རིམ་གསུམ་འགྲེལ་པ།
རིམ་གསུམ་འགྲེལ་པ་བཞུགས་སོ། །དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་སྒྱུ་འཕྲུལ་དོན་ལས་ནི། །རིམ་གསུམ་རྣམ་པར་བསྡུས་པ་ཡི། །དོན་དམིགས་མཚོན་དམིགས་སྐར་ཁུང་ལྟར། །ཚིག་ཉུང་རྒྱ་ཆའི་དོན་བཤད་པ། །གསལ་བར་བདག་གིས་རྟོགས་ཚད་ཀྱིས། །ཚིག་དོན་ཡན་ལག་བསྡུས་པ་དང་། །རྟོགས་པའི་དོན་དུ་ནུས་ཚད་ཀྱིས། །མ་འོངས་དོན་དུ་བཤད་པར་བྱ། །དཔལ་ལྡན་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་པ་ནི་སློབ་དཔོན་བི་མ་ལས་བདག་གཞན་གཉིས་ཀྱི་ཕྱིར། ཐུགས་དམ་གྱི་ལྷ་ལ་རྟོགས་པས་རྡོ་རྗེ་སེམས་དཔའ་དང་འཇལ་ཏེ་དཔེར་ན་ཆུའི་ནང་དུ་ཆུ་བླུགས་པ་བཞིན་ནོ། །གཞི་ལམ་འབྲས་བུར་བཅས་པའི་ཆོས། །ཞེས་པ་གཞི་ཆོས་ཐམས་ཅད་ཀྱི་དེ་བཞིན་ཉིད་མཐའ་ཐམས་ཅད་དང་བྲལ་ཏེ་བཞུགས་པའི་དོན། ལམ་རྣམ་པ་གཉིས་ཀྱིས་ཉམས་སུ་བླངས་ནས་ཐོབ་པར་བྱེད་པའི་ཕྱིར་རོ། །སངས་རྒྱས་ཀྱི་སྐུ་དང་ཡེ་ཤེས་ནི་དཔེར་ན་སོ་ནམ་གྱི་སྟོན་ཐོག་དང་འདྲ་སྟེ། འབྲས་བུའོ། །དེ་ནས་ཆོས་གསུམ་པོའི་དོན་དྲི་བ་དང་། ཡིད་ཆེས་པའི་ལན་དང་། སོ་སོ་བསྒྲུབ་པའི་ཕྱིར་དམ་བཅའ་བ་དང་། དོན་གྱི་དངོས་པོ་ཤེས་པར་བྱ་བའི་ཕྱིར། གཏན་ཚིགས་ཀྱི་དོན་མཐར་དབྱུང་བར་བྱ་བ་དང་། ངེས་པའི་ལུང་དང་ཐོག་ཏུ་ཕེབས་པའི་ལན་དང་། རང་གི་རིག་པའི་སྒོ་རྟོགས་པར་བྱ་བའི་ཕྱིར་གུ་རུའི་བཤད་པར་ཞལ་གྱིས་བཞེས་པའི་ཕྱིར། དྲིས་ལན་དམ་བཅའ་མཐར་དབྱུང་བ། །ལུང་དང་མན་ངག་རིགས་སྒོ་ནས། །རྟོགས་པར་བྱ་ཕྱིར་རྣམ་བཤད་བྱ། །ཞེས་སྨོས་པ་ཡིན་ནོ། །དང་པོ་རྣམ་པ་གཉིས་བསྟན་ཏེ། ཞེས་པ་ཆོས་ཀྱི་གཞི་དང་ལམ་དང་འབྲས་བུ་གསུམ་གྱི་གྲངས་ཀྱི་དང་པོ་ལ། དབྱེ་ན་རྣམ་པ་གཉིས་སུ་བསྟན་ཏེ། ངོ་བོའི་གཞི་དང་བརྟག་པའི་གཞི་གཉིས་ནི། དང་པོ་ངོ་བོའི་གཞི་བསྟན་ཏེ། དེ་ལ་གཞིའི་རང་གི་ངོ་བོ་ནི་གཉིས་སུ་མེད་པའི་བྱང་ཆུབ་སེམས་ཏེ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སེམས་ཉིད་ཀྱི་ངོ་བོར་བསྟན་པ་ནི་གསེར་གྱི་དཔེ་བཞིན་ཏེ་ཐ་སྙད་གཞན་ཡོངས་སུ་བཅད་པའོ། །མཚན་ཉིད་ཞེས་པ་གཉིས་སུ་མེད་པའི་ངོ་བོ་བས། སྣང་བ་ཐམས་ཅད་སངས་ནས་གོ་མི་འགོག་པ་བཞིན་དེ་ཉིད་དེ་བཞིན་ཉིད་ཀྱིས་རྒྱས་བཏབ་པས་ངོ་བོ་མི་འགྱུར་ཏེ་ཡོད་མེད་པས་གྲོལ་བའོ། །ངེས་ཚིག་དཔེ་རྣམས་བཤད་པ་ནི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ངོ་བོ་དེ་བཞིན་ཉིད་ཡིན་བཞིན་གཉིས་སུ་སྣང་བའི་གོ་མི་འགོག་པ་ཐམས་ཅད་གཞིའོ། །རྒྱུད་ལས། མ་བཅོས་རྒྱུན་གྱི་སྐད་ཅིག་མ། །དེ་ཡིས་མ་བྱས་གང་ཡང་མེད། །ཅེས་འབྱུང་ངོ་། །དེ་ཉིན་མཚོན་པའི་དཔེ་ནི་ཐམས་ཅད་སེམས་ཉིད་ཀྱི་ཕྱིར་ཕྱོགས་མེད་ན། རེ་ཞིག་ཉེ་བར་ཕྱོགས་མཐུན་པར་ནམ་མཁའ་དང་རྒྱ་མཚོ་དང་རིན་པོ་ཆེ་ལ་སོགས་པ་སྟེ། དེ་དག་ཆོས་དུ་དང་ལྡན་པས་དཔེར་བཟུང་བར་བྱའོ། །སྣང་ཚུལ་གཉེར་གྱིས་རྟོགས་པར་བྱ་བ་ནི་སྣང་བ་ཇི་བཞིན་པ་ཉིད་ལས་སྣང་བ་གང་ཡང་མི་འགོག་པས་སྣང་བ་ནི་དཔག་བསམ་ཤིང་བཞིན་ནོ། །དེ་ལྟ་བུའི་དོན་རྟོགས་པར་བྱ་བ་ནི་འཁོར་བ་དང་མྱ་ངན་ལས་འདས་པ་ཐ་དད་སྐྱོན་གཉིས་འབྱུང་བའི་ཕྱིར་སོ་སོ་མ་ཡིན་པར་རྒྱུད་ལས་གསུང་སྟེ། སོ་སོ་རང་བཞིན་ཉེས་ཞེ་ན། ཡང་དག་ལམ་གྱིས་བཅོས་སུ་མེད། །ཅེས་པ་དང་། ཉོན་མོངས་སྤང་ཞིང་བྱང་བསྒྲུབ་མེད། །ཅེས་འབྱུང་བ་ལྟ་བུའོ། །རྟགས་གཞི་གཉིས་སུ་བསྟན་པའི་ཆོས། །ཞེས་པ་ནི། འཁོར་བ་དང་མྱ་ངན་ལས་འདས་པའོ། །དེ་ནི་ལམ་པས་བཏགས་པས་གཞིའི་ཕྱིར་རོ། །འཁོར་བའི་མཚན་ཉིད་ཤེས་པར་བྱ་བའི་ཕྱིར། འཁོར་བའི་རྒྱུ་རྐྱེན་ངོ་བོ་དང་། ཞེས་པའི་ཚིག་རྣམས་སྨོས་ཏེ། དེ་ལ་འཁོར་བའི་རྒྱུ་ནི་གཞི་སྟེ། བརྒྱུད་པའི་དང་། མཚུངས་ལྡན་གྱི་རྒྱུ་དང་། ཉེ་བར་ལེན་པའི་རྒྱུའོ། །དེ་དག་ནི་བསྐྱེད་པ་དང་སྨིན་པའི་ཆོས་བཞིར་རྒྱུའོ། །རྐྱེན་ནི་ལས་དང་ཉོན་མོངས་པ་སྟེ། བསོད་ནམས་ཀྱི་ལས་དགེ་བ་བཅུ་ལ་སོགས་དང་། བསོད་ནམས་མ་ཡིན་པའི་ལས་མི་དགེ་བ་བཅུ་ལ་སོགས་པ་འདོད་པ་ཡིན་ནོ། །མི་གཡོ་བའི་ལས་འཇིག་རྟེན་པའི་བསམ་གཏན་དང་། སྙོམས་པར་འཇུག་པ་རྣམས་ནི་གཟུགས་དང་གཟུགས་མེད་པའོ། །ཉོན་མོངས་པ་ནི་འཕྲལ་དུ་ཡུལ་གྱིས་སླད་པ་ལྔ་དང་གསུམ་པོ་རྣམས་སོ། །ཅིའི་ཕྱིར་ནི། བག་ཆགས་སྨིན་ཅིང་སད་པར་བྱེད་པའི་སྟོངས་རྐྱེན་གྱི་ཕྱིར་རོ། །ངོ་བོ་ནི་སྣོད་འབྱུང་བ་ལྔས་བསྡུས་པ་དང་། བཅུད་འགྲོ་བ་ལྔར་འཁྲུལ་པ་ལ་སྣང་བ་རྣམས་སོ། །དཔེ་ནི་གཉིས་དེ་འཁོར་བའི་དཔེ་ཟོ་ཆུའམ་ཤིང་རྟའི་འཁོར་ལོ་འདྲའོ། །མཆེད་པ་རྩ་སོགས་མེ་འདྲའོ། །མཚན་ཉིད་ནི་སྐྱེ་བ་དང་། རྒས་པ་དང་། ན་བ་དང་། འཆི་བ་དང་བཅས་སྐྱེ་འཇིག་ཅན་ནོ། །བྱེད་པ་པོ་ནི་སྐད་ཅིག་མའི་རྒྱུན་ཏེ། དེ་བརྟགས་པའི་རྟོག་པ་རྣམས་དང་ལྡན་པས་སྣང་བ་ནི་བྱེད་པ་པོ་སྟེ་ལས་ཀྱིས་སོ། །ཚུལ་ཇི་ལྟར་འཁོར་ཞེ་ན། འདོད་ཁམས་རྣམས་རྟེན་འབྲེལ་བཅུ་གཉིས་སུའོ། །གཟུགས་དང་གཟུགས་མེད་པ་ནི་དངོས་པོ་དྲུག་དང་གསུམ་གྱིས་འཁོར་ཞེས་ཀྱང་འབྱུང་། ཆ་ཕྲ་བཅུ་གཉིས་ཀྱིས་སོ། །སྣོད་བཅུད་གཉིས་ཀྱིས་སོ། །རྒྱུད་ལས། ཕྱི་ནང་རྟེན་འབྲེལ་གཉིས་སུ་འཁོར། །ཞེས་འབྱུང་ངོ་། །གཉིས་པ་ནི་འཕགས་པའི་ལམ་དང་བྲལ་བ་དང་སྡུག་བསྔལ་མྱོང་བའོ། །འཁོར་བའི་དུས་ནི་ཐོག་མ་ཐ་མ་མེད་པའི་དུས་ནས་སོ། །དོན་དགུ་ཡིས་འཁོར་བའི་མཚན་ཉིད་ངེས་པར་བརྟག་པར་བྱ་བའི་ཕྱིར། བཅོམ་ལྡན་ཉིད་ཀྱི་བཀའ་ལས་ཀྱང་བཤད་དོ། །མྱ་ངན་ལས་འདས་པའི་ཞེས་པའི་ཚིག་རྣམས་ནི། བརྟགས་ན་ངོ་བོ་མ་གྲུབ་ལ་བསམས་ན་ཐམས་ཅད་འབྱུང་བས་མཐའ་རྣམས་དང་བྲལ་བའོ། །ངེས་ཚིག་ནི་སྐྱེ་རྒ་ན་འཆིའི་མྱ་ངན་ལས་བྲལ་བའི་ཕྱིར་ཏེ། མདོར་སྡུག་བསྔལ་གྱི་གདུང་བ་མེད་པའོ། །རྣམ་གྲངས་ནི་གཉིས་ཏེ། ཕྱོགས་གཅིག་པའི་མྱ་ངན་ལས་འདས་པ་སྟེ་ཐེག་པ་ཆུང་བ་དང་། མི་འདས་པའི་མྱ་ངན་ལས་འདས་པ་སྟེ་ཐེག་པ་ཆེན་པོའི་འབྲས་བུའོ། །གང་ལ་སྣང་བ་ནི་གཉིས་ཏེ། སྤྲུལ་པར་སྣང་བ་དང་། ངོ་བོ་སྣང་བའོ། །སྤྲུལ་པ་གང་ལ་སྣང་ན། གདུལ་བྱ་ལྟོས་ས་འཁྲུལ་པ་བ་ལ་སྣང་བའོ། །ངོ་བོ་ཉིད་ལྷུན་གྱིས་གྲུབ་པའི་རིག་འཛིན་དང་། དེ་བཞིན་གཤེགས་པ་ཉིད་ལ་སྣང་ངོ་། །དེ་མཚོན་པའི་དཔེ་ནི། ཆུ་བོ་ཆེན་པོ་བརྒལ་བའམ། བཙོན་ར་ནས་ཐར་པ་དང་འདྲའོ། །མ་གྲུབ་པའི་ཚུལ་ནི་འཁྲུལ་བ་ལ་སྣང་བ་རྣམས་ནི་མི་བདེན་པའི་ཕྱིར་ཏེ། རྒྱུད་ལས། ཡེ་ཤེས་རོལ་པ་ཉིད་དང་སོག །རྒྱལ་བ་མངོན་བྱང་སྐྱོབ་པ་དང་། བྱིན་བརླབས་སྟོན་པའང་དེ་བཞིན་དེ། ཞེས་འབྱུང་བ་ལྟ་བུའོ། །དེ་དག་ནི་ཤེས་བྱེད་ཀྱིས་ཤེས་པར་བྱ་བ་ཡིན་པས་ཤེས་པའི་མཚན་ཉིད་དུ་བསྡུའོ། གཉིས་པ་གཞི་སྒྲུབ་ཅིང་རྟོགས་པར་བྱ་བའི་ཕྱིར་ལམ་བསྟན་ཏེ། དབུ་མ་རྣམ་པ་ཞེས་པ་སྨོས་པ་ནི། གསུམ་གྱི་དབུ་མ་ལམ་ལ་གདུལ་བྱའི་བསམ་པས་གཉིས་སུ་བསྟན་པ། གྲོལ་བའི་ལམ་ཐོས་བསམ་ལ་བརྟེན་པ་དང་། ཐབས་ཀྱི་ལམ་གདམས་ངག་དང་དབང་ལ་བརྟེན་པའོ། །དབུ་མའི་དང་པོ་ཞེས་པའི་ཚིག་བཞིས་གྲངས་བསྟན་ཏེ། གོ་སླ་བའི་ཕྱིར་མ་བྲིས་སོ། །དེ་ལ་རྟོགས་པས་ཐག་བཅད་པ་མཐོང་ལམ་དང་། ཉམས་སུ་བླང་བ་སྒོམ་ལམ་མོ། །དེ་ལ་རྟོགས་པས་ཐག་བཅད་པ་ནི་འདི་ལྟ་སྟེ། རང་གི་ངོ་བོ་ལྷག་མཐོང་གི་ཤེས་རབ་སྟེ། རྒྱུ་ཤེས་རབ་ཉན་བསམས་ལས་བྱུང་བའི་སྐྱེ་ལུགས་དང་པོར་གཡོ་སྨིན་ལ་སོགས་པ་བཞི་སྟེ། སེམས་བཞི་དང་པོར་གཡོ་སྨིན་རྒྱུ་རྐྱེན་བཞིས་སོ་སོ་སྐྱེ་བོ་མ་རིག་པ་ལས་སེམས་རྩད་མེད་དང་འདྲ་བར་སྐྱེས་པའོ། །དེ་ལྟར་སྐྱེས་ནས་འཇུག་སྟེ། འཇུག་པའི་དུས་ན་གཞུང་མ་ནོར་བར་ཐོས་དགོས་ཏེ། ཐོས་པ་དམིག་ཕྱེ་བ་དང་འདྲ། དེ་ལ་བསམ་པས་རྟོགས་པ་ནི་དངོས་པོར་མཐོང་བ་དང་འདྲ་སྟེ། ཤེས་པའམ་འབྲེལ་བའོ། །དེའི་དོན་ལ་མཉམ་པར་བཞག་པས་གསལ་བར་སྒོམ་པ་སྟེ། ཤེས་རབ་རྣམ་གསུམ་པོ་དེའོ། ཚིག་དང་ཡི་གེ་ལ་བརྟེན་ནས་རྟོགས་པའི་ཕྱིར་རྐྱེན་ཏེ། རྒྱུད་ལས། ཐམས་ཅད་མ་ལུས་དོན་འབྱུང་བ། །ཚིག་གིས་མཚོན་ལས་གུད་ན་མེད། །ཅེས་བྱུང་ངོ་། །དེ་ཡང་ཐབས་ཀྱི་རྒྱུད་དང་། ཤེས་རབ་ཀྱི་རྒྱུད་དང་། མ་ནིང་གི་རྒྱུད་དང་གསུམ་ལ་བརྟེན་པའོ། །བསྒོམ་པས་ཉམས་སུ་བླང་བའི་རྣམ་གྲངས་ལ་གཉིས་སྟེ། མཚན་མར་བསྒོམ་པའི་རིམ་པ་དང་། དེ་བཞིན་ཉིད་དུ་བསྒོམ་པའི་ཞེས་པའི་ཚིག་གསུམ་ནི། དང་པོར་མཚན་མར་བསྒོམ་པ་ལ་མཐུན་པའི་དཔེ་དང་སྒོམ་པའི་རིམ་པ་མདོ་རྒྱས་པར་བསྟན་ཏེ། དགོས་ཆེད་དང་། ཉམས་དང་། རྟགས་སོ། །དེ་ལ་དཔེ་ནི་གཞལ་ཡས་ཁང་བསྐྱེད་པ་སྣོད་ཀྱི་འཇིག་རྟེན་ཆགས་པ་དང་འདྲ་ལ། ལྷ་བསྐྱེད་པ་ནི་བཅུད་ཀྱི་སེམས་ཅན་སྐྱེ་ཚུལ་དང་འདྲ་བར་བསྟན་པའོ། །དེ་ཡང་མངལ་དང་སྒོ་ང་དང་རྫུས་ནས་སྐྱེ་བའི་རྣམ་པ་ལྟ་བུའོ། །བསྒོམ་པའི་རིམ་པ་མདོར་བསྟན་པ་ནི། རྒྱུད་ལས། དངོས་གྲུབ་མྱུར་དུ་ཐོབ་འདོད་པས། །ཐམས་ཅད་མི་དམིགས་དབྱིངས་སུ་བསྒོམ། །ཏིང་འཛིན་དེ་ནི་གོམས་པ་དང་། །ཐམས་ཅད་སྒྱུ་མ་མིག་ཡོར་དང་། །སྤྲུལ་པའི་ཚུལ་དུ་ཤེས་པར་བྱ། །དེ་བཞིན་ཡང་དང་ཡང་གོམས་པས། །ཕྱི་ནང་སྣོད་བཅུད་ཧཱུཾ་དུ་བསྡུས། །ཞེས་འབྱུང་བའོ། །རྒྱས་པར་བསྟན་པ་ནི། དང་པོར་དེ་བཞིན་བསྒོམ་པ་དང་། དེ་ནས་ཀུན་ཏུ་སྣང་བསྒོམ་པ་དང་། དེ་ནས་རྒྱུའི་ཏིང་ངེ་འཛིན་བསྒོམ་པ་དང་། རྒྱུ་དེ་ལས་འབྱུང་བ་རིམ་བརྩེགས་ཀྱི་གཞལ་ཡས་ཁང་གདན་དང་བཅས་པ་བསྒོམ་པ་དང་། ལྷ་བསྐྱེད་ཚུལ་གཉིས་བསྐྱེད་པ་དང་། ཆོ་འཕྲུལ་དང་ལྡན་པར་བྱ་བ་དང་། སྙན་གསན་དབབ་པ་དང་། སྤྱན་དྲང་བ་དང་། མེ་ཏོག་དོར་བ་དང་། བསྟིམ་པ་དང་། བརྟན་པར་བྱ་བ་དང་། ཕྱག་བྱ་བ་དང་། དམ་བཅའ་བ་དང་། ཕྱག་རྒྱས་མཆོད་པ་དང་། ཀུན་ཏུ་བཟང་པོའི་མཆོད་སྤྲིན་དབུལ་བ་དང་། ཕྱག་དང་ཞབས་བསིལ་གསོལ་བ་དང་། ལྷ་མོ་བཞིས་སྣོལ་ནས་མར་མཆོད་པ་དང་། སྨན་གྱི་མཆོད་པ་དང་། དངོས་གྲུབ་བླང་བ་དང་། གཏོར་མ་འབུལ་བ་དང་། གསང་ནན་དབུལ་བ་དང་། ལྷག་པ་ཏིང་ངེ་འཛིན་གྱི་མཆོད་པ་དང་། སྦྱོར་སྒྲོལ་གྱི་མཆོད་པ་དང་། འདོད་ཡོན་གྱི་མཆོད་པ་དང་། གླུའི་མཆོད་པ་དང་། རོལ་མོའི་མཆོད་པ་དང་། སྨོན་ལམ་གདབ་པ་དང་། མཆོད་བཤགས་བྱ་བ་དང་། འདོད་དོན་གསོལ་བ་གདབ་པ་དང་། ཛབ྄་བྱ་བ་དང་། དངོས་གྲུབ་གསོལ་བ་དང་། དཀྱིལ་འཁོར་བསྡུ་བ་དང་། གོ་བགོ་ལུས་སྲུང་བྱ་བ་དང་། རྒྱུན་གྱི་ཏིང་ངེ་འཛིན་ལ་སོགས་པ་རྣམ་གྲངས་ཀྱི་དགོས་པ་དང་། དེ་དག་དངོས་སུ་བྱ་བའི་དགོས་པ་དང་། གནས་སྐབས་ཀྱི་ཏིང་ངེ་འཛིན་གསུམ་དུ་ཤེས་པར་བྱ་སྟེ་བསྒོམ་པའོ། །དགོས་ཆེད་ནི་ཐ་མལ་པའི་རྟོག་པ་བཟློག་པ་དང་། ཕྱག་རྒྱ་ཆེན་པོ་བསོད་ནམས་ཀྱི་ཚོགས་རྫོགས་པར་བྱའོ། །ཉམས་ནི་གསུམ་སྟེ། དཔེར་ན་ཆུ་དྲག་པོ་དལ་བ་མཚོ་གཏིང་ཆུའི་ཚུལ་གྱིས་སེམས་བརྟན་མི་བརྟན་གྱི་ཉམས་གསུང་ངོ་། །རྟགས་སྨིག་རྒྱུ་ལ་སོགས་པ་ལྔའོ། །དེ་ལྟར་བསྒོམ་པས་ལྷག་མཐོང་སྐྱེ་བར་ཡང་འགྱུར་རོ། །དེ་བཞིན་ཉིད་དུ་བསྒོམ་པ་ནི། རྟོགས་པས་ཐག་བཅད་པས་རྟོགས་པའི་དོན་ལ་བསྒོམ་པ་ཡང་། བློ་དབབ་པ་དང་། ངོ་བོ་དང་། བཅོས་པ་དང་། ཉམས་དང་། འབྲས་བུའོ། །དེ་ལ་བློ་དབབ་པ་ནི། མཐའ་ཐམས་ཅད་དང་བྲལ་བའི་དོན་ཉིད་ཀྱིས་རྟོགས་པ་ལ་མ་བཏང་མ་ཤོར་ཙམ་དུ་བཞག་གོ། །ངོ་བོ་བཏང་སྙོམས་ཆེན་པོ་རང་རང་གསལ་བའོ། །སེམས་བཅོས་པ་ནི་བར་དུ་གཅོད་པ་དང་སྐྱོན་སྒྲིབ་བྱུང་ན་དེ་ཉིད་སེམས་ཀྱི་ཡེ་ཤེས་སུ་རྟོགས་པས་འབྱུང་བ་མི་དགག །དེ་བཞིན་ཏུ་རྟོགས་པ་ལ་ཡང་བྲལ་བས་རང་བཞིན་ཏེ་ཆེད་དུ་བཅོས་པ་དང་བྲལ་བའོ། །ཉམས་སྔར་བཤད་པ་དང་མཐུན། འབྲས་བུ་ནི་རྣལ་འབྱོར་མངོན་སུམ་དུ་ལས་སུ་རུང་ན། མུན་པ་དང་མར་མེའི་ཚུལ་དུ་སྒྲིབ་པ་མ་སྤངས་དག་པས་ལྷུན་གྲུབ་རང་ལ་འཆར་ཏེ། རྒྱུད་ལས། མ་བཅོས་ཇི་བཞིན་རང་བཞག་ན། །ལྷུན་གྱིས་གྲུབ་པའི་དཀྱིལ་འཁོར་འབྱུང་། །ཞེས་པ་ལྟ་བུའོ། །དཔེ་ནི་ཁྲོན་པ་རྐོ་བ་ཆུའི་ཕྱིར་རྐོ་སྟེ། མཁར་ལན་གྱི་ཕྱིར་མི་རྐོ། ཆུ་ཐོན་ནས་མཁར་ལན་མི་དགོས། སྒྲོན་མེས་གསེར་འཚོལ་གསེར་རྙེད་ནས་སྒྲོན་མེ་མི་དགོས་ཏེ། དེ་བཞིན་ཏུ་ཚིག་ལ་བརྟེན་པའི་ཤེས་རབ་ཀྱིས་དོན་ཚོལ་ཏེ། དོན་རྟོགས་ནས་ཚིག་བསླབ་མི་དགོས་ཏེ། དོན་ལ་འདྲིས་གོམས་སུ་བྱའོ། །ཐུན་མོང་ལམ་ལྔར་བསླབ་པ་དང་། ཞེས་པ། ཚོགས་ལམ། སྒོམ་ལམ། མཐར་ཕྱིན་པའི་ལམ་ལྔ་སྟེ། ཐུན་མོང་རྒྱུའི་ཐེག་པའི་ལམ་སྟེ། དེ་དག་ལ་བསླབ་པ་ཡང་ལམ་སྟེ། དེ་དག་ལ་བསླབ་པ་ཡང་ལམ་ཐེག་པ་ཆེན་པོའི་ལམ་ཉིད་མ་ཡིན་ནོ། །དེ་དག་སྨོས་པ་ནི་གོང་ལས་དང་སྔགས་ཀྱི་ཆེ་བ་བསྐྱེད་པའི་ཕྱིར་རོ། །ཁྱད་པར་སོ་སོ་ཞེས་པ་དང་པོར་སྟོང་པའི་རྣལ་འབྱོར་ལ་གོམས་པར་བསླབ། དེ་ནས་སྙིང་རྗེའི་རྣལ་འབྱོར་ལ་གོམས་པར་བསླབ། དེ་ནས་ཕྲ་རབས་ལ་བསླབ་སྟེ། འཇུག་གྲངས་མེད་པ་གོམས་པར་བྱ་བ་ལ་སོགས་པ། སློབ་དཔོན་གཞུང་ལུགས་ཇི་ལྟ་བའི་ལམ་མ་ནོར་བ་བསླབ་པའོ། །སྔོན་དུ་གོམས་པར་ཞེས་པ་ལམ་གནས་སྐབས་གང་ལ་ཡང་ལམ་སྔ་མ་ཤིན་ཏུ་གོམས་པར་བརྟན་པ་དང་། གཟོད་ལམ་གཏིང་མའི་ཏིང་འཛིན་ཐོབ་པར་འགྱུར་བ་ནི་དགོས་ཆེད་དུ། ཐུན་མོང་ཁྱད་པར་ཅེས་པ་ལ་སོགས་པ། ཐུན་མོང་གི་ལམ་ལྔ་ཁྱད་པར་གྱི་ལམ་ལྔ་དང་བཞི་ལ་སོགས་གོམས་པའི་དུས་ན་གནས་སྐབས་གང་གི་བསྒོམ་པ་བྱིང་རྒོད་དང་བྲལ་བར་གསལ་བའི་དུས་ན། ཕྱི་ནང་གི་དྲོད་གསུམ་མམ། བཤད་པའི་ཉམས་གསུམ་ལས་ཉམས་ཐ་མ་དང་ལྡན་ཏེ། ཤིན་ཏུ་གོམས་བྱ་གསལ་བའི་སྟོབས་སུ་གྱུར་པ་ནི་ལམ་མཐར་ཕྱིན་པའོ། །དེ་དག་ལས་སུ་རུང་བར་བྱ་བའི་ཕྱིར། རྗེས་སུ་མཐུན་པའི་སྤྱོད་པ་བཞིའམ་གསུམ་གོམས་པར་བྱ་བའི་ཕྱིར། ཏིང་འཛིན་ཁྱད་པར་གྱུར་བའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱད། །ཅེས་གསུངས་སོ། །དབུ་མ་གཉིས་པ་བསྟན་པ་ནི། ཞེས་པ། གྲངས་དབུ་མ་ལ་གཉིས་ཀྱི་ཐ་མ་ཐབས་ཀྱི་ལམ། དེ་ལ་རྣམ་གྲངས་དབྱེ་བ་གཉིས། གདམས་ངག་གི་ལམ་དང་། ཐབས་དབང་ལམ་གཉིས་སོ། །དེ་ཉིད་ཀྱི་སྒོ་ནས་ཆོས་ཉིད་རྟོགས་པའི་ཚུལ་ནི་རྒྱུ་དང་རྐྱེན་གདམས་ངག་གི་སྐབས་སུ་ནི། རང་གིས་རྟོགས་པའི་ཤེས་རབ་དང་། སྔ་མའི་ལས་བརྒྱུད་མན་ངག་ཟབ་མོ་དང་། བླ་མའི་བྱིན་བརླབས་རྐྱེན་ནོ། །རང་ལ་ཡོད་པའི་མན་ངག་གི་རྐྱེན་གྱིས་བསླང་བས་ཆེད་དུ་མ་བརྩལ་བར་དུས་ཉེ་བར་དོན་བློ་ལ་སྣང་བར་འགྱུར་རོ། །ཐབས་ཀྱི་སྐབས་སུ་རྒྱུ་རྐྱེན་ལྔ་དང་ལྡན་པས་སོ། །དཔེར་ན་གསེར་འགྱུར་གྱི་རྩིས་ལྕགས་ཟངས་ཉིད་གསེར་དུ་བྱེད་པ་དང་འདྲ་སྟེ། གདམས་ངག་གི་བྱིན་གྱིས་བརླབས་ཀྱིས། བྱུང་ཚོར་གྱི་རྟོག་པ་འགགས་ནས་རྣམ་རྟོག་ཡེ་ཤེས་སུ་འགྱུར་བའི་ཕྱིར། རྣམ་གྲངས་གདམས་ངག་ཐབས་ཉིད་དང་། ཞེས་གསུངས་སོ། །གདམས་ངག་སྟེང་དང་འོག་གི་སྒོ། །ཐིག་ལེ་རྐྱང་བར་བཅས་པ་ཡི། །ཞེས་པ་གཞི་བླ་མའི་ཞལ་ནས་ཤེས་པར་བྱའོ། །ཐབས་ཀྱི་རྒྱུ་རྐྱེན་ངོ་བོ་དང་། །ཞེས་པ་གསུམ་གྱི་གྲངས་བསྟན། སྤྱིར་དབང་ཐམས་ཅད་ལ་རྒྱུ་རྐྱེན་བཞི་བཞི་ལས། སྐབས་འདིར་ཟབ་མོ་དབང་གི་དོན་གཅིག་པུ་ལ་ལྔ་སྟེ། བླ་མ་དབང་རིམ་པར་ཐོབ་པའི་བྱིན་བརླབས་དང་། རླུང་ལས་སའི་རླུང་རྒྱུ་བའི་དུས་དང་། སྦྱོར་ཐབས་འཕྲེད་བཙུམ་ལ་སོགས་པ་བྱེད་པ་སྡོམ་པའི་མན་ངག་དང་། ཚེ་སྔ་མར་སྦྱངས་པའི་བསོད་ནམས་དང་། གཟུངས་མཚན་ཚང་བའི་ཡོན་ཏན་ལྔས་རང་བཞིན་ལྷན་ཅིག་སྐྱེས་པ་བདག་ལ་གནས་པ་དེ་ཉིད་མན་ངག་གིས་ཉམས་སུ་མྱོང་བ་ནི་དངོས་པོ་ལྷན་ཅིག་སྐྱེས་པའོ། །གདམས་ངག་གིས་རང་བྱུང་གི་ཡེ་ཤེས་ཐོབ་པ་ནི་ཐབས་ཀྱི་མན་ངག་ཅེས་བྱའོ། །དེ་ཅིའི་ཕྱིར་ཞེ་ན། ཁྱད་པར་རྒྱུ་རྐྱེན་ལྔར་བཤད་ཏེ། །ཞེས་པའི་ཚིག་དྲུག་བརྗོད་པ་ཡིན་ནོ། །ཐབས་ཀྱི་ངོ་བོ་ལྔ་སྟེ། ནུས་པའི་དབང་ལྔ། ཕན་པའི་དབང་བཅུ། གསང་དབང་། ཤེས་རབ་ཡེ་ཤེས་དང་། བདེ་བ་ཆེན་པོའི་དབང་དང་ལྔ་སྟེ། དེ་དག་ལ་ཡང་བསྐུར་བའི་གནས། བསྐུར་བའི་ཐབས། རྒྱུ་རྐྱེན་དང་། རང་གི་ངོ་བོ་དང་། ངེས་ཚིག་དང་། ཐོབ་པའི་ཚད་དང་། སྒྲིབ་པ་གང་འདག་པ་དང་། བསྐུར་བའི་དགོས་ཆེད་དང་། སྣོད་གང་ལ་བསྐུར་བ་དང་། ཆོས་གང་མན་ཆོད་མཉན་དུ་རུང་བ་དང་། འབྲས་བུ་རྣམས་སུ་ཤེས་པར་བྱ་སྟེ། ཡི་གེ་མང་བས་འཇིགས་པས་མ་བྲིས་སོ། །དེ་དག་བསྟན་པའི་ཕྱིར། ངོ་བོ་ནུས་ཕན་གསང་བའི་ཆོས། འཆིང་བའི་ལས་ཞེས་ཉོན་མོངས་པ་འདོད་ཆགས་ནི་འཆིང་བའི་ལས་སྟེ། འདིར་ཏིང་ངེ་འཛིན་དང་ལས་ཁྱད་པར་དུ་འགྱུར་བ་ཡིས། འདོད་པ་སྤྱད་པས་གྲོལ་བའི་ཕྱིར་ཐབས་ཀྱི་ཐེག་པ་ཞེས་ཀྱང་མིང་དུ་བསྟན་ནོ། །དད་དང་ཞེས་པ་གསུམ་ནི། དད་པ་ཅན་ལ་ཕན་དབང་སྦྱིན། བདག་གི་དོན་བྱེད་པའི་བརྩོན་འགྲུས་དང་། གཞན་གྱི་དོན་བྱེད་པའི་བརྩོན་འགྲུས་དང་། གཉིས་ཀའི་དོན་བྱེད་པ་གསུམ་ལ་ནུས་པའི་དབང་རིམ་སྦྱིན་ནོ། །སྤྱོད་པའི་བརྟུལ་ཞུགས་ཅན་ལ་གསང་དབང་སྦྱིན་ནོ། །རིག་པའི་བརྟུལ་ཤུགས་དང་མཉམ་པའི་བརྟུལ་ཤུགས་དང་ལྡན་པ་ལ་ཤེས་རབ་ཡེ་ཤེས་དང་བརྟན་པའི་དབང་སྟེ། དེ་ལྟར་སྣོད་ཀྱི་གོ་རིམ་བཞིན་ནོ། །དཔེ་བསྟན་པའི་ཕྱིན་རྒྱལ་པོ་ཕྲུ་གུ་ཅེས་པ་གཉིས་ནི་དབང་བསྐུར་དཔེ་ནི་རྒྱལ་པོ་ཕྲུ་གུ་སྤུ་རྒྱུ་དང་ལྡན་པ་དེ་རྒྱལ་སར་འདོན་པ་དང་འདྲའོ། །བསྐུར་བས་འབྲས་བུ་ཐོབ་པ་ནི་དུག་འགྱུར་གྱི་རྩིས་དུག་སྨན་དུ་གྱུར་པ་དང་འདྲའོ། །དགོས་ཆེད་བསྟན་པའི་ཕྱིར། རིག་པ་དབང་གིས་བགྲོད་པའི་ཕྱིར་དང་། ཞེས་གསུམ་བསྟན་པ་ནི། ཕན་དབང་ནས་ཡར་རིམ་པར་བགྲོད་པའམ། དབང་ཐོབ་རེས་ཀྱི་ས་རེ་ནོན་པར་བྱ་བའི་ཕྱིར་དང་། ཐུན་མོང་སྔ་མ་སྔ་མ་བསྐུར་བས། དབང་ཕྱི་མ་ཕྱི་མའི་སྒོ་འབྱེད་ཅིང་ཐོབ་པར་བྱེད་པའི་དགོས་ཆེད་དོ། །གསུམ་གྱི་ཐ་མ་ལས་ཆུད་མ་ཟོས་པར་འབྲས་བུ་བསྟན་པའི་ཕྱིར། ཐ་མའི་དོན་ལ་ཡང་ངོ་བོ་དང་། ཞེས་པའི་ཚིག་ལྔས་གྲགས་ཀྱི་དབྱེ་བ་བསྟན་ནས། དང་པོ་སྐུ་གསུང་ཐུགས་ཞེས་པ་ལ་སོགས་པ། ངོ་བོ་ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་དང་། མངོན་པར་བྱང་ཆུབ་སྐུ་དང་། རྡོ་རྗེའི་སྐུའོ། །གསུང་ལྔ་ནི། ཡི་གེ་མེད་པའི་གསུང་དང་། ལོངས་སྤྱོད་རྫོགས་པའི་གསུང་དང་། རིག་པའི་གསུང་དང་། ཚིག་གི་གསུང་དང་། རྡོ་རྗེའི་གསུང་ངོ་། །ཐུགས་ལྔ་ནི་ཡེ་ཤེས་ལྔ་སྟེ། རྣམ་པར་མི་རྟོག་པའི་ཐུགས། ཅིར་ཡང་ས་ལེར་མཁྱེན་པའི་ཐུགས་དང་། བདེ་བ་ཆེན་པོའི་ཐུགས་དང་། རྡོ་རྗེའི་ཐུགས་དང་། འགྲོ་བ་སྒྲོལ་བའི་ཐུགས་སོ་ཡོན་ཏན་ལྔ་ནི། ཞིང་ཁམས་དང་། གཞལ་ཡས་ཁང་དང་། གདན་ཁྲི་དང་། འོད་ཟེར་དང་། རྒྱན་ནོ། །འཕྲིན་ལས་ལྔ་ནི། ཞི་རྒྱས་དབང་དྲག་ལྷུན་གྱིས་གྲུབ་པའོ། །མདོར་བསྡུས་པ་ལྔ་པོ་ཉིད་དོ། །མཚན་ཉིད་བཞི་དང་ལྡན་པའི། ཞེས་པ་གཉིས་ནི། ཆོས་ཐམས་ཅད་ཀྱི་སྐུ་བླ་ན་མེད་པའི་བྱང་ཆུབ་ཆེན་པོའི་ངོ་བོ་ཉིད་ཡིན་པར་བསྟན་པ་དང་། འཁོར་བ་མྱ་ངན་ལས་འདས་པའི་ཆོས་ལ་གཉིས་སུ་མེད་པར་ལོངས་སྤྱོད་པ་དང་། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་ཉིད། སངས་རྒྱས་ཐམས་ཅད་ཀྱི་སྤྱིའི་གཟུགས་ཅན་ཉིད་ཡིན་པར་བསྟན་པ་དང་། ཐ་སྙད་གཉིས་ཀྱིས་བསྡུས་པའི་ཆོས་སོ་ཅོག་ཏུ་གྲགས་པ་ཐམས་ཅད་དང་། སྟོན་པའི་ངོ་བོ་ཉིད་དབྱེར་མེད་པར་བསྟན་པའོ། །དེ་ཡང་རྒྱུད་ལས། དེ་བཞིན་གཤེགས་པ་ནས་དབྱེར་མེད་པའི་རང་བཞིན་ཏེ། ཞེས་པའི་བར་གྱིས་བསྟན་ཏོ། །ཕྱོགས་གཉིས་ཀྱིས་བསྡུས་པའི་མ་ལུས་པའི་ཆོས་ཐམས་ཅད་ནི། ཡང་དག་པར་རྫོགས་པའི་སངས་རྒྱས་བརྟགས་པའི་སྒོ་ནས་གཅིག་པ་མ་ཡིན། ངོ་བོའི་སྒོ་ནས་ཐ་དད་པ་ཡང་མ་ཡིན་ཏེ། མདོར་ན་ཆོས་ཐམས་ཅད་དང་སྟོན་པ་ནི། མི་ལྡན་མ་བྲལ་བར་བཞུགས་སོ། །ཡོན་ཏན་བསྟན་པའི་ཕྱིར། འབྲས་བུ་ཡོན་ཏན་ལྷུན་གྲུབ་པ། །ཞེས་པ་གཉིས་བསྟན་ཏེ། དེ་བཞིན་གཤེགས་པའི་འབྲས་བུ་ཐ་སྙད་གྲགས་པ་ཐམས་ཅད་ནི། ཡོན་ཏན་དེ། དེ་ཉིད་དེ་བཞིན་གཤེགས་པ་མ་འདྲེས་པར་ཡོངས་སུ་རྫོགས་པས་གདུལ་བྱ་ལ་ཅིར་ཡང་སྣང་བའི་ལྷུན་གྲུབ་པའོ། །དཔེ་ཡིད་བཞིན་གྱི་ནོར་བུ་རིན་པོ་ཆེ་རྫས་གཅིག་པས་བསོད་ནམས་ཆེ་ཆུང་ཐ་དད་པས་ཅི་ལྟར་བསམ་པ་འབྱུང་བ་བཞིན་ནོ། །དེ་མཛད་སྤྱོད་བསྟན་པའི་ཕྱིར། འཕྲིན་ལས་རྣམ་བཞི་མཛད་སྤྱོད་ཅེས་པ་གཉིས་བསྟན་ཏེ། ཞི་བ་དང་། རྒྱས་པ་དང་། དབང་དང་། དྲག་པོ་བཞིས་གདུལ་བྱ་གང་མཚམས་ལ་ཕྱེད་དུ་བྱ་བརྩལ་མེད་པར་བྱིན་གྱིས་བརླབས་ཀྱིས་སྣང་བས་དོན་རྫོགས་ཤིང་མཐའ་ཐུག་པར་མཛད་དོ། །ཐུགས་རྗེ་དེའི་སྐྱེ་ལུགས་བསྟན་པའི་ཕྱིར། ཐུགས་རྗེ་ཆེན་པོ་གདུལ་བྱ་ལ། །ཞེས་པ་གསུངས་ཏེ། ཐུགས་ནི་མི་གཡོ་བར་སྙིང་རྗེས་ཀུན་ལ་ཁྱབ་པར་གདུལ་བྱ་ལ་སྐྱེ་བར་སྣང་བ་ཡང་། ཐུགས་དམ་གྱི་རྒྱུད་བསྐུལ་ཞིང་འདོད་པའི་དོན་གསོལ་བ་བཏབ་པས་སྐྱེ་བར་སྣང་ཡང་། ཐུགས་རྗེ་ཆེན་པོའི་རང་བཞིན་བྱིན་བརླབས་ཀྱི་ཤུགས་ཀྱིས་སྐྱེ་བར་སྣང་བ་དང་། གདུལ་བྱའི་ཐུགས་རྗེ་འབྱུང་བའི་དུས་ལ་བབ་པས་འབྱུང་བ་དང་། གསུམ་གྱི་ཚུལ་གྱིས་སྣང་བར་འགྱུར་རོ། །ཐུགས་རྗེ་སྣང་བའི་དོན་མཛད་པ། དེ་ཡང་གདུལ་བྱ་ལ་གཟིགས་པའི་ཚུལ་དུ་བསྟན་པའི་ཕྱིར། ཉིད་ལས་མི་གཞན་དོན་ཉིད་ཀྱིས། ཞེས་པ་གཉིས་གསུངས་ཏེ། ངེས་པར་འབྱུང་བའི་གདུལ་བྱ་དང་། གདུལ་དཀའ་དྲག་པོའི་གདུལ་བྱ་རྣམས། རང་གི་རྟོགས་པས་སྒྲིབས་ཀྱང་ངོ་བོ་གསེར་གྱི་དཔེ་བཞིན་དུ། དེ་བཞིན་གཤེགས་པའི་ཐུགས་ཡེ་ཤེས་ལས་མི་གཞན་པས་གཟིགས་པ་སྟེ། དེ་ཡུལ་དང་འཕྲད་པའི་དོན་གྱི་གསལ་བ་ལ་ཐ་སྙད་ཙམ་དུ་གཟིགས་ཞེའོ། །དཔེ་མེ་ལོང་གི་གཟུགས་བརྙན་དང་འདྲའོ། །རྒྱུད་ལས་ཀྱང་། མཐོ་དམན་ཀུན་གྱི་གཟིགས་སྣང་དང་། བླ་མེད་བྱང་ཆུབ་སྐུར་སྣང་བ། མེ་ལོང་ལྟ་བུའི་ཚུལ་བཞིན་དུ། སྣ་ཚོགས་ཁ་དོག་དབྱིབས་སུ་སྣང་། །ཞེའོ། །དེ་དག་གི་དོན་མཐར་ཕྱིན་པར་བྱ་བའི་ཕྱིར་དྲིས་ལན་བསྟན་ཏེ། གཞི་ལམ་འབྲས་བུའི་ཤེས་བྱ་རྣམས། །ཞེས་པ་ལ་སོགས་དགུ་གསུངས་ཏེ། ཆོས་ཀྱི་གཞི་སྒྲུབ་པའི་ལམ་མཐར་ཕྱིན་པའི་འབྲས་བུ་སྟེ། ཤེས་པར་བྱ་བ་དེ་རྣམས་སློབ་མས་རྟོགས་པར་འདོད་ན། བླ་མ་རྡོ་རྗེ་སློབ་དཔོན་དོན་མཁས་ཤིང་དགོངས་པའི་ཉམས་མངའ་བ་ལ་ཞུ་ཞིང་དྲི་བའི་ཚུལ་ནི། སྤྱིར་དྲུག་སྟེ། གཞན་དོན་དུ་དྲི་བ་དང་། གཞན་ལ་མ་རྟོགས་པར་འདྲི་བ་དང་། གལ་པོར་འདྲི་བ་དང་། ཐེ་ཚོམ་དུ་འདྲི་བ་དང་། གཞན་གྱི་ཤེས་པ་བཟློག་པའི་ཕྱིར་འདྲི་བ་དང་། གྱི་ན་ཙམ་དུ་འདྲི་བ་དང་དྲུག་ལས། སྐབས་འདིར་བདག་གིས་མ་རྟོགས་པ་དང་མཐའ་ཐེ་ཚོམ་ཟོས་པ་རྣམས་བླ་མ་ལ་དྲིས་ཤིག་པ་བསྟན་པའོ། །བླ་མས་ཀྱང་ཅིར་ལན་གདབ་པ་ཡང་། མ་གསུངས་པར་དགོངས་པས་ལན་གདབ་པ་དང་། བརྡས་གདབ་པ་དང་ཚིག་གིས་ལན་གདབ་པ་དང་གསུམ་ལས། ཚིག་གིས་ལན་གདབ་པར་བྱ་སྟེ། དེ་ལ་ཡང་བཞི་སྟེ། མདོ་ལས་མགོ་གཅིག་པ་དང་རྣམ་ཕྱེ་དང་། འདྲི་དང་གཞན་དང་ལུགས་བསྟུན་པའོ། །ཞེས་བྱ་བ་ལ་མགོ་གཅིག་ཏུ་ལན་གདབ། རྣམ་པར་ཕྱེ་བ་དང་། དྲིས་ལན་ལ་གདབ་པ་སྟེ་གསུམ་གྱིས་སོ། །དེ་ཡང་སློབ་བུ་རྣམས་དགྲོལ་བར་བྱ་བའི་དགོས་ཆེད་ཀྱིས་བཤད་གཉེར་བཞི་དང་ལྡན་པ་བསྟན་ཏོ། །གལ་ཏེ་ལན་བཏབ་ཀྱང་སློབ་བུ་དག་བརྩོད་ཏེ། ཡིད་ཆེས་པར་མ་གྱུར་ན་དང་པོར་དམ་བཅའ་བར་བྱ་སྟེ། དོན་གྱི་དངོས་པོ་དཔེ་དང་གཏན་ཚིགས་གསུམ་དང་རྟོགས་པ་བཞི། བདེན་པ་གསུམ། དག་པ་བཞི། མཉམ་པ་ལྔ་ལ་སོགས་པས་ཡིད་ཆེས་ཤིང་ནོར་རུང་བ་སྐྱོན་དག་མཐར་བཏུག་གོ། །དེ་ཡང་མན་ངག་ལས་ཤེས་བྱ་གཏན་ལ་དབབ་ཕྱིར་དང་། གཞི་མོར་དམ་བཅའ་བཙན་བྱ་སྟེ། །གྲངས་ཀྱི་དོན་ཉིད་མཐར་ཕྱུང་ལ། །ཡིད་ཆེས་བདག་གིས་དལ་གདབ་བྱ། །གལ་ཏེ་དམ་བཅའི་སྐྱོན་བྱུང་ན། །རང་གི་གྲུབ་མཐའ་མ་རྙེད་པར། །འཕྲལ་དུ་བཞག་ལ་ཡོད་འགྱུར་ན། །དེ་ཉིད་སྐྱེ་བོའི་ལས་འདྲར་འགྱུར། །ཞེས་འབྱུང་ངོ་། །དེ་ལྟ་བུའི་དྲིས་ལན་རྣམས་ཀྱང་། མ་འོངས་པ་ཤེས་པར་བྱ་བའི་ཕྱིར། བདག་གིས་གཞུང་ལུགས་གཞན་ནས་འདིར་བཀོད་པའོ། །དེ་ལྟ་བུའི་དོན་མན་ངག་རྒྱུད་ཀྱི་དོན་གསལ་བར་བྱེད་པ་འདི་བརྩམས་པ་ཡང་། སློབ་དཔོན་གྱིས་བདག་དང་གཞན་དོན་གཉིས་མཐར་དབྱུང་བའི་ཕྱིར། དགེ་བའི་རྩ་བ་བསྔོ་བ་སྟེ། རྡོ་རྗེ་སེམས་དཔའ་དགོངས་པ་བརྒྱུད་པ་ཞེས་པ་ཚིགས་བཞི་གསུངས་སོ། །སྒྱུ་འཕྲུལ་དོན་འབྱེད་འགྲོལ་བ་ཡི། །རིམ་གསུམ་ཡིག་ཆུང་མཚོན་དང་ཡིག་ལྟ་བུ། །བདག་གིས་རིག་པའི་མཐུ་མེད་ཀྱང་། །ཚིགས་ལ་བརྟེན་ནས་འགྲེལ་པ་འདི་བརྩམས་པ། །ནོངས་པ་མཆིས་ན་བཟོད་པར་གསོལ། །རྫོགས་སོ།། །།