སྔ་འགྱུར་བཀའ་མའི་ཆོས་སྡེའི་གླེགས་བམ་གྱ་གཉིས་པ།གླེགས་བམ། ཟུ༽བི་མ་ལ། སློབ་དཔོན་སངས་རྒྱས། སློབ་དཔོན་བི་མ་ལ་མི་ཏྲ། སློབ་དཔོན་པདྨ་འབྱུང་གནས། རུ་ཁུ་གྲོང་དཔལ་འབྱོར། བཻ་རོ་ཙ་ན། གཉགས་ཛྙཱ་ན་ཀུ་མཱ་ར། དཔལ་དབྱངས། སློབ་དཔོན་བི་མ་ལ་མི་ཏྲ། སློབ་དཔོན་ཛྙཱ་ན་ཛ་ཡ། སྒེག་པ་རྡོ་རྗེ།
སི་ཁྲོན་མི་རིགས་དཔེ་བསྐྲུན་ཁང་།
མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།
མགོ་བརྗོད།
རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི། ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།
ཐུགས་རྗེ་ཆེ་ཞུ།
ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།
རང་གནས་རྒྱལ་པོའི་འགྲེལ་པ། སློབ་དཔོན་བི་མ་ལ།
སྭ སྠཱ ན རཱ ཛ སྱཱ བྲྀ ཏྟི ནཱ མ བི ཧ ར ཏི སྨ། །
རང་གནས་རྒྱལ་པོའི་འགྲེལ་པ་ཞེས་བྱ་བ་བཞུགས་སོ། །
བཅོམ་ལྡན་འདས་ཡེ་ཤེས་རང་གནས་རྒྱལ་པོ་ལ་ཕྱག་འཚལ་ལོ། །ཞེས་པ་ལྟ་ལ་དབང་མི་ཟ་བའི་ཕྱིར་དང་། ཚོགས་ཡོངས་སུ་རྫོགས་པའི་ཕྱིར་ཕྱག་གི་མཆོད་པས་མཆོད་དོ། །དེ་ལ་གང་གི་ཕྱིར་ན་བདག་གི་དོན་གཉིས་དང་གཞན་གྱི་དོན་གསུམ་གྱི་ཆེད་དུའོ། །གང་གིས་ཤེ་ན་དཔལ་ཆེན་པོ་དུར་ཁྲོད་ཀྱི་དཀྱིལ་འཁོར་དུ་དངོས་གྲུབ་ཐོབ་པའི་སློབ་དཔོན་ཧཱུྃ་མཛད་ཉིད་ཀྱིས་འདུད་པའོ། །གང་ལ་ཞེ་ན་ཡེ་ཤེས་རང་གནས་རྒྱལ་པོ་ལའོ། །གང་གི་ཚེ་ཞེ་ན་རྩོམ་པའི་དུས་འདི་ཉིད་དུའོ། །ཇི་ལྟར་བཙལ་སྙམ་པ་ལ། འདི་རང་ལ་གནས་པར་སྟོན་པ་ནི་གདུལ་བྱ་གཉིས་པོ་ཉིད་འབྲས་དང་ལམ་དུ་གནས་པས་ངོ་བོས་འབྲེལ་བའི་ཕྱིར་ཐུགས་རྗེས་བཟུང་བར་བཏུབ་པས་བསྟན་ཏེ། དངོས་སུ་ཕྲིན་ལས་ཡོན་ཏན་དང་ངོ་བོ་ལས་མཚན་བརྗོད་པ་ནི། བདུད་བཞིའི་རྩ་བ་གཉིས་སོགས་འདུད། །ཀུན་ནས་རྟོགས་པའི་གདེང་གིས་དག །ཉི་ཤུ་རྩ་ལྔ་ལྡན་གྱུར་ཀྱང་། །མཐའ་གསུམ་འདུ་ཤེས་འདས་པའི་མཚན། །ཞེས་གསུངས་ཏེ། ངོ་བོ་ནི་ཐུན་མོང་མ་ཡིན་པའི་རྡོ་རྗེ་ལྟ་བུའི་ཡེ་ཤེས་ཏེ། རྡོ་རྗེ་ལྟ་བུའི་ཡེ་ཤེས་ཀྱིས། །ང་དང་བདག་མེད་རྟོགས་བྱས་ཏེ། །དངོས་དང་དངོས་མེད་བག་ཆགས་བསྲེག །དེ་བས་ཕ་ལམ་རྡོ་རྗེ་བཞིན། །ཞེས་གསུངས་སོ། །དེ་གང་ལ་ཡོད་ན་ངོ་བོས་གདུལ་བྱ་གཉིས་ཀྱི་རྒྱུད་ལ་གནས་ཏེ། ཚོགས་བརྒྱད་ཉིད་ཡེ་ཤེས་དྲུག་ཡིན་པའི་ཕྱིར། གཞན་དུ་ནས་དཀྱིལ་འཁོར་སྙིང་པོ་དྷརྨ་ཙཀྲའི་ཕོ་བྲང་ན་བཞུགས་ཏེ། རྐྱེན་གཉིས་ལ་རག་ལུས་ཀྱི་བསྐྱེད་པའི་རྒྱུ་མ་ཡིན་ནོ། །བདག་པོ་ནི་ཆེ་བ་དང་ལོངས་སྤྱོད་དང་ཐབས་ལས་མཚན་གསོལ་ཏེ་གནས་སོ། །མཆོད་པ་ནི་བདེན་པ་གསུམ་གྱིས་ཚུལ་རྣལ་འབྱོར་དང་མཐོང་བས་མཇལ་ཞིང་སྟོབས་པའོ། །དགོས་ཆེད་ཡོད་པས་དམ་བཅའ་བ་བསྟན་པའི་ཕྱིར་རོ། །རྡོ་རྗེ་འཛིན་ལ་ཕྱག་འཚལ་ནས། ཞེས་པ་རང་བཞིན་རྡོ་འཛིན་པ་དང་། འབྲས་བུ་རྡོ་འཛིན་པའོ། །མི་གཏོང་བ་ནི་དོན་དང་ལྡན་པའི་ཕྱིར་རོ། །རྟགས་ཀྱང་ལྔ་དང་འབྲེལ་བ་འཆང་བའོ། །མཆོད་པ་ཟིན་ནས་མན་ངག་རྩོམ་པར་འབྲེལ་ཏེ་བཤད་པར་བྱའོ་བར་དམ་བཅའ་བའི་སྡོམ་པ་མཚོན་པའོ། །གང་ཞེ་ན། དཔེ་རང་གནས་བཤད་པར་བྱ། ཞེས་པ། གཅིག་ཤེས་ཀྱི་ཆེད་དུ་ལྷག་པ་གཟུགས་བརྙན་སྨོས་པ་དང་། བརྡ་དེས་འཁོར་ལོ་ཉིད་འཆད་པའི་རང་བཞིན་ལ། ལས་བརྙན་གསང་བའི་དཀྱིལ་འཁོར་ཀུན་རང་ལ་གནས་པ་འཆད་ཕྱིར་མཚན་ངེས་པར་ཐོབ་བོ། །ངོ་བོ་ནི་རྡོ་རྗེའི་ཐུགས་ལ་གནས་པའོ། །གང་གི་ཆེད་དུ་མཉམས་པ་ལ། །རྣལ་འབྱོར་རང་གནས་མངོན་འདོད་པ། །དངོས་དང་བར་མ་རྣམ་སྦྱངས་ཕྱིར། །ཞེས་པ། གང་དག་སྐལ་བ་དང་ལས་བཅུད་དུ་གྱུར་པ་དངོས་ཀྱི་ཕྱིར་དང་། འདའ་ཁ་དང་བར་མ་དང་འདས་པ་ནི་རྒྱུ་འབྲས་ཀྱི་ཕྱིར་ཕྱོགས་གཅིག་ཏུ་བར་མའི་སྟེང་བསྡུ་ཏེ། འཕེལ་བ་དང་འཕངས་འབྲེལ་བའི་ཕྱིར་རོ། །མན་ངག་གི་གཞུང་རྟོགས་པར་བྱ་བའི་ཕྱིར་གཞུང་རྒྱས་པར་བསྟན་པ་ལ། ལུས་དང་ཡན་ལག་ལས། མདོ་ཁོང་དུ་ཆུད་པར་བྱ་བའི་ཕྱིར་མདོར་བསྟན་པ་ནི། རྒྱུ་དང་རང་བཞིན་རྒྱུ་ཉིད་དང་། །ཞེས་པ་དམིགས་དང་གཞི་ཤེས་པར་བྱ་བའི་ཕྱིར་རོ། །རང་བཞིན་ནང་གི་དཀྱིལ་འཁོར་དང་། །ཞེས་པ། གནས་སྦྱང་བའི་ཐབས་ཤེས་པར་བྱ་བའི་ཕྱིར་རོ། །འཕོ་ཚུལ་བར་མའི་མཚན་ཉིད་དང་། །ཞེས་པ། དེའི་སྲོག་དང་རིམ་པ་ཤེས་པར་བྱ་བའི་ཕྱིར་རོ། །སྔ་མ་ནི་འདའ་ཁ་མའི་ཕྱིར་རོ། །ཕྱི་མ་ནི་གཞན་ལ་རག་ལུས་པའི་གུ་རུས་ཤེས་པར་བྱའོ། །ལས་བསྙེན་གསང་བའི་དཀྱིལ་འཁོར་གསུམ་དང་། །ཞེས་པ། བསྒྲལ་ཐབས་ཤེས་བྱ་བའི་ཕྱིར་རོ། །དེ་དག་ཏིང་འཛིན་ལས་རིམ་དང་། །ཞེས་པ། དེའི་སྲོག་དང་རིམ་པ་ཤེས་པར་བྱ་བའི་ཕྱིར་རོ། །རང་གནས་སྦྱང་བའི་རིམ་པ་དང་། །ཞེས་པ། གདུལ་བྱ་ཉིད་ལ་སངས་རྒྱས་ཀྱི་ས་གནས་པས་སྤར་བའི་ཐབས་ཤེས་པར་བྱ་བའི་ཕྱིར་རོ། །བདག་ཉིད་འདའ་ཀའི་མན་ངག་དང་། །ཞེས་པ། བདག་གིས་བདག་སྦྱང་བའི་ཕྱིར་རོ། །མཐར་གནས་ཚུལ་གྱིས་ཐ་སྙད་བཅུ། །ཞེས་པ། དོན་ཡོད་པར་བྱ་བའི་ཕྱིར་འབྲས་བུ་དང་ལུས་བཅུའོ། །རང་གནས་རྨོངས་པའི་དོན་ཕྱིར་དབྱེ། །ཞེས་པ་ལ་གཞན་དོན་པའི་བརྩམས་པའི་ལམ་དྲུག་པོ་དང་། བདག་དོན་ཐ་སྙད་གཅིག་གིས་བྱེད་པའི་ཐབས་མི་ཤེས་པ་རྣམས་ཀྱི་ཕྱིར་གོ་ཆ་བགོས་པའོ། །ཡན་ལག་རྒྱས་པར་བསྟན་པའི་ཕྱིར། །དང་པོ་རྣམ་གཉིས་དེ་ལའང་གཉིས། །ཞེས་པ། དང་པོ་རྒྱུའི་ཡན་ལག་འཆད་པའི་ལུས་རྣམ་པར་གཞག་པ་སྟོན་ཏེ། གནས་སྤར་བའི་རྒྱུའི་འཁོར་བར་སྐྱེ་བའི་རྒྱུ་དང་། རྒྱུ་མངལ་དུ་སྐྱེས་པའི་རྒྱུ་བསྟན་པ་ལས། སྔ་མ་གཉིས་མཚུངས་པར་ལྡན་པ་དང་ལྷན་ཅིག་བྱེད་པའི་རྒྱུ་རྐྱེན་དང་ཐུན་མོང་དུ་བསྟན་པའོ། །དེ་ལ་སྔ་མ་བསྟན་པའི་ཕྱིར། །བདེ་གཤེགས་སྙིང་པོ་རང་རིག་ལ། །མ་རིག་བདག་ལྟ་མཚུངས་པའི་རྒྱུ། །ཞེས་པ་དྲུག་གིས་སེམས་རང་བཞིན་གྱིས་བདེ་བར་གཤེགས་པས་འཁོར་བ་མ་གྲུབ་ན་ཡང་། དེ་མཐོང་བ་ངེས་པར་མ་བྱས་པས་བདག་གཉིས་སུ་ཞེན་པ་ནི་དུས་མཉམ་པར་མེ་ལོང་གཡའ་བཞིན་ལྷན་ཅིག་ངོ་བོ་མི་ཕྱེད་པས་མིང་གྲུབ་པ་ནི་བསྐྱེད་པ་དང་འཕེན་པའི་ལས་བྱེད་པའོ། །དེ་ཡང་དེ་ཉིད་དངོས་པོར་མ་འདྲེས་པས་ཡེ་ཤེས་རྒྱལ་པོ་དེ་ཉིད་དེ་སྣང་བ་ལྷུན་གྱིས་གྲུབ་པ་ལས་གོལ་ཏེ་གཉིས་པ་བསྟན་པའི་ཕྱིར། ཀུན་བརྟགས་མ་རིག་ཉོན་མོངས་ལས། །ལྷན་ཅིག་བྱེད་རྒྱུ་རྒྱུ་ཡི་རྒྱུ། །ཞེས་པ། ཀུན་ཏུ་བརྟགས་པའི་མ་རིག་པ་གསུམ་ལ་སོགས་པའི་ཉོན་མོངས་པ་ལྔ་དང་། འདོད་པ་ཁམས་ཀྱི་ལས་གཉིས་དང་། གོང་མ་གཉིས་ཀྱི་ལས་གཅིག་པ་དག་ནི་ཁམས་གསུམ་པ་དང་མཉམ་དུ་འགྲོགས་ཤིང་འཁོར་བ་མངོན་པར་གྲུབ་པར་བྱེད་བསྐྱེད་ཅིང་མེ་ལོང་བཏགས་པས་འཕེལ་བའི་ནུས་པ་ཅན་དུ་བྱེད་པ་ནི་ལས་ཀྱི་རྐྱེན་དུ་འགྲོ་སྟེ། དེ་ནི་མངལ་གྱི་རྒྱུ་དེའི་ཡང་རྒྱུ་སྟེ། ཆོས་དང་བདག་དང་དངོས་པོ་རྣམས། །ངོ་བོ་ཡོད་ལ་སོགས་བརྟགས་པས། །རྟོག་པ་སྒྱུ་མའི་ཀླུ་གྱུར་ཏེ། །ཞེས་གསུངས་སོ། །དེའི་རང་བཞིན་ནི། བྱ་བྱེད་འབྲས་བུ་གསུམ་སྟོང་པ་ཆེན་པོའི་ཕྱིར་ཡང་དག་པའི་མཛད་པའོ། །གཉིས་པ་རྐྱེན་གྱི་རྣམ་པར་འདོད། །ཅེས་པ། རྒྱུའི་རྒྱུ་གཉིས་པས་ཏེ་འཁོར་བའི་རྐྱེན་བཤད་ཟིན་ཏོ། །སྤྱིར་དེ་ལྟ་བུ་ལས་ཐུགས་རྗེའི་ཡུལ་སྒོས་གནས་གང་གི་སྐྱེ་བ་བསྟན་པའི་ཕྱིར་རྒྱུ་འཆད་དེ། མཚམས་སྦྱོར་རྣམ་ཤེས་ཞེན་བཅས་པ། །རླུང་གི་རྐྱེན་གྱིས་འོང་མཚུངས་རྒྱུ། །ཞེས་པ་ལེན་པའི་རྣམ་པར་ཤེས་པ་ནི་བག་ཆགས་སྨིན་པ་དང་བཅས་པས་སྲིད་པའི་མཚམས་སྦྱོར་བ་དེ་འཕེན་པའི་རྒྱུ་གཉིས་ཀྱིས་འཕངས་པས་བར་མ་དོར་འོངས་པ་ནི་སྐྱེ་བ་མཚུངས་པར་ལྡན་པའི་ཕྱིར་ཏེ། རང་ལ་མེད་ན་མི་སྐྱེ་བའི་ཕྱིར་རོ། །ཕྱི་མའི་མདོ་བསྟན་པའི་ཕྱིར་རོ། །རྟེན་སེམས་ལེན་པར་ཁྲག་དང་བཅས་ཕོ་མོའི་འདོད་བསྣོལ་སེམས་ཀྱིས་འཇུག་ཅེས་པ། ཤེས་པའི་རྟེན་ཕའི་ས་བོན་དང་མའི་ཁྲག་གོ། །ལྡན་པ་ནི་འདྲེས་པའོ། །བསྣོལ་བ་ནི་ཁྱེའུ་མ་ལ་འདོད་ཆགས་སྐྱེ་ཞིང་ཕ་ལ་ཞེ་སྡང་སྐྱེ་བའོ། །བུ་མོར་སྐྱེ་བ་ནི་དེ་ལས་ལྡོག་པའི་ཕྱིར་རོ། །ཆགས་སྡང་གི་སེམས་ཀྱིས་འཇུག་གོ། །དེ་ལའང་འཇུག་པའི་སེམས་དང་། འཇུག་པའི་རྐྱེན་དང་། འཇུག་པའི་ཚུལ་དང་། བར་ཆད་དང་། འཛིན་པའི་ཚུལ་དང་། ཡོན་ཏན། མཐོང་ལུགས་དང་། ཡུལ་ཇི་ཙམ་གནས་པ་དང་། འདུག་པའི་ཚུལ་དང་། སྐྱེ་བའི་ཁྱད་པར་རོ། །དེ་ལ་དང་པོ་ནི་བཤད་ཟིན་ཏོ། །གཉིས་པ་ནི་རླུང་སུམ་ཅུ་སོ་བརྒྱད་འཆད་དོ། །གསུམ་པ་ནི་དགེ་བ་ཅན་གྱི་ཚུལ་དང་། སྡིག་པ་ཅན་གྱི་ཚུལ་དང་། དེ་ཡང་མཐོང་ལུགས་དང་འབྲེལ་བས། སྔ་མ་ནི་བར་མ་དོར་འཇིགས་སྐྲག་གི་ཡུལ་ལྔ་ལ་སོགས་པ་མཐོང་བའི་ཚེ། ཁང་བརྩེགས་ཡང་ཐོག་མཐོན་སྟེང་དང་། གཞལ་མེད་ཁང་ན་ཁྲི་ལ་འདུག་བྱེད་སོགས། དེ་ལྟར་བདེ་འདོད་སེམས་ཀྱིས་འཇུག །ཕྱི་མ་མི་བདེ་ཡུལ་མཐོང་ཚེ། །འཇིགས་སྐྲག་རྩ་དང་ལོ་ཁྱིམ་དང་། །རྩིག་བརྡུལ་དབེན་རི་ནགས་སྡུག་བྲག །སྐྱབས་དེའི་གནས་མཐོང་འཇུག་པར་བྱེད། །དེ་ཚེ་མཁའ་འགྲོ་འདོད་པ་ཡིས། །ས་ཁུང་བུས་པའི་སྙིང་འཛིན་དང་། །སྦྲང་རྒྱ་ཇི་བཞིན་འཛིན་པ་སྟེ། །དེས་ན་མི་འདུལ་བསྟན་པ་ཡིན། །དེ་ཡང་སྐྱེ་གནས་ས་བོན་ལས། །བར་ཆད་གསུམ་མེད་འཇུག་པ་སྟེ། །དང་པོ་ནད་ལྡན་ནོན་པ་ལྔ། །གང་བ་གཉིས་དང་དབྱིབས་རྒུ་དང་། །ལྷག་སྐྱེས་འཛག་འདུག་མི་བཏུབ་དང་། །རྩུབ་མངས་གཉིས་དང་ཡོང་བའོ། །གཉིས་པ་སྔ་ཕྱི་མ་སྙོམས་ཆད། །གསུམ་པ་བསོད་ནམས་ཆ་མ་མཉམ། །མཉམ་ཡང་ཕྲད་ལས་མ་བསགས་པའོ། །དེ་དེ་དེ་བཟློག་ཡོན་ཏན་ཏེ། །དེ་ཡོད་གནས་སུ་འཇུག་པར་བྱེད། །གང་དེ་དེ་ན་གནས་པའི་ཡུན། །ཟླ་བརྒྱད་ཉི་ཤུ་གཅིག་ཞག་གིས། །ཕལ་ཆེར་རྫོགས་ནས་འབྱུང་བར་བྱེད། །འདུག་ཚེ་ཕོ་གཡས་ཁ་སྦྱོར་ལ། །མོ་གཡོན་རྒྱབ་སྟོན་མདུན་དུ་བལྟ། །ཆགས་སྡང་ལས་ཀྱི་བྱེ་བ་ཡིན། །དེ་རྫོགས་སྐྱེ་བ་འཆད་འགྱུར་ཏེ། །བདེ་དང་སྡུག་བསྔལ་ལས་ཀྱི་བྱེ། །ཞེས་པའོ། །རྐྱེན་གྱི་ཡོན་ཏན་ནི། ལེན་རྟེན་འབྱུང་བ་ངེས་ལྡན་པས། །ཐལ་བ་འབྲུ་མར་ཤ་རུལ་ལྟར། །མི་འགྱུར་ངེས་པར་འགྱུར་བ་ཡིན། །ཞེས་པ། ས་བོན་གཉིས་ལ་འབྱུང་བ་བཞི་ཚང་བའི་ཕྱིར། དེའི་ཡོན་ཏན་ནི། ཆུ་ཡིས་བསྡུས་པ་ཐལ་བ་ལྟར། །མི་འགྱུར་བ་ཡིས་འབྲུ་མར་དང་། །མེ་ཡིས་ཤ་རུལ་ལྟར་མི་འགྱུར། །རླུང་གིས་མངོན་པར་འགྲུབ་འགྱུར་ཏེ། །སྭ་སྟི་ཀ་བཞིན་ནོ། །དེ་བས་ན་སྨོས་པའི་རྐྱེན་བཞིའི་དབང་དུ་མ་གྱུར་པར་སྨིན་པར་འགྱུར་བ་ནི་རྐྱེན་ནོ། །སུམ་ཅུ་རྩ་བརྒྱད་ཕྲག་བདུན་རླུང་། །ལྷན་ཅིག་བྱེད་རྒྱུ་རྐྱེན་དུ་འདོད། །ཅེས་པ། དེ་སྙེད་རེ་ལ་ཡང་འབྱུང་བ་བཞིའི་རླུང་ཆ་མཉམ་པར་ཡོད་མོད་ཀྱང་། ཞག་གྲངས་སུ་ལས་སོ་སོ་བྱེད་པས་མི་གྲུབ་པ་ནི་ཕུང་པོ་དང་ལྷན་ཅིག་པས་སྨིན་པར་བྱེད་པས་མིང་ཐོབ་སྟེ་གྲོགས་ཀྱི་ཕྱིར་རྐྱེན་ནོ། །དེ་ལ་ནི་འཕེན་པ་དང་ཡོངས་སུ་རྫོགས་པ་དང་མངོན་པར་འགྲུབ་པར་བྱེད་པ་དང་། འབྱུང་བའི་བྱེད་རྒྱུར་གནས་སྐབས་བྱེ་ཆེའི་མིང་གྲངས་ཀྱིས་འགྱུར་རོ། །འོ་ན་འདིར་མངལ་ནས་སྐྱེ་བ་གཙོ་བོར་བསྟན་ཏེ། སྐྱེ་བ་གསུམ་པོ་ཐུགས་རྗེའི་ཡུལ་མ་ཡིན་པར་འགྱུར་བས་སྤོང་ལེན་རིགས་པས་འགལ་ལོ་སྙམ་པ་ལ། བཞི་སྐྱེ་བ་དང་དྲུག་འགྲོ་བ་ཀུན་ཡིན་མོད་ཀྱི་དངོས་པོ་སྦྱོང་བ་བདག་གི་དབང་དུ་མངལ་ཏེ། སྐྱེ་ས་ཡིན་པའི་ཕྱིར་དང་། བར་མའང་གཙོ་བོར་བསོད་ནམས་ཀྱི་ལུས་ཅན་དང་པོ་ཡིན་པའི་ཕྱིར་གཙོར་བསྟན་གྱིས་གསུམ་པོ་འདོར་བ་ནི་མ་ཡིན་པས་འགལ་བ་ནི་མ་ཡིན་ནོ། །དེ་རྒྱས་པ་བསྟན་པའི་ཕྱིར། ལས་རླུང་དང་པོ་ཞོ་ཆགས་ཚུལ། །ཀུན་སྡུད་མ་ཡི་རྩིབ་ནས་འབུད་ཅུང་ཟད་སྲ་བར་གྱུར་པ་ཡིན། ཞེས་པ། མའི་མངལ་དུ་སེམས་ཅན་དེ་བདུན་ཕྲག་དང་པོར། ལས་རླུང་ཀུན་ཏུ་བསྡུད་པ་འབྱུང་བ་ལས་ས་བོན་གཉིས་གཅིག་ཏུ་བྱས་ཏེ་མེར་མེར་པོ་དེ་འབྲས་ཀྱི་ཁུ་བའམ་ཞོའི་དཀྲིས་མ་འདྲའོ། །བདུན་ཕྲག་གཉིས་པ་ལས་རླུང་དེས་ནུར་ནུར་པོར་བྱས་ཏེ་ཞོ་བསྐ་བའམ་མར་ཆགས་པ་ལྟར་བྱས་པའོ། །མའི་རྩིབ་ལོགས་གཡས་གཡོན་དུ་ཕོ་མོ་སོ་སོར་འབུད་པར་བྱེད་དོ། །ཞག་བདུན་ཕྲག་གསུམ་པ་ལས། མཛོད་ཅེས་བྱ་བས་ཟླུམ་པར་བྱེད། །ཅེས་པ། ལས་ཀྱི་རླུང་མཛོད་ཅེས་བྱ་བ་བྱུང་ནས་མཁྲེགས་ཤིང་ལྡར་ལྡར་བྱས་ཏེ། ལྕགས་ཀྱི་ཐུར་མའམ་འབུ་གྲོག་མ་འདྲ། སྨན་བརྡུང་བའི་གཏུན་བུ་འདྲ་ལ་ཐུང་ཞིང་ཆུང་བའི་ཕྱིར་བཟླུམ་ཞེས་བྱའོ། །བདུན་ཕྲག་བཞི་པ་ལ། རབ་འབྱེད་མཁྲེགས་པ་མཆི་གུ་ལྟར། །ཞེས་པ། ལས་ཀྱི་རླུང་རབ་ཏུ་འབྱེད་པ་ཞེས་བྱ་བས་ལྟར་ལྟར་པོ་དེ་མཁྲེགས་པར་བྱེད་ཏེ་མཁྲང་འགྱུར་ཞེས་བྱ། དབྱིབས་གདར་རམ་མཆི་གུ་འདྲའོ། །བདུན་ཕྲག་ལྔ་པ་ལ། ཡན་ལག་སྡུད་པས་ཡན་ལག་གི། །རྩ་བ་ལྔ་པོ་འབྱུང་བར་འགྱུར། །ཞེས་པ། ལས་ཀྱི་རླུང་ཡང་དག་པར་སྡུད་པ་ཞེས་བྱ་བས་མཁྲང་འགྱུར་གོང་གོང་པོ་རྣམ་པར་འབྱེད་དེ། བརླ་གཉིས། དཔུང་པ་གཉིས། མགོ་བོ་དང་ལྔ་འབྱུང་བར་བྱེད་དོ། །ཆར་གྱིས་ལྗོན་ཤིང་ལོ་འདབ་རྒྱས་པར་བྱེད་པ་དང་འདྲའོ། །བདུན་ཕྲག་དྲུག་པ་ལས། ཟས་ཀྱི་འཕྲོ་ལྔ་དེ་བཞིན་འབྱུང་། །ཞེས་པ་ལས་ཀྱི་རླུང་རྒྱ་ཆེན་པོ་ཞེས་བྱ་བའམ་ཟས་ཞེས་བྱ་བས། པུས་མོ་རྗེ་ངར་གཉིས། དཔུང་པ་ལག་ངར་གཉིས་ཏེ་སྔར་གྱི་འཕྲོ་བཞི་སྣང་བར་བྱེད་དོ། །བདུན་ཕྲག་བདུན་པ་ལ། འཁྱིལ་བྱེད་དེ་བཞིན་ལྔ་རྫོགས་བྱེད། །ཅེས་པ། ལས་ཀྱི་རླུང་འཁྱིལ་བྱེད་ཀྱིས་བོལ་བཞི་འབྱུང་བས་ཡན་ལག་ལྔ་རྫོགས་པར་བྱེད་དོ། །བདུན་ཕྲག་བརྒྱད་པ་ལ་བཟློག་བསྒྱུར་བྱེད་པས་ཉིང་ལག་རྫོགས། ཤེས་པ། ལས་ཀྱི་རླུང་བཟློག་བསྒྱུར་བྱེད་པས་སོར་མོ་ཉི་ཤུ་འབྱུང་བར་བྱེད་དོ། །བདུན་ཕྲག་དགུ་པ་ལ། རྣམ་པར་འབྱེད་པས་བུག་དགུ་དོ། །ཞེས་པ། ལས་ཀྱི་རླུང་བུ་ཁ་རྣམ་པར་འབྱེད་པས་དབང་པོ་ལྔ་ཡི་བུ་ག་བདུན་དང་། གཤང་གཅིའི་ལམ་སྟེ་བུ་ག་དགུ་འབྱུང་བར་བྱེད་དོ། །བདུན་ཕྲག་བཅུ་པ་ལ་སྲ་བྱེད་ཀུན་ནས་སྒོ་མཉམ་པས། སྲ་ཞིང་རྐྱལ་བ་ལྟར་བུ་འགྱུར། །ཞེས་པ། དེའི་ཚེ་ལས་ཀྱི་རླུང་སྲ་བར་བྱེད་པས་ཅུང་ཟད་སྲ་བར་བྱེད་ཅིང་ཀུན་ནས་སྒོ་ཞེས་བྱ་བའི་རླུང་གིས་ལུས་ཀུན་བུས་ནས་རྐྱལ་པ་ལྟ་བུར་གང་རྒྱས་སུ་བྱེད་དོ། །བདུན་ཕྲག་བཅུ་གཅིག་པ་ལ། རྡོ་རྗེ་བུག་སྦྱོང་ཁ་སྣང་ནས། །ཁྲག་རྣག་ཆུ་འབྱུང་དབང་པོ་བཟློག །ཅེས་པ། དེའི་ཚེ་རླུང་ལས་ཀྱི་རྡོ་རྗེ་ཞེས་བྱ་བས་སྟེང་འོག་གི་ཕྱོགས་ཀུན་ཏུ་འགྲོ་ཞིང་ལུས་ཀྱི་བུ་ག་རྣམས་ཕ་ལམ་ནོར་མིག་ལྟར་འབྱེད་པར་བྱེད་དེ། དེས་མ་དེ་ཡང་དགའ་མི་དགར་བྱེད་ཅིང་། །སྤྱོད་ལམ་དུ་ཡང་དེའི་རང་བཞིན་དུ་བྱེད། །རྐང་ལག་བསྐྱེད་པར་ཡང་བྱེད། མངལ་ན་མོ་ཡི་བུ་ག་རྣམས་འཕེལ་བར་བྱེད་ཅིང་ཁ་ནས་ཁྲག་རྣག་དང་ཆུ་མིག་ག ཙང་བ་འབྱུང་སྟེ་དབང་པོ་རྣམས་དེས་བཟློག་ནས་ཞི་བར་འགྱུར་རོ། །བདུན་ཕྲག་བཅུ་གཉིས་པ་ལ། ཡོན་པོའི་སྒོས་ནི་ནང་ཁྲོལ་འབྱུང་། །ཞེས་པ་དེའི་ཚེ་རླུང་ཡོན་པོའི་སྒོས་རྩིབ་ལོགས་གཡས་གཡོན་གཉིས་ཀྱི་ནང་ཁྲོལ་གྱི་རྒྱུ་མ་ཆེ་ཆུང་རྣམས་བསྐྱེད་དོ། །ཞོར་འབྱུང་སྤུ་རྒྱུས་ཤེས་པའི་ལས། །རུས་པའི་ཚིགས་དང་ནད་རྣམས་ལྡན། །ཞེས་པ། དེའི་ཚེ་གཞན་ཡང་སྤུ་རྒྱུས་ཤེས་པའི་རླུང་ཞོར་ལ་འབྱུང་སྟེ། དེས་ཚིགས་ཀྱི་ཡན་ལག་ནད་སུམ་བརྒྱ་དྲུག་ཅུ་དང་ནད་བཞི་བརྒྱ་རྩ་གཅིག་ལུས་ལ་གནས་པར་འགྱུར་རོ། །བདུན་ཕྲག་བཅུ་གསུམ་པ་ལ། བཀྲེས་སྐོམ་བྱེད་པས་དེ་སེམས་བསྐྱེད། །མས་ཟོས་ལྟེ་བར་འཛིན་ཞིང་ཕན། །ཞེས་པ། དེའི་ཚེ་ལས་ཀྱི་རླུང་བཀྲེས་པ་དང་སྐོམ་པར་བྱེད་པ་ཞེས་བྱ་བ་དེས་མངལ་གྱི་ལུས་དང་ཉམ་ཆུང་ཞིང་བཀྲེས་སྐོམ་གྱི་འདུ་ཤེས་བསྐྱེད་པས། མས་ཟས་ཟོས་པ་འཐུངས་པ་ཇི་སྙེད་པ་དག་ལུས་ཀྱི་ནང་དང་ལྟེ་བའི་དཀྱིལ་འཁོར་ནས་འཐུངས་ཞུགས་ཤིང་ཕན་པར་བྱེད་དེ་གནས་པའི་བྱེད་རྒྱུའོ། །བདུན་ཕྲག་བཅུ་བཞི་པ་ལ། སྐུད་པའི་སྒོས་ནི་ཆུ་རྒྱུས་གཡོགས། །ཞེས་པ་དེའི་ཚེ་རླུང་སྐུད་པའི་སྒོ་ཞེས་བྱ་བས་རྩ་རྒྱུས་དགུ་བརྒྱའམ་སྟོང་སྐྱེད་པར་བྱེད་དེ། མདུན་རྒྱབ་གཡས་གཡོན་བསྣོལ་མར་གཡོགས་པར་བྱེད་དོ། །བདུན་ཕྲག་བཅོ་ལྔ་པ་ལ། པདྨས་ཉི་ཤུས་རྩ་འབྱུང་སྟེ། །ཞེས་པ། དེའི་ཚེ་རླུང་པདྨས་རྩར་འགྱུར་བ་མདུན་རྒྱབ་གཡས་གཡོན་རེ་ལ་ལྔ་ལྔ་ཉི་ཤུ་འབྱུང་སྟེ། བཟའ་བཏུང་གི་རེ་འདི་ནས་བཞུགས་ནས་ལུས་ལ་ཕན་འདོགས་པར་བྱེད་དོ། །དེས་ན། ཕྱོགས་བཞི་ལྔ་ལྔའོ། །ཞེས་གསུངས་སོ། །ཉི་ཤུ་པོ་རེ་རེ་ལ་ཡང་བཞི་བཅུ་བཞི་བཅུ་ཡོད་དེ། དེ་རེ་རེ་ལའང་། གཅིག་ལའང་བརྒྱ། ཉིང་ལག་ཕྱོགས་གཅིག་ཉི་ཁྲི་ལ། །ཞེས་པ་ལྔ་ལྔ་པོ་ཉི་ཤུ་ལ་བཞི་བཅུ་པོ་ལ་བརྒྱ་བརྒྱར་གྱེས་པས་ཉིས་སྟོང་ངོ་། །དེ་རེ་རེ་ལའང་ཉིང་ལག་སྟོང་སོ་རེ་རེ་ལའང་བཅུ་བཅུར་འཕྲོས་པས་ཁྲི། མདོར་ན་ཕྱོགས་གཅིག་གི་ཉིས་སྟོང་ལ་ཉི་ཁྲི་དེ་བརྒྱད་ཁྲི་སྡོམ་པར་འགྱུར་རོ། །རྩའི་མིང་ནི། མདུན་རྒྱབ་པ་ག་སྟོབས་ཞེས་བྱ། །ཞེས་པ་མདུན་གྱི་རྩ་ཉི་ཁྲི་པ་གའོ། །རྒྱབ་ཀྱི་ཉི་ཁྲི་སྟོབས་ཞེས་བྱའོ། །གཡས་གཡོན་མཐུར་ལྡན་བརྟན་པའོ། །ཞེས་པ། གཡས་ཀྱི་ཉི་ཁྲི་ནི་མཐུ་དང་ལྡན་པའོ། །གཡོན་གྱི་ཉི་ཁྲི་ནི་བརྟན་པ་ཞེས་བྱ་སྟེ། དེས་ན་ལུས་ཀྱི་ཆ་བཞི་ལ་ནུས་པ་སོ་སོར་འབྱུང་བའོ། །དེ་དག་ཉིང་ལག་གཅིག་ནས་བདུན། །དག་གི་བར་དེར་བ་སྤུར་འབྲེལ། །ཞེས་པ། བརྒྱད་ཁྲི་བཞི་པོ་རེ་རེ་ལའང་ཉིང་ལག་བདུན་དུ་འགྱུར་བས་བ་སྤུར་འབྲེལ་བ་ནི་བརྒྱད་ཁྲི་བ་ཕྲག་བདུན་དུ་འགྱུར་རོ། །རྩའི་ཁ་དོག་ནི། ཁ་དོག་དཀར་དམར་སེར་སྔོ་ལྡན། །ཞེས་པ། རྩ་དེ་དག་གི་ཁ་དོག་ལྔའམ་སྣ་ཚོགས་སུ་ལྡན་པའོ། །བདུན་ཕྲག་བཅུ་དྲུག་པ་ལ། བདུད་རྩི་དབང་པོ་སྙིང་མེད་འབྱེད། །ཅེས་པ། དེའི་ཚེ་ལས་རླུང་བདུད་རྩི་ཞེས་བྱ་བས། སྙིང་དང་མིད་པའི་བུ་ག་དང་། །དབང་པོའི་བུ་ག་རྣམས་ཕྱེ་ནས་དབུགས་རྒྱུ་བ་ཐོགས་པ་མེད་པ་དང་། བཟའ་བཏུང་ཟོས་པའང་ལུས་ལ་ཕན་འདོགས་པ་གསགས་པའི་གནས་ཡོད་པ་དང་། རླུང་དེ་དག་དགེ་སྡིག་གི་ལས་ཀྱི་རྣམ་སྨིན་ལ་སོགས་པ་ཡོངས་སུ་རྫོགས་པར་བྱེད་པས། དབུགས་རྒྱུ་དབང་པོ་རྣམས་ཀྱང་རྫོགས། །ཞེས་གསུངས་སོ། །བདུན་ཕྲག་བཅུ་བདུན་པ་ལ། འབྲི་གཏོང་དབང་པོ་དང་བར་བྱེད། །ཅེས་པ། དེའི་ཚེ་རླུང་འབྲིང་གཏོང་གིས་དཔེར་ན་མེ་ལོང་གཡའ་ཕྱི་ཐལ་བ་སྣུམ་གྱིས་ལེན་པ་ལྟར། རླུང་དེའི་ནུས་པས་དབང་པོ་རྣམས་དྭངས་ཤིང་གསལ་བར་བྱེད་དོ། །བདུན་ཕྲག་བཅོ་བརྒྱད་པ་ལ། བརྟན་འགྱུར་དབང་པོ་ལས་མཐུར་ལྡན། །ཞེས་པ། དེའི་ཚེ་རླུང་དྲི་མ་མེད་པའམ། །ཆེར་བརྟན་པར་འགྱུར་བ་ཞེས་བྱ་བས། དཔེར་ན་ཉི་ཟླ་སྤྲིན་གྱིས་ཁེབས་པ་རླུང་གིས་གཏོར་ནས་གསལ་བ་ལྟར། རླུང་དེས་དབང་པོ་རྣམས་སྨིན་ཅིང་གསལ་བར་བྱེད་དོ། །བདུན་ཕྲག་བཅུ་དགུ་པ་ལ། ལས་བྱེད་དབང་པོ་གསུམ་རྫོགས་བྱེད་ཅེས་པ། དེའི་ཚེ་རླུང་ལས་བྱེད་དམ། སྔ་མའི་ཆེར་བརྟན་གྱིས་དབང་པོ་ལྔ་སྨིན་ནས། ལུས་ཀྱི་དབང་པོ་དང་། སྲོག་གི་དབང་པོ་དང་། ཡིད་ཀྱི་དབང་པོ་གསུམ་ཡང་རྫོགས་པར་བྱེད་དོ། །བདུན་ཕྲག་ཉི་ཤུ་པ་ལས། ཤིན་ཏུ་སྲ་བས་རུས་པ་བརྟན། །ཞེས་པ། དེའི་ཚེ་ལས་ཀྱི་རླུང་བརྟན་པའམ་ཤིན་ཏུ་སྲ་བ་ཞེས་བྱ་བ་དེས་རུས་པ་རྣམས་བསྐྱེད་དེ། རུས་པ་ཆེན་པོ་ཉིས་བརྒྱ་དང་ཕྲ་མོ་རྣམས་འབྱིན་ཏེ། འཇིམ་སྐུ་ཤིང་ལ་སྲད་བུས་བཅིངས་པ་ལྟ་བུའོ། །བདུན་ཕྲག་ཉེར་གཅིག་པ་ལ། ཡང་དག་བསྐྱེད་པས་ཤ་རྣམས་སྐྱེད། །ཅེས་པ། དེའི་ཚེ་རླུང་དེས་ཤ་བསྐྱེད་པ་ནི་དཔེར་ན་སྲད་བུའི་སྟེང་དུ་འཇིམ་པས་གཡོགས་པ་ལྟ་བུའོ། །བདུན་ཕྲག་ཉེར་གཉིས་པ་ལ། ཀུན་ཏུ་རྒྱལ་བས་ཁྲག་རྣམས་འབྱུང་། །ཞེས་པ། དེའི་ཚེ་རླུང་ཀུན་ཏུ་བརྒྱལ་བས་ཁྲག་རྣམས་བསྐྱེད་པར་བྱེད་དོ། །བདུན་ཕྲག་ཉེར་གསུམ་པ་ལ་ཡོངས་དག་འཛིན་པས་པགས་པ་གཡོགས། ཞེས་པ། དེའི་ཚེ་རླུང་ཡོངས་དག་འཛིན་གྱིས་པགས་པ་བསྐྱེད་དོ། །བདུན་ཕྲག་ཉེར་བཞི་པ་ལ། སྤྲིན་འཛིན་དེ་ཉིད་མདོག་ལྡན་བྱེད། །ཅེས་པ། དེའི་ཚེ་རླུང་སྤྲིན་འཛིན་ཞེས་བྱ་བ་འབྱུང་སྟེ་དེས་ལུས་ཀྱི་པགས་པ་སྐྱེད་ཅིང་མདོག་དང་ལྡན་པར་བྱེད་དོ། །བདུན་ཕྲག་ཉེར་ལྔ་པ་ལ་གྲོང་ཁྱེར་འཛིན་པས་ཁྲག་དང་བྱེད། ཅེས་པ། དེའི་ཚེ་རླུང་གྲོང་ཁྱེར་འཛིན་པས་ཤ་དང་ཁྲག་འཕེལ་ཞིང་རིམ་གྱིས་རབ་ཏུ་དང་བར་བྱེད་དོ། །བདུན་ཕྲག་ཉེར་དྲུག་པ་ལ། སྐྱེ་བ་མངོན་གྲུབ་སྤུ་རྣམས་དང་། །ཆུ་རྒྱུས་སེན་མོ་འབྲེལ་བར་བྱེད། །ཅེས་པས། དེའི་རླུང་སྐྱེ་བ་མངོན་པར་གྲུབ་པའི་སྟོབས་ཀྱིས་སྐྲ་དང་སྤུ་དང་སེན་མོ་རྣམས་བསྐྱེད་ནས་ཐམས་ཅད་རྩ་རྒྱུས་རྣམས་དང་འབྲེལ་བར་བྱེད་དོ། །བདུན་ཕྲག་ཉེར་བདུན་པ་ལ། ཕན་ཡོན་ཆེན་པོས་ལས་བཞིན་དུ། །མཛེས་དང་ཆེ་ཆུང་གསལ་བར་བྱེད། །ཅེས་པ། དེའི་ཚེ་རླུང་ཕན་ཡོན་ཆེན་པོ་ཞེས་བྱ་བ་འབྱུང་སྟེ། དེས་ལུས་ཀྱི་མཚན་མ་རྣམས་མངོན་པར་གྲུབ་པར་བྱེད་དོ། །སྡིག་པ་སྤྱོད་པ་ཞིག་ནའང་ཡིད་དུ་མི་འོང་བའི་ལུས་བཅུའི་སྐྱོན་གསོག་ཅན་དུ་བྱེད་དོ། །དགེ་བ་སྤྱོད་པ་ཞིག་ན་ཡང་ཡིད་དུ་འོང་བའི་ལུས་མཚན་དཔེ་ཅན་ངག་ཀུན་སྙན་པ་ཅན་དུ་འགྱུར་རོ། །དེའང་ཕོ་ཞིག་ཡིན་ན་གཡས་ཕྱོགས་སུ། །གདོང་གཡོགས་ཅོག་འདུག་འཚིག་པར་བལྟ། །མོ་ཞིག་གཡོན་ཕྱོགས་ལག་དངས་འགེབས་ལྟོ་བར་ཁ་བལྟས་མ་ཞུའི་འོག །ཞུ་སྟེང་བཅོས་ཤིང་བཅོས་པ་ལ། །གནས་ལྔར་ཀུན་ཏུ་འཆིངས་པ་ནི། །རྩ་རྒྱལ་ནང་ན་འདུག་པ་དང་། །གསལ་ཤིང་རྣོ་རྩེ་གཙུག་ལྟར་གནས། །མས་ཟོས་ཉུང་ཞིང་མི་ཞིམ་པ། །འདོད་སྤྱོད་དྲག་པོ་མཆོངས་དང་ཡུན། །རིང་ཉལ་འདུག་བདེ་སྡུག་བསྔལ་ཞེས་བྱའོ། །ཞག་བདུན་ཕྲག་ཉེར་བརྒྱད་པ་ལ། །རྟོག་པས་འདུ་ཤེས་བརྒྱད་སྐྱེའོ། །ཞེས་པ། དེའི་ཚེ་རླུང་ཀུན་ཏུ་རྟོག་པ་ཞེས་བྱ་བ་དེས། མངལ་ལ་ཞེན་པ་ཁང་བུ་བརྩེགས། །ཁྲི་སྟན་ཆུ་མིག་རྫིང་བུ་དང་། །ཆུ་བོ་ཀུན་དགའ་སྐྱེད་མོས་ཚལ། །འདུ་ཤེས་བརྒྱད་པོ་འབྱུང་བར་འགྱུར། །ཞེས་བྱའོ། །བདུན་ཕྲག་ཉེར་དགུ་པ་ལ། མེ་ཏོག་ཕྲེང་བས་ཁ་དོག་བསྒྱུར། །ཞེས་པ། དེའི་ཚེ་རླུང་མེ་ཏོག་ཕྲེང་བས་པགས་པའི་མདོག་བཟང་ཞིང་མཚན་མ་རྣམས་གསལ་བར་བྱེད་དེ། ལས་ཀྱི་དབང་གིས། ཁ་དོག་ལྔ་པོ་སོ་སོར་འབྱེད་དོ། །བདུན་ཕྲག་སུམ་ཅུ་པ་ལ། ལྕགས་སྒོས་སྤུ་དང་སེན་མོ་འཕེལ། །ཞེས་པ ། དེའི་ཚེ་རླུང་ལྕགས་སྒོས་སྐྲ་དང་སྤུ་དང་སེན་མོ་རྣམས་འཕེལ་བར་བྱེད་དོ། །ཁ་དོག་དམར་ནག་རྣམས་རབ་ཏུ་གསལ་བར་བྱེད་དོ། །བདུན་ཕྲག་སུམ་ཅུ་གཅིག་པ་ནས་ལྔའི་བར་དུ་ཟླ་བ་གཅིག་དང་ཞག་ལྔ་ལ། བདུན་ཕྲག་ལྔ་པོ་ཡངས་བྱེད་ཀྱིས། །མཚན་མ་ཐམས་ཅད་འཕེལ་བར་བྱེད། །ཅེས་པ། རླུང་ཡངས་པར་བྱེད་པས་ལུས་ཀྱི་ཡན་ལག་ཕུན་སུམ་ཚོགས་པར་བྱེད་ཅིང་ཡངས་པར་འགྱུར་ཞིང་ཉིང་ལག་ཡོངས་སུ་རྫོགས་པར་བྱེད་དོ། །བདུན་ཕྲག་སོ་དྲུག་པ་ལ། གཡོ་བྱེད་འབྱུང་བའི་སེམས་སྐྱེའོ། །ཞེས་པ། དེའི་ཚེ་རླུང་གཡོ་བར་བྱེད་པས་མངལ་དུ་འདུག་ཏུ་མི་འདོད་པར་འབྱུང་བའི་བསམ་པ་སྐྱེ་བས། མངོན་པར་མི་དགའ་བར་འགྱུར་རོ། །བདུན་ཕྲག་སོ་བདུན་པ་ལ། ལྡང་བས་ཕྱིན་ཅི་མ་ལོག་པའི། །འདུ་ཤེས་ལྔ་པོ་འབྱུང་བར་འགྱུར། །ཞེས་པ། དེའི་ལྡང་བས་འདུ་ཤེས་ལྔ་ནི། མི་གཙང་བའི་འདུ་ཤེས་དང་། དྲི་མི་ཞིམ་པ་དང་། བཙོན་རའི་དང་། མུན་ནག་གི་དང་། ཡོངས་སུ་སྐྱོང་བའི་འདུ་ཤེས་ལྔ་ཐ་མལ་པ་ཕྱིན་ཅི་མ་ལོག་པར་དེ་འབྱུང་བར་འགྱུར་རོ། །དེ་ཡི་རང་བཞིན་བསྟན་པའི་ཕྱིར། །དེ་དག་རང་བཞིན་གསང་བའི་ཕྱིར། །ཆགས་སོགས་རང་བཞིན་བཞི་བཅུ་གཉིས། །ཤིན་ཏུ་གསལ་བར་བྱེད་པ་འབྱུང་། །ཞེས་པ་དེ་དག་རང་བཞིན་ཉིད་ཀྱིས་སངས་རྒྱས་པས་ལས་དེ་ཡང་ཡང་དག་མཛད་པའི་རང་བཞིན་རྒྱལ་བ་བཞི་བཅུ་གཉིས་སོགས་གསལ་བར་བྱས་པའི་ཕྱིར་ཏེ། ཆགས་པས་བསྡུས་པའི་རྟོག་ཚོགས་ཉིད་འབྲས་བུའི་ཕྱིར་རོ། །བདུན་ཕྲག་སུམ་ཅུ་བརྒྱད་པ་ལ། །ཐོགས་མེད་རྐྱེན་གྱིས་མགོ་ལུས་བསྒྱུར། །ཞེས་པ། རླུང་ཐོགས་པ་མེད་པའི་རྐྱེན་ཞེས་བྱ་བས་རབ་ཏུ་བསྒྱུར་ཏེ། གཞན་རླུང་ཁ་མཐུར་དུ་ལྟ་བ་ཞེས་བྱ་བ་འབྱུང་སྟེ། མགོ་མཐུར་དུ་བལྟ་ཞིང་ལག་གཉིས་རྐྱང་སྟེ་གྱེན་དུ་ཕྱོགས་པར་བྱས་ཏེ་མཐར་གྱིས་འབྱུང་བར་འགྱུར་རོ། །དེ་འཆི་བའི་ལས་ཅན་ནི་ཡན་ལག་བསྣོལ་ཏེ་འགྱུར་མི་ནུས་པ་དང་མི་དགེ་བས་དེ་ཉིད་དུ་འཆི་བ་དང་། མ་ཡང་སྡུག་བསྔལ་མྱོང་བའམ། འཆི་དུས་བྱེད་དོ། །དགེ་བ་ཅན་ལ་དེ་དག་མི་འབྱུང་ངོ་། །རང་བཞིན་སེམས་དཔའ་ལྷུམས་ནས་འབྱུང་། །ཞེས་པ་བདུན་ཕྲག་སུམ་ཅུ་རྩ་བརྒྱད་འདས་ནས་མངལ་ནས་འབྱུང་བ་ནི་དོན་དུ་རང་བཞིན་སེམས་དཔའ་བལྟམས་པའོ། །དེའི་ཚེ་དེ་ལ་བ་གླང་གསོན་བཤུས་ལྟ་བུའི་སྡུག་བསྔལ་ལོ། །ཞག་བདུན་ལོན་ནས་སྲིན་བུའི་རིགས་སྟོང་ཕྲག་དྲུག་ཅུ་ལུས་ལས་སྐྱེས་ཏེ་ཟ་བར་བྱེད་པ་ནི་ཐ་མལ་པའི་དང་མངལ་མཐུན་པའོ། །གཞུང་ཉིད་དུ། རང་བཞིན་ཡེ་ཤེས་རྡོ་རྗེའི་ཕྱིར། །རྡོ་རྗེའི་ཕུང་པོ་ཞེས་སུ་གསུངས། །ཞེས་པས། གང་ཕུང་པོ་སྐྱེས་པ་དེ་ཉིད་ན་རང་བཞིན་གྱི་གཏན་ཚིགས་སམ། བདག་ཉིད་ཆེན་པོའི་གཏན་ཚིགས་ཀྱི་ཕུང་པོ་ནི་རྡོ་རྗེ་ལྔའི་བདག་ཉིད་པས་སྣང་དུ་ཟད་དེ་རྡོ་རྗེ་ཕུང་པོ་ཉིད་དུ་རྒྱུད་ལས་སྟོན་པས་གསུངས་པ་ནི་ལུང་གི་གཏན་ཚིགས་ཏེ། དེ་ཡང་སྔོན་དུ་ཤེས་པར་བྱ་བ་སྟེ་མཚན་ཉིད་དང་པོའི་དོན་ཏེ། ༈ །ལུས་གཉིས་པའི་ཡན་ལག་བསྟན་པའི་ཕྱིར། རང་བཞིན་གནས་རྒྱུད་རྣམ་པ་གཉིས། །ཞེས་པ་གཉིས་པའི་ལུས་ཏེ་དེ་ཉིད་དང་སྔོན་དུ་བྱེད་པའི་རྒྱུད་དོ། །དེ་ལས་སྔ་མ་བསྟན་པའི་ཕྱིར། །སེམས་ནི་རང་བཞིན་ཡེ་ཤེས་ཏེ། །ཞེས་པ། རྟོགས་བཅས་ཀྱི་སེམས་ཉིད་རང་བྱུང་གི་ཡེ་ཤེས་ཡིན་པར་བསྟན་པ་སྟེ། ལྷག་པའི་གནས་སྐབས་གསུམ་ལས་རྒྱུའི་གནས་སྐབས་སོ། །མ་བཅོས་རྒྱུན་གྱི་སྐད་ཅིག་མ་དེ་ཡིས་མ་བྱས་གང་ཡང་མེད། ཅེས་པ། འཁོར་བའི་བྱེད་པ་པོ་ཉིད་ནི་སྐད་གཅིག་མ་བག་ཆགས་དང་བཅས་པ་སྟེ། ངེས་པར་དེ་ཉིད་ངོ་བོ་ཉིད་ཀྱི་རྒྱུ་ཁོ་ནའོ། །མ་རིག་མུན་འཁོར་བསླད་པ་ནི། །ཞེས་པ་འཁོར་བའི་རྒྱུ་རྐྱེན་གྱིས་སེལ་ཞུགས་པའོ། །ཇི་སྙེད་འཇིག་རྟེན་འཁྲུལ་བའི་ཆོས། །ཞེས་པ། འཁོར་བའི་རང་བཞིན་དང་ངོ་བོའོ། །ཕྱིི་ནང་རྟེན་འབྲེལ་གཉིས་སུ་འཁོར། །ཞེས་པ་འཁོར་བའི་ཚུལ་དེ་སྲིད་པའི་འཁོར་ལོར་བག་ལ་ཉལ་དང་མངོན་དུ་རྒྱུས་ཁམས་གསུམ་བསྐོར་བ་ནི་མིང་གྲུབ་བོ། །མི་མཐུན་བདེ་སྡུག་མྱོང་བར་འགྱུར། །ཞེས་པ། བདེ་སྡུག་མི་མཐུན་པ་ནི་འབྲས་བུ་སྟེ་ཉེས་པའོ། །དབང་པོ་ཡུལ་དུས་སྣང་བ་ཀུན། །རང་རྒྱུད་ཡོད་པ་མ་ཡིན་ཏེ། །ཞེས་པ། གང་གཞལ་བར་བྱ་བ་འཁྲུལ་བའི་སྣང་བ་གཉིས་མ་གྲུབ་པ་ནི་ཡུལ་མིག་བརྩིར་བའི་ཟླ་བ་གཉིས་པ་ལྟར། སེམས་ལ་རང་རྒྱུད་ཡོད་པ་དངོས་པོ་གཞན་པར་མེད་པ་ནི་ལུགས་གཞན་དང་ཡང་མཐུན་ཏེ། དེ་དག་དྲང་བའི་ཡང་བརྗོད་པའོ། །ལྷག་མ་ནི་བཞི་དང་ཡང་འབྲེལ་ཏེ། ཀུན་གཞི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །ཞེས་པ། མི་གཙང་བ་བསྒོས་པའི་སྤྱོད་ཡུལ་རུས་པར་སྣང་བ་ལྟར། སྟོན་པ་ནི་ཡུལ་མ་གྲུབ་པའི་གཏན་ཚིགས་སོ། །གཉིས་སྣང་ཆོས་ཀུན་རྣམ་རྟོག་བཤད། །ཅེས་པ། རྟོག་པའི་གཟུགས་བརྙན་སྣང་བའི་ཕྱིར་རོ། །དེ་ཡང་ཐགས་སྦྲུལ་དུ་སྣང་བའི་དུས་དང་། རྣམ་པར་མཐོང་བའི་དུས་གཉིས་ཀ་ན་སྦྲུལ་མེད་པར་འདྲ་བ་བཞིན་དུ་སྣང་ཡང་ལོགས་སུ་མ་གྲུབ་པའོ། །ངེས་པའི་དོན་དུ་ཞེས་པའི་སྒྲར་རྣམ་པ་ཐམས་ཅད་མཁྱེན་པའི་ཡེ་ཤེས་རང་སྣང་བས་དངོས་པོ་མེད་པ་ལ་མཐོང་བའི་རྟོག་སྣང་ཡིན་ནོ། །དེའི་ཕྱིར་ཡུལ་ལོགས་སུ་མ་གྲུབ་པའོ། །འོ་ན་སེམས་གྲུབ་པ་ཡོད་དོ་ཞེ་ན། རྣམ་རྟོག་རང་གི་སེམས་ཡིན་ཏེ། །ཞེས་པ། རྟོག་པའི་སེམས་སྐད་གཅིག་མའི་དངོས་པོའམ་རྒྱུ་རྟགས་པའམ། སྟོང་པ་ཉིད་མ་ཡིན་ཏེ། རྟོག་པའི་ཡུལ་ཞེས་ངོ་བོ་མ་སྐྱེས་པའི་ཕྱིར་རོ། །རྟོག་བདོ་བ་ཉིད་ན་རང་གི་མཚན་ཉིད་རིག་པར་གསལ་བ་ནི། ཉི་མས་བརྒྱན་པའི་ནོར་བུ་ལྟ་བུའོ། །འོ་ཤེས་རིག་ཏུ་གྲུབ་བོ་ཞེ་ན། མ་སྐྱེས་ཡེ་ཤེས་བརྗོད་དུ་མེད། །ཅེས་པ། ངོ་བོ་མིང་ཙམ་བརྗོད་པར་ནུས་མོད་ཀྱང་། འདིའོ་ཞེས་བསྟན་དུ་མེད་པ་དང་། རྒྱུ་རྐྱེན་བྲལ་བ་དང་། སྐད་ཅིག་མ་མེད་པ་དང་། རང་སྤྱི་དུས་གཅིག་ཏུ་ཡེ་རང་གསལ་ལ་འདི་འདྲར་སྨྲར་ཡུལ་མེད་པའི་ཕྱིར་གཟུགས་འཛིན་བཞི་ཅར་མ་གྲུབ་བོ། །དེ་བས་ན་ཐམས་ཅད་མ་ལུས་ཆོས་སོ་ལོག །སེམས་ཉིད་ལས་ནི་གཞན་མེད་ཕྱིར། །ཞེས་པ་གཏན་ཚིགས་སོ། །འདི་ལྟར་སྣང་བ་ཐམས་ཅད་ཀུན། །ཞེས་པ། སྤྱོད་ཡུལ་ལོ། །བརྡོས་པ་ཅན་གྱི་ཆོས་མེད་དེ། །ཞེས། ཡེ་ཤེས་དང་མ་བྲལ་བས་སྐྱེ་བོས་མཐོང་བ་མིན་པ་ལྟ་བུ་སྟོན་པའོ། །རྟོག་མེད་རང་རིག་འོད་གསལ་བའི། །ཞེས་པ། རིལ་ཡེ་ཤེས་ཀྱང་ངོ་བོ་མེད་པ་དང་ཡུལ་མེད་པའི་ཡེ་ཤེས་ནི་ཆོག་པར་འཛིན་པའི་མི་རྟོག་པ་ལ་སོགས་པའི་བཞི་ལས་སྤགས་པར་མ་བསྒྲིབས་པའང་། འདི་ལ་རང་གཉིས་གཅིག་གིས་གཅིག་རིག་པ་དང་། རང་གཅིག་ཡུལ་དུ་བྱེད་པ་མེད་པའོ། །ཡེ་ཤེས་འབའ་ཞིག་ཁོ་ནའི་ཕྱིར། །ཞེས་པ། དེ་བཞིན་ཉིད་ཀྱི་ཡེ་ཤེས་ལ་སེལ་མེད་པ་ནི་ཐུན་མོང་མ་ཡིན་པའི་གཏན་ཚིགས་ཏེ། རེ་དོགས་བཅད་པོའི་ཕྱིར་རོ། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོར་བཤད་ཅེས་པ། གང་འཁྲུལ་པ་སྣོད་བཅུད་དུ་རིག་པ་དང་སྣང་ལ་ཞེན་པའི་ཡུལ་གྱི་རང་བཞིན་ནོ། །དེ་མ་གསལ་བར་མེད་པ་ནི་སྣང་བ་མི་འགོག་ཀྱང་ངོ་བོ་མི་རྙེད་པར་རྟགས་ཡུལ་རང་བྲལ་བ་ནི། སྣང་སྟོང་གཉིས་སུ་མེད་པའི་ཆོས་ཀྱི་སྐུར་ཡེ་ནས་ཀུན་གསལ་བ་ནི་དོན་དམ་གྱི་གནས་ལུགས་ཏེ། དེ་ཉིད་ཆོས་སྐུ་ཆེན་པོར་གསུངས། །ཞེས་གསུངས་ཏེ། རྒྱུད་ལས། ཐམས་ཅད་དག་ཅེས་བྱ་བ་ཡང་། །དངོས་པོ་གསལ་དག་མ་ཡིན་ཏེ། །སྣང་སྤྱོད་ཉིད་ན་རྣམ་པར་དག །ཅེས་པ་དང་། འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོར་གསུངས། །ཞེས་འབྱུང་བའི་ཕྱིར་རོ། །དེ་ལྟར་ཆོས་སྐུ་ཀུན་ཏུ་འོད་སྤར་བ་རང་ལ་རྫོགས་པར་བསྟན་ནོ། །དེའི་ཕྱིར་བདག་གཞན་སྦྱང་བྱ་ལ་པདྨ་སྤྱན་གྱིས་རྫོགས་པར་བསྟན་པའི་ཕྱིར། རྣམ་དག་རང་བཞིན་རྒྱུད་ཉིད་ལ། །སྒོ་དང་བསྒོ་བར་བྱ་བ་ཡིས། །མཚན་མའི་ཉེས་སྐྱོན་ངང་གིས་མེད། །ཅེས་པ། དེ་ལྟར་ངང་གིས་སྨྲ་བསམ་ལས་འདས་པ་ཆོས་ཀྱི་སྐུར་རང་བཞིན་གྱིས་རྒྱུད་དུ་ངོ་བོས་འབྲེལ་བ་དང་བདུན་ཚང་བས་མིང་ཐོབ་པ་ལ་ཡུལ་དང་ཤེས་པར་དབྱེར་མེད་པས་བཅད་པའི་དྲི་མ་རང་བཞིན་གྱི་གཏན་ཚིགས་ཀྱིས་མེད་པར་བསལ་བ་འདམ་སྐྱེས་ལྟ་བུའི་ཕྱིར་རོ། །དེ་བས་སྤར་བ་དེ་རང་ལ་ཡོད་པས་དེར་བརླབས་པས་སྣང་དུ་བཏུབ་པ་ནི་དོན་ལ་རྒྱུ་མ་ཡིན་ནོ། །ཡི་གེ་འཁོར་ལོའི་ས་རང་བཞིན་གྱིས་གནས་པར་བསྟན་པའི་ཕྱིར། གནས་དང་འབྱུང་བ་མ་ལུས་ཀུན། །རང་རིག་ཡེ་ཤེས་གཟུགས་སུ་སྐྱེ། །སྐུ་དང་ཡེ་ཤེས་བསམ་མི་ཁྱབ། །ཅེས་པ། དམིགས་པ་དང་། རྟེན་པའི་གནས་དྲུག་དྲུག་ཕྱི་ནང་སྣང་བ་དང་། ལྔ་འབྱུང་བ་ཐམས་ཅད་རྟོག་པའི་སྐད་ཅིག་མ་མ་སྐྱེས་པ་སྣང་བ་ཉིད་ན་གསུམ་མ་དམིགས་པར་ཡེ་ཤེས་རང་སྣང་བ་ནི་ཕྱོགས་གཅིག་ནས་སྐྱེད་པར་བརྗོད་ཀྱང་འཕེལ་འགྲིབ་འགྲོ་འོང་གི་རྒྱུ་མེད་པའོ། །དེ་བས་ན་མཐོང་ཐོས་ཀུན་ཡེ་ཤེས་ཀྱི་སྐུ་ཉིད་ཡིན་པ་ནི་གྲངས་དང་མཐའ་ཁྱོན་ངོ་བོ་དཔགས་པ་ལས་འདས་པའི་ཕྱིར་རོ། །དེས་རྒྱས་པར་འཁོར་ལོ་དང་སྤྲད་པའི་ཕྱིར། །རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་པ། དཀྱིལ་འཁོར་ལྷ་རྣམས་ལྷག་པའི་དོན་དམ་པ་རྟོགས་ཚོགས་མ་སྐྱེས་པ་ལ་ངོ་བོ་ཉིད་ཀྱི་རྒྱུར་གནས། གཉིས་པ་ཕྱག་རྒྱ་ཡེ་ཤེས་སྒྱུ་མར་ཀྲོང་ངེ་ཝ་ལེ་གནས་པ འོ། །གསུམ་པར་དེ་དག་གཉིས་མི་ཕྱེད་དེ་དུས་གཅིག་ཏུ་གནས་ཀྱང་ངོ་བོ་ཡུལ་གཉིས་ལས་འདས་སོ། །དེ་ལ་ངོ་བོ་སྤྲད་པ་ནི་ངོ་བོ་རྟག་པ་མིན་ཏེ། རྒྱུད་གཞུང་ངེས་པ་སྟེ། ཐ་དད་མོས་གྲོལ་ཆེད་དུ་བསྟན་པ་ལ། འདིར་ངོ་བོའི་ཚུལ་ནས་ལྔ་ཕུང་ནི་ཡེ་ཤེས་རང་སྣང་རྣམ་གྲོལ་གྱི་ཕུང་པོ་བས། གཅིག་ཀྱང་སྐུ་གསུང་ཐུགས་ཡོན་ཏན་ལས་ལྔ་དང་ལྡན་པས་ལྷུན་གྱིས་གྲུབ་པའི་ཕྱིར་རོ། །མཚན་ཉིད་ཀྱིས་ལྔའམ་དེ་ཉིད་དུ་སོན་པ་དང་མི་སྐྱེ་མི་འཇིག་པ་ལ་སོགས་པ་ལྔའི་བདག་ཉིད་པས་གང་ལ་སྦྱར་ནའང་། ཡིན་ནའང་། འདིར་དྲང་བར་ཕྱོགས་ངེས་པ་ནི། སྤྱོད་པ་གནང་བའི་ཐབས་ཀྱིས་འབྱིན་པ་དང་། དེ་སྔོན་དུ་འགྲོ་བའི་རྫོགས་པའི་རིམ་པས་སྦྱར་བ་ནི་ཐབས་དང་ཐབས་ལས་བྱུང་བའི་ཚུལ་ནས་བརྗོད་པའོ། །ལྷ་གཞན་རྗེས་སུ་མཐུན་ཏེ། དོན་དུ་རིགས་ལྔ་ཡང་ཕྱོགས་དང་ཁ་དོག་ལས་བརྗོད་པ་དང་། ཡོན་ཏན་ཆ་ལས་བརྗོད་པ་དང་། འཁོར་ལོའི་དབང་དུ་བརྗོད་པ་དང་། ཡེ་ཤེས་ཀྱི་ཆེ་བ་དང་། རྒྱུད་ཀྱི་ཆེ་བ་ལ་སོགས་པ་ཐ་དག་ཀྱང་། རིགས་ལྔའམ་རིགས་ཆེན་ཉིད་སྣང་བས་རྟོག་པ་དང་སྤྲད་ལ་བཤད་པ་བཞིན་ནོ། །ས་ཆུ་སྤྱན་དང་མ་མ་ཀི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །ཞེས་པ། སྦྱར་བ་གཉིས་ཐུན་མོང་ཡིན་མོད་ཀྱང་། ཡུམ་ཁོ་ན་དང་སྦྱར་བ་ནི་ལས་ཀྱིས་བཞག་པ་ཕྱི་ནང་གསང་བ་གསུམ་འཆར་དུ་འཐད་དོ། །སྐྱེ་མཆེད་ཁམས་རྣམས་མང་པོ་ཀུན། །སེམས་དཔའ་སེམས་མའི་དཀྱིལ་འཁོར་ཉིད། །ཅེས་པ། བཅུ་གཉིས་དང་བཅོ་བརྒྱད་ཀྱིས་རྟོག་པ་ལ་དང་དབང་པོ་རྣམ་ཤེས་བརྒྱད་ཀྱི་ཡུལ། དུས་ནི་སྦྱོར་བའི་རྗེས་སུ་མཐུན་གྱིས་རང་བཞིན་ལྷུན་གྱིས་གྲུབ་པའི་དབང་སྟེ། རྒྱུད་འཛིན་པའི་སངས་རྒྱས་རེ་རེར་སྔ་ཕྱི་མི་འདོད་དེ། དེ་ལྟར་ན་རྟོག་པ་དང་སྤྲད་པའི་རིགས་པས་འགལ་ཏེ། བདག་དང་རྒྱུན་མ་ཆད་པའི་ཕྱིར་རོ། །གསང་ཡུལ་དབང་པོ་རྣམ་ཤེས་དག །མ་ལུས་འཇོམས་ཕྱིར་ཁྲོ་བོ་མཆོག །ཅེས་པ། ཆགས་པའི་ལམ་བཤད་པའི་གཞུང་དུ་ལས་ཀྱི་ཁྲོ་བོར་སྒྱུ་འཕྲུལ་ཐལ་བ་དང་རྡོ་རྗེ་ལ་སོགས་པ་ལས། གསུངས་པའི་ཕྱིར་རོ། །ཐོས་བསམ་དབང་དུ་དེ་ཉིད་ཀྱང་རང་རིག་རང་སྣང་བ་ལ་ངོ་བོས་གྲུབ་པ་ལ་སོགས་ས་གསུམ་གྱི་ཕྱིར་ཏེ། སྔ་ཕྱི་ལ་སྦྱར་ཏེ། རྟག་སོགས་མཚན་མ་ལས་སྐྱེད་ཕྱིར། །ཡུམ་དེ་ལས་ཀྱི་མི་གནས་བཤད། །ཅེས་པ། ཕྱིན་ཅི་ལོག་བཞི་ལྔ་པ་སྐྱེད་པས་ཡུམ་གྱིས་ངེས་ཚིག་གྲུབ་པའོ། །འོན་ཏེ་བསྐྱེད་པའི་ཡུམ་ཡིན་ཡང་སྤྱད་པའི་ཡུམ་མ་ཡིན་པས་འགལ་སྙམ་པ། ལས་ཀྱིས་གྲུབ་པས་རྗེས་སུ་མཐུན་པས་ཁྲོ་མོར་འགྱུར་ཏེ། ཆགས་པས་སྐྱེད་པ་ལྟ་བུའི་ཕྱིར་རོ། །ཡིད་ཆེས་བཟང་པོ་བཟང་མོའི་མཁའ། །ཞེས་པ། དམན་པའི་ངོར་ཡིད་ཀྱི་རྣམ་ཤེས་ཁྱད་པར་གྱིས་ཡུལ་དང་བཅས་པ་ཀུན་ཏུ་བཟང་པོ་ཡབ་ཡུམ་ཡིན་པར་བཤད་པ་བཞིན་ནོ། །དེའང་ཞེན་གྲོལ་གྱི་ཕྱིར་བརྗོད་ཀྱི། རྒྱུད་ལས། སེམས་ཀྱི་སེམས་ཉིད་བྱེད་པའི་གཙོ། །ཀུན་ཏུ་བཟང་པོ་རྡོ་རྗེ་ཡིད། །ཅེས་པ། ཆོས་ཀྱི་ཆོས་ཉིད་ཤེས་བྱའི་ཡུལ། །ཀུན་ཏུ་བཟང་མོ་བདེ་བའི་ཡུལ། །ཞེས་འབྱུང་བས། དབྱིངས་དང་ཡེ་ཤེས་ཉིད་ལ་བརྗོད་པར་འཐད་དོ། །སོ་དྲུག་ལས་བྱུང་བདེ་བའི་དུས། །ཆགས་སོགས་ཡང་དག་ཉོན་མོངས་དྲུག །ཡེ་ཤེས་དྲུག་གི་ས་བོན་དུ། །འདུལ་ཕྱིར་སྤྲུལ་བ་ཞེས་སུ་གསུངས། །ཞེས་པ་ཆགས་པའི་ལམ་དུས་སུ་ཤཱི་རས་དྲུག་གི་ཐིག་ལེ་བདེ་བ་འདུས་པས་ཡེ་ཤེས་ཆེན་པོར་གསལ་བའི་ཕྱིར། གང་ཉོན་མོངས་པ་དྲུག་ཐབས་ཀྱིས་བཏུལ་བས། ཡེ་ཤེས་དྲུག་འབྱིན་པའི་ལས་ཀྱི་སྤྲུལ་པར་བརྗོད་པའོ། །དེ་ཡང་མིན་ལས་ཡིན་པར་མ་བསྒྱུར་ཏེ། ཐབས་ཡིན་པར་བློ་ལ་སྣང་བར་བྱས་པ་ཙམ་མོ། །ངེས་པར་དྲུག་རིག་པར་སྣང་བ་ནི་སོ་དྲུག་གི་ཡུལ་སེམས་འཕྲད་པ་ལས་དྲུག་བསྐྱེད་པ་ཉིད་དེ་ལྟར་ཤེས་ན་ལམ་པའི་དབང་དུ་ས་བོན་དུ་བརྗོད་ཀྱང་ངོ་བོ་ལ་ཡེ་ཤེས་དྲུག་ཉིད་དུ་བཏུབ་པས་ཐུབ་པ་ཆེན་པོའོ། །དེ་ལྟར་ས་དང་འབྲས་བུ་རང་ལ་གནས་པས་མ་ཤེས་ཤིང་མེད་ན་དངོས་དང་བར་མ་སྦྱངས་དང་འཆིང་བུ་དང་རིན་པོ་ཆེ་ལྟར་འཕར་བ་མེད་དེ། འབྲེལ་པ་གསུམ་བཅད་པའི་ཕྱིར་རོ། །མི་བཟད་པ་རྒྱན་གྱི་འཁོར་ལོ་རང་ལ་གནས་པ་ནི། སྐུ་གསུང་ཐུགས་དང་ཡོན་ཏན་ལས། །ཉི་ཤུ་རྩ་ལྔར་རང་ལ་གནས། །ཞེས་པ ། ཡེ་ཤེས་རྒྱལ་པོ་རྡོ་རྗེ་འཛིན་པའི་ཡོན་ཏན་སྣང་བ་ནི། སེམས་རང་བྱུང་གི་ཡེ་ཤེས་ཀྱི་ཡོན་ཏན་ནོ། །དམན་པ་ལ་སྤྲད་པ་ནི། ཀུན་གཞི་ཆེན་པོ་ནི་བྱང་ཆུབ་ཀྱི་སྐུ་སྟོང་པའི་ཡེ་ཤེས་རིག་པའི་གསུང་ངོ་། །རྟོག་སེམས་ནི་མེ་ལོང་ཡེ་ཤེས་ཏེ་ཆོས་སྐུ་དོན་གྱི་གསུང་ངོ་། །ཉོན་མོངས་པ་དང་། ཉིད་ཀྱི་མཉམ་པ་ཉིད་སོ་སོར་རྟོག་པ་སྟེ་ལོངས་སྤྱོད་རྫོགས་པའི་སྐུ་གསུང་ངོ་། །སྒོ་ལྔ་བྱ་བ་གྲུབ་པ་སྤྲུལ་སྐུ་གསུང་ངོ་། །རྡོ་རྗེ་སྐུ་གསུང་ནི་དེ་དག་མཚན་ཉིད་ལས་བསྟན་པའོ། །དེ་བས་ན། ཡོན་ཏན་ལྔ་ནི་སྤྱིར་བསྟན་ལ། །ཕྲིན་ལས་རིགས་བཞི་བཞིས་བྱེད་ལ། །ལས་ཀུན་བྱེད་པས་ལྔ་པའོ། །འོན་ཀྱང་དཔག་བསམ་ཤིང་དང་ནོར་བུ་རིན་པོ་ཆེ་ལྟ་བུར་སྟོན་ཏེ། སྐུ་ཉིད་གསུང་གི་དཀྱིལ་འཁོར་ལ། །གསུང་ཉིད་ཐུགས་ཀྱི་དཀྱིལ་འཁོར་ཏེ། །དབྱེར་མེད་དེ་བཞིན་ཡོངས་ཀྱིས་སོ། །ཞེས་གསུངས་པས། གཞི་དང་བརྡ་སྤྲད་པ་དང་། གསལ་བའི་སྐབས་ཀྱིས་བརྗོད་ཀྱི་ངོ་བོ་མ་ཆད་པས་ཟད་པ་མེད་ལ། ཅིག་ཀྱང་ཀུན་དངོས་པས་ལྡན་པ། ཀུན་བཟླུམ་པས་མིང་ཐོབ་སྟེ་ཡེ་ནས་མ་བྱས་པར་གནས་པའོ། །རང་ལ་གནས་སྦྱངས་ཐབས་ཀྱི་ལམ་རྫོགས་པར་ཤེས་པར་བྱ་བའི་ཕྱིར། ཆོས་ཉིད་ཡེ་ཤེས་ཡོན་ཏན་ནི། །ཏིང་འཛིན་གསུམ་གྱི་ངོ་བོ་ཡིན། །ཞེས་པ། ངང་གི་ཆོས་ཉིད་རྩ་དེ་བཞིན་ཉིད་ཡིན་ནོ། །ཡེ་ཤེས་ཀུན་ཏུ་སྣང་ཡིན་ནོ། །ཡོན་ཏན་རྒྱུ་ཡིན་ནོ། །ངོ་བོ་ཡིན་པའི་ཕྱིར་ལམ་པའི་དུས་ན་དེ་ཉིད་བློ་ལ་སྣང་བར་བྱེད་པའི་ཕྱིར་རོ། །གཞན་དུ་ན་ཀུན་གཞི་དང་མིང་དང་སྒོ་ལྔ་ཡང་ཡིན་ཏེ། ངོ་བོས་ཡིན་པའོ། །འོ་ན་ངོ་བོ་ཆོས་སོ་ཅོག་དེ་གསུམ་དུ་མ་འདུས་པ་མེད་ན། འདི་ཁོ་ན་ལ་སྦྱར་བ་དང་། རང་བཞིན་དབང་དུ་རིགས་པས་འགལ་ལོ་ཞེ་ན། དེ་ནི་རང་བཞིན་ཏེ་ལྷ་མོད་ཀྱང་། འདིར་གྲུབ་པ་གསུམ་གྱི་ཕྱིར་དེ་ལྟར་བརྗོད་པའི་དགོས་པ། ཐབས་མ་འདྲེས་པར་རང་ལ་གནས་པར་ཤེས་པར་བྱ་བའི་ཕྱིར་བརྗོད་པ་དག་གོ། །དེ་སྟེང་དྭངས་མའི་ཐིག་ལེ་ནི། །བསྙེན་བསྒྲུབ་བཞི་རུ་ཤེས་པར་བྱ། །ཞེས་པ་བསྙེན་བསྒྲུབ་ཀྱང་རང་ལ་ཡོད་པར་བཏུབ་སྟེ་རྩ་གསུམ་མམ་བཞིའི་ཐིག་ལེ་ནི། ཆོས་ཉིད་ཀྱི་ཐིག་ལེ་ནི་དོན་དམ་པའི་ཕྱིར་བསྙེན་པའོ། །ཡེ་ཤེས་ཀྱི་ཐིག་ལེ་ནི་ཡེ་ཤེས་བརྒྱའི་ཕྱིར་ཉེ་བའི་བསྙེན་པའོ། །ཡོན་ཏན་གྱི་རྩའི་ཐིག་ལེ་ནི་འདོད་པ་ཚང་བའི་ཕྱིར་བསྒྲུབ་པའོ། །རང་རྒྱུད་ཀྱི་སྙིང་པོ་རྩའི་ཐིག་ལེ་ནི་དོན་དམ་པའི་ཕྱིར། འབྲས་བུ་ཀུན་ཏུ་འོད་ཀྱིས་བསྒྲུབ་པ་ཆེན་པོའོ། །དེ་དབྱིབས་ལས་བཞིའི་དཀྱིལ་འཁོར་ཏེ། ཞེས་པ། འོད་དཀར་པོ་ཟླུམ་པོ་དང་། མཐིང་ག་གྲུ་བཞི་དང་། དམར་པོ་ཟླ་གམ་དང་། དམར་ནག་གྲུ་གསུམ་ནི་དབྱིབས་ཀྱི་རང་བཞིན་གྱིས་ཞི་རྒྱས་དབང་དྲག་པོར་བྱེད་པའམ་ཕྲིན་ལས་ཏེ། འབྱུང་བཞི་གནས་ཀྱང་མི་འདོད་པ་མ་ཡིན་ནོ། །བཞི་བརྒྱད་རྩ་ནི་འཁོར་ལོར་གསུངས། །ཞེས། རྩ་བཞི་དང་བརྒྱད་ནི་ཡེ་ཤེས་བཞི་དང་སངས་རྒྱས་ཀྱི་དཀྱིལ་འཁོར་རང་ལ་གནས་པ་སྟེ། གཞན་དུ་ཀུན་གཞི་བྱང་ཆུབ་སེམས་ཀྱི་མཎྜལ་ལ། རྣམ་ཤེས་སྲས་བུ་བཞི་དང་བརྒྱད་ལྡན་པ་ཡང་འདོད་པའོ། །གསང་བའི་སྐབས་ལ་ཤེས་པར་བྱ། །ཞེས་པ། གསང་སྙིང་ལས་ཤེས་པར་བྱ་སྟེ། །གོ་དཀའ་ཞིང་ཀུན་གྱི་ཡུལ་མ་ཡིན་ནོ། །འཁོར་ལོའི་ལྷའི་གནས་པའི་ཡན་ལག་གི་ལྷ་རང་ལ་གནས་པར་བསྟན་ཕྱིར། བདེས་གང་བཞི་བཅུ་གཉིས་ཀྱི་རྩ། །ས་བོན་སྐུ་སྟེ་ཡི་གེ་གསུང་། །བདེ་ཐུགས་རྡོ་རྗེ་སྐུ་གསུང་ལྡན། །བཞི་བཅུ་རྩ་གཉིས་གསུམ་འཕྲོར་འགྱུར། །ཞེས། རྩ་གནས་བཞི་བཅུ་རྩ་གཉིས་ཀྱི་ལས་སུ་འཁོར་བ་མ་གྲུབ་པའི་ལས་རེ་བྱེད་པ་རང་རང་གི་རྟོག་པ་བསྐྱེད་པ་ཉིད་ངང་གིས་ལྷ་ཡིན་པས་དེ་རེ་ནས་ས་བོན་ནི་ཡེ་ཤེས་སྐྱེ་བའི་རྟེན་གཞི་བས་སྐུ་རྡོ་རྗེའོ། །རྩ་ཡི་གེའི་དབྱིབས་ཅན་ལ་ཡི་གེའི་དོན་ལྡན་པས་གསུང་རྡོ་རྗེའོ། །དེའི་བདེ་བ་ཡེ་ཤེས་ཀྱི་ཕྱིར་ཐུགས་ཡིན་པས་བརྒྱ་དང་ཉེར་དྲུག་ཏུ་སྤྲོས་པ་རང་བཞིན་གྱི་གནས་པའོ། །དབུ་རྒྱན་གནས་པ་ནི། གཅིག་ཀྱང་ཁམས་ཀྱི་བདེ་བ་ལྔ། །ཡེ་ཤེས་ཆེན་པོའི་རེས་གང་བ། །མ་ལུས་འཇོམ་པས་རྒྱས་བཏབ་པའོ། །ཞེས་པ། རྩ་གཅིག་གི་ནང་ན་ཡང་ཁམས་ལྔའི་བཅུད་ཡེ་ཤེས་བདེ་བ་དང་ལྡན་པས་རྟོག་པ་ཡེ་ཤེས་སུ་བཅོམ་པའི་ཕྱིར། ཡེ་ཤེས་ལྔས་རྩ་གནས་རྒྱས་འདེབས་པས་དབུ་རྒྱན་གནས་པའོ། །གཞན་དུ་ན། རྟོག་པ་བཞི་བཅུ་རྩ་གཉིས་དག །ཡེ་ཤེས་རང་སྣང་མ་འགགས་སྐུ། །བརྗོད་འདྲར་གོ་བྱེད་རྡོ་རྗེའི་གསུངས། །གཉིས་མེད་མཚན་འདས་ཐུགས་རྡོ་རྗེ། །དེ་རེའང་ཡེ་ཤེས་ལྔ་རྫོགས་དབང་། །བྱས་པ་མེད་པར་རང་གནས་པས། །ཐབས་དང་ཤེས་རབ་རང་ལ་སྣང་། །ཞེས་གསུངས་སོ། །གླེང་གཞི་རྫོགས་པར་བསྟན་པའི་ཕྱིར། །འབྲུ་བཞི་ངེས་པར་ལྡན་པའི་ཚེ། །སྒྲ་དབྱངས་གསུང་གི་བསྟན་པ་རྣམས། །ངེས་པར་བསྟན་ཕྱིར་བཞི་རུ་འདོད། །ཅེས་པ། འབྲུ་བཞིའི་དབྱིབས་སྒྲས་མཚོན་པ་ནི་དོན་གྱི་ཕུན་སུམ་ཚོགས་པ་དྲུག་སྟེ། གསང་བའི་ཁམས་གཉིས་ལས་རྫོགས་པར་རྒྱུད་ལས་གསུངས་པ་དང་། དྷརྨ་ཙཀྲའི་འོད་བཞི་དང་སྙིང་པོ་ཐིག་ལེ་དང་། ཤེས་པ་བཞི་དང་། ཆོས་ལ་སོགས་པའོ། །ཡང་འོད་བཞི་ཉིད་ཀྱིས་རྫོགས་པའོ། །དེའི་ལས་ཀྱིས་སྒྲ་སུམ་ཅུ་རྩ་གཉིས། དབྱངས་སུམ་ཅུ་རྩ་དྲུག་གིས་བསྡུས་པའི་རྒྱུད་སྟོན་པའི་ཕྱིར་གླེང་གཞིར་ངེས་ཏེ། ངེས་ལུང་རྒྱུད་ལ་གནས་པ་ནི། །ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་པ། ཆོས་སོ་ཅོག་སེམས་ཀྱིས་བཏབ་བསམ་བཞིན་སྣང་བས་རིགས་དང་རྒྱུད་རྟག་པར་རེད་པ་མེད་པའི་ཕྱིར་སེམས་སྣང་བར་མངོན་ཏེ་ཡུལ་མེད་དོ། །སེམས་ནི་རྒྱུད་ལས། བྱང་ཆུབ་སེམས་ཞེས་བརྗོད་པ་ནི། །གང་ནས་མ་འོངས་གར་མི་འགྲོ། །རྟོག་མེད་རང་རིག་ཁོ་ན་ཙམ། །སངས་རྒྱས་སེམས་ཅན་སེམས་ལ་གནས། །ཞེས་གསུངས་ཏེ། ངོ་བོ་ལྷུན་གྱིས་གྲུབ་པ་ལ་དམིགས་སུ་མེད་པའོ། །མཚན་ཉིད་སྐྱེ་འཇིག་མེད་པའོ། །དེ་ནི་སྒྲོ་སྐུར་ལུང་དུ་བསྟན་པ་དགུ་གསུམ་དང་མ་བྲལ་མ་སྤངས་མི་ལྡན་པའི་ཕྱིར་ལུང་ངོ་། །བདེན་འོས་གཤའ་རིགས་ཚད་མའི་ཕྱིར་ན་སྟོན་པས་བདེན་པར་གསུངས་ཏེ། རྒྱུད་ལས། སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཞེས་གསུངས་སོ། །ཚད་བཞི་ཕབ་པའི་དོན་ཡིན་ཏེ། །ཞེས་པ། ལུང་དང་མན་ངག་དང་རིག་པ་དང་མཚོན་པར་བྱེད་པའི་རྟགས་དཔེ་དང་ཚད་དཔེ་དང་ཚད་མས་གཞལ་བར་བྱ་བའི་དོན་དྲི་མ་མེད་པའོ། །ཞེས་གསུངས་ཏེ། འདི་སྐད་དུ། དཔེ་ལུང་མན་ངག་རང་རིག་པ། །ཚད་མ་མི་བསླུ་འོས་གཤའ་བས། །ཡིད་ཆེས་བྱེད་པས་རྣལ་བྱས་པ། །ངེས་པ་གྲུབ་པའི་དོན་ཆེན་ནོ། །ཞེས་གསུངས་སོ། །འདི་ཡང་ཁ་ཅིག་ཏུ་ཆོས་ཡིན་པའི་རྟགས་བཞི་བདེན་པའོ། །ཁ་ཅིག་ཏུ་མངོན་སུམ་དང་། རྗེས་སུ་དཔག་པ་དང་། ལུང་དང་། རིགས་པ་བཞི་ཐུན་མོང་མ་ཡིན་པའི་ཉིད་ཀྱིས་གཏན་ལ་ཕབ་པ་དང་འདྲ་སྟེ། རང་བཞིན་གྱི་སྒྲོ་སྐུར་བཅད་པའི་ཕྱིར་རོ། །དེ་བས་ཐུན་མོང་མིན་པའི་དོན་དང་ཐུན་མོང་མིན་པའི་གཏན་ཚིགས་ཀྱང་གནས་ཏེ། དག་པ་རྣམ་གསུམ་ཚུལ་གནས་ཤིང་། །ཞེས་པ། མ་དག་པ་ལྟར་སྣང་བ་ངང་གིས་སྣོད་བཅུད་རྒྱུད་གསུམ་དག་པ་ཡབ་ལྔ་ཡུམ་ལྔ་ཡེ་ཤེས་ལྔའི་དོན་ཉིད་དེ། ཡེ་ད་ལྟར་གནས་པ་ལུགས་གསུམ་བརྗོད་ཟིན་ཏོ། །འོན་ཀྱང་གཏན་ཚིགས་སུ་འདོད་པ་དང་ཆོས་ཅན་གྱི་དབང་དུ་བརྗོད་ཀྱི་དག་པའི་གྲངས་ནི་མ་ངེས་སོ། །ཚིག་ལམ་ཡང་ན་གནས་ཏེ། འབྱུང་ལྔར་འདུས་པའི་ཐབས་ཆེན་ཏེ། །འགྲོ་བ་ཀུན་ལ་རང་བཞིན་གནས། །ཞེས་པ། དཔའ་བོ་འབྲུ་ལྔར་རིལ་འདུས་པ་ནི་ཤེས་པར་བྱ་བའི་དམ་པ་ཡིན་ཏེ། དེ་ཉིད་ཀྱིས་གྲོལ་བར་བྱེད་པའི་ཐབས་ནི་འགྲོ་བ་ཀུན་གྱི་སྤྲུལ་པ་ལ་སོགས་པ་ན་གནས་པའོ། །དེ་ཡང་གཟུགས་ཀྱིས་ཕྱེ་བས་བག་ལ་ཉལ་དང་མངོན་དུ་རྫོགས་སུ་གནས་པའོ། །གཞན་དུ་ན་དག་པ་གསུམ་ནི་བུམ་པའི་ཡི་གེ་ལྔར་ཉི་ཟླ་འདུས་པས་ཐོབ་པས་ཐབས་ཆེན་པོ་སྟེ་འགྲོ་བ་འདོད་ཁམས་པ་ལ་དངོས་སུ་གནས་སོ། །གཞན་གཉིས་པོ་ནི་གོང་མ་བཞིན་ནོ། །དེ་ལྟར་ལམ་དང་འབྲས་བུ་རང་ལ་གནས་པ་དེ་ཤེས་པས་རྐྱེན་གྱིས་ལྡང་བས་སྣང་བར་བྱེད་ཅིང་གྲོལ། ཐར་པ་ནི་གཉིས་ག་ལ་རག་ལུས་ཀྱང་རྣམ་པར་སྨིན་པར་འདོད་པ་མ་ཡིན་ནོ། །ཕྱི་མ་དེ་མངོན་དུ་བྱེད་པའི་རྒྱུད་བསྟན་པའི་ཕྱིར་རང་བཞིན་མངོན་དུ་རྒྱུད་ནི། ངོ་བོ་དང་ནི་རྐྱེན་ཉིད་དེ་ཞེས་པ། འདི་ཉིད་ཀྱིས་ལུས་རྣམ་པར་བཞག་པའོ། །དེ་ལ་ངོ་བོ་བསྟན་པའི་ཕྱིར། །འཇིག་ལྡང་ལ་སོགས་བྱང་སེམས་ལྔ། །ངེས་པར་སྐྱེ་བ་ངོ་བོ་ཡིན། །ཞེས་པ། ཐུན་མོང་དང་ཐུན་མོང་མ་ཡིན་པར་འཆད་དེ། ཐུན་མོང་ལ་སེམས་སྐྱེ་ལུགས་རིམ་གྱིས་པ་དང་ཅིག་ཅར་བའོ། །དེ་ལ་སྔ་མ་ནི་ཆོས་ཉིད་ཀྱི་རིགས་པས་མུན་པའི་ས་ནས་སེམས་ཕལ་པ་བརྒྱད་སྐྱེ་སྟེ། ལྷ་མཆོད་པ་ནི་མུ་སྟེགས་ཀྱི་ས་ལ་འདུག་པའོ། །དེའི་ཚེ་དབང་པོ་རྟུལ་པོ་ནི་ཉན་ཐོས་དང་རང་རྒྱལ་བ་རྣམས་ལ་འཇུག་པར་བྱེད་དེ། དེ་ནས་བརྒྱུད་དེ་འདིིར་འཇུག་པར་བྱེད་དོ། །དབང་པོ་རྣོན་པོ་བ་ནི་ཅིག་ཆར་དུ་ཐེག་པ་ཆེན་པོ་ལ་འཇུག་པར་བྱེད་དོ། །དེ་ཡང་རྣོན་པོ་རབ་འབྲིང་རྣམ་པ་གསུམ་སྟེ། ཐེག་པ་ཆེན་པོ་རྒྱུ་དང་འབྲས་བུའི་ཕྱི་ནང་ལ་རིམ་གྱིས་འཇུག་པར་སློབ་དཔོན་སངས་རྒྱས་ཞལ་གྱིས་གསུངས་སོ། །དེ་ཡང་རྒྱལ་པོ་ཨིནྟྲ་བྷོ་དྷིའི་མན་ངག་ལས། ཕལ་སེམས་བརྒྱད་ཀྱིས་མཐའ་པ་ནི། །ཀུན་གྱི་རྒྱུད་ཕྱིར་མ་ངེས་རིགས། །དེ་ནས་ཐ་མའི་ཐ་མ་དང་། །འབྲིང་རབ་དབང་པོ་གང་ལྡན་པ། །ལྷ་མིའི་ཐེག་ཆེན་བྱེད་པའི་རིགས། །འཇུག་སེམས་སྐྱེས་ཞུགས་བསྐལ་པའི་གྲངས། །རྡུལ་སྙེད་རྒྱུད་སྦྱངས་གསང་ཆེན་སྦྱོར། །འབྲིང་གསུམ་ཕྱི་མ་གསུང་ཞུགས་རྒྱུད། །མཆོག་གི་མཆོག་དབང་བདུན་ལྡན་པ། །མཚུངས་དང་ལྷན་ཅིག་བྱེད་པ་དང་། །རྐྱེན་བཞི་རྩ་མེ་ཇི་ལྟ་བར། །མ་ངེས་པ་ནས་གསུང་ཆེན་འཇུག་ཅེས་གསུངས་སོ། །དེ་བས་རྒྱུད་ལས་ཀྱང་། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་པ་དང་། ཐེག་པ་བཞི་ཡིས་ངེས་འབྱུང་ལས། ཐེག་པ་གཅིག་གི་འབྲས་བུར་གནས་ཞེས་རིམས་སུ་འཇུག་པར་གསུངས་པ་དང་། ཡང་ན་ཀུན་ལ་མཐུན་པར་འབྱམ་པར་འཇུག །འདི་ནི་མ་ངེས་རྡོ་རྗེ་འཆང་གིས་གསུངས། ཞེས་རིགས་དབྱེ་བ་དང་། ངང་གིས་བློ་དམན་མཐོང་བ་ནི། །ལ་ལ་རག་ལུས་མེད་པའི་ཕྱིར། །གསང་ཆེན་གསང་བ་ཉིད་དུ་འཇུག །དབང་པོ་ཚོགས་དང་རྩོལ་བས་འགྲུབ། །ཅེས་གསུངས་ཏེ། དེའི་ཕྱིར་བཀའ་ལུང་ལས་འབྱུང་བ་ལས་ཡིད་ཆེས་སོ། །ཚུལ་ཉི་འཇུག་ལུགས་གཉིས་ཀ་ལས་འདིར་འཇུག་པའི་ཚེ། རྒྱུ་རྐྱེན་ཐུན་མོང་མ་ཡིན་པ་དྲུག་གིས་སྔ་མའི་ལོག་པ་གཉིས་ཀྱིས་ཤེས་པ་བཞི་ནས་ཐེག་པ་མཆོག་ལ་འཇུག་པའི་སེམས་ཡར་མོ་ལྟར་ལྡང་ཞིང་གཡོ་བ་དང་། རྒྱུད་དེས་སྨོན་པ་གསུམ་སྐྱེ་བ་དང་། དེས་སྒྱུ་འཕྲུལ་རི་མོའི་དཀྱིལ་འཁོར་དུ་ཞུགས་ཏེ། དམ་ཚིག་བྱིན་ཏེ་རིགས་བསྟན་པ་ལ་བདག་དོན་གྱི་ནུས་པ་གཉིས་མན་ཆད་བྱིན་ཏེ། ཤེས་པའི་མཚན་ཉིད་ཚོལ་བའི་རྒྱུ་མཉན་བསམ་པ་ལ་གནས་ཏེ། གླེང་གཞི་དང་གླེང་བསླང་བ་དང་། དགོངས་འགྲེལ། ཡོངས་སུ་ཤེས་པར་བྱ་བའི་དངོས་པོ་དང་། གཏད་པའི་དབྱེ་བའི་རྐྱེན་སྡུད་ཅིང་སྤྱོད་ཡུལ་བྱེད་པ་ནི་གནས་པ་དང་པོའོ། །དེས་ཚད་དུ་ཕྱིན་པ་ལ་བཅོ་ལྔའམ་བཅོ་བརྒྱད་བྱིན་ཏེ་བདག་གཞན་གཉིས་ཀའི་དོན་སྤྱོད་པ་ནི་ཤེས་པ་ཚད་དུ་ཕྱིན་པའི་བར་མན་ཆད་དེ། དེ་ཡང་གནས་པའི་སེམས་ལ་གཉིས། མཐོང་བ་ལ་གནས་པ་དང་། འཇུག་པ་ལྔ་ལ་གནས་པའོ། །མཐར་ཕྱིན་པའི་སེམས་ནི། སྐབས་ཀྱི་མཐར་ཕྱིན་པ་དང་། སྤྱིའི་མཐར་ཕྱིན་པའི་ལམ་གསུམ་མོ། །དེ་དག་ནི་རིམ་པའི་དབང་དུ་བརྗོད་དེ་ལམ་རེ་རེའང་ལྔ་ལྔ་དང་བྱེ་བྲག་ཏུ་ལྡན་པ་དགོས་སོ། །དེའི་ཕྱིར་ཤེས་རབ་ཀྱི་རིགས་ངེས་པའི་སེམས་ནི་འབྲེལ་པ་གསུམ་དང་། རང་བཞིན་དང་རྒྱུད་ལ་ལྡན་པ་ཚང་བའི་ཕྱིར་རྒྱུད་དོ། །ཁ་ཅིག་ཏུ་ཤེས་བྱའི་མིང་ཤེས་བྱེད་ལ་བཏགས་པའོ་ཞེས་བཤད་དོ། །ཐུན་མོང་མ་ཡིན་པའི་སེམས་ལྔ་ནི་རིམ་པ་བཞི་དང་ལྔ་མི་སྤྱོད་པ་གསང་བའི་སྐབས་སུ་བཤད་པ་བླ་མའི་ངག་ལ་ཤེས་པར་བྱ་སྟེ། ཁམས་ཉི་ཤུ་རྩ་གཅིག་ཏུ་ཤེས་པར་བྱའོ། ༈ །གཉིས་པ་རྐྱེན་གྱི་རྒྱུད་བསྟན་པའི་ཕྱིར། ཐབས་དང་ཤེས་རབ་མ་ནིང་རྒྱུད། །བསྟན་པའི་ཡུལ་ལམ་རྐྱེན་དུ་གསུངས། །ཞེས་པ་དང་དཔལ་བདེ་མཆོག་དང་། དེ་ཝཱི་ཛ་ལ་ལ་སོགས་པ་ཤེས་རབ་ཀྱི་རྒྱུད་དང་། ཡང་དཔལ་གསང་བ་འདུས་པ་ལ་སོགས་པ་རྣལ་འབྱོར་ཐབས་ཀྱི་རྒྱུད་དང་། དཔལ་གསང་བའི་སྙིང་པོ་ལ་སོགས་པ་མ་ནིང་གི་རྒྱུད་ཡི་གེར་བཀོད་པ་དག་ནི་ངོ་བོའི་རྐྱེན་དུ་ངེས་ཏེ་དེ་དག་ནི། བཙལ་བྱ་ཐབས་ཁུངས་ལོ་རྒྱུས་དང་། །བཅས་གཞི་གཏམ་རྒྱུད་ཚང་འབྲེལ་རྒྱུད། །ཅེས་གསུངས་སོ། །དེ་གང་གིས་རྟོགས་པར་བྱ་སྙམ་པ་ལ། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་པ། དམིགས་པའི་རྐྱེན་རྒྱུད་གསུམ་རང་བཞིན་དང་ཡི་གེར་འདུས་པ་དེ་དག་བདག་པོའི་རྐྱེན་འདི་གཉིས་ཀྱི་ཐུགས་ལ་གནས་པ་དེས་འབྱིན་པའི་ཕྱིར། བླ་མ་དང་ལུང་ལ་བརྟེན་པར་བསྐུལ་བའི་ཕྱིར་རོ། ༈ །ལུས་གསུམ་པ་དགྲོལ་བའི་ཕྱིར། རང་བཞིན་གསང་བའི་དཀྱིལ་འཁོར་ནི། །ཞེས་པ་རང་གནས་སྦྱང་བ་གཉིས་ཀྱིས་བསྒྲུབ་པའི་གཞི་རུ་རང་ལ་ཡོད་བཞིན་མ་ཤེས་པས་གསང་བའི་དཀྱིལ་འཁོར་ཉེ་བར་བསྟན་པ་ནི་མདོ་དང་རྒྱས་པའོ། །དེ་ལ་སྔ་མ་བསྟན་པའི་ཕྱིར། །དཀྱིལ་འཁོར་སྙིང་པོ་གསེར་སྒྲོམ་ལས། །ཞེས་པ། དྷརྨཱ་ཙཀྲའི་གནས་ཀྱི་ཡོན་ཏན་ལས་མིང་བརྗོད་པ་སྟེ་བཞིའོ། །ཆོས་ཉིད་ཡེ་ཤེས་ཡོན་ཏན་དང་། །རང་རྒྱུད་བཞི་ལ་ཡན་ལག་བརྒྱད། །ཅེས་པ། དང་པོ་མདུན་ན་ཡོད་དེ་སྐྱེ་བ་མེད་པའི་ལས་བྱེད་དེ། གཉིས་པ་གཡས་ན་ཡོད་དེ་ཡེ་ཤེས་འཆར་བའི་ལས་བྱེད་དོ། །གསུམ་པ་གཡོན་ན་ཡོད་དེ་དེས་མངོན་པར་ཤེས་པ་དང་འབྲས་བུ་རྣམས་སྣང་བའི་ལས་བྱེད་དོ། །བཞི་པ་རྒྱབ་ན་ཡོད་དོ་ཤེས་པ་རྣམས། ཤིང་འཇོམས་པའི་ལས་བྱེད་དོ། །ཡན་ལག་ནི་གཉིས་ཀྱི་རྩེ་མོ་གསུམ་དུ་འཕྲོས་པའོ། །འོད་བཞི་ལ་གནས་རྣམ་ཤེས་ནི། །ཞེས་པ། ཆོས་ཉིད་ལ་གནས་པ་ལ་སོགས་པར་འཆད་པར་འགྱུར་རོ། །སྒོ་ལྔ་རྟག་མིན་ཞོར་ལ་བཤད། །ཅེས་པ། ཤེས་པའི་གཙོ་བོ་མ་ཡིན་པས་ཞོར་དུ་བཤད་པ་ནི། གཉིད་ཀྱིས་ལྡོག་པའི་ཕྱིར་མི་རྟག་པའོ། །ས་བོན་ཟུང་གསུམ་གཉིད་དང་བཞི། །འོད་ལ་སྣོད་བཅུད་ཚུལ་དུ་གནས། །ཞེས་པ། འོད་བཞི་སྣོད་ལྟ་བུ་ལ་ས་བོན་ཟུང་གསུམ་དང་གཉིད་བཅུད་ཀྱི་ཚུལ་དུ་གནས་པ་ལུས་ལྟ་བུའོ། །དེ་དག་རྒྱས་པར་བསྟན་པ་གང་སྙམ་པ་ལ། ཆོས་ཉིད་ལྷ་མིན་དུད་འགྲོ་ཟླུམ་ཀུན་གཞི་ༀ་གྱི་སྙིང་པོ་ཅན། ཞེས་པ། ཆོས་ཉིད་ཀྱི་རྩ་ལ་ལྷ་མིན་དང་དུད་འགྲོ། ས་བོན་ཏྲི་སུཾ་གཉིས་འོད་དཀར་པོ་ཟླུམ་པོའི་བགབ་ན་གནས་སོ། །དེ་ན། ཤེས་པ་བརྒྱད་ལ་ཀུན་གཞིའི་རྟེན། སྐུའི་སྙིང་པོ་ༀ་ས་བོན་གཉིས་ཀྱི་སྟེང་ན་རང་བཞིན་གྱིས་གནས་སོ། །ཡེ་ཤེས་ལྷ་མི་གྲུ་བཞི་ཡིད་སྙིང་པོ་ཧཱུྃ་ནི་བདེར་གཤེགས་ཐུགས། ཞེས་པ། ཡེ་ཤེས་ཀྱི་རྩ་ལ་ལྷ་མི་ས་བོན་ཨཎྲྀ་གཉིས་འོད་མཐིང་གའི་གྲུ་བཞིའི་བགབ་ན་གནས་སོ། །ཤེས་པ་བརྒྱད་ལས་ཡིད་ཀྱི་རྣམ་པར་ཤེས་པ་གནས་སོ། །ཐུགས་ཀྱི་སྙིང་པོ་ཧཱུྃ་ས་བོན་གྱི་སྟེང་ན་གནས་སོ། །ཡོན་ཏན་དམྱལ་བ་ཡི་དྲགས་ཨཱོཾ། །ཟླ་གམ་གསུང་གི་རང་བཞིན་ཏེ། །ཞེས་པ་ཡོན་ཏན་གྱི་རྩ་ལ་ཡི་དྭགས་དང་དམྱལ་བའི་ས་བོན་པྲེ་དུ་གཉིས་འོད་དམར་པོ་ཟླ་གམ་ན་གནས་སོ། །ཤེས་པ་བརྒྱད་ལས་ཉོན་མོངས་པའི་ཡིད་གནས་ཏེ། །དེ་ན་གསུང་གི་སྙིང་པོ་ཨཱཾ་ས་བོན་གྱི་སྟེང་ན་གནས་སོ། །དམར་ནག་མདོག་ལ་ཨོག་ཤོལ་དབྱིབས། །ཤེས་པ། རང་རྒྱུད་རྩ་ལ་འོད་དམར་ནག་བྱ་གག་གི་ཨོག་ཤོལ་ལྟ་བུའོ། །དེ་ནི་བློ་རྨུག་སྣོད་ཡིན་ནོ། །ཞེས་པ། གཉིད་གནས་པའོ། །ཤེས་པ་གསུམ་ལ་སྙོམས་པར་འགེབས། །ཞེས་པ། བཤད་པའི་ཤེས་པ་གསུམ་ནི། ཀུན་གཞིའི་དམིགས་པ་ཡོངས་སུ་མ་ཆད་པ་ལ་འགེབས་པར་མི་རིགས་ཀྱང་། འདིར་མ་རིག་པའི་ཆོས་རྨོངས་པར་བྱེད་པ་ཙམ་ལ་བསྙད་དོ། །ཁ་ཅིག་ཏུ་སྒོ་ལྔའི་རྣམ་པར་ཤེས་པ་ནི་འདི་ལ་གནས་ཏེ། དེ་ཡང་དགེ་བ་དང་མི་དགེ་བ་དང་ལུང་དུ་བསྟན་པའི་ཤེས་པ་གསུམ་རེ་རེ་ལའང་ཡོད་པ་ལ་དགོངས་ཏེ། སྒོ་ལྔའི་ཤེས་པ་གསུམ་ལ་འགེབས་པར་གསུངས་པའོ། །དྲག་པོ་ཉིད་དུ་བཤད་པ་ཡིན། །ཞེས་པ། དབྱིབས་གྲུ་གསུམ་དུ་ཡང་འོད་དེ་ཡོད་པར་གསུངས་ཏེ། རང་བཞིན་གྱི་ལས་ཀྱིས་ཀྱང་བཤད་དོ། །རྩ་བཞིའི་ལྟེ་བ་བཤད་པ་ནི། དེ་དབུས་ཡེ་ཤེས་སྙིང་པོ་སྐུ། །དར་སྐུད་མཚལ་ཁུ་གསེར་གྱིས་རླངས། །ཉི་མའི་མེ་ལོང་ངད་དག་ནི། །འབྱུང་བ་བཞི་ཡི་དྭངས་མ་དང་། །བདེ་བའི་དྭངས་མ་ནམ་མཁའི་ཁམས། །ཞེས་པ། རྩ་བརྒྱད་ཀྱི་དབུས་ཡེ་ཤེས་སྙིང་པོའི་རྩ་བ་ཐག་ཁུག་པའམ་རྒྱུས་པ་ནད་མའམ། དར་དཀར་གྱི་སྐུད་པ་འདྲ་བར། རྟ་རྔ་བཅུ་གཤགས་ཀྱི་ངོ་བོ་ནི་སའི་དྭངས་མ་སྟེ། དེའི་ནང་ན་ཆུའི་ངོ་བོ་ཁྲག་གི་དྭངས་མ་མཚལ་ལྕོག་ལ་མ་འདྲ་བའི་ཁུ་བ་ལྟ་བུ་གནས་སོ། །དེའི་ནང་ན་དབུགས་ཀྱི་དྭངས་མ་གསེར་ས་འོག་ན་གནས་པའི་རླངས་པ་ཙམ་ཡོད་པ་ནི་རླུང་གི་ངོ་བོ། དེའི་ནང་ན་དྲོད་ཀྱི་དྭངས་མ་མེ་ལོང་ཉི་མ་ལ་བཞག་པའི་ངད་ཙམ་གནས་པ་ནི་མེའི་ངོ་བོ་སྟེ། དེའི་ནང་ན་བྱང་ཆུབ་ཀྱི་སེམས་ཐིག་ལེ་འོད་ཁ་དོག་སྣ་ཚོགས་པ་དབྱིབས་དང་ཁ་དོག་གང་ལའང་མ་བརྟེན་པར་བཞུགས་པ་ནི་བདེ་བའི་དྭངས་མ་ལས་དང་ངོ་བོས་བཏགས་ཏེ་ནམ་མཁའོ། །རྩ་དེ་རང་བྱུང་ཡེ་ཤེས་མངོན་དུ་བྱེད་པའི་སྙིང་པོའི་སྐུར་བརྗོད་དེ་དེ་དག་གི་གནས་ལུགས་དང་ལས་ནི་ཆོས་ཉིད་ཀྱི་རིགས་པས་ངེས་ཏེ། ཅི་སྟེ་བ་མི་ཆུད་དོ། །དེས་ན་གསང་བའི་གྲུབ་པ་གསུམ་གྱིས་རྩད་དང་སླའོ། །དེ་ལ་དྭངས་མ་ལྔའི་ལས་གང་སྙམ་པ་ལ། འབྱུང་ལྔ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་གཤེགས། །ཞེས་པ་དང་། དྭངས་མ་ཕྲ་རགས་ཀྱི་ཆས་ཡབ་ཡུམ་བཅུར་རང་བཞིན་གྱིས་སངས་རྒྱས་པའོ། །ཐབས་དང་ཤེས་རབ་ལམ་ཉིད་ཀྱི། །དཀྱིལ་འཁོར་ཀུན་ལ་གསལ་བར་བྱེད། །ཅེས་པ། ཡེ་ཤེས་ཀྱི་འབྱུང་བ་ཕྲ་རགས་དབྱེར་མེད་པའི་ལས་ཀྱི་རང་བཞིན་གྱི་དཀྱིལ་འཁོར་ཀུན་འབྱུང་བར་ལྟ་ཅི་སྨོས། རིགས་ལ་སྣང་བར་བྱེད་པའོ། །མི་གནས་པའི་ཡེ་ཤེས་སམ་དེ་བཞིན་ཉིད་ཀྱི་ཡེ་ཤེས་སྤྱོད་ཡུལ་ཡོངས་སུ་དག་པའི་ལས་ཀྱང་བྱེད་དེ། ནམ་མཁའི་ཁམས་ཀྱི་དཀྱིལ་འཁོར་འདིས། །ཞེས་པ། དྷརྨཱ་ཙཀྲ་སྟེ་ཁྱད་པར་གྱི་གནས་སོ། །ཐམས་ཅད་ནམ་མཁར་བྱེད་པའི་ཕྱིར། །ཞེས་པ། ཐམས་ཅད་དེ་བཞིན་ཉིད་ཀྱི་ཡེ་ཤེས་ནམ་མཁའ་ཡེ་ཡིན་པ་དེ་འདི་ལ་བློ་སྣང་བར་བྱེད་པའི་ནུས་པ་ལྷག་པ་རང་ཡོད་པ་ནི་གཏན་ཚིགས་སོ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །ཅེས་པ། ཡེ་ཤེས་སུ་ཀུན་ཟླུམ་པ་དང་། ལྔ་རྫོགས་པས་མིང་ཐོབ་པ་ནི་དྲང་དོན་རྟེན་ཅན་གྱི་མིང་བརྟེན་ལ་བརྟགས་པ་ཡིན་ལ། ངེས་པར་དེ་ཉིད་ཀྱི་ངོ་བོ་སྟེ། དེ་ནི་ལྷག་པའི་དོན་གྱི་དཀྱིལ་འཁོར་གཞན་ལས་སྤགས་སོ། །དེ་གང་ལ་ཡོད་ན། ལུས་ཅན་ཀུན་ལ་ཡོད་པར་བཤད། །ཅེས་པ། ལུས་ནི་ལྷག་མའི་ལུས་དང་། རྣམ་པར་སྨིན་པའི་ལུས་དང་། ལས་ཀྱི་ལུས་དང་། ཤ་ཁྲག་གམ་རྣམ་རྟོག་འབྱུང་བའི་ལུས་དང་། ཡིད་ཀྱི་ལུས་དང་། ཏིང་ངེ་འཛིན་གྱི་ལུས་དང་། སྨོན་ལམ་གྱི་ལུས་དང་། སྤྲུལ་པའི་ལུས་དང་། ཡེ་ཤེས་ཀྱི་ལུས་ལ་སོགས་པ་མང་ནའང་། འདིར་གང་གི་དབང་དུ་ཞེ་ན། འདོད་པ་བསོད་ནམས་ཀྱི་ལུས་དང་པོའི་དབང་དུ་གསུངས་ཏེ། ལྔ་པ་མན་ཆད་ཀྱི་དབང་དུ་བརྗོད་དེ། ཐུགས་རྗེའི་ཡུལ་ཁྱད་པར་འབྲེལ་བ་དང་། རང་གནས་སྦྱངས་པའི་ཕྱིར་རོ། །དེ་ཡང་བག་ལས་ཉལ་དུ་དྲུག་མན་ཆད་ལ་ཡོད་ལ། མངོན་དུ་འདོད་པ་སྤར་གྱི་དང་པོ་ལ་ཡོད་པའོ། །བདུན་པ་ཡན་ཆད་ནི་མི་ལྡོག་པའི་ཕྱིར། ཡོད་ཀྱང་གཟུང་མི་དགོས་པས་དེའི་དབང་དུ་མ་ཡིན་གྱི། སྦྱང་བྱའི་དབང་དུ་ཡོད་པར་གོང་དུ་གཟུང་ཟིན་ཏེ། བསྒྲུབ་པའི་གཞི་རུ་འདི་ཤེས་བྱ། །ཞེས་པ། སྦྱང་བ་དོན་དུ་གཉེར་བའི་གཞིར་སྦྱོང་བྱེད་གཉིས་ཀས་ཤེས་པར་བྱ་བ་བསྟན་ཏེ། མ་ཤེས་ནང་དོན་མི་འགྲུབ་པའི་ཕྱིར་གདམས་པའོ། ༈ །ལུས་བཞི་པ་བར་དོར་ཤི་བའི་འཕེལ་བའི་ཚུལ་འབྲེལ་བར་བསྟན་པའི་ཕྱིར། འཁྲུལ་དབང་མི་གནས་ཐ་སྙད་དུ། །རྣམ་ཤེས་འཕོ་བར་གསུངས་པ་ནི། །ཞེས་པ། འཁྲུལ་དབང་དུ་མ་སྡོད་པར་འཆི་བའི་ངོ་བོ་མེད་ཀྱི་ཐ་སྙད་ཙམ་དུ་ཡོད་དོ་བར་བསྟན་པའོ། །དེ་ལའང་རེ་ཞིག་འཆི་བའི་ཁྱད་པར་དང་། འཆི་བའི་དུས་དང་། འཆི་བའི་རྒྱུ་རྐྱེན་དང་། འཆི་ཁའི་འདུ་ཤེས་དང་། རྟགས་དང་། ལྟས་བདེ་མི་བདེ་འབྱུང་བ་དང་། འཆི་བའི་འཕོ་བ་ཡོད་མེད་ཀྱི་དཔེ་དང་། འཆི་བའི་ཚུལ་དང་། བར་མར་འབྱུང་བའི་ཚུལ་བསྟན་པའོ། །དེ་ལ་དང་པོ་གཉིས་ཏེ་རང་དབང་ཅན་དང་རང་དབང་མེད་པའོ། །སྔ་མ་ནི་དབང་བསྒྱུར་རིགས་ལ་སོགས་པ་འདི་ཉིད་ཀྱི་མཐར་ཕྱིན་པའི་ལམ་པ་ལ་ཡོད་དོ། །ཕྱི་མ་ནི་བར་ཆད་མེད་པའི་ལམ་མན་ཆད་དྲུག་པོ་ལ་ཡོད་པའོ། །དུས་ནི་སྔ་འདུལ་པའི་དུས་ལ་བབ་པ་ནའོ། །ཕྱི་མ་ལ་དུས་དང་དུས་མིན་པ་གཉིས་པོ། །རྐྱེན་ནི་གཉིས་ཏེ། སྔ་མ་ནི་འདུལ་བྱ་བྱ་བའོ། །ཕྱི་མ་ནི་འཁྲུགས་པ་གཉིས་དང་། ཉི་ཁྲི་ཆིག་སྟོང་དང་། གློ་བུར་བརྒྱད་ཅུ་རྩ་གཅིག་དང་། དགུ་དང་། ཡེ་འདྲོག་སུམ་བརྒྱ་དྲུག་ཅུ་དང་། །འདུ་བ་བཞི་ལ་སོགས་པའོ། །རྒྱུ་ནི་ལས་ཟད་པ་དང་། མི་རྟག་པའི་མཚུངས་པ་དང་། ལྷན་ཅིག་བྱེད་པ་རྣམས་ཕྱི་མའི་རྒྱུའོ། །སྔ་མ་ནི་ཐུགས་རྗེའོ། །འདུ་ཤེས་ནི། ཀུན་ཀྱང་གསུམ་དང་ལྡན་གྱིས་ཀྱང་། །སྔ་མ་ནི་དཀར་པོ་ཚད་མེད་པ་དང་ལྡན་ནོ། །རྟགས་ནི་གཅིག་ལ་མ་ངེས་ལ། འོག་མ་ལ་ཕྱི་ནང་མཚན་མར་འབྱུང་བ་བསམ་གྱིས་མི་ཁྱབ་པའོ། །རྟགས་སམ་ལྟས་ནི་སྔོན་དུ་འབྱུང་བ་སྟེ། གཅིག་ཤོས་ནི་དེ་ལ་རག་མ་ལུས་ཏེ་ལས་ཀྱིས་མ་བཀོལ་བའི་ཕྱིར་རོ། །ཕྱི་མ་ནི་བཀོལ་བའི་ཕྱིར་སྤྱོད་ཡུལ་ཀུན་ཏུ་དུས་བྱེད་པའི་ཚེ་གང་དཀར་པོར་སྤྱོད་པ་ལ་ཡིད་དུ་འོང་བ་མཐོང་ཞིང་། སྟེང་དུ་ཡལ་བའོ། །ནག་པོ་རང་ལ་ཡིད་དུ་མི་འོང་བ་འབྱུང་བ་དང་ཤིན་ཏུ་ནད་ཀྱིས་གདུངས་པས་དབང་པོ་བཟློག་ཅིང་ཡན་ལག་གཡོབ་པ། མ་སྙན་པའི་ང་རོ་འདོན་པ་དང་། ཐུར་དུ་ཡལ་བའོ། །འཕོ་བའི་དཔེ་བསྟན་པ་ནི། ཉི་འོད་ས་བོན་རྒྱུ་སྒྲ་བཞིན། །རྒྱུ་ལས་འབྲས་བུ་གཞན་མིན་གྱི། །འདི་ནས་འཕོ་བར་གྱུར་པའི་ཆོས། །རྡུལ་ཆ་ཙམ་ཡང་མེད་པར་གསུངས། །ཞེས་པ། དཔེ་བཞི་པོ་ནི་འཕོ་བ་མེད་པར་གཞན་ལ་སྣང་བ་ལྟར་འཆི་བའི་རྒྱུས་འབྲས་བུ་གནས་གཞན་དུ་འགྲོ་བར་མི་བྱེད་དེ། ལས་ཀྱི་འབྲས་བུ་མངོན་དུ་སྣང་བ་ལ་དེ་ཉིད་དུ་སྤྱོད་ཡུལ་འགྱུར་བ་ལ་བཏགས་ཀྱི། དངོས་གནས་འདི་ནས་གཞན་དུ་བགྲོད་པ་རྡུལ་ཙམ་ཡང་མེད་དོ། །འོ་ན་འཕེལ་བའི་རྒྱུ་དང་། མཚམས་སྦྱོར་བ་འགལ་ལོ་ཞེ་ན། དེ་ཁོ་ན་སྐྱེ་བོ་ལ་མངོན་དུ་ཡོད་པ་ལྟར་སྣང་བ་དེ་འདིར་ཐ་སྙད་ཡོད་པ་ལས་བཏགས་པའི་ཕྱིར་རོ། །འཆི་བའི་ཚུལ་བསྟན་པའི་ཕྱིར། ས་ཆུ་མེ་རླུང་བཞི་ཡི་རླུང་སུམ་མདོ་སྙིང་ལྐོག་ལྟེ་བ་ལ། རིམ་གནས་ཁམས་ཀུན་རྟེན་ཡིན་ཏེ། །ཞེས་པ། སྲོག་གི་དབང་པོ་ཡན་ལག་གི་རྩ་བ་ཡིན་ཏེ་སྤྲོས་པ་རྟེན་པའི་ཕྱིར་རོ། །དེ་གནས་ཚུལ་ནི་སུམ་མདོ་ན་རླུང་ཟླ་གམ་མམ་གཞུའི་དབྱིབས་སྔོན་པོ་གནས་ལྟེ་བ་ནས་སེར་པོ་གྲུ་བཞི། སྙིང་ག་ན་ཆུ་དཀར་པོ་ཟླུམ་པོ། ལྐོག་མ་ན་མེ་དམར་པོ་གྲུ་གསུམ་གནས་པ་ནི་ཕྱི་ནང་གི་ཡན་ལག་ཀུན་གྱི་རྟེན་གཞིའོ། །ལས་རླུང་ཟད་དང་རྐྱེན་དག་གིས། །སྲོག་དབང་ཡན་ལག་ཉམས་པ་ན། །ཞེས་པ། ལས་ཟད་པ་ནི་དུས་སུ་འཆི་བ་སྟེ། རྐྱེན་གྱིས་གནས་པར་མི་ནུས་པ་ནི་ཐུན་མོང་གི་ལས་ཀྱི་དབང་ངོ་། །འདིར་བརྩོན་པ་དང་ཐབས་དང་ལྡན་ན་ལས་འཇོམས་པར་གསུངས་ཏེ། ལས་རག་མ་ལས་པར་ཚེ་འཕོ་ཕྱིར་རོ། །རྐྱེན་སྨོས་པས་དག་གི་འཆི་བ་ནི་རྒྱུ་རྐྱེན་ཏེ། དེས་སྲོག་གི་དབངཔོ་ཡན་ལག་ལུས་ཀྱི་གནས་ཐ་དད་ན་ཡོད་པ་རྒྱུད་པ་དང་། མི་བརྟན་པ་དང་། སྟོབས་མེད་པར་ཡུན་རིང་ཐུང་གང་ཡང་རུང་བར་བྱ་བའི་ཕྱིར། འཆི་ཚུལ་དངོས་ནི། ཚོགས་དྲུག་པར་ཐིམ་གསལ་མི་འགྱུར། །ཞེས་པ། ཡན་ལག་གི་རླུང་གིས་རྐྱེན་དེས་དབང་པོ་ནས་རང་གི་ལམ་ནས་ཞུགས་ཏེ་ལྟེ་བར་སའི་རླུང་ལ་ཐིམ་པས་ཡུལ་དྲུག་མི་གསལ་བར་འབྱུང་ངོ་། །ས་དག་ཆུར་ཞུགས་ལུས་ཉམས་བྱེད། །ཅེས་པ། རང་གི་ལམ་ནས་སྙིང་གི་ཆུ་རླུང་ལ་ཞུགས་པའོ། །དེས་ས་དང་བྲལ་བས་མི་བརྟན་པར་བྱེད་དོ། །དེ་ཉིད་མེར་ཞུགས་བུ་ག་སྐམ། །ཞེས་པ། ཆུ་རླུང་རང་གི་ལམ་ནས་ཞུགས་ནས་ལྐོག་མར་འདུས་པས། ཆུ་མེ་དང་བྲལ་ཏེ་བུ་གའི་སྒོ་རྣམས་སྐམ་མོ། །མེ་རླུང་འགྲོ་བས་དྲོད་ཉམས་འགྱུར། །ཞེས་པ། མེ་འགོང་མདོར་ཞུགས་པས་ལུས་དྲོད་ཉམས་པར་འགྱུར། རླུང་གི་སྙིང་པོ་ཐིག་ལེ་སྟེ། རྔུབ་ཅིང་ཐ་མར་ཐོན་པར་འགྱུར། །ཞེས་པ། རླུང་ཡེ་ཤེས་སྙིང་པོའི་ཐིག་ལེར་རང་གི་ལམ་ནས་ཞུགས་ཏེ་ཐིམ་པས། རླུང་རྩེ་གཅིག་ནང་དུ་རིང་དུ་རྔུབ་པ་དང་འདོན་པར་འབྱུང་ངོ་། །ཐིག་ལེ་མེ་ལོང་དབུགས་བཞིན་དུ། །སྒྲ་དོན་སྤྱི་ཡི་ཡུལ་ནུབ་སྟེ། །ཞེས་པ། ཡེ་ཤེས་སྙིང་པོ་རླུང་སྲོག་གི་དབང་པོ་དངོས་ནི་མེ་ལོང་དབུགས་ཀྱིས་བཏབ་པ་ཡལ་བ་ལྟར་འགྱུར་བས་ཤེས་པ་བདུན་ཡུལ་དང་བཅགས་ནུར་པར་འགྱུར་རོ། །དམིགས་པ་མེད་པའི་རྗེས་ཐོབ་པ། །ཅེས་པ། རྟོག་པའི་ཤེས་པ་རྐྱེན་གྱིས་ལོག་པའི་ཚེ། །མི་དམིགས་པ་ནི་སྒོམ་ལམ་དང་པོའི་གཞི་སྟེ། དེའི་རྗེས་ཐོག་ལ་བར་མ་འབྱུང་བས་རྒྱུ་འབྲས་སུ་འབྲེལ་བའི་ཚུལ་སྟོན་ཏོ། །དཔེ་བཞིའི་ཚུལ་གྱི་བར་མ་ཡི། །ལུས་དང་ཕྱི་མའི་སྤྱོད་ཡུལ་སྣང་། །ཞེས་པ། དཔེ་བཞི་བཤད་དེ། བར་མའི་ཡིད་ཀྱི་ལུས་དང་དགེ་མི་དགེའི་སྤྱོད་ཡུལ་སོ་སོར་སྣང་བར་བྱེད་པའོ། །དེའི་ཕྱིར་འཕོ་བར་ཐ་སྙད་དུ། །བཏག་པའི་ཡོད་པར་ཤེས་པར་བྱ། །ཞེས་པ། རྫ་ཆག་བྱེའུ་འཕུར་ལྟར་བསྟན་པའི་གཏན་ཚིགས་ཀྱི་ཐ་སྙད་དུ་ཡོད་པ་ནི་ངེས་པ་ན་སྐྱེ་འཆི་མེད་པར་ཁས་ལེན་ཏེ། སྐྱེས་པ་མེད་པའི་ཕྱིར་རོ། ༈ །ལུས་ལྔ་པ་བསྟན་པའི་ཕྱིར། བར་མའི་བྱང་ཆུབ་སེམས་དཔའ་ནི། །ཞེས་པ། བར་མ་རང་བཞིན་གྱི་བྱང་ཆུབ་སེམས་དཔའ་ཐུགས་རྗེའི་གནས་དེ་བཤད་པ་ནི། བར་མའི་རྒྱུ་དང་། ངོ་བོའི་ཆ་ལུགས་དང་། རྩལ་དང་ནུས་པ་དང་། བར་མའི་སྤྱོད་ཡུལ་དང་བསམ་པ་དང་། ཚེ་ཚད་དང་། ངེས་ཚིག་དང་ལུས་ཀྱི་ཚད་དང་། མི་གྲངས་དང་། ལོངས་སྤྱོད་དང་། སྐྱེ་བ་གར་གཏོགས་པ་དང་། ཁམས་གང་ལ་ཡོད་པ་དང་། ལས་གང་ལ་དགའ་བ་དང་། ལམ་གྱི་ཁྱད་པར་དང་། ཕྱི་མ་དང་འབྲེལ་བའི་རྒྱུ་འདའ་ཁ་མའི་མན་ངག་བཅས་པར་བསྟན་པའོ། །དེ་ལ་དང་པོ་བསྟན་པའི་ཕྱིར། རྣམ་རྟོག་འབྱུང་བའི་ལུས་སྤངས་ནས་དྭངས་མ་ལ་འབྱུང་། ཞེས་པ་སྔ་མའི་ལུས་དེ་བཤད་པ་ལྟར་འབྲེལ་བས་འབྱུང་བ་བཞིའི་དྭངས་མ་ནི་བར་མའི་ལུས་ཀྱི་རྒྱུའོ། །གཉིས་པ་ནི། ཡིད་ཀྱི་ལུས་ཕྱིས་འབྱུང་དབང་པོ་ཡན་ལག་རྫོགས། །ཞེས་པ། ཡིད་འབྱུང་བའི་སྙིགས་མ་དང་མ་འབྲེལ་བར་གར་སྐྱེ་བའི་ཆ་བྱད་དུ་འབྱུང་བ་ནི། དབང་པོ་དང་ཡན་ལག་ཚང་བའོ། །བརྒྱད་པ་ནི་བྱིས་པ་ལོ་ལྔ་ལོན་པའི་ཚད་དོ། །བཅུ་གཅིག་པ་ནི་རྫུས་ནས་སྐྱེ་བའི་ཆར་གཏོགས་པའོ། །བཅུ་གཉིས་པ་ནི་ཆ་ལུགས་འདིའི་ཕྱིར་གཟུགས་དང་པོའི་ཁམས་སུ་སྐྱེ་བ་ན་ཡོད་དོ། །གཟུགས་མེད་པའི་ཁམས་འཕོ་ན་ཡོད་དེ། དེ་བཟློག་པ་ལ་མེད་པས་ཕལ་ཆེའི་དབང་སྟེ། གང་དག་ལས་ཁྱད་པར་ཅན་གྱིས་སྐད་ཅིག་གིས་རྫུས་ཏེ་འཕེན་པ་དྲག་པོའི་ཐ་ལ་མེད་པ་ཡང་ཡོད་དེ་ཁམས་ཐ་མ་ནའོ། །ཅིག་ཤེས་ལའང་དྲག་པ་ན་མེད་པའང་ཡོད་དོ། །གསུམ་པ་ནི། ལས་ཀྱི་རྫུ་འཕྲུལ་ཤུགས་དང་ལྡན། །སྒྱུ་མ་ལྟ་བུའི་ལུས་དག་གིས། །ཐོགས་པ་མེད་པ་ཀུན་ལ་འཇུག །ཅེས་པ། མཐོང་སྒོམ་ལས་མ་བྱུང་བ་ནི་ལས་འབྱུང་བའི་རྫུ་འཕྲུལ་ཡོད་དེ། སྒྱུ་མའི་ལུས་ཀྱི་འབྱུང་བ་ལྔ་ལ་བྱ་བ་ཐོགས་པ་མེད་པར་འགྲོའོ། །འོ་ན་ལས་ལ་ཁྱད་པར་ཡོད་ན་རྫུ་འཕྲུལ་མཉམ་པ་འདི་རྒྱུ་འབྲས་རྫུན་པར་འགྱུར་རོ་བར་རིགས་པ་སྙམ་ན། དེའི་དགོས་པ་ནི་འཕངས་པའི་ལས་ཉིད་ཀྱི་རྫུ་འཕྲུལ་ཡིན་ཏེ། འཕེན་པས་བསྒྲུབས་པ་མ་ཡིན་པ་དང་། འོན་ཀྱང་གཉིས་པ་ལའང་ཡུལ་དང་ནུས་པ་རྣམ་པར་སྨིན་པའི་ལས་ཀྱི་མཐུས་ཁྱད་པར་ཡོད་པར་གསུངས་སོ། །བཞི་པ་ནི། དཔག་ཚད་བྱེ་བ་བརྒྱ་སྟོང་ཡང་། །འོད་ཀྱི་སྣང་བས་འགེངས་པར་བྱེད། །ཅེས་པ། ཀུན་ལ་ཡོད་མོད་ཀྱང་དགེ་བ་ཅན་དེ་ཆེ་ཆུང་དང་གསལ་མི་གསལ་ཡོད་པའོ། །འདོད་ཁམས་སྣོད་བཅུད་མ་ལུས་པ། །ལྷ་མིག་དག་པས་མཐོང་བར་འགྱུར། །ཞེས་པ་དགེ་བ་ཅན་ལས་དང་འབྲས་བུར་འབྲེལ་བ་དང་ལས་ངན་སྦྱངས་པས་གནས་རིས་ཉི་ཤུ་མཐོང་ལ། །ཅིག་ཤོས་ནི་འབྲེལ་པ་མེད་པ་དང་། དྲི་མིག་ཅན་པས་མར་གྱི་བཅུའི་སྣོད་བཅུད་དང་འདི་ཉིད་ཀྱི་རིགས་ལས་གཞན་པ་མི་མཐོང་ངོ་། །དེ་ནི་ལས་ཀྱི་ལྷ་མིག་གོ། །ལྔ་པ་དང་དྲུག་པ་ནི། འགྲོ་བའི་ལམ་དག་ངེས་པར་ཤེས། །ཞེས་པ། གང་དུ་སྐྱེ་བའི་གནས་ཡུལ་ཤེས་པས་དེའི་རང་བཞིན་དེ་ཉིད་པར་སྣང་བས། དེ་དང་དོགས་པ་ཅུང་ཟད་ཉུང་། །ཞེས་པ། ཆ་ཡོད་མེད་ཀྱང་བདེ་བ་འདོད་པ་དང་། །སྡུག་བསྔལ་བར་དོགས་པ་ཉུང་ངོ་། །ཚེ་ནི་ཞག་བདུན་འགྱུར་དུ་གསུང་། །ཞེས་པ། གནས་པའི་ཚེ་བསམ་པ་དེའོ། །བདུན་ཕྲག་རེ་སྲང་མདའི་ཚུལ་དུ་རྒྱུད་མཐུན་པར་བརྗེའོ། །དེའང་ཕལ་ཆེའི་དབང་དུ་བརྗོད་མོད་ཀྱི། རྐྱེན་དང་འཕྲད་ན་མ་ངེས་སོ། །རྐྱེན་དང་མ་འཕྲད་ན་བདུན་ཕྲག་བདུན་ལས་མི་གནས་ཏེ། དེའི་ཚེ་གཞན་གྱིས་སྟོངས་པའི་ལས་བཟང་པོ་གཅེས་པར་ལུང་བསྟན་ཏོ། །བདུན་པ་ནི་ནུབ་སྣང་བར་ན་གནས་པའི་ཕྱིར་རོ། །དགུ་པ་ནི་ངེས་པར་མིང་གྲངས་བརྒྱད་དམ་དགུའོ། །བཅུ་པ་ནི་ཆ་བྱད་གང་བཟུང་བའི་གནས་དང་རྒྱུད་མཐུན་པའོ། །བཅུ་གསུམ་པ་ནི་གསུམ་སྟེ། གཞན་གྱིས་བཏང་བའི་ལས་མ་སྐྱེས་དགྲ་ལྟ་བུ་བྱུང་། །བདག་གིས་བསགས་པའི་ལས་བསམ་བསྟན་བཞི་པའི་དགེ་སློང་མར་འོངས་པ་ལྟ་བུ་དང་། དེ་ཉིད་དུ་གང་ལ་ཞེན་པ་གཙོ་བོའོ། །བཅུ་བཞི་པ་ནི་སྔར་དཀར་ནག་སྤྱོད་པ་དང་མི་གཡོ་བའི་ལས་ཀྱིས་བར་མའི་སྤྱོད་ཡུལ་དུ་བདེ་སྡུག་སོ་སོར་མྱོང་བའོ། །བཅོ་ལྔ་པ་ནི་བར་མའི་ཡིད་ཀྱི་ལུས་ལ་འཁྱིགས་པས་ཞེ་སྡང་ཞིང་འདོར་བར་མོས་ལ་མ་འོངས་པའི་མངོན་པར་ཆགས་པས་འབྲེལ་ཏེ་རྒྱུ་འབྲས་སུ་བརྩིའོ། །འདའ་ཁ་མ་དེའི་ཕྱིར་གཅེས་པ་ནི། འཆི་ཁའི་མན་ངག་རབ་ཤེས་པས། །འདི་ཚེ་ངེས་པར་འབྱུང་བར་གསུངས། །ཞེས་པ། འདི་ཉིད་ནས་འཆད་པ་བརྟེན་པ་དེར་རྣལ་འབྱོར་དུ་བྱས་པ་དང་། འཇུག་པ་ལྔའི་རྣལ་འབྱོར་རིམ་པ་ལ་གནས་པའི་ཚེ། གང་གོང་མ་ཐོབ་བར་སྐབས་སུ་འཕོ་བ་ནི་རྣལ་འབྱོར་གོམས་པ་དེ་ཉིད་ཀྱིས་བསྐུལ་བ་ནི། བར་མའི་ཚེ་བདུན་ལ་མི་གནས་པར་བདེ་བ་ལ་སྐད་ཅིག་གིས་སྦྱོར་ཏེ་རང་དབང་སྐྱེ་བའི་ཕྱོགས་ཆ་སྟེ། དེ་ཚེ་རྡོ་རྗེ་རྒྱལ་པོའམ་བཤེས་གཉེན་དམ་པས་སྤྲད་པ་དང་། རླུང་དང་འགྲོགས་པའི་ཆོ་ག །བསྟན་པ་གཅེས་པ་གསུངས་སོ། ༈ །དེ་ལྟར་ཤེས་པར་བྱས་ནས་སྒྲུབ་པ་ལ་འཇུག་པའི་མཚན་ཉིད་ལུས་དྲུག་པ་གྲོལ་བའི་ཕྱིར། མ་སྐྱེས་རང་བཞིན་ཡེ་ཤེས་ལས། །ཞེས་པ། ལས་ཀྱི་དཀྱིལ་འཁོར་སྐྱེད་པའི་རྒྱུ་མི་དམིགས་པ་སྒོམ་མོ། །ཨེ་རཾ་ཁམས་གསུམ་ཨེ་དཀྱིལ་འཁོར། །མེ་དཔུང་འབར་བའི་ཀློང་ཡངས་སུ། །ཞེས་པ། ཨེ་རཾ་ཞེས་པ་ཁམས་གསུམ་གྲུ་གསུམ་མཐིང་ནག་གཞལ་ཡས་སུ་མེ་འབར་བར་བསྒོམ་པའོ། །ཛྭ་ལ་རཾ་གྱིས་མེ་དཔུང་འབར་བའི་གཞལ་ཡས་དེར་སྤྲུལ་པའི་ཁྲོ་བོ་བསྒོམ་པ་སྟེ། རང་རིག་ཡེ་ཤེས་རང་སྣང་བ། །ཞེས་པ། ཐམས་ཅད་རིག་པ་ཉིད་ལས་རྒྱུ་རྐྱེན་མ་དམིགས་པའི་ཕྱིར་རོ། །དེ་དག་གང་ཞེ་ན། སྐྱེ་འགྲོ་འབྱུང་བ་ནགས་ཚལ་ཀུན། །མ་ལུས་ཁྲག་འཐུང་རྡོ་རྗེའི་རིགས། །མཐིང་ནག་འཇིགས་པའི་མཚོན་ཆ་ཅན། །གཅེར་བུ་རྔམ་ཚུལ་ཏིལ་གང་སྦྱར། །ཞེས་པ། སྔགས་དེའི་རིག་པ་རང་སྣང་གི་གཞི་སྐྱེ་དྲུག་འགྲོ་འབྱུང་རྡུལ་རྩི་ཤིང་ཐམས་ཅད་རྡོ་རྗེའི་རིགས་ཀྱི་ཁྲོ་བོ་མཐིང་ནག་མཚོན་ཆ་སྣ་ཚོགས་ཅན། གཅེར་བུ་རལ་པ་འབར་བར་གསལ་ལ་ལས་ལ་གཟུད་པའི་སྔགས་བརྗོད་པས་ཤིན་ཏུ་ཁྲམ་རྔམས་ཏེ་འགྲོགས་སྟབས་སུ་ལས་ལ་ཆས་པས་སྣོད་བཅུད་ཀྱི་ཨེ་ཏིལ་འབྲུའི་གང་བུ་ལྟར་བསམ་པའོ། །ཁྲོས་པས་སྤངས་ལངས་ཁམས་གསུམ་ཀྲུགས། །བསྒྲུབ་བྱའི་དམིགས་སུ་ལེན་པར་བསྒོམ། །ཞེས་པ། གཤེད་དང་ཕྲལ་ལ་དགུགས་པ་སྟེ། བདེན་པས་བསྒོས་ལ་ཕོ་ཉས་དགུག་སྟེ། ཁྲོས་པའི་སྔགས་བཟླས་ཉུངས་ཀར་བཅས་པ་གཏོར་བས། ཁྲོ་བོ་དེ་དག་ཕྱོགས་བཅུ་ནས་སྡངས་ལངས་སུ་སྤྲོས་ཏེ་འཆོལ་བར་གང་བ་ལས་རྒྱུད་ལས་འབྱུང་བ་ལྟར་འུར་ཆེམ་གཡོས་འགུལ་ལྡེག་གཏོར་གསུམ་གྱི་རིམ་པས་ཁམས་གསུམ་གྱི་གནས་བཞི་བཅུ་རྩ་གཅིག་དཀྲུགས་ཏེ། གང་ལས་ངན་གྱི་ཕྱོགས་འཛིན་པ་དང་། གཤེད་བྱེད་པ་དང་། ཁོག་བསྲུངས་ཀུན་རྡུལ་དུ་བརླག་བཅོམ་བསྐྲད་དེ། ཐུགས་རྗེའི་གནས་དེ་ཉིད་སྔ་མའི་ཆ་བྱད་དུ་སྙིང་ག་ན་ཀྱོ་ཀ་མགོ་དགུ་པས་བཟུང་སྟེ་རང་དབང་མེད་པར་ནྲྀ་ཛས་དྲངས་པ་ཕོ་ཉ་དང་ཕྱག་རྒྱ་དང་ཏིང་ངེ་འཛིན་གྱིས་བཀུག་སྟེ་དྲུང་དུ་ལྷགས་པ་དང་། འཆད་པ་བཞིན་ཕོབས་ལ་བཅིང་ངོ་། །བསྙེན་པའི་དཀྱིལ་འཁོར་བསྟན་པའི་ཕྱིར། །དུར་ཁྲོད་རས་ཀྱི་དཀྱིལ་འཁོར་ལ། །ཞེས་པ། དཔེ་ཆུང་གི་རྒྱུ་བསྟན་པ་སྟེ། ཆོ་ག་བཞིན་དབུས་ལེ་ཚེ་དགུ་ལ་འཁོར་ལོ་རྩིབས་བརྒྱད་པར་བྲིས་ཏེ། སྟེགས་བུའི་ཁར་སྣམ་འཕྱི་ནང་གཙང་མའི་བླར་གནས་པར་བྱའོ། །བཞི་པའི་དཔེ་ཆུང་ཤོག་བུ་ལ་བྲིས་ཏེ་ལྡེང་བུ་དང་བཅས་པར་ཤིང་རིས་ལ་བཏགས་ཏེ་བླ་གབ་ཏུ་བྱའོ། །དཔེ་ཆུང་གི་དཀྱིལ་འཁོར་བསྐྱེད་པ་བསྟན་པའི་ཕྱིར། ཁྲག་འཐུང་དྲུག་ཅུ་རྩ་དྲུག་རྣམས། །རིམ་པ་གསུམ་དུ་བརྩེགས་པ་རྣམས། །ཞེས་པ། དབུས་སུ་རིགས་ཀྱི་ཧེ་རུ་ཀ་ཡབ་ཡུམ་བཅུ་དགོད། འཁོར་ལོ་ལ་ཕྱོགས་མཚམས་ཀྱི་ཏ་ཀྲྀ་ཏ་ཀྱི་ཁྲོ་བོ་བརྒྱད་དགོད། དབང་མོའི་བུ་དུ་དྲུག་ཅུ་རྩ་བརྒྱད་བསྐྱེད་པའི་དབུས་སུ་རིགས་ལྔའི་སྟེང་དུ་གནམ་ཞལ་མ་ཞབས་བརྒྱད་དབུ་དགུར་བསྐྱེད་དོ། །དེའི་སྟེང་དུ་ཆེ་མཆོག་བསྐྱེད་པར་བྱས་པས་སུམ་བརྩེགས་སོ། །དེ་ལ་ལྷག་པའི་ལྷ་བསྒོམས་པའི་ཕྱིར་རོ། །བྱིན་རླབས་དབང་གིས་མཛེས་པ་ཡིས། །རྔམ་ཚུལ་གཟི་བྱིན་ལྡན་པར་བསྒོམས། །ཞེས་པ། རྡོ་རྗེ་གསུམ་གྱི་བྱིན་རླབས་བསུས་པས་ལྷ་གནས་གསུམ་དུ་གསལ་བ་ལ་ལྷག་པའི་ང་རྒྱལ་བསྐྱེད་པ་དང་། ཡེ་ཤེས་ལྔའི་དབང་ནོས་པའི་དབུ་རྒྱན་པའི་ལྷ་གསལ་བ་ལ་ང་རྒྱལ་བསྐྱེད་པའོ། །ཡེ་ཤེས་སྤྱན་ཡངས་མཆོད་གསུམ་སྦྱར། །ཞེས་པ། རང་བཞིན་གྱི་དཀྱིལ་འཁོར་ཡུལ་ནས་ཕོབས་ལ་གཞུག་ཅིང་བརྟན་པར་བྱས་ནས་ཕྱི་ནང་གསང་བའི་མཆོད་པ་བྱ་བ་དང་། ཡང་རྫས་ཀྱི་མཆོད་པ་དང་། ཏིང་ངེ་འཛིན་གྱི་མཆོད་པ་དང་། ལས་ཀྱི་མཆོད་པ་ཕྱག་རྒྱ་ལ་སོགས་པས་མཉེས་པར་བྱའོ། །བཟླས་པ་སྲོག་དང་ལྡན་པར་སྦྱར། །ཞེས་པ། སྔགས་བསྐྱར་བ་ནི་བཟླས་པ་སྟེ། ཡེ་ཤེས་སྤྱན་དྲངས་པ་དཔེ་ཆུང་གི་སྟེང་བུཾ་པའི་ལྷ་ལ་འཕྲོ་འདུ་གནས་སྦྱང་བར་བསྐུལ་བ་དང་། འདས་པ་ལ་ཐིམ་པས། གང་གི་རྟོག་པར་ལྷར་བྱས་ཏེ་དངོས་གྲུབ་ཐོབ་པར་བསམ་པ་ནི། མ་ཡེངས་པས་སྲོག་གི་ཆོ་གའོ། །འོ་ན་དེ་ཞི་བའི་དཀྱིལ་འཁོར་བསྙེན་ན། དེ་ནས་འཇིགས་བྱེད་དུ་བསྒྱུར་བ་ལ་བསྙེན་པ་ནི་གཞུང་ལས་མ་སྨོས་ཀྱང་སྤྱིར་མི་འགལ་བར་དགོངས་སོ། །ཐུགས་རྗེའི་དཀྱིལ་འཁོར་བསྟན་པའི་ཕྱིར། ཐུགས་རྗེའི་དཀྱིལ་འཁོར་བཞི་བཅུ་གཉིས་རང་བཞིན་ཡིད་ཀྱིས་དམིགས་བྱས་ཏེ། ཞེས་པ། ཞི་བའི་དཔེ་ཆུང་ལྟར་བསྒོམ་སྟེ་འོག་མིན་ཉིད་དུ་བསམ་པར་བྱའོ། །གཅིག་དང་དུ་མ་མེད་ཚུལ་གྱིས། །སངས་རྒྱས་ཀུན་གྱི་ངོ་བོར་བརྟག །ཅེས་པ། རྒྱལ་བ་ནི་གཅིག་ཀྱང་ཀུན་ཡིན་པས་མཐའ་གཉིས་དབྱེར་མེད་པའི་ལུགས་ཀྱི་བཞི་བཅུ་གཉིས་པོ་ཉིད་རྒྱལ་བ་དུས་གསུམ་པའི་བདག་ཉིད་དུ་བསམ་པར་བྱའོ། །བསྡུ་བའི་སྦྱོར་བས་ཀུན་བསྡུས་ཏེ། །བྱིན་རླབས་གཏོང་བ་གསོལ་བར་བྱ། །ཞེས་པ། ས་མན་ཛའི་གསང་སྔགས་ཕྱག་རྒྱ་དང་བཅས་པས་རྒྱལ་བ་ཐམས་ཅད་བཞི་བཅུ་གཉིས་སུ་བཞེངས་ཏེ་བསྡུས་ནས་དཔེ་ཆུང་གསལ་སྟིམས་ཏེ་མདུན་གྱི་ནམ་མཁའ་ལ་བཞུགས་པ་ལ། ཚེ་འདས་པ་ནི་བྱིན་གྱིས་བརླབ་ཅིང་སྒྲིབ་པ་སྦྱང་བ་ལ་དབང་བསྐུར་དུ་གསོལ་ཞེས་གསོལ་བ་གདབ་པར་བྱའོ། ༈ །ལུས་བདུན་པ་འགྲོལ་བའི་ཕྱིར། བསྒྲུབ་བྱ་ཁྲུས་བྱ་དྲི་མ་ལྡན། །ངེས་པར་ཤར་སྒོ་ཉིད་དུ་གཟུང་། །ཞེས་པ། ལས་རིམ་པ་ནི་འདི་ཁོ་ན་ལྟར་བརྩམ་པར་བྱ་སྟེ། ཐོག་མ་ཉིད་དུ་གནས་ཤིས་པར་དཔེ་ཆུང་བཤད་པ་ལྟར་བརྩམ་ལ། ཕྱི་རོལ་དུ་མཆོད་སྦྱིན་རྒྱས་པར་བྱས་ཏེ། དེ་ནས་གང་ཚེ་འདས་པའི་གཟུགས་ཕུང་ལ་ཁྲུས་བྱས་ཏེ་ཆོས་ཉིད་རྣམ་པར་དག་པས་སྦྱངས་པའི་ཆུ་དང་། ཡི་གེ་བརྒྱ་པས་སྦྱངས་པའི་ཆུས་བཀྲུས་ཏེ། རྒྱ་སྤོས་ལ་སོགས་པ་དང་ལྡན་པར་བྱས་ཏེ། ཕྱོགས་བཅིང་བའི་འོག་ཏུ་ཡོན་བདག་འདུག་སྟེ་ཤར་སྒོར་གཟུང་བར་བྱའོ། །དཀྱིལ་འཁོར་དང་པོ་གསལ་བྱས་ལ། །སྤྲུལ་པས་མཚམས་བཅད་བུམ་པ་གཟུང་། །ཞེས་པ། ལས་ཀྱི་དཀྱིལ་འཁོར་གསལ་བཏབ་ལ་བདེན་པ་བསྒོ་སྟེ་འགེགས་བསྐྲད་ལ་བུམ་པ་ཚེ་འདས་པའི་ཕད་དུ་བཞག་སྟེ་འདུག་ལ། ཞི་བ་དང་ཁྲོ་བོའི་དཀྱིལ་འཁོར་བརྩེགས་མར་བསྐྱེད་དེ། ཆུ་བླུགས་པ་ན་ཉུངས་ཀར་དང་སྙིང་པོ་ལྷའི་སྔགས་བཟླས་ཤིང་བླུགས་ཏེ། དེ་ནས་རོལ་མོས་དྲངས་ཏེ་དཀྱིལ་འཁོར་ལ་བསྐོར་ལ་དབུས་སུ་བཞུགས་སུ་གསོལ་ལོ། །གཤེད་དང་ཕྲལ་ལ་ཤེས་པ་དགུག་པ་བསྟན་པའི་ཕྱིར། བཤད་པ་བཞིན་དུ་བསྒྲུབ་བྱ་དགུག །ཅེས་པ་ནས། མ་སྐྱེས། ཞེས་པའི་ཤྭ་ལོ་ཀ་ཕྱེད་དང་གསུམ་གྱིས་དཀྱིལ་འཁོར་བཤད་པ་བཞིན་བྱའོ། །ངེས་པར་གཟུགས་ལ་ཕབ་སྟེ་བཅིངས། །ཞེས་པ། པྲ་བེ་ཤས་ཕྱེ་བ་དང་། ཨ་བེ་ཤས་ཕུང་པོ་ལ་བསྟིམས་ཏེ། ཕྱག་རྒྱ་བཞིས་བཟུང་བཅིངས་བསྡོམས་དགྱེས་སྲོག་དང་ལྡན་པར་བྱའོ། །དེ་ནས་འཆད་ལྟར་བརྡ་སྒོ་དབྱེ་བ་དང་། ལྷ་ལ་གསོལ་བ་གདབ་པ་དང་། སྒྲིབ་པ་བྲལ་ཏེ་ལྷར་བསྐྱེད་པ་ལ་བར་ཆད་བསལ་བའི་ཕྱིར་གོ་བགོ་ལུས་སྲུང་བ་དང་། འཁོར་ལོའི་ཕྱག་རྒྱས་ཅི་རིགས་སུ་བསྲུངས་ལ་བུམ་པའི་ལས་སྦྱར་བའོ། །དཀྱིལ་འཁོར་གཉིས་པ་འདིར་ཤེས་ཏེ། །ཞེས་པ། བསྙེན་པའི་དཀྱིལ་འཁོར་གྱི་ལས་ཉེས་བྱས་བཤགས་པ་དང་། བྱིན་བསྡུས་ཏེ་ལས་ཀྱི་ལྷར་གསལ་བས་མཆོད་པ་བྱིན་གྱིས་བརླབས་ནས་ཞི་བ་དང་། ཁྲོ་བོ་རིམ་པར་གཞུང་བསྲང་བར་བྱའོ། །དེ་ནས་བསྙེན་པ་དངོས་ནི། ཕྲ་བའི་འོད་ཟེར་ཐུགས་དམ་བསྐུལ། །འདུས་པས་བསྒྲུབ་བྱ་གནས་སྦྱངས་ལ། །རྟོག་ཚོགས་དཀྱིལ་འཁོར་ཉིད་དུ་བསླབ། །ཅེས་པ། ཞི་བ་དང་ཁྲོ་བའི་བསྙེན་པའི་ཚེ་སྤྱན་དྲངས་པ་བུམ་པའི་ལྷ་རང་ཉིད་ལ་ཕྱེ་སྟེ། གསལ་བ་གསུམ་གྱིས་བཟླས་པའང་། ཕར་འཕྲོས་ཚེ་འདས་པའི་སྒྲིབ་པ་སྦྱངས་ཤིང་བར་ཐུགས་དམ་བསྐུལ། སླར་འདུས་པས་བར་གྱི་ཚེ་འདས་པ་ལ་ཐིམ་པས་ལྷ་གང་ཡིན་པའི་རྟོག་པ་སྦྱངས་ཏེ་སྐུ་དེ་ཉིད་དུ་གསལ་བར་བྱ་སྟེ། མདོར་ན་དཀྱིལ་འཁོར་གྱི་ལྷ་ཡེ་ཡིན་པར་གསལ་བར་བརླབས་པ་ནི། སློབ་བུ་སྦྱངས་པའི་རིམ་པར་གསུངས། །ཞེས་པ་མི་སྣང་བའི་སློབ་བུའོ། །དེ་ནས་བསྟོད་དེ་འདས་པ་ལ་བསྡུའོ། །ཁྲོ་བོ་ནི་དཔེ་ཆུང་བསྒྲུབ་པའི་དཀྱིལ་འཁོར་བཤད་པ་ལྟར་བསྐྱེད་དེ་དབང་བྱིན་ལྡན་པ་མཆོད་ཅིང་བཟླས་བསྟོད་དེ་འདས་པ་ལ་བསུ་བ་དང་། ཚོགས་ཀྱི་འཁོར་ལོ་འབྱོར་པ་དང་སྦྱར་ཏེ་དབུལ་ཞིང་རོལ་བར་བྱ་སྟེ། ཞག་གྲངས་བདུན་ནས་དྲུག་གི་བར་དུ་དེ་ཁོ་ན་བཞིན་བྱའོ། །ཐོག་མའི་ལས་བསྟན་པའི་ཕྱིར། བསྙེན་པའི་དཀྱིལ་འཁོར་སྒོ་ཕྱེས་ནས། །ཞེས་པ། གོང་གི་བརྡ་སྒོ་དབྱེ་བའོ། །ངེས་པར་གཟུགས་ལ་ཕབ་སྟེ་བཅིངས། །ཞེས་པ། ཕབ་བཅིངས་པའི་རྗེས་ལ་ཕྱག་བཙལ་བ་དང་། དཀྱིལ་འཁོར་ལན་གསུམ་བསྐོར་ཏེ་གསོལ་བ་གདབ་བོ། །སྒྲིབ་སྦྱངས་རང་གི་ལྷར་བསྐྱེད་ལ། །འཁོར་ལོའི་ཕྱག་རྒྱས་བསྲུང་བར་བྱ། །ཞེས་པ། སྒྲིབ་པ་བྲལ་ནས་བསྲུང་བའི་སྐབས་ངེས་པར་བཤད་ཟིན་ཏོ། ༈ །བརྒྱད་པ་རང་གནས་སྦྱང་བའི་རིམ་པ་བསྟན་པའི་ཕྱིར། ཏ་ཀྲྀ་ཏ་ལ་སོགས་ངེས་སྦྱོར་བའི། སྔགས་དང་ཉུངས་ཀར་སྦྱོར་བ་ཡིས། །ངེས་དྲངས་གཙོ་བོའི་མཁའ་ལ་བཞག །ཅེས་པ། བདུན་པ་ལ་བསྟོད་ཟིན་ནས། ཡང་ལས་ཀྱི་དཀྱིལ་འཁོར་གྱི་ཕྲིན་ལས་བྱས་ལ། རང་བཞིན་སྒྲོལ་བའི་ལྟ་བ་ཅན། །ཐབས་ཀྱིས་སྒྲོལ་པའི་མན་ངག་ཅན། །དབང་པོ་ཡུལ་དུས་ཀྱིས་སྒྲོལ་བའི་སྤྱོད་ལམ་རྣལ་འབྱོར་ལམ་གང་ཡང་རུང་བ་ལ་གནས་པ་དེས། ཐུགས་རྗེ་མངོན་སྤྱོད་དང་ཏིང་ངེ་འཛིན་གྱིས་བསྒྲལ་བའི་ཕྲིན་ལས་མངོན་དུ་བྱ་བའི་ལས་རྫོགས་ནས། ཆོས་ཉིད་ཀྱི་ཏིང་ངེ་འཛིན་གྱིས་ཀུན་ཏུ་འོད་དུ་བསྒྲལ་ཏེ་རང་གནས་མཐོང་བར་བྱས་སོ། །དེའི་རྗེས་སུ་དཀྱིལ་འཁོར་གྱི་ལྷ་འཁོར་གྱི་ཕྲིན་ལས་ཀྱིས་སྟུག་པོ་བཀོད་པ་ལ་སྤར་བ་ཡང་། བི་ཤྭ་བཛྲའི་གསང་སྔགས་ཉུངས་ཀར་དང་བཅས་པ་གཏོར་བས། ཏ་ཀྲྀ་ཏ་བརྒྱད་དང་ཁྲོ་མོ་བརྒྱད་རོལ་བའི་སེམས་ལས་སྤྲུལ་པ་མང་པོ་འཕྲོས་པས། ཚེ་འདས་པ་ཤར་སྒོ་ནས་བཛྲ་ཀྲོ་དྷ་ཡབ་ཡུམ་གྱི་མཁའ་ལ་དྲངས་ཏེ་བཞག་པར་བསམ་མོ། །དེ་དག་འོད་ཟེར་མང་པོ་ཡིས། །ཉོན་མོངས་མུན་པ་དག་བྱས་ནས། །གསང་བའི་དཀྱིལ་འཁོར་མཐོང་བར་བྱ། །ཞེས་པ། ཡབ་ཡུམ་བཅུ་དྲུག་གི་སེམས་འོད་དུ་ཐིམ་པས། མ་རིག་པའི་མུན་པ་སྦྱངས་ནས་དྲུག་ཅུ་རྩ་བརྒྱད་ཀྱི་ཞལ་མཐོང་བ་ནི་སྟུག་པོ་བཀོད་པ་ནོན་པའོ། །ལྟ་བའི་སྒྲིབ་པ་དག་ནས་ཚོགས་རིམ་གཅིག་དེར་ཡང་རྫོགས་པའོ། །གཙོ་བོའི་ཕྲིན་ལས་ཀྱིས་པདྨ་སྤྱན་དང་ཡི་གེ་འཁོར་ལོར་བསྒྲལ་བ་བསྟན་པའི་ཕྱིར། རིགས་དྲུག་སྦྱོར་བའི་འོད་ཟེར་གྱིས། །ས་བོན་རྣམ་པ་དྲུག་སྦྱངས་ཏེ། །ཞེས་པ། སྔ་མ་ལྟར་ཏེ་རིགས་ལྔ་ཡབ་ཡུམ་དང་། ཆེ་མཆོག་ཡབ་ཡུམ་རོལ་པའི་བྱང་ཆུབ་སེམས་དེ་ལ་བསྟིམས་པས། བྱང་ཆུབ་སེམས་ཀྱི་འོད་ཟེར་གྱིས་ཚེ་འདས་པའི་ཡི་གེ་དྲུག་བག་ཆགས་དང་བཅས་པ་བསྲེགས་པར་བསམ་མོ། །ལྷག་མ་ནི་ལྷར་བསྐྱེད་པའོ། །ཟུང་གསུམ་འོད་ཀྱི་གོང་བུ་གསུམ། །རྣམ་ཐར་སྐུ་གསུང་ཡིད་གསུམ་གྱིས། །ཁ་དོག་རང་རྒྱུད་བཞིན་དུ་འགྱུར། །ཞེས་པ། ས་བོན་དྲུག་པོ་སྦྱངས་པས་སུཾ་ཏྲི་འོད་དཀར་པོའི་གོང་བུར་འགྱུར། ཨ་ནྲྀ་མཐིང་གའི་གོང་བུར་གྱུར། །པྲི་དུ་དམར་པོའི་གོང་བུར་གྱུར་པའི་དོན་ནི། རིམ་པ་བཞིན། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། སྐུ་གསུང་ཐུགས་ཏེ། ༀ་ཧཱུྃ་ཨཱཾ་གྱི་ཡི་གེ་ཁ་དོག་རང་རྒྱུད་དུ་དཀར་མཐིང་དམར་པོར་གྱུར་པའོ། །འོད་ཀྱིས་སྔོན་བཞིན་བྱིན་བརླབ་བསྟིམ། ཞེས་པ་སྔ་མ་བཞིན་རིགས་དྲུག་གི་སེམས་ལ་འོད་དུ་བསྟིམས་ལ། སྐུ་གསུང་ཐུགས་སུ་བརླབ་བོ། །རྣམ་ཤེས་ཐུགས་ཏེ་ཡི་གེ་གསུང་། འོད་ཀྱི་སྐུ་ཡི་རང་བཞིན་ལས། ཞེས་པ། རང་བཞིན་གྱི་དེ་ལྟ་བུ་ལ་སེམས་འོད་བསྟིམས་པས་འབྲས་བུ་གསུམ་དུ་གྱུར་པ་ཉིད་ཞུ་སྟེ། དཔའ་སྒེག་བྱམས་པ་གར་བྱེད་རྒྱལ། །གསལ་མ་ཆོས་ཉིད་བདག་མེད་མ། །སྐུ་གསུང་དགུ་ཕྲུགས་ལྡན་པ་ཡི། །ཐབས་དང་ཤེས་རབ་སྦྱོར་བ་བསྐྱེད། །ཅེས་པ། ཡིད་ཧཱུྃ་གི་ངོ་བོར་གྱུར་པ་ལས། དཔའ་སྒེག་དང་ཡུམ་གསལ་བར་བསྐྱེད་དེ་ཡང་མཐིང་ཁ་རྡོ་རྗེའོ། །ཀུན་གཞི་ༀ་ཡོངས་སུ་གྱུར་པ་ལས། བྱམས་པ་དང་ཆོས་ཉིད་མ་ཀླུ་ཤིང་ངོ་། །ཉོན་མོངས་པའི་ཡིད་ཨཱོཾ་ཡོངས་སུ་གྱུར་པ་ལས་གར་བྷྱ་ཐི་ལའི་རྒྱལ་པོ་དང་ཡུམ་བདག་ཉིད་མ་དམར་པོ་བསྐྱེད་དེ། དེ་རེ་རེ་ལ་ཡང་རང་བཞིན་གསུམ་གསུམ་ལྡན་པས་དགུ་ཕྲུགས་ལྡན་པའོ། །རྣམ་ཐར་དབུ་དང་ཡེ་ཤེས་ཕྱག །ཅེས་པ། དེ་དག་དབུ་གསུམ་དང་ནི་ཕྱག་དྲུག་པ་སྟེ། རྣམ་ཐར་གསུམ་དང་ཡེ་ཤེས་དྲུག་གིས་མཚོན་པའི་ཕྱག་ནའང་ཐུགས་མཚན་འཛིན་པ་དང་འཁྱུད་པ་ལྟའོ། །ཁམས་གསུམ་སྐུ་གསུང་ཐུགས་རྒྱས་གདབ། །ས་བཅུ་གཉིས་ལ་ངེས་པར་ཕྱིན། །ཞེས་པ། དེ་ལྟར་བརླབས་པས་ཚེ་འདས་པ་ཁམས་གསུམ་སྐུ་གསུང་ཐུགས་ཀྱི་རྒྱས་བཏབ་པར་རྟོག་པ་མངོན་སུམ་བྱས་པས། ལོངས་སྤྱོད་ལ་མ་ཆགས་པར་གསལ་བའི་ཕྱིར་པདྨ་སྤྱན་དུ་རིམ་རིགས་གཅིག་ཡང་འཕར་བའོ། །གཙོ་བོ་ལས་ཀྱིས་ཕྱི་མ་ལ་ཡང་བསྒྲལ་བར་བསྟན་པའི་ཕྱིར། བྱང་ཆུབ་སེམས་ཀྱིས་དབང་བསྐུར་ཏེ། །ཞེས་པ། ཡང་དྲུག་གི་སེམས་ཉིད་ཀྱི་བསྟིམ་སྟེ་དབང་བསྐུར་བས་བཛྲ་ཀྲོ་དྷཱིའི་མཁའ་ལ་གཙོ་བོའི་རྡོ་རྗེའི་ལམ་ནས་བྱུང་། ཐུགས་ཁ་ནས་ཡར་ཐུགས་ཀྱི་ཁྲོ་བོའི་དབུའི་སྟེང་དུ་གནམ་ཞལ་མའི་མཁའ་ལ་བསྟོན་པས། རྡོ་རྗེའི་ཐུགས་ལ་དབུར་གྱུར་པ། །ཞེས་གསུངས་པའོ། །ཆེ་མཆོག་རྒྱུན་གྱི་དབང་བསྐུར་མ། །ཞེས་པ། དེ་ལ་ཆེ་མཆོག་ཡབ་ཡུམ་གྱི་སེམས་འོད་བསྟིམས་པའི་གསང་བའི་དབང་བྱིན་པས་ལྷར་གྱུར་པ་ནི། གུ་ཧྱ་ཡགྴ་རཀྴ་གསུམ། །ཐབས་དང་ཤེས་རབ་ལྡན་གྱུར་ཏེ། །ཞེས་པ། དེ་ལྟར་འོད་བསྟིམས་པས་སེམས་དཔའ་གསུམ་ཡོངས་སུ་གྱུར་པའི་དཔའ་སྒེག་ཡབ་ཡུམ་ནི། གུ་ཧྱ་ཧེ་རུ་ཀ་དང་གུ་ཧྱ་ཀྲོ་ཏི་ཤྭ་རིར་གྱུར་པའོ། །བྱམས་པ་ཡབ་ཡུམ་ནི། ཡཀྴ་ཧེ་རུ་ཀ་དང་། ཡཀྴ་ཀྲོ་དྷི་ཤྭ་རིར་གྱུར་པའོ། །གར་བྷྱིའི་རྒྱལ་པོ་ཡབ་ཡུམ་ནི་རཀྴ་ཧེ་རུ་ཀ་དང་རཀྨོ་ཀྲོ་དྷཱི་ཤྭ་རིར་གྱུར་པའོ། །སྐུ་མདོག་ནི་མཐུན་ལ་དམ་ཚིག་ཕྱག་རྒྱ་སོ་སོར་སྦྱར་ཏེ། དེ་ལྟར་གྱུར་པས་སྤྱོད་ཡུལ་ཐམས་ཅད་མི་ཟད་པ་རྒྱན་གྱི་འཁོར་ལོར་གྱུར་པ་ནི། ཡི་གེ་འཁོར་ལོའམ་རྡོ་རྗེ་སེམས་དཔའ་མཚན་ཡོངས་སུ་རྫོགས་པའི་ས་སྟེ་ལུང་དུ་བསྒྲལ་བའོ། །དེ་ཉིད་ཀྱི་རྗེས་སུ་བསྟན་པ་ནི། བདག་གི་འོད་འཕྲོས་ནམ་མཁའ་ཡི། །བདེ་གཤེགས་རྒྱུན་གྱིས་བྱིན་རླབས་པས། །ཆེ་མཆོག་དབང་མཆོག་དཔལ་མཆོག་གསུམ། །ཐབས་དང་ཤེས་རབ་འཁྲིལ་བར་བསྒོམ། །ཞེས་པ། བདག་གི་སྤྱི་གཙུག་ནས་ས་ནུ་ཧེ་རུ་ཀ་དཀར་པོ་ཚོན་གང་བའི་འོད་ཕྱོགས་བཅུར་འཕྲོས་ཏེ་རྒྱལ་བ་ཐམས་ཅད་ཐུགས་དམ་བསྐུར་བས་མདུན་གྱི་ནམ་མཁའ་ལ་འདུས་ཏེ། སངས་རྒྱས་ཀུན་རོལ་པའི་སེམས་དཔའ་སྤྱི་བོ་ནས་བརྒྱུད་དེ་གནམ་ཞལ་མོ་ལ་ཐིམ་ཞིང་དབང་བསྐུར་ཏེ། ཧེ་རུ་ཀ་གསུམ་དུ་བརླབས་པས་ཡོངས་སུ་གྱུར་པ་ནི། གུ་ཧྱ་ཡབ་ཡུམ་གྱུར་པ་ཆེ་མཆོག་ཧེ་རུ་ཀ་དང་ཆེ་མཆོག་ཀྲོ་དྷི་ཤྭ་རིར་གྱུར། རཀྴ་ཡབ་ཡུམ་དབང་མཆོག་ཧེ་རུ་ཀ་དང་དབང་མཆོག་ཀྲོ་དྷི་ཤྭ་རིར་གྱུར། ཡཀྴ་ཡབ་ཡུམ་དཔལ་མཆོག་ཧེ་རུ་ཀ་དང་དཔལ་མཆོག་ཀྲོ་དྷཱི་ཤྭ་རིིར་གྱུར་པ་ནི། ཡེ་ཤེས་བླ་མར་འཆད་པའང་ཡོད་ན་ཁོ་བོ་ནི་དེའང་ལུང་དུ་བསྒྲལ་བར་དགོངས་སོ། །མན་ངག་ཏུ་བསྒྲལ་བ་ཡང་ཡེ་ཤེས་བླ་མའི་ས་ལ་སྤར་བ་བསྟན་པའི་ཕྱིར། དབང་མཆོག་རོལ་པའི་སེམས་འོད་ཉིད། །ཆེ་མཆོག་མཁའ་ལ་བསྡུ་བར་བྱ། །ཞེས་པ། བཞུ་བ་གཉིས་ལས་ཧེ་རུ་ཀ་བཞུ་བ་སྟོན་ཏེ། ཆོས་ཉིད་ཀྱི་རྩ་ནང་ན་བཞུགས་པ་རོལ་པ་མཛད་པས། ཡོངས་སུ་གྱུར་པའི་སེམས་འོད་དེ་ཡེ་ཤེས་རྩ་ལ་ཞུགས་པའི་མཁའ་ལ་བསྡུའོ། །དེ་ཉིད་དཔལ་མཆོག་ལ་ཞུགས་ཏེ། །ཞེས་པ། ཆེ་མཆོག་ཡབ་ཡུམ་རོལ་པས་ཞུ་བ་དེ་རང་གི་རྩ་ལམ་ནས་ཡོན་ཏན་གྱི་རྩའི་ནང་ན་བཞུགས་པའི་མཁའ་ལ་བསྡུ་བའོ། །དཔལ་མཆོག་རང་གི་གསང་ལམ་ནས། །དྭངས་མའི་ཡེ་ཤེས་སྙིང་པོ་ཐིམ། །ཞེས་པས། ཡབ་ཡུམ་དེ་ཉིད་རོལ་པས་ཞུ་བ་རང་གི་གསང་ལམ་ནས་དབུས་སུ་ཡེ་ཤེས་སྙིང་པོའི་ཐིག་ལེ་མ་ཐིམ་པར་བསམ་མོ། །བཞིའི་ལུས་བཞུ་བ་ནི། གཞི་ཡི་སྐུ་གསུང་ཐུགས་ཉིད་ཀྱང་། །དེ་བཞིན་ཉིད་དུ་འདུ་བར་བྱ། །ཞེས་པ། དེ་ནས་ཚེ་འདས་རང་གི་ལྷའི་ལུས་ཀྱི་ཆ་བྱད་ཅན་ཡོད་པའི་རྡོ་རྗེའི་གསུམ་ཞུ་ནས་རང་གི་ཡེ་ཤེས་སྙིང་པོའི་ཐིག་ལེ་ལ་ཐིམ་པར་བསམ་མོ། །ཡེ་ཤེས་བླ་མའི་ངོ་བོ་བསྟན་པའི་ཕྱིར། །བརྒྱ་རྩ་བརྒྱད་ཀྱི་སྙིང་པོ་ཡིས། །དུས་བཞིའི་བདེ་བ་རབ་ཏུ་བསྡུ། །ཞེས་པ། རྫོགས་དཔལ་བདེ་ཆེན་རྡོ་རྗེའི་ཐུགས་ཀྱིས་དགྱེས་པའི་སྔགས་འཆང་བ་བརྒྱ་རྩ་བརྒྱད་དུ་བརྗོད་པ་ཡིས་ཕྱོགས་བཅུ་དུས་བཞིའི་རྒྱལ་བ་ཐམས་ཅད་རལ་པའི་བདུད་རྩིའི་ཆུ་བོ་ཡེ་ཤེས་ཀྱི་བདེ་བ་དང་བཅས་པར་བསྡུས་ཏེ། ཆེ་མཆོག་གི་སྤྱི་བོ་ནས་བསྟིམས་ཏེ། དབུ་མའི་ལམ་ནས་མཁའ་ལ་མི་ཤིགས་པའི་ཐིག་ལེར་བསྟིམས་པའི་ཕྱིར། གཙུག་གི་ལམ་ནས་ཐིག་ལེ་ཞུགས་ཞེས་གསུངས་སོ། །མི་ཤིགས་ཐིག་ལེ་ཡེ་ཤེས་ནི། །སྐུ་གསུང་ཐུགས་ཀྱི་རྡོ་རྗེ་བདག །ཅེས་པ། ཚེ་འདས་པའི་ཡེ་ཤེས་སྙིང་པོའི་ཐིག་ལེ་རང་བྱུང་ཡེ་ཤེས་རང་སྣང་བ་དེ་སངས་རྒྱས་ཐམས་ཅད་ཀྱི་སྤྱིའི་གཟུགས་ཅན་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །གཅིག་དང་དུ་མ་རྣམ་སྤངས་པ། །སྣ་ཚོགས་སྣང་བ་མཚོན་དུ་མེད་ཅེས་པ་སྣ་ཚོགས་པའི་སྐུ་གསུང་ཐུགས་ཡོན་ཏན་ཕྲིན་ལས་སུ་སྣང་བའི་ཕྱིར་གཅིག་མ་ཡིན་ཞིང་། དེ་དག་ལ་རིགས་མེད་པས་རྒྱན་གྱི་ཕྱིར་དམིགས་སུ་མཚོན་དཀའ་བས་དུ་མ་མེད་དེ་གཅིག་དང་དུ་མ་མ་སྤངས་རང་བྲལ་བས་ཡིད་བཞིན་གྱི་ནོར་བུ་རིན་པོ་ཆེ་སྐྱེད་མོས་ཚལ་ན་འདུག་པའི་འོད་ལྟ་བུར་གྱུར་པ་ནི་ཡེ་ཤེས་བླ་མའི་ས་ལ་སྤར་བའོ། །དེ་ཁོ་ན་བསྟན་པར་བྱ་བའི་ཕྱིར་ལྷར་བསྐྱེད་ལ་འོག་མིན་དུ་འཕང་བ་ནི། རང་དབང་བསྒྱུར་བའི་ཧཱུྃ་རིང་ལས། །ཞེས་པ། མཁའི་མི་ཤིགས་པའི་ཐིག་ལེ་བདག་ཉིད་ཆེན་པོ་ཧཱུྃ་རིང་པོར་གྱུར་པ་ལས། དེ་ཡོངས་སུ་གྱུར་པ་སེམས་དཔའ་རྡོ་རྗེ་ཚོན་གང་བ། དབུ་ལ་ཡེ་ཤེས་སེམས་དཔའ་བཞུགས། །ཞེས་པ། ༀ་བཛྲ་ས་ཏྭ་ར་ཛ་ཧཱུྃ་ཞེས་བརྗོད་པས་སྐད་ཅིག་ལ་རྡོ་རྗེ་སེམས་དཔའ་ཚོན་གང་བ་རྒྱན་ཐམས་ཅད་ལྡན་པ། དཀར་པོའམ་སྣ་ཚོགས་མདོག་ཅན་ངན་སོང་ལས་རྒྱལ་བའི་དབུ་རྒྱན་ཡེ་ཤེས་སེམས་དཔའ་བརླབས་ཏེ། རྒྱུད་ལས། དབྱིངས་སུ་ཐིམ་ནས་ཕྱག་རྒྱར་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བར་བསྒོམ། །ཞེས་སོ། །དཀྱིལ་འཁོར་མང་པོ་འདུ་འཕྲོ་ཅན། །ཞེས་པ། སྤྲུལ་པའི་གཞིར་གྱུར་པ་སྟེ་ངོ་བོ། གཙུག་བྱུང་ཐུགས་རྗེའི་དབང་ཐོབ་ནས། །ཞེས་པ། གནམ་ཞལ་མའི་མཁའ་ལས་གྱེན་དུ་ཆེ་མཆོག་གི་སྤྱི་གཙུག་ཏུ་བྱུང་ནས་དེ་ན་གསལ་བ་དེ་འོག་མིན་དུ་འཕང་བའི་ཚིག་དང་གསང་སྔགས་བརྗོད་དེ་འཕངས་པས། རླུང་བཟླས་བཏེག་སྟེ་འོག་མིན་དུ་གཙོ་བོ་ཡབ་ཡུམ་གྱི་ཐུགས་ཀར་ཐིམ་ནས་ཐབས་ཀྱི་ལམ་ནས་མཁའ་ལ་ཕྱིན་པ་དང་། གསང་བའི་དབང་བསྐུར་རིགས་ངེས་པའི་སྲས་སུ་བྱས་ནས། ཐབས་དང་ཤེས་རབ་ལྡན་གྱུར་པས། །ཞེས་པ། ཁོ་ཉིད་ཡོད་པའི་ཕྱིར་རོ། །སྟོང་ཕྲག་གཅིག་གི་རྩ་བཅུད་རྣམས། །སངས་རྒྱས་སྟོང་གི་དཀྱིལ་འཁོར་དུ། །མངོན་བྱུང་རིགས་ཀྱི་བདག་པོར་འགྱུར། །ཞེས་པ་རང་གི་རྩ་སྟོང་བཅུད་སྟོང་ཐམས་ཅད་ཞེན་པ་དག་པ་ཙམ་གྱིས་སངས་རྒྱས་སྟོང་གི་དཀྱིལ་འཁོར་དུ་རང་རིག་པའི་མངོན་སུམ་དུ་མར་སངས་རྒྱས་པའི་ཕྱོགས་རིགས་བདག་རྡོ་རྗེ་འཛིན་པ་ཉིད་དུ་གྱུར་ཏེ། ས་དང་ཡོན་ཏན་ཀུན་གྱི་བདག་ཉིད་ཡེ་ཤེས་བླ་མའི་ངོ་བོར་ལྷུན་གྱིས་གྲུབ་པའོ། །ནམ་མཁའ་ཁམས་ཀྱང་དེ་བཞིན་ནོ། །ཞེས་པ། བདག་ཏུ་མ་ཟད་སེམས་ཅན་སྣང་བའི་ཆོས་ཐམས་ཅད་ཀྱི་བདག་ཉིད་དུ་སངས་རྒྱས་པའོ། །ༀ་ཤྲཱི་མ་ཧཱ་སུ་ཁ་བཛྲ་ཧཱུྃ་ཧོ༔ ཞེས་པ་བཤད་ཟིན་ཏོ། །དེ་ནས་མུན་ལ་སྣང་བྱུང་ཚུལ་དུ་སྣང་ཡང་བསྒྲུབས་པ་ལམ་གང་ལ་གནས་པས་སྤྲོས་པའི་རྣལ་འབྱོར་བྱས་པའི་རིམ་པ་དང་། གདུལ་བྱའི་སྐབས་མཐོ་དམན་གྱི་ཟབ་མོ་དང་། སྐལ་བ་ཅན་འཇོམ་པས་སྣང་བ་དང་། འབྲིང་ལ་འབྲིང་དང་། ཐ་མ་ལ་ཐ་མ་སྦྱོང་བ་དང་། འོན་ཀྱང་རབ་འབྲིང་ཐ་མ་དང་པོ་སྦྱང་བ་དང་། དེས་འབྲིང་དང་། དེས་ཐ་མ་སྦྱོང་བ་ཀུན་གྱིས་འདི་ཁོ་ན་ལྟར་གྱུར་ན་ལམ་ལ་དགོས་པ་མེད་རིགས་པས་འགལ་ཏེ། བདག་མ་སྒྲོལ་བས་གཞན་ཐར་པར་གྲོལ་བ་མི་རིགས་པའི་ཕྱིར་རོ། །དེ་སྟེ་མ་ཡིན་ན་ལམ་འོག་མའི་གཞན་དོན་འགལ་བར་འགྱུར་ཏེ། ཡང་རིགས་པས་འགལ་བ་ལ་སོགས་པ་འབྱུང་ངོ་ཞེ་ན། གཉིས་ཀའི་རིམ་པ་བཞིན་ཁྱད་པར་ནི་ཡོད་མོད་ཀྱི་ཐབས་འཕར་བ་མཐུན་པས་བྱིན་རླབས་ཀྱི་ནུས་པ་མི་འདྲ་བས་ཕྱེ་ཞིང་། མཆོག་གིས་ཀྱང་དེ་ཉིད་ངོ་བོར་བྱས་པ་མ་ཡིན་ཏེ། བྱིན་རླབས་མཆོག་ཏུ་བཞག་པ་ལ། །སྦྱོང་བའི་ཁྱད་པར་དང་། བྱིན་རླབས་ཐོབ་པའི་ཁྱད་པར་དང་། འབྲས་བུ་བདེ་བའི་ཁྱད་པར་དང་། དུས་ཀྱི་ཁྱད་པར་གྱིས་ཕྱེ་བས་སོ་སོའི་རིམ་པ་བཞིན་ཡོད་ཀྱང་ཀུན་གྱི་བྱ་བའང་། རྒྱུད་ལས་བསྔགས་མཆོག་ཤིན་ཏུ་ཟབ་པ་ཡིས། །སྐྱེ་བོ་ཀུན་གྱིས་བྱ་བར་འབྱུང་། །ཞེས་འབྱུང་བས། ཤེས་འཇུག་ཀུན་གྱིས་ཀྱང་ཡུལ་དང་འཕྲད་ན་མི་འདོར་བའི་སྤྱོད་པ་དང་དམ་ཚིག་གོ། །དེ་ལྟར་སངས་རྒྱས་ས་ལ་འགྲོ་དོན་མཛོད་ཅིག་བར་བསྐུལ་བ་བསྟན་པའི་ཕྱིར། ཧཱུྃ་བགྲོད་ཡིད་ཀྱི་བྱོན་པ་ཡི། །གནས་མཆོག་ཤིན་ཏུ་བརྡལ་བ་ལ། །ཞེས་པ། བསྐུལ་བའི་ཚིག་དབྱངས་དང་བཅས་པ་བརྗོད་པ་སྟེ། རང་གི་དཀའ་བ་མ་བཙལ་བར། །སྟོང་པའི་ཐུགས་རྗེས་ཐོབ་པའི་གནས་རབ་ནི་ཡེ་ཤེས་བླ་མའི་སའོ། །ཡིད་བཞིན་རིན་ཆེན་འབར་བའི་གཞལ་ཡས། ཞེས་པ། གནས་ཀྱི་ངོ་བོ་རྒྱུ་དེ་ལྟ་བུ་ལས་ཚད་དཔག་ཏུ་མེད་པའོ། །དུས་གསུམ་འགྱུར་བ་མེད་པའི་གདན་སྟེང་ན། །ཞེས་པ། ཡེ་ཤེས་རང་སྣང་གི་གདན་ཏེ། །གནས་གཞི་བཞུགས་དང་འབྲེལ་བའོ། །རྟག་པ་ཆེན་པོ་མཆོག་གི་སྐུ་བཞུགས་པ། །ཞེས་པ། ཁོ་རིགས་ཀྱི་བདག་པོ་རྡོ་རྗེའི་སྐུར་བཞུགས་པ་ངོ་བོ་ཉིད་ཀྱི་རྟགས་པ་སྟེ་གཉེན་པོ་མེད་པའི་ཕྱིར་རོ། །མཉམ་རྫོགས་དཔེ་ལས་འདས་པའི་རྒྱན་མངའ་ཞིང་། ཞེས་པ་སྐུའི་ངོ་བོ་ལོངས་སྤྱོད་ཆེན་པོར་བཞུགས་པའི་ཕྱིར་རོ། །དེ་གང་ལ་ལོངས་སྤྱོད་ཅེ་ན་ཡིད་བཞིན་གཏེར་ལ་གང་སྤྱོད་པ། ཞེས་པ་ཟག་པ་མེད་པའི་བདེ་བ་ལ་ལོངས་སྤྱོད་པ་གང་ཞེ་ན། བདེ་བ་ཆེན་པོ་དག་ལ་རྟག་སྤྱོད་པ། །ཞེས་པ། འདོད་པའི་བདེ་བ་ལ་སོགས་པ་བཤད་པ་ཀུན་གྱི་དངོས་གཞི་བ་སྟེ། འཁོར་བ་དང་མྱ་ངན་ལས་འདས་པ་ཀུན་བདེ་སྡུག་ཐམས་ཅད་ལོངས་སྤྱོད་དུ་མཛད་པའི་དབང་ཕྱུག་ཆེན་པོ་ནི་གསང་བའི་ལོངས་སྤྱོད་རྒྱུན་མེད་པས། རྟག་པ་ཆེན་པོ་ལོངས་སྤྱོད་རྫོགས་པའི་སྐུ། །ཞེས་པ། ལོངས་སྤྱོད་དང་སྐུ་གཉིས་ཀ་རྒྱུན་དུམ་བུ་མེད་པའི་དབང་ཕྱུག་གོ། །རྫོགས་ཆེན་འགྱུར་མེད་གཡུང་དྲུང་བརྡལ་བའི་ངང་། །ཞེས་པ། ལོངས་སྤྱོད་པའི་རྫོགས་པའི་ངོ་བོ་ཉིད་རྟག་པ་ནི། སྐུ་ཉག་གཅིག་མ་ཡིན་ཏེ་ཀུན་གྱི་ངོ་བོའོ། །བདེ་བ་ཆེན་པོའི་དབྱིངས་ཀྱི་ཡུམ་དང་མཉམ་སྦྱོར་བས། ཏིང་འཛིན་བདུད་རྩི་ཐུགས་ནི་སངས་རྒྱས་ཡོངས་ཀྱི་བཅུད། །ཅེས་པ། ཆོས་ཉིད་བདེ་བ་ཆེན་པོའི་ངོ་བོ་ཡུམ་དང་འདུ་འབྲལ་མེད་པའི་ཕྱིར། དགོངས་པས་ས་སོགས་ཞེན་མཐའི་ནད་འཇོམས་པ་ནི་ཡེ་ཤེས་དྲུག་པ་སྟེ། རྒྱལ་བ་ཀུན་གྱི་དངོས་གཞི། དེམས་བཅུད་ཡིན་པའོ། །དེ་ཡང་རྒྱུད་ལས། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཞེས་པ། དབྱེར་མེད་པའི་རང་བཞིན་ཏེ། ཞེས་པའི་བར་དུ་གསུངས་པའི་རང་བཞིན་ཁོ་ན་ཉིད་བཞུགས་པའོ། །འཕྲིན་ལས་སྦྱངས་པས་ཐོབ་པའི་ཚུལ་ནི། རྣམ་དག་ཡེ་ཤེས་སྤྱན་གྱིས་མུན་ནག་བསལ། །ཞེས་པ་སྒྲུབ་པ་པོས་ཤེས་པར་བྱ་བ་རྣམས་དང་། དེ་ཁོ་ན་ཉིད་མཐོང་བས་ཁྱོད་ཀྱི་མ་རིག་པ་བསལ་བས། ཁྱོད་ནི་མ་རིག་པ་ཡེ་ཤེས་སུ་གསལ་བ་ཡིན་ནོ། །ཡེ་ཤེས་སྒྲོན་མེ་ཐུགས་ཀྱི་བག་ཆགས་བསྲེགས། །ཞེས་པ། ལྟ་བ་ཅན་གྱི་དགོངས་པའི་འཕྲོ་འདུའི་འོད་ཟེར་གྱིས་རྟོག་པའི་བག་ཆགས་བསྲེགས་པས་བསྙེན་པའི་དཀྱིལ་འཁོར་གྱི་འབྲས་བུ་སྒྲིབ་པར་རང་འདག་པའི་ཕྱིར་དྲི་མ་མེད་ཡིན་པའོ། །རྡོ་རྗེ་སྤུ་གྲི་ཚེམས་ཀྱིས་དུས་གསུམ་བཅད། ཅེས་པས་སྒྲུབ་པ་པོ་ཤེས་རབ་ཀྱི་ཚེམས་མངའ་བས་རང་གནས་སྦྱང་བའི་རིམ་པས་དུས་གསུམ་ཞགས་པས་གཅོད་པས་ཁྱོད་ནི། དུས་གསུམ་བདེ་བ་ཆེན་པོར་མངའ་བརྙེས་པའོ། །རྔམས་ཆེན་ཧཱུྃ་ཉིད་རིང་པོས་ཁྲོ་ཆེན་གདུལ། །ཞེས་པ། རིག་པའི་ཡེ་ཤེས་བླ་མའི་རང་སྣང་བའི་ཧཱུྃ་རིང་ནི་རང་བྱུང་ཡེ་ཤེས་ཀྱི་ཞལ་རྟོགས་པ་ལ་རྔམས་པས་བདག་ཏུ་འཛིན་པ་བཏུལ་བས། ཁྱོད་ནི་བདག་འཛིན་གཉིས་མ་སྤངས་རང་གྲོལ་བ་ཡིན་ནོ། །ཡེ་ཤེས་རོལ་པས་རྒྱུད་དྲུག་གནས་ནས་སྒྲོལ། །ཞེས་པས། སྒྲུབ་པ་པོ་བྱ་བ་ཐམས་ཅད་ཡེ་ཤེས་ཀྱི་མཛད་པར་སྤྱོད་པས་འབྱུང་བའི་སྒོ་འགགས་པ་དང་། སྐྱེ་བའི་རྒྱུན་བཅད་པ་དང་བྲལ་བ་མཛད་པས་དྲུག་ལས་བསྒྲལ་བའི་ཕྱིར་ཁྱོད་ནི་དྲུག་གི་གནས་ལས་རང་ཐར་བར་མཛད་པ་ཡིན་ནོ། །ཐུགས་དམ་ཛྭ་ལ་ཛྭ་ལས་དམྱལ་ཁམས་བསྲེགས། །ཞེས་པ། སྒྲུབ་པ་པོ་ཐུགས་དམ་གདུལ་བྱར་ཐུགས་རྗེས་ཆགས་པས་མི་འདོར་བར་རིགས་པའི་མེས་ཏིང་ངེ་འཛིན་གྱིས་བསྒྲལ་བས། ཁྱོད་ནི་དམྱལ་ཁམས་རང་དག་ནས་བདེ་བར་ལོངས་སྤྱོད་པ་ཡིན་ནོ། །སྲིད་གསུམ་ཞལ་གྱིས་རྒྱལ་སྲས་སྤྲོ་བ་བསྐྱེད། །ཅེས་པ། ཕྱི་ནང་གི་སྲིད་པ་ཐམས་ཅད་རང་བྱུང་གི་ཡེ་ཤེས་ཐིག་ལེ་ཆེན་པོར་བཏུབས་ཏེ། རང་གནས་སྦྱངས་ཏེ་སྤར་བས་འོག་མིན་དུ་ཕྱིན་པས་རྒྱལ་བའི་སྲས་པོ་ཁྱོད་སྤྲོ་བ་བསྐྱེད་པས། ཁྱོད་ཀྱི་རིགས་ཀྱི་བདག་པོ་ཡིན་ནོ། །ཞེས་སངས་རྒྱས་ཇི་ལྟར་བྱས་པའི་ལོ་རྒྱུས་བརྗོད་ནས་དེ་ཁོ་ན་ལྟར་གཞན་དོན་གྱིས་ཤིག་པར་བསྐུལ་བའོ། །ཆེ་བའི་སྒོ་ནས་བསྐུལ་བ་ནི། ཡེ་ཤེས་བྱང་སེམས་སངས་རྒྱས་ཡོངས་ཀྱི་དཔལ། །ཞེས་པ། ཁྱོད་ཡེ་ཤེས་བླ་མའི་བདག་ཉིད་ལེགས་པའི་ངོ་བོ་ཡིན་པའོ། །དཔལ་ཆེན་བླ་མེད་ཁྲོ་རྒྱལ་འབུམ་གྱི་རྗེ། །ཞེས་པ་བླ་ན་མེད་པའི་ཧེ་རུ་ཀ་ཁྱོད་ཁྲོ་རྒྱལ་འབུམ་གྱི་རྗེ་བོ་རིགས་ཀྱི་བདག་པོ་སྟོན་པ་ངོ་བོ་ཡིན་པའོ། །ཀུན་བཟང་རྡོ་རྗེ་སེམས་དཔའ་ལ་སོགས་ཏེ། །དུས་གསུམ་ཀུན་གྱི་ལྷ་ཕུད་ཡིན། །མ་ལུས་འདོན་པའི་དཔལ་ནི་ངེས་པར་མཛོད། །ཅེས་པ། ཁྱོད་ནི་ཞི་བ་དང་ཁྲོ་བོ་ཀུན་གྱི་རིགས་ཀྱི་བདག་པོ་རྒྱལ་བའི་རྒྱལ་བ་ལྷའི་ལྷ་ཡིན་པའི་ཕྱིར། མྱ་ངན་ལས་འདས་པའི་མཐའ་ལ་ཞུགས་པར་གདུལ་བྱ་ཀུན་དང་སྦྱར། སྐལ་བ་ཅན་ཞིག་ན་གསང་བའི་དབང་ཡང་བསྐུར་རོ། །དེ་ནས་དཔེ་ཆུང་དབུས་སུ་མཆོད་པ་བཞག་སྟེ་མཆོད་པ་དང་ལན་བྱ། ཚོགས་ཀྱི་འཁོར་ལོ་བྱས་ནས་བཤགས་པ་དང་སྨོན་ལམ་གདབ་ཅིང་དཔེ་ཆུང་བསྲེགས། མཚན་བྱང་ཡང་བཀྲུ་བའམ་བསྲེག་སྟེ། འཁོར་གྱི་ཕྲ་མེན་ཚིམ་གྱི་ལས་ལ་སྦྱར་རོ། ༈ །དེ་ནས་དངོས་པོ་སྦྱང་བའི་ལུས་དགུ་པ་འདའ་ཀ་མའི་མན་ངག་བསྟན་པའི་ཕྱིར། སྤྱོད་ཡུལ་འགྱུར་བར་མཐོང་བ་ནི། །ཞེས་པ། ཧཱུྃ་མཛད་ཉིད་ཀྱི་བཞེད་པ་འཆད་དེ། སྔོན་དུ་གོམས་པར་བྱས་པ་ལས་ཁྱད་པར་དུ་བསྒོམ་པའི་མཐའི་དུས་བསྟན་པའོ། །གསང་བའི་གནས་སུ་ཉོན་མོངས་ཡིད། །ཟླ་བའི་དཀྱིལ་འཁོར་གསལ་བ་ལ། །ཀུན་གཞི་ཡེ་ཤེས་སྙིང་པོ་ཡིས། །འོད་ཀྱི་ཁམས་གསུམ་སྦྱངས་ཏེ་བསྡུས། །ཚོན་གང་འོད་དུ་གསལ་བ་ལ། །དཀར་པོ་ཧཱུྃ་གནས་རྣམ་ཤེས་སོ། །དེ་དག་སྐུ་གསུང་ཐུགས་དག་སྟེ། །ཤིན་ཏུ་འདྲིས་པ་ཉིད་དུ་བྱ། །ཞེས་པ། སྟོང་པའི་རྣལ་འབྱོར་པའི་ས་པ་སྟེ། དང་པོ་ཉིད་ནས་གསེར་སྒྲོམ་ནང་དུ་ཀུན་གཞི་བྱང་ཆུབ་སེམས་རང་སྣང་བའི་ཡེ་ཤེས་སྙིང་པོའི་ཐིག་ལེ་འཕྲོས་འདུས་སྦྱང་བསྡུས་ཏེ་འོད་ཚོན་གང་བ་ལ་བསླབ། དེ་གོམས་པ་དང་། དེ་མ་ཤོར་བའི་སྟེང་དུ་ཡིད་རང་དག་པ་ལ་ཟླ་མཉམ་དུ་བསམ་མོ། །དེ་གཉིས་བརྟན་པ་དང་དེའི་སྟེང་དུ་ཡིད་ཡེ་ཤེས་ཀྱི་ངོ་བོ་ཧཱུྃ་དཀར་པོ་སྐྱེད་པའི་ཚུལ་དུ་བསམ་མོ། །དེ་ཤེས་གསུམ་འབྲས་བུ་གསུམ་གྱི་བདག་ཉིད་བཤད་ཟིན་ཏོ། །དེ་ལྟར་རིམ་དུ་གོམས་པར་བྱས་པ་ཡང་། ཡང་ན་བློ་ཆེ་བས་ཐོག་མ་ནས་སུམ་བརྩེགས་སུ་བསྒོམ་སྟེ་ཤིན་ཏུ་བརྟན་པ་ཡུལ་གྱིས་མི་འཕྲོགས་པར་བྱའོ། །དེ་ནི་དུས་ཐ་མ་ལ་གསལ་བའི་རྒྱུ་བྱེད་པས་སྟོན་པས་གསུམ་མོ། །དུས་དང་འབྲེལ་བར་བསྒོམ་པ་ནི། རླུང་བརྩེགས་བཅུད་གཡོ་མཚན་མཐོང་ནས། ཞེས་པ། སྤྱོད་ཡུལ་འགྱུར་བར་མཐོང་བ་ཁོ་ན་སྟེ་ལུགས་བཤད་ཟིན་ཏོ། །དེའི་ཚེ་བསྒོམ་པ་ནི། རིང་པོ་ཧཱུྃ་ཉིད་ན་ས་ནས། །དུ་བའི་ཚུལ་དྲངས་འོད་ལ་བསྡུ། །ཞེས་པ། སྒྲ་དོན་ནུབ་ལ་ཁད་པའི་ཚེ། །སུམ་བརྩེགས་གསལ་བ་ནས་ཧཱུྃ་ན་ས་ནས་དུ་བའི་ཚུལ་ལྟར་ཕྱི་རོལ་དུ་དྲངས་ཏེ། སླར་ནང་དུ་འོད་ལ་ཐིམ་པར་བྱའོ། །དེ་བཞིན་ཟླ་བའང་ཤེས་པར་བྱ། ཞེས་པ། ཟླ་བའང་དུ་བའི་ཚུལ་དུ་འབྱུང་འཇུག་བྱ་བ་ནི། ཤེས་པ་གཉིས་ཀྱང་ཀུན་གཞིར་གཅིག་ལ། ཆོས་ཀུན་སེམས་ཀྱི་ཆོས་ཉིད་དུ་འདུས་པའི་ཕྱིར་རོ། །འོད་ཟླུམ་གསང་བའི་ལམ་ཞུགས་ཏེ། །ཕྱིར་ཕྱུང་ཕྱོགས་བཅུར་ཁྱབ་བརྡལ་བས། །ཁམས་གསུམ་བདག་ཕྱིར་མཐའ་དབུས་དང་། །ཕྱི་ནང་ཡུལ་སེམས་བྲལ་བའི་དོན། །དྲན་པས་ལས་ཀྱི་རྒྱུན་བཅད་པས། །རང་གནས་མཐོང་བར་འགྱུར་བ་ཡིན། །ཞེས་པ། དེ་ནས་འོད་ན་ས་ནས་ཞུགས་ཏེ། ཕྱི་རོལ་དུ་ཕྱུང་བ་ཕྱོགས་བཅུར་འཕྲོས་ཁྱབ་བརྡལ་བར་གསལ་བའི་རྐྱེན་གྱིས་ཁམས་གསུམ་བདག་གི་རིགས་པ་རང་སྣང་བའི་གཏན་ཚིགས་ཀྱིས་མཐའ་གསུམ་མ་སྤངས་པར་རང་བྲལ་ཞིང་ཡུལ་སེམས་དབྱེར་མེད་པར་སེམས་ཀྱི་ཆོས་ཉིད་འབའ་ཞིག་ཏུ་གསལ་བའི་དོན་ཅི་ཡང་དྲན་པ་མེད་པ་ཉིད་ཡང་དག་པའི་དྲན་པ་སྟེ། དེའི་ཡོན་ཏན་ནི་ལས་ངན་པ་རྒྱུན་གཅོད་ཅིང་རང་གི་དངོས་པོ་གནས་སྐབས་མངོན་དུ་བྱས་ཏེ་ས་ལ་སྦྱོར་བར་བྱས་པའི་ཕྱིར། མཐོང་བའི་ལས་མང་པོ་བས་མཐུ་ཆེའོ། །སློབ་དཔོན་སངས་རྒྱས་གསང་བའི་བཞེད་བསྟན་པའི་ཕྱིར། གསང་བའི་ཞབས་ཀྱི་རྣམ་པ་ནི། །ཞེས་པ། བླ་མའི་མཚན་སྨོས་པའོ། །དེའི་བཞེད་ནི། གཉིས་ཀྱང་རྣམ་ཤེས་ཡིད་འདུ་སྟེ། །ཞེས་པ། སྔོན་དུ་གོམས་པར་བྱས་པ་སྔོན་བཞིན་བརྟག་པ་ཀུན་གཞི་དང་ཡིད་དྲི་མ་ཅན་ཡེ་ཤེས་སུ་འདུན་པའི་ཕྱིར་ཟླ་འོད་འཕྲོས་འདུས་ཡི་གེ་ལ་བསྡུའོ། །དེ་ནས་ལྕེ་རྩེ་རྐན་ལ་སྦྱར་བྱས་ཏེ། ཧཱུཾ་ཉིད་བླ་མེད་ཧེ་རུར་གྱུར། །སྣ་ཚོགས་མདོག་ལྡན་རྒྱན་རྫོགས་པས། །ཧཱུཾ་བརྗོད་ན་ས་ལམ་བྱུང་སྟེ། །འོག་མིན་ལ་སོགས་འགྲོ་བར་བྱ། །ཞེས་པ། མཚན་མ་མཐོང་སྟེ་སྤྱོད་ཡུལ་འགྱུར་ལ་ཁད་པ་ན། ལྕེ་རྩེ་རྐན་ལ་སྦྱར་ཏེ་ཤེས་པ་གསུམ་གྱི་བདག་ཉིད་ཧཱུཾ་རིང་པོར་གྱུར་པ་སྟེ། བླ་ན་མེད་པའི་ཧེ་རུ་ཀ་མདོག་ལྗང་གུའམ་མ་ངེས་པ་རྒྱན་ཀུན་ཚང་བ་གཅིག་ཏུ་གྱུར་པ་དང་། དེ་གསལ་བ་ལ་ཧཱུཾ་ཞེས་བརྗོད་པས་ཧེ་རུ་ཀ་ན་སའི་ལམ་ནས་ཕྱིར་བྱུང་བ་འོག་མིན་དུ་བསྐུལ་བར་བྱའོ། །དེའི་ཡོན་ཏན་ནི། གདོད་པ་ངེས་པར་འགྲུབ་པར་འགྱུར། །ཞེས་པ། སྨོས་པའི་འབྲས་བུ་ལྷག་པར་གྲུབ་པར་འགྱུར་རོ། །དེ་དག་གི་ཕྱག་རྒྱ་བསྐུལ་བའི་ཕྱིར། ཕྱག་རྒྱ་གཅིག་ལ་སོགས་པ་འབྲས་བུའི་རྣལ་འབྱོར་གྱི་བདེ་བར་ལུང་བསྟན་ཏོ། །འོན་ཏེ་རྐྱེན་གྱིས་བསམ་པའི་སྐབས་མེད་པའང་སྔོན་དུ་གོམས་པའི་སྟབས་ཀྱིས་བདེན་པ་ཐོབ་ན་སྐབས་ཡོད་པ་ཅི་སྨོས་ཏེ། མཐའི་དབང་དུ་བརྗོད་པའི་ཕྱིར་རོ། ༈ །ལུས་བཅུ་པ་འབྲས་བུ་བསྟན་པའི་ཕྱིར། ཐེག་མཆོག་གསང་བ་མངོན་བྱས་པ། །ཞེས་པ། དེ་ལྟར་རང་གི་བསལ་བ་དང་། །བསྟངས་པས་གྲུབ་པའི་འབྲས་བུ་མཆོག་ཐོབ་པ་གང་ཞེ་ན། གཞི་བཞིན་མ་ལུས་བདག་ཉིད་ཕྱིར། །ཞེས་པ། བདག་ཉིད་ཆེན་པོའི་གཏན་ཚིགས་དང་དཔེ་དོན་བསྟན་པའོ། །རྒྱ་བྲལ་གཅིག་དང་དུ་མ་སྤངས། །འདས་དང་མ་འདས་དུས་གསུམ་གྱིས། །རོ་མྱོང་བདག་ཕྱིར་རྣམ་རྟོག་བུལ། །ཞེས་པ། འབྲས་བུ་ཐོབ་ལུགས་ནི། རྒྱུད་ལས། སྐུ་གསུང་ཐུགས་དང་ཡོན་ཏན་དང་། །ཕྲིན་ལས་རྨད་བྱུང་ཀུན་གྲགས་པ། །གཞན་ནས་ཡོད་འོངས་མ་ཡིན་ཏེ། །རང་བྱུང་ཡེ་ཤེས་གནས་མེད་ཡིན། །ཞེས་འབྱུང་སྟེ་རྨི་སད་བདེ་བ་ལྟ་བུ་མ་བཏགས་པའོ། །ངོ་བོ་ནི་ཉེར་ལྔར་མཚན་བརྗོད་ཀྱང་རྒྱན་གྱི་འཁོར་ལོའོ། །མཚན་ཉིད་གང་དུའང་མ་ཟིན་པར་བཤད་ཟིན་ཏོ། །ཀུན་ལ་སོན་པས་རོ་ལྟར་ལ་མི་རྟོག་པ་བཤད་ཟིན་ཏེ། ཐམས་ཅད་མཁྱེན་པའི་ཚུལ་ནི། ཡེ་ཤེས་དབྱིངས་ལས་མི་གཞན་ཕྱིར། །ཞེས་པ། གདུལ་བྱ་དང་ངོ་བོ་མི་གཅིག་པ་ནི་གཏན་ཚིགས་སོ། །ཐུགས་རྗེ་ཆེན་པོས་མ་ལུས་མཁྱེན། །ཞེས་པ་བསམ་རྟགས་ཀྱི་ཐ་དད་པ་ལ་མཁྱེན་ཡོད་ཀྱང་། ཡུལ་དང་བྲལ་བས་ཆུ་དང་གཟུགས་བརྙན་བཞིན་ནོ། །སྐུ་གསུང་ཐུགས་དང་ཡོན་ཏན་ལས། ཁྱབ་དང་བདེ་བ་རྟག་དབང་བསྒྱུར། །ཞེས་པ། ངོ་བོ་སྐུ་ལྔ་ལྷུན་གྱིས་གྲུབ་པ་ཉིད། །ལྷག་པའི་ཆོས་ཀྱི་སྐུ་དང་། ལོངས་སྤྱོད་རྫོགས་པ་དང་། བྱང་ཆུབ་ལ་སོགས་པ་ཉེར་ལྔ་རྫོགས་པས་དོན་རང་བཞིན་གྱིས་མཛད་པའོ། །རྐྱེན་གྱིས་སྐྱེ་འཇིག་མེད་པའི་ཕྱིར། ཞེས་པ་ལྔ་ལྷུན་གྱིས་གྲུབ་པ་དེ་ཉིད་སྐད་ཅིག་མ་མ་ཡིན་པ་ནི་གཏན་ཚིགས་ཏེ། དོན་ནི། རྟགས་ཆེན་རྡོ་རྗེའི་སྐུ་ཞེས་གསུངས། །ཞེས་པ། ངེས་ཚིག་གོ། ༈ །སྤྱི་དོན་ཐ་མ་བརྩམས་པ་ཆུད་མི་ཟ་བའི་ཕྱིར་དགེ་རྩ་བསྔོ་བ་ནི། རང་བཞིན་གནས་རྒྱུད་ཡེ་ཤེས་ཕྱག་རྒྱ་བསམ་ཡས་མངོན་སུམ་ཡུལ་བྲལ་རང་གནས་ལ། ཞེས་པ། བཤད་པའི་འགྲོ་བ་ཉིད་འབྲས་བུར་གནས་པའི་དོན་ནོ། །འཁྲུལ་དང་རྣམ་པ་རང་རྒྱུད་ལོག་རྟོག་གསུམ་ལས། རྐྱེན་རབ་རིབ་ཞེ་ན་སྣང་བ། ཞེས་པ། བཤད་པའི་རྐྱེན་ལ་སོགས་པས་དེ་ལྟར་ཡོངས་མདོངས་པའོ། །ཐབས་མཁས་སྤྱན་མངའ་རྒྱུད་བཞིན་སྒྲོ་བྲལ་རྒྱུད་གསུམ་ཐུར་མས་གསལ་གབ་གསུངས་སོ། །ཞེས་པ། གུ་རུ་ནི་མིག་མཁན་རྒྱུད་གསུམ་ལ་མདོངས་པའི་མིག་འབྱེད་པའི་ཐུར་མ་ནི་མན་ངག་འདིའོ། །དེར་ཆོད་པའི་ཆེད་དུ་སྟོན་པས་ཡི་གེའི་རྒྱུད་ལ་གབ་ནས་གསུངས་པ་ལ་བརྟེན་ནས། ཡིག་གོམས་ཉམས་རྣ་རྒྱུད་ཉམས་ཤར་གསལ་བྱས་འདས་དང་ད་ལྟར་རང་རིག་མིག་ཐོབ་ཤོག །ཅེས་པ། དཔེར་ན་ལོང་བ་དང་སྨན་པ་དང་། །དཔྱད་ཡིག་དང་། ཐུར་མས་མིག་འབྱེད་པ་མཐོང་བ་དང་ལྟར། གུ་རུས་འདི་ཙམ་དུ་གནང་བ་ནི། རྒྱུད་ལ་གོམས་པ་དང་། སྙན་ཁུང་བརྒྱུད་པའི་མན་ངག་ཐོས་པ་དང་། ལུང་མན་ངག་གི་གཉེར་གྱིས་ཉམས་བརླན་པས་བརྩམས་པས། ངལ་བའི་དགེ་བའི་རྩ་བ་དང་འདིའི་སྒོ་ནས་དུས་གསུམ་རྣལ་འབྱོར་ཀུན་ཤེས་རབ་སྤྱན་དང་ལྡན་ནས་རང་གནས་མཐོང་བར་ཤོག་ཅིག་པའོ། །ཤུགས་ལྡན་ཆར་གྱིས་མི་བརྫི་བཞིན། །རང་གནས་མཐོང་བའི་གོ་མཚོན་ཅན། །འཁོར་བའི་དགྲ་དཔུང་འཇིགས་དང་བྲལ། །དེ་ཕྱིར་སྦྱོང་ཐབས་གཉིས་ལ་འབོད། །གཡོ་ཅན་ངག་འཇམ་སྨྲ་བ་དང་། །འཇིག་རྟེན་བྱ་བའི་རྒྱུར་སྒྲུབ་དང་། །བསྟན་པ་བཅུད་ཆེན་འབོ་བ་དང་། །ས་གཞི་མེད་ལ་གནང་མི་བྱ། །གསང་བ་སྙིང་པོའི་རྒྱུད་དག་ལས། །བཅུད་བསྡུས་མན་ངག་གཉིས་ཆེད་དུ། །རྒྱས་པར་བཀྲོལ་བའི་དགེ་བ་ཡིས། །མ་ལུས་རང་གནས་མངོན་འགྲུབ་ཤོག །རང་གནས་རྒྱལ་པོའི་རྒྱ་ཆེར་འགྲེལ་པ་སློབ་དཔོན་བི་མ་ལས་མཛད་པ་རྫོགས་སོ། །ཡེ་ཤེས་དོན་རྟོགས་སྐྱེ་འཆི་མེད་རྟོགས་པས། །འཕོ་འགྱུར་མེད་ཕྱིར་ཛྙཱ་ན་ཀུ་མ་ར། །བདག་གིས་བཤོས་ཁང་དགུ་ཐོག་ཡང་སྟེང་དུ། །དཀའ་བས་བསྒྱུར་འདིའི་བསོད་ནམས་ཡོངས་ལ་བསྔོ།། །།
སྒྱུ་འཕྲུལ་ཁྲོ་བོ་བསྡུས་པའི་སྒྲུབ་ཐབས་དེ་ཉིད་ལས་སྣང་བ་དམ་པ། སློབ་དཔོན་སངས་རྒྱས།
སྒྱུ་འཕྲུལ་ཁྲོ་བོ་བསྡུས་པའི་སྒྲུབ་ཐབས་དེ་ཉིད་ལས་སྣང་བ་དམ་པ་བརྒྱན་ཞེས་བྱ་བ་བཞུགས་སོ། །ཐམས་ཅད་ངོ་བོ་མཉམ་ཉིད་སྐུ། །བདེ་ཆེན་གར་དབང་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་ཡི། །ཧེ་རུ་ཀ་ལ་ཕྱག་འཚལ་ལོ། །སྒྱུ་འཕྲུལ་དྲྭ་བའི་རྒྱུད་དག་ལས། །ལྷ་ཡི་རྣལ་འབྱོར་རིམ་པ་ཞིག །སེམས་ཅན་ཡེ་ཤེས་བསྐྱེད་པའི་ཕྱིར། །ལེགས་པར་བསྡུས་ཏེ་བསྟན་པར་བྱ། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པ། །ཉན་པ་ལ་སོགས་བཙོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །ཡི་གེ་སྒྲས་བརྟགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པའི་རྡོ་རྗེའི་ཐུགས་ལ་གནས། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཀུན་གྱི་ཕྱག་རྒྱ་ཆེན་པོ་མཆོག །ཐོས་བསམ་སྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུངས། །སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །གཞན་དུ་ནམ་ཡང་སྦྱིན་མི་བྱ། །རྨོངས་ལ་འཕྱར་བས་གལ་ཏེ་བྱིན། །དུས་མིན་པར་ནི་སྲོག་ཟད་ནས། །བསྲེག་དང་སྦྲེབ་ལ་ཡུན་རིང་གནས། ༈ །གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བརྟུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །དུར་ཁྲོད་ཆེན་པོ་རབ་དབེན་པའི། །རི་བོས་བསྐོར་མའི་ལྕུག་མ་དང་། །མེ་ཏོག་འཕྲེང་བས་བརྒྱན་པའམ། །བདེ་བའི་གནས་སུ་འདུག་ནས་ནི། །འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་ཡིས། །ང་རྒྱལ་བསྟན་པའི་ཕྱིར། སྒྱུ་འཕྲུལ་དྲ་བའི་ཏིང་འཛིན་བསྟན། །ཨེ་མའོ་ངོ་མཚར་རྨད་ཀྱིས་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ནས་སྐྱེ་བ་མེད། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་པར་བྱ། །ངེས་པ་ལ་ནི་རྡོ་རྗེ་ཆེ། །དེ་ལས་དཔལ་ཆེན་ཧེ་རུ་ཀ །འབར་བ་ཆེན་པོའི་གར་དགུ་ཡི། །འཇིག་པ་ཡི་ནི་དུས་ལྟར་དྲག །བྷྲཱུྃ་བི་ཤྭ་གི་ཤུདྡྷེ། དུར་ཁྲོད་ཆེན་པོ་རབ་འཇིགས་པ། །ཁྲག་གི་རྒྱ་མཚོ་འཁྲུག་པའི་དཀྱིལ། །ཀེང་རུས་ཆེན་པོའི་རི་རབ་ཀྱི། །སྟེང་གི་འབར་བའི་ཀློང་དཀྱིལ་ན། །ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡོངས་མ་ཆད་པ། །ཕྱི་དང་ནང་མེད་ཀུན་ཏུ་ནང་། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མོངས། །ཐོད་སྦྲུལ་སྣ་ཚོགས་ཉི་ཟླས་བརྗིད། །འབར་བའི་འཕྲེང་བ་མང་པོ་འཁྲུག །ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱིས་སྤར་བས་ནི། །དབང་ཕྱུག་ལྷ་ཆེན་ལ་སོགས་གཟུང་། །བདག་ཉིད་སངས་རྒྱས་ཐམས་ཅད་ཀྱིས། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱིས་དབྱིངས་ནས་ནི། །ཁྲོ་མོ་དབང་ཕྱུག་མངོན་ཕྱུང་སྟེ། །ཧི་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་ནས། །གཉིས་མེད་འཁྲིལ་བའི་དགྱེས་པས་ཐིམ། །བྱང་ཆུབ་སེམས་ཀྱི་སྤྲོས་པ་ལས། །ཧཱུཾ་ཧཱུཾ་ཧཱུཾ་བི་ཤྭ་བ ཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། འཇིག་རྟེན་དྲུག་གི་ཕྱོགས་བཅུ་དག །མཐའ་ཡས་ཁྱབ་པར་ཁྲོ་བོ་ཡི། །དཀྱིལ་འཁོར་སྟོང་གསུམ་འཇིག་རྟེན་ཙམ། །ཕྱོགས་བཅུའི་རྡུལ་རྙེད་འཐོན་པར་འགྱུར། །དེ་ནས་བཅོམ་ལྡན་དགྱེས་ཆེན་པོ། །དབུ་དང་ཕྱག་ཞབས་སྟོང་ཁམས་ཀྱིས། །བདག་པོ་དྲེགས་ཆེན་ཁྱོ་ཤུག་གི། །གདན་ལ་བརྐྱང་བསྐུམ་ཚུལ་དུ་བཞུགས། །ཁྲོ་བོའི་དཀྱིལ་འཁོར་སྤྲིན་ཕུང་ཡང་། །དཔལ་ཆེན་ཁྲག་འཐུང་ཆེན་པོ་དང་། །རིན་པོ་ཆེ་དང་པདྨ་དང་། །ལས་སུ་གྱུར་ཏེ་ཕྱོགས་བཞིར་བཞུགས། །དེ་ཀུན་འཇིགས་བྱེད་ཆེན་པོ་ཡི། །ཆ་ལུགས་རྔམས་པའི་ང་རོ་དང་། །འབར་བའི་ཀློང་ན་དབུ་གསུམ་པ། །ཕྱག་དྲུག་ཞབས་བཞིས་དྲི་ཟ་དང་། །གནོད་སྦྱིན་སྲིན་པོ་གཤིན་རྗེ་ཀླུ། །སོགས་པའི་ཁྱོ་ཤུག་གདན་ལ་བཞུགས། །བཙུན་མོ་ཁྲག་འཐུང་ཆེན་མོ་རྣམས། །སོ་སོའི་སྐུ་ལ་འཁྲིལ་ཏེ་བཞུགས། །དེ་ནས་དགྱེས་ཏེ་ཧ་བརྗོད་པས། །བྱང་ཆུབ་སེམས་ཀྱི་སྤྲིན་དག་ལ། །དཀར་མོའི་ཚོགས་དང་རྐུན་མོ་དང་། །རྨོངས་མོ་དང་ནི་ཐལ་བྱེད་མོ། །སྦེས་མོ་དང་ནི་གཏུམ་མོ་དང་། །དམེ་ཤ་ཅན་དང་མ་ཚོགས་མའི། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་རྔམས་འཐོན་ཏེ། །འབར་ཆེན་ཀློང་གི་ཤར་མཚམས་ནས། །འཁོར་བར་འཇིགས་པའི་གཟུགས་ཀྱིས་འཁོད། །དེ་ནས་དགྱེས་ཏེ་ཧ་བརྗོད་པས། །སེང་གདོང་ཆེན་མོའི་ཚོགས་རྣམས་དང་། །སྟག་གདོང་ཝ་དང་ཁྱི་དང་བཞད། །ཀང་ཀ་ཁྲ་དང་འུག་གདོང་མའི། །ཚོགས་རྣམས་རང་གི་ལག་ཆ་དང་། །ངོ་མཚར་དག་ཏུ་ཆས་ནས་ཐོན། །འབར་བ་ཆེན་པོའི་འཁོར་ལོ་ཡི། །ཕྱི་རོལ་ཤར་གྱི་ཕྱོགས་དག་ནས། །འཁོར་བར་རྔམས་པའི་མདངས་ཀྱིས་འཁོད། །དེ་ནས་དགྱེས་ཏེ་ཕཊ་བརྗོད་པས། །རྡོ་རྗེ་སྲིང་འགྲོ་མའི་ཚོགས་དང་། །གདོང་མོ་འཇིག་རྟེན་རོ་ལངས་མའི། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ཏེ་རྔམས་འཐོན་ནས། །དཀྱིལ་འཁོར་སྒོ་བཞིར་རྔམས་གཟུགས་ཅན། །དགྱེས་པའི་སྤྲིན་ལས་ཕྱོགས་བཅུ་ནས། །ཕཊ་ཅེས་བསྒྲགས་པས་ཕྱོགས་བཅུར་འཕྲོས། །དེ་ནས་དཔལ་ཆེན་ཁྲོ་བོའི་རིགས། །ལྷུན་གྱིས་གྲུབ་པར་བྱ་བའི་ཕྱིར། །རང་གི་ངང་ཚུལ་དེ་བཟུང་ལ། །བསྐུལ་ཚིག་འདི་ཡང་རབ་ཏུ་བརྗོད། །ༀ། སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ནས། །ཕྱག་རྒྱ་ཆེན་པོར་བདག་སྦྱོར་ཅིག །ཐབས་དང་ཤེས་རབ་གཉིས་མེད་པའི། །ཡེ་ཤེས་ཟེར་གྱིས་ལུས་རྟོག་སྦྱངས། །གསེར་ཞུན་ལྟ་བུའི་སེམས་དག་ལས། །གསུམ་གྱི་བྱིན་བརླབས་འོད་ཀྱི་འབྲུ། །ཐུགས་ཀར་ཐིམ་ནས་སྐུ་ཡི་དབྱིབས། །རྡོ་རྗེའི་ལམ་ནས་ཡུམ་གྱི་མཁར། །ཆོས་སྐུ་བྱང་ཆུབ་སེམས་སུ་གནས། །ལྷ་རྣམས་སོ་སོའི་སྙིང་པོའི་སྒྲ། །ཧཱུཾ་ཧ་ཧེ་ཕཊ་ཅེས་བྱུང་ནས། །བྱང་ཆུབ་སེམས་སུ་གཅིག་པར་ཐིམ། །དེ་ནས་སྙིང་པོ་དྲན་ཙམ་གྱིས། །གསུང་གི་ཕྱག་རྒྱ་གཉིས་རྫོགས་ནས། །འོད་ཟེར་འཕྲོ་འདུའི་སྦྱོར་བ་ཡིས། །ཐུགས་ཀྱི་ཕྱག་རྒྱ་རབ་ཏུ་འབར། །དེ་ནས་ཕྲ་མོའི་སྐུ་སྤྲོ་བསྡུས། །ཕྱག་རྒྱ་ཆེན་པོའི་སྐུ་གཉིས་རྫོགས། །ༀ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ༀ་མ་ཧཱ་པྲ་ཏྱ་བེ་ཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ༴ ༀ་མ་ཧཱ་ས་མ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་མ་ཧཱ་ཀྲི་ཏྱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐ་གཱ་ཏ་མ་ཧཱ་པཱུ་ཙ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རྡོ་རྗེ་པདྨ་བྱིན་བརླབས་པ། །ཧཱུྃ་ལས་རྡོ་རྗེ་རྩེ་ལྔ་པ། །པཾ་ལས་པདྨར་གྱུར་པའི་དབུས། །མ་ལས་ཉི་མའི་དཀྱིལ་འཁོར་བསམ། །ཤ་ཏ་པ་ལ་སོགས་པ་ཡི། །བསྐུལ་བ་དག་ཀྱང་ཚུལ་བཞིན་བྱ། །བསྙེན་པ་དང་ནི་ཉེ་བསྙེན་དང་། །བསྒྲུབ་པ་དང་ནི་བསྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །དེ་ནས་དཀྱིལ་འཁོར་གསལ་བར་དགོད། །ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་སརྦ་ཏ་ཐ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུ ཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་མ་ཧཱ་བཛྲ་དྷ་ར་མ་ཧཱ་ཀྲོ་དྷེ་ཤྭ་རི་ཛྭ་ལ་ནི་ཧཱུཾ་ཕཊ། ༀ་མ་ཧཱ་སཱུརྻ་རཏྣ་མ་ཧཱ་ཀྲོ་དྷེ་ཤྭ་རི་བི་ད་མ་ཧཱུཾ་ཕཊ། ༀ་ཧྲཱི་ཤུ་ཏ་ས་མ་ཏ་པདྨ་མ་ཧཱ་ཀྲོ་དྷེ་ཤྭ་རི་ཁཱ་ཧི་ཧཱུྃ་ཕཊ། ༀ་སརྦ་ཨ་མོ་གྷ་མ་ཧཱ་ཀྲོ་དྷེ་ཤྭ་རི་བ་ཤྭ་ཧཱུྃ་ཕཊ། ༀ་བཛྲ་ག་རཱི་ཧཿ ༀ་བཛྲ་ཙ་རི་ཧཿ ༀ་བཛྲ་པྲ་མོ་ཧེ་ཧཿ ༀ་བཛྲ་བེ་ཏ་ལཱི་ཧཿ ༀ་བཛྲ་པུཀྐ་སཱི་ཧཿ ༀ་བཛྲ་གྷ སྨ་རི་ཧཿ ༀ་བཛྲ་སྨ་ཤ་ནཱི་ཧཿ ༀ་བཛྲ་ཙཎྜ་ལཱི་ཧཿ ༀ་བཛྲ་སེདྡྷ་མུ་ཁཱི་ཧེཿ ༀ་བཛྲ་བྱ་གྷྲྀ་མུ་ཁཱི་ཧེཿ ༀ་བཛྲ་ཤྲཱི་གཱ་ལ་མུ་ཁཱི་ཧེ། ༀ་བཛྲ་ཤྭ་ན་མུ་ཁཱི་ཧེ། ༀ་བཛྲ་གྷྲྀ་དྷྲ་མུ་ཁཱི་ཧེ། ༀ་བཛྲ་ཀང་ཀ་མུ་ཁཱི་ཧེ། ༀ་བཛྲ་ཀཱ་ཀ་མུ་ཁཱི་ཧེ། ༀ་བཛྲ་ཨུ་མཱུ་ཀ་མུ་ཁཱི་ཧེ། ༀ་བཛྲ་ཨཱརྻ་ཏེ་ཛ་ཏི ང་ང་ཛཿ ༀ་བཛྲ་ཨ་མུ་ཁེ་ཧཱུཾ། ༀ་བཛྲ་ལོ་ཀ་བཾ། ༀ་བཛྲ་བྷ་སྨི་པ་ལ་ཡ་བ་ཏུ་ཧོཿ བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་༧ ས་ལ་སོགས་ལ་ཕྱག་རྒྱར་བྱས། །རྣམ་པ་རིམ་པ་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲངས་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡིན། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ༀ་རུ་ལུ་རུ་ལུ་ཧཱུཾ། ཨེ་ཧྱེ་ཧི་ཨཱ་ན་ཡ་ཛཿཧཱུཾ་བཾ་ཧོཿརཾ། ༀ་བཛྲ་ཀྲོ་དྷ་ས་མ་ཡ་ཧཱུཾ། ༀ། ཁྲོ་ལ་ཁྲོས་པ་ཞི་མཛད་པ། །ཐུགས་རྗེ་ཁྲོ་དཔལ་རྔམ་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་རྩོལ། །ༀ་བཛྲ་ཀྲོ་དྷ་ས་མ་ཡ་སྟཾ། ༀ་བཛྲ་ཀྲོ་དྷ་ས་མ་ཡ་ཕཊ། ༀ་བཛྲ་ཀྲོ་དྷ་ས་མ་ཡ་ཧོཿ ཨ་ལི། ཨུ་ལི། ཏཱ་ལི། ཏ་པཱ་ལི་དཾཥྛ་གོ་ན་ར་དྲི་ཁ་རཾ་ཡོ་གི་ནི་ཁཱ་ཧི་ཧོཿ ཧཱུྃ་ཧ་ཧེ་ཕཊ་བྷྱོ། སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་གཟུགས། །དབུ་གསུམ་ཕྱག་དྲུག་ཞལ་བཞི་བགྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་པར་སྒྲོག །སྦྲུལ་དང་ཐོད་ཕྲེང་ཉི་ཟླས་བརྗིད། །སྟོང་གི་འཇིག་རྟེན་འཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་སྒྲ་སྟ་གཤོལ་ལ་སོགས། །རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱས་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་ན་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །དེ་ལྟར་དཀྱིལ་འཁོར་གསལ་བཀོད་ནས། །མཐའ་དབུས་མེད་པར་ཁྱབ་པ་ཡི། །འཇིག་རྟེན་དྲུག་གི་ཕྱོགས་བཅུ་ན། །འབར་བའི་དཀྱིལ་འཁོར་གསལ་བར་སྣང་། །ཧཱུཾ། གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་པ་བཞིན། །མཆེ་བ་ཟང་ཡག་ཟ་བྱེད་ཆེ། །ཧོཿ ཧཱུྃ། རྔམ་པའི་ང་རོ་འབྲུག་སྟོང་ལྡིར། །སྟུག་ཆེན་རི་རབ་འབུམ་སྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའི་འཐོར་རླུང་གཡེང་བ་ཆེ། །ཧོཿ ཧཱུཾ། ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ། །ཧོཿ ཧཱུཾ། ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ། །ཧོཿ ཧཱུཾ། བདུད་ཀུན་གྱི་ནི་བདག་ཆེན་པོ། །བདུད་ཀྱིས་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིག་བྱེད་པ། །འཇིག་བྱེད་ཆེན་པོ་ཐིག་ལེ་ཆེ། །ཧོཿ ཧཱུཾ། རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་སྟེ་བདུན་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ། །ཧོཿ ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡི། །རྣལ་འབྱོར་ཚོགས་པའི་དཀྱིལ་འཁོར་གྱི། །ངེས་པར་ལེགས་པའི་དགོས་པ་འགྲུབ། །ཁྲོ་བོ་ཁྲོ་མོའི་ཚོགས་ཆེན་པོ། །ཕོ་ཉ་ཕྱག་ཉན་བཀའ་ཉན་སོགས། །ཅི་བགྱི་ལ་སོགས་ཚོགས་རྣམས་ཀྱིས། །དངོས་གྲུབ་ལས་རྣམས་རྫོགས་པར་བྱེད། །དེ་ནས་དཀྱིལ་འཁོར་ཐམས་ཅད་ཀུན། །རང་གི་སྙིང་གར་བསྡུ་བ་ནི། །ཧཱུྃ་ཧཱུྃ་ཞེས་ནི་རབ་བརྗོད་པས། །འདུས་པ་དེ་ནས་ཅི་བདེར་སྤྱོད། །དེ་ལྟར་དཀྱིལ་འཁོར་བསྡུས་ནས་ཀྱང་། །རྣལ་འབྱོར་བདག་ཉིད་ཆེན་པོ་ཡི། །སྤྱོད་ལམ་ཀུན་ཏུ་མ་ཉམས་པར། །ལྷ་ཉིད་དུ་ནི་རྟག་ཏུ་བསྒོམ། །ཕུང་པོ་ལྔ་ཉིད་ཁྲོ་རྒྱལ་གཙོ། །ཆེན་པོ་ལྔ་ཉིད་དབང་ཕྱུག་ཡུམ། །སྐྱེ་མཆེད་ཁམས་རྣམས་མང་པོ་དང་། །ཐུགས་རྗེ་རྔམ་པའི་དཀྱིལ་འཁོར་ཚོགས། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡི། །ཐམས་ཅད་མངོན་རྫོགས་རྒྱལ་པོ་ཆེ། །ཕྱོགས་བཅུ་དུས་བཞི་རྫོགས་པ་ཡིན། །སྐུ་གསུང་ཡོན་ཏན་ཕྲིན་ལས་ཐུགས། །མ་ལུས་བདག་ཉིད་ཞལ་མཐོང་བ། །དབང་བསྒྱུར་མཆོག་ཉིད་དམ་པ་ཡིན། །སྒྲུབ་པའི་ཐབས་འདི་བསྡུས་པ་ཡིས། །བསོད་ནམས་བདག་གིས་གང་ཐོབ་པ། །དཔལ་ཆེན་ཀུན་བཟང་སྐུ་གསུང་ཐུགས། །སེམས་ཅན་ཀུན་གྱིས་ཐོབ་པར་ཤོག །དེ་ཁོ་ན་ཉིད་སྣང་བ་དམ་པ་རྒྱན་ཞེས་བྱ་བ་སློབ་དཔོན་སངས་རྒྱས་གསང་བས་མཛད་པ་རྫོགས་སོ། །མངྒ་ལཾ། །དགེའོ།། །།
སྒྱུ་འཕྲུལ་ཚོགས་ཀྱི་འཁོར་ལོ།
སྒྱུ་འཕྲུལ་ཚོགས་ཀྱི་འཁོར་ལོ་ཐུགས་ཀྱི་སྒྲུབ་པ་བཞུགས་སོ། །ཧེ་རུ་ཀ་ལ་ཕྱག་འཚལ་ལོ། །སྐྱེ་བ་རྣམ་དག་འདི་ཉིད་ཀྱིས། །དབང་བསྒྱུར་དེ་ཚེ་ཐོབ་བྱའི་ཕྱིར། །བསྙེན་པ་དང་ནི་ཉེ་བསྙེན་པ། །བསྒྲུབ་པ་དང་ནི་བསྒྲུབ་ཆེན་པོ། །དཀྱིལ་འཁོར་བདུན་པ་ལ་བརྟེན་ཏེ། །དུས་ཚོགས་སྒྲུབ་པའི་མཆོག་ཉིད་འདི། །དང་པོ་འཇིགས་བྱེད་རོལ་པ་ཡི། །དབང་ཐོབ་བརྟགས་པའི་རྒྱལ་སྲས་ལ། །བརྒྱུད་པའི་ཆུ་བོ་བསྟིམ་བྱས་ཏེ། །བློ་ལ་ངེས་པའི་ལུང་དུ་བསྟན། །གཞན་དུ་ནམ་ཡང་མི་བརྟན་ཅིང་། །གཞོན་དང་སྤྱད་དང་ཚོང་ལ་སོགས། །ལོངས་སྤྱོད་རྣམ་པ་འབྱོར་པ་དང་། །རྫས་ཀྱི་ནོར་ཕྱིར་མ་ཡིན་ནོ། །རྨོངས་ལ་འཕྱར་དང་བརྩོན་འགྲུས་ཞན། །ནམ་ཡང་སྦྱིན་པར་མ་གསུངས་ཏེ། །སྨད་པ་བམ་གྱི་གཏེར་བཞིན་དུ། །སུས་ཀྱང་འབྱིན་པ་མ་གསུངས་ལ། །སྲོག་ཆགས་ཁ་ཡི་གཏམ་བཞིན་དུ། །ནམ་ཡང་སྨྲ་བར་མི་བྱའོ། །གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོར་དམ་མནོས་བཞིན་དུ་བྱ། །ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོངས་པ་འགྲུབ། །ལེ་ལོ་སྒྱིད་སྙོམས་མེད་པ་ཡི། །ཐེ་ཚོམ་མེད་པར་བསྒྲུབ་བྱས་ནས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཕུན་སུམ་ཚོགས་པ་ལྔར་ལྡན་པས། །འདི་འཆང་གླུ་གར་ཕྱག་རྒྱ་དང་། །ཀིང་དང་བྱ་རོག་སྤྱན་པ་དང་། །རྡུལ་ཕྱགས་ལ་སོགས་ཡོན་ཏན་ལྡན། །བཟའ་དང་བཅའ་དང་བཏུང་བགོ་བགོ། །ལོངས་སྤྱོད་ལྔ་གཉིས་ལྡན་པ་ཡི། །མདོར་ན་ཚོགས་རྣམས་མངོན་དུ་བསྒྲུབ། །དཀར་རྩི་དམར་རྩི་དྲི་ཤ་ཆེན། །རྡོ་རྗེ་དུང་ཆེན་དམར་རྩིས་གང་། །དུང་དང་སྲོག་ཤིང་གསར་རྙིང་དང་། །རྒྱལ་མཚན་གསང་བའི་ཏོག་ལྡན་པ། །རྒྱན་བཏགས་བཅོ་བརྒྱད་འབར་བ་དང་། །རོལ་མོའི་བྱེ་བྲག་ཚང་བ་དང་། །སྨན་དང་སྨན་པར་བཅས་པ་དང་། །རྒྱལ་པོ་འབྲུ་དང་དུང་ཆེན་རྒྱུ། །གངས་ཆུ་བཛྲ་ཀཱི་ལ་ཡ། །ཚོགས་ཀྱི་མཆོག་ཏུ་དམིགས་བསལ་བཞག །ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་དང་། །བསྒྲུབ་པ་དང་ནི་བསྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །བསྒྲུབ་པ་ཉི་ཟླའི་སྙིང་པོ་དེ། །འགྲོ་དྲུག་དུས་གནས་དེ་དག་སྣང་། །མཆོད་པ་ཆེན་པོ་མཉམ་སྦྱོར་ཞིང་། །དཀྱིལ་འཁོར་རྡོ་རྗེ་ལྕེ་ཡིས་བླང་། །མཁའ་འགྲོ་གསལ་བར་ཚེ་ལ་སོགས། །ཡིད་བཞིན་སྤྲིན་གྱི་བདག་པོར་འགྱུར། །ཞིང་གྱུར་མཆོག་དང་མཆོག་དམན་རྣམས། །ཉི་ཟླའི་སྟེང་དུ་མཁས་པས་བཞག །མཚམས་བཅད་བསྒྲལ་བའི་རིམ་པ་བཞིན། །ཨེ་མ་མ་ཊི་ཇི་བཞིན་པས། །ང་རྒྱལ་ལག་གི་འདུ་བྱེད་སྒོམ། །ཧཱུཾ་དུ་གྱུར་པས་རྣམ་པར་དག །དབྱིངས་སུ་ཐིམ་ནས་ཕྱག་རྒྱར་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་བསྒོམ། །སྨོན་ལམ་བྱང་ཆུབ་ལམ་དུ་གཞུག །སྨོན་ལམ་གནས་སུ་ཐེ་ཚོམ་མེད། །གླུ་བྲོས་སྦྱངས་ཏེ་ཆར་ཕབ་ནས། །དངོས་ཀྱང་བསྔོ་བ་དག་པར་བྱ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །གཉི་གར་རྣམ་བཞི་དག་པས་ན། །སྦྱོར་གྲོལ་བྱ་བ་ཀུན་བྱས་ཀྱང་། །རྡུལ་བྱ་ཙམ་ཡང་བྱས་པ་མེད། །ཞག་ནི་སུམ་ཅུ་ཕྲག་དྲུག་གམ། །དྲུག་ཅུ་དགུ་བཅུ་རྩ་དྲུག་ཏུ། །འཇིགས་བྱེད་ཆེན་པོའི་དཀྱིལ་འཁོར་བསྒོམ། །འཇིགས་བྱེད་ཚོགས་ལ་བདག་ལུས་འབུལ། །དེ་ཉིད་དཀྱིིལ་འཁོར་ཉིད་དུ་བརྟག །རྫས་དང་ས་གཞི་བརྟགས་ནས་ནི། །སོ་སོར་བྱིན་བརླབ་ཚུལ་བཞིན་བྱ། །གཙུག་ཏོར་བསྒྱུར་བའི་སྙིང་པོ་དང་། །གསུམ་དང་ཚོགས་པས་གདབ་པ་དང་། །ཡོན་ཏན་སྙིང་པོས་བྱ་བ་དང་། །ཛ་གད་ཀ་པཱ་ལ་དེ་བཞིན། །རྒྱན་དང་སྒྲུབ་པ་ཚུལ་བཞིན་བྱ། །སྒྱུ་འཕྲུལ་དྲྭ་བའི་དཀྱིལ་འཁོར་ལ། །གདེངས་དང་བཅས་པའི་བསམ་པ་ཡི། །རེ་བ་མེད་པར་རབ་བསྒྲུབ་ཕྱིར། །དང་པོར་མཆོད་སྦྱིན་དམ་པས་མཚད། །ས་གཞི་རབ་ཏུ་མཉམ་པ་དེར། །རྒྱང་གྲགས་དཔག་ཚད་ལ་སོགས་པ། །ལུས་གང་ལུས་དོ་གསུམ་གྱི་ཚད། །ཉི་ཤུ་རྩ་ལྔས་རབ་མཉམས་པའམ། །དུར་ཁྲོད་ཆག་ཆག་ལྡན་པ་དེར། །ཐིག་གདབ་རྒྱལ་པོས་བྱིན་བརླབས་བཞི། །ལྡན་པས་བ་སུ་ཐིག་གིས་དྲང་། །སྲོག་དང་ལྡན་པའི་ཁ་དོག་ལྔས། །ཕྱག་རྒྱ་གཟུངས་དང་སྙིང་པོ་ལྔ། །ལྔ་ཡི་ཚོན་གྱིས་སྲོག་ལྡན་བྲི། །གསང་བའི་དོན་གྱིས་ལས་བྱོས་ཤིག །ཕྱོགས་མཚམས་བར་ཆད་གདུལ་བའི་ཕྱིར། །ཐམས་ཅད་རྡོ་རྗེ་བྲག་སྟེངས་སུ། །ཁྲོ་བོ་མང་པོ་བཀྲམ་ནས་ནི། །མེ་རི་དཀྱིལ་འཁོར་རབ་ཏུ་འབར། །ཕྱི་རོལ་དམ་སྲི་ཆོས་རྒྱལ་ལས། །རྫོགས་བྱས་བདུད་རྩི་གསང་སྔགས་ལྡན། །སྲོག་དང་ལྡན་བརྗོད་ཀློག་བཞིན་འབྱོར། །གཟུགས་དང་ལུགས་ཆེན་དུང་མཆོག་སོགས། །ཅི་འདོད་སྣང་བ་བདག་གིས་དགོད། །གནས་དང་ཟླ་དང་རྫས་རྣམས་ནི། །བར་གསང་ལྡན་པས་མཆོག་ཏུ་བཞག །མིག་གི་རྟེན་ཡང་ལེགས་པར་བྲི། །གསོལ་བའི་སྣོད་མཆོག་ཚུལ་བཞིན་བཞག །གདན་གྲལ་བྱེད་པས་མངའ་གསོལ་ཏེ། །སྔོན་གྱི་བྱིན་དང་ལྡན་པས་ཀྱང་། །བདག་དོན་གཉིས་པ་ཐོབ་པར་བྱ། །དུར་ཁྲོད་བདག་པོ་བསྡུས་མནན་ཏེ། །ཤེས་པ་བྱང་ཆུབ་བསྲུང་བའི་ལྟ། །ཁོག་པར་རང་བཞིན་དུར་ཁྲོད་གནས། །གཞི་ཕྱིར་ཞུགས་ཏེ་བརྟེན་དུ་བྱ། །སྡོམ་པ་ཉི་ཤུ་ལྡན་པ་ཡི། །ལྷག་པར་མཚན་ནས་རྫས་རྡུལ་མེད། །ཉེ་བར་བསྙེན་པའི་དབང་ཐོབ་ནས། །རྟག་པ་རྣམ་གསུམ་ལུང་དང་སྦྱར། །འབྲས་བུའི་ས་ལྔ་གོམས་བྱས་ཏེ། །དེ་བཞིན་གཤེགས་པའི་སྐུ་གསུང་ཐུགས། །ཆོས་དབྱིངས་རྣམ་དག་དཀྱིལ་འཁོར་ལ། །གསང་སྔགས་སྤྱི་ཡི་དཀྱིལ་འཁོར་ལས། །ཤེས་འཇུག་ཡུམ་གྱི་དཀྱིལ་འཁོར་སྒོམ། །རང་གི་རིག་པས་ཅི་ནུས་པར། །སྒྱུ་འཕྲུལ་དྲ་བའི་དཀྱིལ་འཁོར་སྒོམ། །འཇིགས་བྱེད་དབང་དུ་བདག་ཞུགས་ནས། །ཁྲོ་མོ་ཇི་སྙེད་འཁོར་དུ་བྱ། །རྒྱན་དང་ཆ་ལུགས་ལ་སོགས་པ། །འཇགས་པའི་ཚོགས་ནི་ཇི་བཞིན་པར། །ཚ་རྔམ་ཆེན་པོའི་ཆ་ལུགས་བསྒོམ། །སྤྱིའམ་ཡང་ན་རེ་རེར་ནི། །ཚོམ་བུ་གང་གི་ལྷ་རྣམས་བསྒོམ། །གསང་བའི་སྙིང་པོ་ཉི་བཤམས་ཏེ། །འདས་པ་དག་ཏུ་མཉམ་སྦྱར་ཞིང་། །བྱིན་བརླབས་དབང་གིས་མཛེས་པར་བྱ། །ཐུགས་ཀྱི་སྔགས་ཀྱིས་སྤྱན་དྲངས་ནས། །དེར་བསྐུལ་མཆོད་བསྟོད་ཚུལ་བཞིན་བྱ། །བདག་གིས་ལུས་ལ་ཞུགས་ཚུལ་དུ། །དེ་ཡི་གཟུངས་བཟུང་མཆོག་ཏུ་བསྟིམ། །བརྟན་ནས་གནས་ལ་ཕབ་བྱས་ཏེ། །དམ་ཚིག་བརྟན་ཅིང་ཟིལ་མནན་སྡུད། །ཕྱག་འཚལ་དམ་ཚིག་མཆོད་པ་བྱ། །ཏིང་འཛིན་རྫས་རྣམས་མཉེས་བྱས་ཏེ། །འདོད་དོན་གསོལ་བ་ཚུལ་བཞིན་བྱ། །གླུ་དྲུག་འཕྲིན་ལས་སྔོན་བཞིན་དུ། །དབྱངས་དྲུག་བླངས་པས་དོན་གྲུབ་གསལ། །སྐུ་གསུང་ཐུགས་ཀྱི་བསྙེན་པ་ནི། །རྣལ་འབྱོར་ཕྲ་མོ་སྦྱངས་པས་བྱ། །ཡུམ་གྱི་མཁའ་ལ་དངོས་གྲུབ་བླང་། །ཕྱི་ནང་གསང་བའི་འཕྲོ་འདུ་ནི། །རྣམ་གསུམ་ཚུལ་དུ་སྲོག་དང་ལྡན། །འབྲུ་བརྒྱད་དོན་ནི་མཁའ་ལས་ཤེས། །བར་ཆད་ཏིང་འཛིན་མཆོག་གི་བཟློག །སྤྱོད་ལམ་གདན་སོགས་བསྲུང་བ་བྱ། །གོས་རྒྱན་བཟའ་བཏུང་གླུ་དང་ཚིག །ཧཱུཾ་དུ་ཤེས་པས་སྤྱད་པར་བྱ། །འཇིགས་བྱེད་ཆེན་པོའི་ཏིང་འཛིན་དང་། །ཉམས་པ་མེད་པའི་སེམས་ཀྱི་སྤྱད། །བྲོ་གར་སྐབས་སུ་བཞི་ཕྱིར་བྱ། །བར་ཆད་མེད་པས་སྔོན་བཞིན་བསྒྲུབ། །ཞག་གྲངས་ཚང་ཞིང་རྟགས་བྱུང་ན། །དཀྱིལ་འཁོར་མཐུན་པ་ཉིད་དུ་སྦྱར། །གཟུགས་སྒྲ་དྲི་འོད་དུ་བ་དང་། །འཛུམ་གཡོ་སྟོན་དང་འོད་ཟེར་འཕྲོ། །འཕར་འཁོར་འབར་དང་མཚན་མ་རྣམས། །ཉམས་ཀྱི་ཕྱག་རྒྱ་རང་དོན་སད། །ཕྱེད་པས་བཟློག་དང་སྦོགས་པར་བྱ། །ཨིནྡྲ་བྷཱུ་ཏི་ཀུ་ཀུ་ར་ཛ་བཞིན། །དངོས་གྲུབ་མཆོག་ཤེས་བླང་བར་བྱ། །བརྒྱན་པ་སྒེག་པ་ཕོ་ཉ་དང་། །ཚངས་པ་དབང་པོ་འདོད་དབང་དང་། །མདོར་ན་བཅུ་གཉིས་གླིང་གི་བདག །དྲག་ཤུལ་མཐུ་ཡི་དྲེགས་པ་ཅན། །དངངས་ཤིང་བརྒྱལ་ཏེ་བློ་སྟོར་ནས། །བུམ་པ་བཟང་པོ་འབུལ་བར་འགྱུར། །ལྷ་མོ་ཀླུ་མོ་བརྒྱན་པ་དང་། །རྟ་དང་གླང་པོ་བཞོན་པ་དང་། །གནས་དང་གཏེར་དང་བགོ་བ་དང་། །གཙུག་ན་ནོར་བུ་ཡོད་པ་དང་། །ཅི་འདོད་ཡིད་ལ་བསམས་པ་འབུལ། །དེ་ལ་བྲན་བཞིན་བྱེད་པ་འགྱུར། །དེ་ཡི་དགོས་པ་ཐམས་ཅད་ནི། །མ་ལུས་ཀུན་རྫོགས་འགྲུབ་པར་འགྱུར། །དེ་འདྲའི་མཚན་མ་མཐོང་གྱུར་ན། །རྡོ་རྗེ་བླ་མའི་ངག་བཞིན་བྱ། །དངོས་སུ་ཕན་གནོད་བཟློག་བྱང་བྱ། །ལྷ་དང་རྫས་དང་ཡོ་བྱད་ལྔའི། །གྲུབ་པ་ཚུལ་བཞིན་བསྡུ་བྱ་སྟེ། །མཐིང་ནག་འབར་བའི་ཡིག་འབྲུ་ནི། །ཁྱུང་ཆེན་ལྡིང་ཙམ་མཚོ་སེར་བཞིན། །བསྟིམས་སོགས་ཏིང་འཛིན་ལྡན་པར་བྱ། །གཉིས་མེད་དབྱིངས་ཀྱི་ངང་དུ་ཐིམ། །རིག་འཛིན་དངོས་གྲུབ་མཆོག་ཐོབ་འགྱུར། །དཀྱིལ་འཁོར་མ་ལུས་འབར་བར་འགྱུར། །ཉོན་མོངས་སྡུག་བསྔལ་སེལ་བར་བྱེད། །རྡོ་རྗེ་རིགས་སུ་སྐྱེ་བའི་གནས། །མི་གནས་ནམ་མཁའི་མཐའ་ཀླས་པར། །གོམས་པར་འདོད་པས་འགྲོ་བ་དང་། །ཆུ་ལ་ས་བཞིན་འགྲོ་བ་དང་། །བསྲེག་བྱ་འབར་བའི་དབུས་གནས་དང་། །ཚ་བ་རླུང་གིས་བཏེག་ནས་ཀྱང་། །ཕྱོགས་བཅུ་ཀུན་ཏུ་ཕྱིན་པར་འགྱུར། །ལུས་དང་ཕུང་པོར་བཅས་པ་ཡི། །ཚེ་ལ་དབང་བའི་རིག་འཛིན་འགྲུབ། །རིག་པ་འཛིན་པའི་ཚེ་ཉིད་ཀྱིས། །བླ་མེད་ཀུན་ཏུ་བཟང་པོར་འགྱུར། །ལུས་མ་སྤངས་པར་རིག་འཛིན་པ། །ཡུན་རིང་ཆོས་ཀྱི་བདེ་སྤྱད་ནས། །བླ་མེད་རྡོ་རྗེ་སེམས་དཔའི་ས། །དཔེ་བྱད་མཚན་གྱི་རྣམ་པར་བརྒྱན། །མངོན་ཤེས་དྲུག་ལྡན་ཐམས་ཅད་མཁྱེན། །ཚོགས་ཆེན་གཉིས་ཀྱང་རྫོགས་པར་རོལ། །སངས་རྒྱས་ཞིང་ལ་དབང་སྒྱུར་ཞིང་། །སྤྱོད་ཡུལ་ཀུན་ཏུ་མཎྜ་ལ། །ཇི་ལྟར་དམིགས་པ་བཞིན་དུ་འགྲུབ། །རྣལ་འབྱོར་ལས་སུ་རུང་རྣམས་ཀྱིས། །འབྲས་བུ་མངོན་དུ་མ་བྱུང་ཡང་། །ལུས་ངག་ཡིད་ལ་དབང་ཐོབ་ནས། །སངས་རྒྱས་འབྱུང་དང་བསྐལ་མཉམ་འགྱུར། །ཁྱུང་དང་སེང་ཕྲུག་ཇི་ལྟ་བར། །རྣམ་སྨིན་རིགས་སུ་ཐེ་ཚོམ་མེད། །ཀུན་ཀྱང་འགྲོ་བའི་དོན་དུ་བསྔོ། །སྒྱུ་འཕྲུལ་ཚོགས་ཀྱི་འཁོར་ལོ་ཐུགས་ཀྱི་སྒྲུབ་པ་རྫོགས་སོ། །དགེའོ།། །།
ཕྱག་རྒྱ་བསམ་གཏན། བི་མ་ལ།
