cover

སྔ་འགྱུར་བཀའ་མའི་ཆོས་སྡེའི་གླེགས་བམ་གྱ་གསུམ་པ།

གླེགས་བམ། འུ༽

སློབ་དཔོན་པདྨ། བི་མ་ལ།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

གསང་སྔགས་ལམ་རིམ་འགྲེལ་པ་རིན་ཆེན་ཕྲེང་བ། སློབ་དཔོན་པདྨ།

གསང་སྔགས་ལམ་རིམ་འགྲེལ་པ་རིན་ཆེན་ཕྲེང་བ་ཞེས་བྱ་བ་བཞུགས་སོ། །སློབ་དཔོན་པདྨའི་གསུང་བཀའ་གཏེར་གཉིས་ལྡན་མའོ། །འགྲེལ་པ་རིན་ཆེན་ཕྲེང་བ་ཞེས་བྱ་བ། བླ་མ་ཡི་དམ་མཁའ་འགྲོའི་ཚོགས་ལ་ཕྱག་འཚལ་ལོ། །གང་ཞིག་གསང་སྔགས་རྡོ་རྗེ་ཐེག་པའི་དོན། །ཚེ་གཅིག་སངས་རྒྱས་ཐོབ་བྱེད་ཁྱད་པར་ཆོས། །ཉམས་ལེན་ལམ་རིམ་རིན་ཆེན་སྒྲོན་མ་ཡི། །བཤད་འགྲེལ་རིན་ཆེན་ཕྲེང་བ་བྲི་བར་བྱ། །མན་ངག་འདི་ལ་གསུམ་སྟེ། ཀླད་དང་། གཞུང་དང་། མཇུག་གོ། །དང་པོ་ཀླད་དོན་ལ་གཉིས་ཏེ། ཕྱག་འཚལ་བ་དང་། རྩོམ་པར་དམ་བཅའ་བའོ། །དང་པོ་ཕྱག་འཚལ་ལ་གསུམ་སྟེ། བསྡུས་དོན། དགོས་དོན། ཚིག་དོན་ནོ། །དང་པོ་བསྡུས་དོན་ལ་བཞི་སྟེ། གང་ལ། གང་གིས། དུས་ནམ། ཚུལ་ཇི་ལྟར་བཙལ་བའོ། །དང་པོ་ནི། གང་ལ་ཕྱག་འཚལ་ན། ཀུན་བཟང་ལ། གཉིས་པ་ནི། གང་གིས་བཙལ་ན། སློབ་དཔོན་པདྨས། གསུམ་པ་ནི། དུས་ནམ་འཚལ་ན། མན་ངག་འདི་རྩོམ་དུས། བཞི་པ་ནི། ཚུལ་ཇི་ལྟར་བཙལ་བ། རང་བཞིན་གཉིས་སུ་མེད་པའོ། །གཉིས་པ་དགོས་དོན་ལ་ལྔ། ཕྱག་བཙལ་བས་ཚོགས་རྫོགས། དེས་བར་ཆད་མི་འབྱུང་། དེས་རྩོམ་པ་མཐར་ཕྱིན། དེས་རང་གཞན་གྱི་དོན་འགྲུབ། དེས་ཐུགས་དགོངས་རྫོགས་པའི་དགོས་པའོ། །གསུམ་པ་ཚིག་དོན་ནི། གཉིས་བཅོམ་གཉིས་ལྡན་གཉིས་འདས་གཉིས་དཔལ་མཆོག །བྱ་བ་ནི། བཅོམ་པ་ནི། ཡུལ་དང་ཡུལ་ཅན་གཟུང་བ་དང་འཛིན་པ་གཉིས་བཅོམ། ལྡན་པ་གཟུང་འཛིན་གཉིས་མེད་རིག་པ་ཡེ་ཤེས་ཀྱི་དོན་གཉིས་དང་ལྡན། འདས་པ། ཡོད་མེད་གཉིས་ཀྱི་མཐའ་ལས་འདས། གཉིས་མེད་ཀྱི་དོན་རང་ཆས་སུ་ཡོད་པ་གནས་པ་གཞིའི་དཔལ། དེ་ཇི་བཞིན་ཤེས་པ་རྟོགས་པ་མཆོག་གི་དཔལ་གཉིས་དང་ལྡན། མ་ལུས་འདུས་ཤིང་ཡང་དག་ཟོལ་མེད་པ། །བྱ་བ་ནི། མ་ལུས་པས་ན་ཀུན་ཞེས་བྱ་སྟེ། སངས་རྒྱས་ཀུན་གྱི་དགོངས་པ་ལྷག་མ་མེད་པར་འདུས་པས་ན་འདུས་ཞེས་བྱ་སྟེ། དུས་གསུམ་སངས་རྒྱས་ཀྱི་དགོངས་པ་ཀུན་ཏུ་བཟང་པོའི་ཐུགས་སུ་འདུས། སྤྱོད་ཡུལ་མཛད་པ་ཡོངས་སུ་དག་པས་ན་བཟང་པོ་ཞེས་བྱ་སྟེ། རིག་པ་གཉིས་མེད་ལ་གཉིས་འཛིན་འཁྲུལ་པའི་ཟོལ་མེད་པའོ། །སངས་རྒྱས་བདེ་གཤེགས་དྲུག་པ་ཀུན་ཏུ་བཟང་། །བྱ་བ་ནི། སངས་རྒྱས་ནི། གཉིས་འཛིན་འཁྲུལ་པ་ཐམས་ཅད་སངས། །གཉིས་མེད་ཡེ་ཤེས་ངོ་བོ་རྒྱས། །དགོངས་པ་ནར་སོན་པས་ན་བདེ་གཤེགས། སྐུ་ལྔ་དབྱེར་མེད་པས་ན་དྲུག་པ། དགོངས་པ་མ་ལུས་པས་ན་ཀུན། གཅིག་ཏུ་འདུས་པས་འདུ། སྐྱོད་ཡུལ་ཡོངས་སུ་དག་པས་ན་བཟང་པོའོ། །གུས་གདུང་དད་པའི་སྒོ་ནས་ཕྱག་འཚལ་ལོ། །ཞེས་པ་ནི། ལུས་གུས་པ། ཡིད་གདུང་བ། སེམས་དད་པའི་སྒོ་ནས་ཕྱག་འཚལ་ལོ། །གཉིས་པ་རྩོམ་པར་དམ་བཅའ་བ་ལ་བཞི་སྟེ། གང་གིས། རྩོམ་པ། གང་། བརྩམ་པ། གང་གི་ཕྱིར། བརྩམས་པ། ཚུལ་ཇི་ལྟར་བརྩམས་པའོ། །དང་པོ་ནི། གང་གིས་རྩོམ་ན། བདག་ཉིད་རྣལ་འབྱོར་ཨོ་རྒྱན་པད་འབྱུང་གིས། །ཞེས་པས། ཡང་དག་པའི་དོན་རྟོགས་པ་ལ་གོམས་པས་ན་བདག་ཉིད། རྣལ་མའི་དོན་ལ་རིག་པ་ཡེ་ཤེས་ཀྱི་དགོངས་པ་འབྱོར་བས་ན་རྣལ་འབྱོར། ཡུལ་ཨོ་རྒྱན་དུ་མེ་ཏོག་པདྨ་ལ་བརྫུས་ནས་བྱོན་པས་ན་ཨོ་རྒྱན་པད་འབྱུང་། ཞེས་བྱ་སྟེ། དེས་མཛད་པའོ། །དེ་ནི་སྐུ་ཆེ་བའི་ཡོན་ཏན་དང་ལྡན་ཞིང་མན་ངག་རྩོམ་པའི་ཚད་དུ་གྱུར་པ་ཡིན་ནོ། །གཉིས་པ་ནི། གང་བརྩམ་པ། རྡོ་རྗེ་ཐེག་པའི་ཚེ་གཅིག་ཐོབ་བྱེད་ལམ། །ཞེས་པས། རང་གཞན་གྱི་ལུས་ངག་ཡིད་གསུམ་དང་། ཧེ་རུ་ཀའི་སྐུ་གསུང་ཐུགས་དབྱེར་མི་ཕྱེད་པས་ན་རྡོ་རྗེ། དེ་ནི་ཡཱ་ན་ཞེས་པ་ལ་དྲངས་ནས་ཐེག་པ་སྟེ། ཡང་དག་སངས་རྒྱས་ཀྱི་སར་འདེགས་པའོ། །མ་ན་ཏྲ་ཞེས་པ་ལ་དྲངས་ན་སྔགས་ཏེ། ཤེས་སྐྱོབ་ཅི་ནུས་པ་དང་ལྡན་པའོ། །བཛྲ་ལ་དྲངས་པས་རྡོ་རྗེ་འཇིག་བྲལ་མེད་པའོ། །དེས་ན། བཛྲ་མན་ཏྲ་ཡཱ་ན། ཞེས་པས། རྡོ་རྗེ་སྔགས་ཀྱི་ཐེག་པ་ཞེས་གསུངས་ཏེ། ཕྱི་མཚན་ཉིད་ལས་ཁྱད་པར་འཕགས་སོ། །དེ་ཡང་མཚན་ཉིད་པ་སངས་རྒྱ་བ་ལ་མི་ཚེ་དང་བསྐལ་པ་མང་པོ་བགྲང་དགོས་ལ། འདིར་ཚེ་གཅིག་ལུས་གཅིག་ཁོ་ནར་སངས་རྒྱ་བའོ། །གསུམ་པ་ནི། གང་གི་ཕྱིར་བརྩམས་པ། ཕྱི་རབས་རྣལ་འབྱོར་ལས་ལྡན་དོན་ཆེད་དུ། །ཞེས་པ་སྟེ། གོང་མའི་རྗེས་སུ་འཇུག་པས་ན་ཕྱི་རབས། དཀར་པོའི་ལས་འབྲེལ་ཡོད་པས་ན་རྣལ་འབྱོར། གསང་སྔགས་ཀྱི་སྐལ་པ་ཡོད་པས་ན་ལས་ལྡན་ཏེ། དེ་དག་གི་དོན་དུ་མཛད་པའོ། །བཞི་པ་ནི། ཚུལ་ཇི་ལྟར་བརྩམས་པ། ཉམས་ལེན་ལམ་རིམ་རིན་ཆེན་སྒྲོན་མ་བྲི། །ཞེས་པས། དོར་བྱ་ལ་ལོག །བླང་བྱ་ལ་འཇུག་པས་ན་ཉམས་ལེན། དེ་ཉིད་ལ་བརྟེན་ནས་ཡང་དག་སངས་རྒྱས་ཀྱི་སར་ཕྱིན་ཅིང་བགྲོད་པར་བྱེད་པས་ན་ལས། དེའི་ཐབས་རིམ་པར་སྟོན་པས་ན་རིམ། མཆོག་དང་ཐུན་མོང་གི་ཡོན་ཏན་ཐམས་ཅད་འབྱུང་བ་ན་རཏྣ། མ་རིག་པའི་མུན་པ་སེལ་བར་བྱེད་པས་ན་སྒྲོན་མ་ཞེས་བྱའོ། །གཉིས་པ་གཞུང་གི་དོན་ལ་གསུམ་སྟེ། གཞི། ལམ། འབྲས་བུའོ། །དང་པོ གཞི་ལ་གཉིས་ཏེ། གནས་ལུགས་དང་། འཁྲུལ་ལུགས་སོ། །དང་པོ་གནས་ལུགས་ངོས་བཟུང་བ་ནི། གཉིས་མེད་ལྷུན་གྲུབ་ཀ་དག་ཡེ་སངས་རྒྱས། །ཞེས་པས། འདི་ལ་བཞི་སྟེ། དང་པོ་གཉིས་མེད་དུ་གནས་པའི་གནས་ལུགས་སོ། །དེ་ལ་ལྔ་ལས། ཅིར་ཡང་སྣང་ལ་གང་དུ་ཡང་ངེས་པ་མེད་པས། ངོ་བོ་སྣང་སྟོང་གཉིས་མེད། སེམས་ཉིད་གདོད་མ་ནས་མ་སྐྱེས་ལ། མ་སྐྱེས་པ་ཉིད་ཅིར་ཡང་མ་འགགས་པས། མཚན་ཉིད་སྐྱེ་འགགས་གཉིས་མེད། སྣང་ཚད་རང་གི་སེམས་ཡིན་ལ། སེམས་པས་མ་གཏོགས་པའི་ཆོས་གཞན་མེད་པས། སྣང་བ་རང་སྣང་གཉིས་མེད། རང་སྣང་གཉིས་མེད་ཀྱི་སེམས་དེ་སྔར་མེད་གསར་དུ་བྱུང་བ་མ་ཡིན་ཏེ། གདོད་ནས་ཡོད་པས། གནས་ལུགས་རང་གཞན་གཉིས་མེད། དེ་ལྟར་གཉིས་མེད་མ་ཡིན་པའི་ཆོས་གཞན་མེད་པས། གཉིས་མེད་ཆེན་པོའོ། །མདོར་ན་ཆོས་ཉིད་སྟོང་པ་ལས། ཆོས་ཅན་འཁོར་འདས་ཀྱི་ཆོས་ཐམས་ཅད་སྣང་རུང་མི་འགགས་པ་འཆར་བས། གཉིས་མེད་མ ཐའ་ལས་གྲོལ་བའོ། །དེ་ལྟར་གཉིས་མེད་དུ་ངོ་སྤྲོད་པའི་དགོས་པ་ནི། གཞན་སེལ་གྱིས་གཉིས་ཆོས་ཐ་དད་དུ་འཛིན་པའི་ཞེན་པ་གྲོལ་བ། དོན་གཉིས་གཉིས་མེད་རྟོགས་པ། ངོ་བོ་གཉིས་བསྡུས་ཀྱི་ཆོས་ཐམས་ཅད་གཉིས་མེད་ཐིག་ལེ་ཉག་གཅིག་ཏུ་གནས་པའོ། །གཉིས་པ་ལྷུན་གྲུབ་ཏུ་གནས་པའི་གནས་ལུགས་ལ་ཡང་ལྔ་ལས། ཆོས་ཐམས་ཅད་ཀྱི་གཤིས་ཅིར་ཡང་མ་གྲུབ་པ་ནི། ཆོས་ཉིད་ལྷུན་གྲུབ། ཆོས་ཐམས་ཅད་ཀྱི་རྩལ་ཅིར་ཡང་མ་འགགས་པ་ནི། ཆོས་ཅན་ལྷུན་གྲུབ། ཆོས་ཐམས་ཅད་ཀྱི་ངོ་བོ་ཅིར་ཡང་མི་རྟོག་པ་ནི། གཉིས་མེད་ལྷུན་གྲུབ། དེ་གཞན་གྱིས་བྱས་པ་མ་ཡིན་ཏེ། གདོད་མ་ནས་དེ་ལྟར་གྲུབ་པ་ནི། རང་བཞིན་ལྷུན་གྲུབ། འཁོར་འདས་ཀྱི་ཆོས་ཐམས་ཅད་ལ་ལྷུན་གྲུབ་མ་ཡིན་པའི་ཆོས་གཞན་མེད་པས། ལྷུན་གྲུབ་ཆེན་པོའོ། །མདོར་ན་ཆོས་ཉིད་སྟོང་པ་ལ། ཆོས་ཅན་འཁོར་འདས་ཀྱི་ཆོས་ཐམས་ཅད་འབྱུང་རུང་དུ་གྲུབ་ལ། བདེན་པ་རང་རྒྱུད་དུ་མི་གནས་པས། ལྷུན་གྲུབ་མཐའ་དང་བྲལ་བའོ། །དེ་ལྟར་ལྷུན་གྲུབ་ཏུ་ངོ་སྤྲད་པས། །གཞན་སེལ་གཞན་ནས་རྩོལ་བའི་ཞེན་པ་གྲོལ་བའོ། །དོན་གཉེར་བཙལ་ཞིང་བསྒྲུབ་མི་དགོས་པར། རྟོགས་པའི་ངོ་བོ་སྣང་སྲིད་འཁོར་འདས་ཀྱི་ཆོས་ཐམས་ཅད་རང་གི་སེམས་སུ་ལྷུན་གྲུབ་པའོ། །གསུམ་པ་གཞི་རྣམ་དག་ཏུ་གནས་པའི་གནས་ལུགས་ལ་ཡང་ལྔ་ལས། རང་བཞིན་སྟོང་པ་ཉིད་ལ་དངོས་པོའི་ཆོས་གནས་དག་པ་ནི། དབྱིངས་རྣམ་དང་། སྟོང་པའི་རྩལ་འགགས་མེད་དུ་རང་སྣང་བ་ལ་རང་རྒྱུད་ཀྱི་བདེན་པ་ཀ་ནས་དག་པ་ནི། ཡེ་ཤེས་རྣམ་དག །ངོ་བོ་སྣང་སྟོང་གཉིས་མེད་ལ་ཐ་དད་ཀྱི་ཆོས་གནས་དག་པ་ནི། གཉིས་མེད་རྣམ་དང་། དེ་གློ་བུར་དུ་བྱས་པ་མ་ཡིན་ཏེ་གདོད་ནས་ཡོད་པ་ནི། རང་བཞིན་རྣམ་དག །ཀ་དག་མ་ཡིན་པའི་ཆོས་གཞན་མེད་པ་ནི། རྣམ་དག་ཆེན་པོའོ། །མདོར་ན་ཆོས་ཉིད་སྟོང་པ་ལ་ཆོས་ཅན་འཁོར་འདས་ཀྱི་ཆོས་ཐམས་ཅད་སྣང་རུང་དུ་མ་སྤངས་ལ། རང་བཞིན་རྣམ་པར་དང་པས། རྣམ་དག་མཐའ་བྲལ་ལོ། །དེ་ལྟར་རྣམ་དག་ཏུ་ངོ་སྤྲོད་པས། གཞན་སེལ་འཁྲུལ་བ་རང་རྒྱུད་པར་འཛིན་པའི་ཞེན་པ་གྲོལ་བ། དོན་གཉེར་རྣམ་དག་རྟོགས་བ། ངོ་བོ་ཆོས་ཉིད་རང་བཞིན་གྱིས་རྣམ་པར་དག་པའོ། །བཞི་པ་ཡེ་ནས་སངས་རྒྱས་སུ་གནས་པའི་གནས་ལུགས་ནི། རང་རིག་པ་བྱང་ཆུབ་ཀྱི་སེམས་ཏེ། གཉིས་ཆོས་འཁྲུལ་བ་སངས་ལ། གཉིས་མེད་ཡེ་ཤེས་རྒྱས་པས་སངས་རྒྱས་སོ། །དེ་ཡང་འཁྲུལ་པ་ཡོད་པ་གཅིག་མེད་པར་སངས་ནས། གཉིས་མེད་མེད་པ་གཅིག་ཡོད་པར་རྒྱས་པ་ནི་མ་ཡིན་ཏེ། གཤིས་ལ་འཁྲུལ་པ་མ་གྲུབ་ཅིང་། །ངོ་བོ་གཉིས་མེད་ཡེ་ཤེས་སུ་རྒྱས་པས་ཡེ་ནས་སངས་རྒྱས་པ་ཡིན་ཏེ། རང་བཞིན་སྟོང་པ་ཆོས་སྐུ། རང་མདངས་གསལ་བ་ལོངས་སྐུ། གསལ་སྟོང་གཉིས་མེད་སྤྲུལ་སྐུ། རང་བཞིན་སྟོང་པ། ཇི་ལྟ་བ། རང་མདངས་གསལ་བ། ཇི་སྙེད་པ། གསལ་སྟོང་གཉིས་མེད་དམ། དབྱེར་མེད་དེ་མཁྱེན་པའི་ཡེ་ཤེས་སོ། །གཤིས་ལ་འཁྲུལ་པ་མེད་པ། སྤངས་པ་ཕུན་སུམ་ཚོགས། ངོ་བོ་གཉིས་མེད་དུ་ཡོད་པ། རྟོགས་པ་ཕུན་སུམ་ཚོགས། དེ་ལྟར་ཡེ་ནས་སངས་རྒྱས་མ་ཡིན་ན། བསྒོམས་ཀྱང་སངས་རྒྱས་མི་འབྱུང་སྟེ། ས་ལེ་སྦྲམ་ཡེ་ནས་གསེར་མ་ཡིན་ན། བྱས་ཀྱང་གསེར་དུ་མི་འགྲོ་བ་བཞིན་ནོ། །དེ་ལྟར་ཡེ་ནས་སངས་རྒྱས་སུ་བསྟན་པས། གཞན་སེལ་གཞི་ལ་གྲུབ་པར་འདོད་པའི་ཞེན་པ་གྲོལ་བ། དོན་གཉིས་ཡེ་ནས་སངས་རྒྱས་སུ་རྟོགས་པ། ངོ་བོ་རང་རིག་སྐུ་དང་ཡེ་ཤེས་སུ་རྟོགས་པའོ། །གཉིས་པ་འཁྲུལ་ལུགས་ནི། སྙིང་པོ་མ་རིག་ལས་ཉོན་ལོག་སྡུག་བསྔལ། ཞེས་པས། འདི་ལ་ལྔ་སྟེ། དང་པོ་འཁྲུལ་པའི་གཞི་ནི། སེམས་ཉིད་བདེ་གཤེགས་སྙིང་པོ་ཡོད་མེད་ཀྱི་མཐའ་དང་བྲལ་བའོ། །དེ་ཉིད་རང་ངོ་མ་ཤེས་པ་ལ། ཡོད་མེད་འདྲ་མི་འདྲར་བཟུང་ནས་འཁྲུལ་ལོ། །གཉིས་པ་རྒྱུ་ནི། མ་རིག་པའོ། །དེ་ལ་གཉིས་ལས། དང་པོ་ལྷན་ཅིག་སྐྱེས་པ་ནི། རིག་པར་ངོ་མ་ཤེས་པའོ། །དེ་ཡང་། གང་གིས་ངོ་མ་ཤེས་ན། རང་གིས། གང་མ་ཤེས་ན། རང་། རྒྱུ་མཚན་སྟོན་མཁན་མེད་ནས། ཚུལ་མུན་ཁང་གི་གཟུགས་ལྟར། དཔེ་ཐོ་ལ་ཐོར་མ་ཤེས་པ་བཞིན་ནོ། །གཉིས་པ་ཀུན་ཏུ་བཏགས་པ་ནི། མེད་པ་ལ་ཡོད་པར་བཏགས་པའོ། །དེ་ཡང་གང་གིས་བཏགས་ན། རང་གི་ཡིད་ཀྱིས། གང་ལ་བཏགས་ན། ཡུལ་སེམས་གཉིས་ལ། ཇི་ལྟར་བཏགས་ན། རང་གཞན་གཉིས་སུ། དཔེ་ཐོ་ལ་མིར་བཏགས་པ་བཞིན་ནོ། །གསུམ་པ་རྐྱེན་ནི། ལས་གསུམ་དང་ཉོན་མོངས་ལྔའོ། །དེ་ཡང་དགེ་བའི་ལས་ཀྱིས་འདོད་ཁམས་ཀྱི་ལྷ་མི་ལ་སོགས་པ་མཐོ་རིས་སུ་སྐྱེ་བ། མ་གཡོ་བས་ཚངས་རིས་སུ་སྐྱེ་ཞིང་། མི་དགེ་བས་ངན་སོང་དུ་སྐྱེའོ། །ཉོན་མོངས་པ་ནི། ཞེ་སྡང་གིས་དམྱལ་བ། འདོད་ཆགས་ཀྱིས་ཡི་དྭགས། གཏི་མུག་གིས་དུད་འགྲོ །ཕྲག་དོག་གིས་ལྷ་མིན། ང་རྒྱལ་གྱིས་ལྷ་དང་མི་རུ་སྐྱེའོ། །དེ་ཡང་ལས་གསུམ་དང་ལྡན་པའི་ནུས་པའོ། །བཞི་པ་བྱེད་པ་པོ་ནི། ལོག་རྟོག་གི་སྐད་ཅིག་མ་ཡིན་ཏེ། དེའི་རྒྱུན་སྦྲེལ་བ་ལས་འཁོར་བའི་ཆོས་འབྱུང་བས། མ་དག་པའི་གཞན་དབང་ངོ་། །དེ་ཡང་སྟོང་པ་ལས་སྤྲོས་པ་བྱུང་། དེས་རིག་པ་ལ་བདག་ཏུ་བཟུང་། བདག་ལ་ལྟོས་ནས་གཞན་བྱུང་སྟེ། གཞན་གྱི་ཆ་ལས་ཆགས་སྡང་རྨོངས་གསུམ་སྐྱེས། །དེས་ལས་གསུམ་དུ་བསགས། ལས་རྣམས་སྨིན་དུ་མྱོང་སྟེ། ལོག་རྟོག་གི་སྐད་ཅིག་མ་རྒྱུན་དང་བཅས་པས། འདྲ་བ་གཞན་བྱུང་དང་། ཡོད་པར་དམིགས་པ་ལ་བརྟེན་ནས། རྟག་པ་དོན་ལྟར་དུ་ཆགས། ཆགས་པ་ལ་ཞེན་ཏེ་འཁྲུལ་པ་རུ་བརྟས་ནས་འཁོར་བའི་ཆོས་གྲུབ་བོ། །ལྔ་པ་འབྲས་བུ་ནི། རིགས་དྲུག་གི་ལུས་བླངས་ནས། གནས་སོ་སོ་རུ་དུག་ལྔ་སྣ་ཚོགས་ལ་སྤྱོད་པའོ། །དེ་ལ། སྤྱི་ཚན་དུ་ཐོག་མཐའ་གཉིས་ཀ་མེད་ལ། སྒོས་ཚན་དུ་ཐ་མ་ཡོད་པའོ། །དེ་ལྟར་འཁྲུལ་ལུགས་བསྟན་པའི་དགོས་པ་གཉིས་ཏེ། གཞན་སེལ་གྱི་དགོས་པ་ནི། གཞི་ལ་འཁྲུལ་པ་རང་རྒྱུད་ལ་གྲུབ་པར་འདོད་པའི་ཞེན་པ་གྲོལ་བའོ། །དོན་གཉེར་བའི་དགོས་པ་ནི། གཞི་པ་འཁྲུལ་བ་མ་གྲུབ་ཅིང་། རང་བཞིན་རྣམ་དག་རྟོགས་པའོ། །དེ་ཡང་འཁྲུལ་བ་སྒྲོ་བཏགས་གློ་བུར་པར་འདུག་པས་དེའི་རང་བཞིན་ཤེས་ན་འཁྲུལ་པ་རང་སར་གྲོལ་ཏེ། ཐོ་རུ་ཤེས་པ་ན་མེད་འཛིན་གྱི་འཁྲུལ་པ་རང་སངས་སུ་གྲོལ་བ་བཞིན་ནོ། །གཉིས་པ་ལམ་ལ་གསུམ། ལམ་གྱི་སྔོན་དུ་འགྲོ་བ། ལམ་རང་གི་ངོ་བོ། ལམ་དེའི་ཆ་རྐྱེན་ནོ། །དང་པོ་ལ་གསུམ་སྟེ། ཕུན་སུམ་ཚོགས་པ་ལྔས་བསྒྲུབ་པའི་གཞི་བཟུང་བ། སྲུང་བའི་འཁོར་ལོའི་རིམ་པ་བསྟན་པ། གནད་ལྔའི་སྒོ་ནས་ལམ་ལ་འཇུག་པའོ། །དང་པོ་ལ་ལྔ་སྟེ། ཕུན་སུམ་ཚོགས་ལྔས་བསྒྲུབ་གཞི་གཟུང་བ་ནི། ཞེས་པས། གནས་གང་དུ། དུས་ནམ། གང་ཟག་གང་གིས། རྫས་གང་། ཐབས་ཇི་ལྟར་བསྒྲུབ་པའོ། །དང་པོ་གནས་གང་དུ་ན། བྲག་ནགས་དུར་ཁྲོད་ཕུག་སོགས་སྐྱོན་ཡོན་བརྩི། །ཞེས་པས། བྲག་ཕུག་མ་མོ་དང་སྲིན་པོའི་གནས་ཡིན། རིག་པ་དྭངས། ཐབས་ལམ་ལ་དགའ། ནགས་ཁྲོད་ཀླུ་དང་གནོད་སྦྱིན་གྱི་གནས་ཡིན། གནས་པ་ཆེ། གསར་པ་ལ་དགའ ། དུར་ཁྲོད་གཤིན་རྗེ་དང་ཤ་ཟ་དང་། ཌཱཀྐིའི་གནས་ཡིན། བྱིན་རླབས་ཆེ། རྙིང་པ་ལ་དགའ། ས་ཕུག་ཐེའུ་བྲང་མ་མོ་དང་དམ་སྲིའི་གནས་ཡིན། ཡེ་འབྲོག་མང་། མ་མོ་བསྒྲུབ་པ་ལ་དགའ། ཤིང་རྐང་གཅིག་གི་ལྷ་རྟེན་ཡོད་པ་མུ་སྟེགས་ཀྱི་གནས་ཡིན། དབང་ཕྱུག་ཆེན་པོ་བསྒྲུབ་པ་ལ་དགའ། དེའི་སོགས་ཁོངས་སུ་གནས་མཐའ་དག་ཤེས་པར་བྱའོ། །སྐྱོན་ཡོན་བརྩི་ཞེས་པ་ལ་གསུམ་སྟེ། མཚན་ཉིད་མི་ལྡན་པའི་སྐྱོན། ལྡན་པའི་ཡོན་ཏན། ལྡན་ཚུལ་ངོས་བཟུང་བའོ། །དང་པོ་སྐྱོན་ནི། ཤར་རི་མཐོ་ན་ཚེ་ལ་གནོད། ནུབ་ཧར་བོར་སོང་ན་བཀྲ་མི་ཤིས། རི་སྣ་མདུང་ཚུགས་སུ་ཟུགས་ན་བར་ཆད་འོང་། ཚ་གྲང་མ་མཉམ་ན་ནད་འཇུག །གདོན་གདུག་པ་ཅན་ཡོད་ན་བར་ཆད་འོང་། རྒྱུ་སྲང་ཟུགས་ན་མིའི་འཚེ་བ་ཡོང་། གཞན་ཡང་། སྟེང་ན་བྲག་ལྷུང་དུ་ཆ་བ་དང་། ངུས་པའི་མཆི་ངེས་འདྲ་བ་དང་། སྡེར་སྲན་གྱིས་བྲད་པ་འདྲ་བ། ཤི་ལྤགས་རྒྱངས་པ་འདྲ་བ། སྒོ་ལ་གྲོག་མདོ་ཟུགས་པ། སྒོ་ན་མི་ལངས་པ་ལྟ་བུ་བྱུང་བ་རྣམས་ནི། ས་དགྲ་ཡིན་པས་སྐྱོན་ཅན་ནོ། །གཉིས་པ་ཡོན་ཏན་ནི། བྲག་སྐྱིལ་མོ་ཀྲུང་བྱས་པ་འདྲ་ན་ཏིང་ངེ་འཛིན་སྐྱེ། པདྨ་ཁ་བྱེ་བ་འདྲ་ན་རྟོགས་པ་སྐྱེ། ས་དང་གནམ་གྲུ་གསུམ་དུ་ཡོད་ན་འགྲུབ་ཐག་ཉེ། རྒྱབ་རི་མཐོ་ན་བག་དྲོ། བྱང་རི་མཐོ་ན་བཀྲ་ཤིས། ལྷོ་འདུ་ས་འདྲ་ན་ལོངས་སྤྱོད་འདུ། ས་དགྲ་གང་ཡང་མི་འདུག་ན་བཀྲ་ཤིས་ཏེ། ཡོན་ཏན་ཆེའོ། །གསུམ་པ་ལྡན་ཚུལ་ངོས་བཟུང་བ་ནི། ས་པདྨ་འདབ་བརྒྱད་དུ་ཡོད་པ། གནམ་འཁོར་ལོ་རྩིབས་བརྒྱད་དུ་ཡོད་པ། རྒྱབ་རི་མཐོ་བ། བྱང་རི་སྣུམ་པ། གཡས་དར་དཀར་གྱི་ཡོལ་བ་འདྲ་བ། གཡོན་རི་སྤུངས་པ་འདྲ་བ། མདའ་ཕྱག་རྒྱ་བསྣོལ་བ་འདྲ་བ། རི་ཐམས་ཅད་སྣུམ་ཞིང་ཁེངས་པ། མདོར་ན་ནུབ་མཐོ། བྱང་སྐྱོབ། ཤར་གཞོལ། ལྷོ་འདུད། མདུན་ཐང་། ཆུ་བོ་དབང་གི་ཕྱོགས་ནས་འབབ་པ། ཉི་མ་རྟག་ཅིང་། གངས་མཐོ་བ། གསལ་ཆ་ཆེ་ཞིང་སོ་ཐུབ་པ། ཚ་གྲང་སྙོམས་ཤིང་གཞི་བདག་འཇམ་པ། ཐག་ཉེ་རིང་རན་ཅིང་ས་བཙན་པ། བཀྲ་ཤིས་ཤིང་གྲུབ་ཐོབ་ཀྱི་ཞབས་ཀྱིས་བཅགས་པ་གཅིག་བཙལ་ལོ། །དེར་དགོན་པ་འདེབས་པ་ལ། སའི་སྙིང་ནོན་དགོས་ཏེ། པདྨའི་འདབ་མ་འདྲ་ན་ལྟེ་བ་ལ། སྐྱིལ་ཀྲུང་འདྲ་ན་བསྣོལ་མཚམས་སུ། ཆོས་འབྱུང་འདྲ་ན་འཕེལ་ཀ་ལ། མི་འདྲ་ན་སྙིང་ཁ་ལ། ཕག་གམ་གླང་པོ་འདྲ་ན་མིག་ཚིལ། ལྟོ་ཚིལ། གཞག་གམ། མཁལ་མ་ལ་གདབ་བོ། །གཞན་ཡང་། སྒང་གི་གཤོངས། གཤོངས་ཀྱི་སྒང་། ལོགས་ཀྱི་ཁུགས། ཁུགས་ཀྱི་རྔམས། མདོར་ན་སའི་སྙིང་ནོན་པ། ས་མ་བོ་ཞིང་གཞུང་འདྲིལ་བ་ལ་གདབ་པའོ། །དེ་ལས་གཞན་པ། ཕག་གི་ཟེ་བ། གླང་གི་རྐང་པ། མིའི་སུག་གཤམ་ལ་མི་གདབ་པའོ། །ས་དགྲ་བསྲུང་བའི་རྟེན་འབྲེལ་ནི། རི་སྣ་ཟུགས་པ་དང་། ཁ་དོག་སྔོན་པོའི་ས་དགྲ་ཡོད་ན་མེའི་རི་མོ་བྱ། གྲོག་མདོ་རི་ཧྲུལ་ཆད་པ་ལ་ཆུའི་རི་མོ་བྱ། སྡེར་སེན་གྱིས་བྲད་པའམ་ཤི་ལྤགས་འདྲ་ན་བཀྲ་ཤིས་རྫས་བརྒྱད་བྲི། སྟེང་ནས་ལྷུང་ལ་ཁད་པ་ལ་མཆོད་རྟེན་བརྩིགས། མཚན་མ་བཟེད་པ་འདྲ་ན་ཕོ་རྟགས་གཟུགས། བྲག་སྦྲ་ཙམ་སྒོའི་ཐད་ཀར་ན་འདུག་ན། ས་དགྲ་ཆེ་བས་རྟེན་འབྲེལ་མང་དུ་བྱའོ། །གཞན་ཡང་། སེམས་ཅན་གྱི་གཟུགས་འདྲ་བ་འདུག་ན། དེའི་གཉེན་པོར་གང་འགྲོ་བའི་གཟུགས་བྱའོ། །མདུན་དུ་གཤོང་བུ་མི་འབྲུ། ཤར་དུ་མཆོད་རྟེན་མི་བརྩིག་གོ། །ཁང་པའི་ས་དགྲ་ལ། བྱང་ཁ་ལྷོ་མིག །གདུང་རོ་འདོན། དང་ནད་འདྲི། ཀ་བ་གྲལ་གཤིབས། རླུང་ཁ་ཁྱེངས། སྒོ་ཕུག་གསལ། །སྣེ་ཐུང་གདོང་ཐུག་རྣམས་ས་དགྲ་ཡིན་པས། །ཐད་ཀར་བཀྲ་ཤིས་ཀྱི་མཚན་མ་དང་སྙིང་པོ་བྲི། དེ་ལ། ལྷོ་གཤིན་རྗེ་རུ་སྒོའི་ཁ་མི་བསྟན། ལྷོ་ནུབ་སྲིན་པོའི་སྟེང་དུ་མལ་མི་བཅའ། ནུབ་བྱང་རླུང་ལྷའི་སྟེང་དུ་གཡོས་མི་བྱ། །ཤར་ལྷོ་མེ་ལྷར་ཐབ་གཟུགས། བྱང་ཤར་དབང་ལྡན་མལ་བཅའོ། །མལ་གྱི་ས་དགྲ་ནི། རི་ལ་མགོ་བོ་མཐུར་བསྟན། མལ་མགོ་སྒོར་བསྟན། གདུང་གིས་མལ་གྱི་སྐེད་པ་བཅད་པ། ལྟེམས་མཚམས། སྐས་རྩ། སྒོ་འཕྲེད། སྟན་ཁ་འགག་བསྟན། པགས་རློན་གདན་གཏིང་། ལྷྭམ་ཟོན་སྔས་འཇུག །དེ་རྣམས་མལ་གྱི་ས་དགྲ་ཡིན་པས་མི་བྱའོ། །དེས་ན་ས་གནད་འདོམ་གང་ལ། དགེ་སྦྱོར་འཕེལ་དང་མི་འཕེལ་གྱི་གནད་ཡོད་དོ། །ཕྱི་ནང་སྣོད་བཅུད་ནང་སེམས་གཅིག་གི་ངོ་བོ་ཡིན་པའི་ཕྱིར། རྟེན་ཕྱི་རོལ་གྱི་སྐྱོན་ཡོན་གང་ཡིན་པ་དེ། བརྟེན་པ་ནང་སེམས་ཅན་གྱི་རྒྱུད་ལ་ཡོད་པ་ཡིན་ནོ། །གཉིས་པ་དུས་ནི། ཚེས་སྐར་གཟའ་བཟང་ཡར་ངོའི་སྔ་གོང་འཇུག །ཅེས་པས། ཚེས་གཅིག་གམ། གསུམ་མམ། བརྒྱད་དམ། ཉ་ལ་སོགས་པ་བཟང་བ། སྐར་མ་རྒྱལ་སྨད། ནམ་མཐོང་། ཤེས། བྲེ་ལ་སོགས་པ་བཟང་བ། གཟའ་ཕུར་བུ་ལ་སོགས་པ་དར་བའི་ཚེ། དེ་ནས་ཟླ་བ་ཡར་ངོ་། དུས་ཚོད་ཕྱེད་གོང་འཇུག །མདོར་ན། ཚེས་དང་སྐར་མ་གཟའ་ཐམས་ཅད། རྒྱུད་ལུང་མན་ངག་ཀུན་དང་བསྟུན་པའི་བཟང་པོ་ལ་ཞུགས་པས་དོན་ཐམས་ཅད་འགྲུབ་པ་ཡིན་ཏེ། རྒྱས་པའི་དུས་ན། སྐར་མ་མགོ་ལག་རྒྱལ་སོགས་བཟང་པོ་གསུམ་གཅེས་སོ། །གསུམ་པ་གང་ཟག་ནི། དད་གུས་དབང་དམ་ཤེས་རབ་གདིང་དང་ལྡན། །ཞེས་པས། དད་པ་ཆེན་པོས་དཀར་བའི་ཆོས་ལ་འཇུག་ནུས་པ། མོས་གུས་ཆེན་པོས་བླ་མ་སངས་རྒྱས་སུ་མཐོང་བ། དབང་བཞི་ཐོབ་པས་མན་ངག་གི་སྣོད་དུ་རུང་བ། དམ་ཚིག་ཆེ་བས་བསྒྲུབ་པའི་གཞི་ཐེངས་པ། ཤེས་རབ་ཆེ་བས་ངེས་པའི་དོན་གོ་ནུས་པ། ལྟ་བའི་གདེང་དང་ལྡན་པས་ཉམས་ང་དང་ཁུ་འཕྲིག་མེད་པ། ཆོས་དྲུག་དང་ལྡན་པའོ། །དེ་ལས་གཞན་པ། དད་པ་མེད་ན་འཁོར་བ་ལ་བློ་མི་ལྡོག །མོས་གུས་མེད་ན་བྱིན་རླབས་མི་འཇུག །དབང་མ་ཐོབ་ན་མན་ངག་གི་སྣོད་དུ་མི་རུང་། དམ་ཚིག་ཉམས་ན་སྒྲུབ་པའི་གཞི་རྟེན་མེད། ཤེས་རབ་མེད་ན་ངེས་པའི་དོན་མི་གོ། །ལྟ་བའི་གདིང་དང་མི་ལྡན་ན་བར་ཆད་འབྱུང་བས་དེ་ལྟར་སྣོད་དུ་མི་རུང་སྟེ། མཚན་ཉིད་ལྡན་པར་མན་ངག་སྦྱིན། །དེ་ལས་གཞན་ལ་བསྟན་མི་བྱ། །ཞེས་སོ། །བཞི་པ་རྫས་ནི། ཟས་སྨན་མཆོད་བསྐང་སྒྲུབ་པའི་རྫས་རྣམས་བསགས། །ཞེས་པས། འདི་ལ་ལྔ་སྟེ། འཚོ་བ་ཟས་ཀྱི་ཡོ་བྱད་བལྡབ་ཏུ་བཤམས་ཏེ། མ་གྲུབ་ན་སྤོགས་ལ་སྒྲུབ་དགོས་པའོ། །ནད་ཟློག་སྨན་གྱི་ཡོ་བྱད་སྨན་དང་ཡི་གེ་རུ་གཤོམས་ཏེ། ནད་བྱུང་ན་འབྱུང་བ་ཆ་མཉམ་དགོས་པའོ། །གཞན་ཡང་། ལྟ་བ་དང་དམིགས་པ་རྟེན་འབྲེལ་གྱི་སྒོ་ནས་ཀྱང་བཅོས་སོ། །མཆོད་པའི་རྫས་ནི། མ་རུལ། མ་རྙིང་། མ་ཟགས་པ། མདངས་དང་ལྡན་པ་གཤམས་ཏེ། བདེ་གཤེགས་ཐམས་ཅད་དགེས་པ་ཡིན་ནོ། །སྐོང་བའི་རྫས་ནི། མ་ནོར། མ་གྱག །མ་ཉམས། མ་རྙིང་། རོ་དང་ལྡན་པ་བཤམས་ཏེ། དམ་ཅན་ཐུགས་དམ་བསྐང་བ་ཡིན་ནོ། །སྒྲུབ་པའི་རྫས་ནི། མང་ཞིང་ཚན་ཆེ་བ། ལྷ་སོ་སོའི་རྗེས་སུ་མཐུན་ཅིང་། ཁ་དོག་དྲི་རོ་དང་ལྡན་པ་བཤམས་པས། །བྱིན་རླབས་སྤྲིན་བཞིན་འོང་བ་ཡིན་ནོ། །མཆོད་པའི་རྫས་ཀྱིས་བདེ་གཤེགས་མཉེས། །སྐོང་བའི་རྫས་ཀྱིས་དམ་ཅན་སྐོང་། །སྒྲུབ་རྫས་ཚོགས་པས་བྱིན་རླབས་འབྱུང་། །ཞེས་སོ། །ལྔ་པ་སྒྲུབ་པའི་ཐབས་ནི། མ་དྲེད་རྩེ་གཅིག་དཀའ་ཐུབ་མཐར་འདོན་ནོ། །ཞེས་པས། བློ་མི་དྲེད་པས་ཤེས་པ་རྩེ་གཅིག་ཏུ་དྲིལ་ཏེ་དཀའ་ཐུབ་ཀྱི་ས་རྡོ་བཙུགས་ནས། སྙིང་རུས་ཆེན་པོས་སྒྲུབ་པ་མཐའ་རུ་འདོན་ནོ། །དེ་ཡང་། དགྲ་གཉེན། ནོར་ཟས། གཟུང་འཛིན། ཆགས་སྡང་། ཉོན་མོངས། རྣམ་རྟོག་ལ་སོགས་པའི་ཕྱོགས་སུ་ཤོར་ན། ངན་དྲེད་དུ་སོང་བས་དོན་མི་འགྲུབ། སྒྲུབ་པའི་དུས་ན། འབྲི་བ་དང་། ཀློག་པ་དང་། འཛིན་པ་བསམ་མནོ། རྩོམ་པ་ལ་སོགས་པའི་བློ་རུ་སོང་ན། བཟང་དྲེད་ཡིན་པས་མི་འགྲུབ། དེས་ན་དེ་གཉིས་ཀ་དང་བློ་མ་དྲེད་པར། གང་བསྒྲུབ་པ་དེ་ཉིད་ལ་ཤེས་པ་རྩེ་གཅིག་ཏུ་ཕུར་ཚུགས་སུ་དྲིལ་ཏེ། ལྟོགས་མེད། འཁྱགས་མེད། ཤི་མེད། ཆད་མེད་གསལ་བའི་སྡུག་སྲན་བྱེད། །དཀའ་ཐུབ་ས་རྡོ་བཙུགས་ནས་སྙིང་རུས་ཆེན་པོས་སྒྲུབ་པ་འདི་མཐར་འདོན་དགོས་སྙམ་པའི་སྒོ་ནས་བསྒྲུབ་པའོ། །དེ་ཡང་དང་པོ་འཇུག་པའི་དུས་སུ་སྐྱབས་འགྲོ་བྱ། བྱང་ཆུབ་མཆོག་ཏུ་སེམས་བསྐྱེད། ལྷ་ཡི་ང་རྒྱལ་དང་ལྡན་པར་བྱས་ལ། གཏོར་མ་གསུམ་བཤམས་ཏེ། དང་པོ་བླ་མ་དང་དཀོན་མཆོག་ལ་ཕུལ་གསོལ་བ་གདབ། བར་པ་ཆོས་སྐྱོང་ལ་ཕུལ་ལ་བར་ཆད་མ་བཏང་ཞིག་བར་ཕྲིན་ལས་གཞོལ། ཐ་མ་གཞི་བདག་ལ་ཕུལ་ལ་གནས་བོ་ཞུ། དེ་ནས་རང་དང་གནས་དང་གནས་བདག་གསུམ་པོ་མི་དམིགས་པའི་ངང་ལ་བཞག་གོ། །དེ་ནས་མཚམས་བཅད་དེ། སྒོ་དྲུང་དུ་ཐོ་དཀར་པོ་གཅིག་བརྩིགས། བར་ཆད་མི་འབྱུང་བའི་རྟེན་འབྲེལ་ཡིན། མལ་འོག་ཏུ་ས་དཀར་པོའི་གཡུང་དྲུང་རིས་བྱ། སྡོད་ཚུགས་པའི་རྟེན་འབྲེལ་ཡིན། དེ་ནས་སྡུག་སྲན་དང་། སྙིང་རུས་དང་། གོ་ཆ་དང་། འདུན་པ་སྐྱེད་ལ་མཚམས་དམ་པོར་བཅད་པས་བར་ཆད་མི་འབྱུང་ཞིང་མྱུར་དུ་འགྲུབ་པ་ཡིན་ནོ། །ཉིན་མོ་སྣང་བ་བཟོ་མེད་ལྷུག་པར་བཞག །སྲོད་ལ་རིག་པ་གཟིངས་བསྟོད་ལ། མ་བྱིང་མ་རྨུགས་པར་སེང་ངེ་ཡེར་རེ་བཞག་གོ། །ནམ་གུང་གཉིད་དང་ཆོས་ཉིད་བསྲེས་ལ་རྟོག་མེད་དུ་ཉལ། ཐོ་རངས་དྲན་པ་གསལ་བཏབ་ལ་ལྷའི་ང་རྒྱལ་གྱིས་ལྡང་། ལུས་ལྷར་བསྒོམ། ངག་སྔགས་བགྲང་། སེམས་སྤྲོས་བྲལ་ལ་བཞག །དམ་བཅའ་ཡུན་ཐུང་ལ་གྲངས་མང་བར་བསླབ་བོ། །དེ་ནས་བསྐྱེད་རིམ་ལ། ཆོ་ག་གསུམ་མ མ་སྐད་ཅིག་དྲན་རྫོགས་ལས་ལྷར་བསྐྱེད། བཟླས་པའི་སྔོན་ལ། ༀ་རུ་ཙི་ར་མ་ཎི་པྲ་བརྡ་ནཱ་ཡ་ཧཱུྃ་ཕཊ། ཅེས་པ་བདུན་དང་། རྟེན་འབྲེལ་སྙིང་པོ་བདུན་གྱིས་ཕྲེང་བ་བྱིན་གྱིས་བརླབ། ཕྲེང་བ་མི་ལག་མི་འགྲིམ། ས་ལ་མི་བཞག་གོ། །སྔགས་ནི། སྒྲ་ཆེ་བ་མ་ཡིན། ཆུང་བ། མྱུར་བ། བུལ་བ། ཞ་བ། ཆད་པ། ནོར་བ་མ་ཡིན་ཏེ། སྐྱོན་བདུན་པོ་དེ་བསལ་ལ། སྔགས་ཀྱི་འོད་ཟེར་རམ། འཕྲོ་འདུའམ། ཕྲེང་བ་ལ་རིག་པ་གཏད་ནས་བཟླའོ། །འོད་ཟེར་ནི། ཞི་རྒྱས་དབང་དྲག་བཞི་དཀར་སེར་དམར་ནག་གོ། །འཕྲོ་འདུ་ནི། ཕར་འཕྲོས་པས་བདེ་གཤེགས་མཆོད། ཚུར་འདུས་པས་དངོས་གྲུབ་ཐོབ་པའོ། །ཕྲེང་བ་ནི། མགལ་མེའི་འཁོར་ལོ་ལྟ་བུའོ། །མི་ཚིག་གིས་བར་མི་བཅད། ཁྱད་པར་བསྙེན་པའི་དུས་སུ་ཆོད་ན་བསྙེན་པའི་གོ་མི་ཆོད། བཟླས་པའི་མཇུག་ཏུ། ༀ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཱཻ། ཨོ་ཨ། ཨཾ་ཨཱཿ ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ འགྲུབ་པར་གྱུར་ཅིག་སྭཱ་ཧཱ། །ཞེས་བརྗོད་པས། མྱུར་དུ་འགྲུབ། ཆད་བསྐོང་། བྱིན་རླབས་ཆེ་བ་ཡིན་ནོ། །སྔགས་བཟླས་པའི་དུས་ན། མཚོན་རྩེ་ཁ་རུ་མི་འཇུག །མཆིལ་མ་ཕྱིར་མི་འདོར། ལྷའི་དྲན་པས་བཟུང་། སྟོང་པའི་རྒྱས་གདབ། ལྷ་ཡིན་ནོ་སྙམ་པ་ནི་དོན་སྤྱི་ཡིན། སེམས་ཉིད་ལྷ་ཡི་ངོ་བོ་ཧྲིལ་སོང་ནས། ལྷ་དང་རིག་པ་དབྱེར་མེད་ནི་དོན་རང་མཚན་ནོ། །འཕྲོ་འཇོག་ཙ་ན། ཏིང་ངེ་འཛིན་གསལ་གདབ། དགེ་བའི་རྩ་བ་བསྔོ། སྒྲུབ་པ་མ་ཐོན་བར་ལ་གཞན་དོན་མི་བྱ། ཆོས་མི་བཤད། གནས་མི་སྤོ། སྟན་མི་སྤྲུག །གདོང་པ་དང་ལག་པ་མི་བཀྲུ། སྐྲ་དང་ཁ་སྤུ་མི་འདྲེག །ཐོན་པ་དང་དངོས་གྲུབ་བླང། བཤགས་པ་བྱ། གཏང་རག་བཏང་། དགེ་བའི་རྩ་བ་བསྔོའོ། །གཉིས་པ་བསྲུང་བའི་འཁོར་ལོ་ནི། རྣལ་འབྱོར་བསྲུང་བའི་འཁོར་ལོའི་རིམ་པ་ནི། །ཞེས་པ། ཆོས་ཟབ་ན་བདུད་ཟབ། སྒྲུབ་པ་བྱེད་པ་ལ་བར་ཆད་འོང་བས། དེ་དག་སྲུང་བའི་འཁོར་ལོ་ལ་དྲུག་ལས། དང་པོ་བྱང་ཆུབ་སེམས་ཀྱི་སྲུང་བྱ་ནི། ལུས་ཅན་རྣམས་ཀྱི་བྱང་ཆུབ་མཆོག་ཐོབ་བསྒོམ། །ཞེས་པས། སྐྱེ་འགྲོ་དབུགས་ཀྱིས་བསྡུས་ཤིང་། ཤེས་པས་ཟིན་པ། ཁྱད་པར་བདག་ལ་གནོད་བྱེད་ཀྱི་གཙོས་བྱས་པའི་སེམས་ཅན་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ། སངས་རྒྱས་སྐུ་གསུམ་གྱི་གོ་འཕང་ཐོབ་པར་བྱ། དེའི་ཆེད་དུ། ལྷ་བསྒོམ། བསྔགས་བཟླ། ལུས་ངག་ཡིད་གསུམ་དགེ་བ་ལ་བཀོལ་སྙམ་དུ་སེམས་བསྐྱེད། དེ་ནི་བསྲུང་བ་ཀུན་གྱི་མཆོག་ཡིན་ཏེ། གནོད་བྱེད་ཁོ་རང་གི་དོན་དུ་སྒྲུབ་པ་བྱེད་པ་ལ། ཁོ་རང་གིས་བར་དུ་མི་གཅོད་པས་སོ། །གཉིས་པ་མཚོན་ཆ་ལྔའི་སྲུང་བ་ནི། ལྷ་མཚན་རྡོ་རྗེ་འཁོར་ལོ་མཚོན་མེས་བསྲུང་། །ཞེས་པས། རང་སྐད་ཅིག་མའི་ངང་ལ་ཡི་དམ་ལྷ་གང་ཡིན་དུ་བསྒོམ། དེའི་ཐུགས་ཀར་རྩ་བའི་ས་བོན་ཡིག་འབྲུ་བསམ། ཐུགས་ཀའི་ཡིག་འབྲུ་ལས་ཡི་དམ་གང་ཡིན་གྱི་ཕྱག་མཚན་འོད་ཟེར་དང་བཅས་པ་ཕར་འཕྲོས་པས་གདོན་བགེགས་ཐམས་ཅད་བཅོམ། ཚུར་འདུས་པས་སྟེང་འོག་ཕྱོགས་མཚམས་ཐམས་ཅད་ཕྱག་མཚན་རྩེ་མོ་ཕྱིར་བསྟན་པའི་གུར་དུ་བསམ་མོ། །ཡང་ཐུགས་ཀའི་ཡིག་འབྲུ་ལས་རྡོ་རྗེ་འོད་ཟེར་དང་བཅས་པ་ཕར་འཕྲོས། འདུས་པས་ཐམས་ཅད་རྡོ་རྗེའི་གུར་དུ་བསམ་མོ། །ཡང་ས་བོན་ལས་འཁོར་ལོ་འོད་ཟེར་དང་བཅས་པ་འཕྲོས་འདུས་པ་ལས་ཐམས་ཅད་འཁོར་ལོའི་གུར་དུ་བསམ། ཡང་ས་བོན་ལས་མཚོན་ཆ་སྣ་ཚོགས་འཕྲོས་འདུས་པས་ཐམས་ཅད་མཚོན་ཆའི་གུར་དུ་བསམ་མོ། །ཡང་ས་བོན་ལས་མེའི་འོད་ཟེར་འཕྲོས་འདུས་པས་ཐམས་ཅད་མེའི་གུར་ཁང་དུ་བསམ་མོ། །འདི་ནི་འཁོར་གཡོག་སྲུང་བ་ལ་ཟབ་བོ། །གསུམ་པ་ཡིག་འབྲུ་གསུམ་གྱི་སྲུང་བ་ནི། ལུས་ངག་ཡིད་གསུམ་སྐུ་གསུང་ཐུགས་ཡིག་བསྒོམ། །ཞེས་པས། རང་གི་ལུས་སངས་རྒྱས་ཐམས་ཅད་ཀྱི་སྐུའི་རང་བཞིན་ༀ་དཀར་པོ་གཅིག་ཏུ་བསམ། དེ་ཇེ་ཆེར་གྱུར་པའི་ནང་དུ། ངག་སངས་རྒྱས་ཐམས་ཅད་ཀྱི་གསུང་གི་རང་བཞིན་ཨཱཿདམར་པོ་གཅིག་ཏུ་བསམ། དེ་ཇེ་ཆེར་གྱུར་པའི་ནང་དུ། སེམས་སངས་རྒྱས་ཐམས་ཅད་ཀྱི་ཐུགས་ཀྱི་རང་བཞིན་ཧཱུྃ་མཐིང་ནག་གཅིག་ཏུ་གྱུར་པར་བསམ། དེ་ལྟར་ལུས་ངག་སེམས་གསུམ་སྐུ་གསུང་ཐུགས་ཀྱི་ཡི་གེར་གྱུར་པར་བསམ་པ་ལ། བར་དུ་གཅོད་པ་མེད་དེ་འདི་ནི་རང་ཉིད་ཁོ་ནའོ། །བཞི་པ་ཞི་དྲག་སུམ་བརྩེགས་ཀྱི་བསྲུང་བ་ནི། སྤྱན་རས་འཇམ་དཔལ་གང་ཡིན་ཡི་དམ་བསྒོམ། ཞེས། རང་གང་བསྲུང་བ་ཙམ་ཁྱབ་པར་འཕགས་པ་སྤྱན་རས་གཟིགས་སུ་བསྒོམས། དེ་ནི་ཞི་བའི་རང་བཞིན་ནོ། །དེའི་ཐུགས་ཀར་འཇམ་དཔལ་ཁྲོས་པ་གཤིན་རྗེ་གཤེད་བསྒོམ། དེ་ནི་ཁྲོ་བོའི་རང་བཞིན་ནོ། །དེའི་ཐུགས་ཀར་རང་ཡི་དམ་གང་ཡིན་དུ་བསྒོམ། དེ་ནི་གཉིས་སུ་མེད་པའིརང་བཞིན་ནོ། །དེ་ལྟར་ཞི་དྲག་དབྱེར་མེད་དུ་གནས་པ་ལ། བར་དུ་གཅོད་པ་མེད་དེ། འདི་ནི་ཡུལ་དང་ལུང་བསྲུང་ན་ཟབ་བོ། །ལྔ་པ་རང་བྱུང་ལྷུན་གྱིས་གྲུབ་པའི་བསྲུང་བ་ནི། རྡོ་རྗེའི་ས་རྭ་གུར་དང་མདའ་མེ་བསྒོམ། །ཞེས་པས། རྐང་མཐིལ་རྡོ་རྗེའི་ས་གཞི། རྩིབས་མ་རྡོ་རྗེའི་རྭ་བ། པགས་པ་རྡོ་རྗེའི་གུར། སྐྲ་དང་བ་སྤུ་མདའི་ར་བ ། སོ་དང་སེན་མོ་མེ་རབ་ཏུ་འབར་བར་བསྒོམ། དེ་རྣམས་ནི་དེ་ལྟར་ཡིན་སྙམ་དུ་ཤེས་ཤིང་དྲན་པས་ཆོག་སྟེ། འདི་ནི་རང་བསྲུང་བ་ལ་ཟབ་བོ། །དྲུག་པ་དོན་དམ་མཚན་མ་མེད་པས་བསྲུང་བ་ནི། བྱ་བྱེད་ངོ་བོ་མི་དམིགས་ངང་ལ་བཞག །ཅེས་པས། བར་དུ་གཅད་བྱའི་ཡུལ། གཅོད་མཁན་གྱི་བགེགས། བར་ཆད་རང་གི་ངོ་བོ་དང་གསུམ། དབྱེར་མེད་སྤྲོས་བྲལ་མི་དམིགས་པའི་ངོ་བོར་ཤེས་ཤིང་། སྟོང་ཉིད་ཀྱི་ངང་ལ་བཞག་གོ། །དེ་ལ་གང་གིས་ཀྱང་བར་དུ་མི་ཆོད་དེ། སྟོང་པ་ལ་སྟོང་པས་གླགས་མི་རྙེད་པའོ། །དེ་རྣམས་ཀྱང་སྒྲུབ་པ་ལ་འཇུག་པའི་ནུབ་མོ་དང་། སྐབས་སུ་ཚང་བར་བསྒོམ། སྲོད་ཀྱི་ཐུན་འགོར་བྱང་སེམས་ཀྱི་སྲུང་བ་དང་། མཚོན་མེའི་སྲུང་བ་གང་འགྲུབ་བྱའོ། །གསུམ་པ། གནད་ལྔའི་སྒོ་ནས་ལམ་ལ་འཇུག་པ་ནི། ཞེས་པས། གནད་ལྔའི་སྒོ་ནས་ཐེག་ཆེན་གྱི་ལམ་ལ་འཇུག་པ་ལ་ལྔ་སྟེ། སྐྱབས་འགྲོས་ཆོས་ཀྱི་གཞི་བཅའ་བ། ཡི་གེ་བརྒྱ་པ་བགྲང་ལ་སྒྲིབ་པ་སྦྱང་བ། ལས་འབྲས་དང་མི་རྟག་པ་བསྒོམ་ལ་བློ་སྦྱང་བ། མཎྜལ་དང་གཏོར་མ་བཏང་ལ་ཚོགས་བསགས་པ། མཆོད་པ་ཕུལ་ལ་ཚོགས་ཡོངས་སུ་སྤེལ་བའོ། །དང་པོ་ནི། སྐྱབས་འགྲོ་ཐུན་མོང་ཁྱད་པར་བླ་མེད་གསུམ་སྐྱབས་འགྲོ། ཞེས་པས། འདི་ལ་གཉིས་ཏེ། སྤྱིར་བསྟན་པ་དང་། བྱེ་བྲག་ཏུ་བསྟན་པའོ། །དང་པོ། སྤྱིར་བསྟན་པ་ལ་ལྔ་ལས། དང་པོ་སྐྱབས་སུ་འགྲོ་བའི་ཡུལ་ནི། དཀོན་མཆོག་གསུམ་སྟེ། སྐྱོབ་པའི་ནུས་པ་ཡོད་ཅིང་། ཐུགས་རྗེ་ཐབས་ལ་མཁས་པའི་ཕྱིར་རོ། །གསུམ་གྱི་དང་པོ་སངས་རྒྱས་ལ་གསུམ་སྟེ། ངོ་བོ། གནས་ལུགས་མངོན་དུ་བྱས་པས། ངེས་ཚིག །འཁྲུལ་པ་སངས་ལ་ཡེ་ཤེས་རྒྱས་པ། དབྱེ་ན། ཆོས་སྐུ་གཟུགས་སྐུ་གཉིས་སམ། ཆོས་སྐུ་ལོངས་སྐུ་སྤྲུལ་སྐུ་གསུམ་མམ། ཡེ་ཇི་བཞིན་དང་། རྟོགས་པ་མངོན་དུ་འགྱུར་རོ། །གཉིས་པ་ཆོས་ལ་གསུམ་སྟེ། ངོ་བོ། རྣམ་པར་དཀར་བ། མཚན་ཉིད། ལྟུང་བ་ལས་འཛིན་པ། དབྱེ་ན། རྒྱུ་འབྲས་གཉིས་སམ། སྡེ་སྣོད་གསུམ་མམ། ཐེག་པ་དགུའོ། །གསུམ་པ་དགེ་འདུན་ལ་གསུམ་སྟེ། ངོ་བོ། མི་དགེ་བས་དབེན་པ། ངེས་ཚིག །དགེ་བ་ལ་འདུན་པ། དབྱེ་ན། ཕྱི་གཟུགས་རྟགས་ཀྱི་དགེ་འདུན། ཡང་དག་དོན་གྱི་དགེ་འདུན་ནོ། །གཉིས་པ་སྐྱབས་འགྲོ་གསུམ་པོ་བསྟན་པའི་ངོ་བོར་བསྟན་པ་ནི། ཆོས་ཀྱི་བསྒྲུབ་བྱ་སངས་རྒྱས་ཡིན་པ་དང་། སངས་རྒྱས་ཀྱི་དགོངས་པ་སྟོན་པ་ཆོས་ཡིན་པ་དང་། ཆོས་ཉམས་སུ་ལེན་པ་དགེ་འདུན་ཡིན་པས་བསྟན་པའི་ངོ་བོ་ཡིན་ནོ། །གསུམ་པ་སྐྱབས་འགྲོ་བྱེད་པའི་གང་ཟག་ལ་གསུམ་སྟེ། ངོ་བོ་ནི། སྐྱབས་སུ་སོང་མ་སོང་གི་སྐྱོན་ཡོན་ཤེས་ནས་འཇུག་པའོ། །མཚན་ཉིད། རྒྱུ་འབྲས་ལ་ཡིད་ཆེས་པའི་གང་ཟག་གོ། །དབྱེ་ན་གསུམ། ཉན་རང་། བྱང་སེམས། གསང་སྔགས་རིག་པ་འཛིན་པའི་གང་ཟག་གོ། །བཞི་པ་ཚུལ་ཇི་ལྟར་སྐྱབས་སུ་འགྲོ་བ་ལ་གཉིས་ལས། ཐུན་མོང་གི་འགྲོ་ཚུལ་ནི། སངས་རྒྱས་ལ་སྐྱབས་སུ་སོང་བས། འཇིག་རྟེན་པའི་ལྷ་ལ་ཕྱག་མི་འཚལ། ཆོས་ལ་སྐྱབས་སུ་སོང་བས། སེམས་ཅན་ལ་གནོད་པ་མི་བསྐྱལ། དགེ་འདུན་ལ་སྐྱབས་སུ་སོང་བས། མུ་སྟེགས་པ་དང་མི་འགྲོགས་པའོ། །ཁྱད་པར་གྱི་འགྲོ་ཚུལ་གསུམ་ནི། ཆོས་སྤྱོད་རྒྱུན་གྱི་སྐྱབས་འགྲོ། སྒྲུབ་པ་བཞིའི་སྐྱབས་འགྲོ། རྟོགས་པ་དོན་གྱི་སྐྱབས་འགྲོའོ། །ལྔ་པ་སྐྱབས་འགྲོའི་ཕན་ཡོན་ནི། ནང་པ་སངས་རྒྱས་ཀྱི་ཁོངས་སུ་ཚུད་པ། སྡོམ་པ་ཐམས་ཅད་ཀྱི་རྟེན་བྱེད་པ། མི་དང་མི་མ་ཡིན་པས་མི་ཚུགས་པ། གནས་སྐབས་ཕན་བདེ་དང་། མཐར་ཐུག་སངས་རྒྱས་ཐོབ་པའོ། །གཉིས་པ་སྐྱབས་འགྲོ་བྱེ་བྲག་ཏུ་བཤད་པ་གསུམ། ཐུན་མོང་གི། ཁྱད་པར་གྱི། བླ་ན་མེད་པའི་སྐྱབས་འགྲོའོ། །དང་པོ། ཐུན་མོང་གི་སྐྱབས་འགྲོ་ལ་གསུམ་ལས། དང་པོ་སྐྱབས་གནས་ངོས་བཟུང་བ་ནི། སངས་རྒྱས་ནི། སྤྲུལ་པའི་སྐུ་ཁོ་ན་དམ་པ་འཛིན་ཏེ་ཤཱཀྱ་ཐུབ་པ། ཆོས་ནི། རྒྱུའི་ཐེག་པ་བདེན་པ་བཞི། ལྷག་པ་ཚུལ་ཁྲིམས་ཀྱི་བསླབ་པ་ལ་གཙོར་བྱེད། དགེ་འདུན། ཕྱིའི་ཆ་ལུགས་དང་སྤྱོད་ལམ་གྱིས་འདུལ་བ་ཕྱི་གཟུགས་རྟགས་ཀྱི་དགེ་འདུན་ནོ། །གཉིས་པ་སྐྱབས་སུ་འགྲོ་བྱེད་ཀྱི་གང་ཟག་ནི། ཉན་ཐོས་རང་རྒྱལ་གཉིས་སོ། །གསུམ་པ་སྐྱབས་སུ་འགྲོ་ཚུལ་ནི། རང་དོན་དུ་བྱེད་པའོ། །ཐུན་མོང་གི་སྐྱབས་འགྲོ་ལ་བརྟེན་ནས་སོ་སོར་ཐར་པའི་སྡོམ་པ་སྐྱེ། དེ་ཆོ་གའི་དུས་སུ་ཐོབ། དེ་ལམ་བདེན་པ་བཞིས་སྦྱངས་ནས། འབྲས་བུ་སྲིད་པ་གསུམ་ན་དགྲ་བཅོམ་པ་ཐོབ། གཉིས་པ་ཁྱད་པར་གྱི་སྐྱབས་འགྲོ་ལ་གསུམ། དང་པོ་སྐྱབས་གནས་ངོས་བཟུང་བ་ནི། སངས་རྒྱས་ནི། སྤངས་རྟོགས་ཕུན་སུམ་ཚོགས་པ་སྟེ། ཆོས་སྐུ་ལོངས་སྐུ་སྤྲུལ་སྐུ་གསུམ། དེ་ཡང་ཆོས་སྐུ་དག་པ་གཉིས་ལྡན། དབྱིངས་རང་བཞིན་རྣམ་པར་དག་པ། སྤང་བྱ་གློ་བུར་གྱི་དྲི་མ་དང་བྲལ་བས་དག་པའོ། །ལོངས་སྐུ་ངེས་པ་ལྔ་ལྡན། སྤྲུལ་སྐུ་མ་ངེས་པ་ལྔ་ལྡན། ཆོས་ནི། རྒྱུ་ཡི་ཐེག་པ་དོན་རྣམ་པར་ངེས་པའི། མཚན་ཉིད་མེད་པའི་འཁོར་ལོ། ལྷག་པ་ཤེས་རབ་ཀྱི་བསླབ་པ་ལ་གཙོར་བྱེད། དགེ་འདུན་ནི། གཞན་དོན་སེམས་ཀྱི་དགེ་འདུན་ཏེ། བྱང་ཆུབ་སེམས་དཔའི་སྤྱོད་པ་རླབས་པོ་ཆེའོ། །གཉིས་པ་སྐྱབས་སུ་འགྲོ་བྱེད་ཀྱི་གང་ཟག་ནི། བྱང་ཆུབ་སེམས་དཔའི་གང་ཟག་སྟེ། དབང་པོ་རྣོན་པོ་དང་། རྟུལ་པོའི་རིགས་གཉིས་སོ། །གསུམ་པ་སྐྱབས་སུ་འགྲོ་ཚུལ་ནི། ཚད་མེད་པ་བཞིའི་སྒོ་ནས་རང་གཞན་གཉིས་ཀྱི་དོན་བྱེད་པའོ། །ཁྱད་པར་གྱི་སྐྱབས་འགྲོ་དེ་ལ་བརྟེན་ནས་བྱང་སེམས་ཀྱི་སྡོམ་པ་སྐྱེ། དེ་སེམས་བསྐྱེེད་ཀྱི་དུས་སུ་ཐོབ། དེ་ལམ་ཕ་རོལ་ཏུ་ཕྱིན་པ་དྲུག་ལ་སྦྱངས་ནས། འབྲས་བུ་བསྐལ་པ་གསུམ་ནས་སངས་རྒྱས་ཐོབ་བོ། །གསུམ་པ་བླ་ན་མེད་པའི་སྐྱབས་འགྲོ་ལ་གཉིས་ཏེ། གསང་སྔགས་སྤྱིའི་སྐྱབས་འགྲོ་དང་། ཁྱད་པར་ཨ་ཏིའི་སྐྱབས་འགྲོའོ། །དང་པོ་ལ་གསུམ་ལས། དང་པོ་སྐྱབས་གནས་ངོས་བཟུང་བ་ནི། སངས་རྒྱས་ནི། སྐུ་ལྔ་དབྱེར་མེད་གཅིག་དང་དུ་མ་བྲལ་བ། ཆོས་ནི། འབྲས་བུ་རྡོ་རྗེ་ཐེག་པ། གསང་སྔགས་སྤྱིའི་སྐྱབས་འགྲོ། ལུང་དུ་བསྟན་ཅིང་རྨད་དུ་བྱུང་བ། བསླབ་པ་གསུམ་གང་དུ་ཡང་བསྟན་དུ་བཏུབ་སྟེ། གསང་སྔགས་ཀྱི་ཆོས་ལ་གཙོ་བོར་བྱེད། དགེ་འདུན་ནི། ཡང་དག་དོན་གྱི་དགེ་འདུན་ཏེ། མི་དགེ་བ་ངང་གིས་མི་གནས་པའོ། །གཉིས་པ་སྐྱབས་སུ་འགྲོ་བྱེད་ཀྱི་གང་ཟག་ནི། གསང་སྔགས་རིག་པ་འཛིན་པའི་རྣལ་འབྱོར་ཏེ། སྡོམ་པ་གསུམ་ལྡན་ནོ། །གསུམ་པ་སྐྱབས་སུ་འགྲོ་ཚུལ་ནི། རང་གཞན་གྱི་ལུས་ངག་ཡིད་གསུམ་དང་། དཀོན་མཆོག་གསུམ་དབྱེར་མེད་པས། ཡུལ་དང་ཡུལ་ཅན་གཉིས་མེད་འགྲོའོ། །བླ་མེད་ཀྱི་སྐྱབས་འགྲོ་དེ་དག་ལ་བརྟེན་ནས། གསང་སྔགས་ཀྱི་སྡོམ་པ་སྐྱེ་སྟེ། དེ་དབང་གི་དུས་སུ་ཐོབ། དེ་ལམ་རིམ་པ་གཉིས་ཀྱིས་སྦྱངས་ནས། སྐྱེ་བ་གཅིག་གཉིས་སམ། གསུམ་མམ། ལྔ་ནས་སངས་རྒྱས་སོ། །གཉིས་པ་ཨ་ཏིའི་སྐྱབས་འགྲོ་ལ་གསུམ་སྟེ། དང་པོ་དཀོན་མཆོག་གསུམ་པོ་ངོས་བཟུང་བ་ནི། རིག་པ་སྐུ་བཞིར་གནས་པ་སངས་རྒྱས་དཀོན་མཆོག །དེ་ཉིད་སྟོང་པ་དབྱེར་མེད་པའོ། །དེ་ཤེས་ཀྱི་ཤེས་པ་ཆོས་དཀོན་མཆོག་སྟེ། ཨ་ཏི་ཡོ་ག་ཁྱད་པར་རྨད་དུ་བྱུང་བ་སྟེ། ངེས་པའི་དོན་གྱི་ཆོས། གཤིས་ལ་སྡིག་པ་མ་གྲུབ་ཅིང་། ངོ་བོ་ཟག་པ་མེད་པའི་དགེ་བར་གནས་པ་ནི། ཡང་དག་དོན་གྱི་དགེ་འདུན་ནོ། །གཉིས་པ་གང་ཟག་ངོས་བཟུང་བ་ནི། སྐྱེས་མཆོག་གང་ཟག་ཡང་རབ་ཨ་ཏིའི་རྣལ་འབྱོར་རོ། །གསུམ་པ་སྐྱབས་སུ་འགྲོ་ཚུལ་ལ་གསུམ། དཀོན་མཆོག་རང་གི་སེམས་ལ་གྲུབ་པར་ཤེས་པ་ནི། དོན་དུ་གཉེར་བའི་སྐྱབས་འགྲོ། རང་གི་སེམས་མ་ཡིན་པའི་དཀོན་མཆོག་གསུམ་མེད་པར་རྟོགས་པ་ནི། གཞན་སེལ་བའི་སྐྱབས་འགྲོ། སེམས་ཉིད་དཀོན་མཆོག་གི་རང་བཞིན་གཅིག་དང་དུ་མ་བྲལ་ཞིང་། མཐའ་གང་ལ་ཡང་མི་གནས་པ། གཉིས་མེད་རང་གྲོལ་དུ་རྟོགས་པ་ནི། ཡང་དག་བླ་མེད་ཀྱི་སྐྱབས་འགྲོའོ། །དེས་ན་སངས་རྒྱས་ཀྱི་བཀའ་བཞིན་དུ་བསྒྲུབ་ཅིང་གསུང་ན་བླ་མ་ཡིན། དེའི་གསུང་བཞིན་བསྒྲུབ་ན་སློབ་མ་ཡིན། དེའི་ཆ་རྐྱེན་བསྒྲུབ་ན་ཡོན་བདག་ཡིན། དེ་ལྟ་བུ་གང་ན་ཡོད་པ་དེ་ན་སངས་རྒྱས་བསྟན་པ་ཡོད་དོ། །གཉིས་པ་ཡི་གེ་བརྒྱ་པས་སྒྲིབ་པ་སྦྱོང་བ་ནི། དཀར་དམར་ནག་གསུམ་བརྒྱ་བཟླས་མཆོད་དང་བསྐང་། །ཞེས་པས། དང་པོ་བྱང་ཆུབ་མཆོག་ཏུ་སེམས་བསྐྱེད། དེ་ནས་རང་ཡི་དམ་ལྷ་རུ་བསྒོམ། དེའི་ཐུགས་ཀར་ས་བོན་གྱི་ཡིག་འབྲུ་གཅིག་ལ། ཡི་གེ་བརྒྱ་བ་དཀར་དམར་ནག་གསུམ་གྱིས་བསྐོར་བར་བསམ་ལ། ༀ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་དེ་ནོ་པ་ཏིཥྠ། དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡ་ཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲི་བྷ་ཝ། མ་ཧཱ་ས་མ་ཡ་ས་ཏྭ་ཨ། ཞེས་པས། ཡི་གེ་བརྒྱ་པ་དཀར་པོ་ལས་འོད་དཀར་པོ་འཕྲོས། བདེ་གཤེགས་སྐུ་ལ་མཆོད་པ་ཕུལ། སེམས་ཅན་ཐམས་ཅད་ཀྱི་ལུས་ཀྱི་སྒྲིབ་པ་སྦྱངས། སྐུའི་དམ་ཚིག་ཉམས་པ་བསྐངས་པར་བསམ། བརྒྱ་པ་དམར་པོ་ལས་འོད་དམར་པོ་འཕྲོས་པས། བདེ་གཤེགས་གསུང་ལ་མཆོད་པ་ཕུལ། རང་གཞན་སེམས་ཅན་ཐམས་ཅད་ཀྱི་ངག་གི་སྒྲིབ་པ་སྦྱངས། གསུང་གི་དམ་ཚིགས་ཉམས་པ་ཐམས་ཅད་བསྐངས་པར་བསམ། བརྒྱ་པ་ནག་པོ་ལས་འོད་ཟེར་ནག་པོ་འཕྲོས་པས། བདེ་གཤེགས་ཐུགས་ལ་མཆོད་པ་ཕུལ། རང་གཞན་སེམས་ཅན་ཐམས་ཅད་ཀྱི་ཡིད་ཀྱི་སྒྲིབ་པ་སྦྱངས། ཐུགས་ཀྱི་དམ་ཚིག་ཉམས་པ་ཐམས་ཅད་བསྐངས་བར་བསམ་མོ། །དེ་ནས་རང་ཉིད་འོད་དུ་ཞུ་ནས་ཡིག་འབྲུར་གྱུར། ཡི་གེ་སྐྱེ་མེད་སྟོང་ཉིད་མི་དམིགས་པའི་ངང་ལ་བཞག་གོ། །དང་པོ་མང་དུ་བཟླས། དེ་ནས་བརྒྱའམ་ཉེར་གཅིག་ལ་སོགས་པ་གང་འགྲུབ་རེ་བགྲང་། དེས་སྡིག་སྒྲིབ་ཐམས་ཅད་དག །ཉམས་ཆག་ཐམས་ཅད་བསྐང་ངོ་། །གསུམ་པ་ལས་རྒྱུ་འབྲས་དང་། འཆི་བ་མི་རྟག་པ་བསྒོམ་ལ་བློ་སྦྱོང་བ་ནི། དལ་འབྱོར་ལས་འབྲས་མི་རྟག་ཉེས་དམིགས་བསྒོམ། །ཞེས་པས། འདི་ལ་བཞི་ལས། དང་པོ་དལ་འབྱོར་རྙེད་པར་དཀའ་བ་བསྒོམ་པ་ནི། བྱང་ཆུབ་སྒྲུབ་པའི་རྟེན་ནི། དལ་འབྱོར་ཁོ་ན་ཡིན་ལ། དལ་བ་ཞེས་བྱ་བ་ནི། མི་ཁོམས་པའི་གནས་བརྒྱད་དང་བྲལ་བ་ལ་བྱ་སྟེ། མི་ཁོམས་པ་བརྒྱད་ནི། དམྱལ་བ་ཡི་དྭགས་དུད་འགྲོ་དང་། །ཚེ་རིང་ལྷ་དང་ཀླ་ཀློ་དང་། །སངས་རྒྱས་མི་འབྱུང་ལོག་ལྟ་དང་། །ལྐུགས་པ་འདི་དག་མི་ཁོམས་བརྒྱད། །ཅེས་པས། ངན་སོང་གསུམ་དང་ལྷ་ཚེ་རིང་པོ་སྟེ། མི་མ་ཡིན་པའི་འགྲོ་བ་བཞི་དང་། སངས་རྒྱས་ཀྱི་བསྟན་པ་མེད་པའི་ས་དང་། ཡོད་ཀྱང་མ་ཁྱབ་པའི་མཐའི་ཀླ་ཀློ་དང་། ལས་འབྲས་མེད་ཅེས་ལོག་པར་ལྟ་བ་དང་། འོན་ལོང་དིག་ལྐུགས་ལ་སོགས་པ་དབང་པོ་མ་ཚང་བའི་མིས་བསྡུས་པ་བཞི་སྟེ་བརྒྱད་དོ། །སྐྱོན་བཞི་གཉིས་བརྒྱད་པོ་དེ་དང་བྲལ་བ་ནི་དལ་བ་སྟེ། ཆོས་ཁྱད་པར་ཅན་གྱི་རྟེན་དུ་རུང་བ་ཡིན་ནོ། །འབྱོར་བ་ནི། མིར་གྱུར་ཡུལ་གྱི་དབུས་སྐྱེས་དང་། །དབང་པོ་ཚང་ཞིང་གནས་ལ་དད། །དེ་བཞིན་ལས་མཐའ་མ་ལོག་པའོ། །ཞེས་པས། མི་ཉིད་དུ་གྱུར་པ་དང་། ཡུལ་དབུས་སུ་སྐྱེས་པ་དང་། དབང་པོ་ཚང་བ་དང་། སངས་རྒྱས་བསྟན་པའི་གནས་ལ་དད་པ་དང་། ལས་ཀྱི་མཐའ་མ་ལོག་པ་སྟེ་རང་འབྱོར་ལྔ་དང་། སངས་རྒྱས་རྣམས་བྱོན་ཆོས་གསུངས་དང་། །བསྟན་པ་གནས་དང་དེ་རྗེས་འཇུག །གཞན་ཕྱིར་སྙིང་རྗེ་ལྔ་ཡིན་ནོ། །ཞེས་པས། སངས་རྒྱས་འཇིག་རྟེན་དུ་བྱོན་པ། དེས་ཆོས་གསུངས་པ། བསྟན་པ་དེ་ཡུན་དུ་གནས་པ། བསྟན་པའི་རྗེས་སུ་འཇུག་པ། །གཞན་གྱི་ཕྱིར་བརྩེ་བའི་ཐུགས་རྗེ་ཡོད་པ་སྟེ་གཞན་འབྱོར་ལྔའོ། །དེ་ལྟར་ཡོན་ཏན་ལྔ་གཉིས་བཅུ་དང་ལྡན་པ་དེ་ནི་འབྱོར་བ་ཅེས་བྱ་སྟེ། ཆོས་ལ་སྤྱད་དུ་ཡོད་པའོ། །དེ་ནི་རྒྱུ་རྐྱེན་ངོ་བོ་གང་ལ་བརྟགས་ཀྱང་ཐོབ་པ་ཤིན་ཏུ་དཀའ་བ་ཡིན་པས། དེ་ལྟར་བསྒོམ་ན་འཁོར་བ་ལ་བློ་ལྡོག་པ་ཡིན་ནོ། །གཉིས་པ་ལས་རྒྱུ་འབྲས་ལ་གསུམ་སྟེ། ལས་ཀྱི་ངོ་བོ་ངོས་བཟུང་བ་དང་། སོ་མཚམས་དབྱེ་བ། རྣམ་གྲངས་སོ། །དང་པོ་ནི། ལས་ཀྱི་ངོ་བོ་ངོས་བཟུང་བ། གང་ཉེས་པར་སྤྱོད་པ་དངོས་སམ་བརྒྱུད་ནས་སྡུག་བསྔལ་བསྐྱེད་པ་ནི་སྡིག་པ་སྟེ་མི་དགེ་བའི་ལས་སོ། །དེ་ལ་གསུམ་སྟེ། རང་བཞིན་གྱི་ཁ་ན་མ་ཐོ་བ། སྤྱད་པ་ཉིད་ན་སྡིག་ཏུ་གྱུར་པ། མཚམས་མེད་པ་ལྔ། དེ་དང་ཉེ་བ་ལྔ། མི་དགེ་བ་བཅུའོ། །བཅས་པའི་ཁ་ན་མ་ཐོ་བ། བཅས་པ་ཉིད་ན་ལྟུང་བར་གྱུར་པ། སྡོམ་པ་གསུམ་གྱི་ཉེས་པའོ། །འཇིག་རྟེན་གྱི་ཁ་ན་མ་ཐོ་བ། གཞན་གྱི་སྡིག་ཅན་བྱེད་པ་སྟེ། མི་ཤེས་པ། བག་མེད་པ། མ་གུས་པ། ཉོན་མོངས་པའོ། །གང་ལེགས་པ་སྤྱོད་པ་དངོས་སམ་བརྒྱུད་ནས་བདེ་བ་སྐྱེད་པ་ན་དགེ་བའོ། །དེ་ལ་གསུམ། འཁོར་གསུམ་དམིགས་པ་དང་བཅས་ནས་གཏོང་བ་བསོད་ནམས་ཆ་མཐུན་དགེ་བ། ངེས་འབྱུང་གི་སེམས་ཀྱིས་ཀུན་ནས་བླངས་ནས་གཏོང་བ་ཐར་པ་ཆ་མཐུན་གྱི་དགེ་བ། འཁོར་གསུམ་ཡོངས་དག་མི་དམིགས་པར་ཤེས་པ་ཐར་པ་བླ་ན་མེད་པའི་དགེ་བའོ། །དགེ་སྡིག་གཉིས་ཀ་མ་ཡིན་པ་ནི། ལུང་མ་བསྟན་གྱི་ལས་སོ། །གཉིས་པ་ལས་ཀྱི་སོ་མཚམས་དབྱེ་བ་ལ་བདུན་ལས། དང་པོ།༡༽ དོན་གྱི་དགེ་བ་གནས་ལུགས་འདུས་མ་བྱས། དོན་གྱི་མི་དགེ་བ་འདུས་བྱས་འཁོར་བའི་ཆོས་སོ། །༥༽རང་བཞིན་གྱིས་དགེ་བ་རིག་པ་ཡེ་ཤེས། རང་བཞིན་གྱིས་མི་དགེ་བ་ཉོན་མོངས་དུག་ལྔའོ། །༣༽གཤིས་དགེ་བ་ཆོས་ཉིད་སྟོང་པ། གཤིས་མི་དགེ་བ་མ་རིག་པའོ། །༤༽ ཡང་དག་པའི་དགེ་བ་བློ་ལས་འདས་པ། ཡང་དག་པའི་མི་དགེ་བ་ཡིད་ཀྱིས་བསླད་པའོ། །༢༽ཡིད་ལ་མི་བྱེད་པ་ནི་མྱང་འདས་ཏེ་དགེ་བ། ཡིད་ལ་བྱེད་པ་ནི་འཁོར་བ་དེ་མི་དགེ་བའོ། །༦༽དུག་གསུམ་ཆ་ཕྲ་མོས་སྤགས་པའི་དགེ་བས་མཐོ་རིས་གསུམ། དུག་གསུམ་གྱིས་ཀུན་ནས་བསླངས་པའི་སྡིག་པས་ངན་སོང་གསུམ་བསྐྱེད་དོ། །༧༽ ཐབས་ཤེས་ཀྱི་དགེ་བས་མི་གནས་པའི་མྱང་འདས། ཐབས་ཤེས་ཅི་རིགས་པའི་དགེ་བས་ཕྱོགས་གཅིག་པའི་མྱང་འདས་སོ། །གསུམ་པ་ལས་གྱི་རྣམ་གྲངས་ལ། གཅིག་ཏུ་དཀར་བའི་ལས། དགེ་བ་ཁོ་ནའོ། །གནག་པའི་ལས། མི་དགེ་བ་ཁོ་ནའོ། །འདྲེས་པའི་ལས་དགེ་སྡིག་འདྲེས་པ་སྟེ། གསུམ། བསམ་པ་དཀར་ལ་སྦྱོར་བ་གནག་པ། མི་ནག་མདུང་ཐུང་ཅན་བསད་པ་ལྟ་བུའོ། །བསམ་པ་ནག་ལ་སྦྱོར་བ་དཀར་བ། གསོད་པའི་ཕྱིར་བསྙེན་བཀུར་བྱེད་པ་ལྟ་བུའོ། །བསམ་སྦྱོར་གཉིས་ཀ་དཀར་བ། སངས་རྒྱས་ཐོབ་པའི་ཕྱིར་དགེ་བ་ལ་སྦྱོར་བ་ལྟ་བུའོ། །གཉིས་ཀ་ནག་པ། ཞེ་སྡང་གིས་བསད་པ་ལྟ་བུ། མཐོང་ཆོས་འབྲས་བུ་ཅན། ཚེ་འདིར་རྣམ་སྨིན་མྱོང་བའི་ལས་སོ། །སྐྱེས་ནས་མྱོང་གྱུར། །སྐྱེ་བ་ཕྱི་མ་ལ་མྱོང་ངེས། ལན་གྲངས་གཞན་ལ་མྱོང་བ། སྐྱེ་བ་གསུམ་ཕན་ལ་མྱོང་བའི་ལས་སོ། །ལས་དཀར་རྣམ་སྨིན་དཀར་བ། དགེ་བ་བྱས་པས་བདེ་འགྲོ་སྐྱེ་བའོ། །ལས་ནག་རྣམ་སྨིན་ནག་པ། མི་དགེ་བ་བྱས་པས་ངན་འགྲོར་སྐྱེ་བའོ། །ལས་དཀར་རྣམ་སྨིན་ནག་པ། མི་སྡུག་བསྔལ་ཅན་ལྟ་བུ། ལས་ནག་རྣམ་སྨིན་དཀར་བ། གླང་པོ་ཆེ་རབ་བརྟན། འཕེན་བྱེད་དགེ་བ་ལ་རྫོགས་བྱེད་ཀྱང་དགེ་བ། ལྷར་སྐྱེ་བ། འཕེལ་བྱེད་དགེ་བ་ལ་རྫོགས་བྱེད་མི་དགེ་བ། མི་དབུལ་པོ་ལྟ་བུ། འཕེན་བྱེད་ཀྱང་མི་དགེ་བ་ལ་རྫོགས་བྱེད་ཀྱང་མི་དགེ་བ། དུད་འགྲོར་སྐྱེ་བའི་སྡུག་བསྔལ་ཅན་ལྟ་བུ། འཕེལ་བྱེད་མི་དགེ་བ་ལ་རྫོགས་བྱེད་དགེ་བའི་ལས་ཀླུ་ཕྱུག་པོ་ལྟ་བུ། ཡོད་དོ། །བདག་གིས་མི་དགེ་བ་བྱས་པའི་ལས་གཞན་ལ་མི་སྨིན། གཞན་གྱིས་དགེ་མི་དགེ་བྱས་པ་བདག་ལ་མི་སྨིན། རང་གིས་ལས་མ་བྱས་པ་དང་མི་འཕྲད། རང་གི་དགེ་སྡིག་བྱས་པའི་ལས་ཆུད་མི་ཟ། དགེ་མི་དགེ །དཀར་ནག་གི་ལས་མི་འཆོལ་བས། དེའི་ཕྱིར་སྡུག་བསྔལ་མྱོང་བའི་ལས་དགེ་བ་དང་མི་དགེ་བ། ཤིན་ཏུ་ཕྲ་བ་ནས་འདོར་ལེན་བྱའོ། །གསུམ་པ་མི་རྟག་པ་བསྒོམ་པ་ལ་གསུམ་སྟེ། སྐྱེས་ཕན་ཆད་འཆི་ངེས་པར་འདུག །དེ་ཀ་མི་རྟག་པའི་ངོ་བོ་ཡིན་པར་འདུག །དོན་སྙིང་ལ་མཚོན་ཕོག་པའི་སྐྱེས་བུ་དང་འདྲ། དེ་ཡང་ནམ་འཆི་ངེས་པ་མི་འདུག །དེ་ཀ་མི་རྟག་པའི་མཚན་ཉིད་ཡིན་ཏེ། རྩྭ་ཁའི་ཟིལ་པ་དང་འདྲ། འཆི་བ་ལ་ཅིས་ཀྱང་མི་ཕན་པར་འདུག །དེ་ཀ་མི་རྟག་པའི་ཁྱད་ཆོས་ཡིན་ཏེ། ཉི་མ་རྒས་པའི་གྲིབ་སོ་དང་འདྲའོ། །དང་པོ་འཆི་ངེས་པ་ལ་རྒྱུ་མཚན་གསུམ། སྔར་སྐྱེས་པ་ལུས་པ་མེད་པ་དང་། ཚེ་ལ་བསྣོན་པ་མེད་ཅིང་འབྲིད་པ་ཡོད་པ་དང་། ལུས་སེམས་འདུས་བྱས་ཡིན་ཏེ་འཆི་ངེས་པའོ། །གཉིས་པ་ནམ་འཆི་ངེས་པ་མེད་པ་ལ་ཡང་རྒྱུ་མཚན་གསུམ་སྟེ། ཚེ་ལ་དུས་བཏབ་མེད་པ་དང་། འཆི་རྐྱེན་མང་བ་དང་། འདུས་བྱས་འཇིག་པའི་རང་བཞིན་ཅན་ཡིན་པས་ནམ་འཆི་ངེས་པ་མེད་དོ། །གསུམ་པ་འཆི་བ་ལ་ཅིས་ཀྱང་མི་ཕན་པ་ལའང་རྒྱུ་མཚན་གསུམ་སྟེ། བསགས་པའི་ནོར། འབྲེལ་བའི་གཉེན། བརྩིགས་པའི་མཁར་གྱིས་མི་ཕན་པའོ། །དེ་ལྟར་མི་རྟག་པ་བསྒོམས་པས་འཇིག་རྟེན་འདི་ལ་བློ་ལྡོག་པ་ཡིན་ནོ། །བཞི་པ་འཁོར་བའི་ཉེས་དམིགས་བསྒོམ་པ་ནི། འཁོར་བ་ནི། ཁམས་གསུམ་ཀྱི་སེམས་ཅན་ཡིན་ལ། དེ་དག་ནི་སྡུག་བསྔལ་གྱི་རང་བཞིན། སྡུག་བསྔལ་གྱི་ངོ་བོ། སྡུག་བསྔལ་གྱི་ཡོ་ལང་ཡིན་ཏེ། རྩ་བའི་སྡུག་བསྔལ་བཞི་ནི། ལུ་གུ་རྒྱུད་དང་འདྲ་སྟེ། གཅིག་གཤམ་ལ་གཅིག་འབྲེལ། ཡན་ལག་གི་སྡུག་བསྔལ་དྲུག་ནི། རྒྱ་མཚོའི་རླབས་དང་འདྲ་སྟེ། བུད་པ་དང་སངས་པ་མེད། ཉིང་ལག་གི་སྡུག་བསྔལ་ནི། གནམ་གྱི་སྐར་མ་དང་འདྲ་སྟེ། གྲངས་དང་ཚད་མེད། དེས་ན་གང་དུ་སྐྱེས་ཀྱང་སྡུག་བསྔལ་གྱི་ཡོ་ལང་། སུ་དང་འགྲོགས་ཀྱང་སྡུག་བསྔལ་གྱི་གྲོགས་པོ། གང་དུ་ཕྱིན་ཀྱང་སྡུག་བསྔལ་གྱི་གནས་པོ། །གང་གི་ཡིན་ཀྱང་སྡུག་བསྔལ་གྱི་བསྣོན་པར་འདུག་སྟེ། ལོ་ཀའི་ཕུན་སུམ་ཚོགས་པ་ཐམས་ཅད་སྡུག་བསྔལ་གྱི་རྒྱུ། མ་ཚོགས་པ་ཐམས་ཅད་སྡུག་བསྔལ་གྱི་འབྲས་བུ་སྟེ། སྡུག་བསྔལ་ལུ་གུ་བརྒྱུད་དང་འདྲ་བ། གཅིག་གཤམ་ནས་གཅིག་འབྲེལ། ཆུའི་གཉེར་མ་དང་འདྲ་སྟེ་བུད་པ་དང་སངས་པ་མེད། གནམ་གྱི་སྐར་མ་དང་འདྲ་སྟེ་གྲངས་དང་ཚད་མེད་དོ། །མདོར་ན། འདོད་པ་སེམས་ཀྱི་ཆོ་འཕྲུལ། མྱོང་བ་ལུས་ཀྱི་སྡུག་བསྔལ། སྣང་བ་ཡུལ་གྱི་སྡུག་བསྔལ། སྒོ་གསུམ་རྩོལ་སྒྲུབ་ཀྱི་སྡུག་བསྔལ་ཏེ། སྡུག་བསྔལ་མེད་པ་གཅིག་ཀྱང་མེད་དོ། །དེ་ལྟར་བསམ་ཙ་ན་འཁོར་བ་འདི་ལ་བློ་ལྡོག་པ་ཡིན་ནོ། །བཞི་པ་མཎྜལ་དང་གཏོར་མས་ཚོགས་གསོག་པ་ལ་གཉིས་ལས། དང་པོ་མཎྜལ་དབུལ་བ་ནི། སྒྲུབ་དང་མཆོད་པའི་མཎྜལ་གཉིས་སུ་འབུལ། །ཞེས་པས། སྒྲུབ་པའི་མཎྜལ་དགོད་པ་དང་། མཆོད་པའི་མཎྜལ་དབུལ་བའོ། དང་པོ་ནི། སྒྲུབ་པའི་མཎྜལ། མཎྜལ་ཕྱིས་པས་སྟོང་པ་ཉིད་དུ་བསམ། སྟོང་པའི་ངང་ལས་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པ་བསམ། དེའི་ཕྱོགས་བཞི་དབུས་དང་ལྔར། སེང་གེའི་ཁྲི་རིན་པོ་ཆེས་སྤྲས་པ། ཉི་ཟླ་པདྨ་དང་བཅས་པའི་གདན་ལྔ་བསམ། ཁྲི་དབུས་མའི་སྟེང་ན་རྩ་བའི་བླ་མ། ཤར་དུ་ཡི་དམ། ལྷོར་སངས་རྒྱས། ནུབ་ཏུ་ཆོས། བྱང་དུ་དགེ་འདུན་དཀོན་མཆོག་གསུམ། དེ་རྣམས་ལས་འོད་ཟེར་འཕྲོས་པས། རྩ་བའི་བླ་མ་ལ་བཀའ་བརྒྱུད་ཀྱི་བླ་མ་ཐམས་ཅད་བསྟིམ། ཡི་དམ་ལ་གསང་སྔགས་ཀྱི་ལྷ་ཚོགས། སངས་རྒྱས་ལ་སྐུ་གསུམ་ཡེ་ཤེས་ལྔ་ཕྱོགས་བཅུའི་སངས་རྒྱས། ཆོས་ལ་བསྟན་སྒྲུབ་འགོགས་པའི་ཆོས་ཐམས་ཅད། དགེ་འདུན་ལ་ཉན་རང་བྱང་ཆུབ་སེམས་ཀྱི་དགེ་འདུན་དཔག་ཏུ་མེད་པ་བསྟིམ། དེ་རྣམས་ལ་ལུས་ལོངས་སྤྱོད་དགེ་བའི་རྩ་བ་ཐམས་ཅད་དབུལ། མཆོད་པའི་སྤྲིན་ཚོགས་དཔག་ཏུ་མེད་པས་མཆོད་ལ། ངག་ཏུ། བླ་མ་ཡི་དམ་ཇོ་བོ་དཀོན་མཆོག་བཞེས་ཤིག །བདག་གི་ལུས་ལོངས་སྤྱོད་དགེ་རྩ་ཐམས་ཅད་ཡོངས་སུ་དབུལ་ལོ་བཞེས་ཤིག། བླ་མ་ཡི་དམ་ལྷ་ཚོགས་དཀོན་མཆོག་གསུམ་པོ། །བདག་ལ་རྟོགས་པ་མཆོག་ཏུ་གྱུར་པ། ཉམས་མྱོང་རྒྱུན་ཆད་མེད་པ། སྣང་བ་རྟེན་འབྲེལ་དུ་འཆར་བར་བྱིན་གྱིས་བརླབ་ཏུ་གསོལ། །ཅེས་གསོལ་བ་ལན་གསུམ་གདབ། དེ་ནས་རྟེན་འཁོར་ལོ་ལྔ་པོ་མདུན་གྱི་ནམ་མཁའ་ལ་བཏེགས་ལ། ༀ་སརྦ་གུ་རུ་ལོ་ཀ་པཱུ་ཙ་དྷརྨ་ཡེ་སྭཱ་ཧཱ། །ཞེས་སོ། །གཉིས་པ་མཆོད་པའི་མཎྜལ་དབུལ་བ་ནི། མཎྜལ་དེ་ཕྱིས་བས་རྒྱ་མཚོ་སྔོ་ལ་དྭངས་པ་གཅིག་ཏུ་བསམ། དེའི་དབུས་སུ་ཚོམ་བུ་གཅིག་བཀོད་པས། དབུས་ཀྱི་རི་རབ་རྒྱུ་རིན་པོ་ཆེ་སྣ་ཚོགས་ལས་གྲུབ་པ་དབྱིབས་གྲུ་བཞི་བང་རིམ་ལྔ་དང་ལྡན་པ། རྒྱ་ཆེ་ལ་དཔང་མཐོ་བ་གཅིག་བསམ། ཤར་དུ་ཚོམ་བུ་གཅིག་བཀོད་པས། ལུས་འཕགས་པོ་དུང་ལས་གྲུབ་པ་དབྱིབས་ཟླ་གམ་རྒྱ་ཆེ་ལ་དཔང་མཐོ་བ་གཅིག་བསམ། ལྷོ་རུ་གཅིག་བཀོད་པས། འཛམ་བུ་གླིང་བཻ་ཌཱུརྱ་ལས་གྲུབ་པ་དབྱིབས་སོག་ག །ནུབ་ཏུ་གཅིག་བཀོད་པས། བ་གླང་སྤྱོད་ཤེལ་དམར་པོ་ལས་གྲུབ་པ་ཟླུམ་པོ། བྱང་དུ་གཅིག་བཀོད་པས། སྒྲ་མི་སྙན་གསེར་ལས་གྲུབ་པ་གྲུ་བཞི། །ཤར་དང་དབུས་ཀྱི་བར་དུ་གཅིག་བཀོད་ལ། ཟླ་བའི་དཀྱིལ་འཁོར་ཆུ་ཤེལ་ལས་གྲུབ་པ་རྒྱ་ཆེ་བ་དཔང་མཐོ་བ་གཅིག་བསམ། ནུབ་དང་དབུས་ཀྱི་བར་དུ་གཅིག་བཀོད་ལ། ཉི་མའི་དཀྱིལ་འཁོར་མེ་ཤེལ་ལས་གྲུབ་པ་གཅིག་བསམ། དེ་རྣམས་ཀྱི་བར་ཐམས་ཅད་མཆོད་པའི་སྤྲིན་སྣ་ཚོགས་གཅལ་དུ་བཀྲམ་པ། རཏྣ་སྣ་ཚོགས་ཀྱིས་ཕྱུར་ལུད་དུ་བཀང་བ། སངས་རྒྱས་ཀྱི་ཞིང་ཁམས་རྣམ་པར་དག་པ། སངས་རྒྱས་དང་བྱང་ཆུབ་སེམས་དཔས་གང་བ། ལྷའི་བུ་དང་བུ་མོ་མང་པོ་གླུ་ལེན་ཅིང་གར་བསྒྱུར་བ་དང་བཅས་པ་དམིགས་ལ་དབུལ་ལོ། །རང་གི་ལུས་ལོངས་སྤྱོད་དགེ་བའི་རྩ་བ་ཐམས་ཅད་ལྟོས་པ་མེད་པར་དབུལ་ལོ། །གཉིས་པ་གཏོར་མ་སྐྱོང་བ་ནི། སྣ་ཚོགས་ལམ་ཁྱེར་གཏོར་མས་ཚོགས་གཉིས་བསགས། །ཞེས་པས། འདི་ལ་གཉིས་ཏེ། གནད་སྤྱིར་བསྟན་པ་དང་། བཏངས་ཐབས་བྱེ་བྲག་ཏུ་བཤད་པའོ། །དང་པོ་གནད་སྤྱིར་བསྟན་པ་ལ་ལྔ་སྟེ། ངོ་བོ། ངེས་ཚིག །རྣམ་གྲངས། མགྲོན་ངོས་བཟུང་བ། གཏོར་མའི་དེ་ཉིད་དོ། །དང་པོ་ནི། ངོ་བོ། དབྱིངས་དང་ཡེ་ཤེས་གཉིས་སུ་མེད་པ་སྟེ། ཆོས་ཉིད་སྟོང་པའི་རྩལ་ཆོས་ཅན་གཏོར་མར་འཆར་བའོ། །གཉིས་པ་ངེས་ཚིག་ནི། འཛིན་པ་མེད་པས་གཏོར། ཀུན་ལ་ཁྱབ་པས་མ། ཞེས་བྱ་སྟེ། རྟོག་མེད་ཡེ་ཤེས་ཀྱི་རོལ་པས་མགྲོན་བཞི་ཚིམས་པའོ། །གསུམ་པ་རྣམ་གྲངས་ལ་ལྔ་སྟེ། འཁོར་འདས་ཀྱི་ཆོས་ཐམས་ཅད་རང་སྣང་འཛིན་མེད་དུ་རྟོགས་ནས་ཉོན་མོངས་ཡེ་ཤེས་སུ་ཤར་བ་ནི། འགྱུར་མེད་ཡེ་ཤེས་ཀྱི་གཏོར་མ། ཆོས་ཐམས་ཅད་རང་སྣང་གཉིས་མེད་དུ་རྟོགས་ནས་སྡུག་བསྔལ་བདེ་བར་འཆར་བ་ནི། བདེ་ཆེན་བྱང་ཆུབ་སེམས་ཀྱི་གཏོར་མ། ཕྱི་ནང་སྣོད་བཅུད་སེམས་ཀྱིས་ཁྱབ་ཚད་ཆོས་ཉིད་ཀྱིས་ཁྱབ་པ་ནི། ཡོངས་སུ་ཁྱབ་པའི་གཏོར་མ། ཆོས་ཉིད་བྱང་ཆུབ་སེམས་མ་བྱུང་མ་སྐྱེས་པ་ནི། དག་པ་ཆོས་ཉིད་ཀྱི་གཏོར་མ། །ཐམས་ཅད་ཡང་དག་གཉིས་མེད་ཀྱི་ལམ་དུ་འགྲོ་བ་ནི། སྣ་ཚོགས་ལམ་ཁྱེར་གྱི་གཏོར་མའོ། །བཞི་པ་མགྲོན་ངོས་བཟུང་བ་ལ་གཉིས་ལས། ཕྱི་མཚན་ཉིད་དང་། ནང་གསང་སྔགས་སོ། །དང་པོ་ཕྱི་མཚན་ཉིད་ལྟར་ན། སྲིད་ཞིའི་མགྲོན་ཡང་དག་པར་རྫོགས་པའི་སངས་རྒྱས་ལ་ཉན་རང་བྱང་སེམས་ཀྱིས་བསྐོར་བའམ། ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ་ལ་སྲས་ཕྱོགས་བཅུའི་སངས་རྒྱས་ཀྱིས་བསྐོར་བའོ། །ཡོན་ཏན་གྱི་མགྲོན་གསང་བདག་ཕྱག་ན་རྡོ་རྗེ་ལ་གཙང་རིས་མགོན་པོས་བསྐོར་བ། སྙིང་རྗེའི་མགྲོན་འཕགས་པ་སྤྱན་རས་གཟིགས་ལ་རིགས་དྲུག་སེམས་ཅན་གྱིས་བསྐོར་བ། ལན་ཆགས་ཀྱི་མགྲོན་དཔལ་རྟ་མགྲིན་ལ་བགེགས་རིགས་སྟོང་ཕྲག་བརྒྱད་ཅུས་བསྐོར་བའོ། །གཉིས་པ་ནང་གསང་སྔགས་ལྟར་ན། སྲིད་ཞིའི་མགྲོན་བླ་མ་ཡི་དམ་ཞི་ཁྲོའི་ལྷ་ཚོགས་ཀྱིས་བསྐོར་བ། ཡོན་ཏན་མཁའ་འགྲོ་སྡེ་ལྔ་ལ་ཆོས་སྐྱོང་ཕོ་མོས་བསྐོར་བ། སྙིང་རྗེ་དུས་གསུམ་ཕ་མ་རིགས་དྲུག་སེམས་ཅན་གྱིས་བསྐོར་བ། ལན་ཆགས་རང་གི་སྲུང་མ་ལ་ལྷ་སྲིན་སྡེ་བརྒྱད་ཀྱིས་བསྐོར་བའོ། །ལྔ་པ་གཏོར་མའི་དེ་ཉིད་ལ་བཞི་སྟེ། དོན་དང་རྟགས། དགོངས་པ་དང་སྤྱོད་ལམ། ལས་དང་རིམ་པ། སྐྱོན་དང་ཡོན་ཏན་ནོ། །དང་པོ་ལ། དོན་སྐྱེ་འགགས་གཉིས་མེད། རྟགས་སྔགས་དང་ཕྱག་རྒྱ་ཏིང་ངེ་འཛིན་ཡིག་འབྲུའི་ཆོ་འཕྲུལ་ལོ། །གཉིས་པ་གཏོར་མའི་དགོངས་པ་བཞི་ནི། བདག་ཡི་དམ་ལྷར་གསལ་བ། གནས་གཞལ་ཡས་ཁང་དུ་གསལ་བ། མགྲོན་རྣམས་ལྷ་ཕོ་མོར་གསལ་བ། །རྫས་བདུད་རྩིའི་རྒྱ་མཚོར་གསལ་བའོ། །གཏོར་མའི་སྤྱོད་ལམ་བཞི་ནི། འབགས་པ་དང་རྩོག་པ་མེད་པ། བོ་བ་དང་ཟགས་པ་མེད་པ། དངོས་པོ་བཟང་ཞིང་དྲི་མས་མ་གོས་པ། སེམས་མ་གཡེངས་ཤིང་ཏིང་ངེ་འཛིན་གསལ་བའོ། །གསུམ་པ་གཏོར་མའི་ལས་བཞི་ནི། ཚོགས་གཉིས་རྫོགས་པ། སྒྲིབ་གཉིས་སྦྱོང་བ། བར་ཆད་གཉིས་ཞི་བ། དངོས་གྲུབ་གཉིས་ཐོབ་པའོ། །གཏོར་མའི་རིམ་པ་བཞི་ནི། སྒྲུབ་པའི་གཏོར་མ་བསྐྱིལ་བས་དམ་ཅན་འདུས་པ། རྒྱུན་གཏོར་བཏང་བས་ལས་མྱུར་བ། དུས་གཏོར་དང་སྐོང་གཏོར་མ་ཆག་པས་བསམ་པ་འགྲུབ་པ། དྲག་པོའི་གཏོར་མ་ཟོར་དུ་འཕངས་པས་དགྲ་བགེགས་ཐུལ་བའོ། །བཞི་པ་གཏོར་མའི་དེ་ཉིད་མ་ཤེས་པའི་སྐྱོན་ནི། ཆུ་མ་བླུགས་ན་སྤེལ་བར་མི་ནུས། བྱིན་གྱིས་མ་བརླབས་ན་རྒྱལ་བ་དང་དམ་ཚིག་ཉམས། བསྔོ་བ་ལོག་ན་སྒྲིབ་པ་གསོག །མ་འབྱོར་ན་ལུང་སྐམ་གྱི་རི་དྭགས་སུ་སྐྱེ། རྒྱུ་རྐྱེན་མ་ཚང་ན་མགྲོན་མི་འཚོགས། མགྲོན་མ་འཚོགས་ན་བཏང་བའི་འབྲས་བུ་མེད། རྫས་མ་ཚོགས་ན་སྤྱན་དྲངས་ཀྱང་མི་འབྱོན། དམ་རྫས་ངོ་མ་ཤེས་ན་ལྷའི་ཆད་པ་འོང་། ཆོ་ག་གཞུང་མ་བསྲང་ན་སྲུང་མའི་ཆད་པའོང་། མ་བཏང་ན་བསམ་པ་མི་འགྲུབ། སྒྲུབ་པ་མ་ཐོན་བར་ལ་གཏོར་གཞོང་བཤལ་ན་ཆོས་སྐྱོང་མི་འདུ། གཏོར་གཞོང་ཁ་ཕྱིར་བསྟན་ནས་ཕོ་ན་དངོས་གྲུབ་ལོག །གཏོར་མ་གཏོད་ཁར་མ་སྒུལ་ན་ལེན་མི་ནུས་སོ། །དེ་ཉིད་ཤེས་པའི་ཡོན་ཏན་ནི། ཆུ་བླུགས་པས་སྤེལ་བར་ནུས། བྱིན་གྱིས་བརླབས་པས་རྒྱལ་བ་དང་དམ་ཚིག་མི་ཉམས་པ་ལ་སོགས་པ་སྐྱོན་དེ་དག་ལས་ལོག་པ་ཡོན་ཏན་ནོ། །གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། ལམ་ཁྱེར་དང་། རྒྱུན་གཏོར་རོ། །དང་པོ་ལམ་ཁྱེར་ལ་བཞི་སྟེ། ཕྱི། ནང་། གསང་བ། དེ་ཁོ་ན་ཉིད་ཀྱི་གཏོར་མའོ། །དང་པོ་ཕྱི་སྣ་ཚོགས་ལམ་ཁྱེར་གྱི་གཏོར་མ་ལ་བདུན་ཏེ། སྣོད། རྫས། བྱིན་གྱིས་བརླབ་པ། སྤྱན་དྲངས་ཤིང་བདུན་རྣམ་དག་བྱ་བ། མཆོད་ཅིང་བསྟབ་པ། བསྔོ་ཞིང་ཕྲིན་ལས་བཅོལ་བ། གཤེགས་ཤིང་གཏོར་མ་བཏང་བའོ། །དང་པོ་ནི། རཏྣ་ཏེ་ཆེ་ཆུང་གང་ཡོད། གཉིས་པ་རྫས་ནི། ཞལ་ཟས་སྣ་ཚོགས་དཀར་གསུམ་མངར་གསུམ་གྱིས་བརྒྱན་པ། གསུམ་པ་བྱིན་གྱིས་བརླབ་པ་ལ་གཉིས་ལས། དང་པོ་རང་བརླབ་པ་ནི། རང་ཡི་དམ་ལྷར་བསྐྱེད་དེ། ༀ་ཨཱཿཧཱུྃ། ཞེས་པས། སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་ༀ། མགྲིན་པར་པདྨའི་སྟེང་དུ་ཨཱཿ སྙིང་ཁར་ཉི་མའི་སྟེང་དུ་ཧཱུྃ་བསམ་ལ། ལུས་ངག་ཡིད་གསུམ་སྐུ་གསུང་ཐུགས་སུ་བྱིན་གྱིས་བརླབ་བོ། །གཉིས་པ་གཏོར་མ་ལ་བརླབ་པ་ནི། ༀ་ཨཱཿ ཧཱུྃ། ཞེས་པས་ལན་བདུན་གྱིས། བདག་གི་གནས་གསུམ་གྱི་ཡིག་འབྲུ་ལས་འོད་འཕྲོས་པས། མི་གཙང་བ་འབགས་རྩོག་སྦྱངས། ཡང་། ལན་བདུན་གྱིས། བདུད་རྩིའི་རང་བཞིན་དུ་སྤེལ། ཡང་ལན་བདུན་གྱིས། ཡིད་ལ་གང་འདོད་པ་ལྟར་མོས་པར་བསྒྱུར་ཏེ། བཞི་པ་སྤྱན་དྲངས་བ་ནི། བདག་གི་གནས་གསུམ་ནས་འོད་ཟེར་འཕྲོས་པས། དུས་གསུམ་རྒྱལ་བ་གཤེགས་སུ་གསོལ། །དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །མ་ཆགས་པདྨའི་གདན་ལ་བཞུགས། །མཆོད་པ་རྣམས་ཀྱིས་མཆོད་པར་བགྱི། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང་། །མྱ་ངན་མི་འདའ་གསོལ་བ་འདེབས། །ཆོས་ཀྱི་འཁོར་ལོ་བསྐོར་བར་བསྐུལ། ཐམས་ཅད་བྱང་ཆུབ་མཆོག་ཐོབ་ཤོག །ཅེས་པས། མདུན་གྱི་ནམ་མཁའ་ལ། པདྨ་སྟོང་ལྡན་གྱི་གདན་ལ། མགྲོན་བཞི་བྱོན་པར་བསམ་མོ། །ལྔ་པ་མཆོད་ཅིང་བསྟབ་པ་ནི། སྲིད་ཞུའི་མགྲོན་རྒྱལ་བ་སྲས་དང་བཅས་པ་རྣམས་མཆོད་པ་བཞེས། ཡོན་ཏན་གྱི་མགྲོན་དཔལ་ཕྱག་ན་རྡོ་རྗེ་ལ་གཙང་རིས་མགོན་པོས་བསྐོར་བ་རྣམས་མཆོད་པ་བཞེས། སྙིང་རྗེའི་མགྲོན་འཕགས་པ་སྤྱན་རས་གཟིགས་ལ་རིགས་དྲུག་གིས་བསྐོར་བ་རྣམས་མཆོད་པ་བཞེས། ལན་ཆགས་ཀྱི་མགྲོན་དཔལ་རྟ་མགྲིན་ལ་བགེགས་རིགས་ཀྱིས་བསྐོར་བ་རྣམས་མཆོད་པ་བཞེས། ཞེས་བརྗོད་ཅིང་། སེ་གོལ་ལན་གསུམ་གཏོགས་པས། ཐམས་ཅད་ཚིམ་ཞིང་དགེས་ནས། བདག་ལ་དངོས་གྲུབ་སྟེར་བར་བསམ་མོ། །དྲུག་པ་བསྔོ་ཞིང་ཕྲིན་ལས་བཅོལ་བ་ལ་གཉིས་ཏེ། དང་པོ་བསྔོ་བ་ནི། རིན་ཆེན་རྒྱ་ཆེའི་སྣོད་ནང་དུ། །ཞལ་ཟས་སྣ་ཚོགས་གཏོར་མའི་རྒྱུ། །དཀར་གསུམ་མངར་གསུམ་གཏོར་མའི་རྒྱན། །འབྲུ་གསུམ་སྔགས་ཀྱིས་བྱིན་བརླབས་པས། །མི་མཉེས་པ་དག་གང་ཡང་མེད། །རྒྱལ་བ་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །ལན་ཆགས་བུ་ལོན་བྱང་གྱུར་ཅིག །རྣམ་བཞིའི་མགྲོན་གྱི་རིགས་རྣམས་ལ། །ཚད་མེད་གཏོར་མ་འདི་བསྔོས་པས། །ལོངས་སྤྱོད་ལྡན་ཞིང་ཚོགས་རྫོགས་ནས། །ཐམས་ཅད་མྱུར་དུ་སངས་རྒྱས་ཤོག །གཉིས་པ་ཕྲིན་ལས་བཅོལ་བ་ནི། ནད་དང་། སྡིག་པ་དང་། གདོན་བགེགས་ཐམས་ཅད་ཞི་བར་མཛད་དུ་གསོལ། །ཚེ་དང་ལོངས་སྤྱོད་དབང་ཐང་རྒྱས་པར་མཛད་དུ་གསོལ། །ལོག་པར་ལྟ་བ་རྣམས་དབང་དུ་བསྡུ་བར་མཛད་དུ་གསོལ། བསྟན་པ་བཤིགས་པ་རྣམས་བསྒྲལ་བར་མཛད་དུ་གསོལ། །རྐྱེན་ངན་པ་དང་དུས་མ་ཡིན་པར་འཆི་བ་རྣམས་བཟློག་ཏུ་གསོལ། །བདུན་པ་གཤེགས་ཤིང་གཏོར་མ་བཏང་བ་ནི། ༀ་ཨཱཿཧཱུྃ་མུཿཞེས་པས། མགྲོན་རྣམས་རང་བཞིན་གྱི་གནས་སུ་གཤེགས་སུ་གསོལ། དེ་ནས་གཏོར་མ་བསྒུལ་ལ་སྟེགས་ཀྱི་ཁར་ནང་དུ་བསྟན་ལ་དབུལ་ལོ། །དེས་དངོས་གྲུབ་རང་ལ་འོང་། དགྲ་བགེགས་བཟློག་ན་ཁ་ཕྱིར་བསྟན་ལ་འཕང་། དེས་གཏོར་མ་ཟོར་དུ་འགྲོ་བ་ཡིན། གཉིས་པ་སྣ་ཚོགས་ལམ་ཁྱེར་གྱི་གཏོར་མ་ལ་བདུན། དང་པོ་སྣོད་ནི། ཀ་པཱ་ལ་མཚན་དང་ལྡན་པ། གཉིས་པ་རྫས་ནི། ཞལ་ཟས་སྣ་ཚོགས་པ་ལ་བདུད་རྩི་ལྔས་བརྒྱན་པའོ། །གསུམ་པ་བྱིན་གྱིས་བརླབ་པ་ལ་གཉིས་ཏེ། རང་བརླབ་པ་ནི། ཡི་དམ་ལྷར་བསྐྱེད་ལ། འབྲུ་གསུམ་གྱིས་ལུས་ངག་ཡིད་གསུམ་སྐུ་གསུང་ཐུགས་སུ་བརླབ་པའོ། །གཉིས་པ་གཏོར་མ་བརླབ་པ་ནི། བདག་གི་གནས་གསུམ་ནས་ཡི་གེ་འབྲུ་གསུམ་ལས། གཏོར་མ་ལ་ཡི་གེ་དང་འོད་འཕྲོས། ༀ་ཨཱཿཧཱུྃ། ལན་གསུམ་གྱིས་གཏོར་མ་འོད་དུ་ཞུ། ཡང་བདུན་གྱིས། བདུད་རྩིའི་རང་བཞིན་ཤ་ཁྲག་དམར་གྱིས་བརྒྱན་པ་ནམ་མཁའ་དང་མཉམ་པར་བརླབས། ཡང་བདུན་གྱིས། འདོད་པའི་ལྷ་མོ་མང་པོ་གཏོར་མ་ལས་བྱུང་ནས་རང་རང་ཇི་ལྟར་འདོད་པ་ལྟར་མཆོད་པར་བསམ་མོ། །བཞི་པ་མགྲོན་དགུག་པ་ནི། རང་གི་ཐུགས་ཀའི་ཧཱུྃ་ལས་ཛཿ དེ་ལས་ལྷ་མོ་ལྕགས་ཀྱུ་མ་མང་པོ་སྤྲོས་ཏེ་སྤྱན་དྲངས་ལ། ཡན་ལག་བདུན་པའི་ཚུལ་དུ། བླ་མ་ཡི་དམ་མཁའ་འགྲོ་གཤེགས་སུ་གསོལ། བླ་མ་ལྷ་ཚོགས་ལ་ཕྱག་འཚལ། །ཉི་ཟླ་པདྨའི་གདན་ལ་བཞུགས། །མཆོད་པ་རྣམས་ཀྱིས་མཆོད་པར་བགྱི། །ཉམས་ཆག་སྡིག་སྒྲིབ་ཐམས་ཅད་བཤགས། །གསང་སྔགས་བསྒྲུབ་ལ་རྗེས་ཡི་རང་། །མྱ་ངན་མི་འདའ་འགྲོ་དོན་མཛོད། །གསང་སྔགས་འཁོར་ལོ་བསྐོར་དུ་གསོལ། །ཕྱི་ནང་སྒྲིབ་པ་སྦྱང་དུ་གསོལ། །ཡིད་འོང་སྙིང་པོ་ཐོབ་པར་སྨོན། །ཡང་དག་རྡོ་རྗེའི་དོན་རྟོགས་ཤོག །ཅེས་པས། པདྨ་དང་རཏྣའི་གདན་ལ་མགྲོན་རྣམས་བྱོན་པར་བསམ་ལ། ལྔ་པ་མཆོད་ཅིང་བསྟབ་པ་ནི། རྩ་བའི་བླ་མ་བརྒྱུད་པ་དང་བཅས་པ་མཆོད་པ་བཞེས། ཡི་དམ་དཀྱིལ་འཁོར་ཕྱི་ནང་གི་ལྷ་ཚོགས་རྣམས་མཆོད་པ་བཞེས། མཁའ་འགྲོ་སྡེ་ལྔ་ལ་ཆོས་སྐྱོང་ཕོ་རྒྱུད་མོ་རྒྱུད་ཀྱིས་བསྐོར་བ་རྣམས་མཆོད་པ་བཞེས། ཞེས་བརྗོད་ལ། སེ་གོལ་ལན་གསུམ་གཏོགས། དེ་རྣམས་དགེས་ནས་བདག་ལ་དངོས་གྲུབ་སྟེར་བར་བསམ། དྲུག་པ་བསྔོ་ཞིང་ཕྲིན་ལས་བཅོལ་བ་ནི། ཀ་པ་ལ་ཡི་སྣོད་ནང་དུ། །ཞལ་ཟས་སྣ་ཚོགས་གཏོར་མའི་རྒྱུ། །བདུད་རྩི་རྣམ་ལྔ་གཏོར་མའི་རྒྱན། །ལན་གསུམ་སྔགས་ཀྱིས་བྱིན་བརླབས་པས། །མི་མཉེས་པ་ནི་གང་ཡང་མེད། །བླ་མའི་དགོངས་པ་ལོངས་གྱུར་ཅིག །ཡི་དམ་ཐུགས་དམ་བསྐོང་གྱུར་ཅིག །མཁའ་འགྲོ་དམ་ཅན་མཉེས་གྱུར་ཅིག །བླ་མ་ཡི་དམ་མཁའ་འགྲོ་ལ། །ཚད་མེད་གཏོར་མ་འདི་བསྔོས་པས། །ལོངས་སྤྱོད་ལྡན་ཞིང་ཚོགས་རྫོགས་ནས། །ཐམས་ཅད་མྱུར་དུ་སངས་རྒྱས་ཤོག །ཅེས་གཏོར་མ་བཏེགས་ལ་བསྔོ། དེ་ནས་ཕྲིན་ལས་བཅོལ་བ་གོང་དང་འགྲེའོ། །བདུན་པ་གཏོར་མ་བཏང་བ་ཡང་གོང་ལྟར་རོ། །གསུམ་པ་གསང་བ་སྣ་ཚོགས་ལམ་ཁྱེར་གྱི་གཏོར་མ་ལ་ཡང་བདུན་ཏེ། དང་པོ་སྣོད་ནི། ཕྱི་འཇིག་རྟེན་ནམ་མཁའ་ཁྱབ་ཚད་དོ། །གཉིས་པ་རྫས་ནི། བཅུད་ཀྱི་སེམས་ཅན་རྩི་ཤིང་མེ་ཏོག་འབྲུ་བཅུད་དང་བཅས་པའོ། །གསུམ་པ་བྱིན་གྱིས་བརླབ་པ་ལ་གཉིས་ཏེ། བདག་བརླབ་པ་ནི། ཡི་དམ་ལྷ་སྣང་ལ་རང་བཞིན་མེད་པར་བསྒོམ། གཏོར་མ་བརླབ་པ་ནི། ༀ་ཨཱཿཧཱུྃ། བདུན་གྱིས། བདུད་རྩིའི་རང་བཞིན་འདོད་ཡོན་ལྔ་རུ་བསམ། །བཞི་པ་མགྲོན་སྤྱན་དྲང་བ་ནི། ཐུགས་ཀའི་ཧཱུྃ་ལས་འོད་འཕྲོས་པས། མགྲོན་བཞི་ཆོས་ཉིད་ལ་ཡེ་ཤེས་ཀྱི་རོལ་པ་བྱོན་པར་བསམ་མོ། །ལྔ་པ་མཆོད་ཅིང་བསྟབ་པ་ནི། མགྲོན་བཞི་ཆོས་ཉིད་རོལ་པ་ཡེ་ཤེས་ཀྱི་ལོངས་སྤྱོད་རྒྱུན་མི་ཆད་པའོ། །དྲུག་པ་བསྔོ་ཞིང་ཕྲིན་ལས་བཅོལ་བ་ནི། སྣོད་ཀྱི་ལོ་ཀ་གཏོར་གཞོང་དུ། །བཅུད་ཀྱི་སེམས་ཅན་གཏོར་མའི་རྒྱུ། །བཀྲག་དང་གཟི་མདངས་གཏོར་མའི་རྒྱན། །འབྲུ་གསུམ་སྔགས་ཀྱིས་བྱིན་བརླབས་པས། །མི་མཉེས་པ་ནི་གང་ཡང་མེད། །བླ་མ་དཀོན་མཆོག་དགོངས་པ་བསྐང་གྱུར་ཅིག །རྒྱལ་བ་རྒྱ་མཚོ་མཆོད་པས་མཉེས་གྱུར་ཅིག །མཁའ་འགྲོ་དམ་ཅན་ཐུགས་དམ་བསྐང་གྱུར་ཅིག །ཕ་མ་འགྲོ་དྲུག་སྦྱིན་པས་ཚིམ་གྱུར་ཅིག །བགེགས་རིགས་སྡེ་བརྒྱད་བུ་ལོན་བྱང་གྱུར་ཅིག །མགྲོན་བཞི་ཆོས་ཉིད་རོལ་པ་ལ། །ཚད་མེད་གཏོར་མ་འདི་བསྔོས་པས། །ཀུན་གྱིས་ཡང་དག་དོན་རྟོགས་ཤོག །ཅེས་བརྗོད། །བདུན་པ་གཤེགས་ཤིང་གཏོར་མ་བཏང་བ་ནི། མགྲོན་རྣམས་ཆོས་ཉིད་དུ་ཐིམ་པར་བསམ། གཏོར་མ་སྣང་ལ་རང་བཞིན་མེད་པར་དབུལ་ལོ། །གཏོར་མ་འདི་ནི་ཕྱི་ནང་སྣོད་བཅུད་རྩི་ཤིང་མེ་ཏོག་འབྲུ་བཅུད་གང་མཐོང་ཐམས་ཅད་བྱིན་གྱིས་བརླབས་ནས་གཏོང་བ་ཡིན་ནོ། །བཞི་པ་དེ་ཁོ་ན་ཉིད་སྣ་ཚོགས་ལམ་ཁྱེར་གྱི་གཏོར་མ་ལ་ཡང་བཞི་སྟེ། གཏོར་སྣོད་ཆོས་ཉིད་མཉམ་པ་ཆེན་པོ། གཏོར་མ་རིག་པ་ཕྱོགས་མེད་དུ་འཆར་བ། གཏོར་རྒྱན་སྟོང་རིག་གཉིས་མེད། གཏོར་མ་སྟོང་པ་དེ་ལྟར་ཤེས་པའི་ཤེས་རབ་བོ། །རང་སྣང་ཆོས་སྐུའི་གཞལ་ཡས་ནས། །རྩ་བརྒྱུད་བླ་མ་གཤེགས་སུ་གསོལ། །སྐུ་དང་ཡེ་ཤེས་གཞལ་ཡས་ནས། །ཡི་དམ་ལྷ་ཚོགས་གཤེགས་སུ་གསོལ། །དྲན་པ་འཕྲུལ་གྱི་གཞལ་ཡས་ནས། །མཁའ་འགྲོ་ཆོས་སྐྱོང་གཤེགས་སུ་གསོལ། །ཆོས་ཉིད་རོལ་པའི་མཆོད་པ་འབུལ། །སྐུ་གསུམ་མཉམ་པ་ཆེན་པོར་བཞེས། །ཞེས་སོ། །གཉིས་པ་རྒྱུན་གྱི་གཏོར་མ་བཏང་ལ་ཚོགས་བསགས་པ་ནི། རྒྱུན་གཏོར་གསུམ་བདུན་བཅུ་གཅིག་ལ་སོགས་བཏང་། །ཞེས་པས། རྒྱུན་གཏོར་གསུམ་པའི་བཏང་ལུགས་ནི། རང་ཡི་དམ་གང་ཡིན་དེའི་སྤྱི་བོར་ༀ། མགྲིན་པར་ཨཱཿཐུགས་ཀར་ཧཱུྃ་བསམ། ༀ་འཕྲོས་པས་གཙང་དམེ་སྦྱངས། ཨཱཿཡིས་བདུད་རྩིར་བསྒྱུར། ཧཱུྃ་གིས་འདོད་ཡོན་ལྔར་བརླབ་པའོ། །དེ་ནས། ༀ་ཨཱཿཧཱུྃ་མ་ཧཱ་ས་མ་ཡ་ཧཱུྃ། སརྦ་བྷ་ལིཾ་ཏ་ཁཱ་ཧི། ཞེས་བདུན་ནམ་གསུམ་བརྗོད་ལ། དང་པོ་བླ་མ་དཀོན་མཆོག་ལ། གཉིས་པ་ཡི་དམ་ཆོས་སྐྱོང་ལ། གསུམ་པ་རིགས་དྲུག་ལན་ཆགས་ཐམས་ཅད་ལ་བཏང་ངོ་། །འདི་རྒྱུན་དུ་བཏང་ན་བར་ཆད་སེལ། ཚོགས་རྫོགས། དངོས་གྲུབ་འབྱུང་ངོ་། །དུས་གཏོར་རྒྱུན་དུ་བྱེད་ན། དང་པོ་བླ་མ་དཀོན་མཆོག་ལ། གཉིས་པ་ཡི་དམ་ཆོས་སྐྱོང་། གསུམ་པ་བསྟན་པ་སྤྱིའི་ཆོས་སྐྱོང་། ལྷ་དང་དྲང་སྲོང་། ལྷན་ཅིག་སྐྱེས་པའི་ལྷ་ལ། བཞི་པ་གནས་བདག་གཞི་བདག་ཀླུ་ས་བདག་ལ། ལྔ་པ་རིགས་དྲུག་ཡི་དྭགས་ལ། དྲུག་པ་ལན་ཆགས་སྡེ་བརྒྱད་ལ། བདུན་པ་ཁ་ཞན་དབང་ཆུང་ལ་བཏང་ངོ་། །སྐོང་གཏོར་བཅུ་གཅིག་ཏུ་བྱེད་ན། དང་པོ་བླ་མ་དཀོན་མཆོག་ལ། གཉིས་པ་ཡི་དམ་ཆོས་སྐྱོང་ལ། གསུམ་པ་བསྟན་པ་སྤྱིའི་ཆོས་སྐྱོང་ལ། བཞི་པ་ལྷ་དང་དྲང་སྲོང་ལ། ལྔ་པ་ལྷན་ཅིག་སྐྱེས་པའི་ལྷ་འདྲེ་ལ། དྲུག་པ་གནས་བདག །བདུན་པ་རིགས་དྲུག །བརྒྱད་པ་ཡི་དྭགས། དགུ་པ་ལན་ཆགས། བཅུ་པ་ཀླུ་ས་བདག །བཅུ་གཅིག་པ་ཁ་ཞན་དབང་ཆུང་ལ་བཏང་ངོ་། །དེ་ཡང་བླ་མའི་གཏོར་མ་ལ། རང་ཡི་དམ། སྣོད་རཏྣ། འབྲུ་གསུམ་བྱིན་གྱིས་བརླབས་ལ། གུ་རུ་ས་མ་ཛཿས་སྤྱན་དྲངས། ༀ་གུ་རུ་ཨི་དམ་བྷ་ལིན་ཏ་པྲ་ཏཱི་ཛ་ཡེ་སྭཱ་ཧཱ། །ཞེས་འབུལ་ལོ། །ཡི་དམ་ཆོས་སྐྱོང་ལ། རང་ཡི་དམ་སྣོད་རཏྣ། འབྲུ་གསུམ་གྱིས་བརླབ། བཛྲ་ས་མ་ཡས་སྤྱན་དྲངས། རྩ་སྔགས་དང་ཨ་ཀཱ་རེས་དབུལ་ལོ། །དེ་མིན་རྣམས་ལ། རང་ལྷ། སྣོད་རཏྣ། འབྲུ་གསུམ་གྱིས་བརླབས། བདེ་གཤེགས་བཞི་ལ་ཕྱག་འཚལ་ལོ། །སརྦ་ཏ་ཐཱ་ག་ཏ་ཨ་ཝས་དབུལ་ལོ། །ལྔ་པ་བདེ་གཤེགས་རྣམས་ལ་མཆོད་པ་ཕུལ་ལ་ཚོགས་ཡོངས་སུ་སྤེལ་བ་ནི། རྣམ་དག་བདུན་དང་ཕྱི་ནང་གསང་མཆོད་དབུལ། །ཅེས་པས། འདི་ལ་བཞི་ལས། དང་པོ། ཕྱག་དང་མཆོད་པ་ལ་སོགས་པ་ཐམས་ཅད་ཚང་བས་སྤྱི་མཆོད་ནི་བདུན་རྣམ་དག་ཁོ་ན་ཡིན་ཏེ། སྒྲུབ་ཐབས་རེ་ན་རེ་རེ་ཡོད་དོ། །དེས་འཁོར་འདས་ཀྱི་སྐྱོན་ཡོན་ཚོགས་རྫོགས་མི་རྫོགས། སྒྲིབ་པ་འདག་མི་འདག་ཐམས་ཅད་བདུན་རྣམ་པར་དག་མ་དག་ཡིན་པས། བདེ་བར་གཤེགས་པ་ཐམས་ཅད་སྤྱན་དྲངས་ལ་འདི་སྐད་དོ། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་བགེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པ་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་བགྱི། །མཆོག་གསུམ་སྟོན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་པའོ། །དེ་ལ། སངས་རྒྱས་པའི་མི་མཐུན་ཕྱོགས་ཞི་བ་ལ་ཕྱག་འཚལ་བའི་ཡན་ལག །ཚོགས་རྫོགས་དགོས་པ་ལ་མཆོད་པ། མི་མཐུན་ཕྱོགས་སེལ་བ་ལ་བཤགས་པ། དགེ་བའི་རྩ་བ་མང་དུ་སྤེལ་བ་ལ་རྗེས་སུ་ཡི་རང་བ། ཐེག་ཆེན་ཐབས་ཀྱིས་ཟིན་དགོས་པ་ལ་སེམས་བསྐྱེད། དཀོན་མཆོག་གསུམ་ལ་རྟེན་བཅའ་དགོས་པ་ལ་སྐྱབས་འགྲོ། དགེ་བའི་རྩ་བ་སྤེལ་ཞིང་སྙིང་པོ་བཟུང་དགོས་པ་ལ་བསྔོ་བའོ། །དེས་ན་སངས་རྒྱས་པའི་ལམ་ལ་འགལ་རྐྱེན་སྤངས་ནས། མཐུན་རྐྱེན་ཚང་དགོས་པ་ཡིན་པས། ལམ་གྲོགས་ཆེན་པོ་འདི་ཡིན་ནོ། །གཉིས་པ་ཐུན་མོང་སྤྱིའི་མཆོད་པ་ནི། ཡོན་ཆབ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། །དེ་དག་ལ་ཞི་རྒྱས་དབང་དྲག་བཞི་ཀའི་མཆོད་པ་ཚང་སྟེ། ཡོན་ཆབ་དྲི་མཆོག་ཨརྒྷཾ་ཞི་མཆོད། མེ་ཏོག་མར་མེ་རྒྱས་མཆོད། སྤོས་དང་ཞལ་ཟས་དབང་མཆོད། རོལ་མོ་དྲག་པའི་མཆོད་པའོ། །ཡང་དེ་ཀ་རེ་རེ་ལ་བཞི་ཀ་ཚང་སྟེ། རོལ་མོ་ལ། དྲིལ་བུ་པི་ཝང་ཞི་བ། རྔ་དང་ཅང་ཏེའུ་རྒྱས་པ། དུང་དང་གླིང་བུ་དབང་། ཆ་ལང་དྲག་པོའི་རོལ་མོའོ། །མེ་ཏོག་ལའང་། དཀར་པོ་ཞི་བ། སེར་པོ་རྒྱས་པ། དམར་པོ་དབང་། སྔོ་ལྗང་དྲག་པོའི་མེ་ཏོག་གོ། །དེ་བཞིན་དུ་ཐམས་ཅད་ལ་དོན་གྱིས་བཞི་བཞི་ཚང་སྟེ། དེ་ལྟར་མཆོད་པ་རྣམ་པ་ལྔ་བཤམས་ལ། ཡོན་ཆབ་དང་མར་མེ་ལ་ཨཱ། མེ་ཏོག་ལ་བུ། བདུག་སྤོས་ལ་དྷུ། དྲི་ཆབ་ལ་གྷ། ཞལ་ཟས་ལ་ནཻ་བསམ་སྟེ་བྱིན་གྱིས་བརླབས་ལ། གཙང་ཞིང་གཙང་མར་སྦྱར་བ་ཡི། །ལྷ་རྫས་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་དང་། །གསུང་སྙན་རོལ་མོའི་མཆོད་པ་འབུལ། །འགྲོ་བའི་དོན་དུ་བཞེས་སུ་གསོལ། །ༀ་ན་མཿསརྦ་ཏ་ཐཱ་ག་ཏ་པུཥྤེ། དྷུ་པེ། ཨཱ་ལོ་ཀེ། གྷནྡེ། ནཻ་ཝི་ཏྱ། ཤབྡ། པཱུ་ཙ་མེ་གྷ་ས་མུ་དྲ་སྤ་ར་ཎ་ས་མ་ཡེ་སྭཱ་ཧཱ། །ཞེས་པས། ནམ་མཁའ་གང་བར་འབུལ་ལོ། །གསུམ་པ་ནང་མཆོད་ལ་བཞི་སྟེ། འཁོར་གསུམ་ཡོངས་སུ་དག་པ་ལ་ཀུན་ཏུ་བཟང་པོའི་མཆོད་པ། ལྷ་རྣམས་དགྱེས་པ་བསྐྱེད་པ་ལ་ཕྱག་དང་ཞབས་བསིལ། དབྱེར་མེད་ལྷ་ལ་ལྷ་ཐིམ་པ་ལ་ལྷ་མོ་བཞི་བསྣོལ། སྤྱོད་ཡུལ་ཡོངས་སུ་དག་པ་ལ་ཏིང་ངེ་འཛིན་གྱིས་མཆོད་པའོ། །དང་པོ་ནི། འཁོར་གསུམ་ཡོངས་སུ་དག་པ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོ་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུད་ག་ཏེ་སྤ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། །ཞེས་པས། མཆོད་རྫས་ནམ་མཁའ་གང་བ་དེ་དག །འབུལ་བའི་རྫས། འབུལ་སའི་ཡུལ། དབུལ་བྱེད་ཀྱི་མཁན་པོ་གསུམ་མི་དམིགས་པར་བསམ་པས། འཁོར་གསུམ་ཡོང་དག་གོ། །གཉིས་པ་ནི། ལྷ་རྣམས་དགྱེས་པ་བསྐྱེད་པ། ཡང་དག་དོན་དུ་དག་མོད་ཀྱང་། །འགྲོ་བ་རྣམས་ཀྱི་དོན་སླད་དུ། །ཕྱག་དང་ཞབས་གཉིས་བསིལ་མཛོད་ལ། །རྡོ་རྗེའི་གདན་ལ་བཞུགས་སུ་གསོལ། ༀ་ཨཱ་ཧ་ར་ཨ་ཧ་ར་སརྦ་བིདྱ་དྷ་ར་པཱུ་ཛི་ཏེ། ན་མ༔ས་མནྟ་བྷུདྡྷཱ་ནཱན། ག་ག་ན་ས་མ་ཡེ་སྭཱ་ཧཱ། །ཞེས། དང་པོས་ཕྱག་དང་ཞབས་བསིལ། གཉིས་པས་ཞལ་བསིལ། གསུམ་པས་བདུད་རྩི་དྲི་མ་མེད་པ་གསོལ་ནས་དགེས་བར་བསམ་མོ། །གསུམ་པ་ནི། དབྱེར་མེད་ལྷ་ལ་ལྷ་ཐིམ་པ། ༀ་བ་ན་བྃ ། པེ་ནུ་སུ་ར་ཏོ། ཏི་པུ་བ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ་སརྦ་མ་ཧཱ་སུ་ཁ་སིདྡྷི་ཧུ། །ༀ་ཤྲཱི་རཱ་ཱག་དྷུ་པེ་དྷུ། ༀ་ཤྲཱི་རཱ་ཱག་པུཥྤེ་པུ། ༀ་ཤྲཱི་རཱ་ཱག་ཨཱ་ཱལོ་ཀེ་ཧྲཱི། ༀ་ཤྲཱི་རཱ་ཱག་གྷནྡེ་གྷན། ༀ་ཤྲཱི་རཱ་ཱག་ནཻ་བི་དྱེ་ནཾ། ༀ་ཤྲཱི་རཱ་ཱག་ཤབྡ། ཞེས་པས། མཆོད་པའི་ལྷ་མོ་རྣམས། དང་པོས་ཕྱག་མཚན་གསལ་གདབ། གཉིས་པས་གར་སྟབས་སྒྱུར། གསུམ་པས་ལྷ་ལ་ལྷ་ཐིམ་དུ་དབུལ་ཏེ། དྷུ་པེ་མ་ཤང་། པུཥྤེ་མ་དབུ། མར་མེ་མ་སྤྱན། དྲི་མཆོག་མ་ཐུགས། ཞལ་ཟས་མ་ལྗགས་ལ་ཐིམ་པར་བསམ་མོ། །བཞི་པ་ནི། སྤྱོད་ཡུལ་ཡོངས་སུ་དག་པ། ༀ། མཆོད་པའི་ཕྱག་རྒྱ་ཆེན་པོ་ནི། །ཕྱོགས་བཅུའི་ཞིང་ཁམས་མཉེན་འཇམ་བདེ། །རིན་ཆེན་ཁང་པ་དབྱིབས་ལེགས་རྫིང་། །ལྗོན་ཤིང་གླུ་དབྱངས་ཚིགས་བཅད་སྒྲ། །བླ་རེ་ན་བཟའ་བཟའ་བཏུང་མཆོག །ལྷ་དང་ལྷ་མོ་གར་སྟབས་ཀྱིས། །ཕྱོགས་བཅུའི་ཁམས་བཀང་རྒྱས་པར་འབུལ། །ཨ་ལ་ལ་སྟེ་བཞེས་སུ་གསོལ། །ཅེས་པས། སྣོད་ཀྱི་ལོ་ཀ་ཕྱོགས་བཅུའི་ཁམས་ཐམས་ཅད་སངས་རྒྱས་ཀྱི་ཞིང་ཁམས་རྣམ་པར་དག་པ། ཐོག་མཉེན་པ། ལོགས་འཇམ་པ། འོག་བདེ་བ། ཡེ་ཤེས་རིན་པོ་ཆེའི་ཁང་པ། རི་ཐམས་ཅད་རིན་པོ་ཆེའི་ཕུང་པོ། ཆུ་ཐམས་ཅད་ཁྲུས་ཀྱི་རྫིང་བུ། ཤིང་ཐམས་ཅད་དཔག་བསམ་གྱི་ཤིང་། སྒྲ་ཐམས་ཅད་གླུ་དང་དབྱངས་དང་ཚིགས་སུ་བཅད་པའི་སྒྲ། གོས་ཐམས་ཅད་བླ་རེ་དང་། །ན་བཟའ་དང་། གདུགས་དང་། རྒྱལ་མཚན་དང་། རྫས་ཐམས་ཅད་བཟའ་བ་དང་བཏུང་བའི་མཆོག །འགྲོ་བ་ཐམས་ཅད་ལྷ་དང་ལྷ་མོ། རྐང་བ་སྟབས་བྱེད། ལག་པ་གར་བསྒྱུར་བས། ཕྱོགས་བཅུ་ནམ་མཁའི་ཁམས་གང་བར་བསམ་ལ་དབུལ་ལོ། །བཞི་པ་གསང་བའི་མཆོད་པ་གསུམ་སྟེ། འཁྲུལ་སྣང་གཞི་མེད་དུ་བསྟན་པ་ལ་སྒྲོལ་མཆོད། ཐབས་ཤེས་ཟུང་འབྲེལ་དུ་བསྟན་པ་ལ་སྦྱོར་མཆོད། །གཤིས་མཉམ་པ་ཉིད་དུ་བསྟན་པ་ལ་འདོད་ཡོན་གྱི་མཆོད་པའོ། །དང་པོ་ནི། འཁྲུལ་སྣང་གཞི་མེད་དུ་བསྟན་པ། གཉིས་འཛིན་མཚན་མའི་ཆོས་རྣམས་ལ། །ངོ་བོ་ཅིར་ཡང་གྲུབ་པ་མེད། །ཡེ་ནས་ལྷུན་རྫོགས་སངས་རྒྱས་ཆོས། །གཉིས་སུ་མེད་པའི་མཆོད་པ་བཞེས། །ཞེས་པས། གཉིས་འཛིན་འཁྲུལ་བ་མཚན་མའི་ཆོས་ཐམས་ཅད་ལ་ངོ་བོ་བདེན་པར་གྲུབ་པ་ཅིར་ཡང་མེད་པས། གནས་ལུགས་སྟོང་པ་ཉིད་ཡེ་ནས་སངས་རྒྱས་པའི་རང་བཞིན། སྤྲོས་བྲལ་བདེ་བ་ཆེན་པོ་ཆོས་ཀྱི་སྐུ་རང་བྱུང་གི་ཡེ་ཤེས་ཡིན་ལ། དེའི་དོན་མཐོང་བ་ནི། མཆོད་པ་ཐམས་ཅད་ཀྱི་ནང་ནས་མཆོག་ཏུ་གྱུར་པ་ཡིན་ཏེ། གཉིས་འཛིན་འཁྲུལ་པའི་སྣང་བ་འདི་གཉིས་མེད་ཡེ་ཤེས་སུ་གྲོལ་བས་ན་སྒྲོལ་མཆོད་དོ། །གཉིས་པ་ནི། ཐབས་ཤེས་ཟུང་འབྲེལ་དུ་བསྟན་པ། ཐབས་དང་ཤེས་རབ་གཉིས་མེད་པ། །བདེ་ཆེན་སྤྲོས་བྲལ་ཐིག་ལེའི་སྐུ། །ཡེ་ནས་གནས་པ་དོན་གྱི་མཆོག །འདུ་འབྲལ་མེད་པའི་མཆོད་པ་བཞེས། །ཞེས་པས། ཆོས་ཐམས་ཅད་ཀྱི་གཤིས་ཅིར་ཡང་མ་ཡིན་པར་ཤེས་པ་ནི་ཤེས་རབ། དེའི་གདངས་འགགས་མེད་དུ་འཆར་བ་ནི་ཐབས། དེ་གཉིས་ཐ་མི་དད་པས་ན་གཉིས་སུ་མེད་པ། གཉིས་མེད་ཀྱི་དོན་ལ་མཚན་མའི་ཟུག་རྔུ་མེད་པས་བདེ་བ། དེ་ཐ་མལ་བདེ་བ་ལས་ཁྱད་པར་དུ་གྱུར་པ་ཆེན་པོ། གཉིས་འཛིན་གྱི་ཟུག་རྔུ་མེད་པས་སྤྲོས་བྲལ། གཉིས་ཆོས་ཀྱི་གྲ་ཟུར་མེད་པས་ཐིག་ལེ། ཡོན་ཏན་གྱི་རྟེན་བྱེད་པས་ན་སྐུ་ཞེས་བྱ་སྟེ། དེ་གདོད་མ་ནས་ཡོད་པས་ཡེ་གནས། ཡང་དག་པའི་དོན་ངེས་པས་ན་དོན་གྱི་ཆོས། དེ་ནི་དང་པོར་མ་འདུས། ཐ་མ་མི་འབུལ་བས་ན་མཆོད་པའི་མཆོག་སྟེ། ཡང་དག་གཉིས་མེད་ཀྱི་དོན་ལ་སྦྱོར་པས་ན་སྦྱོར་མཆོད་དོ། །གསུམ་པ་ནི། གཤིས་མཉམ་པ་ཉིད་དུ་བསྟན་པ། མཉམ་པའི་སྒྲུབ་རྫས་ཆེན་པོ་ནི། །བདག་དང་མཉམ་པའི་ཚོགས་ལ་འབུལ། །བཟའ་བཅའ་བཏུང་བགོ་ལོངས་སྤྱོད་རྣམས། །མི་དམིགས་མཉམ་པའི་མཆོད་པར་བཞེས། །ཞེས་པས། ཆོས་ཐམས་ཅད་ཀྱི་གནས་ལུགས་བཟང་ངན་ཆེ་ཆུང་མེད་པས་མཉམ་པའི་སྒྲུབ་རྫས། དེ་ལྟར་ཤེས་ཙ་ན་འཁོར་འདས་གཉིས་མ་གྲུབ་པས། བདག་དང་མཉམ་པའི་ཚོགས། དེ་ཙམ་ན་བཟའ་བཏུང་ལ་སོགས་པ་ཐམས་ཅད་སྤྱོད་ཡུལ་ཡོངས་སུ་དག་པས་ན་མི་དམིགས་པ་མཉམ་པའི་མཆོད་པའོ། །དེ་རྣམས་གསང་སྔགས་ལམ་གྱི་སྔོན་འགྲོ་ཡིན། །ཞེས་པས། དེ་ཡན་ཆད་ལམ་གྱི་སྔོན་འགྲོའོ། །གཉིས་པ་ལམ་རང་གི་ངོ་བོ་ལ་གཉིས་ཏེ། ཐུན་མོང་ཐེག་པ་སྤྱིའི་ལམ། ཁྱད་པར་གསང་སྔགས་ཀྱི་ལམ་མོ། །དང་པོ་ཐུན་མོང་ལ་གཉིས་ཏེ། བསླབ་པ་གསུམ་ལ་ལམ་གཞི་བཅའ་བ་ནི། །ཞེས་པ་དང་། སེམས་གསུམ་གྱིས་ལམ་གྱི་ཁ་བསྒྱུར་བའོ། །དང་པོ་བསླབ་གསུམ་ལ་ལྔ་སྟེ། ངོ་བོ་ངོས་བཟུང་བ། མཚོན་བྱའི་སྒྲ་དོན། མཚན་ཉིད་ཀྱི་རང་ལྡོག །མཚན་གཞིའི་སྐྱེ་ཚུལ། གཉེན་པོའི་སྒོ་ནས་རྣམ་གྲངས་སུ་འགྱུར་ཚུལ་ལོ། །དང་པོ་ནི། ངོ་བོ་ངོས་བཟུང་བ། མི་མཐུན་སྤོང་སེམས་མཉམ་འཇོག་རང་ངོ་ཤེས། །ཞེས་པས། སངས་རྒྱས་བསྟན་པའི་མི་མཐུན་ཕྱོགས་ཐམས་ཅད་སྤོང་ཞིང་། སྡོམ་པ་ནི་ཚུལ་ཁྲིམས་ཀྱི་བསླབ་པ། ལམ་ཐེག་པ་རང་རང་སྒོ་ནས་སེམས་མཉམ་པར་འཇོག་པའི་རིགས་ཐམས་ཅད་ཏིང་ངེ་འཛིན་གྱི་བསླབ་པ། ཐེག་པ་སོ་སོའི་སྒོ་ནས་སེམས་རང་ངོ་ཤེས་པའི་ལྟ་བ་ཐམས་ཅད་ཤེས་རབ་ཀྱི་བསླབ་པའོ། །དེས་ན། བརྗོད་བྱ་བསླབ་པ་གསུམ། རྗོད་བྱེད་སྡེ་སྣོད་གསུམ། ངོ་བོ་ལྟ་སྒོམ་སྤྱོད་པ་གསུམ་མོ། །གཉིས་པ་ནི། མཚོན་བྱ་སྒྲ་དོན། ཤཱི་ལ་ས་མ་ཏི་པྲཛྙཱ་ཤིཀྵ་ཎ། ཞེས་པས། ཤཱི་ལ་ཤཱིཀྵ་ན། ཚུལ་ཁྲིམས་ཀྱི་བསླབ་པ། ཞེས་བྱ་ལ། བུ་ཤཱི་ལའི་རྐྱེན་གྱིས་བཙུན་པའམ། གཙང་མ་སྟེ། ཉེས་ལྟུང་གིས་མ་གོས་པའོ། །ས་མ་ཏི་ཤིཀྵ་ན། ཏིང་ངེ་འཛིན་གྱི་བསླབ་པ། མ་དྷ་རའི་རྐྱེན་གྱིས་ཡིད་འཛིན་པ་སྟེ། ན་མ་ཡིད། དྷ་ར་ན་འཛིན་པའོ། །པྲཛྙཱཤིཀྵ་ན། ཤེས་རབ་ཀྱི་བསླབ་པ། པ་ར་མཱཪྠ་པྲཛྙཱའི་རྐྱེན་གྱིས་དོན་དམ་ཤེས་པའི་ཤེས་རབ་སྟེ། པ་ར་མཱཪྠ་དོན་དམ། པྲཛྙཱ་ནི་ཤེས་རབ་བོ། །དེ་ཀ་ལ་སྡེ་སྣོད་རིན་པོ་ཆེ་གསུམ་ཞེས་བྱ་སྟེ། སྡེ་མང་པོ། སྣོད་བྱུང་ཁུངས། ཡོན་ཏན་འབྱུང་བས་ན་རཏྣའོ། །གསུམ་པ་ནི། མཚན་ཉིད་ཀྱི་རང་ལྡོག། གནོད་སྦྱོར་ལོག་ཞུགས་ཁྱད་པར་ཐབས་ཀྱིས་ཟིན། །ཞེས་པས། སེམས་ཅན་ཀུན་ལ་གནོད་པའི་སྦྱོར་བ་ལས་ལོག་པ་ཚུལ་ཁྲིམས། གནོད་སྦྱོར་ལས་ལོག་གི་སྟེང་དུ་གཞན་ལ་ཕན་འདོགས་པའི་བྱ་བ་ལ་ཞུགས་པ་ལ་བྱང་སེམས་ཀྱི་སྡོམ་པ། གནོད་སྦྱོར་ལས་ཀྱང་ལོག །ཕན་འདོགས་བྱ་བ་ལ་ཡང་ཞུགས། དེ་ཡང་ཐབས་ཁྱད་པར་ཅན་གྱིས་ཟིན་པ་ནི་གསང་སྔགས་ཀྱི་སྡོམ་པའོ། །བཞི་པ་མཚན་གཞི། སྐྱེད་ཚུལ་ནི། བདེན་བའི་དོན་མཐོང་གོམས་འདྲེས་དེ་མི་འདའ། །ཞེས་པས། སྡོམ་གསུམ་གང་ཟག་གཅིག་གི་རྒྱུད་ལ་སྐྱེས་ཤིང་བསྲུང་བའི་དབང་དུ་བྱས་ན། གནས་ལུགས་མ་ནོར་བར་མཐོང་བ་ནི་ཤེས་རབ་སྟེ་གསང་སྔགས་སོ། །དེ་གོམས་ཤིང་འདྲིས་པར་བྱེད་པ་ནི་ཏིང་ངེ་འཛིན་ཏེ་བྱང་སེམས། དེ་ལས་མི་འདའ་བར་ཚུལ་ཁྲིམས་ཏེ་ཉན་ཐོས། དེ་ལ། སྡོམ་གསུམ་མ་འདྲེས་ཡོངས་རྫོགས། ཡར་ལྡན་མི་འགལ་བྱ་བ་ཡིན་ཏེ། རང་ལྡོག་མ་འདྲེས། དགག་དགོས་ཡོངས་རྫོགས། ཡོན་ཏན་ཡར་ལྡན། གནད་ཀྱིས་མི་འགལ་བའོ། །དེ་ཡང་སོ་ཐར་ཉོན་མོངས་སྤངས། བྱང་སེམས་སྦྱོང་། གསང་སྔགས་ལམ་དུ་བྱེད་པས་ན་རང་ལྡོག་མ་འདྲེས་ལ། ཉོན་མོངས་པ་རང་རྒྱུད་པ་སྡོམ་པར་གཅིག་པས་ན་དགག་དགོས་ཡོངས་རྫོགས། ཉོན་མོངས་པས་མི་གནོད་ལ་སླར་གྲོགས་སུ་འགྲོ་བས་ན་ཡོན་ཏན་ཡར་ལྡན། སྡོམ་ལུགས་དང་སྲུང་ལུགས་ཐ་དད་ཀྱང་ཉོན་མོངས་པ་མི་དགེ་བ་ཐམས་ཅད་སྡོམ་པར་གཅིག་པས་ན་སྡོམ་གསུམ་གནད་ཀྱིས་མི་འགལ་བས་སོ། །སྤྱི་ལ་ལོག་ནས་མཁར་བརྩིགས་པ་བཞིན་ནོ། །སྡོམ་གསུམ་རྒྱུད་ཐོག་གཅིག་ཏུ་བསྲུང་དུ་མི་བཏུང་སྟེ། སོ་ཐར་དངོས་པོ་གཙོ་བའི་ཕྱིར་པགས་རིམ་དང་པོ་འདས་ནས་འཆོར་བར་བཤད་པས་སོ་སྙམ་ན། མ་ཡིན་ཏེ། དེ་ནི་ཐབས་མི་མཁས་ཤིང་ཤེས་རབ་ཆུང་བ་ཡིན་ལ། འདིར་ནི་ཐམས་མཁས་ཤིང་ཤེས་རབ་ཆེ་བའི་གནད་ཀྱིས། དངོས་རྣམས་དབྱེར་མེད་དུ་རྟོགས་ནས། འདོད་པའི་དྲི་མ་དང་ཕམ་པའི་ཉེས་པ་མི་ཡོང་བ་ལ། སླར་ཡོན་ཏན་སྐྱེ་བ་ཡིན་ཏེ། དུག་ལ་སྔགས་མ་བཏབ་དང་བཏབ་པའི་ཁྱད་པར་བཞིན་ནོ། །ལྔ་པ་རྣམ་གྲངས་སུ་འགྱུར་ཚུལ་ནི། གཉེན་པོའི་དབང་གིས་བརྒྱད་ཁྲི་བཞི་སྟོང་གསུངས། །ཞེས་པས། སྤྱིར་བསླབ་པ་གསུམ་པོ་དེ་དུག་གསུམ་གྱི་གཉེན་པོ་ཡིན་ལ། བྱེ་བྲག་ཏུ་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དུ་གསུངས་སོ། །དེ་ལ་གཉིས་ཏེ། ཉོན་མོངས་པ་དང། དེའི་གཉེན་པོར་ཆོས་ཀྱི་དོན་ནོ། །དང་པོ་ནི། ཉོན་མོངས་པ། ཉོན་མོངས་པ་འཁྲུལ་སྣང་འདི་དག་རྒྱུ་མ་རིག་པ་ལས་བྱུང་སྟེ། རིག་པ་རང་ངོ་མ་ཤེས་ལ་འཁྲུལ་སྣང་རྒྱུན་སྦྲེལ་ནས་ཆགས་སྡང་རྨོངས་གསུམ་སྐྱེས་སོ། །བརྒྱད་ཁྲི་བཞི་སྟོང་གི་གྲངས་ནི། འདོད་ཡོན་ལྔ་ལ་ཆགས་པའི་སེམས་ནི་འདོད་ཆགས་ཏེ། ནང་ཚན་ཉི་ཁྲི་ཆིག་སྟོང་། རྩུབ་འགྱུར་ཚ་བ་དང་བཅས་པའི་སེམས་ནི་ཞེ་སྡང་སྟེ། ནང་ཚན་ཉི་ཁྲི་ཆིག་སྟོང་། དོན་མི་རིག་མི་གོ་བའི་སེམས་ནི་གཏི་མུག་སྟེ། ནང་ཚན་ཉི་ཁྲི་ཆིག་སྟོང་། དུག་གསུམ་གང་གི་ཡང་ཕྱོགས་གཅིག་ཏུ་མི་གནས་ལ་བག་ཆགས་བག་ལ་ཉལ་རྐྱེན་གང་འཕྲད་དུ་གསལ་བར་སྟོན་པ་ནི་དུག་གསུམ་ཆ་མཉམ་སྟེ། ནང་ཚན་ཉི་ཁྲི་ཆིག་སྟོང་སྟེ། བརྒྱད་ཁྲི་བཞི་སྟོང་ངོ་། །གཉིས་པ་དེའི་དོན་གཉེན་པོ་ནི། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ངོ་། །དེ་ཡང་། རྣམ་པར་དཀར་བའི་དོན་ལྟུང་བ་ལས་འཛིན་པས་ན་ཆོས། འབྱེད་ཅིང་འབྱིན་པས་ན་སྒོ་མོ། བརྒྱད་ཁྲི་བཞི་སྟོང་གི་གྲངས་ནི། གང་ཡང་རུང་བའི་ཉོན་མོངས་པ་ཅིག་བརྟོལ་སྐྱེས་པ་ལ། དེའི་གཉེན་པོར་གྱུར་ཙམ་ཅིག་ཆོས་ཀྱི་སྒོ་མོ་ཡིན་ལ། དེ་འདྲ་བ་བརྒྱད་ཁྲི་བཞི་སྟོང་ངོ་། །དེ་ཡང་འདོད་ཆགས་ཀྱི་གཉེན་པོར་གྱུར་ཚད་ཅིག་འདུལ་བ་སྟེ། ནང་ཚན་ཉི་ཁྲི་ཆིག་སྟོང་ངོ་། །ཞེ་སྡང་གི་གཉེན་པོར་གྱུར་ཚད་ཅིག་མདོ་སྡེ་སྟེ། ནང་ཚན་ཉི་ཁྲི་ཆིག་སྟོང་ངོ་། །གཏི་མུག་གི་གཉེན་པོར་གྱུར་ཚད་ཅིག་མངོན་པ་སྟེ། ནང་ཚན་ཉི་ཁྲི་ཆིག་སྟོང་ངོ་། །ཆ་མཉམ་གྱི་གཉེན་པོར་གྱུར་ཚད་ཅིག་གསང་སྔགས་ཏེ། ནང་ཚན་ཉི་ཁྲི་ཆིག་སྟོང་སྟེ། བརྒྱད་ཁྲི་བཞི་སྟོང་ངོ་། །ཆ་མཉམ་གྱི་གཉེན་པོར་གསང་སྔགས་ཡིན་པའི་རྒྱུ་མཚན་ནི། མ་རིག་པ་བག་ཆགས་བག་ལ་ཉལ་གྱི་གཉེན་པོ་ནི་དངོས་པོ་གཤིས་ཀྱི་གནས་ལུགས་རང་བྱུང་ལྷན་ཅིག་སྐྱེས་པ་ཡིན་ལ། དེ་གསང་སྔགས་ཀྱིས་སྟོན་པའོ། །འབྲས་བུ་སངས་རྒྱས་སྒྲུབ་པ་ལ་བསླབ་པ་གསུམ་ལ་གཞི་བཅས་ལ། སྡོམ་པ་གསུམ་རྒྱུད་ལ་སྐྱེ་དགོས་ཏེ། དཔེར་ན་སྟོན་ཐོག་སྒྲུབ་པ་ལ་ཞིང་ས་དང་སོ་ནམ་དགོས་པ་བཞིན་ནོ། །དེས་ན་དེ་དག་མེད་ཁ་མེད་ཡིན་ནོ། །སེམས་གསུམ་སྒོ་ནས་ལམ་ལ་འཇུག་པ་ནི། །ཞེས་པས། གཉིས་པ་སེམས་གསུམ་གྱིས་ཁ་བསྒྱུར་བ་ལ་ནི་བཞི། བྱམས་པ། སྙིང་རྗེ། བྱང་ཆུབ་ཀྱི་སེམས། དེ་དག་སྡེ་སྣོད་གསུམ་དུ་ངོས་བཟུང་ལ་བསླབ་པ་གསུམ་དུ་བསྟན་པའོ། །དང་པོ་ནི། བྱམས་པ། ཡིད་འོང་ཕ་མར་ཤེས་ཤིང་བདེ་ལྡན་བསྒོམ། །ཞེས་པས། ཡུལ་གང་ཡང་ཡིད་དུ་འོང་ཞིང་དེ་དག་བདེ་བ་དང་ལྡན་པར་བྱའོ་སྙམ་པ་ནི་འཇིག་རྟེན་པའི་བྱམས་པ། ཡུམ་སེམས་ཅན་དེ་དག་ལ་ཕ་མར་ཤེས་ཤིང་དེ་རྣམས་བདེ་བ་དང་ལྡན་པར་བྱའོ་སྙམ་དུ་བསྒོམ་པ་ནི་ཆོས་ཀྱི་བྱམས་པ། དེ་ལྟར་སེམས་ཅན་ཐམས་ཅད་ཕ་མར་ཤེས་ཤིང་དེ་དག་ལ་ཕན་གདགས་པའི་བློ་སྐྱེས་པ་ནི་བྱམས་པའི་ཏིང་ངེ་འཛིན། དེ་རྒྱུན་ཆགས་སུ་སྐྱེས་པ་ནི་བྱམས་པ་ཚད་མེད་པའམ་ཆེན་པོ་ཞེས་བྱའོ། །དེ་ལ་གསུམ་ལས། སེམས་ཅན་ལ་དམིགས་པའི་བྱམས་པ་ནི། སེམས་ཅན་ཐམས་ཅད་ཕ་མར་ཤེས་ཤིང་དེ་དག་བདེ་བ་དང་ལྡན་པར་བྱ་སྙམ་པའི་བློ་སྐྱེས་པའོ། །ཆོས་ལ་དམིགས་པའི་བྱམས་པ་ནི། དོན་དམ་པར་ཅིར་ཡང་མ་གྲུབ་པ་ཡིན་ཡང་ཀུན་རྫོབ་རྨི་ལམ་སྒྱུ་མ་ཙམ་གྱི་ངོར། མ་འདི་རྣམས་བདེ་བ་དང་ལྡན་པར་བྱ་སྙམ་པའི་བློའོ། །དམིགས་པ་མེད་པའི་བྱམས་པ་ནི། དེ་ལྟར་བསྒོམས་པའི་དུས་ཉིད་ན། རང་གཞན་ཐམས་ཅད་ཀྱི་ངོ་བོ་སྟོང་པ་ཉིད་སྤྲོས་བྲལ་ནམ་མཁའ་ལྟར་ཤེས་པས། གདངས་མ་འགགས་པར་བྱམས་པར་དུང་ངེ་། གཤིས་མ་གྲུབ་པར་སྟོང་པར་ལྷག་གེ། ངོ་བོ་མི་རྟོག་མི་དམིགས་ཤིང་འཁོར་གསུམ་ཡོངས་སུ་དག་པའོ། །གཉིས་པ་སྙིང་རྗེ་ནི། སེམས་ཅན་ཕ་མ་སྡུག་བསྔལ་བསྒྲལ་བར་བསམ། །ཞེས་པས། ཡུལ་སེམས་ཅན་ཐམས་ཅད་སྡུག་བསྔལ་བར་མཐོང་ནས་ཤ་ཚས་མི་བཟོད་པའི་སྙིང་རྗེ་སྐྱེས་ཏེ། སྡུག་བསྔལ་དེ་དག་ལས་བསྒྲལ་བར་འདོད་པ་ནི་འཇིག་རྟེན་པའི་སྙིང་རྗེ། སེམས་ཅན་ཐམས་ཅད་ཕ་མར་ཤེས་ནས་དེ་དག་སྡུག་བསྔལ་དུ་གནས་པ་ལ་ཤ་ཚས་མི་བཟོད་པའི་སྙིང་རྗེ་སྐྱེས་ནས། སྡུག་བསྔལ་ལས་བསྒྲལ་བར་འདོད་པའི་བློ་ནི་ཆོས་ཀྱི་སྙིང་རྗེ། མ་འདི་རྣམས་སྡུག་བསྔལ་བ་ལ་སྙིང་བརྩེ་བས་སྡུག་བསྔལ་དང་བྲལ་བར་འདོད་པ་ནི་སྙིང་རྗེའི་ཏིང་ངེ་འཛིན་ནོ། །དེ་དུས་རྒྱུན་ཆད་མེད་པར་སྐྱེས་པ་ནི་སྙིང་རྗེ་ཚད་མེད་པའམ་ཆེན་པོ་ཞེས་བྱའོ། །དེ་ལ་གསུམ་ལས། སེམས་ཅན་ལ་དམིགས་པའི་སྙིང་རྗེ་ནི། སེམས་ཅན་དུཿཁ་དང་བྲལ་བར་བྱ་སྙམ་པའོ། །ཆོས་ལ་དམིགས་པའི་སྙིང་རྗེ་ནི། དོན་དམ་པར་ཅིར་ཡང་མ་གྲུབ་པ་ཡིན་ཡང་ཀུན་རྫོབ་སྒྱུ་མ་ཙམ་གྱི་ངོར་དུ༔ཁ་དང་བྲལ་བར་བྱའོ་སྙམ་པའོ། །དམིགས་པ་མེད་པའི་སྙིང་རྗེ་ནི། དེ་ལྟར་བསྒོམ་པའི་དུས་ཉིད་ན། རང་གཞན་ཐམས་ཅད་ཀྱི་ངོ་བོ་སྟོང་པ་ཉིད་ནམ་མཁའ་ལྟར་ཤེས་པས། གདངས་མ་འགགས་པ་སྙིང་རྗེར་དུང་ངེ་། །གཤིས་མ་གྲུབ་པ་སྟོང་པ་ཉིད་དུ་ལྷག་གེ། ངོ་བོ་མི་དམིགས་མི་རྟོག་ཅིང་འཁོར་གསུམ་ཡོངས་སུ་དག་པའོ། །གསུམ་པ་བྱང་ཆུབ་ཀྱི་སེམས་ནི། སངས་རྒྱས་ཐོབ་འདོད་བསམ་པ་ལེན་དང་བསྒྲུབ། །ཅེས་པས། སེམས་བསྐྱེད་ལ་གཉིས་ཏེ། སྨོན་པ་དང་། འཇུག་པའོ། །དང་པོ་ནི། སྨོན་པ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་འདོད་པ་སྨོན་པའི་སེམས་སོ། །དེ་ལྟར་ཁས་བླངས་ཤིང་མ་ཐོབ་པ་ཐོབ་པར་བྱེད་པ་སྨོན་པའི་སེམས་བསྐྱེད། དེའི་མི་མཐུན་ཕྱོགས་སྤོང་བ་སྨོན་པའི་སྡོམ་པའོ། །གཉིས་པ་ནི། འཇུག་པ། གཞན་དོན་དུ་སངས་རྒྱས་ཐོབ་པར་བྱ་བའི་ཕྱིར། དེའི་སྤྱོད་པ་སྒྲུབ་པར་འདོད་པ་ནི་འཇུག་པའི་སེམས། དེ་ལྟར་ཁས་བླངས་ཤིང་རྒྱུད་ལ་སྡོམ་པ་ཐོབ་པར་བྱེད་པ་འཇུག་པའི་སེམས་བསྐྱེད། དེའི་སྤྱོད་པ་རྒྱུན་དུ་བསྒྲུབ་ཅིང་མི་མཐུན་ཕྱོགས་སྤོང་བ་ནི་འཇུག་པའི་སྡོམ་པའོ། །མདོར་ན། སེམས་ཅན་གྱིས་སངས་རྒྱས་ཐོབ་པར་འདོད་པའི་བསམ་པ་ནི་སྨོན་པ་བྱང་སེམས། དེ་ལག་ཏུ་བླངས་ནས་སྒྲུབ་པ་ནི་འཇུག་པ་བྱང་སེམས། དེ་ནས་སྨོན་པ་གལ་ཆེ་སྟེ། སྨོན་པ་བྱང་སེམས་ལ་བློ་འབྱོངས་ན། འཇུག་པ་ཤུགས་ལ་འོང་ཞིང་། སྨོན་པ་མ་སྐྱེས་ན་འཇུག་པ་བསྒྲུབ་མི་སྲིད། དེ་མེད་ན་མི་འབྱུང་བའི་རྒྱུ་འབྲས་སོ། །དེས་ན་ཡང་དག་སངས་རྒྱས་ཐོབ་པ་ལ་དོན་དམ་སེམས་བསྐྱེད་དགོས། དོན་དམ་སེམས་བསྐྱེད་སྐྱེ་བ་ལ་ཀུན་རྫོབ་བྱང་སེམས་དགོས། དེ་ལ་སྙིང་རྗེ་དགོས། སྙིང་རྗེ་སྐྱེ་བ་ལ་བྱམས་པ། བྱམས་པ་སེམས་ཅན་ཕ་མར་ཤེས་པ་ལས་སྐྱེའོ། །དེས་ན་ཐེག་པ་ཆེན་པོའི་ལམ་གྱི་ངོ་བོ་ནི། བྱམས་པ་སྙིང་རྗེ་བྱང་ཆུབ་ཀྱི་སེམས་ཡིན་པས་མེད་ཁ་མེད་ཡིན་ནོ། །དེ་དག་ལ་བརྟེན་ནས་རང་གཞན་གྱི་དོན་ཐམས་ཅད་འགྲུབ་པས་ལམ་གྱི་ཁ་སྒྱུར་ཡིན་ཏེ་རྟའི་ཁ་ལོ་སྲབ་ཀྱིས་བསྒྱུར་བ་བཞིན་ནོ། །བཞི་པ་དེ་དག་སྡེ་སྣོད་གསུམ་དུ་ངོས་བཟུང་ལ་བསླབ་པ་གསུམ་དུ་བསྟན་པ་ནི། སེམས་གསུམ་སྡེ་གསུམ་བསླབ་གསུམ་ཉམས་གསུམ་ཐུགས། །ཞེས་པས། ནམ་མཁའ་དང་མཉམ་པའི་སེམས་ཅན་ཐམས་ཅད་བདག་གི་ཕ་མ་ཡིན་ཅིང་དྲིན་བསམ་གྱིས་མི་ཁྱབ་པར་ཡོད་པས། བདེ་བ་དང་ལྡན་པར་བྱའོ་སྙམ་དུ་བསྒོམ་པ་ནི་བྱམས་པའི་སེམས། མ་འདི་རྣམས་དུཿཁ་སྣ་ཚོགས་ལ་སྤྱོད་པ་སྙིང་རེ་རྗེ། དུཿཁ་དེ་དག་དང་བྲལ་བར་བྱའོ་སྙམ་དུ་བསྒོམ་པ་ནི་སྙིང་རྗེའི་སེམས། མ་འདི་རྣམས་བདེ་བ་དང་ལྡན་དུཿཁ་དང་བྲལ། མྱུར་དུ་བླ་ན་མེད་པའི་བྱང་ཆུབ་རིན་པོ་ཆེ་ཐོབ་པར་བྱའོ་སྙམ་དུ་བསྒོམ་པ་ནི་བྱང་ཆུབ་ཀྱི་སེམས་སོ། །དེ་ཐམས་ཅད་ལ་ཀུན་ཏུ་སྙོམས་ཤིང་རྒྱུན་ཆད་མེད་པར་བསྒོམ་མོ། །དེ་ལ་བྱམས་པ་ནི་ཞེ་སྡང་མེད་པའི་སེམས། སྙིང་རྗེ་ནི་འདོད་ཆགས་མེད་པའི་སེམས། བྱང་སེམས་ནི་གཏི་མུག་མེད་པའི་སེམས་སོ། །དེ་ཀ་སྡེ་སྣོད་གསུམ་ཡང་ཡིན་ཏེ། སྙིང་རྗེ་འདུལ་བ། བྱམས་པ་མདོ་སྡེ། བྱང་སེམས་མངོན་པའི་སྡེ་སྣོད་དོ། །དེ་ཀ་བསླབ་པ་གསུམ་ཡང་ཡིན་ཏེ། འདོད་ཆགས་མེད་པའི་སྙིང་རྗེ་ཚུལ་ཁྲིམས། ཞེ་སྡང་མེད་པའི་བྱམས་པ་ཏིང་ངེ་འཛིན། གཏི་མུག་མེད་པའི་བྱང་སེམས་དེ་ཤེས་རབ་ཀྱི་བསླབ་པའོ། །དེ་ཀ་ཉམས་གསུམ་ཡང་ཡིན་ཏེ། འདོད་ཆགས་དང་བྲལ་བའི་སྙིང་རྗེ་དེ་བདེ་བའི་ཉམས། ཞེ་སྡང་དང་བྲལ་བའི་བྱམས་པ་དེ་གསལ་བའི་ཉམས། གཏི་མུག་དང་བྲལ་བའི་བྱང་སེམས་དེ་མི་རྟོག་པའི་ཉམས་སོ། །དེ་ལྟར་དུག་གསུམ་གང་ཡང་མེད་པ་དེ་སངས་རྒྱས་ཀྱི་ཐུགས་རྣམ་པར་མི་རྟོག་པ་ཡིན་པས་ཐུགས་ཞེས་བྱའོ། །དེས་ན། བྱམས་པ། སྙིང་རྗེ། བྱང་སེམས་གསུམ་པོ་དེ་ཐེག་པ་ཆེན་པོའི་ལམ་གྱི་ངོ་བོ་ཡིན་པས་མེད་ཀ་མེད་དོ། །ཁྱད་པར་གསང་སྔགས་ལམ་གྱི་ངོ་བོ་ནི། །ཞེས་པས། གཉིས་པ་གསང་སྔགས་ལམ་གྱི་ངོ་བོ་ལ་ལྔ་སྟེ། རྒྱུད་སྨིན་པར་བྱེད་པ་ལ་དབང་། །སྨིན་པ་གྲོལ་བར་བྱེད་པ་ལ་ལྟ་བ། ལྟ་བ་གོམས་པར་བྱེད་པ་ལ་སྒོམ་པ། དེ་དང་མི་འབྲལ་ཞིང་རྩལ་སྦྱོང་བ་ལ་སྤྱོད་པ། དེ་དག་ལས་མི་འདའ་བར་བྱེད་པ་དམ་ཚིག་གོ། །དང་པོ་ནི། རྒྱུད་སྨིན་པར་བྱེད་པ། བུམ་གསང་ཡེ་ཤེས་བདེ་ཆེན་དབང་བཞི་བསྐུར། །ཅེས་པས། བུམ་པའི་དབང་། གསང་བའི་དབང་། ཤེས་རབ་ཡེ་ཤེས་ཀྱི་དབང་། བདེ་བ་ཆེན་པོའི་དབང་ངོ་། །དེ་བཞིའི་དོན་གཏན་ལ་དབབ་པ་ལ་གཉིས་ཏེ། གོ་དོན་བཞག་པ་དང་། ཉམས་སུ་བླང་ཚུལ་ལོ། །དང་པོ་གོ་དོན་བཞག་པ། ལ་གསུམ་སྟེ། གྲངས་ངེས་པ། གོ་རིམ་ངེས་པ། སྒྲ་དོན་ནོ། །དང་པོ་ནི། གྲངས་ངེས་པ། སྤང་བྱ་འདོད་ཆགས་བཞི་སྤོང་བ་དང་། སྒྲུབ་བྱེད་ཕྱག་རྒྱ་བཞི་སྟོན་པ་དང་། འབྲས་བུ་སྐུ་བཞི་ཐོབ་པ་དང་གསུམ་དུ་ངེས་པའོ། །དང་པོ་ནི། སྤང་བྱ། འདོད་ཁམས་ཀྱི་འདོད་ཆགས་ཐམས་ཅད་བཞིར་འདུས་ཏེ། གཞན་འཕྲུལ་དབང་བྱེད་པ་ལ་དགོད་པས་ཚིམས་པའི་ཆགས་པ་ཡོད་པས། དེ་དག་པར་བྱེད་པ་ལ་བུམ་དབང་། འཕྲུལ་དགའ་བ་ལ་བལྟས་པས་ཚིམས་པའི་ཆགས་པ་ཡོད་པས། དེ་དག་པར་བྱེད་པ་ལ་གསང་དབང་། དགའ་ལྡན་པ་ལ་ལག་པ་བཅངས་བས་ཚིམས་པའི་ཆགས་པ་ཡོད་པས། དེ་དག་པར་བྱེད་པ་ལ་ཤེས་རབ་ཡེ་ཤེས། འཐབ་བྲལ་མན་ཆོད་ལ་གཉིས་འཁྱུད་ཀྱིས་ཚིམས་པའི་ཆགས་པ་ཡོད་པས། དེ་དག་པར་བྱེད་པ་ལ་བདེ་བ་ཆེན་པོའོ། །གཉིས་པ་ནི། སྒྲུབ་བྱེད་ཕྱག་རྒྱ་བཞི། བུམ་དབང་གིས་དམ་ཚིག་ཕྱག་རྒྱ། གསང་དབང་གིས་ལས་ཀྱི་ཕྱག་རྒྱ། ཤེས་རབ་ཡེ་ཤེས་ཀྱིས་ཆོས་ཀྱི་ཕྱག་རྒྱ། བདེ་བ་ཆེན་པོས་ཕྱག་རྒྱ་ཆེན་པོ་སྟོན་པའོ། །གསུམ་པ་ནི། འབྲས་བུ་སྐུ་བཞི་ཐོབ་ག་བུམ་དབང་གིས་སྤྲུལ་སྐུ། གསང་དབང་གིས་ལོངས་སྐུ། ཤེས་རབ་ཡེ་ཤེས་ཀྱིས་ཆོས་སྐུ། བདེ་ཆེན་གྱིས་ངོ་བོ་ཉིད་ཀྱི་སྐུ་ཐོབ་པ་དང་བཞིར་ངེས་སོ། །གཉིས་པ་གོ་རིམ་ངེས་པ་ལ་གཉིས་ཏེ། ལྟ་བ་ལ་སྦྱར་བ་དང་། རྟེན་དང་བརྟེན་པའི་ཚུལ་དུ་སྦྱར་བའོ། །དང་པོ་ནི། ཐེག་ཆེན་གྱི་ལྟ་བ་ཐམས་ཅད་བཞིར་འདུས་ཏེ། སེམས་ཙམ། དབུ་མ། གསང་སྔགས། རྫོགས་ཆེན་ནོ། །དེ་བཞིན་དུ་དབང་ཡང་བཞིར་འདུས་ཏེ། བུམ་དབང་གིས་སྣང་བ་རང་སེམས་སྒྱུ་མ་ལྟར་བསྟན་པས། ལྟ་བ་ལ་སྦྱར་བ། སེམས་ཙམ་གྱི་ལྟ་བ། གསང་དབང་གིས་ཆོས་ཐམས་ཅད་སྤྲོས་བྲལ་ནམ་མཁའ་ལྟར་བསྟན་པས་དབུ་མའི་ལྟ་བ། གསུམ་པས་བདེ་སྟོང་དབྱེར་མེད་དུ་བསྟན་པས་གསང་སྔགས་ཀྱི་ལྟ་བ། བཞི་པ་མཐའ་བྲལ་ཡེ་ཤེས་སངས་རྒྱས་སུ་བསྟན་པས་རྫོགས་ཆེན་གྱི་ལྟ་བའོ། །གཉིས་པ་ནི། རྟེན་དང་བརྟེན་པའི་ཚུལ་དུ་སྦྱར་བ། ངོ་བོ་རྩ་ཡིན་ཏེ། དེ་ལ་རླུང་བརྟེན། དེ་ལ་ཁམས་བྱང་སེམས་བརྟེན། དེ་ལ་དོན་དམ་བྱང་སེམས་བརྟེན་པས། དང་པོ་ལུས་འདག་པ་ལ་བུམ་དབང་། ངག་རླུང་གི་རང་བཞིན་འདག་པ་ལ་གསང་དབང་། ཁམས་ཐིག་ལེ་བྱང་སེམས་འདག་པ་ལ་གསུམ་པ། དོན་དམ་བྱང་སེམས་རྟོགས་པར་བྱེད་པ་ལ་བཞི་པའོ། །གསུམ་པ་སྒྲ་དོན་ནི། ཨ་བྷི་ཥིཉྩའི་སྒྲ་ལས་དྲངས་ན། དྲི་མ་འཁྲུད་པས་ན་དབང་སྟེ། དང་པོས་ལུས་ཀྱི། གཉིས་པས་ངག་གི། གསུམ་པས་སེམས་ཀྱི། བཞི་པས་ལུས་ངག་ཡིད་གསུམ་ཀའི་དྲི་མ་འཁྲུད་པ་སྟེ། སྣོད་དག་པར་བཀྲུས་ནས་བཅུད་བླུགས་སུ་རུང་བ་བཞིན་ནོ། །ཨ་བྷི་ཥེ་ཀའི་སྒྲ་ལས་དྲངས་ན། སྐལ་བ་འཇོག་པས་ན་དབང་སྟེ། དང་པོས་ལྷ་བསྒོམ་པའི། གཉིས་པས་གཏུམ་མོ་ཙཎྜ་ལཱི་བསྒོམ་པའི། གསུམ་པས་བདེ་ཆེན་སྤྲོས་བྲལ་བསྒོམ་པའི། བཞི་པས་ཟུང་འཇུག་བློ་འདས་བསྒོམ་པའི་སྐལ་བ་འཇོགས་པ་སྟེ། ཕས་བུ་ལ་ཕོགས་གཏོད་པ་བཞིན་ནོ། །ཨ་བྷི་སི་ཏའི་སྒྲ་ལས་དྲངས་ན། སྨིན་པར་བྱེད་པས་ན་དབང་སྟེ། དང་པོས་ལུས་ཕུང་ཁམས་སྐྱེ་མཆེད་ལྷ་རུ། གཉིས་པས་ངག་འབྱུང་འཇུག་གནས་གསུམ་སྔགས་སུ། གསུམ་པས་ཐིག་ལེ་བདེ་ཆེན་ཡེ་ཤེས། བཞི་པས་སེམས་སངས་རྒྱས་ཆོས་སྐུ་རུ་སྨིན་པར་བྱེད་པས་ན་དབང་སྟེ། རྒྱལ་པོར་དབང་བསྐུར་བ་བཞིན་ནོ། །གཉིས་པ་ལ་མ་ཉམས་སུ་བླང་ཚུལ་ལ་བཞི་སྟེ། རྒྱུ་ལ་གནས་པ། རྐྱེན་ལ་ཐོབ་པ། ལམ་ཉམས་སུ་བླང་བ། འབྲས་བུ་སྐུ་བཞིར་ཐོབ་པའོ། །དང་པོ་ལ། རྒྱུ་ལ་གནས་པ། ལུས་ཕུང་ཁམས་སྐྱེ་མཆེད་ལྷ་རུ་གནས་པ་བུམ་དབང་གི་ས་བོན། ངག་རླུང་དང་ཡི་གེ་སྔགས་སུ་གནས་པ་གསང་དབང་གི་ས་བོན། ཁམས་དྭངས་མ་ཀུན་དྷ་བདེ་ཆེན་དུ་གནས་པ་གསུམ་པའི་ས་བོན། སེམས་སངས་རྒྱས་ཆོས་སྐུར་གནས་པ་བཞི་པའི་ས་བོན་ཡོད་པའོ། །གཉིས་པ་རྐྱེན་ནི། དཀྱིལ་འཁོར་ཁོ་ན་ཡིན་ཏེ། གཞི་དཀྱིལ་འཁོར་དུ་བཅུག་པས། རྩ་བ་དབང་བསྐུར་དུ་བཏུབ་པ་ཡིན་པའོ། །དེའང་ཕྱི་རྡུལ་ཚོན་གྱི་དཀྱིལ་འཁོར་ལ་བརྟེན་ནས་ནང་དོན་གྱི་དཀྱིལ་འཁོར་སྟོན་ཏེ། དང་པོས་ལུས་ལྷའི་དཀྱིལ་འཁོར། གཉིས་པས་ངག་སྔགས་ཀྱི། གསུམ་པས་ཐིག་ལེ་བདེ་ཆེན་གྱི། །བཞི་པས་སེམས་སྐུ་བཞི་ངོ་བོ་ཉིད་ཀྱི་དཀྱིལ་འཁོར་དུ་སྟོན་པའོ། །གསུམ་པ་ལམ་ཉམས་སུ་བླང་བ་ལ་མངོན་པར་རྟོགས་པ་བཞི་སྟེ། བསྐྱེད་རིམ་བུམ་དབང་གི་མངོན་རྟོགས། རྩ་རླུང་ཐིག་ལེ་གཏུམ་མོ་ཙན་དྷ་ལཱི་ཐམས་ཅད་གསང་དབང་གི་མངོན་རྟོགས། རང་གཞན་གྱི་ལུས་ལ་བརྟེན་ནས་འོག་སྒོ་བདེ་ཆེན་སྒོམ་པ་ཐམས་ཅད་ཤེས་རབ་ཡེ་ཤེས་ཀྱི་མངོན་རྟོགས། དེ་ལས་སྐྱེས་པའི་གཉིས་མེད་ཡེ་ཤེས་ཆེན་པོ་ནི་བདེ་བ་ཆེན་པོའི་མངོན་རྟོགས་སོ། །བཞི་པ་ལམ་ཉམས་སུ་བླངས་པའི་འབྲས་བུ་བཞི་ནི། དབང་དང་པོས་སྤྲུལ་སྐུ། གཉིས་པས་ལོངས་སྐུ། གསུམ་པས་ཆོས་སྐུ། བཞི་པས་ངོ་བོ་ཉིད་ཀྱི་སྐུ་ཐོབ་པའོ། །དེས་ན་ལུས་ངག་རྩ་ཁམས་ཐམས་ཅད་སངས་རྒྱས་སུ་ངོ་སྤྲད་པ་དབང་ཁོ་ན་ཡིན་པས་མེད་ཀ་མེད་དོ། གཉིས་པ་སྨིན་པ་གྲོལ་བར་བྱེད་པའི། ལྟ་བ་ལ་གཉིས་ཏེ། བསྐྱེད་རིམ་སྦྱང་བ་དང་། རྫོགས་རིམ་བརྟེན་པའོ། །དང་པོ་ནི། བསྐྱེད་རིམ། ཕྱི་ནང་སྣོད་བཅུད་གཞལ་ཡས་ལྷ་རུ་བསྐྱེད། ཅེས་པས། འདི་ལ་ལྔ་སྟེ་སྦྱང་གཞི། སྦྱང་བྱ། སྦྱོང་བྱེད། འབྲས་བུ། སྦྱོང་ཚུལ་ལོ། དང་པོ་ནི། སྦྱང་གཞི། སྣོད་བཅུད་བརྟན་གཡོའི་དངོས་པོ་ཐམས་ཅད་གཞལ་ཡས་ཁང་དང་ལྷའི་རང་བཞིན་དུ་གནས་པའོ། །གཉིས་པ་ནི། སྦྱང་བྱ། དེ་ལྟར་ངོ་མ་ཤེས་པ་སྣོད་བཅུད་རང་རྒྱུད་འཛིན་པ་ཀུན་བཏགས་གློ་བུར་གྱི་དྲི་མ་འདིའོ། །གསུམ་པ་ནི། སྦྱོང་བྱེད། སྣོད་བཅུད་ཐམས་ཅད་གཞལ་ཡས་ཁང་དང་ལྷ་རུ་བསྒོམ་པའོ། །བཞི་པ་ནི་འབྲས་བུ་ཀུན་བཏགས་གློ་བུར་གྱི་དྲི་མ་དག་ནས། དོན་རང་མཚན་མངོན་དུ་གྱུར་པའོ། །ལྔ་པ་སྦྱང་ཚུལ་ནི། སྟོང་པའི་ངང་ལས་འགགས་མེད་ཀྱི་སྙིང་རྗེ་གཉིས་མེད་ཡི་གེའི་རང་བཞིན་ལས། སྣོད་གཞལ་ཡས་ཁང་། བཅུད་རང་གཞན་ཐམས་ཅད་ལྷའི་དཀྱིལ་འཁོར་དུ་བསྒོམ། དེ་ལ་དམ་ཚིག་ཡེ་ཤེས་གཉིས་ལས། རང་གཞན་གྱི་ལུས་ངག་ཡིད་གསུམ་ལྷའི་སྐུ་གསུང་ཐུགས་སུ་གནས་པ་སྟེ། དེ་ལས་མི་འདའ་བའི་དམ་ཚིག་གི་ལྷར་གསལ་ཞིང་ཐ་མལ་གྱི་ལོག་རྟོག་མེད་པས་ན་སེམས་དཔའོ། །དེ་ལྟར་གདོད་ནས་གནས་ཤིང་ཡེ་ནས་ཡོད་པའི་དེ་ཉིད་ཤེས་པ་ན་ཡེ་ཤེས། གཉིས་འཛིན་གྱི་དྲི་མ་མེད་པས་ན་སེམས་དཔའ་སྟེ། དམ་ཚིག་ཡེ་ཤེས་དབྱེར་མེད་པའོ། །དེ་ནས། ཡེ་ནས་ཡོད་པ་ལ་ངོ་ཤེས་བྱས་པ་ཙམ་ལས། རང་བཞིན་གྱི་གནས་ནས་སྤྱན་དྲངས་ལ་བསྟིམ་ཞེས་བྱ་བ། ཡུལ་ཅན་གཞན་དུ་གྲུབ་པ་ནི་མེད་དོ། །རང་སྣང་དབྱེར་མེད་དཀྱིལ་འཁོར་ལ། །ཞེས་སོ། །དེ་ལྟ་བུའི་བསྐྱེད་རིམ་དེ་ལ། ལམ་དུ་འགྲོ་བ་གནད་གསུམ་སྟེ། ཐ་མལ་གྱི་ཞེན་པ་སྦྱོང་བ་ལ་རྣམ་པ་གསལ་བ། དེའི་དེ་ཉིད་ཤེས་པ་ལ་རྣམ་དག་དྲན་པ། ཀུན་བཏགས་མཉམ་རྗེས་མེད་པ་ལ་ང་རྒྱལ་བརྟན་པའོ། །དང་པོ་ནི། ཐ་མལ་གྱི་ཞེན་པ་སྦྱོང་བ། རྣམ་པ་གསལ་བར་བསྒོམས་པས་ཐུན་མོང་གི་ཡོན་ཏན་ཐམས་ཅད་འབྱུང་སྟེ། གདན་ཆེ་ལ་བརྟན་པས་ཚེ་རིང་བ། ཞབས་བགྲད་ཁམ་ཆེ་བས་སྡོད་ཚུགས་པ། སྐུ་ལང་ཚོ་རྒྱས་ཤིང་ཡིད་དུ་འོང་བ་བསྒོམས་པས་ནད་ཉུང་ཁམས་བཟང་བ། ཕྱག་མཚན་གསལ་བས་བསམ་པ་འགྲུབ་པ། རྒྱན་ཚང་བས་འབྱོར་པ་ལྡན་པ། ཞལ་དང་མཆེ་བ་སྐུ་མདོག་གསལ་བར་བསྒོམས་པས་ཐམས་ཅད་བཀའ་ཉན་ཅིང་སྣང་བ་དབང་དུ་འདུས་པའི་རྟེན་འབྲེལ་ལོ། །དེས་ན་གཙོ་འཁོར་སྐུ་མདོག་ཞལ་ཕྱག་ཐམས་ཅད་མ་ལུས་ཤིང་གསལ་བར་བསྒོམས་པས་བར་ཆད་གང་གིས་ཀྱང་མི་ཚུགས་ཤིང་ཐུན་མོང་གི་ཡོན་ཏན་ཐམས་ཅད་འབྱུང་ངོ་། །གསལ་བ་གང་ཡང་མེད་ན། ཡོན་ཏན་གང་ཡང་མི་འབྱུང་ངོ་། །གཉིས་པ་རྣམ་དག་དྲན་པ་ལ་གཉིས་ཏེ། རྟགས་དང་། དོན་གྱི་རྣམ་དག་གོ། །དང་པོ་ནི། དབུ་གསུམ་ཕྱག་དྲུག་ཞབས་བཞི་ལ་སོགས་པར་བསྒོམ་པ་ན། དབུ་གསུམ་ནི། སྐུ་གསུམ། ཕྱག་དྲུག་ནི། ཡེ་ཤེས་དྲུག །ཞབས་བཞི་ནི། རྫུ་འཕྲུལ་བཞི་དྲན་པར་བྱའོ། །སྐུ་མདོག་ནི། དཀར་པོ་སྐྱོན་གྱིས་མ་གོས་པས། སེར་པོ་ཡོན་ཏན་རྒྱས་པ། དམར་པོ་ཐུགས་རྗེ་ཆགས་པ། ལྗང་གུ་ཕྲིན་ལས་ཐོགས་མེད། མཐིང་གའམ་ནག་པོ་ཆོས་ཉིད་མི་འགྱུར་བའོ། །ཕྱག་མཚན་ནི། རྡོ་རྗེ་འདུས་མ་བྱས་པ། འཁོར་ལོ་ཉོན་མོངས་གཅོད་པ། རིན་པོ་ཆེ་ཡོན་ཏན་འབྱུང་བ། པདྨ་སྐྱོན་གྱིས་མ་གོས་པ། རྒྱ་གྲམ་མམ་རལ་གྲི་ནི་ཕྲིན་ལས་ཐོགས་པ་མེད་པའོ། །དེ་བཞིན་དུ་རང་རང་གི་སྒྲུབ་ཐབས་གང་ཡིན་པའི་གཞུང་བཞིན་བྱས་པས་ཡོན་ཏན་འབྱུང་ངོ་། །གཉིས་པ་དོན་གྱི་རྣམ་དག་ནི། དེ་དག་ཀྱང་བདེན་དངོས་སུ་གྲུབ་པ་མེད་པས། རང་བཞིན་སྟོང་པ་ཉིད་དུ་ཤེས་པར་བྱའོ། །དེས་ན། གདངས་མ་འགགགས་པ་ལྷ་རུ་ལམ་མེ། གཤིས་མ་གྲུབ་པ་སྟོང་པར་ཆོམ་མེ། ངོ་བོ་གསལ་སྟོང་གཉིས་མེད་དུ་ལྷང་ངེ་། དེ་ལྟར་གཉིས་མེད་དུ་བསྒོམས་པས་ཚོགས་གཉིས་རྫོགས་ནས་འབྲས་བུ་སངས་རྒྱས་ཐོབ་པ་ཡིན་ནོ། །གསུམ་པ་ང་རྒྱལ་བརྟན་པ་ནི། གསལ་རུང་མི་གསལ་རུང་ལྷ་རང་ཡིན་ནོ་སྙམ་པའི་བསམ་པ་བྱ་ཞིང་། ཐ་མལ་གྱི་སྣང་བ་མེད་པར་བྱའོ། །དེས་ན་མཆོག་ཐུན་མོང་གི་ཡོན་ཏན་ཐམས་ཅད་ཚེ་འདི་ཉིད་ལས་འབྱུང་བ་ནི་བསྐྱེད་པའི་རིམ་པ་ཡིན་པས་མེད་ཀ་མེད་ཡིན་ནོ། །བསྐྱེད་རྫོགས་གཉིས་ཀྱི་དོན་ནི། ཀུན་རྫོབ་ལམ་དུ་བྱེད་པ་བསྐྱེད་རིམ། དོན་དམ་མངོན་དུ་བྱེད་པ་ལ་རྫོགས་རིམ། དེ་གཉིས་ཐ་དད་གཉིས་སུ་མེད་པས་བསྐྱེད་རྫོགས་དབྱེར་མེད་ཟུང་འཇུག་ཡིན་ནོ། །དེ་ཡང་སྣོད་བཅུད་ཐམས་ཅད་གདངས་མ་འགགས་པར་གསལ་བ་ནི་གཟུགས་སྐུ། གཤིས་སྟོང་པར་གནས་པ་ནི་ཆོས་སྐུ། ངོ་བོ་ཅིར་ཡང་མི་རྟོག་པ་ནི་གཉིས་མེད་ཡིན་ཏེ། གདངས་གཟུགས་སྐུ་ཡིན་ཙམ་ན། གཤིས་ཆོས་སྐུ་ལས་འོས་མེད། གཤིས་ཆོས་སྐུར་གནས་པ་ལས། གདངས་གཟུགས་སྐུ་ལས་འོས་མེད། དེའི་གནད་ཕྱིས་དབྱེར་མེད་ལས་འདས་པ་མེད་དོ། །གཉིས་པ་རྫོགས་རིམ་ནི། སྐྱེ་འགགས་གཉིས་མེད་རང་བྱུང་མཐའ་ལས་འདས། །ཞེས་པས། གཞི་སྟོང་པའི་གནས་ལུགས་སེམས་ཉིད་ཀྱི་བཞུགས་ཚུལ། ཤེས་བྱའི་གཤིས་དེས་དངོས་པོར་མ་སྐྱེས། དངོས་མེད་དུ་མ་འགགས། ཐ་དད་དུ་མ་གྲུབ་པའི་སྐྱེ་འགག་གཉིས་མེད་དོ། །དེ་ཡང་། དངོས་པོར་མ་སྐྱེས་པས་སྟོང་པ། དངོས་མེད་དུ་མ་འགགས་པས་རིག་པ། ཐ་དད་དུ་མ་གྲུབ་པས་གཉིས་མེད་དོ། །དེས་ན་ཆོས་ཐམས་ཅད་རང་གི་སེམས་ཡིན་ལ། སེམས་ནི་སྟོང་པ་ཉིད་དོ། །དེ་ལ་ལྔ་སྟེ། རང་སྟོང་པ། ཡེ་སྟོང་པ། རང་བཞིན་གྱིས་སྟོང་པ། ཀུན་སྟོང་པ། མཉམ་པར་སྟོང་པའོ། །དེ་ཡང་། རང་སྟོང་པས་ཡུལ་མེད་པ་སྟེ་རྟག་པའི་ཆོས་སུ་མི་སྡོད་པ། ཡེ་སྟོང་པས་དུས་གློ་བུར་དུ་བྱུང་བ་མ་ཡིན་ཏེ་གདོད་མ་ནས་སྟོང་པ། རང་བཞིན་གྱིས་སྟོང་པས་སུས་ཀྱང་བྱས་པ་མ་ཡིན་ཏེ་གཤིས་རང་སྟོང་པ། ཀུན་སྟོང་པས་ཉི་ཚེའི་སྟོང་པ་མ་ཡིན་ཏེ་ཆོས་ཐམས་ཅད་ཀྱི་ཆོས་ཉིད། མཉམ་པར་སྟོང་པས་རོ་གཅིག་སྟེ་བཟང་ངན་མེད་པའོ། །མདོར་ན་ཆོས་ཐམས་ཅད་ཀྱི་ཆོས་ཉིད་གཤིས་ཅིར་ཡང་མ་གྲུབ་པ་ནམ་མཁའ་ལྟ་བུའོ། །སྟོང་པ་དེ་ཉིད་ཀྱི་གདངས་འགགས་མེད་དུ་འཆར་བས་ན། སྣང་བ་ཞེས་བྱ། དེ་ལ་ལྔ་སྟེ། སྣང་ཚད་གཅིག་རང་སྣང་བས་གཞན་མ་ཡིན་པ། བཀག་པ་མེད་པས་ཟང་ཐལ་དུ་སྣང་བ། གཏད་སོ་མེད་པས་ཁ་ཡན་དུ་སྣང་བ། དུས་བཏབ་མེད་པས་ངེས་མེད་དུ་སྣང་བ། ཕྱོགས་གཅིག་ཏུ་མ་གྲུབ་པ་སྣ་ཚོགས་སུ་སྣང་བ་སྟེ། འབྲས་བུ་སངས་རྒྱས་པའི་དུས་ན་སྐུ་དང་ཡེ ཤེས་ཡོན་ཏན་སྣ་ཚོགས་སུ་སྣང་། ལམ་རྣལ་འབྱོར་པའི་དུས་ན་ཉམས་དང་ཏིང་ངེ་འཛིན་རྟོགས་པའི་བྱེ་བྲག་སྣ་ཚོགས་སུ་སྣང་། རྒྱུ་སེམས་ཅན་གྱི་དུས་ན་རིགས་དྲུག་གི་སྣང་བ་ཐམས་ཅད་བདེ་སྡུག་སྐྱོན་ཡོན་སྣ་ཚོགས་སུ་སྣང་ངོ་། །མདོར་ན་གཤིས་ཅན་ཡང་མ་ཡིན་པའི་གནད་ཀས་གདངས་ཅིར་ཡང་འཆར་བ་ནམ་མཁའི་ཆོ་འཕྲུལ་ལྟ་བུའོ། །དེས་ན་སྟོང་པའི་གདངས་འགགས་མེད་དུ་སྣང་ལ། སྣང་བའི་རང་བཞིན་སྟོང་པར་གནས་པས་སྣང་སྟོང་གཉིས་མེད། དེ་ཡང་སྣང་བའི་སྟེང་དུ་སྟོང་པ་སྤྱན་དྲངས་པའམ། སྟོང་པ་སྣང་བའི་ལྷ་ལ་བཏབ་པའི་གཉིས་མེད་མ་ཡིན་ཏེ། སྣང་བའི་རང་བཞིན་དབྱིངས་སྟོང་པ་ཉིད་དུ་ལྷང་ངེ་། དབྱིངས་སྟོང་པའི་གདངས་དེ་ཀ་རིག་པ་འགགས་མེད་ཀྱི་རོལ་པ་ཁྲ་ཤིག་གེ། སྟོང་པ་དབྱིངས་ཀྱི་ཆོས་ཉིད། གསལ་བ་ཡེ་ཤེས་ཀྱི་ཕོ་སྒོ། གཉིས་མེད་གཤིས་ཀྱི་གནས་ལུགས་སོ། །ཡང་སྐྱེ་མེད་གགས་མེད་ཀྱི་སྟེང་དུ་བཀུག་པའམ། འགགས་མེད་སྐྱེ་མེད་ཀྱི་ཟླ་ལ་བཏབ་པ་ལྟ་བུ་ནི་མ་ཡིན་ཏེ། སྐྱེ་འགགས་གཉིས་མེད་སྐུ་གསུམ་དུ་གྲོང་ངེ་། མདོར་ན་གཉིས་བསྡུས་ཐམས་ཅད་གཉིས་མེད་གཉུག་མ་ཆོས་སྐུའོ། །དེ་ཡང་ཆུ་དང་འོ་མ་ལྟར་འདྲེས་པའམ། ཕྱེ་ཆུ་ལྟར་བསྲེས་པའི་གཉིས་མེད་མིན། ཡང་རྟོགས་པའམ། སྒོམ་པའམ། ཤེས་ནས་གཉིས་མེད་དུ་སོང་བ་མ་ཡིན། ཡང་གཉིས་ཀ་མེད་པའམ། གཅིག་ཏུ་སོང་བའམ། བཟང་ངན་མེད་པས་གཉིས་མེད་ཀྱང་མིན་ཏེ། ཆོས་ཐམས་ཅད་ཀྱི་གཤིས་སམ། ཡིན་ཚུལ་སམ། གནས་ལུགས་དེ་གཉིས་མེད་ཐིག་ལེ་ཉག་གཅིག་ཏུ་གནས་པས། དབྱེ་བ་བྱར་མེད། བྱར་མི་བཏུབ། བྱར་མི་ཤེས་པ་སྟེ། སོ་སོ་མ་ཡིན་ཐ་མི་དད་དབྱེར་མེད་པ་སྟེ། གཉིས་མ་གྲུབ་པས་གཉིས་མེད་དོ། །ཐོག་དེ་རུ་སོང་བ་ལ་གཉིས་མེད་རྟོགས་ཞེས་བྱའོ། །རྟོགས་ལྡན་ཞེས་བྱའོ། །གཤིས་ཐོག་ཏུ་སོང་བ་ཞེས་བྱའོ། །མདོར་ན་གཤིས་ཅིར་ཡང་མ་གྲུབ། མདངས་ཅིར་ཡང་མི་འགགས། ངོ་བོ་ཅིར་ཡང་མི་རྟོག །མཚན་ཉིད་མཐའ་དང་བྲལ། དོན་ཐིག་ལེ་ཉག་གཅིག །ཅིར་ཡང་མ་ཡིན་པས་ཅིར་ཡང་འཆར་བ་ལ། ཅིར་ཡང་འཆར་བས་ཅིར་ཡང་མ་ཡིན་པ་སྟེ། ནམ་མཁའ་དང་ཆོ་འཕྲུལ་དབྱེར་མེད་པ་བཞིན་ནོ། །དེས་ན། སྟོང་པ་དང་སྣང་བ་འབྲལ་མ་མྱོང་། སྣང་བ་དང་སྟོང་པ་འབྲལ་མ་མྱོང་། སྣང་བས་སྟོང་པ་མ་སྤངས། སྟོང་པས་སྣང་བ་མ་སྤངས་པའོ། །དེ་ཡང་རང་སྣང་ངོ་ཤེས་པས་སྣང་བ་སེམས་སུ་ཐག་ཆོད་པ། མེད་འཛིན་ཆད་པ་ལས་གྲོལ་བའི་ལྟ་བ། ཀུན་རྫོབ་ཤེས་པའི་ཤེས་རབ། རང་སྟོང་རང་ངོ་ཤེས་ཏེ་སེམས་ཉིད་སྟོང་པར་ཐག་ཆོད་པ། ཡོད་འཛིན་རྟག་པ་ལས་གྲོལ་བའི་ལྟ་བ། དོན་དམ་ཤེས་པའི་ཤེས་རབ། ཟུང་འཇུག་རང་ངོ་ཤེས་ཏེ་སྣང་སྟོང་གཉིས་མེད་དུ་ཐག་ཆོད་པས། རྟག་ཆད་གཉིས་ལས་གྲོལ་བའི་ལྟ་བ། ཐ་མི་དད་ཤེས་པའི་ཤེས་རབ་བོ། །དེ་ལ་རྒྱུ་དང་རྐྱེན་མེད་སུས་ཀྱང་མ་བྱས་པས་ན་རང་བྱུང་། ཕྱོགས་གཅིག་ཏུ་མི་གནས་པས་མཐའ་ལས་འདས་པའོ། །དེ་ནི་སྐྱེ་མེད་ཀྱི་ངོས་ནས་ཅིར་ཡང་མ་ཡིན་ཏེ། ཡིན་པ་མེད་པའི་ལྟ་བ། འགགས་མེད་ཀྱི་ངོས་ནས་གང་ཡང་ཡིན་པས། མིན་པ་མེད་པའི་ལྟ་བ། གཉིས་མེད་ཀྱི་ངོས་ནས། ཡིན་མིན་ཡོད་མེད་རྟག་ཆད་ཀྱི་མཐའ་ལས་འདས་པའོ། །དེས་ན། བཤད་པ་མཐའ་ལས་འདས་པར་བཤད། སྒོམ་པ་མཐའ་ལས་འདས་པ་བསྒོམ། སྤྱོད་པ་མཐའ་ལས་འདས་པ་སྤྱོད། བསྔོ་བ་མཐའ་ལས་འདས་པར་བསྔོ། དེས་ན། མཐའ་ཡེ་བྲལ། སྐྱོན་ཡེ་དག །ཡོན་ཏན་ཡེ་རྫོགས། གཉིས་མ་གྲུབ་པས་གཉིས་མེད། ཟུང་མ་རྙེད་པས་ཟུང་འཇུག །མཐའ་མ་རྙེད་པས་མཐའ་བྲལ། བཟང་ངན་མེད་པས་ཀུན་ཏུ་བཟང་པོ། སྡིག་པ་མ་རྙེད་པས་དགེ་སྡིག་མེད། མཉམ་ཁད་མ། ཟང་ཡག་མ་ཡིན་ནོ། །གསུམ་པ་སྒོམ་པ་ནི། གནད་གསུམ་བཅུན་པས་རྟོག་མེད་རང་གསལ་འཆར། །ཞེས་པས། འདི་ལ་བཞི་སྟེ། སྒོམ་སྐྱེས་བའི་གནད། སྐྱེས་པ རང་གི་ངོ་བོ། ཉམས་འཆར་ཚུལ། གོལ་ས་བཅད་པའོ། །དང་པོ་ནི། གནད་གསུམ་སྟེ། འཕྲུལ་འཁོར་ལུས་ཀྱི་གནད། ལྟ་སྟངས་མིག་གི་གནད། བཞག་ཐབས་སེམས་ཀྱི་གནད་དོ། །དང་པོ་ནི། གནས་དབེན་པར་མལ་བདེ་བ་སྟན་འབོལ་བའི་སྟེང་དུ། ལུས་ཀྱི་ཆོས་གསུམ་ནི། རྐང་པ་སྐྱིལ་ཀྲུང་། ལག་པ་མཉམ་བཞག །ལུས་པོ་ཡ་ཡོ་དང་སྒྱེ་སྒུར་མེད་པར་རང་སོ་ལ་ཆམ་བཞག་གོ། །དེས་སྒོམ་རང་བབས་སུ་ཡོང་ལ། འཕྲུལ་འཁོར་བཅའ་མ་ཤེས་ན་སྒོམ་མི་སྐྱེའོ། །གཉིས་པ་ལྟ་སྟངས་མིག་གི་གནད་གསུམ་ནི། མིག་ཚམ་ཚུམ་མི་བྱ། ཁྱད་ཁྱུར་མི་བྱ། ལོགས་དང་ཟུར་དུ་མི་གཅུ་བར་ཐད་ཀའི་སོ་གཅིག་ལ་ཕུར་ཚུགས་སུ་གཏད་དོ། །དེས་སྒོམ་རང་བབས་སུ་འོང་སྟེ། མིག་དང་ཤེས་པ་གནད་གཅིག་ཡིན་ནོ། །ལྟ་སྟངས་མེད་ན་སྒོམ་མི་འཆར་རོ། །གསུམ་པ་བཞག་ཐབས་སེམས་ཀྱི་གནད་གསུམ་ནི། དེ་ཐ་མལ་དུ་མ་ཡེངས། རྟོག་པར་མ་འགྱུས། ཡིད་ཀྱིས་བཟོ་མ་བྱས་པར་ཤེས་པ་རང་ལུགས་སུ་ཆམ་བཞག་གོ། །དེས་སྒོམ་རང་བབས་སུ་འོང་ལ། ཡེངས་པ་དང་འགྱུས་ན་སྒོམ་མི་སྐྱེའོ། །གཉིས་པ་སྐྱེས་པ་རང་གི་ངོ་བོ་ནི། དེ་ལྟར་རང་ལུགས་སུ་བཞག་པས་རྣམ་རྟོག་ཕྲ་རགས་ཐམས་ཅད་རང་སར་ཉལ་ཞི་ནས། སེམས་རང་སར་ལྷག་གེ་གནས་པ་ཞིག་འོང་། །དེ་ཀ་ལ་ཞི་གནས་ཟེར། དེའི་གདངས་མ་འགགས་པར་ཡུལ་མེད་རང་གསལ་དུ་རྗེན་ནེ་ལྷང་ངེ་བ་ཞིག་འོང་། དེ་ཀ་ལྷག་མཐོང་ཟེར། དེ་གཉིས་ཤེས་པ་སྐད་ཅིག་མའི་སྟེང་ན་དབྱེར་མེད་གཅིག་གི་ངོ་བོར་ཧྲིལ་གནས་པ་ཞིག་ཡོང་། དེ་ཀ་ལ་ཞི་གནས་ལྷག་མཐོང་གཉིས་མེད་ཟེར་བ་ཡིན་ནོ། །དེ་བློ་ཡུལ་དུ་བྱས་ན་གོ་བ། ཡུལ་མེད་དུ་ཉམས་སུ་མྱོང་ན་ཉམས། ཤེས་པ་ཉིད་དེའི་ངོ་བོར་ཧྲིལ་ལེ་འདུག་ན་རྟོགས་པ་ཡིན། དུས་གསུམ་སངས་རྒྱས་ཀྱི་དགོངས་པ་བྱ་བ་དེ་ཡིན། དེ་བླ་མ་གདམས་ངག་ཆེ་ནས་བྱས་པ་མིན། སློབ་མ་ཤེས་རབ་ཆེ་ནས་བྱུང་བ་མིན། གནས་ལུགས་སམ་གཤིས་ཐོག་ཏུ་ཕེབས་པ་བྱ་བ་ཡིན་ནོ། །གསུམ་པ་ཉམས་འཆར་ལུགས་ནི། དེ་ལྟར་བསྒོམས་པས་བདེ་གས ལ་མི་རྟོག་པའི་ཉམས་སུ་འཆར་ཏེ། རྣམ་པར་རྟོག་པ་དང་བྲལ་བའི་ཤེས་པ་ལ་མི་རྟོག་པ་ཞེས་བྱའོ། །དེ་ལ་གསུམ། བསྒོམ་བྱ་སྒོམ་བྱེད་ཀྱི་ཞེན་སྣང་མེད་པས་བཟང་རྟོག་དང་བྲལ། རྣམ་རྟོག་ཕྲ་རགས་ཀྱི་རྒྱུན་ཆད་ནས་ངན་རྟོག་དང་བྲལ། རིག་པ་ཡུལ་མེད་དུ་རང་ངོ་ཤེས་པས་ལུང་མ་བསྟན་དང་བྲལ་བའོ། །རྟོག་མེད་ཀྱི་ངང་ནས་རིག་པའི་གདངས་མ་འ གགས་པར་ཡེ་རེ་འདུག་པ་ནི་གསལ་བའོ། །དེ་ལ་གསུམ་སྟེ། ཡུལ་མེད་དེ་རང་གསལ་བ། གློ་བུར་དུ་བྱུང་བ་མ་ཡིན་ཏེ་ཡེ་ནས་གསལ་བ། སུས་ཀྱང་མ་བྱས་ཏེ་རང་བཞིན་གྱིས་གསལ་བའོ། །དེ་ལ་མི་མཐུན་པའི་འགལ་རྐྱེན་མེད་པས་བདེ་བའོ། །དེ་ལ་གསུམ་སྟེ། མཚན་མའི་ཟུག་རྔུ་མེད་དེ་མཚན་མ་མེད་པའི་བདེ་བ། གཉིས་འཛིན་གྱི་ཞེན་སྣང་མེད་པས་གཉིས་སུ་མེད་པའི་བདེ་བ། དེ་ལ་རྒྱུ་རྐྱེན་མེད་པས་འདུས་མ་བྱས་ཀྱི་བདེ་བའོ། །དེ་ལྟ་བུའི་ཉམས་སྐྱེས་པ་ལ་མ་ཆགས་པ་གསུམ་སྒོམ་པ་སྐྱོན་མེད་ཡིན་ཏེ། བདེ་བ་ལ་མ་ཆགས་པ་སྨྱོན་པ་ལྟ་བུའི་སྤྱོད་པ། གསལ་བ་ལ་མ་ཆགས་པ་བུ་ཆུང་གི་རྨི་ལམ་ལྟ་བུ། མི་རྟོག་པ་ལ་མ་ཆགས་པ་བརྟུལ་ཞུགས་མཐར་ཕྱིན་པའི་རྣལ་འབྱོར་བ་ལྟ་བུའོ། །དེ་ལ་ཆགས་ན་སྲིད་པ་གསུམ་དུ་གོལ་ཏེ། བདེ་བ་ལ་ཆགས་ན་འདོད་ཁམས་སུ། གསལ་བ་ལ་ཆགས་ན་གཟུགས་ཁམས་སུ། མི་རྟོག་པ་ལ་ཆགས་ན་གཟུགས་མེད་དུ་གོལ། དེ་དག་ལ་མ་ཆགས་སྙམ་ཡང་ཆགས་སེམས་ཕྲ་མོ་འོང་ཞིང་། མ་ཞེན་མ་མནོ་ཡང་ཞེན་ཆོས་ཕྲ་མོ་ཡོད་པའོ། །བཞི་པ་གོལ་ས་བཅད་ཅིང་སྐྱོན་བསལ་བ་ལ། མཐར་གྱིས་གནས་པའི་སྙོམས་པར་འཇུག་པ་དགུའོ། །དེ་ཡང་འདོད་ཁམས་ཀྱི་རྣམ་རྟོག་སྤོང་བ་ལ། བསམ་གཏན་གྱི་སྙོམས་འཇུག་བཞི་སྟེ། གཟུང་འཛིན་གྱི་རྣམ་རྟོག་མེད་པ་ལས་བསྒོམ་བྱ་སྒོམ་བྱེད་ཀྱི་དཔྱོད་པ་དང་བཅས་པ་ནི་བསམ་གཏན་དང་པོའོ། །རྟོག་པ་དང་དཔྱོད་པ་མེད་ལ་དགའ་བའི་ཏིང་འཛིན་གྱི་རོ་མྱོང་བའི་འཛིན་པ་དང་བཅས་པ་ནི་བསམ་གཏན་གཉིས་པ། སེམས་གཡོ་བ་མེད་ལ་དབུགས་དབྱུང་རྔུབ་དང་བཅས་པ་ནི་གསུམ་པ། རྣམ་རྟོག་ཐམས་ཅད་དང་བྲལ་བའི་གསལ་སྟོང་གོ་མ་འགགས་པ་ནི་བསམ་གཏན་བཞི་པའོ། །གཟུགས་ཁམས་ཀྱི་རྣམ་རྟོག་སྤོང་བ་ལ། གཟུགས་མེད་པའི་སྙོམས་པར་འཇུག་པ་བཞི་སྟེ། ཆོས་ཐམས་ཅད་ནམ་མཁའ་ལྟ་བུ་ཡིན་ནོ་སྙམ་དུ་བློས་བརྟགས་ནས་དེ་ལ་མཉམ་པར་འཇོག་པ་ནི་ནམ་མཁའ་མཐའ་ཡས། རྣམ་པར་ཤེས་པ་མཐའ་ཡས་ཤིང་ཕྱོགས་མེད་ཡིན་ནོ་སྙམ་དུ་བློས་བརྟགས་ནས་དེ་ལ་མཉམ་པར་འཇོག་པ་ནི་རྣམ་ཤེས་མཐའ་ཡས། འདུ་ཤེས་ཀྱི་གསལ་རིག་ཡོད་པའང་མ་ཡིན་ཏེ། མེད་པའང་མ་ཡིན། བློས་བྱར་མ་བཏུབ་པ་ཡིན་ནོ་སྙམ་དུ་བློས་བརྟགས་ནས་དེ་ལ་མཉམ་པར་འཇོག་པ་ནི་ཡོད་མིན་མེད་མིན། སེམས་ནི་ཅིའི་ངོ་བོར་མ་གྲུབ་སྟེ་མེད་ཅིང་སྟོང་པ་ཡིན་ནོ་སྙམ་དུ་བློས་བརྟགས་ནས་དེ་ལ་བློ་འཇོག་པ་ནི་ཅིར་ཡང་མ་གྲུབ་པའི་སྐྱེ་མཆེད་དོ། །དེ་དག་བློས་བརྟགས་པ་དང་། ཡིད་ཆགས་པ་དང་། སེམས་ཀྱི་ཉོན་མོངས་པའི་དྲི་མ་བག་ཙམ་ཡོད་པ། ཐམས་ཅད་མི་རྟོག་པ་ལ་གནས་པ་འགོག་པའི་སྙོམས་པར་འཇུག་པ་སྟེ། ཚོགས་དྲུག་ཡུལ་ལ་འཇུག་པ་ནང་དུ་འགག་ཅིང་། རླུང་སེམས་ཀྱི་འགྱུ་བ་རྒྱུན་ཆད་པ་ལ་ཇི་སྲིད་དུ་མཉམ་པར་བཞག་གི་བར་ལ་གནས་པ་སྟེ་ཞི་གནས་གྱི་ཏིང་ངེ་འཛིན་མཐར་ཐུག་པ་ཡིན་ལ། དེ་ཤེས་རབ་ཀྱིས་གསོས་བཏབ་ནས་མཉམ་པར་འཇོག་པ་ནི། སོ་སོར་བརྟག་འགོག །གཤིས་ཀྱིས་གཞོལ་ཕྱོགས་དེར་སོང་བ་ནི་བརྟག་མིན་གྱིས་འགོག་པའོ། །དེ་ནི་དོན་དམ་པའི་ལུང་མ་བསྟན་ཏེ། དེ་ལྟར་སྙོམས་འཇུག་དགུ་པོ་དེ་ལ་བསམ་གཏན་གྱི་སྙོམས་འཇུག་བཞི་ནི། ལྷག་མཐོང་སྐྱེད་པར་བྱེད་པ་ཞི་གནས་ཏེ། བསམ་གཏན་བཞིའི་ཏིང་ངེ་འཛིན་ནི། གཤིས་དང་མཐུན་ཞིང་འཇིག་རྟེན་པའི་ཏིང་ངེ་འཛིན་རྣམས་ཀྱི་ནང་ནས་མཆོག་གོ། །གཟུགས་མེད་པའི་སྙོམས་འཇུག་བཞི་ནི། ཏིང་ངེ་འཛིན་གྱི་གོལ་ས་ཡིན་ནོ། །འགོག་པའི་སྙོམས་འཇུག་བཞི་ནི། ཉན་ཐོས་བཞིའི་ཏིང་ངེ་འཛིན་ནོ། །དེ་ལྟར་དེ་རྣམས་ངོ་ཤེས་པས། ཏིང་ངེ་འཛིན་གྱི་བྱེ་བྲག་ཕྱེད་ཅིང་། རང་གི་སྒོམ་པ་དེ་ལ། དེ་དག་གི་སེལ་དང་གོལ་ས་མི་འབྱུང་བ་ཡིན་ནོ། །དེ་ལྟར་གོལ་ས་རེ་དོགས་བཅད་ནས། སྒོམ་སྐྱོན་མེད་དུ་ཉམས་སུ་བླངས་པས། མཉམ་བཞག་ལ་དེ་ལྟར་བདེ་གསལ་མི་རྟོག་པ་གསུམ་དུ་སེང་ངེ་ཡེ་རེ་གནས། རྗེས་ཐོབ་ལ་སྣང་བ་བཀྲ་གསལ། རྨི་ལམ་སྒྱུ་མ་ལྟ་བུ་བུན་ལོང་འཆར། རྒྱུ་འབྲས་དེ་ཉིད་ཤེས། བསོད་ནམས་ཀྱི་བྲེ་ཁ་ཁེངས། ཏིང་ངེ་འཛིན་གྱི་དྲོད་ཐོབ་སྟེ། དེས་ཚོགས་ལམ་མཐར་ཕྱིན་མོས་སྤྱོད་ཀྱི་ས་ལ་སླེབས་པ་ཡིན་ནོ། །དེ་ཡུན་རིང་དུ་བསྒོམས་པས་རང་གིས་རང་ལ་ཡོད་པའི་དོན་ཡུལ་མེད་རང་གསལ་མངོན་སུམ་དུ་མཐོང་ཞིང་རང་ངོ་ཤེས་པ་ནི་མཐོང་ལམ་སྟེ། སྣང་རིག་སྟོང་གསུམ་ཡུལ་མེད་དུ་གསལ། ཆོས་ཉིད་ཟག་པ་མེད་པའི་དོན་མངོན་སུམ་དུ་མཐོང་། ཉོན་མོངས་པའི་སྒྲིབ་པ་རྩ་བ་ནས་ཟད། རྒྱུ་འབྲས་རང་རྒྱུད་སྟོང་པར་རྟོགས་ཏེ། འཁོར་བ་རང་རྒྱུད་མེད་པ། དང་པོ་རབ་ཏུ་དགའ་བའི་ས་སྟེ། མཉམ་བཞག་སངས་རྒྱས་སུ་མཚུངས་པ། རྗེས་ཐོབ་སྒྱུ་མ་ལྟ་བུར་འཆར་རོ། །དེ་གོམས་ཤིང་བརྟན་པར་བསྐྱངས་པས། གཉིས་ཆོས་ཐམས་ཅད་གཉིས་མེད་དུ་སོང་། རང་སྣང་རང་ངོ་ཤེས་པས་སྣང་སེམས་གཅིག་ཏུ་འདྲེས། སྟོང་པ་རྒྱུ་འབྲས་སུ་ཤར་བས་རྟེན་འབྲེལ་མངོན་དུ་གྱུར་ཏེ། མཉམ་བཞག་ལ་ཆོས་ཐམས་ཅད་ཡུལ་མེད་རིག་པའི་ངོ་བོར་གསལ། རྗེས་ཐོབ་ལ་སྣང་ཡུལ་བག་ཙམ་ཡོད་པ་ནི་སྒོམ་ལམ་མོ། །དེ་རྒྱུན་བསྲིངས་པས་འཁོར་འདས་ཐམས་ཅད་ལས། སྐྱེ་འགགས་གཉིས་མེད། མ་འདྲེས་ཡོངས་རྫོགས། ཡུལ་མེད་རང་གསལ་མངོན་དུ་གྱུར་པས། ཤེས་སྒྲིབ་གཏན་ནས་མེད་དེ། ཐམས་ཅད་ཡེ་ཤེས་སུ་ཤར་བའི་སྐད་ཅིག་མ་དེ་མཐར་ཕྱིན་གྱི་ལམ་སྟེ་སངས་རྒྱས་ཀྱི་སའོ། །བཞི་པ་སྤྱོད་པ་བསྟན་པ་ནི། སོ་སྤྱི་བོགས་གསང་ཡང་དག་ཁོ་ན་སྤྱོད། །ཅེས་པས། དེ་ལ་གསུམ་སྟེ། དང་པོ་ལམ་གྱི་སོ་ཟུགས་པ་ལ་ཐུན་མོང་སྤྱིའི་སྤྱོད་པ། བར་དུ་དེ་ལ་བོགས་འདོན་པ་ལ་བརྟུལ་ཞུགས་གསང་བའི་སྤྱོད་པ། ཐ་མ་ཡང་དག་དེ་ཁོ་ན་ཉིད་མཐར་ཕྱིན་པའི་སྤྱོད་པའོ། །དང་པོ་ནི། ཐུན་མོང་སྤྱིའི་སྤྱོད་པ། མི་ཚེ་ཐམས་ཅད་རྗེས་ལ་སྐྱེལ་ཞིང་། རྗེས་ནི་སྤྱོད་པ་ཁོ་ན་ཡིན་པས། སྤྱོད་པ་ནི་གལ་ཤིན་ཏུ་ཆེ་སྟེ། ལྟ་བ་མཐོན་པོ་བློ་ཡུལ་དུ་གོ་ཡང་། སྤྱོད་པ་དོན་དང་མི་མཐུན་ན་ལམ་ལོག །སྒོམ་པ་བཟང་པོ་སྐྱེས་ཀྱང་རྗེས་སྤྱོད་དེ་བཞིན་མ་བསྐྱངས་ན་ཡལ་འགྲོ། དེས་རྒྱུ་འབྲས་ཀྱི་གནད་གོ་བར་བྱ་སྟེ་དཀར་ནག་གི་ལས་ཤིན་ཏུ་ཕྲ་བ་ནས་འདོར་ལེན་བྱ། དེ་ནི་ཡང་དག་པའི་ལམ། ཤེས་བྱའི་དེ་ཁོ་ན་ཉིད། སངས་རྒྱས་བསྟན་པའི་ངོ་བོ་ཡིན་ཏེ། སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། ཞེས་པའི་དོན་ནོ། །དེས་ན་མི་ལུས་ཐོབ་ནས་དམ་པའི་ཆོས་ཚུལ་བཞིན་དུ་བྱེད་ན། ལུས་ངག་ཡིད་གསུམ་ཐ་མལ་དུ་སྐད་ཅིག་ཀྱང་འཆོར་ཐབས་མེད་པས། ཉིན་མོ་ཤེས་པ་བཟོ་མེད་ཚོགས་དྲུག་ལྷུག་པ་རྨི་ལམ་སྒྱུ་མ་ལྟ་བུར་ཉམས་སུ་བླང་། ནུབ་མོ་ཤེས་པ་སྤྲོ་བསྡུ་མེད་པར་བློ་རྟོག་མེད་ཀྱི་ངང་ལ་གཉིད་དང་ཆོས་ཉིད་བསྲེས་ལ་ཉལ། རྨི་ལམ་གྱི་འཁྲུལ་སྣང་ཡང་དག་པའི་ལམ་དུ་སྦྱངས། དེ་ཡང་བྱམས་སྙིང་རྗེ་བྱང་ཆུབ་ཀྱི་སེམས་སམ། བསྐྱེད་རྫོགས་ལ་སོགས་པ་གང་ལ་གོམས་པར་སྦྱང་ངོ་། །ནང་ནུབ་ཐུན་གཏོར་དང་རྒྱུན་གཏོར་མ་ཆག་པ་བཏང་། བདུན་རྣམ་དག་བྱ་ཞིང་ཕྱི་ནང་གསང་བའི་མཆོད་པ་འབུལ། ཡི་གེ་བརྒྱ་བས་སྡིག་པ་བཤགས། རྒྱུ་འབྲས་ཀྱི་གནད་བལྟེམས། དལ་འབྱོར་རྙེད་པར་དཀའ་བ། འཆི་བ་མི་རྟག་པ། འཁོར་བའི་ཉེས་དམིགས་བསྒོམ། བྱམས་སྙིང་རྗེ་བྱང་ཆུབ་ཀྱི་སེམས་སྦྱང་། བསྐྱེད་པའི་རིམ་པ་སྣང་སྲིད་ལྷའི་དཀྱིལ་འཁོར་བསྒོམ། རྫོགས་པའི་རིམ་པ་སྣང་ལ་རང་བཞིན་མེད་པ་ཆུ་ནང་གི་ཟླ་བ་ལྟ་བུ་གཉིས་མེད་ཆེན་པོའི་ངང་ལ་བཞག །མཇུག་དགེ་བའི་རྩ་བ་བསྔོ། དེ་ལྟར་བྱེད་པ་པོ་ཐེག་པ་སྤྱི་དང་ཚུལ་མཐུན། ཡང་དག་པའི་ལམ་དུ་འགྲོ་སྟེ་ལམ་གྱི་སོ་ཚུགས་འགྲོ་བ་ཡིན་ནོ། །གཉིས་པ་བར་དུ་བརྟུལ་ཞུགས་གསང་བའི་སྤྱོད་པ་བསྟན་པ་ནི། གོང་ལྟར་བྱས་ཏེ་ལམ་གྱི་སོ་ཚུགས། ཉམས་དང་གོ་བ་སྐྱེས། ཡིན་ལུགས་ལྟ་བའི་གདིང་བག་ཙམ་རྙེད་པ་དང་། ལམ་དེ་ཉིད་ལ་བོགས་འདོན་ཅིང་། རྟོགས་པ་དྲས་ཐག་བཅད་པའི་ཕྱིར་གསང་སྤྱོད་ཉམས་སུ་བླང་ངོ་། །དེ་ཡང་རང་བསྒོམ་པ་གལ་ཆེ་ཞིང་། ཉམས་ལེན་བརྟན་པ་གཅིག་གི་སྒོ་ནས་བཅད་ཅིང་ཉམས་སུ་བླང་ངོ་། །ཐེག་པ་ཆེན་པོའི་ཉམས་ལེན་ཚུལ་བཞིར་འདུས་ཏེ། མཚན་ཉིད་ལྟར་ན། བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱངས་པ་དང་། ཡུལ་ཐམས་ཅད་བརྫུན་པར་ཤེས་པའི་ལྟ་བའོ། །སྔགས་ལྟར་ན། བསྐྱེད་པའི་རིམ་པ་ལྷའི་འཁོར་ལོ་དང་། རྫོགས་པའི་རིམ་པ་གཉིས་མེད་མཐའ་བྲལ་གྱི་ལྟ་བའོ། །དང་པོ་ནི། བྱང་ཆུབ་ཀྱི་སེམས་སྦྱང་བ། རང་བྱང་ཆུབ་ཀྱི་སེམས་ལ་བློ་འབྱོངས་ནས་སེམས་ཅན་ཐམས་ཅད་ཕ་མར་ཤེས་ན་དེས་བཅད་དེ། འདྲེར་འཛིན་གྱི་རྣམ་རྟོག་དང་། བདག་འཛིན་གྱི་ལྟོས་ཐག་བཅད་ཅིང་བྱང་སེམས་ཀྱི་ཤུགས་ཕྱིན་པའི་ཕྱིར་གཉན་སར་ཕྱིན་ཏེ། དེ་ཡང་ས་དམིགས་སམ་གང་འཇིགས་འཇིགས་འདྲ་བ་གཅིག་ཏུ་མལ་བཅས་ལ། དཀོན་མཆོག་གསུམ་ལ་སྐྱབས་འགྲོ་བྱ། བླ་མ་ལ་གསོལ་བ་གདབ། བྱང་ཆུབ་མཆོག་ཏུ་སེམས་བསྐྱེད། དེ་ནས་གནས་བདག་དེ་ཉིད་ཀྱིས་གཙོར་བྱས་པའི་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་བྱམས་སྙིང་རྗེ་བྱང་ཆུབ་ཀྱི་སེམས་ཚད་མེད་པ་དུང་དུང་བ་ཡུན་རིང་དུ་བསྒོམ། དེ་ནས་དོན་དམ་བྱང་སེམས་ཀྱི་སེམས་ལ་ལྷ་འདྲེ་གཉིས་མེད་སྤྲོས་བྲལ་བདེ་བ་ཆེན་པོ། སྐྱེ་འགགས་གནས་གསུམ་དང་བྲལ་བའི་ངང་ལ་ཉལ་ལ་བསྡད། དེ་ལ་འཇིགས་པ་དང་ཉམ་ང་བ་ལ་སོགས་པ་རྣམ་རྟོག་བྱུང་ན། ཤེས་པ་ཁྲིམས་སྒྲིམ་ཆུན་བཅུན་ལ། འཇིགས་ཤིང་ཡ་ང་བ་འདི། སེམས་ཅན་ཕ་མར་མ་ཤེས་པར་འདྲེར་འཛིན་གྱི་རྣམ་རྟོག་སྐྱེས་ཏེ་དེའི་རང་གཟུགས་ཤར་བ་ཡིན་པས། ཁྱོད་ཀྱི་སྔར་གྱི་བྱང་ཆུབ་སེམས་དེ་ནི་ཁ་ཚིག་དང་གོ་ཡུལ་ལས་མི་འདུག་པས། དེས་དོན་མི་འགྲུབ་སྙམ་དུ་ཆུན་གཅུན་ཏེ་བྱམས་སྙིང་རྗེ་བྱང་ཆུབ་ཀྱི་སེམས་དུང་པ་བསྒོམ་ལ། གཞི་བདག་དེས་གཙོར་བྱས་པའི་ལྷ་འདྲེ་ཐམས་ཅད་ལ་ལུས་ལྟོས་མེད་ཀྱི་སྦྱིན་པ་ལིང་བཏང་ལ། ཤ་ཁྲག་ལྷག་རྐང་ཇི་ལྟར་དགའ་བ་ལྟར་ཁྱེར་སྙམས་པ་བློས་ལིང་བཏང་ལ། བྱམས་སྙིང་རྗེ་བྱང་ཆུབ་ཀྱི་སེམས་ལ་ལྷན་བཞག་གོ། །དེ་བཞིན་དུ་འདྲེར་འཛིན་དང་ལྷ་འདྲེའི་རྣམ་རྟོག་བྱུང་མ་ཐག །རང་གི་བྱང་ཆུབ་སེམས་ལ་ལྟེམས་རྐྱང་བྱུང་ནས། འདྲེར་འཛིན་གྱི་རྣམ་རྟོག་སྐྱེས་པའི་རང་གཟུགས་ཡིན་སྙམ་དུ་བསམས་ཤིང་། ལུས་ལྟོས་མེད་ཀྱི་སྦྱིན་པ། སེམས་བྱམས་སྙིང་རྗེ་ལ་ལྷན་ལྷན་བཞག་གོ། །མངོན་སུམ་ལ་སོགས་པར་བྱུང་ན། དེ་ཉིད་ཀྱི་འཕང་དུ་མཆོངས་ཤིང་། ཁ་ནང་དུ་ཕྱིན་ཏེ་ལུས་ལྟོས་མེད་ཀྱི་སྦྱིན་པ་བཏང་། སེམས་བྱམས་སྙིང་རྗེ་དང་མི་འབྲལ་བར་བྱ། མཇུག་སྨོན་ལམ་གདབ་ཅིང་དགེ་བའི་རྩ་བ་ཡོངས་སུ་བསྔོའོ། །དེ་ནས་རང་གི་འདྲེར་འཛིན་གྱི་རྣམ་རྟོག་རྒྱུན་ནམ་ཆད་ཙ་ན། རྣམ་རྟོག་ཆོམས་དང་འདྲེ་ཐུལ་བ་དུས་གཅིག་འོང་། འདྲེར་སྣང་དང་ཆོ་འཕྲུལ་ཞི་ནས་གནས་བདག་དེ་ཉིད་རང་གི་དབང་དུ་གྱུར་ཏེ། དགྲ་ཐུལ་བ་དང་གནངས་ལོན་པ་དུས་གཅིག་འོང་ངོ་། །སེམས་ཅན་ཕ་མར་ཤེས་པས་འདྲེར་འཛིན་གྱི་རྟོག་པ་མི་སྐྱེ། དེ་སྐྱེས་ན་ཕ་མར་མ་ཤེས་པས་ད་རུང་ཕ་མའི་བློ་སྦྱང་། གཉིས་པ་ནི། ཡུལ་ཐམས་ཅད་རྫུན་པར་ཤེས་ཤིང་། སྣང་ཚད་རྨི་ལམ་སྒྱུ་མར་ཤེས་ནས། དེས་བཅད་དེ། དེའང་འདྲེར་འཛིན་གྱི་རྣམ་རྟོག་དང་། སྣང་བ་བདེན་དངོས་སུ་འཛིན་པའི་ཞེན་སྣང་བཅད་ཅིང་། རྫུན་སྣང་གི་ལྟ་བ་ལ་བོགས་དབྱུང་བའི་ཕྱིར། གང་གཉན་པའི་སར་ཕྱིན་ལ། སྐྱབས་འགྲོ་བྱ། གསོལ་བ་གདབ། སེམས་བསྐྱེད་ལ། ཀུན་རྫོབ་ཏུ་ཡུལ་ཐམས་ཅད་རྫུན་པ། བློ་ཐམས་ཅད་འཁྲུལ་པ། སྣང་བ་འདི། རྨི་ལམ་སྒྱུ་མ་ལྟ་བུར་ཤེས་པའི་ངང་ནས། དོན་དམ་པར་ཅིར་ཡང་མ་གྲུབ་པ་སྤྲོས་བྲལ་སྟོང་པའི་ངང་ལ་ཉལ་ཏེ་བསྡད་དོ། །དེ་ལ། འཇིགས་པ་དང་། ཉམ་ང་བ་དང་། བག་ཚ་བ་ལ་སོགས་པ་བྱུང་ན། ཤེས་པ་ཆུན་གཅུན་ལ། འཇིགས་ཤིང་ཉམ་ང་བ་འདི། ཡུལ་ཐམས་ཅད་ནི་བརྫུན་ཞིང་། བློ་ཐམས་ཅད་འཁྲུལ་པ། སྣང་བ་འདི་རྨི་ལམ་སྒྱུ་མ་ལྟ་བུར་མ་ཤེས་པར། འདྲེར་འཛིན་གྱི་རྣམ་རྟོག་སྐྱེས་ཏེ། དེའི་རང་གཟུགས་ཤར་བ་ཡིན་པས། ཁྱོད་ཀྱི་བདེན་མེད་ཀྱི་ལྟ་བ་དེ་ནི། ཁ་ཚིག་དོན་སྤྱི་བློ་ཡུལ། གོ་བ་ཙམ་ལས་མི་འདུག་པས། འདིས་ཡང་དག་པའི་དོན་མི་འགྲུབ་སྙམ་དུ་ཤེས་པ་ཆུན་གཅུན་ཏེ་གྲུངས་བཏོན་ལ། བདེན་མེད་སྒྱུ་མ་ལྟ་བུའི་ངང་དུ་ལིང་བཞག་གོ། །དེ་བཞིན་དུ་འདྲེར་འཛིན་གྱི་རྣམ་རྟོག་དང་། ཆོ་འཕྲུལ་ལ་སོགས་པ་བྱུང་མ་ཐག་ཏུ། བདེན་མེད་ཀྱི་དོན་མ་ཤེས་པར་འདྲེར་འཛིན་གྱི་རྣམ་རྟོག་སྐྱེས་པའི་རང་གཟུགས་ཤར་བ་ཡིན་སྙམ་དུ་བསམ་གྱིན། བདེན་མེད་སྒྱུ་མ་ལྟ་བུར་ལ་ངོས་ཙིར་ཙིར་བཟུང་ངོ་། །མངོན་སུམ་ལ་སོགས་པ་བྱུང་ན། བདེན་མེད་ཀྱི་དོན་ཤེས་པར་བྱས་ལ། དེ་ཉིད་ཀྱི་འཕང་དུ་ཕྱིན་པས་མེད་སྣང་དུ་ཟང་ཐལ་འགྲོའོ། །དེ་ནས་ཡུལ་ཐམས་ཅད་བརྫུན་པར་ཤེས་ཤིང་། རང་གི་འདྲེར་འཛིན་གྱི་རྣམ་རྟོག་རྒྱུན་ནམ་ཆད་ཙམ་ན། ཆོ་འཕྲུལ་རང་ཞིར་འགྲོ་སྟེ། རྟོག་པ་སངས་པ་དང་འདྲེ་ཟད་པ་དུས་གཅིག་འོང་། ཕོག་འགྱེལ་དུས་གཅིག་ཡོང་ངོ་། །གསུམ་པ་རང་ལ་བསྐྱེད་རིམ་བརྟན་པོ་ཡོད་ཅིང་སྣང་བ་ལྷ་སྐུར་འཆར་ན། དེས་བཅད་དེ། དེའང་འདྲེར་འཛིན་གྱི་རྣམ་རྟོག་དང་། སྣོད་བཅུད་ལྷ་རུ་འཛིན་པའི་ཞེན་སྣང་བཅད་ཅིང་། བསྐྱེད་རིམ་ལ་བོགས་དབྱུང་བའི་ཕྱིར། གང་གཉན་སར་ཕྱིན་ལ། སྐྱབས་འགྲོ་བྱ། གསོལ་བ་འདེབས། སེམས་བསྐྱེད་བྱ། དེ་ནས་གནས་དེ་གཞལ་ཡས་ཁང་དུ་བསྒོམ། གཞི་བདག་དེས་གཙོར་བྱས་པའི་སེམས་ཅན་ཐམས་ཅད་ཡི་དམ་ལྷ་རུ་བསྒོམ། ངག་དེའི་སྔགས་བཟླས་ཤིང་། ཤེས་པ་གྲུབ་བཏོན། རིག་པ་ངར་བསྐྱེད་ལ། དེ་ལྟར་ཡུན་རིང་དུ་བསྒོམ། དེ་ནས་དོན་དམ་སྟོང་ཉིད་གནད་ཀྱིས་ཟིན་པར་བྱ་སྟེ། སྣང་ལ་རང་བཞིན་མེད་པའི་ངང་ལ་ཉལ་ལོ། །དེར་ཉམ་ང་བ་དང་ཁུ་འཕྲིག་གི་རྣམ་རྟོག་བྱུང་ན། ཤེས་པ་རྩེ་གཅིག་ཏུ་ཧྲིལ་བཏང་ལ ། འཇིགས་ཤིང་ཉམ་ང་བའི་འདྲེར་སྣང་འདི། སྣང་བ་ཡི་དམ་དུ་མ་ཤེས་པར་འདྲེ་གདོན་དུ་འཛིན་པའི་རྟོག་པ་སྐྱེས་ཡོད་པས། དེའི་རང་གཟུགས་ཤར་བ་ཡིན། ཁྱོད་ཀྱི་བསྐྱེད་རིམ་དེ་ཚིག་དང་གོ་བ་བློ་ཡུལ་ལས་མི་འདུག །དེས་སངས་གང་དུ་རྒྱ་སྙམ་དུ་བསམ་སྟེ། ཤེས་པ་ཕྱོགས་གཅིག་ཏུ་ཧྲིལ་བཏང་ལ། རང་གཞན་ཐམས་ཅད་ཡི་དམ་ལྷ་རུ་ལམ་བསྒོམ་སྟེ། རང་གི་ཐ་མལ་གྱི་ལུས་འདི་བདུད་རྩིར་བྱིན་གྱིས་བརླབས་ལ། གནོད་བྱེད་ཀྱིས་གཙོར་བྱས་པ་ཐམས་ཅད་ལ་དབུལ་ལོ། །དེ་ནས་གཉིས་མེད་སྤྲོས་བྲལ་གྱི་ངང་ལ་ཆམ་བཞག་གོ། །དེ་བཞིན་དུ་འདྲེར་སྣང་དང་ཆོ་འཕྲུལ་ལ་སོགས་པ་བྱུང་མ་ཐག །སྣང་བ་ལྷའི་སྐུའི་དོན་མ་རྟོགས་པར་འདྲེར་འཛིན་གྱི་རྣམ་རྟོག་སྐྱེས་པའི་རང་གཟུགས་ཡིན་སྙམ་དུ་བསམ་གྱིན་ལྷ་རུ་ཡེར་བསམ། ལུས་ཚོགས་སུ་དབུལ། མངོན་སུམ་དུ་བྱུང་ན། རང་གཞན་གཉིས་ཀ་ཡོད་མ་ཡིན་པའི་གནད་ཤེས་པར་བྱས་ལ། ཡི་དམ་ནང་འཇལ་བ་རེ་དགའ་སྙམ་དུ་བསམ་གྱིན། འཕང་དུ་འཁྱུད། ཞལ་ནང་དུ་ཕྱིན་ལ། ཐ་མལ་གྱི་ལུས་འདི་ཚོགས་སུ་དབུལ་ལོ། །དེས་ན་སྣང་བ་ལྷ་རུ་ཤེས་ཤིང་། འདྲེ་རྟོག་རྒྱུན་ནམ་ཆད་ཙམ་ན། ཆོ་འཕྲུལ་རང་ཞིར་འགྲོ་ཞིང་། གཞི་བདག་དེ་དབང་དུ་འདུའོ། །བཞི་པ་ནི། རང་ལ་རྫོགས་རིམ་གྱི་ལྟ་བ་ཡོད་ཅིང་གཉིས་མེད་ཀྱི་དོན་གོ་ན། དེས་བཅད་དེ། དེ་ཡང་ཉམ་ང་བ་དང་བག་ཚ་བ་འདྲེར་འཛིན་གྱི་རྟོག་པ་ལ་སོགས་པ་བཅད་ཅིང་། རྫོགས་རིམ་གཉིས་མེད་ཀྱི་དོན་ལ་བོགས་དབྱུང་བའི་ཕྱིར། གཉན་སར་ཕྱིན་ལ། སྐྱབས་འགྲོ་དང་། སེམས་བསྐྱེད་དང་། གསོལ་འདེབས་བྱ། དེ་ནས། ལུས་སེམས་གཉིས་མེད། རང་གཞན། དགྲ་གཉེན། ལྷ་འདྲེ། མདོར་ན་གཉིས་ཆོས་གང་ཡང་མེད་པར་གཉིས་མེད་ཀྱི་ངང་ལ་ཆམ་བཞག་ལ། དེའི་རྒྱུན་མ་ཡེངས་པར་སྦྱོང་ངོ་། །དེ་ལ་ཆོ་འཕྲུལ་དང་འདྲེ་རྟོག་བྱུང་ན། རང་གི་ཤེས་པ་རྩེ་གཅིག་ཏུ་མ་སོང་བར། འདྲེ་རྟོག་སྐྱེས་པའི་རང་གཟུགས་ཤར་བ་ཡིན་སྙམ་དུ་བསམས་ལ། གཉིས་མེད་རྩེ་གཅིག་ཏུ་ཧྲིལ་གཏོང་ངོ་། །དེ་བཞིན་འདྲེར་རྟོག་ནམ་སྐྱེས་མ་ཐག་གཉིས་མེད་དུ་ཡེར་ཡེར་བཞག་གོ། །མངོན་སུམ་དུ་བྱུང་ན། ཤེས་པ་གཉིས་མེད་རྩེ་གཅིག་ཏུ་ཧྲིལ་བཏང་ལ། ལྟ་བ་ལ་བོགས་དབྱུང་ཞིང་གཉིས་མེད་ཀྱི་དོན་སྦྱངས་སུ་བྱུང་བ་རེ་དགའ་སྙམ་དུ་བསམས་ནས། འཕང་དུ་ཕྱིན་པས། གཞི་མེད་རྩ་བྲལ། སྟོང་ཉིད་ཟང་ཐལ་དུ་འགྲོ་སྟེ། དོན་ལ་བདེན་པར་མ་གྲུབ་པའི་གནད་ཀས་སོ། །དེ་ནས་རང་ལ་གཉིས་མེད་ཀྱི་དོན་སྐྱེས་ནས། གཉིས་སྣང་དང་། འདྲེར་འཛིན་གྱི་རྣམ་རྟོག་རྒྱུན་ནམ་ཆད་ཙམ་ན། ཕྱི་རོལ་གྱི་ཆོ་འཕྲུལ་རང་ཞིར་འགྲོ། གཉིས་མེད་ཀྱི་རྟོགས་པ་ནམ་སྐྱེས་ཙམ་ན། གདོན་བགེགས་དེ་དབང་དུ་འདུ་བ་ཡིན་ཏེ། སྣང་སེམས་རྟེན་འབྲེལ་གཅིག་ཡིན་པའི་གནད་ཀས་སོ། །དེ་ན་རང་གནས་ཙ་ན་བདུད་ཀྱང་གནས། རང་ཞི་ཙ་ན་བདུད་ཀྱང་ཞི། །རང་གྲོལ་ཙ་ན་བདུད་ཀྱང་གྲོལ། རང་འདུས་ཙ་ན་བདུད་ཀྱང་འདུས་པ་ཡིན་ཏེ། དེས་ན་ལོ་གསུམ་བསྒོམ་པ་བས། གཉན་ས་གཅིག་ཆོད་པ་བོགས་ཆེ་བ་ཡིན་ནོ། །གསང་སྤྱོད་དེ། འདྲེ་གདོན་ཁོ་ན་གཅིག་པུ་མ་ཡིན་ཏེ། དགྲ་གཉེན་དགག་སྒྲུབ། མཛེ་རིམས་ལྷོག་པ་ལ་སོགས་པ་ཉམ་ང་བ་ཐམས་ཅད་དམ། མི་གཙང་མི་སྡུག་པ་ལ་སོགས་པ་སྐྱུག་བྲོ་བ་ཐམས་ཅད་དམ། ཉམས་དམའ་ཤེད་ཆུང་ངོ་ཚ་ལ་སོགས་པ་བག་ཚ་བ་ཐམས་ཅད་དམ མདོར་ན་ཉོན་མོངས་རྣམ་རྟོག་སྐྱེས་ཚད་ལ་གོང་བཞིན་བཏང་ངོ་། །གསུམ་པ་ཡང་དག་དེ་ཁོ་ན་ཉིད་མཐར་ཕྱིན་པའི་སྤྱོད་པ་ནི། དེ་ལྟར་ཐུན་མོང་སྤྱིའི་སྤྱོད་པས་ལམ་གྱི་སོ་ཚུགས། བརྟུལ་ཞུགས་གསང་བའི་སྤྱོད་པས་བོགས་ཐོན་ཏེ། ལྷ་འདྲེ་གཉིས་མེད། གཙང་བཙོག་གཉིས་མེད། མདོར་ན་གཉིས་འཛིན་གྱི་མདུད་པ་གྲོལ། བཟང་ངན་གྱི་འདོར་ལེན་ཟད། ཐེ་ཚོམ་དང་སྒྲོ་འདོགས་ཆོད། འཕྲིག་ཆ་དང་གཟའ་གཏད་མེད། སྤང་སྒྲུབ་དང་ཞེན་སྣང་མེད་དེ། འཁོར་འདས་ཀྱི་དཀྱིལ་འཁོར་འདི་ཐམས་ཅད་གཉིས་མེད་ཡེ་ཤེས་ཀྱི་རྦ་ཀློང་གཅིག་ཏུ་ཆམ་གྱིས་སོང་ནས། གཉིས་མེད་ཟུང་འཇུག་བདེ་བ་ཆེན་པོའི་ངོ་བོར་རྗེན་ནེ། དེ་ཙ་ན་གཤིན་རྗེ་ཆོས་ཀྱི་རྒྱལ་པོ་ལྕགས་ཀྱུ་ཁྱེར་བྱུང་ཡང་ཉམ་ང་བ་དང་བག་ཚ་བ་མེད། སངས་རྒྱས་རྡོ་རྗེ་སེམས་དཔའ་བྱོན་ཀྱང་ཐེ་ཚོམ་དང་སྒྲོ་འདོགས་བཅད་རྒྱུ་མི་གདའ་འོ། །དེ་ཀ་ལ་ཡང་དག་དེ་ཁོ་ན་ཉིད་ཀྱི་སྤྱོད་པ་ཞེས་བྱའོ། །དེས་ན་སྤྱོད་པ་འདི་ནི། གནས་ལུགས་ཀྱི་སོ་ཚུགས། ལྟ་བའི་བོགས་འདོན། ཉམས་ལེན་གྱི་བྲེ་སྲང་། འབྲས་བུ་མཐར་འདོན་པའི་ཆོས་ཤིན་ཏུ་ཟབ་པ་ཡིན་ནོ། །ལྔ་པ་དམ་ཚིག་བསྟན་པ་ནི། མཉམ་རྗེས་བཟའ་བཅང་བསྲུང་བའི་དམ་ལྔ་དབོག །ཅེས་པས། དབང་བཞི་ལ། མཉམ་བཞག །རྗེས་ཐོབ། བཟའ་བ། བཅང་བ། བསྲུང་བའི་དམ་ཚིག་ལྔ་ལྔ་སྟེ་ཉི་ཤུ་རྩ་ལྔའོ། །དང་པོ། དབང་ལ། བུམ་དབང་གི། མཉམ་བཞག་གི་དམ་ཚིག་བསྐྱེད་རིམ་སྒོམ་པ། རྗེས་ཐོབ་ཀྱི་དམ་ཚིག་ལྷ་དང་མི་འབྲལ་ཞིང་ལུས་ངག་ཐ་མལ་དུ་མི་འཁྲུལ་བ། བཟའ་བའི་དམ་ཚིག་ཤ་ལྔ་བདུད་རྩི་ལ་རོལ་པ། བཅང་བའི་དམ་ཚིག་རྡོ་རྗེ་དྲིལ་བུ་མི་འབྲལ་བ། བསྲུང་བའི་དམ་ཚིག་སྣོད་བཅུད་གཞལ་ཡས་ལྷ་རུ་ཤེས་པའོ། །གཉིས་པ་གསང་དབང་ནི། མཉམ་བཞག་གི་དམ་ཚིག་གཏུམ་མོ་ཙཎྜ་ལཱི་སྒོམ་པ། རྗེས་ཐོབ་ཀྱི་དམ་ཚིག་རྗེས་སྤྱོད་ཐམས་ཅད་གཏུམ་མོའི་ཉམས་དང་མི་འབྲལ་བ། བཟའ་བའི་དམ་ཚིག་ཟས་ཐམས་ཅད་ཡེ་ཤེས་ཀྱི་བདུད་རྩི་མེ་རུ་བྱིན་གྱིས་བརླབས་ནས་རོལ་པ། བཅང་བའི་དམ་ཚིག་རླུང་ཁ་སྦྱོར་ཉེར་གཅིག་སྒོམ་པ། བསྲུང་བའི་དམ་ཚིག་ཁམས་མི་ཉམས་པར་བྱེད་པའོ། །དབང་གསུམ་པའི། མཉམ་བཞག་གི་དམ་ཚིག་དངོས་སམ་ཡིད་ཀྱི་རིག་མ་བརྟེན་པ། རྗེས་ཐོབ་ཀྱི་བདེ་ཆེན་ཉམས་དང་མི་འབྲལ་བར་བྱེད་པ། བཟའ་བའི་ཟས་སྙོམས་འཇུག་གི་ཚུལ་དུ་རོལ་པ། བཅང་བའི་བྱང་སེམས་ལུས་ལ་མི་ཉམས་པར་བྱེད་པ། བསྲུང་བའི་གཟུངས་མ་མཚན་ལྡན་བརྟེན་པའོ། །དབང་བཞི་པའི། མཉམ་བཞག་གི་དམ་ཚིག་ཟུང་འཇུག་གཉིས་མེད་སྒོམ་པ། རྗེས་ཐོབ་ཀྱི་རྗེས་སྤྱོད་ཐམས་ཅད་དེའི་ངོ་བོར་འཆར་བ། བཟའ་བའི་ཆོས་ཉིད་དུ་རོལ་པ། བཅང་བའི་རྟག་ཏུ་གཉིས་མེད་ཀྱི་དོན་ལ་གནས་པ། བསྲུང་བའི་གཉིས་མེད་ཡེ་ཤེས་ལས་མི་འདའ་འོ། །དེས་ན། དབང་། ལྟ་བ། སྒོམ་པ། སྤྱོད་པ། དམ་ཚིག་ལྔ། རྒྱུད་ཐོག་གཅིག་ན་ག ནས་ཤིང་འབྲལ་མེད་དུ་ཤེས་པ་ནི་མན་ངག་གི་གནད་དེ། སྨིན་བྱེད་བུམ་པའི་དབང་། གྲོལ་བྱེད་ལམ་བསྐྱེད་རིམ་གྱི་ལྟ་བ། ཡིད་ལ་ལྷ་བསྒོམ་པ། དེའི་དོན་ལ་སྤྱོད་པ། དེ་ལས་མི་འདའ་བའི་དམ་ཚིག་གི་ཐོག་གཅིག་ན་ཀྲོང་ངེ་། སྨིན་བྱེད་གསང་བའི་དབང་། གྲོལ་བྱེད་ལམ་རྩ་རླུང་ཤེས་པའི་ལྟ་བ། གཏུམ་མོ་ལམ་ཙནྜ་ལཱི་སྒོམ་པ། དེའི་དོན་ལ་སྤྱོད་པ། དེ་ལས་མི་འདའ་བའི་དམ་ཚིག་གི་ཐོག་གཅིག་ན་ཀྲོང་ངེ་། སྨིན་བྱེད་ཤེས་རབ་ཡེ་ཤེས་ཀྱི་དབང་། གྲོལ་བྱེད་འོག་སྒོ་བདེ་ཆེན་གྱི་ལྟ་བ། ཐིག་ལེ་དབབ་ཟློག་གི་གནད་སྒོམ་པ། དེའི་དོན་ལ་སྤྱོད་པ། དེ་ལས་མི་འདའ་བའི་དམ་ཚིག་དང་ལྔ་ཐོག་གཅིག་ན་རུག་གེ། སྨིན་བྱེད་བདེ་བ་ཆེན་པོའི་དབང་། གྲོལ་བྱེད་ལམ་ཟུང་འཇུག་མཐའ་བྲལ་གྱི་ལྟ་བ། གནས་ལུགས་གཉིས་མེད་ཀྱི་དོན་སྒོམ་པ། དེའི་དོན་ལ་སྤྱོད་པ། དེ་ལས་མི་འདའ་བའི་དམ་ཚིག་དང་ལྔ་ཐོག་གཅིག་ན་ཀྲོང་ངེ་། དེ་ལྟར་ཤེས་ཙ་ན་ལམ་ལ་ནོར་བ་མེད། ལམ་མ་ནོར་བ་ནས་ཞུགས་ཙམ་ན། འབྲས་བུ་ཕྱིན་ཅི་མ་ལོག་པ་མི་ཐོབ་མི་སྲིད་པས་ཤིན་ཏུ་ཟབ་པ་ཡིན་ནོ། །དེ་རྣམས་གསང་སྔགས་ལམ་གྱི་ངོ་བོ་ཡིན། ཞེས་པས། དེ་དག་གིས་ལམ་རང་གི་ངོ་བོ་བསྟན་པའོ། །གསུམ་པ་ལམ་དེའི་ཆ་རྐྱེན་ལ་གསུམ་ལས། རྣལ་འབྱོར་ལྔ་ཡི་ཉམས་ལེན་གྱི་གནད་བསྟན་པ། གེགས་སེལ་བཞིས་ལམ་གྱི་སྐྱོན་བསལ་བ། བོགས་འདོན་གསུམ་གྱིས་ལམ་མཐར་འདོན་པའོ། །དང་པོ་ལ་ལྔ་སྟེ། རྣལ་འབྱོར་ལྔ་ཡིས་ཉམས་སུ་བླང་བ་ནི། ཞེས་པས། ཉལ་བ། ལྡང་བ། ཟ་བ། རྒྱུན་གྱི། དུས་གནད་ཀྱི་རྣལ་འབྱོར་རོ། །དང་པོ་ནི། ཉལ་བའི་རྣལ་འབྱོར། རྟོག་མེད་ཆོས་སྐུར་ཉལ་ལ་འཆི་རྟོག་སྦྱང་། །ཞེས་པས། གཉིད་ལོག་ཁ་འདི་ལ་འཆི་བ་དང་ཆོས་མཐུན་པས་དུས་གནད་གལ་ཆེ་སྟེ། རྒྱུན་བཤགས་དང་སྡོམ་པ་བཟུང་བ་ལ་སོགས་པས་རྒྱུད་ཡོངས་སུ་དག་པར་བྱ། ཉོན་མོངས་དུག་གསུམ་གྱི་རྟོག་པ་བཅད། སྔ་ཕྱིའི་འབྲེལ་བཅད་དེ་སྣང་དམིགས་ཀྱི་ཆོས་ཐམས་ཅད་ཆོས་ཉིད་དེ་བཞིན་ཉིད་གཤིས་ཅིར་ཡང་མ་ཡིན་པའི་ངང་ལ་ཆམ་བཞག །གཉིད་རྫོགས་རིམ་སྤྲོས་བྲལ་རྟོག་མེད་ཆོས་སྐུའི་ངང་དུ་ལོག་པས་འཆི་བ་ལམ་དུ་བྱེད་པ་ཡིན་ནོ། །དེ་ཡང་སྣོད་བཅུད་གཙོ་འཁོར་ཐུགས་ཀའི་ས་བོན་ལ་བསྡུ། དེ་མི་དམིགས་པ་དེ་བཞིན་ཉིད་ཀྱི་ངང་ལ་ཉལ་བས་འཆི་རྟོག་ལམ་དུ་བསླང་། གཉིས་པ་ལྡང་བའི་རྣལ་འབྱོར་ནི། འགག་མེད་ལོངས་སྐུར་ལངས་ཏེ་སྐྱེ་རྟོག་སྦྱངས། །ཞེས་པས། ལྡང་བ་སྐྱེ་བ་དང་ཆོས་མཐུན་པས་ཐོ་རངས་གཉིད་སད་མ་ཐག །རྫོགས་རིམ་སྟོང་པའི་ངང་ནས་རིག་པ་འགགས་མེད་ལྷའི་སྐུ་རུ་ཀྲོང་བསམ། དེ་སྐྱེ་བ་སྦྱང་བ་ཡིན། དེ་ནས་ལས་རྒྱུ་འབྲས་ཀྱི་གནད་ཤེས་པར་བྱ་སྟེ། རང་ཡི་དམ་གང་བྱེད་ཀྱི་དགེ་སྦྱོར་གནད་དུ་བཏང་བས་བོགས་གཞན་བས་ཆེ་སྟེ། ཐོ་རངས་ཀྱི་དུས་དེ་ན་ཟས་ཟོས་པ་དྭངས་སྙིགས་ཕྱེད་དེ་དྭངས་མ་རྩ་མིག་ཏུ་ཁྲེམས། སྙིགས་མཐུར་རུ་སྐྱོལ། རྩ་སྦུག་ཐམས་ཅད་སྟོང་སང་ངེ་ཡོད་པའི་དུས་དེར། ཕྱི་ནང་གསང་གསུམ་གྱི་རྟེན་འབྲེལ་གང་ཡང་སྐྱེ་སླ་སྟེ། རྩ་དབུ་མ། རླུང་ཡེ་ཤེས། ཁམས་བདེ་ཆེན། སེམས་གཉིས་མེད་ཡེ་ཤེས་སུ་འཆར་བ་ཡིན་ནོ། །སྨན་ལ་སོགས་པའང་དྲོ་གོང་ལ་བཏང་ཞིང་། རིམས་སྲུང་ལ་སོགས་པའང་དྲོ་གང་ལ་བྱེད་དོ། །ཡང་དག་པར་རྫོགས་པའི་སངས་རྒྱས་ཀྱང་ཐོ་རངས་ཁོ་ནར་སངས་རྒྱས་པའི་རྒྱུ་མཚན་ཡང་དེ་ཡིན་ནོ། །གསུམ་པ་ཟ་བའི་རྣལ་འབྱོར་ནི། དབང་བཞིའི་བདུད་རྩིར་བརླབ་ལ་བཟའ་བཏུང་རོལ། །ཅེས་པས། ཕྱི་ནང་གི་སྦྱིན་སྲེག་དོན་འདྲ་བས། དབང་བཞིའི་ཟས་ལ་ཟས་ཀྱི་རྣལ་འབྱོར་བཞི་ཡོད་དེ། བསྐྱེད་རིམ་ལམ་དུ་བྱེད་ན། ཟས་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ལ། ལྟོ་བར་དཀྱིལ་འཁོར་བསྐྱེད་དེ་ལྷ་ལ་ལྷ་ཐིམ་པའི་ཚུལ་དུ་རོལ། གཏུམ་མོ་ལམ་དུ་བྱེད་ན། ཟས་ཡེ་ཤེས་ཀྱིས་མེ་རུ་བྱིན་གྱིས་བརླབས་ཏེ། མེ་ལ་མེ་བསྣོན་པའི་ཚུལ་དུ་རོལ། འོག་སྒོ་བདེ་ཆེན་ལམ་དུ་བྱེད་ན། ཟས་ཐབས་ཤེས་རབ་བདེ་བར་བྱིན་གྱིས་བརླབས་ལ། སྙོམས་འཇུག་གི་ཚུལ་དུ་རོལ། བཞི་པ་རྫོགས་རིམ་ལམ་དུ་བྱེད་ན། ཟས་སྣང་སྟོང་ལྷན་ཅིག་སྐྱེས་པའི་ཡེ་ཤེས་སུ་བྱིན་གྱིས་བརླབས་ཏེ། ཆོས་ཉིད་ལ་ཆོས་ཉིད་རོལ། མདོར་ན་རང་ཉམས་སུ་གང་ལེན་པའི་ཏིང་ངེ་འཛིན་ལ་མཉམ་པར་བཞག་ནས། དེ་དང་གཉིས་སུ་མེད་པར་ལོངས་སྤྱོད་པས་ཟས་ཅི་ཟོས་པ་ཏིང་ངེ་འཛིན་གྱི་རྒྱུ་རུ་འགྲོའོ། །བཞི་པ་རྒྱུན་གྱི་རྣལ་འབྱོར་ནི། སྣ་ཚོགས་ཐབས་ཀྱིས་བཟུང་ལ་ལམ་དུ་བཏང་། །ཞེས་པས། ལམ་ཚུལ་བཞིན་བྱེད་པའི་རྣལ་འབྱོར་པ་ལ། ཐམས་ཅད་ནས་ཐམས་ཅད་དུ་ཉོན་མོངས་པ་རང་རྒྱུད་པ་སྤྱད་དུ་མེད་པས། སྐྱེས་ཚད་ཐབས་ཁྱད་པར་ཅན་གྱིས་གནད་ནས་བཟུང་ལ། ཡང་དག་པའི་ལམ་དུ་བཏང་ངོ་། །དེ་ལ་ཉོན་མོངས་པ་ནི་དུག་ལྔ་ཡིན་ལ། དེ་ལམ་དུ་བཏང་ཚུལ་ནི། སེམས་འདོད་ཆགས་སུ་ལམ་སྐྱེས་ཙམ་ན་དེའི་ངོ་བོ་ལ་བལྟ་ཞིང་། ངང་ལ་བཞག་པས་གཤིས་ཅི་ཡང་མ་ཡིན་པའི་སྟོང་པ་ལ། གདངས་འགག་པ་མེད་པ་འཆར་པས། བདེ་སྟོང་གཉིས་མེད་ཀྱི་ངོ་བོར་མངོན་དུ་གྱུར་པ་ནི་འདོད་ཆགས་རྡོ་རྗེའོ། །དེའི་ངོ་བོ་སོ་སོར་རྟོག་པའི་ཡེ་ཤེས་སོ། །ཞེ་སྡང་གི་ངོ་བོ་ལ་བལྟ་ཞིང་རང་ལ་བཞག་པས། གཤིས་སྟོང་། གདངས་གསལ། གསལ་སྟོང་གཉིས་མེད་ཀྱི་ངོ་བོར་མངོན་དུ་གྱུར་པ་ནི་ཞེ་སྡང་རྡོ་རྗེ་སྟེ། དེའི་ངོ་བོ་མེ་ལོང་ཡེ་ཤེས་སོ། །གཏི་མུག་གི་ངོ་བོ་བལྟ་ཞིང་ངང་ལ་བཞག་པས། གཤིས་སྟོང་། གདངས་མི་རྟོག་པ་སྟེ། མི་རྟོག་སྟོང་པའི་ཡེ་ཤེས་སུ་གྱུར་པ་ནི་གཏི་མུག་རྡོ་རྗེའི། །དེའི་ངོ་བོ་ཆོས་དབྱིངས་ཡེ་ཤེས་སོ། །དེ་བཞིན་དུ། ང་རྒྱལ་བདེ་སྟོང་མཉམ་ཉིད་ཡེ་ཤེས། ཕྲག་དོག་གསལ་སྟོང་བྱ་གྲུབ་ཡེ་ཤེས། ཡང་མི་དགེ་བཅུ་ཡང་དུག་ལྔར་འདུས། དུག་ལྔ་ཡང་དུག་གསུམ་དུ་འདུས་ཏེ། འདོད་ཆགས། ཞེ་སྡང་། གཏི་མུག་གོ། །དེ་ཐབས་ཀྱིས་བཟུང་བས་ཉམས་སུ་མྱོང་། སྡེ་སྣོད་གསུམ་དུ་འགྲོ། དུག་གསུམ་རང་ག་མ་ལས་ལྡོག །བསླབ་པ་གསུམ་ཡིན་ནོ། །འདོད་ཆགས་ཀྱི་ངོ་བོ་ལ་བལྟ་ཞིང་ངང་ལ་བཞག་པས་བདེ་བ་རུ་མྱོང་། འདུལ་བའི་སྡེ་སྣོད་དུ་འགྲོ། འདོད་ཆགས་རང་ག་མ་ལས་ལོག་པ་ཚུལ་ཁྲིམས་ཀྱི་བསླབ་པ་ཡིན་ནོ། །ཞེ་སྡང་གི་ངོ་བོ་ལ་བལྟས་ཤིང་ངང་ལ་བཞག་པས་གསལ་བར་མྱོང་། མདོ་སྡེར་འགྲོ། ཞེ་སྡང་རང་ག་མ་ལས་ལྡོག །ཏིང་ངེ་འཛིན་གྱི་བསླབ་པ་ཡིན་ནོ། །གཏི་མུག་གི་ངོ་བོ་ལ་བལྟས་ཤིང་ངང་ལ་བཞག་པས། མི་རྟོག་པར་མྱོང་། མངོན་པའི་སྡེ་སྣོད་དུ་འགྲོ། གཏི་མུག་རང་ག་མ་ལས་ལྡོག །ཤེས་རབ་ཀྱི་བསླབ་པ་ཡིན་ནོ། །ཉོན་མོངས་སྐྱེས་ཚད་ལ་དེ་བཞིན་གནས་ནས་བཟུང་ལ་ལམ་དུ་བཏང་ངོ་། །ལྔ་པ་དུས་གནད་ཀྱི་རྣལ་འབྱོར་ནི། དྲོ་སྲོད་སྐྱེས་ཤར་འདའ་ཁ་བར་དོ་བལྟེམ། །ཞེས་པས། དྲོ་གོང་སྲོད་ལ། ཉོན་མོངས་པ་དྲག་པོ་དང་རྣམ་རྟོག་རྩུབ་མོ་སྐྱེས་པ། རྣམ་པར་མི་རྟོག་པའི་ཡེ་ཤེས་ཤར་བ། འཆི་བའི་དུས་བར་དོ་རྣམས་ལ་གནད་ནས་བཟུང་བ་གལ་ཆེ་སྟེ། དེ་ཡང་ཐོ་རངས་སྔ་དྲོའི་དུས་ན་ཟས་ཀྱི་དངས་སྙིགས་ཕྱེད། ཤེས་པ་དྲུག་ཐོན། ཁམས་དང་བློ་གསལ་བར་ཡོད་དེ། སྐྱོན་ཡོན་གཉིས་ཀའི་སྟོབས་ཆེ་བ། གནད་དུ་བཏང་བ་གལ་ཆེའོ། །སྲོད་ལ་ཉལ་བའི་དུས་ན་ཐིག་ལེ་སྟོབས་ཞན། འཇིགས་སྐྲག་གི་སྣང་བ་མང་། ལྷ་འདྲེའི་ཆོ་འཕྲུལ་ཆེ། འཆི་བ་དང་ཆོས་མཐུན་ཏེ། སྐྱོན་ཡོན་གྱི་སྟོབས་ཆེ་བས། ཐབས་ཀྱིས་བཟུང་བ་གལ་ཆེའོ། །ཉོན་མོངས་པ་དྲག་པོ་དང་། རྣམ་རྟོག་རྩུབ་མོ་སྐྱེས་པའི་དུས་སུ་ལམ་དུ་མ་ཐོང་ན། ཆེར་སྲོག་གི་བར་ཆད་འོང་ཞིང་། བསླབ་པ་འཆལ། ཏིང་ངེ་འཛིན་གྱི་གེགས་བྱས་ནས་ཡང་དག་པའི་ལམ་འཆོལ་བས་གནད་ནས་བཟུང་ལ་ལམ་དུ་བཏང་ངོ་། །གཉིས་མེད་ཀྱི་ཡེ་ཤེས་སྐྱེས་ནས་ཤེས་པ་མི་རྟོག་པའི་ངོ་བོར་ཧྲིལ་སོང་བའི་དུས་ན། ཐབས་ཀྱིས་གནད་ནས་བཟུང་ལ་ལམ་དུ་བཏང་ངོ་། །དེ་གནད་དུ་སོང་བའི་ངང་ལ་སྐད་ཅིག་ཀྱང་མ་ཡེངས་པར། གདན་དེའི་ཐོག་འཁྲུལ་འཁོར་དེའི་ཁོངས་སུ་ཡུན་རིང་དུ་བསྒོམ་པ་ཡིན། འདུན་པ་དང་སྨོན་ལམ་ལ་སོགས་པ་ཐམས་ཅད་ཀྱི་རྟེན་འབྲེལ་དེའི་དུས་སུ་བསྒྲིགས་པ་ཡིན་ནོ། །དེ་ནི་མི་འགྲུབ་ཀ་མེད་ཡིན་ལ། དེ་ལས་གཞན་པ་ཐ་མལ་གྱི་སེམས་རྣམ་རྟོག་དང་འདྲེས་པས་བསྒྲིགས་ཀྱང་མི་འགྲིག་སྟེ། སྒྲིག་པོ་རང་ཡང་རྣམ་རྟོག་ཡིན་པའི་ཕྱིར། གྲང་ནད་ལ་གྲང་བས་མི་ཕན་པ་བཞིན་ནོ། །ནམ་ཞིག་འཆི་བའི་དུས་སུ་གང་གིས་མཚམས་སྦྱར་བའི་ལམ་དེ་ཉིད་ཀྱི་སྟོབས་སུ་ཧྲིལ་འགྲོ་བས། བཟང་པོའི་རྟེན་འབྲེལ་བསྒྲིགས་པ་གལ་ཆེ་སྟེ། སྡིག་པའི་ལས་ཐམས་ཅད་བརྗེད་དུ་བཞུག །དགེ་བའི་ལས་ཐམས་ཅད་དྲན་པར་བྱས། ཉམས་ལེན་གང་བརྟན་པའི་སྟེང་དུ་ཤེས་པ་རྩེ་གཅིག་ཏུ་བཏང་ལ། འཁྲུལ་སྣང་སྐད་ཅིག་ཀྱང་མེད་པར་བྱའོ། །མདོར་ན་དུས་དེ་རྣམས་སུ་ལེགས་ཚོགས་ཀྱི་རྟེན་འབྲེལ་བསྒྲིག་གོ། །བར་དོའི་དུས་གནད་ལ་གསུམ་སྟེ། རབ་བར་དོ་མེད་པར་སངས་རྒྱས་པ། འབྲིང་བར་དོ་ནས་སངས་རྒྱ་བ། ཐ་མ་སྐྱེ་བ་ལེན་ལུགས་སོ། །དང་པོ་རབ་ལ་བཞི་སྟེ། འབྱུང་བ་ཐིམ་ལུགས། རྟོག་པ་འགགས་ལུགས། མི་རྟོག་པའི་ཡེ་ཤེས་འཆར་ཚུལ། དེ་ངོས་ཟིན་ནས་སངས་རྒྱ་ལུགས་སོ། །དང་པོ་ལ་བཞི། འབྱུང་བ་ཐིམ་ལུགས། ས་ཆུ་ལ་ཐིམ་པས་ལྟེ་བའི་རྩ་མདུད་འཇིག །ས་རླུང་མལ་འཁྱུག །ལུས་པོ་ལྕི། ཤེས་པ་བྱིང་། སྨིག་རྒྱུ་ལྟ་བུའི་སྣང་བ་འཆར། གཉིས་པ། ཆུ་མེ་ལ་ཐིམ་པས་སྙིང་ཁའི་རྩ་མདུད་འཇིག་ཆུ་རླུང་མལ་འཆུག །ཁ་སྣ་སྐམ། ཤེས་པ་འཚུབ། དུ་བ་ལྟ་བུའི་སྣང་བ་འཆར་རོ། །གསུམ་པ། མེ་རླུང་ལ་ཐིམ་པས་མགྲིན་པའི་རྩ་མདུད་འཇིག །མེ་རླུང་མལ་འཆུག །དྲོད་འཐུལ། སྣང་བ་གསལ་འགྲིབ་ཡོང་། སྲིན་བུ་མེ་ཁྱེར་ལྟ་བུའི་སྣང་བ་འཆར། བཞི་པ། རླུང་རྣམ་པར་ཤེས་པ་ལ་ཐིམ་པས་གསང་གནས་ཀྱི་རྩ་མདུད་འཇིག །རླུང་གི་རླུང་མལ་འཆུག །དབུགས་སྣ་བཟློག །ཤེས་པ་བག་ཙམ་འཁྲུལ། འོད་ཀྱི་སྣང་བ་བག་ཙམ་འཆར་རོ། །དེ་ལྟར་འབྱུང་བ་ཐིམ་པ་དང་། དབང་པོའི་ཉམས་ཡུལ་ལྔ་འགག་གོ། །གཉིས་པ་རྟོག་པ་འགག་ཚུལ་ནི། རྩ་དབུ་མའི་མར་སྣ་ན། མེའི་དྭངས་མ་ཨའི་གཟུགས་སུ་ཡོད་པ། རོ་མའི་ནུས་པ་ཉམས་ནས་གྱེན་ལ་འགྲོ་བས་དམར་ལམ་འཆར། དེའི་ཚེ་འདོད་ཆགས་ཀྱི་རྟོག་པ་འགགས། དབུ་མའི་ཡར་སྣ་ན། ཕའི་དྭངས་མ་ཧཾ་ཡིག་གི་གཟུགས་སུ་ཡོད་པ། རྐྱང་མའི་ནུས་པ་ཉམས་ཏེ་ཐུར་ལ་བབས་པས་དཀར་ལམ་འཆར། དེའི་ཚེ་ཞེ་སྡང་གི་རྟོག་པ་འགགས། དེ་ནས་སྤྱི་བོ་ཁྱབ་བྱེད་ཀྱི་རླུང་མལ་འཆུག །ནག་ལམ་འཆར། དེའི་དུས་སུ་གཏི་མུག་གི་རྟོག་པ་འགགས། དེ་ལྟར་དུག་གསུམ་འགགས་པས། ང་རྒྱལ་དང་ཕྲག་དོག་རང་འགགས་སུ་འགྲོ་སྟེ། དུག་གསུམ་པོ་རྩ་གསུམ་དུ་འདུས་པའི་ཕྱིར་རོ། །དེའི་ཚེ་ཕྱི་དབུགས་ཆད་དོ། །གསུམ་པ་མི་རྟོག་པའི་ཡེ་ཤེས་འཆར་ཚུལ་ནི། ཕྱི་དབུགས་ཆད། ནང་དབུགས་མ་ཆད་པའི་བར་དེར། ཉི་མ་ཡར་འགྲོ་བ་དང་། ཟླ་བ་མར་འགྲོ་བའི་དུས་དེར། དབུ་མར་རླུང་སེམས་ཚུད་དེ། དེ་གསུམ་དབུ་མར་གནས་ཤིང་རྟོག་ཚོགས་འགགས་པའི་གནད་ཀས། རྣམ་པར་མི་རྟོག་པའི་ཡེ་ཤེས་སངས་རྒྱས་ཆོས་སྐུའི་དགོངས་པ་ཟན་གཅིག་ཟ་ཡུན་ཙམ་ཅིག་འཆར་རོ། །བཞི་པ་དེ་ངོས་ཟིན་ནས་སངས་རྒྱ་ལུགས་ནི། དེ་ལྟར་གོམས་འདྲིས་བྱས་པ་དང་། གདམས་ངག་བསྟན་པའི་སྟོབས་ཀྱིས། རང་བྱུང་ལྷན་ཅིག་སྐྱེས་པའི་ཡེ་ཤེས་དེ་རང་ངོ་ཤེས་པས་ཆོས་སྐུ་མ་བུ་འཕྲོད་ནས་སངས་རྒྱ་སྟེ། དེ་ནས་རིག་པ་ཚངས་བུག་ནས་འཐོན་ཏེ། ཆོས་ཀྱི་དབྱིངས་སུ་གཤེགས་པ་ཡིན་ནོ། །དེ་ནི་དབང་པོ་རབ་བར་དོ་མེད་པར་སངས་རྒྱས་པའི་མན་ངག་གོ། །གཉིས་པ་དབང་པོ་འབྲིང་བར་དོར་སངས་རྒྱས་པའི་མན་ངག་ལ་བཞི་ལས། འབྱུང་བ་ཐིམ་ལུགས་དང་རྟོག་པ་འགག་ལུགས་གཉིས་སྔར་དང་འདྲ། གསུམ་པ་ཆོས་ཉིད་བར་དོ་འཆར་ཚུལ་ནི། དབང་པོ་རབ་ཀྱི་ལྟར་རྟོག་མེད་ཆོས་སྐུའི་དགོངས་པ་ངོས་མ་ཟིན་པར། རིག་པ་སྙིང་ནང་ན་གནས་པ་དེ། རྩ་དར་དཀར་གྱི་སྐུད་པ་ལྟ་བུའི་ལམ་ནས་ཞུགས་ཏེ་དེ་ནས་ཕྱིར་འཐོན་པ་དང་བེམ་རིག་བྲལ་ནས་ཞག་གཅིག་བརྒྱལ་འགྲོ། བརྒྱལ་བ་སངས་ནས་ཆོས་ཉིད་ཀྱི་བར་དོ་སྒྲ་འོད་ཟེར་དང་ཐིག་ལེའི་སྣང་བ་འཆར་རོ། །སྒྲ་ནི་ཆོས་ཉིད་མའི་རང་སྒྲ་དབྱར་དགུན་འབྱེད་པའི་འབྲུག་སྒྲ་ལྟ་བུ་ཆེ་ལ་དྲག་པ་འཆར། འོད་ནི་རིག་པའི་རང་མདངས་གསལ་ལ་དྭངས་པ་འཆར། འོད་ཀྱི་གསེབ་ན་ཟེར་འཕྲོ་བ་སོས་ཀ་ཐང་ལ་སྨིག་རྒྱུ་ལྟ་བུ་མེར་མེར་བ་འཆར་རོ། །བཞི་པ་རང་ངོ་ཤེས་ནས་སངས་རྒྱ་ལུགས་ནི། ད་ལྟ་ངོ་སྤྲད་པ་དང་ཉམས་སུ་བླང་བའི་དབང་གིས། སྒྲ་འོད་ཟེར་གྱི་སྣང་བ་དེ་དག་རང་བྱུང་ལྷན་ཅིག་སྐྱེས་པའི་ཡེ་ཤེས་སུ་ཤེས་ནས་སངས་རྒྱའོ། །དེ་ཡང་ཡང་གོམས་འདྲིས་ཀྱི་བྱེ་བྲག་གིས། རྫོགས་རིམ་སྟོང་ཉིད་ཀྱི་དོན་ལ་གོམས་པའི་རྣལ་འབྱོར་པ་ཡིན་ན། སྒྲ་འོད་ཟེར་གྱི་སྣང་བ་དེ་དག་སྣང་སྟོང་གཉིས་མེད་ཀྱི་ཡེ་ཤེས་སུ་ཤར་ནས་ཆོས་ཀྱི་སྐུ་རུ་སངས་རྒྱའོ། །བསྐྱེད་རིམ་ལྷའི་རྣལ་འབྱོར་ལ་གོམས་པ་ཡིན་ན། སྒྲ་འོད་ཟེར་གྱི་སྣང་བ་དེ་དག་རང་མདངས་ལྷའི་དཀྱིལ་འཁོར་དུ་ཤར་ནས་ལོངས་སྤྱོད་རྫོགས་པའི་སྐུ་རུ་སངས་རྒྱའོ། །རྫུན་སྣང་སྟོང་པའི་རྣལ་འབྱོར་པ་ཡིན་ན། སྒྲ་འོད་ཟེར་གྱི་སྣང་བ་དེ་དག་རྨི་ལམ་སྒྱུ་མ་ལྟ་བུར་ཤར་ནས་སྤྲུལ་པའི་སྐུ་རུ་སངས་རྒྱའོ། །འཁོར་འདས་ཀྱི་ཆོས་ཐམས་ཅད་རང་སྣང་དུ་ཤེས་པའི་རྣལ་འབྱོར་པ་ཡིན་ན། སྒྲ་འོད་ཟེར་གྱི་སྣང་བ་དེ་དག་རང་ཤར་དང་རང་གྲོལ་དུ་ཤེས་ནས་ངོ་བོ་ཉིད་ཀྱི་སྐུ་རུ་སངས་རྒྱ་བ་ཡིན་ནོ། །དེས་ན་རང་རེ་ཉམས་ལེན་བཞི་པོ་གང་ལ་གནས་བལྟས་ལ། གང་ལ་ཉམས་རྟོགས་སྐྱེས་པའི་སྒོ་ནས་བར་དོ་བཅད་དོ། །གསུམ་པ་དབང་པོ་ཐ་མ་སྐྱེ་བ་ལེན་ལུགས་ནི་ལྔ་ལས། འབྱུང་བ་ཐིམ་ལུགས་དང་། རྟོག་པ་འགག་ལུགས་སྔར་དང་འདྲའོ། །གསུམ་པ་ཡིད་ཀྱི་ལུས་གྲུབ་ཚུལ་ནི། རྟེན་འབྲེལ་བརྒྱད་ཀྱིས་ཡིད་ལུས་གྲུབ་སྟེ། འོད་རང་སྣང་མ་ཤེས་པ་ནི་མ་རིག་པ། དེའི་དབང་གིས་རླུང་ལྔར་འདུས་ནས་འཁོར་བར་བྱེད་པ་འདུ་བྱེད། དེ་ལས་ཤེས་པ་གསལ་དུ་སོང་ནས་ཡུལ་འཛིན་སྐྱེ་བ་ནི་རྣམ་ཤེས། དེ་ལས་བར་དོའི་ཡིད་དང་ཡིད་ཀྱི་ལུས་གཉིས་འབྱུང་། དེ་ལས་ཤེས་པ་རྣོ་མྱུར་དུ་སྐྱེ་བས་སྐྱེ་མཆེད་འབྱུང་། དེ་ཡུལ་དང་འཕྲད་པར་རེག་པ། དེས་བདེ་སྡུག་མྱོང་བ་ཚོར་བ། དེ་ལ་ཆགས་སྡང་སྐྱེས་པ་སྲེད་པ། དེ་ལྟར་བརྒྱད་ཀྱིས་ཡིད་ལུས་གྲུབ་བོ། །བཞི་པ་བར་དོའི་སྣང་བ་འཆར་ལུགས་ནི། སྔར་གྱི་བག་ཆགས་དང་ལས་ཀྱི་སྣང་བ་འཆར་ཏེ། སྔར་གྱི་ཡུལ་དང་ཁྱིམ་དུ་འོང་། །ཉེ་དྲུང་ཀུན་དང་ཡིད་ཀྱིས་འགྲོགས། །ཟས་དང་གནས་དང་བརྟེན་སའི་ངེས་པ་མེད། ཡིད་ཀྱི་ལུས་ཀྱིས་དྲི་མའི་ཟས་ཟ། སྐྱེ་གནས་དང་མའི་མངལ་དང་། དེ་བཞིན་གཤེགས་པའི་སྐུ་དང་། རྡོ་རྗེ་གདན་མ་ཡིན་པ་ཐམས་ཅད་ལ་ཐོགས་པ་མེད་པར་འགྲོ། རྟག་ཏུ་འཇིགས། སྔངས། སྐྲག །ཤ་ཟ་སྲིན་པོ། གཅན་གཟན། ཁ་ཆར་བུ་ཡུག་གི་སྣང་བ་འཆར་རོ། །སྐྱབས་དང་འཁྲས་ཐམས་ཅད་དུ་འཚོལ། སྐྱེ་མཆེད་གསལ་ཞིང་ཡིད་ཀྱི་དབང་པོ་ཚང་བ། ལྷའི་མིག་རྣམ་པར་དག་པ་དང་། བར་དོའི་སེམས་ཅན་ནང་གིས་མཐོང་བ་ཡིན་ནོ། །ལྔ་པ་སྐྱེ་བ་ཕྱི་མ་ལེན་ཚུལ་ནི། གོང་གི་རང་མདངས་མཆོག་གི་འོད་གསལ་དེ་ནུབ་ནས། ཐུན་མོང་འོད་ཀྱི་ལམ་ལྔ་ཤད་ཀྱིས་འཆར་རོ། །ལྷན་ཅིག་སྐྱེས་པའི་མ་རིག་པ་དེ་རང་ངོ་མ་ཤེས་ལ། ཀུན་ཏུ་བརྟགས་པའི་མ་རིག་པས་གཞན་དུ་བརྟགས། གཞན་སྣང་ལ་འཛིན་པ་ཞུགས་པས་འགྲོ་དྲུག་ཏུ་སྐྱེ་བ་ཡིན་ཏེ། རི་དྭགས་རྒྱ་རུ་ཚུད་པའམ། སྦྲང་མ་བལ་རྒྱར་འཐུམས་པ་བཞིན་ནོ། །དེ་ཡང་འོད་དཀར་པོ་ལ་འཛིན་པ་ཞུགས་ན་དམྱལ་བ། དམར་པོ་ལ་ཡི་དྭགས། ནག་པོ་ལ་དུད་འགྲོ་སེར་པོ་ལ་མི། ལྗང་གུ་ལ་ལྷ་དང་ལྷ་མ་ཡིན་ཏུ་སྐྱེའོ། །དེའི་དུས་སུ་རིགས་དྲུག་གི་སྡུག་བསྔལ་བསམ་ལ། འོད་ལྔ་པོ་གང་ལའང་འཛིན་པ་མི་བྱ། བར་དོའི་ཤེས་པ་འདི་བསྒྱུར་སླ་བས། དྲན་པས་ཟིན་ན་བདེ་བ་ཅན་ལྟ་བུར་འདུན་པ་བཏང་བས་ཐེ་ཚོམ་མེད་པར་སྐྱེའོ། །ལམ་དེའི་གེགས་བཞིའི་སྐྱོན་བསལ་བསྟན་པ་ནི། ཞེས་པ་ལ། གཉིས་པ་ལམ་གྱི་གེགས་བསམ་པ་ལ་བཞི་སྟེ། ཏིང་ངེ་འཛིན་ཉམས་ཀྱི་གེགས་བསལ་བ་དང་། ལུས་ན་ཚ་སྡུག་བསྔལ་གྱི་གེགས་བསལ་བ། སེམས་རྣམ་རྟོག་ལྷ་འདྲེའི་གེགས་བསལ་བ། རྐྱེན་སྣང་གློ་བུར་གྲིབ་ཀྱི་གེགས་བསལ་བའོ། །དང་པོ་ནི། ཏིང་འཛིན་ཉམས་གེགས་བསལ་བ། བྱིང་རྒོད་ཉམས་གསུམ་བཅོས་ལ་ལམ་དུ་བཏང་། །ཞེས་པས། འདི་ལ་ལྔ་སྟེ། བྱིང་ན་གསེང་བ། རྒོད་ན་མནན། ཕན་པའི་ཉམས་ལམ་དུ་བཏང་བ། གནོད་པའི་ཉམས་གྲོགས་སུ་འཁྱེར་བ། ཕན་གནོད་མེད་པའི་ཉགས་བོགས་སུ་འདོན་པའོ། །དང་པོ་བྱིང་བ་ལ། བྱིང་བ། རྨུགས་པ། འཐིབས་པ་ལ་སོགས་པ་ནི་དོན་མཐུན་ཏེ་བྱིང་བའོ། །དེ་ལ་བྱིང་བ་ནི་རིག་པའི་རང་མདངས་མ་རྙེད་པ། རྨུགས་པ་ནི་གསལ་བའི་ཉམས་ཀྱིས་མ་ཟིན་པ། འཐིབས་པ་ནི་གཉིད་དང་འདྲེས་པའོ། །གཉིས་པ། རྒོད་པ། འགྱུ་བ། འཕྲོ་བ། གཡོ་སྦུན་ལ་སོགས་པ་དོན་མཐུན་ཏེ་རྒོད་པའོ། །དེ་ལ་གཡོ་བ་ནི་སེམས་གནས་སུ་མི་འདོད་པ། སྦུན་པ་ནི་ཡུད་ཙམ་གནས་ཀྱང་ཡུན་རིང་དུ་མི་གནས་པ། འཕྲོ་བ་ནི་ཤེས་པ་ཡུལ་ལ་འཇུག་པའོ། །འགྱུ་བ་ལ་གཉིས། འོག་འགྱུས་ནི་སེམས་གནས་སྙམ་བྱེད་པ་ལ་མ་ཚོར་བར་འགྱུས་པའོ། །རང་འགྱུས་ནི་སེམས་གནས་གྱིན་འདུག་གསལ་གྱིན་འདུག་སྙམ་པའི་ཚོར་བ་ཕྲ་མོ་གཅིག་སྒོམ་གྱི་གསེབ་ཏུ་ཞུགས་པའོ། །རྒོད་པ་ལ་གཉིས། གཞན་རྒོད་ནི་ཤེས་པ་རྐྱེན་གསུམ་གྱིས་རྒོད་པ། རང་རྒོད་ནི་གནས་ཆ་མེད་པ་ཤེས་པ་ཡེང་བའོ། །མདོར་ན་བྱིང་རྒོད་གཉིས་ཀའི་རྐྱེན་གྱི་རྩ་བ་གཅིག་སྟེ། ཤེས་པ་གཞུར་ལ་མ་ཐེབས་པར་བཏང་སྙོམས་སུ་ལུས་པ་ལས་བྱུང་ངོ་། །དེ་གཉིས་བསལ་བ་ལ། བྱིང་ན་སྙིང་ཁར་སེམས་བཟུང་ལ་ཤེས་པ་ཞུར་གཞུར་ཆུན་གཅུན། རྩེ་གཅིག་མདུང་ཚུགས་ཆིག་དྲིལ་དུ་བསྒོམ་མོ། །དེས་བྱིང་མི་ནུས་ཏེ་སྲང་དུ་ཆུད་འགྲོའོ། །རྒོད་ན་སེམས་ལྟེ་འོག་ཏུ་བཟུང་ལ་ཞུར་གཞུར། ཆུན་གཅུན་ལ་ཕུར་ཚུགས་སུ་བསྒོམ། དེས་ཆིག་དམིགས་ལ་ཧྲིལ་སོང་ནས་འཕྲོ་རྒོད་མི་ཡོང་ངོ་། །མདོར་ན་རྩེ་གཅིག་ཕུར་ཚུགས་སུ་སོང་ན་བྱིང་རྒོད་གཉིས་ཀ་མི་ཡོང་ངོ་། །གསུམ་པ་ཕན་པའི་ཉམས་ལམ་དུ་བཏང་བ་ནི། བདེ་གསལ་མི་རྟོག་པའི་ཏིང་ངེ་འཛིན་བཟང་པོའམ། བྱམས་སྙིང་རྗེ་ཞེན་ལོག་གི་བློའམ། མོས་གུས་ལ་སོགས་པ་གཏིང་ནས་ལྷོངས་པ་སྐྱེས་པའི་དུས་སུ་དེའི་རོ་མྱངས་ནས་ལུས་ངག་གི་སྤྲོས་པ་བཅད་ན། ཉམས་དེ་ཉིད་རླུང་ཁ་ལོག་ནས་ཡལ་འགྲོ་བས། བདག་གཞན་དབང་དུ་འགྲོ་བའི་བྱ་བ་བསྐྱེད་ལ། དེ་ཉིད་རླུང་སེམས་ཀྱི་རྟེན་འབྲེལ་ཉམས་སུ་ཤེས་པའི་བློ་གྲོས་ཀྱིས་དགར་འཛིན་དང་ཞེན་སྣང་མེད་པར། རང་གི་ངོ་བོ་ལ་བལྟས་ཤིང་ངང་ལ་བཞག་པས་གཉིས་མེད་ཡེ་ཤེས་ཀྱི་ངོ་བོར་འཆར་ཏེ། ཉམས་ཞེན་མེད་ཀྱི་སྣ་མི་བསྐྱིལ་བར་འུར་བརྐྱང་ངོ་། །ཡང་ཉམས་དགའ་བ་དང་། ཞེན་པ་ལོག་པ་དང་། སྙིང་རྗེ་བཙན་ཐབས་སུ་སྐྱེས་ནས་ངུ་བ་ལ་སོགས་པ་བྱུང་ན། རིག་པ་ངོས་བཟུང་། ལྟ་བའི་གནད་ཤེས་པར་བྱ་སྟེ། དེའི་རོ་མི་མྱོང་བར་ངང་ལ་བཞག་གོ། །རོ་མྱང་ན་རྒྱལ་པོ་ལ་སོགས་པའི་ཚེ་འཕྲུལ་ཡིན་པའང་སྲིད་དོ། །བཞི་པ་གནོད་པའི་ཉམས་གྲོགས་སུ་ཁྱེར་བ་ནི། ན་ཚ་ཟུག་གཟེར་རམ། སྙིང་རླུང་ཁམས་འདུས་ལ་སོགས་པ་ཅི་བྱུང་ཡང་ཉམས་སྣང་དུ་ཤེས་པར་བྱས་ཏེ། ཞུམ་ཞིང་བྱུར་དུ་མི་བལྟ། སྣང་ཡུལ་དང་འཛིན་སེམས་རང་ཤར་རང་གྲོལ་བས། སྐྱོན་དུ་མི་བལྟ། ཡོན་ཏན་དུ་མི་བཟུང་བར་རང་ཤར་རང་གྲོལ་བྱུང་རྒྱལ་དུ་བསྐྱང་ངོ་། །ལྔ་པ་ཕན་གནོད་མེད་པའི་ཉམས་བོགས་སུ་འདོད་པ་ནི། ཀུན་གཞི་ལ་འཁོར་འདས་ཀྱི་ཆོས་ཐམས་ཅད་ལྷུན་གྱིས་གྲུབ་ཅིང་། ས་བོན་གྱི་ཚུལ་དུ་གནས། རྡོ་རྗེའི་ལུས་ལ་རྩ་ཡིག་རླུང་སེམས་སུ་གནས་པ་དེ་དག་ངོ་སྤྲད་ཅིང་ཏིང་ངེ་འཛིན་གནད་དུ་བསྣུན་ནས་བསྒོམས་པས། གནས་ལུགས་རང་ངོ་ཤེས། རྩ་མདུད་གྲོལ། རླུང་སེམས་དྭངས་བག་ཆགས་འདག་ཅིང་ཡོན་ཏན་གྱི་སྣ་སློང་བས། འཁོར་འདས་ཀྱི་སྣང་བ་སྣ་ཚོགས་ཉམས་ལ་འཆར་རོ། །དེ་དག་ལ་བུ་ག་ཡོད་ན་རླུང་འཇུག །རྟོག་པ་སྐྱེས་ན་བདུད་ལྡང་། བཏང་སྙོམས་སུ་ལུས་ན་ལམ་དུ་མི་འགྲོ་བས། ཐམས་ཅད་ཉམས་སུ་ཤེས་པར་བྱ་སྟེ། གང་ལ་ཡང་སྐྱོན་དུ་མི་བལྟ། ཡོན་ཏན་དུ་མི་བཟུང་། རེ་དོགས་དང་འཁུ་འཕྲིག་མེད་པར། ཉམས་སྣང་རང་ཤར་རང་གྲོལ་དུ་བསྐྱངས་བས་ཐམས་ཅད་བོགས་སུ་ཐོན་ནས་འགྲོ་བ་ཡིན་ནོ། །མདོར་ན་སྒྲུབ་པ་བྱེད་པའི་དུས་ན། རེས་བློ་ལས་སུ་རུང་ཞིང་དགེ་སྦྱོར་འཕེལ་ཏེ། སྒོམ་ཆེན་རྒྱང་གླུ་ཙམ་རེ། རེས་བློ་བཀོལ་དུ་མི་གཏུབ་དགེ་སྦྱོར་འགྲིབ། ཤེས་པ་འཚུབས་པས། སྒོམ་ཆེན་ཡུས་ཁ་སྟོང་ངེ་། མདོར་ན་མཐོ་དམན་གྱི་ཉམས་སྣ་ཚོགས་སྐྱེ་བས། ཞུམས་པ་དང་ཁེངས་པ་མེད་པར། ཞེན་མེད་བྱུང་རྒྱལ་དུ་གནད་ནས་བཟུང་ཞིང་ལམ་དུ་བཏང་། སྒྲུབ་པ་ལ་ཐང་ལྷོད་ལྟེམ་ཀྱང་མེད་པར་བྱས་པས། ཐམས་ཅད་བོགས་སུ་ཐོན་འགྲོ་བ་ཡིན་ནོ། །གཉིས་པ་ལུས་ལ་ན་ཚ་དུཿཁའི་གེགས་བསལ་བ་ནི། ནད་ཀྱི་གཞི་རྒྱུ་རྐྱེན་འབྲས་ངོས་བཟུང་བཅོས། ཞེས་པས། ནད་ལ་གནས་པའི་གཞི། འབྱུང་བའི་རྒྱུ། སློང་བའི་རྐྱེན། སྨིན་པའི་འབྲས་བུ། བཅོས་པའི་ཐབས་སོ། །དང་པོ་ནི། ནད་ལ་གནས་པའི་གཞི། ཀུན་གཞི་དང་རྩ་ཁམས་བག་ལ་ཉལ་བག་ཆགས་ཀྱི་ཚུལ་དུ་གནས་སོ། །གཉིས་པ་ནི། འབྱུང་བའི་རྒྱུ། མ་རིག་པ་དང་བདག་ཏུ་འཛིན་པ་སྟེ། བསགས་པའི་ལས་ངན་ནོ། །གསུམ་པ་ནི། སློང་པའི་རྐྱེན། ཉོན་མོངས་རྣམ་རྟོག་འདྲེ་དང་བཅས་པའོ། །བཞི་པ་ནི། སྨིན་པའི་འབྲས་བུ། ཚ་གྲང་བད་ཀན་གཟེར་ཐབས་སྦོས་ནད་ཀྱིས་གཙོས་བྱས་ཏེ་ནད་བཞི་བརྒྱ་རྩ་བཞིའོ། །དེ་ལ་ལྷན་ཅིག་སྐྱེས་པའི་ནད་རྒྱུ་གཙོ། ཀུན་བརྟགས་ཀྱི་ནད་རྐྱེན་གཙོ། ནད་གང་ལ་ཡང་འདི་ལྔ་ཚང་དགོས་ཏེ། གཞི་བག་ལ་ཉལ། རྒྱུ་ལས་ངན། རྐྱེན་ཉོན་མོངས། མཚམས་སྦྱོར་རྣམ་རྟོག །མཇུག་སྡུད་རླུང་། རྒྱབ་བརྟེན་ལྷ་འདྲེ། དེ་ཡང་རྒྱུ་འདོད་ཆགས་ཀྱི་ས་བོན་ཀུན་གཞི་ལ་ཡོད། རྐྱེན་འདོད་ཆགས་དྲག་པོས་བསླངས་བས་གྲང་བའི་ནད་དུ་ལྡང་། ནའོ་ཐུའོ་སྙམ་པའི་རྣམ་རྟོག་གིས་མཚམས་སྦྱར། དེས་ཐུར་སེལ་གྱི་རླུང་ལོག །གདོན་མོ་རིགས་བལྟའོ། །དེ་བཞིན་དུ་རྒྱུ་ཞེ་སྡང་གི་ས་བོན། རྐྱེན་ཞེ་སྡང་དྲག་པོས་བསླངས། རྣམ་རྟོག་གི་ས་མཚམས་སྦྱར། མཉམ་གནས་ཀྱི་རླུང་ཁོག །ནད་མཁྲིས་པ། གདོན་མ་མོ། རྒྱུ་གཏི་མུག་གི་ས་བོན། རྐྱེན་ཉོན་མོངས་པ་གཏི་མུག །ནའོ་ཐུའོ་སྙམ་པའི་རྣམ་རྟོག་གིས་མཚམས་སྦྱར། གྱེན་རྒྱུའི་རླུང་ལོག །གདོན་ཀླུ་གནོད། ནད་བད་ཀན་ནོ། །རྒྱུ་ཕྲག་དོག་གི་ས་བོན། རྐྱེན་ཕྲག་དོག་དྲག་པོས་བསླངས། རྟོག་པས་མཚམས་སྦྱར། སྲོག་འཛིན་གྱི་རླུང་ལོག །གདོན་བཙན། ནད་གཟེར་ཐབས་སོ། །རྒྱུ་ང་རྒྱལ་གྱི་ས་བོན། རྐྱེན་ང་རྒྱལ་དྲག་པོས་བསླངས། རྟོག་པས་མཚམས་སྦྱར། ཁྱབ་བྱེད་ཀྱི་རླུང་ལོག །གདོན་རྒྱལ་པོ་གནོད། ནད་སྦོས་ནད་དོ། །དེ་དག་བཅོས་པ་ལ། རྒྱུ་མ་རིག་པ་ཡིན་པས་ལྷན་སྐྱེས་ཀྱི་ཡེ་ཤེས་ངོས་བཟུང་། རྐྱེན་ཉོན་མོངས་པ་ཡིན་པས་སེམས་མཉམ་པར་བཞག །མཚམས་སྦྱོར་རྣམ་རྟོག་ཡིན་པས་རྣམ་རྟོག་རྒྱུན་བཅད། མཇུག་སྡུད་རླུང་ཡིན་པས་རླུང་གནད་དུ་བཏང་། རྒྱབ་བརྟེན་ལྷ་འདྲེ་ཡིན་པས་ལྷ་འདྲེའི་རྣམ་རྟོག་སྤོང་ངོ་། །དེ་ལྟར་བྱས་པས་ནད་གང་ཡང་དག་གོ། །དང་པོ་བཅོས་པ་ལ་གསུམ་སྟེ། རབ་ངང་ལ་བཞག །འབྲིང་སྒོམ་གནད་དུ་བཏང་། ཐ་མ་དམིགས་པས་བཅོས་པའོ། །དང་པོ་ནི། ངང་ལ་བཞག་པ། སྤྲོས་བྲལ་ངང་བཞག་རྒྱུན་ཆད་སྐྱེས་དང་སེལ། །ཞེས་པས། ནད་དེ་ལ་ཕན་པའི་སྨན་ཐུན་གཅིག་མི་བཏང་། རིམ་གྲོ་ཡེ་གེ་བརྒྱ་པ་གཅིག་ཀྱང་མི་བྱ། སྐྱོན་དུ་མི་བཟུང་། ཡོན་ཏན་དུ་མི་བལྟ། བཟོ་མེད་བྱུང་རྒྱལ་དུ་བསྐྱང་། སྤྲོས་བྲལ་རང་ལུགས་རྟོག་མེད་ཀྱི་ངང་ལ་ཆམ་བཞག །དེ་ལྟར་བཞག་པས་རྣམ་རྟོག་རྒྱུན་ཆད། རྟོག་མེད་ཡེ་ཤེས་སྐྱེས་ནས་ནད་དེ་ཉིད་སེལ་ལོ། །དེ་ལ་སྔོན་འགྲོའི་དུས་སུ་ནད་མི་བཙལ། དངོས་གཞིའི་དུས་སུ་ནད་མི་བསྒོམ། རྗེས་ཀྱི་དུས་སུ་ནད་ཀྱི་རོ་མི་མྱོང་ངོ་། །དེས་ན་ནད་རྙིང་པ་འཐོན། གསར་པས་མི་ཚུགས་སོ། །གཉིས་པ་ནི། སྒོམ་གནད་དུ་བཏང་བ། གནོད་པའི་ཟས་ཟ་འཕྲིག་བཅད་ལྟོས་མེད་བསྐྱུར། །ཅེས་པས། འདི་ལ་གསུམ་སྟེ། འགལ་བསྒྱུར། འཕྲིག་བཅད། རོ་སྙོམས་པའོ། །དང་པོ་ནི། འགལ་བསྒྱུར། ནད་དེ་འདོད་ཐོག་ཏུ་ཁྱེར་ལ། ནད་ཁྱོད་ལ་བརྟེན་ནས་རྣམ་རྟོག་གི་གྲས་ཐག་བཅད་དུ་ཡོད་པ་རེ་དགའ་སྙམ་དུ་བསམ་སྟེ། ཤེས་པ་དགའ་སེང་ངེ་བཏང་། ནད་དེ་ལ་གནོད་པའི་ཟས་བཟའ། སྤྱོད་ལམ་བྱ། དེ་ལ་དྲི་ཆེན་བར་པ་བླངས་ལ་དྲོད་མ་ཡལ་བ་ཚུགས་ཚད་དུ་བཟའ། དྲི་ཆུ་བར་པ་ཡང་ཚུགས་ཚད་བཏུང་ངོ་། །དེ་ནས་རླུང་རྩོལ་བསྒོམས་པས། སྟོད་ནད་ཡིན་ན་སྐྱུགས་སུ་འགྲོ། སྨད་ནད་ཡིན་ན་བཤལ་དུ་འགྲོ། ནད་འཐོན་པ་དང་གཅོད་སྨན་དུ་འགྲོ། གཉིས་པ་འཕྲིག་བཅད་པ་ནི། བཞིན་གྱི་མདངས་སྟོན། ངག་གི་འཁུན་བཅད། ཡིད་རེ་དོགས་ཀྱི་འཕྲིགས། ན་ན་ནི། ཐུ་ན་ནི། ཤི་ན་ནི། ཐུ་རུ་ཡོང་བས་མི་ཡོང་ངམ་སྙམ་པའི་རྟོག་པ་མེད་པར་འཁུ་འཕྲིགས་རྦད་བཅད་ལ་ལྟོས་མེད་དུ་རྒྱང་བསྒྱུར་རོ། །གསུམ་པ་རོ་སྙོམས་པ་ནི། འཕྲང་བྱུང་ཙ་ན་ལུང་བླང་དགོས་པས་ཤེས་པ་གྲུབ་བཏོན་ཏེ་དགེ་སྦྱོར་གསལ་བཏབ་ལ། རྟེན་འབྲེལ་དམིགས་པ་མི་བསྒོམ། རིམ་གྲོ་དང་སྨན་དཔྱད་མི་བྱ། ན་ཟུགས་དེ་ཉིད་ཀྱི་ངོ་བོ་ལ་བལྟས་ཤིང་ངང་ལ་བཞག་པས། ཉམས་མྱོང་སྐྱེས་པ་ཡིན་ན་རང་ཡལ་དུ་འགྲོ། རྟོགས་པ་སྐྱེས་པ་ཡིན་ན་གསལ་སྟོང་དུ་འཆར། ཐ་མ་ཡང་ནད་ལ་དུཿཁ་དང་རྣམ་རྟོག་མི་འབྱུང་ངོ་། །གསུམ་པ་དམིགས་པས་བཅོས་པ་ནི། དཀར་དམར་ནག་པོའི་ཧཱུྃ་འཕྲོས་སྟེང་འོག་འདོན། ཞེས་པས། དང་པོ་སེམས་བསྐྱེད། སྐྱིལ་ཀྲུང་བཅའ། རང་ཡི་དམ་གྱི་ལྷ་རུ་བསྒོམ། དེའི་སྙིང་གི་དཀྱིལ་དུ་ཧཱུྃ་མཐིང་ནག་ནས་ཙམ་ཞིག་བསྒོམ། དེ་ནས་ནད་གང་ཡིན་བརྟགས་ལ། ཚ་བ་ཡིན་ན་སྙིང་ནང་གི་ཧཱུྃ་ལས་ཧཱུྃ་དཀར་པོ་ནས་ཙམ་ཞིག་འཕྲོས་པས། ཁོག་སྟོད་ཐམས་ཅད་བསྐོར་ནས། ནད་ཐམས་ཅད་ཁབ་ལེན་གྱིས་ལྕགས་བསྡུས་པ་ལྟར་འུབ་རིལ་བསྡུས། སྤྱི་གཙུག་ནས་འཐོན་ཏེ་ནམ་མཁའ་ལ་ཡལ་བར་བསམ་ལ་རླུང་གྱེན་ལ་འབུད། གྲང་བ་ཡིན་ན་སྙིང་གི་ཧཱུྃ་ལས་ཧཱུྃ་དམར་པོ་ནས་ཙམ་ཞིག་ཆད་ནས། ཁོག་སྨད་ཐམས་ཅད་བསྐོར། ནད་ཐམས་ཅད་བསྡུས། འོག་སྒོ་ནས་འཐོན་ཏེ་སའི་གཏིང་དུ་སོང་བར་བསམ། ཡན་ལག་གི་ནད་དམ་བྲང་ངར་ལ་སོགས་པ་ཁོལ་བུར་ནན། གང་ན་སར་ཧཱུྃ་ནག་པོ་ནས་ཙམ་གཅིག་བསམ་སྟེ་ཐམས་ཅད་བསྡུས་ནས། སྐྲངས་བའི་དམིགས་སམ་སོར་མོའི་རྩེ་ནས་འཐོན་པར་བསམ་མོ། །ངོས་མ་ཟིན་པའི་ནད་ལ། སྙིང་ནང་གི་ཧཱུྃ་ལས་ཧཱུྃ་མཐིང་ག་ཆད་དེ་ལུས་ཀྱི་སྟོད་སྨད་ཐམས་ཅད་བསྐོར། ནད་ཀུན་བསྡུས་ནས་རླུང་གང་རྒྱུ་བའི་སྣ་ནས་འཐོན་ཏེ་བར་སྣང་ལ་ཡལ་བར་བསམ་མོ། །ངང་ལ་བཞག་པ་ལ་ཤེས་པ་མི་རྟོག་པའི་ངང་དུ་ཧྲིལ་འགྲོ་དགོས། བཟློག་བསྒོམ་ལ་ཐེ་ཚོམ་དང་འཁུ་འཕྲིགས་མེད་པར་ལྟོས་མེད་དུ་རྐྱང་བསྐྱུར་དགོས། དམིགས་པ་ལ་ཤེས་པ་ཆིག་དམིགས་སུ་འགྲོ་དགོས། དེ་གསུམ་ཀ་ལ་བློ་ཁེལ་ཞིང་འགྱུར་དྲག་པ་གལ་ཆེའོ། །གསུམ་པ་སེམས་རྣམ་རྟོག་ལྷ་འདྲེའི་གེགས་པས་བསལ་བ་ནི། རང་ལས་གཞན་མེད་ཡང་འཁུ་འཕྲིགས་བཅད། ཅེས་པས། ཉམས་ཐལ་ཐོལ་སྐྱེས་པའི་དུས་སུ་རྩ་གནས་ཀྱི་རྟེན་འབྲེལ་དང་། རྣམ་རྟོག་གི་ཐེར་ཟུག་གིས་བདུད་རིགས་ལྷ་འདྲེའི་ཆོ་འཕྲུལ་དང་ཐར་ཐུག་འོང་ངོ་། །དེ་ལ་འཇིགས་པ་དང་ཉམ་ངའི་རྣམ་རྟོག་སྐྱེས་ན་མྱུར་དུ་གནད་ནས་བཟུང་ལ་ལམ་དུ་བཏང་ངོ་། །དེ་རང་གར་བཞག་པའམ། དེའི་དབང་དུ་ཤོར་ན། ཕྱིས་སྒྲུབ་པ་ནམ་བྱེད་ཀྱི་བར་ཆད་དུ་ཡོང་བ་ཡིན་ནོ། །གཞན་ཡང་མཐོ་དམན་གྱི་གེགས་བྱུང་བ་དེ་ཉིད་ལམ་དུ་མ་ཐོངས་ན། བྱིས་སྒྲུབ་པ་བྱེད་པའི་དུས་ན། དེ་ཉིད་སྐྱེད་དང་བཅས་པ་ཅིག་བྱུང་ནས་བར་ཆད་དུ་འགྲོ་བ་ཡིན་པས། ལམ་དུ་བཏང་བ་གལ་ཆེ་སྟེ། སྤྱིར་ལམ་དུ་བཏང་བ་ནི། རྩ་བ་རང་གི་རྣམ་རྟོག་ལམ་སྲང་བཅད་ལ། གདོན་དང་ཆོ་འཕྲུལ་ལྟར་སྣང་བ་འདི་རང་གི་བློ་འཁྲུལ་བའི་རང་ངོར་ཤར་བ་ཡིན་ཏེ། རང་ལས་གཞན་པའི་ལྷ་འདྲེ་ནི་གཏན་ནས་རང་མེད་དོ། །དེ་ཡང་གདོན་དང་ཆོ་འཕྲུལ་ལྟར་སྣང་བའི་དུས་ཉིད་ན། བློ་འཁྲུལ་པའི་རང་ངོར་ཤར་བ་ཡིན་ཏེ། དེ་ཉིད་སྐྱེ་འགག་གནས་གསུམ་དང་བྲལ་ཞིང་མ་གྲུབ་པར་ཤེས་པའི་གནད་ཀྱིས། ཆོ་འཕྲུལ་ནམ་བྱུང་བའི་དུས་ན། འཕྲུལ་འཁོར་བཅས་ལྟ་སྟངས་བཞག་ནས། ངོ་བོ་ལ་བལྟས་པས། གསལ་སྟོང་དུ་འཆར་ཏེ། རྣམ་རྟོག་གསལ་སྟོང་དུ་ཤར་ཙམ་ན་ལམ་དུ་བསླངས་པ་ཡིན་ནོ། །གཞན་ཡང་། ལྷའི་ང་རྒྱལ་དང་ལྡན། ལྟ་བའི་གདིང་ཆེ། ཟབ་མོའི་གནད་ཤེས། སྙིང་སྟོབས་གདིང་དང་ལྡན་པར་བྱས་ཏེ། ཉམ་ང་དང་བག་ཚ་འཁུ་འཕྲིགས་རྦད་བཅད་ལ། བདུད་ཚོགས་འདྲེ་དམག་གང་བྱུང་ཡང་། བ་སྤུའི་བུ་ག་གཅིག་ཀྱང་སྐྱོད་པར་མི་ནུས། བར་ཆད་བྱ་བ་རང་མི་འོང་། ཚུགས་རང་མི་ཚུགས་བསམ་པའི་སེམས་དཔའ་བར་བྱའོ། །འདྲེ་དང་བར་ཆད་ན་བ་ལ་སོགས་པ་བྱུང་ན་ནི་སྙམ་པའི་རྣམ་རྟོག་མང་བ་ནི། འདྲེ་ལ་སྣ་ལེན་བྱེད་པ་ཡིན་ནོ། །དེས་ན་ལྷ་འདྲེ་ལྟར་སྣང་བ་ཐམས་ཅད་རང་གི་རྣམ་རྟོག་གི་རང་གཟུགས་ཤར་བ་ཡིན་གྱི། གཞན་དུ་གྲུབ་པ་སྤུ་ཙམ་ཡང་མེད་པས། རྣམ་རྟོག་གི་རྒྱུན་བཅད། ཕུང་པོ་ཚོགས་སུ་འབུལ། ལུས་གཟན་དུ་སྦྱིན། བདག་འཛིན་བློས་ལིང་བཏང་། གནད་ནས་བཟུང་ལ་ལམ་དུ་བཏང་ངོ་། །བཞི་པ་གློ་བུར་གྲིབ་ཀྱི་གེགས་བསལ་བ་ནི། དམ་ཉམས་གྲོགས་གནས་ཟས་ཀྱི་གྲིབ་བཞི་བསལ། །ཅེས་པས། གྲིབ་བཞི་སྟེ། དམ་ཚིག་ཉམས་པའི། གྲོགས་ཀྱི། གནས་ཀྱི། ཟས་ཀྱི་གྲིབ་བོ། །དང་པོ་ནི། དམ་ཚིག་ཉམས་པའམ། ཉེན་པའམ། སེལ་ཞུགས་པ་ལས་བྱུང་ངོ་། །གཉིས་པ་གྲོགས་ཀྱི་གྲིབ། ནི། གྲོགས་དམ་ཉམས་པའམ། སྡོམ་པ་ཤོར་བའམ། མི་སྡིག་པོ་ཆེ་དང་གློ་བུར་དུ་འཕྲད་པའམ། ཁ་འདྲེས་པ་ལས་འབྱུང་ངོ་། །གཞན་ཡང་། མཛེ་ཅན། མི་ཐོང་། ཤན་པ། ཡུགས་ས། འདྲེ་ཅན་ལ་སོགས་པ་ལས་འོང་ངོ་། །གསུམ་པ་ནི། གནས་ཀྱི་གྲིབ། སྡིག་ཁང་། འདྲེ་ཁང་། མཁོན་ཁང་། དམ་ཁང་ལ་སོགས་པར་བསྡད་པ་ལས་གྲིབ་འབྱུང་ངོ་། །བཞི་པ་ནི། ཟས་ཀྱི་གྲིབ། འཁོན་ཟས། དམེ་ཟས། སྡིག་ཟས་ལ་སོགས་པ་ལས་གྲིབ་འབྱུང་ངོ་། །དེ་རྣམས་ཀྱིས་ལུས་ལ་ནད་འཇུག །ཏིང་ངེ་འཛིན་འགྲིབ། ཆོས་སྐྱོང་ལྡོག་གོ། །དེ་དག་གི་རྨི་རྟགས་ནི། དམ་ཚིག་ཉམས་ན་ནམ་སྲོད་ལ། རྨི་ལམ་དུ། མཐུར་དུ་ཕྱིན་པ་འོང་ངོ་། །གྲོགས་ལ་གྲོགས་ཀྱི་མི་གཙང་བ་རང་ལ་གོས་པ་འབྱུང་། གནས་ལ་གནས་མི་གཙང་བར་འདུག་པ་འབྱུང་ངོ་། །ཟས་ལ་རང་གི་མི་གཙང་བ་དང་། དྲི་མས་གོས་པའི་ཟས་ཟོས་པའི་འབྱུང་ངོ་། །དེ་དག་བསལ་བ་ལ་རབ་འབྲིང་ཐ་གསུམ་ལས། རང་དབང་བསྐུར་བས་གསོ། འབྲིང་ཡི་གེ་བརྒྱ་བས་བཤགས། ཐ་མ་ཁྲུས་ཆོག་བྱའོ། །མདོར་ན། ཚོགས་བཏང་། མཆོད་པ་དབུལ། གྲིབ་བཤགས། གྲིབ་སེལ། གྲིབ་མདོས། གྲིབ་སྐོང་ལ་སོགས་པ་མང་དུ་བྱའོ། །ལམ་དེའི་བོགས་འདོན་གནད་དུ་བཏང་བ་ནི། །ཞེས་པས། གསུམ་པ་ལམ་དེའི་བོགས་འདོན་ལ་གསུམ་སྟེ། བོགས་མི་འབྱུང་བས་སྐྱོན་བསལ་བ། འབྱུང་བའི་གཞི་བཅའ་བ། བོགས་ཇི་ལྟར་འདོན་པའི་ཐབས་སོ། །དང་པོ་ནི། སྐྱོན་བསལ་བ། སྐྱོན་གྱི་རྩ་བ་བདག་འཛིན་བློ་ཡིས་བཏང་། །ཞེས་པས། སྐྱོན་ཡོད་པ་ལ་ཡོན་ཏན་མི་འབྱུང་ལ། སྐྱོན་གྱི་རྩ་བ་བདག་དང་བདག་གིར་འཛིན་པའི་ཞེན་སྣང་འདི་དག་ཡིན་པས། བདག་འཛིན་གྱི་ལྟོས་ཐག་བཅད། དགྲ་གཉེན་གྱི་འཛིན་པ་སྤང་། ལོག་བློས་ལིང་གེས་བཏང་ལ། ཆོས་མིན་གྱི་བསམ་པ་མེད་པར་བྱ་སྟེ། ཀམ་ཤ་དམ་པའི་ཆོས་ཁོ་ན་ལ་བྱའོ། །དེ་ལྟར་དེའི་སྐྱོན་མ་སེལ་ན་བོགས་ཐོན་པ་མེད་དེ། རྡོའི་ཐོག་ཏུ་མྱུ་གུ་མི་སྐྱེ་བ་བཞིན་ནོ། །མདོར་ན་སྐྱོན་ཐམས་ཅད་ཀྱི་རྩ་བ་བདག་འཛིན་བློས་བཏང་བ་ཡིན་ནོ། །གཉིས་པ་ནི། གཞི་བཅའ་བ། ཡོན་ཏན་གཞི་མཉམས་ལེན་དྲག་པོ་བྱ། །ཞེས་པས། རང་གང་ལ་ཞུགས་པའི་ལམ་དེ་ཉིད་ལ་བསྒོམ་བསྲན་བསྐྱེད་ལ། སྣ་ཁ་གཅིག་ནམ་ཟིན་ཟིན་ལ་འབད་དོ། །གཅིག་ལ་བསྒོམ་མ་ནུས་པར་མགོ་མང་པོ་བཟུང་སྟེ། རྒྱལ་པོའི་ཟས་ལྟར་སྣ་མང་པོ་སྤྲོས་ན་དོན་མི་འགྲུབ་པས། ལམ་འཇུག་ལྡོག་གི་གནད་མང་པོ་ཤེས་པར་བྱས་ཏེ། མྱོང་བ་གང་སྐྱེས་ལ་བློ་དྲིལ་ནས་འཇུག་ཅིང་། ལམ་གཞན་ལས་ལྡོག་གོ། །དེས་ན་ཡོན་ཏན་གྱི་སྣ་གཅིག་ནམ་ཟིན་བར་ལ་ཕུར་ཚུགས་གཅིག་ཏུ་འདྲིལ་དགོས་པ་ཡིན་ཏེ། ལམ་འོག་མ་ལམ་བསྟེན་ན་གོང་དུ་སྤོར་མི་ཐུབ་པའོ། །དེ་ལྟར་བྱས་བས་སྣ་ཟིན་ཅིང་མྱོང་བ་སྐྱེས་ཤིང་། ངོ་བོ་མཐོང་ནས་བོགས་འབྱུང་བ་ཡིན་ཏེ། ཞིང་ས་གཤིན་པོ་ལ་ས་བོན་གྲུང་པོ་ཐེབས་པ་བཞིན། མདོར་ན་ཡོན་ཏན་ཐམས་ཅད་འབྱུང་བའི་གཞི་ཉམས་ལེན་དྲག་པོ་ཡིན་ནོ། །གསུམ་པ་བོགས་རང་ཇི་ལྟར་འདོན་པ་ལ་གཉིས་ཏེ། རང་ལམ་གང་ལ་གནས་པ་དེ་ལ་བོགས་འདོན་པ་དང་། སྔར་མེད་གསར་དུ་སྐྱེས་པའི་ཉོན་མོངས་རྣམ་རྟོག་བོགས་སུ་འདོན་པའོ། །དང་པོ་ནི། རང་ལམ་གང་ལ་གནས་པ་དེ་ལ་བོགས་འདོན་པ། རང་གི་ལམ་ལ་བོགས་མེད་གཞན་གྱིས་འདོན། །ཞེས་པས། རང་ཐབས་ཀྱི་ཆོས་ལ་གནས་ཤིང་དེ་ལ་བོགས་མེད་ན། དངོས་པོ་དང་མཚན་མར་ཞེན་ནས་ཐབས་རྐྱང་དུ་སོང་བའི་སྐྱོན་ཡིན་པས། ཆོས་ཐམས་ཅད་རང་བཞིན་མེད་པར་ཤེས་རབ་ཀྱིས་བོགས་འདོན་ནོ། །རང་ཤེས་རབ་ཀྱི་ཆོས་ལ་གནས་ཤིང་དེ་ལ་བོགས་མེད་ན། ཤེས་རབ་རྐྱང་དུ་སོང་ནས་སྟོང་པ་ཕྱོགས་གཅིག་པར་གོལ་བའི་སྐྱོན་ཡིན་པས། རྒྱུ་འབྲས་ཀྱི་གནད་བལྟེམས་ལ་ཐབས་ཀྱི་ཆོས་ཀྱིས་བོགས་འདོན་ནོ། །དེ་བཞིན་དུ་རང་ཞི་གནས་ལ་གནས་ཤིང་བོགས་མ་བྱུང་ན། གནས་ལུགས་མ་གོ་བའི་སྐྱོན་ཡིན་པས་ཡིན་ལུགས་ངོ་སྤྲད་ལ་ལྷག་མཐོང་གི་བོགས་བཏོན། ལྷག་མཐོང་ལ་གནས་ཤིང་བོགས་མི་འདུག་ན། གནས་ཆ་ཡུན་ཐུང་བའི་སྐྱོན་ཡིན་པས། དྲན་པ་བསྟེན་ཅིང་ཞི་གནས་ཀྱིས་བོགས་འདོན་ནོ། །དེ་བཞིན་མཉམ་རྗེས་ལ་སོགས་པ་ཐམས་ཅད་ལ་ཤེས་པར་བྱའོ། །མདོར་ན་རྒྱུན་དུ་ཉམས་སུ་ལེན་པ་ནི། བོགས་ཐམས་ཅད་ཀྱི་གནད་དོ། །གཉིས་པ་སྔར་མེད་གསར་སྐྱེས་ལ་བོགས་འདོན་པ་ལ་གཉིས་ཏེ། ཉོན་མོངས་བོགས་སུ་འདོན་པ་དང་། རྣམ་རྟོག་བོགས་སུ་འདོན་པའོ། །དང་པོ་ནི། ཉོན་མོངས་བོགས་སུ་འདོན་པ། ཉོན་མོངས་གནད་ནས་བཟུང་ལ་ལམ་དུ་བཏང་། །ཞེས་པས། ཉོན་མོངས་མི་སྐྱེ་བ་ནི་མེད་ལ། རང་རྒྱུད་པ་ལམ་དུ་མི་འགྲོ་བས། སྐྱེས་པ་དེ་ཉིད་གནད་ནས་བཟུང་ཞིང་ལམ་དུ་བཏང་ལ་བོགས་འདོན་དགོས་སོ། །དེ་ལ་གསུམ་སྟེ། མ་ཐོངས་པའི་སྐྱོན། ཐོངས་པའི་ཡོན་ཏན། ཇི་ལྟར་བཏང་བའི་ཐབས་སོ། །དེ་ཡང་འདོད་ཆགས་ལྟ་བུ་གཅིག་ལ་སྦྱར་ན། སྐྱོན་ནི་མི་དང་མི་མ་ཡིན་པའི་འདོད་ཆགས་ཅན་གཞན་གྱི་དབང་དུ་བདག་འཆར་རོ། །འདོད་ཆགས་ཆེར་སྐྱེས་ཤིང་དེའི་ལས་གསོག །གྲང་ནད་འཇུག །མོ་གདོན་ལྟ། ཕྱི་མ་མངལ་གྱི་སྲིན་བུ་ལ་སོགས་པར་སྐྱེ་སྟེ། རྒྱུ་འབྲས་རྗེས་སུ་འགྲོ་ལྡོག་ངེས་པའོ། །གཉིས་པ་ཡོན་ཏན་ནི་འདོད་ཆགས་ཅན་གྱི་མི་དང་མི་མ་ཡིན་པ་ཐམས་ཅད་ཚུར་རང་གི་དབང་དུ་འདུ། བདེ་སྟོང་གི་ཏིང་ངེ་འཛིན་སྐྱེ། གྲང་བའི་ནད་འབྱང་། མོ་གདོན་ལས་གྲོལ། མོ་རིགས་སྲུང་མས་སྟོང་གྲོགས་བྱེད། ཕྱི་མ་བདེ་བ་ཅན་དུ་སྐྱེའོ། །གསུམ་པ་ལམ་དུ་བཏང་ཐབས་ནི། འདོད་ཆགས་དྲག་པོ་སྐྱེས་པའི་དུས་སུ་སྟན་དེའི་ཐོག །འཕྲུལ་འཁོར་དེའི་ཁོངས་སུ་ལམ་དུ་བཏང་དགོས་སོ། །དེ་ལ་གསུམ། ཕག་སྣར་རྡོ་མི་བརྡེག །ཀོང་བུ་དྲོ་བ་ལ་ཕྱི། དགྲ་ཟིན་མ་ཐག་ཏུ་བསད་པའོ། །དང་པོ་ནི། ཕག་སྣར། ཉོན་མོངས་དེ་རྩལ་རྫོགས་སུ་འཇུག་པ་ཡིན། གཉིས་པ་ནི། ཀོང་བུ། ལས་མ་བསགས་པ་ལ་ལམ་དུ་བཏང་བ་ཡིན། གསུམ་པ་དགྲ་ཟིན། ལ་གཉིས། གོ་དོན་ནི། སེམས་ཀྱི་ངོ་བོ་འདུས་མ་བྱས་ཀྱི་ཡེ་ཤེས་སུ་ཤར་བའི་དུས་ན་རྟེན་འབྲེལ་བསྒྲིག་པ་ཡིན་ནོ། །ཡེ་ཤེས་ཀྱི་གཞི་ལ་དེ་མེད་ན་ལམ་དུ་མི་འགྲོ་བ་ཡིན་ནོ། །མེ་ལོང་མ་དྭངས་ན་བྱད་མི་འཆར་བ་བཞིན་ནོ། །དེས་ན་ཉོན་མོངས་པ་དེ་རྩལ་རྫོགས། ལས་མ་བསགས། ངོ་བོ་ཡེ་ཤེས་སུ་ཤར་བའི་ངང་ལ་རྟོག་པ་གཞན་གྱིས་བར་མ་ཆོད་པ་གཅིག་གནད་ཆེའོ། །ཆོད་ན་རྟོག་པ་དེའི་མཐུར་སྨིན་ནོ། །དེའི་ཐོག་ནས་ལམ་དུ་བཏང་བས་བཟོད་ལམ་དུ་འགྲོ་བ་ཡིན་ཏེ། གསེར་འགྱུར་གྱི་རྩི་བཞིན་ནོ། །བཏང་ཐབས་དངོས་ནི། འདོད་ཆགས་ཀྱི་ངོ་བོ་ལ་བལྟས་ཤིང་ངང་ལ་བཞག་པས། བདེ་སྟོང་གཉིས་མེད་མི་རྟོག་ཡེ་ཤེས་ཀྱི་ངོ་བོར་ལྷན་ནེ་འཆར། དེའི་ངང་ནས་བྱམས་པ་སྙིང་རྗེ་བྱང་ཆུབ་ཀྱི་ལམ་དུ་བཏང་ངོ་། །དེ་ཡང་དང་པོ་སེམས་བསྐྱེད། བར་དུ་སྤྲོས་བྲལ་ལ་བཞག །ཐ་མ་བསྔོ་བའི་རྒྱས་གདབ་བོ། །དེའི་བྱེད་ལས་ནི། སེམས་བསྐྱེད་པས་ཐེག་ཆེན་གྱི་ལམ་དུ་འགྲོ། སྤྲོས་བྲལ་ལ་བཞག་པས་རྟོགས་པ་སྐྱེ། བསྔོ་བ་བྱས་པས་དགེ་བ་འཕེལ་བ་ཡིན་ནོ། །དེ་རེ་རེ་ལ་དང་པོ་སྐྱེས་ནས་ལམ་དུ་སོང་ཙམ་རེ་ཉམས་སུ་བླང་ངོ་། །སེམས་བསྐྱེད་ནས་བསྔོ་བའི་བར་ལ་རྟོག་པ་གཞན་གྱིས་བར་མ་ཆོད་པར་བྱའོ། །ཆོད་ན་ལམ་ང་མི་འགྲོའོ། །དེ་བཞིན་དུ། ཞེ་སྡང་། གཏི་མུག །ང་རྒྱལ། ཕྲག་དོག་ལྔ་ཀ་ལ་ཤེས་པར་བྱའོ། །ཐམས་ཅད་ཀྱི་གནད་ལ། གང་སྐྱེས་དེ་རྩལ་རྫོགས། ལས་མ་བསགས། ཡེ་ཤེས་སུ་ཤར། ངང་མ་ཤོར། རྟོག་པ་གཞན་གྱིས་བར་མ་ཆོད་པ་མ་ཡེངས་བ། ལ་ལམ་དུ་བཏང་བ་ཡིན་ནོ། །གཉིས་པ་རྣམ་རྟོག་བོགས་སུ་འདོན་པ་ནི། རྣམ་རྟོག་ལམ་དུ་བཏང་ལ་བོགས་སུ་འདོན། །ཞེས་པས། དེ་ལ་གཉིས་ཏེ། བཟང་རྟོག་དང་། ངན་རྟོག་གོ། །དང་པོ་ནི། བཟང་རྟོག །ཉམས་བཟང་བ། ཤེས་པ་འུར་བ། ལྷ་ལ་སོགས་པའི་མཐོང་སྣང་བྱུང་བ་ན། དེ་ལ་བཟང་པོར་བལྟས། ཡོན་ཏན་དུ་བཟུང་། རོ་མྱངས་ན་ཉམས་དེ་ཁོ་ནས་ཡལ་འགྲོ། བཏང་སྙོམས་སུ་བཞག་ན་བོགས་མི་འབྱུང་བས། དེ་ལ་བཟང་རྟོགས་མ་ཞུགས། ཡོན་ཏན་དུ་མ་ཞེན། རོ་མ་མྱོངས། ཡེ་ཤེས་སུ་ཤར། ངང་མ་ཤོར། རྟོག་པ་གཞན་གྱིས་བར་མ་ཆོད་པར་ལམ་དུ་བཏང་ངོ་། །གཏོང་ལུགས་གོང་དང་འདྲའོ། །གཉིས་པ་ནི་ངན་རྟོག་ཉམས་མི་དགའ་བ། ཤེས་པ་འཚུབ་པ། འདྲེ་སྣང་ལ་སོགས་པ་བྱུང་ན། དེ་ལ་ངན་པར་བལྟས། སྐྱོན་དུ་བཟུང་། རོ་མྱོངས་ན་བར་ཆད་དུ་འགྲོ་བས། ལམ་དུ་བཏང་ངོ་། །དེ་ལ་ངན་རྟོག་མ་ཞུགས། སྐྱོན་དུ་མ་ཞེན། རོ་མ་མྱངས། ཡེ་ཤེས་ཤར། ངང་མ་ཤོར། རྟོག་པ་གཞན་གྱིས་བར་མ་ཆོད་པར་ལམ་དུ་བཏང་། གཏོང་ལུགས་གོང་དང་འདྲའོ། །དེ་རྣམས་ལམ་གྱི་ཆ་རྐྱེན་ཡན་ལག་ཡིན། ཞེས་པས། དེ་དག་ལམ་གྱི་ཆ་རྐྱེན་ནོ། །ལམ་དེ་མཐར་ཕྱིན་མངོན་གྱུར་འབྲས་བུ་ནི། །ཞེས་པས། གསུམ་པ་ལམ་ཉམས་སུ་བླངས་ནས་མཐར་ཕྱིན་པའི་འབྲས་བུ་ལ་བཞི་སྟེ། འབྲས་ཆོས་ངོས་བཟུང་བ། འགྲོ་དོན་བྱེད་ཚུལ། དགོངས་པ་ལ་བཞུགས་ལུགས། གདུལ་བྱ་ཐུགས་རྗེས་གཟིགས་ཚུལ་ལ་གཞན་གྱིས་ལོག་རྟོག་བཟློག་པའོ། །དང་པོ་ནི། འབྲས་ཆོས་ངོས་བཟུང་བ། སྐུ་ལྔ་གསུང་ལྔ་ཐུགས་ཡོན་ཕྲིན་ལས་ལྔ། །ཞེས་པས། ལམ་སྒྲིབ་བྱེད་ཀྱི་དྲི་མ་དག་པའི་ཚེ། རང་བཞིན་ཡེ་ནས་སངས་རྒྱས་པའི་དོན་མངོན་དུ་བྱེད་པའོ། །དེ་ལ། དོན། རྟགས། ངོ་བོ། སྣང་ཚུལ་བཞི་སྟེ། དོན་གཉིས་མེད་ཀྱི་ཡེ་ཤེས་ཐུགས་སུ་ཆུད་པ། རྟགས་དྲུག་པ་རྡོ་རྗེ་འཆང་དུ་སྣང་བ། ངོ་བོ་རང་རིག་པ་རང་བྱུང་གི་ཡེ་ཤེས་གཅིག་དང་དུ་མ་དང་བྲལ་ཞིང་། མཐའ་གང་ལ་ཡང་མི་གནས་པ། སྣང་ཚུལ་འབྲས་བུའི་ཆོས་ཉེར་ལྔར་སྣང་སྟེ། གཞི་བརྟེན་པའི་སྐུ་ལྔ། གོ་བརྡར་སྤྲོད་པའི་གསུང་ལྔ། མཁྱེན་པའི་ཡེ་ཤེས་ཐུགས་རྗེ་ལྔ། དགོས་པ་འབྱུང་བའི་ཡོན་ཏན་ལྔ། གཞན་དོན་བྱེད་པའི་ཕྲིན་ལས་ལྔ་སྟེ། ལྔ་ལྔ་ཉི་ཤུ་རྩ་ལྔའོ། །དང་པོ་སྐུ་ལྔ་ནི། སྐྱེ་མེད་མཐའ་བྲལ་རྣམ་དག་གི་ཡེ་ཤེས་སྐུ་བཞིའི་རྟེན་བྱེད་པ་ནི་ཆོས་སྐུ། ཆོས་ཐམས་ཅད་སྣང་ལ་འཛིན་མེད་དུ་སྤྱོད་ཅིང་ཡོན་ཏན་རྫོགས་པའི་སྐུ་ལ་བརྟེན་ནས་སྤྲུལ་པའི་སྐུའི་རྟེན་བྱེད་པ་ལོངས་སྐུ། ཆོས་སྐུ་ལས་མ་གཡོས་བར་གདུལ་བྱའི་བློ་དང་མཐུན་པར་སྤྲུལ་ནས་གང་ལ་གང་འཚམས་སུ་སྟོན་པའི་ཡེ་ཤེས་ཡོན་ཏན་གྱི་རྟེན་བྱེད་པ་ནི་སྤྲུལ་པའི་སྐུ། སྟོང་རིག་དབྱེར་མི་ཕྱེད་པའི་ཡེ་ཤེས་དེ་ཁོ་ན་ཉིད་ཀྱི་རྟེན་བྱེད་པ་ནི་རྡོ་རྗེའི་སྐུ། ཆོས་ཐམས་ཅད་རང་རིག་པའི་ཡེ་ཤེས་ཡུལ་མེད་རང་རིག་གསལ་བ་ནི་མངོན་བྱང་གི་སྐུའོ། །གཉིས་པ་གསུང་ལྔ་ནི། བརྗོད་བྲལ་རྣམ་དག་གི་ཡེ་ཤེས་བསམ་བརྗོད་ཀྱི་གཞིར་གྱུར་པ་ནི་དོན་གྱི་གསུང་། སྐུ་མཐོང་བས་དོན་གྱི་བརྡའ་འཕྲོད་པའི་ཡེ་ཤེས་ནི་དགོངས་པ་བརྡའི་གསུང་། གདུལ་བྱའི་ངོར་ཚིག་རེ་རེས་དོན་རེ་གོ་བའི་ཐུགས་ཡེ་ཤེས་ལྔ་དང་ལྡན་པའི་བྱིན་རླབས་ཀྱིས་དོན་གསལ་བར་བྱེད་པ་ཚིག་གི་གསུང་། གྲགས་སྟོང་གཉིས་མེད་ཀྱི་གོ་བརྡ་འཕྲོད་པའི་ཡེ་ཤེས་ནི་རྡོ་རྗེའི་གསུང་། གསུང་དབྱངས་ཡན་ལག་དྲུག་ཅུས་རིགས་དྲུག་ལ་བརྡ་སྤྲོད་པ་སྒྲ་སྐད་ཐམས་ཅད་རང་རིག་པར་གསལ་བའི་ཡེ་ཤེས་ནི་མངོན་བྱང་གསུང་ངོ་། །གསུང་ལྔ་པོ་ལ་ཡང་ངོ་བོ་བརྡ་སྤྲོད་པ་གཅིག་ལ་བརྗོད་ཚུལ་རྟོགས་པ་ཐ་དད་དོ། །གསུམ་པ་ཐུགས་ལྔ་ནི། ཆོས་ཉིད་སྟོང་པ་མི་རྟོག་པའི་ཡེ་ཤེས་བདེ་བ་ཆེན་པོའི་ཐུགས། ཆོས་ཐམས་ཅད་གསལ་བར་མི་རྟོག་པའི་ཡེ་ཤེས་ནི་རྣམ་པར་མི་རྟོག་བའི་ཐུགས། ཆོས་ཉིད་གཉིས་སུ་མེད་པའི་ཡེ་ཤེས་ནི་མཉམ་པ་ཉིད་ཀྱི་ཐུགས། ཆོས་ཐམས་ཅད་སྣང་སྟོང་དབྱེར་མི་ཕྱེད་པའི་ཡེ་ཤེས་ནི་རྡོ་རྗེའི་ཐུགས། ཞེན་མེད་ཡེ་ཤེས་ཀྱིས་ལས་བཞིས་འགྲོ་དོན་མཛད་པ་ནི་འགྲོ་བ་སྒྲོལ་པའི་ཐུགས་སོ། །བཞི་པ་ཡོན་ཏན་ལྔ་ནི། ཞིང་ཁམས། གཞལ་ཡས། འོད་ཟེར། གདན་ཁྲི། རྒྱན་ཆའོ། །དེ་ཡང་དང་པོ་ཆོས་སྐུའི་ཞིང་ཁམས་ནི། དབྱིངས་རང་བཞིན་གྱིས་རྣམ་པར་དག་པའོ། །ལོངས་སྐུའི་རང་གསལ་འོད་ཀྱི་འཁོར་ལོའོ། །སྤྲུལ་སྐུའི་སྟོང་གསུམ་མི་མཇེད། རྡོ་རྗེ་དང་མངོན་བྱང་ལམ་བཤད། གཉིས་པ་གཞལ་ཡས་ནི། ཆོས་སྐུའི་འོག་མིན་ཆོས་ཀྱི་དབྱིངས། ལོངས་སྐུའི་རང་སྣང་ཡེ་ཤེས། སྤྲུལ་སྐུའིུ་རང་སྣང་དཀྱིལ་འཁོར། རྡོ་རྗེ་དང་མངོན་བྱང་ལམ་བཤད། གསུམ་པ་འོད་ཟེར། ཆོས་སྐུ་ལ་ཡེ་ཤེས་ལྔའི་འོད་ཟེར། ལོངས་སྐུ་ལ་ཡེ་ཤེས་ཀྱི་རང་མདངས་འོད་ལྔ་རུ་འབར་བ། སྤྲུལ་སྐུ་ལ་སྐུའི་གནས་རེ་རེ་ནས་ཀྱང་འོད་ཟེར་བྱེ་བ་བརྒྱ་སྟོང་ཕྲག་དྲུག་ཅུ་ཡོད་པར་གསུངས། བཞི་པ་གདན་ཁྲི་ནི། ཆོས་སྐུ་ལ་ལྟ་བ་ཁ་སྦྱོར། ལོངས་སྐུ་ལ་ཤེས་རབ་ཁ་སྦྱོར། སྤྲུལ་སྐུ་ཐུགས་རྗེ་ཁ་སྦྱོར་གྱི་གདན་ཁྲིའོ། །ལྔ་པ་རྒྱན་ཆ་ནི། ཆོས་སྐུ་ལ་སྐྱེ་མེད་རྣམ་དག་གི་རྒྱན། ལོངས་སྐུ་ལ་འགགས་མེད་རང་གསལ་གྱི་རྒྱན་ཏེ། ཐུན་མོང་མ་ཡིན་པའི་མཚན་དཔེ་དང་། རྟགས་ཀྱི་རྒྱན་བཅུ་སྟེ། དབུ་རྒྱན། སྙན་རྒྱན། མགུལ་རྒྱན། དོ་ཤལ། དཔུང་རྒྱན། ཕྱག་གདུབ་གཉིས། ཞབས་གདུབ་གཉིས། སེ་མོ་དོ་དང་བཅུའོ། །སྤྲུལ་སྐུའི་རྒྱན། ཐུན་མོང་གི་མཚན་དང་དཔེ་བྱད་དོ། །རྡོ་རྗེ་དང་མངོན་བྱང་ལ་མ་གསུངས་སོ། །ལྔ་པ་ཕྲིན་ལས་ལྔ་ནི། ཞི་རྒྱས་དབང་དྲག་མངོན་སྤྱོད་དེ། ལས་དང་ཉོན་མོངས་དགྲ་བགེགས་ཐམས་ཅད་མེད་པ་ནི་ཞི་བའི་ལས། ཚེ་དང་བསོད་ནམས་རང་རིག་པའི་ཡེ་ཤེས་རྒྱས་པར་སྟོན་པའི་རྒྱས་པ། སེམས་དང་རིག་པ་འཁོར་འདས་ཐམས་ཅད་དབང་དུ་འདུས་པ་ནི་དབང་། མི་མཐུན་པའི་དབྱིངས་ཐམས་ཅད་ཚར་གཅོད་པའི་དྲག་པོ། གནས་ལུགས་མངོན་དུ་གྱུར་པ་ནི་མངོན་སྤྱོད་ཀྱིའོ། །གཉིས་པ་དོན་བྱས་ཚུལ་ནི། རྟེན་ཅན་རྟེན་མེད་ངོ་བོ་ཉིད་དོན་བྱེད། །ཅེས་པས། རྟེན་ཅན་གྱིས་དོན་བྱེད་པ། རྟེན་མེད་ཀྱིས་དོན་བྱེད། ངོ་བོ་ཉིད་ཀྱིས་དོན་བྱེད་པ་གསུམ་ལས། དང་པོ་རྟེན་ཅན་གྱིས་དོན་བྱེད་པ་ནི། གཞི་ཆོས་སྐུ་གཉིས་སུ་མེད་པའི་ཡེ་ཤེས་ལ་བརྟེན་ནས། གདུལ་བྱ་དག་པ་ལ་ལོངས་སྐུ། མ་དག་པ་ལ་སྤྲུལ་སྐུ་མཛད་དེ། ཡེ་ཤེས་ཡོད་པའི་ལུགས་སོ། །གཉིས་པ་རྟེན་མེད་ཀྱི་མཛད་པ་ནི། སངས་རྒྱས་ལ་རང་རྒྱུད་ཀྱིས་བསྡུས་པའི་ཡེ་ཤེས་མེད་མོད་ཀྱང་། གདུལ་བྱའི་བློ་སྣང་དུ་གཟུགས་སྐུ་གཉིས་སུ་སྣང་ནས་དོན་མཛད་པ་སྟེ། ཡེ་ཤེས་མེད་པའི་ལུགས་སོ། །གསུམ་པ་ངོ་བོ་ཉིད་ཀྱི་མཛད་པ་ནི། ཆོས་ཐམས་ཅད་ཀྱི་ཆོས་ཉིད་གཤིས་ཅིར་ཡང་མ་ཡིན་པ་ལས། རྩལ་ཅིར་ཡང་མ་འགགས་པ་ཤར་ནས་མཛད་པ་སྟེ། གཉིས་མེད་ཀྱི་ལུགས་སོ། །དེ་ཡང་དོན་མཛད་པ་པོ། སྐུ་ལྔ་ལྷུན་གྲུབ་དྲུག་པ་རྡོ་རྗེ་འཆང་ངོ་། །སྐུ་ལྔ་ཡོན་ཏན་གྱི་ལྡོག་ཆ་ནས་ཕྱེའི། དངོས་པོ་ཐ་དད་ལྟར་བདེན་པ་ནི་མ་ཡིན་ནོ། །དེ་ཡང་རྡོ་རྗེ་དང་། མངོན་བྱང་གཉིས་ནི་སྐུ་གསུམ་གྱི་ཆ་ལས་བཏགས་པས་སྐུ་བརྟགས་པ་བ་ཡིན་ལ། ཆོས་སྐུ་ལོངས་སྐུ་སྤྲུལ་སྐུ་གསུམ་ནི་མཚན་ཉིད་པའོ། །དེ་ལའང་། ཆོས་སྐུ་ནི། བདག་དོན་དགོངས་པའི་ཆ་ཡིན་པས་འགྲོ་དོན་མི་མཛད་ལ། གཟུགས་སྐུ་གཉིས་ནི། གཞན་དོན་མཛད་པའི་ཆའོ། །དེ་ལ་གཉིས་ཏེ། གདུལ་བྱ་དག་པ་ས་བཅུའི་བྱང་ཆུབ་སེམས་དཔའ་ལ་སོགས་པ་ལོངས་སྐུས་དོན་མཛད། མ་དག་པ་རིགས་དྲུག་ལ་སྤྲུལ་སྐུས་དོན་མཛད་དོ། །དེ་ལ་བཞི། སྐུའི་དོན་མཛད་པ་ནི། མཛད་པ་བཅུ་གཉིས། ཐུགས་ཀྱི་མཛད་པ་ལ། མངོན་པར་ཤེས་པ་དྲུག །བསམ་གྱིས་མི་ཁྱབ་པའི་མཛད་པ་ནི། བསམ་གྱིས་མི་ཁྱབ་པ་བཞི། གསུང་གི་དོན་མཛད་པ་ལ་བཞི་སྟེ། དབྱེ་བ་ལ་དགོངས་ཏེ་མཛད་པ། གསུང་རབ་ཡན་ལག་བཅུ་གཉིས། བསྡུ་བ་ལ་དགོངས་ཏེ་མཛད་པ། སྡེ་སྣོད་གསུམ། གཉེན་པོ་ལ་དགོངས་ཏེ་མཛད་པ། སྤོང་སྦྱོང་ལམ་དུ་བྱེད་པ་གསུམ། རྒྱུ་འབྲས་ལ་དགོངས་ཏེ་མཛད་པ། སྔགས་མཚན་ཉིད་གཉིས་སོ། །གསུམ་པ་དགོངས་པ་བཞུགས་ཚུལ་ནི། གཅིག་དང་ཐ་དད་གཉིས་སུ་མེད་པར་བཞུགས། །ཞེས་པས། གཞི་བདེན་པ་དབྱེར་མེད་མཐའ་གང་ལ་ཡང་མི་གནས་ཤིང་གཅིག་དང་ཐ་དད་ལས་གྲོལ་བར་གནས་པ་དོན་མངོན་དུ་བྱས་པ་མཐར་ཐུག་གི་འབྲས་བུ་སངས་རྒྱས་ཐམས་ཅད་ཀྱི་དགོངས་པ་མཁྱེན་པ་གཉིས་ལྡན་གྱི་ཡེ་ཤེས། མཐའ་གང་ལ་ཡང་མི་གནས་ལ། གཅིག་དང་དུ་མ་དང་བྲལ་ཞིང་། གཅིག་དང་ཐ་དད་ལས་གྲོལ་བར་བཞུགས་སོ། །དེ་ཡང་ཀུན་ཏུ་བཟང་པོའི་ཡོན་ཏན་གྱི་ཁྱད་པར་ལས་འབྲས་ཆོས་ཉེར་ལྔར་སྣང་བས་གཅིག་དང་བྲལ་ལ། འབྲས་ཆོས་ཉེར་ལྔ་ཡང་ཀུན་ཏུ་བཟང་པོའི་ཐུགས་རང་བྱུང་ཡེ་ཤེས་གཅིག་ཏུ་འདུས་པས་དུ་མ་དང་བྲལ་བའོ། །ཡང་གདུལ་བྱའི་ངོ་བོ་ལ་དུས་གསུམ་སངས་རྒྱས་ལྟར་སྣང་བས་གཅིག་དང་བྲལ་ལོ། །དེ་དག་བདེན་པ་རང་རྒྱུད་དུ་མི་གནས་ཏེ་སྟོང་པ་བདག་མེད་དུ་གཅིག་པས་དུ་མ་དང་བྲལ་ལོ། །དགོངས་པ་གཅིག་ཏུ་བདེན་ན། རྟོག་ཚོགས་གནས་འགྱུར་རྫུན་དུ་འགྱུར། ཐ་དད་དུ་བདེན་ན། སངས་རྒྱས་གཅིག་ལ་སྤྲུལ་པ་དུ་མ་མི་འཆར་བར་འགྱུར། དེས་ན་གཅིག་དང་ཐ་དད་ལས་གྲོལ་བར་བཞུགས་སོ། །བཞི་པ་གདུལ་བྱ་གཟིགས་ཚུལ་ལ་གཞན་གྱི་ལོག་རྟོག་བཟློག་པ་ནི། གཟིགས་ཚུལ་གྲུབ་དང་མ་གྲུབ་བདེན་བརྫུན་བརྟག །ཅེས་པས། གཟིགས་ཚུལ། ཅེས་ནི་རང་གཞུང་སྟེ། གང་གཟིགས་ན་གདུལ་བྱ་སེམས་ཅན་གྱི་ཁམས་འདི་གཟིགས། གང་གིས་གཟིགས་ན་སྟོན་པ་སངས་རྒྱས་ཀྱི་ཐུགས་རྗེས། ཚུལ་ཇི་ལྟར་གཟིགས་པ་ལ་གསུམ་སྟེ། ཇི་ལྟ་བ་མཁྱེན་པའི་ཡེ་ཤེས་ཀྱིས་ཆོས་ཐམས་ཅད་མ་སྐྱེས་པར་གཟིགས། ཇི་སྙེད་མཁྱེན་པའི་ཡེ་ཤེས་ཀྱིས་ཆོས་ཐམས་ཅད་མ་འགགས་པར་གཟིགས། གཉིས་མེད་མཁྱེན་པའི་ཡེ་ཤེས་ཀྱིས་སྐྱེ་འགགས་གཉིས་སུ་མེད་པར་གཟིགས་སོ། །གྲུབ་དང་མ་གྲུབ་བདེན་བརྫུན་བརྟག །ཅེས་པ་ནི། གཞན་གྱི་ལོག་རྟོག་བཟློག་པ་སྟེ། འོ་ན་གཟིགས་པར་བྱ་་བའི་ཡུལ་སེམས་ཅན་གྱི་ཁམས་འདི་དག་སངས་རྒྱས་ཀྱི་ངོས་ནས་གྲུབ་བམ་མ་གྲུབ། དང་པོ་ལྟར་ན་འཁྲུལ་སྣང་འདི་དག་བདེན་དངོས་སུ་འགྱུར་ཏེ། ཡང་དག་གི་ཤེས་ངོར་གྲུབ་པའི་ཕྱིར། འདོད་ན། བརྫུན་པས་བསལ། གཉིས་པ་ལྟར་ན། སངས་རྒྱས་ལོག་ཤེས་ཅན་དུ་འགྱུར་ཏེ། མེད་པ་ལ་ཡོད་པར་གཟིགས་པའི་ཕྱིར། ཟླ་བ་གཉིས་འཛིན་གྱི་མིག་ཤེས་བཞིན་ནོ། །ཞེས་པས་ན། དངོས་པོ་རང་རྒྱུད་པར་བདེན་པར་ཐལ་བ་ནི། ཁྱབ་པ་མ་གྲུབ། བདེན་པ་དབྱེར་མེད་མཐའ་བྲལ་དུ་ཐལ་བ་ནི་འདོད་པ་ཡིན་ནོ། །གསུམ་པ་མཇུག་གི་དོན་ནི། གསང་སྔགས་བླ་མེད་ཐེག་པའི་མཆོག །ཡང་དག་ངེས་པ་དོན་གྱི་ཆོས། །ཚེ་གཅིག་སངས་རྒྱས་ཉེ་བའི་ལམ། །ཨེ་མ་ཡིད་བཞིན་ནོར་བུའོ། །འདི་དགེས་ལུས་ཅན་འགྲོ་བ་ཀུན། །རྡོ་རྗེ་ཐེག་པའི་སྒོར་ཞུགས་ཏེ། །རང་ཆས་རང་ངོ་ཤེས་གྱུར་ནས། །རྫོགས་པའི་སངས་རྒྱས་ཐོབ་པར་ཤོག །འགྲེལ་པ་རིན་ཆེན་ཕྲེང་བ་ཞེས་བྱ་བ། ཨོ་རྒྱན་པདྨ་འབྱུང་གནས་ཀྱིས་མཛད་པ་རྫོགས་སོ།། ༈ །།མདོ་སྔགས་ལམ་རིམ་མན་ངག་སྙིང་པོའི་བཅུད། །སངས་རྒྱས་གཉིས་པའི་ཞལ་གསུང་ཆོས་སྤེལ་དགེས། །བདག་ཅག་འབྲེལ་བཅས་སྐྱེ་ཀུན་རྗེས་བཟུང་སྟེ། །སྐུ་གསུམ་ཡེ་ཤེས་རང་རིག་མངོན་གྱུར་ཤོག །ཅེས་པའང་སློབ་དཔོན་མཚོ་སྐྱེས་རྡོ་རྗེས་ཚེ་རབས་རྗེས་འཛིན་སྨོན་རྟེན་དུ་ཞལ་གསུང་བཀའ་མ་སྐོར་འཚོལ་བསྡུ་དཔེ་སྐྲུན་བྱེད་པོ་པདྨ་ཀུན་གྲོལ་ནས་སྨོན་པ་དགེའོ།། །།མངྒ་ལམ།།

ཕྱི་ཆོས་མདོ་སྔགས་ཐུང་མོང་གི་ལམ་རིམ་རིན་ཆེན་སྤུངས་པ། སློབ་དཔོན་པདྨ།

ཕྱི་ཆོས་མདོ་སྔགས་ཐུན་མོང་གི་ལམ་རིམ་རིན་ཆེན་སྤུངས་པ་ཞེས་བྱ་བ་བཞུགས་སོ། །སློབ་དཔོན་རིན་པོ་ཆེ་པདྨ་འབྱུང་གནས་ཀྱིས་མཛད་པའོ། །བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། ༈ །ཤེས་བྱའི་ཡུལ་ལ་རྣམ་པར་བརྟག །ཐར་པའི་ལམ་ལ་རབ་ཞུགས་ཏེ། །འབྲས་བུ་རྣམ་མཁྱེན་ཐོབ་བྱེད་ཕྱིར། །རིན་ཆེན་སྤུངས་པ་བསྟན་པར་བྱ། ༈ །མཚན་ཉིད་དྲུག་ལྡན་བརྒྱུད་པ་ལྡན་ཞིང་གདམས་ངག་ཆེ། །དབང་དང་ལྡན་ཞིང་བྱིན་རླབས་ཆེ། །ཤེས་རབ་ལྡན་ཞིང་སྙིང་རྗེ་ཆེ། །ཐོས་པ་ལྡན་ཞིང་ཉམས་མྱོང་ཆེ། །ལྟ་བ་ལྡན་ཞིང་སྒོམ་གྱིས་ཟིན། །ཚིག་ལ་མཁས་ཤིང་དོན་ལ་གནས། །ཞེས་པ་སྟེ། བླ་མ་ནི། འདུ་ཤེས་བཞི་ལ། ཐུན་མོང་ཁྱད་པར། ཡང་དག །ལོག་བའི་འདུ་ཤེས་བཞི། དེ་རེ་རེ་ལའང་བཞི་བཞི་སྟེ། དང་པོ་ལ། འཁོར་བ་ཆུ་བོ། ཆོས་གྲུ། བླ་མ་མཉན་པ། ཉམས་ལེན་ཆུ་བརྒལ་བའི་ཚུལ་ལོ། །གཉིས་པ་ལ། རང་ནད་པ། བླ་མ་སྨན་པ། ཆོས་ལ་སྨན། ཉམས་ལེན་ནད་གསོ་བའི་འདུ་ཤེས་སོ། །གསུམ་པ་ལ། རང་དུག་ལྔའི་ནད་ཀྱིས་ཟིན་པ། བླ་མ་སངས་རྒྱས། གདམས་ངག་བདུད་རྩི། ཉམས་ལེན་དུག་ལྔ་སེལ་བའི་འདུ་ཤེས། བཞི་པ་ལ། རང་རྒྱལ་པོ། བླ་མ་ཚོང་པ། ཆོས་ཚོང་ཐོབ། ཉན་བཤད་ཚོང་གི་འདུ་ཤེས་ཏེ། དེ་རྣམས་ལས་ཕྱི་མ་བཞི་སྤང་ལ། སྔ་མ་རྣམས་དང། ལྡན་པའི་དྲན་པས་བསྟེན། སྣོད་ཀྱི་སྐྱོན་ཁ་སྤུབས། ཞབས་བརྡོལ། དུག་ཅན་གསུམ་སྤངས་ལ་བསྙེན། མཐོང་ལུགས་སངས་རྒྱས་ཐམས་ཅད་འདུས་པ། རྡོ་རྗེ་འཛིན་པའི་ངོ་བོ་དཀོན་མཆོག་གསུམ་གྱི་རྩ་བ། དཔེ་ནོར་བུ། དོན་སངས་རྒྱས་ལས་ཀྱང་ལྷག་པར་བལྟ་བ་སྟེ། ལྔ་ལྡན་སྒོ་ནས་ཕ་ལྟ། ༈ དལ་འབྱོར་མི་ལུས་རིན་པོ་ཆེ། །ཤིན་ཏུ་རྙེད་དཀའ་ཐོབ་དུས་སུ། །དོན་མེད་སྟོང་ལོག་མ་བྱེད་པར། །གཏན་གྱི་སོ་ནམ་ད་རེས་གྱིས། །ཕྱི་ཡི་མི་རྟག་དབྱར་༡༽དགུན་དུས་༢༽བཞི། ཉིན་༣༽མཚན། སྐྱེ་འགགས་གནས་༤༽ གསུམ། རྒྱུ་ཟག་པ་དང་མ་ཟད་པ་༥༽ཡང་མི་རྟག་པ་སྟེ། རྣམ་པ་ལྔ། །ནང་གི་མི་རྟག །ངེས་པར་༡༽འཆི། ནམ་འཆིའི་ཆ་༢༽མེད། འཆི་བའི་ཚེ་ཅིས་ཀྱང་མི་སྟོངས་༣༽ པ་སྟེ། རྣམ་པ་གསུམ། །ཚུལ་བདུན་ཅིས་ཀྱང་༡༽འཆི། སྐྱབས་གནས་༢༽མེད། ལམ་རྒྱུས་༣༽མེད། ཅིས་ཀྱང་༤༽མི་བཟློག །མགྱོགས་པར་༥༽འགྲོ །གཟུར་ས་༦༽མེད། ཤིན་ཏུ་ཡང་བར་༧༽འགྲོ་དགོས་པ་སྟེ། བསྟན་ལས་བསྒོམ་བྱ་ཞིང་། །ཕན་ཡོན་རྒྱུད་ལ་དད་༡༽ པ་སྐྱེ། བླ་མ་ལ་མོས་གུས་༢༽འབྱུང་། གདམས་ངག་ལ་ངེས་ཤེས་༣༽ སྐྱེ། ཉམས་ལེན་ལ་འཇུག་༤༽ནུས། སྟོང་ཉིད་རྟོགས་སླ་བ་༥༽སྟེ། ལྔ་ལྡན་སྒོ་ནས་འབད། །ཡུལ་དང་ལུས་དང་སེམས་གསུམ་ལ། །སྐྱེ་བོ་མུ་སྟེགས་ཉན་རང་གིས། །གང་ཟག་ཆོས་ཀྱི་བདག་ཏུ་བཟུང་། །བདག་འཛིན་མ་གྲུབ་བདག་མེད་སྟོང་། །རྩ་བའི་སྡུག་བསྔལ་བཞི་ལ་གནས། །ཡན་ལག་སྡུག་བསྔལ་དྲུག་ལ་སྤྱོད། །ཉིང་ལག་སྡུག་བསྔལ་བགྲང་ལས་འདས། །རང་སེམས་སྟོང་པ་ཉིད་དུ་སྤང་། །དགེ་སྡིག་གཉིས་ཀྱིས་རྒྱུ་བྱས་ནས། །འབྲས་བུ་བདེ་སྡུག་གཉིས་སུ་འབྱིན། །དགེ་སྡིག་སོ་མཚམས་ལེགས་པར་དབྱེ། །སྡིག་པ་སྟོབས་བཞིའི་སྒོ་ནས་བཤགས། ༈ །སངས་རྒྱས་ཆོས་དང་དགེ་འདུན་ལ། །ཉན་རང་བྱང་སེམས་གསང་སྔགས་གསུམ། །རང་དང་གཞན་དང་གཉིས་དོན་དུ། །སྐྱབས་འགྲོ་རྣམ་གསུམ་འདས་པའི་ཆོས། །སངས་རྒྱས་ཐོབ་འདོད་བསམ་པའི་དོན། །སྒྲུབ་ཅིང་ཉམས་སུ་ལེན་པ་དང་། །ཆོས་ཉིད་བློ་འདས་འདུས་མ་བྱས། །སེམས་བསྐྱེད་གསུམ་ཡིན་ཐེག་ཆེན་ཆོས། །སྡིག་པ་རྣམ་གསུམ་མི་བྱ་ཞིང་། །དགེ་བ་རྣམ་གསུམ་སྤྱད་པར་བྱ། །གནས་ལུགས་རང་ངོ་ཤེས་པ་ནི། །སྡོམ་གསུམ་སངས་རྒྱས་བསྟན་པ་ཡིན། །བྱམས་པའི་སེམས་ལ་ཞེ་སྡང་མེད། །སྙིང་རྗེའི་སེམས་ལ་འདོད་ཆགས་མེད། །བྱང་ཆུབ་སེམས་ལ་གཏི་མུག་མེད། །སེམས་གསུམ་སངས་རྒྱས་ཐུགས་དགོངས་ཡིན། །གནོད་སྦྱོར་ལོག་པ་ཚུལ་ཁྲིམས་ཏེ། །ཕན་འདོགས་ཞུགས་པ་ཏིང་འཛིན་ཡིན། །ཐབས་ཤེས་ཟུང་འཇུག་ཤེས་རབ་སྟེ། །བསླབ་གསུམ་སྡེ་སྣོད་གསུམ་ཡིན་ནོ། ༈ །རང་བྱུང་ངོ་བོ་ཉིད་ཀྱི་གཞི། །རང་བཞིན་སྐྱེ་མེད་སྟོང་པར་གནས། །རོལ་པ་འགག་མེད་སྣང་བ་འཆར། །ངོ་བོ་གཉིས་མེད་མཐའ་འབྲལ་ལ། །ངོ་མ་ཤེས་ལ་ལོག་པར་བརྟགས། །ཉོན་མོངས་ལྔ་དང་ལས་གསུམ་གྱིས། །རིགས་དྲུག་ལུས་བླངས་སྡུག་བསྔལ་མྱོང་། །མ་རིག་ནས་བརྩམ་རྒ་ཤིར་འཁོར། །ཡིན་ཚུལ་ཅིར་ཡང་མ་ངེས་པས། །སྣང་ཚུལ་ཅིར་ཡང་འཆར་བར་བྱེད། །སྣང་ཚད་སེམས་ཉིད་རང་སྣང་ཡིན། །རང་གྲོལ་རྟོགས་པ་ལྟ་བའོ། །སོ་མ་རང་བབས་ལྷུག་པར་བཞག །རྟོག་མེད་རང་གསལ་རྗེན་པར་འཆར། །སྣང་སེམས་དབྱེར་མེད་ངོ་བོ་གཅིག །གསལ་སྟོང་དབྱེར་མེད་བསྒོམ་པ་ཡིན། །རྐྱེན་སྣང་ཕྲ་རགས་མཐོ་དམན་ཀུན། །རྟོག་པ་སེམས་ཀྱི་ཆོ་འཕྲུལ་ཡིན། །ཞུམ་དང་ཁེངས་པ་མེད་པ་རུ། །ཞེན་མེད་རང་གྲོལ་སྤྱོད་པ་ཡིན། །གང་བྱེད་རང་སོ་ངང་ལ་གནས། །དེ་ཡི་ངོ་བོ་རང་གསལ་བ། །དེ་ཀ་སྟོང་པ་ཉིད་ཡིན་ཏེ། །སྟོང་པ་འགག་པ་མེད་པ་ཡིན། །མ་གྲུབ་མི་རྟོག་མི་འགག་པ། །རྣམ་དག་ལྷུན་གྲུབ་བདེན་གསུམ་དང་། །ལྟ་སྒོམ་སྤྱོད་པ་འབྲས་བུའི་ཆོས། །ཤེས་བྱ་ཀུན་ལྡན་ལ་བློ་ཡིན། ༈ །ངེས་པ་གཉིས་ཟད་གཞིའི་ངེས་པ་ཟད་དེ་གནས་ལུགས་མངོན་དུ་གྱུར། ལ མ་གྱི་ངེས་པ་ཟད་དེ་ལམ་མཐར་ཕྱིན་པའོ། །སྐུ་རུ་སྨིན། ཇི་ལྟ་ཇི་སྙེད་མཁྱེན་གསུམ་རྒྱས། །རྟེན་ཅན་རྟེན་མེད་ངོ་བོ་ཉིད། །གཅིག་དང་དུ་མ་བྲལ་བར་བཞུགས། ༈ །དགེ་བ་འདི་ཡི་བསོད་ནམས་ཀྱིས། །ནམ་མཁའ་མཉམ་པའི་སེམས་ཅན་རྣམས། །ཡང་དག་དོན་དང་རབ་མཇལ་ནས། །རྫོགས་པའི་སངས་རྒྱས་མྱུར་ཐོབ་ཤོག །རིན་ཆེན་སྤུངས་པ་རྫོགས་སོ། ༈ །ཕྱི་བཤད་རིན་ཆེན་སྤུངས་པའི་བསྡུས་དོན་བཞུགས་སོ། ༈ །བླ་མ་དམ་པ་རྣམས་ལ་ཕྱག་འཚལ་ལོ། །ཕྱི་བཤད་རིན་པོ་ཆེ་སྤུངས་པ་འདི་ལ། དོན་གསུམ་སྟེ། ཀླད་ཀྱི་དོན་དང་། གཞུང་གི་དོན་དང་། མཇུག་གི་དོན་ནོ། །དང་པོ་ལ་གཉིས་ཏེ། བཅོམ་ལྡན་འདས་དཔལ་ཕྱག་འཚལ་བ་དང་། བཤད་པར་དམ་བཅའ་བའོ། །དེ་ལ་བཞི་སྟེ། ཤེས་བྱའི་ཡུལ་ཤེས་བྱ་ལ་བརྟགས་པ་དང་། ཐར་བའི་ལམ་ལ་ཐར་བའི་ལམ་ལ་འཇུག་པ་དང་། འབྲས་བུ་རྣམ་མཁྱེན་འབྲས་བུ་ཐོབ་ཚུལ། རིན་ཆེན་སྤུངས་པ་མན་ངག་གི་མཚན་བསྟན་པའོ། །གཉིས་པ་གཞུང་དོན་ལ་གསུམ་སྟེ། དྲང་དོན་རྒྱུད་བསྐུལ་གྱི་གདམས་པ་དང་། ཐུན་མོང་གི་མན་ངག་དང་། ཁྱད་པར་རྫོགས་པ་ཆེན་པོའི་གདམས་ངག་གོ། །དང་པོ་ལ་དྲུག་སྟེ། བླ་མ་བསྟེན་པ་དང་། དལ་འབྱོར་བརྟག་པ་དང་། མི་རྟག་པ་བསྒོམ་ཚུལ་དང་། བདག་འཛིན་གཞོམས་པ་དང་། སྡུག་བསྔལ་བསམ་པ་དང་། རྒྱུ་འབྲས་དཔྱད་པའོ། །དང་པོ་ལ་བཞི། མཚན་ཉིད་དྲུག་ལྡན་བླ་མའི་མཚན་ཉིད་དང་། འདུ་ཤེས་བཞི་ལྡན་བསྟེན་ཐབས་དང་། སྣོད་ཀྱི་སྐྱོན་མཉན་ཚུལ་དང་། མཐོང་ལུགས་སམ་བཀུར་ཐབས་སོ། །གཉིས་པ་དལ་འབྱོར་བརྟགས་པ་ལ་བཞི། དལ་འབྱོར་མི་ལུས་དལ་འབྱོར་ངོས་བཟུང་བ་དང་། ཤིན་ཏུ་རྙེད་དཀའ་ཐོབ་པར་དཀའ་བར་བསམ་པ་དང་། དོན་མེད་སྟོང་ལོག་ཡལ་བར་མི་དོར་བ་དང་། གཏན་གྱི་སོ་ནམ་དོན་ཡོད་པར་བྱ་བའོ། །གསུམ་པ་མི་རྟག་པ་བསྒོམ་པ་ལ་བཞི། ཕྱིའི་མི་རྟག་ཕྱིའི་མི་རྟག་པ་ལྔ་དང་། ནང་གི་མི་རྟག་ནང་གི་མི་རྟག་པ་གསུམ་དང་། ཚུལ་བདུན་བསྟན་ལས་ཚུལ་ཇི་ལྟར་བསྒོམ་པ་དང་། ཕན་ཡོན་ལྔ་ལྡན་ཕན་ཡོན་གྱི་སྒོ་ནས་འབད་པའོ། །བཞི་པ་བདག་འཛིན་གཞོམ་པ་ལ་བཞི། ཡུལ་དང་ལུས་དང་གང་ལ་བདག་ཏུ་འཛིན་པ་དང་། སྐྱེ་བོ་མུ་སྟེགས་གང་གིས་བདག་ཏུ་འཛིན་པ་དང་། གང་ཟག་ཆོས་ཀྱི་བདག་ཇི་ལྟར་བདག་ཏུ་འཛིན་པ་དང་། བདག་འཛིན་མ་གྲུབ་བདག་འཛིན་བཀག་ལ་བདག་མེད་དུ་བསྟན་པའོ། །ལྔ་པ་སྡུག་བསྔལ་བསམ་པ་ལ་བཞི། རྩ་བའི་སྡུག་བསྔལ་རྩ་བའི་སྡུག་བསྔལ་བཞི་བསྟན་པ་དང་། ཡན་ལག་སྡུག་བསྔལ་ཡན་ལག་གི་སྡུག་བསྔལ་དྲུག་བསྟན་པ་དང་། ཉིང་ལག་སྡུག་བསྔལ་ཉིང་ལག་གི་སྡུག་བསྔལ་གྲངས་ལས་འདས་པར་བསྟན་པ། རང་སེམས་སྟོང་པ་སྡུག་བསྔལ་དེ་དག་སེམས་སུ་ངོ་སྤྲད་པའོ། །དྲུག་པ་རྒྱུ་འབྲས་དཔྱད་པ་ལ་བཞི། དགེ་སྡིག་གཉིས་ཀྱིས་རྒྱུ་ངོས་བཟུང་བ་དང་། འབྲས་བུ་བདེ་སྡུག་འབྲས་བུ་སྐྱེ་ཚུལ་བསྟན་པ་དང་། དགེ་སྡིག་སོ་མཚམས་དགེ་སྡིག་སོ་མཚམས་དབྱེ་བ་དང་། སྡིག་པ་སྟོབས་བཞིའི་སྡིག་པ་བཤགས་པའོ། ༈ །སྤྱི་དོན་གཉིས་པ་ཐུན་མོང་སྤྱིའི་གདམས་པ་ལ་ལྔ་སྟེ། སྐྱབས་འགྲོ་བྱ་བ་དང་། སེམས་བསྐྱེད་པ་དང་། སྡོམ་པ་བཟུང་བ་དང་། བྱང་སེམས་བསྒོམ་པ་དང་། བསླབ་པ་གསུམ་ལ་བློ་སྦྱོང་བའོ། །དང་པོ་ནི། སངས་རྒྱས་ཆོས་དང་སྐྱབས་འགྲོ་བྱ་བ་དང་། གཉིས་པ་ནི། སངས་རྒྱས་ཐོབ་འདོད་སེམས་བསྐྱེད་པའོ། །གསུམ་པ་སྡོམ་པ་བཟུང་བ་ལ་བཞི། སྡིག་པ་རྣམ་གསུམ་སོ་ཐར་སྡོམ་པ་དང་། དགེ་བ་རྣམ་གསུམ་བྱང་སེམས་སྡོམ་པ་དང་། གནས་ལུགས་རང་ངོ་གསང་སྔགས་ཀྱི་སྡོམ་པ་དང་། སྡོམ་གསུམ་སངས་རྒྱས་སྡོམ་གསུམ་སངས་རྒྱས་ཀྱི་བསྟན་པར་བསྟན་པའོ། །བཞི་པ་བྱང་སེམས་བསྒོམ་པ་ལ་བཞི། བྱམས་པའི་སེམས་ལ་བྱམས་པ་དང་། སྙིང་རྗེའི་སེམས་པ་སྙིང་རྗེ་དང་། བྱང་ཆུབ་སེམས་ལ་བྱང་ཆུབ་ཀྱི་སེམས་བསྒོམ་པ་དང་། སེམས་པ་གསུམ་སངས་རྒྱས་དེ་གསུམ་སངས་རྒྱས་ཀྱི་ཐུགས་དགོངས་སུ་བསྟན་པའོ། །ལྔ་པ་བསླབ་པ་སྦྱངས་པ་ལ་བཞི། གནོད་སྦྱོར་ལོག་པ་ལྷག་པ་ཚུལ་ཁྲིམས་ཀྱི་བསླབ་པ་དང་། ཕན་འདོགས་ཞུགས་པ་ལྷག་པ་ཏིང་ངེ་འཛིན་གྱི་བསླབ་པ་དང་། ཐབས་ཤེས་ཟུང་འཇུག་ལྷག་པ་ཤེས་རབ་ཀྱི་བསླབ་པ་དང་། བསླབ་གསུམ་སྡེ་སྣོད་དེ་གསུམ་སྡེ་སྣོད་གསུམ་དུ་བསྟན་པའོ། ༈ །སྤྱི་དོན་གསུམ་པ་ཁྱད་པར་རང་གི་མན་ངག་ལ་གསུམ་སྟེ། གཞི་དང་། ལམ་དང་། འབྲས་བུའོ། །དང་པོ་ལ་གཉིས་ཏེ། གནས་ལུགས་དང་། འཁྲུལ་ལུགས་སོ། །གནས་ལུགས་ལ་བཞི་སྟེ། རང་བྱུང་ངོ་བོ་རང་བྱུང་ངོ་བོ་ཉིད། རང་བཞིན་སྐྱེ་མེད་རང་བཞིན་སྐྱེ་མེད། རོལ་པ་འགགས་མེད་རོལ་པ་འགགས་མེད་དང་། ངོ་བོ་གཉིས་མེད་ངོ་བོ་མཐའ་འབྲལ་དུ་བསྟན་པའོ། །འཁྲུལ་ལུགས་ལ། ངོ་མ་ཤེས་ལ་རྒྱུ་དང་། ཉོན་མོངས་ལྔ་དང་རྐྱེན་དང་། རིགས་དྲུག་ལུས་བླངས་འབྲས་བུ་དང་། མ་རིག་ནས་བརྩ་བ་འཁོར་ཚུལ་ལོ། །གཉིས་པ་ལམ་གྱི་མན་ངག་ལ་ལྔ་སྟེ། མཐའ་ལ་མི་གནས་པའི་ལྟ་བ་དང་། རིག་པ་རང་ལུགས་ཀྱི་བསྒོམ་པ་དང་། འཁྲུལ་པ་རང་གྲོལ་གྱི་སྤྱོད་པ་དང་། འགྱུར་མེད་གནད་དུ་གཏང་བ་དང་། ལ་ཟླའི་མན་ངག་གོ། །དང་པོ་ལྟ་བ་ལ་བཞི་སྟེ། ཡིན་ཚུལ་ཅིར་ཡང་གནས་ལུགས་དང་། སྣང་ཚུལ་ཅིར་ཡང་འཆར་ལུགས་དང་། སྣང་ཚད་སེམས་ཉིད་ཡིན་ལུགས་དང་། རང་གྲོལ་རྟོགས་པ་གྲོལ་ལུགས་སོ། །གཉིས་པ་བསྒོམ་པ་ལ་བཞི་སྟེ། སོ་མ་རང་བབས་སེམས་ཀྱི་བཞག་ཐབས་དང་། རྟོག་མེད་རང་གསལ་ཉམས་ཀྱི་སྐྱེ་ཚུལ་དང་། སྣང་སེམས་དབྱེར་མེད་སྣང་བ་བསྒོམ་དུ་ངོ་སྤྲད་པ་དང་། གསལ་སྟོང་དབྱེར་མེད་རྟོགས་པ་བསྒོམ་དུ་ལ་བཟླ་བའོ། །གསུམ་པ་སྤྱོད་པ་ལ་བཞི་སྟེ། རྐྱེན་སྣང་ཕྲ་རགས་ཉམས་སྣང་ངོས་བཟུང་བ་དང་། རྟོག་པ་སེམས་ཀྱི་དེ་སེམས་སུ་བསྟན་པདང་། ཞུམས་དང་ཁེངས་པ་རོ་སྙོམས་པ་དང་། ཞེན་མེད་རང་གྲོལ་ཞེན་མེད་དུ་བསྐྱང་བའོ། །བཞི་པ་ལམ་གནད་དུ་བཏང་བ་ལ་བཞི་སྟེ། གང་བྱེད་རང་སོ་གནས་པ་ལ་སེམས་བཟུང་བ་དང་། དེ་ཡི་ངོ་བོ་གསལ་བས་མདངས་འདོན་པ་དང་། དེ་ཀ་སྟོང་པ་སྟོང་པར་རྒྱས་གདབ་པ་དང་། སྟོང་པ་འགག་པ་དབྱེར་མེད་དུ་གནད་ལ་དབབ་པའོ། །ལྔ་པ་ལ་བཟླ་བ་ལ་བཞི་སྟེ། མ་གྲུབ་མི་རྟོག་གནས་ལུགས་ངོ་སྤྲོད་པ་དང་། རྣམ་དག་ལྷུན་གྲུབ་དེ་གཞི་རུལ་བཟླ་བ་དང་། ལྟ་སྒོམ་སྤྱོད་པ་ལམ་དང་འབྲས་བུ་ལ་ལ་བཟླ་བ་དང་། ཤེས་བྱ་ཀུན་ལྡན་ཤེས་བྱ་ཀུན་ལྡན་དུ་ལ་བཟླ་བའོ། །གསུམ་པ་འབྲས་བུ་ལ་བཞི་སྟེ། ངེས་པ་གཉིས་ལྡན་རྟེན་སྐུ་བསྟན་པ་དང་། ཇི་ལྟ་ཇི་སྙེད་བརྟེན་པ་ཡེ་ཤེས་བསྟན་པ་དང་། རྟེན་ཅན་རྟེན་མེད་འགྲོ་དོན་མཛད་ཚུལ་དང་། གཅིག་དང་དུ་མ་དགོངས་པ་བཞུགས་ལུགས་སོ། །མཇུག་གི་དོན་ལ་གཉིས་ཏེ། དགེ་བ་འདི་ཡི་དགེ་བ་བསྔོ་བ་དང་། རིན་ཆེན་སྤུངས་པ་མཚན་རྫོགས་ཚུལ་ལོ། །ཕྱི་བཤད་རིན་སྤུངས་པའི་བསྡུས་དོན་རྫོགས་སོ། ༈ །ནང་བཤད་གསང་སྔགས་ལམ་རིམ་གྱི་ལོ་རྒྱུས་བཞུགས་སོ། ༈ །ན་མོ་རཏྣ་གུ་རུ། གསང་སྔགས་ལམ་རིམ་འདི་མཛད་པ་པོ་སློབ་དཔོན་ཆེན་པོ་པདྨ་འབྱུང་གནས་ཡིན་ཏེ། ཨོ་རྒྱན་པདྨ་འབྱུང་གནས་ཀྱིས། ཞེས་པས། དེ་ནི་སྐུ་ཆེ་བའི་ཡོན་ཏན་དཔག་ཏུ་མེད་པ་དང་ལྡན་ཞིང་། མན་ངག་རྩོམ་པའི་ཚད་དུ་ཕྱིན་པའོ། །དང་པོ་ནི། ནུབ་ཕྱོགས་ཨོ་རྒྱན་དུ་སྐུ་མེ་ཏོག་པདྨོ་ལས་བརྫུས་ནས་བྱོན་པས་མངལ་གྱི་སྒྲིབ་གཡོག་མེད་དེ། སྐྱེ་འཆི་དབང་དུ་འདུས་པས་སྐུ་ལ་འདས་གྲོང་མི་མངའ་འོ། །གསུང་གི་ཆེ་བ་ཆོས་ཀྱི་སྒོ་མོ་སྣ་ཚོགས་སུ་སྟོན་ཅིང་ངག་ལ་ནུས་པ་ཐོབ་པས་དྲེགས་པ་ཅན་ཐམས་ཅད་བཀའ་ཉན་པ་ལ་སོགས་པའོ། །ཐུགས་ཀྱི་ཆེ་བ་ཤེས་བྱའི་དཀྱིལ་འཁོར་མ་ལུས་པར་མཁྱེན་ཅིང་ཟག་པ་མེད་པའི་དགོངས་པ་དང་ལྡན་ཏེ་རྣམ་པར་མི་རྟོག་པའི་ཏིང་ངེ་འཛིན་ལ་བཞུགས་པ་ནི་མཁྱེན་པ་གཉིས་དང་ལྡན་ནོ། །སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་དང་ལྡན་ཏེ། དགོས་འདོད་འབྱུང་ཞིང་རེ་བ་སྐོང་བས་ཡོན་ཏན་གྱི་ཆེ་བའོ། །ཉོན་མོངས་པ་དང་རྣམ་པར་རྟོག་པ་ཐམས་ཅད་རང་སར་ཞི། ཚེ་དང་ནུས་པ་ཕྱོགས་མེད་དུ་རྒྱས་ཏེ། མི་དང་མི་མ་ཡིན་པ་ཐམས་ཅད་དབང་དུ་འདུས་ཤིང་། ལོག་ལྟ་གདུག་པ་ཅན་ཐམས་ཅད་ཚར་གཅོད་པ་ན་ཕྲིན་ལས་ཀྱི་ཆེ་བའོ། །དེ་དག་ནི་ཆེ་བའི་ལོ་རྒྱུས་ཟུར་ཙམ་བརྗོད་ཀྱིས། རྒྱས་པར་གཞན་དུ་བལྟའོ། །གཉིས་པ་མན་ངག་རྩོམ་པར་མཐར་ཕྱིན་པ་ནི། རབ་ཆོས་ཉིད་བདེན་པའི་དོན་མཐོང་བ་སྟེ་དངོས་པོའི་གནས་ལུགས་ཇི་བཞིན་རྟོགས་པའོ། །འབྲིང་ཡི་དམ་ལྷའི་ཞལ་གཟིགས་པ་སྟེ་ལོངས་སྤྱོད་རྫོགས་པ་སྐུ་ཡི་ཞིང་ཁམས་མངོན་སུམ་གཟིགས་ཤིང་ཡི་དམ་ཐམས་ཅད་ཀྱི་ཞལ་མཐོང་། ཐ་མ་མཚན་མའི་ལས་ལ་གཉེར་ཐོབ་པ་སྟེ། ཞི་རྒྱས་དབང་དྲག་གི་ལས་ཐམས་ཅད་ཐོགས་པ་མེད་པར་གྲུབ་བོ། །དེ་ལྟ་བུའི་བླ་མ་སྤྲུལ་སྐུ་པདྨ་འབྱུང་གནས་ཀྱིས་མཛད་པའོ། །ཨཐྎ། གདམས་ངག་རིན་པོ་ཆེ་གསལ་བའི་སྒྲོན་མ་འདི། དུས་གསུམ་སངས་རྒྱས་ཀུན་གྱི་གཤེགས་ཤུལ། སྡེ་སྣོད་ཀུན་གྱི་ལྡེའུ་མིག །རྒྱུད་ལུང་ཀུན་གྱི་སྙིང་པོ། མན་ངག་གནད་ཀྱི་སྙིང་ཁུ། ངེས་དོན་གནད་ཀྱི་ཊཱི་ཀ །སངས་རྒྱས་ཀུན་གྱི་ཐུགས་དགོངས། རྡོ་རྗེ་སེམས་དཔའི་གསང་ལམ། མུན་པ་སེལ་བའི་སྒྲོན་མེ། འཛུར་ས་མེད་པའི་འཕྲང་བགུགས། སངས་རྒྱས་ལག་ཏུ་གཏོད་པ། འཁོར་བ་དོང་ནས་སྤྲུགས་པའི་གསང་སྔགས་ལམ་གྱི་རིམ་པ་རིན་པོ་ཆེ་གསལ་བའི་སྒྲོན་མེ་ཞེས་བགྱི་བ་སྟོན་པར་བགྱིད་དོ། །གསང་སྔགས་ལམ་གྱི་རིམ་པ་རིན་པོ་ཆེ་གསལ་བའི་སྒྲོན་མེ་ཞེས་བྱ་བ་བཞུགས་སོ། །རྒྱ་གར་སྐད་དུ། མནྟ་སྱ་པ་ཐ་ཀྲ་མ་ནཱ་མ། བོད་སྐད་དུ། གསང་སྔགས་ལམ་གྱི་རིམ་པ་ཞེས་བྱ་བ། རྩ་བ་གསུམ་ལ་གུས་པས་ཕྱག་འཚལ་ལོ། །གཟུང་འཛིན་གཉིས་བཅོམ་མཁྱེན་པ་གཉིས་ལྡན་རྟག་ཆད་གཉིས་འདས་གཞི་དང་འབྲས་བུའི་གཉིས་དཔལ་མཆོག །སངས་རྒྱས་ཀྱི་དགོངས་པ། མ་ལུས་འདུས་ཤིང་སྤྱོད་ཡུལ་ཡང་དག་འཁྲུལ་པའི་ཟོལ་མེད་པ། །བཅོམ་ལྡན་བདེ་གཤེགས་དྲུག་པ་ཀུན་བཟང་ལ། །གུས་གདུང་དད་པའི་སྒོ་ནས་ཕྱག་འཚལ་ལོ། ༈ །བདག་ཉིད་རྣལ་འབྱོར་ཨོ་རྒྱན་པད་འབྱུང་གིས། །རྡོ་རྗེ་ཐེག་པ་ཚེ་གཅིག་གྲོལ་བྱེད་ལམ། །ཕྱི་རབས་རྣལ་འབྱོར་ལས་ལྡན་དོན་ཆེད་དུ། །ཉམས་ལེན་ལམ་རིམ་རིན་ཆེན་སྒྲོན་མེ་བྲི། ༈ །གནས་ལུགས་འཁྲུལ་ལུགས་ངོ་ཡིས་གཟུང་བ་ནི། །གཉིས་མེད་ལྷུན་གྲུབ་ཀ་དག་ཡེ་སངས་རྒྱས། །སྙིང་པོ་མ་རིག་ལས་ཉོན་ལོག་སྡུག་བསྔལ། ༈ །ཕུན་སུམ་ཚོགས་ལྔས་བསྒྲུབ་གཞི་བཟུང་བ་ནི། །བྲག་ནག་དུར་ཁྲོད་ཕུག་སོགས་སྐྱོན་ཡོན་བརྩི། །དད་གུས་དབང་དམ་ཤེས་རབ་གདིང་དང་ལྡན། །ཚེས་སྐར་གཟའ་བཟང་ཡར་ངོའི་སྔ་གོང་འཇུག །ཟས་སྨན་མཆོད་སྐོང་སྒྲུབ་པའི་རྫས་རྣམས་གསོག །མ་དྲེད་རྩེ་གཅིག་དཀའ་ཐུབ་མཐར་འདོན་ནོ། །རྣལ་འབྱོར་སྲུང་བའི་འཁོར་ལོའི་རིམ་པ་ནི། །ལུས་ཅན་རྣམས་ཀྱིས་བྱང་ཆུབ་མཆོག་ཐོབ་བསྒོམ། །ལྷ་མཚན་རྡོ་རྗེ་འཁོར་ལོ་མཚོན་མེས་བསྲུང་། །ལུས་ངག་སེམས་གསུམ་སྐུ་གསུང་ཐུགས་ཡིག་བསྒོམ། །སྤྱན་རས་འཇམ་དཔལ་ཡི་དམ་གང་ཡིན་གསལ། རྡོ་རྗེའི་ས་ར་གུར་དང་མདའ་མེ་བསྒོམ། །བྱ་བྱེད་ངོ་བོ་མི་དམིགས་ངང་ལ་བཞག ༈ །གནད་ལྔའི་སྒོ་ནས་ལམ་ལ་འཇུག་པ་ནི། །ཐུན་མོང་ཁྱད་པར་བླ་མེད་གསུམ་སྐྱབས་འགྲོ། །དཀར་དམར་ནག་གསུམ་བརྒྱ་བཟླས་མཆོད་དང་བསྐང་། །དལ་འབྱོར་ལས་འབྲས་མི་རྟག་ཉེས་དམིགས་བསྒོམ། །སྒྲུབ་དང་མཆོད་པའི་མཎྜལ་གཉིས་སུ་འབུལ། །སྣ་ཚོགས་ལམ་ཁྱེར་གཏོར་མས་ཚོགས་གཉིས་བསགས། རྒྱུན་གཏོར་གསུམ་བདུན་བཅུ་གཅིག་ལ་སོགས་བཏང་། །རྣམ་དག་བདུན་དང་ཕྱི་ནང་གསང་མཆོད་འབུལ། །དེ་རྣམས་གསང་སྔགས་ལམ་གྱི་སྔོན་འགྲོ་ཡིན། ༈ །བསླབ་པ་གསུམ་ལ་ལམ་གཞི་བཅའ་བ་ནི། །མི་མཐུན་སློང་སེམས་མཉམ་འཇོག་རང་ངོ་ཤེས། །ཤཱི་ལ་ས་མཱ་ཏི་པྲཛྙཱ་ཤིཀྵ་ཎ། །གནོད་སྦྱོར་ལོག་ཞུགས་ཁྱད་པར་ཐབས་ཀྱིས་ཟིན། །བདེན་པའི་དོན་མཐོང་གོམས་འདྲིས་དེ་མི་འདའ། །གཉེན་པོའི་དབང་གིས་བརྒྱད་ཁྲི་བཞི་སྟོང་གསུངས། །སེམས་གསུམ་སྒོ་ནས་ལམ་ལ་འཇུག་པ་ནི། །ཡིད་འོང་ཕ་མར་ཤེས་ཤིང་བདེ་ལྡན་བསྒོམ། །སེམས་ཅན་ཕ་མ་སྡུག་བསྔལ་བྲལ་བར་བསམ། །སངས་རྒྱས་ཐོབ་འདོད་བསམ་པ་ལེན་དང་སྒྲུབ། །སེམས་གསུམ་སྡེ་གསུམ་བསླབ་གསུམ་ཉམས་གསུམ་ཐུགས། ༈ །ཁྱད་པར་གསང་སྔགས་ལམ་གྱི་ངོ་བོ་ནི། །བུམ་གསང་ཡེ་ཤེས་བདེ་ཆེན་དབང་བཞི་བསྐུར། ༈ །ཕྱི་ནང་སྣོད་བཅུད་གཞལ་ཡས་ལྷ་རུ་བསྐྱེད། །སྐྱེ་འགགས་གཉིས་མེད་རང་བྱུང་མཐའ་ལས་འདས། ༈ །གནད་གསུམ་གཅུན་པས་རྟོག་མེད་རང་གསལ་འཆར ། ༈ །སོ་སྤྱི་བོགས་གསང་ཡང་དག་ཁོ་ནར་སྤྱོད། ༈ །མཉམ་རྗེས་བཟའ་བཅང་བསྲུང་བའི་དམ་ལྔ་དབོག །དེ་རྣམས་གསང་སྔགས་ལམ་གྱི་ངོ་བོ་ཡིན། ༈ །རྣལ་འབྱོར་ལྔ་ཡིས་ཉམས་སུ་བླངས་པ་ནི། །རྟོག་མེད་ཆོས་སྐུར་ཉལ་ལ་འཆི་རྟོག་སྦྱང་། །འགག་མེད་ལོངས་སྐུར་ལངས་ཏེ་སྐྱེ་རྟོག་སྦྱང་། །དབང་བཞིས་བདུད་རྩིར་བརླབས་ལ་བཟའ་བཏུང་རོལ། །སྣ་ཚོགས་ཐབས་ཀྱིས་བཟུང་ལ་ལམ་དུ་བཏང་། །དྲོད་སྲོད་སྐྱེས་ཤར་འདའ་ཀ་བར་དོ་བལྟེམ། ༈ །ལམ་དེའི་གེགས་བཞིའི་སྐྱོན་བསལ་བསྟན་པ་ནི། །བྱིང་རྒོད་ཉམས་གསུམ་བཅོས་ལ་ལམ་དུ་བཏང་། །ནད་ཀྱི་གཞི་རྒྱུ་རྐྱེན་འབྲས་ངོས་བཟུང་བཅོས། །སྤྲོས་བྲལ་ངང་བཞག་རྒྱུན་ཆད་སྐྱི་དང་སེལ། །གནོད་པའི་ཟས་བཟའ་འཕྲིག་བཅད་ལྟོས་མེད་བསྒྱུར། །དཀར་དམར་ནག་པོའི་ཧཱུྃ་འཕྲོས་སྟེང་འོག་གདོན། །རང་ལས་གཞན་མེད་ཡང་འཁུ་འཕྲིག་བཅད། །དམ་ཉམས་གྲོགས་གནས་ཟས་ཀྱི་གྲིབ་བཞི་བསལ། ༈ །ལམ་དེའི་བོགས་འདོན་གནད་དུ་བཏང་བ་ནི། །སྐྱོན་གྱི་རྩ་བ་བདག་འཛིན་བློ་ཡིས་བཏང་། །ཡོན་ཏན་གཞི་མ་ཉམས་ལེན་དྲག་པོ་བྱ། །རང་གི་ལམ་ལ་བོགས་མེད་གཞན་གྱིས་འདོན། །ཉོན་མོངས་གནད་ནས་གཟུང་ལ་ལམ་དུ་བཏང་། །རྣམ་རྟོག་ལམ་དུ་བཏང་ལ་བོགས་སུ་འདོན། །དེ་རྣམས་ལམ་གྱི་ཆ་རྐྱེན་ཡན་ལག་ཡིན། ༈ །ལམ་དེ་མཐར་ཕྱིན་མངོན་གྱུར་འབྲས་བུ་ནི། །སྐུ་ལྔ་གསུང་ལྔ་ཐུགས་ཡོན་ཕྲིན་ལས་ལྔ། །རྟེན་ཅན་རྟེན་མེད་ངོ་བོ་ཉིད་དོན་བྱེད། །གཅིག་དང་ཐ་དད་གཉིས་སུ་མེད་པར་བཞུགས། །གཟིགས་ཚུལ་གྲུབ་དང་མ་གྲུབ་བདེན་བརྫུན་བརྟག ༈ །ཚེ་འདིར་སངས་རྒྱས་ཐོབ་བྱེད་ཉེ་བའི་ལམ། །རང་མཚན་མངོན་དུ་སྟོན་པ་ངེས་པའི་ཆོས། །ཐབས་དང་ཤེས་རབ་གཉིས་ལྡན་ཤིང་རྟའི་སྲོལ། །ཕམ་བྱེད་རྒྱལ་འགྱུར་བླ་མེད་ཐེག་མཆོག་གོ། ༈ །འདི་སྦྱར་དགེ་བ་དྲི་མེད་རྣམ་དག་གིས། །ལུས་ཅན་ཐམས་ཅད་སྨིན་གྲོལ་ལམ་ཞུགས་ཏེ། །རང་ཆས་ཤེས་རྟོགས་སྒྲིབ་དག་ཉེས་ཟད་ནས། །ཡང་དག་རྫོགས་པའི་སངས་རྒྱས་མྱུར་ཐོབ་ཤོག །གསང་སྔགས་ལམ་གྱི་རིམ་པ་རིན་པོ་ཆེ་གསལ་བའི་སྒྲོན་མེ་ཞེས་བྱ་བ། ཨོ་རྒྱན་གྱི་སློབ་དཔོན་ཆེན་པོ་པདྨ་སཾ་བྷ་ཝས་མཛད་པ་རྫོགས་སོ། །རིག་འཛིན་རྗེའི་ཕྱག་བྲིས་དཔེ་ལྟར་ཞུས་སོ། །ནང་བཤད་གསང་སྔགས་ལམ་རིམ་ས་བཅད་བཞུགས་སོ། ༈ །དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ནང་བཤད་གསང་སྔགས་ལམ་གྱི་རིམ་པ་འདི་ལ་དོན་གསུམ་སྟེ། ཀླད་ཀྱི་དོན་དང་། གཞུང་གི་དོན་དང་། མཇུག་གི་དོན་ནོ། །དང་པོ་ལ་གཉིས་ཏེ། གཉིས་བཅོམ་གཉིས་ལྡན་ཕྱག་འཚལ་བ་དང་། བདག་ཉིད་རྣལ་འབྱོར་རྩོམ་པར་དམ་བཅའ་བའོ། །གཞུང་དོན་ལ་གསུམ་སྟེ། གཞི། ལམ། འབྲས་བུའོ། །གཞུང་གི་སྤྱི་དོན་དང་པོ་གཞི་ལ་གཉིས་ཏེ། གནས་ལུགས་འཁྲུལ་ལུགས་ལ། གཉིས་མེད་ལྷུན་གྲུབ་གནས་ལུགས་དང་། སྙིང་པོ་མ་རིག་འཁྲུལ་ལུགས་སོ། །གཞུང་གི་སྤྱི་དོན་གཉིས་པ་ལམ་ལ་གསུམ་སྟེ། ལམ་གྱི་སྔོན་དུ་འགྲོ་བ་དང་། ལམ་རང་གི་ངོ་བོ་དང་། ལམ་གྱི་ཆ་རྐྱེན་བསྟན་པའོ། །དང་པོ་ལ་གསུམ་སྟེ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ་དང་། བསྲུང་བའི་འཁོར་ལོའི་རིམ་པ་བསྟན་པ་དང་། གནད་ལྔའི་སྒོ་ནས་ལམ་ལ་འཇུག་པར་བསྟན་པའོ། །དང་པོ་ལ་ལྔ་སྟེ། ཕུན་སུམ་ཚོགས་པ་ལྔས་གནས་གང་དུ་དང་། དད་གུས་དབང་དམ་གང་ཟག་གང་གིས་དང་། ཚེས་སྐར་གཟའ་བཟང་དུས་གང་ལ་དང་། ཟས་སྨན་མཆོད་སྐོང་རྫས་གང་བསགས་པ་དང་། མ་དྲེད་རྩེ་གཅིག་ཐབས་ཇི་ལྟར་བསྒྲུབ་པའོ། །གཉིས་པ་བསྲུང་འཁོར་ལ་དྲུག་སྟེ། རྣལ་འབྱོར་སྲུང་བའི་བྱང་ཆུབ་སེམས་ཀྱི་སྲུང་བ་དང་། ལྷ་མཚན་རྡོ་རྗེ་མཚོན་ཆ་ལྔའི་སྲུང་བ་དང་། ལུས་ངག་སེམས་གསུམ་ཡི་གེ་གསུམ་གྱི་སྲུང་བ་དང་། སྤྱན་རས་འཇམ་དཔལ་ཞི་དྲག་གསུམ་བརྩེགས་ཀྱིས་སྲུང་བ་དང་། རྡོ་རྗེ་ར་བས་རང་བྱུང་ལྷུན་གྱིས་གྲུབ་པའི་སྲུང་བ་དང་། བྱ་བྱད་ངོ་བོ་དོན་དམ་མཚན་མ་མེད་པའི་སྲུང་བའོ། །གསུམ་པ་གན ད་ལྔས་ཐེག་ཆེན་ལམ་དུ་འཇུག་པ་ལ་ལྔ་སྟེ། གནད་ལྔའི་སྒོ་ནས་སྐྱབས་འགྲོས་ཆོས་ཀྱི་གཞི་གཏིང་བ་དང་། དཀར་དམར་ནག་གསུམ་ཡིག་བརྒྱས་སྒྲིབ་པ་སྦྱང་བ་དང་། དཔལ་འབྱོར་ལས་འབྲས་ལས་འབྲས་མི་རྟག་པ་སྒོམ་པ་ལ་བློ་སྦྱངས་པ་དང་། སྒྲུབ་དང་མཆོད་པའི་མཎྜལ་དང་། སྣ་ཚོགས་ལམ་ཁྱེར་གཏོར་མ་བཏང་བས་ཚོགས་བསགས་པ་དང་། རྣམ་དག་བདུན་དང་། མཆོད་པ་ཕུལ་ལ་ཚོགས་གཉིས་ཡོངས་སུ་སྤེལ་བའོ། །གཉིས་པ་ལམ་རང་གི་ངོ་བོ་ལ་གཉིས་ཏེ། ཐུན་མོང་སྤྱི་ཡི་ལམ་དང་། ཁྱད་པར་གསང་སྔགས་ཀྱི་ལམ་མོ། །དང་པོ་ལ་གཉིས་ཏེ། བསླབ་པ་གསུམ་ལ་ལམ་གྱི་གཞི་བཅའ་བ་དང་། སེམས་གསུམ་གྱིས་ལམ་གྱི་ཁ་བསྒྱུར་བའོ། །དང་པོ་ལ་ལྔ་སྟེ། བསླབ་པ་གསུམ་ལ། ངོ་བོ་ངོས་བཟུང་བ་དང་། ཤཱི་ལ་ས་མཱ་མཚོན་བྱའི་སྒྲ་དོན་བཤད་པ་དང་། གནོད་སྦྱིན་ལོག་ཞུགས་མཚོན་བྱེད་ཀྱི་རང་ལྡོག་བསྟན་པ་དང་། བདེན་པའི་དོན་མཐོང་མཚན་གཞི་སྐྱེ་ཚུལ་དང་། གཉེན་པོའི་དབང་གིས་གཉེན་པོའི་སྒོ་ནས་རྣམ་གྲངས་སུ་འགྱུར་ཚུལ་ལོ། །གཉིས་པ་སེམས་གསུམ་གྱིས་ལམ་གྱི་ཁ་བསྒྱུར་བ་ལ་བཞི་སྟེ། སེམས་གསུམ་སྒོ་ནས་བྱམས་པ་དང་། སེམས་ཅན་ཕ་མ་སྙིང་རྗེ་དང་། སངས་རྒྱས་ཐོབ་འདོད་བྱང་ཆུབ་ཀྱི་སེམས་དང་། སེམས་གསུམ་སྡེ་གསུམ་དེ་དག་སྡེ་སྣོད་གསུམ་དུ་ངོས་བཟུང་ལ་བསླབ་པ་གསུམ་དུ་བསྟན་པའོ། །གཉིས་པ་གསང་སྔགས་རང་གི་ལམ་ལ་ལྔ་སྟེ། ཁྱད་པར་གསང་སྔགས་རྒྱུད་སྨིན་པར་བྱེད་པ་དབང་དང་། འོག་ཏུ་འཆད་དོ། །སྨིན་པ་གྲོལ་བར་བྱེད་པ་ལ་ལྟ་བ་དང་། གནད་གསུམ་གཅུན་པས་ལྟ་བ་གོམས་པར་བྱེད་པ་ལ་བསྒོམ་པ་དང་། སོ་སྤྱིའི་བོགས་གསང་དེ་དང་མི་འབྲལ་ཤིང་རྩལ་སྦྱོང་བ་ལ་སྤྱོད་པ་དང་། མཉམ་རྗེས་བཟའ་བཅའ་དེ་དག་ལས་མི་འདའ་བར་བྱེད་པ་ལ་དམ་ཚིག་གོ། །གཉིས་པ་ལྟ་བ་ལ་གཉིས་ཏེ། ཕྱི་ནང་སྣོད་བཅུད་བསྐྱེད་རིམ་སྦྱང་པ་དང་། སྐྱེ་འགགས་གཉིས་མེད་རྫོགས་རིམ་བསྟན་པའོ། །གསུམ་པ་དེའི་ཆ་རྐྱེན་བསྟན་པ་ལ་གསུམ་སྟེ། རྣལ་འབྱོར་ལྔའི་ལམ་ཉམས་ལེན་གྱི་གནད་བསྟན་པ་དང་། གེགས་སེལ་བཞིས་ལམ་གྱི་རྐྱེན་བསལ་བ་དང་། བོགས་འདོན་བཞིས་ལམ་མཐར་འདོན་པའོ། །དང་པོ་ལ་ལྔ་སྟེ། རྣལ་འབྱོར་ལྔས་རྟོག་མེད་ཆོས་སྐུར་ཉལ་བའི་རྣལ་འབྱོར་དང་། འགག་མེད་ལོངས་སྐུར་ལྡང་བའི་རྣལ་འབྱོར་དང་། དབང་བཞིས་བདུད་རྩིར་ཟ་བའི་རྣལ་འབྱོར་དང་། སྣ་ཚོགས་ཐབས་ཀྱིས་རྒྱུན་གྱི་རྣལ་འབྱོར་དང་། དྲོད་བྲོད་སྐྱེས་ཤར་དུས་གནད་ཀྱི་རྣལ་འབྱོར་རོ། །གཉིས་པ་ལམ་གྱི་གེགས་བསལ་བ་ལ་བཞི་སྟེ། ལམ་དེའི་གེགས་བཞི་བྱིང་རྒོད་ཉམས་གསུམ་ཏིང་ངེ་འཛིན་ཉམས་ཀྱི་གེགས་བསལ་བ་དང་། ནད་ཀྱི་གཞི་རྒྱུ་ལུས་ན་ཚ་སྡུག་བསྔལ་གྱི་གེགས་བསལ་བ་དང་། རང་ལས་གཞན་མེད་སེམས་རྣམ་རྟོག་ལྷ་འདྲེའི་གེགས་བསལ་བ་དང་། དམ་ཉམས་གྲོགས་གནས་རྐྱེན་སྣང་གློ་བུར་གྲིབ་ཀྱི་གེགས་བསལ་བའོ། །གསུམ་པ་ལམ་གྱི་བོགས་འདོན་པ་ལ་གསུམ་སྟེ། ལམ་དེའི་བོགས་འདོན། སྐྱོན་གྱི་རྩ་བ་བོགས་མི་འབྱུང་བའི་སྐྱོན་བསལ་བ་དང་། ཡོན་ཏན་གཞི་མ་འབྱུང་བའི་གཞི་བཅའ་བ་དང་། བོགས་ཇི་ལྟར་འདོན་པའི་ཐབས་སོ། །དེ་ལ་གཉིས་ཏེ། རང་གི་ལམ་ལ་རང་ལམ་ལ་གནས་པ་དེ་ལ་བོགས་འདོན་པ་དང་། སྔར་མེད་གསར་དུ་སྐྱེས་པའི་ཉོན་མོངས་པ་རྣམ་རྟོག་བོགས་སུ་འདོན་པའོ། །དེ་ལ་གཉིས་ཏེ། ཉོན་མོངས་གནད་ཀྱིས་ཉོན་མོངས་བོགས་སུ་འདོན་པ་དང་། རྣམ་རྟོག་ལམ་དུ་རྣམ་རྟོག་བོགས་སུ་འདོན་པའོ། །གཞུང་གི་སྤྱི་དོན་གསུམ་པ། ལམ་ཉམས་སུ་བླང་ནས་མཐར་ཕྱིན་པའི་འབྲས་བུ་ལ་བཞི་སྟེ། ལམ་དེའི་མཐར་ཕྱིན། སྐུ་ལྔ་གསུམ་ལྔ་འབྲས་ཆོས་ངོས་བཟུང་བ་དང་། རྟེན་ཅན་རྟེན་མེད། འགྲོ་དོན་བྱེད་ཚུལ་དང་། གཅིག་དང་ཐ་དད་དགོངས་པ་ལ་བཞུགས་ལུགས་དང་། གཟིགས་ཚུལ་གྲུབ་དང་གདུལ་བྱ་ལ་ཐུགས་རྗེས་འཛིན་ཚུལ་ལ་གཞན་གྱི་ལོག་རྟོག་དགག་པའོ། །སྤྱི་དོན་གསུམ་པ་མཇུག་གི་དོན་ལ་གསུམ་སྟེ། ཚེ་འདིར་སངས་རྒྱས་ཆོས་ཀྱི་ཆེ་བ་བསྟན་པ་དང་། འདི་སྦྱར་དགེ་བ་དགེ་བ་ཐམས་ཅད་མཁྱེན་པར་བསྔོ་ཞིང་། གསང་སྔགས་ལམ་གྱི་རིམ་མཚན་རྫོགས་ཚུལ་དང་བཅས་པ་བསྟན་པའོ། །ནང་བཤད་གསང་སྔགས་ལམ་རིམ་གྱི་བསྡུས་དོན་རྫོགས་སོ། ༈ །གསང་སྔགས་ལམ་རིམ་གྱི་སྙིང་པོ་སེམས་ཉིད་གཅེར་སྟོན་ལག་ཁྲིད་ལྔ་པ་བཞུགས་སོ། ༈ །བླ་མ་དམ་པ་རྣམས་ལ་ཕྱག་འཚལ་ལོ། །གུ་རུ་པདྨ་འབྱུང་གནས་ཀྱི་མཛད་པའི་མན་ངག །སེམས་ཉིད་གཅེར་སྟོན་གྱི་ལག་ཁྲིད་འདི་ལ་ལྔ་སྟེ། དང་པོ་རང་སེམས་ལྟ་རུ་གཞུག་པ། གཉིས་པ་མ་མཐོང་ན་སེམས་ངོ་བསྟན་པ། གསུམ་པ་མཐོང་བའི་དོན་ངོ་སྤྲོད་པ། བཞི་པ་དེའི་རྒྱབ་སྐྱོར་བ། ལྔ་པ་ལ་བཟླ་བའོ། །དང་པོ་ནི། རང་གི་སེམས་གང་ཡིན་ལྟོས་ལ། ལན་ཅིག་ཁྱེར་ལ་ཤོག །བྱས་པས། སེམས་སྟོང་པ་ཉིད་ལྟ་རྒྱུ་མེད་པ་གཅིག་འདུག །ཟེར་ན། མ་མཐོང་བ་ཡིན། སྣང་བ་ཐམས་ཅད་སེམས་སུ་འདུག །ཟེར་ནའང་། སེམས་ཀྱི་སྤྱི་རིག་ཙམ་མཐོང་བ་ཡིན་གྱིས། ད་ལྟ་བའི་རང་སེམས་ངོས་མ་ཟིན་པ་ཡིན། ནམ་མཁའ་དང་ས་གཞི་རི་བོ་ལ་སོགས་པ་གང་ནས་བཙལ་ཡང་མི་རྙེད་དོ། །གཉིས་པ་སེམས་ངོ་བསྟན་པ་ནི། སེམས་ཀྱི་སྤྱི་རིག་ཙམ་གྱིས་མཐོང་བའི་གོ་མི་ཆོད་དོ། །ད་ལྟ་གང་ཤར་དེ་ངོས་ཟིན་དགོས་པ་ཡིན། ད་ཐབས་སྒྲ་དེ་སེམས་སུ་ཤར་བ་ཡིན་ཏེ། ངས་སེམས་གང་ཡིན་ལྟོས་ཤིག་བྱས་པ་ཁྱོད་ཀྱི་སེམས་སུ་ཤར་བ་ཡིན་ཏེ། ཁྱོད་རང་གང་ཡིན་ལྟ་བ་པོ་དེ་རང་སེམས་ཡིན་ནོ། །བྱས་ལ། མ་དང་བུའི་དཔེས་ངོ་སྤྲད་དོ། །དེ་ཡང་སེམས་ལ་ལྟོས་ཤིག་ཅེས་པའི། སྒྲ་དེས་སེམས་ལ་ཚུར་བལྟས་སམ། སེམས་ཀྱིས་སྒྲ་ཕར་བཟུང་ངམ། སྒྲ་སེམས་དབྱེར་མེད་དུ་འདུག་ལྟོས་ཤིག །བྱས་ལ་དྲི། སྔ་མ་གཉིས་པོ་ལྟར་ཟེར་ན། མ་གོ་བ་ཡིན། དབྱེར་མེད་དུ་འདུག་ཟེར་ན། གོ་བ་ཡིན་པས་ངོ་སྤྲད་པར་བྱའོ། །དེ་བཞིན་དུ་གཟུགས་ལ་སོགས་པ་ཡུལ་ལྔ་ཀ་སེམས་སུ་ངོ་སྤྲད་དོ། །གསུམ་པ་མཐོང་བའི་དོན་ངོ་སྤྲོད་པ་ལ་གསུམ་སྟེ། རྣམ་པ་རང་གྲོལ། གཤིས་ཡེ་གྲོལ། ངོ་བོ་ག ཉིས་མེད་དུ་ངོ་སྤྲད་པའོ། །དང་པོ། གང་ཡིན་ལྟབ་པོའི་སེམས་དེ་རང་དུ་འདུག་གམ། གཞན་དུ་འདུག་དྲི། གཞན་དུ་འདུག་ཟེར་སྣ། མ་གོ་བ་ཡིན། རང་དུ་འདུག་ཟེར་ན། ངོ་མཐོང་བ་ཡིན་པས་ངོ་སྤྲད་དོ། །གཞན་མ་ཡིན་པར་ཐག་བཅད་ལ། རང་སྣང་ལ་གཞུག་པས་རང་གྲོལ་དུ་ཤེས་འགྲོ་བ་ཡིན་ནོ། །རང་དུ་ཤེས་པས་གཞན་འཛིན་གྱི་རྟོག་པ་མི་སྐྱེ་བ་ནི། རང་གྲོལ་གྱི་གནད་ཡིན་ནོ། །གཉིས་པ། ཡེ་གྲོལ་ངོ་སྤྲད་པ་ནི། ལྟ་བ་ལྟར་སྣང་བའི་སེམས་དེ་སྣང་བ་རང་རྒྱུད་དུ་བདེན་པ་གཅིག་འདུག་གམ། ངོ་བོ་སྟོང་པར་འདུག་དྲི། རང་རྒྱུད་དུ་འདུག་ཟེར་ན། མ་གོ་བ་ཡིན། སྟོང་པར་འདུག་ཟེར་ན། ཚུར་བཀུག་ནས་སྟོང་པར་འདུག་གམ། ཡལ་བའི་རྗེས་ལ་སྟོང་པར་འདུག་གམ། དེ་ཀ་རང་སྟོང་པར་འདུག་དྲི། སྔ་མ་གཉིས་པོ་ལྟར་ཟེར་ན། མ་གོ་བ་ཡིན། དེ་ཀ་རང་སྟོང་པར་འདུག་ཟེར་ན། ངོ་བོ་མཐོང་བ་ཡིན་པས་ངོ་སྤྲད་དོ། །སྣང་བ་རང་རྒྱུད་པ་བདེན་པ་མིན་པར་ཐག་བཅད་ལ་སྟོང་པ་ཉིད་ལ་གཞུག་པས་ཡེ་གྲོལ་ཤེས་འགྲོ་བ་ཡིན་ནོ། །སྟོང་པར་ཤེས་པས་སྣང་བ་ལ་བདེན་འཛིན་མི་སྐྱེ། དེ་ཀ་ཡེ་གྲོལ་གྱི་གནད་ཡིན་ནོ། །གསུམ་པ། གཉིས་མེད་ངོ་སྤྲད་པ་ནི། སྟོང་པ་ཅང་མེད་ཅིག་འདུག་གམ། གསལ་རིག་དང་བཅས་པ་ཅིག་འདུག་གམ་དྲི། ཅང་མེད་ཅིག་འདུག་ཟེར་ན། མ་གོ་བ་ཡིན། གསལ་རིག་ཅན་འདུག་ཟེར་ན། གསལ་བ་དང་སྟོང་པ་ཐ་དད་དུ་འདུག་གམ། གཅིག་ཏུ་འདུག་དྲི། ཐ་དད་དུ་འདུག་ཟེར་ན། མ་གོ་བ་ཡིན། གཅིག་ཏུ་འདུག་ཟེར་ན། ངོ་བོ་མཐོང་བ་ཡིན་པས་ངོ་སྤྲད་དོ། །སྣང་སྟོང་ཐ་དད་དུ་མེད་པར་གཉིས་མེད་ལ་གཞུག་པས་གཉིས་མེད་དུ་ངོ་ཤེས་འགྲོ་བ་ཡིན་ནོ། །གཉིས་མེད་ལ་གནས་པས་གཉིས་འཛིན་གྱི་རྟོག་པ་མི་སྐྱེ། དེ་ཀ་ལ་གཉིས་མེད་རྟོགས་ཟེར་བ་ཡིན་ནོ། །བཞི་པ་རྒྱབ་སྐྱོར་ལ་གསུམ་སྟེ། རང་གྲོལ་གྱི་རྒྱབ་སྐྱོར་བ། རྣམ་པའི་ཆོས་ཐམས་ཅད་ཀྱི་གཤིས་ལ་ཡེ་ཡིན་ཡེ་གྲོལ་ལས་མེད་དེ། བྱ་གར་འཕུར་ཡང་ནམ་མཁའ། མི་གར་ཕྱིན་ས་སྟེང་ལས་མི་འདའ་བ་བཞིན་དུ་དང་། ཡེ་གྲོལ་གྱི་རྒྱབ་སྐྱོར་བ། ཆོས་ཐམས་ཅད་ཀྱི་གཤིས་ལ་ཡེ་ཡིན་ཡེ་གྲོལ་ལས་འདའ་ས་མེད་དེ། གསེར་གླིང་ན་གསེར། ཆུ་གླིང་ན་ཆུ་ལས་འདའ་ས་མེད་པ་ལྟ་བུ་དང་། གཉིས་མེད་ཀྱི་རྒྱབ་སྐྱོར་བ་ལ། ཆོས་ཐམས་ཅད་ཀྱི་ངོ་བོ་ལ་གཉིས་མེད་ལས་འདའ་ས་མེད་དེ། ཆུ་ལ་གཤེར་བ། མེ་ལ་ཚ་བ་ལས་འདའ་ས་མེད་པ་ལྟ་བུའོ། །ལྟ་བའི་སྐབས་སུ་ཤེས་པར་བྱའོ། །ལྔ་པ། ལ་བཟླ་བ་ལ་གསུམ་སྟེ། ཀ་དག །ལྷུན་གྲུབ། ཀུན་གྱི་བདག་ཉིད་དུ་ལ་བཟླ་བའོ། །དང་པོ་ལ་གསུམ་སྟེ། སེམས་ཀྱི་རྩལ་སྣང་འགག་མེད་དུ་ཤར་བ་ལ་གཞན་གྱི་རྟོག་པ་ཀ་ནས་དག་པ་ནི། ཡེ་ཤེས་ཀ་དག །ཤར་ཚད་ཀྱི་རང་བཞིན་སྟོང་པ་ལ་དངོས་པོ་རང་བརྒྱུད་ཀྱིས་བདེན་པ་ཀ་ནས་དག་པ་ནི། དབྱིངས་ཀ་དག །ངོ་བོ་སྣང་སྟོང་གཉིས་མེད་ལ་ཐ་དད་ཀྱི་གཉིས་ཆོས་ཀ་ནས་དག་པ་ནི། གཉིས་མེད་ཀ་དག་གོ། །གཉིས་པ་ལྷུན་གྲུབ་ལ་གསུམ་སྟེ། སེམས་ཀྱི་རྩལ་སྣང་སྣ་ཚོགས་སུ་འཆར་བ་ལ་གཞན་ནས་བཙལ་མི་དགོས་ཏེ། སེམས་རང་ཤར་བ་ནི། ཆོས་ཅན་ལྷུན་གྲུབ། ཤར་ཚད་ཀྱི་རང་བཞིན་སྟོང་པ་ལས་གཞན་ནས་བཙལ་མི་དགོས་ཏེ། ཤར་བ་པོ་རང་སྟོང་པ་ནི། ཆོས་ཉིད་ལྷུན་གྲུབ། ངོ་བོ་སྣང་སྟོང་གཉིས་མེད་ལ་བཙལ་མི་དགོས་ཏེ། གང་སྣང་དེ་དག་རང་གཉིས་སུ་མེད་པ་ནི། གཉིས་མེད་ལྷུན་གྲུབ་བོ། །གསུམ་པ་ཀུན་གྱི་བདག་ཉིད་དུ་གནས་པ་ནི། ཆོས་ཐམས་ཅད་ནི་རང་གི་སེམས་ཡིན་ལ། སེམས་ཀྱི་རྣམ་པ་ཅིར་ཡང་མ་འགགས་པ། གཤིས་ཅིར་ཡང་མ་གྲུབ། ངོ་བོ་ཅིར་ཡང་མི་རྟོག་པ། དེ་ཆོས་ཐམས་ཅད་ཀྱི་བདག་ཉིད་དོ། །དེ་ཀ་གཞི་སྣང་སྟོང་གཉིས་མེད་ཀྱི་བདག་ཉིད་དུ་བསྟན་ཏེ། རྣམ་པ་ཅིར་ཡང་མ་འགགས་པ། གཞི་སྣང་བ་གཤིས་ཅིར་ཡང་མ་གྲུབ་པ། གཞི་སྟོང་པ་ངོ་བོ་ཅིར་ཡང་མི་རྟོག་པ། གཞི་གཉིས་མེད་ཀྱི་བདག་ཉིད་དོ། །དེ་ཀ་ལྟ་བ་བསྐྱེད་རྫོགས་གཉིས་ཀྱི་བདག་ཉིད་ཀྱང་ཡིན་ཏེ། མ་འགགས་པ་བསྐྱེད་རིམ། མ་གྲུབ་པ་རྫོགས་རིམ། མི་རྟོག་པ་གཉིས་མེད་དོ། །བསྒོམ་པ་ཞི་གནས་ལྷག་མཐོང་གི་བདག་ཉིད་ཀྱང་ཡིན་ཏེ། མ་འགགས་པ་ལྷག་མཐོང་། མ་གྲུབ་པ་ཞི་གནས། མི་རྟོག་པ་གཉིས་མེད་དོ། །འབྲས་བུ་སངས་རྒྱས་སྐུ་གསུམ་གྱི་བདག་ཉིད་ཀྱང་ཡིན་ཏེ། མ་འགགས་པ་ལོངས་སྐུ། མ་གྲུབ་པ་ཆོས་སྐུ། མི་རྟོག་པ་སྤྲུལ་སྐུའོ། །མཁྱེན་པ་གཉིས་ལྡན་གྱི་ཡེ་ཤེས་ཀྱང་ཡིན་ཏེ། མ་འགགས་པ་ཅི་སྙེད་པ། མ་གྲུབ་པ་ཅི་ལྟ་བ། མི་རྟོག་པ་གཉིས་མེད་དུ་མཁྱེན་པའོ། །སྤངས་རྟོགས་ཕུན་སུམ་ཚོགས་པ་ཡང་ཡིན་ཏེ། མ་འགགས་པ་རྟོགས་པ། མ་གྲུབ་པ་སྤངས་པ་ཕུན་སུམ་ཚོགས་པའོ། །དེ་ལྟར་ཤེས་པས་འཁོར་འདས་སྐྱོན་ཡོན་ལྷ་འདྲེ་ལ་སོགས་པ་མཉམ་པ་ཉིད་དུ་ལ་བཟླ་བ་ཡིན་ཏེ། སྣང་བ་མ་འགགས་པ་རང་སྣང་དུ་མཉམ། མ་གྲུབ་པ་སྟོང་པར་མཉམ། ངོ་བོ་མི་རྟོག་པར་གཉིས་མེད་དུ་མཉམ་མོ། །དེ་ཙམ་ན་སྣང་ཚད་གཞི་དངོས་པོའི་གནས་ལུགས། ལྟ་བ་བསྐྱེད་རྫོགས་ཀྱི་ཡོ་ལངས། སྒོམ་པ་ཞི་གནས་ལྷག་མཐོང་གི་རང་བཞིན། འབྲས་བུ་སངས་རྒྱས་སྐུ་གསུམ་གྱི་དཀྱིལ་འཁོར་ལས་མི་འདའ་སྟེ། རང་སྣང་རང་ངོ་ཤེས་ནས་གཞན་སྣང་གི་རྟོག་པ་མེད། རང་སྟོང་རང་ངོ་ཤེས་ནས་དངོས་པོ་རང་རྒྱུད་པའི་བདེན་འཛིན་བྲལ། གཉིས་མེད་རང་ངོ་ཤེས་ན་ཐ་དད་གཉིས་འཛིན་མེད། དེ་ཙམ་ན་སྟོང་པ་རྒྱུ་འབྲས་སུ་འཆར་བ་ཐམས་ཅད་མཁྱེན་པའི་ཁྱད་ཆོས། རྒྱུ་འབྲས་སྟོང་པར་རྟོགས་པས་མཉམ་པ་ཉིད་ཆེན་པོར་ལ་བཟླའོ། །ཆོས་ཐམས་ཅད་སྣང་ཙམ་དུ་ཡོད་པ་ཀུན་རྫོབ་བདེན་པའི་ཕོ་སྒོ། བདེན་མེད་དངོས་སུ་གྲུབ་པ་མེད་པ་དོན་དམ་བདེན་པའི་རང་གཞུང་། ཆོས་ཐམས་ཅད་ཡོད་པ་ཡང་མ་ཡིན། མེད་པ་ཡང་མ་ཡིན། རྟག་པ་ཡང་མ་ཡིན། ཆད་པ་ཡང་མ་ཡིན། སྐྱོན་ཡེ་དག །ཡོན་ཏན་ཡེ་རྫོགས། མཐའ་ཡེ་བྲལ། གཉིས་མ་གྲུབ་པའི་གཉིས་མེད། ཟུང་མ་རྙེད་པའི་ཟུང་འཇུག །མཐའ་མ་རྙེད་པའི་མཐའ་བྲལ། བཟང་ངན་མ་རྙེད་པའི་ཀུན་ཏུ་བཟང་པོ། བཙལ་མི་དགོས་པའི་ལྷུན་གྲུབ། འཁྲུལ་པ་མེད་པའི་ཀ་དག་གོ། །བར་ལག་ཐམས་ཅད་རྨིངས་ནས་འགྱེད་ལ། འགྲམ་རྡོ་ཐམས་ཅད་རྩད་ནས་ཐོན། ཐམ་ཐུམ་ཐམས་ཅད་གཅིག་ཏུ་འདྲེས། འཁོར་འདས་ཀྱི་ཆོས་ཐམས་ཅད་གདོད་ནས་རྣམ་པར་གྲོལ་བ་མིན་པ་གཅིག་ཀྱང་མེད་དོ། །སེམས་ཉིད་གཅེར་སྟོན་གྱི་ལག་ཁྲིད་ལྔ་པ། གསང་སྔགས་ལམ་གྱི་རིམ་པ་རིན་པོ་ཆེ་གསལ་བའི་སྒྲོན་མེའི་ཁྲིད་ཆུང་ཨཐྎ། ༈ གསང་སྔགས་ལམ་གྱི་རིམ་པའི་དོན་ཁྲིད་ངོ་སྤྲོད་དུ་གདབ་པ་རྒད་པོ་འཁར་ཚུགས་དང་རྒན་མོ་མཛུབ་ཚུགས་ཀྱི་གདམས་ངག་བཞུགས་སོ། ༈ །ན་མོ་གུ་རུ། སློབ་དཔོན་པདྨ་འབྱུང་གནས་ལ། རྔོག་ཤེས་རབ་རྒྱལ་པོ་ཞེས་བྱ་བ། ལོ་དྲུག་ཅུ་ལོན་པ། ཐོས་པ་མ་བྱས་པ། དད་པ་དང་ལྡན་པ་གཅིག་གིས། བྲག་པོ་ཆེའི་དབེན་རྩ་རུ། སློབ་དཔོན་ལོ་གཅིག་བཞུགས་དེ། རྔོག་གིས་ཀྱང་ཆོས་ཞུ་མ་བྱས། སློབ་དཔོན་གྱིས་ཀྱང་ཆོས་བཤད་མ་བྱས་པར། ལོ་གཅིག་ན་སློབ་དཔོན་བཞུད་པར་དགོངས་པ་ལ། རྔོག་གིས་གསེར་སྲང་གང་གིས་མཎྜལ་གྱི་མེ་ཏོག་བྱས་ནས་སློབ་དཔོན་ལ་ཕུལ་ཏེ། ཞུས་པ། སློབ་དཔོན་རིན་པོ་ཆེ་ལགས། བདག་ལ་ཐུགས་བརྩེ་བར་དགོངས་འཚལ། བདག་གཅིག་ཏུ་ཐོས་པ་ཆུང་། གཉིས་སུ་ཤེས་རབ་ཆུང་། གསུམ་དུ་ན་སོ་རྒས། སློབ་དཔོན་ཆེན་པོ། བདག་ལ་གོ་སླ་བ། སྒྲོ་འདོགས་ཆོད་པ། རྟོགས་པར་སླ་བ། ལྟ་ཁམས་ཆེ་བ། ཉམས་སུ་བླངས་པ། རྒད་པོ་འཆི་ཁ་མའི་གདམས་ངག་ཅིག་ཞུ་འཚལ། ཞུས་པས། སློབ་དཔོན་གྱིས། རྒད་པོའི་སྙིང་གར་ཕྱག་འཁར་བཙུགས་ཏེ་གདམས་པ་ནི་འདིའོ། །ཉོན་ཅིག །རང་རིག་པ་བྱང་ཆུབ་ཀྱི་སེམས་འདི་ལ་ལྟོས་དང་། གཟུགས་དང་ཁ་དོག་ཏུ་གྲུབ་པ་མེད། ཕྱོགས་དང་རིས་སུ་ཆད་པ་མེད། མཐའ་དང་དབུས་སུ་གྲུབ་པ་མེད། དང་པོ་བྱུང་ས་མེད་དེ་སྟོང་། བར་དུ་གནས་ས་མེད་དེ་སྟོང་། ཐ་མ་འགྲོ་ས་མེད་དེ་སྟོང་། སྟོང་པ་དེ་ག་ངོ་ཤེས་ན། རང་ངོ་རང་གིས་ཤེས་པ་ཡིན། ཆོས་ཀྱི་ཆོས་ཉིད་གོ་བ་ཡིན། སེམས་ཀྱིས་སེམས་མཐོང་བ་ཡིན། དངོས་པོའི་གནས་ལུགས་གཏན་ལ་ཕེབས་པ་ཡིན། རིག་པ་བྱང་ཆུབ་ཀྱི་སེམས་དེ་དངོས་པོ་ཅིར་ཡང་མ་གྲུབ་ཅིང་། རང་བྱུང་རང་ལ་གནས་པས། གཞན་ནས་བཙལ་དུ་མེད་དེ། ཆོས་ཉིད་དོན་རྟོགས་པར་སླ། ཆོས་ཉིད་ཀྱི་དོན་ལ་རེ་དོགས་ཀྱི་འཛིན་པ་མེད་དེ། སེམས་རྟག་ཆད་ཀྱི་མཐའ་ལས་འདས། སངས་ལ་རྒྱ་རྒྱུ་མེད་དེ། སངས་རྒྱས་རང་གི་སེམས། དམྱལ་བར་འགྲོ་རྒྱུ་མེད་དེ། དམྱལ་པ་རང་གི་སེམས། སངས་རྒྱས་ལ་རེ་བ་མེད་དེ། རང་གིས་རང་སངས་རྒྱས། དམྱལ་བར་དོགས་པ་མེད་དེ། རིག་པ་རང་དག །ཆོས་ལ་བྱ་རྒྱུ་མེད་དེ། རིག་པ་ཆོས་ཉིད་རང་གསལ། ལྟ་བ་གནས་ལུགས་ཆེན་པོ་རང་ལ་ཡོད་པས། གཞན་ལ་བཙལ་རྒྱུ་མེད་པར་ཐག་བཅད་དོ། །དེ་ལྟར་རྟོགས་ནས་ཉམས་སུ་ལེན་པར་འདོད་ན། རང་གང་ན་འདུག་པ་དེ་ལུས་རི་བོའི་དགོན་གནས་ཡིན་པས། ཕྱི་སྣང་བ་ལ་གང་སྣང་བ་དེ་རང་སྣང་། གསལ་བ་རང་གསལ། སྟོང་པ་རང་སྟོང་། རང་བྱུང་རང་ཞི། སྤྲོས་པའི་མཐའ་ཐམས་ཅད་དང་བྲལ་བར་བཞག་གོ། །དེ་ནས་ཕྱིའི་སྣང་བ་གྲོགས་སུ་ཤར་བས་སྣང་བ་རང་སར་དག །སྣང་བ་རང་སར་དག་པས་སྣང་བ་ལམ་དུ་ཁྱེར་ནས་ཉམས་སུ་བླང་བདེའོ། །ནང་སེམས་ལ་དྲན་པ་ཅི་ཤར་འགྱུས་ཀྱང་། དེའི་ངང་ལ་ངོ་བོ་མེད་དེ་སྟོང་བར་འདུག་པས་འགྱུ་དྲན་རང་སར་དག །སེམས་ལ་གསལ་ཐེབས་ལམ་དུ་སློང་བ་ཉམས་སུ་བླང་བདེའོ། །གསང་བ་ཉོན་མོངས་པ་གང་སྐྱེས་ཀྱང་ཉོན་མོངས་པ་ལ་བལྟས་ན་རྗེས་མེད་དེ། རང་བྱུང་རང་ཞི་ཉོན་མོངས་པ་ལམ་དུ་ཁྱེར་ནས་ཉམས་སུ་བླང་བ་དེའོ། །དེ་ལྟར་ཉམས་སུ་ལོན་ཙ་ན་སྒོམ་པ་ལ་ཐུན་བསྒོམ་བྱར་མེད། ཐམས་ཅད་གྲོགས་སུ་ཤར་བས་ཉམས་ལ་གསལ་འགྲིབ་མེད་དེ། །ཆོས་ཉིད་ཀྱི་ཡེ་ཤེས་ལ་རྒྱུན་ཆད་མེད། སྤྱོད་ལམ་ལ་སྤང་བླང་མེད། ཇི་ལྟར་འདུག་ཀྱང་ཆོས་ཉིད་ཀྱི་དོན་དང་འདུ་འབྲལ་མེད་དོ། །དེ་ལྟར་རྟོགས་ཙམ་ན། འབྱུང་བའི་ལུས་རྒས་ཀྱང་བྱང་ཆུབ་ཀྱི་སེམས་ལ་རྒས་རྒྱུ་མེད། དབང་པོ་རྣོ་བརྟུལ་མེད་དོ། །རྣམ་རིག་གི་རྟེན་ལུས་ཞིག་ཀྱང་། རིག་པ་ཡེ་ཤེས་ཆོས་ཀྱི་སྐུ་ལ་རྒྱུན་ཆད་མེད་པས་མི་འགྱུར་ཞིང་བརྟན་པ་ཐོབ་པས། ཚེ་ལ་རིང་ཐུང་མེད་དོ། །ཆོས་ཉིད་ཀྱི་དོན་ལ་ཕྱོགས་རིས་མེད་པས། དོན་གོ་བས་ཐོས་པ་ལ་ཆེ་ཆུང་མེད་དོ། །རྒད་པོ་ཡང་དག་པའི་ལམ་དེའི་དོན་ཉམས་སུ་ལོངས་མཛོད་ཅིག །ཉམས་ལེན་རྒྱུད་ལ་འཁོལ་མཛོད། ཚིག་དང་དོན་དུ་མ་བྲལ་བར་མཛོད། བརྩོན་འགྲུས་ཀྱི་གྲོགས་དང་མ་བྲལ་བར་མཛོད། དྲན་པའི་རྩིས་ཟིན་པར་མཛོད། ལོང་གཏམ་དང་འཆལ་གཏམ་ལ་མ་དགའ་བར་མཛོད། ཐ་མལ་གྱི་བློ་དང་བྲལ་བར་མཛོད། བུ་ཚ་བོ་ལ་ཞེན་པ་མ་ཆེ་བར་མཛོད། བཟའ་བཏུང་ལ་སྲེད་པ་མ་ཆེ་བར་མཛོད། ཐ་མལ་པ་ཤི་བ་ལ་སོམས་མཛོད། ཚེ་ལ་ལོང་མེད་བརྩོན་འགྲུས་བསྐྱེད་མཛོད། རྒས་པོ་འཆི་ཁ་མའི་གདམས་ངག་མཛོད་ཅིག །གསུངས་ནས་རྒད་པོའི་སྙིང་ཁར་ཕྱག་འཁར་བཙུགས་ནས་གདམས་པས། རྔོག་ཤེས་རབ་རྒྱལ་པོ་གྲུབ་པ་ཐོབ་བོ། །རྒད་པོ་འཁར་བཙུག་གི་གདམས་པ་སངས་རྒྱས་ངོ་སྤྲོད་ཅེས་བྱ་བ། ཕྱི་རབས་ཀྱི་དོན་དུ་མཁར་ཆེན་བཟའ་མཚོ་རྒྱལ་གྱིས་ཡི་གེར་བཀོད་པའོ། །དགེའོ། ༈ །ན་མོ་གུ་རུ། སློབ་དཔོན་པདྨ་འབྱུང་གནས་རྒྱལ་པོ་ཁྲི་སྲོང་ལྡེའུ་བཙན་གྱིས་སྤྱན་དྲངས་ནས། བྲག་དམར་བསམ་ཡས་ན་བཞུགས་པའི་དུས་སུ། དད་ལྡན་བཟའ་དགེ་ལྡན་མ་ཞེས་བྱ་བ། རྒན་མོ་དད་པ་ཆེ་བ། སློབ་དཔོན་ལ་ཤིན་ཏུ་མོས་པ་གཅིག་ཡོད་པ་དེས། གཡོག་མོ་མར་གོང་བཟའ་རིན་ཆེན་མཚོ་ཞེས་བྱ་བ་ལ། ནང་བར་ཆབ་ཞོ་ཞལ་བུ་རེ་ལ་རྒུན་འབྲུམ་གྱི་བྱེ་ཚུམ་རེ་བཏབ་ནས། སློབ་དཔོན་ལ་དྲང་དུ་བཏང་ངོ་། །དེ་ནས་སློབ་དཔོན་བསམ་ཡས་སུ་བཞུད་པའི་ལམ་ཁར་རྒན་མོས་ཕྱག་དང་བསྐོར་བ་བྱས་ནས་ཞུས་པ། སློབ་དཔོན་ཆེན་པོ་ལགས། སློབ་དཔོན་ནི་བཞུད་ཁ་མ། རྒན་མོ་ནི་འཆི་ཁ་མ། བདག་གཅིག་ཏུ་བུད་མེད་ཀྱི་ལུས་ཐོབ་པས་སྐྱེ་བ་དམན། གཉིས་སུ་བློ་དམན་པས་ཤེས་རབ་དང་ཐོས་པ་ཆུང་། གསུམ་དུ་ན་སོ་རྒས་ཤེས་པ་རྨུགས་ནས་མིག་མི་གསལ་བས། སློབ་དཔོན་ཆེན་པོས་རྒན་མོ་ལ། ཚེགས་ཆུང་བ་གོ་སླ་བ། ཉམས་སུ་བླང་བདེ་བ་དོན་ཆེ་བ། རྒན་མོ་འཆི་ཁ་མའི་གདམས་ངག་གཅིག་ཞུ་འཚལ། ཞུས་པས། སློབ་དཔོན་གྱི་ཞལ་ནས། རྒན་མོ་ཁྱོད་སུ་ཡིན་གསུངས་པས། རྒན་མོས་ཞུས་པར། ཁོལ་མོ་ངན་མ་འདི། ནང་པར་གྱི་རིགས་ལ། ཆབ་ཞོ་ཞལ་བུ་རེ་འདྲེན་དུ་བཏང་བ་དེ་ལགས། ཞེས་ཞུས་པས། སློབ་དཔོན་གྱི་ཞལ་ནས། ཁྲི་སྲོང་ལྡེའུ་བཙན་པས་ཀྱང་དད་པ་ཆེ་བ་གཅིག་དེ་ཡིན་ཨང་གསུངས་ནས། རྒན་མོ་དཔོན་གཡོག་ལ་གདམས་པ་བཏབ་པ། རྒན་མོ་སྐྱིལ་ཀྲུང་བཅས་ལ། ལུས་དྲང་པོར་བསྲང་ལ། དར་ཅིག་སེམས་ཀློད་ལ་ཞོག་ཅིག །གསུངས་ནས། སློབ་དཔོན་གྱིས་རྒན་མོའི་སྙིང་གར་མཛུབ་མོ་བཙུགས་ཏེ་གདམས་པ་བཏབ་པ་ནི་འདིའོ། །རྒན་མོ་ཉོན་མཛོད་ཅིག །ཡང་དག་པར་རྫོགས་པའི་སངས་རྒྱས་ཀྱི་དགོངས་པ་དང་། ཁམས་གསུམ་གྱི་སེམས་ཅན་གཉིས་ལ་ཁྱད་པར་ཅི་ཡོད་བྱས་ན། སེམས་རྟོགས་མ་རྟོགས་གཉིས་ལས་མེད། སེམས་ཉིད་ཀྱི་དོན་རྟོགས་པས་སངས་རྒྱས། མ་རྟོགས་པས་འཁོར་བར་འཁྱམས་པ་ཡིན། སངས་རྒྱས་ཀྱི་ཡེ་ཤེས་རང་ལ་ཡོད་ཀྱང་ངོ་མ་ཤེས་པ་ཡིན། དེ་ཡང་སངས་རྒྱས་ཀྱི་རྒྱུ་དེ་སེམས་ཅན་ཐམས་ཅད་ལ་ཡོད། སྒོས་དལ་འབྱོར་ཐོབ་པའི་མི་ལ་ཡོད་དེ། དེ་ཡང་སྐྱེས་པ་ལ་སངས་རྒྱས་ཀྱི་རྒྱུ་ཆེ་ལ། བུད་མེད་ལ་སངས་རྒྱས་ཀྱི་རྒྱུ་ཆུང་བ་མེད། དེས་ན་སྐྱེ་བ་བུད་མེད་དུ་སྐྱེས་ཀྱང་འགལ་བ་མེད་དོ་གསུངས། དེ་ལ་ཡེ་ཤེས་དེ་རྟོགས་ཤིང་ཤེས་པར་བྱེད་པ་ལ། སངས་རྒྱས་ཀྱིས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་ཀྱང་། དེའི་དོན་ཤེས་པར་བྱེད་པ་ལ། བླ་མའི་གདམས་ངག་གི་ཚིག་གསུམ་དུ་འདུས་པས། བློ་དམན་ཞིང་ཤེས་རབ་ཆུང་ཡང་མི་ལྟོ་གསུངས། དེ་ལྟར་ཆོས་ཉིད་ཀྱི་དོན་སངས་རྒྱས་ཀྱི་དགོངས་པ་ཚིག་གསུམ་ནི། ཕྱི་གཟུང་བའི་ཡུལ་དག་པས་སྣང་བ་རང་སར་གྲོལ། ནང་འཛིན་བའི་སེམས་དག་པས་འཛིན་མེད་ཀྱི་རིག་པ་རང་སར་གྲོལ། བར་དུ་འོད་གསལ་ཉམས་དགའ་ནས་རང་ངོ་རང་གིས་ཤེས་པའོ། །དེ་ལ་ཕྱི་གཟུང་བའི་ཡུལ་ཇི་ལྟར་དག་ན། རིག་པ་བྱང་ཆུབ་ཀྱི་སེམས་འདི་ལ། རྣམ་རྟོག་གི་བློས་མ་བསླད་པར་རང་གསལ་དུ་སྣང་བ་འདི་ལ་བཞག་པས། ཡུལ་སྣང་བ་ལ་འཛིན་པ་མ་ཞུགས་པས། སྣང་བ་གང་ལྟར་ཡང་དོན་དུ་བདེན་པར་མི་འཛིན་ཏེ། སྣང་བ་གང་ཡིན། ས་རྡོ་རི་བྲག །རྩི་ཤིང་ནགས་ཚལ། ཁྱིམ་དང་མཁར། ནོར་དང་འབྲུ། དགྲ་དང་གཉེན། སྤུན་དང་གྲོགས། བུ་དང་ཁྱོ་ལ་སོགས་པ་གང་ལའང་བདག་ཏུ་འཛིན་པ་མ་ཞུགས། སྣང་ཡང་དོན་དུ་མི་འཛིན་ཅིང་ཞེན་པ་མེད་པ་དེ། ཕྱི་གཟུང་བའི་ཡུལ་དག་པ་བྱ་བ་ཡིན། གཟུང་བའི་ཡུལ་དག་པ་ཟེར་ནའང་རང་བཞིན་མེད་མི་འགྲོ། ཞེན་པ་དང་འཛིན་པ་མེད་པ། གསལ་ལ་སྟོང་པ། དཔེར་ན་མེ་ལོང་ནང་གི་གཟུགས་བརྙན་ལྟར། སྣང་ཡང་གཟུང་རྒྱུ་དང་འཛིན་པ་མེད་དེ། སྟོང་པ་འདྲ་བས་སྣང་ཡང་རང་སར་སྟོང་བའོ། །ནང་འཛིན་པའི་སེམས་དག་པས་རིག་པ་རང་སར་གྲོལ་བའི་མན་ངག་ནི། སེམས་རྣམ་རྟོག་འགྱུ་བྱེད་ཀྱི་དྲན་པ་དང་། དུག་ལྔ་གང་སྐྱེས་ཀྱང་། གང་དྲན་པ་དེ་ལ་བློས་མ་བཟུང་བས། འགྱུ་བ་རང་སངས་སུ་འགྲོ་བས་སྟོང་སྟེ། འགྱུ་བྱེད་ཀྱི་སྐྱོན་གྱིས་མ་གོས་པའོ། །ནང་རིག་པ་དྲི་མ་མེད་པ་ཟེར་ནས། བེམ་པོ་ས་རྡོ་ལྟར་འགྲོ་བ་མེད། རིག་པ་ལ་རྟོག་པའི་དྲི་མས་མ་འཛིན་པ་ལ་ཟེར་བ་ཡིན། དཔེར་ན་རིན་པོ་ཆེ་གསེར་གླིང་དུ་ཕྱིན་པ་འདྲ། གསེར་གྱི་གླིང་དུ་ཕྱིན་ཙམ་ན། ས་རྡོའི་མིང་ཡང་མེད་པ་བཞིན་དུ། རང་རིག་པའི་ཡེ་ཤེས་སུ་གྲོལ་ཙམ་ན། རྣམ་རྟོག་གི་མིང་ཡང་མེད་པ་ཡིན། གསུངས། བར་དུ་འོད་གསལ་ཉམས་དགའ་བའི་མན་ངག་ནི། དེ་ཉམས་སུ་བླངས་པའི་དུས་སུ། རང་རིག་པ་དྲི་མ་མེད་པ་ལ་ས་ལེ་སང་ངེ་ཧྲིག་གེ་བ་དེ་ཉམས་སུ་བླངས་པས། བདེ་བ་གསལ་བ་མི་རྟོག་པ་གསུམ། ཞེན་འཛིན་དང་བློ་ཡིས་མ་བསླད་པའི་ཉམས་གཅིག་འོང་བས། དེ་སངས་རྒྱས་ཀྱི་དགོངས་པ་ཡིན་པས་རང་ངོ་རང་གིས་ཤེས་པའོ། །དཔེར་ན་རང་གི་ཡིན་པ་ལ་འདི་ངའི་ཡིན་ཆེད་དུ་བསྒོམ་མི་དགོས། མ་ཡིན་སྙམ་པའི་རྣམ་པར་རྟོག་པ་གང་ཡང་མི་འཆར་རོ། །དཔེ་དེ་དང་འདྲ་བར་རང་གིས་རང་རིག་པ་རང་ཆོས་ཉིད་ཡིན་པར་རང་གིས་ངོ་ཤེས་ཙམ་ན། འཁོར་བའི་ཆོས་ཐམས་ཅད་ཆོས་ཉིད་སྟོང་པ་ཉིད་ཡིན་སྙམ་དུ་བསྒོམ་དུ་མི་དགོས། མ་བསྒོམས་ཀྱང་ཆོས་ཉིད་ཀྱི་དོན་དང་མི་འབྲལ་ཏེ། མ་བསྒོམས་པའི་བསྒོམ་པ་བྱ་བ་ཡིན་ནོ། །གསུངས། ཆོས་ཐམས་ཅད་རང་བཞིན་མེད་པར་ཤེས་པ་དེ། ཡེ་ཤེས་ཀྱི་བུ། རིག་པ་ཆོས་ཀྱི་དབྱིངས་ངོ་ཤེས་པས་རང་ངོ་རང་གིས་ཤེས་པ་བྱ་བ་ཡིན་ནོ། །དུས་དེ་ཙམ་ན། སྐྱེ་བ་ལ་མཐོ་དམན་མེད། བྱ་བ་ལ་ཆེ་ཆུང་མེད། བློ་ལ་རྣོ་རྟུལ་མེད། ཤེས་རབ་ལ་ཆེ་ཆུང་མེད། ཐོས་པ་ལ་མང་ཉུང་མེད། ན་སོ་ལ་རྒས་གཞོན་མེད། ཤེས་པ་ལ་གསལ་མི་གསལ་མེད། ཚེགས་ཆུང་ལ་གོ་སླ་བ། ཉམས་ལེན་བདེ་ལ་དོན་ཆེ་བ། འཆི་བ་ལ་ཉམས་མི་ང་བ། རྒན་མོ། དེ་ལྟར་ཉམས་སུ་ལེན་མཛོད། ཚེ་ལ་ལོང་མེད་པས་རྩོལ་བ་བསྐྱེད་མཛད། བུ་ཁྱོའི་ཁོལ་བོར་གླགས་མེད་ལོ་སྟོང་བྱེད་པ་ལས། རིག་པ་སྐད་ཅིག་བསྒོམས་པས་བསྐྱེད་ཆེ། བླ་མས་གདམས་པའི་བརྒྱག་མྱུར་དུ་ཐོན། ཚེ་འདིའི་བྱ་བ་ལ་ཟིན་དུས་མེད་པས་སྒོམ་སྒྲུབ་མཐར་བྱུང་མཛོད། རྒན་མོ་འཆི་ཁ་མི་འཚེར་བའི་སུན་མར་གདམས་པ་འདི་ཐོང་མཛོད། ཅེས་གསུངས་ཏེ། རྒན་མོའི་སྙིང་གར་ཕྱག་མཛུབ་བཙུགས་ནས་གདམས་པ་བཏབ་པས། མིང་ཡང་རྒན་མོ་མཛུབ་བཙུག་གི་གདམས་པ་ཞེས་བྱའོ། །རྒན་མོ་དཔོན་གཡོག་གཉིས་གྲོལ་ཏེ་གྲུབ་པ་ཐོབ་བོ། །ཕྱི་རབས་ཀྱི་དོན་དུ་མཁར་ཆེན་བཟའ་མཚོ་རྒྱལ་གྱི་ཡི་གེར་བཀོད་པའོ། །རྒན་མོ་མཛུབ་བཙུག་གི་གདམས་ངག་རྫོགས་སོ། ༈ །དེ་ལྟར་གསང་སྔགས་ཕྱི་ནང་གི་ལམ་རིམ་རྩ་བ་དང་བསྡུས་དོན་རང་འགྲེལ་གསང་བའི་མན་ངག་ངོ་སྤྲོད་རྣམ་པ་གསུམ་དང་བཅས་པ་འདི་དག་སློབ་དཔོན་ཆེན་པོ་པདྨ་སཾ་བྷ་བའི་གསང་བཀའ་འཁྲུལ་མེད་ལགས་ཤིང་། ལོ་ཙཱ་བ་ཆེན་པོ་གཉགས་ཛྙཱ་ན་ཀུ་མཱ་ཱར་དང་། གནུབས་སངས་རྒྱས་ཡེ་ཤེས་ནས་རིམ་པར་བཀའ་མའི་བརྒྱུད་པ་བར་མ་ཆད་པར་བཞུགས་པའོ། །བར་མཚམས་སུ་ལོ་རྒྱུས་ཀྱི་ཆེ་བ་དང་མཚམས་སྦྱོར་གྱི་ཚིག་རྣམས་ལོ་ཙཱ་བའི་གསུང་ཡིན་པར་སྣང་ངོ་། །ཕྱིས་སུ་ཉང་གུར་གྱི་གཏེར་ཁ་གོང་འོག་གཉིས་དང་། གཏེར་ཆེན་རྡོ་རྗེ་གླིང་པ་བཅས་ཀྱི་གཏེར་བྱོན་རྣམས་དང་ཚིག་དོན་འདྲ་བར་བཞུགས་པས་ཡིད་ཆེས་པའི་གནས་སུ་བཟུང་བར་འོས་པའོ། ༈ །ཁྱབ་བདག་བླ་མ་མཚོ་སྐྱེས་རྡོ་རྗེ་ཡིས། །ཚེ་རབས་ཀུན་ཏུ་འབྲལ་མེད་རྗེས་བཟུང་སྟེ། །རྫོགས་སྨིན་སྦྱངས་གསུམ་ས་ལམ་མྱུར་བགྲོད་ནས། །ཟུང་འཇུག་སྐུ་བཞིའི་འབྲས་བུ་མངོན་གྱུར་ཤོག །ཁྱད་པར་དམུ་གོད་སྙིགས་མའི་འགྲོ །གསང་ཆེན་ཐེག་རྩེའི་གདུལ་སྐལ་དུ། །རྒྱལ་བས་བསྔགས་པའི་ལམ་མཆོག་འདི། །ཡུན་གནས་ཕན་བདེའི་དཔལ་གྱུར་ཅིག །ཅེས་པའང་རྙིང་བསྟན་བཙས་སུ་གུ་རུ་པདྨའི་གསུང་སྐོར་དཔེ་བསྐྲུན་བགྱི་སྐབས་ཀ་མཱ་ལའི་མིང་གིས་སྨོན་པའོ། །མངྒ་ལཾ།། །།

ཞི་བ་ལྷ་རྒྱུད། དཔོན་བི་མ་ལ།

དེ ཝ ཤཱ ནྟི ཏ ནྟྲ ནཱ མ བི ཧ ར ཏི སྨ། །
ཞི་བ་ལྷ་རྒྱུད་ཅེས་བྱ་བ་བཞུགས་སོ། །
རྒྱ་གར་སྐད་དུ། དེ་ཝ་ཤཱནྟི་མ་ཏནྟྲ། བོད་སྐད་དུ། ཞི་བའི་ལྷ་རྒྱུད་ཅེས་བྱ་བ། དཔལ་ཀུན་ཏུ་བཟང་པོ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྐྱེས་བུ་དམ་པ་གང་དག་གིས་ནི་ངེས་དགོངས་པ། །གང་ལ་དགོངས་པ་གང་གིས་ངེས་པར་འགྲེལ་པ་ནི། །སྐྱེ་མེད་ཆོས་ལས་སྐྱེ་བའི་ཆོ་འཕྲུལ་མང་སྣང་ཞིང་། །ཐུགས་རྗེས་ཞིང་འདུལ་ཆོ་འཕྲུལ་བདག་ལ་ཕྱག་འཚལ་ལོ། །སྐྱེ་བ་མེད་ལས་ཐམས་ཅད་སྐྱེས་ཤིང་སྐྱེས་ཉིད་སྐྱེ་མེད་དང་། །བདག་གཞན་ཀུན་རྟོག་དབང་གིས་འཁོར་ལ་སྙིང་རྗེ་མཆོག་གི་སེམས། །བསྐྱེད་པར་གསུངས་པའི་ལུང་ལ་བསྟན་ཏེ་ངེས་དོན་སྙིང་པོ་ལ། །དགོངས་ཤིང་གསུངས་མཛད་ལྷ་རྒྱུད་དོན་འགྲེལ་བདག་གཞན་རྟོག་པ་འདུལ་བར་བཤད། །ཕུང་པོ་ལ་སོགས་ཆོས་རྣམས་བྱང་ཆུབ་སེམས་སུ་གཅིག །མ་འདྲེས་ཡོངས་རྫོགས་ཞི་གནས་ལྷག་མཐོང་རྣམ་པ་གཉིས། །དོན་དམ་ཉེ་བར་བརྟག་པས་བདེ་རོལ་ཕན་མཛད་པ། །ལྷ་རྒྱུད་དག་གི་ཀུན་སྨིན་ཀུན་གཞིར་གྱུར་པས་མོས། །དེ་ཡང་གདུལ་བྱའི་དབང་གིས་མདོ་དང་རྒྱས་སྣང་བ། །གཉིས་གསུམ་གཉིས་གཉིས་གསུམ་གསུམ་བཅུ་བདུན་གཅིག་ལ་སོགས། །རྟོག་འདུལ་མཚན་མ་སྤྱི་དང་ཁྱད་པར་མཚན་ཉིད་དང་། །རབ་འབྲིང་ཐ་མའི་བློ་ཡིས་མ་འོངས་དུས་སུ་བཤད། ༈ །དེ་ཡང་སྐུ་མདོག་ཕྱག་མཚན་དང་། །བཞུགས་ཐབས་གདན་ཁྲི་རྒྱན་ཆས་ཀྱི། །མ་ནོར་དེ་ཉིད་ངེས་པར་བཟུང་། །དེ་ཉིད་རྣམ་པ་ལྔར་ཤེས་བྱ། །དེ་ལ་དང་པོ་གཉིས་ཡིན་ཏེ། །རང་བཞིན་གྱི་ནི་སྐུ་མདོག་དང་། །རིགས་ཀྱི་ཁ་དོག་བསྟན་པ་ཡིན། །རང་བཞིན་སྐུ་མ དོག་བཞི་སྟེ་དུང་དང་ནི། །ཀུ་མུ་ཏ་དང་ཟླ་བ་ཉི་མའོ། །རིགས་ནི་ལྔ་སྟེ་བཻ་ཌཱུར་དང་ནི། །ཤངྑ་རི་དང་ལེ་བརྒན་ལྟ་བུ་དང་། །གསེར་སྦྱངས་པ་དང་སྣ་ཚོགས་ལྟ་བུའོ། །གཉིས་པ་ལ་ཡང་གསུམ་སྟེ་ཕྱག་ཕྱག་མཚན། །ཕྱག་རྒྱའི་རྣམ་པ་གསུམ་སྟེ་རྣམ་པར་དབྱེ། །ཕྱག་ནི་གཉིས་སམ་དྲུག་ནི་གཟུང་འཛིན་དང་། །ཡེ་ཤེས་རྣམ་པ་དྲུག་ལ་དགོངས་པའོ། །ཕྱག་མཚན་རྗེས་མཐུན་ཐབས་དང་ཤེས་རབ་དང་། །དབྱིངས་དང་ཡེ་ཤེས་ཕ་རོལ་ཕྱིན་པ་དྲུག །ཕྱག་རྒྱ་བཞི་སྟེ་མ་བཅོས་མི་འདའ་དང་། །མ་ངེས་པ་དང་འབྲེལ་པ་ལས་ཀྱི་རྒྱའོ། །མ་བཅོས་གཉིས་ཏེ་མ་སྐྱེས་མ་འགགས་པའོ། །མ་འགགས་པ་ཡང་རྣམ་བཞིར་ཤེས་བྱ་སྟེ། །ཁ་དོག་ཡུལ་དང་མཚན་པའི་གཟུགས་དང་ནི། །མཚན་རྟགས་ཉེ་བར་བརྟགས་པའི་ཕྱག་རྒྱའོ། །མི་འདའ་གསུམ་སྟེ་ཟིན་མཛད་མི་བསྐྱོད་པའོ། །མ་ངེས་གྲངས་ནི་ཐ་དད་གཅིག་མཐའ་ཡས། །འབྲེལ་པ་གཉིས་གཉིས་ལས་དང་དམ་ཚིག་གོ། །གསུམ་པ་གསུམ་སྟེ་ཐབས་གནས་ཚུལ་ཉིད་དོ། །ཐབས་ནི་རང་བཞིན་ཁྱད་པར་རྣམ་པ་གཉིས། །གནས་ནི་ཕྱི་ནང་མཐའ་དབུས་མེད་པ་སྟེ། །ཡོན་ཏན་བསམ་ཡས་བརྗོད་འདས་གཅིག་ཉིད་འདུ། །ཚུལ་ནི་གསུམ་གསུམ་ཡང་ན་བཅུ་གཉིས་གསུམ། །བཞེངས་དང་གཤེགས་པ་དང་ནི་གཟིགས་པ་དང་། །མཉེན་ལྕུག་འཁྲིལ་བའི་ཚུལ་དང་ལྡེམ་པ་དང་། །གཞོན་ནུ་གསལ་འཚེར་ཚུལ་དང་ལྷུན་སྡུག་དང་། །གཟི་བྱིན་འབར་བའི་ཚུལ་དང་འཁྱུག་པའི་ཚུལ། །དགོངས་དང་བརྟན་དང་བརྟེན་དང་འབྱོ་བའི་ཚུལ། །འདུད་པ་ཅམ་མེ་མལ་ལེ་ལྷན་ནེ་དང་། །སལ་ལེའི་ཚུལ་དུ་སྤྱི་དང་ཁྱད་པར་གྱིས། །བྱེ་བྲག་ཅི་རིགས་པར་ནི་རྣམ་པར་བཤད། །བཞི་པའང་གསུམ་སྟེ་དྷརྨ་ཙཀྲ་དང་། །ས་ཡི་ཁྱད་པར་ཡོན་ཏན་ཆེ་བའོ། ༈ །ལྔ་པ་གཉིས་ཏེ་རྒྱན་ཆས་གདན་དང་ལྡན། །གཞན་ཡང་རྣམ་པ་མང་པོར་བརྗོད་པ་སྟེ། །དབུ་རྒྱན་སྙན་ཆ་དོ་ཤལ་མགུར་ཆུ་དང་། ཕྲེང་བ་སེ་མོ་ཕྱག་གདུབ་རྒྱན་ཏེ་བདུན། །ཆས་ནི་གསུང་ཐུགས་ཡོན་ཏན་ལས་ཀྱིས་བསྒྱིངས། །དེ་ཕྱིར་ཆོས་གོས་སྨད་དཀྲིས་ཟེའུ་ལྡིར་དང་། །སྟོད་གཡོགས་གསང་གོས་རྣམ་ལྔས་བརྗིད་པར་སྣང་། །གཞན་ཡང་མཚན་དཔེ་འཕགས་པའི་ལམ་ལ་སོགས། །རྫོགས་པར་མངའ་ཕྱིར་སྲས་ཀྱི་ཚོགས་རྣམས་ཀྱང་། །བཀྲ་ཤིས་བརྒྱད་ཀྱིས་ཡོངས་སུ་འཁྱིལ་བའོ། །དེ་ལ་སོགས་པ་དཔག་མེད་བརྗོད་ལས་འདས། །དེ་དག་སྤྱིར་སྣང་ཁྱད་པར་རང་སྣང་འདིའོ། །རྣམ་ཤེས་ཚོགས་བརྒྱད་ཡེ་ཤེས་ལྔར་གྱུར་པ། །དུས་གསུམ་བདེར་གཤེགས་རྒྱལ་བ་ཀུན་གྱི་ཡབ། །རྡོ་རྗེ་སྐུ་དང་གསུང་དང་ཐུགས་ལྡན་པས། །དུག་གསུམ་འཇོམས་མཛད་བཅོམ་ལྡན་རྡོ་རྗེ་སེམས། །ཀུན་གཞི་གནས་གྱུར་ཆོས་དབྱིངས་ཡེ་ཤེས་ཐུགས། །བདེ་བ་ཆེན་པོ་ལོངས་སྤྱོད་རྫོགས་པའི་སྐུ། །སྐུ་ཡི་ལོངས་སྤྱོད་མཐའ་འདས་བརྡ་མཇལ་གསུང་། །དུག་ལྔ་ཞི་མཛད་བཅོམ་ལྡན་རྣམ་སྣང་མཛད། །ཉོན་མོངས་ཡིད་གྱུར་མཉམ་ཉིད་ཡེ་ཤེས་ཐུགས། །བསམ་འདས་བརྗོད་མེད་དམིགས་མེད་ཆོས་ཀྱི་སྐུ། །གཞན་གྱི་མི་བརྗོད་རིག་པའི་ཡེ་ཤེས་གསུང་། །ཡོན་ཏན་རྒྱས་མཛད་བཅོམ་ལྡན་རིན་ཆེན་འབྱུང་། །ཡིད་གྱུར་སོ་སོར་རྟོག་པའི་ཡེ་ཤེས་ཐུགས། །མཚན་རྫོགས་མངོན་པར་བྱང་ཆུབ་བརྙེས་པའི་སྐུ། ལྗགས་ཀྱི་མི་བརྗོད་ཡི་གེ་མེད་པའི་གསུང་། །གདུལ་བྱ་དབང་མཛད་བཅོམ་ལྡན་སྣང་མཐའ་ཡས། །སྒོ་ལྔ་གནས་གྱུར་ནན་ཏན་ཡེ་ཤེས་ཐུགས། །ཐུགས་རྗེ་ཆེན་པོ་ཅིར་ཡང་སྤྲུལ་པའི་སྐུ། །ལྗགས་ཀྱིས་སྟོང་གསུམ་ཀུན་ཏུ་གྲགས་པའི་གསུང་། །བདག་གཞན་དོན་མཛད་བཅོམ་ལྡན་དོན་ཡོད་གྲུབ། །ཡེ་ཤེས་ཐུགས་རྗེ་ཆེན་པོས་འགྲོ་བ་རྣམས། །རྣམ་ཐར་སྒོ་གསུམ་གནས་སུ་འདྲེན་མཛད་ཀྱང་། །ཐུགས་ཀྱི་ལོངས་སྤྱོད་ཐམས་ཅད་མི་དམིགས་པ། །ཀུན་འབྱུང་ཡུམ་ཆེན་ནམ་མཁའ་ཀུན་ཏུ་བཟང་། །ཡེ་ཤེས་ཐུགས་རྗེས་འགྲོ་ཀུན་སངས་རྒྱས་འགོད། །རེ་དོགས་མེད་པར་ཡེ་ཤེས་སྤྱན་གཟིགས་ཀྱང་། །སྐུ་ཡི་ལོངས་སྤྱོད་སྣ་ཚོགས་མི་དམིགས་པ། །ཀུན་སྐྱེད་ཡུམ་ཆེན་མ་གྱུར་སངས་རྒྱས་སྤྱན། །ཡེ་ཤེས་ཐུགས་རྗེས་འགྲོ་ལ་མ་ལྟ་བུ། །དགོས་འདོད་རེ་བ་ཡིད་བཞིན་སྐོང་གྱུར་ཀྱང་། །ཡོན་ཏན་ལོངས་སྤྱོད་སྣ་ཚོགས་མི་དམིགས་པ། །ཀུན་སྡུད་ཡུམ་ཆེན་ཆུ་གྱུར་མཱ་མ་ཀི། །ཡེ་ཤེས་ཐུགས་རྗེས་འགྲོ་བའི་དོན་མཛད་ཀྱང་། །ཚུལ་ཁྲིམས་གོས་ལ་དྲི་མས་མ་གོས་ཤིང་། །གསུང་གི་ལོངས་སྤྱོད་སྣ་ཚོགས་མི་དམིགས་པ། །ཀུན་སྨིན་ཡུམ་ཆེན་མེ་གྱུར་གོས་དཀར་མོ། །ཡེ་ཤེས་ཐུགས་རྗེ་ཆེན་པོའི་ཐུགས་དམ་གྱིས། །འགྲོ་ཀུན་འཁོར་བའི་འདམ་ལས་སྒྲོལ་མཛད་མ། །ཕྲིན་ལས་ལོངས་སྤྱོད་སྣ་ཚོགས་མི་དམིགས་པ། །ཀུན་སྒྲོལ་ཡུམ་ཆེན་རླུང་གྱུར་དམ་ཚིག་སྒྲོལ། །ཆོས་ཀྱི་དབྱིངས་ཀྱི་ཡེ་ཤེས་ཁྱད་པར་ལས། །རྣམ་པར་སྣང་མཛད་ཐུགས་ཀྱི་སྤྲུལ་པ་ནི། །དང་པོ་སེམས་བསྐྱེད་རིན་ཆེན་མྱུ་གུ་བསྣམས། །སེམས་ལས་འདོད་འབྱུང་ཐུགས་མཆོག་ས་ཡི་སྙིང་། །མཉམ་པ་ཉིད་ཀྱི་ཡེ་ཤེས་ཁྱད་པར་ལས། །རིན་ཆེན་འབྱུང་ལྡན་ཐུགས་ཀྱི་སྤྲུལ་པ་ནི། །ཉོན་མོངས་སྒྲིབ་གཅོད་ཤེས་རབ་རལ་གྲི་བསྣམས། །ཡོན་ཏན་མཐར་ཕྱིན་ཐུགས་མཆོག་ནམ་མཁའི་སྙིང་། །སོ་སོར་རྟོག་པའི་ཡེ ཤེས་ཁྱད་པར་ལས། །སྣང་བ་མཐའ་ཡས་ཐུགས་ཀྱི་སྤྲུལ་པ་ནི། །ཤེས་བྱའི་སྒྲིབ་སྦྱོང་པདྨ་དཀར་པོ་བསྣམས། །གསུང་དབྱངས་རྣམ་དག་ཐུགས་མཆོག་སྤྱན་རས་གཟིགས། །བྱ་བ་ནན་ཏན་ཡེ་ཤེས་ཁྱད་པར་ལས། །དོན་ཡོད་གྲུབ་པ་ཐུགས་ཀྱི་སྤྲུལ་པ་ནི། །མཁྱེན་ལྔ་ལྷུན་གྲུབ་རྡོ་རྗེ་རྩེ་ལྔ་བསྣམས། །ཕྲིན་ལས་མཐར་ཕྱིན་ཐུགས་མཆོག་རྡོ་རྗེ་ཅན། །ཆོས་ཀྱི་དབྱིངས་ཀྱི་ཡེ་ཤེས་ཁྱད་པར་ལས། །རྣམ་པར་སྣང་མཛད་སྐུ་ཡི་སྤྲུལ་པ་ནི། །དང་པོར་སེམས་བསྐྱེད་དགའ་བས་འགྱིང་བའི་ཚུལ། །སྐུ་ཡི་འགྲོ་འདུལ་བཛྲ་ལ་སྱ་མ། །མཉམ་པ་ཉིད་ཀྱི་ཡེ་ཤེས་ཁྱད་པར་ལས། །རིན་ཆེན་འབྱུང་ལྡན་སྐུ་ཡི་སྤྲུལ་པ་ནི། །བསོད་ནམས་ཚོགས་རྫོགས་རིན་ཆེན་ཕྲེང་བ་བསྣམས། །ཡོན་ཏན་འགྲོ་བ་འདུལ་མཛད་མ་ལྱ་མ། །སོ་སོར་རྟོག་པའི་ཡེ་ཤེས་ཁྱད་པར་ལས། །སྣང་བ་མཐའ་ཡས་སྐུ་ཡི་སྤྲུལ་པ་ནི། །ཡེ་ཤེས་ཚོགས་རྫོགས་སྙན་པའི་པི་ཝཾ་བསྣམས། །གསུང་གི་འགྲོ་འདུལ་བཛྲ་གཱིརྟི་མ། །བྱ་བ་ནན་ཏན་ཡེ་ཤེས་ཁྱད་པར་ལས། །དོན་ཡོད་གྲུབ་པའི་སྐུ་ཡི་སྤྲུལ་པ་ནི། །སྐུ་ལྔ་ལྷུན་གྲུབ་ཅིར་ཡང་འགྱུར་བའི་ལྷ། །ཕྲིན་ལས་འགྲོ་འདུལ་བཛྲ་ནཱིརྟི་མ། །ཆོས་ཀྱི་དབྱིངས་ཀྱི་ཡེ་ཤེས་ཁྱད་པར་ལས། །རྣམ་པར་སྣང་མཛད་གསུང་གི་སྤྲུལ་པ་ནི། །གཏི་མུག་ལས་ཀྱི་ཆོས་འཆད་ཀླུ་ཤིང་བསྣམས། །ཆོས་དབྱིངས་ཡེ་ཤེས་ཐུགས་རྗེ་བྱམས་པའི་གསུང་། །མཉམ་པ་ཉིད་ཀྱི་ཡེ་ཤེས་ཁྱད་པར་ལས། །རིན་ཆེན་འབྱུང་ལྡན་གསུང་གི་སྤྲུལ་པ་ནི། །སྤྲོས་པ་མེད་པ་ཆོས་ཀྱི་འཁོར་ལོ་བསྣམས། །སྒྲིབ་པ་ཐམས་ཅད་རྣམ་པ་སེལ་བའི་གསུང་། །སོ་སོར་རྟོག་པའི་ཡེ་ཤེས་ཁྱད་པར་ལས། །སྣང་བ་མཐའ་ཡས་གསུང་གི་སྤྲུལ་པ་ནི། །འདོད་ཆགས་ལམ་སྦྱོང་ཆོས་འཆད་རིན་ཆེན་སྙེ། །རྟོག་པའི་ཡེ་ཤེས་ཀུན་ཏུ་བཟང་པོའི་གསུང་། །བྱ་བ་ནན་ཏན་ཡེ་ཤེས་ཁྱད་པར་ལས། །དོན་ཡོད་གྲུབ་པ་གསུང་གི་སྤྲུལ་པ་ནི། །ཕྲག་དོག་ལམ་སྤྱོད་ཆོས་འཆད་ཨུཏྤལ་བསྣམས། །ནན་ཏན་ཡེ་ཤེས་འཇམ་དཔལ་གཞོན་ནུའི་གསུང་། །ཆོས་དབྱིངས་ཡེ་ཤེས་རྣམ་པར་སྣང་མཛད་ངང་། །ཕྱོགས་དུས་འཕགས་པ་མཆོད་པའི་ཕྲིན་ལས་ནི། །སྣང་བ་གཟུགས་མཛེས་མཆོད་པས་མཉེས་མཛད་མ། །སྤྱན་གཉིས་མཛད་པའི་གཟུགས་མཆོག་མེ་ཏོག་མ། །མཉམ་ཉིད་ཡེ་ཤེས་རིན་ཆེན་འབྱུང་ལྡན་དང་། །ཕྱོགས་དུས་རྒྱལ་བ་མཆོད་པའི་ཕྲིན་ལས་ནི། །དྲི་འབྱུང་ཡེ་ཤེས་མཆོད་པས་མཉེས་མཛད་པ། །ཤངས་མཉེས་མཛད་ཕྱིར་དྲི་མཆོག་བདུག་པ་མ། །རྟོག་པའི་ཡེ་ཤེས་སྣང་བ་མཐའ་ཡས་དང་། །ཕྱོགས་དུས་རྒྱལ་བ་མཆོད་པའི་ཕྲིན་ལས་ནི། །སྒྲ་གསུང་སྐད་སྙན་མཆོད་པས་མཉེས་མཛད་དེ། །སྒྲས་མཉེས་མཛད་པ་རྡོ་རྗེ་སྒྲོལ་མའི་སྐུ། །ནན་ཏན་ཡེ་ཤེས་དོན་ཡོད་གྲུབ་པ་དང་། །ཕྱོགས་དུས་རྒྱལ་བ་མཆོད་པའི་ཕྲིན་ལས་ནི། །རོལ་པས་རེག་བྱའི་མཆོད་པས་མཉེས་མཛད་པ། །སྐུ་མཉེས་མཛད་ཕྱིར་རེག་བྱའི་དྲི་ཆབ་མ། །ཆོས་དབྱིངས་ཡེ་ཤེས་རྣམ་པར་སྣང་མཛད་ཀྱིས། །ཤར་ཕྱོགས་ལྷ་ཡི་འཇིག་རྟེན་འཇོམས་མཛད་པ། །ལྟ་ངན་ལམ་སྦྱོང་ཆོས་འཆད་པི་ཝཾ་བསྣམས། །ལྟུང་བ་ཞི་མཛད་ལྷ་དབང་བརྒྱ་བྱིན་སྐུ། །ཆོས་དབྱིངས་ཡེ་ཤེས་རྣམ་པར་སྣང་མཛད་ཀྱིས། །ཤར་ཕྱོགས་ལྷ་མིན་འཇིག་རྟེན་དོན་མཛད་པ། །ང་རྒྱལ་ལམ་སྦྱོང་ཆོས་འཆད་གོ་ཆ་བསྣམས། །འཐབ་རྩོད་ཞི་མཛད་ལྷ་མིན་ཐགས་བཟང་རིས། །ཆོས་དབྱིངས་ཡེ་ཤེས་རྣམ་པར་སྣང་མཛད་ཀྱིས། །ཤར་ཕྱོགས་མི་ཡི་འཇིག་རྟེན་དོན་མཛད་པ། །ཕྲག་དོག་ལམ་སྦྱོང་ཆོས་འཆད་གསེག་པར་བསྣམས། །འགྱུར་བ་ཞི་མཛད་མི་དབང་ཤཱཀྱ་ཐུབ། །ཆོས་དབྱིངས་ཡེ་ཤེས་རྣམ་པར་སྣང་མཛད་ཀྱིས། །ཤར་ཕྱོགས་བྱོལ་སོང་འཇིག་རྟེན་དོན་མཛད་པ། །གཏི་མུག་ལམ་སྦྱོང་ཆོས་འཆད་པུ་ཏི་བསྣམས། །བླུན་ལྐུགས་ཞི་མཛད་སེང་གེ་རབ་བརྟན་མགོན། །ཆོས་དབྱིངས་ཡེ་ཤེས་རྣམ་པར་སྣང་མཛད་ཀྱིས། །ཤར་ཕྱོགས་ཡི་དྭགས་འཇིག་རྟེན་དོན་མཛད་པ། །འདོད་ཆགས་ལམ་སྦྱོང་ཆོས་འཆད་རིན་ཆེན་སྒྲོམ། །བཀྲེས་སྐོམ་སྡུག་བསྔལ་ཞི་མཛད་ཁ་འབར་མ། །ཆོས་དབྱིངས་ཡེ་ཤེས་རྣམ་པར་སྣང་མཛད་ཀྱིས། །ཤར་ཕྱོགས་དམྱལ་བའི་འཇིག་རྟེན་དོན་མཛད་པ། །ཞེ་སྡང་ལམ་སྦྱོང་ཆོས་འཆད་མེ་ཆུ་བསྣམས། །ཚ་གྲང་སྡུག་བསྔལ་ཞི་མཛད་ཆོས་ཀྱི་རྒྱལ། །ཡེ་ཤེས་བཞི་ལ་རིགས་བཞི་ཕྲིན་ལས་ཀྱིས། །དྲུག་གི་འཇིག་རྟེན་བྱེ་བ་ཕྲག་བརྒྱ་རུ། །སྤྲུལ་པ་བྱེ་བ་ཕྲག་བརྒྱས་འགྲོ་དྲུག་གི། །དོན་རྣམས་ཇི་ལྟར་འདུལ་མཛད་ཐུབ་པ་དྲུག །ཆོས་ཀྱི་དབྱིངས་ཀྱི་ཡེ་ཤེས་ཁྱད་པར་ལས། །རྣམ་པར་སྣང་མཛད་དྲག་པོའི་ཕྲིན་ལས་ནི། །སྐུ་ཡི་དངོས་པོ་འཇོམས་པས་ཐོད་དབྱུག་བསྣམས། །དེ་ཕྱིར་ཤར་སྒོ་སྲུང་བའི་གཤིན་རྗེ་གཤེད། །མཉམ་པ་ཉིད་ཀྱི་ཡེ་ཤེས་ཁྱད་པར་ལས། །རིན་ཆེན་འབྱུང་ལྡན་ཕྲིན་ལས་དྲག་པོས་ནི། །ཐུགས་ཀྱི་དངོས་པོ་འཇོམས་པས་རྡོ་རྗེའི་གནོན། །དེ་ཕྱིར་ལྷོ་སྒོ་སྲུང་བའི་རྣམ་པར་རྒྱལ། །སོ་སོར་རྟོག་པའི་ཡེ་ཤེས་བྱིན་རླབས་ལས། །སྣང་བ་མཐའ་ཡས་ཕྲིན་ལས་དྲག་པོས་ནི། །གསུང་གི་དངོས་པོ་འཇོམས་མཛད་ཐོད་སྦྲུལ་གནོན། །དེ་ཕྱིར་ནུབ་སྒོ་སྲུང་བའི་རྟ་མགྲིན་དཔལ། །བྱ་བ་ནན་ཏན་ཡེ་ཤེས་ཁྱད་པར་ལས། །དོན་ཡོད་གྲུབ་པའི་ཕྲིན་ལས་དྲག་པོས་ནི། །ཕྲིན་ལས་དངོས་པོ་འཇོམས་མཛད་རྒྱ་གྲམ་གནོན། །དེ་ཕྱིར་བྱང་སྒོ་སྲུང་བའི་བདུད་རྩི་འཁྱིལ། །ཆོས་ཀྱི་དབྱིངས་ཀྱི་ཡེ་ཤེས་ཁྱད་པར་ལས། །རྣམ་པར་སྣང་མཛད་ཕྲིན་ལས་དྲག་པོས་ནི། །རྟག་པར་ལྟ་བ་འཇོམས་སྡུད་ལྕགས་ཀྱུ་བསྣམས། །ལོག་འདྲེན་སྙིང་འདྲེན་རྟ་གདོང་ལྕགས་ཀྱུ་མ། །མཉམ་པ་ཉིད་ཀྱི་ཡེ་ཤེས་ཁྱད་པར་ལས། །རིན་ཆེན་འབྱུང་ལྡན་ཕྲིན་ལས་དྲག་པོས་ནི། །ཆད་པར་ལྟ་བ་འཇོམས་སྡུད་ཞགས་པ་བསྣམས། །ལོག་ལྟ་ཞི་མཛད་ཕག་གདོང་ཞགས་པ་མ། །སོ་སོར་རྟོག་པའི་ཡེ་ཤེས་ཁྱད་པར་ལས། །སྣང་བ་མཐའ་ཡས་ཕྲིན་ལས་དྲག་པོས་ནི། །མཚན་མར་ལྟ་བ་དབང་སྡུད་ལྕགས་སྒྲོག་བསྣམས། །ལོག་ལྟ་དབང་སྡུད་ཉི་ཟླ་ལྕགས་སྒྲོག་མ། །བྱ་བ་ནན་ཏན་ཡེ་ཤེས་ཁྱད་པར་ལས། །དོན་ཡོད་གྲུབ་པའི་ཕྲིན་ལས་དྲག་པོས་ནི། །བདག་ཏུ་ལྟ་བ་འཇོམས་མཛད་དྲིལ་བུ་བསྣམས། །ལོག་ལྟ་རླག་བྱེད་ཐལ་བྱེད་དྲིལ་བུ་མ། །སྟོང་པ་ཉིད་ཀྱི་ཡེ་ཤེས་ཁྱད་པར་ལས། །འཁོར་བ་མྱ་ངན་འདས་པའི་རྣམ་རྟོག་རྣམས། །བདེ་ཆེན་མཉམ་པའི་ངང་ལས་འགོད་མཛད་པས། །ཕྱག་ཞབས་མཉམ་བཞག་ཡིད་གྱུར་ཀུན་ཏུ་བཟང་། །སྟོང་པ་ཉིད་ཀྱི་ཡེ་ཤེས་ཁྱད་པར་ལས། །འདུས་བྱས་འདུས་མ་བྱས་པའི་ཆོས་རྣམས་ཀུན། །ཆོས་དབྱིངས་རྣམ་པར་དག་པའི་དབྱིངས་གྱུར་པས། །གསང་གསལ་ཕྱག་རྒྱ་ཆོས་གྱུར་ཀུན་བཟང་མོ། །ཀུན་འབྱུང་ཀུན་གཞི་ཆོས་ཉིད་དབྱིངས། །མ་སྐྱེས་མི་འགག་ཀུན་ཏུ་སྣང་། །སྨྲ་བསམ་བརྗོད་མེད་ཡུལ་ལས་འདས། །མཐའ་ཡས་མཐའ་ཡས་བསྐྱེད་པའི་གཞི། །མི་རྟོག་ངང་ལས་རྟོག་ཉིད་དུ། །བརྟགས་པས་སྟོང་པ་གང་བྱུང་བ། །དེ་ཉིད་བརྟགས་པ་ཆེན་པོ་སྟེ། །གང་མི་རྟོག་པ་རྟོག་པའི་རྒྱུད། །སྟོང་ཉིད་མི་གཡོ་ནམ་མཁའ་ལ། །མི་བསྐྱོད་བདེ་བར་གཤེགས་མཛད་པའི། །མི་དམིགས་མི་རྟོག་དེ་བཞིན་ཉིད། །རྟོག་པ་སྣ་ཚོགས་སྐྱེད་པར་མཛོད། །ནམ་མཁའ་དབྱིངས་ཀྱི་སྙིང་པོ་ལས། །རང་བཞིན་ཀུན་ཏུ་སྣང་བའི་དངོས། །ཡོངས་ལ་ཁྱབ་པའི་སྙིང་རྗེའི་ཡུམ། །མཐའ་ཡས་རྒྱལ་སྲས་བསྐྱེད་པར་མཛོད། །ཐ་དད་རྣམ་པར་སྣང་མཛད་ནས། །གསུང་གི་ཕྱག་རྒྱའི་ཡེ་ཤེས་ལས། །རྒྱལ་བ་རྣམས་ནི་ཡི་གེར་སྣང་། །ཡི་གེ་ཡེ་ཤེས་བསྐྱེད་པར་མཛོད། །ཡེ་ཤེས་ཕ་རོལ་ཕྱིན་རྫོགས་པའི། །རྣལ་འབྱོར་རིག་པའི་སྒོ་མཚོན་པ། །ཐུགས་ཀྱི་རྟགས་སྣང་སྣང་བར་མཛོད། །རྣམ་གྲོལ་ཡེ་ཤེས་སྣང་བར་མཛོད། །སྟོང་ཉིད་མི་རྟོག་ཡེ་ཤེས་ལས། །མ་སྐྱེས་མ་འགག་གཟུགས་སྣང་བ། །མཁའ་ལ་འཇའ་སྣང་ཇི་བཞིན་དུ། །དབྱིངས་ལས་ཕྱག་རྒྱ་བཞེས་སུ་གསོལ། །དེ་ཉིད་ཡི་གེའི་རང་བཞིན་ཏེ། །རང་བྱུང་ཡེ་ཤེས་མཱུྃ་དུ་གསལ། །ཐམས་ཅད་ཡི་གེའི་རང་བཞིན་ཏེ། །མ་སྐྱེས་གསལ་བའི་ཡི་གེ་ཨ། །སེམས་ཉིད་ཡི་གེའི་རང་བཞིན་ཏེ། །སྣ་ཚོགས་ཡི་གེ་ཧཱུྃ་དུ་གསལ། །དུག་གིས་ནད་སེལ་ཇི་བཞིན་དུ། །རྟོག་པས་རྟོག་པ་ཞི་བར་མཛོད། །དང་པོའི་ལས་ཅན་ངེས་པར་འབྱུང་བའི་གདུལ་བྱ་དག །རབ་འབྲིང་ཐ་མས་མཚན་མ་མེད་དང་མཚན་མ་ཡི། །རྣལ་འབྱོར་རིམ་པས་འབད་དེ་ཉམས་སུ་བླང་བྱའོ། །དམ་པའི་དགོངས་པ་དམན་པས་དཔག་པར་མི་འོས་ཀྱང་། །བསམ་པས་ད་ལྟར་མ་འོངས་དུས་ཀྱི་བདག་གཞན་ལ། །ཕན་ཕྱིར་ལུང་ལ་བརྟེན་པའི་བཀའ་སྒྲོས་བརྗེད་བྱང་འདི། །ཚིག་དོན་འགལ་འཁྲུལ་འཕགས་དང་མཁས་པ་རྣམས་ལ་བཟོད་པར་གསོལ། །དེ་ལྟར་མོས་པ་དག་དང་མོས་པའི་དགའ་བ་གང་དང་གང་། །བསམ་དཔྱོད་དགེ་བསྐུལ་ཤེས་རབ་འཕེལ་འགྱུར་གཅིག་པ་ཡི། །དགེ་བ་ཅི་མཆིས་མ་འོངས་དོན་དུ་བསྔོས་པ་ཡིས། །འདི་ལ་མོས་པ་མཐའ་དག་གྲོལ་ཞིང་སྨིན་གྱུར་ཅིག །སློབ་དཔོན་བི་མ་ལ་མི་ཏྲས་ཞང་ཛྙཱ་ན་ལ་གནང་། རྒྱུད་ཐམས་ཅད་ཀྱི་འགྲེལ་པ། ལུང་དམ་པའི་བཅུད། མན་ངག་མཐའ་དག་གི་སྙིང་པོ། རྣལ་འབྱོར་གྱི་ལམ་དམ་པ། ལོག་པའི་རྟོག་པ་ཞི་བར་བྱེད་པ། ཞི་བ་རྟོག་པའི་ལྷ་རྒྱུད་དོ། །གང་དག་དམ་པ་འདི་ལ་མོས་མ་མེད། །སྣོད་མིན་རྣམས་དང་ནམ་དུའང་མ་འཕྲད་ཅིག །གལ་ཏེ་འཕྲད་ནའང་མོས་པ་སྐྱེ་བ་དང་། །མོས་ཤིང་ཕྲད་ནས་སྨིན་ཅིང་གྲོལ་བར་ཤོག །རྫོགས་སོ།། །།

ཞི་རྒྱུད་དང་ཁྲོ་རྒྱུད། སློབ་དཔོན་བི་མ་ལ།

ཤཱ ནྟ ཏ ནྟྲ ཤྭ ཀྲོ དྷ ཏནྟྲ བི ཧ ར ཏི སྨ། །
༄༅ ། །ཞི་རྒྱུད་དང་། ཁྲོ་རྒྱུད་བཞུགས་སོ། །
རྒྱ་གར་སྐད་དུ། ཨ་ཏ་ལ་མ་ཡ་ལ་པྲ་བ་ས་ལ། བོད་སྐད་དུ། ཆོས་ཉིད་རང་བཞིན་ཞི་བ་རང་འབར་བའོ། །དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བཤད་པའི་དུས་ན། ཆོས་དབྱིངས་ཀློང་ཆེན་ཁྱབ་པའི་འོད། །འདུ་འབྲལ་མེད་པ་ཐུགས་རྗེའི་འོད། །གཉིས་སུ་མེད་པ་ཡེ་ཤེས་སྐུ། །བརྗོད་དུ་མེད་པ་ཚངས་པའི་གསུང་། །མ་བཅོས་བྱང་ཆུབ་སེམས་ཉིད་ཆོས་ཀྱི་སྐུ། །མ་བྱས་མ་བྱུང་སེམས་ཉིད་ཆོས་ཀྱི་དབྱིངས། །སེམས་ཉིད་ཡོན་ཏན་བསམ་མི་ཁྱབ། །སེམས་ཉིད་སྟོང་གསལ་ཆོས་ཉིད་ལས། །གསང་བའི་ཡེ་ཤེས་རྩ་གནད་ཞི་བའི་ལྷ། །མི་སྦྱོང་མི་སྒྲུབ་ཞི་བའི་སེམས་ཉིད་དང་། །མི་ལྟ་མི་སྒོམ་སེམས་ཉིད་ཞི་བའི་ཚོགས། །གསང་སྔགས་སྙིང་པོ་ཞི་བ་བཞི་བཅུ་གཉིས། །ཀུན་གཞིའི་གདངས་ནི་ཡེ་ཤེས་རྒྱལ་བ་ལྔ། །སེམས་ཉིད་རིགས་ཀྱི་ཡུམ་ལྔ་གཙོ། །དབྱེར་མེད་ཡེ་ཤེས་བརྒྱད་ནི་སེམས་དཔའ་བརྒྱད། །རང་སངས་ཡེ་ཤེས་རྩ་བརྒྱད་སེམས་མ་བརྒྱད། །ལས་ཀྱི་རྩ་ཕྲན་བརྒྱད་ནི་སྒོ་བ་ཡབ་ཡུམ་བརྒྱད། །སེམས་ཉིད་སྣང་སྟོང་གཉིས་ནི་ཀུན་བཟང་ཡབ་ཡུམ་གཉིས། །ཤེས་རབ་འབྲུ་ལྔ་ཐིག་ལེ་དང་། དྲུག་ཐུབ་པ། ཀུན་གཞི་བྱང་ཆུབ་སེམས་ཀྱི་ངང་ཉིད་ལས། །ཁ་དོག་མེད་པ་གསལ་བ་རྡོ་རྗེ་སེམས་དཔའ་ཉིད། །སྒྲིབ་བྱེད་མེད་པར་ཤར་བས་སྐུ་མདོག་མཐིང་། །འདུ་འབྲལ་མེད་པར་གནས་པས་གཡས་པ་རྡོ་རྗེ་བསྣམས། །མཚན་མ་མེད་པར་གནས་པས་གཡོན་པ་དྲིལ་བུ་ཅན། །ཡང་སྐྲག་པ་མེད་པས་བརྩལ་དང་རྩོལ་བ་མེད། །མ་བྱས་མ་བྱུང་མ་བསླད་སེང་གེ་བརྒྱད། །འདོད་པ་ཐམས་ཅད་སེམས་སུ་རྫོགས་པས་རིིན་ཆེན་ཁྲི་རྐང་རང་བྱུང་ངོ་། །རང་གསལ་སྒྲིབ་མེད་དབྱིངས་ལས་འདས་པས་པདྨ་ཉི་ཟླའི་གདན། །ཡེ་ནས་གཉིས་མེད་མཉམ་པར་གནས། །རྡོ་རྗེ་སེམས་དཔའི་བཞུགས་ཚུལ་ལོ། །སེམས་ཉིད་རང་ཤར་རྒྱན་དང་ཆ་ལུགས་སོ། །བྱང་ཆུབ་སེམས་ཀྱི་རང་བཞིན་ནི། །དངོས་པོ་མེད་པར་སྣང་སྣང་བས། །རྒྱལ་བ་རྣམ་པར་སྣང་མཛད་ཉིད། །ཕྱོགས་རིས་མེད་པར་སྐུ་མདོག་དཀར། །སྤྲོས་པ་མེད་པས་གཡས་པ་འཁོར་ལོ་བསྣམས། །མཚན་མ་མེད་པས་གཡོན་པའི་འགྲེའོ། །ང་མེད་བདག་མེད་རིགས་མེད་དང་། །དངོས་མེད་ཕྱོགས་མེད་སྤྲོས་མེད་དང་། །བགྲོད་མེད་སྒྲིབ་མེད་དང་། ཆགས་མེད་བཅུའི་སྟོབས་དག་གིས། །ཆོས་ཀྱི་དབྱིངས་སུ་རྫོགས་པ་གླང་ཆེན་བརྒྱད། །བྱང་ཆུབ་སེམས་ཀྱི་རྒྱུད་རྐྱེན་མེད་པར་རང་བྱུང་བས། །བཅོམ་ལྡན་རིན་ཆེན་འབྱུང་ལྡན་ཉིད། །བདག་མེད་རང་གསལ་སྐུ་མདོག་སེར། །རེ་དོགས་གཉིས་མེད་གཡས་པ་རིན་ཆེན་བསྣམས། །མཚན་མ་མ་སྤངས་མ་སྦྱངས་མ་བལྟས་གསལ། །མ་གཡོས་དབྱིངས་སུ་གནས་པ་རྫུ་འཕྲུལ་བཞི། །རྟ་བརྒྱད་སྟེང་ན་བཞུགས། བྱང་ཆུབ་སེམས་ཕྱོགས་ཀུན་ཏུ་རང་ཤར་བས། །བཅོམ་ལྡན་སྣང་བ་མཐའ་ཡས་ཉིད། །མ་སྤངས་སྐུ་མདོག་དམར། སྐྱོན་མཐའ་ལས་འདས་པས་གཡས་པས་པདྨ་བསྣམས། །མཚན་མ། དངོས་དྭངས་དག་གྲོལ་ཡང་དག་གྲུབ་པའི་རྫོགས། །མཐར་ཕྱིན་བཅུ་ནི་ཡེ་ཤེས་དབང་བཅུའོ། །རྨ་བྱ་བརྒྱད་ཀྱི་ཁྲི་སྟེངས་སོ། །བྱང་ཆུབ་སེམས་ཀྱི་རང་བཞིན་ནི། །མ་བསྒྲུབས་སྐུ་ལྔ་ལྷུན་གྱིས་གྲུབ། ། བཅོམ་ལྡན་དོན་ཡོད་གྲུབ་པའོ། །མཚན་མའི་ཡུལ་དང་བྲལ་བས་སྐུ་མདོག་ལྗང་། །མཐའ་བཞི་སྤྲོས་དང་བྲལ་བས་རལ་གྲི་བརྣམས། །མཚན་མ་མེད་པས་གཡེན་པ་འགྲེའོ། །བཙལ་མེད་རང་བྱུང་གོས་མེད་བུན་དུ་ཤར། །ཕྲིན་ལས་བཞི་ནི་ལྷུན་གྱིས་གྲུབ། །ཤང་ཤང་བརྒྱད་ཀྱི་ཁྲིའོ། །སེམས་ཉིད་རིགས་ཀྱི་ཡུམ་ལྔར་སངས་རྒྱས་ཏེ། །སེམས་དབྱིངས་སྐྱེ་བ་མེད་པས་ཀུན་བཟང་མ། །ཆོས་རྣམས་རང་བཞིན་སྟོང་བས་གཡས་པ་ཡབ་ལ་འཁྱུད། །ཆོས་རྣམས་ཐམས་ཅད་གཉེན་པོ་མེད་པར་གྲོལ་བས་གཡོ་པ་དྲིལ་བུ་ཅན། །སེམས་ཉིད་ཕྱོགས་མེད་གདལ་བས་སངས་རྒྱས་སྤྱན། །སེམས་ལ་རྒྱུན་ཆད་མེད་པས་མ་མ་ཀི། །སེམས་ཉིད་སྒྲིབ་མེད་ཤར་བས་གོས་དཀར་མོ། །སེམས་ལ་རྒྱ་ཆད་ཕྱོགས་ལྷུང་མེད་པས་དམ་ཚིག་སྒྲོལ། །ཡེ་ཤེས་འོད་བརྒྱད་རང་བྱུང་སེམས་དཔའ་བརྒྱད། །ཡེ་ཤེས་ཁ་དོག་མེད་པས་འོད་དཀར་ས་སྙིང་དཀར། །ཡེ་ཤེས་རྒྱུ་རྐྱེན་མེད་པས་རིན་ཆེན་མྱུ་གུ་བསྣམས། །ཡེ་ཤེས་མཚན་མ་མེད་པས་གཡོན་ཀུན་དྲིལ་བུ་བསྣམས། །ཆོས་རྣམས་རང་གསལ་དག་པས་ཐམས་ཅད་པདྨ་ཉི་ཟླའི་གདན། །རང་སེམས་ཕྱེད་ལས་མ་མཐོང་ཕྱེད་སྐྱིལ་ཅན། །ཡེ་ཤེས་སྒྲིབ་མྱེད་མེད་པས་འོད་ཟེར་ནམ་མཁའི་དབྱིངས། །གཟུང་འཛིན་གཅོད་པའི་ཡེ་ཤེས་རལ་གྲི་བསྣམས། །ཡེ་ཤེས་གོས་མེད་དག་པས་གོས་དམར་སྤྱན་རས་གཟིགས། །ཆོས་ཉིད་ཉེས་སྐྱོན་དག་པས་པདྨ་དཀར་པོ་བསྣམས། །བཙལ་མེད་ལྷུན་གྱིས་གྲུབ་པས་འོད་ལྗང་ཕྱག་རྡོར་ཉིད། །ཡེ་ཤེས་འདུ་འབྲལ་མེད་པས་ཡེ་ཤེས་རྡོ་རྗེ་བསྣམས། །འོད་ལ་འབྱེད་འབྲལ་མེད་པས་བྱམས་པ་དཀར་སེར་ཉིད། །འོདཟེར་ངེས་མེད་སྣང་བས་ཀླུ་ཤིང་མགོ་ལྕོགས་བསྣམས། །ཐིག་ལེ་འདུ་འབྲལ་མེད་པས་སྒྲིབ་སེལ་དམར་སེར་ཉིད། །བློ་ལ་སྤྲོས་པ་མེད་པས་ཆོས་ཀྱི་འཁོར་ལོ་བསྣམས། །འདོད་པའི་གཟུགས་དང་བྲལ་བས་ཀུན་བཟང་དམར་ལྗང་ཉིད། །མེད་པར་སྣ་ཚོགས་འབྱུང་བས་རིན་ཆེན་སྙེ་མ་བསྣམས། །འོད་ཟེར་ཕྱོགས་བཅུར་འཕྲོས་པས་འཇམ་དཔལ་དཀར་ལྗང་ཉིད། །ཉེས་མེད་སྐྱོན་དང་བྲལ་བས་མེ་ཏོག་ཨུཏྤལ་བསྣམས། །སེམས་ཉིད་རང་ཤར་འོད་ཟེར་སེམས་མ་བརྒྱད། །དབུས་མཐིང་རྩ་ནི་འགྱུར་བ་མེད་པས་ལཱ་སྱེ་དཀར། །ཕྱོགས་མེད་གདངས་ལ་གསལ་བས་ཡེ་ཤེས་མེ་ལོང་ཅན། །གཡས་དཀར་རྩ་ནི་སྤྲོས་དང་བྲལ་བས་མཱ་ལེ་སེར། །མ་བྱས་རང་བྱུང་ཤར་བས་རིན་ཆེན་ཕྲེང་བ་ཅན། །གཡོན་དམར་རྩ་ནི་ཆགས་དང་བྲལ་བས་གཱིརྟི་དམར། །སྟོང་ཉིད་རྒྱུན་ཆད་མེད་པས་པི་ཝཾ་བསྣམས། །རྒྱབ་ལྗང་རྩ་ནི་མཐའ་ལས་གྲོལ་བས་ནིརྟི་ལྗང་། །མཚན་མའི་དབྱིངས་ལས་གྲོལ་བས་གར་བསྒྱུར་མ། །རྩ་ནི་ཨ་ལས་སྐྱེ་བ་མེད་པས་དྷུ་པེ་དཀར། །ཨ་ཉིད་རྒྱུན་ཆད་མེད་པས་སྤོས་མེ་བསྣམས། །ཨ་ཉིད་རྒྱུ་རྐྱེན་མེད་པས་པུཥྤེ་སྔོ། །ཨ་ཉིད་མ་བཅོས་གསལ་བས་མེ་ཏོག་འཐོར། །ཨ་ཉིད་ཕྱོགས་མེད་གསལ་བས་ཨཱ་ལོ་དམར། །ཁ་དོག་མེད་པར་ཤར་བས་མར་མེ་བསྣམས། །ཨ་ཉིད་འོད་ཟེར་ལྗང་བས་གནྡྷེ་ལྗང་། །ཕྱོགས་དང་རིས་སུ་མེད་པས་དྲི་ཆབ་བསྣམས། །རྩ་ཕྲན་བཅུ་ཡི་གཡས་ཀྱི་རྩ་གཉིས་ནི། །རང་བྱུང་རྩ་ནི་ཐོགས་རྡུལ་མེད་པ་གཤིན་རྗེ་མཐིང་ནག་གོ། །འདོད་པ་དང་བྲལ་མི་མགོ་གདེངས་པ་བསྣམས། །རང་གསལ་རྩ་ནི་རྒྱུན་ཆད་མེད་པས་ལྕགས་ཀྱུ་མ། །རྩ་ཕྲན་བཅུ་ཡི་གཡོན་གྱི་རྩ་གཉིས་ནི། །རང་བྱུང་རྩ་ནི་འགག་མེད་སྟོབས་ཆེན་སེར་ནག་གོ། །འཇིགས་བྲལ་མེད་པས་རྡོ་རྗེ་རྩེ་ལྔས་གནོན། ། རང་གསལ་རྩ་ནི་བྱ་བྲལ་ཞགས་པ་མ། །རྩ་ཕྲན་བཅུ་ཡི་རྒྱབ་ཀྱི་རྩ་གཉིས་ནི། །རང་བྱུང་རྩ་ནི་ཐོགས་མེད་རོལ་པ་རྟ་མགྲིན་དམར་ནག་གོ། །ཆགས་པའི་མདུད་པ་གྲོལ་བས་སྦྲུལ་དཀྲིས་བསྣམས། །རང་གསལ་རྩ་ནི་འབྱེད་པ་མེད་པའི་ལྕགས་སྒྲོག་མ། །རྩ་ཕྲན་བཅུ་ཡི་མདུན་གྱི་རྩ་གཉིས་ནི། །རང་བྱུང་རྩ་ནི་ཀུན་ཏུ་ཤར་བས་བདུད་རྩི་འཁྱིལ་པ་ལྗང་ནག་གོ། །དབྱིངས་ལས་གྲོལ་བའི་རྡོ་རྗེ་རྒྱ་གྲམ་གནོན་པའོ། །རང་གསལ་རྩ་ནི་སྤྲོས་ལས་འདས་པས་དྲིལ་བུ་མ། །དེ་རྣམས་ཐམས་ཅད་རང་རིག་རང་ཤར་བྱུང་བས་ན། །ཀུན་བཟང་མཐིང་ཁ་མཉམ་བཞག་རྫོགས་པའི་རྒྱ། །དེ་རྣམས་ཐམས་ཅད་ཕྱོགས་དང་རིས་ལས་འདས་པས་ན། །ཀུན་ཏུ་བཟང་མོ་མཉམ་བཞག་ཡེ་ཤེས་འཕྲོ། །དཔའ་བོ་འབྲུ་ལྔ་ཐིག་ལེ་དྲུག་ནི་ཐུབ་པ་དྲུག །ༀ་དཀར་དངོས་པོ་མེད་པས་ལྷའི་ཐུབ། ཆོས་ཉིད་སྒྲ་ལ་བརྗོད་པ་མེད་པས་པི་ཝཾ་བསྣམས། །ཧཱུྃ་ཤར་རང་བྱུང་ཤར་བས་མི་ཡི་ཐུབ། །སྣོང་སྟོང་དབྱེར་མེད་གསེག་ཤང་པར་བུ་བསྣམས། །ཨཾ་ནི་དམར་ནག་ཐུགས་རྗེ་དབྱེར་མེད་ཡི་དྭགས་ཐུབ། །འདོད་ཆགས་སེལ་བའི་རིན་ཆེན་སྒྲོམ་བུ་ཅན། །སྭཱ་ནི་སེར་ནག་གཉིས་སྣང་གྲོལ་བའི་བྱོལ་སོང་ཐུབ། །ཆོས་ཉིད་ཡངས་དོག་མེད་པས་པོ་ཏི་བསྣམས། །མི་ཤིགས་ཐིག་ལེ་ལྷ་མིན་ཐུབ་པ་སྔོ་ནག་གོ། །ང་བདག་བྲལ་བའི་གོ་ཆ་མདུད་ཐུང་བསྣམས། །ཧཱ་ལྗང་དུད་ཁ་མདངས་གསལ་དམྱལ་བའི་ཐུབ། །སྣང་དང་སྟོང་པ་དབྱེར་མེད་མེ་ཆུ་ཅན། །ཡེ་ཤེས་རྩ་ལ་སངས་རྒྱས་བཞི་བཅུ་རྩ་གཉིས་མ་སྐྱེས་རང་བཞིན་རྫོགས། །སེམས་ལ་སྤྲོས་པ་མེད་པ་ལ། །སངས་རྒྱས་འདོད་པ་གོལ་བ་ཡིན། །སེམས་ཉིད་ཡེ་ནས་སངས་རྒྱས་ལས། །སྦྱང་བྱ་སྦྱོང་བྱེད་གོལ་བ་ཡིན། །སེམས་ཉིད་ཆོས་དབྱིངས་ཆེན་པོ་ལ། །ཕྱོགས་རིས་འབྱེད་པ་གོལ་བ་ཡིན། །སེམས་ཉིད་མ་བཅོས་ཆོས་སྐུའོ། །མ་བསླབས་ཤེས་པ་ཤེས་རབ་ཉིད། །མ་བྱས་བྱུང་བ་རིག་པ་ཉིད། །མ་ཕྱིར་སླེབས་པ་ཀུན་གཞིའི་དབྱིངས། །ལ་བཟླ་བའི་ཞི་རྒྱུད། སྣུབས་ཆུང་ཆུང་གི་ཐུགས་དམ་ཞི་རྒྱུད་རྫོགས་སོ། ༈ །རྒྱ་གར་སྐད་དུ། བི་མ་ལ་ཨ་ས་ལེ་ཏ་གྷ་བ་བྲག །བོད་སྐད་དུ། ཡང་དག་ཉི་མ་ཁྲོ་བོ་སྣང་བའི་རྒྱན། །དཔལ་ཀུན་དུ་བཟང་པོ་ལ་ཕྱག་འཚལ་ལོ། །འདི་སྐད་བཤད་པའི་དུས་ན། ས་ནི་གཡོས་འབར་བ་དང་། ལྡེག་པ་དང་སྐྱོད་པར་བྱེད་པ་ཡང་འབྱུང་ངོ་། །ནམ་མཁའ་འཁྲུགས་ཏེ་སྟོང་པར་གདལ། །ས་གཞི་འཁྲུགས་ཏེ་དངོས་པོ་མེད། །སེམས་ནི་འཁྲུགས་ཏེ་ང་བདག་མེད། །སངས་རྒྱས་འཁྲུགས་ཏེ་ཕྱོགས་རིས་མེད། །ཐམས་ཅད་ཁྲོ་བོར་རང་བྱུང་གི་སྐུར། སྣང་སྟེ། དྭངས་མའི་རྩ་ལྔ་ལ་ཁྲག་འཐུང་ལྔ་གནས། ཨ་ཝ་དྷུ་ཏིའི་འོད་ལྔ་ལ་ཡུམ་ལྔ་གནས། འཁོར་ལོ་བདུན་གྱི་དབྱིབས་བདུན་དང་། བདེ་བ་བྱང་ཆུབ་སེམས་ལ་ཁྲོ་མོ་བརྒྱད་གནས། འཁོར་ལོ་བདུན་གྱི་འོད་ཟེར་འབར་བ་བདུན་དང་། བྱང་ཆུབ་སེམས་ཀྱི་རྒྱུ་དང་བརྒྱད་ལ་སིངྷ་བརྒྱད་གནས། རོ་མ་རྐྱང་མ་དྲི་ཆེན་དྲི་ཆུ་ལ་སྒོ་མ་བཞི་གནས། ཕུང་པོ་སྐྱེ་བྱེད་ཀྱི་རྩ་ལྔ་དང་། ཕུང་པོ་ཆགས་བྱེད་ཀྱི་རྩ་ལྔ་དང་། ཕུང་པོ་རྒྱས་བྱེད་ཀྱི་རྩ་ལྔ་དང་། ཕུང་པོ་གསལ་བྱེད་ཀྱི་རྩ་ལྔ་སྟེ་ཉི་ཤུ། འགྱུ་བྱེད་ཀྱི་རྩ་བཞི། གཟུགས་ཀྱི་རྩ་བཞི་སྟེ་བརྒྱད། ཉི་ཤུའི་རྩ་བ རྒྱད་ལ་དབང་ཕྱུག་མ་གནས། དང་པོ་འོད་ཀྱི་གདངས་ལས་བཛྲ་ཧེ་རུ་ཀ་རང་གསལ་གཡས་དཀར། རང་གྲོལ་གཡོན་དམར་པོ། དབྱེར་མེད་དབུས་མཐིང་། ཕྱག་དྲུག་ཡེ་ཤེས་དྲུག །ཚད་མེད་ཞབས་བཞི་དངོས་མེད་དྲེགས་པ། རང་གྲོལ་ཉི་ཟླའི་གདན། དུར་ཁྲོད་ཆས་བརྒྱད་པ་བརྒྱན་མ་མནན་ནོ། །གར་དགུ་ཐེག་དགུ་མ་བསྒྲུབས་གྲུབ། །དབྱེར་མེད་གླང་ཆེན་མ་བྲལ་ཞིང་། །རང་གསལ་སྟག་ཤམ་སྐུ་གསུམ་ཐོད་པ་གསུམ། །མ་བཅོས་མ་བསླད་མ་བྱས་རྟགས་གསུམ་མོ། །ཕྱོགས་བྲལ་སྦྲུལ་རྒྱན་རང་ཞལ་ཉི་ཟླ་སྙན། །རྩ་ཡི་དྭངས་མ་བུདྡྷ་ཧེ་རུ་ཀ །དྲོད་ཀྱི་དྭངས་མ་རཏྣ་ཧེ་རུ་ཀ། ཁྲག་གི་དྭངས་མ་པདྨ་ཧེ་རུ་ཀ །དབུགས་ཀྱི་དྭངས་མ་ཀརྨ་ཧེ་རུ་ཀ །དེས་ན་མ་བྱས་རང་བྱུང་དྭངས་མ་ཁྲག་འཐུང་ལྔ། དྷུ་ཏིའི་འོད་མཐོང་བཛྲ་ཀྲོ་ཏི་མ། །དབྱེར་མེད་ཕྱག་གཡས་ཡབ་ལ་འཁྲིལ། །རྣམ་དག་ཐོད་ཁྲག་གཡོན་ནས་གཙོ་ལ་སྟོབ། །དྷུ་ཏིའི་འོད་དཀར་ཕྱོགས་འདས་བུདྡྷ་ཀྲོ་ཏཱི་མ། །དྷཱུ་ཏིའི་འོད་ཟེར་རྩལ་མེད་རཏྣ་ཀྲོ་ཏྲི་མ། །དྷཱུ་ཏིའི་འོད་དམར་པདྨ་ཀྲོ་དྷཱི་མ། །དྷུ་ཏིའི་འོད་ལྗང་བྱ་མེད་ཀརྨ་ཀྲོ་ཏཱི་མ། །དྷུ་ཏིའི་འོད་ལྔ་རང་ཤར་ཡུམ་ལྔའོ། །བདེ་བའི་འཁོར་ལོ་ཐིག་ལེ་འཛག་པས་ཀ་རཱི་སྔོ། །འཛིན་པ་དག་པས་བྱིས་དབྱུག་ཐོད་ཁྲག་བསྣམས། །ཆོས་ཀྱི་འཁོར་ལོ་བསམ་པས་བྱུང་བས་ཙ་རཱི་སེར། །སྣ་ཚོགས་ཡིད་ལས་མདའ་གཞུ་འགེངས། །ལོངས་སྤྱོད་འཁོར་ལོ་སྣ་ཚོགས་འབྱུང་བས་པྲ་མོ་དམར། །དངོས་པོ་མེད་ལས་གླུ་སྒྲ་འབྱུང་བས་ཆུ་སྲིན་རྒྱལ་མཚན་དམར། །སྤྲུལ་པའི་འཁོར་ལོ་སྟོབས་དང་ལྡན་པས་བཻ་ཏ་ནག །འདུ་འབྲལ་མེད་པས་རྩལ་དང་ལྡན་པས་རྡོ་རྗེ་འཕྱར། །མེ་ཡི་འཁོར་ལོ་རང་གསལ་སྒྲིབ་མེད་པུཀྐ་དམར་སེར་མ། །མ་སྤྲོས་བརྡལ་ཁྱབ་དབྱིངས་སུ་བྱིས་རྒྱུ་འདྲེན། །རླུང་གི་འཁོར་ལོ་ཡང་ཞིང་གཡོ་བས་གྷསྨ་ལྗང་། །ཐུགས་རྗེ་ཆགས་པའི་འོད་ལྡན་རྡོ་རྗེ་དུང་ཁྲག་འཁྲུག །གསང་བའི་འཁོར་ལོ་བདེ་བ་འབྱུང་བས་སྨེ་ཤ་མཐིང་། །དགའ་བདེའི་རིག་པ་དབྱེ་རུ་མེད་པས་བྱིས་སྙིང་ཟ། །བྱང་སེམས་ཐིག་ལེ་ཟག་བཅས་བདེ་བས་ཙཎྜ་སེར་སྐྱ་མ། ཐིག་ལེ་འབབ་དཀར་བདེ་ཐོག་བྲལ་བས་མཆོག་ལུས་འདྲལ་དེ་ཡང་རང་བྱུང་ཡེ་ཤེས་ཁྲོ་མོ་བརྒྱད། འཁོར་ལོའི་འོད་ཟེར་རྩ་ཕྲན་སིང་ཧ་བརྒྱད། །ཐིག་ལེའི་ཡུལ་ནི་བདེ་བ་སངས་པས་སེང་ཧ་སེར། །ཐིག་ལེ་དགའ་བདེ་བསྣོལ་མར་གནས་པས་བསྣོལ་སེར་སེང་། །ཆོས་འཁོར་ཡུལ་ནི་བདག་འཛིན་འོད་ཟེར་བྱ་ཀྲྀ་དམར། །ཆོས་དང་བདག་འཛིན་བསྣོལ་མར་གནས་པས་སྣོལ་དམར་སྟག །ལོངས་སྤྱོད་ཡུལ་ནི་ཆགས་པའི་བློ་སྟེ་སྤྲྀ་ལ་གནག །ཆགས་དང་གྲོལ་བ་དབྱེར་མེད་གཅིག་པས་བྱས་ལྡག་ཝ། །བདེ་ཆེན་ཡུལ་ནི་སྡུག་བསྔལ་འོད་ཟེར་ཤྭ་ན་མཐིང་། །བདེ་སྡུག་སྟོང་པར་མཉམ་པས་བྲལ་བལྟ་མཐིང་ཀ་སྤྱང་། །སྤྲུལ་འཁོར་ཡུལ་ནི་མཚན་མ་སྤྲོས་པས་འོད་ཟེར་ཀྲྀ་ཏ་མ། །མཚན་མ་དབྱིངས་ཀྱི་ངང་ལས་མ་འདས་རྒྱུ་མགོ་རྒོད། །མེ་འཁོར་ཡུལ་ནི་སྣ་ཚོགས་འཕྲོ་ལ་འོད་ཟེར་ཀངྐ་སྣར། །ཆོས་ཉིད་ཀློང་དུ་ཐམས་ཅད་གསལ་བས་རྐང་ཕྲན་སྣར་མགོ་རིང་། །རླུང་འཁོར་ཡུག་ནི་བདག་ནི་ལྟ་བ་འོད་ཟེར་ཁ་ཁ་གནག །བདག་ལ་དངོས་པོ་མེད་པས་ཁ་ཁ་བཻ་གྲི་ནག །གསང་བའི་ཡུལ་ནི་ཆགས་པ་སྐྱེ་བས་འོད་ཟེར་ཧུ་ལུ་མཐིང་། །ཆགས་པ་རང་གྲོལ་ལྕགས་ཀྱུ་མཐིང་ཚོགས་འུག །དེ་ཡང་རང་བྱུང་ཡེ་ཤེས་འོད་ཟེར་སིང་ཧ་བརྒྱད། །རོ་མ་ཐབས་ཀྱི་རྩ་སྟེ་མ་འགགས་འོད་ཟེར་ལྕགས་ཀྱུ་མ། །དྲི་ཆེན་དུག་ཐུབ་འོད་ཟེར་ཞགས་པ་མ། །རྐྱང་མ་ཤེས་རབ་རྩ་སྟེ་འོད་དམར་ལྕགས་སྒྲོག་མ། །དྲི་ཆུ་གླང་སྣ་ཐུབ་པས་འོད་ལྗང་དྲིལ་བུ་མ། །དེས་ན་མ་བྱས་རང་བྱུང་ཡེ་ཤེས་འོད་ཟེར་སྒོ་མ་བཞི། །དེས་ན་རང་བྱུང་ཡེ་ཤེས་དབང་ཕྱུག་ཉི་ཤུ་བརྒྱད། །དབང་པོ་ཆགས་བྱེད་ཀྱི་རྩ་ལྔ་ལ། འོད་ཀྱི་མདངས་ལས་ཤར་བའི་རྩ་ནི་བཀྲག་དང་མདངས་ལ་དབང་། །དྲོད་ཀྱི་མདངས་ལས་ཤར་བའི་རྩ་ནི་མེ་དང་ཉི་མ་ལ་དབང་། །ཁྲག་གི་མདངས་ལས་ཤར་བའི་རྩ་ནི་ཁྲག་དང་ཆུ་སེར་དབང་། །དབུགས་ཀྱི་མདངས་ལས་ཤར་བའི་རྩ་ནི་དབུགས་དང་རླུང་ལ་དབང་། །རྩ་ཡི་མདངས་ལས་ཤར་བའི་རྩ་ནི་རུས་དང་ས་ལ་དབང་། །སྙིང་གི་རྩ་ལ་ཤར་བའི་རྩ་ནི་སྐྱིད་སྡུག་གཉིས་ལ་དབང་། །མཆིན་པའི་རྩ་ལ་ཤར་བའི་རྩ་ནི་ང་བདག་གཉིས་ལ་དབང་། །དེ་ཚོ་ཤར་གྱི་དབང་མོ་བདུན་པོ་སྟེ། །ཆོས་ཉིད་ངང་ལས་ཤར་བས་སྐུ་མདོག་དཀར། །སེམས་ལས་མ་གཡོས་འགྱུར་བ་མེད་པས་གཡས་ཀུན་རྡོ་རྗེ་བསྣམས། །འགག་པ་མེད་པའི་ཐུགས་རྗེས་འགྲོ་བ་འདྲེན་པས་གཡོན་ཀུན་ཐ་དད་བསྣམས། །གློ་ཡི་རྩ་ལ་ཤར་བའི་རྩ་ནི་གཟུང་འཛིན་གཉིས་ལ་དབང་། །མཁལ་མའི་རྩ་ལ་ཤར་བའི་རྩ་ནི་འདོད་ཆགས་ཡུལ་ལ་དབང་། །མཆེར་བའི་རྩ་ལ་ཤར་བའི་རྩ་ནི་ཉོན་མོངས་ཚོགས་ལ་དབང་། །རུས་པ་སྐྱེད་པའི་རྩ་ནི་ཞེ་སྡང་ཚོགས་ལ་དབང་། །ཤ་ལས་སྐྱེད་པའི་རྩ་ནི་གཏི་མུག་ཚོགས་ལ་དབང་། །ཁྲག་ལས་སྐྱེད་པའི་རྩ་ནི་འདོད་ཆགས་ཚོགས་ལ་དབང་། །དེ་ཚོ་ལྷོ་ཡི་མ་མོ་བདུན་ཏེ་ལྷོ་ན་གནས། །ཡེ་ཤེས་ཀློང་ལས་ཤར་བས་སྐུ་མདོག་སེར། །གཡས་གཡོན་འགྲེའོ། །ཁུ་བ་བསྐྱེད་པའི་རྩ་ནི་རྒྱལ་ཚོགས་ལ་དབང་། །ལྤགས་ལས་སྐྱེད་པའི་རྩ་ནི་ཕྲག་དོག་ཚོགས་ལ་དབང་། །སྣང་བ་གསལ་བྱེད་རྩ་ནི་གཟུགས་ལ་དབང་། །སྟོང་པ་རང་སངས་རྩ་ནི་སྒྲ་ཡི་ཚོགས་ལ་དབང་། །དངོས་མེད་རང་བྱུང་རྩ་ནི་དྲི་ཡི་ཚོགས་ལ་དབང་། །ཆགས་མེད་རང་གྲོལ་རྩ་ནི་རོ་ཡི་ཚོགས་ལ་དབང་། །སྤྲོས་པ་མེད་པའི་རྩ་ནི་རེག་གི་ཚོགས་ལ་དབང་། །ལག་པའི་རྩ་ནི་ཚ་བའི་ནད་ལ་དབང་། །དེ་ཚོ་ནུབ་ཀྱི་དབང་མོ་ནུབ་ན་གནས། །ཤེས་རབ་བཀྲག་ལས་ཤར་བས་སྐུ་མདོག་དམར། །གཡས་གཡོན་འགྲེའོ། །ལག་པ་གཡོན་པའི་རྩ་ཆེན་གྲང་བའི་ནད་ལ་དབང་། །རྐང་པ་གཡས་པའི་རྩ་ཆེན་བད་ཀན་ནད་ལ་དབང་། །རྐང་པ་གཡོན་པའི་རྩ་ཆེན་རླུང་གི་ནད་ལ་དབང་། །ལག་པ་གཡས་པའི་བླ་རྩ་ལོ་ལ་དབང་། །ལག་པ་གཡོན་པའི་བླ་རྩ་ལོ་ཕྱེད་ལ་དབང་། །རྐང་པ་གཡས་པའི་བླ་ཙ་ཟླ་བ་ལྔ་ལ་དབང་། །རྐང་པ་གཡོན་པའི་བླ་རྩ་ཟླ་བ་གསུམ་ལ་དབང་། །དེ་ཚོ་བྱང་གི་མ་མོ་བདུན་ཏེ་བྱང་ན་གནས། །རིག་པའི་རྩལ་ལས་ཤར་བས་སྐུ་མདོག་ལྗང་གཡས་པ། །གཡོན་པ་འགྲེའོ། །ཡང་ན་གཡས་པ་ཀུན་རྡོ་རྗེ་བདུན། རིན་པོ་ཆེ་བདུན། པདྨ་འདུན། རལ་གྲི་བདུན། གཡོན་ཐ་དད་པའམ། འདམ་ཁའོ། །མི་ལྟ་མི་སྐྱེ་རྩ་གནང་ཁྲོ་བོའི་ཚོགས། །མ་མཆོད་མ་ཕུལ་ཐམས་ཅད་སེམས་ལ་ཤར། །མ་རེ་མ་དོག་ཐམས་ཅད་སེམས་སུ་འདུས། །མ་སྤྲོས་མ་བསྡུས་ཐམས་ཅད་སེམས་སུ་རྫོགས། །ཐེག་པ་ཆེན་པོ་ལ་བཟླ་བ་ཆོས་ཀྱི་འཁོར་ལོ་བསྐོར་བ། ཨཿཁྲོ་རྒྱུད་ལེའུ་གཅིག་པའོ། །ཉམས་སུ་ལེན་ན་གལ་ཆེ། རྒྱུད་སྙིང་པོ་འཆད་ན་གལ་ཆེ། རྫོགས་སོ།། །།

