 སྔ་འགྱུར་བཀའ་མའི་ཆོས་སྡེའི་གླེགས་བམ་གྱ་བཞི་པ།གླེགས་བམ། ཡུ༽སློབ་དཔོན་སངས་རྒྱས། ཆོས་ཀྱི་བློ་གྲོས།སི་ཁྲོན་མི་རིགས་དཔེ་བསྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། མགོ་བརྗོད།རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར། ཐུགས་རྗེ་ཆེ་ཞུ།ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས། ཞི་བ་རིན་ཆེན་དྲྭ་བ། སློབ་དཔོན་སངས་རྒྱས།ཞི་བ་རིན་ཆེན་དྲྭ་བ་ཞེས་བྱ་བ་བཞུགས་པ་ལགས་ས྄ོཧ྅྅྅། །ཕྱག་འཚལ་བ་ལ་གསུམ་སྟེ། དགོས་པའི་དོན་དང་། བསྡུས་པའི་དོན་དང་། ཚིག་གི་དོན་ནོ། །དགོས་པའི་དོན་ལ་གསུམ་སྟེ། མན་ངག་རྩོམ་པ་ལ་བར་ཆད་ཀྱི་བགེགས་ཞི་བར་བྱ་བའི་དགོས་པ་དང་། ཡ་རབས་དམ་པ་དང་ཚུལ་བསྟུན་པའི་སྒོ་ནས་དད་པའི་རྒྱུར་འགྱུར་བའི་དགོས་པ་དང་། ཡི་དམ་གྱི་ལྷ་མི་སྤོང་བའི་དགོས་པ་ཡོད་པའོ། །བསྡུས་པའི་དོན་ནི་བཞི་སྟེ། ཡུལ་གང་ལ་རྩལ། གང་ཟག་གང་གིས་རྩལ། ཚུལ་ལམ་ཐབས་ཇི་ལྟར་རྩལ། རྩལ་བ་ལ་དོན་ཆེད་ཅི་ཡོད་དོ། །དེ་ལ་ཡུལ་གང་ཞེ་ན། དཔལ་ཀུན་ཏུ་བཟང་པོ་རྒྱལ་བ་དྲུག་པའོ། །གང་ཟག་གང་གིས་ན། སྔོན་འབྱུང་དུ་སློབ་དཔོན་སངས་རྒྱས་གསང་བའོ། །རྗེས་འཇུག་ཏུ་བཤད་པ་པོ་རྣམས་སོ། །ཚུལ་ལམ་ཐབས་ནི། ལུས་གུས་པ་དང་ངག་སྙན་པ་དང་བཅས། སེམས་དང་བ་དང་བཅས་ནས་བརྩལ་བའོ། །བརྩལ་བའི་དགོས་ཆེད་ནི། དོན་གྱི་ཕྱག་འཚལ་བས་རིག་པ་ཉིད་ཀུན་ཏུ་བཟང་པོར་རྟོགས་པའོ། །ཚིག་གི་ཕྱག་བཙལ་བས། མཆོག་དང་ཐུན་མོང་གི་དངོས་གྲུབ་ཀྱི་རྒྱུར་འགྱུར་བའི་དོན་ནོ། །ཚིག་གི་དོན་ནི་གཉིས་ཏེ། རྒྱུད་དང་དཀྱིལ་འཁོར་གྱི་བདག་པོ་ངོས་བཟུང་བ་དང་། དེའི་ཆེ་བ་ལ་སྐུ་ལྔ་ལྷུན་གྲུབ་ཏུ་བསྟན་པའོ། །དང་པོ་རྒྱུད་དང་དཀྱིལ་འཁོར་གྱི་བདག་པོ་ངོས་གཟུང་བ་ལ་གསུམ་སྟེ། རང་བཞིན་༼དེ་བཞིན་༽དང་། དགོངས་༼ཡེ་ཤེས་དང་དཀྱིལ་༽ དཔྱོད་དང་། ངོ་༼རྡོ་རྗེ་ཡིད་༽ བོའོ། གཉིས་པ་དེའི་ཆེ་བ་ནི་ལྔ་སྟེ། ཆོས་༼དེ་བཞིན་༽སྐུ་དང་། ལོངས་༼ཡེ་ཤེས་༽སྐུ་དང་། མངོན་པར་བྱང་ཆུབ་༼ཐུགས་༽པའི་སྐུ་དང་། རྡོ་རྗེའི་༼གཏེར་༽སྐུ་དང་། སྤྲུལ་པའི་སྐུ་དང་༼དཀྱིལ་འཁོར་༽ ལྔའོ། ༈ །དེ་བཞིན་གཤེགས་པ་ཀུན་གྱི་བདག །དེ་མ་ནོར་བཞིན་མ་བཅོས། དེའི་ངང་དུ་གཤེགས་པ་ནི་གཉིས་ཏེ། གྲོལ་ལམ་དུ་གཤེགས་པ་དང་། ཐབས་ལམ་དུ་གཤེགས་པའོ། །གྲོལ་ལམ་ནི་རང་འབྱུང་ཡེ་ཤེས་སྐུ་ཉམས་སུ་གཏར་བའོ། །ཐབས་ལམ་དུ་གཤེགས་པ་ནི། ལྷན་ཅིག་སྐྱེས་པའི་ཡེ་ཤེས་སྐུ་ཉམས་སུ་གཏར་བའོ། །ཀུན་གྱི་ནི་དེ་བཞིན་གཤེགས་པ་ཐམས་ཅད་སྤྱིར་བསྡུས་པའོ། །བདག་ནི་ཆོས་ཉིད་ཡེ་ནས་མ་བཅོས་མ་སླད་པའི་དོན་ཇི་ལྟ་བར་རང་གིས་མངོན་གསུམ་དུ་བྱས་པ་ནི། དཔལ་ཀུན་ཏུ་བཟང་པོ་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདག་ཉིད། རྒྱལ་བ་དྲུག་པ་དེ། དངོས་སུ་མཉམ་པ་ཉིད་ཀྱི་ཆོས་ཀྱི་སྐུའི་རང་བཞིན་དུ་གནས་པའོ། །ཡེ་ཤེས་རྒྱ་མཚོའ་རབ་ཟབ་ཐུགས། །ཡེ་ཤེས་ནི་གཉིས་ཏེ། གྲོལ་ལམ་རང་འབྱུང་གི་ཡེ་ཤེས་ཆེན་པོ་དང་། ཐབས་ལམ་ལྷན་ཅིག་སྐྱེས་པའི་ཡེ་ཤེས་སོ། །དེ་གཉིས་ཇི་ལྟ་བར། རྟོགས་པས་ན་ཡེ་ཤེས་སོ། །དེའི་དཔེའ་ནི་རྒྱ་མཚོའ་སྟེ། གཏིང་དཔག་པར་དཀའ་བས་ཟབ་པའོ། །དེ་དང་ཀུན་བཟང་གི་ཐུགས་འདྲ་བས་ན་ཐུགས་སོ། །དེ་བས་ན་དེ་བཞིན་གཤེགས་པའི་ཐུགས་རང་བྱུང་གི་ཡེ་ཤེས་ནི། རབ་ཏུ་ཟབ་པའི་ཕྱིར། གདུལ་བྱས་དཔག་པར་དཀའ་བ་ནི་དཔེའ་རྒྱ་མཚོའི་ལྟ་བུའོ། །དེ་ནི་ལོངས་སྤྱོད་རྫོགས་སྐུར་འབྱུང་ངོ་། །དཀྱིལ་འཁོར་ཡིད་བཞིན་འབྱུང་བའི་གཏེར། །ཐུགས་ཡང་དག་པའི་ཡེ་ཤེས་དེ་ལས་མ་གཡོས་པར་ཞི་བ་དང་ཁྲོ་བོའི་དཀྱིལ་འཁོར་ཐམས་ཅད་མ་ལུས་མ་རྩལ་བར་གདུལ་བྱ་ཡི་སྣང་བ་ལ་འབྱུང་བ་ནི། དཔེར་ན་ཡིད་བཞིན་གྱི་ནོར་བུ་རིན་པོ་ཆེའི་གཏེར་དང་འདྲའོ་དེ་ཡང་ཟད་མི་ཤེས་ཤིང་འདོད་དགུར་འབྱུང་བ་ནི་སྤྲུལ་པའི་སྐུའོ། །རྡོ་རྗེ་ཡིད་ལ་ཕྱག་འཚལ་ཏེ། །ཆོས་ཉིད་འདུས་མ་བྱས་པ་ཡིན་པས་ཐམས་ཅད་དུ་སྣང་བ་ནི། མ་རྩལ་བའི་ཕྱིར་ན་རྡོ་རྗེ་ཡིད་དོ། །དེ་ཡང་རྡོ་རྗེ་ནི་དཔལ་རྡོ་རྗེ་སེམས་དཔའི་སྟེ། དལ་གྱི་གཙོའ་བོའོ། །ཡིད་ནི་ཀུན་ཏུ་བཟང་པོ་སྟེ། རྒྱུད་ཀྱི་སྟོན་པའོ། །ལ་ནི་བཞི་སྟེ་དེ་གཉིས་ཡུལ་དུ་བྱས་པའོ། །ཕྱག་ནི་དོན་དང་ཚིག་ཏུ་རྩལ་ལོ། །དེ་ནི་ལྷག་མ་ཅན་གྱི་ཚིག་སྟེ། རྒྱུད་ཀྱི་དོན་བསྟུས་སྙིང་པོ་ཙམ། །ཞེས་བཤད་པར་དམ་བཅའ་བ་དང་འབྲེལ་བ་ཡིན་ནོ། །བཤད་པར་དམ་བཅའ་བ་ནི་གསུམ་སྟེ། དགོས་པའི་དོན་དང་། བསྟུས་པའི་དོན་དང་། ཚིག་གི་དོན་ནོ། །དགོས་པའི་དོན་ནི། དམ་བཅས་པས་གདུལ་བྱ་ཡལ་བར་མི་དོར་བ་དང་། བསྟན་ཆོས་རྩོམ་པ་མཐར་ཕྱིན་པའི་དགོས་པ་ཡོད་དོ། །བསྟུས་པའི་དོན་ནི། གང་གིས་བཤད། གང་བཤད། ཚུལ་ལམ་ཐབས་ཇི་ལྟར་བཤད། བཤད་པའི་དགོས་པ་ཅི་ཡོད་པའོ། །དེ་ཡང་གང་གིས་བཤད་ན། སངས་རྒྱས་གསང་བས་བཤད་དོ། །གང་བཤད་ན་ཞི་བ་རིན་ཆེན་དྲ་བའོ། །ཚུལ་ལམ་ཐབས་ནི། ཕྱག་འཚལ་ནས་བཤད་པར་དམ་བཅའ་བའོ། །དགོས་པ་ནི་བདེ་བར་གཤེགས་པའི་སྙིང་པོ་མ་རིག་པར་རང་གི་རྣམ་རྟོག་གིས་བཅིངས་པའི་སེམས་ཅན་རྣམས། རང་འབྱུང་གི་ཡེ་ཤེས་ཆེན་པོ་རྒྱུད་ལ་སྐྱེད་པའི་དགོས་པ་ཡོད། ཚིག་དོན་ནི་ཨེ་མའོ་ཞེས་པ་ལ་སོགས་པའོ། །ཨེ་མའོ་བདེའ་གཤེགས་སྙིང་པོ་ལས། གཞིའ་རིག་པའི་གནས་ཐབས་བསྟན། ཨེ་མའོ་ནི་ངམ་ཞིང་ངོ་མཚར་བ་སྟེ། ངོ་གང་ལ་མཚར་ན་སེམས་ཅན་གྱི་སེམས་ཉིད་བདེ་བར་གཤེགས་པའི་སྙིང་པོར་གནས་པ་དེ་མ་རྟོགས་པར་གནས་པས་དེ་ལ་