ཕྱག་རྒྱ་བསམ་གཏན་བཞུགས་སོ། །རྡོ་རྗེ་སེམས་ལ་ཕྱག་འཚལ་ནས། །རྡོ་རྗེ་ཆོས་ཀྱི་ཕྱག་རྒྱ་ཆེ། །འཇུག་དང་དམིགས་པ་ལས་འདས་པའི། །བསམ་གཏན་བསྡུས་པ་འདི་བཤད་དོ། །སྒྱུ་འཕྲུལ་དྲྭ་བའི་དབང་བསྐུར་བའི། །རྒྱུད་དང་བདེན་པའི་དབང་ཐོབ་པའི། །སྔགས་དང་བློ་ལྡན་དབེན་དཀའ་བས། །སྔོན་དུ་བྱ་བ་ཀུན་བྱས་ཏེ། །བར་ཆད་རྣམ་གསུམ་མེད་པའི་གནས། །རྙེད་ནས་ཅིག་པུར་གནས་པར་བྱ། །རང་གི་གཟུགས་བརྙན་མདུན་བཞག་ལ། །སློབ་དཔོན་རྒྱལ་པོ་རྡོ་རྗེ་ཆོས། །ཟླ་བ་རྫ་ཡིས་སྤྱན་དྲངས་ཐིམ། །བདུག་སོགས་མཆོད་དེ་ཐལ་སྦྱར་ལ། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་བསྟོད། །མངོན་སྦྱར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་བགེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུའི་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པ་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །མཆོག་གསུམ་རྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་གསོལ། །ཚེ་རབས་བསྒྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་མཆོག་ཏུ་བསྔོ། །སྒྲུབ་རྫས་པདྨའི་འབྲུས་སྦྱངས་ལ། །ཟླ་འབྲུའི་སྟེང་དུ་ཧྲི་ཟིན་པར། །ཧྲི་ཡིས་ནམ་མཁའི་བདུད་རྩི་དབབ། །སྔགས་བཟླས་བདུད་རྩི་བསྐྱིལ་བར་བྱ། །ༀ་བཛྲ་ཙིཏྟ་ས་མ་ཡ་ཧཱུཾ་ཧྲཱིཿཋཱ། དངོས་རྣམས་ཉིད་ན་དངོས་མེད་པར། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །དེ་བཞིན་ཉིད་དུ་གསལ་བརྟན་ནས། །བསྐྱེད་པའི་ཕྱག་རྒྱ་རིག་པ་ཉིད། །ཨ་མ་སྦྱར་ཏེ་བརྟན་པ་དང་། །འོད་འཕྲོས་དོན་བྱས་བྱིན་བརླབས་ཏེ། །གང་བའི་ཉི་ཟླ་པདྨོར་བཅས། །བརྟན་པས་གཞལ་ཡས་རང་གི་སེམས། །སྔོན་པོ་ཧཱུྃ་ཉིད་རིག་པའི་དངོས། །དབྱིངས་ལ་དབྱིངས་ཀྱིས་བྲིས་པས་ཏེ། །གཟུགས་དང་བྲལ་བས་ཁ་དོག་མེད། །འོད་ཀྱི་ཕྱོགས་ཀུན་སེམས་སུ་བྱས། །སླར་འདུར་ལྟ་བར་བཅས་པར་གྲོལ། །རྣམ་ལྔས་རྫོགས་པའི་ཕྱག་རྒྱ་ཡིན། །བརྟན་ནས་ཁམས་གསུམ་སྐུས་བཀང་སྟེ། །དྲིལ་བུ་ཐབས་དང་ཤེས་རབ་སྐུ། །ཞབས་གསུམ་ཕྱག་དྲུག་ཡང་ན་གཉིས། །ཤུ་ཛྙ་ཏ་སོགས་བརྒྱད་པའི་སྔགས། །རྫོགས་པའི་ཚུལ་དུ་རྫོགས་དབང་བསྐུར། །ཟླ་སྟེང་སྒོ་གསུམ་གསལ་བའི་འབྲུ། །བསྡུ་བའི་སྦྱོར་བས་རླུང་བསྡུས་ཏེ། །དངོས་པོ་སྒོ་གསུམ་ཕྱག་རྒྱ་གསུམ། །དཀར་དམར་མཐིང་ག་དཀྱིལ་ཡི་གེ། །ཕྱོགས་བཅུ་ཁྱབ་པའི་ཧཱུྃ་འོད་ཟེར། །སྒྲས་བསྐུལ་ཐམས་ཅད་རྡོ་རྗེ་བཞེངས། །རྩེ་མོ་ལྕགས་ཀྱུས་སྤྱན་དྲངས་ལ། །ཨེ་ཧ་ཧི་ཞེས་དགུགས་སྟེ་བསྟིམ། །ཧཱུྃ་ཛ་སྤོ་ཏ་ཧོ་ཡིས་བཞུག །མཆོད་དེ་རྡོ་རྗེའི་ཟླས་པ་བྱ། །ཁམས་གསུམ་དབང་ཕྱུག་མུན་གནས་ལ། །སྤྲོ་བ་གསུམ་གྱིས་གསལ་གདབ་བསྐུལ། །རྡོ་རྗེ་གསུམ་དངོས་འདུས་པས་སྟིམ། །རྡོ་རྗེ་ཆོས་ཀྱི་གཞི་འདྲར་འགྱུར། །ཟླ་དྲུག་དེ་བཞིན་ལོ་ཟླ་བཞི། ། རིག་པའི་བརྟུལ་ཞུགས་ལ་གནས་ཏེ། །བརྩོན་འགྲུས་ཡུ་བ་བཅད་པ་བཞིན། །རྡོ་རྗེ་ཉིད་འགྱུར་ཐེ་ཚོམ་མེད། །དབང་པོ་རྣམ་གཉིས་བྱིན་བརླབས་འཁྱུད། །རྡོ་རྗེ་ཁུ་བས་མཁའ་གང་སྟེ། །ཐིག་ལེ་བ་སྤུའི་བུ་ག་ནས། །འདོད་པ་དྲུག་དང་ཚིམ་པ་བཞིན། །སྤྲོས་ནས་མ་ལུས་བདག་ཉིད་མཉེས། །པུ་ཙ་བཛྲ་སྔགས་ཀྱིས་ཐོབ། །དེ་བཞིན་མཉམ་པའི་བསྒྲུབ་རྫས་དག །ཡེ་ཤེས་བདུད་རྩིས་ཐིམ་པར་དབུལ། །དངོས་པོ་འབྲུ་གསུམ་བླངས་ནས་སུ། །རྡོ་རྗེ་ལྕེ་གཞག་དངོས་གྲུབ་གྱུར། །ༀ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་རྫོགས་ཧོ། །ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ཤེས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོ། ༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོ། །ༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་གདུལ་ཕྲན་སྙེད། །སྤྲུལ་པ་རྡུལ་བྲལ་བསམ་ཡས་ཀྱིས། །སྐད་ཅིག་ཉིད་ལ་ལྷུན་གྱིས་གྲུབ། །ཧོ། ༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱི་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། ཧཱུྃ་བཛྲ་དྷྲཱིག །མུཾ་ད་དུ་ཤྭ་རི་སྟཾ། སྤྱོད་ལམ་རྣམ་པ་གསུམ་དུ་ཡང་། །འབད་དེ་ཡེངས་བ་མེད་སེམས་ཤིང་། །སྤྱོད་ཡུལ་མཚན་ཉིད་ཐམས་ཅད་ལ། །ཐིག་ལེའམ་ཡང་ན་ལྷ་མོ་དྲུག །ཉིད་དུ་སྦྱོར་བ་མཐོང་ཐོས་མེད། །དམིགས་རྒྱུ་ལ་སོགས་མཚན་མ་ལྔ། །བསྟན་པས་ཉེས་པའི་རྩ་བ་མེད། །འདྲི་ཆོག་དཀྱིལ་འཁོར་བྲི་ལ་སོགས། །སྐབས་འདིར་གགས་ཡིན་སླང་མི་བྱ། །དེ་ལྟར་གོམས་རྟོགས་རིགས་མཆོག་དེས། །ཇི་ལྟར་དམིགས་པ་བཞིན་དུ་འགྲུབ། །རིག་འཛིན་ས་ལ་གདོན་མི་ཟ། །རྒྱུད་ལས་རྨོས་པའི་ཡོན་ཏན་རྣམས། །ཚེ་འདིས་མངོན་དུ་གྱུར་པ་ཡིས། །བསོད་ནམས་ཡེ་ཤེས་ཚོགས་རྫོགས་ཏེ། །ཡི་གེ་འཁོར་ལོ་ཚོགས་ཆེན་མཉེས། །འདི་ལྟར་བསྒྲུབས་ཤིང་སྒོམ་བྱས་ན། །འབྲས་བུ་མངོན་དུ་མ་བྱུང་ཡང་། །ཚེ་རབས་སྐྱེ་བ་ཐམས་ཅད་དུ། །ལས་ངན་ཀུན་ཏུ་སྐྱེ་མི་འགྱུར། །ཐེག་པ་དམན་པར་ཡོང་མི་སྐྱེ། །བདེ་གཤེགས་འབྱུང་དང་སྐོལ་མི་འགྱུར། །སྡུག་བསྔལ་ཐམས་ཅད་ཡོང་མི་འབྱུང་། །ལྷ་མི་མཚན་རྫོགས་ཡོངས་སུ་འགྲུབ། །མཐར་ནི་སྐྱེ་མེད་རྡོ་རྗེའི་སར། །འགྲུབ་གྱུར་ཐེ་ཚོམ་མེད་ཅེས་བཤད། །སྒྱུ་འཕྲུལ་ཕྱག་རྒྱ་བསམ་གཏན་རྫོགས་སོ།། །།རྒྱལ་བ་ཀུན་ཏུ་བཟང་པོའི་སྒྱུ་འཕྲུལ་ལས། །ངང་པས་འོ་མ་བླངས་པའི་དཔེ་བཞིན་དུ། །རབ་འབྲིང་ཀུན་གྱིས་ཉམས་སུ་བླང་བའི་ཆོས། །གབ་སྦས་མངོན་དུ་བྱུང་བའི་མན་ངག་འདི། །འཕངས་མེད་སེར་སྣ་སྤངས་ལས་མ་རྟོགས་པ། །དམ་མེད་ཆགས་པའི་འཁོར་དང་མ་ཕྲད་ཅིག །སློབ་དཔོན་བི་མ་ལས་མཛད་པ་རྫོགས་སོ།། །།
སྤྱོད་ཡུལ་སྦྱོང་བའི་བསམ་གཏན། སློབ་དཔོན་བི་མ་ལ་མི་ཏྲ།
ཙ ར དེ ཤ ཤོ དྷ ན སྱ དྷྱཱ ནཱ མ བི ཧ ར ཏི སྨ། །
སྤྱོད་ཡུལ་སྦྱོང་བའི་བསམ་གཏན་ཞེས་བྱ་བ་བཞུགས་སོ། །
རྒྱལ་མཆོག་ཉིད་ལ་ཕྱག་འཚལ་ནས། །སྤྱོད་ཡུལ་སྦྱོང་བའི་བསམ་གཏན་བཤད། །ལྟ་སྒོ་བསྡུར་དང་དོན་ལ་བསྒོམ། །རྣམ་རྟོག་བཅོས་དང་སྤྱོད་ལམ་སྦྱང་། །མ་ནོར་ཕ་ལ་མཉེས་པས་ཞུ། །དགོན་པའི་ཐ་མར་གནས་པར་བྱ། །ཡང་དག་ལྟ་བ་ཇི་ལྟར་བཙལ། །མ་ནོར་དོན་ཉིད་གང་ལགས་གསུངས། །འདི་ལྟར་སྣང་བའི་ཆོས་རྣམས་ཀུན། །རང་རྒྱུད་ཡོར་པོར་ཡོད་མ་ཡིན། །དེ་བཞིན་རྟག་དང་ཆད་པར་སྨིན། །ཆོས་སེམས་ཕྲ་ཞིང་ཟབ་ཡོད་མིན། །འཁྲུལ་པར་མཐོང་བ་འཁྲུལ་པ་ཉིད། །དོན་དམ་ཀུན་རྫོབ་རིས་མ་ཡིན། །འོ་ན་སེམས་ཀྱི་མཚན་ཉིད་ཅི། །ཕོ་མོ་མ་ཡིན་མ་ནིང་མིང་། །མཚན་མེད་མ་ཡིན་རིགས་རྒྱུད་མིན། །གནས་སུ་མ་ཡིན་གང་ཡང་མིན། །དཔེར་ན་གསེར་ལ་བཟོས་བསྒྱུར་བཞིན། །སེམས་ཉིད་སྣ་ཚོགས་པར་སྣང་བས། །ཕྱི་རོལ་རྫས་ཡོད་མ་ཡིན་ཏེ། །སྣང་སྤྱོད་ཉིད་ན་རྣམ་པར་དག །དེ་ཕྱིར་སྣང་བ་ཡེ་ཤེས་ཀྱི། །དཀྱིལ་འཁོར་ངང་ལ་འཁོར་བ་མེད། །དེ་ཉིད་རང་རྒྱུད་མ་ཡིན་པས། །ཡེ་ཤེས་བདེན་པ་གཉིས་སུ་མེད། །རྒྱུ་དང་འབྲས་བུ་ཀུན་རྫོབ་དང་། །དོན་དམ་རྣམ་བཞིར་རང་བཞིན་དག །མིན་ལས་ཡིན་པར་བསྒྱུར་མིན་པ། །མཐོང་བས་སྤྱོད་ཡུལ་དག་པར་འགྱུར། །དེས་ན་འཁོར་དང་མྱ་ངན་འདས། །གཉིས་པར་ངེས་པའི་རྒྱུད་མེད་དེ། །དེས་ན་སྐྱོན་གཉིས་འབྱུང་བར་འགྱུར། །གང་ཟག་མཐོང་བའི་དོན་མེད་པ། །དགོན་པའི་དབེན་ལམ་གང་སྤྱོད་པ། །མུན་པའི་ཁམས་སུ་ལྟུང་བར་འགྱུར། །དེས་ན་ཐོགས་མ་རྟོགས་པ་གཅེས། །ཡང་དག་མཐའ་བྲལ་ཡོད་མེད་མིན། །རྟག་མེད་ཆད་མེད་འགྲོ་འོང་མེད། །སྐྱེ་མེད་འགག་མེད་མཐའ་རྣམས་མེད། །མེད་པ་མེད་དེ་སྙིང་པོའི་དོན། །རྣམ་རྟོག་མུན་པར་སྦྱང་ཕྱིར་དང་། །མ་ནོར་དོན་ལ་བསྒྲུབ་ཕྱིར་དུ། །དེ་ཡིས་དེ་ཚེ་དེ་ལ་འཇུག །དེ་སྔོན་བྱ་བ་རྫོགས་བྱས་ཏེ། །སེམས་བསྐྱེད་སྒྲིབ་སྦྱང་བསོད་ནམས་བསགས། །ཕན་ཚུན་འབྲེལ་ཆགས་བསལ་བར་བྱ། །དབང་རྫོགས་མཉེས་བྱས་གདམས་དག་ཞུ། །བར་ཆད་བསྲུང་བའི་ལས་རྫོགས་བརྩམ། །ཆ་རྐྱེན་གྱུར་པ་ཀུན་བསྡུ་འོས། །དེ་ནས་ཕྱི་ནང་འབྲེལ་བ་རྣམས། །དཔག་ཚད་དུ་མས་བཤུགས་ཏེ་སྤང་། །བཀྲ་ཤིས་ལོ་རྒྱུས་ཡོད་པའི་གནས། །དགོན་པ་བཙལ་ཏེ་འདུག་པ་ཡང་། །ཁམས་བསངས་སི་པར་སྟན་ལ་འདུག །ཐུན་མོང་བུ་ལ་ཐག་མི་བཅད། །དོན་བཞི་འདོད་ཕྱིར་རྣལ་འབྱོར་བརྩམ། །བློ་གྲོས་སྲོག་ཤིང་ལྡན་པར་བྱ། །སྒོམ་པ་པོ་ཡི་དམ་ཚིག་ནི། །རྗེས་འཇུག་རྣམས་ཀྱིས་མིག་མི་དགག །ལོང་ཚོགས་ཕལ་པས་དཔྱད་མི་བྱ། །ཁྱུང་ཆེན་གཤོག་པ་ཡ་བྲལ་བཞིན། །ཐབས་དང་ཤེས་རབ་བྲལ་བ་བཞིན། །མི་འགྲུབ་ཕྱིར་ན་ཕྱག་རྒྱ་བཙལ། །ཡང་ན་ལུང་བསྟན་ཉིད་ལ་བསྡད། །བྱང་ཆུབ་འབྲས་བུ་སྟོབས་ཆེ་ཞིང་། །བདེ་གཤེགས་དམ་པ་མཉེས་འགྱུར་ལ། །བཀའ་ཡི་ཡོ་གལ་གཞུང་སྲོང་ན། །ཁ་ན་མ་ཐོས་ཕོག་ཀྱང་བླ། །ལས་ཀྱི་འབྲེལ་བའི་དབང་མི་གཏང་། །དེ་སྲོང་དེ་ནི་རྒྱལ་བའི་སྲས། །དེ་ནས་རྣལ་འབྱོར་ཆེ་སྤྱོད་པས། །རྗེ་བཙུན་རྣམ་སྣང་བཞིན་གནས་ཏེ། །སྤྱི་ཡུད་བརྟེན་པའི་ལེ་ལོ་སྤང་། །གདམས་ངག་སྟེང་དང་འོག་གི་སྒོ། །རྗེས་ཐོབ་མངོན་ཐོབ་བསམ་པར་བྱ། །རྒྱས་པར་གཞུང་ཉིད་ཤེས་པར་བྱོས། །ཡང་ནས་ཡང་དུ་བསླབས་བྱས་ཏེ། །བློ་གྲོས་ངེས་པས་གྲོལ་མཐའ་བལྟ། །ཐོས་པས་གྲོས་ཀྱིས་ཆོད་གྱུར་ནས། །ཡིད་ཀྱི་གླང་པོ་བསླན་བྱས་ཏེ། །དྲན་པའི་ཐག་པས་བཅིང་བར་བྱ། །ཡིད་ཀྱི་མེ་ལོང་བལྟ་བར་བྱ། །ཉིན་མཚན་ཐུན་ཚོད་བརྒྱད་ཀྱི་མཐའ། །བཟུང་སྟེ་ཐུན་གྱི་སུམ་ཆ་ནས། །ཕྱེད་བར་རངས་ལ་རིམ་བཞིན་བསླབ། །ཤིན་ཏུ་གསལ་བྱས་ལོངས་ནས་ནི། །དལ་བུ་དལ་བུས་བཏང་བྱས་ཏེ། །མ་བསྒྲིབས་ཆོས་སྤྱོད་ཅི་ནུས་བརྩམ། །དེ་ནས་མཁས་པས་མངོན་བཞིན་འཇུག །མ་སུན་ཐུན་ཚོད་གྱེན་དུ་སྤར། །ཉིན་མཚན་ཕྱེད་པའི་བར་དུ་གནས། །ཐམས་ཅད་རང་སེམས་གཉིས་མེད་པས། །གསལ་ལ་མི་གཡོ་ཟུང་དུ་འབྲེལ། །ཡེ་ཡིན་དེ་ཡིས་གྱུར་པར་ཟད། །རིམ་གྱིས་སྦྱངས་ལ་ཅིག་ཆར་བགྲོད། །ཤིང་ཐོག་མ་ལི་ཀ་འབྲས་བཞིན། །ཁད་དང་རིམ་གྱིས་སྨིན་འགྱུར་བ། །སྤྱི་ཡུད་ལྟ་བ་ཁ་མཉམ་ལ། །བལྟས་པའི་ང་རྒྱལ་བྱ་བ་མིན། །དེ་ཚེ་རྟོག་པ་ཕྱིན་ཅི་ལོག །སྔོན་ནས་ཞེན་པའི་མཐའ་ལྡང་དང་། །ཡང་དག་ཞེན་པའི་རྟོག་པ་རྣམས། །ཆེད་དུ་བྱེད་ཅིང་སྣང་བར་འགྱུར། །དམིགས་པ་བརྗེད་དང་ལེ་ལོ་དང་། །དོགས་དང་བྱིང་རྒོད་རྩོལ་མ་རྩོལ། །གཅིག་གཉིས་བདུན་དང་གསུམ་གསུམ་དང་། །རེ་རེ་འབྱུང་བ་མཐོང་བའི་ཚེ། །གཉེན་པོ་བརྒྱད་བརྟེན་བཏང་བར་བྱ། །ཡང་ན་ཚོར་ནས་དེ་ཉིད་ཀྱི། །བྱུང་ཚུལ་གནས་དང་མཚན་ཉིད་བརྟག །བཀག་པ་མེད་པར་ཞི་བར་འགྱུར། །སེམས་མཐའི་འདྲིས་པས་རང་བཞིན་ཆེ། །འགྲོ་ཉལ་འདུག་སྡོད་ལོངས་སྤྱོད་དང་། །ཡང་དག་དྲན་པས་འབྲལ་མི་བྱ། །ཉིན་མཚན་བཟང་ངན་ཅི་མཐོང་ཡང་། །བྱེ་དྲག་ངེས་པའི་སེམས་མི་བྱ། །གཙང་དང་སྨེ་བའི་བློ་རྟོག་བོར། །སྙན་དགའ་མི་སྙན་མི་དགའ་དང་། །དེ་བཞིན་བསྟོད་སྨད་གྲགས་མ་གྲགས། །རྙེད་དང་མ་རྙེད་ཆོས་བརྒྱད་པོ། །ཐམས་ཅད་རིང་དུ་བཏང་བར་བྱ། །བསམ་གཏན་གྲོགས་དང་འཆལ་གཏམ་དང་། །མཚན་མའི་སྤྱན་རས་སྤང་བར་བྱ། །བརྩོན་འགྲུས་ཡུ་བ་བཅད་པ་དེས། །རིང་ཉམས་ལོན་ནས་སྒྲིབ་པའི་ཆོས། །ཇི་ལྟར་གསེར་སྦྱངས་འཚེར་བ་དང་། །བཀྲུ་བཅག་འཇེམ་པའི་ཁ་དོག་ལྟར། །གཉིས་ཀྱི་མུན་པ་རིམ་སྤངས་པས། །དྲོད་དང་རྟགས་དང་ཆོ་འཕྲུལ་དང་། །མངོན་ཤེས་ཡེ་ཤེས་ཆེན་པོ་རྣམས། །གསུམ་གསུམ་བཞི་དང་རྣམ་དྲུག་དང་། །ཐ་མ་གཅིག་གིས་ཡོངས་སུ་རྫོགས། །མཚན་མའི་རྨི་ལྟས་སྐབས་སུ་འབྱུང་། །གསང་ཐུབ་དངོས་གྲུབ་མི་ཡལ་བས། །གསུང་གི་རྒྱུན་ལམ་བསྡམ་པར་བྱ། །དེ་དག་བལྟ་ཞིང་དྲི་བར་བྱ། །དེ་ལའང་དེ་བཞིན་ནན་ཏན་བྱ། །འབད་ཅིང་རྩོལ་བས་བསྡུ་མཉེས་བྱ། །བླ་མ་ཚད་མར་མ་གྱུར་ཅིང་། །དབང་ནོད་ཆུ་བོ་བཀའ་ཆག་པས། །དམ་པའི་མཛོད་མེད་ཁེ་གྲགས་གཉེར། །སྙིང་རྗེ་མ་དང་བྲལ་མི་བསྟེན། །ཕྱི་ནང་གཡེང་བས་གཡེང་བཅོས་ན། །རླུང་ལ་རླུང་འཛོམ་ཇི་ལྟའི་ཕྱིར། །ནམ་ཡང་གྲོལ་བར་མི་འགྱུར་ཏེ། །ཨེ་མའོ་ཨེ་མ་འདི་ཇི་ལྟ། །དེ་བས་མཛོད་དང་དྲོད་ལྡན་ཞིང་། །ཆུ་བོ་རྒྱུན་ལྡན་སེམས་ཡོད་ལ། །ལུས་སྲོག་བྱ་བས་གཅལ་བྱས་ཀྱང་། །མ་ཆེས་ཕྱིར་ན་ཡོ་བྱད་ལྔ། །སྤྱོད་ལམ་རྒྱུན་གྱིས་དགྱེས་པ་བསྐྱེད། །སྙིང་གི་སྙིང་དུ་ནན་ཏན་བྱ། །གསེར་ལ་ནག་ཚུལ་ཇི་བཞིན་ཕྱིར། །དོན་ལྡན་དཔའ་བོ་བསྟེན་པ་གཅེས། །སྐྱོན་ཅན་ཁ་འཕྲུལ་སྤ་ལོ་བྱེད། །སེར་སྣས་ནོར་མཆོག་མི་གཏོང་ཞིང་། །ཐབས་དང་གཡོ་སྒྱུས་མན་ངག་འདྲུ། །ཡང་ན་འབྲེལ་བལྟས་མཉེས་མི་བྱ། །བཅུད་པོར་མན་ངག་འདོར་བ་དང་། །ཚིག་འགའ་རྙེད་ན་སྤེལ་བྱེད་ཅིང་། །ཟང་ཟིང་ཁེ་གྲགས་གཉེར་བ་ལ། །ནམ་ཡང་བསྟན་པར་མི་བྱ་སྟེ། །བསྟན་ན་དེ་དང་དེར་ལྟུང་འགྱུར། །ཚིག་ཚོགས་རྒྱ་མཚོ་མ་བཤད་ཀྱང་། །མན་ངག་འདི་སྟེར་བླ་མ་ལ། །སྙིང་གི་སྙིང་དུ་ནན་ཏན་བྱ། །དེ་ལྟར་མན་ངག་འདི་ཡང་བཅང་། །སྤྱོད་ཡུལ་སྦྱོང་བའི་བསམ་གཏན་སློབ་དཔོན་བི་མ་ལ་མི་ཏྲས་མཛད་པ་རྫོགས་སོ། །ཆོས་འདི་བསྒོམ་ཆེན་མི་ནུས་པ་ལ་མི་སྦྱིན། འདི་ལས་ཟབ་པ་མེད་དོ། །འགྲེལ་པ་རྨ་རིན་ཆེན་མཆོག་གིས་མཛད་པ་ཡོད་པར་སྣང་ངོ་།། །།
རིན་ཆེན་དྲྭ་བ་མངོན་རྫོགས།
རིན་ཆེན་དྲྭ་བ་མངོན་རྫོགས་བཞུགས་སོ། །དེ་བཞིན་གཤེགས་པ་ཀུན་གྱི་བདག །ཡེ་ཤེས་རྒྱ་མཚོ་རབ་ཟབ་ཐུགས། །དཀྱིལ་འཁོར་ཡིད་བཞིན་འབྱུང་བའི་གཏེར། །ནོར་བུ་རིན་ཆེན་ཡོན་ཏན་མཛོད། །རྡོ་རྗེའི་ཡིད་ལ་ཕྱག་འཚལ་ལོ། །ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོར་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །ཉོན་མོངས་འཁོར་བའི་རྒྱ་དྲལ་ནས། །བྱང་ཆུབ་མཆོག་ལ་དགོད་པ་དང་། །མ་འོངས་སངས་རྒྱས་བློ་ལྡན་དོན། །བླ་མེད་ཡེ་ཤེས་བསྐྱེད་པའི་ཕྱིར། །རྒྱུད་ཀྱི་དོན་བསྡུས་སྙིང་པོ་འདི། །མ་ནོར་བཏུས་ཏེ་བསྟན་པར་བྱ། །རི་བོ་འདུས་པའི་རྩེ་རྣམས་དང་། །དབེན་པ་ཆེན་པོའི་ས་ཕྱོགས་དང་། །ཙན་དན་ནགས་ཚལ་མེ་ཏོག་ཚལ། །ཡིད་འོང་བཀྲ་ཤིས་སེམས་དགའ་བའི། །བདག་དབང་བར་ཆད་མེད་པའི་གནས། །དེར་ནི་ཏིང་འཛིན་བསྒོམ་པར་བྱ། །བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱི། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱིས་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་ཙམ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱིས་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱིས་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱིས་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདིའི་ས་བྱེད་པར་འགྱུར། །མུན་ལ་སྣང་འབྱུང་ཇི་བཞིན་དུ། །འགྱུར་བས་གསེར་འགྱུར་སྨན་གྱིས་ཚུལ། །རྟོག་པའི་དབང་འགྱུར་ཏིང་འཛིན་ཡིན། །དེ་ལྟར་ཏིང་འཛིན་རིམ་བཞིན་སྒོམ། །དངོས་རྣམས་ཉིད་ན་དངོས་མེད་པས། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་དོ། །དེ་བཞིན་ཉིད་དེ་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་རྣམས་ལ་སྙིང་རྗེའི་ཕྱིར། །ནམ་མཁའ་ལ་ནི་ནམ་མཁའ་སྒོམ། །དངོས་པོ་མེད་ལས་དངོས་པོ་སྤྲིན། །སྣ་ཚོགས་རྣམ་པ་འབྱུང་ཞིང་འགྱུར། །བཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱིས་རྩ་བ་ཡིན། །སེམས་ཉིད་ཡི་གེ་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེའི་མཆོག་ནི་སྒོམ་པར་བྱ། །ཨ་རབ་ཏུ་བརྟན་འགྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་འཕྲོ། །ཕྱོགས་བཅུ་གང་བར་གསལ་འགྱུར་ནས། །བྱང་ཆུབ་སེམས་སུ་བྱིན་བརླབས་ཏེ། །བསྡུས་ཀྱང་འཕེལ་འགྲིབ་མེད་པར་བསྟན། །དེ་ལས་མིང་ཚོགས་གསལ་བར་ཀུན། །སྤྲོ་ཞིང་བསྡུས་པའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །དེ་ལས་རྒྱལ་བའི་བཞུགས་གནས་བསྟེན། །དབང་ཆེན་དཀྱིལ་འཁོར་རིམ་བཞིན་བསྒོམ། །ཨེ་ཡྃ་བྃ་སུ་ལྃ་རྃ་བྲུཾ་བི་དྷེ། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྱིས་གྲུབ། །ལྷག་པའི་ཡེ་ཤེས་གློ་བུར་ཅན། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་རྩ་གཉིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཨ་ཀ་ཁ་ག་གྷ་ང་། ཙ་ཚ་ཛ་ཛྙཱ་ཉ། ཏ་ཐ་ད་དྷ་ན། ཊ་ཋ་ཌ་ཌྷ་ཎ། པ་ཕ་བ་བྷ་མ། ཡ་ཝ་ར་ལ་ཤ་ཥ། ས་ཧ་ཀྵཿ ཨི་ཨཱི་ཨུ་ཨཱུ་ཨཻ་ཨེེཾ། ཨོ་ཨ། ཨཱ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲའི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །དེ་ལས་སྤྲོ་དང་བསྡུས་པ་ཡིས། །སོ་སོའི་ཕྱག་མཚན་གསལ་བར་གྱུར། །དེ་ལས་ཕྱོགས་བཅུར་རབ་སྤྲོས་པས། །རྒྱལ་བ་རྣམས་ཀྱི་ཐུགས་དམ་བསྐུལ། །དེ་དག་སླར་ནི་འདུས་པ་དང་། །ཧཱུྃ་བཛྲ་དྲིག །ༀ་ཛི་ན་ཛིག །སྭ་རཏྣ་དྲིག །ༀ་ཨ་རོ་ལིག །ཧ་པྲ་ཛྙ་དྲིག །མུ་དྷ་དུ་ཥ་རི། ལཾ་དྷེ་ཤར་ཏི། མཾ་མོ་ཧ་ར་ཏི། པཾ་ར་ག་ར་ཏི། ཏཾ་བཛྲ་ར་ཏི། ཀྵི་ཧི་ར་ཙ་ཡ། ཏྲཾ་ཨ་གར་བ་ཡ། ཧྲི་ཏ་པདྨ་བདྷ་མ། ཛི་ཀུ་རུ་པ་ན་ཧྲི། ཧཱུྃ་ལ་སེ་ས་མ་ཡ་སྟྭཾ། ཏྲཾ་མ་ལེ་ས་མ་ཡ་ཧོ། ཧྲཱི་གིར་ཏི་ར་ཧོ་ཡ་ཧཾ། ཨ་ནིར་ཏིར་ག་ཡ་མི། མེ་དྷ་ར་ནི་སྭཱ་ཧཱ། ཐླྷིཾ་ནི་སྭ་ར་པ་ཡ་སྭཱ་ཧཱ། ཧཱུྃ་སྭ་ར་ཙ་ཡ་སྭཱ་ཧཱ། མུཾ་ཤྲཱི་ཨྃ་ར་ག་ཡ་སྭཱ་ཧཱ། ཛ་དུ་པེ་པྲ་བེ་ཤ། ཧཱུྃ་བུས་པ་ཨ་བེ་ཤ། བྃ་དི་པ་སུ་ཀི་ནི་ཧོ་གན་དེ་ཙི་ཏེ་ཧོ། ཧཱུྃ་ཡ་མཱནྟ་ཀྲིད་ཕཊ། ཧཱུྃ་པྲད་ཛྙཱ་ཏ་ཀྲིད་ཕཊ། ཧཱུྃ་པདྨནྟ་ཀྲིད་ཕཊ། ཧཱུྃ་བིགྷ་ནན་ཏ་ཀྲིད་ཕཊ། མ་ཧཱ་བཛྲ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། ༀ་མ་ཧཱ་རཏྣ་ད་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། ༀ་མ་ཧཱ་པདྨོ་ད་ར་མ་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། །ༀ་མ་ཧཱ་ཀ་ར་མ་ད་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་ཙི་ཏ་ༀ། ཨ་ཨ་ཨ་བཛྲ་བ་ཏ་ས་མ་ཡ་ༀ། ༀ་མུ་ནེ་ཀྲིད་སྭཱ་ཧཱ། ༀ་མུ་ནེ་ཧཱུྃ་ཏྲཱུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་བྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ན་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་མྱོང་བྱེད་སྣོམ་བྱེད་རྣམས། །བཙུན་མོའི་ཚོགས་དང་བཅས་པར་གནས། །བར་ཁྱམས་ལ་ནི་ཐུབ་པ་དྲུག །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུད་པ་ལ་གླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེ། །གཟུགས་མཛེས་རིན་ཆེན་འཕྲེང་བ་དང་། །བི་བང་གར་མཁན་མཆོག་ཉིད་དེ། །མེ་ཏོག་འཕྲེང་བ་སྤོས་མཆོག་དང་། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བསྟན། །དབུ་རྣམས་འབྱོ་ཞིང་བདུད་པའི་དུས། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞི་ཁྲོ་བོ་ཕྱག་རྒྱ་ནི། །མི་མགོ་གདེངས་དང་རྡོ་རྗེ་གནོན། །ཐོད་སྦྲུལ་ཆེན་པོས་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་པོ་ཏ་ཧོ། །སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཏུ་བསྟན། །སྲེག་པར་དང་ནི་བི་བང་དང་། །གོ་ཆ་པོ་ཏི་རིན་ཆེན་སྒྲོན། །མེ་དང་ཆུ་རུ་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་འགྱུར་མཉམ་རྫོགས་པདྨོའི་དཀྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །གཉེན་ལྕུགས་ཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྟུག་གཟི་བྱིན་ཆེ། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་འཕྲེང་བས་འཁྱིལ་བ་སྟེ། །མཐར་དབུས་མེད་པར་ཁྱབ་པ་སྟེ། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཕྱག་རྒྱའི་དཀྱིལ་འཁོར་གསལ་བ་དང་། །དབང་བསྐུར་བྱིན་བརླབས་ཚུལ་བཞིན་བྱ། །ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་མ་ཧཱ་ཨ་ཏ་རི་ཤ་ཛྙཱ་ན་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་མ་ཧཱ་ས་མཱནྟ་ཛྙཱ་ན་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་མ་ཧཱ་པྲ་ད་ཏ་པྲ་བེ་ཤ་ཛྙཱ་ན་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་མ་ཧཱ་ཀྲྀ་ཏ་ཨ་ནུ་རྟ་ན་ཛྙན་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཀ་ཡ་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་བཱ་ག་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཙི་ཏ་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་བཛྲ་སྭ་བྷཱ་བ་ཨད་མ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་པུ་ཙ་བཛྲ་སྭ་བྷཱ་བ་ཨད་མ་ཀོ྅་ཧཾ། སངས་རྒྱས་ལྔ་ཡི་ཅོད་པན་ཅན། །རིན་ཆེན་དབུ་རྒྱན་འཕྲེང་བ་དང་། །དཔུང་རྒྱན་སེ་མོ་དོ་ལ་སོགས། །མཛེས་པའི་རྒྱན་ནི་སྣ་ཚོགས་ཀྱིས། །དབང་མཆོག་དེས་ནི་དབང་བསྐུར་རོ། །དེ་ལྟར་རྟོག་པའི་རྣལ་འབྱོར་པས། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྟོག་པས་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཅིག །དཀྱིལ་འཁོར་ཀུན་ཏུ་རབ་སྦྱོར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡི། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་རྙེད་དོ། །ཀུན་ནི་ཕྱག་རྒྱ་ཆེན་པོའི་མཆོག །མ་འགགས་རྣམ་པ་ཅིར་ཡང་སྟོན། །འདུལ་བ་མདོ་སྟེ་ཆོས་མངོན་དང་། །དམ་ཚིག་བསྒྲུབ་དང་བསྒྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་བསྟན་ལ་ངེས་པར་འབེབས། །ཕྱོགས་བཅུའི་དཀྱིལ་འཁོར་སྤྱན་དྲང་ཕྱིར། །གསལ་ལྡན་མའམ་བྱིན་རླབས་ལ། །སྟོང་གསུམ་ཡུངས་འབྲུར་བཞུག་ཚུལ་དུ། །དབྱིངས་ནས་དཀྱིལ་འཁོར་སྤྱན་དྲང་མཆོད། །ༀ་ཧྱ་ཧི་བྷ་ག་བཱན་མ་ཧཱ་ཀུ་ཎི་ཀ་དྲི་ཤ །ས་མ་ཡ་སྟཾ། ཛ་ཧཱུྃ་བཾ་ཧོ། ཞེས་བརྗོད་པས། ཐམས་ཅད་མ་ལུས་འདུས་པ་དང་། །སྐུ་གསུང་མཉེས་པར་བྱ་བའི་ཕྱིར། །བསྟོད་དང་མཆོད་པ་ཚུལ་བཞིན་བྱ། །ༀ་ཕྱོགས་བཅུ་དུས་བཞི་རྫོགས་པའི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུའི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས་ཧོ། །ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་འཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོ། །ༀ་མ་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེ་ཧོ། །ༀ་ཕྱོགས་བཅུ་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཉིད་ལ་ལྷུན་གྱིས་གྲུབ་ཧོ། །ༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། །མཆོད་པའི་ཕྱག་རྒྱ་ཆེན་པོ་འདི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །གཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེའི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱི། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱར་ཞིང་། །མཆོད་པའི་ཕྱག་རྒྱ་ཆེན་པོར་སྒོམ། །སྒྱུ་འཕྲུལ་དྲྭ་བ་མངོན་རྫོགས་པའི། །དབང་པོ་ཡུལ་དུ་གང་འགྱུར་བ། །ཐབས་དང་ཤེས་རབ་ལྡན་འགྱུར་ཞིང་། །མཉམ་པའི་ངང་ཉིད་རྟོགས་གསལ་ན། །ཐམས་ཅད་བྱང་ཆུབ་མཆོག་གི་རྒྱུ། །བསྐྱེད་ཆེན་འཁོར་ལོའི་གཞལ་ཡས་སུ། །ཐབས་དང་ཤེས་རབ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ན། །བསྒུལ་སྐྱོད་ཐམས་ཅད་ཕྱག་རྒྱ་ཡིན། །འདི་ནི་སྤྱི་རྒྱ་ཆེན་པོ་སྟེ། །བླ་མེད་ཆེན་པོས་འདི་སྐད་གསུངས། །གསང་བ་དེ་ཉིད་ངེས་པ་ཡི། །སྙིང་པོ་ཕྱག་རྒྱ་འདའ་ཀ་བའི། །མི་སྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྦྱར་བ་ལས། །སྦྱོར་བའི་ཕྱག་རྒྱ་འབྱུང་བའི་རྒྱུ། །ༀ་དང་མུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ཏེ་རྩེ་སྤྲད་པ། །རྒྱལ་བའི་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཟླ་བཏུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཁར་བཀན། །མཱུཾ་གྱི་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་ལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་བསྒྲེང་རྩེ་མོར་འཁོར་ལོར་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །ལཾ་གྱི་རྩེ་མོར་དྲིལ་བསིལ་ཞིང་། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱི་ལྟ། །འབྲུ་བཞི་སྦས་ནས་ཐུགས་ཀར་བཀན། །སྭ་རྩེར་འབར་བ་རིན་པོ་ཆེ། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །མཾ་གྱི་རྩེ་མོ་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་ལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་ནི་རྩེ་མོར་པདྨ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །པྃ་བསྒྲེང་རྩེ་མོར་དྲིལ་བསིལ་ཞིང་། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་ལྔ། །འབྲུ་བཞི་སྦས་ནས་ཐུགས་ཀར་བཀན། །ཧཾ་བསྒྲེང་རྩེ་མོར་རལ་གྲི་འབར། །ཟླ་བཏུལ་འབྲུ་སྦས་དྲི་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །ཏཾ་བསྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་ལྷ། །དེ་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིས། །དེ་ལ་མཆོད་སྦྱིན་དམ་པ་ནི། །ཐོག་མར་བདག་ཉིད་རྟོགས་བསྒོམས་སྒྲལ། །དེ་ནས་གཉིས་མེད་བློ་ཡིས་ནི། །བློ་ངན་སེམས་ཅན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞིང་འགྱུར་མཆོག་དང་མཆོག་ཕྲན་རྣམས། །ཉི་ཟླའི་དཀྱིལ་དུ་མཁས་པས་བཞག །ང་རྒྱལ་ལག་གི་འདུ་བྱེད་བསྒོམ། །ཧཱུྃ་དུ་གྱུར་པར་རྣམ་པར་དག །དབྱིངས་སུ་ཐིམ་ནས་ཕྱག་རྒྱར་གསལ། །སྐུར་གྱུར་འོད་ཟེར་འཕྲོ་བར་བརྗོད། །གཙུག་ཏུ་རྣམ་པར་རྒྱལ་བ་བསྒོམ། །ངོ་མཚར་ངན་འགྲོ་ཐར་བའི་ལམ། །ཤེས་རབ་མཆོག་དེ་བྱིན་རླབས་ནས། །ཐབས་དང་ཤེས་རབ་གཉིས་མེད་པ། །པདྨོ་ལ་ནི་རྡོ་རྗེ་ཞུགས། །འཁྲིལ་བའི་མཆོད་ཆེན་མཉམ་སྦྱོར་བ། །བདག་ཉིད་མཉེས་པ་ཀུན་ལ་མཆོད། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བའི་མིག་ཡོལ་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །མཉམ་པའི་སྒྲུབ་རྫས་ཆེན་པོ་བདག །བདག་དང་མཉམ་པའི་ཚོགས་ལ་འབུལ། །བཟའ་དང་བཅས་དང་བཏུང་དང་བསྒོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །སྒྱུ་འཕྲུལ་དྲ་བས་མངོན་རྫོགས་པའི། །དཀྱིལ་འཁོར་བསྟན་པའི་ཏིང་ངེ་འཛིན། །བྲོ་གར་ཕྱག་རྒྱའི་འཕྲོ་འདུ་ཡིས། །འཛུམ་ལམ་ནམ་མཁའ་འགྲོ་བར་འགྱུར། །གླུ་ཚིག་སྒྲའི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩིར་འགྱུར། །ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཤེས་འཇུག་མཚན་ཉིད་འབྱོར་བ་ཡིས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཕྱོགས་བཅུ་དེ་བཞིན་གཤེགས་པ་ཡི། །བདེ་གཤེགས་ཡོན་ཏན་རྨད་པོ་ཆེ། །གཞན་ན་ཡོད་པ་མ་ཡིན་ན། །ལྷ་སྲིན་ལ་སོགས་སྨོས་ཅི་དགོས། །རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་བའི་ཡིད་གཉིས་མེད་པས་ན། །དཀྱིལ་འཁོར་ཆེན་པོ་རབ་འབར་འགྱུར། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བ། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་འགྱུར་བའི་དམ་ཚིག་མཆོག །ཆོ་ག་ལྔ་ནི་རྫོགས་བྱས་ནས། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །མཉམ་པར་འཇུག་ལ་རབ་བརྩོན་ན། །ཞག་ནི་སུམ་ཅུ་ཕྲག་དྲུག་གནས། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པར་འགྲུབ། །དེ་ཚེ་བཅུ་དྲུག་ཚུན་ཆད་ཀྱི། །སྐུ་ལྔ་ལྷུན་གྱིས་རྫོགས་པ་སྟེ། །ཡེ་ཤེས་ཐིག་ལེ་དེ་ཉིད་ལས། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་བཅུ་དུས་བཞི་རྫོགས་པའི་ཞིང་། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དུ་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེར་གསུང་ལས་དོན་འབྱུང་བ། །མཐུན་པའི་ཡེ་ཤེས་རང་སྣང་བའོ། །གཅིག་དང་དུ་མར་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་སྣང་མང་སྣང་། །དབང་མཆོག་དམ་པ་མ་ཐོབ་པར། །བསྒྲུབ་ཀྱང་ཅུང་ཟད་འགྲུབ་མི་འགྱུར། །ༀ་ཕྱོགས་བཅུ་དུས་བཞི་ཐམས་ཅད་ཀྱིས། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྤྱད་པ་སྤྱོད། །སློབ་དཔོན་མཉེས་པ་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །དབུ་རྒྱན་ཅོད་པན་འཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟང་བཏུང་དང་། །སྙིང་པོ་ལྔ་ཡིས་དབང་བསྐུར་ན། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །སངས་རྒྱས་ཀུན་གྱིས་འགྲུབ་པའི་གཞི། །རྡོ་རྗེ་དམ་ཚིག་ཆེན་པོ་སྟེ། །བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དང་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །དེ་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །གཏི་མུག་ཆགས་དང་ཞེ་སྡང་ཆེ། །ང་རྒྱལ་ཕྲག་དོག་མི་སྤོང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཡན་ལག་བཅུའི་དམ་ཚིག་སྟེ། །ཡེ་ནས་དག་མཉམ་རྟོགས་པས་སྤྱད། །གསུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིགས་མེད་འགྱུར། །མི་སྤང་མི་འདོར་ལྔ་ཉིད་ནི། །ཡན་ལག་དམ་ཚིག་འདའ་ཀ་པའོ། །མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་འགྱུར་བས། །འདས་ན་སངས་རྒྱས་མ་ཡིན་ནོ། །རྩ་བ་ཉམས་པ་ཕྱལ་བ་དག །གསོ་ལ་ཉེ་བར་མི་བརྩོན་ན། །སྐད་ཅིག་ཡུད་ཙམ་སྨྲ་མ་བྱེད། །ཉམས་འགྱུར་ཉེས་པ་བརྗོད་མི་ལང་། །རྩ་བའི་དམ་ཚིག་ཉམས་པས་ན། །བསྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཡན་ལག་དམ་ཚིག་ཉམས་བྱུང་ན། །འབྲས་བུ་མེད་ཅིང་ངན་སོང་ལྟུང་། །དམ་ཚིག་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་དཀྱིལ་འཁོར་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོའི་རིགས་ཀྱི་དེ་བཞིན་ཏེ། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིགས་པའི་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡིས། །ཐུགས་ཀྱི་ཡེ་ཤེས་ལྔ་ལྟ་ཞིང་། །སྙིང་པོ་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་པ་མཆོད་པར་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་རང་སྣང་བ། །རོལ་མོའི་དཀྱིལ་འཁོར་མཐའ་ཡས་མཆོག །གསང་བའི་དཀྱིལ་འཁོར་ཉིད་ཀྱི་དབྱིངས། །དེ་ནི་སངས་རྒྱས་ཀུན་གྱི་དངོས། །ཡང་དག་དོན་གྱི་སྙིང་པོ་འདི། །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བརྙེས་པའི་ས། །འབྲས་བུ་གསང་ཆེན་འདི་ཡིན་ཏེ། །ཤེས་རབ་མིག་ལྡན་རྣམས་ཀྱིས་ཟུང་། །སྣོད་ལྡན་ངང་ཚུལ་བཟང་ལ་བསྟན། །ལུས་དང་ལོངས་སྤྱོད་སྟོང་ལ་སྦྱིན། །གཞན་དུ་ནམས་ཀྱང་སྦྱིན་མི་བྱ། །རྨོངས་ལ་བྱར་བར་གལ་ཏེ་བྱིན། །དུས་མེད་པར་ནི་སྲོག་ཟད་ནས། །བསྲེགས་དང་སྦྲེབས་ལ་ཡུན་རིང་གནས། །རང་སྣང་དབྱེར་མེད་དཀྱིལ་འཁོར་དུ། །ཐུགས་ཀྱི་དཀྱིལ་འཁོར་ཉིད་ལ་བསྡུ། །ཧཱུྃ་ཧཱུྃ་ཞེས་ནི་རབ་བརྗོད་པས། །ཆོས་ཀྱི་དབྱིངས་སུ་ཐིམ་པར་གྱུར། །དེ་ནས་སྙིང་པོ་དྲན་ཙམ་གྱིས། །ཕྱག་རྒྱ་ཆེན་པོར་གསལ་འགྱུར་ནས། །གོ་སྒོ་མཚམས་བཅད་ལུས་བསྲུངས་ཏེ། །དེ་ནས་རྣལ་འབྱོར་ཆེན་པོ་སྟེ། །འགྲོ་སྡོད་འདུག་ཉལ་བཞི་པོར་ནི། །སྲོག་གི་ཕྱིར་ཡང་མི་བཏང་ཞིང་། །སྤྱོད་ལམ་ཀུན་ཏུ་མ་ཉམས་པར། །བདག་ཉིད་ཆེན་པོར་རྟག་པར་བསྒོམ། །རྒྱུད་ཀྱི་དོན་ལས་བཏུས་པ་ཡི། །རིན་ཆེན་དྲྭ་བ་མངོན་རྫོགས་པའི། །མ་འོངས་རྣལ་འབྱོར་ཐམས་ཅད་དང་། །མཐའ་ཡས་སེམས་ཅན་དོན་གྱི་ཕྱིར། །བསྟན་པས་བསྒྲིབ་པ་ཀུན་བྱང་ནས། །བླ་མེད་བྱང་ཆུབ་ཐོབ་པར་ཤོག །ན་མོ། རིན་ཆེན་དྲྭ་བ་མངོན་རྫོགས་ཞེས་བྱ་བ་མཐར་ཕྱིན་པའོ། །རྫོགས་སོ།། །།
མན་ངག་གསལ་སྒྲོན།
མན་ངག་གསལ་སྒྲོན་བཞུགས་སོ། །རྡོ་རྗེ་སེམས་དཔལ་ཕྱག་བཙལ་ནས། །རང་གི་ལས་དང་བླ་མ་ཡི། །མན་ངག་ཐོབ་དང་རྟོགས་པའི། །ནུས་པའི་ཤེས་སྟབས་ཅི་ཡོད་པ། །ནང་གི་ལིང་རྟོག་ཤེས་རབ་མིག །མདོངས་པའི་འགྲོ་རྣམས་སྒྲོལ་བྱའི་ཕྱིར། །སྒྱུ་འཕྲུལ་ཁོག་གཞུང་དབྱེ་བ་བརྩམ། །སྒྱུ་འཕྲུལ་དྲྭ་བའི་རྒྱུད་དག་གི། །ཚིག་དོན་དགོངས་ཤུགས་བསྟན་པ་ཡང་། །ཡི་གེ་གབ་པས་མི་མངོན་པ། །བཞི་པོ་དངོས་པོ་ལུས་ཉིད་དང་། །དོན་དུ་གཉེར་བའི་ལམ་ཉིད་དང་། །མངོན་འགྱུར་འབྲས་བུ་ལུས་བཞག་པའོ། །བསྟན་ཆོས་ཐོག་མའི་མཚན་ཉིད་ནི། །འབྲུ་ལྔར་འདུས་པའི་ཐབས་ཆེན་པོ། །འགྲོ་བ་ཀུན་ལ་གནས་པའི་ཕྱིར། །རང་བཞིན་རྒྱུད་ཀྱི་ངོ་བོ་ལས། །འགྲོ་བ་རྣམས་ཀྱང་རྒྱུད་ཉིད་དེ། །གཞི་ཕྱིར་རྒྱུ་རུ་བསྟན་པ་ཡིན། །དེ་ཡང་ངོ་བོ་ངེས་ཚིག་དང་། །རྣམ་པར་དབྱེ་བ་གསུམ་དུ་འགྱུར། །ཐམས་ཅད་རང་རིག་བྱང་ཆུབ་སེམས། །གསུང་ལྔ་ལ་སོགས་ལྷུན་གྲུབ་པ། །མཐའ་རྣམས་ཀུན་ལས་ཡོངས་གྲོལ་ཏེ། །ངོ་བོ་བཟུང་དུ་མེད་པ་ནི། །ནམ་མཁའི་ཆུ་སྐྱེས་ཇི་བཞིན་དེ། །ལུང་གི་ཚད་མར་གྱུར་པ་ནི། །རྒྱུ་བཞི་ཞེས་སུ་བསྟན་པའོ། །ཐམས་ཅད་རྫོགས་པའི་ངེས་ལུང་ནི། །རྒྱུད་གསུམ་ཚང་དང་དེས་འབྲེལ་པས། །རང་བཞིན་རྒྱུད་ཀྱི་མིང་དུ་གྲགས། །མཚན་བྱེད་རྒྱུད་ཀྱང་དེ་བཞིན་ནོ། །རིགས་དང་རིགས་སུ་ངེས་པའི་ས། །དབྱེ་བ་རྣམ་པ་གཉིས་སུ་གསུངས། །སེམས་ཅན་སྐད་ཅིག་ཤེས་པ་ཉིད། །བདེ་གཤེགས་འབྲས་བུ་སྙིང་པོའི་རྒྱུད། །ཡེ་ནས་ཡིན་ཕྱིར་རིགས་རྒྱུད་དེ། །ཆོས་ཉིད་རང་བཞིན་དཀྱིལ་འཁོར་ནི། །འགྲོ་རྣམས་ཀུན་ལ་ཁྱབ་ཕྱིར་རོ། །གཡོ་ལྡང་སྨོན་འཇུག་གནས་མཐར་ཕྱིན། །ངེས་སྐྱེས་ཕྱིར་མི་ལྡོག་པའི་ཕྱིར། །རིགས་སུ་ངེས་ཞེས་གྲགས་པ་ཡང་། །ངོ་བོའི་ཚུལ་ནས་རང་བཞིན་རྒྱུད། །དེ་ཡི་ངང་ལས་རྒྱུ་རྐྱེན་བདུན། །འཛོམ་པས་འཁོར་བར་སྣང་བ་ཡང་། །བྱེད་པོ་ཉེས་པའི་ཚུལ་དང་ཡང་། །ངོ་བོ་སྣོད་བཅུད་འཁོར་བའི་དུས། །ཡེ་ནས་ཆོས་ཀུན་སངས་རྒྱས་ཏེ། །རྒྱུད་བཞི་རང་བྱུང་ཡེ་ཤེས་པས། །རྒྱུའི་ངོ་བོ་གདོད་ནས་དག །མ་རིག་པ་ཉིད་ཡེ་ཤེས་ཕྱིར། །འཁོར་སྒྱུ་མ་བཅོས་རང་བཞིན་མཉམ། །འཕྲལ་དུ་ཆགས་སྡང་ཡེ་ཤེས་ལྟར། །ཡེ་ནས་མ་བཅོས་གསལ་བ་སྟེ། །ཉོན་མོངས་དྲང་ཕྱིར་སྐུ་གསུང་ཐུགས། །ཡིན་ཕྱིར་རྐྱེན་ཡང་སངས་རྒྱས་སོ། །རྒྱུ་རྐྱེན་འབྲས་བུའི་རང་བཞིན་པས། །མ་བྱས་འབྲས་བུ་སངས་རྒྱས་ཏེ། །རྡོ་རྗེ་ཕུང་སོགས་སངས་རྒྱས་པའི། །ཉི་མའི་སྙིང་པོས་མུན་པ་བཞིན། །རང་བཞིན་ངང་ལ་འཁོར་བ་མེད། །ལུས་བཞག་པར་མ་ལམ་རྐྱེན་དེ། །ལམ་གྱི་ངོ་བོ་སྣང་ལུགས་དང་། །དགོས་པ་ངེས་ཚིག་ཆེ་བ་དང་། །གཞུང་གི་རྣམ་དྲུག་བསྟན་པའོ། །མངོན་བྱེད་རྐྱེན་མི་རྣམ་པ་གསུམ། །ངོ་བོ་སེམས་ལྔ་སྐྱེས་པ་སྟེ། །མངོན་སུམ་སྣང་ཚུལ་དང་བའི་ཆུར། །ཉི་ཟླ་འཆར་བཞིན་སྐད་ཅིག་གིས། །བྱིན་རླབས་རིག་པ་སྣང་བ་དང་། །སྐལ་མེད་རྒྱུད་ནས་ཐུབ་པས་སྟོན། །ཡེ་ནས་ལྷུན་གྲུབ་སངས་རྒྱས་ཆོས། །གདུལ་བྱ་གཉིས་ལ་རྒྱུད་པ་དང་། །མངོན་སུམ་སྒོ་ནས་བསྟན་པའི་ཕྱིར། །བྱིན་གྱིས་བརླབས་དང་ཚིག་གིས་བསྟན། །རྒྱུད་གསུམ་ཚང་དང་ཚིག་འབྲེལ་བས། །མཚོན་བྱེད་ཡི་གེའི་རྒྱུད་ཅེས་བྱ། །ཐུན་མོང་མ་ཡིན་དེས་རྒྱུད་ཕྱིར། །གཞན་ལས་གསང་བའི་ཆེ་བ་བརྒྱད། །རྒྱ་མཚོར་ཆུ་རླུང་ཀུན་འབབ་བཞིན། །ཐེག་པ་ཀུན་འདུས་ཡང་རྩེར་བསྟན། །གསང་བའི་སྙིང་པོ་ངེས་པ་འདི། །གསང་བ་ཀུན་གྱིས་བདག་ཉིད་ཕྱིར། །རྒྱུད་རྣམས་ཀུན་གྱི་རྒྱལ་པོའོ། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་བསྟན་ལ་ངེས་འབེབས་ཕྱིར། །བསྟན་པ་འབྱུང་གནས་ལུང་གིས་འགྲེལ། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །དགོངས་པའི་ཞེ་ཕུགས་གནག་པའོ། །ས་རྣམས་ཁྱད་པར་བགོད་པ་ཡང་། །གསང་བའི་སྙིང་པོར་འགྲོ་བས་ན། །འབྲས་བུ་རྣམས་ཀྱི་ཐུགས་སའོ། །བདེ་གཤེགས་དཀྱིལ་འཁོར་མ་ལུས་པ། །བརྙེས་ནས་སྐུ་ལྔ་རྫོགས་པས་ན། །ལྔ་པར་འདས་པ་གཤེགས་པའི་ཚུལ། །འབྱུང་དང་མ་འོངས་ཐམས་ཅད་ཀུན། །འདི་ཡིས་ལྷུན་གྱིས་གྲུབ་བྱེད་ཕྱིར། །མ་འོངས་རྣལ་འབྱོར་རྣམས་ཀྱི་ལམ། །དེ་ཕྱིར་འབྲས་བུ་ངེས་འབྱུང་འདི། །ཐམས་ཅད་རྒྱུད་ལས་ཤིན་ཏུ་འཕགས། །གཞུང་གི་དབྱེ་བ་རྣམ་པ་གསུམ། །རབ་ལ་མཚན་དང་འབྲིང་ལ་དབྱེ། །ཐ་མ་འབྲུ་གཉེར་དགྲོལ་བའོ། །རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་སྤྱི་ཡི། །ལག་གི་རྩ་བཞིན་དབུལ་ཞབས་རྟོགས། །བསྐལ་བ་ཅན་གྱི་ཆེད་ཕྱིར་རོ། །གྲངས་ཀ་འབྲིང་གི་དོན་བསྟན་པ། །གླེང་གཞི་བསླེང་དང་རྒྱུད་དོན་དང་། །དགོས་འབྲེལ་བསྟན་པ་དཔེ་རྣམས་དང་། །སྐབས་ཀྱི་དགོས་པ་རྫོགས་པར་འགྱུར། །གླེང་གཞི་བྱེད་པའི་ངོ་བོ་དང་། །དགོས་པ་བྱེད་པའི་དོན་ཉིད་ནི། །ཐུན་མོང་གླེང་གཞི་རྣམ་གཉིས་དང་། །ཐུན་མོང་མིན་པ་གསུམ་དུ་ཤེས། །གྲགས་པ་ཐུན་མོང་ངོ་བོ་ནི། །ཐུབ་དྲུག་སྟོན་པ་སྟོང་གསུམ་པ། །ཁྱད་པར་ཤཱཀྱ་ཐུབ་པ་ཉིད། །རྒྱལ་སྲིད་བཙན་མོ་འཁོར་སྤངས་ནས། །རབ་ཏུ་བྱུང་སོགས་མཛད་པ་ཡི། །རྒྱུ་ཡི་འཁོར་ལོ་བསྟན་པ་སྒྲོགས། །འགྲོ་དྲུག་འཁོར་དང་རྣམ་བཞི་སོགས། །ཤིན་ཏུ་བཀོད་པའི་དུས་སུ་གསུངས། །ཁྱད་པར་ཐུན་མོང་འདི་ཉིད་དུ། །སྟོན་གནས་དུས་འཁོར་སྡུད་བསྟོན་སོགས། །མཚན་ཉིད་གཉིས་ཀྱིས་དགྲོལ་འགྱུར་ཡང་། །འདུལ་ཡང་སོ་སོར་སྣང་འདྲའོ། །ཐུན་མོང་མ་ཡིན་སྟོང་པ་ཉིད། །ཡབ་ཡུམ་ཆགས་སྐུལ་རོལ་པ་དང་། །གསང་བ་ཕུན་སུམ་ཚོགས་པ་དང་། །ཡིག་བཞིའི་སྒོ་ནས་བྱིན་བརླབས་ཀྱི། །དབང་བསྐུལ་མ་བརྗོད་རྒྱུད་བཤད་པ། །ཀུན་ཡུམ་མེད་པས་གསལ་བ་དང་། །ངོ་བོ་ཡང་ནི་འདི་ལྟ་སྟེ། །སྟོན་པ་གནས་དང་སྡུད་པ་འཁོར། །དུས་དང་སྟོན་པ་རྣམ་དྲུག་སྟེ། །སྟོན་པའི་རང་བཞིན་བརྒྱད་དང་ལྡན། །བདག་ཉིད་བྱེད་པ་ཀུན་ཏུ་བཟང་། །འཆད་པའི་སྐྱེས་བུ་རིགས་ལྔ་སྟེ། །མཚུངས་པ་བཞི་དང་ལྡན་པའི་ཕྱིར། །ལྔས་ཀྱང་སྟོན་པ་གསུང་མི་འགལ། །གནས་ཀྱི་རང་བཞིན་དེ་བཞིན་ཉིད། །ངོ་བོ་རིན་ཆེན་གཞལ་ཡས་ཁང་། །ཡེ་ཤེས་རྒྱུ་དང་གྲུ་བཞི་དབྱིབས། །རྩེ་མོ་ཚད་མེད་མཚན་ཉིད་སེམས། །ཕྱི་དང་ནང་མེད་རྒྱ་མ་ཆད། །ཡོན་ཏན་རྫོགས་རྒྱན་རྣམ་ཐར་སྒོ། །སྣ་ཚོགས་ཡོན་ཏན་རྒྱན་དུ་གོ། །རྒྱུ་འབྲས་བརྒྱད་ཉིད་རྟ་བབས་སྐད། །གསང་བདག་ཕྱག་ན་རྡོ་རྗེ་ཡིས། །ཐུན་མོང་མ་ཡིན་ངེས་པའི་རྒྱུད། །དྲིིས་ལན་མི་མངོན་དོན་གྱིས་བསྡུས། །བྱིན་བརླབས་མི་ཡུལ་གྲགས་པ་ཡིས། །འཁོར་གྱི་ཚད་དང་མང་དང་ཁྱབ། །བརྗོད་མེད་ནམ་མཁའི་མཐའ་ཀླས་གང་། །ངོ་བོ་མི་ཞན་རིགས་ལྔ་དང་། །རིག་པ་ཡེ་ཤེས་བྱང་ཆུབ་སེམས། །དད་པ་ཉན་པའི་ལྷ་ཆེན་རྣམས། །འགྲོ་བ་འདུལ་བ་སྦྲུལ་སོགས་སོ། །དུས་ཀྱིས་ངོ་བོ་མཉམ་ཉིད་དོ། །སྐལ་བ་ཅན་ལ་ཀོན་པ་དུས། །མཚན་བྱ་རང་བཞིན་བཞིའི་རྒྱུད། །སྒྲོ་སྐུར་བྲལ་བར་བསྟན་པ་ནི། །མཚོན་བྱེད་སྒྱུ་འཕྲུལ་དྲྭ་བ་སྟེ། །མཛུམ་མོའི་རི་བོང་ཅན་བཞིན་ནོ། །དགོས་པ་གླེང་གཞི་རྣམ་པ་གཉིས། །ལྷན་ཅིག་འཁོར་ལ་གོ་ཕྱེ་བ། །ཐུན་མོང་མ་ཡིན་ཁྱད་པར་གྱིས། །ཐུན་མོང་རྣམ་གཉིས་བཅས་པ་ཡིན། །འགྲོ་བ་ཆགས་ཅན་སྦོང་མེད་ལ། །ལོངས་སྤྱོད་རྫོགས་སྐུ་བཙུན་མོ་དང་། །གཉིས་མེད་རོལ་སོགས་བསྟན་པ་དང་། །མཐུན་པས་མཐུན་པ་དགྲོལ་ཕྱིར་རོ། །སྐྱེ་བོ་ཆགས་ཅན་སྤོང་འདུལ་ལ། །བྱིན་རླབས་ཤར་བའི་ཐུབ་པ་ཉིད། །མི་ཡི་སྐྱེ་བ་བཞེས་སྣང་ནས། །བཅུ་གཉིས་ལ་སོགས་རྫོགས་མཛད་དེ། །རྣམ་དག་མཆོད་རྟེན་རྡོ་རྗེའི་གདན། །རང་འབྱུང་མངོན་པར་རྫོགས་ཚུལ་སྣང་། །དེ་བཞིན་གླེང་བསླང་རྣམ་པ་གཉིས། །ཐུན་མོང་མ་ཡིན་རྣམ་པ་གཉིས། །ཡབ་ཡུམ་ཆགས་སྐུ་རོལ་པ་དང་། །དགྱེས་ལྟར་འཁོར་ལ་དབང་བསྐུར་དང་། །རྒྱུད་དོན་འབྱུང་ཕྱིར་བརླང་ཞེས་བྱ། །དེ་ཡང་སྐྱེ་བོ་ཆགས་ཅན་དོན། །ཐུན་མོང་གླེང་བསླང་སྟོན་འཁོར་དང་། །ཐམས་ཅད་སྣང་ནས་དབང་ཐོབ་འཁོར། །ཉིད་ཀྱིས་རྟོགས་ནས་འགྲོ་དོན་དུ། །བཀའ་སྩལ་དོན་གྱིས་ཞུས་དང་ལན། །སྣང་བར་དོན་གྱི་ཚིག་ཏུ་བྱུང་། །སྐུ་གསུང་ཐུགས་ཀྱི་སྤྲོ་བ་མཛད། །དེ་ནི་སྐྱེ་བོ་ཕལ་བའི་དོན། །ངོ་བོ་དོན་བླང་ཚིག་ཕྱུང་བའོ། །རྒྱུད་དོན་ལམ་དང་ཡན་ལག་སྟེ། །དེ་ཡི་གདུལ་བྱ་བསམ་པ་གཉིས། །དབང་གི་ལམ་ཡང་གཉིས་སུ་བརྗོད། །ཐུན་མོང་མ་ཡིན་རྣམ་གཉིས་ཏེ། །ཐུན་མོང་ལམ་སྟེགས་ཉིད་ཙམ་དུ། །ཕ་རོལ་ཕྱིན་བཅུ་རྒྱུ་འབྲས་སྤྱོད། །མ་ཡིན་པ་ཡང་བསམ་དབང་གིས། །གྲོལ་ལམ་ཐབས་སུ་བསྟན་པ་ཡིན། །གྲོལ་ལམ་མཐོང་དང་སྒོམ་གཉིས་ཏེ། །དག་མཉམ་གསུམ་བཞི་བཞི་དང་ལྔ ། །བདེན་པ་གསུམ་དང་རྟོགས་པ་བཞི། །ལྡན་པས་རང་རིག་མངོན་སུམ་དུ། །ངེས་པར་ཆོད་པས་མཐོང་བའི་ལམ། །མཚན་ཉིད་དང་པོར་བཤད་པ་ཡིན། །བསྒོམ་པ་སྐྱེ་དང་དེ་བཞིན་ཉིད། །སྐྱེད་དབང་སྲིད་པའི་ཆོས་ལུགས་སུ། །ཡེ་ནས་གནས་མཐུན་དེ་ཟློག་ཕྱིར། །དང་པོ་མ་སྐྱེས་སྙིང་རྗེ་དང་། །ཕྲ་རགས་མང་པོ་སྣང་བ་སྟེ། །དངོས་གྲུབ་མྱུར་དུ་གྲུབ་འདོད་པས། །ཤིན་ཏུ་མི་དམིགས་དབྱིངས་སུ་བསྒོམ། །ཏིང་འཛིན་དེ་ནི་གོམས་པ་དང་། །ཐམས་ཅད་སྒྱུ་མ་མི་གཡོར་དང་། །སྤྲུལ་པའི་ཚུལ་དུ་ཤེས་པར་བྱ། །ཇི་བཞིན་ཡང་དང་ཡང་གོམས་ནས། །ཕྱི་ནང་སྣོད་བཅུད་ཧཱུྃ་དུ་བསྡུ། །གང་བསྒྲུབ་ཡི་གེ་སོ་སོ་སྟེ། །ཕྱིར་ནི་གར་སྒོམ་ཀུན་ཏུ་འདྲ། །རྡོ་རྗེ་སེམས་དཔའ་ཉིད་དུ་བསྡུ། །ཡང་ན་ཞལ་གཅིག་ཕྱག་གཉིས་སམ། །ཞལ་གསུམ་ཕྱག་དྲུག་རྟག་ཏུ་བསྒོམ། །དེ་ཡང་ཕྲ་དང་རིང་བ་དང་། །གོམས་པར་རེ་མོས་འདྲིས་པར་བྱ། །དེ་བཞིན་གོམས་ནས་རིགས་ལྔར་བསྒོམ། །བཞི་བཅུ་གཉིས་དང་སྟོང་ཚོགས་སློབ། །དེ་གོམས་ཚེ་ཡི་རིག་འཛིན་དུ། །སྦྱར་ནས་མངོན་པར་སངས་རྒྱས་ཚུལ། །དེ་ཡང་ལྔ་གོམས་གསལ་ཕྱིར་དང་། །རལ་གྱིས་རིམ་པ་ངེས་པར་བཞག །དེ་ཁོ་ཉིད་དེ་ཅིག་ཅར་བ། །བསྒོམ་པའི་རིམ་པ་བསླབ་བྱ་བྲལ། །མ་བཅོས་ཇི་བཞིན་མཉམ་གཞག་ན། །ལྷུན་གྱིས་གྲུབ་པའི་དཀྱིལ་འཁོར་འབྱུང་། །མི་གནས་གནས་ལ་གནས་པར་བསྒོམ། །ཐབས་ལས་རྒྱུད་དང་རིམ་པར་ནི། །མན་ངག་ཏིང་འཛིན་སྟོབས་འགྱུར་ཞིང་། །རླུང་འགག་ལས་ལ་གོམས་པར་བྱ། །ཤིན་ཏུ་བདེ་བ་འབྱུང་བའི་རྒྱུ། །གསང་དབང་པདྨ་ལྡན་འགྱུར་ན། །ཆགས་པ་མེད་པའི་ཚུལ་གྱིས་སུ། །བཅུ་དང་གསུམ་གྱི་རྒྱུ་འབྲས་རྣམས། །རྫོགས་ཕྱིར་རིམ་དང་ཟློག་ཤེས་ན། །བྱིན་རླབས་ཤུགས་ཀྱི་རང་སྣང་འཐོབ། །དབང་པོ་ཡུལ་ས་ལྡན་གྱུར་ནས། །གསང་བ་མཆོག་གི་འཕྲུལ་ཆེན་པོ། །དཀྱིལ་འཁོར་རྡུལ་སྙེད་གྲངས་མེད་དང་། །ཕུན་སུམ་ཚོགས་པའི་ལྷུན་གྲུབ་རྣམས། །གསང་དབང་མཆོག་གིས་འབྱིན་པར་བྱེད། །ཐབས་ཀྱི་ལམ་ལ་འབད་པར་བྱ། །འཇུག་དང་ཐོབ་ཕྱིར་ལམ་བརྗོད་དེ། །སྐྱེ་བོ་ཉིད་སྒྲོལ་ཕྱིར་བཞག་སྟེ། །ལས་སུ་རུང་ནས་ལམ་མཐར་ཕྱིན། །ལམ་གྱི་ཡན་ལག་རྐྱེན་བཤད་པ། །རྗེས་མཐུན་སྤྱོད་པ་ལྟ་བུ་དབང་། །བསྒྲུབ་དང་མཆོད་པ་ཕྲིན་ལས་དང་། །དཀྱིལ་འཁོར་ལ་སོགས་བརྒྱད་ཀྱི་རྫོགས། །སྐབས་ཀྱི་གཙོ་དང་གྲོགས་པོས་བསྡུ། །དེ་ཡང་བདག་གཞན་དོན་དུའོ། །རྗེས་སུ་མཐུན་པའི་སྤྱོད་པ་ཡང་། །སྐབས་ཀྱིས་ཏིང་འཛིན་སྟོབས་ཆེན་བཤད། །བྱ་བ་བྱེད་ལ་བྱ་མེད་ལ། །དང་པོ་དཔྱོད་པར་བཤད་པ་ཡིན། །སྙིང་རྗེས་ཆུད་མ་ཟོས་པར་འཛིན། །ཐབས་ཀྱི་ཕ་རོལ་ཕྱིན་སྤྱོད་པ། །གཉིས་པ་ལམ་དང་མཐུན་པ་ཡིན། །ཆོས་སྤྱོད་བཅུ་ཡི་ཅིག་ཆ་ལ། །གནས་པ་གསུམ་པ་བརྗོད་པ་ཡིན། །གནས་དང་ལོངས་སྤྱོད་ཅི་བདེ་ལ། །མ་ཉམས་བློ་དང་ལྡན་པ་ལ། །ཏིང་འཛིན་ལངས་ཏེ་སྤྱོད་པ་ནི། །གྲངས་ཀྱི་བཞི་པ་སྤྲོས་བཅས་པའོ། །ཀུན་ཀྱང་དུས་ནི་ནམ་ལངས་ཚེ། །སྒོ་གསུམ་ཕྱིར་ན་ངེས་ཚིག་འགྲུབ། །བཤད་པའི་གཏན་ཚིགས་ལྡན་པ་ཡིས། །ལྟ་དང་ལྟ་བར་བྱ་མེད་པ། །ལྷུན་གྲུབ་ཤེས་རབ་སྒྲོན་མ་ཉིད། །རང་བཞིན་གསལ་བ་སྤྱན་གྱི་མཆོག །ངོ་བོ་ཡང་དེ་ལྟར་ཉིད་དུ་ཤེས། །ཡུལ་མེད་གསལ་ཕྱིར་ལྟ་ཞེས་བྱ། །རིམ་པར་བགྲོད་ཕྱིར་དབང་བཤད་པ། །ངོ་བོ་ནུས་ཕན་གསལ་དབང་ཤེས། །ཤིན་ཏུ་བསྟན་པའི་ངོ་བོ་ལྔའོ། །དགོས་པའི་སྐབས་ཀྱིས་སྐབས་ཕྱེད་དང་། །བཤད་པ་བཞིན་དུ་ཤེས་པར་གྱིས། །ངོ་བོ་བཞིན་དུ་གྲངས་འཇུག་པ། །དབང་ལྔ་རྫོགས་བུས་བཅོ་བརྒྱད་རྒྱས། །དུ་ནི་རྣམ་པ་གསུམ་དུ་སྟེ། །ཕྱི་ནང་དཀྱིལ་འཁོར་རྣམ་གསུམ་དུ། །རིམ་པར་བསྐུར་བ་དང་པོ་རུ། །རི་མོ་བཞེངས་གསོལ་ཕན་ནུས་བསྐུར། །བསྐྱེད་པའི་རིམ་པ་སློབ་པའི་དུས། །རྫོགས་རིམས་གདམ་ངག་སྦྱོར་དུས་སུ། །གསང་དབང་བསྐུར་བ་སོར་བཞི་པའོ། །དཀྱིལ་འཁོར་བསྟན་པ་ཤེས་བསྟན་ཕྱིར། །ངོ་བོའི་དུས་ཀྱང་ལྔ་འགྱུར་ཏེ། །རྣོ་ལ་ངར་བཏགས་ནུས་པ་བཞིན། །ནུས་པ་སྐྱེས་དང་ཐོབ་པའི་ཚད། །རྒྱུ་རྐྱེན་རྒྱུ་དང་བདག་པོ་དང་། །ཡུལ་དང་དེ་མ་ཐོག་པ་དང་། །ངོ་བོ་ཀུན་ལ་སྐབས་སུ་སྦྱར། །དད་དང་བརྩོན་འགྲུས་གསུམ་ལྡན་དང་། །བརྟུལ་ཞུགས་སུམ་ལྡན་སློབ་མ་ལ། །རྒྱུ་གཅིག་ལའམ་ཐ་དད་ལ། །གང་ལྡན་ཆུད་མ་ཟོས་པ་སྦྱིན། །བསྐུར་བས་རྐྱེན་གནས་ལས་ཉོན་མོངས། །ཤེས་སྒྲིབ་ཆེ་ཕྲ་རྣམ་དག་པ། །ཡོན་ཏན་སྣང་ཕྱིར་མིང་དུ་བརྗོད། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ལས་རྩོམ་འབྲས་མེད་ལྟུང་བས་རྩོམ། །གང་ཡང་ཕན་པས་དབང་བསྐུར་བའི། །དུས་འདི་ཕྱིན་ཆད་རྒྱལ་བའི་སྲས། །ཕྱིར་མི་ལྡོག་ཕྱིར་ཡོན་ཏན་ནོ། །ལྷ་མི་ཡོན་ཏན་ཡན་ཆད་ནས། །རྡོ་རྗེ་འཛིན་སོགས་སྐྱབས་ཀྱི་ཐོབ། །བསྒྲུབ་པ་འཇིག་རྟེན་པ་དང་འདས། །འཇིག་རྟེན་པ་ཡང་འདི་ལྟ་སྟེ། །རོ་ལོངས་ཚེ་ཕྲ་བསྒྲུབ་པ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་བཞིན། །ཆུང་མ་དབང་དུ་བྱ་བ་གཉིས། །རོ་ལངས་རྐང་མགྱོགས་དམ་ཚིག་བསྒྲུབ། །མི་སྣང་གཟུགས་བསྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་བསྒྲུབ། །ཚེ་འདིའི་ཆེད་ཕྱིར་འཇིག་རྟེན་པའོ། །ཡི་གེ་སྒྱུ་འཕྲུལ་ཚོགས་བསྒྲུབ་པའོ། །རྡོ་རྗེ་སེམས་དང་སྨན་བསྒྲུབ་དང་། །རིགས་ལྔ་བསྒྲུབ་དང་ཡུལ་ལྔ་སེམས། །བྱིན་དབང་བསྒྲུབ་པ་རྣམ་གཉིས་སོགས། །ཕྱག་རྒྱ་རྫས་དང་ཐབས་སྤྱོད་ལ། །རྟེན་པའི་བསྒྲུབ་པ་གསུམ་དུ་བསྡུ། །དོན་དུ་གཉེར་ཕྱིར་བསྒྲུབ་མཚན་ངེས། །ཚོགས་གཉིས་རྫོགས་ཕྱིར་མཆོད་པ་ནི། །ཏིང་འཛིན་སྦྱོར་སྒྲོལ་དམ་རྫས་དང་། །འདོད་ཡོན་བློ་དང་སེམས་ཀྱི་སྤྲིན། །རོལ་མོ་ལ་སོགས་དབང་བསྐུར་དབུལ། །གནས་སུ་སྟབས་ཕྱིར་མཆོད་པ་སྟེ། །ཐུན་མོང་ཁྱད་པར་ཡོན་ཏན་ལྡན། །བདག་གཞན་དོན་གྲུབ་འཕྲིན་ལས་ནི། །མཆོད་རྟེན་ཕྱག་རྒྱའི་སྒོ་དང་ནི། །ཧ་ཕྲོ་ཀླུ་དང་རྫས་ཀྱིས་བྱ། །ན་སོ་གཞན་དང་རིགས་འཕེལ་དང་། །སྐྱེ་རྒྱུ་མེད་དང་ཟླ་བྲལ་དང་། །ལས་བཞི་དུས་སུ་སྦྱར་བར་ཤིས། །ལས་ཀྱི་ནུས་མཐུ་ཆེར་ལྡན་ཕྱིར། །སྔོན་ནས་བཙལ་བར་རབ་ཏུ་གཅེས། །ཞི་ལ་དང་ལ་རྒྱས་ལ་དགའ། །དབང་ལ་ཆགས་དང་དྲག་ཁྲོ་སེམས། །འདི་ཡང་ལས་ཀྱི་སྟོབས་ཆེར་འགྱུར། །རྒྱལ་བ་ཅིག་བསྒོམས་ཀུན་ལ་སྒྲུབ། །བྱེད་ཀྱང་སྐབས་ཀྱིས་ལྷ་ཡང་བཞི། །བསྒྲུབ་གཞིའི་གཟུང་ཕྱིར་དམ་ཚིག་ནི། །ངོ་བོ་མདོ་རྒྱས་གསུམ་དུ་ཤེས། །མཉམ་པའི་དམ་ཚིག་གསུམ་དུ་མདོར་བསྟན་པ། །འབྲིང་དུ་རྩ་བ་བཅོ་ལྔ་སྟེ། །རྒྱས་པར་སུམ་རྒྱ་དྲུག་ཅུའོ། །ཡང་ན་རྩ་བའི་རྩ་བ་དང་། །རྩ་བའི་ཡན་ལག་ཡན་ལག་རྩ། །ཡན་ལག་ཡན་ལག་བཞི་རུ་བསྡུ། །བྱེད་པའི་ངོ་བོ་ཇི་བཞིན་ནོ། །དགོས་པ་སྤྱི་དང་ཁྱད་པར་གཉིས། །རྟོག་པ་འདུལ་དང་ལས་དོན་འགྲུབ། །འདུལ་དང་སྡོམ་དང་དམ་ཚིག་སོགས། །འདུས་པར་གསུངས་པ་ཆེ་བའི་མཆོག །དཔེ་ཡང་སྐབས་ཀྱི་རྣམ་པ་མང་། །ས་བཞི་སོ་མཚམས་མཁར་སོགས་པའོ། །ཉམས་སྐྱོན་སྤྱི་དང་ཁྱད་པར་གྱི། །གཉིས་འགྱུར་རྒྱུད་ནས་གསལ་བར་སྟོན། །གསོ་ཐབས་རྩ་བ་ཡན་ལག་གི། །སྐབས་དང་སྦྱར་ཏེ་གཞུང་བཞིན་བསབ། །ཡོན་ཏན་མདོར་བསྡུས་སྤྱི་རུ་བསྟན། །ཁྱད་པར་རང་རང་སྐབས་སུ་ཤེས། །རང་བཞིན་ཡེ་ནས་སངས་རྒྱས་པའོ། །ངེས་ཚིག་སྐྱོན་ཡོན་སྐབས་ཀྱིས་འགྱུར། །དཀྱིལ་འཁོར་སྐབས་ཀྱིས་བདུན་གསུངས་ཏེ། །ཐོག་མར་རང་བཞིན་དཀྱིལ་འཁོར་ནི། །རང་བཞིན་ཉིད་དང་ལྷུན་གྲུབ་ནི། །འབྲས་བུ་སྐབས་ཀྱི་གསུམ་དུ་འགྱུར། །ཆོས་ཉིད་རང་བཞིན་སྤྲོས་བྲལ་ཏེ། །རང་བཞིན་ཉིད་ཀྱི་དཀྱིལ་འཁོར་རོ། །དཀྱིལ་འཁོར་བཞི་བཅུ་རྩ་ལྔ་ཉིད། །ཁམས་དང་སྐྱེ་མཆེད་ལ་གནས་པའི། །ལྷུན་གྱིས་གྲུབ་པར་རྒྱལ་བས་གསུངས། །འབྲས་བུ་མཐར་ཕྱིན་འོག་མིན་ན། །བཞུགས་པ་དཀྱིལ་དང་འཁོར་གྱི་ཚུལ། །དེ་ཡང་ཞི་ཁྲོ་རྣམ་གཉིས་ཏེ། །ངེས་པར་སྐུ་གསུང་ཐུགས་སུ་འགྱུར། །ངོ་བོ་དུ་མ་ཤེས་བྲལ་བའི། །ངེས་ཚིག་སྐབས་ཀྱིས་གཉིས་སུ་འགྱུར། །མོས་བློས་ལེན་པའི་ཏིང་ངེ་འཛིན། །དཀྱིལ་འཁོར་ལྷག་པས་གཉིས་སུ་གསུངས། །རང་བཞིན་དེ་ཉིད་འདྲིས་པའི་ཕྱིར། །དེ་བཞིན་ཏིང་ངེ་འཛིན་དཀྱིལ་འཁོར་གྱིས། །ཕྱི་ནང་སྣོད་བཅུད་མ་ལུས་ཀུན། །ཉིད་ཀྱི་དབྱིངས་ལ་ཐིམ་བྱ་བ། །ཆོས་སྐུ་ཕྱག་རྒྱ་སྒོམ་པ་ཉིད། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་གྱི་ཚུལ། །འབྲས་བུ་མཐར་ཕྱིན་བསྒྲུབ་པའི་ཕྱིར། །ལྷག་པའི་ཏིང་འཛིན་རྣམ་པ་གཉིས། །གདུལ་བྱའི་དོན་ཕྱིར་ཞི་ཁྲོ་དང་། །ལས་དང་བསོད་ནམས་བསྒྲུབ་པ་ལྔ། །དེ་ཡང་སྐུ་གསུང་ཐུགས་གསུམ་སྟེ། །ཞི་བ་སྐུ་དང་གསུང་དང་ཐུགས། །སྐུ་ཡི་ཆ་ལུགས་བཞུགས་ཚུལ་དང་། །སྐུ་མདོག་བརྒྱན་སོགས་ཤེས་པར་བྱ། །ཐུགས་དང་ཕྱག་རྒྱ་བཅའ་བ་དང་། །འཛིན་དང་བསམ་པ་ལས་སོགས་པའོ། །གསུང་གི་རྩ་བ་བསྐྱེད་པ་དང་། །བཟླས་པ་སྤྱན་དྲང་མེ་ཏོག་དོར། །བསྟིམ་དང་དངོས་གྲུབ་གསོལ་བའི་སྔགས། །བྱིན་བརླབས་དབང་བསྐུར་ལ་སོགས་སྔགས། །དེ་དག་ངོ་བོ་ཤེས་པར་བྱ། །ཁྲོ་བོ་ལྷག་པའི་ཏིང་འཛིན་གྱིས། །སྐུ་གསུང་ཐུགས་བཤད་དེ་བཞིན་སྦྱར། །ལྷག་པ་གསུམ་ཡང་གྲངས་ལྡན་སྦྱར། །ཏིང་འཛིན་རྟེན་ཕྱིར་གཟུགས་བརྙན་ནི། །གཉིས་སུ་བྱེ་བྲག་ཤེས་པར་བྱ། །གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་སུ་གཏོགས། །མཚན་འཛིན་ཡུལ་གྱིས་དཀྱིལ་འཁོར་ཏེ། །ཡེ་ཤེས་སྣང་ཕྱིར་གཟུགས་བརྙན་ནོ། །ལྷག་པའི་གཟུགས་བརྙན་རྣམ་པ་ལྔ། །དབང་ནི་ཕྱི་ནང་བསོད་ནམས་ཚོགས། །བསྒྲུབ་དང་འཕྲིན་ལས་དཀྱིལ་འཁོར་རོ། །དབང་ལ་མཛུབ་གང་སོར་བཞིའོ། །ཞི་རྒྱས་འབྲིང་དང་རྣམ་གསུམ་སྟེ། །ཁྲུ་བཞི་བརྒྱད་དང་བཅུ་གཉིས་དང་། །བཅུ་དྲུག་ཐ་མ་འབྲིང་གི་ཚད། །ཉི་ཤུའམ་ཉི་ཤུ་རྩ་ལྔ་ཡི། །རྒྱས་པའི་ཚུལ་དུ་གསུངས་པ་སྟེ། །ལོགས་རེ་ཚད་དུ་གསུངས་པའོ། །བསོད་ནམས་རྟེན་ནི་མཆོད་རྟེན་ཚོགས། །ཚོགས་ལ་དཔག་ཚད་རྒྱང་གྲགས་སོ། །བསྒྲུབ་པ་ཚེ་སྤྲ་ལ་སོགས་པའོ། །སྐབས་ཀྱིས་དཀྱིལ་འཁོར་གསུམ་པའོ། །དེ་དག་ས་ཆོག་སྟེགས་རྩིག་དང་། །འགོ་མ་གཡེང་དང་ཐིག་སྟ་གོན། །བྲི་དང་རྒྱན་དང་རབ་གནས་དང་། །ལས་ཀྱི་གཞུང་ལུགས་བསྟན་པའོ། །ཁྲོ་བོ་སྐབས་ཀྱི་དེ་བཞིན་ཤེས། །འཕྲིན་ལས་རྣམ་བཞི་དལ་བརྒྱད་དང་། །གཟུགས་བརྙན་སྐབས་སུ་བཤད་པ་ཡིན། །ཟབ་ཕྱིར་བྱང་སེམས་དཀྱིལ་འཁོར་ནི། །རྟེན་དང་བརྟེན་ཅན་ཐ་སྙད་གཉིས། །དབྱེ་བ་ཕྱི་ནང་མཐར་ཐུག་འགྱུར། །ཡེ་ཤེས་ལྔ་ཡི་རོ་ལྡན་པས། །དཀྱིལ་འཁོར་ཞེས་སུ་བརྗོད་པ་སྟེ། །ངོ་བོ་གསང་བའི་ཁམས་གསུམ་མོ། །ཚོགས་ནི་འབྱོར་པ་རྣམ་གསུམ་དང་། །ཚོམ་བུ་ཅིག་གསུམ་ལྔ་པའོ། །དེ་རེའང་སྐབས་ཀྱིས་གསུམ་གསུམ་སྟེ། །དགའ་ལྡན་ལྷ་དང་དགྱེས་ལྡན་མི། །འབྱོར་ལྡན་ཡོ་བྱད་ལྔ་བསགས་པའོ། །མཐུན་དང་ཚད་ཕྱིར་ཚོགས་སུ་བརྗོད། །རྣམ་གྲངས་གནས་དང་ལོངས་སྤྱོད་ལྷ། །ཏིང་འཛིན་སྤྱོད་ཡུལ་འབྲས་བུ་ལྷ། །བདག་གཞན་དོན་ཚིག་ལ་སོགས་ཀྱི། །ཚོགས་ཀྱི་དཀྱིལ་འཁོར་ཡན་ལག་ཤེས། །མཚན་ཉིད་བར་མ་གནས་དུས་སུ། །བསྒྲུབ་པའི་སྟོབས་ཀྱི་རྐྱེན་དུ་གསུངས། །རྒོལ་བ་པོ་དག་ཚར་བཅད་ཕྱིར། །བརྗོད་དང་འབྲེལ་བ་དགོས་ཡང་དགོས། །བརྗོད་པ་བརྗོད་བྱ་རྗོད་བྱེད་དང་། །རང་བཞིན་རྒྱུད་དང་སྟོན་པའམ། །མཚོན་བྱ་མཚོན་བྱེད་རྒྱུད་གཉིས་སོ། །འབྲེལ་བ་ཡང་ནི་འདི་ལྟ་སྟེ། །དཀྱིལ་འཁོར་གཟུངས་མ་བྲལ་བ་དང་། །གཟུངས་མ་དབང་དང་འབྲེལ་བ་ནི། །གསང་དབང་མཆོག་ནི་ནོན་ཏུ་བཤད། །དབང་ཐོབ་བསྒྲུབ་ལ་ངེས་བཞུགས་པ། །དངོས་གྲུབ་རྣམ་གཉིས་ཐོབ་པའི་མི། །གདུལ་བྱ་ཞིང་དང་འབྲེལ་བར་གསུངས། །ཡང་ན་རྒྱུད་གསུམ་འབྲེལ་བ་སྟེ། །མཚོན་བྱ་མཚོན་བྱེད་རྒྱུ་འབྲས་ཚུལ། །ཤེས་དང་ཡུལ་དུ་འབྲས་བུའོ། །དགོས་པའི་ལམ་རྐྱེན་རྣམ་པ་བརྒྱད། །དོན་དུ་གཉེར་ཕྱིར་དགོས་པའོ། །དགོས་པའི་དགོས་པའི་འབྲས་བུ་ཉིད། །དགོས་པ་བསྒྲུབ་ཕྱིར་ཡང་དགོས་སོ། །རྒྱུད་ལ་ལྡན་ཕྱིར་རྒོལ་བ་བཟློག །མི་ནུབ་བསྟན་རྒྱས་ཡུན་རིང་ཕྱིར། །གཏད་པའི་ངོ་བོ་རྣམ་པ་གསུམ། །སྡུད་པ་པོ་དང་བུད་མེད་སོགས། །རྣལ་འབྱོར་མིག་ཅན་ལ་སོགས་པའི། །རྟོགས་དང་བསྲུང་དང་གདམ་པ་ཡི། །ཐ་སྙད་ཙམ་དུ་གཏད་ཅེས་བྱ། །སྐབས་ཀྱི་དཔེ་ཡང་རྣམ་པ་མང་། །རྩོད་པ་ཆེ་འཕྲ་མི་འཐད་པ། །སྦྱོང་མི་འཚོགས་པ་གླེང་གཞིའི་ཚུལ། །བདེན་བརྫུན་འདྲན་པའི་གླེང་བསླང་ཚུལ། །སོ་སོར་རྐང་ཐབས་རྒྱུད་བཤད་དཔེ། །དེ་གཞུང་བཅོས་པ་ལམ་གྱི་ཚུལ། །ཐ་ཚིག་མི་འདའ་གཏད་པ་བཞིན། །འདྲ་ཕྱིར་མཚོན་པ་དཔེ་རུ་གྲགས། །ཤེས་རབ་ཐ་མའི་དོན་བསྟན་པ། །བཤད་ཚུལ་སྣོད་དང་སྦྱང་བ་སྟེ། །བཤད་ཚུལ་ཕ་དང་སྤྱི་དབང་གཉིས། །ཕ་ཡི་འབྲུ་གནས་ལན་བཏབ་པ། །ཁོག་དབུབ་ས་བཅད་བཞི་པོར་གསུངས། །སྤྱི་ནི་བཟུང་བཞི་གཅིག་གི་སྟེ། །ཐུན་མོང་ཁྱད་པར་སློབ་པའི་ས། །ཡོན་ཏན་སོ་སོའི་མཚན་ཉིད་ནི། །དེ་ཡི་བསམ་པ་མཐུན་ཕྱོགས་སུ། །རྨད་བྱུང་ཚུལ་གྱིས་དེ་བཞིན་ནོ། །ཐ་མ་དོན་གྱི་ལུང་བསྟན་པ། །ངོ་བོ་དབྱེ་བ་རྣམ་པ་གཉིས། །ལམ་དུ་རྒྱུ་འབྲས་མཐར་ཐུག་འབྲས། །ཚེ་ལ་དབང་དང་ཕྱག་རྒྱ་ཆེ། །ལྷུན་གྲུབ་རིག་འཛིན་ལ་སོགས་པའོ། །ལམ་དང་འབྲས་བུ་ཐུན་མོང་བརྗོད། །མཐར་ཐུག་པ་བསྐྱེད་དུ་བྱ་བ་མེད། །འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་འཕྲིན་ལས་ལ་སོགས་པའོ། །དེ་ཡང་སྐབས་ཀྱིས་ལྔ་ལྔ་སྟེ། །མཚན་ཉིད་ཅིག་དང་དུ་མ་མེད། །ལོག་པར་རྟོག་དང་སེམས་ཅིག་པས། །ཐུགས་རྗེས་གཟིགས་དང་བྱིན་རླབས་འབྱུང་། །དེ་ཡང་ཞི་ཁྲོ་ལ་སོགས་སྐུ། །ཐ་དད་སྣང་ལ་སྣང་བ་མེད། །བསྒྲུབ་པ་མཐར་ཕྱིན་འབྲས་བུ་འདོད། །ལམ་དང་འབྲས་བུ་བཅས་པ་ཡང་། །འཕྲལ་དུ་བྱས་པས་འབྱུང་མིན་ཏེ། །སེམས་ཅན་དུས་ན་ལྷུན་རྫོགས་ཏེ། །རྒྱས་པར་བདག་གིས་མ་བཀོད་དེ། །ཡིག་མངས་འཇིགས་དང་བརྗོད་འདས་ཕྱིར། །རྣམ་པར་ཕྱེ་ནས་མ་བསྟན་ནོ། །རིགས་པས་སྐབས་སུ་སྦྱར་བྱས་ཤིང་། །ཐ་སྙད་ཇི་སྙེད་གསུམ་དུ་བསྡུའོ། །འགྲོ་མང་ལྷན་ཅིག་ལིང་ཏོག་གིས། །མདོངས་པའི་རྒྱུད་དོན་མ་ཤེས་འདྲེས། །བདག་གི་ཡི་གེ་འདི་བཀོད་པས། །སེམས་ཅན་དམུས་ལོང་མིག་ཕྱེ་ཤོག །འདི་རྟོག་འགྲོ་བ་གཞན་དོན་དུ། །བསྟན་པ་རྒྱ་ཆེར་སྤེལ་བ་ཡིན། །ཀུན་ཀྱང་ཡང་དག་མིག་ལྡན་ལ། །ལོག་ལྟ་མ་ལུས་ཚར་གཅོད་ཤོག །སྒྱུ་འཕྲུལ་མན་ངག་གསལ་བའི་སྒྲོན་མེ་ཞེས་བྱ་བ་རྫོགས་སོ། །བློ་རྣོ་ཟབ་དང་མྱུར་ལྡན་ཞིང་། །རྒྱ་ཆེ་བ་དང་བློ་ཡངས་དང་། །རལ་གྲི་རྒྱ་མཚོའི་རི་བོ་དང་། །ནམ་མཁའ་མཁའ་ཀློང་རྡུལ་ཕྲན་འདྲ། །ངང་རིས་ཚུལ་ཤིས་རང་བཞིན་བཟང་། །དད་པ་སྙིང་རྗེ་ལྡན་པ་ནི། །ཆུ་བོ་དགེ་སློབ་རེངས་པ་འདྲ། །ཉི་མ་འབྱོར་རྩི་ཕ་མ་བཞིན། །མཚན་ཉིད་ལྔ་གཉིས་གཅིག་ལྡན་པས། །དེ་ལ་ལོག་དང་མ་ཕྲད་ཅིག །ཨཐྎ།།
གཏོར་མའི་ལུང་སློབ། དཔོན་པདྨ་འབྱུང་གནས།
བ ལིཾ ཏཱ ག མ ནཱ མ བི ཧ རཾ། །
གཏོར་མའི་ལུང་ཞེས་བྱ་བ་བཞུགས་སོ། །
བཅོམ་ལྡན་འདས་དཔལ་ཀུན་ཏུ་བཟང་པོ་རྡོ་རྗེ་སེམས་དཔའ་ལ་ཕྱག་འཚལ་ལོ། །དོན་དང་བྲལ་བའི་འཇིག་རྟེན་པས། །སྣང་སྲིད་བདེ་བའི་ལོངས་སྤྱོད་ལ། །ཆགས་པར་སྤྱོད་པས་འཁྱམས་པ་རྣམས། །འདི་ལྟར་སྤྱོད་ན་གྲོལ་ཞེས་བཤད། །ལྟ་བ་བྱིན་རླབས་བསྐྱེད་པ་དང་། །སྤྱན་དྲངས་མཆོད་དང་རོལ་པ་དང་། །ལྷག་མའི་ལས་དང་བསྔོ་བ་བརྒྱད། །རྒྱུན་དུ་མི་གཏོང་རྣལ་འབྱོར་ཡིན། །དབང་པོ་ཡུལ་དུས་རྣམ་ཤེས་ཀུན། །ཤེས་རབ་ཐབས་སྦྱོར་ཡེ་སངས་རྒྱས། །འབྱུང་བ་ཡུམ་གྱི་མཁའ་ཀློང་ལས། །སྤྲུལ་པ་རང་བྱུང་ལོངས་སྤྱོད་ལྷ། །བྱང་ཆུབ་སེམས་ཀྱི་ཀློང་བརྡལ་བས། །གཉིས་མེད་གཅིག་པའི་ལོངས་སྤྱོད་ཡིན། །ལྟ་བ་འདི་ལ་གང་གནས་པ། །སངས་མ་རྒྱས་པ་གཅིག་ཀྱང་མེད། །དང་པོ་ལོངས་སྤྱོད་ཀུན་ལྡན་པས། །བདག་ཉིད་ལུང་གི་ཁྲག་འཐུང་ལས། །ཡིག་འབྲུ་གསུམ་འཕྲོས་ཐིམ་ཙམ་གྱིས། །སྦྱང་བར་སྔགས་ཀྱི་མཁའ་གང་བའོ། །བདག་ཉིད་ཁྲག་འཐུང་གསལ་བ་ལས། །ལྟོ་བ་བྷྲཱུྂ་ལས་གཞལ་ཡས་ཁང་། །རིམ་པ་ལྔ་ཡི་དཀྱིལ་འཁོར་ལྷ། །མ་བསྐྱེད་རྫོགས་པའི་ཚུལ་གྱིས་བསྒོམ། །ས་མཱ་ཛཿཡི་ཕྱག་རྒྱ་ཡིས། །འབར་དེས་འཕགས་པ་འཁོར་དང་བཅས། །ནམ་མཁའི་ཁམས་ཀུན་གང་བར་དམིགས། །དེ་ཉིད་ཐིག་ལེའི་ཚུལ་དུ་བསྒོམ། །རིམ་པ་བཞིན་དུ་སྤྲོས་ཏེ་སྦྱངས། །སྔགས་ཀྱི་ལྷ་མོ་རིམ་པ་བཞིན། །ཤེས་རབ་ཐབས་ཚུལ་མཉེས་པར་མཆོད། །བླ་མེད་དངོས་གྲུབ་གསོལ་བར་བསམ། །ༀ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨ་མྲྀ་ཏ་ཧཱུྃ། ༀ་བ་ལིནྟ་ཁ་རམ་ཁ་རཾ་ཌ་ཀི་ནི་ཁ་རཾ་ཡོ་གཱི་ནཱི། ཌཾཥྚ་ཏ་ཐ་ག་ད་ཨ་ལ་ལ་ཧོཿ ཞེས་རྒྱས་པར་མཆོད་དོ། །དེ་ནས་བདག་ཉིད་མཉམ་གཞག་པས། །རྣམ་གསུམ་ཚུལ་གྱིས་རོལ་བར་བྱ། །བདག་ཉིད་རང་གི་ལྷ་མཉེས་པས། །མཆོད་སྦྱིན་ཡིན་ཏེ་དངོས་གྲུབ་བོ། །བདག་ཉིད་མཉམ་བཞག་ཌཱ་ཀྐིའི་རྒྱས། །མ་ཚོགས་དབང་ཕྱུག་དམ་ལ་བསྡུ། །སྔགས་འདིས་མཆོད་ལ་ཕྲིན་ལས་བཅོལ། །རང་གི་གནས་སུ་ལས་ལ་བཀྱེ། །ༀ་ཌཱ་ཀི་ནཱི་ཨ་གརྟ་ཡ། ཨ་གརྟ་ཡ། ཨཱ་བེ་ཤ་ཡ། ཨཱ་བེ་ཤ་ཡ། པྲ་བྲེ་ཤ་ཡ། པྲ་བྲེ་ཤ་ཡ། བྷནྡྷ་ཡ་བནྡྷ་ཡ། ཏོ་ཥ་ཡ་ཏོ་ཥ་ཡ། མོ་ཧ་ཡ་མོ་ཧ་ཡ། སརྦ་བཛྲ་ཌཱཀྐི་ནི་ནཱན་ཎྲྀ་ད་ཡ་ཧཱུྃ་ཛཿ ཛཿཧཱུྃ་བཾ་ཧོཿ ཌཱ་ཀི་ནི་ཧཱུྃ་ཛཿ ཞེས་པ་དང་། བཛྲ་ཌ་ཀི་པྲ་ཏིཙྪ་མ་མ་བ་ལིནྟ་ཧཱུྃ་ཕཊ་ཁཱ་ཧི། ༀ་ཧཱུྃ་ཏྲྃ་ཧྲིཿཨཱཿ ཞེས་ཐིམ་པར་མཆོད་དོ། །ཕ་མ་ལ་སོགས་འགྲོ་དྲུག་ལ། །ཚད་མེད་གཏོར་མ་འདི་བསྔོས་པས། །ལོངས་སྤྱོད་ལྡན་ཞིང་ཚོགས་རྫོགས་ནས། །ཐམས་ཅད་མྱུར་དུ་འཚང་རྒྱ་ཤོག །ༀ་སརྦ་པྲེ་ཏ་ནན། ཨ་མྲྀ་ཏེ་ཧཱུྃ། ཞེས་བྱམས་པ་དང་སྙིང་རྗེར་དམིགས་ལ། །ཅི་འདོད་པ་འབྱུང་བར་བསམ་ཞིང་གཏོར་རོ། །ཕྲིན་ལས་བཅོལ་བ་ནི། སྡང་བའི་དགྲ་ཐུལ། གནོད་པའི་བགེགས་ཆོམས། ཞིང་བཅུ་རྡུལ་དུ་རློག །རྣལ་འབྱོར་པའི་བསམ་པ་ཡིད་བཞིན་དུ་འགྲུབ་པར་མཛད་དུ་གསོལ། ཡ་ཧི་གཙྪ་ༀ་བ་ལིནྟ་ཏེ་ཛོ་བ་ལཱི་ནི་བ་ལ་བ་དྱ་གུ་ཧྱ་ས་མ་ཡ་སྭཱ་ཧཱ། རྣལ་འབྱོར་ལོངས་སྤྱོད་གོལ་བའི་ཕྱི་རབས་ལ། །མ་སྤངས་རོལ་པས་འབྲས་བུ་ལྷུན་གྲུབ་པ། །ཡི་དམ་ཟ་མའི་ཚོགས་གཏོར་འདི་བསྟན་པས། །ཀུན་གྱིས་རྡོ་རྗེ་འཆང་གི་གྲལ་ཐོབ་ཤོག །གཏོར་མའི་ལུང་རྫོགས་སོ། །ཞེས་པ་འདི་ནི་སློབ་དཔོན་སངས་རྒྱས་གསང་བས་མཛད་པའི་གཏོར་མའི་རིམ་པའོ། ༈ །ཟ་ཚོགས་གཏོར་མའི་ལུང་ཞེས་བྱ་བ་བཞུགས། རྒྱ་གར་སྐད་དུ། བ་ལིཾཀྲ་མ་ནཱ་མ། བོད་སྐད་དུ། གཏོར་མའི་རིམ་པ་ཞེས་བྱ་བ། །དབལ་ཚོགས་ཀྱི་བདག་པོ་ལ་ཕྱག་འཚལ་ལོ། །སྤྱི་དཔལ་ཚོགས་གཉིས་རྫོགས་པའི་བདག་པོ་ལ། །བཏུད་ནས་ལོངས་སྤྱོད་དངོས་པོར་ཞེན་པ་རྣམས། །བསམ་པ་དག་པར་སྦྱངས་ཤིང་མཆོད་རོལ་བས། །གྲོལ་ཕྱིར་ཟ་ཚོགས་གཏོར་མའི་ལུང་འདི་བསྟན། །ལྟ་བ་བསྐྱེད་དང་བྱིན་རླབས་དང་། །སྤྱན་དྲངས་མཆོད་དང་རོལ་པ་དང་། །ལྷག་མའི་ལས་ལ་བསྔོ་བ་རྣམས། །རྒྱུན་དུ་གཏོང་ན་རྣལ་འབྱོར་ཡིན། །ཕུང་པོ་འབྱུང་བ་ལྔ་སོགས་ཀུན། །ཤེས་རབ་ཐབས་སུ་ཡེ་སངས་རྒྱས། །འབྱུང་བ་ཡུམ་གྱི་མཁའ་ཀློང་ལས། །རང་བྱུང་ལོངས་སྤྱོད་ཆེན་པོའི་ལྷ། །བྱང་ཆུབ་སེམས་ཀྱི་ཀློང་བརྡལ་བས། །གཉིས་མེད་བདེ་བའི་ལོངས་སྤྱོད་ཡིན། །རྟོག་པ་དེ་ཡི་ངང་ཉིད་ལས། །གང་ཡིན་སྐུ་དེ་གསལ་བར་བསྐྱེད། །གསང་གནས་དང་པོ་འོད་ཟེར་གྱིས། །དབང་བསྐུར་བྱིན་བརླབས་དཀྱིལ་འཁོར་བསྐྱེད། །དེ་ཡང་གཙོ་འཁོར་སྒོ་བར་བཅས། །བསྐྱེད་རྫོགས་ཆེན་པོའམ་གང་བདེར་གསུངས། །ལོངས་སྤྱོད་ཆེན་པོ་བཀྲམ་པ་ལ། །གསང་བའི་ཡི་གེ་འབྲུ་གསུམ་པོས། །སྦྱངས་པས་ལྷ་མོས་མཁའ་གང་བའོ། །ༀ་བ་ལིཾ་ཏ་ཏེ་ཛོ་བ་ལིཾ་ཏ་བ་ལ་བ་དྱ་གུ་ཧྱ་ས་མ་ཡེ་སྭཱ་ཧཱ། དེ་ནས་གསང་བའི་འོད་ཟེར་གྱིས། །གྲུབ་པའི་དཀྱིལ་འཁོར་རབ་བཀུག་ནས། །མདུན་དུ་བཞུགས་ཤིང་གསལ་བར་བྱ། །དེ་ཡང་སྟོང་གསུམ་བདེ་བའི་ཀློང་། །འདོད་ཡོན་རྫོགས་པའི་ལྷ་མོ་རྣམས། །དགྱེས་མདངས་རོལ་པའི་ཚུལ་ཉིད་ཀྱི། །གཉིས་མེད་བདེ་བའི་མཆོད་པས་ཐིམ། །དེ་ཡང་ཆགས་མེད་བདེ་བའི་ངང་། །ༀ་ཨཱཾ་ཧཱུྃ་ཏྲཱྃ་ཧྲཱིཿཧཱ། བུདྡྷ་བ་ལིནྟ་ཁ་རཾ་ཌཱ་ཀི་ནི་བ་ལིཾ་ཏ་ཁ་རཾ་ཡོ་གི་ནཱི་བ་ལིཾ་ཏ་ཁ་རཾ་དཾཥྚ་བྷ་ག་ཝཾ་ཨ་ལ་ལ་ཧོཿ དེ་ནས་བསྙེན་པའི་དཀྱིལ་འཁོར་དེ། །བསྐྱེད་པའི་གནས་སུ་ཐིམ་པར་བསམ། །བདག་ཉིད་ཆེན་པོའི་དཀྱིལ་འཁོར་དེས། །རྣམ་གསུམ་ཚུལ་གྱིས་ཟས་ལ་རོལ། །སྐྱོན་མེད་འོད་ཀྱི་མཆོད་པ་དེ། །ཐིམ་པས་འབར་ཞིང་ཉོན་མོངས་ཞིང་། །ཐལ་བ་མི་གཙང་གཏོར་མར་བྱུང་། །འཇིག་རྟེན་པ་ཡི་མཁའ་འགྲོ་ཚིམ། །དེ་ནས་ལྷག་མ་ཚོགས་བསྡུས་ནས། །འོད་ཀྱིས་དམ་རྫས་ཆེན་པོར་བསྒྱུར། །ལྕགས་ཀྱུས་དྲངས་པས་མཁའ་འགྲོ་དགུག །ཟིལ་གྱིས་མནན་ལ་གཏོར་མ་སྦྱིན། །ཕྲིན་ལས་བཅོལ་ལ་གནས་སུ་བཏང་། །བྷྱོ་ཨེ་ཨཱ་ར་ལི་ཛཿ ༀ་ཤྲཱི་ཧེ་རུ་ཀ་མ་ཧཱ་བཛྲ་ཨཱ་ཀཪྵ་ཡ། པྲ་བེ་ཤ་ཡ་པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཥ་ཡ་ཏོ་ཥ་ཡ་མོ་ཧ་ཡ་མོ་ཧ་ཡ། སརྦ་བཛྲ་ཌཱ་ཀི་ནཱི་ནཱཾ་ཧཱུྃ་ཧཱུྃ། ༀ་བཛྲ་ཌཱ་ཀི་ནཱི་པྲ་ཏི་ཙྪེ་མཾ་བ་ལིཾ་ཏ་ཧཱུྃ་ཁཱ་ཧི། ༀ་བུདྡྷ་ཌཱ་ཀི་ནཱི་པྲ་ཏི་ཙྪེ་མཾ་བ་ལིཾ་ཏ་ༀ་ཁཱ་ཧི། ༀ་རཏྣ་ཌཱ་ཀི་ནི་པྲ་ཏི་ཙྪེ་མཾ་བ་ལིཾ་ཏ་ཏྲཱཾ་ཁཱ་ཧི། ༀ་པདྨ་ཌཱ་ཀི་ནི་པྲ་ཏི་ཙྪེ་མཾ་བ་ལིཾ་ཏ་ཧྲཱིཿཁཱ་ཧི། ༀ་ཀརྨ་ཌཱ་ཀི་ནི་པྲ་ཏི་ཙྪེ་མཾ་བ་ལིཾ་ཏ་ཧཱ་ཁཱ་ཧི། སྡང་བའི་དགྲ་ཐུལ། གནོད་པའི་བགེགས་ཆོམས། རྣལ་འབྱོར་བའི་བསམ་པ་སྒྲུབས། སངས་རྒྱས་ཀྱི་བསྟན་པ་སྲུངས་ཤིག །ཨཱ་ར་ལི་ཡ་ཧི་ག་ཙྪ། ཕ་མ་ལ་སོགས་འགྲོ་ཀུན་ལ། །ཚད་མེད་གཏོར་མ་འདི་བསྔོས་པས། །ལོངས་སྤྱོད་ལྡན་ཞིང་ཚོགས་རྫོགས་ནས། །བྱང་ཆུབ་ཆེན་པོ་ཐོབ་པར་ཤོག །དེ་ནས་ཕྱག་རྒྱ་ཆེན་པོ་དེས། །དུས་གསུམ་ཀུན་ཏུ་མ་ཡེངས་པར། །བཟའ་བཏུང་ཇི་སྙེད་ཡོད་པ་ཀུན། །མཆོད་པ་དང་ནི་སྦྱིན་སྲེག་བྱ། །དེ་ནི་རྣལ་འབྱོར་སྤྱོད་པ་ཡིན། །འགྲོ་དོན་དུས་ལ་བབ་པ་དང་། །དེ་ལས་བསྒྱུར་ཏེ་འཚམས་པར་བྱ། །དད་བརྩོན་ཤེས་རབ་སྙིང་རྗེར་ལྡན། །སྐལ་ལྡན་དེ་བཞིན་སྤྱོད་པ་ནི། །ལུས་མ་བོར་བར་སངས་རྒྱས་པ། །མཐོང་བའི་ཆོས་ལ་མྱ་ངན་འདའ། །མ་དད་ལེ་ལོ་ཆེ་བ་དང་། །ཤེས་རབ་ཆུང་ཞིང་སྙིང་རྗེ་མེད། །སྐལ་མེད་ཚུལ་འཆོས་བྱེད་པ་ནི། །རོ་མྱག་འདམ་དང་ཡི་དྭགས་གནས། །བྱོལ་སོང་རྩ་ཆུས་ཕོངས་པ་དང་། །དབུལ་པོའི་རིགས་སུ་བརྒྱུད་ཅིང་སྐྱེ། །བདག་གཞན་ཀུན་ལ་ཕན་པ་ཡི། །རྒྱུན་གྱི་ཟ་ཚོགས་འཁོར་ལོ་འདིས། །འགྲོ་ཀུན་ཆགས་སྤྱོད་ནད་སོས་ནས། །གྲོལ་བའི་བདུད་རྩི་འཐུང་བར་ཤོག །ཟ་ཚོགས་གཏོར་མའི་ལུང་ཞེས་བྱ་བ་སློབ་དཔོན་པདྨ་འབྱུང་གནས་ཀྱིས་མཛད་པ་རྫོགས་སོ།། །།