ཞི་བའི་ལྷ་རྒྱུད་ཀྱི་འགྲེལ་བ། སློབ་དཔོན་བི་མ་ལ།

ཤཱ ནྟ སྱ དེ ཝ ཏ ནྟྲ སྱ ཊཱི ཀ བི ཧ ར ཏི སྨ། །
ཞི་བའི་ལྷ་རྒྱུད་ཀྱི་འགྲེལ་བ་བཞུགས་སོ། །
བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །རྒྱལ་བ་ཀུན་གྱི་དགོངས་དོན་མདོར་བསྡུས་ཏེ། །ངེས་དོན་སྙིང་པོ་མཁས་པའི་ཐུགས་བརྒྱུད་པའི། །བཀའ་ལུང་དོན་བསྡུས་ཚིག་རྒྱས་རྟོགས་དཀའ་ཡང་། །མ་འོངས་བདག་གཞན་ཕན་སེམས་བརྗེད་བྱང་བྲི། །ཞི་བའི་ལྷ་དག་ལ་མོས་པའི་སྒོ་ནས་ཡང་དག་པའི་དོན་ལ་འཇུག་པར་འདོད་པའི་ལམ་པ་རྣམས་ཀྱིས་ཐེ་ཚོམ་སྤང་བའི་བློ་དམ་པའི་ལུང་འདི་ལ་ནན་ཏན་དུ་གཉེར་བར་རིགས་སོ། །ཡང་དག་པའི་དོན་ལ་སྐྱེས་པ་དང་། རྒྱུ་དང་རྐྱེན་ལས་སྐྱེས་པ་ལྟར་སྣང་བའི་སྟོན་པ་དང་སྡུད་པ་པོ་ལྟར་སྣང་བ་ཡིས་དོན་གང་དང་གང་ལ་དགོངས་ཤེ་ན། དོན་ཆོས་ཉིད་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་ཕན་འདོགས་པ་ནི། ཆོ་འཕྲུལ་བཞི་ལ་སོགས་པར་སྣང་བ་ལ་དགོངས་ཏེ། ཐབས་ཐུགས་རྗེ་བཞི་སྟེ། རང་བཞིན་ཤུགས་དང་། རྟག་པ་རྒྱུན་དང་། ཡུལ་དང་འཕྲད་པ་དང་། བསྐུལ་ཞིང་གསོལ་བའི་ཕན་འདོགས་པ་ནི། སྟོན་པ་དང་བསྟན་པ་སྡུད་པ་རྣམ་པ་གཉིས་ཀྱིས་བསྟན་སངས་རྒྱས་ཀུན་གྱི་དགོངས་པ་འདུས་པའི་རྒྱུད་དེ། གདུལ་བྱའི་སྣང་བར་མཛད་པ་ཉིད། །ཆོ་འཕྲུལ་དེ་དག་གི་བདག་ཉིད་ནི་ལན་གྱིས་ཕན་པར་མཛད་པའི་ཕྱིར། སྐྱེས་བུ་དམ་པ་ཞེས་བྱ་བ་ལ་སོགས་པ་སྔོན་དུ་བརྗོད་པར་བྱེད་དོ། །རང་བཞིན་གྱི་སྣང་བ་ལ་སྐྱེ་བའི་ཆོས་མ་གྲུབ་ཀྱང་། འཁྲུལ་པའི་དབང་གིས་སྐྱེ་བར་སྣང་བ་ལ། །གདུལ་བྱའི་ཁྱད་པར་ལ་དགོངས་ནས། །དེ་བཞིན་གཤེགས་པའི་དགོངས་པའི་དོན་ངེས་པ་ནི་རྒྱུད་དམ་པར་གསུངས་ཤིང་། སྐུའི་མཛད་པ་སྣ་ཚོགས་ངེས་པར་འབྱུང་བའི་གདུལ་བྱ་ལས་དག་པ་ལ་གསུངས་ཤིང་མཛད་ཀྱང་འདུལ་མོད་ཀྱིས། འོན་ཀྱང་ཚོགས་ཆེན་པོ་སྤངས་པའི་ཕྱིར་སྐྱེ་བ་མེད་ལས་ཞེས་བྱ་བ་ལ་སོགས་པ་དམ་བཅའ་བ་ནི་འགལ་བ་སྟེ། བརྩོན་འགྲུས་ཀྱི་ཞེན་བརྡབ་པར་ཀྱང་དགོངས་ལ། བྱང་ཆུབ་ཀྱི་སེམས་རྣམས་གཉིས་ནི་སྔོན་དུ་གཏང་བའི་རིགས་ཏེ། རྒྱུད་དག་ལས་ཀྱང་། སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པ་ལ་སོགས་པ་རྒྱས་པར་གསུངས་ཏེ། གཞན་གྱི་དེ་པའམ་བདག་ཀྱང་རུང་སྟེ། རིམ་པ་བཞིན་དུ་དམན་པ་ལས་སྐྱེ་བར་སྣང་བའི་ཆོས་དག་ཁྱད་པར་དུ་གྱུར་ཅིང་མི་སྣང་བའི་དོན་ལ་བགྲོད་པར་བྱེད་པའོ། །དེ་ལས་ལོག་པ་ནི་འཁོར་བ་སྐྱེད་པར་བྱེད་པ་སྟེ། དེ་བས་ན་ལུང་དག་ལས། བདག་དང་མཐའ་ཡས་སེམས་ཅན་རྣམས་ཞེས་བྱ་བ་ལ་སོགས་པ་གསུངས་ཏེ། ཉེས་དམིགས་སྤང་བའི་ཕྱིར། ཀུན་རྫོབ་ཀྱི་བྱང་ཆུབ་ཀྱི་སེམས་སྔོན་དུ་འགྲོ་བར་དགོངས་སོ། །དེས་ལྷའི་རྒྱུད་ཀྱི་དོན་ཕྱིན་ཅི་མ་ལོག་པར་འགྲེལ་ཅིང་སྟོན་པར་བྱེད་པའི་སློབ་དཔོན་དྲི་མེད་བདག་གིས་བཤད་པར་སྦྱར་བར་བྱའོ། །དེ་ལྟར་བཤད་པ་ལ་དགོངས་པ་གཞན་ཡང་བསྟན་པའི་ཕྱིར་རྟོག་པ་སྔོན་དུ་འགྲོ་བ་དག་ལ་དགོས་འབྲེལ་བསྟན་ཏེ། དེ་ཡང་ཀུན་རྫོབ་ཀྱི་བདེན་པ་ལ་དགོངས་ནས་མཚན་མའི་རྣལ་འབྱོར་གྱི་དབང་དུ་གསུངས་པ། ཕུང་པོ་ལ་སོགས་པས་བསྡུས་པ་ནི་ཁམས་དང་སྐྱེ་མཆེད་དེ་བརྗོད་བྱ་དེ་ལྷག་མཐོང་སྟེ། མ་རྨོངས་པའི་ལྷག་མཐོང་སྟེ། ཤེས་རབ་ཀྱི་མ་འདྲེས་པ་སྟེ། རང་གི་མཚན་ཉིད་གསལ་བར་སྒོམ་པ་ནི། དེས་ཉེ་བར་བརྟག་པ་ནི་ལྷ་སྟེ་སྐུ་ཕྱག་རྒྱ་སྣ་ཚོགས་སུ་སྣང་བ་ནི་དགོངས་པ་སྟེ་ཐབས་ལས་བྱུང་བའོ། །དེ་ཉིད་འབྲེལ་པ་ཞེས་ཀྱང་གྲགས་སོ། །དེས་བདག་དང་གཞན་ལ་ཕན་འདོགས་ཤིང་སྨིན་པར་བྱེད་པ་ནི་དགོས་པའི་ཡང་དགོས་པའོ། །ཡང་དོན་དམ་པའི་བདེན་པ་ལ་དགོངས་ནས་མཚན་མ་མེད་པའི་རྣལ་འབྱོར་གྱི་དབང་དུ་ནི་ཆོས་དེ་དག་ཉིད་ཀྱི་དོན་བྱང་ཆུབ་ཀྱི་སེམས་གང་ཡང་མ་ཡིན་པར་གསུངས་པ་ནི་བརྗོད་པར་བྱ་བ་ཞི་གནས་ཀྱི་དེ་ཉིད་དུ་མི་རྟོག་པར་གནས་པ་ནི་བརྗོད་པར་བྱ་བ་སྟེ། ཡོངས་སུ་རྫོགས་པ་སྤྱིའི་མཚན་ཉིད་ཤེས་པ་ནི་ཐབས། ངེས་དོན་དམ་པའི་ལྷ་ཆོས་ཀྱི་སྐུ་གྲུབ་པ་ནི་དགོངས་པ་སྟེ་ཐབས་ལས་བྱུང་བའོ། །དེས་བདེ་བ་ལ་རོལ་ཅིང་རྟོག་པའི་ནད་ཞི་བར་གྱུར་པ་ནི་གསོ་བའི་ཡང་དགོས་པའོ། །འབྲེལ་བ་ཤུགས་ཀྱིས་ཤེས་པར་བྱའོ། །དོན་དེ་ལ་མོས་པས་ན་གཞུང་འདི་ལ་འབད་དེ་བརྩོམས་པར་བྱའོ། །དེ་ཡང་གདུལ་བྱའི་མོས་པའི་དབང་གིས་མདོར་བསྡུས་པ་དང་། ཡན་ལག་རྒྱས་པར་བསྟན་པའི་ཚུལ་གཉིས་ལ་དགོངས་པ་སྟེ། དེ་ཡང་རེས་ཤིག་གདུལ་བྱ་ནི་མདོར་བསྡུ་ན་གོང་དུ་བསྟན་པ་གཉིས་སམ། བློ་རབ་འབྲིང་གསུམ་ལ་རྒྱས་པར་བསྟན་པ་སྟེ། རེས་ཤིག་གཉིས་ནི་རྣལ་འབྱོར་རོ། །གསུམ་ནི་དབང་པོའི་བྱེ་བྲག་གོ། །གཉིས་ནི་རྣལ་འབྱོར་རེ་རེ་ཡང་དབྱེ་ལ། གསུམ་གསུམ་ཡང་དགུར་དབྱེའོ། །དེ་བཞིན་ལྔ་དེ་ལ་ཆ་ཤས་ཀྱི་དབྱེ་བ་བཅུ་གསུམ་ལ་བཅོ་བརྒྱད་བསྣན་པ་ནི་བདུན་ཅུ་གཅིག་གོ། །སོགས་ཀྱི་སྒྲས་དེ་དག་ལས་ཀྱང་དབྱེའོ། །ཡང་ན་ཞི་བའི་ལྷའི་མཚན་ཉིད་བཤད་པ་ནི་དེ་ཁོ་ན་ཉིད་རྣམ་པ་ལྔས་བཤད་དེ། དེ་ནི་གཉིས་དང་གསུམ་མོ། །དེ་དག་ལ་དང་པོ་དང་ཐ་མ་ལ་ཆེ་ལོང་དུ་གཉིས་གཉིས་བར་མ་གསུམ་ལ་གསུམ་གསུམ་དུ་དབྱེ་བ་ནི་རྗེས་སུ་མཐུན་པར་བཅུ་བདུན་གཅིག་ལ་སོགས་པའོ། །ཡང་ན་གཞན་ནི་རྗེས་སུ་མཐུན་པ་ལས། བཅུ་གསུམ་ལ་ཡན་ལག་རྒྱས་པར་ཕྱེ་ན་བདུན་ཅུ་རྩ་གཅིག་བཅུ་ཕྲག་བདུན་ཞེས་པའོ། །སོགས་ཀྱི་སྒྲས་མཚན་དཔེ་སྟེ། འཁོར་དང་བཀྲ་ཤིས་དག་བསྡུའོ།། དེ་ལྟ་བུ་ལྷ་སྤྱིའི་མཚན་ཉིད་དང་། ཁྱད་པར་ལྷོ་སོ་སོའི་རྟོག་པ་གང་བརྟུལ་གཅིག་ཉོན་མོངས་པ་གང་ཞི་ནས་འབྲས་བུ་གང་སྣང་བ་ལ་སོགས་པ་འོག་ནས་འབྱུང་བ་དག་དབང་པོའི་བྱེ་བྲག་གིས་རབ་ཀྱིས་གཉིས་གསུམ། འབྲིང་གིས་ལྔའམ་བཅུ་གསུམ། ཐ་མས་བདུན་ཅུ་ལ་སོགས་པ་སྒོ་ནས་འཆད་པའམ་ཉན་པ་སྟེ་འབད་དེ་སྤྱད་པར་བྱའོ། །ཞེས་གདམས་པ་དང་འགྲོ་བར་བྱའོ། །དེ་ཡང་ངེས་པར་གཟུང་བ་སྟེ། དེ་ཉིད་དེ་འབྲུ་མང་པོའི་བསྡུ་བར་གྱི་སྒྲ་མི་མངོན་པ་སྟེ། སྐུ་མདོག་གི་དེ་ཁོ་ན་ཉིད་དང་ཞེས་བྱ་བ་ལ་སོགས་པར་སྦྱར་ཏེ་ལྔ་ནི་གྲངས་ངེས་པར་བཀོད་པའོ། ༈ །འདི་ན་མར་སྐུ་མདོག་གི་དེ་ཁོ་ན་ཉིད་ལ་སོགས་པ་གཞུང་དོན་རྒྱས་པར་སྟོན་པའི་སྐབས་ལས་ཐུན་མོང་གི་མཚན་ཉིད་སྤྱིར་བསྟན་པ་སྟེ། དེ་ཡང་དེ་ལ་ཞེས་པ་ལ་སོགས་པའི་དོན་ལྔ་ལས། དང་པོ་སྐུ་མདོག་གི་དེ་ཁོ་ན་ཉིད་དམིགས་ཀྱིས་བཀར་བ་སྟེ། དེ་ལ་རང་བཞིན་གྱིས་དཀར་ཞིང་སྣུམ་ལ་གསལ་ཞིང་འཇམ་པ་རང་བཞིན་དང་ཆོས་ཉིད་ཀྱི་སྣང་བ་ཡིན་ལ། དེ་དག་གི་དཔེ་ཉེ་བར་བཀོད་པ་ནི། དཔེར་ན་དུང་ལ་ནག་ནོག་གི་དྲི་མ་མེད་པ་ལྟར། དེ་བཞིན་གཤེགས་པའི་སྐུ་ལ་ཉོན་མོངས་པའི་སྐྱོན་གྱི་དྲི་མ་མི་མངའ་བའི་རྟགས་སོ། །དེ་བཞིན་དུ་མེ་ཏོག་ཀུ་མུ་ཏ་ནི་སྣུམས་ལ་འཚེར་བ་སྟེ་སྐུ་གཟི་མདངས་དང་ལྡན་པའོ། །ཟླ་བ་གསལ་ཞིང་རྒྱས་པ་ཀུན་ཏུ་ཐལ་ལེར་སྣང་བ་ལྟར། དེ་བཞིན་གཤེགས་པའི་སྐུ་ལ་ཉེས་པའི་སྐྱོན་ཐམས་ཅད་སྤངས་ཤིང་ཆེ་བའི་ཡོན་ཏན་རྒྱས་པའི་རྟགས་སོ། །ཉི་མ་གསལ་ཞིང་འཚེར་བ་ལྟར། །དེ་བཞིན་གཤེགས་པའི་སྐུ་རང་བཞིན་གྱིས་འོད་གསལ་བ་དང་ལྡན་པའོ། །རིགས་ཀྱི་ཁ་དོག་ཅེས་བྱ་བ་ནི། དེ་བཞིན་གཤེགས་པའི་ཡེ་ཤེས་ཀྱི་མཛད་པ་སོ་སོར་སྣང་བའི་རྟགས་ཏེ། དཔལ་རྡོ་རྗེ་སེམས་དཔའི་ཐུགས་ཆོས་ཉིད་དེ་ལ་ནི། དེ་བཞིན་གཤེགས་པ་འཇིག་རྟེན་དུ་གཤེགས་ཀྱང་རུང་། མ་གཤེགས་ཀྱང་རུང་། སངས་རྒྱས་སྒམ་པོས་བཟང་བར་བཅོས་སུ་མེད། སེམས་ཅན་སྒྲིན་པོས་ངན་པར་བསྒྱུར་ཏུ་ཡང་མེད་དེ་བསླད་པའི་ཡུལ་ལས་འདས་པས་མ་བསླད་པའི་ཆོས་ཉིད་དེ་ནག་པོར་བསྟན་ལ། དེས་མཚན་མའི་རྣམ་པར་རྟོག་པ་མ་སྤངས་དག་པས་ནི་མ་སྤངས་པའི་ཡེ་ཤེས་ཏེ། རྣམ་པར་སྣང་མཛད་དཀར་པོར་བསྟན། །དེས་ཞེན་ཆགས་མི་མངའ་བར་འགྲོ་དོན་མཛད་པ་ནི་མ་ཆགས་པའི་ཐུགས་རྗེ་སྟེ། སྣང་བ་མཐའ་ཡས་སྐུ་མདོག་དམར་པོར་སྟོན་ནོ། །དེ་ལྟར་དོན་མཛད་པའི་དུས་ན་ཆེ་བའི་ཡོན་ཏན་ཟད་པ་མེད་པ་འབྱུང་བས་རིན་ཆེན་འབྱུང་ལྡན་སེར་པོར་བསྟན། དེས་མ་རྟོགས་པའི་སེམས་ཅན་ལ་ཕྲིན་ལས་རྣམ་བཞིས་ཇི་ལྟར་འདུལ་བར་མཛད་པའི་ཕྲིན་ལས་མཐར་ཕྱིན་པས་དོན་ཡོད་གྲུབ་པ་སྐུ་མདོག་ལྗང་གུར་བསྟན་པ་སྟེ། དེ་ཡང་ལུང་ལས་ཀྱང་། དེ་བཞིན་ཉིད་ཀྱི་དབྱིངས་ཉིད་ལས། །ཅིས་ཀྱང་མི་ཚུགས་བཅོས་སུ་མེད། །ཁ་དོག་ནག་པོའི་དངོས་པོ་ལ། །ཚོན་གཞན་དག་གིས་བསྒྱུར་དུ་མེད། །ཆོས་རྣམས་བདག་མེད་རྟོགས་བྱ་དང་། །བྱང་ཆུབ་སེམས་ནི་ངག་བྱའི་ཕྱིར། །ཀུན་ཏུ་མདོག་ནི་དཀར་པོར་བསྟན། །དེ་རྟོགས་བྱ་ཕྱིར་དཀར་པོའི་མདོག །ཆོས་རྣམས་མ་ལུས་ཐམས་ཅད་ཀུན། །པདྨ་རཱ་ག་ཞེས་བརྗོད་དེ། །ཆགས་དང་ཆགས་པར་བྱ་བ་མེད། །ཆགས་མེད་ཕྱིར་ཡང་དམར་པོའོ། །ཡོན་ཏན་གཏེར་ཆེན་ཟད་མི་ཤེས། །ཆོས་ཀྱི་དབྱིངས་ཉིད་མ་ལུས་པ། །ཐམས་ཅད་འབྱུང་བའི་གནས་ཡིན་པས། །ཁ་དོག་གསེར་གྱི་མདོག་ཏུ་བསྟན། །ཆོས་རྣམས་ཕྱིན་ཅི་ལོག་རྣམས་ཀུན། །ཐུགས་རྗེས་དབྱིངས་སུ་བགོད་དགེངས་པས། །ལས་རྣམས་མ་ལུས་རྫོགས་བྱའི་ཕྱིར། །ཀུན་ཏུ་ལས་ནི་ལྗང་ཀུའི་མདོག །ཅེས་འབྱུང་བ་ལྟ་བུའོ། ༈ །འདི་ནི་མར་ལ་ཕྱག་མཚན་གྱི་དེ་ཁོ་ན་ཉིད་སྟོན་ཏེ། དེ་ཡང་རྣམ་པར་དབྱེ་བ་རེ་ཞིག་གསུམ་སྟེ། ཕྱག་དང་། ཕྱག་མཚན། ཕྱག་རྒྱའོ། །དེ་ཡང་ཕྱག་ནི་དབྱིངས་དང་ཡེ་ཤེས་སམ་ཐབས་དང་ཤེས་རབ་གཉིས་མཚོན་ཕྱིར་ཕྱག་གཉིས། ཕ་རོལ་ཏུ་ཕྱིན་པ་དྲུག་གམ་ཡེ་ཤེས་དྲུག་མཚོན་ཕྱིར་ཕྱག་དྲུག་ཏུ་བསྟན། ཕྱག་མཚན་ནི་གཙོ་བོ་དང་འཁོར་གྱི་བྱེ་བྲག་གི་དྲུག་གམ་གཉིས་པ་སྟེ། འགྲོ་བ་དྲུག་འདུལ་བའི་ཕྱིར་ཡེ་ཤེས་དྲུག་དང་། ཕ་རོལ་དུ་ཕྱིན་པ་དྲུག་དང་། གཟུང་བ་དང་འཛིན་པ་གཉིས་སྤོང་བའི་གཉེན་པོར་ཐབས་དང་ཤེས་རབ་དང་། དབྱིངས་དང་ཡེ་ཤེས་སུ་བསྟན་ཏོ། །ཕྱག་རྒྱ་ནི་བཞི་སྟེ། དབྱིངས་འགྱུར་མི་སྲིད་པའི་ཕྱག་རྒྱ་དང་། གཟུགས་འདའ་བར་དཀའ་བའི་ཕྱག་རྒྱ་དང་། འདུལ་དབང་མ་ངེས་པའི་ཕྱག་རྒྱ་དང་། འབྲེལ་པ་ལས་ཀྱི་ཕྱག་རྒྱའོ། །དེ་ལ་དབྱིངས་མི་འགྱུར་བའི་ཕྱག་རྒྱ་ལའང་གཉིས་ཏེ། མ་སྐྱེས་པའི་ཕྱག་རྒྱ་དང་། གསལ་བའི་ཕྱག་རྒྱའོ། །དེ་ལ་མ་སྐྱེས་པ་ནི་སྣང་ལ་རང་བཞིན་མེད་པ་སྟེ། སྣང་བ་ཉིད་ན་རང་གི་ངོ་བོ་ཉིད་ཀྱིས་སྟོང་པ་སྟེ། དེ་ནི་ལུང་ལས། སྣང་བ་ཉིད་ན་མེད་པའི་ཆོས་ཉིད་ལ། །ཤེས་ལྡན་རྣམས་ལ་མེད་པའི་བློ་མི་འབྱུང་། །ཞེས་འབྱུང་བ་ལྟ་བུའོ། །གསལ་བའི་ཕྱག་རྒྱ་ལ་ཡང་གསུམ་སྟེ། ཁ་དོག་ཡུལ་གྱི་ཕྱག་རྒྱ་དང་། མཚོན་པ་གཟུགས་ཀྱི་ཕྱག་རྒྱ་དང་། མཚན་མ་འཛིན་པའི་ཕྱག་རྒྱའོ། །དེ་ཡང་དང་པོ་ནི་སྐུ་མདོག་གིས་འདུལ་བ་སྟེ། ཁ་དོག་བསྡུ་ན་ལྔར་སྣང་བ་ཉིད་གོང་དུ་བསྟན་པའི་རིགས་ལྔར་སྣང་བའོ། །མཚོན་པ་གཟུགས་ནི་དབང་པོ་ལྔ་ཡུལ་ལྔ་ལ་ལྷ་འདོད་པའི་ངོ་བོ་ཡོན་ཏན་ལྔའི་ཕྱག་རྒྱར་ཐེབས་པ་ལ་བྱ་སྟེ། མིག་གིས་གཟུགས་ཐམས་ཅད་གཟུགས་རྡོ་རྗེ་ལྷ་མོར་སྣང་བ་ལ་སོགས་པའི། མཚན་མར་འཛིན་པའི་ཕྱག་རྒྱ་ནི། རིགས་ལྔ་སོ་སོའི་མཚན་མ་འཛིན་པའི་ཡུམ་ཆེན་མོ་ལྔར་སྣང་བ་ལ་བྱ་སྟེ། སྲ་བའི་མཚན་མར་འཛིན་པས་སངས་རྒྱས་སྤྱན་མ་ལ་སོགས་པར་སྣང་ངོ་། །དེ་དག་ནི་རང་གི་ངོ་བོས་མ་སྐྱེས་པ་དང་། དེ་དག་གི་ངོ་བོས་གསལ་བའི་ཕྱིར་རོ། །གཟུགས་འདའ་བར་དཀའ་བའི་ཕྱག་རྒྱ་ནི་གསུམ་སྟེ། གྲུབ་པ་རྟགས་ཀྱི་ཕྱག་རྒྱ་དང་། མཛད་པ་ལས་ཀྱི་ཕྱག་རྒྱ་དང་། མི་སྐྱོར་བ་ནན་ཏན་གྱི་ཕྱག་རྒྱའོ། །དེ་ལ་གྲུབ་པ་རྟགས་ཀྱི་ཕྱག་རྒྱ་ནི། བདེ་བར་གཤེགས་པ་རྣམས་ཀྱིས་སྔོན་ཇི་ལྟ་བུ་སྤྱད་པས་དེ་ཇི་ལྟ་བུ་གྲུབ་པའི་རྟགས་སུ་སྣང་བ་སྟེ། སྔོན་ལུས་ངག་ཡིད་གསུམ་རིག་པ་སྦྱངས་པས། སྐུ་གསུང་ཐུགས་སུ་གྲུབ་པའི་རྟགས་སུ་དབུ་གསུམ་དུ་སྣང་ལ། རྣམ་པར་ཐར་པ་གསུམ་སྤྱད་པས་ཡེ་ཤེས་གསུམ་གྲུབ་པའི་རྟགས་སུ་སྤྱན་གསུམ་ཏིང་ངེ་འཛིན་གསུམ་བསྒོམས་པས་སྐུ་གསུང་ཐུགས་གྲུབ་པའི་རྟགས་སུ་ཤངས་གསུམ། ཆོ་ག་རྣམ་པ་གསུམ་གྱིས་ཐེག་པ་ངེས་པའི་དོན་གསུམ་འཆད་པའི་རྟགས་སུ་ལྗགས་གསུམ། དབང་པོ་དྲུག་གིས་དག་པར་སྤྱད་པས་ཕ་རོལ་ཏུ་ཕྱིན་པ་དྲུག་གྲུབ་པའི་རྟགས་སུ་ཕྱག་མཚན་དྲུག །གཟུང་འཛིན་གཉིས་དག་པར་སྤྱད་པས་ཐབས་དང་ཤེས་རབ་གཉིས་སུ་གྲུབ་པའི་རྟགས་སུ་ཡབ་ཡུམ་དུ་སྣང་བ་ལ་སོགས་པ་ནི་གྲུབ་པ་རྟགས་ཀྱི་ཕྱག་རྒྱའོ། །འོ་ན་བདེ་བར་གཤེགས་པས་སྔོན་དེ་ལྟར་གྲུབ་ན། དེ་དག་གིས་ཅི་མཛད་ཅེ་ན། དབུ་གསུམ་གྱིས་སྲིད་པ་གསུམ་གྱི་མགོ་མཛད། སྤྱན་གསུམ་གྱིས་སྲིད་པ་གསུམ་གྱི་བྱ་ར་མཛད། ལྗགས་གསུམ་གྱིས་ཐེག་པ་གསུམ་གྱི་གདངས་ངར་སྒྲོགས། ཤངས་གསུམ་ནས་སྤྲུལ་པ་འཕྲོ། །ཕྱག་དྲུག་གིས་རྒྱུད་དྲུག་གཅོད་ཕྱག་མཚན་དྲུག་གིས་ཉོན་མོངས་པ་དྲུག་སྦྱོང་། ཞབས་བཞིས་ཐབས་དང་ཤེས་རབ་དབྱིངས་དང་ཡེ་ཤེས་ཀྱིས་འགྲོ་བའི་དོན་མཛད་པའོ། །མི་སྐྱོར་བ་ནན་ཏན་ནི་དངོས་སུ་བས། འདུལ་དབང་མ་ངེས་པའི་ཕྱག་རྒྱ་ནི། འགྲོ་བ་འདུལ་བའི་དབང་གིས་སྐུ་གཉིས་ཀྱི་སྣང་བའམ། སྤྲུལ་པའི་སྐུའི་མཛད་པ་ནི་ཐ་དད་བསམ་ཡས་ཏེ། གཅིག་ཏུ་ཆད་པའི་གཉིས་སུ་ཉེས་པ་མེད་པའོ། །འབྲེལ་པ་ལས་ཀྱི་ཕྱག་རྒྱ་ལ་ཡང་གཉིས་ཏེ། དམ་ཚིག་གིས་ཕྱག་རྒྱ་དང་། ལས་ཀྱི་ཕྱག་རྒྱའོ། །དེ་ཡང་སོར་མོ་བསྣོལ་བ་ལས་བྱུང་བ་ཐམས་ཅད་ནི་དམ་ཚིག་གིས་ཕྱག་རྒྱ་ལ། སོར་མོ་ཕྱེ་བས་ལས་བྱུང་བ་ཐམས་ཅད་ནི། ལས་ཀྱི་ཕྱག་རྒྱ་སྟེ། དེ་ཡང་བསྣོལ་ཞིང་བསྡམ་པ་དམ་ཚིག་སྟེ། ཕྱེ་བ་ལས་ཀྱི་ཕྱག་རྒྱ་ཡིན། །ཞེས་འབྱུང་བའོ། ༈ །འདི་ན་མར་བཞུགས་ཚུལ་གྱི་དེ་ཁོ་ན་ཉིད་སྟོན་ཏེ། དེ་ཡང་རྣམ་པར་དབྱེ་བ་གསུམ་སྟེ། བཞུགས་ཐབས་ཀྱི་དེ་ཁོ་ན་ཉིད་དང་། བཞུགས་གནས་དང་བཞུགས་ཚུལ་གྱི་དེ་ཁོ་ན་ཉིད་དོ། །དེ་ཡང་བཞུགས་ཐབས་ལ་ཡང་གཉིས་ཏེ། རང་བཞིན་གྱི་བཞུགས་ཐབས། ཁྱད་པར་གྱི་བཞུགས་ཐབས་སོ། །དེ་བསྟན་པའི་ཕྱིར། ཐབས་ནི། ཞེས་པ་ལ་སོགས་པ་གསུངས་ཏེ། དངོས་སུ་དེ་བཞིན་གཤེགས་པའི་སྐུ་འོད་དང་གཟི་མདངས་སུ་ལྡན་པའི་སྐུ་གསུང་གྱི་ངོ་བོ་ལ་བཞུགས་པ་ལ་བྱ་སྟེ། དེ་ཡང་ཇི་ལྟར་ཞེ་ན། ལུང་ལས་ཀྱང་དམར་པོ་ལ་སོགས་འབར་འདྲ་བ། འོད་ཀྱི་དཀྱིལ་འཁོར་གྱིས་ནི་བརྒྱན། །ཟླ་བ་དྲི་མེད་མདོག་འདྲ་བ། །གློག་དང་ལྡན་པ་རྒྱན་དུ་བསམ། །ཞེས་འབྱུང་སྟེ། དེ་ཡང་ཁ་དོག་དམར་པོ་དངོས་མ་ཡིན་ཡང་། ཁ་དོག་དམར་པོ་ནི། ཁ་དོག་གཞན་བས་གཟི་མདངས་ཆེ་བས་དཔེར་བསྟན་པ་ཡིན་ལ། འདི་ན་གདན་ཟླ་བའི་དལ་གྱི་འོད་དཔུང་གིས་བདེ་བར་གཤེགས་པའི་སྐུ་ལ་ཉི་མ་བཞིན་དུ་ཤར་ནས། འོད་ཀྱི་མཐའ་ཀུན་གཞའ་ཚོན་ནམ་སྤྲིན་ནམ་རི་འམ་གོས་ཟུའི་འདབ་མ་ལྟར་འཁོར་བའོ། །ཟླ་བ་དྲི་མེད་ཅེས་བྱ་སྟེ། ཟླ་བ་དྲི་མ་མེད་པ་སྟོང་དུས་གཅིག་ཏུ་ཤར་བ་བས་ཀྱང་འོད་གསལ་ཞིང་གཟི་བྱིན་ཆེ་བ་སྟེ། དེ་ནི་སྐུ་གསུམ་དང་སྦྱར་ཏེ། འོད་ཀྱི་གོང་བུ་དཀར་ལ་ཟླུམ་པ་ནི་ཆོས་ཀྱི་སྐུ། འོད་ཀྱི་དཀྱིལ་ན་དེ་བཞིན་གཤེགས་པ་བཞུགས་པ་ནི་ལོངས་སྤྱོད་རྫོགས་པའི་སྐུའོ། །མཐའ་གོས་ཐུ་སུབ་མ་ལྟར་འཁོར་བ་ནི་སྤྲུལ་པའི་སྐུ་དང་སྦྱར་རོ། །ཁྱད་པར་གྱི་བཞུགས་ཐབས་ནི། ཞབས་ཀྱི་བརྐྱངས་བསྐུམས་སམ་མདོར་མདུད་ལ་བྱ་སྟེ། དེ་ཡང་ལུང་ལས། མཉམ་པའི་སྐྱིལ་མོ་ཀྲུང་དང་། རྡོ་རྗེའི་སྐྱིལ་མོ་ཀྲུང་དང་། རིན་པོ་ཆེའི་དང་། པདྨའི་དང་། ལས་ཀྱི་སྐྱིལ་ཀྲུང་ངོ་། །ཞེས་འབྱུང་སྟེ། ཞབས་མདུད་ནས་གཅིག་གི་སྟེང་དུ་གཅིག་བྱུང་བ་ནི་མཉམ་པའོ། །གཡས་ཀྱིས་གཡོན་མནན་པ་ནི་རྡོ་རྗེའི་འོ། །སོར་མོ་བཅུ་པདྨ་ལྟར་ཁས་ཕུལ་པ་ནི་པདྨའི་འོ། །ཞབས་མཐིལ་སྦྱར་བ་ནི་རིན་པོ་ཆེའི་འོ། །ཞབས་འབབ་སྐྱིལ་ཏེ་བཞེངས་ལམ་རག་པ་ནི་སྣ་ཚོགས་སྐྱིལ་ཀྲུང་ངོ་། །ཡང་ན་བུདྡྷ་ཐམས་ཅད་ནི་མཉམ་པའི་སྐྱིལ་མོ་ཀྲུང་དུ་བཞུགས་པའོ། །སེམས་དཔའ་རྣམས་ནི་ཕྱེད་སྐྱིལ་ལོ། །ཐུབ་པ་ནི་བཞེངས་ཚུལ་ལོ། །ཁྲོ་བོ་ནི་གཡས་བརྐྱང་བའོ། །ཁྲོ་མོ་ནི་གཡོན་བརྐྱང་བའོ། །དེ་ཡང་ལུང་དག་ལས། སངས་རྒྱས་ཐམས་ཅད་མཉམ་སྦྱོར་བས། །སེམས་དཔའི་སྐྱིལ་ཀྲུང་སྦྱར་བ་སྟེ། །བྱང་ཆུབ་སེམས་དཔའ་དེ་བཞིན་གཤེགས། །ཁྲོ་གཉེར་གཡས་བརྐྱང་དག་ཏུའོ། །ཞེས་པ་དང་གདན་ལ་རྫོགས་དང་སེམས་དཔའི་ཚུལ། ཅེས་པས། ཐུབ་པ་བཞེངས་ཚུལ། སྒོ་སྲུང་ལྡང་སྟབས་ཚུལ་ཞེས་པ་ལ་སོགས་པའོ། ༈ །བཞུགས་གནས་ཀྱི་དེ་ཁོ་ན་ཉིད་བསྟན་པར་འདོད་ནས། གནས་ནི། ཞེས་བྱ་བ་ལ་སོགས་པ་གསུངས་ཏེ། དེའི་ཡོན་ཏན་ཡང་། བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་བསགས་པ་ཆེ་བའི་ཡོན་ཏན་ཐམས་ཅད་རྫོགས་པས་རྒྱས་པའི་ཕྱིར། མཐའ་གླུ་བཞིར་སྣང་ལ། དེ་ལྟར་སྣང་ཙམ་ན་རང་བཞིན་མ་གྲུབ་ཅིང་གཞལ་བྱ་མ་གྲུབ་པས། གཞལ་ཡས་དེར་རྣམ་པར་ཐར་པ་བཞིའི་སྒོ་ནས་འཇུག་པ་དེའི་རྟགས་སུ་སྒོ་བཞི། ཐེག་པ་བརྒྱད་ཞོན་ཏེ་བགྲོད་པའི་རྟགས་སུ་རྟ་བབ་བརྒྱད། བྱིན་རླབས་ཀྱི་ཆོ་འཕྲུལ་ཡ་མཚན་ཆེ་བ་བསམ་གྱིས་མི་ཁྱབ་པ་མདའ་བའི་རྟགས་སུ་མུ་ཏིག་ཧ་ར་དང་ཆུན་འཕྱང་ལ་སོགས་པའི་རྒྱན་སྣ་ཚོགས་པ་དང་། སྐུ་གསུང་ཐུགས་ཀྱི་དམ་ཚིག་ལ་གནས་པ་དང་། མཉམ་པ་རྣམ་པ་གཉིས་ལས་མི་འདའ་བའི་རྟགས་སུ་ཏ་ལའི་ལྗོན་པ་དང་། རེ་འདོད་སྐོང་བའི་རྟགས་སུ་དཔག་བསམ་གྱི་ཤིང་དང་ཐམས་ཅད་ལ་དབང་བསྒྱུར་བའི་རྟགས་སུ་འཇིག་རྟེན་དང་འཇིག་རྟེན་ལས་འདས་པའི་ལྷ་ཆེན་པོ་བརྒྱད་དང་། སེམས་དཔའ་སེམས་མས་བསྐོར་བའོ། །དེ་ཡང་ལུང་ལས་བསོད་ནམས་ཡེ་ཤེས་ཚོགས་རྫོགས་པའི། ཐུགས་རྗེ་རྒྱས་པའི་གཞལ་ཡས་ཁང་། །མཐའ་དང་དབུས་མེད་རྒྱས་པར་གནས། །སྟོང་སྨོན་མཚན་མེད་འོད་གསལ་འཇུག །དེ་གྲོལ་ལམ་གྱི་སྟེགས་བརྒྱད་དང་། །ཐུགས་རྗེ་ཤར་དང་སྒྲིབ་པ་ནུབ། །རྣམ་རྟོག་མཚན་མ་བྱང་གྱུར་ཅིང་། །དེ་ཡི་ཡོན་ཏན་ཆེན་པོ་རྫོགས། །ཐུགས་རྗེའི་བྱིན་རླབས་འཕྲོས་པ་ལས། །ཡེ་ཤེས་བཞི་ཡི་དཀྱིལ་འཁོར་འཕྲོ། །ཡེ་ཤེས་ལྔ་དང་སྐུ་གསུང་ཐུགས། །བྱིན་རླབས་ཕ་མཚན་བསམ་མི་ཁྱབ། །རང་སྣང་བ་ཡི་ཐབས་ལས་བྱུང་། །ཡེ་ཤེས་མཉམ་ཉིད་མི་འདའ་བས། །ཏཱ་ལའི་ལྗོན་ཤིང་རང་བཞིན་གནས། །རེ་བ་ཡིད་བཞིན་སྐོང་བའི་ཕྱིར། །དཔག་བསམ་ཤིང་ནི་རིན་ཆེན་འབར། །ཐམས་ཅད་ལ་ནི་དབང་བསྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཞེས་འབྱུང་བ་ལྟར་ཤེས་པར་བྱའོ། །དེ་ཡང་བསྡུ་ན་གཞལ་བ་ལས་འདས་པ་དེ་ཉིད་དུ་འདུའོ། ༈ །ད་ནི་བཞུགས་ཚུལ་བསྟན་པར་འདོད་ནས། ཚུལ་ནི་གསུམ་གསུམ། ཞེས་པ་ལ་སོགས་པ་སྨོས་ཏེ། སྤྱི་དང་། ཁྱད་པར་དང་། མདོ་དང་། རྒྱས་པའི་བྱེ་བྲག་གིས་གཉིས་ཏེ། །མདོ་ནི་གསུམ་གསུམ་སྟེ་དགུའོ། །དེ་ཡང་ལུང་དག་ལས། མཉེན་ལྕུགས་འཁྲིལ་ལྡེམས་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་ཅན། །ཞེས་འབྱུང་བ་སྟེ། བདེ་བར་གཤེགས་པ་སྔོན་སྤངས་པ་ཕུན་སུམ་ཚོགས་པ་ཉོན་མོངས་པ་སྤངས། དེ་ལྟར་འབྲས་བུ་ཡེ་ཤེས་ཕུན་སུམ་ཚོགས་པ་དང་ལྡན་ཏེ། ཞེ་སྡང་སྤངས་པས་མཉེན་པའི་ཚུལ་དང་། ང་རྒྱལ་སྤངས་བས་ལྕུགས་པའི་ཚུལ་དང་། ཕྲག་དོག་སྤངས་པས་འཁྲིལ་བའི་ཚུལ་དང་། འདོད་ཆགས་སྤངས་པས་ལྡེམ་པའི་ཚུལ་དང་། གཏི་མུག་སྤངས་པས་གཞོན་ནུའི་ཚུལ་དང་། ཡེ་ཤེས་གཉིས་སུ་མེད་པར་གསལ་བས་གསལ་ཅེས་པའོ། །ཉོན་མོངས་པ་སྤངས་པའི་འབྲས་བུ་ཡེ་ཤེས་ལྔ་དང་ལྡན་ཏེ། ཆོས་ཀྱི་དབྱིངས་དང་། མེ་ལོང་ལྟ་བུ་དང་། སོ་སོར་རྟོག་པས་འཁོར་བ་དང་མྱ་ངན་ལས་འདས་པ་སོ་སོར་རྟོགས་པས་འཚེར། མཉམ་པ་ཉིད་ཀྱི་ཡེ་ཤེས་ཀྱི་བདག་མེད་པར་རྟོགས་པས་ལྷུན་སྡུག །བྱ་བ་ནན་ཏན་གྱི་ཡེ་ཤེས་ཀྱིས་འགྲོ་བའི་ངོན་མཛད་པའི་དུས་ན་ཇི་ལྟར་འདུལ་བ་བཞིན་དོན་སྤྱོད་པས་གཟི་བྱིན་དང་ལྡན་པའོ། །ཁྱད་པར་རམ་རྒྱས་པར་ནི། བཅུ་གཉིས་གསུམ་ནི་བཅུ་ཕྲག་གཉིས་དང་གསུམ་སྟེ། ཉི་ཤུ་རྩ་གསུམ་ནི་འདི་ཉིད་ཀྱིའོ། །དེ་ཡང་འདྲ་བ་དང་དོན་ལ་འཇུག་པ་སྟེ། དེ་ཡང་ཅི་རིགས་སུ་སྦྱར་རོ། །བཞེངས་པའི་ཚུལ་དང་། གཤེགས་པའི་ཚུལ་ནི་ཐུབ་པའོ། །གཟིགས་པ་དང་། མཉེན་པ་དང་། ལྕུགས་པའི་ཚུལ་ནི་གཙོ་བོའོ། །འཁྲིལ་བའི་ཚུལ་ནི་ཡུམ་ལྔའི་འོ། །ལྡེམ་པ་ནི་སེམས་དཔའི་འོ། །གཞོན་ནུའི་ཚུལ་ནི་སེམས་མའི་འོ། །གསལ་བ་དང་འཚོར་བ་ནི་སྤྱིའི་མདངས་སོ། །ལྷུན་སྡུག་པ་ནི་ཀུན་ཏུ་བཟང་པོ་ཡབ་ཡུམ་གྱིའོ། །གཟི་བྱིན་འབར་བའི་ཚུལ་ནི་སྒོ་བ་ཡབ་ཡུམ་གྱིའོ། །དེ་བཞིན་དུ་འཁྱུག་པ་ནི་སྤྱན་ནོ། །དགོངས་པ་ནི་ཐུགས་སོ། །བརྟན་པ་ནི་ཞབས་སོ །བརྟེན་པ་ནི་ཕྱག་གོ། །འབྱོ་བ་ནི་དབུའོ། །འདུད་པ་ནི་སྐུའོ། །ཅམ་མེ་བ་ནི་གདན་ནོ། །མལ་ལེ་བ་ནི་རྒྱན་ནོ། །ལྷན་ནེ་བ་ནི་ཆས་སོ། །སལ་ལེ་བ་ནི་འོད་ཟེར་གྱི་ཚུལ་དུ་རིག་པར་བྱའོ། །དེ་བཞིན་དུ་གཞན་དུ་ཡང་ཉན་པ་དང་སྟོན་པ་དག་གིས་དཔྱད་པར་བྱའོ། ༈ །ད་ནི་གདན་ཁྲིའི་དེ་ཁོ་ན་ཉིད་བསྟན་པར་འདོད་ནས་བཞི་པའང་གསུམ་སྟེ། ཞེས་པ་ལ་སོགས་པ་གསུངས་ཏེ། དེ་ཡང་གྲངས་ཀྱི་རིམ་པས་གདན་ཁྲིའི་དེ་ཁོ་ན་ཉིད་ལ་རྣམ་པར་དབྱེ་བ་གསུམ་སྟེ། དྷརྨཱ་ཙཀྲ་ཆོས་ཀྱི་འཁོར་ལོའི་གདན་ཁྲི་དང་། སའི་ཁྱད་པར་གྱི་གདན་ཁྲི་དང་། ༼༠༽ ཡོན་ཏན་རྟགས་ཀྱི་གདན་ཁྲིའོ། ༼༠༽ །དེ་ལ་ཆོས་ཀྱི་འཁོར་ལོ་བསྐོར་བའི་གདན་ཁྲི་ནི་འཁོར་ལོ་མུ་ཁྱུད་དང་བཅས་པ་སྟེ། ཆོས་ཐམས་ཅད་བདག་དང་གཉིས་སུ་མེད་པས་དབྱིངས་གཅིག་པས་སྤྲོས་པ་མེད་པའི་ཕྱིར་ལྟེ་བ་བཞི་ཟླུམ་པོར་བསྟན་ལ། ཆོས་ཐམས་ཅད་མྱ་ངན་ལས་འདས་པའི་ཡེ་ཤེས་ཀྱི་རྒྱུ་དང་འབྲས་བུར་ལྡན་པས་ནི། ཐམས་ཅད་མཁྱེན་པའི་ཆོས་ཀྱི་འཁོར་ལོ་བསྐོར་བའི་ཕྱིར་འཁོར་ལོ་ཟུར་ཅན་དུ་བསྟན་ཏེ། དེ་ནི་ལྷག་པའི་བསླབ་པ་གསུམ་དང་ཡང་སྦྱར་ཏེ། དེ་ཡང་ལྷག་པ་ཚུལ་ཁྲིམས་ལ་མཚན་མའི་སྐྱོན་མེད་པའི་རྟགས་སུ་ནི། འཁོར་ལོ་ཕྱིའི་རེ་མིག་ཟླུམ་པོར་བསྟན་ལ། དེ་ཙམ་ན་ལྷག་པའི་ཤེས་རབ་ཀྱིས་སོགས་ཕྱིན་པའི་རྟགས་སུ་འཁོར་ལོ་ཟུར་ཅན་དུ་བསྟན་ཏེ། དེ་ཡང་ལུང་ལས་ཆོས་རྣམས་ཐམས་ཅད་མི་དམིགས་པས། །དབྱིངས་སུ་ཐིམ་པས་འོད་ཟེར་གསལ། །གཅིག་དང་དུ་མར་བྲལ་བའི་ཕྱིར། །དཀྱིལ་འཁོར་སྤྲོས་མེད་ཟླུམ་པོར་བསྟན། །ཡེ་ནས་མྱ་ངན་འདས་པའི་ཆོས། །ཡེ་ཤེས་རྒྱུད་དང་འབྲས་བུར་ལྡན། །ཐམས་ཅད་མཁྱེན་པའི་ཡེ་ཤེས་སྐུས། །ཆོས་ཀྱི་འཁོར་ལོ་ཡོངས་ཀྱིས་བསྐོར། །ཞེས་གསུངས་པའོ། ༈ །སའི་ཁྱད་པར་གྱི་གདན་ཁྲི་ནི་ཉི་ཟླ་དང་པདྨ་རིན་པོ་ཆེ་སྟེ། ས་གསུམ་ནོན་པའི་ཁྱད་པར་གྱི་རྟགས་སོ། །དེ་ཡང་ཆོས་ཉིད་ཡེ་ནས་འོད་གསལ་བའི་ཕྱིར་ཉི་ཟླའི་གདན་དུ་བསྟན་པ། ལོངས་སྤྱོད་རྫོགས་པའི་སྐུ་ཡེ་ནས་རྣམ་པར་དག་པའི་ཕྱིར་པདྨ་དང་། སྤྲུལ་པའི་སྐུས་འགྲོ་བའི་རེ་བ་ཡིད་བཞིན་ཏུ་སྐོང་བའི་རྟགས་སུ་རིན་པོ་འབར་བའི་གདན་ཏུ་བསྟན་ཏེ། དེ་ཡང་ཇི་ལྟར་ཞེ་ན། དཔེར་ན་ཉི་མ་དང་ཟླ་བ་རང་བཞིན་གྱིས་འོད་གསལ་བའི་འོད་ཀྱིས་གླིང་དང་རི་བོ་ཀུན་ལ་ཁྱབ་ཅིང་གསལ་བ་ལྟར་ཆོས་ཀྱི་སྐུ་ཀུན་ཏུ་འོད་ཀྱི་ས་ལ་བཞུགས་པ་ལྟར་ཐེགས་པ་ཀུན་ལ་ཁྱབ་པའི་རྟགས་སུ་ཉི་ཟླའོ། །ཡང་ན་པདྨ་ཡེ་ནས་དག་པའི་ཕྱིར་འདམ་ནས་སྐྱེས་ཀྱང་དེའི་ཉེས་པས་མ་གོས་པ་ལྟར་ལོངས་སྤྱོད་རྫོགས་པའི་སྐུ་པདྨ་སྤྱན་གྱི་ས་ལ་བཞུགས་ཤིང་འཁོར་བ་ནས་སྐུ་འཁྲུངས་ཏེ་འགྲོ་བའི་དོན་མཛད་ཀྱང་ཉོན་མོངས་ཀྱི་སྐྱོན་གྱིས་མ་གོས་པའི་རྟགས་སུ་པདྨའོ། །ཡང་རིན་པོ་ཆེ་ནི་རེ་འདོད་ཡིན་བཞིན་དུ་སྐོང་ཡང་རྟོག་པ་མེད་ཅིང་ཟད་པ་མེད་པ་ལྟར་ཡི་གེ་འཁོར་ལོ་ཚོགས་ཆེན་གྱིས་ནོན་ནས་སྤྲུལ་པའི་སྐུའི་ཆེ་བའི་ཡོན་ཏན་ནོར་བུ་རིན་པོ་ཆེ་ལྟ་བུས་གདུལ་བྱ་མཐའ་དག་ལ་སྨིན་པར་མཛད་པའི་རྟགས་སུ་རིན་པོ་ཆེ་འབར་བའི་གདན་དུ་བསྟན་ཏེ། དེ་ཡང་པདྨའི་ཁ་ལ་རིན་པོ་ཆེའི་ཕུང་པོ། དེའི་ཐ་མ་དུད་འགྲོ་དེའི་མཐའ་རིན་པོ་ཆེའི་ཁྲི་རྐང་། རིན་པོ་ཆེའི་ཁ་ལ་པདྨ་སྐྱེས། པདྨའི་ཁ་ལ་ཉི་ཟླའོ། །དེ་ཡང་ལུང་ལས། རང་བཞིན་ཡེ་ནས་འོད་གསལ་ཕྱིར། །ཉི་ཟླ་བརྩེགས་པ་འབར་བའི་གདན། །ཡེ་ནས་རྣམ་པར་དག་པའི་ཕྱིར། །མ་ཆགས་པདྨ་འབར་བའི་གདན། །ཟད་མེད་ཡེ་ཤེས་གཏེར་འབྱུང་བས། །ཡིན་བཞིན་རིན་ཆེན་འབར་བའི་གདན། །ཞེས་གསུངས་པ་ལྟ་བུའོ། །ཡོན་ཏན་རྟགས་ཀྱི་གདན་ཁྲི་ནི། བདེ་བར་གཤེགས་པའི་ཆེ་བའི་ཡོན་ཏན་དྲིལ་ན་སྐུ་གསུང་ཐུགས་ཡོན་ཏན་ཕྲིན་ལས་ལྔར་འདུས་ཏེ། སྐུ་ནི་མི་འཇིགས་པ་བཞིས་བདུད་བཞི་འཇོམས་པའི་རྟགས་སོ། །རྣམ་པར་སྣང་མཛད་ནི་སེང་གེ་བཞི་ཁ་ཕྱོགས་བཞིར་བལྟས་པའི་གདན་ལ་བཞུགས་པའོ། །ཐུགས་སྟོབས་བཅུས་མི་དགེ་བ་བཅུ་འདུལ་བའི་རྟགས་སུ་མི་བསྐྱོད་པ་གླང་པོ་བཅུ་ཕྱོགས་བཅུར་བལྟས་པའི་གདན་ལ་བཞུགས་པའོ། ༼༠༽ །ཡོན་ཏན་རྫུ་འཕྲུལ་རྐང་བཞིས། རྟགས་སུ་རིན་ཆེན་འབྱུང་ལྡན་རྟ་མཆོག་བཞིའི་གདན་ལ་བཞུགས་པའོ། ༼༠༽ །གསུང་དབྱངས་བཅུས་ས་བཅུ་ཆོས་ཀྱི་རྒྱལ་པོ་ཐོབ་པའི་རྟགས་སུ་དཔལ་སྣང་བ་མཐའ་ཡས་ཀྱི་གདན་ནི་རྨ་བྱ་བཅུའི་གདན་ལ་བཞུགས་པའོ། །ཕྲིན་ལས་རྣམ་བཞིས་སྐྱེ་བ་རྣམ་པ་བཞི་དབྱིངས་སུ་སྒྲོལ་བའི་རྟགས་སུ་དཔལ་དོན་ཡོད་གྲུབ་པ་ནི་ནམ་མཁའ་ལྡིང་བཞིའི་ཁྲི་ལ་བཞུགས་ཏེ། དེ་ཡང་ཕྱིར་བཅོམ་ལྡན་འདས་ཀྱི་ཆེ་བའི་ཡོན་ཏན་བརྩིས་པར་གྱུར་ན་བརྗོད་པ་ལས་འདས་ཏེ། སྟོང་གསུམ་གྱི་སྟོང་ཆེན་པོ་གཅིག་གི་སེམས་ཅན་སྲིན་བུ་བྷ་ཤི་ཀ་ཀུན་ཡང་འཁོར་ལོས། སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ཤ་སྟག་ཏུ་གྱུར་ཏེ། དེ་རྣམས་ཀྱི་བསོད་ནམས་ཀྱི་ཕུང་པོའང་གཅིག་ཏུ་སྡུས་པ་ནི་རི་རབ་ལྷུན་པོ་ལ་དབང་བའི་ལྷའི་དབང་པོ་བརྒྱ་བྱིན་གཅིག་ཏུ་གྲུབ་བོ། །དེ་ལྟ་བུའི་བརྒྱ་བྱིན་གྱི་བསོད་ནམས་བརྒྱ་ཕྲག་བཅུས་བསྡུས་པ་ནི། ཚོགས་ཀྱི་ལམ་པ་གཅིག་གྲུབ། །དེ་ལྟ་བུ་བརྒྱ་ཕྲག་བཅུར་གྱུར་པས་ནི་ས་བཅུ་ལ་གནས་པའི་བྱང་ཆུབ་སེམས་དཔའ་གཅིག་གྲུབ་བོ། །དེའི་བསོད་ནམས་ཀྱི་ཕུང་པོ་བརྒྱ་ཕྲག་བཅུར་བསྡུས་པས་ནི་བཅོམ་ལྡན་འདས་ཀྱི་དཔེ་བྱད་བཟང་པོ་བརྒྱད་ཅུ་ལས་གཅིག་ཙམ་གྲུབ་པའོ། །དཔེ་བྱད་བཟང་པོ་བརྒྱད་ཅུ་པོ་དེ་སྤྱིར་དྲིལ་ཏེ་བརྒྱད་ཅུར་གྱུར་པས་ནི། མཚན་བཟང་པོ་སུམ་ཅུ་རྩ་གཉིས་ལག་གཅིག་གྲུབ། མཚན་ཉི་ཤུ་རྩ་དགུར་དྲིལ་ཏེ་དེ་བརྒྱ་ཕྲག་བཅུར་གྱུར་པས་ནི་སྨིན་མཚམས་ཀྱི་མཛོད་སྤུ་གྲུབ་བོ། །དེ་བརྒྱ་ཕྲག་བཅུར་གྱུར་པས་ནི་སྤྱི་གཙུག་འགྲོ་བ་ཐམས་ཅད་ཀྱིས་བལྟར་མི་མཐོང་བ་གྲུབ་བོ། །དེ་བརྒྱ་ཕྲག་བཅུར་གྱུར་པས་ནི་གསུང་དབྱངས་ཡན་ལག་དྲུག་ཅུས་འཇིག་རྟེན་ཁམས་མཐའ་ཡས་པར་འབྱུང་བ་གྲུབ་བོ། །དེ་ལྟར་ཕྱེ་བའི་ཡོན་ཏན་མཐར་ཕྱིན་པ་ནི་མཚན་བཟང་པོ་སུམ་ཅུ་རྩ་གཉིས་ཡིན་ལ། མཚན་རྣམས་དང་ལྡན་པའི་རྟགས་སུ། །བྱོལ་སོང་གི་གདན་དུ་བསྟན་ཏེ། ཐུགས་སྟོབས་བཅུ་དང་མི་འཇིགས་པ་བཞི་དང་༼༠༽གསུང་དབང་བཅུ་དང་།༼༠༽ ཡོན་ཏན་རྫུ་འཕྲུལ་གྱི་རྐང་པ་བཞི་དང་། ཕྲིན་ལས་ཐོགས་པ་མེད་པ་བཞི་སྟེ་སུམ་ཅུ་རྩ་གཉིས་སུ་བསྟན་ནོ། །དེ་ཡང་ལུང་ལས། སྐུ་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་སྟབས་སུ་སེང་གེའི་ཁྲི་ལ་བཞུགས། །ཐུགས་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་པས་ཆགས་མེད་བགྲོད། །དེ་སྒྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་པོའི་ཚུལ། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། ། ལས་ནི་ཕྲིན་ལས་རྣམ་བཞིས་སྐྱེ་བཞི་སྒྲོལ། །དེ་གྲུབ་རྟགས་སུ་མཁའ་ལྡིང་ཁྲི་ལ་བཞུགས། ། བདེ་བར་གཤེགས་པའི་ཆེ་བའི་ཡོན་ཏན་ནི། །མཚན་མཆོག་སུམ་ཅུ་རྩ་གཉིས་རྟགས་སུ་བསྟན། །ཞེས་པས་ཡོན་ཏན་རྟགས་ཀྱི་གདན་ཁྲིར་སྣང་ངོ་། ༈ །ད་ནི་རྒྱན་དང་ཆས་ཀྱི་དེ་ཁོ་ན་ཉིད་སྣང་བར་འདོད་ནས། ལྔ་པའང་ནི་གཉིས་ཏེ། ཞེས་པ་ལ་སོགས་པ་གསུངས་ཏེ། དེའང་རིམ་པ་ལྔ་པ་ལ་སོགས་པ་རྣམ་པར་དབྱེ་བ་གཉིས་ཏེ། རྒྱན་བསྟན་པ་དང་། ཆས་བསྟན་པའོ། །དེ་ལ་རྒྱན་ཆེན་པོ་བདུན་ནི། རིན་པོ་ཆེ འི་དབུ་རྒྱན་དང་། མེ་ཏོག་གི་ཕྲེང་བའམ་ཆུན་འཕྱང་དང་། སྙན་ཆ་དང་། དོ་ཤལ་དང་། དཔུང་རྒྱན་དང་། སེ་མོ་དོ་དང་། ཕྱག་གདུབ་སྟེ། དེ་ཡང་བྱང་ཆུབ་ཀྱི་ཡན་ལག་བདུན་དང་ལྡན་ཏེ། བདེ་བར་གཤེགས་པའི་དབུ་རྒྱན་ནི། རྩེ་མོ་ལྔར་བསྟན་པའི་ནང་ནས། པདྨའི་སྐོར་འབུར་ཕྱིར་མ་བསྟན་པར་མེ་ལོང་གི་ནང་ནས་བཟུགས་བརྙན་སྣང་བ་ལྟར་རིགས་ལྔའི་སྐུ་བཞུགས་པ་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔས་ཐེག་པ་ལྔ་འགྲོ་བ་ལྔ་ལ་འཆད་པས། དབུ་རྒྱན་ནི་ཆོས་རྣམས་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གོ། །མེ་ཏོག་གི་ཆུན་པོས་དབུ་བརྒྱན་པ་ནི། དཔེར་ན་མེ་ཏོག་གིས་འགྲོ་བ་རྣམས་དགའ་བ་བསྐྱེད་ལ། བདེ་བར་གཤེགས་པ་ལ་ཕུལ་བས་དགྱེས་པས་ན་ཕྲེང་བ་ནི་དགའ་བ་ཡང་དག་བྱང་ཆུབ་ཀྱི་ཡན་ལག་དང་སྦྱར་རོ། །སྙན་ཆ་ནི་ནོར་བུ་རིན་པོ་ཆེས་ཚ་བའི་ནད་ཀྱིས་གདུང་བ་སེལ་བར་བྱེད་པ་ལ། འདིར་རྒྱན་དུ་བཞག་པས་ནི་ལུས་ངག་ཡིད་གསུམ་གྱི་གདུང་བ་དང་བྲལ་ཏེ། ཆོས་ཉིད་ཀྱི་རྒྱན་ཤིན་ཏུ་བྱང་བ་ཡང་དག་བྱང་ཆུབ་ཀྱི་ཡན་ལག་གོ། །དོ་ཤལ་མགུར་ཆུ་སྟེ་རིན་པོ་ཆེའི་ཕྲེང་བ་མགུལ་འཁོར་གྱི་དབུས་ན་མཆོད་རྟེན་མཆོད་རྡོག་བཞག་པས་ཆེ་བར་གནས་པ་སྟེ། མགུར་ཆུ་གྲངས་མང་བར་བརྒྱུས་པ་ནི་ཏིང་ངེ་འཛིན་འབུམ་ཕྲག་ལ་རོལ་བ་ཡིན་པས། དབུས་ཀྱི་མཆོད་རྡོག་རགས་པ་ནི་དཔའ་བར་འགྲོ་བའི་ཏིང་ངེ་འཛིན་གྱི་རྟགས་ཏེ། དེ་བས་ན་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང་སྦྱར་རོ། །དཔུང་རྒྱན་ནི་རིན་པོ་ཆེའི་གསེར་ལ་རིན་པོ་ཆེ་རྣམ་པ་སྣ་ཚོགས་པས་སྤྲས་པ་སྟེ། དེ་ནི་ཤེས་བྱ་ཅི་ལའང་མ་རྨོངས་པར་མཁྱེན་ཅིང་གསལ་བའི་རྟགས་ཏེ། དྲན་པ་ཡང་དག་བྱང་ཆུབ་ཀྱི་ཡན་ལག་གོ། །སེ་མོ་དོ་ནི་མུ་ཏིག་གི་གཟར་རིང་པོས་མགུལ་དཀྲིས་པ་སྟེ། མཐའ་གཉིས་ཡོངས་སུ་ཟད་པའོ། །དེ་སྐུ་ལ་དཀྲིས་པ་ནི་བདག་གི་དོན་རྟོགས་པ་ཡིན་ལ། མཐའ་གཞན་དུ་ཟག་པ་ནི་གཞན་དོན་རྟོགས་པར་བྱེད་པ་ཡིན་པས། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དང་སྦྱར་རོ། །ཕྱག་གདུབ་ནི་ཕྱག་དང་ཞབས་ཀྱི་མཁྲིག་མ་ལ་གཟེར་གྱི་ལྡེབ་བུ་དཀྲིས་པ་སྟེ། ལག་པས་ནི་བྱ་བའི་ལས་ཐམས་ཅད་བྱེད་པ་ཡིན་ལ། རྐང་པས་ནི་བགྲོད་པའི་གནས་སུ་སླེབ་པར་བྱེད་ལ། དེ་ཡང་བརྩོན་འགྲུས་ཀྱི་གོ་ཆ་ཡིན་པས་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང་སྦྱར་རོ། །དེ་ཡང་ལུང་ལས་དམ་ཆོས་རྣམ་འབྱེད་དབུ་རྒྱན་རིན་ཆེན་ཕྲེང་། དགའ་བ་ཡང་དག་མཉེས་པས་མེ་ཏོག་འཕྲེང་། །སྙན་ཆས་ལུས་སེམས་བསིལ་བྱེད་ཤིན་ཏུ་སྦྱངས། །དོ་ཤལ་ཏིང་འཛིན་འབུམ་མཆོག་ཕྲེང་བས་བཀླུབས། །རིན་ཆེན་ཚོགས་སྤྲས་དཔུང་རྒྱན་དྲན་པའི་ངང་། །འཁྲུལ་པ་བདག་འཛིན་བཏང་སྙོམས་སེ་མོ་དོ། །ཕྱག་གདུབ་སྣ་ཚོགས་ལས་མཛད་བརྩོན་འགྲུས་ལྡན། །ཞེས་འབྱུང་བས་གསལ་ལོ། །དེ་ལས་ཆས་ཆེན་པོ་ལྔ་ནི། ཐུགས་ཡེ་ཤེས་ཀྱི་ཟེ་ལྡིར་ཅོད་པཎ་དང་། ཡོན་ཏན་གཟི་མདངས་ཀྱི་སྟོད་གཡོགས་དང་། སྐུ་བརྗིད་ཚུལ་གྱི་ཆོས་གོས་དང་། གསུང་རྗེས་ཆགས་པའི་སྨད་དཀྲིས་དང་། །མཛད་པ་གར་གྱི་གསང་གོས་དང་ལྔའོ། །དེ་ཡང་མཁྱེན་པ་ཐམས་ཅད་ལ་མ་རྨོངས་པའི་རྟོགས་སུ་ཟེ་ལྡིར་གྱི་ཅོད་པན་ནོ། །ཆེ་བའི་ཡོན་ཏན་གྱིས་འགྲོ་བ་ཐམས་ཅད་ལ་དཔའ་མ་གོང་ཞིང་བརྗིད་པའི་རྟགས་སུ་ནི་དར་དཀར་གྱི་སྟོད་གཡོགས་སོ། །ཚུལ་ཁྲིམས་ཀྱི་གོས་བརྗིད་པའི་ཆས་བཟུང་བ་ནི་ཉན་ཐོས་ཀྱི་དོན་མཛད་པའི་རྟོགས་སུ་དར་སེར་པོའི་ཆོས་གོས་སོ། །འཁོར་བ་མ་སྟོངས་ཀྱི་བར་དུ་དོན་མི་གཏོང་བའི་རྟགས་སུ་དར་ཚི་གུའི་སྨད་བཀྲིས་སོ། །གསང་སྔགས་ཀྱི་དོན་ཟབ་མོའི་སྣོད་དུ་མ་གྱུར་པ་ལ་གསང་བའི་རྟགས་སུ་ཕྱག་རྒྱའི་ཕུ་དུང་ངོ་། །གཞན་ཡང་མཚན་དཔེ་ཞེས་བྱ་བ་ནི་འཁོར་གྱི་སེམས་དཔའ་དང་། སེམས་མ་ལ་སོགས་པའི་ཡོན་ཏན་བརྩི་བའི་ཚུལ་ནི། གཞན་དག་དང་རྗེས་སུ་མཐུན་ལ། འཕགས་པའི་ལམ་དག་ཀྱང་གཞན་དུ་གསལ་ལོ། །ཡང་བཀྲ་ཤིས་ཀྱི་ལྷ་མོ་བརྒྱད་ཀྱིས་ནི། བཀྲ་ཤིས་པའི་ལྷ་མོ་བརྒྱད་ཀྱི་ཕྱག་ན་བཀྲ་ཤིས་པའི་རྫས་ནི་རྟགས་བརྒྱད་དུ་བསྟན་ཏེ། དེ་ཡང་མྱ་ངན་ལས་འདས་པའི་མ་བཅིངས་པ་བཞི་དང་། འཁོར་བའི་སྐྱོན་གྱིས་མ་གོས་པ་བཞིའོ། །དེ་ཡང་མྱ་ངན་ལས་འདས་པའི་མཐའ་མ་བཅིངས་པ་བཞི་ནི། ཀུན་ཏུ་འོད་ཀྱི་ཆོས་ཀྱི་སྐུ་ལ་ཐམས་ཅད་མཁྱེན་པའི་ཡེ་ཤེས་འདུལ་བའི་དུས་མཁྱེན་ནས། ཐུགས་རྗེ་སྐྱེ་པའི་རྟགས་སུ་དཔལ་བེའུ་བསྣམས་པའོ། །དེ་ལྟར་འདུལ་བའི་དུས་སུ་ཆོས་ཀྱི་འཁོར་ལོ་བསྐོར་ཞིང་སེམས་ཅན་གྱི་དོན་མཛད་པས་རྟགས་སུ་འཁོར་ལོ་བསྣམས་པའོ། །དེ་ལྟར་དོན་མཛད་ཙམ་ན་སྦྱིན་པའི་ཕ་རོལ་ཏུ་ཕྱིན་པ་ཡིས་དབུལ་བའི་སྡུག་བསྔལ་སེལ་ཅིང་རེ་འདོད་ཡིད་བཞིན་དུ་སྐོང་བའི་རྟགས་སུ་རིན་པོ་ཆེ་རྒྱལ་མཚན་བསྟན་པའོ། །དེ་ལྟར་མི་ཟད་པའི་གཏེར་གྱིས་དོན་མཛད་པའི་ཚེ་སྐྱེ་བ་ལ་དབང་ཐོབ་པས་འཁོར་མ་འདམ་ལྟ་བུ་ནས་སྐྱེས་ཤིང་འགྲོ་བའི་དོན་མཛད་ཀྱང་འདམ་སྐྱེས་ཀྱི་པདྨ་ལྟར་སྐྱོན་གྱིས་མ་གོས་པའི་རྟགས་སུ་པདྨ་བསྣམས་པའོ། །འཁོར་བས་མ་གོས་པ་བཞི་ནི། གོང་མ་ལྟ་བུ་དེས་ནི་ས་བཅུ་ལ་དབང་བསྐུར་བའི་ཚད་དང་ལྡན་པས་བུམ་པ་བསྣམས་པའོ། །དབང་བསྐུར་བ་དེས་ཐུགས་རྗེས་གཡོག་ཅིང་ཉོན་མོངས་པའི་གདུང་བ་སེལ་བའི་རྟགས་སུ་ནི་གདུགས་སྣམས་པའོ། །དེ་ལ་གཞན་གྱི་རྒོལ་བ་ཐམས་ཅད་སྲ་བཀོད་ཞིང་མི་ཚུགས་པས། འགྲོ་བའི་དོན་དུ་གསུང་རབ་རྒྱ་མཚོ་སྒྲོགས་པའི་རྟགས་སུ་དུང་བསྣམས་པའོ། །ཡང་དཔེར་ན་ཆུ་གངས་ཅན་མཚོའི་ནང་ན་ཉ་འཁོར་བ་བྱོལ་སོང་གནང་ན་བཀྲ་ཤིས་པ་བཞིན་དུ་དབང་བཅུ་རྫོགས་ནས་ཆོས་ཀྱི་འཁོར་ལོ་བསྐོར་ནས་མཐའ་དག་སྨིན་ཞིང་བཀྲ་ཤིས་བའི་རྟགས་སུ་ཉ་བསྣམས་པའོ། །དེ་ལྟ་བུ་དང་ལྡན་པའི་རྟགས་སུ་ལྷ་མོ་དེ་བརྒྱད་ཀྱི་ལྷ་མོ་གཅིག་ལའང་ཕྱག་རྒྱ་བཞི་བཞི་དང་ལྡན་པས། བཞི་ཕྲག་བརྒྱད་དུ་སྣང་བ་ནི་མཚན་བཟང་པོ་སུམ་ཅུ་རྩ་གཉིས་སུ་བསྟན་ལ། ལྷ་མོ་རེ་རེ་ལའང་དབང་བཅུ་བཅུ་དང་ལྡན་པས་དཔེ་བྱད་བཟང་པོ་བརྒྱད་ཅུའི་རྟགས་སུ་བསྟན་ཏེ། དེ་ཡང་ལུང་ལས། ཐམས་ཅད་མཁྱེན་པའི་ཡོན་ཏན་དཔལ་བེའུ་ཐུགས་མཛད་པ་ཁ་ལོ་བསྒྱུར་བའི་འཁོར་ལོ་ཞབས། བདུད་བཞི་འཇོམས་མཛད་རྒྱལ་མཚན་སྐུ་ཡི་ཚུལ། །ཐུགས་རྗེ་འདམ་སྐྱེས་མ་ཆགས་པདྨའི་ཞལ། །ཏིང་འཛིན་བདུད་རྩི་རོ་མཆོག་བུམ་ཚུལ་ཕྱག །འཇིགས་པ་བརྒྱད་སྐྱོབ་ཉོན་མོངས་མི་ཚུགས་གདུགས། །བསྟན་པའི་ཆོས་སྒྲོགས་གསུང་རབ་རུས་པ་དུང་། །འཁོར་བར་དོན་མཛད་ཕྲིན་ལས་ཕྱག་སོར་ཉ། །འཁོར་ལོ་བསྒྱུར་རྒྱལ་ཕྱག་རྒྱ་བཞི་སྣང་བས། །དབང་གི་རྒྱུ་ནི་མ་འདའ་དམ་ཚིག་རྒྱ། །དབང་གི་གཟུགས་ནི་མཆོད་པའི་སྐུའི་རྒྱ། །ལས་ནི་སྒྲུབ་བྱེད་ལས་ཀྱི་ཕྱག་རྒྱ་སྟེ། །བརྗོད་པར་གྲགས་པ་ཆོས་ཀྱི་ཕྱག་རྒྱ་ཡིན། །གཅིག་ལའང་བཞི་བཞིར་ལྡན་པས་སུམ་ཅུ་གཉིས། །མཚན་བཟང་སུམ་ཅུ་རྩ་གཉིས་རྟགས་སུ་བསྟན། །གཅིག་ལའང་བཅུ་བཅུར་ལྡན་ན་བརྒྱད་ཅུ་སྟེ། །དཔེ་བྱད་བཟང་པོ་བརྒྱད་ཅུའི་རྟགས་སུ་བསྟན། །ཞེས་འབྱུང་བ་ལས་གསལ་ལོ། །འཕགས་པའི་ལམ་ཞེས་བྱ་བ་ནི་དེ་ལྟ་བུ་ཡི་བཀྲ་ཤིས་པའི་ལྷ་མོ་བརྒྱད་པོ་ད ེ་དག་མཚན་དང་དཔེ་བྱད་ཀྱི་རྟགས་སུ་བསྟན་པར་མ་ཟད་དེ། འཕགས་པའི་ལམ་ཡན་ལག་བརྒྱད་ཀྱི་རྟགས་སུ་ཡང་སྣང་སྟེ། མེ་ལོང་དང་དུང་ལ་སོགས་པ་སྟེ། ཕྱི་རོལ་པས་བདེན་གཉིས་ལ་སོགས་པར་མཐོང་བ་ལས་ཁྱད་པར་དུ་གྱུར་པ་ནི། བདེན་པ་གཉིས་གཉིས་མེད་དུ་མཐོང་བས་ན་ཡང་དག་པའི་ལྟ་བ་ཞེས་བྱ་བ་ནས། སྦྱིན་པ་དང་ཚུལ་ཁྲིམས་ལ་སོགས་པ་དྲུག་སྔོན་དུ་སྤྱད་པས་འབྲས་བུས་ཚོགས་གཉིས་ཚོགས་པར་འདོད་པ་ལས་ཁྱད་པར་དུ་གྱུར་པ་ནི། མཚན་མ་དང་མཚན་མ་མེད་པའི་ཏིང་ངེ་འཛིན་ལ་མངའ་བརྙེས་པས། ཚོགས་གཉིས་དུས་གཅིག་ཏུ་རྫོགས་པ་སྟེ། ལྷའི་སྐུར་གསལ་བ་ནི་བསོད་ནམས་ཀྱི་ཚོགས། དེ་ཉིད་རང་བཞིན་མེད་པ་ནི་ཡེ་ཤེས་ཀྱི་ཚོགས་ཏེ་དུས་གཅིག་ཏུ་རྫོགས་པ་ནི་ཡང་དག་པའི་ཏིང་ངེ་འཛིན་གྱི་བར་དུ་སྟེ། རིགས་པ་དེ་ཡང་བརྗེད་བྱང་བཀོལ་བ་ལྟར་སྦྱར་ཏེ། དེ་ཡང་ལུང་ལས། ཡང་དག་ལྟ་བ་བདེན་གཉིས་མེ་ལོང་སྟོན། །ཡང་དག་རྟོག་འ བྱིན་མ་སྨིན་པ་ཡི་འབྲས། །ཡང་དག་ལས་ནི་ལི་ཁྲི་ཆགས་ཤིང་འཇིག །ཡང་དག་ངག་ནི་སྒྲ་སྐད་ཚངས་པའི་དུང་། །ཡང་དག་འཚོ་བ་བཅུད་ཀྱི་འདོད་འཇོའི་བ། །ཡང་དག་རྩོལ་བ་ཉུངས་དཀར་བདུད་བཞི་འཇོམས། །ཡང་དག་དྲན་པ་གི་ཝཾ་ནད་གསོ་མཛད། །ཏིང་འཛིན་དུར་བ་བསོད་ནམས་ཀུན་ཏུ་འཕེལ། །ཞེས་འབྱུང་བ་ལྟར་ཤེས་པར་བྱའོ། །དེའི་བསྡུ་བ་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པ་ཆེ་བའི་ཡོན་ཏན་ཏེ། བྱང་ཆུབ་ཀྱི་ཡན་ལག་བདུན་ལ་སོགས་པ་ནི་ཁྲོ་བོ་རྟོགས་པའི་ལྷ་རྒྱུད་ལ་ཡང་ཚུལ་མཐུན་ལ། གོང་དུ་རྒྱན་ཆས་ཀྱི་སྐབས་སུའང་བསྟན་ཏེ། གཞན་ཡང་ལུང་ལས། འདུས་བའི་བྱེ་བྲག་མཁས་པའི་དྲན་པ་དང་། །དམ་ཆོས་རྣམ་པར་འབྱེད་པའི་འཁོར་ལོ་སྟེ། །བརྩོན་འགྲུས་མྱུར་མགྱོགས་ཤུགས་འཆང་རྫུ་འཕྲུལ་རྟ། །དགའ་བ་རང་གི་ཕྱོགས་འཛིན་གཞོམ་དམག་དཔོན། །ཚིམ་བྱེད་ལུས་སེམས་སྦྱངས་པའི་བཙུན་མོ་ཡིན། །ཏིང་འཛིན་མི་འགྱུར་སྟོབས་ཀྱི་གླང་པོ་ཆེ། །བཏང་སྙོམས་གཞན་དོན་མཛད་པའི་བློན་པོ་ཆེ། །ཞེས་འབྱུང་བས་གསལ་ཏེ། དེ་ལ་སོགས་པ་ཆེ་བའི་ཡོན་ཏན་ནི་དཔག་པར་མི་ནུས་ཏེ་བརྗོད་ཀྱིས་མི་ལང་བས་འདིར་མི་བརྗོད་དོ། །དེ་དག་ཅེས་པ་ནི་སྤྱིའི་མཚན་མར་བསྟན་པའོ། །ཁྱད་པར་དུ་རང་གི་རྟོག་པའི་སྣང་བ་སྟེ། ལྷ་རྒྱུད་ཀྱི་རྟོག་པ་སོ་སོར་བསྟན་པ་ནི། འདི་འོ་ཞེས་ཉེ་བ་དང་མངོན་སུམ་པར་བཀོད་པ་སྟེ། རྣམ་ཤེས་ཚོགས་བརྒྱད་ཅེས་པ་ལ་སོགས་པ་སྟེ། བིདྷ་འཕྲོད་པར་ནུས་པའི་ཕྱིར་དང་། ཡི་གེ་མང་བས་འཇིགས་པའི་ཕྱིར་མ་བཀྲོལ་ཏེ་བླ་མ་ལས་ནོད་པའམ། བདག་གིས་ཀྱང་དཔྱད་པར་བྱ་སྟེ། དེ་ཡང་ལུང་ལས། སློབ་དཔོན་གསུངས་པའི་ལུང་ལས་རབ་ཏུ་ཉོན། །རང་གིས་ཤེས་རབ་རྩལ་གྱིས་ཅི་ནུས་དབོགས། །ཞེས་གནང་བ་དག་ཡོད་པའི་ཕྱིར་རོ། ༈ །ད་ནི་ལྟ་བ་གཏན་ལ་དབབ་པའི་ཕྱིར་སྣང་བ་བཞིན་ལ་གནས་པར་སྟོན་པས། ཀུན་འབྱུང་ཞེས་པ་ལ་སོགས་པ་སྨོས་ཏེ། ཆོས་ཐམས་ཅད་རང་བཞིན་ནམ་ངོ་བོ་ཉིད་ནི་ཐམས་ཅད་གཞིར་སྣང་བ་སྟེ། སྣང་བ་གསུམ་གྱིས་བསྡུས་པའི་ཆོས་ཀུན་རྒྱུ་ཡིས་མ་བསྐྱེད་པར་མཐའ་ཡས་པའི་ཆོས་སུ་སྐྱེ་བར་སྣང་ཞིང་འབྱུང་བའི་དབྱིངས་སུ་གྱུར་ལ། དེ་ཙམ་ན་འགགས་པའི་རྐྱེན་གང་ཡང་མེད་པས་ཆོས་ཉིད་དེ་བཞིན་ཉིད་ལ་ཚིག་ཏུ་སྨྲ་ཞིང་ཡི་གེས་བརྗོད་དུ་མེད་པར་ཐིམ་པའི་གཞི་ནི་རང་བཞིན་གྱི་སྣང་བ་ཞེས་གྲགས་སོ། །དེ་བཞིན་དུའང་འཁྲུལ་པའི་སྣང་བ་བསྟན་པར་འདོད་ནས་མི་རྟོག་ངང་ལས། ཞེས་པ་ལ་སོགས་པ་གསུངས་ཏེ། རྟོག་པའི་མཐའ་རྣམ་པ་གཉིས་ལ་སོགས་པ་རྒྱུ་འབྲས་ཀྱི་ངོ་བོ་སྟོན་ཏེ། དེ་ལྟ་བུ་ཡིན་པ་ལ་མཐུན་པར་སྣང་བ་ནི། དོན་དུ་འགྱུར་བ་ནི་གདུལ་བྱའི་སྣང་བ་སྟེ། སྟོང་ཉིད་མི་གཡོ་ཞེས་བྱ་བ་ལ་སོགས་པའོ། །ཞེས་གསུངས་པའོ། །དེ་ཡང་དེ་བཞིན་གཤེགས་པའི་དབང་གིས་སྣང་བར་མཛད་པ་ནི་བདེ་བར་གཤེགས་པའི་སྣང་བ་ཞེས་བྱ་སྟེ། ནམ་མཁའ་དབྱིངས་ཀྱི་སྙིང་པོ་ལ་སོགས་པ་གསུངས་ཏེ། སྙིང་པོ་ནི་རྒྱུ་སྟེང་འོག་ནས་འབྱུང་ཞེས་རྣམ་པ་གཅིག་ཏུ་དེ་དག་ཀྱང་གདམས་པར་འགྱུར་རོ། །དེ་ལྟར་དོན་དམ་པ་དང་ཀུན་རྫོབ་ཀྱི་ལྟ་བ་རྟོགས་དང་། ཉམས་སུ་བླངས་ཤིང་སྒོམ་པ་བསྟན་པའི་ཕྱིར། །ཐ་དད་རྣམ་པར་སྣང་མཛད་ནས། །ཞེས་གསུངས་པ་སྟེ། འཇུག་པ་ཡང་ཐ་དད་པ་སྟེ་མོས་པའི་དབང་གིས་ཆོ་ག་རྣམ་པ་གསུམ་མམ། ཏིང་ངེ་འཛིན་གྱི་སྒོ་ནས་སྐུ་ཕྱག་རྒྱར་བསྐྱེད་པར་མཛོད་ཅིག་པའོ། །ཞེས་རིམ་པར་གདམས་པར་བསྟན་པའི་ཕྱིར། གསུང་གི་ཞེས་པ་ལ་སོགས་པ་སྟེ། ཡི་གེ་ཡེ་ཤེས་སྐྱེད་པར་མཛོད། །ཅེས་པའི་བར་གྱིས་ཕྲ་མོའི་ཏིང་ངེ་འཛིན་ཐུགས་ཀྱི་ཆོ་ག་ལ་བློ་སྦྱོང་བར་གདམས་པའོ། །དེ་བཞིན་དུ་སྟོང་ཉིད་མི་རྟོག་པ་ལ་སོགས་པས་སྐུའི་ཆོ་ག་དཔེ་དང་བཅས་པར་གདམས་པའོ། །ཡང་ནི་ཏིང་ངེ་འཛིན་རྣམ་པ་གསུམ་གྱི་སྒོ་ནས་འཇུག་པར་བྱ་སྟེ། དེ་ཡང་བཅོས་པ་དང་གསལ་དགོངས་པའམ། གཉིས་སུ་མེད་པ་དང་། སྐྱེ་བ་མེད་པ་དང་། ལྷུན་གྱིས་གྲུབ་པའམ། ཡང་ན་རང་བྱུང་གི་ཡེ་ཤེས་དང་། ཆོས་ཀྱི་དབྱིངས་ཀྱི་ཡེ་ཤེས་དག་ལ་དགོངས་པའི་ཕྱིར། ངེས་པ་ཉིད་དུ་བསྟན་ཏེ། མ་བཅོས་པའི་ཕྱིར་ན་དེ་བཞིན་ཉིད་དོ། །གཉིས་སུ་མེད་པའི་མུྃ་གྱིས་མཚོན་ཏོ། །རྒྱུ་རྐྱེན་ལས་རག་མ་ལུས་པས་ནི་རང་བྱུང་ངོ་། །ཐམས་ཅད་ལ་ཁྱབ་པས་ན་ཀུན་ཏུ་སྣང་ངོ་། །སྐྱེ་བ་མེད་པས་ན་ཨས་མཚོན་ཏོ། །གང་ཡང་མ་ཡིན་པར་གསལ་བས་ན་ཆོས་ཀྱི་ཡེ་ཤེས་སོ། །མངོན་དུ་སྣང་བས་ན་གསལ་ཞེས་བྱའོ། །རྒྱུར་གནས་པས་ན་ཧཱུྃ་གིས་མཚོན་པའོ། །ཐམས་ཅད་ཀྱི་རྒྱུར་གནས་ཤིང་ཟད་པ་མེད་པས་ན་དབྱིངས་སོ། །མཛད་པ་སྣ་ཚོགས་ཐ་དད་པར་སྣང་བས་ན་རིགས་ཀྱི་ཡེ་ཤེས་ཏེ་གསལ་ཅེས་སྨོས་སོ། །ཡང་ན་ཀུན་འབྱུང་ཞེས་བྱ་བ་ལ་སོགས་པའི་ཤྭ་ལོ་ཀ་དང་པོས་ནི། དོན་དང་པོ་རྫོགས་པ་ཆེན་པོ་མཚན་མ་མེད་པའི་མན་ངག་ལ་མོས་པའི་དབང་དུ་ཏིང་ངེ་འཛིན་རྣམ་པ་གསུམ་རང་བཞིན་གྱིས་ཚང་བར་སྟོན་ཏོ། །མི་རྟོག་དང་། ཞེས་པ་ལ་སོགས་པ་གཉིས་པས་ནི། ངེས་དོན་གཉིས་ཀྱིས་དེ་དག་ལ་མཚན་མར་བཟུང་ན་ནད་དུ་འགྱུར་བའི་ཉེས་དམིགས་སུ་བསྟན་ཏོ། །གསུམ་པ་སྟོང་ཉིད་ཅེས་པ་ལ་སོགས་པས་ནི། ངེས་དོན་གཉིས་པ་རྫོགས་པའི་ཚུལ་གཉིས་ལ་བསྟེན་པའི་དབང་གིས། ཏིང་ངེ་འཛིན་རྣམ་པ་གསུམ་ཡང་བསྟན་ལ། སྔོན་གྲུབ་པས་ཀྱང་དེ་ལ་བསྟེན་པའི་ལོ་རྒྱུས་སུ་ཡང་བསྟན་ཏོ། །བཞི་པ་ནམ་མཁའི་དབྱིངས་ཞེས་པ་ལ་སོགས་པ་ནི། ངེས་དོན་གསུམ་པ་སྐྱེ་བའི་རྒྱུད་ཀྱི་སྒོ་ནས་མཚན་མ་ལ་མོས་པའི་དབང་དུ་ཏིང་ངེ་འཛིན་གསུམ་ཡང་བསྟན་ལ། དེའི་རྗེས་འཇུག་གིས་ཀྱང་ཏིང་ངེ་འཛིན་རྣམ་པ་གསུམ་གྱི་སྒོ་ནས་སྐུ་ཕྱག་རྒྱར་སྒྲུབས་ཤིག་བར་གདམས་པའང་ཡིན་ནོ། །གཞན་དག་ནི་རྗེས་སུ་མཐུན་ནོ། །ནམ་མཁའི་དབྱིངས་ཀྱི་ས་བོན་གོང་དུ་དམ་བཅས་པ་ནི། ཏིང་ངེ་འཛིན་རྣམ་གསུམ་གྱི་སྐབས་སུ་ཡིག་འབྲུས་མཚོན་པ་སྟེ། མཱུྃ་དང་ཨའོ། །དེ་མཚན་མ་མེད་པར་མི་རུང་ངོ་སྙམ་པ་ལ། ལུང་ཉིད་ལས། ཨ་དང་ༀ་དང་ཧཱུྃ་དང་མཱུྃ་ཞེས་པ་ཐམས་ཅད་ཀྱི་གཞིར་གྱུར་པའོ། །ཞེས་པ་དང་། གཟུགས་བརྙན་ནི་ཅི་ཡང་མེད་པ་ལས་ཅིར་ཡང་རིག་པར་བྱེད་པའོ། །ལངྐའི་བདག་པོ་གཟུགས་བརྙན་གྱིས་གང་མཚོན་པར་བྱེད་མོད་ཀྱི། གཟུགས་བརྙན་ལས་དངོས་གཞི་འབྱུང་བ་ཡང་མ་ཡིན། མི་འབྱུང་བ་ཡང་མ་ཡིན། སྣང་བ་ཡང་མ་ཡིན། མི་སྣང་བ་ཡང་མ་ཡིན། ཁྱབ་པ་ཡང་མ་ཡིན། མ་ཁྱབ་པ་ཡང་མ་ཡིན་ཏེ་དཔེར་ན། ནམ་མཁའ་སྒྲ་བསྒྲོགས་པར་ནི་ཀུན་ཀྱིས་ནུས་མོད་ཀྱིས། འདི་ཁོ་ནའོ་ཞེས་ནི་གང་གིས་ཀྱང་སྒྲ་བསྒྲོགས་པར་མི་ནུས་སོ། །དེ་བཞིན་དུ་གཟུགས་བརྙན་གྱིས་ཀྱང་དངོས་གཞི་མཚོན་པར་ནུས་ཀྱིས་འདི་ཁོ་ན་ཞེས་བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། གཟུགས་བརྙན་ནི་དངོས་གཞི་ལས་འབྱུང་བས་མཚོན་པར་མི་ནུས་ལ། སངས་རྒྱས་ཀྱི་དགོངས་པ་གསང་བ་དེ་ནི་སངས་རྒྱས་འཇིག་རྟེན་དུ་བྱུང་ཡང་རུང་མི་འབྱུང་ཡང་རུང་། ཐམས་ཅད་ཀྱི་རང་བཞིན་དུ་ཡེ་ནས་གནས་ཤིང་ཐམས་ཅད་ལ་ཁྱབ་ཀྱང་ཐམས་ཅད་ཀྱིས་མཐོང་བ་མ་ཡིན་ལ། དེ་ལས་བྱུང་བ་ཐམས་ཅད་ནི་ཤེས་པར་ཡང་རུང་ལ་དེས་དེ་ཉིད་མཚོན་པར་ཡང་རུང་ངོ་། །ཞེས་པ་དང་། ཡུམ་གྱི་མཚོན་པ་གཉིས་མེད་དོ། །ཞེས་པ་དང་། དངོས་གཞི་གང་ཡིན་པ་དེ་ནི་གཟུགས་བརྙན་ནོ། །ཞེས་བྱ་བ་ལ་སོགས་པ་དང་། ཡང་ནུས་པ་མཚོན་པར་བྱེད་པའི་ཡི་གེ་ལ་ནི་ཨ་ཞེས་བླ་དྭགས་སུ་བཏགས་སོ། །ཞེས་པ་དང་། ཡང་། ཨ་ནི་རང་བཞིན་ཡི་གེ་སྟེ། རྟེན་དང་བྲལ་བས་རྒྱུ་རྐྱེན་མེད། །ཁོང་ནས་ཀུན་ཁྱབ་ནམ་མཁའ་འདྲ། །ཞེས་པ་ལ་སོགས་པ་དང་། ཐུགས་མཚོན་པར་བྱེད་པའི་ཡི་གེ་ལ་ནི་མིང་ཧཱུྃ་ཞེས་བླ་དྭགས་སུ་བཏགས་སོ་ཞེས་མཚོན་པར་འགལ་བ་མེད་ཅིང་མཐུན་པ་ཁོ་ནའོ། །གདུལ་བྱའི་ཞེས་རྟོག་ཀྱང་གསང་བ་དམ་པའི་གེགས་སུ་མཐུན་མོད་ཀྱང་། སྐབས་ཀྱི་ཕན་པ་དག་དོན་དུ་གཉེར་ཅིག་པར་གདམས་པའོ། །དེ་གང་ལ་གདམས་སྙམ་པ་ལ། ངེས་པའི་ལས་དང་པོ་པ་ངེས་པར་འབྱུང་བའི་གདུལ་བྱ་ལའོ། །ཇི་ལྟར་བྱ་བའི་གདམས་པ་ནི། དེ་དག་ཀྱང་དབང་པའི་བྱེ་བྲག་གིས་ཏེ། རབ་ཀྱིས་མཚན་མ་མེད་པའི་རྣལ་འབྱོར་ལ་འབད་དེ་ཉམས་སུ་བླང་བར་བྱའོ། །འབྲིང་གིས་གཉིས་སུ་མེད་པ་དང་། ཐ་མས་མཚན་མའི་རྣལ་འབྱོར་ལ་གནས་པ་བྱའོ། ༈ །མཇུག་གི་དོན་ལ་གཉིས་ལས། དང་པོ་བཟོད་པར་གསོལ་བ་བསྟན་པའི་ཕྱིར། དམ་པའི་དགོངས་པ། ཞེས་བྱ་བ་ལ་སོགས་པ་སྨོས་ཏེ། དེ་ཡང་དམ་པའི་སྒྲ་ནི་བླ་མ་སྟེ། སྟོན་པ་དང་། སྡུས་པ་པོ་དང་། སློབ་དཔོན་དག་ལ་འཇུག་ལ། དགོངས་པ་ནི་རྒྱུད་དང་སྒྲུབས་ཐབས་དག་གོ། །དམན་པ་ནི་སློབ་དཔོན་དྲི་མེད་དེ་ང་རྒྱལ་སྤངས་པའམ། ལྟོས་པའི་དབང་ལ་དགོངས་པའོ། །དེས་སྟོན་པས་བསྟན་པའི་དོན་དཔག་པར་མི་འོས་ཀྱང་བསམ་པའི་ལུང་ལ་བརྟེན་པའི་དོན་ཁོང་དུ་ཆུད་པར་བྱ་བའི་ཕྱིར་བརྗོད་བྱང་དང་། །མ་འོངས་པའི་དུས་ན་སྙིགས་མའི་དབང་གིས་བློ་དམན་པ་གཞན་དག་ལ། སྟོན་པའི་བསྟན་པ་བཀའ་ལུང་གིས་སྒྲོས་མི་ནུས་པར་བྱ་བའི་དགོས་པ་འདི། ཚིག་གི་འགལ་བས་དོན་ལ་འཁྲུལ་པ་བྱུང་ན། ཡོན་ཏན་ཁྱད་པར་དུ་འཕགས་ཤིང་དོན་ལ་མཁས་པའི་བླ་མ་རྣམས་ལ་བཟོད་པར་གསོལ། །གཉིས་པ་དགེ་བའི་རྩ་བར་བསྔོ་བ་དང་། །སྨོན་ལམ་ཡང་བརྡའ་འཕྲོད་པར་སླའོ། །འགྲོ་མགོན་བླ་མ་དག་གི་དགོངས་པ་འདི། །གཏིང་དཔག་རྒྱ་ཆེ་ཡོངས་སུ་བརྟག་དཀའ་བ། །དོན་ཕྱིན་ཚིག་རྒྱས་མིན་ཀྱང་འབྲུ་གཉེར་ཟུར་བརྡའ་ཙམ་བདག་གིས་བརྗེད་བྱང་དམན་ལ་ཕན་ཕྱིར་བྲིས། ཚིག་ནོར་དོན་ལ་འགལ་བ་དམ་པ་རྣམས་ལ་མཐོལ། །དགེ་བ་ཅི་མཆིས་འགྲོ་བ་ཡོངས་ལ་བསྔོ། །མོས་པ་རྣམས་དང་ཀུན་ཏུ་འཕྲད་པར་ཤོག །དཔྱ་སེམས་ཅན་དང་ནམ་དུའང་མ་འཕྲད་ཅིག །ཞི་བ་རྟོག་པ་ལྷ་རྒྱུད་ཀྱི་འགྲེལ་བ་བི་མ་ལས་མཛད་པ་རྫོགས་སོ། །མངྒ་ལམ་བྷ་ཝནྟུ།། །།

