ། །ཐུབ་ཆེན་སྟོན་པའི་སྤྱོད་ཡུལ་ནི། །ཇི་ལྟར་དམིགས་པ་བཞིན་དུ་འགྲུབ། །ཆོས་རྣམས་ཐམས་ཅད་དམིགས་སུ་མེད། །ཡེ་ཤེས་སྒྱུ་མ་ཅིར་ཡང་འགྲུབ། །ཟག་མེད་ཟབ་པས་དོན་རྟོགས་ན། །དག་པར་མ་གྱུར་གང་ཡང་མེད། །ཡེ་ཤེས་མ་བཅོས་ཀུན་ཏུ་གསལ། །རང་བཞིན་རྣམ་པར་དག་པའོ། །དེ་ཕྱིར་སྤྱོད་ལམ་ཐམས་ཅད་དུ། །སྒྱུ་མའི་ཡེ་ཤེས་འདའ་མི་བྱ། །རྩ་བ་ཡན་ལག་ཐམས་ཅད་ཀུན། །སྔ་མ་བཞིན་དུ་ནུས་པ་འཕེལ། །དེ་ལྟར་སྒྱུ་མ་རྟོགས་གོམས་པས། །འཁོར་བའི་ཆོས་ལ་ཚད་མེད་པའི། །བྱང་ཆུབ་སེམས་ཀྱིས་འཕྲོག་པར་འགྱུར། །མ་འཁྲུལ་འཁྲུལ་ལ་ཡ་མཚན་སྐྱེ། །དོན་མེད་འདུག་ལའང་དེ་བཞིན་ཏེ། །རྣམ་གསུམ་སྔ་ལས་འཕེལ་བར་སྣང་། །ཉམས་རིམ་འཕེལ་བའི་མཐའ་རྟགས་ནི། །ཤིང་བལ་ལྟ་བུར་ཡང་བ་དང་། །ལུས་ཀྱི་བཟོད་པ་ཕྲ་ཐོབ་ཅིང་། །ཁམས་བདེ་མི་བདེ་སྙོམས་པ་དང་། །ཕལ་ཆེར་ཡོད་ཅིང་ཆོས་བརྒྱད་སྙོམས། །དེ་བས་མང་དང་འབྲིང་ལ་མཉམ། །ཀུན་ཀྱང་སྔ་ལས་གྲངས་འཕེལ་ཞིང་། །ངོ་བོ་གསལ་ལ་ཡུན་རིང་བའོ། །ལྷན་ཅིག་དྲུང་འདུག་ཕ་རོལ་གྱི། །མངོན་ཤེས་འཕེལ་དང་ཅུང་ཟད་བརྟན། །གཞན་ཡང་ཤེས་པ་ཅུང་ཟད་འབྱུང་། །དེ་བས་རྣལ་འབྱོར་བརྟན་པར་བྱ། །འདི་ཚེ་སྤྱོད་ཡུལ་ཐམས་ཅད་ཀུན། །རྨི་ལམ་དུ་ཡང་སྒྱུ་མར་མཐོང་། །སྙིང་རྗེས་གང་བ་མཐོང་བ་དང་། །བྱིན་བརླབས་དབང་བསྐུར་མང་མཐོང་དང་། །བདུད་ཀྱི་སྤྱོད་ཡུལ་མཚན་མར་ཐོབ། །དེ་སོགས་སྣང་ཡང་ཆགས་མི་བྱ། །སྙིང་རྗེ་ཆེན་པོ་གོམས་བྱས་ན། །རྣལ་འབྱོར་དོན་ཆེད་རྟོགས་པ་ཡིས། །དུས་མཐའ་མེད་པར་དེ་ལྟར་བསྒོམ། །ཡོན་ཏན་ནམ་མཁའི་མཐའ་དང་མཉམ། །སྤྱོད་ཡུལ་སངས་རྒྱས་ཉིད་དང་གཅིག །རྒྱུ་སྤྱོད་བསོད་ནམས་ཚོགས་ཆེན་ལྡན། །དེ་མིན་མ་ཆགས་ཡེ་ཤེས་ཆེ། །རྣལ་འབྱོར་ཕྱི་མ་བཙལ་བ་མེད། །ཉི་འོད་ས་བོན་སྐྱུར་སྒྲ་བཞིན། །འཕོ་བ་མེད་བཞིན་འགྱུར་སྣང་ཚེ། །སྒྱུ་མ་བརྟན་བྱས་ལས་རྒྱུན་གཅོད། །འབྲེལ་པས་ལམ་དང་བཀོལ་མི་འགྱུར། །ཕྱི་མའམ་ལན་གྲངས་གཞན་དག་ལ། །མི་ལྡོག་དབང་སྒྱུར་རིགས་སུ་ངེས། །ལམ་འདིར་ཆ་རྐྱེན་རྫོགས་བསྒྲུབས་པས། །མཚན་དང་དཔེ་བྱད་ཀུན་ལྡན་པའི། །དབང་ཕྱུག་ཆེན་པོའི་གནས་ཉིད་དུ། །མངོན་དུ་འབྱུང་བའི་ཐེ་ཚོམ་མེད། །མ་རྟོགས་ལེ་ལོ་སྙོམ་ལས་བྱས། །དོན་མ་གྲུབ་པར་ངན་སོང་འགྲོ །སྙིང་རྗེ་ཆེན་པོའི་རྣལ་འབྱོར་བསྟན་པའི་ལེའུ་སྟེ་བཞི་པའོ།། ༈ །།གཉིས་མེད་ངང་དུ་ཕྱག་བཙལ་ནས། །ཕྱག་རྒྱ་གཅིག་པའི་རྣལ་འབྱོར་བཤད། །གང་དག་རྡོ་རྗེ་གསུམ་སྒོམ་པའང་། །སྔ་བར་འདས་པའི་ལུས་ཀྱིས་ཤེས། །སྤྱི་ཡི་ལམ་སྔོན་རྫོགས་པ་ཡིས། །འདི་ཉིད་སྒྱུ་མཐར་མངོན་བྱ་ཞིང་། །ལུགས་སོགས་མཚན་མའི་ཕྱག་རྒྱ་གཞག །དེ་ལ་ཡན་ལག་བརྒྱད་སྟོན་བཞིན། །འབྲས་བུ་ཡོངས་སུ་རྫོགས་བྱ་དང་། །སྤྲོས་པའི་རྒྱུ་ཡིས་ཐོབ་བྱ་དང་། །སྒྱུ་སྟོང་རྟོག་ཞེན་དབང་དུ་བྱ། །རྟོག་པའི་ཕུང་སོགས་གནས་སྒྱུར་ཞིང་། །གཞན་དག་སྨིན་པར་བྱ་བའི་ཕྱིར། །ཕྱག་རྒྱའི་རྣལ་འབྱོར་ཤིན་ཏུ་གཅེས། །དེ་ལ་འཇུག་ཐབས་རྣམ་གཉིས་ཏེ། །སེམས་སྦྱངས་པ་དང་ལྷར་བསྐྱེད་པའོ། །སྔ་མ་གདམས་ངག་ཤེས་རབ་ཀྱིས། །འཇུག་པའི་གཞི་པོ་འདི་ཉིད་དེ། །ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེའམ་ཡང་ན་ཐུགས་ཡེ་གེ །དེ་བཞིན་ཡང་དང་ཡང་གོམས་ནས། །ཕྱི་ནང་སྣོད་བཅུད་ཧཱུཾ་དུ་བསྡུ། །ཡན་ལག་རྣམ་ཤེས་ཡེ་ཤེས་ཕྱིར། །ཡི་གེ་ཧཱུཾ་དུ་ཤིན་ཏུ་བསྡུ། །ནྲྀ་ཡི་མིག་གིས་བལྟར་ཡོད་པར། །འདྲིས་ནས་བདག་གཞན་དོན་ཕྱིར་སྤྲོ། །མཆོད་དོན་རྫོགས་ནས་སླར་བསྡུས་ཏེ། །ཧཱུཾ་ཉིད་མི་དམིགས་དབྱིངས་སུ་གསལ། །གོམས་པར་བྱ་བ་ཤིན་ཏུ་གཅེས། །ཕྱི་མ་ཚངས་པ་སྲིན་པོའི་ཚུལ། །རྫོགས་པར་བྱ་བས་ཟུང་དུ་འགྱུར། །ཚངས་པའི་ཆ་ལུགས་རྫོགས་བྱ་བའང་། །གང་སྒྲུབ་ཡི་གེ་སོ་སོ་སྟེ། །སྤྱིར་ནི་གང་བསྒོམས་ཀུན་ཏུ་འདྲ། །རྡོ་རྗེ་སེམས་དཔའ་ཉིད་དུ་འདུ། །འདི་ལྟར་དེ་ཉིད་གོམས་བྱ་བ། །སྔོན་དུ་མི་དམིགས་ངང་ཉིད་ལས། །ཨ་དཀར་གསུང་གི་ཕྱག་རྒྱ་འབར། །ཤིན་ཏུ་འཚེར་བར་གསལ་བསྒོམས་ལ། །ཐམས་ཅད་ཨར་ནི་གྱུར་པར་བསྒོམ། །དེ་བཞིན་ཉིད་དུ་འདྲིས་གྱུར་ནས། །ཨ་ལས་མ་ཡི་དཀྱིལ་འཁོར་སྤྲོ། །ཨ་མ་གསལ་བར་འབྱོར་གྱུར་ནས། །ཉི་ཟླ་ག ང་བ་སྒྲིལ་མར་བསྒོམ། །ཧྲཱིཿགསལ་པདྨ་ཆགས་མེད་བསྒོམ། །རིན་ཆེན་འབར་བའི་གཞལ་ཡས་བསྒོམ། །ཉི་ཟླ་གདན་དང་གཞལ་ཡས་ཁང་། །ཐམས་ཅད་བསྡུས་ཤིང་ཕྲ་བར་བསྒོམ། །དེ་དཀྱིལ་ཡི་གེ་ཧཱུཾ་གནས་པ། །མཐིང་ག་འཚེར་ལ་གསལ་བ་ཡི། །འོད་ཟེར་འཕྲོ་བ་རྣམ་པར་བསྒོམ། །འོད་འཕྲོ་དབྱིངས་སུ་སླར་བསྡུས་ནས། །ཤིན་ཏུ་རྡོ་རྗེ་ཕྲ་བར་བསྒོམ། །རྡོ་རྗེ་འོད་འཕྲོ་གསལ་འབར་ནས། །དབྱིངས་སུ་ཡང་ནི་བསྟིམ་པར་བྱ། །དེ་ཉིད་སེམས་དཔའི་སྐུར་གྱུར་ནས། །ཤིན་ཏུ་ཕྲ་ཞིང་འདུས་པར་བསྒོམ། །དེ་བཞིན་གཉིས་མེད་གསལ་གྱུར་ནས། །སྐུ་གཅིག་རྡོ་རྗེ་དྲིལ་འབར་བསྒོམ། །དེ་བཞིན་ཉིད་དུ་གྱུར་པ་དང་། །དབུ་གསུམ་ཕྱག་དྲུག་ཉིད་དུ་བསྒོམ། །རྡོ་རྗེ་འཁོར་ལོ་རལ་གྲི་འབར། །རིན་ཆེན་པདྨ་དྲིལ་བུ་འབར། །ཕྲ་བའི་གཞལ་ཡས་གདན་དང་ལྡན། །གནས་གཅིག་ཡེ་ཤེས་སེམས་དཔའ་བསྒོམ། །སྤྱི་མགྲིན་ཙིཏྟའི་གནས་གསུམ་དུ། །བྱིན་བརླབས་རྡོ་རྗེ་གསུམ་བསྒོམ་བྱ། །དབུ་ཡི་གནས་ལྔར་ཡི་གེ་ལྔ། །ཡེ་ཤེས་ལྔ་དབང་རྫོགས་པས་བརྒྱན། །བློ་ཡི་ཤེས་རབ་ཆེ་ཆུང་གིས། །ཡང་ན་ཕྱག་རྒྱ་ཆེན་པོ་སྟེ། །ཆུ་ལས་ཉ་ལྡང་ཇི་བཞིན་དུ། །བདག་ཉིད་ཕྱག་རྒྱ་ཆེན་པོ་སྟེ། །ཞལ་གསུམ་ཕྱག་དྲུག་རྟག་ཏུ་བསྒོམ། །གཞལ་ཡས་གདན་སོགས་སྔ་མ་བཞིན། །ཡན་ལག་དགུ་ཡང་དེ་བཞིན་ནོ། །དེ་ལ་ཤིན་ཏུ་གོམས་པར་བྱ། །རཀྴའི་ཆ་ལུགས་འཛིན་པའང་། །རིམ་དང་ཅིག་ཅར་སྔོན་བཞིན་ཏེ། །རྡོ་རྗེའི་ཆོ་ག་ཁ་དོག་དང་། །གཞལ་ཡས་ལ་སོགས་བསྒྱུར་ཏེ་བསྒོམ། །ཐུགས་ཀྱི་རིགས་ལས་གཞན་མོས་པའང་། །འབྲུ་བཞིས་སྦྱངས་ཏེ་གདན་གནས་གཅིག །རྡོ་རྗེ་རྣམ་གསུམ་རིགས་སུ་བསྒྱུར། །སྐུ་དང་ཡན་ལག་དེ་བཞིན་ནོ། །རིམ་པས་ཐོབ་པའམ་ཅིག་ཅར་བ། །བརྒྱད་མཐར་བྱིན་ཕབ་ལྷར་བསྐྱེད་ལ། །མཆོད་པ་བྱིན་བརླབས་སྐུར་བསྒོམས་ལ། །ཡན་ལག་ལྡན་རྫོགས་མཆོད་བསྟོད་བྱ། །ཡན་ལག་མ་ཉམས་སྔགས་བཟླས་པའང་། །སྐྱོན་བཅུ་སྤངས་ཏེ་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱ། །སྤྲོ་བསྡུ་བདག་དང་གཞན་དོན་རྫོགས། །ཕྱི་ནང་གསང་བ་གང་མོས་སུ། །བཟླས་པ་ཚད་དུ་ཕྱིན་པར་བྱ། །དུབ་ན་ཡེ་ཤེས་ཐིག་ལེ་བལྟ། །ཉལ་བས་ནང་པར་དེ་ཉིད་ལས། །ཧཱུཾ་སོགས་བསྒྱུར་ཏེ་སྐུར་རྫོགས་པས། །སྔོན་བཞིན་བརྩོན་པས་འདྲིས་པར་བྱ། །གཞལ་ཡས་ལྷ་ཡི་དཀྱིལ་འཁོར་ཡང་། །སེམས་ཀྱི་ཆོ་འཕྲུལ་རང་སྣང་ཕྱིར། །ལྷ་ཡང་དམིགས་མེད་རིག་པ་ཉིད། །གཞི་རྫོགས་སྐུ་དེར་རང་སྣང་བའོ། །རྒྱལ་བའི་རྒྱལ་བ་རྣམས་ཀྱི་སྐུ། །ཀུན་ཏུ་རིན་ཆེན་ལྟ་བུ་སྟེ། །རྫོགས་དང་རྟོག་མེད་རེ་བ་སྐོང་། །ཟད་འཕེལ་འགྲོ་འོང་ཉེ་རིང་མེད། །ཕྱག་རྒྱ་ཡོད་མེད་གྲོལ་མ་གྲོལ། །བདག་ཕྱིལ་ཕྱོགས་ལེན་བླང་དོར་མེད། །བྱིང་རྒོད་སྙོམ་ཙམ་མཉམ་གཞག་པའོ། །མི་མཐུན་འདི་ཚེ་དམིགས་གཟུང་བ། །ཡི་གེ་ནས་བཟུང་རྫོགས་པའི་བར། །ཐུན་མོང་ཀུན་ཏུ་འབྱུང་རགས་ཕྲ། །ཐ་མ་འདི་ལ་སོ་མཐས་བཅད། །ཁྱད་པར་རབ་རིབ་མག་མོག་གྲིབ། །གང་ཚོད་དམིགས་ལ་ཚད་དང་ཚུལ། །གྲངས་དང་ཆ་ལུགས་མདོག་དང་དབྱིབས། །ཁ་དོག་འབའ་ཞིག་རིམ་པར་ནུབ། །དེ་ལྟར་གྱུར་པ་ཚོར་བྱས་ཏེ། །འདུ་བྱེད་རླུང་གིས་བསྐྱོད་མི་བྱ། །དེ་ལྟར་ཟིན་པས་དེ་དག་ཀུན། །ཁྱད་པར་གསུམ་ལའང་སྒྱུ་སྟོང་འདུག །རྗེས་ལས་ཐོབ་པ་མ་སུན་འདུག །དྲུག་ལ་རི་ལྟར་གཏོས་ཆེར་བྱ། །བདུན་ལ་དབྱིབས་ལ་བསྲེག་པར་བྱ། །བརྒྱད་ལ་སྦྱི་མིན་བྲེ་བྲག་གནས། །བྱ་མིན་ལས་ཀུན་དོར་བྱས་ཏེ། །སྤྱོད་ལམ་སྐྱོན་རྣམས་གཏང་བར་བྱ། །གཉིས་ལ་ཞུགས་མོད་རྒྱ་གཅིག་ལ། །གོམས་པས་འཕེལ་བ་གོང་མ་བཞིན། །སྨིག་རྒྱུ་དུ་བ་སྲིན་མེ་ཁྱེར། །མར་མེ་ཉི་མའི་ཚུལ་དང་སྦྱར། །བཏང་སྙོམས་རིམ་དང་བརྩོན་པ་དང་། །སྐབས་ཀྱིས་བླང་དོར་ཉམས་ལས་ཤེས། །འབྲུ་བཞིས་རྟག་ཏུ་མཚམས་བཅད་དེ། །བདག་ཉིད་ཆེན་པོའི་ཚོགས་མཆོད་བྱ། །ནང་གི་སྦྱིན་སྲེག་བླང་བར་བྱ། །གཟུགས་སོགས་ཐིག་ལེའང་ལྷ་མོ་དྲུག །དབང་པོ་ཡུལ་དུས་སྦྱོར་བ་བྱ། །ཞི་ཁྲོ་གང་ཡིན་སྐབས་ཀྱིས་བསྒྱུར། །བདག་ཉིད་ཆེན་པོའི་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །འགྲོ་ཉལ་འདུག་སྡོད་ལོངས་སྤྱོད་དང་། །ཉོན་མོངས་སྡུག་བསྔལ་ཚེ་ན་ཡང་། །ཐེག་ཆེན་ཕྱག་རྒྱ་མི་བཏང་སྟེ། །སྔོན་བཞིན་སྦྱོར་བས་མྱུར་དུ་འགྲུབ། །རྒྱུ་འབྲས་མཚམས་སྦྱོར་བར་སྐབས་ཀུན། །ཆོས་སྤྱོད་དགུ་ཡི་སྤྲོས་པ་དོར། །རྒྱུད་ལ་ལྡན་ཡང་བླང་བྱ་མིན། །མཚན་མའི་གཡེང་བ་ཡིན་ཕྱིར་རོ། །རྡོ་རྗེ་གསུམ་བསྒོམ་ཕྱག་མི་བྱ། །ཕྱག་རྒྱའི་རྣལ་འབྱོར་སྤྱོད་པ་ལ། །དོན་ལྡན་མ་ཉམས་དག་བྱས་ཏེ་། །བརྩོན་འགྲུས་ཆེར་བསྐྱེད་མྱུར་བར་འགྲུབ། །ལྷ་ལ་ལྷ་རོལ་བསོད་ནམས་ཏེ། །སྤྱོད་ལ་མ་ཆགས་གཉིས་མེད་པའོ། །གཞན་ཕྱིར་འཕྲོ་འདུ་རིམ་པར་རྫོགས། །རྐྱེན་དང་འཕྲད་པས་མི་འདོར་ཏེ། །དུས་མིན་གཞན་ཕྱིར་སྤྲོས་པའང་ལེན། །གང་དང་འཚམ་པར་དོན་རྫོགས་བྱེད། །བདག་ཕྱིར་ཐུན་མོང་མཆོག་གྲུབ་རྣམས། །འདི་བརྟན་སྦྱོར་བས་ཐེ་ཚོམ་མེད། །འདི་ཚེ་ས་གཞི་ཀུན་ལྡན་མོད། །གསུང་གི་གཞི་ལ་ལྷུར་བྱ་ཞིང་། །ཕྱག་རྒྱ་ཆེན་པོའི་རྣལ་འབྱོར་དུ། །སྤྱོད་ཡུལ་ཀུན་ཏུ་བསྡམ་པར་བྱ། །ཕྱི་ནང་གས ང་བ་ཤིན་ཏུ་འཕེལ། །ཐོབ་དང་བརྟན་པའི་ཆར་འགྱུར་ཏེ། །ལོངས་སྤྱོད་ཞེན་པ་མེད་པ་དང་། །དབང་པོ་ཡུལ་དུས་གོམས་པ་དང་། །རྒྱུ་བ་ཆད་དང་ཐུན་མཚམས་བྲལ། །དྲོད་ཀྱི་བྱེ་བྲག་ཀུན་དང་ལྡན། །རྟགས་ཆེན་གོམས་མཐར་མཚན་མ་ལྔ། །དངོས་སུ་མཐོང་དང་རྡོ་རྗེ་གསུམ། །སྐྱེ་མཆེད་མཐོང་བ་མཚན་མ་སྟེ། །གྲུབ་པ་དང་པོའི་རྟགས་ཞེས་བྱ། །དམིགས་པ་རྒྱུ་ཆེན་མངོན་ཤེས་ཀྱང་། །གྲངས་དང་ལུས་གྱིས་བླ་ན་མེད། །ཉི་ཤུ་རྩ་ལྔའི་མངོན་ཤེས་ཀྱང་། །གཡོ་ཐོབ་འབྱུང་བར་ཐེ་ཚོམ་མེད། །ལུས་ངག་སེམས་མཐུའི་རྟགས་རྣམས་ཀྱང་། །ཆོ་འཕྲུལ་བཞི་ཚུལ་གཡོ་ཐོབ་བྱེད། །གཞན་ཡང་སྔོན་བས་གསལ་བརྟན་པ། །རྣལ་འབྱོར་ལྷག་པའི་སྟོབས་ཀྱིས་འཐོབ། །སྤྱོད་ལམ་ཉིད་དུ་ལེགས་ཉེས་ཀུན། །གསལ་བར་འབྱུང་ཞིང་ཤིན་ཏུ་བརྟན། །བསམ་གཏན་འབད་པས་བཟླས་པ་ཡིས། །སྒྲུབ་པ་པོས་ནི་རྟག་ཏུ་མཐོང་། །སངས་རྒྱས་མཐུ་དང་མཚུངས་པར་མཐོང་། །སངས་རྒྱས་ལོངས་སྤྱོད་རྫོགས་པའི་སྐུ། །བདག་མེད་པར་ནི་མྱུར་དུ་མཐོང་། །སེམས་དཔའ་ཆེན་པོ་ཁམས་གསུམ་པས། །མཆོད་པ་བྱེད་པར་དེས་མཐོང་ངོ་། །ཡེ་ཤེས་ཆེན་པོ་འོད་འདྲའི་གཟུགས། །སངས་རྒྱས་བྱང་ཆུབ་སེམས་དཔའ་ཡིས། །འདོད་པའི་ཡོན་ཏན་ལྔ་རྣམས་ཀྱིས། །རྟག་ཏུ་མཆོད་པ་བྱེད་པར་མཐོང་། །རྡོ་རྗེ་སེམས་དཔའི་གཟུགས་ཆེན་དང་། །གྲངས་ཆེན་རྡོ་རྗེའི་མཆོག་དག་ཏུ། །རྨི་ལམ་དག་ན་རང་གཟུགས་མཐོང་། །གྲགས་ཆེན་རྡོ་རྗེ་གསང་དབང་དང་། །བྱང་ཆུབ་སེམས་དཔའ་འཁོར་ལོ་ཅན། །སངས་རྒྱས་ཆེན་པོ་ཕྱག་འཚལ་བའི། །རྨི་ལམ་འདི་དག་མཐོང་འགྱུར་བ། །ལུས་ངག་སེམས་ཀྱི་མཐུ་ལས་སྐྱེས། །རྒྱན་རྣམས་ཐམས་ཅད་ཡོངས་རྫོགས་པའི། །ལྷ་ཡི་བུ་མོ་ཡིད་འོང་དང་། །ཁྱེའུ་བུ་མོ་དག་མཐོང་ན། །དེ་ནི་དངོས་གྲུབ་ཐོབ་པར་འགྱུར། །ཕྱོགས་བཅུའི་སངས་རྒྱས་ཐམས་ཅད་རྣམས། །ཞིང་ན་གནས་པ་ངེས་པར་མཐོང་། །ཐུགས་ནི་དགྱེས་པར་གྱུར་ནས་ཀྱང་། །ཆོས་མཛོད་ཡིད་དུ་འོང་པ་སོགས། །ཆོས་ཀྱི་འཁོར་ལོ་སྒྱུར་བའི་སྐུ། །སེམས་ཅན་ཀུན་གྱིས་ཡོངས་བསྐོར་བ། །བསམ་གཏན་རྡོ་རྗེ་ལ་གནས་པའི། །དམ་ཚིག་སྦྱོར་བས་མཐོང་བར་འགྱུར། །སྣ་ཚོགས་ཀུན་དགའ་སྐྱེད་མོས་ཚལ། །ལྷ་ཡི་བུ་ལ་སོགས་པས་རྒྱན། །སངས་རྒྱས་ཀུན་གྱིས་བྱིན་བརླབས་པ། །བསམ་གཏན་དམ་ཚིག་ཅན་གྱིས་མཐོང་། །སངས་རྒྱས་བྱང་ཆུབ་སེམས་དཔའ་ཡིས། །དེ་ནི་མངོན་པར་དབང་བསྐུར་མཐོང་། །རིག་འཛིན་རྒྱལ་པོ་ཆེན་པོ་ཡིས། །མཆོད་པ་བྱེད་བར་དེས་མཐོང་ངོ་། །རྡོ་རྗེ་ལས་བྱུང་སྣ་ཚོགས་པའི། །རྨི་ལམ་དྲི་མེད་དག་མཐོང་ན། །སྐུ་གསུང་ཐུགས་ཀྱི་རྡོ་རྗེ་ལས། །སྐྱེས་པ་བླ་ན་མེད་པ་འགྲུབ། །གདོལ་པ་ཁྱི་ཡི་སྦྱོར་ལ་སོགས། །རྡོ་རྗེ་འཛིན་པས་མཐོང་ན་ནི། །བློ་ལྡན་རྡོ་རྗེ་སེམས་དཔའ་ཡི། །སེམས་ཀྱི་གནས་ནི་འགྲུབ་པར་འགྱུར། །ཡི་གེ་ཕྱག་རྒྱ་རྣམ་གཉིས་ཀྱི། །སྐྱེ་མཆེད་མཐོང་བའང་དེ་བཞིན་ནོ། །ལྷ་ཡི་སྐུ་ནི་གསལ་བསྒོམས་ན། །བསོད་ནམས་ཚོགས་ཆེན་ཐོབ་པར་འགྱུར། །དེ་ཉིད་ཆུ་ཟླའི་ཚུལ་ཤེས་ན། །ཡེ་ཤེས་ཚོགས་ཆེན་ཐོབ་པར་འགྱུར། །བདག་ཉིད་ལྷ་དང་མཉམ་སྦྱོར་བས། །ཡོན་ཏན་ཆུང་ཡང་འགྲུབ་པར་འགྱུར། །ཡེ་ནས་མཉམ་ཉིད་སྦྱོར་བས་སུ། །ལྷ་ཉིད་དུ་ནི་རྟག་ཏུ་བསྒོམ། །བདེ་གཤེགས་ཀུན་དང་མཉམ་སྦྱོར་བས། །དཀྱིལ་འཁོར་ཀུན་དང་མཉམ་པར་འགྱུར། །དཀྱིལ་འཁོར་ཀུན་དང་མཉམ་པའི་ཕྱིར། །སྐུ་གསུང་ཡེ་ཤེས་ལྔ་རྫོགས་འགྲུབ། །ཡི་དམ་ལྷ་ཡི་མཚན་ཉིད་ནི། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་རྡོ་རྗེའི་བདག་པོའི་ཕྱིར། །ལྷ་སྤངས་དགེ་སྤྱད་དོན་མེད་འགྱུར། །དམ་ཚིག་བསྲུང་དང་སྔགས་བཟླས་དང་། །ཕྱག་རྒྱ་རྒྱུན་མི་བཅད་པ་བཞི། །བརྩོན་འགྲུས་ཆེ་ཞིང་བརྟན་པར་ཟུངས། །རྣལ་འབྱོར་བརྩོན་འགྲུས་ཆུང་གྱུར་ན། །མི་འགྲུབ་ཉེན་ཡང་ཆེ་བར་གསུངས། །ཇི་ལྟར་རལ་གྲི་སོ་ལ་ནན་ཏན་དུ། །ལེགས་པར་མ་བཟུང་ལག་པ་གཅོད་པར་འགྱུར། །དེ་བཞིན་ནན་ཏན་མེད་པའི་གསང་བསྔགས་པ། །ཕུང་བའང་ཡང་ན་འབྲས་བུ་མེད་པར་འགྱུར། །དེ་བས་བར་ཆད་བརྩོན་མེད་ན། །དཔེར་ན་ས་བོན་འཚིག་པ་ལས། །འབྲས་བུ་འདོད་པ་དང་འདྲ་སྟེ། །བསྒྲུབས་པའི་འབྲས་བུ་མེད་པར་འགྱུར། །མི་ཁོམ་འཁོར་བར་བརྒྱུད་པར་འགྱུར། །གང་ཞིག་ཞལ་མཐོང་མོས་པ་ཡི། །བསྙེན་བསྐུར་མཆོད་པའི་བསོད་ནམས་ཀྱིས། །མི་དགེ་མཚམས་མེད་བཅོ་ལྔ་སོགས། །ལས་ངན་སྦྱངས་ཏེ་རིགས་ལ་སྦྱོར། །གང་གིས་མི་རྟག་མཐོང་ན་ཡང་། །ཕྱག་རྒྱ་མ་ཉམས་གསལ་བཟུང་སྟེ། །ལས་ཀྱི་མི་འཁོལ་གང་འདོད་དུ། །ཨ་ཡཾ་སྟོབས་ཀྱིས་བསྐུལ་བར་བྱ། །རྣམ་སྨིན་རིགས་ལ་ཐེ་ཚོམ་མེད། །འོན་ཏེ་ན་ཡང་རིམ་པ་ཡིས། །དེ་ཉིད་བར་ཕྱི་ལན་གྲངས་གཞན། །ཚེ་ཡང་ཕྱི་མའམ་གཞན་ཐོབ་ངེས། །རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡིད་གཉིས་མེད་པ་ན། །དཀྱིལ་འཁོར་ཆེན་པོ་འབར་བར་འགྱུར། །འདི་ལྟར་བསྒོམས་ཤིང་བསྒྲུབས་བྱས་ན། །འབྲས་བུ་མངོན་དུ་མ་བྱུང་ཡང་། །ཚེ་རབས་སྐྱེ་བ་ཐམས་ཅད་དུ། །ལྷ་མི་མཚན་རྫོགས་སྡུག་བསྔལ་སེལ། །བདེ་གཤེགས་འབྱུང་དང་མི་བཀོད་ཞིང་། །ཐེག་པ་དམན་པར་འཇུག་མི་འགྱུར། །བྱང་ཆུབ་གཟུང་ལ་ཞུགས་པ་ཡིན། །དེ་བས་ལམ་འདི་འབྲལ་མི་བྱའོ། །ཕྱག་རྒྱ་གཅིག་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། ༈ །།རང་གི་ལྷ་ལ་ཕྱག་བཙལ་ཏེ། །སྤྲོས་པའི་རྣལ་འབྱོར་བཤད་པར་བྱ། །སྤྲོས་པའི་གཞིའོ་དེ་ལྟ་བུར། །གཞག་པ་དགྲོལ་ཕྱིར་རྒྱས་པར་བཤད། །རྣལ་འབྱོར་རྣམ་གསུམ་སྔོན་རྫོགས་ནས། །ས་ལ་སོགས་ལ་ཕྱག་རྒྱར་བྱས། །རི་མོ་རྒྱུ་བཞིའམ་འབུར་ལུགས་དང་། །འཇིམ་པ་ལས་བྱས་དཀྱིལ་འཁོར་ནི། །ལྷག་པའི་གཟུགས་བརྙན་ཁང་བུ་དངོས། །ཡེ་ཤེས་བྱིན་ལྡན་བསྟེན་པར་བྱ། །མ་ཧཱ་བ་ལིཾ་ཨ་མྲྀ་ཏ། །དམར་ཆེན་ཕྱི་ནང་མཆོད་པ་དགྲམ། །རོལ་མོ་མཆོད་སོགས་ཆ་རྐྱེན་རྣམས། །ཇི་ལྟར་འོས་པ་བཞིན་བསྡུ་བྱ། །ཕྱོགས་བཅིང་བརྒྱད་ཀྱི་རིམ་རྫོགས་ནས། །ལས་ཀྱི་ལྷ་ཡི་རྣལ་འབྱོར་གྱིས། །མཆོད་རྫས་བྱིན་གྱིས་བརླབ་པར་བྱ། །བདུད་རྩིའི་ཆུའི་བསངས་བགེགས་བསྐྲད་འདུག །བསོད་ནམས་ཡོངས་སུ་རྫོགས་བྱ་ཞིང་། །སྤྱོད་ཡུལ་བྱིན་གྱིས་བརླབ་པ་དང་། །འཁོར་ལོའི་ས་མཐར་དབྱུང་བ་དང་། །ཚོགས་ལ་དུས་ཀྱིས་བསྒྲུབ་ཕྱིར་བསྒོམ། །དགུག་གཏང་བཅིངས་དགྲོལ་གསོ་བསད་དང་། །ཕམ་རྒྱལ་ཏིང་འཛིན་འདིས་བྱེད་ཕྱིར། །གང་དག་གདུལ་བྱའི་ཇི་སྙེད་པ། །སྤྲོས་པའི་ལས་ཀྱིས་གདོན་ཕྱིར་རོ། །གཅིག་ནས་སྤྲོས་པའང་རྣམ་གཉིས་ཏེ། །རྗེས་སུ་མཐུན་པར་ཞི་དང་ཁྲོ། །དེ་རེ་རེ་ཡང་ཚུལ་གཉིས་ཀྱིས། །བློ་དང་ལྡན་པར་འཚམ་སྟོན་ཡིན། །སྔ་མ་རིམ་དང་ཅིག་ཅར་བར། །ཕྱེ་བས་ཕྱི་མ་བཞིན་འཇུག་པ། །ཉི་ཟླ་གཟའ་སྐར་དུས་གཅིག་ཏུ། །ཆུ་དཀྱིལ་དང་བར་གསལ་བ་བཞིན། །སྐུ་གསལ་སྐད་ཅིག་འོང་དུ་འབར། །སྙིང་པོ་བརྗོད་པས་འཁོར་ལོར་ཤར། །དེ་སྔོན་བསྟན་པ་བཞིན་འཇུག་པ། །མཐོང་དང་སྔ་མའི་རྣལ་འབྱོར་སྟོབས། །ཐོབ་པས་ཤེས་བྱ་སློབ་ཚུལ་དུ། །དུ་མ་གཅིག་གིས་གསལ་བར་བྱེད། །མ་བསྒྱུར་རྣལ་མའི་དཀྱིལ་འཁོར་ལ། །འཁོར་ལོ་ཚོམ་བུ་གྲངས་ཞལ་ཕྱག །དང་པོ་བཅོ་བརྒྱད་བཞི་བཅུ་གཉིས། །རྒྱས་པའི་དཀྱིལ་འཁོར་རིམ་པར་སློབ། །གཉིས་པ་བདག་ཅག་ཡབ་ཡུམ་ཉིད། །གནས་པའི་འཁོར་ལོ་གསལ་བྱས་ཏེ། །གདན་ལྡན་དབུས་ན་བདག་པོ་གནས། །དེ་ལ་སེམས་དཔའ་ཁྲོ་བོས་བསྐོར། །བརྟན་ནས་མདུན་རྒྱབ་སྐུ་གསུང་ཐུགས། །འཁོར་ལོ་རྫོགས་པ་འབྲུ་གསུམ་བརྟན། །མི་ཡི་དབང་དུ་ཚོམ་བུ་གསུམ། །ཤིན་ཏུ་གོམས་པར་བྱ་བ་ཡིན། །བརྟན་ནས་གཡས་དང་གཡོན་ཉིད་དུ། །ཡོན་ཏན་འཕྲིན་ལས་དཀྱིལ་འཁོར་གཞག །རྣལ་འབྱོར་དབང་དུ་ཚོམ་བུ་ལྔ། །ཤིན་ཏུ་འདྲིས་ནས་དུས་ཚོགས་སྦྱར། །གསུམ་པ་རྩ་བའི་སྐུ་ཉིད་དུ། །བརྟན་ནས་སྐུ་གསུང་གཙོ་བོར་གསལ། །གསུམ་འཚོར་མེད་ནས་ཡོན་ཏན་ལས། །ལྔ་རྫོགས་ཡབ་ཡུམ་ཟུང་བརྟན་ནས། །ལྔ་པའི་དོན་སྤྲོས་བཞི་བཅུ་གཉིས། །མ་བཅོས་ངང་གིས་གནས་པ་ལ། །ཡེ་ཤེས་ལྷག་པའི་དཀྱིལ་འཁོར་བསྒོམ། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །སྟངས་དཔྱལ་གཉིས་ཀྱི་ཕྱག་རྒྱ་དང་། །སངས་རྒྱས་སྟོང་གི་དཀྱིལ་འཁོར་ཡང་། །རི་རབ་ཏིལ་འབྲུའི་ཚུལ་བཞིན་དུ། །དཔེ་བྱད་མཚན་གྱིས་རྒྱན་སྤྲོས་པའོ། །དེ་ལྟར་གཙོ་མཆོག་ལྡན་བྱས་ནས། །བྱ་བྱེད་རིགས་བཞིའང་སྟོང་བསྒོམ་བྱ། །བཅུ་གཉིས་དྲུག་གིས་འོད་འཕྲོ་འབར། །ཉི་ཁྲི་བཞི་སྟོང་དུས་གཅིག་གསལ། །ཕྱོགས་བཅུ་མ་ལུས་གཞལ་ཡས་ཁང་། །ཉི་ཟླ་གཟའ་སྐར་གདན་དང་རྒྱན། །བདེ་གཤེགས་དཀྱིལ་འཁོར་མ་ལུས་བསྒོམ། །བསམ་ཡས་ལྷུན་གྲུབ་ཉིད་ལ་སློབ། །བཞི་པ་གཅིག་ཞལ་གསུམ་ཕྱག་དྲུག །བརྟན་ནས་གསུམ་པའང་དེ་བཞིན་ཏེ། །ལྔ་ཡང་རྗེས་སུ་མཐུན་གོམས་ནས། །སྤྲོས་པའི་ཞལ་ཕྱག་རྫོགས་གསལ་བའོ། །བསྒྱུར་བའི་འཁོར་ལོའང་དེ་བཞིན་ཏེ། །དང་པོ་ལྔ་བཅུ་བརྒྱད་གོམས་ནས། །དྲུག་བཅུ་རྩ་བརྒྱད་དེ་བཞིན་ཏེ། །དབུས་ཀྱི་ཧེ་རུ་བཞི་པོ་ལ། །སྐུ་གསུང་ཁྲོ་བོ་མདུན་རྒྱབ་གསལ། །དེ་བརྟན་འཁོར་དང་བཅས་པར་བསྒོམ། །སྐུ་གསུང་ཐུགས་ལ་བརྟན་བྱས་ནས། །གཡས་གཡོན་ཡོན་ཏན་ལས་ཁྲོ་བོ། །ཡབ་ཡུམ་གསལ་ནས་འཁོར་ལོ་ལྷ། །རྫོགས་པར་བསྒོམ་པ་རིམ་བཞིན་དུ། །གསལ་བྱས་མ་སུན་གྱེན་དུ་འཕར། །རྗེས་སུ་མཐུན་པར་འཇིགས་བྱེད་ཀྱང་། །གཅིག་དང་གཉིས་དང་གསུམ་བཞི་ལྔ། །ཡབ་ཡུམ་མཐར་ཕྱིན་འཁོར་ལོའི་ཆས། །ལྔ་བཅུ་ཚོམ་བུའི་གནས་ཡུལ་དང་། །སྒོ་སླས་ཧཱུཾ་ཆེན་བརྒྱ་རྩ་བརྒྱད། །ཡན་ལག་བཀོད་པ་ལྔ་བཅུ་བརྒྱད། །ལྔ་ཆའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞལ་གཅིག་ཕྱག་གཉིས་གསུམ་དྲུག་དང་། །དགུ་དང་བཅོ་བརྒྱད་ཀུན་ལྡན་དང་། །ཉི་ཤུ་རྩ་གཅིག་བཞི་བཅུ་གཉིས། །དགུ་བརྒྱ་སྟོང་བརྒྱད་བརྒྱ་ཞབས་ཕྱག །གྲངས་མེད་བར་དུ་སློབ་བྱེད་པ། །རིམ་ཐབས་བརྗོད་ཀྱི་སྤྱོད་ཡུལ་ནི། །ཉི་ཤུ་གཅིག་དང་དགུ་བརྒྱ་དང་། །གྲངས་མེད་མཐར་ལམ་རིམ་པར་ལྡན། །དེ་ལྟར་གསལ་བའི་ཏིང་འཛིན་གྱིས། །ཞུགས་སློབ་མཐར་ཕྱིན་བར་སྐབས་སུ། །རང་བཞིན་ཡུལ་ལས་དབབ་བྱས་ཏེ། །གཞུག་བཅིང་བརྟན་སོགས་ལྡན་བྱས་ལ། །རྫས་དང་ཏིང་འཛིན་རིམ་བཞིན་མཆོད། །བསྟོད་སྨོས་ལྡན་ནས་བསྙེན་པ་བྱ། །བར་སྐབས་ལྷག་མའི་གནས་བསྐངས་ནས། །དམ་བསྒྲགས་བཅོལ་ཞིང་ལས་ལ་བཀྱེ། །འཁོར་ལོ་བསྡུ་བསྲུང་སྤྱོད་ལམ་ཀུན། །ཁྲོ་ཞིའི་མན་ངག་གཞུང་བཞིན་བྱ། །ཕུང་སོགས་དཀྱིལ་འཁོར་ལྔ་སྣང་བ། །རྒྱ་མཚོའི་གཟུགས་བརྙན་ཇི་བཞིན་དུ། །ཀུན་དངོས་རང་རིག་ལྷར་གསལ་བ། །གཅིག་དང་དུ་མ་ཡོངས་ཀྱིས་མེད། །གསལ་ལ་ཡུལ་མེད་མི་གཡོ་བ། །རྣལ་འབྱོར་ངོ་བོར་རྒྱལ་བས་གསུངས། །རང་བཞིན་སྤྲོས་པས་རྣལ་འབྱོར་སྤྲོས། །དེ་ཡང་གདུག་འདུལ་ཁྲོ་ཞི་སྤྲོས། །འཁོར་ལོ་སྤྲོས་དང་ཕྱག་རྒྱ་སྤྲོས། །ཚོམ་བུ་སྤྲོས་དང་ཞལ་ཕྱག་སྤྲོས། །ཀུན་ནས་སྤྲོས་ཕྱིར་འབྲས་བུའང་སྤྲོས། །སྤྲོས་པས་ཉམས་གསལ་རྣམ་འབྱོར་སྒྲ། །འདི་ཚེ་ལེ་ལོ་རྣམ་གཉིས་དང་། །མཚན་མ་ལྔ་དངོས་མཐོང་འཛིན་དང་། །རྣལ་འབྱོར་བདུད་ཀྱི་ཡུལ་མཐོང་བའང་། །སྤྲུལ་པ་གྲངས་མེད་འགྱེད་པ་མཐོང་། །དམ་པར་འདུན་མཐོང་དམ་པར་སྨྲ། །རྒྱལ་བས་གསུངས་ཀུན་གསལ་མཐོང་དང་། །དུས་གསུམ་གསལ་ཤེས་མཐོང་བ་དང་། །རྒྱུད་དྲུག་ལམ་གནས་ཀུན་མཐོང་དང་། །དེ་ལ་སྙིང་རྗེའི་ཤུགས་འབྱུང་དང་། །ཀུན་ཀྱང་གསལ་བར་མཐོང་བ་དང་། །ཅི་ལའང་ཐོགས་མེད་འགྲོ་བ་དང་། །མཁའ་ལ་བྱ་བཞིན་འགྲོ་འདུག་དང་། །རྒྱལ་བས་ཕྱག་བརྐྱང་ལུང་སྟོན་དང་། །ཀུན་གྱི་སྐད་དུ་ཆོས་སྨྲ་དང་། །སྣོད་བཅུད་བསྟི་གནས་མཐོང་བ་དང་། །སྟོང་གསུམ་མཉམ་པར་བཀོད་པ་དང་། །དེ་ཉིད་རང་བཞིན་གསལ་སྣང་དང་། །ལས་སུ་རུང་བས་ཐོགས་མེད་དང་། །དམ་པའི་དོན་ལ་བསྒོ་བ་དང་། །འཇིག་རྟེན་གཙོ་བོས་མཆོད་འབྱུང་རྣམས། །རང་བཞིན་རྟོགས་ན་དམ་པའི་རྟགས། །མི་ཤེས་དགའ་བྲོད་བྱེད་པ་བདུད། །ཁེ་དང་གྲགས་པས་འཕྲོགས་པ་དང་། །བསྔགས་པ་ཐོབ་པས་མཚན་མས་གཡེང་། །རེ་དང་དོགས་པ་ཅུང་ཟད་ཡོད། །ངའམ་ང་ཞེས་ཆེ་བས་རྒྱལ། །ཐ་མལ་པ་ཡང་ཉུང་ལ་ཕྲ། །རྒྱུ་བའི་གཟུང་འཛིན་བྱེ་བྲག་ཤེས། །ཤེས་འཇུག་འབྱོར་བས་འགོ་ཐོབ་ཅིང་། །ཟུང་དུ་འབྲེལ་བས་བསྐྱེད་མཐར་ཕྱིན། །འབྲས་བུ་ལམ་ཤེས་བརྟན་པ་ཡིས། །བྱ་བ་མེད་པའི་བརྩོན་འགྲུས་བླང་། །མཚན་མ་རང་རིག་ཆོ་འཕྲུལ་པས། །སེམས་ཕྱིར་མཐོང་ལ་རེ་དོགས་མེད། །དཔེར་ན་ནམ་མཁའི་རང་བཞིན་ལ། །ཉི་ཟླ་གཟའ་སྐར་གློག་འགྱུ་དང་། །འཇའ་ཚོན་སྤྲིན་མང་འཁྲུག་འགྱུར་ཡང་། །ནམ་མཁའི་དབྱིངས་ལ་འགྱུར་ཉམས་མེད། །ཆོས་ཀྱི་དབྱིངས་ཉིད་བསམ་ཡས་པར། །སྐུ་གསུང་རྨད་བྱུང་ངོ་མཚར་དང་། །མཚན་མ་སྣ་ཚོགས་སྣང་འགྱུར་ཡང་། །དེ་བཞིན་ཉིད་ལ་འགྱུར་ཉམས་མེད། །རྣལ་འབྱོར་སྟོབས་ཡོན་རྫོགས་འགྱུར་ཡང་། །བདག་གཉིས་མེད་ཤེས་ང་རྒྱལ་མེད། །སྤྱོད་ཡུལ་མཚན་མ་གང་མཐོང་ཡང་། །ཡེ་ཤེས་རང་སྣང་ཉིད་དུ་སྦྱར། །སྣང་བྱེད་སྤྲོས་པའང་འཕེལ་བའི་རིམ། །བསླབ་པའི་རིམ་པ་ཇི་བཞིན་ཏེ། །སྔོན་བརྟན་མོད་ཀྱང་འདི་སློབ་པས། །མ་གོམས་དབང་གིས་རྣམ་པ་ལྔའོ། །གསུམ་ལྔ་ལྷ་གསལ་ཅུང་ཟད་གཡོ། །བར་ཆད་འབྱུང་བ་དང་པོའོ། །དེ་བསལ་ཐུན་གྱི་བཞི་ཆ་གསུམ། །གསལ་ལ་མི་གཡོ་གཉིས་པ་སྟེ། །ཐུན་བརྐྱང་ནུས་པ་གསུམ་པའོ། །དེ་ཉིད་རྐྱེན་དབང་མི་འགྲོ་བ། །བཞི་པའོ་ཁྱད་པར་གང་གནས་པ། །ཤིན་ཏུ་མི་འཕྲོག་ལྔ་པ་སྟེ། །གྲངས་ལ་སྦྱར་ན་མཐར་ཐལ་འགྱུར། །དེ་བས་ཉམས་ཚོན་ཟིན་པ་གཅེས། །རྣལ་འབྱོར་ཆེན་པོའི་ལྟ་སྤྱོད་ནི། །ཇི་ལྟར་སྤྱད་ཀྱང་རང་བཞིན་མེད། །མཁའ་ལ་བྱ་ཆེན་ལྡིང་བ་བཞིན། །ཆུ་ལ་རྐྱལ་ཆེན་འཕྱོ་བ་བཞིན། །མཁའ་ལ་རླུང་ཆེན་འཕྱོ་བ་བཞིན། །རྣལ་འབྱོར་ལྟ་བ་དེ་ལྟར་བལྟ། །རྣལ་འབྱོར་ཆེན་པོའི་སྤྱོད་པ་ནི། །ཐམས་ཅད་ཀུན་ལ་དབྱེར་མེད་སྤྱོད། །བདེ་བའི་རོ་མཆོག་མྱོང་འགྱུར་ཏེ། །དེ་ལ་སུ་ཞིག་ཆགས་པར་བྱེད། །སྤྱོད་བཞིན་མ་ཆགས་ཡེ་ཤེས་ཡིན། །བདེ་བ་མཆོག་ཉིད་བསོད་ནམས་ཚོགས། །དེ་ལྟ་བུ་ཡི་ངང་དུ་སྤྱོད། །འདི་ནི་སྤྱོད་པ་རླབས་ཆེན་ཡིན། །ལྟ་སྤྱོད་ཡ་ཆར་མ་འགྱུར་པར། །སྔགས་འཆང་རྣམས་ཀྱིས་རྟག་ཏུ་སྤྱོད། །ལྔ་བཞི་སྤང་བྱ་སྨད་སྤྱོད་ཀུན། །བདག་དང་གཞན་ཕྱིར་འཇོལ་ཉག་སྟེ། །གང་ཡང་བྱས་ལ་མ་ཐོག་ཤིང་། །ཚོགས་འགྱུར་འདམ་སྐྱེས་བཞིན་སྤྱོད་ཐབས། །ཡན་ལག་དབང་པོ་རྣམ་ཤེས་ཀུན། །རྣམ་མིན་ༀ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་བོའི་དཀྱིལ་འཁོར་བསྒོམ། །གཟུགས་སྒྲ་དྲི་རོ་རེག་ལ་སོགས། །རྣམ་སྨིན་མཱུཾ་དུ་ཤེས་པར་བྱ། །ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་བསྒོམ། །སྤྱོད་ཡུལ་ལྷ་དང་ལྷ་མོར་རོལ། །འདོད་ཡོན་ལྔ་པོ་ཐམས་ཅད་དང་། །སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་དཀྱིལ་འཁོར་དང་། །གཟུགས་མཛེས་ལྷ་ད ང་ལྷ་མོར་བརྟག །ཐམས་ཅད་ཀུན་ཏུ་བཟང་པོ་ཡི། །འདོད་པའི་ཡོན་ཏན་ལྔ་རྣམས་ལ། །ཐོགས་པ་མེད་པར་སྤྱད་བྱ་སྟེ། །བསོད་ནམས་ཚོགས་ཆེན་ཡིན་པར་བརྟག །དེ་བཞིན་གཤེགས་པ་ལྔར་ཡང་བརྟག །གཞན་ཡང་སྟོང་ཁམས་ཐམས་ཅད་ན། །ཤེས་རབ་དབྱིངས་དང་འདོད་ཡོན་རྣམས། །རབ་འབྲིང་ཐ་མ་ཐམས་ཅད་སྤྱོད། །དང་དུ་བླང་དང་མི་སྤང་བ། །རྣལ་འབྱོར་བ་ཡིས་རྟག་ཏུ་སྤྱད། །ཆགས་པ་མེད་པར་གྱུར་པ་དང་། །དངོས་གྲུབ་ཡ་མཚན་ཆེན་པོ་ནི། །དམ་ཚིག་མདོ་བཤད་ནང་ནས་བྱུང་། །སྤྱོད་ཡུལ་མཐོང་ཐོས་ཐམས་ཅད་ཀུན། །འགྲོ་དང་འདུག་དང་ཉལ་བ་ན། །དཀྱིལ་འཁོར་གཉིས་ཀྱི་རྣལ་འབྱོར་ལས། །མ་ཉམས་དེ་ཡི་དབྱིངས་ན་གནས། ཤེས་རབ་མཆོག་གིས་རྟག་ཏུ་སྤྱོད། །ཡང་ན་དམ་ཚིག་འདི་ལྟ་བུ། །ཇི་ལྟར་སྤྱད་ཀྱང་སྡོམ་མི་འདའ། །ཐམས་ཅད་མ་ལུས་སངས་རྒྱས་ལ། སྒྲུབ་ཅིང་བསྲུང་བར་བྱ་བ་མེད། །དགེ་དང་མི་དགེ་གཉིས་ཀ་མེད། །དེ་ལ་བསྲུང་དུ་རྡུལ་ཙམ་མེད། །གཞན་ཕྱིར་གྲགས་པའི་བསྲུང་བྱ་ཀུན། །གང་ལྟར་འཚམ་པར་འདའ་མི་བྱེད། །རྡོ་རྗེ་སེམས་དཔའི་བཀས་བཤད་པའི། །སྡོམ་པའི་རྩ་བ་ཐམས་ཅད་ཀུན། །དེ་བཞིན་དུ་ནི་མ་བསྲུངས་ན། །ཡཀྵ་ཁྲོ་བོ་མེ་དབལ་གྱིས། །སྙིང་ནས་དྲངས་ཏེ་ཁྲག་འཐུངས་ནས། །ངན་སོང་གསུམ་དུ་སྐྱེ་བར་འགྱུར། །དེ་ཡི་སྡུག་བསྔལ་བཟོད་གླགས་མེད། །དེ་ཕྱིར་ལམ་བཞིར་ལྡོག་ཟག་ཡོད། །ཤིང་བལ་ལྟ་བུར་ཤིན་ཏུ་ཡང་། །དབུགས་ཀྱི་རྒྱུ་བ་ཡུན་རིང་བྲལ། །རྣལ་འབྱོར་མཁའ་ལ་གཟའ་སྐར་བཞིན། །གསལ་ལ་མི་གཡོ་སྤྱོད་ཡུལ་མེད། །ཞར་ལས་བྱུང་བ་ཀུན་རྫོགས་ཕྱིར། །འདི་ཞེས་གྲངས་ཀྱི་ཆ་ལས་འདས། །ལས་སུ་རུང་བའི་རྟགས་རྣམས་ཀྱང་། །སྔོན་བྱུང་སྟོབས་ཀྱི་འཕེལ་བ་དང་། །ཁམས་སྙོམས་རང་ལུས་བདེ་བས་རྒྱས། །འདུ་བ་བཞི་བྲལ་བཟོད་ཐོབ་ཆེ། །མངོན་ཤེས་དྲུག་དང་རྩ་ལྔ་རྫོགས། །རབ་འབྲིང་ཆ་ཡིས་ཡུལ་ཁམས་གླིང་། །ཚུན་ཆད་གསལ་ཞིང་འདུལ་བར་བྱེད། །ཚོགས་དྲུག་དག་པའི་སྟོབས་ལས་གྱུར། །རྫུ་འཕྲུལ་ཉི་ཤུ་ཆ་གཡོ་ཐོབ། །ཐམས་ཅད་སྐད་མཐུན་ཆོས་སྟོན་རྗེས། །ས་གཡོས་ཆོས་སྣང་བྱེད་པ་དང་། །ཡི་གེ་སྒྲར་བྱེད་ཀུན་བརྗོད་པའོ། །འདི་དག་མཐོང་དང་བཅོ་བརྒྱད་དང་། །ཤུགས་སྣང་བརྒྱད་མཐོང་རེ་དོགས་གཞག །རྨི་ལམ་གཅིག་དང་ཆོས་མཐུན་པར། །འབྱུང་བ་གསལ་དང་བརྟན་པས་ཕྱི། །བཟང་པོའི་ལྟས་སུ་ལུང་བསྟན་ཀུན། །ལམ་འདིར་རྫོགས་པར་འབྱུང་བ་ཡིན། །གྲུབ་པའི་རིག་འཛིན་ལམ་འདི་ཉིད། །མཐར་ཕྱིན་རིགས་ཀྱི་རྒྱུ་ཡིན་ཕྱིར། །མཚན་མ་འབྱུང་བའི་ས་ཡིན་ཏེ། །བར་ཆད་མེད་ཚོགས་སྐབས་སུའང་འདིའོ། །ཕུང་པོ་ལྔ་ཉིད་དེ་བཞིན་གཤེགས། །འབྱུང་བ་ལྔ་ནི་རིགས་ཀྱི་ཡུམ། །དབང་པོ་རྣམ་ཤེས་བྱང་ཆུབ་སེམས། །ཡུལ་དུས་བྱང་ཆུབ་ཆེན་མོ་ཡིན། །བདག་རྟོག་རྣམ་བཞི་ཁྲོ་བོ་ཡིན། །རྟག་ཆད་མུ་བཞི་ཁྲོ་མོའོ། །དེ་སེམས་རང་རིག་ཉིད་ཅེས་བྱ། །དེ་བཞིན་མཉམ་རྫོགས་ལྷུན་གྲུབ་པའི། །དེ་བཞིན་གཤེགས་དང་ཡེ་ཤེས་ལྔ། །རང་བྱུང་ཆེན་པོའི་དཀྱིལ་འཁོར་བསྒོམ། །རྟོག་གཉིས་བྲལ་བའི་ཐབས་མཁས་ཀྱིས། །ལྷ་གསལ་དངོས་པོ་མེད་བསྒོམས་ན། །མཐོང་ཐོས་ལ་སོགས་མེད་པའི་ཚུལ། །རང་རིག་ཡེ་ཤེས་གསལ་བསྒོམས་ན། །རང་བཞིན་མེད་ལས་ཅིར་ཡང་འགྲུབ། །རྐྱེན་གྱིས་འགྱུར་བའི་དུས་བྱུང་ན། །སྤྲོས་པ་གང་ཡིན་བཟུང་བ་ཡིས། །ལས་ངན་ལམ་ཞེན་རྒྱུན་བཅད་ནས། །བར་མའམ་ཕྱི་མར་གཉིས་སྦྱོར་འཛིན། །གང་ཞིག་ནུས་ཞན་སྐབས་མེད་ནའང་། །འཕེན་པའི་འབྲེལ་བ་ས་བོན་གྱིས། །ཚེ་རབས་ཀུན་ཏུ་བདེ་ཐོབ་ནས། །གསུང་དང་མི་སྐོལ་སྤྱད་པས་ཐོབ། །སྙོམས་ལས་མེད་པར་བརྩོན་བྱས་ན། །ལམ་དུ་རིག་འཛིན་ཐོབ་པ་ཡང་། །ཆོས་ཉིད་དམ་ཚིག་སྨོན་མཐུ་དང་། །ཡན་ལག་རྫོགས་པས་རིག་འཛིན་འགྱུར། །སྤྲོས་པའི་རྣལ་འབྱོར་རྒྱུན་ཆགས་པའི། །བསོད་ནམས་ཡེ་ཤེས་ལོངས་སྤྱོད་ཀྱིས། །མུན་སྣང་དུག་འགྱུར་ཇི་བཞིན་དུ། །ཡི་གེ་འཁོར་ལོ་ཚོགས་མཆོག་བརྙེས། །སྤྲོས་པའི་རྣལ་འབྱོར་ལ་བསླབ་པའི་ལེའུ་སྟེ་དྲུག་པའོ།། ༈ །།དཀྱིལ་འཁོར་གཉིས་ལ་ཕྱག་བཙལ་ནས། །བར་ཆད་མེད་པར་སྦྱོར་བ་ཡི། །སྒྲུབ་པ་དུས་ཀྱི་ཚོགས་བཤད་བྱ། །བར་ཆད་མེད་པའི་ལམ་སྒྲུབ་པའང་། །བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །རྫོགས་པར་སྐབས་འདིར་ཤེས་པར་བྱ། །འདི་ཡང་ལམ་སྒྲུབ་སྦྱོར་བ་ཡི། །ཆ་ཡི་དང་པོ་བསྙེན་པ་ནི། །བྱང་ཆུབ་སེམས་རྟོགས་འགྲུས་པ་སྟེ། །བསྙེན་པའི་དམ་པ་ཡིན་བྱའི་ཕྱིར། །སེམས་བཅས་སྙིང་རྗེ་མན་ཆད་དོ། །ཕྱག་རྒྱ་གསལ་བ་ཉེ་བསྙེན་པ། །དེ་ཕྱིར་གཅིག་དང་སྤྲོས་པའོ། །སྒྲུབ་པ་ཉིད་ནི་བར་ཆད་མེད། །དུས་ཀྱི་ཚོགས་མཐས་སྒྲུབ་ཆེན་ལེན། །མཐར་ལམ་གང་ཐོབ་གྲུབ་པའོ། །གསུམ་པ་མཆོད་པའི་སྐབས་སུ་ཤེས། །གཉིས་པ་གཙོ་བོ་འདིར་བསྟན་པ། །གཞི་དང་གཞུང་གིས་རྫོགས་པར་འགྱུར། །ཕུན་སུམ་ཚོགས་པ་ལྔ་གཞི་ལ། །བསྙེན་སྒྲུབ་བཞི་ཡིས་གཞུང་བསྲང་བའང་། །གང་དག་མོས་པ་ཇི་བཞིན་དུ། །ཞི་དང་ཁྲོ་བོས་བསྒྱུར་བར་བྱ། །དེ་ལ་སྔ་མ་གནས་དང་དུས། །ཡོ་བྱད་སྟོན་འཁོར་སྒྲུབ་པ་པོ། །སྒྲུབ་ཐབས་ཕུན་སུམ་ཚོགས་པའང་། །བཞི་དང་སྦྱར་བས་གཞུང་རྫོགས་བྱ། །དེ་ལ་སྤྲོས་པ་མཐར་ཕྱིན་པས། །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པའི། །རྣལ་འབྱོར་འཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བསྟེན། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འཁོར་གྱིས་འགྲུབ་འགྱུར་མི་ལྡན་བརླག །སྡེ་དཔུང་ཆེན་པོས་མི་ཚུག་ཤིང་། །ས་དང་བར་སྣང་ཤིས་པ་དང་། །ལོ་རྒྱུས་རྣམ་གཉིས་ལྡན་པ་དང་། །ཡིད་འོང་ས་བཙལ་རྒྱས་པར་བྱ། །རྙེད་ནས་ཚོམ་བུའི་གྲངས་བཞིན་དུ། །ཆེ་ཆུང་རྐྱེན་དུ་འཚམས་པར་བྱ། །འཁོར་ཁང་ཕྱི་ནང་བར་ལྡན་པའི། །རིན་ཆེན་བྱུག་པས་བསྲུང་བ་དང་། །རིན་ཆེན་སྤྲ་པའི་གཞལ་ཡས་ཁང་། །ཡིད་འོང་བྱ་བ་ཤིན་ཏུ་གཅེས། །ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་ལ། །གསང་མཆོག་དངོས་གྲུབ་མྱུར་བའི་ཕྱིར། །གཟའ་སྐར་ཤིས་པ་བླང་བར་བྱ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱིས་མཆོག་འགྲུབ་ཕྱིར། །རྣལ་འབྱོར་བརྩོན་བཅས་རིམ་བཞིན་བསྒྲུབ། །གོས་རྒྱན་བཟའ་བཏུང་གསང་བ་དང་། །སྒྲུབ་པའི་ཡོ་བྱད་ལྔ་རྣམས་དང་། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་བརྟེན་དང་བར་ཆད་བཟློག །ཡོ་བྱད་དགབ་པ་སྡུག་བྱས་ཏེ། །ཚོ་གསུམ་བཅད་ལ་བྱིན་གྱིས་བརླབ། །སྒྲུབ་ཐབས་ཡན་ལག་བཞི་སྦྱར་བ། །གནས་དང་ལངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོ་དམ་མནོས་བཞིན་དུ་བྱ། །དམ་བཅའ་ལྡན་པས་འདུས་ཏེ་བསྒྲུབ། །ཡང་ན་དཔག་ཚད་རྒྱང་གྲགས་སམ། །སོ་སོ་འཚམ་པར་གཟུགས་བརྙན་བྲི། །རྒྱན་དང་མཆོད་སོགས་འཁོར་བ་དང་། །ཕྱི་རོལ་མཆོད་པའི་ལངས་རྫོགས་ཏེ། །ཕྱི་བཅད་བསྲུང་བསྒོ་རིམ་བཞིན་བྱ། །བསྙེན་པའི་དོན་དུ་སྔོན་བྱ་བ། །རྫོགས་པའི་ལམ་རྣམས་ཟིན་པར་བྱ། །འདུས་པས་ཕྱོགས་བཅིངས་རྫས་བརླབས་ནས། །སྤྱི་འམ་ཡང་ན་རེ་རེ་ཞིང་། །ཚོམ་བུའི་འཁོར་ལོ་རིམ་བཞིན་བསྒོམ། །སེམས་དཔའ་སེམས་མ་ཉིད་དུ་བསྒོམ། །སོ་སོའི་རིགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གཅིག་པའི་ལྷ་རྣམས་བསྒོམ། །དེ་བཞིན་རིགས་དང་རྡོ་རྗེའི་རིགས། །པདྨའི་རིགས་ཏེ་སྐུ་གསུང་ཐུགས། །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གསུམ་པའི་ལྷ་རྣམས་བསྒོམ། །ལྔ་དང་ལྔ་ཡི་སྦྱོར་བ་ཡིས། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་རྣམ་པར་བསྒོམ། །བྱིན་རླབས་དབང་དང་ལྡན་བྱས་ནས། །རང་བཞིན་གནས་ནས་དབབ་བྱས་ཏེ། །གཞུག་བཅིང་བརྟན་བྱས་རིམ་པར་མཆོད། །རྫོགས་ནས་བསྟོད་དེ་བསྙེན་པ་བྱ། །ཟིན་ནས་བསྡུས་ཏེ་རྣལ་འབྱོར་ཚོགས། །ཚུལ་བཞིན་མཆོད་པའི་འཕྲིན་ལས་བྱ། །ནང་ནུབ་མཁའ་འགྲོར་ལྷག་མ་སྦྱིན། །བར་ཆད་བཟློག་ཅིང་བསྙེན་པ་བྱ། །ཟླ་ཕྱེད་ཕྱེད་ཞག་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །དེ་བཞིན་རྒྱུན་གྱི་ཞག་གྲངས་བཞིན། །བར་ཆད་མེད་པར་བསྒྲུབ་པར་བྱ། །སྤྱོད་ལམ་ཡོ་བྱད་ལྔ་སྦྱོད་ཅིང་། །དངོས་སུ་མཆོད་པ་རྣམ་གཉིས་པ། །གཙོ་རུ་དགོས་པ་གང་ཡིན་པ། །ཕྱི་མ་གདུག་པ་འདུལ་བར་ཤེས། །སྔ་མ་རྒྱས་པར་བཤད་བྱ་བ། །གོས་རྒྱན་བཟའ་བཏུང་གླུ་གར་རྣམས། །ཧཱུཾ་དུ་ཤེས་པས་རབ་སྤྱད་ན། །ངོ་མཚར་དཀྱིལ་འཁོར་མཉེས་པའི་ཕྱིར། །གསང་སོགས་ཡོ་བྱད་ལྔ་པོ་རྣམས། །རིག་ཕྱིར་མ་སྐྱེས་ཡེ་ཤེས་གསལ། །ཆོས་ཉིད་ཡེ་ཤེས་རོལ་པར་བསྒོམ། །ཅིག་ཤོས་ཚེ་ནའང་དེ་བཞིན་ནོ། །ཕྱོགས་བཅུ་མཐའ་ཡས་དུས་བཞི་ཡི། །ཐམས་ཅད་དབྱེར་མེད་མཎྜ་ལ། །ཉི་ཟླ་ཤར་བའི་གཞལ་ཡས་ལ། །པདྨ་ཆགས་མེད་གདན་བཏིང་ནས། །རིན་ཆེན་ཟད་མེད་ཕོ་བྲང་ས། །ཆེ་ཆུང་ཚད་དཔག་མེད་པ་ཡི། །བྱང་ཆུབ་བདེ་ལྡན་དཀྱིལ་འཁོར་ལ། །བདེ་ལྡན་བྱང་ཆུབ་རབ་བཀོད་ནས། །མ་ལུས་ཐམས་ཅད་དབྱིངས་བསྡུས་ནས། །ལུས་བསྐྱོད་ཡན་ལག་བསྒུལ་གསིགས་ན། །དབང་པོ་ལྔ་ཡི་དཀྱིལ་འཁོར་ཀུན། །ཕྱག་རྒྱ་ཆེན་པོ་ཡིན་པར་བཤད། །ལྷག་པའི་ཏིང་འཛིན་འབའ་ཞིང་གམ། །བྲོ་སོགས་ཚེ་ན་བསྒོམ་པ་ཡང་། །བྷྲཱུཾ་དང་ཙཀྲའི་དཀྱིལ་འཁོར་དུ། །ཉི་ཟླ་འཕྲུགས་པའི་ས་གཞི་ལ། །པདྨ་ཆགས་མེད་གདན་བཏིང་ནས། །ཐབས་དང་ཤེས་རབ་ཆགས་མེད་ཚུལ། །ཡན་ལག་དབང་པོ་ཐམས་ཅད་ཀུན། །རང་བཞིན་ཡོང་གིས་དག་པ་དང་། །ཏིང་འཛིན་དེ་བཞིན་གཤེགས་པ་ལྔ། །ཡེ་ནས་མ་བཅོས་ཡོང་གིས་ཏེ། །ལྷག་པའི་ཏིང་འཛིན་དཀྱིལ་འཁོར་གྱིས། །དབུ་ལ་དེ་བཞིན་གཤེགས་པའི་འཁོར། །ཡན་ལག་བཞི་ལ་རིགས་བཞིའི་འཁོར། །ཁ་དོག་དབྱིངས་དང་ཕྱག་རྒྱ་དང་། །ཐབས་དང་ཤེས་རབ་གསལ་བསྒོམས་ཏེ། །ཕྱོགས་བཅུར་སྤྲོ་ཞིང་ངན་སོང་སྦྱོང་། །གནས་སུ་བསྡུ་ཞིང་དཀྱིལ་འཁོར་བསྟིམ། །འདས་དང་མ་འདས་ཐམས་ཅད་ཀུན། །བདེ་གཤེགས་ཞིང་དུ་རྣམ་པར་སྦྱོར། །ཡན་ལག་ཆེན་པོ་ལྔ་བསྐྱོད་ན། །རིགས་ལྔའི་དཀྱིལ་འཁོར་མ་ལུས་གཡོ། །འགྲོ་ལྔ་བྱང་ཆུབ་ལམ་དུ་འཛུད། །སྙིགས་མ་ལྔ་ཡང་རྣམ་པར་དག །བཟང་མཛེས་ལེགས་པའི་གོས་བགོས་ན། །འོད་ཟེར་སྣ་ཚོགས་འཕྲོ་བར་འགྱུར། །དེ་ནས་མཐར་ཐུག་མེད་པའི་བར། །ཡེ་ཤེས་ལྔ་ཡིས་བརྒྱན་པར་འགྱུར། །རྒྱན་མཆོག་མཛེས་པས་ལུས་བརྒྱན་ནས། །ཏིང་འཛིན་འོད་འབར་གསལ་བསྒོམ་ཏེ། །ཕྱོགས་བཅུ་གང་བར་དཀྱིལ་འཁོར་སྤྲོ། །བདག་ཉིད་ཆེན་པོའི་དཀྱིལ་འཁོར་ལ། །མི་དམིགས་དབྱིངས་ནས་དཀྱིལ་འཁོར་མཆོད། །འདོད་ལྔ་ཐབས་དང་ཤེས་རབ་གནས། །བདེ་མཆོག་རོ་ཡང་མྱོང་བར་བྱེད། །མ་ཆགས་ཚོགས་ཆེན་གཉིས་དང་ལྡན། །བྲོ་སྟབས་གར་གྱི་ཕྱག་རྒྱ་དང་། །གླུ་དབྱངས་ཚིག་གི་སྒྲ་བསྒྲགས་ན། །ཕྱོགས་བཅུའི་སྐྱེ་གནས་མ་ལུས་ཀུན། །ལྷུན་གྲུབ་རྡོ་རྗེའི་སྐུ་མཐོང་ཞིང་། །ཆོས་ཀྱི་དུང་ཆེན་སྒྲ་ཡང་ཐོས། །སྒྲིབ་གཉིས་བྱང་ནས་བྱང་ཆུབ་འགྲུབ། །བདེན་མཐོང་སྙན་གྲགས་ཚོགས་ཆེན་འགྲུབ། །མ་ཆགས་ཡེ་ཤེས་ཚོགས་དང་ལྡན། །ཐབས་དང་ཤེས་རབ་ཐམས་ཅད་ཀུན། །དབུས་ནས་ཤར་ཕྱོགས་ཁ་བསྟན་ཏེ། །སེང་གེ་སྟབས་ཆེན་མཆོང་པར་བྱ། །དབང་པོ་ལྔ་ལ་ཡི་གེ་ལྔ། །གསལ་བའི་འཕྲོ་འདུས་མངོན་ཤེས་རྫོགས། །འདོད་པ་ལྔ་ལ་ཆག་མེད་རོལ། །བདག་དང་གཞན་དོན་རྫོགས་པར་བྱེད། །ཚོམ་བུ་གསལ་བའི་ཡབ་ཡུམ་རྣམས། །ཕན་ཚུན་འོད་འཕྲོ་བསྟིམ་བྱས་ཏེ། །དཀྱིལ་འཁོར་འབར་བར་གསལ་གྱུར་ནས། །བདག་དང་ཕྱོགས་བཅུ་གཉིས་མེད་བསྒོ། །ཕྱོགས་ཕྱོགས་རིམ་བཞིན་ཁ་བལྟས་ཏེ། །ཐུགས་སྐུ་གསུང་ཡོན་ལས་ཀྱི་གླུ། །བྲོ་ཚིག་བརྗོད་དང་ཡེ་ཤེས་རྒྱན། །བྲོ་གླུ་རིགས་ལྔའི་སྤྱི་གླུ་བྲོ། །རྣམ་ལྔ་སྟོབས་གླུ་ལྡན་པར་བྱ། །སྲོག་ལྡན་བྲོ་གླུ་དོན་གཉིས་རྫོགས། །བཟའ་དང་བཅའ་དང་མུར་བཏུང་རྣམས། །ཐབས་དང་ཤེས་རབ་ཉིད་གནས་ཤིང་། །བདག་ཉིད་ཆེན་པོའི་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཅིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །དེ་ལྟར་བཞི་དང་ལྡན་པ་ཡིས། །ཐབས་དང་ཤེས་རབ་ལྡན་གྱུར་ནས། །བྱིན་བརླབས་ཆ་རྣམས་རྫོགས་པར་བྱ། །བསྙེན་སྒྲུབ་གསང་བ་བཞི་རིམ་པས། །ཐམས་ཅད་གཉིས་མེད་དབྱིངས་སུ་སྦྱོར། །གཉིས་མེད་དབྱིངས་ནས་བྱང་ཆུབ་འབར། །འོད་འཕྲོ་འབར་བས་ཕྱོགས་བཅུར་གསལ། །བདེ་བས་ཐབས་ཆེན་ཐབས་ཀྱི་མཆོག །ཤེས་རབ་བདེ་མཆོག་བརྟན་ལྡན་རྫོགས། །རྡོ་རྗེ་དྲིལ་བུ་ཡང་དག་ལྡན། །ཕྱག་རྒྱ་བཞི་དང་ལྷ་མོ་བརྒྱད། །རྫོགས་རོལ་ཉི་ཟླ་དུས་གཅིག་ལྡན། །གཉིས་མེད་ཟུང་དུ་འབྲེལ་གྱུར་ན། །བདེ་གཤེགས་དཀྱིལ་འཁོར་མ་ལུས་འབྱུང་། །ཐིག་ལེ་རྡོ་རྗེ་གཟུགས་སུ་ཆགས། །མཆོད་ཚེ་མཁའ་འགྲོ་གསལ་འབར་འགྱུར། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་མངོན་རྫོགས་པའི། །དཀྱིལ་འཁོར་ཐམས་ཅད་འགྲུབ་པར་འགྱུར། །སྒྱུ་འཕྲུལ་དྲྭ་བ་བརྟན་པ་ཡིས། །ཕྱོགས་བཅུ་དུས་བཞིར་གཤེགས་པ་ཡི། །སངས་རྒྱས་དཀྱིལ་འཁོར་མ་ལུས་དང་། །ཁམས་གསུམ་འགྲོ་རྣམས་མངོན་དུ་འགྱུར། །སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །གདུག་པའི་ཚོགས་རྣམས་བསྒྲུབ་བྱ་བ། །གནས་དང་ཟླ་དང་རྫས་རྣམས་ནི། །ཚོགས་ཀྱི་མཆོག་ཏུ་དམིགས་པས་གཞག །ནགས་ཚལ་ཆེན་པོ་དབེན་པའི་ས། །གཞུང་དང་མཐུན་པ་རྙེད་ནས་ནི། །གནོད་བསྐྲད་ས་མནན་བྱིན་གྱིས་བརླབ། །ས་གཞི་བསྙམས་པ་རྒྱས་པར་བྱ། །སྒྱུ་འཕྲུལ་དྲྭ་བས་རྫོགས་སངས་རྒྱས། །དཀྱིལ་འཁོར་ལྔ་བཅུ་བརྒྱད་བསྟན་པའི། །ཆོ་ག་ཡན་ལག་རྫོགས་པ་ཡི། །རྣལ་འབྱོར་འདུས་པས་ངེས་པར་འགྲུབ། །སྟོན་པ་རྡོ་རྗེ་རྒྱལ་དབང་ཅན། །རྒྱལ་ཚབ་རྒྱལ་པོར་མཚུམས་པ་དང་། །ཀརྨ་གདངས་ཆེན་འཕྲེང་བར་ལྡན། །ལྗོན་ལྕུག་སྡོང་རེག་མཚན་རྫོགས་དང་། །རྣལ་འབྱོར་མིང་སྲིང་བརྩེ་གདུང་ལྡན། །ཚོམ་བུ་ལྔའམ་ཟུང་གི་བསྒྲུབ། །དཀར་རྩི་དམར་རྩི་དྲི་ཤ་ཆེན། །རྡོ་རྗེ་དུང་ཆེན་དམར་གྱིས་བཀང་། །དུང་དང་སྲོག་ཤིང་གསར་རྙིང་དང་། །གཟུགས་དང་ལུགས་ཆེན་དུང་མཆོག་དང་། རྒྱས་ཆས་བཅུ་དྲུག་ཚང་བ་དང་། །སྒྲུབ་པོ་འཚོ་བའི་ཡོ་བྱད་དང་། །སྒྲུབ་པ་རྫས་ཀྱི་ཡོ་བྱད་དང་། །ཞིང་གྱུར་མཆོག་དང་མཆོག་ཕྲན་དང་། །ཞིང་གྱུར་མཆོག་དང་མཆོག་ཕྲན་དང་། །རྐྱེན་བཟློག་ཡུངས་ཕུར་ལྕེ་བོག་གནག །སྨན་དང་སྨན་པར་བཅས་པ་དང་། །རྡོ་རྗེ་གོ་མཚོན་བཅས་པ་དང་། །ཇི་སྙེད་པ་ཡི་རྫས་རྣམས་ཀུན། །འཇིགས་བྱེད་ཆེན་པོའ་ིཏིང་འཛིན་དང་། །ཉམས་པ་མེད་པའི་སེམས་གྱིས་སྤྱད། །བསྡུས་ཏེ་ཚོགས་སུ་བྱ་བའི་ཕྱིར། །ཅི་འདོད་སྣང་བར་བདག་གིས་དགོང་། །ཞག་ནི་སུམ་བཅུ་ཕྲག་དྲུག་གམ། །དྲུག་ཅུ་དགུ་བཅུ་རྩ་དྲུག་ཏུ། །འཇིག་བྱེད་ཆེན་པོའི་དཀྱིལ་འཁོར་བསྒོམ། །སྒྱུ་འཕྲུལ་དྲྭ་བའི་དཀྱིལ་འཁོར་ལ། །གདེང་དང་བཅས་པའི་བསམ་པ་ཡིས། །རེ་བ་མེད་པར་རབ་ཏུ་བསྒྲུབ། །གླུ་དང་གར་དང་ཕྱག་རྒྱ་དང་། །ཤེས་རབ་ཐབས་སུ་ཤེས་པ་དང་། །བྱང་ཆུབ་སེམས་ཀྱི་མཆོད་པ་དང་། །བརྡའ་ལ་སོགས་པའི་ཡོན་ཏན་དང་། །བཟའ་དང་བཅས་དང་བཏུང་དང་བགོ །ལོངས་སྤྱོད་ལྔ་ལྡན་ཐམས་ཅད་ཀྱིས། །མདོར་ན་ཚོགས་རྣམས་མངོན་དུ་བསྒྲུབ། །སྤྱི་ཡི་བསྙེན་སྒྲུབ་སྔོན་བཞིན་ཤེས། །སྒྲུབ་པའི་ཐབས་ཀྱི་བསྙེན་སྒྲུབ་བཞི། །དང་པོའི་ཚེ་ན་གནས་ཆེན་དེར། །རྒྱང་གྲགས་དཔག་ཚད་ལ་སོགས་དང་། །ལུས་གང་ལུས་དོ་གསུམ་གྱི་ཚད། །རང་གི་རིག་པས་ཅི་ནུས་བྱ། །ཕྱག་རྒྱ་གཟུགས་དང་སྙིང་པོ་རྣམས། །ལྔ་ཡི་ཚོན་གྱིས་བྲི་བར་བྱ། །ཡོ་བྱད་སྔོན་བཞིན་བྱིན་བརླབས་ནས། །འཕགས་རྒྱལ་མཆོད་ཅིང་ཕྱི་རོལ་པ། །བཅུ་བཞི་མཉེས་དང་གཉིས་པོ་ཡང་། །སྦྱིན་པས་ཚིམ་བྱས་བསྒོམ་པ་བྱ། །འཇིགས་བྱེད་དབང་དུ་བདག་ཞུགས་ནས། །ཁྲོ་བོ་ཁྲོ་མོ་འཁོར་དུ་བྱ། །གདན་དུ་གཟིར་ཞིང་ཕུར་བུས་གདབ། །རང་བཞིན་ཕབ་ལ་མཆོད་བསྟོད་དེ། །བར་ཆད་ཏིང་འཛིན་མཆོག་གིས་བཟློག །ཐུན་མོང་བསྲུང་བའི་འཁོར་ལོ་བྱ། །དེ་ནས་གཉིས་པ་རྒྱན་རྣམས་དང་། །སྒྲུབ་རྫས་མཆོད་པ་དགྲམ་རྫོགས་ནས། །ཕྱི་ནང་གསང་བས་བསྲུང་བྱ་སྟེ། །སྲིན་པོའི་རྒྱལ་པོ་ཚུལ་བཞིན་མནན། །རྟགས་ལྡན་སྦྱང་བྱིན་དབབ་པར་བྱ། །དེ་ནས་རྫས་རྣམས་བྱིན་གྱིས་བརླབ། །དེ་ནས་འཁོར་ལོ་གཅིག་པའང་། །གསུམ་དང་ལྔ་རུ་བསྒོམ་པར་བྱ། །འཁོར་ལོ་བར་ཁྱམས་སྒོ་རྣམས་སུ། །འཇིགས་བྱེད་འཁོར་ལོ་རིགས་ཀྱི་གཙོ། །བཙུན་མོའི་ཚོགས་དང་ལྡན་པར་བསྒོམ། །ཞི་དང་དྲག་པོ་དབང་དང་རྒྱལ། །འཇིགས་པའི་ཚོགས་ཆེན་དེ་དབུས་སུ། །བདག་ཉིད་དྲག་པོར་བཅོས་ཚུལ་དུ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །དེ་བཞིན་རྡོ་རྗེ་པདྨ་དང་། །རིན་ཆེན་རལ་གྲིའི་ཚོམ་བུ་བསྒོམ། །གཅིག་ལ་རྡོ་རྗེ་གསུམ་མོས་པ། །སྐུ་གསུང་ཐུགས་ཀྱི་འཇིགས་བྱེད་དོ། །འཇིགས་བྱེད་ལྔ་རྫོགས་དཀྱིལ་འཁོར་ནི། །འདུས་པའི་ཚོམ་བུ་ལྔ་ཡི་རིགས། །ཉི་ཤུ་རྩ་ལྔ་སྐུ་གསུང་ཐུགས། །ཡོན་ཏན་འཕྲིན་ལས་རྫོགས་པར་བསྒོམ། །རྒྱན་དང་ཆ་ལུགས་ལ་སོགས་པ། །འཇིགས་པའི་ཚོགས་ནི་ཇི་བཞིན་པར། །སྤྱིའམ་ཡང་ན་རེ་རེ་རུ། །ཚམ་ངམ་ཆེན་པོའི་ཆ་ལུགས་བསྒོམ། །ལྷག་པའི་དཀྱིལ་འཁོར་དགུ་དགུར་ལྡན། །བྱིན་དབང་ཐོབ་པའི་བདག་དཀྱིལ་ལ། །རང་བཞིན་ཕབ་དགུག་གཞུག་ཅིང་བརྟན། །དགྱེས་ནས་རིམ་བཞིན་མཆོད་པར་བྱ། །ༀ་ཨཱཿཧཱུྃ་སུ་ར་ཏོ་མ་ཧཱ་པཉྩ་ཨ་མྲྀ་ཏ་ཤྲི་ཧེ་རུ་ཀ་མནྟྲ་ཛྭ་ལ་མ་ཧཱ་མཎྜ་ལ་ཀཱ་ཡ་ཝཱ་ཀ་ཙིཏྟ། ༀ་ༀ་ༀ། ཧཱུཾ་ཧཱུཾ་ཧཱུཾ། སྭཱཾ་སྭཱཾ་སྭཱཾ། ཨཱཾ་ཨཱཾ་ཨཱཾ། ཧཱཾ་ཧཱཾ་ཧཱཾ། བཛྲ་མ་ཧཱ་ཀཱ་པཱ་ལ་ཁ་ཌྷ་གྷཎྜེ་ནཱ་ད་ཛྭ་ལ་སིདྡྷི། མ་ཧཱ་ཤྲཱི་ཧེ་རུ་ཀ །ཨ་མེ་དཱུ་མེ་སིདྡྷོ་བྷ་ཝ་ཏུ། སཾ་ཧ་ར་ཎ། ཧཱུཾ་ཧཱུཾ་ཧཱུཾ། མ་ཧཱ་ཡོ་ག །ཨནྟར་མ་ཧཱ་ས་མ་ཡ། རུ་ལུ་རུ་ལུ་ཨ་ལ་ལ་ཧོཿ ༀ་ཨཱཾ་ཧཱུཾ་སུ་ར་ཏཿ ཀ་མ་ལ། མ་ཧཱ་སུ་ཁ་མཱ་ལེ། མ་ནུ་ས་མ་ན། ཛྭ་ལི་ནཾ་དཱ་ན། ཨ་བ་ཡོ་ག་ཁཱ་ཧི། ཨ་ལ་ལ་ཧོ། མཆོད་བསྟོད་རྫོགས་ནས་བསྙེན་པ་ནི། །ཡེ་ཤེས་མདུན་དུ་ལྷག་པ་ལ། །བཟླས་པ་གསལ་བ་གསུམ་གྱིས་བྱ། །ༀ་བཛྲ་མ་ཧཱ་ཀྲོ་དྷ་ཤྲཱི་ཧེ་རུ་ཀ །བཛྲ་ཀྲོ་དྷི་ཤྭ་རི་སརྦ་དུ་ཥྚཱཾ་ཧཱུཾ་ཕཊ། རུ་ལུ་རུ་ལུ་མ་ཧཱ་ས་མ་ཡ་ཧཱུཾ། རུ་ལུ་རུ་ལུ་ཧཱུཾ་བྷྱོ་ཧཱུཾ། དེ་སོགས་བཟླས་ཏེ་འཕྲོ་འདུ་ཡིས། །བདུན་པར་བསྐུལ་དང་སྣོད་བྱེད་པ། །བསྙེན་པའི་དཀྱིལ་འཁོར་རྫོགས་པའོ། །དེ་བསྙེན་དེ་བཞིན་སྒྲུབ་པ་ཡང་། །འཕྲོ་འདུས་བསྐུལ་དང་དངོས་གྲུབ་སྡུད། །སྐྱོན་བཅུ་སྤངས་ཏེ་སྒྲུབ་པ་ནི། །སྒྲུབ་པའི་དུས་སུ་ཤེས་པར་བྱ། །གཅིག་ལ་རྫས་བསྟར་ཚུར་བསྡུ་བ། །སྒྲུབ་པ་ཆེན་པོར་ཤེས་པར་བྱ། །ཤེལ་དང་བྱུ་རུ་བུང་བ་དང་། །མཐིང་གི་བུང་བ་མོང་པོ་དང་། །རིམ་བཞིན་བུང་བ་མེ་ཏོག་དང་། །མཚོ་ལ་སེར་ཆེན་འབའ་བཞིན་ནོ། །འོད་དང་དྲི་དང་སྒྲ་དང་གཟུགས། །འཁོར་དང་འབར་དང་འཁོལ་བྱུང་ན། །བར་ཆད་ཆ་རྣམས་བརྟགས་བྱས་ཏེ། །བར་ཆད་བསྐྲད་དེ་བདག་བསྲུངས་ལ། །ཞག་གྲངས་ཚང་ཞིང་རྟགས་བྱུང་ན། །དཀྱིལ་འཁོར་མཐུན་པ་ཉིད་དུ་སྦྱར། །གནས་སུ་བསྟིམ་ཞིང་བརྟན་པར་བྱ། །ངེས་ན་སྔོན་བཞིན་རྣམ་གསུམ་ཐོབ། །གསང་མཆོད་རྒྱས་པར་བཤད་པར་བྱ། །ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་སྟེང་དུ་མཁས་པས་བཞག །ང་རྒྱལ་ལག་གི་འདུ་བྱེད་བསྒོམ། །ཧཱུཾ་དུ་གྱུར་པས་རྣམ་པར་དག །དབྱིངས་སུ་ཐིམ་ནས་ཕྱག་རྒྱར་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་པ་བསྒོམ། །དེ་བཞིན་གཤེགས་པར་བྱིན་བརླབས་ནས། །རྒྱལ་བའི་སྲས་སུ་དབང་ཡང་བསྐུར། །ཤིན་ཏུ་ཁྲོ་བོ་ཆེན་པོ་ཡིས། །ཐབས་ཀྱིས་ལྷ་ཆེན་བསྒྲལ་བ་ལྟར། །ཆོས་ཉིད་རྟོགས་པའི་ཏིང་འཛིན་གྱིས། །གཉིས་སུ་མེད་པར་ཐབས་ཀྱིས་བསྒྲལ། །ཐུགས་རྗེ་ཆེན་པོའི་བྱིན་རླབས་ཀྱིས། །ལམ་ལྔའི་སེམས་ཅན་ཀུན་བཀུག་ནས། །ཐམས་ཅད་མ་ལུས་བསྒྲལ་བར་བྱ། །ཕྱི་ནང་སྣོད་བཅུད་ཇི་སྙེད་ན། །གནས་པའི་སེམས་ཅན་མ་ལུས་ཀུན། །བདག་ཉིད་ཆེན་པོ་རྟོགས་པ་ཡིས། །དབྱིངས་སུ་ཡང་ནི་བསྒྲལ་བར་བྱ། །རི་རབ་ཆེན་པོའི་གླིང་བཞི་ལ། །གནས་པའི་སེམས་ཅན་མ་ལུས་ཀུན། །ཡེ་ཤེས་མེ་ཆེན་བསྒོམས་བྱས་ཏེ། །ཐམས་ཅད་མ་ལུས་བསྲེག་པར་བྱ། །དབྱིངས་སུ་ཡང་ནི་བསྟིམ་པར་བྱ། །སྲིད་གསུམ་སྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །རཾ། ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །དེ་ལྟར་བསྒྲལ་བ་ཀུན་བྱས་ཀྱང་། །བསྒྲལ་བའི་དངོས་པོ་གང་ཡང་མེད། །ཕུང་པོ་ལྔ་པོ་གཞིག་པར་བྱ། །བཤིག་ན་འབྱུང་བའི་ཕག་ལ་ཞ། །མ་བཞིན་ན་ཡང་འབྱུང་བ་ཡིན། །རྣམ་ཤེས་མེད་པས་བསད་བྱས་ན། །རྨི་ལམ་སྲོག་བཅད་ཚུལ་བཞིན་དུ། །གནས་པ་ཉིད་ན་དངོས་པོ་མེད། །སེམས་ཀྱི་རང་བཞིན་དེ་ལ་ནི། །དུས་གསུམ་སངས་རྒྱས་དགྲར་ལངས་ཀྱང་། །སུས་ཀྱང་ཟིང་ཅིང་སོད་བ་མེད། །འོ་ན་ཐུགས་རྗེས་གང་བསྒྲལ་ན། །རྣམ་རྟོག་མཚན་མ་ཐམས་ཅད་ཀུན། །ཕྱིན་ཅི་ལོག་ལས་བཟློག་བྱས་ཏེ། །ཏིང་འཛིན་སྔགས་དང་ཕྱག་རྒྱ་རྣམས། །ཤིན་ཏུ་གོམས་པས་དབང་བསྐུར་ཏེ། །བྱང་ཆུབ་ཞིང་ལ་དགོད་པར་བྱ། །དེ་ཙམ་ལ་ནི་བསྒྲལ་ཞེས་གདགས། །བསྒྲལ་བ་ཉིད་ན་སྦྱོར་བ་ཡོད། །ཉོན་མོངས་སྡུག་བསྔལ་རྩད་བཅད་ནས། །བྱང་ཆུབ་གནས་སུ་བསྒྲལ་བས་ན། །གཉིས་མེད་དབྱིངས་སུ་སྦྱོར་བ་ཡིན། །ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་པོ། །སྒྲུབ་པ་དང་ནི་སྒྲུབ་ཆེན་པོས། །ཤེས་རབ་དབྱིངས་མ་ཁྲུས་བཅས་ལ། །བདེ་གཤེགས་དཀྱིལ་འཁོར་ཀུན་བཀོད་དེ། །བདག་ཉིད་རིག་པ་ལྷར་བསྒོམས་ནས། །གཉིས་སུ་མེད་པར་ལྡན་པར་བྱ། །རྡོ་རྗེ་དྲིལ་བུ་ལྡན་གྱུར་ནས། །ཡུལ་གྱི་པདྨའི་དཀྱིལ་འཁོར་དུ། །བྱང་ཆུབ་པདྨའི་བདེ་ཐུགས་སྤྲོ། །སེམས་ལྔའི་རིམ་པ་ཟིན་པ་ཡིས། །སངས་རྒྱས་དཀྱིལ་འཁོར་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །ཕྱོགས་དུས་དཀྱིལ་འཁོར་གསུམ་མཉེས་དང་། །འགྲོ་བ་མང་པོ་བདེ་ཐོབ་ནས། །སླར་ཡང་གཉིས་མེད་དབྱིངས་སུ་ཐིམ། །ཐིམ་གྱུར་དབྱིངས་ནས་ཕྱག་རྒྱ་འབར། །བདེ་གཤེགས་ཐབས་དང་ཤེས་རབ་རྫོགས། །ཕྱག་རྒྱ་དྲུག་ཀྱང་ཡང་དག་རྫོགས། །བསོད་ནམས་ཚོགས་ཆེན་གཉིས་ཀྱང་རྫོགས། །སྒྲུབ་པ་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེ་ལྕེ་ཡིས་བླང་། །མཁའ་འགྲོ་གསལ་འབར་ཚེ་ལ་སོགས། །ཡིད་བཞིན་སྤྲིན་གྱི་བདག་པོར་འགྱུར། །འགྲོ་དྲུག་དུས་གནས་དེ་དག་སྣང་། །མཆོད་པ་ཆེན་པོ་མཉམ་སྦྱོར་ཞིང་། །ཐམས་ཅད་དབྱིངས་སུ་སྦྱོར་བས་ན། །ངན་འགྲོ་མི་ལྟུང་ཡང་དག་འགྲུབ། །འདི་ནི་བསྒྲལ་བ་ཆེན་པོ་ཡིན། །བསྒྲལ་བ་ཆེན་ན་སྦྱོར་བ་ཡིན། །སྦྱོར་བ་ཉིད་ན་མ་ལུས་བསྒྲལ། །ཡེ་ནས་ལྷ་དང་ལྷ་མོ་ཡི། །དཀྱིལ་འཁོར་ཡང་དག་སྦྱོར་བ་དང་། །དབང་པོ་ཡུལ་དུས་སྦྱོར་བའོ། །ཕུང་པོ་ལྔ་ཉིད་དེ་བཞིན་གཤེགས། །འབྱུང་བ་ལྔ་ཉིད་ཡུམ་དུ་སྦྱོར། །དུས་བཞི་ལྷ་མོ་ཉིད་དུ་སྦྱོར། །རྟག་ཆད་མུ་བཞི་ཁྲོ་མོ་བཞི། །ཐམས་ཅད་མ་ལུས་འབྱུང་བ་ཀུན། །མཉམ་པའི་དབྱིངས་དང་རིག་པར་སྦྱོར། །ཐབས་ཀྱིས་སྲིན་མོར་རོལ་པ་ལྟར། །སྦྱོར་བ་ཉིད་ན་ཆགས་པ་མེད། །མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཟིན་ཆགས་མེད། །འདི་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །མ་རྟོགས་པ་ཡིས་སྤྱད་གྱུར་ན། །ཡི་དྭགས་སྲིན་པོའི་གནས་སུ་སྐྱེ། །མཆོད་པའམ་སྤྱོད་ལམ་ཐམས་ཅད་དུ། །ཆས་བརྒྱད་རྒྱན་རྣམས་བགོ་བྱ་སྟེ། །བཟའ་བཏུང་རྗེས་སུ་མཐུན་པར་སྤྱད། །བྲོ་གར་གླུ་ཚིག་ལྡན་པར་བྱ། །དབང་པོ་ཡུལ་དུས་རིག་པ་རྣམས། །ཐབས་དང་ཤེས་རབ་ལྡན་འགྱུར་ཞིང་། །མཉམ་པའི་ངང་ཉིད་རྟོགས་གསལ་ན། །ཐམས་ཅད་བདེ་བ་ཆེན་པོའི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཁྲོ་བོ་ཁྲོ་མོ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །ཐབས་དང་ཤེས་རབ་ལྡན་པའི་ཞབས། །རྟག་ཏུ་རྡོ་རྗེ་འབར་བར་འགྱུར། །ཐབས་ཆེན་རེ་རེ་བསྐྱོད་ན་ཡང་། །པདྨ་ཆགས་མེད་རེ་རེ་འབྱུང་། །རྡོ་རྗེ་པདྨ་དེ་འབྱོར་ན། །སེམས་ཅན་ཐམས་ཅད་བླ་ན་མེད། །བྱང་ཆུབ་ཞིང་དུ་སྐྱེ་བར་འགྱུར། །རང་བཞིན་དཀྱིལ་འཁོར་ལྷ་རྣམས་ཀྱང་། །ཁྲོ་བོའི་དཀྱིལ་འཁོར་བསྒོམས་བྱས་ཏེ། །དབུ་ཡི་དཀྱིལ་འཁོར་བསྒུལ་བསྐྱོད་ན། །སངས་རྒྱས་དཀྱིལ་འཁོར་ཐམས་ཅད་གཡོ། །ལག་གི་འདུ་བྱེད་བསྐྱོད་བྱས་ན། །རིག་འཛིན་ཞིང་ཁམས་ཐམས་ཅད་གཡོ། །རྐང་པའི་སྟངས་ཆེན་མནན་མཆོངས་ན། །སྡུག་བསྔལ་མི་བཟད་ཐམས་ཅད་དང་། །བདུད་དང་ལོག་འདྲེན་ཐམས་ཅད་མནན། །ཡན་ལག་ཐམས་ཅད་བསྒུལ་གསིགས་ན། །བ་སྤུའི་བུ་ག་རེ་རེ་ནས། །ཁྲོ་བོ་རྡུལ་སྙེད་གྲངས་མེད་སྤྲོ། །དེ་ཡི་སྤྲུལ་པ་གྲངས་མེད་ཀྱིས། །ཕྱོགས་བཅུའི་ཞིང་ཁམས་རྡུལ་སྙེད་དུ། །འགྲོ་བའི་དོན་རྣམས་རྡུལ་ཕྲན་སྙེད། །ཐུགས་རྗེས་འདུལ་ཞིང་དབྱིངས་སུ་ཐིམ། བྲོ་གར་གླུ་ཚིག་ལྟ་སྟངས་དང་། །ཏིང་འཛིན་ཡོ་བྱད་སྤྱད་ཐབས་ཀུན། །ཞི་བའི་ཚོགས་ཀྱི་དཀྱིལ་འཁོར་ལས། །བྲོ་གར་རྩི་འཇོ་ལ་སོགས་སྒྱུར། །འཁོར་གྱི་ཕྲ་མན་ཚིམ་བྱས་ཏེ། །དབང་དུ་སྡུད་དང་བསྒོ་བ་རྣམས། །རྒྱས་བྱས་བཀྱེ་ལ་བསྡུས་ཏེ་སྤྱད། །དེ་ལྟར་བསྒྲུབས་ན་ཐེ་ཚོམ་མེད། །ཐབས་དང་ཤེས་རབ་ཐམས་ཅད་ཀྱིས། །དེ་ལྟ་བུ་ཡིས་ལོངས་སྤྱོད་ན། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །རྟགས་ཆེན་སྔོན་བཞིན་འཕེལ་ལ་བརྟན། །གླིང་གྲངས་མཐོང་བ་དྲུག་ཀྱང་འབྱུང་། །སྒྲ་བརྙན་རྨི་ལམ་དག་ཏུ་ཡང་། །བདེ་བའི་འཇིག་རྟེན་གནས་རྣམས་དང་། །སྐྱེ་བ་གང་དག་འཛིན་པ་དང་། །རིག་འཛིན་ལུང་སྟོན་བརྟག་པར་བྱ། །ཞག་གྲངས་བཅུ་དྲུག་ཚུན་ཆད་ཀྱིས། །ལུས་མ་སྤངས་པར་རིག་འཛིན་ས། །ཡུན་རིང་ཆོས་ཀྱི་བདེ་སྤྱད་ནས། །བླ་མེད་རྡོ་རྗེ་སེམས་དཔའི་ས། །དཔེ་བྱད་མཚན་གྱི་རྣམ་པ་བརྒྱན། །མངོན་ཤེས་དྲུག་ལྡན་ཐམས་ཅད་མཁྱེན། །ཚོགས་ཆེན་གཉིས་ཀྱང་རྫོགས་པར་རོལ། །སངས་རྒྱས་ཞིང་ལ་དབང་སྒྱུར་ཞིང་། །སྤྱོད་ཡུལ་ཀུན་ཏུ་མཎྜལ། །ཇི་ལྟར་དམིགས་པ་བཞིན་དུ་འགྲུབ། །དེ་བས་ལས་དུས་རག་ལུས་སེམས། །ངོར་བྱས་བརྩོན་འགྲུས་ཆེན་པོ་སྦྱར། །མཐོང་བའི་ཆོས་ལ་མྱ་ངན་འདའ། །རྣལ་འབྱོར་ལས་སུ་རུང་རྣམས་ཀྱིས། །འདི་ལྟ་བུ་ཡི་ལས་བྱས་ན། །འབྲས་བུ་མངོན་དུ་མ་བྱུང་ཡང་། །ལུས་ངག་ཡིད་ལ་དབང་ཐོབ་ནས། །སངས་རྒྱས་འབྱུང་དང་སྐལ་མཉམ་འགྱུར། །ལས་དང་འབྲེལ་བའི་བྱིན་བརླབས་ཀྱིས། །ཐེག་པ་དམན་པར་ཡང་མི་སྐྱེ། །བསོད་ནམས་ཡེ་ཤེས་དཔུང་ཚོགས་ཀྱིས། །ལས་ཀྱི་མུན་པ་སྦྱངས་པའི་ཕྱིར། །ངན་སོང་གསུམ་དུ་ཡོང་མི་ལྟུང། །གནས་ངན་ལོངས་སྤྱོད་མི་བདེ་བའི། །ངན་སོང་བརྒྱད་དུ་འགྲོ་མི་འགྱུར། །གཟུགས་མཆོག་དམ་པ་ལྡན་པའི་ཕྱིར། །རྡོ་རྗེའི་ཐེག་མཆོག་བརྗེད་མི་འགྱུར། །ཚེ་རིང་བདེ་བ་ཕུན་སུམ་ཚོགས། །ལྷ་མའི་གནས་མཆོག་སྐབས་དེར་ཡང་། །ལུས་བྱད་བཟང་ཞིང་ཡན་ལག་རྫོགས། །དབང་པོ་ཚང་ཞིང་ཆད་ལྷག་མེད། །སྐད་གདངས་སྙན་ཅིང་འགྲོ་དོན་བྱེད། །བདག་གི་ལོངས་སྤྱོད་ཐམས་ཅད་ཀུན། །གཞན་ལ་གནོད་པ་མེད་པར་འགྲུབ། །ཚན་པོ་ཆེ་ཡི་མཐུ་སྟོབས་ལྡན། །འགྲོ་བའི་དོན་དུ་ཡང་དག་འགྲུབ། །གཞན་ལ་གནོད་པ་ཡོང་མི་བྱེད། །སྙིང་རྗེ་ཆེན་ཞིང་ཤེས་རབ་ལྡན། །མཐུ་སྟོབས་ཆེ་ཞིང་ཐབས་ལྡན་པས། །བདག་དང་གཞན་དོན་རྫོགས་པར་བྱེད། །མཐར་ཕྱིན་སྐྱེ་འཆི་མེད་པའི་ས། །སངས་རྒྱས་ཡོན་ཏན་རིན་པོ་ཆེ། །བཀོད་པའི་གཞལ་ཡས་ཐམས་ཅད་ལ། །འདོད་ལྷ་དྲུག་བ་ཇི་ལྟ་བར། །དབང་སྒྱུར་སྤྱོད་པའི་དངོས་གྲུབ་ཐོབ། །དེ་ཕྱིར་དབང་སྒྱུར་ཕྱི་མའི་དུས། །ཉིད་དུ་སྦྱོར་བ་སྨོས་ཅི་དགོས། །དེ་ལྟར་བརྩོན་འགྲུས་ལྡན་པས་ནི། །མཐོང་དང་ཕྱི་མར་མ་གྱུར་ཡང་། །ལན་གྲངས་གཞན་དུའང་བདུན་ཉིད་ལས། །མི་འདའ་རིགས་ཀྱི་དམ་པར་འགྱུར། །ཆོ་ག་སྔགས་དང་ཡོ་བྱད་དང་། །བཅོ་ལྔ་རྫོགས་ནས་མ་ཉམས་ལྡན། །ངེས་པར་ཚོགས་ཏེ་ཚོགས་སྤྱད་ན། །འབྲས་བུ་མངོན་དུ་མ་བྱུང་ཡང་། །རྒྱལ་བོ་བྲན་མོ་ངན་བཤོས་ཀྱང་། །འབྱུང་ནུར་ཆགས་པའི་རིག་འཛིན་ཏེ། །མཐོང་ནས་དམངས་ཀྱི་བླར་འགྱུར་ཞིང་། །ཀུན་ལ་དབང་སྒྱུར་སྟོབས་ལྡན་ལ། །ལྷ་རྣམས་རེ་བའི་མཐུ་སྐྱེས་པས། །བསྲུང་སྦེད་མཆོད་པ་བྱེད་པ་ལྟར། །རྣལ་འབྱོར་སྟོབས་ལྡན་གྱུར་པ་ན། །རྡོ་རྗེ་དམ་ཅན་མང་པོ་ཀུན། །དེ་ཡི་དབང་གིས་ཁུར་བར་བྱེད། །སྤྱོད་ཡུལ་དོར་ནས་ཕྱག་རྒྱར་རྫོགས། །ལ་ལ་དེ་ལྟར་དེ་ངེས་ན། །དེ་ལྟར་མ་གྱུར་བསོད་ནམས་ས། །ཚེ་རབས་སྐྱེ་བ་ཐམས་ཅད་དུ། །ལས་ངན་ལྔ་བཅུ་བརྒྱད་སྤྱོད་པའི། །ས་གནས་ཀུན་ཏུ་སྐྱེ་མི་འགྱུར། ངེས་འབྱུང་བཞི་ལ་སྤྱོད་མི་འགྱུར། །རྡོ་རྗེ་རིགས་མཆོག་འཛིན་འགྱུར་ཏེ། །རྣམ་སྨིན་ཐོབ་ནས་སྔོན་བཞིན་ཏེ། །འདི་ལ་ཐེ་ཚོམ་ལྡན་མིན་པས། །སྐལ་ལྡན་ཀུན་གྱིས་རྟག་འགྲུས་བྱོས། །བར་ཆད་མེད་པའི་ལམ་ཚོགས་སྒྲུབ་པའི་ལེའུ་སྟེ་བདུན་པའོ།། ༈ །།དངོས་གྲུབ་ལྷག་པའི་མཆོག་ཉིད་ལ། །བསྙེན་སྒྲུབ་བཞི་ཡིས་མོས་བྱས་ནས། །བདེ་ཆེན་ས་ལ་དགོད་པའི་ཕྱིར། །མཐར་ཕྱིན་འབྲས་བུའི་མཚན་ཉིད་བཤད། །དུས་ཚོགས་བར་ཆད་མེད་པ་ནས། །ལྷག་པ་མེད་དང་ཡོད་པ་ཡི། །མྱ་ངན་འདའ་བས་མཐའ་སྦྱོར་བ། །ཐུན་མོང་ལྟ་བུར་ཟུང་དུ་འགྱུར། །དེ་ལ་ཐོག་མ་བཤད་པ་ནི། །གཅིག་དང་དུ་མའི་རྣལ་འབྱོར་ལ། །བརྟན་བྱས་ཉིད་སའམ་དེ་ཐོབ་ནས། །ཟླ་དྲུག་བཅུ་དྲུག་བསྙེན་སྒྲུབ་ཚེ། །རྡོ་རྗེའི་ལུས་སུ་མ་གྱུར་པར། །སྟོབས་ཆུང་རྐྱེན་སྨོས་ཞན་པའི་ཕྱིར། །རྣམ་རྟོག་འབྱུང་བའི་ལྷག་ལུས་བཞག །རྡོ་རྗེ་འཆང་སར་རིག་བས་འགྲོ། །ལྷ་ཡི་རྣལ་འབྱོར་གསལ་རྫོགས་མིན། །ལུས་ཀྱི་དྲ་བས་བསྒྲིབས་གྱུར་པས། །ཀ་ལ་པིངྐ་མི་འཇིགས་བཞིན། །བྲལ་ནས་སྣང་བྱེད་དེ་རྣམ་སྨིན། །ཡིད་ཀྱི་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ནས། །ཕྱག་རྒྱའི་སྐུ་ཉིད་གསལ་གྱུར་ན། །རྣམ་པར་སྨིན་ཞེས་དེ་ལ་བརྗོད། །རྒྱ་མིག་རྒྱ་ས་ཇི་ལྟ་བ། །ཕྱག་རྒྱ་ཐོབ་ལ་མ་རག་པའི། །གཟུགས་རྫོགས་སྟོབས་ཆེན་དེ་ཁོ་ན། །དེ་ཡང་དགོངས་པའི་ཁྱབ་པར་གཉིས། །དགོངས་སྤྱོད་རྒྱ་མཚོ་སྔ་ཕྱི་དང་། །རྒྱུད་མཐུན་སྟོབས་ཆས་མིང་གྲགས་པ། །ལྷག་མེད་འབྱུང་མེད་ལས་ལུས་མེད། །མྱ་ངན་འདས་པའང་སྨིན་ཆས་བརྗོད། །དཀྱིལ་འཁོར་རོལ་པའི་ཚུལ་སྤྱོད་པས། །ཚོགས་གཉིས་རྫོགས་པས་བདག་གི་དོན། །སྨིན་པས་འཕྲིན་ལས་རྫོགས་བྱེད་པས། །མི་འདོར་འགོད་པ་གཞན་གྱིའོ། །དེ་དེའང་འདི་དང་ཕྱི་མ་དང་། །ལན་གྲངས་གཞན་དུ་རབ་འབྲིང་གིས། ཐོབ་ཀྱི་བསྐལ་པར་མི་འགྱང་སྟེ། །དགོངས་སྤྱོད་བརྩོན་པ་གཙོ་ཕྱིར་རོ། །གང་དེ་བྲལ་མ་ཐག་པ་རུ། །རྒྱ་བཞི་རྫོགས་པར་བདག་གྱུར་པས། །རྡོ་རྗེ་ལྔ་སོགས་རིག་པས་འཛིན། །ཕྱག་རྒྱ་ཆེན་པོའི་རིགས་འབྲས་བུ། །དེ་ཕྱིར་རྒྱ་ཆེན་བར་ཆད་མེད། །ལམ་འཚོག་དབྱེ་ས་གཅིག་ཡིན་ནོ། །བར་ཆད་མེད་པའང་སྨིན་པ་ཡི། །མངོན་པར་ཤེས་པ་དེ་མིང་ཅན། །མི་འགྱུར་ངེས་པར་གྱུར་པའང་ཡིན། །དཔག་ཚད་གླིང་ཁམས་ཡུལ་ལ་སྦྱོར། །ཕྱི་མ་དུས་ཀྱི་ཚོགས་བསྒྲུབས་པས། །དགོངས་སྤྱོད་བརྩོན་པ་སྟོབས་རྫོགས་དང་། །ཡོ་བྱད་ཐབས་ཀྱི་སྟོབས་ལས་སྐྱེས། །གཞན་པའི་ཡོ་བྱད་རྟགས་ལྡན་པ། །དངོས་གྲུབ་རོལ་པའི་མཐུ་ལས་བྱུང་། །ཐབས་རྒྱུས་ཕྱེ་བས་སོ་སོ་ཡང་། །ལམ་ལས་སྐྱེས་པ་མཆོག་ཡིན་ཏེ། །དེ་ཡང་རྒྱུ་དུས་ངོ་བོ་གྲངས། །དགོངས་སྤྱོད་མངོན་ཤེས་སྦྱོར་བའི་ཚུལ། །བཞི་གཉིས་ལུས་ཀྱི་རྫོགས་པར་བཤད། །ཐབས་དང་དྲང་བ་རྒྱུར་བ་བྱ། །ཤེས་རབ་རྣམ་གསུམ་གོམས་བྱས་ནས། །ཏིང་འཛིན་མཉམ་པའི་དོན་རྟོགས་ཏེ། །ཀུན་ཏུ་ཡངས་པ་ཆེན་པོ་བསྒོམ། །ཤེས་འཇུག་ལྔ་རྟོགས་གོམས་པས་ནི། །ཟླ་ཞག་རྒྱུད་བཞི་སྒྲུབ་བྱེད་པས། །རྡོ་རྗེའི་ལུས་སུ་ཐེ་ཚོམ་མེད། །མིང་བཞིའི་ལུས་ཉིད་དེ་ལྟའོ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །རབ་འབྲིང་ཇི་བཞིན་མི་བསླུ་བར། །དབང་སྒྱུར་རིགས་ཀྱི་དམ་པ་འགྲུབ། །རྒྱུ་འབྲས་དུས་གཅིག་རྫོགས་པ་ཡི། །རང་རིག་ཉིད་ལ་དབང་ཐོབ་སྟེ། །ཚེ་འདི་བཅུ་དང་དྲུག་པ་ཡི། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་ས། །དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་སྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟད་པ་ཟད། །རྡོ་རྗེའི་ལུས་གྱུར་ཚེ་ཡི་རིགས། །མཐོང་བའི་ཆོས་ལ་མྱ་ངན་འདའ། །ལུས་མ་བོར་བར་སངས་རྒྱས་ས། །འཇིགས་པ་ཀུན་བྲལ་ཆོ་འཕྲུལ་རྫོགས། །ལྷ་མིའི་རྒྱལ་པོའི་སྐྱེ་བ་འཛིན། །ལྷ་དང་མི་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཆ་བྱད་དེ་ཉིད་ཀྱིས་ཆོས་སྟོན། །གང་དག་མི་འཇིགས་རྩི་འཆང་ལྟར། །དབང་སྒྱུར་འཇིགས་པ་ལྔ་སོགས་བྲལ། །དྲུག་བཞི་ཡན་ལག་ཀུན་རྫོགས་ཤིང་། །རང་དབང་སྒྱུར་བའི་སྐྱེ་བ་ཡིས། །སྟོང་གསུམ་འཇིག་རྟེན་བརྒྱ་འདུལ་བྱེད། །རྒྱུ་ཡི་དང་པོར་སྐལ་མཉམ་མོ། །བདག་ཕྱིར་དོན་དུ་གཉེར་བ་ནི། །བརྒྱ་ཕྲག་བཅུ་དྲུག་ཚེ་ཡིས་རྫོགས། །གཞན་དུ་རང་དབང་ཐོབ་པའི་ཕྱིར། །བསྐལ་པ་གྲངས་མེད་གནས་གྱུར་ཀྱང་། །སྐུ་ནི་ཤིན་ཏུ་གཞོན་པའི་ཚུལ། །འདུལ་བའི་དུས་ཀྱིས་འཕོ་འདུག་བྱེད། །ངོ་བོ་སྨན་དང་ཐབས་རིག་འཛིན། །རྣམ་འབྱོར་སྒྲོལ་མའི་རིག་འཛིན་དང་། །ལམ་མཆོག་རྫོགས་པའི་རིམ་པ་བཞི། །བཅུ་དབང་དང་པོར་འདྲ་མོད་ཀྱང་། །དེ་ཉིད་མཐུ་དང་ཟད་མི་ཟག །རྒྱུ་དང་ངོ་བོས་རྣམ་པ་གཉིས། །དེ་བས་དགོངས་སྤྱོད་སྨོས་ཅི་དགོས། །གཞན་ལས་གྲུབ་པས་དེ་རིགས་མིན། །མཆོག་ལའང་ཡོན་ཏན་མཚན་ཆས་བརྗོད། །ལུས་དང་ཕུང་པོར་བཅས་པ་ཡིས། །གནས་པར་དབང་བའི་རིགས་གྲུབ་ཕྱིར། །ལྷག་རྟོག་འབྱུང་ལས་ལུས་བཅས་འདས། །ཟག་ཀུན་ཟད་པའི་རིགས་ཆེན་དེ། །ཇི་ལྟར་སྤྱད་ཀྱང་ལྡོག་པ་མེད། །རང་དབང་ཐོབ་པས་དབུགས་ཕྱུང་ཕྱིར། །སྐབས་འདིར་བདེན་པ་བར་མ་མཐོང་། །མཁས་རྟོགས་གོམས་སྤྱོད་རིག་པ་འཛིན། །ལྷ་ལ་སོགས་པ་རྡོ་རྗེ་འཛིན། །མི་གཏོང་གཟུགས་ལས་མིང་ཐོབ་པ། །ཡོན་ཏན་གྲངས་ཀྱིས་བསམ་མི་ཁྱབ། །དངོས་སུ་ས་ཁམས་ལུང་སྟོན་པ། །རྡོ་རྗེ་རྡོ་རྗེ་བོས་དབང་བསྐུར། །མཐོང་གོམས་མཐར་ལྡན་རིག་པ་ཉིད། །སྣང་བ་རིག་པ་འཛིན་པའི་གནས། །རིག་སྣང་གནས་ལ་ངེས་པ་མེད། །སྐྱེ་བ་ཆ་བྱད་དོན་གྱིས་འགྱུར། །ཆོས་རྣམས་བདག་ཕྱིར་དམིགས་མེད་ཕྱིར། །ཆོས་ཀུན་མི་མཐོང་ཆོས་ཉིད་ཀྱང་། །མི་མཐོང་སངས་རྒྱས་ཐུགས་མི་མཐོང་། །སྣོད་བཅུད་མི་མཐོང་གང་མཐོང་པ། །དེས་ནི་ཡང་དག་བདེན་པ་མཐོང་། །དེ་བས་ཐོས་མྱོང་རིག་སོགས་ལམ། །ཤེས་འཇུག་བར་ཆད་མེད་ལས་སྐྱེ། །དེ་ཕྱིར་མངོན་སུམ་རྟོགས་མཆོག་ནི། །རང་དབང་ཐོབ་ནས་སྔོན་བཞིན་ཏེ། །བྲག་གསུམ་ཟག་པ་འདི་ལ་མེད། །སྔོན་ཆད་ལམ་གྱི་འདུ་བྱེད་མེད། །དེ་ནི་རེ་དོགས་ཆགས་བྲལ་བས། །རིག་པའམ་རིམ་པ་མེད་ཚུལ་གྱིས། །སྟོང་ཁྲི་ལ་སོགས་གྲངས་མང་ལྷའི། །འཁོར་ལོ་གསལ་རྫོགས་རྣལ་འབྱོར་གནས། །དཀྱིལ་འཁོར་གཉིས་ཀྱིས་དོན་གྲུབ་མཛད། །དེ་མིང་དབང་སྒྱུར་རྣལ་འབྱོར་ཏེ། །བརྒྱ་ཕྲག་ཆ་རྫོགས་དུས་བར་དུ། །གོམས་བྱས་གཉིས་ཐོབ་མཐའ་སྐད་ཅིག །ཆ་ཡིས་རྡོ་རྗེ་དཔའ་བོས་སྦྱོར། །རིགས་མཐུན་མཆོག་རྒྱ་སྤྲུལ་པ་ལས། །གསང་ཐོས་བསམ་རིག་སྒོམ་སྦྱོང་བས། །དཀྱུས་སར་ཕྱིན་པའི་ཅང་ཤེས་བཞིན། །ཀུན་ཏུ་འགྲོ་བ་བདག་པོའི་དོན། །རྫུ་འཕྲུལ་ཆོས་སྣང་རྗེས་སྟོན་བརྗོད། །དྲུང་ཤེས་དེ་མིང་ལྡན་པ་ཡིས། །དབང་སྒྱུར་རྩ་བའི་རྡོ་རྗེའི་སྐུས། །བྱ་བྱེད་རྫོགས་པར་གྱུར་པ་ཡིན། །བཞི་ཡིས་ཐོག་མས་དོན་སྤྱོད་པ། །ནུས་མཐུ་ཅན་གྱུར་དབང་ཅན་དེས། །མཁའ་ལ་འཕྱོ་དང་རིག་འཛིན་གནས། །ཆུ་རྒྱུན་ལྡོག་དང་རླུང་མི་འགུལ། །རི་བྲག་ལ་སོགས་ཐོགས་མེད་འཛུལ། །ཆུ་ལ་མི་འབྱིང་མེས་མི་འཚིག །དུག་དང་མཚོན་གྱིས་འཇིགས་མི་འགྱུར། །མི་སྣང་བ་དང་མང་པོར་སྤྲུལ། །གཞན་ཡང་ཇི་ལྟར་འདོད་པ་བཞིན། །ལྷ་སྲིད་རྣམས་ལ་དབང་སྒྱུར་དང་། །ཚེ་དང་དུས་ལ་བསྲིང་བསྟུང་དང་། །སྟོང་གསུམ་ཡུངས་འབྲུར་ཤོང་བ་དང་། །ཡུངས་འབྲུས་སྟོང་གསུམ་གོང་བ་དང་། །བ་སྤུས་དགང་བསྡུའང་དེ་བཞིན་ནོ། །བསྲེག་པའི་བསྐལ་པ་གཞིལ་བ་དང་། །ཉི་མའི་དཀྱིལ་འཁོར་འབུམ་དགྱེ་དང་། །སྐམས་སར་ཆུ་དབྱུང་བྱེ་མ་གསེར། །སོལ་པ་ལྗོན་ཤིང་དབྱུང་བ་དང་། །ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་འཐོར་རླུང་བྱ་བའང་འགྲུབ། །དགུག་དང་བཏང་དང་བཅིང་དགྲོལ་དང་། །གསོ་དང་བསད་དང་ཕམ་དང་རྒྱལ། །ཇི་ལྟར་དམིགས་པ་བཞིན་དུ་འགྲུབ། །སྦྲུལ་དང་གཅན་གཟན་གདུག་པ་རྣམས། །ཁྱི་བཞིན་ཕྱི་ནས་འབྲང་བར་འགྱུར། །བདུད་དང་གདུག་པ་ལ་སོགས་པས། །ཚུགས་པར་མི་འགྱུར་བྲན་བཞིན་འགྱུར། །ལུས་མ་བོར་བར་རིག་འཛིན་སར། །ཐུགས་རྗེ་སྤྲུལ་པའི་བྱིན་བརླབས་ཀྱིས། །སོ་སོའི་སྐད་དང་མཐུན་པ་ཡིས། །སོ་སོ་ཐར་པའི་ལམ་ཡང་སྟོན། །ངན་སོང་སྟོངས་ཤིང་བསྐུལ་བ་དང་། །ལམ་སྟེགས་འགོད་ཅིང་དེ་དག་ཉིད། །ཐེག་ཆེན་ལམ་ལ་འགོད་པར་མཛད། །ཐར་པར་བསྐུལ་ཞིང་ཞི་བ་སློང་། །ས་བཅུའི་ཤེས་བྱ་སྦྱོང་བྱེད་ཅིང་། །བདེ་གཤེགས་འཁོར་ལ་ཆོས་སྟོན་མཛད། །སྟོང་གསུམ་བརྒྱད་བཅུའི་འཇིག་རྟེན་རྣམས། །གཡོ་དང་རབ་གཡོ་ཤིན་ཏུ་གཡོ། །མཛད་པ་སྣང་བས་དེ་གནས་རྣམས། །ནང་གཡོས་ས་ཡི་རིམ་སྦྱོང་བྱེད། །གསང་བ་སྔགས་ཀྱི་སྒྲ་བསྒྲགས་པས། །ཀུན་ཀྱང་རྨད་བྱུང་སྔགས་ཀྱི་སྒྲ། །གྲགས་པས་བདུད་འདུལ་ངན་སོང་སྦྱོང་། །འགྲོ་བ་མ་ལུས་དོན་ཡང་བྱེད། །ལས་རྣམས་ཐམས་ཅད་ཀུན་བྱས་ནས། །སྐྱེ་ཤི་མེད་པའི་གཡུང་དྲུང་ཐོབ། །མཚན་དང་དཔེ་བྱད་ཀུན་གྱིས་བརྒྱན། མཐར་ཕྱིན་བྱ་བ་མེད་པ་འགྲུབ། །རྒྱུད་ལས་གསུངས་པ་ལྔ་བཞི་ཡི། །སྤྱོད་པ་བཅུ་གཉིས་འཕྲིན་ལས་རྣམས། །དབང་སྒྱུར་ཉིད་དུ་ཐོགས་མེད་པར། །སྔོན་བཞིན་ཡུལ་ཁྱོན་འདུལ་བར་བྱེད། །སྐྱེ་མཆེད་རང་བྱུང་ཡེ་ཤེས་ཕྱིར། །དེ་ཉིད་གཅིག་དང་དུ་མའི་མཐའ། །གཉིས་སུ་མེད་པར་མངོན་རྟོགས་གོམས། །མཐོང་བས་དྲི་མ་དྲུག་སྦྱངས་ཕྱིར། །དེ་སྙེད་གཟུགས་སྒྲ་དྲི་རོ་རེག །ཤེས་པའི་བྱེ་བྲག་རྩ་ལྔར་ཤར། །གཅིག་གིས་ཡུལ་ལྔ་གཅོད་བྱེད་པས། ཚང་དང་མ་ཚང་འཇིགས་དོགས་མེད། །གཞན་དུ་ལྷ་ཡི་རྣ་བ་དང་། །སྤྱན་གྱི་མངོན་པར་ཤེས་པ་དང་། །སྔོན་གནས་རྗེས་སུ་དྲན་པ་དང་། །ཕ་རོལ་རྣམས་ཀྱི་སེམས་ཤེས་དང་། །འཆི་འཕོ་སྐྱེ་བ་མཁྱེན་པ་དང་། །རྫུ་འཕྲུལ་ཤེས་པའང་ཟག་ཟད་ཤེས། །དེ་སྙེད་ཚུན་ཆད་ཡུལ་ཤེས་པས། །གང་དང་གང་རྣམས་འདུལ་བར་མཛད། །དེ་མིང་མི་ལྡོག་ཟག་མེད་དང་། །དབང་སྒྱུར་རིགས་ཀྱི་མཚན་ལས་བརྗོད། །བདག་གམ་གཞན་ཕྱིར་དབང་ཅན་དེས། །སྐུ་ཚེའི་ཚད་དམ་ཇི་སྙེད་བར། །བཞུགས་མཐར་རང་གི་གྲུབ་སྦྱོར་བ། །སྔོན་བཞིན་རིམ་དང་ཅིག་ཅར་བ། །སྔ་མ་མཐོང་བའི་ལམ་ཉིད་དུ། །རང་གི་ཤེས་རབ་གསུམ་གོམས་པས། །རང་ལུས་རྒྱལ་བའི་ཕྱག་རྒྱ་ཆེ། །གང་བསྒོམས་མངོན་དུ་གྱུར་པའི་ལྷ། །ཕྱག་རྒྱ་ཆེན་པོའི་རིག་འཛིན་དེར། །ཡོངས་གྱུར་ལྷུན་གྲུབ་ཐོབ་ནས་གཤེགས། །ཕྱི་མ་རིགས་མཆོག་དེ་ཉིད་ནས། །སྔོན་བཞིན་གོམས་པ་གསུམ་བྱས་པས། །རྒྱ་དོར་ཅིག་ཅར་མཐར་འགྲོ་བར། །ཆོས་ཉིད་དམ་ཚིག་སྨོས་མཐུ་ཡིན། །དེ་ཉིད་བར་མ་བཤད་བྱ་བ། །སྔོན་གྱི་ལུས་ཀྱིས་རྫོགས་པར་བྱ། །གཅིག་དང་དུ་མའི་རྣལ་འབྱོར་པས། །འབྱུང་ལུས་སེམས་ཕྱིར་རང་བཞིན་ལྷར། །མཐོང་གོམས་བསགས་པའི་མཐར་བསྒྲུབས་པས། །ཀུན་འགྲོའི་སྒྲིབ་དག་ངོ་བོའི་རྒྱུ། །རྣམ་སྨིན་ཚུལ་གྱིས་གྲུབ་པ་མེད། །སྔ་ཕྱི་རྒྱུ་འབྲས་འདོད་པ་མིན། །དུས་རིམ་འདོད་མིན་གཅིག་འདོད་ཕྱིར། །གཅིག་པས་དེ་ཉིད་ལམ་བྱས་པས། །ལྷག་མར་བཅས་པས་བསྣུར་བསྒྲུབས་མཐའ། །དེ་ཉིད་གྱུར་པ་ངེས་པ་མེད། །རང་སེམས་ཕྱག་རྒྱ་ཆེན་པོ་སྟེ། །བསྒོམས་པས་གང་ཡིན་མངོན་གྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །རང་ལུས་གདོད་ནས་ཕྱག་རྒྱ་ཆེར། །བསྒོམས་པས་མངོན་དུ་གྱུར་པའི་ལྷ། །མཚན་དཔེ་བཞི་དང་མངོན་དྲུག་རྫོགས། །ཕྱག་རྒྱ་ཆེན་པོའི་རིགས་སུ་གྲགས། །ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །དེ་ཕྱིར་སྐུ་ཚེ་ཚད་མེད་དེ། །བསྣུར་ཞིང་མངོན་དུ་བྱ་དང་བྲལ། །དེ་ཉིད་རིགས་གསུམ་རིགས་བཞི་དང་། །ལྔ་དང་མཆོག་ལྔའི་རིག་འཛིན་པས། །རྣམ་པ་བཞི་རུ་སྔོན་བཞིན་འགྱུར། །མཆོག་གི་མིང་གྲངས་གཉིས་དང་གསུམ། །མཉམ་པ་ཉིད་ལས་མི་གཡོ་ཞིང་། །དབང་སྒྱུར་འདུ་བྱེད་དང་བྲལ་བས། །ཟག་པ་མེད་པ་སྒོམ་པའི་ལམ། །མི་གཡོའི་རྣལ་འབྱོར་ཉིད་དུ་བརྗོད། །རྒྱལ་བར་ལུང་སྟོན་དངོས་འབྱུང་བས། །བརྟག་པའི་བྱེ་བྲག་འདི་ལ་མེད། །ཡེ་ཤེས་སྐུ་ཡི་རྣལ་འབྱོར་པས། །སངས་རྒྱས་གཉིས་པའི་སྤྱན་དགོངས་དང་། །རྒྱུད་མཐུན་མོད་ཀྱང་མི་གཡོ་ཐོབ། །ཤིན་ཏུ་བརྟན་པའི་ཀླུང་གནས་པ། །གྲངས་ཅན་འཁོར་ལོ་མངོན་དུ་སྣང་། །འོན་ཀྱང་རྣལ་འབྱོར་རྩོལ་བ་ཅན། །མཉམ་གཞག་ངང་ལས་མ་གཡོས་བཞིན། །སྟོང་གི་འཇིག་རྟེན་བརྒྱ་སྟོང་ཕྲག །བཅུ་ཡི་རྡུལ་སྙེད་འཇིག་རྟེན་དང་། །ཞིང་གྲངས་མེད་པ་བརྒྱ་སྟོང་ཕྲག །བཅུ་ཡི་རྡུལ་སྙེད་ཞིང་ཁམས་སུ། །རྔོན་དང་སྨད་འཚོང་ལ་སོགས་པར། །སྤྲུལ་པའི་ལུས་ཀྱིས་འདུལ་བར་བྱེད། །བཞི་དང་དྲུག་སོགས་དེ་བཞིན་ནོ། །དྲུག་དང་ལྔ་ཡི་ཡན་ལག་བཅས། །ཤེས་པའང་འདྲ་མོད་བཞི་སོགས་ཀུན། །དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་འདུལ་བྱས་སྤགས། །རང་གི་མི་གཡོ་མཐོང་གོམས་དང་། །དོན་དུ་གཉེར་རིམ་བརྩམས་པ་ཡི། །ལམ་ཀུན་རྫོགས་པའི་བྱིན་སྟོབས་ཀྱིས། །རྣལ་འབྱོར་བྲལ་ནས་ལྷུན་གྱིས་གྲུབ། །ལྷན་ཅིག་གནས་པའི་དྲི་མ་དག །བཙལ་བ་མེད་པར་ལྷུན་གྲུབ་ཐོབ། །དེ་དེས་མངོན་དུ་བྱས་པ་ཡི། །ལྷུན་གྱིས་གྲུབ་པའི་རིག་པ་འཛིན། །རང་རྒྱུད་དག་པའི་སངས་རྒྱས་ཏེ། །སྔོན་བཞིན་བཞི་བརྒྱད་དགོད་པར་བྱ། །སྔ་མའི་རིགས་ལས་མཐུ་རྫོགས་པས། །བཤད་པ་བཞིན་དུ་དྲི་མ་སྦྱངས། །སངས་རྒྱས་གཉིས་པའི་ཤེས་རབ་གསུམ། །ལྷུན་གྱིས་གྲུབ་པའི་རིགས་སུ་བྱུང་། །གནས་དེར་སྔོན་བཞིན་གསུམ་རྫོགས་པ། །ལོངས་སྤྱོད་གསང་བའི་ལུང་ཐོབ་ཤིང་། །རང་གི་དགོངས་སྤྱོད་ནུས་པ་ཅན། །ས་མཐར་དབྱུང་བའི་དུས་ལ་བབ། །དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོག་ཉིད་དུ་བཞུགས་པའང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་རག་ལས་རིག་འཛིན་མཐའོ། །ཆ་བྱད་རྒྱལ་བ་ཉིད་དུ་སྟེ། །ལྔ་པོ་ལྷུན་གྱིས་གྲུབ་ཕྱིན་ན། །དེ་འདྲ་དེ་ཉིད་རྒྱལ་འཚབ་སྟོན། །དེ་མི་གཏོང་བས་མི་འགྲུབ་ཡིན། །ཉིད་ལ་སྐྱེ་ཤི་མི་མངའི་ཕྱིར། །རྡོ་རྗེའི་སྐུ་ཡང་གདུལ་བྱ་ལ། །སྤྲུལ་པ་རྣམས་ནི་འདའ་ཚུལ་སྟོན། །དོན་གྲུབ་ལ་སོགས་ཇི་ལྟ་བའོ། །བྱ་བ་ལྷུན་གྲུབ་རྣལ་འབྱོར་གྱི། །རིག་འཛིན་ཆེན་པོ་ནང་རིག་འཛིན། །ཐ་མའི་མིང་གྲངས་མཐར་ཕྱིན་ལམ། །རང་རྒྱུད་དག་པའི་སངས་རྒྱས་དང་། །དེ་ཉིད་དང་ནི་མཐར་སྦྱོར་ལམ། །ཡང་དག་རྫོགས་པའི་རྒྱལ་འཚབ་པོ། །སྔ་མ་གསུམ་དང་དང་པོ་བཞིའི། །ཆ་ལུགས་རང་གི་རྒྱལ་འཚབ་སྡུད། །བསམ་ཡས་ལྷུན་གྱིས་རྫོགས་པའི་ཕྱིར། །ཐམས་ཅད་མཁྱེན་པའི་སྤྱན་མཆོག་འཆང་། །ཡི་གེ་འཁོར་ལོ་མངོན་གཟིགས་པ། །མི་གཡོ་བ་ལ་མི་རྟོག་པས། །ད་དུང་མངོན་པར་མི་རྒྱ་སྟེ། །དུས་མཐའ་སྐད་ཅིག་ཉིད་ཀྱིས་གཤེགས། །དེས་ན་དགོངས་སྤྱོད་རྒྱ་མཚོ་ཀུན། །ཡེ་ཤེས་རྩལ་རྫོགས་བྱ་མེད་པའང་། །མཐར་ཕྱིན་བྱ་བྲལ་སོགས་པ་ཡི། །མིང་གྲངས་ཆ་ལས་བརྗོད་པར་ཟད། །ཉིད་ཕྱིར་རྡོ་རྗེ་འཛིན་རྫོགས་ལ། །སྐད་ཅིག་དུས་ཀྱིས་བསླབ་རྫོགས་ནས། །ཐ་མའི་བག་ལ་ཉལ་བ་དག །བཅོམ་ལྡན་འདས་པ་གྱུར་པ་ཡིན། །དེ་ཚེ་དེ་སྒྲིབ་ཆ་ཡོད་ཀྱང་། །ལྷུན་གྲུབ་རིག་འཛིན་སར་བཞུགས་ནས། །ཞིང་ཁམས་ཐུག་པ་མེད་པ་དག །འདུལ་ཕྱིར་སྤྲུལ་སྐུའི་མཛད་པ་སྟོན། །སྲིད་གསུམ་འགྲོ་བ་བསམ་ཡས་སུ། །ཐུགས་རྗེས་སྟོན་པ་བསམ་མི་ཁྱབ། །དོན་དང་མཐུན་པ་འབའ་ཞིག་སྟོན། །མི་མཐུན་ཞགས་པ་འཁོར་བ་གཅོད། །ལ་ལར་ལྷུམས་ཞུགས་བལྟམས་པ་དང་། །ལ་ལར་རབ་བྱུང་དཀའ་ཐུབ་མཛད། །ལ་ལར་ཁབ་དང་རྒྱབ་སྲིད་དང་། །ཆོས་སྟོན་མྱ་ངན་འདའ་སོགས་སྟོན། །རེས་འགའ་ཞི་ལ་རེས་འགའ་དྲག །གཡེམ་ལ་གཡེམ་སྟོན་སྡང་ལ་སྡང་། །དྲེགས་ལ་རི་དང་མུན་ལ་མུན། །རླུང་ཡང་དེ་བཞིན་མཐུན་མི་མཐུན། །རྒྱ་མཚོ་ལྟ་བུར་ཐབས་སྤྱོད་དང་། །འཕྲིན་ལས་དེ་བཞིན་པ་ཡིས་སྒྲོལ། །གསང་བའི་ཏནྟྲ་སྟོན་པ་དང་། །དེ་བཞིན་བསྡུ་བ་མཛད་པ་དང་། །དམན་ལུས་བསོད་ནམས་ལྡན་ལུས་སུ། །སྣ་ཚོགས་ལུས་ཅན་རིགས་ལ་བསྐོར། །མངོན་ཤེས་དྲུག་ལྡན་མཚན་བཟང་སྤགས། །ཀུན་མཁྱེན་ཡེ་ཤེས་མངའ་བའི་ཕྱིར། །ཡུལ་ཡང་ཚད་མེད་རྒྱལ་བ་ཉིད། །ཇི་ལྟར་མེ་ལོང་ལྟ་བུའི་ཚུལ། །མ་མཐུན་མཚན་མ་གཞོམ་པའི་ཕྱིར། །རྡོ་རྗེ་ལྟ་བུའི་ཏིང་འཛིན་གྱིས། །བདག་རྟོག་མཚན་མ་ཀུན་བཅོམ་ནས། །རྡོ་རྗེའི་དབྱིངས་སུ་ཐིམ་པར་བྱེད། །བདག་མེད་རང་རིག་ཡེ་ཤེས་ཀྱིས། །དངོས་དག་དངོས་མེད་བག་ཆགས་བསྲེགས། །རང་དང་སྤྱི་ཡི་ཆོས་རྣམས་དང་། །སེམས་ཀྱི་ཕྲ་རྟོག་ཐམས་ཅད་ཀུན། །དངོས་པོ་མེད་པར་རྟོགས་བྱས་ནས། །དཔའ་བར་འགྲོ་བའི་རྣལ་འབྱོར་དང་། །རྡོ་རྗེ་རྩེ་མོ་མཆོག་ཐོབ་པས། །ཡིད་ཚོད་མིན་དང་བདུད་སྟེ་རྣམས། །ཚར་བཅད་དཔའ་བོས་དེ་རྗེས་ལ། །རྒྱན་གྱི་འཁོར་ལོ་མཎྜ་ལ། །བསམ་ཡས་ལྷུན་རྫོགས་ཀུན་མཁྱེན་འཇོག །མཉམ་གཞག་ཡེ་ཤེས་དབང་སྒྱུར་ཞིང་། །དོན་དུ་གཉེར་བའི་སྨོན་ལམ་མཐུས། །ཉི་ཤུ་རྩ་ལྔར་གཞན་ལས་མིན། །སྐུ་དང་གསུང་ཐུགས་ཡོན་ཏན་དང་། །འཕྲིན་ལས་རྨད་བྱུང་ཀུན་གྲགས་པ། །གཞན་ནས་ཡོད་འོང་མ་ཡིན་ཏེ། །རང་བྱུང་ཡེ་ཤེས་གནས་མེད་ཡིན། །དེ་བས་ངོ་མཚར་ཆོ་འཕྲུལ་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་སྣང་། །མུན་སྣང་འགྱུར་རྩི་མ་གི་ཏ། །ཇི་བཞིན་མ་སྤངས་དེ་ཉིད་འགྱུར། །འཁོར་བ་མ་སྤངས་རྣམ་པར་དག །མྱ་ངན་མི་འདའ་ཡེ་ནས་གནས། །འགྲོ་དང་གནས་པར་བྱ་བ་མིན། །རྟོག་པ་ཐམས་ཅད་ཡེ་ཤེས་ཚོགས། །མཉམ་དང་མི་མཉམ་མི་མཉམ་མཉམ། །བྱ་དང་མི་བྱ་བྱ་མེད་བྱས། །གྲུབ་དང་མ་གྲུབ་ཐམས་ཅད་གྲུབ། །དེ་ཕྱིར་རིག་འཛིན་ཐ་སྙད་བྲལ། །མཐར་ཕྱིན་པའི་ལམ་བསྟན་པའི་ལེའུ་སྟེ་བརྒྱད་པའོ།། ༈ །།རང་བཞིན་ཉིད་དུ་མངོན་རྫོགས་པའི། །རྡོ་རྗེ་འཛིན་པ་ཉིད་ལ་མོས། །སྲིད་པ་རིམ་དང་རྫོགས་ཚུལ་གྱིས། །མངོན་བྱས་དོན་ཡོད་བཤད་པར་བྱ། །མཚན་ཉིད་ཐ་མའི་ཐ་མ་ནི། །ངོ་བོ་ཚུལ་དང་ཁྱད་པར་གྱི། །ལུས་གསུམ་དོན་དུ་སྣང་བ་རྣམས། །ཇི་ལྟར་བ་བཞིན་ཤེས་པར་བྱ། །ལུས་གསུམ་སྔ་མ་བརྗོད་བྱ་བ། །སྐུ་དང་གསུང་དང་ཐུགས་ཉིད་དང་། །ཡོན་ཏན་འཕྲིན་ལས་རྨད་བྱུང་བ། །ལྔ་ཡང་ལྔ་ཉིད་ངོ་བོར་གནས། །ཨེ་མའོ་ཡང་དག་རྫོགས་སངས་རྒྱས། །རྒྱལ་བའི་རྒྱལ་བ་ལྷ་ཡི་ལྷ། །འཕགས་པའི་འཕགས་པ་ཀུན་ཏུ་བཟང་། །དེ་བཞིན་གཤེགས་ལས་དེ་བཞིན་གཤེགས། །བདེ་གཤེགས་ལས་ཀྱང་བདེ་གཤེགས་པའོ། །རིན་ཆེན་ནོར་བུ་བཞིན་དུ་བཞུགས། །ཆོས་དྲུག་ནོར་བུས་མཚོན་པ་ནི། །གཅིག་དང་དུ་མ་ཀུན་བྲལ་ལྡན། །དེ་དེའི་རིགས་དངོས་རིགས་བྲལ་བ། །ཤི་ཤུ་ལྔར་ལྡན་ཀུན་ངོ་བོ། །མོས་བཞིན་དེ་རིགས་མཐུན་སྣང་ལ། །ཡང་དག་ཉིད་དུ་འདི་ཞེས་མེད། །ལྔ་ཉིད་ལྔ་ལྔར་ལྡན་སྣང་བ། །རིགས་བདག་ཡང་དག་སངས་རྒྱས་པ། །ཐ་མའི་ཐ་མ་ཞེན་བྲལ་བ། །ཡེ་ཤེས་འགྲོ་འོང་མེད་ཀུན་ཁྱབ། །གཉིས་སུ་མེད་པའི་དེ་བཞིན་ཉིད། །ངང་ཉིད་འགྲོ་འོང་མེད་པར་གཤེགས། །དེ་བཞིན་བདེ་ཆེན་ངང་ཉིད་དུ། །ཟུག་རྔུ་ཀུན་བྲལ་གཉིས་ཕྱིར་གཤེགས། །སངས་རྒྱས་སེམས་ཅན་སེམས་ལ་སོན། །དབང་ཕྱུག་ཆེན་པོའི་སྐུར་བཞུགས་པས། །གསང་བའི་དབང་པོ་འདུ་འབྲལ་མེད། །དངོས་པོ་གཉིས་ལ་བདེ་ལེགས་སྤྱོད། །དེ་ཉིད་ཆ་རེ་བརྗོད་པ་ནི། །འཇིག་རྟེན་འདས་དང་མ་འདས་ཀུན། །དུས་གསུམ་ཆོས་ཀུན་གཅིག་པ་ཡི། །རྒྱལ་བ་ཉིད་ཕྱིར་སྣ་ཚོགས་ཆོས། །སྣང་བ་རང་བཞིན་མེད་པའི་ཕྱིར། །དེ་ཉིད་དྷརྨ་ཀཱ་ཡར་གནས། །ཐམས་ཅད་རང་རིག་མངོན་སུམ་སྣང་། །ཞེན་མཐའ་ཀུན་བྲལ་ཀུན་ཆུབ་པའི། །རང་བྱུང་ཡེ་ཤེས་ཆེན་པོ་ཉིད། །ཀུན་གཞི་འདུལ་སྣང་ཕྱིན་སྐུ་མཆོག །འདོད་ཁམས་མཐའ་ནས་རྫོགས་ཀྱི་བར། །སྡུག་བསྔལ་ཀུན་དང་འདོད་བསམ་སྙོམས། །འགོག་ཞི་བཏང་སྙོམས་བདེ་ཆེན་སོགས། །ཡུལ་མེད་ཀུན་རོལ་ལོངས་སྤྱོད་ཆེ། །རྟ་བདུན་རི་བོང་ཅན་ཉིད་ཀྱི། །གཞལ་ཡས་ཁང་ལས་མ་གཡོས་བཞིན། །ཀུན་ཏུ་ཐ་དད་སྣང་བ་ལྟར། །འགྲོ་འོང་མེད་འདུལ་ཀུན་སྤྲུལ་མཆོག །ཇི་ལྟར་མཁའ་ལ་འཇིག་མེད་ལྟར། །མི་རྟག་ཀུན་དངོས་རྟག་ཆེན་པོ། །རྡོ་རྗེའི་སྐུ་མཆོག་སྐྱེ་འཇིག་མེད། །ལྔ་པ་ཉིད་དུ་རབ་ཏུ་གྲགས། །སོ་སོར་འདུལ་བ་ཡེ་ཤེས་འཁོར། །རྒྱ་མཚོའི་ཚོགས་དང་ཤེས་བྱ་ཡི། །སྒྲིབ་པ་མཐའ་སྤོང་སེམས་དཔའ་ཆེ། །རྒྱལ་པོ་ལྔ་སོགས་རྒྱུད་སྦྱངས་དང་། །མོས་སྤྱོད་དང་པོའམ་དབང་སྒྱུར་རིགས། །རྡོ་རྗེ་ཚོགས་མཐོང་ཕྱིར་མིང་གྲུབ། །དེ་ལ་དེ་ཡི་དགོངས་བཤད་པ། །བརྗོད་དང་བརྗོད་འདྲ་ཕྱིར་ངེས་པ། །ཡི་གེ་མེད་པར་འཇལ་བ་བཞི། །ཡི་གེ་དྲུག་བཅུ་དྲུག་སུམ་བརྒྱས། །འཇལ་བ་ལྔ་ཉིད་ཚུལ་གོ་བ། །སོ་སོ་ཉིད་དང་གསང་བདག་གིས། །སྙན་ཆ་ལྔ་ལྡན་ཕྱིར་ཐོས་པས། །གསང་བའི་རྒྱུད་བཤད་ཐོས་ཞེས་གསུངས། །རང་བཞིན་འབྲེལ་དང་དབང་དྭང་བས། །དྭང་བའི་ཆུ་ལ་ཉི་ཟླ་བཞིན། །མ་སྐྱེས་དོན་གྱི་གསུང་མཆོག་གི །སྨྲ་བརྗོད་མེད་པར་སྣང་བར་མཛད། །རིག་པའི་ཡེཤེས་མིང་ལྔ་བ། །དེ་བཞིན་འབྲེལ་བའི་བྱིན་བརླབས་ཀྱིས། །རང་བཞིན་གསང་བའི་རྒྱུད་རྣམས་ཀུན། །ཉི་མ་ལྟ་བུར་གསལ་བར་སྣང་། །མེ་ལོང་ལྟ་བུར་ཆོས་བརྒྱད་ཀྱིས། །མཚོན་པའི་དབང་ཕྱུག་སྐུ་མཐོང་བས། །བྱང་ཆུབ་སེམས་དཔའ་སེམས་དཔའ་ཆེའི། །རྒྱུད་ལ་རྡོ་རྗེའི་དོན་སྣང་སད། །གྲོལ་མཐར་ལམ་དང་འཁོར་བའི་སྒྲ། །དྲུག་གི་རྩ་བ་ཡན་ལག་ཚུལ། །ཚངས་པའི་ངག་ལྟར་ལས་ཅན་ལས། །སྣང་བ་ཤ་ཡི་རྣ་བས་ཐོས། །ཇི་ལྟར་གོ་དང་འདུལ་སྣང་བའི། །གསུང་རྣམས་ངོས་ལ་སྒྲས་རྐྱེན་པའི། །སྒྲ་ལྟར་གྲག་སྟོང་དབྱེར་མེད་པར། །མཐོང་ཐོས་བྱེད་པའང་དེ་ཉིད་མཐུའོ། །དངོས་པོ་གཉིས་ཆོས་ཡན་ལག་བཅས། །སེམས་ཆེན་ཕྱིར་ན་སྟོང་ཆེན་པོའི། །ཡེ་ཤེས་ཟུག་རྔུ་ལྡན་བྲལ་བས། །བདེ་བ་ཆེན་པོ་མཆོག་གི་ཐུགས། །ནམ་མཁའ་ལྟ་བུར་ཡེ་གསལ་སྟོང་། །ཆོས་སྤྱི་རང་མཚན་དབྱེར་མེད་ཀུན། །ཡུལ་འདི་མེ་ལོང་ལྟར་གསལ་བ། །མངོན་སུམ་ཀུན་གྱི་མཆོག་ཡིན་ཏེ། །རྣམ་པར་མི་རྟོག་མཆོག་གི་ཐུགས། །ཆེན་པོ་ལྟ་བུར་ཐམས་ཅད་ལ། །མི་འབྱེད་བླང་དོར་མེད་མཉམ་ཞིང་། །མཉམ་པ་ཉིད་ལས་མི་གཡོ་བ། །མཉམ་པ་ཆེན་པོ་མཆོག་གི་ཐུགས། །ཐུགས་རྗེ་ཆེན་པོས་འབྲེལ་བ་དང་། །ཉིད་ཀྱི་དབྱིངས་ལས་མི་གཞན་ཕྱིར། །བྱ་བྱེད་མེད་པར་རྣམ་བཞི་ཡིས། །འགྲོ་བ་སྒྲོལ་བའི་ཐུགས་ཆེན་ཡིན། །ཆོས་དང་ཆོས་ཉིད་ཀུན་བྲལ་བས། །རང་སྤྱི་དབྱེར་མེད་དུས་གཅིག་ཏུ། །མཁའ་ལ་འཇའ་ལྟར་གསལ་བ་ནི། །མི་ཕྱེད་རྡོ་རྗེའི་ཐུགས་མཆོག་གོ །ཕྱོགས་བཅུ་མ་ལུས་མི་ལུས་པ། །རང་རྒྱུད་མེད་པར་རིག་སྣང་བ། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་མ་ལུས་སངས་རྒྱས་ཞིང་། །ལྷུན་རྫོགས་རིག་པ་རང་སྣང་བའི། །གཞལ་ཡས་ཁང་དང་གཟུང་དང་འཛིན། །བྲལ་བའི་རང་རིག་བརྟན་པ་དང་། །བརྟེན་ཅན་མེད་པར་ཀུན་གྱི་གནས། །མ་སྤངས་ལྷུན་གྱིས་རྫོགས་པའི་ཕྱིར། །སྣ་ཚོགས་དཀྱིལ་འཁོར་ཆེན་པོའི་རྒྱན། །རང་བཞིན་མ་སྒྲིབས་བསལ་བྱའི་ཕྱིར། །སྣ་ཚོགས་འོད་ཟེར་ཕྱོགས་བཅུར་གསལ། །སྟོབས་སོགས་འབྲས་བུ་ལྷུན་རྫོགས་ཕྱིར། །གདན་ལྔའི་བྱེ་བྲག་རང་སྣང་བའོ། །གདུལ་བྱའི་བྱ་བ་ཐ་དད་པ། །ཞི་དང་ཁྲོ་བ་མི་མོས་ཉམས། །བཞི་ཕྱིར་རྣམ་བཞི་རོལ་པ་རྣམས། །གང་ལ་འཚམས་པར་འདུལ་བར་མཛད། །རྣམ་བཞི་བྱེ་བྲག་ཐ་དད་པ། །རེ་རེའང་ལྔ་ལྔའི་ཚུལ་གྱིས་སྣང་། །དེ་རིགས་བཞི་ཡི་ཆ་འཛིན་པ། །ལས་ཀྱི་རིགས་ལ་ལྷུན་གྱིས་གྲུབ། །རྣམ་པ་བཞི་ཡིས་འདུལ་མཛད་པས། །ཕྱོགས་ཀྱིས་འདུལ་བར་རིགས་མ་ཡིན། །དེ་ལྟར་སྦྱངས་མཐའ་སྐྱེས་བུ་བ། །རིགས་ལྔ་ཆ་རེ་འཛིན་བྱེད་ཀྱང་། །ཅིག་ཤོས་སངས་རྒྱས་ཀུན་ངོ་བོ། །ཉིད་དུ་སྔ་ཕྱི་དྲང་བ་ཙམ། །སངས་རྒྱས་སངས་རྒྱས་ཞེས་བརྗོད་པའི། །ཚུལ་ནི་སྨྲ་བསམ་བརྗོད་ལས་འདས། །དེ་དོན་ཕྱོགས་ཙམ་བརྗོད་བྱ་བ། །དྲང་དོན་སྔ་ཕྱིའི་སངས་རྒྱས་པ། །དོན་དམ་གཅིག་པུར་མ་ཡིན་ཏེ། །ཆུ་ལ་ཆུ་ལྟར་གཅིག་པ་མེད། །ཅིག་ཤོད་བདེན་པར་མ་ཡིན་པས། །སོ་སོ་ཐ་དད་ཆ་རིགས་མེད། །བདེན་པ་གཉིས་མེད་དབང་གྱུར་ན། །བདག་དང་གཞན་གྱི་གཉིས་མེད་དེ། །སོ་སོར་མེད་ཕྱིར་དེན་སོན་པ། །མཐའ་རྣམས་ཀུན་བྲལ་ཀུན་ལྡན་པར། །རང་གནས་ཞེན་བྲལ་མངོན་བྱས་ལ། །མིང་བརྗོད་འདི་འདྲར་གནས་སྨྲ་དཀའ། །ངོ་བོ་གཅིག་ལ་རྒྱུད་འདྲེས་མིན། །ཤིང་གི་མེ་དཔུང་ལྟར་བརྗོད་བ། །དྲང་བ་ཙམ་སྟེ་དེ་ཉིད་མིན། །ཆུ་ལ་ཆུ་ལྟར་འདོད་པའང་དེའོ། །བདེན་པའི་ཚུལ་གྱིས་སྐྱོན་བརྗོད་པས། །དག་པའི་ཡེ་ཤེས་གནས་ཡིན་པར། །ཏནྟྲ་ཉིད་ལས་གྲགས་པ་དང་། །བདེ་གཤེགས་མི་གནས་མཉམ་པ་ཡི། །ངང་དུ་བྱོན་གསུངས་བརྗོད་པ་ཡང་། །མཉམ་པ་གསུམ་པ་ཡིན་པའི་ཕྱིར། །ངེས་པར་རྒྱུད་འདྲེས་མ་འདྲེས་པའི། །ཐ་སྙད་བྲལ་བའི་ཚུལ་དུ་གནས། །ཐུན་མོང་མིན་པའི་རྒྱལ་མིང་གྲགས། །བདེ་གཤེགས་དེ་བཞིན་གཤེགས་པ་དང་། །བཅོམ་ལྡན་འདས་དང་སངས་རྒྱས་དང་། །དགྱེས་ཆེན་བརྗོད་སོགས་མཐའ་ཡས་ཀྱང་། །ལུས་གསུམ་གྲངས་མིང་ཁྱད་པར་ཙམ། །མདོ་རུ་བརྗོད་པ་ཆུབ་པར་གྱིས། །ལྔ་ལ་ལྔ་ལྔར་ལྷུན་གྲུབ་པའི། །རྒྱལ་བ་གསུམ་རྫོགས་སོ་སོ་ཡི། །གྲུབ་པའི་མཐའ་ཡི་སངས་རྒྱས་ལས། །གྲངས་རྫོགས་ངོ་བོ་བྱིན་བརླབས་ལས། །སྣང་དང་དོན་བྱེད་ཆེ་ཆུང་གིས། །སྤགས་པར་ངོ་བོ་ཉིད་ཀྱིས་གསལ། །དེ་ཚུལ་ས་གཞིའི་རྒྱལ་བ་དག །རྒྱུད་གཅིག་འདྲེས་དང་གྲོལ་སྨྲ་བ། །འདིར་དྲང་ཙམ་ཡིན་བཤད་བཞིན་ཕྱིར། །རྒྱུད་ཀྱི་ཁྱད་པར་བསམ་ལས་འདས། །མིང་གྲངས་ཐེག་ཆེན་དམན་པ་བས། །ཐུན་མོང་ཚོགས་ཀྱིས་བདེ་གཤེགས་ཤིང་། །དེ་བཞིན་ཉིད་དུ་གཤེགས་པ་ཡང་། །དུས་གྱི་དབང་གིས་སྔ་མ་བཞིན། །གཤེགས་པ་ཉིད་དང་གསང་བ་ས། །བྱ་བའི་ལུགས་ཀྱིས་ཤེས་རབ་དང་། །ཆོ་གའི་རྣལ་འབྱོར་གྲགས་རྫོགས་པས། །འབྲས་བུ་ལམ་བྱས་བདེ་གཤེགས་པའམ། །རྡོ་རྗེ་འཛིན་སར་དེ་བཞིན་གཤེགས། །ཡང་ན་བྱ་རྒོད་འདབ་ལོགས་ཀྱི། །དགོན་ཕུག་བྱེ་མ་འདབ་སྣ་རུ། །ས་རི་དབང་བསྐུར་ཇི་བཞིན་ནམ། །ཝཱ་ར་ཎཱ་སིའི་བསིལ་ཁང་དུ། །དམ་པའི་རིགས་ཅན་དབང་བསྐུར་ནས། །རྡོ་རྗེ་འཛིན་ཐོབ་ཇི་བཞིན་ནོ། །ཐུབ་པའི་དབང་པོ་དེ་ཇི་བཞིན། །གཤེགས་པ་རྒྱུ་དང་བྱ་བ་དང་། །གཉིས་ཀའི་རྒྱུད་ལས་གྲགས་བཞིན་ནོ། །རྣལ་འབྱོར་གཞུང་གི་དོན་གྲུབ་ཉིད། །ནཻ་རཉྫ་ནའི་འགྲམ་ལོགས་སུ། །དཀའ་ཐུབ་དཀའ་བ་སྤྱོད་པའི་ཚེ། །ཕྱོགས་བཅུའི་སྤྲུལ་པ་ལོངས་སྤྱོད་སྐུས། །བྱང་ཆུབ་ལྔ་བལྟབས་དབང་བསྐུར་བས། །འོག་མིན་ཉིད་དུ་དོན་གྲུབ་དེ། །སྤྲུལ་པ་དཀའ་ཐུབ་ཁོག་པ་ནས། །ཡེ་ཤེས་སྣང་མཛད་ལུས་སུ་གཤེགས། །རི་རབ་རྩེ་མོར་འཁོར་ལོ་བསྐོར། །དེ་ཡང་རྟོག་པའི་གཟུགས་སྐུ་ཡིན། །ཐབས་དང་ཤེས་རབ་ལམ་ཉིད་ཀྱིས། །འགྲོ་འོང་མེད་པར་བདེ་གཤེགས་དེ། །ཇི་བཞིན་ལྷུན་གྲུབ་ངང་སོན་པ། །ཚུལ་དང་ངོ་བོས་ཁྱད་པར་ཆེ། །དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། །འདུས་པ་གསང་བའི་ལོངས་སྤྱོད་ཀྱིས། །སྲོད་དང་ཐོ་རངས་དུས་ཉིད་དུ། །ཉི་ཟླ་ཟ་བའི་དབང་ཕྱིན་ཅིང་། །རོལ་པའི་ཀ་ར་བསྟན་པ་ཡིས། །ཡེ་ཤེས་བརྟན་རྫོགས་དབང་ཐོབ་པས། །དེ་བཞིན་དེ་བཞིན་གཤེགས་པའོ། །དེ་ཕྱིར་ཐུན་མོང་རྣམ་གསུམ་ལས། །བྱང་བ་བཞིན་དང་ཆུབ་པ་བཞི། །བདེ་བར་དེ་བཞིན་གཤེགས་པ་བརྒྱད། །གྲངས་དང་ངོ་བོ་རྩལ་གྱིས་འཕགས། །དེས་ན་རྒྱལ་བ་བཅོམ་ལྡན་འདས། །ཐུན་མོང་མཆོག་ལུགས་སྔ་མ་བཞིན། །སོ་སོའི་ལམ་ཐབས་ཤེས་རབ་ཀྱིས། །རྡོ་རྗེ་ལྟ་བུ་བཞི་བསྐྱེད་པས། །བདུད་བཞི་ངེས་བཅོམ་མྱ་ངན་བཞི། །འདས་ཤིང་མཐའ་བཞི་འདས་པ་དང་། །མི་མཐུན་གཞུང་གིས་སངས་རྒྱས་པ། །ལྟ་སྤྱོད་ཏིང་འཛིན་ལམ་རིམ་བཞིན། །གྲུབ་པའི་མཐའ་ཡང་ཁྱད་པར་བ། །ལྟ་བའི་སྒྲིབ་པས་ཕྱེ་བ་ཡིན། །དེས་ན་དགྱེས་པའི་ལོངས་སྤྱོད་ཀྱང་། །མདོ་དང་བྱ་བའི་རྣལ་འབྱོར་གཉིས། །རྒྱུད་ལས་ཇི་ལྟར་གྲགས་པ་བཞིན། །གོང་གི་དགྱེས་ཆེན་ཡིན་ཚོད་མིན། །དེ་ཕྱིར་དགྱེས་པའི་རིམ་ཡོད་པས། །ས་ཡི་སངས་རྒྱས་རིམ་ཡོད་ཕྱིར། །མིང་གྲངས་ཡོན་ཏན་ཆ་མིན་ཏེ། །ངོ་བོ་ཉིད་ཀྱིས་རྣམ་པར་འཕགས། །ལམ་གྱི་རྩོལ་བས་ངལ་བ་རྣམས། །བྲོད་པ་བསྐྱེད་ཕྱིར་ཀུན་ཏུ་འོང་། །རྡོར་འཛིན་སྟུག་པོ་བཀོད་པར་བསྟན། །མཐར་ཐུག་ས་གསུམ་ཆ་ལས་བརྗོད། །དེ་ཕྱིར་སྐས་ཀ་ལྟ་བུ་སྟེ། །ཐབས་མཁས་འདི་ཡིས་གཞན་པ་ཡི། །ཐབས་ལ་རྟེན་ནས་མོས་བཅུག་ཅིང་། །བསྒྱུར་བས་འདིར་གྲུབ་རང་ཐབས་ཀྱིས། །རང་ས་ཐོབ་ལས་ངོ་བོ་ཉིད། །གཅིག་པར་སྨྲ་བ་མུན་སྤྲུལ་ལོ། །མཐར་ཕྱིན་པའི་འབྲས་བུ་བསྟན་པའི་ལེའུ་སྟེ་དགུ་པའོ།། ༈ །།འགྲོ་བ་ལམ་ལོག་ལམ་སྟོར་བ། །ལྔ་དང་ལྔ་རྣམས་བཀྲི་བའི་ཕྱིར། །མི་གཉིས་ལམ་མཆོག་འདི་བགྱིས་པའི། །ངལ་བའི་དགེ་རྩལ་ཀུན་གྲོལ་ཤོག །བྱང་ཆུབ་ཞོར་བྱེད་ཁེ་གྲགས་གཉེར། །བཅུད་ཆེན་འཛག་ཅིང་གཞོགས་ངོམ་ཅན། །གཙུག་རྒྱལ་སྒེག་མོ་འཇག་སྐྱེལ་དང་། །ནེ་བྱ་ལྟ་བུ་ལྐོག་གཡེམ་གསོག །ཚུལ་བསྲུང་དམ་ལ་མི་གནས་དང་། །གསང་བའི་གཞུང་ལ་སྲན་མི་ཚིགས། །གཞུང་མང་སྒྲུབ་ལ་ཡིད་ཆེས་དཀའ། །བླ་མ་སྤྱི་བོས་མི་ལེན་ཅིང་། །ཞེ་བས་སྐུར་ཞིང་ཡོངས་ལའང་སྐུར། །སྣོད་མིན་རྣམས་དང་མ་འཕྲད་ཅིག །གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་ཞེས་བྱ་བ་མཆོག་དང་ཐུན་མོང་གི་དངོས་གྲུབ་བརྙེས་པའི་སློབ་དཔོན་མཁས་པ་ཆེན་པོ་སངས་རྒྱས་གསང་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་མ་ཧཱ་པཎྜི་ཏ་བུདྡྷ་གུ་ཧྱ་ཉིད་དང་། བོད་ཀྱི་ལོ་ཙ་བ་གཉགས་ཛྙཱ་ན་ཀུ་མཱ་རས་མང་ཡུལ་ཁྲི་བབས་སུ་བསྒྱུར་བའོ། །སླད་ཀྱིས་རྒྱ་གར་གྱི་མཁན་པོ་མ་ཧཱ་པཎྜི་ཏ་བི་མ་ལ་མི་ཏྲ་དང་། བོད་ཀྱི་ལོ་ཙ་བ་གཉགས་ཛྙཱ་ན་ཀུ་མཱ་ར་ལ་སོགས་པས་བཅོས་ཤིང་ཞུས་ཏེ་གཏན་ལ་ཕབ་པའོ། །ༀ་སྭ་སྟི། རིས་མེད་ཀུན་ཁྱབ་གཞིར་གནས་ཆོས་ཀྱི་དབྱིངས། །དེ་མཐོང་དེར་འཇུག་ཚོགས་སྦྱོར་ལམ་ལྔ་ཡིས། །ལེགས་བསྒྲུབ་སློབ་པའི་ཟུང་འཇུག་རིག་འཛིན་བཞི། །རྒྱུད་ནས་འབྲས་རྒྱུད་སྐུ་ལྔར་མཚམས་སྦྱོར་བའི། །ལམ་མཆོག་རྣམ་པར་བཀོད་པའི་ལེགས་བཤད་གཞུངས། །འཇིགས་བྲལ་སངས་རྒྱས་གསང་བའི་ཐུགས་མཚོ་ལས། །ལེགས་པར་ཐོན་འདི་སྔ་འགྱུར་གཅེས་པའི་ནོར། །རིག་འཛིན་བྱེ་བའི་གཤེགས་ཤུལ་ཟླ་མེད་ཡིན། །དེ་སླད་གླེགས་བམ་གཅིག་ལས་གྲངས་མེད་དུ། །འཆར་བའི་ངོ་མཚར་འཕྲུལ་གྱི་སྤར་ཆེན་འདི། །དད་ལྡན་དགེ་བའི་ཡོན་གྱི་གཞི་སྦྱར་ནས། །བསྟན་གཉིས་དར་རྒྱས་གླིང་གི་ཆོས་གྲར་སྤེལ། །དེ་ལས་བྱུང་བའི་དགེ་འབྲས་བདུད་རྩིའི་ཀླུང་། །འཁོར་གསུམ་རྙོགས་མས་བསླད་མིན་རྣམ་མཁྱེན་མཚོར། །ཡོངས་བསྔོ་རྒྱལ་བ་དགྱེས་པའི་ལམ་གྱུར་ཏེ། །འགྲོ་ཀུན་སྐུ་བཞིའི་རྒྱལ་སར་ངལ་འཚོ་ཤོག །ཐེག་རྒྱལ་ལུང་སྤྱི་རྡོ་རྗེ་རྩེ་མོའི་སྲོག །མི་ནུབ་སྲིད་མཐའི་བར་དུ་ཡུན་གནས་ཤིང་། །བཤད་སྒྲུབ་ཕྲིན་ལས་ཟབ་མོས་ས་གསུམ་ཁྱོན། །ཡོངས་ཁྱབ་བཀྲ་ཤིས་སྣང་བས་མཛེས་གྱུར་ཅིག །བཀྲ་ཤིས་གང་ཞིག་ལྷག་བསམ་མཚོ་ཆེན་ལས་འཁྲུངས་ལེགས་བྱས་ཟླ་གཞོན་འདིས། །ནད་མུག་མཚོན་སོགས་སྐལ་ངན་དུས་ཀྱི་རྒུད་བའི་ཚད་གདུང་གཏན་བཅིལ་ནས། །སྣོད་བཅུད་དཔལ་འབྱོར་ཆུ་གཏེར་རབ་རྒྱས་ཕན་བདེའི་ཀུནྡཱ་བཞད་པ་ཡིས། །ས་འདིར་རྫོགས་ལྡན་དང་པོའི་དུས་སྟོན་གསར་དུ་འཆར་བའི་རྒྱུར་གྱུར་ཅིག །ཅེས་པའང་རྣམ་དཀར་འདུ་བྱེད་པོ་སྔགས་བཙུན་འགྱུར་མེད་པདྨ་བསྟན་འཛིན་རང་ཉིད་ཀྱིས་བྲིས་ཤིང་སྨོན་པ་མངྒ་ལཾ། དགེའོ། །དགེའོ། །དགེའོ། །།བྱེ་ཆེན་ཤིང་པར་ལ་ཞལ་བ ཤུན་པའོ།།
ལམ་རིམ་འགྲེལ་པ་སྣར་སྟོན། མཁར་བ་སེང་གེ་འོད།
ལམ་རིམ་འགྲེལ་པ་སྣར་སྟོན་པས་མཛད་པ་བཞུགས་སོ། །
མང་མཁར་བ་སེང་གེ་འོད། སེ་སྟོན་གྱི་ཕྱག་དཔེ་རྒྱ་མཁར་བ།
བླ་མ་རྣམས་ལ་ཕྱག་འཚལ་ལོ། །དེ་ཡི་གསུང་གི་རིན་ཆེན་ཕྲེང་། །གཙུག་གི་རྒྱན་དུ་བྲི་བར་བྱ། །མཚན་མན་ངག་ལམ་གྱི་རིམ་པ་འདིའི་དོན་སློབ་དཔོན་སངས་རྒྱས་གསང་བས་ཕྱི་རབས་ལས་འཕྲོ་དང་གང་ཟག་སྐལ་བར་ལྡན་པའི་དོན་ཆེད་དུ་རྡོ་རྗེ་སེམས་དཔའི་སྒྱུ་འཕྲུལ་དྲྭ་བའི་རྒྱུད་ལས་བསྡུས་ཏེ་མཛད་པ་དེ་ཉིད་ལས། དེ་ཕྱིར་སངས་རྒྱས་མཚན་ཐོབ་པ། ཅེས་པ་ནས་གཤེགས་ཤུལ་ལམ་མཆོག་འདི་བསྡུས་ཏེ། ཅེས་པའི་ཚིག་ལྔ་བར་དུ་གསུངས་ཏེ། རྩིས་མགོ་དང་པོ་བཞི་དང་རིམ་པ་ལྟར་སྦྱར་རོ། །རྩིས་མགོ་ཐ་མ་དོན་དུ་བསྟན་པ་ལ་གཉིས་ལས། དོན་གྱི་བསྡུས་པའི་ཆ་ནི། དོན་བཅུ་གཉིས་ལེའུ་དགུ་པ། གཞི་ལམ་འབྲས་བུ་གསུམ་དུ་འདུས་ལ། ཚིག་གི་བསྡུས་པའི་ཆ་ནི་གསུམ་སྟེ། བསྡུས་ནས་བྱུང་བ་ལྟར། འདིར་ཚིག་གི་ཆ་ཅུང་ཟད་སྦྱར་ན། དང་པོ་མཆོད་པར་བརྗོད་པ་ལ་དོན་གསུམ་སྟེ། དགོས་པའི་དོན་དང་བསྡུས་པའི་དོན། །ཚིག་གི་དོན་དུ་ཤེས་པར་བྱའོ། །དང་པོ་ནི། སློབ་དཔོན་སངས་རྒྱས་གསང་བས་མཛད་པའི་མན་ངག་ལམ་གྱི་རིམ་པ་འདི་རྩོམ་པའི་སྔོན་དུས་སུ་རང་དད་པའི་ལྷ་དཔལ་རྡོ་རྗེ་སེམས་དཔའ་ལ་ཕྱག་འཚལ་བའི་དགོས་པ་ཅི་ཡོད་ཞེ་ན་གཉིས་སྟེ། གཙོ་བོར་གྱུར་པའི་དགོས་པ་ནི། དེ་ལྟར་མཆོད་བརྗོད་བྱས་པས་རྩོམ་པ་པོ་རང་གི་རྒྱུད་ལ་བསོད་ནམས་བསགས་པས་སྡིག་པ་བདག་ལ་དེས་ཕྱི་ནང་འབྲས་བུ་གི་བར་ཆད་ཐམས་ཅད་ཉེ་བར་ཞི་སྟེ་རྩོམ་པ་མཐར་ཕྱིན་པའི་དགོས་པ་ཡོད་ལ། ཤུགས་ལས་བྱུང་བ་ནི་ཆོས་ཉིད་མཉམ་པ་ཉིད་ལས་ཁུངས་གཞན་དུ་མི་འབྱུང་བ་དང་། ཡི་དམ་ལྷ་ལ་དབང་མི་ཟ་བ་དང་། བདག་ཉིད་ཡ་རབ་ཀྱི་ཚུལ་ཅན་དུ་ཤེས་པར་བྱ་བ་དང་། རྣམ་བཞག་མ་ལོག་པ་དང་ཚུལ་མཐུན་པར་བྱ་བ་སྟེ། དགོས་པ་བཞི་དང་ཡང་ལྡན་པའི་ཕྱིར་རོ། །གཉིས་པ་བསྡུས་པའི་དོན་ལ་བཞི་སྟེ། གང་གིས་གང་ཚེ་གང་ཉིད་ལ་ཕྱག་གི་ཡུལ། ཇི་ལྟར་མཆོད་པར་བརྗོད་པའོ། །གང་གིས་མཆོད་པར་བརྗོད་ན། སྔོན་འབྱུང་བ་རྩམ་པ་པོས་བཙལ་ལ། རྗེས་འཇུག་འཆད་པ་པོས་བཙལ་ལོ། །དུས་གང་གི་ཚེ་ན་སྔོན་རྩོམ་པ་དང་རྗེས་འཆད་པའི་ཚེ་ན་བཙལ་བའོ། །གང་ལ་མཆོད་པར་བརྗོད་ན་རྡོ་རྗེ་སེམས་དཔའ་ལའོ། །དེ་ལ། རང་བཞིན་ངོ་བོ་མཚན་ཉིད་དང་། །ངེས་པའི་ཚིག་དང་བཞི་རུ་བསྡུས་བསྟན། །དེ་ལ་རྡོ་རྗེ་སེམས་དཔའི་རང་བཞིན་ནི་འཁོར་འདས་ཀྱི་ཆོས་ཐམས་ཅད་ཐ་དད་མེད་པའི་རང་བཞིན་ཏེ་རྩ་རྒྱུད་ལེའུ་དང་པོ་ལས། དེ་བཞིན་གཤེགས་པ་ཐམས་ཅད་དང་ཅེས་པ་ནས་དབྱེར་མེད་པའི་རང་བཞིན་ཏེ་ཞེས་པའི་བར་གྱིས་མངོན་ནོ། །གཉིས་པ་རྡོ་རྗེ་སེམས་དཔའི་ངོ་བོ་ལ་གཉིས་ལས། དོན་གྱི་ངོ་བོ་ནི་རང་བྱུང་གི་ཡེ་ཤེས་ཏེ། བདེན་པ་རང་བྱུང་གི་སྟོན་པའོ། །རྟགས་ཀྱི་ངོ་བོ་ནི་གདུལ་བྱ་སྐུ་མདོག་ཞལ་ཕྱག་མཚན་དང་དཔེ་བྱད་ཀྱི་རྣམ་པར་སྣང་བ་སྟེ། དེ་ཉིད་ནི་སྐུ་མདུན་དང་རྒྱབ་མེད་པ་ནས་དབུ་གསུམ་དང་ལྡན་པ་ཞེས་པས་མངོན་ནོ་རྡོ་རྗེ་སེམས་དཔའི་མཚན་ཉིད་ནི། རང་བྱུང་གི་ཡེ་ཤེས་དེ་ཉིད་སྐྱེ་འཇིགས་དང་བྲལ་བས། ངོ་བོ་ཉིད་ཀྱི་རྟགས་པ་གཅིག་དུ་མ་དང་བྲལ་བ་སྟེ། ཕུར་པ་གསང་རྒྱུད་ལས། ངོ་བོ་ཉིད་བརྟག་རྡོ་རྗེའི་སྐུ། །ཐེར་ཟུག་རྒྱུན་ལས་གྲོལ་བར་སྲིད། །ཅེས་པ་དང་། གཅིག་དང་དུ་མར་བྲལ་བས་ཞེས་པས་སོ། །ངེས་ཚིག་ནི་བཞི་རྒྱུས་སུ་སྤྲད་ན། སྟེ། དཔལ་ཡོན་ཏན་གྱི་ངེས་ཚིག་སེམས་པ་ངོ་བོའི་ངེས་ཚིག །དཔའ་བ་ཕྲིན་ལས་ཀྱི་ངེས་ཚིག་སྟེ་རིམ་པར་སྦྱར་བའོ། །ཚུལ་ཇི་ལྟར་མཆོད་པར་བརྗོད་པ་ནི་འོག་ཏུ་འཆད་དོ། །གསུམ་པ་ཚིག་གི་དོན་བཤད་ན། ཤྲྀ་སྒྲ་ལས་དྲངས་ནས་དཔལ་ཞེས་བྱ་སྟེ་ལེགས་པའི་ཡོན་ཏན་ཕུན་སུམ་ཚོགས་པ་ལ་འཇུག་གོ །དེ་ལ་གཉིས་སྟེ་ཐུན་མོང་གནས་སྐབས་ཀྱི་དཔལ་དང་། ཁྱད་པར་བླ་ན་མེད་པའི་དཔལ་ཏེ་དེ་གཉིས་ཀྱི་ཁྱད་པར་ནི་དེ་ལས་ལ་སོགས་པ་གསུམ་གྱིས་ཕྱེ་བའོ། །དང་པོ་ཐུན་མོང་གྱི་དཔལ་ལ་གཉིས་སྟེ། ཐེག་པ་འོག་མ་པས་རང་གི་དོན་ཕྱོགས་ཏེ་རྟོགས་པ་ནི་རྟོགས་པའི་དཔལ་ལོ། །དེས་གདུལ་བྱའི་ཅི་རིགས་པར་བྱེད་པ་ནི་ཐུགས་རྗེ་གཞན་གྱི་དཔལ་ལོ། །དེ་དག་གི་བླར་གྱུར་པས་ཁྱད་པར་གྱི་དཔལ་ནི་གསུམ་སྟེ། གཞི་རང་བཞིན་ལྷུན་གྱིས་གྲུབ་པའི་དཔལ་དང་། ལམ་རིག་པ་རང་སྣང་བའི་དཔལ་དང་། འབྲས་བུ་ཐུགས་རྗེ་ཆེན་པོ་ཞོར་ལ་འབྱུང་བའི་དཔལ་ལོ། །དང་པོ་ནི་གཞི་རང་བྱུང་ཡེ་ཤེས་རང་ཆས་སུ་ཡོད་པ་ལ་བྱ་སྟེ། དེ་ཉིད་འཕྲལ་དུ་བྱེད་པ་པོས་མ་བྱས་པས་རང་བཞིན་ནོ། །དེ་ལ་འཁོར་འདས་ཀྱི་ཆོས་ཐམས་ཅད་ཡོད་ལ་བརྟག་དཀའ་ཞིང་། ངོས་བཟུང་དང་བྲལ་བས་ལྷུན་གྲུབ་བོ། །དེ་ཉིད་རང་ལ་ཡོད་པར་ཤེས་ཤིང་རྟོགས་སུ་བཏུབ་པའི་ཡོན་ཏན་ལྡན་པའི་དཔལ་ཞེས་བྱ་སྟེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་སྟེ། གཉིས་པ་ནི། གནས་ལུགས་ཀྱི་དོན་རྟོག་པའི་རིག་པའི་ཡེ་ཤེས་ཉིད་ཡུལ་མེད་པར་སྣང་བ་སྟེ་དཔེར་ན་བུམ་པའི་ནང་གི་མར་མེད་དང་འདྲའོ། །གསུམ་པ་ནི། འབྲས་བུ་སངས་རྒྱས་ཀྱི་དགོངས་པ་ལ་རྩོལ་བ་མེད་པར་གཞན་དོན་འབྱུང་བ་སྟེ། དེ་ཡང་སྤྲོས་པ་དང་བྲལ་ཞིང་མཐར་མི་གཡོ་བར་ཐུགས་ཀུན་ལ་སྙོམ་པར་ཁྱབ་པས་རྗེ། གཞན་ཡང་ཁྱད་པར་དུ་འཕགས་པས་རྗེ་ཆེན་པོའོ། །དེ་ཉིད་གདུལ་བྱ་ལ་རྟོག་པ་མེད་བཞིན་དུ་ཇི་ལྟར་མོས་པ་ལྟར་སྣང་བས་ཞོར་ལ་འབྱུང་བ་སྟེ། གླིང་བཞི་གསལ་བར་བྱེད་པའི་ཉི་མ་དང་འདྲའོ། །ཉིད་ནི་སེམས་ཉིད་དངོས་པོའི་རྐྱེན་དེ་ཆོས་ཉིད་ལ་ལྡན་པའོ། །གཉིས་པ་མཚན་ཉིད་ལ་ཕྱེ་ན་གཉིས་ལས་རྒྱས་པར་ཕྱེ་ནས། རྡོ་རྗེའི་རིག་པ་ལྔ་སྟེ། ཕྲིན་ལས་འཇོམས་པར་བྱེད་པས་ན་རྡོ་རྗེ། རང་བཞིན་ཡེ་ཤེས་འདུས་མ་བྱས་པས་ན་རྡོ་རྗེ། ཡོན་ཏན་རྩོལ་བ་མེད་པར་ལྷུན་གྱིས་གྲུབ་པས་ན་རྡོ་རྗེ། མཚན་ཉིད་སྐྱེ་འཇིག་དང་སྐྱེ་བྲལ་བས་རྡོ་རྗེ། ངོ་བོ་དབྱེར་མི་ཕྱེད་པས་རྡོ་རྗེའོ། །དང་པོ་ནི་དཔེར་ན་རྫས་ཀྱི་རྡོ་རྗེ་ཕ་ལམ་གྱིས་ཕར་ནོར་བུ་གཟི་མཆོང་ལ་སོགས་གཅོད་ཅིང་འབིགས་པར་བྱེད་ལ། ཚུལ་གཉེན་པོ་གང་གིས་ཀྱང་དབལ་མི་ཉམས་པ་ལྟ་བུ་སྟེ། དོན་རང་རིག་པའི་ཡེ་ཤེས་ཀྱི་བསྒྲིབ་པ་གཉིས་དང་ལྡན་ངན་ཐམས་ཅད་འཇོམས་པར་བྱེད་ལ། ཚུར་གང་གིས་ཀྱང་མི་ཚུགས་པས་རྡོ་རྗེའོ། །གཉིས་པ་ནི་རང་བྱུང་ཡེ་ཤེས་དེ་ཉིད་རྒྱུ་རྐྱེན་བྱེད་པ་པོས་འདུས་མ་བྱས་པ་སྟེ། འོ་ན་ལྟ་བ་དང་ཏིང་ངེའི་རྒྱུ་རྐྱེན་གྱིས་འབྲས་བུ་འབྱུང་བའོ་ཞེ་ན། དེ་ནི་གསལ་བྱེད་ཡིན་གྱི་བསྐྱེད་བྱེད་མ་ཡིན་པའོ། །གསུམ་པ་ནི། དེ་ཉིད་ལ་མ་བཙལ་བར་འབྲས་བུ་ཉེར་ལྔ་པོ་ལྷུན་གྱིས་གྲུབ་པའོ། །བཞི་པ་བསྐྱེད་བྱེད་ཀྱི་རྐྱེན་བཞི་དང་བྲལ་བས་གཉེན་པོ་ཅིས་ཀྱང་མི་ཚུགས་པའོ། །ལྔ་པ་ནི། སེམས་རང་བྱུང་གི་ཡེ་ཤེས་ཉིད་སྤྲོས་པ་དང་བྲལ་ཏེ་ཅིར་ཡང་མ་གྲུབ་པས་ཆོས་ཀྱི་དབྱིངས། དེ་ཉིད་ཐམས་ཅད་དུ་རང་གསལ་བས་རིག་པ་ཡེ་ཤེས་སྟེ། དེ་གཉིས་སུ་འདུ་འབྲལ་མེད་པས་རྡོ་རྗེ། གཉིས་པ་དོན་བསྡུས་པ་ནི། དེ་ལྟར་རིགས་པ་ལྔས་རྡོ་རྗེའི་ངེས་ཚིག་གྲུབ་པའོ། །གསུམ་པ་ངོ་བོའི་ངེས་ཚིག་ནི། དེ་ཉིད་ལ་སེམས་ཆེན་པོ་ཞེས་བྱ་སྟེ། དེ་ཅིས་ན་གཉིས་སུ་མེད་པའི་ཕྱིར་ཞེས་པ་ལ་སོགས་པའི་རིགས་པ་བཞི་སྦྱར་རོ། །དེ་ཉིད་ལ་ཁ་ཅིག་ན་རེ་འཁྲུལ་བའི་ལམ་པའི་བྱང་ཆུབ་སེམས་དཔའི་རྒྱལ་བའི་སེམས་བཞི་ལས་ཐ་མ་ངེས་བཟུང་ཀྱང་ཟེར་རོ། །ཐ་མར་ཕྲིན་ལས་ཀྱི་ངེས་ཚིག་ནི་ཕྲིན་ལས་ཀྱི་སྒོ་ནས་བདུད་བཞི་བཅོམ་པའོ། །ཇི་ལྟར་བཅོམ་ན་ཉོན་མོངས་པ་ལྔ་ཡེ་ཤེས་ལྔར་གསལ་བ་དང་། ཕུང་པོ་ལྔ་རྒྱལ་བ་རིགས་ལྔར་གསལ་བ་དང་། དེ་ཉིད་ལ་སྐྱེ་ཤི་དང་བྲལ་བ་དང་། གཉིས་མེད་ཀྱི་དོན་མངོན་དུ་བྱས་པས་རང་གཞན་མ་གྲུབ་སྟེ། བར་དུ་གཅོད་བྱ་གཅོད་བྱེད་གཉིས་དང་བྲལ་བས་ལྷའི་བདུད་བདུད་བཞི་བཅོམ་པའོ་ཟེར་ཏོ། །ཡང་ཁ་ཅིག་ན་མ་ར་ཡའི་སྒྲའི་དོན་ནི་བར་དུ་གཅོད་པ་ཡིན་པས་སེམས་ཅན་གྱི་སེམས་ཡེ་ཤེས་ལྔར་གསལ་བ་ལ་ཉོན་མོངས་པ་ལྔས་བར་བཅད་པས་མ་མཐོང་བ་སྟེ། དེ་ཉིད་བདུད་ཀྱང་ཡིན་ལ་ཉོན་མོངས་པ་ཡིན་པས་ཉོན་མོངས་པའི་བདུད་ཅེས་བྱ་སྟེ། དེ་བཅོམ་པ་ནི་རང་སྤྱིའི་གཏན་ཚིགས་ཀྱིས་དཔྱད་ན། རང་གི་མཚན་ཉིད་མ་འདྲེས་པའི་ཡེ་ཤེས་སུ་རང་གསལ་ཞིང་། སྤྱིའི་མཚན་ཉིད་ཆོས་ཀྱི་དབྱིངས་སུ་རྟོགས་ན་ཉོན་མོངས་པ་ངང་གིས་མི་གནས་པས་བཅོམ་པའོ། །ཕུང་པོའི་བདུད་ནི་ཕུང་པོ་ལྔ་དོན་དམ་པར་རང་བཞིན་མེད་ལ་ཀུན་རྫོབ་ཏུ་སྣང་ལ་རང་བཞིན་མེད་པ་འཇའ་ཚོན་ལྟ་བུའི་སྐུ་སྣང་བ་ལ་ཕུང་པོ་རང་རྒྱུད་པར་བཟུང་བས་བར་བཅད་པའི་བདུད་དོ། །དེ་བཅོམ་པ་ནི་ཕུང་པོའི་རྒྱུ་ཉོན་མོངས་པ་མེད་པས་འབྲས་བུ་ཉེར་ལེན་གྱི་ཕུང་པོ་ལྔ་མི་སྨིན་པས་ཕུང་པོའི་བདུད་བཅོམ་པའོ། །འཆི་བདག་གི་བདུད་ནི་སྐྱེ་ཤི་མེད་པ་ལ་བར་དུ་གཅོད་པ་སྲོག་གི་དབང་པོ་འགགས་པའི་བདག་ཉིད་དེ། དེ་ཀ་བཅོམ་པ་ནི་ཕུང་པོ་ལྔ་མེད་པས་སྐྱེ་ཤི་དུཿཁ་བ་དང་བྲལ་བས་ནི་འཆི་བདག་གི་བདུད་བཅོམ་པའོ། །ལྷའི་བུའི་བདུད་ནི་འདོད་པ་ཁམས་ཀྱི་ལྷ་ཕྲག་དོག་ཆེ་བས་གཉིས་མེད་མ་རྟོགས་པ་རྣམས་ལ་བར་དུ་གཅོད་པ་སྟེ། དེ་བཅོམ་པའི་ཚུལ་ནི་སྔར་དང་འདྲའོ། །དཔའ་བ་ནི་གཉིས་ཏེ། དགོངས་པ་དཔའ་བ་ནི་གཉིས་སུ་འཛིན་པ་ངང་གིས་མི་གནས་པར་བྱེད་ལ། མཛད་པ་དཔའ་བ་ནི་གཞན་དོན་བྱེད་པའོ། །དེ་རྣམས་ནི་གང་ལ་བཙལ་བའོ། །གང་གིས་བཙལ་བ་ནི། རུ་སངས་རྒྱས་གསང་བ་ཉིད་དོ། །ཇི་ལྟར་བཙལ་བ་ནི་ལྷ་ཡི་ལྷ་ལ་གཉིས་མེད་མོས་ཞེས་པ་སྟེ། ལྷ་ལ་དོན་གསུམ་ལས་ངོ་བོ་ནི། དོན་གྱི་ངོ་བོ་ནི་རྒྱུད་ཞི་བ་ཡིན་ལ་རྟགས་ཀྱི་ངོ་བོ་སྐུ་མདོག་ཞལ་ཕྱག་གི་རྣམ་པ་རང་སྣང་བའོ། །ངེས་ཚིག་ནི་རྒྱུད་ཞི་བའི་དོན་གྱིས་བྱས་ན་ངོ་བོའི་ངེས་ཚིག་དུ་འགྱུར་ལ། ཕན་འདོགས་པའི་དོན་གྱིས་ལྷ་བྱས་ན་དགོས་ཆེད་ཀྱི་ངེས་ཚིག་ཏུ་འགྱུར་རོ། །རྣམ་གྲངས་ལ་གཉིས་ལས། དང་པོ་འཇིག་རྟེན་པའི་ལྷ་ལ་གཉིས་ཏེ་སྐྱེ་བའི་ལྷ་ནི་འདོད་པའི་ཁམས་ན་དྲུག་གཟུགས་ཁམས་ན་བཅུ་བདུན་གཟུགས་མེད་ན་བཞི་སྟེ་ཉེར་བདུན་ནོ། །སྐྱོབ་བའི་ལྷ་ནི་ལྔ་ཏེ། ཕོ་ལྷ་ཞང་ལྷ་དགྲ་ལྷ་མ་ལྷ་སྲོག་ལྷའོ། །གཉིས་པ་འཇིག་རྟེན་ལས་འདས་པའི་ལྷ་ལ་གཉིས་གཉིས་སྟེ། དོན་གྱི་ལྷ་ནི་རྒྱུད་དག་པའི་སངས་རྒྱས་སོ། །རྣམ་པར་དག་པའི་ལྷ་ནི་རིགས་འཛིན་བྱང་ཆུབ་སེམས་དཔའ་འོ། །འདིར་དང་པོ་ཡིན་པས་ལྷའི་ཡང་ལྷའོ། །ཇི་ལྟར་བཙལ་བ་དངོས་ནི། གཉིས་མེད་མོས་ཞེས་པ་སྟེ། ངོ་བོ་ནི་ཕྱག་གི་ཕྱག་ཡུལ་རྡོ་རྗེ་སེམས་དཔའ་ཞེས་བྱ་བ་གུད་ན་ཡོད་པ་མ་ཡིན་ཏེ་རང་གི་སེམས་རང་བྱུང་གི་ཡེ་ཤེས་ཉིད་ཡིན་ལ། དེའི་དོན་ཕྱིར་ཅི་ལོག་པར་རྟོགས་ཏེ་ཆུ་ལ་ཆུ་བཞག་པ་ལྟར་ལ་བྱ་སྟེ། དེ་ཡང་ཇི་ལྟར་ཆུ་ལ་ཆུ་བཞག་གམ། མར་ལ་མར་ནི་བླུགས་པ་ལྟར། །རང་གི་ཆོས་ཉིད་གང་ཡིན་པ། །ལེགས་མཐོང་ག ང་ཡིན་འདིར་ཕྱག་ཡིན། །ཞེས་པས་སོ། །ངེས་ཚིག་འཇལ་བའི་ཕྱིར་ན་ཕྱག་ཞེས་བྱའོ། །དེ་ཉིད་ལ་དབྱེ་ན་གཉིས་ལས་ཐུན་མོང་གི་ཕྱག་ནི་སྒོ་གསུམ་དང་བས་བཙལ་བ་ཡིན་ལ། ཐུན་མོང་མ་ཡིན་པའི་ཕྱག་རྒྱ་ནི་གོང་མ་ལྟ་བུ་སྟེ། དེ་ལ་ཡང་གསུམ་སྟེ། རྟོགས་པ་ནི་ལྟ་བའི་འོ། །གོམ་པ་ནི་ཏིང་ངེ་བའི་འོ། ནར་སོན་པ་ནི་འབྲས་བུའི་ཕྱག་གོ །འོ་ན་སྤྱིར་སངས་རྒྱས་སྐུ་ལྔ་ལོངས་སྐུ། རིགས་ལྔ་ལས་རྡོ་རྗེ་སེམས་དཔའ་ཁོ་ན་ལ་ཕྱག་འཚལ་བའི་རྒྱུ་མཚན་ཅི་ཞེ་ན་གསུམ་སྟེ། དཀྱིལ་འཁོར་གྱི་གཙོ་བོ་ཡིན་པ་དང་། འཆད་པའི་སྐྱེས་བུ་ཡིན་པ་དང་། ཐུགས་དམ་གྱི་ལྷ་ཡིན་པའི་ཕྱིར་རོ་ཞེས་སྤྱན་འབྱེད་ལས་བཤད་དོ། །དང་པོ་མི་ཡུལ་གསང་སྔགས་ཇི་ལྟར་བྱུང་བའི་ཚུལ་ནི། སངས་རྒྱས་ཐུབ་པའི་དབང་པོ་ཡོངས་སུ་མྱ་ངན་ལས་འདས་བར་དགོངས་ནས་འཁོར་བསྡུས་ཏེ་གདམས་ངག་བཞག་པ་ལས། འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུ་ཀུ་ར་ཛས་གསང་སྔགས་ནམ་འབྱུང་དྲིས་པས་བྱུང་ཚུལ་བཅུ་གཉིས་ཀྱིས་འབྱུང་བར་ལུང་བསྟན་པ་ལས། ཁྱད་པར་ལུང་ཆེན་ངེས་པར་བསྟན་པའི་བྱུང་ཚུལ་ལས། ང་ནི་འདི་ནས་མི་སྣང་ནས་ཞེས་པའི་ཚིག་རྐང་བཅུ་གཉིས་དྲང་། སྟོན་པ་འདས་ནས་ལོ་ཉེར་བརྒྱད་ནས་གསང་སྔགས་ཀྱི་སྟོན་པ་ཕྱག་ན་རྡོ་རྗེ་ཉིད་འབྱུང་བར་རྒྱལ་པོ་ཛ་དང་རིགས་ཅན་ལྔ་ལ་ལུང་བསྟན་པ་ལྟར། ལོ་ཉེར་བརྒྱད་ན་རིགས་ཅན་ལྔ་པོ་རང་རང་གི་རྫུ་འཕྲུལ་གྱིས་རི་མ་ལ་ཡ་གནམ་ལྕགས་ཡོད་པའི་རྩེ་ལ་འདུས་སྟེ། སྟོན་པ་འདས་པ་ལ་གདུང་བ་ཉེར་གསུམ་བཏོན་པས། ཕྱོགས་བཅུའི་རྒྱལ་བས་གསན་ནས་ཐམས་ཅད་ཀྱིས་ཕྱག་ན་རྡོ་རྗེ་ལ་གདུང་བ་སེལ་ཅིག་པར་བསྐུལ་བས་རི་མ་ལ་ཡའི་རྩེ་ལ་གསང་བའི་བདག་པོ་མངོན་སུམ་དུ་གཤེགས་ཏེ་འཁོར་ལྷ་ཀླུ་གནོད་སྦྱིན་སྲིན་པོ་དང་མི་ལས་སྐལ་ལྡན་ཏེ་རིགས་ཅན་ལྔ་པོ་ལ་ཆོས་ཀྱི་འཁོར་ལོ་བསྐོར་ཏོ། །དེའི་བྱིན་རླབས་ཀྱིས་ཟ་ཧོར་གྱི་ཡུལ་ཨ་བར་ཏྲ་མུ་ཏྲ་བྱ་བའི་རྒྱལ་པོ་ཛཿཞེས་བྱ་བ་གསང་སྔགས་ཀྱི་རིགས་ཅན་དེ་ལ་རྨི་ལྟས་ཐུན་མོང་མ་ཡིན་པ་བདུན་ཤར་བ་འདི་ལྟ་སྟེ། དང་པོར་རི་དེའི་རྩེར་ཕྱག་ན་རྡོ་རྗེ་བྱོན་དེའི་སྐུ་ལས་འོད་སྔོན་པོ་འཕྲོས་པས་འཇིག་རྟེན་གྱི་ཁམས་བསྲེགས་ཏེ་སྣང་བར་བྱས། གསུང་གི་སྒྲ་འབྲུག་སྟོང་ལྡིར་བ་ལྟ་བུ་ནི་ཐོས། ཐུགས་ལས་རྡོ་རྗེ་འབར་བ་ཅིག་བྱུང་ནས་ཐུགས་ཀར་ཐིམ། ཉི་མ་འོད་འབར་བ་ཅིག་སྤྱི་བོར་ཐིམ། ཟླ་བ་འོད་འབར་བ་ཅིག་རྐང་བའི་མཐིལ་དུ་ཐིམ། སྣང་སྲིད་ཀྱི་གཏོས་ཐམས་ཅད་ལྟོས་ནས་འཚོལ་བ་ཅིག་རྨིས་སོ། །གཉིས་པ་ནི། དེ་བཞིན་གཤེགས་པ་ཐམས་ཅད་ཆོས་ཀྱི་འགྲོ་བ་མཛད་ཅིང་ཉི་ཟླ་ལ་ཞོན་ནས་ཆོས་ཀྱི་འཁོར་ལོ་བསྐོར་ཅིང་སྲིད་གསུམ་ཁ་ལོ་གྱེན་དུ་བསྒྱུར་བ་ཅིག་རྨིས་སོ། །གསུམ་པ་ཡང་ནམ་མཁའི་འོད་ལས་སྤྲིན་གསེར་གྱི་མདོག་ཅན་ནི་འཐིབས། ཆོ་འཕྲུལ་གྱི་འབྲུག་སྒྲ་སྙན་ཅིང་ཚིམ་པ་ནི་གྲགས། རིན་པོ་ཆེ་སྣ་ཚོགས་ཀྱི་སྨུགས་པ་ནི་འཐིབས། བཻཌཱུརྱ་ཡི་འོད་ནི་ལྷུང་། སྣང་སྲིད་གསལ་བའི་གློག་ནི་འགྱུ། རིན་པོ་ཆེའི་ཆར་མངོན་བར་འབབ་པ་ཅིག་རྨིས་སོ། །བཞི་པ་ཡང་ལོ་ཀའི་གཏོས་ནི་འགྱུ། རད་ན་འབར་བའི་སྒྲོན་མ་ཤར་བས་སྣང་སྲིད་ཀྱི་མུན་པ་ནི་བསལ། བདུད་རྩིས་སྨན་གྱི་ཆུ་རྒྱུན་བྱུང་བས་འགྲོ་བ་རྣམས་ཀྱི་གཅོང་རྙིང་ནི་སྦྱངས། འགྲོ་བ་ཐམས་ཅད་རྡོ་རྗེ་རྣལ་འབྱོར་གྱི་སྒྲ་དིར་རི་རི་སྒྲོགས་པ་ཅིག་རྨིས་སོ། །ལྔ་པ་ཡང་སྤྲིན་གྱི་ནང་ནས་ཉི་མའི་དཀྱིལ་འཁོར་རད་ན་སྣ་ཚོགས་ཀྱི་འོད་ཟེར་ཤར་བའི་དཀྱིལ་ན་རད་ན་སྨུག་པོ་དཔལ་གྱི་བེའུ་ཡི་སྒྲོམ་འོད་དང་བཅས་པ་ཕྱི་ནང་ཐམས་ཅད་གསལ་བའི་ནང་ནས་གསེར་གྱི་གླེགས་བམ་ལ་བཻཌཱུརྱའི་ཞུན་མས་རྒྱ་རང་ནན་དུ་བྲིས་པའི་གླེགས་བམ་མང་པོ་སྐར་མདའ་ཐང་ལ་ལྷུང་བ་ལྟར་བབས་པ་རྨིས་སོ། །དྲུག་པ་ཡང་གླེགས་བམ་མང་པོ་དེ་ལ་བྱང་ཆུབ་སེམས་དཔའ་མང་པོ་དང་རིག་འཛིན་དང་ལྷ་དང་ལྷ་མོ་ཚད་མེད་པ་རྣམས་འདོད་ཡོན་གྱི་སྒྲ་སྒྲོགས་ཤིང་མཆོད་བསྟོད་འདོན་ཀློག་བསྐོར་བ་བྱེད་པ་རྨིས་སོ། །བདུན་པ་ཡང་ནམ་མཁའི་སྤྲིན་གྱི་གསེས་ན་ལུང་སྟོན་པའི་སྒྲ་བྱུང་སྟེ། ལས་དང་སྐལ་བ་དང་ལྡན་ཞིང་ཞེས་པའི་ཚིག་བཅུ་གསུངས་པ་རྨིས་སོ། །དེ་ཡང་། བགས་ཆགས་བྱང་དང་ཆོས་ལ་དབང་ཐོབ་དང་། ཆོས་ཀྱི་ཆར་འབེབས་རྣལ་འབྱོར་གྲལ་དུ་བཞག །ཆོས་ཀྱི་རྒྱལ་པོར་དབང་བསྐུར་རྨད་བྱུང་ཆེ་བ་སྟོན་གསང་བ་དམ་པ་རྒྱ་ཆེར་སྒྲོགས་པའི་ལྟས། དེ་ནས་འཁོར་རྣམས་བསྡུས་ཏེ་རྨི་ལམ་དག་བཟླས་ནས། རྨི་ལམ་འདི་དག་དང་སྦྱར་ན་བདག་སྐལ་བ་དང་ལྡན་པར་ངེས་སོ་གསུངས་པས། འཁོར་རྣམས་ཀྱིས་དེ་ལྟར་ལགས་སོ་ཨ་ལ་ལ་ཧོ་ཞེས་ངོ་མཚར་དུ་གསོལ་ལོ། །དེ་ལྟར་རྨི་ལམ་རྫོགས་པ་དང་སད་ནས་ལྟས་དགོས་སྟེ་བལྟ་བར་ཡང་ཐོག་རྩེ་མོར་ཕྱིན་པས་རཏྣ་ལས་བྱས་པའི་ཕྱག་ན་རྡོ་རྗེའི་བཞུགས་པ་མཐོང་བས་དགྱེས་ཏེ་བསྐོར་བ་དང་ཕྱག་དང་མཆོད་པ་བྱས་ཏེ། སྔོན་ཚེ་གོང་ནས་བསྒྲུབས་པ་ཡི་སོགས་ཞེས་ཚིག་དྲུག་གསུངས་ནས་ཐུགས་དམ་དུ་བྱས་ཏེ་ཟླ་བ་བདུན་བསྒྲུབས་པས་རྨི་ལམ་དུ་བྱུང་བའི་གླེགས་བམ་རྣམས་མཐོང་ངོ་། །མཐོང་ནས་ལས་དང་ཐུགས་རྗེ་འབྲེལ་བར་སྣང་བའི་གླེགས་བམ་ལ་རབ་ཏུ་དགའ་བའི་ཚུལ་གྱིས་བརྟགས་ན་ཡིག་འབྲུ་གཅིག་ཀྱང་བརྡ་མ་མཇལ་ལོ། །ཨེ་མ་ཧོ་སྔར་གྱི་ཚུལ་རྟགས་མཚན་འདི་དང་སྦྱར་ན་གླེགས་བམ་འདི་རྣམས་ལ་ངོ་མཚར་དུ་གྱུར་པའི་དོན་ཆེན་པོ་ཅིག་ཡོད་པར་ངེས་པ་ལ། བདག་གིས་མི་རྟོགས་པ་ཅི་ཉེས་སྙམས་ནས་བཤུམས་སོ། །དེར་ཐེ་ཚོམ་གྱི་རྟོགས་པ་ཞི་ནས་འཇིག་རྟེན་གྱི་ཁམས་ན་བརྡ་མཇལ་བ་སུ་ཡོད་ཅེས་བསྒྲགས་ན་ཟ་ཧོར་གྱི་རྒྱལ་པོ་ཨུ་པ་ར་ཛ་ཞེས་བྱ་བཤེས་ཉེན་ཆེའོ་ཞེས་ཐོས་ཏེ། ཕོ་ཉ་བརྫངས་ནས་ལོ་རྒྱུས་ཞིབ་ཏུ་གསོལ་ཏེ་སྤྱན་དྲངས་པས་མ་ཤེས་ན་རྒྱལ་པོས་ཁྲེལ་གྱིས་དོགས་ནས་མ་གནང་སྟེ། ལན་དུ་གླེགས་བམ་གླང་པོ་ཆེར་འདིར་སྐྱོལ་ཅིག་གསུངས་པས། ཕོ་ཉས་ཀྱང་རྒྱལ་པོ་ཛ་ལ་ཞིབ་ཏུ་བསྙད་པས་གླང་པོ་ཆེ་ལ་བཀལ་ཏེ་བསྐྱལ་བས་ཚིག་ཅིག་ཀྱང་བརྡ་མ་འཇལ་ཏེ། བདག་གི་ཡུལ་དུ་མ་གྱུར་གྱིས་རྒྱལ་པོ་ཉིད་རང་གི་དགོངས་པའི་རྩལ་གྱིས་དཔག་འཚལ་ལོ་ཞེས་སླར་བཟློག་གོ །དེ་ནས་ཡབ་གྱིས་རྒྱལ་པོ་ལག་ཐུང་དང་ཡུམ་རྩའི་ལ་བ་ཅན་གྱི་བུ་དགེ་སློང་ཀུ་ཀུ་ར་ཛ་ཞེས་བྱ་བ་ཚེ་ལོ་སྟོང་ཐུབ་པ་བྱང་ཆུབ་སེམས་དཔའ་རིན་ཆེན་མང་གི་སྤྲུལ་པར་གྲགས་པ་དེ་ལ་བསྟན་པས་ཐུགས་རྡོ་རྗེ་རིགས་ཀྱི་རྡོ་རྗེ་སེམས་དཔའི་ལེའུ་རྟོགས་ཏེ། དེ་ཉིད་ཀྱི་སྒོ་ནས་བསྒྲུབས་པས་རྡོ་རྗེ་སེམས་དཔའ་དེ་ཉིད་གྲུབ་སྟེ་ཞལ་མཐོང་སྟེ། རིགས་ཀྱི་བུ་དངོས་གྲུབ་ཅི་འདོད་གསུངས་པས། གླེགས་བམ་འདི་དག་གི་དོན་རྟོགས་པར་འཚལ་ལོ། །ཞེས་ཞུས་པས། རིགས་ཀྱི་བུ་རང་གི་ཕུང་པོ་སྦྱངས་དང་གསང་བའི་བདག་པོས་ལུང་སྟོན་ནོ། །ཞེས་གསུངས་ནས་མི་སྣང་བར་གྱུར་ཏོ་ཞེས་ཟེར་ཏེ་གཞུང་དོན་ལ་མི་འཇུག་གོ །འོ་ན་ཇི་ལྟ་བུ་ཞེ་ན། རྒྱལ་པོ་ཉིད་ཀྱི་བསོད་ནམས་བསགས་པ་མང་དུ་བྱས་པས་དེ་རྟོགས་ནས་བསྒྲུབས་པས་དེ་ཞལ་མཐོང་བར་དགོངས་འདུས་ལས་ཀྱང་གསལ། སྨན་པ་སྤྱིའི་གཅོད་མ་གོ་ཁོ་ཁྱབ་གསུམ་ལས་བཤད་པའི་ཕྱིར་རོ། །དེ་ནས་དགའ་བ་སྐྱེས་ཏེ་ས་དག་ཀྱང་ཆེར་གཡོས་ནས་ཕྱག་ན་རྡོ་རྗེ་མངོན་དུ་བྱོན་ཏེ། རྡོ་རྗེ་ནམ་མཁའ་ལ་སྤར་ཏེ་བརྟུལ་ཞུགས་མཛད་པས་སྣོད་དང་སྒྲིབ་པ་ཀུན་སྦྱོང་བས་ཀུན་མཁྱེན་པའི། བསྟན་པའི་དངོས་གྲུབ་དེ་ནས་ཐོབ་ལེགས་པར་སྦྱར་རོ། །ལོ་རྒྱུས་གཉིས་པ་ཇི་ལྟར་བསྒྲུབས་པའི་གནས་ནི། ཕོ་བྲང་དམ་པ་སྟེ། དྲག་ཤུལ་ཅན་གྱི་རི་མ་ལ་ཡ་ཞེས་བྱ་བ་ཅིག་ཡོད་དེ། རི་དེ་ཡང་རྩེ་མོ་རི་དྭགས་ཀྱི་རྒྱལ་པོ་སེང་གེའི་འཁྲ་སར་གྱུར་པ་འདབ་གཤོག་ན་གཅན་གཟན་རིགས་འཁྲ་ས་ཡོད་པ། རྩ་བ་དང་སྡོང་བུ་དང་མྱུ་གུ་ཤུན་པ་ལོ་མ་དང་མེ་ཏོག་འབྲས་བུ་སྨན་སྣ་ཚོགས་སྐྱེ་བ། ངོས་ལ་བྲག་དཀར་པོ་སེང་གེ་ཁྱི་ཚུགས་བྱས་པ་འདྲ་བ་ཡོད་པ། ཤར་ངོས་ནས་ཀྲི་ཤ་ཨ་སུ་རིའི་བྲག་ཕུག་ཡོད་པ། སྒོ་ཟླ་གམ་ལ་ངོ་མཚར་གྱི་རི་མོ་རང་བྱུང་བ། ཡང་ཐོག་སུམ་རིམ་དང་བཅས་པ། དེའི་སྤྱི་བོ་ནི་བྱ་ཀ་ལ་འདའ་ཀའི་ཚང་བཅས་པ་ཡི་དགོན་གནས་ཡོད་དེ། དེར་སྐལ་བ་དང་ལྡན་པ་རྣམས་ཀྱིས་བགྲོད་ཅིང་ཕྱིན་པ་ལས་སྐལ་མེད་ཀྱིས་མི་ཕྱིན་ནོ། །དེ་ལྟ་བུའི་ཀྲི་ཤ་སུ་རིའི་བྲག་ཕུག་དེ་ཉིད་ཕོ་བྲང་དམ་པ་ཞེས་བྱ་སྟེ། སྒྲུབ་པ་པོ་ནི་ཀུ་ཀུ་ར་ཛ་ལ་སོགས་ཏེ། དེ་ཡང་དགེ་སློང་ཀུ་ཀུ་ར་ཛ་ཚོམ་བུ་འབུམ་དང་བཅས་ཏེ་གཤེགས་པ་ལ་སོགས་པར་སྦྱར་རོ། །དབང་ཐོབ་པ་ནི་གསུམ་ལས། ལམ་བགྲོད་ཅན་གྱི་དབང་ཏེ་རུ་རིག་འཛིན་བུ་སྣང་བྱེད་མཐར་ཕྱིན་པས་ཞུས་སོ། །དམ་བཅའ་ནི། དེའི་ཕྱིར་ངས་བསྡུས་ཏེ་བསྟན་པར་བྱའོ། །ཞེས་བསྡེབ། གང་གིས་གང་གིས་དོན་དུ་བསྟན། །གང་ལ་བསྟན་ཏེ་གང་བསྟན་དང་། །གང་གི་ཚེ་བསྟན་དགོས་པ་གང་། །དྲུག་པོ་རྒྱུད་ཚིག་དྲུག་དང་སྦྱར། །གང་གི་ཕྱིར་ན་གསུམ་སྟེ། དང་པོར་སངས་རྒྱས་ཐུབ་པའི་དབང་པོ་འདས་ནས་གསང་བའི་བདག་པོས་རིགས་ཅན་ལྔ་ལ་བཤད་པས་དང་པོར་ཁུངས་བཙུན། དེ་ནས་ཀུ་ཀུ་ཛ་ལ་སོགས་པས་ཚོགས་སྒྲུབ་པས་བར་དུ་རིག་འཛིན་ཐོབ་པས་བར་དུ་གྲོགས་བཟང་འདིའི་དོན་ཉམས་སུ་བླངས་ནས་འཁོར་བའི་དུ་ཁ་ལས་གྲོལ་བས་ཐ་མར་སྐྱབས་ཆེ་བ་དང་གསུམ་གྱིས་བསྟན་པར་བྱ་སྟེ། ཐོག་མ་བར་དང་མཐར་དགེ་བ་ཞེས་གསུངས་སོ། །དམ་པ་ནི་གསུམ་ལས། ཤེས་བྱ་དམ་པ་ནི་སོ་སོའི་གནས་དེའི་དོན་ཕྱིན་ཅི་མ་ལོག་པར་གོ་བར་ནུས་པའི་ཕྲད་གཉིས་ཏེ་གདུལ་བྱའི་སྣང་བའོ། །ཤེས་པ་དམ་པ་ནི་ཇི་ལྟ་བ་བཞིན་ནར་སོན་པ་སྟེ་སངས་རྒྱས་སོ། །དེ་ལྟར་གསུམ་ལས་བར་པའོ། །འདི་ནི་འབྲེལ་བའོ། །རིགས་ནི་ཀུན་འདུས་ལས། དང་པོ་དེ་ལས་བྱུང་བ་དང་། །བར་དུ་དེ་ཡི་བྱ་བ་བྱེད། །ཐ་མར་དེ་ཡིས་རྒྱུད་འཛིན་པས། །རིག་འཛིན་ཞེས་ནི་གྲགས་པ་ཡིན། །ཞེས་སོ། །ཅན་ནི་རང་གི་མིང་གི་ཅན་ལྡན་པ་སྟེ་དཔེར་ན་སྐྱེས་བུ་དང་རྩལ་ཐ་མི་དད་པ་ལྟར་རོ། །དེ་ལྟར་རིག་ཅན་ཙམ་ནི་ཕྱི་རྒྱུད་ལའང་ཡོད་པས་ཕྱི་རྒྱུད་ཀྱི་གདུལ་བྱའོ། །དྲ་མ་ནི་རྣལ་འབྱོར་ཆེན་པོ་ཉིད་ཀྱི་རིགས་ཅན་དེ་གཉིས་ཆར་དངོས་ཀྱི་སློབ་མ་ཡིན་ལ། དེ་རྗེས་མ་འོངས་ནི་རྒྱུད་པའི་སློབ་མའོ་ཞེས་ཟེར་རོ། །སྔར་འདས་པའི་རྒྱལ་བའི་གཤེགས་ཤུལ་ཡིན་པ་ཡང་། འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་ཀུན། །བརྙེས་ནས་སྐུ་ལྔ་ལྷུན་གྱིས་རྫོགས། །ཞེས་སོ། །མ་འོངས་བའི་རྣལ་འབྱོར་པའི་ལམ་ཡིན་པ་ཡང་། འབྱུང་དང་མ་འོངས་ཐམས་ཅད་ཀུན། །འདི་ཡིས་ལྷུན་གྱིས་གྲུབ་པར་བྱེད། །ཞེས་སོ། །ལམ་དེ་ཡང་འོག་མའི་ལམ་ལས་ཁྱད་པར་གསུམ་གྱིས་འཕགས་ཏེ་པས་མཆོག་ཅེས་བྱ་སྟེ་གང་ཞེ་ན། སྐལ་པ་གྲངས་མེད་གསུམ་དུ་བགྲོད་མི་དགོས་སྟེ་ཚེ་གཅིག་གིས་འབྲས་བུ་ཐོབ་པས་ཉེ་བའི་ཕྱིར་དང་། འོག་མའི་ལམ་འདིའི་ལམ་སྟེགས་སུ་སྔོན་དུ་སོང་བས་རྫོགས་པའི་ཕྱིར་ན་མཆོག་ཅེས་བྱའོ། །དེ་ཡང་ཞགས་པ་ལས། ལམ་གྱི་ནང་ན་ཉེ་ལམ་བདེ་རྫོགས་པ། །ཐབས་ཀྱི་ནང་ནས་མ་ནོར་དམ་པ་ཡིན། །ཞེས་སོ། །འདི་ཞེས་བྱ་བ་ཉེ་བ་མངོན་སུམ་པའི་ཚིག་ཏེ་གཞུང་དབུ་ཞབས་སོ། །བསྡུས་ཞེས་པ་ལམ་རིམ་འདིའི་དོན་སྔར་རྒྱུད་ལས་གསུངས་པ་ཞིག་གམ། མ་གསུངས་པ་ཞིག་བསྡུས། དང་པོ་ལྟར་ན་ཟློས་པའི་སྐྱོན་དུ་འགྱུར་ལ་གཉིས་པ་ལྟར་ན་རང་དགའ་བར་འགྱུར་སྙམ་ན། སྔར་གསུངས་པས་རང་དགའི་ཉེས་པ་མེད་ལ། འོན་ཀྱང་རྒྱུད་སྡེ་དག་ལས་འཐོར་བ་ཕྱོགས་གཅིག་ཏུ་བསྡུས་པ། མང་བ་ཉུང་ངུར་བསྡུས། ཟློས་སྐྱོན་གྱི་ཉེས་པ་ཡང་མེད། །ལུང་བཞིན་མདོར་བསྡུས་ནས་ནི་བསྟན་པར་བྱ། ཞེས་པ་ལྟ་བུའོ། །སྙིགས་མ་ནི་སངས་རྒྱས་ཀྱི་བསྟན་པ་ལོ་སུམ་བརྒྱ་དང་ལྔ་སྟོང་གནས་པ་ལས་དེ་རྣམས་རྫོགས་པ་ལ་ནི་སྙིགས་མ་ཞེས་བྱ་སྟེ། དེའི་ཚེ་སེམས་ཅན་གྱི་རྒྱུད་ལ་ཉེས་པ་དྲག་ཏུ་སྨིན་པས་ཕ་རོལ་ཏུ་ཕྱིན་པའི་ལམ་ལྟ་བུར་དུས་ཡུན་རིང་པོ་གཉེན་པོ་བྱམས་པ་བསྒོམ་པ་ལ་སོགས་ཞི་དུལ་གྱི་མ་འདུལ་བ་དེའི་ཚེ་གསང་སྔགས་ཀྱི་ལམ་དུས་མྱུར་ཞིང་ཉོན་མོངས་པ་ཉིད་ལམ་དུ་བསྟན་ཞིང་གདུལ་བྱ་འདུལ་བའི་ཕྱིར་བསྟན་པར་བྱ་ཞེས་སོ། །སྤྱན་བཟང་ལ་སོགས་པ་ནི། དཔེར་ན་ལོང་བས་ལོང་ཁྲིད་མེད་པར་གང་དུ་བགྲོད་པའི་གནས་སུ་མི་ཕྱིན་པ་ལྟར། ལས་དང་པོ་པས་རྒྱུ་ལ་མ་བརྟེན་པར་དོན་མི་རྟོགས་ཅིང་འབྲས་བུ་མི་ཐོབ་པའི་དཔེ་དོན་ནོ། །ལུང་བཞིན་བསྐུར་བ་ནི་གསུམ་སྟེ། གསང་འདུས་ལས་བླ་མ་དང་མཉམ་པ་བལྟས་ཏེ་བཀུར་བ་དང་། བླ་མ་ལྔ་བཅུ་པ་ལས། བླ་མ་དང་ནི་རྡོ་རྗེ་འཛིན། །ཐ་དད་པར་ནི་མི་ལྟ་ཞིང་། །ཞེས་པས་ཐ་དད་མེད་པར་དང་། །དགོངས་འདུས་ལས། སྐལ་བ་འབུམ་གྱི་སངས་རྒྱས་པས། །སློབ་དཔོན་གཉེན་པར་ཤེས་པར་བྱ། །ཞེས་པས་གཉེན་པ་དང་གསུམ་ཡིན་ཁ་ཅིག་ཟེར་རོ། །རྒྱུའི་གཉེན་ནི་ལོ་ཀའི་བྱ་བ་སྤོང་དུ་བཅུག་ནས་བྱང་ཆུབ་ཀྱི་ལམ་དུ་འཛུད་པ་ཡིན་ཟེར། རྒྱང་ནས་བརྟགས་པ་ནི་རིགས་བཟང་ངན་དང་ཤེས་རབ་ཆེ་ཆུང་དང་དད་པ་ཆེ་ཆུང་དྲིས་ལ་དེ་བརྟགས་པའོ། །དྲུང་ནས་ལུས་ངག་གི་རིག་བྱེད་དང་ཚིག་གི་རྣམ་པ་ལ་བརྟགས། མི་ལྡོག་པ་ནི་ངེས་པ་སྟེ་དེ་ལ་གསུམ། དང་པོ་ནས་གསང་སྔགས་ཀྱི་དོན་ལ་མི་སྐྲག་ཅིང་རིམ་གྱིས་རིགས་ངེས་པའོ། །དཀྱིལ་འཁོར་དུ་ཞུགས་སྟེ་དབང་དམ་ཚིག་གི་ཕོག་པ་ནི་དགེ་བསྙེན་དང་ཉན་ཆགས་ཀྱི་རིགས་ངེས་པའོ། །ལྟ་བ་རྟོགས་པ་ནི་དོན་མཐོང་བས་རིགས་ངེས་པ་སྟེ་གསུམ་ལས་བར་པའོ། །མདོར་བསྟན་གྱི་དོན་ནི་བརྗོད་བྱའི་དོན་གྱི་རྣམ་གྲངས་བཅུ་གཉིས་ཏེ། རྗོད་བྱེད་ཚིག་གི་གཞུང་ཚད་ལེའུ་དགུ། དེ་དག་བསྡུས་ནས་གཞི་ལམ་འབྲས་བུ་གསུམ། ལམ་མཚན་ཉིད་གསུམ་དང་ལམ་ལྔར་སྦྱར། དེ་དག་གི་ཚིག་དོན་ནི་འདི་ལྟ་སྟེ། མ་བཅོས་མ་བསླད་པ་རང་བཞིན་རང་བྱུང་གི་ཡེ་ཤེས་ལམ་དང་འབྲས་བུ་ཐམས་ཅད་ཀྱི་དངོས་གཞི། རང་ལ་ཡེ་ནས་གནས་པས་གཞིའོ། །དེའི་དོན་ཤེས་རབ་ཀྱི་སྤྱན་གྱིས་ཕྱིན་ཅི་མ་ལོག་པར་ལྟ་བའི་མཐོང་བའི་ལྟ་བ་ནི་རྒྱུ་ཤེས་པའི་མཚན་ཉིད་དོ། །བསྒོམ་བྱའི་དོན་དེས་བསྒོམ་བྱེད་ཀྱི་བློ་འཇུག་པའི་ཏིང་ངེ་འཛིན་གཉིས་ལས། ཅིག་ཅར་འཇུག་པ་ནི་བདེན་པ་གཅིག་ཆོད་དུ་གོམས་པར་བྱེད་པའོ། །རིམ་གྱིས་འཇུག་པ་ནི་དེ་བཞིན་ཉིད་ཀྱི་ཏིང་ངེ་འཛིན་སྟོངས་པ་ཆེན་པོའི་རྣལ་འབྱོར་ལ་སོགས་པ་བཞི་སྟེ། ཚོགས་ལམ་ཟག་མེད་ཀྱིས་མཐོང་ལམ་ལ་སྦྱོར་ལ་ལམ་གཞན་གྱི་བར་ཆད་མེད་པ་སྟེ། སྦྱོར་བའི་ལམ་མོ། །དེ་ལྷ་ནི་རྐྱེན་འཇུག་པའི་མཚན་ཉིད་ཡིན་ནོ། །འབྲས་བུ་མཐར་ཕྱིན་པའི་མཚན་ཉིད་ལ་གསུམ་སྟེ། མཐོང་ལམ་བློ་ཆུང་བ་རྣམ་པར་སྨིན་པའི་རིག་འཛིན་ཏེ། ཡིད་ལྷའི་སྐུར་སྨིན་ཀྱང་ལས་ཀྱི་རྣམ་པར་སྨིན་པའི་ལུས་ཀྱིས་བསྒྲིབས་པའོ། །བློ་ཆེ་བ་ནི་རྡོ་རྗེའི་ལུས་ཐོབ་པས་སྐྱེ་ཤི་མེད་པ་ཚེ་ལ་དབང་བའི་རིག་འཛིན་ནོ། །བསྒོམ་ལམ་ནི་ཕྱག་རྒྱ་ཆེན་པོའི་རིག་འཛིན་ཏེ། འབྱུང་བ་དང་རྡོ་རྗེའི་ལུས་གཉིས་ལས་གྲོལ་བའི་ཡེ་ཤེས་སྒྱུ་མའི་སྐུ་ཕྱག་རྒྱ་ཆེན་པོ་ལོངས་སྐུའི་ཆ་བྱད་ཅན་ནོ། །མཐར་ལམ་ནི་ལྷུན་གྱིས་གྲུབ་པའི་རིག་འཛིན་ཏེ། སྐུ་ལྔ་ལྷུན་གྱིས་གྲུབ་པའི་ཆ་བྱད་དུ་ཡོད་དེ། མཉམ་བཞག་ཏུ་སངས་རྒྱས་དང་ཁྱད་མེད་པའོ། །དེ་ལྔ་པོ་ནི་ལམ་ཡིན་ནོ། །དཔེ་གཞི་ཇི་ལྟ་བ་བཞིན་མངོན་དུ་བྱས་པ་ནི་མཐར་ཐུག་འབྲས་བུ་ཏེ། དེ་རྣམས་གོ་རིམས་བློ་དམན་གྱིས་ཀྱང་གོ་བར་སླ་བར་ལེའུ་དགུ་པས་བརྗོད་པར་བྱ་ཞེས་སོ། །དང་པོའི་དོན་ནི་གསུམ་དུ་བསྡུས། །འཁྲུལ་གཞི་ཚུལ་དང་རང་བཞིན་ནོ། །དང་པོའི་དོན་ནི། གནས་ལུགས་ཆོས་ཉིད་དབྱེར་མེད་ལ། །ལོག་རྟོག་བློ་ཡིས་ཐ་དད་སྣང་། །སྣང་རུང་སྤངས་པའི་རྣམ་དག་དང་། །རང་རྒྱུད་ཡོད་པའི་ལྷུན་གྲུབ་དང་། །དགག་པ་གཞན་ལས་ཤེས་པར་བྱའོ། །རང་གི་འཆད་པ་འདི་ལྟ་སྟེ། །ཆོས་ཉིད་བདེན་པ་དབྱེར་མེད་པ། །ཆོས་ཅན་འཁོར་འདས་སྣང་བ་ཀུན། །རང་རྒྱུད་ངང་གིས་བྲལ་བ་ལས། །སྣང་རུང་ཅིར་ཡང་འཆར་བ་ནི། །མ་སྤང་བྲལ་བར་འདི་ཉིད་དང་། །སྤྱན་འགྲེལ་ཐུགས་ཀྱི་སྒོ་ལྕགས་དང་། །ཡེ་ཤེས་སྣང་བ་རྒྱན་ལས་གསལ། །འཁོར་འདས་རང་རྒྱུད་མ་གྲུབ་སྟེ། །གྲུབ་ན་ཉེས་ཉེས་སྐྱོན་པོར་འགྱུར། །འོན་ཀྱང་སྣང་རུང་མ་སྤངས་པ། །མ་རྟོགས་བློ་ལ་འཁྲུལ་པར་སྣང་། །སྣང་ཡང་གཤིས་ལ་འགྱུར་བ་མེད། །དེ་ཉིད་གཉིས་པའི་དོན་ཡིན་ནོ། །གསུམ་པ་རང་གི་རིགས་པ་ལས། །ལམ་དང་འབྲས་བུ་གཞན་ན་མེད། །རྣམ་གསུམ་ཚུལ་གྱིས་རང་ལ་གནས། །ལེའུ་དང་པོའི་ངག་དོན་ཡིན། །དང་པོ་འཁོར་བ་མ་གྲུབ་པ་བསྟན་པ་ནི། །ཕྱོགས་བཅུ་དུས་བཞིའི་རང་བཞིན་འདི་ཉིད་ཆོས་ཅན། ཡེ་ནས་ལྷ་ཞི་ལྔའི་ངོ་བོ་ཡིན་ཏེ། དམ་བཅའ། འཁོར་བ་གཤིས་ལ་མ་གྲུབ་པའི་ཕྱིར་རོ། །དེ་ཅིས་ན་འཁོར་བའི་ཆོས་ཐམས་ཅད་བསྡུ་ན་གཉིས་ཏེ། རྒྱུ་བདག་ཏུ་འཛིན་པ་དང་འབྲས་བུ་སྡུག་བསྔལ་གཉིས་སུ་འདུས་པ་ལས། འཁོར་བའི་རྒྱུ་བདག་མེད་པའི་ཕྱིར་རོ། །བདག་དང་འཁོར་བ་ཡོད་ན་ཅི་འགལ་སྙམ་ན། འོ་ན་མེ་མེད་ན་དུ་བ་ཡོད་ན་ཅི་སྟེ་ཞེས་མཚུངས་སོ། །བདག་མེད་པ་རང་ཅི་ཞེ་ན། སྤྱིར་འཁོར་བའི་ཆོས་ཐམས་ཅད་སེམས་ཡིན་པའི་ཕྱིར་ན་ཡུལ་བདག་གི་བ་མེད་ལ། སེམས་དེ་ཉིད་ཅི་ཡང་མ་ཡིན་པའི་སེམས་བདག་མེད་པའི་ཕྱིར་རམ་སེམས་རང་བཞིན་དོན་དམ་སྤྲོས་བྲལ་ལ་ཡང་བདག་མ་གྲུབ་ལ། ཀུན་རྫོབ་རིག་པ་སྒྱུ་མ་ཡང་བདག་མ་གྲུབ་པའི་ཕྱིར་རོ། །རྟགས་ཀྱིས་གྲུབ་པའི་དོན་དེའི་ཕྱིར་ན་དེ་བཞིན་གཤེགས་པ་བསམ་ཡས་ཏེ། ཆོས་ཅན་དུ་མ་ཡོད་པས་ཆོས་ཉིད་སྐུ་དང་ཡེ་ཤེས་དེ་བཞིན་གཤེགས་པའི་སྐུ་དང་ཡེ་ཤེས་གྲངས་བསམ་ཡས་ལ། དེ་ཉིད་བློ་ཡུལ་དུ་བྱས་པ་དང་བྲལ་བ་ངོ་བོ་བསམ་ཡས་སོ། །དེ་ལྟར་འཁོར་བ་མ་གྲུབ་ན་འདས་པ་རང་རྒྱུད་པ་གྲུབ་བམ་སྙམ་ན། རྒྱུ་མི་དམིགས་པའི་དེ་དུས་མ་གྲུབ་པ་བསྟན་ཏེ། མྱ་ངན་མེད་པའི་འདས་པ་མི་སྲིད་པ་བཞིན་ནོ། །དེ་ལྟར་ཡང་། བཅིངས་མེད་རྣམ་པར་གྲོལ་མེད་པའི་ཞེས་པ་དང་། འཁོར་བ་ཀ་དག་རིན་ཆེན་གླིང་། །མྱ་ངན་འདས་བཟླས་བརྗོད་མེད་པ། །ཞེས་སོ། །ཆོས་ཉིད་བདེན་པ་དབྱེར་མེད་ཀྱི་ངོ་བོ་ལ་འཁོར་བ་དང་འདས་པའི་རང་བཞིན་སྤྲོས་བྲལ་ལ་དོན་དམ་གཉིས་ཐ་དད་པར་འདོད་པའི་སྐྱོན་དང་འཁོར་འདས་ཀྱི་ངོ་བོ་ལོག་རྟོག་སྒྱུ་མ་དང་ཡེ་ཤེས་སྒྱུ་མ་གཉིས་ཐ་དད་པར་འདོད་པའི་སྐྱོན་གཉིས་ཟློས་སྐྱོན་མེད་དོ། །འཆིང་བུ་དགོས་པ་མི་འབྱུང་བ་དང་ཡིད་བཞིན་གྱི་རིན་པོ་ཆེ་ལ་དགོས་པ་འབྱུང་བ་བཞིན་འདོད་ན་མི་རིགས་ཏེ་ཐ་དད་མེད་པ་ཡིན་ཞེས་མི་མཐུན་པའི་དཔེ་ཡིན་ཞེས་ཀྱང་ཟེར་རོ། །བདེ་སྡུག་གདུང་བས་ཉམས་ཐག་བྲལ། ཞེས་པ་བདེ་བ་འཁོར་བའི་ཉེས་དམིགས་སུ་འགལ་སྙམ་ན། མི་འགལ་ཏེ་འཁོར་བའི་བདེ་བ་ཡང་འཕགས་པ་རྣམས་ཀྱིས་སྡུག་བསྔལ་དུ་གཟིགས་པ་སྟེ་འགྱུར་བའི་སྡུག་བསྔལ་ཡིན་པའི་ཕྱིར་རོ། །དཔེར་ན་བླ་མའི་རྙེད་པ་བཞིན་ནོ། །རྩོམ་མེད་ཅེས་པ་ཁམས་གསུམ་སྤྱི་བཙན་དུ་འཁོར་བ་ལ་ཐོག་མཐའ་མེད་སེམས་ཅན་གྲངས་ལས་འདས་པའི་ཕྱིར་རོ། །འོན་ཀྱང་གང་ཟག་སྒོས་བཙན་དུ་ཐ་མ་ཡོད་པ་སྟེ་ཐུབ་པ་ཆེན་པོ་ལྟ་བུའོ། །འཁྲུལ་ཚུལ་གྱི་དོན་འདི་དག་ཞིབ་པར་རྒྱུད་ཀྱི་ཁོག་དོན་ལྟར་ཤེས་པར་བྱའོ། །རྣམ་གསུམ་གནས་ཚུལ་ནི། རིག་པ་སྤྲོས་བྲལ་ལ་འཕགས་པའི་ཀོར་བདུན་སྣང་རུང་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་པར་ནི་དོན་དམ་གནས་ཚུལ་ལོ། །རིག་པ་ཡེ་ཤེས་སྒྱུ་མ་ལ་ལྟ་བུ་ལ་ལམ་དང་འབྲས་བུ་ཐམས་ཅད་ཀྱི་དངོས་གཞི་ནི་ཀུན་རྫོབ་ཀྱི་གནས་ཚུལ་ལོ། །དེ་གཉིས་གདོད་མ་ནས་ངོ་བོ་དབྱེར་མེད་པ་ནི་གཉིས་མེད་ཀྱི་གནས་ཚུལ་ལོ། །དང་པོ་ཀུན་རྫོབ་གནས་ཚུལ་གྱི་ཁོག་དོན་ནི་དྲུག་སྟེ། ངོ་བོ་རིག་པ་རང་གསལ་ཏེ། རྣམ་པ་སྒྱུ་མ་ལྟ་བུའོ། །ངེས་ཚིག་ཆོས་ཀུན་སྒྱུ་མས་སྟོང་། །དབྱེ་ན་ཡང་དག་ལོག་པའམ། །ཡང་ན་སྒྱུ་མའི་དངོས་པོ་དྲུག །སྒྲུབ་བྱེད་གཉིས་ཏེ་དང་པོ་ནི། །སེམས་ལས་མ་གཏོགས་ཆོས་མེད་ཕྱིར། །ཐམས་ཅད་ཡེ་ཤེས་རང་གསལ་བའོ། །གཉིས་པ་སྣང་བཞིན་རང་རྒྱུད་པ། །མེད་པས་སྒྱུ་མ་ལྟ་བུའོ། །མཚན་བྱེད་དཔེ་གསུམ་རྒྱུད་ལས་གསལ། །ཞིབ་ཏུ་གཏན་ལས་ཤེས་པར་བྱ། །དཔའ་བོ་འབྲུ་ལྔས་མཚོན་ནས་སེམས་རྣམ་པར་ཤེས་པ་ཚོགས་བརྒྱད་ཡེ་ཤེས་ལྔར་གནས་པ་སྟེ། མཚོན་བྱ་དོན་གྱི་བསྟན་པའོ། །མཚོན་བྱེད་དོན་གྱི་བསྟན་པ་ནི་ཡི་གེ་སྟེ། ཀླད་པ་བདེ་ཆེན་གྱི་རྩ་འདབས་སོ་གཉིས་ལ་སྒྲ་ཡིག་སོ་གཉིས། མགྲིན་པ་ན་དབྱངས་ཡིག་བཅུ་དྲུག །སྙིང་ག་ན་མ་ནིང་གི་ཡི་གེ་བརྒྱད། ལྟེ་བ་ན་སྒྲ་གཉིས་ན་ཡིག་སོ་གཉིས་དང་དབྱངས་ཡིག་བཅུ་དྲུག་གཡས་བསྐོར་དང་གཡོན་དུ་གནས། ཨེ་བམ་མ་ཡ་ནི་ཡུམ་གྱི་མཁའ་གཅིག་པུ་ལ་སྦྱར་ཡང་ན་གླེང་བཞི་སྟེ། ཨེ་ནི་གནས་ཕུན་སུམ་ཚོགས་པ་སྟེ་ཡུམ་གྱི་མཁའ་ཆོས་འབྱུང་གྲུ་གསུམ་མོ། །བྃ་ནི་སྟོན་པ་གསང་བའི་རྡོ་རྗེའི་རྩེར་ཐིག་ལེ་བྃ་གྱི་དབྱིབས་སུ་ཡོད་པ། དེས་བདེ་བ་གསལ་བྱེད་དོ། །མ་ནི་འཁོར་ཏེ་མ་མ་ནུ་ན་ཡིད་ཀྱི་རྣམ་པར་ཤེས་པ་ལོགས་རྟོགས་ཚོགས་ཐམས་ཅད་དོ། །ཡ་ནི་བསྟན་པ་ཕུན་སུམ་ཚོགས་པ་སྟེ་ལྷན་ཅིག་སྐྱེས་པ་བདེ་བ་དོན་དམ་བྱང་ཆུབ་ཀྱི་སེམས་དེ་ཉིད་དོ། །དེ་ཡང་ཐལ་བ་ལས་འདི་ཞེས་ཉེ་བར་མཚོན་པ་ནི་ཞེས་པ་སོགས་དྲངས་ཏེ་ཞིབ་ཏུ་རྒྱུད་ལས། ཤེས་པར་བྱའོ། །སྙིང་པོ་རླུང་སྒྲོམ་སྙིང་ཁ་ཆོས་ཀྱི་འཁོར་ལོ་སྟེ་གནས་ཕུན་སུམ་ཚོགས་པའོ། །གནས་དངོས་སུ་སྨོས་པས་གཞན་ཤུགས་ལས་སྦྱར་ཏེ་བསྟན་པ་ནི་སྲོག་མི་ཤིག་པའི་ཐིག་ལེ་བྃ་གྱི་དབྱིབས་ཅན་ནོ། །འཁོར་ནི་རྩ་བཞིན་གནས་པའི་རྣམ་ཤེས་བཞིའོ། །བསྟན་པ་ནི་དོན་དམ་འོད་གསལ་གྱི་ཡེ་ཤེས་སོ། །དེ་ཡང་རྒྱལ་མཚོ་ལས་དྷརྨ་ཙཀྲ་ཆོས་ཀྱི་དབྱིངས། ཅེས་པ་ལ་སོགས་ཞིབ་ཏུ་རང་རྒྱུད་ལས་ཤེས་པར་བྱའོ། །ལས་གཉིས་དངོས་པོ་ཞེས་པ་ལས་ནི་བསྒོམ་ན་དེ་ལྟར་སྣང་བ་སྟེ་བྱ་བ་བྱེད་པའི་རིགས་པའོ། །དངོས་ཞེས་པ་མེའི་ཚ་བ་ལྟར་རང་བཞིན་གྱིས་དེ་ལྟར་གནས་པ་ནི་སྟེ། ཆོས་ཉིད་ཀྱི་རིགས་པས་གྲུབ་པའོ། །སྣོད་ཀྱི་འོད་དབྱིབས་ཕྲིན་ལས་བཞི། ཞེས་པ། སྣོད་ནི་རྩ་བ་བཞི་སྟེ་ཆོས་ཉིད་ཡོན་ཏན་ཡེ་ཤེས་རང་རྒྱུད་དོ། །འོད་ནི་དཀར་སེར་དམར་ནག་གོ །དབྱིབས་ནི་ཟླུམ་པོ་ཟླ་གམ་གྲུ་བཞི་གྲུ་གསུམ་མོ། །དེ་ཉིད་ཕྲིན་ལས་བཞི་སྟེ་ཞི་རྒྱས་དབང་དྲག་ནི་རིམ་པ་ལྟར་སྦྱར་རོ། །གནས་བཞི་ནི་སྙིང་ལྐོག་མགྲིན་ལྟེ་བ་འགྲོ་མེད་པའོ། །འབྱུང་བ་ནི་ཆུ་མེ་ས་རླུང་བཞིའི་རི་ཡིན་ཞིང་། དབྱིབས་ལ་བཞིར་ཡོད་པས་ལས་ཞི་རྒྱས་དབང་དྲག་ནི་རིམ་པ་ལྟར་སྦྱར་རོ། །གསང་བའི་མཁའ་ལ་ལས་བཞིར་ལྡན་པ་ནི། ཁྱམས་གྲུ་གསུམ་དྲག་པོའི་ལས། སྒོ་གྲུ་བཞི་རྒྱས་པའི་ལས། སྐྱེ་གནས་ཟླ་གམ་དབང་། སྣ་ཚོགས་མདུད་པ་ཟླུམ་པོ་ཞི་བའི་ལས་བཞིར་རང་ཆས་སུ་ལྡན་པའོ། །ཐིག་ལེ་བསྙེན་བསྒྲུབ་ནི་ཆོས་ཉིད་རྩ་བའི་ཐིག་ལེ་དེ་ཏིང་གི་ངོ་བོ་སྟེ་བསྙེན་པའོ། །ཡེ་ཤེས་ཀུན་ཏིང་ཉེ་བསྙེན། །ཡོན་ཏན་རྒྱ་ཅིག་བསྒྲུབ་པ། །རང་རྒྱུད་འབྲས་བུ་བསྒྲུབ་ཆེན་ནོ། །གནས་པ་རྩ་དང་དེ་ལ་བརྟེན་པའི་ཐིག་ལེ་ལ་དབང་གནས་ཚུལ་ནི་གསུམ། དང་པོ་ཕན་པའི་དབང་བཅུ་གནས་པ་འདི་ལྟ་སྟེ། ཚོགས་བརྒྱད་རང་བཞིན་ཡེ་ཤེས་དབུ་རྒྱན་ལྔ། །གཡས་གཡོན་ཅོད་པཎ་རོ་མ་རྐྱང་མ་གནས། །ཀུན་རྟར་ནང་ན་ཐིག་ལེའི་ཕྲེང་། །ས་ཡ་བཅུ་གསུམ་གོ་ཆ་རྩ་ལུས་ཁྱབ། །གསང་བའི་དབང་པོ་རྟོགས་ཚོགས་ནི། །རྒྱས་བསྡུས་ལྷ་མི་དལ་དུ་གནས། །སྤྱི་བོ་བདེ་ཆེན་གདུགས་ཀྱི་ཚུལ། །ལུས་ཉིད་བུམ་པར་ཆོས་མཐུན་པས། །འདོད་ཡོན་མ་སྤངས་སེམས་སུ་སྤྱོད། །ཁམས་ལྔའི་བཅུད་ལྔ་ཡེ་ཤེས་ལྔ། །གཉིས་པ་ནུས་དབང་གནས་པ་ནི། །རྣ་བའི་འདོམ་རྩ་ཐིག་ལེའི་སྒྲ། །ཉན་པར་ནུས་པ་ཉན་དབང་ངོ་། །ལྕེ་ཡི་ཐིག་ལེས་བརྗོད་བྱའི་དོན། །གསལ་བྱེད་ནུས་པ་འཆད་པའི་དབང་། །སྙིང་ལ་མི་ཤིགས་ཐིག་ལེ་ནི། །དྲན་པའི་རྟེན་ཏེ་བསྒོམས་པའི་དབང་། །ལག་པའི་ཐིག་ལེ་བྱ་བྱེད་དག །ནུས་པ་ཕྲིན་ལས་དབང་ཡིན་ཏེ། ཡན་ལག་ལྔ་པོ་རང་བཞིན་གྱི། །བྱ་བྱེད་ནུས་པ་རྡོ་རྗེ་རྒྱལ། །གསུམ་པ་ཟབ་མོའི་དབང་གསུམ་ནི། །དོན་དམ་མ་སྐྱེས་གསང་བའི་དབང་། །ཡེ་ཤེས་རང་རྒྱལ་ཀུན་རྫོབ་ནི། །ཤེས་རབ་ཡེ་ཤེས་དབང་ཡིན་ཏེ། །ཟུང་འཇུག་བདེ་བ་བདེ་ཆེན་དབང་། །མཚུངས་ལྡན་རང་ལ་མི་གནས་ན། །བསྐུར་བས་ཐོབ་པར་མི་འགྱུར་ཏེ། །དེ་ཕྱིར་རང་ལ་གནས་པའོ། །གསང་བའི་འདོད་ཡོན་ནི། །ཉི་ཟླ་མཛེས་པའི་གཟུགས་ཀྱི་ལྷ། །ཧ་སི་གྲགས་པ་སྒྲ་ཡི་ལྷ། །བདེ་བས་ཚིམ་པ་དྲི་ཡི་ལྷ། །བདེ་བ་མྱོང་བ་རོ་ཡི་ལྷ། །ཁམས་གསུམ་འདུས་པ་རེག་པའི་ལྷ། ནང་གི་འདོད་ཡོན་ནི། རྩ་ནང་ནས་གཟུགས་འབབ་པ་ལ་སོགས་པའོ། །རྟོག་པའི་འབྲས་བུ་ཀུན་སྐུ་དང་ཡེ་ཤེས་སུ་རང་ལ་གནས་པའོ། །ཐབས་གང་གི་སྒོ་ནས་ཞེ་ན། ཆགས་པ་སྟེ་འོག་སྒོ་ཁམས་གསུམ་རོལ་པའི་བདེ་གསལ་མི་རྟོག་པའི་ཡེ་ཤེས་ཀྱིས་རྟོགས་པའི་མཚན་མ་ཟིལ་གྱིས་མནན་ནས་ལྷར་སྣང་ལ། ནང་སྟེང་སྒོ་བཞིའི་འཁོར་ལོ་བཞིའི་འཇུ་འདུལ་གྱི་ལས་ཀྱིས་དོན་དམ་འོད་གསལ་གྱིས་རྟོག་པ་ཟིལ་གྱིས་མནན་པ་ནས་ལྷར་སྣང་བའོ། །དེ་རང་བཞིན་བསྒོམ་པའི་ལས་ཀྱི་སྣང་བས་བྱ་བ་བྱེད་པའོ། །ངོ་བོས་ཆོས་གདོད་ནས་རང་རྟོགས་པའི། རང་བཞིན་ལྷར་གནས་པ་སྟེ་ཆོས་ཉིད་ཀྱི་རིགས་པའོ། །དུ་མ་བསགས་པས་ཕུང་པོ། བྱེད་པ་མེད་ལས་རང་རང་གི་མཚན་ཉིད་འཛིན་པས་ཁམས། རྣམ་ཤེས་སྐྱེ་བའི་གོ་འབྱེད་པས་ན་སྐྱེ་མཆེད་དོ། །རྫོགས་ནི་དམ་ཚིག་ལས་ཆོས་ཕྱག་རྒྱ་ཆེན་པོའོ། །འདི་དག་དཔེ་དོན་གསུམ་རིམ་པར་སྦྱར་བའམ། ཡང་ན་དཔེ་གསུམ་ཆར་གྱི་དོན་ནི་རྟོགས་ཚོགས་ལྷར་སྣང་ཞིང་དེ་ཉིད་གདུལ་བྱའི་ངོ་བོ་ལ་ཅིར་ཡང་སྣང་བར་ཡང་སྦྱར་རོ། །གཉིས་པ་དོན་དམ་གནས་ཚུལ་ལ། །ཁོག་དོན་དྲུག་སྟེ་ངོ་བོ་ནི། །ཀོར་བདུན་སྣང་རུང་ངོ་བོའི་རྒྱུ། །མཚོན་ཚུལ་བསམ་བརྗོད་བྲལ་བ་སྟེ། །སྐྱེ་མེད་སྤྲོས་པ་ཀུན་དང་བྲལ། །རྣམ་བཀོད་ལས། ངེས་ཚིག་ཤེས་བྱའི་དོན་ཀུན་གྱི། །མཆོག་ཏུ་གྱུར་པས་དམ་པའོ། །ཡང་ན་ཤེས་རབ་དམ་པའི་ཡུལ་ཡིན་པས་ན་དམ་པའི་དོན། མི་བསླུ་ངེས་པས་སྒྲ་འཇུག་གོ །རྣམ་གྲངས་རྒྱས་པ་ཀོར་བདུན་ནོ། །དེ་ཉིད་བསྡུས་ན་རང་བཞིན་དང་། །ཡེ་ཤེས་འབྲས་བུ་དོན་དམ་མོ། །དང་པོ་ཆོས་ཉིད་སྤྲོས་བྲལ་ཏེ། །གཉིས་པ་དེ་རྟོགས་ཡེ་ཤེས་ལ། །ཡུལ་མིང་ཡུལ་ཅན་དག་ལ་བཏགས། །གསུམ་པ་འབྲས་བུ་སངས་རྒྱས་ཀྱི། །ཡོན་ཏན་ལྔ་སྟེ་དེ་རྟོགས་འབྲས། །བསྒྲུབ་བྱེད་གཉིས་སྟེ་དང་པོ་ནི། །སྣང་རུང་ངོ་བོ་ཉིད་ཀྱི་རྒྱུར། །བསྒྲུབ་བྱེད་ཀུན་ཁྱབ་གསུམ་པ་ཡང་། །ལུང་དང་མན་ངག་གཞན་ན་གསལ། །ཞགས་པ་ལས་རིག་པ་ཆོས་རྣམས་ཐམས་ཅད་ནི། །མཚན་ཉིད་མེད་ལས་བྱུང་བའི་ཕྱིར། །དོན་དམ་རྒྱུ་ལ་ཀུན་རྫོབ་འབྲས། །གཉིས་པ་སྐྱེ་མེད་བསྒྲུབ་བྱེད་ཀྱི། །རིགས་པ་བཞི་སྟེ་གཞན་ན་གསལ། །བར་པ་ཞེས་པ་ནི་བདེན་པ་གསུམ་གྱི་བརྗོད་བྱའི་དོན་ལ་གོ་རིམས་མེད་ཀྱང་། བརྗོད་བྱེད་ཚིག་གི་གོ་རིམ་དུ་ཀུན་རྫོབ་བསྟན་ནས་དོན་དམ་སྟོན་པས་སོ། །བསྒྲུབ་བྱའོ་དོན་གྱི་མཆོག་ཏུ་གྱུར་པ། སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ནི་འབྲས་བུ་དོན་དམ་སྟེ། དོན་དམ་རྟོགས་པའི་འབྲས་བུ་ཡིན་པའི་ཕྱིར་རོ། །ཆོས་ཀྱི་དབྱིངས་ཕྱིན་ཅི་མ་ལོག་པར་རྟོགས་པའི་ཡེ་ཤེས་ནི་དོན་དམ་སྟེ། དོན་དམ་ཤེས་བྱེད་ཡིན་པའི་ཕྱིར་རོ། །ཆོས་ཉིད་མུ་མཐའ་དང་བྲལ་བ་ནི་དབྱིངས་དོན་དམ་པ་སྟེ། རང་གི་ངོ་བོ་ཡིན་པས་སོ། །དེ་ཉིད་ལམ་གྱི་ངོ་བོ་ཞེས་པའི་སྐབས་སུ། སྤྱིར་རྟོག་པ་ལམ་དུ་འགྲོའི་མི་རྟོག་པ་འགྲོ་ཞེས་ན། ཉང་ཆེན་པོ་རྟོགས་པ་ལམ་དུ་འགྲོ་བ་ནི་མི་འཐད་དེ། ཐ་མ་ཐ་མ་དེ་ལ་གཉེན་པོ་མེད་པའི་ཕྱིར་རོ། །རྡོ་རྗེ་ལྟ་བུའི་ཏིང་ངེ་འཛིན་ཡོད་པ་ཞེ་ན། དེ་རྟོག་པ་ཡིན་ནམ་མ་ཡིན། དེ་རྟོག་པ་ཡིན་ན་དེ་སྤང་དུ་གཏུབ་བམ་ཞེ་ན། ཁྱེའུས་ཁྱེའུ་འབྱིན་པ་དང་འདྲ་ཟེར་ཏེ། རྟག་པ་ལ་མཐའ་ཐུག་པ་མེད་པས་ལམ་ཐུག་མེད་དུ་འགྱུར་བའི་ཕྱིར་མི་འཐད་དོ། །འོ་ན་ཇི་ལྟ་བུ་ཞེ་ན། གསང་སྔགས་ངེས་དོན་གྱི་དབང་དུ་བྱས་ནས་སོ་སོའི་དོན་རྟོགས་མེད་དེ་ལམ་དུ་འགྲོ་བའོ། །འོ་ན་དངོས་པོའི་དོན་དེ་སེམས་ཅན་ཀུན་ལ་ཡོད་པས་སེམས་ཅན་ཐམས་ཅད་འབད་མེད་དུ་གྲོལ་བར་འགྱུར་ཉི་མ་ན། དེ་ལ་བརྟག་པ་གཉིས་བྱ་སྟེ། རྟོག་མེད་དངོས་པོའི་དོན་རྒྱུད་ལྡན་དུ་ཡོད་པས་གྲོལ་བར་ཐལ་ཟེར་རོ། །མངོན་སྤྱོད་དུ་ཡོད་པས་གྲོལ་བར་ཐལ་ཟེར། དངོས་ལྟར་ན་ཁྱབ་པ་མ་གྲུབ་ལ། གཉིས་པ་ལྟར་ན་བདེན་པ་དོན་དུ་མ་གྲུབ་སྟེ། འདིར་དངོས་པོའི་དོན་རྟོགས་པ་དེ་ལམ་དུ་འགྲོ་བའོ། །དེ་ལ་ཁ་ཅིག་ན་རེ་རྟོགས་པ་དེ་དངོས་པོའི་དོན་མིན་ཏེ། དཔེར་ན་དཀར་པོ་མཐོང་བའི་ཤེས་པ་དེ་དཀར་པོ་མིན་པ་ལྟར་རོ་ཞེས་ན། དེ་ནི་མི་འདྲ་སྟེ། དངོས་པོ་ཆོས་ཉིད་རྟོགས་པའི་རྐྱེན་ལུང་མན་ངག་གིས་བྱས་པ་ལས་མ་ཟད་པ་ཡུལ་ཅན་ཐ་དད་པ་ཡིན་ཏེ། དངོས་པོ་དེ་ཉིད་ཀྱིས་དེ་ཉིད་རིགས་པའི་ཕྱིན་རང་རིག་པའི་ཡེ་ཤེས་ཞེས་བྱ་སྟེ། ནམ་མཁའ་ཆེ་ལས། རང་གི་མཐུ་ཡིས་རིག་པ་ལས། ཆོས་ནི་གཞན་ནས་བྱུང་བ་མེད། ཞེས་པ་དང་། འབྲེལ་བས་བདག་ཕྱིར་ཐབས་ཆེན་པོ། །མངོན་བྱེད་རང་ལས་འབྱུང་བར་ཟད། །ཅེས་པས། དངོས་པོ་དོན་རྟོགས་པ་ལམ་དུ་འགྲོ་བའོ། །རྟོག་པ་དེ་ཉིད་རྟོག་པ་ཡིན་ནོ་ཞེ་ན། །དྲང་དོན་སྤྱིའི་མཚན་ཉིད་ཡུལ་དུ་བྱེད་པས་ན་རྟོགས་པ་ཡིན་པ་སྲིད་ཀྱི། འདིར་དབང་པོ་རབ་ཀྱིས་རང་གི་མཚན་ཉིད་ཀྱིས་རྟོགས་པས་རྟོག་པ་མ་ཡིན་ནོ། །དེ་ལྟར་ན་དངོས་པོའི་དོན་སངས་རྒྱས་པས་དེ་ཉིད་ཡེ་ནས་གནས་པ་ནི་འབྲས་བུ་ཡིན་ལ། ཡིན་ཀྱང་ཡིན་པར་ངོ་མ་ཤེས་ཏེ་ཕྱིན་ཅི་ལོག་གི་ཞེན་པས་བསྒྲིབས་ཏེ། དེ་ཉིད་མ་ཤེས་པ་ཤེས་པར་བྱེད་ཅིང་ཕྱིན་ཅི་ལོག་གི་ཞེན་པ་སྤོངས་བ་ཉིད་ལ་འབྲས་བུ་ལ་ལམ་དུ་བྱེད་པ་ཞེས་བཏགས་པའོ། །དེ་ལ་ཁ་གཅིག་ན་རེ་འབྲས་བུ་ལ་ལམ་དུ་བྱེད་པ་སྨིན་པའམ་མ་སྨིན་པ་ལམ་དུ་བྱེད། དང་པོ་ལྟར་ན་ཐུགས་པ་མེད་པར་འགྱུར་ལ། གཉིས་པ་ལྟར་ན་འབྲས་བུ་ཉིད་མ་ཡིན་ནམ་ཞེ་ན། དངོས་པོའི་ལན་ནི་གོང་དུ་བས། དེས་ཀྱང་མི་ཉན་ན་ཁྱེད་རང་ལྟར་ན་བྱས་པའི་རྟགས་ཀྱིས་མི་རྟག་པར་བསྒྲུབ་པ་དེ། དངོས་པོ་ལ་མི་རྟག་པར་གནས་པ་ཅིག་རྟགས་ཀྱིས་མི་རྟག་པར་བསྒྲུབ་བམ། འོ་ན་དེ་རྟག་པར་གནས་ཀྱང་བྱས་པའི་རྟགས་ཀྱིས་མི་རྟག་པར་བསྒྲུབ་པ་དེ། དང་པོ་ལྟར་ན་ཐུག་པ་མེད་པར་འགྱུར་ལ། གཉིས་པ་ལྟར་ན་བསྒྲུབ་ཏུ་མི་བཏུབ་བོ་ཞེས་མཚུངས་སོ། །དེ་དངོས་པོ་ལ་མི་རྟག་པར་གནས་ཀྱང་ངོ་མ་ཤེས་ཤིང་ཕྱིན་ཅི་ལོག་གི་བློས་རྟག་པར་འཛིན་པའི་སྒྲོ་འདོགས་གཅོད་པའི་ཆེད་དུ་བྱས་པའི་མི་རྟག་པར་བསྒྲུབས་པའི་ཐུག་མེད་ཀྱི་སྐྱོན་དུ་མི་འགྱུར་རོ་སྙམ་ན། འདིར་ཡང་དངོས་པོ་ལ་འབྲས་བུ་ཡེ་ནས་སྨིན་ཟིན་ཡང་དེའི་དོན་མ་རྟོགས་ཤིང་བརྟགས་པའི་ཞེན་པ་སྤོང་བའི་ཆེད་དུ་ལམ་དུ་བྱེད་པས་ཐུག་མེད་དུ་མི་འགྱུར་རོ། །ཞེས་ཐམས་ཅད་ནས་འགོ་མཚུངས་སོ། །མིང་གྲངས་མེད་པའི་རྒྱུ་ཉིད་ཞེས་པའི་སྐབས་སུ། ཁ་ཅིག་ན་རེ་སྤྱིར་རྒྱུ་འབྲས་ལ་མང་སྟེ། མེ་དུད་ལྟ་བུ་བསྐྱེད་བྱ་བསྐྱེད་བྱེད་ཀྱི་རྒྱུ་འབྲས་དང་། བྱས་མི་རྟག་ལྟ་བུ་ཤེས་བྱེད་ཀྱི་རྒྱུ་འབྲས། སྒྲོན་མེ་དང་མུན་ཁུང་རྫས་ལྟ་བུ་གསལ་བྱ་གསལ་བྱེད་ཀྱི། རྒྱུ་འབྲས་དང་། མཚན་ཉིད་དང་མཚོན་བྱ་ལྟ་བུ་རྣམ་པར་བཞག་འཇོག་གི་རྒྱུ་འབྲས་དང་བཞི་པོ་ལྟ་བུ་མིན་གྱི། འདིར་ནི་དོན་དམ་སྤྲོས་བྲལ་ཉིད་སྣང་བའི་འབྱུང་རུང་དུ་གྲུབ་པས་ངོ་བོ་ཉིད་ཀྱི་རྒྱུ། དེ་ཉིད་ཀུན་རྫོབ་རིག་པ་སྒྱུ་མ་ཅིར་ཡང་འཆར་བའི་ཆ་ནས་འབྲས་བུ་སྟེ། རྒྱུ་འབྲས་ཀྱི་ངོ་བོ་ལ་ཐ་དད་མེད་པས། ངོ་བོ་ཉིད་ཀྱི་རྒྱུ་འབྲས་སོ་ཟེར་རོ། །གསུམ་པ་བདེན་པ་དབྱེར་མེད་ལ་ཁོག་དོན་ལྔ་སྟེ། ངོ་བོ་ནི། འཁོར་འདས་ཆོས་ཀུན་སེམས་ཉིད་དེ། །དེ་ཉིད་གསལ་ཡང་ངོ་བོ་སྟོང་། །ངེས་ཚིག་ཐ་དད་རིས་དང་བྲལ། །དམིགས་ཀྱིས་བཟུང་ན་རྣམ་གསུམ་ལས། །འདི་ནི་ངོ་བོ་དབྱེར་མེད་དེ། །གཅིག་ལ་གཉིས་མེད་དབྱེར་མེད་དང་། །ཤེས་ངོ་གཅིག་ལ་ལྟོས་པ་ཡིན། །གཞན་གྱི་གཞུང་ནི་འདིར་འཐད་མིན། །སྒྲུབ་བྱེད་ཀུན་ཁྱབ་གསུམ་པོར་སྦྱར། །དཔེ་ནི་མཁའ་དང་འཇའ་ཚོན་ལྟར། །སྣང་དང་སྟོང་པ་ཐ་དད་མིན། །ཚིག་དོན་རྒྱུས་ངན་གསལ་བར་སྣང་། ལེའུ་དང་པོའོ།། །།ཨཱི་ཐཱི། དེ་ལྟར་གཞི་ཡེ་ཤེས་རང་ལ་གནས་ཀྱང་རྟོགས་པའི་ཐབས་ལམ་དང་མི་ལྡན་ན་དབུལ་པོའི་གཏེར་དང་མཚུངས་པས། དེའི་ཕྱིར་དེ་རྟོགས་ནས་གོམས་པར་བྱེད་པའི་ཐབས་ལམ་བཤད་པར་བྱའོ། །སྤྱིར་ལམ་ཐམས་ཅད་བསྡུ་ན་གཉིས་ལས། ཐུན་མོང་གི་ལམ་ནི་སྦྱངས་པ་རིམ་གྱིས་པའི་སྐབས་ལས་ཤེས་པར་བྱའོ། །ཁྱད་པར་གྱི་ལམ་ལ་གཉིས་ལས། གྲོལ་ལམ་ལ་རྩ་རྒྱུད་ཀྱི་བཅུ་གཉིས་པ་ལྟར་མཚན་ཉིད་གསུམ་ལས། དང་པོ་རྒྱུ་ཤེས་པའི་མཚན་ཉིད་སྟོན་པའི་ཡེ་ཤེས་རང་ལ་གནས་ཀྱང་མཐོང་བའི་ལེའུ་གཉིས་པའི་ལྟ་བ་ཐོག་མར་གཅེས་པ་སྟེ། དེ་ཅེས་ནི་རྟོགས་པར་བསྒོམ་ཀྱང་ལྟུང་བའི་ཕྱིར་རོ། །དེའི་ཕྱིར། མ་རྟོགས་བསྒོམ་པ་ལོང་བ་འདྲ། །ཞེས་པ། མདོ་སྡེ་དག་ལས་རྐྱལ་མ་འབྱོངས་པར་ཆུ་རུ་འཇུག་པའི་དཔེ་བསྟན་པ་དང་། ཀུན་བཟང་རང་ཆེ་ལ་གནས་པ་ལས། བསྒོམ་པས་རྟོགས་པ་གཅེས་ཞེས་པ་ལ་སོགས་པ་བཤད་པའི་ཕྱིར་རོ། །དེའི་ཕྱིར་ཁ་ཅིག་ཐོག་མར་ཞི་གནས་ཀྱི་ཐོག་མར་སེམས་བཟུང་བ་ལས་ལྷག་མཐོང་སྐྱེ་བར་འདོད་པ་ནི། བློ་དམན་པའི་དབང་དུ་བྱས་པ་སྟེ། ཤེས་རབ་སྤྱན་འབྱེད་ལས། དམན་པ་ལས་རྒྱ་གསུམ་གོམས་པའི། ཞེས་པ་ལ་སོགས་གསུངས་སོ། །འདིར་ཐོག་མར་ལྷག་མཐོང་གི་རང་བཞིན་དམིགས་དང་འདྲ་བར་བཤད་ནས། དེ་བསྟན་པར་བྱེད་པ་རྐང་པ་དང་འདྲ་བ། དེའི་རྗེས་སུ་བཤད་པར་བྱ་སྟེ། ལྷག་མཐོང་ལ་ཞི་གནས་སྐྱེ་བར་འདོད་པའོ། །ལྷུན་གྲུབ་ངང་ཞེས་པ་སྤྱི་ངང་ལ་གཉིས་ལས། སྐྱེ་བ་མེད་པའི་ངང་ནི་སྤྲོས་པའི་མཐའ་བརྒྱད་དང་བྲལ་བ་སྟེ་དབུ་མ་དང་མཐུན། འདིར་ནི་རང་གི་སེམས་ཉིད་ཅི་ཡང་མ་ཡིན་པ་ལས་ལམ་དང་འབྲས་བུའི་ཐམས་ཅད་ལྷུན་གྱིས་གྲུབ་པས་ན། ལྷུན་གྱིས་གྲུབ་པའི་ལེའུ་སྟེ་དང་པོའོ། །དེ་ཡེ་ནས་གནས་པས་ན་ཕྱག་འཚལ་བའོ། །མཚན་ཉིད་ཀྱི་དང་པོ་རྒྱུ་ཤེས་པའི་མཚན་ཉིད་ལྟ་བ་ནི་ལམ་གྱི་ནང་ནས་མཆོག་སྟེ། ལམ་ཀུན་གྱི་གཟུངས་བྱེད་པ་དང་། བྱེ་བྲག་ཏུ་བསྒོམ་པའི་གཞི་ཡང་བྱེད་པའི་ཕྱིར། ཡང་ལམ་གྱི་དང་པོ་ལྟ་བ་ཡིན་པས་ན། དོན་བཅུ་པོ་འདི་དག་རྒྱུ་དང་ངོ་བོ་དགོས་པ་གསུམ་དུ་ཡང་འདུ་ཟེར་ཏེ། དུས་དང་སྣོད་ཆེ་ཆུང་དང་སྦྱར་རོ། །རྒྱུ་རྐྱེན་དང་ཐབས་ལ་ཁྱད་ཅི་ཡོད་ཅེ་ན། རྒྱུ་རྐྱེན་ནི་འཚོགས་པ་ཙམ་སྟེ། དཔེར་ན་མེ་རྡོ་མེ་ལྕགས་དང་བཙའ་མེ་ལྟ་བུའོ། །ཐབས་ནི་སྐྱེས་བུའི་རྩོལ་བ་དང་དེ་རྣམས་འཛོམ་པ་ལྟ་བུའོ། །ལོང་བའི་གྲོང་ཁྱེར་ནི་འདུ་ཤེས་མེད་པའི་ཁྲོད་དམ། ཡང་ན་མི་སྣང་བའི་སྣང་བ་ཕྱེད་སྣང་གི་གྲོང་ཁྱེར་གསུམ་ལས་མི་སྣང་བའི་གྲོང་ཁྱེར་གཟུགས་མེད་དུ་འགྲོའོ། །རིམ་ཅིག་ཆར་བཞི་ཆར་ལ་ཁ་གཅིག་ན་རེ། རྒྱུ་འབྲས་ཀྱི་ཐེག་པ་ལྟར་རང་བཞིན་གྱི། གྲོལ་ལམ་གྱི་བློ་ཆེ་ཆུང་གཉིས་པོ་ལྟ་བུ་ལམ་གྱི། སྒོམ་ལམ་ལྔའི་རེ་རེ་ལ་གཉིས་གཉིས་ཡོད་པ་ལྟ་བུ་ལ་གནས་སྐབས་ཀྱིས་དང་། ལྷུན་གྲུབ་སངས་རྒྱས་ལ་སྦྱོར་བའི་ཉེ་རིང་ལྟ་བུས་དུས་མཐའ་རིམས་དང་ཅིག་ཆར་འཇུག་པ་གཉིས་ཏེ་བཞི་ཡིན་ཟེར་ཏེ་རྒྱུད་ཀྱི་དོན་མ་ཡིན་ནོ། །འདིའི་དོན་ནི་སྔར་ཐུན་མོང་གི་ཐེག་པ་ལ་མ་སྦྱངས་པར་འདིར་རྒྱུ་འབྲས་ཀྱི་ཐེག་པ་ཆེན་པོ་ལ་འཇུག་པ་རང་བཞིན་གྱིས་སྣོད་དུ་གྱུར་པའོ། །སྔར་ཐུན་མོང་ལམ་སྟེགས་ཀྱི་ཐེག་པ་ལ་མ་སྦྱངས་ནས་འདིར་མ་ཧཱ་ལ་འཇུག་པ་ནི་སྦྱངས་པའི་སྣོད་དུ་འགྱུར་པའོ། །དེ་རེ་རེ་དུས་ཉེ་རིང་གིས་ཕྱེ་བས་རིམས་འཇུག་དང་ཅིག་ཆར་འཇུག་པ་གཉིས་གཉིས་ཏེ། སྦྱངས་པའི་སྣོད་གཉིས་ཆར་སྔར་ལམ་སྟེགས་ཀྱི་ཐེག་པ་ལ་སྦྱངས་པ་ནི་མཐུན་ལ། འདིར་ཡང་འདི་ཉིད་མ་རྒྱུད་ལ་འཇུག་པ་ནི་རིམ་འཇུག་གོ །དངོས་སུ་འཇུག་པ་ནི་གཅིག་ཆར་བའོ། །རང་བཞིན་གྱི་ཆར་ཡང་སྔར་ལམ་སྟེགས་ལ་མ་སྦྱངས་པ་ནི་མཐུན་ལ། འདིར་རྒྱུ་འབྲས་ཀྱི་ཐེག་པ་ཆེན་པོ་གང་ཡང་རུང་བ་ལ་མ་ངེས་པར་འཇུག་པ་ནི་རིམ་གྱིས་པའོ། །མ་ཧཱ་འདི་ཉིད་ལ་ཉེ་བར་འཇུག་པ་ནི་ཅིག་ཆར་པའོ། །རྐྱེན་བཞི་ལས་རྒྱུའི་རྐྱེན་གང་ཡིན་ཞེ་ན། ཁ་གཅིག་ནི། བདེ་གཤེགས་སྙིང་པོ་ཙམ་མཚུངས་ལྡན་གྱི་རྒྱུ་ཡིན། དེ་ཉིད་སེམས་སྐྱེ་བར་ནུས་པའི་དབང་པོ་རྣོན་པོ་དེ་རྒྱུའི་རྐྱེན་ཡིན་ཟེར་ཏེ་མི་འཐད་དོ། །འོ་ན་གང་ཡིན་ན་ལྷན་ཅིག་བྱེད་པའི་རྒྱུ་དེ་ཀ་རགས་པའི་ཆ་ནས་རྒྱུ་ཡི་རྐྱེན་དུ་འགྲོ་བའོ། །སེམས་སྐྱེ་ཚུལ་ནི་མཚུངས་ལྡན་གྱི་རྒྱུ་རང་ལ་ཡོད་པས་དེ་ལ། བདག་པོའི་རྐྱེན་རྒྱུ་ཡིས། རྒྱུའི་རྐྱེན་དབང་པོ་རྣོན་པ་དང་དམིགས་པའི་རྐྱེན་བསྟན་པ་གཉིས་བརྡ་སྤྲད་པས་སེམས་སྐྱེ་གསུང་ངོ་། །འདིར་རང་བཞིན་གྱི་དབང་པོ་རྣོན་པའི་དོན་གཏན་ལ་དབབ་ན་གསུམ་སྟེ། ཡོད་པ་སྒྲུབ་བྱེད་ཀྱི་ལུང་རིགས་དང་། གཞན་གྱི་རྩོད་པ་སྤང་བ་དང་། མེད་པར་འདོད་པ་ལ་སྐྱོན་བརྗོད་པའོ། །དེ་ལ་རང་བཞིན་གྱི་དབང་པོ་རྣོན་པོ་ཡོད་པར་ཅིས་གྲུབ་ཞེ་ན། ལུང་མན་ངག་རིགས་པ་གསུམ་གྱིས་གྲུབ་ཏེ། ལུང་ནི་ཀུན་བྱེད་ལས། ལྷ་དང་མིའི་སེམས་ཅན་དབང་པོ་མི་མཐུན་ཏེ། ལ་ལ་དབང་པོ་སྦྱངས་པའི་འཕྲོ་ཅན་ཡོད། །ལ་ལ་ཡེ་ནས་དབང་པོ་ཚིག་ཆོད་ཡོད། །ཅེས་སོ། །ཡང་རིན་ཆེན་འཁོར་ལོ་རྫོགས་པའི་རྒྱུད་ལས། རིགས་དྲུག་དབང་པོ་ཅིག་ཆོད་དམ། །ཡང་ན་སྦྱངས་པའི་འཕྲོ་ཅན་ཡོད། །ཅེས་པ་དང་། །ཡང་ཁ་ཅིག་ཐོག་མ་ནས་དེ་རིགས། ཁ་ཅིག་སྦྱངས་པ་ལས་གྱུར་པའོ། །ཅེས་སོ། །ཡང་དགོངས་འདུས་ལས། ཞིང་ཁམས་དེ་ན་སེམས་ཅན་ཆེན་པོ་དེ་དག་གི་སེམས་ཀྱི་རང་བཞིན་སྣ་ཚོགས་པའི་ཕྱིར་རོ། །ཞེས་པས་སོ། །མན་ངག་འདི་ཉིད་ལས། མ་སྦྱངས་གྲུབ་པ་གསུམ་ཕྱིར་གྱིས། །ཞེས་སོ། །རིགས་པ་ནི། སེམས་ཅན་འགའ་ཞིག་གི་ཤེས་རྒྱུད་ཆོས་ཅན། རང་བཞིན་གྱི་དབང་པོ་རྣོན་པོ་ཡོད་དེ། དམ་བཅའ། སེམས་ལ་བགས་ཆགས་མཐའ་ཡས་ཡོད་པའི་ཕྱིར་རོ། །མ་གྲུབ་ཞེ་ན། འོ་ན་བགས་ཆགས་ཕྱོགས་གཅིག་པ་ཡོད་ན་དགེ་མི་དགེའི་བགས་ཆགས་ཀྱིས་འབྲས་བུ་བདེ་འགྲོ་དང་ངན་འགྲོ་རྟེན་ལ་སོགས་པ་མེད་པར་འགྱུར་ཏེ། མི་རིགས་སོ། །བག་ཆགས་མཐའ་ཡས་ཡོད་ཀྱང་རང་བཞིན་གྱི་དབང་པོ་རྣོན་པོ་མེད་ན། ཅི་སྟོ་སྟེ། ཁྱབ་པ་མ་གྲུབ་དེ་བག་ཆགས་སྦྱངས་པའི་སྟོབས་ཀྱིས་འབྱུང་བའོ། །ཞེ་ན། དེ་ལ་སྐྱོན་གཉིས་ཏེ། ཀུན་གཞིའི་ངེས་ཚིག་མེད་པ་དང་། །འཁོར་བ་ཐོག་མཐའ་ཡོད་པས་ཐལ། །དེ་ཡང་བག་ཆགས་ཕྱིས་བསགས་པས་འབྱུང་གི་དེའི་གོང་དུ་མེད་ན་བག་ཆགས་མེད་པའི་ཀུན་གཞི་སྟོང་པ་དེ་ལ་ཀུན་གཞིའི་ངེས་ཚིག་མེད་ལ། དང་པོ་སྟོང་པ་ལ་ཕྱིས་བག་ཆགས་བཞག་ནས་ཡོད་པ་དེ་ཀས། འཁོར་བའི་ཐོག་མ་ཡིན་པས་སོ། །གཉིས་པ་གཞན་གྱི་གནོད་པ་སྤངས་པ་ནི། གཞན་དག་ན་རེ་སྦྱངས་པའི་རྐྱེན་ལ་མི་ལྟོས་པར་རང་བཞིན་གྱིས་དབང་པོ་རྣོན་པོ་ཡོད་ན། ལམ་གྱི་རྐྱེན་ལ་མ་ལྟོས་པའི་རྒྱུད་དག་པའི་སངས་རྒྱས་ཡོད་པར་ཐལ། གནས་ལུགས་བཟང་ངན་དུ་ཐལ། རྟག་པ་ཡང་ཡོད་པར་འདོད་ཀྱིས། ཁོག་ཞེ་ན་ཉེས་སྐྱོན་དང་པོ་མེད་དེ། གཞི་ལ་དབང་པོ་རྣོན་པོར་གནས་པ་དེ་གསལ་བར་བྱེད་པའི་རྐྱེན་ལ་ལྟོས་པར་འདོད་ལ། དེ་བཞིན་དུ་རྐྱེན་ལ་ལྟོས་པའི་རྒྱུད་དག་ཡོད་པ་སྟེ། རྐྱེན་ལ་མ་ལྟོས་ན་རྒྱུ་མཚན་མི་མཚུངས་སོ། །འོ་ན་རྐྱེན་ལ་ལྟོས་ན་རང་བཞིན་དུ་འགལ་སྙམ་ན། སྦྱངས་པ་ལྟ་བུ་བསྐྱེད་བྱ་བསྐྱེད་བྱེད་ཀྱི་རྐྱེན་ལ་རག་མ་ལས་པའི་རང་བཞིན་ནོ། །ཉེས་པ་གཉིས་པ་ཡང་མེད་རྣོ་བཏུལ་དུ་སྣང་བ་ནི་ལམ་པའི་བློ་སྣང་ཡིན་གྱི། དངོས་པོའི་དོན་ལ་རྣོ་བཏུལ་མ་གྲུབ་པས་སོ། །གསུམ་པ་ཡང་མེད། རྟག་པ་ནི་དོན་བྱེད་ནུས་པས་སྟོང་ལ། རང་བཞིན་གྱི་དབང་པོ་རྣོན་པོ་རྟག་པ་མ་ཡིན་པས་མི་མཚུངས་སོ། །གསུམ་པ་མེད་ན་སྐྱོན་དུ་འགྱུར་བའི་རིགས་པ་བསྒྲུབ་པ་ནི། རང་བཞིན་དབང་པོ་རྣོན་པོ་མེད་ན་གོང་གི་ཡོད་པར་བཤད་པ་དང་འགལ་ལ། དགོངས་འགྲེལ་ལས་ཀྱང་། སེམས་ཅན་རྣམས་ལ་རང་བཞིན་གྱི་དབང་པོ་རྣོ་བཏུལ་ཡོད་པ་མ་ཡིན་ནོ་ཞེས་པས་ཡོད་པར་མངོན་ནོ། །སྦྱངས་པ་ཁོ་ན་གཙོ་ན་ལོ་ཀ་ཕལ་པའི་སེམས་བརྒྱད་མི་སྐྱེ་བར་ཐལ་ཏེ། སྔར་མ་སྦྱངས་པས་སེམས་བརྒྱད་སྐྱེ་བར་མི་འཐད་པས་སོ། །སེམས་བརྒྱད་སྔ་མ་ལས་སྐྱེའོ་ཞེ་ན། ཐོག་མ་མེད་པར་འགྱུར་རོ། །སྦྱངས་པ་མཉམ་པོ་ལ་རྣོ་བཏུལ་འོང་བར་མི་རིགས་ལ། གསང་སྔགས་ཀྱི་ངོ་བོ་ཉིད་ལྷུན་གྱིས་གྲུབ་པ་ལས་ཅིར་ཡང་མི་འགགས་པར་སྣང་བ་དང་འགལ་ཞིང་། གསང་སྔགས་ལས་དང་དུས་ལས་རགས་མ་ལུས་པར་བསྟན་པ་དང་འགལ་ལོ། །འོ་ན་རང་བཞིན་དང་སྦྱངས་པ་གཉིས་གང་གཙོ་ཞེ་ན། གཅིག་གཙོ་ལ་གཅིག་མི་གཙོ་ན་སྐྱོན་བས་གཉིས་ཆར་གཙོའོ། །འོ་ན་བློ་དེ་གཉིས་རང་རྒྱུད་གཅིག་གི་དབང་དུ་བཞག་གམ་ཐ་དད་ཀྱི་དབང་དུ་བཞག །དོན་རྟོག་ཟིན་པའི་གྲུབ་མཐའ་འམ་རྟོགས་པར་ནུས་པའི་ཕྲད་གཉིས་གང་ཡིན་ཞེ་ན། རྒྱུད་གཅིག་ལ་བློ་རིགས་གཉིས་མི་སྲིད་པས་རྒྱུད་ཐ་དད་ཀྱི་དབང་དུ་བཞག །རྟོགས་ཟིན་ནས་བློ་ལ་དགོས་པ་མེད་པས་རྟོགས་པར་ནུས་པའི་ཕྲད་གཉིས་མ་ཞོག་ཟེར་རོ། །གྲུབ་པར་གསུམ་ནི། ཆོས་ཉིད་རང་གི་རང་བཞིན་ལྷུན་གྱིས་གྲུབ་པ་དང་། དངོས་པོ་གྲུབ་དང་། ཆོས་ཅན་རང་གི་མཚན་ཉིད་ཀྱིས་གྲུབ་པའོ། །དང་པོ་ནི། དོན་དམ་ཆོས་ཀྱི་དབྱིངས་སྤྲོས་བྲལ་ཉིད་ལ་ཅིར་ཡང་འཆར་རུང་དང་། ངོ་བོ་ཉིད་ཀྱི་རྒྱུར་གནས་པའོ། །གཉིས་པ་ནི་ཀུན་རྫོབ་རིག་པའི་ཡེ་ཤེས་ཉིད་ཅིར་ཡང་མི་འགགས་པར་འཆར་བའོ། །གསུམ་པ་ནི། ཕྱི་རོལ་ཡུལ་ལ་ས་བོན་གཤགས་ལྕུགས་དང་ལྕགས་ལ་ངར་ཆེ་ཆུང་ཡོད་པ་ལྟར་ནང་ཤེས་པའང་རྣོ་རྟུལ་རང་བཞིན་གྱིས་གྲུབ་པའོ། །བློའི་རང་བཞིན་བདུན་དང་ལྡན་པའི་གང་ཟག་གི་ཉེར་ལེན་གྱི་རྒྱུ་ཡིན་ལ། རྒྱུ་དང་བསྟན་པ་ནི་ལྷན་ཅིག་བྱེད་པའི་རྐྱེན་དེ། རྒྱུ་རྐྱེན་དེ་གཉིས་ཀ་ལ་ནུས་པ་ཆེ་ཆུང་ཡོད་པས། དེ་གཉིས་ནུས་པ་ཆུང་ན་མ་ངེས་པར་འཇུག་ལ། ཆེ་ན་འདི་ཉིད་དུ་འཇུག་འོ་ན་སྦྱངས་པ་ལ་འབྲེལ་བ་བཞི་མི་བརྩི་བ་རང་བཞིན་ལ་བཞི་བརྩི་བ་ནི་སྦྱངས་པ་ལ་སྦྱངས་པ་སྔོན་དུ་སོང་བའི་འབྲེལ་བ་བརྩི་མི་དགོས་ལ། རང་བཞིན་ལ་སྦྱངས་པ་སྔོན་དུ་སོང་བ་མེད་པས་འབྲེལ་བ་རྩིས་བའོ། །དམིགས་པའི་རྐྱེན་བསྟན་པ་ལ་གཉིས། །མཚོན་བྱ་དོན་གྱི་བསྟན་པ་དང་། །མཚོན་བྱེད་ཚིག་གི་བརྟན་པའོ། །འདིར་དང་པོའོ། །བདག་པོའི་རྐྱེན་ལ་གཉིས་སྟེ། །བརྡ་དོན་འགྲོལ་བའི་རྒྱུ་དང་། །ཡང་དག་དོན་གྱི་རྒྱུ་སྟེ། །རང་རིག་པའི་དགེ་བའི་བཤེས་གཉེན་ཏེ་བདེན་པ་རང་བྱུང་གི་དགོངས་སྟོན་པ་ཞེས་ཀྱང་བྱའོ། །སྣོད་ཤེས་བྱེད་ལ་ཁྱད་ཅི་ཡོད་ཞེ་ན། ཤེས་བྱེད་ནི་གོ་བར་བྱུང་བ་ཙམ་ཡིན་ལ་སྣོད་ནི་དེའི་སྟེང་དུ་རྟོགས་པ་འཛིན་ནུས་ནོགས་ཐུབ་པའོ། །རྒྱུ་རྐྱེན་ལ་གསུམ་དུ་ཡང་བྱེད་དེ་གཉིས་སུ་སྦྱར། གང་ཞེ་ན་སྦྱངས་པའི་སྣོད་དུ་གྱུར་པ་དང་། རང་བཞིན་གྱི་སྣོད་དུ་གྱུར་པའོ། །དེ་གཉིས་ཀ་ཉེར་ལེན་གྱི་རྒྱུ་མི་འདྲ་བ་ཙམ་ལས་ལྷན་ཅིག་བྱེད་པའི་རྐྱེན་ནི་གཉིས་ཆར་འདྲ་བས་གཅིག་ལས་མ་སྨྲོས་སོ། །དེ་ལྟར་ཚིག་ཤེས་ནི་རང་བཞིན་གྱི་སྣོད་དུ་འགྱུར་པ་ལ་བྱའོ། །རྟོགས་ཐབས་ཀྱི་དོན་གསུམ་པོ་འདི་ནི་ཁ་གཅིག་ན་རེ། དེ་དུས་གཏན་ལ་ཕབ་སྟེ་དོན་གྱི་དམིགས་བཟུང་བ་དང་། གོལ་སྒྲིབ་ཀྱི་གདར་ཤ་བཅད་དེ་དོན་གྱི་དམིགས་བཟུང་བ་དང་། རྣམ་གྲངས་རྣམ་པར་ཕྱེ་སྟེ་དོན་གྱི་དམིགས་བཟུང་བ་དང་། གསུམ་རིམ་པ་ལྟར་སྦྱར་རོ། །དེས་ན་འདི་གསུམ་ལ་ལྟ་བའི་དམིགས་བཟུང་རེ་རེ་ཡོད་ཀྱང་ལྟ་བས་ཕབ་མེད་དོ། །གཏན་ཚིགས་ཀྱིས་ཡོངས་སུ་བརྟག་པར་བྱའི་གཞལ་གཞི་ཆོས་ཅན་གང་ལ་བརྟག་སྟེ་རྟོགས་པར་བྱ་སྙམ་ན། འཁོར་འདས་ཀྱི་དངོས་པོ་གཉིས་ལ་གཞལ་ཏེ། ཨིན་ཏྲ་བོ་དྷི་སངས་རྒྱས་གསང་། །སྒེགས་རྡོར་དྲི་མེད་བཤེས་གཉེན་བཞི། །དགོངས་པ་མཐུན་པས་གཉིས་ལ་གཞལ། །དོན་འདི་ལ་གསུམ་ལས། དོགས་པ་དང་དེ་བསལ་བའོ། །དང་པོ་ནི། སྤྱིར་འཁོར་འདས་གཉིས་ལ་འཇལ་ན། སྤྱི་གང་ཡིན་པ་བྱེ་བྲག་གི་མཐར་ཐུག་པས་བྱེ་བྲག་འདས་པ་ལ་འཇལ་ལམ་འཁོར་བ་ལ་འཇལ། དང་པོ་ལྟར་ན་མྱ་ངན་ལས་འདས་པ་ལས་དང་པོ་བའི་སྤྱོད་ཡུལ་དུ་མ་གྱུར་བས་རྟག་པར་མི་རིགས་ཏེ། གལ་ཏེ་འཇལ་ན་འདས་པའི་སྣང་བ་རང་གི་མཚན་ཉིད་ལ་འཇལ་ལམ། ཞེན་པ་སྤྱིའི་མཚན་ཉིད་ལ་འཇལ། ཞེས་བརྟག །དང་པོ་ལྟར་ན་དོན་དེ་ལ་ལས་དང་པོ་པའི་བློའི་སྤྱོད་ཡུལ་དུ་མ་གྱུར་ཅིང་ལྐོག་ཏུ་གྱུར་པས་གཞལ་དུ་མི་བཏུབ་བོ། །གཉིས་པ་ལྟར་ན་རང་གི་སེམས་ལས་འདས་པར་འཛིན་པའི་ཞེན་བློ་ལ་འཇལ་ལོ་སྙམ་ན། ཞེན་པ་འཁོར་བའི་ཆོས་ཡིན་པས། དེ་བཙལ་བས་འདས་པ་འཇལ་བར་མི་འགྱུར་རོ། །དེ་ལྟར་ན་འདས་པ་གཞལ་བྱར་བཤད་པ་དང་འགལ་ཞིང་། འདས་པའི་དེ་ཁོ་ན་ཉིད་མི་ཤེས་པར་འགྱུར་རོ་ཞེ་ན། དེ་ནི་འཁོར་བ་ལ་བཙལ་བས་འཁོར་བ་མ་གྲུབ་པར་ཤེས་པའི་ཚེ་འདས་པ་ཡང་ཟླས་མ་གྲུབ་པར་ཤེས་པར་འགྱུར་བའི་ཕྱིར། དེའི་ཉེས་པ་མེད་དོ། །གཉིས་པ་འཁོར་བ་ལ་འཇལ་ན་ཡང་སྣང་བ་དང་བརྟགས་པ་གང་ལ་མཇལ་བརྟག །དང་པོ་ལྟར་ན་འཁོར་བའི་སྣང་བ་རང་གི་མཚན་ཉིད་ནི་རྒྱུའི་ཐེག་པ་ལྟར་ན་རྒྱུ་རྐྱེན་གཞན་ལས་བསྐྱེད་པའི་སྐད་ཅིག་མའི་རྒྱུན་འཕགས་པའི་སྤྱོད་ཡུལ་ཡིན་པས་ལས་དང་པོ་བའི་སྤྱོད་ཡུལ་མ་ཡིན་ཏེ་སྣང་ལ་མ་ངེས་པའོ། །སྔགས་ཀྱི་ཐེག་པ་ལྟར་ན། ངོ་བོ་རིག་པ་རང་སྣང་བ་ཡིན་པས་གཞལ་བྱར་མི་རིགས་ཏེ། གལ་ཏེ་འཇལ་ན་དེ་མཐོང་ནས་འཇལ་ལམ། མ་མཐོང་བ་མཇལ་བརྟག །མཐོང་ན་དེ་ཉིད་རྟོག་པའི་གྲུབ་མཐའ་ཡིན་པས་གཞལ་མི་དགོས་ལ། མ་མཐོང་ན་གཞལ་དུ་མི་གཏུབས་སྟེ། །སྤྱོད་ཡུལ་དུ་མ་གྱུར་པའི་ཕྱིར་རོ། །དེ་ལྟར་ཡང་། གཞན་དབང་ཡེ་ཤེས་སྣང་གཉིས་ལ། །མི་འགོག་ཡུལ་ལ་མི་དཔྱོད་ཕྱིར། །འདོད་གྱིན་རྟག་པར་མི་མཛད་དེ། །ཞེས་སོ། །གཉིས་པ་ཞེན་པ་སྤྱི་ཡི་མཚན་ཉིད་ལ་མཇལ་ན། བརྟགས་པའི་ཡུལ་ལ་འཇལ་ལམ། རྟོག་མཁན་གྱི་བློ་ལ་འཇལ་བརྟག །དང་པོ་ལྟར་ན་ཡུལ་སྒྲོ་བཏགས་འཇལ་བས་བློ་ཚད་མར་མི་འགྱུར་ཏེ་ཐོ་ལ་མིར་འཛིན་པ་ལྟར་རོ། །གཉིས་པ་ལྟར་རྟོག་མཁན་གྱི་ཤེས་པ་སྐད་ཅིག་མ་ཡིན་པས། འདས་པ་མ་འོངས་པ་ད་ལྟར་བ་གསུམ་གང་ལ་མཇལ་བརྟག །འདས་པ་འགག་སྟེ་ཞིག་ནས་མེད་པའི་ཕྱིར་དང་། མ་འོངས་པ་ད་རུང་མ་སྐྱེས་ན་མེད་པའི་ཕྱིར་དེ་གཉིས་ལ་བཞག་དུ་མི་གཏུབ་བོ། །ད་ལྟ་བ་ལ་འཇལ་ལོ་སྙམ་ན་ད་ལྟར་བ་རང་བཞིན་ཅིག་དུ་མི་གནས་ཏེ་མི་བརྟན་པས་ཡིན་སོ་སོར་རྟོག་པའི་ཤེས་རབ་གནས་འགྱུར་ཙམ་ན། ཞེན་པ་འགག་པས་ཡུལ་མེད་པའི་ཕྱིར་ཞེན་པ་ད་ལྟར་བ་མེད་པའི་དང་། ཡང་ཞེན་པ་ད་ལྟ་བ་དེ་ཉིད་གཞལ་བྱའི་གཏན་ཚིགས་མེད། ཆེད་དུ་བྱས་ན་གཞལ་དུ་མེད། །གཉིས་ཆར་དུས་ཅིག་ལ་ཡོད་དོ་སྙམ་ན་འགྲོ་ལ་ཤེས་རྒྱུད་གཉིས་འཆང་བའི་ཉེས་པ་ཡོད་དོ་སྙམ་པའི་དོགས་པའོ། །དོན་འདི་ཡང་ཁ་ཅིག་ན་རེ་ཞེན་པ་ད་ལྟ་བ་དེ་ཉིད་རང་ལ་མ་མཇལ་བར་འདོད་དེ། དེ་ལྟར་ན་སྔར་བརྗོད་པའི་ཉེས་པ་གཉིས་པོ་ཇི་ལྟར་སེལ་ཞེ་ན། ཡིད་སོ་སོར་རྟོག་པའི་ཤེས་རབ་གནས་འགྱུར་ཀྱང་ཞེན་པ་རྩ་བ་ནས་དག་པར་བྱེད་པའི་གཉེན་པོ་ལྟ་བ་རང་གི་མཚན་ཉིད་རྒྱུད་ལ་མ་སྐྱེས་པས་ཞེན་པ་མ་འགགས་པའི་ཕྱིར་ཞེན་ཡུལ་ཡོད་ལ། གཞི་དེ་ཉིད་དུ་སེམས་རྒྱུད་གཉིས་འཆང་བར་ཡང་མི་འགྱུར་ཏེ། གཞལ་བྱ་ཞེན་པའི་སྣང་བ་ཉམ་མྱོང་དུ་དངོས་སུ་གྲུབ་ལ། དེ་ཉིད་དུ་རང་རིག་ཚད་མ་གཞལ་བྱ་དེ་ཉིད་ཀྱི་རང་བཞིན་གོ་བར་ནུས་པ་རྒྱུད་ལ་བསྟན་དུ་ཡོད་པས། དེ་ཉིད་རྐྱེན་བླ་མའི་ལུང་མན་ངག་དང་འཕྲད་པའི་ཚེ་ཞེན་ལ་རང་གྲོལ་དུ་འགྱུར་ཏེ། །དཔེར་ན་བུམ་པའི་གཟུགས་གྲུབ་ན་ས་ཉིད་ན་འཇིག་པ་རྒྱུད་ལ་ལྡན་དུ་ཡོད་པས། །རྐྱེན་ཐོ་བ་དང་འཕྲད་པའི་ཚེ་གྱོ་མོག་ཏུ་འགྱུར་བ་ལྟར་རོ། །ཞེས་བཞེད་པ་ཡང་འཐད་པ་མ་ཡིན་ཏེ། གཞལ་བྱའི་བྱེ་བྲག་འཁོར་བ་སྤྱིའི་མཚན་ཉིད་ཀྱི་ཞེན་པ་ཁོ་ན་ལ་འཇལ་ན། སྤྱིར་འཁོར་འདས་གཉིས་ཀ་གཞལ་བྱར་བཤད་པ་དང་འགལ་བའི་ཕྱིར་རོ། །འོ་ན་ཇི་ལྟ་བུ་ཞེ་ན། འཁོར་འདས་ཀྱི་སྣང་བ་རང་གི་མཚན་ཉིད་ལ་མི་འཇལ་ཀྱང་འཁོར་འདས་ཀྱི་ཞེན་པའི་སྣང་བ་ལ་འཇལ་ལོ། །ཞེན་པའི་སྣང་བ་གང་ཡིན་ཞེ་ན། ཁ་གཅིག་ན་རེ་ཞེན་ཕྱི་རོལ་དུ་ཞེན་ཀྱང་ཀུན་གཞི་རང་སྣང་ཡིན་པ་ཞེན་པའི་སྣང་བ་སྟེ། ཞེན་པ་དང་སྣང་བ་རྐྱང་པ་ལ་མི་འཇལ་གྱི་ཞེན་སྣང་སྦྲག་མ་ལ་འཇལ་ལོ་ཞེས་ཀྱང་གསུང་ངོ་། །ཁོ་བོ་སྣ་ནམ་ནི་ཞེན་པའི་དོན་སྣང་བ་ལ་ཞེན་སྣང་དུ་འཐད་དོ། །དེ་ཡང་ཆོས་ཐམས་ཅད་སེམས་ལས་མ་གཏོགས་པའི་ཕྱི་རོལ་གྱི་དོན་མེད་ལ། སེམས་ཉིད་ཆོས་ཅན་ཐམས་ཅད་དུ་རང་སྣང་བ་ལ་འཁྲུལ་པའི་བློས་འཁོར་འདས་སེམས་ལས་ཐ་དད་པའི་ཕྱི་རོལ་གྱི་དོན་དུ་ཞེན་པ་བརྟགས་པའི་ཞེན་པའི་ངོ་ན་སྣང་བས་ཞེན་པའི་སྣང་བས་སྟེ་ཀུན་བརྟགས་སོ། །འོ་ན་ཡུལ་སྒྲོ་བཏགས་ལ་འཇལ་བས་དེ་འཇལ་བའི་བློ་དེ་ཚད་མ་ཡིན་ནམ་ཞེ་ན། གཟུང་ཡུལ་སྒྲོ་བཏགས་སྣང་བས་འཁྲུལ་བ་ལྟར་སྣང་ཡང་། འཇུག་ཡུལ་སྒྲོགས་འདོགས་གཅོད་པའི་ཆ་ནས་བློ་ཚད་མར་མི་འགལ་ལོ། །འོ་ན་ཆོས་ཅན་སྣང་བའི་ཞེན་པ་ལ་བརྟེན་ནས་ཆོས་ཉིད་ཀུན་གཞི་རང་སྣང་དུ་རྟོགས་སུ་བཏུབ་བམ་སྙམ་ན། བཏུབ་སྟེ་ཆོས་དང་ཆོས་ཅན་ངོ་བོ་དབྱེར་མེད་ཡིན་པའི་ཕྱིར་རོ། །དཔེར་ན་རྒྱལ་པོ་ཉིད་ངོ་བོ་མ་ཤེས་པ་ལ་ཁོལ་པོར་སྣང་བས་སྣང་ཚུལ་ཁོལ་པོ་ལ་བརྟེན་ནས་ཡིན་ཚུལ་རྒྱལ་པོ་རྟོགས་པ་ལྟ་བུའོ། །འོ་ན་ཆོས་ཅན་ཞེན་པའི་སྣང་བ་བསམ་གྱིས་མི་ཁྱབ་པའི་ཕྱིར་གཞལ་གྱིས་མི་ལང་བའི་ཉེས་པར་འགྱུར་སྙམ་ན། ཆོས་ཅན་ཞེན་པའི་སྣང་ཚུལ་ཐ་དད་ཀུན་ཀྱང་། ཆོས་ཉིད་རང་སྣང་ལ་རང་བཞིན་ཐ་དད་མེད་པ་ཞེན་པའི་སྣང་བའི་སྐད་ཅིག་མ་གཅིག་གི་ཆོས་ཉིད་ལ་ཞེན་པའི་སྣང་བ་སྐད་ཅིག་མ་ཀུན་གྱི་ཆོས་ཉིད་རྫོགས་པའི་ཕྱིར་རོ། །ཞེན་པའི་སྣང་བའི་སྐད་ཅིག་མ་གཅིག་གི་རང་བཞིན་ཆོས་ཉིད་རྟོགས་པ་ན། དེ་ལྟར་ཞེན་པའི་སྣང་བ་ཀུན་གྱིས་ཆོས་ཉིད་རྟོགས་པར་འགྱུར་ཏེ། དཔེར་ན་འཁྱག་པ་གཅིག་ཆུ་རུ་གོ་རྩམ་ན་དེའི་རིགས་ཅན་གྱི་འཁྱག་པ་ཀུན་ཆུར་ཤེས་པ་ལྟར་རོ། །དེ་ལྟར་ཡང་། དུས་གསུམ་འཁོར་འདས་ཞེན་བག་ཆགས། །སྐད་ཅིག་གཅིག་ལ་ཀུན་རྫོགས་ཕྱིར། །དེ་ཤེས་འགྲོ་བ་རྣམས་ཀུན་མཁྱེན། །ད་ལྟར་གཟུགས་འཛིན་མ་གྲུབ་ཕྱིར། །འདས་དང་མ་འོངས་དེ་དང་འདྲ། །ཞེས་པ་དང་། ཡང་ཆོས་ཉིད་གཅིག་གི་དེ་བཞིན་ཉིད་ཤེས་ན་བརྟགས་པ་ཐམས་ཅད་ངང་གིས་ཤེས་པར་འགྱུར་ཏེ་ཞེས་འབྱུང་ངོ་། །དེ་ལྟར་ཞེན་པའི་སྣང་བ་ལ་འཇལ་ན། ཞེན་པ་བརྟགས་པའི་ཞེན་ཡུལ་ཀུན་བརྟགས་དངོས་མེད་དེ་ལ་འཇལ་ལམ། རྟོག་མཁན་གྱི་བློ་རང་ལ་འཇལ་བརྟགས། དང་པོ་ལྟར་ན་ཞེན་ཡུལ་ཀུན་བརྟགས་ཡུལ་དུ་བྱེད་པའི་གཞི་བྱེད་ཀྱི་ཡིད་ཀུན་བརྟགས་ཀྱི་ཤེས་པ་དེ་ལྷན་ཅིག་བྱེད་པའི་རྐྱེན་བླ་མའི་ལུང་མན་ངག་དང་འཕྲད་པའི་ཚེ། ཞེན་བྱེད་ཀྱི་ཡིད་དེ་ཤེས་རབ་གསུམ་གྱི་བར་མ་བསམ་བྱུང་ཤེས་རབ་བམ། གཞི་དང་གཏན་ཚིགས་གྲུབ་པའི་དོན་གསུམ་གྱིས་བར་མ་གཏན་ཚིགས་སུ་གནས་པར་འགྱུར་ལ། དཔེར་ན་ལུས་མེད་ན་གྲིབ་མ་མི་འབྱུང་བ་ལྟར། ཞེན་བྱེད་ཀྱི་ཡིད་མེད་ན་ཞེན་པས་བཏགས་པའི་སྒྲ་དོན་སྤྱིར་སྣང་གི་ཡུལ་མེད་པས་གཞལ་དུ་མི་བཏུབ་བོ། །གཉིས་པ་ལྟར་ན། ཞེན་བྱེད་ཀྱི་ཡིད་ཁོ་རང་ཉིད་ཀྱིས་གཞལ་དུ་མི་བཏུབ་སྟེ། དཔེར་ན་རལ་གྲི་རང་གི་རང་མི་ཆོད་པའམ། མཛུབ་མོའི་རྩེ་མོ་དེ་ཉིད་ཀྱི་དེ་ཉིད་ལ་རེག་པར་མི་ནུས་པ་བཞིན་ནོ། །དེ་ལྟར་ཡང་རལ་གྲི་རང་གི་སོ། ཇི་ལྟར་མཛུབ་མོ་རང་གི་རྩེ། །མི་ཆོད་པ་དང་མི་འབུགས་པ། །དེ་ནི་སེམས་ཀྱིས་སེམས་མི་མཐོང་། །ཞེས་འབྱུང་བས་ཡུལ་དང་ཡུལ་ཅན་གཉིས་ཀ་ལ་གཞལ་དུ་མི་བཏུབ་པར་དགོས་པ་ལ། དེ་བསལ་བ་ནི། འདིར་རྟོགས་མཁན་གྱི་བློ་ལ་མི་འཇལ་གྱི་རྟགས་པའི་ཡུལ་ལ་འཇལ་ལོ། །སྔར་བརྗོད་པའི་ཉེས་པ་མེད་དེ། འདི་ལྟར་ཞེན་བྱེད་ཀྱི་ཡིད་སོ་སོར་རྟོགས་པའི་ཤེས་རབ་གནས་འགྱུར། ཞེན་པ་མ་དག་པར་ཡོད་དེ། དེ་ཅིའི་ཕྱིར་ཞེ་ན། ཞེན་པ་རྩ་བ་ནས་དག་པར་བྱེད་པའི་གཉེན་པོ་ལྟ་བ་རང་གི་མཚན་ཉིད་རྒྱུད་ལ་སྐྱེས་པ་མེད་པས་སྤང་བྱ་ཞེན་པ་མ་དག་པར་ཡོད་ཅིང་། ཞེན་པ་དེའི་དངོས་དོན་སྣང་བའི་སྣང་ཡུལ་དེ་བསམ་བྱུང་གིས་ཤེས་སམ། ཆེད་དུ་ཡུལ་ལམ་རྟེན་དུ་གྱུར་པས་བརྟགས་གཞི་ཞེས་མིང་དོན་འཐད་དོ། །དཔེར་ན་རྒྱང་རིང་པོའི་ཐོ་ལ་འཁྲུལ་བ་དག་གིས་མི་ཁོ་ནར་རྟོག་པ་དང་། མཁས་པ་དག་གིས་དེ་ནི་མི་མ་ཡིན་ནོ་ཞེས་བསྟན་པ་ལ་བརྟེན་ནས་འཁྲུལ་པ་དེའི་བློ་ལ་མིར་འཛིན་གྱི་སྒྲོ་འདོགས་རྩ་བ་ནས་མ་ཆོད་པས་ད་རུང་མིར་སྣང་བ་མ་འགགས་པ་སྟེ། མི་འམ་ཐོ་གང་ཡིན་སྙམ་དུ་སོ་སོར་རྟོག་པ་ལྟར་རོ། །དེས་ན་འདིར་གཏན་ལ་འབེབས་པ་མ་ཡིན་གྱི། གཏན་ལ་འབེབས་པའི་དུས་ཡིན་པས་ཞེན་པ་མ་ཡིན་པའི་ཕྱིར་སྔར་གྱི་ཉེས་པ་དང་བྲལ་ལོ། །ཁ་གཅིག་ན་རེ་ཞེན་པ་རྩ་བ་ནས་སྤོངས་བའི་གཉེན་པོ་བསྒོམ་བྱུང་གི་ཤེས་རབ་ལ་བཞེད་དེ། འདི་ལྟར་ལྟ་བ་རྟོགས་པ་ཙམ་ཡོད་ཀྱང་ཐོག་མ་མེད་པ་ནས་གཉིས་སུ་ཞེན་པ་གོམས་པས་དེའི་གཉེན་པོར་བསྒོམ་བྱུང་གི་ཤེས་རབ་མེད་པས་ཞེན་པ་མ་དག་སྟེ། དཔེར་ན་བཙོན་ལྕགས་སྒྲོགས་ཁྲོལ་ཡང་སྔོན་གོམས་པའི་མཐུས་བཅིངས་པ་སྙམ་བྱེད་པ་ལྟར་རོ། །དེ་ཡང་། འཛིན་སེམས་དག་གིས་ལྕགས་དཀྲོལ་ཡང་། །གོམས་པའི་དབང་གི་བཅིངས་དང་འདྲ། །ཞེས་བཤད་པའི་ཕྱིར་རོ། །ཞེས་པའང་མི་འཐད་དེ་ད་ལྟར་ལྟ་བ་ཡང་རྒྱུད་ལ་མ་སྐྱེས་པར་བསྒོམ་པའི་ཤེས་རབ་ལྟ་སྨོས་ཀྱང་ཅི་དགོས་ཏེ། ལྟ་བ་གཏན་ལ་འབེབས་པའི་དུས་ཡིན་པའི་ཕྱིར་རོ། །གཞལ་བྱ་གཏན་ལ་དབབ་པའོ། །གཉིས་པ་གཏན་ལ་འབེབས་པའི་ཆེད་དུ་ནི། གསུམ་པ་སྟེ། དངོས་ལྔའི་དང་། ཚུལ་ལྔའི་དང་། ཚིག་ལྔའི་འོ། །དང་པོ་ནི་སྔོན་བྱུང་ཡང་དག་པར་རྫོགས་པའི་སངས་རྒྱས་སྟོན་པ་སྐུ་ལྔས་རང་རང་གིས་འདུལ་བའི་འཁོར་ལྔ་ལ། གསུང་ལྔས་ཆོས་དངོས་སུ་བསྟན་པས་འཁོར་གྱི་སེམས་གྱི་དེ་ཁོ་ན་ཉིད་གཏན་ལ་འབེབས་ཅིང་དོན་གོ་བར་བྱེད་པ་སྟེ། སྔོན་བྱུང་དུ་ལྷན་ཅིག་པའི་འཁོར་གྱིས་དོན་གོ་བྱེད་ཀྱི་ཆེད་དུའོ། །འོ་ན་ལྷན་ཅིག་པའི་འཁོར་ལ་གཞལ་བྱ་ཞེན་པའི་སྣང་བ་ཡོད་ན་ལས་དང་པོ་ས་པའི་སོ་སོ་སྐྱེ་བོ་དང་ཁྱད་པར་མེད་པར་འགྱུར་ལ། བསྟན་པ་དེ་ཉིད་གཏན་ཚིགས་ཀུན་ཁྱབ་གསུམ་ལས་ལུང་གི་ཆེད་དུ་ཡིན་པས་རྗེས་འཇུག་གིར་ཡང་ཆ་དེ་རྩམ་ནས་བཞག་པའི་དང་པོ་ལྟར་ན་ལྷན་གཅིག་པའི་འཁོར་ལོ་ཁོ་ནའི་ཆེད་དུའོ། །གཉིས་པ་ཚུལ་ལྔ་ནི། ཡང་ལྷན་ཅིག་པའི་འཁོར་སྤྱོད་ཡུལ་ཡིན་ཡང་རྗེས་འཇུག་དབང་པོ་ཡང་རབས་ཀྱིས་སྔོན་བྱུང་དང་ཚུལ་མཐུན་པར་གོ་བའོ། །དེ་ལ་དྲུག་ལས། ཆོས་ཀྱི་སྐུའི་སྐྱེ་མེད་དོན་གྱི་གསུང་གི་ཚུལ་ལོ། །བརྡ་དང་ཏིང་ངེ་འཛིན་ལ་བརྟེན་ནས་རྟོགས་པ་ནི་ལོངས་སྐུའི་བརྡ་དང་དགོངས་པའི་གསུང་གི་ཚུལ་ལོ། །ཡེ་ཤེས་རང་གསལ་དུ་གཞི་ལ་གནས་པའི་བྱིན་གྱི་རླབས་ཀྱིས་གོ་བ་ནི་མངོན་པར་བྱང་ཆུབ་པའི་རིག་པའི་བྱིན་རླབས་ཀྱིས་གསུང་ངོ་། །དབྱེར་མེད་དུ་གོ་བ་ནི་རྡོ་རྗེའི་སྐུའི་གསུང་གི་ཚུལ་ལོ། །ཚིག་ཏུ་བརྗོད་པས་དོན་གོ་བ་ནི་སྤྲུལ་པའི་སྐུའི་ཚིག་གི་གསུང་རྟོགས་ཚུལ་ཏེ། དྲུག་གི་དང་པོ་ནི། ཆོས་སྐུའི་དོན་གྱི་གསུང་གི་ཚུལ་དུ་བསྡུ་གསུང་ན་ཁོ་བོ་ནི་བརྡའི་གསུང་དུ་འཐད་དོ། །རང་བཞིན་གྱི་བརྡ་ཡིན་པའི་ཕྱིར་རོ། །གསུམ་པ་ཚིག་ལྔ་ནི། བློ་ཆུང་བ་ལ་ཚིག་ཏུ་བརྗོད་པ་དོན་མཚོན་པའོ། །དེ་ཡང་བདུན་ཏེ། རྒྱུད་སྡེ་དག་ལས་སྣང་བ་འདི་ཉིད་ཀྱིས་དོན་མཚོན་པར་སྟོན་པ་དང་། སྐྱེ་མེད་དུ། བརྡ་དགོངས་དུ། ཡེ་ཤེས་རང་གསལ་དུ། དབྱེར་མེད་དུ། བཀྲི་དྲང་དུ། ཐབས་ལམ་དུ་བསྟན་པ་དག་སྟེ། རིམ་པ་ལྟར་སྐུ་བདུན་གྱི་གསུང་མཚོན་པའི་ཚིག་གོ །དེ་ལས་ལྔར་བསྡུ་བ་ནི། ངོ་བོ་གསུང་གི་ཚུང་ལྔར་བརྗོད་ལ། ཐ་མ་གསང་བའི་སྐུའི་འདོད་པ་རང་རྐྱེན་གྱི་ཚིག་ནི་སྤྲུལ་སྐུའི་ཚིག་གི་ཚུལ་མཚན་པར་བསྡུ་གསུང་སྟེ། རེག་པ་ལུས་ཀྱི་བརྡའ་ཡིན་པས་བརྡ་ཡི་གསུང་དུ་བསྡུ་བར་འཐད་དམ་བསམ་དེ་ལྟར་ཚིག་ལྔ་སོ་སོར་བཤད་པ་དེ་ཡང་མདོར་བསྡུ་ན་གཉིས་ཏེ། དོན་གྱི་གསུང་མཚོན་པའི་ཚིག་ལ་སོགས་པ་བཞིའི་རྗེས་སུ་ཞུགས་ཏེ་དཔྱད་དུ་མེད་པའི་ཚུལ་གྱིས་དོན་མཐོང་བར་བྱེད་པའི་ཤེས་རབ་དབང་པོ་རྣོན་པོ་སྟེ་རང་བཞིན་གྱི་སྣོད་དུ་གྱུར་པ་དང་། རྗོད་པའི་ཚིག་གི་རྗེས་སུ་བཞག་ཏེ་དཔྱད་དུ་ཡོད་པའི་ཚུལ་གྱིས་ཆོས་ཉིད་ཀྱི་དོན་མཐོང་བར་བྱེད་པ་ཤེས་རབ་དབང་པོ་རྟུལ་པོ་སྟེ་སྦྱངས་པའི་སྣོད་དུ་གྱུར་པ་དང་། གོ་བྱེད་ཀྱི་ཆེད་དུ་མཐུན་པར་སྦྱར་བའོ། །དང་པོའི་དོན་ནི་སེམས་ཅན་ཐམས་ཅད་ཆོས་ཉིད་དུ་གཅིག་པས་དཔྱད་བྱ་དང་སྤྱོད་བྱེད་མ་གྲུབ་པའི་ཚིག་ཏུ་བརྗོད་པ་དང་བྲལ་ལ་རྟོག་དཔྱོད་བྱས་ན་འཆིང་བས། དོན་ཇི་ལྟ་བར་མཚོན་པའི་ཚིག་གིས་མཚོན་བྱའི་དོན་རྟོག་དཔྱོད་མ་བྱས་པར་འཆིང་གྲོལ་བར་གོ་བས་ཞེ་འདོད་དང་བྲལ་བའོ། །རྒྱལ་པོ་སྲས་པོ་དགེ་བསྙེན་ལི་ཙ་བི་དྲི་མ་མེད་པར་གྲགས་པས་བསྙུན་ཚུལ་བསྟན་པ་ལས། ཤ་རིའི་བུ་ལ་སོགས་པ་ཀུན་དྲི་བར་མ་སྤོབས་པ་ལས། འཇམ་དཔལ་གྱིས་ལི་ཙ་བིར་བསྙུང་ངམ་དྲིས་པས། ང་ན་གསུང་ཅིས་བསྙུང་དུས་ནམ་ནས་བསྙུང་། ནམ་གྲག་པ་ལགས་གསུམ་པོ་ཞུས་པས། རིམ་པ་ལྟར་དུ། ང་ཉོན་མོངས་པ་དུག་གསུམ་གྱིས་ན། །འཁོར་བ་ཐོག་མ་མེད་པ་ནས་ན། ད་སྙིང་པོ་བྱང་ཆུབ་ལ་ཐུག་ཙམ་ན་གྲགས་ཏེ་འོང་གསུང་ངོ་། །སྙིང་པོ་བྱང་ཆུབ་ཀྱི་དོན་ཇི་ལྟ་བུ་དྲིས་པས། རྒྱལ་བའི་སྲས་པོ་ལི་ཙ་བྱི་སྤྱན་བཙུམས་ནས་ཅི་ཡང་མི་གསུང་བར་བཞུགས་པས་འཇམ་དཔལ་གྱིས་དོན་སྨྲ་བརྗོད་དང་བྲལ་བར་གོ་ནས་མ་གསུངས་པ་ཉིད་རྒྱ་ཆེར་བཤད་པའོ། །དེ་ལ་བརྗོད་དུ་མེད་པས་བཤད་དུ་མེད་ལ་ཐོས་སུ་མེད་པས་ཉན་པའང་མེད། མཆོག་ཏུ་གསང་བའི་ཆོས་ཉིད། རྣམ་གྲངས་གཉིས་པ་ལ་གཉིས་ལས། ཚིག་དོན་མི་མཐུན་པར་སྒྲ་ཇི་བཞིན་པ་མ་ཡིན་ཏེ་ཆོས་མི་མཐུན་པ་ཉིད་ཅན་གྱི་སྦྱར་བ་སྟེ། ཆུ་རླུང་མེ་མེད་ཀྱིས་ལ་མེ་ལྡན་དུ་མཚོན་པ་ལྟར། དོན་ཆོས་ཉིད་ཅི་ཡང་མ་གྲུབ་སྟེ། རང་རྒྱུད་པའི་མཐའ་ཐམས་ཅད་དང་ངང་གིས་བྲལ་བས་ཆོས་ཅན་འཁོར་འདས་ཅིར་ཡང་མ་འགགས་པར་སྣང་བ་སྟེ། སྣང་རུང་དུ་གང་ཡང་མ་སྤངས་པའོ། །ཆོས་ཉིད་ཕྱོགས་གཅིག་དུ་གྲུབ་ན་ཕྱོགས་ཐམས་ཅད་དུ་འཆར་དུ་མི་བཏུབ་ལ། ཅིར་ཡང་མ་གྲུབ་པས་ཅིར་ཡང་འཆར་བ་ཁོ་ན་སྟེ། དཔེར་ན་འབྱུང་ཆེན་སྲོལ་གྱི་ནམ་མཁའ་དབྱིབས་དང་ཁ་དོག་ཕྱོགས་ཅིག་པས་ཐམས་ཅད་དང་བྲལ་བས་རྐྱེན་གྱིས་དབྱིབས་དང་ཁ་དོག་ཐམས་ཅད་དུ་སྣང་བ་ལྟར་རོ། །འོ་ན་ཚིག་མི་མཐུན་པ་ཞེས་བྱ་བ་དེ་ཚིག་དང་དོན་ཕྱོགས་ཐམས་ཅད་ནས་མཐུན་པས་ཚིག་དོན་མི་མཐུན་པར་འགྱུར་རམ། འོན་ཏེ་ཕྱོགས་དག་གིས་མི་མཐུན་པས་ཚིག་དོན་མི་མཐུན་པར་འགྱུར་ཞེས་བཏགས། དང་པོ་ལྟར་ན་མི་འཐད་དེ། ཚིག་གིས་མཚོན་ནས་དོན་གྱི་ཕྱོགས་རེ་གོ་རུ་བཏུབ་པའི་ཕྱིར་རོ། །གཉིས་པ་ལྟར་ན་ཚིག་མཐའ་ཅན་དང་དོན་མཐའ་བྲལ་ཡིན་པས་ཚིག་གི་དོན་ཇི་ལྟར་བཞིན་གཏན་ལ་མི་ཕེབས་པས། དོན་གྱི་ཕྱོགས་རེ་མཚོན་འདུག་པས་ཚིག་དོན་མཐུན་པའི་གཏན་ཚིགས་ཡང་ཚིག་དོན་མི་མཐུན་པའི་གཏན་ཚིགས་སུ་འགྱུར་རོ། །ཚིག་གི་དོན་མཐུན་པའི་ཧེ་དུ་ཡང་ཚིག་དང་དོན་ཕྱོགས་ཐམས་ཅད་ནས་མཐུན་པས་མཐུན་པར་འགྱུར་རོ། །འོན་ཏེ་ཕྱོགས་གཅིག་གིས་མཐུན་པས་ཚིག་དོན་མཐུན་པར་འགྱུར། ཞེས་བརྟགས། དང་པོ་ལྟར་ན་ཚིག་མཐའ་ཅན་དང་དོན་མཐའ་བྲལ་ཡིན་པས། ཚིག་གི་དོན་ཇི་ལྟ་བ་བཞིན་གཏན་ལ་མི་ཕེབས་པས་ཕྱོགས་ཐམས་ཅད་ནས་མཐུན་པ་མི་སྲིད་དོ། །གཉིས་པ་ལྟར་ན་ཚིག་གིས་དོན་གྱི་ཕྱོགས་རེ་མཚོན་དུ་བཏུབ་པས་ཚིག་དོན་མི་མཐུན་པའི་ཧེ་དུ་ཡང་ཚིག་དོན་མཐུན་པར་འགྱུར་སྙམ་ན། དེའི་ལན་ནི་ཚིག་དང་དོན་ཕྱོགས་ཐམས་ཅད་ནས་མཐུན་པ་དང་། མི་མཐུན་པར་མི་བརྗོད་ཀྱི། འོན་ཀྱང་གཏན་ཚིགས་སུ་བཀོད་པའི་ཚིག་དེ་དང་སྒྲུབ་བྱའི་དོན་གྱི་གནས་མི་མཐུན་པ་ནི་ཚིག་དོན་མི་མཐུན་པ་ཡིན་ལ། དེ་གཉིས་མཐུན་པ་ནི་ཚིག་དོན་མཐུན་པའོ་ཞེས་བཞེད་དོ། །གཉིས་པ་ཚིག་དོན་མཐུན་པ་ནི། ཧེ་དུའི་མདོ་ཀུན་ཁྱབ་གསུམ་དུ་འདུ་ཞིང་། དབྱེ་ན་ཚད་མ་གསུམ་གཞུང་དང་སྒྲ་མཐུན་དོན་སྤགས་གཉིས་སུ་དབྱེའོ། །དང་པོ་ནི་རྒྱལ་བས་གསུངས་པའི་ལུང་དང་བླ་མ་བརྒྱུད་པའི་མན་ངག་དང་། དེ་གཉིས་ལ་བརྟེན་པའི་རང་རིག་པའི་ཚད་མའོ། །དེ་གསུམ་རེ་རེ་ལའང་ལྔ་ལྔ་སྟེ། ངོ་བོ་ངེས་ཚིག་དགོས་ཆེད། རྣམ་གྲངས་བདེན་པ་སྒྲུབ་བྱེད་དོ། །དང་པོ་ལུང་གི་ངོ་བོ་ནི། ལ་ལ་དག་སྐུ་གསུང་ཐུགས་ཀྱི་རྒྱུད་གསུམ་ཡིན་ཞེས་འཆད། འདིར་ནི། བསྒྲུབ་བྱའི་དོན་ལ་ཁྱབ་ཅིང་ལྷག་ཆད་མེད་སྟེ་ཚིག་སྒྲོ་སྐུར་དང་བྲལ་བའོ། །ངེས་ཚིག་ནི་བཀའ་ལས་འོངས་ཤིང་བསྒྲུབས་བྱའི་དོན་དང་འབྲེལ་བའམ། ཡང་ན་ལུས་ཅན་རྫས་ལ་སྤྱད་བདེ་བཞིན། དམིགས་པ་བདེ་ཕྱིར་ལུང་ཞེས་བཤད། ཞེས་ཀྱང་ཟེར་རོ། །དགོས་པ་ནི་བློ་དམན་དད་པའི་ཡིད་ཆེས་པར་འགྱུར་བའོ། །ལུང་གི་རྣམ་གྲངས་ལ་གཉིས་ལས་མཚོན་བྱ་སྤྱིའི་ལུང་ནི་དངོས་པོའི་གནས་ལུགས་སྟེ། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་སོ། །མཚོན་བྱེད་ཚིག་གི་ལུང་ནི་དངོས་ལྔ་ཚུལ་ལྔ་ཚིག་ལྔ་ཡིན་པ་ཟེར་ཏེ། རྒྱ་མ་ལས་ཀྱི་ཡེ་ཤེས་ལྷའི་བྱ་བྲལ་རྫོགས་པའི་ལུང་ངོ་། །ལུང་བདེན་པར་བསྒྲུབ་པ་ནི། ཕ་རོལ་ཏུ་ཕྱིན་པའི་ལུགས་ཀྱིས་ལུང་ཆོས་ཅན། བདེན་པ་ཡིན་ཏེ། བརྗོད་བྱེད་དག་པ་རྣམ་གསུམ་གྱིས་གསུང་བའི་ཕྱིར་རོ། །ཞེས་པ་ལྟ་བུ་སྟེ། སྤྱིར་གཞལ་མངོན་གྱུར་མངོན་སུམ་ཚད་མས་མཇལ། ལྐོག་གྱུར་རྗེས་དཔག་ཚད་མས་འཇལ་ཞིང་། ཤིན་ཏུ་ལྐོག་གྱུར་ལུང་གི་ཚད་མས་མཇལ་ལོ་ཞེས་ཟེར་རོ། །འདིར་ནི་མྱོང་བས་བདེན་པར་གྲུབ་པའོ། །མན་ངག་གི་ངོ་བོ་ལ་སོགས་པ་འདྲ། དགོས་པ་རྟོགས་དཀའ་བ་བདེ་བླག་ཏུ་རྟོགས་པར་འགྱུར་བའི་ཕྱིར་རོ། །ཡང་དོན་གྱི་བཅུད་དང་ལྡན་པར་བྱེད་པ་སྟེ། །བདེན་པར་བསྒྲུབ་པ་ཉམས་སུ་མྱོང་བས་གྲུབ་པའོ། །རང་རིགས་པ་ལ་ལྔ་ལས། ངོ་བོ་ནི་ལུང་མན་ངག་གི་རྐྱེན་དང་འཕྲད་ན་དངོས་པོའི་དོན་གོ་བར་ནུས་པའི་ཤེས་རབ་སྟེ། དཔེར་ན་ངར་ཚད་དང་ལྡན་པའི་རལ་གྲི་རྣོན་པོ་དེས་གཅད་བྱའི་རྐྱེན་དང་ཕྲད་ན་ཆོད་པའི་ནུས་པ་དང་ལྡན་པ་ལྟར་རོ། །ངེས་ཚིག་ནི་དེ་ཉིད་ཀྱིས་དེ་ཉིད་རིགས་པས་རང་རིག་པ་སྟེ་ངོ་བོའི་ངེས་ཚིག་གོ །དགོས་ཆེད་ནི་ལུང་མན་ངག་གི་དོན་དུ་འགྱུར་བར་བྱེད་དེ། རྣམ་གྲངས་ནི་སྤྱིར་བསམ་གྱིས་མི་ཁྱབ་ཏེ་མཐོ་ལ་སོགས་པ་བདུན། ཡང་ན་རིགས་པ་བཞི་སྟེ་ཟེར། ཡང་ན། རིག་པའི་གནས་ལྔ་ཡང་ཟེར། བདེན་པར་ཁོ་རང་ཉིད་གྱིས་གྲུབ་ཀྱི་གཞན་གྱིས་བསྒྲུབ་མི་དགོས་སོ། །ཁོ་རང་ཡོད་པར་ནི་ལུས་ངག་གི་རིགས་བྱེད་ལས་དཔག་ཏུ་བཏུབ་བོ། །རྣལ་འབྱོར་ཆེན་པོ་འདི་ཉིད་ཀྱི་རྒྱུད་གཞུང་ལས་གྲགས་པས་ཚད་མ་གསུམ་གཞུང་ངོ་། །རང་སྤྱི་ལ་སོགས་པ་ནི་ཐེག་པ་འོག་མ་དང་སྒྲ་ཙམ་མཐུན་ལ་དོན་ཁྱད་པར་དུ་འཕགས་པ་སྟེ། བཙད་པོ་ཧ་མཁན་གཉིས་ཀྱི་མིང་རྩེ་ལྡེ་རུ་མཐུན་ཡང་དོན་ཁྱད་པར་ཡོད་པ་ལྟར་རོ། །དག་པ་བཞི་པ་ནི། རྒྱུ་འབྲས་ཀུན་རྫོབ་དོན་དམ་དག །རྒྱུ་དག་པ་ཐམས་ཅད་བསྐྱེད་པའི་རྒྱུ་འབྱུང་བ་ལྔ་ནི་རང་གི་སེམས་ཉིད་དེ་རང་རྒྱུད་པ་མ་གྲུབ་པས་དག་པའོ། །དེ་ཡང་རྒྱུའི་མཚན་ཉིད་དག་པ་ནི། ཕྱི་རོལ་ཆེན་པོ་ལྔ་རྣམས་སྟེ། །སེམས་ཉིད་གཟུང་འཛིན་རང་སྣང་བའི། །གཟུང་བའི་ཡུལ་ཉིད་འབྱུང་ཆེན་ལྔ། །འབྱུང་བ་ཆེན་པོ་རྒྱུད་ནས་དག །ཅེས་སོ། །འབྲས་བུ་དག་པ་ནི། རྒྱུད་དེ་ཉིད་ལས་བྱུང་བའི་འབྲས་བུ་དམ་རྫས་ལྔ་སྟེ། དེ་ཡང་རྒྱུ་དག་པས་འབྲས་བུ་ཡང་དག་པ་སྟེ་དཔེར་ན་མཚལ་དམར་ན་ཁུ་བ་ཡང་དམར་བ་ལྟར་རོ། །དེ་ཡང་འབྲས་བུ་དངོས་སུ་དག་པ་ནི། སེམས་ཅན་ཀུན་གྱིས་རུས་པ་སྟེ། །རྡོ་རྗེ་བྱང་ཆུབ་སེམས་ཡིན་པས། །ཤ་ནི་པདྨ་རག་ཏ་ཡིན། །དྲི་ཆེན་དྲི་ཆུང་གུམ་རྒུ་ཆུ། །སོ་སོའི་ལུས་ལ་གནས་པས་དག །ཅེས་སོ། །དོན་དམ་དག་པ་ནི་ཆོས་ཐམས་ཅད་སེམས་ཉིད་ཅིར་ཡང་མ་གྲུབ་སྐྱེ་འགགས་དང་བྲལ་བའི་ངང་དུ་དག་པས། དོན་དམ་དམིགས་མེད་དག་པ་ནི། ཕྱི་ནང་ཆོས་རྣམས་ཐམས་ཅད་ཀུན། །གང་གི་ངོ་བོ་མ་ཡིན་ཏེ། །སྐྱེ་འགགས་མེད་པར་ཡེ་ནས་དག །ཅེས་སོ། །ཀུན་རྫོབ་དག་པ་ནི། རང་བཞིན་རང་རྒྱུད་པ་དང་བྲལ་བ་སྟེ། ཀུན་རྫོབ་ཡེ་ནས་དག་པ་ནི། །སྒྱུ་མའི་རང་བཞིན་ཐམས་ཅད་སྣང་། །ཆུ་ཟླ་ཚལ་དུ་མི་དམིགས་གནས། །མི་དམིགས་པ་ཉིད་སྣ་ཚོགས་གནས། །དེ་བཞིན་གཤེགས་དང་ཡེ་ནས་མཉམ། ཞེས་སོ། །དག་པ་གསུམ་ནི། སྣོད་འབྱུང་བ་ལྔ་ཡུམ་ལྔར་དག །བཅུད་ཕུང་པོ་ལྔ་ཡབ་ལྔར་དག །རྒྱུད་རྣམ་ཤེས་ལྔ་ཡེ་ཤེས་ལྔར་དག་གོ །དེ་ལྟར་ཤེས་པས་རང་རྒྱུད་པར་འཛིན་པ་དག་པ་ལ་དག་ཅེས་བྱ་སྟེ། དེ་ནི་ཐུན་མོང་གི་དག་ཚུལ་ལོ། །གཉིས་པ་ཐུན་མིན་གྱི་དག་ཚུལ་ནི། རྟོག་པ་གསུམ་དུ་སྣང་བ་ལོག་རྟོག་སྒྱུ་མ། ལྷར་སྣང་བ་ཕྱག་རྒྱ་སྒྱུ་མ། དེ་གཉིས་སུ་མ་འགགས་པ་ཀུན་རྫོབ། རང་བཞིན་མེད་པས་དོན་དམ། དེ་གཉིས་གཉིས་སུ་ཡེ་ནས་དབྱེར་མེད་དུ་དག་པའོ། །དེ་ལྟར་རྟོགས་པའི་ཡོན་ཏན་ནི། དམ་ཀུན་པོ་ཡི་ཞིང་ཞེས་བྱའོ། །མཉམ་པ་བཞི་ལས། ཐུན་མོང་གི་མཉམ་པ་གཉིས་ནི་ཕ་རོལ་དུ་ཕྱིན་པའི་ལུགས་ཀྱིས་རྟགས་གཅིག་དང་དུ་བྲལ་ལ་སོགས་པས་གཏན་ལ་ཕབ་པའི་དོན་སྐྱེ་ཚུལ་ཙམ་དུ་མཉམ་པ་དང་། ཀུན་རྫོབ་ཏུ་ཆོས་ཐམས་ཅད་སྒྱུ་མ་ཙམ་དུ་སྣང་བའོ། །ལྷག་པའི་མཉམ་པ་གཉིས་ནི། དོན་དམ་པར་འཕགས་པའི་དཀོར་བདུན་སྣང་རུང་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་པས་ལྷག །ཀུན་རྫོབ་ཏུ་སེམས་ཉིད་རང་སྣང་བས་ཆོས་ཐམས་ཅད་སྐུ་དང་ཡེ་ཤེས་སུ་གསལ་བར་མཉམ་པ་ཉིད་ལ་འབྲས་བུ་ལུས་པ་མེད་པར་རྫོགས་པས་ལྷག་སྟེ། དོན་དམ་དུ་ནི་དཀོར་བདུན་ཡང་། ཀུན་རྫོབ་དུ་ནི་མཉམ་རྫོགས་པའོ། །ཞེས་སོ། །དོན་དེ་དག་གི་དོན་རྒྱས་པར་ཕྱེ་ན་དོན་དམ་ལྷག་པ་ནི། དཀོར་བདུན་བརྗོད་དང་བསམ་བརྗོད་འདས། ངོ་བོ་དགུས་གྲུབ་ཤེས་བྱ་ཡི། །མཆོག་འགྱུར་ཤེས་རབ་དམ་པའོ། །ཡུལ་ཡིན་རྟོག་གེའི་མ་ཡིན་ཏེ། །མི་བསླུ་ངེས་པར་སྒྲ་འཇུག་གོ །ཞེས་པས་ཟུང་བདུན་པ་བཅུ་བཞི་བཞིས་འཕགས་པར་སྦྱར་ལ་ཀུན་རྫོབ་ནི། རྐྱེན་ལས་སྐྱེས་པ་དང་མཐུན་པར་སྣང་། དོན་བྱེད་ནུས་དང་བརྟགས་ན་དབྱེས། །དེ་བཞིན་རང་ལ་བྲང་སྤྲོད་ཀྱི། །ཁྱད་པར་ཡོད་ལ་ལྡན་པའོ། །རྒྱས་པར་བཞི་ལ་ཤེས་པར་བྱ། །རྟོགས་པ་བཞི་ནི། མེ་ལོང་ལྟ་བུའི་སྒྲུབ་ཐབས་ལས། ཙཀྲ་བཞིའམ་དགའ་བ་བཞི་ལ་ཡང་བཤད་ན། འདིར་གཏན་ཚིགས་ཁོ་ནར་བཞག་སྟེ། དེ་ཡང་བློ་ཆེ་ཆུང་གི་བྱེ་བྲག་གིས་འཇལ་ཚུལ་ལ་གཉིས་ལས། དང་པོ་རིམ་འཇུག་གི་འཇལ་ཚུལ་ནི་པདྨ་དག་གིས་བཞག་པ་སྟེ། རྟོགས་པ་མེད་པ་བདེན་པ་མེད། གོ་རིམས་ལྟར་གཏན་ལ་འབེབས་པ་སྟེ། དེ་ཡང་རྒྱུད་གཅིག་པས་དོན་དམ་གཏན་ལ་འབེབས་ཚུལ་ནི། སྤྱིར་གཏན་ཚིགས་མ་ཡིན་ན་མ་ཡིན་ཏེ་འཐད། ཡིན་ནོ་ཅོག་ལ་བཞི་དང་ཧེ་དུ་དུ་གྲུབ་པའི་མཐའ་གསུམ་མི་བྱུང་མི་སྲིད་དོ། །དེས་ན་ཐམས་ཅད་ཅེས་པ་གཞལ་བྱ་སྟེ། འཁོར་འདས་མ་ལུས་པ་སྟེ། རིགས་ཕལ་པ་དེ་བསྡུ་བའོ། །ཡང་ན་རྒྱུ་ཞེས་པ་ནི་རང་ངོ། །འཇལ་ཚུལ་ནི་འཁོར་འདས་ཀྱི་རྒྱུ་མ་རིག་པ་ཡེ་ཤེས་གཉིས་གཉིས་སེམས་ཅི་ཡང་མ་ཡིན་པའི་དོན་དམ་པར་གཅིག་སྟེ་གཤེགས་སྐུ་སྒྱུ་མར་སྣང་བ་དང་། ཞེས་པ་ལ་སོགས་པ་དང་། གཏི་མུག་ཅེས་ནི་བརྗོད་པ་ཡང་། །མ་རིག་མིང་གི་རྣམ་གྲངས་ཏེ། །གཉིས་མེད་དོན་གཅིག་ཡིན་པར་བཤད། །ཅེས་པ་དང་། ཡང་མ་རིག་པ་ཉིད་ཡེ་ཤེས་གསལ། ཕྱིན་ཅི་ལོག་ཉིད་ཡང་དག་སྟེ། །བདེ་ཉིད་ཡི་གེའི་སྒྲ་མཚོན་ཏེ། །ཉོན་མོངས་སྡུག་བསྔལ་བྱང་ཆུབ་མཆོག ། ཅེས་པ་ལ་སོགས་པས་མངོན་ནོ། །དེ་ལྟར་ཉམས་སུ་མྱོང་བ་ནི་མན་ངག་གོ །དེ་ལྟར་རྟོགས་པར་ནུས་པ་ནི། །རང་རིག་ཚད་མའོ། །ཡིག་འབྲུའི་ཚུལ་གྱིས་ཚད་མ་ནི་གཞལ་བྱ་ནི་ལུས་ངག་ཡིད་གསུམ་དུ་ཞེན་པའོ། །འཇལ་ཚུལ་ནི་ལུས་ཀྱི་དངོས་པོ་ནི་ཨཿས་མཚོན་ནས་མ་སྐྱེས་པ་ཆོས་ཀྱི་སྐུ་སྟེ། དེ་ཉིད་ཡི་གེའི་སྒྲ་མཚོན་ཏེ། །སྣང་སྟོང་གཉིས་མེད་ཆོས་ཀྱི་རྒྱ། །ཞེས་སོ། །ངག་ཉིད་ཨོས་མཚོན་ནས་མ་འགགས་པའི་གསུང་སྟེ། ཆ་གཉིས་ལྡན་པའི་ཚིག་ཚུལ་གྱིས། །གསུང་གི་ཕྱག་རྒྱ་ཆེན་པོའོ། །ཡིད་ཉིད་ནི་ༀ་གྱིས་མཚོན་ནས་གཉིས་སུ་མེད་པའི་ཐུགས་ཡེ་ཤེས་ལྔར་སྣང་བ་སྟེ། ཡི་གེ་རྫོགས་པའི་ཚུལ་ཉིད་ཀྱིས། །ཐུགས་ཀྱི་ཕྱག་རྒྱ་ཆེན་པོ་ཡིན། །ཞེས་པས་མངོན་ནོ། །དེ་ལྟར་བཤད་པ་ལུང་། ཉམས་སུ་མྱོང་བ་མན་ངག། རྟོགས་པར་ནུས་པ་རང་རིག་ཚད་མ་སྟེ་ཀུན་ལ་འདྲེ། ཚུལ་ནི་དོན་དང་སྨོན་པ་གཉིས་ལ་འཇུག་པ་ལས་དང་པོའོ། །བྱིན་གྱིས་བརླབས་ཀྱི་གཞལ་བྱ་ནི་རྟོགས་པ་གོང་མ་གཉིས་སོ། །འཇལ་ཚུལ་ནི་གོང་མ་གཉིས་ཀྱི་བྱིན་རླབས་སམ། ཡང་ན་དངོས་པོའི་གནས་ཐབས་བྱེ་བྲག་ཏུ་བསྟན་པ་ཉིད་ཀྱི་བྱིན་གྱིས་དོན་བདེན་པ་གཉིས་མེད་ལ་རྟགས་སྤྱོད་ཡུལ་སྐུ་དང་ཡེ་ཤེས་སུ་རྟོགས་པའོ། །མངོན་སུམ་པའི་གཞལ་བྱ་ནི། དབྱེར་མེད་སྤྱིའི་མཚན་ཉིད་དེ་བློ་ཡུལ་ན་ཡོད་པ་དེའི། རྟོག་ཚུལ་ནི་ཡུལ་དང་ཡུལ་ཅན་དབྱེར་མེད་དུ་རྟོགས་ཏེ་ཡུལ་དང་བྲལ་བའོ། །དེ་ལ་ཀུན་ཁྱབ་གསུམ་གོང་ལྟར་སྦྱར་རོ། །དེ་ལྟར་རིམ་འཇུག་དང་སྦྱར་བ་འདི་ནི་བཤད་པའི་གཞུང་མཁྱེན་པས་འཐད་པ་ཁོ་ན་མཁྱེན་ནོ། །འདི་ཉིད་ལས། མངོན་བྱས་རིམས་དང་རྟོགས་གོམས་རིམ། ཅེས་པ་རིམ་འཇུག་གི་འཇལ་ཚུལ་ཡིན་ཟེར་ཏེ། དེའི་ཡང་ངེས་ཀ་ན་མེད་གསུངས་ཏེ་མི་འཐད་དོ། །གཉིས་པ་གཅིག་ཆར་དུ་འཇུག་པའི་དབང་དུ་བཤད་ན། རྟོགས་པ་དང་པོ་གསུམ་ཆར་གྱིས་བདེན་པ་དབྱེར་མེད་རྟོགས་པ། མངོན་སུམ་པས་དབྱེར་མེད་སྤྱོད་ཡུལ་དང་བྲལ་བར་རྟོགས་ཏེ། དང་པོ་རྒྱུ་གཅིག་པ་དང་དབྱེར་མེད་རྟོགས་ཚུལ་གཞལ་བྱ་གོང་དང་འདྲ། རྟོགས་ཚུལ་ནི་འཁོར་འདས་ཀྱི་རྒྱུ་མ་རིག་པ་དང་ཡེ་ཤེས་གཉིས་བསལ་བས་ཐ་དད་ཀྱང་ངོ་བོ་བདེན་པ་དབྱེར་མེད་དུ་གཅིག་པ་སྟེ་དེའི་ཀུན་ཁྱབ་གསུམ་སྔར་དང་འདྲ། ཡིག་འབྲུའི་ཚུལ་གྱིས་ལུས་ངག་ཡིད་ཨ་ཨོ་ཨཱོཾ་གྱི་མ་སྐྱེས་མ་འགགས་གཉིས་སུ་མེད་པའི་སྐུ་གསུངས་ཐུགས་སུ་རྟོགས་པ་སྟེ་ཀུན་ཁྱབ་དང་གསུམ་སྔར་དང་འདྲ། བྱིན་གྱིས་རླབས་ནི་རས་དཀར་པོ་དམར་པོར་བསྒྱུར་བའི་ནུས་མཐུ་བཙོད་ལ་ཡོད་པ་ལྟར་། ཧེ་དུ་གོང་མ་གཉིས་ཀྱི་ཆོས་ཐམས་ཅད་སྐུ་དང་ཡེ་ཤེས་སུ་རྟོགས་པ་སྟེ་ལུང་མན་ངག་རིགས་པ་གསུམ་ལྡན་དུ་ཤེས་པར་བྱའོ། །མངོན་སུམ། པར་ཞེས་པ་སྤྱིར་མངོན་སུམ་ཞེས་བྱ་བ་རང་གི་མཚན་ཉིད་གསལ་བའི་མཐར་ཐུག་པ་སྟེ། དེ་ཡང་བཞི་སྟེ། དབང་པོ་དང་། ཡིད་དང་། རྣལ་འབྱོར་དང་། རང་རིག་ལས། འདིར་བལྟ་བྱ་བལྟ་བྱེད་མེད་པར་རང་རིག་པའི་ཕྱིར་རང་རིག་པའི་མངོན་སུམ་མོ། །འདི་ཉིད་ལུང་མན་ངག་གསུམ་དང་ལྡན་པར་སྦྱར་རོ། །འོ་ན་མངོན་སུམ་པའི་གཏན་ཚིགས་གྱི་ལས་གང་ལ་བྱ་ཞེ་ན། རང་རིག་ཚད་མ་རྐྱེན་དང་འཕྲད་ན་གོ་བར་ནུས་པའོ། །ཁ་གཅིག་ན་རེ། ཙཀྲ་སྒྱུར་བའི་ར་ཙའི་སྲས་སྐྱེས་ན་མཐུན་ཕྱོགས་དགའ་བ་སྐྱེ་ལ་མཐུན་ཕྱོགས་མི་དགའ་བ་སྐྱེ་བ་ལྟར། མངོན་སུམ་པས་ཀྱང་མཐུན་ཕྱོགས་གསལ་བར་བྱེད་ལ། མི་མཐུན་ཕྱོགས་ངང་གིས་སེལ་བར་བྱེད་ལ། མི་མཐུན་ཕྱོགས་ངང་གིས་སེལ་བར་བྱེད་པ་ལ་བྱའོ། །ཞེས་འདོད་པ་ནི་མི་འཐད་པ་སྟེ། གཞན་སེལ་དོན་གཉེར་གྱི་དགོས་པ་གཉིས་དང་ལྡན་ན་རྟོགས་པའི་གྲུབ་མཐའ་འགྱུར་བ་ལས་ཧེ་དུར་མི་འགྱུར་རོ། །དེས་ན་གཏན་ཚིགས་ཀྱི་ལུགས་ཀྱིས་གཏན་ལ་འབེབས་པར་བྱེད་པ་ལས་མི་འདའ་སྟེ། ཕབ་ཟིན་པའི་གྲུབ་ཡིན་ལ། འབེབས་མི་ནུས་པ་ཡང་གཏན་ཚིགས་ལྟར་སྣང་ཡིན་པས་སོ། །རབ་ཏུ་རྟོགས་པ་ཞེས་པའི་ཏིང་ཕྱིན་པའི་ཚིག་ཙམ་མ་ཡིན་པར་རྟོགས་པ་སྟེ། དེ་ལ་ཚུལ་གསུམ་ལས། ཤེས་བྱ་རབ་ཏུ་རྟོགས་པ་ནི་ཤེས་བྱ་ཇི་སྙེད་པ་མཐའ་དག་མ་ལུས་པར་རྟོགས་པའོ། །ངོ་བོ་རབ་ཏུ་རྟོགས་པ་དེ་སོ་སོའི་དོན་ལྷག་ཆད་མེད་པར་རྟོགས་པའོ། །དཔེར་ན་བུ་གའི་ནམ་མཁའ་དང་ནམ་མཁའི་ཆེན་པོའི་ངོ་བོ་ལ་ཁྱད་མེད་པ་ལྟར་ཟག་བཅས་ཀྱི་མཐོང་ལམ་དང་། ཟག་མེད་ཀྱི་མཐོང་ལམ་དང་། རྒྱལ་བའི་དགོངས་པ་དང་གསུམ་པོ་ངོ་བོ་ལ་ཁྱད་པར་མེད་དེ། རྒྱལ་པོའི་སྲས་དང་ཤིང་སྣའི་མེ་བཞིན་ནོ། །འོ་ན་བསྒོམ་མི་དགོས་སམ་ཞེ་ན་སྐབས་འདིར་ནུས་པ་རབ་ཏུ་རྟོགས་པ་མིན་པས་བསྒོམ་པས་ནུས་པ་བོགས་སུ་འགྲོ་བར་ཡོད་དེ་ནམ་མཁའ་འདྲ་ཡང་རྒྱ་ཆེ་ཆུང་མི་འདྲ་བ་ལྟར་རོ། །ཡིས་ཞེས་པ་ས་སྒྲ་སྨོས་པ་ནི་ཧེ་དུར་འགྱུར་བས་བྱེད་པའི་ཚིག་སྟེ། སྤྱན་འགྲེལ་ལས་བྱ་བ་དང་བྱེད་པ་དང་། བྱས་པ་དང་གསུམ་དུ་འགྱུར་གྱིས་དང་རྣམ་གྲངས་སྨོས་པའི་ཕྱིར་ཧེ་དུར་འཐད་ཅེས་པ་དང་། མངོན་ཞེས་པ་རང་རིག་པའི་མངོན་སུམ་དུའོ། །རྫོགས་པ་ནི་འབྲས་བུའི་ཆོས་ཐམས་ཅད་ལྷག་མ་མེད་པར་རྫོགས་སོ། །རྒྱལ་པོ་ནི་དེ་ལྟར་ཤེས་ན་ཆོས་ཐམས་ཅད་ལ་རང་དབང་བསྒྱུར་བས་སོ། །ཆེ་བ་ལ་གསུམ་ལས། རང་རིག་པའི་ངོ་བོས་ཆེ་སྟེ་རྟོགས་པ་དེ་ལས་ལྷག་པ་མེད་པས། རྒྱལ་བ་ལ་ཡང་མི་མངའ་བ་སྟེ་སངས་རྒྱས་དང་སྤྱོད་ཡུལ་གཅིག་པར་རྟོགས་པའོ། །ཡོན་ཏན་གྱི་ཆེ་བ་ནི། དེ་ལྟར་རྟོགས་ན་སངས་རྒྱས་ཀྱི་ཡོན་ཏན་བཙལ་བ་མེད་པར་སྣང་ངོ་། །ལས་ཀྱིས་ཆེ་བ་ནི་མཐའ་ཡི་ལྟ་ངན་ཐམས་ཅད་ངང་གིས་སེལ་བར་བྱེད་པས་སོ། །དེ་ནི་ལྟ་བའི་ཆེ་བའོ། །རང་སྤྱིའི་སྐབས་སུ་ངག་དོན་ནི། །ཉོན་མོངས་མི་སྤོང་དོན་དེ་ནི། །གབ་པ་ཡིན་ནམ་བསྒྲགས་པ་ཡིན། །དྲང་དོན་ཡིན་ནམ་ངེས་དོན་ཡིན། །མི་སྤོང་བ་ཡི་འཐད་པ་གང་སྤོངས་སམ་སྤྱད་ན་ཉེས་པ་ཅི་ཡོད་དོན་བཞི་སྙིང་པོའི་སྐབས་སུ་ཤེས། རང་སྤྱི་རང་ལ་རྣམ་གཉིས་ཏེ། །ཐུན་མོང་དང་ཁྱད་པར་རོ། །དང་པོ་ཞེ་སྡང་མནར་སེམས་སོགས། །རང་གི་མཚན་ཉིད་མ་འདྲེས་པའོ། །མི་རྟག་སྡུག་བསྔལ་སྟོང་བདག་མེད། །སྤྱིའི་མཚན་ཉིད་ཀུན་ལ་མཚུངས། །ཁྱད་པར་རང་གི་མཚན་ཉིད་ནི། །རིག་པ་སྒྱུ་མར་མ་འགགས་གསལ། །སྤྱིའི་ཡི་མཚན་ཉིད་ཆོས་རྣམས་ཀུན། །དོན་དམ་སྤྲོས་བྲལ་ངང་དུ་གཅིག །མཐའ་དང་བྲལ་བ་ནི་སྤང་པས། །མཐའ་དང་བྲལ་བ་མིན་ཏེ་མཐའ་མ་སྤང་བྲལ་བའོ། །རྣམ་པར་དབྱེ་བ་ནི། འབྱུང་བཞི་བཅུ་དྲུག་ཏུ་འབྱེད་པ་ནི་མིན་གྱི་འབྱུང་བ་ལྔ་ལ་འབྱུང་ཆུང་ཉེར་ལྔའོ། །ཕུང་པོ་ལྔ་ཡིས་དང་། དོན་མཚོན་ཏེ་གཟུགས་ཀྱི་ཕུང་པོས་སྣང་སྟོང་དབྱེར་མེད་མཚོན། དེས་འདྲེ་སྟེ། ཚོར་བས་མྱོང་སྟོང་དབྱེར་མེད་དང་། འདུ་ཤེས་མཚན་མར་འཛིན་སྟོང་། འདུ་བྱེད་སེམས་སྟོང་། རྣམ་ཤེས་ཕུང་པོ་རིག་སྟོང་དབྱེར་མེད་དུ་མཚོན་དབང་པོ་ལྔས་མཚོན་པ་དང་ཤེས་ཏེ། རང་སྣང་གིས་གཟུགས་འཛིན་པ་ལ་སོགས་པའམ། ཡུལ་ལྔས་དང་མཚོན་ཏེ་གཟུགས་སྣང་སྟོང་དབྱེར་མེད་ལ་སོགས་པའོ། །ཉོན་མོངས་པ་ལྔས་དང་ཤེས་ཏེ་ཆགས་པས་འདུ་འབྲལ་མེད་པར་ཤེས། སྡང་བའི་དངོས་འཛིན་མེད་པར་ཤེས། །གཏི་མུག་འབྱེད་པ་མེད་པར་ཤེས། །ང་རྒྱལ་ཉོན་མོངས་ཟིལ་གནོན་ཤེས། །ཕྲག་དོག་གིས་ནི་གཉིས་མེད་ཀྱི། །ངང་དུ་གཉིས་རྟོག་མི་ཚུག་ཤེས། །ཁ་དོག་ལྔས་ཡེ་ཤེས་ལྔ་མཚོན་པའམ། །ཡང་ཆོས་ཉིད་དུས་གསུམ་མི་འགྱུར་མཐིང་། །ཉེས་སྐྱོན་བྲལ་བ་དཀར་པོ་སྟེ། །སེར་པོས་ཡོན་ཏན་རྒྱས་པ་མཚོན། །དམར་པོས་འགྲོ་བའི་དོན་ལ་ཆགས། །ལྗང་གུས་ཕྲིན་ལས་སྣ་ཚོགས་འགྲུབ། །ངེས་ཚིག་ངོ་བོ་ལ་སོགས་པ་བསྒྲུབ་བྱ་རང་བྱུང་ཡེ་ཤེས་དང་སྦྱར་ན། རྒྱུ་རྐྱེན་མེད་པར་སྣང་བ་གསལ་བའི་ཕྱིར་རང་བྱུང་ཡེ་ཤེས་ཡིན་བྱས་ན། ངེས་ཚིག་གི་སྒོ་ནས་རྟོགས་པའོ། །སྣང་སྟོང་གཉིས་སུ་མེད་པའི་ཕྱིར་རང་བྱུང་ཡེ་ཤེས་ཡིན་བྱས་ན་ངོ་བོའི་སྒོ་ནས་སོ། །མཐའ་ཐམས་ཅད་དང་བྲལ་ཞིང་བཟུང་དུ་མེད་པའི་ཕྱིར་རང་བྱུང་ཡེ་ཤེས་ཡིན་བྱས་ན་མཚན་ཉིད་ཀྱི་སྒོ་ནས་སོ། །རྩོགས་ནི་ཡོན་ཏན་ནོ་ཟེར། བསྒྲུབ་བྱེད་གཏན་ཚིགས་དང་སྦྱར་ན། །ངེས་ཚིག་གི་སྒོ་ནས་གཏན་ལ་འབེབས་པ་ནི་རྟོགས་པ་དག་པ་མཉམ་པའོ། །ངོ་བོ་ནི་ཚིག་དོན་མི་མཐུན་པ་ལྟ་བུའོ། །མཚན་ཉིད་རང་སེམས་ནི་མཐའ་བྲལ་རྣམ་དབྱེ་ལ་སོགས་པའོ། །སྩོགས་ནི་ལས་ཀྱི་སྒོ་ནས་བཏགས་པའོ། །ཐམས་ཅད་འཇིགས་བྱེད་ཅེས་པ་ཆོས་ཐམས་ཅད་ཉིད་སྤྲོས་བྲལ་དུ་ཤེས་པ་ནི་དངོས་པོ་འཇིག་པའོ། །དེ་ཉིད་ཡེ་ཤེས་སུ་རང་གསལ་བ་ནི་དངོས་མེད་འཇིགས་པའོ། །ཐབས་ཀྱི་ལྟ་སྤྱོད་ཅེས་པ་ལ་སོགས་པའི་སྐབས་སུ། མ་རེག་ན་ར་གཉིས་མདོ་སྔགས་གཉིས་ལ་ལྟ་བ་དང་འབྲས་བུ་ལ་ཁྱད་པར་མེད་ལ། འོན་ཀྱང་ཁྱད་པར་གསུངས་པ་ནི་ཐབས་ཀུན་རྫོབ་ཀྱི་ཁྱད་པར་ཡིན་ཟེར་བ་ནི། འཐད་པ་མ་ཡིན་ཏེ། འདི་ལྟར་ཁྱད་པར་མེད་ན་ཡིན་ཚུལ་དངོས་པོའི་གནས་ལུགས་ལ་ཁྱད་མེད་དམ། རྟོག་ཚུལ་བློའི་སྣང་བ་ལ་ཁྱད་པར་མེད་ཅེས་བརྟག །དང་པོ་ལྟར་ན་ཆོས་ཐམས་ཅད་ལ་ཡང་ཁྱད་མེད་ན་མདོ་སྔགས་ཀྱི་ལྟ་ཅི་སྨོས། གཉིས་པ་ལྟར་ན་རྟོགས་ཚུལ་བློའི་སྣང་བ་ཡིན་ནམ་མིན་བརྟག །མིན་ན་བློ་སྣང་དུ་རྒྱས་པ་ལས་བཤད་པ་དང་། ཐེག་པ་དངོས་པོ་ལ་གྲུབ་པས་གཞི་བཟང་ངན་དུ་ཐལ། །འདོད་ན་གཉིས་མེད་ཡེ་ཤེས་དང་འགལ་ལོ། །བློ་སྣང་ཡིན་ན་ཤེས་བྱེད་བློ་ལ་ཆེ་ཆུང་ཡོད་པ་ལྟར་ཤེས་པའི་ལྟ་བ་ཡང་ཁྱད་ཡོད་མེད་བརྟག །མེད་ན་ཐེག་པ་ཆེ་ཆུང་གི་ལྟ་བ་ཡང་ཁྱད་མེད་པར་ཐལ། ཡོད་ན་མདོ་སྔགས་ཀྱི་ལྟ་བ་ཁྱད་མེད་དང་འགལ། དེ་གཉིས་བློ་ཆེ་ཆུང་མེད་དོ་ཞེ་ན། འོ་ན་དགོངས་འདུས་ཞེ་བཞི་པ་ལས། བློ་ཆེ་ཆུང་དགུ་ལ་དོན་དམ་པའི་ཐེག་པ་དགུར་བཤད་པ་དང་འགལ། དེ་དྲང་དོན་དགོངས་པ་ཅན་ནོ་ཞེ་ན། འོ་ན་མན་ངག་ལམ་རིམ་དང་ལ་ཤན་ལ་མདོ་སྔགས་ཀྱི་ཁྱད་པར་བཤད་པ་དེ་ཅི། དེའང་དྲང་དོན་ན་ལུགས་ཀྱིས་མན་ངག་ནི་ལུང་རིགས་ཀྱི་དགོངས་པ་འགྲེལ་པ་ངེས་དོན་འབའ་ཞིག་བཀོད་པ་ཡིན་ན། །ལུང་མན་ངག་ཀུན་དྲང་དོན་ཡིན་ན་ངེས་དོན་ཁྱེད་རང་གི་ལོག་པ་འདོད་དམ། དེས་ན་མཁས་པ་དག་ཁྱད་པར་བདུན་དུ་བཞེད་དེ། གཞུང་ལས་ལྔས་བཞེད་དོ། །ཆོས་ཉིད་རྟོགས་པའི་ཤེས་རབ་ཀྱིས་སྲིད་གསུམ་དུ་འཛིན་པའི་རྟོག་པ་བཅོམ་སྟེ། ཆོས་ཐམས་ཅད་ཡེ་ཤེས་རང་གསལ་བ་ཉིད་ལ་ཤེས་རབ་ཆེན་པོའི་སྦྱིན་བསྲེག་ཅེས་བྱའོ། །རྟོགས་པའི་ཡོན་ཏན་འཁོར་བ་དང་ངན་སོང་དུ་མི་ལྟུང་བར་བཤད་པ་དང་། སྣང་བྱེད་ཀྱི་སྐབས་སུ་ལྟུང་བ་བཤད་པ་དང་འགལ་ལོ་སྙམ་ན། དེ་རྟོགས་པའི་ཡོན་ཏན་མཐར་མི་བསླུ་བ་ལ་དགོངས་པ་སྟེ། ཡུན་གཅིག་ངན་སོང་དུ་སོང་ཡང་ཐད་མི་བསླུ་བས་མི་འགལ་ལོ་ཟེར་རོ། །དེ་མི་འཐད་དེ་མཐར་མི་བསླུ་བ་ཙམ་དུད་འགྲོ་ལ་ཟན་ཆང་གཅིག་བྱིན་པ་ཙམ་ལ་ཡོད་དེ། ལས་སྐལ་པ་བརྒྱར་ཡང་ཆུད་མི་ཟ་བར་བཤད་པའི་ཕྱིར་རོ། །དེ་དང་ལྟ་བ་རྟོགས་པའི་ཡོན་ཏན་ཁྱད་མེད་པར་འགྱུར་བའི་ཕྱིར་མི་འཐད་དོ། །ཉི་རེ་བ་ན་རེ། དཔེར་ན་སྐྱེས་བུ་སྟོབས་ལྡན་གྱིས་དར་གྱིས་ཕོ་ལོང་བརྡབས་པས་དེར་མི་ལྡོད་པར་འཕར་ནས་འགྲོ་བ་ལྟར། དམ་ཚིག་ཉམས་པའི་འགལ་རྐྱེན་དྲག་པོས་ངན་སོང་དུ་རྣམ་སྨིན་མི་བསླུ་བས་ཡུད་ཙམ་སོང་ཡང་རྟོགས་པའི་ཡོན་ཏན་གྱིས་དེའི་སྡུག་བསྔལ་གྱིས་མི་གོས་ཏེ། དགོངས་འདུས་ལས་ཇི་ལྟར་ཕོ་ལོང་བརྡབས་པ་བཞིན། ཞེས་ནས་རེག་འགྱུར་མྱོང་བར་འགྱུར་མ་ཡིན། ཞེས་པའི་བར་དུ་བཤད་པ་ལྟར་ཟེར་ཏེ། དེ་ཡང་མི་འཐད་དེ་དྲུག་པ་ནས་དེའི་སྡུག་བསྔལ་བཟོད་བླགས་མེད་ཅེས་སྡུག་བསྔལ་མྱོང་བར་བཤད་པས་སོ། །འོ་ན་ཇི་ལྟ་བུ་ཞེ་ན། འཁོར་བ་མི་ལྟུང་བ་ཉིད་དོ། །ལྟུང་བ་བཤད་པ་ཅེས་མ་གཏོགས་པར་གདམ་ངག་གི་སྟོབས་ཀྱིས་དགོངས་པ་དེ་དམ་ཚིག་ཉམས་པའི་འགལ་རྐྱེན་གྱིས་ལྟུང་བར་བཤད་པ་ཡིན་ཏེ་འདི་ཉིད་ལས། བསམ་གྱིས་མི་ཁྱབ་མ་མཐོང་བར་ཅེས་པ་ལ་སོགས་པ་བཤད་པས་གསལ་ལོ། །རྟོགས་པ་ནི་མི་ལྟུང་སྟེ་ཉེས་ལྟུང་མེད་པར་བཤད་པའི་ཕྱིར། གཞན་ཡང་དམ་ཚིག་གི་ངོ་བོ་ལྟ་བར་ཡིན་པར་བཤད་པས་རྟོགས་ན་རྒྱུ་དམ་ཉམས་པ་མེད་པའི་ཕྱིར། དེའི་རྐྱེན་གྱིས་ངན་སོང་དུ་ལྟུང་བ་མེད་དོ། །འོ་ན་གདམ་ངག་གིས་བསྒོམ་པ་དེ་ལྟུང་ན་བསྒོམ་པ་དོན་མེད་པར་འགྱུར་སྙམ་ན། དེ་འགལ་རྐྱེན་མེད་ཅིང་མཐུན་རྐྱེན་ཕྲད་ན་མི་ལྟུང་བས་དོན་ཡོད་ལ། དེ་གཉིས་དང་མི་ལྡན་ན་ལྟུང་བའོ། །ཟག་བཅས་ཀྱི་སྐབས་སུ་ཆོས་ཉིད་རང་གི་མཚན་ཉིད་མཐོང་ངམ་མི་མཐོང་ཞེ་ན། མཐོང་བ་སྟེ་དེ་ཡང་སྤྱིར་སྤྱི་དང་རང་གི་མཚན་ཉིད་མཐོང་བ་ཡང་གི་ཁྱད་པར་ཇི་ལྟ་བུ་ཞེ་ན། སྒྲ་སྤྱིར་སྣང་བ་ལ་བརྟེན་ནས་མིང་གིས་མཚོན་པའི་དོན་ཅིག་བློ་ཡུལ་དུ་ཡིད་ལ་བྱེད་པ་ནི་བློ་རྟོག་པའི་ཡུལ་ཡིན་པས་སྤྱིའི་མཚན་ཉིད་མཐོང་བའོ། །དེ་ལས་ལོག་ཏེ་རིག་པ་ཡུལ་མེད་རང་གསལ་དུ་མཐོང་བ་ནི་རང་རིག་མངོན་སུམ་གྱི་སྤྱོད་ཡུལ་བ་ཡིན་པས་རང་གིས་མཚན་ཉིད་མཐོང་བའོ། །འོ་ན་ཟག་མེད་དུ་མཐོང་བ་དང་། །ཁྱད་ཅི་ཡོད་ཅེ་ན། ངོ་བོ་ལ་ཁྱད་མེད་ལ་ནུས་པ་ལ་ཁྱད་ཡོད་པ་སྟེ། རྒྱལ་པོའི་སྲས་དང་ཤིང་སྣའི་མེ་བཞིན་ནོ། །ཞེས་པའི་དཔེ་ཡི་བསྟན་ཧོ། ཁ་གཅིག་ཁ་ན་རེ་རང་གི་མཚན་ཉིད་མཐོང་བའི་ཕྱིར་བསྒོམ་མི་དགོས་པར་ཐལ་ཟེར་རོ། །རང་གི་མཚན་ཉིད་མཐོང་ཡང་སྔར་འཁོར་བ་ཐོག་མ་མེད་པ་ནས་གོམ་པའི་ཕྱིན་ཅི་ལོག་གི་ཞེན་པ་སྤོང་བ་ལ་བསྒོམ་དགོས་པ་ཁོ་ནའོ། །འོ་ན་རང་གི་མཚན་ཉིད་མ་མཐོང་བར་འགྱུར་སྙམ་ན། འོ་ན་ཁྱེད་ལྟར་ན་ཡང་ས་དང་པོར་བདེན་པ་མཐོང་བའི་ཕྱིར་གཉིས་པ་ལ་སོགས་བསྒོམ་མི་དགོས་པར་མཚུངས་སོ། །དེ་བདེན་པ་མཐོང་ཡང་བསྒོམ་པས་སྤངས་པའི་ཉོན་མོངས་པ་རྒྱུད་ལ་ཡོད་པས་དེ་སྤོངས་བའི་གཉེན་པོར་བསྒོམ་དགོས་སྙམ་ན། འདིར་ཡང་གོང་མ་ལྟར་ཡིན་པས་མཚུངས་པ་ཁོ་ནའོ། །རང་གི་མཚན་ཉིད་མཐོང་ན་ཕྱིན་ཅི་ལོག་གི་ཞེན་པ་ཡོད་པར་འགལ་སྙམ་ན། འོ་ན་ཁྱེད་རང་ལྟར་ན་བདེན་པ་མཐོང་བའི་ཕྱིར་རྒྱུད་ལ་ཡོད་པར་འགལ་ལོ་ཞེས་མཚུངས་སོ། །ལེའུ་གཉིས་པ། ཨཱི་ཐཱི། དེ་ལྷར་རྟོགས་པའི་གསལ་ཆ་ཡོད་གོམས་པའི་བརྟན་ཆ་མེད་པས་རླུང་གིས་བསྐྱོད་པའི་མར་མེ་ལྟར་མི་བརྟན་པ་ལ། དེ་ཉིད་བརྟན་པར་བྱེད་ཅིང་ཕྱིན་ཅི་ལོག་གི་ཞེན་པ་སྤོངས་བ་ལ་བསྒོམ་དགོས་པས། གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་བཤད་པར་བྱའོ། །དེ་ལ་ཡང་བློ་ཆེ་ཆུང་གི་བྱེ་བྲག་གིས་གཉིས་ཏེ། འོག་ཏུ་རྒྱས་པར་འཆད་དོ། །དེ་གཉིས་ཀྱི་ཁྱད་པར་ནི་བདེན་པར་དབྱེར་མེད་ཅིག་ཆོད་དུ་རྟོགས་ཤིང་ཅིག་ཆོད་དུ་བསྒོམ་པས་འབྲས་བུ་ལ་སྦྱོར་བ་ནི་ལམ་གཅིག་ཆར་བའོ། །བདེན་པ་དབྱེར་མེད་རིམ་གྱིས་བསྒོམ་རྟོགས་ཤིང་རིམ་གྱིས་བསྒོམས་པས་འབྲས་བུ་ལ་སྦྱོར་བ་ནི་རིམ་གྱིས་འཇུག་པ་སྟེ། དེའི་ཕྱིར་རྟོགས་པའི་ངོ་བོ་ལ་ཁྱད་པར་མེད་པར་འདོད་པ་ནི་མི་འཐད་དེ་བློ་ཆེ་ཆུང་ཡོད་པའི་ཕྱིར་རོ། །དེ་གཉིས་ཀ་ལ་མཚན་ཉིད་གསུམ་གསུམ་དང་ལྡན་པར་སྦྱར་རོ། །ཚོགས་བརྒྱད་ཡེ་ཤེས་ལྔར་རྟོགས་པ་ནི་རྣམ་ཤེས་བརྒྱད་དང་ཡེ་ཤེས་ལྔ་རིམ་པར་སྦྱར་བའམ། ཡང་ན་རྣམ་ཤེས་ལྔ་ལ་ཡང་ཡེ་ཤེས་ལྔ་ལྔ་སྟེ། གསལ་ལ་རྟོག་པ་མེད་པ་མེ་ལོང་ལྟ་བུའི་ཡེ་ཤེས། ཆོས་ཐམས་ཅད་བཟང་ངན་གྱི་རིས་དང་བྲལ་བས་མཉམ་པ། སྤྱི་དང་རང་གི་མཚན་ཉིད་གསལ་ལ་མ་འདྲེས་སོ་སོར་མཐར་ཕྱིན་བྱ་རྩོལ་དང་བྲལ་བས་བྱ་བ་གྲུབ་པ། མཐའ་བྲལ་སྤྲོས་པ་མེད་པས་སྟོང་པ་ཉིད་ཀྱི་ཡེ་ཤེས་སོ། །མ་བཅོས་ལྷུན་མཉམ་ཞེས་པ་ལ་སོགས་པ་ནི། བྱེད་པ་པོ་དང་བྲལ་བ་ནི་མ་བཅོས་པའི་ངང་ལ་བཞག་པའོ། །རྩོལ་བ་དང་བྲལ་བས་ནི་ལྷུན་གྱིས་གྲུབ་པའི་ས་ལ་བཞག་པའོ། །ཁྱད་པར་གྱི་རིས་དང་བྲལ་བ་ནི་མཉམ་པའི་ངང་ལ་བཞག་པའོ། །དེ་ལ་བློ་མི་གཡོ་བ་ནི་ཇི་བཞིན་པའི་ངང་ལ་བཞག་པའོ། །བསྒོམ་བྱ་བསྒོམ་བྱེད་ཀྱི་སྐྱོན་བཅོས་པ་ནི་སྤྱོད་ཡུལ་གྱི་ཆོས་ཐམས་ཅད་མ་སྐྱེས་པའི་ཡེ་ཤེས་སུ་རང་གསལ་བས་བསྒོམ་བྱའི་ཡུལ་ཆོས་ཉིད་གུད་ན་མེད་པའོ། །བསྒོམ་བྱེད་ཀྱི་སེམས་ཉིད་མཐའ་ཐམས་ཅད་དང་བྲལ་བས་མ་གྲུབ་པའོ། །དེ་གཉིས་མ་གྲུབ་པར་བསྒོམ་པ་རང་གི་ངོ་བོ་ཡང་མ་གྲུབ་པས་དེ་གཉིས་ཀྱི་སྐྱོན་མེད་དོ། །འཆི་བ་དོན་དམ་ལ་སོགས་པ་ནི་འཆི་བ་བར་མ་སྐྱེས་ཟིན་པ་གསུམ་ནི་སྦྱངས་གཞི་རྒྱུད་ལ་གནས་ཚུལ་དང་མཚོན་པར་བྱེད་པའི་ཐུན་མོངས་པའོ། །དོན་དམ་པ་ཀུན་རྫོབ་དབྱེར་མེད་གསུམ་ནི་སྦྱོང་བྱེད་གཉེན་པོ་བསྒོམ་བྱ་ལམ་གྱི་ལྟ་བའོ། །རིམ་པར་བཤད་ན། འཆི་བའི་ཚེ་ཚོགས་དྲུག་ཡུལ་ལ་སྣང་བའི་རྟོག་པ་འགགས་པས་ཕྱི་སྣང་བའི་རྟོགས་པ་དང་། ནང་ཞེན་པའི་རྟོག་པ་གཉིས་ཀ་དང་བྲལ་བས་དོན་དམ་པའི་བདེན་པ་བསྒོམ་པ་སྟོང་པ་ཆེན་པོ་དང་འདྲ་ཞིང་སྦྱང་གཞི་ཡང་ཡིན་ནོ། །སྐྱེ་བ་བར་མའི་ཚེ་ན་ད་ལྟར་གྱིས་ལུས་རྡོས་པ་ཅན་དང་ནི་བྲལ། སྒྱུ་མ་ལྟ་བུའི་ལུས་འོད་དང་བཅས་ཏེ། དབང་པོ་ཀུན་གསལ་ཐོག་མེད་འགྲོ་བ་དང་། ཀུན་རྫོབ་གྱི་བདེན་པ་བསྒོམ་པའི་སྒྱུ་མ་ལྟ་བུ་དང་འདྲའོ། །དེ་ནས་ལས་ཀྱི་རླུང་གིས་བདས་ཏེ་སྐྱེ་གནས་ཀྱི་དང་པོ་མ་ཡི་མངལ་དུ་ཉིང་མཚམས་སྦྱར་བ་ན། རྟེན་ཁུ་བ་དཀར་དམར་ནི་ཉི་ཟླའི་གདན་ནོ། །རྣམ་པར་ཤེས་པ་ནི་གསུང་ཡིག་འབྲུ་དང་འདྲ། དེ་ནས་གཏུན་ཤིང་ལྟར་སྐྱེད་ཉེག་ཏུ་གྱུར་པ་ནི་ཐུགས་ཕྱག་རྒྱ་རྡོ་རྗེ་དང་འདྲ། དེ་ནས་ཁ་མིག་དོད་པ་ནི་སྐུ་ཕྲ་མོ་དང་འདྲ་སྟེ། དེ་ཉིད་དགེས་རྡོར་ལས་རང་བཞིན་གྱི་དགེ་སློང་ཞེས་བྱ་བ་སྟེ་སྐྲ་དང་ཁ་སྤུ་མེད་ཅིང་ཕྲུ་མའི་ཆོས་གོས་དང་ལྡན་ཏེ་ཨ་ཧཾ་གི་སྔགས་བརྗོད་པའོ། །དེ་ནས་བལྟམས་ཏེ་ལོ་བཅུ་གཉིས་ལོན་པ་མན་ཆོད་ནི་སྐུ་རྫོགས་པ་སྟེ་ཕྱག་རྒྱ་གཅིག་པ་ཕྲ་མོའོ། །དེ་ནས་ལོ་ཉེར་ལྔ་ལོན་པ་ནི་རགས་པའོ། །དེ་ནས་བུ་ཚ་དང་ལྡན་པ་ནི་སྤྲོས་པ་དང་འདྲའོ། །དེ་ཡོ་བྱད་མང་པོ་ཡོད་དེ་ལོངས་སྤྱོད་པ་ནི་ཚོགས་བསྒྲུབ་པ་དང་འདྲ་བས་བསྐྱེད་པའི་རིམ་པ་གསུམ་པོ་ལྟར་ཕྱག་རྒྱ་གཅིག་སྤྲོས་ཚོགས་བསྒྲུབ་གསུམ་ཆར་གྱིས་ལྷ་སྣང་སྟོང་གཉིས་མེད་དུ་བསྒོམ་པའོ། །སྐྱེས་བུ་སེང་གེ་བཞིན་རྒྱུ་བ་ཞེས་པས་གཅིག་པུར་གནས་པར་བཤད་པ་དང་། ལོངས་སྤྱོད་རེག་མ་དང་ལྡན་པར་བྱ་བ་གཉིས་མི་འགལ་ལམ་ཞེ་ན། དེ་ནི་སེང་གེ་ལྟར་གྲོགས་ངན་པ་སྤངས་པ་ཡིན་གྱི་ལམ་གྱི་གྲོགས་བཟང་པོ་མ་སྤངས་པས་མི་འགལ་ལོ། །གཞན་ཡང་འདི་ལ་སྤྱི་ཡི་སྔོན་དུ་འགྲོ་བ་ཡིན་པས་འདིའི་ཚེ་སུམ་མི་དགོས་དང་ཕྱག་རྒྱ་གཅིག་སྤྲོས་ལ་དགོས་པས་དེ་ལ་དགོངས་པའོ། །ཡན་ལག་བརྒྱད་པ་ནི་དང་པོ་ཞིང་སྤྲུལ་པའི་ཡན་ལག་དང་གཞན་བདུན་ཏེ་བརྒྱད་དོ། །གདམ་ངག་གི་སྟོབས་ཀྱིས་འཇུག་པ་ནི་ཐོག་མར་ཞི་གནས་དམིགས་པ་གང་ཡང་རུང་བ་ཞིག་ལ་སེམས་བཟུང་ནས་བློ་གནས་པ་དང་ལྷག་མཐོང་བལྟ་བའི་དོན་སྟོན་པ་སྟེ་བློ་ཆུང་གི་ཡུལ་ལོ། །ཤེས་རབ་ཀྱི་སྟོབས་ཀྱིས་འཇུག་པ་ནི་རང་གི་ཐོས་བསམ་གྱི་ཤེས་རབ་ཀྱིས་སྒྲོ་འདོགས་ཆོད་དེ་ལེའུ་གཉིས་པ་ལྟར་ལྟ་བ་རྟོགས་ན་བསྒོམ་པ་བློ་ཆེ་བའི་ཡུལ་ལོ། །དེ་ལ་གཉིས་ལས་དྲན་པ་ཙམ་གྱིས་ཆོས་ཉིད་སྤྲོས་བྲལ་དུ་གསལ་བ་ནི། ཅིག་ཆར་སྤྱི་བླུགས་སུ་བཞག་པའོ། །དེ་ལྟར་མི་གསལ་ན་སྔར་དོན་དམ་སྤྲོས་བྲལ་དུ་རྟོགས་པ་ནི་ལྟ་བ་དྲན་པར་བྱ་སྟེ་བསྒོམ་པ་ནི་ལྟ་བ་རྟོགས་པའི་རྗེས་སུ་བཞག་པའོ། །དེ་ལྟར་གཉིས་ནི་བློ་བཞག་ཐབས་དང་ངོ་བོ་གཉིས་ལ་བྱ། བྱིང་རྒོད་དྲུག་གི་བྱིང་བ་གསུམ་ནི་ཤེས་པ་རང་བཞིན་གྱིས་འཐིབས་པ་ནི་རང་བཞིན་གྱིས་བྱིང་བའོ། །ཆང་དང་ངལ་དུབ་དང་དྲོ་བར་བསྡད་པས་འཐིབས་པ་ནི་རྐྱེན་གྱིས་སོ། །ཤེས་པ་ནང་དུ་བསྡུས་པས་འཐིབས་པ་ནི་ཆེད་དུ་བྱས་པས་བྱིང་བའོ། །རྒོད་པ་གསུམ་ལ། རང་ཤུགས་ཀྱིས་ཤེས་པ་འཕྲོ་བ་ནི་རང་བཞིན་གྱིས་གྲུབ་པའོ། །བྱ་བ་མང་པོ་ལ་ཞུགས་པའམ་གྲོགས་འཆལ་བགད་ཅན་གྱི་སྟོབས་ཀྱིས་ཤེས་པ་ཡུལ་ལ་འཕྲོ་བ་ནི་རྐྱེན་གྱིས་སོ། །དོན་གསལ་པོ་གཅིག་འདོད་དེ་ཤེས་པ་ཁ་བཏེགས་ཏེ་ཡུལ་ལ་འཕྲོ་བ་ནི་ཆེད་དུ་བྱས་པས་རྒོད་པ་སྟེ་དེ་ལྟར་དྲུག་གོ །ཉམས་ལྔ་ལས་གཡོ་བའི་ཉམས་ནི་དོན་བློ་ལ་མི་གནས་པར་ཡུལ་རྟོག་པ་འཕྲོ་བ་སྟེ་དེ་ཉམས་སུ་ཅི་འགྱུར་ཞེ་ན། ཐ་མལ་པ་ལ་དེ་མི་འབྱུང་སྟེ་བསྒོམ་པའི་སྟོབས་ཀྱིས་རྟོག་པ་འཕྲོ་བ་ཚོར་བ་ཉམས་སོ། །རྒྱུད་ལ་ལྡན་གསུམ་ནི་དེ་ཏིང་ལྟ་བུ་ལ་སྦྱར་ན། ཤེས་པར་བྱ་བའི་གཏན་ཚིགས་མངོན་དུ་བྱ་བར་རྒྱུད་ལ་ལྡན་ནོ། །གླང་པོ་བརྗིད་གནོན་གྱི་དམ་ཚིག་མངོན་དུ་སྤྱོད་རྒྱུད་ལྡན་ནོ། །ཆོས་ཐམས་ཅད་གཟུགས་བརྙན་ལྟར་ཤེས་པའི་དམ་ཚིག་ནི་མངོན་དུ་བྱེད་རྒྱུད་ལ་ལྡན་ནོ། །དྲོད་རྟགས་བརྟན་པའི་དགོངས་པ་ནི་འབྲས་བུ་ལ་དྲོད་པའི་ཡིད་ཅན་རུ་ལ་ནན་ཏན་གྱིས་འཇུག་པའི་ཕྱིར་རོ། །མཚན་བཅས་ཀྱི་འདའ་ཀ་མའི་སྐབས་སུ། ཤེས་པ་གསུམ་འདོད་ཕུང་དང་ཟླ་གདན། ཧཱུཾ་ཉིད་རིང་པོ་དང་གསུམ་བརྩེགས་པ་དམིགས་པ་ལ་བརྟན་པ་ཐོབ་ནས་ཟླ་དཀྱིལ་དང་ཧཱུཾ་གཉིས་འོད་གཉིས་ལ་ཐིམ། འོད་དེ་དང་རླུང་དབུགས་དང་འགྲོགས་ཏེ་ཕྱིར་འགྲོ་བ་དང་། ནང་དུ་དབུགས་འགྲེལ་ཙམ་ན་ཚུར་སྡུད་དེ། མཐར་འགྲེན་མ་ནུས་པར་དབུགས་ཕྱིར་འགྲོ་ཙམ་ན་འོད་ཀྱིས་སྟོང་ཁམས་ཁྱབ་པར་བརྡལ་བ་དེའི་ངང་ལ་བློ་འདུག་གོ །འབྲས་བུ་ཆོས་སྐུ་ཐོབ་པར་བསྟན་པ་ནི། དང་པོས་ཆོས་སྐུ་ཐོབ་པ་མ་ཡིན་ཏེ། ཡིན་ན་ལམ་གཞན་ལ་དགོས་པ་མེད་པའི་ཕྱིར་རོ། །འོན་ཀྱང་སར་བཤད་པ་ནི་རྒྱུའི་ཆོས་མཐུན་འབྲས་བུ་ལ་སྦྱར་བ་སྟེ། དཔེར་ན་རྒྱུ་ཕབས་ཀྱི་ཚེ་ལུང་ཁུར་མོར་བཏང་བས་འབྲས་བུ་ཆང་གི་ཚེ་མངར་བར་འགྱུར་བས་ཡང་རྒྱུ་གཞན་དང་འཚོག་ནས་འབྱུང་བ་ཡིན་ཏེ། ལུད་ཁུར་དེ་ཉིད་ཆན་ལ་བཏབ་ཀྱང་མངར་བར་མི་ནུས་པ་ལྟར་རོ། །རྒྱུ་ལམ་གྱི་དུས་ན་སྟོང་ཆེན་བསྒོམ་པས་འབྲས་བུ་ཆོས་སྐུ་ཐོབ་པས་ཀུན་ཏུ་བཟང་ལ་སོགས་པ་རྒྱུ་གཞན་དང་འཚོགས་ནས་ཆོས་སྐུ་ཐོབ་པ་ཡིན་གྱི། དེ་ཉིད་ཀྱིས་ཐོབ་ན་ལམ་གཞན་ལ་དགོས་པར་འགྱུར་རོ། །འོ་ན་རྒྱུ་འཚོགས་ནས་ཆོས་སྐུ་དེ་འདུས་བྱས་སུ་འགྱུར་རམ་ཞེ་ན། །དེ་གསལ་བྱེད་རྒྱུ་ཙམ་ཡིན་གྱི་སྐྱེད་བྱེད་ཀྱི་རྒྱུ་ལ་མི་ལྟོས་པས་ངེས་པ་མེད་དོ། །ལེའུ་གསུམ་པ།། ཨཱི་ཐཱི། དེ་ལྟར་སྟོང་པ་ཆེན་པོའི་རྣམ་འབྱོར་ལ་གོམས་པས་དངོས་པོ་ལ་ཡང་བདག་ཏུ་འཛིན་པས་སྣང་བར་འཛིན་པའི་རྟོགས་པ་སྦྱོངས་སྟོན་པར་ཞེན་པས་དང་འཆིང་བས་དེ་བཀྲོལ་བ་དང་། གཞན་ཡང་སྟོང་ཉིད་གོམ་པས་ལས་སྒྱུ་མ་ལྟར་ཤེས་པ་དང་། དེ་མ་རྟོགས་པ་ལས་སྙིང་རྗེ་འབྱུང་བས་དེའི་ཕྱིར་དེའི་རྗེས་སུ་ཡེ་ཤེས་སྒྱུ་མ་བསྒོམ་པ་སྙིང་རྗེ་ཆེན་པོའི་རྣལ་འབྱོར་བཤད་པར་བྱའོ། །བདེན་པ་གཉིས་སུ་མི་སྣང་ཕྱིར་ཅེས་པས་ཁ་ཅིག་ན་རེ་ཀུན་སྣང་གི་བསྒོམ་བྱ་ནི་བདེན་པ་གཉིས་མེད་ཡིན་ལ། ཕྱག་རྒྱ་གཅིག་སྤྲོས་ནི་ཀུན་རྫོབ་ལྷའི་དཀྱིལ་འཁོར་བསྒོམ་པ་ཡིན་ཏེ། སྤྱིར་ལེའུ་གོང་མའི་བརྗོད་བྱའི་དོན་ལ་ཕྱག་འཚལ་བ་ཡིན་ལ་ཕྱག་རྒྱ་གཅིག་པའི་སྐབས་ན་གཉིས་མེད་ལ་ཕྱག་བཙལ་ནས་ཞེས་ནས་ཅེས་པས་སྔགས་ཀྱི་ལུགས་ཀྱིས་ཀུན་རྫོབ་ལྷའི་དཀྱིལ་འཁོར་ཡིན་པས་ཕྱག་རྒྱ་གཅིག་སྤྲོས་ལྷ་བསྒོམ་པའི་ཕྱིར་རོ་སྙམ་ན། དེ་ནི་འཐད་པ་མ་ཡིན་ཏེ་ཅིས་ཞེ་ན་གོ་རིམ་ནོར་བ་དང་གཞུང་དང་འགལ་བའི་ཕྱིར་རོ། །དང་པོ་ནི་ཐོག་མར་དོན་དམ་པ་བསྒོམ་ནས་དེའི་རྗེས་སུ་ཀུན་རྫོབ་མི་སྨོས་པར་གཉིས་མེད་སྨོས་པ་འགལ་དོན་དམ་གཅིག་པུ་ལས་གཉིས་སུ་མེད་པར་ཡོད་མེད་ཀྱི་སྒྲ་མི་འཇུག་གོ །གཞན་ཡང་གཉིས་མེད་གོམས་ནས་ཀུན་རྫོབ་བསྒོམ་པར་རིགས་པས་ཀྱང་མི་འཐད་དོ། །གཉིས་པ་ནི། འདི་ཉིད་ལས་སྐྱེ་བ་བར་མ་ཀུན་རྫོབ་སྟེ། ཞེས་པ་དང་། ཀུན་རྫོབ་སྒྱུ་མའི་དངོས་པོ་དྲུག་སྨོས་སོ། །དྲུག་སྨོས་པའི་ཕྱིར་རོ། །དེའི་ཕྱིར་མཁས་པ་དག་ནི་ཀུན་ཏུ་སྣང་བའི་བསྒོམ་བྱ་ནི་ཀུན་རྫོབ་སྒྱུ་མའོ་ཟེར་རོ། །རྡ་བསམ་གཏན་ན་རེ་ཏིང་ངེ་འཛིན་འདི་དག་ཇེ་ངན་ཇེ་ངན་སོང་སྟེ་ཕྱག་རྒྱ་གཅིག་སྤྲོས་ཀྱི་ཚེ་ཁ་མིག་ཅན་སྣང་བ་ཅན་བསྒོམ་པ་ཟེར་བ་ཡང་མི་འཐད་དེ། ཏིང་ངེ་འཛིན་གོང་མ་རང་བཞིན་རིག་པ་ལྟར་དབུ་མ་སེམས་ཙམ་པ་ཡང་ལུང་རིགས་ཁོག་བསྟུན་པ་ཡིན་ཏེ། གསང་སྔགས་ཀྱི་གྲུབ་མཐའ་གཉིས་མེད་བསྒོམ་པ་ཕྱག་རྒྱ་གཅིག་སྤྲོས་ཁོ་ན་ཡིན་ནོ། །ཏིང་ངེ་འཛིན་ལ་འཇུག་པའི་ཐུན་ཚད་ནི་ཉམས་ཀྱི་དུས་ཀྱིས་བྱས་ཏེ། འདི་ལྟར་གཡོ་བའི་ཉམས་ཀྱི་ཚེ་ཉིན་ཞག་ཕྲུག་གཅིག་ལ་ཐུན་བཞིར་བཅད་ནས་སོ་གཉིས་བོར་ནས་སོ་གཉིས་བར་དུ་བསྒོམ་པའོ། །དེས་འདྲེ་ཐོབ་པ་སོ་གཉིས་ལ་བཅུ་དྲུག་བསྒོམ་པ་ལ་སོགས་པར་སྦྱར་རོ། །གང་གིས་ཅེས་པ་ལ་སོགས་པ་ནི་འཁོར་འདས་ཀྱི་ཆོས་ཐམས་ཅད་ནི་ཡེ་ཤེས་རང་གསལ་གྱི་ངང་དུ་མི་ཕྱེད་པའི་སྙིང་རྗེ་ཆེན་པོ་རྒྱུ་ཤེས་རབ་ཀྱི་དབང་པོ་དྲུག་གིས་ཤེས་པའི་དོན་བློ་ལ་བཞག་པའི་ཐབས་ལ་གཉིས་ཏེ། སོ་སོར་རྟོགས་པའི་ཤེས་རབ་རྒྱུའི་བསྒོམ་པ་དང་། ལམ་སྔ་མ་གོམས་པའི་རྗེས་ལ་དགོངས་པའོ། །དང་པོ་ལ་གཉིས་ཏེ། ལྟ་བ་མཐོང་བའི་རྗེས་ལ་བཞག་པའོ། །རྟོག་དཔྱོད་སྔོན་དུ་བཏང་བ་ལ་བཞག་པའོ། །དང་པོ་ནི་ཆོས་ཐམས་ཅད་ཡེ་ཤེས་རང་གསལ་སྒྱུ་མ་ལྟར་རྟོགས་པའི་ངང་ལ། བློ་མི་གཡོ་བར་བཞག་པ་སྟེ། དེ་ནི་དེ་ནས་རྗེས་ཀྱི་བར་དུ་སྟེ་དཔེ་དྲུག་དང་སྒྱུ་མའི་དངོས་པོ་དྲུག་ཏུ་སྦྱར་བའམ། ཡང་དྲུག་ཀ་ཡེ་ཤེས་སྒྱུ་མ་ལྟ་བུའི་དཔེའོ། །དེས་ན་དཔེ་དྲུག་གི་ཚུལ་དུ་དག་གོ །གང་གཅིག་ན་བདག་དང་འགྲོ་བ་གཉིས་ངོ་བོ་ཡེ་ཤེས་རང་གསལ་དུ་དག་གོ །གཅིག་པས་དངོས་པོ་ཐ་དད་པ་མེད་ཅེས་སྦྱར། འོ་ན་ཐ་དད་དུ་སྣང་བ་ཞེ་ན། དེ་ནི་མཚོན་ཚུལ་གྱི་གསལ་བས་ཐ་དད་པ་དང་རྟོགས་པའི་བློས་ཐ་དད་སྣང་བའི་ཕྱིར་མཚན་ཉིད་གཅིག་པ་མེད་དོ། །དེས་ན་གཅིག་དང་ཐ་དད་གཉིས་མེད་པས་ན། ཐ་དད་མེད་པས་འགྲོ་དོན་བྱེད་པའང་མེད། གཅིག་པ་མེད་པས་འགྲོ་དོན་བྱ་བ་འགོག་པ་མེད་པར་མཐོང་བ་དེ་མ་ཤོར་ཙམ་དུ་བྱས་ནས་དེའི་རྗེས་ལ་བསྒོམ་པའོ། །གཉིས་པ་ནི་སྣང་བ་འདི་ལ་བདེན་པའི་སྙིང་པོ་རང་རྒྱུད་པ་གྲུབ་བམ་མ་གྲུབ་སྙམ་དུ་རྟོག་དཔྱོད་བྱས་ནས་མ་གྲུབ་པར་ཤེས་ན་དེའི་ངང་ལ་བློ་འཇོག་པའོ། །ལམ་སྔ་མ་གོམས་པའི་རྗེས་ལ་ཐོབ་པ་ནི། སྔར་ལྟ་བ་རྟོགས་པ་དང་སྟོང་པ་ཆེན་པོ་གཉིས་ལ་གོམས་པས་ཡེ་ཤེས་སྒྱུ་མ་བསྒོམ་སྙམ་དུ་དྲན་པ་ཙམ་གྱིས་ཅིག་ཆར་དུ་ཆོས་ཐམས་ཅད་ཡེ་ཤེས་སྒྱུ་མར་གསལ་བའོ། །དེ་ནི་རྟོག་དཔྱོད་ཀྱི་སྔོན་འགྲོ་ལ་མ་ལྟོས་ཏེ་སྔོན་དུ་འགྲོ་བ་མི་དགོས། ཐམས་ཅད་ཡེ་ཤེས་རང་གསལ་དུ་ཤེས་པས་དེ་ལས་མ་གཏོགས་པའི་ཆོས་མ་གྲུབ་ཏེ། གཉིས་སུ་འཛིན་པ་རང་སར་གྲོལ་བ་ནི་གསོད་པ་ཆེན་པོ་སྟེ་སྙིང་རྗེ་ཆེན་པོའོ། །འོ་ན་འདིར་དང་ཚད་མེད་སྨོས་ལ་འོག་ཏུ་ཡང་སྨིན་པས་ཟློས་པའི་སྐྱོན་ཆགས་སོ། །ཞེ་ན། འདིར་ནི་ཡེ་ཤེས་རང་གསལ་ཉིད་ལ་ཚང་ཚུལ་བརྩིས་པའོ། །འོག་མ་ནི་ཡེ་ཤེས་སྒྱུ་མ་གོམས་པ་ལས་གཞན་དུ་ཚད་མེད་པ་བཞིར་སྣང་བ་ཡིན་པས་ཟློས་སྐྱོན་མེད་དོ། །ཁྱད་པར་ནི་ཕ་རོལ་ཏུ་ཕྱིན་པ་ལྟར་ཆོས་ཅན་འཁོར་བའི་རྒྱུ་རྐྱེན་ལ་སོགས་པ་ལ་དམིགས་ནས་སྙིང་རྗེ་བསྒོམ་ལ། འདིར་ནི་ཆོས་ཉིད་འཁོར་བའི་རང་བཞིན་ལ་དམིགས་ནས་གཉིས་སུ་མེད་པའི་སྙིང་རྗེ་བསྒོམ་པའོ། །སྒྱུ་མའི་དངོས་པོ་དྲུག་ནི་བདག་མེད་པ་ལ་བདག་ཏུ་བརྟགས་པས་ལོག་རྟོག་གོ །རྐྱེན་ལས་སྐྱེས་པ་ལ་སོགས་པ་གསུམ་གྱི་ཕྱིར་སྒྱུ་མའོ། །རྟོག་མཐུན་གྱི་ཤེས་པ་མ་འཁྲུལ་བའི་ངོ་ལ་རྒྱུ་རྐྱེན་འདུས་ནས་འབྲས་བུ་སྣང་བས་རྟེན་འབྲེལ་ལོ། །རང་རྒྱུད་པ་ངང་གིས་སྟོང་པས་སྒྱུ་མ་སྟེ་འདྲེའོ། །རིག་པ་ཉིད་རང་སྣང་བས་རིག་པ་སྒྱུ་མ་འདྲེ། རྒྱལ་བའི་སྐུ་ཕྱག་རྒྱར་མ་འགགས་པས་ཕྱག་རྒྱར་རིག་པ་སྒྱུ་མ་འཁོར་འདས་ཀྱི་དངོས་གཞིར་མ་འགགས་པར་ཤར་བས་ཐབས་སྒྲིབ་བྱེད་མེད་པར་རང་གསལ་བས་ཡེ་ཤེས་སོ། །ཐུན་རྐྱང་ཅེས་པ་ནི་ཐུན་རྐྱང་པར་སོང་ན་རབ་འབྲིང་གི་བྱེ་བྲག་གིས་ཐུན་བརྒྱད་བཅུ་དྲུག་སོ་གཉིས་ལ་སོགས་པར་བསྒོམ་པའོ། །ཐུན་རྐྱང་པར་སོང་ན་ཉིན་མཚན་ཕྱེད་པར་བསྒོམ་ནུས་པ་ལ་བྱ་གསུང་ངོ་། །རྗེས་སུ་འཇུག་པ་ལ་གསུམ་སྟེ། ཉན་ཐོས་དགྲ་བཅོམ་པའི་རྗེས་སུ་འཇུག་པ། བྱང་སེམས་ས་ལ་གནས་པའི་བྱང་ཆུབ་སེམས་དཔའི་རྗེས་སུ་འཇུག་ཅིང་། གསང་སྔགས་སངས་རྒྱས་པའི་རྗེས་འཇུག་པའི་ཕྱིིར་ན་སངས་རྒྱས་ལྟར་སྤྱོད་པའོ། །དེ་བས་མང་དང་འབྲིང་ལ་མཉམ་ཞེས་པ་ནི། སྟོང་ཆེན་གྱིས་སྙན་མི་སྙན་ཆུང་ངུ་ཙམ་མཉམ་ལ། ཀུན་ཏིང་ནི་དེ་བས་གྲངས་མང་སྟེ་གྲགས་མ་གྲགས་མཉམ། དེ་ཡང་དེ་གཉིས་འབྲིང་པོ་ཙམ་མཉམ། ཉི་འོད་ལ་སོགས་པ་དཔེ་བཞིན་ནི་རིམ་པ་ལྟར་ད་ལྟར་གྱི་ཡིད་ལུས་གསུམ་ལས་མ་གཡོས་བཞིན་སྐྱེ་བ་ཕྱི་མའི་དེ་གསུམ་དུ་སྣང་བའི་དཔེའོ། །ཕྱི་མ་ཞེས་པ་སྒྱུ་མའི་ལྟ་བུའི་རྣལ་འབྱོར་བསྟན་པའི་ཕྱི་མ་ཕྱག་རྒྱ་གཅིག་པ་ནས་འཁོར་བར་མི་ལྡོག་པར་ཚེ་ལ་དབང་བསྒྱུར་བའི་རིག་འཛིན་ཐོབ་པར་བརྟན་ཞེས་སྦྱར་ཕྱི་མ་ལ་སྦྱོར་མི་ནུས་ན་ལན་གྲངས་གཞན་དེ་ཡང་ཕྱི་ཞེས་ཕྱི་མ་སྤྲོས་པའམ་ཚོགས་སྒྲུབ་ནས་འཁོར་བར་མི་ལྡོག་པ་དབང་བསྒྱུར་རིགས་སུ་ངེས་སོ། །འབྲས་བུ་ལོངས་སྐུ་ཐོབ་པར་བརྟན་པ་ནི་རྒྱུའི་ཆོས་མཐུན་འབྲས་བུ་ལ་སྦྱར་བ་སྟེ་ལེའུ་གསུམ་པར་བཤད་པ་བཞིན་ནོ། །ལེའུ་བཞི་པ་ཨཱི་ཐཱི། དེ་ལྟར་ཡེ་ཤེས་རང་གསལ་སྒྱུ་མ་ལྟ་བུ་གོམས་པས་སྟོང་པར་འཛིན་པའི་ཞེན་པ་སྦྱངས་ཀྱང་ཟུང་དུ་འཇུག་པ་ལ་མ་བརྟེན་པས་སྣང་སྟོང་རེས་འཇོག་ཏུ་ཞེན་པ་བཀྲོལ་བ་དང་། གཞན་ཡང་གོང་ལྟར་ཡེ་ཤེས་རང་གསལ་ཉིད། ཅིར་ཡང་སྣང་བ་ལས་འབྲས་བུ་ལྷའི་སྐུར་འཆར་བས་དེའི་ཕྱིར་ཕྱག་རྒྱ་གཅིག་ལ་བསྒོམ་པར་བཤད་པར་བྱའོ། །སེམས་སྦྱངས་པ་ལ་གཉིས་ལས། གདམས་ངག་གིས་ལྷ་བསྒོམ་པར་ལ་འཇུག་པ་ལ་སྔ་མ་བསྟན་པ་མེད་ཀྱང་ལས་དང་པོ་པ་ཡིད་ཀྱི་ལྷ་བསྒོམ་པའི་དུས་སུ་ཡི་གེ་ལ་སེམས་སྦྱངས་པའོ། །ཤེས་རབ་ཀྱིས་འཇུག་པ་ནི་ལྟ་བ་རྟོགས་པ་ནས་ཀུན་ཏིང་གི་བར་དུ་ལམ་བརྟན་ནས་ཕྱག་རྒྱ་གཅིག་པ་བསྒོམ་པའི་སྔོན་དུ་ཡིག་འབྲུ་ལ་སེམས་སྦྱངས་པའོ། །དེ་གཉིས་ཆར་གྱི་འཇུག་པའི་གཞི་ཡིག་འབྲུ་བསྒོམ་པ་འདི་ཡིན་ཞེས་བྱའོ། །ཁ་གཅིག་ན་རེ་ཨ་དང་ཧཱུྃ་བསྒོམ་པ་གཉིས་གདམས་ངག་དང་ཤེས་རབ་ཀྱི་འཇུག་པ་ཡིན་ཟེར་ཏེ་མི་འཐད་དོ། །འོན་ཀྱང་ཡིག་འབྲུ་གཉིས་པོ་ནི་རྒྱུ་མ་སྐྱེས་པ་དང་། ངོ་བོ་རང་རིག་པའི་ཡེ་ཤེས་ཡིན་པས་ཨ་དང་ཧཱུཾ་ངོ་། །ཡང་ན་གདུལ་བྱ་མོས་པ་ཐ་དད་ཀྱི་དབང་དུ་བྱས་པར་ཟད། ལྷ་བསྐྱེད་པའི་ཐབས་དང་ལམ་ཀྱི་རིམ་པ་ནི་ཕྱག་རྒྱ་བསམ་གཏན་ལྟར་སྦྱར་བས་སླ་བར་ཟད་དོ། །རྡོ་རྗེ་རྣམ་གསུམ་རིག་གསུམ་བསྒྱུར་བ་ནི། བུདྡྷ་ཧེ་རུ་ཀའི་ༀ་སྨུག་ནག་ལས་ཧེ་རུ་ཀ་ལ་སོགས་པར་སྦྱར་ཏེ་སླ་བར་ཟད་དོ། །བཏང་སྙོམས་ནི་གསུམ་སྟེ། རྩོལ་བ་དང་བཅས་པ་དང་། རྩོལ་བ་དོར་བ་དང་། དུས་ཕྱེད་པའི་བཏང་སྙོམས་གསུམ་གྱི་རིམ་པ་དང་སྦྱར་རོ། །བརྩོན་པ་ཆེ་ཆུང་བྱ་བ་དག་ཀྱང་ཉམས་ཀྱི་སྐབས་ཀྱིས་གསུམ་སྟེ། གཡོ་ཐོབ་ཀྱི་ཚེ་རྩོལ་བ་དང་བཅས་པའི་བཏང་སྙོམས་བླང་། གཉིས་པོ་དོར་བར་བྱ། གོམ་བརྟན་གྱི་ཚེ་རྩོལ་བ་དོར་བའི་བླང་། མཐར་ཕྱིན་པའི་ཚེ་དུས་ཕྱེད་པ་བླང་། གཉིས་པོ་དོར་གཟུགས་ལ་སོགས་པའི་ཡུལ་དྲུག་ཐིག་ལེ་སྤྲོས་བྲལ་རྣམས་པར་མི་རྟོག་པར་ཤེས་ཏེ་ལོངས་སྤྱོད་པ་ནི་མཚན་མ་མེད་པའི་སྤྱོད་ལམ་མོ། །ཡང་ན་འདོད་ཡོན་ལྷ་མོ་དྲུག་ཏུ་ཤེས་པར་བྱས་ཏེ་སྤྱད་པ་ནི་མཚན་མ་དང་བཅས་པའི་སྤྱོད་ལམ་མོ། །དབང་པོ་ཡུལ་དུས་ཀྱི་སྦྱོར་བ་ཞི་ཁྲོ་གང་ཡིན་གྱི་སྐབས་དང་སྦྱར་བ་ནི་ཞི་བ་ལྟར་ན་དབང་པོ་ལ་བརྟེན་ནས་སྐྱེ་བ་ཐབས་ཡབ་ཏེ་སེམས་དཔའ། དུས་ཀྱི་གོ་ཕྱེ་ནས་ཡུལ་སྣང་བ་ནི་ཤེས་རབ་ཡུམ་སྟེ་སེམས་མའོ། །དེ་ལྟར་ནའང་མིག་གིས་ཡུལ་མཐོང་བའང་ཐབས་ཤེས་རབ་གཉིས་སུ་སྦྱར་བས་གཟུང་འཛིན་གཉིས་རང་ཀ་མའི་ཞེན་པ་བཟློག་པའོ། །ཁྲོ་བོ་ལྟར་ན་དབང་པོ་རྣམ་ཤེས་ཁྲོ་མོ་དུས་ཀྱི་གོ་ཕྱེ་ནས་ཡུལ་ཕྲ་མེན་ནོ། །རྡོ་རྗེ་རྣམ་གསུམ་བསྒོམ་པས་རུ་མིན་པ་གཞན་ལ་ཕྱག་མི་འཚལ་བ་ནི། སྤྱིར་ལྕི་བ་བཞི་ལས་བསྒོམ་ཆེན་པའི་ཕྱག་ལྕི་བའི་དེས་ན་བདག་ལ་བརྟེན་ནས་གཞན་སྡིག་གསོག་པར་འགྱུར་རོ། །མདར་ནག་ན་རེ་སྤྱོད་ལམ་ཉིད་དུ་ལེགས་ཉེས་ཀུན་གྱི་མདོར་བསྟན་ནས། རྒྱས་པ་ལ་གཉིས་ལས་ལེགས་པར་འབྱུང་བའི་རྒྱས་བཤད་ནི། གདོལ་པ་ཁྱིའི་སྦྱོར་བ་ལ་སོགས་ཀྱིས་བསྟན་ནོ། །བདག་ཉིད་ལྷ་དང་མཉམ་སྦྱོར་ན། །གཞན་ཐོས་པ་དང་ཤེས་རབ་ལ་སོགས་པའི་ཡོན་ཏན་ཆུང་ཡང་འགྲུབ་པར་འགྱུར་རོ། །ཡི་དམ་གྱི་ལྷ་སྤངས་ན་སྦྱིན་པ་དང་ཚུལ་ཁྲིམས་ལ་སོགས་པའི་དགེ་བ་སྤྱད་ཀྱང་དགོས་པའི་དོན་འབྲས་བུ་མེད་པར་འགྱུར་ཏེ་སངས་རྒྱས་ཐམས་ཅད་སྤང་བའི་ཕྱིར་རོ། །གང་གིས་ཞལ་མཐོང་མོས་པ་ཡིས། །ཞེས་པ་ནི། ཡི་དམ་ལྷའི་ཞལ་མཐོང་ནས་ལྷ་དེ་ལ་མོས་པའི་སྟོབས་ཀྱིས་སྡིག་པ་འདག་སྟེ་འབྲས་བུ་ལ་སྦྱོར་བའམ། ཡང་ན་ཡི་དམ་ལྷ་མཐོང་བའི་རྣལ་འབྱོར་པ་ལ་མཆོད་པ་བྱས་པའི་བསོད་ནམས་དུ་སྦྱར་རོ། །དེ་ཉིད་བར་ཕྱི་ཞེས་པ་རྣམ་པར་སྨིན་པའི་རིག་འཛིན་སྲིད་པ་བར་མ་དོ་ལ་ཐོབ་པའི་ཚུལ་ནི། བར་དོའི་སྐབས་སུ་བསྒོམ་བྱའི་ལྷའི་རྣལ་འབྱོར་དུ་གསལ་ཡང་སྔར་གོམས་པའི་བག་ཆགས་ཀྱིས་སྔར་གྱི་ལུས་སུ་འཛིན་པས་བསྒྲིབས་ཏེ། དེ་དང་བྲལ་མ་ཐག་ཏུ་ཕྱག་རྒྱ་ཆེན་པོ་ལ་སྦྱར་བའི་ཆོས་གསུམ་ལྡན་ནོ། །དེ་ལྟར་ཕྱག་རྒྱ་གཅིག་པའི་བློ་ཆུང་གི་བྱེ་བྲག་གིས་ཚེ་འདི་ཉིད་ལ་སྦྱོར་བ་དང་། སྲིད་པ་བར་དོ་ལ་སྦྱོར་བ་དང་། ལན་གྲངས་གཞན་ལ་ཐོབ་པར་ནི་འདི་ཉིད་དང་ལམ་ཆུང་ངུ་གཅིག་པ་བཤད་པས་འཐད་དོ། །ཕྱག་རྒྱ་གཅིག་སྤྲོས་ནས་རྣམ་སྨིན་དུ་སྦྱོར་བས་ཐོད་རྒལ་བ་ཞེས་བྱ་སྟེ། སྤྱིར་གྲོལ་ལམ་རིམས་འཇུག་ལ་ཐོད་རྒལ་དང་མཐར་ཆགས་གཉིས་སུ་ཡོད་དོ། །དེ་ཡང་བློ་ཆུང་བས་བར་དུ་ལམ་གཞན་མ་བོར་བགྲོད་པ་ནི་མཐར་ཆགས་ཡིན་ལ། བློ་ཆེ་བས་བར་དུ་ལམ་གཞན་བོར་ནས་བགྲོད་པ་ནི་ཐོད་རྒལ་བ་སྟེ། དེ་ཡང་སྟོབས་གང་ལས་བྱུང་ཞེ་ན། ཟག་བཅས་ཕྱག་རྒྱ་གཅིག་སྤྲོས་ནས་འབྱུང་ཞིང་ཟག་མེད་ཚེ་དབང་ཕྱག་རྒྱ་གཉིས་ནས་འབྱུང་ངོ་། །དེ་ཡང་ཟག་བཅས་ནས་ཐོད་རྒལ་འབྱུང་བའི་རྒྱུ་མཚན་ནི། ཉ་རེ་བ་ན་རེ། བདེན་གཉིས་དབྱེར་མེད་ཉམས་སུ་ལེན་པ་ལས་འབྱུང་ཟེར་རོ། །འོ་ན་རྣམ་སྨིན་ནམ་ཚོགས་ནས་འབྱུང་བར་ཐལ་སྙམ་ན། དེ་ཐོད་རྒལ་འོང་བ་ལ་དབྱེར་མེད་ཉམས་སུ་ལོན་པ་ཅིག་དགོས་ཏེ། དབྱེར་མེད་ཉམས་སུ་ལོན་ཚད་ལ་ཐོད་རྒལ་འོང་བའི་ངེས་པ་མེད་དེ། དཔེར་ན་བཙུན་པ་ལ་མིས་ཁྱབ་སྟེ་མི་ཐམས་ཅད་ལ་བཙུན་པས་མ་ཁྱབ་པ་བཞིན་ཟེར། དེ་མ་ངེས་པར་ཐལ་བས་མི་འཐད་བསམ། །ཡང་ཁ་གཅིག་ན་རེ། ལྷར་སྣང་སྟོང་གཉིས་སུ་མེད་པ་གསལ་བ་ལས་འབྱུང་ཞེས་ཟེར་རོ། །འོ་ན་ལས་དང་པོ་པས་བསྒོམ་པ་ལས་འབྱུང་བར་ཐལ་བས་མི་འཐད་དོ། །འོ་ན་ཅི་སྙམ་ན་ཟག་བཅས་ནས་ཐོད་རྒལ་འབྱུང་བ་ལ་རྒྱུ་མཚན་གསུམ་དང་ལྡན་པར་གཅིག་དགོས་ཏེ། རྒྱུ་ཤེས་པའི་མཚན་ཉིད་ལྟ་བ་རྟོགས་པ་དང་། རྐྱེན་འཇུག་པའི་མཚན་ཉིད་ཏིང་ངེ་འཛིན་གོམས་པ་དང་། རང་གི་ངོ་བོ་ལྷ་སྣང་སྟོང་དབྱེར་མེད་དུ་གསལ་བའི་བློ་ཆེ་བ་ལས་འབྱུང་ངོ་། །འོ་ན་ཚོགས་བསྒྲུབ་ནས་ཀྱང་འོང་བར་རིགས་ཞེ་ན། དེ་ནི་ཟག་བཅས་ནས་ཐོད་རྒལ་འོང་བྱ་བར་ཡང་ཟག་མེད་ཀྱི་མཐོང་ལམ་རྣམ་སྨིན་ལ་སྦྱར་བ་ལ་བྱ་ཡི། ཟག་མེད་ཀྱི་མཐོང་ལམ་བོར་ནས་སྦྱོང་བར་མི་ནུས་ཏེ་པས། ཚོགས་བསྒྲུབ་ལ་ཐོད་རྒལ་བ་རང་མེད་དོ། །ཡང་ན་ཚོགས་བསྒྲུབ་ནས་ཐོད་རྒལ་བ་ཡོད་དེ། ཟླ་བ་དྲུག་ན་སྦྱོར་བ་དེ་ལ་ལོ་གཅིག་གམ་ཟླ་བ་གསུམ་མམ་བཞིར་བསྒྲུབ་པ་སྦྱོར་དུས་མྱུར་བའི་ཕྱིར་རོ། །ཟག་མེད་ནས་ཐོད་རྒལ་འབྱུང་བ་ནི་ལུས་ཀྱི་རྒྱ་མདུད་བྲལ་བའི་བློ་ཆེ་བ་ལས་འབྱུང་བ་སྟེ། ཚེ་དབང་ནས་སངས་རྒྱས་ལ་སྦྱོར་བ་དང་། ལྷུན་གྲུབ་ལ་སྦྱོར་བའི་ཐོད་རྒལ་བ་གཉིས་ཡོད་ལ། ཕྱག་རྒྱ་ཆེན་པོ་ནས་སངས་རྒྱས་ལ་སྦྱོར་བ་གཅིག་ཡོད་དོ། །རྣམ་སྨིན་ནས་མི་འབྱུང་བ་ནི་ཚེ་དབང་བས་སྟོབས་ཆུང་རྐྱེན་སྨོས་ཆུང་ཞེན་པ་དང་ལུས་ཀྱི་རྒྱ་མདུད་དང་མ་བྲལ་བའི་ཕྱིར་རོ། །ལེའུ་ལྔ་པ་ཨཱི་ཐཱི། དེ་ལྟར་ཕྱག་རྒྱ་ཅིག་པ་སྣང་སྟོང་དབྱེར་མེད་ལ་བློ་བརྟན་ཡང་སྤྱོད་ཡུལ་ལྷའི་དཀྱིལ་འཁོར་མི་གསལ་བས་སྤྱོད་ཡུལ་གྱི་རྟོགས་ཚོགས་ལྷའི་དཀྱིལ་འཁོར་དུ་བསྒོམ་སྟེ་རྟོག་པ་རང་ཀ་མའི་ཞེན་པ་དགྲོལ་བ་དང་། གཞན་ཡང་ཕྱག་རྒྱ་ཅིག་པ་ལ་བརྟེན་ན་ལྷ་དུ་མར་བསྒོམ་ནུས་ཏེ། དུ་མ་ཅིག་གིས་གསལ་བའི་ཕྱིར་ཕྱག་རྒྱ་སྤྲོས་པར་བཤད་པར་བྱའོ། །རང་ཞེ་སྡང་རྡོ་རྗེའི་ཐུགས་ལས་ཁྲོ་བོ་བཅུ་ཕྱུང་སྟེ་ཕྱོགས་བཅུ་གདན་དུ་གཟིར་བས་ཕྱོགས་བཅིང་བའོ། །སརྦ་པཉྩས་རང་ལ་གཏོར་བས་ཉམས་ཆགས་དག་པར་བསམ་པ་ནི་བདུད་རྩི་སྨན་གྱིས་སྦྱང་བའོ། །བི་ཤུདྡྷེས་མཆེད་ལ་གཏོར་བས་དེའི་ཉམས་དག་པས་ནི་སྟོང་པ་ཉིད་ཀྱིས་བསང་བའོ། །དྷརྨ་པཉྩས་མཆོད་རྫས་ལ་གཏོར་བས་དེའ་ིཉེས་པ་དག་པར་བསམ་པ་ནི། ཆོས་ཉིད་ཀྱིས་བསང་བ་སྟེ་གསང་བ་རྣམ་པ་གསུམ་མོ། །དེ་ནས་བཛྲ་ཡཀྵས་གཏོར་ནས་ཁྲོ་བོ་རྡོ་རྗེ་གནོད་སྦྱིན་གྱི་གུར་གྱིས་བགེགས་བསྐྲད་པར་བསམ་མོ། །རྗེས་སུ་མཐུན་པར་ཞི་བས་དང་ཁྲོ་བོའི་སྐབས་སུ་ཉ་རི་བ་ན་རེ་ཞི་ཁྲོ་ཕྱག་རྒྱ་གཅིག་པ་ནས་རིགས་ཕྱེ་བས་ཟག་མེད་ཀྱི་མཐོང་ལམ་ལ་སྦྱར་བ་དེ་ཕྱག་རྒྱ་གཅིག་གིས་ཞི་བ་དེ་ཀས་ཞི་བ་ཕྱག་རྒྱ་སྤྲོས་པ་བསྒོམ་ནས་ཞི་བ་ཚོགས་བསྒྲུབ་པས་རྣམ་སྨིན་ནམ་ཕྱག་རྒྱ་ཡང་ཞི་བའི་ལྷ་རིགས་ལྔ་གང་རུང་གསལ་བའོ། །ཚོམ་བུ་དང་དཀྱིལ་འཁོར་གྱི་ཁྱད་པར་ནི། བསྒྲུབ་བྱེད་རྣལ་འབྱོར་གྱི་ཁྱད་པར་ཡོད་དེ་ལྷ་དང་རྣལ་འབྱོར་བྲང་སྤྲོད་དུ་བསྒོམ་པ་ནི་ཚོམ་བུའོ། །རྣམ་པ་གཅིག་གིས་ངང་ལྷ་ཀུན་རྫོགས་པར་བསྒོམ་དུ་བཏུབ་པ་མ་ཡིན་ཟེར་རོ། །སློབ་རིམས་དང་སྦྱར་ན་ཚོམ་བུའི་སྐབས་སུ་རྣམ་པ་གཅིག་གིས་ལྷ་དུ་མར་བསྒོམ་པས་དེའི་ངེས་པ་མེད་དེ། འོན་ཀྱང་ལྷའི་རྣལ་འབྱོར་བྱུང་རྫོགས་སུ་བཅས་པའི་ཆ་ནས་དཀྱིལ་འཁོར་ཕོ་བྲང་གཙོ་བོའི་ཆ་ནས་ཚོམ་བུ་སྟེ་གཙོ་བོ་ལྔ་རིགས་གཅིག་ལས་མེད་པས་ཚོམ་བུ་གཅིག་པ། གསུམ་ཡོད་པས་གསུམ་པ། ལྔ་ཡོད་པས་ལྔ་པ་ཞེས་སྨོས་སོ། །འོ་ན་རྩ་རྒྱུད་ཚོམ་བུ་ལ་ཡང་ཞེས་འདམ་ཀ་སྨོས་ལ། འདིར་ནི་གཅིག་པ་ལ་བརྟན་གསུམ་པ་ལ་སློབ་ངས་བརྟན་ནས་ལྔ་པ་ལ་སློབ་པའི་གོ་རིམས་སུ་བཤད་པ་གཉིས་མི་འགལ་ལམ་ཞེ་ན། མི་འགལ་ཏེ། རྩ་བརྒྱུད་དུ་ནི་ཚོགས་བསྒྲུབ་པའི་དབང་དུ་བྱས་ཏེ། རྣམ་པ་གྲལ་དུ་ཡོད་པས་ཚོམ་བུ་གཅིག་པ་ལ་སོགས་པ་གང་ཡང་རུང་བ་བསྒྲུབ་ལ། འདིར་ནི་སློབ་པའི་རིམ་པ་སྨོས་པས་མི་འགལ་ལོ། །སངས་རྒྱས་སྟོང་གི་དལ་སོ་སོ་ནི་སྙིང་པོའི་སྐབས་སུ་བསྟན་ནོ། །དེ་ཕྱིར་ལམ་བཞི་ལྡོག་གསུམ་གྱི་སྐབས་སུ་ཉི་རི་བ་ན་རེ། ཅིག་སྤྲོས་མན་ཆོད་ཟག་ལྡོག་གཉིས་ཀ་ཡོད་པའི་ལམ་མོ། །ཟག་པ་ཡོད་ལ་ལྡོག་པ་མེད་པ་ནི་རྣམ་སྨིན་ཚོགས་བསྒྲུབ་བོ། །ཟག་ལྡོག་གཉིས་ཀ་མེད་པ་ནི་ཟག་མེད་གསུམ་ཡིན་གསུངས། སྤྲོས་པ་དང་ཚོགས་བསྒྲུབ་གཉིས་ཀྱི་ཁྱད་པར་ནི། དཔེར་ན་ཐོ་མཁན་གསར་རྙིང་དང་འདྲ་སྟེ། ལྷའི་རྣལ་འབྱོར་དུ་གསལ་བཞིན་ཡོ་བྱད་ལ་ལོངས་སྤྱོད་ནུས་པ་ནི་ཚོགས་བསྒྲུབ་བོ། །ལྷའི་རྣལ་འབྱོར་དུ་གསལ་དང་ཡོ་བྱད་ལ་ལོངས་སྤྱོད་མི་ནུས་པ་ནི་སྤྲོས་པ་སྟེ། དེས་ན་སྤྲོས་པ་ནི་ཏིང་ངེ་འཛིན་བར་ཆད་མེད་པ་ཡིན་ལ། ཚོགས་བསྒྲུབ་ནི་ཡོ་བྱད་བར་ཆད་མེད་པ་ཡིན་ནོ། །དེ་ཡན་བར་ཆད་མེད་པའི་སྐབས་སུ་རྨི་ལམ་འདི་དང་མཐུན་པར་འབྱུང་ངོ་། །ལེའུ་དྲུག་པ་ཨཱི་ཐཱི། དེ་ལྟར་ལྷ་དུ་མར་གསལ་ཀྱང་ཡོ་བྱད་ལྔ་ལ་འཛིན་ཆགས་མེད་པར་སྤྱོད་མི་ནུས་པས་ཡོ་བྱད་ལ་སྤྱོད་བཞིན་མ་ཞེན་པར་བྱ་བ་དང་། གཞན་ཡང་ལྷ་དུ་མ་ལ་ཏིང་ངེ་འཛིན་བར་ཆད་མེད་པར་བརྟེན་ཡོ་བྱད་ལ་མ་ཞེན་པར་སྤྱོད་ནུས་པས་ཡོ་བྱད་བར་ཆད་མེད་པའི་ཚོགས་བསྒྲུབ་བཤད་པར་བྱའོ། །བར་ཆད་མེད་པར་སྦྱོར་བ་ནི་གླན་ན་རེ། ཕལ་ཆེ་བ་ལ་དགོངས་པ་སྟེ། མཐུན་རྐྱེན་ཚང་ཞིང་འགལ་རྐྱེན་དང་མ་འཕྲད་ན་ཟག་མེད་ཀྱི་མཐོང་ལམ་ལ་སྦྱོར་བས་བར་ཆད་མེད་ཅེས་བྱའོ། །རྐྱེན་དེ་གཉིས་དང་མི་ལྡན་པར་བསྒྲུབ་ཀྱང་ངན་སོང་དུ་ལྟུང་བར་རྩ་རྒྱུད་ལེའུ་ལྔ་པ་ལས་བཤད་པས་ན་ཕལ་ཆེ་བ་ལ་དགོངས་ཟེར་ཏེ་སྟོན་པ་མཆོད་བརྩོན་རྟོགས་པ་གསལ་ལ་སོགས་པའི་མཐུན་རྐྱེན་དེ་དག་མ་ཚང་བར་ཚོགས་བསྒྲུབ་དུ་མི་བཏུབ་པས་ན་མི་འཐད་དོ། །དེས་ན་མཁས་པ་དག་ནི་ཟག་བཅས་ནས་ཟག་མེད་མཐོང་ལམ་དུ་སྦྱོར་བ་ལ་ལམ་གཞན་གང་གིས་དང་བར་ཆོད་པ་མེད་པའི་ཕྱིར། བར་ཆད་མེད་པའོ། །ཡང་ན་སྐྱེ་བ་བདུན་ཚུན་ཆད་འགྱངས་ཀྱང་ངན་སོང་དུ་ལྟུང་བའི་བར་ཆད་མེད་པའོ། །སྤྱིར་བསྙེན་བསྒྲུབ་བཞི་ཚུལ་གསུམ་དུ་འགྱུར་བ་ལས། ལམ་གྱི་དུས་ཀྱི་བསྙེན་བསྒྲུབ་བཞི་རྒྱུས་གསལ། བསྒྲུབ་པའི་དུས་ཀྱི་བསྙེན་བསྒྲུབ་བཞིའི་ངག་དོན་ནི། སྤྱིར་ཟླ་བ་གཅིག་ལ་བསྙེན་བསྒྲུབ་ཆ་གཅིག་རྫོགས་པ་ལས། དང་པོ་བསྙེན་པ་ནི་གཞི་ཕུན་སུམ་ཚོགས་པ་ལྔ་དང་ལྡན་ནས་དཀྱིལ་འཁོར་རྒྱས་འབྲིང་བཀོད་མཆོད་པ་བཤམས་ཏེ། ཕྱི་མཆོད་ཕྱི་མཚམས་དང་མཚམས་ཕུར་གདབ་པ་ལ་སོགས་པ་སྔོན་འགྲོ་རྫོགས་པར་བྱས་ཏེ། ཏིང་དལ་བསྐྱེད་ཡེ་ཤེས་པ་སྤྱན་དྲངས་ཏེ་མཆོད་བསྟོད་རྫོགས་ནས། བསྙེན་པ་བྱ། ཚོགས་དང་ལྷག་མ་བྱས་ཏེ་ཉུལ་ལེ་བཟློག་པ་མན་ཆད་དོ། །དེ་ལ་ཞག་ཕྱེད་དང་བརྒྱད་དོ། །དེ་ནས་ཚེས་བརྒྱད་ནས་་ལྷར་གསལ་བའི་ཁ་དོག་དཀར་པོའི་འཕྲོ་འདུ་ལས། རང་གི་རྒྱུད་སྦྱངས་ཏེ་དངོས་གྲུབ་ཀྱི་སྣོད་དུ་རུང་བར་བྱས་པ་ནི་བསྙེན་པའོ། །དེ་ནས་མར་ངོའི་ཕྱེད་ལ་ཕར་འཕྲོས་དངོས་གྲུབ་བསྐུལ་ཚུར་འདུས་པས་དངོས་གྲུབ་ཏུ་གྱུར་ཏེ་ཁ་དོག་དམར་པོའི་འཕྲོ་འདུ་བྱེད་པ་ནི་བསྒྲུབ་པའོ། །ཞག་ཉེར་དགུ་རྫོགས་ཏེ་ཐོན་ནས་འོད་ཟེར་མཐིང་ནག་ཚུར་བསྡུ་བ་ནི་བསྒྲུབ་ཆེན་ནོ། །སྦྱོར་བའི་བསྙེན་བསྒྲུབ་བཞི་ནི། ཡོན་ཏན་བཅུ་གསུམ་དང་ལྡན་པའི་ཕྱག་རྒྱ་མ་རྙེད་ནས་རློབ་ཅིང་འཕྲུལ་བ་དང་། རད་ནའི་རྒྱན་གྱིས་བརྒྱན་ཟས་བསྲུང་། དམ་ཚིག་དཔོག་ཆོས་བཤད་སྐུ་མཁའ་སྐྱེ་མཆེད་བྱིན་གྱིས་བརླབ་པ་ཡན་ཆད་བསྙེན་པའོ། །ཡོ་བྱད་བཞི་དང་བྲུད་པ་རྩེ་བ་བརྡབ་པ་ལ་སོགས་པ་བསྟན་བཅོས་ཀྱི་ཆ་ཡིས་བདེ་བ་རྒྱས་པར་བྱེད་པ་ཉེ་བསྙེན། ཕྱག་རྒྱ་བཞིས་རོལ་བ་བསྒྲུབ་པ། བྱང་སེམས་མཁའ་ལ་ཕབ་སྟེ་བདེ་བ་སྟེར་བའམ་ཉི་ཟླ་རྡོ་རྗེ་ལྕེ་ཡིས་ལོངས་སྤྱོད་པ་ནི་སྒྲུབ་ཆེན་ནོ། །ལམ་གྱི་དུས་ཀྱི་བསྒྲུབ་ཆེན་དང་བསྒྲུབ་པ་དུས་ཀྱི་བསྒྲུབ་ཆེན་ནི་ངོ་བོ་འདྲ། སྔར་གྱི་རྒྱུ་མི་འདྲ་བས་ཕྱེ་བའོ། །ཚོ་གསུམ་དུ་བཅད་ལ་བྱིན་གྱིས་བརླབས་པ་ནི། ཚེ་དང་སོ་ཏྲམ་ལས་རཏྣའི་མཆོད་སྡོང་འོད་འབར་བའི་རྩེ་ལ་ཡི་གེ་གསུམ་ལས་ཕྱི་ནང་གསང་བའི་ལོངས་སྤྱོད་འབྱུང་བར་བསམ་ཏེ་ཕྱི་ནང་གསང་བའི་གཏོར་མ་བྱའོ། །ཚེ་བར་བ་ལ་ཉི་ཟླའི་སྟེང་དུ་དཔའ་བོ་འབྲུ་ལྔའི་འཕྲོ་འདུ་ལས་འདོད་ཡོན་གྱི་ལྷར་བརླབས་ཏེ་རྣལ་འབྱོར་པ་རྣམས་རོལ། ཐ་མལ་ལས་ནམ་མཁའ་མཛོད་ཀྱིས་མང་ཞིང་རྒྱ་ཆེ་བར་སྤེལ་ཏེ་མཆོད་མགྲོན་བྱའོ། །སྤྱིར་བསྒོམ་པ་ནི་རྣལ་འབྱོར་པ་ཕོ་མོ་ལྷ་ཡབ་ཡུམ་བྲངས་སྤྲད་དུ་བྱས་ཏེ་ཀུན་ཚོགས་ནས་ཚོམ་བུ་གང་རུང་ཅིག་བསྒོམ་པའོ། །བྱེ་བྲག་ཏུ་བསྒོམ་པ་ནི། ཚོམ་བུ་གསུམ་པོ་རྣལ་འབྱོར་པ་རེ་རེ་ས་དང་གང་རུང་བསྒོམ་པའོ། །ཡང་དེ་ལས་བཟློག་པར་ཡང་ཀྱང་འདོད། དངོས་གྲུབ་ཟླས་བླངས་བ་ནི་སྒྲུབ་ཟླ་མོ་ཡུམ་གྱི་མཁའ་ལས་བླང་བའམ། ཡང་ན་བཟླས་པ་བྱས་ཏེ་བླང་པའམ། །ཡང་ན་ཟླ་བ་གཅིག་གིས་བླང་བའམ། ཞི་བ་བས་ཁྲོ་བོའི་ཚོམ་བུ་ཚོགས་བསྒྲུབ་དུས་མྱུར་བར་བསྟན་པ་ནི། ཚོམ་བུ་སྤྱིར་བསྒོམ་ལྟར་ན་བར་ཆད་ཉུང་བ་དང་སྤྱོད་པ་རླབས་ཆེ་བ་ཡིན་ཟེར་རོ། །བྱེ་བྲག་ཏུ་བསྒོམ་པ་ལྟར་ན་ཏིང་ངེ་འཛིན་སྟོབས་ཆེ་སྟེ་ཞི་བའི་ཚོམ་བུ་གསུམ་པོ་བས་ཁྲོ་བོའི་ཚོམ་བུ་གསུམ་པོ་ལྷ་མང་བས་མྱུར་ཟེར་རོ། །ཕྱི་ནང་གསང་བ་སྲུང་བྱ་སྟེ་ཞེས་པ་ཕྱི་མཚམས་ནི་བདུད་རྩི་འཁྱིལ་བའི་ཏིང་ངེས་ཕ་རོལ་ཏུ་ཕྱིན་པ་ལས་བཀའ་ལོག་པ་བགེགས་སུ་གྱུར་པ་བསྲུང་བའོ། །ནང་མཚམས་ནི་རྣམ་སྣང་དང་མི་གཡོ་བའི་ཏིང་ངེས་ཕྱི་པ་ལས་བྱུང་བའི་བགེགས་བསྲུང་བའོ། །གསང་མཚམས་ནི་ཁྲོ་བཅུས་གསང་བ་ནང་པ་ལས་ལོག་པའི་བགེགས་དམ་སྲི་བསྲུང་བའོ། །ཟེར་རོ། །ཞིང་འགྱུར་མཆོག་དང་ལ་སོགས་པ་ནི་རྩ་རྒྱུད་ལྟར་སྦྱོར་སྒྲོལ་བ་ལྔའི་ངག་དོན་ནི་སྤྲོས་པ་མཐར་ཕྱིན་པས་ཞིང་བཅུ་དངོས་སུ་སྒྲོལ་བ་ནི་མངོན་དུ་ཕྱུང་བའོ། །སྔོན་བྱུང་དཔལ་ཆེན་པོས་རུ་ཏྲ་བསྒྲལ་བ་ལྟར་རྣལ་བས་གནས་ལུགས་རྟོགས་པའི་ལྟ་བ་དང་ཏིང་ངེས་ཀྱང་བསྒྲལ་བྱ་ཀྱང་མི་དགོས་པ་ནི་ཐབས་ཆེན་པའོ། །དབང་པོ་རྣམ་ཤེས་ལྷ་ཡབ་ཡུལ་དུས་ལྷ་ཡུམ་ཤེས་པས་ཡུལ་ཤེས་རང་ཀ་མར་ཞེན་པ་དག་པ་ནི་དབང་པོ་ཡུལ་དུས་ཀྱིའོ། །ཆོས་ཐམས་ཅད་ཆོས་ཀྱི་དབྱིངས་སྤྲོས་བྲལ་དུ་རྟོགས་པའི་དངོས་པོར་དག་མ་དག་པ་ནི་རང་བཞིན་རྟོགས་པའོ། །རང་ལྷར་གསལ་བའི་ཐུགས་ཀ་ནས་རམ་ལས་མེ་འབྱུང་བས་འགྲོ་དྲུག་གི་ལུས་དང་བག་ཆགས་སྦྱང་བ་ནི་ཏིང་ངེའོ། །བསྒྲལ་བས་མི་གོས་པའི་འཐད་པ་རྣམ་པར་ཕྱེ་བའི་རྟགས་ཀྱི་དོན་ནོ། །སྤྱི་ཕུང་པོ་ལྔས་ལས་གཟུགས་འབྱུང་བ་ཡིན་པས་མིང་བཞིའི་གཙོ་བོ་རྣམ་ཤེས་གཟུགས་སུ་མེད་པས་རྣམ་ཤེས་ཀྱི་རང་ཆོས་ཉིད་གཟུང་དུ་མེད་པར་རྟོགས་པས་མི་བསྒྲིབ་པའོ། །སྦྱང་བ་ལྔ་ནི། སྤྲོས་པ་ལས་སུ་རུང་བས་ལྷ་མོ་ལ་སོགས་པ་དངོས་སུ་བཀུག་ནས་སྦྱོར་བ་ནི་མངོན་དུ་ཕྱུང་བའོ། །སྤྱོད་ཡུལ་གྱི་རྟོགས་པ་ལྷ་དང་ལྷ་མོའི་དཀྱིལ་འཁོར་དུ་གནས་པ་ནི་རང་བཞིན་ནོ། །དབང་པོ་ཡུལ་དུས་སྔར་དང་འདྲ། །ཆོས་ཀྱི་དབྱིངས་རིག་པའི་ཡེ་ཤེས་ཀྱིས་རྟོགས་པ་ནི་མཚན་མ་མེད་པའི་ཏིང་ངེ་འཛིན་ནོ། །སྔོན་བྱུང་དུ་དཔལ་ཆེན་པོས་དབང་ཕྱུག་མ་ལ་རོལ་བ་ལྟར་སྣང་བས་དང་སྤྱོད་བཞིན་མ་ཆགས་པའི་ཐབས་ཆེན་པོའོ། །དེ་ལྟར་སྦྱོར་སྒྲོལ་ཆ་གཉིས་པོ་དེ་གཞུང་དང་བསྟུན་པའི་ངག་དོན་ཏེ། སྤྱི་དང་མི་མཐུན་པ་དག་ཀྱང་སྣང་ངོ་། །རང་བཞིན་དཀྱིལ་འཁོར་ལྷ་རྣམས་ཀྱང་། །ཁྲོ་བོའི་དཀྱིལ་འཁོར་བསྒོམ་བྱ་སྟེ། །གཉིས་ནི་ཡན་ལག་ལྔ་གདོད་ནས་རིགས་ལྔར་གནས་པ་དེ་ལ་ཞི་ཁྲོ་ཐ་དད་མེད་ཀྱང་། འདིར་ཁྲོ་བོ་ལྷག་པའི་ཏིང་ངེ་དཀྱིལ་འཁོར་རིགས་ལྔར་བསྒོམ་པའོ། །ཚེ་དབང་ལ་སྦྱོར་བ་ནི་ཚོགས་སྒྲུབ་བློ་ཆེ་ཤོས་ཡིན་ལ། དེ་ལ་སྦྱོར་མ་ནུས་པའི་བློ་ཆུང་ཤོས་ནི་རྣམ་སྨིན་ལ་སྦྱོར་བའོ། །དེ་ལ་གཉིས་ལས་ཚེ་འདི་ཉིད་ལ་སྦྱོར་བ་ནི། དཔེར་ན་རྒྱལ་པོའི་སྲས་པོ་བྲན་མོའི་ལྟོ་བ་ན་ཡོན་ཀྱང་ཕྱི་རོལ་མ་ཡིས་བསྒྲིབས་ལ་དེ་དང་བྲལ་མ་ཐག་འབངས་ལ་ཁ་ལོ་བསྒྱུར་བ་ལྟར། ཕྱི་ལུས་ཀྱི་དྲྭ་བས་བསྒྲིབས་ཀྱང་ཡིད་ལྷའི་སྐུར་སྨིན་པས་ལུས་དེ་དང་བྲལ་མ་ཐག་ཕྱག་རྒྱ་ལ་སྦྱོར་བའོ། །ལེའུ་བདུན་པ་ཨཱི་ཐཱི། དེ་ལྟར་ཉེར་ལེན་གྱི་རྒྱུ་ལྷན་ཅིག་བྱེད་པའི་རྐྱེན་རིགས་ངེ་འཛིན་དང་གཉིས་ལས་བྱུང་བའི་གནས་སྐབས་ཀྱི་འབྲས་བུ་ནི། ཟག་པ་མེད་པའི་རིག་འཛིན་དེ་བཤད་པར་བྱའོ། །སྔ་རབས་པ་དག་ཚེ་དབང་དང་ཕྱག་རྒྱ་ལྷུན་གྲུབ་གསུམ་ཀ་ལྷག་བཅས་སུ་བཞེད་པ་ནི་འཐད་པ་མ་ཡིན་ཏེ། །ཚེ་དབང་ནས་ཐོབ་པའི་ཕྱག་རྒྱ་དང་ལྷུན་གྲུབ་གཉིས་ཀ་ལྷག་བཅས་ཡིན་ལ་རྣམ་སྨིན་ནས་ཐོབ་པའི་ཕྱག་རྒྱ་དང་ལྷུན་གྲུབ་གཉིས་ལྷག་བཅས་སུ་འགྱུར་བས་སོ། །འདོད་ན་རྒྱུ་ལྷག་མེད་ལ་འབྲས་བུ་ལྷག་མེད་འགལ་ལོ། །དེས་ན་མཐོང་ལམ་འདའ་ཚུལ་གཉིས་སུ་བྱའི་རྣམ་སྨིན་དང་པོ་ནི་ལྷག་བཅས་སོ། །ལྷག་མ་མེད་དང་ཡོད་པ་ནི་ལྷག་མའི་ལུས་འདི་ཉིད་མ་དོར་བར་རྡོ་རྗེའི་ལུས་ཀྱིས་སངས་རྒྱས་ཀྱི་ས་ལ་སྦྱོར་བའི་ཚེ་དབང་ནི་ལྷག་བཅས་ཀྱི་འདའ་ཚུལ་ལོ། །ལྷག་མའི་ལུས་འདི་དོར་ཏེ་རིག་པ་ཡིས་སངས་རྒྱས་ཀྱི་ས་ལ་སྦྱོར་བའི་རྣམ་སྨིན་ནི་ལྷག་མེད་ཀྱི་འདའ་ཚུལ་ལོ། །དེ་ལ་ལྷག་མའི་ལུས་རང་གསལ་བྱ་སྙམ་ན། ཁ་གཅིག་ན་རེ་བར་དོའི་འབྱུང་བའི་དངས་མ་ལས་གྲུབ་པའི་ལུས་ནི་ལྷག་མའི་ལུས་མིན་གྱི་འོན་ཀྱང་འབྱུང་བ་རགས་པ་རྙིང་པའི་ཆ་ལས་གྲུབ་པའི་ཤ་ཁྲག་རྡོས་པ་ཅན་དེ་ལྷག་མའི་ལུས་ཡིན་ནོ་ཞེས་པ་ནི་མི་འཐད་དེ། དེ་ལྟར་ན་ཚེ་དབང་བར་དོ་ནས་ཐོབ་པ་དེ་ལྷག་མེད་དུ་འགྱུར་ཏེ་བར་དོ་ལ་ལྷག་མའི་ལུས་འབྱུང་བ་རགས་པས་གྲུབ་པ་དེ་མེད་པའི་ཕྱིར་རོ། །ཡང་རྣམ་སྨིན་བར་དོ་ནས་ཐོབ་པ་དེ་ལྷག་མེད་མིན་པར་ཐལ་ཏེ་བར་དོའི་ལུས་དེ་ཕྱི་མ་གང་ལེན་གྱི་ཆ་བྱད་དུ་ཡོད་པས། ཕྱི་མ་ཕྱག་རྒྱ་ཆེན་པོའི་ཆ་བྱད་ལ་ལྷག་མའི་ལུས་དོར་དུ་མེད་པའི་ཕྱིར་རོ། །དེས་ན་སྔར་ཐོག་མ་མེད་པ་ནས་ལས་དང་ཉོན་མོངས་པས་རང་དབང་མེད་པར་བསྐྱེད་པའི་ལུས་ཀྱི་ལྷག་མ་ནི་ཟག་མེད་ཀྱི་མཐོང་ལམ་ལ་སྦྱོར་བའི་ལུས་འདི་ཡིན་ནོ་རང་དབང་མེད་པར་བསྐྱེད་པའི་ལུས་མི་ལེན་པར་སྤངས་པའི་ཕྱིར་རོ། །འོ་ན་མཐོང་ལམ་ཡན་ཆད་ལུས་མི་ལེན་ནམ་སྙམ་ན་དེ་རྣམས་ལ་སྨོན་ལམ་གྱི་སྟོབས་ཀྱིས་ལྷ་མི་ལ་སོགས་པ་རང་དབང་ཅན་དུ་སྐྱེ་ཞིང་སྨོན་ལམ་གྱི་ལུས་ལེན་པ་སྟེ། ལས་དང་ཉོན་མོངས་པ་རང་དབང་མེད་པར་བསྐྱེད་པའི་ལུས་མི་ལེ ན་ནོ། །འཁོར་བའི་ལུས་ཟད་ཀ་མའི་ལུས་ཡིན་པས་ལྷག་མའི་ལུས་ཡིན་ལ། འདི་དོར་བ་དང་མ་དོར་བ་སངས་རྒྱས་ལ་སྦྱོར་བ་ལ་ལྷག་བཅས་ལྷག་མེད་དུ་བཞག་གོ །ཐུན་མོང་གི་ཐེག་པ་ལ་ཡང་མྱ་ངན་ལས་འདའ་ཚུལ་ལ་གཉིས་ཡོད་དེ་སྤང་བྱ་ཉོན་མོངས་པ་ཐམས་ཅད་སྤང་བ་དང་སྐྱེ་བ་སྔ་མའི་ལས་མ་གྲུབ་པའི་རྟེན་ཕུང་པོ་དང་མ་བྲལ་བའི་དགྲ་བཅོམ་པ་ལྟ་བུ་ནི་ལྷག་བཅས་ཀྱི་མྱ་ངན་ལས་འདས་པའོ། །ད་ལྟར་གྱི་ཕུང་པོ་འདི་བསྐྱེད་པའི་སྔར་གྱི་འཕེན་པ་ནི་ཟད་ཡང་སྲིད་སྐྱེ་བའི་རྒྱུ་ཀུན་འབྱུང་མཐའ་དག་སྤངས་པས་སྐྱེ་བ་ཕྱི་མ་མི་ལེན་པ་ཕུང་པོ་ལྔའི་རྒྱུན་ཚོགས་པ་འཁྱག་ཞུ་བ་ལྟར་གཏན་ཟད་དུ་སོང་བ་ནི་ལྷག་མེད་ཀྱི་མྱང་འདས་སོ་དེ་ལྟར་གཉིས་ཡོད་པ་ལྟར་འདིར་ཡང་མྱ་ངན་ལས་འདའ་ཚུལ་གཉིས་ཡོད་བྱའམ་ཡང་ན་ལམ་ཐུན་མོང་པ་སྟོང་པ་ཆེན་པོ་ནས་ལྟོས་པའི་བར་དུ་རིམ་ཆར་གཉིས་གཉིས་ཡོད་པ་ལྟར་ཚོགས་བསྒྲུབ་ནས་མཐོང་ལམ་ལ་སྦྱོར་བ་ཡང་ལྷག་བཅས་ཅིག་ཆར་བ་དང་། ལྷག་མེད་རིམས་འཇུག་ཡོད་པར་སྦྱར་རོ། །དང་པོ་མཐོང་ལམ་གྱི་བློ་སྟོབས་ཆུང་ཤོས་རྣམ་པར་སྨིན་པའི་རིག་འཛིན་གྱི་དོན་དག་གཏན་ལ་དབབ་པ་ནི་འདི་ལྟ་སྟེ། རྣམ་སྨིན་རང་གི་ངོ་བོ་ལ་གཞན་གྱི་རྟོག་པ་དག་པ་དང་། ཟག་པ་ཡོད་མེད་བསམ་པ་དང་། །རང་གི་འཐད་པ་བརྗོད་པའོ། །དང་པོ་རྣམ་སྨིན་མཚན་ཉིད་པ། །སྐད་ཅིག་མ་ལ་འདོད་པ་དང་། །ཁ་གཅིག་ཕྱག་རྒྱ་ཆེན་པོ་དང་། །རྣམ་པ་ཁྱད་པར་མེད་པ་ལ། །དགོངས་པའི་ཁྱད་པར་ཡོད་པར་འདོད། །ཁ་གཅིག །དཔེར་ན་སྒོང་ཤུན་ཕྲུ་མ་གཉིས། །ཁྱུང་དང་སེང་གེ་མ་ཡིན་ཏེ། །དེ་དག་ནང་ན་གཤོག་པ་སྟོབས། །རྫོགས་པའི་ཁྱུང་སེང་ཡིན་པ་ལྟར། །རྒྱ་མདུད་རྣམས་སྨིན་མ་ཡིན་གྱི། །རིག་པ་ལྷར་གསལ་རྣམ་སྨིན་འདོད། །དེ་རྣམས་གཞན་གྱི་འདོད་པ་སྟེ། །ངན་རྟོག་བློ་ཡིས་བསླད་པར་ཟད། །ཁ་གཅིག་ན་རེ། རྣམ་སྨིན་གྱི་རིག་འཛིན་ལ་གཉིས་ལས། བཏགས་པ་པ་ནི་རྒྱུ་བར་ཆད་མེད་པ་ལས་བཏགས་ཀྱང་རུང་། འབྲས་བུ་ཕྱག་རྒྱ་ཆེན་པོ་ལས་བཏགས་ཀྱང་རུང་སྟེ། རྒྱུ་མིང་འབྲས་བུ་འབྲས་མིང་རྒྱུ་ལ་བཏགས་པའི་ཕྱིར་རོ། །མཚན་ཉིད་པ་ནི་ཚོགས་སྒྲུབ་འདས་ཀ་མའི་སྐད་ཅིག་མ་གསུམ་ལས་དང་པོ་ནི་ཚོགས་བསྒྲུབ་ཡིན་ལ་གསུམ་པ་ནི་ཕྱག་རྒྱ་ཆེན་པོ་སྟེ། དེ་གཉིས་ཀྱི་བར་གྱི་སྐད་ཅིག་མ་དེ་རྣམ་སྨིན་ཡིན་ནོ་ཞེས་པ་ནི་མི་འཐད་དེ། རྣམ་སྨིན་སྐད་ཅིག་མ་གཞན་དོན་བྱེད་དམ་མི་བྱེད་མི་བྱེད་ན་སྨིན་པས་ཕྲིན་ལས་རྫོགས་བྱེད་པ། ཞེས་པ་གཞན་དོན་བྱེད་པར་བཤད་པ་དང་འགལ་ལོ། །བྱེད་ན་སངས་རྒྱས་དང་ཁྱད་པར་མེད་པར་ཐལ་ཏེ་སངས་རྒྱས་ཀྱིས་སྐད་ཡུན་ལ་ལྷུན་གྱིས་གྲུབ། ཅེས་པས་སྐད་ཅིག་མས་དོན་བྱེད་པར་བཤད་པས་སོ། །དེ་སྐད་ཅིག་གིས་དོན་བྱེད་པར་མཐུན་དང་དོན་བྱ་བའི་ཡུལ་གདུལ་བྱ་རྒྱ་ཆེ་ཆུང་དང་དོན་བྱེད་མཁན་ལ་ནུས་པ་ཆེ་ཆུང་ཡོད་པས་ཁྱད་མེད་དུ་མི་འགྱུར་ཏེ། དཔེར་ན་སངས་རྒྱས་དང་ལྷུན་གྲུབ་གཉིས་མཉམ་བཞག་ཁྱད་མེད་ཏེ་རྗེས་ཐོབ་ཁྱད་ཡོད་པ་ལྟར་སྙམ་ན། འོ་ན་སྐད་ཅིག་གིས་བྱ་བ་རྫོགས་པའི་ཕྱིར་རྣམ་སྨིན་དེ་ཚེ་དབང་ལས་བཟང་བར་ཐལ། དེ་འདོད་ན་སྟོབས་ཆུང་རྐྱེན་སྨོན་ལམ་ཞན་པའི་ཕྱིར། ཞེས་པ་དང་འགལ་ལོ། །ཡང་ཁ་གཅིག་ན་རེ་རྣམ་སྨིན་གྱི་ངོ་བོ་ནི་ཡེ་ཤེས་སྒྱུ་མའི་སྐུའི་ཆ་ལུགས་ཕྱག་རྒྱ་ཆེན་པོ་མཐུན་པར་འདོད་དོ། །འོ་ན་དེ་གཉིས་ཁྱད་མེད་དུ་འགྱུར་སྙམ་ན་ཆ་ལུགས་ལ་ཁྱད་མེད་དགོངས་པ་ལས་ཁྱད་ཡོད་ཅེས་འདོད་པ་ནི་མི་འཐད་དེ། དེ་ལྟར་ན་མཐོང་ལམ་སྟོབས་ཆེ་ཤོས་ཚེ་དབང་གིས་དང་རྡོ་རྗེའི་ལུས་ལས་ཡེ་ཤེས་སྒྱུ་མའི་ལུས་སུ་བསྒྱུར་མི་ནུས་པས་རྣམ་སྨིན་དེ་ཚེ་དབང་བས་བཟང་བར་ཐལ། དེ་འདོད་ན་གཞུང་དང་འགལ་ལོ། །དེ་ཆ་ལུགས་དེ་ལྟར་ཡིན་ཡང་དགོས་པའི་སྟོབས་ཚེ་དབང་བས་དང་ཆུང་བས་གཞུང་དང་མི་འགལ་སྙམ་ན། འོ་ན་རྣམ་སྨིན་དེ་ལྷག་མེད་ཀྱི་འདའ་ཚུལ་མ་ཡིན་པར་ཐལ་ཏེ། ཡེ་ཤེས་སྒྱུ་མའི་སྐུ་དེ་ལྷག་མའི་ལུས་མ་དོར་བར་སངས་རྒྱས་ཀྱི་ས་ལ་སྦྱོར་བས་སོ། །དེ་ཉིད་མི་འདོར་ཀྱང་སྔར་གྱི་སྦྱོར་ཀའི་འདོར་བས་ལྷག་མེད་ཀྱི་འདའ་ཚུལ་དུ་འཐད་སྙམ་ན་རང་གི་ལུས་མ་ཡིན་པར་འདོར་བས་ལྷག་ཏུ་འགྱུར་ཧ་ཅང་ཐལ་བས་དེ་ལྟར་ན་ཚེ་དབང་དང་ལྷག་མེད་དུ་འགྱུར། ཚེ་དབང་རང་གི་ལུས་དེ་ཉིད་མི་འདོར་དང་སྔར་ཕྱག་རྒྱ་གཅིག་སྤྲོས་ཀྱི་ཚེ་བོར་བའི་ཕྱིར། དེ་སྔར་དོར་ཀྱང་ཚེ་དབང་རང་གི་ལུས་དེ་ཉིད་མ་དོར་བར་སངས་རྒྱས་ལ་སྦྱོར་བས་ལྷག་བཅས་སུ་འཐད་སྙམ་ན། འོ་ན་རྣམ་སྨིན་ཀྱང་སྔར་གྱི་ལྷག་མའི་ལུས་བོར་ཀྱང་རྣམ་སྨིན་རང་གི་ལུས་དེ་ཉིད་མ་བོར་བར་སངས་རྒྱས་ལ་སྦྱོར་བའི་ཕྱིར་ལྷག་མེད་ཀྱི་འདའ་ཚུལ་དུ་མི་འགྱུར་རོ། །ཡང་ན་དེ་ལ་རྣམ་པར་སྨིན་པའི་མིང་དོན་མེད་པར་འགྱུར་རོ། །ཡང་ཁ་གཅིག་ན་རེ། ཁྱུང་ཕྲུག་གི་ལུས་སྒོ་ངའི་ནང་ན་གཤོག་པ་རྒྱས་པ་དེ་ཡིན་གྱི་ཕྱི་རོལ་གྱི་སྒོང་ཤུན་དེ་ཁྱུང་གི་ལུས་མིན་པ་ལྟར་ནང་དགོངས་པ་ལྷའི་སྐུར་སྨིན་པ་དེ་རྣམ་སྨིན་ཡིན་གྱི་ཕྱི་ལྷག་མའི་ལུས་ཀྱི་དྲྭ་བ་དེ་རྣམ་སྨིན་མིན་པས་ཟག་མེད་འདོད་དོ་ཞེས་པ་འོ་ན་ཡིད་ལྷའི་སྐུར་སྨིན་པ་དེ་ཡིད་ཡིན་ནམ་སྐུ་ཡིན་ཞེ་ན། དཔེར་ན་ཆོས་སྐུ་དང་སྐྱེ་མེད་དོན་གྱི་གསུངས་གཉིས་ངོ་བོ་སྐྱེ་མེད་དུ་གཅིག་ལ། དེ་ཉིད་རྟེན་བྱེད་པའི་ཆ་ནས་སྐུ། གོ་བརྡ་སྤྲོས་པའི་ཆ་ནས་གསུང་ཡིན་པས་མཚོན་ཚུལ་མ་འདྲེས་པ་ལྟར། ཡིད་ལྷའི་སྐུར་གསལ་བར་ངོ་བོ་གཅིག་ལ། དེ་ཉིད་རྟེན་བྱེད་པའི་ཆ་ནས་ལུས། རིག་ཅིང་གསལ་བར་སེམས་ཡིན་པས། མཚོན་ཚུལ་མ་འདྲེས་ཅེས་འདོད་པ་ནི་མི་འཐད་དེ། དེ་ལྟར་ན་རྣམ་སྨིན་དེ་ལྷག་མེད་ཀྱི་འདའ་ཚུལ་མ་ཡིན་པར་ཐལ་ཏེ་ཡིད་ལྷའི་སྐུར་གསལ་བ་ལས་ལྷག་མའི་ལུས་དོར་བྱ་བ་མེད་པའི་ཕྱིར་རོ། །དེ་ཡིད་ལྷར་གསལ་བ་ལ་དོར་བྱ་མེད་ཀྱང་ཕྱི་རོལ་ལྷག་མའི་ལུས་དེ་དོར་བས་ལྷག་མེད་ཀྱི་འདའ་ཚུ ལ་དུ་འཐད་སྙམ་ན། ཕྱི་རོལ་ལྷག་མའི་ལུས་དེ་རྣམ་པར་སྨིན་པ་རིག་འཛིན་གྱི་ལུས་ཡིན་ནམ་མ་ཡིན། ཡིན་ན་གོང་དང་འགལ་ལ། མིན་ན་རང་གི་ལུས་མིན་པ་དོར་བ་ལྷག་མེད་དུ་འགྲོ་ན་ཧ་ཅང་ཐལ་ཞེས་གོང་དང་མཚུངས་སོ། །གཉིས་པ་རང་གི་ལུགས་ནི་མཚན་ཉིད་གསུམ་ལྡན་ཏེ། རིག་པ་ལྷའི་སྐུར་སྨིན་པ་དང་ལུས་ཀྱི་རྒྱ་མདུད་ཀྱིས་སྒྲིབས་པ་དེ་དང་བྲལ་མ་ཐག་ཕྱག་རྒྱ་ཆེན་པོ་ལ་སྦྱོར་བའི་ནུས་པ་དང་ལྡན་པའོ། །གསུམ་པ་ཟག་བཅས་ཡིན་ནམ་ཟག་མེད་ཡིན་ཞེ་ན། ཡང་ཁྱེད་ན་རེ་ཡིན་ཟག་བཅས་ཡིན་དང་ཟག་མེད་ཀྱི་ཁོངས་སུ་འདུ་སྟེ། དཔེར་རྒྱུ་ཞབས་སུ་མཚོན་རྣོན་པོ་བརྒྱབ་པའི་མི་དེ་གཤིན་པོའི་ཁོངས་སུ་འདེབས་པ་དང་འདྲ་ཞེས་འདོད་དོ། །སྤྱི་ཟག་བཅས་ཟག་མེད་ཀྱི་ཁྱད་པར་ནི་ཁ་གཅིག་ཟག་པ་གསུམ་དང་བྲལ་མི་བྲལ་ལ་བྱེད་ན། འོ་ན་ཟག་པ་གསུམ་དང་བྲལ་ཙམ་གྱི་མེད་དགག་ལ་འདོད་ན་རི་བོང་གི་རྭ་ཡང་ཟག་མེད་དུ་འགྱུར་རོ། །དེ་མིན་གྱི་ཤེས་པ་གསུམ་དང་བྲལ་བའི་ཤེས་པ་ཟག་མེད་ཡིན་ཞེ་ན། འོ་ན་ཚོགས་བསྒྲུབ་ཀྱི་བློ་སྟོབས་ཆེ་ཤོས་ཚེ་དབང་ལ་སྦྱོར་བ་ལ་མ་རེག་པའི་རྒྱུ་ནུས་ཐོབ་པ་དེ་ཡང་ལུས་ཁམས་སྐྱེ་གནས་ཀྱི་ཟག་པ་གསུམ་དང་བྲལ་བས་ཟག་མེད་དུ་འགྱུར་རོ། །དེས་ན་ཟག་མེད་རང་གི་མཚན་ཉིད་མཐོང་བ་ནི་ཟག་མེད་ཡིན་ལ་མ་མཐོང་བ་ནི་ཟག་བཅས་སོ། །དེ་གཉིས་ཀྱི་མཚམས་ནི་བར་ཆད་མེད་པ་མན་ཆད་ཟག་བཅས་ལམ་མཆོག་ཡོངས་སུ་སྦྱངས་པའི་ཚེ་དབང་ཡན་ཆད་ཟག་མེད་དོ། །ལམ་ཟག་བཅས་ཟག་མེད་ནི་ཟག་པ་གསུམ་དང་བཅས་པའི་ཤེས་རབ་དང་ཏིང་ངེ་འཛིན་ནམ་ཤེས་ཐོབ་བྱེད་པ་ཟག་བཅས་དེ་ལས་ལོག་པ་ཟག་མེད་དོ། །རྣམ་སྨིན་ལུས་ཀྱི་ཟག་པ་ཡོད་ལ་ཁམས་དང་སྐྱེ་གནས་ཀྱི་ཟག་པ་མེད་དོ། །སྤྱིར་རྣམ་སྨིན་ཟག་བཅས་སུ་འདོད་པ་མི་འཐད་དོ། །སྤྱིར་ཟག་པ་ཞེས་བྱ་བ་ནི་ཉོན་མོངས་པ་ཁོ་ན་ལ་བྱ་སྟེ། དེ་ཅིའི་ཕྱིར་ན་འབོ་ཞིང་ཟག་པས་ན་ཟག་པ་སྟེ། དཔེར་ན་རྨ་ནས་རྣག་ཁྲག་འཛག་ཅིང་འབོ་བ་ལྟར་འདུ་བྱེད་སྐྱེ་མཆེད་རྨ་དང་འདྲ་ཞིང་བས་ཡུལ་སྡུག་ཅི་མི་སྡུག་ལ་ཉོན་མོངས་པ་ཟག་ཅིང་འབོ་བའི་ཕྱིར་རོ། །དེ་ལ་དབྱེ་ན་གསུམ་ཉོན་མོངས་པས་ཀུན་ནས་བསླངས་ནས་ལས་བསགས་པས་རང་དབང་མེད་པར་འཁོར་བར་སྐྱེ་བ་ནི་སྐྱེ་གནས་ཀྱི་ཟག་པ་སྟེ་ཟག་པ་རང་གི་ངོ་ཉིད་དམ་རང་དབང་མེད་པར་བསྐྱེད་པའི་རྟེན་ཕུང་པོ་འདི་ཉིད་ལ་འཆི་བའི་སྡུག་བསྔལ་དང་ལྡན་པ་ནི་ལུས་ཀྱི་ཟག་པ་སྟེ། ཟག་པའི་འབྲས་བུ་ལ་ཟག་པར་བཏགས་པའོ། །ཡང་གཤང་གཅི་འཛག་པ་ལ་ཡང་ཟེར། ལུས་དེ་ཉིད་ནད་འདུ་བ་བཞི་དང་ལྡན་པ་ནི་ཁམས་ཀྱི་ཟག་པའོ། །དེ་གསུམ་ལས་རྣམ་སྨིན་ལ་ཟག་པའི་གཙོ་བོ་སྐྱེ་གནས་ཀྱི་ཟག་པ་མེད་པའི་ཕྱིར་ཟག་མེད་ཡིན་ལ། གཞན་ལུས་ཀྱི་ཟག་པ་ཡང་མེད་དེ། ལུས་ཡོད་པ་ཙམ་གྱིས་ཟག་པར་མི་འགྱུར་ཏེ། འགྱུར་ཚེ་དབང་གི་རྡོ་རྗེའི་ལུས་ཀྱང་ཟག་པར་འགྱུར་རོ། །ཡང་ལུས་འདོར་བ་ཙམ་གྱིས་ཟག་པར་མི་འགྱུར་ཏེ་སྤྲུལ་པའི་སྐུ་ཡང་ཟག་བཅས་སུ་འགྱུར་རོ། །དེས་ན་ལུས་འདོར་བའི་སྡུག་བསྔལ་ནི་ལུས་ཀྱི་ཟག་པ་སྟེ། རྣམ་སྨིན་ལ་སྦྲུལ་ཤུན་ནམ་སྒོང་ཤུན་འདོར་བ་ལྟ་བུ་ལས་འདོར་བའི་སྡུག་བསྔལ་མེད་པས་ཟག་མེད་དུ་འཐད་དོ་གསུང་སྟེ་སྡུག་བསྔལ་ཡོད་པ་དང་མེད་པ་གཉིས་ཀ་གཞུང་ལས་མི་གསལ་ལོ། །རིག་འཛིན་བཞིའི་ལུས་ཀྱི་ཁྱད་པར་ནི། རྣམ་སྨིན་གྱི་རྩ་བའི་ལུས་ནི་ལྷའི་སྐུར་སྨིན་པའོ། །སྤྲུལ་པའི་ལུས་ནི་ད་ལྟར་གྱི་རྟེན་གང་ཡིན་པའོ། །ཚེ་དབང་གི་རྩ་བའི་ལུས་ནི་རྡོ་རྗེའི་ལུས་སྐྱེ་འཇིག་དང་བྲལ་བའོ། །སྤྲུལ་པའི་ལུས་ནི་ལྷ་མིའི་ཆ་བྱད་དོ། །ཕྱག་རྒྱའི་རྩ་བའི་ལུས་ནི་ལོངས་སྐུའི་ཆ་བྱད་ཅན་ནོ། །སྤྲུལ་པའི་སྐུ་ནི་རྔོན་པ་ལ་སོགས་ཇི་ལྟར་འདུལ་བ་ལྟར་སྣང་ངོ་། །ལྷུན་གྲུབ་ཀྱི་རྩ་བའི་ལུས་ནི་སྐུ་ལྔ་ལྷུན་གྲུབ་བོ། །སྤྲུལ་པའི་ལུས་ནི་མཛད་པ་བཅུ་གཉིས་ཀྱིས་གདུལ་བྱའི་དོན་བྱེད་པ་སྟེ་དོན་གྲུབ་ལྟ་བུའོ། །རྣམ་རྟོག་འབྱུང་བའི་ལྷག་ལུས་ཅེས་པ་ནི་ཐོག་མ་མེད་པ་ནས་ལུས་ལ་བདག་ཏུ་རྟོག་པའི་བག་ཆགས་ལས་གྲུབ་པའི་རྟོག་པའི་ལུས་སོ། །རྒྱུ་འབྱུང་བ་ལྔ་ལས་གྲུབ་པས་འབྱུང་བའི་ལུས་སམ། རྣམ་སྨིན་ཚེ་དབང་གཉིས་ལམ་གྱི་ཚོགས་པ་འབྲས་བུ་ཕྱག་རྒྱ་ཆེན་པོར་གཅིག་ལ། རིགས་ཀྱི་དབྱེ་རྒྱུ་བར་ཆད་མེད་པར་གཅིག་སྟེ། དཔེར་ན་ཡུལ་འདི་ནས་ཡུལ་གཞན་དུ་འགྲོ་བའི་མི་གཉིས་ལམ་གཉིས་ནས་ཞུགས་པ་དང་འདྲའོ། །བར་ཆད་མེད་པ་དང་རྣམ་སྨིན་གཉིས་ལམ་གྱི་ཚོགས་མངོན་ཤེས་ལ་ཁྱད་མེད་དུ་མི་འགྱུར་ཏེ། རྣམ་སྨིན་གྱི་ཚེ་གསལ་ཞིང་ངེས་པར་འགྱུར་བ་ཡིན་ནོ། །འོ་ན་རྣམ་སྨིན་དང་གཅིག་སྤྲོས་ཀྱི་ཡུལ་ལ་ཁྱད་མེད་པར་འགྱུར་སྙམ་ན་དེ་ནི་རྣམ་སྨིན་གྱི་ཐོབ་པ་གཅིག་སྤྲོས་ཚོགས་བསྒྲུབ་གསུམ་དང་མངོན་ཤེས་ཀྱི་རྟེན་ལུས་མཐུན་པས་དེ་གསུམ་དང་ཡུལ་མཐུན་པས་སྨོས་ཀྱི་རང་གི་ཡུལ་ནི་ཚེ་དབང་གི་མངོན་ཤེས་དང་ཁྱད་མེད་དོ། །ཞེས་གླན་གསུང་ངོ་། །སྤྱིར་ཚེ་དབང་བཞིའི་ཁྱད་པར་ནི། སྨན་ཕྱེ་མ་དང་ར་མོ་ཤག་དང་ར་དཀར་མོའི་འོ་མ་ལ་སོགས་པ་ཟོས་པས་ནི་ཚེ་རིང་བ་ནི་བཅུད་ལེན་སྨན་གྱི་རིག་འཛིན་ནོ། །ཐབས་སྟེང་སྒོ་འཁོར་ལོ་བཞི་བཞུ་ནས་ལུས་བཅུད་ཟུང་དུ་བསྲེས་པའམ། འོག་སྒོ་ལས་བྱུང་བ་རྟེན་ཐིག་ལེ་ཟོས་པ་ནི་ཚེ་རིང་བ་དང་སྦྱོར་བའི་ཐབས་ཀྱི་ཚེ་དབང་ངོ་། །རླུང་ཞི་བའམ་བུམ་པའི་དྲག་པོ་ལ་སོགས་པ་བཟུང་བས་ཚེ་རིང་བ་ནི་སྒྲོན་མ་རླུང་གི་ཚེ་དབང་ངོ་། །ལྟ་བ་དང་ཏིང་ངེ་འཛིན་བརྟན་པ་ལས་བྱུང་བ་ནི་ལམ་མཆོག་ཡོངས་སུ་སྦྱངས་བའི་ཚེ་དབང་ངོ་། །ཆོ་འཕྲུལ་ནི་རྫུ་འཕྲུལ་ཉི་ཤུ་ལ་དོན་བྱེད་པ་ནི་རྫུ་འཕྲུལ་གྱིའོ། །གདུལ་བྱ་སོ་སོའི་རང་གི་སྐད་དང་རྗེས་སུ་མཐུན་པར་བློ་དང་འཚམས་པའི་ཆོས་སྟོན་པ་ནི་བློ་རྗེས་སུ་བསྟན་པའི་འོ། །ཕྱི་ལྟར་ས་སྣང་བ་གཡོ་བར་སྣང་ཞིང་དེ་ནས་གནས་པའི་སེམས་ཅན་རྣམས་ས་འོག་ནས་གོང་དུ་སྦྱོར་བ་ནི་ཆོས་སྣང་བའི་འོ། །རང་གི་སྔགས་བཟླས་པ་སྒྲ་ཀུན་གསང་སྔགས་ཀྱི་སྒྲ་གྲགས་པས་གདུག་པ་འདུལ་ཞིང་གཞན་དོན་བྱེད་པ་ནི་ཀུན་བརྗོད་པའོ། །དབང་པོ་རེ་རེའི་ཡུལ་ལྔ་ལྔ་གཅོད་པ་ནི་ཅིས་ཞེ་ན། སྐྱེ་མཆེད་རྣམས་རང་བྱུང་ཡེ་ཤེས་ཉིད་ཡིན་ལ་དེ་གཅིག་དང་དུ་མ་དང་བྲལ་བར་ལྟ་བ་རྟོགས་ཏིང་ངེ་འཛིན་གོམས་པས་རང་བྱུང་ཡེ་ཤེས་གཅིག་དང་དུ་མ་དང་བྲལ་བ་རང་གི་མཚན་ཉིད་ཚེ་དབང་དུ་མཐོང་བས། དེས་ཡུལ་ཤེས་ཐ་དད་དྲུག་ཏུ་འཛིན་པ་དྲི་མ་སྦྱངས་པའི་ཕྱིར་རོ། །མངོན་ཤེས་དྲུག་གི་སྤྱན་དང་སྙན་སླ། །སྔོན་གྱི་གནས་རྗེས་སུ་དྲན་པ་ནི། རང་དང་གཞན་སྔོན་གང་དང་གང་དུ་སྐྱེས་པའི་སྐྱེ་གནས་དང་ལས་ཅི་སྤྱད་རྣམ་པ་དང་བཅས་པ་མལ་དང་བཅས་དུས་རྟགས་གཏན་ཚིགས་དང་བཅས་ཤེས་པའོ། །སྒྲིབ་པ་གསུམ་གྱི་ཁྱད་པར་ནི་ཤེས་བྱ་ཐམས་ཅད་ཀྱི་རྗེས་སུ་སོ་སོར་རྟོགས་པའི་ཤེས་རབ་འགྲོ་བ་ནི་ཀུན་ཏུ་འགྲོ་བའོ། །ཆོས་ཇི་བཞིན་པའི་ངང་ལ་བློ་དེ་བཞིན་འཇོག་པའི་ཞེན་པ་ནི་ལྷན་ཅིག་གནས་པའོ། །ཉོན་མོངས་པ་ནི་རྐང་ངམ་སྲི་ལ་གནས་པ་ལྟར་ཤིན་ཏུ་ཕྲ་བ་ནི་བག་ལ་ཉལ་ལོ། །ཕྱག་རྒྱ་ཆེན་པོའི་རིག་འཛིན་གྱི་རྒྱུ་ནི་རང་གི་ལུས་སེམས་ཉིད་ཡིན་པས་རང་བཞིན་ཡེ་ནས་ལྷ་ཡིན་པར་རྟོགས་གོམས་པས་ཀུན་ཏུ་འགྲོ་བའི་སྒྲིབ་པ་དག་པས་ལྷར་སྣང་བ་སྟེ། སྒྲིབ་བྱེད་ཀྱི་ཞེན་པ་དག་ཙམ་ལས་རྒྱུ་རྐྱེན་གྱིས་བསྐྱེད་པ་མེད་དོ། །ལྷུན་གྲུབ་ཀྱི་གྲངས་ནི་གསུམ་ལས། བྱ་བ་རྒྱུད་ཀྱི་ལྷུན་གྱིས་གྲུབ་པའི་རིག་འཛིན་ནི་རིགས་གསུམ་གྱི་ཆ་བྱད་དུ་སྣང་ཞིང་། སྟོན་པའི་རྒྱལ་ཚབ་སྐྱེས་བུ་དང་སྡུད་པ་པོ་ཡང་བྱེད་དེས་འགྲེ་དེ་ཚེ་སྒྲིབ་བཅས་པ་ནི་ལྷུན་གྲུབ་ཐོབ་པ་དེའི་ཚེ་བག་ལ་ཉལ་གྱི་སྒྲིབ་པ་ཆ་ཕྲ་མོ་ཡོད་ཀྱང་རང་གི་སྒྲིབ་པ་མི་སྦྱངས་པར་གཞན་དོན་མཛད་པའོ། །རླུང་ལའང་དེ་བཞིན་ཅེས་པ་ནི་སྤྱིར་གདུལ་བྱ་དུག་ལྔ་དང་ལྡན་པ་དག་གིས་སྤང་བྱ་ཉོན་མོངས་པ་དང་གཉེན་པོ་ལམ་མཐུན་པར་སྟོན་པའི་ཐབས་ལམ་མོ། །དེ་གཉིས་མི་མཐུན་པར་སྟོན་པ་ནི་གྲོལ་ལམ་མོ། །གསང་བའི་ཏནྟྲ་སྟོན་པ་ནི། སྔར་སངས་རྒྱས་ཀྱིས་བསྟན་པའི་རྒྱུན་འཆད་ཅིང་སྡུད་པ་པོ་བྱེད་པ་ཡིན་གྱི་ལྷུན་གྲུབ་རང་ལ་གནས་པའི་རྒྱུད་འཆད་པའི་ནུས་པ་མེད་དོ། །སྤྱིར་ལྷག་བཅས་ཀྱི་རིག་འཛིན་གསུམ་གྱི་ཁྱད་པར་ནི། སྤང་བྱ་སྒྲིབ་པའི་ཆ་ནི་གང་དུ་བས། གཉེན་པོ་ལམ་གྱི་ཁྱད་པར་ནི་ཚེ་དབང་གི་བདེན་པ་དབྱེར་མེད་རང་གི་མཚན་ཉིད་མཐོང་སྟེ་དེ་ལ་དབང་བསྒྱུར་བའོ། །ཕྱག་རྒྱ་ནི་བདེན་པ་དབྱེར་མེད་ལས་མི་གཡོ་བའོ། །ལྷུན་གྲུབ་ནི་མི་གཡོ་བ་ལས་མི་རྟོག་པར་གནས་པའོ། །དེ་གསུམ་ཀྱང་རིམ་པ་ལྟར་ཟག་མེད་ཀྱི་མཐོང་ལམ་སྒོམ་ལམ་མཐར་ལམ་མོ། །ལེའུ་བརྒྱད་པ་ཨཱི་ཐཱི། དེ་ལྟར་གཉེན་པོ་རིམས་དང་ཅིག་ཆར་གྱི་ལམ་གཉིས་ལ་མཚན་ཉིད་གསུམ་གྱི་སྒྲིབ་བྱེད་ཀྱི་ཞེན་པ་དག་པའི་ཚེ་ཡེ་ནས་སངས་རྒྱས་པའི་དོན་ཇི་ལྟ་བ་བཞིན་མངོན་དུ་བྱས་པའི་མཐར་ཐུག་གི་འབྲས་བུའི་དོན་བཤད་པར་བྱའོ། །དོན་རྡོ་རྗེ་འཛིན་པ་ནི། གཉིས་མེད་ཀྱི་ཡེ་ཤེས་ཐུགས་སུ་ཆུད་པའོ། །རྟགས་རྡོ་རྗེ་འཛིན་པ་ནི་རིགས་དྲུག་པ་རྡོ་རྗེ་འཆང་དུ་སྣང་བའོ། །དོན་གསུམ་ནི་རྒྱལ་བ་དྲུག་པའི་ཡོན་ཏན་གྱི་ཁྱད་པར་ལས་འབྲས་བུ་ཉེར་ལྔར་སྣང་བ་ནི་ངོ་བོའོ། །དགོངས་པའི་རྒྱུད་དང་དུ་མའི་སྒྲ་བརྗོད་ལས་འདས་པ་ནི་ཚུལ་ལོ། །ཐེག་པ་འོག་མའི་ཚུལ་ལས་སངས་རྒྱས་ངོ་བོ་ཚུལ་མིང་གྲངས་གསུམ་གྱིས་འཕགས་པ་ནི་ཁྱད་པར་རོ། །དང་པོ་ལ་གཉིས་ལས་དབྱེར་མེད་ལྷུན་གྲུབ་ཀྱིས་ངོ་བོ་ནི། རིགས་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་ངོ་བོ་ཉིད། རྒྱལ་བ་དྲུག་པ་ཀུན་ཏུ་བཟང་པོ་སྟེ་རད་ན་ལྟར་ལྷུན་གྱིས་གྲུབ་ཅིང་གཅིག་དང་དུ་མར་དང་བྲལ་བས་སོ། །དེ་ཅིའི་ཕྱིར་ན་ཀུན་ཏུ་བཟང་པོའི་ཡོན་ཏན་གྱི་ཁྱད་པར་ལ་འབྲས་བུ་ཉེར་ལྔ་གདུལ་བྱ་ཇི་ལྟར་མོས་པ་ལྟར་སྣང་བས་གཅིག་དང་བྲལ་ལ། ཡང་དག་པར་ན་རིགས་འདི་ཀ་ཞེས་གྲུབ་པ་མེད་པས་དུ་མ་དང་བྲལ་བའི་ཕྱིར་རོ། །དེ་ཉིད་ལ་རིགས་ཐམས་ཅད་ཀྱི་བདག་པོ་ལ་ཡང་དག་པར་རྫོགས་པའི་སངས་རྒྱས་དེ་བཞིན་གཤེགས་པ་ལོངས་སྤྱོད་ཆེན་པོ་ཞེས་བྱ་སྟེ་མཚན་གྱི་རྣམ་གྲངས་སྨོས་པ་ཁོ་ནའོ། །མ་འདྲེས་རྣམ་གྲངས་སུ་སྣང་བའི་ངོ་བོ་ལ་སྤྱིར་ལྔ་བྱེ་བྲག་ཉེར་ལྔ་སྟེ། དང་པོ་སྐུ་ལྔ་ནི་ཆོས་ཐམས་ཅད་སེམས་ཉིད་སྐྱེ་མེད་དུ་གཅིག་པས་སྣ་ཚོགས་སུ་སྣང་ལ་རང་བཞིན་མེད་པ་ནི། གནས་ལུགས་ཆོས་སྐུའོ། །ཆོས་ཐམས་ཅད་རང་རིག་པའི་མངོན་སུམ་དུ་ཡུལ་མེད་པར་རང་གསལ་བ་ནི་རང་བྱུང་གི་ཡེ་ཤེས་ཉིད་སྐུ་སྣ་ཚོགས་སུ་འཆར་བའི་གཞི་རྟེན་ནི་མངོན་པར་བྱང་ཆུབ་པའི་སྐུའོ། །འཁོར་འདས་བདེ་སྡུག་གི་ལོངས་སྤྱོད་ཐམས་ཅད་བཏར་ལ་འཛིན་མེད་པར་རོལ་བ་ནི་ལོངས་སྐུའོ། །ཉི་ཟླའི་དལ་ལས་མ་གཡོས་པར་གཟུགས་བརྙན་སྣང་བ་ལྟར་ཆོས་སྐུ་ལས་མ་གཡོས་བཞིན་གདུལ་བྱ་ལ་སྣ་ཚོགས་སུ་སྣང་བ་ནི་སྤྲུལ་སྐུའོ། །ནམ་མཁའ་ལྟར་སྐྱེ་འཇིགས་དང་བྲལ་བའི་ངོ་བོ་ཉིད་ཀྱི་རྟག་པ་ནི་རྡོ་རྗེའི་སྐུའོ། །རྩ་རྒྱུད་དུ་བཤད་པ་དང་མི་འདྲ་བར་སྣང་། གསང་བདག་སྙན་ཆ་ལྔ་དང་ལྡན་པ་ནི། ཆོས་སྐུ་ལ་སྐྱེ་མེད་ཀྱི་དོན་གྱི་ཉན་པ་ལ་སོགས་པ་སྙན་གྱི་ཡུལ་ཅན་སྙན་ལ་སྦྱར་བས་སླ་བར་ཟད། དེ་ལྟར་སྐུ་ལྔ་ལ་ཐོས་པས་སྐུ་བཞི་ལ་ཚིག་ཏུ་བརྗོད་པར་གོ་བས་སྡུད་པ་པོས་རྒྱུད་ཀུན་ཏུ་འདི་སྐད་བཤད་པའི་དུས་ན་ཞེས་སྨོས་ལ། སྤྲུལ་སྐུ་ལ་གསུང་དབྱངས་ཡན་ལག་དྲུག་ཅུ་བརྗོད་དེ་གོ་བས་གསང་སྔགས་དྲུག་ཀྱི་རྒྱུད་ཀུན་ཏུ་འདི་སྐད་བདག་གིས་ཐོས་པའི་དུས་གཅིག་ན་ཞེས་གསུངས་སོ། །གསུང་ལྔ་ནི། དཔེར་ན་ཆུ་དང་བའི་ནང་དུ་ཉི་ཟླའི་གཟུགས་བརྙན་འཆར་བ་ལྟར་འཁོར་གྱི་དབང་པོ་དང་པོ་ལ་སྟོན་པས་ཚིག་ཏུ་མར་བརྗོད་པར་སྐྱེ་མེད་ཀྱི་དོན་གོ་བར་བྱེད་པ་ནི་དོན་གྱི་གསུང་ངོ་། །དཔེར་ན་ཉི་མའི་འོད་ལྟར་སྟོན་པའི་ཐུགས་རིག་པའི་ཡེ་ཤེས་ལྔ་དང་ལྡན་པའི་ཕྱིར་བྱིན་གྱིས་བརླབས་ཀྱིས་དོན་གསལ་བར་བྱེད་པ་ནི་རིག་པའི་གསུང་ངོ་། །དཔེར་ན་མེ་ལོང་གི་བྱད་བཞིན་སྣང་བ་ལྟར་སྟོན་པའི་སྐུ་མཐོང་བའི་བརྡ་ཡིས་དོན་བརྡའ་སྤྲོད་པ་ནི་བརྡའི་གསུང་ངོ་། །དཔེར་ན་ལྷ་ཚངས་པའི་ངག་ལྟར་སྟོན་པས་གསུང་དབྱངས་རིགས་དྲུག་གི་ལས་ཅན་ལ་བརྡའ་སྤྲོད་པ་ནི་ཚིག་གི་གསུང་ངོ་། །བྲག་ཆ་ལྟར་སྒྲ་གྲགས་སྟོང་དབྱེར་མེད་ཀྱིས་དོན་རྟོགས་པར་བྱེད་པ་ནི་རྡོ་རྗེའི་གསུང་ངོ་། །ཐུགས་ཡེ་ཤེས་ལྔའི་དོན་ནི་ལེའུ་གསུམ་པར་བཤད་པ་ལྟར་སྦྱར། འདིར་ཐུགས་ལྔའི་ངག་དོན་ནི། ཆོས་ཐམས་ཅད་སེམས་ཉིད་ནམ་མཁའ་ལྟར་སྟོང་པ་ཆེན་པོའི་ཡེ་ཤེས་ལ་འཛིན་པ་ཟུག་རྔུ་གཉིས་མ་སྤངས་བྲལ་བས་བདེ་བ་ཆེན་པོའི་ཐུགས་སོ། །ཆོས་སྤྱི་དང་རང་རང་གི་མཚན་ཉིད་ཐམས་ཅད་མེ་ལོང་ལྟར་གསལ་ལ་རྟོག་པ་མེད་པས་རྣམ་པར་མི་རྟོག་པའི་ཐུགས་སོ། །ཆོས་ཐམས་ཅད་མ་བྱུང་བ་ཆེན་པོ་ལྟར་བླང་དོར་མེད་པའི་མཉམ་ཉིད་ལས་མི་གཡོ་བས་མཉམ་པ་ཆེན་པོའི་ཐུགས་སོ། །གདུལ་བྱ་ཉིད་ལས་མི་གཞན་པར་མཁྱེན་པས་གདུལ་བྱ་འདུལ་བྱ་འདུལ་བྱེད་དུ་ཞེན་པར་མེད་པ་ལས་བཞིས་འགྲོ་དོན་མཛད་པས་འགྲོ་བ་སྒྲོལ་བའི་ཐུགས་སོ། །ཆོས་ཐམས་ཅད་ནམ་མཁའ་ལྟར་གཞའ་ཚོན་ལྟར་གསལ་སྟོང་དབྱེར་མེད་དུ་སྣང་བ་ནི་རྡོ་རྗེའི་ཐུགས་སོ། །འོ་ན་ཆོས་སྐུ་དང་དོན་གྱི་གསུང་དང་བདེ་བ་ཆེན་པོའི་ཐུགས་གསུམ་པོ་སྐྱེ་མེད་དུ་མཚོན་ཚུལ་དུ་འདྲེས་སྙམ་ན། སྐྱེ་མེད་དེ་ཉིད་རྟེན་བྱེད་པས་སྐུ། དེ་ཉིད་འཁོར་ལ་གོ་བརྡ་སྤྲོད་པས་གསུང་། སྐྱེ་མེད་དུ་སྟོང་པའི་དགོངས་པ་གསལ་བས་ཐུགས་ཏེ་མཚོན་ཚུལ་ཐ་དད་པ་རྩམ་མོ། །ཡོན་ཏན་ལྔ་ན་གཟུགས་སྐུ་ལ་མངོན་སྤྱོད་དུ་ཡོད་ལ་སྐུ་གསུམ་པོ་ལ་རྒྱུད་ལ་ལྡན་དུ་སྦྱར་རོ་གཞལ་ཡས་ཁང་ལ་གཉིས་ཏེ། འབྲས་བུ་ཆོས་ཐམས་ཅད་རྫོགས་པའི་རིག་པ་ཉིད་ལ་ཉིད་རང་སྣང་བའི་རྟགས་གཞལ་ཡས་ཁང་ཉིད་དབྱིབས་དང་ཁ་དོག་ཏུ་སྣང་བ་ནི་གཟུགས་སྐུའོ། །གཟུངས་འཛིན་རང་དང་བྲལ་བའི་རང་རིག་ཉིད་རྟེན་དང་རྟེན་ཅན་པའི་ནི་སངས་རྒྱས་སྐུ་ལྔའི་ཀུན་གྱི་གཞལ་ཡས་ཁང་ངོ་། །གཏན་དང་གདན་གྱི་དོན་རྟོགས་རྩ་རྒྱུད་ལྟར་ཞིབ་ཏུ་སྦྱར། ལྷུན་གྱིས་གྲུབ་པའི་ལས་ཀྱི་རིགས་ལ་ལས་བཞི་ཆར་ལྷུན་གྱིས་གྲུབ་པས་དེ་ཉིད་གདུལ་བྱ་ལ་ཕྲིན་ལས་བཞིར་སྣང་ནས་དོན་བྱེད་པ་ཡིན་གྱི་ཕྲིན་ལས་ཕྱོགས་གཅིག་པས་གདུལ་བྱ་ཐམས་ཅད་འདུལ་བ་ནི་རིགས་པ་མ་ཡིན་ནོ། །གཉིས་པ་ཚུལ་ནི་ལམ་དེ་ལྟར་སྦྱོངས་པའི་ཐ་མ་ལྷུན་གྲུབ་ཀྱི་ཚེ་རྒྱལ་ཚབ་སྐྱེས་བུ་རྡོ་རྗེ་དང་རྡོ་རྗེ་རིན་ཆེན་ལ་སོགས་སངས་རྒྱས་ཙམ་ན་དེ་མི་བསྐྱོད་པ་དང་རིན་འབྱུང་ལ་སོགས་པ་རིགས་ལྔའི་ཆ་རེ་འཛིན་པར་བྱེད་དང་། རིགས་དྲུག་པ་སངས་རྒྱས་ཀུན་གྱི་ངོ་བོར་ཉིད་དུ་གཅིག་པས་ངོ་བོ་རིགས་ལྔ་དང་དུས་སྔ་ཕྱིའི་སངས་རྒྱས་དང་མར་མེ་མཛད་དང་། བྱམས་པ་ལ་སོགས་པར་བསྟན་པ་དྲང་དོན་ཙམ་ཡིན་གྱི། སངས་རྒྱས་ཞེས་བརྗོད་པའི་དགོངས་པའི་རྒྱུད་ཇི་ལྟར་བཞུགས་པའི་ཚུལ་ནི་སྨྲ་བསམ་གྱིས་བརྗོད་པ་ལས་འདས་པའི་གཟུང་དུ་མེད་དོ་ཞེས་སྤྱིར་བསྟན་ནས། དེའི་དོན་གྱི་ཕྱོགས་གཅིག་ཙམ་ཞིག་བསྟན་པར་བྱ་ན་དེའི་དོན་ཇི་ལྟ་བུ་སྙམས་ན་གཉིས་ལས། དང་པོ་གཅིག་དང་ཐ་དད་དུ་དགག་པ་ནི། དྲང་དོན་དུ་སྔ་ཕྱིའི་སངས་རྒྱས་དབུ་མ་པ་ན་རེ། ཆུ་ལ་ཆུ་བླུགས་པ་ལྟར་དགོངས་པའི་རྒྱུད་དོན་དམ་སྤྲོས་བྲལ་གྱི་ངང་དུ་གཅིག་པར་འདོད་པ་ལྟར་མེད་དེ། དེ་ཅིས་ཞེ་ན། དོན་དམ་སྤྲོས་བྲལ་ཁོ་ནར་ཕྱོགས་གཅིག་ཏུ་གྲུབ་པ་མ་ཡིན་པའི་ཕྱིར་རོ། །འོ་ན་སེམས་ཙམ་པ་ལྟར་ན་སངས་རྒྱས་ཐམས་ཅད་ཤིང་གི་མེ་དཔུང་ལྟར་སྦྱངས་པའི་ཡེ་ཤེས་རྫས་ཐ་དད་པའོ། །སྙམ་ན་ཐ་དད་པའང་མེད་ན་གཅིག་ཆོས་ཀུན་རྫོབ་ཡེ་ཤེས་གསལ་ཆ་མ་འདྲེས་པ་དེར་བདེན་པ་གྲུབ་པ་མ་ཡིན་པའི་ཕྱིར་རོ། །དེས་ན་རང་གཞུང་གཅིག་དང་དུ་མ་དང་བྲལ་བར་བསྟན་པ་ནི། བདེན་པ་དབྱེར་མེད་དབང་བཙན་པར་བྱས་ན་བདེན་པ་དབྱེར་མེད་ཀྱི་དོན་རང་གཞན་སོ་སོ་བ་གཉིས་མེད་པའི་ཕྱིར་རོ། །གཉིས་མེད་དེ་མངོན་དུ་བྱས་པའི་ཚུལ་ནི། འདི་ཉིད་གཅིག་དང་དུ་མའི་མཐའ་ཐམས་ཅད་དང་བྲལ་བའི་ལམ་མ་སྤངས་པར་རང་གདོད་མ་ནས་རང་ལ་གནས་པ་དེ་ལམ་གྱི་སྒྲིབ་བྱེད་དང་བྲལ་བར་མངོན་དུ་བྱས་པ་ལ་སངས་རྒྱས་ཞེས་མིང་དུ་བརྗོད་ཀྱི་རང་གི་ངོ་བོ་འདི་འདྲ་ཞེས་སྨྲ་བ་དཀའོ། །འོ་ན་གཞུང་དག་ལས་དགོངས་པའི་རྒྱུད་གཅིག་དང་ཐ་དད་དུ་བསྟན་པ་དང་འགལ་སྙམ་ན། དེ་ནི་སྤྱིར་སངས་རྒྱས་ཐམས་ཅད་རྣམ་པར་མི་རྟོག་པའི་ཡེ་ཤེས་སུ་ངོ་བོ་ཉིད་དུ་གཅིག་ལ་སྦྱངས་པའི་རྫས་ཐ་དད་པ་ཡེ་ཤེས་ཀྱི་རྒྱུན་མ་འདྲེས་ཏེ་གཅིག་པ་མ་ཡིན་པ་ནི། དཔེར་ན་ཤིང་ཐ་དད་ཀྱི་མེ་དཔུང་གཅིག་པ་འདྲ་ཞེས་པ་ནི་ཐ་དད་ལ་མོས་པ་དྲང་བའི་དོན་ཙམ་དུ་བསྟན་གྱི་དེ་ཁོ་ན་ཉིད་ངེས་པའི་དོན་མ་ཡིན་ནོ། །འོ་ན་དགོངས་པའི་རྒྱུད་གཅིག་གམ་ཞེ་ན་ཆུ་ལ་ཆུ་བླུགས་པ་ལྟར་འདོད་པ་ལ་དྲང་དོན་ལས་ངེས་དོན་མིན་པས་དེ་དང་མཐུན་ནོ། །ངེས་དོན་ཡིན་ན་སྐྱོན་ཅི་ཡོད་སྙམ་ན་གཉིས་ལས། རིགས་པའི་སྐྱོན་གཅིག་དང་ཐ་དད་དུ་འདོད་པ་ལ་གོང་དུ་བདེན་གཉིས་ཀྱི་ཚུལ་གྱིས་སྐྱོན་བརྗོད་པས་དངོས་ཀྱི་དོན་ལ་གནོད་ལ། གཉིས་པ་ལུང་གི་སྐྱོན་ནི། གཟུང་འཛིན་བྲལ་བའི་ཡེ་ཤེས་ཉིད། །དེ་བཞིན་གཤེགས་པ་ཀུན་གྱི་གནས། །ཞེས་རྒྱུད་ལས་བཤད་པ་དང་ཡང་བདེ་གཤེགས་མི་གནས་མཉམ་པའི་ངང་དུ་བྱོན། ཞེས་གསུང ས་དེ་ཡང་དོན་དམ་སྐྱེ་མེད་ཀྱི་མཉམ་པ་དང་། ཀུན་རྫོབ་སྒྱུ་མའི་མཉམ་པ་གཉིས་པོ་ལྟ་བུ་མིན་གྱི་མཉམ་པ་གསུམ་པ་བདེན་པ་དབྱེར་མེད་ཀྱི་ངང་དུ་བྱོན་པ་གཤེགས་པར་བཤད་པ་ཡིན་པའི་ཕྱིར་རོ། །དོན་དམ་དུ་གཅིག་པ་དང་ཀུན་རྫོབ་དུ་ཐ་དད་པར་བསྟན་པ་དྲང་དོན་ནོ། །ངེས་པའི་དོན་དུ་ན། དོན་དམ་དུ་རྒྱུད་གཅིག་སྟེ་འདྲེས་པ་དང་ཀུན་རྫོབ་ཏུ་ཐ་དད་དེ་མ་འདྲེས་པའི་ཐ་དད་དང་བྲལ་བས། གཅིག་དང་དུ་མར་བྲལ་བའི་ཞེས་པ་ལ་སོགས་པ་བཤད་དོ། །གསུམ་པ་ཁྱད་པར་ནི་གསུམ་སྟེ། འདིར་འབྲས་བུ་ཉེར་ལྔར་ལྷུན་གྱིས་གྲུབ་པའི་སངས་རྒྱས་ཏེ། འོག་མ་སྐུ་གསུམ་ཐོབ་པའི་གྲུབ་མཐའ་བཞག་པའི་སངས་རྒྱས་ལས་བཞིས་ལ་སྤགས་པ་ནི་ངོ་བོའི་ཁྱད་པར་རོ། །ཐེག་པ་འོག་མ་ས་རྒྱུད་གཅིག་དང་ཐ་དད་དུ་འདོད་པ་ལ་འདིར་བསམ་བརྗོད་དང་བྲལ་བ་ནི་ཚུལ་གྱི་ཁྱད་པར་རོ། །བདེ་གཤེགས་དེ་བཞིན་གཤེགས་པ་དང་། །བྱང་ཆུབ་སེམས་དཔའ་བཅོམ་ལྡན་འདས། །དགེས་ཆེན་ལོངས་སྤྱོད་ཆེན་པོ་སོགས། །མིང་མཐུན་དོན་གྱིས་སྤགས་པ་ནི། །མཚན་གྱི་རྣམ་གྲངས་ཁྱད་པར་རོ། །མདོ་ཡི་ལུགས་ཀྱིས་ཐུན་མོང་གྲོལ་བའི་ལམ་ཕ་རོལ་ཏུ་ཕྱིན་པ་དྲུག་ཚོགས་གཉིས་སུ་འདུལ་ལ་ཚོགས་གཉིས་ཀྱི་སྒོ་ནས་བདེ་བར་གཤེགས་པ་ནི། དུས་གསུམ་ཐ་དད་དུ་འདོད་པས་སྔར་འདས་པའི་རྒྱལ་བ་དེ་བཞིན་དུ་གཤེགས་པས་དེ་བཞིན་གཤེགས་པའམ། བདེ་བར་གཤེགས་པའོ། །ཡང་ཀྲི་ཡ་རང་གི་ལྟ་བ་ཏིང་ངེ་འཛིན་གྱི་འབྲས་བུ་ལྷའི་དལ་དུ་བྱས་ནས་གཤེགས་པའམ། འབྲས་བུ་རྡོ་རྗེ་འཛིན་པའི་སར་སྔར་དེ་བཞིན་གཤེགས་པའོ། །ཡང་ཐབས་ལམ་སྔོན་བྱུང་དུ་དགེ་སློང་པ་རི་མ་དགྲ་བཅོམ་པ་ལྔ་བརྒྱས་རྒྱལ་ཚབ་ཏུ་བྱ་བའི་ཕྱིར་ཚིག་དང་ཡི་གེས་དབང་བསྐུར་བ་བཞིན་དུ་ད་ལྟར་ཡང་དབང་ཐོབ་པས་གཤེགས་པའམ། ཡང་ཀྲི་ཡའི་དབང་ཐོབ་པས་དེ་བཞིན་གཤེགས་པའི་ས་ཐོབ་པ་ཇི་བཞིན་དུ། ད་ལྟར་ཡང་དབང་ཐོབ་ནས་རྡོ་རྗེ་འཛིན་པའི་ས་ལ་གཤེགས་པ་སྟེ་དུས་སྔ་མ་དཔེར་བླངས་པའོ། །དེ་ལྟར་གཤེགས་ཚུལ་རང་རང་གི་མདོ་སྡེའམ་རྒྱུད་སྡེ་དག་ལས་གྲགས་པ་ལྟར་རོ། །ཡོ་གའི་ལུགས་ཀྱིས་རྒྱལ་བུ་དོན་གྲུབ་ཉིད་ཀྱི་དཀའ་ཐུབ་ཀྱི་ཁོག་པ་ཆུ་ཀླུང་ནཻ་ར་ཛ་ནར་བོར་ནས་ཐུགས་འོག་མིན་དུ་སངས་རྒྱས་པར་འདོད་དོ། །ཚུན་འཆོས་ཀྱི་དཔེ་ནི། རྒྱལ་པོ་སྟོབས་བཟང་མུ་ཏིག་འབེབས་པར་འདོད་ནས་རྒྱལ་བུ་མུ་ཏིག་འབེབས་ཅེས་བྱ་བ་བགད་ཙ་ན་མུ་ཏིག་ཁ་ནས་འབབས་པ་གཅིག་ཡོད་པས་བཀུག་སྟེ། སྣང་གཡེལ་ཆེ་ས་གཅིག་ཏུ་བཞག་པས། བཞི་པོ་འདིའི་སྤྱོད་ལོག་མཐོང་བས་བགད་པ་བས་དང་ཡིད་མུག་ནས་ཚིགས་བཅད་སྨྲས་པ། རྒྱལ་མོ་མེ་ཏོག་ཕོག་ན་བཤུམས། །མོན་པས་རྒྱུག་པ་བརྒྱབ་མིན་ན། །བྲམ་ཟེ་མེ་ལེན་སྦུར་སྐྱེལ་དང་། །ནེལ་བྱ་ཁ་ན་གཤོག་ཐོགས་དང་། །ཀུ་མ་ར་ཡི་འོ་མ་བཞི། །ལེགས་པར་སྤྱོད་པའི་ཚུལ་འཆོས་མཁན། །མུ་ཏིག་འབེབས་ལས་མ་གཏོགས་པ། །བདེན་པར་སྨྲ་བ་གཅིག་ཀྱང་མེད། །ཁོ་བོ་ཧ་ཧ་དགོད་རེ་བྲོ། །ཞེས་བགད་པས་མུ་ཏིག་ཁྱོར་གང་ཙམ་བྱུང་ངོ་། །སེང་གེའི་ང་རོ་ལྟ་བུ་གསུང་གི་འོད་ཟེར་གྱིས། འཇིག་རྟེན་ཁམས་གསུམ་རྒྱལ་མཚན་རྩེ་མོ་ལྟར། མི་ནུབ་གསལ་བའི་དོན་དུ་བདག་གིས་བསྡེབས། ནོངས་པ་བཟོད་གསོལ་དགེ་རྩ་ཡོངས་ལ་བསྔོ། །ཁོང་དོན་རྨོངས་པའི་ནད་སེལ་བདུད་རྩིའི་སྒྲོན་མ་དང་། བསྡུས་དོན་སྨན་པའི་འབྲས་ལྕགས་ཀྱི་ལྡེ་མིག་དང་། །ཚིག་དོན་སྤེལ་ལེགས་རིན་ཆེན་ཕྲེང་བ་སྟེ། །འདི་གསུམ་ལྡན་པ་དབུལ་མོའི་གཏེར་སྙེད་འདྲ། །དོན་གྱི་བློ་གྲོས་ཚིག་གི་བསྡེབ་སྦྱོར་ལ། །རྨོངས་འགྱུར་ཆེན་ལ་རགས་པའང་ཡུལ་འགྱུར་གྱིས། །གཞན་ལས་སྤགས་པར་རློམ་ན་འདི་ལྟ་བུའི། །རྟོགས་ལྡན་མཁས་པ་རྣམས་ནི་མ་གསང་མཚར། །ལམ་ཆེན་མོའི་ཏི་ཀ །ཤཱཀྱའི་དགེ་བསྙེན་སེང་སེང་གེ་ཧ་པྲ་འོད་བྷ་བས་སྦྱར་བ་རྫོགས་སོ། །རྒྱལ་བར་གྱུར་ཅིག །དགེའོ། །དགེའོ། །དགེའོ།། །།
རྣལ་འབྱོར་ཆེན་པོའི་རྒྱུད་སྒྱུ་འཕྲུལ་དྲྭ་བའི་མན་ངག་དཔལ་ལམ་གྱི་རིམ་པ་ཞེས་བྱ་བའི་དཀའ་བ་རྣམ་པར་འགྲེལ་པ་ལམ་མཆོག་གསལ་བའི་སྒྲོན་མེ།
རྣལ་འབྱོར་ཆེན་པོའི་རྒྱུད་སྒྱུ་འཕྲུལ་དྲྭ་བའི་མན་ངག་དཔལ་ལམ་གྱི་རིམ་པ་ཞེས་བྱ་བའི་དཀའ་བ་རྣམ་པར་འགྲེལ་པ་ལམ་མཆོག་གསལ་བའི་སྒྲོན་མེ་ཞེས་བྱ་བ་བཞུགས་སོ། །བདེ་ཆེན་དབྱིངས་ནས་སྤྲུལ་པའི་གཟུགས་གཟུང་སྟེ། །བརྗོད་མེད་ངང་ལས་ཚངས་པའི་གསུང་དུ་བཞེངས། །སྟོང་ཉིད་དབྱིངས་ནས་མཁྱེན་པའི་པདྨོ་རྒྱས། །མི་ཡི་སེང་གེ་ཁྱོད་ལ་ཕྱག་འཚལ་ལོ། །བདག་ཏུ་ལྟ་བའི་ཐ་བ་མ་ལུས་ཀུན། །དམ་ཆོས་བདུད་རྩིའི་ཆར་གྱིས་བརླན་བྱས་ནས། །བྱང་ཆུབ་སེམས་ཀྱི་ལྗོན་ཤིང་བསྐྱེད་པའི་ཕྱིར། །ལམ་མཆོག་གསལ་བའི་སྒྲོན་མེ་བཤད་པར་བྱའོ། །ཇི་ལྟར་དམུས་ལོང་དམིགས་བུ་བྲལ་བ་ཡིས། །བགྲོད་ཅིང་འཕྱན་པའི་གནས་སུ་རྟོལ་མིན་ལྟར། །གསང་བའི་ལམ་མཆོག་འདི་དང་བྲལ་གྱུར་གང་། །ཕུན་ཚོགས་འདོད་པའི་འབྲས་བུ་འབྱིན་མི་ནུས། །དེ་ཕྱིར་ཤེས་རབ་མིག་ལྡན་སྐྱེས་བུ་དག །ཤིང་རྟའི་བཞོན་པ་ལྟ་བུའི་ཐར་པའི་ལམ། །དབང་རྫོགས་ཐབས་ཀྱི་ཕྲིན་ལས་བསྒྲུབ་པའི་ཕྱིར། །སྔོན་གྱི་བདེ་གཤེགས་ཤུལ་འདིར་འབད་པར་བྱའོ། །འདི་ན་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་པ་མཐའ་དག་གི་འདྲེན་པ་སྟོན་པ་རྡོ་རྗེ་འཆང་ཆེན་པོ་སྔོན་གྱི་དེ་བཞིན་གཤེགས་པ་རྣམས་ཀྱི་ཤུལ་ལམ་ཆེན་པོ་སྒྱུ་འཕྲུལ་དྲ་བའི་ལེའུ་སྟོང་ཕྲག་བརྒྱ་པ་གང་ཡིན་པ་དེ་དག་གི་སྙིང་པོ་བསྡུས་ཤིང་དབང་ཕྱུག་སྐལ་བ་རབ་དང་ལྡན་པ་རྣམས་ཀྱི་དོན་དུ་ལེགས་པར་གསུངས་པ་ཡིན་ནོ། །འདི་ལྟར་རྣལ་འབྱོར་ཆེན་པོའི་རྒྱུད་སྒྱུ་འཕྲུལ་དྲྭ་བའི་མན་ངག་ལམ་གྱི་རིམ་པ་འདི་ལ་བཞི་སྟེ། ཡི་དམ་གྱི་ལྷ་ལ་དབང་མི་ཟ་བའི་ཕྱིར་ཕྱག་བཙལ་བ་དང་། གཞུང་བརྩམ་པ་མི་འགྱུར་བའི་ཕྱིར་བཤད་པར་དམ་བཅའ་བ་དང་། མངོན་པར་འདོད་པ་ལེགས་པར་རྟོགས་པའི་ཕྱིར་གཞུང་བཤད་པ་དང་། བསྟན་བཅོས་ཡོངས་སུ་རྫོགས་པའི་མཇུག་གི་བྱ་བ་བསྟན་པའོ། །དང་པོ་ཡི་དམ་ལྷ་ལ་དབང་མི་ཟ་བའི་ཕྱིར་ཕྱག་བཙལ་བ་ནི། བསྟན་བཅོས་ལས། དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱར་བཅས། །བརྒལ་ལན་བཅས་ཏེ་བསྟན་པར་བྱ། །ཞེས་གསུངས་པས། དགོས་པའི་དོན་དང་། བསྡུས་པའི་དོན་དང་། ཚིག་གི་དོན་དང་། ཚིག་གི་མཚམས་སྦྱར་བ་དང་། བརྒལ་བ་དང་ལན་བསྟན་པའོ། །དགོས་པའི་དོན་ལ་བཞི་སྟེ། སློབ་དཔོན་ཉིད་ཡ་རབས་སུ་ཤེས་པ་དང་། །ཡི་དམ་ལྷ་ལ་དབང་མི་ཟ་བ་དང་། །ཚོགས་གཉིས་རྫོགས་ཤིང་བར་ཆད་ཞི་བ་དང་། །བརྩམ་པ་མཐར་ཕྱིན་པའི་དགོས་པའོ། །དང་པོ་ཕྱག་འཚལ་བ་སློབ་དཔོན་ཡ་རབས་སུ་ཇི་ལྟར་ཤེས་ཤེ་ན། སྤྱིར་རྒྱ་གར་ན་མ་རབས་དང་གཡུང་པོ་ལ་ཕྱག་དང་ཞེས་ས་མེད། ཡ་རབས་དང་གོང་མ་ལ་ཕྱག་དང་ཞེ་ས་ཡོད་པས། མན་ངག་འདིའི་ཀླད་དུ་དུའང་ཕྱག་བཙལ་ནས་འདུག་པས། འདི་བརྩམ་པའི་སློབ་དཔོན་འདི་ཡ་རབས་ཀྱི་ཚུལ་ཅན་གཅིག་ཏུ་འདུག་སྙམ་དུ་ཤེས་སོ། །སློབ་དཔོན་ཡ་རབས་སུ་ཤེས་པ་ལ་དགོས་པ་ཇི་ཡོད་ཅེ་ན། ཕྱི་རབས་ཀྱི་གང་ཟག་བློ་དམན་པ། གང་ཟག་དད་པའི་རྗེས་སུ་འབྲང་བ་རྣམས་སློབ་དཔོན་ཡ་རབས་ཀྱིས་བརྩམ་པའི་ཆོས་འདི་བདེན་ངེས་སྙམས་དུ་དོན་དུ་འགྱུར་བའི་ཐེ་ཚོམ་ཁྱད་པར་ཅན་སྐྱེས་ནས་འཇུག་པའི་ཡན་ལག་ཏུ་འགྲོ་བའི་དགོས་པ་ཡོད་དོ། །གཉིས་པ་ཡི་དམ་ལྷ་ལ་དབང་མི་ཟ་བའི་དགོས་པ་ནི། དཔེར་ན་རྒྱལ་པོ་ཆེན་པོའི་འཁོར་ན་གནས་པ་རྣམས་ཀྱིས་ལས་དང་བྱ་བ་ཅི་ལ་འཇུག་ཀྱང་ཐོག་མར་རྒྱལ་པོ་ལ་མ་ཞུས་ན་བྱ་བ་དེ་ཡང་མཐར་མི་ཕྱིན། དཔེ་དེ་དང་འདྲ་བར་བརྟན་བཅོས་རྩམ་པའི་ཐོག་མར་རང་མོས་པའི་ལྷ་ལ་ཕྱག་མ་བཙལ་ན་བྱིན་རླབས་ཀྱང་མི་འཇུག་ལ་རང་བཟོར་འགྲོ་བའི་ཉེས་པ་ཡོད་དོ། །དཔེར་ན་ལས་དང་བྱ་བ་ལ་འཇུག་པའི་ཐོག་མར་རྒྱལ་པོས་གནང་བ་ཐོབ་ན་རྒྱལ་པོའི་ཆད་པ་མི་འབྱུང་ཞིང་། བྱ་བ་དེ་ཡང་མཐར་ཕྱིན་པར་འགྱུར་རོ། །དེ་བཞིན་དུ་བསྟན་བཅོས་བརྩམ་པའི་ཀླད་དུ་རང་མོས་པའི་ལྷ་ལ་ཕྱག་བཙལ་ན། རས་ཆོད་ཀྱི་སྒོ་ནས་དབང་ཟོས་པ་པར་ཡང་མི་འགྲོ་ལ། དེ་རྣམས་ཀྱིས་བྱིན་གྱིས་རློབ་པའི་དགོས་པ་ཡོད་དོ། །གསུམ་པ་ཚོགས་གཉིས་རྫོགས་ཤིང་བར་ཆད་ཞི་བའི་དགོས་པ་ནི། ཕྱག་བཙལ་བ་ཙམ་དུ་མ་འགགས་པས་བསོད་ནམས་ཀྱི་ཚོགས་རྫོགས་ལ། བཙལ་ཡང་རང་བཞིན་མེད་པར་ཤེས་པས་ཡེ་ཤེས་ཀྱི་ཚོགས་རྫོགས། དེ་ལྟར་ཚོགས་གཉིས་རྫོགས་པའི་གང་ཟག་དེ་ལ་མི་དང་མི་མ་ཡིན་པའི་བར་ཆད་ཀྱིས་མི་ཚུགས་པའི་དགོས་པ་ཡོད་དོ། །བཞི་པ་བརྩམ་པ་མཐར་ཕྱིན་པའི་དགོས་པ་ནི། གོང་དུ་བསྟན་པ་བཞིན་དུ་རང་མོས་པའི་ལྷ་ལ་ཕྱག་བཙལ་བས་མི་དང་མི་མ་ཡིན་པའི་བར་ཆོད་ཀྱིས་མི་ཚུགས་པས་བར་ཆད་མེད་ཙམ་ན་བརྩམ་པ་མཐར་ཕྱིན་པར་འགྱུར་བའི་དགོས་པ་ཡོད་དོ། །སྤྱི་དོན་གཉིས་པ་བསྡུས་པའི་དོན་ལ་བཞི་སྟེ། ཡུལ་གང་ལ་བཙལ་བ་དང་། གང་ཟག་གང་གིས་བཙལ་བ་དང་། ཚུལ་ཇི་ལྟར་བཙལ་བ་དང་། །དུས་ནམ་གྱི་ཚེ་བཙལ་བའོ། །དང་པོ་ཡུལ་གང་ལ་བཙལ་ན་རང་གི་ཡི་དམ་གྱི་ལྷ་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་ཟག་གང་གིས་བཙལ་ན་གཞུང་རྩོམ་པའི་མཁན་པོ་སངས་རྒྱས་གསང་བས་བཙལ་ལོ། །ཚུལ་ཇི་ལྟར་བཙལ་ན། ཐུན་མོང་དང་ཐུན་མོང་མ་ཡིན་པའོ། །ཐུན་མོང་མ་ཡིན་པའི་ཕྱག་ནི་དཔལ་རྡོ་རྗེ་སེམས་དཔའི་ཐུགས་ཆོས་དབྱིངས་རྣམ་པར་དག་པ་དང་། སློབ་དཔོན་སངས་རྒྱས་གསང་བའི་ཐུགས་དགོངས་ཐ་མི་དད་དུ་རྟོགས་པས་རྟོགས་པ་མཇལ་བའི་ཕྱག་བཙལ་ལོ། །དེ་ཡང་རིམ་ལྔ་ལས། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་ཡིན། ཞེས་གསུངས་སོ། །ཐུན་མོང་གི་ཕྱག་ནི། ལུས་ངག་ཡིད་གསུམ་གུས་པ་དང་བཅས་པས་ཕྱག་བཙལ་བའོ། །དུས་ནམ་གྱི་ཚེ་ན་གཞུང་རྩོམ་པའི་ཚེ་ན་བཙལ་ལོ། །སྤྱི་དོན་གསུམ་པ་ཚིག་གི་དོན་བསྟན་པ་ནི། དཔལ་གྱི་དཔལ་གསུམ་ཉིད་ལྡན་ཞེས་པ་ལ་སོགས་པའི་ཚིགས་སུ་བཅད་པ་གཅིག་གིས་སྟོན་ཏོ། །དེ་ཡང་དཔལ་ཞེས་པ་ཐུན་མོང་གི་དཔལ་གཉིས་ཏེ་ཆོས་ཀྱི་ཕྱོགས་རེ་རྟོགས་པ་རྟོགས་པ་བདག་གི་དཔལ། དེས་གདུལ་བྱའི་དོན་ཕྱོགས་རེ་བྱེད་པ་ནི་ཐུགས་རྗེ་གཞན་གྱི་དཔལ་ལོ། །དེ་ནི་ཡོ་ག་མན་ཆད་ལ་གནས་པས་ཐུན་མོང་གི་དཔལ་ལོ། །དེའི་ཡང་དཔལ་དུ་གྱུར་པ་ནི་དཔལ་གསུམ་ཉིད་ལྡན་ཞེས་པ་སྟེ། རང་བཞིན་ལྷུན་གྱི་གྲུབ་པའི་དཔལ་དང་། རིག་པ་རང་ལ་སྣང་བའི་དཔལ་དང་། ཐུགས་རྗེ་ཞར་ལ་འབྱུང་བའི་དཔལ་དང་གསུམ་མོ། །དེ་ལ་རང་བཞིིན་ལྷུན་གྱིས་གྲུབ་པའི་དཔལ་ནི། སེམས་ཉིད་བདེན་པ་དབྱེར་མེད་དེ་ལོག་པའི་རྒྱུ་རྐྱེན་དང་ཤེས་རབ་དང་བསྟན་བཅོས་ཀྱིས་མ་བཅོས་པའོ། །དེ་འཁོར་འདས་གཉིས་ཀའི་ངོ་བོར་གནས་ཤིང་སེམས་ཉིད་དུ་ལྷུན་གྱིས་གྲུབ་པའོ། །དེས་དངོས་སུ་ནི་ཕན་མི་འདོགས་པས་དཔལ་དུ་ཇི་ལྟར་འགྲོ་ན། བསྒྲུབ་ན་གྲུབ་ཏུ་རུང་གོ་རུ་རུང་། རྟོགས་སུ་རུང་བས་དཔལ་དུ་འགྲོ་སྟེ། དཔེར་ན་ཡོད་ན་ཕན། གང་ན་འབོ་ཟེར་བ་བཞིན་ནོ། །གཉིས་པ་ཐུགས་རིག་པ་རང་སྣང་བའི་དཔལ་ནི། གོང་གི་དབྱེར་མེད་ཀྱི་དོན་ཇི་ལྟ་བ་བཞིན་དུ་མངོན་དུ་བྱས་པ་སྟེ། རིག་པ་ཡུལ་མེད་དུ་གསལ་བ་ཉི་མའི་སྙིང་པོ་ལྟ་བུའོ། །གསུམ་པ་ཐུགས་རྗེ་ཞར་ལ་འབྱུང་བའི་དཔལ་ནི། དབྱེར་མེད་ཀྱི་དོན་ཇི་ལྟ་བར་རྟོགས་པའི་སྟོབས་ཀྱིས་རྟོགས་པ་དང་རྩོལ་བ་མེད་པར་ཞོར་རམ་ཤུགས་ལས་གདུལ་བྱ་དང་མཐུན་པར་དོན་བྱེད་པ་སྟེ། དཔེར་ན་ཉི་མ་ནམ་མཁའི་མཐོངས་སུ་ཤར་བས་འོད་ས་གཞི་ལ་སྙོམས་པར་འབྱུང་བ་བཞིན་ནོ། །དེ་གསུམ་ནི་ཁྱད་པར་རྣལ་འབྱོར་ཆེན་པོའི་མ་ཧཱ་ཡོ་གའི་དཔལ་ལོ། །ཉིད་ལྡན་ཞེས་པ། དེ་གསུམ་ཡང་མ་བཙལ་བར་སེམས་ཉིད་ལ་ལྡན་པའོ། །རྡོ་རྗེ་ཞེས་པ་ནི། གཉིས་མེད་ཀྱི་ཡེ་ཤེས་དེ་རྒྱུ་མཚན་ལྔར་རྡོ་རྗེར་འཇོག་སྟེ། ཕྲིན་ལས་ཀྱི་སྒོ་ནས་འཇོམས་པ་ནི་རྡོ་རྗེ་ལྟ་བུ་ཞེས་བྱ་བ་སྟེ། དཔེར་ན་རྡོ་རྗེ་ཕ་ལམ་དེས་ཕར་ལ་དངོས་པོ་ཐམས་ཅད་འཇོམས་པར་ནུས་ལ་ཚུར་ལ་ཅིས་ཀྱང་མི་ཆོད་པ་བཞིན་ནོ། །སེམས་ཉིད་གཉིས་མེད་ཀྱི་ཡེ་ཤེས་དེས་ཕར་ལ་ཉོན་མོངས་པ་དང་མཐའི་དྲི་མ་ཐམས་ཅད་འཇོམས་པར་ནུས་ལ། ཚུར་ལ་ཉོན་མོངས་པ་གང་གིས་ཀྱང་འཇོམས་པར་མི་ནུས་པའོ། །ངོ་བོ་འདུས་མ་བྱས་པ་ནི། ཡེ་ཤེས་འདུས་མ་བྱས་ཞེས་པ་སྟེ། སེམས་ཉིད་གཉིས་མེད་ཀྱི་ཡེ་ཤེས་དེའི་ངོ་བོ་ནི་རྒྱུ་རྐྱེན་འདུས་པ་ལས་མ་བྱས་པའོ། །ཡོན་ཏན་བཙལ་མེད་པར་ལྷུན་གྱིས་གྲུབ་པ་ནི། མ་བཙལ་ལྔ་རྫོགས་ཞེས་པ་སྟེ། ཞིང་ཁམས་དང་གདན་ཁྲི་ལ་སོགས་པའི་ཡོན་ཏན་ལྔ་ཡང་མ་བཙལ་བར་རང་གི་སེམས་ཉིད་ལ་རྫོགས་པའོ། །མཚན་ཉིད་སྐྱེ་འཇིག་མེད་པའི་རྡོ་རྗེ་ནི། རྐྱེན་བྲལ་མི་ཤིགས་ཞེས་པ་སྟེ། སེམས་ཉིད་གཉིས་མེད་ཀྱི་ཡེ་ཤེས་དེ་ནམ་མཁའ་དང་འདྲ་བས། དང་པོ་རྒྱུ་ལས་མ་སྐྱེས་ཤིང་ཐ་མ་རྐྱེན་གྱིས་མི་འཇིག་པའོ། །རང་བཞིན་སྒོ་ནས་དབྱེར་མི་ཕྱེད་པའི་རྡོ་རྗེ་ནི། དབྱིངས་ཉིད་ཡེ་ཤེས་འདུ་འབྲལ་མེད་ཅེས་པ་སྟེ། སེམས་ཉིད་དབྱེར་མེད་ཀྱི་ཡེ་ཤེས་དེ་ལ་དབྱིངས་ཡེ་ཤེས་དེ་ལ་དབྱིངས་ཡེ་ཤེས་སམ། འཁོར་འདས་སྣང་སྟོང་ལ་སོགས་པ་དབྱེར་མི་ཕྱེད་པའོ། །ལྔ་ཡིས་གྲུབ་ཉིད་ཅེས་པ་དེ་ལྟར་རྒྱུ་མཚན་ལྔ་པོ་དེས་རྡོ་རྗེའི་ངེས་ཚིག་གྲུབ་པ་ཉིད་དོ། །གཉིས་མེད་ངང་གསལ་ནི་སྣང་སྟོང་གཉིས་སུ་མེད་པའི་རིག་པ་ཡང་སྒྲིབ་གཡོགས་མེད་པར་རང་བཞིན་ངང་གིས་གསལ་བའོ། །མི་གཡོ་མི་སེམས་ནི། གཉིས་མེད་ཀྱི་རིག་པ་དེ་མཐའ་གང་དུའང་མི་གཡོ་ལ་དམིགས་པ་ཅིར་ཡང་མི་སེམས་སོ། །དེ་ཁོ་ན་ཤེས་རིག་རང་ག་མ་ལས་ཁྱད་པར་དུ་གྱུར་པའི་ཕྱིར་སེམས་ཆེན་པོ་ཡིན་པས་སེམས་ཆེན་པོ་ཞེས་བྱའོ། །ཕྲིན་ལས་བཞི་བཅོམ་དཔའ་བོ་ནི་ཕྲིན་ལས་ཀྱི་སྒོ་ནས་བདུད་བཞི་བཅོམ་པ་སྟེ། ཉོན་མོངས་པ་ཡེ་ཤེས་ལྔར་གསལ་བས་ཉོན་མོངས་པའི་བདུད་བཅོམ། ཕུང་པོ་ལྔ་པོ་རིགས་ལྔར་གསལ་བས་ཕུང་པོའི་བདུད་བཅོམ། རིག་པ་ལ་འགྱུར་བ་མེད་པས་འཆི་བདག་གི་བདུད་བཅོམ། གཉིས་མེད་ཀྱི་དོན་དུ་བྱ་བ་ཙམ་ན་གཞན་མ་གྲུབ་པས་དྲེགས་པ་ལྷའི་བུའི་བདུད་བཅོམ། དེ་ལྟར་བདུད་བཞི་བཅོམ་པ་ཉིད་ལ་དཔའ་བོ་ཞེས་བྱ་སྟེ། དཔེར་ན་འཁོར་བའི་གཡུལ་ངོ་བཟློག་པའི་དཔའ་བོ་ལྟ་བུའོ། །རང་ཉིད་ནི་སངས་རྒྱས་གསང་བའོ། །ལྷ་ཡི་ཞེས་པ་ནི་བཞི་སྟེ། མིང་གི་ལྷ་བཙད་པོ་དང་། བཏགས་པའི་ལྷ་ཡུལ་ལྷ་དང་། སྐྱེ་བའི་ལྷ་གཟུགས་མེད་ཁམས་ཀྱི་ལྷ་དང་། རྣམ་པར་དག །རྣམ་པར་དག་པའི་ལྷ་ཡོ་ག་མན་ཆད་ཀྱི་ལྷའོ། །དེ་ཡང་ལྷའི་ལྷ་ཞེས་པ་སྟེ། དཔལ་རྡོ་རྗེ་སེམས་དཔའ་འོ། །གཉིས་མེད་མོས་ཞེས་དཔལ་རྡོ་རྗེ་སེམས་དཔའི་ཐུགས་དང་། སློབ་དཔོན་གྱི་ཐུགས་གཉིས་མེད་དུ་རྟོགས་པས་རྟོགས་པ་མཇལ་བའི་སྒོ་ནས་མོས་ཤིང་ཕྱག་བཙལ་བའོ། །སྤྱི་དོན་བཞི་པ་ཚིག་གིས་མཚམས་སྦྱར་བ་ནི། མོས་ཤིང་ཕྱག་བཙལ་ནས་ཅི་བྱེད་ཅེ་ན། ལག་བཀྲུས་ནས་ཟན་བྱེད་ཟེར་བའམ། ཁ་བཤལ་ནས་མདོ་འདོན་ཟེར་བའི་ཚུལ་དུ་ཕྱག་བཙལ་ནས་བཤད་པར་དམ་བཅའ་སྟེ། འོག་ནས་བསྟན་པར་བྱའོ་ཞེས་བྱ་བར་འབྲེལ་ལོ། །སྤྱི་དོན་ལྔ་པ་བརྒལ་བ་དང་ལན་ནི། འོ་ན་ཕྱག་བཙལ་བ་དེ། ཆོས་ཀྱི་སྐུ་ཀུན་ཏུ་བཟང་པོ་ལ་ཡང་མི་འཚལ། རིགས་ལྔ་གཞན་ལ་ཡང་ཕྱག་མི་འཚལ། སྡུད་པ་པོ་གསང་བའི་བདག་པོ་ལ་ཕྱག་མི་འཚལ་བར་རྡོ་རྗེ་སེམས་དཔའ་ཁོ་ན་ལ་འཚལ་བ་ཅིའི་ཕྱིར་ཞེ་ན། དེ་ནི་རྒྱུ་མཚན་གསུམ་གྱི་ཕྱིར་ཕྱག་འཚལ་ཏེ། རྒྱས་པ་ལས། རྡོ་རྗེ་སེམས་དཔའི་བཀའ་བཤད་པའི་ཞེས་གསུངས་སོ། །གཉིས་པ་དཀྱིལ་འཁོར་གྱི་གཙོ་བོ་ཡིན་པའི་ཕྱིར་ཡང་ཕྱག་འཚལ་ཏེ། ཤེས་རབ་སྦྱན་འབྱེད་ལས། དཀྱིལ་འཁོར་གཙོ་བོ་སྐྱེས་བུའི་མཆོག །དམ་པའི་ལྷ་ཕྱིར་ཕྱག་འཚལ་ལོ། །ཞེས་གསུངས་སོ། །གསུམ་པ་ཡི་དམ་གྱི་ལྷ་ཡིན་པའི་ཕྱིར་ཡང་ཕྱག་འཚལ་ཏེ། རང་ཉིད་ལྷ་ཡི་ལྷ་ཞེས་འདི་ཉིད་ནས་བཤད་པའི་ཕྱིར་རོ། །དེའི་ཕྱིར་ལྷ་གཞན་པས་ཀྱང་རྡོ་རྗེ་སེམས་དཔའ་ལ་བཙལ་ལོ། །གཉིས་པ་བཤད་པར་དམ་བཅའ་བ་ལ་གསུམ་སྟེ། དགོས་དོན་དང་། བསྡུས་དོན་དང་། ཚིག་དོན་ནོ། །དགོས་པའི་དོན་ནི། གཞུང་རྩོམ་པའི་ཡན་ལག་ཏུ་བཤད་པར་དམ་བཅའ་བ་མཛད་པས་གཞུང་རྩོམ་པའི་ལས་མི་འདའ་བའི་དགོས་པ་ཡོད་དོ། །དེ་ཅིའི་ཕྱིར་ཞེ་ན། གང་དག་མི་ཆེན་པོ་རྣམས་དམའ་མི་འདོར་བའི་ཕྱིར་རོ། །བསྡུས་པའི་དོན་ལ་བཞི་སྟེ། དང་པོ་གང་གིས་བཤད་པར་བྱ་ན། དེ་ཕྱིར་སངས་རྒྱས་མཚན་ཐོས་ངས་ཞེས་པས་སངས་རྒྱས་གསང་བས་བཤད་པར་དམ་བཅའ་འོ། །གང་གི་དོན་དུ་བཤད་ན། དམ་པའི་རིགས་ཅན་དྲ་མ་ལྔ། །ཞེས་པས་ཕྱི་རབས་ཀྱི་གང་ཟག་གསང་སྔགས་ཀྱི་སྣོད་དང་ལྡན་པ་རྣམས་ཀྱི་དོན་དུའོ། །གང་ལ་བརྟེན་ནས་བཤད་པར་དམ་བཅའ་ན། སྟོང་ཕྲག་བརྒྱ་པའི་རྒྱུད་དག་ལས། ཞེས་པ་སྟེ། སྔོན་གྱི་རྒྱལ་བ་རྣམས་ཀྱི་ཤུལ་ལམ་ཆེན་པོ་སྒྱུ་འཕྲུལ་དྲ་བ་ལེའུ་སྟོང་ཕྲག་བརྒྱ་པ་ལ་བརྟེན་ནས་བཤད་དོ། །དུས་ནམ་གྱི་ཚེ་བཤད་ཅེ་ན། །སྙིགས་མའི་རྒྱུད་དྲག་དུས་ཀྱི་ཚེ། ཞེས་པ་སྟེ། དུས་མཐའ་མ་ལ་ཉོན་མོངས་པ་རྒྱས་པའི་ཚེ་གཉེན་པོ་གཞན་གྱིས་མི་ཐུབ་པས་དེའི་དུས་སུ་བཤད་པར་དམ་བཅའ་འོ། །དེ་ཅིའི་ཕྱིར་ཞེ་ན། །སྤང་བྱ་རྒྱུད་དྲག་ལ་གཉེན་པོ་སྟོབས་ལྡན་དགོས་པའི་ཕྱིར་རོ། །ཚིག་གི་དོན་ལ་གཉིས་ཏེ། མན་ངག་དམ་པ་ཡིན་པར་ཡིད་ཆེས་པའི་ལོ་རྒྱུས་དང་། དམ་བཅའ་རང་གི་ངོ་བོ་དགོས་ཆེད་དང་བཅས་པའོ། །མན་ངག་དམ་པ་ཡིན་པར་ཡིད་ཆེས་པའི་ལོ་རྒྱུས་ནི། གསང་བའི་བདག་པོ་མངོན་གཤེགས་ནས་ཞེས་བྱ་བ་ལ་སོགས་པ་སྟེ། འོ་ན་གསང་སྔགས་ཀྱི་བསྟན་པ། སྔོན་གྱི་ཤུལ་ལམ་ཆེན་པོ་འདི་དུས་ནམ་གྱི་ཚེ་ཇི་ལྟར་འབྱུང་ཞེ་ན། ལྷ་ཀླུ་གནོད་སྦྱིན་སྲིན་པོ་དང་ཞེས་བྱ་བ་ལ་སོགས་པ་གསུངས་ཏེ། དེ་ཡང་འཇིག་རྟེན་གྱི་སྒྲོན་མ་ཐུབ་པའི་དབང་པོའི་འཁོར་གསང་སྔགས་གོ་བའི་སྐལ་བ་དང་ལྡན་པ་ནི་ལྷ་གྲགས་ལྡན་མཆོག་སྐྱོངས། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན་དང་། །ལས་སྐལ་བ་དང་ལྡན་པ་ལི་ཙ་བྱི་ལ་སོགས་པ་འདུས་པའི་ཚེ། དབང་པོས་ཇི་ལྟར་ལུང་བསྟན་དུས། །ཞེས་པ། ཐུབ་པའི་དབང་པོས་འཁོར་དེ་རྣམས་ལ་གསང་སྔགས་ཕྱིས་འབྱུང་བར་ལུང་བསྟན་ཏེ། ང་ནི་འདི་ནས་མི་གནས་ན། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་དེ། །རྒྱལ་པོ་ཛཿཞེས་བྱ་བ་ལ། །སྔོན་དུ་ལྟས་སྣང་སྣང་འགྱུར་བ། །གྲོགས་ཀྱི་སེམས་དཔའ་དམན་པའི་ལུས། །ལངྐའི་བདག་པོ་ལ་སོགས་ལ། །ལག་ན་རྡོ་རྗེས་སྣང་བར་འགྱུར། །ཞེས་གསུངས་སོ། །དེ་ནས་ཐུབ་པ་མྱ་ངན་ལས་འདས་ཏེ་ལོ་ཉེར་བརྒྱད་ཐུབ་པའི་རིགས་ཅན་ལྔ་རི་མ་ལ་ཡར་འདུས་ཏེ། གདུང་བ་ཉེར་གསུམ་སྟོན་པ་ལས། ཕྱོགས་བཅུའི་སངས་རྒྱས་ཀྱིས་གསང་བའི་བདག་པོ་ལ་བསྐུལ་བ་མཛད་ནས་གསང་བའི་བདག་པོ་བྱོན་ཏེ། གསང་བའི་བདག་པོ་མངོན་གཤེགས་ནས་ཞེས་སོ། །དེ་ཡང་གསང་བའི་བདག་པོ་ནི་གསུམ་སྟེ། །གནོད་སྦྱིན་རྣམས་གསང་ཚིག་དང་བཅས་པར་སྐྱེ་ལ། དེའི་བདག་པོ་ཡིན་པའི་ཕྱིར་དང་། །དམ་པའི་མཛོད་གསུམ་ནི་གསང་བ་ཡིན་ལ། །དེའི་བདག་པོ་ཡིན་པའི་ཕྱིར་དང་། །རྒྱལ་བའི་སྐུ་གསུང་ཐུགས་ཐོབ་དཀའ་བས་གསང་བ་ཡིན་ཏེ། དེ་ལ་མངའ་བརྙེས་པས་བདག་པོ་སྟེ། དེ་མངོན་སུམ་དུ་མི་ཡུལ་དུ་གཤེགས་ནས་ཞེས་པའམ། ཡང་ན་གདུང་བ་ཉེར་གསུམ་འདོན་པ་མངོན་དུ་ཤེས་ནས་མི་ཡུལ་བྱོན་པའོ། །བྱོན་ནས་མ་ལ་ཡར་གསང་སྔགས་ཀྱི་ཆོས་ཀྱི་འཁོར་ལོ་བསྐོར་ཏེ། ལངྐའི་བདག་པོས་གླེགས་བམ་དུ་བྲིས་ནས་དགོངས་པའི་རྩལ་གྱིས་མདུན་གྱི་ནམ་མཁའ་ལ་སྦས་སོ། །རྒྱལ་བུ་རིགས་ཅན་ལྟས་ཤར་བ། །ཞེས་པ་ནི། དེ་ལྟར་ཆོས་ཀྱི་འཁོར་ལོ་བསྐོར་བའི་བྱིན་རླབས་ཀྱིས་རྒྱལ་བུ་གསང་སྔགས་ཀྱི་རིགས་ཅན་རྒྱལ་པོ་ཛཿལ་རྨི་ལྟས་བདུན་ཤར་ཏེ། གཉིད་སད་ནས་བཟླས་པས། སྐལ་བ་དང་ལྡན་པས་སྒྲུབ་པ་བྱ་དགོས་ཟེར་ཏེ། སྒྲུབ་པ་མཛད་པའི་ཕྱིར་ཡང་ཐོག་ཏུ་གཤེགས་པས་ཕྱག་ན་རྡོ་རྗེའི་སྐུ་གཅིག་ཀྱང་སྣང་བས་དེ་ལ་བརྟེན་ནས་སྒྲུབ་པ་མཛད་པས་རྨི་ལྟས་དང་མཐུན་པའི་གླེགས་བམ་རྣམས་མངོན་དུ་གཟིགས་ནས་སོ། །འབྲེལ་པས་སྣང་ལ་མངོན་བརྟགས་པས། ཞེས་པས། ལས་དང་སྐལ་བས་འབྲེལ་བའི་གླེགས་བམ་ལ་མངོན་སུམ་དུ་བརྟགས་པས་ཚིག་གཅིག་ཀྱང་བརྡའ་མ་མཇལ་ནས། ཀུ་ཀུ་ར་ཛ་ལ་བསྟན་པས་ཀྱང་མ་རྟོགས་ཏེ། རྒྱལ་པོ་ཉིད་ཀྱིས་དཔག་འཚལ་ཏེ་ཟེར་ཏེ་སླར་ལ་བསྐུར། ཐུགས་ཀྱི་བསྒྲུབ་པ་སྔོན་མངོན་རྟོགས་ཏེ་ཞེས་པ། ཡང་བསྐྱར་ཏེ་ཚོགས་བསག་སོགས་བྱས་གུས་པ་བྱས་ཏེ་བརྟགས་པས་རྡོ་རྗེ་སེམས་དཔའ་ཞལ་མཐོང་གི་ལེའུ་སྟོགས་ཏེ། དེ་ཉིད་སྒོ་ནས་དེ་ཉིད་འགྲུབ། །ཅེས་པ་རྡོ་རྗེ་སེམས་དཔའ་ཞལ་མཐོང་གི་ལེའུ་དེ་ཉིད་ཀྱི་སྒོ་ནས་བསྒྲུབ་པས་འགྲུབ་སྟེ་ཞལ་མཐོང་། རིགས་ཀྱི་བུ་དངོས་གྲུབ་ཅི་འདོད་ཟེར་བ་ལ། གླེགས་བམ་འདི་རྣམས་རྟོགས་པར་འཚལ་ཞེས་ཞུས་པས། རང་གི་ཕུང་པོ་སྦྱོངས་དང་གསང་བའི་བདག་པོས་ལུང་སྟོན་པར་འགྱུར་གྱི་གསུངས་ནས་མི་སྣང་བར་གྱུར་ཏོ། །དེ་ནས་ཕྱག་རྒྱ་རྡོ་རྗེ་དངོས་སུ་བྱོན་ནས་བསྟན་པ་གསལ་བར་བྱས་སོ། །བསྟན་པའི་དངོས་གྲུབ་དེ་ནས་ཐོབ། །ཅེས་པ་ལ་སོགས་གོ་སླའོ། །དེ་བས་བླ་མ་ལུང་བཞིན་བཀུར་ཞེས་པ། བླ་མ་ལ་ལྟོས་ན་གནས་སྐབས་ཀྱི་འབྲས་བུ་དང་མཐར་ཐུག་གི་འབྲས་བུ་མི་ཐོབ་པས་དེ་བས་ན་བླ་མ་བཀུར་རོ། །ཚུལ་ཇི་ལྟར་བཀུར་ན་ལུང་ལས་འབྱུང་བ་བཞིན་དུ་བཀུར་ཏེ། དེ་ལ་གསུམ། བླ་མ་དཀོན་མཆོག་བཞི་བཞི་པར་བཀུར་བ་དང་། །བླ་མ་སངས་རྒྱས་དང་མཉམ་པར་བཀུར་བ་དང་། །བླ་མ་སངས་རྒྱས་ལས་ལྷག་པར་བཀུར་བའོ། །བླ་མ་དཀོན་མཆོག་བཞི་པར་བཀུར་བའི་ལུང་ནི། སངས་རྒྱས་ཆོས་ཉིད་དང་དགེ་འདུན་ཏེ། བླ་མ་ཡང་ནི་བཞི་པ་ཡིན། །ཞེས་གསུངས་སོ། །མཉམ་པར་བཀུར་བ་ནི། གསང་བ་འདུས་པ་ལས། །བླ་མ་སངས་རྒྱས་ཀུན་དང་མཉམ། །ཞེས་པ་དང་། བླ་མ་ལྔ་བཅུ་པ་ལས། བླ་མ་དང་ནི་རྡོ་རྗེ་འཛིན། །ཐ་དད་པར་ནི་མི་བལྟའོ། །ཞེས་སོ། །བླ་མ་སངས་རྒྱས་ལས་ལྷག་པར་བཀུར་བ་ནི། དགོངས་འདུས་ལས། བསྐལ་པ་འབུམ་གྱི་སངས་རྒྱས་པས། །སློབ་དཔོན་གཉན་པར་ཤེས་པར་བྱ། །ཞེས་སོ། །འོ་ན་དེ་རྣམས་མི་འགལ་ལམ་ཞེ་ན། མི་འགལ་ཏེ། སངས་རྒྱས་ཞལ་བཞུགས་པའི་དུས་སུ་བླ་མ་དཀོན་མཆོག་བཞི་པ་ཡིན་ཏེ། བླ་མ་མེད་ཀྱང་སངས་རྒྱས་ལ་ཞུས་པས་ཆོག་པའི་ཕྱིར་རོ། །སངས་རྒྱས་འདས་ནས་དགྲ་བཅོམ་པ་བཞུགས་པའི་དུས་སུ། བླ་མ་སངས་རྒྱས་དང་མཉམ་པར་ལྟ་སྟེ། བླ་མ་མེད་ཀྱང་དགྲ་བཅོམ་པ་ལ་ཞུས་པས་ཆོག་གོ །ད་ལྟ་ནི་བླ་མ་སངས་རྒྱས་བས་ལྷག་སྟེ། བླ་མ་མེད་ན་ཐར་པ་ཐོབ་པའི་ཐབས་མེད་པའི་ཕྱིར་རོ། །བརྟག་སྤྱོ་ཞེ་གཅོད་བཟོ་བྱ་སྟེ། །ཞེས་པ་ནི། སློབ་དཔོན་གྱི་སློབ་མའི་སྣོད་བརྟགས་པའི་དོན་དུ་ལུས་ངག་ཡིད་གསུམ་གྱི་སྤྱོ་བ་བྱ་སྟེ། ལུས་ཀྱི་སྤྱོ་བ་ནི་ལས་ལ་བཀོལ་ཞིང་ཆོས་མི་འཆད་བརྡེེག་པ་དང་བཙོག་པ་ལ་སོགས་པ་བྱའོ། །ངག་གི་སྤྱོ་བ་ནི། ངལ་མེད་དུ་བརྒལ་བ་དང་། ཞེ་འབྲུའ་ིཚིག་འབྲུ་བརྗོད་པ་དང་། །ཁྱོད་ལ་ཆོས་མི་འཆད་དོ་བྱ་བ་ལ་སོགས་པའོ། །ཡིད་ཀྱི་སྤྱོ་བ་ནི། ཁྲོ་བ་དང་འཚིག་པ་སོགས་པའོ། །དེ་རྣམས་སློབ་བུས་བཟོད་པར་བྱའོ། །ཇི་ལྟར་བཟོད་པར་བྱ་ན། མཐོང་བའི་གདུང་བས་ཁུར་མི་ལྟ། །ཞེས་པ་སྟེ། དེ་ལྟར་སྤྱོང་པ་བྱེད་པར་མཐོང་བའི་ཚེ་ན་སྡུག་བསྔལ་གྱི་ཁུར་དུ་མི་ལྟ་བར་བླ་མ་ལ་མོས་གུས་རྒྱུན་མི་གཅོད་དོ། །དེ་ཅིའི་ཕྱིར་ཞེ་ན། དེ་ཀུན་ཡུན་གྱི་དོན་དུ་བཟོད། །ཅེས་པ་སྟེ། སྤྱོ་བའི་སྡུག་བསལ་ཕྲ་མོ་ཡིན་ལ། །དེ་ལ་བརྟེན་ནས་བྱང་ཆུབ་ཐོབ་པར་བྱ་བའི་ཕྱིར་བཟོད་པར་བྱའོ། །དཀའ་བས་བརྟེན་ནས་ཞེས་པ་ལ་སོགས་པ་གོ་སླ་བར་ཟད་དོ། །དེ་བས་རྡོ་རྗེ་གཉེར་ལྡན་པས། །ཞེས་པས་ཉམས་ཀྱི་གདམས་ངག་ལ་བརྟེན་ནས་འབྲས་བུ་ཐོབ་པ་དེ་བས་ན་རྡོ་རྗེ་སློབ་དཔོན་གྱི་གཉེར་དང་ལྡན་པས། །མི་ཆོས་ཀྱི་བྱ་བ་སྤོང་དུ་བཅུག་ནས་ཐར་པའི་ལམ་དུ་འཛུད་པའོ། །གཉེར་ཇི་ལྟ་བུ་དང་ལྡན་ན་སློབ་མིའི་སྣོད་བརྟགས་པའི་གཉེར་དང་ལྡན་པ་ཡིན་ཏེ། རྒྱང་དྲུང་སོན་པྲ་མཁའ་འགྲོ་ཡིས། །ཞེས་པས། ཐབས་ལྔས་བརྟག་སྟེ། རྒྱང་ནས་བརྟགས་པ་ནི། རིགས་བཟང་ངན་དང་། རྒྱུད་འཇམ་རྩུབ་དང་། དད་པ་དང་གཏོང་ཕོད་ཆེ་ཆུང་མི་གཞན་ལ་དྲིའོ། །དྲུང་ནས་བརྟག་པ་ནི། འཕྲལ་གྱི་སྤྱོད་ལམ་དང་མི་རྒྱུད་བཟང་ངན་ལ་བརྟག་གོ །དཔེར་ན་པྲ་ཡིས་བརྟགས་པ་ནི། པྲ་དབབ་པ་དང་མོ་ལྟ་བུས་ཀྱང་བརྟག་གོ །མཁའ་འགྲོས་བརྟག་པ་ནི། མཁའ་འགྲོ་དང་ཆོས་སྐྱོང་ལ་གསོལ་བ་བཏབ་ལ་འདི་ལ་གསང་སྔགས་བརྗོད་དུ་རུང་ངམ་མི་རུང་ཞེས་བརྗོད་པས་རྨི་ལམ་དུ་སྟོན་པར་འགྱུར་རོ། །སྤྱོ་བ་ཡིས་བརྟག་པ་སྔར་བསྟན་ཟིན་ཏོ། །མི་བཟློག་བརྟན་བྱས་བརྟས་པ་ཡིས། །ཞེས་པ་མི་བཟློག་ཅིང་བརྟན་པ་ནི་རིགས་ངེས་པ་ལས་བྱུང་བ་ཡིན་ཏེ། རང་བཞིན་གྱི་རིགས་ངེས་པ་དང་། །དོན་མཐོང་བའི་རིགས་ངེས་པ་དང་། །ཁེ་ཉེན་དང་ནན་ཆགས་ཀྱི་རིགས་ངེས་པ་གསུམ་མོ། །དང་པོ་ནི། དབང་པོ་རྣོན་པོ་གསང་སྔགས་ཀྱི་རིགས་སུ་ངེས་པའོ། །གཉིས་པ་ནི་ལྟ་བ་རྟོགས་པའི་དུས་སུ་གཞན་གྱིས་བསྒྱུར་དུ་མི་བཏུབ་པའོ། །འདི་ནི་ཐ་མ་ཡིན་ནོ། །བརྒྱད་ཀྱི་མཁའ་འགྲོ་བཞིན་འདུས་ནས། །ཞེས་པ་ནི། དུར་ཁྲོད་ཀྱི་གནས་བརྒྱད་དེ། རྒྱ་གར་ཡུལ་ན་བསིལ་བའི་ཚལ། །སིདྷའི་ཡུལ་ན་སྐུ་ལ་རྫོགས། །སོ་སའི་ཡུལ་ན་ཧེ་ཆེན་བརྟལ། །བརྡལ་ལའི་ཡུལ་ན་གསང་ཆེན་རོལ། །བལ་པོའི་ཡུལ་ན་ལྷུན་གྲུབ་བརྩེགས། །ཨོ་རྒྱན་ཡུལ་ན་པདྨ་བརྩེགས། །ཟ་ཧོར་ཡུལ་ན་ལྷུན་གྲུབ་བརྩེགས། །ལི་ཡི་ཡུལ་ན་འཇིག་རྟེན་བརྩེགས། །མཁའ་འགྲོ་མ་བརྒྱད་ནི། སྲིན་མོ་ཐོད་སྐོམས་མ་དང་། མདའ་འཕེན་མ། འཛིན་བྱེད་མ། བེ་ཏ་མ། ནང་ཁྲོལ་འདྲེན་མ། རབ་འཇིགས་མ། སྲོག་གཅོད་མ། སྙིང་འབྱིན་མ། དེ་ལྟར་མཁའ་འགྲོ་མ་བཞིན་མི་སྡུག་པ་རྣམས་འདུས་ནས། །ཚེ་འདིར་སྲོག་ལ་འབེབས་ཤིང་ཤ་ཟ། །ཕྱི་མར་ངན་སོང་དུ་ལྟུང་ངོ་། །རང་བཞིན་ཡེ་ཤེས་རང་གནས་དང་། །ཞེས་པ་ན་མར་ནི་མན་ངག་མདོར་བསྟན་པ་ཡིན་ཏེ། རང་བཞིན་ནི་བྱེད་པ་མེད་པ་སྟེ་འཕྲལ་ལ་མ་བྱས་པ། ཡེ་ཤེས་ནི་བདེན་པ་གསུམ་སྟེ། །དེ་ཡང་མ་བཙལ་བར་གསང་སྔགས་ཀྱི་ལུགས་ཀྱིས་རང་ལུས་ལ་ཐབས་ལྡན་ལ་གནས་པར་འདོད་དེ་ལེའུ་དང་པོའོ། །དེ་མཐོང་ནི་རང་ལ་གནས་པའི་བདེན་པ་གསུམ་གཏན་ཚིགས་ལ་བརྟེན་ནས་མཐོང་བ་སྟེ་ལེའུ་གཉིས་པའོ། །དེ་ལྟར་འཇུག་རྣལ་འབྱོར་བཞི་ནི་མཐོང་བའི་དོན་གྱི་བདེན་པ་ཁ་ཕྲལ་ནས་གོམས་པར་བྱ་བའི་ཕྱིར་ཏེ། སྟོང་པ་ཆེན་པོ་དང་། སྒྱུ་མ་ལྟ་བུ་དང་། ཕྱག་རྒྱ་ཆེན་པོ་དང་། སྤྲོས་པའོ། །བར་ཆད་མེད་བསྒྲུབ་རྣམ་པར་སྨིན། །ཞེས་པ་ནི། བར་ཆད་མེད་པའི་ལམ་དུ་ཚོགས་བསྒྲུབ་པ་དང་། བློ་ཆུང་བ་ལྷག་མའི་ལུས་དང་བཅས་པའི་རྣམ་པར་སྨིན་པའི་ལུས་རིག་འཛིན་ནོ། །དབང་བསྒྱུར་ཕྱག་རྒྱ་ལྷུན་གྲུབ་ལམ། །ཞེས་པ་ནི། དབང་བསྒྱུར་ནི་ཚེ་ལ་དབང་བསྒྱུར་བ་སྟེ་མཐོང་ལམ་མོ། །ཕྱག་རྒྱ་ནི་ལྷའི་སྐུ་ཕྱག་རྒྱར་དངོས་སུ་གསལ་བ་སྟེ་བསྒོམ་ལམ་མོ། །ལྷུན་གྲུབ་ནི་ལམ་གྱི་རྩོལ་བ་དང་བྲལ་ཏེ་འབྲས་བུ་རང་དབང་ཅན་དུ་གྱུར་པ་མཐར་ལམ་མོ། །མངོན་བྱས་རིམ་པར་བརྗོད་པར་བྱ། །ཞེས་པ་ནི། གཞིའི་དོན་ཇི་ལྟར་བ་བཞིན་དུ་མངོན་དུ་བྱས་ཏེ་མཐར་ཕྱིན་པ་ནི་འབྲས་བུ་དངོས་སོ། རྩོམ་མེད་དུས་བཞི་ཀུན་ཏུ་མཉམས། ཞེས་པ་ནི། འདིའི་སྐབས་སུ་འཁོར་བ་ལ་ཐོག་མཐའ་ཡོད་དམ་མེད། ཡོད་ན་གཞུང་འདི་དང་འགལ། །མེད་ན་ལམ་བགྲོད་པ་དོན་མེད་དུ་འགྱུར་ཞེ་ན། ཁ་ཅིག་ནི་ཐ་མ་ཡོད་པར་འདོད་དེ། འབྲི་བ་ཡོད་ལ་སྣོན་པ་མེད་པའི་ཕྱིར། སྦྱང་གི་ཏིལ་བཞིན་ནོ་ཟེར་རོ། །དེ་མི་འཐད་གྲངས་ལ་མཐའ་མེད་པའི་ཕྱིར་རོ། །ཤར་ཕྱོགས་ཀྱི་ནམ་མཁའ་ཚོལ་བ་བཞིན་ནོ། །ཁ་ཅིག་ཁམས་གསུམ་སྤྱི་བཙན་དུ་མེད་ལ། །གང་ཟག་སྒོས་པ་ཙམ་དུ་ཡོད་ཟེར་རོ། །དེ་ལྟར་སྤྱི་དེས་སྒོས་ལ་ཁྱབ་བམ་མ་ཁྱབ། མ་ཁྱབ་ན་སྤྱི་མ་ཡིན་པར་ཐལ། ཁྱབ་ན་སྒོས་མི་འགྲུབ་པར་འགྱུར་རོ། །འོ་ན་ཇི་ལྟར་ཤེས་པར་བྱ་ན། ཚོགས་སྤྱིས་ཁྱབ་ཀྱང་རིགས་སྤྱིས་མ་ཁྱབ་པས་ལམ་ཉམས་སུ་ལེན་པ་ལ་ཐ་མ་འབྱུང་བ་མི་འགལ་ལོ། །དེ་ལ་རྣམས་གསུམ་གནས་ཚུལ་བཞག །ཅེས་པ་མདོར་བསྟན་ནས། །འབྲུ་ལྔར་གནས་པའི་ཐབས་ཆེན་པོ། །ཞེས་པ་ན་མར་ལ་རང་ལ་གནས་པའི་ཀུན་རྫོབ་རང་ལ་གནས་པར་སྟོན་ཏེ། འབྲུ་ལྔར་ཇི་ལྟར་གནས་ན། ཨཱོཾ་ལྟེ་བར་གནས་པ་སྟོང་པ་ཉིད་ཀྱི་ཡེ་ཤེས། ཨཱོཾ་མགྲིན་པར་གནས་པ་སོ་སོར་རྟོག་པ། ཧཱུྃ་སྙིང་གར་གནས་པ་མེ་ལོང་ལྟ་བུ། སྭ་སྟ་ཟུར་གཡས་པ་མཉམ་པ་ཉིད། ཧ་ཀླད་པ་བྱ་བ་གྲུབ་པ་སྟེ། དེ་ལྟར་འབྲུ་ལྔ་པོ་ཉིད་ཡེ་ཤེས་ལྔ་མ་འགགས་པས་ན་ཐབས་ཆེན་པོའོ། །འགྲོ་བ་ཀུན་ལ་རང་བཞིན་གནས། །ཞེས་པ་ནི། འདོད་ཁམས་ཀྱི་མི་ལ་དངོས་སུ་གནས་ལ། འགྲོ་བ་གཞན་ལ་བག་ཆགས་ཀྱི་ཚུལ་དུ་གནས་པ་ནི་མཚོན་བྱ་དོན་གྱི་སྟོན་པའོ། །དཀྱིལ་འཁོར་བཞི་དང་སྲོག་ཤིང་གསུམ། ཞེས་པ་དཀྱིལ་འཁོར་བཞི་ནི། ཀླད་པ་བདེ་བ་ཆེན་པོའི་འཁོར་ལོ། །མགྲིན་པ་ལོངས་སྤྱོད་ཀྱི་འཁོར་ལོ། །སྙིང་ཀ་ཆོས་ཀྱི་འཁོར་ལོ། །ལྟེ་བ་སྤྲུལ་པའི་འཁོར་ལོ། །སྲོག་ཤིང་གསུམ་ནི། དབུས་རྩ་ཨ་ཝ་དྷུ་ཏི། གཡས་རྐྱང་མ། གཡོན་རོ་མའོ། །གནས་ན་ཀཱ་ལིའི་སྒྲ་དབྱངས་ལྡན། །ཞེས་པ་ནི། འཁོར་ལོ་བཞིའི་བཞིའི་གནས་ན། ཀཱ་ལི་ཡིག་འབྲུ་སུམ་ཅུ་སོ་གཉིས་དང་། །ཨཱ་ལི་དབྱངས་ཡིག་བཅུ་དྲུག་རང་བཞིན་གྱིས་གནས་པ་ནི་མཚོན་བྱེད་ཚིག་གི་སྟོན་པའོ། །དེ་ཡང་ཀླད་པ་བདེ་ཆེན་གྱི་འཁོར་ལོ་རྩ་འདབ་སུམ་ཅུ་རྩ་གཉིས་ལ་གསལ་བྱེད་སུམ་ཅུ་རྩ་གཉིས་གནས། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་ལ་དབྱངས་ཡིག་བཅུ་དྲུག་གནས། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ལ་མ་ནིང་གི་ཡི་གེ་བརྒྱད་གནས་ཏེ། ཨ་ཀ་ཙ་ཊ་ཏ་པ་ཤ་ཡའོ། །ལྟེ་བ་སྤྲུལ་པའི་འཁོར་ལོ་རྩ་འདབས་དྲུག་ཅུ་བཞི་ལ་དབྱངས་ཡིག་དང་གསལ་བྱེད་རྣམས་གཡས་སྐོར་དང་གཡོན་སྐོར་དུ་རང་བཞིན་གྱིས་གནས་སོ། །གླིང་གཞི་རང་ལ་གནས་པ་ནི། །ཨེ་བྃ་མ་ཡ་མཁའ་ལྡན་དང་། །ཞེས་པ་ལ་སོགས་པ་སྟེ། དེ་ལ་གཉིས་ལས། སྟེང་སྒོ། འོག་སྒོ། མཁའ་གསང་གཉིས་ལ་ཕུན་གསུམ་ཚོགས་པ་ལྡན་ལུགས་ནི། ཐལ་བའི་རྒྱུད་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །བྃ་དབྱིབས་ཐིག་ལེར་བཅས་སྟོན་པའོ། །མ་དང་མ་ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །ས་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཉིད་དོ། །དུས་ནི་བསམ་གྱིས་མི་ཁྱབ་དུས། །ན་མ་དེ་མིན་ཞེས་བྱའོ། །ཞེས་གསུངས་པས། ཨེས་མཚོན་པའི་གནས་ནི་ཡུམ་གྱི་མཁའ་ཟླ་གམ། སྒོ་གྲུ་བཞི། ཁྱམས་གྲུ་གསུམ། སྣ་ཚོགས་འདུས་འདུས་པ་ཟླུམ་པོ་ནི་གནས་ཕུན་སུམ་ཚོགས་པའོ། །བྃ་གྱིས་མཚོན་པ་ནི། ཡབ་ཀྱི་རྡོ་རྗེ་རྩེ་མོ་ན་རྩ་ས་ཡ་ཕྲག་བཅུ་གསུམ་འདུས་པའི་བཅུད་ཐིག་ལེ་བྃ་གྱི་གཟུགས་ཅན་དུ་གནས་པ་ནི་སྟོན་པའོ། །མ་མ་ནུ་ན་ཡིད་ཀྱི་རྣམ་པར་ཤེས་པ་ལ་སོགས་པའི་ཚོགས་བརྒྱད་ནི་འཁོར་ལོ། །མས་མཚོན་པའི་བསྟན་པ་ནི། པ་ར་མཱརྠ་ན་དོན་ཟབ་མོ་སྟེ། ལྷན་ཅིག་སྐྱེས་པའི་ཡེ་ཤེས་ནི་བསྟན་པ་ཕུན་སུམ་ཚོགས་པའོ། །སྙིང་པོ་རླུང་སྒོམ་གནས་ན་ཡོད་ཅེས་པ་ནི། སྟེང་སྒོ་སྟེ་སྙིང་ཆོས་ཀྱི་འཁོར་ལོ་ལ་ཕུན་སུམ་ཚོགས་པ་ལྔ་གནས་ཏེ། རྒྱ་མཚོ་ལས། དྷརྨཱ་ཱཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །མི་ཤིག་ཐིག་ལེ་བྃ་ཡིག་ཅན། །རང་ལ་བདེ་བ་གསལ་བྱེད་དག །མ་ནུའི་ཡིད་ཚོགས་རྣམ་ཤེས་བཞི། །ཡེ་ཤེས་མྱོང་བ་བསྡུས་བཤད་པའོ། །ཞེས་གསུངས་པས། སྙིང་ག་ཆོས་ཀྱི་འཁོར་ལོ་ལ་གཡས་ཡེ་ཤེས་ཀྱི་རྩ། གཡོན་ཡོན་ཏན་གྱི་རྩ། རྒྱབ་རང་རྒྱུད་ཀྱི་རྩ། མདུན་ཆོས་ཉིད་ཀྱི་རྩ་བཞི་ཕྲིན་ལས་བཞིའི་དབྱིབས་སུ་མྱོང་བ་ནི་གནས་ཕུན་སུམ་ཚོགས་པའོ། །རྩ་བཞིའི་དབུས་ན་ཡེ་ཤེས་སྙིང་པོ་ཅན་གྱི་ཐིག་ལེ་བྃ་གྱི་དབྱིབས་སུ་གནས་པ་ནི་སྟོན་པ་ཕུན་སུམ་ཚོགས་པའོ། །ཡིད་ཀྱི་རྣམ་ཤེས། ཀུན་གཞིའི་རྣམ་ཤེས། ཉོན་མོངས་པ་ཅན་གྱི་ཡིད་སྒོ་ལྔའི་རྣམ་ཤེས་བཞི་ནི་འཁོར་ཕུན་སུམ་ཚོགས་པའོ། །བདེ་སྟོང་གཉིས་མེད་ཀྱི་དོན་ཉམས་སུ་མྱོང་བ་ནི་བསྟན་པ་ཕུན་སུམ་ཚོགས་པའོ། །དེ་ཡིས་ཏནྟྲ་འབྱིན་པར་བྱེད། །ཅེས་པ་ནི་དེ་ལྟར་གླེང་གཞི་གཉིས་པོ་དེ་ཡིས་རྒྱུད་ཀྱི་དོན་འབྱིན་ཅིང་སྟོན་པར་བྱེད་དོ། །གྲོལ་ལམ་རང་ལ་གནས་པ་ནི། །དེ་དོན་དེ་ན་ཆོས་ཉིད་དང་། །ཞེས་པ་ལ་སོགས་པ་སྟེ། རྒྱུད་ཀྱི་དེའི་དོན་ནི་སྙིང་ག་ཆོས་ཀྱི་འཁོར་ལོའི་གནས་ན་ཡོད་དེ། ཇི་ལྟར་ཡོད་ན། ཆོས་ཉིད་དང་ཟེར་བས་མཐུན། །ཆོས་ཉིད་ཀྱི་རྩ་དཀར་ལ་ཟླུམ་པ་ལ་ཐིག་ལེ་མི་རྟོག་པའི་ངོ་བོར་གནས་པ་ནི་དེ་ཏིང་གི་ངོ་བོའོ། །ཡེ་ཤེས་ཡོན་ཏན་ལས་ཉིད་དངོས། །ཞེས་པ། གཡས་ཡེ་ཤེས་ཀྱི་རྩ་སེར་པོ་གྲུ་བཞི་ཐིག་ལེ་མ་འགགས་པ་ངོ་བོར་གནས་པ་ནི་ཀུན་ཏུ་སྣང་བའི་ངོ་བོའོ། །རྒྱབ་ཡོན་ཏན་གྱི་རྩ་དམར་པོ་ཟླ་གམ་ལ་གཉིས་སུ་མེད་པའི་ཐིག་ལེ་གནས་པ་ནི་ཕྱག་རྒྱ་གཅིག་པའི་ངོ་བོའོ། །གཡོན་རང་རྒྱུད་ཀྱི་རྩ་དམར་ནག་གྲུ་བཞི་ལ་སྤྲོས་པ་དང་ཚོགས་སྒྲུབ་ཀྱི་ངོ་བོའི་ཐིག་ལེ་གནས་པའོ། །དངོས་ཞེས་པ་སྟེ་ཆོས་ཉིད་ཀྱི་རིག་པ་སྟེ། ཡེ་ནས་དེ་ལྟར་གནས་པའི་ཐ་ཚིག་གོ །རྣལ་འབྱོར་ལམ་རིམ་རང་བཞིན ལྡན། །ཞེས་པ་རྣལ་འབྱོར་ནི། སྐབས་འདིར་ཏིང་ངེ་འཛིན་ལ་བྱ་སྟེ། ཟག་བཅས་ཀྱི་ཏིང་ངེ་འཛིན་ལྔ་ཡང་ཕྲལ་དུ་བསྒྲུབས་པ་མ་ཡིན་ཏེ་རང་བཞིན་གྱིས་ལྡན་ནོ། །ཐབས་ལམ་རང་ལ་གནས་པ་ནི། ཆགས་པས་ཁམས་གྲུབ་ཅིག་ཤོས་ཀྱིས་ང་ཞེས་པ་སྟེ། དེ་ཡང་འདོད་ཆགས་རང་རྒྱུད་པའི་འཕེན་པས་ནི་ཁམས་གསུམ་དུ་སྐྱེ་བའི་ལས་གྲུབ་ཅིང་། ཅིག་ཤེས་ཞེས་བྱ་བ་སྟེ་གསང་སྔགས་ཀྱི་ཐབས་ཁྱད་པར་ཅན་ཐིག་ལེ་དབབ་པ་དང་། གཟུང་བ་དང་། བཟློག་པ་དང་། གནས་སུ་དགྲམ་པ་ལ་སོགས་པ་ནི་རང་བྱུང་གི་ཡེ་ཤེས་འགྲུབ་པར་བྱེད་པའོ། །སྣོད་ཀྱི་འོད་དབྱིབས་ཕྲིན་ལས་བཞི། ཞེས་པ། སྣོད་ནི་རྩ་ཡིན་ལ་འོད་ནི་རྩའི་ཁ་དོག་ཡིན་ཞིང་དབྱིབས་ནི་ཟླུམ་པོ་ལ་སོགས་པ་ཕྲིན་ལས་བཞིའི་དབྱིབས་ཏེ། ཆོས་ཉིད་ཀྱི་རྩ་དཀར་པོ་ཟླུམ་པོ་ཞི་བ། ཡེ་ཤེས་ཀྱི་རྩ་སེར་པོ་གྲུ་བཞི་རྒྱས་པ། །ཡོན་ཏན་གྱི་རྩ་དམར་པོ་ཟླ་གམ་དབང་། །རང་རྒྱུད་ཀྱི་རྩ་དམར་ནག་གྲུ་གསུམ་དྲག་པོའོ། །གནས་བཞི་འབྱུང་བ་ལས་བཞི་སྟེ། ཞེས་པ་ནི། བདེ་ཆེན་རླུང་གི་འཁོར་ལོ་ཟླ་གམ་སྔོན་པོ་ནི་དབང་། སྙིང་ག་ཆུའི་འཁོར་ལོ་ཟླུམ་པོ་དཀར་པོ་ནི་ཞི་བ། མགྲིན་པ་མེའི་འཁོར་ལོ་གྲུ་གསུམ་ནི་དྲག་པོ། ལྟེ་བ་སའི་འཁོར་ལོ་སེར་པོ་གྲུ་བཞི་ནི་རྒྱས་པ། དེ་ལྟར་གནས་བཞི་འབྱུང་བ་བཞི་འཁོར་ལོ་གནས་པ་ནི་གཞིའོ། །གསང་བའི་མཁའ་ལ་རང་བཞིན་ལྡན། །ཞེས་པ་ནི། ཡུམ་གྱི་མཁའ་ཕྱི་གྲུ་བཞི་ནི་རྒྱས་པ། །ཁྱམས་གྲུ་གསུམ་དྲག་པོ། སྣ་ཚོགས་འདུས་པ་ཟླུམ་པོ་ཞི་བ། །ཟ་མ་ཏོག་ཟླ་གམ་ནི་དབང་། །དེ་ལྟར་ཡུམ་གྱི་མཁའ་ལ་ཡང་ཕྲིན་ལས་བཞིའི་རང་བཞིན། རྃ་ཡྃ་གཡས་གཡོན་སྦྱིན་སྲེག་ལྡན། ཞེས་པ་ནི། རཾ་ནི་མེའི་ས་བོན་ཏེ་ལྟེ་བ་ན་གནས། ཡཾ་ནི་རླུང་གི་ས་བོན་ཏེ་སྒྲོམ་མདོ་ན་གནས་སོ། །གཡས་ཀྱི་རྩ་ནི་རྐྱང་མ་སྟེ་དགང་གཟར། །གཡོན་གྱི་རྩ་ནི་རོ་མ་སྟེ་བླུག་གཟར། །སྲེག་ལྷ་ནི་ཨ་ཝ་དྷུ་སྟེ། ཐིག་ལེ་ཞུ་ནས་དྭངས་མ་རྩ་ལམ་དུ་ཚུད་པ་ནི་སྦྱིན་སྲེག་རང་ལ་ལྡན་པའོ། །ཐིག་ལེ་བསྙེན་བསྒྲུབ་རང་བཞིན་ལྡན། ཞེས་པ་ནི། མདུན་ཆོས་ཉིད་ཀྱི་རྩ་དོན་དམ་པ་ཡིན་པས་བསྙེན་པ། གཡས་ཡེ་ཤེས་ཀྱི་རྩའི་ཐིག་ལེ་ཕྱག་རྒྱར་གསལ་བས་ཉེ་བསྙེན། རྒྱབ་ཡོན་ཏན་གྱི་རྩ་འདོད་པ་ཚང་བས་བསྒྲུབ་པ། གཡོན་རང་རྒྱུད་ཀྱི་རྩའི་ཐིག་ལེ་འབྲས་བུ་དངོས་གཞི་ཡིན་པས་བསྒྲུབ་པ་ཆེན་པོ་སྟེ། དེ་ལྟར་བསྙེན་བསྒྲུབ་བཞི་ཡང་མ་བཙལ་བར་རང་བཞིན་གྱིས་ལྡན་ནོ། །བཞི་བརྒྱད་ཀྵི་ར་མ་དྷ་ལ། ཞེས་པ་ནི། བཞི་ནི་གོང་གི་རྩ་བཞི་ཡིན་ལ། །བརྒྱད་ནི་རྩ་ཕྲན་དུ་ཕྱེ་བ་སྟེ། །ཆོས་ཉིད་ཀྱི་རྩ་དང་ཡོན་ཏན་གྱི་རྩ་གཉིས་ལ་གསུམ་གསུམ། །ཡེ་ཤེས་དང་རང་རྒྱུད་གཉིས་ཏེ་བརྒྱད་དོ། །ཀྵི་ར་ནི་རྩ་ལ་མ་དྷ་ལ་ནི་དཀྱིལ་འཁོར་ཏེ། རྩ་དཀྱིལ་འཁོར་གྱི་ཚུལ་དུ་རང་ལ་ལྡན་ནོ། །གནས་བརྟེན་རྩ་དང་ཐིག་ལེ་ལ། ཞེས་པ་ནི། གནས་རྩ་ཡིན་ལ། བརྟེན་པ་ནི་ཐིག་ལེ་རྩ་ནང་ན་གནས་པའོ། །བཅུ་དབང་ལྔ་གསུམ་དབང་རྣམས་ལྡན། ཞེས་པ་ནི། ཕན་པའི་དབང་བཅུ། ནུས་པའི་དབང་ལྔ། ཟབ་མོའི་དབང་གསུམ་དང་ལྡན་ནོ། །ཇི་ལྟར་ལྡན་ན། ཚོགས་བརྒྱད་ཡེ་ཤེས་ལྔར་ལྡན་པ་དབུ་རྒྱན་གྱི་དབང་། རྩ་རོ་མ་རྐྱང་མ་ཅོད་པན། ཨ་ཝ་དྷུ་ཏི་ལ་ཐིག་ལེ་སུམ་ཅུ་རྩ་གཉིས་ཡོད་པ་ཕྲེང་བ། ལུས་ལ་རྩས་ཁྱབ་པ་གོ་ཆ། གསང་བའི་རྒྱལ་པོ་རྒྱལ་མཚན། །རྟོག་ཚོགས་རྒྱས་བསྡུས་ཕྱག་རྒྱ། །ཀླད་པ་བདེ་བ་ཆེན་པོའི་རྩ་གདུགས། རྩ་གནས་ན་ཐིག་ལེས་གང་བ་བུམ་པ། །ཐམས་ཅད་སེམས་སུ་ལོངས་སྤྱོད་པ་བཟའ་བཏུང་། །རྩ་རོ་མ། རྐྱང་མ། ཀུན་རྡར་མ། ལོང་། ཤ་ཆེན་གྱི་རྩ་ལྔ་ལ་དམ་རྫས་ལྔའི་བཅུད་ཡོད་པ་སྙིང་པོའི་དབང་། དེ་ལྟར་ཕན་པའི་དབང་བཅུའོ། །རྣ་བའི་འདོམ་རྩ་ན་ཐིག་ལེ་ཡོད་པ་ནི་ཉན་པའི་དབང་། ལྕེའི་ཐིག་ལེ་འཆད་པའི་དབང་། སྲོག་མི་ཤིགས་པའི་ཐིག་ལེ་སྒོམ་པའི་དབང་ངོ་། །ལག་པ་གཉིས་ཀྱི་ཐིག་ལེ་ཕྲིན་ལས་ཀྱི་དབང་། །ཡན་ལག་ལྔ་ཆར་ལ་ཐིག་ལེ་ཡོད་པ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་ངོ་། །དེ་ནི་ནུས་པའི་དབང་ལྔའོ། །དོན་དམ་གྱི་ཡེ་ཤེས་རང་ཆས་སུ་ཡོད་པ་གསང་དབང་། ཀུན་རྫོབ་ཀྱི་ཡེ་ཤེས་རང་ཆས་སུ་ཡོད་པ་ཤེས་རབ་ཡེ་ཤེས་ཀྱི་དབང་། དབྱེར་མེད་རང་ཆས་སུ་ཡོད་པ་ནི་བདེ་བ་ཆེན་པོའི་དབང་ངོ་། །དེ་རྣམས་ནང་གསང་བའི་དབང་གསུམ་པོ་དེ་རྣམས་ཀྱང་རང་ལ་ལྡན་ནོ། །གསང་བ་ནང་གི་འདོད་ཡོན་ལྔ། །ཞེས་པ་ནི། །ཕྱིའི་མཆོད་པ་མ་ཡིན་ཏེ། གསང་བའི་མཆོད་པའམ། །ཡང་ན་ནང་གི་མཆོད་པའི་འདོད་ཡོན་ལྔ་ཡིན་ཏེ། དེ་ཡང་ཡབ་ཡུམ་ཀྱི་གཟུགས་མཛེས་པ་གཟུགས་ཀྱི་ལྷ་མོ། སྦྱོར་བ་ཧ་སའི་སྒྲ་སྒྲོགས་པ་སྒྲའི་ལྷ་མོ། བདེ་བས་ཚིག་པ་དྲིའི་ལྷ་མོ། དབང་པོ་རེག་པ་རེག་གི་ལྷ་མོ། །བདེ་བས་ཁྱབ་པ་ཆོས་ཀྱི་ལྷ་མོ། །དེ་ལྟར་གསང་བའི་མཆོད་པ་ལྔ་ཡང་རང་ལ་ལྡན་ནོ། །དམ་རྫས་རང་བཞིན་མཆོད་པ་སྟེ། །ཞེས་པ་ནི། ནང་གི་མཆོད་པ་སྟེ། རྩ་རོ་མ། རྐྱང་མ། ཀུན་འདར་མ། ལོང་གི་རྩ། ཤ་ཆེན་གྱི་རྩ་རྣམས་ལ་དམ་རྫས་ལྔ་ཡི་དྭངས་མ་གནས་པ་ནི་མཆོད་པ་སྟེ་རང་ལ་ལྡན་པའོ། །དམ་ཚིག་ནི་གོ་བར་ཟད་དོ། །ཅིར་ཡང་འགྱུར་ཞིང་ཅིར་ཡང་འགྲུབ། །ཅེས་པ་ནི། ཀུན་རྫོབ་ཀྱི་བདེན་པ་སྟེ། དེ་ཡང་ཀུན་རྫོབ་ཀྱི་ངོ་བོ་ནི་སྣང་ལ་མ་འགགས་པ་ཙམ་མོ། །ལྷག་པར་ཀུན་རྫོབ་ཀྱི་ངོ་བོ་ནི་བདེན་པ་སྟོང་པའི་སྣང་བ། སྣང་བ་རིས་སུ་མ་ཆད་པའོ། །ཕུག་རོན་གྱི་རྐེ་ལྟ་བུའོ། །དེ་ལྟར་ཡིན་པར་ཅིས་ཤེས་ན། ལུང་དང་རིགས་པས་ཤེས་ཏེ། ལུང་ནི་རྒྱས་པ་ལས། ཀུན་རྫོབ་ཆུ་ཟླ་ལྟར་ཡིན་པས། །ཅིར་ཡང་འགྱུར་ཞིང་ཅིར་ཡང་འགྲུབ། །ཅེས་གསུངས་ལ། རིགས་པ་ནི། ཆོས་ཅན་གཅིག་གི་སྟེང་དུ་ཕབ་ན། རྒོལ་ཕྱིར་རྒོལ་བ་མཐུན་སྣང་དུ་གྲུབ་པའི་ཆོས་ཅན། རིགས་པ་སྒྱུ་མའི་སྣང་བ་ཡིན་ཏེ། སྣང་བའི་ངོ་བོ་མ་ངེས་པའི་ཕྱིར་རོ། །གཏན་ཚིགས་མ་གྲུབ་ན། འོ་ན་ངེས་སམ། ངེས་ན་དམྱལ་བ་ལ་ཡང་བུམ་པར་སྣང་བ་ཐལ། འདོད་ན། དམྱལ་བ་རང་སེམས་མེ་སོགས་ཞེས་པ་དང་། རྫས་ཀྱི་དངོས་པོ་གཅིག་ལ་ཡང་། །ལོག་མཐོང་དྲུག་དང་ཡང་དག་དགུ །ཞེས་པ་དང་འགལ། འོ་ན་ང་ལ་བུམ་པར་སྣང་བ་བཞིན་དུ་ཁྱོད་ལ་མི་སྣང་བར་ཐལ། མ་ངེས་པའི་ཕྱིར་རོ་ཟེར་ན། །ཁྱོད་དང་ང་གཉིས་མཐུན་སྣང་གཅིག་ཏུ་ངེས་པ་མི་སྟོ། འགྲོ་བ་ལས་མཐུན་གཅིག་ཏུ་འཚོགས་པས་མཐུན་པར་སྣང་བ་ཡིན། དཔེར་ན་མིག་སེར་གྱི་ནད་ཀྱིས་བཏབ་པ་གཉིས་དུང་དཀར་པོ་ལ་སེར་པོར་མཐུན་པོར་མཐོང་བ་དེ། དུང་སེར་པོར་ཡོད་ནས་མཐོང་ལུགས་མཐུན་པ་མིན། ནང་རིགས་མཐུན་པས་མཐོང་ལུགས་མཐུན་པ་བཞིན་ནོ། །ཡང་ཤེས་ངོ་ཐུན་མོང་པ་དང་། །དུས་གསུམ་ཐུན་མོང་བ་ལ་མཐུན་པ་མི་འགལ་ཡང་། ཤེས་ངོ་ཁྱད་པར་བ་དང་། དུས་གསུམ་སྔ་ཕྱི་མཐུན་པར་མི་འགྱུར་ཏེ། དཔེར་ན་ཤེས་ངོ་མཐུན་མོང་བ་ཡི་དྭགས་ལྟ་བུ་དང་། ཆུ་བོ་ཆེན་པོ་ལ་རྣག་ཁྲག་ཡོད་པར་མཐུན་པ་མཐོང་ཡང་། ཤེས་ངོ་བྱེ་བྲག་པ་མི་ལྟ་བུ་དང་། །ཡི་དྭགས་ལྟ་བུ་གཉིས་མི་མཐུན་པའི་སྣང་བའི་ངོ་བོ་མ་ངེས་པའོ། །ཡང་དུས་མ་འོངས་པ་དང་། དུས་ད་ལྟ་བའི་བུམ་པ། དངོས་པོ་རྫའི་བུམ་པ། རྣམ་པ་ཁ་གཡེལ་ཞབས་ཞུམ་པའི་རྣམ་པར་འདུག་པའི་ཚེ། སྣང་བའི་ངོ་བོ་བུམ་པར་འདུག་ཀྱང་། དུས་སྔར་གྱི་འཇིམ་པ་དང་། དུས་ཕྱིས་ཀྱི་གྱོ་དུམ་དང་། །དུས་ད་ལྟའི་བུམ་པ་རྣམས་སྣང་བའི་ངོ་བོ་མ་ངེས་པའི་ཕྱིར་རོ། །གཏན་ཚིགས་མ་གྲུབ་ན་མངོན་སུམ་གྱི་འགལ་ལོ། །ཁྱབ་པ་མ་གྲུབ་ཅེ་ན། གང་ལ་སྣང་བའི་ངོ་བོ་མ་ངེས་པ་དེས་རིག་པ་སྒྱུ་མ་ཡིན་པ་ལ་ཁྱབ་སྟེ། སྒྱུ་མ་མཁན་གྱི་རྟ་གླང་བཞིན་ནོ། །བདུན་དང་གསུམ་གྱི་དོན་དམ་ལས། ཞེས་པ་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔ་དབྱིངས་ཡེ་ཤེས་གཉིས་ཏེ་བདུན་དང་། གསུམ་ནི་རང་བཞིན་དོན་དམ། ཡེ་ཤེས་དོན་དམ། འབྲས་བུ་དོན་དམ་མོ། །དེ་ཡང་ཤེས་བྱའི་གནས་ལུགས་ནི་རང་བཞིན་དོན་དམ། དེ་རྟོགས་ཏེ་ཤེས་བྱ་མ་སྒྲིབ་གཡོགས་ཀྱིས་དབེན་པ་ཡེ་ཤེས་དོན་དམ། དམ་པའི་དཀོར་བདུན་ནི་འབྲས་བུའི་དོན་དམ་མོ། །ཡེ་ཤེས་དང་འབྲས་བུ་དོན་དམ་ལ་ཁྱད་པར་ཅི་ཡོད་ཅེ་ན། ཡེ་ཤེས་སྤྱི་ཡིན་ལ། འབྲས་བུ་བྱེ་བྲག་པ་ཡིན་ནོ། །རང་བཞིན་དང་ཡེ་ཤེས་དོན་དམ་ལ་ཁྱད་པར་ཅི་ཡོད་ཅེ་ན། ཡེ་ཤེས་ནི་མངོན་དུ་བྱས་པའི་ཆ་འཛིན་ལ། རང་བཞིན་ནི་མངོན་དུ་མ་བྱས་པའོ། །སྣང་བ་ཉིད་ན་ངོ་བོ་མེད། །ཅེས་པ་དང་། དེ་ཀུན་ངོ་བོ་ཉིད་རྒྱུར་གནས། །ཞེས་པ་ནི། དོན་དམ་པའི་བདེན་པ་སྟེ། དེ་ཡང་དོན་དམ་ཙམ་པོའི་ངོ་བོ་ནི་སྤྲོས་པ་དང་བྲལ་བའོ། །ལྷག་པ་དོན་དམ་གྱི་ངོ་བོ་ནི། རིག་པ་སྤྲོས་དང་བྲལ་བ་ལ་སྣང་བ་ངོ་བོ་ཉིད་ཀྱི་རྒྱུར་ལྷུན་གྱི་གྲུབ་པའོ། །དེ་ལྟར་ཡིན་པར་ཅིས་ཤེས་ན། ལུང་དང་རིག་པས་ཤེས། ལུང་ནི་རྒྱས་པ་ལས། དོན་དམ་སྐྱེ་བ་མེད་པ་ཞེས་བྱ་བའི་དམ་ཚིག་ནི། ཡང་དག་ཉིད་དང་ཆོས་ཀྱི་དབྱིངས། །མཚན་ཉིད་མེད་དང་དམིགས་སུ་མེད། །ཅེས་སོ། །རིགས་པ་ལ་གཉིས་ལས། དང་པོ་སྤྲོས་བྲལ་དུ་བསྒྲུབ་པ་ནི། སྣང་བ་འདི་ཆོས་ཅན། ཡང་དག་པར་རང་བཞིན་མེད་དེ། །ཡང་དག་ཅིག་དང་དུ་མ་དང་བྲལ་བའི་ཕྱིར་རོ། །གཏན་ཚིགས་མ་གྲུབ་ཅེ་ན། གཅིག་ཏུ་ཡོད་དམ། དུ་མར་ཡོད་དུ་མར་ཡོད་ཅེ་ན། དུ་མ་དེ་གཅིག་ལ་ལྟོས་སམ་མ་ལྟོས། །མ་ལྟོས་ན་ཁྱབ་བྱེད་གཅིག་མ་གྲུབ་པས། །ཁྱབ་བྱ་དུ་མ་ལ་གྲུབ་པར་ཐལ། ལྟོས་ན་ནི་གཅིག་ཏུ་ཡོད་པ་དང་མཐུན་ཏེ། གཅིག་པོ་དེ་ཆ་ཤས་དང་བཅས་པ་ཡོད་དམ། ཆ་ཤས་དང་བྲལ་བ་ཡོད། ཆ་ཤས་དང་བཅས་པའི་ཕྱིར་དུ་མར་ཐལ། རྡུལ་ཕྲ་རབ་ཆ་མེད་རིས་མེད་དུ་ཡོད་ཅེ་ན། རྡུལ་གྱི་གོང་བུ་རྩོམ་པའི་ཚེ། ཕྱོགས་དྲུག་གི་རྡུལ་གྱིས་བསྐོར་རམ་མ་བསྐོར། །མ་བསྐོར་ན་གོང་དུ་མི་འགྲུབ་པར་ཐལ། །བསྐོར་ན་དབུས་ཀྱི་རྡུལ་དེས་ཤར་ཕྱོགས་ཀྱི་རྡུལ་ལ་བལྟས་པའི་དུས་སུ་ནུབ་ཀྱི་རྡུལ་ལ་བལྟས་སམ་མ་བལྟས། བལྟས་ན་གང་དུ་རྩོམ་མི་ནུས་ཏེ། གཅིག་ལ་གཅིག་ཐིམ་པར་ཐལ། མ་བལྟས་ན། ཤར་གྱི་རྡུལ་ཆོས་ཅན་དབུས་ལ་བལྟས་པའི་ཆ་དང་། ནུབ་ལ་མ་བལྟས་པའི་ཆ་གཉིས་སུ་བྱུང་བས། ཆ་ཤས་དང་བཅས་པར་ཐལ་ལོ། །གང་ན་གང་ཆ་ཤས་དང་བཅས་པ་ནི་དུ་མ་ཡིན་པས་གཅིག་མི་འགྲུབ་ལ། ཁྱབ་བྱེད་གཅིག་ཡང་དག་ཏུ་མ་གྲུབ་པས། ཁྱབ་བྱ་དུ་མ་མི་འགྲུབ་སྟེ་སྤྲོས་པ་དང་བྲལ་ལོ། །གཅིག་དང་དུ་མ་མེད་ཀྱང་རང་བཞིན་མེད་པའམ། སྤྲོས་པ་དང་བྲལ་བར་མི་འགྲོ་ན་ཅི་སྟོ་སྟེ་ཁྱབ་པ་མ་གྲུབ་ཅེ་ན། གང་ན་གང་གཅིག་དང་དུ་མ་དང་བྲལ་བའམ་སྤྲོས་པ་དང་བྲལ་བའམ་སྤྲོས་པ་དང་བྲལ་བའམ། རང་བཞིན་མེད་པས་ཁྱབ་སྟེ་ནམ་མཁའ་བཞིན་ནོ། །རིགས་པ་སྤྲོས་པ་དང་བྲལ་བའི་སྣང་བ་ངོ་བོ་ཉིད་ཀྱི་རྒྱུར་ལྷུན་གྱི་གྲུབ་པར་བསྒྲུབ་པ་ནི། གོང་གི་སྤྲོས་བྲལ་དེ་ཆོས་ཅན། །སྣང་བ་ངོ་བོ་ཉིད་ཀྱི་རྒྱུར་ལྷུན་གྱི་གྲུབ་སྟེ། སྣང་ཚད་ཙམ་ཞིག་མ་འགགས་པའི་ཕྱིར་རོ། །གཏན་ཚིགས་མ་གྲུབ་ཅེ་ན། མངོན་སུམ་གྱིས་གསལ་ཏེ། ད་ལྟར་སྣང་ལུགས་སྣ་ཚོགས་སུ་འཆར་ཞིང་འདུག་གོ །རང་བཞིན་ངང་གིས་དབྱེར་མེད་པའོ། །ཞེས་པ་ནི། བདེན་པ་དབྱེར་མེད་དུ་སྟོན་པའི་ཚིག་ཡིན་ཏེ། ཐེག་པ་གཞན་ཉན་ཐོས་བཞིན་དུ་སྣང་བ་ཡང་སྟོང་པའི་རྩིས་མ་ཟིན་པའི་སྣང་བ་རང་རྒྱུད་དུ་མི་འདོད་དོ། །དབུ་མ་བཞིན་དུ་སྟོང་པ་ལ་སྣང་བའི་རྩིས་མ་ཟིན་པའི་སྟོང་པ་གཅིག་པུར་ཡང་མི་འདོད་དེ། འདིར་ནི་སྣང་སྟོང་ངོས་མཉམ་གྱི་ལྟ་བ་ཤེས་བྱ་བདེན་པ་དབྱེར་མེད་དུ་འདོད་དེ། དེ་ལྟར་འདོད་པ་ཅིས་ཤེ་ན། ལུང་དང་རིགས་པས་ཤེས། ལུང་ནི་རྩ་རྒྱུད་ལས། བདེན་པ་གཉིས་ཀར་དབྱེར་མེད་པས། །འཕྲུལ་དགའི་ཚུལ་དེ་ཐ་དད་མིན། །ཞེས་སོ། །རིགས་པ་ནི། མཐུན་སྣང་གི་ཆོས་ཅན་གཅིག་གི་སྟེང་དུ་བསྒྲུབ་སྟེ། བུམ་པ་ཆོས་ཅན། བདེན་པ་དབྱེར་མེད་ཡིན་ཏེ། །སྣང་སྟོང་གང་གི་ཡང་ཕྱོགས་སུ་མ་ཐུག་པའི་ཕྱིར་རོ། །གཏན་ཚིགས་མ་གྲུབ་ཅེ་ན། སྟོང་པར་ཐུག་གམ་སྣང་བར་ཐུག །སྟོང་པར་ཐུག་ན་མངོན་སུམ་གྱིས་གསལ་ལ། །སྣང་བར་ཐུག་ན་གོང་གི་གཅིག་དང་དུ་བྲལ་གྱིས་གནོད་དོ། །གཞན་ཡང་ཀུན་འདུས་ལས། དཔེར་ན་རྡོ་ཡི་དངོས་པོ་ལས། །བཏགས་སམ་ཕྱེ་མར་བྱས་ནས་ནི། །རླུང་གི་ངོས་ལ་བསྐྱོད་བྱས་ན། །དེ་ལ་རང་བཞིན་གང་ཡང་མེད། །ཅེས་གསུངས་པའི་དོན་གྱིས་གནོད་པས་སྟོང་པའི་མཐར་ཡང་མ་ལྷུང་ངོས། །སྣང་སྟོང་གང་གི་ཡང་ཕྱོགས་སུ་མ་ཐུག་ཀྱང་དབྱེར་མེད་མིན། །ཅི་སྟེ་ཁྱབ་པ་མེད་ཅེ་ན། །གང་ན་གང་སྣང་སྟོང་གང་གི་ཡང་ཕྱོགས་སུ་མ་ཐུག་ན་དབྱེར་མེད་ཡིན་ཏེ་ཆུ་ཟླ་བཞིན་ནོ། །འོ་ན་ཆོས་ཅན་དུ་བུམ་པ་ལྟ་བུ་གཅིག་གཏན་ལ་ཕབ་ཀྱང་། ཆོས་ཅན་གཞན་ཕེབས་སམ་ཞེ་ན། །དེ་ཕེབས་ཏེ། དངོས་པོའི་ཆོས་ཐམས་ཅད་རིགས་འདྲ་བའི་ཕྱིར། །འདམ་བུ་གཅིག་ཁོག་སྟོང་ན་ཀུན་ཀྱང་ཁོག་སྟོང་པ་བཞིན་ནོ། །མདོ་ལས་ཀྱང་། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ། །ཞེས་གསུངས་སོ། །དེས་སྣང་བ་མ་སྤངས་སྣང་བའི་མཐལ་ལས་གྲོལ། སྟོང་པ་མ་སྤངས་སྟོང་པའི་མཐའ་ལས་གྲོལ། །གཉིས་ཀ་མ་སྤངས་གཉིས་སུ་འཛིན་པའི་མཐའ་ལས་གྲོལ། མདོར་ན་དབྱེར་མེད་ཅེས་བྱ་བ་རང་ཡང་ཐ་དད་དུ་ཞེ་ན་ས་འགོག་པའི་དོན་དུ་གསུངས་པ་ལས། དབྱེར་མེད་རུང་དུ་འདོད་པ་ནང་ཡང་བྲལ་ཏེ། དབྱེར་མེད་སྤྱོད་ཡུལ་དང་བྲལ་བའོ། །དེ་ལ་ནི་ཤེས་བྱའི་གནས་ལུགས་ཀྱང་བྱ། སངས་རྒྱས་ཀྱི་དགོངས་པ་ཞེས་ཀྱང་བྱ། རྟོགས་ན་དེ་ཡིས་འཚེངས། མ་རྟོགས་ན་དེ་ཡིས་ཕུང་སྟེ་ཤེས་བྱའི་གནས་ལུགས་དེ་ལྟར་རང་གནས་པ་ཡིན་ནོ། །ལམ་མཆོག་གསལ་བའི་སྒྲོན་མེ་ལས། །ལེའུ་དང་པོའི་རྣམ་པར་འགྲེལ་པའོ། །ལེའུ་གཉིས་པ་ལ་གཉིས་ཏེ། གནས་སྐབས་ཀྱི་རྩོམ་པའི་ཡན་ལག་དང་། ལེའུ་ཡི་གཞུང་ངོ་། །རྩོམ་པའི་ཡན་ལག་ལ་གཉིས་ཏེ། །ཕྱག་དང་དམ་བཅའ་བའོ། །དང་པོ་ཕྱག་ནི་ལྷུན་གྲུབ་ངང་ལ་ཕྱག་འཚལ་ནས། ཞེས་པ་སྟེ། དེ་ཡང་ལེའུ་གོང་དུ་བསྟན་པའི་གསུམ་པོ་དེ་ཡང་། གཞན་ལ་མ་བཙལ་བར་རང་ལ་རང་ཆས་སུ་ལྷུན་གྱི་གྲུབ་སྟེ། དེ་ནི་རང་ལུས་ཐབས་ལྡན་དུ་འདུག་པའི་ཕྱིར་ཕྱག་གི་གནས་ཡིན་ལ། དེ་ལྟ་བུའི་བདེན་པ་གསུམ་པོ་དེ་ཡང་རྟོགས་ཤིང་མཐར་ཕྱིན་པའི་ཕྱིར་རམ། ཡང་ན་ལེའུ་འདིར་བདེན་པ་གསུམ་པོ་དེ་རང་ལ་གནས་པ་དེ་གཏན་ལ་འབེབས་པའི་ཕྱིར་ཕྱག་འཚལ་ལོ། །དེ་མི་རིགས་ཏེ། ལམ་གོང་མ་ནི་རྟོགས་པ་མཐོ་ལ། འོག་མ་ནི་དམའ་བའི་ཕྱིར་ཞེ་ན་རིགས་ཏེ། འདིར་བདེན་པ་གསུམ་རང་ལ་མི་གནས་ན་གཏན་ལ་ཕབ་ཀྱང་མི་རྟོགས་ཏེ། རང་ལ་གནས་པས་གོ་རུ་རུང་། རྟོགས་སུ་རུང་བར་ཡོད་པས། དེ་ཉིད་དྲིན་ཆེ་བའི་ཕྱིར་ཕྱག་འཚལ་ལོ། །དམ་བཅའ་བ་ནི། དང་པོ་ལམ་མཆོག་བཤད་པར་བྱ། །ཞེས་པ་སྟེ། ལམ་རྣམས་ཀྱི་དང་པོར་ཡང་ལྟ་བ་བྱུང་ལ། །ལམ་ཀུན་གྱི་མཆོག་ཀྱང་ལྟ་བ་ཡིན་པས། །ཐོག་མར་ལྟ་བ་བཤད་པར་བྱའོ། །ཞེས་བྱ་བའི་ཐ་ཚིག་གོ །འོ་ན་ལྟ་བ་ལམ་གྱི་མཆོག་ཡིན་པ་ཅིའི་ཕྱིར། དང་པོ་འོངས་པ་ལ་རྒྱུ་མཚན་ཅི་ཡོད་ཅེ་ན། དང་པོ་ལྟ་བ་ལམ་གྱི་མཆོག་ཡིན་པ་ནི་རྒྱུ་མཚན་གསུམ་གྱི་ཕྱིར་ཡིན་ཏེ། མདོ་སྔགས་གཉིས་ཀའི་ལུང་ལས་མཆོག་ཏུ་གསུངས་པའི་ཕྱིར་དང་། ལམ་རང་རྐྱ་བའི་སྟོབས་འགྲན་པའི་ཚེ་ན་ཁྱད་ཡོད་པའི་ཕྱིར་དང་། ལམ་ལམ་དུ་འགྱུར་བ་དང་མི་འགྱུར་བའི་ཕྱིར་ན་ལམ་གྱི་མཆོག་ལྟ་བ་ཡིན་ནོ། །དང་པོ་མདོ་སྔགས་གཉིས་ཀའི་ལུང་ལས་ལྟ་བ་ལམ་གྱི་མཆོག་ཏུ་གསུངས་ཏེ། རྒྱལ་བའི་ཡུམ་ལས། ཤེས་རབ་མེད་ན་ཕ་རོལ་ཕྱིན་པ་འདི་དག་ཀུན། །དམིགས་བུ་བྲལ་བས་བགྲོད་པར་ནུས་པར་མི་འགྱུར་རོ། །ཞེས་གསུངས་པ་དང་། སྤྱོད་འཇུག་ལས། ཡན་ལག་འདི་དག་ཐམས་ཅད་ཀུན། །ཐུབ་པས་ཤེས་རབ་དོན་དུ་གསུངས། །དེ་ཡི་ཕྱིར་ན་སྡུག་བསྔལ་དག །ཞི་བར་འདོད་པས་ཤེས་རབ་བསྐྱོད། །ཅེས་གསུངས་སོ། །བརྒྱད་ཅུ་པ་ལས། བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པར། །བླུན་པོ་མུན་སྤྲུལ་བློ་ཅན་དེ། །ལོངས་བའི་གྲོང་ཁྱེར་ཆེན་པོར་འགྲོ། །ཞེས་པ་ལ་སོགས་པ་མང་དུ་གསུངས་སོ། །གཉིས་པ་ལམ་རང་རྐྱང་བའི་སྟོབས་འགྲན་པའི་ཚོན་ཡང་ཁྱད་ཡོད་དེ། །ལྟ་བ་མ་རྟོགས་པར་ཏིང་ངེ་འཛིན་གསལ་ཡང་། །བདག་ཏུ་འཛིན་པ་དང་མ་བྲལ་བས། །དངོས་པོ་འམ། བློས་བྱས་ཀྱི་ཆོས་སུ་འགྲོའོ། །དེ་ཅིས་ཤེ་ན། །བདག་ཏུ་འཛིན་པ་སྤོང་བའི་གཉེན་པོ་ལྟ་བ་ཡིན་ལ། །དེ་འདིར་མེད་པའི་ཕྱིར་རོ། །ལྟ་བ་གནས་ལུགས་ཀྱི་དོན་ཇི་ལྟར་བར་རྟོགས་ན། ཏིང་ངེ་འཛིན་མེད་ཀྱང་གྲོལ་ཏེ། །མཚན་མེད་དེ་བཞིན་ཉིད་སྒོམ་པའི་ཅིག་ཆར་བའམ། མན་ངག་རྫོགས་པ་ཆེན་པོ་ལྟ་བུའོ། །དེ་ཡང་བླ་མ་ལས། ཐིག་ལེ་ཆེན་པོ་རང་བཞིན་ལ། །བསྒོམ་པ་རྣམ་གསུམ་དུས་གཅིག་རྫོགས། །དེ་ནི་དེ་བཞིན་ཉིད་ཀྱི་ངང་། །ཞེས་གསུངས་སོ། །གསུམ་པ་ལམ་ལམ་དུ་འགྱུར་འགྱུར་བ་དང་མི་འགྱུར་བའི་ཁྱད་པར་ཡང་ཡོད་དེ། ལྟ་བ་རྟོགས་ན་ཅི་བྱས་ཐམས་ཅད་ལམ་དུ་འགྱུར་ཏེ། དེ་ཡང་མ་འགགས་པར་སྤྱོད་པ་ཐབས་ལ། རང་བཞིན་མེད་པ་ཤེས་རབ་སྟེ། ཇི་ལྟར་སྤྱོད་ཀྱང་ཐབས་ཤེས་རབ་གཉིས་སུ་མེད་པའི་ངང་ལས་མི་འདའ་བས་ཅི་བྱས་ལམ་དུ་འགྱུར་ལ། ལྟ་བ་མ་རྟོགས་ན་ཏིང་ངེ་འཛིན་ལ་གསལ་བརྟན་ཐོབ་ཀྱང་ལམ་དུ་མི་འགྱུར་ཏེ། དཔལ་ཆེན་པོ་རང་རྒྱུད་དུ་བསྒོན་ན་རུ་ཏྲར་སྐྱེ་བ་ལ་སོགས་པ་ཏིང་ངེ་འཛིན་རིག་པ་མཆོག་ལས་གསུངས་སོ། །དེ་ཅི་ལན་ཞེ་ན། ལྟ་བ་ཆོས་ཉིད་ཀྱི་རྩིས་མ་ཟིན་པས་ལྷ་རང་རྒྱུད་དུ་བསྒོམ་པས་ཉེས་སོ། །དེས་ན་ལྟ་བ་ལམ་གྱི་མཆོག་ཡིན་ནོ། །འོ་ན་ལམ་གྱི་དང་མཆོག་ཡིན་ན། དང་པོར་བསྒོམ་པ་ལ་རྒྱུ་མཚན་ཅི་ཡོད་ཅེ་ན། དེ་ནི་སེམས་ཅན་རྣམས་བདག་ཏུ་འཛིན་པ་ལ་ཡུན་རིང་དུ་གོམས་པས། ཐོག་མར་དེ་སྤོང་དགོས་པས། དེ་མ་སྤངས་ན་ཅི་བྱས་ཀྱང་ལམ་དུ་མི་འགྲོ། དེ་སྤོང་བར་བྱེད་པའི་གཉེན་པོ་ལྟ་བ་མ་ཡིན་པ་གཞན་གང་གིས་ཀྱང་མི་ནུས་པས། དེའི་ཕྱིར་ལྟ་བ་དང་པོར་བཤད་པ་ཡིན་ནོ། །གང་དག་རང་གནས་མཐོང་འདོད་དགོས། ཞེས་བྱ་བ་ལ་སོགས་པས་ནི་མདོར་བསྟན་པ་ཡིན་ནོ། །རིམ་དང་ཅིག་ཆར་བཞི་ཆ་ཡིས། །ཞེས་པ་ལ། རིམ་ཅིག་ཆར་ལ་བཞི་སྟེ། རང་བཞིན་གྱིས་རིམ་ཅིག་ཆར་ནི། རྒྱུ་མཚན་ཉིད་ཀྱི་ཐེག་པ་ལ་འཇུག་པ་དང་། རྡོ་རྗེའི་ཐེག་པ་ལ་འཇུག་པའོ། །གཞི་གནས་ཀྱི་རིམ་གྱིས་པ་དང་གཅིག་ཆར་བ་ནི། མ་ཧཱའི་ལམ་རིམ་ཀྱིས་པ་དང་གཅིག་ཆར་བའོ། །གནས་སྐབས་ཀྱི་རིམ་གྱིས་པ་དང་གཅིག་ཆར་བ་ནི། ལམ་རིམ་ཀྱིས་པའི་དབང་དུ་བྱས་ནས་ལམ་རེ་རེ་ལའང་རིམ་ཅིག་ཅར་གཉིས་གཉིས་ཡོད་པའོ། །དེ་ཡང་དེ་ཏིང་ལྟ་བུ་ལ་སྦྱར་ན། གདམས་ངག་གི་སྟོབས་ཀྱི་འཇོག་པ་རིམ་གྱིས་པ་དང་། །ཤེས་རབ་ཀྱི་སྟོབས་ཀྱིས་འཇོག་པ་ཅིག་ཅར་བའོ། །དེ་བཞིན་དུ་ཀུན་ལ་འགྲེའོ། །དུས་ཀྱི་མཐའི་རིམ་གྱིས་པ་དང་ཅིག་ཅར་བ་ནི། ལྷུན་གྱིས་གྲུབ་པའི་རིག་འཛིན་ནས། །སངས་རྒྱས་ཀྱི་ས་ལ་སྐད་ཅིག་གིས་སྦྱོར་བ་དང་། དུས་རིང་བས་སྦྱོར་བའོ། །སྐབས་འདིར་ནི་རང་བཞིན་གྱི་དབང་པོ་རྣོན་པོ་ཅིག་ཅར་བ་དང་། །སྦྱངས་པའི་དབང་པོ་རྣོན་པོ་རིམ་གྱིས་པའོ། །དེ་རེ་རེ་ལ་ཡང་གཉིས་གཉིས་ཏེ། །རིམ་གྱིས་པའི་རིམ་གྱིས་པ་དང་། །རིམ་གྱིས་པའི་ཅིག་ཅར་བ་དང་། །ཅིག་ཅར་བའི་ཅིག་ཅར་བ་དང་། །ཅིག་ཅར་བའི་རིམ་གྱིས་པའོ། །དེ་དག་གི་ཁྱད་པར། རིམ་གྱིས་པའི་གཉིས་ནི། །བསྐལ་པ་རྡུལ་སྙེད་དུ་ལམ་རྟོགས་ལ་སྦྱངས་པར་མཐུན་ལ། ཚེ་སྟོད་ལ་ཐེག་པ་གཞན་ལ་སྦྱངས་ནས་ཚེ་སྨད་ལ་མ་ཧཱ་ཡོ་ག་ལ་འཇུག་པ་ནི་རིམ་གྱིས་པའི་རིམ་གྱིས་པའོ། །ཚེ་སྟོད་ལ་ལམ་སྟེགས་ལམ་སྦྱངས་པར་མ་ཧཱར་འཇུག་པ་ནི་རིམ་གྱིས་པའི་ཅིག་ཅར་བའོ། །ཅིག་ཅར་བ་གཉིས་ནི། ཚེ་སྔ་མ་ཕན་ཆད་ལ་ལམ་སྟེགས་གཞན་ལམ་སྦྱངས་པར་མཐུན་ལ། ཚེ་འདིའི་ཚེ་སྟོད་ལ། མཚན་ཉིད་དམ་ཀྲི་ཡོག་ལྟ་བུ་ལ་སྦྱངས་ནས། ཚེ་སྨད་མ་ཧཱར་འཇུག་པ་ནི། ཅིག་ཅར་བའི་རིམ་གྱིས་པའོ། །ཚེ་སྟོད་རང་ལ་མ་ཧཱར་འཇུག་པ་ནི་ཅིག་ཅར་བའི་ཅིག་ཅར་བའོ། །དེ་ཕྱིར་མ་ངེས་རིགས་མཆོག་ནས། ཞེས་པ་ནི། རིགས་མཆོག་དབྱེ་བའི་ལེའུ་ནས་མ་ངེས་པ་གཉིས་བཤད་དེ། ཐེག་པ་གང་བསྟན་ཀྱང་མི་གོ་བའི་ངན་པ་དང་། ཐེག་པ་གང་བསྟན་ཀྱང་གོ་བའི་བཟང་པོ་དང་གཉིས་ལས། འདི་བཟང་པོ་དེ་ནས་སྐྱེའོ། །མུན་པའི་ཤེས་པ་དེ་ཉིད། ཅེས་པ་ནི། སོ་སོའི་སྐྱེ་བོ་གྲུབ་མཐས་བློ་མ་བསྒྱུར་བ་ཕྱུགས་དང་འདྲ་བ་དེའོ། །རང་བཞིན་རྒྱུ་ཡི་སྙུང་བར་གནས། ཞེས་པ་ནི། དད་པ་ཅུང་ཟད་གཡོ་བའི་རྟགས་སུ་བླ་མ་ལ་མ་ཞུས་པར་ཟ་མ་སྲུང་བ་ཙུག་བྱེད་དེ། དགེ་བའི་ལད་མོ་བྱེད་པའོ། །ཕལ་པའི་སེམས་བརྒྱད་མཐར་གནས་ཆེ། །ཞེས་པ་ནི། དེ་ནས་དགེ་བའི་བསམ་པ་འཇིག་རྟེན་ཕལ་པའི་སེམས་བརྒྱད་འབྱུང་སྟེ། ཉེ་དྲུང་ལ་སྦྱིན་པ་གཏོང་བ་དང་། ཡུལ་མི་ལ་གཏོང་བ་དང་། སྙིང་པོ་ལ་གཏོང་བ་དང་། །ཡུལ་བསྡོམས་ནས་གཏོང་བ་དང་། །ལྷུག་པར་གཏོང་བ་དང་། ལག་པ་བརྐྱང་ནས་གཏོང་བ་དང་། །འཇིག་རྟེན་པའི་ལྷ་མཆོད་པ་དང་། །དཀོན་མཆོག་མཆོད་པ་དང་བརྒྱད་འབྱུང་ངོ་། །སྙིང་པོ་རང་བཞིན་མཚུངས་པ་དང་། །ཞེས་པ་ནི། སེམས་ཉིད་བདེ་གཤེགས་སྙིང་པོ་དང་ཡེ་ནས་མཚུངས་པར་ལྡན་པ་ནི་མཚུངས་པར་ལྡན་པའི་རྒྱུའོ། །བཤེས་གཉེན་མགོན་ལ་ལུང་གཉིས་ཐོས། །ཞེས་པ་ལུང་གཉིས་ནི། འདས་པའི་ཡོན་ཏན་ཐོས་ནས་བྲོད་པ་དང་། འཁོར་བའི་སྐྱོན་ཐོས་ནས་སྐྱོ་བ་ནི་ལྷན་ཅིག་བྱེད་པའི་རྒྱུའོ། །དེ་བདག་གསང་སོགས་དམིགས་པ་སྟེ། ཞེས་པ་ལ་སོགས་པ་སྐྱོན་བཞི་སྟེ། དེ་ཡང་འཁོར་འདས་ཀྱི་སྐྱོན་ཡོན་སྟོན་པའི་ཉན་ཐོས་ཀྱི་བླ་མ་ལྟ་བུ་ནི་བདག་པོའི་རྐྱེན་ཡིན་ལ། གསང་སྔགས་ནི་ཉན་ཐོས་ཀྱི་སྡེ་སྣོད་དེ་དམིགས་པའི་རྐྱེན་ནོ། །སྐད་ཅིག་འཕེལ་བ་དེ་མ་ཐག །ཅེས་པ་སྐད་ཅིག་ཤེས་པ་སྔ་མ་འགགས། ཕྱི་མ་འཕེལ་བ་ནི་དེ་མ་ཐག་པའི་རྐྱེན་ནོ། །དེ་ལ་རྒྱུ་གཉིས་རྐྱེན་བཞི་སྟེ་དྲུག་ལས་རྩྭ་ལས་མེ་འབྱུང་བ་བཞིན་དུ་སེམས་གཡོས་ཏེ། བཞི་ཡི་ཐེག་པ་དང་པོར་ཞོག །ཅེས་པ་ངེས་འབྱུང་གི་ཐེག་པ་བཞི་བགྲོད་བྱའི་དང་པོ་ལྷ་མིའི་ཐེག་པ་ཞོག་ཅེས་པའམ། ཡང་ན་ངེས་འབྱུང་གི་ཐེག་པ་བཞིའི་དང་པོ་ལྷ་མིའི་ཐེག་པ་སྟེ་སེམས་སྐྱེ་བའི་རྟེན་ནམ་གཞིར་ཞོག་ཅེས་པའོ། །དེ་ནས་རིམ་གྱིས་བགྲོད་བྱས་ཏེ། །ཞེས་པ་ནི། དེ་ལྟར་ལྷ་མི་ནས་ཉན་ཐོས་སུ་བགྲོད་པ་ཇི་བཞིན་དུ། དེ་ནས་རང་རྒྱལ། བྱང་ཆུབ་སེམས་དཔའ། གསང་སྔགས་ཕྱི་རྒྱུད་ཀྱི་བར་དུ་རིམ་པ་བཞིན་དུ་བགྲོད་པར་བྱ་སྟེ་ཞེས་པའོ། །མ་སྦྱངས་གྲུབ་པ་གསུམ་ཕྱིར་གྱིས། ཞེས་པ། ལམ་སྟེགས་ཀྱི་ཐེག་པ་བློ་མ་སྦྱངས་པར་ཆོས་ཉིད་རང་བཞིན་གྱིས་གྲུབ་པ་དང་། རང་གི་ངོ་བོས་གྲུབ་པ་དང་། ཆོས་ཅན་རང་གི་མཚན་ཉིད་ཀྱིས་གྲུབ་པ་གསུམ་གྱི་ཕྱིར། མཐོ་བསྟན་མྱུར་སྣོ་རྒྱ་ཆེ་ཡང་། ཞེས་པ་སྦྱར་རོ། །འདིའི་སྐབས་སུ་དབང་པོ་སྒྲུབ་བྱེད་ཀྱི་རིགས་ལ་ཡང་གསུམ་སྟེ། དེ་ཡང་ཐེག་པ་འོག་མའི་ལུགས། དོན་གསང་བའི་མཁན་པོས་ཀྱང་རང་བཞིན་དབང་པོ་རྣོན་པོ་ཁས་བླངས། སྔགས་རང་ལ་ཡང་འདོད་གཞུང་མི་མཐུན་པ་མང་དུ་ཡོད་དོ། །འདིར་གསང་སྔགས་མ་ཧཱ་ཡོ་གའི་རང་བཞིན་གྱི་དབང་པོ་རྣོན་པོ་ཡོད་པར་ཁས་ལེན་ནོ། །དེ་ལ་གཉིས་ཏེ། རང་བཞིན་གྱི་དབང་པོ་རྣོན་པོ་མེད་ན་སྐྱོན་དུ་འགྱུར་བས་ཡོད་པར་བསྒྲུབ་པ་དང་། ཡོད་པར་བསྒྲུབ་པའི་རིགས་པ་དངོས་པོ། དང་པོ་ལ་གཉིས་ཏེ། དང་པོ་ནི། རང་བཞིན་གྱི་དབང་པོ་རྣོན་པོ་གཞི་ལ་མ་གྲུབ་ན། དང་པོ་འཇིག་རྟེན་ཕལ་པའི་སེམས་བརྒྱད་རང་རྐྱང་སྐྱེ་བར་མི་རིགས་ཏེ། སེམས་བརྒྱད་སྐྱེ་བ་དེ་སྦྱངས་པ་ལས་སྐྱེས་སམ་རང་བཞིན་གྱིས་སྐྱེས། རང་བཞིན་གྱིས་སྐྱེས་ན་དེ་ཀ་རང་བཞིན་གྱི་དབང་པོ་ཡིན་མོད། སྦྱངས་པ་ལས་སྐྱེས་སོ་ཞེ་ན་གང་ལ་སྦྱངས། སྔ་མ་སྦྱངས་སོ་ཞེ་ན། འཇིག་རྟེན་ཕལ་པའི་སེམས་བསྐྱེད་བརྒྱད་ལས་སྔ་བའི་ལམ་གང་ཡོད། སྡེ་སྣོད་ནས་བཤད་པ་མེད་དོ། །ཡང་གཉིས་པ། རང་བཞིན་གྱི་རྣོན་པོ་མེད་པར་སྦྱངས་པ་འབའ་ཞིག་ཡིན་ན། ད་སྦྱངས་པ་མཉམ་པོ་ལ་རྣོ་རྟུལ་འོང་བར་མི་རིགས། འདོད་ན་མངོན་སུམ་གྱི་གསལ། དེ་རྣོ་བ་དེ་དེའི་སྔོན་མ་ལ་སྦྱངས་སམ་ཅི་ཆ་ཞེ་ན། མ་སྦྱངས་སམ་ཅི་ཆ། ཅི་ཆ་ཡོད་ལ་རིགས་པ་མི་བཏུབ་བོ། །ཡང་གསུམ་པ། ཐེག་པ་ཆེ་ཆུང་འོང་བར་མི་རིགས་ཞེ་ན། སྦྱངས་པ་མཉམ་པོ་ལ་བློ་ཆེ་ཆུང་འོང་བར་མི་རིག་ལ། བློ་ལ་ཆེ་ཆུང་མེད་ན་ཐེག་པ་ལ་ཆེ་ཆུང་མི་སྲིད་དོ། །དེ་ཅིས་ན། ཐེག་པ་ཆེ་ཆུང་ནི་བློའི་ཁྱད་ཀྱིས་ཕྱེ་བའི་ཕྱིར་རོ། །གཉིས་པ་ཡོད་པར་བསྒྲུབ་པའི་དངོས་པོ་ནི་གཉིས་ཏེ་ལུང་གིས་བསྒྲུབ་པ་དང་། རིགས་པས་བསྒྲུབ་པའོ། །ལུང་ནི། དགོངས་འདུས་ལས། །རྡོ་རྗེ་སེམས་དཔའི་ཞིང་ཁམས་ན་གནས་པའི་སེམས་ཅན་ཆེན་པོ་དེ་དག་གི་སེམས་ཀྱི་རང་བཞིན་སྣ་ཚོགས་པའི་ཕྱིར་ཤིན་ཏུ་ཟབ་པ་དང་། མ་ཟབ་པ་དང་། ཡངས་པ་དང་། དོག་པ་དང་། བརྟན་པ་དང་། མྱུར་བ་དང་། རྣོ་བ་དང་། རྟུལ་བ་དང་། ཞེས་པ་དང་། མྱུར་བ་དང་། བུལ་བ་དང་། ཞེས་པ་དང་། ཀུན་བྱེད་ལས། ལྷ་མི་སེམས་ཅན་དབང་པོ་མི་མཐུན་པས། །ཁ་ཅིག་དབང་པོ་ཆིག་ཆོད་ཡེ་ནས་ཡོད། །ཁ་ཅིག་དབང་པོ་སྦྱངས་པའི་འཕྲོ་ཅན་ཡོད། ཅེས་པ་དང་། སྙིང་པོ་ལས། སྐལ་ལྡན་གསང་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། ཞེས་པ་དང་། མངོན་པ་མཛོད་ལས་ཀྱང་། ཁ་ཅིག་ཐོག་མ་ནས་དེའི་རིགས། ཁ་གཅིག་སྦྱངས་པ་ལས་གྱུར་པ། ཞེས་པ་དང་། འདི་ཉིད་ནས་ཀྱང་། མ་སྦྱངས་གྲུབ་པ་གསུམ་ཕྱིར་གྱིས། ཟེར་བས། རང་བཞིན་གྱི་དབང་པོ་རྣོན་པོ་གཞི་ལ་གྲུབ་པར་གསུངས་སོ། །རིགས་པས་བསྒྲུབ་པ་ནི། མདར་ནག་ན་རེ། སེམས་ཅན་རྣམས་ཀྱི་ཤེས་རྒྱུད་ཆོས་ཅན། །དབང་པོ་རྣོན་པོ་གཞི་ལ་གྲུབ་སྟེ། །ཀུན་གཞི་ལ་བག་ཆགས་སྣ་ཚོགས་བསགས་པའི་ཕྱིར་རོ། །གསུང་སྐད། དེ་མི་འཐད་དོ། །ཀུན་གཞི་ལ་དབང་པོ་རྣོན་པོའི་བག་ཆགས་སོག་པ་དེ། ཐོས་བསམ་ལ་བརྟེན་ནམ་མ་བརྟེན། བརྟེན་ན་སྦྱངས་པར་ཐལ། མ་བརྟེན་ན་དབང་པོ་རྣོན་པོའི་བག་ཆགས་ཇི་ལྟར་ད པོག་སྟེ་མི་རིགས་སོ། །ཡང་ཀུན་གཞི་ལ་བག་ཆགས་བསགས་པ་དེ་ཁོ་ན་ལ་སྦྱངས་པ་ཟེར་བ་ཡིན་ནོ། །ལྷ་རྗེ་ཧོར་པོའི་ཞལ་ནས། སེམས་ཅན་རྣམས་ཀྱི་ཤེས་རྒྱུད་ཆོས་ཅན། རང་བཞིན་གྱི་དབང་པོ་རྣོ་བ་དང་རྟུལ་བ་ལ་སོགས་པ་ཐ་དད་དུ་གྲུབ་སྟེ། སེམས་ཀྱི་རང་བཞིན་སྣ་ཚོགས་པའི་ཕྱིར། དཔེར་ན་ལྕགས་ཀྱི་རྣོ་རྟུལ་བཞིན་ནོ། །གཏན་ཚིགས་མ་གྲུབ་བོ་ཞེ་ན། མངོན་སུམ་གྱི་གསལ་ཏེ་སེམས་ཅན་རྣམས་ལ་དབང་པོ་ཐ་དད་དུ་གནས་སོ། །དེ་སྦྱངས་པ་ཐ་དད་ལས་བྱུང་བ་ཡིན་ཞེ་ན། སྦྱངས་པ་ཐ་དད་དུ་བྱེད་པ་ཅིའི་ཕྱིར། དེ་སེམས་ཅན་རང་རང་གི་འདོད་པ་དང་བློ་རིགས་ཡིན་ནོ། །ཞེ་ན། དེ་ཀ་ན་སེམས་ཅན་གྱི་རང་བཞིན་སྣ་ཚོགས་པ་ཡིན་ནོ། །ཡང་གཞན་ན་རེ། འོ་ན་གཞི་ལ་རང་བཞིན་གྱིས་རྣོ་བ་དང་། རྟུལ་བ་ལ་སོགས་པ་གྲུབ་ན་གཞི་བཟང་ངན་ཅན་དུ་ཐལ་ཞེ་ན། ལྷ་རྗེའི་ཞལ་ནས། གཞིའི་ངོ་བོ་བཟང་ངན་ཅན་དུ་ཐལ་ཞེས་ཟེར་རམ། ལྡོག་པ་བཟང་ངན་ཅན་དུ་ཐལ་ཟེར། དང་པོ་ལྟར་ན་ཅིའི་ཕྱིར། རྣོ་རྟུལ་གྲུབ་པའི་ཕྱིར་ཞེ་ན། རྣོ་རྟུལ་མ་འགགས་ཀྱང་། ཆོས་ཉིད་དབང་བཙན་པར་གཞི་ལ་ཐ་དད་མེད་པར་བཟང་ངན་དུ་མི་འགྲོ་སྟེ་ཅི་སྟོ་སྟེ་ཁྱབ་པ་མེད་དོ། །གཉིས་པ་ལྟར་ན་འདོད་ཐོག །ལྡོག་པ་བཟང་ངན་བྱུང་བ་ལས་འཁོར་འདས་སྣ་ཚོགས་སུ་ཤར་བ་ཡིན་གསུངས། སློབ་དཔོན་ཁ་རག་པ་དང་ཡམ་ཤུད་པ་ན་རེ །གཞི་བཟང་ངན་དུ་མི་འགྲོ་སྟེ། དོན་དམ་པ་དབང་པོ་རྣོ་རྟུལ་གང་དུ་ཡང་མ་གྲུབ། ཀུན་རྫོབ་ཏུ་རྣོ་རྟུལ་སྣ་ཚོགས་སུ་མ་འགགས། དབྱེར་མེད་དུ་རྣོ་རྟུལ་ཐ་དད་ཀྱི་ཞེན་པ་དང་བྲལ་གསུངས་ངོ་། །ཡང་གཞན་ན་རེ། རང་བཞིན་དབང་པོ་རྣོན་པོ་དེ་རྐྱེན་ཐོས་བསམ་ལ་རག་ལུས་སམ་མ་ལུས། ལུས་ན་རང་བཞིན་མ་ཡིན་ཏེ་སྦྱངས་པར་ཐལ། མ་ལུས་ན་འབད་པ་མེད་པར་གྲོལ་བར་ཐལ་ཞེ་ན། དེ་ཚོད་དུ་ལྕགས་ཀྱི་རྣོ་རྟུལ་རྒྱུ་ལ་ཡོད་པ་དེ་རྐྱེན་མགར་བ་ལ་རག་ལུས་སམ་མ་ལུས། ལུས་ན་འདིར་ཡང་རྐྱེན་ཐོས་བསམ་ལ་རག་ལུས་སོ། །འོ་ན་རང་བཞིན་གྱིས་རྣོ་བ་མ་ཡིན་ཏེ་སྦྱངས་པའི་རྣོ་བར་ཐལ་ཞེ་ན། འདིར་ཡང་རྐྱེན་མགར་བ་ལ་རག་ལུས་པ་དེ་ལྕགས་ཀྱི་རྒྱུ་རྣོ་བ་མ་ཡིན་ཏེ། རྐྱེན་མགར་བས་རྣོ་བ་བྱས་པ་ཐལ། རྐྱེན་མགར་བ་ལ་རག་མ་ལུས་སོ་ཞེ་ན། འདིར་ཡང་རྐྱེན་ཐོས་བསམ་ལ་རག་མ་ལུས་སོ། །འབད་མེད་དུ་གྲོལ་བར་ཐལ་ཞེ་ན། འོ་ན་ལྕགས་རྡོས་ཀྱང་མཚོན་གྱི་དོན་བྱེད་ནུས་པར་ཐལ་ལོ། །དེ་རྐྱེན་མགར་བ་དང་ཕྲད་པ་མཉམ་པོ་ལ་རྣོ་རྟུལ་གྱི་ཁྱད་ཡོད་པ་ཡིན་ཞེ་ན། །འདིར་ཡང་རྐྱེན་ཐོས་བསམ་བྱས་པ་མཉམ་པོ་ལ་རྣོ་རྟུལ་གྱི་ཁྱད་ཡོད་པ་ཡིན་ནོ། །འཇུག་པ་བཞི་ཡི་ཡན་ལག་མཆོག །ཅེས་པ་ནི། རང་བཞིན་གྱི་དཀྱིལ་འཁོར་དུ་འཇུག་པ་ལ། ཐོས་པའི་ཤེས་རབ་མིག་ཕྱེ་བ་དང་འདྲ། དོན་ཁོང་དུ་ཆུད་ཅིང་ལྟ་བ་རྟོགས་པ་དཀྱིལ་འཁོར་མཐོང་བ་དང་འདྲ། དེ་གོམ་པ་དཀྱིལ་འཁོར་དུ་ཞུགས་པ་དང་འདྲ། དེ་མངོན་དུ་གྱུར་པ་དབང་ཐོབ་པ་དང་འདྲའོ། །གཞི་དང་གཏན་ཚིགས་གྲུབ་པའི་དོན། །ཞེས་པ་ནི། གཏན་ལ་དབབ་པར་བྱ་བའི་གཞི་འཁོར་འདས་ཀྱི་ཞེན་སྣང་དང་། དེ་གཏན་ལ་འབེབ་པའི་གཏན་ཚིགས་དང་། དེས་གཏན་ལ་ཕབ་པའི་གྲུབ་མཐའོ། །དེ་ལྟར་རྣམ་པ་གསུམ་ནི་ཡན་ལག་རྒྱས་པ་འབྱུང་བའི་གཞི་རུ་བཞག་གོ །དང་པོ་དེ་གཏན་ལ་དབབ་པ་ནི། གཞི་འཁོར་འདས་ཀྱི་ཞེན་སྣང་བསྟན་པ་ནི། དེ་ཡང་ཡོངས་སུ་བརྟག་པའི་གཞི། ཞེས་པ་ལ་སོགས་པ་སྟེ། འཁོར་དང་འདས་ངོ་ཞེན་སྣང་བརྟག །ཅེས་པ་ནི། སྤྱིར་གཞལ་བར་བྱ་བའི་གཞི་ནི། འཁོར་བ་ཕྱི་ནང་སྣོད་བཅུད་དུ་ཞེན་པ་དང་། །མྱ་ངན་ལས་འདས་པ་སྐུ་དང་ཡེ་ཤེས་སུ་ཞེན་པའི་ཞེན་བྱེད་ཀྱི་བློ་ལ་འཇལ་ལོ། །སྐབས་འདིར་ལམ་རྣམ་བཀོད་ལས་ཞིབ་པར་གསུངས་ཏེ། སྤྱིར་གཞལ་བྱ་ཞེས་པའི་སྣང་བ་ལ་གཞལ་བ་དེ། འཁོར་བའི་ཞེན་སྣང་ལ་གཞལ་ལམ། མྱ་ངན་ལས་འདས་པའི་ཞེན་སྣང་ལ་འཇལ། འདས་པ་ལ་འཇལ་ན། མྱ་ངན་ལས་འདས་པ་རང་གི་མཚན་ཉིད་ལ་འཇལ་ལམ། མྱ་ངན་ལས་འདས་པ་ལ་ཞེན་པའི་སེམས་དེ་ལ་འཇལ། རང་གི་མཚན་ཉིད་ནི་ལས་དང་པོ་བ་ལྐོག་ཏུ་གྱུར་པ་ཡིན་ཏེ་འོ་སྐོལ་རྣམས་ཀྱི་སྤྱོད་ཡུལ་མིན་ནོ། །རྣམ་བཀོད་ལས། འདས་པ་སྤྱོད་ཡུལ་མ་གྱུར་གྱིས། །གཞལ་བྱའི་ཡུལ་དུ་ཇི་ལྟར་རིགས། །ཞེས་སོ། །དེར་ཞེན་པའི་སེམས་དེ་ལ་འཇལ་བར་ཡང་མི་རིགས་ཏེ། འཁྲུལ་པའི་སེམས་ཀྱིས་མྱ་ངན་ལས་འདས་པ་དེ་མི་རྟོགས་པའི་ཕྱིར་རོ། །སེམས་ལ་མྱ་ངན་འདས་ཤེ་ན། །དེ་ཉིད་འདས་པར་རུང་མ་ཡིན། །ཞེས་སོ། །འཁོར་བ་ལ་འཇལ་ན་སྣང་བ་ལ་འཇལ་ལམ། བརྟག་པ་ལ་འཇལ། སྣང་བ་ལ་འཇལ་བར་མི་རིགས་ཏེ། རིག་པ་རང་སྣང་བ་གྲུབ་མཐའ་ལྟར་གནས་པའི་ཕྱིར་རོ། །ཡུལ་མིན་གྲུབ་པའི་མཐའ་ལྟར་སྣང་ཞེས་སོ། །བརྟག་པ་ལ་ཡང་སྐད་ཅིག་མ་གསུམ་གྱི་རང་བཞིན་ཡིན་ཏེ། འདས་པ་འགགས། མ་འོངས་པ་མ་སྐྱེས། ད་ལྟར་བ་མི་རྟག་པས་གཞལ་དུ་མི་བཏུབ་སྟེ། སྔ་འདས་ཕྱི་མ་མ་བྱུང་བས། དེ་ལ་བརྟེན་ནས་བརྟག་མི་རིགས། ཞེས་སོ། །འོ་ན་གང་ལ་འཇལ་ན། ད་ལྟར་གྱི་ཤེས་པ་སྐད་ཅིག་མ་རང་ཐད་རང་ཐད་ཀྱི་ཞེན་སྣང་ལ་འཇལ་ཏེ། ད་ལྟར་རང་ཐད་རང་ཐད་དཔྱད་ཅེས་པ་དང་། ཞེན་སྣང་འཇལ་ལ་སྐྱོན་པ་མེད་ཅེས་བཤད་དོ། །དངོས་གཉིས་ཞེན་དངོས་དུས་གསུམ་ཆོས། ཞེས་པ་ལ་སོགས་པ་གཞལ་གྱིས་མི་ལང་བའི་དོགས་པ་བསལ་བ་ཡིན་ཏེ། འཁོར་བ་དང་མྱ་ངན་ལས་འདས་པའི་དངོས་པོ་གཉིས་ལ། འཁོར་བ་ངན་པར་ཞེན་ནས་སྤོང་བ་དང་། མྱ་ངན་ལས་འདས་པ་བཟང་པོར་ཞེན་ནས་བསྒྲུབ་པའི་ཞེན་པའི་དངོས་པོ་དང་། དུས་གསུམ་ཆོས། སྐད་ཅིག་གཅིག་ལ་ཀུན་རྫོགས་ཕྱིར། ཞེས་པ་སྟེ། དེ་ཡང་འདས་མ་འོངས་ད་ལྟར་གྱི་དུས་གསུམ་གྱི་ཆོས་ཐམས་ཅད་རིག་པ་སྐད་ཅིག་མ་གཅིག་ལ་རྫོགས་ཏེ། ལོག་པའི་སྐད་ཅིག་མ་དུ་མ་མཐུད་པ་ལས་འཁོར་བའི་ཆོས་རྫོགས། མ་བཅོས་པའི་སྐད་ཅིག་མ་རྒྱུན་གྱི་འབྱུང་བ་ལས་མྱ་ངན་ལས་འདས་པའི་ཆོས་རྫོགས་པའི་ཕྱིར། དེ་དངོས་མཐོང་བས་ཡང་དག་པར། རིག་བཞིན། ཞེས་འབྲེལ་ཏེ། དེ་ལྟར་ཆོས་ཀུན་རྫོགས་པའི་སྐད་ཅིག་མ་དེའི་དངོས་པོ་ཇི་ལྟ་བར་མཐོང་བའམ། ཡང་དག་པར་རིག་པ་བཞིན་དུ་ཀུན་གྱི་དེ་ལྟར་ཞེས་ཏེ། འཁོར་འདས་ཀྱི་ཆོས་ཀུན་ཀྱང་ཡང་དག་པར་ཤེས་ཤིང་ཇི་ལྟ་བར་རིག་གོ །དེ་མི་འཐད་དམ་སྙམ་ན་འཐད་དེ། འདམ་བུ་གཅིག་ཁོག་སྟོང་ན་ཀུན་ཀྱང་ཁོག་སྟོང་པ་བཞིན་དུ་ཞེན་སྣང་གི་ཆོས་སྐད་ཅིག་མ་རྟོགས་ན་ཞེན་སྣང་གི་ཆོས་ཀུན་རྟོགས་ཏེ། ཞེན་སྣང་ཀུན་རིགས་འདྲ་བའི་ཕྱིར་རོ། །མདོ་ལས། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ་ཞེས་གསུངས་པ་ཡིན་ནོ། །ཀུན་བཏགས་ཤེས་པ་བར་མར་འགྱུར། ཞེས་པ་ལ་སོགས་པ་གཞལ་བྱ་མེད་པའི་དོགས་པ་ཡིན་ཏེ། འོ་ན་ཀུན་བརྟགས་ཀྱི་ཤེས་པ་ཞེན་སྣང་ཅན་དེ་ནི། བར་མ་བསམ་པའི་ཤེས་རབ་ཏུ་གནས་འགྱུར་ནས་མེད་པས། འདིར་གཏན་ཚིགས་ཀྱིས་བརྟགས་དཔྱད་བྱ་བའི་གཞི་མ་གྲུབ། དཔེར་ན་ཕྱིའི་ཡུལ་མེད་པས་ཡུལ་ཅན་མི་འབྱུང་བའམ། ལུས་མེད་གྲིབ་མ་བཞིན་ཞེས་པས་ལུས་མེད་པར་གྲིབ་མ་མི་འབྱུང་བ་བཞིན་དུ། གཞལ་བྱ་འཁོར་འདས་ཀྱི་ཞེན་སྣང་དེ། འཇལ་བྱེད་སོ་སོར་རྟོག་པའི་ཤེས་རབ་ཏུ་འགྱུར་ནས་མེད་པས་མི་བཏུབ་སྟེ། དེའི་ཕྱིར་གཞལ་དུ་མི་བཏུབ་བོ། །རང་ཉིད་ལ་མ་བཏུབ། ཅེས་བསམ་པའི་ཤེས་རབ་དེ་ཉིད་ཀྱིས་དེ་ཉིད་ལ་འཇལ་ལོ་ཞེ་ན་ཡང་མི་བཏུབ་སྟེ། མཛུབ་མོ་བཞིན་དོགས་པས། ཞེས་པ། དཔེར་ན་མཛུབ་མོ་དེ་ཉིད་ཀྱིས་དེ་ཉིད་ལ་རེག་ཏུ་མི་བཏུབ་པའམ། རལ་གྲི་དེ་ཉིད་ཀྱིས་དེ་ཉིད་མི་ཆོད་པ་བཞིན་དུ་དོགས་པ་ལ། གཉེན་པོ་མེད་པས་དོགས་མིན་ཞིང་། དེས་སྐྱོན་མི་འོང་སྟེ། ཡིད་རྟོག་བཅས་ཀྱི་ཤེས་པ་གཏན་ནས་འདག་པར་བྱེད་པའི་གཉེན་པོ་སྒོམ་པའི་ཤེས་རབ་ཡིན་ཏེ། དེ་ཡང་སྐབས་འདིར་མ་བརྟེན། ཀུན་བརྟགས་རྩ་བ་ནས་སྤོང་བའི་གཉེན་པོ་མཐོང་ལམ་ཡིན་ཏེ། སྐབས་འདིར་དེ་ཡང་མ་སྐྱེས་པས། ཡིད་རྟོག་བཅས་བསམ་པའི་ཤེས་རབ་ཏུ་གནས་འགྱུར་ཡང་། སོ་སོར་རྟོག་པའི་ཤེས་རབ་ཉིད་ལ་ཀུན་རྟོག་སྐྱེ་རུང་དུ་ཡོད། ཞེན་སྣང་འབྱུང་བ་རུང་དུ་ཡོད་པས་ཞེན་སྣང་དག་པ་མིན་ཞིང་། བར་མའི་ཡུལ་ཕྱིར་ངེས་ཚིག་འགྲུབ། ཅེས་པ་དེ་ན་བར་མའི་བསམ་པ་ཤེས་རབ་ཀྱི་ཡུལ་ཞེན་སྣང་ཡིན་པའི་ཕྱིར་བརྟག་གཞིའི་ངེས་ཚིག་འགྲུབ་བོ། །ཡན་ལག་རྫོགས་སངས་རྒྱས་བསྟན་པ། ཞེས་པ་ལ་སོགས་པ་ནི་གཏན་ཚིགས་སྟོན་ཏེ། དེ་ཡང་སྔོན་བྱུང་དུ་སྟོན་པ་སྐུ་ལྔ་ཡིས་གསུང་ལྔའི་སྒོ་ནས། དངོས་སུ་ལྟ་བ་གཏན་ལ་ཕབ་པ་ནི་སྔོན་བྱུང་དངོས་ལྔའི་གཏན་ཚིགས་སོ། །སྐུ་ལྔ་དངོས་མིན། སྐུ་ལྔ་དང་ཚུལ་མཐུན། གསུང་ལྔ་དངོས་མིན། གསུང་ལྔ་དང་ཚུལ་མཐུན། འཁོར་ལྔ་དངོས་མིན། འཁོར་ལྔ་དང་ཚུལ་མཐུན་པས་ནི་ཚུལ་གྱི་གཏན་ཚིགས་སོ། །ཡང་གཏན་ལ་ཕབ་པའི་ཚུལ་དུ་གོ་བ་ཚུལ་གྱི་གཏན་ཚིགས་སོ་གསུངས་སོ། །དེ་ཚིག་ཏུ་བརྗོད་པས་ནི་ཚིག་གི་གཏན་ཚིགས་སོ། །ཡང་དག་རྫོགས་སངས་རྒྱས་སྟོན་པ། ཞེས་པ་སྟོན་པ་སྐུ་ལྔ་དངོས་ཏེ། ཆོས་སྐུ་ལོངས་སྐུ་སྤྲུལ་སྐུ། རྡོ་རྗེའི་སྐུ། མངོན་པར་བྱང་ཆུབ་པའི་སྐུ་དང་ལྔའོ། །སྐུ་ལྔས་འདུས་པའི་འཁོར་རྣམས་ལ། ཞེས་པ་སྐུ་ལྔའི་འཁོར་ལྔའོ། །གསུང་ལྔ་བསྟན་པ་དེ་ཁོ་ན། ཞེས་པ། གསུང་ལྔ་ནི་དགོངས་པ་བརྡའ་ལ་སོགས་པ་ཡིན་ལ། བསྟན་པ་དེ་ཁོ་ན་གཏན་ལ་འབེབས་ཤིང་འཇལ་བྱེད་པའོ། །ཞེས་པ་ནི། དེ་ལྟར་སྐུ་ལྔས་གསུང་ལྔའི་སྒོ་ནས། འཁོར་ལྔ་ལ་སེམས་ཅན་ཉིད་གསང་སྔགས་ཀྱི་དེ་ཁོ་ན་ཉིད་གཏན་ལ་འབེབས་པ་དང་འཇལ་བར་བྱེད་པའོ། །དེ་ཉིད་དངོས་ལྔ་ཚུལ་དང་ཚིག །ཞེས་པ་ནི། དེལྟར་སྐུ་ལྔས་ལྟ་བ་དངོས་སུ་གཏན་ལ་ཕབ་པ་དེ་ཉིད་སྔོན་བྱུང་དངོས་ལྔའི་གཏན་ཚིགས་ཡིན་ལ། ཚུལ་དང་ཞེས་པ་ནི་ཚུལ་གྱི་གཏན་ཚིགས་ཏེ། རྗེས་འཇུག་བློ་ཆེ་བ་ལ་སྐུ་ལྔ་དངོས་མིན། སྐུ་ལྔ་དང་ཚུལ་མཐུན་པ་འབྱུང་བ་ལྔ། གསུང་ལྔ་དངོས་མིན་ཏེ། གསུང་ལྔ་དང་ཚུལ་མཐུན་པ་འབྱུང་བ་ལྔ་རང་གི་ངོ་བོས། འཁོར་ལྔ་དངོས་མིན་ཏེ་འཁོར་ལྔ་དང་ཚུལ་མཐུན་པའི་རྗེས་འཇུག་བློ་ཆེ་བ་ལ། །རང་གི་ངོ་བོས་གཏན་ལ་ཕབ་པའོ། །ཚིག་བརྗོད་པ་ལྔས་མཚོན། ཞེས་པ་ནི། ཚིག་གིས་གོ་རྟོགས་སུ་གྱུར་པ་ལ་བརྗོད་པའི་ཚིག་གིས་མཚོན་ནས་ལྟ་བ་གཏན་ལ་འབེབས་པ་སྟེ། དེ་ལྟར་གསུམ་ནི་གཏན་ཚིག་འབྱུང་བའི་གཞིའོ། །དེ་ལ་གཏན་ཚིགས་དངོས་ལྔ་ཡིས། ཞེས་པ་ནི། དེ་ལྟར་གཏན་ཚིགས་གསུམ་ཡོད་པ་དེ་ལ། དང་པོ་ནི་སྟོན་པ། སྐུ་ལྔ་དངོས་ཀྱི་བརྡའ་སྤྲོད། ཅེས་འབྲེལ་ཏེ། གསུང་ལྔ་ཡིས་བརྡའ་སྤྲོད། གང་ལ་སྤྲོད་ན། རྗེས་སུ་འཇུག །ཅེས་པས་འཁོར་ལྔ་ལ་བརྡའ་སྤྲོད་དེ། ཇི་ལྟར་སྤྲོད་ན། སྟོན་པ་ཆོས་ཀྱི་སྐུས། སྐྱེ་མེད་དོན་གྱི་གསུང་གིས་ཡེ་ཤེས་རྒྱ་མཚོ་ལ་བརྡའ་སྤྲོད། སྟོན་པ་ལོངས་སྐུས། དགོངས་པ་བརྡའི་གསུང་གིས་འཁོར་སྨིན་པ་རྒྱ་མཚོ་ལ་བརྡའ་སྤྲོད། སྟོན་པ་སྤྲུལ་པའི་སྐུས། བརྗོད་པ་ཚིག་གི་གསུང་གིས་འཁོར་མོས་པ་རྒྱ་མཚོ་ལ་བརྡའ་སྤྲོད། སྟོན་པ་རྡོ་རྗེའི་སྐུས། དབྱེར་མེད་རྡོ་རྗེའི་གསུང་གི་འཁོར་དབྱེར་མེད་རྡོ་རྗེའི་འཁོར་ལ་ངོ་སྤྲོད། སྟོན་པ་མངོན་པར་བྱང་ཆུབ་པའི་སྐུས། རིག་པ་བྱིན་གྱིས་རླབས་ཀྱི་གསུང་གིས་འཁོར་རྒྱལ་བ་རྒྱལ་མཚོ་ལ་ངོ་སྤྲོད་དོ། །ཇི་ལྟར་སྤྲོད་ན། བསྲེགས་བཅད་བརྡར་བའི་གསེར་བཞིན་དུ། ཞེས་པ་སྟེ། དཔེར་ན་གསེར་ཡིན་མིན་བལྟ་བལྟ་བའི་ཕྱིར། བསྲེགས་པ་དང་། བཅད་པ་དང་། བརྡར་བ་བྱས་ནས། གསེར་བཟང་པོར་གཏན་ལ་འབེབས་པ་བཞིན་དུ། དངོས་ལྔ་ལེགས་པར་བརྟགས་ཏེ་དབབ། ཅེས་པ། སྐུ་དངོས་ཀྱི་གཏན་ཚིགས་ལ་བརྟེན་ནས་ལྟ་བ་གཏན་ལ་དབབ་བོ། འོ་ན་སྟོན་པ་སྐུ་ལྔའི་འཁོར་ལྔ་ལ་གཞལ་བྱ་ཞེན་པའི་སྣང་བ་ཡོད་དམ་མེད། མེད་ན་གཞལ་བྱ་མེད་པའི་ཕྱིར། འཇལ་བྱེད་གཏན་ཚིགས་དོན་མེད་དུ་ཐལ། །ཡོད་ན་ཤིན་ཏུ་ཡང་མི་རིགས་ཏེ། །སྟོན་པ་སྐུ་ལྔའི་འཁོར་བྱེད་པ་ནི་མཐོང་ལམ་ཡན་ཆད་ཀྱི་སྤྱོད་ཡུལ་ཡིན་པའི་ཕྱིར་རོ། །གལ་ཏེ་མཐོང་ལམ་སྐྱེས་ཀྱང་ཞེན་སྣང་ཡོད་དོ་ཞེ་ན། མཐོང་ལམ་སྐྱེས་པ་དོན་མེད་དུ་ཐལ། ཞེན་སྣང་སྤང་མ་ནུས་པའི་ཕྱིར། །མཐོང་ལམ་དང་ཞེན་སྣང་དངོས་འགལ་ཡིན་པའི་ཕྱིར་རོ། །དེ་ལ་ཁ་ཅིག་དངོས་ལྔའི་གཏན་ཚིགས་ཀྱི་སྐབས་སུ་གཞལ་བྱ་ནི་ཕྱག་ན་རྡོ་རྗེ་སྙན་ཆ་ལྔ་དང་ལྡན་པའོ་ཟེར་རོ། །དེ་ལྟར་ན་ཕྱག་ན་རྡོ་རྗེ་ལ་ཞེན་སྣང་ཡོད་དམ་མེད། ཡོད་ན་མི་རིགས་ཏེ། ཕྱག་ན་རྡོ་རྗེ་སངས་རྒྱས་ཀུན་གྱི་མེས་པོར་བཤད་པ་དང་། ས་བཅུའི་དབང་ཕྱུག་ཏུ་བཤད་པའི་ཕྱིར་རོ། །ཞེན་སྣང་མེད་ན་གཞལ་བྱར་མི་བཏུབ་བོ། །གལ་ཏེ་གཞལ་བྱ་ཞེན་སྣང་མིན་ནོ་ཞེ་ན། །འཁོར་དང་འདས་ངོ་ཞེན་སྣང་བརྟག །ཅེས་གསུངས་པ་དང་འགལ་ལོ། །འོ་ན་ཇི་ལྟར་ཤེས་པར་བྱ་ཞེ་ན། འཁོར་བཞི་ལ་ཞེན་སྣང་མེད་ལ། །སྤྲུལ་སྐུའི་འཁོར་ལ་ཞེན་སྣང་ཡོད་པའང་སྲིད་དོ། །སྤྲུལ་སྐུ་དེ་གདུལ་བྱ་དག་པ་དང་མ་དག་པ་ཀུན་འདུལ་པའི་སྟོན་པ་ཡིན་པའི་ཕྱིར་རོ། །འོ་ན་སྐུ་བཞིའི་འཁོར་ལ་གཞལ་བྱ་ཞེན་སྣང་མེད་པའི་ཕྱིར་རོ། །འཇལ་བྱེད་གཏན་ཚིགས་དོན་མེད་དུ་ཐལ་ཞེ་ན། སྔོན་བྱུང་དུ་དོན་མེད་དུ་ཐལ་ཞེའམ། །རྗེས་འཇུག་ཏུ་དོན་མེད་དུ་ཐལ་ཟེར། སྔོན་བྱུང་དུ་དོན་མེད་དུ་ཐལ་ཟེར་ན། །སྔོན་བྱུང་དུ་དོན་མེད་ཀྱང་། །རྗེས་འཇུག་གོ་ཕྱེ་བའི་འཁོར་གྱི་ཆེད་དུ་ཞེན་སྣང་ཡོད་པ་ལྟར་བསྟན་ནས། །གཏན་ལ་ཕབ་པ་མི་འགལ་ལོ། །རྗེས་འཇུག་དུ་དོན་མེད་པར་ཐལ་ཞེ་ན། ཅིའི་ཕྱིར་ཏེ། ད་ལྟར་དོན་དང་བཅས་ནས་འདུག་པ་མངོན་སུམ་གྱིས་གསལ་ལོ། །ངོ་བོ་སྣང་ཚིག་རང་སྣང་ཚིག །ཅེས་པ་ལ་སོགས་པ་ནི། འདིར་སྟོན་པ་སྐུ་ལྔའི་གསུང་ལྔ་ལ། ཚིག་བདུན་འབྱུང་བ་ཇི་ལྟར་ཡིན་ཞེ་ན། ངོ་བོ་སྣང་ཚིག་ནི་ཆོས་སྐུའི་ཚིག་ཏུ་སྡུད་ལ། རང་རིག་མངོན་གསལ་ཚིག་གིས་མཚོན། ཞེས་པ་ནི་མངོན་པར་བྱང་ཆུབ་པའི་སྐུའི་ཚིག་ཏུ་སྡུད་པའམ། ཡང་ན་སྤྱིར་སྡུད་པའོ། །མེ་ལོང་བཞིན་དུ་སྐུ་ལ་སྣང་། ཞེས་པ། སྟོན་པ་ལོངས་སྐུ་ནི་འཁོར་བྱང་ཆུབ་སེམས་དཔའ་རྣམས་ལ་གསུང་གིས་ཆོས་མི་སྟོན་ཏོ། །སྐུ་ཡིས་ཆོས་སྟོན་ལ་ཇི་ལྟར་སྟོན་ན། དཔེར་ན་མེ་ལོང་ལ་བལྟས་པས་བཞིན་གྱི་དྲི་མ་ངོས་ཟིན་པ་བཞིན་དུ། བྱང་ཆུབ་སེམས་དཔའ་ལོངས་སྐུ་ལ་བལྟས་པས་རང་གི་སྒྲིབ་པ་ངོས་ཟིན་ཏོ། །ཇི་ལྟར་ཟིན་ན། ལོངས་སྐུ་ནི། །གཅིག་དང་དུ་མ་ལས་གྲོལ་བར་འདུག་ལ། བྱང་ཆུབ་སེམས་དཔའ་ནི་མ་གྲོལ། ལོངས་སྐུ་ནི་དགོངས་པ་ལ་བཞེངས་བཞུགས་མེད་ལ། བྱང་ཆུབ་སེམས་དཔའ་ལ་ཡོད། ལོངས་སྐུ་ནི་དགོངས་པ་རྫོགས་པས་རྫོགས་པའི་སྐྱིལ་ཀྲུང་དུ་བཞུགས་ལ། བྱང་ཆུབ་སེམས་དཔའ་ནི་དེ་ལྟར་མིན་པས་སྒྲིབ་པ་ངོས་ཟིན་ནོ། །དེ་ལྟར་མོད་ཀྱང་བསྡུ་ན་གཉིས། ཞེས་པ་ནི། གཏན་ཚིགས་ལ་ཕྱེ་ན། དངོས་ལྔ། ཚུལ་ལྔ། ཚིག་ལྔ་ལ་སོགས་པ་ཡོད་མོད་ཀྱང་། བསྡུ་ན་གཉིས་ཏེ་གང་ཞེ་ན། །བཞི་རྗེས་མི་དཔྱོད་གཅིག་རྗེས་དཔྱོད། །ཅེས་པས། དཔྱད་དུ་ཡོད་པས་གོ་བ་དང་། །དཔྱད་དུ་མེད་པས་གོ་བའོ། །དེ་ཡང་སྐུ་བཞིའི་གསུང་དང་། དེ་དང་ཚུལ་མཐུན་པས་གོ་བ་བཞི་དང་། ཚིག་བཞི་ནི་དཔྱད་དུ་མེད་པས་གོ་བ་སྟེ། དབང་པོ་རྣོན་པོའི་སྤྱོད་ཡུལ་ལོ། །སྤྲུལ་པའི་སྐུའི་གསུང་དང་། དེ་དང་ཚུལ་མཐུན་པའི་གཏན་ཚིགས་དང་། དེའི་མཚན་ཉིད་ཆེད་དུ་དཔྱད་པས་གོ་བ་སྟེ་དབང་པོ་རྟུལ་པོའི་སྤྱོད་ཡུལ་ལོ། །དོན་དང་མཐུན་དང་མི་མཐུན་པ། ཞེས་པ་ནི། དོན་དང་མཐུན་པ་ནི་ཐེག་པ་ཐུན་མོང་བ་བཞིན་དུ་ཚིག་དོན་མཐུན་པར་གཏན་ལ་འབེབས་པའོ། །མི་མཐུན་པ་ནི། ཐེག་པ་ཐུན་མོང་མ་ཡིན་པའི་གཏན་ཚིག་ཏེ། ཚིག་དོན་མི་མཐུན་པའི་གཏན་ཚིགས་ཀྱིས་གཏན་ལ་འབེབས་པའོ། །ཕྱི་མ་མི་མཐུན་མཚོན་བྱེད་ལྟར། ཞེས་པ་ནི། ཐེག་པ་ཐུན་མོང་དང་མི་མཐུན་པའི་གཏན་ཚིགས་གོ་འབྱེད་དུ་གཏོང་བ་སྟེ། དཔེར་ན་མེ་ཚ་བ་ཕྱོགས་གཅིག་ཏུ་ཞེན་པ་ལ། མེ་བྱི་དཀར་པོའི་ལོ་རྒྱུས་བརྗོད་པ་བཞིན་ནོ། །ངོ་བོ་བཞིའི་ཚུལ་གྱིས་དོན་རྟོགས་མངོན། ཞེས་པ་ནི་འབྲུ་ཟུར་གཉིས་ཏེ། དག་པའི་གཏན་ཚིགས་སུ་བྱེད་ན། སྣོད་འབྱུང་བ་ལྔར་དག་པ་དང་། གཅིག །ཕུང་པོ་ལྔ་ཡབ་ལྔར་དག་པ་དང་གཉིས། །དོན་དམ་སྐྱེ་མེད་དུ་དག་པ་དང་གསུམ། ཀུན་རྫོབ་སྒྱུ་མར་དག་པ་དང་བཞིའོ། །མདོར་བསྟན་དུ་བྱེད་ན། དག་པའི་གཏན་ཚིགས། མཉམ་པའི་གཏན་ཚིགས། རྟོགས་པའི་གཏན་ཚིགས། བདེན་པའི་གཏན་ཚིགས་དང་བཞི་ཡིས་ཆོས་ཉིད་ཀྱི་དོན་མངོན་སུམ་དུ་རྟོགས་པའོ། །སྣོད་བཅུད་རྒྱུད་རྣམས་དག་རྟོགས་ཤིང་། ཞེས་པ། སྣོད་འབྱུང་བ་ལྔ་ནི་ཡུམ་ལྔར་དག་སྟེ། ས་སངས་རྒྱས་སྤྱན། ཆུ་མཱ་མ་ཀི། མེ་གོས་དཀར་མོ། རླུང་དམ་ཚིག་སྒྲོལ་མ། ནམ་མཁའ་དབྱིངས་ཕྱུག་མའོ། །བཅུད་ཕུང་པོ་ལྔ་ཡབ་ལྔར་དག་ཏེ། གཟུགས་རྣམ་པར་སྣང་མཛད། ཚོར་བ་རིན་ཆེན་འབྱུང་གནས། འདུ་ཤེས་སྣང་བ་མཐའ་ཡས། འདུ་བྱེད་དོན་ཡོད་གྲུབ་པ། རྣམ་པར་ཤེས་པ་རྡོ་རྗེ་སེམས་དཔའོ། །རྒྱུད་ཚོགས་བརྒྱུད་ཡེ་ཤེས་ལྔར་དག་སྟེ། གཞི་དོན་གྱི་ཀུན་གཞི་ཆོས་ཀྱི་དབྱིངས་ཀྱི་ཡེ་ཤེས། སྦྱོར་བ་བདུན་པའི་ཀུན་གཞི་མེ་ལོང་ལྟ་བུའི་ཡེ་ཤེས། ཉོན་མོངས་པ་ཅན་གྱི་ཡིད་མཉམ་པ་ཉིད་ཀྱི་ཡེ་ཤེས། སྒོ་ལྔ་བྱ་བ་གྲུབ་པའི་ཡེ་ཤེས། །ཡིད་སོ་སོར་རྟོག་པའི་ཡེ་ཤེས་སོ། །མཉམ་གཉིས་ལྷག་པའི་མཉམ་གཉིས་ཀྱིས། ཞེས་པ་མཉམ་པ་གཉིས་དང་། ལྷག་པའི་མཉམ་པ་གཉིས་ཏེ་བཞིའོ། །དེ་ཡང་མཉམ་གཉིས་ནི་ཐེག་པ་ཐུན་མོང་བ་དང་མཐུན་ཏེ། དོན་དམ་སྐྱེ་མེད་དུ་མཉམ། ཀུན་རྫོབ་སྒྱུ་མར་མཉམ་པའོ། །ལྷག་པའི་མཉམ་གཉིས་ནི། ངོ་བོ་དང་། རང་བཞིན་དང་། མཚན་ཉིད་གསུམ་གྱིས་ལྷག་སྟེ། འོག་མ་བའི་ཀུན་རྫོབ་རྒྱུ་རྐྱེན་གྱིས་བསྐྱེད་ལ། འདིར་མ་བསྐྱེད་པས་ངོ་བོས་ལྷག །དེ་ཡང་རྒྱུ་རྐྱེན་རག་ལུས་མེད་པའི་ཕྱིར། ཞེས་སོ། །འོག་མ་པའི་ཀུན་རྫོབ་རྒྱུ་རྐྱེན་གྱིས་བསྐྱེད་པ་མཚན་ཉིད་མི་རྟག་པ། འདིར་རྒྱུ་རྐྱེན་གྱིས་མ་བསྐྱེད་པས་མཚན་ཉིད་ངོ་བོ་ཉིད་ཀྱིས་རྟག་པ་སྟེ། སྒྱུ་མ་རྡོ་རྗེ་བཙན་པོ་མཆོག །ཅེས་སོ། །འོག་མའི་ཀུན་རྫོབ་བཟང་ངན་ཅན་ཡིན་ལ། འདིར་བཟང་ངན་མེད་པས་རང་བཞིན་གྱིས་ལྷག་གོ །དོན་དམ་པ། འོག་མའི་དོན་དམ་མཐར་ལྟུང་བས་ལྟག་མེ་སྐེ་སྟོང་པ་དང་འདྲ། འདིར་སྣང་བ་ངོ་བོ་ཉིད་ཀྱི་རྒྱུར་ལྷུན་གྱི་གྲུབ་པས་ཕྱུག་མོ་སྐེ་གང་པ་དང་འདྲའོ། །མཚན་ཉིད་ཀྱིས་ལྷག་སྟེ་འོག་མ་སྟོང་མཐར་ལྟུང་བས་མཚན་ཉིད་ཕྱོགས་གཅིག་ཏུ་བཟུང་དུ་ཡོད་ལ། འདིར་སྟོང་མཐར་མ་ལྟུང་པས་མཚན་ཉིད་ཕྱོགས་གཅིག་ཏུ་བཟུང་དུ་མེད་དོ། བྱིན་གྱིས་བརླབས་ཀྱིས་ལྷག་སྟེ་འོག་མ་བའི་སྐྱེ་མེད་སྒྲ་ཇི་བཞིན་པར་སོང་བས་བྱིན་རླབས་རིག་པ་རང་སྣང་དུ་མི་འཆར་ལ། འདིར་སྐྱེ་མེད་སྒྲ་ཇི་བཞིན་པར་མ་སོང་བས། རིག་པ་བྱིན་རླབས་རང་སྣང་དུ་འཆར་རོ། །རབ་ཏུ་རྟོགས་པ་རྣམ་བཞི་ཡིས། ཞེས་པ། དེ་ཡང་རྒྱུ་གཅིག་པར་རྟོགས་པ་ནི་འཁོར་འདས་ཐམས་ཅད་ཀྱི་རྒྱུ་རང་གི་སེམས་སུ་རྟོགས་པ་སྟེ། སེམས་ལས་མ་རྟོགས་ཆོས་མེད་ཕྱིར་ཞེས་སོ། །ཡིག་འབྲུའི་ཚུལ་ནི། སྣང་བ་ༀ། གྲགས་པ་ཨཱཿ དྲན་རྟོག་ཧཱུྃ་དུ་རྟོགས་སོ། །བྱིན་གྱིས་བརླབས་ནི། ༀ་གྱི་བྱིན་གྱིས་བརླབས་ཀྱིས་སྣང་བ་སྐུར་རྟོགས། ཨཾ་གྱི་བྱིན་གྱིས་བརླབས་ཀྱིས་གྲགས་པ་གསུང་དུ་རྟོགས། ཧཱུྃ་གི་བྱིན་གྱིས་བརླབས་ཀྱིས་དྲན་རྟོག་ཐུགས་སུ་རྟོགས་སོ། །མངོན་སུམ་པར་རྟོགས་པ་ནི། དེ་ཡང་སྤྱིའི་མཚན་ཉིད་མ་ཡིན་ཏེ་རང་གི་མཚན་ཉིད་མངོན་སུམ་པར་རྟོགས་པའོ། །ཉོན་མོངས་པ་རང་དང་སྤྱི་བསྟན་པ། ཞེས་པ། སྤྱིར་རང་སྤྱི་ལ་གཉིས་ཏེ། ཉོན་མོངས་པའི་རང་སྤྱི་དང་། ཆོས་ཉིད་ཀྱི་རང་སྤྱིའོ། །ཉོན་མོངས་པའི་རང་སྤྱི་ནི། མཚན་ཉིད་ཐེག་པ་རྣམས་ཀྱིས་ནི། །རང་གི་མཚན་ཉིད་ནི། ཞེ་སྡང་ཀུན་ནས་མནར་སེམས་པ། གཏི་མུག་ཀུན་ནས་རྨོངས་པ། ང་རྒྱལ་ཀུན་ནས་ཁེངས་པ། གཞན་གྱི་ཕུན་སུམ་ཚོགས་པ་ལ་མི་བཟོད་པའི་ཕྲག་དོག །ཀུན་ནས་ཞེན་པའི་འདོད་ཆགས་སོ། །སྤྱིའི་མཚན་ཉིད་ནི། རབ་ཏུ་མ་ཞི་བའི་རྣམ་པའོ། །ཞེས་ཟེར་རོ། །སྔགས་ཀྱི་ལུགས་ཀྱི་ཉོན་མོངས་པ་རང་གི་མཚན་ཉིད་ནི། རིག་པ་སྒྱུ་མའི་རྩ་འགགས་པ་ཡིན་ལ། སྤྱིའི་མཚན་ཉིད་རིག་པ་སྤྲོས་པ་དང་བྲལ་བར་འདོད་དོ། །ཆོས་ཉིད་ཀྱི་རང་སྤྱི་ནི། མཚན་ཉིད་པའི་ལུགས་ཀྱིས། ཆོས་ཉིད་སྤྱིའི་མཚན་ཉིད་སྒྲོ་འདོགས་ཡིན་ལ། རང་གི་མཚན་ཉིད་ནི་་སྤྲོས་བྲལ་དུ་རྟོགས་པའོ། །ཟེར་རོ། །སྔགས་ཀྱི་ལུགས་ཀྱིས་ནི། ཆོས་ཉིད་སྤྱིའི་མཚན་ཉིད་ནི་ཆོས་ཀྱི་དབྱིངས་ཡིན་ལ། རང་གི་མཚན་ཉིད་ནི་ཡེ་ཤེས་ལྔར་གསལ་བའོ། །དེ་ལྟ་བུའི་དོན་རྟོགས་པར་གྱུར་ན་རྣམ་པར་བྱང་བའི་ལམ་དུ་འགྱུར་རོ་ཞེས་པའི་ཐ་ཚིག་གོ །རྣམ་པར་བྱང་བའི་ལམ་དུ་འགྱུར་ཞེས་པ་འདིས་གསང་སྔགས་པའི་ལུགས་ཀྱིས་ཉོན་མོངས་པ་མི་སྤངས་བའི་གཏན་ཚིགས་སྟོན་པ་ཡིན་ཏེ། དུག་ལྔ་ཆོས་ཅན། གསང་སྔགས་ཀྱི་ལུགས་ཀྱིས་མི་སྤོང་ཞིང་ལམ་དུ་བྱེད་པ་ཡིན་ཏེ། སྤང་བྱའི་རྫས་མ་གྲུབ་པའི་ཕྱིར་དང་། ཡེ་ཤེས་ལྔའི་ངོ་བོ་ཡིན་པའི་ཕྱིར་དང་། ཕྱོགས་གཅིག་པའི་ཞེན་པ་བཟློག་པའི་ཕྱིར་དང་། སྤངས་པས་མི་སྤོང་བའི་ཕྱིར་དང་། དང་པོ་སྤང་བྱའི་རྫས་མ་གྲུབ་སྟེ། སེམས་ཉིད་ཀྱི་རྩལ་མ་འགགས་པར་ཤར་བ་ཡིན་ཏེ། དཔེར་ན་སྨིན་རྒྱུ་ལ་ཆུ་རག་མི་དགོས་པ་བཞིན་ནོ། །སྐུ་ལྔ་ཡེ་ཤེས་ལྔའི་ངོ་བོ་ཡང་ཡིན་ཏེ། དུག་ལྔ་མ་སྤངས་སྐུར་སྟོན། ཡེ་ཤེས་ལྔར་ལྡན་ལྷུན་གྱི་གྲུབ། ཅེས་གསུངས་པ་ཡིན་ནོ། །སྤོངས་པས་མི་སྤོང་བ་ཡིན་ཏེ། མེ་ལོང་མ་སྤངས་པར་གཡའ་མི་སྤོང་བ་བཞིན་དུ། སེམས་མ་སྤངས་པར་སེམས་ཀྱི་རྩལ་སྤང་དུ་མི་བཏུབ་བོ། །ཆོས་ཉིད་སྒྱུ་དགོས་པ་ཡིན་ནོ། །ཕྱོགས་གཅིག་པའི་ཞེན་པ་བཟློག་པའི་ཕྱིར་ཡིན་ཏེ། རྒྱུའི་ཐེག་པ་རྣམས་ཉོན་མོངས་པ་སྤང་བྱ་ཕྱོགས་གཅིག་ཏུ་འདོད་ལ། འདིར་ལམ་དུ་འགྱུར་བས་སྤང་བྱ་ཕྱོགས་གཅིག་པའི་ཞེན་པ་དང་བྲལ་བ་ཡིན་ཏེ། དཔེར་ན་རྟ་བོང་གི་ཟས་ཕུབ་མ་ཡིན་པ་བཞིན་ནོ། །བདེན་པ་གཉིས་ཀར་དབྱེར་མེད་པས། །ཡང་དག་ཉིད་དུ་རབ་ཏུ་རྟོགས། །ཞེས་པ་ལྟ་བ་རྟོགས་པའི་ཚུལ་ཡིན་ནོ། །བདེན་པ་དབྱེར་མེད་དཀོར་བདུན་ལྷུན་གྱིས་གྲུབ་པ་རང་གི་མཚན་ཉིད་དུ་རྟོགས་ནས་རིག་པ་ཡུལ་མེད་དུ་གསལ་བའོ། །དེ་ཡང་ལམ་གཅིག་ཆར་བའི་སྐབས་སུ་གསལ་བ་ཆིག་ཆོད་དུ་རྟོགས། ཐོད་རྒལ་བའི་སྐབས་སུ་དེ་བས་གསལ་བར་མི་རྟོགས། རིམ་གྱིས་པའི་སྐབས་སུ་ནང་ན་མི་གསལ་བར་རྟོགས་སོ། །དེ་ལྟར་རྟོགས་པ་ལ་རིམ་པ་འབྱུང་བ་ཅིའི་ཕྱིར་ཞེ་ན། །བློ་ཆེ་ཆུང་ཡོད་པས་རྟོགས་པ་ལ་གསལ་མི་གསལ་བྱུང་བའོ། །འོ་ན་རིམ་གྱིས་པ་དང་གཅིག་ཅར་བ་དང་གཉིས་ལ། ལྟ་བའི་ངོ་བོ་ལ་ཁྱད་པར་ཡོད་དམ་མེད་ཅེ་ན། ཁ་ཅིག་ཡོད་པ་བཞེད་དེ། རྟོགས་པ་ཚབ་ཆེ་ཆུང་ཁྱད་པར་ཤིན་ཏུ་ཡང་ཆེའོ་གསུང་། ཁ་ཅིག་ནི་རྟོགས་པ་མྱུར་བུལ་ལས། རང་གི་ངོ་བོ་ལ་ཁྱད་པར་མེད་དེ། རྟ་པ་དང་མི་རེང་བཞིན་གསུང་ངོ་། །ཡང་ཟག་བཅས་ལྟ་བའི་སྐབས་སུ་ཆོས་ཉིདརང་གི་མཚན་ཉིད་མཐོང་ངམ་མ་མཐོང་ཞེ་ན། ཁ་ཅིག་ནི་རང་གི་ཉིད་དེ། ཟག་བཅས་ལྟ་བའི་སྐབས་སུ་དང་ཅི་ལ་མཐོང་སྟེ། ཟག་མེད་མཐོང་ལམ་སྒོམ་ལམ་མཐར་ལམ་གསུམ་དུ་ཡང་མ་མཐོང་། སངས་རྒྱས་ཀྱི་སྐབས་ཁོ་ནར་མཐོང་བ་ཡིན་ཏེ། དགོངས་འདུས་ལས། ཆོས་འདི་ཟབ་སྟེ་མཐོང་བ་དཀའ། །རྟོགས་པར་ཡང་ནི་མ་ཡིན་ཏེ། །མཐར་ཕྱིན་པ་ལ་གནས་པ་ཡིས། །སྐྱེས་བུས་ཀྱང་ནི་མཐོང་བ་མིན། །ཞེས་གསུངས་སོ། །ཟེར་བ་ཡང་མི་འཐད་དེ། ལམ་ཆུང་ལས། ནུས་པ་ཐོབ་དང་མ་ཐོབ་ཀྱི། །མཐོང་ལམ་གཉིས་སུ་གྱུར་པ་ཡིན། །ཞེས་པ་ལམ་གྱི་ངེས་ཚིག་ཀྱང་། །ལུང་ཡང་དུས་བཞི་མཉམ་སྦྱོར་གྱི་དགོངས་པ་ཉམས་སུ་སྦྱོར་བ་མྱོང་བ་ལ་དགོངས་པ་ཡིན་གྱི་ལྟ་བ་རང་གི་མཚན་ཉིད་མ་མཐོང་བ་ལ་དགོངས་པ་མིན་ནོ། །ལྷ་རྗེ་སྐྱོ་ན་རེ། ལྟ་བ་མ་རྟོགས་ན་ཕར་ཞོག །རྟོགས་ན་རང་གི་མཚན་ཉིད་བོགས་དང་སྐྱེད་དབྱུང་དུ་མེད་པ་སངས་རྒྱས་ཀྱི་དགོངས་པ་དང་ཁྱད་མེད་པར་ཟག་བཅས་ལྟ་བའི་སྐབས་སུ་རྟོགས་སོ་ཟེར་ཏེ། འོ་ན་ཟག་མེད་ལམ་དང་ཁྱད་མེད་པར་ཐལ་ལོ། །དེ་ནི་ཡུན་རིང་ཐུང་གི་ཁྱད་པར་ཡོད་པ་ཡིན་ཏེ། དཔེར་ན་ཆང་རྫ་མ་དང་ཕུལ་གང་བཞིན་ཟེར་བ་ཡང་མི་འཐད་དེ། མཐོང་ལམ་ན་ཡུན་རིང་དུ་སོང་བ་ལ་ཟེར་བ་མིན། སྔར་མ་མཐོང་བའི་དོན་མཐོང་བ་ལ་ཟེར་བ་ཡིན་ཏེ། ཐུན་མོང་གི་ལུང་ལས་ཀྱང་། མ་མཐོང་མཐོང་ཕྱིར་མཐོང་བའི་ལམ། །ཞེས་གསུངས་པ་དང་། འདི་ཉིད་ལས། སྐབས་འདིར་བདེན་པ་བར་མ་མཐོང་། །ཞེས་གསུངས་པ་ཡིན་ནོ། །ཡང་སྔོན་གྱི་ཟུར་ཚོ་བགྲེས་པོ་རྣམས་ན་རེ། ཟག་བཅས་ལྟ་བའི་སྐབས་སུ་སྤྱིའི་མཚན་ཉིད་དུ་མཐོང་ལ། ཟག་མེད་མཐོང་ལམ་དུ་རང་གི་མཚན་ཉིད་དུ་མཐོང་བ་འོ་ཟེར་བ་ཡང་མི་འཐད་དེ། ལ་ཤན་ལས། སྤྱི་མིན་རང་གི་མཚན་ཉིད་དུ། །རང་རིག་མངོན་སུམ་དམིགས་བྲལ་བའོ། །ཞེས་གསུངས་པ་དང་། འདི་ཉིད་ལས། སྒྲ་རྟེན་ཡིད་ལ་བྱེད་མིན་པར། །ཞེས་རང་གི་མཚན་ཉིད་མཐོང་བར་བཤད་པ་དང་འགལ་ལོ། །ཡང་ཁ་ཅིག་ན་རེ། ཟག་བཅས་ལྟ་བའི་སྐབས་སུ་སྤྱིའི་མཚན་ཉིད་དུ་མཐོང་། དེ་ནས་དེ་བཞིན་ཉིད་ཀྱི་སྐབས་སུ་དོན་དམ་རང་གི་མཚན་ཉིད་དུ་རྟོགས། ཀུན་ཏུ་སྣང་གི་སྐབས་སུ་ཀུན་རྫོབ་རང་གི་མཚན་ཉིད་དུ་རྟོགས། ཕྱག་རྒྱ་གཅིག་པའི་སྐབས་སུ་དབྱེར་མེད་རང་གི་མཚན་ཉིད་དུ་མཐོང་། དེ་ནས་སངས་རྒྱས་ཀྱི་ས་ཚུན་ཆད་དུ་རྟོགས་པ་ལ་གནས་མི་གསལ་ལ་ཁྱད་མེད་དེ། ཡུན་རིང་ཐུང་གི་ཁྱད་ཡོད་ཟེར་བ་ཡང་མི་འཐད་དེ། ལྟ་བའི་སྐབས་སུ་རྟོགས་པར་བཤད་པ་དང་། ཏིང་ངེ་འཛིན་གྱི་སྐབས་སུ་རྟོགས་པའི་ལུང་མེད་པ་གཉིས་ཀ་དང་འགལ་ལོ། །འོ་ན་ཇི་ལྟར་ཤེས་པར་བྱ་ན། ཟག་བཅས་ལྟ་བའི་སྐབས་སུ་ལྟ་བ་རང་གི་མཚན་ཉིད་རྟོགས་ནི་རྟོགས་ལ། ཟག་མེད་མཐོང་ལམ་ལ་ལྟོས་ན་མི་གསལ་བའམ། ནུས་པ་མ་ཐོབ་པའི་ཚུལ་དུ་མཐོང་ངོ་། །འོ་ན་མཐོང་ལམ་དུ་ཐལ་ཟེར་རམ། མཐོང་ལམ་ཙམ་དུ་ཐལ་ཟེར། མཐོང་ལམ་ཙམ་དུ་ཐལ་བ་དང་འདོད་ཐོག་ཡིན་ལ། ཟག་མེད་མཐོང་ལམ་དུ་ཐལ་ཞེ་ན། ཅིའི་ཕྱིར། མཐོང་བའི་ཕྱིར་ཞེ་ན། མཐོང་ཡང་ནུས་པ་མ་རྫོགས་པས་ཟག་མེད་མཐོང་ལམ་དུ་མི་འགྲོ་ན་ཅི་སྟོ་སྟེ་ཁྱབ་པ་མེད་དོ། །དཔེར་ན་རྒྱང་རིང་པོ་ནས་མཐོང་བའི་མི་དང་། དྲུང་དུ་ཐུག་པ་བཞིན་ནོ། །འདི་ཉིད་ནས་ཀྱང་དབང་པོ་དང་བའི་སྤྱོད་ཡུལ་ལ། ཉེ་རིང་དྲུང་བཞིན་སྟོབས་འཕེལ་བས། རྒྱུ་རྐྱེན་གོང་འོག་འབྲས་བུར་འགྲོ། གསལ་བའི་བྱེ་བྲག་རིམ་པར་འགྲོ། །ཞེས་གསུངས་པས། ཟག་བཅས་ལྟ་བའི་སྐབས་སུ་རང་གི་མཚན་ཉིད་མི་གསལ་བའི་ཚུལ་དུ་མཐོང་ལ། དེ་ནས་མཐོང་ལམ་མན་ཆད་དུ་ཇེ་གསལ་དུ་འགྲོ །ཟག་མེད་མཐོང་ལམ་དུ་ནུས་པ་ཐོབ་སྟེ། སངས་རྒྱས་ཀྱི་ས་མན་ཆད་ལ་ལྟ་བའི་ངོ་བོ་ལ་ཁྱད་མེད་དེ། གསལ་བ་ཡུན་རིང་ཐུང་གི་ཁྱད་ཡོད། སངས་རྒྱས་ཀྱི་ས་དུས་བཞི་མཉམ་སྦྱོར་གྱི་དགོངས་པ་མངའ་བ་ཡིན་ནོ། །ཐམས་ཅད་དག་ཅེས་བྱ་བ་ཡང་། ཞེས་པ་དང་། ལྷུན་གྲུབ་མཉམ་པ་མ་མཐོང་ཞིང་། ཞེས་པ་ནི། ཀ་དག་དང་ལྷུན་གྲུབ་ཏུ་སྟོན་པའི་ཚིག་ཡིན་ཏེ། དེ་ཡང་ཀ་དག་ལ་སྐྱོན་ཅན་དང་སྐྱོན་མེད་གཉིས། ལྷུན་གྲུབ་ལ་སྐྱོན་ཅན་དང་སྐྱོན་མེད་གཉིས་སོ། །དེ་ལ་ཀ་དག་སྐྱོན་ཅན་ལ། དབྱིངས་ཀ་དག །ཡེ་ཤེས་ཀ་དག །དག་ཕྱོགས་གསུམ་དུ་ཕྱེ་ཡང་། དེའི་ལུགས་ཀྱི། ཆོས་ཉིད་ཀྱི་གཞི་ལ་མ་རིག་ཡོད་མ་མྱོང་སྟེ་མ་རིག་པའི་སྣང་བ་འདི་དང་ཆོས་ཉིད་ཐ་དད་དུ་འདོད་པའོ། །དེ་དང་མི་འཐད་དེ། སྐྱོན་དྲུག་གོ །ཐ་དད་ན་ཆོས་ཉིད་མཐོང་ཡང་མྱ་ངན་ལས་འདས་པ་མི་ཐོབ་པར་ཐལ། མ་རིག་པ་ལོགས་སུ་སྤང་དགོས་པའི་ཕྱིར་རོ། །ཡང་ཆོས་ཉིད་འདི་ལ་རིག་པའི་སྣང་བ་འདིའི་ཆོས་ཉིད་མ་ཡིན་པར་ཐལ། ཐ་དད་པའི་ཕྱིར་རོ། །ཡང་རྣམ་པར་བྱང་བ་འཁོར་བ་གཉིས་ཀ་གང་ཟག་གཅིག་གི་རྒྱུད་ལ་དུས་གཅིག་ཏུ་དམིགས་པར་ཐལ། འདོད་ན་འགྲོ་ལ་ཤེས་རྒྱུད་གཉིས་ལྡན་དུ་ཐལ། ཡང་མ་རིག་པ་དེ་ཆོས་ཉིད་དུ་བསྒྱུར་དུ་མི་བཏུབ་པར་ཐལ། ཐ་དད་པའི་ཕྱིར་རོ། །ཐ་དད་པ་དེ་ནི་བསྒྱུར་དུ་མི་བཏུབ་ཏེ་ནོར་བུ་འཆིང་བུར་བསྒྱུར་དུ་མི་བཏུབ་པ་བཞིན་ནོ། །མཚུངས་ལྡན་གྱི་མ་རིག་པ་མེད་པར་ཐལ། ཐ་དད་པའི་ཕྱིར་རོ། །འདོད་ན་གཟུང་དང་འགལ་ལོ། །ཡང་ཆོས་ཉིད་ཀྱི་གཞི་ལ་མ་རིག་པ་མེད་ན་འཁྲུལ་པ་གཏན་ནས་མི་འབྱུང་བར་ཐལ། གློ་བུར་དུ་བྱུང་བ་ཡིན་ཞེ་ན། གཞི་ལ་མེད་ཀྱང་འཁྲུལ་པ་གློ་བུར་དུ་འབྱུང་ན་རྒྱུད་དག་གི་སངས་རྒྱས་ལ་ཡང་འཁྲུལ་པ་འབྱུང་བར་ཐལ་ལོ། །ལྷུན་གྲུབ་སྐྱོན་ཅན་ལ། ཆོས་ཅན་ལྷུན་གྲུབ། ཆོས་ཉིད་ལྷུན་གྲུབ། ལྷུན་གྲུབ་ཁ་འབྱམས་པ་ལ་སོགས་པ་མང་ཡང་། ཆོས་ཉིད་དང་མ་རིག་པ་གཉིས། མཚོན་ཚུལ་གྱི་དབྱེ་བ་ཡང་མེད་པར་ཆུ་དང་འོ་མ་འདྲེས་པ་བཞིན་དུ་གཅིག་པར་འདོད་པའོ། །དེ་ཡང་མི་འཐད་དེ། སྐྱོན་བཞི་ལས། དང་པོ་མ་རིག་པའི་སྣང་བ་འདི་མཐོང་བས་ཆོས་ཉིད་མཐོང་བར་ཐལ། གཅིག་པའི་ཕྱིར་རོ། །འདོད་ན་འབད་མེད་དུ་གྲོལ་བར་ཐལ་ལོ། །ཡང་མ་རིག་པ་ལ་ཟག་པ་འཕེལ་བ་བཞིན་དུ། ཆོས་ཉིད་ལ་ཡང་ཟག་པ་འཕེལ་བ་བཞིན་དུ། ཆོས་ཉིད་ལ་ཡང་ཟག་པ་འཕེལ་བར་ཐལ། གཅིག་པའི་ཕྱིར་རོ། །འདོད་ན་ལམ་དོན་མེད་དུ་ཐལ་ལོ། །ཡང་ཆོས་ཉིད་ལ་དབྱེ་བ་མེད་པ་བཞིན་དུ། མ་རིག་པའི་སྣང་བ་འདི་ལ་ཡང་དབྱེ་བ་མེད་པར་ཐལ ། འདོད་ན་མངོན་སུམ་གྱིས་གསལ་ལོ། །ཡང་མ་རིག་པའི་སྣང་བ་འདི་མཐོང་ཐོས་ལས་ལོགས་སུ་གྲུབ་པ་མེད་པར་ཐལ། འདོད་ན་ཆོས་ཉིད་དབང་པོའི་མངོན་སུམ་དུ་དམིགས་པར་ཐལ་ལོ། །དེས་ན་སྐྱོན་ཆེན་གཉིས་ནི་འཕུང་འཚེངས་ཅན་གྱི་ལྟ་བ་ཡིན་པས་མི་འཐད་དོ། །སྐྱོན་མེད་གཉིས་ནི་དོན་གཅིག་ཏེ། ཆོས་ཉིད་དང་མ་རིག་པ་གཉིས་ངོ་བོ་དབྱེར་མེད། རྫས་སངས་རྒྱས་ཀྱིས་ཀྱང་མི་ཕྱེད་ལ། མཚོན་ཚུལ་ཐ་དད་དོ། །རྟོགས་པས་ཡེ་ཤེས་སུ་མཚོན། མ་རྟོགས་པས་མ་རིག་པར་མཚོན་པ་ཡིན་ནོ། །དེ་ལྟར་ན། སངས་རྒྱས་ཀྱི་ས་ན་མ་རིག་པ་ཡོད་པར་ཐལ། ངོ་བོ་གཅིག་པའི་ཕྱིར་རོ་ཞེ་ན། མ་རིག་པའི་ངོ་བོ་ཡོད་པར་ཐལ་ལམ། མཚོན་ཚུལ་ཡོད་པར་ཐལ། དང་པོ་འདོད་ཐོག །སངས་རྒྱས་མ་ཡིན་པར་ཐལ་ཞེ་ན། ངོ་བོ་ཡོད་ཀྱང་མཚོན་ཚུལ་མེད་པས་སངས་རྒྱས་མ་ཡིན་པར་མི་འགྱུར་ན་ཅི་སྟོ་སྟེ་ཁྱབ་པ་མ་གྲུབ། མཚོན་ཚུལ་ཡོད་པའི་ཕྱིར་ཞེ་ན་ཁས་ལེན་མེད་དོ། །ཡང་ཆོས་ཉིད་ཉམས་སུ་བླངས་པས་གྲོལ་བ་བཞིན་དུ་མ་རིག་པ་ཉམས་སུ་བླངས་པས་ཀྱང་གྲོལ་བར་ཐལ་ཞེ་ན། ངོ་བོ་གཅིག་པར་ཤེས་ནས་གྲོལ་བར་ཐལ་ལམ་མ་ཤེས་ཀྱང་གྲོལ་བར་ཐལ། དང་པོ་འདོད་ཐོག །གཉིས་པ་ཅིའི་ཕྱིར། གཅིག་པའི་ཕྱིར་ཞེ་ན། གཅིག་ཀྱང་གཅིག་པར་ཤེས་པས་མི་གྲོལ་ན་ཅི་སྟོ་སྟེ་ཁྱབ་པ་མེད་དོ། །ཡང་མ་རིག་པ་དང་ཡེ་ཤེས་གཉིས་བཟང་ངན་མེད་པར་ཐལ་ཞེ་ན། གཉིས་མེད་དུ་ཤེས་ནས་བཟང་ངན་མེད་པར་ཐལ་ལམ། མ་ཤེས་ཀྱང་བཟང་ངན་མེད་པར་ཐལ། དང་པོ་འདོད་ཐོག །གཉིས་པ་ཅིའི་ཕྱིར། གཅིག་ཀྱང་གཅིག་པར་མ་ཤེས་པས་བཟང་ངན་མེད་པར་མི་འགྲོ་ན་ཅི་སྟོ་སྟེ་ཁྱབ་པ་མེད་དོ། །དེ་ལས་གཞན་པའི་སྐྱོན་ཀྱང་མི་འོང་ལ། ཐ་དད་པའི་སྐྱོན་རྣམས་མི་འོང་སྟེ། འདིར་ངོ་བོ་གཅིག་ཏུ་འདོད་པས་སོ། །མདོར་ན་ཆོས་ཉིད་ཀྱི་གཞི་ལ་མ་རིག་པ་གཉིས་མེད་རིས་མེད་དུ་ཀར་དག་པས་ཀ་དག་ཅེས་བྱ་སྟེ། ཐམས་ཅད་དག་ཅེས་བྱ་བ་ཡང་། ཞེས་སོ། །ཆོས་ཉིད་ཀྱི་གཞི་ལ་རིག་པ་དང་མ་རིག་པ་གཉིས་མེད་རིས་མེད་དུ་ལྷུན་གྱིས་གྲུབ་པས་ལྷུན་གྲུབ་ཅེས་བྱ་སྟེ། ཡེ་ནས་ལྷུན་གྲུབ་སངས་རྒྱས་ཆོས། །ཞེས་སོ། །དེས་ན་སྐྱོན་མཐའ་དག་ལས་གྲོལ་བ་ཡིན་ནོ། །དྲུག་གམ་བརྒྱད་ཉིད་གནས་འགྱུར་ཕྱིར། །ཞེས་པ་ནི། ཐེག་པ་ཆུང་ངུ་ཅན་གྱི་འདུག་པ་ལྟར་ན། ཀུན་གཞི་དང་ཉོན་མོངས་པ་ཅན་གྱི་ཡིད་མ་རྟོགས་པའི་རྣམ་ཤེས་ཚོགས་དྲུག་གམ། ཡང་ན་ཐེག་པ་ཆེན་པོ་ལྟར་དུ་ཚོགས་བརྒྱད་ཡེ་ཤེས་ལྔར་གནས་འགྱུར་བའི་ཕྱིར། ཤེས་རབ་དབང་དྲུག་ཚུལ་ནས་བརྗོད། ཅེས་པ། ཤེས་རབ་ཀྱི་དབང་པོ་དང་། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། ཏིང་ངེ་འཛིན་གྱི་དབང་པོ་དང་། དྲན་པའི་དབང་པོ་དང་། མོས་པའི་དབང་པོ་དང་དྲུག་གི་ཚུལ་ནས་ལྟ་བའི་མིང་གི་རྣམ་གྲངས་བརྗོད་དོ་ཞེས་པའམ། ཡང་ན། ཤེས་རབ་ཀྱི་མིག་གི་དབང་པོ་དང་། རྣ་བ་སྣ་ལྕེ་ལུས་ཤེས་རབ་ཀྱི་ཡིད་ཀྱི་དབང་པོ་དང་དྲུག་གི་ཚུལ་ནས་བརྗོད་པའོ། །མངོན་བྱས་རིམ་པ་རྟོགས་གོ་རིམ། ཞེས་པ་རྟོགས་པ་བཞི་དང་ཏིང་ངེ་འཛིན་བཞི་སྦྱར་ཏེ། རྒྱུ་གཅིག་པར་རྟོགས་པ་དེ་བཞིན་ཉིད་ཀྱི་ཏིང་ངེ་འཛིན་དང་། ཡིག་འབྲུའི་ཚུལ་ཀུན་ཏུ་སྣང་། བྱིན་གྱིས་བརླབས་ཕྱག་རྒྱ་གཅིག་པ། མངོན་སུམ་པར་རྟོགས་པ་སྤྲོས་པའོ། །རྣམ་བཞིའི་ལམ་དང་སྒོ་བཞི་དང་། །ཞེས་པ། ལམ་བཞི་དང་རྣམ་ཐར་གྱི་སྒོ་བཞི་བསྟུན་པ་སྟེ། དེ་བཞིན་ཉིད་ཀྱི་ཏིང་ངེ་འཛིན་རྣམ་པར་ཐར་པའི་སྒོ་དང་། ཀུན་ཏུ་སྣང་བ་མཚན་མ་མེད་པའི་སྒོ་དང་། ཕྱག་རྒྱ་གཅིག་པ་སྨོན་པ་མེད་པའི་སྒོ་དང་། ཕྱག་རྒྱ་སྤྲོས་པ་རང་བཞིན་གྱིས་འོད་གསལ་བའི་སྒོའོ། །བསྙེན་སྒྲུབ་ལམ་གྲངས་ཉམས་གཡོ་ཐོབ། ཅེས་པ་ནི་ལྟ་བའི་ཉམས་ལྔ་སྟེ། བདག་པོའི་རྐྱེན་དང་། དམིིགས་པའི་རྐྱེན་གྱིས་བྱིན་གྱིས་རློབས་ཙམ་ན་ཉམས་གཡོ་བའོ། །ལྷན་ཅིག་བྱེད་པའི་རྐྱེན་གྱིས་ལྟ་བ་ལ་འཇུག་པ་ཙམ་ན་ཐོབ་སྙམས། དེ་ལྟར་ལྟ་བ་རྟོགས་པའི་ངང་ལ་གནས་ཙམ་ན་གོམས་པ་ལ་རྟོགས་པ་ལ་རྐྱེན་གྱིས་མི་གནོད་པ་ནི་བརྟན་པ། རྟོགས་པ་བསྐྱེད་དུ་བྱར་མེད་པ་ནི་མཐར་ཕྱིན་པའི་ཉམས་སོ། །དེ་བས་རྣམ་བདུན་རིག་པའི་ངང་། ཞེས་པ། རྒྱལ་པ་ལས། འདིར་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་དང་། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་གསུངས་པས། རང་བཞིན་གྱིས་དལ་དང་གཟུགས་བརྙན་གྱི་དང་། ལྷག་པ་གཟུགས་བརྙན་དང་། བྱང་ཆུབ་སེམས་དང་། ཏིང་ངེ་འཛིན་དང་། ལྷག་པའི་ཏིང་ངེ་འཛིན་དང་ཚོགས་ཀྱི་དལ་ཀུན་ཀྱང་སེམས་ཀྱི་རྩལ་ཡིན་ནོ། །ཞེས་པའོ། །ཐོས་བསམ་བཅུ་སྤྱོད་ཆེད་དུ་གཉེར། །ཞེས་པ་ནི། བསླབ་པའི་མཐའ་བཅུ་སྟེ། གཞི་དམ་ཚིག་གིས་བཟུང་བ་ཞིང་ས་གཤིན་པོ་ལ་སོ་ནམ་བྱེད་པ་ལྟར་བསླབ་པ་དང་། རྒྱུད་ཐོས་པས་གྲོལ་བ་གྱི་ལིང་སྒྲོག་གྲོལ་བ་ལྟ་བུ་དང་། སྒོ་ཀུན་ནས་བསྡུར་བ་བུང་བ་ཚོང་ཚོལ་བ་ལྟ་བུ་དང་། ཕུལ་དུ་མཁས་པས་དབྱུང་བ་རི་རྒྱལ་གྱི་རྩེར་ཕྱིན་པ་ལྟ་བུ་དང་། ཐག་ལྟ་བས་བཅད་པ་ཁྱུང་ཆེན་པོ་ནམ་མཁའ་ལ་ལྡིང་བ་ལྟ་བུ་དང་། ཉམས་སུ་ཏིང་ངེ་འཛིན་གྱིས་བླངས་པ་རྒྱ་མཚོ་ལས་ནོར་བུ་ལོན་པ་ལྟ་བུ་དང་། ལ་སྤྱོད་པས་དོར་བ་གླང་པོ་ཆེ་ཆུར་ཞུགས་པ་ལྟ་བུ་དང་། རིམ་པ་དབང་གིས་བགྲོད་པ་རྒྱལ་བུ་རྒྱལ་སར་བཏོན་པ་ལྟ་བུ་དང་། དོན་མན་ངག་གིས་སྒྲུབ་པ་གསེར་འགྱུར་གྱི་རྩི་ལྟ་བུ་དང་། མདོ་དོན་གཅིག་ཏུ་བསྡུ་བ་སོ་ནམས་ཀྱིས་ཁེ་བསྒྲུབ་པ་ལྟ་བུ་དང་བཅུ་ཆེད་དུ་གཉེར་བའོ། །ཤེས་རབ་ཆེན་པོའི་སྦྱིན་སྲེག་གིས། ཞེས་པ་ནི། ལྟ་བ་དབྱེར་མེད་དུ་རྟོགས་པའི་ཤེས་རབ་ཆེན་པོའི་སྦྱིན་སྲེག་གིས་སྲིད་གསུམ་ཐམས་ཅད་སྲེག་སྟེ། སེམས་ཅན་ཀུན་གཉིས་མེད་ཀྱི་ངང་དུ་བསྒྲལ་བས་གཞན་དོན་རྫོགས་སོ། །འོ་ན་རྣལ་འབྱོར་གཅིག་གིས་ལྟ་བ་རྟོགས་པས་སེམས་ཅན་ཐམས་ཅད་གྲོལ་བར་བྱེད་པ་དེ་མི་འཐད་དེ། དེ་འཐད་ན། སེམས་ཅན་ཐམས་ཅད་སྔོན་བྱུང་གི་དུས་སུ་གྲོལ་བར་རིགས། སྔོན་སངས་རྒྱས་བཅོམ་ལྡན་འདས་ཀྱིས་ཆོས་ཉིད་རྟོགས་པའི་ཕྱིར་རོ་ཞེ་ན། དེའི་ལན་ནི། རྣལ་འབྱོར་པ་རྟོགས་པ་ཅན་གྱི་འཁོར་ན། སློབ་བུ་ལས་ཅན་གཅིག་ལ་རྟོགས་པའི་བྱིན་རླབས་ཤར་ནས་གྲོལ་བ་ཡང་སྲིད་ལ། སྐལ་མེད་ལ་ཕན་མི་ཐོགས་པས་ཉེས་པ་མེད་དོ་ཞེས་པའམ། ཡང་ན་རིགས་བརྒྱུད་ལ་སྲིད་པ་གསུམ་དུ་འཛིན་པའི་རྟོག་པ་ཡོད་པས། དེ་ཡིས་ཡེ་ཤེས་མེ་ལྟར་འབར་ནས་འཛིན་རྟོག་དེ་བསྲེག་པ་ཡིན་ཏེ། གཞན་མི་གྲོལ་བ་མི་སྟོ་གསུང་ངོ་། །ཡང་ལྟ་བ་ལ་དམིགས་བཟུང་བ་ལན་གསུམ་བྱུང་བས་འདི་མ་བལྡབས་སམ་ཞེ་ན། མ་བལྡབས་ཏེ། དང་པོ་ནི་གཏན་ཚིགས་ཀྱིས་ལྟ་བ་གཏན་ལ་འབེབས་པའི་ལྟ་བའི་དམིགས་བཟུང་བ་ཡིན་ལ། གཉིས་པ་ནི་གོལ་སྒྲིབ་བརྡར་ཤ་བཅད་དེ་མ་ནོར་བའི་དམིགས་བཟུང་བ་ཡིན། གསུམ་པ་ནི་རྣམ་གྲངས་རྣམ་པར་ཕྱེ་སྟེ་དོན་གྱི་དམིགས་བཟུང་བ་ཡིན་ནོ། །ལམ་མཆོག་གསལ་བའི་སྒྲོན་མེ་ལས། ལེའུ་གཉིས་པའི་འགྲེལ་པའོ།། །།ལེའུ་གསུམ་པའི་རྩོམ་པ་ལ་འཇུག་པའི་ཡན་ལག་ནི། བདག་ཉིད་ངང་ཆེན་རྟོགས་པས་མོས། ཞེས་གསུངས་ཏེ། དེ་ལ་བདག་ཉིད་ནི་འཁོར་འདས་ཀྱི་ཆོས་ཐམས་ཅད་ཀྱི་བདག་པོ་རང་གི་སེམས་ཡིན་ལ། སེམས་ཉིད་དེ་ཤེས་བྱ་བདེན་པ་དབྱེར་མེད་ཆོས་ཀྱི་སྐུའི་ངང་ཡིན་ཏེ། དེ་ལྟར་མོས་ཤིང་རྟོགས་པའི་སྒོ་ནས་ཕྱག་འཚལ་ལོ། །དེ་རྗེས་གོམས་བྱེད་བཤད་པར་བྱ། ཞེས་པ། ལྟ་བ་རྟོགས་པའི་རྗེས་ལ་རྟོགས་པ་རྒྱུན་བསྲིང་བའི་ཕྱིར། ཏིང་ངེ་འཛིན་གྱིས་གོམས་པར་བྱེད་པའི་ཐབས་བཤད་པར་བྱའོ། །ཞེས་པའོ། །འོ་ན་ལྟ་བ་རང་གི་མཚན་ཉིད་མངོན་སུམ་དུ་རྟོགས་ནས། ཏིང་ངེ་འཛིན་བསྒོམ་ཅི་དགོས་ཤེ་ན། སེམས་ཅན་རྣམས་ཀྱི་ཕྱིན་ཅི་ལོག་ལས་སྤྱད་པ་ཡུན་རིང་བས། རྟོགས་པའི་དོན་ལ་གནས་སུ་མི་བཏུབ་པའི་ཕྱིར། བསྒོམ་ཞིང་རྒྱུན་བསྲིང་བའོ། །འོ་ན་ལྟ་བའི་སྐབས་སུ་བདེན་པ་དབྱེར་མེད་དུ་རྟོགས་ནས། ཏིང་ངེ་འཛིན་ཁ་ཕྲལ་ནས་བསྒོམ་ཅི་དགོས་ཤེ་ན། དེ་ལ་གཉིས་ཏེ། བློ་ཆེ་བ་རྣམས་ནི་དབྱེར་མེད་དུ་རྟོགས་ཤིང་དབྱེར་མེད་དུ་གོམ་པར་བྱེད་དེ་ལམ་ཅིག་ཆར་བ་ཡིན་ལ། །བློ་ཆུང་བས་དབྱེར་མེད་དུ་རྟོགས་པར་ནུས་ཀྱང་། གོམས་པར་མ་ནུས་པས། ཐོག་མར་བདེན་པ་ཁ་ཕྲལ་ནས་གོམས་པར་བྱེད། འཇུག་ཏུ་དབྱེར་མེད་བསྒོམས་པ་ཡིན་ནོ། །སྔ་མ་སྔ་མ་གང་དང་གང་། ཞེས་པ་ལམ་མམ་སེམས་སྔ་མ་གང་ཡིན་པ་ཐམས་ཅད་དོ། །ཕྱི་མ་ཕྱི་མ་ཐབས་དང་རྒྱུ། ཞེས་པ། ལམ་སྔ་མ་དེ་ཕྱི་མ་རྒྱུད་ལ་སྐྱེད་པར་བྱེད་པའི་ཐབས་སམ་རྒྱུ་ཡིན་ནོ། །དེ་བཞིན་ཕྱི་མ་ཕྱི་མ་གང་། ཞེས་པ། ལམ་ཕྱི་མ་གང་ཡིན་པ་ཐམས་ཅད་དོ། །སྔ་མ་སྔ་མ་ལས་བྱུང་འབྲས། ཞེས་པ་ལམ་ཕྱི་མ་དེ་སྔ་མ་ལས་བྱུང་བའི་ཕྱིར་གནས་སྐབས་ཀྱི་འབྲས་བུ་ཡིན་ནོ། །དེ་ལྟར་རྒྱུ་འབྲས་ཐབས་འབྲེལ་བས། ཞེས་པ། ལམ་གོང་མ་གང་ཡིན་པ་ཐམས་ཅད་རྒྱུ་ཡིན་ལ། གྲངས་གང་ཡིན་པ་ཐམས་ཅད་ནི་ཐབས་ཡིན་ཞིང་། ཕྱི་མ་གང་ཡིན་པ་ནི་འབྲས་བུ་ཡིན་ནོ། །དེ་ལྟར་རྒྱུ་དང་འབྲས་བུའི་འབྲེལ་པའམ། ཐབས་དང་ཐབས་བྱུང་དུ་འབྲེལ་ལོ། །སྲིད་པ་འཁོར་ལོ་ཚུལ་བཞིན་དུ། ཞེས་པ། སྲིད་པའི་འཁོར་ལོ་ནི་སྐྱེ་གནས་ལ་བྱ་སྟེ། དེ་ཡང་རྫུས་ཏེ་སྐྱེ་བའི་ཚུལ་དང་འདྲ་བ་གཅིག་ཅར་བ་ཡིན་ལ། མངལ་ནས་སྐྱེ་བའི་ཚུལ་དང་འདྲ་བ་རིམ་གྱིས་པའོ། །དེ་ལྟར་གཉིས་སུ་འབྱུང་བ་གང་གི་ཕྱིར་ཞེ་ན། །དབང་པོ་བརྩོན་འགྲུས་བཟང་ངན་གྱིས། ཞེས་པ། དབང་པོ་ནི། ཤེས་རབ་ཀྱི་དབང་པོ་སྟེ། རྣོ་རྟུལ་གཉིས་དང་། བརྩོན་འགྲུས་དང་། བློ་བཟང་ངན་དང་། དེ་རྣམས་ཀྱིས་རྣམ་པར་ཕྱེ་བའི་ལུས་གཉིས་བསྟན། ཞེས་པ་སྟེ། དབང་པོ་རྣོ་ཞིང་བརྩོན་འགྲུས་ཆེ་བ་ཅིག་ཆར་བ། དབང་པོ་རྟུལ་ཞིང་བརྩོན་འགྲུས་ཆུང་ན་རིམ་གྱིས་པར་བསྟན་ནོ། །འོ་ན་ཅིག་ཆར་བ་དང་རིམ་གྱིས་པ་གཉིས་ལ་ཁྱད་པར་ཅི་ཡོད་ཅེ་ན། འདི་ལ་འདོད་པ་མི་མཐུན་ཏེ། རྗེ་མེ་ཀག་ན་རེ། སྔོན་དུ་ལྟ་བ་རྟོགས་ནས་ཏིང་ངེ་འཛིན། ཁ་སྤོས་ནས་ཉམས་སུ་ལེན་པ་ནི་རིམ་གྱིས་པ། སྔོན་དུ་ལྟ་བ་རྟོགས་ནས་ཏིང་ངེ་འཛིན་ཁ་མ་སྤོས་པར་ཉམས་སུ་ལེན་པ་ཅིག་ཆར་བ་ཡིན་གསུངས་སོ། །དེ་ཡང་མི་འཐད་དེ། ཕྱག་རྒྱ་ལམ་དུ་ཁྱེར་བའི་ཅིག་ཆར་བ་ནི་ཅིག་ཅར་བ་མ་ཡིན་པར་ཐལ། ལྟ་བའི་སྐབས་སུ་ལྷ་སྐུ་མི་བསྒོམ་ལ། ཏིང་ངེ་འཛིན་དུ་ལྷ་སྐུ་བསྒོམས་པས་སྤོས་གདུག་པའི་ཕྱིར་རོ། །ཡང་སློབ་དཔོན་ཡམ་ཤུད་ནི། སངས་རྒྱས་ཀྱི་ས་ལ་དུས་མྱུར་བར་སྦྱོར་ན་ལམ་ཅིག་ཆར་བ། བུལ་བར་སྦྱོར་ན་རིམ་གྱིས་པའོ། །གསུངས་པ་ཡང་མི་འཐད་དེ། ཐོད་རྒལ་བ་ཡང་གཅིར་ཅར་བར་ཐལ། རིམ་གྱིས་པ་ལ་ལྟོས་ན་མྱུར་བའི་ཕྱིར་རོ། །ཁ་རོག་པའི་ཞལ་ནས། སེམས་ལྔ་དུས་མྱུར་བར་སྐྱེ་བ་ལམ་ཅིག་ཆར་བ་ལ། དུས་བུལ་བ་ལས་མི་སྐྱེ་ན་རིམ་གྱིས་པའོ་གསུངས་ཏེ། སྐྱོན་གོང་དུ་མཚུངས་སོ། །འོ་ན་ཇི་ལྟར་ཞེ་ན། དབྱེར་མེད་ཆིག་ཆོད་དུ་རྟོགས། ཆིག་ཆོད་དུ་གོམས། ཆིག་ཆོད་དུ་མཐར་ཕྱིན་ན་ཅིག་ཆར་བ། དབྱེར་མེད་རིམ་གྱིས་རྟོགས། རིམ་གྱིས་གོམས། རིམ་གྱིས་མཐར་ཕྱིན་ན་ལམ་རིམ་གྱིས་པའོ། །ཞེས་ལྷ་རྗེ་ཧོར་པོ་གསུངས་ཏེ་ལེགས་སོ། །འོ་ན་ཅིག་ཆར་བ་ལ་སེམས་ལྔ་སྐྱེ་འམ་མི་སྐྱེ། མི་སྐྱེ་ན་སེམས་ལྔ་ལམ་གྱི་ངོ་བོ་མ་ཡིན་པར་ཐལ། འདོད་ན་མི་རུང་སྟེ། ངོ་བོ་སེམས་ལྔ་སྐྱེས་པའོ་ཞེས་བཤད་དོ། །སྐྱེ་ན་རིམ་གྱིས་སྐྱེ་འམ་ཅིག་ཆར་དུ་སྐྱེ། རིམ་གྱིས་སྐྱེ་ན་གཅིག་ཅར་བ་མ་ཡིན་པར་ཐལ། རིམ་པར་སྐྱེ་བའི་ཕྱིར་རོ། །ཅིག་ཆར་དུ་སྐྱེ་ན་འགྲོ་བ་སེམས་རྒྱུད་ལྔ་ལྡན་དུ་ཐལ། འདོད་དུ་མི་རུང་སྟེ། འགྲོ་ལ་སེམས་རྒྱུད་གཉིས་མི་འཆང་ཞེས་གསུངས་པ་ཡིན་ནོ། །ཞེ་ན། ལན་ལ་གཉིས་ཏེ། དངོས་ལན་དང་། མགོ་བསྒྲེ་བའོ། །དངོས་པོའི་སྐྱེ་སྐྱེ་སྟེ་སྐྱེ་ལུགས་ཡོད། ཇི་ལྟར་ཡོད་ན་རིམ་གྱིས་པ་ལ་ལྟོས་ན་དུས་ཤིན་ཏུ་མྱུར་བར་སྐྱེའོ། །མགོ་བསྒྲེ་བའི་ལན་ནི། སེམས་རིམ་གྱིས་སྐྱེས་སམ་ཅིག་ཅར་དུ་སྐྱེ་ཞེ་ན། ཨུཏྤལ་ལྔ་མདའ་གཅིག་གིས་དུས་གཅིག་ལ་ཕུག་པའི་ཚེ། རིམ་གྱིས་ཕུག་གམ་ཅིག་ཅར་དུ་ཕུག །ཅིག་ཆར་དུ་ཕུག་ཅེ་ན། འདིར་ཡང་སེམས་ལྔ་ཅིག་ཅར་དུ་སྐྱེ། འགྲོ་ལ་སེམས་རྒྱུད་ལྔ་ལྡན་དུ་ཐལ་ཞེ་ན། ཨུཏྤལ་ལྔ་གོ་ས་གཅིག་ན་གནས་པར་ཐལ་ལོ། །རིམ་གྱིས་ཕུག་གོ་ཞེ་ན། འདིར་ཡང་སེམས་རིམ་གྱིས་སྐྱེའོ། །ཅིག ཆར་བ་མ་ཡིན་པར་ཐལ་ཞེ་ན་ཁྱོད་ཀྱིས་དུས་གཅིག་ཏུ་ཕུག་པ་མ་ཡིན་པར་ཐལ་ལོ། །བྱམས་པའི་བསྟན་པའོ། །ཅིག་ཆར་བ་ནི་དོན་གོ་བར་ཟད་དོ། །ཤི་བ་དོན་དམ་བདེན་པ་སྟེ། ཞེས་པ་སྟེ། དོན་ཏིང་ངེ་འཛིན་གྱི་དཔེ་དང་བསླབ་བྱ་གཉིས་ཀ་ཡིན་ཏེ། ཤི་བའི་དུས་ཀྱི་ཚེ་ཕྱི་ནང་གི་རྟོགས་པ་འགགས་ནས་སྤྲོས་བྲལ་གྱི་ངང་ལ་གནས་པ་དང་གཅིག་ཡོང་སྟེ། དེ་ཏིང་སྤྲོས་པ་དང་བྲལ་བར་སྒོམ་པའི་དཔེ་ཡང་ཡིན་ལ། དེ་ངོ་ཤེས་ན་བསླབ་བྱ་གཞི་ཡང་ཡིན་ནོ། །སྐྱེ་བ་བར་མ་ཀུན་རྫོབ་ཡིན། ཞེས་པ་ནི། སྲིད་པ་བར་མ་དོ་དེ་ནི་ཀུན་ཏུ་སྣང་གི་དཔེ་དང་བསླབ་བྱ་ཐུན་མོང་པ་ཡིན་ཏེ། བར་དོའི་ཚེ་སྤྱོད་ཡུལ་ཐམས་ཅད་སྒྱུ་མར་མཐོང་བས་སྙིང་རྗེ་སྒྱུ་མ་སྒོམ་པའི་དཔེ་ཡང་ཡིན་ལ། དེ་ནི་སྒྱུ་མར་ཤར་བས་བསླབ་བྱ་ཡང་ཡིན་ནོ། །སྐྱེས་པའི་རིམ་གསུམ་གཉིས་མེད་དོན། ཞེས་པ་ནི། བར་དོའི་སེམས་དེ་མའི་མངལ་དུ་ཞུགས་ནས་སྐྱེས་པའི་རིམ་པ་ནི། ཕྱག་རྒྱ་གཅིག་པ་དང་། སྤྲོས་པ་དང་། ཚོགས་སྒྲུབ་དང་གསུམ་གྱི་དཔེ་དང་བསླབ་བྱ་ཡིན་ཏེ། དེ་ཡང་རྒྱས་པར་སྦྱར་ན་རིམ་དྲུག་ལས། རྣམ་ཤེས་ལྷུམས་སུ་ཞུགས་དང་སྦྱར། ཟེར་བས། མིའི་ས་བོན་ཡི་གེ་ནྲིའི་གཟུགས་ཅན་དུ་ཡུམ་གྱི་ལྷུམས་སུ་ཞུགས་པ་ནི་གསུང་ཡིག་འབྲུ་དང་མཐུན་ལ། འཆི་བུ་རྡོ་རྗེ་ལྟ་བུའི་གཟུགས་ཟེར་བས། ས་བོན་དེ་རླུང་གིས་བསྐྱོད་ནས་སྐེད་པ་ཉག་གིས་སོང་བའི་སྣ་ཕྱག་མཚན་རྡོ་རྗེ་དང་འདྲའོ། །སྐྱེས་ལ་མ་རག་པ་ནི་སྐུ་ཡོངས་སུ་རྫོགས་པ་སྟེ་ཕྱག་རྒྱ་གཅིག་པའི་དཔེ་ཡིན་ལ། བསླབ་བྱ་ཡང་དེ་ཉིད་དོ། །དེ་ནས་ལུས་རྫོགས་བུ་ཚ་འདབ་རྒྱས་པ་ནི་སྤྲོས་པ་དང་མཐུན་ཏེ། རིམ་དྲུག་པས། སྐྱེན་ལྡན་བུ་སོགས་རྒྱས་པ་སྟེ། །རིགས་ལ་སོགས་པ་རྒྱས་པར་བྱེད། །ཅེས་གསུངས་ཏེ་སྤྲོས་པའི་དཔེ་དང་བསླབ་བྱའོ། །དེ་ནས་བུ་ཚ་འདབ་རྒྱས་པ་དེ་ཡུལ་ནོར་གྱི་སྐྱེ་རིས་དང་། ཁེ་དྲག་ལ་སོགས་པ་བྱེད་པ་ནི་ཚོགས་སྒྲུབས་ཀྱི་དཔེ་དང་བསླབ་བྱ་ཡིན་ཏེ། ཡུལ་ལྷ་ཟས་ནོར་བྱེད་པ། ཆང་གཉིས་ལ་སོགས་པ་ལ་འཇུག་པ་བྱེད་ཅེས་པའོ། །ལོངས་སྤྱོད་རིག་མ་ལྡན་པར་བྱ། །ཞེས་པ། གོང་དུ་སྐྱེས་བུ་སེང་གེ་བཞིན་རྒྱུ་བས། ཟེར་ནས་གཅིག་པར་གནས་པར་བཤད་པ་དང་། འདིར་ཡུམ་དགོས་པར་མཐའ་དག་བཤད་པ་དང་མི་འགལ་ལམ་ཞེ་ན་མི་འགལ་ཏེ། སྐྱེས་བུ་སེང་གེ་བཞིན་རྒྱུ་བས་ཟེར་བ་ནི། སེང་གེ་ནི་སྟོབས་ཆེ་ཞིང་གྲོགས་ངན་སྤོང་བ་ཡིན་ལ། འདིར་ལམ་གྱི་གྲོགས་སུ་མི་འགྱུར་བའི་གྲོགས་ངན་སྤོང་བ་ལ་དགོངས་པ་ཡིན །རིག་མ་མཚན་ལྡན་གྱི་གྲོགས་ངན་མ་ཡིན་ཏེ། ལམ་གྱི་གྲོགས་ཡིན་པས་མི་འགལ་ལོ། །ཐུན་མོང་སྤྱི་ཡི་མངོན་རྫོགས་ནས། ཞེས་པ། ཐུན་མོང་གི་ལམ་རྟགས་སྔོན་དུ་རྫོགས་པའམ། ཡང་ན་སྐྱབས་འགྲོ་དང་སེམས་བསྐྱེད། ཚད་མེད་པ་བསྒོམ་པ་ལ་སོགས་པ་རྫོགས་པར་བྱེད་པ་ཡིན་ནོ། །མཆོད་དོན་ཉེ་བའི་གཟུགས་བརྙན་ནི། ཞི་ཁྲོའི་ལུགས་སྐུའམ་བྲིས་སྐུ་ལ་སོགས་པ་བཞུགས་ཏེ། དངོས་གྲུབ་ཀྱི་རྟེན་ཡིན་ནོ། །ཡན་ལག་བརྒྱད་པའི་ཚུལ་བཟུང་ལ། ཞེས་པ་ནི། བདག་ཉིད་སྟན་བདེ་བ་ལ་འདུག་སྟེ། བཛྲ་ས་མ་ཡ་ཛཿལན་གསུམ་གྱིས་བླ་མ་དང་ཡི་དམ་དང་ཆོས་སྐྱོང་རྣམས་སྤྱན་དྲངས་ལ་ཕྱག་འཚལ། མཆོད་པ་འབུལ། བཤགས་པ་བྱ། རྗེས་སུ་ཡི་རང་། སེམས་བསྐྱེད། ཆོས་ཀྱི་འཁོར་ལོ་བསྐོར་བར་བསྐུལ། མྱ་ངན་ལས་མི་འདའ་བར་གསོལ་བ་གདབ་སྐྱབས་སུ་གསོལ། དགེ་བའི་རྩ་བ་བསྔོ་བ་དང་བརྒྱད་བྱ། དེ་ནས་ལྷ་ཚོགས་རྣམས་ཡོངས་སུ་འོད་དུ་ཞུ་ནས་བདག་ལ་ཐིམ་པར་བསྒོམ། དེ་ཡང་གདམས་ངག་ཤེས་རབ་ཀྱིས། ཞེས་པ་ནི། བློན་ནི་བཞག་ཐབས་ཡིན་ཏེ། དེ་ཡང་གདམས་ངག་གི་སྟོབས་ཀྱིས་འཇོག་པ་ནི་བློ་ཆུང་བ་ཡིན་ལ། ཤེས་རབ་ཀྱི་སྟོབས་ཀྱིས་འཇོག་པ་ནི་བློ་ཆེ་བ་ཡིན་ཏེ། གདམས་ངག་གི་སྟོབས་ཀྱིས་འཇོག་པ་ནི་ལྟ་བ་རྟོགས་པའི་ངང་ལས། ཏིང་ངེ་འཛིན་ལ་བློ་བཞག་པས་གནས་སུ་མ་འདོད་ལྟ་བ་དྲན་པར་བྱས་ནས་བཞག་པས་ཀྱང་གནས་སུ་མ་འདོད་དོ། །བླ་མ་ལ་གདམས་ངག་ཞུས་ནས། གདོད་ཏིང་ངེ་འཛིན་ལ་འཇོག་པའོ། །ཤེས་རབ་ཀྱི་སྟོབས་ཀྱིས་འཇོག་པ་ལ་གཉིས་ཏེ། རིག་པ་སྤྱི་ལུགས་སུ་བཞག་པ་དང་། མཐོང་བའི་རྗེས་ལ་བཞག་པའོ། །ཕྱི་མ་སྤྱི་ལུགས་མཐོང་རྗེས་བཞག །ཅེས་པ་སྟེ། རིག་པ་སྤྱི་ལུགས་སུ་བཞག་པ་ནི། ཆོས་ཉིད་སྤྲོས་བྲལ་དུ་སྒོམ་རྣོ་བ་དྲན་པ་ཙམ་གྱིས། ཏིང་ངེ་འཛིན་ཆོས་ཉིད་ཀྱི་ངང་དུ་རིག་པ་ཡུལ་མེད་དུ་གསལ་བའོ། །མཐོང་བའི་རྗེས་ལ་བཞག་པ་ནི། སྔར་བཞིན་དུ་སྒོ་རྣོ་བ་ཙམ་གྱིས་སེམས་གནས་སུ་མ་འདོད་དེ། སྔར་རྟོགས་པའི་ལྟ་བ་དྲན་པར་བྱས་ནས། དེའི་ངང་ལ་འཇོག་པ་ཡིན་ནོ། །བླ་མ་སྐབས་མིང་མཉམ་ཉིད་དང་། །ཞེས་པ་ནི། དེ་བཞིན་ཉིད་ཀྱི་རྣམ་གྲངས་བདུན་ཡིན་ཏེ། དེ་རེ་རེ་ལ་ཡང་ངོ་བོ་དང་། ངེས་ཚིག་དང་། གཏན་ཚིགས་གསུམ་མོ། །ངོ་བོ་ནི་མིང་གི་རྣམ་གྲངས་ཀྱི་རྗེས་སུ་འཇུག་པ་སྟེ། མཉམ་པ་ཉིད་དང་ལྷུན་གྱིས་གྲུབ་པ་དང་། མཐའ་བྲལ་དང་། ཐ་དད་མེད་པ་དང་། སྟོང་པ་ཆེན་པོ་དང་། མ་སྐྱེས་པ་དང་། ཆོས་ཀྱི་དབྱིངས་རྣམས་སོ། །ངེས་ཚིག་ནི། བཟང་ངན་མེད་པའི་ཕྱིར་ན་མཉམ་པ་ཉིད་ཅེས་བྱ། ཆོས་ཐམས་ཅད་སེམས་སུ་འདུས་པས་ལྷུན་གྲུབ་དང་། མཐའི་ཞེན་པ་མེད་པས་མཐའ་བྲལ་དང་། ཆོས་ཉིད་ལ་ཚིག་གིས་མཚོན་དུ་མེད་པས་ཐ་སྙད་མེད་པ། རང་གི་ངོ་བོ་མ་གྲུབ་པས་སྟོང་པ་ཆེན་པོ། རྒྱུ་རྐྱེན་མེད་པས་མ་སྐྱེས་པ། །མཐའ་དང་མུ་མེད་པས་ཆོས་ཀྱི་དབྱིངས་སོ། །གཏན་ཚིགས་ནི་རེ་རེ་ལ་ལུང་། །མན་ངག་རིགས་པ་གསུམ་མོ། །དེ་ཡང་མཉམ་པ་ཉིད་ཀྱི་ལུང་ནི། རྒྱས་པ་ལས། མཉམ་གཉིས་ལྷག་པའི་མཉམ་ཉིད་ཀྱིས། །ཞེས་སོ། །མན་ངག་ནི། རྣམ་བཀོད་ལས། ཐམས་ཅད་མཉམ་པའི་དཀྱིལ་འཁོར་ལ། །རང་བྱུང་ཡེ་ཤེས་འཕྲོ་བ་ཡིས། །ཞེས་སོ། །རིགས་པ་ནི། བཟང་ངན་མེད་ཆེ་ཆུང་མེད་པའི་ཕྱིར་ན་མཉམ་པའི་མཉམ་པ་ཉིད་དོ། །ལྷུན་གྱིས་གྲུབ་པའི་ལུང་ནི། རྩ་རྒྱུད་ལས། ཡེ་ནས་ལྷུན་རྫོགས་སངས་རྒྱས་ཆོས། །ཞེས་སོ། །མན་ངག་ནི། འདི་ཉིད་ལས། གཉིས་མེད་ལྷུན་མཉམ་དེ་བཞིན་ཉིད། །ཅེས་སོ། །རིགས་པ་ནི། ཡེ་ནས་གཉིས་མེད་དུ་གནས་པའི་ཕྱིར་ལྷུན་གྲུབ་བོ། །མཐའ་དང་བྲལ་བའི་ལུང་ནི། རྒྱས་པ་ལས། ནམ་མཁའ་བཟུང་དུ་མེད་པ་ལྟར། །སྣང་སྲིད་ཐམས་ཅད་དེ་དང་འདྲ། །ཞེས་སོ། །མན་ངག་ནི། འདི་ཉིད་ལས། མཐའ་ཀུན་ཕྱོགས་སུ་མ་ཆད་ཕྱིར། །མཐའ་དང་བྲལ་ཕྱིར་མ་བྲལ་ལོ། །ཞེས་སོ། །རིགས་པ་ནི། འདི་འོ་ཞེས་དམིགས་སུ་མེད་པས་མཐའ་བྲལ་བའོ། །ཐ་དད་མེད་པ་ནི། རྩ་རྒྱུད་ལས། གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །ཞེས་སོ། །མན་ངག་ནི་རྣམ་བཀོད་ལས། འཇིག་རྟེན་འདི་ན་ཅི་ཡོད་པ། །མིང་དང་ཐ་སྙད་འཛིན་པ་དག །སོ་སོའི་རང་བཞིན་བཤིག་བྱས་ན། །རང་བཞིན་མེད་དེ་ཡང་དག་ཉིད། །ཅེས་སོ། །རིགས་པ་ནི་ཚིག་གིས་མཚོན་དུ་མེད་པས་ཐ་སྙད་མེད་པའོ། །སྟོང་ཆེན་ནི། རྒྱས་པ་ལས། ཡན་ལག་རྟོགས་པས་རབ་བརྟགས་ན། དང་པོ་ཐམས་ཅད་སྟོང་པ་ཡིན། ཅེས་སོ། །མན་ངག་ནི་འདི་ཉིད་ལས། རྣམ་པ་ཀུན་ལྡན་སྟོང་ཆེན་མཐོང་། །ཞེས་སོ། རིགས་པ་ནི་གང་དུའང་མ་གྲུབ་པའི་ཕྱིར་ན་སྟོང་ཆེན་ནོ། །མ་སྐྱེས་པ་ནི། རྩ་རྒྱུད་ལས། སྐྱེས་པ་ཉིད་ན་སྐྱེ་བ་མེད། །ཅེས་སོ། །མན་ངག་ནི་འདི་ཉིད་ལས། བསྒོམ་བྱ་སྒོམ་བྱེད་མ་སྐྱེས་པས། །ཞེས་སོ། །རིགས་པ་ནི་རྒྱུ་རྐྱེན་ལས་མ་གྲུབ་པའི་ཕྱིར་མ་སྐྱེས་པའོ། །ཆོས་དབྱིངས་ནི་རྒྱས་པ་ལས། ཆོས་ཀྱི་དབྱིངས་ཀྱིས་ཀུན་ལ་ཁྱབ། །ཅེས་སོ། །མན་ངག་ནི། འདི་ཉིད་ལས། དབྱིངས་ལ་དབྱིངས་ནི་རྣམ་པར་སྦྱོར། །ཞེས་སོ། །རིགས་པ་ནི་མཐའ་དབུས་མེད་པའི་ཕྱིར་ན་ཆོས་ཀྱི་དབྱིངས་སོ། །དེ་ལྟར་ངོ་བོ་དང་། ངེས་ཚིག་དང་། གཏན་ཚིགས་དང་གསུམ་གསུམ་འཕྲུགས་པར་འབྱུང་བའོ། །དམིགས་པ་བརྗོད་པ་བྱིང་རྒོད་དྲུག །ཅེས་པ་ལ་སོགས་པ་སྟེ། རྩ་བའི་སྐྱོན་དྲུག་དང་། ཡན་ལག་གི་སྐྱོན་བཅོ་བརྒྱད་དེ། རྩ་བའི་སྐྱོན་དྲུག་ནི། དམིགས་པ་བརྗོད་པ་བྱིང་རྒོད་དྲུག །ཅེས་པ། བསྒོམ་བྱའི་དོན་ལ་ཆེད་དུ་དམིགས་པ་དང་གཅིག །བསྒོམ་བྱའི་དོན་བརྗེད་པ་དང་གཉིས། བྱིང་བ་དང་གསུམ། རྒོད་པ་དང་བཞི། རྩོལ་བ་དང་མི་རྩོལ་བྱེད་པ་དང་། ཞེས་པས། རྩོལ་མི་དགོས་པར་རྩོལ་བ་དང་ལྔ། དགོས་ཀྱང་མི་རྩོལ་བ་དང་དྲུག་གོ །ཡན་ལག་ནི་སྐྱོན་བཅོ་བརྒྱད་ནི། དོགས་པ་ལོགས་པ་བཅུ་གཅིག་ནི། ཐུན་མོང་བདུན་ཏེ་བཅོ་བརྒྱད་དོ། །ཞེས་པ། དེ་ཡང་ལོག་གིས་དོགས་པ་བཅུ་གཅིག་དང་། གོལ་གྱིས་དོགས་པ་བདུན་ནོ། །ལོག་གིས་དོགས་པ་བཅུ་གཅིག་ནི། ཁམས་གསུམ་ས་དགུ །རྟག་ཆད་གཉིས་ཏེ་བཅུ་གཅིག་གོ །གོལ་གྱིས་དོགས་པ་བདུན་ནི། ལྷ་མི། ཉན་ཐོས། རང་རྒྱལ། བྱང་ཆུབ་སེམས་དཔའ། ཀྲི་ཡ། ཨུ་པ་ཡ། ཡོ་ག་དང་བདུན་ནོ། །དེ་ལྟར་བཅོ་བརྒྱད་དོ། །དེ་བཞིན་གཡེངས་བ་རྣམ་དྲུག་སྟེ། ཞེས་པ་ནི། སྒོ་ལྔས་གཡེང་བ་ན་དང། ཡུལ་ལྔས། བྱིང་རྒོད་ཀྱི་རོས། དགེ་སྤྱོད་ཀྱི་མཚན་མས། ཐེག་པ་གཞན་གྱི་སྙོམས་འཇུག་གིས། ང་འོ་སྙོམས་འཇུག་གིས་གཡེང་བ་དང་དྲུག་འོག་ནས་འཆད་དོ། །དྲན་འབྱུང་རྗེས་སུ་འབྲང་བ་དང་། ཞེས་པ་ལ་སོགས་པ་ནི་བར་དུ་གཅོད་པའི་སྐྱོན་ཡིན་ཏེ། དེ་ཡང་སྔར་བྱས་ཀྱི་རྟོག་པ་བྱུང་བ་ནི་དྲན་བྱུང་གི་རྗེས་སུ་འབྲང་བ་ཡིན་ཏེ། བག་ཆགས་རྨི་བ་ལྟ་བུའོ། །ཉམས་ནི་གཡོ་ཐོབ་ལ་སྒྲིབ་བོ། །འགོག་པ་ནི་ཏིང་ངེ་འཛིན་ལ་ཐེ་ཚོམ་དུ་འཛིན་པ་སྟེ། གཟེར་བུ་ཅན་དབང་ཆེས་ན་གྲོལ་ལ་སྲིན་འཇུག་པ་ལྟ་བུ་ཡིན་ཏེ། ཟུང་འབྲེལ་ལ་སྒྲིབ་བོ། །ཐེར་ཟུག་ནི་ཉམས་འཐས་པ་སྟེ། མར་འདོད་ནས་བ་ཉོས་པས་ཞོ་ལ་ཆགས་པ་དང་འདྲ་སྟེ་ལྷག་མཐོང་ལ་སྒྲིབ་བོ། །ཕྱལ་བ་ནི། ཏིང་ངེ་འཛིན་ལ་མི་བརྩོན་པ་སྟེ། འབྲས་སྟོན་ཐོག་འདོད་པའི་མི་སོ་ནམ་ལ་མི་བརྩོན་པ་དང་འདྲ་སྟེ་ཟུང་འབྲེལ་ལ་སྒྲིབ་ཆེད་དུ་གསུམ་འཆོས་ནི། ལུས་ངག་ཡིད་གསུམ་བཅོས་མི་དགོས་པ་བཞིན་དུ་འཆོས་པ་སྟེ། བདེ་བ་འདོད་པའི་མི་སྡུག་བསྔལ་གྱི་རྒྱུ་ལ་བརྩོན་པ་དང་འདྲ་སྟེ་ཟུང་འབྲེལ་ལ་སྒྲིབ་བོ། །ཡིད་ལ་བྱེད་ནི་ཆོས་ཉིད་ལ་དམིགས་པ་ཆེད་དུ་ཡིད་ལ་བྱེད་པ་སྟེ། ནམ་མཁའ་སྤར་བས་འཛིན་པ་དང་འདྲ་སྟེ་ཟུང་འབྲེལ་ལ་སྒྲིབ་བོ། །མྱོང་དང་ནི་ཏིང་ངེ་འཛིན་གྱི་རོ་མྱོང་བར་འདོད་པ་སྟེ་རྨི་ལམ་གྱི་བུད་མེད་ལ་ཆགས་པ་དང་འདྲ་སྟེ་ལྷག་མཐོང་ལ་སྒྲིབ་བོ། །འདུ་ཤེས་གནས་དམིགས་ནི། ཏིང་ངེ་འཛིན་དང་དངོས་སུ་མི་མཐུན་པའི་གེགས་ཡིན་ཏེ། ཐར་པ་འདོད་པའི་ཕྱིར་སྡིག་པ་བྱེད་པ་དང་འདྲའོ། །སྡུད་དང་ནི། ཤེས་པ་ཆེད་དུ་སྡུད་པ་སྟེ། །ཁབ་མིག་དང་འཛུད་པས་ནམ་མཁའ་མི་མཐོང་བ་བཞིན་དུའོ། །མངོན་བྱེད་ནི། ཏིང་ངེ་འཛིན་ལ་ཆེད་དུ་དམིགས་ནས་མངོན་སུམ་དུ་བྱ་བར་འདོད་པ་སྟེ་ནམ་མཁའ་གཟུགས་སུ་སྟོན་པ་ལྟ་བུའོ། །རེ་མར་ནི། དྲོད་རྟོགས་ལ་ཆེད་ངར་རེ་བས་ཏེ། ཏིང་ངེ་འཛིན་ལ་དགའ་དྲོད་ཀྱི་སྐྱོན་ཡིན་ནོ། །རི་མོའི་བ་འཇོ་བ་དང་འདྲ་སྟེ་ཟུང་འབྲེལ་ལ་སྒྲིབ་བོ། །སྒྲིབ་པ་ལྔ་བཅུ་རྩ་ཡན་ལག །ཅེས་པ་ནི། སྒྲིབ་པའི་རྩ་བ་ལྔ། ཡན་ལག་བཅུའོ། །རྩ་བ་ལྔ་ནི། རྟོག་པ་དང་། མཚན་མ་དང་། དྲན་པ་དང་། ཚོར་བ་དང་། བྱུང་ཚོར་རོ། །ཡན་ལག་བཅུ་ནི། རྣམ་པའི་སྒོ་ནས་བཞག་ན་རྟོག་པ་ལ་ཕྲ་རགས་གཉིས་འཛིན་པའི་སྒོ་ནས་བཞག་ན་མཚན་མ་ལ་ཆེ་ཆུང་གཉིས། རྒྱུན་གྱི་སྒོ་ནས་བཞག་ན་དྲན་པ་ལ་རིང་ཐུང་གཉིས། ཉམས་ཀྱི་སྒོ་ནས་བཞག་ན་ཚོར་བ་ལ་གསལ་མི་གསལ་གཉིས། འབྱུང་འཇུག་གི་སྒོ་ནས་བཞག་ན་བྱུང་ཚོར་ལ་མྱུར་བུ་ལ་གཉིས་ཏེ་དེ་ལྟར་ལྔ་དང་བཅུའོ། །འཇིག་རྟེན་དང་པོ་བསམ་གཏན་བཞི་ནི། ཞེས་པ་ནི། འཇིག་རྟེན་དང་པོ་ནི་འདོད་པའི་ཁམས་ཏེ། དེ་ཡང་རྟོགས་པའི་སྐྱོན་གྱིས་ངན་སོང་གསུམ་དུ་སྐྱེའོ། །མཚན་མས་མིར་སྐྱོ། རྒྱུ་བས་སུམ་ཅུ་རྩ་གསུམ་དུ་སྐྱེ། ཚོར་བས་འཐབ་བྲལ་དུ་སྐྱེ། བྱུང་ཚོར་གྱིས་དགའ་ལྡན་དུ་སྐྱེ། །སྒྱུ་མར་ཤེས་པས་འཕྲུལ་དགའ་དང་གཞན་འཕྲུལ་དབང་བྱེད་དུ་སྐྱེ། བསམ་གཏན་བཞི་ནི། གཟུགས་ཁམས་འཇིག་རྟེན་པར་བས་ཏེ། །བྱིང་རྨུགས་ཀྱིས་སྐྱེའོ། །སྙོམས་པར་འཇུག་བཞིར་ས་དགུ་སྟེ། ཞེས་པ། དེ་ཡང་འགོག་པའི་སྙོམས་འཇུག་ལས་སོ། །ས་བཞིས་ནི་འཇིག་རྟེན་ཐ་མ་གཟུགས་མེད་བཞིར། གོལ་ཏེ་མདོར་ན་ས་དགུར་གོལ་ལོ། ། ཐེར་ཟུག་ཆད་པ་ཕྱིན་ཅི་ལོག །ཅེས་པ། ཐེར་ཟུག་ནི་རྟག་པའི་ལྟ་བ་ཡིན་ལ། །ཆད་པ་ནི་ཅང་མེད་དུ་འདོད་པ་སྟེ། །དེ་གཉིས་ནི་ཕྱིན་ཅི་ལོག་མུས་ཕྱོགས་སུ་གོལ་ལོ། །སྤྱོད་ལམ་གྱི་སྐྱོན་ནི། མེལ་ཚེ་དུར་རྐུན་ཉ་གླང་ཉིད། ཅེས་པ། མེལ་ཚེ་ཁྲའི་སྒོམ་དང་། དུར་རྐུན་ཝའི་སྒོམ་དང་། མཚན་མ་ཉའི་སྒོམ་དང་། ཉལ་བ་གླང་གཉིད་ཀྱི་སྒོམ་དང་། །བརྐམ་ཆགས་ཚོང་སེམས་སྤྲེ་སྤྱོད་སྐྱོང་། །ཞེས་པ་ནི། བརྐམ་ཆགས་ཟས་ཀྱི་སྒོམ་དང་། གཡེང་བ་ཚོང་སེམས་སྒོམ་དང་། འདུ་བྱེད་སྤྲེའུའི་སྒོམ་མོ། །སྤང་བའི་འདུ་བྱེད་བརྒྱད་སྟོན་པའང་། ཞེས་པ་ནི། འབྲུ་ལུགས་གཉིས་ཏེ། རྒྱུད་གཅིག་གི་བཅོས་ཐབས་དང་། ཐ་དད་ཀྱི་བཅོས་ཐབས་སོ། །ཐ་དད་ཀྱི་བཅོས་ཐབས་དང་སྦྱར་ན། དབང་པོ་ཐ་མ་ནི། སྤོང་བའི་འདུ་བྱེད་བརྒྱད་སྟོན་པའང་། ཟེར་བས་སྐྱོན་ཆེད་དུ་སྤོང་དགོས་ལ། སྤོང་བའི་འདུ་བྱེད་བརྒྱད་སྟོན་ཏེ། འདུན་པ་དང་དད་པས་དམིགས་པ་བརྗེད་པ་སྤོང་། བརྩོན་འགྲུས་ཀྱིས་ལེ་ལོ་སྤོང་། དྲན་པས་བྱིང་རྒོད་སྤོང་། ཤེས་རབ་ཀྱིས་དོགས་པ་དང་ལོག་པ་གཉིས་སྤོང་། རྒྱུད་གཅིག་གི་བཅོས་ཐབས་དང་། ཐ་དད་ཀྱི་བཅོས་ཐབས་སོ། །ཐ་དད་ཀྱི་བཅོས་ཐབས་སུ་སྦྱར་ན། སེམས་པ་ཡིས་མི་རྩོལ་བ་སྤོང་། བཏང་སྙོམས་ཀྱིས་ཆེད་དུ་རྩོལ་བ་སྤོང་། ཤིན་ཏུ་སྦྱངས་པས་བརྗེད་པ་སྤོང་ངོ་། །དབང་པོ་འབྲིང་ནི། སོ་སོ་ཅུང་ཟད་བལྟ་བར་བྱ། སོ་སོར་རྟོག་པའི་ཤེས་རབ་ཀྱིས་བརྟགས་པས། སྐྱོན་དུ་ངོས་ཟིན་པ་ཙམ་གྱིས་ཆོག་སྟེ། རྐུན་མ་ཚོར་ན་འབྲོས་པ་དང་འདྲའོ། །དབང་པོ་རབ་ནི། ཡང་ན་རང་བྱུང་རང་ཞིར་བཞག །ཅེས་པས། སྐྱོན་བྱུང་ཡང་ཆོས་ཉིད་ལས་བྱུང་ཞིང་། དེ་ཞི་ཡང་དེར་ཞི་བའི་སྐྱོན་གྱིས་གནོད་པ་མ་སྐྱེལ་ཏེ། རྡོ་ཚན་ལ་ཁ་བ་བབས་པ་དང་འདྲའོ། །རྒྱུད་གཅིག་གི་བཅོས་ཐབས་དང་སྦྱར་ན། ཉམས་གཡོ་ཐབས་ཀྱི་དུས་སུ་སྤོང་བའི་འདུ་བྱེད་བརྒྱད་སྟོན་དགོས་པས། གོམས་བརྟན་གྱི་དུས་སུ་སོ་སོར་རྟོག་པའི་ཤེས་རབ་ཀྱིས་བལྟས་པས་ཞི། མཐར་ཕྱིན་པའི་དུས་སུ་སྐྱོན་རང་བྱུང་རང་ཞིར་འགྲོ་བ་ཡིན་ནོ། །སྤྲོས་པའི་འཁོར་ལོ་མོས་སྒོམ་ཞིང་། ཞེས་པ་ནི། དེ་བཞིན་ཉིད་ཀྱི་སྐབས་སུ་ལྷ་དུ་མ་བསྒོམ་ལམ་མི་སྒོམ་ན་སྤྲོས་པ་དང་ཁྱད་པར་མེད་པར་ཐལ། མི་སྒོམ་ན་གཞུང་དང་འགལ་ཞེ་ན། ལན་ནི། དངོས་སུ་སྒོམ་ལམ་མི་སྒོམ་ཟེར་རམ། མོས་པས་སྒོམ་ལམ་མི་སྒོམ་ཟེར། དང་པོ་ཟེར་ན། དངོས་སུ་མི་སྒོམ་གཞུང་དང་འགལ་ཞེ་ན། མི་འགལ། གཞུང་ནས་དངོས་སུ་སྒོམ་པར་མ་བཤད་དོ། །མོས་སྒོམ་ཞིང་ཟེར་རོ། །མོས་པ་སྒོམ་མམ་མི་སྒོམ་ཞེ་ན། བསྒོམ་མོ། །སྤྲོས་པ་དང་ཁྱད་མེད་པར་ཐལ་ཞེ་ན། དངོས་སུ་སྒོམ་པའི་ཕྱིར་རམ་མོས་པས་སྒོམ་པའི་ཕྱིར། དངོས་སུ་སྒོམ་པའི་ཕྱིར་གྱི་གཏན་ཚིགས་མ་གྲུབ་སྟེ་ཁས་ལེན་མེད་དོ། །མོས་པས་སྒོམ་པའི་ཕྱིར་ཞེ་ན། མོས་པས་སྒོམ་ཡང་དངོས་སུ་མི་སྒོམ་པས་སྤྲོས་པ་དང་ཁྱད་མེད་དུ་མི་འགྲོའོ། །སྤྲོས་པ་ནི་ལྷ་དུ་མ་དངོས་སུ་སྒོམ་པ་ཡིན་ལ། འདིར་མོས་པ་ཙམ་དུ་གཞན་དོན་བྱེད་པའི་ཚེ་བསྒོམས་པས་གཞུང་དང་མི་འགལ་ལོ། །དངོས་སུ་མི་སྒོམ་མི་ནུས་པས་སྤྲོས་པར་མི་འགྲོའོ། །མི་འཕྲོགས་མྱོས་སྐྲག་དགའ་བྲོད་མེད། ཅེས་པ་ནི། ནང་དུ་ཏིང་ངེ་འཛིན་བརྟན་པའི་རྟགས་སོ། །ཐེག་པ་གཞན་གྱི་གྲུབ་མཐའ་དང་། རྐྱེན་བློ་བུར་བས་ཏིང་ངེ་འཛིན་མི་འཕྲོགས་ཤིང་ཆད་དང་ངལ་དུབ་ཀྱིས་ཀྱང་མི་མྱོས་པ་ལ། བདུད་དང་སྲིན་པོ་མཐོང་ཡང་མི་སྐྲག ། བཟང་པོའི་རྟགས་ལ་ཡང་དགའ་བྲོད་ཀྱིས་ཤེས་པ་མི་སྐྱེའོ། །ཤུགས་སྣང་བརྒྱད་པོ་མཐོང་བར་འགྱུར། །ཞེས་པ་ནི། ཏིང་ངེ་འཛིན་གོམས་པའི་ཤུགས་ལས་སྣང་བ་བརྒྱད་མཐོང་བར་འགྱུར་ཏེ། གླང་པོ་ཞོན་པ་དང་། གྲུར་ཞུགས་པ་དང་། མེ་ལོང་སྐར་མས་བརྒྱན་པ་དང་། ཟད་པར་གྱི་སྐྱེ་མཆེད་མཐོང་བ་དང་། སྟོང་གསུམ་ལག་མཐིལ་ལྟར་མཉམ་པ་དང་། ཀུན་དགའ་ར་བའི་ཞིང་ཁམས་འོད་ཀྱིས་གང་བ་དང་། ནམ་མཁའ་རྡུལ་གྱིས་གང་བ་དང་། ནམ་མཁའ་སྐར་མས་གང་བ་དང་དེ་ལྟར་བརྒྱད་འབྱུང་ངོ་། །བདུད་ཀྱི་སྤྱོད་ཡུལ་བཅོ་བརྒྱད་ནི་འོག་ནས་འབྱུང་ངོ་། །མངོན་པར་ཤེས་པ་རྣམ་དྲུག་དང་། ཞེས་པ་འབྲུ་ཟུར་གཉིས་ཏེ། སྔོན་གྱི་གནས་ཤེས་པ་དང་། འཆི་འཕོ་དང་སྐྱེ་བ་ཤེས་པ་དང་། ཕ་རོལ་གྱི་སེམས་ཤེས་པ་དང་། ལྷའི་མིག་གི་མངོན་ཤེས་དང་། རྫུ་འཕྲུལ་གྱི་བྱ་བ་ཤེས་པ་དང་། ཟག་པ་མེད་པའི་མངོན་ཤེས་དང་དྲུག་གམ། ཡང་ན་ཟག་བཅས་ཀྱི་མངོན་ཤེས་གསུམ། ཟག་མེད་ཀྱི་མངོན་ཤེས་གསུམ་སྟེ་དྲུག་གོ །ཟག་བཅས་ཀྱི་གསུམ་ནི་འོག་ནས་སྔོན་ལ་དམིགས་པའི་མངོན་ཤེས་དང་གཅིག །ཡོངས་སུ་རྫོགས་པའི་མངོན་ཤེས་དང་གཉིས། བར་ཆད་མེད་པའི་མངོན་ཤེས་དང་གསུམ་མོ། །ཟག་མེད་ཀྱི་གསུམ་ནི། མཐོང་ལམ་གྱི་མངོན་ཤེས། སྒོམ་ལམ། མཐར་ལམ་གྱིའོ། །ཡང་ན་སྔོན་ལ་དམིགས་པའི་མངོན་ཤེས་ལ་སོགས་པ་གསུམ་པོ་ལ། འོག་ནས། དམིགས་པ་འགའ་དང་འཕེལ་བ་དང་། ཟེར་བས། དེ་གསུམ་རེ་རེ་ལ་དམིགས་པ་འགའ་ཙམ། དེ་རྒྱ་ཆེར་འཕེལ་བ་གཉིས་གཉིས་སུ་བགྲང་པས་ཀྱང་དྲུག་གོ །སྔོན་ལ་དམིགས་པའི་མངོན་ཤེས་དང་། ཞེས་པ་ནི། ཐོག་མའམ་སྔོན་ལ་ཟག་བཅས་ཀྱི་མངོན་ཤེས་སྟོན་པ་དེའང་། ཐོག་མར་ཡུལ་བདེན་པ་གཉིས་ལ་དམིགས་ནས་སྐྱེ་བ། དེ་ཏིང་དང་ཀུན་སྣང་གཉིས་ཀྱི་མངོན་ཤེས་དང་། ཡོངས་སུ་རྫོགས་པའི་མངོན་ཤེས་དང་། ཞེས་པ། ཏིང་ངེའི་རྩལ་ཡོངས་སུ་རྫོགས་པ་ཕྱག་རྒྱ་གཅིག་སྤྲོས་ཀྱི་མངོན་ཤེས་དང་། བར་ཆད་མེད་པའི་མངོན་ཤེས་སོ། །ཞེས་པ། ཟག་མེད་འགྲོ་བ་ལ་ལམ་གཞན་གྱིས་བར་ཆོད་པ་ཚོགས་སྒྲུབ་ཀྱི་མངོན་ཤེས་སོ། །དམིགས་པ་འགའ་དང་འཕེལ་བ་དང་། ཞེས་པ། དམིགས་པ་འགའ་ནི་དྲུང་ན་ཡོད་པའི་སེམས་ཅན་གྱི་སེམས་ལ་ཆེད་དུ་བལྟས་ནས་དམིགས་ན་དེའི་སེམས་ཤེས་ཤིང་མདོར་ན་གང་ཟག་འགའི་བསམ་པ་ཤེས་པ་དེ་དེ་བཞིན་ཉིད་ཀྱི་མངོན་ཤེས་སོ། །དེ་འཕེལ་བ་ནི་དེའི་སྟེང་དུ་སྔོན་གྱི་གནས་པ་རྩེ་གཅིག་འཕེལ་བ་ནི་ཀུན་སྣང་གི་མངོན་ཤེས་སོ། །དེ་བཞིན་དུ་འགྲོའོ། །རེ་རེ་ལ་ཡང་སྦྱར་ཏེ། ཡོངས་སུ་རྫོགས་པ་ལ་ཡང་འགའ་དང་འཕེལ་གཉིས། བར་ཆད་མེད་པ་ཡང་དམིགས་པ་འགའ་དང་འཕེལ་བ་གཉིས་སོགས་སོ། །ཉི་ཤུ་ལྔ་སོགས། ཞེས་པ་ནི། མངོན་པར་ཤེས་པ་ཉི་ཤུ་ལྔ་སྟེ། སྒོ་ལྔ་རེ་རེས་ཀྱང་ཡུལ་ལྔ་ལྔ་གཅོད་པའོ། །སོགས་ནི། གཞན་གྱི་སེམས་ཤེས་པ་དང་། སྔོན་གྱི་གནས་ཤེས་པ་དང་། འཆི་འཕོ་དང་སྐྱེ་བ་ཤེས་པ་དང་། རྫུ་འཕྲུལ་གྱི་མངོན་ཤེས་རྣམས་བསྡུའོ། །དེ་ནི་ཕྱག་རྒྱ་གཅིག་པའི་མངོན་ཤེས་སོ། །ཡུལ་ཁམས་མཐོང་། ཞེས་པ་ནི། བོད་ཡུལ་དང་རྒྱ་ཡུལ་ཙམ་ཤེས་པ་ནི་སྤྲོས་པའི་མངོན་ཤེས་ཀྱི་ཡུལ་ལོ། །གླིང་གྲངས་མཐོང་ཐོས་རིམ་པས་ཕྱེ། །ཞེས་པ་ནི། ཚོགས་སྒྲུབ་ཀྱི་སྐབས་སུ་སྤྲོས་པ་བས་མངོན་ཤེས་ཀྱི་ཡུལ་ཆེ་སྟེ། གླིང་གཅིག་དང་གཉིས་ལ་སོགས་པ་འབྱུང་ལ། མངོན་ཤེས་ཀྱི་སྟོབས་ཀྱང་རིམ་པས་ཆེ་བ་ཡིན་ནོ། །ཕྱི་མ་སྟོང་གསུམ་རྒྱ་ཡུལ་དང་། །ཞེས་པ། ཚེ་དབང་གི་མངོན་ཤེས་ཀྱི་ཡུལ་ཡིན་ཏེ། གླིང་བཞི་བྱེ་བ་ཕྲག་བརྒྱ་སྤྲུལ་པ་སྐུའི་འདུལ་ཞིང་མཉམ་པ་ཡིན་ནོ། །སྟོང་གསུམ་སྟོང་སོགས་ཡུལ་འགྱུར་སོགས། ཞེས་པ་ནི། མདོར་བསྟན་ནས། སྟོང་གསུམ་སྟོང་ཕྲག་བཅུ་རྡུལ་སྙེད། །ཅེས་པ། སྟོང་གསུམ་གྱི་སྟོང་ཆེན་པོ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དོ། །གྲངས་མེད་སྟོང་ཕྲག་བཅུ་ཡི་རྡུལ། ཞེས་པ། གོང་གི་སྟོང་གསུམ་གྱི་སྟོང་ཆེན་པོ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དེ་གཞིར་བཞག་ནས། དེ་གཅིག་གཉིས་སུ་བགྲངས་པ་ལས། གྲངས་ཀྱི་གནས་ལས་འདས་ནས་གྲངས་མེད་དུ་གྱུར་པ་དེ་ལྟ་བུ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ནི་སྒོམ་ལ མ་གྱི་མངོན་ཤེས་ཀྱི་ཡུལ་ཡིན་ཏེ། ལོངས་སྐུའི་འདུལ་ཞིང་མཉམ་མོ། །དེ་སྙེད་ཡུལ་གྱུར། ཅེས་པ་ནི་གོང་གི་ཚིག་སྡུད་པ་ཡིན་ལ། རྒྱལ་བ་དང་། མཉམ་པས། ཞེས་འབྲེལ་པ་སྟེ། ལྷུན་གྱིས་གྲུབ་པའི་རིག་འཛིན་གྱིས་མངོན་ཤེས་ཀྱི་ཡུལ་ནི་སངས་རྒྱས་དང་མཉམ་མོ། །ཕྱི་བ་ལམ་རྫོགས། ཞེས་པ། དེ་ལྟར་སྐུ་གསུམ་གྱི་འདུལ་ཞིང་དང་། ཁམས་གསུམ་མཉམ་ན་ཁྱད་ཚུལ་ཅིས་བྱེད་ཅེ་ན། སྐུ་གསུམ་ནི་ཞིང་ཁམས་རྣམས་དངོས་སུ་འདུལ་ལ། ཁམས་གསུམ་གྱིས་ནི་དངོས་སུ་འདུལ་མི་ནུས་ཏེ་མངོན་ཤེས་ཀྱི་ཡུལ་ཙམ་ཡིན། དེ་ལྟར་ཁྱད་ཆེ་བས་ལམ་རྫོགས་པའམ། ཡང་ན་ལམ་གོང་འོག་ལ་མངོན་ཤེས་ཀྱི་ཁྱད་ཕྱེ་བས་ལམ་རྫོགས་པ་ཡིན་ནོ། །དེ་བས་རྒྱུ་ཡི་སེམས་དཔའ་དང་། ཞེས་པ་ལ་སོགས་པ་ནི། འོ་ན་ལམ་ལྔ་པོ་འདི་རྒྱུའི་སེམས་དཔའ་ལ་ཡང་འདུག་པས། སྔགས་དང་ཁྱད་ཅི་ཡོད་ཅེ་ན། དེ་ནི་ལམ་ལྔ་སྔགས་དང་ཕ་རོལ་དུ་ཕྱིན་པ་གཉིས་ཀ་ལ་ཡོད་ཀྱང་ཁྱད་པར་ཡོད་དེ། རྒྱུའི་ཐེག་པའི་བྱང་ཆུབ་སེམས་དཔའ་དང་། འབྲས་བུའི་ཐེག་པའི་བྱང་ཆུབ་སེམས་དཔའ་གཉིས། སྐལ་མཉམ་ཕྱིར་དང་བརྗོད་ཀྱི་ཚུལ། ཞེས་པ། དེ་གཉིས་སྐལ་བ་མཉམ་པའི་ཕྱིར་མཚན་ཉིད་ཙམ་ནས་ལམ་ལྔར་བརྗོད་པའམ། ཚུལ་མཐུན་པར་བརྗོད་ཀྱིས། དངོས་སུ་མེད་པར་ཤིན་ཏུ་ཆེའོ། །དེ་ཇི་ལྟར་ཁྱད་ཡོད་ན། ཤེས་པའི་ཁྱད་པར་དགོངས་པ་ཡིས། ཞེས་པ། རྒྱུ་ཤེས་པའི་མཚན་ཉིད་ལྟ་བའི་སྐབས་སུ་དབྱེར་མེད་རྟོགས་མ་རྟོགས་ཀྱི་ཁྱད་པར་དང་། དགོངས་པ་ཏིང་ངེ་འཛིན་སྐབས་སུ་དབྱེར་མེད་ལ་ཉམས་མཐར་ཕྱིན་པར་སློབ་ནུས་མི་ནུས་ཀྱི་ཁྱད་པར་དང་། གཞི་ཡི་ཆེ་བས་རྒྱུ་འབྲས་ངེས། ཞེས་པ། གཞི་སེམས་ཉིད་སངས་རྒྱས་ཀྱི་རྒྱུར་འདོད་པ་དང་། འབྲས་བུའི་ངོ་བོར་འདོད་པས་ཁྱད་པར་ཆེ་སྟེ། དེ་བས་ན་རྒྱུའི་ཐེག་པ་དང་འབྲས་བུའི་ཐེག་པ་གཉིས་སུ་ངེས་སོ། །དྲན་པ་ལམ་གྱིས་རྒྱུན་བཅད་དེ། ཞེས་པ་ནི། འོ་ན་དྲན་པ་དང་ལས་རྒྱུན་ཆད་ནས་ཕྱི་མར་འདོད་ཁམས་ལྷར་མིར་སྐྱེ་བར་མི་རིགས་སོ། །ཞེ་ན། སྤྱིར་ཀུན་གཞི་ལ་བརྟེན་ནས་ཚོགས་བདུན་སྐྱེ་ལ། དེ་འགག་པའི་དུས་ཀྱང་གསུམ་ཡོད་དོ། །གཉིད་ལོག་པའི་དུས་སུ་སྒོ་ལྔའི་རྣམ་ཤེས་འགགས་ཏེ་ཡུལ་ལ་མི་འཕྲོ། བརྒྱལ་བའི་དུས་སུ་ཡིད་ཀྱི་རྣམ་ཤེས་འགགས་ཏེ། ཆོས་འདུས་བྱས་དང་འདུས་མ་བྱས་ལ་མི་འཕྲོ། ཤི་བའི་དུས་སུ་བདག་ཏུ་རྟོགས་པའི་ཉོན་མོངས་པ་ཅན་གྱི་ཡིད་འགགས་ནས། འགྲོ་བ་ཀུན་ལ་ཆོས་ཉིད་འོད་གསལ་འཆར་བ་ཡིན་ལ། དེ་རྣམས་འགགས་ཀྱང་ཀུན་གཞི་འགག་ཏུ་མི་བཏུབ་པས། ཀུན་གཞི་ལ་བག་ཆགས་ཡོད་པས་ཚོགས་བདུན་ལངས་ནས་ལུས་ལེན་པ་ཡིན་པས་འགལ་པ་མེད་དོ། །ཡང་ན་གསང་བའི་གསེར་སྒྲོམ་དུ། ཞེས་པ་མན་ངག་གི་ལུགས་མི་མཐུན་པ་སྟོན་པ་ཡིན་ཏེ། གསང་བའི་གསེར་སྒྲོམ་ནི། བདག་ཉིད་ལྷའི་སྐུར་གསལ་བར་མོས་པ་བྱས་ཙམ་ན། སྙིང་ཆོས་ཀྱི་འཁོར་ལོ་གསང་བའི་གསེར་སྒྲོམ་དང་འདྲ་བ་དེར། མཚོན་གང་ནོར་བུ་ཟླ་བའི་ཧཱུྃ། ཞེས་པ་ནི། གསེར་སྒྲོམ་གྱི་ནང་དུ་སྒོ་ལྔའི་རྣམ་ཤེས་ཀྱི་ངོ་བོར་ཡེ་ཤེས་སེམས་དཔའ་ཚོན་གང་བ་བསྒོམ། དེ་ལ་ཀུན་གཞིའི་རྣམ་ཤེས་ཀྱི་ངོ་བོ་འོད་ཁ་དོག་ལྔ་འཕྲོ་བར་བསྒོམ། དེའི་ཐུགས་དཀར་ནི་ཉོན་མོངས་པ་ཅན་གྱི་ཡིད་ཀྱི་རང་བཞིན་ཟླ་བའི་དལ་གཅིག་བསྒོམ། དེའི་སྟེང་དུ་ཡིད་ཀྱི་རྣམ་ཤེས་ཀྱི་ངོ་བོ་ཧཱུྃ་དཀར་པོ་གཅིག་བསྒོམ། རིང་པོ་བརྩེགས་པ་དམིགས་ཐོབ་ནས། ཞེས་པ་ནི། དེ་ལྟར་ལྷ་སུམ་བརྩེགས་ལ་དམིགས་པ་ཤིན་ཏུ་བརྟན་པ་ཐོབ་ནས་སོ། །རླུང་གི་འཕྲོ་འདུས་འོད་བརྡལ་འདུག །ཅེས་པ་ནི། དེ་ལྟར་བརྟན་ནས་དབུགས་ཕྱིར་རྒྱུ་བའི་རླུང་དང་། ཧཱུྃ་གི་འོད་འགྲོགས་ནས་འཕྲོས་པས། སྣོད་བཅུད་ལ་ཕོག་པས་འོད་དུ་ཞུ། རང་ལ་ཐིམ་པས་རང་འོད་དུ་ཞུ་ནས་ཡེ་ཤེས་སེམས་དཔའ་ལ་ཐིམ། དེ་འོད་དུ་ཞུ་ནས་ཟླ་བ་ལ་ཐིམ། ཧཱུྃ་ཞུ་བས་སྟོང་གསུམ་འོད་ཀྱིས་གང་བར་བསམ་པ་དེའི་ངང་ལ་འཇུག་གོ །སྔོན་བྱས་ལྷག་པའི་ཆོས་བསྐུར་སྦྱོར། ཞེས་པ། འོ་ན་དེ་བཞིན་ཉིད་ཀྱི་ཏིང་ངེ་འབྲས་བུ་ཆོས་སྐུ་ལ་སྦྱོར་ན། ཀུན་ཏུ་སྣང་གི་ཏིང་ངེ་ལ་སོགས་པ་དོན་མེད་དུ་ཐལ་ཞེ་ན། ལན་ནི། འདིར་ནི་དེ་བཞིན་ཉིད་ཀྱི་འབྲས་བུ་ཆོས་སྐུ་ལ་དངོས་སུ་སྦྱོར་བ་མ་ཡིན་ཏེ། དེ་བཞིན་ཉིད་ཀྱི་ཏིང་ངེ་འཛིན་སྟོང་ཉིད་བསྒོམ་པ། ཆོས་ཀྱི་སྐུ་སྟོང་པ་ཉིད་དུ་གནས་པ་ཆོས་མཐུན་པའི་ཕྱིར་སྨྲས་པ་ཡིན་ཏེ། ཕྱོགས་མཐུན་བརྗེད་ཀྱི་རིས་མ་ཡིན། །ཅེས་པའོ། །འབྲས་བུ་ཉིད་ལ་ལམ་ཕྱིར་ཏེ། ཞེས་པ་ནི། འདིར་གསང་སྔགས་ཀྱི་ལུགས་ཀྱི་འབྲས་བུ་ལམ་དུ་བྱེད་པ་ཡིན་ནམ་མིན། མིན་ན་རྩ་རྒྱུད་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཅེས་པ་དང་། འདི་ཉིད་ལས། ཀུན་ཀྱང་སྨིན་ཟིན་བགྲོད་པ་མེད། །དེ་ཉིད་ལམ་གྱི་ངོ་བོ་སྟེ། །འཇུག་ནས་འབྱིན་པས་ཕྱེ་བ་ཡིན། །ཅེས་གསུངས་པ་དང་འགལ། འབྲས་བུ་ལམ་དུ་བྱེད་ན། སྨིན་པ་ལམ་དུ་བྱེད་དམ། །མ་སྨིན་པ་ལམ་དུ་བྱེད། །དང་པོ་ལྟར་ན། སྨིན་ནས་ཀྱང་ལམ་དུ་བྱེད་དགོས་ན་ཐུག་པ་མེད་པར་ཐལ། མ་སྨིན་པ་ལ་ལམ་དུ་བྱེད་ན། མ་སྨིན་པའི་ཕྱིར་འབྲས་བུ་མ་ཡིན་པར་ཐལ། དཔེར་ན་མྱུ་གུ་སྔོན་པོ་བཞིན་ནོ། །ལན་ལ་གཉིས་ལས། དངོས་ཀྱི་ལན་དང་། མགོ་བསྒྲེ་བའི་ལན་ནོ། །དངོས་སུ་ལེན་ནི། འབྲས་བུ་ལ་ལམ་དུ་བྱེད་དམ་མི་བྱེད། མི་བྱེད་ན་མི་བྱེད་དེ། བྱེད་ན་སྨིན་པ་ལ་ལམ་དུ་བྱེད་དམ། མ་སྨིན་པ་ལ་ལམ་དུ་བྱེད་ཅེ་ན་སྨིན་ཞེས་སྒྲོས་མི་འདོགས། མ་སྨིན་ཞེས་སྐུར་པ་མི་འདེབས་ཏེ། འབྲས་བུའི་ངོ་བོ་ལམ་དུ་བྱེད་དོ། །ངོ་བོ་གང་ཡིན་ན། སྐུ་གསུང་ཐུགས་ཡོན་ཏན་ཕྲིན་ལས་ལྔ་ཡིན་ཏེ། དེ་ཉིད་རང་ཆས་སུ་ཡོད་ཀྱང་ངོ་མ་ཤེས་ལ། དེ་མ་ཤེས་པ་ཤེས་པར་བྱེད་པའམ། མི་གསལ་བ་གསལ་བར་བྱེད་པ་ཙམ་ཞེས་བྱ་སྟེ། མདོར་ན་ཐོབ་བྱ་ད་ལྟ་ཉིད་ནས་རང་ལ་གནས་པ་ནི་འབྲས་བུ། དེ་ལ་སྒྲིབ་པའི་ཞེན་པ་འདག་པར་བྱེད་པ་ཙམ་ལ་ལམ་དུ་བྱེད་ཅེས་བྱའོ། །མགོ་བསྒྲེ་བའི་ལན་ནི། ཁྱེད་གསང་སྔགས་པ་འབྲས་བུ་ལ་ལམ་བྱེད་དམ་མི་བྱེད་ཅེ་ན། ཁྱེད་མཚན་ཉིད་པ་ཕ་རོལ་ཏུ་ཕྱིན་པ་ལམ་དུ་བྱེད་དམ་མི་བྱེད། བྱེད་ན་འདིར་ཡང་འབྲས་བུ་ལམ་དུ་བྱེད། འོ་ན་སྨིན་པ་ལ་ལམ་དུ་བྱེད་དམ་མ་སྨིན་པ་ལམ་དུ་བྱེད་ཅེ་ན། ཁྱེད་ཀྱང་ཕ་རོལ་དུ་ཕྱིན་ཟིན་ནས་ལམ་དུ་བྱེད་དམ། མ་ཕྱིན་ཀྱང་ལམ་དུ་བྱེད། ཕྱིན་ཟིན་ནས་ལམ་དུ་བྱེད་ཅེ་ན། སྨིན་ནས་ཀྱང་ལམ་དུ་བྱེད་དགོས་ན་ཐུག་པ་མེད་པར་ཐལ་ཞེ་ན། ཁྱེད་ཀྱང་ཕ་རོལ་ཏུ་ཕྱིན་པ་ལམ་དུ་བྱེད་ན་ཐུག་པ་མེད་པར་ཐལ། མ་ཕྱིན་པ་ལ་ལམ་དུ་བྱེད་ཅེ་ན། འདིར་ཡང་མ་སྨིན་པ་ལ་ལམ་དུ་བྱེད། མ་སྨིན་པའི་ཕྱིར་འབྲས་བུ་མ་ཡིན་པར་ཐལ་ཞེ་ན། ཕ་རོལ་ཏུ་མ་ཕྱིན་པའི་ཕྱིར། ཕ་རོལ་ཏུ་ཕྱིན་པ་མ་ཡིན་པར་ཐལ་ལོ། །ཤིན་ཏུ་ཡང་འདྲ་སྟེ་བྱམས་པའི་བསྟན་པ་ལ་འགྲོ་བ་ཡིན་ནོ། །ལམ་མཆོག་གསལ་བའི་སྒྲོན་མ་ལས། ལེའུ་གསུམ་པའི་རྣམ་པར་འགྲེལ་པའོ།། །།ལེའུ་བཞི་པ་ལ་གཉིས་ལས། རྩོམ་པ་ལ་འཇུག་པའི་ཡན་ལག་ནི། ཆོས་ཀྱི་སྐུ་ལ་ཕྱག་འཚལ་ཏེ། ཞེས་པ་སྟེ། དེ་ཡང་ལེའུ་གསུམ་པར། དེ་བཞིན་ཉིད་ཀྱི་ཏིང་ངེ་འཛིན་དང་། ཆོས་ཀྱི་སྐུ་སྟོང་པ་ཙམ་དུ་ཆོས་མཐུན་པས་ན་དེ་ཏིང་ལ་ཆོས་ཀྱི་སྐུ་ཞེས་བྱ་སྟེ། དེ་ལ་ཕྱག་འཚལ་ལོ། །འོ་ན་ལམ་གོང་མས་འོག་མ་ལ་ཕྱག་འཚལ་བར་མི་རིགས་ཏེ། རྒྱུད་ཚོད་ལ་མཐོ་དམན་ཡོད་པའི་ཕྱིར་རོ། །ཞེ་ན། ལན་དུ་ལམ་འོག་མ་པས་གོང་མ་རྒྱུད་ཚོད་མཐོ་བ་ཡིན་ཀྱང་། གོང་མ་ཡང་འོག་མ་ལ་བརྟེན་ནས་བྱུང་བ་ཡིན་པས་ན། འདི་ལམ་གོང་མ་ལ་འོག་མ་བཀའ་དྲིན་ཆེ་བས་བཀའ་དྲིན་དྲན་པའི་ཕྱག་ཡིན་ཏེ། དཔེར་ན། ཐོག་མར་ཆོས་སྒོར་འཇུག་པའི་བླ་མ་བཀའ་དྲིན་ཆེ་བས་དུས་ཕྱིས་ཆོས་སློབ་མ་མཁས་ཤིང་རྒྱུད་ཚོད་སློབ་མ་མཐོང་ཡང་བཀའ་དྲིན་བླ་མ་ཆེ་བས་བཀའ་དྲིན་དྲན་པའི་བླ་མ་ལ་ཕྱག་འཚལ་བ་བཞིན་ནོ། །གཉིས་པ་དམ་བཅའ་བ་ནི། སྙིང་རྗེ་ཆེན་པོའི་རྣལ་འབྱོར་བཤད། །ཅེས་པ། དེའང་སྙིང་རྗེ་ཆེན་པོ་ཅིའི་ཕྱིར་ཡིན་ཞེ་ན། ཐེག་པ་འོག་མ་བ་ནི་སྙིང་རྗེ་བྱ་བའི་ཡུལ་སེམས་ཅན་རང་རྒྱུད་པ་ལ། སྙིང་རྗེ་བྱེད་ཀྱི་མཁན་པོ་བདག་རང་རྒྱུད་པ་གཅིག་གིས། སྙིང་རྗེའི་དངོས་པོ་ནི་ཁམས་གསུམ་གྱི་སེམས་ཅན་སྡུག་བསྔལ་སྣ་ཚོགས་ཀྱིས་གདུངས་པས་འདི་སྙིང་རེ་རྗེ་ཞེས་དམིགས་པ་དང་བཅས་ནས་ཁ་འཁུན་ཅིང་སྡོད་པ་ཡིན་ཏེ། དེ་ནི་སྙིང་རྗེ་ཙམ་པོ་ཡིན་ཀྱང་། ཆེན་པོ་མ་ཡིན་ལ། འདིར་སྙིང་རྗེ་བྱ་རྗེ་བྱེད་དང་། སྙིང་རྗེའི་དམིགས་པ་གསུམ་མ་གྲུབ་སྟེ། བདག་དང་སེམས་ཅན་ཐ་དད་དུ་མི་འབྱེད་ལ། དེ་ལྟར་རྟོགས་པའི་ངང་ལ་རིག་པ་སྒྱུ་མའི་རྩལ་མ་འགགས་པས་སེམས་ཅན་ལ་ཕན་འདོགས་པ་ནི་སྙིང་རྗེ་ཆེན་པོ་ཡིན་ནོ། །རྣལ་འབྱོར་ནི་དེ་ལྟ་བུ་དེ་ཡང་སྤྱི་ཡུལ་ཙམ་དུ་འཇོག་པ་མ་ཡིན་ཏེ། རང་གི་རྒྱུད་ལ་ཇི་ལྟ་བ་བཞིན་དུ་སྦྱར་ནས་ཉམས་སུ་ལེན་པ་ཡིན་ཏེ། དེ་ལྟ་བུའི་ལེའུ་འདི་བཤད་པར་བྱའོ་ཞེས་པའོ། །འོ་ན་སྤྱི་ལུགས་ཀྱི་ལམ་གོང་མ་གོང་མ་དང་། འོག་མ་འོག་མ་རྣམས། གོང་མ་བཟང་བ་མིན་ནམ། མིན་ན་ལམ་གོང་དུ་བགྲོད་པ་དོན་མེད་པར་ཐལ། གོང་མ་བཟང་བ་ཡིན་ན། འོ་ན་དོན་དམ་པ་བས་ཀྱང་ཀུན་རྫོབ་བཟང་བར་ཐལ། ལམ་གོང་མ་ཀུན་རྫོབ་སྙིང་རྗེ་ཆེན་པོའི་རྣལ་འབྱོར་ཡིན་པའི་ཕྱིར་རོ། །དེ་འདོད་ན་ཐེག་པ་ཐམས་ཅད་ཀྱང་འགལ་ཏེ། ཀུན་རྫོབ་བྱ་བ་སམ་སྐྲྀ་ཏའི་སྒྲ་ལས་དྲངས་ན་ངན་པའམ་བསླུ་བའི་རྣམ་པ་ཡིན་ལ། དོན་དམ་པར་ཆོས་ཉིད་མི་བསླུ་བར་ཡིན་པར་ཐེག་པ་ཐམས་ཅད་མཐུན་པའི་ཕྱིར་རོ་ཞེ་ན། ལན་ནི། སྤྱིར་ནི་ལམ་གོང་མ་དང་འོག་མ་གཉིས་ལམ་གོང་མ་བཟང་བར་འདོད་ལ། འོ་ན་དོན་དམ་པས་ཀུན་རྫོབ་བཟང་བར་ཐལ། ཞེ་ན། དོན་དམ་པ་བས་ལྷག་པ་ཀུན་རྫོབ་བཟང་བར་ཐལ་ཞེས་ཟེར་རམ། ཀུན་རྫོབ་ཙམ་པོ་བཟང་བར་ཐལ་ཟེར། ཀུན་རྫོབ་ཙམ་སོ་བཟང་བར་ཐལ་ཟེར་ན། ཅིའི་ཕྱིར་ལམ་གོང་མ་ཡིན་པའི་ཕྱིར། ཞེ་ན། གཏན་ཚིགས་མ་གྲུབ་སྟེ། ཀུན་ཏུ་སྣང་བའི་སྐབས་སུ་ཀུན་རྫོབ་ཙམ་བསྒོམ་པ་ཡིན་ནོ། །ལྷག་པ་ཀུན་རྫོབ་བཟང་བར་ཐལ་ཞེ་ན་འདོད་ཐོག །འོ་ན་ཐེག་པ་སྤྱི་ལུགས་དང་མི་འགལ་ཏེ། ཐེག་པ་སྤྱི་ལུགས་ཀྱི་ཀུན་རྫོབ་བཟང་ངན་པར་འདོད་པ་དེ་ཀུན་རྫོབ་ཙམ་པོ་ལ་ཟེར་བ་ཡིན་ཏེ། འདིར་ལྷག་པ་ཀུན་རྫོབ་བསྒོམ་པ་ཡིན་པས་དོན་དམ་པ་བས་བཟང་བར་འདོད་པ་ཡིན་ནོ། །འོ་ན་དོན་དམ་པས་ཀུན་རྫོབ་བཟང་བར་འདོད་པ་ཅིའི་ཕྱིར་ཞེ་ན། སྤྱི་ལུགས་ཀྱིས། སེམས་ཅན་རྣམས་བདག་ཏུ་ལྟ་བའི་དངོས་པོ་ལ་ཞེན་པས། དེ་ལ་སྤོང་བའི་གཉེན་པོ་སྟོང་པ་ཉིད་ཡིན་པ་ལ། སྟོང་ཉིད་ལ་རང་རྒྱུད་པར་ཞེན་ན་དེ་ཡང་འཆིང་བ་ཡིན་པས། དེ་སྤོང་བའི་གཉེན་པོ་ལྷག་པ་ཀུན་རྫོབ་ཡིན་པས་དེ་བས་ཀྱང་བཟང་བ་ཡིན་ནོ། །ཡང་ལམ་གོང་འོག་མའི་དོན་དམ་ནམ་ཡང་རྒྱུད་ལ་ལྡན་ལ། དེའི་སྟེང་དུ་ཡང་ལྷག་པ་ཀུན་རྫོབ་བསྒོམ་ནུས་པས་ཡོན་ཏན་ཡར་ལྡན་ཡིན་ཏེ། དེ་ཡང་། སྔ་མ་སྔ་མ་རྒྱུད་ལྡན་པས། །ཕྱི་མ་ཕྱི་མ་གོམས་པར་བྱེད། །ཅེས་སོ། །ཡན་ལག་བརྒྱད་སྔོན་བཞིན་བྱས་ནས། །ཞེས་པ། སྔོན་དེ་ཏིང་གི་སྐབས་ཡན་ལག་བརྒྱད་པ་བྱས་ཏེ། བཛྲ་ས་མཱ་ཛཿལན་གསུམ་གྱིས་རྟེན་མདུན་གྱི་ནམ་མཁའ་ལ་སྤྱན་དྲངས་ལ། དེ་ལ་ཕྱག་འཚལ་ལོ། །མཆོད་པ་ཕུལ། བཤགས་པ་བྱ། རྗེས་སུ་ཡི་རང་བ་བྱ། ཆོས་ཀྱི་འཁོར་ལོ་བསྐོར་བར་བསྐུལ། མྱ་ངན་ལས་མི་འདའ་བར་གསོལ་བ་གདབ། སྐྱབས་སུ་འགྲོ། དགེ་བའི་རྩ་བར་བསྔོ་བ་བྱས་ལ་རྟེན་འོད་དུ་ཞུ་ནས་རང་ལ་བསྟིམ་མོ། །དེ་ནས་སྙིང་རྗེ་སྒྱུ་མ་བསྒོམ་མོ། །འཇུག་པའི་མཐུན་མཚམས་དུས་ཀྱི་ཚེ། ཞེས་པ་ནི། སྙིང་རྗེ་ཆེན་པོའི་ཏིང་ངེ་འཛིན་བསྒོམ་པའི་སྐབས་སུ། ཐུན་མཚམས་རིང་ཐུང་གི་ཉམས་ཀྱི་དུས་ལྔ་དང་སྦྱར་ལ་བྱ་སྟེ། གཡོ་བའི་དུས་སུ་ཉིན་ཞག་ཕྲུགས་གཅིག་ལ་དྲུག་ཅུ་རྩ་བཞིར་ཕྱེ་བའི་ཆ་གཅིག་བསྒོམ་མོ། །ཉམས་ཐོབ་པའི་དུས་སུ་ཉིན་ཞག་ཕྲུགས་གཅིག་ལ་སུམ་ཅུ་སོ་གཉིས་སུ་ཕྱེ་བའི་ཆ་གཅིག་བསྒོམ། ཉམས་གོམས་པའི་དུས་སུ་བཅུ་དྲུག་ཏུ་ཕྱེ་བའི་ཆ་གཅིག་བསྒོམ། ཉམས་བརྟན་པའི་དུས་སུ་བརྒྱད་དུ་ཕྱེ་བའི་ཆ་གཅིག་བསྒོམ། ཉམས་མཐར་ཕྱིན་པའི་དུས་སུ་བཞིར་ཕྱེ་བའི་ཆ་གཅིག་བསྒོམ་ནུས་པ་ཡིན་ནོ། །སྒྱུ་མ་མིག་ཡོར་སྤྲུལ་པ་དང་ཞེས་པ་དང་། སྒྱུ་མའི་དངོས་པོ་དྲུག་སྟོན་པ་ཡིན་ཏེ། སྒྱུ་མ་ནི་རང་རྒྱུད་པ་མེད་པ་ཡིན་ཏེ། ལོག་རྟོག་སྒྱུར་མའི་དཔེ་ཡིན་ལ། མིག་ཡོར་སྣང་ལ་མ་གྲུབ་པ་སྟེ་རྟེན་འབྲེལ་སྒྱུ་མའི་དཔེ་ཡིན་ནོ། །སྤྲུལ་པ་ནི་གཅིག་ཏུ་མ་ངེས་ཏེ་ཐབས་སྒྱུ་མའི་དཔེའོ། །སྨིག་རྒྱུར་འཇའ་ཚོན་ཆུ་ཟླ་བཞིན། ཞེས་པ་སྨིག་རྒྱུ་ནི་སྣང་ལ་ཚིམ་པ་མེད་པ་སྟེ་ཡན་ལག་སྒྱུ་མའི་དཔེའོ། །འཇའ་ཚོན་ནི་མེད་བཞིན་དུ་བཀྲ་བ་སྟེ་ཡེ་ཤེས་སྒྱུ་མའི་དཔེའོ། །ཆུ་ཟླ་ནི་སྣང་ལ་རྟོགས་པ་མེད་པ་སྟེ་ཕྱག་རྒྱ་མའི་དཔེའོ། །གདུང་འདྲ་མ་བསྒྲལ་དུས་གཅིག་བསྒྲལ། ཅེས་པ་ལ་སོགས་པ། གསང་སྔགས་ཀྱི་ལུགས་ཀྱིས་ཚད་མེད་པ་བཞི་སྟོན་ཏེ། སྤྱིར་གསང་སྔགས་པའི་སྙིང་རྗེ་ཆེན་པོ་ལ་འོག་མའི་ཚད་མེད་བཞི་ཀ་རྫོགས་པར་ཆེན་པོར་སྟོན་པ་ཡིན་ཏེ། དེ་ཡང་འོག་མ་ཀུན་ནི། ཡང་དག་པར་ན་ཆོས་ཉིད་སྤྲོས་པ་དང་བྲལ་བ་ཡིན་པ་ལ། དེ་ལྟར་མ་རྟོགས་པའི་སེམས་ཅན་འདི་དག་སྙིང་རེ་རྗེ་སྙམ་ནས་སྙིང་རྗེ་བསྒོམ། འདི་དག་འཁོར་བའི་རྒྱ་མཚོ་ལས་བསྒྲལ་བར་བྱའོ་སྙམ་པ་བྱམས་པ་བསྒོམ། འདི་དག་སྡུག་བསྔལ་དང་བྲལ་ནས་བདེ་བ་ཐོབ་ན་རེ་ལེགས་ཏེ་སྙན་དུ་དགའ་བ་བསྒོམ། དེ་དག་ཀྱང་སེམས་ལ་ཕྱོགས་རིས་མི་འབྱེད་པའི་བཏང་སྙོམས་བསྒོམ། ད་རེས་འདིར་གསང་སྔགས་ཀྱི་ལུགས་ཀྱི་གདུལ་བྱ་འདུལ་བྱེད་རང་རྒྱུད་པ་དེ་ལྟ་བུ་མི་འདོད་དོ། །འཁོར་འདས་ཀྱི་ཆོས་ཐམས་ཅད་རིག་པ་སྒྱུ་མའི་ཡེ་ཤེས་སུ་གསལ་ཙམ་ན། མ་བསད་པའི་བསད་པ་ཆེན་པོ་སྙིང་རྗེ་ཡིན་ཏེ། དེ་ཡང་འབྱེད་པ་མེད་པའི་ངང་ལས་ཕན་འདོགས་པས་བྱམས་པ། འབྱེད་པ་མེད་པར་ཡེ་ཤེས་སྒྱུ་མའི་ངང་དུ་སངས་རྒྱས་པས་དགའ་བ། གདུལ་བྱ་དང་འདུལ་བྱེད་གཉིས་ཀ་རིགས་པ་སྒྱུ་མའི་ངང་དུ་འདུ་འབྲལ་མེད་པས་བཏང་སྙོམས་ཡིན་ཏེ། དེ་ཡང་འབྲས་བུ་ལ་སྦྱར་ན། གདུང་འདྲ་མ་བསྒྲལ་དུས་གཅིག་བསྒྲལ། ཅེས་པ། ཐེག་པ་འོག་མ་བ་ནི་སྙིང་རྗེའི་ཡུལ་ཁམས་གསུམ་གྱི་སེམས་ཅན་ལ་ཆེད་དུ་གདུང་ལ། འདིར་ཆེད་དུ་མི་གདུང་ཡང་དོན་གདུང་པ་དང་འདྲ་སྟེ། ཇི་ལྟར་འདྲ་ན། འཁོར་འདས་ཐམས་ཅད་རིག་པ་སྒྱུ་མར་རྟོགས་པས། ཆེད་དུ་མ་བསྒྲལ་ཡང་རང་བཞིན་གྱིས་བསྒྲལ་བ་ཡིན་ནོ། །གསོད་ཆེན་སྙིང་རྗེའི་རང་བཞིན་ཏེ། ཞེས་པ་ནི། དེ་ནི་ཐ་མལ་གྱི་ལུས་སྲོག་འབྲལ་བ་ལྟ་བུ་མ་ཡིན་ཏེ། རིག་པ་སྒྱུ་མའི་ངང་དུ་བསད་པ་མེད་པར་བསད་པ་ཡིན་པས། གསོད་པ་ཆེན་པོ་ཡིན་ལ། དེ་ནི་ཐེག་པ་འོག་མ་བའི་སྙིང་རྗེ་བཞིན་དུ་གདུང་མི་དགོས་པས་སྙིང་རྗེ་ཆེན་པོའི་རང་བཞིན་ཡིན་ནོ། །མི་འདོད་ཕན་འདོགས་བྱམས་པ་ཆེན་པོ། ཞེས་པ་ནི། དེ་ཙམ་ན་གདུལ་ལ་རང་རྒྱུད་དུ་གྲུབ་པ་མེད་པས་ཆེད་དུ་ཕན་འདོགས་པ་མེད་ལ། དེ་ལྟར་རྟོགས་པ་ཉིད་ཕན་པ་ཀུན་གྱི་གཞི་ཡིན་པས་བྱམས་པ་ཆེན་པོའོ། །མི་འགྱོད་དགའ་མཆོག་འབྲལ་མེད་སྙོམས། ཞེས་པ། དེ་ལྟར་རྟོགས་པ་ལ་འགྱོད་པ་མེད་པས་དགའ་བ་ཡིན་ལ། རིག་པ་སྒྱུ་མ་དང་མི་འབྲལ་བས་བཏང་སྙོམས་སོ། །ཚངས་པའི་རྒྱུ་བཞི་དུས་གཅིག་རྫོགས། ཞེས་པ་ནི། སྤྱིར་སྐབས་དེའི་ཚད་མེད་པ་བཞིས་ཚངས་གནས་སུ་སྐྱེ་བ་མིན་ཀྱང་། ཐེག་པ་འོག་མ་བའི་ཚད་མེད་པ་བཞིས་ཚངས་གནས་སུ་སྐྱེ་ལ། འདིར་ཡང་མི་ལ་སྙིང་དྲིན་ཆགས་པ་ལྟ་བུ་ཡིན་ཏེ་བཙུན་ལོག་ལྟ་བུའོ། །དེ་ན་འདིར་སྙིང་རྗེ་གཅིག་པུ་ལ་ཚད་མེད་པ་བཞི་ཀ་རྫོགས་སོ། །མངོན་པར་གདུང་པ་དེ་ལ་མེད། ཅེས་པ་ཐེག་པ་འོག་མ་བཞིན་དུ་སྙིང་རྗེ་དམིགས་པ་ཅན་དུ་བྱས་ནས་ཆེད་དུ་གདུང་བ་མེད་དོ། །མིང་ལ་དངོས་མེད་འདོད་མ་ཡིན། ཞེས་པའི་སྐབས་སུ། འོ་ན་སྒྱུ་མའི་ཏིང་ངེ་འཛིན་གྱི་སྐབས་འདིར། ལོག་རྟོག་སྒྱུ་མ་དང་རྟེན་འབྲེལ་སྒྱུ་མ་བསྒོམ་ལམ་མི་བསྒོམ་མི་བསྒོམ་ན་སྒྱུ་མའི་ཆོས་དྲུག་བསྒོམ་པ་དང་འགལ། བསྒོམ་ན་དེས་གྲོལ་ལམ་མི་གྲོལ། མི་གྲོལ་ན་བསྒོམ་པ་དོན་མེད་དུ་ཐལ། གྲོལ་ན་ཁམས་གསུམ་གྱི་སེམས་ཅན་ཐམས་ཅད་འབད་པ་མེད་པར་གྲོལ་བར་ཐལ། ཅིས་ནས། ལོག་རྟོག་དང་རྟེན་འབྲེལ་བསྒོམ་པའི་ཕྱིར་རོ་ཞེ་ན། ལན་ནི། ཁ་ཅིག་ན་རེ་མི་བསྒོམ་ཟེར་རོ། །འོ་ན་སྒྱུ་མའི་ཆོས་དྲུག་བསྒོམ་པར་བཤད་པ་དོན་མེད་དོ། །བྱས་པས། དོན་ཡོད་དེ། ཤེས་ནས་སྤང་བར་བྱ་བ་ཡིན་ལ་བསྒྲུབ་པར་བྱ་བ་མིན་གསུང་སྟེ། ལེགས་སོ། །ཁ་ཅིག་ན་རེ། ལོག་རྟོག་དང་རྟེན་འབྲེལ་གཉིས་བསྒོམ་མམ་མི་བསྒོམ་ཟེར་རམ། ལོག་རྟོག་སྒྱུ་མ་དང་རྟེན་འབྲེལ་ལ་སྒྱུ་མ་བསྒོམ་མམ་མི་བསྒོམ་ཟེར། དང་པོ་ཟེར་ན་མི་བསྒོམ་མོ། །འོ་ན་སྒྱུ་མའི་ཆོས་དྲུག་སྨོས་པ་ལ་དགོས་པ་མེད་ཅེ་ན། ནོར་བའི་ཤེས་རབ་དམིགས་བསལ་བའི་དགོས་པ་ཡོད་དོ། །གཉིས་པ་ཟེར་ན་བསྒོམ་མོ། །གྲོལ་ལམ་མི་གྲོལ་ཞེ་ན་གྲོལ་ལོ། །སེམས་ཅན་ཐམས་ཅད་འབད་མེད་དུ་གྲོལ་བར་ཐལ་ཞེ་ན། ཅིའི་ཕྱིར། བསྒོམ་པའི་ཕྱིར། ཞེ་ན། ལོག་རྟོག་དང་རྟེན་འབྲེལ་རང་རྒྱུད་ལ་བསྒོམ་པའི་ཕྱིར་ཟེར་རམ། ལོག་རྟོག་སྒྱུ་མ་དང་རྟེན་འབྲེལ་སྒྱུ་མ་བསྒོམ་པའི་ཕྱིར་ཟེར། དང་པོ་ལྟར་ན་གཏན་ཚིགས་མ་གྲུབ་སྟེ། རྟེན་འབྲེལ་དང་ལོག་རྟོག་རང་རྒྱུད་པ་མི་བསྒོམ་མོ། །གཉིས་པ་ལྟར་ན་འདོད་པ་ཡིན་ཏེ། །མདོར་ན་སེམས་ཅན་རྣམས་ཀྱི་ལོག་རྟོག་དང་རྟེན་འབྲེལ་རང་རྒྱུད་པ་བསྒོམས་པས་མི་གྲོལ་ལ། འདིར་ལྷག་པ་ཀུན་རྫོབ་ཅེས་བྱ་སྟེ། ལོག་རྟོག་སྒྱུ་མ་དང་རྟེན་འབྲེལ་སྒྱུ་མ་བསྒོམ་སྟེ། མདོར་ན་སྒྱུ་མ་ཙམ་དུ་བསྒོམས་ན་གྲོལ་བར་འདོད་པའོ། །ཚོར་ནས་ལོ་རྒྱུས་བཤད་པས་ཞི། ཞེས་པ་ནི། སྐྱོན་ཆེ་ཆུང་གང་ཡིན་ཡང་སྐྱོན་ཚོར་ནས་སྤང་སླ་སྟེ། ལོ་རྒྱུས་བཤད་པས་ཞི་བའོ། །ཇི་ལྟར་བཤད་པས་ཞི་ན། སྐྱོན་བྱུང་བའི་ཚེ་སྐྱོན་དུ་ངོ་ཤེས་ནས་གོང་དུ་ལོ་རྒྱུས་བཤད་པའི་མི་བསལ་ཤིན་ཏུ་བུལ་བར་བྱེད། ཅེས་གསུངས་པས། སྐྱོན་དེ་ལྟ་བུ་ཡོད་དོ་སྙམ་དུ་ཤེས་པས་ཞི་འོ། །ཡང་ན་སྐྱོན་དེ་དང་པོ་གང་ནས་བྱུང་བའི་ལོ་རྒྱུས་རྩད་བཅད་པས། བྱུང་ས་མ་རྙེད་དེ་སེམས་ཉིད་དུ་ཤེས་པས་ཞིའོ། །ཡང་ན་རྟོག་པའི་གནས་ཡུལ་ལྟ། ཞེས་པ། དེ་ལྟར་བྱས་པས་མ་ཞི་ན་རྟོག་པའི་གནས་ཡུལ་ལྟ་སྟེ། རྟོག་པའི་སྐྱོན་དེ་རང་ཇི་ལྟ་བུ་གཅིག་འདུག་བལྟས་པས། རྟོགས་པས་བརྟག་མ་ཐུབ་སྟེ། ངེས་གཟུང་མེད་པས་རང་ཞིར་འགྲོའོ། །འབྱུང་བ་བཞི་ཡི་གཉེན་པོས་གཞིལ། །ཅེས་པ། འབྱུང་བ་འཁྲུགས་པའི་སྐྱོན་ནི། གོང་དུ་མི་གསལ་མདོག་མཐིང་ཁམས་འཁྲུགས་ལྟར་ཞེས་གསུངས་པ་ཡིན་ནོ། །དེ་དང་མཐུན་པའི་གཉེན་པོས་འཇིལ་བའོ། །དེ་ཡང་འབྱུང་བ་ས་ཤས་ཆེ་ན་ཁོང་པར་རྡོ་བཅུག་པ་དང་འདྲ་སྟེ་བདུད་རྩི་སྦྱར་ལ་ཟ་བར་བྱའོ། །འབྱུང་བ་ཆུ་ཤས་ཆེ་ན་བདེ་བ་མེད་པར་བྱང་ཆུབ་སེམས་འཛག་སྟེ། དེ་ལ་སྤྲུལ་བའི་འཁོར་ལོའི་གནས་སུ་དྲོད་མེད་མེ་མར་ཙམ་གཅིག་བསྒོམ་ལ་བསྲེག་གོ །འབྱུང་བ་མེ་ཤས་ཆེ་ན་ཁ་སྐོམ་གདོང་པའི་མདངས་འཆོར། དེ་ལ་དྲི་ཆུའི་བཅུད་ལེན་བྱའོ། །འབྱུང་བ་རླུང་ཤས་ཆེ་ན་མགོ་མཇུག་མེད་པར་འདར་ཏེ། དེ་ལ་ཤ་ཆེན་གྱི་བཅུད་ལེན་བྱའོ། །ཡང་ན་འབྱུང་བ་ཆུ་ཤད་ཆེ་ན་དྲོད་ཀྱི་སྨན་མར་བརྟེན་ནོ། །མེ་ཤས་ཆེ་ན་བསིལ་གྱི་ཕྱེ་མ་བརྟེན། རླུང་ཤས་ཆེ་ན་འཇམ་རྩི་དང་ཟས་བཅོས་བརྟེན། ས་ཤས་ཆེ་ན་དྲོད་ཀྱི་སྨན་སྦྱོར་བྱའོ། །སྔོན་བཞིན་སྔར་འབྲངས་ཕྱིས་སྔོན་བྱེད། ཅེས་པ་ནི། སྔོན་དེ་བཞིན་ཉིད་ཀྱི་ཏིང་ངེའི་སྐབས་བཞིན་དུ། སྔར་འབྲངས་ཀྱི་སྐྱོན་ནི་གོང་གི་བག་ཆགས་རྙིང་པ་ཡིད་ལ་དྲན་པ་ཡིན་ལ། ཕྱིས་སྔོན་བྱེད་ནི་ངས་འདི་བྱ་དང་རྣམ་པ་འདི་བྱའི་བག་ཆགས་ཡིད་ལ་བྱུང་བའོ། །ད་ལྟ་རང་བཞིན་རྐྱེན་གྱིས་སྐྱེ། ཞེས་པ། ད་ལྟ་ཡུལ་ལྔ་ལ་བརྟེན་ནས་དངོས་སུ་འཕྲོ་བའི་རྟོག་པ་སྣ་ཚོགས་སོ། །དེ་ལྟ་བུ་ཡིན་པར་ཤེས་ནས་སྤང་ངོ་། །འོབ་འགྱེས་འཐིམ་པས་རི་དྲག་ཆུ། ཞེས་པ་ནི། ཉམས་གཡོ་བའི་དུས་སུ་ནི། ཏིང་ངེའི་ཕྱོགས་སུ་བློ་འབོ་ཞིང་འགྱེས་ལ། ཏིང་ངེ་ལ་བློ་ནང་དུ་ཐིམ་པས་ཤིན་ཏུ་མྱུར་བར་སློབ་བོ། །རི་དྲག་ཆུ། ཞེས་པ་ནི། དཔེར་ན་རི་དྲག་པོའི་ཆུ་དང་འདྲ་སྟེ་བློ་མི་གཏོད་པར་ཏིང་ངེ་ལ་རྩོལ་བ་དྲག་ཏུ་བྱེད་པའོ། །ཅུང་ཟད་ཐུན་གྱི་སུམ་ཆར་ཡོད། ཅེས་པ་ནི། གཡོ་བའི་ཉམས་ལ་ཐུན་སུམ་ཆར་གནས་པ་ཡོད་དོ། །བཞི་ཆ་ལྔ་ཆར་དེ་མེད་ཐོབ། ཅེས་པ་ནི། ཐོབ་པའི་ཉམས་ཀྱི་སྐབས་སུ་ཐུན་གྱི་བཞི་ཆའམ་ལྔ་ཆར་དེ་མེད་ཐོབ་སྟེ། དེ་ཡང་གཡོ་བའི་ཉམས་ཀྱི་སྐབས་སུ་སྐྱོན་དང་འདྲེས་མར་ཐོབ་པ་ལས། འདིར་དེ་ལྟར་མེད་དེ། སྐྱོན་དེ་ལྟར་མེད་པར་ཐོབ་བོ། །འོ་ན་གཡོ་བའི་ཉམས་ལ་ཐུན་གྱི་སུམ་ཆ་ཐོབ་ལ། ཐོབ་པ་ལ་བཞི་ཆ་ལས་མེད་པས། ལམ་གོང་དུ་བགྲོད་པ་དོན་མེད་དེ། ཉམས་ངན་དུ་སོང་ནས་འདུག་པ་ཞེ་ན། དེ་ལྟར་མ་ཡིན་ཏེ། གཡོ་བའི་སྐབས་སུ་ཐུན་གྱི་སུམ་ཆ་ཐོབ་ཀྱང་། སྐྱོན་དང་འདྲེས་མ་ཡིན་ལ། ཐོབ་པའི་སྐབས་སུ་བཞི་ཆ་ལས་མ་ཐོབ་ཀྱང་། སྐྱོན་དང་མ་འདྲེས་པའི་ཏིང་ངེ་འཛིན་ཡིན་ཏེ། དེ་མེད་ཅེས་པ་འདིས་ཤེས་པ་ཡིན་ནོ། །ཡང་ན་གཡོ་བའི་ཉམས་ཀྱི་སྐབས་སུ་དྲུང་ཅུ་རྩ་བཞིའི་སུམ་ཆ་ཐོབ་པ་ཡིན་ནོ། །ཐོབས་པའི་ཉམས་ཀྱི་སྐབས་སུ་སུམ་ཅུ་སོ་གཉིས་ཀྱི་བཞི་ཆ་ཡིན་པས་མིང་དེ་ལྟར་བཏགས་ཀྱང་དོན་བཞི་ཆ་རིགས་གསུངས་ཏེ། དོན་ལ་གཉིས་ཀ་འཐད་དོ། །ཐུན་བསྐྱང་ནུས་ཤིང་གསལ་ལྡན་ན། ཞེས་པ། གོམས་པའི་ཉམས་ཀྱི་སྐབས་སུ་སྐྱོན་ཕྲ་མོས་གནོད་མི་ནུས་པའི་ཐུན་བསྐྱང་ནུས་ཤིང་གསལ་བ་ཡིན་ཏེ། དཔེར་ན། ཆུ་ཀླུང་བུལ་འབབ་ཚུལ་བཞིན་ནོ། །ཞེས་པ་སྟེ། བརྩོན་པ་དྲག་པོ་མི་དགོས་པའི་དཔེ་ཡིན་ནོ། །སྒོ་གཏན་རྫས་ལྟར་རྟོག་རླུང་གིས། ཞེས་པ། དཔེར་ན་སྒོ་ལ་གཏན་པ་བཅུག་ན་ནང་གི་རྫས་མི་འགུལ་བ་བཞིན་དུ། མི་བསྒུལ་བཞི་ལ་གནས་པའོ། །ཞེས་པ། རྣམ་རྟོག་དྲག་པོའི་རླུང་གིས་མི་བསྒུལ་བར་གནས་པའོ། །དབང་པོའི་མངོན་སུམ་གང་བྱས་པ། ཞེས་པ། དཔེར་ན་རྫས་ཀྱི་དངོས་པོ་མིག་གི་དབང་པོས་མངོན་སུམ་དུ་བྱས་པ་དང་འདྲ་བར། ཤེས་རབ་ཀྱི་དབང་པོ་ཏིང་ངེ་། རྣལ་འབྱོར་གྱི་མངོན་སུམ་གང་བྱས་པ། ཞེས་པ། དཔེར་ན་རྫས་ཀྱི་དངོས་པོ་མིག་གི་དབང་པོས་མངོན་སུམ་དུ་བྱས་པའོ། །བསྐྱེད་དུ་བྱད་མེད་ཕྱིར་མཐའ་འོ། །ཞེས་པ། ཏིང་ངེ་འཛིན་གསལ་བར་མཐར་ཕྱིན་པ་སྐྱེད་དབྱུང་དུ་མེད་པ་ནི་མཐར་ཕྱིན་པའི་ཉམས་སོ། །ས་བོན་ཉི་འོད་སྐྱུར་སྒྲ་བཞིན། ཞེས་པ། དཔེར་ན་ཉི་མ་ལས་མ་གཡོས་པར་འོད་འབྱུང་བའམ། ས་བོན་ལས་མ་གཡོས་པར་མྱུ་གུ་བཞིས་འབྱུང་བ་བཞིན། སྐྱུར་གྱི་སྒྲ་ལས་མ་གཡོས་པར་རྣལ་འབྱོར་པས་དོན་བློ་ཡུལ་དུ་མངོན་སུམ་དུ་བྱེད་པ་བཞིན་དུ། འཕོ་བ་མེད་བཞིན་འགྱུར་སྣང་ཆེ། ཞེས་པ། ཡང་དག་གསར་ན་ལུས་ངག་ཡིད་གསུམ་སྒྱུ་མ་ལྟ་བུ་ལས་མ་གཡོས་པར། ལུས་འདི་གཞན་དུ་འཕོ་བར་སྣང་བའི་ཚེ་ཞེས་བྱའོ། །དབང་ཕྱུག་ཆེན་པོའི་གནས་ཉིད་དུ། ཞེས་པ་ནི། འབྲས་བུ་ལ་ལོག་པར་རྟོག་པ་བསལ་བ་ནི། དེ་ནི་ཉིད་ཀྱི་སྐབས་སུ་བཤད་པ་དང་མཐུན་ནོ། །ལམ་མཆོག་གསལ་བའི་སྒྲོན་མ་ལས། ལེའུ་བཞི་པའི་རྣམ་པར་འགྲེལ་བའོ།། །།ལེའུ་ལྔ་པར། གཉིས་མེད་ངང་ལ་ཕྱག་འཚལ་ནས། ཞེས་པ། དེ་བཞིན་ཉིད་ཀྱི་ཏིང་ངེ་འཛིན་གྱི་སྐབས་སུ་དོན་དམ་པའི་བདེན་པ་བསྟན་ཀུན་ཏུ་སྣང་གི་ཏིང་ངེ་འཛིན་གྱི་སྐབས་སུ་ཀུན་རྫོབ་ཀྱི་བདེན་པ་བསྟན། དེ་གཉིས་ཐ་དད་རིས་སུ་ཆད་པ་མ་ཡིན་ཏེ། སྣང་སྟོང་གཉིས་སུ་མེད་པ་དེ་ལྟ་བུའི་ངང་ལ་ཕྱག་འཚལ་ལོ། །གནས་གཅིག་ཡེ་ཤེས་སེམས་དཔའ་བསྒོམ། ཞེས་པ། གནས་གཅིག་ནི་ཐུགས་ཀ་སྟེ། ཙིཏྟ་རིན་པོ་ཆེའི་ནང་དུ་ཡེ་ཤེས་སེམས་དཔའ་ཚོན་གང་བ། སྐུ་མདོག་ཕྱི་རོལ་དང་འདྲ་བ་ཞལ་གཅིག་ཕྱག་གཉིས་བསྒོམ། དེའི་ཐུགས་དཀར་ཉི་མའི་དལ་གྱི་སྟེང་དུ་རྡོ་རྗེ་བསྒོམ། དེའི་ལྟེ་བར་ཡི་གེ་ཧཱུྃ་བསྒོམ། སྤྱི་མགྲིན་ཙིཏྟའི་གནས་གསུམ་དུ། ཞེས་པ། གོང་གི་ཐུགས་ཀའི་ཧཱུྃ་ལས་འོད་འཕྲོས་ཏེ་ཕྱོགས་བཅུའི་སངས་རྒྱས་ལ་ཕོག་པས་སྐུ་གསུང་ཐུགས་ཀྱི་དངོས་གྲུབ་བསྡུ། སླར་འདུས་ཏེ་སྐུའི་བྱིན་རླབས་སྤྱི་བོར་ཐིམ་པས་ཡི་གེ་ༀ་དུ་གྱུར། མགྲིན་པར་གསུང་གི་བྱིན་རླབས་ཐིམ་པས་ཡི་གེ་ཨཾ་དུ་གྱུར། ཐུགས་ཀྱི་བྱིན་རླབས་སྙིང་གར་ཐིམ་པས་ཡི་གེ་ཧཱུྃ་དུ་གྱུར། དེའི་ངང་ལ་ༀ་ན་མ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭཱ་བྷཱ་ཝ་ཨཏྨ་ཀོ྅་ཧཾ། ཞེས་པས། ༀ་འོད་དུ་ཞུ་ནས་རྣམ་པར་སྣང་མཛད་དུ་གྱུར་པར་བསམ། དེས་འགྲེ་ཨཱོཾ་ལ་སྔགས་བརྗོད་པས་སྣང་བ་མཐའ་ཡས། ཧཱུྃ་ལ་སྔགས་བརྗོད་པས་རྡོ་རྗེ་སེམས་པར་བསྒོམ་ཏེ་སྐུ་གསུང་ཐུགས་བྱིན་གྱིས་བརླབས་པའོ། །བྱིན་རླབས་རྡོ་རྗེ་གསུམ་བསྒོམ་བྱ། ཞེས་པ། དེ་ལྟར་ཡི་གེ་གསུམ་གྱི་བྱིན་གྱིས་བརླབས་ནས། ཡི་དམ་ལྷ་ཡི་སྐུ་གསུང་ཐུགས་རྡོ་རྗེར་བསྒོམས་པའོ། །དབུ་ཡི་གནས་ལྔར་ཡི་གེ་ལྔ། ཞེས་པ། སྤྱི་བོར་ༀ། མཚོག་མར་ཧཱུྃ། རྣ་ལྟག་གཡས་པར་སྭཱ། གཡོན་པར་ཧཱ། ལྟག་པར་ཨཱོཾ་བསྒོམ་མོ། ཡི་གེ་དབང་ལྔས་རྫོགས་པར་བརྒྱན། ཅེས་པ་དེ་ལྟར་ཡི་གེ་ལྔ་ལས། ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྟ་མ་ཀོ་྅་ཧཾ། ཞེས་པ་ལ་སོགས་པ། ཡིག་འབྲུ་རྣམས་འོད་དུ་ཞུ་བ་ལས་རིག་ལྔར་གྱུར་ཏེ་དབུ་བརྒྱན་པར་བསྒོམ་མོ། །ཡང་སྐབས་འདིར་འདི་སྐད་གསུང་སྟེ། ཕྱག་རྒྱ་གཅིག་པའི་སྐབས་སུ་ལྷ་དུ་མ་བསྒོམ་མམ་མི་སྒོམ། མི་སྒོམ་ན་གཞུང་དང་འགལ་ལ། བསྒོམ་ན་ཕྱག་རྒྱ་གཅིག་པ་མ་ཡིན་པར་ཐལ། ཞེ་ན། ལན་དུ་རྩ་བའི་ལྷ་དུ་མ་བསྒོམ་མམ་མི་བསྒོམ་ཟེར་རམ། ཡན་ལག་གི་ལྷ་དུ་མ་བསྒོམ་མམ་མི་སྒོམ་ཟེར། རྩ་བའི་ལྷ་དུ་མ་བསྒོམ་མམ་མི་སྒོམ་ཟེར་ན་མི་སྒོམ་ཟེར། ཡན་ལག་གི་ལྷ་དུ་མ་བསྒོམ་མམ་མི་སྒོམ་ཟེར་ན་སྒོམ་མོ། །ཕྱག་རྒྱ་གཅིག་པ་མ་ཡིན་པར་ཐལ་ཞེ་ན། ཅིའི་ཕྱིར། ཡན་ལག་གི་ལྷ་དུ་མ་བསྒོམ་པའི་ཕྱིར་ཟེར་ན་ཡན་ལག་དུ་མ་བསྒོམ་ཡང་རྩ་བ་གཅིག་ལས་མི་སྒོམ་པས་ཕྱག་རྒྱ་གཅིག་པ་ཡིན་ཏེ། དཔེར་ན་ཤིང་གི་སྡོང་པོ་བཞིན་ནོ། །བརྒྱད་མཐར་བྱིན་ཕབ་ལྷར་བསྐྱེད་ལ། ཞེས་པ། ཏིང་ངེ་འཛིན་གྱི་དཀྱིལ་འཁོར་ལ་གསལ་བརྟན་གྱི་ཚད་བརྒྱད་མཐར་ཕྱིན་ནས་དྲང་ཞིང་མཆོད་པ་དབུལ་ཞེས་པའི་དོན་ཡིན་ཏེ། གསལ་བརྟན་གྱི་ཚད་བརྒྱད་ནི། སང་ངེ་བ། ས་ལེ་བ། ལྷང་ངེ་བ། ལྷག་གེ་བ། མི་འགྱུར་བ། མི་འཕྲོག་པ། མི་གཡོ་བ། ཅིར་བསྒྱུར་ཡང་དུ་བཏུབ་པ་དང་བརྒྱད་ཡིན་ཏེ། དེ་ལྟར་གྱུར་ནས་སྙན་གསན་ཕབ་ལ་སྤྱན་དྲངས་ཞེས་པའམ། ཡང་ན་ཡན་ལག་བརྒྱད་མཐར་ཕྱིན་པར་བྱས་ལ། དེ་ནས་མཚམས་བཅད། བཤགས་པ་བྱ། བྱིན་ཕབ་ལ་ལྷར་བསྐྱེད་ལ་ཞེས་པར་ཡང་འགྱུར་རོ། །མཆོད་པ་བྱིན་བརླབས་བསྐུར་བསྒོམས་ལ། ཞེས་པ་ནི། བདག་ཉིད་ལས་ཀྱི་ལྷའི་སྐུར་བསྒོམས་ནས་མཆོད་པ་བྱིན་གྱིས་བརླབས་ཏེ། ཁྱད་པར་གྱི་མཆོད་པ་སྨན་རག་གཏོར་གསུམ་དང་། ཐུན་མོང་གི་མཆོད་པ་ལྔའམ་བདུན་ནམ། ལས་བྱང་ནས་འབྱུང་བ་བཞིན་དུ་བྱིན་གྱིས་བརླབ་བོ། །ཡན་ལག་ལྡན་བྱས་མཆོད་བསྟོད་བྱ། །ཞེས་པ། ཡན་ལག་ལྷག་པའི་ལྷ་དགུར་ལྡན་ཞིང་། རྫོགས་པར་གོང་དུ་བཤད་པ་བཞིན་དུ་བསྐྱེད་ལ། དེ་ནས་རང་བཞིན་གྱི་དཀྱིལ་འཁོར་སྙན་གསན་དབབ། སྤྱན་དྲངས་པ་གཉིས་སུ་མེད་པར་བསྟིམ། རིག་པའི་མེ་ཏོག་དོར་རོ། །བརྟན་པར་བཞུགས་སུ་གསོལ་ལོ། །མཆོད་པ་རྣམས་བྱ། བསྟོད་པ་རྣམས་བྱའོ། །ཞི་ཁྲོའི་ལས་བྱང་ནས་འབྱུང་བ་བཞིན་དུ་བྱའོ། །ཡན་ལག་མ་ཉམས་སྔགས་བཟླས་པ། ཞེས་པ། སྔགས་ཀྱི་ཡན་ལག་ལྔ་དང་ལྡན་ཞིང་དམ་ཚིག་གི་མ་ཉམས་པ་ཡིན་ཏེ། སྔགས་ཀྱི་ཡན་ལག་ལྔ་ནི་དབུ་རྒྱན་རིག་ལྔ་གཅིག་ཏུ་སྦྲེལ། སྐུ་གསུམ་ཐུགས་ཀྱི་ལྷ་གསུམ་སོ་སོར་བགྲངས། ཡེ་ཤེས་སེམས་དཔའ་དང་ལྔའོ། །དམ་ཚིག་ནི་སྤྱིར་སྐུ་གསུང་ཐུགས་གསུམ་ཀའི་དམ་ཚིག་མ་ཉམས་པ་དགོས་ལ། ཁྱད་པར་དུ་གསུང་གི་དམ་ཚིག་མ་ཉམས་པའོ། །དེ་ལྟ་བུ་དེས་སྔགས་བཟླས་པ་གང་ཞེ་ན། སྐྱོན་བཅུ་སྤངས་ཏེ་རྣམ་གསུམ་གྱིས། ཞེས་པ། བཟླས་པའི་སྐྱོན་བཅུ་ནི་རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པ་མ་ཡིན་བུལ་བ་མིན། །དྲག་པ་མ་ཡིན་ཞན་པ་མིན། །ཡིག་འབྲུ་ཡན་ལག་ཉམས་པ་མིན། །གཡེངས་བར་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པ་མིན། །ཅེས་པ་བཅུའོ། །རྣམ་གསུམ་ནི་གསལ་བ་རྣམ་པ་གསུམ་སྟེ། བདག་དམ་ཚིག་སེམས་དཔར་གསལ་བ་ལྷ་ཡེ་ཤེས་སེམས་དཔར་གསལ་བ་བར་གྱི་འཕྲོ་འདུ་སྔགས་སུ་གསལ་བ་གསུམ་མོ། །བཟླ་ཐབས་གསུམ་ནི་འོག་ནས། ཕྱི་ནང་གསང་བ་གང་མོས་སུ། ཞེས་པ་སྟེ་བཟླ་ཚུལ་ལོ། །དེ་ཡང་ཕྱི་ལྟར་བཟླས་པ་དང་། ནང་ལྟར་བཟླས་པ་དང་། གསང་བ་ལྟར་བཟླས་པའོ། །དེ་གསུམ་གྱི་ཁྱད་པར་ཡང་འདོད་པ་མི་མཐུན་མང་དུ་གསུང་སྟེ། ཁ་ཅིག་ན་རེ། དམ་ཚིག་གི་ལྷ་དང་ཡེ་ཤེས་ཀྱི་ལྷ་ཕྱེ་ནས་བཟླས་པ་ནི་ཕྱི་ལྟར་བཟླས་པ་ཡིན། དམ་ཚིག་དང་ཡེ་ཤེས་ཐ་དད་མེད་པར་བཟླས་པ་ནི་ནང་ལྟར་བཟླས་པ་ཡིན། དམ་ཚིག་དང་ཡེ་ཤེས་ཞལ་དང་ཁ་རུ་འཁོར་བར་ཟློས་པ་གསང་བ་ལྟར་བཟླས་པ་ཡིན་གསུངས་ཏེ། དེ་ལྟར་བྱེད་ན། སྥ་ར་ཎ་ཕཊ་ཀྱིས་ཡེ་ཤེས་པ་མདུན་གྱི་ནམ་མཁའ་ལ་ཕྱེ་ནས། བདག་དང་ཡེ་ཤེས་སེམས་དཔའི་སྙིང་གའི་ཐུགས་ཀའི་ཡིག་འབྲུ་ལ་སྔགས་ཀྱིས་བསྐོར་བ་གསལ་བཏབ་ལ། དམ་ཚིག་གི་ཐུགས་ཀ་ནས་ཡིག་འབྲུ་བྱང་ཆུབ་སེམས་ཀྱི་འོད་ཟེར་དང་བཅས་པ་ཞལ་ནས་ཕར་ལ་འཕྲོས་ཏེ། ཡེ་ཤེས་ཀྱི་ལྷའི་ཞལ་དུ་ཞུགས། ཀླད་པའི་རྒྱས་སམ་ཐུགས་ཀའི་ཧཱུྃ་ལ་ཐིམ། རྩ་ཨ་ཝ་དྷུ་ཏིའི་ནང་ན་མར་ལ་ཞུགས། གསང་བའི་རྡོ་རྗེ་ནས་འཕྲོས་ནས་འཕགས་པ་ལ་མཆོད་པ་ཕུལ། སེམས་ཅན་གྱི་སྒྲིབ་པ་སྦྱངས་ནས། བདག་གི་རྡོ་རྗེའི་ནང་དུ་ཞུགས་ཏེ། ཐུགས་ཀར་ཐིམ་པར་ཡིན་ནོ། །དེ་ནི་ཕྱི་ལྟར་འཕྲོ་འདུ་བྱའོ། །ནང་ལྟར་བྱེད་ན་ཡེ་ཤེས་སེམས་དཔའ་མི་འབྱེད་པར། བདག་གི་ཐུགས་ཀ་ནས་ཡིག་འབྲུའི་འོད་ཟེར་ཞལ་ནས་ཕར་ལ་འཕྲོས་ཏེ། འཕགས་པ་མཆོད་སེམས་ཅན་གྱི་དོན་བྱས་ནས། སླར་ལ་རྡོ་རྗེའི་ནང་དུ་འདུས་ཏེ་རྩ་དབུ་མར་ཞུགས་ཏེ་ཐུགས་ཀར་ཐིམ་མོ། །གསང་བ་ལྟར་བྱེད་ན་ཡེ་ཤེས་སེམས་དཔའ་མདུན་དུ་ཕྱེ་ལ། བདག་གི་ཐུགས་ཀ་ནས་ཡིག་འབྲུ་ཞལ་ནས་ཕར་ལ་འཕྲོས་ཏེ་ཡེ་ཤེས་སེམས་དཔའི་ཞལ་དུ་ཐིམ་སྟེ། རྩ་དབུ་མར་ཞུགས་ཏེ་རྡོ་རྗེ་ནས་ཐོན་ནས། བདག་གི་ཞལ་དུ་ཞུགས་ནས་ཐུགས་ཀར་ཐིམ་པར་འདོད་དོ། །ཡང་ན་འདི་ལྟར་བྱེད་དེ། བདག་དང་ཡེ་ཤེས་པ་ཕྱེ་ནས་ཟློས་པའི་དུས་སུ་ཕར་འཕྲོས་ནས་སེམས་ཅན་གྱི་དོན་བྱས་པ་མཐུན་ལ། ཚུར་འདུས་ནས་བདག་གི་སྒྲིབ་པ་སྦྱངས་ནས་དངོས་གྲུབ་ཀྱི་སྣོད་དུ་རུང་བར་བྱས་པ་ཕྱི་ལྟར་བཟླས་པ་ཡིན། ཡང་ཕར་འཕྲོས་ནས་འཕགས་པ་མཆོད་ནས། ཚུར་འདུས་ནས་དངོས་གྲུབ་ཐོབ་པར་འདོད་པ་ནང་ལྟར་བཟླས་པ་ཡིན། ཕར་མི་སྤྲོ་བར་ཚུར་ལ་དངོས་གྲུབ་འབའ་ཞིག་སྡུད་པ་ནི་གསང་བ་ལྟར་བཟླས་པ་ཡིན་གསུང་སྟེ་ལེགས་སོ། །ཡང་ཕྱི་བ་སྤུའི་བུ་ག་ནས་འཕྲོ་འདུ་བྱེད། ནང་ཐུགས་ཀ་ནས་འཕྲོ་འདུ་བྱེད། གསང་བ་མཁའ་མཚམས་ནས་འཕྲོ་འདུ་བྱེད་གསུངས་པ་ཡང་ཡོད། ཡང་ན་ཕྱི་སྐུ་གསུང་ཐུགས་གསུམ་ཆར་བརྒྱུད་ནས་འཕྲོ་འདུ་བྱེད། ནང་ཡེ་ཤེས་སེམས་དཔའ་གཅིག་པུའི་འཕྲོ་འདུ་བྱེད། གསང་བ་དྲག་སྟོང་དབྱེར་མེད་དུ་ཟློས་ཟེར་བ་ཡང་ཡོད། དེ་ལྟར་གསུམ་ཆར་རམ་ཡང་ན་གང་རུང་གཅིག་ཚད་དུ་ཕྱིན་པ་ཡིས་ཞེས་བྱའི། བཟླས་པའི་གྲངས་བཞིན་རྫོགས་པར་བྱ། །ཞེས་པ། གྲངས་ཀྱི་བསྙེན་པའམ། དུས་ཀྱི་བསྙེན་པའམ། མཚན་མའི་བསྙེན་པ་རྫོགས་པར་བྱ་བ་ཡིན་ཏེ། གྲངས་ཀྱི་བསྙེན་པ་ནི་ཐུན་རེ་རེ་ལ་སྔགས་འདི་ཙམ་རེ་བཟླས་སྙམ་པའམ། སྤྱིར་འདི་ཙམ་གཅིག་བཟླས་སྙམ་དུ་དམ་བཅའ་བ་ཡིན། དུས་ཀྱི་བསྙེན་པ་ནི། ཟླ་བ་གཅིག་བྱ་སྙམ་པའམ། ལོ་གཅིག་བྱ་སྙམ་དུ་དམ་བཅས་པ་ཡིན་ཏེ། མཚན་མའི་བསྙེན་པ་ནི། ཕྱག་རྒྱ་གཅིག་པ་ལ་ཉམས་མཐར་མ་ཕྱིན་གྱི་བར་དུ་བསྙེན་པ་བྱེད་པ་ཡིན་ནོ། །དུབ་ན་ཡེ་ཤེས་ཐིག་ལེ་ལྟ། ཞེས་པ། སྔགས་དང་ཏིང་ངེ་འཛིན་གྱིས་དུབ་ན། རྩ་དབུ་མའི་ནང་ན་མི་རྟོག་པའི་ཐིག་ལེ་ཡུངས་འབྲུ་ཙམ་གཅིག་ཡོད་པས་དེ་ལ་དམིགས་པ་གཏད་དེ་ལྟའོ། །དེ་ཡང་མེ་སྟག་ཕུས་བཏབ་པ་ལྟར་འདུག་པར་བསྒོམ་མོ། །ཡང་ན་ལྷ་ཚོགས་རྣམས་རིམ་པར་བསྡུས་ཏེ་ཐུགས་ཀའི་ༀ་ལ་ཐིམ། ཧཱུྃ་ཡང་རིམ་པར་བསྡུས་ཏེ་མཇུག་ཏུ་ཐིག་ལེ་ལ་ཐིམ་སྟེ། ཐིག་ལེ་དེ་ལ་དམིགས་པ་གཏད་དེ་སྒོམ་མོ། །དེས་ནི་མི་རྟོག་པའི་ཡེ་ཤེས་རྒྱུད་ལ་སྐྱེ་བའི་རྒྱུར་འགྱུར་རོ། །སྨིག་རྒྱུ་དུ་བ་སྲིན་མེ་ཁྱེར། །ཞེས་པ་ནི་ཉམས་དཔེ་ཡིན་ཏེ། གཡོ་བའི་དུས་སུ་ཏིང་ངེ་འཛིན་མི་གསལ་བ། སྨིག་རྒྱུ་བཞིན་དུ་བྲང་དྲོད་འབྱུང་། ཐོབ་པའི་ཉམས་ཀྱི་སྐབས་སུ་མི་བརྟན་པ་དུ་བ་བཞིན་དུ་རེས་ཡོད་རེས་མེད་དུ་འབྱུང་། གོམས་པའི་ཉམས་ཀྱི་སྐབས་སུ་གསལ་ལ་སྟོབས་ཆུང་བ་སྲིན་བུ་མེ་ཁྱེར་བཞིན་དུ་འབྱུང་། བརྟན་པའི་ཉམས་ཀྱི་སྐབས་སུ་གསལ་བ་མར་མེ་ཙམ་དུ་འབྱུང་། མཐར་ཕྱིན་པའི་ཉམས་ཀྱི་སྐབས་སུ་གསལ་ལ། མཐར་ཕྱིན་པ་ཉི་མ་བཞིན་དུ་འབྱུང་། དེ་ལྟར་ཉམས་ལྔ་སྐྱེ་བའི་ཚུལ་དང་སྦྱར་རོ། །བཏང་སྙམས་རིམ་དང་བརྩོན་པ་དག་ཅེས་པ། ལམ་གྱི་ཉམས་ལྔ་ལ། བཏང་སྙོམས་གསུམ་དང་བརྩོན་འགྲུས་གཉིས་བྱས་ཏེ། །དང་པོ་ཉམས་གཡོ་བ་ལ་སྩོལ་བ་དང་བཅས་པའི་བཏང་སྙོམས་བྱ། ཐོབ་པའི་ཉམས་ལ་རྩོལ་བ་མེད་པའི་བཏང་སྙོམས་བྱ། གོམས་པའི་ཉམས་ལ་དུས་ཕྱད་པའི་བཏང་སྙོམས་བྱ། བརྟན་པའི་ཉམས་ལ་བརྩོན་འགྲུས་འདོར་བར་བྱས་པ། མཐར་ཕྱིན་པའི་ཉམས་ལ་བརྩོན་འགྲུས་མ་དོར་བར་བྱས་ཏེ། དེ་ལྟར་ཉམས་ལྔ་སྐྱེ་བའི་སྐབས་ལ་བཏང་སྙོམས་བླང་དོར་བྱའོ། །ནང་གི་སྦྱིན་སྲེག་བླང་བར་བྱ། ཞེས་པ། རྒྱུན་གྱི་སྤྱོད་ལམ་ཡིན་ཏེ། བཟའ་བཏུང་ལ་ལོངས་སྤྱོད་པའི་ཚེ་ན། བདག་ཡི་དམ་ལྷར་གསལ་བའི་ཐུགས་ཀར་ཡེ་ཤེས་སེམས་དཔའ་སྲེག་ལྷའི་ཚུལ་དུ་བསྐྱེད། ཁ་ཧོམ་ཁུང་དུ་བསྐྱེད། ལག་པ་གཡས་པ་དགང་གཟར། གཡོན་པ་བླུག་གཟར། ཟས་ཟོས་པའི་ཚེ་ལྕེ་མེ་དཔུང་འབར་བར་བསམ་ལ་ཟོས་པས་སྲེག་ལྷ་ལ་མཆོད་པ་ཕུལ་བར་བསམ། དེ་ནས་ཟས་ཁོང་དུ་སོང་བས་བསྲེག་རྫས་བདུད་རྩིར་ཞུ་ནས་ཐུགས་ཀའི་ཡེ་ཤེས་སེམས་དཔའི་ཞལ་དུ་གསོལ་བར་བསམ་མོ། །རྣམ་སྨིན་རིགས་ལ་ཐེ་ཚོམ་མེད། །ཅེས་པ་ནི། ཐོད་རྒལ་སྟོན་པ་ཚིག་ཡིན་ཏེ། །སྤྱིར་ཐོད་རྒལ་བ་ལ་ཆོས་བཞིས་གཏན་ལ་འབེབས་པ་ཡིན་ཏེ། ཐོད་རྒལ་ལ་དེ་གང་ནས་འབྱུང་བའི་ལམ་དང་གཅིག །ཇི་ལྟར་འབྱུང་བའི་ཚུལ་དང་གཉིས། འབྱུང་མི་འབྱུང་གི་རྒྱུ་མཚན་བསྟན་པ་དང་གསུམ། སྒྲོས་འདོགས་ཀྱི་བློས་ཐ་སྙད་བསལ་བ་དང་བཞིའོ། །གང་ནས་འབྱུང་བ་ལ་གཉིས་ཏེ། ཟག་བཅས་ཐོད་རྒལ་དང་ཟག་མེད་ཀྱི་ཐོད་རྒལ་ལོ། །ཟག་བཅས་ལ་གསུམ་སྟེ། ཕྱག་རྒྱ་གཅིག་པ། སྤྲོས་པ། ཚོགས་སྒྲུབ་གསུམ་ནས་འབྱུང་ངོ་། །ཟག་མེད་ནི་ཕྱག་རྒྱ་ཆེན་པོ་དང་། ཚེ་དབང་གཉིས་ནས་འབྱུང་། གཉིས་པ་ཇི་ལྟར་འབྱུང་བའི་ཚུལ་ནི། ཕྱག་རྒྱ་གཅིག་པ་ནས་ལམ་གསུམ་བཞག་སྟེ། རྣམ་སྨིན་ལ་སྦྱོར་ཏེ། འདི་ནས་ཀྱང་། རྣམ་སྨིན་རིག་པ་ཐེ་ཚོམ་མེད། ཅེས་བཤད་པ་དང་། ལམ་ཆུང་ལས། ཕྱག་རྒྱ་གཅིག་བརྟན་འཕོ་བ་ཡང་། ཁྱུང་དང་སེང་གེ་ཇི་བཞིན་དུ། སྤྲོས་ཚོགས་སྐབས་ནས་སྨོས་ཅི་དགོས། ཞེས་སོ། །སྤྲོས་པ་ནས་ཀྱང་རིག་འཛིན་ལ་སྦྱོར་ཏེ། ཕྱི་མར་བར་དོའམ་གཉིས་འཛིན་འབྱོར་ཞེས་སོ། །ལམ་ཆུང་ལས། སྤྲོས་ཚོགས་སྐབས་ན་སྨོས་ཅི་དགོས། ཞེས་བཤད་དོ། །ཚོགས་སྒྲུབ་ནས་ཀྱང་བློ་ཆེན་མཐོང་ལམ་བོར་ནས་ཕྱག་རྒྱ་ཆེན་པོ་ལ་སྦྱོར་ཏེ། སྤར་ཁབ་ལས། ཡོ་བྱད་རྣམ་པ་བཞི་ལ་ལྟ་སྤྱོད་གསུས་སུ་མེད་པས་བསྒྲུབས་ན་འབྲས་བུ་ཆེན་པོའི་རིག་འཛིན་ཐོབ་བོ་ཞེས་བཤད་དོ། །ཟག་མེད་ཀྱི་ཐོད་རྒལ་ཡང་ཚེ་དབང་ནས་སངས་རྒྱས་ཀྱི་བར་ལ་སྦྱར་ཏེ། ལམ་ཆུང་ལས། ཁ་ཅིག་དབང་བསྒྱུར་རིགས་ཉིད་ནས། བཅུ་དྲུག་རྒྱུན་གྱི་དབང་ལྔ་རྫོགས། ཞེས་སོ། །ཡང་ཚེ་དབང་ནས་མཐར་ལམ་ལ་སྦྱོར་ཏེ། རྒྱ་དོར་ཅིག་ཅར་མཐར་འགྲོ་བ། ཞེས་སོ། །ཕྱག་རྒྱ་ཆེན་པོ་ནས་སངས་རྒྱས་ཀྱི་ས་ལ་སྦྱོར་ཏེ། ཁ་གཅིག་ཕྱག་རྒྱ་ཆེན་པོ་ནས། །བླ་མེད་ཀུན་ཏུ་བཟང་པོར་སྦྱོར། །ཅེས་སོ། །དེ་རྣམས་མ་ཡིན་པ་རྣམས་ལ་ནི་ཐོད་རྒལ་མེད་དོ། གསུམ་པ་ཐོད་རྒལ་འབྱུང་མི་འབྱུང་གི་རྒྱུ་མཚན་ནི། སྤྱིར་ཐོད་རྒལ་འབྱུང་བ་ལ་ཆོས་གསུམ་དང་ལྡན་དགོས་ཏེ། ལམ་གཞན་གོང་ན་བགྲོད་དུ་ཡོད་པ་དང་གཅིག །དབྱེར་མེད་སྒོམ་ནུས་པ་དང་གཉིས། བློ་ཆེ་བ་དང་གསུམ་མོ། །དེ་རྣམས་དང་ལྡན་ན་ཐོད་རྒལ་འོང་ལ། མི་ལྡན་ན་མི་འོང་ངོ་། །དེ་བས་དེ་བཞིན་ཉིད་དང་ཀུན་ཏུ་སྣང་གཉིས་ཀྱིས་དབྱེར་མེད་སྒོམ་མི་ནུས་པས་ཐོད་རྒལ་མི་འབྱུང་ངོ་། །རྣམ་སྨིན་ནི་བློ་ཆུང་བས་མི་འབྱུང་སྟེ། སྟོབས་ཆུང་བསྐྱེད་མོས་ཞན་པའི་ཕྱིར། ཞེས་གསུངས་སོ། །ལྷུན་གྲུབ་ལ་ལམ་གཞན་གོང་ན་བགྲོད་བྱ་མེད་པས་མི་འོང་སྟེ། སངས་རྒྱས་ཀྱི་ས་ལ་སྦྱོར་བ་ལ་ལམ་གཞན་གྱིས་བར་མ་ཆོད་པ་ཡིན་ནོ། །བཞི་པ་སྒྲོ་འདོགས་ཀྱི་བློས་ཐ་སྙད་བསལ་བ་ནི། ཁ་ཅིག་ན་རེ། སྟོང་པ་ཆེན་པོ་ནས་ཀྱང་ཐོད་རྒལ་འབྱུང་བར་འདོད་དོ། །མངོན་བྱས་ལྷག་པའི་ཆོས་སྐུར་སྦྱོར། ཞེས་བཤད་པས་ཆོས་སྐུ་ལ་སྦྱོར་ཟིན་ཏེ་ནོར་རོ། །ལུང་དེ་ནི་དེ་བཞིན་ཉིད་དང་ཆོས་སྐུ་གཉིས་སྟོང་པ་ཙམ་དུ་ཆོས་མཐུན་པར་བཤད་པ་སྟེ། དངོས་སུ་སྦྱོར་བ་མིན། འདི་ཉིད་རང་ནས་ཕྱོགས་མཐུན་བརྗོད་ཀྱི་དངོས་མ་ཡིན། ཅེས་སོ། །འོ་ན་གཅིག་སྤྲོས་ནས་ཐོད་རྒལ་འབྱུང་བ་དེ་ཡང་དངོས་སུ་སྦྱོར་བ་མིན་ཞེ་ན། དེ་ཡིས་མགོ་མི་བསྒྲེ་སྟེ། ཐོད་རྒལ་འོང་བ་ལ་ཆོས་གསུམ་ལྡན་དགོས་པ་ཡིན་ཏེ། འདིར་དབྱེར་མེད་སྒོམ་མི་ནུས་པ་ཡིན་ནོ། །ཁ་ཅིག་སྒྱུ་མ་ལྟ་བུ་ནས་ཐོད་རྒལ་ཡོང་བར་འདོད་དོ། །མི་ལྡོག་དབང་སྒྱུར་རིགས་སུ་ངེས། ཞེས་པས། ཚེ་དབང་ལ་སྦྱོར་བ་ཡིན་ཟེར་ཏེ་ནོར་རོ། ཅེས་ན། འདིར་དབྱེར་མེད་སྒོམ་མ་ནུས་པས་ཆོས་གསུམ་མ་ཚང་ངོ་། །ལུང་ནས་བཤད་པ་དེ་ཡང་དགོངས་པ་ཅན་ཡིན་ནོ། །སྒྱུ་མ་ལྟ་བུའི་ཏིང་ངེ་འཛིན་གྱིས་རིག་པ་ས་ལ་དབང་བསྒྱུར་ནས་སྐྱེ་བ་ཕྱི་མ་ལ་སྔགས་ཀྱི་ཐེག་པ་ལ་སྦྱོར་བའི་ཁུང་ཡིན་ནོ། །ཡང་ཁ་ཅིག་ན་རེ། ཚོགས་སྒྲུབ་ནས་ཐོད་རྒལ་མི་འོང་ཟེར་ཏེ། དེ་མི་འཐད་ཐོད་རྒལ་གྱི་ཆོས་གསུམ་ཀ་ཡང་ཚང་ལ། སྤར་ཁབ་ལས་ཀྱང་ཡོ་བྱད་རྣམ་པ་བཞི་ལྟ་སྤྱོད་གཉིས་སུ་མེད་པས་བསྒྲུབས་ན་འབྲས་བུ་ཕྱག་རྒྱ་ཆེན་པོའི་རིག་འཛིན་ཐོབ་བོ་ཞེས་བཤད་པ་ཡིན་ནོ། །དེ་རྣམས་ནི། གཞན་གྱིས་སྒྲོ་འདོགས་བསལ་བ་ཡིན་ནོ། །ཁོ་བོ་ནི་རྣམ་སྨིན་ལ་ཐོད་རྒལ་འོང་བར་འཐད་སྙམ། དེས་ཅིས་ཤེ་ན། མི་འོང་བའང་ཅིས། རྣམ་སྨིན་བློ་ཆུང་བས་ཐོད་རྒལ་མི་འོང་བ་ཡིན་ཞེ་ན། འོ་ན་ཕྱག་རྒྱ་གཅིག་པ་དང་རྣམ་སྨིན་གཉིས་ཕྱག་རྒྱ་གཅིག་པ་བློ་ཆེ་བར་ཐལ། ཕྱག་རྒྱ་གཅིག་པ་ལ་ཐོད་རྒལ་འོང་བའི་ཕྱིར་ཞེ་ན། འདོད་ཐོག་ནས་ལམ་གོང་དུ་བགྲོད་པ་དོན་མེད་དུ་ཐལ་ལོ། །ཡང་ཁོ་ན་རེ། རྣམ་སྨིན་དེ་ཕྱག་རྒྱ་གཅིག་པ་བས་བློ་མི་ཆུང་སྟེ། ལམ་ཁད་སྙོམས་པ་ཚེ་དབང་བ་བློ་ཆུང་བ་ཡིན་ཞེ་ན། འོ་ན་ཕྱག་རྒྱ་གཅིག་པ་ཡང་སྤྲོས་པ་བས་བློ་ཆུང་བས་ཐོད་རྒལ་མི་འབྱུང་བར་ཐལ་ལོ། །ཡུང་ལུང་གིས་མ་ཟིན་ཟེར་ན། ལམ་ཆུང་ལས། སྙམ་ཟིན་ཆེ་ཡི་ལུས་ཕྱེ་ནས། ལྷག་མ་ཡོད་མེད་ལུང་བསྟན་པ། མཐར་མ་དངོས་ལ་སྦྱོར་བ་བྱེད། ཅེས་ཟེར་བས། ཕྱག་རྒྱ་ཆེན་པོ་བོར་ནས་མཐར་ལམ་ལ་སྦྱོར་བ་ཡིན་ནོ། །འོན་ཀྱང་བླ་མ་རྣམས་ཀྱང་མི་གསུང་། གཞན་གསུངས་པ་ཡང་མ་ཐོས་པས་སྒྲོ་འདོགས་ཀྱི་བློར་ཤེས་པར་བྱའོ། །དེ་ཉིད་བར་ཕྱིའམ་ལན་གྲངས་གཞན། ཞེས་པ། ཐོད་རྒལ་བ་རང་ལ་ཡང་བློ་རབ་འབྲིང་གི་སྦྱོར་ཚུལ་གསུམ་སྟེ། རབ་འདི་ལ་སྦྱོར། འབྲིང་བར་དོ་ལ་སྦྱོར། ཐ་མ་ལན་གྲངས་གཞན་ལ་སྦྱོར་རོ། །འོ་ན་བར་དོ་ལ་རྣམ་སྨིན་ཐོབ་པ་དེ། ལུང་ལས་གྲུབ་པར་ཡོད་དམ་མེད། ཡོད་ན་བར་དོར་མི་བཏུབ་སྟེ། བར་དོ་འབྱུང་བ་ལས་གྲོལ་བ་ཡིན་ཏེ། ཡིད་ཀྱི་གཟུགས་སུ་བཤད་དོ། །འབྱུང་པའི་ལུས་སུ་མེད་ན་ཡང་རྣམ་སྨིན་མི་བཏུབ་སྟེ། རྣམ་སྨིན་ཚེ་སྔ་མའི་ལས་ཀྱི་རྣམ་སྨིན་ལས་གྲུབ་པའི་ལུས་དང་མ་བྲལ་བས་རྣམ་སྨིན་ཟེར་བ་ཡིན་ནོ་ཞེ་ན། ལན་ནི་ཁ་ཅིག་ན་རེ། བར་དོ་ལ་ཐོབ་པའི་རྣམ་སྨིན་དེ་ལུས་བག་ཆགས་ཀྱི་ཚུལ་དུ་ཡོད་ལ། དགོངས་པ་ལྷའི་སྐུར་གསལ་བ་ཡིན་ཏེ། དེ་ཡང་མི་འཐད། འོ་ན་ལུས་བག་ཆགས་ཀྱི་ཚུལ་དུ་ཡོད་པ་ལ་རྣམ་སྨིན་མི་བཏུབ་སྟེ་ངེས་ཚིགས་ཉམས་སོ། ཁོང་ཁ་ཅིག་ན་རེ། རྣམ་སྨིན་བར་དོ་ལ་ཐོབ་པ་སྟེ། ལུས་ནི་ལྷའི་སྐུ་ཡིན་ལ་དགོངས་པ་ནི་ཆོས་ཉིད་དོ་ཞེས་བཤད་དོ། །དེ་ཡང་མི་འཐད་དོ། །འོ་ན་ཕྱག་རྒྱ་ཆེན་པོ་དང་ཁྱད་མེད་དུ་ཐལ། ལུས་ལྷ་སྐུར་སྣང་བའི་ཕྱིར་རོ། །འོ་ན་ཇི་ལྟར་ཞེ་ན། འདི་ལ་ཚིག་གི་འཇུག་སྒོ་གསུམ་ཡོད་དེ། བར་དོ་རུ་ཐོབ་པ་དང་། བར་དོ་ལ་ཐོབ་པ་དང་། བར་དོ་ནས་ཐོབ་པ་དང་གསུམ་མོ། །བར་དོ་རུ་ཐོབ་པ་ནི། ཚེ་འདིར་ཚོགས་སྒྲུབས་ཀྱང་བདེན་པ་མ་མཐོང་སྟེ་རྣམ་སྨིན་མ་ཐོབ་པ་ལ་ལུས་དང་བྲལ་མ་ཐག་ཏུ་འཆི་བའི་འོད་གསལ་ལ་བརྟེན་ནས། བདེན་པ་མཐོང་སྟེ་རྣམ་སྨིན་ཐོབ་བོ། །བར་དོ་ལ་ཐོབ་པ་ནི། ཚེ་འདིར་ཚོགས་བསྒྲུབས་ཀྱང་བདེན་པ་མ་མཐོང་སྟེ་རྣམ་སྨིན་མ་ཐོབ་པ་ལ་ལུས་དང་བྲལ་མ་ཐག་ཏུ་འཆི་བའི་འོད་གསལ་ལ་བརྟེན་ནས། བདེན་པ་མཐོང་སྟེ་རྣམ་སྨིན་ཐོབ་བོ། །བར་དོ་ལ་ཐོབ་པ་ནི། ཚེ་འདིར་ཚོགས་བསྒྲུབས་ཀྱང་བདེན་པ་མ་མཐོང་བ་ལ་འཆི་བའི་འོད་གསལ་ལ་ངོ་མ་ཤེས་ཏེ། བར་དོ་དངོས་ཀྱི་སྣང་བ་ཤར་བའི་དུས་སུ་སྤྱོད་ལ་སྒྱུ་མར་མཐོང་བའི་དུས་སུ་དེ་ལ་བརྟེན་ནས་བདེན་པ་མཐོང་སྟེ་སྨིན་ཐོབ་བོ། །འོ་ན་དེ་ཉིད་ལ་རྣམ་སྨིན་ལས་གྲུབ་པའི་ལུས་མེད་པས་རྣམ་སྨིན་གྱི་ངེས་ཚིག་ཉམས་སོ། །ཞེ་ན། དེ་ནི་རྣམ་སྨིན་བཏགས་པའོ། །ཡིན་ཏེ་འབྱུང་བའི་ལུས་མེད། བདེན་པ་མཐོང་བ་ཙམ་གྱི་ཆ་ཤས་འཇོག་གོ །འོ་ན་ཚེ་དབང་དང་འདྲ་མོད་ཅེ་ན། ཚེ་དབང་ཅི་འབྱུང་བ་དྭངས་མའི་ལུས་སུ་ཡོད་ལ། འདིར་ནི་བག་ཆགས་ཀྱི་ལུས་སུ་ཡོད་པས་མི་འདྲའོ། །ཕྱག་རྒྱ་ཆེན་པོ་དང་ཁྱད་པར་ཅི་ཡོད་ཅེ་ན། ཕྱག་རྒྱ་ཆེན་པོ་ནི་ལྷ་སྐུའི་ཆ་ལུགས་སུ་ཡོད་དོ། །བར་དོ་ནས་ཐོབ་པ་ནི། བར་དོའི་སྣང་བ་ནུབ་ནས། ལུས་ལེན་ཁར་བདེན་པ་མཐོང་སྟེ། དེ་ནི་ལུས་རྣམ་སྨིན་གྱི་ལུས་སུ་འགྱུར་བ་དགོངས་པ་ལྷའི་སྐུར་གསལ་བ་ཡིན་ནོ། །ལམ་མཆོག་གསལ་བའི་སྒྲོན་མ་ལས། ལེའུ་ལྔ་པའི་འགྲེལ་པའོ།། །།ལེའུ་དྲུག་པའི་གཞུང་ལ་བཅོ་ལྔས་བསྟན་པ་ལས། སྒོམ་པའི་ཐབས་རྒྱས་པར་བསྟན་པ་ནི། དང་པོ་བཅོ་བརྒྱད་བཞི་བཅུ་གཉིས། ཞེས་པ་ལ་སོགས་པས་བསྟན་པ་སྟེ། དེ་ཡང་དཀྱིལ་འཁོར་བསྡུས་པ་ལ་ལྷ་ཚོག་བཅོ་བརྒྱད་ཡོད་པས་དང་པོ་བཅོ་བརྒྱད་ཅེས་བྱ་སྟེ། མདོར་ན་རིག་ལྔ་ཡབ་ཡུམ་བཅུའི་སྟེང་དུ་སྒོ་བ་ཡབ་ཡུམ་བརྒྱད་དེ་བཅོ་བརྒྱད་དོ། །བཞི་བཅུ་གཉིས་ཞེས་པ། དཀྱིལ་འཁོར་འབྲིང་པོ་ལ་ལྷ་ཚོགས་བཞི་བཅུ་རྩ་གཉིས་གཉིས་ཡོད། རིགས་ལྔ་ཡབ་ཡུམ་བཅུ། སེམས་དཔའ་ཡབ་ཡུམ་བཅུ་དྲུག །སྒོ་བ་ཡབ་ཡུམ་བརྒྱད། ཐུབ་པ་དྲུག ཀུན་བཟང་ཡབ་ཡུམ་གཉིས་ཏེ། རྒྱས་པའི་དཀྱིལ་འཁོར་རིམ་བཞིན་བསླབ། ཅེས་པ། དཀྱིལ་འཁོར་རྒྱས་པ་ལ་ལྷ་ཚོགས་བརྒྱད་ཅུ་རྩ་གཉིས་ཡོད་དོ། །དེ་ཡང་དབུས་རྡོ་རྗེ་སེམས་དཔའ་ཡབ་ཡུམ་ལ་རིགས་ཆུང་གི་སེམས་དཔའ་ཡབ་ཡུམ་བརྒྱད་ཀྱི་བསྐོར་ཏེ། རྡོ་རྗེ་སེམས་དཔའ། རྡོ་རྗེ་སེམས་མ། རྡོ་རྗེ་རིན་ཆེན། རྡོ་རྗེ་འབར་མ། ཆོས་རྡོ་རྗེ། སྒྱུ་མ་རྡོ་རྗེ། ལས་ཀྱི་རྡོ་རྗེ། བསྐྱོད་མ་རྡོ་རྗེའོ། །ཤར་རྣམ་སྣང་ཡབ་ཡུམ་ལ་རིགས་ཆུང་བརྒྱད་ཀྱིས་བསྐོར་བ་ནི། རྡོ་རྗེ་སེམས་དཔའ། རྡོ་རྗེ་སྒེག་མོ། །རྡོ་རྗེ་རྒྱལ་པོ། རྡོ་རྗེ་དྷུ་པེ་མ། རྡོ་རྗེ་ཆགས་པ། རྡོ་རྗེ་ལྕགས་ཀྱུ་མ། རྡོ་རྗེ་ལེགས་པ། རྡོ་རྗེ་སྒྲོལ་མའོ། །ལྷོ་རིན་འབྱུང་ཡབ་ཡུམ་ལ་རིགས་ཆུང་བརྒྱད་ཀྱིས་བསྐོར་ཏེ། རྡོ་རྗེ་རིན་ཆེན། རྡོ་རྗེ་ཕྲེང་བ་མ། རྡོ་རྗེ་གཟི་རྗིད། རྡོ་རྗེ་མེ་ཏོག་མ། རྡོ་རྗེ་རྒྱལ་མཚན། རྡོ་རྗེ་ཞགས་པ་མ། རྡོ་རྗེ་བཞད་པ། རྡོ་རྗེ་བདེ་བ་མའོ། །ནུབ་སྣང་བ་མཐའ་ཡས་ལ་རིགས་ཆུང་བརྒྱད་ཀྱིས་བསྐོར་ཏེ། རྡོ་རྗེ་དབྱངས་ལེན་མ། རྡོ་རྗེ་ཆོས། རྡོ་རྗེ་རྣོན་པོ། རྡོ་རྗེ་སྒྲོན་མ། རྡོ་རྗེ་འཁོར་ལོ། རྡོ་རྗེ་ལྕགས་སྒྲོག་མ། རྡོ་རྗེ་སྨྲ་བ། རྡོ་རྗེ་གསལ་བཀྲ་མའོ། །བྱང་དོན་ཡོད་གྲུབ་པ་ལ་ལས་ཀྱི་རིགས་ཆུང་བརྒྱད་ཀྱིས་བསྐོར་ཏེ། རྡོ་རྗེ་རིན་ཆེན་རྡོ་རྗེ་ལས། རྡོ་རྗེ་གར་བྱེད་མ། རྡོ་རྗེ་བསྲུང་བ། རྡོ་རྗེ་དྲི་ཆབ་མ། རྡོ་རྗེ་གནོད་སྦྱིན། རྡོ་རྗེ་དྲིལ་དཀྲོལ་མ། རྡོ་རྗེ་ཁུ་ཚུར། རྡོ་རྗེ་འབེབས་མ་སྟེ་དེ་ལྟར་ལྔ་བཅུའོ། །སེམས་དཔའ་ཡབ་ཡུམ་བཅུ་དྲུག་ནི། ཐུབ་པ་དྲུག །སྒོ་བ་ཡབ་ཡུམ་བརྒྱད། ཀུན་བཟང་ཡབ་ཡུམ་གཉིས་ཏེ་ལར་བརྒྱད་ཅུ་རྩ་གཉིས་ཡོད་དོ། །ཚོམ་བུ་ལ་བསླབ་པ་ནི། གཉིས་པ་བདག་ཅག་ཡབ་ཡུམ་གཉིས། ཞེས་པ་གཉིས་པ་ཚོམ་བུ་སྤྲོས་པ་ནི། གཙོ་བོ་བདག་ཅག་རྡོ་རྗེ་སེམས་དཔའ་ཡབ་ཡུམ་གཉིས་ལ། གནས་པའི་དཀྱིལ་འཁོར་གསལ་བྱས་ཏེ། ཞེས་པ། དབུས་ན་གནས་པའི་འཁོར་ལོ་གཞལ་ཡས་ཁང་ལ་སོགས་པ་གསལ་བར་བྱ་སྟེ། གདན་ལྡན་དབུས་ན་བདག་པོ་གཉིས། ཞེས་པ་དབུས་ན་གདན་ལྔ་བརྩེགས་པའི་སྟེང་ན། རིགས་ཀྱི་བདག་པོ་རྡོ་རྗེ་སེམས་དཔའ་ཡབ་ཡུམ་གནས་པའོ། །དེ་ལ་སེམས་དཔའ་ཁྲོ་བོས་བསྐོར། ཞེས་པ་གཙོ་བོ་དེ་ལ་རྡོ་རྗེ་རིགས་ཀྱི་སེམས་དཔའ་ཡབ་ཡུམ་བརྒྱད་དང་། སྒོ་བ་ཁྲོ བོ་ཁྲོ་མོ་བརྒྱད་ཀྱིས་བསྐོར་ཏེ་དེ་ལྟར་བཅོ་བརྒྱད་ཡིན། དཀྱིལ་འཁོར་བསྡུས་པ་དང་ལྷ་གྲངས་མཉམ་ཡང་། ལྷ་ངོ་ལ་ཁྱད་ཡོད་དོ། །བརྟན་ནས་རྒྱབ་མདུན་སྐུ་གསུང་ཐུགས། །ཞེས་པ་ལ་སོགས་པ་ཚོམ་བུ་གསུམ་པ་ཡིན་ཏེ། ཚོམ་བུ་གཅིག་པ་ལ་བརྟེན་ནས་འཁོར་ལོ་མདུན་ཤར་དུ་ནི་སྐུའི་རིགས་རྣམ་པར་སྣང་མཛད་ལ་རིགས་ཆུང་གི་སེམས་དཔའ་ཡབ་ཡུམ་བརྒྱད་དང་། རྒྱབ་ནི་འཁོར་ལོའི་ནུབ་གཙོ་བོའི་རྒྱབ་ཏུ་གསུང་གི་རིགས་སྣང་བ་མཐའ་ཡས་ཡབ་ཡུམ་ལ་པདྨ་རིགས་ཀྱི་སེམས་དཔའ་བརྒྱད་ཀྱིས་བསྐོར། དབུས་སུ་ཐུགས་ཀྱི་རིགས་རྡོ་རྗེ་སེམས་དཔའ་ཡབ་ཡུམ་ལ་རིགས་ཆུང་གི་སེམས་དཔའ་ཡབ་ཡུམ་བརྒྱད་ཀྱིས་བསྐོར་ཏེ་དེ་ལྟར་སུམ་ཅུ་ཐམ་པའོ། །དེའི་སྟེང་དུ་སྒོ་བ་ཡབ་ཡུམ་དེ་བརྒྱད་དམ། ཡང་ན་ཕྱོགས་མཚམས་ཀྱི་ཁྲོ་བོ་ཡབ་ཡུམ་བཅུ་དྲུག་སྟེ་ཞེ་དྲུག་གོ །འཁོར་ལོ་རྫོགས་པའི་འབྲུ་གསུམ་བརྡ། ཞེས་པ་ནི། འོ་ན་ཚོམ་བུ་གསུམ་དུ་ཡོད་པ་ཇི་ལྟར་ཞེ་ན། ཐ་མལ་གྱི་ལུས་ངག་ཡིད་གསུམ། ལྷའི་སྐུ་གསུང་ཐུགས་སུ་རྫོགས་པའི་ཕྱིར་ༀ་ཨཱཿཧཱུྃ་གི་ཡིག་འབྲུ་གསུམ་གྱི་བརྡ་སྦྱོར་བའོ། །མི་ཡི་དབང་དུ་ཚོམ་བུ་གསུམ། ཞེས་པ་ནི། ལྷ་གྲངས་དང་མི་གྲངས་བསྟུན་ཞེས་པའི་ཐ་ཚིག་གམ། ཡང་ན་མི་ལ་ལུས་ངག་ཡིད་གསུམ་ཡོད་པས་དེའི་སྒྲིབ་པ་སྦྱོར་བའི་ཚུལ་དུ་ཚོམ་བུ་གསུམ་དུ་བསྟན་ཏེ། དེ་ལ་གོམས་པར་བྱ་བ་ཤིན་ཏུ་གཅེས་སོ། །བརྟན་ནས་གཡས་དང་གཡོན་ཉིད་དུ། ཞེས་པ། ཚོམ་བུ་གསུམ་པ་བརྟན་ནས་ལྔ་བསྒོམ་སྟེ། དབུས་ཀྱི་གཙོ་བོས་གཡས་ལྷོའི་འཁོར་ལོ་ཡིན་ལ་གཡོན་བྱང་གི་འཁོར་ལོའོ། །ཡོན་ཏན་ཕྲིན་ལས་དཀྱིལ་འཁོར་གནས། ཞེས་པ་གཡས་སུ་ནི་ཡོན་ཏན་གྱི་དཀྱིལ་འཁོར་བཞག་སྟེ། རིན་ཆེན་འབྱུང་ལྡན་ཡབ་ཡུམ་ལ་རིན་ཆེན་རིགས་ཀྱི་སེམས་དཔའ་ཡབ་ཡུམ་གྱིས་བསྐོར། གཡོན་དུ་ཕྲིན་ལས་ཀྱི་དཀྱིལ་འཁོར་བཞག་སྟེ། དོན་ཡོད་གྲུབ་པ་ཡབ་ཡུམ་ཀྱི་རིགས་ཀྱི་སེམས་དཔའ་ཡབ་ཡུམ་བརྒྱད་ཀྱིས་བསྐོར་བས་ལྔ་བཅུ་རྩ་བརྒྱད་དམ་ཡང་ན་དྲུག་ཅུ་རྩ་དྲུག་གོ །རྣལ་འབྱོར་དབང་དུ་ཚོམ་བུ་ལྔ། ཞེས་པ་རྣལ་འབྱོར་པའི་ཉོན་མོངས་པ་ལྔ་འདུལ་བའི་དོན་དུ་ཚོམ་བུ་ལྔ་བསྟན་པའམ། ཡང་ན་རྣལ་འབྱོར་པའི་གྲངས་ཀྱང་ཚོམ་བུའི་ལྷ་གྲངས་དང་མཉམ་མོ་ཞེས་པའི་ཐ་ཚིག་གོ །དེ་ལྟར་འདྲིས་ནས་ཚོགས་བསྒྲུབ་པ་ལ་སྦྱོར་རོ། །འོ་ན་ཚོམ་བུ་དང་དཀྱིལ་འཁོར་ལ་ཁྱད་ཅི་ཡོད་ན། འདོད་པ་མི་མཐུན་ཏེ། ལྷ་རྗེ་སྒྲོ་ཕུག་པའི་ཞལ་ནས། རྣམ་གྲངས་སྟོན་པ་དཀྱིལ་འཁོར། གཙོ་བོ་དབྲི་བསྣན་དུ་སྟོན་པ་ཚོམ་བུ། གཙོ་བོ་གཅིག་ན་ཚོམ་བུ་གཅིག །གཙོ་བོ་གསུམ་ན་ཚོམ་བུ་གསུམ། གཙོ་བོ་ལྔ་ན་ཚོམ་བུ་ལྔ་ཡིན་གསུངས་ཏེ་མི་འཐད། དེ་ལྟར་ན་དཀྱིལ་འཁོར་གྱིས་ཚོམ་བུ་ལ་མ་ཁྱབ་པར་ཐལ། འདོད་ན་ཚོམ་བུ་ཚོགས་ཀྱི་དཀྱིལ་འཁོར་ཟེར་ནས་ཁྱབ་པར་བཤད་པ་དང་འགལ་ལོ། །ཡང་སྐྱོ་ན་རེ། གནས་སྐབས་སུ་གཙོ་བོ་ངེས་པ་ནི་དཀྱིལ་འཁོར་ལ། མ་ངེས་པ་ནི་ཚོམ་བུ་གསུང་། ལྷ་མང་དུ་སོང་ཡང་གཙོ་བོ་གཅིག་ལས་མི་འཕོ་བ་ནི་དཀྱིལ་འཁོར་ཡིན། ཚོམ་བུ་ནི་ལྷ་མང་དུ་སོང་ན་གཙོ་བོ་ཡང་མང་དུ་འགྲོ་བ་ཡིན་གསུངས་ཏེ་ལེགས་སོ། །ཡང་ཁ་གཅིག་ན་རེ་མི་གྲངས་ངེས་པ་མེད་པས་ལྷ་གྲངས་ངེས་པ་མེད་པ་སྒྲུབ་ན་དཀྱིལ་འཁོར་ལ། གྲངས་ངེས་པ་མེད་པ་སྒྲུབ་ན་དཀྱིལ་འཁོར་ལ། མི་གྲངས་ངེས་ཅན་གྱིས་ལྷ་གྲངས་ངེས་པ་ཅན་བསྒྲུབ་ན་ཚོམ་བུ་ཡིན་གསུངས། དེ་ཡང་མི་འཐད། ཅེས་ན། ཚོམ་བུ་གཅིག་པ་བརྟན་ན་གསུམ་པར་འཕོ་བའི་ཚེ་མི་གྲངས་མང་དུ་མ་སོང་ལ་ལྷ་གྲངས་མང་དུ་སོང་བ་ཡིན་ནོ། །དེས་ན་འདིར་ནི་གཙོ་བོ་གཅིག་ལ་ལྡོག་པ་ཐ་དད་པས་ཁྱད་བྱས་པས་ཁྱབ་ཆེ་ཆུང་དུ་གྱུར་པ་ཡིན་ནོ། ངོ་བོ་གཅིག་སྟེ་ཚོམ་བུ་དང་དཀྱིལ་འཁོར་གཉིས་ལ་ལྷ་ངོ་ལ་ཁྱད་མེད་དོ། །ལྡོག་པ་ཐ་དད་དེ་ཚོམ་བུ་ནི་གཙོ་བོའི་ཕྲི་བསྣན་གྱི་ལྡོག་པ་ནས་སྨོས་གཙོ་བོ་གཅིག་གིས་བྱེད་ན་ཚོམ་བུ་གཅིག་ལ་གཙོ་བོ་གསུམ་གྱིས་བྱེད་ན་ཚོམ་བུ་གསུམ་མོ། །གཙོ་བོ་ལྔས་བྱེད་ན་ཚོམ་བུ་ལྔ་ཡིན་ནོ། །དཀྱིལ་འཁོར་ནི་རྣམ་གྲངས་བྱུང་ཚོགས་སུ་བསྟན་པ་ཡིན་ཏེ། ལྷ་གྲངས་མང་ན་དལ་རྒྱས་པ། ལྷ་གྲངས་ཉུང་ན་དལ་བསྡུ་བ་ཡིན་ནོ། །ཁྱབ་ཆེ་ཆུང་ཡང་ཡོད་དེ་དལ་གྱི་ཚོམ་བུ་ལ་ཁྱབ་པ། ཚོམ་བུས་དལ་ལ་མ་ཁྱབ་པ་ཡིན་ནོ། །ཡན་ལག་བཞི་བཅུ་རྩ་གཉིས་ལྡན། ཞེས་པ་ནི། རྩ་བའི་ལྷ་རྡོ་རྗེ་སེམས་དཔའ་ཡབ་ཡུམ་གཉིས་ལ་ཡན་ལག་གི་ལྷ་བཞི་བཅུ་ལྡན་པའོ། །དེ་ཡང་ཇི་ལྟར་ལྡན་ན། ཡབ་ལ་ཡབ་དགོད་ཡུམ་ལ་ཡུམ་དགོད་དེ། ཡབ་ཀྱི་སྤྱིར་བོར་རྣམ་སྣང་མགྲིན་པར་སྣང་མཐའ་ཐུགས་དཀར་རྡོ་རྗེ་སེམས་དཔའ། ལྟེ་བར་རིན་འབྱུང་། སྟ་ཟུར་གཡས་པར་དོན་གྲུབ། ཡུམ་ཡང་དེས་འགྲེའོ། །ཡབ་ཀྱི་མིག་གི་ནང་རྩར་ནམ་སྙིང་། རྣ་བའི་ནང་རྩར་ཕྱག་རྡོར༔ སྣའི་ནང་རྩར་ནམ་སྙིང་། ལྕེའི་ནང་རྩར་སྤྱན་རས་གཟིགས། མིག་གི་ཕྱི་རྩར་བྱམས་པ། རྣ་བའི་ཕྱི་རྩར་སྒྲིབ་སེལ། སྣའི་ཕྱི་རྩར་ཀུན་ཏུ་བཟང་པོ། ལྕེའི་ཕྱི་རྩར་འཇམ་དཔལ། ཡུམ་ལ་ཡུམ་དགོད་པ་དེ་དང་འདྲའོ། །ཡབ་ཀྱི་སྤྱི་བོར་ལྷའི་ཐུབ་པ། མགྲིན་པར་ཡི་དྭགས་དཔུང་པར་ལྷ་མ་ཡིན། སྙིང་གར་བྱོལ་སོང་། པུས་མོར་མི། རྐང་མཐིལ་དུ་དམྱལ་བ། ཡུམ་ལ་དགོད་པའི་དོད་མེད་དོ། །ཡབ་ཀྱི་ལག་པ་གཡས་གཤིན་རྗེ་གཤེད། གཡོན་སྟོབས་པོ་ཆེ། རྐང་པ་གཡས་རྟ་མགྲིན། གཡོན་བདུད་རྩི་འཁྱིལ་པ། ཡབ་ཀྱི་ཐུགས་ཀར་ཀུན་ཏུ་བཟང་པོ། ཡུམ་ལ་ཡུམ་དགོད་པ་ཡབ་དང་འདྲའོ། །རྩ་བའི་ལྷ་སྤྱིར་ཐིམ་པ་ཡིན་མདོར་ན་ལྷ་ཚོགས་བཞི་བཅུ་ལ་བརྩི་བ་ཡིན་ནོ། །རྩ་བའི་ལྷ་སྤྱིར་ཐིམ་ནས་བཞི་བཅུ་ཐམ་པ་ལ་བརྩི་བ་ཡིན་ནོ། །གོང་ནས་དེ་ཉིད་ཡན་ལག་སྤྲོས། ཞེས་པ་ཐབས་ཀྱི་ལྷ་རེ་རེའི་ཐུགས་དཀར་ཡེ་ཤེས་སེམས་དཔའ་རེ་རེ་བསྒོམས་པས་བརྒྱད་ཅུའོ། །འོག་ནས། བཞི་བཅུ་རྩ་གཉིས་གསུམ་འཕྲོས་འགྱུར། ཞེས་པས། དེ་ལྟར་ཡན་ལག་བཞི་བཅུ་པོ་དེ་ལ་སྐུ་གསུང་ཐུགས་ཀྱི་ལྷ་གསུམ་གསུམ་འཕྲོས་ཏེ། དེ་རྣམས་ཀྱི་སྤྱི་བོར་རྣམ་པར་སྣང་མཛད། མགྲིན་པར་སྣང་མཐའ། ཐུགས་ཀར་རྡོ་རྗེ་སེམས་དཔའ་དང་གསུམ་མོ། །བདག་ཅེས་པས། དེ་རྣམས་རེ་རེ་ལ་དབུ་རྒྱན་རིགས་ལྔ་བརྩིས་པས་མདོར་དྲིལ་བས་སྟོང་ཐམ་པའོ། སྟངས་ནི་ཡབ་དཔྱལ་ནི་ཡུམ་སྟེ། ཡབ་ཡུམ་གྱི་སྐུ་ལ་ཕྱག་རྒྱའི་དལ་བཀོད་པའོ། རྩ་བའི་ལྷ་དང་ཡན་ལག་གི་ལྷའི་ཁྱད་པར་སྟོན་པ་ཡིན་ཏེ། ཁ་ཅིག་ན་རེ་རྩ་བའི་ལྷ་རི་རབ་ཙམ་ལ་ཡན་ལག་གི་ལྷ་ཏིལ་འབྲུ་ཙམ་སྟོན་པ་ཡིན་ཏེ། བློ་ཆུང་བ་ལ་དེ་ལྟར་འཐད་དོ། །ཁ་ཅིག་ན་རེ་རྩ་བའི་ལྷ་དང་ཡན་ལག་གི་ལྷ་ལ་ཆེ་ཆུང་མེད་དེ། རྩ་བའི་ལྷ་རི་རབ་ཙམ་ལ་ཡན་ལག་གི་ལྷ་ཡང་རི་རབ་ཙམ་ལ་ཡན་ལག་གི་ལྷ་ཡང་རི་རབ་ཙམ་བསྒོམ་སྟེ། བློ་འབྲིང་ལ་དེ་ལྟར་ཡང་བཏུབ་བོ། །ལྷ་རྗེ་ཟུར་ཆུང་ན་རེ། རྩ་བའི་ལྷ་ཏིལ་འབྲུ་ཙམ་ལ་ཡན་ལག་གི་ལྷ་ཡང་ཏིལ་འབྲུ་ཙམ་མམ། རི་རབ་ཙམ་བསྒོམས་ཀྱང་མི་འགལ་གསུངས་ཏེ། ཏིང་ངེ་འཛིན་ལས་སུ་རུང་ན་དེ་ཡང་བཏུབ་ཏུ་རུང་བ་ཡིན་ནོ། །ཁ་རག་པ་ན་རེ་དཔེར་ན། ལག་པ་མཛེས་པ་སོར་གདུབ། སོར་གདུབ་མཛེས་པར་བྱེད་པ་གཡུ་ཕྲ། དེ་བཞིན་དུ་རྩ་བའི་ལྷ་མཛེས་པར་བྱེད་པ་ཡན་ལག་གི་ལྷ། ཡན་ལག་ལྷ་མཛེས་པར་བྱེད་པ་ཐབས་དང་ཤེས་རབ་ཀྱི་ལྷ་ཡིན་པས། རྩ་བའི་ལྷ་རི་རབ་ཙམ་ལ་ཡན་ལག་གི་ལྷ་ནི་མཚན་དང་དཔེ་བྱད་ཀྱི་ཚུལ་དུ་དེ་བས་ཀྱང་ཆུང་བ་བྲག་ཙམ་དུ་བསྒོམ། ཐབས་དང་ཤེས་རབ་ཀྱི་ལྷ་ནི་དེ་བས་ཆུང་བ་བྲག་ལ་ལྕོང་རྡོ་བཀོད་པ་བཞིན་དུ་བསྒོམ་གསུངས་ཏེ་བདེའོ། །འོ་ན་ཡན་ལག་ལྷས་རྩ་བའི་ལྷ་མི་སྒྲིབ་བམ་ཞེ་ན། མི་སྒྲིབ་སྟེ། དཔེར་ན་གསེར་གྱི་བུ་གར་རིན་པོ་ཆེ་ཟེའུ་ཀ་བཅུག་པ་ལྟར་གཅིག་ལ་གཅིག་མི་སྒྲིབ་པར་གསལ་བ་ཡིན་ནོ། དཔེ་བྱེད་མཚན་གྱིས་རྒྱན་སྤྲས་པའོ། །ཞེས་པ་དེ་ལྟར་བཀོད་པ་དེ་ཡང་རྩ་བའི་ལྷ་ལ་ཡན་ལག་གི་ལྷ་རྣམས་མཚན་དང་དཔེ་བྱེད་ཀྱི་ཚུལ་དུ་བརྒྱན་པ་ཡིན་ནོ། །ཞེས་བྱ་བའི་ཐ་ཚིག་གོ །དེ་ནི་སངས་རྒྱས་སྟོང་གི་དཀྱིལ་འཁོར་ལ་བསླབས་པ་ཡིན་ནོ། །དེ་ལྟར་གཙོ་མཆོག་ལྡན་བྱས་ནས། ཞེས་པ་གཙོ་བོ་ཡབ་ཡུམ་གཉིས་ལ་བྷུདྡྷ་སྟོང་དང་ལྡན་པར་བྱས་ནས། བྱ་བྱེད་རིགས་བཞི་སྟོང་བསྒོམ་བྱ། ཞེས་པ་ཡིད་བྱེད་པ་པོ་ཀུན་ཏུ་བཟང་པོ་དང་། ཆོས་བྱ་བ་མོ་ཀུན་ཏུ་བཟང་མོ་ལ་ཡང་སྟོང་བསྒོམ། རིགས་བཞི་ཡབ་ཡུམ་ལ་ཡང་སྟོང་པ་རེ་རེ་བསྒོམ། བཅུ་གཉིས་དྲུག་གི་འོད་འཕྲོ་འབར། ཞེས་པ་སེམས་དཔའ་ཡབ་ཡུམ་བརྒྱད་སྒོ་བ་ཡབ་ཡུམ་བཞི་སྟེ་བཅུ་གཉིས་ལ་ཡང་སྟོང་སྟོང་སྔར་ལྟར་བསྒོམ། ཐུབ་པ་དྲུག་ལ་སྟོང་བསྒོམ། ཉི་ཁྲི་བཞི་སྟོང་དུས་གཅིག་གསལ། ཅེས་པ་རྣམ་གྲངས་བྱུང་ཚོགས་སུ་ཉི་ཁྲི་བཞི་སྟོང་ངོ་། །ཡང་ན་བཞི་སྟོང་དུ་བྱེད་ན་ཐབས་ཤེས་ཀྱི་ལྷ་བཞི་བཅུ་ལ་དབུ་རྒྱན་མ་བརྩིས་པས་དབུ་རྒྱན་གྱི་ལྷ་བརྒྱད་བརྒྱ་ལས་མེད། དེའི་སྟེང་དུ་དབུ་རྒྱན་བརྩིས་པའི་ཐབས་ཀྱི་ལྷ་དང་ཤེས་རབ་ཀྱི་ཉིས་བརྒྱ་ཐམ་པ་ལ་དབུ་རྒྱན་བརྩིས་པས་སྟོང་ཕྲག་བཅད། གཞི་དེ་ནས་རྩིས་པས་ལྷ་ཚོགས་ཉི་ཁྲི་བཞི་སྟོང་ཁྲེགས་བཅད་ཡིན་ནོ། །འོ་ན་ཡུམ་ལ་ཡུམ་དགོད་པའི་ཚེ་ཐུབ་པ་ལ་ཡུམ་ཇི་ལྟར་དགོད་ཅེ་ན། ལྷ་རྗེ་གླན་ན་རེ། རིགས་ལྔ་དང་ཀུན་ཏུ་བཟང་པོའི་ཡུམ་གཡར་བ་ཡིན་ཟེར་རོ། །ལྷ་རྗེ་ཧོར་པོ་ན་རེ། ཡུམ་ལ་ཡུམ་དགོད་པའི་དོད་སོར་རང་གི་གཡོན་ཕྱོགས་སུ་དགོད་པ་ཡིན་གསུངས་སོ། །དང་པོ་ལྔ་བཅུ་བརྒྱད་བསྒོམས་ནས། ཞེས་པ་དལ་བསྡུས་པ་ཡིན་ཏེ། རིགས་ལྔ་ཡབ་ཡུམ་བཅུ། ལྷ་མོ་ཉི་ཤུ། དབང་མོ་ཉེར་བརྒྱད་དོ། །དྲུག་ཅུ་རྩ་བརྒྱད་དེ་བཞིན་ཏེ། ཞེས་པ་སྔར་གྱི་སྟེང་དུ་ཁྲོ་བོ་བཅུ་བསྣན་པས་དྲུག་ཅུ་རྩ་བརྒྱད་དོ། །བདུན་ཅུ་རྩ་བརྒྱད་དེ་བཞིན་ནོ། །ཞེས་པ་ཁྲོ་མོ་བཅུ་བསྣན་པས་བདུན་ཅུ་རྩ་བརྒྱད་དོ། །ཡང་ན་གཞུང་ལ་ལར་ཚིག་ཕྱི་མ་དེ་མེད་པ་ཡོད་དེ་ལྟར་འོག་གི །ལྔ་བཅུའི་ཚོམ་བུ་གནས་ཡུལ་དང་། ཞེས་པ་ཡར་བླང་སྟེ། འཁོར་འོག་གཞི་འཁོར་ལོ་ཆེན་པོ་གཅིག་གི་སྟེང་ན་འཁོར་ལོ་རྩིབས་བཞི་པ་ཡོད་པའི་ཆ་ལྔ་པ་སྟེ། དབུས་ཀྱི་བཛྲ་ཧེ་རུ་ཀ་ཡབ་ཡུམ་གཉིས་ལ་རིགས་ཆུང་གི་ཧེ་རུ་ཀ་བརྒྱད་དེ་བཅུ་ཐམ་པ། ཤར་དུ་བུདྡྷ་ཧེ་རུ་ཀ་ལ་རིགས་ཆུང་གིས་བསྐོར་བ་བཅུ། ལྷོར་རཏྣ་ཧེ་རུ་ཀ་ལ་རིགས་ཆུང་གིས་བསྐོར་བ་བཅུ། ནུབ་པདྨ་ཧེ་རུ་ཀ་ལ་རིགས་ཆུང་གིས་བསྐོར་བ་བཅུ། བྱང་ཀརྨ་ཧེ་རུ་ཀ་ལ་རིགས་ཆུང་གིས་བསྐོར་བ་བཅུ་སྟེ་ལྔ་བཅུ། ལྷ་མོ་ཉི་ཤུ། ཁྲོ་བོ་ཁྲོ་མོ་ཉི་ཤུ། དབང་མོ་ཉེར་བརྒྱད་དེ། བརྒྱ་དང་བཅོ་བརྒྱད་དོ། །དེ་གསུམ་ནི་དཀྱིལ་འཁོར་སྤྲོས་པའོ། །དབུས་ཀྱི་ཧེ་རུ་བཞི་བོ་ལ། ཞེས་པ་དབུས་ཀྱི་གཙོ་བོ་བཛྲ་ཧེ་རུ་ཀ་ཡབ་ཡུམ་མོ། །འོག་ནས། ལྔ་བཅུའི་ཚོམ་བུ་གནས་ཡུལ་དང་། ཞེས་པ་ཡར་བླང་སྟེ། ལྔ་བཅུའི་ཚོམ་བུ་ནི་རྡོ་རྗེ་རིགས་ཀྱི་གཙོ་བོ་ཡབ་ཡུམ་ལ་རྡོ་རྗེ་རིགས་ཀྱི་སེམས་དཔའ་ཡབ་ཡུམ་བརྒྱད་ཀྱིས་བསྐོར་བའོ། །སྒོ་སླབ་ཧཱུྃ་ཆེན་བརྒྱད་རྩ་བརྒྱད། ཅེས་སྒོ་མ་བཞི་དཔལ་གྱི་ཕོ་བྲང་སླས་པར་བྱེད་པའི་དབང་མོ་ཉེར་བརྒྱད་དང་། ཧཱུྃ་ཁྲོ་བོ་ཁྲོ་མོ་ཉི་ཤུ། དབང་མོ་ཉེར་བརྒྱད་དེ། མདོར་དྲིལ་བས་ཚོམ་བུ་གཅིག་པ་ལ་ལྷ་ཚོགས་བདུན་ཅུ་རྩ་བརྒྱད་དོ། །བརྒྱ་རྩ་བརྒྱད་ཅེས་པ་འོག་མ་ཚོམ་བུ་ལྔ་པའི་དབང་དུ་སྦྱོར་རོ། །སྐུ་གསུང་ཁྲོ་བོའི་མདུན་རྒྱབ་ལ། ཞེས་པ་དེ་ལྟར་ཚོམ་བུ་གཅིག་པ་བསྟན་པ་གཙོ་བོའི་མདུན་ཤར་དུ་བུདྡྷ་ཧེ་རུ་ཀ །གཙོ་བོའི་རྒྱབ་ནུབ་ཏུ་པདྨ་ཧེ་རུ་ཀའོ། །དེ་བསྟན་འཁོར་དང་བཅས་པ་བསྒོམ། ཞེས་པ། གཙོ་བོ་བརྟན་ནས་འཁོར་བསྒོམ་སྟེ། ཤར་དུ་བུདྡྷ་ཧེ་རུ་ཀ་ལ་བུདྡྷ་རིགས་ཀྱི་རིགས་ཆུང་བརྒྱད། ནུབ་ཏུ་པདྨ་ཧེ་རུ་ཀ་ལ་པདྨ་རིགས་ཀྱི་རིགས་ཆུང་ཡབ་ཡུམ་བརྒྱད། ཐུན་མོང་གི་འཁོར་གོང་དང་འདྲའོ། །མདོར་ན་ཚོམ་བུ་གསུམ་པ་ལ་ལྷ་ཚོགས་དགུ་བཅུ་རྩ་བརྒྱད་དོ། །སྐུ་གསུང་ཐུགས་ལ་བརྟན་བྱས་ནས། ཞེས་པ་ཚོམ་བུ་གསུམ་པ་བརྟེན་ནས་གཡས་གཡོན་ཡོན་ཏན་ཕྲིན་ལས་ཁྲོ། ཞེས་པ་གཡས་ཀྱི་འཁོར་ལོ་ལ་ཡོན་ཏན་གྱི་ཁྲོ་བོ་རཏྣ་ཧེ་རུ་ཀ །གཡོན་གྱི་འཁོར་ལོ་ལ་ཕྲིན་ལས་ཀྱི་ཁྲོ་བོ་ཀརྨ་ཧེ་རུ་ཀའོ། །ཡབ་ཡུམ་གསལ་ནས་འཁོར་ལོ་སྟེ། ཞེས་པ། རཏྣ་ཧེ་རུ་ཀ་དང་ཀརྨ་ཧེ་རུ་ཀ་ཡབ་ཡུམ་གསལ་ནས། འཁོར་ལོའི་ལྷ་རིགས་ཆུང་བསྒོམ་ཏེ། ལྷོར་རིན་ཆེན་རིགས་ཀྱི་རིགས་ཆུང་བརྒྱད། བྱང་དུ་ལས་ཀྱི་རིགས་ཀྱི་རིགས་ཆུང་བརྒྱད། རྫོགས་པའི་འཁོར་ལོ་རིམ་པ་བཞིན། ཞེས་འཁོར་ལོ་ཐུན་མོང་པ་རྣམས་ཀྱང་གོང་དང་མཐུན་པར་རིམ་པ་བཞིན་བསྐྱེད་དོ། །མདོར་ན་ཚོམ་བུ་ལྔ་པ་ལ་ལྷ་ཚོགས་བརྒྱ་དང་བཅོ་བརྒྱད་དོ། །གཅིག་དང་གཉིས་དང་གསུམ་བཞི་ལྔ། ཞེས་པ་རྣམ་གྲངས་སྤྲོས་པའི་སྐབས་སུ། ཇི་ལྟར་ལྕོགས་པ་ལ་སློབ་པ་ཡིན་ཏེ། རྡོ་རྗེ་རིགས་གཅིག་པུ་ལ་སློབ་བམ། དེ་བཞིན་གཤེགས་པའི་རིགས་དང་གཉིས་སམ། པདྨའི་རིགས་དང་གསུམ་མམ། རིན་པོ་ཆེའི་རིགས་དང་བཞིའམ། ལས་ཀྱི་རིགས་དང་ལྔའོ། །ཡབ་ཡུམ་མཐར་ཕྱིན་འཁོར་ལོའི་ཆས། ཞེས་པ། དེ་ལྟར་རིགས་ལྔ་ཡབ་ཡུམ་བཅུ་ལ་མཐར་ཕྱིན་ནས་འཁོར་ལོའི་ལྷ་གཞན་བསྒོམ་སྟེ། ལྔ་བཅུའི་ཚོམ་བུ་གནས་ཡུལ་དང་། ཞེས་པ་གཙོ་བོ་རིགས་ལྔའི་ཁྲག་འཐུང་ལ། རང་གི་རིགས་ཆུང་ཡབ་ཡུམ་བརྒྱད་ཀྱིས་བསྐོར་བ་ལྔ་བཅུའོ། །དེ་སྟེང་དུ་གནས་ཀྱི་མ་མོ་བརྒྱད། ཡུལ་གྱི་ཕྲ་མེན་བརྒྱད། སྒོ་སླས་ཧཱུྃ་ཆེན་བརྒྱ་རྩ་བརྒྱད། ཅེས་པ། སྒོ་མ་བཞི། དབང་མོ་ཉེར་བརྒྱད། ཧཱུྃ་ཁྲོ་བོ་བཅུ་སྟེ། བརྒྱ་རྩ་བརྒྱད་དོ། །ཡན་ལག་བཀོད་པ་ལྔ་བཅུ་བརྒྱད། ཅེས་པ། དེ་ལྟར་རྩ་བའི་ལྷ་ཡབ་ཡུམ་ཟུང་འབྲེལ་རེ་རེ་ལ་ཡང་། ཡན་ལག་ལྔ་བཅུ་བརྩ་བརྒྱད་དགོད་དེ་དབུས་ཀྱི་བཛྲཱ་ཧེ་རུ་ཀ་ཡབ་ཡུམ་ལ་བརྩིས་ན། བཛྲ་ཧེ་རུ་ཀའི་དབུ་ལ་བུདྡྷ་ཧེ་རུ་ཀ་དང་། ཕྱག་ལས་བཛྲ་ཧེ་རུ་ཀ །གཡོན་རཏྣ་ཧེ་རུ་ཀ །རྐང་གཡས་པདྨ། གཡོན་ཀརྨ། ཡུམ་དེས་འགྲེས། རྣམ་ཤེས་ཚོགས་བརྒྱད་ཀེ་རི་བརྒྱད། ཡུལ་བརྒྱད་ཕྲ་མེན་མ་བརྒྱད། ཡན་ལག་བཞིར་སྒོ་མ་བཞི། རྒལ་ཚིགས་ལ་དབང་མོ་དགོད་དོ། །དེ་ལྟར་ལྔ་བཅུ་རྩ་བརྒྱད་ལ་ཤེས་རབ་ཀྱི་ལྷ་ཡེ་ཤེས་སེམས་དཔའ་རེ་རེ་ཐུགས་ཀར་བསྒོམས་པས་བརྒྱ་དང་བཅུ་དྲུག །ཐབས་ཤེས་ཀྱི་ལྷ་ལ་སྐུ་གསུང་ཐུགས་ཀྱི་ལྷ་གསུམ་གསུམ་བསྒོམས་པས། བཞི་བརྒྱ་དང་དྲུག་ཅུ་རེ་བཞི། དེ་རེ་རེ་ལ་དབུ་རྒྱན་ལྔ་ལྔ་བརྩིས་པས་ཉིས་སྟོང་སུམ་བརྒྱ་ཉི་ཤུའོ། །དེ་བཞིན་དུ་གཞན་ལ་ཡང་སྦྱར་རོ། །འོ་ན་ཡབ་ལ་ཡབ་དགོད་པའི་དོང་པོར་ལྷ་མོ་རྣམས་ལ་གར་དགོད་ཅེ་ན། ལུས་ཀྱི་གཡོན་ཕྱོགས་སུ་དགོད་པ་ཡིན་གསུངས་སོ། །ཆ་ལྔའི་གྲངས་ནི་ཉིས་བརྒྱད་དང་། ཞེས་པ་བགྲང་ལུགས་མི་གཅིག་པ་ཡིན་ཏེ། ཁྲག་འཐུང་ལྔ་བཅུ་རྩ་བརྒྱད་རེ་རེ་ལ་དབུ་རྒྱན་ལྔ་ལྔ་བརྩིས་པས། དགུ་བཅུ་ལྷ་ལ་ཡན་ལག་ལྡན། ཞེས་པ་གཉིས་བརྒྱ་དགུ་བཅུ་ཡོད་པར་འདོད་དོ། །ཡང་ན་གོང་བཞིན་དུ་ཚིག་འདི་ཡར་སྡེབ་པ་ཡིན་ནོ། །རིམ་བརྗོད་བརྟན་པའི་སྤྱོད་ཡུལ་ནི། ཞེས་པ་ཕྱག་ཞབས་དེ་ཙམ་སྐབས་འདིར་སྒོམ་མམ་ཞེ་ན། འདིར་གོ་རིམ་སྡེབ་པའི་ཆེད་དུ་བརྗེད་པ་ཡིན་གྱིས་དངོས་སུ་བསྒོམ་མི་ནུས་སོ། །འོ་ན་གང་སྒོམ་ཞེ་ན། ཉི་ཤུ་གཅིག་དང་དགུ་བརྒྱ་དང་། ཞེས་པ་དབུ་དགུ་ཕྱག་བཅོ་བརྒྱད་པ་ནི་ཚོགས་སྒྲུབ་སྐབས་སུ་བསྒོམ། དབུ་ཉི་ཤུ་རྩ་གཅིག་ཕྱག་བཞི་བཅུ་རྩ་གཉིས་ནི་མཐོང་ལམ་ཚེ་དབང་དུ་བསྒོམ་མོ། །དབུ་དགུ་བརྒྱ་ཕྱག་སྟོང་བརྒྱད་བརྒྱ་ཕྱག་རྒྱ་ཆེན་པོར་བསྒོམ་མོ། །གྲངས་མེད་མཐར་ལམ་རིམ་པར་ལྡན། ཞེས་པ། དབུ་ཕྱག་གྲངས་མེད་རྣམས་ནི་མཐར་ལམ་དུ་བསྒོམ་མོ། །གྲངས་ཉམས་སྦྱར་ན་མཐར་ལམ་འགྱུར། ཞེས་པ། རྣམ་གྲངས་སྤྲོས་པ་ལ་ཉམས་རྣམ་པ་ལྔ་ལ་སྦྱར་ན་མཐར་ལམ་དུ་ཐལ་བར་འགྱུར་རོ། །འདིར་རྣམ་གྲངས་སྤྲོས་པ་དངོས་སུ་བསྒོམ་མི་ནུས་ཏེ། མཐར་ལམ་དུ་དངོས་སུ་གསལ་བ་ཡིན་ནོ། །དེ་བས་ཉམས་ཚོད་ཟིན་པ་གཅེས། ཞེས་པ། དེ་བས་ཏིང་ངེ་འཛིན་གྱི་སྐབས་འགར་འོང་བ་ཉམས་ཚོད་ཟིན་དགོས་ཏེ། ཇི་ལྟར་ཟིན་ནས་འདིར་ཕྱག་རྒྱ་སྤྲོས་པའི་སྐབས་སུ་དངོས་སུ་གསལ་བ་བཞི་བཅུ་རྩ་གཉིས་ཡིན་ལ། གཞན་མོས་པ་ཙམ་ཡིན་ནོ། །དེ་ནས་ཚོགས་སྒྲུབ་ཏུ་ཚོམ་བུ་སྤྲོས་པ་གསལ། དེ་ནས་ཚེ་དབང་དང་རྣམ་སྨིན་གྱི་དུས་སུ་བུདྡྷ་སྟོང་གི་དཀྱིལ་འཁོར་གསལ། མཐར་ལམ་ལྷུན་གྲུབ་ཏུ་བསམ་ཡས་ལྷུན་གྱི་གྲུབ་པའི་ཏིང་ངེ་འཛིན་གསལ་བ་ཡིན་ནོ། དེ་ཕྱིར་ལམ་བཞི་ཟག་ལྡོག་ཡོད། ཅེས་པ་ལ་སྐབས་འདིར་ཟག་ལྡོག་ཡོད་མེད་ཀྱི་དབྱེ་བ་གསུངས་ཏེ། སྤྱིར་ལམ་ལ་རིག་གསུམ་སྟེ། ཟག་པ་ཡོད་པ་ལྡོག་པ་མེད་པའི་ལམ། ཟག་པ་མེད་ལ་ལྡོག་པ་ཡོད་པའི་ལམ། གཉིས་ཀ་མེད་པའི་ལམ་དང་གསུམ་མོ། །དེའང་དེ་བཞིན་ཉིད། ཀུན་ཏུ་སྣང་། ཕྱག་རྒྱ་གཅིག་པ། ཕྱག་རྒྱ་སྤྲོས་པ་བཞི་ནི་ཟག་ལྡོག་གཉིས་ཀ་ཡོད་དེ། འདི་ནས་དེ་ཕྱིར་ལམ་བཞི་ཟག་ལྡོག་ཡོད། ཅེས་བཤད་པས། ལམ་ཆུག་ནས། ལྡོག་བཅས་བཞི་དག་སྦྱོར་ལམ་དུ། ཞེས་བཤད་པ་ཡིན་ནོ། ཟག་ལྡོག་གཉིས་ཀ་མེད་པའི་ལམ་ནི། རིག་འཛིན་བཞི་ཡིན་ཏེ། ཐུགས་ཐིགས་ལས། དེ་ནས་བཞི་ཡི་ཟག་དང་བྲལ། ལྕགས་ཟངས་གསེར་དངུལ་གོ་རིམ་བཞིན། ཅེས་སོ། །ལམ་ཆུང་ལས། མཐར་ཤེས་འཇུག་ལ་ག་ལ་ཡོད། ཅེས་སོ། །ཚོགས་སྒྲུབ་ན་ཟག་པ་ཡོད་ལ་ཟློག་པ་མེད་དོ། །ཅེས་ན། ལྡོག་བཅས་བཞི་དང་སྦྱོར་ལམ་དུ། ཞེས་པས། ལྡོག་པ་མེད་པར་དོན་གྱིས་ཤེས་ལ། ཟག་པ་ནི་ལུས་ཁམས་སྐྱེ་གནས་ཉོན་མོངས་པ་ཐམས་ཅད་ཡོད་པ་ཡིན་ནོ། །འོ་ན་སྐབས་འདིར། དེ་ཕྱིར་ལམ་བཞི་ཟག་ལྡོག་ཡོད་ཟེར་ནས་སྤྲོས་པ་ནས་ལྡོག་པར་བཤད་པ་དང་། ལྟ་བའི་སྐབས་འདིར། དངོས་གྲུབ་མཆོག་གི་དང་པོ་འདིར། དང་པོར་དོན་རྟོགས་མཐར་མི་ལྡོག །ཆུ་སྲིན་ཕྱག་རྒྱ་ཇི་བཞིན་དུ། སྐྱེ་བར་བགྲང་ཀྱང་ལྷུང་མི་སྲིད། ཟེར་ནས། ལྟ་བ་རྟོགས་ནས་མི་ལྷུང་བར་བཤད་པ་དང་མི་འགལ་ལམ་ཞེ་ན། སློབ་དཔོན་ཡམ་ཤུད་ན་རེ། འདིར་སྤྲོས་པ་ནས་ལྡོག་པར་བཤད་པ་དེ་དམ་ཚིག་ཉམས་པའི་ཉེས་པ་བརྗོད་པ་ཡིན། ལྟ་བའི་སྐབས་སུ་བརྗོད་པ་དེ། དམ་ཚིག་ཉམས་པའི་ཉེས་པས་ངན་སོང་དུ་སྐྱེས་ཀྱང་ལྟ་བ་རྟོགས་པའི་ཡོན་ཏན་གྱི་དུཿཁ་དྲག་པོ་ཉམས་སུ་མི་མྱོང་ཞིང་ཡུན་ཐུང་བ་ལ་དགོངས་པ་ཡིན་ཏེ། གཉིས་ཀ་དགོངས་པ་ཅན་ཡིན་ཏེ། དཔེར་ན་ལྷ་མོ་རྐེད་མེད་མ་དང་འདྲ་གསུངས། དགོངས་འདུས་ལས་ཀྱང་། དཔེར་ན་དར་གྱི་ཕོ་ལོང་བརྡབས་པ་བཞིན། འཕེན་འགྲོའི་སྟོབས་ཀྱིས་དེར་མི་གནས། ཞེས་བཤད་པ་ཡིན་གསུང་ངོ་། །ལྷ་རྗེ་གླན་ན་རེ། འདིར་སྤྲོས་པ་ནས་ལྡོག་པར་བཤད་པ་དེ་དམ་ཚིག་ཉམས་པའི་ཉེས་པ་ནས་སྨོས་པ་ཡིན། ལྟ་བ་ནས་མི་ལྡོག་པར་བཤད་པ་དེ་ལྟ་བའི་ཚེ་བང་བྱུང་བ་ཡིན། དགོངས་པ་ཅན་ཡིན་གསུངས། སློབ་དཔོན་སོའི་ཞལ་ནས། འདིར་སྤྲོས་པ་ནས་ལྡོག་པར་བཤད་པ་དེ། དམ་ཚིག་ཉམས་པའི་ཉེས་པས་འཁོར་བར་སྤྱི་ཙམ་དུ་ལྡོག་པར་བཤད་པ་ཡིན་གྱིས། ངན་སོང་དུ་ལྡོག་པའི་ངེས་པ་མེད། ལྟ་བའི་སྐབས་ནས་མི་ལྡོག་པར་བཤད་པ་དེ་འཁོར་བའི་བྱེ་བྲག་ངན་སོང་དུ་མི་སྐྱེ་བ་ལ་དགོངས་པ་ཡིན་ཏེ། འཁོར་བ་ཙམ་པོར་མི་ལྡོག་པ་མིན། དེས་ན་འགལ་བ་མེད་གསུངས་སོ། །དེ་རྣམས་གང་གཙུག་བྱས་ཀྱང་ལེགས་སོ། །རྫུ་འཕྲུལ་ཉི་ཤུ་ཆ་གཡོ་ཐོབ། ཅེས་པ་སྤྱིར་བུདྡྷའི་རྫུ་འཕྲུལ་ཉི་ཤུ་དང་། བུདྡྷ འི་རྫུ་འཕྲུལ་ཉི་ཤུ་ལས། བུདྡྷའི་རྫུ་འཕྲུལ་ཉི་ཤུ་འདུས་ནས་བཤད། འདིར་དེ་མིན་ཏེ། དེའི་རྫུ་འཕྲུལ་སྟེ། རྒྱས་པ་ལས། མཁའ་ལ་འགྱོ་ཞིང་རིག་འཛིན་པ། །ཆུ་རྒྱུན་ཟློག་དང་རླུང་མི་འགུལ། །རི་བྲག་ལ་སོགས་ཐོག་མེད་འཛུལ། །དུག་མཚོན་འབྱུང་བས་མི་ཚུགས་ཤིང་། །འབྱུང་བ་ལྔ་ལ་དབང་ཡང་བསྒྱུར། །ནད་དང་ལོངས་སྤྱོད་ངན་སོང་སྦྱོང་། །དགུག་དང་བཅིང་དགྲོལ་གསོ་བསད་དང་། །ཉུང་འབྲུར་སྟོང་གསུམ་བསྡུ་བ་དང་། །བདུད་དང་གཅན་ཟན་ལ་སོགས་པ། །ཚུགས་པར་མི་འགྱུར་བྲན་བཞིན་འགྱུར། །ཞེས་གསུངས་སོ། །ལམ་མཆོག་གསལ་བའི་སྒྲོན་མེད་ལས། ལེའུ་དྲུག་པའི་རྣམ་པར་འགྲེལ་བའོ།། །།ལེའུ་བདུན་པ་ལའང་གཉིས་ལས། རྩོམ་པའི་ཡན་ལག་ནི། དཀྱིལ་འཁོར་གཉིས་ལ་ཕྱག་འཚལ་ནས། ཞེས་པ། སྤྲོས་པའི་སྐབས་སུ་བསྟན་པའི་ཞི་བ་དང་། ཁྲོ་བོའི་དལ་གཉིས་ལ་ཕྱག་བཙལ་བའོ། །བར་ཆད་མེད་པར་སྦྱོར་བ་ཡི། ཞེས་པ། བར་ཆད་མེད་པའི་ལམ་དུ་ཚོགས་སྒྲུབ་ནས་འབྲས་བུ་རིག་འཛིན་ལ་སྦྱོར། གང་གིས་བར་ཆད་མེད་ཅེ་ན། མདའ་སེང་ན་རེ། ཟག་བཅས་ནས་ཟག་མེད་དུ་སྦྱོར་བ་ལ་ལམ་གཞན་གྱིས་བར་མ་ཆོད་པས་བར་ཆད་མེད་པ་ཡིན་གསུང་ངོ་། །གླན་ན་རེ། ཕལ་ཆེ་བའི་དབང་དུ་ལམ་གཞན་གྱིས་བར་མ་ཆོད་པའི་ཕྱིར་བར་ཆད་མེད་པ་ཡིན་གསུང་ངོ་། །ལྷ་རྗེ་ཧོར་པོ་ན་རེ། ངན་སོང་དུ་འགྲོ་བའི་བར་ཆད་མེད་པ་ཡིན་གསུང་སྐད་ན། ཁོ་བོ་ནི་སྤྱིར་སྤྲོས་པ་མན་ཆད་ལ་དམ་ཚིག་ཉམས་པའི་ཉེས་པས་འཁོར་བར་ལྡོག་པའི་བར་ཆོད་ཡོད་ལ། ཚོགས་སྒྲུབ་ཡན་ཆད་ལ་ལྡོག་པའི་བར་ཆད་མེད་དོ། །སྤྱིར་ཚོགས་སྒྲུབ་ཡན་ཆད་ཅག་གེ་ལ་བར་ཆད་མེད་ཀྱང་སྤྱིའི་སྒྲ་བྱེ་བྲག་ལ་ཞུགས་ཏེ། ཚོགས་སྒྲུབ་ལ་བར་ཆད་མེད་པའི་ལམ་དུ་བཏགས་པ་ཡིན་སྙམ་མོ། །བསྒྲུབ་པ་དུས་ཀྱི་ཚོས་བཤད་བྱ། ཞེས་པ་ནི། ཟླ་བ་དྲུག་ལ་སོགས་པར་དུས་བཏབ་ནས་ཚོགས་སྒྲུབ་བམ། ཡང་ན་སྤྲོས་པ་མཐར་ཕྱིན་པའི་དུས་སུ་མཆོད་མང་པོ་འཚོགས་ཏེ་བསྒྲུབ་པར་བྱའོ་ཞེས་བྱའོ། །ཆ་ཡི་དང་པོ་བསྙེན་པ་ནི། ཞེས་པ་ལ་སོགས་པ་ལམ་ལ་བསྙེན་བསྒྲུབ་ཏུ་སྦྱར་བ་ཡིན་ཏེ། དེ་ནི་ཉིད་དང་ཀུན་ཏུ་སྣང་བསྙེན་པ། གཅིག་པ་དང་སྤྲོས་པ་ཉེ་བསྙེན། ཚོགས་སྒྲུབ་ནི་སྒྲུབ་པ། རིག་འཛིན་བཞི་ནི་སྒྲུབ་པ་ཆེན་པོ་ཡིན་ནོ། །ཆོ་ག་ལྔ་ནི་རྫོགས་བྱ་ཞིང་། ཞེས་པ། ཏིང་ངེ་འཛིན་གྱི་ཆོ་ག་ལྔ་སྟེ། དེ་བཞིན་ཉིད་དང་། ཀུན་ཏུ་སྣང་། ཕྱག་རྒྱ་ཕྲ་བ། རགས་པ། སྤྲོས་པའོ། །ཡོ་བྱད་ལྔ་ནི་རྫོགས་པར་ལྡན། ཞེས་པ། སྒྲུབ་པའི་ཡོ་བྱད་ལྔ་ཡིན་ཏེ། ཨ་ལི་ཀཱ་ལིའི་ཡོ་བྱད། རྒྱན་དང་བགོ་བའི་ཡོ་བྱད། །བཟའ་བ་དང་བཏུང་བའིཡོ་བྱད། །བྲོ་གར་འདུ་འཕྲོའི་ཡོ་བྱད། གླུ་ཚིག་སྒྲ་ཡི་ཡོ་བྱད་དོ། །སྔགས་ཀྱི་ཡན་ལག་ལྔ་རྫོགས་པ། ཞེས་པ། སྔགས་ཀྱི་ཡན་ལག་ལྔ་ནི། ཡན་ལག་གི་ལྷ་དགུ་ནི། སྔགས་ཀྱི་ཡན་ལག་ལྔར་སྡུད་པ་ཡིན་ཏེ། དབུ་རྒྱན་རིགས་ལྔ་གཅིག་ཏུ་བརྩིས་པས་སྐུ་གསུང་ཐུགས་ཀྱི་ལྷ་གསུམ་སྟེ་བཞི། ཡེ་ཤེས་སེམས་དཔའ་དང་ལྔའོ། །སྟོན་པ་མཛོད་ལྡན་ཆུ་བོ་རྫོགས། ཞེས་པ་ལ། སྟོན་པ་དེ་ཡང་གསང་སྔགས་ཀྱི་མཛོད་སྒོ་གསུམ་རྫོགས་པ་སྟེ། རྟོགས་པ་ལྟ་བའི་མཛོད་ཨ་ཏི་ཡོ་ག །གོམས་པ་བསྒོམ་པའི་མཛོད་ཨ་ནུ་ཡོ་ག མི་འདའ་བ་དམ་ཚིག་གི་མཛོད་མ་ཧཱ་ཡོ་ག་དང་ལྡན་ཏེ། དབང་གི་ཆུ་བོ་རྫོགས་པ་སྟེ། ལྷའི་དབང་ཐོབ་པ་དགའ་རབ་རྡོ་རྗེ། རིག་པ་ལ་དབང་ཐོབ་པ་པདྨ་འབྱུང་གནས། པོ་ཏི་གླེགས་བམ་ལ་དབང་ཐོབ་པ་ཨིནྡྲ་བོ་དྷི། གང་ཟག་ལ་དབང་ཐོབ་པ་བི་མ་ལ་མི་ཏྲ་དང་བཞི་ཆུ་བོའི་རྒྱུན་དང་འདྲ་བ། བར་མ་ཆད་པར་ཐོབ་པའོ། །གཉེར་ལྡན་རྒྱུད་འཆད་ལས་ལ་མཁས། ཞེས་པ་རྡོ་རྗེ་སློབ་དཔོན་གྱི་གཉེར་ནི། བློ་མཐོན་པོའི་གཉའ་གཅོག་པ། དམའ་མོའི་རྒབ་བརྟེན་པ། འཁོར་གྱི་བར་ཆོད་སེལ་བ། སྣོད་དང་ལྡན་པ་ལ་ཡལ་བར་མི་འདོད་བའི་གཉེར་དང་ལྡན་པའོ། །རྒྱུད་འཆད་པ་ལ་མཁས་པ་དང་། ཕྲིན་ལས་ཀྱི་སྡེབས་སྦྱོར་ལ་མཁས་པའོ། །མན་ངག་དྲོད་འཆང་བརྒྱད་འཆང་བ། ཞེས་པ་སྙན་རྒྱུད་ཀྱི་མན་ངག་འཆང་བའམ། སྒྲུབ་པའི་དྲོད་ཚད་ཀྱི་མན་ངག་བརྒྱད་འཆང་བའོ། །ཞེས་པ་དེ་ལྟར་དཀོར་མཛོད་གསུམ་སོ་སོར་བགྲངས་པ་དང་བརྒྱད་དམ། ཡང་ན་སྔགས་དང་ཕྱག་རྒྱ་ཏིང་ངེ་འཛིན་ལ་གནས་ཤིང་དབང་ཆོས་སྐུ་གསུང་ཐུགས་ཀྱི་དམ་ཚིག་གང་ལྡན་པ། བཀའ་དོག་ཅིང་དབང་ཐོབ་པས་འབྲས་བུ་ལ་འདོད་པ་མེད་པའི་ཡོན་ཏན་དང་། དམ་ཚིག་གཙང་ཞིང་སྒྲིབ་པ་ལ་བརྩོན་པས་ལྷ་དང་སྲུང་མ་ཉེ་བའི་ཡོན་ཏན་དང་། སྒོམ་སྲན་ཆེ་ཞིང་མཐུན་རྩལ་ཆེ་བས་བགེགས་ཀྱིས་མི་ཚུགས་པའི་ཡོན་ཏན་དང་། རྐྱེན་ཐུབ་ཅིང་དགོངས་པ་ཟབ་པས་བར་ཆད་མི་འབྱུང་བའི་ཡོན་ཏན་དང་། གཉིད་དང་ཆང་དང་ཆུང་བས་ལས་མཐར་ཕྱིན་པའི་ཡོན་ཏན་དང་། སྙིང་རྗེ་ཞིང་འཁོར་ལ་བརྩེ་བས་ཀུན་གྱིས་ཁུར་ཞིང་བསྔགས་པའི་ཡོན་ཏན་དང་། དགོངས་པ་ཟབ་ཅིང་ཁོང་ཡངས་པས་ཡ་ག་དང་ཕྲ་བས་མི་ཚུགས་པའི་ཡོན་ཏན་ཡོད་དོ། །ལོ་རྒྱུས་རྣམ་གཉིས་ལྡན་པ་དང་། ཞེས་པ། སྐྱེ་བོ་མི་ཆོས་ཀྱི་ལོ་རྒྱུས་ནི་གཙུག་ལག་ནས་འབྱུང་བ་བཞིན་ནམ་ཡང་ན་ཡིད་དང་འཐད་པ་ཡིན་ནོ། །དམ་པ་ལྷ་ཆོས་ཀྱི་ལོ་རྒྱུས་ནི། གནས་དེའི་ཤར་གཞོལ་བ། ལྷོ་བྲེས་པ། ནུབ་མཐོ་བ། བྱང་སྐྱོབ་པ། ཤིང་ཡ་ག་ཐམས་ཅད་གར་བྱེད་པ་འདྲ་བ། །བུང་བ་རྒྱང་རིང་པོ་ནས་གླུ་ལེན་པ། །ཕུ་ཆུ་ལྷུང་ལྷུང་གི་སྒྲ་འབྱིན་པ་གནམ་འཁོར་ལོ་རྩིབས་བརྒྱད་དུ་ཡོད་པ། ས་པདྨ་འདབ་བརྒྱད་དུ་ཡོད་པ། བར་སྣང་འོལ་ཀ་ཆུས་བཀང་བ་འདྲ་བའི་གནས་དེར་བསྒྲུབ་བོ། །ཚོ་གསུམ་བཅད་ལ་བྱིན་གྱིས་བརླབ། ཅེས་པ། ཡོ་བྱད་ཚོ་གསུམ་དུ་བཅད་དོ། །ཆ་གཅིག་ལ་སྔོན་དུ་མཆོད་སྦྱིན་བྱའོ། །ཆ་གཅིག་མཇུག་ཏུ་དཔའ་བོའི་སྟོན་མོ་ལ་བཞག་གོ །ཆ་གཅིག་ལ་སྒྲུབ་པའི་ཆ་རྐྱེན་བྱེད་པས། རཾ་ཡཾ་ཁཾ་གིས་བསྲེགས་སྦྱངས་བཀྲུས་ལ། ཏྲཾ་ལས་རིན་པོ་ཆེ་འམ་འདོད་པའི་ཡོན་ཏན་དུ་བྱིན་གྱིས་བརླབ་བོ། །ཡང་ན་རྒྱང་གྲགས་དཔག་ཚད་དམ། ཞེས་པ། བློ་ཆུང་བ་ལས་ཡང་ན་ཆེ་བ་ཡིན་ན་དངོས་སུ་མི་འབྲི་བར་ཏིང་ངེ་འཛིན་གྱི་དཀྱིལ་འཁོར་རྒྱང་གྲགས་དཔག་ཚད་ལ་སོགས་པར་བསྒོམ་པའོ། །ཁ་ཅིག་འབྲི་བ་ཡིན་ཟེར་ཏེ་ནོར་རོ། །སོ་སོ་འཚམས་པའི་གཟུགས་བརྙན་བྲི། ཞེས་པ། བློ་ཆུང་ཏིང་ངེས་འབྲི་མ་ནུས་ན་གཟུགས་བརྙན་གྱི་དཀྱིལ་འཁོར་འབྲིའོ། །དེའང་མཆེད་མང་ཉུང་དང་གནས་ཆེ་ཆུང་འཚམས་པར་བྲིའོ། །རིགས་ཀྱི་རིགས་ཏེ་རིགས་ཀྱི་གཙོ། ཞེས་པ་ལ་སོགས་པ་ལེའུ་དྲུག་པར་བཤད་པ་དང་མཐུན་པར་ཚོམ་བུ་གསུམ་པའི་ལྷ་གྲངས་སྦྱར་རོ། །ཟླ་ཕྱེད་ཕྱེད་ཞག །ཅེས་པའི་ཕྱིར་བསྙེན་བསྒྲུབ་བཞིའི་དུས་ཚིགས་དང་འཕྲོ་སྟོན་པ་ཡིན་ཏེ། དེའང་སྒྲུབ་པ་ཟླ་བ་ཕྱེད་བྱེད་ཀྱང་། །ཟླ་བ་གཅིག་ལྟ་བུ་ལ་བརྩིས་ན། །ཆ་རྐྱེན་ཚང་ནས་བསྒྲུབ་པ་ལ་ཞུགས་ཏེ། །ཞག་གཅིག་ཕན་ཆད་ནི་བསྙེན་པ་ཡིན་ནོ། །ཟླ་ཕྱེད་ཕྱེད་ཞག་ཉེ་བསྙེན་པ། ཞེས་པ། ཚེས་གཅིག་ནས་དབུ་བཙུགས་ཏེ་ཉ་གསུམ་ཚུན་ཆད་ཉེ་བསྙེན་ཡིན་ནོ། །གོང་དུ་ཞག་གཅིག་བསྙེན་པར་སོང་བ་ཡིན་ནོ། །ལྷ་གསལ་འཕྲོ་འདུ་སྣོད་དུ་རུང་། ཞེས་པ། དེའི་དུས་སུ་འཕྲོ་འདུའི་ཏིང་ངེ་འཛིན་ཡིན་ཏེ། མདུན་དུ་ཡེ་ཤེས་ཀྱི་ལྷ་ཕྱེ་ནས་འཕྲོ་འདུ་བྱེད་པའི་ཚེ་ཕར་ལ་འཕྲོས་པས་ཡེ་ཤེས་སེམས་དཔའ་ལ་ཕོག་པས་སྐུ་གསུང་ཐུགས་མཉེས་ཚུར་འདུས་པས་ལུས་ངག་ཡིད་གསུམ་གྱི་སྒྲིབ་པ་དག་པས་དངོས་གྲུབ་ཀྱི་སྣོད་དུ་རུང་བར་བྱས་སོ། །བཅོ་ལྔ་མར་ཕྱེད་སྒྲུབ་པ་སྟེ། ཞེས་པ། ཉ་ནས་དགུ་སྟོང་ཡན་ཆད་ཞག་བཅུ་བཞི་སྒྲུབ་པ་ཡིན་ནོ། །འཕྲོ་འདུ་བསྣོལ་ནས་བསྒྲུབ་པར་བྱ། ཞེས་པ་སྒྲུབ་པའི་དུས་སུ་ཕར་ལ་འཕྲོས་པས་མཉེས་པའི་མཆོད་པ་ཕུལ་ནས་དངོས་གྲུབ་བསྐུལ། ཚུར་འདུས་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ། དེ་ལྟར་འཕྲོ་འདུ་བསྣལ་ནས་བྱེད་པའོ། །ཞག་གྲངས་ཚངས་ནས་རྟགས་བྱུང་ན ། ཞེས་པ། སྤྱིར་སྒྲུབ་པ་ཇི་ཙམ་བྱེད་པ་ལ་ཆ་རྩི་བ་ཡིན་གྱིས། ཟླ་བ་གཅིག་ལ་སྒྲུབ་པ་རྫོགས་པ་མ་ཡིན། འདིར་ཟླ་བ་གཅིག་ལ་སྦྱར་བ་ནི་གོ་བདེ་བའི་ཆེད་དུ་བྱས་པ་ཡིན་ནོ། །དེ་ལྟར་སྒྲུབ་པ་བྱེད་པ་ཇི་ཙམ་བྱེད་གྲངས་ཚད་ནས་སྒྲུབ་རྟགས་བྱུང་བའི་ཚེ། ནུབ་ཐ་མ་ནི་སྒྲུབ་པ་ཆེན་པོ་ཡིན་ནོ། །དངོས་གྲུབ་བཟླས་བླང་སྒྲུབ་ཆེན་པ། ཞེས་པ། དེའི་དུས་ཀྱི་འཕྲོ་འདུ་ནི་བཟླས་པའི་སྒོ་ནས་དངོས་གྲུབ་ལེན་པ་ཡིན་ཏེ། སྔགས་ཀྱི་འོད་ཟེར་ཕར་མི་སྤྲོ་བར་ཁ་དོག་དམར་པོ་འབའ་ཞིག་མཚོ་ལ་ཆར་པ་བབ་པ་དང་འདྲ་བར། དེ་བཞིན་གཤེགས་པའི་སྐུ་གསུང་ཐུགས་ཀྱི་དངོས་གྲུབ་བདག་གི་ལུས་ངག་ཡིད་གསུམ་དང་དངོས་གྲུབ་ཀྱི་རྫས་རྣམས་ལ་སིབ་སིབ་ཐིམ་པར་བསམ་མོ། །བསྙེན་བསྒྲུབ་གསང་བ་བཞི་རིམ་པས། ཞེས་པ་སྦྱོར་བ་དུས་ཀྱི་བསྙེན་པ་བཞི་ཡིན་ཏེ། དེའང་ཡུམ་བཙལ་ནས་ཁྲུས་བྱས། རྒྱན་གདགས། ཆོས་བཤད། དམ་ཚིག་དབོག །ཡུམ་ལྷར་བསྐྱེད། འདོད་པའི་བསྟན་ཆོས་བསྐུལ་བར་བྱ་སྟེ། དྲུད་པའི་གནས་སུ་དྲུད། བརྩེ་བའི་གནས་སུ་བརྩེ། འོ་དང་འཛུམ་བུ་བྱེད་པ་ནི་བསྙེན་པ། ཡབ་ཡུམ་སྙོམས་པར་ཞུགས་ཏེ། ཕྱག་རྒྱ་བཞིས་རོལ་པ་ནི་ཉེ་བའི་བསྙེན་པ། དབབ་པའི་གནས་སུ་དབབ་པ། དྲུད་པའི་གནས་སུ་དྲུད་པ། བསྐྱོད་པའི་གནས་སུ་བསྐྱོད་པ་སོགས་བདེ་བ་གཡོ་ཞིང་སྒྲུབ་པ་ནི་སྒྲུབ་པ། ཐིག་ལེ་བྱང་ཆུབ་ཀྱི་སེམས་ཡབ་ཡུམ་གྱི་རྩ་བྱེ་བ་ཕྲག་བཅུ་གསུམ་འདུས་པའི་བདུད་རྩི་ཡུམ་གྱི་མཁའ་ལ་དུས་གཅིག་ཏུ་བབས་ནས་བདེ་བ་ཉམས་སུ་མྱོང་བ་ནི་སྒྲུབ་པ་ཆེན་པོ་ཡིན་ནོ། །དེ་ལྟར་བསྙེན་བསྒྲུབ་བཞི་གཅིག་ཏུ་དྲིལ་ནས་ཡབ་ཡུམ་གཉིས་རོལ་བས་ཆོས་ཐམས་ཅད་གཉིས་མེད་དུ་རྟོགས་ཤིང་མྱོང་བའོ། །འོ་ན་ལམ་གྱི་སྒྲུབ་པ་ཆེན་པོ་དང་། སྦྱོར་བའི་སྒྲུབ་པ་ཆེན་པོ་དང་། སྒྲུབ་པ་དུས་ཀྱི་སྒྲུབ་པ་ཆེན་པོ་དང་གསུམ་ལ་ཁྱད་ཅི་ཡོད་ཅེ་ན། ལམ་གྱི་སྒྲུབ་པ་ཆེན་པོ་ནི་རིག་འཛིན་ལ་སྦྱོར་ལ་མ་རེག་པའི་ཆ་ནས་འཇོག་པའོ། །སྦྱོར་བ་དུས་ཀྱི་སྒྲུབ་ཆེན་ནི་ཡེ་ཤེས་ཀྱི་ཐིག་ལེ་བརྟན་པའི་ཆ་ནས་བཞག་པའོ། །སྒྲུབ་པ་དུས་ཀྱི་སྒྲུབ་ཆེན་ནི་རྫས་དང་ཡུམ་གྱི་མཁའ་ལ་དངོས་གྲུབ་ལེན་པ་གཉིས་ཀའི་ཆ་ནས་འཇོག་པའོ། །ཕྱག་རྒྱ་བཞི་དང་ལྷ་མོ་བརྒྱད། ཅེས་པ། ཡུམ་དང་ཡབ་རོལ་བའི་དུས་སུ་ཕྱག་གཅིག་ལ་གཅིག་གཟུང་བ་ལྕགས་ཀྱུ། འཁྱུད་པ་ཞགས་པ། སྟོད་སྨད་བསྡམས་པ་ལྕགས་སྒྲོག །བདེ་བས་དགྱེས་པ་དྲིལ་བུ། བདེ་བས་ཚིམ་པ་སྤོས་མེ་མ། བྱང་ཆུབ་ཀྱི་སེམས་འཕྲོ་བ་མེ་ཏོག །བདེ་བས་གསལ་བ་མར་མེ། །བདེ་བས་རྒྱས་པ་དྲི་ཆབ། ཡབ་ཡུམ་ཐིག་ལེ་དཀར་དམར་འདྲེས་པ་གཟུགས། རྩ་གནས་བདེ་བ་ཧ་སའི་སྒྲ་སྒྲོགས་པ་གིརྟི། བདེ་བ་རྒྱུན་མ་ཆད་པ་ཕྲེང་བ་མ། རྩ་མདུད་གྲོལ་བ་ནིཪྟི་མ་སྟེ་དེ་ལྟར་བཅུ་གཉིས་དོན་གྱིས་ལྡན་ནོ། །ཐིག་ལེ་རྡོ་རྗེའི་གཟུགས་སུ་ཆགས། ཞེས་པ་སྒྲུབ་པ་ཆེན་པོའི་དུས་སུ་ཡབ་ཡུམ་གྱི་ཐིག་ལེ་དངོས་གྲུབ་ཀྱི་རྫས་ཡིན་ཏེ། དེ་ནི་སྐྱེ་འཆི་མེད་པ་རྡོ་རྗེའི་གཟུགས་དང་འདྲའོ། །དེ་ཅིས་ན། གོང་གི་ཟོས་པ་དེ་སྐྱེ་འཆི་མེད་པ་རྡོ་རྗེའི་གཟུགས་སུ་འགྲོ་བའི་ཕྱིར་རོ། །དེ་ཉིད་ལ་ཐབས་ལས་གྲུབ་ཚེ་དབང་ཡང་ཟེར་བ་ཡིན་ནོ། །མཆོད་ཆེན་མཁའ་འགྲོ་གསལ་འབར་འགྱུར། ཞེས་པ་གཞན་གྱིས་མཆོད་པའི་གནས་སུ་ཁུར་བ་དང་། ནམ་མཁའ་ལ་འགྲོ་བ་དང་མདོག་གསལ་བ་ལ་སོགས་པ་འབྱུང་ངོ་། །རྒྱན་ཆ་བཅུ་དྲུག་ཚང་བ་དང་། ཞེས་པ་རྒྱན་ཆ་བཅུ་དྲུག་ནི། དཔལ་གྱི་ཆས་བརྒྱད་དང་། དུར་ཁྲོད་ཀྱི་ཆས་བརྒྱད་དོ། དཔལ་གྱི་ཆས་བརྒྱད་ནི། ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །གནོད་འདུག་འདུལ་བྱེད་དཔའ་བོ་ལྗགས་ཀྱི་ཆས། །ཏིང་ངེ་དཔའ་བཏུལ་འབར་བ་སྟག་གི་ཆས། །དབང་གི་བསེ་ཁྲབ་དམར་པོ་བགྲོད་པའི་ཆས། །དཔའ་བརྗིད་མཉེན་ལྕུག་སྦྲུལ་ནག་འཁྲིལ་བའི་ཆས། །རྡོ་རྗེ་ལྔ་ཡི་སློག་པ་རིག་པའི་ཆས། གཟི་མདངས་ཆེ་བ་གཙིགས་པ་སྤྲུལ་པའི་ཆས། བསྐལ་པ་མེ་ལྟར་འབར་བ་བསྐལ་མེའི་ཆས་སོ། །དུར་ཁྲོད་ཀྱི་ཆས་བརྒྱད་ནི། བགོ་བའི་གོས་གསུམ། གདགས་པའི་རྒྱན་གཉིས། བྱུག་པའི་རྫས་གསུམ་མོ། །བགོ་བའི་གོས་གསུམ་ནི། གླང་ཆེན་གྱི་ཀོ་རློན། ཞིང་ཆེན་གྱི་གཡང་གཞི། སྟག་གི་ཤམ་ཐབས་སོ། །གདག་པའི་རྒྱན་གཉིས་ནི། ཐོད་པ་ཚར་གསུམ་དང་སྦྲུལ་གྱི་ཆུན་འཁོར་རོ། །བྱུག་པའི་རྫས་གསུམ་ནི། ཐལ་ཆེན་གྱི་ཚོམ་བུ། རཀྟའི་ཐིག་ལེ། ཞག་གི་ཟོ་རིས། དེ་ལྟར་རྒྱན་ཆས་བཅུ་དྲུག་ཚང་བའོ། །ཞག་ནི་བཅུ་དྲུག་ཚང་བའོ། །ཞག་ནི་བཅུ་དྲུག་ཕྲག་དྲུག་གམ། ཞེས་པ་འདིར་ནི་ཞི་བ་ལས་ཁྲོ་བོར་སྒྲུབ་ཐག་ཉེ་བ་ཅིའི་ཕྱིར་ཞེ་ན་ཁ་ཅིག་ན་རེ། ཞི་བ་འཛབ་འཐོར་ལ། ཁྲོ་བོ་འཛབ་མི་འཐོར་བ་ཡིན་གསུང་ངོ་། །ཁ་ཅིག་ན་རེ། ཞི་བ་ལ་བར་ཆོད་འབྱུང་ལ། ཁྲོ་བོ་ལ་བར་ཆོད་མི་འབྱུང་བས་སྒྲུབ་ཐག་ཉེ་ཟེར་རོ། །ཐུན་མོང་བསྲུང་བའི་ལས་རྫོགས་ནས། ཞེས་པ། གང་དང་ཐུན་མོང་ངམ་ཞེ་ན། ལྷ་རྗེ་ཧོར་པོའི་ཞལ་ནས། ཁྲོ་བོ་བཅུའི་མཚམས་ནི། བསྙེན་པ། ཉེ་བསྙེན། སྒྲུབ་པ། སྒྲུབ་པ་ཆེན་པོ་རྣམས་ཀྱི་ཐུན་མོང་གི་མཚམས་ཡིན་གསུངས་སོ། །ལྷ་རྗེ་གླན་ན་རེ། ཚོམ་བུ་གཅིག་པ་དང་ལྔ་པ་གསུམ་པ་ཀུན་གྱི་ཐུན་མོང་གི་མཚམས་ཡིན་གསུང་ངོ་། །ལྷག་པའི་དཀྱིལ་འཁོར་ལྷ་དགུར་ལྡན། ཞེས་པ། དེ་ལྟར་དཀྱིལ་འཁོར་བསྐྱེད་ནས་ཡན་ལག་ལྷག་པའི་ལྷ་དགུ་བསྒོམ་སྟེ། ཇི་ལྟར་བསྒོམ་ན། བྱིན་དབང་ཐོབ་པའི་དཀྱིལ་འཁོར་ལ། ཞེས་པ། གནས་སུ་ཡེ་ཤེས་སེམས་དཔའ་དགོད་པ་དང་། སྐུ་གསུང་ཐུགས་སུ་བྱིན་གྱིས་བརླབ་པའོ། །གནས་སུ་ཡེ་ཤེས་སེམས་དཔའ་བསྒོམ་པ་ནི། བདག་དམ་ཚིག་གི་ཐུགས་ཀར་ཡེ་ཤེས་སེམས་དཔའ་ཞལ་གཅིག་ཕྱག་གཉིས་བསྒོམ། དེའི་ཐུགས་ཀར་ཉི་མའི་སྟེང་དུ་རྡོ་རྗེའི་ལྟེ་བ་ལ་ཧཱུྃ། ཧཱུྃ་ལས་འོད་འཕྲོས་པས་ཕྱོགས་བཅུ་སངས་རྒྱས་ལ་ཕོག་པས་སྐུ་གསུང་ཐུགས་ཀྱི་བྱིན་བརླབས་བསྡུས་ཏེ་བདག་གནས་གསུམ་དུ་ཐིམ་པས་ༀ་ཨཱཿཧཱུྃ་དུ་གྱུར། དེ་ལས་སྔགས་བརྗོད་པས་སྐུ་གསུང་ཐུགས་ཀྱི་ལྷ་བསྒོམ་མོ། །ཡང་དབུའི་གནས་ལྔར་ཡི་གེ་ༀ་ཧཱུྃ་སྭཱ་ཨཱཾ་ཧཱ་ལྔ་བསྒོམ་མོ། །དེ་ལས་སྔགས་བརྗོད་པས་ཡིག་འབྲུ་རྣམས་ཞུ་ནས་ཧེ་རུ་ཀ་ལྔར་གྱུར་ནས་དབུ་བརྒྱན་པར་བསམ་མོ། །དེ་ནི་ཡན་ལག་ལྷག་པའི་ལྷ་དགུའོ། །རང་བཞིན་ཕན་མཆོད་བཀུག་ཅིང་བསྟིམ། ཞེས་པ། དེ་ལྟར་ཏིང་ངེ་འཛིན་གྱི་དཀྱིལ་འཁོར་བསྐྱེད་ནས། བདག་གི་ཐུགས་ཀའི་ཧཱུྃ་ལས་འཕྲོས་འོག་མིན་ན་གནས་པའི་བདེ་བར་གཤེགས་པ་རྣམས་ཆོས་ཀྱི་སྐུའི་ངང་ལ་བཞུགས་པ་རྣམས་སྨོན་ལམ་གྱི་སྟོབས་དྲན་ནས་གཟུགས་སྐུར་བཞེངས་པར་བསམ་སྟེ། སྙན་གསན་དབབ། སྤྱན་དྲངས་མདུན་གྱི་ནམ་མཁའ་ལ་བཞུགས་པ་ལ་རིག་པའི་མེ་ཏོག་དོར། ཕྱག་རྒྱ་བཞིས་བསྡམ། བརྟན་པར་བཞུགས་སུ་གསོལ། ཡང་ན་ལྕགས་ཀྱུ་མས་འགུག། ཞག་པ་མས་བཅིངས། ལྕགས་སྒྲོ་མས་བསྡམ། །དྲིལ་བུ་མས་མཆོད་པར་བྱའོ། །དགྱེས་ནས་རིམ་བཞིན་བརྟན་བྱས་ཏེ། ཞེས་པ། དེ་ནས་མཉེས་པ་ཕྱག་མཆོད་ལ་སོགས་པ་བྱས་ཏེ། ལས་བྱང་བཞིན་ནོ། །དེ་སོགས་བཟླས་བསྙེན་འཕྲོ་འདུ་དང་། ཞེས་པ། གོང་དུ་བསྟན་པའི་བསྙེན་སྔགས་ནི་གཙོ་བོ་ཡབ་ཡུམ་ཀྱི་ཡིན་ལ་སོགས་ཁོངས་སུ་རིགས་གཞན་བཞི་པོ་སྡུད་དོ། །འཕྲོ་འདུ་ནི་བདག་དམ་ཚིག་གི་ཐུགས་ཀ་ནས་འོད་དཀར་པོ་འཕྲོས་པ་དང་ཚུར་ལ་དམར་པོ་འདུས་པའོ། །འདུན་པར་བསྐུལ་དང་གནོད་བྱེད་པ། ཞེས་པ་ནི། འོད་དཀར་པོ་ཕར་ལ་འཕྲོས་པའི་དུས་སུ་ན་བདེ་བར་གཤེགས་པ་རྣམས་སྒྲུབ་པ་པོ་ལ་འདུག་ཅིག་པར་བསྐུལ་བ་དང་། ཚུར་འདུས་པས་ལུས་ངག་ཡིད་གསུམ་གྱི་སྒྲིབ་པ་དག་པས། དངོས་གྲུབ་ཀྱི་སྣོད་དུ་རུང་བར་གྱུར་པར་བསྒོམ་མོ། །བསྙེན་པའི་དཀྱིལ་འཁོར་རྫོགས་པའོ། །ཞེས་པ་ནི། དེ་རྣམས་ཀྱིས་བསྙེན་པ་དང་ཉེ་བའི་བསྙེན་པ་བསྟན་ཏོ། །ཞེས་བྱ་བའི་ཐ་ཚིག་གོ །དེ་བསྙེན་དེ་བཞིན་སྒྲུབ་པ་ཡང་། ཞེས་པ། དེ་བསྙེན་ཞེས་པ་གོང་དུ་སྙག་པའི་ཚིག་ཡིན་ལ། སྒྲུབ་པའང་དེ་དང་འབྲེལ་བར་སྟོན་པའོ། །འཕྲོ་འདུ་བསྐུལ་དང་དངོས་གྲུབ་རྫོགས། ཞེས་པ་སྒྲུབ་པའི་དུས་སུ་བདག་དམ་ཚིག་གི་ཐུགས་ཀ་ནས་འཕྲོས་ནས་ཡེ་ཤེས་སེམས་དཔའ་ལ་ཕོག་པས་དངོས་གྲུབ་སྩོལ་ཅིག་བར་བསྐུལ། ཚུར་འདུས་པས་དངོས་གྲུབ་ཐོབ་པར་བསམ་པའོ། །དེ་ལྟར་སྐྱོན་སྤངས་ནས་བསྒྲུབ་པ་ནི་བསྒྲུབ་པའི་དུས་ཡིན་ནོ། །གཅིག་ལ་རྫས་ལྟར་འཕྲོ་འདུ་དང་། ཞེས་པ། སྒྲུབ་པའི་རྟགས་ཐོན་ནས་ཐ་མའི་ནུབ་གཅིག་ལ་འོད་ཟེར་ཕར་མི་སྤྲོ་བར་ཚུལ་ལ་དངོས་གྲུབ་ཀྱི་རང་བཞིན་ཁ་དོག་དམར་པོ་ཁོ་ན་བསྒྲུབ་རྫས་ལ་སྡུད་པ་ནི་སྒྲུབ་པ་ཆེན་པོའི་བཟླས་པར་ཤེས་པར་བྱའོ། །ཤེལ་དང་བྱུ་རུ་བུང་བ་དང་། །ཞེས་པ། འདི་ལ་འབྲུ་སྦྱོར་ལུགས་གསུམ་སྟེ། བསྙེན་པའི་དུས་སུ་འོད་ཟེར་དཀར་པོ་ཤེལ་ལྟར་འཕྲོ་བ་དང་། སྒྲུབ་པའི་དུས་སུ་དམར་པོ་བྱུ་རུ་ལྟར་དུ་སྡུད་པ་དང་། སྔགས་ཀྱི་འོད་ཟེར་ཆེ་ཆུང་བུང་བ་ལྟར་དུ་བྱེད་པའོ། །མཐིང་གི་བུམ་པ་མང་པོ་དག །ཅེས་པ། ཉེ་བསྙེན་གྱི་དུས་སུ་བདག་ཉིད་དངོས་གྲུབ་ཀྱི་སྣོད་དུ་རུང་བ་ནི་མཐིང་གི་བུམ་པ་ལྟ་བུ་ཡིན་ནོ། །བཟླས་པའི་གྲངས་མང་པོ་དག་བྱའོ། །ཞེས་པའམ། ཡང་ན་སྐུའི་གནས་སུ་དཀར་པོ་ཤེལ་ལྟ་བུའི་འཕྲོ་འདུ་བྱ། གསུང་གི་གནས་སུ་དམར་པོ་བྱེ་རུ་ལྟ་བུའི་འཕྲོ་འདུ་བྱ། ཐུགས་གི་གནས་སུ་མཐིང་གི་བུམ་པ་ལྟ་བུའི་འཕྲོ་འདུ་བྱའོ། །ཞེས་པའོ། །ཡང་ན་ཕར་འཕྲོས་པའི་དུས་སུ་འོད་ཟེར་དཀར་པོ་ཤེལ་ལྟ་བུ་འཕྲོ་ལ། ཚུར་འདུས་པའི་དུས་སུ་དམར་པོ་བྱེ་རུ་ལྟ་བུ་འདུས། ཆེ་ཆུང་གི་ཚད་བུང་བ་ཙམ་ཡིན། །དངོས་གྲུབ་ཐོབ་པའི་དཔེ་མཐིང་གི་བུམ་པ་སྦྲང་རྩིས་གང་བ་ལྟ་བུ་ཡིན་ནོ། །རིམ་བཞིན་བུང་བ་མེ་ཏོག་དང་། ཞེས་པ་རིམ་པ་བཞིན་གོང་དུ་བསྟན་པ་ལ་སྙེག་པའི་ཚིག་ཡིན་ལ། བུང་བ་ཕར་ལ་འཕྲོས་ཏེ་མེ་ཏོག་གཞིབས་ནས་ཚུར་ལ་སྦྲང་རྩི་ཁྱེར་ནས་འོང་བ་དང་འདྲ་བར། སྒྲུབ་པའི་དུས་སུ་འོད་ཟེར་དཀར་པོ་ཕར་ལ་འཕྲོས་ནས་མཆོད་པ་ཕུལ་ཏེ་དམར་པོ་ཚུར་སྡུད་པའི་དུས་སུ་དངོས་གྲུབ་ཐོབ་པའོ། །མཚོ་ལ་སྦྲང་ཆར་བབ་བཞིན་ནོ། །ཞེས་པ་མཚོ་ལ་སེར་བ་བབ་པ་ནི། ཡར་ལ་མི་འཕྲོ་བར་མར་ལ་འབབ་པ་ཡིན། དེ་བཞིན་དུ་སྒྲུབ་པ་ཆེན་པོ་དུས་སུ་ཕར་མི་སྤྲོ་བར་ཚུལ་ལ་ཁོ་ན་སྡུད་པ་ཡིན་ནོ། །ལྷ་མོ་ཀླུ་མོ་རིགས་ངན་མོ། །ཞེས་པ། འདི་ལ་རྒྱུད་གཅིག་གི་དབང་དུ་བྱས་པ་དང་། ཐ་དད་ཀྱི་དབང་དུ་བྱས་པ་གཉིས་སོ། །ཐ་དད་ཀྱི་དབང་དུ་བྱས་ན་ལྷ་མོ་དངོས་དང་། ཀླུ་མོ་དངོས་དང་། རིགས་ངན་མོ་མིའི་བུ་མོའོ། །རྒྱུད་གཅིག་གི་དབང་དུ་བྱས་གསུམ་ལས། ལོ་གྲངས་ཀྱི་སྒོ་ནས་བཞག་ན་ལྷ་མོ་ནི་བཅུ་གཉིས་ལོན་པ་ལ་བྱ། ཀླུ་མོ་ནི་བཅུ་དྲུག །རིགས་ངན་མོ་ནི་ཉི་ཤུ་རྩ་གཉིས་ལོན་པའོ། །མཚན་གྱི་སྒོ་ནས་དབྱེ་ན། ལྷ་མོ་ནི་པདྨ་ཅན་ཡིན་ལ། ཀླུ་མོ་ནི་དུང་ཅན་མ། རིགས་ངན་མོ་ནི་རི་མོ་ཅན། སྟོབས་ཀྱི་སྒོ་ནས་དབྱེ་ན། ལྷ་མོ་ནི་བདག་གཞན་གཉིས་ཀ་བདེ་བ་སྐྱེད་ནུས་པ་ཡིན་ལ། ཀླུ་མོ་ནི་གཞན་བདེ་བ་སྐྱེད་ནུས་པ། རིགས་ངན་མོས་རང་བདེ་བ་སྐྱེད་ནུས་པའོ། །རབ་འབྲིང་གི་སྒོ་ནས་དབྱེ་ན། ལྷ་མོ་རབ་ཡིན་ལ། ཀླུ་མོ་འབྲིང་། རིགས་ངན་མོ་ཐ་མའོ། །དབྱེའམ་ཡང་ན་མི་དབྱེ་ཞེས་པ། དེའང་ལྟ་དགོངས་དམའ་ན་དབྱེ་དགོས་ཏེ། ངན་པ་དོར་ནས་རིགས་བཟང་པོ་ལ་འཇུག་གོ །ལྟ་དགོངས་མཐོ་ན་དབྱེ་མི་དགོས་ཏེ། བསྙེན་སྒྲུབ་བཞི་ནི་ཞི་བ་དང་མཐུན་ནོ། །སེམས་ལྔ་རིམ་པར་ཟིན་པ་ཡིས། ཞེས་པ། ཡབ་ཡུམ་གྱི་བདེ་བ་མགོ་གཡོ་ཞིང་ཐིག་ལེ་མགོ་ལྡང་ཙམ་ན་གཡོ་ལྡང་བྱང་ཆུབ་ཀྱི་སེམས། སྔ་མའི་བདེ་བ་འཇིག་ཅིང་ཕྱི་མ་ལ་འཇུག་ཙམ་ན། འཇིག་འཇུག་བྱང་ཆུབ་ཀྱི་སེམས། བདེ་བ་སྐྱེས་པ་མ་འགགས་པ་གནས་པ་བྱང་ཆུབ་སེམས། སྔ་མའི་བདེ་བས་ཀྱང་ཕྱི་མ་ལ་དམིགས་པ་ནི་དམིགས་པ་བྱང་ཆུབ་ཀྱི་སེམས། ཐིག་ལེ་རྩ་གནས་ནས་འོང་ཞིང་སླར་རྩ་གནས་སུ་འགྲོ་བ་ནི་འགྲོ་འོང་བྱང་ཆུབ་ཀྱི་སེམས་སོ། །ལམ་མཆོག་གསལ་བའི་སྒྲོན་མེ་ལས། ལེའུ་བདུན་པའི་རྣམ་པར་འགྲེལ་པའོ། །།ལེའུ་བརྒྱད་པའི་གཞུང་ལ་གཉིས་ལས། རྩོམ་པའི་ཡན་ལག་ལ་གཉིས་ལས། དངོས་གྲུབ་ལྷག་པའི་མཆོག་ཉིད་དང་། ཞེས་པ་ལ་སོགས་པ་སྟེ། དེའང་དངོས་གྲུབ་ནི་མཆོག་ཐུན་གཉིས་ལས། འདི་ཐུན་མོང་གི་དངོས་གྲུབ་པས་ལྷག་པ་མཆོག་གི་དངོས་གྲུབ། ཕྱག་རྒྱ་ཆེན་པོ་ཚེ་དབང་རྣམ་སྨིན་གསུམ་བློ་ཆུང་གི་ཅི་རིགས་པར་ཐོབ་པ་ཡིན་ལ། དེ་དག་གང་ལ་བརྟེན་པ་ཐོབ་ན། བསྙེན་བསྒྲུབ་བཞི་ལ་མོས་བྱས་ནས། ཞེས་པ་སྟེ་ལེའུ་བདུན་པར་ཞི་ཁྲོ་གཉིས་ཀྱི་ཚོགས་སྒྲུབ་པའི་སྐབས་སུ། བསྙེན་པ་ཉེ་བསྙེན་སྒྲུབ་པ་སྒྲུབ་པ་ཆེན་པོ་བཞི་ལ་བརྟེན་ནས་ཐོབ་པས་དེའི་ཕྱིར་དེ་ལ་མོས་ཤིང་ཕྱག་བཙལ་བའོ། །བདེ་ཆེན་ས་ལ་འགོད་པའི་ཕྱིར། ཞེས་པ་ནི། མཐར་ཐུག་གིས་སངས་རྒྱས་བདེ་བ་ཆེན་པོའི་སྐུ་ལྔའི་ས་ལ་འགོད་པའི་ཕྱིར་རམ་ཆེད་དུ་བཤད་དོ། །གང་བཤད་ན། མཐར་ཕྱིན་འབྲས་བུའི་མཚན་ཉིད་བཤད། ཅེས་པ་སྟེ། ལམ་ཟག་བཅས་མཐར་ཕྱིན་པའི་འབྲས་བུ་རིག་འཛིན་བཞི་བཤད་པར་བྱའོ། །ཞེས་པའོ། །ཡང་འདི་སྐད་ཟེར་ན་རིག་འཛིན་བཞི་པོ་འདི་ལམ་མཐར་ཐུག་པའི་འབྲས་བུ་ཡིན་ནམ་མིན། མིན་ན་གཞུང་དང་འགལ། ཡིན་ན་སངས་རྒྱས་དང་ཁྱད་མེད་དུ་ཐལ། ཞེ་ན། འདོད་ན་མི་རིགས་ཏེ། སངས་རྒྱས་སྤངས་རྟོགས་མཐར་ཐུག་པས་ལམ་བགྲོད་དུ་མེད་པ་ཡིན་ལ། རིག་འཛིན་བཞི་པོ་ནི། སྤངས་རྟོགས་མཐར་མ་ཐུག་སྟེ། ཤེས་བྱའི་སྒྲིབ་པ་དང་བག་ལ་ཉལ་གྱི་སྒྲིབ་པ་གཉིས་ཡོད་དོ། །ལམ་བགྲོད་པར་བཤད་པ་དང་འགལ་ལོ་ཞེ་ན། ལན་ནི། སྤྱིར་འབྲས་བུ་ལ་གཉིས་ཏེ། ལམ་དུ་གྱུར་པའི་འབྲས་བུ་དང་། མཐར་ཐུག་གི་འབྲས་བུ་གཉིས་སོ། །དེ་ལ་རིག་འཛིན་བཞི་ནི་ལམ་དུ་གྱུར་པའི་འབྲས་བུ་སྟེ། འབྲས་བུ་བཏགས་པ་བ་ཡིན་ནོ། །སངས་རྒྱས་ནི་མཐར་ཐུག་གི་འབྲས་བུ་མཚན་ཉིད་པ་ཡིན་ནོ། །དེའང་ལམ་དུ་གྱུར་འབྲས་མཐར་ཐུག་འབྲས་ཞེས་གསུངས་པ་ཡིན་ནོ། །འོ་ན་རིག་འཛིན་བཞི་ལ་འབྲས་བུ་ཟེར་བ་ཅིའི་ཕྱིར་ཞེ་ན། དེ་ན་ལམ་ཟག་བཅས་མཐར་ཕྱིན་པས་གནས་སྐབས་ཀྱི་འབྲས་བུ་ཡིན་པས་སམ། ཡང་ན་འབྲས་བུ་སངས་རྒྱས་ལ་སྦྱོར་བ་ལ་ཉེ་བ་ཡིན་པས་འབྲས་བུ་མིང་བཏགས་པ་ཡིན་ཏེ་དཔེར་ན་ལྷ་མོ་རྐེད་མེད་མ་བཞིན་ནོ། །དུས་ཚིག་བར་ཆད་མེད་པ་ནས། ཞེས་པ་ནི། དུས་ཀྱི་ཚོགས་བསྒྲུབས་ནས་འབྲས་བུ་ལ་སྦྱོར་ཚུལ་གཉིས་ཡོད་དོ། །གང་ཞེ་ན། ལྷག་མ་ཡོད་དང་མེད་པ་ཡི། ཞེས་བྱ་སྟེ། ལྷག་བཅས་སུ་སྦྱོར་བ་དང་། ལྷག་མེད་དུ་སྦྱོར་བའོ། །ལྷག་མའི་གོ་བར་རང་ཇི་ལྟར་ཡིན་ཞེ་ན། ལྷག་མ་ལུས་འདི་བཞག་ནས། ཡི་གེ་འཁོར་ལོར་ཚོགས་ཆེན་ལ། འགྲོ་བ་ནི་ལྷག་མ་མེད་པ་ཡིན་ལ། ལྷག་མའི་ལུས་འདི་འཇིག་པ་མེད་པ་རྡོ་རྗེའི་ལུས་སུ་བྱས་ནས་སངས་རྒྱས་ཀྱི་ས་ལ་སྦྱོར་ནུས་པ་ནི་ལྷག་བཅས་སོ། །དེའང་ཚོགས་སྒྲུབ་ནས་བློ་ཆུང་བ་རྣམ་སྨིན་ཐོབ་པའི་དུས་སུ་ཕུང་པོ་འདི་སངས་རྒྱས་ཀྱི་ས་ལ་ཁྱེར་མི་ནུས་པས་ལྷག་མེད་ཡིན་ལ། ཚེ་དབང་ཐོབ་པའི་དུས་སུ་ལྷག་མའི་ལུས་སྐྱེ་འཇིག་མེད་པ་རྡོ་རྗེའི་ལུས་སུ་བྱས་ནས་སངས་རྒྱས་ཀྱི་ས་ལ་ཁྱེར་ནུས་པ་ལྷག་བཅས་ཡིན་ནོ། །དེའང་འབྱུང་བ་དངས་མ་ལས་གྲུབ་པ་ལྷག་མའི་ལུས་མིན་པ། འབྱུང་བ་རགས་པ་རྙིགས་མའི་ཆ་ལས་གྲུབ་པ་ནི་ལྷག་མའི་ལུས་སོ། །ཡང་འཁོར་བ་ཐོག་མ་མེད་པ་ནས་བརྒྱུད་པའི་ལྷག་མའི་རིག་འཛིན་ཐོབ་པའི་ལུས་འདི་ཡིན་ལ། འདི་སངས་རྒྱས་ཀྱི་ས་ལ་ཁྱེར་ནུས་པ་དང་མི་ནུས་པ་གཉིས་ཡིན་ནོ། ཐུན་མོང་ངམ་ལྟ་བུར་ཟུང་དུ་འགྱུར། ཞེས་པ་ནི། ཐེག་པ་ཐུན་མོང་བ་ལ་ལྷག་བཅས་ལྷག་གཉིས་ཟུང་དུ་ཡོད་པ་བཞིན་དུ། འདིར་ཡང་ལྷག་བཅས་ལྷག་མེད་གཉིས་ཟུང་དུ་འགྱུར་རོ། །ཐུན་མོང་ལ་ཇི་ལྟར་ཡོད་ཅེ་ན། འཕགས་པ་དགྲ་བཅོམ་པའི་སྐབས་ན། འཁོར་བར་སྐྱེ་བར་བྱེད་པའི་རྒྱུ་ལས་དང་ཉོན་མོངས་པ་ཟད་ནས་ཚེ་སྔ་མའི་ལས་ཀྱི་ལྷག་མས་བསྐྱེད་པའི་ལུས་འདི་དང་མ་བྲལ་ན་ལྷག་བཅས། འཁོར་བར་སྐྱེ་བར་བྱེད་པའི་ལས་དང་ཉོན་མོངས་པ་ཟད་ནས་སྐྱེ་བ་འདིའི་ཕུང་པོ་དང་བྲལ་ན་ལྷག་མེད་དོ། །ཡང་ན་ཀུན་འབྱུང་གི་བདེན་པ་སྤངས་ཀྱང་འབྲས་བུ་སྡུག་བསྔལ་གྱི་བདེན་པ་མ་སྤངས་ན་ལྷག་བཅས་ལ། རྒྱུ་ཀུན་འབྱུང་གི་དུས་སུ་འབྲས་བུ་སྡུག་བསྔལ་གཉིས་ཀ་སྤངས་ན་ལྷག་མེད་དོ། །དེ་བཞིན་དུས་འདིར་ཡང་ངོ་བོ་མི་འདྲ་ཡང་རྣམ་པར་འདྲའོ། །ཡིད་ཀྱིས་ལྷ་ཡི་གཟུགས་གཟུང་ཞིང་། ཞེས་པ་ལ་སོགས་པ་ནི་རྣམ་སྨིན་གྱི་ངོ་བོ་བསྟན་པ་ཡིན་ཏེ། དེ་ལ་འདོད་ལུགས་མི་མཐུན་ཏེ། ཁ་ཅིག་ནི་རྣམ་སྨིན་སྐད་ཅིག་མས་ཐོབ་པར་འདོད་དོ། །དེའང་ཚོགས་སྒྲུབ་ནས་ཚེ་འཕོ་བའི་དུས་སུ། སྐད་ཅིག་མ་དང་པོ་ཚོགས་སྒྲུབ། །གཉིས་པ་རྣམ་སྨིན། གསུམ་པ་ཕྱག་རྒྱ་ཆེན་པོ་ཡིན་ཟེར་རོ། །དེ་མི་འཐད་དེ། རྣམ་སྨིན་གྱིས་གཞན་དོན་བྱེད་དམ་མི་བྱེད། མི་བྱེད་ན། སྨིན་པས་ཕྲིན་ལས་རྫོགས་མཛད་པ། །མི་འདོར་དགོད་པ་གཞན་གྱིའོ། །ཞེས་གཞན་དོན་བྱེད་པ་དང་འགལ། །བྱེད་ན་སྐད་ཅིག་མ་ལ་གྲུབ་པས་སངས་རྒྱས་དང་ཁྱད་མེད་པར་ཐལ་ལོ། །ཁ་ཅིག་རྣམ་སྨིན་ནི་ཕྱག་རྒྱ་ཆེན་པོ་དང་ཆ་ལུགས་མཐུན་ཏེ། ཡེ་ཤེས་སྒྱུ་མའི་སྐུ་ཡིན་ཟེར་རོ། །འོ་ན་ཕྱག་རྒྱ་ཆེན་པོའི་རིག་འཛིན་དང་ཁྱད་པར་མེད་དམ་བྱས་པ་ལ་སྒྱུ་མའི་ཆ་ལུགས་ལ་ཁྱད་མེད་ཀྱང་དགོངས་པ་ལ་ཁྱད་ཡོད་པར་འདོད་དོ། །དེ་མི་མཐད་དེ། སྤྱིར་རྣམ་པར་སྨིན་པའི་རིག་འཛིན་བློ་ཆུང་ཤོས་ཆུང་བ་ཡིན་ལ། བློ་ཆེ་ཤོས་ཚེ་དབང་གིས་ཀྱང་ལུས་འདི་སྐྱེ་འཇིག་མེད་པ་རྡོ་རྗེའི་ལུས་ལས་ལྷའི་སྐུར་སྣང་མ་ནུས་པ་ལ་བློ་ཆུང་ཤོས་རྣམ་སྨིན་གྱིས་ལྷ་སྐུར་སྣང་བ་མི་འཐད། འཐད་ནི་བློ་ཆེ་བར་ཐལ། འདོད་ཐོག་མི་བཏུབ་སྟེ། རྡོ་རྗེའི་ལུས་སུ་མ་གྱུར་པར། །སྟོབས་ཆུང་སྐྱེད་མོས་ཞན་པ་དང་། །ཞེས་བཤད་དོ། །གཞན་ཡང་ཐེག་པ་ནང་འཛེགས་ཀྱི་དབང་དུ་མ་ཧཱ་ཡོ་ག་བློ་ཆུང་བ་ཡིན་ལ། ཨ་ནུ་ཡོ་ག་བློ་ཆེ་བ་ཡིན་ཏེ། མ་ཧཱ་ཡོ་གའི་མཐོང་ལམ་དང་། མཉམ་པའི་ཨ་ནུའི་ས་དྲུག་པ་དབུགས་ཆེན་འབྱིན་པའི་རྣལ་འབྱོར་ཀྱིས་ཀྱང་ལུས་འདི་རྡོ་རྗེའི་ལུས་ལས་ལྷ་སྐུར་སྣང་མ་ནུས་པ་ཡིན་ལ། འདིར་དེ་བས་དམའ་བའི་མ་ཧཱ་ཡོ་གའི་མཐོང་ལམ་གྱིས་ལྷའི་སྐུར་སྣང་བ་ཤིན་ཏུ་མི་འཐད་དོ། །ཡང་ལུས་ལྷའི་སྐུར་སྣང་ན་ལྷག་མེད་ཀྱི་ངེས་ཚིག་ཀྱང་ཉམས་སོ། །ཡང་ཁ་ཅིག་ནི་རྣམ་པར་སྨིན་པའི་རིག་འཛིན་གྱི་ལུས་ནི་ལྷའི་སྐུར་གསལ་བ་དེ་ཡིན་ལ། ལྷག་མའི་ལུས་འདི་རྣམ་སྨིན་གྱི་ལུས་མིན། དཔེར་ན་ཁྱུང་ཕྲུག་གི་ལུས་ནང་གི་གཤོག་ཏུ་རྒྱས་པ་དེ་མིན་གྱིས་ཕྱིའི་སྒོ་ང་མིན་པ་བཞིན་ཟེར་བ་དེའང་མི་འཐད་དོ། །འོ་ན་ལྷའི་སྐུར་གསལ་བ་དེ་ཡིད་ཡིན་ནམ་ལུས་ཡིན། ཡིད་ཡིན་ན་ལུས་ག་རེ། ལུས་ཡིན་ན་ཡིད་ག་རེ། དཔེར་ན་སྟག་དོང་ནང་གི་མདའ་གཅིག་ལ་དགྲ་མདའ་བྱས་ན་རྩེ་མདའ་མེད། རྩེ་མདའ་བྱས་ན་དགྲ་མདའ་མེད་པ་བཞིན་ནོ། །ཡང་ལྷག་མེད་ཀྱི་ངེས་ཚིག་ཀྱང་ཉམས་ཏེ། ལྷ་སྐུར་གསལ་བ་དེ་ཡིད་ཡིན། དེ་མི་འདོར་བར་སངས་རྒྱས་ཀྱི་ས་ལ་འགྲོ་བས་ལྷག་བཅས་སུ་ཐལ་ལོ། །ལྷ་རྗེ་ཧོར་པོ་ནི་ཆོས་གསུམ་ལྡན་ལ་བཞེད་དོ། །ཡིད་ལྷའི་སྐུར་སྨིན་པ། ལུས་ཀྱི་རྒྱ་མདུད་དང་མ་བྲལ་བ། བྲལ་མ་ཐག་ཏུ་ཕྱག་རྒྱ་ཆེན་པོའི་རིག་འཛིན་ལ་སྦྱོར་ནུས་པའི་ཆོས་གསུམ་དང་ལྡན་པ་ཡིན་ཏེ། དེའང་ཅུང་ཟད་མི་འཐད་དོ། །ཚོགས་སྒྲུབ་བགྲེས་པོ་བློ་ཡང་རབ་དེ་ཕྱག་རྒྱ་ཆེན་པོ་ལ་སྦྱོར་བར་བཤད་པ་ཡིན་ཏེ། སྤར་ཁབ་ལས་ཡོ་བྱད་རྣམ་པ་བཞི་ལ་ལྟ་སྤྱོད་གཉིས་སུ་མེད་པར་བསྒྲུབས་ནས་འབྲས་བུ་སྐུ་ཕྱག་རྒྱ་ཆེན་པོའི་རིག་འཛིན་ཐོབ་བོ། །ཞེས་པ་དེ་དང་རྣམ་སྨིན་ཁྱད་པར་མེད་པར་འགྱུར་རོ། །དེ་ཅིའི་ཤེ་ན། ཆོས་གསུམ་དང་ལྡན་པའི་ཕྱིར་རོ། །དེ་ཡིད་ལྷའི་སྐུར་གསལ་ཏེ་སྤྲོས་པར་ཡང་གསལ་བས་འདིར་ཅི་སྟེ་མི་གསལ། ལུས་ཀྱི་རྒྱ་མདུད་དང་ནམ་ཡང་མ་བྲལ། བྲལ་མ་ཐག་ཏུ་ཕྱག་རྒྱ་ཆེན་པོ་ལ་སྦྱོར་བར་བཤད་པའི་ཕྱིར་རོ། །དེ་ལུང་དགོངས་པ་ཅན་ཡིན་ཏེ། ཚོགས་སྒྲུབ་ནས་ཐོད་རྒལ་མེད་ཅེ་ན། དེ་ལྟར་ན་ཐོད་རྒལ་དང་གཞན་གྱི་ལུང་ཡང་དགོངས་པ་ཅན་དུ་ཐལ་ལོ། །སློབ་དཔོན་ཡམ་ཤུད་ན་རྣམ་སྨིན་ལ་བཏགས་པ་དང་། མཚན་ཉིད་པ་གཉིས་སུ་འདོད་དོ། །ཕྱག་རྒྱ་ཆེན་པོ་འབྲས་བུ་ལ་བཏགས་པ་ཡིན་ལ། ཚོགས་སྒྲུབ་མན་ཆད་ནི་རྣམ་སྨིན་རྒྱུ་ལ་བཏགས་པ་ཡིན་ནོ། །མཚན་ཉིད་པ་ནི་ལྷ་རྗེ་ཧོར་བོ་དང་མཐུན་པར་ཆོས་གསུམ་ལྡན་ལ་འདོད་དེ། དེའང་མི་འཐད་དེ། སྤྱིར་རྣམ་སྨིན་ལ་གཉིས་སུ་དབྱེ་མི་དགོས་ཏེ། ལུང་ཡང་སྦྱོར་ཚུལ་གྱི་ཁུངས་ཡིན་ཏེ། རྒྱུ་རྣམ་སྨིན་ལ་ཚོགས་སྒྲུབ་ཏུ་འདོགས་པ་མི་འཐད་དེ། ཕྱིས་འོང་བའི་སྒྲ་ལ་ཞུགས་པ་རྒྱུ་འབྲས་གོ་ལོག་གོ །འབྲས་བུ་ཕྱག་རྒྱ་ཆེན་པོ་ལ་འདོགས་པའང་མི་འཐད་དེ། ལྷའི་སྐུར་གསལ་བ་ལ་རྣམ་སྨིན་གྱི་ལུས་ལྷག་མེད་དུ་མི་བཏུབ་བོ། །ཁོ་བོ་ནི་ཆོས་བཞི་ལྡན་དུ་འདོད་དེ། ཡིད་ལྷ་སྐུར་གསལ་བ། ལུས་ཀྱི་རྒྱ་མདུད་དང་མ་བྲལ་བ། བྲལ་མ་ཐག་ཏུ་ཕྱག་རྒྱ་ཆེན་པོའི་རིག་འཛིན་ལ་སྦྱོར་བ་ལ་བར་གཞན་གྱིས་མི་ཆོད་པའི་ནུས་པ་དང་ལྡན་པ་རང་གི་ངོ་བོ་ནུས་ཐོབ་ཀྱི་མཐོང་ལམ་ལ་གནས་པ་དང་ཆོས་བཞིར་འདོད་དོ། །ཕྱི་མ་དེས་ཚོགས་སྒྲུབ་བགྲེས་པོ་བློ་ཡང་རབ་དང་ཁྱད་པར་བྱས་པ་ཡིན་ནོ། །མྱ་ངན་འདས་པ་སྨིན་ཞེས་བརྗོད། ཅེས་པའི་སྐབས་འདིར་འདི་སྐད་གསུང་སྟེ། སྤྱིར་ལམ་ལ་ཟག་བཅས་དང་ཟག་མེད་གཉིས་སུ་འདུས་པས། རྣམ་སྨིན་འདི་གང་ཡིན་ཞེ་ན། འདི་ལ་བཞེད་ལུགས་མང་སྟེ། མདའ་ཏིག་ཇོ་ཤཱཀ་ན་རེ། རྣམ་སྨིན་འདི་ཟག་བཅས་ཡིན། གསུང་ཇི་ལྟར་ཡིན་ན། དཔེར་ན་ནད་པར་འགྲོ་བ་ལ་ནད་འདུ་བ་བཞི་ཀ་ཚང་མི་དགོས་ཏེ། གང་ན་ཡང་ནད་པར་འགྲོ་བ་ཡིན། དཔེ་དེ་བཞིན་དུ་ཟག་བཅས་སུ་འགྲོ་བ་ལ་ཟག་པ་གསུམ་ཀ་ཚང་མི་དགོས་ཏེ། འདིར་ལུས་ཀྱི་ཟག་པ་འདུག་པས་ཟག་བཅས་ཡིན་གསུང་སྐད། དེ་མི་འཐད་དེ། དཔེ་མ་གྲུབ་ལ་དོན་མི་གནས་ཏེ། དཔེ་ནད་པར་འགྲོ་བ་ལ་ནད་གང་རུང་གཅིག་གིས་ཆོག་པ་བཞིན་དུ། ཟག་མེད་དུ་འགྲོ་བ་ལ་ཟག་པ་གང་རུང་གཅིག་མེད་པས་ཆོག་པར་འགྱུར་ཏེ། འདིར་རྣམ་སྨིན་ལ་སྐྱེ་གནས་ཀྱི་ཟག་པ་མེད་པས་དེ་བས་ཀྱང་ཟག་མེད་དུ་འགྲོ་ལ། དོན་ཡང་མི་འཐད་དོ། །རྣམ་སྨིན་མྱ་ངན་ལས་འདས་པ་ཡིན་ནམ་མིན། མིན་ན། མྱ་ངན་འདས་པ་སྨན་ཅིས་བརྗོད། ཅེས་པ་དང་འགལ། ཡིན་ན་མྱ་ངན་ལས་འདས་པ་ཟག་བཅས་པར་ཐལ་ལོ། །གླན་ན་རེ། རྣམ་སྨིན་འདི་ཟག་མེད་ཡིན་ཏེ། ལམ་གྱིས་ཤན་འབྱེད་པའི་དུས་སུ་ཡང་ཟག་མེད་དུ་བྱེད་ལ། ད་ལྟའི་ལུས་འདིས་ཕྱི་མའི་ལུས་མི་བསྐྱེད་པར་ལུས་ཀྱི་ཟག་པ་མེད་པ་ལ། ཁམས་དང་སྐྱེ་གནས་ཀྱང་དེ་དང་འདྲ་བར་འདོད་དོ། །དེ་མི་འཐད་དེ། གཅིག་སྤྲོས་ནས་ཐོད་རྒལ་དུ་ཚེ་དབང་ལ་སྦྱོར་བ་དེའང་ཟག་མེད་དུ་ཐལ་ཏེ། འདིའི་ཟག་པ་ཕྱི་མའི་ཟག་པ་མི་སྐྱེད་དེ་ཚེ་དབང་ལ་སྦྱོར་བའི་ཕྱིར་རོ། །ཡང་ཁོང་ན་རེ། འདུག་ཟག་བཅས་སུ་འདུག་ཀྱང་གདབ་ཟག་མེད་ཀྱི་ཁོངས་སུ་གདབ་སྟེ། དཔེར་ན་ཉ་ལྕགས་ཀྱུས་བཟུང་བའམ། སྐྱེས་བུ་གནད་དུ་མཚོན་བསྣུན་པ་ལྟ་བུ་ཡིན་གསུང་ངོ་ལོ། དེའང་མི་འཐད་དེ། དཔེ་མ་གྲུབ་ལ་དོན་མི་གནས་སོ། །དཔེ་མ་གྲུབ་སྟེ། སྐྱེས་བུ་དང་ཉ་གཉིས་ཀ་མ་ཤིའི་བར་དུ་གཤིན་པོའི་ཁོངས་སུ་གདབ་ཏུ་མི་འདོད་དོ། །འཆི་ངེས་པས་འདེབས་པ་ཡིན་ཟེར་ན། སེམས་ཅན་ཐམས་ཅད་གཤིན་པོར་ཐལ། འཆི་ངེས་པའི་ཕྱིར། མྱུར་དུ་འཆི་བའི་ཕྱིར་ཞེ་ན། ཉི་ཚེ་བ་ལ་སོགས་པའི་སེམས་ཅན་ཚེ་ཐུང་བ་རྣམས་ཀྱང་གཤིན་པོར་ཐལ་ལོ། །དོན་མི་གནས་ཏེ། ཟག་པ་དང་མ་བྲལ་གྱི་བར་དུ་ཟག་མེད་དུ་བགྲང་དུ་མི་འདོད། ཟག་མེད་དུ་འགྱུར་ངེས་པའི་ཕྱིར་ཞེ་ན། སྤྲོས་ཚོགས་ཀྱང་ཟག་མེད་དུ་ཐལ། ཟག་མེད་དུ་འགྱུར་ངེས་པའི་ཕྱིར་རོ། །ཡང་ལྷ་རྗེ་གྲུ་ཕུག་པ་ནི། རྣམ་སྨིན་ལ་སྐྱེ་གནས་ཀྱི་ཟག་པ་མེད་པས་ཟག་མེད་དུ་འདོད་པ་ཡིན་གསུང་ངོ་། །དེ་ཅིས་ན། སྐྱེ་གནས་ཀྱི་ཟག་པ་ཡོད་ན་ལུས་དང་ཁམས་ཀྱང་ཞར་ལ་ཡོད ལ། སྐྱེ་གནས་མེད་ན་དེ་གཉིས་ཀྱང་མི་འོང་བས་སྐྱེ་གནས་གཙོ་བོ་ཡིན་གསུང་ངོ་། །དེའི་མི་འཐད་དེ། འོ་ན་རིག་འཛིན་བཞི་ལ་ཡང་སངས་རྒྱས་སུ་ཐལ། སྒྲིབ་པའི་གཙོ་བོ་ཉོན་མོངས་པ་མེད་པའི་ཕྱིར་རོ། །ཉོན་མོངས་པའི་སྒྲིབ་པ་མེད་ཀྱང་ཤེས་བྱའི་སྒྲིབ་པ་ཡོད་པས་སངས་རྒྱས་སུ་མི་འགྲོ་ཞེ་ན། འོ་ན་རྣམ་སྨིན་གྱི་ཟག་པའི་གཙོ་བོ་སྐྱེ་གནས་ཀྱི་ཟག་པ་མེད་ཀྱང་། ལུས་ཁམས་ཀྱི་ཟག་པ་ཡོད་པས་ཟག་མེད་མི་འགྲོའོ། །སྐྱེ་གནས་ལ་ཟག་པའི་གཙོ་བོར་བཞག་པ་རང་ཡང་མི་འཐད་དོ། །དེས་ན་སྤྱིར་རྣམ་སྨིན་ལ་འདོད་ལུགས་མང་ཡང་ཟག་མེད་ལ་ཁ་འཆམ། འོ་ན་ཡང་སྐྱོན་མེད་དུ་སྐྱོང་བ་ནི་ཤིན་ཏུ་ཉུང་ངོ་། །ཁོ་བོ་ནི་མེ་ཉག་དང་སྤར་ཁབ་ཀྱི་རྗེས་སུ་འབྲངས་ནས་འདི་ལྟར་འདོད་དེ། སྤྱིར་ཟག་པ་ལ་གཙོ་བོ་དང་ཕྲན་གཉིས་སུ་གནས། གཙོ་བོ་ནི་ཉོན་མོངས་པའི་འཛིན་པ་ཡིན་ལ་ཕྲན་ནི་ལུས་ཁམས་སྐྱེ་གནས་ཀྱི་ཟག་པ་ཡིན་ནོ། །ཉོན་མོངས་པའི་འཛིན་པ་ཟག་པའི་གཙོ་བོ་ཡིན་པའི་རྒྱུ་མཚན་ཡང་། ཉོན་མོངས་པའི་འཛིན་པ་བྱུང་ན་འཁོར་བར་ཟག་པའི་རྒྱུ་བྱེད་ལ། ལུས་ཁམས་སྐྱེ་གནས་ཀྱི་ཟག་པས་འཆིང་མི་ནུས་པས་ཕྲན་དུ་འགྱུར་རོ། །དེས་ན་འཇིག་རྟེན་ལས་འདས་པ་དང་མཐོང་ལམ་ལ་ཉོན་མོངས་པའི་འཛིན་པ་མེད་དེ། ཉོན་མོངས་པའི་འཛིན་པ་གཏན་ནས་འདག་པར་བྱེད་པའི་གཉེན་པོ་མཐོང་ལམ་ཡིན་པ་དང་། འཛིན་པ་བྱུང་ན་མྱ་ངན་ལས་འདས་པར་མི་འགྲོ་བའི་ཕྱིར་རོ། །ཉོན་མོངས་པའི་འཛིན་པ་ལ་ཟག་པར་བཤད་པ་མེད་དམ་ཞེ་ན། སྤར་ཁབ་ལས། དེ་དག་འཇིག་རྟེན་ལ་ཡོད་པ་ནི་འཛིན་པའི་ཕྱིར་ཟག་པར་འགྱུར་ལ་ཞེས་བཤད་དོ། །འདིར་ལུས་ཁམས་སྐྱེ་གནསཀྱི་ཟག་པ་སྨོས་པ་ནི་ཕྲན་ཡིན་ནོ། །དེས་ན་རྣམ་སྨིན་ལ་ཟག་པའི་གཙོ་བོ་ཉོན་མོངས་པའི་འཛིན་པ་དེ་མེད་པས་ཟག་མེད་དུ་འགྱུར་རོ། །དེ་ཇི་ལྟར་མེད་སྙམ་ན། སྤྱིར་ཉོན་མོངས་པའི་འཛིན་པ་གཏན་ནས་འདག་པར་བྱེད་པའི་གཉེན་པོ་མཐོང་ལམ་ཡིན་ལ། མཐོང་ལམ་ལ་ཟག་པ་མེད་པས་ཁྱབ། མཐོང་ལམ་ནི་ཚེ་དབང་ཡིན་ཏེ། །སྐབས་འདིར་བདེན་པ་བར་མ་མཐོང་། །ཞེས་བཤད། ཚེ་དབང་རྣམ་སྨིན་ལམ་ཁོད་སྙོམས་པ་ཡིན་ཏེ། རྣམ་སྨིན་ལ་མཐོང་ལམ་གྱིས་ཁྱབ། རྣམ་སྨིན་མཐོང་ལམ་ཡིན་ཙམ་ན་ཉོན་མོངས་པའི་ཟག་པ་མི་འབྱུང་ངོ་། །ཡང་ཉོན་མོངས་པའི་འཛིན་པ་བྱུང་ན་མྱ་ངན་ལས་འདས་པར་མི་འགྱུར་ལ། མྱ་ངན་ལས་འདས་པ་ལ་ཉོན་མོངས་པའི་ཟག་པ་མེད་པས་ཁྱབ། དེས་རྣམ་སྨིན་ལ་ཁྱབ་སྟེ། རྣམ་སྨིན་ནི་འདི་ཉིད་ནས་མྱ་ངན་འདས་པར་བཤད་པའི་ཕྱིར་རོ། །སྐྱེ་གནས་ཀྱི་ཟག་པ་ཡང་མེད་དེ་སྐྱེ་བ་བཞིར་རང་དབང་མེད་པར་མི་འཇུག་གོ །དེས་ན་རྣམ་སྨིན་ཟག་མེད་དུ་བདེའོ། །གལ་ལྟེ་ལུས་དང་ཁམས་ཀྱི་ཟག་པ་ཡོད་པས་ཟག་བཅས་སུ་འགྲོ་ན། མཆོག་གི་སྤྲུལ་པའི་སྐུ་ཤཱཀྱ་སེང་གེ་ལ་ཡང་ལུས་ཡོད་ལ། ཁམས་བདེ་མི་བདེ་ཡང་འདའ་བའི་དུས་སུ་བྱུང་བས་དེ་ཡང་ཟག་བཅས་སུ་འགྱུར་རོ། །དེས་ན་རྣམ་སྨིན་འདི་ཟག་མེད་ཡིན་ནོ། །ལམ་མཆོག་དབྱིངས་གཅིག་ཡིན་ནོ། །ཞེས་པ། ཚོགས་བསྒྲུབས་ནས་བློ་ཆེ་ཆུང་གིས་ལམ་ལྷག་བཅས་ཚེ་དབང་དུ་འབྱོར་བ་དང་། ལྷག་མེད་རྣམ་སྨིན་དུ་སྦྱོར་བ་དང་གཉིས་སུ་གྱེས་པ་ཡིན་ཏེ། དེ་གཉིས་ལ་བློ་ཆེ་ཆུང་ཡོད་ཀྱང་ལམ་ཁད་སྙོམས་པར་ཡོད་པས་གཅིག་ལ་གཅིག་སྦྱོར་བ་མེད་དོ། །འོ་ན་ལམ་ཆུང་ལས། དུས་དེ་ཉིད་སྨིིན་ལུས་དེ་ཉིད། རྡོ་རྗེའི་ལུས་འགྱུར་ཚེ་ལ་སྦྱོར། ཞེས་པ་དང་མི་འགལ་ལམ་ཞེ་ན། མི་འགལ་ཏེ། དེ་ནི་ཚོགས་སྒྲུབ་བློ་ཆེ་བས་ཚེ་དབང་ལ་སྦྱོར་བ་སྟེ། ཚེ་སྔ་མའི་ལས་ཀྱི་རྣམ་པར་སྨིན་པའི་ལུས་དེ་མ་སྤངས་པར་རྡོ་རྗེའི་ལུས་ལ་སྦྱོར་བའི་ཁུངས་ཡིན་ཏེ་རྣམ་སྨིན་འདི་ལ་ཟེར་བ་མིན་ནོ། །དགོངས་སྤྱོད་བརྩོན་པས་སྟོབས་རྫོགས་པ། ཞེས་པ། ལམ་ཡོངས་སུ་རྫོགས་པའི་ཚེ་དབང་ཡིན་ཏེ། དེ་ཡང་ཐབས་ལམ་དང་གྲོལ་ལམ་གྱི་དགོངས་པ་ལ་བརྟེན་ནས། ལམ་གྱི་སྟོབས་རྫོགས་ཏེ་སྐྱེ་འཇིག་མེད་པ་རྡོ་རྗེའི་ལུས་སུ་བྱས་སོ། །སྟོབས་གང་ཡིན་ཞེ་ན། མངོན་ཤེས་ཉི་ཤུ་རྩ་ལྔ་དང་། འཇིགས་པ་ལྔ་དང་བྲལ་བ་ལ་སོགས་པ་ཡིན་ནོ། །ཡོ་བྱད་ཐབས་ཀྱི་སྟོབས་ལས་སྐྱེ། ཞེས་པ་ནི། ཡོ་བྱད་ནི་རང་ལ་གནས་པའི་རྩ་དང་རླུང་ཡིན་ལ། ཐབས་ནི་སྟེང་རླུང་མནན་འོག་རླུང་བསྡམས་ཏེ་རླུང་ལས་སུ་རུང་བས་ཚེ་རིང་བར་འགྱུར་རོ། །སྒྲོལ་ལམ་རླུང་ལས་གྲུབ་པའི་ཚེ་རིང་བ་ཡིན་ནོ། །གཞན་པའི་ཡོ་བྱད་རྟགས་ལྡན་པ། ཞེས་པ་གཞན་པ་ནི་གོང་བཞིན་དུ་རང་ལ་གནས་པའི་ཡོ་བྱད་ལ་མི་བརྟེན་པར་དེ་ལ་གཞན་པ་ཕྱི་རོལ་གྱི་ཡོ་བྱད་སྨན་ར་མོ་ཤག་ལ་སོགས་པའི་བཅུད་ལེན་གྲུབ་པས་ཚེ་རིང་བ་ཡིན་ཏེ། སྨན་ལས་གྲུབ་པའི་ཚེ་དབང་ངོ་། །དངོས་གྲུབ་རོལ་པའི་མཐུ་ལས་བྱུང་། ཞེས་པ་སྒྲུབ་པ་ཆེན་པོའི་དུས་སུ་དངོས་གྲུབ་ཆེན་པོ་ཡུམ་གྱི་མཁའ་ལ་བླང་བའི་དུས་སུ་ཡབ་ཡུམ་རོལ་པའི་བྱང་ཆུབ་ཀྱི་སེམས་ཟོས་པས་ཚེ་རིང་བ་ཡོད་དེ་ཐབས་ལས་གྱུར་པའི་ཚེ་དབང་ངོ་། །དེ་ལྟར་ཐུན་མོང་གི་ཚེ་དབང་གསུམ་པོ་ཡང་ལྟ་བའི་རྩིས་མ་ཟིན་ན་ལམ་ཡིན་གྱིས། ལྟ་བའི་རྩིས་ཟིན་ན་ཐབས་ལམ་དུ་འགྲོའོ། །འོ་ན་ལམ་མཆོག་ཡོངས་སུ་རྫོགས་པ་དང་། ཁྱད་ཅི་ཡོད་ཅེ་ན། ཁྱད་པར་ཆེ་སྟེ། ཐུན་མོང་གི་ཚེ་དབང་གསུམ་ནི། རྒྱུ་རྫས་ལ་བརྟེན་ནས་འགྲུབ་པས་ཟག་བཅས་ཡིན་ལ་ལམ་ཡོངས་སུ་རྫོགས་པའི་ཚེ་དབང་ནི་རྒྱུ་ལྟ་བ་དང་ཏིང་ངེ་འཛིན་ལས་གྲུབ་པས་ངོ་བོ་ཟག་མེད་ཡིན་ནོ། །རྡོ་རྗེའི་ལུས་འགྱུར་ཐེ་ཚོམ་མེད། །ཅེས་པ། འོ་ན་ཚོགས་སྒྲུབ་ན་ཚེ་དབང་ཐོབ་པའི་དུས་སུ་ཚོགས་སྒྲུབ་ཀྱི་ལུས་བོར་ནས་རྡོ་རྗེའི་ལུས་སུ་འགྱུར་རམ་མ་བོར་བར་འགྱུར་ཞེ་ན། ཚོགས་སྒྲུབ་ཀྱི་ལུས་དེ་བོར་ན་ལྷག་བཅས་སུ་མི་འགྲོ་ལ། མ་བོར་ན་ཚོགས་སྒྲུབ་ཀྱི་འབྱུང་བ་རགས་པའི་ལུས་དེ་ཉིད་འབྱུང་བ་དངོས་པོ་རྡོ་རྗེའི་ལུས་སུ་གནས་འགྱུར་ནས་འགྲོ་བ་ཡིན་ནོ། །ཟེ་བདེ་བ་རྒས་པ་ཆ་བདེ་བར་འགྲོ་བ་དང་འདྲ་བའོ། །གསུང་། ལུས་ཁམས་སྐྱེ་གནས་ཟག་པ་ཟད། ཅེས་པ་ནི། ཚེ་དབང་ནི་ཟག་པ་གསུམ་དང་བྲལ་བ་ཡིན་སྟེ། རྡོ་རྗེའི་ལུས་སུ་གྱུར་པས་འཆི་བ་དང་བྲལ། གཤང་གཅི་མི་འབྱུང་བས་ལུས་ཀྱི་ཟག་པ་དང་བྲལ་ལ། ལུས་ལ་བཀྲེས་སྐོམ་དང་ན་ཚ་མི་འབྱུང་བས་ཁམས་ཀྱི་ཟག་པ་མེད་ལ། སྐྱེ་གནས་བཞིར་བདག་དོན་དུ་རང་དབང་མེད་པར་ཞུགས་མི་དགོས་པས་སྐྱེ་གནས་ཀྱི་ཟག་པ་མེད་དོ། །གཞན་དོན་སྤྲུལ་པའི་སྐུར་ཞུགས་པ་ལ་ངེས་པ་མེད་དོ། །མདོར་ན་ཚེ་དབང་གི་རྩ་བའི་ལུས་འདི་སྐྱེ་འཇིག་མེད་པ་རྡོ་རྗེའི་ལུས་ཡིན་ལ། སྤྲུལ་པའི་ལུས་ནི་ལྷ་མི་སྟོད་རིམ་གྱི་ཆ་ལུགས་བཟུང་ནས་སེམས་ཅན་གྱི་དོན་བྱེད་པ་ཡིན་ནོ། །བདག་གི་དོན་དུ་གཉེར་བ་ནི། །བརྒྱ་ཕྲག་བཅུ་དྲུག་ཚེ་ཡི་རྫོགས། །ཞེས་པ་ཚེ་དབང་ནི་རིག་འཛིན་འདི་དག་རང་དོན་དུ་ལོ་སྟོང་དྲུག་བརྒྱ་སྡོད་པ་མིན་ནམ། མིན་ན་གཞུང་འདི་དང་འགལ། ཕྱག་རྒྱ་ཆེན་པོ་ལ་སྦྱོར་ལ་རྣམ་སྨིན་མགྱོགས་པའི་ཕྱིར་རོ། །དེ་ཅིས་མགྱོགས་ན་ཚེ་དབང་ནི་བདག་གི་དོན་དུ་ཡང་ལོ་སྟོང་དྲུག་བརྒྱ་སྡོད་ལ། རྣམ་སྨིན་ལ་ཚེ་ལོ་དེ་ཙམ་སྡོད་མི་ནུས་པའི་ཕྱིར་རོ། །རྣམ་སྨིན་བློ་ཆེ་བ་འདོད་ཐོག་ཅེ་ན་གཞུང་དང་འགལ་ལོ། །སྟོབས་ཆུང་སྐྱེད་མོས་ཞན་པའི་ཕྱིར། ཞེས་གསུངས་པ་ཡིན་ནོ། །རིགས་མཐུན་མཆོག་བརྒྱ་སྤྲུལ་པ་ལས། ཞེས་པ་ནི། ཚེ་དབང་གི་རང་དོན་གྱི་སྤྱོད་པ་ནི་རང་གི་རིགས་མཐུན་པ་བློ་མཆོག་ཏུ་གྱུར་པའི་ཚེ་དབང་ལ་ཆོས་ཉན། ཕྱག་རྒྱ་ཆེན་པོའི་རིག་འཛིན་ལའང་ཆོས་ཉན་ལ་སྤྲུལ་པའི་སྐུ་ལ་ཡང་ཆོས་ཉན་པ་ཡིན་ནོ། །གོམས་པ་ལས་ཀྱང་མངོན་དུ་འགྱུར། ཕྱག་རྒྱ་ཆེན་པོའི་ཆ་ལུགས་ནི་རིགས་གང་རུང་གི་སྐུར་གསལ་བ་ཡིན་ཏེ། དེ་ཡང་སྤྲོས་བཅས་སུ་གཙོ་བོ་གང་ལ་བྱས་པ་གོམས་པའི་ལྷའི་སྐུ་རུ་གཅིག་ཏུ་གསལ་བ་ཡིན་ཏེ། དེའང་གཅིག་སྤྲོས་བཅས་སུ་གཙོ་བོ་གང་བྱས་སུ་གསལ་བ་ཡིན་ནོ། །སྤྲུལ་པའི་ལུས་ནི་ངེས་པ་མེད་དེ་རྔོན་པ་དང་སྨད་འཚོང་ལྟ་བུར་བསྟན་ནས་སེམས་ཅན་གྱི་དོན་བྱེད་པ་ཡིན་ནོ། །ཐུན་མོང་མཆོག་གི་མཚན་དཔེར་ལྡན། ཞེས་པ་ནི། ཐུན་མོང་གི་མཚན་བཟང་པོ་སུམ་ཅུ་རྩ་གཉིས་ནི། ཕྱག་ཞབས་འཁོར་ལོའི་མཚན་དང་ལྡན་པ་ལ་སོགས་པ་ཡིན་ལ། དཔེ་བྱད་བཟང་པོ་བརྒྱད་ཅུ་ནི་སེན་མོ་ཟངས་ཀྱི་མདོག་ལྟར་དམར་བ་ལ་སོགས་པ་འབུམ་ཉི་ཁྲི་ནས་བཤད་པ་རྣམས་ཡིན་ཏེ། མཆོག་གི་མཚན་དཔེ་ནི་མཚན་བཟང་པོ་སུམ་ཅུ་རྩ་གཉིས་ཡིན་ལ་དེ་རེ་རེ་ལ་དབུ་རྒྱན་རིགས་ལྔ་ལྔ་བསྣན་ཏེ་དཔེ་བྱད་བཟང་པོ་བརྒྱད་ཅུ་ཡིན་ཏེ་ཕྱག་རྒྱ་ཆེན་པོའི་རིག་འཛིན་ལ་སྦྱོར་བ་ཡིན་ནོ། །འོ་ན་ལོངས་སྐུ་ཁྱད་ཅི་ཡོད་ཅེ་ན། ལོངས་སྤྱོད་གཉིས་པ་ཕྱག་རྒྱའི་རིགས། ཞེས་པ། ལོངས་སྐུ་དངོས་མིན་ཏེ་ལོངས་སྐུ་དང་ཆ་ལུགས་མཐུན་པས་ལོངས་སྐུ་གཉིས་པ་ཟེར་བ་ཡིན་ཏེ། དགོངས་པ་ལ་བཞེངས་བཞུགས་ལ་སོགས་པ་ཁྱད་པར་ཤིནཏུ་ཆེའོ། །ཡེ་ཤེས་སྐུ་ཡི་ཆ་ལུགས་ཅན། ཞེས་པ་ནི། ཚེ་དབང་གིས་ཕྱག་རྒྱ་ཆེན་པོའི་རིག་འཛིན་ལ་སྦྱོར་བའི་དུས་སུ་རྡོ་རྗེའི་ལུས་དེ་སྤངས་སམ་དེ་ཀ་ལྟར་ཁྱེར། སྤངས་ན་ལྷག་བཅས་མི་བཏུབས་ལ། དེ་ཁོ་ན་ལྟར་ཁྱེར་ན་ཡེ་ཤེས་སྒྱུ་མའི་སྐུར་མི་འགྲོ་འོ། །ཞེ་ན། མ་སྤངས་ལ་མི་ལྡན་ཞེས་བྱ་སྟེ། ཚེ་དབང་གི་ལུས་དེ་སྤངས་པ་མ་ཡིན་ལ་དེ་ཁོ་ན་ལྟར་ཡང་མི་ལྡན་ལ། འོ་ན་ཇི་ལྟར་སྦྱོར་ཞེ་ན། རྡོ་རྗེའི་ལུས་དེ་ཉིད་ཡེ་ཤེས་སྒྱུ་མའི་ལུས་སུ་གནས་འགྱུར་བ་ཡིན་ནོ། །སྔ་མའི་རིག་འཛིན་ལ་མཐུ་རྫོགས། ཞེས་པ་ལམ་སྔ་མ་ཕྱག་རྒྱ་ཆེན་པོའི་རིག་འཛིན་སྐབས་སུ་ལྟ་སྤྱོད་ཀྱི་མཐུ་རྫོགས་པར་བྱས། བཤད་པ་བཞིན་དུ་དྲི་མ་དག་པར་བྱས་ཏེ་ཕྱག་རྒྱ་ཆེན་པོའི་རིག་འཛིན་གྱི་སྐབས་སུ་བཤད་པ་བཞིན་དུ་ལྷན་ཅིག་གནས་པའི་དྲི་མ་དག་པའོ། །སངས་རྒྱས་གཉིས་པ་ནི་ལོངས་སྐུ་སྟེ། ཤེས་རབ་གསུམ་ནི་ལོངས་སྐུ་དེ་ལ་ཐོས་བསམ་སྒོམ་གསུམ་བྱས་པ་ལ་བརྟེན་ནས་ལྷུན་གྲུབ་ཐོབ་པར་འགྱུར་རོ། །སྐད་ཅིག་རག་ལས་རིག་འཛིན་མཐའོ། །ཞེས་པ་ནི། ལྷུན་གང་གིས་གྲུབ་པའི་རིག་འཛིན་དེས་སངས་རྒྱས་ཐོབ་པའི་དུས་ནི། བྱ་བ་རྫོགས་པའི་སྐད་ཅིག་མ་ལ་ཐོབ་སྟེ། དེ་ཡང་བག་ལ་ཉལ་གྱི་སྒྲིབ་པ་ཆ་ཕྲ་ཞིང་ཕྲ་བ་ལས་མེད་དོ། །ཉིན་མོའི་སྐར་མ་དང་འདྲ་བ་ཡོད་དུ་མི་ཚོར་བ་བག་ཙམ་པ་གཅིག་གིས་བསྒྲིབས་པ་ཡིན་ལ། དེའི་གཉེར་པོ་རྡོ་རྗེ་ལྟ་བུ་ལ་བརྟེན་ནས་སྦྱོང་བ་ཡིན་ཏེ། དེའང་རིག་འཛིན་རྣམས་ཀྱི་ཐ་མ་སྟེ་ཡར་མཐའ་ཡིན་ནོ། །ཆ་བྱད་རྒྱལ་བ་ཉིད་དུ་སྟེ། ཞེས་པ་ནི་ལྷུན་གྱི་གྲུབ་པ་དེའི་རིག་འཛིན་གྱི་ཆ་ལུགས་ནི་རིགས་དྲུག་པ་རྡོ་རྗེ་འཆང་ཆེན་པོའི་ཆ་ལུགས་སུ་བཞུགས་པ་ཡིན་ནོ། །ཆོས་སྐུའི་རྒྱལ་ཚབ་ཡིན་ལ་སྤྲུལ་པའི་ལུས་ནི་མ་ངེས་ལ། ཞི་བ་དང་ཁྲོ་བོ་རྒྱལ་བུ་དོན་གྲུབ་ལ་སོགས་པ་སྟོན་པ་ཡིན་ནོ། །རྡོ་རྗེ་ལྟ་བུའི་ཏིང་འཛིན་གྱིས། ཞེས་པ། དཔེར་ན་རྡོ་རྗེ་ཕ་ལམ་དེས་ཕར་ལ་དངོས་པོ་སྲ་ཞིང་སྲ་བ་ཡོངས་ལ་འཇོམས་པར་ནུས་ལ། ཚུར་ལ་གང་གིས་ཀྱང་མི་ཚུགས་པ་བཞིན་དུ། ལྷུན་གྱིས་གྲུབ་པའི་རིག་འཛིན་གྱི་སྐབས་འདིར་ཡང་ཡིད་འཛུམ་མུ་ལེ་བའི་ཏིང་ངེ་འཛིན་གྱིས་ཕར་ལ་སྒྲིབ་པ་ཆ་ཕྲ་ཞིང་ཕྲ་བ་བག་ལ་ཉལ་བ་ཐམས་ཅད་ཀྱང་འཇོམས་པར་ནུས་ལ་ཚུར་ལ་ཉོན་མོངས་པ་སོགས་སྒྲིབ་པ་གང་གིས་ཀྱང་མི་གོས་པས། དེས་ན་ཏིང་ངེ་འཛིན་རྡོ་རྗེ་ཕ་ལམ་དང་འདྲ་བས་ན་རྡོ་རྗེ་ལྟ་བུའི་ཏིང་ངེ་འཛིན་ཞེས་བྱའོ། །དེ་ལ་ཇི་ལྟར་འཇོག་ན། ལྷུན་གྱི་གྲུབ་པའི་རིག་འཛིན་དེ་རང་གི་འབྲས་བུ་ལ་སྦྱོར་བའི་ཚེ་ན། ཕྱོགས་བཅུ་སངས་རྒྱས་རྣམས་ཀྱིས་བསྐུལ་བ་མཛད་དེ་ཕྱོགས་བཅུ་སངས་རྒྱས་ཐམས་ཅད་ཀྱིས་རིགས་ཀྱི་བུ་དེའི་མགོ་ལ་ཕྱག་གིས་བྱུག་སྟེ། ཕྱག་བརྐྱང་ནས་རིགས་ཀྱི་བུ་ཡིད་འཛུམ་མུ་ལེ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཤིག་ཅེས་བརྗོད་པས་རིགས་ཀྱི་བུ་དེ་ལ་དེ་ལྟ་བུའི་ཏིང་ངེ་འཛིན་སྐྱེས་ཏེ། བདག་ཏུ་རྟོག་པའི་མཚན་མ་བག་ལ་ཉལ་གྱི་སྒྲིབ་པ་ཕྲ་ཞིང་ཕྲ་བ་དེ་རྣམས་བཅོམ་སྟེ་སངས་རྒྱས་ཀྱི་ས་མངོན་དུ་གྱུར་པར་བྱེད་པ་ཡིན་ནོ། །འོ་ན་རྡོ་རྗེ་ལྟ་བུའི་ཏིང་ངེ་འཛིན་གྱིས་བག་ལ་ཉལ་གྱི་སྒྲིབ་པ་སྤོང་བའི་དུས་ན། རྡོ་རྗེ་ལྟ་བུའི་ཏིང་ངེ་འཛིན་སྐྱེས་ནས་སྒྲིབ་པ་སྤོང་ངམ། སྒྲིབ་པ་སྤོངས་པའི་ཤུལ་དུ་རྡོ་རྗེ་ལྟ་བུའི་ཏིང་ངེ་འཛིན་སྐྱེ། སྒྲིབ་པ་སྤངས་པའི་ཤུལ་དུ་སྐྱེ་ན་ཏིང་ངེ་འཛིན་དོན་མེད་དུ་ཐལ། སྤང་བྱ་མེད་པའི་ཕྱིར་རོ། །རྡོ་རྗེ་ལྟ་བུའི་ཏིང་ངེ་འཛིན་སྐྱེས་ནས་སྤོང་ཞེ་ན། འོ་ན་རྡོ་རྗེ་ལྟ་བུའི་ཏིང་ངེ་འཛིན་སྐྱེས་པའི་དུས་སུ་སྤང་བྱའི་སྒྲིབ་པ་ཡོད་དམ་མེད། མེད་ན་ཏིང་ངེ་འཛིན་སྐྱེས་པ་དོན་མེད་དུ་ཐལ། ཡོད་ན་སྤང་བྱ་གཉེན་པོ་ལྷན་ཅིག་འཚོགས་པ་དངོས་འགལ་ལྷན་ཅིག་མ་ཡིན་པར་ཐལ། ཡང་གཉེན་པོ་སྐྱེས་ཀྱང་སྤང་བྱ་ཡོད་ན། གཉེན་པོ་སྐྱེས་པ་དོན་མེད་དུ་ཐལ་ཞེ་ན། འདི་ལྟར་འདོད་དེ། རྡོ་རྗེ་ལྟ་བུ་སྐྱེས་པ་དང་སྒྲིབ་པ་སྤངས་བ་དུས་མཉམ་སྟེ། དུས་ལ་སྔ་ཕྱི་མི་འདོད་དེ། དེ་ཡང་སྐད་ཅིག་མ་དང་པོ་ལ་སྤང་བྱ་གཉེན་པོ་ལྷན་གཅིག་ཏུ་འཚོགས། །སྐད་ཅིག་མ་གཉིས་པར་གཉེར་པོས་སྤང་བྱ་ནུས་མེད་དུ་བྱས། སྐད་ཅིག་མ་གསུམ་པ་ལ་སྤང་བྱ་མི་གནས་པར་གཉེན་པོའི་ཡེ་ཤེས་འབའ་ཞིག་ཏུ་གནས་པར་གྱུར་ནས། །དེ་ཕན་ཆད་སངས་རྒྱས་ཀྱིས་ཞེས་བྱ་སྟེ་སྤངས་པ་དང་རྟོགས་པ་མཐར་ཐུག་པ་ཡིན་ནོ། །མཉམ་དང་མི་མཉམ་མི་མཉམ་མཉམ། །ཞེས་པ་ལ་སོགས་པར་དོན་དམ་པར་ཆོས་ཐམས་ཅད་སྐྱེ་བ་མེད་པའི་ངོ་བོར་གནས་པས་མཉམ་པ་ཉིད་ཡིན་ལ། ཀུན་རྫོབ་ཏུ་ལས་དགེ་སྡིག་ལ་སྤང་བླང་དགོས་པས་མི་མཉམ་མོ། །དེ་ལྟར་ལས་དགེ་སྡིག་ལ་སྤང་བླང་དགོས་པས་མི་མཉམ་པའི་དུས་ན། ཡང་དག་ལྡན་པར་ལས་དགེ་སྡིག་ཏུ་མ་གྲུབ་པས་མཉམ་མོ། །བྱ་དང་མི་བྱ་བྱ་མེད་བྱ། །ཞེས་པ་འབྲས་བུ་ལམ་ལ་བརྟེན་ནས་ཞེས་རྒྱས་པ་དང་། འབྲས་བུ་དེ་ཡང་རིག་པ་ལས་ཐོབ་བྱ་ལོགས་ན་མེད་པས། གཞན་ནས་ཐོབ་པར་མི་བྱ་དེ་ལྟར་གཞན་ནས་ཐོབ་བྱ་མེད་པ་དེ་ཉིད་ཐོབ་པར་བྱས་པ་ཡིན་ནོ། །གྲུབ་དང་མ་གྲུབ་ཐམས་ཅད་གྲུབ། ཅེས་པ་དེ་ལྟར་ལྟ་བ་དང་ཏིང་ངེ་འཛིན་ལ་བརྟེན་ནས་འབྲས་བུ་གྲུབ་པ་དང་། གྲུབ་པའི་དུས་སུ་ཡང་ལོགས་སུ་གྲུབ་རྒྱུ་མེད་པས་མ་གྲུབ་པ་དང་། དེ་ལྟར་མ་གྲུབ་གྲུབ་ཙམ་རིག་པའི་ཆོ་འཕྲུལ་ཡིན་གྱིས། ཡེ་ནས་འབྲས་བུའི་ངོ་བོར་གནས་པས་ཐམས་ཅད་གྲུབ་པ་ཡིན་པ་ཡིན་ནོ། །གྲུབ་དང་མ་གྲུབ་ཐམས་ཅད་ཀུན། ཞེས་པ་གཉིས་མེད་ཀྱི་རིག་པ་མངོན་དུ་གྱུར་པ་ཙམ་དེ་ལ་ནི་རིག་འཛིན་ཞེས་བྱ་བའི་ཐ་སྙད་དང་བྲལ་ལོ། །འདིའི་གནས་སྐབས་སུ་རིག་འཛིན་གྱི་ཁྱད་པར་ཡང་གསུངས་ཏེ། ལམ་གྱི་ཁྱད་པར་དང་གཅིག །ཆ་ལུགས་ཀྱི་ཁྱད་པར་དང་གཉིས། རྩོལ་བ་ཡོད་མེད་ཀྱི་ཁྱད་པར་དང་གསུམ། སྟོན་འཁོར་གྱི་ཁྱད་པར་དང་བཞི། དང་པོ་ལམ་གྱི་ཁྱད་པར་ཡོད་དེ། རྣམ་སྨིན་དང་ཚེ་དབང་གཉིས་ནི་མཐོང་ལམ་ཡིན་པས་ས་དང་པོ་དང་སྐལ་པ་མཉམ་མོ། །དེའང་སྐབས་འདིར་བདེན་པ་བར་མ་མཐོང་། ཞེས་པ་དང་། རྒྱུ་ཡི་དང་པོར་སྐལ་བ་མཉམ། ཞེས་གསུངས་སོ། །དེའང་ཕྱག་རྒྱ་ཆེན་པོ་སྒོམ་ལམ་པ་ཡིན་ཏེ། དེ་ཡང་ཕྱག་རྒྱ་ཆེན་པོ་སྒོམ་ལམ་བའི། ཞེས་སོ། །ས་གཉིས་པ་ནས་དགུ་པའི་བར་བརྒྱད་དང་སྐལ་པ་མཉམ་སྟེ། ལམ་ཆུང་ལས། བརྒྱད་པའི་སེམས་པར་སྐལ་བ་མཉམ། ཞེས་སོ། །ལྷུན་གྲུབ་ནི་མཐར་ལམ་པ་ཡིན་ཏེ། དེ་ཉིད་དང་ནི་མཐར་སྦྱོར་ལམ། །ཞེས་པ། ས་ནི་བཅུ་པ་དང་མཉམ་སྟེ། །བཅུ་པ་གསུམ་དང་སྐལ་མཉམ་མོ། །ཞེས་སོ། །ཆ་ལུགས་ཀྱི་ཁྱད་པར་ནི། རྣམ་སྨིན་ཐ་མལ་གྱི་ལུས་སུ་ཡོད་དེ། ལུས་ཀྱི་རྒྱ་མདུད་མ་བྲལ་ཞིང་། ཞེས་སོ། །ཚེ་དབང་ནི་འབྱུང་བ་དྭངས་མ་རྡོ་རྗེའི་ལུས་སུ་ཡོད་དེ། དབང་སྒྱུར་རྩ་བ་རྡོ་རྗེའི་ལུས། ཞེས་སོ། །ཕྱག་རྒྱ་ཆེན་པོ་ནི་རིགས་ལྔ་གང་རུང་གཅིག་གི་ཆ་ལུགས་སུ་གནས་ཏེ། ཡེ་ཤེས་སྐུ་ཡི་ཆ་ལུགས་ཅན། ཞེས་སོ། །ལྷུན་གྱི་གྲུབ་པའི་རིག་འཛིན་ནི་སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོའི་ཆ་ལུགས་སུ་བཞུགས་ཏེ། ཆ་བྱད་རྒྱལ་བ་ཉིད་དུ་སྟེ། ཞེས་སོ། རྩོལ་བ་ཡོད་མེད་ཀྱི་ཁྱད་པར་ནི། རྣམ་སྨིན་ཚེ་དབང་ནི་གདུལ་བྱའི་དོན་ཆེད་དུ་རྩོལ་བ་བྱེད་དགོས་ལ། ཕྱག་རྒྱ་ཆེན་པོ་ཏིང་ངེ་འཛིན་ལ་སྙོམས་པར་ཞུགས་ནས་སེམས་ཅན་གྱི་དོན་བྱེད་དོ། །དེའང་ལམ་ཆུང་ལས། མཐོང་བས་ཆེད་དུ་ཆོ་འཕྲུལ་ཏོ། །རྣོ་ངར་མི་བཞིན་སྤྲུལ་པ་དང་། །རྩོལ་བ་མེད་པར་ཆོ་འཕྲུལ་མཛད། །ཅེས་སོ། །སྟོན་འཁོར་གྱི་ཁྱད་པར་ནི། རྣམ་སྨིན་ཚེ་དབང་གཉིས་ནི། ཕྱག་རྒྱ་ཆེན་པོ་ལ་ཆོས་ཉན། ཕྱག་རྒྱ་ཆེན་པོ་ནི་ལྷུན་གྲུབ་ལ་ཆོས་ཉན། དེ་ཡང་ལམ་ཆུང་ལས། གཅིག་གི་སྟོན་པར་གཅིག་གྱུར་པས། ཁྱད་པར་ཆེ་བ་དེ་ལྟའང་། ཞེས་སོ། །ཡང་རྣམ་སྨིན་ཚེ་དབང་གཉིས་ཏེ་སྤྲུལ་སྐུ་ལ་ཆོས་ཉན། ཕྱག་རྒྱ་ཆེན་པོ་ནི་ལོངས་སྐུ་ལ་ཆོས་ཉན། མཐར་ལམ་ལྷུན་གྱིས་གྲུབ་པའི་རིག་འཛིན་ནི། ཆོས་སྐུ་ལ་ཆོས་ཉན་ཅིང་དེ་དག་གི་རྒྱལ་ཚབ་ཀྱང་རིག་པ་བཞིན་དུ་བྱེད་པ་ཡིན་ནོ། །དེ་ཡང་སྤྲུལ་པ་ལོངས་སྤྱོད་སྤྲུལ་པ་ལས། རིམ་པར་ཞལ་མཐོང་ཉན་ཡོད་ཀྱང་། །ཞེས་གསུངས་སོ། །ལམ་མཆོག་གསལ་བའི་སྒྲོན་མེ་ལས། །ལེའུ་བརྒྱད་པའི་རྣམ་པར་འགྲེལ་པའོ།། །།ལེའུ་དགུ་པ་ལ་གཉིས་ལས། རྩོམ་པ་ལ་འཇུག་པའི་ཡན་ལག་ནི། རང་བཞིན་ཉིད་དུ་མངོན་རྫོགས་པའི། །ཞེས་པ་ལ་སོགས་པ་སྟེ། དེའང་རང་བཞིན་ནི་ལེའུ་དང་པོར་བསྟན་པ་བཞིན་དུ་ཡེ་ནས་སངས་རྒྱས་པའི་རང་བཞིན་དུ་གནས་ལ། དེ་ལ་རྟོག་པ་གློ་བུར་བའི་སྒྲིབ་པ་བསལ་བའི་ཆེད་དུ། ལེའུ་གཉིས་པར་ལྟ་བ་གཏན་ལ་ཕབ་ནས་ཏིང་ངེ་འཛིན་བསྒོམ་པའི་རིམ་པ་ལ་བློ་སྦྱངས་ཏེ། མདོར་ན་ལམ་གྱི་རྩལ་ཡོངས་སུ་རྫོགས་པར་བྱས་པའི་རྡོ་རྗེ་འཛིན་པ་ཉིད་ལ་མོས། ཞེས་པ་སྐུ་ལྔ་ལྷུན་གྲུབ་རྡོ་རྗེ་ཆང་ཆེན་པོའི་ཆ་ལུགས་སུ་གནས་པའི་ལྷུན་གྱི་གྲུབ་པའི་རིག་འཛིན་ལ་མོས་ཤིང་ཕྱག་བཙལ་བའོ། །སྲིད་པ་རིམ་དང་རྫོགས་ཚུལ་གྱིས། ཞེས་པ་སྤྱིར་ལམ་ས་ལ་བློ་ཆེ་ཆུང་ཡོད་པས་འབྲས་བུ་ལ་སྦྱོར་ཚུལ་ཡང་གཉིས་ཡོད་དེ། རྫུས་སྐྱེས་དང་ཚུལ་མཐུན་པ་ཅིག་ཅར་དུ་སྦྱོར་བ་དང་། མངའ་སྐྱེས་དང་ཚུལ་མཐུན་པ་རིམ་གྱིས་པར་སྦྱོར་བ་ཡིན་ནོ། །དེ་རེ་རེ་ལའང་གཉིས་གཉིས་འགྲོ་སྟེ། གཞི་གནས་ཀྱི་རིམ་གྱིས་པ་དང་། །ཅིག་ཆར་བ་དང་། གནས་སྐབས་ཀྱི་རིམ་གྱིས་སྦྱོར་བ་དང་། ཅིག་ཅར་དུ་སྦྱོར་བ་གཉིས་སུ་ཡོད་དོ། །སྦྱོར་ཚུལ་གཉིས་ཀྱིས་སོ། །གཞི་གནས་ཀྱི་རིམ་གྱིས་པ་ནི། དང་པོ་ལྟ་བ་གཏན་ལ་ཕབ་ནས་ཏིང་ངེ་འཛིན་རིམ་པར་བསྒོམ་སྟེ། འབྲས་བུ་ལ་དུས་བུལ་བས་མི་སྦྱོར་བ་ཡིན། གཞི་གནས་ཀྱི་ཅིག་ཅར་བ་ནི། །ལྟ་བ་དབྱེར་མེད་ཆིག་ཆོད་དུ་རྟོགས། ཆིག་ཆོད་དུ་བསྒོམ། ཆིག་ཆོད་དུ་མཐར་ཕྱིན་ནས་འབྲས་བུ་ལ་དུས་མྱུར་བ་སྦྱོར་བ་ཡིན་ནོ། །གནས་སྐབས་ཀྱི་རིམ་དང་ཅིག་ཆར་བ་ནི། དེ་རེ་རེ་ལའང་བློ་ཆེ་ཆུང་གིས་རིམ་གྱིས་སྦྱོར་བ་དང་ཅིག་ཅར་སྦྱོར་བ་གཉིས་སུ་ཡོད་དེ། དེ་ལྟར་སྦྱོར་ཚུལ་གཉིས་ཀྱིས་སོ། །མངོན་བྱས་དོན་ཡོད་བཤད་པར་བྱའོ། །ཞེས་པ་སྟེ། དེའང་ལམ་གྱི་རྩོལ་བས་གཞི་ཇི་ལྟ་བ་བཞིན་དུ་མངོན་དུ་བྱ་སྟེ། ལམ་གྱི་རྩོལ་བ་དོན་ཡོད་པར་བྱ་བའི་འབྲས་བུ་བཤད་པར་བྱའོ། །ཞེས་སོ། །འོ་ན་འབྲས་བུའི་གནས་སྐབས་སུ་གཞི་ཇི་ལྟ་བ་བཞིན་དུ་བྱས་པ་ཡིན་ནམ་མིན། མིན་ན་འདི་ཉིད་དང་འགལ། ལེའུ་གསུམ་པ་ལས། མངོན་བྱས་ལྷག་པའི་ཆོས་སྐུར་སྦྱོར། །ཞེས་བཤད་པ་དང་འགལ། འབྲས་བུ་ལམ་དུ་བྱེད་པ་དང་ཡང་འགལ་ཏེ། །འབྲས་བུ་རང་ལ་རང་ཆས་སུ་གནས་པ་དེ་ལམ་གྱིས་མངོན་སུམ་དུ་བྱེད་པར་འདོད་པའི་ཕྱིར་རོ། །ཡང་གཞི་ལྷུན་གྲུབ། འབྲས་བུ་ལྷུན་གྲུབ། ལམ་ལྷུན་གྲུབ་གསུམ་དུ་བྱེད་པ་དང་ཡང་འགལ། སྤར་ཁབ་ལས། དེ་དག་ངོ་བོ་གཅིག་ལ་རིམ་པ་སྣང་བ་ནི། ཞེས་པས་གཞི་ལམ་འབྲས་བུ་གསུམ་ངོ་བོ་གཅིག་པར་བཤད་པ་དང་འགལ་ལོ། །གཞི་ཇི་ལྟ་བ་བཞིན་དུ་མངོན་དུ་བྱས་ནས་གཞིའི་དུས་ཀྱི་རིག་པ་སྤངས་སམ་མ་སྤངས། སྤང་ན་ཇི་ལྟ་བ་བཞིན་དུ་མངོན་དུ་བྱས་པ་མ་ཡིན་པར་ཐལ། གཞིའི་དུས་ན་མ་རིག་པ་མ་སྤངས་ལ། །འབྲས་བུའི་དུས་སུ་སྤངས་པའི་ཕྱིར་རོ། །མ་རིག་པ་མ་སྤངས་ན་རྒྱུད་དག་གིས་སངས་རྒྱས་མ་ཡིན་པར་ཐལ། མ་རིག་པ་ཡོད་པའི་ཕྱིར་རོ། །ཡང་གཞི་དང་ལམ་གྱི་ཉམས་པ་ཡང་མ་ཟད་པར་ཐལ། གནས་ཀྱི་མ་རིག་པ་མ་སྤང་པའི་ཕྱིར་རོ། །ཉེས་པ་མ་ཟད་པ་འདོད་པའི་ཕྱིར་རོ་ཞེ་ན། གཞུང་དང་འགལ་ཏེ། སྤར་ཁབ་ལས། གཞི་དང་ལམ་གྱི་ཉེས་པ་ཟད་པ་སྟེ་དེ་ལྟར་སྣང་བའི་ཕྱིར་ན་འབྲས་བུའོ། །ཞེས་པ་དང་། སྤྱན་འགྲེལ་ལས། ཉེས་པ་གཉིས་ཟད་འབྲས་བུ་ཏེ། །ཞེས་བཤད་པ་དང་འགལ་ལོ། །ལན་ནི། གཞི་ཇི་ལྟ་བ་མངོན་དུ་བྱས་སམ་མ་བྱས་ཤེས་ན། ཇི་ལྟ་བ་བཞིན་དུ་མངོན་དུ་བྱས་པ་ཡིན་ནོ། །འོ་ན་མ་རིག་པ་སྤངས་སམ་མ་སྤངས་ཤེ་ན། ངོ་བོ་མ་སྤངས་ལ་དེ་ཀ་ལྟར་མི་ལྡན་ནོ། །མ་སྤངས་པས་རྒྱུད་དག་གི་སངས་རྒྱས་མི་བཏུབ་ལ། དེ་ཀ་ལྟར་མི་ལྡན་པས་གཞི་ཇི་ལྟ་བ་མངོན་དུ་བྱས་པ་མི་བཏུབ་བོ་ཞེ་ན། ལན་དུ་མ་རིག་པ་ཡེ་ཤེས་གཉིས་དབྱེར་མེད་ཡིན་པས་ཡེ་ཤེས་གང་ན་ཡོད་པ་ན་མ་རིག་པ་བག་ལ་ཉལ་དུ་ཡོད་པས་མ་རིག་པ་མ་སྤངས་ཏེ། གཞི་ཇི་ལྟ་བ་བཞིན་དུ་མངོན་དུ་བྱས་པ་ཡིན་ལ་མ་རིག་པ་བསལ་དུ་མེད་དེ། མ་རིག་པ་ཉིད་ཡེ་ཤེས་ཀྱི་ངོ་བོ་ཤར་བས་མ་རིག་པ་རང་རྒྱུད་མི་ལྡན་པས། རྒྱུད་དག་ཏུ་མི་འགྱུར་བའི་སྐྱོན་མེད་དོ། །རྒྱལ་བའི་རྒྱལ་བ་ལྷ་ཡི་ལྷ། །ཞེས་པ་ལ་འབྲུ་སྦྱོར་ལུགས་གཉིས་ཏེ། རྒྱལ་བ་ནི་ཐུན་མོང་གི་ཐེག་པ་སངས་རྒྱས་ཏེ། །འཁོར་བའི་མཐའ་ལས་རྒྱལ་བ་ཡིན་ལ། དེའི་རྒྱལ་བ་ནི་མ་ཧཱ་ཡོ་གའི་རྒྱལ་བ་ཡིན་ཏེ། ཐེག་པ་འོག་མའི་རྒྱལ་བ་དང་མྱ་ངན་ལས་འདས་པའི་གཉིས་ལས་ཀྱང་རྒྱལ་ལོ། །མ་ཧཱ་ཡོ་ག་རང་ལ་སྦྱར་ན་རྒྱལ་བ་ནི་རིགས་ལྔའམ་སྐུ་ལྔ་ཡིན་ལ། དེའི་ཡང་སངས་རྒྱས་རྒྱལ་བ་ནི་སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོ་ཡིན་པས་རྒྱལ་བའི་རྒྱལ་བ་ཞེས་བྱའོ། །དེ་ལྟར་འབྲུ་ཟུར་གཉིས་ག་ལ་སྦྱོར་རོ། །ཆོས་དྲུག་ནོར་བུས་མཚོན་པ་ནི། །ཞེས་པ་ནི། སྐུ་ལྔ་ལྷུན་གྲུབ་ཀྱི་སངས་རྒྱས་དེ་ནི་ནོར་བུ་རིན་པོ་ཆེ་དང་འདྲ་ལ། ནོར་བུ་ལ་ཆོས་མཐུན་དྲུག་ཡོད་དེ་དགོས་འདོད་ཐམས་ཅད་ལྷུན་གྱི་གྲུབ་པ་དང་། དགོས་འདོད་འདིའོ་ཞེས་རང་རྒྱུད་པ་མེད་པ་དང་། འགྲོ་བ་ལ་དགོས་འདོད་ཇི་ལྟ་བ་བཞིན་མོས་པར་སྣང་བ་དང་། དགོས་འདོད་སྦྱིན་སྙམ་པའི་རྟོག་པ་མེད་པ་དང་། རྩོལ་བ་མེད་པར་རང་བྱུང་བ་དང་། འདི་དང་འདིའི་ཕྱོགས་རིས་མེད་པའོ། །དེ་བཞིན་དུ་རིགས་དྲུག་པའི་སངས་རྒྱས་དེ་ལ་ཡང་སྐུ་ལྔ་ལྷུན་གྲུབཀྱི་ངོ་བོར་གནས་པ་དང་། སྐུ་ལྔ་ཐ་དད་ཀྱི་ངོ་བོ་མེད་པ་དང་། གདུལ་བྱ་ལ་ཇི་ལྟར་མོས་པ་བཞིན་དུ་དོན་བྱེད་པ་དང་། དོན་བྱེད་པའི་ཚེ་རང་རྒྱུད་པའི་རྟོགས་པ་མེད་པ་དང་། རྩོལ་བ་བྱ་མི་དགོས་པ་དང་། །གདུལ་བྱ་ལ་ཕྱོགས་རིས་མེད་པའོ། །གཅིག་དང་དུ་མ་ཀུན་བྲལ་ལྡན། །ཞེས་པ་ནི། དེ་ལྟ་བུའི་རིགས་དྲུག་པ་དེ་ཡང་གཅིག་དང་དུ་མ་ལ་སོགས་པའི་གཟུང་ཡུལ་ལ་སོགས་པས་གྲོལ་ཞིང་མཐའ་ཐམས་ཅད་ལས་མ་སྤངས་པར་བྲལ་བ་ལ་བྲལ་བའི་དུས་ན་ལྡན་པའོ། །འོ་ན་སྐུ་ལྔ་ལྷུན་གྲུབ་དེ་གཅིག་དང་དུ་མ་ལས་གྲོལ་ན་ཕྱོགས་བཅུའི་སངས་རྒྱས་ཐམས་ཅད་དགོངས་པ་གཅིག་གམ་ཐ་དད། གཅིག་ན་སྟོང་པར་ཐལ། གནས་ཀྱི་མ་རིག་པའི་དུས་ན་གཅིག་ཐ་དད་ལས་གྲོལ་བའི་ངོ་བོར་གནས་ལ། དེའི་དོན་མ་རིག་པ་སྟེ་འབྲས་བུའི་གནས་སྐབས་གཅིག་ཏུ་སོང་བས་གནས་ཀྱི་མ་རིག་པ་མེད་པར་ཐལ་ལོ། །ཐ་དད་ན་སྣང་མཐར་ཐལ། གནས་ཀྱི་མ་རིག་པ་མེད་པར་ཐལ། གཞིའི་དུས་ན་ཐ་དད་ལས་གྲོལ་བ་ལས། འདིར་དེའི་དོན་དམིགས་སྟེ། འབྲས་བུའི་དུས་སུ་ཐ་དད་དུ་སོང་བའི་ཕྱིར་རོ། །ལན་ནི། སྤྱིར་སངས་རྒྱས་ཐམས་ཅད་རྒྱུད་གཅིག་དང་། ཐ་དད་ལས་གྲོལ་བ་ཡིན་བྱ། །དེ་ཡང་དུ་མ་མ་སྤངས་གཅིག་ཏུ་ཤར། །གཅིག་མ་སྤངས་དུ་མར་ཤར་རོ། །འོ་ན་ཁྱབ་བྱེད་གཅིག་མ་གྲུབ་པས་ཁྱབ་བྱ་དུ་མ་མ་གྲུབ་པར་ཐལ་ཞེ་ན། དེ་ནི་གཅིག་མེད་དུ་མ་མེད་ཟེར་བ་མེད། གཅིག་མ་སྤངས་དུ་མའི་མཐའ་ལས་གྲོལ། དུ་མ་མ་སྤངས་གཅིག་གི་མཐའ་ལས་གྲོལ་བ་ཡིན་ནོ། །དེ་ཉིད་ཆེ་རེ་བརྗོད་པ་ནི་སྐུ་ལྔ་ལྷུན་གྲུབ་དེ་ཉིད་ལ་ཡོན་ཏན་གྱི་སྒོ་ནས། སྐུ་ལྔ་གསུང་ལྔ་ཐུགས་ལྔ་ཡོན་ཏན་ལྔ་ཕྲིན་ལས་ལྔ་སྟེ་རེ་རེ་ལ་ལྔ་མཚན་ལྔ་ལྔར་བརྗོད་པའོ། །འཇིག་རྟེན་འདས་དང་མ་འདས་ཀུན། །ཞེས་པ་ལ་སོགས་པས་ཆོས་སྐུ་སྟོན་ཏོ། །དོན་དམ་པའི་གདམས་པ་སྐྱེ་འགག་མེད་པ་ཆོས་སྐུ་མངོན་དུ་བྱས་པ་ཆོས་སྐུའོ། །ཐམས་ཅད་རང་རིག་མངོན་སུམ་སྣང་། །ཞེས་པ་མཚན་དང་དཔེ་བྱད་ཐམས་ཅད་མངོན་དུ་སྣང་བའམ། ཡང་ན་འཁོར་འདས་ཀྱི་ཆོས་ཐམས་ཅད་རིག་པ་ལ་མངོན་སུམ་དུ་སྣང་བར་བྱས་པའམ། མདོར་ན་མངོན་པར་བྱང་ཆུབ་པའི་སྐུ་ནི་མཚན་དང་དཔེ་བྱད་སོགས་ཐུབ་བགྲང་ཐུབ་ཏུ་ཡོད་པར་གསལ་ལ། ལོངས་སྐུ་ལ་མཚན་དཔེ་ཡོད་ཀྱང་སྔོ་ཐུབ་བགྲང་ཐུབ་ཏུ་མེད་དོ། །ཡུལ་མེད་ཀུན་རོལ་ལོངས་སྤྱོད་ཆེ། ཞེས་པ་ནི་འཁོར་འདས་གཉིས་ཀ་ལ་ཡུལ་མེད་དུ་རོལ་པ་ཡིན་ལ། འོ་ན་ཐུན་མོང་གི་ལོངས་སྐུ་དང་ཁྱད་ཅི་ཡོད་ཅེ་ན། ཐུན་མོང་གི་ལོངས་སྐུ་ནི་མྱ་ངན་ལས་འདས་པ་ལ་ལོངས་སྤྱོད་ཀྱང་འཁོར་ལ་ལོངས་སྤྱད་མི་ནུས། འདིར་ནི་འཁོར་འདས་གཉིས་ཀ་ལ་འགྱོད་མེད་པས་ཁྱད་ཆེའོ། །སོ་སོར་འདུལ་བ་ཡེ་ཤེས་འཁོར། །ཞེས་པ་ནི། སྐུ་ལྔ་ལྔ་སོ་སོས་འཁོར་ལྔ་སོ་སོར་འདུལ་ཏེ། ཡེ་ཤེས་འཁོར་ཞེས་པ་ནི། ཆོས་སྐུའི་འཁོར་ཡེ་ཤེས་རྒྱ་མཚོ་སྟེ། ཐུན་མོང་མ་ཡིན་པའི་ཡེ་ཤེས་ལྔའི་ཚུལ། །མ་ཧཱ་ཡོ་གའི་རིག་ལྔར་སྣང་བའོ། །ཡང་ན་རྒྱུད་ལས་སྦྱངས་སོ། །རྒྱ་མཚོའི་ཚོགས་དང་ཤེས་བྱ་ཡི། །ཞེས་པ་ནི། རྒྱ་མཚོའི་ཞེས་པ་ནི་གཉིས་ཏེ། །རྒྱལ་བ་རྒྱལ་མཚོ་དང་། སྨིན་པ་རྒྱ་མཚོའོ། །དེ་ལ་རྒྱལ་བ་རྒྱ་མཚོ་ནི་མངོན་པར་བྱང་ཆུབ་པའི་འཁོར་ཡིན་ཏེ། ཕྱི་པའི་ལམ་བགྲོད་ནས་རང་རང་གི་སངས་རྒྱས་ཐོབ་པའམ། ཡང་ན་འདི་ཉིད་ཀྱི་རྒྱུད་མས་སྦྱངས་སོ། །སྨིན་པ་རྒྱ་མཚོ་ནི། ལོངས་སྐུའི་འཁོར་ཏེ་ས་བཅུ་ལ་གནས་པའི་བྱང་ཆུབ་སེམས་དཔའ་འོ། །ཚོགས་དང་ཡེ་ཤེས་པ་སྤྲུལ་པའི་འཁོར་ནི་གདུལ་བྱ་དག་པ་དང་མ་དག་པ་ཐམས་ཅད་དོ། །དབྱེར་མེད་གོ་བའི་སྐབས་དང་ལྡན། །ཞེས་པ་ནི་དབྱེར་མེད་རྡོ་རྗེའི་འཁོར་རོ། །སྒྲིབ་པ་མཐའ་སྤོང་སེམས་དཔའ་ཆེ། །ཞེས་པ་ནི། ཤེས་བྱའི་སྒྲིབ་པ་མཐའ་ནས་སྤོང་བ་སྟེ། །སེམས་དཔའ་ཆེ་ནི་འཁོར་ལོངས་སྐུའི་འཁོར་ལ་སྙག་པའོ། །རྒྱལ་བ་ལྔ་སོགས་རྒྱུད་སྦྱངས་པ། །ཞེས་པ་ནི། རྒྱལ་བ་ནི་སྐུ་ལྔ་ལ་སོགས་པ་ནི་རིགས་ལྔ་སྟེ། དེ་དག་ལ་རིམ་པ་བཞིན་དུ་རྒྱུད་སྦྱངས་པས། མོས་སྤྱོད་དང་སེམས་དབང་བསྒྱུར་རིགས་ཏེ། ཚེ་ལ་དབང་བའི་རིག་འཛིན་གྱིས་བརྟུལ་ནས་སྔགས་སྦྱོར་བའོ། །རྡོ་རྗེ་ཚོགས་མཐོང་ཕྱིར་མིང་འགྲུབ། །ཅེས་པ་སྟེ། དེ་ལྟར་གསུང་སྔགས་རྡོ་རྗེ་ཐེག་པ་ལ་སྦྱོར་བ་ལ། ཡི་གེ་འཁོར་ལོའི་ལྷ་ཚོགས་དང་དབྱེར་མེད་དུ་མངོན་སུམ་དུ་མཐོང་བའི་ཕྱིར་ན་འཁོར་གྱི་མིང་འགྲུབ་བོ། །ཡི་གེ་དྲུག་ཅུ་དྲུག་གསུམ་སངས་རྒྱས། ཞེས་པ་ནི་སྤྲུལ་པའི་སྐུའི་གསུང་དབྱངས་སུམ་བརྒྱ་དྲུག་ཅུའོ། །དེ་ལ་རྩ་བའི་གསུང་དྲུག་ཏེ། །ལྷ་ལ་ཚངས་པ་ལྟ་བུ་དང་། ལྷ་མ་ཡིན་ལ་སྒྲ་སྙན་ལྟ་བུ་དང་། མི་ལ་གླུ་གར་ལྟ་བུ་དང་། བྱོལ་སོང་ལ་ཀ་ལ་པིང་ཀ་ལྟ་བུ་དང་། ཡི་དྭགས་ལ་འབྲུག་སྒྲ་ལྟ་བུ་དང་། དམྱལ་བ་ལ་སིལ་སྙན་ལྟ་བུའོ། །ཚངས་པའི་དབྱངས་གཅིག་པུ་ལ་ཡང་བྲེང་དེ་བ་དང་། དུང་ངེ་བ་དང་། ཤ་ད་པ་དང་། ག་ད་པ་དང་། ཅང་ཀ་དེའུ་དང་། བང་ཀ་དེའུ་སྟེ་དྲུག་གོ །དེ་རེ་རེ་ལའང་འདུ་ཤེས་བསྐྱེད་པ་དང་། རྣམ་པར་རིག་པ་དང་། མི་མཐུན་པ་མེད་པ་དང་། མཉན་པར་འོས་པ་དང་། ཤིན་ཏུ་ཟབ་པ། རྗེས་སུ་འབྱུང་བ་གང་གིས་ཀྱང་མི་ཚུགས་པ། ན་བར་སྙན་པ། མ་འཁྲུགས་པ། ཤིན་ཏུ་གསལ་བ་དང་བཅུའོ། །དེ་ལྟར་ཚངས་པའི་དབྱངས་ལ་དྲུག་ཅུའོ། །དེ་བཞིན་དུ་འགྲོ་བ་གཞན་གྱི་ལ་ཡང་དྲུག་ཅུ་ཕྲག་དྲུག་ཏུ་འགྱུར་ཏེ། དེ་རྣམས་ལ་སུམ་བརྒྱ་དྲུག་ཅུའོ། །སྙན་ཆ་ལྔར་ལྡན་ཕྱིར་ཐོས་པ། ཞེས་པ་ནི། གསང་བའི་བདག་པོ་དེ་སྐུ་ལྔ་ཀའི་སྡུད་པ་པོ་མིན་པས། སྙན་ལྔར་ལྡན་ཏེ། ཆོས་ཀྱི་སྐུ་ལ་ཆོས་ཉན་ཙམ་ན་སྐྱེ་མེད་དོན་གྱི་སྙན་གྱིས་སོ། །ལོངས་སྐུ་ལ་དགོངས་པ་བརྡའི་སྙན་གྱིས་གོ །མངོན་པར་བྱང་ཆུབ་པའི་སྐུ་ལ་རིག་པ་བྱིན་རླབས་སྙན་གྱིས་གོ །རྡོ་རྗེའི་སྐུ་ལ་དབྱེར་མེད་རྡོ་རྗེའི་སྙན་གྱིས་གོ །སྤྲུལ་པའི་སྐུ་ལ་རྣ་བ་ཤའི་རྣ་བས་ཐོས་སོ། །གསང་བའི་རྒྱུད་བཤད་ཐོས་ཞེས་གསུངས། །ཞེས་པ་ནི་སྐུ་ལྔས་གསང་བ་སྔགས་ཀྱི་རྒྱུད་བཤད་པའི་ཚེ་ན། སྐུ་བཞི་ནི་སྤྲུལ་སྐུ་ལ་དངོས་སུ་ཐོས་སོ། །དེས་ན་གསང་བདག་གིས་ཀྱང་ཚིག་ཏུ་སྡུད་པའི་ཚེ་ན། སྐུ་བཞིས་བསྟན་པ་ལ་འདི་སྐད་བཤད་པའི་དུས་ན་ཞེས་བཤད་ལ། སྤྲུལ་པའི་སྐུ་ལ་འདི་སྐད་བདག་གིས་ཐོས་པའི་དུས་གཅིག་ན་ཞེས་གསུངས་པ་ཡིན་ནོ། །མེ་ལོང་ལྟ་བུའི་ཆོས་བརྒྱད་ཀྱིས། །ཞེས་པ་ནི། ལོངས་སྐུ་དགོངས་པས་འཁོར་གྱི་སྒྲིབ་པས། སེལ་བའི་དཔེ་ཡིན་ཏེ། དཔེར་ན་མེ་ལོང་ནི་ཆོས་བརྒྱད་དང་ལྡན་ཏེ། བྱད་ཀྱི་དྲི་མ་སེལ་བ་དང་། །ལེགས་པ་བསྐྱེད་པ་དང་། བཞིན་གསལ་བར་བྱེད་པ་དང་། གཟུགས་བརྙན་འབྱུང་བ་དང་། རྩོལ་བ་མེད་པ་དང་། འདུ་བྱེད་མེད་པ་དང་། ལྡན་པ་མ་ཡིན་པ་དང་། མི་ལྡན་པ་མ་ཡིན་པའོ། །དཔེ་དེ་བཞིན་དུ་ལོངས་སྤྱོད་རྫོགས་པའི་སྐུ་དེས་ཀྱང་འཁོར་གྱི་སྒྲིབ་པ་སེལ་བ་དང་། ཆོས་ཉིད་གསལ་བར་སྟོན་པ་དང་། །དོན་གསལ་བར་བྱེད་པ་དང་། རྩོལ་བ་མེད་པ་དང་། དངོས་པོར་མི་ལྡན་པ་དང་། མ་འགགས་པར་ལྡན་པའོ། །དྲངས་དོན་སྔ་ཕྱི་སངས་རྒྱས་པ། །ཞེས་པ་ནི། རྒོལ་བ་ཁོང་ནས་བཏོན་ནས་ལན་དཀྱུས་ཀྱིས་འདེབས་པ་ནི། དེའང་རྒྱུའི་ཐེག་པའི་སངས་རྒྱས་དང་། འབྲས་བུའི་ཐེག་པའི་སངས་རྒྱས་གཉིས་རྒྱུད་གཅིག་གམ་ཐ་དད། གཅིག་ན་ཁྱོད་ཀྱི་འབྲས་བུ་ཀུན་ཏུ་འོད། ཐེག་ཆེན་ཐེག་པའི་བསྟི་གནས་པ། །ཞེས་པ་དང་། ཀུན་ཏུ་འོད་ལ་གནས་ནས་པདྨ་སྤྱན་དུ་འགྱུར་ཞེས་པ་མི་འགལ་ལམ། ཐ་དད་ན་དགོངས་འདུས་ལས། གསང་བའི་སྙིང་པོར་ངེས་པ་ན། །ཐེག་པའི་སྒོ་ཡང་གཅིག་ལས་མེད། །ཅེས་པ་དང་མི་འགལ་ལམ་ཞེ་ན། གཅིག་ཐ་དད་ལས་གྲོལ་ལོ་ཞེས་སྟོན་པ་ནི། ལན་ནི། དྲང་དོན་སྔ་ཕྱི་སངས་རྒྱས་པ། །ཞེས་པ་སྟེ། དྲང་དོན་གྱི་ཐེག་པ་སེམས་ཙམ་པ་བཞིན་དུ་རྒྱུ་སྔ་མ་ལས་འབྲས་བུ་ཕྱི་མ་བྱུང་ནས་རྒྱུ་ཐ་དད་དུ་འདོད་པ་ཡང་མི་འཐད་དེ། དོན་དམ་གཅིག་པུ་མ་ཡིན་ཕྱིར། །ཞེས་པ་དབུ་མ་བཞིན་དུ་འབྲས་བུ་ཐམས་ཅད་གཅིག་པར་འདོད་པ་ཡང་མི་འཐད་དེ། ཆུ་ལ་ཆུ་ལྟར་གཅིག་པ་མེད། །ཅེས་པ་ནི། སངས་རྒྱས་ཀྱི་ཐུགས་ཆུ་གཅིག་ལ་གཅིག་ཐིམ་པ་ལྟར་གཅིག་ཏུ་ཡོང་བ་མེད། གཅིག་ཤེས་ལྡན་པ་མ་ཡིན་པས། །ཞེས་པ། དེས་ནི་གཅིག་ཤོས་རྒྱུའི་ཐེག་པ་སྟེ། དེ་དག་གི་འདོད་པ་ཡང་བདེན་པ་མ་ཡིན་ཏེ། འོ་ན་ཇི་ལྟར་གནས་ཤེ་ན། །སོ་སོ་ཐ་དད་ཆ་རིགས་མེད། །ཅེས་པ་ནི། ངེད་གསང་སྔགས་ཀྱི་ལུགས་ཀྱིས་འདོད་པ་བསྒྲུབ་པའི་འབྲས་བུ་རེ་རེ་ཐེག་པ་ཀུན་ལ་ཡོད་པས་ཐ་དད་པ་ལྟར་གནས་ཏེ། ཐ་དད་པར་བཤད་པ་དང་ཡང་མི་འགལ་ལ། མཐར་ཐུག་གསང་སྔགས་ཀྱི་འབྲས་བུར་གཅིག་པས་གཅིག་པར་བཤད་པ་དང་ཡང་མི་འགལ་ཏེ། མདོར་ན་མཐར་ཐུག་གི་འབྲས་བུ་ལ་རྒྱུད་སོ་སོའི་ཆ་དང་རིགས་སོ་སོ་མེད་དོ། །ངོ་བོ་གཅིག་ལ་རྒྱུད་འདྲེས་མིན། །ཞེས་པ་ནི། སེམས་ཙམ་པ་ནི་འདས་མ་འོངས་ད་ལྟར་གྱི་སེམས་ཅན་རྣམས་མི་རྟོག་པའི་ངོ་བོར་གཅིག་ཀྱང་། སྦྱངས་པའི་ཡེ་ཤེས་ཐ་དད་དེ་རང་རྒྱུད་ལ་འདྲེས་པར་འདོད་དེ། དཔེར་ན་ཤིང་ཕུང་དུ་མ་ལ་མེ་བཏང་ན་མེ་ཙམ་དུ་ངོ་བོ་གཅིག་ཀྱང་མེའི་ནང་དུ་རིས་མི་འདྲ་བ་བཞིན་དུ་འདོད་པའང་མི་འཐད་དེ། དྲང་དོན་ཡིན། ཆུ་ལ་ཆུ་ལྟར་འདོད་པ་ཡང་དེའོ། །ཞེས་པ། དབུ་མ་པ་སངས་རྒྱས་ཀྱི་རྒྱུ་སྟོང་པ་ཉིད་དུ་གཅིག་ཏེ། འདས་མ་འོངས་ད་ལྟར་གྱི་སངས་རྒྱས་རྣམས་ཆུ་ལ་ཆུ་ཐིག་པ་ལྟར་འདོད་པ་མི་འཐད་དོ། །ལྔ་དང་ལྔ་ལྔར་ལྷུན་གྲུབ་པའི། ཞེས་པ་ནི། འདི་ལྟར་སྐུ་གསུང་ཐུགས་ཡོ་ཏན་རེ་རེ་ལའང་ལྔ་ལྔར་གྲུབ་པའོ། །རྒྱལ་བ་གསུམ་རྫོགས་ས་སོ་མ། ཞེས་པ་ནི། ཐེག་པ་འོག་མ་པའི་རྒྱལ་བ་སྐུ་གསུམ་ཡང་རྫོགས་པའོ། །གྲུབ་མཐའི་སངས་རྒྱས་ལ་ཞེས་པ་ནི། །འོག་མ་བ་སོ་སོ་གྲུབ་པའི་སངས་རྒྱས་ལས་འདིར་དཔགས་སོ། །གང་གིས་དཔགས་ན། གྲངས་དང་ངོ་བོ་བྱིན་རླབས་ལས། ཞེས་པ་ལ་གཉིས་ཏེ། དེའང་གྲངས་ཀྱིས་དང་པོ་དཔགས་ཏེ། འོག་མའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལས། འདིར་རེ་རེ་ལའང་ལྔ་ལྔ་ལས་དཔགས་སོ། །ངོ་བོ་དཔགས་ཏེ། འོག་མའི་ཆོས་སྐུ་སྐྱེ་མེད་ཕྱོགས་གཅིག་ཏུ་བྱས་པ་ཡིན། འདིར་སྣང་བ་ངོ་བོ་ཉིད་དུ་ལྷུན་གྱིས་གྲུབ་པ་མངོན་དུ་བྱས་པ་ཡིན་ནོ། །བྱིན་གྱིས་རླབས་ཀྱིས་འཕགས་ཏེ། འོག་མའི་གཟུགས་སྐུ་སྨོན་ལམ་གྱི་བྱིན་རླབས་ལས་གྲུབ་པ་ཡིན་ལ། འདིར་རིག་པ་རང་ཤར་ལས་གཟུགས་སྐུ་གཉིས་གྲུབ་པ་ཡིན་ནོ། །སྣང་དང་དོན་བྱེད་ཆེ་ཆུང་གིས། ཞེས་པ། སྣང་ལུགས་ཀྱིས་འཕགས་ཏེ། འོག་མ་པའི་སངས་རྒྱས་འདོད་ཡོན་སྤང་བའི་ཚུལ་དུ་སྣང་བས་ཐབས་ཆུང་ལ། འདིར་འདོད་ཡོན་མི་སྤང་བའི་ཚུལ་དུ་སྣང་བས་ཐབས་ཆེའོ། །དོན་བྱེད་པ་ལ་རྒྱ་ཆེ་ཆུང་གིས་འཕགས་ཏེ། འོག་མའི་སངས་རྒྱས་ཀྱིས་གདུལ་བྱ་སོ་སོའི་སྐྱེ་བོ་དང་ལམ་པ་འདུལ་ལ། འདིར་འོག་མའི་སངས་རྒྱས་ཀྱང་འདུལ་བས་དེས་ན་འཕགས་པ་ངོ་བོ་ཉིད་ཀྱིས་གསལ་ལོ། །དེ་ཚུལ་ས་བཞི་རྒྱལ་བ་དག །ཅེས་པ། ས་བཞི་ནི་མདོ་ཀུན་ཏུ་འོད་ཀྱི་ས། །ཀྲི་ཡ་རིགས་གསུམ་རྡོ་རྗེ་འཛིན་གྱི་ས། །ཨུ་པ་ཡ་རིགས་བཞི་རྡོ་རྗེ་འཆང་གི་ས། ཡོ་ག་འཐུག་པོ་བཀོད་པའི་རྒྱལ་བའོ། །རྒྱུད་གཅིག་འདྲེས་དང་གྲོལ་སྨྲ་བ། ཞེས་པ། དབུ་མ་པ་སངས་རྒྱས་ཀྱི་རྒྱུད་ཆུ་ལ་ཆུ་ཐིམ་པ་ལྟར་གཅིག་ཏུ་སྨྲ་བ་དང་། སེམས་ཙམ་པ་རྒྱུད་ཐ་དད་དུ་སྨྲ་བ་དང་། ཀྲི་ཡ་པ་གཅིག་ཐ་དད་ལས་གྲོལ་བར་སྨྲ་བ་དང་། ཀུན་འདིར་དྲང་བའི་ཐབས་ཙམ་ཡིན་ཏེ། བཤད་པ་མིན་ནོ། །དེས་ན་སངས་རྒྱས་ཀྱི་རྒྱུད་ཀྱི་ཁྱད་པར་འདི་འདྲ་འོ་ཞེས་བསམ་པ་ལས་འདས་སོ། །ས་རི་དབུ་མར་ཇི་བཞིན་ནམ། །ཞེས་པ། གནས་དེར་དགྲ་བཅོམ་པ་ལྔ་བརྒྱ་འདུས་ནས། །འདི་ནི་རྒྱལ་ཚབ་སྐྱེས་བུའོ། །འདིས་ནི་སྟོན་པའི་ཞལ་མཐོང་བའོ། །ཞེས་ཟེར་ནས་རྒྱལ་ཚབ་ཏུ་དབང་བསྐུར་བ་ཡིན་ནོ། །ཐུན་མོང་གི་ཐེག་པའི་མིང་གི་དབུ་མར་བ་ཡིན་ནོ། །རྡོ་རྗེ་ཟམ་པ་ལས། བྱ་རྒོད་ཕུང་པོའི་འདབས་ལོགས་སུ། །དགོན་ཕུག་ཕྱེ་མ་འདབ་སྣ་རུ། །དང་པོར་ལྟ་བའི་རིགས་ཅན་དེས། །བྲམ་ཟེ་ནས་ཟན་རྒན་མོའི་བུ། །དགེ་སློང་ས་རི་ཞེས་བྱ་བ། །དངོས་ནི་དགྲ་བཅོམ་ཟག་པ་ཟད། །རྒྱལ་ཚབ་སྐྱེས་བུའི་ས་འཛིན་ཟེར། །དགྲ་བཅོམ་ལྔ་བརྒྱ་སྟོང་འདུས་ཏེ། །སྐྱེས་བུ་ཆེན་པོར་དབང་ཡང་བསྐུར། །ཞེས་གསུངས་སོ། །ཝཱ་རཱ་ཎཱ་སའི་བསིལ་ཁང་དུ། དམ་པའི་རིགས་ཅན་དབུ་མར་ནས། །ཞེས་པ། གནས་དེ་ཉིད་དུ་འཁོར་དམ་པའི་རིགས་ཅན་ཀྲི་ཡ་ཡོ་ག་རྣམས་ལ། སྟོན་པ་ཕྱག་ན་རྡོ་རྗེས། རིགས་གསུམ་གྱི་དབུ་མར་ནས། རིགས་གསུམ་རྡོ་རྗེའི་མཚན་པ་ཐོབ་སྟེ། དེ་ཡང་ཝཱ་རཱ་ཎཱ་སའི་བསིལ་ཁང་དུ། །གཙང་མ་ལག་ན་རྡོ་རྗེ་ཡིས། །ལག་མཐིལ་གཙང་མའི་དྲིས་བྱུགས་ཏེ། །རིགས་གསུམ་སྟོབས་ཀྱི་དཀྱིལ་འཁོར་བྲིས། །དམ་པ་གསུམ་ལ་དངོས་སུ་བསྟན། །ཞེས་གསུངས་སོ། །གཉིས་ཀའི་རྒྱུད་ལས་གྲགས་བཞིན་ནོ། །ཞེས་པ། ཨུ་པ་རང་གི་རྒྱུད་ལས་གྲགས་པ་བཞིན་དུ་གཤེགས་ཏེ། དེ་ཡང་། རིན་ཆེན་ལྷུན་གྲུབ་བརྩེགས་པའི་ཁང་། །རི་བོ་འབར་བའི་རྩེ་མོ་ལ། །དབང་འབྱུང་ལག་ན་རྡོ་རྗེ་ཡིས། །རྡོ་རྗེ་དབྱིངས་ཀྱི་དཀྱིལ་འཁོར་འབར། །རང་བཞིན་དཀྱིལ་འཁོར་མངོན་ཕྱུང་སྟེ། །དམ་པ་ལྔ་ལ་དངོས་སུ་བསྟན། །ལྷ་བྲག་རྡོ་རྗེའི་བྲག་ཕུག་ཏུ། །གཙང་མའི་རིག་འཛིན་གྲལ་དུ་བཀོད། །ཅེས་གསུངས་སོ། །དོན་གྲུབ་དཀའ་ཐུབ་རིགས་ཅན་ལ། ཞེས་པ་ནི་ཐུན་མོང་དང་ཐུན་མོང་མ་ཡིན་པ་ལ་སྦྱར་ཏེ། ཐུན་མོང་བ་ལ་སྦྱར་ན། དོན་གྲུབ་ཉིད་ཀྱིས་རི་རབ་ཀྱི་རྩེ་ལ། །ཆོས་ཀྱི་འཁོར་ལོར་བསྐོར་ཏེ། ལོངས་སྐུར་སངས་རྒྱས་ནས་གཞན་དོན་དུ་འཚང་རྒྱ་བ་བསྟན་པའི་ཕྱིར་རོ། །ལུས་དཀའ་ཐུབ་ཀྱི་ཁོག་པར་ཞུགས་ནས། གྲོང་ཁྱེར་དུ་བྱོན་ཏེ་ཚོང་དཔོན་གྱི་བུ་མོ་ཤེས་དཀར་བཟའ་གང་མོ་མཚོས་བ་ལྔ་བརྒྱའི་འོ་མ་བརྒྱ་ལ་བླུད། བརྒྱའི་འོ་མ་བཅུ་ལ་བླུད། །བཅུའི་འོ་མ་གཅིག་ལ་བླུད། །གཅིག་གི་འོ་མ་འོ་ཐུག་བྱས་ནས་དྲངས་པས་སྐུ་གསེར་གྱི་གཏན་པ་ཕྱིས་པ་ལྟར་དུ་གྱུར་ཏོ། །དེ་ནི་འཁོར་ཐུན་མོང་པའི་ངོ་བོ་སྣང་བ་ཙམ་ཡིན་ཏེ། ཐུན་མོང་མ་ཡིན་པའི་དབང་དུ་བྱས་ན་གཞུང་གི་འབྲུ་བཞིན་དུ་སྦྱར་ཏེ། སྲོད་ནི་རྣམ་རྟོག་ནུབ་པའི་དུས་ཡིན་ལ། ཐོ་རངས་ནི་ཡེ་ཤེས་ཤར་བའི་དུས་ཡིན་ཏེ། མདོར་ན་འོ་ཐུག་འཐུངས་པ་དེའི་ཚེ་ཕྱོགས་བཅུ་རྒྱལ་བ་འདུས་ཏེ། ཡབ་ཡུམ་རོལ་པའི་བྱང་ཆུབ་སེམས་ཀྱི་ཐེག་ལེ་ཉི་ཟླ་གསང་བའི་དབང་བྱིན་པ་ཡིན་ནོ། །ལམ་གྱི་རྩོལ་བས་དམ་པ་རྣམས། །ཞེས་པ་འབྲས་བུ་ལ་བཟང་ངན་འོང་བ་ཇི་ལྟར་ཡིན་ཞེ་ན། གོང་དུ་ལྟ་བའི་སྒྲིབ་པས་ཕྱེ་བ་ཡིན་ཟེར་བས། །ལྟ་བའི་ཆེད་འཛིན་གྱི་སྒྲིབ་པ་ཡོད་མེད་ཀྱིས་འབྲས་བུ་ལ་ཁྱད་བྱུང་བ་ཡིན་ནོ། །འོ་ན་ལྟ་བའི་སྒྲིབ་པ་ཡོད་པའི་ཕྱིར་འབྲས་བུ་རང་གྲོལ་དུ་འགྲོ་ངེས་ཤེ་ན། ལམ་གྱི་སྩོལ་བས་ངལ་བ་རྣམས། །བྲོད་པ་བསྐྱེད་ཕྱིར་ཞེས་པ་སྟེ། །འདིར་མ་ཧཱ་ཡོ་གའི་སྐལ་བ་དང་མི་ལྡན་པ་རྣམས། ལམ་སྟེགས་ཀྱི་ཐེག་པ་གཞན་ལ་བློ་སྦྱོང་བའི་ཕྱིར་མ་ཧཱ་ཡོ་ག་བསྟན་ལ། དེ་རྣམས་ཀྱིས་དངོས་སུ་མཐར་ཐུག་གི་འབྲས་བུ་མི་ཐོབ་ཀྱང་གཞན་དག་གཞུགས་པ་འམ། བྲོད་པ་བསྐྱེད་པའི་ཕྱིར་འབྲས་བུ་གནས་སྐབས་ཐོབ་པར་སྨོས་པ་ཡིན་ནོ། །ཇི་ལྟར་སྨོས་ན། རྒྱུའི་ཐེག་པ་ལ་བཅུ་གཅིག་ཀུན་ཏུ་འོད་དུ་བསྟན། །ཀྲི་ཡ་བ་ལ་རིག་གསུམ་རྡོ་རྗེ་འཛིན་དུ་བསྟན། །ཡོ་ག་བ་ལ་སྟུག་པོ་བཀོད་པར་བསྟན་ནོ། །འོ་ན་འབྲས་བུ་དེ་ཉིད་དངོས་གནས་གང་ཡིན་ཞེ་ན། །མཐར་ཐུག་ས་གསུམ་ཆ་ལ་ལ་བརྗོད། ཅེས་པ་སྟེ་མཐར་ཐུག་མ་ཧཱ་ཡོ་གའི་འབྲས་བུ་ལ་ས་གསུམ་དུ་བརྗོད་དོ། །འོ་ན་ས་ཞེས་བྱ་བ་སྦྱངས་བྱ་སྤོང་བ་དང་། །དེ་སྤོང་བའི་གཉེན་པོ་རེ་རེ་སྐྱེ་བ་མིན་ནམ། །ཡིན་ན་འདིར་སྤང་བྱ་གང་སྤོང་ཞེ་ན། དེ་ལྟར་མ་ཡིན་ཏེ་ས་ལ་བཏགས་པ་དང་མཚན་ཉིད་པ་གཉིས་ཡོད་དེ། ས་བཅུ་མན་ཆད་ས་མཚན་ཉིད་པ་ཡིན་ཏེ། སྤང་བྱ་སྤང་བ་དང་གཉེན་པོ་སྐྱེ་བའི་ས་ཡིན་ལ། འདིར་བཏགས་པ་བ་ཡིན་ཏེ། ཆ་ལ་བརྗོད་ཟེར་བས། སྐུ་གསུམ་གྱི་ཆ་ལ་ས་གསུམ་དུ་བརྗོད་དེ། །ལོངས་སྐུ་ལ་ནི་པདྨ་སྤྱན་དུ་བརྗོད། །སྤྲུལ་སྐུ་ལ་ནི་ཡི་གེ་འཁོར་ལོ་ཚོགས་ཆེན་གྱི་སར་བརྗོད། ཆོས་སྐུ་ལ་ནི་ཡེ་ཤེས་བླ་མའི་སར་བཏགས་པ་ཡིན་ཏེ། །སྐུ་གསུམ་གྱི་ཆ་ལས་ས་གསུམ་དུ་མིང་བཏགས་ཡིན་ནོ། །གཅིག་པར་སྨྲ་བ་མུན་སྤྲུལ་ལོ། །ཞེས་པ་ནི་སྤྱིར་ཐེག་པ་འོག་མ་བ་ཀུན་ལ་ཡང་རང་སའི་འབྲས་བུ་ཐོབ་པ་ཙམ་ཡོད། ལ་ལས། འདིར་མཐར་ཐུག་གི་འབྲས་བུ་དང་ཁྱད་པར་ཆེ་ལ། གཞན་དག་མཐར་ཐུག་གི་འབྲས་བུ་ལ་ཁྱད་མེད་ཅེས་སྨྲ་བ་ནི་དོན་མི་ཤེས་པས་མུན་པའི་བློ་ཅན་ནོ། །གཙུག་རྒྱལ་སྒེག་མོ་འཇལ་སྐྱེལ་དང་། ཞེས་པ་ནི་ཚུལ་འཆོས་ཀྱི་དཔེ་བཞི་ཡིན་ཏེ། རྒྱ་གར་གྱི་ཡུལ་ན་རྒྱལ་བུ་ཏིག་འབེབས་ཞེས་བྱ་བ་གད་མོ་བགད་པས་མུ་ཏིག་སྐྱུག་པ་ཞིག་ཡོད་པ་ལ། རྒྱལ་པོ་སྟོབས་བཟང་ཞེས་བྱ་བས་མུ་ཏིག་འདོད་པའི་ཆེད་དུ་རྒྱལ་བུ་བོས་ནས། སྣང་གཡེལ་ཆེ་ས་གཅིག་ཏུ་བཞག་པས་རྒྱལ་བུས་བལྟས་པས། གཙུག་རྒྱལ་སྒེག་མོ་ཞེས་བྱ་བ་རྒྱལ་པོའི་བཙུན་མོ་གཅིག་འཁོར་གྱིས་མེ་ཏོག་བོར་ཙམ་ན་ཨ་ར་ར་ཞེས་ཟེར་ཞིང་ངུ་ལ། ཕགས་སུ་མོན་པ་དང་དུས་བཏབ་པ་ཆགས་པས་བཤེས་པོ་སྙིང་ན་ནས་དབྱུགས་པ་བརྒྱབས་པས་སླར་ཧེ་ཧེ་ཞེས་བགད་པ་མཐོང་སྟེ། རྒྱལ་བུ་ཡི་མུག་གདོང་འཇག་སྐྱེལ་ནི། རྒྱལ་པོའི་མཆོད་གནས་དགེ་སློང་གཅིག་མེ་སློང་བའི་ཆོས་གོས་ལ་སྦུར་མ་འབྱར་བ་ང་མ་བྱིན་བླངས་པ་སྤངས་པ་ཡིན་ཟེར་ནས་སླར་སྐྱེལ། མི་མེད་ཙ་ན་ཕགས་སུ་ཐོབ་ཚད་རྐུ་བ་མཐོང་ནས་རྒྱལ་བུ་ཡི་མུག །ནགས་བྱ་ནི། རྒྱལ་པོའི་ནེ་ཚོ་གཅིག་ང་སྲོག་གཅོད་སྤངས་པ་ཡིན་ཟེར་ནས་ཆུ་གཤོག་པས་བཙགས་ནས་འཐུང་ཞིང་ཕགས་སུ་འབུ་སྲིན་ཟ་བ་མཐོང་ནས་རྒྱལ་བུ་ཡིད་མུག་གོ །ལྐོག་གཡེམ་ནི། རྒྱལ་བུ་ཀུ་མ་ར་ཞེས་བྱ་བའི་ཨ་མས་བུ་ལ་ནུ་མ་ལུད་ཙ་ན་གོས་ལ་བུག་པ་ཕུག་ནས་ལུད་དེ། ང་ཁྱོད་བདག་དང་རེག་པ་བསྲུང་བ་ཡིན་ཟེར་ནས་སྤག་ཏུ་ཁྱོ་ག་དང་གཡེམ་པའི་སྤྱོད་པ་མཐོང་ནས་རྒྱལ་བུ་ཡི་མུག་གོ །རྒྱལ་པོའི་ཞལ་ནས་ཁྱོད་ལ་རྒོད་བྲོ་བ་མ་བྱུང་ངམ་ཟེར་བ་ལ། མ་བྱུང་ཟེར་རོ། །རྫུན་མིན་ནམ་ཟེར་བ་ལ་ཚིགས་བཅད་བྱས་པ། བཙུན་མོ་མེ་ཏོག་ཕོགས་བཤུམ་དང་། །ཀུ་མཱ་ར་ཡི་ཨ་མ་དང་། །ནགས་བྱ་ཁ་ནས་གཤོག་ཐོགས་དང་། །དགེ་སློང་མེ་ལེན་སྤུར་སྐྱེ་བཞི། །མུ་ཏིག་འབེབས་ལས་མ་གཏོགས་པ། །བདེན་པར་སྨྲ་བ་ངས་མ་མཐོང་། །ཧ་ཧ་ཧེ་ཧེ་རྒོད་རེ་བྲོ། ཟེར་ནས་བགད་པས་མུ་ཏིག་ཁྱོད་གང་ཙམ་སྐྱུག་གོ །དེ་ལྟར་ཚུལ་འཆོས་པ་ནི་གསང་བསྔགས་ཀྱི་སྣོད་མ་ཡིན་ནོ། །ལམ་མཆོག་གསལ་བའི་སྒྲོན་མེ་ལས། །ལེའུ་དགུ་པའི་རྣམ་པར་འགྲེལ་བའོ། །རྒྱལ་བུའི་དགོངས་པ་རྣམ་དག་རྒྱ་ཆེ་བས། །ཉི་ཟླའི་ཚུལ་བཞིན་སྔོན་གྱི་མཁས་པས་ལེགས་བཀྲོལ་ཏེ། །བདག་བློ་སྲིན་པོའི་མེ་ཡིས་གསལ་བར་མི་ནུས་ཏེ། །རྗེས་འཇུག་གུས་པས་གསོལ་འདེབས་དོན་ཕྱིར་ལེགས་པར་སྦྱར། །འདི་ལས་གང་བྱུང་དགེ་བ་དེ་ཡིས་འགྲོ་བ་ཀུན། །ཐབས་དང་གྲོལ་བའི་ལམ་མཆོག་འདི་ལ་རབ་འབད་དེ། །འདི་འམ་ཕྱི་མ་བར་དོར་བདེ་ཐོབ་ནས། །རང་གཞན་དོན་རྣམས་ཕུན་སུམ་ཚོགས་པར་ཤོག །ཇི་ལྟར་སྔོན་གྱི་བདེ་གཤེགས་ཤུལ་ལམ་ཆེན་པོ་དང་། ལུང་དང་མན་ངག་རིགས་པ་དག་དང་རབ་སྦྱར་ནས། རོག་གི་བན་དེ་ཤེས་རོག་བདེ་གཤེགས་ཆེན་པོ་རབ་འོད་ཀྱིས་ལེགས་པར་བྲིས། །ནོངས་པར་གྱུར་ན་ཐུགས་རྗེ་ཅན་གྱིས་བཟོད་པར་བཞེས། །རྣལ་འབྱོར་ཆེན་པོའི་རྒྱུད་སྒྱུ་འཕྲུལ་དྲྭ་བའི་མན་ངག་དཔལ་ལམ་གྱི་རིམ་པ་ཞེས་བྱ་བའི་དཀའ་བ་རྣམ་པར་འགྲེལ་བ། ལམ་མཆོག་གསལ་བའི་སྒྲོན་མེ་ཞེས་བྱ་བ། བློ་གྲོས་ཀྱི་མེ་ལོང་ལ་ལེགས་པར་ཕྱར་བའི་དོན་རྫོགས་སོ།། །།
| 