ཆ་གསུམ་གྱི་སྒོམ་ཕྲེང་། རུ་ཁུ་གྲོང་དཔལ་འབྱོར།
ཏྲི ཀ ལཱ ཡཱ སཱོ ཏྭཱ དཱ རྒྷཱ སྟི། །
ཆ་གསུམ་གྱི་སྒོམ་ཕྲེང་བཞུགས་སོ། །
དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མཆོད་པ་ཀུན་གྱི་སྔོན་འགྲོ་བ། །དཀོན་མཆོག་མཉེས་དང་སྲུང་མ་འགོ། །འགྲོ་དྲུག་ཚིམ་དང་བགེགས་ཞི་བའི། །ཆ་གསུམ་ལས་ཀྱི་རིམ་པ་སྟེ། །སྔོན་བྱ་གཞུང་དང་མཇུག་སྡུད་གསུམ། །དང་པོ་མཆོད་གཏོར་གཞུང་བཞིན་བཤམས། །དབུལ་རིམ་བཞིན་དུ་དངར་ཏེ་བཞག །ཁྲུས་བྱ་གོས་གོན་ཚུལ་ཕྱག་དང་། །པང་ཀོང་ནུབ་ཏུ་ཁ་བལྟས་བྱ། །རྣམ་པར་མི་རྟོག་ཏིང་འཛིན་བསྒོམ། །སྔོན་དུ་བྱ་བའི་རིམ་པའོ། །མཆོད་བྱེད་རྟ་མགྲིན་མཆོད་བྱ་མགྲོན། །མཆོད་པ་རྫས་ཀྱི་ཏིང་འཛིན་གསུམ། །གཞུང་གི་དོན་དུ་ཤེས་པར་བྱ། །ཧཱུྃ་བརྗོད་ཡི་དམ་ལྷར་དྲན་བྱ། །སྙིང་དཀྱིལ་མ་དམར་འཕྲོ་འདུ་ལས། །སུརྻས་སྙིང་དཀྱིལ་ཧྲཱིཿབཞི་བསམ། །འཕྲོས་འདུས་རྟ་མགྲིན་ཕྱག་བཞི་པའམ། །ཡང་ན་ཞལ་གཅིག་ཕྱག་གཉིས་ཏེ། །གཡས་པད་གཡོན་ཞགས་སྡིགས་མཛུབ་བཅས། །སྐུ་དམར་རྟ་མགོའི་རྒྱན་བཅས་པའོ། །ཀླུ་བརྒྱད་གདན་ལ་དོར་སྟབས་བཅས། །སྙིང་དཀྱིལ་ཉི་འདྲ་ཡེ་ཤེས་སེམས། །ཐུགས་ཀར་ཉིད་ལ་ཧྲཱིཿབཅས་པ། །མཐའ་མ་བཟླས་པས་བསྐོར་བའོ། །སྔགས་བཟླས་མཐུ་དང་ལྡན་བྱའི་ཕྱིར། །ལྕེ་སྟེང་རྡོ་རྗེ་ཡིག་གོང་བཞིན། །ཡེ་ཤེས་སེམས་དཔའ་ཐུགས་ཡིད་འཕྲོས། །རིགས་གཙོ་མཐའ་ཡས་ཡེ་ཤེས་ཏེ། །འོད་ཟེར་ཚུལ་དུ་དབུ་ལ་ཐིམ། །རྟ་མགོ་མདུན་དུ་མཐའ་ཡས་གསལ། །གསལ་བྱའི་བཟླས་པ་བརྒྱ་རྩ་བརྒྱད། །ལས་བཞི་ནུས་ལྡན་བྱ་བའི་ཕྱིར། །ཕྱག་རྒྱས་གནས་བཞིར་གཏུག་ཅིང་བསྲུང་། །ཡི་དམ་རྟ་བསྐྱེད་བྱིན་བསྲུང་བཞི། །མཆོད་བྱེད་རྟ་མགྲིན་ཏིང་འཛིན་ནོ། །དྲི་སྟེང་ཟླ་དཀྱིལ་ཨ་དཀར་བསམ། །མཐེབ་སྲིན་རྡོ་རྗེ་བཅས་ནས་གཏད། །སྔགས་བཟླས་ཨ་ཡི་འོད་ཟེར་གྱིས། །ཆུ་ཉིད་རྣམ་པར་མི་རྟོག་སྦྱངས། །གཡས་པ་ཨཾ་གི་ནང་བླུགས་ཏེ། །བདག་བཏབ་ལུས་སེམས་རྣམ་རྟོག་སྦྱངས། །མཆོད་བཏབ་མི་གཙང་ཕུད་ཉམས་སྦྱངས། །ཁོང་འཐུང་གཟུང་འཛིན་བག་ཆགས་སྦྱངས། །ལག་པ་གཡས་པ་ཉིད་ཀྱིས་སུ། །གཡས་བསྐོར་གཡོན་བསྐོར་འཆམ་ཚུལ་ཏེ། །བསྲུང་བའི་གོ་ཆ་བླ་ན་མེད། །དེ་ནས་ཕྱི་ནང་བྱེ་བྲག་ལས། །ཕྱི་ལྟར་ཚོགས་དང་མི་སྦྱོར་ན། །མཆོད་པ་བྱིན་རླབས་འདི་ལྟ་སྟེ། །སྦྱངས་སྤེལ་ཡེ་ཤེས་བདུད་རྩི་རུ། །བརྟགས་པ་གསུམ་ནི་གསུམ་གསུམ་བཟླ། །དེ་ནས་སོ་སོའི་སྔགས་རྒྱ་ཡིས། །སོ་སོའི་ལྷ་མོ་མང་པོར་བརླབ། །ལྷ་མོ་མི་མཐུན་བཞི་བཞིས་འདེགས། །དྲི་བརླབས་སྦྱང་བསྐྲད་ལྔ་བརླབ་བཞི། །མཆོད་པ་རྫས་ཀྱི་ཏིང་འཛིན་ནོ། །མཆོད་བྱ་མགྲོན་གྱི་ཏིང་འཛིན་ལ། །འཇིག་རྟེན་འདས་དང་འཇིག་རྟེན་གཉིས། །འདས་པ་བསྐྱེད་དྲངས་མཆོད་རིམ་གསུམ། །བཛྲ་ས་ཏྭ་དྲན་ཙམ་གྱིས། །རྟ་མགྲིན་རྡོ་རྗེ་སེམས་པར་བསྒྱུར། །སྙིང་དཀྱིལ་ཧཱུྃ་གི་ཁྱད་པར་ལས། །བྷྲུྂ་བཏོན་མདུན་དུ་བསམ་པ་ལས། །བི་ཤ་ཤུདྡྷེས་གཞལ་ཡས་གསལ། །ཐིག་བཞི་བཏབ་པས་ལིང་ཙེ་དགུ། །གྲུ་ཆད་སྒོ་དང་བཅས་པ་ཡིས། །དབུས་སུ་སེང་ཁྲི་པད་ཉི་ཟླ། །གཞན་ལ་པད་ཟླ་ཉིད་དཀྱིལ་བསམ། །ཧཱུྃ་ལས་བསྐྱེད་དམ་རྫོགས་ཚུལ་དུ། །སྔགས་བཟླས་ཙམ་གྱིས་སོ་སོར་བསྐྱེད། །དྷཱུ་པེ་ལ་སོགས་བཞི་རྣམ་ནི། །གྲུ་ཆད་བཞི་ལས་བསྐྱེད་ཀྱང་རུང་། །དྲིལ་གསིལ་ཕྱག་རྒྱ་བསྒྱུར་ཀྱང་རུང་། །གཞལ་ཡས་གདན་དང་ལྷ་བསྐྱེད་གསུམ། །འདས་པའི་དང་པོ་བསྐྱེད་པའོ། །སེ་གོལ་བསྐུལ་ཚིག་ས་མཱ་ཛཿས། །ཆོས་ཀྱི་སྐུ་ལས་བཞེངས་པར་བསམ། །ཐུགས་རྗེ་ལྕགས་ཀྱུ་ཨེ་ཧྱའི་སྒྲས། །གུར་ཐོག་སྤྱན་དྲངས་ཕྱག་རྒྱ་བཞིས། །དགུག་བསྐྲད་བསྟིམ་ལ་དགྱེས་པ་བསྐྱེད། །ཨ་ནུད་ད་རས་ནང་ལྟར་ན། །སྤྲིན་དང་རྒྱ་མཚོ་སྤེལ་འདམ་ཀའོ། །ནན་ཏན་གོ་ལེབ་ཏིཥྛ་ཡིས། །བརྟན་ཞིང་མི་འགྱུར་བཞུགས་སུ་བར། །ཀཱ་མ་ལ་ཡིས་གདན་དབུལ་བྱ། །སྙན་དྲངས་བསྟིམ་བརྟན་གན་འབུལ་ལྔ། །སྤྱན་དྲངས་བསྟིམ་སྟེ་གཉིས་པའོ། །ཕྱག་རྒྱས་ཨརྒྷ་བླངས་ནས་ནི། །ཨ་བསམ་འཕྲོ་འདུས་ཡན་ལག་བརྒྱད། །བསམས་ཏེ་སུ་ཁས་ལན་གསུམ་སྦྲེང་། །ཕྱག་ཞབས་བསིལ་དང་ཞབས་བསིལ་བསམ། །སྤོས་ལ་སོགས་པ་དབུལ་ཚུལ་ཡང་། །དང་པོ་ཚིག་བརྗོད་སྔགས་ཀྱིས་བསྟབ། །མཆོད་སྤྲིན་རྒྱ་མཚོས་ནམ་མཁའ་བཀང་། །མཆོད་སྤྲིན་དཀོན་མཆོག་རིན་ཆེན་གྱིས། །མཆོད་པའི་སྤྲིན་ཕུང་སྣ་ཚོགས་དང་། །སྤོས་དང་མེ་ཏོག་སྣ་ཚོགས་དང་། །འོས་དང་གྲགས་པས་མཆོད་པར་བསམ། །ཚིགས་བཅད་རྫོགས་ནས་ནམ་མཁའ་མཛོད། །སྤྱི་བོར་རྒྱ་བཞག་ལན་གསུམ་བརྗོད། །དུས་གསུམ་སངས་རྒྱས་ཐམས་ཅད་ལ། །ནམ་མཁའ་བཀང་སྟེ་མཆོད་པར་བསམ། །ཐལ་སྦྱར་མི་མཉམ་གཏི་མུག་ཁྱེད་ཕ་མ། །འབྲས་ཐོབ་མུན་བསལ་དམ་པ་སྐྱབས་མཛོད་བཞི། །བསིལ་དབུལ་སྒྲ་སྤྲིན་ནམ་མཛོད་བསྐུལ་བ་དྲུག །མཆོད་པའི་ལས་རིམ་ལས་འདས་པའི་ཐ་མ་རྫོགས་སོ། ༈ །འཇིག་རྟེན་འདས་པའི་སྔོན་བྱས་ཏེ། །རྡོ་རྗེ་སེམས་དཔའ་རྟ་མགྲིན་བསྒྱུར། །དེ་ལ་རྣམ་གསུམ་དང་པོ་ནི། །གཏོར་བཏེགས་དྲི་ཡིས་སྐྱོན་རྣམས་སྦྱངས། །ཨ་མྲྀ་ཏ་ཡིས་རིམ་པར་བསང་། །ཕུད་དང་རྣམ་ལྔ་ཨརྒྷ་ཀུན། །རིམ་པར་བླུག་སྟེ་བདུད་རྩིར་བསམ། །བརྟག་བཞིས་བྱིན་རླབས་རྒྱུས་བཞིན་ནོ། །ལས་དང་དངོས་གྲུབ་བསམ་འགྲུབ་ཕྱིར། །ཀ་རིའི་སྔགས་བརྗོད་རྡོ་རྗེས་གཏུག །ཀུན་གཞིའི་མཇུག་ཏུ་བདག་སྟོབས་བརྗོད། །སྦྱང་རྩི་སྨོན་ལམ་བྱིན་རླབས་བཞི། །བྱིན་རླབས་རིམ་སྟེ་དང་པོའོ། །ཡང་དཀྱིལ་ཟླ་གདན་ལ་བཞག་སྟེ། །ལྕགས་ཀྱུས་སྔགས་ཀྱིས་ནམ་མཁར་དྲངས། །དད་པ་ཚིག་གིས་ནང་དུ་དྲངས། །ཨརྒ་ལན་གསུམ་དབུལ་བ་མཐུན། །རྣམ་ལྔ་སྔགས་དང་ཕྱག་རྒྱས་དབུལ། །ཡེ་ཤེས་བདུད་རྩིའི་རང་བཞིན་དུ། །དབུལ་ལམ་སོ་སོ་བསམ་མི་ཁྱབ། །མེ་ཏོག་སྡུག་མཛེས་ནམ་མཁའ་བཀང་། །དེ་ཚུལ་བཞི་ཡང་དེ་བཞིན་ནོ། །རྫས་ལྔ་ལག་གིས་བླང་མི་དགོས། །གཏོར་མ་རྣམ་ལྔ་སྦྱར་བ་དང་། །སྔགས་བཟླས་རྒྱ་བས་དབུལ་བར་བྱ། །ཨརྒ་སྦྲེང་ཞིང་རི་རྒྱལ་བརྗོད། །དེ་ལ་གནས་མགྲོན་ལས་བཅོལ་གསུམ། །ཕྱི་ནང་དྲིལ་གསིལ་ཕྱག་རྒྱ་བསྒྱུར། །བསྟོད་ཅིང་བསྐུལ་བའི་རིམ་པའོ། །སོ་སོའི་དམ་ཚིག་རྒྱ་བསྟན་པས། །དམ་ལས་མི་འདའི་དངོས་གྲུབ་དང་། །ལས་རྣམས་བྱེད་པ་ཉིད་དུ་བསམ། །སྤྱི་སྨོན་མེ་ཏོག་གཟེད་ཞལ་དབུལ། །དེ་ནས་དང་པོའི་སྨོན་ལམ་གདབ། །ཆོས་སྦྱིན་མེ་ཏོག་གཏོར་མ་དབུལ། །རྗེ་ལ་འབངས་ཞུའི་ཚུལ་དུ་བྱ། །དེ་དབུལ་དམ་ཚིག་སྨོན་ལམ་གདབ། །དང་པོའི་རིམ་པ་ཤེས་པར་བྱ། །བསྐུལ་ཚིག་སྔགས་རྒྱ་ཏིང་འཛིན་བཞིས། །རིགས་དྲུག་མདུན་དུ་འོང་བར་བསམ། །བཅིངས་སྨོན་ཆོས་བཞིན་མེ་ཏོག་བསྡུ། །སྔགས་བརྗོད་མ་བུ་གདམས་ངག་ཚུལ། །དགུག་བཅིངས་སྨོན་སྦྱིན་མེ་ཏོག་གཤེགས། །དྲུག་གམ་བར་མའི་ལས་རིམ་མོ། །ལུང་དགྲོལ་སྔགས་དང་བཅས་པ་ཡིས། །དགུག་ལས་མ་མ་གཏོགས་མཚམས་བཅད་བྱ། །གསལ་གདབ་བདེན་བརྡར་ཧྲཱིཿཡིས་བསྟོད། །བི་ཤ་ཧ་ཡས་མ་འགྲུས་དགུག །དགྲ་བགེགས་དྲུང་དུ་འོང་བར་བསམ། །ཕྱག་རྒྱ་བཞིས་བཅིང་ཕུར་བུས་གདབ། །སྨོན་ལམ་བྲན་ལ་བཀྱོན་ཚུལ་གདབ། །བརླག་པར་མཛོད་དང་རྒྱུར་འགྱུར་དང་། །གཙོ་འཁོར་གྱུར་དང་སྐབས་གསུམ་དུ། །དམ་བྱིན་རྡོ་རྗེའི་མིང་ནས་དྲི་ཆུ་སྦྲེང་། །ཧ་ན་ཡཀྵ་ས་ཏྭ་ཡིས། །སྔགས་རེའང་གསུམ་གསུམ་བསྒྲིང་བར་བྱ། །མཆོད་སྦྱིན་གཏོར་མར་མེ་ཏོག་བསྡུ། །དེ་ལས་རྔ་མོ་གདེང་སོར་བསྐྱེད། །ཕྱག་རྒྱ་བཞི་ཡིས་བསྐྱོད་ནས་སུ། །དེ་ཡང་རྩེ་གསུམ་བ་དན་རྒྱས། །ལྷོ་ཕྱོགས་གཤིན་རྗེའི་ལག་ཏུ་འཕང་། །སེམས་མ་སྐྱེས་པའི་བར་དུ་གཏད། །རྟིང་ལ་ཚིག་དང་སྔགས་དཀྱིལ་བསྐྲད། །མཚམས་བདེན་བསྟོད་དགུད་བཅིངས་སྨོན་གདབ། །དམ་ཆུས་ཆོས་སྦྱིན་མེ་ཏོག་བསྐྲད། །ཐ་མའི་ལས་རིམ་བཅུ་གཅིག་རྫོགས། །དེ་ནི་འཇིག་རྟེན་པཱུ་ཙའོ། །སྤྱི་དོན་གསུམ་པ་མཇུག་སྡུད་ནི། །མཆོད་མ་བདག་ལ་བདག་ཡེ་ཤེས། །རིམ་པར་ཧཱུྃ་བསྡུ་ཆོས་ཉིད་ལ། །སླར་བསྐྱེད་ལུས་བསྲུང་གོ་བགོ་བྱ། །ཚུལ་ཕྱག་བྱས་ཏེ་རྒྱུན་ཏིང་བསྒོམས། །བསྡུ་བསྐྱེད་བསྲུང་དང་རྒྱུན་ཏིང་བསྒོམ། །མཇུག་བསྡུ་བ་ཡི་ལས་རིམ་མོ། །རྡོ་རྗེ་ག་ཛས་དང་པོ་དགྱེ། །སྒྲུབ་བྱེད་མི་དགྱེ་བསྡུ་འཁོར་བྱ། །འདི་ནི་དང་པོའི་མཇུག་སྡུད་བྱ། །ཐོབ་དང་རྟོགས་པའི་ནུས་པ་ཡིས། །མཉེས་ཚིམ་ཞི་བར་བྱ་ཕྱིར་རོ། །ཆ་གསུམ་ལས་ཀྱི་ཐོ་རིམ་བསྡེབས། །ནོངས་ན་འཕགས་ལ་བཟོད་པར་གསོལ། །རུ་ཁུ་གྲོང་དཔལ་འབྱོར་གྱིས་མཛད་པའི། ཆ་གསུམ་གྱི་སྒོམ་ཕྲེང་རྫོགས་སོ།། །།
བསྟན་པའི་སྙིང་པོ་རིག་པའི་སྒྲོན་མེ། བཻ་རོ་ཙ་ན།
བསྟན་པའི་སྙིང་པོ་རིག་པའི་སྒྲོན་མེ་ཞེས་བྱ་བ་བཞུགས་སོ། །རྒྱ་གར་སྐད་དུ། ཤཱ་ས་ན་གརྦྷ་བིདྱཱ་ཨ་ལོ་ཀ་ནཱ་མ། བོད་སྐད་དུ། བསྟན་པའི་སྙིང་པོ་རིག་པའི་སྒྲོན་མེ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །སྣ་ཚོགས་བདག་ཏུ་རྟོག་པ་གཞི་གཉིས་ལས་འཕྲོས་རྒྱུ་མིན་རྒྱུར་སྨྲ་ཞིང་། །བྱེད་པོས་བྱས་པས་ཐར་པའི་ལམ་དུ་འདོད་དེ་མི་གྲོལ་ངལ་དོན་ཆུང་། །སྣ་ཚོགས་ཆོས་སུ་བརྟགས་ཤིང་འདུ་བྱེད་སྤྱད་སོགས་བག་ཆགས་མཐའ་ཡས་པ། །ཉོན་མོངས་དབང་གི་མཐུན་སྤྱད་རྐྱེན་གྱིས་རྟས་སད་སྨིན་ཅིང་མི་བཟད་མྱོང་། །བཅུ་སྤངས་བཅུ་སྤྱད་འཆེལ་འབྱུང་ཤས་ཀྱིས་འདོད་ཁམས་ལྷ་མིར་རིམ་པ་བཞིན། །དེ་སྟེང་ཚད་མེད་བསམ་གཏན་ཡན་ལག་བསྒོམས་པས་ཚངས་སོགས་གཟུགས་ཁམས་ལྷར། །དེ་དང་ཟག་མེད་སྤེལ་མར་བསྒོམས་པས་གཟུགས་ཁམས་འཕགས་གནས་གཙང་རིས་ལྔར། །གཟུང་འཛིན་ཕྲ་བ་མ་མཐོང་སྙོམས་པར་འཇུག་པ་བཞི་བསྒོམས་སྲིད་རྩེར་འབྱིན། །བདེན་བཞིའི་སྒོར་ཞུགས་བརྒྱ་ཕྲག་ཕྱེད་དང་གསུམ་བསྲུང་ཡོན་ཏན་བཅུ་གཉིས་སྤྱོད། །ཡོད་མེད་གང་ཟག་བདག་མེད་དེ་ཡང་བདེན་བཞི་ཡེ་ཤེས་བཞི་བཞིས་རྟོགས། །ཁམས་གསུམ་ཉོན་མོངས་མཐོང་བསྒོམས་ལམ་སྤངས་རྒྱུན་ཞུགས་ལ་སོགས་རིམ་པ་ཡིས། །དགྲ་བཅོམ་ཐོབ་ཀྱང་བསྐུལ་ནས་འདོད་སྤྱོད་གཉིས་ལས་གཉིས་པོ་བཞི་ལ་རྩོད། །གཞི་མཐོང་རྒྱུན་ཞུགས་མ་ཐོབ་སློབ་པར་ཚེ་འཕོས་ཚེ་རིང་ལྷར་སྐྱེས་འདས། །འདོད་ཁམས་མིར་སྐྱེས་དེ་ཚེ་བློ་ལྡན་ཕྱི་ནང་འབྲས་བུའི་སྒོ་ནས་བརྟགས། །གང་ཟག་ཆོས་ལའང་བདག་མེད་རང་རྒྱལ་འབྲས་ཐོབ་གནས་གསུམ་མྱོང་པ་དེ། །སྔོན་མཐུན་ད་ལྟར་བསམ་གཏན་འབའ་ཞིག་དགའ་བརྩོན་ཆོ་འཕྲུལ་གཞན་དོན་སྤྱོད། །གཉིས་ཞུགས་གསུམ་བསྲུང་ཤེས་རབ་སྙིང་རྗེས་མཐའ་གཉིས་གང་ལའང་མི་གནས་ཤིང་། །བདག་མེད་གཉིས་རྟོགས་ཆེན་པོ་བདུན་ལྡན་བདག་གཞན་དོན་དུ་བཅུ་སྤྱད་པས། །ཀུན་ཏུ་འགྲོ་དོན་ལ་སོགས་ས་ནས་སར་འཕགས་དྲི་མ་བཅུ་བསལ་ཏེ། །རྡོ་རྗེ་ཏིང་འཛིན་སྟོབས་སུ་གྱུར་པས་གསལ་ཁྱབ་མཐར་ཕྱིན་དེ་ཉིད་བརྙེས། །ཕྱི་དག་པ་ལ་བརྟེན་ནས་ནང་དག་པ་ལ་སྦྱོར་བ་སྟེ། །དམ་ཚིག་ཆོ་ག་མ་ཉམས་བཟླས་པ་ཟུར་ཕྱིན་སྤྱན་དྲངས་རྗེ་ཁོལ་ཚུལ། །ཡེ་ཤེས་སེམས་དཔའ་མཉེས་ཏེ་དབང་དང་དངོས་གྲུབ་སྩལ་ནས་ཐོབ་འགྱུར་ཏེ། །རིགས་གསུམ་སངས་རྒྱས་གཉིས་པར་ཚེ་འདིས་འགྲུབ་སྟེ་དེ་ཚེ་མཐར་ཕྱིན་ཉིད། །འཇུག་བསྲུང་སྤྱོད་པ་མཐུན་ཏེ་བཀག་མིན་བྱོན་ལ་ལྟོས་པ་འབའ་ཞིག་མིན། །ནམ་དགོས་དུས་སུ་ཡི་གེ་འབྲུ་ལས་བསྐྱེད་ཅིང་དཔོན་གཡོག་ཚུལ་བལྟས་ནས། །དེ་ཉིད་རྣམ་པ་བཞི་དང་ལྡན་པར་རྩེ་གཅིག་སྒོམ་པའི་ཏིང་འཛིན་དང་། །ཡོ་བྱད་རྒྱུ་རྐྱེན་གཉིས་ཀ་འཚོགས་པས་གཉིས་པར་དེ་ཚེ་མཐར་ཕྱིན་ཉིད། །ཡོ་བྱད་རྒྱུ་རྣམས་འཚོགས་སམ་འོན་ཏེ་མེད་ཀྱང་དེ་ལ་གཙོར་མི་བྱེད། །ཏིང་འཛིན་གཙོར་སྤྱོད་ཕྱག་རྒྱ་ཆེན་པོ་བཞི་སྒོམ་བྱོན་པ་སྤུན་གྲོགས་ཚུལ། །བྱིན་རླབས་ལས་བྱུང་རྩ་བ་ཡན་ལག་སྤྱི་དང་ཁྱད་པར་ལྡན་དེ་དང་། །ཏིང་འཛིན་ལྟ་སྤྱོད་ལྡན་པས་སངས་རྒྱས་གཉིས་པར་དེ་ཚེ་མཐར་ཕྱིན་ཉིད། །སྐལ་ངན་འཆི་བདུད་གང་ཡིན་དེ་ཉིད་སྐལ་ལྡན་རྩི་ལམ་ཐབས་ཡིན་ཏེ། །བསྒྲལ་སྦྱོར་ལེན་རྫུན་རླང་སྤྱོད་ལས་བཞིས་དོན་བྱེད་རྩ་བརྒྱད་སྡོམ་སྲུང་ཞིང་། །གསུམ་འདྲིས་གྱུར་ནས་གསུམ་གྱིས་བསྐྱེད་བཏོན་དཀྱིལ་འཁོར་ཡབ་ཡུམ་ཤེས་རབ་ཐབས། །ཤེས་འཇུག་འབྱོར་པ་དེ་ནི་བཅུ་དྲུག་ཚུན་ཆད་ལྷུན་རྫོགས་མཐའ་ཡས་མཆོག །ཡེ་ཤེས་ཐིག་ལེའི་སྒོར་ཞུགས་མི་འགོགས་ཉེས་མེད་མཐུན་ཏེ་འཆལ་པར་བསྲུང་། །མཉམ་ལ་མ་འདྲེས་རྫོགས་པ་ལྷུན་གྲུབ་ཕྱག་རྒྱར་བསྒོམས་པ་མཎྜལ། །འབྱུང་དང་འབྱུང་འགྱུར་ཡབ་ཡུམ་སྲས་བཅས་ཡེ་ཤེས་ཐིག་ལེའི་ངང་རྟོགས་པ། །ཀུན་ལྡན་གཉིས་པ་དེ་ནི་མྱུར་རམ་བསྣུར་ཞིང་ཚེ་དེས་མཐར་ཕྱིན་བྱེད། །བསྐྱེད་བརྟགས་ཕྱག་རྒྱ་སྣང་ཡང་དེ་ནི་དེ་མིན་འོ་འདོད་རྭ་ལ་འཇོ། །མཐར་ལྷུང་སྒྲོ་སྐུར་བཅིང་གྲོལ་མེད་དེ་བརྒྱུད་ལ་རེ་འཇོག་རྟེན་འཆར་མེད། །སྒོ་ཕུགས་མི་འབྱེད་ཅིག་ཅར་སྤྱི་བླུགས་ལྷུན་རྫོགས་སྡོམ་བཞི་རྩོལ་ནད་སྤངས། །དེ་བཞིན་ཉིད་དུ་དེ་བཞིན་གྱི་ནར་བཞག་ན་རང་བྱུང་རང་གིས་འཆར། །བསྟན་པ་མཐའ་དག་གི་དོན་མདོར་བསྡུས་པའི་སྐྱུད་བྱང་བསྟན་པའི་སྙིང་པོ་ཞེས་བྱ་བ་བཻ་རོ་ཙ་ནས་མཛད་པ་རྫོགས་སོ། །མངྒ་ལཾ། །དགེའོ།། །།
འཕྲུལ་གྱི་མེ་ལོང་དགུ་སྐོར།
འཕྲུལ་གྱི་མེ་ལོང་དགུ་སྐོར་ཞེས་བྱ་བ་བཞུགས་སོ། །ཀུན་མཁྱེན་ཉིད་ལ་ཕྱག་འཚལ་ལོ། །རྣལ་འབྱོར་ལྟ་བའི་སྤྱི་འབྲེལ་བརྡེག །ལོག་རྟོག་བྱང་ཆུབ་ཡུལ་སྣང་བའི། །ཆོས་ཀུན་སེམས་སུ་གཅིག་མི་གཅིག །ལྷུན་གྱིས་གྲུབ་པ་གང་ལ་བགྱི། །དེ་ཉིད་སྣང་བ་ཡོད་དམ་མེད། །ཡེ་ནས་སངས་རྒྱས་ཡིན་ནམ་མིན། །ཁམས་གསུམ་སེམས་ཅན་ཇི་ལྟར་འཁྲུལ། །འཁྲུལ་བ་ཉིད་ན་དོན་ཅི་ལགས། །རྣལ་འབྱོར་ལྟ་བའི་ངོ་བོ་གང་། །དེ་དག་དགོས་པའི་ཐེ་ཚོམ་གང་། །དེ་རྣམས་ཁྱད་པར་ཇི་ལྟར་ཆེ། །འཕྲུལ་གྱི་མེ་ལོང་དགུ་སྐོར་བཞིན། །གསལ་བྱེད་འཕྲུལ་ཚིག་དགུ་ཡིས་སྟོན། །སྒྱུ་མ་རྣམ་གཉིས་སྤྱོད་ཡུལ་ནི། །སེམས་ཀྱི་ཆོས་ཉིད་ངང་དུ་གཅིག །དེ་ཡི་དེ་ཉིད་ཇི་ལྟ་བ། །མཁའ་དང་གཞའ་སྣང་ཇི་བཞིན་དུ། །ལོག་རྟོག་སེམས་རྒྱུད་ཐ་དད་ཀྱང་། །རིགས་རྒྱུད་མེད་ཕྱིར་དབྱེ་བ་དཀའ། །སེམས་ཉིད་ནོར་བུ་རིན་པོ་ཆེ། །ཇི་ལྟར་དམིགས་ཤིང་བསམས་པར་སྣང་། །འགྲོ་ལ་སེམས་རྒྱུད་གཉིས་མི་འཆང་། །དེ་ནི་དངོས་མེད་ཀུན་གྱི་གཞི། །ལོག་རྟོག་མུན་པའི་ཡུལ་སྣང་ཀུན། །སེམས་ཕྱིར་མཐའ་ལ་རྩོད་པ་མེད། །གང་ལ་ཡོད་མེད་མེད་པ་ལྟར། །རྟོག་པའི་སྨྲ་བསམ་ཡུལ་ལས་འདས། །དེ་ནི་དེ་ཕྱིར་རྒྱལ་འགྲོ་ཞེས། །རིས་སུ་བཅད་པ་མེད་པ་ལ། །གཙང་དང་མི་གཙང་དངོས་གཅིག་བཞིན། །ཕྱོགས་སུ་བལྟས་ན་ནོར་བའི་བློ། །ཇི་སྙེད་འཇིག་རྟེན་འཁྲུལ་བའི་སེམས། །མེ་ལོང་གཡའ་དང་མཁའ་སྤྲིན་བཞིན། །རིག་དང་མ་རིག་གཉིས་མེད་པས། །ཕྱོགས་གཅིག་རྐྱེན་གྱི་དུས་སུ་འཁྲུལ། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་རང་བཞིན་མེད། །རང་བྱུང་ཕྱིན་ནང་མེད་སྣང་ཕྱིར། །དེ་དུས་རང་བཞིན་ཉམས་པ་མེད། །འཇུག་པའི་རྣམ་ཤེས་དེ་ལྟ་བ། །ཤེས་རབ་ཐུན་མོང་སྤྱན་ཡིན་ནོ། །རང་བྱུང་ཡེ་ཤེས་ཚོགས་ཀུན་བདག །ཤེས་རབ་ཅན་གྱི་མཆོག་ཡིན་ནོ། །རྡོ་རྗེ་ཡིད་ནི་དབང་མཆོག་ཕྱིར། །ལྟ་བ་མེད་ཕྱིར་རང་སྤྱི་ཆོས། །དབྱེར་མེད་ཕྱོགས་ལྟའི་འོད་བྲལ་བས། །མ་ནོར་རང་གི་མཚན་ཉིད་རྟོགས། །གསུམ་གཉིས་གཅིག་གི་ཐེ་ཚོམ་ཡང་། །དང་པོ་དངོས་དང་གསལ་བ་དང་། སྔ་མ་སངས་རྒྱས་སེམས་ཅན་དང་། །སོ་སོ་སེམས་རྒྱུད་ཐ་དད་པ། །གཅིག་ན་བདུན་ལ་སྔ་རྟོག་སྐྱེ། །དེ་བཞིན་སེམས་རྒྱུད་བརྒྱད་ལ་ཟད། །ཐ་དད་ཞེ་ན་བདུན་གྱིས་འགལ། །དེ་བས་དགག་དང་སྒྲུབ་མེད་པའི། །གཅིག་དང་དུ་མ་མེད་པའོ། །གསུམ་པའི་སྔ་མ་རྟོག་སྐྱོན་དགུ། །ཕྱི་མ་མེད་པའི་ཐེ་ཚོམ་དག །སྐྱོན་གྱི་དངོས་པོ་བཅུ་གཉིས་གཞི། །མི་མཁས་མཁས་པའི་བསམ་པ་ནི། །མ་མཁས་ཤིན་ཏུ་མི་མཁས་པ། །ཤིན་ཏུ་མི་མཁས་མཐར་ལྟ་བ། །མི་མཁས་ཡོད་མེད་རྩོད་བྱེད་ཅིང་། །དགག་ཅིང་བསྒྲུབ་པ་གང་བྱེད་པ། །དེ་དེ་དེ་ལ་ཆགས་སྡང་སྐྱེ། །མཁས་དང་ཤིན་ཏུ་མཁས་པ་ནི། །མཁས་པ་ཕལ་ལ་དགག་སྒྲུབ་ཅན། །སྒྲུབ་པའི་དོན་ལ་བརྟེན་པར་བྱེད། །བྱས་པའི་གཟུང་འཛིན་དབང་གྱུར་པའི། །མ་ནོར་ལམ་དང་བྲལ་བ་ཡིན། །ཤིན་ཏུ་མཁས་པ་ཐམས་ཅད་ལ། །སེམས་ཕྱིར་དགག་དང་སྒྲུབ་པ་མེད། །དེ་ལ་རང་རིག་རང་སྣང་ཕྱིར། །དགག་སྒྲུབ་བྲལ་ལ་ཡིད་མི་རྟོན། །དེ་ཕྱིར་སོ་སོ་དགག་བསྒྲུབ་ཅན། །སྒྲུབ་པའི་ཕྱོགས་ལ་ཞེན་པའི་ཕྱིར། །དེ་དེ་མེད་པ་ག་ལ་མཐོང་། །དེ་བས་རང་གི་བརྟགས་མཐོང་བའི། །དེ་དེ་སྐས་གདངས་ཇི་ལྟ་བ། །ཁྱད་པར་གྲངས་དང་དོར་བ་མེད། །ཆ་ཡོད་དུག་ལ་མི་འཐུང་བཞིན། །ལོག་ལྟ་གཉིས་སུ་ག་ལ་འགྱུར། །གཉིས་པོ་དེ་ལྟར་དེ་ཉིད་ལ། །གྲུབ་པའི་ཐ་སྙད་ཇི་ལྟར་མཚོན། །མ་གྲུབ་གྲུབ་ན་ངེས་ཚིག་མེད། །དེ་མ་གྲུབ་ན་དེ་བཞིན་ནོ། །དེ་བས་སྲིད་དང་མི་སྲིད་ཀུན། །ལྷུན་གྲུབ་ཕྱོགས་སུ་གྲུབ་པ་མེད། །བཞི་པ་སྔ་མ་སྐྱོན་དྲུག་གཉིས། །དེ་བཞིན་ཕྱི་མ་རྗེས་སུ་འཐུན། །གཉིས་མེད་ཞེ་ན་དུས་གསུམ་ལུང་། །འབྱུང་ཞེས་བྱ་བའང་གཉིས་མེད་དང་། །སྨན་ཉིད་ཕན་གནོད་བདག་གནས་ལྟར། །ངོ་བོས་ཐ་དད་འགྱུར་བ་མེད། །ཕྱོགས་ལས་ལོག་པའི་ཐ་དད་མེད། །ལྔ་པ་འཁྲུལ་གཞི་ཡོད་མེད་པའི། །སྐྱོན་ནི་གསུམ་པ་ཇི་བཞིན་གྲངས། །མིག་ཡོར་གསུམ་ལ་དངོས་མེད་འདྲའི། །ཆོས་ཡོད་བཞིན་པས་རང་སེམས་ལ། །དེ་དངོས་མེད་ཀྱང་རྒྱུ་རྐྱེན་དྲུག །རང་བཞིན་ལྷུན་གྲུབ་དཔག་བསམ་བཞིན། ། སོ་སོར་སྣང་བ་དུས་གསུམ་དུ། །རྒྱུན་དུ་འཕྲུལ་ལ་ལྷུན་གྲུབ་པ། །འགྲོ་འོང་འབྱུང་འཇུག་མེད་སྣང་བཞིན། །གཞི་ཡོད་མེད་དང་དབྱེར་མེད་མཚུངས། །དྲུག་པ་དེ་ལྟར་དེ་བདེན་ན། །དེ་ལ་སྐྱོན་དུ་བྱ་བ་བདུན། །ཐམས་ཅད་འཆིང་འགྲོལ་དབྱེར་མེད་ལ། །གཉིས་མཐོང་འཁྲུལ་པར་བལྟ་བ་འཁྲུལ། །དེ་བས་བླང་དང་དོར་བ་མེད། །བདེ་སྡུག་གནས་སུ་རིས་མ་བལྟ། །བདུན་པ་རང་རིག་ཅན་ཡིན་ན། །དེ་ལ་སྐྱོན་བཅུ་འབྱུང་བར་འགྱུར། །དེ་བཞིན་ཉིད་ཀྱི་ཡེ་ཤེས་འདི། །མི་ལྔ་བདག་པོ་ཀུན་གྱི་སེམས། །རང་སྤྱི་ཇི་སྙེད་ཇི་ལྟ་བ། །རང་ཡུལ་མེད་པར་ངེས་གསལ་བ། །ནམ་མཁའ་སྤྲིན་མཐོང་འོད་བཞིན་དུ། །རབ་རིབ་གང་དག་ཤེས་རབ་སྣང་། །བརྒྱད་པ་ངེས་མཐོང་སྒྲིབ་པའི་གྲངས། །བརྒྱད་པ་བསྙད་པ་ཡན་ལག་བཅས། །ཕྱག་རྒྱ་བཞི་ཡི་གཞིར་གྱུར་པ། །ངེས་པར་ངོས་ཟིན་བྱ་བར་བསྙད། །མ་རིག་པ་ཉིད་ཡེ་ཤེས་གསལ། །ཐེ་ཚོམ་ཉིད་ཀྱང་ངེས་པའི་སྤྱན། །ལོག་རྟོག་ཉིད་ཀྱང་མ་ནོར་ལམ། །དེ་ལ་མི་མཐུན་ཤེས་དང་བྲལ། །དགུ་པ་འདས་དང་འཇིག་རྟེན་པའི། །ཐེག་པའི་ལྟ་བ་གྲལ་བཀོད་པ། །སྐས་གདང་ལྟ་བུར་བསྟན་པ་དག །ཀུན་ཀྱང་བདག་དང་བྲལ་བའི་ཕྱིར། །འཇིག་རྟེན་ཤེས་འཕགས་ཅི་སྨོས་ཏེ། །དེ་དང་ཉིད་ནི་དགག་དང་སྒྲུབ། །རིམ་པ་ཡོད་མེད་ཁྱད་པར་དང་། །ལྟོས་པས་ཕྱེ་བའི་ཁྱད་པར་ནི། །བདག་སྤོང་བདག་མེད་སྒྲུབ་པ་དང་། །གཟུགས་སྤོང་ཕྱི་སྟོང་སྒྲུབ་པ་དང་། །དོན་འགོག་སེམས་ཙམ་སྒྲུབ་པ་དང་། །མཐའ་སྤོང་མཐའ་བྲལ་སྒྲུབ་པ་དང་། །དྲི་སྤོང་དག་པ་སྒྲུབ་པ་དང་། །མཚན་འགོག་མཚན་མེད་སྒྲུབ་པ་དང་། །བླང་དོར་འགོག་མེད་སྒྲུབ་པ་དང་། །རྩོལ་སྤོང་རྩོལ་བྲལ་སྒྲུབ་པ་དང་། །དེ་དག་ཀུན་ཀྱང་ཡོད་མེད་ཕྱིར། །དགག་སྒྲུབ་རང་གིས་མི་བྱེད་པའོ། །རིམ་པར་ཕྱེ་བའི་ཁྱད་པར་སྟོན། །མཐོང་བ་དག་དང་མ་དག་པའི། །རིམ་པས་དོན་གཅིག་ཁྱད་པར་སྣང་། །མཐོང་བ་དག་པ་ཀུན་མཐོང་འདི། །སྣ་ཚོགས་ཐེག་པའི་ལྟ་བ་དང་། །ཇི་སྙེད་སྡོམ་པའི་བྱ་བ་རྣམས། །སྤྱད་པར་བྱ་བ་མ་ཡིན་ཡང་། །མ་འདྲེས་ཡོངས་སུ་རྫོགས་པར་གསལ། །ཀུན་ཤེས་བཞིན་འདྲ་རབ་རིབ་དྲི་མ་དག །བསྟན་པའི་མེ་ལོང་མཐོང་གོམས་རང་དག་སར། །འགྱུར་བས་མ་འོངས་དེ་ཅན་ཆེད་བགྱིས་པའི། །དགེ་རྩས་བདག་དང་མཐའ་ཡས་གྲོལ་བར་བསྔོ། །འཕྲུལ་གྱི་མེ་ལོང་དགུ་སྐོར་རྫོགས་ས྄ོཧ྅྅྅།། །།
འཕྲུལ་གྱི་མེ་ལོང་དགུ་སྐོར་གྱི་འགྲེལ་པ། གཉགས་ཛྙཱ་ན་ཀུ་མཱ་ར།
འཕྲུལ་གྱི་མེ་ལོང་དགུ་སྐོར་གྱི་འགྲེལ་པ་བཞུགས། རྣལ་འབྱོར་རིག་པའི་མེ་ཏོག་འཕྲུལ་གྱི་མེ་ལོང་ལ་དབུ་ཞབས་སུ་བསྡུས་པའི་དོན་བཞི་སྟེ། ཕྱག་འཚལ་མཆོད་པའི་ལུང་དང་། དམ་བཅའ་སྡོམ་པའི་ལུང་དང་། གཞུང་ལུགས་རྩ་བའི་ལུང་དང་། བསྔོ་བ་ཚོགས་ཀྱི་ལུང་དང་བཞིའོ། །ཀུན་མཁྱེན་ཉིད་ལ་ཕྱག་བཙལ་ནས། ཤེས་པ་གང་གིས་གང་ལྟར་ཕྱག་བཙལ་བའོ། །རྣལ་འབྱོར་ལྟ་བའི་སྤྱི་འགྲེལ་བརྡོག །ཅེས་པ་ལྟ་བའི་རིམ་པ་སྤྱིའི་ཤན་དབྱེ་བའི་ཕྱིར་འགྲེལ་པ་སྟེ། ཐེ་ཚོམ་གཏར་དཀའ་གནད་དུ་བརྡེག་པར་དམ་བཅའ་བའོ། །ལུང་བསྡུ་བ་བསྟན་པ་ལ་གཉིས་ཏེ། དྲིས་པའི་ལུང་དང་། ལན་ནོ། །དྲིས་པ་ནི་དགུ་སྟེ། ལོག་རྟོག་བྱང་ཆུབ་ཡུལ་སྣང་བའི། །ཆོས་ཀུན་སེམས་སུ་གཅིག་མི་གཅིག །ཅེས་པ་འཁོར་བ་དང་མྱ་ངན་འདས་པའི་སྤྱོད་ཡུལ་བྱང་ཆུབ་སེམས་སུ་གཅིག་མི་གཅིག་དྲིས་པ་དང་པོའོ། །ལྷུན་གྱིས་གྲུབ་པ་གང་ལ་བགྱི་དྲིས་པ་གཉིས་པའོ། །དེ་ཉིད་སྣང་བ་ཡོད་དམ་མེད། །ཅེས་པ་ལྷུན་གྲུབ་སྣང་སྟོང་གང་ཡིན་དྲིས་པ་གསུམ་པའོ། །ཡེ་ནས་སངས་རྒྱས་ཡིན་ནམ་མིན། །ཞེས་པ་ཆོས་ཀུན་གཞི་ཡེ་སངས་རྒྱས་པ་ཡིན་ནམ་མ་རྒྱས་པ་ཡིན་དྲིས་པ་བཞི་པའོ། །ཁམས་གསུམ་སེམས་ཅན་ཇི་ལྟར་འཁྲུལ། །ཞེས་པ་ལྔ་པའོ། །འཕྲུལ་པ་ཉིད་ན་དོན་ཅི་ལགས། །འཁྲུལ་བའི་གྲུབ་མཐའ་དྲིས་པ་དྲུག་པའོ། །རྣལ་འབྱོར་ལྟ་བའི་ངོ་བོ་གང་། །ཞེས་པ་བདུན་པའོ། །དེ་དག་དགོས་པའི་ཐེ་ཚོམ་གང་། །ཞེས་པ་སྐྱོན་བདུན་པའོ། །དེ་དག་དགོས་པའི་ཐེ་ཚོམ་གང་། །ཞེས་པ་སྐྱོན་དྲིས་པ་བརྒྱད་པའོ། །དེ་རྣམས་ཁྱད་པར་ཇི་ལྟར་ཆེ། །བདུན་པོ་ཐེག་པ་གཞན་ལས་གང་སྤགས་དྲིས་པ་དགུ་པའོ། །འཕྲུལ་གྱི་མེ་ལོང་དགུ་སྐོར་བཞིན། །ཞེས་པ་མཚོན་པའི་དགུས་མཚོན་ཏུ་བཏུབ་པའོ། །གསལ་བྱེད་འཕྲུལ་ཚིག་དགུ་ཡིས་སྟོན། །ཞེས་པ་དོན་དྲིས་པ་ལན་ཟུང་དགུ་ཡི་ཚིག་གིས་གསལ་བར་སྟོན་པའོ། །ལན་དང་པོ་བསྟན་པའི་ཕྱིར། སྒྱུ་མ་རྣམ་གཉིས་སྤྱོད་ཡུལ་ནི། སེམས་ཀྱི་ཆོས་ཉིད་ངང་དུ་གཅིག །ཅེས་པ་ལོག་རྟོག་སྒྱུ་མའི་སེམས་ཅན་དང་། ཡེ་ཤེས་སྒྱུ་མའི་སངས་རྒྱས་ཀྱི་སྤྱོད་ཡུལ་འཁྲུལ་ལམ་མ་འཁྲུལ་གཉིས། སེམས་ཀྱི་དེ་ཁོ་ན་ཉིད་ཆོས་ཀྱི་དབྱིངས་ཀྱི་ཡེ་ཤེས་སུ་གཅིག་པར་ལན་གདབ་པའོ། །དེའི་དཔེ་ནི། དེའི་དེ་ཉིད་ཇི་ལྟ་བའོ། །མཁའ་དང་གཞའ་སྣང་ཇི་བཞིན་དུ། །ཞེས་པ་གཞའ་ཚོན་སྣང་བ་དང་རང་བཞིན་སྟོང་པ་དབྱེར་མེད་པ་བཞིན། གཏན་ཚིགས་ནི། ལོག་རྟོག་སེམས་རྒྱུད་ཐ་དད་ཀྱང་། །རིགས་རྒྱུད་མེད་ཕྱིར་དབྱེ་བ་དཀའ། །ཞེས་པ་ལོག་རྟོག་གི་རྒྱུད་སོ་སོར་རྟོག་པ་དང་། འདུ་ཤེས་ཐ་དད་པས། ཚོར་བ་དང་། འདུ་བྱེད་དེ་ལྟ་བ་དང་། རྒྱལ་བའི་ཐུགས་གསལ་བ་བརྟགས་ཀྱིས་ཐ་དད་པ་ལས་མི་མཐུན་པ་ནི་རྒྱལ་བ་དང་འགྲོ་བ་ལ་རིགས་བརྒྱུད་རྟག་པར་རེད་པ་མེད་པའི་ཕྱིར། གཅིག་ཅེས་དགོས་ཆེད་གཉིས་ཀྱི་ཕྱིར་བརྗོད་ཀྱིས་ངོ་བོ་གཅིག་དང་ཐ་དད་ལས་གྲོལ་བའི་ངང་དུ་དབྱེར་མེད་པ་ལ་དེ་སྐད་བརྗོད་པའོ། །གཉིས་པ་ནི། སེམས་ཉིད་ནོར་བུ་རིན་པོ་ཆེ། །ཞེས་པ་ལྷུན་གྲུབ་ཀྱི་དཔེའོ། །ཇི་ལྟར་དམིགས་ཤིང་བསམ་པར་སྣང་། །ཞེས་པ་ལྷུན་གྱིས་གྲུབ་པ་དང་མ་གྲུབ་པའི་ཆོས་ཐམས་ཅད་དུ་སེམས་སོ་སོར་སྣང་བའོ། །འགྲོ་ལ་སེམས་རྒྱུད་གཉིས་མི་འཆང་། །ཞེས་པ་སེམས་ཀུན་གྱི་སེམས་ཀྱི་ཆོས་ཉིད་ཀྱི་གཞིའམ་དངོས་པོ་ཞེས་པ་སྐད་ཅིག་མ་ནི་བསམ་པའམ་བློ་ཞེས་རྟོག་པ་དང་མི་རྟོག་པའི་སེམས་རྒྱུད་གཉིས་པ་འགྲོ་བ་གཅིག་ལ་མེད་དེ། སྐབས་ཀྱིས་མི་བརྗོད་པའོ། །དེ་ནི་དངོས་མེད་ཀུན་གྱི་གཞི། །ཞེས་པ་སེམས་ཅན་གྱི་སེམས་གཅིག་པ་དེ་ནི་དངོས་པོ་བརྟག་དཀའ་སྟེ། དགོས་འདོད་བསྐོང་བའི་ནོར་བུ་ལྟ་བུ་ལ། ཅིག་ལ་ཅིག་མ་གྲུབ་པ་དང་། ལྷུན་གྲུབ་ཀྱི་ངོ་བོ་ལ་ནི་ཕྱོགས་གཅིག་པའི་ལྷུན་གྲུབ་ཏུ་ཁས་བླངས་པའོ། །ལན་གསུམ་པ་ནི། ལོག་རྟོག་མུན་པའི་ཡུལ་སྣང་ཀུན། །ཞེས་པ་འགྲོ་བ་སོ་སོའི་མ་རིག་པའི་སྣང་བ་ཐ་དད་པ་བསྡུའོ། །སེམས་ཕྱིར་མཐའ་ལ་རྩོད་པ་མེད། ཅེས་པ་སྣང་བ་ཡོད་མེད་ཀུན་བདག་ཉིད་ཆེན་པོའི་གཏན་ཚིགས་ཀྱིས་དབྱེར་མེད་པ་ལ་ཡོད་མེད་སྒྲོ་སྐུར་ཏུ་རྩོད་པ་བྱིན་པའི་བློའོ། །དཔེ་ནི། གང་ལ་ཡོད་མེད་མེད་པ་ལྟར། །ཅེས་པ་དངོས་པོ་གང་ལ་ཕན་པ་འབའ་ཞིག་ཡོད་ཞེའམ། གནོད་པའི་མཐུ་འབའ་ཞིག་ཡོད་ཅེས་ཕྱིར་ནི་མི་བཏུབ་སྟེ། བརྟགས་ན་མི་དམིགས་པར། བསམ་ན་ཕན་གནོད་སོ་སོར་སྣང་ཡང་དབྱེར་མེད་པ་ལྟར། རྟོག་པའི་སྨྲ་བསམ་ཡུལ་ལས་འདས། །ཞེས་པ་འཁྲུལ་པའི་སྣང་བ་ཡོད་མེད་དབྱེར་མེད་པ་ནི་ཐུན་མོང་ཆེན་པོའི་སྨྲ་བསམ་ལས་འདས་པ་སྟེ། དོན་དམ་དངོས་པོའམ་གཞི་ལ་མེད། ཀུན་རྫོབ་བློའམ་བསམ་པ་ལ་ཡོད་ཅེས་སྨྲ་བ་དག་མི་མཁས་པའི་ཤེས་པས། འདི་སྐད་དུ། སེམས་འདི་ཡོད་དམ་མེད་དོ་ཞེས། །བྱིས་པ་རྣམས་ནི་རྩོད་པར་བྱེད། །ཅེས་པ་ལ་སོགས་པས་གསལ་ལོ། །ལན་བཞི་པ་ནི། དེ་ནི་དེ་ཕྱིར་རྒྱལ་འགྲོ་ཞེས། །རིས་སུ་བཅད་པ་མེད་པ་ལ། །སེམས་སྣང་སྟོང་དབྱེར་མེད་པའི་ལྷུན་གྲུབ་དེ་ནི། ཚིག་སྔ་མ་གཏན་ཚིགས་སུ་གྱུར་པས་ཡེ་སངས་རྒྱས་པས་རྒྱལ་བ་ཞེའམ། འགྲོ་བ་འཁོར་བ་ཡིན་ཞེས་གསུངས་པའི་ཚིག་གཉིས་ཀར། སེམས་འཁོར་བ་དང་མྱ་ངན་ལས་འདས་པ་དབྱེར་མེད་ལ་མི་བསམ་མི་བརྗོད་དོ། །གཙང་དང་མི་གཙང་དངོས་གཅིག་བཞིན། །ཞེས་པ་གཉིས་སུ་མེད་པའི་དཔེ་སྟེ། ལ་ལའི་གཙང་བ་ལ་ལའི་མི་གཙང་བར་སྣང་བས་གཙང་མི་གཙང་དངོས་པོ་གཅིག་སྟེ། གཞི་ལ་ངེས་པ་བཞིན་དེ་ཁོ་ན་ཇི་སྙེད་པའི་ཇི་བཞིན་པ་སེམས་ཀྱི་ཆོས་ཉིད་སངས་རྒྱས་སེམས་ཅན་དབྱེ་བ་མེད་པ་ལ། ཕྱོགས་སུ་བལྟས་ན་ནོར་པའི་བློ། །ཞེས་པ་གཞི་འཁྲུལ་འཁོར་མེད་པའོ། །རྣམ་དག་ཕྱོགས་གཅིག་ཏུ་བལྟས་ཏེ། གཞི་མེད་པ་ལ་བསམ་བློས་གློ་བུར་དུ་བལྟ་བ་དག་ནི། ཀུན་ནས་ཉོན་མོངས་པ་དག་དང་། ཐ་སྙད་ལ་སྐུར་པ་འདེབས་པའི་ལྟ་བ་སྟེ། གཉིས་མེད་ངང་ལ་གསལ་བ་འདུས་པར་བརྗོད་པ་ཉིད་ཀྱིས་མཁའི་ལྟ་བ་ཁས་བླངས་པའོ། །འདིར་གཉིས་སུ་ཡོད་མེད་ཉིད་ཀྱང་དབྱེར་མེད་པས་ཐུན་མོང་མ་ཡིན་པའི་གཉིས་སུ་མེད་པ་སྟེ། འདི་སྐད་དུ། གཉིས་མེད་གཉིས་སུ་མེད་མིན་ཞིང་། །ཞེས་པ་དགོས་བྱེད་གཉིས་ཀྱི་ཕྱིར་བརྗོད་པ་ཙམ་མོ། །ལན་ལྔ་པ་ནི། ཇི་སྙེད་འཇིག་རྟེན་འཁྲུལ་པའི་སེམས། །ཞེས་པ་ལོག་རྟོག་ཐ་དད་པའི་སེམས་བསམ་ཡས་པའོ། །མེ་ལོང་གཡའ་དང་མཁའ་སྤྲིན་བཞིན། །ཞེས་པ་མ་རིག་པ་དང་སེམས་ཡེ་ཤེས་གཉིས་སུ་མེད་པའི་དཔེའོ། །རིག་དང་མ་རིག་གཉིས་མེད་པས། །ཞེས་པ་ལྷན་ཅིག་སྐྱེས་པའི་མ་རིག་པ་མེད་པ་མིན་པའི་ཕྱིར། ཡེ་ཤེས་དང་མ་རིག་པ་དབྱེར་མེད་ཀྱང་། །ཕྱོགས་གཅིག་རྐྱེན་གྱིས་དུས་གསུམ་འཁྲུལ། །ཕྱོགས་གཅིག་ནས་ལྟོས་པས་འཁོར་བའི། །དེའི་རྒྱུ་མ་རིག་པས་རྐྱེན་ལས་དང་ཉོན་མོངས་པས་དུས་གསུམ་ཐོག་མཐའ་མེད་པར་རྒྱུན་ཆགས་སུ་འཁྲུལ་བ་ནི། ཐག་སྦྲུལ་ཐོ་མི་སབ་རྟས་མཚོན་ནས་གཞི་མེད་པ་ལས་འབྱུང་བར་སྨྲ་བ་ལྟ་བུ་མ་ཡིན་ཏེ། སྒྲོ་སྐུར་དང་བྲལ་བའི་ངང་ལས་འཁྲུལ་བའོ། །ལན་དྲུག་པ། འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་རང་བཞིན་མེད། །ཅེས་པ་ལ་བརྟན་གཡོ་བློ་བརྟགས་ཀྱི་རང་བཞིན་བསམ་པ་ལ་ཡོད་ལ་གཞི་ལ་མེད་པར་སྨྲ་བ་ནི་རང་བཞིན་ལ་སྐུར་བ་སྟེ། འདིར་འཁྲུལ་པ་སྣང་བདོ་བའི་དུས་ཉིད་ན་མཁའ་སྤྲིན་ལྟར་རྣམ་པ་མཆོག་དང་ལྡན་པའི་སྟོང་པ་ཆེན་པོ་ལ་རང་བཞིན་ཡོད་མེད་དབྱེར་མེད་ལ་དགོས་ཆེད་ཀྱིས་བརྗོད་པའོ། །རང་བྱུང་ཕྱི་ནང་མེད་སྣང་ཕྱིར། ཞེས་པ་བདག་ཉིད་ཆེན་པོའི་གཏན་ཚིགས་ཀྱིས་ཀྱང་ཆུ་ཉིད་རླབས་ལྟ་བུར་འགྲོ་འོང་མེད་པར་སྣང་བའོ། །དེ་དུས་རང་བཞིན་ཉམས་པ་མེད། །ཅེས་པ་འཁྲུལ་པ་དེ་སྣང་བའི་དུས་ན་རང་བཞིན་སྟོང་པས་ཇི་བཞིན་ཉིད་ལས་མ་ཉམས་རང་བཞིན་ཐུན་མོང་མ་ཡིན་པའི་འཁྲུལ་པ་སྟེ། འདི་སྐད་དུ། འཁོར་བ་ཉིད་ན་བདེ་གནས་སོ། །ཞེས་པ་དང་། རང་བཞིན་ཉིད་ལས་ཉམས་པ་མེད། །ཅེས་གསུངས་སོ། །ལན་བདུན་པ་ནི། འཇུག་པའི་རྣམ་ཤེས་དེ་ལྟ་བ། །ཤེས་རབ་ཐུན་མོང་སྤྱད་ཡིན་ན། །ཞེས་པ་ལྟ་བའི་ངོ་བོ་འོག་མ་བདག་ཡིད་ཀྱི་རྣམ་པར་ཤེས་པ་དེ་ཉིད་ལ་དམིགས་པའི་ཕྱིར། འདུ་བྱེད་ཀྱི་ཤེས་རབ་དང་མཚུངས་པར་ཐུན་མོང་གི་ལྟ་བ་ལམ་དུ་རིགས་པའི་ཤེས་པ་ལ་ལྟ་བ་ཞེས་བརྗོད་དོ། །འདིར་རང་བྱུང་ཡེ་ཤེས་ཚོགས་ཀུན་བདག །ཤེས་རབ་སྤྱན་གྱི་མཆོག་ཡིན་ནོ། །ཞེས་པ་ཚོགས་བརྒྱད་རིགས་རྒྱུད་གཟུགས་མཚན་གནས་ཀྱིས་ཐ་དད་མེད་པར་འོད་གསལ་བའོ། །རྐྱེན་དང་རྒྱུ་མེད་པར་མ་འགགས་པར་ཡེ་རང་གསལ་བར་རང་བྱུང་ཡེ་ཤེས་ཏེ། བལྟས་པ་མེད་པར་དེ་ཁོ་ན་ཉིད་དུ་གསལ་བ་ལྟ་བའི་ཕུལ་ལོ། །ལྟ་བའི་ངོ་བོ་དེས་ཇི་ལྟར་མཐོང་སྙམ་པ་ལ། རྡོ་རྗེ་ཡིད་ནི་དབང་མཆོག་ཕྱིར། །ཞེས་པ་ཡིད་ཡེ་ཤེས་རྡོ་རྗེ་ནི་ཤེས་རབ་ཀྱི་དབང་པོ་མཆོག་སྟེ་གཏན་ཚིགས་སོ། །ལྟ་བ་མེད་པ་རང་སྤྱིའི་ཆོས། །དབྱེར་མེད་ཕྱོགས་ལྟའི་འདོད་བྲལ་བ། །ཞེས་པ་ཡུལ་དུ་ལྟ་བ་མེད་དེ་རང་རིག་ཕྱི་ནང་མེད་ཕྱིར་རོ། །རང་དང་སྤྱིའི་མཚན་ཉིད་ཀྱི་ཆོས་སུ་སྣང་བ་ཡང་ཤེས་པ་དང་རྣམ་པ་ཙམ་དུ་དབྱེར་མེད་པས། ནང་ཕྱོགས་ནས་ཕྱི་རུ་བལྟས་པའམ། ཕྱི་ནས་ནང་དུ་བལྟ་བའི་འདོད་ཆགས་དང་བྲལ་བས་དེ་ཁོ་ན་ཉིད་ཡུལ་མེད་པར་རིག་པ་རང་གསལ་བའི་གདེངས་རྙེད་པས་ཐམས་ཅད་མཁྱེན་པ་ལ་ཞེས་པས། ཞེ་འདོད་དུ་མེད་པས། མ་ནོར་རང་གི་མཚན་ཉིད་རྟོགས། ཞེས་གསུངས་སོ། །དེ་ལ་གཡོ་ཐོབ་བརྟན་མཐར་ཕྱིན་པའི་ལམ་དུ་གྱུར་པའོ། །ལན་བརྒྱད་པ་ནི། གསུམ་གཉིས་གཅིག་གི་ཐེ་ཚོམ་སྤངས། །ཞེས་པ་དྲིས་ལན་བདུན་པའི་ཐེ་ཚོམ་དྲིས་པ་རྗེས་སུ་བསལ་བའི་ཕྱིར། དང་པོ་དངོས་དང་གསལ་བ་དང་། ཞེས་པ་ཚིག་ལྔས་ཏ་རྐ་གཉིས་ཀྱི་གེགས་བསལ་བ་ལ། སྔ་མ་སངས་རྒྱས་སེམས་ཅན་དག །སོ་སོ་སེམས་རྒྱུད་ཐ་དད་པ། །གཅིག་ན་བདུན་ལ་སྔ་རྟོག་སྐྱེ། །ཞེས་པ་སྤྱིར་སངས་རྒྱས་དང་སེམས་ཅན་རྣམས་ཕྱོགས་གཅིག་པ་ཡིན་ན་བཀའ་ལུང་ལ་མི་སྣང་བ་དང་། དོན་དང་འགལ་བ་དང་། གཏན་ཚིགས་ཀྱིས་མི་རྒྱས་པ་དང་། རིགས་པས་མི་འཐད་པ་དང་། ཆོས་རྟགས་བཞི་དང་འགལ་བ་བདུན་པོ་ཀུན་ལ་འབྱུང་མོད་ཀྱང་། སྐབས་གཉིས་ཀྱིས་གསང་སྔགས་ནི། སྤྱི་དང་མཐུན་པར་རིགས་པས་མི་འཐད་པའི་སྐྱོན་བརྗོད་དོ། །སངས་རྒྱས་ཀྱི་ཐུགས་དང་སེམས་ཅན་གྱི་སེམས་ཕྱོགས་གཅིག་པའི་ལྡོག་པ་དང་བཅས་པ་ཡིན་ཞེ་ན། རྒྱལ་བ་བཞིན་དུ་འགྲོ་བས་ཀྱང་། ཐམས་ཅད་མཁྱེན་པར་གྱུར་པ་དང་། རྟོག་པ་མེད་པར་འགྱུར་བ་དང་། ཉོན་མོངས་པའི་སྡུག་བསྔལ་མི་འབྱུང་བར་འགྱུར་བ་དང་། ལམ་གྱི་ཆོས་ལ་རག་ལས་མི་དགོས་པ་དང་། རྒྱལ་བ་ཡང་འགྲོ་བ་བཞིན་ཐམས་ཅད་མི་མཁྱེན་པ་དང་། རྟོག་པ་ཅན་དུ་འགྱུར་བ་དང་། ཉོན་མོངས་པ་སྡུག་བསྔལ་མྱོང་བ་དང་། སྐྱོན་བདུན་འབྱུང་ངོ་། །འགྲོ་བ་དྲུག་གི་སེམས་ཅན་ཐ་དད་གཅིག་ན་ཡང་། དེ་བཞིན་སེམས་རྒྱུད་བརྒྱད་ལ་ཟད། །ཅེས་པ་ཆོས་ཐ་མའི་སྐྱོན་འབྱུང་སྟེ། འགྲོ་བ་དྲུག་པོ་ཀུན་སེམས་རང་བྱུང་གི་ཡེ་ཤེས་སུ་གཅིག་ན་ཡང་། འགྲོ་བ་གཅིག་སངས་རྒྱས་ན་ཀུན་སངས་རྒྱས་པར་རིགས་པ་དང་། གཅིག་ལྟུང་ན་ཀུན་ལྟུང་བར་རིགས་པ་དང་། གཅིག་ཤེས་པ་ཆེ་ན་ཀུན་ཆེ། གཅིག་ཤེས་པ་ཆུང་ན་ཀུན་ཆུང་། གཅིག་འདུ་ཤེས་རྒྱ་ཆེ་ན་ཀུན་ཆེ། གཅིག་འདུ་ཤེས་ཆུང་ན་ཀུན་ཆུང་། གཅིག་རྣོ་ན་ཀུན་རྣོ། གཅིག་བརྟུལ་ན་ཀུན་བརྟུལ། གཅིག་དོག་ན་ཀུན་དོག་གཅིག་ཡངས་ན་ཀུན་ཡངས། གཅིག་ཚོར་བ་གསལ་ན་ཀུན་གསལ། གཅིག་མི་གསལ་ན་ཀུན་མི་གསལ། གཅིག་དྲན་པ་གསལ་ན་ཀུན་གསལ། གཅིག་མི་གསལ་ན་ཀུན་མི་གསལ། བརྒྱད་པོ་དེ་ལྟར་ཐེ་ཚོམ་ཟ་བ། ཐ་དད་ཞེ་ན་བདུན་གྱིས་འགལ། ཅེས་པ་སངས་རྒྱས་ཀྱི་ཐུགས་དང་འགྲོ་བའི་སེམས་ཐ་དད་ན་ཡང་། སངས་རྒྱས་སེམས་ཅན་གཉིས་རང་བཞིན་ཐ་དད་དུ་འགྱུར། ངོ་བོ་ཐ་དད་དུ་འགྱུར་བས་འབྲེལ་པ་མེད་པས་དོན་བྱར་མི་བཏུབ། འགྲོ་བ་ཚང་རྒྱར་མི་བཏུབ། ཉོན་མོངས་པ་སྤངས་ཤིང་སྒྲིབ་པ་བྱང་དུ་མི་བཏུབ་རྒྱལ་བས་བསྟན་པ་དགོས་པ་མེད། སོ་སོར་རྟག་པའི་མཐར་འགྱུར་བ་དང་བདུན་ནོ། །སེམས་ཅན་ཀུན་གྱི་རང་རང་གི་ཡེ་ཤེས་ཐ་དད་ན་ཡང་། རང་བྱུང་གི་ཡེ་ཤེས་སོ་སོ་ན་ཡོད་པའི་ཕྱིར། གཅིག་གིས་གཅིག་རིག་ན་གཞན་འབྱུང་དུ་འགྱུར་བ་དང་། ངེས་ཚིག་མེད། གཅིག་གི་གཅིག་མ་རིག་ན་ཡེ་ཤེས་སུ་མི་འགྱུར་རོ། །ཡུལ་མེད་པར་རིག་ན་དམ་བཅའ་ཉམས། ཤེས་པའི་རྣམ་པ་ཡེ་ཤེས་གཞན་དུ་སྣང་ངོ་ཞེ་ན། བདག་གཞན་གྱི་ཕྱོགས་ནས་རྣམ་པ་ཆ་གཉིས་ཡོད་པས་གཟུང་འཛིན་དུ་འགྱུར་རོ། །ཡེ་ཤེས་ལ་རིགས་བརྒྱུད་ལ་སོགས་པ་ཐ་དད་པ་བདུན་འོང་བས་དུ་མིའི་མཐར་འགྱུར་རོ། །དེ་བསལ་བ་ནི། དེ་བས་དགག་དང་སྒྲུབ་མེད་པས་གཅིག་དང་དུ་མར་བྲལ་བའོ། །ཞེས་པ་སངས་རྒྱས་དང་སེམས་ཅན་གཅིག་དང་དུ་མའི་མཐའ་མ་བཀག་ལ་བྲལ་བ་སྒྲུབ་ཏུ་མེད་པ་ནི་རིག་པ་རང་བྱུང་གི་ཡེ་ཤེས་ཉིད་གཅིག་དང་དུ་མ་དང་བྲལ་བ་ཀུན་ཡིན་པས། བྲལ་མ་བྲལ་དབྱེར་མེད་པ་ལ་ཤུགས་སྣང་ལ་དགག་བསྒྲུབ་ལྟར་སྣང་ཡང་། ཞེས་འདོད་ལ་ལྷག་པའི་དགག་བསྒྲུབ་མེད་པས་སྐྱོན་དེ་དག་མི་འབྱུང་ངོ་། །གསུམ་པ་འཁྲུལ་སྣང་གཞི་ལ་ཡོད་མེད་སྟོན་པའི་ཕྱིར། གསུམ་པའི་སྔ་མ་རྟོག་སྐྱོན་དགུ། །ཞེས་པ་འཁྲུལ་སྣང་གཞི་ལ་ཡོད་ན་གཞི་འཁོར་བ་རང་རྒྱུད་རྟག་པའི་སྐྱོན་གྱིས་སྒྲིབ་པ་མི་འབྱུང་། འཆིང་བུའི་དཔེས་འཚང་མི་རྒྱ། རྒྱལ་བ་དང་འགྲོ་བ་རིགས་རྒྱུད་ཐ་དད་འབྱུང་། བསྟན་པ་གསུངས་པ་ལ་དགོས་ཆེད་མེད། མྱ་ངན་འདས་པའི་སྣང་བ་འགག །འཁོར་བ་མཐར་འགྱུར། འབྲེལ་བ་མེད་པས་དོན་བྱར་མི་བཏུབ། གཞིའི་ཆོས་དྲི་མ་ཅན་དུ་འགྱུར་བའོ། །ཕྱི་མ་མེད་པའི་ཐེ་ཚོམ་དག །སྐྱོན་གྱི་དངོས་པོ་བཅུ་གཉིས་གཞིའོ། །ཞེས་པ་གཞི་ལ་འཁྲུལ་པ་མེད་པ་ཡིན་ནའང་། ལྷན་ཅིག་སྐྱེས་པའི་མ་རིག་པ་མེད་པའི་སྐྱོན་དང་། རང་བཞིན་ཆད་པའི་སྐྱོན་དང་། མྱ་ངན་ལས་འདས་པ་མཐར་འགྱུར། འཁྲུལ་སྣང་འགག །གཞི་མེད་པ་ལ་འཁོར་བ་སྣང་ན། འཁོར་བ་ལ་ཐོག་མ་འབྱུང་། རྒྱུད་དག་པ་ཡང་འཁོར། སྒྲིབ་པ་སྦྱང་མི་དགོས། བསྟན་པ་ལ་དགོས་ཆེད་མེད། ཡེ་ནས་གཞི་ལ་མེད་པ་ལས་སྣང་ན། མུ་སྟེགས་ཆད་པའི་སྣང་བར་འགྱུར། སྔ་ན་མེད་པའི་སྐྱོན་དང་། གཅིག་ལ་གཅིག་མེད་པའི་སྐྱོན་དང་། །ཡེ་ནས་མེད་པ་དང་བཅུ་གཉིས་འབྱུང་ངོ་། །གཞི་ནི་འཁྲུལ་སྣང་ཡོད་མེད་གཉིས་སུ་མེད་པའི་དོན་དང་འགལ། བཀའ་ལུང་ལས་མི་སྣང་བ། གཏན་ཚིགས་ཀྱིས་མ་རྒྱས་པ། དེ་ལྟར་རིགས་པས་མི་འཐད་པའོ། །ཞོར་ལ་ཤེས་པའི་ཁྱད་པར་བསྟན་པ་ནི། མི་མཁས་མཁས་པའི་བསམ་པ་ནི། ཞེས་པ། དབྱེ་ན། མི་མཁས་ཤིན་ཏུ་མི་མཁས་པ། ཞེས་པ། མི་མཁས་པའི་བསམ་པ་ལ་གཉིས་ཏེ ། གང་ཞེ་ན། ཤིན་ཏུ་མི་མཁས་མཐར་ལྟ་བའོ། །ཞེས་པ། མུ་སྟེགས་པ་དང་སྐྱེ་བོ་དག་གོ། །མི་མཁས་ཡོད་མེད་རྩོད་བྱེད་ཅིང་། །དགག་དང་སྒྲུབ་པ་གང་བྱེད་པ། །དེ་དང་དེ་ལ་ཆགས་སྡང་སྐྱེ། །ཞེས་པ། ལྟོས་པའི་མི་མཁས་པ་དག་ནི། ཚད་མ་ཚུལ་ཡོད་ལ་རྩོད། སེམས་ཙམ་པ་རྣམ་པ་ཡོད་མེད་ལ་རྩོད། དབུ་མ་སྣང་བ་ཡོད་མེད་ལ་རྩོད་པ་བྱེད་ཅིང་། རིགས་པ་མ་ཡིན་པའི་ཤེས་པའི་ཡུལ་ཆེད་དུ་འགེགས། རིགས་པའི་ཤེས་པའི་ཡུལ་སྒྲུབ་པར་བྱེད་པ་དེ་ནི། སྒྲུབ་པའི་དོན་ལ་བློ་ཆགས། དགག་བྱ་ལ་ཞེ་སྡང་བསྐྱེད་པས། བླང་དོར་མེད་པའི་དོན་མ་མཐོང་བའི་ཕྱིར་མི་མཁས་པའོ། །འོ་ན་མཁས་པ་གང་ཞེ་ན། མཁས་དང་ཤིན་ཏུ་མཁས་པ་ནི། ཞེས་པ་མཁས་པའི་བསམ་པ་དབྱེ་བ་ཉེ་བར་བསྟན་པའོ། །མཁས་པ་ཕལ་པ་དགག་བསྒྲུབ་ཅན། །སྒྲུབ་པའི་དོན་ལ་བརྟེན་པར་བྱེད། །ཅེས་པ་ཐེག་པ་ཆེན་པོ་དབུ་མ་དང་སེམས་ཙམ་པའོ། །དེ་ཡང་གསང་སྔགས་ལ་ལྟོས་ན་འཁྲུལ་པའི་ཕྱིར། བྱས་པའི་གཟུང་འཛིན་དབང་གྱུར་པའི། །མ་ནོར་ལམ་དང་བྲལ་བ་ཡིན། །ཞེས་པའོ། །ཆེད་དུ་དགག་སྒྲུབ་བྱེད་པའི་ངེས་པ་འཇོག་པའི་རྟོག་པ་སྐྱེས་པས། གསང་སྔགས་ཀྱི་ལྟ་བ་དང་བྲལ་བའོ། །གསང་སྔགས་ནི། ཤིན་ཏུ་མཁས་པ་ཐམས་ཅད་ལ། །སེམས་ཕྱིར་དགག་དང་སྒྲུབ་པ་མེད། །ཞེས་པ་གསང་སྔགས་པ་ནི་ཤིན་ཏུ་མཁས་པའི་བསམ་པ་སྟེ། བདག་ཉིད་ཆེན་པོའི་གཏན་ཚིགས་ཀྱིས་དགག་སྒྲུབ་ཆེད་དུ་མི་བྱེད་པ་ཡང་རྟོགས་བྱེད་ཀྱི་ཐབས་དམ་པ་སྟེ། ཞོར་ལ་དགག་སྒྲུབ་ཅན་གྱི་ལྟ་བ་འགེགས་པ་དང་། དགག་སྒྲུབ་མེད་པའི་དོན་སྒྲུབ་པ་ཡོད་མོད་ཀྱང་། དགག་སྒྲུབ་མེད་པའི་ཕྱོགས་གཅིག་པུར་ཁས་མི་ལེན་ཏེ། དོན་ནི། དེ་དང་རང་རིག་རང་སྣང་ཕྱིར། །དགག་སྒྲུབ་མེད་པའི་ཡིད་མི་རྟོན། །ཞེས་པ་དགག་སྒྲུབ་ཡོད་མེད་ཀྱི་ཆོས་ཐམས་ཅད་རང་རིག་པ་ཡིན་པས། དགག་སྒྲུབ་མེད་པའི་དོན་ཆེད་དུ་དམིགས་པ་ཡུལ་དུ་མི་བྱེད་དོ། །དགག་སྒྲུབ་གཏན་ལ་འབེབས་པའི་དུས་དང་། མཉམ་པ་ལ་བཞག་པའི་དུས་གཉིས་ཀ་ཆེད་དུ་བྱེད་པ་འཁྲུལ་པའི་ཕྱིར། དེ་ཕྱིར་སོ་སོ་དགག་སྒྲུབ་ཅན། །བསྒྲུབ་པའི་ཕྱོགས་ལ་ཞེན་པའི་ཕྱིར། །དེ་དེ་མེད་པ་ག་ལ་མཐོང་། །དེ་བས་རང་གི་བརྟགས་མཐོང་ཡིན། །ཞེས་གསུངས་སོ། །ལན་དགུ་པ་ཞར་ལ་བསྟན་པའི་ཕྱིར། དེ་དེ་སྐས་གདང་ཇི་ལྟ་བ། །ཁྱད་པར་གྲངས་དང་དོར་བ་མེད། །ཅེས་པ་རྒྱུའི་ཐེག་པ་དེ་དང་། འབྲས་བུ་དེ་སྐས་གདང་ལྟར་ཁྱད་ཡོད་པའི་གྲངས་མི་འདོད་པས། བདུན་པོའི་སྐྱོན་རྒྱུའི་ཐེག་པ་ལ་གྲངས་ཇི་ལྟར་བརྗོད་པ་ལྟར་འབྱུང་གི། འབྲས་བུའི་ཐེག་པ་ལ་སྐྱོན་མི་འབྱུང་བར་སྨོས་པའོ། །དགོས་ཆེད་ནི། ཆ་ཡོད་དུག་ལ་མི་བཏུང་བཞིན། །ལོག་ལྟ་གཉིས་སུ་ག་ལ་འགྱུར། །ཞེས་པ་དཔེ་དེ་བཞིན་དུ་རང་བཞིན་ལོག་པ་དང་། ལྟོས་པའི་ལོག་པ་ལྟར་གསང་སྔགས་མི་འགྲོ་བའོ། །གཉིས་པ་ཐེ་ཚོམ་བསལ་བའི་ཕྱིར། །གཉིས་པ་དེ་ལྟར་དེ་ཉིད་ལ། །ཞེས་པ་གྲངས་ཀྱི་གཉིས་པ་དེ་ལྟར་ལྷུན་གྲུབ་དྲིས་པ། གྲུབ་པའི་ཐ་སྙད་དེ་ལྟར་མཚོན། །ཞེས་པ་ལྷུན་གྱིས་གྲུབ་པ་ཕྱོགས་གཅིག་པའམ། ཕྱོགས་མེད་པ་གང་ཡིན་དྲིས་པའོ། །མ་གྲུབ་གྲུབ་ན་ངེས་ཚིག་མེད། །ཅེས་པ་ཕྱོགས་མེད་ན་གྲུབ་པའི་ངང་ལ་རྟ་ལ་གླང་མ་གྲུབ་པ་ལ་སོགས་པ་ཡང་གྲུབ་པས། གྲུབ་པ་གཅིག་པུའི་ངེས་ཚིག་མེད་པར་འགྱུར་རོ། །དེ་མ་གྲུབ་ན་དེ་བཞིན་ནོ། །ཞེས་པ་མ་གྲུབ་པར་གྲགས་པའི་ཆོས་ལྷུན་གྱིས་མ་གྲུབ་ནའང་། མ་གྲུབ་པའི་ཆོས་མ་རྫོགས་པས་ངེས་ཚིག་མེད་དོ། །གཞན་ཡང་མ་གྲུབ་པ་ཕྱོགས་གཅིག་པར་འགྱུར་བས་ཡོད་མཐར་ལྟ་བ་དང་། བདེན་པ་མཐོང་བ་ཡང་འཁོར་བ་དང་། ཞེན་པས་འཚང་རྒྱ་བ་དང་། དགེ་སྡིག་འབྲས་བུ་བསྣོལ་མར་འགྱུར་བ་ཡང་གྲུབ་དགོས་པའི་སྐྱོན་དུ་འགྱུར་རོ། །དེ་བསལ་བའི་ཐབས་ནི། དེ་བས་སྲིད་དང་མི་སྲིད་ཀུན། །ལྷུན་གྲུབ་ཕྱོགས་སུ་གྲུབ་པ་མེད། །ཅེས་པ་ལྷུན་གྲུབ་ཀྱི་གཏན་ཚིགས་ཀྱིས་དགེ་བས་མཐོ་རིས་སུ་སྲིད་པ་ལ་སོགས་པ་དང་། དགེ་བས་ངན་སོང་དུ་མི་སྲིད་པ་ཀུན་ཡོད་མེད་གྲུབ་མ་གྲུབ་དབྱེར་མེད་པ་ལ་དགོས་ཆེད་ཀྱིས་ལྷུན་གྲུབ་ཏུ་བརྗོད་ཀྱིས། དོན་གྲུབ་མ་གྲུབ་པོར་བརྗོད་པ་མེད་པས། ལྷག་པའི་ལྷུན་གྲུབ་ལ་སྐྱོན་དེ་དག་མི་འབྱུང་། བཞི་པའི་སྔ་མ་སྐྱོན་དྲུག་གཉིས། ཞེས་པ་ཡེ་སངས་རྒྱས་པ་ཕྱོགས་གཅིག་པ་ཅིག་རིན་ཆེན་གླིང་དང་། ཉི་མས་མཚོན་པ་སྒྲ་ཇི་བཞིན་དུ་བརྟགས་ན། མྱ་ངན་ལས་འདས་པ་མཐར་འགྱུར། སངས་རྒྱས་རིགས་རྒྱུད་ཅན་དུ་འགྱུར། སྒྲིབ་པ་སྦྱང་མི་དགོས། རྒྱལ་བས་དོན་བྱར་མེད། སྒྲུབ་པའི་གང་ཟག་མེད་པས་ལམ་མི་དགོས། བསྟན་པ་གསུངས་པ་ལ་དགོས་ཆེད་མེད། འཁོར་བའི་སྣང་བ་འགག །གལ་ཏེ་ན་བརྒྱུད་པ་ཡང་འཁོར། འཁོར་བ་ལ་ཐོག་མ་འབྱུང་། གཞི་ལ་འཁོར་བ་མེད་ལ་བློ་ལ་ཡོད་ན་བློ་དེ་གཞི་ཐ་དད་པའི་སྐྱོན་འོང་། ཐ་མི་དད་ན་བློ་ལ་ཡོད་པ་བཞིན་དུ་གཞི་ལ་ཡང་ཡོད་པར་འགྱུར། དེ་ཉིད་དང་གཞན་དུ་བརྗོད་དུ་མེད་པ་ཡིན་ཞེ་ན། དེ་ཉིད་མ་ཡིན་པས་གཞི་ལ་མེད་ཀྱང་། གཞན་དུ་བརྗོད་དུ་མེད་པའི་ཚུལ་གྱིས་གཞི་ལ་ཡོད་པར་འགྱུར། སྒྲུབ་ངག་གཉིས་པ་དེས་ཡེ་ནས་སངས་རྒྱས་པའི་ཕྱོགས་ཀྱང་མིན་ནོ། །དེ་བཞིན་ཕྱི་མ་རྗེས་སུ་མཐུན། །ཞེས་པ་གཞི་སངས་རྒྱས་མ་ཡིན་པར་འཁོར་བ་ཡིན་ཞེ་ན། སྐྱོན་གྲངས་ཕྱི་མའང་སྔ་མའི་རྗེས་མཐུན་ཏེ། གཞི་འཁོར་བའི་མཐར་འགྱུར། གཞི་དྲི་མ་ཅན་དུ་འགྱུར། འགྲོ་བ་རང་རྒྱུད་པར་འགྱུར། དོན་བྱེད་པ་པོ་མེད་པར་འགྱུར། མྱ་ངན་འདས་པ་འགག་གལ་ཏེ་མྱ་ངན་འདས་པ་ལ་ཐོག་མ་འབྱུང་འཁོར་བ་མཐའ་མ་འབྱུང་སྟེ། མཐའ་སྟོང་པར་འགྱུར། སྒྲིབ་པ་མི་འབྱོངས་པར་འགྱུར། འཁོར་བ་རྟག་པའི་སྐྱོན་དང་། འགྲེལ་པ་མེད་པས་དོན་བྱར་མེད་པ་དང་། བསྟན་པ་གསུངས་པ་ལ་དགོས་ཆེད་མེད། གཞི་ལ་འཁོར་བ་ཡོད་ན། ཞེན་བློ་དང་ཁྱད་མི་འབྱུང་བར་འགྱུར་བ་དང་བཅུ་གཉིས་སོ། །གཉིས་མེད་ཞེ་ན་དུས་གསུམ་ལ། །ཞེས་པ་ཡེ་སངས་རྒྱས་པ་ཡིན་མིན་གཉིས་ཀ་མ་ཡིན་ནའང་། ཕུང་པོ་གསུམ་པ་དང་། ལུང་དུ་མ་བསྟན་པ་དང་། འགལ་བ་འདུས་པ་འབྱུང་ངོ་ཞེ་ན། དེ་བསལ་ན་ནི་གཉིས་མེད་ངང་། ཞེས་པ་རང་རིག་པ་ནི་སངས་རྒྱས་དང་སེམས་ཅན་དབྱེར་མེད་ནའང་། འདི་སྐད་དུ། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་གསུངས་པའི་དོན་ལ། དཔེ་སྨན་ཉིད་ཕན་གནོད་བདག་གནས་ལྟར། ཅེས་པ་སྨན་ཅིག་ཀྱང་ཕན་གནོད་གཉིས་ཀའི་ངོ་བོར་གནས་པ་ལྟར། ངོ་བོ་ཐ་དད་འགྱུར་བ་མེད། །ཅེས་པ་སེམས་རྒྱལ་འགྲོ་གང་གི་ཕྱོགས་སུ་མ་གྱུར་པས། ཡིན་མིན་ལུང་དུ་མ་བསྟན་པའི་སྐྱོན་མི་འབྱུང་ངོ་། །ལམ་པ་འཁྲུལ་གཞི་ཡོད་མེད་པའི། ཞེས་པ་ཆོས་ཉིད་ངང་ལ་འཁོར་གཞི་ཡོད་མེད་གཉིས། གཉིས་མེད་དང་གསུམ་ལ་གསུམ་པ་མཚོན་པ་སྒོ་སོ་སོར་བསྟན་ཀྱང་། དོན་ལ་གཅིག་པར་མ་ཤེས་པ་དག་ཡོད་པ་རང་རྒྱུད་པ་དང་། མེད་པ་རྣམ་དག་ཕྱོགས་གཅིག་པ་དང་། ཕྱོགས་ཀྱི་གཉིས་མེད་ལ་འཁྲུལ་པར་སྨྲ་ན། སྐྱོན་ནི་གསུམ་པ་ཇི་ལྟར་གྲངས། །ཞེས་པ་འཁྲུལ་སྣང་ཡོད་མེད་སྐབས་སུ་བཤད་པ་དང་མཐུན་པར་བགྲང་ངོ་། །དེ་བསལ་བ་ནི། མིག་ཡོར་གསུམ་ལ་དངོས་མེད་འདྲའི། །ཆོས་ཡོད་བཞིན་པས། ཤེས་པ་འཁྲུལ་ཏུ་བཏུབ་པའི་དཔེ་ནི། ཐོ་ཡོར་དང་སབ་མོ་དང་ཐག་པ་ལ་ཡང་དག་པའི་རྟ་སྦྲུལ་གྱི་ཤ་ཁྲག་མེད་ཀྱང་མི་རྟ་སྦྲུལ་དང་འདྲ་བའི་ཆོས་ཡོད་པས་འཁྲུལ་ཏུ་བཏུབ་པའི་རྐྱེན་བཞིན་བཏུབ་པ་བཞིན། རང་སེམས་ལ། དེ་དངོས་མེད་ཀྱང་རྒྱུ་རྐྱེན་དྲུག །རང་བཞིན་ལྷུན་གྲུབ་དཔག་བསམས་བཞིན། །སོ་སོར་སྣང་བ། ཞེས་པ་སེམས་ལ་འཁོར་བ་རང་རྒྱུད་མེད་ཀྱང་མེ་ལོང་གི་གཡའ་བཞིན་འཁོར་བའི་རྒྱུ་གཉིས་རྐྱེན་བཞི་གནས་པས་སྣང་དུ་བཏུབ་ལ། དཔག་བསམ་ཤིང་ལ་བསོད་ནམས་ཆེ་ཆུང་གིས་སོ་སོར་སྣང་བ་ལྟར། དག་དང་མ་དག་པའི་སྤྱོད་ཡུལ་དུ་སྣང་ངོ་། །གཞི་མ་རིག་པ་ཡང་དག་པར་རང་སྣང་བ་དང་། ལྷན་ཅིག་སྐྱེས་པའི་མ་རིག་མཚུངས་པར་ཡོད་པ་དང་། ཡོད་མེད་དབྱེར་མེད་པས་འཁྲུལ་གཞི་མེད་དོ་ཡོད་དོ་གཉིས་སུ་མེད་དོ། །ཞེས་པར་བསྟན་པ་དོན་གཅིག་གོ། །དུས་གསུམ་དུ། རྒྱུན་དུ་འཁྲུལ་པ་ལྷུན་གྲུབ་པས། །ཞེས་པ་དུས་དང་འཁྲུལ་གཞིའོ། །འགྲོ་འོང་འབྱུང་འཇུག་མེད་སྣང་བ། །གཞི་ཡོད་མེད་དང་དབྱེར་མེད་མཚུངས། །ཞེས་པ་ཆུ་རླབས་ཀྱི་ཚུལ་དུ་འགྲོ་འོང་མེད་པར་འཁོར་བར་སྣང་བའི་གཞི་ཡོད་མེད་དབྱེར་མེད་དུ་གཅིག་པ་ལ་སྐྱོན་མེད་དོ། །དྲུག་པ་དེ་ལྟར་དེ་བདེན་ན། །དེ་ལ་སྐྱོན་དུ་བྱ་བ་བདུན། །ཞེས་པ་གོང་དུ་འཁྲུལ་ཚུལ་བསྟན་པ་ལྟར་བདེན་ཏེ། ཡོད་མེད་ཕྱོགས་ཅན་ལས་འཁྲུལ་ཏུ་བཏུབ་ན། ཐོ་ཡོར་ལ་རྟ་རུ་འཁྲུལ། སབ་མོ་ལ་མིར་འཁྲུལ། ཐ་ག་བ་ལ་རྟར་འཁྲུལ་བར་རིགས། མི་སྲིད་པའི་ཆོས་བཞི་འབྱུང་བར་རིགས་ཏེ། དཔེ་སྐྱོན་བདུན་ནོ། །དེ་བས་འཁྲུལ་པའི་རང་བཞིན་འཁྲུལ་པ་ཉིད་དུ་བརྟག་ནའང་། འཁོར་བ་གཞི་ལ་གྲུབ་ནས། འཁྲུལ་པའི་རྒྱུ་རྐྱེན་གཉིས་ལ་རག་མི་ལུས་པའི་སྐྱོན་གཉིས། འཁྲུལ་པ་མི་སངས་པའི་སྐྱོན། གང་ཟག་དགོས་བཙན་དུ་འཁོར་བ་ལ་མཐའ་མི་འོང་། བདེན་པ་མཐོང་དུ་མི་གཏུབ། ཆོས་ཉིད་དུ་མ་འདུས་ཤིང་མ་ཁྱབ་པའི་སྐྱོན་འབྱུང་ངོ་། །དེ་གསལ་བའི་ཐབས། ཐམས་ཅད་འཆིང་གྲོལ་དབྱེར་མེད་ལ། །ཞེས་པ་གཞི་ལ་འཁྲུལ་མ་འཁྲུལ་ཡོད་མེད་ཀྱི་སྒྲོ་སྐུར་མེད་པའོ། །གཉིས་མཐོང་འཁྲུལ་བར་བལྟ་བའོ། །འཁྲུལ། ཞེས་པ་རང་བཞིན་མ་ཉམས་པར་བལྟ་བའོ་འཁྲུལ་པའོ། །དེ་བས་བླང་དང་དོར་མ་བྱེད། །བདེ་སྡུག་གནས་སུ་རིམ་མ་བལྟ། །ཞེས་པ་དོན་གཉིས་མེད་ལ་ལྟ་སྤྱོད་ཀྱི་གདམས་ངག་དག་གོ། །བདུན་པ་རང་རིག་སྤྱད་ཡིན་ན། །དེ་ལ་སྐྱོན་བཅུ་འབྱུང་བར་འགྱུར། །ཞེས་པས་རང་བྱུང་ཡེ་ཤེས་ལྟ་བའི་ངོ་བོ་ཡིན་ན། རང་བྱུང་ཡེ་ཤེས་གཅིག་པས་གཅིག་གིས་རྟོགས་ན་ཀུན་གྱིས་སྐྱོན་འབྱུང་། སྐྱེད་མི་འབྱུང་། རྒྱལ་བ་དང་འགྲོ་བ་ཁྱད་པར་མེད་པར་འགྱུར། ལམ་ཆད། ད་ལྟ་ཉིད་ནས་ཐམས་ཅད་མཁྱེན་པར་ཐལ། གཞིར་ཐལ། སྒོམ་མི་དགོས། ཚིག་དང་ཡི་གེ་ལ་དགོས་པ་མེད། གཏན་ལ་དབབ་མི་དགོས། མངོན་ཤེས་མ་བསྒོམས་པར་འཆར་བར་འགྱུར་བ་དང་བཅུའོ། །དེ་བསལ་བ། དེ་བཞིན་ཉིད་ཀྱི་ཡེ་ཤེས་འདི། །མི་ལྔ་བདག་པོ་ཀུན་གྱི་སེམས། །ཞེས་པ་དེ་བཞིན་ཉིད་དང་། ཆོས་ཀྱི་དབྱིངས་དང་། མི་གནས་པ་དང་། རང་བྱུང་དང་། ལྷུན་གྱིས་རྫོགས་པའི་ཡེ་ཤེས་དང་ལྔའོ། །ངོ་བོ་འགྲོ་བ་ཀུན་གྱི་སེམས་སོ། །རང་སྤྱི་ཇི་སྙེད་ཇི་ལྟ་བ། །རང་ཡུལ་མེད་པར་ངེས་གསལ་བ། །ཞེས་པ་ལྟ་བའི་དོན་ནོ། །དཔེ་ནི། ནམ་མཁའི་སྤྲིན་མཐོངས་འོད་བཞིན་དུ། ཞེས་པ་སྤྲིན་གང་དག་པ་ན་ཉི་མའི་འོད་དང་ནམ་མཁའ་གསལ་བ་ལྟར། རབ་རིབ་གང་དག་ཤེས་རབ་སྣང་། །ཞེས་པ་ལོག་རྟོག་ཐ་དད་པའི་བསམ་རྒྱུད་གང་དག་པ་ལས་རིམ་པར་རང་བྱུང་ཡེ་ཤེས་སྣང་བས། སྟོབས་རྫོགས་མ་རྫོགས་ཀྱི་སྐྱོན་མེད་དོ། །བརྒྱད་པ་ངེས་མཐོང་སྒྲིབ་པའི་གྲངས། །བརྒྱད་པ་བསྙད་པ་ཡན་ལག་བཅས། །ཤེས་པ་དོན་མཐོང་ལ་སྒྲིབ་པའི་ཐེ་ཚོམ་སྟེ། དེའི་རྩ་བ་བདུན་ལ་སྐྱོན་གྱི་གྲངས་བརྗོད་ཟིན་པ་དེ་བསྡུ་ན། ཕྱག་རྒྱ་བཞིའི་གཞིར་གྱུར་པ། ངེས་པར་ངོས་ཟིན་བྱ་བར་བསྙད། །ཅེས་པ་འདི་སྐད་དུ། བཀའ་དོན། གཏན་ཚིགས། རིགས་པ་བཞི། སྣང་དང་། མེ་འགལ། རྒྱས་འཐད་སྦྱར་ཞེས་པས་དོན་ངོས་གཟུང་ངོ་། །ལ་ཟླ་བ་ནི། མ་རིག་པ་ཉིད་ཡེ་ཤེས་གསལ། །ཐེ་ཚོམ་ཉིད་ཀྱང་ངེས་པའི་སྤྱན། །ལོག་རྟོག་ཉིད་ཀྱང་མ་ནོར་བར། །དེ་ལ་མི་མཐུན་ཤེས་དང་བྲལ། །ཞེས་པ་གསུམ་པོ་རིག་པ་རང་སྣང་ཕྱིར། དེ་དག་གཉིས་སུ་མེད་པར་བསྟན་པ་ལ་འགལ་བ་འདུས་པར་རྟག་ཏུ་མེད་པའོ། །དགུ་པ་འདས་དང་འཇིག་རྟེན་པའི། །ཐེག་པའི་ལྟ་བ་གྲལ་བགོད་པའོ། །སྐས་གདང་ལྟ་བུར་བསྟན་པ་དག །ཀུན་ཀྱང་བདག་དང་བྲལ་བའི་ཕྱིར། །འཇིག་རྟེན་ཤེས་འཕགས་ཅིས་སྨོས་ཏེ། །ཞེས་པ་ཉན་ཐོས་ཡན་ཆད་ཀུན་འཇིག་རྟེན་པའི་བདག་ཉིད་མེད་པར་འཕགས་མོད་ཀྱང་། དེ་དག་ཉིད་ནི་དགག་དང་སྒྲུབ། །ཅེས་པ་ཐེག་པ་ཆེ་ཆུང་ནང་པ་གོལ་བ་མན་ཆོད་ལ་ཡོད་པས་ཁྱད་པར་ནི། རིམ་པར་ཡོད་མེད་ཁྱད་པར་དང་། ལྟོས་པས་ཕྱེ་བའི་ཁྱད་པར་ནི། །ཞེས་པ་འཇིག་རྟེན་ལས་འདས་པའི་ཐེག་པ་རྣམས་ལྟ་བ་གཏན་ལ་འབེབས་པའི་ཚེ། འདི་སྐད་དུ། བདག་སྤོང་བདག་མེད་སྒྲུབ་པ་དང་། །གཟུགས་སྤོང་ཕྱི་སྟོང་སྒྲུབ་པ་དང་། །དོན་འགོག་སེམས་ཙམ་སྒྲུབ་པ་དང་། །མཐའ་སྤོང་མཐའ་བྲལ་སྒྲུབ་པ་དང་། །དྲི་སྤོང་དག་པ་སྒྲུབ་པ་དང་། །མཚན་འགོག་མཚན་མེད་སྒྲུབ་པ་དང་། །བླང་དོར་འགོག་མེད་སྒྲུབ་པ་དང་། །རྩོལ་སྤོང་རྩོལ་བྲལ་སྒྲུབ་པ་དང་། །དེ་དག་ཀུན་ཀྱང་ཡོད་མེད་ཕྱིར། །དགག་སྒྲུབ་ངང་གིས་མི་བྱེད་པའོ། །རིམ་པར་ཕྱེ་བའི་ཁྱད་པར་སྟོན། །མཐོང་བ་དག་དང་མ་དག་པའི། །རིམ་པས་དོན་གཅིག་ཁྱད་པར་སྣང་། །ཞེས་པ་ལྟ་བ་མ་དག་པའི་བྱིས་པ་གཉིས་སོ། །ལྟོས་པའི་མ་དག་པའི་རྗེས་སུ་རྣལ་འབྱོར་མན་ཆད་དོ། །འོ་ན་དག་པ་ཆེན་པོ་གང་ཞེ་ན། མཐོང་བ་དག་པ་ཀུན་མཐོང་བ་འདི། ཞེས་པ་ཐམས་ཅད་མཁྱེན་པའི་ལྟ་བའོ། །དེ་ཡང་འདི་སྐད་དུ། སྣ་ཚོགས་ཐེག་པའི་ལྟ་བ་དང་། །ཇི་སྙེད་སྡོམ་པའི་བྱ་བ་རྣམས། །སྤྱད་པར་བྱ་བ་མ་ཡིན་ཡང་། །མ་འདྲེས་ཡོངས་སུ་རྫོགས་པར་གསལ། །ཞེས་འབྱུང་བས་ངོ་བོ་རང་བྱུང་ཐམས་ཅད་མཁྱེན་པ་དང་། རང་བཞིན་ལྟ་བ་ཐམས་ཅད་དང་། མཚན་ཉིད་ལྟ་བ་གང་དང་ཡང་མ་འདྲེས་པ་དང་། རྩལ་ལྟ་བའི་སྒྲིབ་པ་ཀུན་བཅོམ་པ་དང་། བྱིན་རླབས་ལྟ་བ་ཀུན་འབྱུང་བ་དང་། ཡོན་ཏན་ལྷག་པའི་ལྷ་དང་། སངས་རྒྱས་ཐོབ་པས་གོ་འཕང་བླ་ན་མེད་པའོ། །བསྔོ་བ་ཚོགས་ཀྱི་ལུང་ནི། ཀུན་ཤེས་བཞིན་འདྲ་རབ་རིབ་དྲི་མ་ཉིད། ཞེས་པ་འགྲོ་བ་ཀུན་གྱི་ཤེས་རབ་ཀྱིས་རང་གི་བཞིན་རང་གིས་མ་མཐོང་བ་ལྟར། མ་རིག་པས་བསྒྲིབས་པ་ནི། བསྟན་པའི་མེ་ལོང་མཐོང་གོམས་རང་དག་པར། །འགྱུར་བས་མ་འོང་དེ་ཅན་ཆེད་བགྱིས་པའི། །དགེ་རྩས་བདག་དང་མཐའ་ཡས་གྲོལ་བར་བསྔོ། །ཞེས་པ་བཞིན་ལ་མེ་ལོང་བསྟན་པས། དྲི་མ་མཐོང་ནས་དག་པར་བྱས་པ་བཞིན། །འཕྲུལ་གྱི་ཚིག་དགུས་བསྟན་པའི་ཚིག་གི་སྒྲོན་མས། ལྟ་བ་རྟོགས་པ་ལ་བསྒོམ་པས་སྒྲིབ་པ་འདག་པར་འགྱུར་བས། མ་འོངས་པ་བདག་བས་བློ་དམན་པའི་དོན་དུ། འཕྲུལ་གྱི་མེ་ལོང་བརྩམས་པ་དག་གིས་སྦྱིན་པའི་དགེ་རྩས། མཐའ་ཡས་པ་ཐེག་པ་ཆེན་པོའི་ཆེན་པོར་གྲོལ་བར་དམིགས་པའོ། །འཕྲུལ་གྱི་མེ་ལོང་དགུ་སྐོར་ལ། རིགས་པའི་མེ་ཏོག་གིས་འགྲོལ་བའོ། །གཉགས་ཛྙཱ་ན་ཀུ་མཱ་རས་མཛད་པ་རྫོགས་སོ།། །།ལུང་རྒྱུན་མེད་ཀྱང་སེའི་དཀར་ཆག་གིས་ཟིན། བོད་རྩོམ་ཡིན་ཀྱང་རྒྱ་འགྱུར་དང་འདྲ་བས་ཤུས་ཀྱང་ཡོང་། ཞུས་དག་ཀྱང་སོང་། འདྲི་བ་ཤར་ན་རྩ་འགྲེལ་ལེ་ཚན་སོ་སོར་བྱས་པ་དགའ། ལོ་ཆེན་གསུང་།
ཐུགས་ཀྱི་སྒྲོན་མ། གཉན་དཔལ་དབྱངས།
ཐུགས་ཀྱི་སྒྲོན་མ་བཞུགས་སོ། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཆོས་ཀུན་རྫོགས་པའི་ཐུགས་རྡོ་རྗེ། །སེམས་དཔའ་ཆེ་ལ་ཕྱག་འཚལ་ལོ། །སྤྱན་མཆོག་དབུལ་བའི་སློབ་བུའི་ཕྱིར། །སྒྱུ་འཕྲུལ་དྲྭ་བའི་རྒྱུད་དག་ལས། །འཁོར་ལོ་དག་མཆུའི་ཚུལ་བཞིན་ཏུ། །སྒྱུ་འཕྲུལ་ཐུགས་ཀྱི་སྒྲོན་མ་དེ། །འཛིན་པའི་དབང་གིས་སྡུག་བསྔལ་བས། །གཡོ་འཛིན་གསུམ་དང་མི་གཡོ་བའི། །འཛིན་དགུ་ལོག་ལྟ་དེ་བཞིན་པའི། །རྣམ་གཉིས་སྤང་ཕྱིར་གཉེན་པོར་བརྗོད། །བསམ་མི་ཁྱབ་དང་དེ་བསྡུས་པ། །བརྒྱད་ཁྲི་བཞི་སྟོང་དེ་ལྟ་བས། །གཉིས་བསྡུས་ངེས་བཞིན་འབྲས་བུར་གཅིག །ཐུན་མོང་མཆོག་གི་ལམ་ལྔ་པོ། །འདོད་པའི་ཡུལ་ལ་ཞེན་པ་དང་། །བསམ་གཏན་སྙམས་འཇུག་འདུ་ཤེས་མེད། །རྟག་ཆད་བཅུ་གསུམ་ཞེན་པ་རྣམས། །རིང་དུ་གཏོང་ལ་མི་མཐུན་པའི། །སྤྱོད་པ་ཉི་ཤུ་གཅིག་ལའང་། །དང་པོ་ཕྱེད་སྤོང་གཅིག་བཏང་སྙོམས། །བྱེད་པའི་ཞེན་པས་གཞི་བྱེད་དང་། །ཕྲ་ཟབ་དངོས་ལྷའི་ཞེན་པ་དང་། །ཕྱོགས་སྟོང་དེ་ནི་ཕྱོགས་འཛིན་པའི། །རྒྱུད་འཛིན་ཞེན་པ་བདེན་པ་གཉིས། །རིགས་འབྱེད་ཞེན་པའི་སྟོང་པ་ཅན། །འཇིག་རྟེན་ངན་སོང་ཁམས་སུ་རྩེ། །ཞི་བ་ཕྱོགས་ལ་ངེས་འབྱུང་དང་། །རྒྱུ་འབྲས་ས་ལ་ངེས་འབྱུང་བའང་། །ཕྱི་པ་དག་ལྷ་གཉིས་རྗེས་འབྲང་། །མཚན་མེད་འོད་གསལ་ངེས་ཞེན་པའི། །སྤོང་ལེན་ངོས་འཛིན་བདག་འཛིན་བཞི། །ཐེག་མཆོག་ལམ་གྱི་སྟེགས་གྱུར་ཀྱང་། །རང་རང་ངེས་པས་བསྒྲིབས་པ་ཡི། །མཆོག་གི་གཞུང་ལུགས་གདེངས་མ་གྱུར། །དེ་བས་རྣལ་འབྱོར་ཆེན་པོའི་ལུགས། །བཅུ་གཉིས་གཅིག་གི་ཞེན་པ་དག །མི་སྤོང་གཉིས་མེད་བླང་དོར་མེད། །ཐབས་ཀྱི་རང་བཞིན་བྲལ་མངོན་བྱེད། །དེ་བཞིན་ས་ཡི་ལུགས་མཆོག་འདི། །རྒྱུད་དང་རྣལ་འབྱོར་གསུམ་རིམ་པ། །དེ་ལས་ཀུན་ནས་སྤགས་པའི་དོན། །ཡང་རབ་རྣལ་འབྱོར་བློ་ལ་གསལ། །དེ་གང་ཞེ་ན་གདོད་བསམ་པས། །དུག་ལྔ་དངོས་དང་ཡུལ་ཤེས་བཅས། །སེམས་ཕྱིར་ཆོ་འཕྲུལ་སྣང་བ་ལས། །གསུམ་སྣང་ཞེན་པའི་ཡུལ་མེད་པར། །རྒྱུད་དྲུག་ཤེས་པ་རྐྱེན་བཅས་ཀྱིས། །ཡུལ་མེད་མི་དམིགས་ཕྱིར་མི་མཐོང་། །མཐོང་ཤེས་དབང་བཅས་རང་མ་མཐོང་། །དེ་བཞིན་ས་ཡིས་ལྔ་ཉོན་མོངས། །རྗེས་འབྲང་སྟོབས་གྱུར་འགྲོ་ལྔར་སྨིན། །མི་མཐུན་བདེ་སྡུག་མྱོང་གྱུར་བཞིན། །ལམ་བྲལ་དུས་དགྲས་བཅོམ་པ་དང་། །ཐར་མེད་ཡང་དག་ལམ་སྟོན་དགོས། །དེ་ཕྱིར་མི་གཙང་རུས་སྤྱོད་དང་། །སབ་དྷ་ཐག་སྦྲུལ་མཐོ་མི་ལྟར། །མི་བདེན་ཤེས་སྣང་ཕྱིར་རྫུན་པའང་། །མི་སྤོང་མོད་ཀྱང་བདེན་པ་མིན། །རང་བྱུང་ཡེ་ཤེས་མཐའ་དབུས་མེད། །མི་གཡོ་རང་གསལ་འཛིན་བྲལ་ལ། །ཚད་མེད་བཞི་དང་བསམ་གཏན་བཞི། །རིམ་པས་སོ་སོས་བདག་འཛིན་ཅིང་། །གཟུགས་རྣམས་ཀུན་ལ་བདག་རྟོག་པས། །གསང་བའི་བདེན་གསུམ་མཉམ་མི་མཐོང་། །ཐམས་ཅད་མཁྱེན་ལྡན་འབྲལ་བ་ཡིས། །འདུ་ཤེས་མེད་ལྟ་ཤོ་སར་པ། །མཉམ་པ་གསུམ་ལ་ལྡོངས་པ་ཡིས། །མི་གཡོ་སྙོམས་འཇུག་གཞི་འཛིན་ཅན། །ཐལ་འབྱུང་ཏིང་འཛིན་ལུས་ཞིག་ན། །ཡ་ངའི་འབྲས་བུར་ལྟུང་ཡོད་ཕྱིར། །དྲན་པ་ཉམས་པའི་ཏིང་འཛིན་ཏེ། །ཡིད་རྟེན་བྱ་བའི་ཡུལ་མ་ཡིན། །རང་བཞིན་འདས་དང་འཁོར་བ་དག །གཉིས་མེད་ལྷུན་གྲུབ་བརྗོད་བསམ་ཡུལ། །འདས་དང་སྔོན་བཞིན་མ་མཐོང་བས། །འཁྲུལ་ཡུལ་གཞིར་ལྟ་ར་བློ་འཁྲུལ། །གཡང་བ་མཐོ་དམན་ལམ་ཞུགས་པས། །ཟད་པར་བདེ་སྡུག་མྱོང་བར་འགྱུར། །འདོད་པའི་འབྲས་བུ་ག་ལ་ཡིན། །དེ་ཕྱིར་གསུམ་ལ་ཁྱད་པར་མེད། །དྲུག་གཉིས་སྟོན་པའི་རྗེས་འབྲངས་པའི། །རིགས་མིན་ནང་ལྟ་བསམ་ཡས་པ། །གཉིས་བསྡུས་རྟག་དང་ཆད་པ་དངོས། །ལོག་ལྟའི་གཙོ་བོ་ཡ་ངའི་རྒྱུ། །ལྔ་པ་རིལ་པོ་འབྱེད་ལྟ་བའང་། །སྔ་མ་དྲན་པའི་བྱེད་ལྟ་བའི། །རིགས་བཞི་ངེས་འདོད་རང་བློ་ལོག །དེ་ལ་ཁ་དོག་དབྱིབས་ཡོད་ན། །གཟུགས་སུ་ཐལ་བས་མང་ཉུང་གིས། །འགལ་དང་དྲན་པ་སྐྱེ་མི་འགྱུར། །རྣམ་སྨིན་མྱོང་བ་ག་ལ་རུང་། །འོན་ཏེ་གཟུགས་ཀྱིས་ཤེས་མྱོང་ཐལ། །དེ་ལ་རིལ་སོ་རྫུན་པར་ངེས། །བྱེད་པོས་བྱས་པའང་དེ་བཞིན་ཏེ། །དེ་ཁོ་གལ་ཏེ་བདེན་ཞེ་ན། །བྱེད་པོར་གྲུབ་པ་སུ་ཡིས་བྱས། །བྱེད་པོ་རྡུལ་ལས་འགྲུབ་འགྱུར་རམ། །འོན་ཏེ་ལས་ཀྱི་བྱད་འབྱུང་ཞེའམ། །བྱེད་པོ་ཉིད་ལ་བྱེད་ཡོད་དམ། །རང་བཞིན་ཉིད་ཀྱིས་འབྱུང་བར་འགྱུར། །བྱེད་པོ་སྟེས་དབང་ཙམ་དུ་ཟད། །བྱེད་ལ་བྱེད་ཡོད་ཐུགས་མེད་སྐྱེན། །རྡུལ་ན་བྱས་འདྲ་རག་ལུས་མེད། །ལས་ཡིན་ཁོ་བོའི་འདོད་པ་མོད། །རང་བཞིན་སྟེས་དབང་བྱས་པའང་ཐལ། །ཚ་རིམས་ཨ་འབྲས་ཆོད་པའི་མིག །འབག་སོགས་སྣང་ལྟར་ག་ལ་བདེན། །གཅིག་ཤོས་ཉ་ཤིང་བཙོས་བསྲེགས་པས། །མི་སྐྱེ་བརླག་འགྱུར་རིགས་པ་ཡིན། །སྔ་ཕྱི་མེད་པར་བདེན་ལྟ་བ་དང་། །མི་བདེན་ད་ལྟ་ཤ་འབྲུག་ལྟར། །སྟེས་དབང་སྣང་དུ་བཏུབ་ཅེ་ན། །སྔ་ཕྱིའང་སྟེས་དབང་ཅིས་མི་འགྱུར། །དེ་མི་འབྱུང་ན་ད་ལྟ་ཡང་། །མི་འབྱུང་དེ་མིན་སྨོས་ཅི་དགོས། །ད་ལྟར་དེ་ན་བདག་དང་གཞན། སྟེས་དབང་སྣང་བ་དུས་གསུམ་དུ། །རྒྱུན་བརྟགས་མེད་པ་ཅིས་ངེས་འགྱུར། །གཟུགས་ལ་རུང་ཡང་མིང་བཞི་པོ། །དེ་ལྟར་བདེན་ན་རྨི་ལམ་གྱི། །ཤེས་པའང་ཉ་ཤིང་མཚུངས་བརླག་འགྱུར། །རྨི་ལམ་བརྟགས་ལྡང་རྒྱུན་རྟག་ན། །གཟུགས་ཕུང་ཞིག་ཀྱང་དེ་འདྲ་མོད། །འོན་ཏེ་ད་ལྟ་ཡོད་པ་བཞིན། །སྔ་ཕྱི་ཡོད་པ་སྨོས་ཅི་དགོས། །རྟག་ཆད་གཉིས་ཀར་བློ་ཞེན་ན། །དོན་གྱི་སྙིང་པོ་མཆོག་ལས་གོལ། །རང་རིག་སྣང་སྟོང་ཡུལ་མིན་པར། །རིག་པ་རང་གསལ་བསམ་བརྗོད་འདས། །དེ་ཕྱིར་གཉིས་དང་དེར་མི་འཛིན། །དེ་ལ་བླང་དོར་ཕྱོགས་འཛིན་མེད། །དེ་དག་སོ་སོ་ཞེན་ཡུལ་བཅས། །བློས་བཞག་མེད་མ་ཡོད་བརྟགས་པ། །སྤོང་བྱེད་ཆེད་དུ་བྱས་སྤོང་པའང་། །ལྔ་ཡི་བྱེ་བྲག་མི་མཐུན་པ། །མོས་པ་ཐ་དད་ཕྱི་གསུངས་པ། །བྱེ་བྲག་མདོ་ཙམ་བཤད་པར་བྱ། །ཐེག་པ་དང་པོ་བཅུ་དྲུག་མགོན། །གཉིས་པ་གཞི་ཡི་ལྟ་སྤྱོད་བསྲུང་། །གསུམ་པ་བཅུ་གཉིས་ངེས་པར་བསྟན། །བཞི་པ་བདེན་པ་རྣམ་པ་གཉིས། །ལྔ་པ་གསང་བ་ཕྱི་པ་ཡང་། །དང་པོ་རང་རིག་རྣམ་པར་དག །གཉིས་པ་སྔ་ཕྱི་རྗེས་སུ་འབྲང་། །གསུམ་པ་དབྱིངས་ཉིད་འོད་གསལ་བའི། །ས་བདུན་རིམ་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཐེག་པ་བཞི་ཡི་ངེས་འབྱུང་ལས། །ཐེག་པ་གཅིག་གི་འབྲས་བུར་གནས། །ཐ་མའང་བསྟི་གནས་མཐར་ཐུག་སྟེ། །ཐ་མའང་གཙོ་མཆོག་འདིར་བཤད་དོ། །དེ་ལ་སྤོང་ཐབས་མི་མཐུན་པ། །འདོད་དང་འགོག་སྤོང་སྦྱོང་སེལ་བྱེད། །འབྲས་ཤེས་བཏང་སྙོམས་དག་བྱེད་དང་། །ཕྱོགས་སྤྱོད་དང་ལེན་ད་རོལ་དང་། །བདག་ཕྱིར་བླང་དོར་མེད་པ་ཡིས། །ཆེ་བས་སྐས་གདངས་ལྟ་བུར་འགྱུར། །བརྒྱད་གཉིས་བཅུ་སྤྱོད་ཐེག་སོགས་པ། །ཐུན་མོང་ལམ་བརྗོད་རྣམ་པ་དགུ། །སྲིད་པ་དང་པོ་དངོས་ལྟ་བ། །རྣལ་འབྱོར་གཡེང་དྲུག་གིས་བྲལ་ཡང་། །རྒྱུ་འབྲས་ཤེས་པས་ཡ་ང་སྤོངས། །བསྟི་གནས་དང་པོ་སྨིན་པར་འདོད། །ལོག་རྟོག་ཉིད་ལ་ཉིད་སྤྱོད་དེ། །གཞན་དུ་གཡོ་བ་ཅི་ཡང་མེད། །བསམ་གཏན་སྙོམས་འཇུག་ས་བརྒྱད་པོ། །འདོད་སྤྱོད་སྡིག་སོགས་སྤྱོད་པས་འདོར། །དང་པོའི་གཡེང་དྲུག་བསམ་པས་འདོར། །འཛིན་པ་ཕྲ་བས་ཏིང་ངེ་འཛིན། །དོར་བ་གཉིས་མཐུན་དོར་བ་ཡིས། །ས་སྟེགས་རྩ་གཅིག་འཐོབ་བྱེད་པའོ། །ལོག་ལྟ་བཞི་པོ་གཉིས་མཐོང་བས། །ལོག་པའི་ལམ་ཞུགས་ཡ་ངའི་འབྲས། །ལམ་རིམ་དང་པོ་དངོས་འཛིན་གཞི། །འཁོར་བའི་ལམ་གཞི་ཟག་བཅས་འབྲས། །དེ་དག་མཆོག་གི་གསུམ་ལ་རྨོངས། །དེ་ཕྱིར་མ་རྟོགས་ལོག་རྟོག་པའོ། །སྤོང་འགེགས་བྱེད་པའི་བྱིས་པ་གཉིས། །ཚུལ་ཁྲིམས་བསླབ་པས་དངོས་འགོག་ཅིང་། །མཐོང་གོམས་ཤེས་རབ་ཏིང་འཛིན་གྱིས། །སྤོང་འགེགས་མེད་སྨྲ་ཏིང་འཛིན་ལྟ། །ཟབ་ཕྲའི་གཟུང་འཛིན་ཞེན་པ་བཅས། །བླང་དོར་ཞགས་པས་བཅིངས་པ་ཡི། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པའང་ཡོད་མིན་ཏེ། །ལྷག་པར་དྲུག་གཉིས་ཕྱི་སྟོང་འདོད། །ཕྱོགས་སྟོང་ཞེན་པས་བསྒྲིབས་པས་ཏེ། །རྨི་ལམ་རྟེན་འབྲེལ་བཞི་སྣང་བས། །མི་བདེན་རང་བྱུང་ཡེ་ཤེས་སྐལ། །བཤད་མེད་ཐེག་པའི་གཞུང་གཉིས་པོས། །རྡུལ་དང་རྟེན་འབྲེལ་བཞིར་འདོད་པས། །ཕྱོགས་གཅིག་འདས་མཐའ་ལམ་ཞུགས་པས། །བསྟི་གནས་དང་པོ་འབྲས་བུ་ཙམ། །བླ་ན་མེད་པའི་ཐེག་པ་པ། །བསླབ་པ་གསུམ་གྱིས་སྤང་བྱ་དག །སོལ་སྦྱོང་དག་པས་ཐེབ་འདོད་པ། །རྣམ་རིག་རྣལ་འབྱོར་མདོ་སྡེའོ། །དང་པོ་རང་བྱུང་ཡེ་ཤེས་དོན། །མ་རིག་ཕྱིར་ན་རང་སེམས་ལ། །རྣམ་པ་ཡོད་མེད་རྩོད་པ་བྱེད། །གང་ལྟར་རྩོད་ཀྱང་འཁྲུལ་པའི་མཐའ། །འཁྲུལ་སྣང་ཡུལ་གྱི་རྣམ་པ་ཅན། །རང་བཞིན་འཁྲུལ་མཐོང་ཡོད་མ་མྱོང་། །རྣམ་པ་མེད་པའི་རང་རིག་པ། །འོད་གསལ་ཤེལ་ལྟར་དག་པའང་། །རྒྱུ་རྟག་སྐད་ཅིག་མི་རྟག་པས། །སྐྱེ་འགག་མེད་པའི་ཡེ་ཤེས་ལ། །རྣམ་ཡང་རེག་པར་མི་འགྱུར་ཏེ། །རྣམ་པར་འགོག་པར་ཐུག་པའི་མཐའ། །རྣམ་དག་ཡེ་ཤེས་རྣམ་བྲལ་བ། །སེམས་ཅན་རྒྱུད་རེ་དེ་ཡིན་ཏེ། །རྒྱུད་འཛིན་ཡུལ་མེད་གཟུང་འཛིན་ཅན། །གཡོ་མེད་རྩོད་པ་འཁྲུལ་པར་ཟད། །བྱིས་པས་མཁའ་ལ་རྩོད་དང་མཚུངས། །རྣམ་པ་ཡོད་མེད་ཀུན་བདག་སྐལ། །ཤེས་རྒྱུད་བཞི་ལ་རྩོལ་བའི་ལམ། །དེ་མཐུན་སངས་རྒྱས་དེའི་འབྲུར། །བྱེད་ཀྱི་ལྷག་པའི་གསུམ་མ་མཐོང་། །དམ་པའི་ཤེས་པའང་རྫུན་པའོ། །རྣལ་འབྱོར་སྤྱོད་པའང་དེ་འདྲའི་ཕྱིར། །སྔ་མའི་དམ་པ་རྒྱུ་རྐྱེན་ལ། །རང་ལུས་ཞིག་དང་སྐྱེས་དང་སྐྱེས། །དེ་བས་བརྫུན་ལྟ་དམ་པར་ནི། །ཐམས་ཅད་སེམས་ཏེ་དེ་མ་དམིགས། །མ་སྐྱེས་སྟོང་པ་སྨྲ་བསམ་འདས། །མཐའ་ལ་དབེན་པའི་དོན་དུ་ལྟ། །རྣམ་པ་ཡོད་མེད་རྩོད་དང་བྲལ། །ཤེས་པ་མ་སྐྱེས་ཕྱོགས་ལྟ་བ། །མཐའ་དང་བྲལ་བ་ཐུག་པའི་མཐའ། །སྐྱེ་མེད་ཕྱོགས་གཅིག་མཐའ་དང་བྲལ། །དེ་ཁོ་མཆོག་ལྟའི་ཞེན་པ་ཅན། །གཉིས་མེད་དབྱེར་མེད་མ་མཐོང་བས། །སེམས་སྟོང་བཞི་ལ་དཀའ་སྤྱོད་ལམ། །འབྲས་བུ་སྔོན་བཞིན་འདས་པའི་མཐའ། །གྲུབ་མཐའ་ནོར་རྟོགས་ཤེས་རབ་ཀྱིས། །འབད་པས་བརྟན་ཐོབ་དེ་ཡིས་ཕྱིར། །དེ་མི་བདེན་པས་དེ་མིན་བདེན། །མདོ་སྡེ་པ་ཡི་གཞུང་ལུགས་ཀྱང་། །ཀུན་བརྟགས་སྣང་བའི་སྤྱོད་ཡུལ་འདི། །དམ་པ་གཞན་དབང་སྒྱུ་མ་ཙམ། །ཤེས་སྣང་མ་ཡིན་འདུས་སྣང་ཡིན། །དམ་པར་སྐྱེ་མེད་སྨྲ་བསམ་འདས། །རྟེན་འབྲེལ་གཅིག་དང་དུ་མ་མེད། །རྡོ་རྗེ་གཟེགས་མ་རྣམ་བཞི་དང་། །མུ་བཞི་སྐྱེ་འགོག་ལ་སོགས་པས། །མཐའ་ཡི་བྱེ་བྲག་སེལ་བྱེད་ཅིང་། །དེ་འདྲ་བསམ་གཏན་འདས་ཆེན་ཅིང་། །སྣང་བ་ཡོད་དང་མེད་པ་དང་། །རིགས་པས་འགྲུབ་དང་མ་འགྲུབ་སོགས། །དེ་དག་ལ་རྩོད་མཐའ་འཚོལ་བ། །སྙེད་ནས་ངེས་འཇོག་གཟུང་འཛིན་ཅན། །བདེན་གཉིས་ངོ་བོ་གཅིག་མི་གཅིག །རྩོད་ཅིང་གཅིག་ལ་བདེན་དང་རྫུན། །རིགས་ལྟ་ཆ་ཤས་ཞེན་པ་བཅས། །གཅིག་ན་རྫུན་མཐོང་བདེན་ཐལ་འགྱུར། །ཡང་ན་བདེན་མཐོང་རྫུན་པར་འགྱུར། །རྫུན་ཞིང་བདེན་པར་བསླུ་སོགས་ལྔར། །ཐལ་འགྱུར་བདེན་ཞིང་རྫུན་པའང་། །སྐྱེ་འགག་མེད་སོགས་བཞིར་ཐལ་འགྱུར། །ཡང་ན་མཉམ་བཞག་ཚེ་ན་ཡང་། །བདེན་གཉིས་དུས་གཅིག་མཐོང་བར་རིགས། །བདེན་རྫུན་ཕན་ཚུན་སྤངས་པས་འགལ། །ཐ་དད་གྱུར་ན་སྒྱུ་མ་ལ། །བརྟེན་ནས་དོན་དམ་མི་རྟོགས་ཤིང་། །སྒྱུ་མར་འབད་པའང་ཚི་ཆད་འགྱུར། །དམ་པ་བཙལ་བའི་གནས་མེད་ཅིང་། །འབྲེལ་པ་མེད་པས་ཡོད་མི་འགྱུར། །གང་ལ་མ་སྐྱེས་པ་ཡང་མིན ། །སྐྱེ་བ་མེད་པར་འགྲུབ་མི་འགྱུར། །ཞེན་སྤོང་གཉེན་པོ་མི་བཏུབ་ཅིང་། །དེ་ཉིད་རང་རྒྱུད་ཅན་གྱུར་པས། །གང་ལ་ཕན་གནོད་མེད་འགྱུར་རོ། །དེ་ལྟར་རྟོགས་ཤིང་ཐེ་ཚོམ་ཟ། །ཁས་བླངས་མེད་སྒྲ་ཕྱོགས་ལ་ཞེན། །དེ་བས་བླ་མེད་ཐེག་པ་བ། །དོན་དམ་དུ་ནི་དབྱེར་མེད་དེ། །ཀུན་རྫོབ་ཙམ་དུ་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །དོན་དམ་དུ་ནི་དཀོར་བདུན་ནོ། །ཀུན་རྫོབ་ཏུ་ནི་མཉམ་རྫོགས་སོ། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །དེ་ཉིད་འབྲས་བུའི་མཚན་ཉིད་ལ། །དོན་དམ་ངོ་བོ་ཉིད་ཀྱི་རྒྱུ། །ལྷག་པའི་བདེན་པར་མཚན་བརྗོད་དེ། །ཅིར་ཡང་སྣང་བའི་ཡེ་ཤེས་ཉིད། །མཚན་མར་མ་འགགས་ཅིར་ཡང་སྣང་། །ངོ་བོ་མ་ངེས་དོན་མཛད་དང་། །རྟག་པ་གཉིས་ལས་རིང་བ་དང་། །རྣལ་འབྱོར་དམ་པའི་ཡུལ་མཐུན་དང་། །སྣང་ལ་སྐྱེ་འགག་མེད་པའི་ཕྱིར། །ལྷག་པའི་ཀུན་རྫོབ་ཅེས་སུ་གྲགས། །ཐམས་ཅད་ཀུན་གྱི་རང་བཞིན་པས། །ཡེ་ཤེས་སྣང་བའང་རྒྱུ་རྐྱེན་མེད། །སྐྱེ་འཇིག་མེད་དོ་ལྔ་འབྲས་བུ། །དབྱིངས་དང་ཡེ་ཤེས་རྫོགས་མི་དམིགས། །ཕྱོགས་མེད་རེ་སྐོང་ཕྲིན་ལས་ནི། །ཀུན་ནས་འཚམས་པས་དོན་མཛད་དེ། །ཆེད་དུ་བྱས་པའི་རྟག་པའང་བྲལ། །རང་བཞིན་མཚན་ཉིད་ངོ་བོ་དང་། །ཡོན་ཏན་ཕྲིན་ལས་བརྟགས་པས་དབེན། །ཆོས་དྲུག་ལྡན་ཕྱིར་ལྷག་པར་བསྒྲགས། །དེ་བཞིན་རང་བཞིན་འབྲས་བུ་དང་། །ཡེ་ཤེས་གསུམ་ཕྱིར་དོན་དམ་པའང་། །ཤེས་དོན་ནང་ནས་མཆོག་གྱུར་པས། །དོན་གྱི་མིང་དུ་འགྲུབ་པ་ཡིན། །དེ་ཡང་མ་སྐྱེས་དབྱིངས་ཀྱི་དོན། །བཞི་ཡི་ངེས་ལ་ཆད་གྱུར་པ། །ལོག་རྟོག་སྤྱོད་ཡུལ་ལ་སོགས་པ། །ཀུན་གྱི་རང་བཞིན་ཕྱོགས་བཀོལ་མེད། །ངོ་བོ་བདུན་རྫོགས་དམིགས་པ་མེད། །མཚན་ཉིད་ཀུན་གྲོལ་ཀུན་བདག་ལ། །ཕྱོགས་སྟོང་ཁྱད་པར་ཡོད་པ་མེད། །ཀུན་བྱིན་ལྡན་པའི་བརླབས་སྣང་ལ། །དངོས་པོ་གཉིས་ཀྱི་ངོ་བོ་རྒྱུར། །གྱུར་པས་ཅི་ཡང་མི་འགོག་སྟེ། །རྒྱ་མཚོའི་ཆུ་དང་རླབས་བཞིན་ནོ། །ཡིད་བཞིན་ནོར་ལྟར་རེ་སྐོང་བའོ། །ཡོན་ཏན་ཀུན་རྫོགས་ཕྱིར་སྣང་བའོ། །ཐུན་མོང་དམ་པའི་ཡུལ་མིན་ཏེ། །ཕྱོགས་གཅིག་མཐའ་བྲལ་མ་ཡིན་ཏེ། །དཔེ་དང་གཏན་ཚིག་ཐུན་མོང་པས། །གཏན་ལ་འབེབས་པ་མ་ཡིན་ཏེ། །བདུན་སོགས་ངོ་བོར་གནས་པའི་ཕྱིར། །ལྷག་པ་གྲངས་མཐུན་ཉིད་དུ་བརྗོད། །རྣལ་སོགས་སྤྱོད་ཡུལ་མ་ཡིན་ནོ། །གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་རྒྱུད་མེད། །ཁ་དོག་མ་ཡིན་དབྱིབས་མ་ཡིན། །གནས་སུ་མེ་ཡིན་གང་ཡང་མེད། དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཕྱོགས་བཅུ་མ་ལུས་ཐམས་ཅད་ལ། །རང་བྱུང་ཆེན་པོས་ཀུན་ཏུ་ཁྱབ། །རང་བྱུང་དེ་ཉིད་དངོས་མེད་པས། །ཆོས་དང་གང་ཟག་བདག་མེད་པ། །ཀུན་གྱི་ཕྱག་རྒྱའི་རྒྱུ་ཡིན་ནོ། །མ་སྐྱེས་བཞི་ལ་བགྲོད་པའི་ལམ། །གང་སྤང་གང་ཐོབ་དེའི་འབྲས་བུ། །དངོས་པོ་ཇི་བཞིན་མི་མཐོང་བས། །འབྲས་བུ་བཏགས་པའི་སངས་རྒྱས་ཙམ། །དེ་ལྟར་ངེས་འབྱུང་བྱེ་བྲག་གིས། །རྒྱུད་ནས་ངེས་པའི་གསང་བའང་། །དང་པོ་རྒྱུ་འབྲས་དབྱེར་མེད་པས། །འབྲས་བུ་ལམ་དུ་བྱེད་ཅེ་ཡང་། །ཕྱོགས་གཅིག་དག་པའི་ཆོས་ཉིད་ལ། །ལྟ་ཞིང་དེ་ལས་ལྷ་དྲུག་སོགས། །དམིགས་པ་གསུམ་དང་ཡན་ལག་གིས། །སྒོམ་བྱེད་འབྲས་བུ་གཟུང་འཛིན་ཅན། །ལྟ་སྤྱོད་ཡ་ཆའི་ཞེན་པ་ཡིས། །བདག་ཉིད་ཆེན་པོ་ནང་མི་མཐོང་། །དག་པའི་སེམས་ཞི་རྩོལ་བའི་ལམ། །རྡོ་རྗེ་གསུམ་གྱི་ས་འཛིན་པ། །དམུས་ལོང་འབྲི་མཁན་དང་མཚུངས་ཏེ། །རྣལ་འབྱོར་ཆེན་པོའི་ཐུགས་རྗེའི་ཡུལ། །གཉིས་ཀ་བ་ཡི་བྱ་བ་དང་། །རྣལ་འབྱོར་རྗེས་སུ་ལྟ་སྤྱོད་འབྲང་། །གཉིས་པོ་ཡ་ཆ་སྔོན་བཞིན་ཏེ། །དེ་ཉིད་བཞི་ཡི་ཞེན་པ་ཅན། །དེ་ཡང་ཕྱི་རོལ་པ་ལ་གནས། །རྣལ་འབྱོར་ཏིང་འཛིན་ཞེན་པ་ཅན། །དམ་པ་རང་རིག་འོད་གསལ་བ། །དབྱིངས་ཉིད་རྣམ་དག་ཡེ་ཤེས་ལ། །ཀུན་རྫོབ་བྱིན་རླབས་དཀྱིལ་འཁོར་དག །ཡེ་ཤེས་སྣང་ཕྲ་དེ་ལ་དམིགས། །དེ་ཕྱིར་ལྟ་དགོངས་ཕྱི་རོལ་འགྱུར། །དེ་ཕྱིར་ཁས་ལེན་གཙང་དམེར་ལྟ། །ཆུ་ཡི་རལ་གྲི་བྱིས་པ་ཡིན། །སྤྱོད་པར་མི་ཕོད་འཛིན་པ་ཅན། །དེ་ཉིད་ནས་ནི་ཕྱི་རོལ་སྤྱོད། །ཤིན་ཏུ་ནང་དོན་མ་རྟོགས་པས། །ཕྱི་རོལ་ཆ་ཡིས་བཅིངས་པ་ཡིན། །འོད་གསལ་བཞི་ལས་མཚན་མར་གཡོ། །སྣང་སྟོང་རེས་བསླབ་ལམ་ལྔ་ཡིས། །ཐོབ་པ་དམ་པའང་བསྟི་བའི་གནས། །ཕྱི་རོལ་གཉིས་སོགས་འབྲས་བུའི་ཕྱིར། །འཆིང་བུ་རིན་ཆེན་ཇི་ལྟ་བར། །ལམ་འབྲས་མ་འབྲེལ་འཁྲུལ་པར་ཟད། །གཙོ་མཆོག་བཤད་པར་ཁས་བླངས་པ། །རྒྱས་པར་གདམས་ཀྱི་གདེང་དུ་བགྱིས། །རྣལ་འབྱོར་ཆེན་པོའི་ལྟ་བའི་དོན། །ཡོད་ལས་བཙལ་ན་སྒྲོ་བཏགས་ཏེ། །མེད་ལས་བཙལ་ན་སྐུར་བཏབ་འགྱུར། །ཡོད་མེད་གཉིས་ལས་བཙལ་བྱས་ན། །དེ་ནི་ལུང་དུ་མ་བསྟན་འགྱུར། །དེ་ལས་གཞན་པའང་འབྲེལ་མེད་པས། །ནམ་ཡང་རྙེད་པར་མི་འགྱུར་ཏེ། །མཐའ་ལ་རྩོད་ཀུན་དེ་ལྟ་བས། །གསུམ་བྲལ་ཕྱོགས་གཅིག་མཐའ་བྲལ་བ། །རང་བློ་འཁྲུལ་པ་སྣང་བ་ཡིན། །དེ་བས་མཐར་ཐུག་ལྟོས་ཡོད་པ། །ཀུན་ཀྱང་མཐའ་ཡིས་བྲལ་བའང་མཐའ། །ཡིན་ཕྱིར་ངེས་པའི་བློ་མི་བཞག །གཉིས་མེད་སྨྲ་བསམ་བྲལ་བ་ལྟོས། །ཚིག་དང་སྒྲ་མཐུན་ཐ་དད་པ། །ལྟ་སྤྱོད་ལོག་པར་དྲངས་ཐབས་སུ། །གསུང་ཕྱིར་རྡོ་རྗེ་ཐེག་ཆེན་པོ། །སྒྲ་གཅིག་དོན་གྱི་ཁྱད་པར་རྟོགས། །དང་པོ་ཆོས་ཀུན་གནས་ལུགས་ཉིད། །དང་པོར་མཚན་ཅིང་དངོས་བཟློག་དང་། །གཉིས་པར་ཡང་དག་བདེན་བྲལ་དོན། །མཚོན་ཕྱིར་མ་སྐྱེས་དེ་བཞིན་ཉིད། །སྟོང་པ་ཉིད་དང་སྣང་བ་མེད། །གཉིས་སུ་མེད་དང་མཉམ་པ་ཉིད། །ཅི་ཡང་མིན་དང་སྨྲ་བསམ་འདས། །མི་གནས་མི་དམིགས་མི་རྟོག་དང་། །མཐའ་བྲལ་རྣམ་པར་དག་པ་དང་། །མཚན་མེད་སྨོན་པ་མེད་པ་དང་། །ཆོས་ཉིད་ཆོས་ཀྱི་དབྱིངས་ཉིད་དུ། །སྤྲོས་བྲལ་འགྲོ་འོང་མེད་པ་དང་། །སྣང་དང་འགག་མེད་ཐོབ་པ་མེད། །གྲོལ་དང་ཐར་དང་ཐོབ་པ་དང་། །ཀུན་རྫོབ་དོན་དམ་བདེན་པ་དང་། །མ་ཆགས་པ་དང་རང་བཞིན་དང་། །དངོས་མེད་ཞེན་མེད་རིགས་པ་དང་། །བདག་མེད་གཞན་མེད་སྤྱོད་ཡུལ་མེད། །ལྟ་བ་རིག་པ་ཡེ་ཤེས་སོགས། །མཚོན་པའི་སྒྲ་གྲགས་ཆོས་རྣམས་ཀྱི། །རང་རང་དོན་རྣམས་ཐ་དད་པ། །ཁྱད་པར་མ་འདྲེས་གསལ་བྱའི་ཕྱིར། །རིགས་པས་མདོ་ཙམ་ཕྱོགས་བརྗོད་པ། །དང་པོ་རྒྱུན་གྱི་ལོག་རྟོག་ཆོས། །བཀག་གསལ་ཕྱོགས་གཅིག་མ་སྐྱེས་དང་། །དྲི་མར་མ་སྐྱེས་མཚན་མར་མིན། །ཆེད་དུ་བྱས་པ་མ་སྐྱེས་རྣམས། །སྐྱེས་སྤོང་མ་སྐྱེས་འདོད་པ་ཡིས། །སྲིན་བུ་བལ་བཞིན་བཅིངས་པར་ཟད། །ཇི་སྙེད་ཐ་དད་ཆོས་རྣམས་ཀུན། །གཉིས་མེད་བླང་དོར་མེད་པ་ཡིས། །ལྷག་པ་མ་སྐྱེས་དོན་མཆོག་ནི། །སྐྱེས་པ་ཉིད་ན་སྐྱེ་བ་མེད། །དབྱིངས་ཕྱོགས་མ་སྐྱེས་དེ་བཞིན་ཉིད། །རིག་པ་ཉིད་དང་ཡེ་ཤེས་འདོད། །བླང་དོར་མེད་པའི་དེ་བཞིན་ཉིད། །གཉིས་མེད་མ་བྱས་མ་བཅོས་པ། །སྨྲ་བསམ་འདས་པའི་གཙོ་མཆོག་གོ། །དེ་བཞིན་སྟོང་ཉིད་ཞེན་པ་ཡང་། །ཕྱོགས་སྟོང་གསལ་སྟོང་ལ་སོགས་ལས། །རྣམ་པ་མཆོག་ལྡན་སྟོང་ཆེན་པོ། །ཡོད་པ་ཉིད་ན་སྟོང་པ་ཉིད། །ཡོད་དང་མེད་པས་སྨྲ་བསམ་འདས། །ངོ་བོ་རང་བཞིན་མཚན་ཉིད་དང་། །བྱིན་རླབས་ལ་སོགས་ཁྱད་པར་འཕགས། །སྣང་བ་མེད་ཅེས་བརྗོད་པ་ཡང་། །མ་རྟོགས་པ་དང་ལོག་པར་རྟོག །སྣང་ལ་མེད་པ་ལྟ་བུ་མེད། །ཕྱོགས་གཅིག་སྣང་མེད་ཕྱོགས་རིས་མེད། །རྫུན་པ་གསལ་བ་སྣང་མེད་དང་། །སྣང་བ་དྲི་མ་མེད་པ་དང་། །མཚན་སྣང་མེད་པ་ལ་སོགས་པ། །ཆེས་བྱས་སྣང་བརྟགས་ཀུན་པར་ཟད། །སྣ་ཚོགས་སྣང་བ་དང་བཅས་པའི། །སྣང་བ་མེད་པའི་མཆོག་འདི་ནི། །སྣང་བ་ཡོད་མེད་དབྱེར་མེད་པས། །འདི་ལྟར་སྣང་ཞེས་བསམ་དུ་མེད། །གཉིས་སུ་མེད་པར་བསྟན་པ་ཡང་། །ཕྱོགས་སྟོང་གཉིས་མེད་ཡུལ་སེམས་མེད། །ཕྱོགས་གཅིག་བྲལ་བའི་གཉིས་མེད་པ། །དེ་ཀུན་གཉིས་པའི་གཙོ་མཆོག་གོ། །དོན་དང་འདོད་པ་ཡོད་ཕྱིར་རོ། །རྒྱུ་འབྲས་གཉིས་སུ་མེད་པ་ཡང་། །བྱ་བ་རྣལ་འབྱོར་དོན་དམ་པར ། །གཉིས་མེད་དང་དུ་ལེན་པ་ཡང་། །རེས་འཇོག་ལྟོས་པའི་ཕྱོགས་གཅིག་པའོ། །གཉིས་པར་གྲགས་པའི་ཆོས་སོ་ཅོག །ལྡན་བཞིན་གཉིས་སུ་མེད་པ་ཡིས། །ལྷུན་འགྲུབ་བླང་དོར་མེད་པ་དང་། །གཟུགས་བརྙན་ནོར་བུས་མཚོན་པའོ། །ཚེ་ཕྱིར་མཉམ་ཉིད་གསུངས་པ་དང་། །འདྲ་བའི་མཉམ་པ་མི་མཉམ་ཆོས། །མི་མཉམ་བྲལ་བའི་ཕྱོགས་མཉམ་ནི། །མཉམ་པའི་མཐའ་ལ་གནས་པས་ལོག །གསང་ཆེན་མཉམ་པ་ཆེན་པོ་ནི། །མི་མཉམ་ཆོས་ཀུན་བདག་ཉིད་ལ། །མཉམ་དང་མི་མཉམ་ཆ་ཤས་མེད། །མཉམ་པ་ཀུན་གྱི་ཡང་རྩེ་ཡིན། །གཞན་སེལ་དོན་དུ་གཉེར་བའི་ཕྱིར། །ཅི་ཡང་མིན་པར་བཀའ་སྩལ་པའང་། །རིག་པས་མ་ཡིན་ཤེས་པ་ལ། །ཡིན་པར་སྣང་ལ་སྐྱོན་ལྟ་བར། །མཐའ་སེལ་ཕྱོགས་གཅིག་མ་ཡིན་དང་། །དམིགས་པ་མ་ཡིན་ཀུན་ཀྱང་མཐའ། །བླང་དོར་མེད་སོགས་མིང་གསུམ་ལྡན། །ཅི་ཡང་མིན་ཞེས་བརྗོད་པ་ཡང་། །ཅི་ཡང་མིན་པའི་དངོས་གཞི་ཅན། །ཡིན་མིན་དབྱེར་མེད་ཆ་ཤས་བྲལ། །ཕྱོགས་སུ་ཐུགས་པ་འདི་ལ་མེད། །རྨ་བྱའི་མདོངས་རྩེ་ཁ་དོག་འདྲ། །དགོས་ཆེད་སྔོན་བཞིན་སྨྲ་བསམ་འདས། །བདེན་པ་ཕྱོགས་གཅིག་དེ་བཞིན་པ། །འཁུ་བར་ཆུ་བླུགས་བཞིན་འདོད་པ། །ཕྱོགས་ཆས་སྨྲ་བསམ་ཡུལ་ལས་འདས། །རྟོག་གེའི་ཡུལ་དུ་ང་སྨྲའོ། །མིང་གསུམ་ལྡན་པའི་དོན་མཆོག་ནི། །སྨྲ་བསམ་ཀུན་དངོས་སྨྲ་བསམ་དཀའ། །བློ་ངན་ཡུལ་དུ་མ་གྱུར་པས། །ནམ་མཁའ་འདི་ཞེས་དཀའ་དང་འདྲ། །ལོག་རྟོག་ཕྱོགས་རིས་རྣལ་འབྱོར་དང་། །ཕྱོགས་གསལ་མ་གནས་རྟེན་པ་ཅན། །ཕྱི་སའང་འཛིན་པའི་གཞི་ཅན་དེ། །གནས་པའི་གཙོ་བོར་བདག་གིས་བརྗོད། །བླང་མེད་དོར་མེད་མི་གནས་པ། །བསྒོམ་བྱ་སེམས་ཕྱིར་བརྟན་བྲལ་བ། །གནས་དང་མི་གནས་སྤོང་ལེན་མེད། །ཅི་ལའང་ཡིད་རྟེན་མི་འཆའ་བས། །མི་གནས་ཉིད་ལ་གནས་མི་བྱེད། །རྟེན་དང་བརྟེན་ཅན་མེད་པས་ནི། །མི་གནས་ཆེན་པོ་མཆོག་ཡིན་ཏེ། །ནམ་མཁའ་ལྟ་བུ་རྟེན་དང་བྲལ། །གང་གིས་མི་དམིགས་ཞེས་བརྗོད་པའང་། །ལོག་དང་འཇིག་རྟེན་ཏིང་འཛིན་དང་། །འགོག་གཉིས་ཕྱོགས་གཅིག་ལ་གནས་དང་། །དབུ་མ་པ་དག་མི་དམིགས་གསུམ། །འདོད་ལས་སེལ་བའི་དམིགས་པ་ཅན། །ཕྱོགས་གཅིག་རྟེན་མེད་དམིགས་པའོ། །དམིགས་པ་ཀུན་བདག་མི་དམིགས་པ། །མཚོན་ཆེན་ཅན་དུ་དེ་བརྗོད་ཀྱང་། །མི་དམིགས་འདོད་པའི་ཆགས་པ་མེད། །དམིགས་སྤོ་ཞེ་སྡང་ཕྲག་དོག་མེད། །གཉིས་སུ་མེད་པར་མི་དམིགས་ལ། །མཁའ་ལ་འདི་ཞེས་དམིགས་བྲལ་འདྲའོ། །རྣམ་པར་མི་རྟོག་བརྗོད་པ་ཡང་། །འཇིག་རྟེན་ཞེན་པའི་རྣམ་མི་རྟོག །ལོག་པར་བསྒོམ་པ་མི་རྟོག་དང་། །བྱིས་པ་དགག་སྒྲུབ་མི་རྟོག་གཉིས། །ཕྱོགས་འཛིན་གསལ་བ་མི་རྟོག་པ། །རྣམ་དག་གསལ་བ་མི་རྟེན་རྣམས། །བཞི་ལ་རྟོག་པ་མེད་སྨྲ་ཞིང་། །མི་རྟོག་མི་མཐུན་བགེགས་ལྟ་བས། །དགག་སྒྲུབ་བླང་དོར་བྱེད་པ་དེ། །ངེས་མཆོག་བཞི་ཡི་རྟོག་པ་ཅན། །ཐབས་ཆེན་རྣམ་པར་མི་རྟོག་པ། །རྟོག་ཚོགས་མིང་ཙམ་ཡེ་ཤེས་ཕྱིར། །རྟོག་པ་ཉིད་ནས་མ་སྐྱེས་པས། །སྐྱེས་བརྡའི་འདུ་ཤེས་དབྱེ་བ་མེད། །དགག་དང་སྒྲུབ་མེད་མི་རྟོག་པ། །མི་རྟོག་ཉིད་དུའང་རྟོག་མེད་པས། །མེ་ལོང་ནག་ལ་རྟག་མེད་བཞིན། །གྲོལ་རྟོགས་བྱ་ཕྱིར་མཐའ་བྲལ་བ། །མཐའ་ཞེས་ཐུགས་པར་གྲགས་པ་རྣམས། །ལོག་པའི་མཐའ་གཉིས་བྲལ་གཟུགས་མེད། །སྐྱེ་འགག་ཆ་ཤས་བྲལ་བ་དང་། །རང་རིག་མཐའ་བརྒྱད་བཞི་གཉིས་བྲལ། །མཐའ་ལ་སྐྱོན་དུ་རྟོག་བྱེད་ཅིང་། །མཐའ་བྲལ་ཡོན་ཏན་ལན་བྱེད་པ། །ལྟོས་པས་ཐུགས་པ་ཡོད་པའི་ཕྱིར། །མཐའ་བྲལ་ཉིད་ཀྱང་མཐའ་ཡི་གཙོ། །ཀུན་རྫོབ་ཤེས་ཡུལ་བྱེད་པས་འཁྲུལ། །ཡང་དག་མཐའ་བྲལ་ཤེས་བྱའང་། །མཐའ་བརྒྱད་ལ་སོགས་གྲགས་པ་རྣམས། །རང་རིག་ཡེ་ཤེས་སྣང་བའི་ཕྱིར། སྤྲོས་པ་ཐུགས་རྡོའི་དུས་ཉིད་ན། །མིང་ཙམ་དེར་རེ་མེད་པའི་ཕྱིར། །མཐའ་དང་བྲལ་བ་གཉིས་སུ་མེད། །སྨན་ཞེས་བྱ་བའི་ག་པུར་དུས། །གྲང་བའི་དུག་དང་གཉིས་མེད་ལྟར། །བྲལ་རྗེས་བརྗོད་པ་དེ་ཁོ་ན། །ཐུག་པའི་མཐའ་དང་དབྱེར་མེད་ལ། །གང་དུའང་ཐུག་པ་མེད་པའི་ཕྱིར། །མཐའ་བྲལ་བླ་མར་བཤད་པ་ཡིན། །རྣམ་པར་དག་པ་སྦྱང་བྱ་དག །མཐོང་སྒོམ་ལམ་གྱིས་སྤང་བྱ་ཞིང་། །སྔགས་དང་ཕྱག་རྒྱ་སྦྱོང་རིམ་དག །དག་འདོད་དྲི་མེད་ཆགས་པས་བཅིངས། །ཐུག་པའི་རྣམ་དག་ཞེན་པ་ཅན། །རང་རང་ཀུན་ཏུ་བརྟགས་པས་ནོན། །འོག་མས་སྨད་པའི་དྲི་མ་རྣམས། །དྲི་མ་ཉིད་ན་རྣམ་དག་ཅིང་། །བླང་དོར་གཉིས་སུ་མེད་པ་ལ། །དག་དང་མ་དག་རིས་མེད་པས། །ཐེག་པ་ཀུན་གྱི་ཡང་རྩེ་སྟེ། །འདམ་སྐྱེས་པདྨ་ཇི་བཞིན་ནོ། །མཚན་མ་མེད་པའི་རིམ་པ་ཡང་། །གྲགས་པའི་མཚན་མེད་འདོད་པ་ཡིས། །སྤོང་དང་སྤེལ་བས་ཕྱོགས་གཅིག་པ། །འདུ་ཤེས་ཡུལ་ལ་སྐྱོན་ལྟ་ཞིང་། །དེ་མེད་པ་ལ་མཆོག་གཞོལ་བྱེད། །འདོད་དང་ཞེན་པའི་གཟུང་འཛིན་ཅན། །ཕྱི་ཡི་བྱ་བ་རྣལ་འབྱོར་ཀྱང་། །དེ་ཕྱོགས་མཐུན་མཚན་ཕྱིར་ན་རྫུན། །མཆོག་གི་མཚན་མ་མེད་ཅེས་པ། །འདུ་ཤེས་ཀུན་བདག་རང་རིག་ཕྱིར། །ཡུལ་མེད་དེ་ལ་འཛིན་པ་མེད། །དེ་ནས་ཕྱོགས་ཀྱི་མཚན་འཛིན་བྲལ། །དེ་བཞིན་སྨོན་པ་མེད་པ་ཡང་། །བློ་ཆུང་ལྟོས་པའི་སྨོན་བྱེད་དང་། །བསལ་དང་ལེན་པ་སྨོན་མེད་གསུམ། །འདོད་པས་ཞེན་པ་སྨོན་པ་ཡིན། །སྨོན་པ་ཀུན་རྫོགས་རང་རིག་ཉིད། །ལམ་དང་འབྲས་བུ་དངོས་གཞིའི་ཕྱིར། །འཕྲུལ་དགའི་ལོངས་སྤྱོད་ཚུལ་བཞིན་དུ། །གཞན་དུ་རེ་སྨོན་སྐྱེ་བ་མེད། །ཆོས་ཉིད་དབྱིངས་ཞེས་བརྗོད་པ་ཡང་། །སྤྱོད་ཡུལ་འདི་དག་མེད་སྟོང་ཞིང་། །གསལ་བྲལ་སྟོང་པའི་ཆོས་དབྱིངས་དང་། །རང་རིག་དག་པའི་ཆོས་ཉིད་དང་། །མཚན་ཉིད་མེད་པའི་དབྱིངས་སོགས་པས། །ཞེན་ཡུལ་ཆོས་ཅན་མཐའ་ལས་རིལ། །སྟོང་ཉིད་མུ་མཐའ་མེད་སོགས་སྨྲ། །རང་རིག་རྟགས་མཐོང་དབྱིངས་ཞེས་བྱ། །གསང་སྔགས་ཆེན་པོའི་ཆོས་ཉིད་དབྱིངས། །ཆོས་ཅན་མ་གོལ་དམིགས་པའང་མེད། །བྱེད་མེད་བྱས་མེད་བསླད་པའང་མེད། །འདི་དང་འདི་ཞེས་རིས་མེད་པ། །ཆོས་ཉིད་དམ་པ་དེ་ཁོ་ནའོ། །ཀུན་འབྱུང་མུ་མེད་བརྡལ་ཁྱབ་མེད། །གང་ཡང་མ་སྤངས་བཀོལ་བ་མེད། །ཕྱོགས་ཆད་མེད་དེ་བློས་རེག་མེད། །དེ་ཕྱིར་གསང་བའི་དབྱིངས་ཞེས་བྱ། །རྣམ་གྲངས་ཆོས་དེ་ནམ་མཁའ་དང་། །མཐུ་ཡོད་ཕྱིར་ན་ཉེར་སྦྱར་བའོ། །སྤྲོས་བྲལ་ཤེས་པར་བྱ་བ་ཡང་། །ལོག་རྟོག་ཞེན་པའི་སྤྲོས་པ་རྣམས། །སྐྱོན་ཤེས་སེལ་བའི་ཕྱོགས་གཅིག་པ། །ཕྱོགས་གཅིག་སྤྲོས་པའི་མཐའ་ཐུག་ཅིང་། །རང་རིག་ཡེ་ཤེས་སྤྲོས་པ་ཡང་། །སྤོང་ལེན་བྱེད་ན་སྤྲོས་པའི་མཐའ། །ཐིག་ལེ་ཀུན་ནས་ཟླུམ་པ་ལྟར། །སྤྲོས་པ་ལྷུན་གྲུབ་སྤྲོས་བྲལ་ནི། །ཇི་སྙེད་སྤྲོས་པ་སེམས་ཉིད་ཕྱིར། །རྒྱུ་འཛིན་མེད་པའི་བྱང་ཆུབ་སེམས། །མིང་ལྔ་ལྡན་པའི་ཡེ་ཤེས་ནི། །དེ་ཉིད་ཆོས་དབྱིངས་རང་བྱུང་སྟེ། །མི་གནས་ཤེས་པ་ལྷུན་གྲུབ་པ། །དེ་ཁོ་དེ་བཞིན་ཉིད་དམ་པའོ། །ཡུལ་དང་ངོ་བོས་སྤྲོས་མེད་ཕྱིར། །སྤྲོས་བྲལ་ཀུན་གྱི་བླར་གྱུར་ཡིན། །འགྲོ་དང་འོང་བ་མེད་པ་ཡང་། །ཞེན་ལོག་འགྲོ་འོང་དམ་པར་མེད། །ཐུན་མོང་ཕྱོགས་གཅིག་འགྲོ་འོང་མེད། །དག་དང་འོད་གསལ་འགྲོ་འོང་མེད། །འགྲོ་འོང་ཕྱོགས་ལ་སྨོད་བྱེད་ཅིང་། །འགྲོ་འོང་མེད་ཕྱོགས་རྗེས་འབྲང་བ། །ཤེས་བྱ་ཤེས་བྱེད་ཡ་ཆ་བ། །དམ་པའི་ལམ་དུ་ག་ལ་འགྱུར། །འགྲོ་འོང་ཀུན་དང་གཉིས་མེད་པའི། །འགྲོ་འོང་མེད་པ་ཆེན་པོ་ལ། །འགྲོ་འོང་ཉིད་ན་མེད་པའི་ཕྱིར། །འོང་དང་མི་འོང་ཡོད་མེད་མེད། །རྒྱ་མཚོར་འབྲེལ་བའི་འབབ་ཆུ་བཞིན། །ཡོད་མེད་མཐའ་ཡི་མེད་པ་མེད། །བརྟགས་པ་འཁྲུལ་སྣང་ལོག་སྣང་དང་། །ཕྲ་རབ་སྟོང་འཁྲུལ་རྣམ་སྣང་དང་། །སྒྱུར་སྣང་ལྷར་སྣང་རིམ་པ་དག །ཡོད་སྣང་ལ་སོགས་འདུས་སྣང་དང་། །བདག་རིག་རང་བཞིན་སྐྱེན་བསླང་བས། །ལྷར་སྣང་འདོད་པ་འཁྲུལ་མཐོང་ཡིན། །སྣང་མེད་སྣང་བ་ཀུན་བདག་ཉིད། །རང་རིག་ཡེ་ཤེས་ཆོ་འཕྲུལ་ནི། །རྒྱ་མཚོ་ཆུ་དང་རླབས་བཞིན་དུ། །བྱང་ཆུབ་སེམས་ཉིད་ཀུན་ཏུ་ཤར། །འགག་པ་མེད་པའི་བྱེ་བྲག་ནི། །མེ་ནག་མི་འགྱུང་འགག་མེད་དང་། །གློ་བུར་ཙམ་སྣང་མི་འགོག་དང་། །འབྲས་བུ་རྡོ་རྗེའི་འགག་མེད་གཉིས། །འགག་སྤོང་དེ་དང་འབྲལ་འདོད་ན། །འགག་མེད་མཐའ་ལ་ཞེན་པར་ཟད། །གཉིས་མེད་འགག་པ་མེད་པ་ནི། །རང་བྱུང་ཡེ་ཤེས་རང་སྣང་ཕྱིར། །འགག་པ་ཉིད་ནི་འགག་མེད་པས། །ནམ་མཁའ་ལྟ་བུར་སྐྱེ་འཇིག་མེད། །འདོད་པ་ཞེན་པ་ཐོབ་པ་དང་། །སྤོང་ཐོབ་སྦྱང་ཐོབ་བགྲོད་པ་དང་། །བདག་ཡིན་ལས་རུང་ཐོབ་པ་དག །འདོད་པས་སྤང་ཐོབ་ཕྱིར་ན་རྫུན། །ཐོབ་པ་མེད་པའི་ཐོབ་པ་ནི། །མཚན་ལྡན་ལོང་བ་མིག་ཕྱེ་བཞིན། །ཐབས་ལ་བརྟེན་པའི་ཤེས་རབ་ཉིད། །འབྲས་བུ་རང་ལས་ཤར་བར་ཟད། །གཞི་ཙམ་ཉིད་ལ་སྤང་ཐོབ་མེད། །ཆེད་དུ་བྱས་པའི་ཐོབ་མེད་གཉིས། །ལན་ཅིང་ཆགས་པ་ཡོད་པའི་ཕྱིར། །ཐོག་མེད་ཞེན་པ་ལྕགས་སྒྲོག་ཅན། །བདག་ཉིད་ཆེན་པོ་ཐོབ་མེད་ནི། །འབྲས་བུ་ཀུན་བདག་རང་རིག་ལ། །གཉིས་ཕྱིར་ཐོབ་བྱའི་ཆོས་མེད་དེ། །དབུལ་མོའི་གཏོར་དང་གྱད་ནོར་བཞིན། །བྱེད་པོས་དགྲོལ་དང་བཀག་གྲོལ་དང་། །སྦྱངས་པས་གྲོལ་བ་ཕྱོགས་གཅིག་པ། །ཐུན་མོང་མིན་པའི་ལྟས་གྲོལ་བ། །འཆིང་གྲོལ་གཉིས་སུ་ལྟས་པས་བཅིངས། །བདག་ཉིད་ཆེན་པོར་དབྱེར་མེད་པ། །སུས་ཀྱང་མ་བཅིངས་བཅིང་མེད་དེ། །བཅིང་བར་བྱ་བ་མེད་གཉིས་གྲོལ། །མཁའ་ལ་མདུད་མེད་ཇི་ལྟ་བུའོ། །མ་རིག་ཉོན་མོངས་ལས་སྡུག་བསྔལ། །ཆུ་བོ་བཞི་ལས་ཐར་པའམ། །ཤིན་ཏུ་རིང་དང་བརྒྱུད་པ་དང་། །བཀག་སྤངས་བསལ་བས་ཐར་བ་དང་། །ཟིལ་གནོན་སྦྱོར་བས་ཐར་འདོད་པ། །འདོད་པའི་རྒྱ་མཚོར་ཆུད་པའི་ཕྱིར། །རྩོལ་བའི་ཆུ་རྒྱུན་ཕྱོགས་ཆས་ཁྱེར། །མཆོག་དང་རིང་བའི་ལོག་ལྟ་ཅན། །ཆུ་བོ་བཞི་ཉིད་ལམ་འབྲས་ཕྱིར། །ཐབས་དང་ཤེས་རབ་ལས་ཉིད་ཀྱི། །ཆུ་བོ་ཉིད་ལ་རོལ་སྤྱོད་པས། །བརྒལ་བ་མེད་པར་རྣམ་པར་ཐར། །ཆུ་ལ་ཉ་ཆེན་འཕྱོ་བའམ། །སྨན་སྔགས་ལྡན་པའི་དུག་ནད་འདྲ། །ལོག་པའི་ཀུན་རྫོབ་རྣམ་གཉིས་དང་། །འཁྲུལ་པ་གཞན་དབང་ཀུན་རྫོབ་རྣམས། །རིག་པ་བཞི་བཅུས་བདེན་ལྟ་བའང་། །ཡོན་ཏན་རླབས་འབྱུང་ལྷ་ཡི་འཁོར། །ཚུལ་མཐུན་རིགས་པས་འབྲས་བུར་བལྟ། །ལྷག་པ་ཀུན་རྫོབ་དོན་དམ་གཉིས། །བཤད་པ་བཞིན་དུ་ཤེས་པར་བྱ། །ཐུན་མོང་དོན་དམ་བྱེ་བྲག་ཀྱང་། །བཤད་པ་ཆ་ཡིས་ཤེས་པར་བྱ། །རྒྱ་མཚོ་དྭངས་པར་གཟའ་སྐར་བཞིན། །བདེན་གཉིས་སྣང་སྟོང་དབྱེར་མེད་པ། །ཕྱོགས་ལྟའི་མཐར་ཐུག་མེད་པ་ནི། །དེ་ཀ་རང་བཞིན་རྒྱུད་ཉིད་དོ། །ཞེན་པའི་ཡུལ་ལ་མ་ཆགས་པའང་། །ཚིམ་དང་སྙིང་པོ་བར་ཆད་སོགས། །ཆགས་མེད་འཁྲུལ་དང་ལོག་པ་དང་། །བཀག་སྤངས་ཕྱོགས་གཅིག་ཆགས་པ་དང་། །བཟློག་དང་བཏང་སྙོམས་ཆགས་མེད་དང་། །བཞི་པོ་ཆགས་མེད་ཆགས་པས་བཅིངས། །ཆགས་མེད་བླང་དོར་མེད་པ་ནི། །ཆགས་པ་ཉིད་ན་ཆགས་མེད་པས། །ཐབས་དང་ཤེས་རབ་གདེངས་ལྡན་པས། །པདྨ་ལ་ནི་འདམ་བཞིན་ནོ། །ཀུན་བརྟག་རང་བཞིན་ཆོས་རྣམས་ནི། །རྒྱུད་སྤངས་ཕྱོགས་གཅིག་རང་བཞིན་མེད། །ཕྱོགས་གཅིག་མཐའ་ཡིི་རང་བཞིན་དང་། །ཆོས་ཉིད་མཚན་ཉིད་ལ་སོགས་པ། །རང་བཞིན་ཡོད་འདོར་མེད་བསྒྲུབ་ཕྱིར། །སྤོང་ལེན་མཐར་གྱུར་རང་བཞིན་ཅན། །ནམ་མཁའ་དྭངས་པའི་དུས་ཉིད་དང་། །འཇའ་སྤྲིན་ཚོགས་ཀྱི་རང་བཞིན་ལྟ། །བཏགས་པའི་རང་བཞིན་ཐམས་ཅད་ཡ། །དེ་ཉིད་སྣང་ཕྱིར་གཉིས་མེད་པའོ། །དེ་བཞིན་དངོས་པོ་མེད་པ་དང་། །ཞེན་པ་མེད་ཅིང་གྲགས་པ་རྣམས། །ཡེ་མེད་སྔ་ལ་གཅིག་ལ་གཅིག །མེད་དང་ཞིག་མེད་འདོད་ལྟ་བ། །བཞི་ལ་གཉིས་པ་མེད་འདོད་པ། །མི་སྲིད་བཞི་ཡི་དཔེས་མཚོན་པར ། །འདོད་པ་སྣང་རིས་མི་མཐུན་པར། །ལྟ་བ་སྔོན་བཞིན་རྒྱུ་རིམ་བཞིན། །དེ་ཉིད་འབྲས་ལྟའི་རིམ་པ་གཉིས། །དྲུག་པོ་འདས་པའི་མཐར་ཞེན་ཅིང་། །ཕྱོགས་གཅིག་གཞི་ལ་གང་ལྟ་བ། །སྣ་ཚོགས་སྣང་བའི་གཞིར་མི་རུང་། །དེ་བས་མར་མེ་གསལ་དུས་ན། །མུན་པ་མ་སོང་སྒྲོས་མེད་དེ། །གསལ་ཉིད་གཉིས་སུ་མེད་པར་ལྟར། །དངོས་ཞེན་མ་རིག་ཡེ་ཤེས་པ། །སྤངས་དང་མི་གནས་འགལ་བ་མེད། །ཡིད་བཞིན་ནོར་བུའི་ཡོན་ཏན་ལྟར། །དངོས་གཉིས་ལྷུན་གྲུབ་ཅིར་ཡང་སྣང་། །ཆོས་ཀུན་གཞི་ཞེས་དེ་ཕྱིར་བྱའོ། །རྫུན་ལ་སོགས་པའི་རིག་པ་ནི། །རྒྱུ་ཡི་གཞི་འདོད་བདེན་ལྟ་བ། །ཕྱོགས་གཅིག་ཡིན་གྱི་ངེས་འཇོག་པ། །འབྱུང་བའི་གཞི་རྩར་ཐེ་ཚོམ་མེད། །ཐམས་ཅད་ཡེ་ནས་དབྱེར་མེད་ལ། །རིགས་དང་མི་རིགས་བླང་དོར་མེད། །གཉིས་མེད་སྟོན་པའི་ལུང་མན་ངག །རིག་པས་འཚོམས་པ་གོ་འབྱེད་པ། །དཔའ་བོའི་ལག་ཆ་ཇི་བཞིན་དུ། །རྣམ་གྲངས་ཀུན་ཀྱང་རྟོགས་པའི་ཐབས། །རིག་པ་མེད་ཀྱང་ཐབས་ཀྱིས་མཆོག །ཡིན་མིན་ཆོས་ལ་རྩོད་མི་བྱེད། །ཆོས་དང་གང་ཟག་བདག་མེད་པ། །དངོས་ལྟའི་བདག་མེད་ཉན་ཐོས་པས། །ཕྱོགས་ཙམ་སྟོང་པའི་ཆོས་བདག་མེད། །རྒྱུན་སྣང་དོན་འགོག་བདག་མེད་དང་། །གསལ་བ་ཕྱོགས་གཅིག་བདག་མེད་དང་། །རིགས་སྣང་བདག་མེད་ཡེ་ཤེས་སྣང་། །གསུམ་གཉིས་སྤོང་ལེན་བྱེད་པའི་ཕྱིར། །བདག་ཏུ་འཛིན་པའི་གཙོ་བོ་ཡིན། །ཕྱོགས་བཅུ་རང་བྱུང་ཡེ་ཤེས་ལ། །རང་བྱུང་འདི་འདྲའི་དངོས་མེད་པས། །ཆོས་དང་གང་ཟག་ཡོད་མ་ཡིན། །ལ་ལར་ཉི་མའང་མུན་རྐྱེན་ལྟར། །བདག་མེད་ཡེ་ཤེས་བདག་ཀུན་ལྡན། །གཉིས་མེད་བདག་མེད་བདག་ཉིད་ཆེ། །མེད་མཐར་ཐུག་པ་འདི་ལ་མེད། །གཞན་མེད་སྤྱོད་ཡུལ་མེད་པ་ཡང་། །ཕྲ་བས་གཞན་པའི་ཡོར་པོ་མེད། །ཟབ་པས་བརྟགས་པའི་དཔྱོད་བྱེད་མེད། །གཞན་ཡང་སྟོང་པས་མེད་པ་དང་། །འཁྲུལ་པས་མེད་དང་རྫུན་པས་མེད། །རིག་ཕྱིར་མེད་དང་ཡེ་ཤེས་ཕྱིར། །གཞན་མེད་པ་ཡང་དེ་བཞིན་ནོ། །དེ་བྲལ་འདོད་ཕྱིར་ལྕགས་ཀྱིས་དཀྲིས། །སྔོན་བཞིན་ཐམས་ཅད་ཡེ་ཤེས་ལ། །ངོ་བོ་གཅིག་ཕྱིར་ཆ་ཤས་མེད། །གཅིག་མཐའ་མེད་པས་ཀུན་ཏུ་ཤར། །གཉིས་སུ་མེད་པས་ཕུང་གསུམ་མེད། །དེ་ལ་སྨྲ་བསམ་མེད་པའི་ཕྱིར། །གཟུགས་འཛིན་ལྕགས་ཀྱིས་སྡོམ་པ་མེད། །ལྷ་རིག་གཉིས་ཀྱི་སྔོན་བརྗོད་པ། །འདོད་པ་ཐ་དད་ཡུལ་མཐོང་བའོ། །ཤེས་རབ་སྤྱན་གྱི་ངོ་བོ་སྟེ། །ཁྱད་པར་བཤད་པ་ཉིད་དུ་ཟད། །མཐོང་བའི་ལམ་དུ་གཅིག་སྨྲ་བའང་། །བཤེས་གཉེན་སྐྱེན་ཕྲད་སྔགས་མཐོང་གི། །དེ་མེད་རང་གི་མངོན་ཤེས་ཀྱིས། །མཐོང་ན་བཅུ་པའང་ཐོབ་པར་རིགས། །ལྟ་བའི་སྒྲིབ་པས་ཕྱེ་བའི་ཕྱིར། །ལས་དང་འབྲས་བུའི་ཁྱད་པར་ཆེ། །སྒྱུ་འཕྲུལ་དྲ་བའི་ཡེ་ཤེས་ལ། །བཅུ་དྲུག་གཉིས་སུ་འདོད་པ་དང་། །བཞི་དང་གཉིས་སུ་གནས་འགྱུར་འདོད། །རིགས་པ་བཞི་དང་ལྔར་འདོད་པ། །རང་རང་རྟགས་པའི་དོན་མཐོང་ཕྱིར། །མུན་པའི་རབ་མཆོག་ཡིན་ཞེས་བརྗོད། །བརྒྱད་དྲུག་ཚོགས་བཞི་སྣང་བཅས་པ། །སྤྱོད་ཡུལ་དངོས་པོ་སྣང་ངོ་ཅོག །རིག་པས་དབང་བསྒྱུར་བཞིན་སྣང་དང་། །སོ་སོའི་ཇི་ལྟར་བརྟགས་སྣང་དང་། །ངོ་བོས་ངེས་པར་རེད་མེད་ཕྱིར། །སེམས་ཉིད་འབའ་ཞིག་སྣང་བ་ཡང་། །འཁྲུལ་དུས་རང་བཞིན་མ་འཁྲུལ་དང་། །སོ་སོ་ཤེས་པ་བརྒྱད་ཆོས་ཕྱིར། །མིང་གསུམ་ལྡན་པའི་ཤེས་གཅིག་སྟེ། །གཅིག་དང་དུ་མ་ཀུན་དངོས་པས། །ཡེ་ཤེས་ཀུན་གྱི་བདག་ཉིད་པ། །ཆ་ཡི་ལྔ་དང་བརྒྱད་བརྗོད་པ། །རྩ་བ་རང་བྱུང་ཡེ་ཤེས་སོ། །ཡེ་ནས་ཤེས་པའི་བདག་ཉིད་པས། །མེ་ལོང་ལྟ་བུའི་ཚུལ་བཞིན་དུ། །སྣང་སྟོང་ཆོས་སུ་གྲགས་པ་ཀུན། །ཁ་དོག་དབྱིབས་སོགས་རང་སྣང་བའོ། །རྟག་ཆད་ཕྱིན་ཅི་ལོག་པའི་གྲངས། །དངོས་དང་ཐེར་ཟུག་སྐད་ཅིག་རྒྱུན། །མི་མཉམ་ངོ་བོ་ཉིད་རྟག་པ། །ཐ་མ་ཐེག་མཆོག་བཞེད་ཀུན་དང་། །ཞིག་མེད་ཡེ་ནས་ཆད་པ་དང་། །རྐྱེན་གྱི་རིགས་ཆད་ལ་སོགས་པ། །མེད་བཞིན་སྔོན་བཞིན་གསུངས་པ་ཡང་། །ཆེད་དུ་བྱས་པའི་བརྟགས་སྣང་ཟད། །སུམ་ཅུ་བརྒྱད་སོགས་མཐའ་རྣམས་ལ། །སྤོང་ལེན་བྲལ་འདོད་ཞེན་ཆགས་ཅན། །བདག་མེད་སྨྲ་བའི་བླང་དོར་མཁན། །བླང་དོར་མཐའ་ལ་མཁན་པོ་གནས། །མཆོག་འདིར་མཐའ་ཡི་གྲངས་དེ་ཡང་། །འདུ་ཤེས་ལྡོག་ཕྱིར་བརྗོད་པ་ལས། །དེ་དག་ཉིད་དུ་འདོད་པ་མེད། །སེམས་ཕྱིར་མི་སྤོང་རྐུན་བུ་ཡང་། །སོ་སོ་ཕྱོགས་ཀྱི་མ་རེག་པ། །སྒྱུ་འཕྲུལ་དྲྭ་བའི་ངོ་བོ་ལ། །ཐམས་ཅད་དག་ཅེས་བྱ་བ་ཡང་། །དངོས་པོ་བསལ་དག་མ་ཡིན་ཏེ། །སྣང་སྤྱོད་ཉིད་ན་རྣམ་པར་དག །དེ་ཕྱིར་ལྷག་པ་ཞེས་སུ་བརྗོད། །རང་བཞིན་སྒྱུ་འཕྲུལ་དྲྭ་བའི་དོན། །སངས་རྒྱས་སེམས་ཅན་ཐམས་ཅད་ཀུན། །ངོ་བོ་གཅིག་པའི་དེ་ཁོ་ན། །དེ་ནི་གཅིག་གི་མཐར་ཐུག་འགྱུར། །ཅིར་ཡང་སྣང་བའི་ཡེ་ཤེས་ཉིད། །བཅོས་མེད་ངེས་པའི་དེ་ཁོ་ན། །ལྷག་པའི་ཡེ་ཤེས་སྒྱུ་མ་དེ། །བྱས་འགྲོ་མེད་པར་ཅིར་ཡང་འཁྲུལ། །ནམ་མཁའི་ཆོ་འཕྲུལ་མཚོ་རླབས་བཞིན། །སྣང་བའི་དུས་ན་སྣང་མེད་དེ། །དབྱེར་མེད་པ་ལ་རིམ་མི་བྱེད། །དེ་ཕྱིར་གཅིག་ཅེས་མཚོན་ཐབས་བརྗོད། །དེ་ཁོ་འདྲ་བའི་མཆོག་ཡིན་ནོ། །ཐ་དད་སྤོང་བའི་གཅིག་འདོད་པ། །གཅིག་གི་མཐའ་ལ་ཞེན་པས་ནོར། །དག་པའི་འོག་ཏུ་གཅིག་པ་ལས། །མ་དག་གློ་བུར་སྣང་འདོད་པ། །ས་བོན་མེད་པའི་འབྲས་འདོད་པ། །སབ་རྟ་ཐོ་མི་ཐག་སྦྲུལ་དང་། །སྨིག་རྒྱུ་ཆུར་སྣང་ལྟར་མེད་པས། །སྣང་ཞེས་རིག་པས་སྒྲུབ་པ་ཡང་། །འཁྲུལ་ཏེ་དེ་ན་རི་བོང་རྭ། །འབྱུང་བ་ཉིད་དུ་ཐེ་ཚོམ་མེད། །གཞི་ལ་འདྲ་འཁྲུལ་ཆོས་ཡོད་ཕྱིར། །འདི་འདྲ་འཁྲུལ་པའི་ཆོས་མེད་ལྟར། །ལྷུན་གྲུབ་དབྱེར་མེད་ངང་ལས་སྣང་། །འཁོར་འདས་སྣང་ཡང་གྲུབ་པ་མེད། །ཡོད་པ་སུན་འབྱིན་ཆོས་འདི་ལ། །མེད་པར་སྨྲ་བ་བྱིས་པའི་བློ། །མེད་པར་སུན་འབྱིན་ཆོས་དག་ལ། །ཡོད་ལྟ་མིན་ཞེས་སྨྲ་བའང་ལོག །དབུས་འཛིན་སུན་འབྱིན་ཆོས་དག་ལ། །གཅིག་ཏུ་ལྟ་དགུར་བྱེད་པའང་འཁྲུལ། །མཐའ་བྲལ་འཛིན་པ་སུན་འབྱིན་པ། །དྲི་མས་བགོས་འདྲ་ནོར་བའི་མིག །ཀུན་གྱི་འབྱུང་གནས་བྱེད་པའོ། །དེ་ཡི་མ་བྱས་གང་ཡང་མེད། །ཁ་དོག་དབྱིབས་རིགས་ཀུན་དངོས་དང་། །ཁ་དོག་དབྱིབས་རིགས་གང་ཡང་མིན། །ཤིན་ཏུ་བརྟག་དཀའ་སུས་མི་རིགས། །རིག་མེད་ངང་ལ་ཐམས་ཅད་སྣང་། །བྱང་ཆུབ་སེམས་ཞེས་བརྗོད་པ་ནི། །སྐད་ཅིག་ཀུན་དངོས་རྒྱུད་མེད་ཕྱིར། །གང་ནས་མ་འོངས་གར་མི་འགྲོ། །རྟོག་མེད་རང་རིག་ཁོ་ནའོ། །ཤེས་བྱར་གྱུར་པའི་ཆོས་སོ་ཅོག །རིག་པ་ཡེ་ནས་རང་གསལ་ཕྱིར། །རང་རིག་ཤེས་བྱ་དམིགས་སྐྱེད་དམ། །དངོས་ཡུལ་ཙམ་ཡང་འདོད་མ་ཡིན། །བྱང་ཆུབ་སེམས་ཀྱི་ཐིག་ལེ་ནི། །ཀུན་ལ་ཁྱབ་ཅིང་མི་གནས་པ། །ཁ་དོག་ནས་རིམ་རིས་ཡོད་མིན། །ཡོན་ཏན་མཆོག་གི་སྙིང་པོ་ནི། །རྟོག་གེའི་སྤྱོད་ཡུལ་དེ་མ་ཡིན། །མཉམ་པའི་དོན་ཉིད་ཇི་ལྟ་བུ། །མཉམ་ཉིད་རང་བཞིན་གང་ཡང་མིན། །གཉིས་ཕྱིར་མིན་ཞེས་བརྗོད་པ་ལས། །ཕྱོགས་གཅིག་མིན་པ་སྨྲ་བརྗོད་འདས། །ཞེན་པ་བཟློག་ཕྱིར་རྐྱེན་བཤད་མ་རྟོགས་པ། །ཆོས་ཀྱི་ངང་ལ་ཚིག་མེད་བརྗོད་མེད་པའང་། །སྤང་བསལ་མེད་ཕྱོགས་ལོག་གསུམ་བལྟ་བ་སྟེ། །རང་བཞིན་ངོ་བོ་མཚན་ཉིད་མཆོག་ལས་གོལ་བ་ནི། འོག་མས་སྤངས་པའི་ལོག་རྟོག་གྲངས། །མཐའ་ཡས་མི་སྤོང་རང་རིག་ཕྱིར། །ལེན་པའི་ཆོས་རྣམས་བླང་དུ་མེད། །བླང་དོར་མེད་པའི་དོན་མཆོག་ནི། །ཞེན་བྲལ་མཐའ་འདས་འཆིང་གྲོལ་སོགས། །བླང་བྱ་ཀུན་གྱི་མཆོག་ཡིན་ཏེ། །དེ་ཉིད་བདག་ཡིན་བླ་མེད་པ། །ཉམས་སུ་བླངས་པའི་ཐབས་མཆོག་ཡིན། །སུས་ཀྱང་མ་བཅིངས་བཅིང་མེད་དེ། །བཅིང་བར་བྱ་བ་ཡོད་མ་ཡིན། །བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཡིད་བཞིན་ནོར་བུའི་ཡོན་ཏན་ལྟར། །བདེན་གསུམ་དོན་ཀྱང་དེ་ལྟར་སྣང་། །དོན་དུ་བདེན་དང་མི་བདེན་ཞེས། །གཉིས་པའི་རྟོག་པ་ངང་གིས་མེད། །དེ་མཐོང་ཤེས་རབ་མཆོག་གི་སྤྱན། །དམིགས་པའི་ཡུལ་གྱི་བལྟ་འདོད་པ། །གཟུང་འཛིན་ལམ་དུ་ཞུགས་པའི་ཕྱིར། །ནམ་ཡང་ལྷག་པའི་དོན་མི་མཐོང་། །རྟོག་པའི་ཡིད་དང་རྡོ་རྗེའི་མིག །སྔ་མ་མི་སྤོང་མི་ལེན་ཏེ། །དེ་སོགས་བརྒྱད་པོའི་རིགས་མེད་ཕྱིར། །བརྒྱད་བཞིའི་ཚོགས་རྣམས་གཅིག་ཡིན་ཏེ། །རང་རིག་ཚོགས་གཅིག་དབང་དྲུག་མཆོག །སོ་སོའི་རྒྱུད་དུ་དབྱེར་མེད་དེ། །བརྟགས་པས་ཐ་སྙད་སྣང་དུས་ན། །ངོ་བོས་གཅིག་པ་རྡོ་རྗེ་ཡིན། །ཡུལ་མེད་རང་གསལ་ཤེས་རབ་སྤྱན། །ཤེས་པ་སྤྱོད་ཡུལ་གཉིས་སུ་མེད། །ཤེས་དང་ཤེས་པར་བྱ་མེད་པའི། །ཡེ་ཤེས་སྒྲོན་མེ་སྦྲེང་བར་ནི། །རྒྱུད་མེད་རྒྱུན་དུ་རང་ཤར་བས། །ཕྱོགས་བཅུའི་ཞིང་ཁམས་ཐམས་ཅད་མཐོང་། །ཐམས་ཅད་མཁྱེན་པའི་ཤེས་རབ་སྤྱན། །གོ་ཚིམ་མྱོང་རེག་རིག་སོགས་ཆོས། །མི་གྲངས་དྲུག་བཞི་གཉིས་སུ་གྲངས། །དེ་ལྟར་ངེས་པའི་ལྟ་བ་ལ། །ཞེན་པའི་ལམ་དུ་འགྲོ་ས་མེད། །འཇུག་པའི་དུས་ན་གཅིག་པོ་ཉིད། །ངེས་པར་རང་གསལ་མི་གཡོ་ལ། །རྟོག་གེ་པ་དག་དེ་ལྟ་ན། །བོགས་དང་ཡོན་ཏན་འགག་འགྱུར་ཞེས། །སོམ་ཉི་ཟ་ཞིང་ཡུལ་མིན་པས། །གཉིས་སུ་བསླབ་པ་ཞེས་བྱ་བ། །དེ་བཞིན་གཤེགས་པའི་སྤྱོད་ཡུལ་ཏེ། །བློ་རྩལ་རབ་ཀྱིས་རྟོགས་འགྱུར་ཞིང་། །བརྗོད་བཞིན་ཤེས་པ་ངེས་སྐྱེ་ཕྱིར། །ཟབ་བརྗོད་ཟབ་མོར་ངེས་པར་སྐྱེ། །ཟབ་མོའི་ཚེ་ན་བློ་ཅན་གྱིས། །རང་གི་མཚན་ཉིད་མངོན་རྟོགས་ཕྱིར། །འདོད་པ་མེད་པར་ཞོར་སོགས་སོགས། །འབྱུང་བ་ཉིད་ན་གཡོས་པ་མེད། །རྣལ་འབྱོར་ཐབས་དང་ཤེས་རབ་ལམ། །རིམ་པར་མངོན་བྱས་སྟོབས་འགྱུར་ན། །དཔག་བསམ་ཤིང་དང་རིན་ཆེན་ལྟར། །ངོ་མཚར་རྨད་བྱུང་འབྲས་བུ་ལྔ། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཡང་དག་རྫོགས་སངས་རྒྱས་ཤེས་བྱ། །རིག་འཛིན་གསུམ་པའི་གང་དེ་ཉིད། །སྲིད་པ་ཐ་མ་མཛོད་རྫོགས་པས། །དེ་ལ་དབང་སྐུར་མངོན་སངས་རྒྱས། །རྡོ་རྗེ་འཛིན་པར་ཐེ་ཚོམ་མེད། །སྐལ་བ་སྣོད་ཤེས་དད་བརྩོན་ཤེས། །མཆོག་རྣམས་ཀུན་གྱི་བརྟག་བྱ་བགྱིས། །དེ་ལྡོག་ཡུལ་མིན་སྒྲོ་སྐུར་ལ། །མིང་ཙམ་དོན་ཕྱིར་བསྟན་མི་བྱ། །བསྐལ་མུན་ནང་གི་རིན་ཆེན་ནོར། །སྒྲོན་མེས་རྙེད་གྱུར་དབུལ་སེལ་ལྟར། །སྐལ་བ་ཐུགས་ཀྱི་རིན་ཆེན་ནོར། །སྟོར་ཚིག་སྒྲོན་མ་འདིས་རྙེད་ཤོག །ཐུགས་ཀྱི་སྒྲོན་མ་གཉན་དཔལ་དབྱངས་ཀྱིས་མཛད་པ་རྫོགས་སོ།། །།
ལྟ་བ་ཡང་དག་སྒྲོན་མ། གཉེན་དཔལ་དབྱངས།
ལྟ་བ་ཡང་དག་སྒྲོན་མ་བཞུགས། དཔལ་ལྡན་ཐུགས་ཀྱི་དཀྱིལ་འཁོར་ཉི་མའི་འོད་སྟོང་གིས། །ཤིན་ཏུ་འབར་བའི་ཟེར་ཙམ་བདག་བློ་མུན་པར་བྱུང་། །དབྱངས་དང་ཚིག་འདས་ནམ་མཁའི་མཚན་ཉིད་ལས་འདས་པའི། །རང་སེམས་སྐྱེ་མེད་ཟབ་མོའི་དོན་གྱི་ཕྱོགས་ཙམ་སྣང་། །རང་གིས་རྟོགས་པ་མཁས་པས་གསུངས་པའི་རྣམ་མང་བ། །རྟོག་གེ་བདག་འདྲའི་སྤྱོད་ཡུལ་བརྩམ་པར་མི་འོས་ཀྱང་། །རིག་པའི་བརྗོད་བྱང་ཙམ་འདི་ངེས་དོན་མོས་རྣམས་ཀྱི། །ཆོས་ཕྱིར་འབྲང་བའི་བློ་ཡིས་དཔྱད་ཅིང་གོམས་པར་བྱ། །བསྐལ་པ་མང་པོར་རྒྱལ་བ་རྣམས་ལ་ནི། །དགེ་རྩ་བསྐྱེད་ཅིང་རང་སེམས་སྦྱངས་པ་ཡིས། །རྣལ་འབྱོར་དམ་པ་ངེས་པའི་ལུང་ཆེན་མ། །ཤེས་རབ་མཆོག་ལྡན་རིག་པའི་མོས་བློ་གསལ། །རྣམ་པར་མི་རྟོག་དོན་དམ་རང་བཞིན་གྱི། །རིག་པའི་ཚུལ་ཆེན་སེམས་ཀྱིས་དམིགས་པ་ནི། །ལུང་དང་མན་ངག་རིགས་པས་ཐག་བཅད་དེ། །ཆོས་ཀྱི་རང་བཞིན་ཡང་དག་ཡིད་ཆེས་བྱ། །ཇི་ལྟར་ནམ་མཁའ་ལ་ནི་ཐ་སྙད་དུ། །མིང་དང་ཚིག་གིས་བརྗོད་པར་བྱེད་མོད་ཀྱི། །མཚན་མ་མེད་ཅིང་སྤྲོས་དང་བྲལ་བ་སྟེ། །ངོ་བོ་ཉིད་ཀྱིས་སེམས་ཀྱི་ཡུལ་ལ་འདས། ། ཇི་ལྟར་སྨིག་རྒྱུའི་ཕུང་པོ་སྣང་བ་དག །སྣང་བ་ཉིད་ན་ནམ་མཁའི་རང་བཞིན་ལྟར། །དེ་བཞིན་ཆོས་རྣམས་སྣ་ཚོགས་སྣང་བ་ཡང་། །སྣང་བ་ཉིད་ན་མཚན་མེད་ནམ་མཁའ་བཞིན། །རྒྱ་ཆེ་རབ་ཟབ་ཐེག་མཆོག་ཡངས་པའི་ལམ། །དོན་དམ་དམིགས་མེད་སྤྲོས་པ་ཀུན་ལས་འདས། །བདག་དང་ཆོས་ཀྱི་དབྱིངས་སུ་མཉམ་པ་ཡི། །དབུ་མའི་དོན་ཅན་བློ་ཡིས་གོ་བར་བྱོས། །ཡང་དག་དོན་དམ་ཅིག་ཅར་གོ་ནས་ནི། །ཡོད་མེད་ལ་སོགས་སེམས་ཀྱི་ཡུལ་འདས་ཤིང་། །རེ་དང་དོགས་པའི་མཐའ་ནི་རབ་སྤངས་ནས། །རྩོལ་བ་མེད་པའི་བརྩོན་འགྲུས་བརྩམ་པར་བྱ། །ཆོས་རྣམས་ཐམས་ཅད་ཡེ་ནས་རོ་གཅིག་ཕྱིར། །སྒོམ་པ་དང་ནི་བསྒོམ་བྱའང་དམིགས་སུ་མེད། །སེམས་ཉིད་ཡེ་ནས་ཆོས་ཉིད་ཡིན་ཤེས་ན། །ཆོས་ཀྱི་དབྱིངས་ཉིད་གཞན་དུ་བསྒོམ་མི་དགོས། །རྨི་ལམ་དག་གི་བདེ་དང་སྡུག་བསྔལ་དག །སད་པར་གྱུར་ན་རང་བཞིན་མཉམ་པ་ལྟར། །རྣམ་པར་རྟོག་དང་མི་རྟོག་གཉིས་ཀ་ཡང་། །ཤེས་པས་རིག་ན་རང་བཞིན་ཡོངས་ཀྱིས་མཉམ། །དེ་ལྟར་དུས་གསུམ་རྣམ་པར་དག་པ་དང་། །རང་བཞིན་ཉིད་ལས་མ་འདས་ཤེས་ན་ནི། །སྒྲོ་འདོགས་བུས་པའི་རྗེས་སུ་མ་འབྲངས་ནས། །རང་བཞིན་ཉིད་དུ་ཡོང་གིས་བཅོས་མི་དགོས། །ཇི་ལྟར་ནམ་མཁའ་མཚན་མ་མེད་པའི་ཕྱིར། །ནམ་མཁའ་དེ་ཉིད་བསྒོམ་པར་མི་འགྱུར་བཞིན། །ངོ་བོ་ཉིད་ཀྱིས་མ་སྐྱེས་སེམས་ཀྱིས་ནི། །མ་སྐྱེས་དེ་ཉིད་བསྒོམ་པར་ག་ལ་འགྱུར། །མི་མཐུན་པ་དང་གཉེན་པོ་དབྱེར་མེད་དོན། །རང་གིས་ཤེས་ན་རྩོལ་བ་ཀུན་སྤངས་ཏེ། །བཏང་སྙོམས་ཆེན་པོར་མ་བཅོས་ངང་བཞག་ན། །ཐ་སྙད་ཙམ་དུའང་བསྒོམ་ཞེས་དེ་ལ་བྱ། །སྐྱོན་དང་ཡོན་ཏན་གཉིས་པོ་མ་སྐྱེས་ཕྱིར། །རྣམ་པར་རྟོག་པའི་མཚན་མ་ཅི་བྱུང་ཡང་། །མ་བཀག་རང་བྱུང་མ་འབྲངས་རང་ཞི་སྟེ། །མ་བཅོས་མ་བྱས་རང་གི་ངང་གིས་རྒྱལ། །ལྟ་བ་ཡང་དག་སྒྲོན་མ་རྫོགས་སོ།། །།གཉན་ཨཱ་ཙརྻ་དཔལ་དབྱངས་ཀྱིས་མཛད་པའོ།།
མཐའ་ཡི་མུན་སེལ་སྒྲོན་མ། དཔལ་དབྱངས།
༈ མཐའ་ཡི་མུན་སེལ་སྒྲོན་མ་བཞུགས་སོ། །ཆོས་རྣམས་སེམས་ཀྱི་འཁྲུལ་པ་སྟེ། །སེམས་ལས་མ་གཏོགས་ཆོས་གཞན་མེད། །ཆོས་སུ་སྣང་བ་འཁྲུལ་པའི་སེམས། །རྟེན་འབྲེལ་སྒྱུ་མ་སྐྱེ་བ་མེད། །སྐྱེ་བ་མེད་ཅེས་བསྟན་པ་ཡང་། །དངོས་པོར་འཛིན་པ་བཟློག་ཕྱིར་ཏེ། །སྒྱུ་མ་ཡེ་ནས་སྐྱེ་མེད་ལ། །སྐྱེ་མེད་གནས་ཀྱི་སྒྲ་མི་གདགས། །ནམ་མཁའ་འདི་ནི་མེད་དོ་ཞེས། །བླུན་པོ་གང་ཞིག་རྟོག་པར་བྱེད། །མཁས་པ་སྔོན་ནས་ཡོད་མི་འཛིན། །མེད་པར་མི་རྟོག་ཚིག་མི་བརྗོད། །སེམས་ལས་མ་གཏོགས་ཆོས་མེད་ཕྱིར། །བསྒོམ་བྱའི་ཆོས་ཉིད་གུད་ན་མེད། །སེམས་ཀྱང་ཡེ་ནས་མ་སྐྱེས་ནས། །སྒོམ་པ་པོ་ཡང་གང་ལ་ཡོད། །བརྗོད་པའི་རྩ་བ་སེམས་ཉིད་ནི། །མ་སྐྱེས་དངོས་གཞི་ཡོད་མིན་ན། །སྒོམ་དང་བསྒོམ་དུ་མེད་པ་ཡི། །ཐ་སྙད་གང་ཞིག་གང་ལ་འཇུག །འགྲོ་ལ་སེམས་རྒྱུད་གཉིས་མི་འཆང་། །དེ་ནི་མ་སྐྱེས་རང་མི་དམིགས། །དེ་ལས་གཞན་པའི་སེམས་མེད་ཕྱིར། །བཅོས་ཤིང་གནས་པ་གང་ཞིག་ཡོད། །འཁྲུལ་རྟོག་རྐྱེན་དང་ལྡན་གྱི་བར། །སྨིག་རྒྱུ་བཞིན་དུ་སེམས་སྣང་ན། །རང་བཞིན་ཤེས་པས་བཅོས་སུ་མེད། །མི་ཤེས་སྨིག་རྒྱུ་བཅོས་པ་བཞིན། །མི་རྟོག་མཚན་མེད་སེམས་རྣམས་ཀྱི། །མཚན་མ་མེད་ལའང་གནས་མི་བྱེད། །མཚན་མ་མེད་ལ་མི་གནས་ན། །མཚན་མར་གནས་པ་སྨོས་ཅི་དགོས། །བསྒྲུབ་པ་མེད་ཅིང་གནས་པ་མེད། །འདུ་བྱེད་མེད་པ་མཁའ་འདྲ་བས། །འདུ་བྱེད་ལས་བྱུང་བསམ་གཏན་སྐྱེན། །མ་ལུས་ཀུན་གྱི་དགོས་པ་མེད། །ཇི་ལྟར་རྟོག་མེད་ཟབ་མོ་ཞིག །བློ་ཡི་ཡུལ་དུ་སྣང་ཞེ་ན། །མི་རྟོག་ཟབ་མོའི་ཉམས་མྱོང་བ། །མྱོང་བ་ཡིན་ཕྱིར་དེ་ཉིད་མིན། །ལྟ་བ་སྒོམ་ཆུང་མཐའི་མུན་སེལ་སྒྲོན་མེ། །བོད་ཀྱི་པཎྜི་ཏ་ཨཱ་ཙརྻ་གཉན་དཔལ་དབྱངས་ཀྱི་མཛད་པའོ།།
ཐབས་ཤེས་སྒྲོན་མ། དཔལ་དབྱངས།
༈ ཐབས་ཤེས་སྒྲོན་མ་བཞུགས་སོ། །དུས་གསུམ་རྒྱལ་བས་ཇི་ལྟར་ཐུགས་ཆུད་པའི། །ཆོས་ཀྱི་རང་བཞིན་རིག་པའི་རྣལ་འབྱོར་པས། །མཐོ་བ་ཐོབ་ཕྱིར་བརྩོན་པར་མི་བྱེད་ཀྱང་། །སྙིང་རྗེའི་བྱེ་བྲག་ཐབས་ཀྱི་སྤྱོད་པའང་སྟོན། །ཇི་ལྟར་མཁའ་ལ་འཇའ་ཚོན་རྣམ་མང་ཡང་། །ནམ་མཁའི་ངང་དུ་རོ་གཅིག་བྱེ་བྲག་མེད། །དེ་བཞིན་རྒྱལ་བའི་གཟུགས་སྐུ་རྣམ་མང་ཡང་། །ཡེ་ཤེས་དབྱིངས་སུ་རོ་གཅིག་བྱེ་བྲག་མེད། །བདེ་གཤེགས་སྙིང་པོ་སེམས་ཀྱི་རང་བཞིན་ལ། །ཡུན་རིང་དུས་ནས་རྨོངས་པའི་སེམས་ཅན་རྣམས། །བདག་ཏུ་འཛིན་པའི་སེམས་རྒྱུད་སོ་སོར་སྣང་། །རང་བཞིན་ཉིད་ནི་རྒྱལ་བའི་ཆོས་སྐུར་གཅིག །ཡེ་ཤེས་སྒྱུ་མར་སྣང་བའི་སངས་རྒྱས་དང་། །ལོག་རྟོག་སྒྱུ་མར་སྣང་བའི་སེམས་ཅན་གཉིས། །ཡེ་ཤེས་ལོག་རྟོག་ཁྱད་པར་བསམ་ཡས་ཀྱང་། །སྒྱུ་མ་ཡིན་ཕྱིར་རང་བཞིན་ཡོངས་ཀྱིས་མཉམ། །སེམས་ཅན་སངས་རྒྱས་བདེན་པར་ཚུལ་གཅིག་ཅིང་། །རང་གི་སེམས་ཉིད་སངས་རྒྱས་ཡིན་ཤེས་ན། །གཞན་ནས་བསྒྲུབ་པར་བྱ་བ་ཅི་ཡང་མེད། །དེ་ལྟ་བས་ན་སྤང་བར་བྱ་བའང་མེད། །འདི་ལྟ་བུ་ཡི་ཆོས་ཀྱིས་ཚུལ་རིག་ན། །མ་རིག་རྣམས་ལ་སྙིང་རྗེ་ཡོངས་ཀྱི་སྐྱེ། །སྙིང་རྗེ་སྐྱེས་ནས་རྒྱུ་མའི་ཏིང་འཛིན་གྱིས། །ཕན་འདོགས་ཐབས་ཀྱིས་སྤྱོད་པ་ཅིར་ཡང་སྟོན། །སངས་རྒྱས་རྣམས་ཀྱི་དགོངས་པ་ཇི་ལྟ་བ། །སེམས་ཀྱི་རང་བཞིན་གནས་མེད་དེ་ལྟར་བསྒོམ། །ཐུགས་རྗེའི་འབད་པ་རབ་འབྱམས་ཇི་ལྟ་བ། །རྣལ་འབྱོར་ཐབས་ཀྱིས་ཏིང་འཛིན་དེ་ལྟར་སྤྲུལ། །བདག་དང་བདག་གིར་འཛིན་པ་མེད་པའི་ཕྱིར། །ཕ་རོལ་ཕྱིན་དྲུག་དམིགས་མེད་རྫོགས་པར་ལྡན། །ཐབས་ཀྱི་སྤྱོད་པས་གདུལ་བྱ་ཀུན་འདུལ་ཡང་། །སྒྱུ་མའི་བློ་ལྡན་རློམ་སེམས་ཅི་ཡང་མེད། །མ་སྐྱེས་སེམས་ལ་སེམས་ཅན་མེད་པའི་ཕྱིར། །ངོ་བོ་ཉིད་ཀྱི་ཆོས་སྐུའི་ང་རྒྱལ་འཆང་། །ཆོས་ཀུན་སྒྱུ་མར་མངོན་སུམ་གསལ་བའི་ཕྱིར། །ཏིང་འཛིན་སྒྱུ་མས་ཅི་འདུལ་དེ་ལྟར་སྟོན། །ཆོས་སྐུ་མཉམ་ཉིད་རྟོགས་ནས་འགྲོ་དོན་དུ། །བདེ་གཤེགས་བྱིན་རླབས་ཅིར་ཡང་སྟོན་པ་ལྟར། །བདག་ཉིད་ཆོས་སྐུ་རིག་པའི་རྣལ་འབྱོར་པས། །ཐབས་ཀྱིས་བྱེ་བྲག་ད་ནས་དེ་ལྟར་མཛོད། །ཐབས་དང་ཤེས་རབ་ལྡན་པའི་སྒྲོན་མ་རྫོགས་སོ། །སློབ་དཔོན་དཔལ་དབྱངས་ཀྱིས་མཛད་པའོ།། །།མངྒ་ལམ།། ༈
ལྟ་བའི་སྒྲོན་མེ། དཔལ་དབྱངས།
ལྟ་བའི་སྒྲོན་མ་བཞུགས་སོ། །གདོད་ནས་མ་སྐྱེས་རྣམ་དག་བྱང་ཆུབ་སེམས། །རྒྱལ་བ་རྒྱ་མཚོའི་ཐུགས་དང་ཡེ་ནས་མཉམ། །རིག་དང་གཏི་མུག་སྒྱུ་མའི་ཁྱད་པར་ལས། །སྲིད་དང་རྣམ་གྲོལ་རྒྱུ་དང་འབྲས་བུར་སྣང་། །དངོས་པོ་མེད་ཕྱིར་དངོས་པོར་རྟོག་པའང་མེད། །ཆོས་ཅན་མི་དམིགས་ཆོས་ཉིད་ཡོད་མ་ཡིན། །ཞེས་པ་བཟློག་ཕྱིར་རྐྱེན་བཤད་མ་གཏོགས་པ། །ཆོས་ཀྱི་ངང་ལ་ཚིག་མེད་བརྗོད་དུ་མེད། །སྣང་བ་ཉིད་ན་མེད་པའི་སྨིག་རྒྱུ་ལ། །ཤེས་ལྡན་རྣམས་ནི་མེད་པའི་བློ་མི་འབྱུང་། །ཆོས་རྣམས་རང་བཞིན་མ་སྐྱེས་རྟོག་པ་ཡིས། །མཁས་པས་སྐྱེ་མེད་སྟོང་པར་སྒྲོ་མི་འདོགས། །ཇི་བཞིན་མ་སྐྱེས་གདོད་ནས་ཞི་བ་ཡི། །གཉིས་མེད་སྤྲོས་བྲལ་རང་རིག་བློ་ལྡན་པ། །བརྗོད་མེད་ངང་ཙམ་དུ་ཡང་མི་གནས་ན། །དངོས་དང་ཐ་སྙད་འཛིན་པར་ག་ལ་འགྱུར། །བདག་མེད་ཆོས་སྐུ་བྱང་ཆུབ་སྙིང་པོ་ལས། །གཞན་ནས་བཙལ་ཞིང་ཐོབ་པ་མ་ཡིན་ཡང་། །རྨི་ལམ་སད་ནས་གཟུགས་དང་བྲལ་བ་བཞིན། །སྒྲིབ་སྤངས་བྱང་ཆུབ་ཐོབ་ཅེས་རྒྱལ་བས་གསུངས། །རྨི་ལམ་སྐྱེས་བུས་དུག་འཐུངས་ཇི་བཞིན་དུ། །སྲིད་རྒྱུ་ཉོན་མོངས་ལས་རྣམས་དེ་ལྟར་ཤེས། །རྨི་ལམ་དུག་ནད་སྡུག་བསྔལ་བཟོད་དཀའ་བ། །སྐྱེ་རྒ་ན་འཆི་འཁོར་བའི་སྡུག་བསྔལ་ཡིན། །རྨི་ལམ་ནད་སེལ་སྨན་དང་འདྲ་བ་ནི། །འཕགས་ལམ་རྣམ་ཐར་མང་པོར་རིག་པར་བྱ། །སྡུག་བསྔལ་ཁད་ཀྱིས་འབྱང་བའི་སྐད་ཅིག་མ། །ཤེས་རབ་ཏིང་འཛིན་ཁྱད་པར་སྐྱེ་བའི་ཚུལ། །རྨི་ལམ་ནད་བསལ་སོས་པའི་བདེ་རྙེད་པ། །སེམས་ཀྱི་རང་བཞིན་བྱང་ཆུབ་ཐོབ་པའི་དཔེ། །རྨི་ལམ་ཉིད་ན་རྒྱུ་འབྲས་མི་བསླུ་བཞིན། །མ་རིག་གཉིད་ལོག་རྣམས་ལ་དེ་ལྟར་ངེས། །རྨོངས་པའི་གཉིད་སད་ཤེས་རབ་ལྡན་པ་དང་། །འཁོར་བ་རྨི་ལམ་ལྟ་བུའི་དབང་ཙམ་དུ། །འཕགས་ལམ་དོན་བརྩོན་འབྲས་བུ་རིག་པར་གསལ། །རང་བཞིན་མི་འགྱུར་ཐོབ་པའི་རློམ་སེམས་མེད། །མཉམ་པའི་དོན་ཉིད་བློ་དང་མ་མཉམ་ན། །ཚིག་གི་མཉམ་པས་རྟོག་པའི་ཀླུང་མི་ཟློག །དམྱལ་སོགས་འཁོར་བས་མཉམ་ལས་མ་གཡོས་ཀྱང་། །སྡུག་བསྔལ་མི་བཟད་སྲིད་ལས་འཁྱམས་པར་སྣང་། །ཡེ་ནས་རྣམ་དག་ཐོབ་པ་མེད་རིག་ནས། །ཤེས་རབ་ཐབས་ཀྱི་རྣལ་འབྱོར་རབ་བརྩོན་ཞིང་། །སྐུ་གསུང་ཆེ་ནའི་ཡོན་ཏན་ཀུན་བསྡུས་པས། །མཚན་མའི་ཉེས་དང་ལྡན་པ་ག་ལ་ཡིན། །ཤེས་རབ་མཆོག་གིས་ལོག་རྟོག་སེམས་སྦྱངས་ནས། །ཡེ་ཤེས་ཚོགས་ཆེན་རྒྱལ་བ་ཆོས་ཀྱི་སྐུ། །དཔེ་བྱད་མཚན་གྱི་ཏིང་འཛིན་དབང་ཐོབ་ནས། །བསོད་ནམས་ཚོགས་ཆེན་རྒྱལ་བ་གཟུགས་ཀྱི་སྐུ། །རྣམ་སྨིན་ཚུལ་གྱིས་གྲུབ་པར་མི་བལྟ་ཞིང་། །ཡེ་ཤེས་གཞན་ནས་ཐོབ་པར་མི་བྱེད་དེ། །སྐུ་གསུམ་ཇི་བཞིན་སྦྱོར་བས་འབྲས་བུའི་མཆོག །རྩོལ་བྱས་སྒྲུབ་པའི་དབང་གིས་རྒྱུ་ཡང་ཡིན། །རང་སེམས་རྣལ་འབྱོར་ཤེས་རབ་ཏིང་འཛིན་ཡིན། །སེམས་ཅན་ཉིད་ན་བདེ་གཤེགས་ཡུལ་ལ་འཇུག །དག་པའི་ཞིང་དུ་སྨིན་པར་མི་བྱེད་དེ། །སྙིགས་མ་ལྔ་ཉིད་བདེ་ལྡན་གནས་སུ་བསྒོམ། །ཤེས་རབ་གནས་མེད་ཆགས་པའི་རྡུལ་བྲལ་ཡང་། །སྙིང་རྗེ་སེམས་ཅན་ཁམས་ལ་སྐྱེ་བ་མེད། །སྒྱུ་མའི་མཚན་ཉིད་མ་འགགས་མངོན་སུམ་སྟེ། །མཚན་མེད་རོ་གཅིག་དོན་དམ་དབྱིངས་སུ་རྟོགས། །སློབ་དཔོན་དཔལ་དབྱངས་ཀྱིས་མཛད་པ་ལྟ་བ་རིན་པོ་ཆེ་སྒྲོན་མ་ཞེས་བྱ་བ་རྫོགས་སོ།། །།
རྣལ་འབྱོར་སྤྱོད་པའི་ལུགས་ངེས་པའི་དོན་ལ་ཇི་བཞིན་སྒོམ་ཐབས། དཔལ་དབྱངས།
རྣལ་འབྱོར་སྤྱོད་པའི་ལུགས་ངེས་པའི་དོན་ལ་ཇི་བཞིན་སྒོམ་ཐབས་ཀྱི་སྒྲོན་མ་བཞུགས་སོ། །ཇི་བཞིན་པ་ཡི་ཆོས་བཙན་པར། །ཆོས་ལ་ཆོས་ནི་མི་འཇུག་སྟེ། །ཇི་ཙམ་ཟབ་པའི་ཚིག་བརྗོད་ཀྱང་། །དོན་དང་མཐུན་པར་མི་འགྱུར་རོ། །སེམས་ནི་ཅི་ལའང་མི་གནས་དང་། །ཅི་ལའང་མི་དམིགས་ཞེས་བྱ་བ། །སེམས་ལ་གནས་དམིགས་སྐྱོན་སེལ་བའི། །སེམས་འཛིན་ཕྲ་མོ་དེ་ལ་ཡོད། །སྨིག་རྒྱུ་བཞིན་དུ་སེམས་མེད་ན། །མི་གནས་མི་དམིགས་བྱེད་པ་གང་། །ནམ་མཁའ་རང་ལའང་མི་གནས་ཞེས། །བསྒོམ་པ་དོན་དང་ལྡན་མ་ཡིན། །དེ་བཞིན་སྐྱིལ་ཀྲུང་འདུག་པ་དང་། །ལུས་ཀྱི་བཅོས་པ་ཐམས་ཅད་ཀྱང་། །ལུས་རྟོག་མངོན་པར་ཞེན་ལས་བྱུང་། །ལུས་མེད་མཁའ་ལ་བཅོས་སུ་མེད། །སྒྱུ་མ་བཞིན་དུ་ལུས་ཤེས་ན། །དྲང་འདུག་སྐྱིལ་ཀྲུང་འཆའ་བ་མེད། །སྤྱོད་ལམ་གསུམ་གྱི་གནས་པ་གང་། །ཆེད་དུ་བྱ་མེད་བྱེད་པའང་མེད། །ལུས་སེམས་མ་སྐྱེས་གཞི་མེད་པ། །མཁའ་ལྟར་བཅོས་པའི་ཁ་ན་མེད། །ཚད་མར་ལུས་སེམས་འཆོས་བྱེད་པ། །འཛིན་པའི་ཕུར་པ་དེ་ལ་ཡོད། །ཇི་ལྟར་མཚན་མེད་ནམ་མཁའ་ནི། །དམིགས་དང་དམིགས་མེད་རྩོལ་དང་བྲལ། །དེ་བཞིན་སེམས་ཉིད་ནམ་མཁའ་ཡང་། །རང་བཞིན་ཉིད་ཀྱིས་དེ་ལྟའོ། །ལུས་ལ་སོགས་ཀྱང་དེ་བཞིན་ཏེ། །རྩོལ་བ་མེད་ཕྱིར་གང་ལྟར་ཡང་། །གནས་པ་མེད་དེ་མི་གནས་ན། །མི་འགལ་ཙམ་དུ་གྱུར་པ་ཡིན། །རྣལ་འབྱོར་སྤྱོད་པའི་ལུགས་ངེས་པའི་དོན་ལ་ཇི་བཞིན་སྒོམ་ཐབས་གཉན་དཔལ་དབྱངས་ཀྱིས་མཛད་པ་རྫོགས་སོ། །དགེའོ།། །།
སྒྱུ་འཕྲུལ་རྒྱས་པའི་སྒྲུབ་ཐབས་འོད་ཀྱི་རིམ་པ། སློབ་དཔོན་བི་མ་ལ་མི་ཏྲ།
སྒྱུ་འཕྲུལ་རྒྱས་པའི་སྒྲུབ་ཐབས་འོད་ཀྱི་རིམ་པ་བཞུགས་སོ། །རྒྱ་གར་སྐད་དུ། བཛྲ་ས་ཏྭ་མཱ་ཡ་ཛ་ལ་ཀྲ་མ་པྲ་བྷཱ་ནཱ་མ། བོད་སྐད་དུ། རྡོ་རྗེ་སེམས་དཔའི་སྒྱུ་འཕྲུལ་དྲྭ་བའི་འོད་ཀྱི་རིམ་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྒྱུ་འཕྲུལ་དྲྭ་བའི་རྒྱུད་དག་གིས། །མཐར་ཕྱིན་ལྷ་ཡི་རྣལ་འབྱོར་གྱི། །སྒོམ་ཐབས་རིམ་པ་མདོ་ཙམ་ཞིག །ལེགས་པར་བསྡུས་ཏེ་བསྟན་པར་བྱ། ༈ །མ་རྟོགས་པ་དང་ལོག་པར་རྟོག །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཡི་གེ་སྒྲས་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་གནས་ཕྱིར། །མཉེས་པའི་ཐབས་ཀྱིས་ཟིན་པར་བྱ། །ཐོས་བསམ་སྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུངས། །སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །གང་ན་གསང་ཆེན་འདི་ཡོད་པར། །མེ་མ་མུར་གྱི་འོབ་འབོགས་ཤིང་། །སྤུ་གྲི་སོ་ནི་གཏམས་པ་ལ། །འཛེགས་ནས་ཕུ་དག་འགྲོ་བར་བྱོས། །ཁོང་ན་གནས་པའི་ཡང་ཁོང་དུ། །ལྕགས་ཀྱི་སྒྲོམ་བུ་ཁ་བསྡམ་མོ། ༈ །སློབ་དཔོན་ངེས་པར་མཉེས་བྱས་ཤིང་། །སྒྱུ་འཕྲུལ་རི་མོའི་དཀྱིལ་འཁོར་དུ། །དབང་རྣམས་ཐོབ་པར་བྱས་པ་དང་། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །སྔགས་དང་ཆོ་ག་ཡན་ལག་ཀུན། །ཚང་ཞིང་ལམ་ལ་གོམས་འདོད་པས། །ཁེང་དྲེགས་འདོད་པ་ཀུན་སྤངས་ཏེ། །དཀའ་ཐུབ་གདུང་པས་མ་ཉེན་པར། །གནས་དང་ལོངས་སྤྱོད་ཅི་བདེ་བར། །མ་ཉམས་བློ་ལྡན་ཚོགས་པས་འགྲུབ། །རི་བོ་དབེན་པའི་ས་ཕྱོགས་ནི། །མེ་ཏོག་ཤིང་དང་བཀྲ་ཤིས་བྱ། །སྙན་པའི་སྒྲ་ལྡན་བར་ཆད་མེད། །ཆུ་བོ་ནུབ་ནས་ཤར་འབབ་ཅིང་། །བར་སྣང་མཚན་ལྡན་བསམ་སྒོ་ཉུང་། །རྣལ་འབྱོར་སྤྱོད་ལ་དོགས་མེད་པར། །ཡོ་བྱད་བཙལ་སླ་མཆོག་ཡིན་ཏེ། །ཡོན་ཏན་བཟློག་པ་སྤང་བར་བྱ། །བསམ་སྤྱོད་མཐུན་པའི་ས་ཕྱོགས་དེར། །ས་ཡི་བྱ་བ་རྒྱས་བྱས་ལ། །སྟོངས་བྱེད་མགོན་ལ་ཚིམ་བྱས་ཏེ། །ཇི་ལྟར་འདོད་པའི་བསྒོ་བ་བྱ། །བུ་མཆོག་གཞུག་མའི་ལས་བརྩམས་ན། །ཉི་ཤུའམ་ཉི་ཤུ་རྩ་ལྔ་ཡི། །ཚད་ལྡན་སྟེགས་བུར་སུམ་ཅུས་བྱུང་། །ཐིག་གཡོག་གྲོགས་མོར་ལྡན་བྱས་ཏེ། །ཐིག་གདབ་ཆོ་ག་ཕུན་སུམ་ཚོགས། །མཁས་ལྡན་ཆེན་པོས་སྒྲིབས་ཏེ་བྱ། །ཕུར་བུ་སྲེད་བུ་ཚོན་ཕྱེད་ལན། །རབ་ཏུ་གནས་བྱས་བྱིན་ལྡན་པས། །འོག་གཞི་རྩིབས་བཞི་ཕོ་བྲང་ལྔ། །ཆ་ཆེན་ཆ་ཕྲན་གསལ་ཕྱིར་བྱ། །བརྒྱད་ཅུ་གཉིས་ཀྱི་ཕོ་བྲང་དུ། །དཀར་དམར་ཐིག་ལེ་གདན་ལྡན་པས། །རིགས་ཀྱི་དཀྱིལ་འཁོར་ཚང་བར་བསྒོམ། །གཤེགས་གསོལ་བྱིན་ལྡན་རིན་ཆེན་ཚོན། །ཉི་ཤུ་རྩ་ལྔའི་མཆོག་ལྡན་པས། །ལྟེ་བའི་ཆ་ཕྱེ་ཚུལ་བཞིན་བྲི། །བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་ལྟུང་བའི་བྲོ་ལྡན་པས། །དག་པས་སྦྱངས་པའི་དཀྱིལ་འཁོར་ལ། །བདག་གཞན་དོན་ཕྱིར་འབྱོར་པ་དབུལ། །དབང་ཕྱུག་ཐོག་མར་རིག་པས་འཇུག །དཀྱིལ་འཁོར་གསོལ་གདབ་གནང་ཞུགས་པས། །བུ་མཆོག་སེར་སྣ་སངས་པ་ཉིད། །གཞུག་བསྐུར་ལས་བཞིན་རྫོགས་པར་བྱ། །ཡང་ན་དཔག་ཚད་རྒྱང་གྲགས་ཏེ། །ཏིང་འཛིན་གཟུགས་བརྙན་དཀྱིལ་འཁོར་དུའོ། །རྣལ་འབྱོར་འདྲིས་གོམས་འདོད་པ་ཡི། །ཚད་མེད་ཐུགས་རྗེས་འགྲོ་བསྒྲལ་ཞེས། །དམ་བཅས་བསྟན་ཏེ་འཕར་བསྟན་ལ། །ཁམས་བསང་ལུས་ཀྱི་ལུགས་བཞིན་འདུག །རང་གི་ཡི་གེ་ས་བོན་ཟེར། །འཕྲོས་པས་བདེ་གཤེགས་མདུན་གྲངས་དབུར། །བླ་མ་ཀུན་གྱི་ཡབ་ཕྱིར་བསམ། །ཕྱི་རྫོགས་ནང་གི་ལྷ་མོས་མཆོད། །ཕྱག་འཚལ་མཆོད་བསྟོད་བཤགས་པ་དང་། །ཡི་རང་སྐྱབས་གསོལ་སེམས་བསྐྱེད་བསྔོ། །མོས་པའི་དཀྱིལ་འཁོར་མཆོད་ཟིན་ནས། །སེམས་བསྐྱེད་བདག་ལ་བསྡུ་བར་བསམ། ༈ །བར་ཆད་བགེགས་རྣམས་བསལ་བའི་ཕྱིར། །སྟོང་ཆེན་གསལ་བའི་རིག་པ་ཉིད། །སྐད་ཅིག་ས་བོན་རང་གི་ལྷར། །གསལ་བ་ཧཱུཾ་བསྐུལ་འཕྲོ་འདུས་པས། །ཞེ་སྡང་རྡོ་རྗེ་གསལ་བ་ཡི། །ཐུགས་ཀྱི་ས་བོན་འོད་ཟེར་ལས། །མཚོན་ཆ་རིམ་སྤྲོས་བར་ཆོད་བསྐྲད། །སླར་བསྡུས་རིམ་བཞིན་སྟེང་འོག་གུར། །ཛྭ་ལ་རམ་གྱིས་མེ་དཔུང་འབར། །ཅི་ཙམ་ལྕོགས་པས་མཚམས་གཅོད་བྱ། །དམ་རྫས་ཆུ་དག་ས་བོན་གྱིས། །འཕྲོའང་ཟླ་སྟེང་གསལ་བར་བྱ། །ཉམས་ཆག་བར་གཅོད་བསལ་བའི་ཕྱིར། །སྒྲུབ་པའི་རྫས་བསངས་བགེགས་ལ་གཏོར། །མི་མཐུན་ཕྱོགས་ལ་གཏོར་བྱས་ན། །དྲག་པོ་གཏུམ་པོ་ལྷན་ནེར་འགྱུར། །དམ་བཅས་གཉེན་པོར་ཤར་ཕྱིར་རོ། །ༀ་བཛྲ་ཀྲོདྷ་ཨ་མྲྀ་ཏ་ཀུ་ཎྜ་ལི་ཧ་ན་ཧ་ན་ཧཱུཾ་ཕཊ། བི་ཤུདྡྷེ་ཨ་མྲྀ་ཏེ་ཧཱུཾ་ཕཊ། དྷརྨ་ཨ་མྲྀ་ཏེ་ཧཱུཾ་ཕཊ། ཐམས་ཅད་དག་གྱུར་བདུད་རྩིར་འགྱུར། ༈ །སྲིད་པ་ཕྱི་ནང་བྱུང་ཚུལ་གྱིས། །སྣོད་བཅུད་དཀྱིལ་འཁོར་བསྐྱེད་བྱས་ཏེ། །ཚེ་འཕོས་ཡུལ་བྲལ་བར་མའི་ལུས། །སྒྱུ་སྣང་མིག་གཟུགས་འབྲེལ་བ་བཞིན། །ཏིང་འཛིན་གསུམ་ཡང་རིམ་བཞིན་བསྒོམ། ༈ །དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུམ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་དོ། །ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ལས་སྙིང་རྗེ་ཆགས་པ་བསྐུལ། །ལུས་ངག་སེམས་དང་ཆོས་ཐམས་ཅད། །གང་ནའང་མི་དམིགས་མི་གནས་པ། །མིག་ཡོར་ཚུལ་དུ་སྦྱོར་བ་ཡི། །ནམ་མཁའ་ལ་ནི་ནམ་མཁའ་བསྒོམ། །རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། །ཨཿརབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བསྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །མི་དམིགས་སྟོང་པའི་གཟུགས་བརྙན་ལ། །ཡིད་ཀྱི་ནམ་མཁར་གསལ་བ་ལ། །སྙིང་ལྐོག་ལྟེ་བ་སྒྲོམ་མདོ་རླུང་། །ལས་བཞིས་ལུས་བཞིན་ཨེ་མཐིང་ལས། །འཕྲོ་འདུ་ཆོས་ཀྱི་འབྱུང་གནས་བསམ། །དེ་སྟེང་ཡཾ་ལས་གཞུ་དབྱིངས་རླུང་། །དུད་ཁ་ཝཾ་དཀར་ཆུ་ཟླུམ་པོ། །ལཾ་སེར་རི་རབ་གསེར་རྒྱས་དབྱིངས། །དེ་སྟེང་རི་ལས་ཡེ་ཤེས་མེ། །དཀྱིལ་དུ་སྣ་ཚོགས་བྷྲཱུྂ་དུ་འཕྲོ། །ཡོངས་གྱུར་ཡེ་ཤེས་གཞལ་ཡས་ཁང་། །ཡེ་ཤེས་རིན་ཆེན་རྒྱུ་ལས་བྱུང་། །ཚད་མེད་རྩིབས་བཞིའི་འཁོར་ལོ་ལ། །རྩིབས་བཞི་མུ་ཁྱུད་པཉྩར་ལྡན། །གྲུ་ཆད་གློ་འབུར་བར་འཁྱམས་ལྡན། །མུ་ཁྱུད་བཞི་ལྡན་རྟ་བབས་བཅས། །བསྟི་གནས་ལམ་གྱི་བགྲོད་ཕྱིར་རོ། །འབྲས་བུ་ཡོན་ཏན་བརྒྱད་རྫོགས་ཕྱིར། །རྟ་རྐང་ཆུ་སྐྱེས་རིན་ཆེན་སྒྲོམ། །སྣ་འཕྱོང་བཞི་ལས་ཟ་ར་ཚགས། །རིན་ཆེན་སྒྲིལ་འཕྱང་ཤར་བུ་ཁྱུང་། །རིམ་བཞིན་དབྱིབས་མདོག་མཛེས་པར་བྱ། །ཐ་སྙད་སེམས་ཕྱིར་བུམ་པ་གཅིག །རྨ་བྱའི་མདོངས་ལྟར་ཅིར་ཡང་སྣང་། །མཐོ་དམན་ཚད་མེད་བྱ་འདབ་ལྡན། །ཐུགས་རྗེ་ཀུན་སྙོམས་ཁྱབ་ཕྱིར་རོ། །ཡང་ཐོག་མཐོ་དམན་རིམ་ལྡན་པའི། །ཐ་མའི་འདབ་མས་ཀུན་གཡོགས་པར། །ཡེ་ཤེས་རྩིག་སྟེང་སེང་མགོས་གཏམས། །མི་འཇིགས་ཁ་ནས་མུ་ཏིག་ཧཱར། །ཕ་གུ་མཛེས་པའི་བད་དང་ལྡན། །དྲྭ་བ་དྲྭ་ཕྱེད་མགུལ་འཁོར་ལྡན། །གཟུགས་སོགས་ལྷ་མོས་འཁྲིགས་པ་སྟེ། །སྣ་ཚོགས་མཆོད་བྱེད་རོལ་མོ་ཡིས། །བར་སྣང་ཁམས་སུ་སྤྲིང་ཕུང་བཞིན། །སྒོ་བཞི་གཡས་གཡོན་ལྗོན་ཤིང་དང་། །དཔག་བསམ་ཤིང་ཟུང་ཙོང་ཙོང་སྦྲེལ། །དྲིལ་བུ་གཡེར་ཁ་ཐེག་ཆེན་སྒྲོག །བཀྲ་ཤིས་བྱ་སྙན་སྒྲ་སྒྲོགས་ལྡན། །ཡིད་བཞིན་རིན་ཆེན་རྒྱན་བསྐོར་བ། །རིན་ཆེན་ཕུང་པོ་བཞི་གཉིས་ལྡན། །ཐམས་ཅད་ལ་ནི་དབང་བསྒྱུར་ཕྱིར། །ལྷ་ཆེན་ཕྱོགས་སྐྱོང་བརྒྱད་ཀྱིས་བསྐོར། །འཁོར་ལོ་རྩིབས་ཆེན་མུ་ཁྱུད་གཉིས། །རྩིབས་ལྡན་ཕོ་བྲང་ལྔ་པ་ཉིད། །བར་ཁྱམས་སྒོ་ཁྱུད་ལྡན་པ་ལ། །དཀྱིལ་འཁོར་བཅུ་ཕྲག་བརྒྱད་གཉིས་ལྡན། ༈ །ཕོ་བྲང་དབུས་ཀྱི་ལྟེ་བ་ལ། །མི་འཇིགས་སེང་གེ་བརྒྱད་དང་ལྡན། །ཤར་ཕྱོགས་ལྟེ་བར་སྟོབས་གླང་ཆེན། །ལྷོ་རུ་རྫུ་འཕྲུལ་རྟ་བརྒྱད་གཏིང་། །ནུབ་ཀྱི་ཕོ་བྲང་རྨ་བྱ་དབང་། །བྱང་དུ་ཕྲིན་ལས་ཤང་ཤང་བརྒྱད། །ཁྲི་རྐང་འབར་མཛེས་པད་ལྡན་པ། །ཉི་མ་ཟླ་བ་ལྔ་བརྩེགས་ལྡན། །ཉི་ཟླ་ཆུ་སྐྱེས་སུམ་བརྩེགས་སེམས། ཉི་རྐྱང་ཁྲོ་དང་པད་རྐྱང་ཐུབ། །བྱ་བྱེད་ཀུན་བཟང་ཡབ་ཡུམ་ལ། །ཉི་ཟླ་པདྨ་རིན་ཆེན་རྒྱས། །གདན་ལ་མཉམ་པའི་སྐྱིལ་ཀྲུང་བཞུགས། །བདུན་ཕྲག་སུམ་ཅུ་རྩ་བརྒྱད་རླུང་། །ལས་ཀྱི་རིམ་བཞིན་རྣམ་སྨིན་ལུས། །རྫོགས་བཞིན་ངམ་པའི་ས་བོན་ལས། །འཕྲོ་འདུ་གསུམ་གྱི་སྐུ་རྫོགས་བསྐྱེད། །རྒྱུ་ཡི་ཨ་ལས་ༀ་ཧཱུྃ་ཏྲཱཾ། །ཨཱཾ་ཧཱ་མཱུཾ་སོགས་ཡི་གེ་བཅུ། །ཕོ་བྲང་ལྔ་ལ་རིམ་བཞིན་བསམ། །རྩིབས་བཞིན་ཡི་གེ་ༀ་ཏྲཱཾ་ཧཱུཾ། །ཨཱ་དང་ཛཿཧཱུཾ་བཾ་སོགས་དང་། །ཏྲཱཾ་དང་ཧྲཱིཾ་དང་ཧཱ་སོགས་པའམ། །ཡང་ན་ས་བོན་ཟུང་བཅས་པའོ། །ཨ་ཀྵ་ཧཱུཾ་དྲུག་བར་ཁྱམས་ལ། །ཛཿཧཱུཾ་བཾ་ཧོཿསྒོ་བཞིར་ཏེ། ཧཱུཾ་ཆེན་ཉི་ཤུ་ཕྱི་རོལ་ཏུ། །བསྐལ་པའི་མེ་ལ་རིམ་བཞིན་བསམ། །ས་བོན་ཡི་གེ་སྤྱི་རུ་ཐིམ། །དེ་དག་འཕྲོས་འདུས་ཡོངས་གྱུར་པས། །སོ་སོའི་ཕྱག་མཚན་འབར་བར་གྱུར། །ཡོངས་གྱུར་ཕྲ་མོ་སྐུ་འཕྲོ་འདུས། ཕྱག་རྒྱ་ཆེན་པོ་རྫོགས་པར་བསྐྱེད། །ཐ་སྙད་གདགས་ཕྱིར་རྒྱུ་ལས་སྐྱེད། །བདེ་གཤེགས་རིག་ལས་ཤར་བའི་ཕྱིར། །རྒྱལ་བའང་བདག་གི་སྲས་འགྱུར་ཏེ། །རྒྱུ་ཡི་འཁོར་ལོ་བསྐྱེད་པའོ། ༈ །འབྲས་བུའི་འཁོར་ལོ་བསམ་པ་ནི། །གཙོ་བོའི་ཐུགས་ལས་ཤར་བའི་བདག །འཇིག་རྟེན་མེས་པོ་སྲས་ཀྱི་ཆ། །བདག་གིས་གཟུང་སྟེ་གསོལ་བ་གདབ། །ཧོཿ སེམས་ཉིད་ཐེག་པར་རབ་ངེས་པས། །དཀྱིལ་འཁོར་བརྒྱད་ཅུ་རྩ་གཉིས་རྫོགས། །སངས་རྒྱས་རྡོ་རྗེ་སེམས་དཔའ་ཡི། །ཚོམ་བུའི་དཀྱིལ་འཁོར་བསམ་ཡས་པའི། །སྐུ་གསུང་ཐུགས་སུ་བདག་སྦྱོར་ཅིག །བསྐུལ་བས་གནས་གསུམ་ཟེར་འཕྲོས་ཏེ། །དངོས་གསུམ་སྦྱངས་པ་ལུགས་ཁ་བཞིན། །གྱུར་པས་འཕྲོས་ཕྱིར་ཡི་གེ་གསུམ། །སྐུ་གསུམ་ཡི་གེ་ཧཱུཾ་གྱུར་པ། །ཟླ་རླུང་སྦྱོར་བས་བཏེག་ནས་ནི། །བསྐོར་ཏེ་གཙོ་བོའི་ཐུགས་ཀར་ཐིམ། །རྡོ་རྗེ་ལམ་བྱུང་ཡུམ་གྱི་མཁའ། །རྒྱུ་ཡི་ཆོས་སྐུ་སེམས་སུ་གནས། །ལྷ་རྣམས་སོ་སོའི་སྒྲ་བྱུང་རོལ། །ཀུན་ཀྱང་འོད་ཕུང་སྣ་ཚོགས་མདོག །སྐད་ཅིག་དྲན་པས་ཨ་ཀྵ་སྟེ། །ཡོངས་གྱུར་རྡོ་རྗེ་འབར་བ་བསམ། །འཕྲོ་འདུས་འགྲོ་དོན་འཕགས་མཆོད་ནས། །སླར་འདུས་ཕྲ་མོའི་སྐུ་འཕྲོ་འདུས། །ཕྱག་རྒྱ་ཆེན་པོའི་སྐུ་གཉིས་རྫོགས། །བྱེད་པ་རྡོ་རྗེ་ཡབ་ཡུམ་གཉིས། །ཨིནྡྲ་ནཱི་ལའི་ཁ་དོག་འདྲ། །རང་རྟགས་རྡོ་རྗེ་དྲིལ་བུ་འཛིན། །འཁྲིལ་བ་ཆེན་པོའི་ཚུལ་དུ་བསམ། །ནུས་མཐུ་ལྡན་ཕྱིར་བྱིན་རླབས་དབང་། །ཐུགས་ཀའི་འོད་ཟེར་ཁྱབ་བསྐུལ་ནས། །ཕྱོགས་དུས་བདེ་གཤེགས་རིགས་ལྔར་བཞེངས། །ཡེ་ཤེས་ལྔ་རྫོགས་དབུ་བརྒྱན་དབང་། །དེ་ཉིད་རྐྱེན་གྱིས་སྔགས་ཀྱི་བསྐུལ། གནས་གསུམ་འབྲུ་གསུམ་འཕྲོ་འདུ་ལས། །སྐུ་གསུང་ཐུགས་ལྡན་ལྷ་བསྐྱེད་དེ། །གསུམ་པའི་སྔགས་ཀྱི་ང་རྒྱལ་བྱ། །མཚོན་གང་དཀར་དམར་མཐིང་ག་ཤར། །སྲས་ཀྱི་དཀྱིལ་འཁོར་བདོན་པོའི་ཕྱིར། །རྡོ་རྗེ་སྐྱེ་མཆེད་གསང་གནས་བསྐྱེད། །ཀུན་བཟང་སྤྱི་བོ་ལྗགས་སྟེང་སྙིང་། །ལྟེ་བ་ནང་གི་གསང་བ་ལ། །ༀ་ཧཱུཾ་སྭཱ་ཨཱཾ་ཧཱ་རིམ་བཞིན། །གནས་དེར་ཡུམ་ལ་མཱུཾ་ལཱཾ་མཱཾ། །པཱཾ་ཏཱཾ་བསམ་པ་ཡབ་ཡུམ་བཅུ། །མིག་རྣ་སྣ་ལྕེ་ཕྱི་ནང་ལ། །ཀྵིཾ་ཏྲཾ་ཧྲཱིཾ་ཛིཾ་མཾ་ཐླྷིཾ་ཧཱུཾ། མཱུཾ་སོགས་བརྒྱད་པོ་རིམ་བཞིན་བསམ། །གཡས་གཡོན་ཡན་ལག་མཁའ་གསང་ལ། །ཧཱུཾ་བཞི་ཁྲོ་བོ་བཞི་རུ་བསམ། །ཡུམ་ལ་ཛཿཧཱུཾ་བཾ་ཧོཿལས། །སྒོ་མ་བཞི་བསམ་བཅོ་བརྒྱད་གཉིས། །ཡབ་ཡུམ་གཉིས་ལ་རྫོགས་པར་བྱ། །དེ་ནས་གསང་གནས་བྱིན་བརླབ་པ། །ཧཱུཾ་ལས་རྡོ་རྗེ་རྩེ་ལྔ་ཕཊ། །པཾ་ལས་འདབ་བརྒྱད་པདྨ་ཨཾ། །རྗེས་སུ་ཆགས་པ་ཚུལ་བཞིན་བསྐུལ། །ཕྱག་རྒྱ་བཞི་རོལ་དགྱེས་སྤྲིན་འཕྲོ། །མཁའ་ལ་ཐིག་གདབ་གཞལ་ཡས་གདན། །བསམས་ཏེ་སྐུ་རྫོགས་གནས་པ་ཉིད། །གཙོ་འཁོར་རིམ་བཞིན་ཛཿཡིས་གདོན། །ཕྱི་རོལ་གནས་སུ་ཁྱབ་པར་སྦྱར། ༈ །བྷྲཱུྂ་བི་ཤྭ་བི་ཤུདྡྷེ། ཛྙཱ་ན་ཙཀྲ། ངུ་ཏི་ཙཀྲ་ནན། སཱུརྱ་ཙནྡྲ་རཏྣ་པདྨ་མཎྜ་ལ། ཧཱུཾ་བཛྲ་དྷྲི་ཀ །མཱུཾ་དྷཱ་ཏཱེ་ཤྭ་རི། ༀ་ས་ཏྭ་བཛྲ་ཧྲཱུཾ། ༀ་ཏིཀྵྞ་བཛྲ་ཧཱུཾ། ༀ་རཏྣ་བཛྲ་ཏྲཱཾ། ༀ་བཛྲ་ཛྭ་ལ་ཧཱུཾ། ༀ་བཛྲ་དྷརྨ་ཧྲཱིཿ ༀ་བཛྲ་སཾ་གྲ་བཛྲ་ཧཱུཾ། ༀ་ཀརྨ་བཛྲ་ཧ། ༀ་ཙནྡྲ་ལ་བཛྲ་ཧཱུཾ། ༈ ༀ་ཛི་ན་ཛིཀ །ལཱཾ་དེ་ཥ་ར་ཏི། ༀ་བཛྲ་ས་ཏྭ་ༀ། ༀ་བཛྲ་ལཱ་སྱ་ཧཱུཾ། ༀ་བཛྲ་རཱ་ཛ་ༀ། ༀ་བཛྲ་དྷཱུ་པེ་ༀ། ༀ་བཛྲ་ར་ག་ༀ། ༀ་བཛྲ་ཨཾ་ཀུ་ཤ་ༀ། ༀ་བཛྲ་སཱ་དྷཱུ་ཧཱུཾ། ༀ་བཛྲ་དྭེ་ཥ་ར་ཏི་ༀ། སྭཱ་རཏྣ་དྷྲིཀ །མཱཾ་མོ་ཧ་ར་ཏི། ༀ་བཛྲ་རཏྣ་ཏྲཾ། ༀ་བཛྲ་མཱ་ལེ་ཏྲཾ། ༀ་བཛྲ་སཱུརྱ་ཏྲཾ། ༀ་བཛྲ་པུཥྤེ་ཏྲཾ། ༀ་བཛྲ་ཀེ་ཏུ་ཏྲཾ། ༀ་བཛྲ་པཱ་ཤ་ཏྲཾ། ༀ་བཛྲ་ཧ་ས་ཏྲཾ། ༀ་བཛྲ་རཏྣ་ཏི་ཏྲཾ། ༈ ཨཱོཾ་ཨ་རོ་ལི་ཀ །པཱཾ་ར་ག་ར་ཏི། ༀ་བཛྲ་དྷརྨ་ཧྲི། ༀ་བཛྲ་གཱི་ཏྲི་ཧྲཱི། ༀ་བཛྲ་ཏི་ཀྵྞ་ཧྲཱི། ༀ་བཛྲ་ཨ་ལོ་ཀེ་ཧྲཱི། ༀ་བཛྲ་ཙཀྲ་ཧྲཱི། ༀ་བཛྲ་སྥོ་ཊ་ཧྲཱི། ༀ་བཛྲ་བྷཱ་ཥ་ཧྲཱི། ༀ་བཛྲ་ཨ་ལོ་ཀེ་ཧྲཱི། ༈ ཧཱ་པྲ་ཛྙཱ་དྷྲཱིཀ །ཏཱཾ་བཛྲ་ར་ཏི། ༀ་བཛྲ་ཀརྨཱ་ཧཱ། ༀ་བཛྲ་ནྲྀ་ཏི་ཨ། ༀ་བཛྲ་རཀྵ་ཨ། ༀ་བཛྲ་གནྜེ་ཧོཾ། ༀ་བཛྲ་ཡཀྵ་ཧཱ། ༀ་བཛྲ་གནྜེ་ཨ། ༀ་བཛྲ་སནྡྷི་ཧཱ། ༀ་བཛྲ་ཨ་བེ་ཤ་ཧཱ། ༈ ༀ་བཛྲ་ཨཾ་ཀུ་ཤ་ཛཿ ༀ་བཛྲ་པཱ་ཤ་ཧཱུཾ། ༀ་བཛྲ་སྥོ་ཊ་བཾ། ༀ་བཛྲ་གནྜེ་ཧོཿ ༈ ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱ་བྷ་ཏྲ་ས་མནྟ་ཨ། ༈ ༀ་མུ་ནེ་ཀྲཱིཾ་སྭཱ་ཧཱ། ༀ་མུ་ནེ་ཧཱུཾ་ཏྲུཾ་སྭཱ་ཧཱ། ༀ་མུ་ནེ་པྲཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། ༀ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་ཕཊ། ༀ་ཀྲོ་དྷཱི་ཤྭ་རཱི་དཱི་བ་ཡ་ཏེ་ཧཱུཾ། ༀ་བཛྲ་ཀྲོ་དྷ་བི་ཛཱ་ཡ་ཧཱུཾ་ཕཊ། ཀྲོ་དྷཱི་ཤྭ་རཱི་ལ་སེ་ཀི་ཧཱུཾ། ༀ་ཀྲོ་དྷ་ནཱི་ལ་དཎྜ་ཧཱུཾ་ཕཊ། ཀྲོ་དྷཱི་ཤྭ་རཱི་ཏཱི་ཏཱ་དུ་ཧཱུཾ། ༀ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་ཕཊ། ཀྲོ་དྷཱི་ཤྭ་རི་ཤཱ་ཤ་པ་ཏི་ཧཱུཾ་ཕཊ། ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུཾ་ཕཊ། ཀྲོ་དྷཱི་ཤྭ་རི་མུ་ཧ་ལ་ཧཱུཾ། ༀ་བཛྲ་ཀྲོ་དྷ་ཧ་ཡ་གྲཱི་བ་ཧཱུཾ་ཕཊ། ཀྲོ་དྷཱི་ཤྭ་རཱི་ཙནྜ་ཡ་ཏི་ཧཱུཾ། ༀ་བཛྲ་ཀྲོ་དྷ་ཨ་རཱ་ཛི་ཏ་ཧཱུཾ་ཕཊ། ཀྲོ་དྷཱི་ཤྭ་རི་བྱ་ཏི་ཧཱུཾ། ༀ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ་ཕཊ། ཀྲོ་དྷཱི་ཤྭ་རི་ས་བྱ་མ་ཏི་ཧཱུཾ། ༀ་བཛྲ་ཀྲོ་དྷ་ཏྲཻ་ལོཀྱ་བི་ཛྲ་ཡ་ཧཱུཾ་ཕཊ། ཀྲོ་དྷཱི་ཤྭ་རི་མཱ་ར་ཎི་ཧཱུཾ། ༀ་བཛྲ་ཀྲོ་དྷ་མ་ཧཱ་བ་ལ་ཧཱུཾ་ཕཊ། ཀྲོ་དྷཱི་ཤྭ་རི་མུཎྜེ་མཾ་ཧཱུཾ། དེ་ལྟར་དཀྱིལ་འཁོར་གསལ་བཏོན་ནས། སོ་སོའི་གནས་སུ་རྒྱས་པར་དགོད། །གདན་ལ་རྫོགས་དང་སེམས་དཔའི་ཚུལ། །འཇོམས་དང་ཐུབ་པ་བརྐྱང་བསྐུམ་བཞེངས། །འཁོར་ལོ་དབུས་ལྔར་རྒྱལ་པོ་ཡུལ། །མདུན་རྒྱབ་གཡས་གཡོན་ཕྱོགས་བཞི་རུ། །སེམས་དཔའ་སེམས་མ་རིམ་བཞིན་བསམ། །བར་ཁྱམས་ལ་ནི་ཐུབ་པ་དྲུག །རྒྱུད་དྲུག་སྦྱོང་བའི་ཕྱག་རྒྱར་གནས། །ཤར་ལྷོ་ལྷ་དང་ལྷོ་ཕྱོགས་མི། །ལྷོ་ནུབ་བྱང་ནུབ་ཡི་དྭགས་བྱོལ། །བྱང་དང་བྱང་ཤར་ལྷ་མིན་དམྱལ། །མདུན་རྒྱབ་བྱེད་པ་ཡབ་ཡུམ་གཉིས། །སྒོ་ཁྱུད་བསྲུང་བ་ཕོ་མོ་བཞི། །བསྐལ་པའི་མེ་ལ་ཁྲོ་ཟུང་བཅུ། །ཕྱོགས་མཚམས་བསྲུང་བའི་ཚུལ་དུ་གནས། །དེ་ཀུན་བྱིན་བརླབ་ནུས་ལྡན་པས། །འགྲོ་དོན་བྱ་ཕྱིར་ཚུལ་བཞིན་བསམ། །ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཨ་དཪྴ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་མ་ཧཱ་པྲ་ཏྱཱེ་བེ་ཀྵ་ཎ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅་ཧཾ། ༀ་མ་ཧཱ་ཀྲི་ཏྱ་ཨ་ནུཥྠཱ་ན་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ༈ ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱ་མ་ཀོ྅་ཧཾ། ༈ དཀྱིལ་འཁོར་དབང་བསྐུར་ཐིམ་པར་གྱུར། །བྱིན་རླབས་རབ་ཏུ་གསལ་བར་གྱུར། །རིན་ཆེན་སྨུག་པོ་གནས་གཅིག་ཏུ། །མཚོན་གང་སེམས་དཔའ་འོད་ལྡན་པ། །ཐུགས་ཀྱི་ས་བོན་བཟླས་པས་བསྐོར། །ཀུན་གྱི་བདག་ཕྱིར་དཀྱིལ་དུ་བསམ། །ཐུབ་དྲུག་སྤྲུལ་བ་རབ་བྱུང་ཕྱིར། །བྱིན་རླབས་དབུ་རྒྱན་མ་གསུངས་སོ། ༈ །མཐིང་ག་དཀར་པོ་སེར་ལེ་བརྒན། །ལྗང་གུ་ཁ་དོག་གསལ་འཚེར་བ། །སེམས་དཔའ་རྣམས་ནི་རིགས་ཀྱི་ཚུལ། །སེར་དང་དཀར་མཐིང་སེར་ནག་དང་། །དམར་ནག་དུད་ཁ་ཐུབ་པའི་སྐུ། །སྔོ་སེར་དམར་ལྗང་སྒོ་བསྲུང་ལྷ། །ཁྲོས་པས་བསྲུང་ཕྱིར་རྩ་ནག་པོ། །མཐིང་ག་ཧཱུཾ་ཆེན་རྣམ་རྒྱལ་དཀར། །དབྱུག་པ་ནཱི་ལ་གཤེད་མཐིང་ནག །མི་གཡོ་རྟ་མགྲིན་ལྗང་སྔོ་དམར། །འདོད་རྒྱལ་བདུད་རྩི་དུང་དཀར་ལྗང་། །ཁམས་གསུམ་སྟོབས་ཆེན་དཀར་ལྗང་དུད། །ཁྲོ་མོ་རྣམས་ནི་ཁྲོ་དང་མཐུན། །ཀུན་ཀྱང་དུར་ཁྲོད་ཆས་ལྡན་པས། །མེ་དཔུང་འཕྲོ་འདུ་ལྡན་པའོ། །སྐུ་ཡི་མཚན་ཉིད་དགུར་ལྡན་ཏེ། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུག་སྡུག་གཟི་བྱིན་ལྡན། ༈ །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །གཙོ་གཟུངས་འབྲེལ་བའི་ཕྱག་རྒྱའོ། །སོར་རྩེ་འཆང་བ་ཐུགས་ཀར་ལྡན། །རྡོ་རྗེ་རིན་ཆེན་པདྨ་དྲིལ། །རྡོ་རྗེ་ལྕགས་ཀྱུ་མདའ་གཞུ་དགྱེས། །རིན་ཆེན་མྱུ་གུ་ཉི་མ་དང་། །རྒྱལ་མཚན་སོ་འཕྲེང་འཛིན་པ་དང་། །པདྨ་ཁ་འབྱེད་རལ་གྲི་དང་། །འཁོར་ལོ་རྡོ་རྗེ་ལྕེ་འཛིན་པ། །རལ་གྲི་རྡོ་རྗེ་ཕྲེང་བ་དང་། །མཆེ་བ་ཞུ་ཚུར་ཐོགས་པའོ། །མེ་ལོང་ལྕགས་ཀྱུ་སོག་པོར་ཕྲེང་། །རིན་ཆ ེན་མེ་ཏོག་ཞགས་བསིལ་ཡབ། །པི་ཝང་མར་མེ་ལྕགས་སྒྲོག་འདོགས། །གར་མཛད་སྤོས་དྲིལ་དམའ་བྱང་བུམ། ༈ །གསེར་ཤང་པར་བུ་པི་ཝང་དང་། །གོ་ཆ་བུ་སྟིམ་མདུང་ཐུང་སོགས། །རིན་ཆེན་སྒྲོམ་བུ་མེ་དང་ཆུ། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པདྨོའི་དཀྱིལ། །ཡང་ན་རྡོ་རྗེ་དྲིལ་བུ་ཉིད། ༈ །ལྕགས་ཀྱུ་ཞགས་པ་སྤོ་ཊ་ཧོ། །འཁོར་ལོ་རྡོ་རྗེ་མགོ་དང་ཏིར། །ཞུགས་ལིང་དང་ནི་དྲང་སྲོང་ཉིད། །ཞིང་དབྱུག་གཤེགས་རྗེའི་རྐང་བཟུང་བ། །རལ་གྲི་བདེན་བྲལ་ཏིར་དབྱུག་གཤོལ། །བ་དན་ལྕེ་བརྒྱད་པ་རེ་ཐོང་། །རིན་ཆེན་མགོ་དང་གསུམ་གྱི་དབྱུག །རྡོ་རྗེ་རྩེ་གསུམ་ནྲྀ་མགོ་གདེངས། །ཐོང་གཤོལ་གཏུན་ཤིང་གཡས་གཡོན་ཐོགས། །ཡང་ན་ཕྱག་དྲུག་མངོན་པར་རོལ། །ཁྲོ་མོ་གཡས་ནི་གཙོ་ལ་འཁྱུད། །གཡོན་པ་རཀྟ་གཙོ་ལ་སྟོབ། །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བ། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ༀ་ཨེ་ཧྱེ་ཧི་བྷ་ག་བྷཱ་ན་མ་ཧཱ་ཀཱ་རུ་ཎི་ཀ་ཌི་ཤྱ་ཧོཿ ས་མ་ཡ་སྟཱཾ། ཛཿཧཱུཾ་བཾ་ཧོཿ ༈ ༀ་ཨཱཿཧཱུཾ་སྭཱ་ཧཱ། བ་བ་བ་བ་བ། ཛྲ་ཛྲ་ཛྲ་ཛྲ་ཛྲ། ས་ས་ས་ས་ས། མ་མ་མ་མ་མ། ཡ་ཡ་ཡ་ཡ་ཡ། ༀ་ཨཱཿཧཱུཾ་སྭཱ་ཧཱ། ༈ ༀ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་སྟཱཾ། ༀ་བཛྲ་ས་མ་ཡ་ཧཱུཾ། ༀ་བཛྲ་ས་མ་ཡ་ཧོ། ༈ སྒོ་བཞི་སྤྱོན་བསྟིམ་བརྟན་བྱས་ལ། །གཉིས་མེད་ཕྱག་འཚལ་ཚོགས་ཕྱིར་མཆོད། ༈ །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །བསྐྱོད་ཆེན་འཁོར་ལོའི་གཞལ་ཡས་སུ། །ཚོམ་བུའི་དཀྱིལ་འཁོར་གསལ་བསྒོམས་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །འབྲུ་བཞི་སྦས་ནས་ཐུགས་ཀར་བཀན། །ཧཱུཾ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་ལྟ། །རིགས་བཞི་ཀུན་ཀྱང་གཙོ་བོ་བཞིན། །གཡས་གཡོན་མཛུབ་མོ་ༀ་ལཾ་ལ། །འཁོར་ལོ་དྲིལ་བུ་འབར་བ་བལྟ། །མཐེ་བོང་གཉིས་ལ་སྭཱ་མ་སྟེ། །རིན་ཆེན་དྲིལ་བུ་འབར་བ་ཡི། །སྲིན་ལག་གཡས་གཡོན་ཨཱཾ་པཾ་སྟེ། །པདྨ་དྲིལ་བུ་རྩེ་ལ་འབར། །མཐེའུ་ཆུང་ཧཱ་ཏཱཾ་རལ་གྲི་དྲིལ། །འབྲུ་སྦས་པ་དང་བརྟེན་འཁྲིལ་བའོ། །ཡང་ན་རྩ་བསྐྱེད་སྔགས་ཀྱིས་སོ། །གཡས་གཡོན་སོར་རྩེ་ཧཱུཾ་ཏྲཱཾ་ཧྲཱིཿ ཨ་སོགས་ཟུང་བཞི་ཉི་ཟླ་སྟེ། །རིམ་བསམ་གུང་མོ་རྩེ་སྤྲད་པ། །སེམས་དཔའ་རྡོ་རྗེ་ཡབ་ཡུམ་མོ། །མཛུབ་མོ་རྩེ་སྤྲད་རིན་ཆེན་ནོ། །སྲིན་ལག་རྩེ་སྤྲད་ཆོས་རྡོ་རྗེ། །མཐེ་ཆུང་རྩེ་སྤྲད་ལས་རྡོ་རྗེ། །མཐེ་བོང་མཛུབ་མ་རྡོ་རྗེ་འཛིན། །མཐེ་བོང་གུང་མོ་རྒྱལ་བ་འཛིན། །སྲིན་ལག་མཐེ་བོང་ཆགས་པ་ཆེ། །མཐེ་ཆུང་མཐེ་བོང་ལེགས་པ་མཆོག །གཡས་ཧཱུཾ་ཛ་དང་ཧོ་ད་སྭཱ། ༈ །མཛུབ་མོ་གཉིས་སྦྱར་རིན་ཆེན་མཆོག །གུང་མོ་གཉིས་སྦྱར་རིན་ཆེན་དོན། །སྲིན་ལག་གཉིས་སྦྱར་རྒྱལ་བ་སྟེ། །རྡོ་རྗེ་བཞད་པ་མཐེ་ཆུང་སྤྲད། །ཏྲཾ་དང་ཧེ་རུ་ཧེ་རིམ་བཞིན། ༈ །མཛུབ་མོ་སྟེང་འོག་རྡོ་རྗེ་ཆོས། །གུང་མོ་སྟེང་འོག་འཇམ་དཔལ་དབྱངས། །སྲིན་ལག་སྟེང་འོག་འཁོར་ལོ་མཆོག །མཐེ་ཆུང་སྟེང་འོག་རྡོ་རྗེ་སྨྲ། །དྷཱི་བྷཱཾ་ཏྲཾ་ནི་ཧྲཱིཿབཞི་བསམ། ༈ །མཛུབ་མོ་རྒྱ་གྲམ་རྡོ་རྗེའི་ལས། །གུང་མོ་རྒྱ་གྲམ་རྡོ་རྗེ་བསྲུང་། །སྲིན་ལག་རྒྱ་གྲམ་གནོད་སྦྱིན་མཆོག །མཐེ་ཆུང་རྒྱ་གྲམ་ཁུ་ཚུར་རེ། །ཧ་ཧཱུཾ་ཨ་བཾ་སོར་དེར་བསམ། །ཛཿདང་ཧོཿལ་སོགས་པ་ཡི། །གར་དུ་བསྒྱུར་བས་རྡོ་རྗེ་འཆང་། །ཕྱག་རྒྱ་བརྡ་ཚིག་ཆེན་པོ་འདིས། །སངས་རྒྱས་དཀྱིལ་འཁོར་མཉེས་པར་སྣང་། །རང་བཞིན་དཀྱིལ་འཁོར་ཕུན་སུམ་ཚོགས། །གླུ་གཉིས་ཕྱག་རྒྱ་ལྡན་པ་ཡི། །སལ་ལེར་གསལ་བའི་དཀྱིལ་འཁོར་འབེབས། །ཕྱག་རྒྱ་སྤྲོས་པ་ཆེན་པོ་ནི། །གཟུང་དང་འཛིན་པ་རྣམ་གཉིས་ལ། །དག་པར་གསལ་བ་ཕྱག་རྒྱ་ཡི། །ཡི་གེ་སོ་སོར་གསལ་བ་ཡི། །གར་དུ་སྒྱུར་བས་མྱ་ངན་འདས། །གསེག་པར་པི་ཝང་གོ་ཆ་དང་། །པུ་སྟི་སྒྲོམ་དང་མེ་ཆུ་སྒྲ། །ཇི་ལྟར་གནས་བཞིན་བཅའ་བ་སྟེ། ༈ །ལྕགས་ཀྱུ་ཞགས་པ་དྲིལ་བུ་སྒྲོག །ཡི་གེ་གསལ་བས་གཟུང་བཅིངས་ཚུལ། །ཁྲོ་བཅུ་གཡས་གཡོན་ཉི་ཧཱུཾ་གིས། །གར་དུ་བསྒྱུར་ཞིང་རིམ་བཞིན་བསམ། །སྤེལ་ནས་ཞལ་བསིལ་གསོལ་མཆོད་བྱ། ༈ །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། །ལྷ་ལ་རྟག་ཏུ་མཆོད་བྱས་ན། །བདག་དང་གཉིས་སུ་མེད་པར་འགྱུར། ༈ །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །ཧཱུྃ་དུ་ཤེས་པས་རབ་སྤྱད་ན། །ངོ་མཚར་འབྱུང་བའི་དཀྱིལ་འཁོར་མཉེས། ༈ །རི་རབ་ཆེན་པོ་གླིང་བཞི་ལ། །གནས་པའི་སེམས་ཅན་ཐམས་ཅད་ཀུན། །བདག་ཉིད་ཆེན་པོར་རྟོགས་པ་ཡིས། །དབྱིངས་སུ་ཡང་ནི་སྦ་བར་བྱ། །འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷ་ཝ་ཨཏྨ་ཀོ྅་ཧཾ། ཐིག་ལེ་འདྲེན་པས་ཕྱི་ནང་གི། །ལྷ་མོ་སྤོས་པས་བདག་ཉིད་མཆོད། །ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༈ མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །སྣོད་དང་བཅུད་ཀྱི་དངོས་པོ་ཀུན། །ཇི་ལྟར་འདོད་པ་སེམས་ཕྱིར་དབུལ། །འབྲས་བུ་དོན་ཕྱིར་དགྱེས་བྱའི་ཕྱིར། །གླུ་ཡི་མཆོད་པ་ཚུལ་བཞིན་མཆོད། ༈ །འཕགས་བསྟོད་སེམས་ཅན་གྲོལ་བྱའི་ཕྱིར། །དུང་དང་ཟངས་དང་མུ་ཙ་ར། །པི་ཝང་གླིང་བུ་ཀ་རྐོ་ཏ། །ཕེབ་རྡོབ་རྫ་རྔ་པི་ཝང་དང་། །གོ་བོ་རྒྱུད་མངས་སྒྲ་སྒྲོག་སྦྱར། །རྒྱལ་བ་འཁོར་བཅས་དགོངས་གསོལ་ཏེ། །ཚོགས་འབྱོར་མཆོད་པ་རྒྱ་མཚོ་འབུལ། །རྣལ་འབྱོར་དབང་ཕྱུག་ཉམས་ཆག་བཤགས། །ལས་ལ་དོན་ཕྱིར་ཕྲིན་ལས་གསོལ། །སྒྲུབ་པའི་དོན་འདོད་གསོལ་བ་གདབ། །ཕྱི་དང་ནང་གི་འཕྲོ་འདུ་ཡི། །རྣལ་འབྱོར་བསྒྲུབ་ཕྱིར་བཟླས་པ་བྱ། །ཕྱི་རོལ་ཡན་ལག་བརྒྱད་ལྡན་པའི། །དམ་ཚིག་ཡེ་ཤེས་ཡིག་གསལ་བའི། །རྣམ་གསུམ་མ་འཁྲུགས་ཚུལ་གྱིས་བཟླས། །ༀ་ཧཱུྃ་བཛྲ་ས་ཏྭ་ཧཱུཾ། བཛྲ་པྲ་བ་ན་ཧཱུཾ། མཱུཾ་བཛྲ་གནྡྷ་མཱུཾ། ༀ་བཛྲ་ཙཀྲ་མཎྜལ་ༀ། ལཱཾ་བཛྲ་གནྡྷ་པ་ཤ་ལཾ། སྭཱ་རཏྣ་པྲ་བ་ནི་སྭཱ། མཱུཾ་བཛྲ་གནྡྷ་བཛྲ་པ་ཤ་མཱུཾ། ༀ་པདྨ་པྲ་བ་ན་ༀ། པཱཾ་བཛྲ་གནྡྷ་པྲ་བ་ན་པཱཾ། ཧཱཾ་ཁཾ་ཏིཀྵྞ་པྲ་བ་ན་ཧཱུཾ། ཏཱཾ་བཛྲ་གནྡྷ་བྲ་བ་ན་ཏཱཾ། ཡང་ན་བསྐྱེད་དང་བཟླས་ཐུན་མོང་། །ནང་དུ་ཡབ་ཡུམ་ཞལ་སྤྲོད་དེ། །སྒྲ་བཅོམ་མེད་པའི་བཟླས་པ་ཡི། །དབུས་ཀྱི་རྩ་གཉིས་འཕྲོ་འདུའི་ལམ། །ཞལ་ནས་ཞལ་དང་མཁའ་ནས་མཁའ། །སྐོར་བ་དུག་ལོག་བདེ་མྱོང་འགྱུར། །བསྙེན་པ་གྲངས་དུས་མཚན་མ་ཡིས། །ཐབས་ཀྱི་མཆོག་ཏུ་དེ་གསུངས་སོ། །རིམ་པར་གོམས་ཉམས་ལྡན་པ་ཡིས། །རྫུས་སྐྱེས་ཚུལ་དུ་སྐད་ཅིག་ལ། །ཡོངས་སུ་རྫོགས་པར་བསྐྱེད་བྱས་ཏེ། །དེ་གོམས་གྲངས་མེད་སློབ་བྱེད་པས། །བདག་གཞན་ལས་ཀུན་རྩོམ་པའི་ཕྱིར། །སྐབས་ཀྱི་དང་པོར་བརྗོད་པ་ཡིན། །དེ་གོམས་རིག་འཛིན་ཚེ་ལ་སྦྱོར། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །ལུས་དང་ཕུང་པོ་བཅས་པ་ཡི། །ཚེ་ལ་དབང་བའི་རིག་འཛིན་འགྲུབ། །རིག་པ་འཛིན་པའི་ཚེ་ཉིད་ཀྱིས། །བླ་མེད་ཀུན་ཏུ་བཟང་པོར་འགྱུར། །ལྷག་མ་བཅས་དང་ལྷག་མེད་པའི། །མྱ་ངན་འདས་པའི་ཚུལ་གྱིས་ནི། །འདི་དང་བར་མར་སྦྱོར་བ་སྟེ། །དཔེར་ན་ཁྱུང་དང་སེང་གེ་བཞིན། །རྣམ་སྨིན་འབྲས་བུ་གྲོལ་མ་ཐག །བར་མ་ཡེ་ཤེས་སྒྱུ་མའི་སྐུ། །མངོན་ཐོབ་རིག་པའི་ས་ལ་གནས། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་བསམ་ཡས་མཆོག །མངོན་གྱུར་ཆུ་དང་མེ་ལོང་བཞིན། ༈ །དེ་ནས་ལོངས་སྤྱོད་བདེ་ལྡན་པས། །ཚོགས་གཉིས་རྫོགས་ཕྱིར་ཡོ་བྱད་ལྔས། །སྣ་ཚོགས་མཆོད་པ་རྒྱས་མཆོད་ལ། །རྣལ་འབྱོར་དབང་ཕྱུག་ལོངས་སྤྱོད་དེ། །སེམས་ཕྱིར་ཧཱུྃ་གིས་ལོངས་སྤྱོད་པ། །ཡེ་ཤེས་རོལ་པའི་ཚུལ་བྱས་ནས། །ཐ་མལ་འཛིན་གྲོལ་བདེ་ལ་སྦྱོར། །དེ་ཕྱིར་འབྱོར་པའི་ནན་ཏན་བསྐྱེད། ༈ །བདག་ཉིད་མཁའ་འགྲོ་འདུལ་བྱེད་པ། །དབང་ཕྱུག་རྒྱལ་བ་རིགས་ལྔ་ཡི། །བསམ་དང་ལྡན་པས་ལྷག་མ་ཉིད། །གཞུང་བཞིན་སྩལ་ཏེ་ཚིམ་བྱས་ལ། །རྗེས་སུ་མཐུན་པའི་ལས་བཅོལ་ཏེ། །རང་རང་གནས་སུ་རྒྱས་པར་དགྱེ། །རྟག་ཆད་མཐའ་ལས་གྲོལ་བྱའི་ཕྱིར། །དཀྱིལ་འཁོར་རིམ་བཞིན་སྙིང་ལ་བསྡུ། །མི་དམིགས་ངང་ལས་གཙོ་བོར་བསྐྱེད། །བསྐྱེད་པའི་རྫོགས་པ་བསྟན་པའོ། །བར་ཆོད་རྒྱུན་ལས་གྲོལ་བྱའི་ཕྱིར། །རྒྱ་གྲམ་གོ་དང་ཁྲོ་ལུས་བསྲུང་། །དེ་ཉིད་འགྲོ་དོན་ནུས་ལྡན་ཕྱིར། །དབང་བསྐུར་དབུ་རྒྱན་ཅོད་པཎ་ལྡན། །བདག་ཉིད་སྤྱོད་ལམ་འགྲོ་འདུག་ཉལ། །ལོངས་སྤྱོད་དུས་བཞི་མཉམ་ལང་ཚོ། །རིག་ཕྱིར་ཐམས་ཅད་དཀྱིལ་འཁོར་ལྷ། །གསལ་བས་ཐ་སྙད་ཞེན་ལས་འདས། །ཕྱག་རྒྱ་ཆེན་པོ་ཉིད་དུ་འགྱུར། །དེ་ཕྱིར་ལེ་ལོ་གཉིས་སྤངས་འབད། །དེ་ལྟའི་ཏིང་འཛིན་སྐྱོ་ལྡང་ན། །རྫོགས་པའི་བསམ་པ་སངས་བྱས་ཏེ། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་ཉིད་ཀྱི་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་གཤེགས། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིག་པ་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔས་ལྟ་ཞིང་། །སྙིང་པོའི་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པ་དབུལ། ༈ །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་རང་སྣང་བ། །རོལ་མོའི་དཀྱིལ་འཁོར་མཐའ་ཡས་མཆོག །དེ་ལ་སོགས་པའི་གདམས་ངག་ནི། །བླ་མའི་ཞལ་ལས་ཤེས་པར་བྱ། ༈ །དེ་གོམས་འཁོར་ལོ་རིམ་བསྡུས་ཏེ། །ནཱ་དའི་སྒྲ་ལ་དམིགས་ཏེ་འདུག །བདེ་ཡི་ངང་ལས་ནང་པར་འདུག །སྐད་ཅིག་ལྷ་ཀུན་རྫོགས་བསམ་སྟེ། །མཆོད་བསྟོད་ལ་སོགས་རྫོགས་པར་བྱ། ༈ །རྫོགས་པ་ཉིད་དུ་སྦྱོར་བ་ཡིས། །ནཱ་དའི་སྒྲ་ཡང་མི་དམིགས་འདུག །སྟོབས་འགྱུར་ཐམས་ཅད་ཡེ་ཤེས་སྐུ། །སྐད་ཅིག་རིག་ལ་གསལ་མཐོང་བའོ། །རྫོགས་པའི་རྫོགས་པར་བཤད་པ་ཡི། ༈ །བདག་ཉིད་ནམ་ཞིག་འཕོ་བའི་ཚེ། །ཡེ་ཤེས་སྐུ་གཉིས་གསལ་བརྟན་ནས། །འཕོ་བའི་སེམས་སྟོབས་དྲག་པོ་ཡི། །བར་མ་ཡེ་ཤེས་གཟུགས་སྐུར་སྦྱོར། ༈ །དེ་ལྟར་གོམས་པ་སྔ་མ་བཞིན། །ཚེ་དང་ཕྱག་རྒྱ་ལྷུན་གྲུབ་རིགས། །ངེས་ཐོབ་རྫོགས་པའི་ས་སྦྱོར་བ། །ཡེ་ཤེས་ལྷ་མོར་རོལ་སྤྱོད་དང་། །གསང་བའི་རྫོགས་སྐུ་བྱིན་རླབས་ཀྱིས། །སྐད་ཅིག་ལྷུན་གྲུབ་ས་ལ་འགྲོ། །ལོག་པར་རྟོགས་རྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་སྣང་བ་ཡང་། ༈ །མཐོ་དམན་ཀུན་གྱིས་གཟུགས་སྣང་དང་། བླ་མེད་བྱང་ཆུབ་སྐུ་སྣང་བ། །སྣ་ཚོགས་ཁ་དོག་དབྱིབས་སུ་སྣང་། །ལྷུན་གྲུབ་སྐུ་ལས་མ་གཡོས་བཞིན། །སོ་སོ་ཇི་ལྟར་འདུལ་བ་ལྟར། །རྟོགས་པ་རྣམས་ལ་འཁོར་བའི་ལུས། །ཐར་པའི་ཆ་སྟོན་རྒྱལ་པོ་དང་། །ཚངས་དང་ལ་ཆེན་ཐ་དད་སྣང་། །ཐར་པ་རྣམས་ལ་དག་པའི་སྐུ། །ཉན་ཐོས་རྣམས་ལ་དགྲ་བཅོམ་གཟུགས། །རང་རྒྱལ་རྣམས་ལ་བསེ་རུ་ཚུལ། །མོས་སྤྱོད་མདོ་སྡེ་ཤཱཀྱ་ཐུབ། །བྱང་ཆུབ་སེམས་ལ་རྫོགས་ལོངས་སྤྱོད། །ལྷུན་གྲུབ་རྣམས་ལ་རྡོ་རྗེ་དབྱིངས། །ཞི་ཁྲོ་རྣམས་ལ་ཚོགས་ཆེན་ལ། །སོ་སོར་མཐུན་བྱས་ཀུན་ཏུ་སྣང་། །དཔེར་ན་མེ་ལོང་ཆུ་ཟླ་བཞིན། །འགྲོ་འོང་མེད་ལ་ཀུན་ཏུ་གསལ། །གསལ་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །ཐར་པ་བསྐུལ་ཞིང་ངན་སོང་སྦྱོང་། །ཞི་བ་ཕྱོགས་གཅིག་ཤེས་བྱ་སྦྱོང་། །ས་བཅུ་མཉམ་པར་སྦྱོར་བྱེད་ཅིང་། །ཚོགས་གཉིས་ཡང་དག་རྫོགས་བྱེད་པའི །རྒྱལ་བའི་རྒྱལ་བ་ཉིད་ཀྱི་སྐུ། །ཀུན་ཏུ་རིན་ཆེན་ལྟ་བུའོ། །སྒྱུ་འཕྲུལ་དྲྭ་བའི་རྒྱུད་ཆེན་རྒྱ་མཚོ་ལས། །ངང་པས་འོ་མའི་ཚུལ་བཞིན་འོད་ཀྱི་སྐས། །རིམ་པའི་སྒྲུབ་ཐབས་གསལ་བྱེད་ཡི་གེ་འདི། །ཤེས་ཆུང་ཕྱོགས་ཤར་བདག་གིས་ལེགས་པར་བསྡུས། །འདི་ལ་ནོངས་འགལ་ར་ཆོད་གྱུར་པ་དག །མི་དམིགས་སེམས་ཀྱིས་དག་པའི་ཀློང་དུ་བཤགས། །དེ་ལྟར་དགེ་རྩས་ལམ་གནས་རྣལ་འབྱོར་ཀུན། །བསྐྱེད་རིམ་མཐར་ཕྱིན་ཡང་དག་ཤེས་ནས་ཀུན་གྱི་མཐར་ལམ་མངོན་གྱུར་དོན་རྫོགས་ཏེ། ཐར་ལམ་འགྲོ་དོན་ཚུལ་བཞིན་བྱེད་པར་རྫོགས་པར་ཤོག །སྒྱུ་འཕྲུལ་དྲྭ་བའི་བསྐྱེད་པའི་རིམ་པའི་ཏིང་ངེ་འཛིན་དཀྱིལ་འཁོར་ལྔའི་དབང་དུ་བྱས་ལ། འོད་ཀྱི་རིམ་པ་ཞེས་བྱ་བའི་མན་ངག་རྫོགས་སོ། །སློབ་དཔོན་བི་མ་ལ་མི་ཏྲས་མཛད་པའི་སྒྱུ་འཕྲུལ་རྒྱས་པའི་སྒྲུབ་ཐབས་ཨཐྎ།། །།མངྒ་ལཾ།།
སྒྱུ་འཕྲུལ་ཞི་བ་འབྲིང་པོའི་སྒྲུབ་ཐབས་རིན་ཆེན་དྲྭ་བ། སློབ་དཔོན་བི་མ་ལ་མི་ཏྲ།
མཱ ཡཱ ཤཱ ནྟ མ དྷྱཾ སཱ དྷ ཀཾ ར ཏྣ ཛ ལ ནཱ མ བི ཧ ར ཏི སྨ། །
སྒྱུ་འཕྲུལ་ཞི་བ་འབྲིང་པོའི་སྒྲུབ་ཐབས་རིན་ཆེན་དྲྭ་བ་ཞེས་བྱ་བ་བཞུགས་སོ། །
དེ་བཞིན་གཤེགས་པ་ཀུན་གྱི་བདག །ཡེ་ཤེས་རྒྱ་མཚོ་རབ་ཟབ་ཐུགས། །དཀྱིལ་འཁོར་ཡིད་བཞིན་འབྱུང་བའི་གཏེར། །ནོར་བུ་རིན་ཆེན་ཡོན་ཏན་མཛོད། །རྡོ་རྗེ་ཡིད་ལ་ཕྱག་འཚལ་ལོ། །ཨེ་མ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་གནས་ལ་སོགས། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱི་མཁའ་ལ་མདུད་པ་འདོར། །ཉོན་མོངས་འཁོར་བའི་བྱ་བྲལ་ནས། །བྱང་ཆུབ་མཆོག་ལ་དགོངས་པ་དང་། །མ་འོངས་སངས་རྒྱས་བློ་ལྡན་དོན། །བླ་མེད་ཡེ་ཤེས་བསྐྱེད་པའི་ཕྱིར། །རྒྱུད་ཀྱི་དོན་བསྡུས་སྙིང་པོ་འདི། །མ་ནོར་བསྡུས་ཏེ་བསྟན་པར་བྱ། །རི་བོ་འདུས་པའི་རྩེ་རྣམས་དང་། །དབེན་པ་ཆེན་པོའི་ས་ཕྱོགས་སུ། །ཙནྡན་ནགས་དང་མེ་ཏོག་ཚལ། །ཡིད་འོང་བཀྲ་ཤིས་སེམས་དགའ་བའི། །བདག་དབང་བར་ཆད་མེད་པའི་གནས། །དེར་ནི་ཏིང་འཛིན་བསྒོམ་པར་བྱ། ༈ །བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགགས་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །སྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་བྱེད་པར་འགྱུར། །མུན་ལས་སྣང་བྱུང་དེ་བཞིན་དུ། །འགྱུར་བ་གསེར་འགྱུར་སྨན་གྱི་ཚུལ། །རྟོག་པའི་དབང་བསྒྱུར་ཏིང་འཛིན་ཡིན། །དེ་ལྟར་ཏིང་འཛིན་རིམ་བཞིན་བསྒོམ། །དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། །ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་འཕྲོས། །ཕྱོགས་བཅུ་གང་བར་གསལ་གྱུར་ནས། །བྱང་ཆུབ་སེམས་སུ་བྱིན་བརླབས་ཏེ། །བསྡུས་ཀྱང་འཕེལ་འགྲིབ་མེད་པར་བསྟན། །དེ་ལས་མིང་ཚོགས་གསལ་བ་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟེན་འབྱུང་ཡེ་ཤེས་རྒྱུ་ཡིན་ནོ། །དེ་ལས་རྒྱལ་བའི་བཞུགས་གནས་རྟེན། །དབང་ཆེན་དཀྱིལ་འཁོར་རིམ་བཞིན་བསྒོམ། །ཨེ་ཡཾ་ཝཾ་ལྃ་སུྃ་རྃ་བྷྲཱུྃ། བི་ཤྭ་བི་ཤུ་དྷེ། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཨ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ཝ་ར་ལ་ཤ་ཥ་ས་ཧ། ཀྵ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨ། ཨ་ཉིད་སྣ་ཚོགས་པར་སྣང་བས། །རྒྱལ་བ་རྣམས་ཀྱི་ཐུགས་དམ་བསྐུལ། །དེ་ལས་སླར་ཡང་འདུས་པ་ལས། །ཧཱུྃ་བཛྲ་དྷྲཱྀཀ །ༀ་ཛི་ན་ཛིཀ །སྭཱ་རཏྣ་དྷྲཱྀཀ །ཨཱཾ་ཨ་རོ་ལི་ཀ །ཧཱཾ་པྲཛྙཱ་དྷྲཱྀཀ །མུཾ་དྷ་ཏེ་ཤྭ་རི། ལཾ་དྭེ་ཥ་ར་ཏི། མཱཾ་མོ་ཧ་ར་ཏི། པཱཾ་རཱ་ག་ར་ཏི། ཏཱཾ་བཛྲ་ར་ཏི། ཀྵི་ཧི་རཱ་ཛ་ཡ། ཏྲཱཾ་ཨ་གརྦྷ་ཡེ། ཧྲཱིཾ་ཧ་ཧཱུྃ་པདྨ་པྲ་ད་མ། ཛྲཱིཾ་ཀུ་རུ་པཱ་ཎ། ཧཱུྃ་ལཱ་སྱེ་ས་མ་ཡ་སྟཾ། ཏྲཱཾ་མཱ་ལེ་ས་མ་ཡ་ཧོཿ ཧྲཱིཾ་གཱིརྟི་རཱ་གོ་ཧཾ། ཨ་ནཱིརྟི་ར་ག་ཡཱ་མི། མཻ་དྷཱ་ར་ཎེ་སྭཱ་ཧཱ། ཐླྷིཾ་ནི་སྶ་རཾ་བྷ་ཡ་སྭཱ་ཧཱ། ཧཱུཾ་སྭཱ་རཱ་ཛ་ཡ་སྭཱ་ཧཱ། མུྃ་ཤྲཱི་ཨ་རཱ་ག་ཡ་སྭཱ་ཧཱ། ཛཿདྷུ་པ་པྲ་བེ་ཤ་ཧཱུྃ་པཥྤ་ཨ་བྷེ་ཤ །བཾ་དི་པ་སུ་གི་རི། ཧོཿ གནྡྷེ་ཙིཏྟ། ཧཱུྃ་ཡ་མནྟ་ཀྲྀ་ཏ་ཕཊ། ཧཱུྃ་བགྷཱནྟ་ཀྲི ཏ་ཕཊ། ཧཱུྃ་པདྨནྟ་ཀྲྀ ཏ་ཕཊ། ཧཱུྃ་པྲ་ཛྙཱནྟ་ཀྲྀ ཏ་ཕཊ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རི་ཛྭ་ལཱི་ནི་ཧཱུྃ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱ་ནི་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཨ་ཨ་ཨ་བཛྲི་བྷ་དྲ་ས་མནྟ་ཨཱཿ ༀ་མུ་ནེ་ཀྲེཾ་སྭཱ་ཧཱ། ༀ་མུ་ནེ་ཧཱུྃ་ཏྲུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་པྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་ལྡན་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེད། །གཟུགས་མཛེས་རིན་ཆེན་ཕྲེང་བ་དང་། །པི་ཝཾ་གར་མཁན་མཆོག་ཉིད་དེ། །མེ་ཏོག་ཕྲེང་དང་སྤོས་མཆོད་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བརྟན། །དབུ་རྣམས་འབྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞི་ཁྲོ་བོའི་ཕྱག་རྒྱ་ནི། །ཎྀ་མགོ་གདེངས་དང་རྡོ་རྗེ་གནོན། །ཐོད་སྦྲུལ་ཆེན་པོ་མནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྥོ་ཊ་ཧོཿ སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཏུ་བསྟན། །གསེག་པར་དང་ནི་པི་ཝཾ་དང་། །གོ་ཆ་པུ་སྟི་རིན་ཆེན་སྒྲོམ། །མེ་དང་ཆུར་ནི་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པདྨོའི་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྲིག་པ་སྟེ། །མཐའ་དབུས་མེད་པར་ཁྱད་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཕྱག་རྒྱའི་དཀྱིལ་འཁོར་གསལ་བ་དང་། །དབང་བསྐུར་བྱིན་རླབས་ཚུལ་བཞིན་བྱ། །ༀ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཨ་དཪྴ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ༀ་མ་ཧཱ་ས་མ་ཏ་ཛྙཱ་ན་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ༀ་མ་ཧཱ་པྲ་ཏྱ་བེཀྵ་ཎེ་ཛྙཱ་ན་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཱཀྲྀ་ཏྱ་ཨ་ནུཥྛ་ན་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱཀྐ་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་ཛྙཱ་ན་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། སངས་རྒྱས་ལྔ་ཡི་ཅོད་པན་ཅན། །རིན་ཆེན་དབུ་རྒྱན་ཕྲེང་བ་དང་། །དཔུང་རྒྱན་སེ་མོ་དོ་ལ་སོགས། །མཛེས་པའི་རྒྱན་རྣམས་སྣ་ཚོགས་ཀྱིས། །དབང་མཆོག་དེས་ནི་དབང་བསྐུར་རོ། །དེ་ལྟར་རྟོགས་པའི་རྣལ་འབྱོར་ནི། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་མི་འཚོལ་ཏེ། །སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་དུ་མ་འཚོལ་ཅིག །དཀྱིལ་འཁོར་ཀུན་ཏུ་རབ་ཚོལ་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཡང་རྒྱལ་བས་མི་བརྙེས་སོ། །ཀུན་གྱི་ཕྱག་རྒྱ་ཆེན་པོ་མཆོག །མ་འགགས་རྣམ་པ་ཅིར་ཡང་སྟོན། །འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཕྱོགས་བཅུའི་དཀྱིལ་འཁོར་སྤྱན་དྲངས་ཕྱིར། །གསལ་ལྡན་མའམ་བྱིན་བརླབས་ལ། །སྟོང་གསུམ་ཡུངས་འབྲུར་གཞུག་ཚུལ་དུ། །དབྱིངས་ནས་དཀྱིལ་འཁོར་སྤྱན་དྲང་མཆོད། །ཨེ་ཧྱ་ཧི་བྷ་ག་ཝཱན་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿས་མ་ཡ་སྟཾ། ཛཿཧཱུྃ་བཾ་ཧོ། ཞེས་བརྗོད་པས། ཐམས་ཅད་མ་ལུས་འདུས་པ་དང་། །སྐུ་གསུང་མཉེས་པར་བྱ་བའི་ཕྱིར། །བསྟོད་དང་མཆོད་པ་ཚུལ་བཞིན་བྱ། །ༀ། ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་མཆོག །སྣང་སྟོང་ཐིག་ལེ་ཀུན་རྫོགས་ཧོ། །ༀ། རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ༀ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོཿ ༀ། མི་དམིགས་སྒྱུ་འཕྲུལ་དྲྭ་བའི་དབྱིངས། །མཐའ་ཡས་ཀུན་ནས་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་གྲུབ། །སྣ་ཚོགས་སྐུ་གསུང་ཐུགས་ཆེན་པོ་ཧོཿ ༀ། ཕྱོགས་བཅུ་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱི། །སྐད་ཅིག་ཡུད་ལ་ལྷུན་གྱིས་གྲུབ་ཧོཿ ༀ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱི་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། །ༀ། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོ་འབར། །དབྱིབས་ལེགས་རྫིང་བུ་རོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཆར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །སྒྱུ་འཕྲུལ་དྲྭ་བས་མངོན་རྫོགས་པའི། །དབང་པོའི་ཡུལ་དུ་གང་གྱུར་པ། །ཐབས་དང་ཤེས་རབ་ལྡན་གྱུར་ཞིང་། །མཉམ་པའི་ངང་དུ་རྟོག་གསལ་ནས། །ཐམས་ཅད་བྱང་ཆུབ་མཆོག་གི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཐབས་དང་ཤེས་རབ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །འདི་ནི་སྤྱི་རྒྱ་ཆེན་པོ་སྟེ། །བླ་མེད་ཆེན་པོས་དེ་སྐད་གསུངས། །གསང་བ་དེ་ཉིད་ངེས་པ་ཡིས། །སྙིང་པོའི་ཕྱག་རྒྱ་འདའ་དཀའ་འོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ༀ་དང་མཱུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པས། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུྃ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུྃ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ལཱྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟར། །འབྲུ་བཞི་སྦས་ནས་ཐུགས་ཀར་བཀན། །སྭཱྃ་སྒྲེང་རྩེ་མོར་རིན་ཆེན་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱྃ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་ལྟ། །འབྲུ་བཞི་སྦས་ནས་ཐུགས་ཀར་བཀན། །ཨྃ་སྒྲེང་རྩེ་མོར་པདྨ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀན་བཀན། །པཱྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཧཱྃ་སྒྲེང་རྩེ་མོར་རལ་གྲི་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། ཏཱྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འདི་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིན། ༈ །དེ་ལ་མཆོད་སྦྱིན་དམ་པ་ནི། །ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་སྟེང་དུ་མཁས་པས་བཞག །ང་རྒྱལ་ལག་གི་འདུ་བྱེད་བསྒོམ། །ཧཱུྃ་དུ་གྱུར་པས་རྣམ་པར་དག །དབྱིངས་སུ་ཐིམ་པས་ཕྱག་རྒྱར་གསལ། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་བསྒོམ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། ༈ །ཤེས་རབ་མཚན་ལྡན་བྱིན་གྱིས་བརླབས། །ཐབས་དང་ཤེས་རབ་གཉིས་མེད་པའི། །པདྨོ་ལ་ནི་རྡོ་རྗེ་གཞུག །འཁྲིག་པའི་ཚུལ་གྱིས་མཉམ་སྦྱོར་བས། །བདག་ཉིད་མཉེས་པས་ཀུན་ལ་མཆོད། །སྦྱོར་སྒྲོལ་བྱ་བ་ཀུན་བྱས་ཀྱང་། །དེ་ལ་བྱས་པ་རྡུལ་ཙམ་མེད། ༈ །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །སྒྱུ་འཕྲུལ་དྲ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་ཕྱག་རྒྱའི་འདུ་འཕྲོ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨཱ་ལི་ཀ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཕྱོགས་བཅུ་དུས་བཞི་རྫོགས་པ་ཡི། །བདེ་གཤེགས་ཡོན་ཏན་རྨད་པོ་ཆེ། །གཞན་ནས་ཡོད་འོང་མ་ཡིན་ཏེ། །སྣང་སྲིད་ལ་སོགས་སྨོས་ཅི་དགོས། །རྣལ་འབྱོར་ལས་སུ་རུང་རྣམས་ཀྱི། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་བ་ཡིད་གཉིས་མེད་པ་ན། །དཀྱིལ་འཁོར་ཆེན་པོ་འབར་བར་འགྱུར། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །མ་ཉམས་འཇུག་ལ་རབ་བརྩོན་ནས། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་བཅུ་དུས་བཞི་མངོན་རྫོགས་པའི། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་བསམ་ཡས་མ་ལུས་ཀུན། །མཐོང་ནས་ཉེ་བར་བསྙེན་པ་དང་། །རྒྱ་ཆེན་གསུང་ལ་དོན་འབྱུང་བའང་། །མཐུན་པའི་ཡེ་ཤེས་རང་སྣང་བའོ། །གཅིག་དང་དུ་མར་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །དབང་མཆོག་དམ་པ་མ་ཐོབ་པར། །བསྒྲུབ་ཀྱང་ཅུང་ཟད་འགྲུབ་མི་འགྱུར། །ༀ་ཕྱོགས་བཅུ་དུས་བཞི་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིན་པ་སྤྱོད། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡི་དབང་བསྐུར་ན། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །སངས་རྒྱས་ཀུན་གྱིས་གྲུབ་པའི་གཞི། །རྡོ་རྗེ་དམ་ཚིག་ཆེན་པོ་སྟེ། །བླ་མེད་མི་སྤང་བླ་མ་བསྐུར། །སྔགས་དང་ཕྱག་རྒྱ་རྒྱུན་མི་གཅོད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །གཏི་མུག་ཆགས་སྡང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་དོར་རོ། །ཡན་ལག་བཅུ་ཡི་དམ་ཚིག་སྟེ། །ཡེ་ནས་དག་མཉམ་རྟོགས་པས་སྤྱད། །བསྲུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིང་མི་འགྱུར། །མི་སྤང་མི་དོར་ལྔ་གཉིས་ནི། །ཡན་ལག་དམ་ཚིག་འདའ་དཀའ་འོ། །མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །འདས་ན་སངས་རྒྱས་མ་ཡིན་ནོ། །རྩ་བ་ཉམས་པའི་འཆལ་པ་དག །གསོ་ལ་ཉེ་བར་མི་བརྩོན་དང་། །སྐད་ཅིག་ཡུད་ཙམ་སྨྲ་མ་བྱེད། །ཉམས་འགྱུར་ཉེས་པ་བརྗོད་མི་ལང་། །རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །དམ་ཚིག་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བ་ཐིག་ལེའི་དཀྱིལ་འཁོར་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་ཏེ། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིག་པ་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔ་ལྟ་ཞིང་། །སྙིང་པོའི་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡི། །ཡེ་ཤེས་དགྱེས་ལ་མཆོད་པར་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་རང་སྣང་བས། །རོལ་མོའི་དཀྱིལ་འཁོར་མཐའ་ཡས་མཆོག །གསང་བཞི་ཐིག་ལེ་ཉིད་ཀྱི་དབྱིངས། །དེ་ནི་སངས་རྒྱས་ཀུན་གྱི་དངོས། །ཡང་དག་གསང་ཆེན་སྙིང་པོ་འདི། །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་རྣམས་ཀྱིས་ཟུངས། །སྣོད་ལྡན་ངང་ཚུལ་བཟང་ལ་བསྟན། །ལུས་དང་ལོངས་སྤྱོད་གཏོང་ལ་སྦྱིན། །རྨོངས་ལ་འཕྱར་བས་གལ་ཏེ་བྱིན། །དུས་མིན་པར་ནི་སྲོག་ཟད་ནས། །སྲེག་དང་སྦྲེབས་པར་ཡུན་རིང་གནས། །རང་སྣང་དབྱེར་མེད་དཀྱིལ་འཁོར་ཀུན། །ཐུགས་ཀྱི་དཀྱིལ་འཁོར་ཉིད་དུ་བསྡུ། །ཧཱུྃ་ཧཱུྃ་ཞེས་ནི་རབ་བརྗོད་པས། །ཆོས་ཀྱི་དབྱིངས་སུ་ཐིམ་པར་འགྱུར། །དེ་ནས་སྙིང་པོ་དྲན་ཙམ་གྱིས། །ཕྱག་རྒྱ་ཆེན་པོ་གསལ་གྱུར་ནས། །གོ་བགོ་མཚམས་བཅད་ལུས་བསྲུང་ཏེ། །དེ་ནས་རྣལ་འབྱོར་ཆེན་པོ་དེ། །འགྲོ་ཉལ་འདུག་སྡོད་བཞི་པོ་རྣམས། །སྲོག་གི་ཕྱིར་ཡང་མི་གཏང་ཞིང་། །སྤྱོད་ལམ་ཀུན་ཏུ་མ་ཉམས་པར། །བདག་ཉིད་ཆེན་པོ་བརྟན་པར་བསྒོམ། །རྒྱུད་ཀྱི་དོན་ལས་བསྡུས་པ་ཡི། །རིན་ཆེན་དྲ་བས་མངོན་རྫོགས་འདི། །མ་འོངས་རྣལ་འབྱོར་ཐམས་ཅད་དང་། །མཐའ་ཡས་སེམས་ཅན་དོན་གྱི་ཕྱིར། །བསྟན་པས་སྒྲིབ་པ་ཀུན་བྱང་ནས། །བླ་མེད་བྱང་ཆུབ་ཐོབ་པར་ཤོག །རིན་ཆེན་དྲྭ་བ་སློབ་དཔོན་བི་མ་ལ་མི་ཏྲས་མཛད་པ། བོད་ཀྱི་ལོ་ཙཱ་བ་ཉང་པོ་ཀླུའི་རྒྱལ་མཚན་དང་། བྲན་ཀ་ར་མུརྟི་དང་། ཅོག་རོ་ཀླུའི་རྒྱལ་མཚན་དང་གསུམ་གྱིས་དཔལ་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སརྦ་མངྒལཾ།། །།
ཞི་བ་འབྲིང་པོའི་སྒྲུབ་ཐབས་རིན་ཆེན་ཕྲེང་བ།
ཤཱ ནྟ རྨ དྷྱཱཾ སཱ དྷོ བ ཡ ར ཏྣ མཱ ལ བི ཧ ར ཏི སྨ། །
ཞི་བ་འབྲིང་པོའི་སྒྲུབ་ཐབས་རིན་ཆེན་ཕྲེང་བ་བཞུགས་སོ། །
དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞི་བའི་དཀྱིལ་འཁོར་བསྒྲུབ་ལུགས་ལ། །དང་པོ་བྱང་ཆུབ་མཆོག་ཏུ་སེམས་ལྔ་བསྐྱེད་པ་འདི་སྐད་དོ། །བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། ། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་བྱེད་པར་འགྱུར། །མུན་ལས་སྣང་བྱུང་ཇི་བཞིན་དུ། །འགྱུར་བ་གསེར་འགྱུར་སྨན་གྱི་ཚུལ། །རྟོག་པའི་དབང་བསྒྱུར་ཏིང་འཛིན་ཡིན། །དེ་ལྟར་ཏིང་འཛིན་རིམ་བཞིན་བསྒོམ། །དངོས་རྣམས་ཉིད་ན་དངོས་མེད་པས། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །དེ་བཞིན་ཉིད་ལས་སྤྲོས་མེད་དེ། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་རྣམས་ལ་སྙིང་རྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །དངོས་པོ་མེད་ལ་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེའི་མཆོག་ནི་བསྒོམ་པར་བྱའོ། །ཨ་རབ་ཏུ་བརྟན་འགྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་འཕྲོས། །ཕྱོགས་བཅུ་གང་བར་གསལ་གྱུར་ནས། །བྱང་ཆུབ་སེམས་སུ་བྱིན་བརླབས་ནས། །བསྡུས་ཀྱང་འཕེལ་འགྲིབ་མེད་པར་བརྟན། །ཨ་ཀ་ཁ་ག་གྷ་ང་། ཙ་ཚ་ཛ་ཛྙཱ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཝ་ཡ་ར་ལ། ཥ་ཤ་ས་ཧ་ཀྵཿ ཨི་ཨཱི། ཨུ་ཨཱུ། ཨེ་ཨཻ། ཨོ་ཨ། དེ་ལས་མིང་ཚོར་གསལ་བར་ཀུན། །སྤྲོ་ཞིང་བསྡུ་བའང་དེ་བཞིན་ཏེ། །འདི་ནི་རྡོ་རྗེའི་དངོས་གྲུབ་ཀྱི། །བསྟན་འབྱུང་ཡེ་ཤེས་རྒྱུད་ཡིན་ནོ། །དེ་ལས་རྒྱལ་བའི་བཞུགས་གནས་རྟེན། །དབང་ཆེན་དཀྱིལ་འཁོར་རིམ་བཞིན་བསྒོམ། །ཨེ་ཡཾ་བཾ་སུཾ་ལཾ་བྷྲཱུྃ་བྷྲཱུྃ་བི་ཤྭ་བི་ཤུདྷེ། བཛྲ་ཛྙཱ་ན་ཙཀྲ་སུརྻ་ཙནྜ་རཏྣ་པདྨ་མཎྜ་ལ་བྷྲཱུྃ། ཡེ་ཤེས་ཕྱོགས་བཞི་དབུས་བརྟེན་ཏེ། །དཀྱིལ་འཁོར་བསམ་ཡས་ལྷུན་གྱིས་གྲུབ། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །ལྷག་པའི་ཡེ་ཤེས་གློ་འབུར་ཅན། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལས། །ཉི་ཟླ་པདྨ་རིན་པོ་ཆེའི་གདན་ལ། མ་སུརྻ་མཎྜ་ལ་ཧཱུྃ། ཨ་ཙནྜ་མཎྜ་ལ་ཧཱུྃ། པཾ་པདྨ་མཎྜལ་ཧཱུྃ། ཋ་ཐ། ཊ་ཏ། ཌ་ད། ཌྷ་དྷ། ཎ་ན། ཀ་ཙ། ག་ཛ། གྷ་ཛྷ། ཁ་ཚ། ས་ཡ། ཕ་ཝ། བ་ར། བྷ་ལ། ང་ཤ། ཉ་ཥ། མ་ས། ཨོ་ཨ། ཀྵ་ཨ། ཨི་ཨཱི། ཨུ་ཨཱུ། ཨེ་ཨཻ། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པའི་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུ། །མངོན་རྫོགས་རྒྱལ་པོ་དེ་ཉིད་ངེས། །བཛྲ་ཙཀྲ་རཏྣ་པདྨ་ཁངྒ་གཎྜེ། བྱས་པས། ཕྱག་མཚན་བཞི་བཅུ་རྩ་གཉིས་གྱུར། །དེ་ལས་སྤྲོ་དང་བསྡུ་བ་ཡིས། །སོ་སོའི་ཕྱག་མཚན་འབར་བར་གྱུར། །དེ་ལས་ཕྱོགས་བཅུར་རབ་སྤྲོས་ཏེ། །རྒྱལ་བ་རྣམས་ཀྱི་ཐུགས་དམ་བསྐུར། །དེ་ལས་སླར་ནི་བསྡུས་པ་ལས། ཧཱུྃ་བཛྲ་དྷྲྀཀ་མཱུཾ་དཱ་དུ་ཤྭ་རི། ༀ་ཛི་ན་ཛཱིཀ །ལཾ་དྭེ་ཥ་ར་ཏི། སྭཱ་རཏྣ་དྷྲིཀ །མཱཾ་མོ་ཧཱ་ར་ཏི། ཨཱཾ་ཨ་རོ་ལྀཀ །པྱཾ་རཱ་ག་ར་ཏི། ཧཱ་པྲ་ཛྙཱ་དྷྲཱྀཀ །ཏྃ་བཛྲ་ར་ཏི། ཀྵི་ཧི་ར་ཙ་ཡ། ཧཱུྃ་ལ་སྱེ་ས་མ་ཡ་སྟྭཾ། ཏྲཱཾ་ཨ་གརྦྷ་ཡ། ཏྲཾ་མ་ལྱེ་ས་མ་ཡ་སྟྭཾ། ཧྲཱིཿཧ་ཧཱུྃ་པདྨ་བ་ད་མ། ཧྲཱིཿགིརྟི་རཱ་ག་ཧོ་ཧཾ། ཛིཾ་ཀུ་རུ་པ་ཎ་ཧྲཱིཿ ཨ་ནིརྟི་ར་ག་ཡ་མིཾ། མེ་ད་ར་ནི་སྭཱ་ཧཱ། ཛཿདྷུ་བེ་ཕྲ་བེ་ཤེ། ཐི་ལྷིང་ནི་ས་རཾ་པཱ་ཡ་སྭཱ་ཧཱ། ཧཱུྃ་པུཥྤེ་ཨཱ་བེ་ཤ། ཧཱུྃ་སྭ་རཱ་ཙ་ཡ་སྭཱ་ཧཱ། བཾ་དཱི་པཾ་སུ་ཀེ་ནི། མུཾ་ཤྲཱི་ཨ་རཾ་ག་ཡ་སྭཱ་ཧཱ། ཧོ་གནྡེ་ཙིཏྟ་ཧོ། ཧཱུྃ་ཡ་མཱནྟ་ཀྲྀ་ཏ་ཕཊ། ༀ་བཛྲ་དྷ་ར་མ་ཧཱ་ཀྲོ་ཏཱི་ཤྭ་རི་ཛྭ་ལ་ནི་ཧཱུྃ་ཕཊ། ཧཱུྃ་བིགྷྣཱནྟ་ཀྲྀ་ཏ་ཕཊ། ༀ་རཏྣ་དྷ་ར་མ་ཧཱ་ཀྲོ་ཏཱི་ཤྭ་རི་ཛྭ་ལ་ནི་ཧཱུྃ་ཕཊ། ཧཱུྃ་པདྨནྟ་ཀྲྀ་ཏཱ་ཕཊ། ༀ་པདྨ་དྷ་ར་མ་ཀྲོ་ཏཱི་ཤྭ་རི་ཛྭ་ལ་ནི་ཧཱུྃ་ཕཊ། ཧཱུྃ་པྲ་ཛྙཱ་ན་ཏ་ཀྲྀ་ཏ་ཕཊ། ༀ་ཀརྨ་དྷ་ར་མ་ཧཱ་ཀྲོ་ཏི་ཤྭ་རཱི་ཛྭ་ལ་ནི་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཧཱུྃ། ཨ་ཨ་ཨ་བཛྲ་བྷ་དྲ་ས་མནྟ་ཨ། ༀ་མུ་ནེ་ཀྲིཾ་སྭཱ་ཧཱ། ༀ་མུ་ནེ་ཧཱུྃ་ཏྲཱུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་བྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ན་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅད། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་མྱོང་བྱེད་སྣོམ་བྱེད་རྣམས། །བཙུན་མོའི་ཚོགས་དང་ལྡན་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེ། །གཟུགས་མཛེས་རིན་ཆེན་ཕྲེང་བ་དང་། །པི་ཝཾ་གར་མཁན་མཆོག་ཉིད་དེ། །མེ་ཏོག་ཕྲེང་དང་སྤོས་མཆོག་མ། །མར་མེ་བྱུགས་པ་ལ་སོགས་མཚན། །ལས་ལ་འཁྲིལ་ཞིང་ཆོས་ལ་བསྙེན། །དབུ་རྣམས་འབྱོན་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞི་ཁྲོ་བའི་ཕྱག་རྒྱ་ནི། །ཎི་མགོ་གདེངས་པ་རྡོ་རྗེ་གནོན། །ཐོད་སྦྲུལ་ཆེན་པོས་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྥོ་ཊ་ཧོ། །སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཡིན་ནོ། །གསེག་པར་དང་ནི་པི་ཝཾ་དང་། །གོ་ཆ་པོ་ཏི་རིན་ཆེན་སྒྲོམ། །མེ་དང་ཆུར་ནི་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པདྨོའི་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་པ་ཉིད། །ཡང་ན་རྗེ་རྗེ་ཐལ་མོ་ཉིད། །མཐིང་ཀ་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུག་སྡུག་གཟི་བྱིན་འཕྲོ། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྲིག་པ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཕྱག་རྒྱའི་དཀྱིལ་འཁོར་གསལ་བ་དང་། །དབང་བསྐུར་བྱིན་རླབས་ཚུལ་བཞིན་བྱ། །ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཨདྨ་ཀོ ྅་ཧཾ། ༀ་མ་ཧཱ་ཨ་དཪྴ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཱཾ། ༀ་མ་ཧཱ་ས་མ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་མ་ཧཱ་པྲ་ཏྱ་བྷྱེ་ཤ་ཎ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ། ༀ་མ་ཧཱ་ཀྲྀ་ཏྱ་ཨ་ནུ་ཥྛ་ན་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཀ་ཡ་བཛྲ་སྭ་བྷ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཝཀྐ་བཛྲ་སྭ་བྷ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཙིཏྟ་བཛྲ་སྭ་བྷ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཨ་ནུ་རཱ་ག་བཛྲ་སྭ་བྷ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཱཔུ་ཙ་བཛྲ་སྭ་བྷ་ཝ་ཨཏྨ་ཀོ྅་ཧཾ། སངས་རྒྱས་ལྔ་ཡི་ཅོད་པཎ་ཅན། །དབུ་རྒྱན་རིན་ཆེན་ཕྲེང་བ་དང་། །དཔུང་རྒྱན་སོ་མོ་དོ་ལ་སོགས། །མཛེས་པའི་རྒྱན་རྣམས་སྣ་ཚོགས་ཀྱིས། །དབང་མཆོག་ཏུ་ནི་དབང་བསྐུར་རོ། །སྙན་གསན་དབབ་སྟེ། སྟོང་པ་ཤིན་ཏུ་ཡོད་མེད་རྣལ་འབྱོར་མཐུ། །ནམ་མཁའ་བཞིན་ལ་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་མཛད་གཤེགས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔའ་ཁྱོད་བདག །ༀ་བཛྲ་ས་མ་ཡ་ཧཱུྃ་ཛཿ སྤྱན་དྲངས་ཏེ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉས་གནས་བསྐྱོད་དེ། །བདེ་གཤེགས་བཞུགས་ཤིང་རྣམ་གྲོལ་དགྱེས་པ་བསྐྱེད། །ༀ་ཨེ་ཧྱ་ཧི་བྷ་ག་ཝན། མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོ། ས་མ་ཡ་སྟྭཾཿ ཛཿཧཱུྃ་བཾ་ཧོཿ ༀ་བཛྲ་ཨཾ་ཀུ་ཤ་ཛ། ༀ་བཛྲ་པཱ་ཤ་ཧཱུྃ། ༀ་བཛྲ་སྥོ་ཊ་བཾ། ༀ་བཛྲ་གཎྜེ་ཧོཿ བརྟན་པར་བཞུགས་སུ་གསོལ་བ་ནི། རིན་ཆེན་སེང་གེའི་ཁྲི་ལ་ཡང་དག་ངེས་བཞུགས་ཤིང་། རང་གི་ལྷ་མོ་དག་དང་སྲས་དང་གཡོག་འཁོར་བཅས། ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། འཇིག་རྟེན་ལྷ་དང་བཅས་པ་རྣམས་ལ་སྨན་སླད་བཞུགས་སུ་གསོལ། ཀཱ་ཡ་ཝ་ཀ་ཙིཏྟ་ཏིཥྛ་བཛྲ། ཕྱག་འཚལ་བ་ནི། ཧཱུྃ་མ་སྐྱེས་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེ་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ཁམས་གསུམ་ཞིང་དུ་སྦྱོར་ལ་ཕྱག་འཚལ་ལོ། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །མཛེས་པའི་སྐུ་མཆོག་སེམས་ཅན་སྒྲོལ་ལ་མཁན། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །ཤེས་རབ་ཐབས་ཀྱིས་གཙོ་ལ་མཉེས་མཛད་མ། །རིགས་ཀྱི་ཡུམ་ཆེན་ལྔ་ལ་ཕྱག་འཚལ་ལོ། །ཐབས་མཁས་ཐུགས་རྗེ་ཡེ་ཤེས་སྤྲུལ་པ་ཡིས། །རྣལ་འབྱོར་དག་པས་བསྒྲུབས་པའི་ས་བརྙེས་ཤིང་། །ཐུགས་རྗེ་ཆེན་པོས་འགྲོ་བའི་དོན་མཛད་པ། །སེམས་དཔའ་སེམས་མ་རྣམས་ལ་ཕྱག་འཚལ་ལོ། །ཆོས་རྣམས་རྣམ་དག་ཡེ་ནས་ལྷུན་གྲུབ་པའི། །རྟོག་པར་བྱ་བའི་ཡུལ་ནི་ཆོས་བཟང་མོ། །དེ་ཉིད་དོན་རིག་བྱེད་པ་རྡོ་རྗེ་ཡིས། །ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །རྫོགས་པ་ཆེན་པོའི་ངང་ལས་མ་གཡོས་ཀྱང་། །རྟོག་པས་རྒྱུད་དྲུག་སོ་སོར་འཁོར་བ་ལས། །ཐབས་མཁས་ཐུགས་རྗེ་ཅིར་འདུལ་དེར་སྟོན་པའི། །ཐུབ་པ་ཆེན་པོ་དྲུག་ལ་ཕྱག་འཚལ་ལོ། །བྱམས་དང་སྙིང་རྗེ་དགའ་དང་བཏང་སྙོམས་ཀྱིས། །ཉོན་མོངས་ལོག་པར་ལྟ་བའི་བགེགས་རྣམས་འཇོམས། །གཤིན་རྗེ་གཤེད་པོ་ལ་སོགས་ཁྲོ་རྒྱལ་བཞི། །སྒོ་བ་ཡབ་ཡུམ་རྣམས་ལ་ཕྱག་འཚལ་ལོ། །ཨ་ཏི་པཱུ་ཧོཿ ཕྲ་ཏཱི་ཙྪ་ཧོཿ དེ་ནས་དམ་བཅའ་སྟེ། བདེ་བར་གཤེགས་པ་ཁྱེད་རྣམས་ཅི་འདྲ་བར། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་སེམས་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོར་བྱིན་བརླབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་མཛད། །བྱང་ཆུབ་སྤྱད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་ཁམས་གསུམ་སེམས་ཅན་ཐམས་ཅད་ཀྱིས་བསམ་པའི་དོན་ཐམས་ཅད་ཆོས་བཞིན་དུ་འགྲུབ་པར་གྱུར་ཅིག །སྒྱུ་འཕྲུལ་དྲྭ་བ་མངོན་རྫོགས་པའི། །དབང་པོའི་ཡུལ་དུ་གང་བསྒྱུར་བ། །ཐབས་དང་ཤེས་རབ་ལྡན་གྱུར་ཅིང་། །མཉམ་པའི་ངང་ཉིད་རྟོག་གསལ་ནས། །ཐམས་ཅད་བྱང་ཆུབ་མཆོག་གི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཐབས་དང་ཤེས་རབ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ནས། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །འདི་ནི་སྤྱི་རྒྱ་ཆེན་པོ་སྟེ། །བླ་མེད་ཆེན་པོ་འདི་སྐད་གསུངས། །གསང་བ་དེ་ནི་ངེས་པ་ཡི། །སྙིང་པོའི་ཕྱག་རྒྱ་འདབ་དཀའོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲོས་པ་ལས། །སྦྱར་བའི་ཕྱག་རྒྱ་འབྱུང་བའི་རྒྱུ། །ༀ་དང་མུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ཏེ་རྩེ་སྤྲད་པ། །རྒྱལ་བ་ཀུན་དང་མཉམ་སྦྱར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུྃ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུྃ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་ལ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྱུང་བཞི་སྦས་ནས་ཐུགས་ཀར་བཀན། །ལཱྃ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་ལ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །སྭཱ་སྒྲེང་རྩེ་མོར་རིན་ཆེན་འབའ། །ཟླ་བརྟུལ་འབྲས་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུྃ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་ལ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨཾ་སྒྲེང་རྩེ་མོར་པདྨ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །པྱཱྃ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་ལ་འཁྲིལ། །བཏུད་དེ་འཛུམ་པའི་མདངས་ཀྱིས་ལྟ། །འབྲུ་བཞི་སྦས་ནས་ཐུགས་ཀར་བཀན། །ཧཱ་སྒྲེང་རྩེ་མོར་རལ་གྲི་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ཏྲཱྃ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་ལ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འདི་ནི་རྒྱལ་བ་ཐམས་ཅད་ཀྱི། །ཕྱག་རྒྱ་མཆོད་པ་ཐམས་ཅད་ཀུན། །དགྱེས་པ་ཆེན་པོ་བསྐྱོད་པའི་ཕྱིར། །ཕྱག་རྒྱ་མཆོད་པ་དམ་པ་ཡིན། །ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་དགྱེས་པར་མཛོད། །བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོ་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏངྑཾ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་གཉིས་བསིལ་ནས་ཀྱང་། །རྡོ་རྗེའི་གདན་ལ་བཞུགས་སུ་གསོལ། །ༀ་ཨ་ཧ་ར་ཨ་ཧ་ར་སརྦ་བྱི་རྱ་ད་ར་པཱུ་ཛི་ཏེ། ན་མཿས་མནྟ། བུདྡྷ་ནན། ས་མ་ཡེ་སྭ་ཧཱ། ༀ་པ་ན་པེེཾ། པེ་ནུ་སུ་རུ་ཏོ། ཏི་པུ་པཱ་ར་མུ། ཨཱཿསརྦ་ཏ་ཐཱ་ག་སིདྡྷི་ཧོ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧོ། ༀ་ཤྲཱི་བཛྲ་རཱ་ག་པུཥྤེ་བུ། ༀ་ཤྲི་བཛྲ་ར་ག་དྷུ་པེ་དྷུ། ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿ ༀ་ཤྲཱི་བཛྲ་རཱ་ག་གྷེནྡྷ་གྷན། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །ༀ་ཨཿཧཱུྃ། རབ་ཏུ་དགའ་བའི་འགྲེའོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛད་དུ་གསོལ། །ༀ་ཨཱཿཧཱུྃ། རབ་ཏུ་དེ་བཞིན་གཤེགས་པའི་མཆོད་པ་ཆེན་པོ་ཐམས་ཅད་དག །ༀ་ཨཱཿཧཱུྃ། མཆོད་པ་ཆེན་པོ་ཐམས་ཅད་གྲུབ་པར་མཛད་དུ་གསོལ། སྨན་མཆོད་བྱ་སྟེ། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་མཆོག །ཐམས་ཅད་བདུད་རྩི་རྣལ་འབྱོར་ཆེ། །བྱང་ཆུབ་སེམས་ནི་རྡོ་རྗེ་སྟེ། །ཤ་ཆེན་མཆོད་པ་རིན་པོ་ཆེ། །པདྨ་མེ་ཏོག་ཡང་དག་ལྡན། །རྡོ་རྗེ་ཆུ་སྟེ་ལས་ཀྱི་མཆོག །ཟས་མཆོག་ཚེ་ཡི་དྲི་ཆེན་པོ། །ག་པུར་ཤེལ་གྱི་སྤོས་པོར་དྲི། །རིན་ཆེན་མེ་ལྟར་འབར་བའི་ཚོགས། །མ་ལུས་འདུས་པའི་ཐིག་ལེ་ཆེ། །གཅིག་ཏུ་དཔའ་བོའི་རོ་རྣམས་དང་། །གཉིས་སུ་མེད་པར་མཉམ་སྦྱར་ནས། །བདུད་རྩི་དམ་པའི་རིན་ཆེན་བཅུད། །བདེ་གཤེགས་རྣམས་ཀྱི་ཐུགས་དམ་ཉིད། །རྒྱལ་བ་རྒྱལ་མཚོའི་དངོས་གྲུབ་མཆོག །ཐུགས་རྗེ་ཆེན་པོའི་དཀྱིལ་འཁོར་འདིར། །བདག་ཅག་དད་པ་འབུལ་ལགས་ཀྱིས། །ཐུགས་རྗེས་དགོངས་ནས་བཞེས་སུ་གསོལ། །བཞེས་ནས་རབ་ཏུ་དགྱེས་མཛོད་ལ། །བླ་མེད་དངོས་གྲུབ་བདག་ལ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མི་བསྐྱོད་རྣམ་སྣང་རིན་ཆེན་མཐའ་ཡས་གྲུབ། ། དུས་གསུམ་བདེ་གཤེགས་རྒྱལ་མཆོག་ཡབ་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེ་ཆེར་དགོངས་དབང་དང་དངོས་གྲུབ་སྩོལ། །མ་ཧཱ་པཉྩ༴ འགྲེའོ། །བཟང་མོ་སྤྱན་དང་མཱ་མ་གོས་དཀར་སྒྲོལ། །དུས་གསུམ་བདེ་གཤེགས་རྒྱལ་མཆོག་ཡུམ་རྣམས་ལ། །རྣམ་དག༴ ཐུགས་རྗེ༴ མ་ཧཱ་པཉྩ། འགྲོ་བའི་དཔལ་དུ་གྱུར་པའི་བྱང་ཆུབ་སེམས། །ས་སྙིང་ལ་སོགས་སེམས་དཔའ་བརྒྱད་རྣམས་ལ། །རྣམ་དག༴ ཐུགས་རྗེ༴ མ་ཧཱ༴ སྒེག་མོ་ཕྲེང་དང་དབྱངས་དང་གར་ལ་སོགས། །མཛེས་པའི་སྐུ་མཆོག་ལྷ་མོ་བརྒྱད་རྣམས་ལ། །རྣམ་དག༴ ཐུགས་རྗེ༴ མ་ཧཱ༴ གཤིན་རྗེ་སྟོབས་ཆེན་རྟ་མགྲིན་བདུད་རྩི་འཁྱིལ། །རིག་པའི་རྒྱལ་པོ་ཁྲོ་བོ་བཞི་རྣམས་ལ། །རྣམ་དག༴ ཐུགས་རྗེ༴ མ་ཧཱ༴ ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །ཡེ་ཤེས་གཞལ་ཡས་སྒོ་མ་བཞི་རྣམས་ལ། །རྣམ་དག༴ ཐུགས་རྗེ༴ མ་ཧཱ༴ དུས་གསུམ་རྒྱལ་བའི་རང་བཞིན་མཁྱེན་པའི་དཔལ། །བྱ་བ་བྱེད་དང་གཉིས་མེད་ཆོས་སྐུ་ལ། །རྣམ་དག༴ ཐུགས་རྗེ༴ མ་ཧཱ༴ འགྲོ་བའི་དོན་ཕྱིར་སྤྲུལ་པའི་སྐུར་སྟོན་པའི། །འཇིག་རྟེན་འདུལ་བའི་ཐུབ་པ་དྲུག་རྣམས་ལ། །རྣམ་དག༴ ཐུགས་རྗེ༴ མ་ཧཱ༴ སློབ་དཔོན་དང་མཆེད་དང་དུས་གསུམ་ཕ་མ་ལ་དབུལ་ལོ། །ཧཱུྃ་ལྕེ་ཡི་དམ་ཚིག་རྡོ་རྗེ་སྟེ། །རྡོ་རྗེ་ཅན་གྱི་ཧཱུྃ་བསྒོམས་པས། །བདུད་རྩི་ལྔ་ཡི་སྦྱོར་བ་ཡིས། །ཟོས་ན་བྱང་ཆུབ་མཆོག་ཐོབ་འགྱུར། །ཀཱ་ཡ་སིདྡྷི་ༀ། ཝཱ་ཀ་སིདྷི་ཨཱ། ཙིཏྟ་སིདྷི་ཧཱུྃ། དེ་ནས་གཏོར་མ་དབུལ་བ་ནི། ༀ་ཨཱཿཧཱུྃ། སུ་ར་ཏོ། ས་པོ་ཀ་མ་ལ། མ་ལེ་བཛྲ། ཨ་མྲྀ་ཏ། ཧ་ར་ན་པྲ་ཏི་ཛ། བ་ག་ཝཱན། ཛཿཧཱུྃ་བཾ་ཧོཿ ཨ་ལ་ལ་ཧོ། ༀ་པ་ན་པེེཾ་བརྗོད། གསང་མནན་དབུལ་བ་ནི། ༀ་ཨཱཿཧཱུྃ། བླ་མེད་མཆོག་གི་མཆོད་པ་དམ་པར་སྦྱར་བ་འདི། ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པར་བཞེས་སུ་གསོལ། །མི་སྐྱེ་ཡེ་ཤེས་བདེ་བ་ཡི། །མཆོག་དང་ལྡན་པའི་རོ་ལ་སྣོམ་དུ་གསོལ། །ཨ་ལ་ལ་ཧོ། སེམས་དཔའ་བདེ་མཆོག་དེ་ཉིད་འགོག་པ་རྣམས་ལས་སློང་བའི་ཕྱིར། །ཆགས་པ་མེད་པའི་བདེ་མཆོག་ཀུན་ཏུ་མྱོང་མཛད་བཞེས་ཤིང་སྣོམ་དུ་གསོལ། །མཆོག་ཏུ་རོལ་བའི་བདེ་ལ་རོལ་ཅིང་དམ་ཅན་འཇིག་རྟེན་སྒྲགས། །བྱང་ཆུབ་སྐྱེ་གནས་བདེ་མཆོག་དབྱིངས་ལས་མི་མཉམ་དགའ་བའི་གར་མཛོད་ཅིག །ཧོ་སྔོན་གྱི་ཞེན་པའི་མཐའ་དང་ཉོན་མོངས་བློ་བསྐམས་གཟིར་བ་ཡི། །རྨོངས་བྱེད་བདེ་མཆོག་རྒྱན་དང་ལྡན་པས་ཐབས་ཀྱིས་བསྐུལ་ཏེ་གོ་བར་མཛོད། །འགྲོ་ཀུན་མཚུངས་པར་སྤྱོད་པའི་བྱང་ཆུབ་སྒོ་མོར་ལམ་སྟོན་ཅིག །བདེ་མཆོག་བདུད་རྩི་ཁྱད་པར་མེད་པ་འདུས་པའི་ཚོགས་ལ་བཀའ་སྩོལ་ཅིག །ཨ་ལ་ལ་ཧོ། ལྷག་པའི་ཏིང་ངེ་འཛིན་གྱི་མཆོད་པ་ནི། ༀ་མཆོད་པའི་ཕྱག་རྒྱ་ཆེན་པོ་ནི། སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེའི་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོ་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་ཚོགས་རྣམས་ཀྱིས། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱན་པར་དབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །ཨ་ལ་ལ་སྟེ་མཆོད་པར་འབུལ། །དེ་ནས་སྒྲོལ་བའི་མཆོད་པ་ནི། །ༀ་རི་རབ་ཆེན་པོའི་གླིང་བཞི་ལ། །གནས་པའི་སེམས་ཅན་མ་ལུས་ཀུན། །ཡེ་ཤེས་མེ་ཆེན་བསྒོམས་བྱས་ཏེ། །ཐམས་ཅད་མ་ལུས་བསྲེག་པར་བྱ། །སྲིད་གསུམ་སྲེག་པའི་མེ་ཡིན་ཏེ། །ཡིད་ཀྱིས་ཡེ་ཤེས་མེ་འབར་རམ། །ཐོག་མར་བདག་ཉིད་རྟོགས་བསྒོམ་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །སྦྱོར་བའི་མཆོད་པ་ནི། ཐབས་དང་ཤེས་རབ་གཉིས་མེད་པར། །པདྨོ་ལ་ནི་རྡོ་རྗེ་གཞུག །འཁྲིལ་བའི་མཆོད་བརྟེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །ས་མ་ཡ་སྟྭཾ། ས་མ་ཡ་ཧོ། ཨ་ནུ་རཱ་ག་ཡ་མེ། ཨ་ནུ་རཱ་ག་ཡ་སྟཾ། ཨ་ནུ་རཱ་ག་ཡ་ཧཾ། ཛཿཧཱུྃ་བྃ་ཧོ། བྷོ་དྷི་ཙིཏྟ་སྤར་ཎ་ཕཊ། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཙ་བཛྲ་སྭ་བྷཱ་ཝ་ཨཱདྨ་ཀོ྅་ཧཾ། འདོད་ཡོན་ལྔ་ཡི་མཆོད་པ་ནི། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ནི་ཆོས་ཉིད་རོལ། །ཨ་ལ་ལ་ཧོ། དེ་ནས་གླུ་ཡེ་ཤེས་ཀྱི་མཆོད་པ་ནི། ༀ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་རྫོགས་ཧོ། །ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོ། །ༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེ་ཧོ། །ༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པའི་རྡུལ་ཕྲན་གྲངས་མེད་ཀྱི། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །ༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱི་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། །དེ་ནས་རོལ་མོ་ཡེ་ཤེས་ཀྱི་མཆོད་པ་ནི། དབང་པོའི་སྤྱོད་ཡུལ་རང་བཞིན་དངོས་པོ་མེད། །རྣམ་དག་བདུད་རྩི་རང་བཞིན་སྡུག་བསྔལ་སེལ། །དམ་རྫས་དག་པ་ལྔ་དང་ཞལ་ཟས་ལྔ། །སྐུ་ལྔ་ཆོས་ལྔ་དབྱེར་མེད་རང་བཞིན་མཉམ། །དེ་ཕྱིར་དག་པས་དག་པ་ཉིད་མཆོད་ཅིང་། །ཆོས་ཉིད་ལ་ནི་ཆོས་ཉིད་ཐིམ་པར་དབུལ། །དྲི་མེད་རྣམ་དག་ནམ་མཁའི་རང་བཞིན་ལས། །ལོག་རྟོག་མཚན་མ་མང་པོའི་སྤྲིན་སྤུངས་ཏེ། །ཡེ་ཤེས་ཉི་ཟེར་འོད་ཀྱིས་རབ་བརྒྱན་ཏེ། །དག་པའི་དོན་ཕྱིར་རྟོགས་ནས་མཆོད་པར་གྱིས། །མཉམ་ཉིད་བླང་དོར་མེད་པར་སྙོམས་པར་འཇུག་པ་དང་། །བདེ་མཆོག་ལོངས་སྤྱོད་རྫོགས་པ་སྐུ་ཡི་རྒྱན། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལ་ཅི་བདེར་བཞེས་སུ་གསོལ། །ཧོ་སྤྲོས་པ་མེད་པའི་དབྱིངས་ལས་རང་བཞིན་གྱི་དཀྱིལ་འཁོར་རྣམ་པར་དག་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པ་རིགས་ལྔའི་བདེ་བར་གཤེགས་པ་རིགས་མཆོག་ཡུམ་གྱི་གཟུངས་མ་དང་བཅས་པ་སེམས་པའི་ཚོགས་སེམས་མའི་འཁོར། ཡེ་ཤེས་ཆེན་པོའི་དབང་ཕྱུག །ཐབས་མཁས་པའི་བདག་ཉིད། སྒྲོལ་བའི་ཁྲོ་བོ་རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དང་། སོ་སོའི་བཞུགས་གནས་དང་གཞལ་ཡས་ཁང་ཁྱད་པར་ཅན་ནས་སྐུ་བསྐྱོད་དེ། མཆོད་པའི་གནས་དམ་པ་འདིར་གཤེགས་ཤིང་བྱིན་གྱིས་བརླབ་པར་མཛད་དུ་གསོལ། ཧོཿགཞན་ཡང་རྣལ་འབྱོར་གྱི་མཆོད་ཡོན་དམ་པ་སྐུ་གསུང་ཐུགས་རྡོ་རྗེ་ལས་བྱུང་བ་ཡིད་བཞིན་གྱི་ནོར་བུ་རིན་པོ་ཆེ། ཡོན་ཏན་དཔག་བསམ་གྱི་ལྗོན་ཤིང་། འདོད་པའི་ཡོན་ཏན་ལྔའི་ལྷ་མོར་གྱུར། བྱིན་གྱིས་བརླབས་ཏེ་ཕུལ་བས་ཡེ་ཤེས་རྒྱ་མཚོ་དུས་གསུམ་དུ་བཞུགས་པ་རྣམས་ཀྱི་སྤྱན་ལམ་དུ་མངོན་སུམ་དུ་དབབ་པར་གྱུར་ཅིག །དེ་ལྟར་མངོན་སུམ་དུ་བབས་པས་རིག་པ་མཆོག་གི་ཐུགས་རྗེས་བཞེས་ཏེ། བདེ་བ་མཆོག་གི་དགྱེས་པ་ལ་ལོངས་སྤྱོད་དུ་གསོལ་ལོ། །མཐོལ་བཤགས་བཟོད་པར་གསོལ་བ་ནི། བདག་གིས་དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་པོ་མངོན་པར་ནོས་པ་ལས། རྩ་བ་དང་ཡན་ལག་གི་དམ་ཚིག་ཉམས་པ་འགལ་འཁྲུལ་དུ་གྱུར་པ། ལྷ་ཉེ་བར་མ་བསྒོམས་པ་དང་། སྙིང་པོ་ཡང་དག་པར་མ་བགྲངས་པ་དང་། སྦྱོར་བ་མང་པོའི་བར་བསྐུམས་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུགས་པ། མཆོད་པ་ལོ་ཟླ་ལས་འདའ་པ། །དམ་རྫས་དང་ལེན་རྔོ་མ་ཐོག་པ། བསྙེན་པ་ཡུན་ཐུང་བ། ཛཔ྄་དང་བཟླས་བརྗོད་གྲངས་ཉུང་བ། ཏིང་ངེ་འཛིན་ཐང་ལྷོད་དུ་གྱུར་པ། ལེ་ལོ་དང་བཏང་སྙོམས་ཀྱི་དབང་དུ་གྱུར་པ། མདོ་དེ་བཞིན་གཤེགས་པའི་མཛད་སྤྱོད་ཀློང་དུ་མ་གྱུར་ཅིང་། སེམས་ཅན་གྱི་རང་བཞིན་དུ་གྱུར་པས་སྔ་སླད་དུ་དམ་ཚིག་ཆག་ཉམས་སུ་གྱུར་པ་ཐམས་ཅད་ནི་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་བཤགས་ཤིང་མཆིས་ན། ཐུགས་རྗེ་ཆེན་པོས་བཟོད་པ་དང་དུ་བཞེས་ཏེ་ཚངས་པ་ཡིད་བཞིན་དུ་ཐོབ་པར་སྩལ་དུ་གསོལ། དངོས་གྲུབ་ཏུ་རོལ་བ་ནི། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ་མི་བརྗེད་པའི་གཟུངས་མངོན་པར་ཤེས་པ་དྲུག་རྒྱུན་གྱི་ཏིང་ངེ་འཛིན་རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། མདོ་དཔལ་ཆེན་པོ་འཁོར་དང་བཅས་པའི་སྐུ་གསུང་ཐུགས་ཀྱི་ལྷ་མན་ཆད་ནས། རྒྱུ་དང་སྐལ་བ་གང་ལགས་པ། །དུས་ཕྱི་མར་བསྡད་མི་འཚལ་བར། །དུས་ད་ལྟ་ཉིད་དུ་ཐོབ་པར་མཛད་དུ་གསོལ། ཕྲིན་ལས་གསོལ་བའི་མདོ་ནི། བདག་ལ་སྡང་བར་བྱེད་པའི་དགྲ། །གནོད་པར་བྱེད་པའི་བགེགས། གདུག་པའི་དཔལ་དུ་གྱུར་པ། ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། ཡེ་འདྲོག་སུམ་བརྒྱ་དྲུག་ཅུ་ལ་སོགས་པ་མི་ཤེས་པ་དེ་དག་ཐམས་ཅད་ཕྱིར་བཟློག་ཅིང་ཞི་བ་ཆེན་པོ་མཛད་དུ་གསོལ། འདོད་དོན་དུ་གསོལ་བ་ནི། བདག་ཅག་དམ་ཚིག་གི་འདི་ལ་མངོན་དུ་ཞུགས་པ་རྣམས། བཅད་གཏུབས་ལུས་ལ་འབྱུང་བར་འགྱུར་ཞིང་གྲིབ་མས་ཕོག་པའི་སྡུག་བསྔལ་ཤིན་ཏུ་མི་ཟད་པ། སྐུའི་ཕྱོགས་ཙམ་མཐོང་བས་མདོ་ལས་འཚོ་བ་དང་། གཟིམ་མདངས་ལུས་ལ་འཇུག་པ་ཉི་མ་འོད་ཟེར་སྟོང་ཕྲག་གིས། འོད་ཀྱིས་འཇིག་རྟེན་ཁམས་འདིར་རྟག་ཏུ་འཆར་བ་དང་། ལུས་ངག་སེམས་ནི་རྡོ་རྗེའི་ཚེ་འདིར་རབ་སྣང་ཞིང་། རེ་སྨོན་ཐམས་ཅད་དུས་འདིར་ཐོབ་པར་མཛད་དུ་གསོལ་ལོ། །ཡང་དག་དོན་གྱི་སྙིང་པོ་ནི། དེ་ནས་ཛབ྄་བྱ་སྟེ། ཇི་སྙེད་བརྗོད་པའི་ཁ་བརྒྱུད་ཀྱང་། །གང་ནས་བཙལ་ཀྱང་མི་རྙེད་དེ། །རང་རིག་སྒྲིབ་མེད་དག་པ་ཡིན། །དེ་ལ་རྟག་ཏུ་གོམས་པ་ནི། །བསྙེན་པའི་དམ་པ་མཆོག་ཡིན་ནོ། །སེམས་ཉིད་ཐེག་པར་རབ་ངེས་ན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཧཱུྃ་བཛྲ་དྷྲི་ཀ །མཱུཾ་དཱ་ཏྭི་ཤྭ་རི་སྟཾ། ཡང་ན་བྷོ་དྷི་ཙིཏྟ་བཟླས། ཡེ་ནས་མཉམ་ཉིད་ཆོས་སྐུར་དག་པ་ལ། །མ་རིག་དབང་གིས་སྒྲོས་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་བཟློག་དོན་ཕྱིར་རྒྱལ་བའི་དམ་མནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་ཏེ། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ༀ་བཛྲ་ས་མ་ཡ་ༀ། ཨཱྃ་བཛྲ་ས་མ་ཡ་ཨཾ། ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ༀ་ཡེ་ཤེས་རྒྱལ་པོ་ཀུན་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧཱུྃ། ༀ་བཛྲ་ས་མ་ཡ་ཧོ། ཛཿཧཱུྃ་བཾ་ཧོ། དེ་ནས་ཚོགས་དྲངས་བསང་། འབྲུ་གསུམ་གྱིས་བྱིན་གྱིས་བརླབས། རྐང་པས་སྟངས་སྟབས་བྱ་ཞིང་ཚོགས་དབུལ། སྨོན་ལམ་བཏབ། ལྷག་མ་བཏང་། རིན་ཆེན་ཕྲེང་བ་རྫོགས་སོ། ༈ །ཞི་བའི་ཚོགས་ཀྱི་མཆོད་པ་ནི། མཆོད་པ་དྲངས། བསང་སྦྱངས། བརླབས་ནས། སྤྱན་དྲངས་པ་ནི། བསོད་ནམས་ཡེ་ཤེས་ཚོགས་རྫོགས་ཏེ། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོས་འཁོར་ལོའི་ཚུལ། །ཚོགས་མཆོག་དཀྱིལ་འཁོར་བཞེས་སུ་གསོལ། །བཅོམ་ལྡན་རྡོ་རྗེ་སེམས་དཔའ་ཉིད། །རིགས་བཞི་ལྷ་དང་ལྷ་མོ་དང་། །ཀུན་བཟང་སྤྲུལ་པའི་ཚོགས་རྣམས་དང་། །སྒོ་བ་ལ་སོགས་གཤེགས་སུ་གསོལ། །ཨེ་ཧྱ་ཧིས་སྤྱན་དྲངས། ཧཱུྃ་བླ་མེད་མཆོག་གི་མཆོད་པ་དམ་པ་སྦྱར་བ་འདི། ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པ་བཞེས་སུ་གསོལ། །རྨད་དུ་བྱུང་བའི་གཏོར་མ་འབུལ། །ༀ་ཨཱཿཧཱུྃ་སུ་ར་ཏོ་བརྗོད་པ་ན་པེེཾ་ཡང་བརྗོད་དོ། །ལྷ་མོ་བཅུ་གཉིས་ཀྱི་མཆོད་པ་ནི། ༀ་བཛྲ་ཨཾ་གུ་ཤ་ཛཿ ༀ་བཛྲ་པཱ་ཤ་ཧཱུྃ། ༀ་བཛྲ་སྥོ་ཊ་བཾ། ༀ་བཛྲ་གཎྜེ་ཧོ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉས་གནས་བསྐྱོད་དེ། །བདེ་གཤེགས་བཞུགས་ཤིང་རྣམ་གྲོལ་དགྱེས་པར་མཛོད། །ༀ་ཤྲཱི་བཛྲ་ལཱ་སྱེ་ཧཱུྃ། ༀ་ཤྲཱི་བཛྲ་མ་ལྱེ་ཏྲཱཾ། ༀ་ཤྲཱི་བཛྲ་གཱིརྟི་ཧྲཱིཿ ༀ་ཤྲཱི་བཛྲ་ནཱིརྟི་ཨཱཿ དུང་མདོག་སྒེག་མོ་རྡོ་རྗེ་སྤྱན། །སེམས་དཔའ་སྔོན་པོའི་ཡེ་ཤེས་འབེབས། །མེ་ལོང་ལྟ་བུའི་ཡེ་ཤེས་ལས། །བཛྲ་ལཱ་སྱེའི་མཆོད་པར་འབུལ། །ཡིད་བཞིན་ནོར་བུ་འོད་འབར་མ། །འཇམ་དཔལ་རྣོན་པོའི་དངོས་གྲུབ་འཛིན། །མཉམ་པ་ཉིད་ཀྱི་ཡེ་ཤེས་ལས། །བཛྲ་མ་ལྱེའི་མཆོད་པར་རོལ། །པདྨ་དབྱངས་མཁན་རྨ་བྱའི་མགྲིན། །སྤྱན་རས་གཟིགས་ཀྱི་དངོས་གྲུབ་འཛིན། །སོ་སོར་རྟོག་པའི་ཡེ་ཤེས་ལས། །བཛྲ་གཱིརྟའི་མཆོད་པ་རོལ། །གར་མཁན་མགྲིན་མ་གཟི་མདངས་མ། །ལས་ཀྱི་འཁོར་ལོ་རྣམ་པར་འཇོམས། །བྱ་བ་ནན་ཏན་ཡེ་ཤེས་ལས། །བཛྲ་ནིརྟིའི་མཆོད་པ་རོལ། །ནང་གི་མཆོད་པ་དམ་པ་ནི། །ཡེ་ཤེས་བཞི་དང་མཉམ་པར་སྦྱོར། །ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་དགྱེས་པར་མཛོད། །ༀ་བཛྲ་དྷཱུ་པེ་དྷུ། ༀ་བཛྲ་པུཥྤེ་པུ། ༀ་བཛྲ་ཨཱ་ལོ་ཀེ་ཧྲཱི། ༀ་བཛྲ་གནྡྷེ་གན། སྤོས་ཀྱི་སྤྲིན་ལྡིང་བདུག་པ་མོ། །རྒྱལ་བའི་དཀྱིལ་འཁོར་གདུགས་ཀྱིས་འགེབས། །བྱམས་པ་ཐབས་དང་ཤེས་རབ་ལས། །བཛྲ་དྷཱུ་པེའི་མཆོད་པར་རོལ། །ཨུཏྤལ་མཐིང་ག་མེ་ཏོག་འཐོར། །ཟླ་གམ་རིན་ཆེན་འོད་དུ་འཕྲོ། །སྙིང་རྗེ་ཐབས་དང་ཤེས་རབ་ལས། །བཛྲ་པུཥྤེའི་མཆོད་པར་རོལ། །དབང་གི་ཕྱག་ན་སྒྲོན་མེ་བསྣམས། །ཆོས་ཀྱི་རྒྱལ་མཚན་འབར་བ་འཛིན། །དགའ་བ་ཐབས་དང་ཤེས་རབ་ལས། །བཛྲ་ཨཱ་ལོ་ཀེའི་མཆོད་པར་རོལ། །ཙནྡན་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་ཐབས་དང་ཤེས་རབ་ལས། །བཛྲ་གནྡྷེའི་མཆོད་པ་རོལ། །ཕྱི་ཡི་མཆོད་པ་དམ་པ་འདི། །ཚད་མེད་བཞི་དང་མཉམ་པར་སྦྱོར། །ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་དགྱེས་པར་མཛོད། །ཚོགས་སྤྲོས་ལ་དབུལ་ཏེ། ཐབས་དང་ཤེས་རབ་ལྡན་གྱུར་ཅིག །བྱང་ཆུབ་སེམས་དང་མ་ཆགས་པའི། །གཉིས་སུ་མེད་པར་ཐིམ་གྱུར་ནས། །ཚོགས་ཆེན་གཉིས་ཀྱང་རྫོགས་པར་འབུལ། །འདོད་ཡོན་ལྔ་པོ་ཐམས་ཅད་དང་། །སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་དཀྱིལ་འཁོར་དང་། །གཟུགས་མཛེས་ལྷ་དང་ལྷ་མོ་རྟག །སྣ་དང་པོ་འབུལ། ཚོགས་གཟུགས་ནི་ཐམས་ཅད་ཀུན། །སྣང་སྟོང་ངོ་བོ་ཉིད་ཀྱི་གཞི། །ཆོས་དབྱིངས་དག་པའི་ཡེ་ཤེས་ཏེ། །རྡོ་རྗེ་ལྷ་མོ་གཟུགས་མཛེས་མ། །འདོད་ཡོན་ཕྱག་ན་བསྣམས་པ་ནི། །རྐང་པས་སྟབས་བྱེད་ལག་གར་བསྒྱུར། །སྙན་པའི་གླུ་དབྱངས་བླངས་ནས་ནི། །དཀྱིལ་འཁོར་ལྷ་ལ་མཆོད་པར་འབུལ། །ཐམས་ཅད་གཉིས་པ་མ་ལུས་སྒྲ་རྣམས་ནི། །སྒྲ་སྟོང་ངོ་བོ་ཉིད་ཀྱི་གཞི། །མེ་ལོང་ལྟ་བུའི་ཡེ་ཤེས་ཏེ། །རྡོ་རྗེ་ལྷ་མོ་འཇམ་པའི་སྒྲ། །འདོད་ཡོན་ཕྱག༴ རྐང་པས༴ སྙན་པའི༴ དཀྱིལ་འཁོར༴ བདེ་བས་གསུམ་པ་ཚིམ་བྱེད་བསོད་ནམས་ཏེ། །ཚིམ་སྟོང་ངོ་བོ་ཉིད་ཀྱི་གཞི། །བརྗོད་མེད་མི་གནས་ཡེ་ཤེས་ཏེ། །རྡོ་རྗེ་ཆགས་མེད་པདྨའི་གསུང་། །འདོད་ཡོན༴ རྐང་པས༴ སྙན་པའི༴ དཀྱིལ་འཁོར༴ བདེ་བཞི་པ་གཤེགས་དཀྱིལ་འཁོར་མ་ལུས་པ། །བདེ་བ་རོ་ཡིས་ཚིམ་བྱེད་པ། །རོ་སྟོང་ངོ་བོ་ཉིད་ཀྱི་གཞི། །སོ་སོར་རྟོག་པའི་ཡེ་ཤེས་ཏེ། །ཐམས་ཅད་ཚིམ་བྱེད་རོ་ཡི་ལྷ། །འདོད་ཡོན༴ རྐང་པས་གར༴ སྙན་པའི༴ དཀྱིལ་འཁོར༴ རྡོ་རྗེ་ལྔ་པའོ་རེག་བྱ་མྱོང་བྱེད་མ། །དཀྱིལ་འཁོར་བསམ་ཡས་ལྷུན་གྲུབ་ནི། །བདེ་མཆོག་དཀྱིལ་འཁོར་ཡངས་བྱེད་མ། །བྱ་བ་གྲུབ་པའི་ཡེ་ཤེས་ཏེ། །རྡོ་རྗེ་རེག་བྱའི་ལྷ་མོ་ནི། །འདོད་ཡོན༴ རྐང་པས༴ སྙན་པའི༴ དཀྱིལ་འཁོར༴ ཧོ་བདེ་བར་གཤེགས་པའི་ལྷ་རྣམས་ལ། ཚོགས་ཀྱི་མཆོད་པ་ཕུལ་བས། བཞེས་ཤིང་རོལ་ནས་མཉེས་ཏེ། བདག་ཅག་གི་དམ་ཚིག་ཉམས་པ་ཐམས་ཅད་བསྐངས་ནས་སྐུ་གསུང་ཐུགས་ཀྱི་དངོས་གྲུབ་ཐོབ་པར་སྩལ་དུ་གསོལ། རྐང་པས་སྟབས་བྱས། ལག་པས་གར་བསྒྱུར་ཏེ། ཕུལ་ན་ཞི་བར་འགྱུར་རོ། །མཁའ་འགྲོ་མ་གསང་བའི་རྒྱུད་ནས་འབྱུང་ངོ་། །ཚོགས་ཀྱི་ཁ་ཚར་རྫོགས་སོ། ༈ །དེ་ནས་ལྷག་མ་གསོག་འཇོག་མེད་པར་བཞག་ལ། ཧོ། མཁའ་འགྲོ་མ་གསང་བའི་རྒྱུད་ཀྱི་དམ་ཚིག་ལ་གཏོགས་པའི་མཁའ་འགྲོ་མ་སུམ་ཅུ་རྩ་གཉིས་སྔོན་གྱི་ཐུགས་དམ་ལས་མ་འདའ་བར་སྒྲུབ་པ་པོའི་སྟོང་གྲོགས་ལ་གཤེགས་ཤིག །ཛཿཧཱུྃ་བཾ་ཧོ། ཌཀྐི་ནི་ཧཱུྃ་ཛཿ ཨེ་ཨ་ར་ལི་ཧྲིཾ་ཧྲིཾ་ཧྲིཾ། ཧཱུྃ་རྣམ་དག་ཆོས་ཉིད་ཞི་བ་ལས། །ཐུགས་རྗེ་ཆེན་པོའི་སྤྲུལ་པ་འབྱུང་། །རང་རང་ལས་ཀྱིས་བསྐུར་གྱུར་པས། །སྤྲུལ་པ་བསམ་ཡས་མཁའ་ལ་རོལ། །འཇའ་ཚོན་མདོག་འཛིན་རིགས་ལས་སྤྲུལ། །མི་རོ་སྐམ་པོའི་གདན་སྟེང་ནས། །ཐུགས་རྗེའི་སྤྲུལ་པ་ཡང་དག་ཞོན། །མཐིང་ག་མི་བསྐྱོད་དཔའ་བོའི་གཟུགས། །སུམ་ཅུ་རྩ་གཉིས་ཀུན་འཇིགས་ཤིང་། །མི་ཐོད་ཁྲག་གིས་བཀང་བ་དང་། །ཁ་ཊྭཱྃ་ཏྲི་ཤུལ་གཤོལ་གྲི་བསྣམས། །རང་རང་ལག་ཆ་སྣ་ཚོགས་ལྡན། །དཔའ་བོའི་གཟུགས་ཅན་ཁྲོ་མིག་བསྒྲད། །ཉི་ཟླའི་ཚུལ་དུ་མཁའ་ལ་འགྲོ། །ཟས་སུ་ཤ་དང་ཁྲག་དང་ནི། །རྐང་དང་ཚིལ་བུ་རྒྱུ་མ་ཟ། །ཡང་དག་དེ་ཉིད་འཇིག་རྟེན་ཉིད། །སྤྲུལ་པའི་ཚུལ་གྱི་གཟུགས་ཀྱིས་འདུལ། །གཙོ་བོ་དགའ་བར་བྱེད་མ་དང་། །ནང་ཁྲོལ་འདྲེན་པར་བྱེད་མ་དང་། །ཁྱོ་ལ་ཆགས་པར་བྱེད་མ་དང་། །རྣལ་འབྱོར་སྤྲོ་བར་བྱེད་མ་དང་། །སྐྱེ་འགྲོ་གསོད་པར་བྱེད་མ་དང་། །འཇིག་རྟེན་འབར་བ་བྱེད་པ་དང་། །གཟུགས་རྣམས་བརྗིད་པར་བྱེད་པ་དང་། །གླིང་རྣམས་འཁོར་ལོ་ལྟར་བསྐོར་མ། །མཁའ་འགྲོ་མ་མོ་ཁྱེད་རྣམས་ཡིན། །སྔོན་ཚེ་བཅོམ་ལྡན་མི་བསྐྱོད་པའི། །ཡེ་ཤེས་དབྱིངས་ལས་ཆགས་ཚུལ་དུ། །དགའ་མ་གསོད་དགའ་འཛིན་དགའ་མ། །འདྲེན་དགའ་མིག་དམར་ཐོད་པ་འཛིན། །མྱོས་མ་རྭ་བྱིལ་གདོང་དམར་གྱིས། །མདུན་རྒྱབ་ཟུར་གཉིས་དབུ་གསུམ་མོ། །མདུན་ལ་གཙོ་མོ་བདུན་གྱིས་འཁྲིལ། །མི་བསྐྱོད་སྤྱན་སྔར་ཁས་བླངས་པ། །སླས་སུ་བདག་ཅག་འདུད་བགྱིད་བ། །མནའ་བོར་དམ་བཅས་ཁས་བླངས་ཏེ། །འཇིག་རྟེན་མ་འདས་བར་དུ་ནི། །འཇིག་རྟེན་བསྟན་པ་སྲུང་བར་བྱས། །ཁས་བླངས་འགལ་བར་མི་རྒྱའི་ཕྱིར། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །སྔོན་ཚེ་བཅོམ་ལྡན་རྟག་པ་ལ། །ཆགས་ཞེན་མ་དང་ཆགས་མཆོག་མ། །ཆགས་བྲལ་མ་དང་རྒྱས་འདེབས་མ། །འཁོར་ལོ་བསྐོར་བ་ལྔ་ཡིས་འཁྲིལ། །རྟག་པའི་སླས་སུ་བྱས་ནས་ནི། །འཇིག་རྟེན་མ་འདས་བར་དུ་ནི། །བསྟན་པ་སྲུང་བར་མནའ་བོར་བ། །ཁས་བླངས་འགལ་བ་མི་བྱའི་ཕྱིར། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །བཅོམ་ལྡན་རིན་ཆེན་འབྱུང་ལྡན་ལ། །བདུད་རྩི་འཆང་མ་བསིལ་མ་དང་། །བེ་ཅོན་འཛིན་མ་རྒྱུན་འཐུང་མ། །རྒྱུ་འཛིན་ཁ་འཛིན་ལྔ་ཡིས་ནི། །མདུན་རྒྱབ་ཟུར་གཉིས་དབུ་ལ་འཁྲིལ། །འབྱུང་ལྡན་སླས་སུ་བྱས་ནས་ནི། །འཇིག་རྟེན་མ་འདས་བར་དུ་ནི། །འཇིག་རྟེན་བསྟན་པ་སྲུང་བར་བྱས། །ཁས་བླངས་འགལ་བར་མི་བྱའི་ཕྱིར། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །བཅོམ་ལྡན་སྣང་བ་མཐའ་ཡས་ལ། །སྟོབས་བཟང་སེར་སྨུག་ཁ་ཡལ་མ། །འདོད་པ་མོ་དང་ནོར་བུ་བཟང་། །བ་དན་མ་ནི་བུམ་ལྟོ་བ། །ལྔ་ཡིས་མདུན་རྒྱབ་དབུ་ལ་འཁྲིལ། །འཇིག་དབང་སླས་སུ་བྱས་ནས་ནི། །བསྟན་པ་སྲུང་བར་མནའ་བོར་བས། །ད་རུང་འཇིག་རྟེན་མ་འདས་པས། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་པའི་ལས་གྱིས་ཤིག །བཅོམ་ལྡན་དོན་ཡོད་གྲུབ་པ་ལ། །གསོད་བརྩོན་གསལ་བའི་འོད་འཆང་མ། །སོ་ཞག་ཁྲག་འཇིབ་བུས་པ་ཟ། །དབྱུག་ལ་སྦྲུལ་ལུས་གསེར་མིག་མ། །མདུན་ཟུར་བཞི་དང་དབུ་གསུམ་ལ། །དྲུག་འཁྲིལ་དོན་གྲུབ་སླས་སུ་བྱས། །བསྟན་པ་སྲུང་བར་མནའ་བོར་བས། །ད་རུང་འཇིག་རྟེན་མ་འདས་པས། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་པའི་ལས་གྱིས་ཤིག །ཤར་ཉིད་དུ་ནི་བུམ་སྣ་མ། །ནུབ་རུ་དྷ་ཤ་གྲཱྀ་བའོ། །ལྷོ་རུ་རྣམ་པར་འཇོམས་མ་སྟེ། །བྱང་ཉིད་དུ་ནི་བོད་འབྲོགས་སོ། །མཁའ་ལ་འགྲོ་བའི་སྒོ་མ་བཞི། །བཅོམ་ལྡན་རྡོ་རྗེ་མི་བསྐྱོད་པའི། །ཞབས་བཞིའི་འོག་ཏུ་བཞི་བཞི་མནན། །ཉི་ཟླ་པདྨའི་གདན་དུ་འབར། །མཁའ་འགྲོ་སུམ་ཅུ་རྩ་གཉིས་ཀྱང་། །ད་རུང་འཇིག་རྟེན་མ་འདས་པས། །བསྟན་པ་སྲུང་བར་མནའ་བོར་བ། །ཁས་བླངས་འགལ་བར་མི་བྱའི་ཕྱིར། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་པའི་ལས་རྣམས་འགྲུབ་པར་མཛོད། །མཁའ་འགྲོ་གསང་བའི་རྒྱུད་ལས་བཏུས་པའི་ཞི་བའི་ལྷག་ཆོག་གོ། །རྫོགས་སོ། ༈ །རྡོ་རྗེ་ཕྲིན་ལས་ཀྱི་རྒྱུད་ཀརྨ་མ་ལེ་ཞེས་བྱ་བའོ། །ཧཱུྃ་འགྲོ་བའི་དོན་ཕྱིར་རྒྱལ་བས་གསུངས་པ་ཡི། །ཐེག་པའི་ནང་ནས་ཡང་རབ་བླ་ན་མེད། །གསང་སྔགས་རྡོ་རྗེ་ཐེག་པའི་ངེས་དོན་འདི། །བློ་རབ་སྐལ་བ་ཅན་གྱིས་སྤྱད་པའི་རྒྱུ། །གསང་སྔགས་རྒྱུད་འདི་ཡོངས་སུ་གཟུང་བ་དང་། །ཡོངས་སུ་སྤེལ་ཞིང་བསྟན་པ་སྲུང་བ་དང་། །རྣལ་འབྱོར་སྒྲུབ་པ་རྣམས་ཀྱི་གྲོགས་བྱ་ཞེས། །ཐུགས་དམ་ཞལ་གྱིས་བཞེས་པའི་མཁའ་འགྲོ་མ། །བདག་ཀྱང་རྣལ་འབྱོར་དབང་ཕྱུག་བསྒྲུབ་པའི་ཕྱིར། །དམ་ཚིག་གཉན་པོ་མནོས་པ་ཁྱོད་དང་གཅིག །དམ་ཚིག་གཅིག་གིས་བསྡུས་པས་ཉེ་བ་དང་། །མཉམ་པའི་དོན་གྱིས་བསྡུས་པ་དབྱེར་མེད་ན། །མི་མཉམ་ཁྱད་ཀྱིས་རྩིས་པའི་དོན་དང་འགལ། །རྡོ་རྗེ་སྤུན་གྲོགས་ལག་པས་བརྩེ་བ་དང་། །ལྕམ་དྲལ་ཚུལ་དུ་ཉེ་ཞིང་གདུངས་པར་མཛོད། །བདག་གིས་ཁས་བླངས་དམ་བཅའ་ཚུལ་ཆད་དུ། །གྲུབ་པ་མངོན་དུ་གྱུར་པ་མ་མཆིས་ཀྱང་། །དམ་ཚིག་མི་གཏོང་སངས་རྒྱས་སྐུ་མི་བསླུ། །མངོན་སུམ་དྲན་པས་རྟག་ཏུ་ཁྱེད་ལ་སེམས། །མཁྱེན་གསལ་ཐུགས་ཀྱིས་བདག་ལ་མི་དགོངས་སམ། །སྒྲིབ་མེད་སྤྱན་གྱིས་བདག་ལ་མི་གཟིགས་སམ། །བདག་ཀྱང་གསོག་མེད་ངེས་པའི་རྣལ་འབྱོར་ཞིག །ཞལ་ཆེམས་སྐྱབས་ཀྱི་དམ་པར་ཁྱེད་ཞུགས་ན། །བདག་འདྲ་སྡུག་བསྔལ་གནོད་པས་ཉེན་པ་ལ། །ཕན་པའི་སྐྱབས་དང་གྲོགས་གཅིག་མི་མཛད་དམ། །བདེ་དང་སྡུག་བསྔལ་ཆོས་ཀྱང་སྒྱུ་མ་ཞིག །སྟོབས་དང་དབང་དུ་གྱུར་པ་ཁྱེད་ལ་མངའ། །སེམས་ཅན་ལས་འཕྲོ་བཙན་པར་བཞག་ལྟ་ན། །ཐུགས་རྗེ་བྱིན་རླབས་ཅི་འཚལ་དོན་ཡོད་འགྱུར། །ལས་ངན་སྒྲིབ་པའི་བག་ཆགས་མེད་པར་མཛོད། །བསྐུལ་ཀྱང་མི་གསན་བཅོལ་ཀྱང་མི་མཛད་ན། །དང་པོའི་ཞལ་བཞེས་དོན་དང་མི་འགའ་ལམ། །ནོངས་པ་བཤགས་ཀྱང་ཚངས་པར་མི་འགྱུར་ན། ། བརྩེ་སེམས་སྙིང་རྗེ་མེད་པར་མི་འགྱུར་རམ། །དམ་ཚིག་སྲུང་བར་ཀུན་གྱིས་ཁས་བླངས་ཀྱང་། །ཁྱེད་འདྲ་རྩེ་གཅིག་བསྒྲུབ་པ་བདག་ལས་མེད། །བདག་གི་དམ་ཚིག་ཉམས་པ་བསྐང་བ་དང་། །གནོད་པའི་དགྲ་བགེགས་བཟློག་ཅིང་ཞི་བར་མཛོད། །འཇིག་རྟེན་འདིར་ཡང་ཡོངས་སུ་བསྲུང་བ་དང་། །ཕྱི་མའི་གོ་འཕང་ཐོབ་པའི་གྲོགས་མཛོད་ཅིག །འཇིག་རྟེན་འདི་ན་དབང་ཆེར་གྲངས་པ་ཡང་། །ཁྱེད་ཅག་ལག་སྟེ་གང་ན་གཞན་མ་མཆིས། །སོ་སོའི་བྲན་གཡོག་འབུམ་ཕྲག་མང་པོ་ཡང་། །དམ་ཚིག་སྲུང་ཞིང་ཁྱེད་ཀྱི་བཀའ་བཞིན་བྱེད། །འདི་ལྟར་གཅིག་བཞིན་རྗེས་སུ་མཐུན་སྦྱར་ནས། །བདག་ལ་བསྲུང་ཞིང་འཁོར་རྣམས་བསྐྱང་དུ་གསོལ། །བདག་གི་དམ་ཚིག་ཉམས་པའི་ཚོགས་དང་འདྲེས། །ཉམས་པ་བསྐང་བས་བཀའ་ཆད་དམིགས་བགྱིད་རྣམས། །བདག་གིས་སྒྲིབ་པར་གྱུར་ཅིག་ཁྱེད་ཀྱི་ཐུགས་དང་འགལ། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །སྟོབས་དང་གདེང་དུ་གྱུར་པ་མེད་བཞིན་དུ། །རུང་བུ་རེ་ནས་ཐུབ་ཐུབ་རས་གཅོད་བགྱིས། །སྣོད་དང་སྐལ་བར་མི་ལྡན་སློབ་མར་བཅུད། །མི་འཚམས་བཞིན་དུ་དབང་བསྐུར་གསང་བ་བཤད། །བདག་གི་སྒྲིབ་པར་གྱུར་ཅིང་ཐུགས་དང་འགལ། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །ནོངས་པ་དྲན་ནས་ཤིན་ཏུ་གནོང་ཞིང་འགྱོད། །ཐུགས་རྗེ་ཐབས་མཁས་ཁྱེད་ལ་བཟོད་གསོལ་ན། །ཚངས་པ་འཕྲུལ་གྱི་དངོས་གྲུབ་སྩལ་དུ་གསོལ།། །ཨཐྎ།།
སྒྱུ་འཕྲུལ་དྲྭ་བ་མེ་ལོང་ལྟ་བུའི་སྒྲུབ་ཐབས། སློབ་དཔོན་ཛྙཱ་ན་ཛ་ཡ།
སྒྱུ་འཕྲུལ་དྲྭ་བ་མེ་ལོང་ལྟ་བུའི་སྒྲུབ་ཐབས་བཞུགས་སོ། །རྒྱ་གར་སྐད་དུ། མཱ་ཡཱ་ཛཱ་ལ་ཨཱ་ད་ཤ་པཱ་དྷ་ན་ནཱ་མ། བོད་སྐད་དུ། སྒྱུ་འཕྲུལ་དྲྭ་བའི་མེ་ལོང་ལྟ་བུའི་སྒྲུབ་ཐབས། །དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་གཉིས་མེད་སྒྲིབ་པ་གཉིས་སྤངས་པའི། །ཡེ་ཤེས་རང་རིག་གསལ་བའི་མཁའ་དཀྱིལ་ནས། །དཀྱིལ་འཁོར་སྤྲོ་དང་འགྲོ་དོན་སྒྲུབ་པ་ཡིས། །མ་ལུས་ཐུགས་སུ་ཆུད་ལ་ཕྱག་འཚལ་ལོ། །སྒྱུ་འཕྲུལ་དྲྭ་བའི་གཞུང་ལུགས་ལས། །འགྲོ་བའི་རྣམ་རྟོག་བསལ་བའི་ཕྱིར། །ཡེ་ཤེས་བསྐྱེད་པའི་སྒྲུབ་ཐབས་འདི། །རྒྱུད་བསྡུས་བདག་གིས་བརྩམ་པར་བྱ། །མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་པ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཐོས་བསམ་སྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུང་། །སྣོད་ལྡན་ངང་ཚུལ་བཟང་ལ་བསྟན། །ལུས་དང་ལོངས་སྤྱོད་གཏོང་ལ་བྱིན། ༈ །སློབ་དཔོན་མཉེས་པར་བྱས་པ་དང་། །སྒྱུ་འཕྲུལ་དྲྭ་བའི་དཀྱིལ་འཁོར་དུ། །དབང་རྣམས་རྫོགས་པར་བྱས་པ་དང་། །འདོད་པ་གཡེང་བ་ཀུན་སྤངས་ཏེ། །དཀའ་ཐུབ་སྤྱོད་པས་མ་གདུངས་པར། །ཏིང་འཛིན་མཐུན་པའི་ས་ཕྱོགས་སུ། །རབ་བདེ་སྟན་ལ་འདུག་ནས་ནི། །བྱམས་དང་སྙིང་རྗེ་དགའ་བ་དང་། །བཏང་སྙོམས་བཞི་ནི་རབ་བསྒོམས་ནས། །སེམས་ཅན་རྣམས་ཀྱི་དོན་གྱི་ཕྱིར། །སྐུ་གསུང་ཐུགས་ཀྱི་བསྒྲུབ་བྱ་ཞེས། །བདག་ཉིད་བསམ་པ་བརྟག་བྱས་ཚེ། །རང་སྙིང་ས་བོན་འོད་ཟེར་ལས། །སྤྲུལ་པ་མཆོད་པའི་ཚོགས་སྤྲོས་ནས། །མདུན་དུ་དཀྱིལ་འཁོར་ཚོགས་རྣམས་དང་། །བླ་མ་སྤྱི་སོགས་རྣམས་ཀྱི་མཆོག །དེ་ནས་སྡིག་པ་བཤགས་པ་དང་། །སྐྱབས་རྩོལ་སོགས་བ་བྱས་ནས་ནི། །བགེགས་རྣམས་མ་ལུས་གཞོམ་པའི་ཕྱིར། །སྣ་ཚོགས་རྡོ་རྗེ་ཧཱུྃ་ལས་བསྐྱེད། །རྡོ་རྗེའི་ས་གཞི་བསམ་པར་བྱ། །རྣམ་རྟོག་འདུ་ཤེས་ཀུན་སྤངས་ན། །བགེགས་ཀྱི་སྦྱོར་བ་ཡོད་མི་འགྱུར། །དེ་བས་རྣམ་རྟོག་བགེགས་ཡིན་པར། །ཡང་དག་རིག་པ་ཉིད་ཀྱིས་གསུངས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ལྟར་སྟོང་ཉིད་རབ་གསལ་ནས། །སྙིང་རྗེའི་ཡུམ་གྱིས་བསླད་ནས་ནི། །ས་བོན་ཤིན་ཏུ་གསལ་བར་གྱུར། །རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་པར་གསལ་གྱུར་པ། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་སྤྲོ། །ཕྱོགས་བཅུ་གང་བར་གསལ་གྱུར་པ། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཆོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །དེ་ནས་མཐའ་དང་དབུས་མེད་པའི། །འོག་མིན་ཆོས་འབྱུང་གསལ་བར་བྱ། །དེ་ནས་ཡཾ་ལས་བྱུང་བ་ཡི། །རླུང་གི་དཀྱིལ་འཁོར་བསམ་པར་བྱ། །དེ་སྟེང་ཡི་གེ་རཾ་ལས་ནི། །མེ་ཡི་དཀྱིལ་འཁོར་བསྐྱེད་པར་བྱ། །མེ་སྟེང་དུ་ནི་པཾ་བསམས་ཏེ། །དེ་ལས་ཆུ་ཡི་དཀྱིལ་འཁོར་རོ། །ཆུ་ཡི་དཀྱིལ་འཁོར་སྟེང་དུ་ནི། །ལམ་ལས་ཡེ་ཤེས་ས་གཞི་བརྟག །བྷྲུཾ་བི་ཤྭ་བི་ཤཱདྡྷེ། བྷྲཱུཾ་ལས་ཡེ་ཤེས་གཞལ་ཡས་ཁང་། །ཡེ་ཤེས་རིན་ཆེན་རང་བཞིན་ཅན། །རྒྱ་རྣམས་ཡོངས་སུ་མ་ཆད་པ། །བསོད་ནམས་ཡེ་ཤེས་ཚོགས་རྒྱས་པས། །ཀུན་ཏུ་གྲུ་བཞིར་གནས་པར་གྱུར། །ཡེ་ཤེས་ལྷག་པའི་འབུར་གྱིས་མཛེས། །ཐམས་ཅད་ངོ་བོ་གཅིག་པའི་ཕྱིར། །རྩེ་མོ་ཀུན་ཏུ་འདུས་པ་ཡིན། །རིན་ཆེན་རྒྱན་ཚོགས་བྱེ་བྲག་གིས། །བསམ་མི་ཁྱབ་པར་སྤྲས་པར་གྱུར། །རྣམ་ཐར་བཞི་ཡི་སྒོ་འཁྱུད་ལ། །རྣམ་ཐར་བརྒྱད་ཀྱི་རྟ་བབས་ལྡན། །ཀུན་ནས་བསྐོར་བའི་ཁ་ཁྱེར་ལ། །རོལ་མོ་སྣ་ཚོགས་སྤྲིན་ཕུང་བཞིན། །ཕྱི་དང་ནང་མེད་ཀུན་ཏུ་ནང་། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །དབུས་སུ་མི་འཇིགས་སེང་གེའི་ཁྲི། །བརྒྱ་བྱིན་ཕྱོགས་ནི་སྟོབས་གླང་གདན། །རྫུ་འཕྲུལ་རྟ་ནི་གཤིན་རྗེའི་ཕྱོགས། །དབང་ནི་རྨ་བྱ་ཆུ་ལྷ་དེ། །ཐོགས་མེད་མཁའ་ལྡིང་གནོད་སྦྱིན་ཕྱོགས། །རང་བཞིན་འོད་གསལ་ཉི་ཟླའི་གདན། །ཆགས་མེད་པདྨས་སོ་སོར་མཛེས། །གཞན་ནི་ཉི་ཟླ་པདྨ་དང་། །གདན་ནི་སུམ་བརྩེགས་དག་ཏུ་གནས། །སེང་གེའི་གདན་གྱི་དབུས་སུ་ནི། །དམ་པའི་ཡི་གེ་ས་བོན་བསམ། །དེ་ལས་པདྨ་རྡོ་རྗེ་བརྟག །སོ་སོའི་སྙིང་པོ་མཚན་པར་བྱ། །དེ་ལས་སངས་རྒྱས་སྐུ་ནི་སྤྲོ། །ཕྱོགས་བཅུའི་འཇིག་རྟེན་ཁམས་རྣམས་སུ། །སེམས་ཅན་དོན་ནི་མཛད་ནས་སུ། །དེ་ཉིད་ལ་ནི་ཐིམ་པར་གྱུར། །ཕྱག་རྒྱ་ཡོངས་སུ་གྱུར་པ་ལས། །ཀུན་བཟང་ཡུམ་དང་ལྡན་པ་ནི། །ཟླ་བའི་འོད་ལྟར་དཀར་ཞིང་དང་། །ཞལ་གཅིག་ཕྱག་གཉིས་རྒྱན་གྱིས་མཛེས། །སངས་རྒྱས་ལྔ་ཡི་དབུ་རྒྱན་ཅན། །འོད་ཟེར་རྣམ་པ་སྣ་ཚོགས་ལས། །སྤྲུལ་པས་སེམས་ཅན་དོན་རྣམས་མཛད། །ཀུན་ཏུ་བཟང་མོ་འཇོ་སྒེག་ཚུལ། །ཨིནྡྲ་ནཱི་ལའི་ཁ་དོག་འདྲ། །རྒྱན་དང་དབུ་རྒྱན་ཡབ་དང་མཐུན། །ཕྱག་གཡས་རྡོ་རྗེ་ཐུགས་ཀར་བསྟན། །གཡོན་པ་དྲིལ་འཛིན་ཡབ་ལ་འཁྲིལ། །གཡོན་གྱི་པདྨ་ཐུགས་ཀར་བསྟན། །གཡས་ཀྱི་ཉི་མ་ལས་སུ་འཁྲིལ། །དབུ་ནི་འཕྱོ་ཞིང་འདུད་པའི་ཚུལ། །དེ་ལྟར་ཡོངས་སུ་བསྐྱེད་ནས་ནི། །གཉིས་མེད་ཆགས་པའི་སྤོར་བའི་སྒྲས། །དེ་བཞིན་གཤེགས་པ་ཀུན་བསྡུས་ནས། །ཡབ་ལ་དེ་བཞིན་གཤེགས་རྣམས་ཐིམ། །རྡོ་རྗེའི་ལམ་ནས་བྱུང་ནས་ནི། །ཡུམ་གྱི་པདྨའི་དཀྱིལ་འཁོར་དུ། །བྱང་ཆུབ་སེམས་ཀྱིས་འཕྲོ་འདུ་ལས། །ཡེ་ཤེས་དཀྱིལ་འཁོར་རྫོགས་པར་སྤྲུལ། །དེ་ནས་སྙིང་རྗེ་ཆགས་པ་ཡིས། །སེམས་ཅན་མ་ལུས་བསྡུས་ནས་སུ། །དཀྱིལ་འཁོར་ཕྱི་རིམ་འཁོར་ནས་ནི། །དེ་དག་འཇུག་པར་གསོལ་བ་འདེབས། །གསོལ་བ་བརྗོད་པའི་ཚིག་གསན་ནས། །ཐམས་ཅད་དཀྱིལ་འཁོར་འཇུག་པར་གྱུར། །བདུད་རྩི་འོད་ཀྱིས་རེག་མ་ཐག །ཐམས་ཅད་རང་རིག་སངས་རྒྱས་ཤེས། །དེ་ལྟར་རྒྱལ་བའི་བྱིན་རླབས་ཀྱིས། །རང་ལུས་སངས་རྒྱས་ཤེས་ནས་ནི། །ངོ་མཚར་ཚིག་ཀྱང་བརྗོད་པར་བྱ། །ཨེ་མའོ་རྡོ་རྗེ་ཕུང་པོ་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམ་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་དེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །དེ་ལྟར་ངོ་མཚར་ཚིག་བརྗོད་ནས། །དེ་ནས་ཡིད་བརྟན་བྱ་བའི་ཕྱིར། །གཉིས་མེད་ཀུན་ཏུ་བཟང་མོ་ཡིས། །ཆེད་དུ་བརྗོད་པ་འདི་བརྗོད་དོ། །ཨེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་མངོན་སངས་རྒྱས། །ཐམས་ཅད་མཆོག་གི་སྙིང་པོ་བས། །གཞན་དུ་རྒྱལ་བའི་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཡང་རྒྱལ་བས་མི་བརྙེས་སོ། །དེ་བས་རྒྱལ་བ་སངས་རྒྱས་རྣམས། །སོ་སོའི་ཞིང་དུ་འཁོད་པར་བྱ། །ཡོངས་སྦྱངས་གསུང་གི་ཡིག་འབྲུ་ནི། །ཡབ་ཀྱི་ཐུགས་ཀར་ཐིམ་གྱུར་ནས། །ཡུམ་གྱི་པདྨའི་ཆགས་བརླན་གྱིས། །ཡབ་ཡུམ་གཉིས་མེད་དཀྱིལ་འཁོར་ཐིམ། །དེ་ལྟར་རྒྱལ་བ་སྙོམས་ཞུགས་ནས། །བདེ་བའི་འབྲུ་ཚོགས་མངོན་དྲན་ཏེ། །རྒྱུ་གཅིག་བ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །མངོན་རྫོགས་རྒྱལ་པོར་དེ་ཉིད་ངེས། །དེ་ལྟར་རྟོགས་པ་རྣམ་བཞི་ཡིས། །རྒྱལ་བའི་སྐུ་རྣམས་མངོན་བསྐྱེད་པ། །ཨིནྡྲ་ནཱི་ལའི་ཁ་དོག་འདྲ། །སྐུ་གསུང་ཐུགས་ཀྱི་དབུ་གསུམ་ལྡན། །ཡེ་ཤེས་དྲུག་གི་ཕྱག་གཉིས་ལས། །རྡོ་རྗེ་པདྨ་རལ་གྲི་ནི། །གཡས་ཀྱི་ཕྱག་ན་བསྣམས་པར་མཛད། །དྲིལ་བུ་འཁོར་ལོ་རིན་ཆེན་འབར། །གཡོན་གྱི་ཡེ་ཤེས་ཕྱག་ན་བསྣམས། །གཡས་པ་རྡོ་རྗེ་ཐུགས་ཀར་བརྟེན། །གཡོན་པ་དྲིལ་བུ་ཡུམ་ལ་འཁྱུད། །ཐབས་དང་ཤེས་རབ་ཞབས་གཉིས་ནི། །མཉམ་པའི་བརྟུལ་ཞུགས་སྐྱིལ་ཀྲུང་བཞུགས། །མདུན་དང་རྒྱབ་མེད་ཀུན་ཏུ་གསལ། །མཚན་དང་དཔེ་བྱད་ཀུན་ཏུ་ལྡན། །འོད་ཟེར་འབར་བའི་ཚོགས་ཆེན་ལས། །ཐུབ་པའི་དཀྱིལ་འཁོར་སྣ་ཚོགས་འཕྲོ། །རྒྱལ་བ་རིགས་ལྔས་དབུ་བརྒྱན་བཅིང་། །སྣ་ཚོགས་རྒྱན་རྣམས་ཀུན་གྱིས་བརྒྱན། །བཙུན་མོ་སྣང་བའི་དབྱིངས་ཕྱུག་མ། །གཞོན་ཚུལ་འཁྲིལ་ལྡེམ་ཤིན་ཏུ་ཆགས། །ཆ་ལུགས་ལ་སོགས་ཡབ་དང་མཐུན། །གཡོན་པ་དྲིལ་བུ་ཐུགས་ཀར་བརྟན། །གཡས་པ་ཉི་མ་ལུས་སུ་འཁྱིལ། །ཕུང་པོ་དབང་པོ་རྣམ་ཤེས་ཀུན། །རྣམ་སྨིན་ༀ་དུ་ཤེས་པར་བྱ། །རྫོགས་པའི་སངས་རྒྱས་ཉིད་དུ་བསྒོམ། །སྤྱི་བོར་ཡི་གེ་ༀ་བཀོད་དེ། །ལྕེ་ལ་ཨཱཾ་ནི་རབ་ཏུ་གནས། །སྙིང་ག་ལྟེ་བ་མཆུ་སོར་ནི། །ཧཱུཾ་དང་སྭཱ་ཧཱ་རིམ་བཞིན་དགོད། །མིག་དང་རྣ་བ་སྣ་དང་ལྕེ། །ཀྵིཾ་ཏྲཾ་ཧྲཱིཾ་ཛྲིཾ་རིམ་བཞིན་བསམ། །མཾ་ཐླྷིཾ་ཧཱུཾ་མཱུཾ་དང་ནི་བཞི། །མིག་སོགས་ཕྱི་རོལ་རིམ་བཞིན་བསམ། །དེ་ལྟར་ཡི་གེ་རྣམས་ལས་ནི། །རྒྱལ་མཆོག་སྐུ་ཡི་དཀྱིལ་འཁོར་རྫོགས། །ཡེ་ཤེས་སེམས་དཔའི་ཐུགས་ཀར་ནས། །འོད་ཟེར་རྣམ་པ་མང་པོ་འཕྲོས། །ཕྱོགས་བཅུ་སྐུ་གསུང་ཐུགས་བསྡུས་ནས། །བདག་གི་མདུན་དུ་བཞུགས་པ་ལས། །ཚིག་ཤད་འདིས་ནི་གསོལ་བ་གདབ། །ༀ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོ་བདག་སྦྱོར་ཅིག །དེ་ལྟར་གསལ་བ་བརྗོད་མ་ཐག །བདག་གི་སྐུ་གསུང་ཐུགས་ལ་ནི། །རྒྱལ་བའི་དཀྱིལ་འཁོར་ཞུགས་པར་གྱུར། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝ་ཀ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། དེ་ལྟར་སྐུ་གསུང་ཐུགས་གསུམ་དུ། །ང་རྒྱལ་རབ་ཏུ་བསྐྱེད་ནས་ནི། །ཡུམ་གྱི་སྐུ་ཡི་དཀྱིལ་འཁོར་དགོད། །གཟུགས་སྒྲ་དྲི་རོ་རེག་ལ་སོགས། །རྣམ་སྨིན་མཱུཾ་དུ་ཤེས་པར་བྱ། །ཡུམ་གྱི་དཀྱིལ་འཁོར་ཉིད་དུ་བསྒོམ། །སྤྱི་བོ་མགྲིན་པ་གཉིས་སུ་ནི། །ལཱཾ་དང་པཱཾ་ནི་རིམ་བཞིན་བསམ། །སྙིང་ག་ལྟོ་བ་ཆུ་སོར་ནི། །མཱུཾ་དང་མཱཾ་དང་ཏཱཾ་རྣམས་དགོད། །མིག་དང་རྣ་བ་སྣ་ལྕེ་ལ། །ཧཱུཾ་ཏྲཱཾ་ཧྲཱི་ཨ་རིམ་པ་བཞིན། །མིག་དང་སྣ་ལྕེའི་ཕྱི་རོལ་དུ། །ཛཿཧཱུཾ་བཾ་ཧོ་རིམ་བཞིན་བསྒོམ། །སྐུ་གསུམ་བྱིན་རླབས་ཡབ་ཇི་བཞིན། །དེ་ནས་ཡུམ་ནི་བྱིན་བརླབ་བྱ། ༀ་ཨཱཾ་ཧཱུཾ་སྭཱ་ཧཱ་ལྔ། གནས་ལྔ་དག་ཏུ་བསྒོམ་པར་བྱ། །དེ་ལྟར་ཡབ་ཡུམ་སྐུ་རྫོགས་ནས། །དཀྱིལ་འཁོར་ཆེན་པོ་རྣམ་སྤྲུལ་ཕྱིར། །གཉིས་ཆགས་པ་ཡི་སྦྱོར་དོན་དུ། །རྡོ་རྗེ་པདྨ་བྱིན་གྱིས་བརླབས། །ཧཱུཾ་ལས་བྱུང་བའི་ནོར་བུ་བསམ། །ཨ་ལས་པདྨ་བསྐྱེད་པར་བྱ། །ༀ་སརྦ་ཏ་ཐཱ་ག་ཏ་ཨ་ནུ་ར་ག་ཎ་བཛྲ་སྭ་བྷ་ཝ་ཨཏྨ་ཀོ྅་ཧཾ། བསྙེན་པ་དང་ནི་ཉེ་བསྙེན་པོ། །སྒྲུབ་པ་དང་ནི་སྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །བྱང་ཆུབ་སེམས་ཀྱི་བྱིན་བརླབས་ལས། །ཐ་སོགས་ཡིག་འབྲུ་སྤྲུལ་པར་གྱུར། །ས་བོན་མཚན་མའི་སྐུ་རྣམས་རྫོགས། །སུམ་ཅུ་དྲུག་གི་དཀྱིལ་འཁོར་གྱུར། །དེ་ནས་འགྲོ་བ་རྨོངས་པ་ལ། །བསྟན་ཕྱིར་དཀྱིལ་འཁོར་གདོན་པར་མཛད། །ཧཱུཾ་བཛྲ་དྷཱི་ཀ་དང་མཱུཾ་དྷཱ་ཏྭི་ཤྭ་རིས། མི་བསྐྱོད་ཡབ་ཡུམ་བཏོན་ནས་ནི། །བདག་ཉིད་ལ་ནི་ཐིམ་པར་གྱུར། །ༀ་ཛི་ན་ཛི་ཀ །སྭཱ་རཏྣ་དྷྲིཀ །ཨཾ་ཨཱ་རོ་ལི་ཀ །ཧཱ་པྲ་ཛྙཱ་དྷྲིཀ །ལཱཾ་དེ་ཥ་ར་ཏི། མཱཾ་མོ་ཧ་ར་ཏི། པཱཾ་རཱ་ག་ར་ཏི། ཏཱཾ་བཛྲ་ར་ཏི། ཀྵིཾ་ཧི་རཱ་ཛ་ཡཱ། ཏྲཱཾ་ཨཱ་གརྦྷཱ་ཡ། ཧྲཱིཿཔདྨ་བ་ད་མ། ཛྲིཾ་ཀུ་རུ་པཱ་ཎ། ཧཱུཾ་ལཱ་སྱ་ས་མ་ཡ་སྟྭཾ། ཏྲཱཾ་མཱ་ལེ་ས་མ་ཡ་ཧོ། ཧྲཱིཿགཱི་ཏི་ར་གོ་ཧཾ། ཨཾ་ནིརྟི་རཱ་ག་ཡཱ་མི། མཾ་དྷ་ར་ཎི་སྭཱ་ཧཱ། ཐླྷིཾ་ནི་སྨ་རཾ་བྷ་ཡ་སྭཱ་ཧཱ། ཧཱུཾ་ས་རཱ་ཛཱ་ཡ་སྭཱ་ཧཱ། མཱུཾ་ཤྲཱི་ཨཾ་རཱ་ག་ཡ་སྭཱ་ཧཱ། ཛཿདྷུ་པ་པྲ་བེ་ཤ །བཾ་དཱི་པ་སུ་གི་ནཱི། ཧོ་གནྡྷེ་ཙིཏྟ། ཧཱུཾ་ཡ་མན་ཏ་ཀྲྀཏ་ཕཊ། ཧཱུཾ་བིགྷནྟ་ཀྲྀ་ཏ་ཕཊ། ཧཱུཾ་པདྨནྟ་ཀྲྀ་ཏ་ཕཊ། ཧཱུཾ་པྲ་ཛྙཱནྟྲ་ཀྲྀ་ཏ་ཕཊ། ༀ་མ་ཧཱ་བཛྲ་དྷ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་རཏྣ་དྷ་ར་མ་ཧཱ་ཀྲོ་དྷི་དྷཱ་ཤྭ་རཱི་ཛྭ་ལ་ནི་ཧཱུཾ་ཕཊ། ༀ་མ་ཧཱ་པདྨ་དྷ་རི་མ་ཧཱ་ཀྲོ་དྷི་ཤྭ་རི་ཛྭ་ལ་ནི་ཧཱུཾ་ཕཊ། ༀ་མ་ཧཱ་ཀརྨ་དྷ་ར་མ་ཧཱ་ཀྲོ་དྷི་ཤྭ་རི་ཛྭ་ལ་ནི་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲ་བྷཱ་དྲ་ས་མནྟ་ཨ། སོ་སོའི་སྔགས་ཀྱིས་བཏོན་ནས་ནི། །བརྒྱ་བྱིན་ལ་སོགས་ཕྱོགས་སུ་གནས། །མཐིང་ག་དཀར་པོ་སེར་ལེ་བརྒན། །ལྗང་གུའི་མདོག་ཏུ་འཚེར་བ་ནི། །གཙོ་བོ་གདན་ལ་རྫོགས་པའི་ཚུལ། །འཁོར་རྣམས་སེམས་དཔའི་ཚུལ་དུ་བཞུགས། །སོ་སོའི་སྐུ་མདོག་ཡབ་དང་མཐུན། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོབ་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་རྣམས་ལྡན་པར་གནས། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །ཡབ་ཡུམ་བཞུགས་ཚུལ་ཕྱག་མཚན་ནི། །འབྲུ་བཞི་སྦས་ནས་ཐུགས་ཀར་བཀན། །ཧཱུཾ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ལཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་མཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །སྭཱ་སྒྲེང་རྩེ་མོར་དྲིལ་གསིལ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་མཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨཾ་སྒྲེང་རྩེ་མོར་པདྨ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །པཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་མཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཧཾ་སྒྲེང་རྩེ་མོར་རལ་གྲི་འབར། ། ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ཏཱཾ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཨུཏྤལ་ཀླུ་ཤིང་ལ་སོགས་མཚན། །མཛེས་ཚུལ་མཉེས་པའི་ཡོ་བྱད་འཛིན། །ལས་ལ་འཁྲིལ་ཞིང་ཆོས་ལ་བརྟན། །དབུ་རྣམས་འབྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །བྱ་བྱེད་ཁྲོ་བོའི་ཕྱག་རྒྱ་ནི། །རྒྱུད་ལས་གསུངས་པ་བཞིན་དུ་བསྟན། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་འབར། །འོད་ཟེར་འཕྲོ་བ་ཚོགས་ཆེན་པོ། །འབར་བ་ཕྲེང་བས་འཁྲིགས་པ་སྟེ། །མཐའ་དབུས་མེད་པར་ཁྱབ་པ་ཡི། །འོད་ཟེར་འཕྲོ་བའི་རྩེ་མོ་ལ། །དཀྱིལ་འཁོར་བསམ་ཡས་ལྷུན་གྲུབ་གནས། །དཀྱིལ་འཁོར་ཡོངས་སུ་རྫོགས་པ་ལ། །རྒྱལ་བ་ཡོངས་སུ་མཉེས་པར་འགྱུར། །མཉེས་ནས་སེམས་ཅན་དོན་བྱ་ཞེས། །དཀྱིལ་འཁོར་དམ་པ་བསྟན་གྱུར་ཀྱང་། །སེམས་ཅན་མ་རིག་པས་སྒྲིབ་པས། །དཀྱིལ་འཁོར་མཐོང་བའི་སྐལ་མེད་འགྱུར། །རྒྱལ་མཆོག་ཐུགས་རྗེ་སྐྱེས་ནས་ནི། །དེ་ནས་གཉིས་མེད་སྦྱོར་བར་གྱུར། །དེ་ལས་བྱང་ཆུབ་སེམས་སྤྲོས་ལ། །ཨི་སོགས་ཡི་གེ་མངོན་པར་ཕྱུངས། །ས་བོན་ལས་ནི་ཕྱག་མཚན་འབར། །དེ་ལས་ཐུབ་པའི་སྐུ་རྫོགས་ཏེ། །སོ་སོའི་སྙིང་པོ་བརྗོད་ནས་ནི། །མཁའ་དབྱིངས་སྐུ་གསུང་ཐུགས་སུ་གནས། །འཇིག་རྟེན་དྲུག་གི་ཕྱོགས་བཅུར་སྤྲོས། །ༀ་མུ་ནེ་ཀྲིཾ་སྭཱ་ཧཱ། ༀ་མུ་ནེ་ཧཱུཾ་ཏྲུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་པྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། འཇིག་རྟེན་དྲུག་གི་ཕྱོགས་བཅུར་ནི། །འདུལ་བ་རྣམ་བཞིས་འགྲོ་དོན་མཛད། །བལྟམས་དང་རབ་ཏུ་བྱུང་སོགས་དང་། །མངོན་སངས་རྒྱས་དང་བདུད་བཏུལ་དང་། །འཁོར་ལོ་བསྐོར་དང་ཆོ་འཕྲུལ་སྟོན། །མྱ་ངན་འདས་སོགས་ཐུབ་པ་ཡིས། །སྤྱོད་པ་རྗེས་སུ་མཐུན་པར་མཛད། །མངོན་ཤེས་དྲུག་པོ་ཆོ་འཕྲུལ་གྱིས། །ཐམས་ཅད་མཁྱེན་པ་ཉིད་དུ་སྟོན། །སྐུ་དང་གསུང་དང་ཐུགས་རྣམས་ཀྱིས། །བྱེ་བྲག་སྣ་ཚོགས་སྟོན་མཛད་པ། །འགྲོ་བ་སོ་སོར་འདུལ་བ་བཞིན། །བྱིན་རླབས་འདུལ་བ་སྟོན་པར་མཛད། །སོ་སོ་བསམ་པའི་བྱེ་བྲག་གིས། །ལྷ་དང་མི་ཡི་ཐེག་སོགས་པས། །ཐེག་པ་ལྔ་རྣམས་སོ་སོར་སྟོན། །རྗེས་སུ་བསྟན་པས་འགྲོ་བཏུལ་ནས། །འགྲོ་བ་སངས་རྒྱས་སར་བཞག་ནས། །སླར་བྱོན་བར་ཁྱམས་ཐུབ་དྲུག་བཀོད། །དེ་ལྟར་དཀྱིལ་འཁོར་རྣམས་སྤྲོས་ལ། །ཁྱབ་པར་ཀུན་ཏུ་བལྟས་ནས་ནི། །སྒྱུ་མ་བཞིན་དུ་དམིགས་ནས་ཀྱང་། །སོ་སོའི་ཡབ་ཡུམ་བྱེ་བྲག་ལ། །ལུས་ཀྱི་དཀྱིལ་འཁོར་རྫོགས་པར་དགོད། །སྐུ་གསུང་ཐུགས་ནི་བྱིན་བརླབ་པ། །གཙོ་བོ་ཡབ་ཡུམ་བཞིན་དུ་བྱ། །ཡེ་ཤེས་ཡོངས་སུ་རྫོགས་པའི་ཕྱིར། །ཡེ་ཤེས་དབུ་རྒྱན་ཀུན་ལ་བསམ། །ཐུབ་དྲུག་ལུས་ཀྱི་དཀྱིལ་འཁོར་དང་། །བྱིན་རླབས་དབུ་རྒྱན་མ་གསུངས་སོ། །ཐུགས་ཀྱི་འོད་ཟེར་ས་བོན་ལས། །ཕྱོགས་བཅུའི་དཀྱིལ་འཁོར་སྤྱན་དྲངས་ཏེ། །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །ༀ་ཨེ་ཧྱེ་ཧི་བྷ་ག་ཝཱན་མ་ཧཱ་ཀ་རུ་ཎི་ཀ་དྲི་ཤྱ་ཧོཿས་མ་ཡ་ཧོ། ཛཿཧཱུཾ་བཾ་ཧོཿ རང་གི་མདུན་དུ་མངོན་པར་བསམ། །ཞབས་བཀྲུ་ལ་སོགས་བྱས་ནས་ནི། །ༀ་དང་མཱུཾ་གཉིས་རྩེ་སྤྲང་དེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བས། །བདེ་བ་ཆེན་པོ་སྦྱིན་པའི་རྒྱ། །དེ་ལ་ཚིག་འདིས་གསོལ་བ་གདབ། །ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་འཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་ཧཱུཾ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧཱུཾ། ཛཿཧཱུཾ་བཾ་ཧོཿ རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ནི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །དེ་ལྟར་ཡེ་ཤེས་དཀྱིལ་འཁོར་དང་། །དམ་ཚིག་དཀྱིལ་འཁོར་མཉམ་སྦྱར་བྱ། །དཀྱིལ་འཁོར་ཀུན་ལ་མཉམ་སྦྱར་ནས། །སྒྱུ་མ་མིག་སྒྱུ་ལྟ་བུར་བསམ། །དེ་ནས་ལྷ་རྣམས་མཆོད་པའི་ཕྱིར། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །བདག་གི་སྙིང་པོ་ས་བོན་ལས། །འོད་ཟེར་མང་པོའི་ཟེར་འཕྲོས་ཏེ། །ཕྱོགས་བཅུའི་སངས་རྒྱས་ཐམས་ཅད་ཀྱིས། །མཆོད་པའི་ཚོགས་རྣམས་ཀུན་བསྡུས་ཏེ། །བདག་ཉིད་ཀྱི་ནི་ཐུགས་ཀར་ཐིམ། །རྡོ་རྗེའི་ལམ་ནས་བྱུང་ནས་ནི། །བྱང་ཆུབ་སེམས་ཀྱི་དབྱིངས་ཉིད་ནས། །བྱང་ཆུབ་སེམས་ཀྱི་འོད་ཟེར་ལས། །མཆོད་པའི་ལྷ་མོའི་ཚོགས་སྤྲོས་ཏེ། །རྒྱལ་མཆོག་དཀྱིལ་འཁོར་མཆོད་པར་བྱེད། །དེ་ནས་ལྷ་མོའི་ཚོགས་རྣམས་ཀྱིས། །དེ་བཞིན་གཤེགས་པའི་དཀྱིལ་འཁོར་ལ། །དགྱེས་པའི་གླུ་འདི་བླང་བར་བྱ། །ༀ། ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས། །ཧོཿ ༀ། རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོཿ ༀ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་རྫོགས། །འདུས་པའི་ཚོགས་ཆེན་ཐིག་ལེ་ཆེ། །ཧོཿ ༀ། མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་གྲུབ། །སྣ་ཚོགས་སྐུ་གསུང་ཐུགས་ཆེན་པོ། །ཧོཿ ༀ། ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ། །ཧོཿ ༀ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ལ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ། །ཧོཿ དེ་ལྟར་རྒྱལ་བའི་དཀྱིལ་འཁོར་ནི། །བསྐྱེད་པ་ཡོངས་སུ་རྫོགས་བྱས་ཏེ། །སླར་ཡང་བདག་གི་ཐུགས་ཀར་བསྡུ། །དེ་ནས་གསང་བའི་དཀྱིལ་འཁོར་བསྒོམ། །བདེ་བ་ཆེན་པོའི་དཀྱིལ་འཁོར་ནི། །སྟོངས་དཔྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་བཞུགས་ནས། །འདོད་པ་ཡིད་འོང་མཉམ་པར་འགྱུར། །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱིས་ཡན་ལག་ལྔ་རྫོགས་པས། །མ་ཉམས་འཇུག་ལ་རབ་བརྩོན་ན། །ཞག་ནི་སུམ་ཅུ་ཕྲག་དྲུག་གམ །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་དུས་དཀྱིལ་འཁོར་རྫོགས་པ་ཡི། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོ་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བའི་བསྙེན་པ་དང་། །རྒྱ་ཆེན་གསུངས་ལས་དོན་བྱུང་བ། །མཐུན་པའི་ཡེ་ཤེས་རང་སྣང་བའོ། །གཅིག་དང་དུ་མར་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཉིད་ཀྱིས་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །དེ་ལྟར་རྒྱལ་མཆོག་དཔལ་ལྡན་པའོ། །དཀྱིལ་འཁོར་གསང་བར་བསྒྲུབ་པའི་ཕྱིར། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་དཀྱིལ་འཁོར་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱིས་དེ་བཞིན་ཉིད། །བྱང་ཆུབ་སེམས་ནི་རྡོ་རྗེ་ཚོགས། །དབང་པོ་ཡུལ་དུས་རིགས་པ་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔས་བལྟ་ཞིང་། །སྙིང་པོའི་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡི། །ཡེ་ཤེས་དགྱེས་ལ་མཆོད་པ་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་རང་སྣང་བ། །རོལ་མོའི་དཀྱིལ་འཁོར་མཐའ་ཡས་མཆོག །གསང་བའི་ཐིག་ལེ་ཉིད་ཀྱི་དབྱིངས། །དེ་ནི་སངས་རྒྱས་ཀུན་གྱི་དངོས། །ཕྱོགས་བཅུ་དུས་བཞི་མངོན་རྫོགས་པའི། །སྐུ་གསུང་ཡོན་ཏན་འཕྲིན་ལས་ཐུགས། །མ་ལུས་བདག་ཉིད་ཞལ་མཐོང་བ། །དབང་བསྒྱུར་མཆོག་ཉིད་དམ་པ་ཡིན། །དཀྱིལ་འཁོར་ལ་གནས་དཀྱིལ་འཁོར་ཉིད། །རྫོགས་པའི་དཀྱིལ་འཁོར་ལྷུན་གྱིས་གྲུབ། །རྒྱན་དུ་དཀྱིལ་འཁོར་མ་ལུས་ཐོགས། །རྫོགས་པའི་དཀྱིལ་འཁོར་མཉམ་སྦྱོར་བས། །ཐུགས་རྗེའི་དཀྱིལ་འཁོར་ཡོངས་ཀྱི་འབྱུང་། །ཕྱོགས་དུས་དཀྱིལ་འཁོར་འདུལ་བའི་མགོན། །སྒྱུ་མའི་དཀྱིལ་འཁོར་སྒྲོལ་བ་ཡི། །བྱ་བྱེད་མེད་པའི་དཀྱིལ་འཁོར་སྤྱོད། །ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་སྐུ་ལྔ་ལྷུན་གྱིས་གྲུབ། །འདི་ནི་སངས་རྒྱས་ཐམས་ཅད་ཀྱི། །འདའ་བར་མི་མཛད་དམ་ཚིག་མཆོག །གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་བུ་དགོངས་པར་འགྱུར། །གསང་བའི་ཡེ་ཤེས་སྒོམ་པའི་གནས། །མཁའ་དབྱིངས་དང་བའི་དབྱིངས་ཉི་ཟླ། །ཡེ་ཤེས་རྒྱལ་པོ་ཡབ་ཡུམ་བསྒོམས། །གང་གི་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཏིང་ངེ་འཛིན་ལས་ལངས་ནས་ནི། །སྤྱོད་ལམ་རྣམ་པ་གར་གནས་ཀྱང་། །སྣང་བའི་དངོས་པོ་སོ་སོ་ནི། །ལྷ་ཡི་དཀྱིལ་འཁོར་ཉིད་དུ་བལྟ། །ཡང་ན་སྒྱུ་མ་ལ་སོགས་ཚུལ། །ཟས་ལ་སོགས་པ་བཟའ་བ་ནི། །རྒྱལ་བའི་བྱིན་རླབས་མངོན་སུམ་དུ། །བདུད་རྩི་ལྔར་ནི་བྱིན་བརླབས་ཏེ། །ལྕེ་ཡི་དབང་པོ་རབ་སྦྱངས་ནས། །ཡེ་ཤེས་དཀྱིལ་འཁོར་ཐུགས་ཀར་ནི། །རྒྱལ་བའི་ཚོགས་རྣམས་ཐིམ་པར་བྱ། །དམ་ཚིག་ཉམས་པ་ཚུལ་བཞིན་བཤགས། །ཡང་ན་རྒྱལ་བའི་དཀྱིལ་འཁོར་གྱིས། །བྱིན་རླབས་ཀྱིས་ནི་རྣམ་པར་སྦྱང་། །སེམས་ཅན་ཐམས་ཅད་མཐོང་བ་དང་། །སྙིང་རྗེ་བྱམས་པའི་སེམས་བསྐྱེད་དེ། །སངས་རྒྱས་ཉིད་དུ་བྱའོ་ཞེས། །སྨོན་པའི་སེམས་ནི་ཁྱད་པར་ཅན། །བློ་ཅན་གྱིས་ནི་རྟག་ཏུ་བྱ། །དེ་ལྟར་དུས་བཞི་ཉིན་མཚན་དུ། །རྣལ་འབྱོར་ཚུལ་ལ་གནས་པ་ཡིན། །བདག་གིས་མི་ཤིས་རྨོངས་ལ་གསང་དོན་དུ། །སྒྱུ་འཕྲུལ་གསང་དོན་སྒྲུབ་ཐབས་འདི་བྱས་ཏེ། །བདག་བློ་ཆུང་བས་ནོར་དང་འཁྲུལ་མཆིས་པ། །འཕགས་པ་མཁས་པ་རྣམས་ལ་བཟོད་པར་གསོལ། །འདི་ལས་དགེ་བ་བདག་གིས་གང་ཐོབ་པ། །འགྲོ་བ་བློ་ཞན་རྣམས་ཀྱིས་ཆོས་རྣམས་ཀུན། །སྟོང་ཉིད་སྒྱུ་མ་ལྟ་བུར་རབ་རྟོགས་ནས། །ཡེ་ཤེས་གཉིས་མེད་སྐུ་གསུམ་ཐོབ་པར་ཤོག །སྒྱུ་འཕྲུལ་དྲྭ་བ་མེ་ལོང་ལྟ་བུའི་སྒྲུབ་ཐབས། རྒྱ་གར་གྱི་སློབ་དཔོན་ཛྙཱ་ན་ཛ་ཡས་མཛད་པའོ། །བྱམས་སྙོམས་གཙུག་ལག་ཁང་དུ་སློབ་དཔོན་བི་མ་ལ་མི་ཏྲས། སློབ་བུ་ཡང་རབ་ཀྱིས་དོན་དུ་གསང་བ་སྙིང་པོ་དང་བསྟུན་ནས་བསྒྱུར་ཅིང་གཏན་ལ་ཕབ་པ་རྫོགས་སོ།། །།སརྦ་མངྒ་ལཾ།།
སྒྲུབ་ཐབས་རིན་ཆེན་དྲྭ་བ་བསྡུས་པ། སློབ་དཔོན་སངས་རྒྱས།
སྒྲུབ་ཐབས་རིན་ཆེན་དྲྭ་བ་བསྡུས་པ་བཞུགས། དེ་བཞིན་གཤེགས་པ་ཀུན་གྱི་བདག །ཡེ་ཤེས་རྒྱ་མཚོ་རབ་ཟབ་ཐུགས། །དཀྱིལ་འཁོར་ཡིད་བཞིན་འབྱུང་བའི་གཏེར། །རྡོ་རྗེ་ཡིད་ལ་ཕྱག་བཙལ་ཏེ། །ཨེ་མ་འོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱི་སྤྲུལ། །རང་བྱུང་ཡེ་ཤེས་བསྐྱེད་པའི་ཕྱིར། །རྒྱུད་ཀྱི་བསྡུས་དོན་སྙིང་པོ་བརྩམ། ༈ །ཐོས་བསམ་སྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུངས། །སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། ༈ །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩམ་པ་རྣམས། །འབྲས་བུ་མེད་ཅིང་བཏུབ་པར་འགྱུར། ༈ །མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་འགྱུར་བས། །འདས་ན་སངས་རྒྱས་མ་ཡིན་ནོ། ༈ །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་བརྙེད་མི་འགྱུར། །སེམས་ཉིད་རྟོགས་ན་སངས་རྒྱས་པས། །སངས་རྒྱས་གཞན་དུ་མ་འཚོལ་ཅིག ༈ །གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱས་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། ༈ །དགོན་པ་དབེན་པའི་ས་ཕྱོགས་སུ། །ཙནྡན་ནགས་དང་མེ་ཏོག་ཚལ། །ཡིད་འོང་བཀྲ་ཤིས་སེམས་དགའ་བའི། །བདག་དབང་བར་ཆད་མེད་པའི་གནས། ༈ །བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། ༈ །ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །སྒྲུབ་པའི་གཙོར་ནི་ཏིང་འཛིན་པས། །གསེར་འགྱུར་སྨན་དང་མུན་སེལ་ཚུལ། །རྟོག་པའི་དབང་བསྒྱུར་ཏིང་འཛིན་ཡིན། །དེ་ཕྱིར་ཏིང་འཛིིན་རིམ་བཞིན་བསྒོམ། །དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་དོ། ༈ །དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། ༈ །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་མཆོག་གི་བསྒོམ་པར་བྱ། །ཨཿ རབ་ཏུ་བརྟན་འགྱུར་ཨཿདཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོགས་གསལ་བར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། ༈ །ཨེ་ཡཾ་བཾ་ལཾ་སུཾ་རཾ། བྷྲུཾ་བི་ཤྭ་བི་ཤུདྡྷེ། ཡེ་ཤེས་ཕྱོགས་བཞི་དབུས་བརྟག་སྟེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །ལྷག་པའི་ཡེ་ཤེས་གློ་འབུར་ཅན། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཨ་ནི་སྐྱེ་མེད་དེ་བཞིན་ཉིད། །ཀྵ་ནི་ཐུགས་ཀྱི་ཡེ་ཤེས་ཤར། །དེ་ལས་ཆོ་འཕྲུལ་གསུམ་གྱིས་བསྐྱེད། །ཀུན་བཟང་མཉམ་བཞག་ཡེ་ཤེས་འཕྲོ། །ཡུལ་གྱུར་མཉམ་རྫོགས་པདྨོའི་དཀྱིལ། །ཕྱག་རྒྱ་ཆེན་པོའི་སྐུ་གཉིས་རྫོགས། །བདག་ཉིད་སངས་རྒྱས་ཐམས་ཅད་ཀྱི། ། སྐུ་གསུང་ཐུགས་ཀྱི་རྡོ་རྗེ་བདག །ཕྱོགས་དུས་དཀྱིལ་འཁོར་བདག་ཉིད་ཆེ། །ཀུན་བཟང་ཡེ་ནས་ཡིན་པའི་ཕྱིར། །ཐབས་དང་ཤེས་རབ་དགྱེས་སྤྲིན་ལས། །བྱང་ཆུབ་སེམས་ཚོགས་རྒྱུ་འཁོར་ལ། །འབྲས་བུ་རྒྱལ་བ་སྨིན་གྲུབ་བྱེད། །ངོ་མཚར་མིང་ཚོགས་བཞི་བཅུ་གཉིས། །ཨཿ ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ཝ་ར་ལ་ཤ་ཥ་ས་ཧ། ཀྵཿ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨ། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གི་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །དེ་ལ་རྐྱེན་གྱི་སྔགས་ཀྱིས་བསྐྱེད། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲ་བའི་དཀྱིལ་འཁོར་ཡོངས་རྫོགས་པའི། །འདུས་མ་བྱས་ཉིད་འདུས་བྱས་ཀྱིས། །རྡོ་རྗེ་དཀྱིལ་འཁོར་འབྱིན་པའི་དམ། །དབང་མེད་རྒྱུ་རྐྱེན་ཚོགས་པའི་མཐུ་ཆེན་ཡིན། །དེ་ནས་བཅོམ་ལྡན་དགྱེས་ཆེན་རིགས། །ལྷུན་གྱིས་གྲུབ་པར་བྱ་བའི་ཕྱིར། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །རང་གི་ངང་ཚུལ་དེ་བཟུང་ལ། །བསྐུལ་ཚིག་འདི་ཡང་རབ་ཏུ་བརྗོད། །ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་འཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ཐབས་དང་ཤེས་རབ་གཉིས་མེད་པའི། །ཡེ་ཤེས་ཟེར་གྱིས་ལུས་རྟོག་སྦྱང་། །གསེར་ཞུན་ལྟ་བུའི་སེམས་དག་ལས། །གསུམ་གྱི་བྱིན་རླབས་འོད་ཀྱི་འབྲུ། །ཐུགས་ཀར་ཐིམ་ནས་སྐུ་ཡི་དབྱིངས། །རྡོ་རྗེའི་ལམ་བྱུང་ཡུམ་གྱི་མཁའ། །ཆོས་སྐུ་བྱང་ཆུབ་སེམས་སུ་གནས། །ལྷ་རྣམས་སོ་སོའི་སྙིང་པོ་འབྲུ། །བཞི་བཅུ་རྩ་གཉིས་སྒྲ་བྱུང་ནས། །བྱང་ཆུབ་སེམས་སུ་གཅིག་པར་ཐིམ། །དེ་ནས་སྙིང་པོ་དྲན་ཙམ་གྱིས། །ཨ་ཀྵ་གསུང་གི་ཕྱག་རྒྱ་ཉིད། །ཆོ་ག་གསུམ་གྱི་སྦྱོར་བ་ཡི། །ཕྱག་རྒྱ་ཆེན་པོའི་སྐུ་ཉིད་རྫོགས། །འབྲུ་གསུམ་འབྲུ་ལྔས་བྱིན་རླབས་དབར། །ཧཱུཾ་ལས་རྡོ་རྗེ་རྩེ་ལྔ་ༀ། །པཾ་ལས་པདྨ་འདབ་བརྒྱད་དབུས། །རྗེས་སུ་ཆགས་པས་ཚུལ་བཞིན་བསྐུལ། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །གཞན་ཡང་ཐིག་གདབ་སྙིང་པོ་དགོད། །དེ་ལས་སྤྲོ་དང་བསྡུ་བ་ཡི། །ཐུགས་ཀྱི་ཕྱག་རྒྱ་བཞི་བཅུ་གཉིས། །དེ་ལས་ཕྲ་མོའི་སྐུ་འཕྲོ་འདུས། །སོ་སོའི་སྔགས་ཀྱིས་བསྐྱེད་ཅིང་གདོན། །ཧཱུཾ་བཛྲ་དྷྲིཀ །མུ་དྷ་ཏྭི་ཤྭ་རི། ༀ་ཛི་ན་ཛིཀ྄ །ལཱཾ་དཱེ་ཥ་ར་ཏི། སྭཱ་རཏྣ་དྷྲིཀ །མཱཾ་མོ་ཧ་ར་ཏི། ཨཱཾ་ཨཱ་རོ་ལིཀྲ། པཾ་རཱ་ག་ར་ཏི། ཧཱ་པྲ་ཛྙཱཾ་དྷྲིཀ །ཏཱཾ་བཛྲ་ར་ཏི། ཀྵིཾ་ཧི་རཱ་ཛ་ཡ། ཧཱུཾ་ལཱ་སྱེ་ས་མ་ཡ་སྟཾ། ཏྲཱཾ་ཨཱ་གརྦྷ་ཡ། ཏྲཱཾ་མ་ལེ་ས་མ་ཡ་ཧོཿ ཧྲཱིཿཔདྨ་བ་ད་མ། ཧྲཱིཿགཱི་ཏི་རཱ་གོ་ཧཾ། ཛྲིཾ་ཀུ་རུ་རུ་པནྣ་ཧྲཱིཿ ཨ་ནྲྀ་ཏཱི་རཱ་ག་ཡ་མི། མེ་དྷ་ར་ཎེ་སྭཱ་ཧཱ། ཛཿདྷུ་པ་པྲ་བེ་ཤ །ཐླྷིཾ་ནི་སྶ་རཾ་བྷ་ཡ་སྭཱ་ཧཱ། ཧཱུཾ་པུཥྤེ་ཨ་བེ་ཤ །ཧཱུཾ་ས་རཱ་ཛ་ཡ་སྭཱ་ཧཱ། བཾ་ཏཱི་པ་སུ་ཁི་ནི། མཱུཾ་ཤྲཱི་ཨཾ་རཱ་ག་ཡ་སྭཱ་ཧཱ། ཧོཿགནྡྷེ་ཙིཏྟ། ཧཱུཾ་ཡ་མཱནྟ་ཀྲིཏྲ་ཕཊ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷཱི་ཤྭཱ་རི་ཛྭ་ལ་ནི་ཧཱུཾ་ཕཊ། ཧཱུཾ་པྲ་ཛྙཱནྟ་ཀྲིཏྲ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷཱི་ཤྭ་རི་ཛྭ་ལ་ནཱི་ཧཱུཾ་ཕཊ། ཧཱུཾ་པདྨཱནྟ་ཀྲྀཾ་ཏྲ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷཱི་ཤྭ་རི་ཛྭ་ལི་ནཱི་ཧཱུཾ་ཕཊ། ཧཱུཾ་བིགྷྣཱནྷ་ཀྲྀ་ཏྲ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷཱི་ཤྭ་རི་ཛྭ་ལ་ནཱི་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མཱནྟ་ཨ། ༀ་མུ་ནེ་ཀྲཱེེཾ་སྭཱ་ཧཱ། ༀ་མུ་ནེ་ཧཱུཾ་ཏྲུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་པྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་ལྡན་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེ། །གཟུགས་མཛེས་རིན་ཆེན་ཕྲེང་བ་དང་། །པི་ཝང་གར་མཁན་མཆོག་ཉིད་དེ། །མེ་ཏོག་ཕྲེང་དང་སྤོས་མཆོད་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བརྟེན། །དབུ་རྣམས་འབྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱིས་ངང་དུ་འཁྲིལ། །སྒོ་བཞི་ཁྲོ་བོའི་ཕྱག་རྒྱ་ནི། །ནྲྀ་མགོ་གདེང་དང་རྡོ་རྗེ་གནོན། །ཐོད་སྦྲུལ་ཆེན་པོས་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྥོ་ཊ་ཧོཿ སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཏུ་བསྟན། །གསེག་པར་དང་ནི་པི་ཝཾ་དང་། །གོ་ཆ་པུ་སྟི་རིན་ཆེན་སྒྲོམ། །མེ་དང་ཆུ་རུ་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པདྨོའི་དཀྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྟུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཕྲིགས་པ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་རྫོགས། །ༀ་མ་ཧཱ་ཤྱ་ནྱ་ཏཱ་ཛྙཱ་ན་བཛྲ་སྭ་བྷཱ་ཨཏྨ་ཀོ྅་ཧཾ། ༀ་མ་ཧཱ་ཨ་དཪྴ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཱཾ། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་མ་ཧཱ་ཀྲྀ་ཏྱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཀ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱཀ྄་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྐུ་གསུང་ཐུགས་དང་ཡེ་ཤེས་ལྔའི། །དབང་དང་བྱིན་རླབས་ཀུན་བསྡུས་ནས། །དཀྱིལ་འཁོར་ཤིན་ཏུ་གསལ་བར་འགྱུར། །ས་ལ་སོགས་པ་ཕྱག་རྒྱར་བྱས། །རྣམ་གྲོལ་རིམ་པ་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཕྱག་རྒྱའི་དཀྱིལ་འཁོར་གསལ་བཀོད་ལ། །དབང་བསྐུར་བྱིན་རླབས་རྫོགས་བྱས་ནས། །སྟོང་གསུམ་ཡུངས་འབྲུར་འཇུག་ཚུལ་དུ། །དབྱིངས་ནས་དཀྱིལ་འཁོར་སྤྱན་དྲངས་མཆོད། ༈ །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཉམ་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ཨེ་ཧྱེ་ཧི་བྷ་ག་ཝན་མ་ཧཱ་ཀ་རུ་ཎི་ཀ་དྲི་ཤྱ་ས་མ་ཡ་སྟྭཾ། ཛཿཧཱུཾ་བཾ་ཧོཿ ༀ་བཛྲ་ས་མ་ཡ་ༀ། ༀ་བཛྲ་ས་མ་ཡ་ཨཾ། ཧཱུཾ་བཛྲ་ས་མ་ཡ་ཧཱུཾ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ༀ་བཛྲ་ས་མ་ཡ་ཧཱུཾ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧཾ། ཛཿཧཱུཾ་བཾ་ཧོ། མེ་ཏོག་དོར་བས་དངོས་གྲུབ་སྩོལ། །གཉིས་མེད་ཐིམ་བཞུགས་མཉེས་པར་བྱ། །སྒྱུ་འཕྲུལ་དྲ་བས་མངོན་རྫོགས་པའི། །དབང་པོའི་ཡུལ་དུ་གང་གྱུར་པ། །མཉམ་པའི་ངང་ཉིད་རྟོགས་གསལ་ན། །ཐམས་ཅད་བྱང་ཆུབ་མཆོག་གི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཐབས་དང་ཤེས་རབ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ༀ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པས། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུཾ་བསྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུཾ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་བསྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ལཱཾ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་མཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །སྭཱ་བསྒྲེང་རྩེ་མོར་རིན་ཆེན་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱཾ་བ སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨཾ་བ སྒྲེང་རྩེ་མོར་པདྨ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །པཱཾ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་མཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཧཱ་བསྒྲེང་རྩེ་མོར་རལ་གྲི་འབར། ། ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ཏཱཾ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་མཛུམ་པའི་མདངས་ཀྱིས་བལྟ། །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོ་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་བྲེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སོ་མོ་དོ། །མཛེས་པའི་རྒྱན་རྣམས་སྣ་ཚོགས་དང་། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱི། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་དབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་སྒོམ། ༈ །ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་སེམས་ཅན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། ༈ །གསལ་ལྡན་མའམ་བྱིན་རླབས་ལ། །ཐབས་དང་ཤེས་རབ་གཉིས་མེད་པའི། །འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། ༈ །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། ༈ །ༀ། ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས། །ཧོཿ ༀ། རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ། །ཧོཿ ༀ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་རྫོགས། །འདུས་པའི་ཚོགས་ཆེན་ཐིག་ལེ་ཆེ། །ཧོཿ ༀ། མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ། །ཧོཿ ༀ། ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ། །ཧོཿ ༀ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ལ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ། །ཧོཿ སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་འདུ་འཕྲོའི་ཕྱག་རྒྱ་ཡི། །འཛུམ་ལམ་ནམ་མཁར་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡི། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། ༈ །དེ་ཡི་བཟླས་པའི་འཕྲུལ་ཆེན་ནི། །རྣམ་གསུམ་ཚུལ་གྱིས་མ་འཁྲུལ་བར། །སྔགས་དང་འཕྲོ་འདུ་བར་མི་གཅོད། །འདྲིས་གསལ་བརྟན་པ་མཆོག་གིས་བྱ། ༈ །ཤེས་འཇུག་མཚན་ཉིད་འབྱོར་པའི་གཟུགས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །བསྙེན་པ་རྫོགས་ནས་དཀྱིལ་འཁོར་ཀུན། །ཧཱུཾ་ཞེས་བརྗོད་ཅིང་ཐུགས་ཀར་བསྡུ། །སྐྱེ་མེད་མཉམ་རྫོགས་དབྱིངས་སུ་ཐིམ། །སྟོང་པའི་ཆོ་གས་ལུས་བསྲུང་སྟེ། །སྤྱོད་ལམ་ཀུན་ཏུ་བཙལ་མེད་པར། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །འགྲོ་དང་འདུག་དང་ཉལ་བ་དང་། །མ་ཉམས་དེ་ཡི་དབྱིངས་ན་གནས། །དེ་ཡིས་བྱང་ཆུབ་སྙིང་པོ་ལེན། །ཆོ་ག་སྔགས་དང་ཡོ་བྱད་རྣམས། །རྣལ་འབྱོར་ཚོགས་པའི་དཀྱིལ་འཁོར་གྱིས། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱི། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་བཅུ་དུས་བཞི་རྫོགས་པ་ཡི། །ཞིང་ཁམས་རྣམ་དག་གཞལ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་ཐམས་ཅད་ཀུན། །མཐོང་ནས་ཉེ་བར་བསྙེན་པ་དང་། །རྒྱ་ཆེན་གསུང་ལས་དོན་འབྱུང་བ། །མཐུན་པའི་ཡེ་ཤེས་རང་སྣང་བའོ། ༈ །གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་ཡིན། །ཕྱོགས་བཅུ་དུས་བཞི་རྫོགས་པ་ཡི། །བདེ་གཤེགས་ཡོན་ཏན་རྨད་པོ་ཆེ། །གཞན་ནས་ཡོད་འོངས་མ་ཡིན་ཏེ། །ལྷ་སྲིན་ལ་སོགས་སྨོས་ཅི་དགོས། །རྒྱུད་ཀྱི་དོན་ལས་སྒྲུབ་པའི་ཐབས། །རིན་ཆེན་དྲྭ་བ་བསྡུས་པ་འདི། །བཅོམ་ལྡན་ཀུན་བཟང་སྐུ་གསུང་ཐུགས། །སེམས་ཅན་ཀུན་གྱིས་ཐོབ་པར་ཤོག །སློབ་དཔོན་སངས་རྒྱས་གསང་བས་མཛད་པ་རྫོགས། །མངྒལཾ། །དགེའོ། །དགེའོ། །དགེའོ།། །།
དངོས་གྲུབ་གྲུབ་པའི་སྒྲུབ་ཐབས། སྒེག་པ་རྡོ་རྗེ།
དངོས་གྲུབ་གྲུབ་པའི་སྒྲུབ་ཐབས་བཞུགས་སོ། །རྒྱ་གར་སྐད་དུ། བཛྲ་ཛ་ལ་མ་ལ་ཤྲི་གུ་ཡ་གརྦ་ས་ད་ན། བོད་སྐད་དུ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བའི་སྙིང་པོའི་དངོས་གྲུབ་སྒྲུབ་པའི་ཐབས། དཔལ་མི་བསྐྱོད་རྡོ་རྗེ་ལ་ཕྱག་འཚལ་ལོ། །མི་སྐྱོད་ཡེ་ཤེས་རྡོ་རྗེ་ལ། །གསུམ་ཕྱིར་གཉིས་མེད་འདུད་བྱས་ཏེ། །གྲུབ་པ་རྣམ་གཉིས་འདོད་པའི་ཕྱིར། །སྒྲུབ་པའི་ཐབས་ནི་ཚུལ་བཞིན་བཤད། །ལུས་འདིར་གཉེར་གྱིས་རྣམ་དབྱེ་ན། །བསྙེན་པ་དང་ནི་ཉེ་བསྙེན་དང་། །སྒྲུབ་དང་བསྒྲུབ་པ་ཆེན་པོ་བཞིས། །འདི་ཡི་དོན་ཀུན་འདིར་བསྡུས་ཡིན། །དང་པོ་དག་ནི་གཉིས་ཡིན་ཏེ། །སློབ་དཔོན་སྒྲུབ་ལ་བརྩོན་པ་དང་། །དབང་བསྐུར་ཤེས་དང་ཐུགས་རྗེ་ཆེ། །སེམས་ཅན་ཀུན་ལ་ཕན་བརྩོན་བས། །སྙིང་རྗེའི་ཆུད་མ་ཟོས་པར་གཟུང་། །གཉིས་པ་དེ་ཡི་སྣོད་བསྟན་པ། །དད་བརྩོན་བརྟུལ་ཞུགས་ལྡན་པ་ལ། །ཕན་པའི་དབང་སྦྱིན་ནུས་དབང་དང་། །གསང་དབང་ཡེ་ཤེས་བདེ་ཆེན་པོ། །མན་ངག་མཛོད་ཀུན་དེ་སྦྱིན་ཕྱིར། །དེ་ཡིས་དེ་ལ་དེ་བཞིན་སྦྱིན། །གསུམ་དང་གཉིས་ཀྱི་སྣོད་སྦྱངས་ནས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཉེ་བསྙེན་ཐག་བཅད་འདི་ཡིན་ཏེ། །མཉམ་གསུམ་རྟོགས་བཞི་དག་གསུམ་དང་། །བདེན་གསུམ་ཚུལ་གྱིས་དེ་བརྟགས་ལ། །དབང་པོ་ཡུལ་དུས་སྣང་བ་ཀུན། །ཡུལ་རྣམས་ཡོད་པ་མ་ཡིན་ཏེ། །ཀུན་གཞིའི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་བའི། །སྣང་བའི་དངོས་པོར་རྣམས་གཞི་གནས། །གཉིས་མེད་ངང་དུ་ཐིམ་པར་བྱ། །བསྒྲུབ་པ་རྣམ་བཞིར་ཤེས་བྱ་སྟེ། །རིམས་བཞིན་བཤད་བྱ་དེ་ཤེས་བྱོས། །དངོས་རྣམས་ཉིད་ན་དངོས་མེད་པར། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་རྒྱུད་མིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །དེ་བཞིན་ཉིད་ཀྱི་དབྱིངས་ཉིད་ནི། །གཅིག་ཅེས་འདི་ཞེས་བརྗོད་དུ་མེད། །གཉིས་མེད་དབྱིངས་ཀྱི་ངང་དུ་མེད། །གསུམ་དུ་སྣ་ཚོགས་འབྱུང་ཞིང་འཕྲོ། །བྱིན་རླབས་སྣ་ཚོགས་མཐའ་ཡས་མཆོག །དང་པོ་ཅི་ཡང་མི་དམིགས་ཏེ། །དངོས་གྲུབ་ཤིན་ཏུ་འགྲུབ་འདོད་ན། །ཤིན་ཏུ་ཕྲ་ཞིང་ཟབ་པར་བསྒོམ། །དམིགས་མེད་རྣམ་པར་མི་རྟོག་ལ། །དོན་གྱིས་མཉམ་པར་བཞག་སྟེ་བསྒོམ། །སྤྱོད་པ་གང་ཡང་མི་འགོག་སྟེ། །སྤྱད་བྱ་སྤྱོད་བྱེད་མ་དམིགས་པས། །ངང་གིས་ཐམས་ཅད་རང་རིག་པས། །བྱ་ཡངས་རྣལ་འབྱོར་སྤྱོད་པའོ། །དངོས་པོ་ངོ་བོ་དགོས་པ་དང་། །བསྒོམ་ཐབས་སྤྱོད་པ་གསུམ་གཉིས་ཀྱིས། །མདོར་བསྡུས་བཞི་ཡི་དང་པོར་བཤད། །དེ་ཉིད་དེ་ལས་མ་གཡོས་པར། །དེ་ཉིད་དང་པོར་གོམས་པ་དང་། །ཐམས་ཅད་དེ་ལས་མ་གཡོས་པར། །ཐམས་ཅད་སྒྱུ་མ་མིག་ཡོར་ཚུལ། །སྣང་བྱེད་དེ་ཉིད་མ་གྲུབ་པར། །སྒྱུ་མ་བདེ་ཆེན་ཉིད་དུ་གནས། །ལས་དང་གནས་གཉིས་མ་གྲུབ་པས། །བསླུ་བར་བྱེད་ཅེས་རྒྱལ་བས་གསུངས། །སྣང་སྟོང་དབྱེར་མེད་ཡེ་ཤེས་ཏེ། །མཚམས་སུ་སྦྱོར་ཞེས་གྲགས་པ་ཡིན། །སྣང་སྟོང་དབྱེར་མེད་སྒྱུ་མའི་རྒྱ། །དཔེ་བརྒྱད་ལྟ་བུར་སྣང་བ་ཡིན། །སྣང་སྟོང་སྟོང་པ་དབྱེར་མེད་པའི། །སྒྱུ་མ་ལྟ་བུའི་ཏིང་འཛིན་བསྒོམ། །ལོངས་སྤྱོད་སྐུ་དང་སངས་རྒྱས་ཞིང་། །ཇི་ལྟར་འདོད་པ་འགྲུབ་ཅེས་གསུངས། །སྒོ་གསུམ་གཞན་ལ་ཕན་འདོགས་པ། །སྒྱུ་མ་ཉིད་ལས་གཞན་མ་ཡིན། །འདི་ཉིད་དངོས་པོ་ལས་ཉིད་དང་། །དགོས་པ་བསྒོམ་ཐབས་འབྲས་བུ་དང་། །སྤྱོད་ལམ་ཉིད་དེ་དྲུག་ཏུ་བཤད། །ཏིང་འཛིན་དེ་ལས་མ་གཡོས་པར། །ཡི་གེ་ཨའམ་ཧཱུཾ་སོགས་བསྒོམ། །གང་བསྒྲུབ་ཡི་གེ་སོ་སོ་སྟེ། །སྤྱིར་ནི་གང་བསྒོམ་ཀུན་ཏུ་འདྲ། །རྡོ་རྗེ་སེམས་དཔའ་ཉིད་དུ་འདྲ། །ཞལ་གསུམ་ཕྱག་ནི་དྲུག་པ་སྟེ། །དེ་ཉིད་ཤིན་ཏུ་གོམས་པ་དང་། །མི་ཡི་མིག་གི་བལྟར་ཡོད་པར། །ལྷང་ངེ་ལྷན་ནེ་སང་ངེ་བ། །དེ་ནི་ཤིན་ཏུ་གསལ་འདྲིས་བྱ། །དེ་ནི་ཤིན་ཏུ་གོམས་པ་དང་། །རྡོ་རྗེ་འཁོར་ལོ་རིན་པོ་ཆེ། །གང་གོམས་དེ་ཉིད་མོས་པ་བསྒོམ། །དེ་ལ་ཕྲ་མོར་གྱུར་པ་མཆོག །ཉི་ཟླ་གང་བ་ཡན་ཆད་བསྒོམ། །དེ་ལ་རང་གིས་གསལ་ཚད་དེ། །ཞལ་གསུམ་ཕྱག་དྲུག་ཡང་ན་གཉིས། །གང་ལ་གོམས་པ་བསྒོམ་པར་བྱ། །འོད་ཟེར་འཕྲོ་བ་འབྲུ་གསུམ་སྟེ། །ཡང་ན་ཡི་གེ་འབྲུ་ལྔའོ། །རྗེས་མཐུན་སྤྲོད་པ་གསུམ་གཉིས་བཞིན། །འོད་ཟེར་འཕྲོ་འདུ་མཆོག་དོན་བྱེད། །མཐའ་ལས་སྤྲུལ་སྐུ་ཐོབ་ཅེས་བཤད། །རྒྱུ་རྐྱེན་ཚོགས་པས་སྣང་བའི་ཕྱིར། །དེ་བཞིན་དམ་བཅའ་གསུམ་ཆོ་ག །ངོས་བཟུང་ཐུགས་མཚན་གསལ་བའི་ཚད། །སྐུ་ཕྲ་ཞལ་ཡས་སྐུ་ཆེན་པོ། །དབང་བསྐུར་བྱིན་རླབས་སྤྱོད་པ་དང་། །འབྲས་བུ་དགོས་ཆེད་ལྔ་གཉིས་གསུམ། །གསུམ་པའི་མདོར་བསྡུས་སྤྱོད་དོན་ཡིན། །དེ་ཉིད་དེ་ལས་མ་གཡོས་པར། །དཔག་ཆེན་འཕོང་སློབ་ཇི་ལྟ་བར། །གཅིག་ལས་མང་པོར་སྣང་བའི་ཕྱིར། །དེ་ཉིད་དེ་ཡི་འོག་ཏུ་སྣང་། །རྩ་བའི་ལྷ་ནི་གང་ཡིན་པ། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །རིགས་བཞི་རྒྱལ་མཆོག་དེ་བཞིན་དུ། །ནམ་མཁའ་དབྱིངས་ནི་བསམ་ཡས་པར། །གཟའ་སྐར་མང་པོ་བཀྲམ་པ་ལྟར། །སངས་རྒྱས་དཀྱིལ་འཁོར་མ་ལུས་བསྒོམས། །ཡང་ན་རྒྱང་གྲགས་དཔག་ཚད་དུ། །རྒྱལ་བའི་དཀྱིལ་འཁོར་མ་ལུས་བསྒོམས། །རྒྱང་གྲགས་དཔག་ཚད་ལ་སོགས་པར། །སློབ་དཔོན་མཐར་ཉེའི་ལམ་གནས་པས། །ཕྱག་རྒྱའི་དཀྱིལ་འཁོར་གསལ་ལྡན་པ། །སྣ་ཚོགས་དཀྱིལ་འཁོར་མཆོག་ཏུ་གསལ། །བཞི་བཅུ་རྩ་གཉིས་ལ་སོགས་པ། །སངས་རྒྱས་སྟོང་གི་དཀྱིལ་འཁོར་སྤྲོ། །སྤྱོད་པ་མཆོག་གི་སྤྱོད་པ་སྟེ། །དགོན་པའི་གནས་སུ་ཡོ་བྱད་ལྔ། །བསོགས་ཏེ་བྱིན་གྱིས་རླབས་སྤྱད་པར། །ཡོན་ཏན་དཔག་མེད་ཐོབ་པར་འགྱུར། །བཞི་གསལ་མ་བྱས་ཨ་ལ་ནི། །སྟན་ཆོས་ཆ་བྱས་སྦྱོར་བྱས་ལ། །གཡོ་ལྡང་ལ་སོགས་བྱང་སེམས་ལྔ། །དགའ་བཞི་ལྷན་ཅིག་སྐྱེས་པ་ཡི། །དངོས་པོ་ལྷན་ཅིག་སྐྱེས་པ་མཐོང་། །དེ་ནས་དངོས་གྲུབ་སྒྲུབ་ཆེན་ལ། །སྦྱར་བའི་རིམ་པ་གཉིས་ཡིན་ནོ། །དམ་ཚིག་དངོས་གྲུབ་གཉིས་སུ་འདོད། །དམ་ཚིག་དངོས་པོ་གཉིས་པར་གསལ། །དངོས་གྲུབ་རིམ་པ་འདི་ཡིན་ཏེ། །ཐུན་མོང་དང་ནི་མཆོག་ཡིན་ཏེ། །ཐུན་མོང་དངོས་གྲུབ་དམ་པ་ནི། །བདུད་རྩི་འབྱུང་ཞིང་འགྱུར་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྤྱོང་། །ཅིར་ཡང་གཞན་དུ་འགྱུར་མེད་འགྲུབ། །ནམ་མཁའ་རྡོ་རྗེ་སྲ་འབྱུང་ཞིང་། །འབར་བས་མེ་ཡིས་འཚིགས་པ་དང་། །ཆུར་འགྱུར་འབབ་པ་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །དགུག་དང་གཏང་དང་བཅིང་དང་དགྲོལ། །ཐམས་ཅད་དེ་ཡིས་འགྲུབ་པར་འགྱུར། །དེ་ནི་ཐུན་མོང་ཡིན་པར་འདོད། །ས་བཅུ་མཐར་ཕྱིན་དབང་ཕྱུག་ཆེ། །ཏིང་འཛིན་རིམ་པ་དུས་གཅིག་གསལ། །འོག་མིན་བླ་མེད་གནས་མཆོག་ན། །སྐུ་ནི་རྣམ་པར་སྣང་མཛད་སྐུ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་མཇལ་པར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་རྟོག་ངན་ཐམས་ཅད་སེལ། །འཁོར་གྱི་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །བླ་མེད་བྱང་ཆུབ་ཡང་དག་ཐོབ། །ཆོས་སྐུ་དཔག་མེད་བརྗོད་དུ་མེད། །ལོངས་སྐུ་ཟད་མེད་རིན་ཆེན་གཏེར། །སྤྲུལ་པ་བྱ་བ་བསམ་མི་ཁྱབ། །མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་ཏུ་མ་འདའ་ལ། །སྐྱེ་ཤི་མེད་པའི་གཡུང་དྲུང་སྐུ། །ཉོན་མོངས་ཀུན་ཏུ་ཞིང་དུ་གནས། །སྐུ་ལྔ་དེ་ཚེ་ལྷུན་གྱིས་རྫོགས། །གོང་ཚུལ་ཉིད་ལས་མ་གཡོས་པར། །དེ་ཚེ་མི་མཐུན་སྣ་ཚོགས་ལ། །སོ་སོར་འདྲ་བར་སྣང་བ་ནི། །དེ་བཞིན་ཉིད་ཀྱིས་མ་བཅོས་ཀྱང་། །ལས་འཕྲོ་དབང་གིས་སོ་སོར་སྣང་། །དཔེར་ན་མེ་ལོང་ཆུ་ཟླ་བཞིན། །དེ་ཚེ་འགྲོ་དྲུག་ཐམས་ཅད་ལ། །སྡིག་སྤོང་གཟུགས་སུ་རྣམ་པར་བསྟན། །དགེ་ཚུལ་རྣམས་ལ་དགྲ་བཅོམ་གཟུགས། །རང་རྒྱལ་རྣམས་ལ་བསྭེ་རུའི་ཚུལ། །ལ་ལ་ལྷུམས་ཞུགས་སྐུ་ལས་བལྟམས། །ལ་ལ་བྱང་ཆུབ་ཤིང་དྲུང་གཤེགས། །ལ་ལ་མེ་འབར་ཆུ་རུ་འཁྲུགས། །ལ་ལ་ནམ་མཁའ་སྒྲ་རུ་འབར། །ལ་ལ་ཡོངས་སུ་མྱ་ངན་འདས། །ཀུན་ཀྱང་ཆོས་ཀྱི་འཁོར་ལོ་བསྐོར། །ཐེག་པ་མཐོ་དམན་བསམ་ཡས་ཀྱང་། །དེབཞིན་ཉིད་ཀྱིས་མ་གསུངས་ཏེ། །གདུལ་བྱའི་སྐབས་སུ་སོ་སོར་ཐོས། །དེ་ནི་གསུང་མཆོག་རྒྱལ་པོ་ཡིན། །དངོས་གསུམ་ལམ་ཉིད་སྒྱུ་འཕྲུལ་མང་འབྲེལ་འདྲ་བའི་རྒྱུད་ཆེན་ལས། །བསྒྲུབ་པའི་རིམ་པ་རྒྱུད་ཆེན་རིགས་པས་གཏིང་ནས་གཏན་ལ་ཕབ། །དེ་ཡི་དག་པས་ཁམས་གསུམ་མ་ལུས་སེམས་ཅན་ཐམས་ཅད་ཀུན། །སྐུ་དང་གསུང་ཐུགས་ཡོན་ཏན་ཕྲིན་ལས་ཐམས་ཅད་རྒྱུད་ལ་ཡོངས་སྨིན་ཏེ། །ཉོན་མོངས་ཡེ་ཤེས་སྤང་བླང་མེད་པར་རང་བཞིན་མཐོང་ནས་སྐུ་ལྔ་ལྷུན་གྲུབ་ཐོབ་པར་ཤོག །རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བའི་སྙིང་པོའི་དངོས་གྲུབ་སྒྲུབ་པའི་ཐབས། སྒེག་པ་རྡོ་རྗེས་མཛད་པ་རྫོགས་སོ།། །།
ཁྲོ་བོ་བསྡུས་པའི་སྒྲུབ་ཐབས་ཧེ་རུ་ཀའི་གལ་ཕྲེང་།
མཱ ཡཱ ཀྲོ དྷ པི ཎྜ སཱ དྷ བ ཡ ཧེ རུ ཀ ཀ ལྤ མཱ ལ རི ཧ ར ཏི སྨ།
སྒྱུ་འཕྲུལ་ཁྲོ་བོ་བསྡུས་པའི་སྒྲུབ་ཐབས་ཧེ་རུ་ཀའི་གལ་ཕྲེང་བཞུགས་སོ།
ཧཱུྃ་འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་ཡི། །ང་རྒྱལ་ཆེན་པོ་བརྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་བསྒོམ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་ཙམ་ཉིད་ན་སྐྱེ་བ་མེད། །ཨེ་མ་ཀུན་ཏུ་བཟང་པོ་འདི། །བདེ་ཆེན་སྤྲོས་མེད་ཐིག་ལེ་ལས། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་པར་བྱ། །མཁའ་མཉམ་དབྱིངས་ཉིད་དག་པའི་རང་བཞིན་ལ། །བདེ་གཤེགས་ཐུགས་ཀྱི་སྙིང་པོའི་ཡི་གེ་ནི། །རང་གི་སེམས་ཉིད་ཡི་གེ་ཧཱུྃ་དུ་སྣང་། །ཐམས་ཅད་འབྱུང་གནས་ཡེ་ཤེས་ཆེན་པོའི་རྒྱུ། །ཧཱུྃ་ཨེ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཨེ་ཨ་ཀ་ཤ་མཎྜ་ལ་ཧཱུྃ། ཡཾ་ཡཾ་ཀརྨ་རཀྵ་ཧཱུྃ། དཀྱིལ་འཁོར་གཞལ་ཡས་རྟེན་གྱུར་པའི། །རྒྱ་གྲམ་དབང་ཆེན་གཏམས་པ་ལ། །རླུང་ནག་རྡོ་རྗེ་དཀྱིལ་འཁོར་ཆེ། །ཐམས་ཅད་འདེགས་པའི་སྟོབས་དང་འགྲན། །ར་རཀྟ་ཛོ་ལ་ས་མུ་དྲ་ཧཱུྃ། ཀེེཾ་ཀེེཾ་ནི་རི་ཏི་ཛོ་ལ་མཎྜ་ལ་ཧཱུྃ། རཾ་རཾ་བཛྲ་པཱ་ཎི་ཧཱུྃ། བྷྲཱུྃ་བྷྲཱུྃ་བྷྲཱུྃ་བི་ཤྭ་བི་ཤུདྷེ། བཛྲ་བཛྲ་ཙཀྲ་ཛྙཱ་ན་སཱུརྻ་ཙནྡྲ་པདྨ་མཎྜ་ལ། དེ་བ་ཏིསྟ་ནན། དུ་ཏི་ཙཀྲ་ནན། ཏི་ར་བཾ། དུར་ཁྲོད་ཆེན་པོ་རབ་འཇིགས་པའི། །ཁྲག་གི་རྒྱ་མཚོ་འཁྲུགས་པའི་དཀྱིལ། །ཀེང་རུས་ཆེན་པོ་རི་རབ་ཀྱི། །སྟེང་གི་འབར་བའི་ཀློང་དཀྱིལ་ནས། །ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡོངས་མ་ཆད་པའི། །ཕྱི་དང་ནང་མེད་ཀུན་ཏུ་ནང་། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞི་ཡིས་རྣམ་པར་བརྒྱན། །གྲུ་བཞི་སྒོ་ཁྱུད་བཞི་ཡིས་བརྒྱན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྦྲུལ་སྣ་ཚོགས་ཉི་ཟླར་བརྗིད། །འབར་བའི་འཕྲོ་བ་མང་པོ་འཁྲུག །ཁྱུ་མཆོག་མ་ཧེ་གཟིག་དང་སྟག །གཏུམ་པོ་དོམ་གྱི་སྦར་བས་ནི། །དབང་ཕྱུག་ལྷ་ཆེན་མ་སོགས་བཟུང་། །ཧཱུྃ་སྥ་ར་ཎ་ཕཊ། སཾ་ཧ་ར་ཎ་ཧཱུྃཿ ༀ་བཛྲ་ཀྲོ་དྷ་ཤྲི་ཧེ་རུ་ཀ་ཧཱུྃ། ངེས་པའི་ལས་ནི་རྡོ་རྗེ་ཆེ། །དེ་ལམ་དཔལ་ཆེན་ཧེ་རུ་ཀ །འབར་བ་ཆེན་པོ་གར་དགུ་ཡིས། །འཇིགས་པ་ཡི་ནི་དུས་ལྟར་དྲག །ༀ་བཛྲ་ཀྲོ་ཏཱི་ཤྭ་རི་མཱུྃ། མ་སཱུརྻ་མཎྜ་ལ་ཨེ། པཾ་པདྨ་མཎྜལ་ཨེ། ས་མ་ཡ་སྟམ། ས་མ་ཡ་ཧོ། ཨ་ནུར་ར་ག་ཡ་ཧཾ། ཛཿཧཱུཾ་བྃ་ཧོཿ བོ་དྷི་ཙིཏྟ་སྭ་ར་ཎ་ཕཊཿ བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱི་དབྱིངས་ཉིད་ནས། ཁྲོ་མོ་དབང་ཕྱུག་མངོན་ཕྱུང་སྟེ། །ཧེ་ཧེ་དགྱེས་པའི་གཟི་མདངས་ཀྱིས། །རིིིན་ཆེན་པདྨ་རྒྱས་མཛད་ནས། །གཉིས་མེད་འཁྲིལ་བས་དགྱེས་པར་ཐིམ། །བྱང་ཆུབ་སེམས་སྤྲིན་འཕྲོས་པ་ལས། །སྟོང་གསུམ་ཁྲོ་བོའི་དཀྱིལ་འཁོར་སྤྲོ། །ཧཱུྃ་ཧཱུྃ་ཧཱུྃ་བི་ཤཱ་བཛྲ་ཀྲོ་ཏ་ཛྭ་ལ་མཎྜལ། ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། འཇིག་རྟེན་དྲུག་གི་ཕྱོགས་བཅུ་ན། །མཐའ་ཡས་ཁྱབ་པ་ཁྲོ་བོ་ཡི། །དཀྱིལ་འཁོར་སྟོང་གསུམ་འཇིག་རྟེན་ཙམ། །ཕྱོགས་བཅུའི་རྡུལ་སྙེད་ཐོན་པར་འགྱུར། །ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུཾ། ༀ་བཛྲ་མ་ཧཱ་ཀྲོ་ཏཱི་ཤཱ་རི་མཱུྃ། དེ་ནས་བཅོམ་ལྡན་དགྱེས་ཆེན་པོ། །དབུ་དང་ཕྱག་ཞབས་སྟོང་ཁམས་གང་། །རྡུལ་སྙེད་མཚོན་ཆ་འཛིན་པ་སྟེ། །དབུ་གསུམ་ཕྱག་དྲུག་ཞབས་བཞིར་གྱུར། །འབར་ཆེན་ཀློང་གི་འཁོར་ལོའི་དཀྱིལ། །དབང་ཕྱུག་ཆེ་དང་དུར་ཁྲོད་ཀྱི། །བདག་པའི་དྲེགས་པ་ཁྱོ་ཤུགས་ཀྱི། །གདན་ལ་བརྐྱང་བསྐུམ་ཚུལ་དུ་བཞུགས། །ༀ་བུདྡྷ་ཤྲཱི་ཧེ་རུ་ཀ་ཧཱུཾ། བུདྡྷ་མ་ཧཱ་ཀྲོ་ཏི་ཤྭ་རི་ཧཱུཾ། ༀ་རཏྣ་ཤྲཱི་ཧེ་རུ་ཀ་ཧཱུཾ། རཏྣ་མ་ཧཱ་ཀྲོ་ཏི་ཤ་རི་ཧཱུཾ། ༀ་པདྨ་ཤྲཱི་ཧེ་རུ་ཀ་ཧཱུཾ། པདྨ་མ་ཧཱ་ཀྲོ་ཏཱི་ཤྭ་རཱ་ཧཱུཾ། ༀ་ཀརྨ་ཤྲཱི་ཧེ་རུ་ཀ་ཧཱུཾ། ཀརྨ་མ་ཧཱ་ཀྲོ་ཏི་ཤྭ་རཱི་ཧཱུྃ། དཔལ་ཆེན་ཁྲག་འཐུང་ཆེན་པོ་དང་། །རིན་པོ་ཆེ་དང་པདྨ་དང་། །ལས་སུ་གྱུར་ཏེ་ཕྱོགས་བཞིར་བཞུགས། །དེ་ཀུན་འཇིགས་བྱེད་ཆེན་པོ་ཡི། །ཆ་ལུགས་རྔམས་པའི་ང་རོ་ཡིས། །འབར་བའི་ཀློང་ནས་དབུ་གསུམ་པོ། །ཕྱག་དྲུག་ཞབས་བཞི་དྲི་ཟ་དང་། །གནོད་སྦྱིན་གཤིན་རྗེ་སྲིན་པོ་སོགས། །ཁྱོ་ཤུག་དྲེགས་པ་ཕོ་མོ་ཡི། །གདན་ལ་བརྐྱང་བསྐུམ་ཚུལ་དུ་བཞུགས། །བཙུན་མོ་ཁྲག་འཐུང་ཆེན་མོ་རྣམས། །སོ་སོའི་སྐུ་ལ་འཁྲིལ་ཏེ་འཁོད། །ཧ་ཧ་ཧ་ཧ་ཧ་ཧ་ཧ་ཧ། །དེ་ནས་དགྱེས་ཏེ་ཧ་བརྗོད་པས། །བྱང་ཆུབ་སེམས་ཀྱི་སྤྲིན་དག་ལས། །དཀར་མོའི་ཚོགས་དང་རྐུན་མོ་དང་། །རྨོངས་བྱེད་དང་ནི་ཐལ་བྱེད་མ། །སྦོ་མ་དང་ནི་གཏུམ་མོ་དང་། །སྨེ་ཤ་ཅན་དང་མ་ཚོགས་མའི། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་རྔམས་ཐོན་ཏེ། །འབར་ཆེན་འཁོར་ལོའི་ཤར་མཚམས་ནས། །འབར་བས་རྔམས་པའི་མདོངས་ཀྱིས་འཁོད། །ཧེ་ཧེ་ཧེ་ཧེ་ཧེ་ཧེ་ཧེ་ཧེ། །དེ་ནས་དགྱེས་ཏེ་ཧེ་བརྗོད་ཞེས། །བྱང་ཆུབ་སེམས་ཀྱི་སྤྲིིན་དག་ལས། །སེང་གདོང་ཆེན་མོའི་ཚོགས་དང་ནི། །སྟག་དང་ཝ་དང་ཁྱི་དང་བཞད། །ཀངྐ་དུར་བྱ་འུག་གདོང་ཆེ། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་རྔམས་འཐོན་ཏེ། །འབར་བ་ཆེན་པོའི་འཁོར་ལོ་ཡི། །ཕྱི་རོལ་ཤར་གྱི་ཕྱོགས་དག་ནས། །འཁོར་ལ་རྔམས་པའི་མདངས་ཀྱི་འཁོད། །ཕཊ་ཕཊ་ཕཊ་ཕཊ། དེ་ནས་དགྱེས་ཏེ་ཕཊ་བརྗོད་པས། །བྱང་ཆུབ་སེམས་ཀྱི་སྤྲིན་དག་ལས། །རྡོ་རྗེ་སྲིང་འགྲོ་མ་ཚོགས་དང་། །གདོང་མོ་འཇིག་རྟེན་རོ་ལངས་མ། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་རྔམས་འཐོན་ཏེ། །དཀྱིལ་འཁོར་སྒོ་བཞིར་རྔམས་བཟུང་ནས། །དགྱེས་པའི་ཕྲིན་ལས་ཕྱོགས་བཅུ་ནས། །ཕཊ་ཅེས་བསྒྲགས་པས་ཐམས་ཅད་ཁྲོ། ༈ །ༀ་སྔོན་གྱི་ཐུགས་དམ་ཆེན་པོ་ནི། ། འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ཐབས་དང་ཤེས་རབ་གཉིས་མེད་པའི། །ཡེ་ཤེས་ཟེར་གྱིས་ལུས་རྟོག་སྦྱངས། །གསེར་ཞུན་ལྟ་བུའི་སེམས་དག་ལས། །གསུང་གི་བྱིན་རླབས་ཡིད་ཀྱི་འབྲུ། །ཐུགས་ཀར་ཐིམ་ནས་སྐུ་ཡི་དབྱིངས། །རྡོ་རྗེའི་ལམ་བྱུང་ཡུམ་གྱི་མཁའ། །ཆོས་ཀུན་བྱང་ཆུབ་སེམས་སུ་གནས། །ལྷ་རྣམས་སོ་སོའི་སྙིང་པོ་ནི། །ཧཱུྃ་ཧ་ཧེ་ཕཊ་ཀྱི་སྒྲ་བྱུང་བས། །བྱང་ཆུབ་སེམས་སུ་གཅིག་པར་གནས། །ཧཱུཾ་ཧཱུཾ་བཛྲ་གཎྜེ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུཾ། ༀ་བཛྲ་ཀྲོ་ཏི་ཤྭཱ་རཱི་ཧཱུཾ། མ་སུརྻ་མཎྜལ་ཧཱུཾ། པཾ་པདྨ་མཎྜལ་ཨེ། ས་མ་ཡ་སྟཾ། ས་མ་ཡ་ཧོཿ ཨ་ནུ་རཱ་ག་མེ། བོ་དྷི་ཙིཏྟ་སྥ་ར་ན་ཕཊ། ཧཱུྃ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཧ་ཧ་ཧ་ཧ་ཧ་ཧ་ཧ་ཧ། ཧེ་ཧེ་ཧེ་ཧེ་ཧེ་ཧེ་ཧེ་ཧེ། ཕཊ་ཕཊ་ཕཊ་ཕཊ། ༀ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ །མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་བཛྲ་དྷ་ར་མ་ཧཱ་ཀྲོ་ཏིི་ཤྭ་རཱི་ཛྭ་ལ་ནཱ་ཧཱུཾ་ཕཊ། ཛཿༀ་ཨཱཿཧཱུཾ་སྥ་ར་ཎ་ཕཊ། སཾ་ཧ་ར་ཎ་ཧཱུཾ། འདི་འགྲེའོ། །ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ །མ་ཧཱ་ཙཎྜ་སརྦ༴ ༀ་སརྦ་ཏ་ཐཱ་ག་ཏ་མ་ཧཱ་ཀྲོ་ཏྭི་ཤྭ་རི་སརྦ་དུཥྚན་ཧཱུྃ་ཕཊ། ཛཿ ༀ་ཨཿཧཱུྃ། སྥར༴ སཾ༴ ༀ་རཏྣ་མ་ཧཱ་ཤྲཱི་ཧེ་རུ་ཀ །མ་ཧཱ་ཙཎྜ་སརྦ༴ ༀ་སུརྻ་རཏྣ་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། ཛཿ སྥ༴ སཾ༴ ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ༴ ༀ་པདྨ་མ་ཧཱ་ཀྲོ་དྷི་ཤྭ་རི་ཁཱ་ཧི་ཧཱུྃ་ཕཊ། ཛཿ སྥ༴ སཾ༴ ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ༴ ༀ་སརྦ་ཨ་མོ་གྷ་མ་ཧཱ་ཀྲོ་ཏི་ཤྭ་རི་བི་ཤྭ་ཧཱུྃ་ཕཊ། ཛཿ སྥ༴ སཾ༴ ༀ་བཛྲ་ག་རཱི་ཧ། བཛྲ་ཙ་རཱི་ཧ། བཛྲ་པྲ་མོ་ཧ། བཛྲ་བཻ་ཏ་ལཱི་ཧ། བཛྲ་པུཀྐ་སཱི་ཧ། བཛྲ་གྷསྨ་རཱི་ཧ། བཛྲ་སྨ་ཤ་ནཱི་ཧ། བཛྲ་ཙཎྜ་ལཱི་ཧ། ཕཊ་ཛཿ ༈ །བཛྲ་སེངྷ་མུ་ཁ་ཧེ། བཛྲ་བྱ་གྷྲི་མ་ཁ་ཧེ། བཛྲ་ཤྲཱི་གཱ་ལ་མུ་ཁ་ཧེ། བཛྲ་ཤྭ་ན་མུ་ཁ་ཧི། བཛྲ་གྷྲྀ་ཌྷ་མུ་ཁ་ཧེ། བཛྲ་ཀཾ་ཀ་མུ་ཁ་ཧེ། བཛྲ་ཁཱ་ཁ་མུ་ཁ་ཧེ། བཛྲ་ཧུ་ལཱུ་མུ་ཁ་ཧེ། ཕཊ་ཛཿ བཛྲ་ཨརྻ་ཏེ་ཛ་ཡེ་ཛཿབཛྲ་ཨ་མོ་གྷ་ཧཱུྃ། བཛྲ་ལོ་ཀ་བྃ། བཛྲ་བྷསྨིཾ་པཱ་ལ་ཡ་བཱ་ཏུ་ཧོཿཕཊ་ཛཿ ༀ་ཨཱཿཧཱུྃ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། མ་ནུ་རཀྴ་སཱིབྷྱོ། པྲ་ཧྨ་ཎི་བྷྱོ། རོའུ་ཏྲི་མ་བྷྱོ། བིཤྣ་བེ་བྷྱོ། ཀུ་མཱ་རཱི་བྷྱོ། ཨིནྟྲ་ཡ་བྷྱོ། བཛྲ་སིདྷ་ཀ་ལ་བྷྱོ། ཨ་མྲྀ་ཏ་བྷྱོ། ས་མྱ་མ་བྷྱོ། དྷ་ན་ད་ཧཾ་བྷྱོ། རཀྵ་སཱི་བྷྱོ། བཀྵ་སཱི་བྷྱོ། ར་ཏི་བཛྲ་བྷྱོ། རུ་རེ་ཏི་མ་ཏི་བྷྱོ། ཨེ་ཀ་ཙ་ར་མ་བྷྱོ། མ་ནོ་ཧ་ར་མ་བྷྱོ། སི་ཏི་ཀ་བྷྱོ། བ་ཡཾ་བེབྷྱོ། མ་ར་མ་ན་བྷྱོ། ཨགྣེ་མ་བྷྱོ། བ་ར་ཧཱི་བྷྱོ། ཙ་མུནྟྲི་བྷྱོ། སུ་ཏ་མ་བྷྱོ། བ་རུ་ན་བྷྱོ། བཛྲ་མ་ཧཱ་ཀ་ལ་བྷྱོ། ཙ་ཀཱ་ལ་བཛྲ་བྷྱོ། བཛྲ་བུཾ་པ་ཀརྞ་མ་བྷྱོ། བཛྲ་ལཾ་བྷྱོ་དྷ་ར་མ་བྷྱོ། ༈ །ཧཱུྃ་སྔོ་ནག་སྨུག་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞི་བགྲད། །ཀོ་རློན་གོས་ནི་སྣ་ཚོགས་གོན། །རྔམ་པའི་སྒྲ་ཆེན་འཇིགས་པར་སྒྲོག །སྦྲུལ་དང་ཐོད་ཕྲེང་ཉི་ཟླར་བཅས། །སྟོང་གི་འཇིག་རྟེན་འཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་བསྣམས། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱ་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱིས་ཞེས་ནས་ཆས་ཏེ་གནས། །དེ་ལྟར་དཀྱིལ་འཁོར་གསལ་བཀོད་ནས། །མཐའ་དབུས་མེད་པར་ཁྱབ་པ་ཡི། །འཇིག་རྟེན་དྲུག་གི་ཕྱོགས་བཅུ་ན། །འབར་བའི་དཀྱིལ་འཁོར་གསལ་བར་སྣང་། །ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཨཱཏྨ་ཀོ྅་ཧཾ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ས་མཱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་པྲ་ཏྱ་བེ་ཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཀྲྀ་ཏྱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭོ་བྷཱ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱཀ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་ཨ་ནུ་ར་ག་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཱཔུ་ཙ་བཛྲ་སྭ་བྷཱ་ཝ་ཨཱཏྨ་ཀོ ྅་ཧཾ། ས་ལ་སོགས་པ་ཕྱག་རྒྱ་བྱས། །རྣམ་གྲོལ་རིམ་པ་ཐོབ་པར་བྱ། །དག་པ་ཡེ་ཤེས་ཀྱིས་སྦྱངས་ཏེ། །སྨོས་ཅི་དགོས་ཏེ་དེ་ཉིད་ཡིན། །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨེ་ཧྱ་ཧི་ཨཱ་ན་ཡ་ཧོཿ ཛཿཧཱུྃ་བྃ་ཧོཿ རཾ་ༀ་བཛྲ་ཀྲོ་དྷ་ས་མ་ཡ་སྟམ། ༀ་ཁྲོ་ལ་ཁྲོས་པ་ཞི་མཛད་པ། །ཐུགས་རྗེ་ཁྲོ་དཔལ་རྔམ་པའི་མཆོག །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ༀ་བཛྲ་མ་ཧཱ་ཀྲོ་དྷ་ས་མ་ཡ་སྟམ། ༀ་བཛྲ་ཀྲོ་དྷ་ས་མ་ཡ་ཧོ༔ ༀ་བཛྲ་ཀྲོ་དྷ་ས་མ་ཡ་ཕཊ། ཨཱ་ལི་ཨཱུ་ལི་ཏཱ་ལི་ཏཱ་བ་ཏཱི། དརྟྲིཾ་གུ་ཎ་རི་ཏྲི་ཁ་ར་མ་ཡོ་གི་ནི་ཁཱ་ཧི་ཧོ། ཧཱུྃ་ཧ་ཧེ་ཕཊ་བྷྱོ་རམ། ༀ་ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚན་ས་མ་ཡ་མུ་ཏྲ་པྲ་བན་ཙཀྲ་ཧཱུྃ་ཕཊ། ༀ་ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚཱཾ་ཨཾ་པ་ཏཾ་པ་ཀ་ཡ་ཧཱུྃ་ཕཊ། ༀ་བཛྲ་གུ་ཧྱ་ཏྲྀ་ཤྱ་ཧོཿ ས་མ་ཡ་ཧོ། ས་མ་ཡ་སྟྭཾ། ས་མ་ཡ་ཕཊ། ཤྲཱི་ཧེ་རུ་ཀ་ས་མུ་ཏྲ་པྲ་བན་ཙཀྲ་བཀྵ་ཡ། སི་ཏོ་ས་མ་ཡ། ཧེ་བྷ་ག་བཱན། བྷཱུ་ཏ་ཀྵ་ཏྲི་པྲ་ཏི་ཏཾ་པ་ཀ་ཡ་ཧཱུྃ་ཕཊ། ༈ །སེམས་ཅན་དོན་ཕྱིར་ནན་ཏན་མཆོག་བསྐྱེད་ནས། །ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །མི་དམིགས་དོན་ཕྱིར་དངོས་གྲུབ་མཆོག་གི་བསྣམས། །བདག་ལ་སྩལ་ཞིང་བརྟན་པར་བཞུགས་སུ་གསོལ། །ཀཱ་ཡ་ཝཱཀ་ཙིཏྟ་བཛྲ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེ་དགྲ་ཟིན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །སྲིད་གསུམ་འཇོམས་པའི་ལྷ་ལ་ཕྱག་འཚལ་ལོ། །མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོ་བོ་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་འདུ་འཕྲོ་ཁྲོ་ལ་ཕྱག་འཚལ་ལོ། །མི་གནས་མི་དམིགས་ཆོས་སྐུར་དག་པ་ལས། །བདུད་འདུལ་ཁྲོ་བོ་མཆོག་གི་སྐུར་སྟོན་པ། །ཐུགས་རྗེ་གཟི་མདངས་གདུག་པ་ཐབས་ཀྱིས་འདུལ། །བཅོམ་ལྡན་ཁྲོ་རྒྱལ་གཙོ་ལ་ཕྱག་འཚལ་ལོ། །ཐབས་དང་ཤེས་རབ་འབྲེལ་བའི་དཀྱིལ་འཁོར་ནས། །ཁྲོ་མོ་དབང་ཕྱུག་སྐུ་ལ་འཁྲིལ་མཛད་ཅིང་། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །ནམ་མཁའི་ལུས་ཅན་གང་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །ཕྱི་ནང་མཁའ་འགྲོའི་ཚོགས་ལ་ཕྱག་འཚལ་ལོ། །ཨ་ཏི་པཱུ་ཧོ་པྲ་ཏིཙྪ་ཧོཿ བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོར་བྱིན་གྱིས་རློབས། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བགྱིས། །བྱང་ཆུབ་སྤྱད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཧེ་རུ་ཀ་ཡི་གལ་པོ་དང་། །གསང་བ་སྙིང་པོའི་རྒྱུད་དག་ལས། །རྣམ་པར་གྲོལ་བ་མཚོན་པའི་ཕྱིར། །དབུས་ཀྱི་ཁྲོ་བོའི་ཕྱག་རྒྱ་ནི། །གཡས་དཀར་གཡོན་དམར་དབུས་མཐིང་ཞལ། །རྩེ་དགུ་རྩེ་ལྔ་ཏི་ར་གཡས། །དྲིལ་བུ་དུང་དམར་འཇིག་རྟེན་གཡོན། །དཔལ་ཆེན་བཛྲ་ཐབས་ཀྱི་རྒྱུ། །ཤེས་རབ་ཡུམ་གྱི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་ཤེས་རབ་ཐབས་ལ་འཁྱུད། །གཡོན་པ་དུང་དམར་གཙོ་ལ་སྟོབས། །ཀྲོ་ཏི་ཤྭ་རི་དབྱིངས་ཀྱི་རྒྱ། །ཡབ་ཡུམ་འབར་བའི་གདན་ལ་བཞེངས་ནས་ཀྱང་། །ཕྱག་རྒྱ་དབྱངས་ཀྱི་མཆོད་པ་འདི་འབུལ་གྱིས། །མཆོད་བཞེས་དམ་སྐོངས་མཐུ་དབང་དངོས་གྲུབ་སྩོལ། །ཤར་གྱི་ཁྲོ་བོའི་ཕྱག་རྒྱ་ནི། །གཡས་དཀར་གཡོན་དམར་དབུས་སྨུག་ཞལ། །འཁོར་ལོ་རྡོ་རྗེ་ཏི་ར་གཡས། །དྲིལ་བུ་དུང་དམར་ཏྲི་ཤུལ་གཡོན། །དཔལ་ཆེན་བུདྡྷ་ཐབས་ཀྱི་རྒྱ། །ཤེས་རབ་ཡུམ་གྱི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་སྨུག །གཡས་པ་སོགས། ལྷོ་ཡི་ཁྲོ་བོའི་ཕྱག་རྒྱ་ནི། །གཡས་སྔོ་གཡས་དཀར་དབུས་སེར་ཞལ། །རིན་ཆེན་རྡོ་རྗེ་ཏི་ར་གཡས། །དྲིལ་བུ་དུང་དམར་དགྲ་སྟྭ་གཡོན། །དཔལ་ཆེན་རཏྣ༴ ཤེས་རབ་ཡུམ༴ ཞལ་གཅིག་ཕྱག་གཉིས་སྐུ་མདོག་སེར། །གཡས་སོགས༴ ནུབ་ཀྱི་ཁྲོ་བོའི་ཕྱག་རྒྱ་ནི། །གཡས་དཀར་གཡོན་སེར་དབུས་དམར་ཞལ །པདྨ་རྡོ་རྗེ་ཏི་ར་གཡས། །དྲིལ་བུ་དུང་དམར་རྔེའུ་ཆུང་གཡོན། །དཔལ་ཆེན་པདྨ༴ ཤེས་རབ་ཡབ་ཡུམ༴ ཞལ་གཅིག་ཕྱག་གཉིས་སྐུ་མདོག་དམར། །གཡས་པ་སོགས༴ བྱང་གི་ཁྲོ་བོའི༴ གཡས་དཀར་གཡོན་དམར་དབུས་ལྗང་ཞལ། །རལ་གྲི་རྡོ་རྗེ་ཏི་ར་གཡས། །དྲིལ་བུ་དུང་དམར་ཐོང་གཤོལ་གཡོན། །དཔལ་ཆེན་ཀརྨ༴ ཤེས་རབ་ཡུམ༴ ཞལ་གཅིག་ཕྱག་གཉིས་སྐུ་མདོག་ལྗང་། །གཡས་པ་སོགས༴ དཀྱིལ་འཁོར་དག་པའི་ཕྱི་རིམ་ན། །བཅོམ་ལྡན་དཔལ་ཆེན་ཧེ་རུ་ལ། །ཀེའུ་རི་ཚོགས་ཀྱིས་བསྐོར་བ་ལ། །ཀ་རི་སྔོན་མོ་བྱིས་དབྱུག་སྔོ། །ཙ་རཱི་འདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱལ་མཚན་འཕྱར། །བཻ་ཏ་ལི་ཟ་རྡོ་འཕྱར་ནག །པུཀྐ་དམར་སེར་བྱིས་རྒྱུ་འདྲེན། །གྷཱསྨ་དུང་དམར་དཀྲུག་འཐུང་ལྗང་། །སྨེ་ཤ་མཐིང་ནག་བྱིས་སྙིང་ཟ། །ཙཎྜ་སེར་སྐྱ་མཆོག་ལུས་འདྲལ། །ཁྲོ་མོ་ཀ་རི་མ་བརྒྱད་རྣམས། །འབར་བའི་གདན་ལ་བཞེངས་ནས་ཀྱང་། །ཕྱག་རྒྱ་དབྱངས་ཀྱི་མཆོད་པ་འདི་འབུལ་གྱིས། །མཆོད་བཞེས་དམ་སྐོངས་མཐུ་དབང་དངོས་གྲུབ་སྩོལ། །དཀྱིལ་འཁོར་དག་གི༴ བཅོམ་ལྡན་དཔལ༴ སིདྷའི་ཚོགས་ཀྱིས་བསྐོར་བ་ནི། །སིདྷ་ཁ་རོ་བསྣོལ་སེར་སེང་། །བྱ་ཀྲི་གནས་ལྟག་བསྣོལ་མར་སྟག །སྲི་ལ་ནག་པོ་བྱིས་བལྡག་ཝ། །ཤྭ་ན་འདྲལ་བལྟ་མཐིང་ཁ་སྤྱང་། །ཀྲི་ཏ་མགྲིན་དམར་རྒྱུ་འདྲེན་རྒོད། །ཀཾ་ཀ་ཞིང་ཕྲག་སྣར་མཆུ་རིང་། །ཁ་ཁ་ཁ་རོ་བྷན་གྲི་ནག །ཧུ་ལུ་རྡོར་ཀྱུ་མཐིང་ཚོགས་འུག །སིདྷ་ཆེན་མོ་བརྒྱད་རྣམས་ཀྱང་། །འབར་བའི༴ ཕྱག་རྒྱ༴ མཆོད་བཞེས༴ དཀྱིལ་འཁོར༴ བཅོམ་ལྡན༴ སྒོ་མའི་ཚོགས་ཀྱིས་བསྐོར་བ་ནི། །རྟ་གདོང་དཀར་མོ་ལྕགས་ཀྱུ་འཛིན། །ཕག་གདོང་ནག་མོ་མཆེ་ཞགས་སྡོམ། །ལྕགས་སྒྲོག་དམར་མོ་ཉི་ཟླ་སྤྱད། །ཐལ་བྱེད་དྲིལ་བུ་སྣ་ཚོགས་མདོག །སྒོ་མ་ཆེན་མོ་བཞི་རྣམས་ཀྱང་། །འབར་བའི༴ དཀྱིལ་འཁོར༴ བཅོམ་ལྡན༴ དབང་མོའི་ཚོགས་ཀྱིས་བསྐོར་བ་ནི། །འཇིག་རྟེན་འདས་དང་མ་འདས་པའི། །ཅི་བགྱིས་བཀའ་ཉན་ཕོ་ཉའི་ཚོགས། །མ་མོ་རྣམས་ཀྱི་ཕྱག་རྒྱ་ནི། །སྲིན་མོ་སྨུག་ནག་ཐོད་རློན་འཆང་། །ཚངས་པ་དམར་སེར་པདྨ་འཛིན། །ལྷ་ཆེན་དཀར་ལྗང་ཏྲི་ཤུལ་ལ། གཏོགས་འདོད་སྔོན་མོ་འཁོར་ལོ་འཆང་། །གཞོན་ནུ་དམར་མོ་མདུང་ཐུང་འཕེན། །བརྒྱ་བྱིན་དཀར་མོ་ཨནྟྲ་གདེངས། །རྡོ་རྗེ་སེར་མོ་ཙཎྜ་འཐུང་། །བདུད་རྩི་དམར་མོ་པདྨ་བསྣམས། །ཟླ་བ་དཀར་མོ་པུཎྜ་རི། །བེ་ཅན་ལྗང་ནག་དབྱུག་ཐོ་འཕྱར། །སྲིན་མོ་དམར་མོ་དུང་ཁྲག་འཐུང་། །ཟ་བ་ལྗང་ནག་བ་སུ་འདྲེན། །དགའ་བ་དམར་མོ་ཀ་དར་འཕྱར། །སྟོབས་ཆེན་དཀར་མོ་གཤོལ་མདའ་འཛིན། །རྡོ་རྗེ་སེར་ནག་སྤྲུ་གྲིས་གཅོད། །འདོད་པ་དམར་མོ་མདའ་གཞུ་འགེངས། །ནོར་སྲུང་དཀར་མོ་བུམ་པ་འཛིན། །གསོད་བྱེད་ནག་མོར་རལ་གྲིའི་སོ། །མི་མོ་དམར་མོ་གསལ་ཤིང་འཕྱར། །ཕག་མོ་ནག་མོ་མཆེ་ཞགས་ཅན། །རྒན་བྱེད་དམར་མོ་ཞིང་ཆུང་ཟ། །སྣ་ཆེན་དཀར་མོ་ཐོད་ཁྲག་འཐུང་། །ཆུ་ལྷ་སྔོན་མོ་སྦྲུལ་ཞགས་འཛིན། །རྡོ་རྗེ་ནག་མོ་ལྕགས་ཀྱུ་འཛིན། །རྡོ་རྗེ་སེར་མོ་ར་མགོ་ཞགས། །རྡོ་རྗེ་དམར་མོ་ལྕགས་སྒྲོག་སྡོམ། །རྡོ་རྗེ་ལྗང་ནག་དྲིལ་འཁྲོལ་དགྱེས། །དབང་ཕྱུག་ཉི་ཤུ་བརྒྱད་རྣམས་ཀྱང་། །འབར་བའི༴ ཕྱག་རྒྱ༴ མཆོད་བཞེས༴ བདེ་བར་གཤེགས་སོ་ཁྲོ་རྒྱལ་གཙོ། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཥེ་བྷྱ་སརྦ་ཏདྑཾ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་ས་མ་ཡེ་སྭཱ་ཧཱ། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་གཉིས་བསིལ་ནས་ཀྱང་། །རྡོ་རྗེའི་གདན་ལ་གཞུགས་སུ་གསོལ། །ༀ་ཨ་ཧ་ར་ཨ་ཧ་ར་བིརྱ་རྡ་ར་པུ་ཙི་ཏེ་ན་མཿས་མནྟ་ག་ག་ན་ཁཾ་ས་མ་ཡེ་སྭཱ་ཧཱ། ༀ་པ་ན་པེེཾ་པེ་ནུ་སུ་ར་ཏོ་ཏཱི་པུ་པ་ན་མུ། ཏ་ཐ་ག་ཏ། ས་མ་ཡོ་ཏ། མུ། ༀ་སརྦ་མ་ཧཱ་སུ་ཀ་སིདྡྷི་ཧཱུཾ། ༀ་ཤྲཱི་བཛྲ་དྷུ་པེ་དྷཱུ། ༀ་ཤྲཱི་བཛྲ་པཥྤེ་པུ། ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿ ༀ་ཤྲཱི་བཛྲ་རཱ་ག་གྷནྡྷེ་གྷན། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་དག་ཅིང་ལྷུན་གྱིས་གྲུབ་པར་མཛད་དུ་གསོལ། ༀ་ཨཱཿཧཱུྃ། གསུམ་མཆོད་དོ། །དེ་བཞིན་གཤེགས་པའི་མཆོད་པ་ཆེན་པོ་ཐམས་ཅད་དག་ཅིང་ལྷུན་གྱིས་གྲུབ་པར་མཛད་དུ་གསོལ། ཧཱུྃ་རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་མཆོད་ཀྱིས། །ཐུགས་དམ་དབྱིངས་ཉིད་བསྐང་བའི་མཆོད། །སྐུ་གསུང་ཐུགས་ཀྱི་ངང་ཉིད་འདི། །བདག་ཅག་དད་པས་འབུལ་ལགས་ཀྱི། །བཞེས་ཏེ་ཀུན་ཏུ་དགྱེས་མཛོད་ལ། །འཕྲུལ་གྱི་དངོས་གྲུབ་སྩལ་དུ་གསོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ༈ །ཚོགས་རྗེ་ཚོགས་བདག་དཔལ་ཆེན་ཧེ་རུ་ཀ །འབར་བའི་རྒྱལ་པོ་ཁྲག་འཐུང་ལྔ་རྣམས་ལ། །རྣམ་དག་བདུད་རྩིའི་དམ་རྫས་མཉེས་མཆོད་འབུལ། །ཐུགས་རྗེ་ཆེ་དགོངས་དབང་དང་དངོས་གྲུབ་སྩོལ། །ༀ་སརྦ༴ དཔལ་ཆེན་སྐུ་ལ་ལྷུན་གྲུབ་མཉམ་སྦྱོར་བའི། །ཀྲོ་ཏི་ཤྭ་རི་ལ་སོགས་རིགས་ཀྱི་ཡུམ་རྣམས་ལ། །རྣམ་དག༴ ཐུགས༴ ༀ༴ མཐིང་ནག་མཆོག་རྣམས་རྡོ་རྗེ་གསང་བའི་ཡུམ། །ཀེའུ་རི་ལ་སོགས་གནས་ཀྱི་མ་བརྒྱད་ལ། །རྣམ་དག༴ ཐུགས་རྗེ༴ ༀ༴ རྡོ་རྗེ་གདོང་མོ་ཟ་བྱེད་མཆེ་གཤོག་ཅན། །སེདྷ་ལ་སོགས་ཕྲ་མེན་བརྒྱད་རྣམས་ལ། །རྣམ་དག༴ ཐུགས་རྗེ༴ ༀ༴ སྒོ་བཞི་རབ་རྔམ་རྡོ་རྗེ་སྲིང་འགྲོ་མ། །གདོང་མོ་རོ་ལངས་འཇིག་རྟེན་མ་ཚོགས་ལ། །རྣམ་དག༴ ཐུགས་རྗེ༴ ༀ༴ དཔལ་གྱི་འཁོར་ཚོགས་བཛྲ་ཨ་ར་ལི། །མཁའ་འགྲོ་ཤུག་འགྲོ་མ་ཚོགས་རྒྱ་མཚོ་ལ། །རྣམ་དག༴ ཐུགས་རྗེ༴ ༀ༴ ཐུགས་རྗེའི་ཤུགས་ཀྱི་འདྲེན་པའི་ལས་མཛད་མ། །ཕོ་ཉ་རྒྱ་མཚོ་འབར་བའི་ཚོགས་རྣམས་ལ། །འགྲོ་དྲུག་སེམས་ཅན་མ་ལུས་སྒྲོལ་བ་ཡི། །མ་ཅིག་སྔགས་ཀྱི་སྲུང་མ་མཐུ་མོ་ཆེ། །འདོད་པ་ཁམས་ཀྱི་བུད་མེད་ཉག་གཅིག་མ། །དཔལ་ལྡན་གཉན་གྱི་སྲིང་གཅིག་རེ་མ་ཏི་རྣམས་ལ། རྣམ་དག༴ ཐུགས་རྗེ༴ ༀ༴ དམ་ཚིག་དབང་དང་ཤེས་རྒྱུད་གབ་སྦས་པའི། །ངེས་པའི་ལུང་སྟོན་རྡོ་རྗེ་སློབ་དཔོན་ལ། །རྣམ་དག༴ ཐུགས་རྗེ༴ ༀ༴ ཤེས་པའི་ཁྱད་པར་རིམ་པས་དབང་བསྐུར་བའི། །རྒྱལ་ཐེམས་ལ་སོགས་ཀརྨ་གིང་རྣམས་ལ། །རྣམ་དག༴ ཐུགས་རྗེ༴ ༀ༴ འཇིག་རྟེན་འདི་དང་ཕྱི་མ་ཐམས་ཅད་དུ། །དམ་ཚིག་ཟུང་གིས་འབྲེལ་བའི་མཆེད་རྣམས་ལ། །རྣམ་དག༴ ཐུགས་རྗེ༴ ༀ༴ དམ་ལ་གནས་ཤིང་རིག་འཛིན་སྒྲུབ་པ་པོ། །ལྷ་དང་ལྷ་མིན་ཕྱོགས་བཅུའི་རྣལ་འབྱོར་ལ། རྣམ་དག༴ ཐུགས་རྗེ༴ ༀ་ཚེ་རབ་སྔོན་ནས་ད་ལྟ་ཡན་ཆད་དུ། །ལུས་སྲོག་སྐྱེད་པའི་དུས་གསུམ་ཕ་མ་ལ། རྣམ་དག༴ ཐུགས་རྗེ༴ ༀ༴ ལྕེ་ཡི་དམ་ཚིག་རྡོ་རྗེ་སྟེ། །རྡོ་རྗེ་ཅན་གྱི་ༀ་བསྒོམས་ནས། །བདུད་རྩི་ལྔ་ལས་སྦྱར་བའི་སྨན། ཟོས་ན་བྱང་ཆུབ་སྐུ་ཐོབ་འགྱུར། །ཀཱ་ཡ་སིདྡྷི་ༀ། ལྕེ་ཡི་དམ་ཚིག་རྡོ་རྗེ་ནི། །རྡོ་རྗེ་ཅན་གྱི་ཨཱཿབསྒོམས་ནས། །བདུད་རྩི་ལྔ་ལས་སྦྱར་བའི་སྨན། །ཟོས་ན་བྱང་ཆུབ་གསུང་ཐོབ་འགྱུར། །ཝཱཀ་སིདྡྷི་ཨཱཾ། ལྕེ་ཡི་དམ་ཚིག་རྡོ་རྗེ་སྟེ། །རྡོ་རྗེ་ཅན་གྱི་ཧཱུྃ་བསྒོམས་ནས། །བདུད་རྩི་ལྔ་ལས་སྦྱར་བའི་སྨན། ། ཟོས་ན་བྱང་ཆུབ་ཐུགས་ཐོབ་འགྱུར། །ཙིཏྟ་སིདྷི་ཧཱུྃ། ཀཱ་ཡ་ཝཱ་ཀ་ཙིཏྟ་སིདྷི་བཛྲ་ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་ཨི་དམ་དྷུ་པ། པུཥྤེ། དཱི་པ། གྷཱཏྣ་བ་ལིངྟ་པྲ་ཏི་ཙྪ་ཧོཿ ཤྲཱི་བཱ་ན་ཁ་ཁ་ཁཱ་ཧི་ཁཱ་ཧི། ༈ ཧཱུྃ་བླ་མེད་མཆོག་གི་མཆོད་པ་དམ་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པར་བཞེས་སུ་གསོལ། །མ་ཧཱ་བ་ལིངྟ་ཁ་རམ་ཁཱ་ཧི། །ཐོག་མར་བདག་ཉིད་རྟོགས་སྒོམ་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་སེམས་ཅན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །རྃ་ཐབས་དང་ཤེས་རབ་གཉིས་མེད་པའི། །པདྨ་ལ་ནི་རྡོ་རྗེ་ཞུགས། །འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་ཀུན་ལ་མཆོད། །ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་ག་ཡ་མི། ཨ་ནུ་རཱ་ག་ཡ་ཧཾ། ཧཱུྃ་ཧཱུྃ་ཧཱུྃ། བོ་དྷི་ཙིཏྟ་སྥ་ར་ཎ་ཕཊ། མཉམ་པའི་སྒྲུབ་རྫས་ཆེན་པོ་འདི། །བདག་དང་མཉམ་པའི་ཚོགས་ལ་འབུལ། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ཀྱིས། །དཀྱིལ་འཁོར་ལ་ནི་དཀྱིལ་འཁོར་ཐིམ། །ཆོས་ཉིད་ལ་ནི་ཆོས་ཉིད་ཐིམ། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ་ཨཱ་བེ་ཤ་ཡ་ཨཱ་བེ་ཤ་ཡ། པྲ་ཏི་ཙྪ་ཧོཿ ཤྲཱི་བཱ་ན་ཁ་ཁ་ཁཱ་ཧི། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསལ་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་པར་ནི་སྣོམ་དུ་གསོལ། །ང་ནི་ཟ་བྱེད་ཆེན་པོ་སྟེ། །ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་ཟབ་བར་བྱ། །ང་ནི་ཁྲག་འཐུང་ཆེན་པོ་སྟེ། །འཁོར་བའི་དྲྭ་བ་ཆགས་པ་ཡི། །དམར་ཆེན་པོ་ཡི་ཨརྒྷཾ་ལ། །དམར་གྱི་དེ་ནི་རྒྱ་མཚོར་བསྐྱིལ། །འཁོར་གྱི་མཁའ་འགྲོ་རྣམས་དང་རོལ། །ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ་ས་མ་ཡ། མ་ཧཱ་ས་མ་ཡ། མ་ཧཱ་རཀྟ། མ་ཧཱ་ཙིཏྟ། མ་ཧཱ་པཉྩ་ཨ་མྲི་ཏ། མ་ཧཱ་ཨརྒྷཾ་པྲ་ཏིཙྪ་ཧཾ་ཁ་ཁ་ཁ། ལེ་ལེ་ལེ། ཧཱུྃ་བྷྱོ་ཧཱུྃ་བྷྱོ་ཧཱུྃ་བྷྱོ། སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེད་དང་འཇིགས་པར་སྟོན་པ་དང་། །སྙིང་རྗེ་རྔམས་དང་ཞི་བ་ལ་སོགས་པའི། །སྐུ་ཡི་དངོས་པོ་ཤིན་ཏུ་བསྒྱུར་བ་ཡིན། །གར་བྱས་སྒྲུབ་པོ་རྣལ་འབྱོར་པ། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། །མཱཾ་ས་ལ་སོགས་བྲོ་མཆོག་བསིལ། །མེ་ཏོག་ལ་སོགས་ཙཎྜན་ཕྲེང་། །བཟང་དགུ་འབུལ་ལོ་བཞེས་སུ་གསོལ། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །གྲུབ་པའི་རྫས་ནི་ཐམས་ཅད་ལ། །ཧཱུྃ་དང་ཕཊ་ཀྱིས་ལྡན་པར་མཛོད། །གཟིགས་པ་ལ་སོགས་འདིར་བྱའོ། །རོལ་མོ་དབུལ་ཏེ། རྣམ་དག་སྒྲིབ་སྤངས་སྲིད་གསུམ་སྐྱོན་བྲལ་ཞིང་། །སྟོན་དཀའི་ཟླ་གསལ་དྲི་མེད་ཞལ་མངའ་བའི། །བཅོམ་ལྡན་བདེ་གཤེགས་ཡེ་ཤེས་དཀྱིལ་འཁོར་དབྱིངས། །ཁྲོ་བོའི་ཚོགས་ཆེན་མ་ལུས་ཐམས་ཅད་དང་། །དུས་གསུམ་བདེ་བར་གཤེགས་པ་བསྐྱེད་པའི་ཡབ། །ཤེས་རབ་ལྷ་མོ་རིགས་ཀྱི་ཡུམ་དང་བཅས། །ཕྱག་བརྙན་གཏམ་ཆེན་རྔམས་པའི་ཚོགས་ལ་སོགས། །བསོད་ནམས་ཡེ་ཤེས་ཚོགས་ཀྱི་ཞིང་རབ་རྫོགས། །རྣལ་འབྱོར་དམ་ཚིག་བདག་ཅག་རྣམས་ཀྱིས་འཚལ། །དགྱེས་པའི་དུས་ཀྱིས་མཆོད་པར་སྦྱར་བ་འདི། །བཞེས་ཏེ་ཨ་ལ་ལ་སྟེ་དགྱེས་པ་མཛོད། །ༀ་བཛྲ་ཨེ་ས་ཧཱུྃ། སེ་ས་ཧཱུྃ། ས་མ་ཡ་བྷཀྵ་ཧཱུྃ། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཛཿཧཱུྃ་བྃ་ཧོཿ བཛྲ་པྲ་ཏིཙྪ་ཧོ། ཧོ་སྤྲོས་པ་མེད་པའི་དབྱིངས་དང་རང་བཞིན་གྱི་དཀྱིལ་འཁོར་རྣམ་པར་དག་པ་ན། །དུས་གསུམ་དུ་རྣམ་པར་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ། བཅོམ་ལྡན་འདས་རྡོ་རྗེ་སེམས་དཔའ་ལ་སོགས་པ་རིགས་ལྔའི་བདེ་བར་གཤེགས་པ་རིགས་མཆོག་ཡུམ་གྱི་དབྱིངས་ན་རྟག་ཏུ་རྣམ་པར་ཞུགས་པ་འཁོར་ཕུན་སུམ་ཚོགས་པ། ཐུགས་རྗེ་དང་བཅས་པ། ཐུན་མོང་མ་ཡིན་པའི་སྤྱོད་པས་ཤིན་ཏུ་ཁྲོས་ཤིང་། ཡེ་ཤེས་ཆེན་པོ་ལ་རོལ་བ་རྨད་དུ་བྱུང་བ་དྲག་ཤུལ་ཐབས་མཁས་པའི་རྒྱ་མཚོ་དང་ལྡན་པའི་རྒྱལ་པོ། །བཅོམ་ལྡན་འདས་དཔལ་ཆེན་པོ་ཤྲཱི་ཧེ་རུ་ཀ་བཛྲ་ཌཱ་ཀི་ནི་ཡུམ་ཀྲོ་དྷི་ཤྭ་རི་དང་གཉིས་སུ་མེད་པའི་རོལ་པ་ལས་བྱུང་བའི་རིགས་ལྔའི་དཔལ་ཆེན་པོ་ཡབ་ཡུམ། ཀ་རིའི་ཚོགས། སེངྷའི་འཁོར། ནང་གི་རྣལ་འབྱོར་ཕྱིའི་སྒྲུབ་པ་ཕོ་མོ་ལ་སོགས་པ། ཡེ་ཤེས་དང་ལས་ལས་བསྐྱེད་པ་ཐམས་ཅད་མཁྱེན་པ་དང་བྱིན་གྱིས་བརླབས་པ་དམ་པ་མཛད་དུ་གསོལ། གཞན་ཡང་རྣལ་འབྱོར་ཕོ་མོ་དང་། ཕོ་ཉ་ཕོ་མོ་དང་། ཅི་བགྱིས་དང་བཀའ་ཉན་ཐམས་ཅད་དང་། ཕྱོགས་བཅུ་དུས་གསུམ་ན་བཞུགས་པའི་རྡོ་རྗེ་སློབ་དཔོན་མཆེད་ལྕམ་དྲལ། རྣལ་འབྱོར་གྱི་དོན་ལ་ཐུགས་དམ་རྩེ་གཅིག་ཏུ་མཛད་པ་རྣམ་དགོངས་ཤིང་། གསང་སྔགས་མ་ཧཱ་ཡོ་གའི་དགོངས་པ་གཞུང་བཞིན་དུ་མ་མཛད་པ་རྣམས་མཁྱེན་པ་དང་བྱིན་གྱིས་བརླབ་པར་མཛད་དུ་གསོལ། ཧོ་རྣལ་འབྱོར་གྱི་མཆོད་པ་འདི་ལ་ཕུད་ཀྱི་མཆོད་པ། ཆོས་ཉིད་ལ་ཆོས་ཉིད་འབྱུང་། འབྱུང་བ་ཆེན་པོ་ཀུན་རྫོབ་ཀྱི་མཚན་ཉིད་ཙམ་ལ་བསྡུས་ནས། སྤྲུལ་པ་ལ་སྤྲུལ་པ་རོལ། རྣལ་འབྱོར་གསང་བ་མཆོག་གི་མཆོད་པ་ལོངས་སྤྱོད་པའི་ཚུལ་དུ་སྦྱར་བ་འདི། བདག་ཉིད་ཆེན་པོ་འཁོར་དང་བཅས་པ་ཁྱེད་རྣམས་ལ། དབང་མི་འཚལ་བར་ཕུད་གཙང་སར་སྤགས་ཏེ། དགའ་མགུར་རངས་པའི་སེམས་ཀྱིས་མཆོད་པའི་ལྷ་མོ་འདོད་འབྱོར་བསྟན་པའི་ཚུལ་དུ་གར་གྱི་སྤྱི་གཙུག་གིས་བླངས་ཏེ། རྒྱལ་བའི་དཀྱིལ་འཁོར་རིན་པོ་ཆེའི་གཞལ་ཡས་ཁང་། ཆོས་ཀྱི་དབྱིངས་ཀྱི་མཐའ་ཀླས་པ་བྱུར་བུར་བཀང་སྟེ་འབུལ་ཞིང་མཆིས་ན། གཉིས་སུ་མེད་པའི་བདེ་བ་ཆེན་པོའི་ངང་ནས་དགྱེས་པའི་ལྷུན་དགོངས་ཏེ། ཡེ་ཤེས་ཆེན་པོ་ཆུ་ཟླ་ལྟ་བུས་སྒྱུ་མ་ལ་སྒྱུ་མར་རོལ་ཏེ་སྐུ་གསུང་ཐུགས་ཀྱི་ལོངས་སྤྱོད་མ་ཟད་པའི་གཏེར་ཆེན་པོ་བཞེངས་སུ་གསོལ། དེང་ཡོན་གྱི་བདག་པོ་དང་བདག་རྡོ་རྗེ་འཛིན་པ་འཁོར་དང་བཅས་པ་ལ་སོགས་པ། བདག་ཅག་གསང་བའི་དལ་འདིར་འདུས་ཤིང་ཚོགས་པ་རྣམས་ཀྱིས། དང་པོ་གསང་བ་རྡོ་རྗེ་ཐེག་པའི་སྒོར་མཆིས་ཏེ་དམ་ཚིག་ཆེན་པོ་མངོན་པར་ནོས་པ་ལས། རྩ་བ་དང་ཡན་ལག་གི་དམ་ཚིག་ཆག་ཉམས་སུ་གྱུར་པ། ལྷ་ཉེ་བར་མ་བསྒོམས་པ་སྙིང་པོ་དག་པར་མ་བཟླས་པ། སྦྱོར་བ་མང་པོའི་བར་བསྐུམས་པ། །དད་པ་ཅན་གྱིས་ཚོགས་བཅག་པ། །དགེ་བ་ཅན་གྱི་ཐུགས་དཀྲུགས་པ། །དམ་རྫས་དང་དུ་མ་ལེན་པ། །བསྔོ་བ་བསྔོ་མ་ཐོགས་པ། མཆོད་པ་ལོ་དང་དུས་ལས་འདས་པ། བསྙེན་པ་ཡུན་ཐུང་བ། ཛབ྄་བཟླས་པ་གྲངས་ཉུང་བ། ཏིང་ངེ་འཛིན་འཐང་ལྷོད་དུ་གྱུར་པ། ལེ་ལེ་དང་སྙོམ་ལས་ཀྱི་དབང་དུ་གྱུར་པ་དེ་བཞིན་གཤེགས་པའི་མཛད་སྤྱོད་དགོངས་སྤྱོད་དམ་པ་གདེང་དུ་མ་གྱུར་ཅིང་། སེམས་ཅན་གྱི་ཤེས་པ་རང་ཐད་དུ་གྱུར་པ་དང་། ཁྱད་པར་དུ་ཡང་བསྒྲུབ་པའི་དམ་ཚིག་དང་། ཁྱད་པར་གྱི་དམ་ཚིག་གཉེན་པོ་ནོས་པ་ལས་ཉམས་ཤིང་། ཞིག་རལ་དུ་གྱུར་པ་ཅི་མཆིས་པ་དེ་དག་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོང་ཞིང་བཤགས་ན། དབྱིངས་ཉིད་ནམ་མཁའ་ལྟ་བུའི་ངང་ལས་སྐུ་མ་ཆགས་པ་བཟོད་པ་དང་དུ་བཞེས་ཏེ། ཚངས་པ་ཡིད་བཞིན་དུ་རྒྱས་པར་མཛད་དུ་གསོལ། དངོས་གྲུབ་ཏུ་གསོལ་བའི་མདོ་ནི། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས་མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། དེ་བཞིན་གཤེགས་པའི་སྐུ་གསུང་ཐུགས་མན་ཆད། དངོས་གྲུབ་ཀྱི་རྒྱུ་དང་སྐལ་བ་གང་ལགས་པ་དུས་ཕྱི་མར་མི་ཐོགས་པར་དེང་འཕྲལ་དུ་ཐོབ་པར་སྩལ་དུ་གསོལ། འཕྲིན་ལས་དེས་སྙན་ཁུང་དུ་གསོལ་བ་ནི། བདག་ཅག་རྣམས་ལ་སྡང་བར་བྱེད་པའི་དགྲ། གནོད་པའི་བགེགས་གདུག་པའི་དབལ་རྣོ་བའི་མཚོན། སྦྱར་བའི་དུག །ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་བཅུ། ཡེ་འདྲོག་སུམ་བརྒྱ་དྲུག་ཅུ། སོ་སོའི་རྨི་ལམ་ངན་པ་དང་པྲ་སོགས་རྩུབ་པ་ལ་སོགས་ཏེ། ལོ་ཀག་དང་ཟླ་ཀག་དང་། གཤེད་བཞི་ལ་སོགས་པ། མི་མཐུན་པའི་ཕྱོགས་ཚེ་རབས་ལས་ཀྱི་འཕྲོ་ལས་གྱུར་ཀྱང་རུང་། འཕྲལ་གྱི་རྐྱེན་ལས་གྱུར་ཀྱང་རུང་། མི་དང་མི་མ་ཡིན་ལ་སོགས་པའི་གནོད་པའི་སྦྱོར་བ་ལས་གྱུར་ཀྱང་རུང་སྟེ། དེ་དག་ཐམས་ཅད་བཟློག་ཅིང་ཞི་བར་མཛད་དུ་གསོལ། གལ་ཏེ་ཞི་བས་མི་འདུལ་ན་ཡང་། དྲག་པོའི་ཕྲིན་ལས་ཀྱིས་གདུལ་ཞིང་ཚར་བཅད་པ་དང་། དབང་དུ་སྡུད་པ་དང་སྤོར་ཞིང་སྤར་བ་དང་། གཟིར་ཞིང་མནན་པ་དང་། ཕྲིན་ལས་དྲག་དབལ་རྣམ་པ་བཞི་ཇི་ལྟར་ཁུལ་ཞིང་འཚམས་པ་དང་། ཡལ་བར་མི་འདོར་བཏང་སྙོམས་མི་དགོངས་ཤིང་། མི་ཡང་མི་དྲག་ཁོ་ནར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས་བཅད་གཏུབས་ལུས་ལ་འབྱུང་བར་མི་འགྱུར་ཏེ། གྲིབ་པས་འཕོག་པའི་སྡུག་བསྔལ་ཤིན་ཏུ་མི་བཟོད་པ། སྐུའི་ཕྱོགས་ཙམ་མོད་ན་འཚོ་བ་དང་། གཟི་མདངས་ལུས་ལ་འཇུག་པ་ཉི་མ་སྟོང་དག་གི་འོད་བཞིན་འཇིག་རྟེན་ཁམས་འདིར་རྟག་ཏུ་འཆར་བ་དང་། ལུས་ངག་སེམས་རྣམས་ཚེ་འདིར་རྡོ་རྗེ་རབ་སྣང་ཞིང་། རེ་སྨོན་ཐམས་ཅད་དུས་འདིར་ཐོབ་པར་མཛད་པ་སྩལ་དུ་གསོལ། ཛཔ྄་བྱ་སྟེ། བྷྲཱུྃ་བི་ཤྭ་བི་ཤུདྡྷེ་ཕཊ། ཛཿ ཧཱུྃ་སྟོང་གསུམ་སྟོང་གི་འཇིག་རྟེན་ན། །དབུས་ཕྱོགས་འཁོར་ལོ་འབར་བའི་ལྟེ་བ་ལ། །དབང་ཕྱུག་ལྷ་ཆེན་བསྣོལ་བའི་ཁྲི་སྟེང་ནས། །བཅོམ་ལྡན་དཔལ་ཆེན་བཛྲ་ཧེ་རུ་ཀ །ཡུམ་ཆེན་བཛྲ་ཁྲོས་པའི་རྒྱལ་མོ་གཉིས། །ཡབ་ཡུམ་ཐབས་དང་ཤེས་རབ་གཉིས་སུ་མེད། །གཉིས་མེད་སྦྱོར་བའི་མཁའ་དབྱིངས་ནས། །གསང་བ་བྱང་ཆུབ་སེམས་ཀྱི་འཕྲོ་འདུ་ཡིས། །རྣལ་འབྱོར་བདག་གི་སྒྲིབ་པ་སྦྱང་དུ་གསོལ། །བླ་མེད་སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཤར་ཕྱོགས་འཁོར་ལོ་འབར་བའི་རྩིབས་སྟེང་ནས། །དྲི་ཟ་ཕོ་མོ་བསྣོལ་བའི་ཁྲི་སྟེང་ན། །བཅོམ་ལྡན་དཔལ་ཆེན་བུདྡྷ༴ ཡུམ་ཆེན་བུདྡྷ༴ ཡབ་ཡུམ་ཐབས་དང་ཤེས་རབ་གཉིས་སུ༴ གཉིས་མེད་སྦྱོར༴ གསང་བ༴ རྣལ་འབྱོར༴ བླ་མེད༴ ལྷོ་ཕྱོགས༴ གཤིན་རྗེ༴ བཅོམ་ལྡན་དཔལ་ཆེན་རཏྣ༴ ཡུམ་ཆེན་རཏྣ༴ ཡབ་ཡུམ་ཐབས། གཉིས་མེད༴ གསང་བ༴ རྣལ་འབྱོར༴ བླ་མེད༴ ནུབ་ཕྱོགས༴ ཀླུ་དབང༴ བཅོམ་ལྡན་དཔལ་ཆེན་པདྨ༴ ཡུམ་ཆེན་པདྨ༴ ཡབ་ཡུམ་ཐབས༴ གཉིས་མེད༴ གསང་བ༴ རྣལ་འབྱོར༴ བླ་མེད༴ བྱང་ཕྱོགས༴ གནོད་སྦྱིན༴ བཅོམ་ལྡན་དཔལ་ཆེན་ཀརྨ༴ ཡུམ་ཆེན་ཀརྨ༴ ཡབ་ཡུམ་ཐབས༴ གཉིས་མེད༴ གསང་བ༴ རྣལ་འབྱོར༴ བླ་མེད༴ ༀ་ཡེ་ཤེས་ལྷ་ནི་བསྐུལ་བའི་ས་ལ་བཞེངས། །རྣལ་འབྱོར་དབང་ཕྱུག་གསོ་བའི་ཆོ་ག་མཛད། །ལྷ་དང་གཉིས་སུ་མེད་པར་བྱ་བའི་ཕྱིར། །བཟླས་བརྗོད་གྲངས་དང་འཚམས་པའི་བསྙེན་པ་འབུལ། །ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། བསྟོད་པ་ནི། ཧཱུྃ་གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟངས་ཡག་ཟ་བྱེད་ཆེ་ཧོ། ཧཱུཾ། རྔམ་པའི་ང་རོ་འབྲུག་སྟོང་ལྡིར། །ཐུགས་ཆེན་རི་རབ་འབུམ་བསྙིལ་སྐད། །ཨ་ལ་ལ་ཡི་གད་རྒྱང་ཆེ། །བཤུགས་པའི་འཐོར་རླུང་གཡེང་བ་ཆེ་ཧོ། །ཧཱུཾ་ཁྲོ་བོ་ཡེ་ཤེས་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོ། །ཧཱུཾ་ཁྲོ་བོའི་རྒྱལ་པོ་སྤྲིན་ཆེན་པོ། །ཁྲོས་པས་དཀྱིལ་འཁོར་ཆར་བཞིན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་འཕྲོས་པའི་ཐིག་ལེ་ཆེ་ཧོ། །ཧཱུཾ་བདུད་ཀུན་གྱི་ནི་བདུད་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །བདུད་ཀྱི་ཚོགས་རྣམས་འཇིགས་པར་བྱེད། །འཇིགས་བྱེད་ཆེན་པོ་ཐིག་ལེ་ཆེ་ཧོ། །ཧཱུཾ་རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་པོ་ཆེ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོ། དེ་ལྟར་བསྟོད་ནས། ཚོགས་མདུན་དུ་སྤྱན་དྲངས་ཏེ། ༀ་བི་ཤྭ་བི་ཤུདྷེ་ཨ་མྲྀ་ཏེ་ཧཱུྃ་ཕཊ། ད་ར་མ་ཏེ་ཨ་མྲྀ་ཏ་ཧཱུྃ་ཕཊ། ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཧཱུྃ་དབང་ཕྱུག་ཆེན་པོ་ཡབ་ཡུམ་དང་། །བྱང་ཆུབ་རྡོ་རྗེ་ལྕམ་དྲལ་དང་། །ཁྲོ་བོ་རྒྱལ་པོ་མཐའ་ཡས་དང་། །མ་མོ་མཁའ་འགྲོའི་ཚོགས་ཆེན་པོ། །ལྷ་དང་ལྷ་ཆེན་རྣལ་འབྱོར་པ། །ཐུགས་དང་འཐད་པའི་གནས་ཆེན་འདིར། །དམ་ཚིག་ཚུལ་བཞིན་གཤེགས་སུ་གསོལ། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ཤྲཱི་ཧེ་རུ་ཀ་མ་ཧཱ་བཛྲ་ཨཱ་གརྟ་ཡ་ཨཱ་གརྟ་ཡ། པྲ་བེ་ཤ་ཡ་པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཤ་ཡ་ཏོ་ཤ་ཡ། སརྦ་བཛྲ་ཌཱཀྐི་ནཱི་ནན། ཧྲི་ད་ཡ་ན། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ༀ་ཤྲཱི་ཧེ་རུ་ཀ་མ་ཧཱ་བཛྲ། སརྦ་དུཥྚ་ས་མ་ཡ་མུ་ཏྲ་པྲ་བཱན་ཙཀྲ་ཧཱུཾ་ཕཊ། ཛཿཧཱུྃ་བཾ་ཧོ། ཤྲཱི་ཧེ་རུ་ཀ །ཨེ་ཧྱ་ཧི་དྲྀ་ཤྱ་ཧོ། ས་མ་ཡ་སྟཾ། ཨེ་ཨ་ར་ལི་ཧོ། ཧྲཱི་ཧྲཱི་ཧྲཱིཿབླ་མེད་མཆོག་གི་མཆོད་པ་དམ་པ་སྦྱར་བ་འདི། ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པར་བཞེས་སུ་གསོལ། །ༀ་ཨཱཿཧཱུྃ་སུ་ར་ཏོ་ལ་པོ་ཀ་མ་ལི། མ་ལེ་བཛྲ་ཨ་མྲྀ་ཏ་ཧ་ར་ན་པྲ་ཏི་ཛཿ བ་ག་བཱན། ཛཿཧཱུྃ་བྃ་ཧོཿ ཨ་ལ་ལ་ཧོ། ༀ་པ་ན་པེེཾ། པེ་ནུ་སུ་ར་ཏོ། ཏི་པུ་པ་ར་མུ། ཏ་ཐཱ་ག་ཏ་སི་ཏི་པུ་ས་མ་ཡོ་ཏ་མུ། མ་ཧཱ་སུ་ཁ་སི་ཏི་དུ། སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེད་དང་འཇིགས་པར་སྟོན་པ་དང་། །སྙིང་རྗེ་རྔམ་དང་ཞི་བ་ལ་སོགས་པ། །སྐུ་ཡི་དངོས་པོ་ཤིན་ཏུ་བསྒྱུར་བ་ཡིན། །གང་བྱས་སྒྲུབ་པོ་རྣལ་འབྱོར་པ། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ལྔ། །མཱཾ་ས་ལ་སོགས་བྲོ་མཆོག་བསིལ། །མེ་ཏོག་ལ་སོགས་ཙནྡན་ཕྲེང་། །བཟའ་དགུར་འབུལ་ལོ་བཞེས་སུ་གསོལ། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །གྲུབ་པའི་རྫས་ནི་ཐམས་ཅད་ལ། །ཧཱུྃ་དང་ཕཊ་ཀྱིས་ལྡན་པར་མཛོད། །ཚེ་རབས་ཐོག་མཐའ་མེད་པའི་དུས་མཐའ་ནས། །ད་ལྟའི་ལུས་འདི་བླངས་པ་ཡན་ཆད་དུ། །ལུས་ཀྱིས་སྡིག་བྱས་སྤྱོད་པ་ངན་དུ་བྱས། །ངག་གིས་ཚིག་འཁྱལ་སྨྲ་བ་ཀུན་ཏུ་བརྗོད། །སེམས་ཀྱི་བློ་ནོར་ལོག་པར་བསམ་ལ་སོགས། །འདོད་ཁྲོ་གཏི་མུག་དབང་གིས་ནོངས་བགྱིས་ན། །འདི་འདྲའི་དམྱལ་ཚོགས་ཤིན་ཏུ་མི་བཟོད་པ། །བཀྲམ་པའི་ལྷ་ཚོགས་ཁྱེད་ལ་བཟོད་པར་གསོལ། །ཡེ་ཤེས་ལྷ་ལ་རྟོག་པ་མི་མངའ་ཡང་། །དེ་ཡི་འཁོར་དུ་གཏོགས་པའི་ལྷ་སྲིན་རྣམས། །མི་ཡི་སྐྱོན་མཐོང་ཙམ་ན་ཆད་པ་གཅོད། །ཉམས་ཆག་འགལ་འཁྲུལ་མཆིས་པ་མཐོལ་ལོ་བཤགས། །བཟོད་པར་བཞེས་ནས་ཚངས་པའི་དངོས་གྲུབ་སྩོལ། །བདག་ཅག་རྡོ་རྗེ་སློབ་དཔོན་མཆེད་ལྕམ་དྲལ། །གསང་བའི་དལ་འདིར་འདུས་པ་རྣམས་ཀྱི་རྩ་བ་དང་ཡན་ལག་གི་དམ་ཚིག་ཉམས་ཆག་ཏུ་གྱུར་པ་རྣམས་མཐོལ་ལོ་བཤགས་སོ། །དེ་ལྟར་མཐོལ་ཞིང་བཤགས་པས་བཟོད་པ་དང་དུ་བཞེས་ཏེ་ཉམས་པ་ཐམས་ཅད་སྐོང་བར་མཛད་དུ་གསོལ། །ཨེ་རཾ་ཛྭ་ལ་རཾ། ༀ་བཛྲ་ཤྲཱི་ཧེ་རུ་ཀ་བཛྲ་མ་ཧཱ་ཀྲོ་ཏི་ཤྭ་རི་ཧཱུྃ། བེའུ་བི་དིར་རོའུ་ཏྲི། པཉྩ་ཏྲི་ཨཱ་བེ་ཤ་ཤེ་ན་བི་ན་ཡཱ་བི་ཏ་ཐཱ་ག་ཏེ། ཙ་ལེ་པྲ་ཙ་ལེ་གུར་པ་གུར་པི་ཤཾ་པ་ཏི། ཙ་ལེ་ཧུ་ལུ་ཧཱུྃ་བྷྱོ་ཧཱུྃ། ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམས་པ་ལས། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔ་ཡི་ཟས་ལྔ་ལ། །མཚན་མ་མིང་རུས་བཅས་པར་བྱ། །བཀུག་ནས་རྡོ་རྗེ་ཕུར་པས་གདབ། །རྡུལ་དུ་བྱས་ནས་ཚོགས་ལ་དབུལ། །ཞེ་སྡང་རྡོ་རྗེ་འཁོར་བཅས་པས། །འཇིག་རྟེན་ཁམས་ནི་རབ་འཇིགས་ཀུན། །སྐད་ཅིག་ཡུད་ལ་བརླག་མཛད་དེ། །བརླགས་པར་མ་གྱུར་གང་ཡང་མེད། །བརླག་མཛད་ཁྱོད་ལ་ཕྱག་འཚལ་ལོ། །ཧཱུྃ་ཛཿ ཆོས་ཉིད་ཀུན་ཏུ་བཟང་པོའི་རོལ་བ་ལས། །འཇིག་རྟེན་སྤྱོད་པའི་ཚུལ་ཡང་མི་སྤང་སྟེ། །ཐབས་ལ་མཁས་པས་ཁྲོ་རྒྱལ་ཚུལ་སྟོན་པ། །མ་ཆགས་དག་པ་ཡབ་ཡུམ་གྱི་གཞལ་ཡས་སུ། །དབང་ཕྱུག་རྒྱལ་པོ་ཐབས་ཀྱི་རོལ་པ་ཡིས། །གཉིས་མེད་བྱང་ཆུབ་སེམས་ཀྱི་འཕྲོ་འདུ་ལས། །སྐུ་གསུང་ཐུགས་ལས་སྤྲུལ་པའི་ཕྲ་མིན་མ། །རྡོ་རྗེ་མཁའ་འགྲོ་ཡེ་ཤེས་དམ་ཚིག་ཅན། །བཀའ་བཞིན་རྗེས་སུ་སྒྲུབ་པའི་མཆེད་ལྕམ་ལ། །སྡང་བར་བྱེད་པའི་དགྲ་དང་གནོད་པའི་བགེགས། །ཀོའུ་རི་འགུགས་པའི་ཚོགས་ཀྱི་ཁུག་ལ་ཤོག །ཙ་རི་རྐུན་མོའི་ཚོགས་ཀྱིས་མཐུ་སྟོབས་རྐུས། །པྲ་མོ་རྨོངས་བྱེད་ཚོགས་ཀྱིས་རྨོངས་པར་མཛོད། །བེ་ཏ་ཐལ་བྱེད་ཚོགས་ཀྱིས་ཐལ་བར་རློག །པུསྐ་ཀསྨ་སྨ་ཤ་ཙཎྜ་ལཱིས། །གནོད་བྱེད་ཟུངས་ལ་ཆིངས་ཤིག་དབང་དུ་སྡུས། །རབ་ཏུ་མྱོས་སུ་ཆུག་ལ་བརྒྱལ་བར་མཛོད། །སེང་གེ་སྟག་དང་ཝ་དང་སྤྱང་མོའི་མགོ། །གདུག་པའི་མགོ་ལ་ཡུམ་གྱི་ཆས་ཅན་མ། །མགོ་ནས་གསོལ་ལ་ཤ་རུས་ལྷ་རྐང་གཞིབས། །ཀྲྀ་ཏ་ཀཾ་ཀ་ཕོ་རོག་འུག་པའི་མགོ། །མཁའ་ལ་རླུང་ལྟར་འགྱུ་བའི་མཁའ་འགྲོ་མ། །དེ་ཡིས་གློ་སྙིང་ནང་ཁྲོལ་རྐང་ཚིལ་རྣམས། །ཆེམ་ཆེམ་གསོལ་ཏེ་དྲག་པོའི་ལས་རྣམས་མཛོད། །དཀར་མོ་རྡོ་རྗེ་ཁྱབ་པའི་སྐུ། །ཡེ་ཤེས་ཉི་མ་འབུམ་གྱི་གཟི། །རྡོ་རྗེ་གདོང་མོ་ཚུལ་བཞིན་སྤྱོན། །ཆིངས་ཤིང་ཕག་གདོང་ཞགས་པ་མ། །འདོད་ཆགས་དམར་མོ་དྲིལ་འཁྲོལ་སྐུ། །རྣམ་དག་པདྨའི་དཀྱིལ་ན་བཞུགས། །རྡོ་རྗེ་འཇིག་རྟེན་ལྕགས་སྒྲོག་མ། །དབང་དུ་སྡུས་ཤིག་ཉི་ཟླའི་སྤྱན། །འབར་བ་ཆེན་པོ་ཐལ་བྱེད་མ། །སངས་རྒྱས་ལོངས་སྤྱོད་རྫོགས་པའི་སྐུ། །སངས་རྒྱས་བདེན་པ་ཀུན་སྟེན་མ། །རོལ་ཅིག་ཁམས་གསུམ་སླར་མཚོ་མ། །ཁྱེད་ཀྱི་ཐུགས་དམ་དུས་ལ་བབ། །དྲོངས་ཤིག་ཁུག་ཅིག་དགྲ་བགེགས་ཀྱི། །ཙིཏྟ་དཀར་ནག་མཚམས་ནས་དྲོངས། །གོ་རོ་ཙ་ནའི་རྒྱ་ནས་དྲོངས། །བ་སུ་ཏ་ཡི་མགུལ་ནས་དྲོངས། །དབང་པོ་རྣམ་ཤེས་ཀུན་ནས་དྲོངས། །དཔལ་ཆེན་རྔམས་པའི་ཞལ་དུ་སྟོབས། །རྡུལ་ཆ་ཚམས་ཡང་མེད་པར་གྱིས། །པྲ་བེ་ཤ་ཡ་ཕཊ། ཨཱ་བེ་ཤ་ཡ་ཨ། ༀ་བཛྲ་ཀྲོ་ཏ་ཡ་མ་ཧཱ་ཀྲོ་ཏ་ཧཱུྃ་ཕཊ། ཛ་ཏི་ཏ་ཙཀྲ་ཧ་ན་ཧ་ན་ཧཱུྃ་ཕཊ། ཧྲི་ཕུར་པ་ཏ་ཕཊཿ ༀ་བཛྲ་ས་ཏ་རཱ་ཙ་ཧཱུྃ་ན་མཿས་མནྟ་ཀཱ་ཡ་ཝཱ་ཀ་ཙིཏྟ་ནན། ༀ་གྷ་གྷ་ག་ཏ་ཡ་ག་ཏ་ཡ། ས རྦ་དུཥྚཾ་ཕཊ། ཀཱི་ལི་ཀཱི་ལཱ་ཡ་སརྦ་པཱ་པཾ་ཕཊཿཕཊཿ ཧཱུྃ་ཧཱུྃ་ཧཱུྃ་བཛྲ་ཀི་ལཱ་ཡ་བཛྲ་དྷ་རོད་ཨ་ཛྙཱ་པ་ཡ་ཏི། ཀཱ་ཡ་ཝཱ་ཀ྄་ཙིཏྟ་བཛྲ་ཀ་ལཱ་ཡ་ཧཱུྃ་ཕཊཿ ༀ་ཧྲཱིཿཏི་བི་ཏི་ཙིཏྟ་ནན་སརྦ་ཤ་ཏྲུཾ་ན་ཤ་སྟཾ་ས་ཡ་ཧཱུྃ་ཕཊཿ ༈ དམ་ཉམས་འབྱུང་པོའི་ཤ་ནི་ཟན་བས་ཞིམ། །ཤ་ཡི་རང་བཞིན་གཏི་མུག་ཆེ། །གཏི་མུག་མཆོད་པ་འདི་བཞེས་ལ། །བདེ་གཤེགས་སྐུ་ཡི་དངོས་གྲུབ་སྩལ་དུ་གསོལ། །དམ་ཉམས་འབྱུང་པོའི་ཁྲག་ནི་ཆུ་ལས་ཞིམ། །ཁྲག་གི་རང་བཞིན་འདོད་ཆགས་ཆེ། །འདོད་ཆགས་མཆོད་པ་འདི་བཞེས་ལ། །བདེ་གཤེགས་གསུང་གི་དངོས་གྲུབ་སྩལ་དུ་གསོལ། །དམ་ཉམས་འབྱུང་པོའི་རུས་པ་མར་ལས་ཞིམ། །རུས་པའི་རང་བཞིན་ཞེ་སྡང་ཆེ། །ཞེ་སྡང་མཆོད་པ་འདི་བཞེས་ལ། །བདེ་གཤེགས་ཐུགས་ཀྱི་དངོས་གྲུབ་སྩལ་དུ་གསོལ། །ཧཱུྃ་བཻ་ཌཱུར་སྔོན་པོའི་རིན་ཆེན་རི་རབ་ལས། །ཉི་མ་སྟོང་གི་འོད་ཟེར་བདལ་བ་ལྟར། །སེམས་དཔའ་སྔོན་པོ་འོད་ཀྱི་དཀྱིལ་འཁོར་ཅན། །དཔལ་ལྡན་གཟི་བྱིན་འབར་ལ་ཕྱག་འཚལ་ལོ། །འོད་ཕུང་སྟུག་པོ་སྤྲིན་ལྟར་འཁྲིགས་པ་ཡི། །འཇིག་བྱེད་ལྡམ་ཐབས་བརྐྱངས་བསྐུམ་ཚུལ་དུ་བཞུགས། །ཟ་བྱེད་བསྐལ་པའི་མེ་དཔུང་བཞིན་དུ་འབར། །གདུག་པ་ཐམས་ཅད་རྡོ་རྗེའི་ཞལ་དུ་འདྲེན། །མི་བཟད་མཆེ་བ་གཙིགས་པའི་ཞལ་གདངས་ཤིང་། །སྲིད་གསུམ་ཟ་བར་བྱེད་པའི་རྐན་སྒྲ་ཅན། །ཉི་ཟླ་འབར་བའི་སྤྱན་གྱི་གདང་མིག་གིས། །བགེགས་དཔུང་བསྲེག་པར་མཛད་ལ་ཕྱག་འཚལ་ལོ། །བཛྲ་ཤྲཱི་ཧེ་རུ་ཀ །བཛྲ་ཀྲོ་ཏི་ཤྭ་རི་ཁཱ་ཧི། དབང་མོ་ཡན་ཆད་བྱའོ། །དགྲ་དཔུང་བཤིག །བགེགས་དཔུང་ཆོམས། དངོས་གྲུབ་སྩོལ་རྟགས་ཕྱུངས་མཚན་མ་སྟོན་ཅིག །ཚོགས་ཀྱི་སྨོན་ལམ་གདབ་པ་ནི། །ཧོ་བདག་ཅག་རྡོ་རྗེ་སློབ་དཔོན་མཆེད་ལྕམ་དྲལ་གྱིས། རྡོ་རྗེའི་ཚེ་གསོལ་བས་ཚེ་དབང་ཕུན་སུམ་ཚོགས་པ་ཐོབ་པར་གྱུར་ཅིག །ཞལ་ཟས་སྣ་ཚོགས་གསོལ་བས་རྡོ་རྗེ་སེམས་དཔའི་སྐུ་ཚེ་དང་ལང་ཚོ་ལ་མདའ་མཉེས་པར་གྱུར་ཅིག །ཛ་གད་དཔའ་བོ་གསོལ་བས་འགྲོ་བ་མང་པོ་དབང་དུ་འདུས་པར་གྱུར་ཅིག །ཞལ་ཟས་སྣ་ཚོགས་གསོལ་བས་ཞི་ཁྲོའི་རྫུ་འཕྲུལ་ལ་མངའ་བརྙེས་པར་གྱུར་ཅིག །དེ་ནས་ལྷག་མ་བསྡུས་ལ་སྤྱན་དྲངས་ཏེ། །ཧཱུྃ་ལས་ཀྱི་རྡོ་རྗེ་བྱེད་པར་དབང་བསྐུར་བའི། །དབང་ཕྱུག་མ་དང་དཀར་མོ་གིང་ལ་སོགས། །ལྷག་མ་ཁ་ཆུའི་དམ་ལ་མངའ་བ་རྣམས། །དམ་ཚིག་ཚུལ་བཞིན་མཆོད་ཀྱི་གཤེགས་སུ་གསོལ། །མཁའ་འགྲོ་མ་རྣམས་ཀྱིས་དཔལ་ཆེན་པོའི་ཕམ་ཕབ་ནོད་ཅིང་། རྣལ་འབྱོར་པའི་སྡོང་གྲོགས་མཛད་པའི་ཕྱིར་སྐད་ཅིག་ཡུད་ཙམ་ལ་གནས་འདིར་འདུ་བར་གྱིས་ཤིག །ཛཿཧཱུྃ་བཾ་ཧོ། བཛྲ་ཌཱ་ཀི་ནི་ཨ་ཀཪྴ་ཡ་ཧཱུྃ་ཛཿ ཨེ་ཨཱ་ར་ལི་ཧྲིང་ཧྲིང་། ༀ་ཊ་ཀི་ནི་ཨཱ་ཀཪྴ་ཡ། ཨ་ཀཪྴ་ཡ། པྲ་བེ་ཤ་ཡ་པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཤ་ཡ་ཏོ་ཤ་ཡ། མོ་ཧ་ན་མོ་ཧ་ན། སརྦ་བཛྲ་ཏི་ནན། ཧྲཱྀ་ད་ཡ་ཛཿཧཱུྃ་བཾ་ཧོ། ཌཱ་ཀི་ནི་ཧཱུྃ་ཛཿ ༀ་ཤྲཱི་ཧེ་རུ་ཀ །མ་ཧཱ་བཛྲ་སརྦ་དུཥྟ྄་ན། ས་མ་ཡ་མུ་ཏྲ་པྲ་བན་ཙཀྲ་ཡ། ཏི་ར་བཾ་ས་མ་ཡ། ཧེ་བྷ་ག་བཱན། བྷཱུ་ཧ་ཀྵེ་ཏྲ་པྲ་ཏི། སྟྭམ་པ་ཡ་ཧཱུྃ་ཕཊ། ༀ་བྷནྡྷ་ཡ་མུ་ཁ། ཨཱ་ཀཪྴ་ཡ་ཨཱ་ཀཪྴ་ཡ། པྲ་བེ་ཤ་ཡ་པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཤ་ཡ་ཏོ་ཤ་ཡ་སརྦ་བཛྲ་ཌཱཀྐི་ནི་ནན་ཧྲྀ་ད་ཡན། ཧ་ཧ་ཧ་ཧི་ཧི་ཧི། ༀ་ཨཱཿཧཱུྃ། ༀ་བཛྲ་ཌཱཀི་ནི་པྲ་ཏི་ཛ་མན་བྷ་ལིངྟ་ཧཱུྃ་ཕཊ་ཁཱ་ཧི། ༀ་བུདྡྷ་ཌཱཀྐི་ནི་པྲ་ཏི་ཛ་མན་བ་ལིངྟ་ༀ་ཕཊ་ཁཱ་ཧི། ༀ་རཏྣ་ཌཱ་ཀི་ནི་པྲ་ཏི་ཛ་མན་བ་ལིངྟ་ཏྲི་ཕཊ་ཁཱ་ཧི། ༀ་པདྨ་ཌ་ཀཱི་ནི་པྲ་ཏི་ཛ་མན་བ་ལིངྟ་ཧྲཱིཿཕཊ་ཁཱ་ཧི། ༀ་ཀརྨ་ཌཱ་ཀི་ནི་པྲ་ཏི་ཛ་མན་བ་ལིངྟ་ཨ་ཕཊ་ཁཱ་ཧི། ཞེས་སྨན་སྦྲེང་། དེ་ནས་ཁ་ཆུ་བཏབ་སྟེ། ༀ་གུ་རུ་ཀྲོ་ཏ་ཧ་ཀ་རཏྣ་ཏྲ་ཡཱ་ཡ་བྲཾ་ཤ་ཁ་ལག་ཤ་སུ་ག་ན་བྷུ་ཧྲི་ཏི་པྲ་ཏི་སྟམ་པ་ཡ་ཁཱ་ཧི་ཧཱུྃ་ཕཊཿ ཧཱུྃ་རྣམ་དག་ཆོས་ཉིད་ཞི་བ་ལས། །ཐུགས་རྗེ་ཆེན་པོ་སྤྲུལ་པ་འབྱུང་། །ཐབས་ཆེན་ཟླ་གསང་ཐིག་ལེ་ལས། །ཡལ་གམ་ཅན་རྣམས་འདུ་བར་མཛོད། །འདུ་མཛད་རྣམ་དག་འདི་བཞེས་ལ། །གྲུབ་པ་ཚོགས་ཀྱི་བདག་པོ་རྣམས། །རེ་བ་སྐོང་ཕྱིར་གནས་པ་ཀུན། །མངོན་སུམ་སྣང་བར་ཤར་བར་མཛོད། །རྡོ་རྗེ་ནམ་མཁའ་འགྲོ་བའི་ལམ། །མི་དག་རྣ་མ་ཡང་དག་ཞེན། །གདུག་པའི་སེམས་ཀྱིས་སྡིགས་བྱེད་ཅིང་། །དཔའ་བོ་བརྗིད་པའི་གཟུགས་འཛིན་པ། །སྐལ་ལྡན་རང་གི་ཕྱག་བྱར་ལྡན། །ཤ་དང་ཁྲག་དང་རྒྱུ་མ་དང་། །རྐང་དང་ཚིལ་བུ་ཟ་ཞིང་སྤྱོད། །དགག་པར་བྱེད་དང་འདྲེན་པར་བྱེད། །གཟི་བརྗིད་ཆེ་དང་འབར་བྱེད་མ། །འཇོམས་བྱེད་མ་དང་བོང་བུའི་མགོ། །ཆགས་ཆེན་མ་དང་ཆགས་བྲལ་མ། །འཁོར་མོ་མ་དང་རྒྱས་འདེབས་མ། །སྣ་ཚོགས་འདུས་དང་སྲུང་བ་མོ། །ཚོགས་ཀྱི་ད་ལ་སྲུང་བར་བྱེད། །གནོད་སྦྱིན་མོ་དང་ཡང་དག་འཕྲོག །བྱ་རོག་ངོ་དེ་མིག་འབྲུ་ཞིང་། །འཇིགས་པའི་གདོང་ལ་འཇིགས་པའི་མིག །སྣ་ཚོགས་མཆོག་གི་གདོང་འཛིན་ཅིང་། །ལག་པར་གྲི་དང་འཁར་གཞོང་ཐོགས། །གཞད་དང་འུག་པའི་གདོང་རིང་མ། །ཁྲོ་བ་ཁྱི་དང་ཕག་གི་མགོ། །བསུས་པོ་ཆེ་ལ་ལྟོ་འཕྱང་མ། །རྔ་མོ་བོང་བུའི་གཟུགས་འཛིན་ཅིང་། །ཁྲོས་པས་ར་དང་བྱི་ལའི་གདོང་། །རྒྱུ་མའི་མགོ་ནས་ཟ་བྱེད་ཅིང་། །ཀེང་རུས་དཀར་མོ་འཛིན་པ་སྟེ། །ཁྲོས་པས་རུས་པའི་ཕྲེང་བ་བཀླུབས། །ཕན་ཚུན་འཐབ་ཅིང་རྩོད་པ་སྟེ། །ཅེ་སྤྱང་ཁྲོ་གཏུམ་རྔམ་པའི་ཚོགས། །འཇིགས་བྱེད་གདོང་གི་མཆེ་བ་འཛིན། །རྣམ་པར་འགྱུར་བའི་གཟུངས་འཛིན་མ། །ཤར་ཉིད་དུ་ནི་བུམ་སྣ་འཛིན། །ནུབ་ཏུ་དྷ་ཤ་གྲཱྀ་བའོ། །ལྷོ་རུ་རྣམ་པར་འཇོམས་མ་སྟེ། །བྱང་ཉིད་དུ་ནི་བོད་འགྲོགས་སོ། །མདོར་ན་ཡེ་ཤེས་ལས་གྲུབ་པའི། །རྡོ་རྗེ་ནམ་མཁའ་འགྲོ་བ་རྣམས། །དོན་གྱི་སངས་རྒྱས་ཡིན་མོད་ཀྱང་། །སྒྲུབ་པ་པོ་ལ་ཕན་གདགས་ཕྱིར། །བྲན་གྱི་ཚུལ་དུ་ཁས་བླངས་པའི། །སྔོན་གྱི་ཐུགས་དམ་གཅེར་དགོངས་ཏེ། །གནས་འདིར་བརྩེ་ཕྱིར་གཤེགས་སུ་གསོལ། །གནས་འདིར་བརྩེ་ཕྱིར་གཤེགས་ནས་ཀྱང་། །མཆོད་པ་དམ་པ་འདི་བཞེས་ལ། །བཅོལ་བའི་ལས་རྣམས་གྲུབ་པར་མཛོད། །མཁའ་འགྲོ་སུམ་ཅུ་རྩ་གཉིས་ལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་བ་ལིངྟ་ཁཱ་ཧི། བཅོམ་ལྡན་དཔལ་ཆེན་ཧེ་རུ་ཀ །ཁྲོ་བོ་གིང་ཀ་ར་ཡི་ཚོགས་ཀྱིས་བསྐོར་བ་ནི། དཔའ་བོའི་ཚོགས་ཀྱིས་ལས་རྣམས་ཀུན་བྱེད་པ། །ཁྲོ་མོ་ཆེན་མོ་ཁམས་གསུམ་དབང་སྡུད་མ། །ཏ་ན་ག་ནའི་ཕྲིན་ལས་དུས་ལ་འབབས། །རྡོ་རྗེ་གནོད་སྦྱིན་རྡོ་རྗེ་སྲིན་པོ་དང་། །རྡོ་རྗེ་འབྱུང་པོ་རྡོ་རྗེ་སྤྱང་ཀི་དང་། །རྡོ་རྗེ་གཤིན་རྗེ་རྡོ་རྗེ་རོ་ལངས་དང་། །རྡོ་རྗེ་འཆི་བདག་རྡོ་རྗེ་དུས་འཚམས་དང་། །དབང་སྡུད་ལྕགས་ཀྱུས་འདྲེན་པ་ཆེན་པོ་དང་། །གར་གྱི་གློག་སྟོང་འགྱུ་བ་ཆེན་པོ་དང་། །གཟུགས་མེད་རླུང་ལྟར་འགྱུ་བ་ཆེན་པོ་དང་། །ཁམས་གསུམ་གཡབ་ཀྱིས་འདེབས་ས་ཆེན་པོ་དང་། །རྦོད་གཏོང་ལེན་པར་བྱེད་པ་ཆེན་པོ་དང་། །རྣ་ཉན་ཕྲ་མ་ཟེར་བ་ཆེན་པོ་དང་། །ཚོགས་ཀྱི་བྱན་མོ་མཛད་པ་ཆེན་པོ་དང་། །རྡོ་རྗེ་བྱེ་ནུ་ཕོ་མོ་འཁོར་དང་བཅས། །ཁམས་གསུམ་སྒྲོལ་བའི་གིང་ཆེན་བཅོ་བརྒྱད་རྣམས། །ཏ་ན་ག་ནའི་ཚོགས་ཀྱི་གནས་ཆེན་འདིར། །སྔོན་གྱི་དམ་ཚིག་ཚུལ་བཞིན་གཤེགས་སུ་གསོལ། །རྣམ་ལྔའི་ལོངས་སྤྱོད་མཆོད་པ་འདི་བཞེས་ལ། །དགྱེས་པ་གར་གྱིས་རོལ་ཅིག་ཕྲིན་ལས་མཛོད། །ༀ་བཛྲ་ཀིངྐ་ར་ཧ་ར་ཧ་ར་བྷྱོ། རུ་ལུ་རུ་ལུ་བྷྱོ། ༀ་མ་ཧཱ་བ་ལིངྟ་པྲ་ཏི་ཛ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧི། གིང་ཆེན་བཅོ་བརྒྱད་སྔོན་གྱི་ཐུགས་དམ་ལས་མ་འདའ་བར་གདུག་པ་ཅན་སྒྲོལ་བའི་ཕྲིན་ལས་མཛོད་ཅིག །བཅོམ་ལྡན་དཔལ་ཆེན་ཧེ་རུ་ལ། །དབང་ཕྱུག་ཚོགས་ཀྱིས་བསྐོར་བ་ནི། །སྙིང་རྗེ་བྱམས་མའི་ད་ལ་ནས། །གྲུབ་པའི་མ་ཚོགས་དབང་ཕྱུག་མ། །ཚངས་པ་ལ་སོགས་ཉི་ཤུ་བརྒྱད། །ལག་ན་གློ་སྙིང་ནང་ཁྲོལ་ཐོགས། །མཁལ་མ་ཁྲག་དང་མཉེ་མ་འཛིན། །སྤུ་གྲིའི་སོ་ལ་དགྲ་གཡང་མ། །མཆེ་བ་གཙིགས་ཤིང་འབྲུ་ཚུགས་བལྟ། །གད་རྒྱངས་སྒྲ་འབྱིན་དུང་སྒྲོལ་མ། །གསོད་པའི་ལས་རྣམས་ཀུན་ལ་བརྩོན། །རྒྱལ་མོ་བློན་མོ་དེད་དཔོན་མོ། །གཡོག་མོ་དང་ནི་ཡང་གཡོག་མོ། །བྲན་དང་ཡང་བྲན་འཁོར་དང་བཅས། །བཅོམ་ལྡན་དཔལ་ཆེན་ཧེ་རུ་མ། །བཀའ་ཡི་གཏོར་མ་འདི་ལོངས་ལ། །ད་ལྟར་ཁྱེད་ཀྱི་གཟུངས་མཆོག་རྣམས། །ཇི་སྲིད་གྲུབ་མཆོག་མ་ཕུལ་བར། །ཁྱེད་རྣམས་མངོན་དུ་མ་གྱུར་པར། །བར་དུ་ཏ་ནའི་གནས་ཆེན་འདིར། །འདུག་ལ་ལས་རྣམས་ཀུན་གྱིས་ཤིག །མ་མོ་ཆེན་མོ་ཁྱེད་རྣམས་ཀྱང་། །འདས་པའི་དུས་ན་སྔོན་བྱུང་ལྟར། །དེ་ཚེ་དཔལ་ཆེན་ཧེ་རུ་ཀའི། །སྤྱན་སྔར་ཁས་བླངས་དམ་བཅས་པའི། །འཇིག་རྟེན་འདས་དང་མ་འདས་པའི། །ཡེ་ཤེས་ཐོབ་པར་བྱ་བའི་ཕྱིར། །སྒྲུབ་པ་པོ་ཡི་ལས་བྱེད་ཅེས། །དམ་བཅས་བཞིན་དུ་ཧེ་རུ་ཀའི། །བཀའ་ཡི་གཏོར་མ་འདི་ལོངས་ལ། །བཅོལ་བའི་ལས་རྣམས་གྲུབ་པར་མཛོད། །མ་ནུ་རཀྵ་སི་མ་ཧཱ་བ་ལིངྟ་ཁཱ་ཧི། ཞེས་བརྗོད་ལ་དམར་སྦྲེང་ངོ་། །བཅོམ་ལྡན་དཔལ་ཆེན་ཧེ་རུ་ལ། །མ་མོའི་ཚོགས་ཀྱི་བསྐོར་བ་ནི། །དཔལ་ལྡན་ནག་མོ་རེ་མ་ཏི། །ལྕགས་ཀྱི་དྲེའུ་རྟ་རྐང་གསུམ་ཆིབས། །དྲྭ་བ་དགུ་ཡི་ཏེ་ལེན་ཅན། །བྱུ་རུ་དམར་མོའི་རྒྱན་སྲབ་ཅན། །ཉིད་ཀྱི་སྐུ་མདོག་མཐིང་ནག་ལས། །རལ་པའི་ཟུར་ཕུད་གཡས་ནས་གཡོན་དུ་འཁྱིལ། །ཞལ་ནས་མི་ཤ་རྟ་ཁྲག་འཛག །མིག་ནས་ཁྲག་འཛག་ཟུ་ལུ་ལུ། །དྲེ་རྟ་རྐང་གསུམ་རབ་བསྐྱེད་དེ། །དཔག་ཚད་བརྒྱད་ཁྲི་བཞི་སྟོང་ཡང་། །མཚན་མོ་གཅིག་ལ་ཁྱབ་པར་ཉུལ། །རྣལ་འབྱོར་ཆེན་པོ་ཨ་ལ་ལ། །དབང་ཕྱུག་ཆེན་པོ་ཨ་ལ་ལ། །གཡས་ནས་གཤིན་རྗེའི་ཁྲམ་བམ་ཐོགས། །དགྲ་བགེགས་ཁྲམ་ལ་གདབ་ཏུ་གསོལ། །གཡོན་ནས་བཙན་གྱི་ཤོད་རྡེའུ་འགྲེམས། །དགྲ་བགེགས་ཤོད་རྡོ་ནག་པོ་ཁྲེམས། །མཆན་ཁུང་གཡས་ན་བྱང་དམར་སྦེད། །དགྲ་བགེགས་བྱང་དམར་ཀྱུས་ལ་ཐོབ། །གཡོན་ན་ནད་ཀྱི་རྐྱལ་པ་སྦེད། །ཡིད་ལ་བརྣག་པའི་དགྲ་བོ་ལ། །ཡམས་ནད་རིམས་ནད་གཏང་དུ་གསོལ། །རྣམ་ལྔ་དམར་གྱི་མཆོད་པ་འདི་བཞེས་ལ། །བདག་གི་བཅོལ་པའི་ལས་རྣམས་སྒྲུབས་པར་མཛོད། །ཧཱུྃ་རྒྱ་མཚོ་ཆེན་པོའི་ད་ལ་ནས། །དཔལ་ལྡན་ཤུགས་སྒྲོལ་གཙོ་མོ་སྟེ། །རི་རབ་བསྙིལ་བའི་རྔམ་ཐབས་ཅན། །ཁ་ནས་མེ་འབར་རྒྱ་མཚོ་སྐེམས། །རྡོ་རྗེ་ཀུན་གྲགས་གཤེགས་སུ་གསོལ། །ཐོད་རུས་མང་པོའི་ད་ལ་ནས། །མཛེས་པའི་ཚུལ་གྱིས་འོད་འཕྲོ་ཞིང་། །འཇིག་རྟེན་འཆི་བདག་གཟི་འཕྲོག་མ། །ཀུན་ཏུ་བཟང་མོ་གཤེགས་སུ་གསོལ། །ཕྱག་རྒྱ་འབར་བའི་ད་ལ་ནས། །ནམ་མཁའ་སྟོང་ལ་དབང་བསྒྱུར་ཞིང་། །བདུད་དཔུང་གྲགས་སྙེམས་ཀུན་འདུལ་མ། །རྡོ་རྗེ་གྲགས་སྙེམས་གཤེགས་སུ་གསོལ། །ཧཱུྃ་དམ་ཚིག་ཆེན་པོའི་ད་ལ་ནས། །ཁྲོ་མོ་གཏུམ་ཆེན་ཟ་བྱེད་མ། །ཕོ་ཉ་མོ་སྟེ་དྲུག་ཅུའི་གཙོ། །ཤ་ཆེན་ཁྲག་ལ་ལོངས་སྤྱོད་ཅིང་། །གདུག་པ་མ་ལུས་ཀུན་འདུལ་མ། །རྡོ་རྗེ་ཆེན་པོ་ཡེ་ཤེས་མཆོག །དམ་ཚིག་ཚུལ་བཞིན་གཤེགས་སུ་གསོལ། །ཁྲག་གི་རྒྱ་མཚོའི་ད་ལ་ནས། །རྡོ་རྗེ་དྲྭ་བའི་ཕྲེང་ཐོགས་ཤིང་། །བྱང་ཕྱོགས་རང་གི་འཁོར་འདུལ་མ། །རྡོ་རྗེ་འདོད་ཆགས་གཤེགས་སུ་གསོལ། །ཧཱུྃ་འོད་དཔུང་འཁྲིགས་པའི་ད་ལ་ནས། །ཞགས་པ་སྟོང་གི་སྡེ་ལྡན་ཞིང་། །ཕྲིན་ལས་འབྱུང་པོ་ཀུན་འདུལ་མ། །རྡོ་རྗེ་གསལ་འཕྲོ་གཤེགས་སུ་གསོལ། །དབང་ཕྱུག་ཆེན་པོའི་ད་ལ་ནས། །ལྕགས་ཀྱུ་འབར་བའི་འཕྲོ་འདུ་ཅན། །དམ་ཚིག་ཉམས་པ་སྒྲོལ་བྱེད་ཅིང་། །བཀའ་ལས་འདའ་བྱེད་སྙིང་འབྱིན་མ། །རྡོ་རྗེ་གཡུ་སྒྲོན་གཤེགས་སུ་གསོལ། །མ་མོ་ཆེན་མོ་ཁྱེད་རྣམས་ཀྱང་། །ཀུན་ཀྱང་ནག་མོ་རལ་པ་ཅན། །ཀུན་ཀྱང་ཁ་ནས་ཁྲག་འཛག་མ། །ཀུན་ཀྱང་མིག་ནས་མེ་འབར་མ། །ཀུན་ཀྱང་སྣ་ནས་དུད་འཐུལ་མ། །འཁོར་བཅས་མ་ལུས་གཤེགས་སུ་གསོལ། །རྣམ་ལྔ་བདུད་རྩིའི་མཆོད་པ་འདི་བཞེས་ལ། །བདག་གི་བཅོལ་པའི་ལས་རྣམས་གྲུབ་པར་མཛོད། །བཅོམ་ལྡན་དཔལ་ཆེན་ཧེ་རུ་ལ། །སྲིད་བཞིའི་མཆོག་གིས་བསྐོར་བ་ནི། །གླིང་བཞི་མགྱོགས་མ་ལྷ་ཡི་སྲིང་། །ཤར་གྱི་མགྱོགས་མ་གཤེགས་སུ་གསོལ། །མཁའ་ལ་ཁྱུང་ལྡིང་གཤིན་རྗེའི་སྲིང་། །ལྷ་ཡི་མགྱོགས་མ་གཤེགས་སུ་གསོལ། །དམར་མོ་གཡག་ཐོད་ཀླུ་ཡི་སྲིང་། །ནུབ་ཀྱི་མགྱོགས་མ་གཤེགས་སུ་གསོལ། །ནག་མོ་སྡེར་ཆེན་གནོད་སྦྱིན་སྲིང་། །བྱང་གི་མགྱོགས་མ་གཤེགས་སུ་གསོལ། །སྲིང་མོ་ཆེན་མོ་ཁྱེད་བཞི་ཡང་། ། ཤིན་ཏུ་གདུངས་པའི་དམ་ཚིག་ཅན། །ཁྲོ་དང་ཞི་བའི་ལས་མཛད་མ། །གསེར་གྱི་སྤྲུལ་པ་མང་པོའི་ཁྲི་སྟེང་ནས། །དམ་ཚིག་ཡལ་གམ་ཅན་ལ་བརྩེ་དགོངས་ཏེ། །འཁོར་བཅས་མ་ལུས་གཤེགས་སུ་གསོལ། །རྣམ་ལྔ་དམར་གྱི་མཆོད་པ་འདི་བཞེས་ལ། །རྣལ་འབྱོར་བཅོལ་པའི་ལས་གྱིས་ཤིག །མ་ཧཱ་བ་ལིངྟ་མ་ཧཱ་པཉྩ་མ་ཧཱ་རཀྟ་ཁཱ་ཧི། གོང་གི་མཐོལ་བཤགས་འདིར་ཀྱང་སྦྱར་རོ། །ཧཱོཿ བཅོམ་ལྡན་འདས་དཔལ་ཆེན་པོའི་ཤྲཱི་ཧེ་རུ་ཀའི་འཁོར། །ནང་གི་རྣལ་འབྱོར་དང་། ཕྱིའི་སྒྲུབས་པ་པོ་ལ་སོགས་པ། ཡེ་ཤེས་དང་ལས་ལས་བསྐྱེད་པ་ཐམས་ཅད་མཁྱེན་པ་དང་བྱིན་གྱིས་བརླབ་པར་མཛད་དུ་གསོལ། དེང་ཡོན་གྱི་བདག་པོ་དང་བདག་རྡོ་རྗེ་སློབ་དཔོན་འཁོར་དང་བཅས་པ་གསང་བའི་དལ་འདིར་འདུས་པ་རྣམས་ཀྱིས་གསང་བ་མཆོག་གི་བཀའ་ནོས་པ་ལས་རྩ་བ་དང་ཡན་ལག་གི་དམ་ཚིག་གི་ནོར་བ་དང་། མ་ནོར་བར་ཉམས་པ་རྣམས་གནོང་ཞིང་འགྱོད་པའི་སེམས་ཀྱིས་མཐོལ་ལོ་བཤགས་ཤིང་མཆིས་ན། བཟོད་པ་དང་དུ་བཞེས་ནས་ཆགས་པ་ཐམས་ཅད་བྲལ་བར་མཛད་དུ་གསོལ། དངོས་གྲུབ་ཏུ་གསོལ་བ་ནི། མངོན་པར་ཤེས་པ་དང་། རྡོ་རྗེའི་ཚེ་ལ་སོགས་པ་ཁྱད་པར་དུ་མོས་པ་རྣམ་པ་བཞི་བསམ་གྱིས་མི་ཁྱབ་པ་གྲུབ་པའི་དངོས་གྲུབ་སྩལ་དུ་གསོལ། ཕྲིན་ལས་དང་སྙན་ཁུང་དུ་གསོལ་བ་ནི་གོང་བཞིན་བརྗོད་དོ། །བསྡུས་པ་ནི། རྒྱལ་བ་རྒྱ་མཚོ་མ་ལུས་དགོངས་སུ་གསོལ། །མངོན་པར་རྒྱ་མཚོ་མ་ལུས་དགོངས་སུ་གསོལ། །དངོས་གྲུབ་རྒྱ་མཚོ་མ་ལུས་དགོངས་སུ་གསོལ། །ཕྲིན་ལས་རྒྱ་མཚོ་མ་ལུས་དགོངས་སུ་གསོལ། །འགྲོ་བའི་དོན་ཕྱིར་བཅོལ་ལ་བཤགས་པར་བྱའོ། །བརྟན་མ་ལས་བཞིའི་ཕྲིན་ལས་བྱ། །དཀོན་མཆོག་གི་བཀྲ་ཤིས་བརྗོད་ལ། བྱང་ཆུབ་སེམས་མཆོག་ཤེས་རབ་ཏིང་འཛིན་གྱིས། །ཉོན་མོངས་བདག་འཛིན་རྣམ་རྟོག་ཀུན་སྤངས་ཏེ། །བདག་ཉིད་ཆེན་པོའི་དོན་ལ་རབ་བསྒོམས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱང་ཆུབ་སེམས་དཔའ་སྤྲུལ་པར་གར་འཕྲོ་བ། །ཟ་བྱེད་བདུད་ལོག་རྟོག་པ་ཀུན་བཏུལ་ནས། །བླ་མེད་བྱང་ཆུབ་མཆོག་ལ་འགོད་པ་ཡི། །བཀྲ་ཤིས་དེས་ཀྱང༴ ཕྲིན་ལས་ཞི་རྒྱས་དབང་དང་དྲག་པོ་ཡིས། །རྒྱུད་དྲུག་སེམས་ཅན་མ་ལུས་ཀུན་བསྒྲལ་ནས། །བླ་མེད་བྱང་ཆུབ་མཆོག་ལ་འགོད་པ་ཡི། །བཀྲ་ཤིས༴ བཀའ་གསང་རྨད་དུ་བྱུང་བའི་དཀྱིལ་འཁོར་དུ། །རྡོ་རྗེ་སློབ་དཔོན་མཆེད་དང་ལྕམ་དྲལ་གྱིས། །ཐུགས་དམ་སེམས་ཅན་ཡོངས་སུ་བསྐང་བ་ཡི། །བཀྲ་ཤིས་དེས། བཀྲ་ཤིས་པར་གྱུར་ཅིག །ངོ་དྲོ་བར་གྱུར་ཅིག །བྱིན་ཆེ་བར་གྱུར་ཅིག །དཔལ་ཆེ་བར་གྱུར་ཅིག །མི་ནུབ་བསྟན་པའི་རྒྱལ་མཚན་ཡོངས་ཀྱི་ཏོག་དམ་པར་གྱུར་ཅིག །ཤུ་བྷ་མ་སྟུ་སརྦ་ཛ་ག་ཏཾ།། །།
ཁྲོ་བོ་ཡང་དག་སྒྲོན་མ། སློབ་དཔོན་བི་མ་ལ།
ཀྲོ དྷ ས མྱ གུ ལྐཱ བི ཧ ར ཏི སྨ། །
ཁྲོ་བོ་ཡང་དག་སྒྲོན་མ་བཞུགས་སོ། །
ཡེ་ནས་སྤྲོས་མེད་རང་བཞིན་ལྷུན་གྱིས་གྲུབ། །ཡེ་ཤེས་མཁྱེན་ལྡན་སྐུ་གསུང་རྫོགས་པའི་དཔལ། །ཚད་མེད་ཡོན་ཏན་རྒྱ་མཚོའི་ཚོགས་མངའ་བའི། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །བསྒྲུབ་པའི་རྒྱལ་པོ་རྒྱལ་བ་ཀུན་གྱི་ཐུགས། །དོན་གྱི་སྙིང་པོ་མ་བཅོས་བྱང་ཆུབ་སེམས། །བླ་མེད་མཆོག་གི་དངོས་གྲུབ་ཐོབ་པ་ཡི། །ངེས་པའི་བསྙེན་བསྒྲུབ་རིམ་པ་འདི་བརྩམ་མོ། ༈ །གནས་དང་ཤེས་པ་ཡོ་བྱད་འཁོར་རྣམས་དང་། །དབང་དང་དམ་ཚིག་ཕུན་སུམ་ཚོགས་པ་ཡི། །རྒྱུད་ལྔར་སྐྱེས་པའི་འགྲོ་བ་སྡུག་བསྔལ་རྣམས། །བྱང་ཆུབ་ཆེན་པོའི་སྙིང་རྗེས་སེམས་བསྐྱེད་དོ། །ཆོས་རྣམས་ཐམས་ཅད་ཡེ་ནས་སེམས་ཉིད་དེ། །སེམས་ཉིད་རང་བཞིན་གདོད་ནས་མ་སྐྱེས་པས། །བསྒོམ་པར་བྱ་དང་བྱེད་མེད་ཡེ་ནས་སྟོང་། །ཅི་ཡང་མི་རྟོག་མི་དམིགས་བསམ་མོན་བྲལ། ། མཐའ་དང་དབུས་མེད་ནམ་མཁའི་ངོ་བོ་ཉིད། །ཡོངས་ལ་སྙོམས་པས་སྙིང་རྗེ་འབྱུང་བའི་ཡུལ། །བདེ་བ་ཆེན་པོའི་ངང་དུ་བཀོད་དོ་ཞེས། །ཡང་ནས་ཡང་དུ་དམ་ཚིག་རྣམ་པར་བཅའ། །མཁའ་མཉམ་རང་བཞིན་དག་པའི་དབྱིངས་ཉིད་ལ། །བདེ་གཤེགས་ཐུགས་ཀྱི་ཡེ་ཤེས་སྙིང་པོ་ནི། །སེམས་ཀྱི་རང་བཞིན་ཡི་གེ་ཧཱུྃ་དུ་སྣང་། །ཐམས་ཅད་འབྱུང་གནས་ཡེ་ཤེས་ཆེན་པོའི་ཧཱུྃ། །དེ་ལས་ཡེ་ཤེས་འོད་ཟེར་རབ་འཕྲོས་པས། །རྒྱལ་བའི་ཚོགས་བརྙེས་འགྲོ་བའི་རྒྱུད་སྦྱངས་ཏེ། །དུར་ཁྲོད་ཆེན་པོའི་ཡོན་ཏན་ཀུན་བསྡུས་ནས། །རེ་ཞིང་ངམ་ནས་འབར་བའི་དཀྱིལ་འཁོར་བཀོད། །ༀ་སརྦ་ཏ་ཐ་ག་ཏ་བྷུ དྷ་གརྦྷ་ལ། ༀ་པདྨ་དྷརྨ་ཨཱ་བེ་ཤ་ཡ་ཨ་ཨ། དུར་ཁྲོད་ཆེན་པོའི་རབ་འཇིགས་པར། །རླུང་ནག་རྡོ་རྗེ་གཏམས་པའི་སྟེང་། །ཁྲག་གི་རྒྱ་མཚོ་འཁྲུགས་པའི་དཀྱིལ། །ཀེང་རུས་ཆེན་པོའི་རི་རབ་བརྩིགས། །ཡཾ་ཀརྨ་རཀྵ་ཧྃ། ར་མ་ཧཱ་རཀྟ་ས་མུན་ཏ་ཛ་ལ་ས་མུ་ཏྲ་ཧཱུྃ། ཀེེཾ་ནི་རི་ཏི་ཛྭ་ལ་མཎྜ་ལ་ཧཱུྃ་ཕཊ། ཟླ་གམ་དབང་ཆེན་མཎྜལ། དུར་ཁྲོད་ཡོན་ཏན་ཚོགས་ཀྱིས་བརྒྱན། །ཕྱི་དང་ནང་མེད་ཀུན་ཏུ་སྣང་། །ཡེ་ནས་གཞལ་ཡས་ནམ་མཁའི་རྒྱ། །བྷཱུྃ་བི་ཤྭ་བི་ཤུདྡྷེ། འབར་བའི་འཁོར་ལོ་རྩིབས་བཞི་པ། །གྲུ་ཆད་བཞི་ཡིས་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྦྲུལ་སྣ་ཚོགས་ཉི་ཟླས་བརྗིད། །འབའ་བའི་ཕྲེང་བ་མང་པོ་འཁྲུགས། །ཛྙཱ་ན་བྷནྡྷ་ཙཀྲ་མཎྜ་ལ་ཧ་ན་ཧ་ན་ཧཱུྃ་ཕཊ། དྲེགས་པ་ལྷ་ཆེན་ཁྱབ་འཇུག་དང་། །ཚངས་པ་བརྒྱ་བྱིན་ཁྱོ་ཤུག་སྟེ། །ཁྱུ་མཆོག་མ་ཧེ་གཟིགས་དང་སྟག །གཏུམ་པོ་དོམ་གྱིས་བརྫིས་པའོ། །དེ་སྟེང་ཧཱུྃ་ཆེན་འཕྲོ་འདུ་ལས། །ཡེ་ཤེས་སྐུ་མཆོག་ཧེ་རུ་ཀ །འཇིགས་བྱེད་འབར་བའི་ཆ་ལུགས་དང་། །ལྷ་ཆེན་གདན་ལ་བརྐྱང་བསྐུམ་བཞུགས། །ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཾ་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། བཅོམ་ལྡན་ཁྲག་འཐུང་བཛྲ་ཧེ་རུ་ཀ །དབུ་གསུམ་མཐིང་ནག་དམར་དང་དཀར་བའི་ཞལ། །ཕྱག་དྲུག་ཁ་ཊཱྃ་རྡོ་རྗེ་རྔེའུ་ཆུང་གཡས། །སྟི་ར་དབྱུག་པ་བྷན་དམར་རྒྱུ་ཞགས་གཡོན། །ཞབས་བཞི་ཐབས་དང་ཤེས་རབ་བརྐྱང་བསྐུམ་ཞབས། །སྤྱན་དགུ་ཉི་ཟླའི་དཀྱིལ་འཁོར་སྡང་མིག་བགྲད། །དུང་ཆེན་ཁོང་སེང་ཀུན་ཏུ་གསན་པའི་སྙན། །ཤངས་ནས་ཧཱུྃ་དང་ཞལ་ནས་ཕཊ་སྒྲོགས་ཤིང་། །རྣོ་དབལ་མཆེ་བ་སྐྱེ་ཤི་རྩད་གཅོད་གཙིགས། །དབུ་སྐྲ་ཁམ་ནག་རལ་པ་གྱེན་དུ་འཁྱིལ། །སྨིན་མཚམས་ཁྲོ་གཉེར་གློག་སྟོང་འགྱུ་བ་བཞིན། །ཐོད་ཕྲེང་སྦྲུལ་ནག་ཉི་ཟླ་ཕྲེང་བས་བརྒྱན། །གླང་ཆེན་ཀོ་རློན་ཞིང་ལྤགས་གཡང་གཞི་གསོལ། །གཅན་གཟན་རྒྱལ་པོ་སྟག་གི་ཤམ་ཐབས་ཅན། །བ་སུ་ཐལ་ཆེན་རཀྟ་ཞག་གིས་བརྒྱན། །བསྐལ་པའི་མེ་དཔུང་ཉི་མ་འབུམ་གྱི་གཞི། །ཁྱུ་མཆོག་ལྷ་ཆེན་ཁྱོ་ཤུག་གདན་ལ་བཞུགས། །བཅོམ་ལྡན་འཇིགས་བྱེད་ཐུགས་ཀྱི་དཔལ་བེའུ་ན། །ཡེ་ཤེས་སྐུ་མཆོག་ཚོན་གང་རིན་པོ་ཆེ། །ཟུར་བརྒྱད་དཀྱིལ་ནས་འབྲུ་བརྒྱད་འོད་འཕྲོ་ཞིང་། །བདེ་ཆེན་བྱང་ཆུབ་སེམས་ནི་འཕྲོ་ཞིང་འདུ། །བདག་ཉིད་སངས་རྒྱས་ཐམས་ཅད་ཀྱི། །ཁྲོ་རྒྱལ་ཡེ་ནས་ཡིན་པའི་ཕྱིར། །ཕྱག་རྒྱ་ཆེན་པོ་མངོན་རྫོགས་ཤིང་། །སྐུ་གསུང་ཡེ་ཤེས་རང་དབང་བསྐུར། །ༀ་སརྦ་ཏ་ཐ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སོགས་ཝཱཀྐ་བཛྲ༴ ༀ་སོགས་ཙིཏྟ༴ ༀ་སརྦ་ཏ་ཐ་ག་ཏ་ཨ་ནུ་རཱ་ག་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐ་ག་ཏ་པཱུ་ཙ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་མ་ཧཱ་ཱཨ་དཪྴ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་པྲ་ཏྱ་བེ་ཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་ས་མ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ༀ་ཀྲྀ་ཏྱ་ནུཥྛ་ནྟེ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཁྲོ་རྒྱལ་གཟུངས་དང་མཉམ་སྦྱོར་ཕྱིར། །སྤྲོས་མེད་དེ་བཞིན་ཉིད་དབྱིངས་ནས། །ཡུམ་ཆེན་ཀྲོ་དྷི་མངོན་ཕྱུང་སྟེ། །ཆུ་ལུགས་འཛིན་པ་སྐུ་ལ་འཁྲིལ། །ༀ་བཛྲ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལི་ནི་ཧཱུྃ་ཕཊ་ཛཿ ༀ་ཨཱཿཧཱུྃཿ མཁའ་དབྱིངས་རྡོ་རྗེ་པདྨར་བྱིན་བརླབས་ཏེ། །ཉི་མའི་དཀྱིལ་འཁོར་ཧཱུྃ་ལས་རྩེ་ལྔ་ༀ། །པྃ་ལས་མ་ཆགས་པདྨའི་གཞལ་ཡས་སུ། །ཟླ་བའི་དཀྱིལ་འཁོར་ཆོས་སྐུར་ཨཱཾ་དང་ལྡན། །བདེ་མཆོག་སྒྱུ་མའི་བརྡས་མཚོན་ཏེ། །པདྨ་རིན་ཆེན་ལྡན་བྱས་ན། །དབྱིངས་ཀྱི་བདེ་ཆེན་འབྱུང་བ་སྟེ། །རང་རིག་ཡེ་ཤེས་དེ་ལ་འོང་། །ༀ་པདྨ་ས་མ་ཡོ་གཱི་ནི་པྲ་ཝེ་ཤ་ཡ་ཕཊཿ ཛཿཧཱུྃ་བྃ་ཧོཿ ཧི་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་དེ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། ། དགྱེས་མཉམ་མཆོག་གི་སྦྱིན་པས་བསྟིམ། །ༀ་ཧཱུྃ་ཨཱཿ ཇི་བཞིན་མཁའ་ལ་གསལ་དག་པ། དྲི་མེད་ཉི་མའི་འོད་བས་འཚེར། །བྱང་ཆུབ་སེམས་སྤྲིན་འཕྲོས་པ་ལས། །ཁྲོ་བོའི་དཀྱིལ་འཁོར་སྤྲིན་ཕུང་སྤྲོ། །ཧཱུྃ་ཧ་ཧེ་ཕཊཿ ཧཱུྃ་ཧཱུྃ་ཧཱུྃ་བི་ཤྭ་ཀྲོ་ཏ་ཛྭ་ལ་མཎྜ་ལ་ཕཊ་ཕཊ་ཕཊ་ཧ་ལ་ཧ་ལ། སྟོང་གསུམ་ཕྱོགས་བཅུ་རྡུལ་ཕྲན་སྙེད། །དེ་སྙིང་ཁྲོ་བོའི་དཀྱིལ་འཁོར་འཐོན། །དེ་དག་སངས་རྒྱས་མཛད་པ་ཡིས། །ཕྱོགས་བཅུའི་དྲེགས་པ་མ་ལུས་བསྒྲལ། །ༀ་མ་ཧཱ་བཛྲ་ཨ་ཏ་ཧ་ས་ཧ་ས། ཧ་ཧ་ཧཱུྃ་ཏ་ཨ་ཏི། དེ་ནས་དུར་ཁྲོད་བདག་པོ་དག །ཕྱག་རྒྱ་ཆེ་དང་ལྡན་པས་ནི། །བསྒྲུབ་པའི་གནས་སུ་བྱིན་བརླབས་ནས། །ཅི་རིགས་སུ་ནི་ལས་རྣམས་བྱ། །ༀ་ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚཱན་པྲ་བྷ་ན་ཙཀྲ་ཧ་ན་ཧ་ན་ཧཱུྃ་ཕཊ། སྟོང་གསུམ་གང་བའི་ཁྲག་འཐུང་རྣམས། །དབྱིངས་སུ་འདུས་ནས་ཞལ་གསུམ་པ། །ཕྱག་དྲུག་འབར་བའི་ཆ་ལུགས་དང་། །རིགས་ལྔ་ཁྲག་འཐུང་རང་གི་ཕྱོགས་སུ་བཀོད། །ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་སརྦ་ཏ་ཐཱ་ག་ཏ་མ་ཧཱ་ཀྲོ་དྷེ་ཤྭ་རཱི་སརྦ་དུཥྚན་ཧཱུྃ་ཕཊ། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་སུརྻ་རཏྣ་མ་ཧཱ་ཀྲོ་དྷི་ཤྭ་རི་བིད་མ་ཧཱུྃ་ཕཊ། ༀ་པདྨ་མ་ཧཱ་ཤྲཱི་ཧེ་རུ་ཀ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་ཧྲཱི་ཤྭ་པདྨ་བ་ད་མ་མུ་ཀ་མ་ཧཱ་ཀྲོ་དྷི་ཤྭ་རི་ཁཱ་ཧི་ཧཱུྃ་ཕཊ། ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་སརྦ་ཨ་མོ་གྷ་མ་ཧཱ་ཀྲོ་དྷེ་ཤྭ་རཱི་བི་ཤྭ་ཧཱུྃ་ཕཊ། རིགས་བཞིའི་ཁྲག་འཐུང་འཁོར་དང་བཅས། །གསང་བའི་མཁའ་ནས་གསལ་བཏོན་ནོ། །ངོ་མཚར་རྨད་བྱུང་རྔམས་སྟབས་དང་། །འབར་ཆེན་ཀློང་གི་འཁོར་ལོ་ཕྱོགས་བཞིར་གནས། །བཅོམ་ལྡན་ཁྲག་འཐུང་བུདྡྷ་ཧེ་རུ་ཀ །དབུ་གསུམ་སྨུག་ནག་མཐིང་ག་དམར་བའི་ཞལ། །ཏི་ར་དབྱུག་པ་རྡོ་རྗེ་ཁྱུང་ཆེན་གཡས། །རྒྱུ་ཞགས་བྷན་དམར་ཏི་ར་བ་སུ་གཡོན། །བཅོམ་ལྡན་ཁྲག་འཐུང་རཏྣ་ཧེ་རུ་ཀ །དབུ་གསུམ་སེར་ནག་མཐིང་ཁ་དམར་བའི་ཞལ། །ཕྱག་དྲུག་བྱིས་དབྱུག་རྡོ་རྗེ་དགྲ་སྟྭ་གཡས། །སྟོང་གི་འཇིག་རྟེན་བྷན་དམར་རྒྱུ་ཞགས་གཡོན། །བཅོམ་ལྡན་ཁྲག་འཐུང་པདྨ་ཧེ་རུ་ཀ །དབུ་གསུམ་དམར་ནག་མཐིང་ག་དཀར་བའི་ཞལ། །རྡོ་རྗེ་བེ་ཅོན་རྡོ་རྗེ་དགྲ་སྟྭ་གཡས། །སྟོང་གི་འཇིག་རྟེན་བྷན་དམར་གཤོལ་ནི་གཡོན། །བཅོམ་ལྡན་ཁྲག་འཐུང་ཀརྨ་ཧེ་རུ་ཀ །དབུ་གསུམ་ལྗང་ནག་དཀར་དང་དམར་བའི་ཞལ། །ཕྱག་དྲུག་རལ་གྲི་རྡོ་རྗེ་དགྲ་སྟ་གཡས། །སྟོང་གི་འཇིག་རྟེན་བྷན་དམར་གཤོལ་ནི་གཡོན། །དེ་ནས་དགྱེས་ཏེ་ཧ་བརྗོད་པས། །བྱང་ཆུབ་སེམས་ཀྱི་སྤྲིན་དག་ལས། །དཀར་མོའི་ཚོགས་དང་རྐུན་མོ་དང་། །རྨོངས་མོ་དང་ནི་རོ་ལོངས་དང་། སྤོས་མོ་དང་ནི་གཏུམ་མོ་དང་། །སྨེ་ཤ་ཅན་དང་མ་ཚོགས་མའི། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་རྔམ་འཐོན་ཏེ། །འབར་བའི་འཁོར་ལོའི་ཤར་མཆན་ནས། །འཁོར་བར་རྔམས་པའི་མདངས་ཀྱིས་འཁོད། །ༀ་བཛྲ་ཀ་རཱི་ཧ། ༀ་བཛྲ་ཙ་རཱི་ཧ། ༀ་བཛྲ་པྲ་མོ་ཧ། ༀ་བཛྲ་བེ་ཏ་ལཱི་ཧ། ༀ་བཛྲ་པུཀྐ་སཱི་ཧ། ༀ་བཛྲ་གྷ སྨ་རཱི་ཧ། ༀ་བཛྲ་སྨེ་ཤ་ནཱི་ཧ། ༀ་བཛྲ་ཙཎྜ་ལཱི་ཧ། ཀ་རཱི་བྷན་དམར་བྱིས་དབྱུག་སྔོ། །ཙ་རཱི་མདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱལ་མཚན་དམར། །བེ་ཏ་བྱིས་ཟ་རྡོར་འཕྱར་ནག །པུཀྐ་སེར་བྱིས་རྒྱུ་འདྲེན་སེར། །གྷསྨ་དུང་དམར་དཀྲུག་འཐུང་ལྗང་། །སྨེ་ཤ་སྔོ་ནག་བྱིས་སྙིང་ཟ། །ཙཎྜ་སེར་སྐྱ་བྱིས་ལུས་བགོ། །དེ་ནས་དགྱེས་ཏེ་ཧེ་བརྗོད་པས། །སེང་གདོང་ཆེན་མོའི་ཚོགས་དང་ནི། །སྟག་དང་ཝ་དང་ཁྱི་དང་བཞད། །དུར་བྱ་ཀངྐ་འུག་གདོང་ཆེའི། །ཚོགས་རྣམས་རང་གི་ལག་ཆ་དང་། །ངོ་མཚར་དག་ཏུ་ཆས་ཐོན་ནས། །འབར་བ་ཆེན་པོའི་བར་ཁྱམས་ཀྱི། །ཕྱི་རོལ་ཤར་གྱི་ཕྱོགས་དག་ནས། །འཁོར་བར་རྔམ་པའི་མདངས་ཀྱིས་འཁོད། །ༀ་བཛྲ་སིདྷ་མུ་ཁ་ཧེ། ༀ་བཛྲ་བྱ་ཀྲྀ་མུ་ཁ་ཧེ། ༀ་བཛྲ་ཤྭ་ན་མུ་ཁ་ཧེ། ༀ་བཛྲ་གྷྲྀ་དྷ་མུ་ཁ་ཧེ། ༀ་བཛྲ་ཀངྐ་མུ་ཁ་ཧེ། ༀ་བཛྲ་ཀ་ཀ་མུ་ཁ་ཧེ། ༀ་བཛྲ་ཨུ་ལུ་ཀ་མུ་ཁ་ཧེ། སེངྷ་ཁ་རོ་བསྣོལ་སེར་སེང་། །བྱེ་ཀྲྀ་གནས་ལྟ་བསྣོལ་དམར་སྟག །སྲི་ལ་བྱིས་ལྡག་ནག་མོ་ཝ། །ཤྭ་ན་འདྲལ་ལྟ་མཐིང་ཁ་ཁྱི། །གྷྲྀ་དྷ་མགྲིན་དམར་རྒྱུ་འདྲེན་རྒོད། །ཀཾ་ཀ་ཞིང་ཁྲག་སྣར་མགོ་རིང་། །ཁ་ཁ་བྱ་རོག་བལ་གྲི་ནག །ཨུ་ལུ་ལྕགས་ཀྱུ་མཐིང་ཚོགས་འུག །འཕྲོས་པས་སྤྲིན་ལས་ཧཱུྃ་བརྗོད་པས། །དཀྱིལ་འཁོར་འབར་བའི་ཕྱོགས་བཅུ་ན། །རྣམ་རྒྱལ་གཤིན་རྗེ་རྟ་མགྲིན་རྒྱལ། །བདུད་རྩི་དབྱུག་སྔོན་མི་གཡོ་མགོན། །འདོད་པའི་རྒྱལ་དང་སྟོབས་པོ་ཆེ། །ཧཱུྃ་མཛད་པདྨ་འཁྱིལ་པ་རྣམས། །སྟེང་འོག་ཕྱོགས་མཚམས་བདུད་འདུལ་ཞིང་། །རྔམས་པའི་སྟབས་ཀྱིས་བརྗིད་པར་གནས། །ༀ་པྲ་ཛྙཱ་ན་ཏ་ཀྲྀ་ཏ་ཨ་པ་ར་ཛི་ཏ་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་ཡ་མཱནྟ་ཀྲྀ་ཏ་ཡ་མཱནྟ་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་པདྨཱནྟ་ཀྲྀ་ཏ་ཧྱ་གྲྀ་ཝ་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་བིགྷྣནྟ་ཀྲྀ་ཏ་ཨ་མྲྀ་ཏ་ཀུཎྜ་ལཱི་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་ནཱི་ལ་དཎྜ་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་ཨ་ཙརྻ་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་ཊ་ཀི་ར་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་མ་ཧཱ་བྷ་ལ་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་ཧཱུྃ་ཀཱ་ར་བཛྲ་མ་ཧཱ་ཀྲོ་དྷ་ཧཱུྃ་ཕཊཿ ༀ་པདྨ་ཀུཎྜ་ལཱི་བཛྲ་མ་ཧཱ་ཀྲོ་དྷ་ཧཱུྃ་ཕཊཿ རྣམ་པར་རྒྱལ་བ་རྡོ་རྗེ་བྷན་དམར་དཀར། །གཤིན་རྗེ་གཤེད་པོ་ཐོད་དབྱུག་མཐིང་ནག་ཞལ། །རྟ་མགྲིན་དམར་མོ་དབྱུག་ཏོ་ལུ་གུ་རྒྱུད། །བདུད་རྩི་འཁྱིལ་བ་ལྗང་ནག་རྒྱ་གྲམ་དྲིལ་བུ་བསྣོལ། །དབྱུག་སྔོན་རིན་ཆེན་དབྱུག་ཏོ་སྡིགས་མཛུབ་ཁྲོ། །མི་གཡོ་ལྗང་སྔོན་རལ་གྲི་སྡིག་པ་བདུད། །འདོད་པའི་རྒྱལ་པོ་དམར་སྐྱ་རྡོ་རྗེ་སྦྲུལ་གྱིས་ཞགས། །སྟོབས་ཆེན་དུད་ཁ་རྡོ་རྗེ་རྔ་ཡབ་བསྣམས། །ཧཱུྃ་ཆེན་མཐིང་ག་རྡོ་རྗེ་དྲིལ་བུ་ཧཱུྃ་གི་རྒྱ། །པདྨ་དུད་ཁ་འཁོར་ལོ་ནེ་ལེ་གཏེར། །དེ་ནས་དགྱེས་ཏེ་ཕཊ་བརྗོད་པས། །རྡོ་རྗེ་སྲིང་འགྲོ་མ་ཚོགས་དང་། །གདོང་མོ་འཇིག་རྟེན་རོ་ལངས་མའི། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་འཇིགས་འཐོན་ཏེ། །དཀྱིལ་འཁོར་སྒོ་བཞིར་རྔམས་གཟུགས་གནས། །ༀ་བཛྲ་ཨཱརྻ་ཏེ་ཛ་ཏེ་ང་ཛཿཧཱུྃ། བཛྲ་ཨ་མོ་གྷ་ཧཱུྃ། བཛྲ་ལོ་ཀ་བམ། བཛྲ་བྷ་ལ་ཡ་བ་ཏོ་ཧོཿ རྟ་གདོང་དཀར་མོ་ལྕགས་ཀྱུ་འཛིན། །ཕག་གདོང་ནག་མོ་མཆེ་ཞགས་ཐོགས། །ཉི་ཟླ་དམར་མོ་ལྕགས་སྒྲོག་སྡོམ། །ཐལ་བྱེད་སྣ་ཚོགས་དྲིལ་འཁྲོལ་དགྱེས། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་གདན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །མ་ནུ་རཀྵ་སི། པྲཧྨ་ཎི། ར་དྲི། བིཥྞ་བེ། ཀུ་མཱ་རཱི། ཨིནྡྲ་ནི། བཛྲ་སིངྒ་ལཾ། ཨ་མྲྀ་ཏ། ས་མྱ། དཎྜ་དཾ། རཀྵ་སཱི། བཀྵ་སཱི། ར་དྷི་བཛྲ། རུ་དྷི་རེ་མ་ཏི། ཨེ་ཀ་ཙཱ་རི། མ་ངོ་ན་ཧ་ར་མ། སི་དྷི་ཀ །བཱ་ཡེ་བེ། མ་ཧཱ་མ་ར་ཎ་བཛྲ་ཨགྣེ། བ་ར་ཧཱི། ཙ་མུནྟྲི། སུ་ཏ་ནམ། བེ་རུ་ནི། བཛྲ་མ་ཧཱ་ཀ །ཙ་ཀ་ལ། ཀུམྦྷ་ཀརྞ། ལམ་བྷོ་དྷ་ར། བྷྱོ། མི་སྲིན་དམར་སེར་ཏྲི་ཤུལ་ཞིང་ཆེན་གཡག །ཚངས་མ་དམར་སྐྱ་རྩེ་ལྔ་བྷན་དམར་སྦྲུལ། །ཁྲོ་མོ་སེར་ནག་དབྱུག་ཏོ་སྤུ་གྲི་གཟིག །ཁྱབ་འཇུག་དཀར་དམར་རྒྱུ་ཞགས་དུང་དམར་ཟེར། །གཞོན་ནུ་སེར་ནག་ཕ་ཝཾ་འཁོར་ལོ་དྲིལ། །དབང་མོ་དམར་སེར་བམ་དབྱུག་ཁོག་ཆེན་དྲེད། །བྷྱོ། དབང་མོ་དམར་མོ་རྒྱུ་ཞགས་ཞིང་ཆེན་དམ། །བདུད་རྩི་སྔོ་ནག་ཆུ་སྲིིན་རིན་ཆེན་བུམ། །ཞི་བ་སྔོ་སྐྱ་གློ་སྙིང་བུམ་པ་སྡིག །བེ་ཅོན་ནག་མོ་བམ་ཆེན་གྲི་འདེབས་ཁྲ། །སྲིན་མོ་སེར་ནག་རུ་འདྲེན་རྔེའུ་ཆུང་ཝ། །ཟ་ཆེན་མཐིང་ནག་བམ་ཆེན་སྙིང་འབྱིན་སྟག །བྷྱོ། དགའ་བྱེད་དམར་ནག་ལྕགས་ཀྱུ་བགེགས་འདྲེན་རྒོད། །ཁྲག་འཐུང་དམར་མོ་རྩེ་ལྔ་དུང་དམར་རྟ། །གཅིག་པུ་དཀར་དམར་རྡོ་རྗེ་བྷན་དམར་ལྡིང་། །ཡིད་འཕྲོག་དམར་ནག་ཏིར་ཆུང་དུང་དམར་བྱི། །གྲུབ་པ་དཀར་དམར་པད་ཞགས་པུ་ཤུད་མགོ། །རླུང་མོ་ལྗང་སེར་རོ་ཟ་ཤ་ཕོའི་མགོ། །བྷྱོ། གསོད་བྱེད་དམར་ནག་རྔེའུ་ཆུང་རལ་གྲི་ཡ་ཏི་སྤྱང་། །མེ་མོ་ལྗང་ནག་རྒྱུ་འདྲེན་ཁ་དང་སྐྱིན། །ཕག་མོ་ལྗང་སེར་རྩེ་ལྔ་ཞིང་ཟ་ཕག །རྒན་བྱེད་དམར་མོ་དུང་དམར་རྒྱུ་འདྲེན་རྒོད། །སྣ་ཆེན་ལྗང་ནག་ཟངས་གྲི་ཞགས་པ་ར། །ཀླུ་མོ་སྔོ་སྐྱ་བྱ་རོག་དུང་དམར་གྲི། །ནག་མོ་ལྕགས་ཀྱུ་སྤུ་གྲི་ཁུ་བྱུག་མགོ། །ར་ནི་སྔོན་མོ་རྒྱུ་ཞགས་རོ་འདྲེན་པའི། །བུམ་རྣ་དམར་མོ་ལྕགས་སྒྲོག་ཀུན། །སྡོམ་སྤྲེའུ་གསུས་འཛིན་སེར་ནག་དྲིལ་ཆེན་དུང་དམར་སྦྱང་། །ཁྲག་འཐུང་དཀྱིལ་འཁོར་འཁོར་བཅས་ཀུན། །དང་པོར་བསྐུལ་དང་བསྐྱོད་པ་དང་། །རྫོགས་དང་མཐར་ཕྱིན་བྱ་བའི་ཕྱིར། །སོ་སོའི་སྙིང་པོ་ལན་བཞི་བརྗོད། །བདག་ཉིད་སངས་རྒྱས་ཐམས་ཅད་ཀྱི། །ཐུགས་ཀྱི་སྲས་སུ་བྱ་བའི་ཕྱིར། །བསྐུལ་ཚིག་དབྱངས་ཀྱིས་གསོལ་བཏབ་པས། །སྐུ་གསུང་ཐུགས་ཀྱི་རིན་ཆེན་དབྱིག །ཐིམ་པས་ལྷུན་བྱས་གཅིག་པའི་འོད། །སྙིང་པོ་བྱང་ཆུབ་སེམས་སུ་གནས། །དེ་ལས་སྙིང་པོ་སྤྲོ་བསྡུ་ཡིས། །ཕྱག་རྒྱ་ཆེན་པོའི་དཀྱིལ་འཁོར་རྫོགས། །དེ་ལྟར་དཀྱིལ་འཁོར་གསལ་འཐོན་ཏེ། །མཐའ་དབུས་མེད་པའི་ཕྱོགས་བཅུ་ནས། །ཀུན་ཀྱང་ཁྲག་འཐུང་འབར་བའི་ཚོགས། །ཡེ་ནས་མ་བཅོས་ལྷུན་གྱིས་རྫོགས། །ལུས་ངག་ཡིད་གསུམ་སྐུ་གསུང་རྡོ་རྗེའི་ཐུགས། །ཕུང་པོ་ལྔ་ཉིད་རྣམ་གྲོལ་ཧེ་རུ་ཀ །འབྱུང་བ་ལྔ་ཉིད་ཁྲོ་མོ་དབྱིངས་ཕྱུག་ཡུམ། །རྣམ་ཤེས་དབང་པོ་ཡུལ་དུས་ལ་སོགས་པ། །མ་མོ་ཕྲ་མེན་ཅི་བགྱིད་ཕོ་ཉའི་ཚོགས། །ལུས་ཀྱི་ཡན་ལག་ཏ་ཀྲིཏ་ཁྲོ་རྒྱལ་བཅུ། །དོན་དམ་སྤྲོས་མེད་བྱང་ཆུབ་སྙིང་པོ་ནི། །མཉམ་ཉིད་མི་གཡོ་ཆོས་དབྱིངས་ནམ་མཁའ་ཆེ། །རང་བྱུང་ཡེ་ཤེས་རྩོལ་བྲལ་གནས་མེད་པ། །གཞི་རྩ་མེད་པའི་སེམས་ཉིད་དེ་ལྟར་སྣང་། །དབང་པོ་རང་ཉམས་ཕྱལ་པར་མི་གཏང་ཞིང་། །སྤྱོད་ལམ་ཀུན་ཏུ་རང་གི་ཏིང་འཛིན་བསྒོམ། །ཤེས་པར་བྱ་དང་བསྲུང་དང་བསྒྲུབ་པ་དང་། །མི་སྤང་བ་དང་མཆོད་པའི་དམ་ཚིག་རྣམས། །བཀའ་བཞིན་སྲུང་ཞིང་ཀློང་དུ་གོམས་པར་བྱ། །དམ་ཚིག་འདི་ལས་མི་འདའ་རྣལ་འབྱོར་པ། །ཀུན་ཏུ་བཟང་དང་མཉམ་པའི་སྤྱོད་ཡུལ་ཏེ། །འདི་ལས་འདས་པར་བྱེད་ན་བསྲེག་པར་འགྱུར། །སྤྱན་དྲངས་མཆོད་པ་རྫོགས་པ་དང་། །བསྒོམ་དབྱངས་ཡི་གེ་འབྲུ་བརྒྱད་དག །ལེ་ལོ་མེད་པའི་བརྩོན་འགྲུས་ཀྱིས། །བར་ཆད་མེད་པའི་འཕྲོ་འདུ་བྱ། །རྟགས་དང་མཚན་མ་བྱུང་བ་ནས། །སྒྲུབ་པ་ཆེན་པོའི་དངོས་གྲུབ་བླང་། །དངོས་གྲུབ་དེ་དག་སྤྱད་པ་ཡང་། །དང་པོ་བདེ་གཤེགས་དཀྱིལ་འཁོར་ལ། །གཉིས་པ་རིག་འཛིན་གྲུབ་པ་ལ། །གསུམ་པ་གཙོ་བོ་མཆོག་ལ་དབུལ། །བཞི་པ་སྒྲུབ་པོ་བདག་ཉིད་ལ། །ལྔ་པ་གྲོགས་མཆོག་རྣམས་ལ་སྦྱིན། །དེ་དག་ལས་ཀྱང་ཅི་རིགས་པ། །འཛིན་ཆགས་མེད་པར་བགོ་བར་བྱ། །ལས་ཀྱི་ལྷག་ཆད་བསྐང་བའི་ཕྱིར། །གཞུང་བཞིན་བཤགས་ནས་སྨོན་ལམ་གདབ། །སྙིང་པོ་དྲན་པར་ལྷར་བསྐྱེད་ལ། །བར་ཆད་བགེགས་ལས་བསྲུང་བའི་ཕྱིར། །ཚིག་འདི་སྔགས་དང་བཅས་པར་བརྗོད། །ཅིས་ཀྱང་མི་ཚུགས་མི་ཤིགས་པའི། །སྟོང་པའི་གོ་ཆ་བླ་ན་མེད། །མཚན་མའི་ཡུལ་ཀུན་བཅོམ་ནས་ཀྱང་། །ཐམས་ཅད་དུ་ནི་རྒྱལ་བར་གནས། །ༀ་བཛྲ་ཀ་བ་ཙ་ཀ་ཝ་མན། ཧཱུྃ། མིང་དང་མཚན་མར་མ་གྲུབ་པ། །མི་གནས་མ་བྲལ་འདུས་མ་བྱས། །ཆོས་ཀྱི་དབྱིངས་ཀྱིས་བསྲུངས་པ་ན། །སངས་རྒྱས་ཀྱིས་ཀྱང་མི་གཟིགས་སོ། །ༀ་བཛྲ་རཀྵ་མན་ཧཾ་ཧཱུྃ་བཾ་ཧཱུྃ་྄ཕཊ། རིན་ཆེན་འབར་བའི་དབང་མཆོག་འདིས། །བླ་མེད་ཆོས་ཀྱི་རྒྱལ་པོའི་རྟགས། །སངས་རྒྱས་འདུས་པའི་སྐུ་གསུང་ཐུགས། །རབ་ཏུ་བརྟན་པར་དབང་བསྐུར་རོ། །ༀ་རཏྣ་སརྦ་མུ་ཏྲ་མཱ་ལེ་ཨཱཿ ཨ་བྷིཥཉྩ་ཧཱུྃ། སྭ་བྷཱ་ཝ་རཱ་ག་བ་སཱ་ན་ཏྲི་ཏི་ཀུ་རུ་ཕཊཿ མཉམ་པ་ཉིད་ལས་མ་ཡེངས་ཤིང་། །དོན་རྣམས་ཡིད་ལ་དྲན་པར་བྱ། །དཔལ་ཆེན་ཀུན་བཟང་སྒྲུབ་ཐབས་འདི། །བླ་མའི་ལུང་ལས་དེས་བརྩམས་པས། །ཁྲོ་རྒྱལ་ཡེ་ཤེས་སྐུ་གསུང་ཐུགས། །འགྲོ་བ་ཀུན་གྱིས་འགྲུབ་པར་ཤོག །ཁྲོ་བོ་ཡང་དག་སྒྲོན་མ་སློབ་དཔོན་བི་མ་ལ་མི་ཏྲས་མཛད་པ་རྫོགས་སོ། །དགེའོ།། །།
| 