ཁྲོ་བོ་རྟོག་པ་ལྷ་རྒྱུད་ཀྱི་འགྲེལ་པ། སློབ་དཔོན་བི་མ་ལ།

ཀྲ དྷ ཀ ལྤ ད ཝ ཏ ནྟྲ སྱ བྲྀ ཏྟི ཐི ད ར ཏི སྨ། །
ཁྲོ་བོ་རྟོག་པ་ལྷ་རྒྱུད་ཀྱི་འགྲེལ་པ་བཞུགས་སོ། །
ལྷ་རྒྱུད་ཀྱི་རྟོག་པ་བཤད་པའི་ལུགས་ཀྱིས། དང་པོ་ཕྱག་བཙལ་བ་དང་། བཤད་པར་དམ་བཅའ་བ་དང་། བར་དུ་མདོ་གདོན་པ་དང་། མཇུག་དགེ་བའི་རྩ་བ་བསྔོ་བ་དང་བཞིའོ། །དེ་ལ་ཕྱག་འཚལ་བ་ལ་གཉིས། ཁྱབ་པ་སྤྱིར་གཏང་བ་དང་། ཆོས་ལ་ཕྱོགས་བསྡུ་བ་གཉིས་སོ། །ཁྱབ་པ་སྤྱིར་གཏང་བ་ནི། རིགས་ལྔ་ཁྲག་འཐུང་འཁོར་རྒྱལ་བ་རྒྱ་མཚོ་དང་བཅས་པ་ལ་ཕྱག་འཚལ་ལོ། །ཞེས་བྱ་བ་འདིས་བསྟན་ནོ། །དེ་ལ་ཆོས་ལ་ཕྱོགས་བསྡུ་ན། དཔལ་ཧེ་རུ་ཀ་ཆིག་ཚུགས་ལ་ཕྱག་བཙལ་བ་བསྟན་ཏེ། བདག་མེད་གཉིས་རྟོགས་སྒྲིབ་པ་གཉིས་སྤངས་ཞེས་བྱ་བ་ཆོས་དང་གང་ཟག་ལ་བདག་མེད་པར་རྟོགས་པ་སྟེ། ཆོས་ལ་བདག་མེད་པར་རྟོགས་པ་ནི་ཕྱི་གཟུང་བའི་ཡུལ་མ་སྐྱེས་པས། ཆོས་ཀྱི་དབྱིངས་སུ་རྟོགས་པར་བྱ། གང་ཟག་ལ་བདག་མེད་པ་རྟོགས་པ་ནི། ནང་འཛིན་པའི་སེམས་ལ་བདག་མེད་པར་རིག་པའི་ཡེ་ཤེས་སུ་གྱུར་པ་ལ་བྱ། གཟུང་འཛིན་གཉིས་ཀྱང་བདག་མེད་པར་རྟོགས་པ་ནི་ཡེ་ཤེས་ཕུན་སུམ་ཚོགས་པའོ། །དེ་ལྟར་ཆོས་ལས་བདག་མེད་པར་རྟོགས་པས་ནི་ཉོན་མོངས་པའི་སྒྲིབ་པ་སྤངས་ལ། གང་ཟག་ལ་བདག་མེད་པར་རྟོགས་པས་ནི་ཤེས་བྱའི་སྒྲིབ་པ་སྤངས་པས། སྤངས་པ་ཕུན་སུམ་ཚོགས་པ་སྟེ། ཡེ་ཤེས་དང་སྤངས་པ་ནི་བདག་གི་དཔལ་ལོ། །ཐུགས་རྗེ་སྤྲུལ་པས་འགྲོ་བ་མ་ལུས་གྲོལ། །བྱ་བ་དེ་ལྟར་རྟོགས་པའི་སྒོ་ནས་མ་རྟོགས་པའི་འགྲོ་ལ་ཚད་མེད་པའི་སྙིང་རྗེ་ཆེན་པོ་སྐྱེ་བ་ནི་ཐུགས་རྗེ་ཕུན་སུམ་ཚོགས་པ། ཐུགས་རྗེ་དྲག་པོའི་ཕྲིན་ལས་ཀྱིས་འགྲོ་བའི་དོན་མཛད་པ་ནི། དཀྱིལ་འཁོར་ཕུན་སུམ་ཚོགས་པ་སྟེ་གཞན་གྱི་དཔལ་ལ་ལོ། །ཧེ་རུ་ཀའི་འབྲུ་དྲུག་བཤད་ན། ཡུལ་མེད་མ་སྐྱེས་བྱམས་པའི་ཆོས་དབྱིངས་ལས། ཞེས་བྱ་བ་ནི། ཕྱི་གཟུང་བའི་ཡུལ་ཆོས་དབྱིངས་སུ་གྱུར་པ་ནི། ཧེ་ཧེ་ཀ་ཞེས་བྱ་སྟེ། དགྱེས་པ་ཆེན་པོའི་མཆོག་སྐུ་ཉམས་སུ་བསྟར་བས་བྱམས་པ་ཚད་མེད་པ་དང་སྦྱར། དེ་ལྟར་མ་སྐྱེས་པའི་ངང་ལས་ཇི་ལྟར་འབྱུང་ཞེ་ན། ཆོས་ཀྱི་དབྱིངས་ལས། ཐུགས་རྗེའི་བདག་ཉིད་ཁྲོ་བོའི་དཀྱིལ་འཁོར་ཐམས་ཅད་འབྱུང་བའི་རྒྱུར་གྱུར་པས་ཧེ་ཞེས་བྱ་སྟེ། དེ་བས་ན་དཀྱུས། འཛིན་པ་མི་རྟོག་སྙིང་རྗེ་ཞེན་ཆགས་ཁྲོ། ཞེས་བྱ་བ་ནི། ཆགས་པའི་ཐུགས་རྗེས་འཁོར་བ་ལ་ཆགས་པ་ནི་སྙིང་རྗེ་ཚད་མེད་པ་དང་སྦྱར། ཁྲོ་ཞེས་པ་ནི་ཐུགས་རྗེ་དྲག་པོའི་ཕྲིན་ལས་ཀྱིས་དྲེགས་བྱེད་ཐམས་ཅད་རྡུལ་དུ་རློག་པས་ཁྲོ་ཞེས་བྱ་སྟེ། རུ་ཏྲ་དང་སྦྱར་རོ། །གཉིས་མེད་དག་ལས། ཞེས་བྱ་བ་ནི། དབྱིངས་དང་ཡེ་ཤེས་གཉིས་སུ་མེད་པའི་ངང་ལས། ཐུགས་རྗེའི་ཕྲིན་ལས་ཐ་དད་པས་འགྲོ་བའི་དོན་ཇི་ལྟར་འདུལ་བ་བཞིན་དུ་མཛད་པ་ནི། ཀ་ཀ་རྨ་ཞེས་བྱ་སྟེ། ཕྲིན་ལས་སོ། །དེ་ལྟར་མཛད་པའི་དུས་ན་བདག་ཏུ་འཛིན་པ་ཡོངས་སུ་བཏང་ནས་འགྲོ་བའི་དོན་ལ་ཁོད་སྙོམས་པར་བཞུགས་ནས་མཐར་ཕྱིན་པར་མཛད་པས། ཀ་ཀ་རུ་ནི་ཀ་ཞེས་བྱ་སྟེ་བཏང་སྙོམས་ཚད་མེད་པ་དང་སྦྱར་རོ། །དོན་དེ་ལྟ་བུ་དང་ལྡན་པའི་སྒོ་ནས་ཕྱག་བཙལ་བའོ། ༈ །འདི་ན་མར་དགོས་འབྲེལ་རྣམ་པ་བཞིས་བཤད་པར་དམ་བཅའ་བ་བསྟན་ཏེ། རྟོག་འཇོམས་སྤྱོད་པ་མཐུན་པས་འགྲོ་འདུལ་ཞིང་། །ཞེས་པ་ནི། སེམས་ཅན་ནི་སྨད་པའི་རྫས་ལྔ་ལ་རྟོག་པས་ཁམས་གསུམ་དུ་འཁོར་བ་ཡིན། རྟོག་པ་དེ་གཞོམ་པར་བྱ་བའི་ཕྱིར་སྨད་པའི་རྫས་ལྔ་དང་དུ་བླངས་ནས། རྟོག་པ་གཞོམ་པའི་གཉེན་པོར་བསྟན་པའོ། །སྤྱོད་པ་མཐུན་པས་འདུལ་བའི་ཐབས་སུ་བསྟན་པ་ནི། ཉོན་མོངས་པ་ལྔ་པོ་འདི་དག་སྤངས་པས་མི་སྤོང་སྟེ། སྤྱོད་པ་གྲོལ་བའི་ཐབས་སུ་བསྟན་ཏེ། འདོད་ཆགས་ཅན་ལ་སྦྱོར་བ་བཤད། ཞེ་སྡང་ཅན་ལ་སྒྲོལ་བ་བཤད། གཏི་མུག་ཅན་ལ་འབྱེད་པ་མེད་པ་ཆོས་ཉིད་ཀྱི་དོན་བཤད། ང་རྒྱལ་ཅན་ལ་ང་རྒྱལ་མེད་པའི་ཏིང་ངེ་འཛིན་བཤད། ཕྲག་དོག་ཅན་ལ་དམ་ཚིག་བཤད། གཞན་ཡང་བདུད་དང་སྲིན་པོ་ལ་སོགས་པ་དྲག་བྱེད་འདུལ་བའི་ཐབས་སུ་ཧེ་རུ་ཀའི་སྐུར་སྤྲུལ་ནས་བཏུལ་བས་སྤྱོད་པ་མཐུན་པས་འདུལ་བའི་ཐབས་སུ་བསྟན་པས་སོ། །རྟོག་པ་གཞོམ་པ་དང་། སྤྱོད་པ་མཐུན་པས་འདུལ་བའི་དགོས་པ་ཡོད་པའི་ཕྱིར་དགོས་པར་སྦྱར་རོ། །བརྡ་ཅན་ཡང་དག་ལེན་པས་དོན་གོ་བ་ནི། བུས་པ་ལ་ཟླ་བ་མཚོན་པས་ཟླ་བ་ངོ་ཤེས་པ་དང་འདྲ་བ་ཆོས་ཅན་དགོས་པ་དང་བཅས་པའི་དཔལ་ཧེ་རུ་ཀའི་སྐུ་ལ་བསྣམས་པ་དང་། ཞལ་དུ་གསོལ་བ་དང་། ཕྱག་ཏུ་བསྣམས་པ་དང་། གདན་དུ་བཏིང་བ་དང་། ཐམས་ཅད་བརྡས་མཚོན་ནས་ཡང་དག་པའི་དོན་བློ་ལ་གོ་བར་བྱ་བའི་དགོས་པ་ཡོད་པས་དགོས་པའི་ཡང་དགོས་པ་དང་སྦྱར་རོ། །ལྷ་རྒྱུད་བརྗོད་པས་དངོས་གྲུབ་ཀུན་དང་འབྲེལ། །བྱ་བ་ནི་འདི་ན་མར་དཀྱིལ་འཁོར་ཆེན་པོ་གསུམ་གྱི་ལྷ་རྣམས་ལ་ཕྱག་རྒྱ་བཞི་བཞི་དང་ལྡན་པའི་བསྟོད་པས་བསྟོད་ཅིང་བསྙེན་ཅིང་བསྒྲུབས་ནས། ལྷ་རྒྱུད་ཀྱི་སི་ཏི་དང་བདག་འབྲེལ་པས། འབྲེལ་བ་དང་སྦྱར་རོ། །བཀའ་དོན་གཏན་ཚིགས་རིགས་པས་བརྗོད་པར་འོས། བྱ་བ་རྟོག་པ་གཞོམ་པ་དང་། སྤྱོད་པ་མཐུན་པས་འདུལ་བ་ཀུན། །གསང་བ་ནང་རྒྱུད་ཀྱི་བཀའ་ཀུན་ནས་འབྱུང་བས། བཀའ་ལས་འབྱུང་། ཞེས་བྱའོ། །རྡོས་པ་དང་བཅས་པའི་རྫས་འབར་བའི་ཆས་ཆེན་པོ་བརྒྱད་དང་། སྐུ་མདོག་དང་ཕྱག་མཚན་བསྐལ་པའི་མེ་རི་དང་། འོད་དཔུང་དང་། དབུའི་རལ་པ་དང་། ཞབས་ཀྱི་གདན་ཁྲི་ཡན་ཆད་བརྡས་མཚུན་ཅིང་དོན་དང་མཐུན་པར་སྤྱོད་པས་དོན་དང་མི་འགལ་ཞེས་བྱའོ། །གཏན་ཚིགས་ཀྱིས་རྒྱས་པ་ནི། འདི་ན་མར་དཀྱིལ་འཁོར་གསུམ་གྱི་ལྷ་རྣམས་ལ་བསྟོད་པའི་ཚིགས་སུ་བཅད་པ་ཚིག་བཞི་པ་རེ་རེ་བྱུང་བས། ཕྱག་རྒྱ་བཞིའི་གཏན་ཚིགས་ཀྱིས་མ་ཕེབས་པ་གཅིག་ཀྱང་མེད་པས། གཏན་ཚིགས་ཀྱི་རྒྱས་ཞེས་བྱའོ། །རིགས་པས་འཐད། ཅེས་པ་ནི། དཔེར་ན་ས་བདག་གི་རྒྱལ་པོའམ། བླ་མ་གོང་མ་ཞིག་ལ་བསྟོད་པ་བྱས་ཤིང་བསྙེན་བཀུར་བྱས་ན། བདག་ལ་བཀའ་དྲིན་བྱ་དགའ་སྩོལ་བ་དང་འདྲ་བར། ཡེ་ཤེས་ཀྱི་ལྷ་རྣམས་ལ་དོན་དང་མཐུན་པའི་བསྟོད་པ་བྱས་ལ། བསྙེན་ཅིང་བསྒྲུབས་ན་ལྷ་རྣམས་ཀྱི་སྐུ་གསུང་ཐུགས་ཀྱི་དངོས་གྲུབ་མན་ཆད། ཏིང་ངེ་འཛིན་ཕྲ་མོའི་དངོས་གྲུབ་མན་ཆད་གདོན་མི་ཟ་བར་ཐོབ་པར་ངེས་པས། བརྗོད་པར་བྱ་བ་དང་སྦྱར་རོ། །དེ་ལྟར་དགོས་འབྲེལ་རྣམ་པ་བཞིས་བཤད་པར་དམ་བཅའ་བའོ། །ཞི་གནས་མི་རྟོག་དངོས་པོ་མཁའ་ཁྱབ་འདྲ། །ཞེས་བྱ་བ་ནི་ཆོས་ཅན་དང་། བསྒྲུབ་པར་དམ་བཅའ་བ་དང་། ལུང་གི་གཏན་ཚིགས་གསུམ། དེ་ལ་ཆོས་ཅན་ཞི་གནས། བསྒྲུབ་པར་བྱ་བ་ནི་ཞི་གནས་མི་རྟོག་པར་བསྒྲུབ། མཐུན་པའི་དཔེ་ནི། དངོས་པོ་ལ་མཁས་ཁྱབ་པ་དང་འདྲའོ། །དེ་གསུམ་འཚོགས་པ་ནི་ལུང་གི་གཏན་ཚིགས་སོ། །དཔེར་ན་ས་ཆུ་མེ་རླུང་བཞི་ནི་དངོས་པོ་ཅན་ཡིན་ལ། ནམ་མཁའ་ནི་དངོས་པོ་མེད་པ་སྟེ། འོན་ཀྱང་ནམ་མཁའ་གར་ཁྱབ་པའི་འབྱུང་བ་བཞི་ལ་རང་བཞིན་གྱི་དངོས་པོ་མེད་པ་དང་འདྲ་བར། ཆོས་ཅན་མཚན་མར་སྣང་བའི་དངོས་པོ་ཐམས་ཅད་ལ་ཆོས་ཉིད་རྣམ་པར་མི་རྟོག་པས་ཁྱབ་པས། ཆོས་ཐམས་ཅད་ཀྱང་ཆོས་ཉིད་ལས་མ་གཡོས་པ་ལ། ཞི་གནས་མི་རྟོག་དངོས་པོ་མཁའ་ཁྱབ་འདྲ། །ཞེས་བྱ་བའི་དོན་དམ་པའི་བདེན་པའོ། །དེ་ཡང་ལྷག་མཐོང་གི་ཆོས་ཅན་བསྒྲུབ་པར་བྱ་བ་ནི། ལྷག་མཐོང་མ་རྨོངས་པར་བསྒྲུབས། མཐུན་པའི་དཔེ་ནི། གཟའ་སྐར་མཁའ་ལ་བཀྲམ་པ་དང་འདྲ། དེ་གསུམ་འཚོགས་པ་ལུང་གི་གཏན་ཚིགས། དཔེར་ན་ནམ་མཁའ་ངང་གིས་མཐོ་ཞིང་གསལ་བ་ལ་ཉི་ཟླ་གཟའ་སྐར་གྱི་ཚོགས་བཀྲམ་པས་འཇིག་རྟེན་གྱི་ཁམས་ཀུན་ཏུ་གསལ་བ་དང་འདྲ་བར། ཞི་གནས་རྣམ་པར་མི་རྟོག་པའི་ཏིང་ངེ་འཛིན་ཡོངས་ཀྱི་གསལ་བ་ལ། ལྷག་མཐོང་མ་རྨོངས་གསལ་བའི་ཤེས་རབ་ཀྱིས། །སྐུ་དང་ཡེ་ཤེས་ཕྱག་རྒྱའི་མཎྜལ་གཟའ་སྐར་བཀྲམ་པ་བཞིན་དུ་གསལ་བར་བྱུང་བས། ལྷག་མཐོང་མ་རྨོངས་མཁའ་ལ་གཟའ་སྐར་བཀྲམ་པ་འདྲ། ཞེས་བྱ་སྟེ་ཀུན་རྫོབ་ཀྱི་ལྷ་ཉེ་བའོ། །གདོས་བཅས་དོན་དང་མཐུན་ཞིང་འཚམས་པར་བཤད། ཅེས་བྱ་སྟེ། གདོས་པ་དང་བཅས་པ་ནི་ཆོས་ཅན། བསྒྲུབ་པར་བྱ་བར་ནི་དོན་དང་མཐུན་ཞིང་བསྒྲུབས་པ་མཐུན་པའི་དཔེ་ནི། རྣེའུ་བྲག་ལ་འཛེགས་པ་དང་འདྲ། དམ་གསུམ་འཚོགས་པ་ལུང་གི་གཏན་ཚིགས། དཔེར་ན་སྟག་དང་སེང་གེ་ལ་སོགས་པ་རྩལ་ཆེ་ཡང་བྲག་ལ་འཛེགས་པའི་རྩལ་ཆུང་ཞིང་མི་འཚམ། རྣ་ཕྲུག་རྩལ་ཆུང་ཡང་བྲག་ལ་འཛེགས་པ་རྩལ་ཆེ་ཞིང་འཚམ་པ་དང་འདྲ་བར། ཐེག་པ་འོག་མ་དང་། སོ་སོར་སྐྱེ་བོ་རྣམས་གསེར་ཕོར་དང་དངུལ་ཕོར་གྱི་ནང་དུ་ཞལ་ཟས་དཀར་གསུམ་ལ་སོགས་པ་གསོལ་བར་འཚམས་ན་ཡང་དེས་རྟོག་པ་མི་འབྱང་ཞིང་དངོས་གྲུབ་ཐབ་པའི་རྒྱུ་མེད་པས་གསང་སྔགས་ཀྱི་སྒོར་མི་འཚམས། ཐེག་པ་ཆེན་པོ་གསང་སྔགས་ཀྱི་བཞེད་ཀྱིས། སྣོད་བྷནྡྷ་ལྕང་ལོ་ཅན་རློན་པའི་ནང་དུ་བཅུད་བདུད་རྩིའི་རྣམ་པ་ལྔ་གོ་རོ་ཙ་ན་ལ་གཞི་བླངས་ཏེ། གཡོས་སུ་བྱས་ཏེ་རྟོག་པ་སྦྱངས་ཏེ་གསོལ་བས། རྣམ་པར་འབྱང་ཞིང་བྱང་ཆུབ་ཐོབ་པའི་རྒྱུར་གྱུར་ལ། ཉོན་མོངས་པ་རྣམ་པ་ལྔ་མ་སྤངས་སྤྱད་པས་རྣམ་པར་གྲོལ་བའི་རྒྱུར་གྱུར་པས་དང་། འབར་བའི་ཆས་ཆེན་པོ་བརྒྱད་ལ་སོགས་གདོས་བཅས་ཅན་གྱི་རྫས་ཐམས་ཅད། མི་འཚམ་པ་འཚམ་པར་བཤད་པས་བྱང་ཆུབ་ཐོབ་པའི་རྒྱུར་གྱུར་པས། གདོས་བཅས་དོན་དང་མཐུན་ཞིང་འཚམ་པར་བཤད། ཅེས་བྱ་སྟེ། རྒྱུད་བྱ་བ་དང་སྦྱར་རོ། ༼༠༽ །བདག་ཏུ་མི་རྟོག་སྤྲུལ་པ་མཛད་ནས་འཐོན། ༼༠༽ འདི་ནི་ཉན་ཐོས་ཀྱི་གེགས་བསལ་བ་ཡིན། ཐེག་པ་ཆེན་པོའི་བཞེད་ཀྱིས་འགྲོ་བའི་དོན་ཐུགས་རྗེ་ཡེ་ཤེས་ཀྱི་སྤྲུལ་པའི་སྐུའི་སྒོ་ནས་འབྱེད་པ་ལ། ཉན་ཐོས་ཀྱི་སེམས་ལ་བདག་ཏུ་བརྟགས་པས་ཐུགས་རྗེ་སྤྲུལ་པས་འགྲོ་བ་འབྱུང་བའི་རྒྱུ་མེད། ཐེག་པ་ཆེན་པོ་བས་འཛིན་པའི་སེམས་ལ་བདག་མེད་དུ་རྟོགས་པས་ཡེ་ཤེས་ཀྱི་སྤྲུལ་པ་འབྱུང་བ་ལ་ཐོགས་པ་མེད། དེ་ཉན་ཐོས་ཀྱི་གེགས་བསལ་བའོ། །ཡུལ་དུ་མ་གྲུབ། ཅེས་པ་ནི། རང་སངས་རྒྱས་ཀྱི་གེགས་བསལ་བ་ཡིན་ཏེ། རང་སངས་རྒྱས་ཀྱི་སེམས་ལ་བདག་མེད་པར་མ་རྟོགས་ཀྱང་ཕྱི་གཟུང་བའི་ཡུལ་ཆོས་ཀྱི་ཁམས་ལ་ཕྱོགས་གཅིག་ཙམ་ལ་བདག་མེད་པར་རྟོགས་ཀྱང་། ཕྱིའི་ཡུལ་རྡུལ་ཕྲ་རབ་མང་པོའི་ཁམས་ལ་བདག་མེད་མ་རྟོགས་པས་སྤྲུལ་པ་ཕྱིའི་ཡུལ་ལ་ཆགས་ནས་དབྱིངས་སུ་ཕྱིར་འདུལ་མི་བཏུབ་པས། རང་སངས་རྒྱས་ཀྱི་གེགས་སོ། །ཐེག་པ་ཆེན་པོ་བས་ཕྱི་གཟུང་བའི་ཡུལ་མེད་པ་མ་སྐྱེས་པ་ཆོས་ཀྱི་དབྱིངས་སུ་རྟོགས་པས་ཡེ་ཤེས་ཀྱི་སྤྲུལ་པ་དབྱིངས་ལ་འཇུག་ལ། ཆགས་ཐོགས་མེད་པར་རང་སངས་རྒྱས་ཀྱི་གེགས་བསལ་ཏོ། །ཡུལ་སེམས་གཉིས་མེད་མ་སྐྱེས་དབྱིངས་སུ་གཅིག །ཅེས་བྱ་བ་ནི་སེམས་ཙམ་གྱི་གེགས་བསལ་བ་ཡིན་ཏེ། སེམས་ཙམ་གྱིས་ཕྱི་གཟུང་བའི་ཡུལ་ནི། ཀུན་རྫོབ་ཏུ་མེད་པར་འདོད་ལ། ནང་འཛིན་པའི་སེམས་ནི་དོན་དམ་པར་མར་མེ་རླུང་གིས་མ་བསྐྱོད་པ་ཙམ་ཞིག་ཡོད་པར་འདོད་དེ། ཐེག་པ་ཆེན་པོའི་ལུགས་ཀྱིས་གཟུང་བའི་ཡུལ་མ་སྐྱེས་པའི་ཆོས་ཉིད་དུ་གྱུར་པ་དང་། འཛིན་པའི་སེམས་བདག་མེད་པ་རིག་པ་ཡེ་ཤེས་སུ་གྱུར་པའི་དུས་ན། དབྱིངས་དང་ཡེ་ཤེས་གཉིས་སུ་མེད་པ་ནམ་མཁའ་སྟོང་པ་ལ་ཉི་མ་ཤར་བ་བཞིན་དུ་ནམ་མཁའི་རང་བཞིན་གྱིས་ནི་ཉི་མའི་འོད་སྟོང་པར་བྱེད་ལ། ཉི་མའི་འོད་ཀྱིས་ནམ་མཁའ་གསལ་བར་བྱེད་པ་དང་འདྲ་བར། དབྱིངས་དང་ཡེ་ཤེས་གཉིས་སུ་མེད་པའི་དུས་ན། ཡུལ་སེམས་གཉིས་མེད་མ་སྐྱེས་དབྱིངས་སུ་གཅིག །ཅེས་བྱ་བ་སྟོང་སེམས་ཙམ་གྱི་གེགས་བསལ་ལོ། །ཉན་ཐོས་རང་རྒྱལ་སེམས་ཙམ་སྤོང་མན་ངག །ཅེས་བྱ་བ་བློ་བཞག་པའི་མན་ངག་གོ། །དེ་ལ་སྤྱི་དོན་གསུམ་ནི། དང་པོ་རྒྱུ་མཐུན་པའི་འབྲས་བུ་ལེན་པ་ཡིན་ཏེ། མུ་སྟེགས་པས་རྟག་པ་ཐེར་ཟུག་པར་བསྒོམས་པས། མགོ་བོ་ལ་རྭ་སྐྱེ་བར་ནུས་ཀྱང་། སྟོང་པ་ཕྱལ་བར་བསྒོམས་པས་བདག་གི་ལུས་མི་སྣང་བར་ནུས། ཐེག་པ་མཚན་ཉིད་ལས་རྒྱུ་ཕ་རོལ་ཏུ་ཕྱིན་པ་དྲུག་དང་བཅུའི་སྒོ་ནས། རྐྱེན་ལས་དང་བྱ་བ་ལ་བརྟེན་ནས། འབྲས་བུ་ཆོས་ཀྱི་སྐུ་མེད་པ་ཞིག་ཡོད་པར་འདོད་པས། འབྲས་བུ་རྡོ་རྗེ་ཐེག་པའི་བཞེད་ཀྱིས། རྒྱུ་ཆོས་ཀྱི་སྐུ་མཚན་མ་མེད་པ་ནམ་མཁའ་ལྟ་བུའི་ངང་ནས། རྐྱེན་བསྙེན་བསྒྲུབ་རྣམ་པ་བཞིའི་སྒོ་ནས། འབྲས་བུ་སྐུ་དང་ཡེ་ཤེས་ཕྱག་རྒྱའི་དཀྱིིལ་འཁོར་ཀུན་རྫོབ་སྒྱུ་མའི་མཚན་ཉིད་ཙམ་དུ་བརྟགས་པས་ནི་ཆགས། བསྒྲུབས་པས་ནི་འགྲུབ། ལྟ་བ་ནི་ཡེ་ཤེས་ཀྱི་ངོ་གང་ལ་སྣང་སྟེ། མེད་སྒྱུ་བརྟགས་ཆགས་བསྒྲུབས་འགྲུབ་ལྟ་བར་སྣང་། ཞེས་བྱའོ། །སྤྱོད་མཐུན་ཁྲོ་དྲག་གདུག་པའི་དཔའ་བོས་འདུལ། བྱ་བ་སྤྱོད་པ་མཐུན་པས་འདུལ་བའི་ཐབས་སུ་བསྟན་པ་ནི། སྔོན་དཔལ་རྡོ་རྗེ་སེམས་དཔས་བདུད་ལས་ཀྱི་སྲིན་པོ་འདུལ་བའི་དུས་ལ་བབ་ཙམ་ན། ཞི་བས་མི་འདུལ་བར་མཁྱེན་པས། ཡེ་ཤེས་སྤྲུལ་པ་དཔལ་ཧེ་རུ་ཀའི་སྐུ་གསུང་ཐུགས་ལས་ཕྱུང་ནས། དཔལ་ཧེ་རུ་ཀའི་དབུ་དང་ཕྱག་དང་ཞབས་སྟོང་ཁམས་སྙེད་ཀྱི་རྡུལ་ཕྲ་རབ་ཙམ་དུ་སྤྲུལ་ནས། ལས་ཀྱི་སྲིན་པོ་ལ་སོགས་པའི་འཇིག་རྟེན་གྱི་དྲེགས་བྱེད་ཐམས་ཅད་དཔའ་བཀོངས་ནས་རྡུལ་དུ་བརླགས་ཏེ་ཚར་བཅད་པས། སྤྱོད་མཐུན་ཁྲོ་དྲག་གདུག་པའི་དབང་པོ་འདུལ། །ཅེས་བྱའོ། །རྟོག་འཇོམས་སྨད་རྫས་དང་ལེན་དངོས་གྲུབ་རྒྱུ། །ཞེས་པ་ནི། རྟོག་པ་གཞོམ་པའི་ཕྱིར་སྨད་པའི་རྫས་ལྔ་དང་དུ་བླང་བ་དང་། ཉོན་མོངས་རྣམ་ལྔ་མ་སྤངས་པར་དང་དུ་བླངས་ཏེ་སྤྱད་པས་རྣམ་པར་གྲོལ་བའི་ལམ་དུ་གསུངས་པ། དངོས་གྲུབ་ཐོབ་པའི་རྒྱུར་བཤད་པ་ཀུན་གོང་དུ་དགོས་འབྲེལ་གྱི་སྐབས་སུ་བཤད་པ་དང་མཐུན། གང་ཁྲོ་ཞིང་གང་ལ་ཁྲོ་ཞེས་བཤད་པ་ལ་གཉིས་ཏེ། ཁྲོ་བོ་འབྱུང་བའི་རྒྱུ་གང་ཁྲོ་བ་ནི། ཡུལ་མ་སྐྱེས་པའི་ཆོས་ཉིད་དུ་འགྱུར་ལ། སེམས་ཡེ་ཤེས་སུ་གྱུར་པས་རྟོགས་པའི་དུས་ན་དབྱིངས་དང་ཡེ་ཤེས་གཉིས་མེད་དུ་གྱུར་པའི་ངང་ལས་སྟྭར་ཚན་ལ་སྡུར་མི་ཆགས་པའམ་མར་ཁོལ་བ་ལ་ཆུའི་ཐིགས་པ་གཅིག་ཀྱང་མི་ཤོང་བ་དང་འདྲ་བར། ཉོན་མོངས་པ་ངང་གིས་མི་གནས་པས་ངང་གིས་ཁྲོ་ཞེས་བྱའོ། །ཤུགས་ཀྱིས་ཁྲོ་བ་ནི་འཁོར་བའི་སེམས་ཅན་ཉོན་མོངས་པས་གདུངས་པ་ལ་ཐུགས་རྗེ་དྲག་པོའི་ཕྲིན་ལས་ཀྱིས་འཁོར་བ་ལ་ཤུགས་ཀྱིས་ཁྲོ་ཞེས་བྱའོ། །ཁྲོ་བར་བཅས་པ་ནི། འཁོར་བ་འཇིག་པའི་ཆོས་ཅན་འབྱུང་བ་ཆེན་པོ་བཞི་ཡང་། གཉེན་པོ་མེ་རླུང་ཆུ་ཡི་འཇིག་པས་ཁྲོ་ལ། བཅུད་ཀྱི་སེམས་ཅན་ཐམས་ཅད་ཀྱང་ཉོན་མོངས་པ་ཤས་ཆེ་བ་སྙིགས་མ་ལ་བབ་ཙམ་ན་ཞེ་སྡང་གི་སེམས་སྐྱེས་ནས། གཅིག་གིས་གཅིག་ལ་གསོད་གཅོད་ཀྱི་ལས་བྱེད་པ་ནི། ཁྲོ་བར་བཅས་པ་ཞེས་བྱའོ། །ཁྲོ་བོར་བཅོས་པ་ནི། སྙིང་རྗེ་དབང་གིས་ཕ་མས་བུ་འཚོ་འདྲ། །ཞེས་འབྱུང་སྟེ། སེམས་ཅན་ཐམས་ཅད་ལ་ཐུགས་རྗེའི་དབང་གིས་ཁྲོ་བར་བཅོས་ནས་བྱང་ཆུབ་ཀྱི་ལམ་དུ་འདྲེན་པར་བྱེད་པའོ། །ཁྲོ་བའི་ཡུལ་དང་ཁྲོ་བའི་གནས་གཉིས་ལས། ཁྲོ་བའི་ཡུལ་ནི་སེམས་ཅན་ཐམས་ཅད་ལ་བྱ། ཁྲོ་བའི་གནས་ནི་སྡིག་ཆེ་ཞིང་ལས་ངན་པ་གང་འདུལ་བའི་དུས་ལ་བབ་པ་ལ་བྱའོ། །ལས་དང་འབྲས་བུ་ཞེས་བྱ་བ་ནི། ལས་ཀྱི་རྒྱུ་དུག་གསུམ་ལ་སྤྱད་པས། འབྲས་བུ་ལུས་ངག་ཡིད་གསུམ་དུ་སྨིན་པས་ཕྲིན་ལས་རྣམ་བཞིས་རྒྱུ་དུག་གསུམ་ནི་སྦྱངས། འབྲས་བུ་ལུས་ངག་ཡིད་གསུམ་ནི་བསྒྲལ། ཅིའི་ཕྱིར་ཁྲོ་བ་ནི། རྒྱུ་དང་འབྲས་བུ་གཉིས་ནི། དུག་གསུམ་མི་སྤོང་སྟེ་སྤྱོད་པའོ། །འབྲས་བུ་ནི་ཁྲག་དང་རུས་པ་དང་ཤ་གསོལ་བའོ། །གང་གིས་ཁྲོ་བ་ལ་ལྔ་སྟེ། ཁྲོ་བོ་འབྱུང་བའི་རྒྱུ་སྟེ་དཔལ་ཆེན་པོ་ཡབ་ཡུམ་བཅུ་ཧཱུྃ་ལས་བསྐྱེད། མ་མོ་བརྒྱད་ནི་ཧ་ལས་བསྐྱེད། །ཕྲ་མེན་བརྒྱད་ནི་ཧེ་ལས་བསྐྱེད། །སྒོ་མ་བཞི་ནི་ཕཊ་ལས་བསྐྱེད། །བསྐྱེད་པའི་གནས་ནི་གསུམ་སྟེ། ཡབ་ཀྱི་ཤངས་ཀྱི་རླུང་སྒྲོམ་ནས་བསྐྱེད་པ་དང་། ཡུམ་གྱི་གསང་བའི་མཁའ་དབྱིངས་ནས་བསྐྱེད་པ་དང་། ཐུགས་དཔལ་བེའུ་རིན་པོ་ཆེ་ཟུར་བརྒྱད་པའི་གཞལ་ཡས་ཁང་ནས་བསྐྱེད་པ་དང་གསུམ་མོ། །བསྐྱེད་པའི་ཐབས་ནི། ཆོ་འཕྲུལ་རྣམ་པ་བཞི་དང་། ཆོ་ག་རྣམ་པ་གསུམ་གྱིས་བསྐྱེད། བསྐྱེད་པའི་འབྲས་བུ་ནི། དཔལ་ཆེན་པོ་ཕྲ་མིན་འཁོར་ཚོགས་དང་བཅས་པའོ། །བསྐྱེད་པའི་འབྲས་བུའི་ལས་ནི། ཕྲིན་ལས་དྲག་པོས་དབང་དུ་མཛད་པ་ཞེས་བྱ་སྟེ། ཕྲིན་ལས་དྲག་པོས་འགྲོ་བ་འདུལ་བའི་ལས་མཛད་དོ། །དེ་ལ་དང་པོ་ལྷའི་བུའི་བདུད་གཞོམ་པའི་ཚམ་རྔམ་ནི་སྟོབས་ཆེན་པོ་བཅུའོ། །དྲག་པོ་ནི་གསུང་སྒྲ་དྲག་པོས་བསྔངས་པའོ། །བསྒྱེལ་བ་ནི་སྟོབས་དང་བྲལ་བའོ། །བརྫིས་པ་ནི་ང་རྒྱལ་བཅག་པས་ལྷའི་བུའི་བདུད་བཅོམ་མོ། །བརྟུལ་ཞུགས་ནི་རྟོག་འཇོམས་སྤྱོད་པའི་ཤུགས་སོ། །རོལ་པ་ནི་མཚན་མ་རྣམ་པ་ལྔ་ལ་རོལ་པའོ། །གདོས་པའི་ཕུང་པོ་ནི་ཕུང་པོའོ། །བཅས་པ་ནི་ང་རྒྱལ་དང་བཅས་པའོ། །ཕུང་པོ་བཤིག་པ་ནི་རྟག་ཏུ་རེ་བ་མི་རྟག་པར་སུན་ཕྱུང་བས་ཕུང་པོའི་བདུད་བཅོམ་མོ། །རྒྱུ་དག་པ་དང་། རྐྱེན་དག་པ་དང་། འབྲས་བུ་དག་པ་དང་གསུམ་མོ། །དེ་ལ་རྒྱུ་དག་པ་དུག་གསུམ་གཏན་སྦྱངས། རྐྱེན་དག་པ་ཤ་ཁྲག་རུས་པ་གསུམ་ལ་རོལ་བའོ། །འབྲས་བུ་དག་པ་ལུས་ངག་ཡིད་གསུམ། སྐུ་གསུང་ཐུགས་སུ་སྒྲོལ་བས་ཉོན་མོངས་པའི་བདུད་བཅོམ་མོ། །དེ་རྣམས་ཀྱི་རྣམ་པར་ཤེས་པའི་སེམས་ཁུ་རླངས་སམ་སྨིག་རྒྱུ་བ་ལྟར་གནས་པ་དེ་ཧཱུྃ་གིས་བསྡུས་ནས། འོག་མིན་གྱི་གནས་སུ་བདེ་བར་གཤེགས་པ་ཡུམ་གྱི་མཁའ་དབྱིངས་སུ་གནས་སྤར་བས་འཆི་བདག་གི་བདུད་བཅོམ་ཞེས་བྱའོ། །ཉོན་མོངས་པ་ལྔ་དབང་དུ་མཛད་པ་ནི། འདོད་ཆགས་དབང་དུ་མཛད་པའི་རྟགས་སུ་ཡུམ་དང་གཉིས་སུ་མེད་པར་གྱུར་ཏོ། །ཞེ་སྡང་དབང་དུ་མཛད་པའི་རྟགས་སུ་སྦྲུལ་གྱི་ཆུན་པོ་དང་། སྟག་ལྤགས་ཀྱི་ཤམ་ཐམས་ཀྱིས་བརྒྱན་པའོ། །གཏི་མུག་དབང་དུ་མཛད་པའི་རྟགས་སུ་ཐོད་པའི་ཕྲེང་བ་དང་། གླང་པོ་ཆེའི་ཡ་བསྐོར་དང་། ཞིང་གི་གཡང་གཞིས་བརྒྱན་པའོ། །ང་རྒྱལ་དབང་དུ་མཛད་པའི་རྟགས་སུ་ང་རྒྱལ་གྱི་ཁ་ཊྭཱྃ་ག་ཀླད་ལ་བསྐོར་བའོ། །ཕྲག་དོག་དབང་དུ་མཛད་པའི་རྟགས་སུ་དབང་ཕྱུག་ཆེན་པོ་ཡབ་ཡུམ་གདན་དུ་བསྣོལ་ནས་བརྫིས་པའོ། །ཐམས་ཅད་ལ་ཁྱབ་པའི་དཔལ་ནི་འགྲོ་བ་ཡོངས་ཀྱི་སྒྲོལ་བའི་དཔལ་ལོ། །ཐམས་ཅད་ཡོངས་ལ་ཁྱབ་པའི་དཔལ་ནི། ཉི་མ་དང་འདྲ་སྟེ་ཀུན་ལ་ཁྱབ་པས་ཐམས་ཅད་ཡོངས་ལ་ཁྱབ་པའི་དཔལ་ལོ། །ཞེས་བྱའོ། །འགྲོ་བ་ཡོངས་ཀྱི་སྒྲོལ་བའི་ཉི་མ་ཀུན་ལ་དྲོ་བ་དང་འདྲ་ན་ཡང་། ལྷོར་བལྟས་པའི་ཕུག་པ་ལ་ལྷག་པར་ཡང་དྲོ་བ་དང་འདྲ་བར། སེམས་ཅན་གང་འདུལ་བའི་ཞིང་དུ་གྱུར་པ་ལ་ལྷག་པར་ཡང་དེའི་དོན་མཛད་པས་འགྲོ་བ་དམིགས་ཀྱིས་སྒྲོལ་བའི་དཔལ་ཞེས་བྱའོ། །འདིར་ནི་འཇིག་རྟེན་ལ་བུ་ལྟར་དགོངས་པའི་དཔལ་ཡིན་ཏེ། སྣང་སྲིད་ཀྱི་སེམས་ཅན་ཐམས་ཅད་ལ་མ་བུ་གཅིག་པ་ལ་དགོངས་པ་ལྟར་ཤིན་ཏུ་ཐུགས་རྗེའི་སྒོ་ནས་ཀུན་ལ་བརྩེ་བར་དགོངས་པས། འཇིག་རྟེན་དགོངས་པའི་དཔལ་ཞེས་བྱའོ། །འདི་ནི་གཞན་དོན་མཐར་ཕྱིན་པ་ཡིན་ཏེ། སྔོན་གྱི་སྨོན་ལམ་གྱི་དབང་གིས་ཇི་སྲིད་འཁོར་བ་མ་སྟོངས་ཀྱི་བར་དུ། ཐུགས་རྗེ་དེ་སྲིད་ཀྱི་བར་དུ་སྐུ་བསྙེལ་བ་མི་མངའ་བར་འགྲོ་བའི་དོན་མཐར་ཕྱིན་པའི་དཔལ་ལོ། །འདི་ནི་བདག་དོན་ལྷུན་གྱིས་གྲུབ་པའི་དཔལ་ཡིན་ཏེ། དེ་ལྟར་གཞན་དོན་མཐར་ཕྱིན་པས་བདག་ལ་ཡོན་ཏན་ཅི་ཡོད་ཅེ་ན། མེ་དམར་བུས་ནས་རང་གི་ངོ་བོ་ཕྱིར་གསལ་བ་དང་འདྲ་བར་བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པས། བདག་དོན་ལྷུན་གྱི་གྲུབ་པའི་དཔལ་ཞེས་བྱའོ། །འདི་ནི་དེ་བཞིན་གཤེགས་པའི་བྱིན་བརླབས་བསམ་གྱིས་མི་ཁྱབ་སྟེ། དེ་བཞིན་གཤེགས་པ་ཐམས་ཅད་ནི་སྐུ་གསུམ་དུ་གྲུབ་པ་ལས་གསུམ་གྱི་ངང་ལ་བཞུགས་ནས། ཡེ་ཤེས་གསུམ་གྱིས་དམིགས་པའི་ཡུལ་ལས་འདས་པ་དེ་ས་བཅུ་བའི་བྱང་ཆུབ་སེམས་དཔས་ཀྱང་མཉམ་པར་བཞག་པའི་དུས་ན་དེ་བཞིན་གཤེགས་པ་དང་ཁྱད་མེད་པར་སྣང་ན་ཡང་། མཉམ་པ་ལས་བཞེངས་པའི་དུས་ན། དེ་བཞིན་གཤེགས་པའི་དགོངས་པ་ཤིན་ཏུ་རྟོགས་པར་དཀའ་བས། སེམས་དཔའ་རྟོགས་དཀའ་བ་ཞེས་བྱའོ། །དཔེར་ན་ནམ་མཁའ་གར་ཁྱབ་སྤྲིན་གྱིས་ཁྱབ་པ་ལ། སྤྲིན་གྱིས་གར་ཁྱབ་པར་ཆར་པ་འབབ་པ་དང་འདྲ་བར། ཆོས་སྐུས་གར་ཁྱབ་པར་ལོངས་སྤྱོད་རྫོགས་པའི་སྐུས་ཁྱབ་ལ། ལོངས་སྤྱོད་རྫོགས་པའི་སྐུས་གར་ཁྱབ་པར་སྤྲུལ་པའི་སྐུས་ཀྱང་ཁྱབ་ཐུགས་རྗེའི་ཕྲིན་ལས་ཀྱི་ཆུ་བོ་ཆེན་པོའི་རྒྱུན་བཞིན་དུ་རྒྱུན་མི་ཆད་པར་འགྲོ་བའི་དོན་མཛད་པས། མཁའ་ལ་སྤྲིན་བརྡལ་ཆར་འབབ་ཆུ་བོའི་རྒྱུན། །ཞེས་བྱའོ། །འདི་ནི་བསམ་གཏན་གྱི་ཡུལ་བསམ་གྱིས་མི་ཁྱབ་སྟེ། དེ་བཞིན་གཤེགས་པའི་བསམ་གཏན་གྱི་ཡུལ་ནི། བྱང་ཆུབ་སེམས་དཔའ་རྣམས་ཀྱིས་བགྲང་བ་ལ་ཐོགས་ཏེ། ས་དང་པོའི་བྱང་ཆུབ་སེམས་དཔས་ཞིང་ཁམས་བརྒྱ་སྦྱོང་ངོ་། །སྤྲུལ་པ་བརྒྱ་འགྱེད། བསྐལ་པ་བརྒྱ་ལ་གནས་ཤིང་འགྲོ་བ་བརྒྱ་སྒྲོལ་བ་ལྟ་བུ། བགྲང་བ་ཐོགས་པ་ལྟ་བུ་མ་ཡིན་གྱི། དེ་བཞིན་གཤེགས་པའི་བྱིན་གྱིས་བརླབས་ཤིང་གནས་རྣམ་པར་མི་རྟོག་པའི་ཏིང་ངེ་འཛིན་ནམ་མཁའ་དང་འདྲ་བར་བསམ་ཡས་པ་ལ། ཏིང་ངེ་འཛིན་གྱི་སྤྲུལ་པ་བསམ་གྱིས་མི་ཁྱབ་པ་གཟའ་སྐར་མཁའ་ལ་བཀྲམ་པ་དང་འདྲ་བར་འབྱུང་བ་བསམ་ཡས། བསམ་གྱིས་མི་ཁྱབ་མཁའ་ལ་གཟའ་སྐར་གསལ། ཅེས་བྱའོ། །འདི་ནི་ཀླུ་ཡི་མཐུ་བསམ་གྱིས་མི་ཁྱབ་པ་དབང་དུ་མཛད་དེ། ཀླུ་རྒྱལ་རིགས་དབང་དུ་མཛད་པའི་རྟགས་སུ་དབང་ཆེན་ཞེས་བྱ་སྟེ། རྒྱལ་པོ་ཀུན་ལ་མངའ་མཛད་པ་དང་འདྲ་བར། རྒྱལ་རིགས་དཀར་ཁྲས་དབུ་ལ་བརྒྱན་པའོ། །བྲམ་ཟེའི་རིགས་དབལ་མཆེ་བ་རྣོ་ཞིང་སྔགས་དྲག་པ་དེ་དབང་དུ་བསྡུས་པའི་རྟགས་སུ་སྦྲུལ་སེར་ཁྲས་མགུལ་ལ་བརྒྱན་པའོ། །རྗེ་རིགས་ཤུགས་དྲང་ཞིང་ལག་བཟོ་ངག་སྙན་པ་དེ་དབང་དུ་སྡུད་པའི་རྟགས་སུ་སྦྲུལ་དམར་ཁྲས་དཔུང་པ་ལ་བརྒྱན་པའོ། །དམངས་རིགས་ལས་བྱེད་པ་སྟེ། ཕོ་ཉ་དང་རང་རྒྱུག་བྱེད་པས་དེ་དབང་དུ་བསྡུས་པའི་རྟགས་སུ་སྦྲུལ་སྔོ་ཁྲས་རྐེད་ལ་བརྒྱན་པའོ། །འདི་ནི་སེམས་ཅན་གྱི་ལས་བསམ་གྱིས་མི་ཁྱབ་པ་སྟེ། ཉོན་མོངས་པ་ལྔ་དབང་དུ་མཛད་པའི་རྟགས་ཏེ། ཆགས་སྡང་གཏི་མུག་གསུམ་དབང་དུ་མཛད་པའི་རྟགས་སུ། ཁྲག་གི་ཐིག་ལེ་དང་། སྦྲུལ་གྱི་ཆུན་པོ་དང་། བགས་སྲལ་གྱི་གཡང་གཞིས་སྐུ་ལ་བརྒྱན་པའོ། །ང་རྒྱལ་ཕྲག་དོག་དབང་དུ་མཛད་པའིརྟགས་སུ་ཁ་ཊྭཱྃ་ག་འཕྱར་བ། ལྷ་ཆེན་པོ་ཡབ་ཡུམ་མནན་པའོ། །མི་ཐུང་བྱིན་པའི་གཟུགས་འདྲ་བ་ནི་གནོད་སྦྱིན་ཐམས་ཅད་བྱིས་པ་ཞེས་འགྲེངས་པའམ། ཨ་ཀོ་ལ་ལའི་རྐང་ལག་བཏགས་པ་བཞིན་དུ་ཤིན་ཏུ་བསྙིལ་ཅིང་གཏུམ་བག་ཏུ་འདུག་པས། དེ་གདུལ་བའི་ཕྱིར་མི་ཐུང་གི་གཟུགས་སུ་བསྟན་པ་ཡིན་ནོ། །གྲགས་པ་སངས་རྒྱས་ཀྱི་ཞིང་དུ་གྲགས་པ་ནི། སངས་རྒྱས་ཀྱིས་ནི་བསྟོད་ནས་སྲས་སུ་དགོངས། བྱང་ཆུབ་སེམས་དཔས་ནི་སྤུན་དང་སྲས་སུ་དགོངས། སེམས་ཅན་གྱི་རིགས་སུ་གྲགས་པ་ནི། དེ་ལྟ་བུའི་སྐྱེས་བུའི་སྐུ་མཐོང་བ་དང་། སེམས་ཅན་གཏི་མུག་རྨོངས་པ་ཐམས་ཅད་ནི་གཟེངས་བསྟོད་ནས་སངས་རྒྱས་པར་བྱེད་ལ། ང་རྒྱལ་དང་ཕྲག་དོག་ཐམས་ཅད་ནི་གནོན་ནས་གྲགས་པའོ། །མེ་ལོང་ལྟ་བུའི་ཡེ་ཤེས་ཀྱིས་ནི་ཆོས་ཀྱི་དབྱིངས་ཀྱི་དོན་ཕྱིན་ཅི་མ་ལོག་པར་རྟོགས་པས། སོ་སོར་ཀུན་ཏུ་རྟོག་པའི་ཡེ་ཤེས་ཀྱིས་འགྲོ་བའི་རྒྱུད་མཁྱེན་པས་མྱ་ངན་ལས་འདས་པའི་མཐའ་དང་བྲལ། མཉམ་པ་ཉིད་ཀྱི་ཡེ་ཤེས་ཀྱིས་མཐའ་གཉིས་ཀྱིས་སྐྱོན་སྤངས་ཏེ་གཉིས་སུ་མེད་པར་མཁྱེན་པས་དབུ་མ་ཆེན་པོའོ། །གཉིས་སུ་མེད་པའི་དོན་མཐོང་། །མདོར་ན་རྣམ་པ་ཐམས་ཅད་མཁྱེན་པའི་ཡེ་ཤེས་གཅིག་གི་ངང་དུ་འདུས་སོ། །ནན་ཏན་སྙིང་པོ་ནི་ཟག་པ་དང་བཅས་པའི་ཆོས་ཐམས་ཅད་ཟག་པ་མེད་པའི་ཆོས་ཉིད་ཀྱི་ངང་དུ་འདུས་པས་ན་ནན་ཏན་སྙིང་པོ་ཞེས་བྱའོ། །ནན་ཏན་གྱི་ཕྲིན་ལས་ནི་འགྲོ་བ་རིགས་དྲུག་གི་སེམས་ཅན་སོ་སོའི་གནས་ནས། བླ་ན་མེད་པ་བྱང་ཆུབ་ཀྱི་སེམས་གནས་སུ་འདོན་པར་བྱེད་པའོ། །ནན་ཏན་གྱི་འབྲས་བུ་ནི། སེམས་ཅན་དེ་སྙེད་ཅིག་བསྒྲལ་བས་འཁོར་བར་གཅིག་ཀྱང་འཆོར་བ་མེད་པས། འགྲོ་བ་ཆུད་མི་གསོན་པའི་ནན་ཏན་ནོ། །ནན་ཏན་མཆོག་གི་མཆོག་ཏུ་ཤེས་པར་བྱའོ། །གླང་པོ་ཆེའི་ཡ་བ་སྐོར་ལ་དོན་རྣམ་པ་གསུམ་སྟེ། བདུད་འཇོམས་ལས་ཀྱི་རྒྱན་དང་། སྨད་པ་བསྒྲུབ་རྫས་སྟོབས་ཀྱི་རྒྱན་དང་། ལྟ་བ་གཞུང་ཚུགས་ཐེག་པ་མཆོག་གི་རྒྱན་དང་གསུམ་མོ། །བདུད་འཇོམས་ལས་ཀྱི་རྒྱན་ནི། དཔེར་ན་གླང་པོ་ཆེས་རྩི་ཁྱིམ་མང་པོ་འཇོམས་པ་དང་འདྲ་བར། ཡང་དག་པའི་ཡེ་ཤེས་གླང་པོ་ཆེ་དང་འདྲ་བས་ཉོན་མོངས་པའི་བག་ཆགས་རྩི་ཁྱིམ་དང་འདྲ་བ་འཇོམས་པར་བྱེད་པས་བདུད་འཇོམས་ལས་ཀྱི་རྒྱན་ནོ། །སྨད་པ་བསྒྲུབ་རྫས་སྟོབས་ཀྱི་རྒྱན་ནི། གླང་པོ་ཆེའི་ཤ་ནི་ཤིན་ཏུ་སྨད་དུ་བཤུང་བ་ཡིན་པས་སྨད་པའི་བསྒྲུབ་རྫས་ཞེས་བྱ། སྟོབས་ཆེན་བྱ་བ་ནི་གླང་པོ་ཆེའི་རྒྱབ་ཏུ་མཁར་བརྩིགས་ནས། དམག་མང་པོ་བཞུགས་ན་ཐེག་ཅིང་ཤོང་བ་དང་འདྲ་བར། ཐེག་པ་འོག་མས་མི་ཐེག་ཅིང་དེའི་ནང་དུ་མི་ཚུད་པའི་སྨད་པའི་རྫས་ལྔ་དང་། ཉོན་མོངས་པ་ལྔ་ལ་སོགས་པ་ཐམས་ཅད། ཐེག་པ་ཆེན་པོའི་ནང་དུ་མི་ཚུད་པ་དང་མི་ཐེག་པ་གཅིག་ཀྱང་མེད་པས། སྨད་པའི་བསྒྲུབ་རྫས་སྟོབས་ཀྱི་རྒྱན་ཅེས་བྱའོ། །ལྟ་བ་གཞུང་ཚུགས་ཐེག་པ་མཆོག་གི་རྒྱན་ནི། དཔེར་ན་གླང་པོ་ཆེ་ལ་རྒུན་ཆང་བླུད་ནས་སྣ་ལ་ཆུ་གྲི་དང་། འཁོར་ལོ་དང་ཤཀྟི་ལ་སོགས་པ་མཚོན་ཆ་མང་པོ་བཏགས་ནས། དགྲ་ཕྱོགས་སུ་ཁ་བསྟན་ནས་བཏང་ན། ཅིས་ཀྱང་མི་ཟློག་པར་ཕ་རོལ་གྱི་དཔུང་གཤགས་ནས་གཏོངས་པ་དང་འདྲ་བར་ཐེག་པ་ཆེན་པོ་གསང་སྔགས་ཀྱིས་ཀྱང་རང་གི་ལྟ་བ་གཞུང་ཚུགས་ལ། གཞན་གྱི་ལྟ་བ་ནི་ཟིལ་གྱིས་གནོན་པས། ལྟ་བ་གཞུང་ཚུགས་ཐེག་པ་མཆོག་གི་རྒྱན། །ཞེས་བྱའོ། །སྟག་ལའང་གསུམ། དཔའ་བ་ཡེ་ཤེས་ཀྱི་རྒྱན་དང་གཏུམ་པ་ཐུགས་རྗེའི་རྒྱན་དང་། ཟ་བྱེད་ཕྲིན་ལས་ཀྱི་རྒྱན་དང་གསུམ་མོ། །དཔའ་བ་ཡེ་ཤེས་ཀྱི་རྒྱན་ནི། དཔེར་ན་སྟག་ནི་རིགས་ཀྱིས་དཔའ་བ་སྟེ་སེམས་ཅན་གྱི་གཉེན་པོར་འགྱུར་ཞིང་འཇིགས་པ་དང་འདྲ་བར་ཡེ་ཤེས་ནི་རིགས་ཀྱིས་དཔའ་བ་སྟེ། ཉོན་མོངས་པ་ཐམས་ཅད་ཀྱི་གཉེན་པོར་གྱུར་པས་རིགས་ཀྱིས་དཔའ་བ་ཞེས་བྱའོ། །རྟུལ་བའི་ཐུགས་རྗེའི་རྒྱན་ནི། སྟག་གཟན་ལ་བབས་ཙམ་ན། བདེ་མི་བདེ་མི་འདམ་པ་ཤིན་ཏུ་རྟུལ་བའི་བརྩོན་འགྲུས་ཀྱིས་མཆོངས་པ་དང་འདྲ་བར། དེ་བཞིན་གཤེགས་པའི་ཐུགས་རྗེས་འགྲོ་བའི་དོན་མཛད་ཙམ་ན། བཏང་སྙོམས་དང་ལེ་ལོ་མི་མཛད་པར་ཤིན་ཏུ་རྟུལ་བའི་བརྩོན་འགྲུས་ཀྱིས་མཛད་པས་རྟུལ་པ་ཐུགས་རྗེའི་རྒྱན་ཞེས་བྱའོ། །ཟ་བྱེད་ཕྲིན་ལས་ཀྱི་རྒྱན་ནི། ཟ་བྱེད་ནི་སྟག་གིས་སེམས་ཅན་ཟིན་པའི་དུས་སུ། ཤ་སྙིང་ནི་ཟ་ལ་རུས་པ་སྲ་བ་ནི་འཇོག་པ་མ་ཡིན་ཏེ། ཤ་རུས་མེད་པར་ཆམ་ཆོམ་བྱེད་པ་དང་འདྲ་བར། ཐུགས་ཕྲིན་ལས་ཀྱིས་བག་ཆགས་སྲབ་པའི་ནི་དོན་བྱེད་ལ་འཐུག་པའི་ནི་དོན་མི་བྱེད་པ་མ་ཡིན་ཏེ། བག་ཆགས་འཐུག་སྲབ་མེད་པར་ཀུན་གྱི་དོན་མཛད་པ་ཟ་བྱེད་ཕྲིན་ལས་ཀྱི་རྒྱན་ཞེས་བྱའོ། །སྦྲུལ་ནི་གསུམ་སྟེ། དཔའ་བས་འཇིགས་པ་དང་། བརྗིད་པས་དུག་གནོན་པ་དང་། མཉེན་ལ་ལྕུག་པས་ཡུམ་གྱི་ཚུལ་སྟོན་པ་དང་གསུམ་མོ། །དེ་ལ་དཔའ་བས་འཇིགས་པ་ནི། དཔེར་ན་ལུས་ཁྲ་བོར་འདུག་ལ། གདུག་རྩུབ་ཆེ་བས་ཀུན་འཇིགས་པ་དང་འདྲ་བར། དཔལ་ཆེན་པོའི་སྐུ་ལ་སྦྲུལ་གྱི་ཆུན་པོས་དྲེགས་བྱེད་ཐམས་ཅད་དཔའ་བཀོང་ཞིང་ཟིལ་གྱིས་གནོན་པས་དཔའ་བས་འཇིགས་པའི་རྒྱན་ཞེས་བྱའོ། །བརྗིད་པས་དུག་གནོན་པ་ནི། སྦྲུལ་གྱི་ལྕེ་ལ་དུག་ཡོད་པ་དང་འདྲ་བར། དེ་བཞིན་དུ་ཕྱིའི་དུག་ལྔ་དང་། ནང་གི་དུག་ལྔ་མ་སྤངས་པར་གནས་སུ་བཅོམ་པས་བརྗིད་པས་དུག་གནོན་ཞེས་བྱའོ། །མཉེན་ལྕུག་ཡུམ་གྱི་ཚུལ་སྟོན་པ་ནི། སྦྲུལ་གྱི་མཚན་ཉིད་མཉེན་ལ་ལྕུག་པས་སྦྲུལ་ཨུ་མ་ཏ་བུད་མེད་ཀྱི་སྒྱུ་རྩལ་སུམ་ཅུ་རྩ་གཉིས་ཀྱིས་ཁྲོ་བོའི་སྐུ་ལ་འཁྲིལ་ཞིང་མཉེས་པའི་མཆོད་པ་འབུལ་བས་མཉེན་ལྕུག་འཁྲིལ་ལ་ཡུམ་གྱི་ཚུལ་སྟོན། ཞེས་བྱའོ། །ཐོད་པ་ལ་གསུམ། སྐུ་གསུམ་ཐོབ་པའི་དབང་། ཞེས་པ། སྐུ་གསུམ་ཐོབ་པའི་དབང་དང་། ཐེག་པ་གསུམ་འཆད་པའི་རྟགས་དང་། དུས་གསུམ་སེམས་ཅན་སྒྲོལ་བའི་རྒྱན་ནོ། །དེ་ལ་སྐུ་གསུམ་ཐོབ་པའི་དབང་ནི། ཐོད་པ་སྐམ་པོ་དཀར་བ་དང་འདྲ་བར་ཆོས་ཀྱི་སྐུ་ལ་མཚན་མའི་སྐྱོན་གྱིས་མ་གོས། ཐོད་པ་སྐམ་པོ་ལ་ཤ་དང་ཁྲག་མེད་པ་དག་འདྲ་བར་ཆོས་ཀྱི་སྐུས་འགྲོ་བའི་དོན་མི་མཛད། ཐོད་པ་ཟླུམ་པ་དང་འདྲ་བར་ཆོས་ཀྱི་སྐུ་ལ་མཚན་མའི་སྐྱོན་མེད། ཐོད་པ་ར་རི་ཁྲ་བོ་ནི། ལོངས་སྤྱོད་རྫོགས་པའི་སྐུ་དང་སྦྱར་རོ། །ར་རི་ཁྲ་བོ་ཤ་ཕྱེད་བཏོགས་པ་དང་འདྲ་བར། ཞལ་གྱི་དཀྱིལ་འཁོར་ནས་ལྗགས་ཀྱི་དབང་པོ་ལ་བཀྲམ་ནས་ཆོས་མི་འཆད་ཕྱེད་མ་བཏོགས་པ་དང་འདྲ་བར་ས་བཅུའི་བྱང་ཆུབ་སེམས་དཔའ་རྣམས་ལ་ཏིང་ངེ་འཛིན་གྱི་སྒོ་ནས་ཆོས་སྟོན་པས་ལོངས་སྤྱོད་རྫོགས་པའི་སྐུ་དང་སྦྱར་རོ། །ཐོད་པ་རློན་པ་ནི་སྤྲུལ་པའི་སྐུ་དང་སྦྱར་ཏེ། ཐོད་པ་རློན་པ་ཤ་དང་ཁྲག་གང་ཡང་མ་སྤངས་པ་དང་འདྲ་བར། འཁོར་བ་ཤ་ཁྲག་དང་འདྲ་བའི་ནང་ན། ཐུགས་རྗེས་འགྲོ་བ་རྣམས་ཀྱི་དོན་མཛད་པས་སྤྲུལ་པའི་སྐུ་དང་སྦྱར་རོ། །ཐེག་པ་གསུམ་འཆད་པའི་རྟགས་ནི། ཐོད་པ་སྐམ་པོ་ཉན་ཐོས་ཀྱི་ཐེག་པ་དང་སྦྱར། ཐོད་པ་སྐྲ་མེད་པ་དང་འདྲ་བར་ཉན་ཐོས་ཀྱི་ཞི་བ་ཕྱོགས་གཅིག་པ་ལ་ཐུགས་རྗེའི་སྤྲུལ་པ་མི་འབྱུང་བས་ཐོད་པ་སྐམ་པོ་ཉན་ཐོས་ཀྱི་ཐེག་པ་དང་སྦྱར། ཐོད་པ་ར་རི་ཁྲ་བོ་བྱང་ཆུབ་སེམས་དཔའི་ཐེག་པ་དང་སྦྱར་ཏེ། ར་རི་ཁྲ་བོ་ཤ་མེད་པར་བཏོགས་པ་དང་འདྲ་བར་བྱང་ཆུབ་སེམས་དཔའི་ཐེག་པས་ཀྱང་ཆོས་ཐམས་ཅད་སྟོང་ཞིང་བདག་མེད་པར་རྟོགས་ལ་ཕྱེད་མ་བཏོགས་པ་དང་འདྲ་བར་གསང་སྔགས་ལྟ་བ་ཟབ་མོའི་གྲོགས་སྤྱོད་པ་བརླང་པོ་ལ་དངོས་སུ་འཇུག་མི་ནུས་པ་དང་འདྲ་བར་ཐོད་པ་ར་རི་ཁྲ་བོ་བྱང་ཆུབ་སེམས་དཔའི་ཐེག་པ་དང་སྦྱར་རོ། །ཐོད་པ་རློན་པ་གསང་སྔགས་ཀྱི་ཐེག་པ་དང་སྦྱར་ཏེ། ཐོད་པ་རློན་པ་ཤ་ཁྲག་གང་ཡང་མ་སྤངས་པ་དང་འདྲ་བར། ཐེག་པ་གསང་སྔགས་ཀྱིས་ཀྱང་འདོད་པའི་ཡོན་ཏན་རྣམ་པ་ལྔ་དང་སྨད་པའི་རྫས་ལྔ་ལ་སོགས་པ་མ་སྤངས་མ་བཅད་པའི་སྒོ་ནས་རྣམ་པར་གྲོལ་བའི་ལམ་དུ་མཁྱེན་ལ། ཐོད་པ་རློན་པའི་དབང་པོ་མ་སྤངས་པ་དང་འདྲ་བར། མཁྱེན་པའི་ཡེ་ཤེས་ཆོས་དང་གང་ཟག་ལ་བདག་མེད་པར་རྟོགས་ལ། ཐོད་པ་རློན་པ་སྐྲ་མ་སྤངས་པ་དང་འདྲ་བར། ཐུགས་རྗེ་སྤྲུལ་པས་འགྲོ་བའི་དོན་མཛད་པས། ཐོད་པ་རློན་པ་གསང་སྔགས་ཀྱི་ཐེག་པ་དང་སྦྱར་རོ། །དུས་གསུམ་སེམས་ཅན་སྒྲོལ་བའི་རྒྱན་ནི། ཐོད་པ་སྐམ་པོ་འདས་པའི་སངས་རྒྱས་དང་སྦྱར། ཐོད་པ་སྐམ་པོ་ལ་ཤ་ཁྲག་གང་ཡང་མེད་པ་དང་འདྲ་བར་ལྔ་མ་འདས་པའི་སངས་རྒྱས་ཀྱིས་ཀྱང་ཁམས་གསུམ་དུ་འཁོར་བའི་སེམས་ཅན་ལ་ཐུགས་རྗེས་ཆགས་པ་མེད་པས་ཐོད་པ་སྐམ་པོ་སྔ་མའི་སངས་རྒྱས་ལ་སྦྱར་རོ། །ཐོད་པ་ར་རི་ཁྲ་བོ་ད་ལྟར་བཞུགས་པའི་སངས་རྒྱས་དང་སྦྱར། ཐོད་པ་ར་རི་ཁྲ་བོ་ཤ་ཕྱེད་གཏོགས་ཕྱེད་མ་བཏོགས་པ་དང་འདྲ་བར། སེམས་ཅན་ཕྱེད་ནི་སྒྲོལ་ད་ལྟར་སྐྱེ་འགྲོ་ཁད་ཀྱིས་སྒྲོལ་བས་ད་ལྟར་བཞུགས་པའི་སངས་རྒྱས་དང་སྦྱར་རོ། །ཐོད་པ་རློན་པ་གང་ཡང་མ་སྤངས་པ་དང་འདྲ་བར་མ་བྱོན་པའི་སངས་རྒྱས་ཀྱིས་ཀྱང་འགྲོ་བའི་དོན་མ་སྤངས་པར་ཀུན་མཛད་ལ། ཐོད་རློན་གཞོན་ཚུལ་དུ་འདུག་པ་དང་འདྲ་བར། མ་བྱོན་པའི་སངས་རྒྱས་ཀྱིས་ཀྱང་རྟག་པར་གཞོན་ཚུལ་བསྙེལ་བ་མི་མངའ་བར་ཆོས་སྟོན་ཆེན་པོ་མཛད་པས། རློན་པ་མ་བྱོན་པའི་སངས་རྒྱས་དང་སྦྱར་རོ། །གཡང་གཞི་ཚུལ་ཁྲིམས་གོས་ཀྱི་རྒྱན་ཞེས་པ། དཔེར་ན་པགས་པ་མ་བརྟོལ་ན་ཁྲག་མི་ཡོང་བ་དང་འདྲ་བར། བྱང་ཆུབ་སེམས་གཏིང་ནས་མ་ཉམས་ན་ཁམས་གསུམ་འཁོར་བར་མི་ལྟུང་བས་མི་འཁོར་བ་ཞེས་བྱ། བྱང་ཆུབ་ཅེས་པ། ཕྱི་གཟུང་བའི་ཡུལ་མ་སྐྱེས་པས་བྱང་ཆོས་ཉིད་ལས་བྱང་ལ། ཞིང་ལྤགས་རློན་དུ་སྣང་བ་ལ། ནང་འཛིན་སེམས་བདག་མེད་པར་རིག་པའི་སེམས་སུ་ཆུབ་པས། སླ་བཞི་མགོ་དང་ལྔ་འདོམས་སུ་བསྣོལ་བར་བསྟན་ནོ། །དེ་བས་དེ་ལྟར་གཟུང་འཛིན་གཉིས། དབྱིངས་དང་ཡེ་ཤེས་གཉིས་སུ་མེད་པ་ལས། ཐུགས་རྗེ་ཆེན་པོས་སེམས་ཅན་དོན་ལ་སེམས། །ཞེས་བྱའོ། །ཞིང་མི་རྟོལ་བ་བྱང་ཆུབ་སེམས་ཀྱི་རྒྱན་དུ་བཤད་པ། དེ་ལྟར་བྱང་ཆུབ་སེམས་ཀྱི་དོན་དང་ལྡན་ན། ཕྱི་ལུས་ཀྱི་ཚུལ་མ་ཉམས་ན། །ངན་སེམས་ཀྱི་ཁྲིམས་མི་འདྲར་བས་དམ་ཁྲིམས་གོས། ཞེས་བྱའོ། །རཀྟ་ཐུགས་རྗེ་ཆགས་པའི་རྒྱན། །ཞེས་པ། རྣམ་པར་རྟོག་པའི་དབྱིངས་ནས་ཐུགས་རྗེ་ཆགས་པས། འཁོར་བར་མི་གཏོང་བས་ན་ལོངས་སྤྱོད་རྫོགས་པའི་སྐུ་ཐོབ་ནས་པདྨ་སྤྱན་གྱི་ས་ཐོབ་པའི་རྟགས་སོ། །གཟི་ཆེན་དོན་དམ་བཅུད་ཀྱི་རྒྱན། །ཞེས་པ། ཟས་བདུན་ལ་ཆུ་སེར་ཐིགས་པ་གཅིག །ཁྲག་ཐིགས་པ་བདུན་ལ་ཞག་ཐིགས་པ་གཅིག་ཏུ་གྱུར་པས། ཟས་ཐམས་ཅད་ཀྱི་བཅུད་ཞག་ཡིན་པ་དང་འདྲ་བར། ཕྱི་གཟུང་བའི་ཡུལ་མ་སྐྱེས་པས་ཆོས་ཀྱི་དབྱིངས་ལ། འཛིན་པའི་སེམས་ལ་བདག་མེད་པས་རིག་པའི་ཡེ་ཤེས་བཅུད་དུ་གྱུར་པས་བཅུད་ཀྱི་ཐིག་ལེ་ཞེས་བྱའོ། །ཆོས་སྐུ་ཐོབ་ནས་ཀུན་ཏུ་འོད་ཀྱི་ས་ནོན་པའི་རྟགས་སུ་བསྟན་ནོ། །ཐལ་བ་འདུལ་བྱེད་ཕྲིན་ལས་རྒྱན། ཞེས་པ། དཔེར་ན་རྩི་ཤིང་ནགས་ཚལ་སྲ་ཞིང་མཁྲེགས་པ་ཐམས་ཅད་མེར་བུས་ནས་ཐལ་བར་བརླགས་ནས་མཉེན་ཞིང་དལ་བ་དང་འདྲ་བར། ཁམས་གསུམ་གྱི་དྲེགས་བྱེད་བདུད་དང་སྲིན་པོ་རྩི་ཤིང་དང་འདྲ་བར། དཔལ་ཆེན་པོའི་ཐུགས་ཡང་དག་པའི་ཡེ་ཤེས་མེ་དང་འདྲ་བས་བསྲེགས། ཐུགས་རྗེ་ཕྲིན་ལས་དྲག་པོས་བརྟུལ་ཞིང་སྦྱངས་ནས། བླ་ན་མེད་པའི་བྱང་ཆུབ་ཀྱི་དབྱིངས་སུ་བསྒྲལ་ནས། ཐལ་ཆེན་གྱི་ཐིག་ལེ་ཞེས་བྱ་སྟེ། སྤྲུལ་པའི་སྐུ་ཐོབ་ནས་ཡི་གེ་འཁོར་ལོ་ཚོགས་ཆེན་གྱིས་ཐོབ་པའི་རྟགས་སུ་བསྟན་ནོ། །ད་ནི་བསྐལ་བའི་མེ་རི་བཤད་པ་ལ། མེའི་རང་བཞིན་དང་མེ་སྒྲ་གཉིས་སོ། །རང་བཞིན་ལ་དོན་དྲུག་སྟེ། འབར་བས་སེལ་བའི་ཡེ་ཤེས་དང་། འཕྲོ་བས་ཁྱབ་པའི་ཐུགས་རྗེ་དང་། དབྱིངས་སུ་འདུལ་བའི་ཆོས་ཉིད་དང་། སྲེག་པར་བྱེད་པའི་ཕྲིན་ལས། ཟད་པར་བྱེད་པའི་ཀློང་དང་། མཐའ་ལས་འདས་པའི་དཀྱིལ་ལོ། །དེ་ལ་འབར་བས་སེལ་བའི་ཡེ་ཤེས་ནི། དཔེར་ན་མེ་ཆེན་པོ་འབར་བ་ཡིས་རྩི་སྦུར་ཐམས་ཅད་སེལ་བ་དང་འདྲ་བར། ཡང་དག་པའི་ཡེ་ཤེས་ཀྱིས་མཚན་མའི་རྣམ་པར་རྟོག་པ་ཐམས་ཅད་མི་གནས་ཤིང་སེལ་བར་བྱེད་པ། འབར་བས་སེལ་བའི་ཡེ་ཤེས་ཞེས་བྱའོ། །འཕྲོ་བས་ཁྱབ་པའི་ཐུགས་རྗེ་ཞེས་པ། མེ་ཆེན་པོ་འབར་བས་མེ་སྟག་ཕྱོགས་བཅུར་འཕྲོ་བ་དང་འདྲ་བར། དཔལ་ཆེན་པོའི་ཡེ་ཤེས་ལ་ཐུགས་རྗེའི་སྤྲུལ་པ་ཕྱོགས་བཅུར་འཕྲོ་བས་ཁྱབ་པའི་ཐུགས་རྗེ་ཞེས་བྱའོ། །དབྱིངས་སུ་འདུལ་བའི་ཆོས་ཉིད་ནི། དཔེར་ན་མེ་ཆེན་པོ་ལས་མེ་སྟག་འཕྲོ་བར་གང་མང་མི་འཕྱིར་འདུལ་བ་དང་འདྲ་བར། ཐུགས་རྗེའི་སྤྲུལ་པ་ཕྱོགས་བཅུར་འཕྲོ་བས། ཕྱིར་སྐྱེ་བ་མེད་པའི་དབྱིངས་སུ་འདུ་བས་ཆོས་ཉིད་དོ། །སྲེག་པར་བྱེད་པའི་ཕྲིན་ལས། དཔེར་ན་མེ་ཆེན་པོས་ཐམས་ཅད་སྲེག་པར་བྱེད་པ་དང་འདྲ་བར། ཡང་དག་པའི་ཡེ་ཤེས་ལས་ཐུགས་རྗེ་འབྱུང་། ཐུགས་རྗེ་ལས་སྤྲུལ་པའི་ཕྲིན་ལས་འབྱུང་བས་ཁམས་གསུམ་འཁོར་བའི་སྡུག་བསྔལ་དང་ཉོན་མོངས་པའི་བག་ཆགས་སེམས་ཅན་རྐང་དང་སྲི་ལ་གནས་པའི་ཤེས་བྱའི་སྒྲིབ་པ་ཤེས་པའི་རྒྱུད་ལ་གནས་པ་དེ་དག་ཐམས་ཅད་ཐུགས་རྗེའི་ཕྲིན་ལས་སྐད་ཅིག་ཡུད་ཙམ་གྱིས་བསྲེག་པར་མཛད་པས། སྲེག་པར་བྱེད་པའི་ཕྲིན་ལས་ཞེས་བྱའོ། །ཟད་པར་བྱེད་པའི་ཀློང་ཞེས་པ་ནི། དཔེར་ན་མེ་ཆེན་པོའི་ནང་དུ་ལྕགས་ཀྱི་ཕ་ཝང་ཞུ་ཞིང་ཉམས་ཏེ་འགྲོ་བ་དང་འདྲ་བར། ཡང་དག་པས་ཡེ་ཤེས་ཀྱི་ཀློང་དུ་མཚན་མའི་བག་ཆགས་ཞུ་ཞིང་མེད་པར་འགྲོ་བས་ཟད་པར་བྱེད་པའི་ཀློང་ཞེས་བྱའོ། །མཐའ་ལས་འདས་པའི་དཀྱིལ་ཞེས་བྱ་བ་ནི། དཔེར་ན་མེ་ཆེན་པོ་མེ་ལྕེ་ཀུན་ཏུ་འབར་བ་ལ་མེ་སྟག་ཕྱོགས་བཅུར་འཕྲོ་ཡང་། དཀྱིལ་འཚུབ་ཅིང་ཟླུམ་པོར་འབར་བ་དང་འདྲ་བར། ཐུགས་རྗེའི་སྤྲུལ་པ་ཕྱོགས་བཅུར་འཕྲོ་ལ། འཕྲོ་བའི་དོན་ཕྲིན་ལས་མཛད་ཀྱང་མཐའ་རྣམ་པ་གཉིས་འདས་ནས་དབུ་མ་ཆེན་མོ་དམིགས་སུ་མེད་པའི་ངང་དུ་གྱུར་པས་མཐའ་ལས་འདས་པའི་དཀྱིལ་ཅེས་བྱའོ། །དེ་ལ་མེའི་སྒྲ་ནི་སྒྲ་ཆེན་པོ་དང་། སྒྲ་ཐ་དད་པ་གཉིས་ཏེ། སྒྲ་ཆེན་པོ་ཆོས་ཀྱི་སྐུ་དང་སྦྱར། སྒྲ་ཐ་དད་པ་ཏིང་ངེ་འཛིན་འབུམ་ཕྲག་གྲངས་མེད་པ་དང་སྦྱར། དེ་ལ་དཔེར་ན་མེ་ཆེན་པོ་འབར་བ་ལ་རྒྱང་ནས་ཉན་ན་སྒྲ་འུར་ཆེན་པོ་གཅིག་ལས་མི་གྲག་པ། ཆོས་ཀྱི་སྐུ་ཀུན་ཏུ་འོད་དང་སྦྱར་རོ། །སྒྲ་ཐ་དད་པ་ནི་མེ་ཆེན་པོའི་དྲུང་དུ་སོང་ནས་ཉན་ན་རྣམ་པ་མང་པོ་དང་འདྲ་བར། ཏིང་ངེ་འཛིན་འབུམ་ཕྲག་གྲངས་མེད་པ་དུ་མས་འགྲོ་བའི་དོན་མཛད་པ་དང་སྦྱར་རོ། །དེ་ལ་དབུའི་རལ་པ་ནི། མ་བསླད་པའི་ཆོས་ཉིད་དང་། དབང་དྲག་འཇོམས་པའི་ཕྲིན་ལས། ཐུགས་རྗེ་འབྱུང་བའི་སྤྲུལ་པའི་སྐུ་དང་གསུམ་སྦྱར་རོ། །དཔེར་ན་རལ་པ་ནི་འཕྱིངས་པ་ཡིན་འཕྱིངས་པ་ནི་འཛིངས་པ་ཡིན། འཛིངས་པ་ནི་ཅིས་ཀྱང་མི་ཕྱེད་པ་ཡིན་ནོ། །དཔེ་དེ་དང་འདྲ་བར། ཆོས་ཉིད་མ་སྐྱེས་པའི་དོན་ནི་བསླད་པས་མི་འགྱུར་ལ་མཐུན་པའི་གཉེན་པོ་ནི། མི་ཤིགས་པས་རལ་པ་འཕྱིངས་བ་དང་སྦྱར་རོ། །དབང་དྲག་འཛོམས་པའི་ཕྲིན་ལས་ནི། ཚོན་དམར་ནག་གཉིས་བསྲེ་ན་ཁམ་བར་འགྲོ་བ་དང་། ཕྲིན་ལས་དབང་དྲག་གཉིས་ཀྱིས་འགྲོ་བའི་དོན་མི་འགྲུབ་མི་སྲིད་པས། དབང་དྲག་འཛོམས་པའི་ཕྲིན་ལས་ཞེས་བྱའོ། །ཐུགས་རྗེ་འབྱུང་བའི་ཕྲིན་ལས་ཞེས་བྱ་བ་ནི། དཔེར་ན་རལ་ཚར་གཅིག་གསེད་ན། སྤུ་ཉག་མང་པོ་འབྱུང་བ་དང་འདྲ་བར་ཐུགས་རྗེའི་སྤྲུལ་པ་བསམ་གྱིས་མི་ཁྱབ་པ་འབྱུང་ནས་འགྲོ་བའི་དོན་མཐར་ཕྱིན་པར་མཛད་པ་རྩ་བའོ། །དེ་ལ་སྐུ་མདོག་མཐིང་ནག་ཏུ་སྟོན་པ་ནི། འདུལ་བའི་དབང་དང་། ཡོན་ཏན་མཐའ་ལས་འདས་པ་དང་། དགོངས་པ་གཏིང་མི་དཔོག་པའོ། །དེ་ལ་འདུལ་བའི་དབང་ནི། གླིང་ལ་དགོངས་པ་ལྷོའི་འཛམ་བུ་གླིང་གི་དོན་མཛད་པའི་ཕྱིར་རོ། །ཡོན་ཏན་མཐའ་ལས་འདས་པ་ནི། ནམ་མཁའི་དགོངས་པ་སྟེ། དཔལ་གྱི་དགོངས་པ་དེ་དང་འདྲའོ། །དགོངས་པ་གཏིང་མི་དཔོག་ཅེས་པ་ནི། རྒྱ་ཆེ་གཏིང་དཔག་དཀའ་བས་ཚད་བཟུང་དུ་མེད་དེ་དཔལ་གྱི་དགོངས་པ་དེ་དང་འདྲ་བའོ། །དེ་ལ་དཔལ་ཧེ་རུ་ཀའི་སྐུ་མདོག་དང་ཕྱག་མཚན་མ་ངེས་པར་འབྱུང་སྟེ། མཚན་མ་མེད་པའི་ཕྱག་རྒྱ་ནི་ཆོས་ཀྱི་སྐུའོ། །དེ་ལ་དངོས་གྲུབ་འབྱུང་བ་ནི་གཟུགས་སྐུ་རྣམ་པ་གཉིས་ཏེ། ཡེ་ཤེས་ཀྱི་སྤྲུལ་པ་ཅིར་ཡང་སྣང་ཡང་། མ་ངེས་པར་དཔའ་བོས་བཤད་ཅེས་དེ་ལ་བྱའོ། །ཆོས་སྒྱུ་མ་ལ་ཏིང་ངེ་འཛིན་གྱིས་དབང་བསྐུར་བས་མཁས་པས་ཅི་དགར་བསྒོམ་ན་འགྲུབ་ཅེས་བྱའོ། །འོ་ན་ཡང་དཔལ་ཧེ་རུ་ཀའི་སྐུ་མདོག་དང་ཕྱག་མཚན་ནི། ཡན་ལག་རྟགས་ཀྱི་ལུང་བཤད་དོ། །གྲུབ་པ་རྟགས་ཀྱི་ལུང་ལ། དབུ་གསུམ་དུ་སྣང་བ་ནི། དུག་གསུམ་རྣམ་པར་དག་པར་བསྒོམས་པས། སྐུ་གསུང་ཐུགས་ལྷུན་གྱིས་གྲུབ་པའི་རྟགས་སུ་སྣང་སྟེ། དེ་ཡང་གང་ཞེ་ན། གཏི་མུག་རྣམ་པར་དག་པར་བསྒོམས་པས་སྐུ་གྲུབ་པའི་རྟགས་སུ། དབུ་གཡས་དཀར་བར་བསྟན་པ། འདོད་ཆགས་རྣམ་པར་དག་པར་བསྒོམས་པས་གསུང་གྲུབ་པའི་རྟགས་སུ་དབུ་གཡོན་དམར་བར་སྟོན་པ། ཞེ་སྡང་རྣམ་པར་དག་པར་བསྒོམས་པས་ཐུགས་གྲུབ་པའི་རྟགས་སུ་དབུས་མ་མཐིང་ནག་ཏུ་སྟོན་པ། དེ་ཡང་ལྟ་སྤྱོད་རྣམ་གསུམ་གྱིས་གྲུབ་པའི་རྟགས་སུ་སྟེ། ལྟ་བས་འཕང་བཅད། སྤྱོད་པས་ལ་དོར། དམ་ཚིག་གིས་གཞི་བཟུང་བས་དེ་ལྟར་གྲུབ་བོ། །སྤྱན་དགུ་ནི། སྐུ་གསུམ་དང་། ས་གསུམ་དང་། ཡེ་ཤེས་གསུམ་དང་། ཏིང་ངེ་འཛིན་གསུམ་སྟེ། སྐུ་གསུམ་ནི་བླང་རྒྱུ་མེད་པས་ཐོབ་ལ། ས་གསུམ་ནི་བགྲོད་པ་མེད་པས་ནོན། ཏིང་ངེ་འཛིན་གསུམ་གྱིས་གོམས་པ་མངོན་དུ་གྱུར་ལ། ཡེ་ཤེས་གསུམ་གྱིས་དམིགས་པའི་ཡུལ་ལས་འདས་པས་སྤྱན་དགུར་གྲུབ་སྟེ། བགྲོད་མེད་ཐོབ་མེད་དམིགས་པའི་ཡུལ་ལས་འདས། །ཞེས་སོ། །སྤྱན་གཡས་གཡོན་གཉིས་ནི། རྟག་ཆད་ཀྱི་མཐའ་ལས་གྲོལ་བས་འགྲོ་ལ་གཟིགས་ལ། སྤྱན་དབུས་མ་ནི་དབུ་མ་ཆེན་མོ་དམིགས་སུ་མེད་པར་གཟིགས་པ་ཞི་བའི་ཚུལ་ལོ། །ཤངས་གསུམ་ནི། ཏིང་ངེ་འཛིན་རྣམ་པ་གསུམ་བསྒོམས་པས་ཤངས་གསུམ་དུ་གྲུབ་སྟེ། སྲོག་ལ་མངའ་མཛད། ཅེས་བྱ་སྟེ། ཤངས་ནི་སྦུབས་ཀྱི་སྣོད་ཡིན། སྦུབས་ནི་སྲོག་འཛིན་པར་བྱེད་པ་ཡིན། སྦུབས་བཅད་ན་སྲོག་གཅོད། སྦུབས་འབྱུང་ན་སྲོག་འབྱུང་བས། སྲོག་ལ་མངའ་མཛད་ཏིང་འཛིན་གསུམ། །ཞེས་བྱ། ཏིང་ངེ་འཛིན་ཆོས་ཀྱི་སྲོག་ཡིན་ནོ། །སྒྲ་ཆེན་ཐ་དད་སྒྲ་སྟེ། ཆོས་སྐུ་ཏིང་འཛིན་སྙན། ཞེས་བྱ་སྟེ། སྒྲ་ཆེན་པོ་ནི་དབྱངས་ཐོས་རིག་པའི་སྙན་ཡིན་ཏེ། ཆོས་ཀྱི་སྐུ་བསྒོམས་པ་འགྲུབ་ལ། སྒྲ་ཐ་དད། རྩལ་མ་འགགས་པའི་སྙན་ཏེ། ཏིང་འཛིན་གྲངས་མེད་པར་བསྒོམས་པས་འགྲུབ་པས་ཆོས་སྐུ་ཏིང་ངེ་འཛིན་སྙན། ཞེས་བྱའོ། །ཞལ་གསུམ་རྣམ་པར་ཐར་པ་གསུམ་བསྒོམས་པས་འགྲུབ་སྟེ། དེ་ཡང་སྐུ་སྟོང་པ་ཉིད་དུ་བསྒོམས་པས་དབུ་གཡས་དཀར་བའི་ཞལ་དུ་གྲུབ་ལ། གསུང་སྨོན་པ་མེད་པར་བསྒོམས་པས་གཡོན་དམར་བའི་ཞལ་དུ་གྲུབ་ལ། ཐུགས་མཚན་མ་མེད་པར་བསྒོམས་པས་དབུས་མཐིང་ནག་གི་ཞལ་དུ་གྲུབ་པས། རྣམ་ཐར་གསུམ་ལྷུན་གྱིས་གྲུབ། ཅེས་བྱའོ། །ལྗགས་གསུམ་ནི། སྐུ་གསུང་ཐུགས་ཀྱི་ཐེག་པ་གསུམ་འགྲོ་བ་ལ་བཤད་པས་འགྲུབ་སྟེ། དེ་ཡང་སྐུ་ཡི་ཐེག་པ་བཤད་པས་གཡས་ཀྱི་ལྗགས་སུ་གྲུབ། གསུང་གི་ཐེག་པ་བཤད་པས་གཡོན་གྱི་ལྗགས་སུ་གྲུབ། ཐུགས་ཀྱི་ཐེག་པ་བཤད་པས་དབུས་ཀྱི་ལྗགས་སུ་གྲུབ་པས། ལྗགས་གསུམ་ཐེག་གསུམ་ཤེས་པའི་རྟགས། །ཞེས་བྱའོ། །མཆེ་བ་བཞི་ནི་ཕྲིན་ལས་མཐར་ཕྱིན་པའི་རྟགས་སོ། །ཞི་རྒྱས་དབང་མངོན་སྤྱོད་འགྲོ་བའི་དོན་མཐར་ཕྱིན་པས་མཆེ་བ་བཞིས་འགྲོ་བའི་དོན་མཐར་ཕྱིན་པར་མཆེ་བ་བཞིས་ཕྲིན་ལས་འབྱིན། ཞེས་བྱའོ། །༼༠༽ཕྱག་དྲུག་ནི། ༼༠༽ ཆོས་ཀྱི་དབྱིངས་དང་མེ་ལོང་ལྟ་བུ་གཉིས། མཉམ་པ་ཉིད་དང་སོ་སོར་རྟོག་པ་གཉིས། བྱ་བ་ནན་ཏན་དང་སྟོང་པ་ཉིད་ཀྱི་ཡེ་ཤེས་དང་དྲུག་བསྒོམས་པས། ཡེ་ཤེས་དྲུག་ནི་མཐར་ཕྱིན་ཕྱག །ཅེས་བྱའོ། །ཕྱག་མཚན་དྲུག་ནི་བསྒོམས་པས་འགྲུབ་སྟེ། རྡོ་རྗེ་ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། བྷནྡྷ་བཟོད་པའི་ཕ་རོལ་ཏུ་ཕྱིན་པ་དང་། ཁ་ཊྭཱཾ་ཀ་སྟོབས་ཀྱི་ཕ་རོལ་དུ་ཕྱིན་པ་དང་། ཞིང་ནི་སྨོན་ལམ་གྱི་ཕ་རོལ་ཏུ་ཕྱིན་པ་དང་། ཐང་གཤོལ་ཐབས་ཀྱི་ཕ་རོལ་ཏུ་ཕྱིན་པ་དང་། རྔ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་དྲུག་བསྒོམས་པས་ཕ་རོལ་ཏུ་ཕྱིན་པ་དྲུག་འགྲུབ་སྟེ། ཕ་རོལ་ཕྱིན་དྲུག་ཕྱག་མཚན་དྲུག །ཅེས་བྱའོ། །ཞབས་བཞི་དད་པ་ལ་སོགས་པ་རྣམ་པ་བཞི་བསྒོམས་པས་འགྲུབ་སྟེ། ཞབས་བཞི་ལམ་བཞི་བགྲོད་པ་མེད་པར་ཐོབ། །ཅེས་བྱའོ། །གྲུབ་པའི་རྟགས་ཀྱི་ཕྱག་རྒྱ་དེ་ལྟར་གྲུབ་ནས། མཛད་པ་རྟགས་ཀྱི་ཕྱག་རྒྱ་ཕྲིན་ལས་ཅི་མཛད་ཅེ་ན། དབུ་གསུམ་གྱིས་ནི་སྲིད་པ་གསུམ་གྱི་མགོན་མཛད་དེ། སྲིད་པ་གསུམ་ནི། ས་འོག །ས་སྟེང་། ས་བླ། ནམ་མཁའ་བར་སྣང་གར་གནས་པའི་སྲིད་པ་གསུམ་གྱི་སེམས་ཅན་ཐམས་ཅད་འཁོར་བའི་གནས་ནས་བླ་ན་མེད་པའི་བྱང་ཆུབ་སྐུ་གསུང་ཐུགས་སུ་བསྒོམས་ནས་སྐྱོབ་པའི་མགོན་མཛད་པས། དབུ་གསུམ་སྲིད་གསུམ་མགོན་མཛད་སྐུ་གསུང་ཐུགས། །ཞེས་བྱའོ། །སྤྱན་དགུ་ནི་ས་དགུ་ལ་གནས་པའི་སེམས་ཅན་སོ་སོ་འདུལ་བའི་བྱེ་བྲག་གཟིགས་ཏེ། གཟིགས་པའི་སྒོ་ནས་ཤངས་གསུམ་ནས་སྤྲུལ་པའི་ཚོགས་བསམ་གྱིས་མི་ཁྱབ་པ་བྱུང་ནས་འགྲོ་བ་ཅིས་འདུལ་དུ་ཕྲིན་ལས་མཛད་པའོ། །ཤངས་གསུམ་ནས་བྱུང་སྤྲུལ་པས་སྟོང་གསུམ་འགེངས། ཞེས་བྱའོ། །སྙན་དྲུག་ནི་འགྲོ་བ་དྲུག་གི་སེམས་ཅན་ཐམས་ཅད་ཀྱིས། སོ་སོའི་གནས་ནས་ཇི་ལྟར་ཞུ་ཞིང་གསོལ་བ་གསན་ནས་སྙན་དྲུག་ནས་ཅི་གསོལ་གསན་ནོ། །ཞལ་གསུམ་ཞེས་པས་སེམས་ཅན་གྱི་ཉོན་མོངས་པ་དུག་གསུམ་སྦྱངས་ཤིང་འབྲས་བུ་ལུས་ངག་ཡིད་གསུམ་སྐུ་གསུང་ཐུགས་སུ་སྦྱང་བའི་ཕྱིར། རྐྱེན་ཤ་ཁྲག་རུས་པ་གསུམ་ཞལ་དུ་གསོལ་བས་ཞལ་གསུམ་སྟེ། མཆོད་པ་ཕུན་སུམ་ཚོགས་པའོ། །ལྗགས་གསུམ། ཞེས་པ། ལྗགས་གསུམ་གྱིས་སྐུ་གསུང་ཐུགས་ཀྱི་ཐེག་པ་འགྲོ་བ་ལ་བསྒྲགས་པས་འགྲོ་བ་སོ་སོའི་རྒྱུད་བཀྲོལ་ནས་བླ་ན་མེད་པའི་བྱང་ཆུབ་ལམ་ལ་བཀོད་པས། ཐེག་གསུམ་སྟོན་པའི་གདངས་ངར་སྒྲོགས། །ཞེས་བྱའོ། །ཁམས་གསུམ་ཉུག་བྱེད་རྡོ་རྗེ་སྲིན་པོའི་ལྕེ། །ཞེས་པ་དཔེར་ན་ཤིང་ཁུང་དུ་དོམ་གྱི་ལྕེ་བརྐྱངས་ན། ནགས་ཁུང་གི་སྦྲང་མ་ཐམས་ཅད་འདུ་བ་དང་འདྲ་བར། དཔལ་ཆེན་པོའི་ལྗགས་ཁམས་གསུམ་དུ་བརྐྱང་པས། ཁམས་གསུམ་གྱི་ཉོན་མོངས་པ་ཐམས་ཅད་དཔལ་ཆེན་པོའི་ལྗགས་ཀྱིས་བསྡུས་ནས་ཞལ་གྱི་དབྱིངས་སུ་ཐིམ་པས་ཁམས་གསུམ་ཉུག་བྱེད་ཅེས་བྱའོ། །མཆེ་བ་བཞི་ཞེས་པ་ནི། སྐྱེ་གནས་བཞིར་སྐྱེས་པའི་སེམས་ཅན་ཐམས་ཅད་སྐྱེ་ཤི་རྩད་གཅོད་པས། སྐྱེ་ཤི་རྩད་གཅོད་ཅེས་བྱའོ། །ཕྱག་དྲུག་འགྲོ་བ་སེམས་ཅན་གཏིང་ནས་འདྲེན་མཛད་པ། ཞེས་པ། ཡེ་ཤེས་དྲུག་དང་ལྡན་པའི་ཕྱག་དྲུག་གིས་འགྲོ་བ་རིགས་དྲུག་གི་སེམས་ཅན་སོ་སོའི་གནས་ནས་བླ་ན་མེད་པའི་བྱང་ཆུབ་ཀྱི་གནས་སུ་འདྲེན་པར་མཛད་པས། གཏིང་ནས་འདྲེན། ཞེས་བྱའོ། །ཕྱག་མཚན་ཕ་རོལ་ཕྱིན་དྲུག་འགྲོ་དོན་མཛད། །ཅེས་པས། ཕྱག་མཚན་དྲུག་གི་ཕ་རོལ་ཏུ་ཕྱིན་པ་དྲུག་དང་ལྡན་པའི་སྒོ་ནས་འགྲོ་བ་རིགས་དྲུག་གི་སེམས་ཅན་རྣམས་ལ་ཅི་མ་ཅིས་འདུལ་བ་དང་། གང་གིས་གང་ལ་འཚམ་པ་བཞིན་དུ། ཇི་ལྟར་འཐད་པ་བཞིན་དུ་འགྲོ་བའི་དོན་མཛད་པས། ཕྱིན་དྲུག་འགྲོ་དོན་མཛད། ཅེས་བྱའོ། །ཞབས་བཞི་ཞེས་པ། ཞི་རྒྱས་དབང་དྲག་པོའི་ཕྲིན་ལས་རྣམ་པ་བཞིས་འཁོར་བའི་སེམས་ཅན་ཐམས་ཅད་བླ་ན་མེད་འི་བྱང་ཆུབ་ཀྱི་དབྱིངས་སུ་སྒྲོལ་བར་མཛད་པས། ཞབས་བཞིས་སྒྲོལ། ཅེས་བྱའོ། །ཡན་ལག་རྟགས་ཀྱི་ལུགས་འདི་ལྟར་ཡང་བཤད་དེ། ༼༠༽དཔལ་བཛྲ་ཧེ་རུ་ཀའི་ཕྱག་གཡས་ཀྱི་དང་པོས་རྡོ་རྗེ་བསྣམས་པ་ནི། ༼༠༽རྡོ་རྗེ་ཡེ་ཤེས་ཕ་རོལ་ཕྱིན་བསྟན་པ། རང་བཞིན་མི་འགྱུར་ལས་ནི་འབིགས་ཤིང་འཇོམས། རྡོ་རྗེའི་རང་བཞིན་མི་འགྱུར་བའི་ཆོས་ཉིད་ཡིན། རྡོ་རྗེའི་ལས་ནི་འཇོམས་པ་བཞིན། ཡེ་ཤེས་ནི་རྡོ་རྗེ་ཡིན་པས། ཡེ་ཤེས་ཀྱི་ཕ་རོལ་ཏུ་ཕྱིན་པ་ཞེས་བྱའོ། །ཕྱག་གཡོན་གྱི་དང་པོས་བྷནྡྷ་བསྣམས་པ། བཟོད་པའི་ཕ་རོལ་ཏུ་ཕྱིན་པ་དང་སྦྱར་ཏེ། བྷནྡྷ་ཆོས་ཀྱི་དབྱིངས་ཡིན་ལ། རྡོ་རྗེ་ཡེ་ཤེས་འཇུག་པས་དབྱིངས་དང་ཡེ་ཤེས་དབྱེར་མེད་པ་ནི། མཐའ་གཉིས་ཀྱི་སྐྱོན་ལ་མི་སྐྲག་པས་བཟོད་པའི་མཆོག་ཅེས་བྱའོ། །ཆོས་དབྱིངས་སྤྲོས་མེད་ཡེ་ཤེས་བཞི་དང་ལྡན། ཞེས་པས། བྷནྡྷ་ལ་དབང་པོ་བཞི་ཡོད་པ་ནི་མཁྱེན་པའི་ཡེ་ཤེས་བཞི་དང་ལྡན་པས། ཡེ་ཤེས་བཞི་ལྡན། ཞེས་བྱའོ། །བྷནྡྷ་ཟླུམ་པ་ནི་ཆོས་ཀྱི་སྐུ་ལ་སྤྲོས་པ་མེད་པའི་རྟགས་ཡིན། དབྱིངས་རྟོགས་ཞེས་པ། བྷནྡྷ་ཆོས་ཀྱི་དབྱིངས་ལ་རྡོ་རྗེ་ཡེ་ཤེས་བཅུག་ནས་རཀྟ་བཅུད་ཀྱི་འཇིག་རྟེན་དཀྲུགས་ནས་ཞལ་དུ་གསོལ་བ་ནི། འཐུངས་པས་འཁོར་བར་མི་གཏོང་བླ་ན་མེད་པའི་དབྱིངས་སུ་སྒྲོལ་བར་མཛད་པས། དབྱིངས་རྟོགས། ཞེས་བྱའོ། །གཡས་ཀྱི་བར་མ་ཁ་ཊྭཱྃ་ག་བསྣམས་པ་ནི། སྟོབས་ཀྱི་ཕ་རོལ་ཏུ་ཕྱིན་པ་དང་སྦྱར། དུག་གསུམ་སྒྲོལ་བྱེད་དྲེགས་པའི་ལྷ་བདུད་བཅོམ་སྟེ། འཇིག་རྟེན་གྱི་ལྷ་ཆེན་པོ་དྲེགས་པ་ཅན་ང་རྒྱལ་རྡོས་པ་རྣམས། ཕུང་པོ་རྟག་ཏུ་རེ་བ་མི་རྟག་པར་སུན་དབྱུང་བའི་ཕྱིར་ཁ་ཊྭཱྃ་ཀ་ཀླད་ལ་བསྐོར་ཏེ་བརྒྱབས་པས་དྲེགས་པའི་ལྷ་བཅོམ་མོ། །སྟོང་གསུམ་སྲིད་གསུམ་ཡོངས་བཏུལ་རྒྱལ་བའི་རྟགས། ཞེས་པས་ཁམས་གསུམ་གྱི་བདག་པོ་དབང་ཕྱུག་ཆེན་པོ་མ་ཧཱ་྄དེ་ཝ་མནན་ནས་ལག་ཆ་ཕྲོགས་ཏེ་ཀླད་ལ་བསྐོར་བས་རྒྱལ། བཙོན་དུ་བཟུང་བས་དམ་པ་མཆན་ལ་ཕེབས་པ་དང་འདྲ་བར་འཇིག་རྟེན་གྱི་དྲེགས་པ་ཅན་ཐམས་ཅད་དཔའ་བཀོང་ཞིང་ཟིལ་གྱིས་མནན་པས་རྒྱལ་བ་རྟགས་ཀྱི་ཁ་ཊྭཱྃ་ཀ་ཞེས་བྱའོ། །ཀུན་ལ་མངའ་མཛད་འཁོར་རྣམས་དབང་དུ་སྡུད། ཁ་ཊྭཱྃ་ཀླད་ལ་བསྐོར་ཁ་དག་ཤ་དག་ཅེས་བརྗོད་པས། དྲེགས་པ་ཅན་གྱི་འཁོར་ཐམས་ཅད་རང་དབང་མེད་པར་འུབ་ཀྱིས་འདུས་པས་འཁོར་དབང་དུ་སྡུད་པའི་ཁ་ཊྭཱྃ་ཀ་ཞེས་བྱའོ། །གཡོན་བར་མ་ནི་ཞིང་གི་དབྱུག་པ་སྟེ་སྨོན་ལམ་གྱི་ཕ་རོལ་ཏུ་ཕྱིན་པ་དང་སྦྱར། འདི་ལ་དོན་རྣམ་བཞིས་བསྟན་ཏེ། འབོད་པའི་གཡབ་མོ་དང་། སྦྱིན་པའི་བཟའ་བ་དང་། བརྡེག་པའི་དབྱུག་པ་དང་། རྟོགས་པའི་ཆོས་ཉིད་དང་བཞིའོ། །དེ་ལ་འབོད་པའི་གཡབ་མོ་ནི། ཞིང་གི་དབྱུག་པ་གཡབ་པས་བྷྱོ་ཞེས་གཡབ་པ་དང་། ལྷ་ཆེན་པོ་ཉི་ཤུ་རྩ་གཅིག་གི་ཆུང་མ་སིལ་གྱིས་འདུ་བར་འབོད་པའི་གཡབ་མོའོ། །ཞིང་གི་མཁའ་འགྲོ་མའི་དམ་རྫས་ཡིན་པས། ཞིང་གི་དབྱུག་པ་བསྣམས་ནས་ཁ་ཁ་ལ་ཤ་ད་བ་ཀ་ཨ་ལ་ལ་ཧོཿ ཞེས་བརྗོད་པས་མཁའ་འགྲོ་མ་རྣམས་ཚིམ་པར་གྱུར་པས་སྦྱིན་པའི་བཟའ་བ་ཞེས་བྱའོ། །བརྡེག་པའི་དབྱུག་པས་གདོས་བཅས་ཕུང་པོ་བཤིག་པ་ནི། ཞིང་གི་དབྱུག་པ་ཐོགས་ནས་བདུད་ལས་ཀྱི་སྲིན་པོ་ལ་སོགས་པ་ཁམས་གསུམ་གྱི་དྲེགས་བྱེད་ཐམས་ཅད་ཕུང་པོའི་གདོས་གཅན་ང་རྒྱལ་དང་བཅས་པ་ཐམས་ཅད་རྡུལ་དུ་བརླགས་པས་གདོས་བཅས་ཕུང་པོ་བཤིག་ཅེས་བྱའོ། །རྟོགས་པའི་ཆོས་ཉིད་ནི་ཞིང་ཡིན། ཞིང་ནི་རོ་ཡིན། རོ་ནི་དྲན་པ་མེད་པ་ཡིན། སོར་མོ་ལྔ་ནི་ཡེ་ཤེས་ལྔ་ཡིན། མཁྱེན་པའི་ཡེ་ཤེས་རྣམ་པ་ལྔས་ཆོས་ཉིད་ཀྱི་དོན་རྟོགས་ཤིང་། མ་ཤོར་བར་འཛིན་པ་ཡིན་པས། དྲན་བྱེད་ཡེ་ཤེས་ལྔས་བཟུང་། ཞེས་བྱའོ། །གཡོན་གྱི་ཐ་མ་ནི་ཐོང་གཤོལ་བསྣམས་པ་ཐབས་ཀྱི་ཕ་རོལ་ཏུ་ཕྱིན་པ་དང་སྦྱར་ཏེ། ཉོན་མོངས་པའི་ཞིང་ས་ལ་ཐུགས་རྗེའི་ཐོང་གཤོལ་གྱིས་རྨོས་ནས་འཁོར་བ་རོལ་བཟློག་ནས། འབྲས་བུ་བླ་ན་མེད་པའི་བྱང་ཆུབ་ཀྱི་མྱུ་གུ་བསྐྱེད་པར་བྱེད་དོ། །ཞིང་ཆོས་ཉིད་ཀྱི་ཞིང་ས་ལ་ཡེ་ཤེས་ཀྱི་ཐོང་གཤོལ་གྱིས་རྨོས་ནས་ཡོད་མེད་ཀྱི་རོལ་བཟློག་ནས། ས་བོན་ཐབས་ལ་མཁས་པའི་བྱང་ཆུབ་ཀྱི་འབྲས་བུ་ཆེ་བའི་ཡོན་ཏན་གྱི་སྤྲུལ་པ་ཕྱོགས་བཅུར་འཕྲོ་བར་བྱེད་དོ། །དེའི་ཕྱིར་ཐོང་གཤོལ་ཐབས་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །གཡས་ཐ་མ་རྔ་བསྣམས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་སྦྱར་ཏེ། ཡུལ་མེད་རྣམ་དག་ཅེས་བྱ་སྟེ། ཕྱི་གཟུང་བའི་ཡུལ་མ་སྐྱེས་པའི་ལྔ་ལོགས་ལ་ནང་འཛིན་པ་བདག་མེད་རིག་པའི་དབྱུག་པས་བརྡུང་ཞེས་བྱ་སྟེ། ཕྱི་གཟུང་བའི་ཡུལ་རྣམ་པར་དག་པའི་ལྔ་ལོགས་ལ། ནང་འཛིན་སེམས་བདག་མེད་པའི་རིག་པའི་ཡེ་ཤེས་ཀྱི་དབྱུག་པས་བསྟན་པའི་གསུང་རབ་ཀྱི་སྒྲ་འབྱུང་བས་འགྲོ་བ་སོ་སོའི་སྐད་དུ་སྒྲོགས་པས། ལྔ་ཤེས་རབ་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །འཁོར་ལོ་བསམ་གཏན་ལྷག་པ་གསུམ་གྱིས་མཚན། །ཞེས་པ། འཁོར་ལོ་བསམ་གཏན་གྱི་ཕ་རོལ་ཏུ་ཕྱིན་པ་དང་སྦྱར། ལྷག་པའི་ཚུལ་ཁྲིམས་ལ་ཞིག་རལ་མེད་པའི་རྟགས་སུ། འཁོར་ལོའི་མཐའ་མྱུ་གུ་ཟླུམ་པོས་བསྐོར་བར་བྱ། ཚུལ་ཁྲིམས་ལ་ཞིག་རལ་མེད་ཙམ་ན། ལྷག་པའི་ཏིང་ངེ་འཛིན་འདུར་བཏུབ་པས་དབུས་ཀྱི་ལྟེ་བ་ཟླུམ་པར་བསྟན་པ་ཡིན། ལྷག་པའི་ཏིང་ངེ་འཛིན་འདུར་བཏུབ་ཙམ་ན། ལྷག་པའི་ཤེས་རབ་ཀྱིས་བོགས་འབྱིན་པའི་རྟགས་སུ་བུདྡྷ་ཧེ་རུ་ཀའི་འཁོར་ལོའི་རྩིབས་ཟུར་ཅན་དུ་བསྟན་ནོ། །བདག་མེད་རིན་ཆེན་སེམས་ལ་རེ་འདོད་སྐོང་། །ཞེས་པ། རིན་པོ་ཆེ་སྦྱིན་པའི་ཕ་རོལ་ཏུ་ཕྱིན་པ་དང་སྦྱར། ཡིད་བཞིན་གྱི་ནོར་བུ་རིན་པོ་ཆེས་ནི་སེམས་ཅན་གྱི་དགོས་འདོད་རེ་བ་ཡིད་བཞིན་དུ་སྐོང་བ་དང་འདྲ་བར། རཏྣ་ཧེ་རུ་ཀ་སྐུ་ཆེ་བའི་ཡོན་ཏན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར། སེམས་ཅན་གྱི་དགོས་འདོད་ཡིད་བཞིན་དུ་སྐོང་ཞེས་བྱའོ། །མི་ཟད་པར་ལྡན། ཞེས་པ་བདག་ཏུ་མི་འཛིན་པའི་སྒོ་ནས་མེད་ལ་ཟད་མི་ཤེས་པས། མི་ཟད་པར་ལྡན་ཞེས་བྱ་སྟེ། སྦྱིན་པའི་ཕ་རོལ་ཏུ་ཕྱིན་པ་དང་སྦྱར་རོ། །པདྨ་འདམ་སྐྱེས་མ་ཆགས་རྗེས་སུ་སྤྱོད། །ཅེས་པ། དཔེར་ན་པདྨ་འདམ་ནས་སྐྱེས་ཀྱང་འདམ་གྱི་སྐྱོན་གྱིས་མ་གོས་པ་དང་འདྲ་བར། དཔལ་པདྨ་ཧ་རུ་ཀ་ལ་ནི་འཁོར་བའི་སྐྱོན་འདམ་རྫབ་དང་འདྲ་བའི་ནད་ན་ཐུགས་རྗེ་ཆགས་པས་འགྲོ་བའི་དོན་མཛད་ན་འཁོར་བའི་སྐྱོན་གྱིས་མ་གོས་པས་དཀྱུས་དེ་ལྟར་ཉེས་པའི་སྐྱོན་མ་གོས་པས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །རལ་གྲི་ཡེ་ཤེས་ཐུགས་རྗེས་མཐའ་གཉིས་གཅོད། །ཅེས་པ་ཡེ་ཤེས་ཀྱི་ངོས་ནི། མྱ་ངན་འདས་པའི་མཐའ་ལ་གཅོད་པ་ཆོས་ཉིད་ཐུགས་རྗེའི་སོས་འཁོར་བའི་མཐའ་ལ་གཅོད་པས། མཐའ་གཉིས་གཅོད་ཅེས་བྱའོ། །རྩེ་གཅིག་ཏིང་འཛིན་གཉིས་ལས་བརྩོན་འགྲུས་མཛད། །ཅེས་པས། ཐུགས་རྗེ་རྩེ་གཅིག་གིས་སེམས་ཅན་གྱི་དོན་མཛད་པ་ལ་བརྩོན་ལ། ཡེ་ཤེས་རྩེ་གཅིག་གིས་ཆོས་ཉིད་དབྱིངས་ལས་འགྲུས་པས་བརྩོན་འགྲུས་མཛད་ཅེས་བྱའོ། །དགྲ་སྟྭ་ཞགས་པ་ལ་སོགས་ཕྱག་མཚན་རྣམས། །ཞེས་པ། དགྲ་སྟྭས་ཉོན་མོངས་མཐའ་ལས་གཅོད་པར་བྱེད་ལ། ཞགས་པས་འཁོར་བའི་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཀྱི་དབྱིངས་སུ་འདྲེན་པར་མཛད་པས། རང་གཉེར་ཆོས་སྐུའི་བརྡ་ཞེས་བྱའོ། །༼༠༽དེ་ལ་སྐུའི་རྔམ་བཞི་མ་ནི། ནམ་མཁའི་རི་མོ་ཕྱག་རྒྱར་རྔམ། །ཞེས་པ་ཀུན་རྫོབ་ཏུ་རང་བཞིན་མེད་པ་ནམ་མཁའ་ལས་སྤྲིན་དེངས་པའི་ཚུལ་ལོ། །ཅིར་ཡང་འགྱུར་བའི་བཞུགས་ཐབས་རྔམ། །ཞེས་པ་ལྷ་དང་འཕགས་པ་དང་ཚངས་པ་དང་། སྨོན་ལམ་དང་ཅིར་ཡང་འགྱུར་བའི་བཞུགས་སྟབས་ཀྱི་ཚུལ་ལོ། །ཟིལ་གྱིས་གནོན་པའི་གདན་ཡང་རྔམ། །༼༠༽རྟགས་བར་ནི། རྙིང་རྒྱུད་ནང་ཁྲོ་བོ་ལྷ་རྒྱུད་ཀྱི་རྟོག་པ་ལས་སྣང་བ་སོར་བཞག་རེ་ཞིག་བྱས། ཞེས་པ་མ་ཆགས་པདྨའི་གདན་དང་། ཐབས་ཤེས་རབ་ཏུ་ལྡན་པ་ཉི་ཟླའི་འོད་ཀྱི་གདན་དང་། ཡོན་ཏན་གྱི་རྟགས་གདན་ཁྲི་མི་འཇིགས་པ་སེང་གེ་དང་། སྟོབས་གླང་པོ་ཆེ་དང་། རྫུ་འཕྲུལ་རྟ་དང་། དབང་གི་རྨ་བྱ་དང་། ཐོགས་པ་མེད་པ་ནམ་མཁའ་ལྡིང་དང་། མཚན་བཟང་པོ་སུམ་ཅུ་རྩ་གཉིས་དང་ལྡན་པའི་ཡོན་ཏན་རྟགས་ཀྱི་གདན་ཁྲིའོ། །ཁྲོ་བོའི་དུས་ན་ཡང་བདུད་བཞི་འཇོམས་པའི་ཁྱུ་མཆོག་དང་། ཐེག་ཆེན་སྦྱོང་བའི་མ་ཧེ་དང་། ཡོན་ཏན་གཟི་འབར་གྱི་གཟིག་དང་། དཔའ་བརྟུལ་ཟ་བྱེད་ཀྱི་སྟག་དང་། བཤོལ་བ་མེད་པའི་དོམ་དང་། ཟིལ་གྱིས་གནོན་པའི་ལྷ་ཆེན་པོ་ཡབ་ཡུམ་དང་། བསྣོལ་བས་ཟིལ་གྱིས་གནོན་པའི་གདན་རྔམ་ཞེས་བྱའོ། །ཚེམས་རྔམ་ཆེན་པོའི་སྟབས་ནི་འོག་ནས་འབྱུང་བ་དང་སྦྱར་རོ། །གསུང་གི་རྔམ་བཞི་ལ། ཧོམ་ལྔ་འབྲེལ་བར་འབྱུང་བའི་ཞལ་རྔམ་ནི། འོག་ནས་ཞིབ་ཏུ་བཤད་པ་དང་སྦྱར་རོ། །ཟླ་གམ་ཅིར་ཡང་འགྱུར་བའི་ལྗགས་ནི། ལྗགས་ཟླ་གམ་ཅིར་ཡང་འགྱུར་བ་ལས། བྱཱ་ཀ་ར་ཎའི་སྐད་དང་། སཾ་སྐྲི་ཏའི་སྐད་དང་། ཨ་བ་བྲཾ་ཤི་ཏའི་སྐད་ལ་སོགས་པ་སྒྲའི་བྱེ་བྲག་ཐམས་ཅད་སོ་སོར་མ་འདྲེས་པར་བསྟན་པའི་ཕྱིར་རོ། །སྐྱེ་ཤི་རྩད་ནས་གཅོད་པའི་ཚེམས་རྔམ་ཞེས་པ། རྣམ་པར་ཤེས་པ་བཞི་ཡོད་པ། དུག་བཞི་ཡོད་པ། མཆེ་བ་ཡེ་ཤེས་བཞི་འཕྲོས་པས་གཅོད་དེ། ཀུན་བཞིའི་རྣམ་པར་ཤེས་པ་ལ་གཏི་མུག་ཡོད་པས། ཆོས་དབྱིངས་མེ་ལོང་ཡེ་ཤེས་ཀྱིས་གཅོད་དོ། །ཉོན་མོངས་པ་ཅན་ལ་ང་རྒྱལ་དང་ཕྲག་དོག་གནས་པ་མཉམ་པ་ཉིད་ཀྱིས་གཅོད་དོ། །ཡིད་ཀྱི་རྣམ་པར་ཤེས་པ་ལ་འདོད་ཆགས་གནས་པ་སོ་སོར་རྟོག་པའི་ཡེ་ཤེས་ཀྱིས་གཅོད་དོ། །སྒོ་ལྔའི་རྣམ་པར་ཤེས་པ་ལ་ཞེ་སྡང་གནས་པས་བྱ་བ་ནན་ཏན་གྱི་ཡེ་ཤེས་ཀྱིས་གཅོད་པ། ཚེམས་རྔམ་ཞེས་བྱའོ། །གསུང་དབྱངས་འབྲུག་ལྟར་སྒྲོགས་པའི་དབྱངས་རྔམ་ཞེས་པ་དབྱངས་ཀྱི་ཡན་ལག་དྲུག་ཅུའི་སྒོ་ནས། ཚངས་པའི་རྒྱལ་པོའི་དབྱངས་ལྟར་སྙན་པ་དང་། མིའམ་ཅིའི་རྒྱལ་པོ་ལྗོན་པའི་དབྱངས་ལྟར་གདུང་པས། འགྲོ་བའི་མཐའ་ཡས་པ་ལ་གསུང་རྒྱ་མཚོ་གོ་བར་སྒྲོགས་པ་དང་། འབྲུག་གི་རྒྱལ་པོའི་སྒྲ་ལྟར་ཟབ་ལ་དྲག་པས་དྲེགས་པར་བྱེད་པ་ཐམས་ཅད་དཔའ་བཀོང་ཞིང་ཟིལ་གྱིས་གནོན་པའ ི་ཚིག་ཅེས་བྱའོ། །ཐུགས་ཀྱི་རྔམ་བཞི་ལས། ལྷག་མཐོང་གི་རང་བཞིན་ལས་ལྷག་མཐོང་གི་རྒྱན་མ་གཡོས་པར་སྣང་བ་ནི། ལྷག་མཐོང་གི་རང་བཞིན། ཆོས་ཀྱི་དབྱིངས་རང་བཞིན་རྣམ་པར་དག་པའི་ངང་ལས། ལྷག་མཐོང་གསལ་བའི་ཤེས་རབ་རྒྱན། ཞེས་ཡེ་ཤེས་ཀྱི་སྤྲུལ་པ་མཁའ་ལ་གཟའ་སྐར་བཀྲམ་པ་བཞིན་དུ་གསལ་བར་བསྟན་ཏེ། ལྷག་མཐོང་གི་རྒྱན་མ་གཡོས་པར་སྣང་བ། ཞེས་བྱའོ། །ཞི་གནས་ཀྱི་རང་བཞིན་ལས་ཞི་གནས་ཀྱི་རང་བཞིན་རྒྱན་ཁྱད་པར་དུ་འབྱུང་བ་ནི། དཔེར་ན་རྒྱ་མཚོ་མ་གཡོས་པ་ལས་རྦ་རླབས་ཕྱོགས་བཅུར་འཕྲོས་པ་དང་འདྲ་བའམ། ཞི་གནས་ཀྱི་རང་བཞིན་རྣམ་པར་མི་རྟོག་པའི་ཏིང་ངེ་འཛིན་མ་གཡོས་པར་རྒྱ་མཚོ་ལྟ་བུའི་ངང་ལས། ཞི་གནས་ཀྱི་རྒྱན་ཕྲིན་ལས་རྒྱ་མཚོའི་རྦ་རླབས་བཞིན་དུ་ཕྱོགས་བཅུར་འཕྲོ་ཞིང་འགྲོ་བའི་དོན་མཛད་པས། ཞི་གནས་ཁྱད་པར་དུ་འབྱུང་བའི་ཚུལ་ཅེས་བྱ་སྟེ། ཕྲིན་ལས་རྒྱ་མཚོ་རྒྱན་པའི་རྦ་རླབས་ལྟར་རྔམ་ཞེས་བྱའོ། །ཡོན་ཏན་ས་གཞི་རྒྱན་པའི་རྩི་ཤིང་ལྟར་རྔམ་པ་ནི། དཔེ་ས་གཞི་ཐ་བ་རྐང་ཁེངས་པ་དང་འདྲ་བ་ལ་ཆར་འབབ་པས། རྩི་ཤིང་ནགས་ཚལ་དང་། ལོ་འབྲས་ཐམས་ཅད་སྨིན་པ་དང་འདྲ་བར་ཞི་གནས་ཀྱི་རང་བཞིན་བཟོད་པའང་ས་གཞི་དང་འདྲ་བ་ལས། ལྷག་མཐོང་ཡེ་ཤེས་ཀྱི་སྤྲུལ་པ་ནམ་མཁའ་ལ་ཆར་འབབས་པ་བཞིན་དུ་འབྱུང་བ་ལས། བྱང་ཆུབ་སེམས་ཀྱི་འབྲས་བུ་སྨིན་པར་བྱེད་པས། ཞི་གནས་ཀྱི་རང་བཞིན་ལ་ལྷག་མཐོང་གི་རྒྱན་གྱིས་ཕན་འདོགས་པ་སྟེ། རྩ་བ་བླང་། རོལ་མོ་རྒྱན་གྱི་གར་ཐབས་རྔམ་པ་ནི། དཔེར་ན་གར་མཁན་གྱིས་གར་སྟབས་བྱས་པས། ཁོ་བདག་གི་ལུས་ལ་བཀོད་པ་རྡུལ་ཙམ་མེད་པར། གར་གྱི་རྣམ་པ་ཐ་དད་པ་བྱེ་བྲག་གི་འགྲོ་བ་མཐའ་དག་དགའ་བར་བྱེད་པ་དང་འདྲ་བར། ཞི་གནས་རྣམ་པར་མི་རྟོག་པའི་ཆོས་ཉིད་ལས་ལྷག་མཐོང་ཡེ་ཤེས་ཀྱི་སྤྲུལ་པ་འབྱུང་ནས་འཁོར་ལ་རྔ་ཐབས་དང་འདྲ་བ་ལས། ཐུགས་རྗེ་གར་སྟབས་དང་འདྲ་བས་འགྲོ་བ་ཇི་ལྟར་འདུལ་བ་བཞིན་དུ་དོན་མཛད་པས། རྩ་བ་བླང་། མཐུའི་རྔམ་བཞི་ལས། རུ་ཏྲ་འཇོམས་པའི་གནས་རྔམ་ནི། སྔོན་འཇམ་དཔལ་གཤིན་རྗེ་གཤེད་ཀྱིས་བདུད་དང་ཀ་རུ་ཏྲ་བསྒྲལ་ནས་ཁོག་པ་རིན་པོ་ཆེའི་གཞལ་ཡས་ཁང་དུ་བྱིན་གྱིས་བརླབས་ཏེ། ཡན་ལག་བརྒྱད་ལ་དུར་ཁྲོད་ཀྱི་གནས་བརྒྱད་བརྩིགས་ནས་བསྒྲུབས་པས་དཔལ་ཆེན་པོའི་སྐུ་གསུང་ཐུགས་ཀྱི་དངོས་གྲུབ་བརྙེས་ཏེ། དྲེགས་བྱེད་ཀྱི་རྒྱལ་པོ་བསྒྲལ་བས། ཁམས་གསུམ་གྱི་དྲེགས་པ་ཅན་ཟིལ་གྱིས་གནོན་པས་བཀྲ་ཤིས་ཤིང་ཅིས་ཀྱང་མི་ཚུགས་པ་ཞེས་བྱའོ། །ལྷ་ཆེན་པོ་བརྫིས་པའི་གདན་རྔམ་ནི། གདན་ཁྱད་པར་ཅན་ཟིལ་གྱིས་གནོན་པའི་ཚུལ་ནི། ཁམས་གསུམ་གྱི་བདག་པོ་དབང་ཕྱུག་ཆེན་པོ་མ་ཧཱ་དེ་ཝ་གདན་དུ་བཏིང་བས་རྒྱལ་པོ་བཙོན་དུ་བཟུང་ན་དམངས་མཚན་ལ་ཕེབས་པ་བཞིན་དུ། ཐམས་ཅད་ཟིལ་གྱིས་གནོན་པས། རྩ་བ་བླང་། ཁམས་གསུམ་སྒྲོལ་བའི་ཞིང་རྔམ་ནི། ཞིང་ཁྱད་པར་ཅན་ཁམས་གསུམ་ཡོངས་སུ་བསྒྲལ་བ་ནི། ས་དང་པོའི་བྱང་ཆུབ་སེམས་དཔའ་གཅིག་གིས་ཞིང་ཁམས་བརྒྱ་སྦྱོང་བ། སྤྲུལ་པ་བརྒྱ་འགྱེད་པ། སེམས་ཅན་བརྒྱ་སྒྲོལ་བྱ་བ་ལྟ་བུའམ། ས་བཅུ་པའི་བྱང་ཆུབ་སེམས་དཔའ་མན་ཆད་ཀྱིས་ཕྲིན་ལས་བགྲངས་པ་ལ་ཐོགས་པ་ལྟ་བུ་མ་ཡིན་ཏེ། དཔལ་ཆེན་པོས་གནས་ཁམས་གསུམ་ན། ལམ་རྒྱུད་དྲུག་གིས་བསྡུས་པའི་སེམས་ཅན་སྐྱེ་འགྲོ་དབུགས་ཀྱིས་བསྡུས་པ་ཐམས་ཅད། འཇག་མིག་གི་སྲིན་བུ་ཡན་ཆད་ལུས་པ་མེད་པར་སྐྱེ་བ་མེད་པ་ཆོས་ཀྱི་དབྱིངས་སུ་བསྒྲལ་བས། རྩ་བ་བླང་། རྟོག་འཇོམས་སྤྱོད་པའི་བརྟུལ་ཞུགས་རྔམ་པ་ནི། ཉན་ཐོས་ལྟར་གཉིས་སུ་མེད་པའི་རྟོགས་པས་ཟིན་ཏེ། གཉིས་སུ་མེད་པའི་རྩལ་ཚད་མར་མ་ཕྱིན་པས་ཉོན་མོངས་པ་རྣམ་པ་ལྔ་དང་། འདོད་པའི་ཡོན་ཏན་རྣམ་པ་ལྔ་ལ་སོགས་པ་མི་སྤོང་བ་བཞིན་དུ། དགྲ་དང་ཚེར་མར་བལྟས་ནས་རིམ་གྱིས་སྤོང་བར་བྱེད་པ་མ་ཡིན་གྱི། ཐེག་པ་ཆེན་པོ་གསང་སྔགས་ཀྱི་བཞེད་ཀྱིས། སྲིད་པ་གསུམ་གྱི་ཉོན་མོངས་པ་དང་། གཉིས་སུ་འཛིན་པའི་རྟོག་པ་དུས་གཅིག་ཏུ་བཅོམ་པས། རྩ་བ་བླང་། དེ་ལ་སྐུའི་བརྗིད་བཞི་ལ། སྐུ་ཆེ་ཡན་ལག་རགས་པས་བརྗིད་ཆེ་བ་ནི། ནམ་མཁའ་གར་ཁྱབ་པར་ཆོས་སྐུས་ཁྱབ་ལ། ཆོས་སྐུས་གར་ཁྱབ་པར་གཟུགས་ཀྱི་སྐུས་ཀྱང་ཁྱབ་ལ། ཆོས་སྐུ་དང་མཉམ་པར་འབྱུང་བས་བརྗིད་ཆེ་ཞེས་བྱའོ། །གཟུགས་ཀྱི་སྐུ་དེས་གར་ཁྱབ་པའི་ཐུགས་རྗེས་སྤྲུལ་པ་ཡང་འཇིག་རྟེན་པའི་ཧེ་རུ་ཀ་ཞེས་བྱ་སྟེ། དབུ་གསུམ་ཕྱག་དྲུག་པས་སྟོང་གསུམ་ལྷག་གིས་འགེངས་ལ། དེ་དག་གི་བ་སྤུའི་བུ་ག་ཐམས་ཅད་སྦྱང་། སྤྲུལ་པའི་ཕྲ་མེན་མ་དང་། ཕོ་ཉ་ཟངས་ཀྱི་པགས་པ་ཅན་དང་། ཁབ་ཀྱི་སྤུ་ལ་སོགས་པ་བསམ་གྱིས་མི་ཁྱབ་པར་འབྱུང་བས་ཐུགས་རྗེ་དང་། མཉམ་པར་འབྱུང་བའི་སྒོ་ནས་སྤྲུལ་པ་རགས། ཞེས་བྱའོ། །གྲངས་མང་རྐྱེན་དང་འཚམས་པས་བརྗིད་ཆེ་བ་ནི། སེམས་ཅན་གྱི་འདུ་བྱེད་སྐད་ཅིག་མ་ལ་དྲན་པ་བསམ་གྱིས་མི་ཁྱབ་པ་གཅིག་འབྱུང་བ་དང་འདྲ་བར། ཡེ་ཤེས་སྐད་ཅིག་མ་ལ་ཐུགས་རྗེའི་སྤྲུལ་པ་བསམ་གྱིས་མི་ཁྱབ་པ་གཅིག་འབྱུང་བ་སེམས་ཅན་འདུལ་བྱེད་དང་མཉམ་པའི་སྒོ་ནས་སྤྲུལ་པ་གྲངས་མང་ཞེས་བྱའོ། །གྲངས་མང་བ་དེ་ཡང་སོ་སོའི་རྐྱེན་དུ་མི་འཚམས་པ་མིན་ཏེ། སྨོན་ལམ་གྱི་སྒོ་ནས་སོ་སོ་ཇི་ལྟར་འདུལ་བ་ལ། གང་ལ་གང་གིས་འཚམས་པར་སྟོན་པས་སྨོན་ལམ་གྱི་སྒོ་ནས། རིགས་དང་མཐུན་པའི་རྐྱེན་དུས་འཚམས། །ཞེས་བྱའོ། །བཀུར་འོས་གཙོ་བོར་མཐོང་བས་བརྗིད་ཆེ་བ་ནི། དཔེར་ན་མི་སྤྱོད་པ་བཟང་པོ་ཞིག་ལ་འདི་ནི་ཀུན་གྱིས་བཀུར་བར་འོས་པ་ཅན་ཞིག་ཡིན་ཟེར་བ་དང་འདྲ་བར། བཅོམ་ལྡན་འདས་ཀྱིས་ཀྱང་སེམས་ཅན་ཐམས་ཅད་ལ་ཕ་རོལ་ཇི་ལྟར་དགའི་སྤྱོད་པ་བཟང་པོ་མཛད་པས་བཀུར་བར་འོས་ཞེས་བྱའོ། །རིགས་བཙུན་པའི་སྒོ་ནས་གཙོ་བོར་མཐོང་བ་ནི། བཅོམ་ལྡན་འདས་རྒྱལ་རིགས་ཤིང་སཱ་ལ་ལྟ་བུ་རིགས་མཐོ་བར་སྐྱེས་ལ། རིགས་བཙུན་པས་གཙོ་བོར་མཐོང་ཞེས་བྱའོ། །ཁྱད་ཞུགས་ཡིད་དང་འཐད་པར་བརྗིད་ཆེ་བ་ནི། བཅོམ་ལྡན་འདས་སྐྱེ་བ་བསམ་གྱིས་མི་ཁྱབ་པའི་གོང་རོལ་ནས་བསོད་ནམས་ཀྱི་ཚོགས་བསམ་གྱིས་མི་ཁྱབ་པར་བསགས་པས་མངོན་པར་རྫོགས་པར་སངས་རྒྱས་ནས་འགྲོ་བ་ཐམས་ཅད་དང་། བདུད་དང་མུ་སྟེགས་ཐམས་ཅད་ཁྱད་ཞུགས་པ་རང་བཞིན་གྱིས་གྲུབ་པའི་སྒོ་ནས་ཁྱད་ཞུགས། ཞེས་བྱའོ། །ཡིད་འཐད་ཅེས་བྱ་བ་ནི། ཕྲིན་ལས་རྣམ་པ་བཞིའི་སྒོ་ནས་འགྲོ་བ་ཇི་ལྟར་འདུལ་བ་བཞིན་དུ་མཛད་པའི་ཕྲིན་ལས་ཀྱི་སྒོ་ནས་ཡིད་དང་འཐད་ཅེས་བྱའོ། །གསུང་གི་བརྗིད་བཞི་ལ། གདངས་ཆེ་སྟོང་གསུམ་གང་བས་བརྗིད་ཆེ་ཞེས་བྱ་བ་ནི། ཆོས་ཀྱི་སྐུས་གར་ཁྱབ་པའི་སར་བཅོམ་ལྡན་འདས་ཀྱི་གསུང་གིས་ཀྱང་ཁྱབ་པས་གདངས་ཆེ་ཞེས་བྱ་ལ། གདངས་ཆེ་བ་དེ་ཉིད་ཀྱིས་ཀྱང་སྒྲ་ཐ་དད་པའི་སྒོ་ནས་སྟོང་གསུམ་ཁེངས་ཏེ། ལྷའི་སྐད་དང་། ཀླུའི་སྐད། སོ་སོའི་སྐད་དུ་ཆོས་སྟོན་པས་སྐད་ཐ་དད་པའི་སྒོ་ནས་སྟོང་གསུམ་འགེངས། ཞེས་བྱའོ། །ཚིག་ཉུང་ཐེ་ཚོམ་གཅོད། ཅེས་བྱ་བ། སྐད་ཀྱི་དབྱིངས་ཀྱི་སྒོ་ནས་ཀུན་གྱིས་གོ་བར་འགྱུར་ཏེ། གསུང་གཅིག་བཀའ་སྩལ་པས་འགྲོ་བ་སོ་སོའི་སྐད་དུ་འགྱུར་བས་བརྡ་མཇལ་ཏེ། སྐད་དབྱངས་ཀྱི་སྒོ་ནས་ཀུན་གོ་བར་འགྱུར། ཞེས་བྱའོ། །ཐེ་ཚོམ་གཅོད་བྱ་བ་ནི། སེམས་ཅན་ཐམས་ཅད་ལ་ཐུགས་བརྩེ་ཞིང་གོ་བར་འགྱུར་བའི་སྒོ་ནས་གསུང་གཅིག་བཀའ་སྩལ་བས་སེམས་ཅན་སོ་སོའི་ཡིད་ལ་བརྣག་པ་དང་། སེམས་ལ་འཁྱིལ་བའི་ཐེ་ཙོམ་གྱི་མདུད་པ་དུས་གཅིག་ཏུ་དཀྲོལ་བས། ཚིག་མྱུར་ཐེ་ཚོམ་གཅོད། ཅེས་བྱའོ། །བདག་ལ་ཉི་ཚེར་སྟོན་སྙམ་བརྗིད་ཆེ། ཞེས་པ་ནི། བྱམས་པའི་སྒོ་ནས་བདག་ལ་གཟིགས་ཏེ། སེམས་ཅན་ཐམས་ཅད་ལ་བལྟས་ནས་བདག་གཅིག་པུའི་སྔོན་ན་བཞུགས་ནས་བདག་ལ་གཟིགས་སོ་སྙམ་མོ། །ཉི་ཚེར་སྟོན་པ་ནི་སྙིང་རྗེ་ཚད་མེད་པ་མངའ་བས་བཅོམ་ལྡན་འདས་ནི་ཆོས་ཀྱང་བདག་གཅིག་པུ་ལ་སྟོན་སྙམ་མོ། །དེ་བས་ན་བདག་ལ་ཉི་ཚེར་སྟོན་སྙམ་བརྗིད་ཆེའོ། །ཁྱད་ཞུགས་ཡོན་ཏན་མཐོང་བས་བརྗིད་པ་ནི། ཤེས་རབ་ཆེན་པོའི་རྩལ་མངའ་བས་རིག་པའི་གནས་ལྔ་ལ་མ་རྨོངས་པའམ། རྣམ་པ་ཐམས་ཅད་མཁྱེན་པའི་ཡེ་ཤེས་མངོན་དུ་ཤར་བས། ཤེས་པའི་བྱེ་བྲག་གི་སྒོ་ནས་ཁྱད་བཞུགས། ཞེས་བྱའོ། །ཚིག་གི་ཡོན་ཏན་གྱི་སྒོ་ནས་ཀུན་འདུལ་བྱ་བ་སྔོན་བདེན་པ་གསུངས་པའི་དབང་གིས་བདུད་ལྷས་སྦྱིན་མ་གཏོགས་པ་བཀའ་མི་ཉན་པ་གཅིག་ཀྱང་མ་མཆིས་པས་ཚིག་གི་ཡོན་ཏན་གྱི་སྒོ་ནས་ཀུན་འདུལ་ཞེས་བྱ་སྟེ། ཁྱད་ཞུགས་ཡོན་ཏན་མཐོང་བས་བརྗིད་ཆེ། ཞེས་བྱའོ། །ཐུགས་ཀྱི་བརྗིད་བཞི་ལས། ཡངས་པས་རེ་དོགས་མེད་པས་བརྗིད་ཆེ་ཞེས་པ་ནི། བདག་ཏུ་མི་འཛིན་པའི་སྒོ་ནས་ཡངས་ཏེ། ཆོས་དང་གང་ཟག་བདག་མེད་པར་རྟོགས་པས་དབྱིངས་ཡེ་ཤེས་གཉིས་སུ་མེད་པའི་ངང་མི་ཤོང་བ་གཅིག་ཀྱང་མེད་པ་ཡངས་ལ། འཁོར་བ་དང་སྡུག་བསྔལ་ཅེས་པ་ནི་སྤང་དུ་མེད་ལ། མྱ་ངན་ལས་འདས་པར་དང་། བྱང་ཆུབ་ཅེས་པ་ནི། དང་དུ་བླང་དུ་མེད་དེ། བླ་ན་མེད་པའི་བྱང་ཆུབ་ལ་རེ་བ་མེད་ལ། ཁམས་གསུམ་འཁོར་བའི་སྡུག་བསྔལ་ལ་དོགས་པ་མེད་དོ། །སྤང་བླང་མེད་པའི་སྒོ་ནས་རེ་དོགས་མེད་ཅེས་བྱའོ། །ལྷག་མཐོང་གི་སྒོ་ནས་དབུ་མ་གསལ་བྱ་བ། ལྷག་མཐོང་མེད་ན་དབུ་མ་མི་གསལ་ཏེ། ལྷག་མཐོང་གསལ་བའི་ཤེས་རབ་ཀྱིས་མཐའ་གཉིས་ཀྱི་སྐྱོན་སྤངས་པས་དབུ་མ་ཆེན་པོ་དམིགས་སུ་མེད་པའི་འོད་གསལ་བར་གྱུར་པས། ལྷག་མཐོང་གི་སྒོ་ནས་དབུ་མ་གསལ་ཅེས་བྱའོ། །ཞི་གནས་ཀྱི་སྒོ་ནས་མི་འགྱུར་བ་མཐའ་ཡས་པ་ནི། ཞི་གནས་རྣམ་པར་མི་རྟོག་པའི་ཏིང་ངེ་འཛིན་བསྒོམ་པས། མཐའ་གཉིས་ཀྱི་སྐྱོན་སྤངས་ཏེ། ཞི་གནས་ཀྱི་སྒོ་ནས་མི་འགྱུར་བ་མཐའ་ཡས། ཞེས་བྱའོ། །ཐུགས་རྗེ་ཐུགས་དམ་མཐར་ཕྱིན་པས་བརྗིད་ཆེ་བ་ནི། འཁོར་བར་ཡུན་རིང་པོར་བཞུགས་པའི་སྒོ་ནས་ཐུགས་རྗེ་ཆེ་སྟེ། ཐུགས་རྗེ་ཆེན་པོའི་དབང་གིས་འཁོར་བར་ཇི་སྲིད་ཀྱི་བར་དུ་བཞུགས་པས་ཐུགས་རྗེ་ལ་དམ་བཅས་བའི་སྒོ་ནས་འཁོར་བ་མཐར་ཕྱིན་པར་མཛད་པའོ། །མ་རྨོངས་ཐབས་ཀྱིས་འདུལ་བས་བརྗིད་ཆེ་བྱ་བ་ནི། ཤེས་རབ་ཀྱི་སྒོ་ནས་མ་རྨོངས་ཏེ། ཆོས་ཉིད་སྟོང་ཞིང་བདག་མེད་པའི་དོན་རྟོགས་ནས། འཁོར་བ་ཐམས་ཅད་མྱ་ངན་ལས་འདས་པའི་དབྱིངས་སུ་མཁྱེན་ལ། ཏིང་ངེ་འཛིན་གྱི་ཐབས་ཀྱིས་འདུལ་ཏེ། རྣམ་པར་མི་རྟོག་པའི་ཏིང་ངེ་འཛིན་གྱིས་སྤྲུལ་པས་སེམས་ཅན་ཐམས་ཅད་བྱང་ཆུབ་ཀྱི་གནས་སུ་སྒྲོལ་བར་མཛད་པས། ཏིང་ངེ་འཛིན་གྱི་སྒོ་ནས་ཐབས་ཀྱིས་འདུལ། །ཅེས་བྱའོ། །ཡོན་ཏན་གྱི་བརྗིད་བཞི་ལས་མེད་པ་ཟད་མི་ཤེས་བྱ་བའང་། བདག་ཏུ་མི་འཛིན་པའི་སྒོ་ནས་མེད་ལ། མེད་པའི་སྒོ་ནས་ཟད་མི་ཤེས་ཏེ། དཔེར་ན་ནམ་མཁའ་སྟོང་པ་ཅི་ཡང་མེད་པ་ལས་ཆར་ཟད་མི་ཤེས་པ་འབབ་པ་དང་འདྲ་བར། ཆོས་ཀྱི་སྐུ་རང་བཞིན་དངོས་པོ་མེད་པ་ལས། ཡེ་ཤེས་ཀྱི་སྤྲུལ་པ་བསམ་གྱིས་མི་ཁྱབ་པ་བྱུང་ནས། འགྲོ་བའི་དོན་མཐར་ཕྱིན་པར་མཛད་པས། རྩ་བ་བླང་གཅིག་ལ་འདོད་རྒུར་བསྒྱུར་བས་བརྗིད་ཆེ་བ་ནི། ཡེ་ཤེས་ཀྱི་སྒོ་ནས་གཅིག་སེམས་ཀྱི་སྒོ་ནས་འདོད་རྒུར་བསྒྱུར་ཏེ། ཡེ་ཤེས་རྩེ་གཅིག་གིས་ནི་ཆོས་ཉིད་ཀྱི་དོན་ལ་དགོངས་ལ། ཐུགས་རྩེ་གཅིག་གིས་ནི་སེམས་ཅན་གྱི་དོན་ལ་དགོངས་པས་གཅིག །ཅེས་བྱ་ལ། སེམས་ཅན་གྱི་བསམ་པའི་སྒོ་ནས་འདོད་རྒུར་སྟོན་པ་ནི། སེམས་ཅི་ལ་ཡང་ཅིས་འདུལ་ལ། འདོད་པ་ནི་རྟ་དཀར་རྩྭ་འདོད་པ་ལ་རྩྭ་དེ་ལ་སོགས་པ་ཇི་ལྟར་འདོད་པ་བཞིན་དུ་འགྲོ་བའི་དོན་མཛད་པས། རྩ་བ་བླང་། གནོད་སྦྱོར་ཕན་པར་མཛད་པས་བརྗིད་ཆེ་བ་སེམས་ཅན་གྱི་སྒོ་ནས་གནོད་པར་སྦྱོར་ལ། གྲུབ་པའི་རྒྱུའི་སྒོ་ནས་ཕན་པར་སྦྱོར་མཛད་པ་སྟེ། སེམས་ཅན་བདག་ལ་གནོད་པར་བྱེད་པའམ་གང་ལ་གནོད་པར་བྱེད་པ་ལ། བྱང་ཆུབ་མཆོག་ཐོབ་ཤོག་ཅེས་སྨོན་ལམ་བཏབ་པས། གནོད་པར་བྱེད་པ་ལ་ཇི་མི་སྙམ་པའི་བཟོད་པ་བསྒོམས་ནས། བཟོད་པའི་ཕ་རོལ་ཏུ་ཕྱིན་པ་ལ་ཡོངས་སུ་རྫོགས་ཏེ། རྩ་བ་བླང་། ཐབས་མཁས་སྐྱོན་གྱིས་མ་གོས་པ་ནི། ཤེས་བྱའི་སྒོ་ནས་ཐབས་ལ་མཁས་པས་ཤེས་བྱའི་བྱེ་བྲག་གིས་ཅི་ཡང་མ་རྨོངས་པས་སེམས་ཅན་བླ་ན་མེད་པའི་བྱང་ཆུབ་ཀྱི་གནས་སུ་བསྒྲལ་བའི་ཐབས་ལ་མཁས་པས་ཤེས་བྱའི་སྒོ་ནས་ཐབས་ལ་མཁས་པ་ཞེས་བྱའོ། །དེ་ལྟར་ཐབས་ཐུགས་རྗེ་ཆེན་པོས་འཁོར་བའི་སེམས་ཅན་བསྒྲལ་ན་ཡང་། སྤྱོད་པ་རྣམ་པར་དག་པས་པདྨ་འདམ་སྐྱེས་ལྟར། ཉེས་པའི་སྐྱོན་གྱིས་མ་གོས་པས། །རྩ་བ་བླང་། ཕྲིན་ལས་ཀྱིས་བརྗིད་བཞི་ལས། མི་སྙེམ་ཉམས་ཕག་རོལ་པས་བརྗིད་ཆེ་ཞེས་བྱ་བ་སྒྱུ་མར་མཁྱེན་པའི་སྒོ་ནས་མི་སྙེམ་པ་ནི། འཁོར་བ་བདག་མེད་སྒྱུ་མའི་རང་བཞིན་ལ། བདག་ནི་འཇིགས་པ་ཅི་ཡང་མ་མཆིས་ཏེ། བྱ་བ་ལྟར་བུ་ཡིན་ཏེ། ཐམས་ཅད་སྒྱུ་མར་མཁྱེན་པའི་སྒོ་ནས་མི་སྙེམས། ཞེས་བྱའོ། །བདག་དང་གཞན་གཉིས་སུ་མེད་པའི་རང་བཞིན་ནི། གཅིག་པའི་སྒོ་ནས་ཉམས་ཕག་རོལ་ཏེ། བདག་དང་གཞན་དུ་མི་ཕྱེད་པས། མཛད་པ་ཕྲིན་ལས་ཀྱང་ཕྱོགས་མེད་པས། མི་སྙེམ་ཉམས་ཕག་རོལ་ཅེས་བྱའོ། །འཁོར་བར་ཡུན་རིང་མི་བསྙེལ་བར་བརྗིད་ཆེ་ཞེས་བྱ་སྟེ། དོན་མཛད་པའི་སྒོ་ནས་འཁོར་བར་ཡུན་རིང་པོར་བཞུགས་ལ་འཁོར་བ་མ་སྟོངས་པར་དུ་ཐུགས་རྗེས་འགྲོ་བའི་དོན་མཛད་དོ། །བྱ་བ་མེད་པའི་སྒོ་ནས་བསྙིལ་རྒྱུ་ཅི་ཡང་མ་མཆིས་པས། རྩ་བ་བླང་། མགོན་སྐྱབས་རྒྱུན་དུ་མཛད་པས་བརྗིད་ཆེ་བ་མཐུའི་མགོན་སྐྱབས་ཆེ་སྟེ། སྲིད་པ་གསུམ་ན་འགྲན་གྱི་ཟླ་མེད་པ་རྒྱལ་བ་བཅོམ་ལྡན་འདས་ཀྱི་མཐུ་ཡིན་པས། དེ་ལྟ་བུའི་སྒོ་ནས་མགོན་སྐྱབས་རྒྱུན་དུ་མཛད་དོ། །དམ་བཅས་པའི་སྒོ་ནས་འགྲོ་བའི་དོན་རྒྱུན་མི་འཆད་པར་མཛད་དོ། །དགོང་པས་དོན་རྣམས་གྲུབ་པས་བརྗིད་ཆེ་བ་ནི། ཡེ་ཤེས་རྩེ་གཅིག་གི་སྒོ་ནས་ཆོས་ཀྱི་དབྱིངས་ལ་དགོངས་ལ། ཐུགས་རྗེ་རྩེ་གཅིག་གི་སྒོ་ནས་སེམས་ཅན་གྱི་དོན་ལ་དགོངས་པས། འཁོར་བ་དང་མྱ་ངན་ལས་འདས་པའི་མཐའ་གཉིས་ལ་དགོངས་ལ། དགོངས་པ་རྩེ་གཅིག་པའི་སྒོ་ནས་མཐའ་གཉིས་ལ་དགོངས། ཞེས་བྱའོ། །ནན་ཏན་གྱི་སྒོ་ནས་བྱ་བ་བསྒྲུབ་པ་ནི། ནན་ཏན་གྱི་སྙིང་པོ་དང་། ནན་ཏན་གྱི་ཕྲིན་ལས་དང་། ནན་ཏན་གྱི་འབྲས་བུ་གསུམ་གྱི་སྒོ་ནས་འགྲོ་བའི་དོན་མཐར་ཕྱིན་པས་འགྲུབ་པར་མཛད་དོ། །རྒྱལ་པོ་ནི། རྒྱལ་རྟགས་རྣམ་པ་བདུན་ནི། རཏྣ་སྣ་བདུན། འཁོར་ལོ་རིན་པོ་ཆེའི་དབང་བཅུ་ནི། སྐྱེ་བ་ལ་དབང་བ། སྐྱེ་བ་བཞི་སྐུར་སྟོན་སྐྱེ་བཞི་སྒྲོལ་མཛད་ཅེས་བྱ་སྟེ། ལྷ་ལ་སོགས་པས་བརྫུས་ཏེ་སྐྱེ་བ་དང་། མི་དང་བྱོལ་སོང་ལ་སོགས་པ་མངལ་ལས་སྐྱེ་བ་དང་། བྱ་དང་སྦྲུལ་ལ་སོགས་པ་སྒོ་ང་ལས་སྐྱེ་བ་དང་། སྡིག་པ་དང་གྲོག་སྦུར་ལ་སོགས་པ་དྲོད་དང་རླན་ལས་སྐྱེ་བ་དང་། དེ་ལྟར་གནས་བཞིར་སྐྱེས་པའི་སྐྱེ་ཤི་འཁོར་བའི་སེམས་ཅན་རྩད་གཅོད་པའི་ཕྱིར། མཆེ་བ་བཞིར་བསྟན་ནས་སྐྱེ་བ་ལ་དབང་། ཞེས་བྱའོ། །ཡོ་བྱད་ལ་དབང་བ་ནི། སྲིད་པའི་འདོད་པའི་ཡོན་ཏན་ལྔ་ཞེས་བྱ་སྟེ། འདོད་པའི་ཡོན་ཏན་ལྔ་ལ་དབང་བསྒྱུར། རྟོག་པ་གཞོམ་པའི་ཕྱིར། ཅེས་བྱ་སྟེ། བདུད་རྩི་རྣམ་པ་ལྔ་ལ་ལོངས་སྤྱོད་པས་ཡོ་བྱད་ལ་དབང་བ་ཞེས་བྱའོ། །མོས་པ་ལ་དབང་བ་ནི། ཞི་བའི་མཉེན་ལྕུག་འཁྲིལ་ལྡེམ་ཅན་དང་། གསལ་འཚེར་ལྷུན་སྡུག་གཟི་བྱིན་ལ་སོགས་པ། ཁྲོ་བོའི་དཔའ་བོ་སྒེག་པོ་འཇིགས་སུ་རུང་བ་དང་། དགོད་དང་གཤེ་དང་ངོ་མཚར་ཆེ་བ་དང་། སྙིང་རྗེ་རྔམ་དང་ཞི་བ་ལ་སོགས་པའི། ཁྲོ་བོའི་ཚུལ་དགུར་བསྟན་ནས། འཁོར་བ་རྔ་ཐབས་དང་འདྲ་བ་ལ། ཐུགས་རྗེ་གར་ཐབས་ལྟ་བུས་འགྲོ་བའི་དོན་མཛད་པས། གར་ཐབས་ཐར་པའི་ཚུལ་དུ་རོལ་མཛད་ཅིང་། ཞེས་བྱའོ། །རྫུ་འཕྲུལ་ལ་དབང་བ་ནི། བ་སྤུའི་དབྱིངས་ནས་ཕྲ་མེན་འཕྲོ། །ཞེས་བྱ་སྟེ། བ་སྤུ་ཉག་རེའི་ཁ་ནས་སྤྲུལ་པའི་ཕྲ་མེན་བསམ་གྱིས་མི་ཁྱབ་པ་འབྱུང་སྟེ། ལུས་ཀྱི་རྫུ་འཕྲུལ་ནི་སྟོད་ནས་མེ་འབར་བ་དང་། སྨད་ནས་ཆུ་འབབ་པ། སེམས་ཀྱི་རྫུ་འཕྲུལ་ཏིང་ངེ་འཛིན་འབུམ་ཕྲག་གྲངས་མེད་པས་སེམས་ཅན་གྱི་དོན་མཛད་པས། ལུས་ནི་ཅིར་ཡང་རྫུ། སེམས་ནི་ཆོ་འཕྲུལ་བསྟན། ཞེས་བྱའོ། །ཆོས་ལ་དབང་བ་ནི། གཞན་མེ་དྲག་པོའི་གད་རྒྱངས་ཀྱིས་དྲེགས་བྱེད་ཟིལ་གྱིས་གནོན་ལ། གསུང་དབྱངས་ཡན་ལག་དྲུག་ཅུའི་སྒོ་ནས་འགྲོ་བ་སོ་སོའི་སྐད་དུ་ཆོས་སྒྲོགས་པས། ཆེ་བ་ཟིལ་གནོན་ཐ་དད་ཆོས་རྣམས་སྟོན། ཞེས་བྱའོ། །ཡེ་ཤེས་ལ་དབང་བ་ནི། ཤེས་རབ་ཐབས་ལྡན་སྤྱན་གཉིས་དབུ་མའི་ངང་། ཞེས་བྱ་སྟེ། གཡས་པ་ཐབས་ཀྱི་སྤྱན་ནི་འཁོར་བའི་སེམས་ཅན་ལ་གཟིགས་ནས་འཁོར་བའི་སེམས་ཅན་གྱི་དོན་མཛད་ལ། གཡོན་པ་ཤེས་རབ་ཀྱི་སྤྱན་གྱིས་ཆོས་སྟོང་ཞིང་བདག་མེད་པ་རྟོགས་ཏེ། དབུ་མ་ཆེན་པོ་དམིགས་སུ་མེད་པའི་ངང་དུ་གྱུར་པས། སྤྱན་དབུ་མ་ནི། ཅི་ཡང་མ་ཡིན་པའི་ཚུལ་གྱིས་གཟིགས་ཏེ། དབྱིངས་ལས་མི་གཡོ་ཅི་ཡང་སལ་ལེ་མཁྱེན། །ཞེས་བྱའོ། །སེམས་ལ་དབང་བ་ནི། ཏིང་ངེ་འཛིན་བྱེ་བ་ས་ཡ་ཙམ་འཕྲོས་པས། བསམ་གྱིས་མི་ཁྱབ་པ་བཞི་ལ་རོལ་པར་མཛད་དེ། དེ་བཞིན་གཤེགས་པའི་བྱིན་རླབས་བསམ་གྱིས་མི་ཁྱབ་པ། ཀླུའི་མཐུ་བསམ་གྱིས་མི་ཁྱབ་པ། བསམ་གཏན་གྱི་ཡུལ་བསམ་གྱིས་མི་ཁྱབ་པ། སེམས་ཅན་གྱི་ལས་བསམ་གྱིས་མི་ཁྱབ་སྟེ། བསམ་གྱིས་མི་ཁྱབ་པ་བཞི་ལ་རོལ་བར་མཛད་དོ། །ཚེ་ལ་དབང་བ་ནི། སྤྲུལ་པ་བསམ་གྱིས་མི་ཁྱབ་པ་འབྱུང་བ་ཡང་། སྡེར་མོ་དང་བ་སྤུ་ཐམས་ཅད་ཀྱང་རྡོ་རྗེ་དང་ལྕགས་ཀྱི་ཕྲེང་བས་བརྒྱན་ཅིང་། ཟངས་ཀྱི་པགས་པ་ལ་ལྕགས་ཀྱི་ཁ་སྤུ་ཅན་འབྱུང་བས། སེམས་ཅན་ཚེ་ཉམས་པ་ཐམས་ཅད་ཀྱང་ཚེ་ལོ་བསྲིང་བར་བྱེད་ལ། དོན་དམ་སྐྱེ་འཆི་མེད་པ་གཡུང་དྲུང་གི་ཚེ་ཐོབ་པས་ཚེ་ལ་དབང་ཞེས་བྱའོ། །ལས་ལ་དབང་བ་ནི། ལྟ་བ་རྣམ་པ་བཞིས་སྤྱན་ཟུར་གྱིས་བསྐུལ། ཞེས་བྱ་སྟེ། ཕྲིན་ལས་རྣམ་པ་བཞིས་འདུལ་བའི་སེམས་ཅན་ལ་དྲག་པོའི་ལས་ཀྱིས་འདུལ་བ་རྣམས་ལ་ཕྲིན་ལས་ཀྱི་ལྷ་མོ་བེ་ཏ་ལིར་སྤྲུལ་ནས་ཕྲིན་ལས་མཛད་པས། ཕྲ་མེན་བཞི་འཕྲོ་ཕྲ་མེན་བཞི་ལས་བཞི་མཛད་ཅེས་བྱའོ། །སྨོན་ལམ་ལ་དབང་བ་ནི། དཔལ་ཆེན་པོའི་སྔོན་གྱི་སྨོན་ལམ་གྱི་དབང་གིས་ཕྲིན་ལས་དྲག་པོས་འགྲོ་དོན་མཛད་པའི་དུས་ན། དུས་ཀྱི་མཐའ་ལ་བསྐལ་པ་ཆེན་པོ་འབྱུང་བ་དང་འདྲ་བར། སྐད་ཅིག་ཀྱང་བཤོལ་བ་མེད་པར་ཤིན་ཏུ་གཏུམ་པའི་བརྩོན་འགྲུས་ཀྱིས་མཐར་ཕྱིན་པར་མཛད་ལ། དུས་མཐའི་བསྐལ་པའི་མེ་བཞིན་གཤོལ་དུ་མེད། །ཅེས་བྱའོ། །དེ་ལ་བཙུན་མོ་རིན་པོ་ཆེས་མཉེས་པ་འབུལ་བ་ནི། མ་ཆགས་རྡོ་རྗེ་གཟུངས་ཀྱི་ཡུམ་ནི་སངས་རྒྱས་སྤྱན་མའི་ཁམས་ཡིན་པས། ས་ཡི་ལྷ་མོ་དཔལ་གྱི་སྐུ་ལ་འཁྱུད་པར་མཛད་ལ། ཞི་གནས་ཏིང་ངེ་འཛིན་མི་གཡོ་བའི་ཡུམ་ནི། མ་མཱ་ཀི་ཆུ་ཡི་ཁམས་ཡིན་པས། ཞི་གནས་རྣམ་པར་མི་རྟོག་པའི་ཏིང་ངེ་འཛིན་ལ་སྦྱོར་བར་མཛད་ལ། ཐོགས་མེད་བླུགས་འཆང་དངོས་གྲུབ་ཀྱི་ཡུམ་ནི། དམ་ཚིག་སྒྲོལ་མ་རླུང་གི་ཁམས་ཡིན་པས། ཐོགས་མེད་ཤུགས་འཆང་ཡུམ་གྱིས་བསྐྱོད་བར་མཛད་ལ། ལྷག་མཐོང་ཡེ་ཤེས་ཀྱི་ཡུམ་ནི། ན་བཟའ་དཀར་མོ་མེ་ཡི་ཁམས་ཡིན་པས། མེ་ཡི་དྲོད་ཀྱིས་ཡབ་ཡུམ་གཉིས་སུ་མེད་པའི་བྱང་ཆུབ་ཀྱི་སེམས་འབེབས་པར་མཛད་པས། བདེ་བ་ཆེན་པོའི་སྐུ་ལ་མཆོད་པ་འབུལ། །ཅེས་བྱའོ། །དེ་ལ་དམག་དཔོན་རིན་པོ་ཆེ་ནི། ཚུལ་དགུས་དཔུང་འཇོམས་པ་ནི། སྒེག་པས་འགྲོ་བ་ཤེས་རབ་བསྐྱེད། །ཅེས་བྱ་བ། ཞི་བའི་དུས་ན་མཚན་དང་དཔེ་བྱད་ཆ་ལུགས་མང་པོས་བརྒྱན་ནས་སྒེག་ལ། ཁྲོ་བོའི་དུས་ན་འབར་བའི་ཆས་དང་། རྔམ་པའི་ཆ་བྱད་མང་པོའི་བརྒྱན་པས། འགྲོ་བ་ཀུན་གྱི་ཤེས་རབ་བསྐྱེད་པའི་ཚུལ། །ཅེས་བྱའོ། །ཉམ་ང་མེད་པའི་མཛད་སྤྱོད་དཔའ་བའི་ཚུལ་བྱ་བ། དཔེར་ན་མི་དཔའ་བོ་ཅི་ལ་ཡང་ཉམ་ང་མེད་པ་དང་འདྲ་བར། འཁོར་བའི་བདུད་དྲེགས་བྱེད་དང་། ཉོན་མོངས་པའི་ཕྱོགས་གཅིག་ལ་ཡང་ཉམ་ང་མི་མཛད་པར་དཔའ་བོའི་ཚུལ་ཅེས་བྱའོ། །འཇིགས་པའི་ཚུལ། ཅེས་པ་ནི། པགས་སྲལ་གྱི་གཡང་གཞི་དང་། སྦྲུལ་ནག་གི་ཆུན་པོ་དང་། ཐོད་རློན་གྱི་ཕྲེང་བ་དང་། ཁྲག་ཞག་གི་ཐིག་ལེ་ལ་སོགས་པ་གདུག་རྩུབ་ཅན་གདོས་པས་བརྒྱན་པ་འཇིགས་པའི་ཚུལ་ཅེས་བྱའོ། གཞད་པའི་ཚུལ་ནི་གསང་སྔགས་རྨད་དུ་བྱུང་བའི་ཐེག་པ་ངོ་མཚར་ཆེ་བའི་ཚུལ་དུ་བཤད་པས། གཞད་པའི་ཚུལ་ཅེས་བྱའོ། །ལོག་པར་ལྟ་བ་ཞེ་གཅོད་གཤེ་བའི་ཚུལ་དང་། བསྒྲལ་བའི་ཞིང་བཅུ་ཞེ་གཅོད་པའི་བརྒྱད་བཀག་ལ་སོགས་པའོ། །གསང་སྔགས་གཉན་པོའི་བཀའ་ལ་འཁྲུ་བ། དམ་ལས་ལོག་པ་ཞེ་གཅོད་པ་ལ་བརྒྱད་བཀག་བྱེད་པ་ལ། ལོག་པར་ལྟ་བ་ལ་ཞེ་གཅོད་པའི་ཚུལ་ཅེས་བྱའོ། །ཤིན་ཏུ་གདུལ་དཀའ་ཁྲོས་པ་ལ་སྙིང་རྗེ་བའི་ཚུལ་བྱ་བ་བདུད་ལས་ཀྱི་སྲིན་པོ་ལ་སོགས་པ་ཤིན་ཏུ་གདུལ་དཀའ་བ་མས་བུ་གཅིག་པ་ལ་དགོངས་པ་བཞིན་དུ་སྙིང་རྗེ། ཁྲོ་བ་བཅམ་ནས་འདུལ་བས། ཁྲོ་བ་སྙིང་རྗེའི་ཚུལ། ཅེས་བྱའོ། །ཉོན་མོངས་གྲུབ་པ་རྒྱུ་མཛད་ངོ་མཚར་ཚུལ། །ཅེས་པ། ཉོན་མོངས་པ་རྣམ་པ་ལྔ་དང་། འདོད་པའི་ཡོན་ཏན་རྣམ་པ་ལྔ་ལ་སོགས་པ་མ་སྤངས་པར་སྤྱོད་པའི་སྒོ་ནས་གྲུབ་པའི་རྒྱུ་མཁྱེན་པས། དཀྱུས་སྨོན་ལམ་དབང་གིས་མི་བཤོལ་རྔམ་པའི་ཚུལ་ནི། སྨོན་ལམ་གྱི་དབང་དང་ཐུགས་རྗེ་ཆེན་པོའི་སྟོབས་ཀྱིས་སྐད་ཅིག་ཀྱང་མི་བཤོལ་བར་རྔམ་ནས་མཛད་པའི་ཚུལ། ཁྲོ་དྲག་དབྱིངས་ནས་མི་གཡོ་ཞི་བའི་ཚུལ་ནི། དེ་ཡན་ཆད་ཀྱིས་ཐུགས་རྗེ་དྲག་པོའི་ཕྲིན་ལས་ཀྱིས་འགྲོ་བའི་དོན་ཇི་ལྟར་མཛད་ཀྱང་དོན་དམ་པར་ཆོས་ཀྱི་དབྱིངས་ལས་མ་གཡོས་པའི་རྟགས་སུ་ཞི་བའི་ཚུལ་ཅེས་བྱའོ། །ཁྱིམ་བདག་རིན་པོ་ཆེས་ཚད་མེད་པ་བཞིས་འགྲོ་བའི་དོན་མཛད་པ་ནི། ཁྲོ་གཏུམ་ཚད་མེད་བྱམས་པར་སྣང་བ་ནི། ཐུགས་རྗེ་བྱང་ཆུབ་ཀྱི་སེམས་ཀྱིས་ཁྲོ་བོར་བཅོས་ནས་བརྟུར་པ་ནི། བྱམས་པ་ཚད་མེད་པ་ཡིན་ལ། དེ་ལྟར་བརྟུར་པས་སྐྱེ་བའི་ཆོས་ཅན་ཐམས་ཅད་མ་སྐྱེས་པའི་དབྱིངས་སུ་བཟོད་པར་ནི། སྙིང་རྗེ་ཚད་མེད་པ་དང་སྦྱར་རོ། །དེ་ལྟར་ཐམས་ཅད་མ་སྐྱེས་པའི་དབྱིངས་སུ་བསྒྲལ་ནས་ཕུང་པོ་ལྷག་རོ་ལ། དུག་གསུམ་གྱི་དལ་བསྐྱེད་ནས་མཁའ་འགྲོ་འབར་བའི་ཚོགས་རོལ་པ་ནི། དགའ་བ་ཚད་མེད་པ་དང་སྦྱར་རོ། །དེ་ལྟར་བསྒྲལ་བའི་དུས་ན་བདག་ཏུ་འཛིན་པ་ཡོངས་སུ་བཏང་ནས་འགྲོ་བ་གཞན་གྱི་དོན་མི་ཡལ་བར་གཏུམ་པའི་བརྩོན་འགྲུས་ཀྱིས་མཛད་པས། བཏང་སྙོམས་ཚད་མེད་པ་དང་སྦྱར་རོ། །གླང་པོ་རིན་པོ་ཆེའི་སྟོབས་བཅུ་ནི། ཐུགས་རྗེའི་སྟོབས་ནི་དྲག་བྱེད་སྙིང་རྗེ་འབྱིན་གནོན། ཞེས་བྱ་བ་ནི་འཇིག་རྟེན་གྱི་ལྷ་དྲེགས་པ་ཅན་ཐམས་ཅད་ཀྱི་ཉོན་མོངས་པ་རྣམ་པ་ལྔ་སྦྱང་བའི་ཕྱིར། གཏི་མུག་གི་ཤས་ཆེ་བ་ཐམས་ཅད་སྤྱི་བོར་མནན། ཞེ་སྡང་གི་ཤས་ཆེ་བ་ཐམས་ཅད་སྙིང་གར་མནན། འདོད་ཆགས་ཀྱི་ཤས་ཆེ་བ་ཐམས་ཅད་ནུ་མའི་སྟེང་དུ་མནན། ང་རྒྱལ་གྱི་ཤས་ཆེ་བ་འགྲམ་པའི་སྟེང་དུ་མནན། ཕྲག་དོག་དཔྲལ་བར་མནན། ཉོན་མོངས་པ་རྣམ་པ་ལྔ་སྦྱོང་བ་དེ། མཚན་མར་མི་འགྱུར་རམ་ཞེ་ན། ཆོས་ཉིད་སྟོབས་ནི་མི་དམིགས་ནམ་མཁའི་མདོག་ཅེས་བྱ་སྟེ། སྐྱེ་བ་མེད་པས་ཆོས་ཉིད་ལས་མ་གཡོས་པའི་རྟགས་སོ། །དོན་དེ་ལྟར་མི་དམིགས་པ་དེ་དབྱེ་བཀོལ་མི་མཛད་དམ་ཞེ་ན། མི་འབྱེད་སྟོབས་ནི་གླང་པོའི་རྫས་ལ་རོལ་ཞེས་བྱའོ། །རྨད་དུ་བྱུང་བའི་དམ་རྫས་གཉེན་པོ་རྣམས་ལ་རོལ་བར་མཛད་དོ། །འོ་ན་དེ་ལྟར་རོལ་བ་དེ་ལ་གྲུབ་པའམ་ཕན་པ་ཅི་ཡོད་ཅེ་ན། གྲུབ་པའི་སྟོབས་ནི་བདུད་རྩི་དངོས་གྲུབ་རྒྱུ་ཞེས་བྱའོ། །བདུད་རྩི་རྣམ་པ་ལྔ་དང་ལྡན་པས་དངོས་གྲུབ་ཐོབ་པའི་རྒྱུ་ཡིན་ཏེ། བདུད་རྩི་དངོས་གྲུབ་རྒྱུ་ཞེས་བྱའོ། །འོ་ན་ཕྱིས་སྤོང་བར་མི་འགྱུར་རམ་ཞེ་ན། མ་སྤངས་སྟོབས་ནི་གདོས་སྐུ་ལ་བརྒྱན། ཞེས་བྱ་སྟེ། གདོས་པ་དང་བཅས་པའི་ཆོས་མི་འཚམ་པ་ཐམས་ཅད་དོན་དང་མཐུན་པར་བཤད་པས་གྲོལ་བའི་རྒྱན་ཞེས་བྱའོ། །འོ་ན་དེ་ལྟར་བརྒྱད་པ་དེ་དོན་དང་མཐུན་པ་དེ་ཞེ་ན། མི་གཡོ་སྟོབས་ནི་དོན་མཐུན་གྲོལ་བའི་རྒྱན། །ཞེས་བྱ་སྟེ། གདོས་པ་དང་བཅས་པའི་ཆོས་མི་འཚམ་པ་ཐམས་ཅད་དོན་དང་མཐུན་པར་འཚམ་པར་བཤད་པས་གྲོལ་བའི་རྒྱན་ཞེས་བྱའོ། །འོ་ན་དེ་ལྟར་མཛད་པ་དེས་འགྲོ་བའི་དོན་སྐད་ཅིག་མས་མཛད་དམ་རྒྱུན་དུ་མཛད་ཅེ་ན། སྨོན་ལམ་སྟོབས་ཀྱིས་བསྐལ་པར་ཡོངས་སྨིན་མཛད། །ཅེས་བྱ་བ། སྨོན་ལམ་དབང་གིས་བསྐལ་བར་བཞུགས་ཤིང་སྲིད་པ་ཡོངས་སྒྲོལ་མཛད་ཅེས་བྱའོ། །འོ་ན་དེ་ལྟར་སྒྲོལ་བ་དེ་བདག་གཅིག་པུས་སྒྲོལ་ལམ་ཞེ་ན། སྤྲུལ་པའི་སྟོབས་ཀྱི་མགོ་བརྙན་ཕྲ་མེན་འཕྲོ། །ཞེས་བྱ་བ་སྟེ། དཔལ་གྱི་སྐུ་ལས་སྤྲུལ་པའི་ཕྲ་མེན་བསམ་གྱིས་མི་ཁྱབ་པ་བྱུང་ནས་སེམས་ཅན་སྒྲོལ་བར་མཛད་པས་ཕྲ་མེན་འཕྲོ། ཞེས་བྱའོ། །འོ་ན་དེ་ལྟར་བསྒྲལ་བས་དེ་ལ་ལོག་པའི་ལམ་དུ་ཞུགས་པ་འགའ་ཡོད་དམ་ཞེ་ན། འཕྲང་དོག་ལོག་ལྟ་འཁོར་བར་གཅིག་མ་ཤོར། །ཅེས་བྱ་སྟེ། ཁམས་གསུམ་འཁོར་བར་ཤོར་བ་གཅིག་ཀྱང་མེད་དོ། །དེས་ན་དེ་ལྟར་མཛད་པ་དེ་ལ་འཕྲལ་དུ་ཇི་ཙམ། ཕུགས་སུ་ཇི་ཙམ། འདོད་ཆགས་འཕྲལ་འདོད་ཡུན་ཆགས་སྤྱན་བཟློག་དམར། །ཅེས་བྱ་སྟེ། འཕྲལ་དུ་འདོད་པའི་རྟགས་སུ་ནི་སྤྱན་བཟློག་པར་བསྟན་ལ། ཡུན་དུ་ཆགས་པའི་རྟགས་སུ་ནི་མིག་རྩ་དམར་བར་བསྟན་པའོ། །རྟ་རིན་པོ་ཆེ་རྫུ་འཕྲུལ་གྱི་རྐང་པ་བཞི་ནི་ཆོས་ཀྱི་དབྱིངས་རྫུ་འཕྲུལ་ཅིར་ཡང་སྣང་བ་ནི། ཆོས་ཀྱི་དབྱིངས་ཀྱི་རྫུ་འཕྲུལ་ཡེ་ཤེས་ལ་ཚུར་སྣང་བའི་དཔེ་ནམ་མཁའ་ལ་འཇའ་ཚོན་སྣང་བ་དང་འདྲ་སྟེ། མ་སྐྱེས་པའི་ཆོས་ཉིད་ལས་སྐྱེ་བའི་ཆོས་ཉིད་འཇའ་ཚོན་ལྟར་སྣང་བས། མཁའ་ལ་འཇའ་ཚོན་ཚུལ་བཞིན་རྣམ་པར་དཀྲོལ། །ཅེས་བྱའོ། །ཡེ་ཤེས་ཀྱི་རྫུ་འཕྲུལ་ཆོས་ཀྱི་དབྱིངས་ལས། ཕར་འཇུག་པའ་ིདཔེ་ནི། ནམ་མཁའ་ལ་ཉི་མ་ཤར་ན་ནམ་མཁའི་རང་བཞིན་གྱིས་ཉི་མའི་འོད་སྟོང་པར་བྱེད་ལ། ཉིན་མའི་འོད་ཀྱིས་ནི་ནམ་མཁའ་གསལ་བར་བྱེད་པ་དང་འདྲ་བར། རིག་པ་ཡེ་ཤེས་ཀྱིས་ཆོས་ཀྱི་དབྱིངས་ལ་ཞུགས་པའི་དུས་ན། ཆོས་ཀྱི་དབྱིངས་ཀྱི་རང་བཞིན་གྱིས་ནི། ཡེ་ཤེས་ལ་མཚན་མའི་རྣམ་པར་རྟོག་པ་མེད་ལ། ཡེ་ཤེས་ཀྱི་རྟོགས་པ་ནི་ཆོས་ཀྱི་དབྱིངས་ལ་མཐའ་ཐུག་པ་མེད་པས། དབྱིངས་ཡེ་ཤེས་གཉིས་སུ་མེད་པར་གྱུར་པ། མཁའ་ལ་ཉི་ཤར་ཇི་བཞིན་སྟོང་། །ཞེས་བྱའོ། །དེ་ལྟར་དབྱིངས་དང་ཡེ་ཤེས་གཉིས་སུ་མེད་པའི་དུས་ན། ཚོགས་གཉིས་རྫོགས་པའི་རྫུ་འཕྲུལ་ཇི་ལྟར་འབྱུང་ཞེ་ན། མཁའ་དང་མཉམ་པའི་སྤྲིན་ཕུང་བཞིན་དུ་བརྡལ། །ཅེས་བྱ་སྟེ། ནམ་མཁས་གར་ཁྱབ་པར་སྤྲིན་གྱིས་ཁྱབ་པ་དང་འདྲ་བར། ཆོས་ཀྱི་སྐུ་ནམ་མཁའ་དང་འདྲ་བ་ལས། གཟུགས་ཀྱི་སྐུ་སྤྲིན་ཕུང་དང་འདྲ་བར་བརྡལ་བས། དཀྱུས། སྤྲུལ་པའི་བྱེ་བྲག་འཕྲོ་བའི་རྫུ་འཕྲུལ་ཇི་ལྟར་འབྱུང་ཞེ་ན། སྤྲིན་གྱིས་གར་ཁྱབ་པར་ཆར་འབབ་སྟེ། ཆར་བབ་པ་ཆུའི་རང་བཞིན་གཅིག་འབབ་པ་ལས། ས་གཞི་སྣོད་ཀྱི་ཁ་དོག་གིས་བསྒྱུར་ནས། །ས་དཀར་ན་ཆུ་དཀར། ས་སེར་ན་ཆུ་སེར། ས་དམར་ན་ཆུ་དམར། ས་ནག་ན་ཆུ་ནག་ས་དང་འདྲ་བར། ཆོས་ཀྱི་སྐུ་ནམ་མཁའ་དང་འདྲ་བ་ལས་ལོངས་སྤྱོད་རྫོགས་པའི་སྐུ་སྤྲིན་དང་བ་བྱུང་། སྤྲུལ་པའི་སྐུ་ཐུགས་རྗེ་ཕྲིན་ལས་རྣམ་པ་བཞིར་འབྱུང་སྟེ། ཞི་བས་འདུལ་བ་ལ་ཞི་བ། རྒྱས་པས་འདུལ་བ་ལ་རྒྱས་པ། དབང་གིས་འདུལ་བ་ལ་དབང་། དྲག་པོས་འདུལ་བ་ལ་དྲག་པོའོ། །དེ་ལྟར་འདུལ་བས་རོ་གཅིག་ཆར་འབབ་སྣོད་ཀྱི་བྱེ་བྲག་ཕྱེ་ཞེས་བྱའོ། །ནོར་བུ་རིན་པོ་ཆེ་ནི་རང་བཞིན་དང་། བྱིན་རླབས་དང་། ལས་དང་། འབྲས་བུ་དང་བཞི་ལས། དེ་ལ་ནོར་བུ་རིན་པོ་ཆེའི་རང་བཞིན་ནི། འགྲོ་རྣམས་ཇི་ལྟར་འདུལ་ཞིང་རེ་འདོད་སྐོང་། །ཞེས་བྱ་སྟེ། འགྲོ་བ་སེམས་ཅན་རྣམས་ཇི་ལྟར་འདོད་པ་བཞིན་དུ་རེ་འདོད་སྐོང་བས། ཡིད་བཞིན་སྐོང་ཞེས་བྱའོ། །རིན་པོ་ཆེའི་བྱིན་རླབས་ནི། ནམ་མཁའ་སྟོང་པ་ལས་ཆར་ཟད་མི་ཤེས་པ་འབབ་པ་དང་འདྲ་བར་ཆོས་ཀྱི་སྐུའི་རང་བཞིན་དངོས་པོ་མེད་པ་ནམ་མཁའ་དང་འདྲ་བ་ལས་ཡེ་ཤེས་དང་སྤྲུལ་པའི་བྱིན་རླབས་བསམ་གྱིས་མི་ཁྱབ་པ་ཟད་མི་ཤེས་པ་འབྱུང་བས། མི་ཟད་བདག་མེད་གཏེར་ཆེན་ནམ་མཁའི་མདོག །ཅེས་བྱའོ། །ནོར་བུའི་ལས་ནི། སྲིད་པ་གསུམ་གྱི་མ་རིག་པའི་མུན་པ་དུས་གཅིག་ཏུ་སེལ་བས། སྲིད་གསུམ་མུན་ནག་སེལ་བྱེད་ཡེ་ཤེས་སྒྲོན། །ཞེས་བྱ་བ། ནོར་བུ་རིན་པོ་ཆེའི་འབྲས་བུ་ནི་དུས་གསུམ་དུ་རྒྱུན་མི་འཆད་དེ། སྔ་མ་འདས་པའི་དུས་ན་ཡང་སེམས་ཅན་གྱི་རེ་འདོད་ཡིད་བཞིན་དུ་བསྐངས་ཤིང་། ད་ལྟར་བཞུགས་པའི་དུས་ན་ཡང་སྐོང་ལ། མ་འོངས་པའི་དུས་ན་ཡང་བསྐང་བར་འགྱུར་བས། དུས་གསུམ་རྒྱུན་མི་འཆད་པས་རིན་ཆེན་ཕྲེང་། །ཞེས་བྱའོ། ༈ །ད་ནི་ལྷ་རྒྱུད་ཀྱི་རྟོག་པ་སོ་སོར་བརྗོད་པར་བྱ་སྟེ། འདི་ན་མར་ཧེ་རུ་ཀ་རྣམ་པ་ལྔ་ལ། ཕུན་སུམ་ཚོགས་པ་བཞི་དང་སྦྱར་ཏེ། དང་པོ་རིགས་ཕུན་སུམ་ཚོགས་པ་དང་། བསྐལ་པའི་ཕྲིན་ལས་ཕུན་ཚོགས་པ་དང་། རིགས་ཀྱིས་འདུལ་བའི་ཕྲིན་ལས་ཕུན་སུམ་ཚོགས་པ་དང་། དོན་དང་མཐུན་པའི་མིང་ཕུན་སུམ་ཚོགས་པའོ། །དེ་ལ་དང་པོ་རིགས་ཕུན་སུམ་ཚོགས་པ་ནི། འགྲོ་རྣམས་ཇི་ལྟར་འདུལ་ཞིང་གཤེགས་མཛད་པ། །ཞེས་པ། བུདྡྷ་ཧེ་རུ་ཀ་དེ་བཞིན་གཤེགས་པའི་རིགས་ཡིན་པས། འགྲོ་བ་སེམས་ཅན་གང་ལ་ཅིས་འདུལ་བ་དེ་ལ། དེ་བཞིན་གཤེགས་ནས་འགྲོ་བ་་རྣམས་ཀྱི་དོན་མཛད་པས། གཤེགས་མཛད་པ་ཞེས་བྱའོ། །བསྐལ་བའི་ཕྲིན་ལས་ཕུན་སུམ་ཚོགས་པ་ནི། ཤེས་རབ་ནམ་མཁའི་བསྐལ་པས་རྒས་རྒུད་སྟོངས། །ཞེས་བྱ་སྟེ། ཤེས་རབ་ནམ་མཁའི་བསྐལ་པས་འཁོར་བ་ལས་བརྒལ་བ་དང་། ཉོན་མོངས་པས་སེམས་ཅན་རྒུད་པ་ཐམས་ཅད་སྟོངས་པར་བྱེད་པས། རྒས་རྒུད་སྟོངས། ཞེས་བྱའོ། །རིགས་ཀྱིས་འདུལ་བའི་ཕྲིན་ལས་ཕུན་སུམ་ཚོགས་པ་ནི། གཏི་མུག་ཚུལ་གྱིས་གཏི་མུག་འཇོམས་མཛད་པ། །ཞེས་བྱ་སྟེ། ལོག་པའི་གཏི་མུག་ལྷ་དང་སློབ་དཔོན་གྱི་ཞལ་མི་འཚོལ། ཆོས་དང་དགེ་འདུན་ནི་ཞལ་མི་ཐོས། རྨུགས་ཤིང་འཐིབས་པ་རྣམས་ཡང་དག་པའི་དོན་གྱིས་གཏི་མུག་གིས་བཅོམ་པས་འཇོམས་མཛད་ཅེས་བྱའོ། །དོན་དང་མཐུན་པའི་མིང་ཕུན་སུམ་ཚོགས་པ་ནི། གཏི་མུག་རྡོ་རྗེ་བུདྡྷ་ཧེ་རུ་ཀ །ཞེས་བྱ་སྟེ། གཏི་མུག་ཉིད་རྡོ་རྗེ་ལྟར་འདུས་མ་བྱས་པ་ནི། རྡོ་རྗེའི་གཏི་མུག་ཡིན་ལ། འདུས་མ་བྱས་ཉིད་གཏི་མུག་རྡོ་རྗེ་བུདྡྷ་ཧེ་རུ་ཀར་སྣང་བས། རྩ་བ་སྟེ། དོན་དང་མཐུན་པའི་མིང་ཕུན་སུམ་ཚོགས་པའོ། །ཡེ་ཤེས་རྡོ་རྗེས་ཉོན་མོངས་འཁོར་བ་འཇོམས། །བྱ་བ་བཛྲ་ཧེ་རུ་ཀའི་རིགས་ཕུན་སུམ་ཚོགས་པ་ཡིན་ཏེ། བཛྲ་ཧེ་རུ་ཀ་ནི་རྡོ་རྗེའི་རིགས་ཡིན་པས། ཡང་དག་པའི་ཡེ་ཤེས་རྡོ་རྗེ་ལྟ་བུས་ཉོན་མོངས་པ་ལྔ་དུས་གཅིག་ཏུ་འཇོམས་ལ། ཡེ་ཤེས་རྡོ་རྗེ་ཞེས་བྱ་བ་ཉོན་མོངས་པ་ལ་ཅིའི་ཕྱིར་རྡོ་རྗེ་ཞེས་བྱ་ཞེ་ན། ཐོག་མ་མེད་པའི་དུས་ནས་ཀུན་གཞི་ལ་བག་ཆགས་གངས་ཀྱི་རིམ་པ་བཞིན་དུ་བསགས། ལྕགས་ཀྱི་བཙའམ་ཟངས་ཀྱི་གཡའ་བཞིན་དུ་ཞེན་པ་ཤིན་ཏུ་བཤིག་ཅིང་གཞོམ་དཀའ་བས་ཉོན་མོངས་མེད་པ་རྡོ་རྗེ་ཞེས་བྱ་སྟེ། དེ་ཡང་དག་པའི་ཡེ་ཤེས་རྡོ་རྗེ་དང་འདྲ་བས་འཇོམས་པས། ཉོན་མོངས་རྡོ་རྗེས་འཇོམས། ཞེས་བྱའོ། །བསྐལ་པའི་ཕྲིན་ལས་ཕུན་སུམ་ཚོགས་པ་ནི། འཐབ་འཛིངས་མཚོན་ཆའི་བསྐལ་པས་དངོས་པོ་འཇིག །ཅེས་བྱ་སྟེ། བསྐལ་པ་སྙིགས་མ་ལ་མཚོན་གྱི་བསྐལ་པ་ཞག་བདུན་འབྱུང་བས། སེམས་ཅན་ལས་ཐོག་བསྐལ་པ་བརྡོ་བ་ཡང་། བཛྲ་ཧེ་རུ་ཀས་མཚོན་གྱི་བསྐལ་པ་ལས་སེམས་ཅན་སྒྲོལ་བ་ཡིན་པས། མཚོན་གྱི་བསྐལ་པས་དངོས་པོ་འཇིག །ཅེས་བྱའོ། །དོན་དམ་པར་ན་སྐྱེས་པའི་ཆོས་ཐམས་ཅད་མ་སྐྱེས་པའི་དབྱིངས་སུ་གསོད་པས་དངོས་པོ་འཇིག །ཅེས་བྱའོ། །རིགས་ཀྱིས་འདུལ་བའི་ཕྲིན་ལས་ཕུན་སུམ་ཚོགས་པ་ནི། ཞེ་སྡང་ཚུལ་གྱིས་ཞེ་སྡང་འཇོམས་མཛད་པ། །ཞེས་བྱ་སྟེ། ལོག་པའི་ཞེ་སྡང་མནར་སེམས་རིམ་པ་དགུ་ལ་སོགས་པ། ཡང་དག་པའི་ཞེ་སྡང་བྱམས་པས་འཁོར་བ་ཞེ་མནན་ནས་སྡང་ལ། ཐུགས་རྗེས་འཁོར་བ་སྙིང་རྗེས་བསྒྲལ་ཏེ། དེ་ལྟར་ཡང་དག་པའི་བྱམས་པ་དང་། སྙིང་རྗེས་ལོག་པའི་ཞེ་སྡང་བཅོམ་པས། ཞེ་སྡང་ཚུལ་གྱིས་དེ་ལྟར་ཞེ་སྡང་བཅོམ། །ཞེས་བྱའོ། །དེ་ནི་རིགས་ཀྱིས་འདུལ་བའི་ཕྲིན་ལས་ཕུན་སུམ་ཚོགས་པའོ། །དོན་དང་མཐུན་པའི་མིང་ནི། ཞེ་སྡང་རྡོ་རྗེ་བཛྲ་ཧེ་རུ་ཀ །ཞེས་བྱ་སྟེ། ཞེ་སྡང་ཉིད་རྡོ་རྗེ་ལྟ་བུར་འདུས་མ་བྱས་པ་ནི། རྡོ་རྗེ་ཞེ་སྡང་ངོ་བོ་འདུས་མ་བྱས་པའི་ངང་དེ་ཉིད་ལས་ཞེ་སྡང་རྡོ་རྗེ་བཛྲ་ཧེ་རུ་ཀའི་སྐུར་བསྟན་པ་ནི། དོན་དང་མཐུན་པའི་མིང་ཕུན་སུམ་ཚོགས་པའོ། །རིན་ཆེན་དབྱིག་ལྟར་རེ་བ་ཀུན་སྐོང་ཞིང་། །ཞེས་པ་ནི་རཏྣ་ཧེ་རུ་ཀའི་རིགས་ཕུན་སུམ་ཚོགས་པ་སྟེ། རཏྣ་ཧེ་རུ་ཀའི་སྐུ་ཆེ་བའི་ཡོན་ཏན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བའི་བྱིན་རླབས་ཀྱིས་སེམས་ཅན་གྱི་རེ་འདོད་ཡིད་བཞིན་དུ་སྐོང་བ་ནི། དོན་དང་མཐུན་པའི་མིང་ཕུན་སུམ་ཚོགས་པའོ། །རེ་འདོད་སྐོང་ཞེས་བྱའོ། །བསྐལ་པའི་ཕྲིན་ལས་ཕུན་སུམ་ཚོགས་པ་ནི། །བདག་མེད་ཞི་གནས་ཆུ་ཡི་བསྐལ་པ་འཁྲུགས། །ཞེས་བྱ་སྟེ། ཆུའི་བསྐལ་པས་འཇིག་རྟེན་གྱི་ཁམས་ཐམས་ཅད་འཇིག་ཅིང་འཁྲུགས་པ་ཡང་། རཏྣ་ཧེ་རུ་ཀའི་བྱིན་རླབས་ཀྱིས་འཁྲུ་བ་ཡིན་ལ། དོན་དམ་པར་ཞི་གནས་རྣམ་པར་མི་རྟོག་པའི་ཆུས་འཇིག་རྟེན་གྱི་ཆུ། བསྐལ་བ་འཁྲུ་བས་ཐམས་ཅད་འཁྲུ། །ཞེས་བྱའོ། །རིགས་ཀྱིས་འདུལ་བའི་ཕྲིན་ལས་ཕུན་སུམ་ཚོགས་པ་ནི། ང་རྒྱལ་ཚུལ་གྱིས་ང་རྒྱལ་འཇོམས་མཛད་པ། །ཞེས་བྱ་སྟེ། ལོག་པའི་ང་རྒྱལ་ངའོ་སྙམ་པ་དང་། ཆེའོ་སྙམ་པའི་ང་རྒྱལ་ལ་སོགས་པ་ཡང་དག་པའི་ང་རྒྱལ་རིག་རློམ་པའི་ང་རྒྱལ་དང་། ཆོས་ཉིད་ཟབ་མོའི་དོན་ལ་སྲན་ཚུགས་པའི་ཏིང་ངེ་འཛིན་གྱིས་བཅོམ་པས། ང་རྒྱལ་ཚུལ་གྱིས་ང་རྒྱལ་འཇོམས་མཛད་པ། །ཞེས་བྱའོ། །དོན་དང་མཐུན་པའི་མིང་ནི། ང་རྒྱལ་ཉིད་འདུས་མ་བྱས་པས་རྡོ་རྗེ་ང་རྒྱལ་ཅེས་བྱ་ལ་འདུས་མ་བྱས་དེ་ཉིད་ལས། ང་རྒྱལ་རྡོ་རྗེ་རཏྣ་ཧེ་རུ་ཀའི་སྐུར་སྣང་བས་དོན་དང་མཐུན་པའི་མིང་ཞེས་བྱའོ། །འཁོར་བའི་འདམ་ནས་པད་ལྟར་སྐུ་འཁྲུངས་ཤིང་། ཞེས་བྱ་ལ། པདྨ་ཧེ་རུ་ཀའི་མིང་ཕུན་སུམ་ཚོགས་པ་སྟེ། པདྨ་ཧེ་རུ་ཀ་ནི། འཁོར་བའི་འདམ་རྫབ་དང་འདྲ་བའི་ནང་དུ་ཉོན་མོངས་པ་ཀུན་ལ་སྤྱད་ཀྱང་། པདྨ་འདམ་སྐྱེས་ལྟར་ཉེས་པའི་སྐྱོན་གྱིས་མ་གོས་པས་པདྨ་ལྟར་སྐུ་འཁྲུངས། ཞེས་བྱའོ། །ལྷག་མཐོང་ཡེ་ཤེས་བསྐལ་པ་ཐམས་ཅད་བསྲེག །བྱ་བ་བསྐལ་པའི་ཕྲིན་ལས་ཕུན་སུམ་ཚོགས་པ་སྟེ། མེའི་བསྐལ་པས་འཇིག་རྟེན་གྱི་ཁམས་བསྲེག་ཅིང་འཇིག་པ་ཡང་། པདྨ་ཧེ་རུ་ཀའི་མེའི་བསྐལ་པས་བསྲེག་པ་ཡང་འཇིག་ཅིང་བསྲེག་པ་ཡིན་ལ། དོན་དམ་པར་ལྷག་མཐོང་རིག་པའི་ཡེ་ཤེས་ཀྱི་མེས་ཉོན་མོངས་པ་ཐམས་ཅད་སྲེག་པར་བྱེད་པས་མེའི་བསྐལ་པས་ཐམས་ཅད་བསྲེག །ཅེས་བྱའོ། །འདོད་ཆགས་ཚུལ་གྱིས་འདོད་ཆགས་འཇོམས་མཛད་པ། །ཞེས་བྱ་བ། རིགས་ཀྱིས་འདུལ་བའི་དོན་ཕུན་སུམ་ཚོགས་པ་སྟེ། སེམས་ཅན་གྱི་ལོག་པའི་འདོད་ཆགས་དང་། འདོད་པའི་འདོད་ཆགས་དང་། འཁྲིག་པའི་འདོད་ཆགས་ལ་སོགས་པ། དཔལ་པདྨ་ཧེ་རུ་ཀའི་ཡེ་ཤེས་ཆེན་པོས། ཆོས་ཉིད་ཀྱི་དོན་ལ་ཆགས་པ་དང་། ཐུགས་རྗེ་ཆེན་པོས་སེམས་ཅན་གྱི་དོན་ལ་ཆགས་པས་འདོད་ཚོགས་ཆེན་པོའི་དོན་ལ་ལོག་པའི་འདོད་ཆགས་བཅོམ་པས། དཀྱུས། འདོད་ཆགས་རྡོ་རྗེ་པདྨ་ཧེ་རུ་ཀ །ཞེས་པ། དོན་དང་མཐུན་པའི་མིང་ཕུན་སུམ་ཚོགས་པ་སྟེ། འདོད་ཆགས་ཉིད་རྡོ་རྗེ་ལྟར་འདུས་མ་བྱས་པ་ནི། རྡོ་རྗེ་འདོད་ཆགས་ཡིན་ལ། འདུས་མ་བྱས་པ་དེ་ཉིད་ལ་འདོད་ཆགས་པདྨ་ཧེ་རུ་ཀའི་སྐུར་སྣང་བ་ནི་དོན་དང་མཐུན་པའི་མིང་ངོ་། །ཕྲིན་ལས་རྒྱ་མཚོས་འགྲོ་བའི་དོན་མཛད་པ། ཞེས་པ་ཀརྨ་ཧེ་རུ་ཀའི་རིགས་ཕུན་སུམ་ཚོགས་པ་སྟེ། དཔལ་ཀརྨ་ཧེ་རུ་ཀ་ནི་ལས་ཀྱི་རིགས་ཡིན་པས། །ཕྲིན་ལས་རྒྱ་མཚོས་འགྲོ་བ་མཐའ་ཡས་པའི་དོན་མཛད་པས། དོན་མཛད་ཅིང་། ཞེས་བྱའོ། །ཤེས་བྱ་ཐོགས་མེད་བསྐལ་པའི་རླུང་གིས་བསྐྱོད། །ཅེས་བྱ་བ། བསྐལ་པའི་ཕྲིན་ལས་ཕུན་སུམ་ཚོགས་པ་སྟེ། རླུང་གི་བསྐལ་པས་འཇིག་རྟེན་གྱི་ཁམས་ཐམས་ཅད་འཐོར་ཞིང་གཡེང་བ་ཡང་། ཀརྨ་ཧེ་རུ་ཀ་རླུང་གི་བསྐལ་པར་གྱུར་ཏེ་གཡེང་བ་ཡིན་ལ། དོན་དམ་པར་ཤེས་པར་བྱ་བའི་ཡུལ་ཡིན་ལ། ཐོགས་པ་མེད་པའི་ཤེས་རབ་ཀྱིས་ཁམས་གསུམ་འཁོར་བའི་སེམས་ཅན་རྣམས་བླ་ན་མེད་པའི་བྱང་ཆུབ་ཀྱི་གནས་སུ་བསྐྱོད་པར་མཛད་པས་རླུང་གིས་བསྐྱེད། །ཅེས་བྱའོ། །ཕྲག་དོག་ཚུལ་གྱིས་ཕྲག་དོག་འཇོམས་མཛད་པ། །ཞེས་པ་སེམས་ཀྱི་ལོག་པའི་ཕྲག་དོག་ངན་པ་ཐམས་ཅད་དཔལ་ཀརྨ་ཧེ་རུ་ཀའི་ཡང་དག་པའི་ཕྲག་དོག་རྟོགས་པས། འཁོར་བ་དང་སྡུག་བསྔལ་བ་ཕྲག་དོག་པ་དང་། དེའི་དོན་ལས་མི་འདའ་བའི་དམ་ཚིག་གི་ཕྲག་དོག་དང་། རྣམ་པ་གཉིས་ཀྱིས་བཅོམ་པས་ཕྲག་དོག་འཇོམས་མཛད། ཅེས་བྱའོ། །ཕྲག་དོག་ཉིད་རྡོ་རྗེ་ལྟར་འདུས་མ་བྱས་ཤིག་ཡང་དག་པར་མཁྱེན་པས་ཕྲག་དོག་རྡོ་རྗེའོ། །རྡོ་རྗེ་ལྟར་འདུས་མ་བྱས་པ་ལ་ཕྲག་དོག་རྡོ་རྗེའི་སྐུར་བསྟན་ནས། འགྲོ་བ་ཇི་ལྟར་འདུལ་བ་བཞིན་དུ་དོན་མཛད་པས་ཕྲག་དོག་རྡོ་རྗེ་ཞེས་བྱའོ། །ཧེ་རུ་ཀའི་ཡུམ་ཆེན་མོ་ལྔ་ལ་ཡང་ཕུན་སུམ་ཚོགས་པ་བཞི་བཞིས་བསྟན་ནོ། །ཡུམ་གྱི་རང་བཞིན་ཕུན་སུམ་ཚོགས་པ་དང་། ཕྲིན་ལས་ཕུན་སུམ་ཚོགས་པ་དང་། མཆོད་པ་ཕུན་སུམ་ཚོགས་པ་དང་། དབང་ཕུན་སུམ་ཚོགས་པ་དང་བཞིའོ། །དེ་ལ་བུདྡྷ་ཧེ་རུ་ཀའི་ཡུམ་གྱི་རང་བཞིན་ཕུན་སུམ་ཚོགས་པ་ནི། སྐུ་ཡི་ལོངས་སྤྱོད་སྣ་ཚོགས་མི་དམིགས་ཤིང་། །ཞེས་པ། སྐུའི་ལོངས་སྤྱོད་ནི་སྐུ་ཆེ་བའི་ཡོན་ཏན་གྱི་སྒོ་ནས་ཡེ་ཤེས་སྤྲུལ་པ་བསམ་གྱིས་མི་ཁྱབ་པས་འགྲོ་བའི་དོན་མཛད་ཀྱང་། ཡུམ་ཆེན་མོ་ཉིད་ཀྱི་རང་བཞིན་མི་དམིགས་པས་ཟིན། དཔེ་ཏིལ་འབྲུ་ལ་མར་གྱིས་ཁྱབ་པ་དང་འདྲ་བར། མཚན་མའི་དབང་ཁར་མ་གྱུར་ཡུམ་གྱི་རང་བཞིན་ཕུན་སུམ་ཚོགས་པའོ། །ཡུམ་གྱི་ཕྲིན་ལས་རབ་ཏུ་ཤེས་པས་ཤེས་རབ་མཐར་ཕྱིན་ལས་ལོག་པའི་གཏི་མུག་འཇོམས་པའི་ཕྲིན་ལས་སོ། །ཡུམ་གྱི་མཆོད་པ་ནི། མིག་གི་ཡུལ་གཟུགས་སུ་སྣང་བ་ཐམས་ཅད་གཟུགས་ཀྱི་ལྷ་མོ་མེ་ལོང་མར་བྱིན་གྱིས་བརླབས་ནས་གཙོ་བོའི་སྐུ་ལ་མཉེས་པའི་མཆོད་པ་འབུལ་ལོ། །ཡུམ་གྱི་དབང་ནི། ནམ་མཁའ་གར་ཁྱབ་པར་བུདྡྷ་ཀྲོ་ཏཱི་ཤྭ་རིས་ཁྱབ་ལ་ཡུམ་གྱིས་གར་ཁྱབ་པའི་སེམས་ཅན་ཐམས་ཅད་བུདྡྷ་ཧེ་རུ་ཀའི་སྲས་སུ་དབང་བསྐུར་བས། དབང་ཕུན་སུམ་ཚོགས་པའོ། །ཐུགས་ཀྱི་ལོངས་སྤྱོད་སྣ་ཚོགས་བྱ་བ། བཛྲ་ཧེ་རུ་ཀའི་ཐུགས་རྣམ་པར་མི་རྟོག་པ་ལས། ཏིང་ངེ་འཛིན་འབུམ་ཕྲག་གྲངས་མེད་པས་འགྲོ་བའི་དོན་མཛད་པས་དེ་ཡུམ་ཆོས་ཉིད་ཀྱི་རང་བཞིན་གྱིས་ཏིལ་འབྲུ་བཞིན་དུ་མི་དམིགས་པ་ཟིན་པས་མཚན་མའི་དབང་ཁར་མ་གྱུར་པ་ནི་ཡུམ་གྱི་རང་བཞིན་ནོ། །ཡུམ་གྱི་ལས་ནི་བྱམས་པ་དང་སྙིང་རྗེ་བརྩོན་འགྲུས་ཀྱིས་ལོག་པའི་ཞེ་སྡང་རྣམ་པར་དག་པས་ཡུམ་གྱི་ཕྲིན་ལས་སོ། །ཡུམ་གྱི་མཆོད་པ་ནི། ལུས་ཀྱི་རེག་བྱ་འཇམ་རྩུབ་ཏུ་སྣང་བ་ཐམས་ཅད་རེག་བྱའི་ལྷ་མོ་རྡོ་རྗེ་ཡོངས་སུ་འཁྱུད་མར་བྱིན་གྱིས་བརླབས་ནས་ཡབ་ཀྱི་སྐུ་ལ་མཉེས་པའི་མཆོད་པ་འབུལ་བས་ཡུམ་གྱི་མཆོད་པའོ། །ཡུམ་གྱི་དབང་ནི། ནམ་མཁས་གར་ཁྱབ་པར་བཛྲ་ཀྲོ་ཏཱི་ཤྭ་རིའི་མཁས་ཁྱབ་ལ། མཁས་གར་ཁྱབ་པའི་སེམས་ཅན་ཐམས་ཅད་བཛྲ་ཧེ་རུ་ཀའི་སྲས་སུ་དབང་བསྐུར་བས་ཡུམ་གྱི་དབང་ཕུན་སུམ་ཚོགས་པའོ། །ཡོན་ཏན་ལོངས་སྤྱོད་སྣ་ཚོགས་བྱ་བ་རཏྣ་ཧེ་རུ་ཀའི་སྐུ་ཆེ་བའི་ཡོན་ཏན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར། སེམས་ཅན་དགོས་འདོད་ཡིད་བཞིན་དུ་སྐོང་བར་སྣང་བ་སྟེ། ཡུམ་ཆོས་ཉིད་ཀྱི་རང་བཞིན་གྱིས་ཏིལ་འབྲུ་མར་གྱི་མི་དམིགས་པར་ཟིན་པ་དེ། མཚན་མར་གྱུར་པ་ནི་ཡུམ་གྱི་རང་བཞིན་ནོ། །ཡུམ་གྱི་ཕྲིན་ལས་ནི། ང་དང་བདག་མེད་པ་སྦྱིན་པའི་ཕ་རོལ་ཏུ་ཕྱིན་ལ། ལོག་པའི་ང་རྒྱལ་རྣམ་པར་དག་པར་མཛད་པས་ཡུམ་གྱི་ཕྲིན་ལས་སོ། །ཡུམ་གྱི་མཆོད་པ་ནི། སྣང་བ་ཐམས་ཅད་དྲི་ཡི་ལྷ་མོ་ཞལ་ཟས་མར་བྱིན་གྱིས་བརླབས་པས་ཡབ་ཀྱི་སྐུ་ལ་མཉེས་པའི་མཆོད་པ་འབུལ་བས་ཡུམ་གྱི་མཆོད་པའོ། །ཡུམ་གྱི་དབང་ནི། ཆུས་གར་ཁྱབ་པར་རཏྣ་ཀྲོ་ཏི་ཤྭ་རིའི་མཁས་ཁྱབ་ལ། མཁས་གར་ཁྱབ་པའི་སེམས་ཅན་ཐམས་ཅད་རཏྣ་ཧེ་རུ་ཀའི་སྲས་སུ་དབང་བསྐུར་བས་སོ། །གསུང་གི་ལོངས་སྤྱོད་སྣ་ཚོགས་བྱ་བ་པདྨ་ཧེ་རུ་ཀ །གསུང་རབ་རྒྱ་མཚོས་འགྲོ་བ་སོ་སོའི་སྐད་དུ་ཆོས་ཀྱི་སྒྲ་བསྒྲགས་པ་དེ་ཡུམ་ཆོས་ཉིད་ཀྱི་རང་བཞིན་གྱིས་ཏིལ་འབྲུ་ལ་མར་གྱིས་ཁྱབ་པ་བཞིན་ཏེ། མི་དམིགས་པས་ཟིན་པའི་ཕྱིར་ན་མཚན་མའི་དབང་ཁར་མ་གྱུར་པས་ཡུམ་གྱི་རང་བཞིན་ནོ། །ཡུམ་གྱི་ཕྲིན་ལས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་སེམས་ཅན་གྱི་ལོག་པའི་འདོད་ཆགས་རྣམ་པར་དག་པས་སེམས་ཅན་གྱི་ལོག་པའི་འདོད་ཆགས་རྣམ་པར་དག་པས་ཡུམ་གྱི་ལས་སོ། །ཡུམ་གྱི་མཆོད་པ་ནི། རྣ་བའི་སྒྲར་གྲག་པ་ཐམས་ཅད་ལྷ་མོ་པི་ཝཾ་མར་བྱིན་གྱིས་བརླབས་ནས་ཡབ་ཀྱི་སྐུ་ལ་མཉེས་པའི་མཆོད་པ་འབུལ་བས་སོ། །ཡུམ་གྱི་དབང་ནི། མེས་གར་ཁྱབ་པར་པདྨ་ཀྲོ་ཏཱ་ཤྭ་རིའི་མཁས་ཁྱབ་ལ། མཁས་གར་ཁྱབ་པའི་སེམས་ཅན་ཐམས་ཅད་པདྨ་ཧེ་རུ་ཀའི་སྲས་སུ་དབང་བསྐུར་རོ། །ཕྲིན་ལས་ལོངས་སྤྱོད་སྣ་ཚོགས་བྱ་བ་ཀརྨ་ཧེ་རུ་ཀའི་ཕྲིན་ལས་རྒྱ་མཚོས་འགྲོ་བ་སེམས་ཅན་གྱི་དོན་མཛད་པ་དེ། ཡུམ་ཆོས་ཀྱི་རང་བཞིན་གྱིས་ཏིལ་འབྲུར་མར་གྱིས་ཁྱབ་པ་དང་འདྲ་བར། མི་དམིགས་པས་ཟིན་པས་མཚན་མར་མ་གྱུར་པས་ཡུམ་གྱི་རང་བཞིན་ནོ། །ཡུམ་གྱི་ཕྲིན་ལས་ནི། བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པས་ཡུམ་གྱི་ཕྲིན་ལས་སོ། །ཡུམ་གྱི་མཆོད་པ་ནི། སྣའི་ཡུལ་དྲིའི་ལྷ་མོ་སྤོས་མེ་མར་བྱིན་གྱིས་བརླབས་ནས་ཡབ་ཀྱི་སྐུ་ལ་མཉེས་པའི་མཆོད་པ་འབུལ་ལོ། །ཡུམ་གྱི་དབང་ནི། རླུང་གིས་གར་ཁྱབ་པར་ཀརྨ་ཀྲོ་ཏཱི་ཤྭ་རིའི་མཁས་ཁྱབ་ལ། མཁས་གར་ཁྱབ་པའི་སེམས་ཅན་ཐམས་ཅད་ཀརྨ་ཧེ་རུ་ཀའི་སྲས་སུ་དབང་བསྐུར་བས། ཡུམ་གྱི་དབང་ཕུན་སུམ་ཚོགས་པའོ། ༈ །འདི་ན་མར་ཀ་རི་བརྒྱད་ལ་དོན་དང་མཐུན་པའི་མིང་དང་། རང་བཞིན་གྱི་རྟགས་དང་། ལས་དང་། ཕྱག་མཚན་དང་། ཡང་དག་ལམ་དང་གཟིགས་ཐབས་དང་། ལས་ཀྱི་ཕྱག་རྒྱ་དང་། མིང་གི་ངེས་ཚིག་གོ། །དེ་ལ་ཐུགས་མཆོག་རྣམ་དག་ཡེ་ཤེས་དཀར་མོའི་ཚོགས། །ཞེས་བྱ་བ། དཔལ་ཧེ་རུ་ཀའི་ཐུགས་རྣམ་པར་དག་པའི་ཡེ་ཤེས་ལ་མཚན་མའི་སྐྱོན་གྱིས་མ་གོས་པའི་རྟགས་སུ་དཀར་མོའི་ཚོགས་བྱའོ། །རང་བཞིན་ཀ་རི་མར་བསྟན་པ་དོན་དང་མཐུན་པའི་མིང་ཡང་ཡིན་ལ། རང་བཞིན་གྱི་རྟགས་ཞེས་ཀྱང་བྱའོ། །འགུགས་མཛད་ཅེས་བྱ་བ། ཕྱག་ན་རྡོ་རྗེའི་མཐུ་ཡང་འགུགས་པར་བྱེད་ལ། ཕྱག་ན་ཞིང་བསྣམས་པ་ལ་དབང་པོ་ལྔ་དང་། ཡེ་ཤེས་ལྔ་དང་ལྡན་པའི་དབྱུང་བས་སོ། །དྲན་པ་རྒྱུད་ལྔ་བྱ་བ་ཡང་དག་པའི་དྲན་པ་དང་སྦྱར། ཡེ་ཤེས་ལྔའི་དབྱུག་པས་ལམ་རྒྱུད་ལྔ་གྲོལ་བ་ལ་སོགས། གཟིགས་ཐབས་ཐམས་ཅད་ནི་ཞི་བར་གཟིགས་སོ། །སྲིད་གསུམ་ནི་སྲིད་པ་གསུམ་གྱི་སེམས། ཉོན་མོངས་པ་ཐམས་ཅད་ཐལ་བར་བརླག་གོ། །རྩ་བ་དེ། མིང་གི་ངེས་ཚིག་གོ། །ཙ་རི་སྐུའི་ལྷ་མོ་སྟེ། སྐུའི་ཡོན་ཏན་ཚོགས་སྡུད་ནི། རྐུན་མོའི་ཚོགས་བྱ་བ་དཔལ་ཧེ་རུ་ཀའི་སྐུ་ཆེ་བའི་ཡོན་ཏན་ལས་ཀྱི་ཁྱད་པར་ལས་སྤྲུལ་པས་ཡོན་ཏན་ནོ། །དེ་དག་ཐམས་ཅད་མ་མོ་བདེ་ལ་གནས་ཤིང་ཡོད་པའི་ཕྱིར་བརྡས་མཚོན་པས་ན། རྐུན་མོའི་ཚོགས་ཞེས་བྱའོ། །དེའི་རྟགས་སུ་ཧེ་རུ་ཀའི་ཐུགས་ཀར་མདའ་བཀང་བ་མདེའུ་རྩེ་ལྕགས་སྤྲོས་ཆེ་བ་ཡིས་ཐུགས་ཀྱི་དབྱིངས་བསྐུལ་ནས་མདེའུ་རྩེ་ཆང་པ་ལ་ཐུག་པ་ལ་བསྐུལ་ཞེས་བྱ། ཐུགས་འཕྲོག་ནི་ཕྱག་ན་རྡོ་རྗེའི་མཐུ་མང་འཕྲོག་གོ། །ཞི་གནས་ཀྱི་གཞུ་ལ་ལྷག་མཐོང་རིག་པའི་ཡེ་ཤེས་ཀྱི་མདའ་བཀང་ནས་གཙོ་བོའི་ཐུགས་དམ་གྱི་དབྱིངས་ནས་ཆེ་བའི་ཡོན་ཏན་གྱི་རྒྱུད་བསྐུལ་བས་ཟུང་དུ་འབྲེལ་ཅེས་བྱའོ། །བདེན་པ་གཉིས་ཀྱི་དོན་ཡང་བསྙམས་སོ། །བདེན་གཉིས་ལྟ་ཞེས་པ། བདེན་པ་གཉིས་ཀྱི་དོན་བསྙམས་ནས་བལྟས་པས་ཡང་དག་པའི་ལྟ་བ་དང་སྦྱར་རོ། །གཟིགས་པའི་སྟབས་ནི་ཁྲོ་མོའི་ཚུལ་དུ་གཟིགས་སོ། །མིང་གི་ངེས་ཚིག་ནི། དམ་ཚིག་དབྱིངས་མཆོག་སྐུལ་བྱེད་ཙ་རི་མ། །ཞེས་བྱའོ། །པྲ་མོ་ཧ་ནི་གསུང་གི་ལྷ་མོ་སྟེ། གསུང་པདྨ་ཧེ་རུ་ཀས་གསུང་རབ་རྒྱ་མཚོས་འགྲོ་བ་ལ་ཆོས་བསྒྲགས་པས་ཉོན་མོངས་པ་ཐམས་ཅད་ཀྱི་མགོ་རྨོངས་པར་བྱ་སྟེ། དེའི་རྟགས་སུ་རྨོངས་ཞེས་བྱའོ། །རང་བཞིན་གྱི་རྟགས་དང་དོན་དང་མཐུན་པའི་མིང་ངོ་། །དབང་མཛད་མཐའ་གཉིས་བྱ་བ་ནི། སྟོང་གསུམ་གྱི་སྟོང་དུ་མཛད་པས་དབང་མཛད་ཅེས་བྱ། མཐའ་གཉིས་ནི་ཆུ་སྲིན་མའི་མགོ་ལ་མཆེ་བ་བཞི་ཡོད་དོ། །གཡས་ཀྱི་མཆེ་བས་ནི་ཐབས་ཀྱི་ཐུགས་རྗེ་ཆེན་པོས་འཁོར་བའི་མཐའ་མི་སྤོང་ཞིང་འཛིན་ལ། གཡོན་ཤེས་རབ་ཀྱི་མཆེ་བས་མྱ་ངན་ལས་འདས་པའི་མཐའ་མི་སྤོང་ཞིང་འཛིན་པས། རྩ་བ་བླང་། མི་གནས་ཁྱབ་པ་མཐའ་གཉིས་འཛིན་ཅིང་མི་གཏོང་ཡང་དེ་ལ་མི་གནས་པས་མི་གནས་ཞེས་བྱའོ། །བདུད་བཞི་ལས་རྒྱལ་བས་རྒྱལ་རྟགས་སུ་ཆུ་སྲིན་གྱི་རྒྱལ་མཚན་བསྣམས་ལ། གཟིགས་ཐབས་ནི། ར་རོ་བའི་ཚུལ་དུ་མྱོས་ཐབས་སུ་གཟིགས་སོ། །དེ་ལྟ་བུའི་དོན་དང་ལྡན་པས། སྟོང་གསུམ་དབང་མཛད་རྒྱལ་བྱེད་པྲ་མོ་ཧོ། །ཞེས་བྱ་སྟེ། མིང་གི་ངེས་ཚིག་གོ། །བེ་ཏ་ལི་ནི་དཔལ་ཧེ་རུ་ཀའི་སྐུ་ཆེ་བའི་ཡོན་ཏན་མཛད་པའི་ཕྲིན་ལས་གཉིས་ལས་སྤྲུལ་པའི་ལྷ་མོ་ཡིན་ཏེ། ཐལ་བར་བྱེད་པ་ནི། དཔལ་ཧེ་རུ་ཀ་ནི་ཡོན་དང་། ཕྲིན་ལས་ཀྱིས་ཁམས་གསུམ་གྱི་ཉོན་མོངས་པ་ཐལ་བར་རློག་པར་མཛད་པའི་རྟགས་སུ་བེ་ཏ་ལིར་བསྟན་པས་རང་བཞིན་གྱི་རྟགས་ཀྱང་ཡིན་ལ། དོན་དང་མཐུན་པའི་མིང་ཡང་ཡིན་ནོ། །ལས་ཀུན་གྱི་ལས་གྲུབ་པར་བྱ་བ། འགྲོ་བ་གཞན་གྱིས་ལས་སྣ་རེ་ལས་མི་འགྲུབ། དཔལ་ཆེན་པོའི་ཆེ་བའི་ཡོན་ཏན་དང་། མཛད་པའི་ཕྲིན་ལས་ཀྱིས་ནི། བདུད་འདུལ་བ་དང་། དགྲ་བསད་པ་དང་། དངོས་གྲུབ་སྩོལ་བ་དང་། ཅིར་ཡང་བསམ་པའི་ཕྲིན་ལས་ཀུན་འགྲུབ་པས་ལས་འགྲུབ་བོ། །འཁོར་བ་ལས་ཡང་དག་པའི་གནས་སུ་སྒྲོལ་བར་མཛད་པས་ལས་འགྲུབ་སྟེ། ཡང་དག་པའི་ཕྲིན་ལས་སོ། །ཕྲིན་ལས་དེས་ཅི་འགྲུབ་ན། ཕྱག་གཡས་ན་རྡོ་རྗེ་རྩེ་དགུ་པ་བསྣམས་པ། མར་བལྟས་པ་དགུ་ནི་ས་དགུ་ན་གནས་པའི་སེམས་ཅན་གྱི་རྟོག་པ་འཇོམས་ལ། ཡར་བལྟས་པ་དགུ་ནི་མ་བརྒྱད་དཔལ་དང་དགུའི་དཀྱིལ་འཁོར་དུ་སྒྲོལ་བས། ཀུན་གྱི་ལས་འགྲུབ་མཛད། ཅེས་བྱའོ། །ས་དགུའི་གོང་དུ་བས། ཤི་བ་སློང་བ་ནི། ཕྱག་གཡོན་པ་ན་རྔེའུ་ཆུང་གཅིག་བསྣམས་པས། འཁོར་བ་ཤི་བ་དང་འདྲ་བ་ལས་བླ་ན་མེད་པའི་བྱང་ཆུབ་གསོན་པོ་དང་འདྲ་བར་སྒྲོལ་བར་བྱེད་པས་བསློང་ཞེས་བྱ་ལ། གཟིགས་པ་ཡང་དེའོ། །དོན་དེ་ལྟ་བུ་དང་ལྡན་པས་རྩ་བ་དེ་མིང་གི་ངེས་ཚིག་གོ། །པུཀྐ་སི་ནི་གཏི་མུག་གི་ལྷ་མོ་སྟེ། འབྱེད་ཅེས་བྱ་སྟེ་མེད་པའི་ཆོས་ཉིད་དོན་གྱི་གཏི་མུག་གི་དོན་རིག་པའི་ཡེ་ཤེས་ཀྱིས་རྟོགས་པས་གཙོ་མོ་ཞེས་བྱའོ། །དེ་བས་དོན་དང་མཐུན་པའི་མིང་ཡང་སྤོས་མོའོ། །རང་བཞིན་གྱིས་རྟགས་ཀྱང་དེའོ། །འཁོར་བའི་རྒྱུད་འཛིན་ཞེས་པ་ནི། འཁོར་བ་རྒྱུད་འཛིན་ཅིང་འདྲེན་པའི་རྟགས་སུ་བ་སུ་འདྲེན་པའོ། །རྒྱུད་དྲུག་ཐུགས་རྗེས་སྒྲོལ་བས་འཁོར་བའི་རྒྱུན་དྲངས་ནས་བླ་ན་མེད་པའི་བྱང་ཆུབ་ཏུ་འདྲེན་པའི་རྟགས་སོ། །དོན་དེ་ལྟ་བུ་དང་ལྡན་པས་རྩ་བ་དེ་མིང་གི་ངེས་ཚིག་གོ། །གྷསྨ་ཧྲི་ནི་ཞེ་སྡང་གི་མ་མོ་སྟེ། གཏུམ་མོ་ཞེས་བྱ་སྟེ། དཔལ་ཧེ་རུ་ཀའི་ཡང་དག་པའི་ཞེ་སྡང་གིས་ལོག་པའི་ཞེ་སྡང་བཅོམ་པའི་རྟགས་སུ་ག་སྨ་ཧྲི་བསྟན་པས་རང་བཞིན་རྟོགས་ཞེས་བྱ་ལ། དོན་དང་མཐུན་པའི་མིང་ཡང་གཏུམ་མོ་ཞེས་བྱའོ། །མྱོས་བྱེད་དབྱིངས་ཞེས་བྱའོ། །ཕྱག་གཡོན་པ་ན་བྷནྡྷ་དམར་གྱིས་བཀང་བ་བསྣམས་པ། བྷནྡྷ་ནི་སྣོད་ཀྱི་འཇིག་རྟེན་ཡིན་ལ། རཀྟ་ནི་བཅུད་ཀྱི་འཇིག་རྟེན་ཡིན། རྡོ་རྗེས་དཀྲུག་ཅིང་གསོལ་བ་ནི། སྣོད་བཅུད་དཀྲུག་ཅིང་གསོལ་བ། སྣོད་བཅུད་དཀྲུགས་ནས་དུས་གཅིག་ཏུ་དཔལ་གྱི་ཞལ་དུ་སྟབས་ལ་རོལ་བར་སྣང་ལ། དོན་དམ་པར་བྷནྡྷ་ནི་ཆོས་ཀྱི་དབྱིངས་ཡིན། རྡོ་རྗེ་ནི་ཡེ་ཤེས་ཡིན། ཡེ་ཤེས་དབྱིངས་ན་བཞུགས་པའི་དུས་ན་རཀྟ་ཐུགས་རྗེ་ཆགས་པའི་འབྱུང་གནས་ཆགས་པའི་ཕྲིན་ལས་འགྲོ་བའི་དོན་མཛད་པས། རྩ་བའི་དོན་དེ་ལྟ་བུ་དང་ལྡན་པས་མིང་གི་ངེས་ཚིག་གོ། །ཙཎྜ་ལི་ནི་འདོད་ཆགས་འཇོམས་པའི་ལྷ་མོ་སྟེ། ཆགས་པའི་ཚུལ་ཅེས་པ་དཔལ་ཧེ་རུ་ཀའི་ཐུགས་ཡང་དག་པའི་ཡེ་ཤེས་ཀྱི་འདོད་ཆགས་ཆེན་པོ་ཉིད་ཀྱི་དོན་ལ་ཆགས་པས། དབྱིངས་དང་ཆོས་ཉིད་གཉིས་སུ་མེད་པར་གྱུར་པ་ལས། དེའི་ངང་ལས་ཐུགས་རྗེ་ཆེན་པོས་འགྲོ་བའི་དོན་ལ་ཆགས་ནས་སེམས་ཅན་བླ་ན་མེད་པའི་གནས་སུ་བསྒྲལ་བའི་རྟགས་སུ་ཙཎྜ་ལཱི་ར་བཏགས་པས་རང་རྟགས་དང་དོན་མཐུན་པའི་མིང་ཡིན་ནོ། །སྨེ་ཤ་ཅན་ཞེས་བྱ་བ་ནི། མ་ནིང་རྒྱུད་འཕེལ་ཅེས་པ། ལྷ་མོ་འདི་བསྟེན་པས་ནི་མ་ནིང་ཡང་རྒྱུད་འཕེལ་བར་ནུས་སོ། །གཟུང་འཛིན་དང་བྲལ་རྟགས་ནི། ཕྱི་གཟུང་བའི་ཡུལ་དང་བྲལ་བའི་རྟགས་སུ་ཕྱག་གཡོན་པ་ཞིང་གི་ལུས་བཟུང་ནས་ལ་འཛིན་པའི་སེམས་དང་བྲལ་བའི་རྟགས་སུ་གཡས་མགོ་བཅད་ནས་འཛིན་པས། གཟུང་འཛིན་དང་བྲལ་བའི་རྟགས་ཞེས་བྱའོ། །མཐའ་གཉིས་མ་སྤངས་ཞེས་བྱ་བ། ཞིང་གི་ལུས་བཟུང་བ་ནི་འཁོར་བ་མ་སྤངས་པའི་རྟགས་ཡིན་ལ། ཞིང་གི་མགོ་བཟུང་བ་ནི་མྱ་ངན་ལས་འདས་པའི་མཐའ་མ་སྤངས་པའི་རྟགས་ཡིན་ལ། མགོ་ལུས་བཅས་པར་དཔལ་གྱི་ཞལ་དུ་སྟོབ་པ་ནི་འཁོར་བའི་ཆོས་མྱ་ངན་ལས་འདས་པའི་དབྱིངས་སུ་ཐིམ་པའམ་རོལ་སྤོར་བས། རྣམ་པར་གཡེངས་ཚུལ་གཟིགས་སོ། །དོན་དེ་ལྟ་བུ་དང་ལྡན་པས་འབར་བ་སྟོང་གསུམ་ཡང་དག་པའི་སྦྱོར་བ་དང་སྦྱར་ནས་སྟོབ་བྱེད་ཙནྚ་ལཱི་ཞེས་པ་མིང་གི་ངེས་ཚིག་གོ། །སྨེ་ཤ་ཅན་ནི་ཐམས་ཅད་འབྱུང་བའི་ཚོགས་ཞེས་བཏགས་སོ། །ཅིའི་ཕྱིར་ཞེ་ན་མ་མོ་ཆེན་མོ་བདུན་གྱི་ཆེ་བའི་ཡོན་ཏན་དང་སྤྲུལ་པའི་ཁྱད་པར་ཐམས་ཅད་འབྱུང་ཡང་འདི་ལས་འབྱུང་ལ། གནས་ཀྱང་འདི་ལ་གནས་པས་ཡུམ་གྱུར་ཅེས་བྱའོ། །ཀུན་གྱི་ལས་མཛད་ཅེས་བྱ་བ་ནི་མ་བདུན་གྱི་ཕྲིན་ལས་འདིས་མཛད་པས་ཀུན་གྱི་ལས་མཛད་ཅེས་བྱ་ལ། ཆོས་སྐུ་སྙིང་པོར་འཛིན་པ་ནི་ཞིང་ལྟོ་བྲལ་ནས་ཙིཏྟ་ཚེམས་ཀྱིས་འཛིན་པ་ལ་བྱ་སྟེ། ཞིང་ཁོང་དྲན་པ་མེད་པ་ཆོས་ཉིད་ཡིན་ལ། ཙིཏྟ་ཚེམས་ཀྱི་གཟུང་བ་ནི་ཆོས་ཉིད་ཀྱི་དོན་སྙིང་པོའི་རྟགས་ཡིན། རྩ་བ་སྨོས་པས་སོ། །ཀུན་ལ་རོལ་པས་གཟིགས་ཚུལ་ཀུན་དང་ལྡན་བྱ་བ་མ་མོ་བདུན་གྱི་ཕྲིན་ལས་ཀྱི་རྒྱུད་ཀུན་ལ་འདི་རོལ་པའི་རོལ་ཅེས་བྱའོ། །གཟིགས་པའི་ཚུལ་ཀྱང་ཀུན་གྱི་གཟིགས་ཚུལ་དུ་གཟིགས་སོ། །དེ་ལ་གཟིགས་ཚུལ་ཀུན་ལྡན་ནོ། །དེ་ལྟ་བུ་དང་ལྡན་པས་ཐུགས་རྗེས་འཇིག་རྟེན་སྒྲོལ་མཛད་སྨ་ཤ་ནི། ཞེས་མིང་གི་ངེས་ཚིག་གོ། ༈ །ད་ནི་ཡུལ་གྱི་ཕྲ་མེན་བརྗོད་དེ། སིངྷ་མུ་ཁ་འཇོམས་བྱེད་རྩལ་འཕང་མཆོག །ཅེས་བྱ་སྟེ། ཉོན་མོངས་པའི་བདུད་བཅོམ་པས་རྩ་བ་སྨོས་པའོ། །དཔེར་ན་སེང་གེ་གངས་ཏི་སེའི་ཁར་བྱུང་ནས་སྐད་ང་རོ་ཆེན་པོ་ཕྱུང་ན། ནགས་ཁ་བཞི་ལ་གནས་པའི་གཅན་གཟན་ཐམས་ཅད་བརྒྱལ་བར་བྱེད་པ་དང་། རྩལ་ཆེ་བས་འབྲུག་སྟོང་ཟེར་བ་ཙམ་སྤྲིན་གྱི་ནང་དུ་ཡང་མཆོངས་ཏེ་འགྲོ་བ་དང་འདྲ་བར། གཉེན་པོའི་སྟོབས་ཀྱིས་ཐམས་ཅད་འཇོམས། །ཞེས་བྱ་སྟེ། དཔལ་ཆེན་པོའི་གསུང་སྒྲ་དྲག་པོས་ནི་དྲེགས་བྱེད་ཐམས་ཅད་དཔའ་བཀོང་ཟིལ་གྱིས་གནོན་ལ། ཡེ་ཤེས་ཀྱི་རྩལ་གྱིས་ཉོན་མོངས་པ་ཐམས་ཅད་འཇོམས་པར་བྱེད་པས། འཇོམས་བྱེད་རྩལ་འཕང་མཆོག་མ། ཞེས་བྱའོ། །རྡོ་རྗེ་ཐུགས་ཀྱི་ཡུམ་ཞེས་བྱ་བ་ནི། དཔལ་ཧེ་རུ་ཀའི་ཐུགས་རྣམ་པར་མི་རྟོག་པའི་ཡེ་ཤེས་ལས་སྤྲུལ་པའི་ཡུམ་དུ་གྱུར་པས་རྡོ་རྗེ་ཐུགས་ཀྱི་ཡུམ་ཞེས་བྱའོ། །གཉེན་པོའི་སྟོབས་ཀྱི་ཞེས་པ་ནི། དཔེར་ན་ཁྱུང་དང་སེང་གེའི་བུ་བྱ་ཞེས་བྱ་བ་ལྟ་བུ་སྟེ། ཐམས་ཅད་ཟིལ་གྱིས་གནོན་པ་དང་འདྲ་བར་དཔལ་ཆེན་པོ་ཡང་བདུད་དང་སྲིན་པོ་དྲག་བྱེད་ཐམས་ཅད་ཟིལ་གྱིས་གནོན་པས་རྩ་བའོ། །ཤེས་རབ་ལྡན་ཞེས་བྱ་བ། ཕྱག་རྒྱ་རྩེ་གསུམ་བསྣམས་པ་ལ་བྱ་སྟེ། །ཕྱག་གཡས་ཐབས་ཀྱི་རྩེ་གསུམ་བསྣམས་པ་ནི་སྐུ་གསུང་ཐུགས་ཀྱི་སྒོ་ནས་འགྲོ་བ་གཞན་མཐར་ཕྱིན་པར་མཛད་པ། གཡོན་ཤེས་རབ་ཀྱི་རྩེ་གསུམ་བསྣམས་པ་ནི། སྐུ་གསུང་ཐུགས་ཀྱི་སྒོ་ནས་འགྲོ་བའི་དོན་མཛད་པ་ཡང་། སྐུ་སྟོང་པ་ཉིད་ཀྱི་རང་བཞིན་དུ་རྟོགས། གསུང་སྨོན་པ་མེད་པ། ཐུགས་མཚན་མ་མེད་པའི་རང་བཞིན་དུ་རྟོགས་པས་ན་བདག་གི་དོན། དོན་དེ་ལྟ་བུ་དང་ལྡན་པའི་སྒོ་ནས་དུག་ལྔ་དུག་གསུམ་གྱི་གཞི་གནས་སུ་དག་པས། སྡུག་བསྔལ་ཞེ་སྡང་གསོད་བྱེད་སིདྷ་མ། །ཞེས་བྱ་སྟེ་མིང་གི་ངེས་ཚིག་གོ། །དེས་ཉོན་མོངས་པའི་བདུད་བཅོམ་མོ། །བྱ་གྷྲྀ་མུ་ཁ། དཔའ་གཏུམ་ཟ་བྱེད་ཡེ་ཤེས་ཐུགས་རྗེ་ལས། །ཞེས་བྱ་སྟེ། སྟག་དཔའ་བས་སེམས་ཅན་ཀུན་གྱི་གཉེན་པོར་གྱུར་པ་དང་འདྲ་བར། ཡེ་ཤེས་ཆེན་པོ་དཔའ་བས་ཉོན་མོངས་པ་ཐམས་ཅད་ཀྱི་གཉེན་པོར་གྱུར་པས། དཔའ་ལ་གཏུམ་པ་བརྟུལ་ཞུགས་ཀྱི་གཏུམ་པ་དང་འདྲ་བར། ཐུགས་རྗེའི་ཤུགས་ཀྱིས་གཏུམ་ལ། སྟག་ལས་ཀྱིས་ཟ་བ་དང་འདྲ་བར་ཕྱིན་ལས་ཀྱིས་ཉོན་མོངས་པ་ཟ་བར་བྱེད་པས། རྩ་བ་བླང་། བརྩོན་འགྲུས་མྱུར་བའི་ཤུགས་འཆད་འགྲོ་དོན་མཛད། །ཅེས་ཀྱང་དེ་ལ་བྱའོ། །ཐུགས་རྩེ་གཅིག་ནི། ཕྱག་རྒྱ་རྩེ་གཅིག་ཐུགས་ཀར་བསྣོལ་བ་ལ་བྱ་སྟེ། གཡས་ཐབས་ཀྱི་རྩེ་གཅིག་གིས་འགྲོ་དོན་ལ་དགོངས་པ་ལའང་། གཡོན་ཤེས་རབ་ཀྱི་ཡེ་ཤེས་རྩེ་གཅིག་གིས། །བདག་ཉིད་ཆོས་ཉིད་དབྱིངས་ལ་ཡེ་ཤེས་རྩེ་གཅིག་ཏུ་དགོངས་པས། རྩ་བ་བླང་། ང་རྒྱལ་འཆི་བདག་འཇོམས་པ་ནི། སྔོན་གྱི་ཞིང་ལ་འབྲུ་ཚུགས་སུ་ལྟ་བས་ཉོན་མོངས་པའི་སེམས་ཅན་འཁོར་བ་གླེ་གད་ལ་ཆགས་པ་འཚོ་བའི་སྲོག་སྦྱིན་ཞིང་། འཆི་བའི་བདུད་དང་བྲལ་བར་བྱེད་པས། འཆི་བདག་གི་བདུད་བཅོམ། ཞེས་བྱའོ། །འཆི་བདག་གི་བདུད་ཚོགས་བྱ་གྷྲྀ་མ་ཞེས་བྱ་སྟེ། མིང་གི་ངེས་ཚིག་གོ། །འཇོམས་བྱེད་ཐབས་མཁས་རྣམ་དག་ཡིད་ཀྱི་ཡུམ། །ཞེས་པ། དཔལ་ཧེ་རུ་ཀའི་གསུང་ལས་སྤྲུལ་པ་ཡིན་པས། རྣམ་དག་གསུང་གི་ཡུམ་ཞེས་བྱ་ལ། དཔེར་ན་ཝ་འཛེམ་བག་ཆེ་བས་གྲོང་སྲོང་དུ་ཡང་མི་རྒྱུ། ཐབས་ལ་མཁས་ཤིང་ཆགས་བདེ་བར་ཅི་བྱས་ཀྱང་མི་ཟིན་དཔེ་དེ་དང་འདྲ་བར། ཡེ་ཤེས་ཀྱི་སྤྲུལ་པ་ཕྲ་མེན་མ་འདི་ཡང་འཛེམ་བག་ཆེ་བས་རྣམ་པར་རྟོག་པའི་དགྲ་ལའང་འཛེམ་ལ། ཐབས་མཁས་པས་འཁོར་བའི་སྐྱོན་གྱིས་མི་བརྫི་བར་བདག་དང་གཞན་གྱི་དོན་བྱེད་པས་རྩ་བའོ། །དོན་གྱི་ཆོས་ཀྱི་སྐུ་ཞེས་པ་ནི་ཞིང་ལ་ལྕེས་བལྡག་པ་ལ་བྱ་སྟེ། ཞིང་དྲན་པ་མེད་པའི་ཆོས་ཉིད་ལ་ཏིང་ངེ་འཛིན་གྱི་རོ་ལྗགས་ཀྱི་དབང་པོ་ལ་བཏང་བས། ཏིང་ངེ་འཛིན་ལྗགས་ལ་བདར་ཅེས་བྱ། དེ་ལྟ་བུ་དང་ལྡན་པས། འདོད་ཆགས་དུར་ཁྲོད་བགེགས་ཚོགས་འཇོམས་པའི་སྲི་ལ་མ་ཞེས་བྱ་སྟེ། ཕུང་པོའི་བདུད་བཅོམ་མོ། །མི་འབྱེད་སྤྱོད་པ་ལས་མཆོག་རིགས་ཀྱི་ཡུམ་ནི། དཔེར་ན་ཁྱིས་ནི་ཟས་ཀྱང་བཟང་ངན་དུ་མི་འབྱེད་ཀུན་ལ་ཁྱིས་གཤིན་པོ་གཅིག་གིས་གྲོང་ཁྱེར་གཅིག་སྲུང་ནུས་པ་དང་འདྲ་བར་འཁོར་བའི་སེམས་ཅན་མ་རིག་པའི་མུན་པས་ལྡངས་པ་ལ། ཐུགས་རྗེ་ཁྱི་གཤིན་པོ་དང་འདྲ་བས་སེམས་ཅན་འཁོར་བར་མི་ཤོང་བར་བཅའ་བའི་རྫི་བྱེད་ལ། ཟས་ལ་གཙང་དམེ་མི་འདམ་པ་དང་འདྲ་བར་ཉོན་མོངས་པ་ལྔ་དང་། སྨད་པའི་རྫས་ལྔ་མི་སྤང་བར་དང་དུ་ལེན་པས་མི་འབྱེད་ལ། ལས་མཆོག་རིགས་ཀྱི་ཡུམ། །ཞེས་པ་དཔལ་ཧེ་རུ་ཀའི་ཕྲིན་ལས་རྒྱ་མཚོའི་འགྲོ་བའི་དོན་མཛད་པའི་རྟགས་བསྟན་པས། མི་འབྱེད་སྤྱོད་པ་ལས་མཆོག་རིགས་ཀྱི་ཡུམ། །ཞེས་སོ། །གཡེར་བའི་ཕྲིན་ལས་འགྲོ་ལ་ཐུགས་རྗེས་སྲུང་བ་ནི། གཡེར་བ་ནི། ཟ་བྱེད་སྤྱང་མོས་ནུབ་གཅིག་གམ། སྐད་ཅིག་ལ་ལུང་པ་གསུམ་མཐོང་ཞིང་རྒྱུག་ལ། འགྲོ་བ་ཐུགས་རྗེས་སྲུང་བ་ནི། དཔེར་ན་སྤྱང་ཀུས་ཀྱང་རང་ཡུལ་ན་ཡོད་པའི་ར་ལུག་དང་མི་ཕྱུགས་ངོ་ཤེས་ནས། རང་ཨ་ཅང་ཡང་ཆེས་གཞན་ཡང་སྲུང་བར་བྱེད་པ་དང་འདྲ་བར། ཡེ་ཤེས་ཀྱི་དབང་པོས་རིག་པ་སྐད་ཅིག་མ་ལ་སྟོང་གསུམ་གཟིགས་པས་ནི་གཡེར་ལ། འགྲོ་བ་ཐུགས་རྗེས་སྲུང་བ་ནི་ཡེ་ཤེས་མཁའ་འགྲོས་འགྲོ་བ་སེམས་ཅན་ཕྱིན་ཅི་ལོག་དུག་ལྔས་ཁམས་གསུམ་འཁོར་བའི་སྡུག་བསྔལ་དུ་ཟོ་ཆུའི་ཁྱུད་མོའམ་ཤིང་རྟའི་འཕང་ལོ་བཞིན་འཁོར་བ་དེ་ཀ་བསྲུངས་པས་ཀྱང་། འགྲོ་བ་ཐུགས་རྗེས་བསྲུངས་པས་ཀྱང་བསྲུངས་ལ། དོན་དུ་ན་བཅོམ་ལྡན་འདས་ཀྱིས་འཁོར་རྣམ་པ་བཞི་ལ། བདུད་རྣམ་པ་བཞིའི་ནང་ནས། ལྷའི་བུའི་བདུད་བསྲུངས་པས་ཀྱང་བསྲུངས་ལ། བདུད་དང་སྲིན་པོ་ངན་ཁྲི་ཅི་ཡང་བསྲུངས་པས་འགྲོ་ལ་ཐུགས་རྗེས་སྲུང་། རྣལ་འབྱོར་པ་ལ་བར་དུ་གཅོད་པའི་གནོད་སྦྱིན་རྒོད་མ་ཁ་ཅན་ཡན་ཆད་བསྲུང་ངོ་། །དེ་ལ་རྩ་བ་བླང་། ཆོས་ཀྱི་སྐུ་ལ་ཡེ་ཤེས་སྤྱན་གྱིས་གཟིགས། བྱ་བ་ཞིང་གི་ལྟོ་བྲལ་ནས་མིག་གི་འབྲུ་ཚུགས་སུ་བལྟ་བ་ལ་བྱ་སྟེ། ཞིང་ནི་ར་རོ་དྲན་པ་མེད་པའི་ཆོས་ཡིན་ལ་ཆོས་ཉིད་ཀྱི་ཀུན་གཞི་མ་བཅོས་པའི་ཆོས་ཉིད་ཡིན། དབྱིངས་རྣམ་པར་དག་པའི་ངང་ཉིད་ལ་ཡེ་ཤེས་སྤྱན་ནི་ཡིད་ཀྱི་རྣམ་པར་ཤེས་པ་རིག་པའི་གཟུང་འཛིན་ལས་འདས་ཤིང་རྟོགས་པས་གཟིགས་ཞེས་བྱའོ། །ཁྱི་ལ་ང་རྒྱལ་ཁེངས་སེམས་ཀྱི་ང་རྒྱལ་མེད་ལ། དམའ་ས་འཛིན་པ་དང་འདྲ་བར། དབྱིངས་དང་རིག་པ་གཉིས་སུ་མེད་པའི་ཆོས་ཀྱི་སྐུ་ལ་ང་དང་བདག་གི་ང་རྒྱལ་གྱི་རྟོག་པ་དང་བྲལ་ཞིང་ཕྱོགས་དང་རིས་ཕྲག་དོག་དང་བྲལ་བས། ཕྲག་དོག་ལས་ཀུན་འགྲུབ་བྱེད་ཤོ་ན་མ། །ཞེས་བྱའོ། །ལྷའི་བུའི་བདུད་བཅོམ་མོ། །ཡིད་ཀྱི་ཡེ་ཤེས་སོ་སོར་ཀུན་ལ་རྟོག །ཅེས་པ། བྱ་རྒོད་རྨི་ལམ་རྣོ་བས་གཟན་གར་ཡོད་ཕྱྭ་ཡོད་ལ། བྱ་ཤ་ཟན་གཞན་བྱ་རྒོད་ལྡིང་བའི་ས་ན་གང་ན་ཡོད་པར་ཕྱྭ་ཡོད་ནས་ཀུན་དེ་རུ་རྒྱུགས་ནས་རྙེད་པ་དང་གོད་ལ་ཟ་བར་བྱེད་པའོ། །བྱ་རྒོད་ཕྱི་མའི་ལྷག་རོ་ལ་བབས་ནས་སྟོད་ཅིང་ཟ། དཔེ་དེ་དང་འདྲ་བར་འདུ་བྱེད་ཡིད་ཀྱི་རྣམ་པར་ཤེས་པ་ཕྱིའི་ཡུལ་ལ་བསྐུལ་ནས། རྣམ་པར་བཅད་ནས་འདུ་ཤེས་ཀྱིས་མཚན་མ་དང་དོན་རྟགས་སུ་འཛིན་ནོ། །དེ་གནས་གྱུར་པའི་དུས་ན། འཕགས་པའི་གནས་སྐབས་སུ་འདུ་བྱེད་ནི་ཡེ་ཤེས་སུ་གྱུར་པ་ལ། རྣམ་པར་ཤེས་པ་ནི་ཐུགས་རྗེར་གྱུར་ལ་འདུ་བྱེད་ནི་ཕྲིན་ལས་སུ་གྱུར་ལ། ཕྲིན་ལས་ཀྱིས་འགྲོ་བའི་དོན་ཐ་དད་མཛད་པས་ཡིད་ཀྱི་ཡེ་ཤེས་སོ། །སོ་སོ་ཀུན་ལ་རྟོག །རྣམ་ཤེས་ཀྱིས་བསད་རྒོད་འ བྲིང་ཚུལ་ཁྲིམས་བསྲུངས། ཞེས་བྱ་སྟེ། བྱ་རྒོད་ནི་གཞན་གྱི་སྲོག་མི་གཅོད་པར་གོད་ལ་ལྡིང་བ་དང་འདྲ་བར། ཐུགས་རྗེས་འགྲོ་བའི་དོན་མཛད་ན་ཡང་ལུས་ཀྱི་ཚུལ་མི་ཉམས་ལ། སེམས་ཀྱི་ཁྲིམས་མི་འདྲལ་བར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །འཁོར་བའི་རྒྱུད་འཛིན་རྒྱུན་གཅོད་སྤུ་གྲི་འཛིན་བྱ་བ། འཁོར་བའི་རྒྱུན་འཛིན་པའི་རྟགས་སུ། བ་སུའི་མགོ་ནས་དྲངས་ནས་འཛིན་ལ། རྒྱུད་གཅོད་པའི་རྟགས་སུ་གྲི་བསྣམས་པས་གཅོད། དཀྱུས། འགྲོགས་པས་སྙེག་བྱེ་ཀྲི་ཏ་མ། །ཞེས་བྱ་སྟེ། མིང་གི་ངེས་ཚིག་གོ། །རྣམ་རྟོག་མཉམ་ཉིད་མིད་འཕྲོག་མཚན་མ་འཇོམས། །ཞེས་པ། དཔེར་ན་བྱ་ཀཾ་ཀ་ནི་རོ་གང་ན་ཡོད་པའི་སྟེང་དུ་འགྲོ་སྟེ། ལྕེ་སྤྱང་ལ་སོགས་པའི་ཤ་ཟན་གཞན་ཡང་ཀཾ་ཀའི་ཕྱི་ན་ཕར་འགྲོ། ཀཾ་ཀས་རོ་སྟེང་དུ་ཕྱིན་པ་དང་། གཤོག་པ་བརྐྱང་རྐན་བརྡབས་སྐད་ཕྱུང་བས། རོ་སྟེང་དུ་རྒྱངས་ཀྱིས་འབྱུང་སྟེ། ཀཾ་ཀས་རོ་དེ་གཅད་ཁྲག་འཇིབས་ཏེ། ཅེ་སྤྱང་ལ་སོགས་པས་ཕྱི་ཤ་ཟ། དཔེ་དང་དེ་དང་འདྲ་བར་ཡིད་ཀྱི་རྣམ་པར་ཤེས་པ་དང་། ངེས་པར་འབྱེད་པའི་ཡིད་གཉིས་འགྲོགས་ནས་ཕྱིའི་ཡུལ་ལ་འགྲོ། །དེ་གནས་གྱུར་པའི་དུས་ན་ཡེ་ཤེས་ཀྱི་རྟོག་པའི་སྒོ་ནས་ཐུགས་རྗེས་སེམས་ཅན་གྱི་དོན་མཛད་ལ། བསད་པའི་གོད་ཕྲེང་སྦྱིན་པའི་ཕ་རོལ་ཏུ་ཕྱིན་བྱ་བ་ནི། ཀཾ་ཀས་ལྕེ་སྤྱང་ལ་སོགས་པའི་ཤ་ཟ་ལ། ཤ་སྦྱིན་པ་བཏང་བ་དང་འདྲ་བར། ཆེ་བའི་ཡོན་ཏན་ཡིད་བཞིན་གྱི་ནོར་བུ་དང་འདྲ་བར་སེམས་ཅན་གྱི་རེ་འདོད་ཡིད་བཞིན་དུ་སྐོངས་པས་སྦྱིན་པའི་ཕ་རོལ་ཏུ་ཕྱིན་པ་དང་སྦྱར་རོ། །མཐའ་འདས་ཆོས་ལ་གཟུང་འཛིན་སྤངས་ཚུལ་གཟིགས། བྱ་བ་ནི་ཞིང་རོ་དྲན་པ་མེད་པར་ཆོས་ཉིད་ཀྱི་རང་བཞིན་ཉམས་སུ་བླངས་པའི་རྟགས་སུ། རོ་ཕྲག་པ་ལ་ཁུར་བར་བསྟན་ལ། དེ་ཉམས་སུ་བླངས་པས་གཟུང་འཛིན་གྱི་སྐྱོན་སྤངས་པས། སྤང་ཚུལ་གཟིགས་ཞེས་བྱའོ། །དོན་དེ་ལྟ་བུ་དང་ལྡན་པས་འགྲོ་བའི་སྡུག་བསྔལ་ཚེ་འཕྲོག་ཀཾ་ཀ་མ། ཞེས་བྱའོ། །མིང་གི་ངེས་ཚིག་གོ། །བསླད་པས་མི་འགྱུར་བཀྲུས་པས་མི་འདག །ཅེས་པས། དཔེར་ན་བྱ་རོག་གི་བཀྲུས་ཀྱང་གནག་མ་བཀྲུས་ཀྱང་གནག་ཁ་དོག་གཞན་དུ་མི་འགྱུར། དཔེ་དེ་དང་འདྲ་བར་ཆོས་ཉིད་ཀྱི་རང་བཞིན་ནི་སངས་རྒྱས་སྒམ་པོས་བཅོས་སུ་ཡང་མེད་ལ། སེམས་ཅན་སྒྲིན་ཏེ་མ་བསླད་པའི་ཡུལ་ལས་འདས་པའི་ཆོས་ཉིད་དང་སྦྱར། དེའི་རྟགས་སུ་བྱ་རོག་གི་མགོ་ཅན་དུ་བསྟན་ནོ། །མི་མཐུན་གཉེན་པོས་མི་ཤིགས་བཟོད་པའི་མཆོག །ཅེས་བྱ་ལ་དེ་ལྟ་བུའི་ཆོས་ཉིད་ཀྱི་དོན་ལ་བཟོད་པ་ཐོབ་པས་བཟོད་པའི་མཆོག །ཅེས་བྱ་བ། བཟོད་པའི་ཕ་རོལ་ཏུ་ཕྱིན་པ་དང་སྦྱར་རོ། །ཆོས་སྐུ་ཐུགས་སུ་ཆུད་ཕྱིར་ཞལ་ན་ཐོགས་མེད། ཞེས་པ། ཞིང་ཁ་ན་ཁྱེར་བ་ཡིན་ཏེ། རོ་དྲན་པ་མེད་པ་ཆོས་ཉིད་ཀྱི་དོན་རྟོགས་པའི་རྟགས་སུ་རོ་ཁ་ན་ཁྱེར་བར་བསྟན་པས་སོ། །དེ་ལྟ་བུའི་དོན་དང་ལྡན་པའི་རྟགས་སུ། ཡོན་ཏན་ཡིད་བཞིན་བདག་ཉིད་ཁ་ཁ་མ། །ཞེས་མིང་གི་ངེས་ཚིག་གོ། །ཧུ་ལུ་མུ་ཁའི་ཤེས་རབ་ཀྱི་ཕ་རོལ་ཏུ་ཕྱིན་པ་དང་སྦྱར་ཏེ། དབྱིངས་ལས་མི་རྟོག་འགྲོ་ལ་ཐུགས་རྗེས་གཟིགས། བྱ་བ་ཡེ་ཤེས་ཀྱི་དབྱིངས་ལས་མི་རྟོག་པས་འགྲོ་ལ་ཐུགས་རྗེས་གཟིགས་པའོ། །གཉིས་ལ་མི་གནས་ཤེས་རབ་ཕ་རོལ་ཕྱིན། །ཞེས་པ་ནི་རྟག་ཆད་གཉིས་ལས་འདས་པས་ན་དབུ་མ་ཆེན་པོའི་དམིགས་སུ་མེད་པའི་ངང་དུ་གྱུར་པས་ཤེས་རབ་ཀྱི་ཕ་རོལ་ཏུ་ཕྱིན། ཞེས་བྱའོ། །དབྱིངས་ཀྱི་ཐུགས་རྗེས་ཕྲིན་ལས་འདུས་མ་བྱས་ཞེས་པ། དབྱིངས་ཀྱི་ངང་ལས་ཐུགས་རྗེའི་ཕྲིན་ལས་ཀྱིས་འགྲོ་བའི་དོན་མཛད་པ་ཡང་འདུས་མ་བྱས་པའི་ངང་ལས་མ་གཡོས་པའི་ལྕགས་ཀྱུས་མགོ་བོ་མནན་པར་བྱའོ། །དོན་དེ་ལྟ་བུ་དང་ལྡན་པས་མཐའ་གཉིས་སྤངས་པའི་རྔམ་ཚུལ་དུ་ཨུ་ལུ་མུ་ཁ་ཞེས་བྱ་སྟེ་མིང་གི་ངེས་ཚིག་གོ། །བཅུ་དྲུག་ཞག་གིས་ཟླ་བའི་དཀྱིལ་འཁོར་རྫོགས། །ཞེས་པ་ནི། དཔེར་ན་ཟླ་བ་ཚེས་བརྒྱད་གཉིས་བཅུ་དྲུག་ཁ་སྤྲད་ན་ཟླ་བའི་དཀྱིལ་འཁོར་གང་ཞིང་རྒྱས་པ་དང་འདྲ་བར། དཔལ་ཆེན་པོ་བཅུ་དྲུག་ས་ལ་ལྷུན་གྱིས་གྲུབ། ཅེས་བྱ་སྟེ། དཔལ་ཆེན་པོའི་ཡང་བསོད་ནམས་དང་ཡེ་ཤེས་ཀྱི་ཚོགས་ཕྲ་མེན་བཅུ་དྲུག་གིས་རྫོགས་ནས་སངས་རྒྱས་ཀྱི་ས་ལ་ལྷུན་གྱིས་གྲུབ་པས། བསོད་ནམས་ཡེ་ཤེས་ཚོགས་རྫོགས་ཆེན་པོའི་སྐུ། །ཞེས་བྱའོ། །ཐོག་མཐའ་མེད་ཅིང་ཡོན་ཏན་ཟླ་མེད་པའི། །ཞེས་པ་འཁོར་བ་ཐོག་མ་མེད་པའི་དུས་མཐའ་མ་སྟོངས་ཀྱི་བར་དུ་འཇིག་རྟེན་ཆེ་བའི་ཡོན་ཏན་ལ། འགྲན་གྱི་ཟླ་མེད་པས་ཟླ་མེད་པའོ། །ཞེས་བྱའོ། ༈ །སྒོ་མ་བཞི་ནི་ཚད་མེད་པ་བཞི་དང་བསྡུ་བའི་དངོས་པོ་བཞི་དང་སྦྱར་ཏེ། སྦྱིན་པས་རིག་པའི་ཀློང་དུ་མཚོ་དྲངས་ལྟར། །བྱ་བ། དེའང་སྦྱིན་པ་དང་སྦྱར་ཏེ། དཔེར་ན་ས་དམའ་སར་ཆུ་འབབ་པར་འོས། སྒང་མཐོ་བར་མི་འོས་པས་ལྟར་སྦྱིན་པ་གཏོང་བ་ཡང་སྙིང་རྗེ་ཚད་མེད་པའི་སྒོ་ནས་གཏོང་སྟེ། འཁོར་བའི་འཇིངས་ནས་ཐུགས་རྗེའི་ལྕགས་ཀྱུས་འདྲེན། །ཞེས་པ། སེམས་ཅན་འཁོར་བ་རྒྱ་མཚོ་དང་འདྲ་བའི་ནང་ནས་ཉོན་མོངས་པ་ཉ་དང་འདྲ་བ། ཐུགས་རྗེ་ལྕགས་ཀྱུ་དང་འདྲ་བས་འདྲེན་པར་མཛད་པས་སྙིང་རྗེ་ཚད་མེད་པ་དང་སྦྱར་ཏེ། དེ་ལྟར་འགྲོ་བའི་དོན་མཛད་པ་དེ་ཡང་འཁོར་བ་ལ་བསྙེངས་པ་མི་མངའ་བའི་རྟགས་སུའོ། །དཔའ་བར་འགྲོ་བའི་ཏིང་ངེ་འཛིན་གྱི་སྒོ་ནས་མཛད་པས། རྩ་བ་བླང་། ཐུགས་རྗེ་ཤར་མཛད་རྟ་གདོང་ལྕགས་ཀྱུ་མ། །ཞེས་པས། འཁོར་བ་སྨག་རུམ་དང་འདྲ་བའི་ནང་དུ་ཐུགས་རྗེ་ཉི་མ་ཤར་བ་བཞིན་དུ་མཛད་པས་ཤར་ཕྱོགས་བཞུགས་པར་བསྟན་ནོ། །དོན་དང་མཐུན་པས་ཀུན་ཀྱང་དགའ་བཞིན་བྱེད། །ཅེས་པས་དོན་དང་མཐུན་པ་དང་སྦྱར་ཏེ། དོན་དང་མཐུན་པའི་བཀའ་བདུད་ཀྱིས་ཀྱང་མི་གཅོག་པས། དོན་དང་བཀའ་སུ་ཡང་མི་ཉན་པར། དཀྱུས། བྱམས་པའི་ཞགས་པས་འཁོར་བའི་རྒྱུད་འཛིན། ཞེས་པ་འཁོར་བའི་སེམས་ཅན་རྟ་རྒོད་དང་འདྲ་བ་ཐུགས་རྗེ་ཞགས་པ་དང་འདྲ་བས་བཟུང་ནས་བྱང་ཆུབ་ཀྱི་ལམ་དུ་འདྲེན་པར་མཛད་པས། བྱམས་པ་ཚད་མེད་པ་དང་སྦྱར་རོ། །རིན་ཆེན་ཕྱག་རྒྱས་སེམས་ཅན་རེ་འདོད་སྐོང་། །བྱ་བ། ལྷོ་ཕྱོགས་ན་སྐུ་དང་ཡེ་ཤེས་ཀྱི་བརྡ་དང་གར་གྱི་ཕྱག་རྒྱ་བསྒྱུར་ཞིང་ཡང་བསྒྱུར་བ། ཆེ་བའི་ཡོན་ཏན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བས་སེམས་ཅན་གྱི་རེ་འདོད་ཡིད་བཞིན་དུ་སྐོངས་པས་རིན་ཆེན་ཕྱག་རྒྱའི་ཏིང་ངེ་འཛིན་དང་སྦྱོར། དོན་དེ་ལྟ་བུ་དང་ལྡན་པས། ཡོན་ཏན་ཚོགས་རྫོགས་ཕག་གདོང་ཞགས་པ་མ། །ཞེས་བྱ་སྟེ། ལྷོ་ཕྱོགས་ཡོན་ཏན་གྱི་སྒོ་ནས་བཞུགས་པར་སྣང་ངོ་། །གཞན་གྱི་དོན་དུ་སྤྱོད་པས་བདག་གི་དོན། །ཞེས་བྱ་སྟེ། དོན་རྗེས་སུ་སྤྱོད་པ་དང་སྦྱར་ཏེ། ལྕགས་སྒྲོག་བསྣམས་པ་ནི་གཞན་གྱི་དོན་མཐར་ཕྱིན་པའི་རྟགས་སུ་ལྕགས་སྒྲོག་ལེའུ་ཡང་གཅིག་ཏུ་བསྟན་ལ། བདག་དོན་ལྷུན་གྱིས་གྲུབ་པའི་རྟགས་སུའང་ལེའུ་གཅིག་ཏུ་བསྟན་ནོ། །ཤེས་རབ་སྒྲོན་མེས་མུན་པའི་སྡུག་བསྔལ་སེལ། །ཅེས་བྱ་སྟེ། འདི་ནི་སྣང་བ་མཐའ་ཡས་ཀྱི་སྤྲུལ་པ་ཡིན་ཏེ། སོ་སོར་རྟོག་པའི་ཤེས་རབ་ཀྱི་སྒྲོན་མེས་ཉོན་མོངས་པ་བསལ་ལོ། །དོན་དེ་གཉིས་མི་འགལ་བའི་རྟགས་སུ་ལུ་གུ་རྒྱུད་ཀྱིས་མདོ་འབྲེལ་བར་སྣང་ངོ་། །དོན་དེ་བས་ན། དོན་གཉིས་མི་འདའ་ལྷུན་གྲུབ་དགའ་བའི་མཆོག །ཅེས་བྱ་སྟེ། དགའ་བ་ཚད་མེད་པ་དང་སྦྱར་རོ། །ཀུན་མཁྱེན་མ་རིག་ནུབ་མཛད་ཉི་མའི་སྤྱན། །ཞེས་པ་ལྷག་མཐོང་ཞི་གནས་ཀྱི་སྤྱན་རྣམ་པར་དག་པས་གཟིགས་པས་མ་རིག་པའི་མུན་པ་བསལ་བའི་རྟགས་སུ་ནུབ་ཕྱོགས་ན་བཞུགས་པར་སྣང་ངོ་། །སྙན་པར་སྨྲ་བས་ཀུན་ཀྱང་བཀའ་བཞིན་བྱེད། ཅེས་པ་སྦྱིན་པ་གཏོང་བའི་ཚེ་གང་སྙམ་པར་སྨྲ་བ་དང་སྦྱར་རོ། །བཏང་སྙོམས་ཐབས་མཁས་ཐུགས་རྗེས་འགྲོ་དོན་མཛད། ཅེས་པ་བདག་ཏུ་འཛིན་པ་ཡོངས་སུ་བཏང་ནས་གཞན་གྱི་དོན་ལ་ཁོད་ལ་ཁོད་སྙོམས་པར་ཞུགས་པས་བཏང་སྙོམས་ཚད་མེད་པ་དང་སྦྱར་རོ། །ཕབ་ན་རྣམ་ཤེས་ཐལ་བའི་གཟུགས་ཀྱང་མཚོ། །ཞེས་པ་དོན་དེ་ལྟ་བུ་དང་ལྡན་པའི་ཐུགས་རྗེའི་བྱིན་རླབས་འགྲོ་བ་ལ་ཕབ་པས་རྣམ་པར་ཤེས་པ་ཐལ་བའི་གཟུགས་ཀྱང་འཚོ་བར་ནུས་པས། དཀྱུས། ཆོས་སྟོན་བག་ཆགས་བྱང་མཛད་དྲིལ་འཁྲོལ་མ། བྱ་བ། དྲིལ་བུའི་སྒྲ་ལ་བརྟེན་པའི་གསུང་རབ་ཀྱི་སྒྲ་འབྱུང་བ་སོ་སོའི་སྐད་དུ་ཆོས་སྒྲ་བསྒྲགས་པས་འགྲོ་བའི་ཉོན་མོངས་པའི་སྒྲིབ་པ་བག་ཆགས་བྱང་བར་མཛད། ཅེས་བྱ་སྟེ། བྱང་ན་བཞུགས་པར་བསྟན་ནོ། ༈ །ད་ནི་རྡོ་རྗེ་སྲིན་པོའི་ལྷ་རྒྱུད་བརྗོད་པར་བྱ་སྟེ། ཞེས་པ། ཆེ་མཆོག་ལ་གསུམ་སྟེ། མ་མོ་ལ་གཟིགས་པ། བདུད་རྩི་ལ་གཟིགས་པ། ཆོས་ཉིད་ལ་གཟིགས་པ་ཐ་མའོ། །ཡང་སྲིན་པོ་ལ་གསུམ་སྟེ། རྟོགས་པ་དོན་གྱི་རྡོ་རྗེ་སྲིན་པ ོ། འདུལ་བྱེད་དབང་གི་རྡོ་རྗེ་སྲིན་པོ། ཐུགས་རྗེ་ཐབས་ཀྱི་རྡོ་རྗེ་སྲིན་པོ་དང་གསུམ་མོ། །དང་པོ་ནི་དབྱིངས་དང་ཡེ་ཤེས་ལ་བྱ། གཉིས་པ་ནི་དྷ་ཤ་གྷྲི་བ་སྟེ། མགོ་དགུ་ཡོད་པའི་དབུས་མ་རྟའི་དབུ་ཡིན། གསུམ་པ་ནི་འགྲོ་བའི་ངོར་སྣང་བ་གསལ་བ་ཅིར་ཡང་སྣང་བ་ལ་བྱའོ། །བཅོ་བརྒྱད་ཁམས་ཞེས་པ། དབུ་དགུ་ལ་སྤྱན་ཉེར་བདུན་ཡོད་དེ། དབུ་མ་གསུམ་བོར་བས་སྤྱན་བཅོ་བརྒྱད་དོ། །དབང་པོ་དང་ཡུལ་དང་རྣམ་ཤེས་དྲུག་གསུམ་བཅོ་བརྒྱད་ཀྱི་ཁམས་ལ་གཟིགས་པས་ཁམས་ལ་གཟིགས་ཞེས་བྱའོ། །བཅོ་བརྒྱད་སྙན་གྱིས་དེ་དག་གི་སྡུག་བསྔལ་ཉམ་ཐག་པའི་སྐད་འབོད་འགྲོགས་གསན་པ་དང་། གསན་པ་དེ་ཐུགས་རྗེས་མི་བཟོད་པས། བཅོ་བརྒྱད་ཤངས་ནས་སྤྲུལ་བྱ་བ། དབུགས་ཀྱི་རྟ་ལ་སྲོག་གི་མི་ཞོན། བསམ་གྱིས་མི་ཁྱབ་པའི་སྒྲ་ཕྱུང་ནས་འགྲོ་བ་རྣམས་ཀྱིས་དོན་མཛད་པས་ཤེས་རབ་ཀྱི་ཤངས་ནས་སྤྲུལ་པ་འབྱུང་ཞེས་བྱའོ། །སྐུ་བཅོ་བརྒྱད་མི་མངའ་ན་ཡང་། སྐུའི་རྟགས་སུ་ཕྱག་བཅོ་བརྒྱད་ཀྱིས་ཁམས་བཅོ་བརྒྱད་འདུལ་བའི་ཞིང་དུ་དགོངས། ཐུགས་བཅོ་བརྒྱད་མི་མངའ་ན་ཡང་ཕྱག་བཅོ་བརྒྱད། ཐུགས་ཀྱི་སྤྲུལ་པ་ཕྱུང་ནས་སྟོང་ཁམས་གང་བའི་ཕྲིན་ལས་མཛད་དོ། །བཅོ་བརྒྱད་ལྗགས་ནི་ཟླ་གམ་གཞུང་སྲུངས་ཀྱིས་ཕྱེ་བ་བཅོ་བརྒྱད་ཀྱིས། ཏནྟྲ་སྡེ་བཅོ་བརྒྱད་དུ་འགྲོ་བ་ལ་བསད་པས། བཅོ་བརྒྱད་གསུང་རབ་འཆད། ཅེས་བྱའོ། །དེ་ལྟར་བཅོ་བརྒྱད་ཕྲག་དྲུག་གིས་སྤྲུལ་པ་ཁྲོ་བོ་བརྒྱ་རྩ་བརྒྱད་དུ་སྤྲུལ་ནས་སྟོང་ཁམས་འདུལ་བར་མཛད་པས། བརྒྱ་རྩ་བརྒྱད་ཀྱི་དགོངས་པ་བསམ་གྱིས་མི་ཁྱབ་ཅེས་བྱའོ། །ས་དགུ་ཐུགས་རྗེར་ཤར་མཛད་དབུ་དགུར་ལྡན། ཞེས་པ་ནི། ཁམས་གསུམ་ན་ས་དགུ་ཞིག་ཡོད་པ་ལས། གཟུགས་མེད་པའི་ཁམས་ན་མཆེད་བཞི་ལ་ས་བཞི། གཟུགས་ཀྱི་ཁམས་ན་བཏང་སྙོམས་དགའ་བདེ་རྟོགས་དཔྱོད་བཞི་ལ་ས་བཞི། འདོད་པའི་ཁམས་ན་འདོད་པའི་ཡོན་ཏན་རྣམ་པ་ལྔ་ལ་ས་གཅིག་སྟེ་དེ་དགུ་ལ་གནས་པའི་སེམས་ཅན་ཐམས་ཅད་ཀྱི་མགོན་མཛད་པས། དགུར་ལྡན་ཞེས་བྱའོ། །བརྗིད་གནོན་ཞབས་བརྒྱད་ཕྱོགས་མཚམས་ལྷ་བརྒྱད་གནོན། ཞེས་པ། ཞབས་བརྒྱད་ཀྱིས་ལྷ་བརྒྱད་གནོན་པ་ནི། ཆེ་བར་བསྟན་པ་དང་། གོ་བར་བསྒྲགས་པ་དང་། ང་རྒྱལ་ཟིལ་གྱིས་གནོན་པས། དཀྱུས། ཇི་ལྟར་རོལ་ཀྱང་སྤྱན་དགུ་དབྱིངས་མི་འགྱུར་བར་བྱ་བ། དེ་ཡན་ཆད་ཀྱིས་དཔལ་རཀྴ་ཧེ་རུ་ཀའི་ཡེ་ཤེས་ཀྱི་སྤྲུལ་པ་བསམ་གྱིས་མི་ཁྱབ་པས་འགྲོ་བའི་དོན་ཇི་ལྟར་སྣང་བར་མཛད་པ་དེ་དག་ཐམས་ཅད་དོན་དམ་པར་སྐྱེ་བ་མེད་པ་ཆོས་ཀྱི་དབྱིངས་ལས་མ་གཡོས་པའི་རྟགས་སུ། སྤྱན་དགུ་དབྱིངས་མི་འགྱུར་ཞེས་བྱ་སྟེ། སྤྱན་དབུས་མ་དགུ་ནི་ཞི་བའི་ཚུལ་དུ་གཟིགས་སོ། །འདུལ་བའི་དབང་དུ་བསྐལ་པའི་སྐུར་སྟོན། བྱ་བ་ལ། ཧེ་རུ་ཀ་བཞིའི་སྤྲུལ་པ་འབྱུང་བས། འབྱུང་བ་ཆེན་པོ་བཞིར་བྱིན་གྱིས་བརླབས་ནས། དེ་ཡང་བཛྲ་ཧེ་རུ་ཀའི་བསྐལ་པར་གྱུར་བས། རི་རབ་ཀྱི་འཇིག་རྟེན་གནོན་པས་འཇིགས་པ་དང་། རཏྣ་ཧེ་རུ་ཀའི་བསྐལ་པར་གྱུར་ཏེ་ཆུ་ཕྱག་ན་བསྣམས་པས་འཇིག་རྟེན་ཁམས་འཁྲུ་བར་བསྟན་པ་དང་། པདྨ་ཧེ་རུ་ཀའི་བསྐལ་པར་གྱུར་ནས་མེས་འཇིག་རྟེན་གྱི་ཁམས་བསྲེག་པར་བསྟན་པ་དང་། ཀརྨ་ཧེ་རུ་ཀའི་བསྐལ་པར་གྱུར་ནས་རླུང་གིས་འཇིག་རྟེན་གྱི་ཁམས་འཐོར་ཞིང་གཡེང་བར་བྱེད་པ་ནི་འདུལ་བའི་དབང་དུ་བསྐལ་པའི་སྐུལ་སྟོན། ཞེས་བྱའོ། །རྡོ་རྗེ་སྲིན་པོས་ཅིས་འདུལ་ཡིད་བཞིན་རྫོགས། བྱ་བ། དེ་ཡན་ཆད་ཀྱིས་ཡེ་ཤེས་ཀྱི་སྤྲུལ་པ་བསམ་གྱིས་མི་ཁྱབ་པས་འགྲོ་བའི་དོན་མཛད་པ་དེ་དག་ཀྱང་ཡིད་བཞིན་གྱིས་ནོར་བུ་རིན་པོ་ཆེ་ལྟར་སེམས་ཅན་གྱི་རེ་འདོད་སྐོངས་པས། ཡིད་བཞིན་རྫོགས་ཞེས་བྱའོ། །རྣམ་ཐར་གསུམ་ལས་སྐུ་གསུང་ཕྲིན་ལས་འབྱུང་། །ཞེས་པ། ཨེ་ཀ་ཙ་ཏི་ཞེས་བྱ་སྟེ། ཨེ་གྲུ་གསུམ་རྣམ་པར་ཐར་པའི་སྒོ་གསུམ་དང་ལྡན་ཏེ། སྐུ་སྟོང་པ་ཉིད་ཀྱི་རྣམ་པར་ཐར་པ་དང་། གསུང་སྨོན་པ་མེད་པའི་རྣམ་པར་ཐར་པ་དང་། ཐུགས་མཚན་མ་མེད་པའི་རྣམ་པར་ཐར་པ་དང་། དེ་གསུམ་དང་ལྡན་པ་ཨེ་ཞེས་བྱ་ལ། ཀ་ཞེས་བྱ་བ་ནི། རྣམ་པར་ཐར་པ་གསུམ་གྱི་ངང་ལས་སྐུ་གསུང་ཐུགས་གསུམ་གྱི་ཕྲིན་ལས་འབྱུང་སྟེ། ཕྲིན་ལས་རྣམ་པ་བཞིས་འགྲོ་བའི་དོན་མཛད་པ་ནི་ཀ་ཀརྨ་ཞེས་བྱ་སྟེ། ཕྲིན་ལས་ཕུན་སུམ་ཚོགས་པའོ། །ཙ་ཞེས་པ་ནི། དེ་ལྟར་ཕྲིན་ལས་ཕུན་སུམ་ཚོགས་པར་མཛད་ན་ཡང་། སྤྱོད་པ་རྣམ་པར་དག་པས་འདམ་སྐྱེས་ཀྱི་པདྨ་ལྟར་ཉེས་པའི་སྐྱོན་གྱིས་མ་གོས་པས། ཙ་ཙརྱ་ཞེས་བྱ་སྟེ་སྤྱོད་པ་ཕུན་སུམ་ཚོགས་པའོ། །ཏི་ཞེས་པ་ནི་མཛད་པའི་ཕྲིན་ལས་ཀྱི་བྱེ་བྲག་ཐམས་ཅད་མ་སྐྱེས་པ་ཆོས་ཉིད་ཀྱི་དབྱིངས་སུ་ཐིམ་པ་ལ་ཏི་ཞེས་བྱ་སྟེ། རྣམ་པར་ཐར་པ་གསུམ་ལས་སྐུ་གསུམ་ཕྲིན་ལས་འབྱུང་། སྤྱོད་པ་རྣམ་དག་སྨོན་ལམ་གྱིས་གཤེགས། །ཞེས་བྱའོ། །རལ་བསིག་སྤྲུལ་པས་འགྲོ་དོན་རྩེ་གཅིག་མཛད། །ཅེས་པས། རལ་པ་ཚར་གཅིག་ལ་སྐྲ་ཉག་མ་བསམ་གྱིས་མི་ཁྱབ་པ་འབྱུང་བ་དང་འདྲ་བར། ཨེ་ཀ་ཙ་ཏིའི་ཐུགས་རྗེ་ཡེ་ཤེས་རྩེ་གཅིག་གི་སྒོ་ནས་སྤྲུལ་པ་བསམ་གྱིས་མི་ཁྱབ་པས་འགྲོ་བའི་དོན་མཛད་པས། རྩ་བ་བླང་། བཅོ་བརྒྱད་སྟོང་པས་མཉེས་མཛད་ཛ་ཏི་མ། །ཞེས་བྱ་བ། དཔལ་རཀྴ་ཧེ་རུ་ཀའི་བཅོ་བརྒྱད་ཕྱག་གི་སྤྲུལ་པས་ཁྲོ་བོ་བརྒྱད་བརྒྱད་དུ་སྟོན་པས་འགྲོ་བ་འདུལ་བར་སྣང་སྟེ། དེ་ཡང་ཨེ་ཀ་ཛ་ཏི་སྟོང་པ་བཅོ་བརྒྱད་མི་དམིགས་པས་ཟིན་པས་མཚན་མའི་དབང་ཁར་མ་གྱུར་པས། དཀྱུས་བླང་། ༈ །འདི་ན་མར་ཁྲོ་བོ་བཅུ་ལ་དོན་ལྔ་ལྔ་ལྔ་བཅུ་ཐམ་པས་བསྟན་ཏེ། སྟོབས་བཅུ་དང་། གནོན་པ་བཅུ་དང་། ཤེས་པའི་སྐྱོན་སྤངས་པ་བཅུ་དང་། ཕ་རོལ་ཏུ་ཕྱིན་པ་བཅུ་དང་། དབང་བཅུ་དང་ལྔ་བཅུ་སྟེ་ལྔ་བཅུ་ཐམ་པའོ། །བརྗིད་པའི་སྟབས་ཀྱིས་ཀླུ་རྣམས་ཟིལ་གྱིས་གནོན། །ཞེས་པ། ཤིན་ཏུ་དཔའ་ཞིང་བརྗིད་པའི་སྟོབས་ཀྱིས་འགྱིང་ཞིང་ཟིལ་གྱིས་གནོན་ནོ། །གནོན་པ་བཅུ་ལས་ཀླུའི་རྒྱལ་པོ་གནན་པས་ཀླུ་ཐམས་ཅད་ཟིལ་གྱིས་གནོན་ཏེ། རྩ་བ་བླང་། ཉེས་པའི་སྐྱོན་སྤངས་པ་བཅུ་ལས་ནི། ཀླུ་ཐམས་ཅད་ནི་ངག་གི་ཕྲ་མ། ཞེས་པས་ངག་གི་ཕྲ་མ་དེ་སྦྱང་བའི་ཕྱིར་གདན་དུ་བཏིང་ནས་ཆོས་བཤད་པས། ངག་གི་ཕྲ་མ་དེའི་ཉེས་པ་དང་བྲལ་ནས་ངག་གི་དབང་ཕྱུག་ཆེན་པོ་དང་ལྡན་པས། ཕྲ་མའི་སྐྱོན་སྤང་ངག་གི་དབང་ཕྱུག་ཆེ། །ཞེས་སོ། །འབད་པ་མེད་པའི་བརྩོན་འགྲུས་ཤུགས་དང་ལྡན། ཞེས་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དག་སྦྱར་ཏེ། ཏིང་ངེ་འཛིན་དང་ཤེས་རབ་ཀྱི་སྒོ་ནས་འབད་རྩོལ་བྱས་པས། རྡུལ་ཙམ་ཡང་མེད་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པས། རྩ་བ་བླང་ངོ་། །ཆོས་ལ་དབང་མཛད་ཧ་ཡ་གྲཱྀ་ཝ་དཔལ། །ཅེས་པ་དབང་བཅུ་ལས་ནི་ཆོས་ལ་དབང་ངོ་། །མཚན་ཧ་ཡ་གྲཱྀ་ཝ་བྱ་བ་མིང་གི་ངེས་ཚིག་གོ། །འཇོ་ཚུལ་སྟོབས་ཀྱིས་དྲང་སྲོང་ཚར་གཅོད་གནོན་བྱ་བ། སྟོབས་བཅུ་ལས་འཇོ་ཚུལ་གྱི་སྟོབས་ཏེ། བུད་མེད་བྲོ་ཟུར་གནོན་པའི་ཚུལ་གྱིས་གནོན། གནོན་པ་བཅུ་ལས་དྲང་སྲོང་གི་རྒྱལ་པོ་མེ་ལྷ་ཨག་ནེ་གནོན་པས་དྲང་སྲོང་གི་འཁོར་ཐམས་ཅད་ཟིལ་གྱིས་གནོན་ནོ། །ཉེས་པའི་སྐྱོན་སྤངས་པ་བཅུ་ལས་ནི། དྲོང་གི་གདོན་འཁོར་ཐམས་ཅད་ནི། སེམས་མི་དགེ་བ་ལོག་པར་ལྟ་བ་ཤེས་ཆེ་བས་དེ་སྦྱང་བའི་ཕྱིར་གདན་དུ་བཏིང་ནས་ཆོས་བཤད་པས་ལོག་པར་ལྟ་བའི་ཉེས་པ་སྦྱངས་པས་ཐུགས་ཀྱི་དབང་ཕྱུག་ཆེན་པོ་དང་ལྡན་ནོ། །ཚུལ་ཁྲིམས་མཐར་ཕྱིན་དྲང་སྲོང་སྤྱོད་པ་ཆེ། །ཞེས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་སྦྱར་ཏེ། གདུག་རྩུབ་ཀྱི་སྒོ་ནས་འགྲོ་བའི་དོན་མཛད་ཀྱང་དོན་དམ་པར་ཆོས་ཉིད་ཀྱི་ངང་ལས་མི་གཡོ་བས་ལུས་ཀྱི་ཚུལ་ནི་མི་ཉམས། སེམས་ཀྱི་ཁྲིམས་ནི་མི་འདའ་བས། །ཚུལ་ཁྲིམས་མཐར་ཕྱིན་དྲང་སྲོང་སྤྱོད་པ་ཆེ། །བྱ་བ་ནི། ཁྲོ་བོ་ཆེན་པོ་མི་གཡོ་མགོན་པོ་ལུས་དྲང་སྲོང་གི་ཆ་བྱད་བྱས་ནས། དྲང་སྲོང་སྤྱོད་པས་མཐུན་པའི་ཐབས་ཀྱིས་འདུལ་བས་དྲང་སྲོང་སྤྱོད་པ་ཆེ། ཞེས་པ་དང་། སྐྱེ་ལ་དབང་མཛད་བྲན་ཚུལ་མི་གཡོ་མགོན། །ཞེས་པ་དབང་བཅུ་ལས་སྐྱེ་བ་ལ་དབང་བ། བྲན་ཚུལ་ཅེས་པ་ནི། དཔལ་རྣམ་པར་སྣང་མཛད་ཀྱི་དཔྲལ་བའི་དབྱེས་ནས་བྱུང་ལ་ཞལ་གྱི་བྲན་དུ་བཀའ་སྡོད་ལས་ཀྱི་ཁྲོ་བོ་མཛད་ལ། ཆོས་ཉིད་ཀྱི་ངང་ལས་མི་གཡོ་བར་འགྲོ་བའི་མགོན་མཛད་པས། སྐྱེ་ལ་དབང་མཛད་བྲན་ཚུལ་མི་གཡོ་མགོན། །ཞེས་བྱའོ། །ཤུགས་འཆང་སྟོབས་ཀྱིས་རླུང་ལྟར་ཚར་གཅོད། བྱ་བ། སྟོབས་བཅུ་ལས་ནི་གྱད་ཀྱིས་གདུང་མ་འདེགས་པའི་ཚུལ་ཤུགས་དང་ལྡན་པས་གནོན་ལ། གནོན་པ་བཅུ་ལས་ནི། རླུང་གི་རྒྱལ་པོ་བེ་ཅི་རམ་སྟོབས་ཀྱིས་གནོན་ལ། མནན་པས་རླུང་ལྷའི་གདོན་འཁོར་ཐམས་ཅད་ཟིལ་གྱིས་གནོན་ནོ། །ཉེས་པའི་སྐྱོན་སྤངས་པ་བཅུ་ལས་ནི་ངག་འཁྱལ་པའི་ཉེས་སྐྱོན་སྤང་བའི་ཕྱིར་ཞབས་ཀྱི་འོག་ཏུ་མནན་ནས་ཆོས་བཤད་པས་ངག་གི་འཁྱལ་པའི་སྐྱོན་སྤངས་པས་ངག་གི་དབང་ཕྱུག་ཆེ་དང་ལྡན་ནོ། །འདོད་པ་ཀུན་ལ་དབང་སྦྱིན་རྒྱལ་པོའི་ཚུལ། །ཅེས་པ་སྦྱིན་པའི་ཕ་རོལ་ཏུ་ཕྱིན་པ་དང་སྦྱར་ཏེ། སྦྱིན་པས་ཡང་རྒྱལ་པོ་འབངས་ལ་ཕབ་པས་རྩོལ་བའི་ཚུལ་དུ་རྩོལ་བས། རྩ་བ་བླང་། དབང་བཅུ་ལས་ནི་ཡོ་བྱད་ལ་དབང་བས། ཡོ་བྱད་དབང་མཛད་གཞན་གྱིས་མི་ཐུབ་རྒྱལ་པོ། ཞེས་བྱའོ། །འཚིར་བའི་སྟོབས་ཀྱིས་གནོད་སྦྱིན་ཟིལ་གྱིས་གནོན། །ཞེས་པ་སྟོབས་བཅུ་ལས་ནི། གནོད་སྦྱིན་བྱིས་པ་ཞེས་འགྲངས་པ་ལྟར་འདུག་པ་དེ་ཞོ་རྐྱལ་རྡོག་པས་བརྫིས་པ་ལྟར་གནོན་པས་བརྫིས་པའི་སྟོབས་ཞེས་བྱའོ། །གནོན་པ་བཅུ་དང་ལས་ནི། གནོད་སྦྱིན་གྱི་རྒྱལ་པོ་ཀུ་བེ་ར་མནན་པས། གནོད་སྦྱིན་གྱི་གདོན་འཁོར་ཐམས་ཅད་ཟིལ་གྱིས་གནོན་ནོ། །ངག་རྩུབ་སྐྱོན་སྤངས་ངག་གི་དབང་ཕྱུག་ཆེ། །ཞེས་པ། ཉེས་པའི་སྐྱོན་སྤངས་པ་བཅུ་ལས་ནི། ངག་རྩུབ་མོའི་ཉེས་པའི་སྐྱོན་སྤངས་ཏེ། གནོད་སྦྱིན་ཐམས་ཅད་ངག་རྩུབ་མོ་སྨྲས་ཏེ། དེ་སྦྱང་བའི་ཕྱིར་གདན་དུ་བཏིང་ནས་ཆོས་བཤད་པས་ངག་རྩུབ་མོའི་སྐྱོན་སྤངས་ཏེ། ངག་གི་དབང་ཕྱུག་ཆེན་པོ་དང་ལྡན་ནོ། །སྨོན་ལམ་མཐར་ཕྱིན་བདུད་འདུལ་ཐུགས་རྗེའི་རྩི། །ཞེས་པ། སྨོན་ལམ་གྱི་ཕ་རོལ་ཏུ་ཕྱིན་པ་ཏེ། སྨོན་ལམ་མཐར་ཕྱིན་པས་འགྲོ་བ་འདུལ་བ་དང་འདྲ་བར། ཐུགས་རྗེ་ཆེན་པོའི་རྩི་ལྟ་བུ། དཀྱུས། ལས་ལ་དབང་མཛད་བདུད་རྩི་ཀུནྡྷ་ལི། །ཞེས་པ་དབང་བཅུ་ལས་ནི། ལས་ལ་དབང་བ། ཁྲོ་བོ་འདིས་ནི་ལས་ཐམས་ཅད་བྱེད་པས་ཞེས་བྱ་སྟེ། རྩ་བ་བླང་། གནོན་པའི་སྟོབས་ཀྱིས་འབྱུང་བའི་ཚར་གཅོད་ཅིང་། ཞེས་ས་གནོན་པའི་སྟོབས་ཀྱིས་ནི་གྱད་ཀྱིས་མནན་པའི་སྟོབས་ཀྱིས་གནོན་ལ། གནོན་པ་བཅུ་ལས་ནི། འབྱུང་པོའི་རྒྱལ་པོ་དབང་ལྡན་མནན་པས། འབྱུང་པོའི་གདོན་འཁོར་ཐམས་ཅད་ཟིལ་གྱིས་གནོན་ནོ། །ཉེས་པའི་སྐྱོན་སྤངས་པ་བཅུ་ལས་ནི། འབྱུང་པོ་ཐམས་ཅད་ནི་གནོད་སེམས་ཆེ་བས་དེ་སྦྱང་བའི་ཕྱིར་འབྱུང་པོ་གནོན་ནས་ཆོས་བཤད་པས། གནོད་སེམས་ཀྱི་སྐྱོན་སྤངས་པས་ཐུགས་ཀྱི་དབང་ཕྱུག་ཆེན་པོ་དང་ལྡན་ནོ། །གཉེན་པོའི་སྟོབས་ཀྱིས་མི་མཐུན་གནོན་མཛད་ཅིང་། །ཞེས་པ། སྟོབས་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །ཁྲོ་བོ་ཆེན་པོ་གཞན་གྱིས་མི་ཐུབ་པ་ནི་མཐའ་གཉིས་གནོན་པའི་སྟོབས་དང་ལྡན་པས་མི་མཐུན་པའི་ཕྱོགས་ཐམས་ཅད་ཟིལ་གྱིས་གནོན་པས། སྨོན་ལམ་དབང་མཛད་འདམ་སྐྱེས་ཀུནྡྷ་ལི། ཞེས་བྱ་སྟེ། དབང་བཅུ་ལས་སྨོན་ལམ་ལ་དབང་ངོ་། །དྲེགས་པའི་སྟོབས་ཀྱིས་སྲིན་པོ་ཚར་གཅོད་ཅིང་། །ཞེས་པ་ནི། སྟོབས་བཅུ་ལས་ནི་བརྡེག་པའི་སྟོབས་ཀྱིས་གནོན་ལ། གནོན་པ་བཅུ་ལས་ནི་སྲིན་པོ་བདེན་བྲལ་གནོན་པའི་སྲིན་པོའི་གདོན་འཁོར་ཐམས་ཅད་ཟིལ་གྱིས་གནོན་ནོ། །ཉེས་པའི་སྐྱོན་སྤངས་ས་བཅུ་ལས་ནི། བདེན་དང་བྲལ་བ་རྫུན་དང་སྐྱོན་སེལ་བའི་ཞེས་པ། བདེན་པ་དང་བྲལ་བ་ནི་རྫུན་ཡིན་པས་རྫུན་སྦྱང་བའི་ཕྱིར་སྲིན་པོའི་རྒྱལ་པོ་མནར་ནས་རྫུན་གྱི་ཉེས་སྐྱོན་སྦྱངས་ནས་ངག་གི་དབང་ཕྱུག་ཆེན་པོ་དག་ལྡན་ནོ། །མཚན་མའི་སྟོབས་ཀྱིས་མཚན་མ་འདུལ་མཛད་པ། ཞེས་པ་ཐབས་ཀྱི་ཕ་རོལ་ཏུ་ཕྱིན་པ་དང་སྦྱར་ཏེ། ཁྲོ་བོ་ཆེན་པོ་དབྱུག་སྔོན་ཅན་གྱིས་གནོད་སྦྱིན་དབྱུག་ཐོ་ཅན་ལ་ཡེ་ཤེས་ཀྱི་དབྱུག་པ་བསྟན་ནས་བཏུལ་བས། མཚན་མའི་སྟོབས་ཀྱིས་མཚན་མ་འདུལ་མཛད་པ། ཞེས་པ་སྟེ། དབང་བཅུ་ལས་ནི་ཡེ་ཤེས་ལ་དབང་བའོ། །ཕྱག་ན་དབྱུག་པ་བསྣམས་ཤིང་སྐུ་མདོག་སྔོན་པོར་འདུག་པས་ནི་དབྱུག་སྔོན་ཅན་ནོ། །འདེགས་པའི་སྟོབས་ཀྱིས་ས་བདག་ཚར་གཅོད་ཅིང་། །ཞེས་པ། སྟོབས་བཅུ་ལས་ནི་གྱད་ཀྱི་སྟོབས་གདུང་འདེགས་པའི་ཚུལ་གྱིས་འདེགས་ལ། གནོན་པ་བཅུ་ལས་ནི། ས་བདག་གི་རྒྱལ་པོ་ཕག་གི་མགོ་ཅན་མནན་པས། ས་བདག་གི་གདོན་འཁོར་ཐམས་ཅད་ཟིལ་གྱིས་མནན་ནོ། །ཉེས་པའི་སྐྱོན་སྤངས་ས་བཅུ་ལས་ནི། ས་བདག་བརྣབ་སེམས་ཆེ་བས། ལུང་པ་ནི་བདག་གི་ཁོག་ཡིན་སྙམ། རི་ཟུར་ནི་བདག་གི་རྐང་ལག་ཡིན་སྙམ་མོ། །སེམས་ཅན་ཉོན་མོངས་པ་བརྣབ་སེམས་ཆེ་བས། །དེ་སྦྱང་བའི་ཕྱིར་ས་བདག་གི་རྒྱལ་པོ་མནན་ནས་ཆོས་བཤད་པས་བརྣབ་སེམས་ཀྱི་སྐྱོན་སྤངས་ནས་ཐུགས་རྗེའི་དབང་ཕྱུག་ཆེན་པོ་དང་ལྡན་ནོ། །ཕ་རོལ་ཏུ་ཕྱིན་པ་བཅུ་ལས་ནི། བཟོད་པ་ས་གཞི་ལྟ་བུའི་གཞིར་གྱུར། ཅེས་བྱ་སྟེ། ཆོས་ཉིད་ཟབ་མོའི་དོན་ལ་སྲན་ཚུགས་པའི་བཟོད་པ་ས་གཞི་དང་འདྲ་བར་སྙོམས་པས། བཟོད་པའི་ཕ་རོལ་ཏུ་ཕྱིན་པ་དང་སྦྱར་རོ། །དབང་བཅུ་ལས་ནི། རྫུ་འཕྲུལ་དབང་མཛད་སྟོབས་པོ་ཆེ། །ཞེས་བྱ་སྟེ་རྫུ་འཕྲུལ་ལ་དབང་ངོ་། །རོལ་པའི་སྟོབས་ཀྱིས་གཟའ་སྐར་ཚར་གཅོད་ཅིང་། ཞེས་པ། སྟོབས་བཅུ་ལས་ནི། ཁྲོ་ཞིང་གར་བྱེད་པའི་ཚུལ་གྱིས་གནོན་ལ། གནོན་པ་བཅུ་ལས་ནི། ཚངས་པ་དང་ཉི་ཟླ་མནན་པས། གཟའ་ཐམས་ཅད་ཟིལ་གྱིས་གནོན། ཉེས་པའི་སྐྱོན་སྤངས་ས་བཅུ་ལས་ནི། འདོད་ཆགས་སྐྱོན་སྤངས་སྐུ་ཡི་དབང་ཕྱུག་ཆེ། །ཞེས་བྱ་སྟེ། ཚངས་རིགས་ཀྱི་ལྷ་ནི་འདོད་ཆགས་ཆེ་བའི་དེ་སྦྱང་བའི་ཕྱིར་ཉི་ཟླ་འོག་ཏུ་བཅུག་ནས་ཆོས་བཤད་པས་འདོད་ཆགས་ཀྱི་སྐྱོན་སྤངས་པས། སྐུའི་དབང་ཕྱུག་ཆེན་པོ་དང་ལྡན་པར་གྱུར་ཏོ། །ཕ་རོལ་ཏུ་ཕྱིན་པ་བཅུ་ལས་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་དང་སྦྱར་ཏེ། ཡེ་ཤེས་མཐར་ཕྱིན་ཉི་ཟླའི་འོད་བཞིན་གསལ། །ཅེས་བྱ་སྟེ། ཡེ་ཤེས་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །དབང་བཅུ་ལས་ནི། སྐྱེ་བཞི་མོས་ལ་དབང་མཛད་ཧཱུྃ་ཀཱ་ར། ཞེས་བྱ་སྟེ། སྐྱེ་བ་བཞིར་སྐྱེས་པའི་སེམས་ཅན་ལ་ཇི་ལྟར་མོས་བཞིན་དུ་དབང་བསྒྱུར་བས། རྩ་བ་བླང་། བཟློག་པའི་སྟོབས་ཀྱིས་ལྷ་རྣམས་ཚར་གཅོད་ཅིང་། །ཞེས་པ། སྟོབས་བཅུ་ལས་ནི། བཟློག་པའི་སྟོབས་ཞེས་བྱ་སྟེ། འཐབ་མོའི་གཡུལ་བཟློག་པའི་སྟོབས་སུ་གནོན་ལ། གནོན་པ་བཅུ་ལས་ནི་ལྷའི་དབང་པོ་བརྒྱ་བྱིན་གནོན་པས་ལྷའི་གདོན་ཐམས་ཅད་ཟིལ་གྱིས་གནོན་ནོ། །ཉེས་པའི་སྐྱོན་སྤངས་ས་བཅུ་ལས་ནི། འདོད་ཁམས་ཀྱི་ལྷ་རྣམས་ལ་མ་བྱིན་པར་ལེན་པའི་སྐྱོན་ཡོད་པས་དེ་སྦྱོང་བའི་ཕྱིར་གདན་དུ་བཏིང་ནས་ཆོས་བཤད་པས་མ་བྱིན་ལེན་པ་སྦྱངས་ནས་སྐུའི་དབང་ཕྱུག་ཆེན་པོ་དང་ལྡན་པར་གྱུར་ཏོ། །ཕ་རོལ་ཏུ་ཕྱིན་པ་བཅུ་ལས་ནི། རབ་ཏུ་ཤེས་པས་ཤེས་རབ་མཐར་ཕྱིན་པ། །ཞེས་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །དབང་བཅུ་ལས་ནི་སེམས་ལ་དབང་མཛད་ཁྲོ་བོ་རྣམ་པར་རྒྱལ། །ཅེས་བྱའོ། །སྲོག་ཅེས་བྱ་བ་རླུང་དུ་བཤད། དྲན་པ་སྩོལ་བ་རླུང་གི་ཁམས་ཏེ། ཞེས་བྱ་སྟེ། སྲོག་ནི་དབུགས་ཡིན། དབུགས་ནི་རླུང་ཡིན། ཁྲོ་བོ་འདི་རླུང་ལ་དབང་མཛད་པས། སེམས་ལ་དབང་མཛད་ཅེས་བྱའོ། །འཇིགས་བྱེད་སྟོབས་ཀྱིས་འཆི་བདག་ཚར་གཅོད་ཅིང་། །ཞེས་པ། སྟོབས་བཅུ་ལས་ནི་དྲེགས་བྱེད་བསྔངས་ཚུལ། སྤྱན་དགུ་བསྒྲད་ཞལ་གདངས་ལྗགས་འདྲིལ་ཚེམས་གཙིགས་ནས་མནན་ནོ། །གནོན་པ་བཅུ་ལས། གཤིན་རྗེའི་རྒྱལ་པོ་ཞབས་ཀྱིས་གནོན་པས་གཤིན་རྗེའི་གདོན་ཚོགས་འཁོར་ཐམས་ཅད་ཟིལ་གྱིས་མནན་ནོ། །ཉེས་པའི་སྐྱོན་སྤངས་བཅུ་ལས་ནི། སྲོག་གཅོད་ཉེས་སྤངས་སྐུ་ཡི་དབང་ཕྱུག་ཆེ། །ཞེས་བྱ་སྟེ། གཤིན་རྗེ་ལ་ནི་སྲོག་གཅོད་པའི་སྐྱོན་ཡོད་པས་དེ་སྦྱང་བའི་ཕྱིར་གདན་དུ་བཏིང་ནས་ཆོས་བཤད་པས་སྐྱོན་དེ་སྤངས་ནས། སྐུའི་དབང་ཕྱུག་ཆེན་པོ་དང་ལྡན་ནོ། །ཕ་རོལ་ཏུ་ཕྱིན་པ་བཅུ་ལས། བསམ་འཛིན་སྐྱོན་སྤངས་བསམ་གཏན་ངང་ལ་གནས་། །ཞེས་བྱ་སྟེ། གཟུང་འཛིན་གཉིས་ཀྱི་སྐྱོན་སྤངས་ཏེ་ཡུལ་ཆོས་ཉིད་ལ་སེམས་ཡེ་ཤེས་ཀྱི་བརྟན་པ་བཅས་ནས། བསམ་གཏན་གྱི་ཕ་རོལ་ཏུ་ཕྱིན་པའོ། །དབང་བཅུ་ལས་ནི། ཚེ་ལ་དབང་བྱེད་འཇིགས་བྱེད་གཤིན་རྗེ་གཤེད། །ཅེས་བྱ་སྟེ། འཁོར་སྲིད་བཞུགས་པའི་ཚེ་ལ་དབང་ངོ་། །དྲག་བྱེད་བསྔགས་ཚུལ་གཤིན་རྗེ་གནོན་པས་གཤིན་རྗེའི་གཤེད། །ཅེས་བྱའོ། །ཡེ་ཤེས་ཐུགས་རྗེས་ཟིན་པ་མཐར་མི་འཆིང་། །ཞེས་པ་རིག་པའི་ཡེ་ཤེས་ལ་ཚད་མེད་པའི་སྙིང་རྗེས་ཟིན་པས་ན། མཐའ་གཉིས་ཀྱི་སྐྱོན་དང་བྲལ་ལ། ཐུགས་རྗེ་ཡེ་ཤེས་ཀྱིས་ཟིན་པས་ནི། འཁོར་བའི་སེམས་ཅན་ཐམས་ཅད་སྲིད་པའི་མཚོ་ལས་སྒྲོལ་བར་བྱེད་པས་ན། སྲིད་ལས་གྲོལ། ཞེས་བྱའོ། །གཉིས་པ་མི་གནས་མཐའ་བྲལ་དབུ་མ་བརྙེས། །ཞེས་པ་ནི། མཐའ་གཉིས་ལས་འདས་པ་ནི་དབུ་མ་དམིགས་སུ་མེད་པའི་གདེང་དུ་གྱུར་པས། དབུ་མ་བརྙེས། ཞེས་བྱའོ། །དོན་དེ་གསུམ་དང་ལྡན་པས་འདོད་པའི་རྒྱལ་པོ་མཛད་ལ་སེང་གེ། ཞེས་བྱའོ། །རིག་པའི་སྡེར་མོས་ཆོས་ཀྱི་དབྱིངས་ཉིད་འཛིན། །ཞེས་པ། རིག་པ་ཡེ་ཤེས་སྡེར་མོ་ལྕགས་ཀྱིས་ནི། ཆོས་ཉིད་ཀྱི་དོན་རྟོགས་པས་འཛིན་ལ། ཐུགས་རྗེ་ལྕགས་ཀྱུས་འགྲོ་བའི་དོན་མི་གཏོང་ཞེས་པ། ཐུགས་རྗེ་ལྕགས་ཀྱུས་འགྲོ་བ་སེམས་ཅན་ཐམས་ཅད་བྱང་ཆུབ་ཏུ་འདྲེན་པར་མཛད་ཅིང་མི་གཏོང་བས་མི་གཏོང་ཞེས་བྱའོ། །ཤེས་རབ་ཐབས་ཀྱི་ལྕགས་ཀྱུས་མཐའ་གཉིས་འཛིན། །ཞེས་པ་ཤེསརབ་ཀྱི་ལྕགས་ཀྱུས་ནི་མྱ་ངན་ལས་འདས་པས་མཐའ་འཛིན་ལ། ཐབས་ཐུགས་རྗེའི་ལྕགས་ཀྱུས་ནི་འཁོར་བའི་མཐའ་འཛིན་པས། མཐའ་གཉིས་འཛིན་ཞེས་བྱ། དོན་དེ་གསུམ་དང་ལྡན་པས་ཁྲོ་བོ་མཉེས་པར་མཛད་པས། གཙོ་བོ་དབྱུག་སྔོན་མཉེས་པར་མཛད་པས་ཏྲ་ཏྲི་རུ་ཞེས་བྱའོ། །ཡེ་ཤེས་མཚན་སྡུད་ཐུགས་རྗེས་ཁྲོད་འབྱུང་ཞིང་། །ཞེས་པ་ནི་ཡེ་ཤེས་ཀྱི་དུར་ཁྲོད་ཆོས་ཀྱི་དབྱིངས་ཀྱི་ཡེ་ཤེས་ཀྱིས་མཚན་མའི་དངོས་པོ་ཐམས་ཅད་མ་སྐྱེས་པའི་དབྱིངས་སུ་འདུས་པས་ཐུགས་རྗེས་ཁྲོད་འབྱུང་བས། ཁྲོད་འབྱུང་ཞེས་བྱའོ། །སྤྲུལ་པས་སྒྲོལ་བས་སྐུ་དང་ཡེ་ཤེས་འཕྲོ། །ཞེས་པ་ནི། སྤྲུལ་པའི་དུར་ཁྲོད་དེ་སྤྲུལ་པའི་ཕྲིན་ལས་ཀྱིས་འགྲོ་བ་སྒྲོལ་བས་སྐུ་དང་ཡེ་ཤེས་ཀྱི་ཁྲོད་འབྱུང་བས། ཁྲོད་འབྱུང་ཞེས་བྱའོ། །ཤེས་སྙིང་མ་སྐྱེས་དབུ་མའི་རིགས་པ་སྐྱེས་ཞེས་པ་ནི། ཤེས་རབ་ཀྱིས་མཚན་མ་དབྱིངས་སུ་སྡུད་པ་ལྟར་སྣང་བ་དང་སྙིང་རྗེས་སེམས་ཅན་གྱི་དོན་བྱེད་པ་ལྟར་སྣང་བ་གཉིས་ཀ་མ་སྐྱེས་པ་ཆོས་ཀྱི་དབྱིངས་སུ་འདུས་པས་དབུ་མའི་རིག་པ་སྐྱེས་ཞེས་བྱའོ། །དོན་དེ་གསུམ་དང་ལྡན་པས་གཤིན་རྗེ་གཤེད་མཉེས་པར་མཛད་པས། སྟ་ན་སྟེ་ཁྲོ་རྒྱལ་གཤིན་རྗེ་མཉེས་ཞེས་བྱའོ། །དབྱིངས་སུ་མཚན་མ་ཤེས་རབ་ཐོ་བས་བརྡུངས། །ཞེས་པས། སྐྱེ་བ་མེད་པའི་ཆོས་ཉིད་གཏུན་ཁུང་དུ་མཚན་མའི་བག་ཆགས་ཤེས་རབ་ཀྱི་ཐོ་བས་བརྡུངས་པས་མཚན་མ་མེད་པའི་དབྱིངས་སུ་བཅོམ་པས་དབྱིངས་དང་ཡེ་ཤེས་སུ་གཏུན། ཞེས་བྱའོ། །ཐུགས་རྗེའི་ཕྲིན་ལས་སེམས་ཅན་མཚན་མ་བཅོམ། ཞེས་ཐུགས་རྗེའི་གཏུན་ཁུང་དུ། ཕྲིན་ལས་ཀྱི་ཐོ་བས་སེམས་ཅན་གྱི་ཉོན་མོངས་པ་བཅོམ་པས་ཐུགས་རྗེའི་ཕྲིན་ལས་ཀྱི་གཏུན་ཞེས་བྱའོ། །དབུ་མར་ཡེ་ཤེས་སྙིང་རྗེས་མི་རྟོག་པར། །ཅེས་པས་དབུ་མའི་གཏུན་ཁུང་དུ་སྙིང་རྗེར་སྣང་བ་ཉིད་མི་རྟོག་པའི་ཐོ་བས་བརྡུངས་པས། དབུ་མ་ཆེན་པོ་དམིགས་སུ་མེད་པའི་ངང་དུ་གྱུར་ཏེ། དོན་དེ་གསུམ་དང་ལྡན་པས། མི་གཡོ་མགོན་པོ་མཉེས་མཛད་མུ་ཧ་ལ། །ཞེས་བྱའོ། །རྡོ་རྗེ་གཏུམ་མོས་མཚན་མའི་དངོས་པོ་བཅོམ། །ཞེས་པ་ནི། ཡང་དག་པའི་ཡེ་ཤེས་རྡོ་རྗེ་ལྟ་བུས་ཤེས་བྱའི་སྒྲིབ་པ་ཆ་ཕྲ་བའི་ཕྲ་བ་ཡང་བཅོམ་པས་རྡོ་རྗེ་གཏུམ་མོ་ཞེས་བྱའོ། །ཐུགས་རྗེ་རྔམ་ཚུལ་སྲིད་པ་ཐལ་བར་རློག །ཅེས་པ། ཡེ་ཤེས་ལས་ཐུགས་རྗེ་འབྱུང་། ཐུགས་རྗེ་ལས་དྲག་པོའི་ཕྲིན་ལས་བྱུང་ནས་སྲིད་པ་གསུམ་གྱི་ཉོན་མོངས་པ་རྡུལ་དུ་རློག་པས། ཐུགས་རྗེ་གཏུམ་མོ་ཞེས་བྱའོ། །གཉིས་ལ་མི་གནས་མཐའ་བྲལ་དབུ་མ་རིགས། །ཞེས་བྱ་བ་ནི། ཡེ་ཤེས་དང་ཐུགས་རྗེའི་ཕྲིན་ལས་ཀྱི་དོན་མཛད་པ་ཉིད་སྣང་ཡང་དེ་ཉིད་ངང་ལ་མི་གནས་ཤིང་མི་དམིགས་པས་མཐའ་གཉིས་སྤངས་ཏེ་དབུ་མ་ཆེན་པོའི་ངང་དུ་གྱུར་པས། དབུ་མས་བསྡིགས་ཞེས་བྱའོ། །དོན་དེ་གསུམ་དང་ལྡན་པའི་མཛད་པས་ཧ་ཡ་གྲཱི་ཝ་མཉེས་པར་མཛད་པས། ཧ་ཡ་གྲྀ་ཝ་མཉེས་མཛད་ཛ་ཡ་ཏི་ཞེས་བྱའོ། །ཕྲ་མོར་འབིགས་པའི་ཡེ་ཤེས་དབྱིངས་སུ་འཕེན། །ཞེས་པ། ཡེ་ཤེས་ཀྱི་མདའ་ཡིན་ཏེ། སྐྱེ་བ་མེད་པ་ཆོས་ཀྱི་དབྱིངས་ཏེ་ཤིན་ཏུ་ཕྲ་ཞིང་རྟོགས་པར་དཀའ་བས་དོན་དེ་རྟོགས་པར་བྱ་བའི་ཕྱིར་ཡང་དག་པའི་ཡེ་ཤེས་ཀྱི་མདའ་འཕེན་ལ། དེ་རྟོགས་པའི་སྒོ་ནས་ཐུགས་རྗེའི་ཕྲིན་ལས་ཀྱི་མདའ་ཡིས་གནད་དུ་བརྡེག་པས། འབིགས་པས་ཡེ་ཤེས་གནད་དུ་ཐུགས་རྗེས་བརྡེག །ཅེས་བྱ། མ་འཁྱོགས་དབུ་མ་ཆེན་པོའི་དོན་རྟོགས་པས། །ཞེས་པ་ནི་དབུ་མ་ཆེན་མོ་ནི་མདའ་ཡིན་ཏེ་མཐའ་གཉིས་ཀྱི་སྐྱོན་སྤངས་ནས་དབུ་མ་ཆེན་པོ་དམིགས་སུ་མེད་པའི་དབྱིངས་སུ་འཕེན་པས་དབུ་མའི་མདའོ། །དོན་དེ་གསུམ་དང་ལྡན་པས་གཞན་གྱིས་མི་ཐུབ་པ་མཉེས་པར་མཛད་པས། གཞན་གྱིས་མི་ཐུབ་མཉེས་མཛད་ཤ་ཡ་ཏི། །ཞེས་བྱའོ། །མཚན་མ་མེད་པའི་དབྱིངས་ཐོས་རིག་པའི་སྒྲ། །ཞེས་པ་དབྱིངས་རིག་པ་ལ་ཉན་པའི་སྒྲ་ཡིན་ཏེ། ཡེ་ཤེས་ཀྱི་སྒྲ་ཡིན་ལ་མཚན་མ་མེད་པར་གྲགས་པས་རིག་པའི་སྒྲ་ཞེས་བྱ་ལ། དབྱིངས་ཉིད་ཡེ་ཤེས་ཉིད་ལ་ཉན་པའི་སྒྲ། །ཞེས་པ། དབྱིངས་རྟོགས་པར་བྱ་བའི་ཕྱིར་རིག་པ་དབྱིངས་ལ་མ ཉན་པས། རིག་པ་དབྱིངས་ལ་ཉན་ཞེས་བྱའོ། །དེ་ལ་བསྟན་པ་གསུང་གི་སྒྲ་འབྱིན། ཞེས་པ། དབྱིངས་དང་ཡེ་ཤེས་གཉིས་སུ་མེད་པའི་ངང་ལས་བསྟན་པ་གསུང་རབས་ཀྱི་སྒྲ་བྱུང་ནས་འགྲོ་བ་སོ་སོའི་སྐད་དུ་ཆོས་བསྒྲགས་པས། བསྟན་པ་གསུང་རབ་ཀྱི་སྒྲ་ཞེས་བྱ་སྟེ། དོན་དེ་གསུམ་དང་ལྡན་པས་བདུད་རྩི་འཁྱིལ་པས་བདུད་རྩི་འཁྱིལ་པ་ཤ་བྱ་ཡ་ཏི་མཉེས། ཞེས་བྱའོ། །བདག་ཏུ་རྟོག་པའི་མཚན་མ་ཀུན་བཅོམ་ནས། །ཞེས་པ་བདག་ཏུ་རྟོག་པ་སེམས་ཡིན། ལོག་པར་ལྟ་བ་ཡུལ་ཡིན། དེ་ལྟར་གཟུང་འཛིན་རྣམ་པ་གཉིས་ཀྱི་སྒྲིབ་པ་བཅོམ་པས་བཅོམ་ཞེས་བྱའོ། །ཟ་བྱེད་མཆེ་བས་སྐྱེ་ཤི་རྩད་གཅོད་དེ། ཞེས་པ་ནི། མཆེད་པའི་ཡེ་ཤེས་བཞི་ལས་ཡེ་ཤེས་ཀྱི་ཕྲིན་ལས་རྣམ་པ་བཞི་བྱུང་ནས་སེམས་ཅན་སྲིད་པར་འཁོར་བའི་སྐྱེ་ཤི་རྩད་གཅོད་པས་གཅད་ཅེས་བྱའོ། །སྐུ་དང་ཡེ་ཤེས་མ་སྐྱེས་མི་དམིགས་བྱ་བའི་ཡེ་ཤེས་ཀྱི་སྤྲུལ་པས་གཟུང་འཛིན་གྱི་སྒྲིབ་པ་སྤོང་བ་དང་། ཟ་བྱེད་ཆོས་ཀྱི་སྤྲུལ་པས་སྐྱེ་ཤི་རྩད་གཅོད་པར་སྣང་བ་དེ་གཉིས་སྐུ་ནི་མ་སྐྱེས་པ། ཡེ་ཤེས་མི་དམིགས་པས། མ་སྐྱེས་མི་དམིགས་ཞེས་བྱའོ། །དོན་དེ་གསུམ་དང་ལྡན་པས། པདྨ་འཁྱིལ་བས་མཉེས་མཛད་མ་ར་ན་ཞེས་བྱའོ། །ཐུགས་དམ་དབང་གིས་རྣམ་དག་དབྱིངས་ནས་བསྐུལ། །ཅེས་པ། སྐུལ་བྱེད་ལྕགས་སྒྲོག་མ་སྟེ། ཡེ་ཤེས་ཀྱི་ལྕགས་ཀྱུས་གཙོ་བོའི་ཐུགས་དམ་གྱི་དབྱིངས་ནས་ཆེ་བའི་ཡོན་ཏན་གྱི་ཕྲིན་ལས་འགྲོ་བའི་དོན་ལ་བསྐུལ་བས་དབྱིངས་ནས་བསྐུལ་ཅེས་བྱའོ། །ཐུགས་རྗེའི་ཤུགས་ཀྱིས་འགྲོ་བ་གནས་ནས་འདྲེན། །ཞེས་བྱ་སྟེ། ཐུགས་རྗེ་ཆེན་པོའི་ལྕགས་ཀྱུས་ཁམས་གསུམ་འཁོར་བའི་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཏུ་འདྲེན་པས་འདྲེན་བྱེད་ཅེས་བྱ་བ། གཉིས་མེད་མཆོད་བསྐུལ་དབུ་མའི་དགྱེས་པ་སྟོབས། ཞེས་པ། གཡས་ཐབས་ཀྱི་ལྕགས་ཀྱུ་ཤེས་རབ་ཡུམ་གྱི་མཁའ་ལ་བསྐུལ་ལ། གཡོན་ཤེས་རབ་ཀྱི་ལྕགས་ཀྱུས་ཐབས་ཡབ་ཀྱི་མཁའ་ལ་བསྐུམ་ནས་ཡབ་ཡུམ་གཉིས་སུ་མེད་པའི་དགྱེས་པའི་མཆོད་པ་དབུ་མ་དམིགས་སུ་མེད་པའི་དབྱིངས་སུ་སྟོབས་ལ། དགྱེས་སྟོབས་ལ། ཞེས་བྱའོ། །དོན་དེ་གསུམ་དང་ལྡན་པས། མ་ཧཱ་བ་ལ་མཉེས་མཛད་ཙུནྡ་མ། །ཞེས་བྱའོ། །སྐྱེད་པའི་ཡེ་ཤེས་ས་རྣམས་དུས་གཅིག་གཅོད། །ཅེས་པ། ཡེ་ཤེས་རླུང་ཡིན་པས། བྱང་ཆུབ་སེམས་དཔའ་ས་བཅུ་རིམ་གྱིས་བགྲོད་ནས་བསྐལ་པ་བགྲངས་པ་མ་ཡིན་གྱི། ཡང་དག་པའི་ཡེ་ཤེས་ཀྱི་རླུང་གིས་ས་བཅུ་དུས་གཅིག་ཏུ་བགྲོད་ནས་སངས་རྒྱས་ཀྱི་ས་ནོན་པས། དུས་གཅིག་གཅོད་ཅེས་བྱའོ། །ཐུགས་རྗེ་ཤུགས་ཀྱིས་འགྲོ་བ་གནས་ནས་འདྲེན། །ཞེས་པ། སྨོན་ལམ་གྱི་དབང་གིས་སྐྱེ་འགྲོའི་སེམས་སྐལ་བར་ཁད་ཀྱིས་སྦྱངས་པ་མ་ཡིན་གྱིས། ཐུགས་རྗེ་ཆེན་པོའི་རླུང་གི་ཤུགས་ཀྱིས་ཁམས་གསུམ་འཁོར་བའི་གནས་ནས་དུས་གཅིག་ཏུ་སོང་བས། གནས་ནས་སྤོར་ཞེས་བྱའོ། །ཐབས་དང་ཤེས་རབ་སྐྱོད་པས་མཐའ་གཉིས་སྤོང་། །ཞེས་པ་ནི། ཐབས་ཀྱི་རླུང་གིས་འཁོར་བའི་མཐའ་སྐྱོད་ཅིང་སྤོང་ལ། ཤེས་རབ་ཀྱི་རླུང་གིས་མྱ་ངན་ལས་འདས་པ་སྤང་ངོ་། །དོན་དེ་གསུམ་དང་ལྡན་པས། མ་བ་ཡ་ཏི་ཁམས་གསུམ་ཧཱུྃ་མཛད་མཉེས། ཞེས་བྱའོ། །ཁྲོ་བོ་ཁྲོ་མོའི་རྟོག་པ་རང་ཉིད་ཀྱིས་བཤད་པའོ། ༈ །སྡུག་བསྔལ་ཐུགས་རྗེས་མི་བཟོད་ཕྲིན་ལས་དཔལ། །ཞེས་པ་རྣམ་པར་རྒྱལ་བའི་སྤྲུལ་པ་ཟ་བྱེད་སྟག་གི་མགོ་ཅན་ལ་བྱ་སྟེ། དཔེར་ན་བུ་སྨད་ཀྱི་སྟེང་དུ་དགྲ་བྱུང་ན་ཁྱོས་མི་བཟོད་པ་དང་འདྲ་བར། ཁམས་གསུམ་གྱི་ཉོན་མོངས་པའི་དགྲས་ཉེན་ཞིང་སྡུག་བསྔལ་ཉམས་སུ་མྱོང་བ་ལ། དེ་བཞིན་གཤེགས་པའི་ཐུགས་རྗེས་མི་བཟོད་པས། ཡེ་ཤེས་རིགས་ཀྱི་དཔའ་བ་སྟེ། ཐུགས་རྗེ་ཆེན་པོ་ཅི་ལ་ཡང་ཐོགས་པ་མེད་པར་སྒོམ་པ་ཡིས་གཉེན་པོར་གྱུར་པས་དཔའ་བ་ཞེས་བྱའོ། །སྟག་གཟན་ལ་བབ་ཙམ་ན་ཤིན་ཏུ་མྱུར་བའི་བརྩོན་འགྲུས་ཀྱིས་བརྟུར་བ་དང་འདྲ་བར་ཐུགས་རྗེ་ཤུགས་ཀྱིས་བརྟུར་ཏེ་བཏང་སྙོམས་དང་ལེ་ལོ་མི་མཛད་པར་ཤིན་ཏུ་བརྟུར་པའི་བརྩོན་འགྲུས་ཀྱིས་མཛད་པས། ཡལ་བར་མི་གཏོང་བརྩོན་འགྲུས་ཤུགས་ཀྱིས་བརྟུར་ཞེས་བྱའོ། །ཕྲིན་ལས་ཀྱིས་ཟ་བ་ནི་སྟག་གི་གཟན་རྙེད་ནས་ཟ་བའི་དུས་སུ་ཤ་དང་རུས་པ་མེད་པར་མགོ་ནས་གཞུག་ཏུ་བཅམ་འཆོམས་བྱེད་པ་དང་འདྲ་བར། ཐུགས་རྗེའི་ཕྲིན་ལས་ཀྱིས་འགྲོ་བའི་དོན་མཛད་པའི་དུས་ན་བག་ཆགས་མཐུག་སྲབ་མི་འདམ་པར་འགྲོ་བའི་དོན་མཐར་ཕྱིན་པར་མཛད་པས། གདོད་ནས་དོན་མཛད་འཁོར་བའི་མཐའ་གཏུགས་སྒྲོལ། །ཅེས་བྱའོ། །དོན་དེ་གསུམ་དང་ལྡན་པས་དེའི་ཕྱིར། དཔའ་གཏུམ་ཟ་བྱེད་བྱ་ཀྲི་མ། །ཞེས་བྱའོ། །སྡང་མིག་ཐུགས་རྗེས་མི་འགྱུར་ཞེ་ལ་གནོན། ཞེས་པ་དབྱུག་པ་སྔོན་པོ་དང་། སྡེར་མོ་ཅན་གྱི་སྤྲུལ་པ་སྟེ་གཡག་གི་མགོ་ཅན་ལ་བྱ་སྟེ། དཔེར་ན་གཡག་ཆེན་པོའང་མིག་སྡང་མིག་ཏུ་བསྒྲད་ཅིང་ཞེ་ལ་གནོན་པ་དང་འདྲ་བར། དཔལ་ཆེན་པོས་ཀྱང་བདུད་དང་དྲེགས་བྱེད་ལ་སྤྱན་སྡང་མིག་ཏུ་བཟློག་ནས་ཉོན་མོངས་པ་ཞེ་ལ་གནོན་པར་མཛད་པས། མི་འགྱུར་ཞེ་ལ་གནོན། ཞེས་བྱའོ། །མཐུ་རྩལ་ཅེས་པ། གཡག་མཐུ་རྩལ་ཆེ་ཞིང་ཤིན་ཏུ་བརྗིད་པས་འགྱིང་ཞིང་ཀུན་ལ་ཉམ་ང་བ་མེད་པ་དང་འདྲ་བར། དཔལ་ཆེན་པོའི་ཡེ་ཤེས་ཀྱི་རྩལ་དང་། ཐུགས་རྗེའི་མཐུས་བདུད་ཀྱི་དཔུང་ཐམས་ཅད་ཤག་གིས་བྲལ་ནས་ཉོན་མོངས་པ་ཐམས་ཅད་འཇོམས་པར་བྱེད་པས་ལྡོག་པ་ཞེས་བྱའོ། །ཚམ་རྔམ་རལ་གསིགས་གདངས་ངར་འཇིག་རྟེན་འགེངས། །ཞེས་པ། གཡག་ཆེན་པོ་ཚམ་རྔམ་གྱི་རལ་པ་བསིགས་ནས་སྐད་ཀྱི་གདངས་ངར་གྱིས་ཐམས་ཅད་ཀླད་པ་འགེམས་པ་དང་འདྲ་བར། དཔལ་ཆེན་པོས་ཀྱང་སྐུ་ཡི་ཚམ་རྔམ་དང་། གསུང་གི་གདངས་ངར་དང་། ཐུགས་ཀྱི་སྤྲུལ་པས་འཇིག་རྟེན་གྱི་ཁམས་བཀང་ནས་འགྲོ་བ་འདུལ་བར་མཛད་པས་འཇིག་རྟེན་འགེངས། ཞེས་བྱའོ། །གཡག་ཆེན་པོ་ཕ་རོལ་ཏུ་ཞུགས་ནས་ཕྱིར་མི་བཟློག་ཅིང་འགྱུར་བ་མེད་པ་དང་འདྲ་བར། དཔལ་ཆེན་པོའི་ཐུགས་རྗེས་འགྲོ་བའི་དོན་མཛད་པ་དེ་ནི་ཅིས་ཀྱང་འགྱུར་བ་མེད་པར་འགྲོ་བའི་དོན་མཛད་དེ། དོན་དེ་གསུམ་དུ་ལྡན་པས། དེའི་ཕྱིར་ཕྲ་མེན་འགྱུར་མེད་ཙ་པ་ར། །ཞེས་བྱའོ། །རྟོག་པའི་དྲྭ་སྤངས་དྲན་པའི་སྒོ་ནས་འཇུག །ཅེས་པ་འདི་ཁྲོ་བོ་གཤིན་རྗེ་གཤེད་དང་། ཡུམ་དུར་ཁྲོད་བདག་མོའི་སྤྲུལ་པ་ཡིན་ཏེ། ཤ་བ་ནི་དགྲ་སྤངས་ནས་དགོན་པ་ན་གནས་པ་དང་འདྲ་བར། དེ་བཞིན་གཤེགས་པས་ཀྱང་འཁྲུལ་རྟོག་གི་དགྲ་སྤངས་ནས་དྲན་པའི་དགོན་པ་ན་གནས་པས། དགོན་པར་གནས་ཞེས་བྱའོ། །འཁྲུལ་ཅེས་པ་ཤ་བ་ནི་རྫི་རྣོ་བ་སྟེ། ལ་ཕར་རྒྱབ་ནས་མི་ཡོང་ན་རྫིས་ཚོར་ནས་རི་གསེབ་ཏུ་འབྲོས་པ་དང་འདྲ་བར། འཁྲུལ་པའི་རྣམ་པར་རྟོག་པའི་དགྲ་ཤེས་བཞིན་གྱི་རྫིས་ཚོར་ནས་སྤངས་པས། འཁྲུལ་རྟོག་དྲི་མ་ཤེས་བཞིན་རྫིས་ཚོར་སྤོང་། །ཞེས་བྱའོ། །ཤ་བ་འཇུག་པའི་དུས་ན་ཡུ་མོ་མང་པོ་རི་སྐམ་དུ་བཀར་ནས་ཆུ་ལ་འབབ་ཙམ་ན་ཡང་ཆུ་འཐུང་བའི་བར་དུ་མུ་ནས་དུས་གཅིག་འཇུག་པ་དང་འདྲ་བར། འགྲོ་དོན་དུས་ལ་བབ་ཙམ་ན། ཐུགས་རྗེས་འཇུག་ཅེས་བྱའོ། །དོན་དེ་གསུམ་དང་ལྡན་པའི་ཕྱིར་ན། དེའི་ཕྱིར་ཕྲ་མེན་འཇུག་བྱེད་ཧ་ར་ནི། ཞེས་བྱའོ། །ཆོས་ཉིད་གནས་ལམ་རྟོག་པའི་སྐྱོན་སེལ་ཞིང་། །ཞེས་པ་མི་གཡོ་མགོན་པོ་དང་། གཏུན་ཁུང་མ་གཉིས་ཀྱི་སྤྲུལ་པའི་ཕྲ་མེན་མ་གཟིག་གི་མགོ་ཅན་ཏེ། གཟིག་གི་ཚང་སེལ་དེ་ཚང་རྫི་ན་མ་ཐམས་ཅད་སྒོར་འབྱིན་ཅིང་སེལ་བ་དང་འདྲ་བར། ཆོས་ཀྱི་དབྱིངས་ཀྱི་ལམ་དུ་མཚན་མའི་རྣམ་པར་རྟོག་པའི་སྐྱོན་སེལ་བ་ཡིན་པས། སྐྱོན་སེལ་ཅེས་བྱའོ། །གཟིག་སྤུ་རིགས་མང་སྟེ་དཀར་སེར་དམར་ནག་བཞི་ཀ་ཡོད་པ་དང་འདྲ་བར། ཐུགས་རྗེ་སྤྲུལ་པ་བསམ་གྱིས་མི་ཁྱབ་པས་ཕྲིན་ལས་རྣམ་པ་བཞིའི་སྒོ་ནས་འགྲོ་བ་སེམས་ཅན་གྱི་དོན་མཛད་པས། ཐུགས་རྗེ་སྤུ་རིགས་སྤྲུལ་པ་བསམ་མི་ཁྱབ། །ཅེས་བྱའོ། །གཟིག་ཤ་ཁྲག་རློན་པ་ཟ་བ་དང་འདྲ་བར། རྒྱུ་དུག་གསུམ་ནི་སྦྱངས་ལ། འབྲས་བུ་ལུས་ངག་ཡིད་གསུམ་ནི་བསྒྲལ། རྐྱེན་ཤ་ཁྲག་རུས་པ་གསུམ་ལ་རོལ་བས། དུགས་གསུམ་མི་སྤོང་ཤ་ཁྲག་རུས་ལ་རོལ། །ཅེས་བྱའོ། །དོན་དེ་གསུམ་དང་ལྡན་པས། སེལ་བྱེད་སྤྲུལ་པས་དོན་མཛད་བྱ་ཧ་ར་མ། ཞེས་བྱའོ། །ཡང་བག་ཟོན་ཆགས་འགྲོ་དོན་ཐབས་མཁས་ལྡན། །ཞེས་པ། ཧ་ཡ་གྲཱྀ་ཝ་དང་གཏུམ་མོ་གཉིས་ཀྱི་སྤྲུལ་པ་བྱི་ལའི་མགོ་ཅན་ལ་བྱའོ། །དཔེར་ན་བྱི་ལ་ནི་བག་ཆེ་ཞིང་ཟོན་ཆགས་པ་དང་འདྲ་བར། ཐུགས་རྗེ་ཐབས་ལ་མཁས་པའི་བྱེ་བྲག་གིས། འགྲོ་བའི་དོན་མཛད་པའི་ཐབས་ལ་མཁས་པས། ཐབས་མཁས་ལྡན་ཞེས་བྱའོ། །བྱི་ལ་ཡང་བྱི་བ་ཁུང་ནས་མ་བྱུང་བར་དུ་ནོགས་ཐུབ་པར་སྡོད་པ་དང་འདྲ་བར། ཐུགས་རྗེ་ཐབས་ལ་མཁས་པའི་བྱེ་བྲག་འགྲོ་དོན་དུས་ལ་མ་བབས་ཀྱི་བར་དུ་ཐུགས་རྗེ་ཆེན་པོ་བཏང་སྙོམས་སུ་བཞུགས་ལ། བྱི་བ་ཁུང་ནས་འཇུར་གྱིས་བྱུང་ཙམ་ན་བྱི་ལ་ཡིས་ཕན་གྱིས་མཆོང་ནས་ཚིར་གྱིས་འཛིན་པ་དང་བར། ཐུགས་རྗེའི་དུས་ལ་བབ་ཙམ་ན་བཏང་སྙོམས་མི་མཛད་པར་ཤིན་ཏུ་མྱུར་བའི་བརྩོན་འགྲུས་ཀྱིས་མཛད་པས། མི་འདུལ་ཟིན་ཐུབ་བཏང་སྙོམས་ཆེན་པོར་བཞུགས། །ཞེས་བྱའོ། །དོན་དེ་གསུམ་དང་ལྡན་པའི་ཕྱིར་མཁས་བརྩོན་མཛད་པའི་ས་ཙ་ལ་ཞེས་བྱའོ། །ཡེ་ཤེས་དབྱིངས་ལ་འཇུག་པའི་ཤེས་བྱ་ཟ། །ཞེས་པ། གཞན་གྱིས་མི་ཐུབ་པ་དང་། མདའ་སྙེམ་མ་ཞེས་བྱ་བའི་སྤྲུལ་པ་སྤྱང་ཁུའི་མགོ་ཅན་ལ་བྱ་སྟེ། སྤྱང་ཀུས་ནི་ཤ་ལ་སྲེད་ཅིང་ཟ་འདོད་དེ། དེ་བཞིན་དུ་རིག་པའི་ཡེ་ཤེས་ཀྱིས་ཀྱང་ཆོས་ཀྱི་དབྱིངས་ཀྱི་དོན་རྟོགས་ཤིང་མོས་པར་འདོད་པས་ཤེས་བྱའི་བག་ཆགས་ལ། དབྱིངས་ཡེ་ཤེས་ལ་འཇུག་པའི་བག་ཆགས་ལ་ཟ། དབྱིངས་དང་ཡེ་ཤེས་གཉིས་སུ་མེད་པའི་ངང་ལས། སྤྲུལ་པའི་ཕྲ་མེན་གྱིས་འཁོར་བའི་སེམས་ཅན་ལ་ཟ་བས། དབྱིངས་དང་ཡེ་ཤེས་ལ་འཇུག་པས་ཉོན་མོངས་པ་ཟ་ལ། དབྱིངས་ཉིད་ཡེ་ཤེས་འཁོར་བའི་བག་ཆགས་ཟ། །ཞེས་བྱའོ། །དོན་དེ་གསུམ་དང་ལྡན་པས་དེའི་ཕྱིར་ཟ་བྱེད་སུ་ཀ་མུ་ཁ་མ། ཞེས་བྱའོ། །རིགས་བཙུན་གཉེན་པོར་གྱུར་པས་ཐམས་ཅད་འདུལ། ཅེས་པ་ཁྲོ་བོ་བདུད་རྩི་འཁྱིལ་པ་དང་འདྲ་བར། ཡེ་ཤེས་ཀྱི་རྩལ་གྱིས་ཉོན་མོངས་པ་ཐམས་ཅད་འཇོམས་པར་བྱེད་པས། ཉོན་མོངས་འཇོམས་ཞེས་བྱའོ། །ཕྲིན་ལས་རྩལ་གྱིས་བདུད་དཔུང་མ་ལུས་འཇོམས། །ཞེས་པ། དཔེར་ན་སེང་གེ་སྤྲིན་གསེབ་ཏུ་འབྲུག་ཀྱང་འཛིན་ནུས་པ་དང་འདྲ་བར། སྟོང་ཉིད་སྒྲ་བསྒྲགས་མུ་སྟེགས་ཁྱི་ཚོགས་འཇོམས་ཞེས་པས། སེང་གེ་སྒྲ་བསྒྲགས་པས་ནགས་ཚལ་ཁ་བཞི་ལ་གནས་པའི་གཅན་གཟན་ཕྲ་མོ་ཐམས་ཅད་བརྒྱལ་བ་དང་འདྲ་བར། ཆོས་ཉིད་སྟོང་པ་ཆེན་པོའི་སྒྲ་བསྒྲགས་པས་མུ་སྟེགས་ལ་སོགས་པ་ཁྱིའི་ཚོགས་དང་འདྲ་བ་འཇོམས་པར་བྱེད། དོན་དེ་གསུམ་དང་ལྡན་པའི་ཕྱིར། རྩ་མཆོག་སེང་གེ་མ། ཞེས་བྱའོ། །དབྱིངས་ལ་ཡེ་ཤེས་ཉལ་ཞིང་ཐུགས་རྗེ་སྨི། །ཞེས་པ། ཁྲོ་བོ་ལ་པདྨ་འཁྱིལ་པ་དང་། ཡུམ་གསོད་བྱེད་གཉིས་ཀྱི་སྤྲུལ་པ་དོམ་གྱི་མགོ་ཅན་ལ་བྱ་སྟེ། དཔེར་ན་དོམ་ཤིང་ཁུང་ན་ཉལ་བ་ལ་རྨི་ལམ་རྨིས་ཏེ་མཆོངས་འགྲོ་བ་དང་འདྲ་བར། རིག་པའི་ཡེ་ཤེས་ཆོས་ཀྱི་དབྱིངས་ན་ཉལ་ནས་འགྲོ་བའི་དོན་ལ་ཐུགས་རྗེ་རྨི་བས་རྨི་ཞེས་བྱའོ། །མཐིང་ནག་གཅེར་བུ་དྲག་པོའི་སྐུར་སྟོན། ཞེས་པ། ཐུགས་རྗེ་དྲག་པོའི་ཕྲིན་ལས་དྲག་པོས་འགྲོ་བའི་དོན་མཛད་པའི་རྟགས་སུ་སྐུ་མདོག་མཐིང་ནག་ཏུ་སྟོན། ཐུགས་མཆོག་རྣམ་དག་ཡེ་ཤེས་དབྱིངས་སུ་མཁྱེན། །ཞེས། དོམ་མཐིང་ནག་ཏུ་འདུག་ཀྱང་སྙིང་གའི་ཐིག་ལེ་དཀར་པོ་ཡོད་པ་དང་འདྲ་བར། ཐུགས་རྗེ་དྲག་པོས་འགྲོ་བའི་དོན་མཛད་ཀྱང་། །དོན་དམ་པར་ཆོས་ཉིད་དབྱིངས་ལས་མ་གཡོས་པའི་རྟགས་སུ། རྣམ་དག་དབྱིངས་སུ་མཁྱེན། །ཞེས་བྱའོ། །དོན་དེ་གསུམ་དང་ལྡན་པས་དེའི་ཕྱིར་ཕྲ་མེན་རྨོངས་བྱེད་རིག་ཤ་མ། ཞེས་བྱའོ། །ཡེ་ཤེས་ཐུགས་རྗེའི་སྟོབས་ཀྱིས་རྨི་བྱེད་གནོན། །ཞེས་པ། མ་ཧཱ་བ་ལ་དང་ཙུནྡ་མུ་ནེ་གཉིས་ཀྱི་སྤྲུལ་པ་དྲེད་ཀྱི་མགོ་ཅན་ཡིན་ཏེ། ཡེ་ཤེས་སྟོབས་ཀྱིས་ནི་མྱ་ངན་ལས་འདས་པའི་མཐའ་གནོན་ལ། ཐུགས་རྗེའི་སྟོབས་ཀྱིས་ནི་འཁོར་མཐའ་གནོན་པས། མཐའ་གཉིས་གནོན། ཞེས་བྱའོ། །ཚམ་རྔམ་རལ་གསིགས་སྤྲུགས་པས་བདུད་དཔུང་འཇོམས། །ཞེས་པ། དྲེད་མོས་རལ་པ་གསིགས་ནས་ཚམ་རྔམ་བྱས་པས་ཀུན་འཇིགས་པ་དང་འདྲ་བར། ཐུགས་རྗེ་སྤྲུལ་པའི་ཕྲིན་ལས་ཀྱི་དྲག་ཤུལ་གྱི་ཚམ་རྔམ་གྱི་དྲེགས་བྱེད་ཐམས་ཅད་ཟིལ་གྱིས་གནོན་ཅིང་འཇོམས་པར་བྱེད་པས། བདུད་དཔུང་འཇོམས་པར་བྱེད། །ཅེས་བྱའོ། །ལས་སུ་ཅི་མཛད་བརྩོན་འགྲུས་སྟོབས་དང་ལྡན། །ཞེས་པ། དྲེད་མོ་ནི་སྟོབས་ཆེ་བས་ཐ ང་ཤིང་རྩ་ལྷོགས་སུ་བྱེད་ལ། ཕ་ཝཾ་གྱང་འགྲིལ་བ་དང་འདྲ་བར་ཡེ་ཤེས་ཀྱི་སྟོབས་ཀྱིས་ཐུགས་རྗེ་ཆེན་པོའི་བརྩོན་འགྲུས་ཀྱི་ཤུགས་དང་ལྡན་པས་འགྲོ་བའི་དོན་མཛད་པས་ན། བརྩོན་འགྲུས་སྟོབས་ཀྱིས་ཕ་རོལ་འཇོམས། །ཞེས་བྱའོ། །དོན་དེ་གསུམ་དང་ལྡན་པས། དེའི་ཕྱིར་ཕྲ་མེན་སྟོབས་ལྡན། ཞེས་བྱའོ། །ལྷག་མཐོང་ཞི་གནས་ཆོས་ཉིད་རླན་གྱིས་བརྒྱལ། །ཅེས་པ། ཁྲོ་བོ་ཧཱུྃ་ཀཱ་ར་དང་རླུང་སྒྲ་འབྱིན་མའི་སྤྲུལ་པ་ཕག་གི་མགོ་ཅན་ཡིན་ཏེ། དཔེར་ན་ཕག་ནི་མི་གཙང་བ་ལ་སྲེད་པས་རྟག་ཏུ་མྱོས་ཤིང་བརྒྱལ་བ་དང་འདྲ་བར། ལྷག་མཐོང་རིག་པའི་ཡེ་ཤེས་ཀྱི་དབྱིངས་ལ་འཇུག་པའི་དུས་ན་ཞི་གནས་རྣམ་པར་མི་རྟོག་པའི་ཏིང་ངེ་འཛིན་གྱི་རླན་གྱིས་ཟིན་པས་བརྒྱལ་ཅེས་བྱའོ། །འཁོར་བ་ཐུགས་རྗེའི་སྨོན་ལམ་སྟོབས་ཀྱིས་མྱོས། །ཞེས་པ། དཔེ་ན་ཕག་ནི་ཟས་ལ་བཟང་ངན་གཙང་དམེ་མི་འབྱེད་པ་ལྟར་ཐུགས་རྗེ་ཆེན་པོའི་སྟོབས་དང་སྨོན་ལམ་གྱིས་དབང་གིས། འཁོར་བ་སེམས་ཅན་གྱི་དོན་མཛད་པས། སྨོན་ལམ་སྟོབས་ཀྱིས་མྱོས་ཞེས་བྱའོ། །རྟོག་འཇོམས་རྫས་ལ་གཙང་དམེ་མེད་པར་རོལ། །ཅེས་བྱ་བ། ཕག་གིས་ཟས་ལ་བཟང་ངན་དུ་མི་འབྱེད་པ་དང་འདྲ་བར་ཉོན་མོངས་པའི་རྟོག་པ་གཞོམ་པའི་ཕྱིར། ཉོན་མོངས་པ་དུག་གསུམ་དང་དུག་ལྔ་དང་། སྨན་རྣམ་པ་ལྔ་ལ་སོགས་པ་རོལ་པའོ། །དོན་དེ་གསུམ་དང་ལྡན་པ་དེས་ཕྲ་མེན་མྱོས་བྱེད་ཀུ་ཀུ་ར་ཞེས་བྱའོ། །དེས་ན་ཕྲ་མེན་མ་བཅུ་བསྟན་ཏེ། འདུ་བྱེད་ལྔ་བཅུ་རྩ་གཅིག་ནས་གྱུར་པ་ལ་བྱ་སྟེ། དེ་ལ་འདུ་བྱེད་ལྔ་བཅུ་རྩ་གཅིག་ལ། ཉི་ཤུ་ཉེ་བའི་ཉོན་མོངས་པ་དང་། རྩ་བའི་ཉོན་མོངས་པ་དྲུག་སྟེ། བཅུ་གཅིག་དགེ་བ་དང་། ལྔ་ཡུལ་སོ་སོར་ངེས་པ་དང་། ལྔ་ཀུན་ཏུ་འགྲོ་བ་དང་། བཞི་གཞན་དུ་འགྱུར་བ་སྟེ། ལྔ་བཅུ་རྩ་གཅིག་གོ། །དེ་ལ་གནས་གྱུར་པ་བཅུ་གཅིག་དགེ་བ་ལ་དད་པ་དང་། ཤེས་རབ་གཉིས་གནས་གྱུར་པ། ལྔ་ཡུལ་སོ་སོར་ངེས་པ་ལ་འདུན་པ་དང་། མོས་པ་གཉིས། ཏིང་ངེ་འཛིན་དང་དྲན་པ་གཉིས། དེ་བཞི་གནས་གྱུར། ལྔ་ཀུན་ཏུ་འགྲོ་བ་ལ་འདུ་བྱེད་སེམས་པ་དང་། ཡིད་ལ་བྱེད་པ་གཉིས། རེག་པ་གསུམ་གནས་གྱུར། བཞི་གཞན་དུ་གྱུར་པ་ལས། གཉིད་གནས་གྱུར་པ་དང་བཅས་དེ་ལ་བྱ་རྒོད་མགོ་ཅན་ནི་འདུ་བྱེད་སེམས་པ་དང་སྦྱར་ཏེ། དཔེར་ན་བྱ་རྒོད་རྨི་ལམ་རྣོ་བ་སྟེ། གཟན་གང་ན་འདུག་པའི་ས་དེ་རྨི་ལམ་དུ་རྨི་སྟེ་དེར་འགྲོ། བྱ་ཤ་ཟན་གཞན་མས་ཀྱང་གོད་ཡོད་པར་མངོན་ནས་དེའི་འགྲོ་ཕྱོགས་སུ་རྒྱུག་གོ། །རྒྱུག་ནས་གོད་ལ་ཟའོ། །བྱ་རྒོད་ཕྱི་མ་ལྷག་རོ་ལ་བབས་ནས་གོད་ལ་ཟའོ། །དཔེ་དེ་དང་འདྲ་བར་འདུ་བྱེད་ཀྱི་གནས་སྐབས་ན་ཡིད་ཀྱི་རྣམ་པར་ཤེས་པ་འདུ་བྱེད་ཀྱིས་ཕྱིའི་ཡུལ་ལ་བསྐུལ་ལ། ཡིད་ཀྱི་རྣམ་པར་ཤེས་པས་ཕྱིའི་ཡུལ་ལ་དཔྱད་ཙམ་ན། ངེས་པར་འཇོམས་པའི་ཡིད་ཀྱིས་གཏན་ལ་ཕེབས་ཏེ་གནས་གྱུར་པའི་དུས་ན། འདུ་ཤེས་སེམས་པ་ནི་ཡེ་ཤེས་སུ་གནས་གྱུར་ལ། ཡིད་ཀྱི་རྣམ་པར་ཤེས་པ་ཐུགས་རྗེར་གནས་གྱུརནས། ངེས་པར་འཇོམས་པའི་ཡིད་ནི་ཕྲིན་ལས་སུ་གནས་གྱུར་ལ། ཡེ་ཤེས་ཀྱིས་དང་པོར་འགྲོ་བའི་རྒྱུད་མཁྱེན་པའི་སྒོ་ནས་ཐུགས་རྗེས་མི་བཟོད་པར་འགྲོ་བ་ལ་གཡོ་བར་བྱེད་ལ། ཐུགས་རྗེ་གཡོ་བ་བཞིན་དུ་ཕྲིན་ལས་ཀྱིས་འགྲོ་བའི་དོན་མཛད་པ་ཉིད་ན། ཡེ་ཤེས་ཕྱི་མ་ཏིང་ཐོགས་སུ་བྱུང་ནས་བྱས་པ་རློམ་པ་ངར་མི་འཛིན། མཚན་མའི་དབང་ཁར་མི་གཏོང་བས་ངར་མི་འཛིན། དམིགས་པའི་ཡུལ་ལས་འདས་པའོ། །དེ་བས་ན་ཡིད་གཡོ་བའི་ལས་ཅན་པར་གྱུར་པས་ནི། ཡེ་ཤེས་དབང་གི་ཐུགས་རྗེས་འགྲོ་ལ་གཡོ། །དོན་མཛད་ཡེ་ཤེས་གོད་ཕྲེང་དབྱིངས་སུ་མཁྱེན། །ཞེས་པ། བྱ་རྒོད་སེམས་ཅན་གྱི་སྲོག་མི་གཅོད་ཅིང་གོད་ལ་འབྲངས་པ་ཚུལ་ཁྲིམས་སྲུང་བ་དང་འདྲ་བར། ཡེ་ཤེས་དང་ཐུགས་རྗེའི་ཕྲིན་ལས་ཀྱིས་འགྲོ་བའི་དོན་མཛད་ན་ཡང་། མཚན་མའི་སྐྱོན་གྱིས་མ་གོས་ཤིང་མཚན་མའི་དབང་ཁར་མ་གྱུར་པ་ལས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་སྦྱར་རོ། །དེ་བས་ན། ཚུལ་ཁྲིམས་ཆེན་མོ་ཀྲི་ཀྲི་མ། ཞེས་བྱའོ། །བསམ་པའི་དངོས་ལ་འདོད་པ་འདུན་པར་གྱུར་པ། ཞེས་པ་ནི་འདི་ནི་གཡག་གི་མགོ་ཅན་གྱི་ཟླ་བྱ་རོག་མགོ་ཅན་ཡིན་ཏེ། དཔེར་ན་བྱ་རོག་ནི་ལྟོ་ལ་ངན་པས་གཟན་མི་འདུ། གང་འདོད་པ་དེ་ལ་སེམས་ཀྱིས་མི་གཏོང་། དེ་དང་འདྲ་བར་འདུ་བྱེད་འདུན་པ་ནི་གང་སེམས་ཀྱི་འདོད་པ་དེ་ལ་འདོད་ཅིང་འདུན་པ་ལ་བྱ། དེ་གནས་གྱུར་པའི་དུས་ན་འཕགས་པའི་གནས་སྐབས་སུ། དབྱིངས་ཉིད་ཡེ་ཤེས་མཁྱེན་པས་ཟ་བྱེད། ཅེས་བྱ་སྟེ། དབྱིངས་དང་ཡེ་ཤེས་གཉིས་སུ་མེད་པར་གྱུར་ཙམ་ན་ཤེས་བྱའི་བག་ཆགས་ཟ་ལ། དེ་ལས་ཐུགས་རྗེས་འབྱུང་བས་ཐུགས་རྗེའི་མདུན་པས་མཚན་མའི་བག་ཆགས་ཟ་བས། མཚན་མའི་བག་ཆགས་ཟ་ཞེས་བྱའོ། །དེ་གསུམ་དང་ལྡན་བས་དེས། ཟ་བྱེད་ཕྲ་མེན་ཀྲོ་ན་ཀ །ཞེས་བྱའོ། །དམིགས་ལ་སེམས་འཛིན་ཡིད་ལ་བྱེད་པར་འགྱུར། ཞེས་པ། ཤ་བའི་མགོ་ཅན་གྱི་ཟླ་འུག་པའི་མགོ་ཅན་ལ་བྱ་སྟེ། དཔེར་ན་འུག་པ་ཉིན་མོ་ཚང་ན་ཉལ་ཞིང་ཇི་ལྟར་བྱ་བ་ཡིད་ལ་བྱེད་དོ། །དེ་དང་འདྲ་བར་འདུ་བྱེད་ཡིད་ལ་བྱེད་པ་ནི། བདག་ནུབ་མོ་ཉལ་ཙམ་ན་སང་གི་ཉོན་པར་གྱི་བྱ་བ་དེ་ནུབ་མོ་ཡིད་ལ་བྱེད་དེ། ཡིད་མ་བྱེད་ཅེས་བྱ། ཡེ་ཤེས་གཉིས་མེད་རྟོགས་པ་ཉོན་མོངས་ཉལ། །ཞེས་བྱ་སྟེ། རིག་པའི་ཡེ་ཤེས་ཉིད་ཀྱིས་ཆོས་ཉིད་ཀྱི་དབྱིངས་རྟོགས་པ་ལ། དབྱིངས་ལ་ཉལ་བ་དྲངས་ཞེས་བྱའོ། །འགྲོ་དོན་རྨོངས་ལ་ཐུགས་རྗེས་མཚན་མོ་དངས། །ཞེས་བྱ་སྟེ། ཡེ་ཤེས་ལ་ཐུགས་རྗེ་བྱུང་ནས་འགྲོ་བའི་དོན་མཛད་པ་མཚན་མོ་ལྡང་ཞེས་བྱའོ། །དོན་དེ་གསུམ་དང་ལྡན་པས། ཡེ་ཤེས་ཐུགས་རྗེས་དྲངས་པས་ཨུ་ལི་ཀ །ཞེས་བྱའོ། །རྟག་པའི་དངོས་པོ་རྩེ་གཅིག་ཏིང་ངེ་འཛིན་གྱུར་ཅེས་པ། གཟིག་གི་མགོ་ཅན་གྱི་ཟླ། ཁྭ་ཏའི་མགོ་ཅན་ལ་བྱ་སྟེ། ཁྭ་ཏ་ནི་གང་དྲན་པ་དེ་སེམས་ཀྱིས་མི་གཏོང་ཞིང་ཏིང་ངེ་འཛིན་དུ་སེམས་ལ། དེ་དང་འདྲ་བར་འདུ་བྱེད་ཏིང་ངེ་འཛིན་ནི། སེམས་ལ་བྱ་བའི་རྣམ་པ་ལ་གང་དྲན་པའི་ཏིང་ངེ་འཛིན་མི་ཤོར་ཞིང་འཛིན་ཏེ། གྱུར་པའི་དུས་ན་བརྟག་པར་བྱ་བའི་ཡུལ་ཆོས་ཉིད་ལ། རྟོགས་པར་བྱ་བའི་ཡེ་ཤེས་ཀྱིས་ཏིང་ངེ་འཛིན་ཅིང་མི་གཏོང་བས། ཏིང་ངེ་འཛིན་འགྱུར་ཞེས་བྱའོ། །མཉམ་ཉིད་མཐའ་བྲལ་དབྱིངས་ལས་མི་གཡོ། །ཞེས་པས། དེ་ལྟར་དབྱིངས་དང་ཡེ་ཤེས་གཉིས་སུ་མེད་པའི་དུས་ན། ཁྭ་ཏ་ལ་སྒྲིབ་ཤིང་ཡོད་པས་ཚང་མི་རྙེད་པ་དང་འདྲ་བར། མཐའ་གཉིས་ཀྱི་སྐྱོན་སྤངས་ནས་དབུ་མ་ཆེན་པོ་དམིགས་སུ་མེད་པར་གྱུར་ཙམ་ན། ཉན་ཐོས་དབྱིབས་འདྲ་བ་རྟོག་པའི་སྤྱོད་ཡུལ་དུ་མ་གྱུར་པས། རྟོག་པའི་སྤྱོད་ཡུལ་བྱིས་པས་མི་མི་མཐོང་ཞེས་བྱའོ། །དོན་དེ་གསུམ་དང་ལྡན་པས་དེའི་ཕྱིར་ཕྲ་མེན་མ་སྦེད་བྱེད་པ་ཡ་ཏ་ཞེས་བྱའོ། །ལས་འཕྲོ་ལྡན་ལ་ཡིད་ཆེས་དད་པས་འགྱུར། །ཞེས་པ་བྱི་ལའི་ཟླ་པུ་ཤུད་པ་བླ་སྟེ། པུ་ཤུད་ནི་གནམ་དྲང་པོར་འཕུར་བ་ལ་ཡང་མགྱོགས་པ་ཅི་བྱ་བ་ཡང་ཡིད་ཆེས་པར་བྱེད། དཔེ་དེ་དང་འདྲ་བར་འདུལ་བྱེད་དད་པ་ནི། བཅུ་གཅིག་གི་དགེ་བ་ལ་གནས་གྱུར་པ་ཡིན་ཏེ། དད་པ་ནི་ལས་དང་འབྲས་བུ་ལ་ཡིད་ཆེས་པ་ཡིན་ཏེ། ལས་དགེ་བ་སྤྱད་པས་འབྲས་བུ་མཐོ་རིས་སུ་སྐྱེ། མི་དགེ་བ་སྤྱད་པས་ངན་སོང་དུ་སྐྱེ་བར་ཡིད་ཆེས་ཏེ། ལས་དགེ་བ་སྤྱད་པས་འབྲས་བུ་བླ་ན་མེད་པའི་བྱང་ཆུབ་ཏུ་མགྱོགས་པས། མཉམ་ཉིད་དབྱིངས་སུ་ཡེ་ཤེས་ཤུགས་ཀྱིས་མགྱོགས། །ཞེས་བྱའོ། །ཞི་གནས་སྤྱན་རྩིས་ལྷག་མཐོང་གོད་ཚུགས་ཆུང་། །ཞེས་པ། པུ་ཤུད་ལ་མིག་རྩི་ཡོད་པ་ཕྲུ་གུ་ནུབ་མོ་མིག་ཁབ་ཀྱིས་བཅར་ཡང་ནངས་པར་སོས་པ་དང་འདྲ་བར། ལྷག་མཐོང་གསལ་བའི་ཤེས་རབ་ཀྱིས་ཆོས་ཉིད་ཀྱི་དོན་རྟོགས་པའི་དུས་ན་ཏིང་ངེ་འཛིན་གྱིས་ཟིན་པས། འགྲོ་ཚེགས་ཆུང་ཞེས་བྱའོ། །དོན་དེ་གསུམ་དང་ལྡན་པས་དེའི་ཕྱིར་ཕྲ་མེན་མགྱོགས་བྱེད་བག་ཤི་ཏ། ཞེས་བྱའོ། །ངེས་པའི་དངོས་པོར་འཛིན་སེམས་མོས་པར་འགྱུར། །ཅེས་པ། སྤྱང་ཁུའི་ཟླ་ཁྲ་ཡི་མགོ་ཅན་ལ་བྱ་སྟེ། ཁྲ་ནི་བྱ་བྱེའུ་ཟིན་པར་མོས་ལ་ཁྲས་བྱ་ཟིན་པ་ཡང་གཞན་གྱིས་མི་འཕྲོག་པ་དང་འདྲ་བར་འདུ་བྱེད་ཀྱི་དུས་ན་མོས་པ་ནི་གང་འདོད་པ་ལ་མོས་པས་མོས་པ་དེ་གནས་གྱུར་པའི་དུས་ན། ལྷག་མཐོང་ཡེ་ཤེས་དབྱིངས་སུ་གྱུར་པས་འཛིན་ཞེས་བྱ་སྟེ། ཡེ་ཤེས་དབྱིངས་ལ་ཞུགས་པའི་དུས་ན་སྐྱེ་བ་མེད་པའི་དོན་རྟོགས་པ་ལ་འཛིན་ཞེས་བྱའོ། །ཞི་གནས་གཅེས་པར་མི་འཛིན་མི་ཕྲོགས་ཏེ། ཞེས་པ་ལྷག་མཐོང་གི་ཤེས་རབ་ལ་ཞི་གནས་རྣམ་པར་མི་རྟོག་པའི་ཏིང་ངེ་འཛིན་གྱིས་ཟིན་པས་གཅེས་པར་འཛིན་ཞེས་བྱའོ། །དོན་དེ་གསུམ་དང་ལྡན་པས་དེའི་ཕྱིར་ཕྲ་མེན་འཛིན་མ་ཏི་ཏི་མ་ཞེས་བྱའོ། །འདྲེས་པའི་དངོས་པོ་མ་བརྗོད་དྲན་པར་འགྱུར། །ཞེས་པ། འདི་ནི་སེང་གེའི་མགོ་ཅན་གྱི་ཟླ་ཕ་ཝཾ་གི་མགོ་ཅན་ཡིན་ཏེ། དཔེར་ན་ཕ་ཝཾ་ནི་དྲན་པ་ཆེ་བས་ཅི་ཡང་ཤེས་དང་འདྲ་བར་འདུ་བྱེད་དྲན་པས་ཡིད་གཞུང་བཞིན་མི་བརྗེད་པ་ལ་བྱ་སྟེ། བདག་སྔོན་བྱིས་པ་ཙམ་ནས་བྱས་པ་ཡང་ད་ལྟ་དྲན། དེ་གནས་གྱུར་པའི་དུས་ན་ཡེ་ཤེས་དབྱིངས་ལ་འཇུག་པའི་ཚེ་སྐྱེ་བ་མེད་པའི་ཆོས་ཉིད་ཀྱི་དོན་མི་བརྗེད་པར་དྲན་པ་མཉམ་པ་ཉིད་མ་བརྗེད་པར་དྲན་ཞེས་བྱའོ། །ཏིང་འཛིན་འབུམ་ཕྲག་ལྷག་མཐོང་སོ་སོར་གསལ། ཅེས་པ། ཞི་གནས་རྣམ་པར་མི་རྟོག་པའི་ཏིང་ངེ་འཛིན་བསམ་ཡས་པ་ནམ་མཁའ་དང་འདྲ་བ་ལ། ལྷག་མཐོང་རིག་པའི་ཡེ་ཤེས་ཀྱི་སྤྲུལ་པ་བསམ་གྱིས་མི་ཁྱབ་པ་བྱུང་ནས་འགྲོ་བའི་དོན་མཛད་པས་གསལ། ཅེས་བྱའོ། །དེ་གསུམ་དང་ལྡན་པས་དེའི་ཕྱིར་ཕྲ་མེན་སྒྲོལ་མ་ཏི་ཞེས་བྱའོ། །ཆོས་རྣམས་འབྱེད་པའི་བྱེད་པར་གྱུར་པ་ནི། ཞེས་པ་དོམ་གྱི་མགོ་ཅན་གྱི་ཟླ་ཟེར་མོའི་མགོ་ཅན་ལ་བྱ་སྟེ། ཟེར་མོ་ནི་ཚོང་རྩི་བཟང་ངན་སེལ་བས་བཟང་པོ་ཕུགས་སུ་བཅུག་ནས། ངན་པ་སྒོར་སེལ་བར་བྱེད་པ་དང་འདྲ་བར། འདུ་བྱེད་ཤེས་རབ་ཀྱིས་ནི་ཆོས་རྣམས་འབྱེད་པར་བྱེད་པ་ནི། ཀུན་ནས་ཉོན་མོངས་པ་འོཁར་བའི་ཆོས་ནི་སྤོང་ཞིང་རྒྱབ་ཏུ་འདོར་ལ། རྣམ་པར་བྱང་བ་མྱ་ངན་ལས་འདས་པའི་ཆོས་ནི་དང་དུ་ལེན་པར་འབྱེད་བར་བྱེད་པས་འབྱེད་ཅེས་བྱའོ། །མཉམ་ཉིད་ངང་དུ་ལོག་ལྟ་སེལ་བར་བྱེད་ཅེས་པ། ཟེར་མོ་ཚང་སེལ་བ་དང་འདྲ་བར། སྐྱེ་བ་མེད་པའི་ཆོས་ཉིད་ཀྱི་དབྱིངས་སུ་ལོག་པར་ལྟ་བའི་ཉེས་པ་ཐམས་ཅད་སེལ་ཞིང་སྤོང་བར་བྱེད་པས། སེལ་བྱེད་ཅིང་ཞེས་བྱའོ། །རིག་པ་སྐྱེས་ཕྱིར་སེམས་ཉིད་ཐེ་ཚོམ་གཅོད། །ཅེས་པ། དེ་ལྟར་ལོག་པར་ལྟ་བའི་ཉེས་པ་སྤངས་ནས་ཡང་དག་པའི་དོན་ལ་ཞུགས་པའི་དུས་ན་རིག་པ་ཡེ་ཤེས་ཀྱི་རྩལ་འབྱུང་། ཤེས་རབ་ཀྱི་བོགས་སྐྱེས་ནས་སེམས་ཉིད། ཡིད་ཀྱི་ཐེ་ཚོམ་གཅོད་ནས་འཁོར་བའི་ཆོས་ཐམས་ཅད་མ་སྐྱེས་པའི་དབྱིངས་སུ་བཅད། དེའི་ཕྱིར་ཕྲ་མེན་གསོད་བྱེད་ན་ཀུ་ལ་ཞེས་བྱའོ། །འཇུག་པ་རང་དབང་མེད་པའི་གཉིད་གྱུར་པ། །ཞེས་པ། རྨིགས་པ་གཉིད་ཆེ་བ་དང་འདྲ་བར་འདུ་བྱེད་བཞིའི་གཞན་དུ་གྱུར་པ་དང་འདྲ་བར། གཉིད་ནི་རང་དབང་མེད་པར་དབང་པོ་སྒོ་ལྔ་ཁ་ནང་དུ་སྡུད་པ་ལ་བྱའོ། །དེ་གནས་གྱུར་པའི་དུས་ན། མཉམ་པ་ཉིད་ཀྱི་དབྱིངས་སུ་ལོག་ལྟ་མྱོས་བྱེད་ཅིང་། །ཞེས་པ། སྐྱེ་བ་མེད་པའི་ཆོས་ཉིད་ཀྱི་དབྱིངས་རྟོགས་པའི་དུས་ན། མཚན་མའི་རྣམ་པར་རྟོག་པ་དང་འཁོར་བའི་ཉོན་མོངས་པ་ཐམས་ཅད་མགོ་སྙོམས་པར་བྱེད་པས། མྱོས་བྱེད་ཅིང་། ཞེས་བྱའོ། །བསྟན་པའི་ཆོས་ལ་ལོག་ལྟ་མྱོས་བྱེད་ཅིང་། །ཞེས་པ། དེ་ལྟར་རྟོགས་པའི་སྒོ་ནས་བསྟན་པའི་ཆོས་བསྒྲགས་པས་འཁོར་བའི་ལོག་པར་ལྟ་བའི་ཉོན་མོངས་པ་ཐམས་ཅད་མྱོས་པར་བྱེད་པས། མྱོས་བྱེད་ཅིང་། ཞེས་བྱའོ། །དོན་དེ་གསུམ་དང་ལྡན་པས། དེའི་ཕྱིར་ཕྲ་མེན་མྱོས་བྱེད་འུ་ཤི་ཀ་ཞེས་བྱའོ། །གསུམ་འདུས་གཅོད་པའི་རེག་པར་གྱུར་པ་ནི། །ཞེས་པ། དྲེད་ཀྱི་མགོ་ཅན་གྱི་ཟླ་བྱི་བའི་མགོ་ཅན་ལ་སྦྱར་ཏེ། བྱི་བ་ནི་ཐང་ལ་གཟན་བཙལ་ཞིང་བྱི་ཁུང་དུ་འབྲོས་པ་དང་འདྲ་བར། འདུ་བྱེད་རེག་པ་ནི་དབང་པོ་དང་ཡུལ་དང་རྣམ་པར་ཤེས་པ་དང་གསུམ་འདུས་ནས་ཡུལ་ལ་སྤྱོད་པས་རེག་པ་ཞེས་བྱའོ། །དེ་གནས་གྱུར་པའི་དུས་ན་ཕྱག་རྒྱ་བཞིར་གྱུར་ཏེ། ཡན་ཆད་ཀྱི་རཀྴ་ཧེ་རུ་ཀའི་ལྷ་ཅི་བསྒོམ་པ་ཐམས་ཅད་ཀྱི་ཡབ་ཐམས་ཅད་ནི་གཙོ་བོ་སྐུའི་ཕྱག་རྒྱར་གྱུར་ལ། ཡུམ་ཐམས་ཅད་ནི་མི་འདའ་བ་དམ་ཚིག་གི་ཕྱག་རྒྱར་གྱུར། གཉིས་སུ་མེད་པར་མཉམ་པ་ནི་ཆོས་ཀྱི་ཕྱག་རྒྱར་གྱུར་ལ། ཡེ་ཤེས་ཀྱི་སྤྲུལ་པ་འབྱུང་བ་ཐམས་ཅད་ནི་འཕྲོ་འདུ་ལས་ཀྱི་ཕྱག་རྒྱར་གྱུར་ཏེ། ཕྱག་རྒྱ་བཞིས་ཐམས་ཅད་མ་སྐྱེས་པའི་དབྱིངས་སུ་འདུས་པས། ཕྲིན་ལས་བྱེ་བྲག་མང་པོ་ཅི་མཛད་ཀྱང་། ཕྱག་རྒྱ་བཞི་པོ་མ་སྐྱེས་དབྱིངས་སུ་འཕྲོ། །ཞེས་བྱའོ། །དོན་དེ་གསུམ་དང་ལྡན་པས་དེའི་ཕྱིར་འབྲོས་བྱེད་ཕྲ་མེན་ཀ་སེང་གེ་ཞེས་བྱའོ། །འཁོར་བའི་རྡོ་རྗེ་བརྗོད་པས་མྱ་ངན་འདས། །ཞེས་པ། ཁམས་གསུམ་འཁོར་བའི་ཉོན་མོངས་པ་ཐམས་ཅད་ནི་ཀུན་གཞི་ལ་ཉོན་མོངས་ཐམས་ཅད་ཞེན་ཅིང་ཀོ་འཐས་ནས་སྦྱངས་དཀའ་བ་ལ་འཁོར་བའི་རྡོ་རྗེ་ཞེས་བྱ་སྟེ། དེ་ཡང་ཡང་དག་པའི་ཡེ་ཤེས་ཆེན་པོས་འཁོར་བ་བདག་མེད་སྒྱུ་མའི་རང་བཞིན་དུ་མཁྱེན་པས། སྒྱུ་མའི་ཚུལ་དུ་སྐྱེ་འགྲོ་སྒྲོལ་བས་མྱ་ངན་འདས། །ཞེས་བྱའོ། །ཆོས་སྐུ་རྡོ་རྗེ་བརྗོད་པས་མཐའ་གཉིས་ལས་འདས། ཞེས་པ། ཆོས་འདུས་མ་བྱས་དུས་གསུམ་དུ་འགྱུར་བ་མེད་པ་དག་པའི་ཡེ་ཤེས་ཆེན་པོར་རྟོགས་ཤིང་ཐུགས་སུ་ཆུད་པའི་དུས་ན། ད་དུང་ཡང་ཛྙཱ་ན་གཉིས་སུ་མེད་པར་གྱུར་པས་རྟག་ཆད་ཀྱི་མཐའ་གཉིས་ལ་མི་གནས་ཏེ། མཐའ་གཉིས་སྤངས་ཞེས་བྱའོ། །དེ་ལྟར་འཁོར་བ་བདག་མེད་པ་སྒྱུ་མའི་རང་བཞིན་དུ་བསྒྲལ་བར་སྣང་བ་དང་། མཉམ་པ་ཆེན་པོའི་ངང་དུ་རྟོགས་ནས་མཐའ་གཉིས་སྤངས་པར་སྣང་བ་དེས་གང་ཡང་མི་རྟོག་ཅིང་། མི་རྟོགས་པ་དེ་ཙམ་ལ་ཡང་མི་དམིགས་པས། བརྗོད་མེད་བརྗོད་བྲལ་དོན་གྱི་ཚིག་དང་བྲལ། །ཅེས་བྱ་སྟེ། དོན་དེ་གསུམ་དང་ལྡན་པས། དེའི་ཕྱིར་བརྗོད་མེད་བཛྲ་པཱ་ཤ་མ། །ཞེས་བྱའོ། །ཆོས་ཉིད་རྡོ་རྗེས་མཚན་མའི་དངོས་པོ་བཅོམ། །ཞེས་བྱ་སྟེ། ཆོས་ཉིད་སྐྱེ་བ་མེད་པའི་དབྱིངས་སུ་རྡོ་རྗེ་ལྟར་གནས་པ་དང་། མཚན་མའི་རྣམ་པར་རྟོག་པ་མ་སྐྱེས་པས་ཆོས་ཉིད་དབྱིངས་སུ་འཇོམས་པར་བྱེད་པས་དངོས་པོ་བཅོམ། ཞེས་བྱའོ། །ཡེ་ཤེས་རྡོ་རྗེས་གཟུང་འཛིན་རྟོག་པ་བསྲེག །ཅེས་པ། ཡང་དག་པའི་ཡེ་ཤེས་རྡོ་རྗེ་ལྟར་གནས་པ་དེས་ཀྱང་གཟུང་འཛིན་གྱིས་རྣམ་པར་རྟོག་པ་ཐམས་ཅད་འཇོམས་ཤིང་བསྲེག་ཅིང་འཇོམས་པར་བྱེད་པས། གཟུང་འཛིན་རྟོག་པ་བསྲེག །ཅེས་བྱའོ། །ཕྱག་མཚན་རྡོ་རྗེས་དྲེགས་པའི་ལྷ་བདུད་བཅོམ། །ཞེས་བྱ་བ་ཕྱག་མཚན་རྡོ་རྗེས་ཀྱང་དྲེགས་པ་ཅན་གྱི་ལྷ་བདུད་མ་རུང་པ་ཐམས་ཅད་བཅོམ་ཞེས་བྱའོ། །དོན་དེ་གསུམ་དང་ལྡན་པས། དེའི་ཕྱིར་འཇོམས་བྱེད་བཛྲ་བེ་ར་བེ། །ཞེས་བྱའོ། །འཆི་མེད་བདུད་རྩི་ཡུལ་སེམས་གཉིས་སུ་མེད། །ཅེས་པས། འཆི་བ་མེད་པའི་བདུད་རྩི་ནི་སྐྱེ་བ་མེད་པའི་དོན་རྟོགས་པ་ཡིན་པས། དེ་ལྟར་རྟོགས་པའི་དུས་ན་ཕྱིའི་ཡུལ་ཆོས་ཀྱི་དབྱིངས་སུ་གྱུར་པ་ནི་སྐྱེ་བ་མེད་ལ། ནང་གི་སེམས་ཡེ་ཤེས་སུ་གྱུར་པའི་དུས་ན་འགག་པ་མེད་པས། ཡུལ་སེམས་སྐྱེས་འགག་མེད་ཅེས་བྱ་ལ། གྲུབ་པའི་བདུད་རྩིས་བསམ་པའི་འབྲས་བུ་ཐོབ། །ཅེས་བྱ། དེ་ལྟར་རྟོགས་པའི་དུས་ན་ཉོན་མོངས་པ་ལྔ་དང་། སྨད་པའི་རྫས་ལྔ་དང་། དང་དུ་བླངས་ནས་གྲུབ་པ་རྣམ་པ་བཞི་དང་ལྡན་པས་བསྒོམས་ནས་དང་དུ་བླངས་ཏེ་བསྒྲུབས་པས་སྐུ་གསུང་ཐུགས་ཀྱི་རོལ་པའི་དངོས་གྲུབ་ཐོབ་སྟེ། བསམ་པའི་འབྲས་བུ་ཐོབ་ཅེས་བྱའོ། །ཐུགས་རྗེ་རྩི་གཏོང་བདུད་རྩི་བླ་མེད་འབྲས་བུ་འགྲུབ། ཅེས་བྱ་བ། ཡང་དག་པའི་ཐུགས་རྗེ་ཆེན་པོས་འཁོར་བའི་སེམས་ཅན་བདུད་དང་འདྲ་བ་ལ། ཐུགས་རྗེ་ཆེན་པོའི་རྩིས་སླེབས་ཤིང་ཟིན་པས་བླ་ན་མེད་པའི་བྱང་ཆུབ་ཆེན་པོ་ཐོབ་ནས། དོན་དེ་གསུམ་དང་ལྡན་པས། རྩི་མཆོག་ཡེ་ཤེས་རྡོ་རྗེ་ཨ་མྲྀ་ཏ། །ཞེས་བྱའོ། །ཡེ་ཤེས་འཕྲོག་བྱེད་ཡོན་ཏན་རྒྱ་མཚོ་འགྲུབ། །ཅེས་པ་ཡང་དག་པའི་ཡེ་ཤེས་ཆེན་པོས་སྐྱེ་བ་མེད་པའི་ཆོས་ཉིད་ཀྱི་དོན་རྟོགས་པའི་དུས་ན། སྐྱེ་བ་མེད་པའི་དབྱིངས་དེ་ནས་ཆེ་བའི་ཡོན་ཏན་ཐམས་ཅད་འབྱུང་བའི་རྒྱུར་གྱུར་པས་ཡོན་ཏན་རྒྱ་མཚོ་འགྲུབ། ཅེས་བྱའོ། །ཐུགས་རྗེ་འཕྲོག་བྱེད་འཇིག་རྟེན་དབང་དུ་སྡུད། །ཅེས་བྱ། ཡེ་ཤེས་ལ་ཐུགས་རྗེ་བྱུང་ནས། ཐུགས་རྗེས་འཁོར་བའི་སེམས་ཅན་དབང་དུ་བསྡུས་ནས་དབྱིངས་སུ་བསྒྲལ་བ་ལ། འཕྲོག་བྱེད་དབང་དུ་སྡུད་ཅེས་བྱའོ། །ཡེ་ཤེས་ཐུགས་རྗེས་གཉིས་མེད་དབྱིངས་སུ་འུབ། །ཅེས་པ་ཡེ་ཤེས་ཀྱིས་ཆོས་ཀྱི་དབྱིངས་རྟོགས་པ་དང་། ཐུགས་རྗེས་སེམས་ཅན་གྱི་དོན་བྱས་པ་གཉིས་ཀ་མཐའ་གཉིས་ལས་འདས་ནས་དབུ་མ་ཆེན་པོ་དམིགས་སུ་མེད་པའི་ངང་དུ་གྱུར་པ་ལ། དབྱིངས་སུ་འུབ། ཅེས་བྱའོ། ༈ །ད་ནི་པདྨ་དབང་ཆེན་དང་དབང་ཕྱུག་མའི་ལྷ་རྒྱུད་བརྗོད་པར་བྱའོ། །བཅོ་ལྔའི་སྤྱན་གྱིས་རྒྱུད་ལྔའི་མི་དགེ་བ་བཅུ་ཞེས་པ། ལམ་རྒྱུད་ལྔའི་མ་ནུབ་ལ་མི་དགེ་བ་བཅུ་ཡོད་པས་དེ་དག་འདུལ་བའི་ཐབས་ཀྱི་བྱེ་བྲག་ལ་གཟིགས་པས་མི་དགེ་བ་བཅུ་ཞེས་བྱའོ། །ཡེ་ཤེས་ལྔ་ལྡན་སོ་སོ་རྩིས་འདུལ་མཁྱེན། །ཅེས་པ་སྤྱན་ལྔ་མཁྱེན་པའི་ཡེ་ཤེས་རྣམ་པ་ལྔ་དང་ལྡན་པས་དེ་དག་འདུལ་བའི་ཐབས་ཀྱི་བྱེ་བྲག་ལ་གཟིགས་སོ། །སྙན་བཅུས་མི་དགེ་བཅུ་ཡི་སྡུག་བསྔལ་གསན། །ཞེས་པ། ལམ་རྒྱུད་ལྔའི་སེམས་ཅན་ལ། མི་དགེ་བ་བཅུའི་སྡུག་བསྔལ་གྱི་དགྲས་ཉེན་ནས་སྨྲེ་སྔགས་འདོན་འོ་དོད་འབོད་པ་ལ་ཐུགས་རྗེས་མི་བཟོད་པ་དང་། གཞན་ཡང་འགྲོ་བ་རྒྱུད་ལྔའི་སེམས་ཅན་སོ་སོ་ནས་ཅི་ཞུ་བ་གསོལ་བ་གསན་པའི་སྒོ་ནས་སྙིང་རྗེས་མི་བཟོད་པས་ཤངས་ནས་སྙིང་རྗེའི་སྤྲུལ་པ་འབྱུང་བས། ཤངས་ནས་འབྱུང་རིགས་ལྔས་སྤྲུལ་པ་འཕྲོ། ཞེས་བྱ་སྟེ། ཤངས་ནས་སྤྲུལ་པ་འབྱུང་བ་ལ་དོན་རྣམ་པ་གསུམ་སྟེ་ཤངས་ཀྱི་རླུང་སྒྲོམ་རྡོ་རྗེ་ཚུབ་མས་སྟོང་གསུམ་དམག་འདྲེན་པའི་ཚུལ་དང་། ཤངས་ཀྱི་རླུང་སྒྲོམ་རྡོ་རྗེ་ཚུབ་མས་སྲིད་གསུམ་ལ་ཚེ་སྦྱིན་པ་དང་། ཤངས་ཀྱི་རླུང་སྒྲོམ་རྡོ་རྗེ་ཚུབ་མས་རིགས་ལྔ་ཡེ་ཤེས་སྤྲིན་ཕུང་དབྱིངས་སུ་མཆོད་པའོ། །དེ་ལ་སྟོང་གསུམ་དུ་དམག་འདྲེན་པའི་ཚུལ་ནི། དཔེར་ན་སྐུངས་ཀྱི་ལུང་བུ་ནས་ཁྲོམ་གྱི་ཚོགས་བྱུང་ནས་བརྡེག་པར་བྱ་བའི་གནས་གང་ཡིན་པ་ཆམ་ལ་འབེབས་པ་དང་འདྲ་བར། ཡེ་ཤེས་ཀྱི་སྤྱན་གྱིས་གཟིགས་པ་དང་། རྫུ་འཕྲུལ་གྱི་སྙན་གྱིས་གསན་པའོ། །བྱེ་བྲག་ལ་སྙིང་རྗེས་མི་བཟོད་པས། ཤངས་ཀྱི་རླུང་སྒྲོམ་ནས་ཡེ་ཤེས་ཀྱི་སྤྲུལ་པ་བསམ་གྱིས་མི་ཁྱབ་པ་བྱུང་ནས་དེ་དག་འདུལ་བའི་ཕྲིན་ལས་མཛད་པས། དམག་འདྲེན་པའི་ཚུལ་གྱིས་བྱའོ། །སྲིད་པ་གསུམ་ལ་ཚེ་སྦྱིན་པའི་ཚུལ་ནི། ཤངས་ཀྱི་རླུང་སྒྲོམ་ནས་ཡེ་ཤེས་ཀྱི་འོད་ཟེར་རྣམ་ལྔ་བྱུང་ནས་སྲིད་པ་གསུམ་གྱི་སེམས་ཅན་ཚེ་ཟད་པ་རྣམས་ལ་ཚེ་སྦྱིན་པར་མཛད་ནས། དོན་དམ་པར་ཁམས་གསུམ་འཁོར་བའི་སེམས་ཅན་ཉོན་མོངས་པ་སྡུག་བསྔལ་གྱི་དགྲས་ཟིན་པ་རྣམས་སྐྱེ་ཤི་མེད་པའི་ས་ལ་བཀོད་ནས་འཆི་བ་མེད་པའི་ཚེ་སྦྱིན་པས་ཚེ་སྦྱིན་ཞེས་བྱའོ། །རིགས་ལྔ་དབྱིངས་སུ་སྤྲུལ་པ་དབྱིངས་སུ་མཆོད་པ་ནི། ཞལ་དབུས་མའི་ཤངས་ནས་ཡེ་ཤེས་ཀྱི་འོད་ཟེར་ལས་གཟུགས་ཀྱི་ལྷ་མོ་མེ་ལོང་ཐོགས་པ་བསམ་གྱིས་མི་ཁྱབ་པ་བྱུང་ནས་དབུའི་གཙུག་ན་རྣམ་པར་སྣང་མཛད་འཁོར་དང་བཅས་པ་བཞུགས་པའི་སྐུ་ལ་ཐིམ་ནས་མཉེས་པའི་མཆོད་པ་ཕུལ་ལོ། །ཞལ་ཤར་དུ་གཟིགས་པའི་ཤངས་ནས་ཡེ་ཤེས་ཀྱི་འོད་ཟེར་ལས་རེག་བྱའི་ལྷ་མོ་རྡོ་རྗེ་མ་ཡོངས་སུ་འཁྱུད་མ་བསམ་གྱིས་མི་ཁྱབ་པ་བྱུང་ནས་དབུའི་སྟེང་ན་རྡོ་རྗེ་སེམས་དཔའ་འཁོར་དང་བཅས་པ་བཞུགས་པའི་སྐུ་ལ་ཐིམ་ནས་མཉེས་པའི་མཆོད་པ་འབུལ་ལོ། །ཞལ་ལྷོར་གཟིགས་པའི་ཤངས་ནས་ཡེ་ཤེས་ཀྱི་འོད་ཟེར་ལས་རོའི་ལྷ་མོ་ཕྱག་ན་རིན་པོ་ཆེའི་གཞོང་པ་ཡིད་བཞིན་གྱི་ཞལ་ཟས་ཀྱིས་བཀང་བ་བསམ་གྱིས་མི་ཁྱབ་པ་བྱུང་ནས་དབུའི་སྟེང་དུ་རིན་ཆེན་འབྱུང་ལྡན་འཁོར་དང་བཅས་པ་བཞུགས་པ་ལ་མཉེས་པའི་མཆོད་པ་འབུལ་ལོ། །ཞལ་ནུབ་ཏུ་གཟིགས་པའི་ཤངས་ནས་ཡེ་ཤེས་ཀྱི་འོད་ཟེར་ལ་སྒྲའི་ལྷ་མོ་པི་ཝཾ་ཐོགས་པ་བསམ་གྱིས་མི་ཁྱབ་པ་བྱུང་ནས་དབུའི་སྟེང་ན་སྣང་བ་མཐའ་ཡས་འཁོར་དང་བཅས་པ་བཞུགས་པ་ལ་མཉེས་པའི་མཆོད་པ་འབུལ་ལོ། །ཞལ་བྱང་དུ་གཟིགས་པའི་ཤངས་ནས་དྲིའི་ལྷ་མོ་སྤོས་མེ་མ་བསམ་གྱིས་མི་ཁྱབ་པ་བྱུང་ནས་དབུའི་སྟེང་ན་དོན་ཡོད་གྲུབ་པ་འཁོར་དང་བཅས་པ་བཞུགས་པ་ལ་མཉེས་པའི་མཆོད་པ་འབུལ་ལོ། །དྲི་ལྔ་ཡེ་ཤེས་སྤྲིན་ཕུང་དབྱིངས་སུ་མཆོད་ཅེས་བྱའོ། །རྒྱུད་ལྔའི་མགོན་མཛད་བརྩོན་ལྡན་རྟ་དབུ་ལྔ། །ཞེས་པ། རྒྱུད་ལྔའི་མགོན་མཛད་པའི་རྟགས་སུ་དབུ་ལ་རྟ་མགོ་ལྔར་བསྟན་པ་ལ་ཡང་དོན་གསུམ་གྱིས་བསྟན་ཏེ། ཤུགས་ཀྱི་འགྲོ་བའི་བརྩོན་འགྲུས་དང་། །སྒྲོལ་བར་བྱེད་པའི་མཐུ་སྟོབས་དང་། །དབང་དུ་སྡུད་པའི་ཕྲིན་ལས་དང་གསུམ་མོ། །དེ་ལ་ཤུགས་ཀྱིས་འགྲོ་བའི་བརྩོན་འགྲུས་ནི། དཔེར་ན་བ་དང་བོང་བུས་ལོ་དང་ཟླ་བར་བགྲོད་པའི་ལམ་དུ་རྟས་སྐད་ཅིག་གིས་བགྲོད་པ་དང་འདྲ་བར་ཉན་ཐོས་ལ་སོགས་པ་མཚན་ཉིད་པས་ས་བཅུ་རིམ་གྱིས་བགྲོད་ནས་བསྐལ་པ་བགྲངས་ནས་སངས་རྒྱས་པ་ལྟ་བུ་མ་ཡིན་གྱི་ཐེག་པ་ཆེན་པོ་གསང་སྔགས་པས་བརྩོན་འགྲུས་ཆེན་པོས་སྐད་ཅིག་ནས་སྐད་ཅིག་ཏུ་བླ་ན་མེད་པའི་བྱང་ཆུབ་ཐོབ་པར་བྱེད་པའི་ཤུགས་ཀྱི་འགྲོ་བའི་བརྩོན་འགྲུས་ཞེས་བྱའོ། །སྒྲོལ་བར་བྱེད་པའི་མཐུ་སྟོབས་ནི། སྔོན་གྱི་སེང་གེའི་ཡུལ་ན་དེད་དཔོན་ཆེན་པོ་འཁོར་དང་བཅས་པ་རྒྱ་མཚོར་ཞུགས་པ་ལ་ལས་ཀྱི་རླུང་གིས་བདས་ནས་སྲིན་གྱི་བུ་གནོད་སྦྱིན་འཇིགས་མས་བཟུང་སྟེ་སྙིང་རྗེ་མེད་པར་ཟ་བར་བྱ་བ་ལས། སྤྱན་རས་གཟུགས་ཀྱི་ཐུགས་རྗེའི་སྤྲུལ་པ་རྟ་ཅང་ཤེས་པ་ལ་ཧར་སྤྲུལ་ནས་དེད་དཔོན་འཁོར་དང་བཅས་པ་འཇིགས་པའམ་རྒྱ་མཚོ་ལས་བསྒྲལ་བ་དེ་བཞིན་དུ། དཔལ་ཧེ་རུ་ཀས་ཀྱང་འཁོར་བའི་སེམས་ཅན་འཁོར་བའི་རྒྱ་མཚོའི་ནང་ནས་བླ་ན་མེད་པའི་བྱང་ཆུབ་ཀྱི་གནས་སུ་སྒྲོལ་བས་མཐུ་སྟོབས་ཞེས་བྱའོ། །དབང་དུ་སྡུད་པའི་ཕྲིན་ལས་ནི། རྒྱ་མཚོའི་གཏིང་དཀྱིལ་ན་ཆུ་སྲིན་རྒོད་མ་ཁ་ཞེས་བྱ་བ་ཡོད་པ་དེ་ཁ་གདངས་པའི་ནང་དུ་མཚོ་ན་གནས་པའི་སེམས་ཅན་ཐམས་ཅད་དེར་འགྲོ་ལ། དཔེ་དེ་དང་འདྲ་བར་དཔལ་ཛྙཱ་ནའི་ཞལ་གདངས་པས་ཁམས་གསུམ་གྱི་ཉོན་མོངས་པ་ཐམས་ཅད་དབང་དུ་སྡུད་པའི་ཕྲིན་ལས་ཞེས་བྱའོ། །དུག་ལྔ་ཞལ་དུ་ཤར་ཏེ་རྔུབ་མཛད་ཅིང་ཞེས་པ་སེམས་ཅན་གྱི་ཉོན་མོངས་པ་དུག་ལྔ་འབར་བའི་ཞལ་ལྟར་གསོལ་བས་རྔུབ་པར་མཛད་ཅིང་། ཞེས་བྱའོ། །ལྗགས་ལྔ་ཐེ་ཚོམ་གཅོད་ཕྱིར་ཐེག་ལྔ་འཆད། །ཅེས་པ། ལམ་རྒྱུད་ལྔའི་སེམས་ཅན་ལ་ཐེག་པ་ལྔའི་ཆོས་བཤད་པས་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་བསྐོར་བས་ཉོན་མོངས་པ་ལྔའི་སྒྲིབ་པ་སྦྱོང་བར་མཛད་དེ། སྐྱེ་བཞིའི་ལས་བཞི་བསྒྲལ་ཕྱིར་གཤོག་བཞི་བསྐྱོད་ཅེས་པ། གཤོག་པ་ལ་ཡང་དོན་རྣམ་པ་བརྒྱད་ཀྱིས་བསྟན་ཏེ། མཁའ་ལྟར་ཡེངས་ལ་ཁྱབ་པའི་ཆོས་ཉིད་དང་། རྩལ་ཆེན་ཤུགས་དང་ལྡན་པའི་ཡེ་ཤེས་དང་། མ་ལྟར་ཀུན་ལ་བྱམས་པའི་སྙིང་རྗེ་དང་། འགྲོ་བ་བརླབས་ཀྱིས་སྡུད་པའི་ཕྲིན་ལས་དང་། ཁྱུང་ཆེན་སྐུ་ལ་རྫོགས་པ་དང་། ཀླུ་ཆེན་ཟིལ་གྱིས་གནོན་པ་དང་། དགྱེས་པར་རོལ་བ་དང་། མཁའ་འགྲོ་རྒྱལ་པོ་རྒྱལ་མོ་དབང་དུ་བྱེད་དོ། །དེ་ལ་མཁའ་ལྟར་ཡོངས་ལ་ཁྱབ་པའི་ཆོས་ཉིད་ནི། ནམ་མཁའ་ཀུན་ལ་ཁྱབ་པ་དང་འདྲ་བར་མ་ཧཱ་ཤྲཱི་ཛྙཱ་ན་ཉིད་ཀྱི་གཤོག་པས་མཚན་མའི་ཆོས་ཐམས་ཅད་ལ་ཁྱབ་པས་མཚན་མ་མེད་པའི་དབྱིངས་སུ་གྱུར་ཏོ། །ཤུགས་དང་ལྡན་པའི་ཡེ་ཤེས་ནི། ཡེ་ཤེས་ཀྱི་གཤོག་པས་ཆོས་ཉིད་ལ་ཁྱབ་པས་ཡུལ་ཆོས་ཉིད་ཀྱི་དབྱིངས་སུ་གྱུར་ཏོ། །མ་ལྟར་ཀུན་ལ་ཁྱབ་པའི་སྙིང་རྗེ་ནི། དཔེར་ན་མས་བུ་ལ་གོས་འགེབས་པ་དང་འདྲ་བར་སྙི ང་རྗེའི་གཤོག་པས་ཁམས་གསུམ་འཁོར་བའི་སེམས་ཅན་ལ་ཁྱབ་པས་སྙིང་རྗེའི་བྱིན་རླབས་ཀྱིས་དྲོ་ཞིང་འཇམ་པར་འགྱུར་ལ། འགྲོ་བ་རླབས་ཀྱིས་སྡུད་པའི་ཕྲིན་ལས་ནི། དཔེར་ན་བུད་མེད་ཀྱི་སྒྲོ་ཟུས་སྤུར་མ་སྡུད་པ་དང་འདྲ་བར་དཔལ་མ་ཧཱའི་ཕྲིན་ལས་གཤོག་པས་འཁོར་བའི་སེམས་ཅན་ཐམས་ཅད་སོ་སོའི་གནས་ནས་ཕྲིན་ལས་ཀྱི་གཤོག་པས་བསྡུས་ནས་བྱང་ཆུབ་ཀྱི་དབྱིངས་སུ་སྐྱོད་པར་མཛད་དོ། །ཁྱུང་ཆེན་སྐུ་ལ་རྫོགས་པ་དང་། ཀླུ་ཆེན་ཟིལ་གྱིས་གནོན་པ་ནི། དཔེར་ན་བྱ་ཁྱུང་གི་གཤོག་པས་ནམ་འཕང་རླབས་ཀྱིས་གཅོད་པ་དང་འདྲ་བས། དཔལ་མ་ཧཱ་ཡ་ནའི་གཤོག་པས་ཀྱང་ཆོས་ཉིད་ཀྱི་ནམ་མཁའ་ལ་གཅོད་པར་བྱེད་ལ། ཁྱུང་གི་མཐུས་ནི་ཀླུ་འདུལ་བའི་གཉེན་པོར་གྱུར་ཏེ། ཀླུའི་གདུག་པའི་དབལ་ཟེར་ཐམས་ཅད་ཟིལ་གྱིས་གནོན་པར་བྱེད་དོ། །དགྱེས་པར་རོལ་པ་ནི། རྡོ་རྗེ་གཤོག་པ་བཞི་ནི་གསང་བ་ཡུམ་ཆེན་མོའི་རང་བཞིན་ཡིན་པས་ཡུམ་དང་དུས་གསུམ་དུ་འདུ་འབྲལ་མེད་པའི་རྟགས་སོ། །མཁའ་འགྲོ་རྒྱལ་པོ་རྒྱལ་མོ་དབང་དུ་བྱེད་པ་ནི། མཁའ་འགྲོ་མ་ཐམས་ཅད་གཤོག་པ་ཡིན་ལ་གཤོག་པ་ཐམས་ཅད་ཀྱིས་ཀྱང་རང་གི་གཙོ་བོར་མཐོང་ནས་དབང་དུ་སྡུད་པར་བྱེད་དོ། །དོན་དེ་བརྒྱད་དང་ལྡན་པས་གཤོག་བཞི་སྐྱོད་ཅེས་བྱའོ། །བཅུ་དྲུག་དམྱལ་ཁམས་བཅུ་དྲུག་ཕྱག་གིས་འདྲེན། །ཞེས་པ་ཕྱག་དྲུག་གིས་ནི་དམྱལ་ཁམས་བཅུ་དྲུག་འདྲེན་པའི་རྟགས་ཡིན་ལ། དེ་ཇི་ལྟར་འདྲེན་ཞེ་ན་ཕྱག་མཚན་བཅུ་དྲུག་གི་ཕྲིན་ལས་ཀྱིས་འདྲེན་ཏེ། ཕྱག་མཚན་བཅུ་དྲུག་ནི། གཡས་ཀྱི་དང་པོ་ན་ལྕགས་ཀྱུ་བསྣམས་པ་ནི། སྡུད་བྱེད་ཐབས་ཀྱི་ལྕགས་ཀྱུ་ཞེས་བྱ་སྟེ། ཁམས་གསུམ་འཁོར་བ འི་སེམས་ཅན་ཐམས་ཅད་ནི་སྙིང་རྗེ་ཆེན་པོས་མ་ལུས་འདྲེན་ཅིང་དབྱིངས་སུ་སྡུད་པར་བྱེད་ལ། གཡོན་གྱི་དང་པོ་ན་ལྕགས་ཀྱུ་བསྣམས་པ་ནི། རྣམ་དག་དབྱིངས་ནས་སྐུལ་བྱེད་ཅེས་བྱ་སྟེ། པྲཛྙཱའི་ལྕགས་ཀྱུས་ཕྱོགས་བཅུའི་རྒྱལ་བ་རྒྱ་མཚོ་རྣམས་ཀྱི་ཐུགས་དམ་གྱི་རྒྱུད་འགྲོ་བའི་དོན་ལ་བསྐུལ་བར་མཛད་ལ་གཡོན་གྱི་ཐ་མ་ན་ལྕགས་ཀྱུ་གཅིག་ཁ་ཐུར་ལ་བསྟན་ནས་བསྣམས་པ་ནི་སྙིང་རྗེ་ཤུགས་ཀྱིས་འདྲེན་བྱེད་ཅེས་བྱ་སྟེ། འཁོར་བ་རྒྱ་མཚོ་དང་འདྲ་བའི་ནང་ནས་ཉོན་མོངས་པའི་སེམས་ཅན་ཉ་དང་འདྲ་བ་ལ་ཐུགས་རྗེ་ལྕགས་ཀྱུ་དང་འདྲ་བས་བླ་ན་མེད་པའི་བྱང་ཆུབ་ཀྱི་སྐམ་ས་ལ་འདྲེན་པར་མཛད་དོ། །གཡས་གཡོན་དང་འོག་གཉིས་ན་བྷནྡྷ་རེ་བསྣམས་པ་ནི། གཡོན་གྱི་ཐ་ལྟག་ན་བྷནྡྷ་རློན་པ་གཅིག་བསྣམས་པ་ནི། བྷནྡྷ་སྐམ་པོ་ནི་རྣམ་པར་དག་པའི་ཆོས་ཉིད་ཡིན་ལ། རྣམ་པར་དག་པའི་ཆོས་ཉིད་ལ་རྟོག་པའི་སྐྱོན་མེད་པས་བྷནྡྷ་དཀར་བར་བསྟན་ལ། ཆོས་ཉིད་ལ་སྤྲོས་མེད་པ་མེད་པའི་རྟགས་སུ་བྷནྡྷ་ཟླུམ་པར་བསྟན། བྷནྡྷའི་ནང་རཀྟས་བཀང་བ་ནི་ཆོས་ཉིད་སྤྲོས་པ་མེད་པའི་དབྱིངས་ནས་ཐུགས་རྗེའི་ཆགས་པས་འཁོར་བ་ལ་ཆགས་ཤིང་ཞེན་པའི་རྟགས་སོ། །བྷནྡྷ་རློན་པ་ལ་དབང་པོ་ཚང་བར་ཡོད་པ་ནི་མཁྱེན་པའི་ཡེ་ཤེས་ཐུགས་སུ་ཆུད་པའི་རྟགས་སོ། །དེའི་འོག་ན་ཁ་ཊྭཱྃ་ག་བསྣམས་པ་ནི་དོན་རྣམ་པ་གསུམ་སྟེ་གོང་མ་དང་མཐུན་ནོ། །དེའི་འོག་མ་སྦྲུལ་གྱི་ཞགས་པ་བསྣམས་པ་ཡང་གོང་མ་དང་མཐུན། དེའི་འོག་མ་བཞི་ན་རྡོ་རྗེ་རེ་རེ་བསྣམས་པ་ནི་མཛད་པ་ལས་ཀྱི་རྡོ་རྗེ་སྟེ་ཕྲིན་ལས་དང་སྦྱར་ན། གོང་མ་རྩེ་དགུ་པ་གཅིག་བསྣམས་པ་མར་བལྟས་པ་དགུ་ནི་ས་དགུ་ལ་གནས་པའི་རྟོག་པ་འཇོམས། ཡར་བལྟས་པ་དགུ་ནི་མ་བརྒྱད་དཔལ་དང་དགུའི་དཀྱིལ་འཁོར་དུ་སྒྲོལ་བར་མཛད་པས། ས་དགུའི་རྟོག་པ་འཇོམས་པའི་ལས་ཞེས་བྱའོ། །དེའི་འོག་ན་རྩེ་ལྔ་པ་བསྣམས་པ་ནི་རྩེ་མོ་མར་བལྟས་པ་ལྔས་ནི་ལམ་རྒྱུད་ལྔའི་སེམས་ཅན་ཐམས་ཅད་ཀྱི་ཉོན་མོངས་པ་ལྔའི་རྟོག་པ་འཇོམས་ལ། ཡར་བལྟས་པ་ལྔས་ནི་རིགས་ལྔའི་དཀྱིལ་འཁོར་དུ་སྒྲོལ་བར་མཛད་པས། དུག་ལྔ་སྒྲོལ་བའི་ལས་ཞེས་བྱའོ། །དེའི་འོག་ན་རྩེ་གསུམ་བསྣམས་པ་ནི་མར་བལྟས་པ་གསུམ་གྱིས་ནི། མ་ནུའི་ཉོན་མོངས་པ་རྒྱུ་དུག་གསུམ་འཇོམས་པར་བྱེད་ལ། ཡར་བལྟས་པ་གསུམ་གྱིས་ནི་འབྲས་བུ་ལུས་ངག་ཡིད་གསུམ་སྐུ་གསུང་ཐུགས་གསུམ་དུ་སྒྲོལ་བར་མཛད་པས་དུག་གསུམ་འཇོམས་པའི་ལས་ཞེས་བྱའོ། །ཐ་མ་ན་རྩེ་གཅིག་བསྣམས་པ་ནི་མར་བལྟས་པ་གཅིག་གིས་ནི་སྙིང་རྗེ་རྩེ་གཅིག་གིས་མི་འགྱུར་བའི་འགྲོ་བའི་དོན་མཛད་པའི་རྟགས། ཡར་བལྟས་པའི་རྩེ་གཅིག་གིས་ནི་ཆོས་ཉིད་ཀྱི་དོན་རྟོགས་པའི་རྟགས་ཏེ། སྙིང་རྗེ་རྩེ་གཅིག་པའི་ལས་ཞེས་བྱའོ། །གཡོན་གྱི་གཉིས་འོག་མ་ན་སྡིགས་མཛུབ་ཀྱི་རྩེ་ལ་བསྐལ་པའི་མེ་འབར་བ་ལ་དོན་གསུམ་སྟེ། སྤྲོས་པ་མེད་པའི་དོན་ཉིད་རང་བཞིན་གྱི་སྡིགས་པས་ནི། ཁུ་ཚུར་བཅང་བ་ལྟར་བསྟན་ལ། རྟགས་པར་བྱེད་པའི་ཡེ་ཤེས་རྟོགས་པས་སྡིགས་པ་ནི་ཆོས་ཉིད་ལ་ཡེ་ཤེས་འབྱུང་བའི་རྟགས་སུ་ཁུ་ཚུར་ལས་མཛུབ་མོ་སྒྲེང་བར་བསྟན་ལ། འགྲོ་བའི་དོན་བྱེད་པའི་ཐབས་ཕྲིན་ལས་ཀྱིས་སྡིགས་པ་ནི་ཡེ་ཤེས་ལས་སྙིང་རྗེ་འབྱུང་། སྙིང་རྗེའི་ལས་ཀྱིས་འགྲོ་བའི་དོན་མཛད་པའི་རྟགས་སུ་ཁྲོ་བོའི་མཛུབ་མོའི་རྩེ་ལ་བསྐལ་པའི་མེ་འབར་བར་བསྟན་ནོ། །དེའི་འོག་ན་རྡོ་རྗེ་ལུ་གུ་རྒྱུད་ཀྱི་ཞགས་པ་བསྣམས་པ་ལ་ཡང་དོན་རྣམ་པ་གསུམ་སྟེ། རྟོགས་པ་དོན་གྱི་འབྲེལ་པ་དང་། དམ་ཚིག་དབང་གི་འབྲེལ་པ་དང་། སྙིང་རྗེ་ཤུགས་ཀྱི་འབྲེལ་པ་དང་གསུམ་མོ། །ཡང་དག་པའི་ཡེ་ཤེས་ཀྱིས་ཆོས་ཉིད་སྐྱེ་བ་མེད་པའི་དོན་རྟོགས་པའི་དུས་ན་དབྱིངས་དང་ཡེ་ཤེས་གཉིས་སུ་མེད་པར་གྱུར་པ་ནི་རྟོགས་པ་དོན་གྱི་འབྲེལ་བ་ཞེས་བྱའོ། །དེ་ལྟར་དབྱིངས་དང་ཡེ་ཤེས་གཉིས་སུ་མེད་པའི་ངང་ལས་སྙིང་རྗེ་ཆགས་པར་བྱུང་ནས་ཐུགས་དམ་ཚིག་གི་དབང་གིས་ཆགས་ཤིང་ཞེན་ནས་མི་གཏོང་བ་ནི་དམ་ཚིག་དབང་གི་འབྲེལ་བ་ཞེས་བྱའོ། །དེ་ལྟར་སྙིང་རྗེ་ཕྲིན་ལས་བྱུང་ནས་ཕྲིན་ལས་ཀྱིས་སེམས་ཅན་འཁོར་བར་མི་གཏོང་ཞིང་སྙིང་རྗེ་ཞུགས་པས་འདྲེན་པར་མཛད་པས་ཐུགས་རྗེ་ཤུགས་ཀྱི་འབྲེལ་པ་ཞེས་བྱའོ། །དེའི་འོག་མ་ན་ཅང་ཏེའུ་བསྣམས་པ་ལའང་དོན་གསུམ་སྟེ། རོལ་མོ་དབྱངས་ཀྱི་རྔ་དང་། སྒྲུབ་པ་ལས་ཀྱི་རྔ་དང་། གསང་བ་ཡུམ་གྱི་རྔ་དང་གསུམ་མོ། །རོལ་མོ་དབྱངས་ཀྱི་རྔ་ནི། འཇིག་རྟེན་གྱི་རྔ་ཐབས་ཀྱི་བྱེ་བྲག་སརྦ་ལ་བྱ་སྟེ། ཡུམ་ཆོས་ཉིད་ཀྱི་རྔ་ལ་སེམས་ཡེ་ཤེས་ཀྱི་དབྱུག་པས་བརྡུངས་པས་བསྟན་པ་གསུང་རབ་ཀྱི་སྒྲ་བྱུང་ནས་འགྲོ་བའི་ཤེས་རབ་སྐྱེད་པར་བྱེད་པས། རོལ་མོ་དབྱངས་ཀྱི་རྔ་ཞེས་བྱའོ། །སྒྲུབ་པ་ལས་ཀྱི་རྔ་ནི། བྷནྡྷ་ལྟག་སྤྲོད་ལ་རས་ཆེན་གྱིས་གཡོགས་ནས་བ་སུ་ཏའི་རྒྱུ་ཞགས་ཀྱིས་བསྣམས་ནས་གནམ་ལྕགས་ཀྱི་གཟེར་ཆེན་གྱིས་བསྡམས་ནས་བརྡུང་སྟེ་ཐུགས་དམ་བསྐུལ་ནས་བྱིན་རླབས་སྤྲུལ་པའི་རྔ་སྒྲ་བྱུང་ནས་དཔལ་གྱི་ཐུགས་ཀྱི་དངོས་གྲུབ་ཐོབ་པར་བྱེད་པས་སྒྲུབ་པ་ལས་ཀྱི་རྔ་ཞེས་བྱའོ། །གསང་བ་ཡུམ་གྱི་རྔ་ནི། ཀུན་ཏུ་བཟང་མོའི་མཁའ་ཀློང་རྣམ་པར་དག་པ་མི་གནས་པའིི་བྷ་ག་ཆོས་ཀྱི་དབྱིངས་ཀྱི་ཕོ་བྲང་དུ་རིགས་པ་ཡེ་ཤེས་ཀྱི་རྟགས་ཀྱི་ཕྱག་རྒྱ་ཐབས་སྙིང་རྗེ་ཡེ་ཤེས་ཀྱི་ཐབས་ཤེས་རོལ་པའི་རྔ་བརྡུངས་པས་གསང་བ་བྱང་ཆུབ་སེམས་ཀྱི་འོད་ཟེར་ལས་ཏིང་ངེ་འཛིན་གྱི་སྤྲུལ་པ་བསམ་གྱིས་མི་ཁྱབ་པ་བྱུང་ནས་ཐམས་ཅད་གསང་བ་བྱང་ཆུབ་སེམས་ཀྱི་དབང་བསྐུར་ནས་སྐྱེ་ཤི་མེད་པའི་ས་ལ་བཀོད་པས་གསང་བ་ཡུམ་གྱི་རྔ་ཞེས་བྱའོ། །དེའི་འོག་ན་ཁྲོ་བོ་བརྒྱད་ཀྱི་ཙིཏྟ་ཕྱུང་ནས་བསྣམས་པས་ཁྲོ་བོ་ནི་རྟག་ཆད་ཀྱི་མཐའ་ལས་ཁྲོ་བ། མཐའ་གཉིས་ཀྱི་སྐྱོན་སྤངས་ནས་དབུ་མ་ཆེན་པོའི་དོན་དང་ལྡན་པའི་ཕྱིར་ཙིཏྟ་བསྣམས་པ་ཡིན་ལ། དེ་ལ་ཡང་དོན་རྣམ་པ་གསུམ་སྟེ། གསང་ཆེན་ཐུགས་ལ་རོལ་བ་དང་། །ཡེ་ཤེས་ལྔ་ལྡན་བྱང་ཆུབ་སེམས་ལ་རོལ་པ་དང་། ཡེ་ཤེས་ལྔ་ལྡན་རྒྱུ་འབྲས་ལྷུན་གྱིས་རྫོགས་པའོ། །དེ་ལ་གསང་ཆེན་ཐུགས་ལ་རོལ་པ་ནི། རྒྱ་གར་གྱི་སྒྲ་གྲངས་ན་བྷོ་དྷི་ཙིཏྟ་ཞེས་བྱ་སྟེ། བྷོ་དྷི་ནི་བྱང་ཆུབ། ཙིཏྟ་ནི་སེམས་ཏེ། རྟོགས་ཤིང་ཐུགས་སུ་ཆུད་པའི་རྟགས་སུ། ཡེ་ཤེས་ལྔ་ལྡན་བྱང་ཆུབ་སེམས་ལ་རོལ་པ་ནི། བདག་གི་སོར་མོ་ལྔ་ནི་མཁྱེན་པའི་ཡེ་ཤེས་རྣམ་པ་ལྔ་དང་ལྡན་པའི་རྟགས་ཡིན་ལ། སོར་མོ་ཡེ་ཤེས་ལྔས་གསང་བ་བྱང་ཆུབ་ཀྱི་སེམས་དེ་ཉིད། ཡེ་ཤེས་ལྔས་རྟོགས་ཤིང་ཟིན་པ་ཡིན་པས། །ཡེ་ཤེས་ལྔ་ལྡན་བྱང་ཆུབ་སེམས་ལ་རོལ་པ་ཞེས་བྱའོ། །ཡེ་ཤེས་ལྔ་ལྡན་རྒྱུ་འབྲས་ལྷུན་གྱིས་རྫོགས། །ཞེས་པ་ཀུན་གཞི་ནི་རྣམ་པར་ཤེས་པ་ཚོགས་བརྒྱད་འདུས་པའི་རྟགས་ཡིན་ལ། ཀུན་གཞི་བྱང་ཆུབ་སེམས་དེ་མེ་ལོང་ལྟ་བུའི་ཡེ་ཤེས་གནས་གྱུར་པའི་དུས་ན། རྒྱུ་རྣམ་པར་ཤེས་པའི་ཚོགས་བརྒྱད་འབྲས་བུ་ཡེ་ཤེས་རྣམ་པ་ལྔ་རང་བཞིན་གྱིས་གནས་གྱུར་པས་འབྲས་བུ་ལྷུན་གྱིས་རྫོགས་ཞེས་བྱའོ། །དམྱལ་ཁམས་བཅུ་དྲུག་ཕྱག་གིས་འདྲེན་ཞེས་བྱའོ། །ཕྱོགས་བརྒྱད་འདུལ་ཕྱིར་ཞབས་བརྒྱད་ཁྲོ་བརྒྱད་བཅོམ། །ཞེས་པ། ཡང་ཆེ་བ་བླ་ན་མེད་པ་བསྟན་པའི་ཕྱིར་ཞབས་བརྒྱད་ཀྱིས་ཕྱོགས་བརྒྱད་དུ་ཁྲོ་མོ་བརྒྱད་མནན་པར་བསྟན་ཏེ། དེ་ཡང་ཤར་ཕྱོགས་སུ་བརྐྱང་བའི་ཞབས་ཀྱིས་ཧཱུྃ་ཀཱ་རའི་སྙིང་གར་མཁྲིག་མ་བསྐུལ་ཏེ་མནན་པས། གཞུང་ལས་ཀྱང་། དཔའ་བའི་ཏིང་འཛིན་གཟི་བརྗིད་སྟག་གི་ཆས། །ཤར་དུ་ཧཱུྃ་ཀཱ་རས་མཁྲིག་མ་མནན་ཏེ་མནན་ཞེས་བྱའོ། །ཤར་ལྷོ་མཚམས་སུ་བརྐྱང་བའི་ཞབས་རྒྱ་བྱེ་སྔོན་པོ་ཆས་ཀྱིས་བརྒྱན་པས་ཁྲོ་བོ་མི་གཡོ་མགོན་པོ་ཤར་ལྷོ་ཕྱོགས་སུ་མནན་པས། གཞུང་ལས་ཀྱང་། རྣོ་བརྟུལ་ཟློག་བྱེད་རྒྱ་བྱེ་ལྕགས་ཀྱི་ཆས། །མི་གཡོ་མགོན་པོ་ཤར་ལྷོ་མཚམས་སུ་མནན། །ཞེས་བྱའོ། །ལྷོར་བརྐྱང་པའི་ཞབས་རྡོ་རྗེ་རྩེ་མོས་བརྡབ་པས་རྒྱན་གྱི་ཞབས་ཀྱིས་གཤེད་པོ་མནན་པས། གཞུང་ལས་ཀྱང་། སྟོང་པ་ཉིད་ཀྱི་ཏིང་འཛིན་རྡོ་རྗེ་འཆང་གི་ཆས། གཤིན་རྗེ་གཤེད་པོ་ལྷོ་ཡི་ཕྱོགས་སུ་མནན། །ཞེས་བྱའོ། །ལྷོ་ནུབ་ཀྱི་མཚམས་སུ་བསེ་ཁྲབ་སྨུག་པོའི་ཆས་ཀྱིས་བརྒྱན་པའི་ཞབས་ཀྱིས་ནི་ནི་ལ་དནྜ་མནན་པས། གཞུང་ལས་ཀྱང་དབང་གི་བསེ་ཁྲབ་གཟི་འབར་དགྲ་ཡི་ཆས། དབྱུག་པ་སྔོན་པོ་ལྷོ་ནུབ་མཚམས་སུ་མནན། །ཞེས་བྱའོ། །ནུབ་ཀྱི་ཕྱོགས་སུ་སྦྲུལ་གྱི་ཆས་ཀྱིས་བརྒྱན་པའི་ཞབས་ཀྱིས་པདྨོ་འཁྱིལ་པ་མནན་པས། གཞུང་ལས་ཀྱང་། དཔའ་བརྗིད་མཉེན་ལྕུག་སྦྲུལ་ནག་འཁྱིལ་བའི་ཆས། །པདྨ་འཁྱིལ་བའི་སྙིང་གར་མཁྲིག་མ་སྦུབ། །ཞེས་བྱའོ། །ནུབ་བྱང་མཚམས་སུ་ཞབས་ཀྱི་མཐིལ་ཁྲོ་ཞལ་དུ་བྱས་པས་འདོད་པའི་རྒྱལ་པོའི་མགོ་བོ་བཅོམ་པས། གཞུང་ལས་ཀྱང་། དམར་གསལ་དབང་ཕྱུག་ཞབས་ཀྱི་མཆེ་བའི་ཆས། །ནུབ་བྱང་འདོད་པའི་རྒྱལ་པོ་སྤྱི་ནས་བཅོམ། །ཞེས་བྱའོ། །བྱང་ཕྱོགས་སུ་ཤུ་རྐྱེན་གྱི་ཆས་ཀྱིས་བརྒྱན་པའི་ཞབས་ཀྱིས་བདུད་རྩི་འཁྱིལ་པ་ཁ་སྦུབ་ཏུ་མནན་པས། གཞུང་ལས་ཀྱང་། གཟི་མདངས་ཤུ་རྐྱེན་ཆུ་སྲིན་སྤྲུལ་པའི་ཆས། །བདུད་རྩི་འཁྱིལ་པ་ཁ་སྦུབ་བྱང་དུ་མནན། །ཞེས་བྱའོ། །བྱང་ཤར་དུ་གཟིག་གི་མགོ་བོས་བརྒྱན་པའི་ཞབས་ཀྱིས་སྟོབས་པོ་ཆེ་སྤྱི་བོ་ནས་མནན་པས། གཞུང་ལས་ཀྱང་། གཅན་གཟན་རྒྱལ་པོ་འཇིགས་བྱེད་གཟིག་གི་ཆས། མ་ཧཱ་བ་ལ་དུང་ཆེན་མཚམས་སུ་བཅོམ། །ཞེས་བྱའོ། །རིགས་བཞི་ཞེས་པ། གདན་ཁྲི་ཁྱད་པར་རིན་པོ་ཆེའི་ཁྲིི་དང་། གསེར་གྱི་པདྨ་དང་། ཉི་ཟླའི་འོད་ཀྱི་གདན་དང་བཅས་པར་བཤད་དེ། དེ་ལ་རིན་པོ་ཆེའི་ཁྲི་རྐང་བཞི་ནི། སྣོད་ཀྱི་འཇིག་རྟེན་ནས་འབྱུང་བ་ཆེན་པོ་བཞིའི་རང་བཞིན་དུ་བསྟན་ཏེ། སའི་ཁམས་བཛྲ་ཧེ་རུ་ཀའི་རང་བཞིན་དང་། ཆུ་རཏྣ་མེ་དང་རླུང་ཡང་པདྨ་ཧེ་རུ་ཀ་དང་ཀརྨ་ཧེ་རུ་ཀའི་རང་བཞིན་དུ་བསྟན་པས་འབྲེལ་པ་ཆོས་དོན་གྱིས་མངོན་ཏེ། སྣོད་ཡོད་དང་བཅུད་ཀྱི་རང་བཞིན་གྱིས་ཡོད་པའི་ཕྱིར། སྣོད་དང་བཅུད་ཀྱི་གདན་ཞེས་བྱ་ལ། ཁྲི་རྐང་བཞི་ལ། སྤྲིན་མེད་པའི་ཉི་མ་བདུན་གྱིས་བརྒྱན་པ་ནི། རིགས་བཞིའི་ཧེ་རུ་ཀ་ལ་ཕྱོགས་བཞིའི་དབང་ཕྱུག་མ་དྲུག་དྲུག་སྒོ་བ་རེ་དང་བདུན་བདུན་འཁྲུལ་བའི་ཚུལ་དུ་སྦས་པའི་རྟགས་སུ་བསྟན་ཏོ། །གཞུང་ལས་ཀྱང་། ཁྲི་རྐང་རིན་ཆེན་བཞི་ལས་འབར་བའི་སྐུར་བསྟན་པ། རིགས་བཞི་ཁྲག་འཐུང་སྐུ་ལ་མ་བདུན་མཉེས་པར་འཁྲིལ། །ཅེས་བྱའོ། །ཕྱོགས་བཞི་ཞེས་པ། ཁྲོ་བོ་ཁོང་སྐམ་བཞི་ལ་གསེར་གྱི་སེང་གེ་དྲུག་བཞི་ཉི་ཤུ་རྩ་བཞི་སྤྱན་གསུམ་མཆེ་བ་གཙིགས་པ། མཇུག་མ་ནང་ཕྱོགས་སུ་བསྟན་པ། ཞལ་ཕྱིར་གཟིགས་པར་བསྟན་པ་ནི་དབང་ཕྱུག་མ་ཉི་ཤུ་རྩ་བཞི་ཞབས་ཀྱི་གདན་ཁྲིར་སྦས་པའི་རྟགས་ཏེ། གཞུང་ལས་ཀྱང་། དབང་ཕྱུག་མར་འདུས་སིདྷ་ཙ་པ་ལ། །དོན་དམ་གསང་སྦས་ཆེ་བའི་དབང་ལྡན་པ། །ཞེས་བྱའོ། །ཁྲིའི་སྟེང་ན་གསེར་གྱི་པདྨ་འདབ་མ་བརྒྱད་དང་ལྡན་པར་བསྟན་པ་ནི། གསང་བའི་ཡུམ་ཆེན་མོ་བརྒྱད་ལ་རོལ་པ་མཛད་པའི་རྟགས་ཏེ། འདབ་མ་བརྒྱད་དང་ལྡན་པར་བསྟན་ཏེ། གཞུང་ལས་ཀྱང་། འདམ་གྱི་སྐྱོན་བྲལ་པདྨ་ཁ་བརྒྱད་ལ། །རིགས་མཆོག་བརྗིད་ལྡན་གསང་བ་ཡུམ་གྱི་དབྱིངས། །ཞེས་བྱའོ། །དེའི་སྟེང་ན་ཉི་ཟླའི་དཀྱིལ་འཁོར་གབ་ཙེ་བརྩེགས་པ་ལྟར་སྣང་བ་ཡིན། ཉི་མ་ནི་རྐྱེན་སྨིན་པར་བྱེད་པ་ཡིན་ཏེ། གསང་བའི་ཡུམ་བརྒྱད་ཀྱི་མཁའ་དབྱིངས་ན་ཡུམ་གྱི་པདྨ་རཀྟ་དམར་ལ་དྭངས་པ་འཁྱིལ་བར་བསྟན་པའི་རྟགས་ཡིན་ལ། དེའི་སྟེང་ན་ཟླ་བའི་དཀྱིལ་འཁོར་དཀར་ལ་འདྲེལ་བར་བསྟན་པ་ནི། ཡབ་ཀྱི་མཁའ་གསང་བའི་རྡོ་རྗེ་གསང་བའི་བྱང་སེམས་དཀར་ལ་འདྲིལ་བ་ཡུམ་གྱི་གསང་བའི་མཁའ་ལ་ཕེབས་པའི་རྟགས་སོ། །གཞུང་ལས་ཀྱང་། རྒྱུད་འབྱུང་སྨིན་བྱེད་མཚམས་ཀྱི་དཀྱིལ་འཁོར་དུ། །གསང་ཡུམ་བྱིན་བརླབས་སྣ་ཚོགས་འཕྲོ་ཞིང་འདུ། །ཞེས་བྱའོ། །ཆེ་བའི་ཆེ་བ་བྱ་བ། ཆེ་བ་ནི་བགེགས་བཅུའི་སྟེང་ན་ཕྱོགས་སྐྱོང་བཅུ་ཆེ་བ་ཡིན་ལ། ཆེ་བའི་ཆེ་བ་ནི། ཕྱོགས་སྐྱོང་བཅུའི་སྟེང་ན་ཁྲོ་བོ་བཅུ་སྟེ། ཡང་ཆེ་བ་བླ་ན་མེད་པ་ནི་དཔལ་པདྨ་ཧེ་རུ་ཀ་སྟེ། ཧེ་རུ་ཀ་ཆེན་པོ་བཞི་དང་། ཁྲོ་བོ་ཆེན་པོ་བཞི་དང་། ཁྲོ་མོ་དབང་ཕྱུག་མ་ཉི་ཤུ་རྩ་བརྒྱད་ལ་སོགས་ཏེ། དེ་རྣམས་ཀུན་ཞབས་ཀྱིས་མནན་གདན་ཁྲིར་བྱིན་གྱིས་བརླབས་ཏེ་དེའི་སྟེང་ན་དཔའ་པདྨ་ཧེ་རུ་ཀའི་སྐུ་བཞུགས་པས་ཆེ་བའི་ཆེ་བ་བླ་ན་མེད་ཅེས་བྱའོ། །བཅུ་དྲུག་ཞག་གི་ཟླ་བའི་དཀྱིལ་འཁོར་རྫོགས་པ་ལྟར། ཅེས་པ་དཔེར་ན་ཟླ་བ་ཚེས་བརྒྱད་གཉིས་བཅུ་དྲུག་ཁ་གང་ནས་ཟླ་བའི་དཀྱིལ་འཁོར་ཤིན་ཏུ་གསལ་ཞིང་རྒྱས་པ་དང་འདྲ་བར། དཔལ་པདྨ་ཧེ་རུ་ཀ་དང་ཡང་ཕྲ་མེན་མ་བཅུ་དྲུག་གི་བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་ཡོངས་སུ་རྫོགས་ཏེ་ཆེ་བའི་ཡོན་ཏན་སྐུ་ལ་རྫོགས་ཤིང་མཐར་ཕྱིན་པའི་རྟགས་ཏེ། ཚོགས་གཉིས་རྫོགས་པ་བཅུ་དྲུག་པ་ལ་བཞུགས། །ཞེས་བྱའོ། །ཕྱོགས་བཞི་ཞེས་པ་དབུ་ཀླད་པ་སངས་རྒྱས་ཀྱི་དཀྱིལ་འཁོར་ན་རིགས་ལྔའི་སངས་རྒྱས་འཁོར་དང་བཅས་པའི་གསང་བའི་ཡུམ་ཆེན་མོ་བཞི་དང་ལྡན་པའི་མཁྱེན་པའི་ཡེ་ཤེས་རྣམ་པ་བཞིས་འགྲོ་བའི་རྒྱུད་སོ་སོར་མཁྱེན་པར་གཟིགས་ནས་དེ་དག་གི་དོན་མཛད་པས་མཁྱེན་ལྔའི་ཡེ་ཤེས་ཐུགས་རྗེས་སོ་སོར་གཟིགས་ཞེས་བྱའོ། །དབང་ཆེན་ཡོངས་སུ་འདུས་པའི་དཀྱིལ་འཁོར་དུ། །ཞེས་པ་དབང་གསུམ་ལུང་གི་བརྒྱུད་པ་སྟེ། ལོ་ཀ་དབང་དུ་མཛད་པ་དང་། འཇིག་རྟེན་ལས་འདས་པ་དབང་དུ་མཛད་པ་དང་། བླ་ན་མེད་པའི་ཡེ་ཤེས་དབང་དུ་མཛད་པའོ། །དེ་ལ་འཇིག་རྟེན་དབང་དུ་མཛད་པ་ནི་ཁྲོ་འཛུམ་གྱི་ཕྱག་རྒྱས་ལྷ་ཆེན་པོ་ཉི་ཤུ་རྩ་གཅིག་བསྡུས་ནས་དབང་དུ་མཛད་པའོ། །འཇིག་རྟེན་ལས་འདས་པ་དབང་དུ་མཛད་པ་ནི། སྤྱན་གསུམ་མཆེ་བ་གཙིགས་པའི་ཕྱག་རྒྱས་ཞབས་འོག་ཏུ་ཁྲོ་བོ་བརྒྱད་མནན་པར་བསྟན་པ་དང་། བླ་ན་མེད་པའི་ཡེ་ཤེས་དབང་དུ་མཛད་པས། རིགས་ལྔའི་སངས་རྒྱས་དབུའི་དཀྱིལ་འཁོར་དུ་སྦས་པ་ལ་བྱ་སྟེ། དབང་ཆེན་ཡོངས་སུ་འདུས་པའི་དཀྱིལ་འཁོར་དང་ཞེས་བྱའོ། །ཚོགས་ཆེན་པོ་དང་ཞེས་པ་དེ་ལྟར་བསོད་ནམས་ཡེ་ཤེས་ཀྱི་ཚོགས་རྣམ་པ་གཉིས་རྫོགས་ནས་ཆེ་བའི་ཡོན་ཏན་ལྷུན་གྱིས་གྲུབ་པ་ལ་བྱའོ། །དཀྱིལ་འཁོར་གསུམ་གྱིས་བརྗིད་པའི་ཁྲོ་རྒྱལ་སྐུ། །ཞེས་པ་དབུ་ལ་ཡེ་ཤེས་ལྷུན་གྱིས་གྲུབ་པའི་དཀྱིལ་འཁོར་ནི། རིགས་ལྔའི་སངས་རྒྱས་འཁོར་དང་བཅས་པ་བཞུགས་པ་དང་གཅིག །སྐུ་སྟོད་ཚོགས་ཆེན་ཡོངས་སུ་འདུས་པའི་དཀྱིལ་འཁོར་ལ་ཕྲ་མེན་བཅུ་དྲུག་ཕྱག་རྒྱའི་མཚོན་ཆར་བསྣམས་པས་རྣོན་པོའི་མཎྜལ་སྐུ་སྟོད་ལ་རྫོགས་པར་བསྟན་པ་དང་གཉིས། སྐུ་སྨད་དབང་ཆེན་ཡོངས་སུ་འདུས་པའི་དཀྱིལ་འཁོར་ལ་ཁྲོ་བོ་བརྒྱད་ཞབས་འོག་ཏུ་མནན་པས། ཧེ་རུ་ཀ་ཉི་ཟླ་འོད་དང་བཅས་པ་བརྗིད་པ་ཀུན་སྐུ་སྨད་ལ་རྫོགས་པས་དབང་ཆེན་ཡོངས་སུ་འདུས་པའི་དཀྱིལ་འཁོར་ཏེ། དཀྱིལ་འཁོར་གསུམ་གྱིས་བརྗིད་པའི་ཁྲོ་རྒྱལ་སྐུ། །ཞེས་བྱའོ། །དེ་ལྟར་ཆེ་བའི་ཡོན་ཏན་གྱི་སྤྲུལ་པ་བསམ་གྱིས་མི་ཁྱབ་པས་འགྲོ་བའི་དོན་མཛད་ཀྱང་། པདྨ་འདམ་ནས་སྐྱེས་པ་ལྟར་ཉེས་པའི་སྐྱོན་གྱིས་མ་གོས་པས། པདྨ་འདམ་སྐྱེས་ཉེས་པའི་སྐྱོན་མ་གོས་ཞེས་བྱའོ། །ཇི་ལྟར་སྣང་བ་ཐམས་ཅད་མཚན་མ་མེད་པའི་སྐྱོན་གྱི་དབྱིངས་སུ་གྱུར་པས། རྟག་པའི་མཐའ་ལས་འདས་པས་དབུ་མ་ཆེན་མོ་དམིགས་སུ་མེད་པའི་ངང་དུ་གྱུར་ཀྱང་། རྒྱུ་རྐྱེན་རྟེན་འབྲེལ་འཚོགས་པའི་ནུས་མཐུས་མི་སྐྱེ་བའི་ངང་ལ་སྐྱེ་བའི་ཆོ་འཕྲུལ་འབྱུང་བས་ཆད་པའི་མཐའ་བསལ་ཏེ། དོན་དེ་རྣམས་དང་ལྡན་པས་པདྨ་ཧེ་རུ་ཀ་ཞེས་བྱའོ། ༈ །ད་ནི་དབང་ཕྱུག་མ་ཉི་ཤུ་རྩ་བརྒྱད་ཀྱི་ལྷ་རྒྱུད་བརྗོད་པར་བྱ་སྟེ། རྔམ་པའི་ཞེས་པ་ནི་བདུད་ཀྱི་སྲིན་པོའི་ཆུང་མ་སྟེ། མིའི་སྲིན་མོ་ཞེས་ཀྱང་བྱ་ལ་མི་བསྲུན་མོ་ཞེས་ཀྱང་བྱའོ། །མིའི་སྲིན་མོ་ཞེས་བྱ་བ་ནི། མོ་ལ་བུ་ལྔ་བརྒྱ་ཡོད་དེ། ནང་རེ་ལ་བྱིས་པ་ལྔ་བརྒྱ་ལྔ་བརྒྱ་ཟ་བས་མིའི་སྲིན་མོ་ཞེས་བྱ་ལ། མི་སྲུན་མོ་ཞེས་བྱ་བ་ནི་སྣོད་ཀྱི་འཇིག་རྟེན་ནི་གོས་སུ་གོན་ལ་བཅུད་ཀྱི་འཇིག་རྟེན་ནི་ཟས་སུ་ཟ་ཉི་ཟླ་གཟའ་སྐར་ནི་སྐྲའི་ལན་ཚར་དུ་བྱས་ནས་ཁྲག་གི་དྲི་ཚོར་ན་མཚན་གཅིག་ལ་དཔག་ཚད་བརྒྱད་ཁྲིར་བརྒྱུག་པས་མི་སྲུན་མོ་ཞེས་བྱའོ། །ཐོད་རུས་གདུག་པའི་འབྲུ་མར་ཟས་སུ་ཟ། །ཞེས་པ། ཕྱག་ན་ཐོད་པ་གཅིག་བསྣམས་པའི་ནང་ན་ཁྲག་འབྲུ་མར་ཞག་དང་བསྲེས་ནས་ཟ་བ་སྟེ། སྲིད་པ་གསུམ་གྱི་སེམས་ཅན་གྱི་རྒྱུ་ཉོན་མོངས་པ་ཆགས་པའི་གནས་སྐམ་པའི་ཕྱིར། སྲིད་པའི་སེམས་ཅན་ཆགས་པའི་སྙིང་ཁྲག་གསོལ། །ཅེས་བྱའོ། །ཕྲིན་ལས་དྲག་པོ་རྣམ་པ་གཉིས་ཀྱི་སྒོ་ནས་འགྲོ་བའི་དོན་མཛད་པའི་རྟགས་སུ་སྐུ་མདོག་སྨུག་ནག་ཏུ་བསྟན་པས། དབང་དྲག་ལས་མཛད་མ་ནུ་རཀྴ་སཱི། །ཞེས་བྱ་སྟེ། མིའི་སྲིན་མོ་ཞེས་བྱའོ། །སྡུག་བསྔལ་མྱ་ངན་འདས་སྟོན་ཚངས་མའི་གཟུགས། །ཞེས་བྱ་སྟེ་ཚངས་པའི་ཆུང་མ་ཡིན་ཏེ། ཚངས་པའི་ལྟ་བས་ནི་འདོད་ཁམས་མན་ཆད་ཀྱི་ལྷའི་ཡོན་ཏན་རྣམ་པ་ལྔ་ལ་སྤྱོད་པ་ནི་ཀུན་ནས་ཉོན་མོངས་པ་འཁོར་བའི་ཆོས་སུ་ལྟ་ལ། ཚངས་རིགས་ཀྱི་ལྷ་ནི་བསམ་གཏན་དགའ་བདེ་རྟོག་དཔྱོད་བཞི་ནི་ཞི་བ་མྱ་ངན་ལས་འདས་པ་བདེ་བ་མྱ་ངན་ལས་འདས་པར་ལྟ་བས། དེ་བས་མྱ་ངན་འདས་རྟོགས་ཚངས་མའི་གཟུགས། །ཞེས་བྱའོ། །ཚད་མེད་པ་རྣམ་པ་བཞི་བསྒོམ་པའི་རྟགས་སུ་དབུ་ཡང་བཞིར་སྣང་ལ། ཞལ་བཞི་ནས་གླིང་བཞིའི་སེམས་ཅན་ལ། བཀྲ་ཤིས་ཆེན་པོ་ཚིགས་སུ་བཅད་པ་བཞི་བརྗོད་ཅིང་སྨོན་ལམ་འདེབས་པས། ཞལ་བཞི་སྨྲང་འདོན་གླིང་བཞི་བཀྲ་ཤིས་བརྗོད། །ཅེས་བྱའོ། །ཚངས་པ་ནི་གཏི་མུག་ཆེ་སྟེ། འདོད་ཁམས་ཀྱི་བདེ་བ་ནི་སྡུག་བསྔལ་དུ་ལྟ་ལ་ཁོང་བདག་གི་དགའ་བདེ་རྟོག་དཔྱོད་ནི། ཞི་བ་མྱ་ངན་ལས་འདས་པ་དེ་ཉིད་ཀྱང་གཏི་མུག་ཡིན་ཏེ་གཏི་མུག་དེ་ཉིད་ཀྱང་བཅོམ་ལྡན་འདས་ཀྱི་འབྱེད་པ་མེད་པའི་དོན་གྱི་གཏི་མུག་གིས་བཅོམ་ལ། ཕྱག་ན་རིན་པོ་ཆེ་གཅིག་བསྣམས་པས། སེམས་ཅན་གྱི་རེ་འདོད་ཡིད་བཞིན་དུ་སྐོངས་པས། གཏི་མུག་ཡིད་བཞིན་རིན་ཆེན་པྲཧྨ་ཎི། ཞེས་བྱ་སྟེ། ཚངས་མའོ། །ཐམས་ཅད་མཉམ་པ་ཉིད་རྟོགས་རིགས་མཆོག་མ། །ཞེས་བྱ་བ་དབང་ཕྱུག་མ་ཧཱ་དེ་བའི་ཆུང་མ་ཡིན་ཏེ། ཁྱད་ཆེན་པོའི་ཆུང་མ་ལ་ཆེན་མོ་ཟེར་བ་དང་འདྲ་བར་དབང་ཕྱུག་ཆེན་མོ་མ་ཧཱ་དེ་བ་ནི་ལྷ་ཆེན་པོ་ཉི་ཤུ་རྩ་གཅིག་གི་ནང་ན་བཅོམ་ལྡན་འདས་ཀྱིས་རྡོ་རྗེ་རིགས་ཀྱི་གཙོ་མཆོག་ཏུ་དབང་བསྐུར་བ་ཡིན་པས། འཁོར་བའི་ཆོས་ཉིད་མཉམ་པ་ཉིད་ཀྱི་དབྱིངས་སུ་རྟོགས་པས། རིགས་མཆོག་མ་ཞེས་བྱའོ། །ཕྱག་ན་ཏྲི་ཤུལ་རྩེ་གཅིག་པ་བསྣམས་པས་སྲིད་པ་གསུམ་གྱི་ཉོན་མོངས་པ་འཇོམས་པའི་རྟགས་ཡིན་པས། མ་རིག་དུག་གསུམ་འཇོམས་མཛད་དཔལ་རྩེ་བསྣམས། །ཞེས་བྱའོ། །བུད་མེད་ཆགས་པ་དབང་བྱེད་དཀའ་ཟློག་མ། །ཞེས་པས། སྔོན་ལྷ་དང་ལྷ་མ་ཡིན་གཡུལ་བྱེད་དུས་ན། ལྷ་ནི་ཕམ་ལྷ་མ་ཡིན་ནི་རྒྱལ་བས། ལྷ་ཐམས་ཅད་ཀྱི་རྨི་ལྟས་ལས། དབང་ཕྱུག་ཆེན་པོ་མ་ཧཱ་དེ་བ་དེ་ཙམ་ན༔ དྲང་སྲོང་ནག་པོ་ལེགས་ལྡན་བྱ་བ་ཡིན་ཏེ། རི་དགོན་པའི་གནས་ན་དྲང་སྲོང་དགའ་བ་སྤྱོད་པ་དེ་ལྷ་མོ་དཀའ་ཐུབ་ཟློག་མས་དཀའ་ཐུབ་ལས་བཟློག་ནས་འདོད་པ་སྤྱད་པས། བུ་མགོན་པོ་མ་ཧཱ་ཀཱ་ལ་ཞེས་བྱ་བ་ལྷ་མ་ཡིན་གྱི་གཡུལ་ཟློག་ནུས་པ་གཅིག་འོང་བ། རྨི་ལྟས་ལས་བྱུང་བས་བཙུན་མོ་ཨུ་མ་དེ་བས་དྲང་སྲོང་ལ་ཆགས་པའི་ཚུལ་གྱིས་བསྔགས་པས་དྲང་སྲོང་འདོད་ཆགས་མེ་སྟག་ཙམ་ཞིག་མ་ཟད་པས། འདོད་ཆགས་ཇེ་ཆེ་ཇེ་ཆེ་མེ་ལྟར་འབར་བས་བཙུན་མོ་ཨུ་མ་ལ་འདོད་ཆགས་སྤྱད་པས། སྲས་མགོན་པོ་ཤྲཱི་མ་ཧཱ་ཀཱ་ལ་བྱ་བ་སྐུ་མདོག་མཐིང་ནག་རལ་པ་མེ་ལྟར་འབར་བ་སྤྱན་དང་ཤངས་ཀྱི་ཁྲོ་གཉེར་འབྲི་གུ་གྱེན་དུ་འགྲེངས་པ། ཕྱག་ན་ཙནྡན་གྱི་བེར་ཀ་ཆེན་པོ་ཐོགས་ཏེ། ཡབ་ཀྱི་སྤྱན་སྔར་མཆིས་པས། སུག་ལས་ཅི་འཚལ་ཞེས་ཞུས་པ་དང་། ཡབ་ཀྱིས་ལྷ་དང་ལྷ་མ་ཡིན་གཡུལ་འགྱེད་པས། ལྷ་མ་ཡིན་གྱི་གཡུལ་བཟློག་ལ། ལྷ་རྣམས་རྒྱལ་བར་གྱིས་ཤིག །ཅེས་བསྒོའོ། །དེར་མགོན་པོ་མ་ཧཱ་ཀཱ་ལས་རི་རབ་ཀྱི་ཟོམ་ལ་བྱོན་ནས། ཙནྡན་གྱི་བེར་ཀ་ཆེན་པོ་ལན་གསུམ་བརྡབས་ཏེ་ཚིགས་སུ་བཅད་པ་བཞི་འདི་གསུངས་སོ། །ལྷ་རྣམས་རྒྱལ་བར་གྱུར་ཅིག་ལྷ་མིན་རྒྱལ་མ་གྱུར། ཆོས་རྣམས་རྒྱལ་གྱུར་ཆོས་མིན་རྒྱལ་མ་གྱུར། །དྲང་སྲོང་རྒྱལ་གྱུར་མུ་སྟེགས་རྒྱལ་མ་གྱུར། །མི་རྣམས་རྒྱལ་གྱུར་མི་མིན་རྒྱལ་མ་གྱུར། །ཅེས་ཚིགས་སུ་བཅད་པ་བཞི་པ་བརྗོད་པས། ལྷ་མ་ཡིན་གྱི་གཡུལ་བཟློག་གོ། །དེའི་ཕྱིར་ན་ཆགས་ཚུལ་དབང་མཛད་དཀའ་ཟློག་མ་ཞེས་བྱའོ། །སྔོན་འདོད་ཆགས་ཆེ་ཡང་ད་ལྟ་ལོག་པའི་སྐྱོན་དང་བྲལ་བས། ཆགས་པའི་སྐྱོན་བྲལ་ལྷ་ཆེན་ར་ཏྲི་མ། །ཞེས་བྱ་སྟེ། ལྷ་ཆེན་མོ་ཞེས་བྱའོ། །ཐམས་ཅད་སྒྱུ་མ་བཞིན་དུ་རྟོགས་མཁྱེན་མ། །ཞེས་པ་འདི་ནི། འཁོར་ལོ་ནག་པོ་གསོད་རྐྱེན་གྱི་ཆུང་མ་སྟེ། འཁོར་བའི་ཆོས་འདི་ལྟ་བས་འཁོར་བའི་ཆོས་ཐམས་ཅད་སྒྱུ་མའི་རང་བཞིན་དུ་མཁྱེན་པས། རྟོགས་མཁྱེན་མ་ཞེས་བྱའོ། །འབྲེལ་བའི་སྙིང་རྗེས་འཇིག་རྟེན་ཀུན་ལ་རྟོག །ཅེས་པ། བདེ་བར་གཤེགས་པའི་སྙིང་རྗེས་སེམས་ཅན་གྱི་དོན་དང་འབྲེལ་བས། མོའི་སྙིང་རྗེ་ཡང་དེ་དང་འདྲ་སྟེ་སྙིང་རྗེས་འཇིག་རྟེན་ཀུན་ལ་རྟོག་ཅེས་བྱའོ། །ཕྲིན་ལས་རྒྱ་མཚོས་སྒྲོལ་བའི་བཞེད་ཆེན་ཅན། །ཞེས་པ། འཁོར་ལོ་ནག་པོ་གསོད་སྐྱོན་གྱི་ཕ་ལྷ་མ་ཡིན་གྱི་རྒྱལ་པོ་ཀྱེ་ཧེ་ར་ན་ཀྱེ་ཤུ་ངས་བསད་པས་དེའི་ཕྱོགས་སུ་ཕ་ཤ་ལེན་པའི་ཕྱིར་གཅོད་པའི་འཁོར་ལོ་ཐོགས་ནས་ལྷ་མ་ཡིན་དང་གནོད་སྦྱིན་གྱི་ཕྱོགས་སུ་གསོད་པའི་ལས་ལ་ཞུགས་པས། སྒྲོལ་བ་མ་སྐྱེས་པའི་དབྱིངས་སུ་སྒྲོལ་བས་སྒྲོལ་བའི་བཞེད་ཆེན་ཞེས་བྱའོ། །ཕྱག་མཚན་ཙཀྲ་ནི་འཁོར་བའི་རྒྱུན་གཅོད་ལ་ཕྲིན་ལས་དྲག་པོའི་འགྲོ་བའི་དོན་མཛད་པས། འཁོར་བའི་རྒྱུན་གཅོད་དྲག་པོ་བེ་སྣ་བེ། །ཞེས་བྱ་སྟེ་གསོད་བྱེད་མའོ། །འདུ་བྱེད་མི་རྟག་དྲིལ་བུའི་སྒྲ་ལྟར་མཁྱེན། །ཞེས་པ་འདི་ནི་གཞོན་ནུ་སྨིན་དྲུག་གི་ཆུང་མ་སྟེ། འདི་ལྟ་བས་ནི་ཆོས་ཐམས་ཅད་མི་རྟག་པའི་དྲིལ་བུའི་སྒྲ་ལྟར་མཁྱེན་པའི་མཁྱེན་ཞེས་བྱའོ། །རྟག་པར་གཞོན་ཚུལ་འཁོར་བར་ཇི་སྲིད་བཞུགས། །ཞེས་པ་མ་ཧཱ་དེ་བ་ལ་བུ་མང་པོ་ཡོད་པ་ཀུན་རྒན་ཏེ། གཞོན་ནུ་བཞི་ཞིག་བྱིན་གྱིས་བརླབས་ཏེ་གཞོན་ནུ་ཀརྟི་ཀ་དང་། གཞོན་ནུ་ལོག་གཞོན་དང་། གཞོན་ནུ་དགེ་བྱེད་དང་། གཞོན་ནུ་སྨིན་དྲུག་དང་བཞིའོ། །དེ་ལ་གཞོན་ནུ་སྨིན་དྲུག་འདི་ནི་མ་ཧཱ་དེ་བའི་འདོད་པའི་ཁུང་བུ་ནས་ལྷུངས་པས་བརྒྱ་བྱིན་ལྷའི་དབང་པོ་རི་རབ་ཀྱི་རྩེ་ལ་འདུག་པའི་སྤྱི་བོར་བབས་བརྒྱ་བྱིན་གྱི་ལག་པས་བྱིབས་ནས་འཕངས་པ་དང་། ལྷ་མོ་དྲུག་ར་ན་ལྷའིི་རས་ཀ་ཤི་ཀ་འཐག་པ་ལ་ཕོག་སྟེ་བུད་མེད་དྲུག་འདོད་པ་གཡོས་པ་ལས་བུའི་ས་བོན་དུ་ཆགས་ཏེ། བུ་མགོ་བོ་དྲུག་ལུས་པོ་གཅིག་ཡོད་པ་ཞིག་ཡུམ་ལ་བཙལས་ཏེ་མིང་ཡང་གཞོན་ནུ་སྨིན་དྲུག་ཏུ་བཏགས་སོ། །དེའི་ཆུང་མ་ཡིན་པས་རྟག་པར་སྐུ་གཞོན་ཚུལ་གྱིས་འགྲོ་བའི་དོན་མཛད་པས། ཇི་སྲིད་བཞུགས་ཞེས་བྱའོ། །ཕྱག་ན་མདུང་ཐུང་གཅིག་བསྣམས་པ་ནི་ཡང་དག་པའི་ཡེ་ཤེས་མདུང་དང་འདྲ་བས་ཉོན་མོངས་པ་ཕུག་པ་དང་འདྲ་བ་འབིགས་པས། ཉོན་མོངས་ཐ་བ་འབིགས་པའི་མདུང་ཐུང་འཕེན། །ཞེས་བྱའོ། །གཞོན་ནུར་སྨིན་དྲུག་གི་ཆུང་མ་ཡིན་ལ། །སྙིང་རྗེ་ཆགས་པས་འགྲོ་བའི་དོན་མཛད་པའི་རྟགས་སུ་སྐུ་མདོག་ཀྱང་དམར་སེར་སྟོན་པས་ཆགས་པའི་ཚུལ་གྱིས་དབང་མཛད་ཀ་རི་མ། ཞེས་བྱ་སྟེ། གཞོན་ནུ་མའོ། །རྡོ་རྗེ་ལས་མཛད་ཀུན་གྱི་བླ་ན་མེད། །ཅེས་པ། བརྒྱ་བྱིན་ལྷའི་དབང་པོའི་ཆུང་མ་ཡིན་ཏེ་བརྒྱ་བྱིན་ལྷ་ཡི་དབང་པོས་ནི་རི་རབ་ཀྱི་རྩེ་མོར་སུམ་ཅུ་རྩ་གསུམ་ལྷའི་གནས་ན་ལྷའི་གྲོང་ཁྱེར་ལྟ་ན་སྡུག་དང་ཁང་བཟང་རྣམ་པར་རྒྱལ་བ་དང་། ཆོས་བཟང་ལྷའི་འདུན་ས་དང་། ཚལ་ཆེན་པོ་བཞི་དང་། རྫིང་བུ་ཆེན་པོ་བཞི་དང་། རིན་པོ་ཆེའི་ཐུང་བུ་བཏང་བ་བཞི་དང་། ཤིང་གི་རྒྱལ་པོ་ཡོངས་འདུ་ས་རྟོལ་དང་། རྡོ་ཨར་མོ་ལི་ག་དང་། གླང་པོ་ཆེ་ས་སྲུངས་ཀྱི་བུ་རབ་ཏུ་བརྟན་པ་དང་། རྟའི་རྒྱལ་པོ་སྤྲིན་གྱི་ཤུགས་དང་། དེ་རྣམས་ལ་དབང་བྱེད་པས། ལྷ་ཡི་རྒྱལ་སྲིད་ཆོས་ལ་དབང་བསྒྱུར་ཞིང་། །ཞེས་བྱའོ། །མོས་ཀྱང་དེ་རྣམས་ལ་དབང་བྱེད་དོ། །མཆོད་སྦྱིན་རྒྱས་མཛད་མི་དམིགས་སྐུ་མདོག་དཀར། །ཅེས་པ་ནི་བརྒྱ་བྱིན་ལྷའི་དབང་པོས་སྐྱེ་བ་བརྒྱ་ལ་མགོ་བོ་བརྒྱ་སྦྱིན་པར་བཏང་ནས་མཆོད་སྦྱིན་རྒྱ་ཆེན་མཛད། ཅེས་བྱ་ལ། དེ་བཙུན་མོ་ཤི་ཙ་ཀ་ལོ་དམིགས་པ་ཟིན་པས་མཚན་མའི་དབང་ཁར་མ་གྱུར་ཅིང་ཉོན་མོངས་པའི་སྐྱོན་གྱིས་མ་གོས་པའི་རྟགས་སུ་མི་དམིགས་སྐུ་མདོག་དཀར་ཞེས་བྱའོ། །ཕྱག་ན་རྡོ་རྗེས་སྡོང་པོ་གཅིག་བསྣམས་པས་ར་ཕྱིར་གྱེད་པ་བཞི་ལ། རྡོ་རྗེ་ཕྲ་མོའི་ཐོག་དང་སེར་བ་གློག་དང་ལྕེ་དམར་པོ་འབེབས་པ། ལྷ་མ་ཡིན་གྱི་གཡུལ་ལས་ཟློག་པར་བྱེད་པ། ཕྲིན་ལས་རྣམ་པ་བཞིས་མ་སྐྱེས་པའི་དབྱིངས་སུ་གསོད་པར་མཛད་པས། གསོད་བྱེད་རྡོ་རྗེ་ལྕེ་འབེབས་ཨིནྡྲ་མ། །ཞེས་བྱ་སྟེ་བརྒྱ་བྱིན་མའོ། །ཆགས་པའི་ཚུལ་གྱིས་དོན་མཛད་སྐུ་མདོག་དམར། ཅེས་བྱ་སྟེ། འདི་ཁྱོ་མེད་མ་ཡིན་ཏེ། ལྷ་ཆེན་པོ་ཉི་ཤུ་རྩ་གཅིག་ཀུན་གྱི་བྱི་མོ་ཡིན་པས། སྐུ་མདོག་དཀར་ཟངས་མ་ལ་ཚངས་གཏོར་མ་དང་འདྲ་སྟེ། དམར་མོ་ལ་ཐིག་ལེ་ལྗང་གུ་ཡོད་ལ། བྷནྡྷ་སྣོད་ཅེས་པ། བྷནྡྷ་ཕྱིའི་སྣོད་ཀྱི་འཇིག་རྟེན་ལ། རཀྟ་ནང་བཅུད་ཀྱི་འཇིག་རྟེན་ཡིན་པས་སྣོད་བཅུད་དུས་གཅིག་ཏུ་དཀྲུགས་ནས་ཞལ་དུ་གསོལ་བས། ཉོན་མོངས་པའི་རྒྱུ་དུག་གསུམ་ཟད་བྱེད་མ་ཞེས་བྱའོ། །དུག་གསུམ་ཟད་པར་མཛད་པས་ཐུགས་དམ་སྐོང་སྟེ། སྡུག་བསྔལ་དབྱིངས་སུ་སྐོང་མཛད་སིང་ག་ལམ། །ཞེས་བྱའོ། །སེམས་ཅན་འདུལ་ཐབས་ཁྲོ་མོ་མཆོག་་ཏུ་མཁྱེན། །ཞེས་པ་འདི་ནི་གཟའ་ཉི་མའི་ཆུང་མ་སྟེ། འདི་ཡང་ལྟ་བས་ནི་སེམས་ཅན་ཐམས་ཅད་དྲག་ཤུལ་གྱིས་འདུལ་བར་མཛད་པས་མཆོག་ཏུ་མཁྱེན་ཞེས་བྱའོ། །མུན་སེལ་སྒྲོན་འབར་ཞེས་པ། ཉི་མས་ནི་འཇིག་རྟེན་གྱི་མུན་པ་སེལ་བར་བྱེད་ལ། ཉི་མའི་རྣ་ཆ་ལས་བདུད་རྩི་འཛག་པ་སེམས་ཅན་གྱི་གསོས་སུའང་འགྱུར་ལ། དོན་དམ་པར་ཡེ་ཤེས་ཀྱི་ཉི་མས་མ་རིག་པའི་མུན་པ་སེལ་བར་བྱེད་ལ། ཐུགས་རྗེའི་བདུད་རྩིས་སྡུག་བསྔལ་གྱི་ནད་སོས་བར་བྱེད་ལ། ནད་སོས་མཛད་ཅེས་བྱའོ། །འདམ་སྐྱེས་པད་ལྟར་འཁོར་བར་སྐུ་འཁྲུངས་ཀྱང་། ཞེས་པ་འཁོར་བ་འདམ་རྫབ་དང་འདྲ་བའི་ནང་ནས་སྐུ་འཁྲུངས་ནས་སེམས་ཅན་གྱི་དོན་མཛད་ཀྱང་པདྨ་འདམ་སྐྱེས་ལྟར་ཉེས་པའི་སྐྱོན་གྱིས་མ་གོས་པའི་རྟགས་སུ་ཕྱག་ན་པདྨ་གཅིག་བསྣམས། ཆགས་པའི་སྐྱོན་བྲལ་དབང་མཛད་ཨ་མྲྀ་ཏམ། །ཞེས་པ་ཉི་མའི་ཆུང་མ་ཡིན་པས་སྐུ་མདོག་དམར་པོར་སྟོན་པས། ཡང་དག་པའི་འདོད་ཆགས་ཀྱིས་སེམས་ཅན་གྱི་དོན་མཛད་ཀྱང་ལོག་པའི་འདོད་ཆགས་དང་བྲལ་བས་སྐྱོན་བྲལ་ཞེས་བྱ་ལ། ཨ་མྲྀ་ཏམ་ཞེས་བྱ་སྟེ་བདུད་རྩི་མའོ། །ཞི་བའི་ལས་ནི་གསོད་པའི་མཆོག །ཅེས་པ། འདི་གཟའ་ཟླ་བའི་ཆུང་མ་ཡིན་ཏེ། འདིའི་ལྟ་བ་ནི། སེམས་ཅན་ཐམས་ཅད་ཞི་བའི་ལས་ཀྱིས་འདུལ་བ་མཁྱེན་པས་ཞི་བའི་བྱང་སེམས་དཀར་མོའི་སྐྱེ་བོ་ཆོས་ཅན་མ་སྐྱེས་པའི་དབྱིངས་སུ། གསོད་པས་མཆོག་ཏུ་མཁྱེན་ཞེས་བྱའོ། །ཟླ་ལྟར་ཡོན་ཏན་ཆ་ཤས་མཐར་ཕྱིན་སྐུ། །ཞེས་པ། ཟླ་བ་ནི་ཉ་བ་ལ་ཕྱག་མི་བྱེད་པར་ཚེས་པ་ལ་ཕྱག་བྱེད་པ་དེ་ཟླ་བ་ཡར་མར་འགྲིབ་པ་ཡིན་ལ། ཚེས་པ་ལ་ནི་སྐྱེ་བས་ཟླ་བའི་དཀྱིལ་འཁོར་གང་ཞིང་རྒྱས་པར་བྱེད་པས། དེ་ལ་ཕྱག་བྱེད་པ་དང་འདྲ་བར། ཟླ་བ་ཚེས་ནས་སྐྱེས་པ་བཞིན་དུ་བསོད་ནམས་དང་ཡེ་ཤེས་ཀྱི་ཚོགས་བསགས་ནས་ཆེ་བའི་ཡོན་ཏན་མཐར་ཕྱིན་ནས་ལྷུན་གྱིས་གྲུབ་པའི་ཕྱིར་ཆ་ཤས་མཐར་ཕྱིན་སྐུ་ཞེས་བྱའོ། །གདུང་བའི་ནད་སེལ་ཞེས་པ། ཉིན་པར་ཉི་མས་བསྲེགས་པ་ཐམས་ཅད་ནུབ་མོ་ཟླ་བས་བསིལ་ཞིང་རླན་པ་དང་འདྲ་བར་ཉོན་མོངས་པའི་ཚ་བས་གདུང་བ་ལ་ཟླ་བ་བྱང་ཆུབ་སེམས་ཀྱིས་བརླན་ཅིང་བསིལ་བར་བྱེད་པས་ནད་སེལ་ཅེས་བྱ་ལ། འཇིག་རྟེན་སྒྲོལ་མཛད་ཅིང་། ཞེས་པ། སེམས་ཅན་སྙིང་རྗེའི་ཕྲིན་ལས་ཀྱིས་སྒྲོལ་བའི་དུས་ལ་བབ་ཙམ་ན། གདན་མཆོག་ཐམས་ཅད་སྟོང་བྱེད་ས་མྱ་མ། །ཞེས་བྱ་སྟེ། ཟླ་བའི་མཎྜལ་གྱི་སྟེང་དུ་བཞག་སྟེ་ཡྃ་ལས་རླུང་གི་དཀྱིལ་འཁོར་གྱིས་བཏེག་སྟེ་འོག་མིན་གྱི་གནས་སུ་སྤོར་བས། སྒྲོལ་མཛད་ཅིང་ཞེས་བྱའོ། །དེ་བས་ན་སོ་མེ་མྱ་ཞེས་བྱ་སྟེ་ཞི་བ་མའོ། །དབྱུག་པས་གསོད་པ་འདྲ་བས་གཞན་མེད་མཁྱེན། །ཞེས་པ། འདི་གཟའ་སྤེན་པའི་ཆུང་མ་ཡིན་ཏེ། འདི་ལྟར་བས་ཀྱང་སེམས་ཅན་ཐམས་ཅད་དྲག་ཤུལ་གྱི་དབྱུག་པས་འདུལ་བར་མཁྱེན་ལ། ཐམས་ཅད་མ་ལུས་ཕྲིན་ལས་ལྗང་གུའི་མདོག །ཅེས་པས། ཕྲིན་ལས་དྲག་པོས་འགྲོ་བའི་དོན་མཛད་པའི་རྟགས་སུ་སྐུ་མདོག་ཀྱང་ལྗང་ནག་ཏུ་བསྟན། ནན་དབང་དྲག་ཤུལ་མཆོག་གི་དབྱུག་ཐོ་བསྣམས་ཞེས་པ། ནན་གྱི་དབང་བྱེད་དྲག་ཤུལ་གྱིས་མཛད་པའི་རྟགས་སུ་ཕྱག་ན་ཡང་བེ་ཅོན་གྱི་དབྱུག་པ་གཅིག་བསྣམས་ལ། དྲེགས་བྱེད་སྤྱི་ནས་འཇོམས་པའི་ད་ན་ཧཾ། །ཞེས་བྱ་སྟེ་འཇོམས་བྱེད་མའོ། །ལོག་པར་ལྟ་བ་འཇིགས་བྱེད་སྤྱན་གྱི་མཆོག །ཅེས་པ་འདི་ནི། མིག་དམར་གྱི་ཆུང་མ་ཡིན་ཏེ། གཟའ་སྲིན་པོ་མིག་དམར་གྱི་ནི་མིག་ལ་དུག་ཡོད་པས་གང་ལྟར་བལྟ་བ་ཐམས་ཅད་འཆི་བར་བྱེད་ལ། དེའི་ཆུང་མས་ཀྱང་གང་ལ་བལྟས་པ་འཆི་བར་བྱེད། དེ་བཞིན་གཤེགས་པས་སེམས་ཅན་བྱིན་གྱིས་བརླབས་ནས་ལོག་པར་ལྟ་བའི་དྲེགས་བྱེད་ཐམས་ཅད་ནི་འཆི་བར་བྱེད་ལ། ཡང་དག་པའི་ལྟ་བ་ནི། མཚོ་ལ་སྤྱད་པས་སྤྱན་གྱི་མཆོག །ཅེས་བྱའོ། །སྐྱེ་བ་འཕྲོག་བྱེད་ཅེས་པ་ཕྱག་ན་བྷནྡྷ་རཀྟ་དམར་གྱིས་བཀང་བ་བསྣམས་པ། འཁོར་བའི་རྒྱུ་ཆེས་གསང་བའི་གནས་སྐམ་པའི་ཕྱིར། ཁྲག་མཚོ་གསོལ་ཅེས་བྱས། ལས་མཛད་ཆགས་ཚུལ་གསེར་གྱི་རྐེད་ཆིངས་ཅན། །ཞེས་པ། དཔེ་ན་མི་ལས་བྱེད་སྐེ་རགས་བསྡོམས་པ་དང་འདྲ་བར་ཕྲིན་ལས་རྒྱ་མཚོས་འགྲོ་བའི་དོན་མཛད་པའི་རྟགས་སུ་གསེར་གྱི་རྐེད་ཆིངས་གཅིག་འཆིང་ལ། དྲག་མོ་རྔམས་ཚུལ་གློག་འགྱུར་རཀྴ་སཱི། །ཞེས་པ་སྲིན་མོ་ཞེས་བྱའོ། །ཕྲེང་བ་རྒྱན་གྱི་ནང་དུ་མཆོག་ཏུ་མཛེས། །ཞེས་པ་འདི་ནི་མ་ཧཱ་ཀཱ་ལའི་ཆུང་མ་ཡིན་ཏེ། རྒྱན་ཐམས་ཅད་ཀྱི་སྟེང་ན་ཕྲེང་བ་དཀར་པོ་གཅིག་ཐོགས་ནས། ཕྲེང་བ་ནི་སྙིང་རྗེ་རྒྱུན་མི་འཆད་པའི་རྟགས་ཡིན་ལ། དཀར་བ་ནི་ཉེས་པའི་སྐྱོན་གྱིས་མ་གོས་པས་མཛེས་ཞེས་བྱའོ། །སྙིང་རྗེའི་རྒྱུན་སྐད་བ་སུ་ཞགས་པ་ཡིས། ཆགས་མེད་ཞིང་དུ་ཁམས་གསུམ་འདྲེན་མཛད་མ། ཞེས་བྱ་བ་ཕྱག་ན་བ་སུ་ཏའི་ཞགས་པ་གཅིག་བསྣམས་ཏེ། སྙིང་རྗེ་རྒྱུན་མི་འཆད་པའི་ཞགས་པ་ཡིན་པས། ཁམས་གསུམ་འཁོར་བའི་སེམས་ཅན་ཆོས་ཉིད་ཀྱི་དབྱིངས་སུ་འདྲེན་པར་མཛད་པས་འདྲེན་མཛད་ཅེས་བྱའོ། །རྒྱུན་གྱི་ཐུགས་རྗེས་སྒྲོལ་མཛད་བག་ཤ་སི། །ཞེས་བྱ་སྟེ་ཟ་བ་མའོ། །འཚོག་པའི་དབྱུག་པས་ཆད་པའི་མཆོག་ཏུ་མཁྱེན། །ཞེས་པ་འདི་ནི་རྣམ་ཐོས་སྲསཀྱི་ཆུང་མ་ཡིན་ཏེ། འདི་ནི་ལྟ་བས་ཀྱང་སེམས་ཅན་བཀའ་མི་ཉན་པ་ཐམས་ཅད་དབྱུག་པས་འཚོག་ཅིང་ཆད་པས་བཅད་པས་འདུལ་བའི་མཆོག་ཏུ་མཁྱེན་ཏེ་མཁྱེན་ཞེས་བྱའོ། །གཏུན་བུས་གདུག་པས་མ་ལུས་འཇོམས་མཛད་ཅིང་། །ཞེས་པ་ཕྱག་ན་གཏུན་བུ་གཅིག་བསྣམས་པས་ཀྱང་སེམས་ཅན་འཇོམས་པར་བྱེད་ན། དོན་དམ་ན་བཛྲ་ཡེ་ཤེས་ཀྱི་གཏུན་གྱིས་ཉོན་མོངས་པ་འཇོམས་པར་བྱེད་པས་འཇོམས་མཛད་ཅིང་ཞེས་བྱའོ། །ཡོན་ཏན་མི་ཟད་ནོར་གྱི་གཏེར་འཛིན་མ། །ཞེས་པ། རྣམ་ཐོས་སྲས་ནི་གནོད་སྦྱིན་གྱི་རྒྱལ་པོ་ཆེན་པོ་ཡིན་ཏེ་ནོར་ལ་དབང་བས། མོ་ཡང་དབང་བའི་རྟགས་སུ་ལག་ན་རིན་པོ་ཆེའི་སྒྲོན་མ་གཅིག་བསྣམས་པས་ཏིང་ངེ་འཛིན་ཞེས་བྱའོ། །སྟོང་གསུམ་ནོར་གྱིས་རྒྱས་མཛད་ར་ཏི་མ། །ཞེས་བྱ་སྟེ། སྟོང་གསུམ་གྱི་སེམས་ཅན་ཐམས་ཅད་ལ་ཆེ་བའི་ཡོན་ཏན་མི་ཟད་པའི་གཏེར་འབྱིན་པས་ར་ཏི་མ་ཞེས་བྱ་སྟེ་ནོར་ལྷ་མའོ། །ར་རོ་འདྲ་བས་དཔའ་བོ་གཞན་མེད་མཁྱེན། །ཞེས་པ་འདི་ནི་ལྷ་སྟོབས་བཟང་གི་ཆུང་མ་ཡིན་ཏེ། སྟོབས་བཟང་གིས་ནི་བཅོམ་ལྡན་འདས་དགོངས་པ་མྱ་ངན་ལས་འདས་པའི་ཕྱིར་ཁོ་ཡང་ཞབས་འབྲིང་དུ་འགུམ་པར་དམ་བཅས་པ་ལས། དེ་གཉིད་ལོག་པའི་བར་དུ་བཅོམ་ལྡན་འདས་མྱ་ངན་ལས་འདས་པའི་ཀྱི་ཧུད་ཀྱི་སྒྲ་བྱུང་བ་ཁོས་མ་ཐོས་པར་ཆུང་མས་ཐོས་ནས། ཆུང་མས་འབྲས་ཆང་ས་བོན་ཉིང་སིང་མང་པོ་བྱས་ནས་ཁོ་ལངས་མ་ཐག་ཆང་ལ་མོ་བླུད་ནས་ར་རོ་སྟེ་མྱོས་ནས་འགྱེལ་བས་གྲུབ་པར་མ་གྲུབ་སྟེ་ཤོལ་བས། ལྟ་བ་ཡང་ར་རོ་བས་དཔའ་བ་མེད་པར་བལྟས་སོ། །གཞན་མེད་མཁྱེན། ཞེས་བྱའོ། །ཆོས་རྣམས་གཉིས་མེད་དོན་རྟོགས་རྟག་ཏུ་མྱོས། །ཞེས་བྱ་སྟེ། ཆོས་ཐམས་ཅད་ཀྱང་ར་རོ་བ་བཞིན་དུ་གཉིས་སུ་མེད་པ་ཆོས་ཉིད་ཀྱི་དབྱིངས་ལས་མི་གཡོ་བར་རྟོགས་ནས། རྟག་ཏུ་མྱོས། ཞེས་བྱའོ། །ཉོན་མོངས་ཐ་བ་རློག་མཛད་བཤོལ་བསྣམས་ཤིང་། །ཞེས་པ། ཉོན་མོངས་པའི་སེམས་ཅན་གྱི་ཞིང་ཐ་བ་དང་འདྲ་བ་ལ་སྙིང་རྗེ་ཐོང་གཤོལ་འདྲ་བས་རྨོས་ནས་བླ་ན་མེད་པའི་བྱང་ཆུབ་ཀྱི་མྱུ་གུ་སྨིན་པར་མཛད་པས། དགེ་བའི་ལོ་ཏོག་སྨིན་མཛད་རུ་ཏི་ར་མཱརྟ། ཞེས་བྱ་སྟེ་ར་རོ་མའོ། །བསྟན་པས་གཞན་རྣམས་འཕམ་བྱེད་དཔའ་མོའི་ཚུལ། ཞེས་པ་འདི་ནི་བྷྲིང་གི་རི་ཏིའི་ཆུང་མ་ཡིན་ཏེ། ལྷ་ཆེན་པོ་ལྟ་བ་རང་ཀ་མས་ཀྱང་། བསྟན་པ་ཙམ་གྱིས་གཞན་ཕམ་མོ། །ཞེས་བྱ་སྟེ་བགེགས་རང་གི་སེམས་ལ་ལྡང་ངོ་། །སེམས་མི་འཇོག་ཅིང་བསྟན་པ་ཙམ་གྱིས་བདག་རྒྱལ་ཞིང་བགེགས་གཞན་འཕམ་པར་བྱེད་པས། དཔའ་བོ་མཆོག་ཅེས་བྱའོ། །མ་ལུས་གསོད་ཅེས་པ་བྷྲྀང་གི་རི་ཏིས་ནི་ཐམས་ཅད་གསོད་པའི་ལས་ལ་འཇུག་པས་མ་མེ་གསོད་པའི་ལས་བྱེད་མ་སྟེ། བཅོམ་ལྡན་འདས་ཀྱིས་བྱིན་གྱིས་བརླབས་པས་སྐྱེ་བའི་ཆོས་ཐམས་ཅད་མ་སྐྱེས་པའི་དབྱིངས་སུ་གསོད་པའི་ལས་ལ་འཇུག་པས་འཇུག་མཛད་ཅིང་ཞེས་བྱའོ། །སྙེམས་པ་མི་མངའ་འགྲོ་དོན་གཅིག་ཏུ་སྤྱོད། །ཅེས་པ། བྷྲྀང་གི་རི་ཏི་ནི་མ་ཧཱ་དཱེ་ཝའི་བུ་ཡིན་ཏེ། ཕ་མ་གཉིས་མིག་མང་བྱེད་པའི་དྲུང་ན་འདུག་པ་དང་། ཁོས་ཕ་ལ་བསྟན་ཅིང་མ་ལ་མ་བསྟན་པས་ཕ་ནི་རྒྱལ་མ་ནི་ཕམ་པ་དང་མ་མ་དགའ་ནས་བུ་ལ་འཁངས་ཏེ། བུ་དེ་མིན་ཁ་རོག་འདུག་ན་ཅི་ཉེས། དེ་མིན་ན་རེས་འགའ་མཉམ་པོ་ཙམ་དུ་བསྟན་པས་ཆོག །མ་ཐད་ཀར་ཕམ་དུ་འཇུག་པ་ཅི་བྱས་ཞེས་བྱས་ཏེ་འཁངས་པས། འོ་ན་མའི་བཀའ་དྲིན་འདི་ལས་མ་མཆིས་ཟེར་ནས་ཤ་བསགས་ནས་མའི་དྲུང་དུ་སྤུངས་ཏེ་རུས་ལ་ཀྱེང་ཐོག་གཅིག་ཏུ་སྤྱད་པས་གཅིག་པུ་སྤྱོད་ཅེས་བྱའོ། །གསོད་བྱེད་དྲལ་མཛད་ཨེ་ཀ་ཙ་ར་མ། །ཞེས་བྱ་སྟེ། མ་སྐྱེས་པའི་དབྱིངས་སུ་གསོད་པའི་རྟགས་སུ་ཕྱག་ན་སྤུ་གྲི་གཅིག་བསྣམས་པས་ཨེ་ཀ་ཙ་ར་མ་ཞེས་བྱ་སྟེ་གཅིག་པུ་སྤྱོད་མའོ། །བུད་མེད་ཆགས་ཚུལ་འགྲོ་བ་དབང་དུ་སྡུད། །ཅེས་པ་འདི་ནི་བདུད་ཀ་མ་དེའི་ཆུང་མ་ཡིན་ཏེ། ཀ་མ་དེ་བས་ནི་ལྷ་མོ་གང་ཡིད་དུ་འོང་བ་ལ་མེ་ཏོག་གི་མདའ་འཕངས་པས་ཕོག་མ་ཐག་ཏུ་རང་དབང་མེད་པར་ཁོའི་དབང་དུ་འོང་ངོ་། །མོས་ཀྱང་ལྷ་ཕྲན་གང་སྙིང་དུ་སྡུག་པ་ལ་མེ་ཏོག་འཕངས་པས་ཕོག་མ་ཐག་ཏུ་དབང་དུ་འོང་ངོ་། །གཞུང་ལས་ཀྱང་། མདའ་ཡང་ནི་གཞུ་གང་སྟེ། གཞུ་ཡང་ནི་མེ་ཏོག་ཡིན། མི་རྣམས་གང་ལ་ཕོག་ཆགས་པས། །ཐམས་ཅད་མ་ལུས་དབང་དུ་སྡུད། །ཅེས་བྱའོ། །ཐམས་ཅད་མ་ལུས་འགུགས་པར་བྱེད་པས་དགེ་བའི་ལས་ཞེས་བྱ་སྟེ། ལྷ་མོ་འདིས་མེ་ཏོག་གི་མདའ་གང་ལ་འཕངས་ཀྱང་འཁོར་བའི་ཡིད་ཕྲོགས་ནས་བྱང་ཆུབ་ཀྱི་ལམ་དུ་འཛུད་པར་བྱེད་ལ། མེ་ཏོག་གི་མདའ་བུདྡྷ་ལ་འཕངས་པས་ཀྱང་ཐུགས་དམ་གྱི་རྒྱུད་འགྲོ་བའི་དོན་ལ་བསྐུལ་མར་མཛད་པས་ཡིད་ཕྲོག་ཅིང་ཞེས་བྱའོ། །ཐུགས་རྗེ་ཆེན་པོ་མ་ནོ་ཧ་ར་མ། །ཞེས་བྱ་སྟེ་འདོད་ལྷ་མའོ། །ཁྲག་ལས་ཟས་གཞན་མེད་པར་རྟོགས་པས་མཁྱེན། །ཞེས་པ་དབང་ལྡན་གྱི་ཆུང་མ་ཡིན་ཏེ། འདིའི་ལྟ་བས་ཀྱང་སེམས་ཅན་གྱི་ཉོན་མོངས་པའི་རྒྱུ་ནི་འདོད་ཆགས་ཡིན་ལ། འདོད་ཆགས་ཀྱི་སྐྱོན་ནི་ཁྲག་ཡིན་ལ་ཁྲག་འཐུངས་པས་འདོད་ཆགས་ཟད་པར་བྱའོ་སྙམ་མོ། །གདོན་རྣམས་ཞེས་པ། ཕྱོགས་སྐྱོང་ལས་དབང་ལྡན་ནི་འབྱུང་པོའི་གདོན་འཁོར་ཐམས་ཅད་ལ་དབང་བསྒྱུར་བས་མོས་ཀྱང་དབང་བསྒྱུར་དེ་བས་གདོན་རྣམས་ལ་དབང་བསྒྱུར་བས་ཕྲིན་ལས་ཀྱི་རྦོད་གཏོང་མཛད་དོ། །མི་བཟད་ཅེས་པ། དབང་ལྡན་གྱིས་ནོར་ཕྱུགས་སྤེལ་ཞེས་བྱ་སྟེ། ནོར་ལ་དབང་བྱེད་པས་མོས་ཀྱང་ནོར་ལ་དབང་བྱེད་པའི་རྟགས་སུ་ཕྱག་ན་ནོར་གྱི་བུམ་པ་གཅིག་བསྣམས་སོ། །སྡུག་བསྔལ་རེ་སྐོང་ཐག་ཐུག་སི་ཏི་ཀ །ཞེས་པ། སེམས་ཅན་ནོར་གྱི་སྡུག་བསྔལ་གྱིས་ཕོངས་པ་རྣམས་ལ་རེ་འདོད་ཀྱང་བསྐང་བའི་ཕྱིར་ནོར་གྱི་བུམ་པ་འཛིན་ལ། ཐུག་མེད་ཅེས་བྱ་བ་ནི། ཡོ་བྱད་བཞིན་བཟང་ལེགས་ཞེས་པ་ཁྱོས་ཐད་ཀར་དང་སྙིང་སྦྱར་ནས་གཏོང་དུ་མ་བཏུབ་པ་ལས། མོས་མི་སྡུག་པ་བྱས་ནས་ལུས་ཐག་ཐུག་ཡ་ཡོ་ཙག་ཙོག་མིག་སླ་སླེ་བྱས་པ་དང་། ཁོ་ཁྲོས་ནས་མོ་ལ་དམོད་བོར་བ། ངས་ཀྱང་ལོག་པར་ནི་མ་བསམས། ཁྱོད་ལ་མཉེས་བྱ་བའི་ཕྱིར་སྦྱར་ནས་བཏང་བ་ཡིན་ན། ཁྱོད་ང་མ་འདི་ཙུག་བྱེད་པ། ཁྱོད་ཀྱང་ཐད་ཀར་དེ་ཙུག་གྱུར་ཅིག་ཅེས་སྨྲས་པ་དང་། མོ་ཐད་ཀར་དེ་ཙུག་གྱུར་པས་ཐག་ཐུག་ཅེས་བྱ་ལ། སི་ཏི་ཀ་ནི་ནོར་ལྷའི་ཆུང་མ་ལ་བྱའོ། །རེག་བྱའི་སེམས་ནི་རླུང་གི་ཁམས་ཏེ་མཆོག །ཅེས་པ་འདི་ནི་རླུང་ལྷའི་ཆུང་མ་ཡིན་ཏེ། སེམས་ཅན་གྱི་སྲོག་ནི་དབུགས་ཡིན། དབུགས་ནི་རླུང་ཡིན། རླུང་ལ་མངའ་མཛད་པས་རླུང་ལྷ་ཡིན། སྲིད་གསུམ་ཞེས་པ། སེམས་ཅན་ཐམས་ཅད་ཀྱི་ཁོང་ན་ཨུ་ཏ་ཞེས་བྱ་བའི་རླུང་གཅིག་ཡོད་པ་དེས་སེམས་ཅན་ཐམས་ཅད་ཀྱི་སྲོག་ལ་དབང་བྱེད་པས་སྲོག་འཛིན་པར་བྱེད་ལ། སྒོ་ལྔ་དབང་པོ་རིག་པས་ཀྱང་སྒོ་ལྔའི་རྣམ་པར་ཤེས་པ་གསལ་བར་བྱེད་ཀྱང་ཚེ་འཕེལ་ཅེས་བྱའོ། །བདེ་གཤེགས་ཞེས་པ། བདེ་བར་གཤེགས་པ་ཐམས་ཅད་ཕྲིན་ལས་ཀྱི་རྒྱུ་གཅིག །བསྐལ་པའི་རླུང་ཆེན་པོ་དང་འདྲ་བར་མོས་བསྐྱོད་ཅིང་མཛད་ལ། དེའི་རྟགས་སུ་ཕྱག་ནའང་རླུང་གཡབ་ཀྱི་བ་དན་གཅིག་དང་། རླུང་རས་ཀྱི་སྒྱེའུ་གཅིག་ཀྱང་བསྣམས་སོ། །སེམས་ཅན་ཐམས་ཅད་སོ་སོའི་གནས་ནས་བསྐྱོད་པར་མཛད་པས། ཁམས་གསུམ་གནས་བསྐྱོད་མཛད་མ་བ་ཡ་བེ། ཞེས་བྱའོ། །སྙིགས་མ་ལྔ་ལྡན་ལྔ་བརྒྱ་ཐ་མ་ལ། །ཞེས་པ་འདི་ནི་བདུད་ཀྱི་ཆུང་མ་ཡིན་ཏེ། སྙིགས་མ་ལྔ་ཞེས་པ་ནི། བསྐལ་པའི་སྙིགས་མ་སྟེ། མ་ཐོག་རིང་མོ་ཀུན་ལ་བྱ། །དུས་ཀྱི་སྙིགས་མ་སྟེ་ལྔ་བརྒྱའི་ཐ་མ་ལ་བྱ། ཚེའི་སྙིགས་མ་སྟེ་ཚེ་ལོ་བཅུ་པ་ལ་བྱ། གོས་ཀྱི་སྙིགས་མ་སྟེ་སྐྲའི་ལྭ་བ་གོན། ཟས་ཀྱི་སྙིགས་མ་སྟེ་ཁྲེ་རྒོད་དང་ཀོ་ཁྲབ་པ་ཟ་བས་ལྔ་ལྡན་ཞེས་བྱ་ལ། དེ་ཙམ་ན་སེམས་ཅན་གྱི་ལས་སུ་ནི་གསོད་གཅོད་བྱེད་ལ། ནམ་མཁའ་ལས་ཀྱང་མཚོན་ཆའི་ཆར་པ་བབས་ནས་སེམས་ཅན་དམྱལ་རྡོ་བས། དེ་ཙམ་ན་སེམས་ཅན་ཐམས་ཅད་གསད་པ་ཉི་ཚེ་བས་འདུལ་བར་མཁྱེན་པས་སེམས་ཅན་ཐམས་ཅད་མ་སྐྱེས་པའི་དབྱིངས་སུ་གསོད་པས་ཕྱག་ན་ཡང་རལ་གྲི་གཅིག་བསྣམས་ཏེ་གསོད་པའི་ལས་མཛད་པས། སྡུག་བསྔལ་དབྱིངས་སུ་གསོད་མཛད་མ་ར་ན། །ཞེས་བྱའོ། །གཟི་བརྗིད་ཅེས་པ་འདི་ནི་མེ་ལྷའི་ཆུང་མ་ཡིན་ཏེ། མོས་ནི་སེམས་ཅན་གྱི་སྐྲག་འབྱིན་ཞིང་གཟི་བརྗིད་སྐྱེ་བར་བྱེད་ལ། འབར་བ་མཆོག་གིས་གདུག་པ་མ་ལུས་བསྲེག །ཅེས་པ། དཔེར་ན་བསྐལ་པའི་མེས་འཇིག་རྟེན་བསྲེག་པ་དང་འདྲ་བར། ཡང་དག་པའི་ཡེ་ཤེས་ཀྱི་མེས་ཉོན་མོངས་པ་སྲེག་པར་བྱེད་པས་སྲེག་པར་བྱེད་ལ། བསྐལ་པ་དུས་མཐའ་ཚུལ་སྟོན་ཞེས་པ། དུས་ཀྱི་མཐའ་ལ་བསྐལ་པའི་མེ་ཆེན་པོ་དང་འདྲ་བར། ལྷག་མཐོང་གསལ་བའི་ཤེས་རབ་ཀྱི་མེས་སེམས་ཅན་གྱི་ཤེས་རབ་ཀྱི་དབང་པོ་ནི་གསལ་བར་བྱེད་ལ། འཕྲོས་པས་ཉོན་མོངས་པ་ནི་སྲེག་པར་བྱེད་ལ། དེའི་རྟགས་སུ་ཕྱག་ན་ཡང་མེའི་གསལ་ཤིང་བསྣམས་པས། ལྷག་མཐོང་ཡེ་ཤེས་འབར་འཕྲོས་ཨགྣེ་མ་ཞེས་བྱའོ། །མཆེ་བ་དག་ལས་སྐྱེ་ཤི་རྩད་གཅོད་བཞུགས། ཞེས་པ་འདི་ནི་ས་བདག་ཕག་མགོ་ཅན་གྱི་ཆུང་མ་ཡིན་ཏེ། མོ་ཡང་མགོ་བོ་ཕག་མགོ་མཆེ་བ་བཞི་ཡོད་པས། སེམས་ཅན་འཁོར་བའི་སྐྱེ་ཤི་རྩད་གཅོད་པས། རྩད་གཅོད་བཞུགས་ཞེས་བྱའོ། །ཉོན་མོངས་ཐལ་བར་བརློག་མཛད་ཕག་གི་དབུ། །ཞེས་པས། སྙིང་རྗེ་ཕག་སྣ་དང་འདྲ་བས། ཉོན་མོངས་པ་ཐ་བ་དང་འདྲ་བ། བརློགས་ནས་བྱང་ཆུབ་ཁྲོན་པ་དང་འདྲ་བ་འབྱིན་པར་མཛད་པས། འོག་གི་ཕྱོགས་ནས་སྲིད་གསུམ་སྟོབས་ཀྱིས་སྤོར། །ཅེས་པ། ས་བདག་གི་ས་གཞི་ཆེན་པོ་ལ་དབང་བྱེད་པས། ས་འོག་ས་སྟེང་ས་བླ་བར་སྣང་ནམ་མཁའ་ལ་གནས་པའི་སྲིད་གསུམ་སེམས་ཅན་ཐམས་ཅད་ཀྱི་ལུས་ལ་སྲོག་འཛིན་པའི་སྟོབས་ལྷ་གཅིག་ཀྱང་ཡོད་ལ། སྲོག་གཅོད་པའི་བགེགས་གཅིག་ཀྱང་ཡོད་ལ། སྲོག་འཛིན་པའི་ལྷ་ནི་རྒུད་ལ། སྲོག་གཅོད་པའི་བགེགས་ནི་དར་བའི་དུས་ན་འཆི་བར་བྱེད་པ་དེ་གང་ནས་ཀྱང་མ་བྱུང་སྟེ། རང་མ་ཡོད་པའི་ཕྱིར་མ་འཕོས་མཁྱེན་ཞེས་བྱའོ། །འཆི་བདག་དབང་ཕྱུག་མས་དབང་མཛད་པས། དམ་ཚིག་བསྲུང་མཚམས་ཐམས་ཅད་ཀྱི་འཆི་བདག་བཟློག་པར་མཛད་པས་དམ་ཚིག་ཉམས་པ་ཐམས་ཅད་ཀྱི་འཆི་བདག་གི་བདུད་བྱེད་པས། ཐམས་ཅད་གསོད་བྱེད་དམ་ཉམས་འཆི་བདག་མཛད། ཅེས་སོ། །དམ་ཚིག་བསྲུང་བའི་འཆི་བདག་གི་བདུད་ཟློག་པར་བྱེད་པས། འཆི་བདག་བཟློག་མཛད་ཅིང་། ཞེས་སོ། །ལུང་གི་དུར་ཁྲོད་བགེགས་མཛད་ཛ་མུན་ཏི། །ཞེས་པ། འདི་ཡང་དང་པོ་མ་ཧཱ་དེ་ཝའི་ཆུང་མ་ཡིན་པ་ལ། མ་ཧཱ་དེ་ཝས་བཙུན་མོ་ཨུ་མ་དེ་ཝཱི་བཟང་ཞིང་ལེགས་པ་ལ་བལྟས་ནས་མོ་བོར་བ་དང་། ལུས་རྒྱན་བྱད་དུ་བྱས། དུར་ཁྲོད་དུ་བཞུགས་ནས་བགེགས་བསྒོམ་པ་ལས་དུར་ཁྲོད་ཀྱི་བགེགས་སུ་སྐྱེས་ན། ཨུ་མ་དེ་ཝའི་བུ་གཅིག་བྱུང་བ་བརྐུས་ཤིང་ཟོས་པས། ཨུ་མ་དེ་ཝའི་དུར་སྲིར་སོང་ནས། དེའི་རྟགས་སུ་ལག་ན་ཡང་བུ་གཅིག་གི་རོ་གཅིག་བསྣམས་པས་ཛ་མུན་ཏི་ཞེས་བྱ་ལ་རྒན་བྱེད་མའོ། །འཇིགས་ལས་ལྷག་པའི་བགེགས་ནི་གཞན་མེད་མཁྱེན། ཞེས་པ་འདི་ནི་བགེགས་ཀྱི་རྒྱལ་པོ་བི་ན་ཡ་གའི་ཆུང་མ་ཡིན་ཏེ། འདིའི་ལྟ་བས་ཀྱང་སེམས་ཅན་གྱི་རྣམ་པར་རྟོག་པ་བགེགས་སུ་ལྟ་བར་མཁྱེན་ཏེ། སེམས་ཅན་འཇིགས་ན་བགེགས་ཀྱང་གཞན་མེད་པས་མཁྱེན་པས་གཞན་མེད་མཁྱེན་ཞེས་བྱ། སྟོང་ཕྲག་བཅུ་ཡི་བགེགས་ལ་དབང་མཛད་ཅིང་། །ཞེས་པ། སྟོང་ཕྲག་བརྒྱད་ཅུའི་བགེགས་ནི་སེམས་ཅན་ཐམས་ཅད་ལ་བར་ཆད་ཀྱི་བགེགས་བྱེད་ལ། མོས་བགེགས་དེ་རྣམས་འཇིལ་ཞིང་སྐྲོད་པའི་ལས་བྱེད་པས་བགེགས་མཛད་ཅིང་ཞེས་བྱའོ། །སྣ་ཆེན་གླང་སྣ་བདུད་རྩི་གྷི་ཝང་འཐོར། །ཞེས་བྱ་བ་ནི། བི་ན་ཡ་ག་ནི་མ་ཧཱ་དེ་ཝའི་བུ་ཡིན་ལ། ཁོ་བཟང་ལེགས་ཆེས་པས་མ་ཡར་མོ་ཨུ་མ་དེ་བས་འདོད་ཆགས་སྤྱོད་པའི་ཕྱིར་ཁོང་ལ་སྡུག་པར་བལྟ་ཞིང་འཁོར་བ་དང་། བི་ན་ཡ་གས་བདག་ནི་བཟང་ལ་ལེགས་ཆེས་སེམས། མ་ཡར་མོ་ནི་འདོད་ཆགས་ཆེས། བདག་གི་ཕ་ནི་མཐུ་རྩལ་ཆེ་ཆེས་པས། །འདི་དང་བདག་གཉིས་འདོད་པ་སྤྱད་ན་ཕས་ཚོར་ན་ངེས་པར་གསོད་སྙམ་ནས་མ་ཡར་མོ་ཞེན་པ་བཟློག་པའི་ཕྱིར་གླང་པོ་ཆེའི་གཡང་གཞི་གོན་ནས་མགོ་གཡོགས་ནས་གུག་པ་དང་། མོས་སྨྲས་པ། ངས་ཁྱོད་སྙིང་དུ་སྡུག་ནས་མཉེས་བྱ་བའི་ཕྱིར་ཁྱོད་མ་འཁོར་ལ། ཁྱོད་ང་ལ་མི་སྡུག་པ་བྱེད་པས་ཁྱོད་ཀྱང་གླང་པོ་ཆེའི་མགོ་དང་མི་འབྲལ་བར་གྱུར་ཅིག །ཁོ་ཐད་ཀར་གླང་པོ་ཆེའི་མགོ་ཐོགས་པས། ཆུང་མ་ཡང་གླང་པོ་ཆེའི་མགོ་ཐོགས་པའོ། །བདུད་རྩི་གྷི་ཝང་འཐོར་ཞེས་བྱ་བ་ནི། གླང་པོ་ཆེའི་ཀླད་པ་བདུད་རྩི་གྷི་ཧང་ཡོད་པ་དེ་ཀླད་པ་ནས་ཟག་ནས་སེམས་ཅན་ཐམས་ཅད་ཀྱི་གསོས་བྱེད་པས་འཐོར་ཅེས་བྱའོ། །དེ་བས་ན། སྡུག་བསྔལ་ནད་འཇོམས་མཛད་པ་བུ་ཏ་ན། །ཞེས་བྱའོ། །སྣ་ཆེན་མའོ། །ཆུ་ལས་ལྷག་པའི་རོ་ནི་གཞན་མེད་མཁྱེན། །ཞེས་པ་འདི་ནི་ཆུ་ལྷའི་ཆུང་མ་ཡིན་ཏེ། འདིའི་ལྟ་བས་ཀྱང་ཁ་ཟས་ཐམས་ཅད་ཀྱི་ནང་ན་རོ་ཐམས་ཅད་ཀྱི་མཆོག་ཏུ་གྱུར་པ་ནི་འདི་ཡིན་ནོ་བར་མཁྱེན་པས་གཞན་མེད་མཁྱེན། ཞེས་བྱ་ལ། ཆུ་ལྷ་ནི་ཆུ་ཀླུང་ལ་དབང་བྱེད་པས། རྒྱ་མཚོའི་ནང་ན་ཀླུའི་རྒྱལ་པོའི་ཕོ་བྲང་ན་ཡིད་བཞིན་གྱི་ནོར་བུ་རིན་པོ་ཆེ་ཡོད་པ་ཡང་མོས་བླངས་ནས་འཛམ་བུའི་གླིང་གི་སེམས་ཅན་གྱི་རེ་འདོད་སྐོང་བས་འཕྲོག་མཛད་ཅིང་། ཞེས་བྱའོ། །གདུག་པ་འདུལ་ཕྱིར་དུག་གདོང་སྦྲུལ་ཞགས་བསྣམས། །ཞེས་པ་ནི། ཀླུ་ནི་གདུག་པ་ཆེ་ལ། གདུག་པ་ནི་སྦྲུལ་གྱིས་གཏོང་བས་གདུག་པ་དེ་དབང་དུ་བསྡུ་བའི་རྟགས་སུ་སྦྲུལ་གྱི་ཞགས་པ་གཅིག་བསྣམས་པའོ། །དོན་དམ་པ་ན་ཞི་བའི་གནས་རྣམ་པར་མི་རྟོག་པའི་ཏིང་ངེ་འཛིན་གྱིས་ཐམས་ཅད་དབང་དུ་སྡུད་པས། ཏིང་འཛིན་དབང་སྡུད་བ་རུ་ན། །ཞེས་བྱ་སྟེ་བ་རུ་ནའོ། །བྱམས་དང་སྙིང་རྗེའི་དོན་མཛད་སྐུ་མདོག་ནག །ཅེས་པ། འདི་ནི་བདུད་ནག་པོ་འཆར་ཀའི་ཆུང་མ་ཡིན་ཏེ། བྱམས་པ་དང་སྙིང་རྗེ་རྣམ་པ་གཉིས་ཀྱིས་འགྲོ་བའི་དོན་མཛད་པའི་རྟགས་སུ་ཕྱག་ན་ཏྲི་ཤུ་ལ་གདེངས་པ་གཅིག་དང་། དེའི་མགུལ་ན་ལྕགས་ཀྱུ་གཅིག་བསྣམས་པའོ། །ཆེ་བའི་ཡོན་ཏན་མི་འགྱུར་བའི་རྟགས་སུ་སྐུ་མདོག་ཀྱང་ནག་པོར་བསྟན་ནོ། །ཏྲི་ཤུ་ལ་རྩེ་གསུམ་ནི་སྐུ་གསུང་ཐུགས་གསུམ་གྱི་སྒོ་ནས། ཆགས་པའི་ཚུལ་གྱིས་དོན་མཛད་ར་མགོ་ཅན། །ཞེས་པ་འདི་ནི་བདུད་ར་ཐོད་ཀྱི་བུ་མོ། སྲིན་པོ་དྷ་ཤ་གྷྲི་བའི་ཆུང་མ་ཡིན་ཏེ། བྱམས་པ་ཚད་མེད་པའི་རྟགས་སུ་ཞགས་པ་གཅིག་བསྣམས་པ། སྙིང་རྗེ་ཆགས་པའི་གཟུགས་ཚུལ་གྱིས་འགྲོ་བའི་དོན་མཛད་པའི་རྟགས་སུ་ར་མགོ་གཅིག་ཏུ་བསྟན་པའོ། །ཞུགས་པས་འཁོར་བའི་རྒྱུད་འཛིན་ཅིང་བྱང་ཆུབ་ལམ་དུ་འདྲེན་པར་མཛད་པས་འཛིན་ཅིང་ཞེས་བྱའོ། །གང་ལ་ཅི་འདུལ་དེ་ལ་དེར་སྟོན་པ། །ཞེས་པ་ནི། སེམས་ཅན་གང་ལ་ཅིས་འདུལ་བ་ཡིད་བཞིན་རིན་ཆེན་སྐུ་དང་དེར་སྟོན་ནས་འགྲོ་དོན་མཛད་པས་དེར་སྟོན་ཞེས་བྱའོ། །ཡོན་ཏན་ཚོགས་རྫོགས་རེ་སྐོང་ཙ་ཀ་ལམ། །ཞེས་བྱ་སྟེ། ཆེ་བའི་ཡོན་ཏན་ཐམས་ཅད་སྐྱེད་སྐྱེད་པས་ལྷོ་ཕྱོགས་སུའོ། །པའི་བཀའ་དང་ཞེས་པ། སྲིན་པོ་བུམ་རྣའི་ཆུང་མ་རཀྴ་གླང་མགོ་ཅན་གྱི་བུ་མོ་སྟེ་སྟོན་པའི་བཀའ་ལས་མི་འདའ་བའི་རྟགས་སུ་ལྕགས་སྒྲོག་ལེའུ་ཡ་གཅིག་གཡས་སུ་བསྣམས་ལ། རང་གི་དམ་བཅས་པ་ལས་མི་འདའ་བའི་རྟགས་སུ་ལེའུ་ཡ་གཅིག་གཡོན་ན་བསྣམས་པའོ། །མི་འདའ་མ་གྲུབ་བར་དུ་བརྟན་པར་བཞུགས། །ཞེས་བྱ་སྟེ། བཀའ་དམ་བཅས་པ་ལས་མི་འདའ་བའི་རྟགས་སུ་ལུ་གུ་རྒྱུད་ཀྱིས་མདོ་སྦྲེལ་བར་བསྟན་ཏོ། །དེ་ལྟར་སྙིང་རྗེ་དམ་ཚིག་གིས་སེམས་ཅན་ཐམས་ཅད་འཚོ་བར་མཛད་པས། སྒྲོག་གིས་སེམས་ཅན་འདུལ་བར་མཛད་ཅེས་བྱའོ། །མ་རིག་ནུབ་མཛད་ཅིང་ཞེས་པ། སེམས་ཅན་མ་རིག་པའི་མུན་པ་དང་འདྲ་བ་ལ་སྙིང་རྗེ་ཉི་མ་ཤར་བ་དང་འདྲ་བས་མ་རིག་པ་ནུབ་པར་མཛད་པས། སྣུབས་མཛད་ཀུམྦྷ་ཀརྞ་ཞེས་བྱ་སྟེ། སྲིན་པོ་བུམ་རྣའི་ཆུང་མ་ཡིན་པས་ནུབ་ཏུའོ། །སྐུ་གསུང་ཐུགས་ཡོན་ཏན་ཞེས་པ་འདི་ནི་བདུད་ནག་པོ་གསུས་འཛིན་གྱི་ཆུང་མ་ཡིན་ཏེ། སྐུ་གསུང་ཐུགས་ཡོན་ཏན་ཕྲིན་ལས་རྣམ་པ་ལྔས་གར་ཁྱབ་པར་སྟོན་པའོ། །དྲིལ་བུ་ལས་སྟོང་པ་ཆེན་པོ་ཆོས་ཉིད་ཀྱི་སྒྲ་གྲགས་པས་འཁོར་བ་སོ་སོའི་རྒྱུད་ལ་འབེབས་ཏེ་སོ་སོའི་སྐད་དུ་ཆོས་ཀྱི་སྒྲ་བསྒྲགས་པས། བག་ཆགས་བྱང་མཛད་ལམ་བོ་དྷ་ར་མ། ཞེས་བྱ་སྟེ། སེམས་ཅན་ཉོན་མོངས་པའི་བག་ཆགས་བྱང་བར་མཛད་པས་བྱང་དུའོ། ༈ །མཚན་དང་དཔེ་བྱད་ཅེས་པ། དཔལ་པདྨ་དབང་ཆེན་གྱི་མཚན་དང་དཔེ་བྱད་ལས་སྤྲུལ་པའི་ཕོ་ཉ་ཡིན་ཏེ། མཚན་ལས་སྤྲུལ་པ་ནི་མགྱོགས་མ་ཞེས་བྱ་སྟེ་གློག་འགྱུར་མའོ། །དཔེ་བྱད་ལས་སྤྲུལ་པ་ནི་མགྱོགས་མ་ཞེས་བྱ་སྟེ་དྲ་བ་མའོ། །དྲ་བ་ནི་སྡུད་པའི་ཕོ་ཉའོ། །དེ་ལ་ཡང་གསུམ་སྟེ། ཆོས་ཉིད་ཀྱི་དྲ་བ་དང་། ཡེ་ཤེས་ཀྱི་དྲ་བ་དང་། ཕྲིན་ལས་ཀྱི་དྲ་བའོ། །ཆོས་ཉིད་དྲ་བས་མཚན་མ་དབྱིངས་སུ་སྡུད། ཅེས་བྱ་སྟེ། ཆོས་ཉིད་ཀྱི་དྲ་བ་ནམ་མཁའ་དང་འདྲ་བས་མཚན་མའི་ཆོས་ཐམས་ཅད་ལ་ཁྱབ་ལ། དེས་ཁྱབ་པའི་ཆོས་ཐམས་ཅད་ཀྱང་མཚན་མ་མེད་པའི་དབྱིངས་སུ་སྡུད་པར་མཛད་དོ། །ཡེ་ཤེས་དང་ཐུགས་རྗེའི་དྲ་བ་ནི་ཁྲ་རྒྱ་དང་འདྲ་སྟེ། དཔེར་ན་ཁྲ་རྒྱས་བྱ་བཀབ་པ་བཞིན་དུ་ཡེ་ཤེས་ལས་ཐུགས་རྗེ་བྱུང་ནས་ཐུགས་རྗེས་ཁམས་གསུམ་གྱི་སེམས་ཅན་ཐམས་ཅད་ཐུགས་རྗེས་འགེབ་པར་མཛད་པས། ཡེ་ཤེས་ཐུགས་རྗེས་འབྲེལ་པས་ཀུན་ལ་ཁྱབ། །ཅེས་བྱའོ། །ཕྲིན་ལས་ཀྱི་དྲྭ་བ་ནི་ཉ་རྒྱ་དང་འདྲ་སྟེ། ཉ་རྒྱས་མཚོའི་གཏིང་ནས་བཅུས་ནས་སྐམ་ལ་ཕྱིན་པ་དང་འདྲ་བར། འཁོར་བ་རྒྱ་མཚོ་དང་འདྲ་བའི་གཏིང་ནས་ཉོན་མོངས་པའི་སེམས་ཅན་ཉ་དང་འདྲ་བ་ལ་སྙིང་རྗེ་ཆེན་པོ་ཉ་རྒྱ་དང་འདྲ་བས་བཅུས་ནས་བྱང་ཆུབ་ཀྱི་སྐམ་ལ་འདོན་པར་མཛད་པས། ཕྲིན་ལས་དྲྭ་བས་འགྲོ་བ་རླབས་ཀྱིས་སྒྲོལ། །ཞེས་བྱའོ། །གློག་འགྱུར་མ་ལ་ཡང་དོན་རྣམ་པ་གསུམ་སྟེ། ཡེ་ཤེས་ཀྱི་གློག་དང་། ཐུགས་རྗེའི་གློག་དང་། ཕྲིན་ལས་ཀྱི་གློག་དང་གསུམ་མོ། །དེ་ལ་ཡེ་ཤེས་ཀྱི་གློག་ནི། དཔེར་ན་འཇིག་རྟེན་གྱི་གློག་གིས་སྐད་ཅིག་ནས་སྐད་ཅིག་ཏུ་བར་སྣང་ལ་བསྐྱོད་ཅིང་སྣང་བར་བྱེད་པ་དང་འདྲ་བར། ཡེ་ཤེས་ཀྱི་གློག་གིས་ཆོས་ཉིད་ནམ་མཁའ་དང་འདྲ་བའི་དབྱིངས་སུ་རྣམ་པར་རྟོག་པའི་མཚན་མ་མ་སྐྱེས་པའི་དབྱིངས་སུ་གཅོད་ལས། ཡེ་ཤེས་གློག་འགྱུ་མཛད་མ་དབྱིངས་སུ་གཅོད། །ཅེས་བྱའོ། །ཐུགས་རྗེའི་གློག་ནི་ནམ་མཁའ་ལ་གློག་འབྱུང་བ་དེ་དབྱེ་བཀྲོལ་མེད་པར་ཀུན་ལ་སྣང་བ་དང་འདྲ་བར་ཐུགས་རྗེའི་གློག་གིས་སེམས་ཅན་ཐམས་ཅད་ལ་དབྱེར་མེད་པར་སྐད་ཅིག་ནས་སྐད་ཅིག་ཏུ་དོན་མཛད་པས། སྐད་ཅིག་ཐུགས་རྗེས་འཁོར་བ་དབྱེ་བཀྲོལ་མེད། །ཅེས་བྱའོ། །ཕྲིན་ལས་ཀྱི་གློག་ནི། དཔེར་ན་ནམ་མཁའ་ལ་གློག་མ་མེད་པར་འབྱུང་བ་དང་འདྲ་བར། ཡེ་ཤེས་དང་ཐུགས་རྗེ་ལས་ཕྲིན་ལས་བྱུང་ནས་ཕྲིན་ལས་ཀྱིས་འགྲོ་བའི་དོན་གློག་ལྟར་ཐོགས་པ་མེད་པར་མཛད་པས། ཕྲིན་ལས་གློག་འགྱུས་འགྲོ་བ་ཡུད་ཀྱིས་སྒྲོལ། །ཅེས་པའོ། །དྲྭ་བ་བསྡུས་པ་གློག་འགྱུ་མས་འདྲེན་པ་ནི། དྲྭ་བ་མོ་ནི་སྡུད། གློག་འགྱུ་མས་ནི་བླ་ན་མེད་པའི་གནས་སུ་འདྲེན་པར་མཛད་པའོ། ༈ །གཞན་ཡང་། འདི་ན་མར་ཕོ་ཉ་འབར་མ་དྲུག་ལ། བདུད་ཁྱིམ་འཇོམས་པའི་ཕོ་ཉ་མོ་ཞེས་བྱ་སྟེ། དཔེར་ན་མེ་འབར་བའི་དུ་བ་སྔོན་དུ་འབྱུང་བ་དང་འདྲ་བར། དྲག་པོའི་ཕྲིན་ལས་སླད་ཀྱིས་མཛད་ཀྱང་། ཐུགས་རྗེ་སྔོན་ནས་འབྱུང་བས། དུད་ཁ་དང་ཉིད་ཀྱི་རང་བཞིན་ལས་མེ་འོད་ཡེ་ཤེས་ཀྱི་རང་བཞིན་འབྱུང་ངོ་། །མེ་འོད་ཡེ་ཤེས་ཀྱི་རང་བཞིན་ལས་འོད་ཟེར་ཕྲིན་ལས་ཀྱི་རང་བཞིན་འཕྲོ་བས། འོད་ཟེར་དུད་ཁ་འཕྲོ་བ་ནི་ཞེས་བྱའོ། །ཧཱུྃ་དང་ཕཊ་ཀྱི་སྒྲ་བསྒྲགས་ཤིང་། ཞེས་པ་ཧཱུྃ་གིས་ཐམས་ཅད་མ་སྐྱེས་པའི་དབྱིངས་སུ་སྡུད་པར་བྱེད་ལ། ཕཊ་ཀྱིས་ཉོན་མོངས་པ་དང་དྲེགས་བྱེད་ཐམས་ཅད་འཇོམས་པར་བྱེད་དོ། །བསྐལ་པའི་འབྲུག་སྒྲ་ཆེན་པོ་བཞིན། ཞེས་པ། དེ་དག་དྲག་པོའི་ཕྲིན་ལས་ཀྱིས་འགྲོ་བའི་དོན་མཛད་པ་ཡང་བར་སྣང་སྤྲིན་གྱི་ནང་ནས་འབྲུག་མང་པོ་དུས་གཅིག་ཏུ་སྒྲོགས་པ་དང་འདྲ་བར་རྔམས་པ་རུ་ཁྲོས་པའི་འབྲུག་སྒྲས་དྲེགས་བྱེད་ཐམས་ཅད་དཔའ་བཀང་ཞིང་ཟིལ་གྱིས་གནོན་པར་བྱེད་པས་འབྲུག་སྒྲ་ཞེས་བྱའོ། །ཀུན་ཀྱང་མགྱོགས་པ་རླུང་དང་མཚུངས། །ཞེས་པ། ཐུགས་རྗེ་མགྱོགས་པའི་ཚད་ནི་རླུང་དང་མཚུངས་ཏེ། ཐུགས་རྗེའི་ཤུགས་ཀྱི་རླུང་གིས་བསྐྱོད་པས་ཡེ་ཤེས་ཆེན་པོ་ཉི་མའི་དཀྱིལ་འཁོར་དང་འདྲ་བས་སེམས་ཅན་གྱི་མ་རིག་པའི་མུན་པ་སེལ་བྱེད་པས། ལྕགས་ཀྱི་སྡེར་མོས་ནི་ཕྲིན་ལས་ཕུན་སུམ་ཚོགས་པ་སྟེ། ཐུགས་རྗེ་ལྕགས་ཀྱི་སྡེར་མོ་དང་འདྲ་བས་ཐམས་ཅད་འཛིན་ཅིང་མི་གཏོང་བར་བྱེད་པས་དེ་ལྕགས་སྡེར་ཅན་ཞེས་བྱའོ། །མགོ་གསུམ་པོ་ལ། ཞེས་པ། མགོ་གསུམ་པོ་ནི་མགོན་ཕུན་སུམ་ཚོགས་པས་ཁམས་གསུམ་གྱི་སེམས་ཅན་ཐམས་ཅད་ལ་ཐུགས་རྗེས་མགོན་མཛད་པའི་རྟགས་སོ། །རྐང་གསུམ་ནི་བགྲོད་པ་ཕུན་སུམ་ཚོགས་པ་སྟེ། ས་གསུམ་བགྲོད་པ་མེད་པར་ནོན་པའི་རྟགས་སོ། །མ་ས་ནི་སྤྱོད་པ་ཕུན་སུམ་ཚོགས་པ་སྟེ། ལྟ་བ་ཟབ་མོའི་གྲོགས་སྤྱོད་པ་བརླང་པོས་དབྱེ་བསལ་དང་ཉམ་ང་བ་མེད་པར་མཛད་པའི་རྟགས་སུ་མ་ཞེས་བྱའོ། །བདུད་འཇོམས་པ་ནི་ཕྲིན་ལས་ཕུན་སུམ་ཚོགས་པ་སྟེ། བདུད་སྲིན་པོ་ལ་སོགས་པ་ཁྱིམ་འཇོམས་པར་མཛད་དོ། །མིག་བལྟས་པས་ཀྱང་བདུད་ཀྱི་ཁྱིམ་རྣམས་འཚིག་པར་མཛད་དོ། །དོན་དམ་པར་ཡེ་ཤེས་ཆེན་པོ་མེ་དང་འདྲ་བས་ཉོན་མོངས་པ་བདུད་ཀྱི་ཁྲམ་དང་འདྲ་བ་འཚིག་པར་བྱེད་དོ། །ཀླུའི་ཞེས་པ། ཀླུའི་ཕོ་བྲང་ཐམས་ཅད་ཀྱི་འདི་ཡིས་ཕོ་ཉས་འཇོམས་པར་བྱེད་དོ། །འདི་རྣམས་ཞེས་པ། ཕོ་ཉ་འབར་བ་དྲུག་པོ་འདི་དག་ཀུན་དཔལ་པདྨ་ཧེ་རུ་ཀའི་ཐུགས་ལས་སྤྲུལ་པའི་ཕོ་ཉ་ཡིན་པས། ཁྱོད་ནི་ཁྲོ་བོའི་ཕོ་ཉ་ཞེས་བྱའོ། །དེ་དག་ཀུན་གྱི་ཞལ་ནས་ཀྱང་ཧ་ཧ་དང་། རུ་ལུ་རུ་ལུ་དང་། མ་མ་བྷྱོ་བྷྱོ་དང་། ཟོ་ཞིག་འཆོ་ཞིག་དང་། རྒྱོབ་ཅིག་བཏོང་ཞིག་ལ་སོགས་པའི་སྒྲ་འབྱིན་ཅིང་། གང་གི་རླུང་ཕྱོགས་སོང་བའི་སར་ཁྲོ་བོ་ཐམས་ཅད་འཆི་བར་བྱེད་ན། དེ་བས་བགེགས་ཀྱི་ཚོགས་གཞན་ལྟ་ཅི་སྨོས་ཞེས་བྱའོ། །ན་མོ་བྷི་ཙ་ར་བྷྱོ། ཧ་ཧ་རུ་ལུ་བྷྱོ། ཞེས་པ་རྩ་བའི་སྙིང་པོའོ། །མགོ་བརྒྱད་པོ་ཞེས་པ། མགོ་བརྒྱད་ནི་ཕུན་སུམ་ཚོགས་པ་སྟེ། ལག་པ་བརྒྱད་ནི་ཕྲིན་ལས་ཕུན་སུམ་ཚོགས་པ་སྟེ་ཕྱོགས་བརྒྱད་དུ་བསྙབ་ཅིང་འགྲོ་བའི་དོན་མཛད་དོ། །རྐང་པ་བརྒྱད་ནི་བགྲོད་པ་ཕུན་སུམ་ཚོགས་པ་སྟེ། ཕྱོགས་བརྒྱད་དུ་འགྲོ་བ་མེད་པར་བགྲོད་པའི་རྟགས་སུ་རྐང་པ་བརྒྱད་དོ། །མིག་བརྒྱད་ནི་ཡེ་ཤེས་ཕུན་སུམ་ཚོགས་པ་སྟེ། ཕྱོགས་བརྒྱད་ཀྱི་ཉོན་མོངས་གཟིགས་སོ། །ལག་པ་བརྒྱད་ན་རྡོ་རྗེ་ཕུར་པ་འདྲིལ་བ་ནི། ཡར་བསྟས་པ་རྩེ་ལྔ་ནི་མཁྱེན་པའི་ཡེ་ཤེས་ལྔ་དང་ལྡན་པའི་རྟགས་ཡིན་ལ། མར་ལྟ་བ་ནི་གནམ་ལྕགས་ཕུར་བ་ཟུར་གསུམ་དུ་བསྟན་པ་ནི། མགོ་དྲུག་མ་མ་རྐང་དྲུག་མོ། །ཞེས་པ་མགོ་དྲུག་ནི་མགོན་ཕུན་སུམ་ཚོགས་པ་སྟེ་ལམ་རྒྱུད་དྲུག་གི་འགྲོ་བའི་དོན་མཛད། ལག་པ་དྲུག་གིས་ནི་རྒྱུད་དྲུག་སྐྱེ་ཤི་འཁོར་བའི་རྒྱུན་གཅོད་དོ། །གཡོན་པ་གཏོར་མ་གཏོང་བ་ནི་སྦྱིན་པ་ཕུན་སུམ་ཚོགས་པ་སྟེ། ལམ་རྒྱུད་དྲུག་གི་སེམས་ཅན་ལ་ཆགས་པ་མེད་པའི་སྦྱིན་གཏོང་མཛད། གཡས་པ་གསུམ་ན་ཕུར་པ་འཛིན་པའི་རྟགས། རྩེ་གཅིག་གིས་སེམས་ཅན་གྱི་དོན་མཛད་པའི་རྟགས་སོ། །གང་ནས་གང་དུ་འགྲོ་ཞེས་པ་ནི། ལྕགས་ཀྱི་ཕུར་པ་ཟུར་གསུམ་གྱིས་བགེགས་དང་ལོག་འདྲེན་ཐམས་ཅད་འཇོམས་ཤིང་འཇུག་པར་བྱེད་དོ། །འོད་ཟེར་དུད་ཁས་རེག་པས་ཚངས་པའི་འཇིག་རྟེན་ནས་ཀྱང་འཇིག་པར་བྱེད་ན། གདུག་བྱེད་གཞན་གྱི་ཚོགས་ལྟ་ཅི་སྨོས། ལག་པ་གཡོན་པ་བསྐྱོད་པའི་མཆན་ནས་སྤྲུལ་པའི་ཕྲ་མེན་མ་རལ་པ་མེ་ལྟར་འབར་བ། ལ་ལ་ནི་ལྕགས་ཀྱུ། ལ་ལ་ནི་ཞགས་པ། ལ་ལ་དགྲ་སྟྭ། ལ་ལ་ཞིང་ཆེན་པོའི་ཡན་ལག་འཛིན་པ། བསམ་གྱིས་མི་ཁྱབ་པ་འཕྲོས་ཏེ། འགྲོ་བའི་དོན་མཛད་དེ་སྤྲུལ་པ་འགྱེད་པའི་ཕོ་ཉ་མོ་ཞེས་བྱའོ། །བྱང་གི་ཕྱོགས་ནས་འབྱུང་བ་ནི། ཞེས་པ་ལྕགས་ཀྱུའི་རྐང་པ་ལུས་ལྕགས་ཀྱི་ལུས་སུ་བསྟན་པ་ནི། ཅིས་ཀྱང་མི་ཚུགས་ཚུལ་ཁྲིམས་ཀྱི་ལུས་སུ་བསྟན། མིག་ཉི་མར་བསྟན་པ་ནི། ཡེ་ཤེས་ཀྱི་ཕོ་ཉ་ནི་མ་རིག་པའི་མུན་པ་སེལ་བའི་རྟགས་ཡིན་ལ་སྦུ་ལྕགས་ཀྱུ་བསྲེགས་པ་དང་འདྲ་བ་ནི། ཚུལ་ཁྲིམས་ཀྱི་ལུས་ལས་ཐུགས་རྗེའི་སྤྲུལ་པ་བྱུང་ནས་འགྲོ་བ་སེམས་ཅན་གྱི་དོན་མཛད་པའི་རྟགས་སོ། །སྒྲ་འབྲུག་བས་ཀྱང་ཆེ་བ་དང་། བང་གློག་གིས་ཀྱང་བསྐྱོད་དུ་མེད་དོ། །རབ་ཏུ་མི་སྲུན་པའི་ཚད་ནི། ལན་འགའ་འཕྲོས་པའི་ཚེ་ཕྱག་ན་རྡོ་རྗེའི་མཐུ་ཡང་འཕྲོག་པར་ནུས་པའི་མཆོག་གོ། །སྒོ་སྐྱོང་གི་ཕོ་ཉི་ནི། མགོ་དགུ་པ་ལ་རྐང་གཅིག་པ། མགོ་དགུ་ནི་མགོན་ཕུན་སུམ་ཚོགས་ཏེ། ས་དགུ་ལ་གནས་པའི་སེམས་ཅན་རྐང་པ་གཅིག་གིས་ནི་ཐུགས་རྗེའི་ཕྲིན་ལས་རྩེ་གཅིག་གིས་འགྲོ་བའི་དོན་མཛད་པའི་རྟགས་སོ། །ལུས་གནག་འོད་དཔུང་ཡང་གནག་ཅེས་པ་ལུས་ནག་པོར་བསྟན་པ་ནི་ཆོས་སྐུ་མི་འགྱུར་བའི་རྟགས་ཡིན། འོད་ཕུང་ནག་པོ་ནི་ཆོས་སྐུ་ལས་ཡེ་ཤེས་ཀྱི་འོད་འབྱུང་བའི་རྟགས་ཡིན། རལ་པ་དང་མཆེ་བ་ནག་པོ་ནི་ཐུགས་རྗེ་ལས་ཡེ་ཤེས་ཀྱི་སྤྲུལ་པ་འབྱུང་ནས། འགྲོ་བའི་དོན་མཛད་པའི་རྟགས་ཡིན་ལ། མཆེ་བ་ནག་པ་ནི། སེམས་ཅན་སྐྱེ་ཤི་འཁོར་བའི་རྒྱུན་གཅོད་པའི་རྟགས་ཡིན་ལ། མིག་དང་ལག་པ་གཉིས་ནི། འགྲོ་བའི་དོན་ལ་ཞེ་གནག་པའི་འགྲོ་བའི་དོན་མཛད་པའི་རྟགས་སོ། །མགྱོགས་པའི་ཚད་ནི་རླུང་གིས་ཀྱང་བསྐྱོད་དུ་མེད་དོ། །ཕོ་ཉ་ཐམས་ཅད་ཀྱི་མཆོག་ཡིན་ཏེ། སེམས་ཞུམ་པ་མེད་པར་ལུས་ཕ་རོལ་གྱི་སྟོབས་ཆེན་པོ་ཡང་འཇོམས་སོ། །ཕ་རོལ་གྱི་རྣམ་ཤེས་ཀྱང་ངེས་པར་འཇོམས་སོ། །རྐང་གཅིག་ཕོ་ཉ་ཡང་སྤྲུལ་གྱི་སྒོ། རྟ་བབས་ཀྱི་ཕྱི་རོལ་དུ་ལོང་བ་ལག་སྦྲེལ་མང་པོ་འབྱུང་སྟེ། ཁ་དོག་རེས་འགའ་སྐྱ། རེས་འགའ་སྔོ། རེས་འགའ་སེར། རེས་འགའ་དམར། གཉིས་གཉིས་ཀྱང་གཅིག་ལ་འཁྲིལ་གཅིག་ལ་འཁྱུད་ནས། དབྱིངས་དང་ཡེ་ཤེས་གཉིས་སུ་མེད་པའི་རྟགས་སུ་གཅིག་ལ་གཅིག་འཁྲིལ། ཐབས་དང་ཤེས་རབ་ཟུང་དུ་འབྲེལ་བ་ཡང་སྦྲེལ་ཏེ་འགྲོ། མིག་ཀྱང་མེད་ཅིང་ཅང་མི་སྨྲ་བ་ནི། འཛིན་པའི་སེམས་ལ་བདག་མེད་པའི་རྟགས་སུ་དམིགས་ཀྱང་མེད་ལ། གཟུང་བའི་ཡུལ་མེད་པའི་རྟགས་སུ་ཅང་མི་སྨྲ་བའོ། །ལོང་བ་ཐབས་ཀྱི་མཆོག་ཡིན་ཏེ། རྟ་བབས་ཀྱི་ཕྱི་རོལ་དུ་ཡིད་བཞིན་དུ་སྐོང་ངོ་། ༈ །ཁྲོ་བོ་རྟོག་པ་ལྷ་རྒྱུད་ཀྱི་འགྲེལ་པ་བི་མ་ལས་མཛད་པ་རྫོགས་སོ།། །།ཤུ བྷཾ།། །།

