ལྟ་བ་ཡང་དག་སྒྲོན་མ། གཉེན་དཔལ་དབྱངས།

ལྟ་བ་ཡང་དག་སྒྲོན་མ་བཞུགས། དཔལ་ལྡན་ཐུགས་ཀྱི་དཀྱིལ་འཁོར་ཉི་མའི་འོད་སྟོང་གིས། །ཤིན་ཏུ་འབར་བའི་ཟེར་ཙམ་བདག་བློ་མུན་པར་བྱུང་། །དབྱངས་དང་ཚིག་འདས་ནམ་མཁའི་མཚན་ཉིད་ལས་འདས་པའི། །རང་སེམས་སྐྱེ་མེད་ཟབ་མོའི་དོན་གྱི་ཕྱོགས་ཙམ་སྣང་། །རང་གིས་རྟོགས་པ་མཁས་པས་གསུངས་པའི་རྣམ་མང་བ། །རྟོག་གེ་བདག་འདྲའི་སྤྱོད་ཡུལ་བརྩམ་པར་མི་འོས་ཀྱང་། །རིག་པའི་བརྗོད་བྱང་ཙམ་འདི་ངེས་དོན་མོས་རྣམས་ཀྱི། །ཆོས་ཕྱིར་འབྲང་བའི་བློ་ཡིས་དཔྱད་ཅིང་གོམས་པར་བྱ། །བསྐལ་པ་མང་པོར་རྒྱལ་བ་རྣམས་ལ་ནི། །དགེ་རྩ་བསྐྱེད་ཅིང་རང་སེམས་སྦྱངས་པ་ཡིས། །རྣལ་འབྱོར་དམ་པ་ངེས་པའི་ལུང་ཆེན་མ། །ཤེས་རབ་མཆོག་ལྡན་རིག་པའི་མོས་བློ་གསལ། །རྣམ་པར་མི་རྟོག་དོན་དམ་རང་བཞིན་གྱི། །རིག་པའི་ཚུལ་ཆེན་སེམས་ཀྱིས་དམིགས་པ་ནི། །ལུང་དང་མན་ངག་རིགས་པས་ཐག་བཅད་དེ། །ཆོས་ཀྱི་རང་བཞིན་ཡང་དག་ཡིད་ཆེས་བྱ། །ཇི་ལྟར་ནམ་མཁའ་ལ་ནི་ཐ་སྙད་དུ། །མིང་དང་ཚིག་གིས་བརྗོད་པར་བྱེད་མོད་ཀྱི། །མཚན་མ་མེད་ཅིང་སྤྲོས་དང་བྲལ་བ་སྟེ། །ངོ་བོ་ཉིད་ཀྱིས་སེམས་ཀྱི་ཡུལ་ལ་འདས། ། ཇི་ལྟར་སྨིག་རྒྱུའི་ཕུང་པོ་སྣང་བ་དག །སྣང་བ་ཉིད་ན་ནམ་མཁའི་རང་བཞིན་ལྟར། །དེ་བཞིན་ཆོས་རྣམས་སྣ་ཚོགས་སྣང་བ་ཡང་། །སྣང་བ་ཉིད་ན་མཚན་མེད་ནམ་མཁའ་བཞིན། །རྒྱ་ཆེ་རབ་ཟབ་ཐེག་མཆོག་ཡངས་པའི་ལམ། །དོན་དམ་དམིགས་མེད་སྤྲོས་པ་ཀུན་ལས་འདས། །བདག་དང་ཆོས་ཀྱི་དབྱིངས་སུ་མཉམ་པ་ཡི། །དབུ་མའི་དོན་ཅན་བློ་ཡིས་གོ་བར་བྱོས། །ཡང་དག་དོན་དམ་ཅིག་ཅར་གོ་ནས་ནི། །ཡོད་མེད་ལ་སོགས་སེམས་ཀྱི་ཡུལ་འདས་ཤིང་། །རེ་དང་དོགས་པའི་མཐའ་ནི་རབ་སྤངས་ནས། །རྩོལ་བ་མེད་པའི་བརྩོན་འགྲུས་བརྩམ་པར་བྱ། །ཆོས་རྣམས་ཐམས་ཅད་ཡེ་ནས་རོ་གཅིག་ཕྱིར། །སྒོམ་པ་དང་ནི་བསྒོམ་བྱའང་དམིགས་སུ་མེད། །སེམས་ཉིད་ཡེ་ནས་ཆོས་ཉིད་ཡིན་ཤེས་ན། །ཆོས་ཀྱི་དབྱིངས་ཉིད་གཞན་དུ་བསྒོམ་མི་དགོས། །རྨི་ལམ་དག་གི་བདེ་དང་སྡུག་བསྔལ་དག །སད་པར་གྱུར་ན་རང་བཞིན་མཉམ་པ་ལྟར། །རྣམ་པར་རྟོག་དང་མི་རྟོག་གཉིས་ཀ་ཡང་། །ཤེས་པས་རིག་ན་རང་བཞིན་ཡོངས་ཀྱིས་མཉམ། །དེ་ལྟར་དུས་གསུམ་རྣམ་པར་དག་པ་དང་། །རང་བཞིན་ཉིད་ལས་མ་འདས་ཤེས་ན་ནི། །སྒྲོ་འདོགས་བུས་པའི་རྗེས་སུ་མ་འབྲངས་ནས། །རང་བཞིན་ཉིད་དུ་ཡོང་གིས་བཅོས་མི་དགོས། །ཇི་ལྟར་ནམ་མཁའ་མཚན་མ་མེད་པའི་ཕྱིར། །ནམ་མཁའ་དེ་ཉིད་བསྒོམ་པར་མི་འགྱུར་བཞིན། །ངོ་བོ་ཉིད་ཀྱིས་མ་སྐྱེས་སེམས་ཀྱིས་ནི། །མ་སྐྱེས་དེ་ཉིད་བསྒོམ་པར་ག་ལ་འགྱུར། །མི་མཐུན་པ་དང་གཉེན་པོ་དབྱེར་མེད་དོན། །རང་གིས་ཤེས་ན་རྩོལ་བ་ཀུན་སྤངས་ཏེ། །བཏང་སྙོམས་ཆེན་པོར་མ་བཅོས་ངང་བཞག་ན། །ཐ་སྙད་ཙམ་དུའང་བསྒོམ་ཞེས་དེ་ལ་བྱ། །སྐྱོན་དང་ཡོན་ཏན་གཉིས་པོ་མ་སྐྱེས་ཕྱིར། །རྣམ་པར་རྟོག་པའི་མཚན་མ་ཅི་བྱུང་ཡང་། །མ་བཀག་རང་བྱུང་མ་འབྲངས་རང་ཞི་སྟེ། །མ་བཅོས་མ་བྱས་རང་གི་ངང་གིས་རྒྱལ། །ལྟ་བ་ཡང་དག་སྒྲོན་མ་རྫོགས་སོ།། །།གཉན་ཨཱ་ཙརྻ་དཔལ་དབྱངས་ཀྱིས་མཛད་པའོ།།