པདྨའི་ལམ་རིམ་གྱི་ལོ་རྒྱུས།

པདྨའི་ལམ་རིམ་གྱི་ལོ་རྒྱུས་བཞུགས།

པདྨའི་ལམ་རིམ་ནི། སློབ་དཔོན་པདྨའི་དགོངས་པ་རྫོགས་པ་ཆེན་པོའི་མན་ངག་གནུབས་ཆེན་སངས་རྒྱས་ཡེ་ཤེས་ནས་བརྒྱུད། ཟུར་ཤཱཀྱ་འབྱུང་ལ་བཀའ་བབས་པའི་ཁུང་མ་རང་དུ་སྣང་ལ། གུ་རུའི་གཏེར་ཆོས་རྣམས་ཕར་བཞག །བཀའ་མར་གྲགས་པའི་སྔ་འགྱུར་རང་རྐང་ལ་རྫོགས་ཆེན་གྱི་ཆོས་སྐོར་ཕལ་ཆེར། བི་མ་ལ་དང་། བཻ་རོ་ཙ་ན་ལས་བརྒྱུད་པ་ཤས་ཆེ་ཞིང་། སངས་རྒྱས་གསང་བ་དང་གནུབས་ཆེན་གྱིས་བྲུ་ཤ་ནས་བླངས་པ་དང་། རྒྱ་ནག་ཧ་ཤང་བདུན་བརྒྱུད་དང་། རྒྱ་གར་གྱི་སློབ་དཔོན་བདུན་རྒྱུད་སོགས་མང་གིས། སློབ་དཔོན་པདྨ་ནས་བརྒྱུད་པའི་རྫོགས་ཆེན་ནི་འདི་ཁོ་ནར་མངོན་ནོ། །འདི་ཡན་རྗེ་བཙུན་ཏ་ར་ནཱ་ཐའི་གསུང་ངོ་། །དེར་མ་ཟད་མངའ་བདག་ཉང་གིས་ཟབ་གཏེར་ནས་བཞེས། སྲས་འགྲོ་མགོན་དང་། དེས་གུ་རུ་ཆོས་དབང་ལ་གནང་། ཆོས་དབང་རིན་པོ་ཆེས་ཀྱང་ཟབ་གཏེར་ནས་བཞེས་པ་སྟེ། གཏེར་ཁ་གོང་འོག་གི་གདམས་པ་ཟུང་འབྲེལ་ཟུར་ཤཱཀ་འབྱུང་ཕྱི་མའི་ཕྱག་ཏུ་བབས་པས། བཀའ་གཏེར་གྱི་གདམས་ཟབ་ཆུ་བོ་གཉིས་འདྲེས་སུ་གྱུར། འཆད་ཉན་གྱིས་གཏན་ལ་ཕབས་པའི་བཤད་སྒྲུབ་རྒྱ་ཆེར་དར་། དེ་ཡང་གཞུང་རྡོ་རྗེའི་ཚིག་རྐང་ནི་ཡི་གེ་གསུམ་ཀའི་དགོངས་ཉམས་ཟབ་ཅིང་རྒྱ་ཆེ་བ་ཐམས་ཅད་གཅིག་ཏུ་དྲིལ་བར་སྣང་ནའང་། སྐབས་འདིར་མཐར་ཐུག་གི་རྫོགས་རིམ་སྙིང་པོར་དྲིལ་བའི་གདམས་པ་ངོ་སྤྲོད་ཀྱི་ལུགས་སུ་གདབ་པའོ། །དགེའོ།། །།