ངོ་མཚར་བའོ། །དེ་བས་ན་ཁམས་གསུམ་ན་གནས་པའི་སེམས་ཅན་ལ། སྙིང་པོ་བྱང་ཆུབ་ཀྱི་སེམས་རང་ལ་རང་ཆས་སུ་ཡོད་ཀྱང་ངེས་པའི་ཤེས་པ་མ་སྐྱེས་པའི་ཕྱིར་འཁྲུལ་བ་ནི། ངོ་མཚར་ཏེ། སྙིང་པོ་བྱང་ཆུབ་ཀྱི་སེམས་མ་རྟོགས་པ་དེ་ཉིད་འཁོར་བའི་རྒྱུར་གྱུར་པའོ། །རང་གི་རྣམ་རྟོག་ལས་ཀྱིས་བཅིངས། །ལམ་སྐྱོན་གྱིས་འཁྲུལ་བ་བསྟན། རྒྱུད་པའི་རྒྱུར་གྱུར་པ་དེ་ཁོ་ན་རང་གི་རྣམ་རྟོག་སྟེ། ལྷན་ཅིག་སྐྱེས་པའི་མ་རིག་པ་ཞེས་ཀྱང་བྱའོ། །རྒྱུ་དེ་ལ་རྐྱེན་ནི་ལས་དང་ཉོན་མོངས་པའི་དབང་གིས་རང་གི་རྒྱུད་བཅིངས་ནས། འབྲས་བུ་འགྲོ་བ་རིགས་དྲུག་གི་རྟོག་པས་བཅིངས་ནས་ཐར་པའི་དུས་མེད་དོ། །རང་བྱུང་ཡེ་ཤེས་སྐྱེད་པའི་ཕྱིར། །འབྲས་བུ་ཡེ་ཤེས་སྐྱེད་ཐབས་བསྟན། འགྲོ་དྲུག་ནས་ཐར་དུས་མྱེད་པ་དེ་ལྟ་བུ་ལ། རང་འབྱུང་ཡེ་ཤེས་ཀྱི་སྣང་བ་སྔར་མ་སྐྱེས་པ་དེ་སྐྱེད་པ་དེ་སྐྱེད་པའི་ཕྱིར་སློབ་དཔོན་སངས་རྒྱས་གསང་བས་རྒྱུད་གསང་བ་སྙིང་པོའི་དོན་བསྡུས་ནས་རྩོམ་པའོ། །ཇི་ལྟར་རྩོམ་ན་རྒྱུད་ཀྱི་དོན་ཅེས་སྦྱར་རོ། །རྒྱུད་ཀྱི་དོན་བསྡུས་སྙིང་པོ་རྩམ། །རང་གཟོག་སྤངས་པའི་ཕྱིར་ཐུས་པའི་རྒྱུད་ཀྱི་ཁུངས་བ སྟན། རྒྱུད་ནི་དཔལ་གསང་བ་སྙིང་པོ་ལ ། དེའི་དོན་ནི་བདུན་ཏེ། ལྟ་བ་དང་། སྤྱོད་པ་དང་། དབང་དང་། དམ་ཚིག་དང་། འཕྲིན་ལས་དང་། སྒྲུབ་པ་དང་། དལ་དང་། བདུན་གྱི་དོན་མན་ངག་འདིར་བསྟུས་པས་ན། མན་ངག་གི་སྙིང་པོ་ལྟ་བུའོ། །དེ་བས་ན་རྒྱུད་དོན་གྱི་མན་ངག་འདིར་བསྡུས་ནས་སྙིང་པོ་རྩམས་སོ། །ཐོས་བསམ་བསྒོམས་ལ་རབ་སྦྱངས་པའི། །གཞིའ་རིག་པའི་གནས་ཐབས་བསྟན། སོ་སོ་སྐྱེ་བོ་རིག་པའི་རྩལ་སྦྱོང་ན་ཤེས་རབ་རྣམ་པ་གསུམ་ནི། སྒྲ་དང་དོན་ཡུལ་དུ་བྱས་པ་ལས་སྐྱེ་བ་ཡིན་ཏེ། དེ་ཡང་སྒྲ་ཡུལ་དུ་བྱས་པ་ལས་ཐོས་པའི་ཤེས་རབ་སྐྱེ་བ་དང་། སྒྲ་དོན་གཉིས་ཀ་ཡུལ་དུ་བྱས་པ་ལས་བསམ་པའི་ཤེས་རབ་སྐྱེ་བ་དང་། སྒྲ་སྤངས་ནས་དོན་བྷ་ཞིག་ཡུལ་དུ་བྱས་པ་ལས་སྒོམ་པའི་ཤེས་རབ་སྐྱེའོ། །དེའི་དུས་སུ་སྣོད་ཀྱི་སྐྱོན་བཞི་སྤངས་ཏེ། སྣོད་ཁ་སྦུབ་དང་། གཞོག་རལ་དང་། ཞབས་རྡོལ་དང་། དུག་ཅན་ནོ། །དེ་བས་ན་དང་པོ་ཐོས་པའི་ཤེས་རབ། བར་དུ་བསམ་པའི་ཤེས་རབ། ཐ་མར་སྒོམ་པའི་ཤེས་རབ། ཐོས་བསམ་སྒོམ་གསུམ་ལ་བློ་རབ་ཏུ་སྦྱངས་པ་བྱས་པའོ། །ཤེས་རབ་དམིགས་ལྡན་རྣམས་ཀྱིས་བཟུང་། །སྔོན་དུ་ཐེག་པ་འོག་མ་ལ་བློ་སྦྱང་བ་བསྟན། དེ་ལྟར་ཤེས་རབ་གསུམ་གྱིས་ཐུན་མོང་གི་ཐེག་པ་ལ། ཚེ་སྔ་མ་ལའམ། སྔོན་དུ་བློ་སྦྱངས་པས། དུས་ད་ལྟ་ཤེས་རབ་ཀྱི་སྤྱན་གྱིས་བློ་མཆོག་ཏུ་གྱུར་པའི་དེ་ལྟ་བུའི་གང་ཟག་རྣམས་ཀྱིས་འདི་ཟུང་ཞིག །དེ་མ་ཡིན་པའི་གཞན་སྦྱངས་པ་སྔོན་དུ་མ་སོང་བ་དང་། ཤེས་རབ་དང་མི་ལྡན་པ་རྣམས་ཀྱིས་འདིའི་དོན་མི་རྟོགས་པའོ། །དེ་བས་ན་སྣོད་ལྡན་ངང་ཚུལ་བཟང་ལ་བསྟན་ཅེས་བྱའོ། །དེ་རྣམས་ནི་སྦྱངས་པའི་ཡོན་ཏན་ནོ། །སྣོད་ལྡན་ངང་ཚུལ་བཟང་ལ་བསྟན། །སྦྱངས་པ་ཅན་གྱི་གང་ཟག་དེ་ཉིད་སྣོད་དང་ལྡན་པར་བྱ་བ་བསྟན། དེ་ལྟར་སྣོད་དང་ལྡན་པར་གྱུར་པ་ནི། ངང་རིང་བ་ཆུ་བོའི་རྒྱུན་ལྟ་བུ་སྟེ། བཟོད་པ་ཁྱད་ཅན་ཐོབ་པ་དང་། ཚུལ་ཤེས་པ་དགེ་སློང་གསང་བ་ལྟ་བུ་སྟེ། ཐོ་ཆོ་དང་བབ་ཆོལ་གྱི་སྤྱོད་པ་སྤངས་པ་དང་། རང་བཞིན་གྱིས་བཟང་བ་ཉི་མ་ལྟ་བུ་སྟེ། སེམས་ཅན་ལ་སྙིང་རྗེ་ཆེན་པོ་དང་ལྡན་པས། ཕྱོགས་སུ་འཛིན་པ་ཐམས་ཅད་སྤངས་པ་དང་། རིགས་ལྡན་པས་རི་བོ་ལྟ་བུ་སྟེ། གསང་བའི་ཐེག་པའི་སྒོར་ཞུགས་ནས། ཕྱིས་ཐེག་པ་དམན་པ་ལ་མྱི་ལྡོག །དེ་ལྟ་བུ་ལ་ཆོས་བསྟན་པར་བྱའོ། །དེ་རྣམས་ནི་རང་བཞིན་གྱི་ཡོན་ཏན་ཡིན་ནོ། །ལུས་དང་ལོངས་སྤྱོད་གཏོང་ལ་སྦྱིན། །སྤྱིར་ན་བླ་མ་མཉེས་པའི་ཡོན་ཏན་གསུམ་སྟེ། རབ་ཤེས་རབ་ཀྱིས་མཉེས་པ་དང་། འབྲིང་ལུས་ཀྱིས་མཉེས་པ་དང་། ཐ་མ་ལོངས་སྤྱོད་ཀྱིས་མཉེས་པའོ། །རབ་ནི་ཐེག་པ་འོག་མ་བ་ལ་བློ་སྦྱངས་པས། ཤེས་རབ་ཀྱི་སྤྱན་དང་ལྡན་པའོ། །འབྲིང་ནི་བླ་མ་ལ་ལུས་སྲོག་འབུལ་བའོ། །ཐ་མ་ནི་བླ་མ་ལ་ནོར་འབུལ་བའོ། །མདོར་ན་མཆེད་ལྕམ་དྲལ་དང་སློབ་དཔོན་གྱི་དོན་དུ་རང་གི་ལུས་དང་ལོངས་སྤྱོད་གཏོང་ནུས་པ་སྟེ། དེ་ལྟ་བུའི་གང་ཟག་ལ་མན་ངག་སྦྱིན་ནོ། །དེས་ནི་བླ་མ་མཉེས་པའི་ཡོན་དབུལ་ལོ། །སློབ་དཔོན་མཉེས་པར་མ་བྱས་ཤིང་། །དབང་སྒོ་ཡོན་གྱིས་འབྱེད་པ་བསྟན། སྤྱིར་ནི་སློབ་དཔོན་ལ་དྲུག་སྟེ། སྤྱིའི་སློབ་དཔོན་དང་། འདྲེན་པའི་༼ཆོས་སྒོ་འདྲེན་པ་༽དང་། དབང་སྐུར་བའི་༼དབང་སྐུར་བྱས་པ་༽ དང་། ཉམས་ཆག་༼སྙན་ཆེན་ལྟ་བུ་༽ སྐོང་བའི་དང་། ཤེས་རྒྱུད་༼བཤད་པ་༽ འགྲོལ་བའི་དང་། མན་ངག་༼གཏེར་༽ལུང་གི་སློབ་དཔོན་ལས། འདིར་རྡོ་རྗེ་སློབ་དཔོན་དེ་ལ་རྡོ་རྗེ་སློབ་དཔོན་གྱི་ལུས་ངག་ཡིད་གསུམ། རྫས་དང་ཡོ་བྱད་ཤེས་རབ་རྣམ་པ་གསུམ་གྱིས་མཉེས་པར་མ་བྱས་ཤིང་། དབང་རྣམས་ཐོབ་པར་མ་བྱས་ན། །ཆོས་སྒོ་དབང་གིས་འབྱེད་པ་བསྟན། དབང་རྣམས་ནི། དབང་བཅོའ་བརྒྱད་དེ། ཕྱིའི་དབང་བཅུ་ནི་ཕན་དབང་དང་། ནང་དབང་ནི་ནུས་པའི་དབང་ལྔ་དང་། གསང་བའི་དབང་ནི་ཟབ་མོའི་དབང་གསུམ་སྟེ། དབང་བཅོའ་བརྒྱད་པོ་རིམ་པར་ཐོབ་པར་མ་བྱས་ན་ཞེས་སོ། །ཉན་པ་ལ་སོགས་རྩོམ་པ་རྣམས། །དབང་རིམ་པར་ནོད་པ་བ སྟན། དབང་མ་ཐོབ་པར་གསང་བ་བླ་ན་མྱེད་པའི་དོན་ལ་ཉན་པ་དང་། འཆད་པ་དང་འཕྲིན་ལས་དང་། བསྒོམ་བསྒྲུབ་དང་། གཞན་གྱི་སློབ་དཔོན་བྱེད་པར་རྩོམ་པ་རྣམས་ནི། གསང་སྔགས་ལ་ར་ཆོད་དང་། གཟུའ་ལུམས་སུ་འགྲོ་བས། དབང་ཐོབ་པ་གཅེས་ཏེ། རབ་ཏུ་གཅེས་པར་གདམས་པའོ། །འབྲས་བུ་མྱེད་ཅིང་བརླག་པར་འགྱུར། །དེ་རྣམས་མ་བྱས་ན་སྐྱོན་ཆེ་བར་བསྟན། དང་པོར་བླ་མ་མཉེས་པར་མ་བྱས། བར་དུ་དབང་མ་ནོས། ཐ་མར་ར་ཆོད་དང་གཟུའ་ལུམས་སུ་གྱུར་པས་ན། ཚེ་འདིར་བྱས་པ་རྣམས་ནི་འབྲས་བུ་མྱེད་ཅིང་། ཕྱི་མ་ལ་བྱས་པ་ཆུད་ཟོས་ཏེ་བཀའ་བཞིན་དུ་མ་སྤྱད་པས། འབྲས་བུ་ངན་སོང་དུ་སྐྱེ་བས་ན། བདེ་གཤེགས་སྙིང་པོ་འཁོར་བར་གནས་པར་འགྱུར་བའོ། ༈ །སྐྱོན་ཆེ་བ་དེ་བས་ན། འབྲས་བུ་ཆོས་སྐུ་ཐོབ་པས་ན། རྐྱེན་བསྒོམ་བསྒྲུབ་ལ་རག་ལས། དེ་ཆོས་སྒོ་ལ་རག་ལས། ཆོས་སྒོ་དབང་གིས་འབྱེད། དབང་སྒོ་ཡོན་གྱིས་སླུ་བས་ན། དང་པོ་སློབ་དཔོན་མཉེས་པར་བྱ། དེ་མཉེས་ན་དབང་ནོད། དབང་ཐོབ་ནས་ཉན་བཤད་མཐར་དབྱུང་། དེ་མཐར་ཕྱིན་པས་འབྲས་བུ་མཆོག་དང་ཐུན་མོང་འགྲུབ་པར་འགྱུར་རོ། །དེ་བས་ན་ཤིན་ཏུ་སྐྱོན་ཆེ་བར་བསྟན་པའོ། །དེ་ནས། སློབ་དཔོན་མཉེས་པར་རབ་བྱས་ནས། །དབང་རྣམས་ཐོབ་པར་གྱུར་པ་ནི། །ཉན་པ་ལ་སོགས་རྩོམ་པ་རྣམས། །མཆོག་དང་ཐུན་མོང་འབྲས་བུ་འགྲུབ། །ཅེསསོ། །མཉམ་དོན་དམ་ལ་མཉམ་པར་ཀུན་རྫོབ་སྦྱོར་བ་དབྱེར་མེད་ཡིས། །མཉམ་པར་བྱ་བའི་ངོ་བོ་བསྟན། གསུམ་སྟེ། དོན་དམ་མ་སྐྱེས་པར་མཉམ་པ་དང་། ཀུན་རྫོབ་སྒྱུ་མར་མཉམ་པ་དང་། དོན་དམ་ཀུན་རྫོབ་དབྱེར་མྱེད་དུ་མཉམ་པའོ། །དང་པོ་ནི། ཆོས་ཐམས་ཅད་ནི་ཡེ་ཤེས་ཀྱི་རང་བཞིན་ཏེ། ཐོག་མ་ནས་ཆོས་ཐམས་ཅད་མ་སྐྱེས་པར་མཉམ་སྟེ། གཉིས་པ་ནི། ཀུན་རྫོབ་ཏུ་ཕུང་པོ་ལྔ་རིགས་ལྔར་མཉམ། འབྱུང་བ་ལྔ་ཡུམ་ལྔར་མཉམ། རྣམ་པར་ཤེས་པའི་ཚོགས་བརྒྱད་སེམས་དཔའ་སེམས་མར་མཉམ། ལུས་ཀྱི་རེག་བྱ་བཞི་སྒོ་བར་མཉམ། ཉོན་མོངས་པ་དྲུག་ཐུབ་པར་མཉམ་པའོ། །གསུམ་པ་ནི། དོན་དམ་ཀུན་རྫོབ་ངོ་བོ་གཅིག་པར་མཉམ་པར་སྦྱོང་བ་སྟེ། ལྟ་བ་བདེན་པ་དབྱེར་མྱེད། རིག་པ་སྤྱོད་ཡུལ། སྐོར་བདུན་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་ནས་གནས་སོ། །མཉམ་པའི་དམ་ཚིག་ལ་གནས་སྔགས། །མཉམ་པའི་དགོས་པ་བ སྟན། དེ་ལྟར་ཆོས་ཐམས་ཅད་མཉམ་པ་ཉིད་དུ་རྟོགས་པའི་རང་བཞིན་ལས། མྱི་འདའ་བར་དུས་གསུམ་དུ་གནས་ན། རང་བཞིན་ལྟ་བའི་དམ་ཚིག་སྟེ། འབྲས་བུ་དེ་ཉིད་མངོན་དུ་བྱེད་པར་མ་གསུངས་སོ། །དེ་ཡང་གསལ་བཀྲ་ལས། དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །ཞེས་སོ། །མཉམ་རྫོགས་ཆེན་པོ་ཐོབ་པར་འགྱུར། །མཉམ་པའི་ཡོན་ཏན་བསྟན། དོན་དམ་སྐྱེ་མྱེད་དུ་མཉམ། ཀུན་རྫོབ་སྒྱུ་མར་མཉམ། དེ་གཉིས་དབྱེར་མྱེད་དུ་མཉམ་རྫོགས་སོ། །དེ་ནི་ཆེན་པོ་ཞེས་བྱ་སྟེ། མཉམ་རྫོགས་ཆེན་པོའི་ལྟ་བ་ལ་གནས་ན། རྟེན་གྱི་གང་ཟག་གིས་ཚེ་འདི་ཉིད་ལ་མངོན་པར་རྫོགས་པར་སངས་རྒྱས་པ་ཐོབ་པར་འགྱུར་རོ། །འདས་ན་སངས་རྒྱས་མ་ཡིན་ནོ། །མཉམ་པ་མ་རྟོགས་པའི་སྐྱོན་བསྟན། དེ་ལྟ་བུའི་དམ་ཚིག་ལས་འདས་ན། ཡང་དག་པར་རྫོགས་པའི་སངས་རྒྱས་མ་ཡིན་ནོ་ཞེས་བྱ་སྟེ། ཆོས་ཐམས་ཅད་མཉམ་པ་ཆེན་པོར་མ་ཤེས་ཏེ། ཐེག་པ་འོག་མ་ལྟར་དོན་དམ་ཀུན་རྫོབ་ཐ་དད་དུ་མར་འཛིན་པ་ནི་དེ་ལས་འདས་པའོ། །དེ་བས་ན་ཐ་དད་ཀྱི་གཉིས་འཛིན་གྱིས་སངས་རྒྱས་ཐོབ་པར་མི་འགྱུར་རོ། །དེ་བས་ན་མཉམ་པ་ཆེན་པོའི་ལྟ་བས་ཐག་ཆོད་པར་བྱ་བ་གལ་ཆེའོ། །དུས་བཞི་ཕྱོགས་བཅུ་གང་ནས་ཀྱང་། །གནས་གང་ནས་ཙམ་ནས། དུས་བཞི་ནི། རྒྱུ་རྐྱེན་འཚོགས་ནས་འབྲས་བུ་སྤྱད་ཟིན་པ་ནི་འདས་པའི་དུས། རྒྱུ་རྐྱེན་འཚོགས་པ་ལས་འབྲས་བུ་མ་སྤྱད་པ་ནི་ད་ལྟ་བ། རྒྱུ་ཙམ་ཡོད་པ་ནི་འབྱུང་བར་མ་ངེས་པའི་དུས། རྒྱུ་རྐྱེན་གང་ཡང་མ་འཚོགས་པ་ནི་མ་འོངས་པའི་དུས་སོ། །ཕྱོགས་བཅུ་ནི་གནས་པ་རང་བཞིན་གྱི་ཕྱོགས་བཅུ་དང་། སྒྲུབ་པ་པོ་དམྱིགས་པས་གཟུང་བའི་ཕྱོགས་བཅུ་དང་། དེ་ལྟར་ཕྱོགས་དང་དུས་ཀྱིས་བསྡུས་པ་གང་ནས་ཀྱང་སངས་རྒྱས་རྩལ་དུ་མྱེད་པར་བསྟན་པའོ། །རྫོགས་པའི་སངས་རྒྱས་རྙེད་མི་འགྱུར། །ངོ་བོ་གང་རྩལ་ན། དེ་ལྟར་ན་གནས་བཅུ་དང་། དུས་བཞིར་རྫོགས་པའི་སངས་རྒྱས་གཞན་ནས་རྩལ་ཀྱང་། ཡང་དག་པར་རྫོགས་པའི་སངས་རྒྱས་ཀྱི་འབྲས་བུ་གཞན་ནས་མི་རྙེད་དོ། །གང་ནས་རྙེད་ཞེ་ན། རང་སེམས་ལ་བརྩལ་ལོ། །སེམས ཉིད་རྟོགས་ན་སངས་རྒྱས་པས། །བཙལ་བའི་ཐབས་ཇི་ལྟར་རྩལ་ན། རང་གི་སེམས་ཉིད་རིག་པ་བྱང་ཆུབ་སེམས་ནི་ཡེ་ནས་འབྲས་བུ་ཆོས་ཀྱི་སྐུའི་ངོ་བོ་ཡིན་ཏེ། དེའི་དོན་རྟོགས་པར་མངོན་དུ་གྱུར་པ་ལ་འབྲས་བུ་ཐོབ་ཅེས་གདགས་ཀྱིས་དེ་ལས་གཞན་དུ་སངས་རྒྱས་མ་ཚོལ་ཅིག །སངས་རྒྱས་གཞན་དུ་མ་ཚོལ་ཅིག །མཉམ་པ་མ་རྟོགས་པའི་སྐྱོན་བསྟན། རང་རིག་པ་དེ་ལས་མ་རྟོགས་པ་མྱེད་པ་ལ། རིག་པ་དེ་ལས་སངས་རྒྱས་གཞན་དུ་ཚོལ་ན་ནི། རྒྱ་མཚོའི་ངོས་ནས་སོང་སྟེ་དམྱིགས་སྒྱུའི་ཆུ་རྙོག་པ་དང་འདྲའོ། །དེ་མྱི་སྙེད་པའི་ཕྱིར་ན་དེ་ལས་མ་རྟོགས་པ་མྱེད་པ་མ་ཚོལ་ཅིག་ཅེས་གདམས་སོ། །གང་ཞིག་གླང་ཆེན་མྱོས་འདྲའི་སེམས། །དཔེའ་བསྟན། དཔེར་ན་གླང་པོ་ཆེ་སྙོན་པ་འདུལ་བའི་དུས་ན། སྐྱེས་བུ་གོས་དམར་པོ་གོན། དབྱངས་སྙན་པ་བླངས་ནས། ལག་པ་གཡོན་དུ་སྤོས་དུད་ཐོགས། གཡས་སུ་ལྕགས་ཀྱུ་ཐོགས་ནས། གླང་བྲིད་ནས་རྩར་བྱུང་ཙ་ན་ལྕགས་ཀྱུས་གླང་སྣ་ནས་བཟུང་ནས། འབྲས་ཆང་བླུད་པས་གླང་མྱོས་པ་ལ། དམག་མང་པོ་ཞོན་ནས་བཏུལ་ནས། དེ་ཐུལ་ཙམ་ན་གཞན་གྱི་དམག་དཔུང་འཇོམས་པའོ། །དཔེའ་དེ་བཞིན་དུ་རྣལ་འབྱོར་པ་གང་ཞིག་གི་སེམས་ནི། གླང་པོ་ཆེ་སྙོན་པ་དང་འདྲ་སྟེ། འདུལ་ཐབས་ནི། སྔགས་དང་ཕྱག་རྒྱས་མཉམ་པར་བཞག །ཅེས་པའོ། །མཉམ་པར་བཞག་ལ་བཏུལ་ནས་སུ། །སྔགས་དང་ཕྱག་རྒྱ་རབ་བསྟན་ན། །དོན་བསྟན། དཔེའ་དེ་བཞིན་དུ། འཁྲུལ་པའི་སེམས་གླང་པོ་དང་འདྲ་བ་དེ་ལ། བླ་མ་དམ་པའི་གདམ་ངག་ལྕགས་ཀྱུ་དང་འདྲ་བས་གཟུང་ནས། ཆོས་ཉིད་རྣམ་པ་མི་རྟོག་པའི་ངང་ལ་བློ་མཉམ་པར་བཞག་པ་དང་། གཟུང་འཛིན་གྱི་རྣམ་པར་རྟོག་པ་དེ་དག་བརྟུལ་ནས། སེམས་དང་ཡེ་ཤེས་ཀྱི་ཕྱག་རྒྱས་ཐམས་ཅད་དུ་སྣང་བར་འགྱུར་རོ། །དེ་ཡང་སྒྱུ་མ་ནོར་བ་རྩ་བའི་སྔགས་ཀྱིས་སྐྱེད་པའི་རྒྱུ་བྱེད། སྐྱེད་པ་རྐྱེན་གྱི་སྔགས་ཀྱིས་གསལ་བར་བྱེད། བཟླས་པ་ལས་ཀྱི་སྔགས་ཀྱིས་བསྟན་པར་བྱེད་པའོ། །སྔགས་དེ་གསུམ་གྱིས་ལྷའི་སྐུ་གསལ་བ་དེ་ལ་ནི། ཕྱག་རྒྱ་ཆེན་པོ་བཞི་དང་ལྡན་པ་ཞེས་པ་སྟེ། དམ་ཚིག་གི་ཕྱག་རྒྱ་དང་། ལས་ཀྱི་དང་། ཆོས་ཀྱི་དང་། སྐུ་ཕྱག་རྒྱ་ཆེན་པོ་རབ་ཏུ་བསྟན་ན་དངོས་གྲུབ་འབྱུང་ངོ་། །དངོས་གྲུབ་ཡ་མཚན་ཆེན་པོར་འགྱུར། །དེ་ལྟར་ལྡན་ན་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་དང་། ལེགས་པའི་ཡོན་ཏན་ཐམས་ཅད་ཐོབ་པར་འགྱུར་རོ། །དགོན་པ་ཆེན་པོའི་ས་ཕྱོགས་སུ། །གནས་ཀྱི་རིང་ཐུང་གི་ཚད་བསྟན། བསྒྲུབ་པའི་གནས་ནི། དགོན་པ་དེ་གྲོལ་ཡུལ་ལ་དཔག་ཚད་དང་རྒྱང་གྲགས་ཀྱིས་རིང་བར་གྱུར་པ་སྟེ། དེའི་དགོས་པ་ནི། བསམ་གྱི་དགྲ་མྱི་འབྱུང་བའི་ཕྱིར་རོ། །དེ་བས་ན་ཆེན་པོ་ཞེས་སོ། །གནས་དེར་ས་གཞིའ་བརྟག་པ་ནི། གནམ་འཁོར་ལོ་རྩིབས་བརྒྱད་འདྲ་བ། ས་གཞིའ་པད་མ་འདབ་བརྒྱད་འདྲ་བ། ས་སྣུམ་ལ་བཀྲག་ཆགས་པའོ། །གནམ་དེར་ཕྱོགས་བརྟག་པ་ནི། ཤར་འཇམ་པ། ལྷོ་གཞོལ་བ། ནུབ་དཔུང་པ་བཞིན་དུ་འཐོ་བ། བྱང་རི་འདུད་པའོ། །དེ་བས་ན་ས་ཕྱོགས་སུ་ཞེས་པའོ། །ཙན་དན་ནགས་དང་མེ་ཏོག་འཚལ། །གནས་ཀྱི་དབྱིབས་བསྟན། ས་ཕྱོགས་དེར་སྔོན་བཀྲ་ཤིས་པའི་གནས་ནི། ཙན་དན་གྱི་ནགས་ཚལ་དང་། མདུན་ན་མེ་ཏོག་གི་གླིང་ཆགས་པ་སྟེ། ཁ་དོག་མཛེས་ཤིང་བཀྲ་ཤིས་པའི་ཡན་ལག་གོ། །ཡིད་འོང་བཀྲ་ཤིས་ཉམས་དགའ་བའི། །གནས་ཀྱི་རང་བཞིན་བསྟན། དེ་རྣམས་ནི་རྣལ་འབྱོར་པ་འཕྲལ་ཉམས་དགའ་བ་ཡིད་དུ་འོང་བའི་གནས་སོ། །གྲུབ་པ་ཐོབ་པས་བཀྲ་ཤིས་པའི་གནས་ནི། ལི་ཡུལ་ལྕང་ར་སྨུག་པོ འམ། སྤ་གྲོ་སྟག་ཚལ་ལམ། ལྷོ་བྲག་མཁར་ཆུ་ལྟ་བུའོ། །དེ་ལྟ་བུ་རྣལ་འབྱོར་པས་སྒྲུབ་པ་ཐོབ་པའོ། །བདེའ་བར་གཤེགས་པའི་ཞབས་ཀྱིས་བཅག་པའི་གནས་ནི། རྒྱ་གར་རྡོ་རྗེ་གདན་དང་། རི་མ་ལ་ཡ་དང་། འཕགས་པ་ཤིང་ཀུན་ལ་སོགས་པ་ལྟ་བུའོ། །བདག་དབང་བར་ཆད་མྱེད་པའི་གནས། །གནས་ཀྱི་སྐྱོན་གསལ་བའི་བསྟན། གནས་དེ་བདག་གི་དབང་དུ་བྱེད་པས་ན། ས་བླང་བ་ནི་སྣང་བ་དང་མི་སྣང་བ་ལ་རིན་བསྩལ་ལ་བདག་གི་དབང་དུ་བྱ་བ་དང་། གནས་དེ་ཧ་ཅང་ཐག་རིང་ན་རྫས་ཀྱི་བར་ཆད་འབྱུང་། གཡེལ་ན་དགྲའི་བར་ཆད་འབྱུང་། ལྷ་འདྲེའི་ལམ་ཆོད་ན་བགེགས་ཀྱི་བར་ཆད་འབྱུང་བས་ན་བཀྲ་ཤིས་ལ་ཡིད་དུ་འོང་བ་ཕྱི་ནང་གི་བར་ཆད་གང་ཡང་མི་འབྱུང་བའི་གནས་བཙལ་བར་བྱའོ། ༈ །བདག་དང་མཐའ་ཡས་སེམས་ཅན་རྣམས། །སྒྲུབ་པ་པོ་བདག་དང་འགྲོ་བ་དྲུག་གི་སེམས་ཅན། བསམ་གྱིས་མི་ཁྱབ་པ་མཐའ་ཡས་པ་ཐམས་ཅད་རྣམས་སོ། །ཡེ་ནས་སངས་རྒྱས་ཡིན་མོད་ཀྱང་། །གང་གིས་སེམས་བསྐྱེད་ན། ཡེ་ཐོག་མ་ཉིད་ནས། སྐུ་ལྔ་ཡེ་ཤེས་ལྔར་སངས་རྒྱས་པ་ཡིན་མོད་ཀྱང་ཞེའམ། ཡང་ན་རང་བཞིན་ལྷུན་གྱིས་གྲུབ་པའི་སངས་རྒྱས་གཅིག་ཡིན་ཀྱང་། དེ་ལྟར་མ་རྟོགས་པའི་དབང་གིས་ན་བྷུ་ཏ་ཡིན་ཀྱང་ངོ་མ་ཤེས་པའོ། །རྟོག་པའི་དབང་གིས་འཁོར་བ་ལ། །ཚུལ་ཇི་ལྟར་སེམས་བསྐྱེད་ན། དེ་ལྟར་མ་རྟོགས་པའི་བདག་དང་བདག་གི་རྟོག་པའི་དབང་གིས། ཁམས་གསུམ་གྱི་འཁོར་བ་མཐོ་དམན་དུ་འཁོར་བས་ན། ད་ལྟ་ཉིད་དུ་སྐུ་ལྔ་ཡེ་ཤེས་ལྔར་སངས་རྒྱས་པའི་སེམས་བསྐྱེད་དོ། །བྱང་ཆུབ་མཆོག་ཏུ་སེམས་བསྐྱེད་དོ། །དགོས་པ་གང་གི་ཕྱིར་སེམས་བསྐྱེད་ན། ངོ་བོ་གང་སྐྱེད་ན། བདག་ཀྱང་ཁམས་གསུམ་ལས་ཐར་བར་བྱ་བ་དང་། བདག་ཉིད་ཐར་ནས་ཀྱང་སེམས་ཅན་ཐམས་ཅད་ཐར་བར་བྱའོ། །ཞེས་བྱང་ཆུབ་མཆོག་ཏུ་སྐུ་ལྔ་ཡེ་ཤེས་ལྔར་སངས་རྒྱས་པ་ཡིན་པར་རྟོགས་པར་སེམས་བསྐྱེད་དོ། ༈ །སྤྱིར་གནས་ལ་གསུམ་སྟེ། ཕྱིའི་གནས་དང་། ནང་གི་གནས་དང་། གསང་བའི་གནས་སོ། །ཕྱིའི་གནས་ལ་གཉིས་ཏེ། ཚུལ་ཤིས་པའི་གནས་དང་། ཚུལ་དང་འཐུན་པའི་གནས་སོ། །ཚུལ་ཤིས་པའི་གནས་ནི་གསུམ་སྟེ། བདེའ་བར་གཤེགས་པའི་ཞབས་ཀྱིས་བཅག་པས་བྱིན་གྱིས་བརླབས་པའི་གནས་དང་། དངོས་གྲུབ་ཐོབ་པ་བཀྲ་ཤིས་པའི་གནས་དང་། རང་ཡིད་དུ་འོང་བས་ཉམས་དགའ་བའི་གནས་སོ། །ཚུལ་དང་འཐུན་པའི་གནས་ནི། ཞི་བའི་དགོན་གནས་དང་། རྒྱས་པའི་འཕེན་གནས་དང་། དབང་གི་འདུ་གནས་དང་། དྲག་པོའི་འགྱེད་གནས་དང་། ལྷུན་གྲུབ་ཀུན་འབྱུང་གི་གནས་སོ། །ནང་གི་གནས་ནི། རང་གི་རིག་པས་ངོ་ཤེས་ཏེ་ཉམས་དགའ་བའོ། །གསང་བའི་གནས་ནི། ཡུམ་མཚན་ལྡན་ནོ། །དགོན་པ་ཆེན་པོ་ནི་ཡུམ་ལ་ཟེར་བ་ཡང་ཡོད་དོ། །གཞན་མ་རང་གི་གནས་སྐབས་སུ་ངོས་གཟུང་བའོ། །དེ་ནི་ཕྱིའི་གནས་གཙོའ་ཆེའོ། ༈ །ཨེ་མའོ་ངོ་མཚར་རྨད་ཀྱི་ཆོས། །ཆོས་ཀྱི་སྐུ་དང་སྟོང་པ་ཉིད་ཀྱི་ཡེ་ཤེས་སེམས་བསྐྱེད་པ་བསྟན། ཨེ་མའོ་ནི་ངམ་པ་སྟེ། དེ་ཡང་གང་ལ་ངམ་ན་ཆོས་ཐམས་ཅད་སྐུ་ལྔ་ཡེ་ཤེས་ལྔའི་རང་བཞིན་དུ་སངས་རྒྱས་པ་ཡིན་པ་ལ། སེམས་ཅན་རྣམས་ཀྱིས་དེ་ལྟར་མ་རྟོགས་པ་ལ་ངོམ་པའོ། །རྨད་ཀྱི་ཆོས་ནི་ཚིག་ངོ་མཚར་ཅན་ལས། དོན་རྨད་དུ་བྱུང་བའི་དོན་སྟོན་པ་ལ་བྱའོ། །རྫོགས་པའི་སངས་རྒྱས་ཀུན་གྱི་གསང་། །ཆོས་དེ་གང་གིས་གསུངས་ན། རྒྱུ་བསོད་ནམས་དང་འབྲས་བུ་ཡེ་ཤེས་ཀྱི་ཚོགས་རྫོགས་པའི་སངས་རྒྱས། སྐུ་ལྔ་ཡེ་ཤེས་ལྔར་ལྷུན་གྱིས་གྲུབ་པ་དེས་གསུངས་ལ་སངས་རྒྱས་ཉིད་ཀྱི་ཐུགས་ཀྱི་གནག་པ་ཡང་འདི་ཡིན་པས་ན་གསང་བའོ། །སྐྱེ་བ་མྱེད་ལས་ཐམས་ཅད་སྐྱེས། །སྟོང་པ་ཉིད་ཀྱི་ཡེ་ཤེས་ཀྱི་རང་བཞིན་ནི། ཆོས་ཐམས་ཅད་ཀྱི་ངོ་བོ་སྟོང་ཞིང་བདག་མྱེད་པ་དེ་ལ། རྒྱུ་གང་ཡང་སྐྱེ་བ་མྱེད་པའོ། །དེ་ལྟར་དོན་དམ་པར་སྐྱེ་བ་མྱེད་པས། ཀུན་རྫོབ་ཏུ་ཆོས་ཐམས་ཅད་རྒྱུ་ལས་སྐྱེད་པ་ལྟར་སྣང་བའོ། །སྐྱེས་པ་ཉིད་ན་སྐྱེ་བ་མྱེད། །དེ་ལྟར་ཀུན་རྫོབ་ཏུ་སྐྱེས་པ་ཉིད་ན་དོན་དམ་པར་མ་སྐྱེས་པའི་ངང་ལས་མ་གཡོས་པ་ནི་སྟོང་པ་ཉིད་ཀྱི་ཡེ་ཤེས་དང་ཆོས་ཀྱི་སྐུར་སེམས་བསྐྱེད་པའོ། ༈ །སྤྱིར་ན་སེམས་བསྐྱེད་པ་ལ་གཉིས་ཏེ། ཀུན་རྫོབ་བྱང་ཆུབ་མཆོག་ཏུ་སེམས་བསྐྱེད་པ་དང་། དོན་དམ་པ་བྱང་ཆུབ་མཆོག་ཏུ་སེམས་བསྐྱེད་པའོ། །ཀུན་རྫོབ་བྱང་ཆུབ་མཆོག་ཏུ་སེམས་བསྐྱེད་པ་ནི། སྨོན་པ་འབྲས་བུར་སེམས་བསྐྱེད་པ་དང་། འཇུག་པ་རྒྱུར་སེམས་བསྐྱེད་པའོ། །དོན་དམ་པ་བྱང་ཆུབ་མཆོག་ཏུ་སེམས་བསྐྱེད་པ་ནི། གནས་པ་བྱང་ཆུབ་ཀྱི་སེམས་དང་། བསྟན་པ་བྱང་ཆུབ་ཀྱི་སེམས་དང་། མཐར་ཕྱིན་པ་བྱང་ཆུབ་ཀྱི་སེམས་བསྐྱེད་པའོ། །འདིར་ནི་ཀུན་རྫོབ་གཞན་ལས་ཁྱད་པར་བྱས་པས་ན། བྱང་ཆུབ་མཆོག་ཏུ་སེམས་བསྐྱེད། དོན་དམ་པ་འོད་གསལ་མངོན་དུ་བྱས་པས་ན་ཡེ་ཤེས་ལྔར་སེམས་བསྐྱེད་པའོ། །འདི་ལྔ་དོན་དམ་ཀུན་རྫོབ་དབྱེར་མྱེད་སྟོན་པར་འདུག་པས་འདབས་སོ་ཞེ་ན། རྩམ་གཞི་སོ་སོ་ལས་རྩམ་བྱ་ཐ་དད་པར་དང་། བརྗོད་བྱ་སོ་སོ་ལ་དོན་སོ་སོར་སྟོན་པའི་ཚིག་ཡིན་ནོ། ༈ །ཨེ་མའོ་མེ་ལོང་ལྟ་བུའི་ཡེ་ཤེས་དང་ལོངས་སྐུར་སེམས་བསྐྱེད་པ་བསྟན་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཨེ་མའོ་ནི་ངམ་ཞིང་ངོ་མཚར་བ་སྟེ། ངོ་གང་ལ་མཚར་ན། རང་སེམས་སྟོང་པ་སྐྱེ་མྱེད་དུ་གཏན་ལ་འབེབས་པའི་དེ་ཁོ་ན་ལ་ངོ་མཚར། དེ་གང་གི་ཆོས་ལུགས་ཡིན་ན། གསང་བ་རྨད་དུ་བྱུང་བ་མ་ཧཱ་ཡོ་གའི་ཆོས། དེ་གང་གི་གསུང་ཡིན་ན། རྫོགས་པའི་སངས་རྒྱས་དཔལ་ཀུན་ཏུ་བཟང་པོ་རྒྱལ་བ་དྲུག་པའི་གསུང་། བློ་དམན་དང་ཐེག་པ་འོག་མ་བའི་སྤྱོད་ཡུལ་དུ་མ་གྱུར་པས་ན་གསང་བའོ། །འགག་པ་མྱེད་ལས་ཐམས་ཅད་འགག །ཆོས་ཐམས་ཅད་གསལ་ལ་རྟོག་པ་མྱེད་པའམ། གསལ་ལ་འགག་པ་མྱེད་པ་ཡིན་པ་དེ་ལས་མ་གཡོས་བཞིན་དུ། ཆོས་ཐམས་ཅད་ཀྱི་རྐྱེན་དུ་གྱུར་པ་འགག་པ་ལྟར་སྣང་ངོ་། །སོ་སོར་རྟོག་པའི་ཡེ་ཤེས་དང་སྤྲུལ་པའི་སྐུར་སེམས་བསྐྱེད་པ་བསྟན་ནོ། །འགག་པ་ཉིད་ན་འགག་པ་མྱེད། །དེ་ལྟར་ཀུན་རྫོབ་ཏུ་འགག་པ་ལྟར་སྣང་བའི་དུས་ཉིད་ན། དོན་དམ་པར་འགག་པ་ཅི་ཡང་མྱེད་དོ། །དེ་ལྟར་རྟོགས་པ་ནི། མེ་ལོང་ལྟ་བུའི་ཡེ་ཤེས་དང་ལོངས་སྤྱོད་རྫོགས་པའི་སྐུར་སེམས་བསྐྱེད་པ་ཡིན་ནོ། ༈ །ཨེ་མའོ་ངོ་མཚར་རྨད་ཀྱི་ཆོས། །མཉམ་པ་ཉིད་ཀྱི་ཡེ་ཤེས་དང་། མངོན་པར་བྱང་ཆུབ་པའི་སྐུར་སེམས་བསྐྱེད་པ་བསྟན། རྫོགས་པའི་སངས་རྒྱས་ཀུན་གྱིས་གསང་། །ཨེ་མའོ་ནི་ངམ་ཞིང་ངོ་མཚར་བ་སྟེ། གང་ལ་ངོ་མཚར་ན། རང་སེམས་མཉམ་པ་ཉིད་ཆེན་པོར་སྟོན་པས་ངོ་མཚར་བའོ། །དེ་གང་གི་ཆོས་ལུགས་ཡིན་ན། གསང་བ་རྨད་དུ་བྱུང་བ་སྒྱུ་འཕྲུལ་དྲ་བའི་ཆོས། དེ་གང་གི་གསུང་ཡིན་ན། ཡང་དག་པར་རྫོགས་པའི་སངས་རྒྱས་ཀུན་གྱི་གསང་བའོ། །གནས་པ་མྱེད་ལས་ཐམས་ཅད་གནས། །ཆོས་ཉིད་དོན་དམ་པར་གཟུང་བ་དང་འཛིན་པ་མྱེད་པར་གནས་པ་ཡིན་ལ། ཀུན་རྫོབ་ཏུ་ཆོས་ཐམས་ཅད། གཟུང་འཛིན་གྱིས་གནས་པ་ལྟར་སྣང་ཡང་སྣང་བའོ། །གནས་པ་ཉིད་ལ་གནས་པ་མྱེད། །དེ་ལྟར་ཀུན་རྫོབ་ཏུ་གནས་པ་ལྟར་སྣང་བའི་དུས་ཉིད་ན། དོན་དམ་པར་གནས་པ་མྱེད་དེ། དེ་ཉིད་མཉམ་པ་ཉིད་ཀྱི་ཡེ་ཤེས་དང་། ངོ་བོ་ཉིད་ཀྱི་སྐུར་སེམས་བསྐྱེད་པ་ཡིན་ནོ། ༈ །ཨེ་མ་ངོ་མཚར་རྨད་ཀྱི་ཆོས། །སོ་སོར་རྟོག་པའི་ཡེ་ཤེས་དང་། སྤྲུལ་སྐུར་སེམས་བསྐྱེད་པ་བསྟན། རྫོགས་པའི་སངས་རྒྱས་ཀུན་གྱི་གསང་། །ཨེ་མའོ་ནི་ངམ་ཞིང་ངོ་མཚར་བ་སྟེ། དེ་ཡང་ངོ་གང་ལ་མཚར་ན། རང་སེམས་ཡེ་ཤེས་སུ་རྟོགས་པ་དེ་ལའོ། །དེ་གང་གི་ཆོས་ཡིན་ན། མ་ཧཱ་ཡོ་གའི་འོ། །དེ་གང་གི་གསུང་ཡིན་ན། ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོའི་གསུང་ངོ་། །དམྱིགས་པ་མྱེད་ལས་ཐམས་ཅད་དམྱིགས། །ཆོས་ཐམས་ཅད་རང་དང་སྤྱིའི་མཚན་ཉིད་མ་འདྲེས་པར་མཁྱེན་ལ། རང་དང་སྤྱིའི་མཚན་ཉིད་དོན་དམ་པར་དམྱིགས་པ་མེད་དོ། །དེ་ལས་མ་གཡོས་བཞིན་དུ་ཆོས་ཐམས་ཅད་ཀུན་རྫོབ་ཏུ་དམྱིགས་པར་ཤར་ནས་སྣང་བ་ཡིན་ནོ། །དམྱིགས་པ་ཉིད་ན་དམྱིགས་པ་མྱེད། །དེ་ལྟར་ཀུན་རྫོབ་ཏུ་དམྱིགས་པའི་དུས་ཉིད་ནི། དོན་དམ་པར་དམྱིགས་པ་མྱེད་པ་ལས་མ་གཡོས་པ་ཡིན་ནོ། །དེ་ནི་སོ་སོར་རྟོག་པའི་ཡེ་ཤེས་དང་། སྤྲུལ་པའི་སྐུར་སེམས་བསྐྱེད་པ་ཡིན་ནོ། །ཨེ་མ་ངོ་མཚར་རྨད་ཀྱི་ཆོས། །ཨེ་མའོ་ནི་ངམ་ཞིང་ངོ་མཚར་ཏེ། ངོ་གང་ལ་མཚར་ན། རང་སེམས་ཡེ་ཤེས་རྟོགས་པའོ། །དེ་གསང་བ་མ་ཧཱ་ཡོ་གའི་ཆོས་ཡིན་ནོ། །རྫོགས་པའི་སངས་རྒྱས་ཀུན་གྱི་གསང་། །འཁོར་འདས་སེམས་ཉིད་དུ་རྫོགས། ལྟ་བ་ངན་པའི་དྲི་མ་དང་བྲལ་བས་སངས་ལ། ཡེ་ཤེས་མཐའ་དབུས་མྱེད་པར་རྒྱས་པས་ན་རྒྱས་ལ། ཕྱོགས་བཅུ་དུས་བཞིའི་སངས་རྒྱས་ཀུན་གྱི་བདག་པོ་ཡིན་པས་ན་ཀུན། རྟོགས་དཀའ་བས་ན་གསང་ངོ་། །འགྲོ་འོང་མྱེད་ལས་འགྲོ་དང་འོང་། །བྱ་བ་གྲུབ་པའི་ཡེ་ཤེས་ཀྱིས་བདག་དང་གཞན་གྱི་དོན་ཐམས་ཅད་གྲུབ་ཅིང་མཐར་ཕྱིན་པར་མཛད་ཀྱང་། དོན་དམ་པར་བདག་དང་གཞན་གྱི་དོན་ལ་སྤྲུལ་པས་ཕར་འགྲོ་བ་དང་ཚུར་འོང་བ་མྱེད་དོ། །ཀུན་རྫོབ་ཏུ་སྤྲུལ་པ་ཕར་འགྲོ་བ་དང་ཚུར་འོང་བར་སྣང་ངོ་། །འགྲོ་འོང་ཉིད་ན་འགྲོ་འོང་མྱེད། །དེ་ལྟར་རྟོགས་ཙམ་ཉིད་ན་དོན་དམ་པར་འགྲོ་འོང་མྱེད་པ་ནི་བྱ་བ་ནན་ཏན་གྱི་ཡེ་ཤེས་དང་། རྡོ་རྗེའི་སྐུར་སེམས་བསྐྱེད་པའོ། ༈ །བསྒྲུབ་པའི་གཙོར་ནི་ཏིང་འཛིན་པས། །གཙོའ་བོ་གང་ཡིན་ན། ཐུན་མོང་གི་བསྒྲུབ་པ་དང་། ཐུན་མོང་མ་ཡིན་པའི་བསྒྲུབ་པ་ལས། གཙོའ་བོར་གང་བྱེད་ཀྱང་། ཏིང་ངེ་འཛིན་མྱེད་ན་འབྲས་བུ་མི་འགྱུར་བས། དེའི་ཕྱིར་གཙོ་བོར་ཏིང་ངེ་འཛིན་ཁོ་ན་བསྔགས་པ་ཡིན་པས་སོ། །ཏིང་འཛིན་འདི་ཡིས་བྱེད་པར་འགྱུར། །དབང་ཇི་ལྟར་སྒྱུར་ན། དེ་བས་ན་མཆོག་དང་ཐུན་མོང་གི་སྒྲུབ་ཐབས་ཐམས་ཅད། ཏིང་འཛིན་འདིར་འགྲུབ་པར་བྱེད་པ་ཡིན་པས་ན། འགྲུབ་པར་འགྱུར་བ་ཡིན་ནོ། །གསེར་འགྱུར་སྨན་དང་མུན་སེལ་བཞིན། །དཔེའ་གང་གིས་མཚོན་ན། དཔེར་ན་ལྕགས་ལ་གསེར་འགྱུར་གྱི་རྩི་གཏང་ན་ལྕགས་གསེར་དུ་འགྱུར་བ་དང་། དུག་ལ་སྨན་མ་ཀི་ཏ་གཏབ་ན་དུག་སྨན་དུ་འགྱུར་བ་དང་། མུན་པ་ལ་སྒྲོན་མེ་བྱུང་ན་མུན་པ་སེལ་བ་བཞིན་དུ། རྟོག་པའི་དབང་སྒྱུར་ཏིང་འཛིན་ཡིན། །དགོས་པ་ཅི་ཡོད་ན། དཔེ་དེ་བཞིན་དུ། ཆོས་ཉིད་རྣམ་པར་མི་རྟོག་པ་དེ་བཞིན་ཉིད་ཀྱི་ཏིང་འཛིན་བསྒོམ་པས་རྟོག་པ་ཐམས་ཅད་ཆོས་ཉིད་དུ་འགྱུར། ཡེ་ཤེས་སྒྱུ་མའི་ཏིང་ངེ་འཛིན་ཐམས་ཅད་དུ་ཀུན་ཏུ་སྣང་བར་བསྒོམས་པས། ཕྱོགས་གཅིག་པའི་མུན་པ་སེལ། སྐུ་དང་ཡེ་ཤེས་དབྱེར་མྱེད་ཕྱག་རྒྱ་རྒྱུ་ཏིང་དུ་བསྒོམས་པས་ཕུང་པོ་ཁམས་དང་སྐྱེ་མཆེད་གནས་འགྱུར་བའོ། །དེ་ཕྱིར་ཏིང་འཛིན་རིམ་པར་བསྒོམ། །གཏན་ཚིགས་གང་གིས་གདམས་ན། ཏིང་འཛིན་གཙོའ་བའི་ཕྱིར་ན། དེ་ཏིང་ལ་སོགས་པ་གོང་མ་རྣམས་གསལ་བའི་ཏིང་ལ་འོག་མ་རིམ་པར་བསྒོམ་མོ། ༈ །དངོས་རྣམས་ཉིད་ན་དངོས་མྱེད་པས། །ཕྱི་ནང་སྣོད་བཅུད་ཀྱི་དངོས་པོ་སྣ་ཚོགས་སུ་སྣང་བ་འདི། གཞན་མ་ཡིན་ཏེ་རིག་པ་བྱང་ཆུབ་ཀྱི་སེམས་ཉིད་རང་སྣང་བའོ། །བྱང་ཆུབ་ཀྱི་སེམས་ཉིད་སྣང་བའི་དུས་ན་རང་གི་ངོ་བོ་ཅིར་ཡང་མ་གྲུབ་པས། སྣང་བའི་དངོས་པོར་ཡང་མ་གྲུབ་སྟེ་མྱེད་པའོ། །རྟོག་པའི་སྨྲ་བསམ་ཡུལ་ལས་འདས། །དཔེར་ན་འཚལ་དམར་ན་ཁུ་བ་ཡང་དམར་བ་ལྟར། དངོས་པོའི་རྟོག་པ་མ་གྲུབ་པས། དངོས་འཛིན་སྨྲ་བསམ་མྱེད་དེ། དོན་སེམས་ཉིད་ལ། རྟོག་པ་དང་ཐ་སྙད་ཐམས་ཅད་རང་བཞིན་གྱིས་བྲལ་བ་ནི། འཛིན་པའི་ཡུལ་ལས་འདས་པའོ། །དེ་བཞིན་ཉིད་དབྱིངས་ཡེ་ཤེས་ཏེ། །མ་ནོར་བའི་དེ་བཞིན་ཉིད། དངོས་པོ་མྱེད་པས་ཆོས་ཀྱི་དབྱིངས། མ་བཅོས་པ་ཡིན་པས་ཡེ་ཤེས། དེ་ཐམས་ཅད་དུ་ཁྱབ་པར་གནས་པ་ཡིན་པས་ན། དེ་ཕྱིར་དངོས་པོ་དངོས་མྱེད་དོ། །མཐའ་དང་དབུས་མྱེད་དེ་ཁོ་ན་ཆོས་ཀྱི་དབྱིངས་སོ། །དངོས་པོར་སྣང་བ་དངོས་མྱེད་དོ། །དང་པོ་དེ་བཞིན་ཉིད་ཀྱི་ཏིང་ངེ་འཛིན་ལ་དྲུག་སྟེ། སྦྱང་བྱ་ནི་ཤི་བ་རྣམ་རྟོག་མྱེད་སྤངས་སོ། །སྦྱོང་བྱེད་ནི་དེ་བཞིན་ཉིད་ཀྱི་ཏིང་ངེ་འཛིན་ནོ། །ངོ་བོ་ནི་སྟོང་པ་ཆེན་པོའོ། །རྣམ་གྲངས་ནི་མ་ནོར་བའི་དེ་བཞིན་ཉིད། མ་བཅོས་པའི་དེ་བཞིན་ཉིད། དངོས་པོ་མྱེད་པའི་དེ་བཞིན་ཉིད། གཞན་མ་ཡིན་པའི་དེ་བཞིན་ཉིད་དོ། །བསྒོམ་ཐབས་ནི་སྟོང་པ་ཉིད་མཐའ་བརྒྱད་ད ང་བྲལ་བའོ། །འབྲས་བུ་ནི་ཆོས་ཀྱི་སྐུ་ཐོབ་པའོ། །དེ་བཞིན་ཉིད་ནི་སྤྲོས་མྱེད་ཀྱང་། །དེ་བཞིན་ཉིད་དེས་ཐམས་ཅད་ལ་ཁྱབ་པ་དང་། སྣང་བའི་ཕྱིར་ཀུན་ཏུ་ཞེས་བྱ་ལ། རང་བཞིན་ཀུན་ཏུ་སྣང་བའི་དབྱིངས། །དེ་ལྟ་བུའི་དོན་མ་རྟོགས་པའི་སེམས་ཅན་ལ་སྙིང་རྗེ་ཆེན་པོ་ཕྱོགས་རིས་མྱེད་པ་བསྒོམ་པའོ། །སེམས་ཅན་ཀུན་ལ་སྙིང་རྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །ཆོས་ཀྱི་དབྱིངས་ནམ་མཁའ་དང་འདྲ་བར་ཀུན་ལ་ཁྱབ་ལ། སྙིང་རྗེ་ཆེན་པོ་ཡང་དེ་ལྟར་བསྒོམ་མོ། ༈ །ཀུན་ཏུ་སྣང་གི་ཏིང་ངེ་འཛིན་ལ་དྲུག་ལ། སྦྱང་བྱ་ནི་བར་དོའི་སྣང་བའོ། །སྦྱོང་བྱེད་ནི་ཀུན་ཏུ་སྣང་ངོ་། །ངོ་བོ་ནི་ཡེ་ཤེས་སྒྱུ་མའོ། །རྣམ་གྲངས་ནི་ཀུན་ཏུ་སྣང་ཞེས་བྱ། ཡེ་ཤེས་སྒྱུ་མ་ཞེས་བྱ། འཚམས་སྦྱོར་ཆེན་པོའི་ཏིང་ངེ་འཛིན་ཞེས་བྱའོ། །བསྒོམ་པའི་ཐབས་ནི། མ་ཧཱ་ཡོ་ག་ཆོས་ཉིད་ཡེ་ཤེས་སྒྱུ་མ་བསྒོམ་ལ། ཨ་ནུ་ཡོ་ག་བ་རང་གི་སྨིན་འཚམས་སུ་འོད་དམར་སྨུག་ཚོན་གང་བ་ལས་འོད་འཕྲོས་པས། འཇིག་རྟེན་ཐམས་ཅད་འོད་ཀྱིས་ཁེངས་པར་བསྒོམ་མོ། །འདིར་ནི་ཆོས་ཉིད་ཡེ་ཤེས་སྒྱུ་མར་བསྒོམ་པའོ། །འབྲས་བུ་ནི། ལོངས་སྤྱོད་རྫོགས་པའི་སྐུ་འཐོབ་བོ། །གཞིའ་རྩ་མྱེད་པའི་སེམས་ཉིད་ནི། །ངོ་བོ་གང་ཡིན་ན། གནས་པའི་གཞིའ་མྱེད། རྟེན་པའི་རྩ་བ་མྱེད། མཚོན་པ་ཙམ་དུ་སེམས་ཞེས་བྱ་སྟེ། ཉིད་ནི་ཆོས་ཉིད་དོ། །ཆོས་ཉིད་ནི། བརྟེན་པ་དང་གནས་པའི་ཐ་སྙད་དང་བྲལ་བའི། ཆོས་རྣམས་ཀུན་གྱི་རྩ་བ་ཡིན། །རང་བཞིན་ཅི་ཡིན་ན། དེ་ཉིད་དངོས་པོ་ཡོད་མྱེད་གཉིས་ཀྱིས་བསྡུས་པའི་ཆོས་ཐམས་ཅད་ཀྱི་རྩ་བ་ཡིན་ཏེ། རིག་པ་བྱང་ཆུབ་ཀྱི་སེམས་རྟེན་གཞིའི་དང་བྲལ་བ་ཉིད་དོ། །སེམས་ཉིད་ཡི་གེའི་རང་བཞིན་ཏོ། །རིག་པ་སེམས་ཉིད་རྟེན་གཞིའ་དང་བྲལ་བ་ཉིད་གནས་ཀྱི་ཡེ་ཤེས་རང་སྣང་བ་ནི་ཨ་དཀར་པོའོ། །ཨའི་སྒྲ་ནི་ཆོས་ཉིད་སྐྱེ་བ་མྱེད་པའི་དོན་བསྒོམ་མོ། །ཡི་གེ་མཆོག་ནི་བསྒོམ་པར་བྱ། །ཐབས་ཇི་ལྟར་སྒོམ་ན། ཨའི་དབྱིབས་ལས་ཡི་གེ་ཐམས་ཅད་འབྱུང་བའི་ཕྱིར་ན་ཡི་གེ་ཨའི་མཆོག་སྟེ། དེ་ལ་དམྱིགས་པ་རྩེ་གཅིག་ཏུ་བརྟན་པ་ལ་སྒོམ་པ་ཞེས་བྱའོ། ༈ །ཨ་རབ་ཏུ་བརྟན་འགྱུར་ཨ་དཀར་ལས། རྩ་བའི་ཡི་གེ་ཨ་ལས་སྤྲོས་བསྡུའ་བྱ་བར་བསྟན། རྒྱུའི་ཏིང་ངེ་འཛིན་ཨ་དཀར་པོ་དེ་རྐྱེན་དབང་དུ་མི་འགྲོ་བ་བརྟན་པ་དང་འོད་སྤྲོས་ཏེ། ཨ་ནི་ཆོས་ཉིད་ཀྱི་རང་བཞིན་རིག་པ་བྱང་ཆུབ་སེམས་སོ། །བརྟན་པ་ནི་གསལ་བའོ། །རབ་ཏུ་དམྱིགས་ཀྱིས་མངོན་པར་ནའོ། ༈ །རྒྱུའི་ཏིང་ངེ་འཛིན་ལ་དྲུག་སྟེ། སྦྱང་བྱ་ནི་མངལ་དུ་འཇུག་པའོ། །སྦྱོང་བྱེད་ནི་རྒྱུའི་ཏིང་ངེ་འཛིན་ནོ། །ངོ་བོ་ནི་ཡི་གེ་ཨའོ། །རྣམ་གྲངས་ནི། ཧཱུྃ་དང་ཨ་ལས། འདིར་ཨའོ། །བསྒོམ་ཐབས་ནི་ཨ་དཀར་པོ་རྒྱ་སྐར་མ་ལ་ས་པ་ལ་ཁར་ཤར་བ་ལྟ་བུའོ། །འབྲས་བུ་ནི་སྤྲུལ་སྐུ་འཐོབ་བོ། །ཤིན་ཏུ་འཕྲ་བའི་ཨ་རྣམས་འཕྲོ། །ཡན་ལག་གི་ཡི་གེ་དབྱངས་དང་གསལ་བྱེད་ལ་སྤྲོ་བསྡུ་བྱ་བར་བསྟན་ནོ། །གཞིའ་བོའི་ཨ་དེ་ལས་ཨ་འཕྲ་མོ་མང་པོ་ཕར་ལ་སྤྲོས་པའོ། །ཕྱོགས་བཅུ་གང་བར་གསལ་འགྱུར་ནས། །ཡི་གེ་ཨ་ཕྱོགས་བཅུར་སྤྲོས་པས། ཕྱོགས་བཅུ་ཨས་གང་ནས་ཡི་གེ་ཨ་གསལ་བ་དང་། འོད་སྤྲོད་བསྡུ་བྱ། བསྡུས་ཀྱང་འཕེལ་འགྲིབ་མྱེད་པར་བརྟན། །འོད་ཟེར་གྱིས་དངོས་པོར་སྣང་བ་ཐམས་ཅད་སྲེགས་སྦྱངས་ནས། ཆོས་ཐམས་ཅད་དོན་དམ་པའི་བདེན་པར་བྱས་ནས། ཚུར་ལ་འདུས་པས་ཨའི་གཞི་མོ་ལ་ཐིམ་མོ། །དེ་ལྟར་བྱས་པས་ཕར་ལ་སྤྲོས་ཀྱང་ཨ་ཆུང་དུ་མ་སོང་། ཚུར་བསྡུས་ཀྱང་ཆེར་མ་སོང་བས་བསྡུས་ཀྱང་འཕེལ་འགྲིབ་མྱེད་པའོ། །དེ་ལས་མིང་ཚོགས་འབར་བ་ཀུན། །ཨ་དེ་ལ་མིང་གི་ཡི་གེ་ནི། ཀ་ཁ་ག་གྷ་ང་། ལ་སོགས་པ། ཨ་ཨཱ་ཨི་ཨཱི་ལ་སོགས་པ་དང་། དེ་དག་ཡིད་ལ་གསལ་བ་དང་། ཁ་དོག་འོད་ཟེར་འབར་བར་བསྒོམ་པའོ། །དེ་ནི་ཀུན་རྫོབ་བདེན་པའི་ཡི་གེའོ། །སྤྲོ་ཞིང་བསྡུའ་བའང་དེ་བཞིན་ནོ། །ཨ་ལས་ཡི་གེ་དབྱིབས་དང་འོད་ཟེར་ཅན་དུ་འཕྲོས་པས། སྣོད་བཅུད་སྦྱངས་པས་ཨ་ཆུང་དུ་མ་སོང་། བསྡུས་པས་ཀྱང་ཆེར་མ་སོང་། དེ་ལྟར་བྱའོ། །དེ་ཡང་ཆོས་ཉིད་ཡིན་པས་འཕེལ་འགྲིབ་དང་བྲལ་ལོ། །འདི་ནི་རྡོ་རྗེ་དངོས་གྲུབ་ཀྱི། །ཡི་གེ་འདི་ནི་དོན་སྐྱེ་བ་མེད་པའི་ཡི་གེ་རྟགས་ནི་ཡི་གེ་ཨ། འབྲས་བུ་སྐུ་གསུང་ཐུགས་ཀྱི་དངོས་གྲུབ་ཐམས་ཅད་འབྱུང་བའོ། །བསྟན་འབྱུང་ཡེ་ཤེས་རྒྱུ་ཡིན་ནོ། །ཏིང་ངེ་འཛིན་ལས་བྱུང་བ་ནི་སྐུ་དང་ཡེ་ཤེས་ཐམས་ཅད་ཀྱི་འབྱུང་བའི་རྒྱུའམ་སྐྱེད་པའི་རྐྱེན་ཡང་ཡི་གེ་ཡིན་ནོ། །དེ་ལས་རྒྱལ་བའི་བཞུགས་གནས་རྟེན། །རྒྱུའི་ཏིང་ངེ་འཛིན་གསལ་ཞིང་རྟན་པ་དེ་ལས། རྒྱལ་བ་རྣམས་བཞུགས་པའི་རྟེན་ནམ་གནས་སུ་གྱུར་པར་བསྒོམ་པ་ནི། དབང་ཆེན་དཀྱིལ་འཁོར་རིམ་བཞིན་བསྒོམ། །འབྱུང་བ་ལྔ་རང་བཞིན་གྱིས་སངས་རྒྱས་པས་ན་དབང་ཆེན་ནོ། །ཨེ་ནམ་ཀ་ཡཾ་རླུང་བཾ་ཆུ་སུཾ་གསེར་ལཾ། རི་རབ་བྷྲཱུཾ་བི་ཤ་བི་ཤུད་དྷེ། རིན་པོ་ཆེའི་རི་རབ་ཀྱི་སྟེང་དུ། ཡི་གེ་བྷྲཱུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་། ཕྱི་ནས་བལྟས་ན་ནང་གསལ་བ། ནང་ནས་བལྟས་ན་ཕྱི་གསལ་བ། གང་ཡང་མི་སྒྲིབ་པའི་རང་བཞིན་ཅན་ནོ། ༈ །འབྱུང་བ་རིམ་རྩེགས་པ་ཡང་དྲུག་སྟེ། སྦྱང་བྱ་ནི་སྣོད་ཀྱི་འཇིག་རྟེན་ནོ། །སྦྱོང་བྱེད་ནི་འབྱུང་བ་རིམ་རྩེགས་སོ། །ངོ་བོ་ནི་འབྱུང་བ་ལྔའོ། །རྣམ་གྲངས་ནི། འདུས་བྱས་ཀྱི་འབྱུང་བ་དང་། ཆོས་ཉིད་ཀྱི་འབྱུང་བའོ། །བསྒོམ་ཐབས་ནི། ཨ་ལས་ཨེ་ཆད། དེ་ཡོངས་སུ་གྱུར་པ་ལས། ཨེ་གྲུ་གསུམ་ཆོས་ཀྱི་འབྱུང་གནས། ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བ་གཅིག་བསྒོམ། དེ་ཡང་འབྱུང་བ་ནམ་མཁའ། ཡུམ་ཀུན་ཏུ་བཟང་མོའི་བ་ག་རྣམ་པར་དག་པས་ནང་དུ་ན་ཀུན་གཞིའི་སྦྱོང་བའོ། །ཡཾ་ལས་རླུང་གི་དཀྱིལ་འཁོར། དབྱིབས་ཟླ་ཁམ། མདོག་ལྗང་ཁུ། ཡུམ་དམ་ཚིག་སྒྲོལ་མ། འབྱུང་བ་རླུང་། ནང་དུ་ན་ཕུང་པོའི་དབུགས་སོ། །བཾ་ལས་ཆུའི་དཀྱིལ་འཁོར་དབྱིབས་ཟླུམ་པོ། མདོག་དཀར་པོ། ཡུམ་མ་མ་ཀི། འབྱུང་བ་ཆུ། ལུས་ལ་སྦྱར་ན་ཁྲག་གོ། །སུཾ་ལས་གསེར་གྱི་ས་གཞིའ། དབྱིབས་གྲུ་བཞི། མདོག་སེར་པོ། ཡུམ་སངས་རྒྱས་སྤྱན། འབྱུང་བ་ས། ཕུང་པོ་ན་ཤའོ། །ཡཾ་ལས་རིན་པོ་ཆེའི་རི་རབ། དབྱིབས་གྲུ་བཞི་མཁར་ཐབས། མདོག་ཡེ་ཤེས་ལྔ་ལྡན། འདི་ཡང་ཡུམ་སངས་རྒྱས་སྤྱན། འབྱུང་བ་ས། ཕུང་པོ་ན་ཤའོ། །གཏིའ་མུག །ཞེ་སྡང་། ང་རྒྱལ། འདོད་ཆགས། འཕྲག་དོག་དུག་ལྔ་དང་ཡང་སྦྱར་རོ། །དེའི་སྟེང་དུ་རཾ་ལས་མེའི་དཀྱིལ་འཁོར། དབྱིབས་གྲུ་གསུམ། ཁ་དོག་སྣ་ཚོགས། ཡུམ་གོས་དཀར་མོའི་བ་ག་རྣམ་པར་དག་པ། འབྱུང་བ་ན་མེ། ཕུང་པོའི་དྲོད་དང་སྦྱར་རོ། །ཆོས་ཀྱི་དབྱིངས་ཀྱི་ཡེ་ཤེས་དང་། མེ་ལོང་ལྟ་བུའི་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པ་སྟེ་ཡེ་ཤེས་ལྔ་དང་སྦྱར་རོ། །དཀྱིལ་འཁོར་བསམ་ཡས་ལྷུན་གྲུབ་ནི། །ཇི་ལྟར་རྟོགས་པ་བྱ་ན། དཀྱིལ་རྡོ་རྗེ་སེམས་དཔའ་ལ། འཁོར་བཞི་བཅུ་ཐམ་པས་སྐོར་བ་ནི། གདུལ་བྱའི་བློ་བསམ་ཡས་ཀྱང་། བློ་ཆེ་བ་ལ་རང་བཞིན་ལྷུན་གྲུབ་དུ་གནས་པ་ནི། རང་བཞིན་ལྷུན་གྱིས་གྲུབ་པའི་དཀྱིལ་འཁོར་རོ། །རྫོགས་ཆེན་རྟོགས་པའི་རྣལ་འབྱོར་པས། །གང་གིས་རྟོགས་པར་བྱ་ན། སྒྲུབ་པ་པོ་རྟེན་གྱི་གང་ཟག་བློ་མཆོག་ཏུ་གྱུར་པ་སྟེ། དེས་ཆོས་ཐམས་ཅད་ཡེ་ནས་ལམ་དང་གཉེན་པོས་མ་བཅོས་པ། སྐུ་དང་ཡེ་ཤེས་སུ་སངས་རྒྱས་པའི་རང་བཞིན་དུ། རྒྱུད་ཀྱི་དོན་རྫོགས་པ་ཆེན་པོའི་དོན་རྟོགས་པར་བྱས་པའོ། །ཡེ་ཤེས་ཕྱོགས་བཞི་དབུས་རྟགས་ཏེ། །གང་རྟོགས་པར་བྱ། མཚོན་བྱེད་ནི་འཁོར་ལོ་རྩིབས་བཞི་དབུས་དང་ལྔའོ། །མཚོན་བྱ་ནི་ཡེ་ཤེས་ལྔ་སྟེ། དབུས་ཆོས་ཀྱི་དབྱིངས་ཀྱི་ཡེ་ཤེས། ཤར་མེ་ལོང་། ལྷོ་མཉམ་པ་ཉིད། ནུབ་སོ་སོ་ཀུན་རྟོག །བྱང་བྱ་བ་གྲུབ་པའི་ཡེ་ཤེས་སོ། །དེ་ཡང་ཕྱོགས་མཐུན་པ་དང་། གྲངས་དང་མཐུན་པ་དང་། དོན་མཐུན་པ་དང་། རྟགས་མཐུན་པས་སོ། །ཀུན་འབྱུང་དཀྱིལ་འཁོར་ཆེན་པོ་སྤྱོད། །རྟོགས་པའི་དོན་ཅི་ཞེ་ན། བྷུ་ཏ་བཞི་བཅུ་རྩ་གཉིས་དང་པོ་རང་ལ་ལྷུན་གྱིས་གྲུབ་པའི་ཕྱིར་ན། རིག་པ་ལས་འབུ་ཏ་ཀུན་འབྱུང་། རྒྱ་མཚོ་ལས་གཟའ་སྐར་འཆར་བ་བཞིན་དུ། དུས་གཅིག་ལ་རྫོགས་པར་བསྒོམ་པ་ཡིན་ནོ། ༈ །སྤྱིར་ན་གཞལ་ཡས་ཁང་ལ་གསུམ་སྟེ། ཆོས་ཉིད་རང་བཞིན་གྱི་དཀྱིལ་འཁོར་དང་། དམྱིགས་པ་གཟུགས་བརྙན་དང་། བསམ་པ་ཏིང་ངེ་འཛིན་ནོ། །རང་བཞིན་ལ་གཉིས་ཏེ། རང་བཞིན་གྱི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་པའི་དཀྱིལ་འཁོར་རོ། །གཟུགས་བརྙན་ལ་གཉིས་ཏེ། གཟུགས་བརྙན་དང་། ལྷག་པའི་གཟུགས་བརྙན་ནོ། །ཏིང་ངེ་འཛིན་གྱི་དཀྱིལ་འཁོར་ལ་གཉིས་ཏེ། ཏིང་ངེ་འཛིན་གྱི་དཀྱིལ་འཁོར་དང་། ལྷག་པ་ཏིང་ངེ་འཛིན་གྱི་དཀྱིལ་འཁོར་རོ། །དེའི་སྟེང་དུ་བྱང་ཆུབ་སེམས་ཀྱི་དཀྱིལ་འཁོར་དང་། མཆོད་པ་ཚོགས་ཀྱི་དཀྱིལ་འཁོར་རོ། །དེ་ལས་འདིར་རང་བཞིན་གྱི་དཀྱིལ་འཁོར་རོ། །འཁོར་ལོ་རྩིབས་བཞི་མུ་ཁྱུད་བཅས། །གཞལ་ཡས་ཁང་ནི། དབུས་ལྟེ་བ་ཟླུམ་པོ་ཆོས་ཀྱི་དབྱིངས་ཏེ་མཐིང་ཀའོ། །རྩིབས་བཞི་ནི་ཡེ་ཤེས་བཞི་སྟེ། གསེར་གྱི་འཁོར་ལོ་རྩིབས་བཞི་སྟེ། སྤྲོས་པ་མྱེད་པའི་མུ་ཁྱུད་ཟླུམ་པོ་རྡོ་རྗེ་རྩིགས་པའོ། །ཐམས་ཅད་དབང་དུ་བསྡུས་པའི་རྩིབས་འཆན་དམར་པོ། འཕྲིན་ལས་བཞི་དང་ལྡན་པས་ན་གྲུ་ཆད་ལྗང་ཁུའོ། །ལྷག་པའི་ཡེ་ཤེས་བློ་འབུར་ཅན། །ཡེ་ཤེས་རེ་རེ་ལ་ཡང་ཡེ་ཤེས་བསམ་གྱིས་མི་ཁྱབ་པའི་རྟགས་སུ། བློ་འབུར་བཞི་སྟེ། ཤར་ན་དུང་གི། ལྷོ་ན་གསེར་གྱི། ནུབ་ན་ཟངས་ཀྱི། བྱང་ན་གཡུའ་ཡི། བློ་འབུར་དུ་སྣང་ངོ་། །དེ་ཡང་ཡེ་ཤེས་གཞན་ལས་ཁྱད་པར་དུ་གྱུར་ཏེ་སྤགས་ནས་ལྷག་པའི་བརྟགས་ཅན་ནོ། །གྲུ་ཆད་བཞིས་བརྒྱན་བར་ཁྱམས་དང་། འཕྲིན་ལས་བཞིའི་གྲུ་ཆད་བཞིས་དབུས་ཀྱི་ཕོ་བྲང་ལ་རྒྱན་པའོ། །དབྱེར་མེད་པའི་དོན་ལ་མཁས་པས་བདེན་བར་ཚུལ་གཅིག་ཏུ་འདུས་ཏེ། དོན་དམ་པ་ཀུན་རྫོབ་དབྱེར་མེད་པས་ན་བར་ཁྱམས་ཕྱོགས་མཐུན་ནོ། །ཀུན་ཏུ་གྲུ་བཞི་སྒོ་ཁྱུད་ལྡན། །གཞལ་ཡས་ཁང་གི་དབྱིབས་བསྟན། རང་རིག་པ་ཉིད་ལ་སངས་རྒྱས་ཀྱི་ཆེ་བའི་ཡོན་ཏན་ཐམས་ཅད་ལྷུན་གྱིས་གྲུབ་པའི་རྟགས་སུ། ཕྱིའི་དབྱིབས་གྲུ་བཞིར་གྱུར་པའོ། །དེ་ཡང་སྟོང་པ་ཉིད་དང་། མཚན་མ་མྱེད་པ་དང་། སྨོན་པ་མྱེད་པ་དང་། རང་བཞིན་གྱིས་འོད་གསལ་བའི་ཕྱིར་ན་སྒོ་བཞི་ཡོད་པ། ཐེག་པ་རིམ་པ་བརྒྱད་ཡོད་པའི་གནས་སུ་གྱུར་པས་རྟ་བབས་བརྒྱད་ཡོད་པ། སྟོང་ཉིད་མི་ཤིགས་པའི་རྟགས་སུ་རྡོ་རྗེའི་ར་བས་སྐོར་བ། གདུག་པ་ཅན་འཇོམས་པའི་རྟགས་སུ། མེ་དཔུང་འབར་བས་འཁྲིགས་པ་ཅན་ནོ། ༈ །རོལ་མོ་སྣ་ཚོགས་སྤྲིན་ཕུང་བཞིན། །སྤྲུལ་པའི་རྒྱན་བསྟན། གཞལ་ཡས་ཁང་དེ་ལ་པན་ཙ་ར་གའི་རྩིག་པ་དང་། རིན་ཆེན་ཕ་གུའི་བར་ན། འདོད་ཡོན་སྣམ་བུ་དམར་པོ་ལ། འདོད་པའི་ཡོན་ཏན་ལྔའི་ལྷ་མོ་སྤྲིན་ཕུང་བཞིན་དུ་འཁྲིགས་པ་སྟེ། སྣང་ལ་རང་བཞིན་མྱེད་པ་གསལ་ལ་མི་སྒྲིབ་པའོ། །དཀྱིལ་འཁོར་བཞི་བཅུ་གཉིས་ཀྱིས་རྒྱན། །བདག་པོའི་རྒྱན་བསྟན། གཞལ་ཡས་ཁང་གི་བདག་པོ་ནི་རྒྱལ་བ་བཞི་བཅུ་རྩ་གཉིས་སོ། །འོ་ན་དཀྱིལ་འཁོར་གྱི་རྒྱན་ནི་ལྷ་འགྲོ་བའི་ཅི་སྟེ་ཞེ་ན། སྤྱིར་རྒྱན་ལ་མང་དུ་ཡོད་ཀྱང་འདིར་རང་བཞིན་ལྷུན་གྱིས་གྲུབ་པའི་དབང་དུ་བྱས་ན། གཞལ་ཡས་ཁང་དང་ལྷ་ལ་སྔ་ཕྱི་མྱེད་ལ། འདིར་སྔ་ཕྱི་བྱུང་བ་ནི་གདུལ་བྱའི་བསམ་པ་ལ་དགོངས་ནས། གདུལ་བྱ་བློ་ཆུང་བས་དུས་སྐད་ཅིག་ལ་མི་ལྕོགས་པར། རིམ་པས་སྨོས་པ་ཡིན་ཏེ། དེ་བས་ན་སྔོན་ལ་གཞལ་ཡས་ཁང་བསྐྱེད་ནས། དེ་ནས་ལྷ་ཕྱི་ལ་བསྐྱེད་པ་ལ་དགོངས་ན་རྒྱན་ཟེར་རོ། །ལྷ་བཞི་བཅུ་རྩ་གཉིས་ཀྱི་ཆ་བྱད་ཅན། སྤྲུལ་པ་བཞི་བཅུ་རྩ་གཉིས་ཀྱི་ཆ་བྱད་ཅན། སྤྲུལ་པ་བཞི་བཅུ་རྩ་གཉིས་ཀྱིས་རྒྱན་ཟེར་རོ། །ཡང་ན་གཞལ་ཡས་ཁང་གི་རྒྱན་དུ་ལྷ་འགྱུར་ཏེ། ཁང་སྟོང་ལ་བདག་པོས་རྒྱན་པ་ལྟ་བུའོ། །སེང་གེ་གདན་བ སྟན་པ་ནི། དབུས་ཤེས་རབ་ཀྱི་ཕ་རོལ་ཏུ་ཕྱིན་པས་མྱི་འཇིགས་པ་བཞི་ཐོབ་པས་སེང་གེ་གདན་ནོ། །གླང་ཆེན་ཤར་དུ་བསམ་གཏན་གྱི་ཕ་རོལ་ཏུ་ཕྱིན་པས་མི་འགྱུར་བའི་རྟགས་སུ། སྟོབས་བཅུ་མངའ་བས་གླང་པོའི་གདན་དཀར་པོའོ། །རྟ་དང་ལྷོ་སྦྱིན་པའི་ཕ་རོལ་ཕྱིན་པས་རྫུ་འཕྲུལ་རྐང་པ་བཞི་མཚོན་པའི་རྟགས་སུ་རྟ་མཆོག་གི་གདན་སྔོན་པོ། ཁྱུང་། །ནུབ་ཏུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རྟགས་སུ་དབང་བཅུ་མཚོན་པ་མཛེས་པའི་ཁྱུང་རྨ་བྱའི་གདན་སྣ་ཚོགས། ༈ །འདིར་གདན་ལ་གསུམ་སྟེ། རྟགས་ཀྱི་ཆེ་བ་བཅོམ་པའི་གདན་ནི། སེམས་ཅན་བརྒྱད་བརྒྱད་མཇུག་མ་ནང་དུ་སྣོལ་ནས་གདན་འོག་ན་རྣ་བས་ཆོས་ཉན་པ་སྟེ། དེ་ཡང་བྱང་ཆུབ་སེམས་དཔའ་ཤེས་བྱའི་སྒྲིབ་པ་སྦྱོང་བས་ལུས་གདན་དུ་ཕུལ་བའོ། །སའི་ཁྱད་པར་སྒྲོད་པའི་གདན་ནི། བཅུ་གཅིག་ཀུན་ཏུ་འོད་དང་། བཅུ་གཉིས་མ་ཆགས་པད་མ་ཅན་དང་། བཅུ་གསུམ་ཡི་གེ་ཚོགས་ཆེན་གྱི་ས་ནོན་པས། ཉི་ཟླ་པད་མའོ། །ཆོས་ཀྱི་འཁོར་ལོ་བསྐོར་བའི་གདན་ནི། འོག་གཞིའ་ཆོས་ཀྱི་འཁོར་ལོ་རྩིབས་བཞིའམ། རིན་པོ་ཆེའི་ཁྲི་རྐང་ལ་དགོས་འདོད་འབྱུང་བ་དང་། འོག་གཞིའ་འཁོར་ལོ་ལ་ཆོས་ཀྱིས་འགྲོ་བ་འདུལ་བར་བསྟན་པའོ། །དེ་བས་ན་དོན་དང་རྟགས་སུ་ལྡན་པའི་གདན་ལྔ་རྩེགས་སོ། །སེམས་དཔའ་སེམས་མ་ལ་ཉི་ཟླ་པད་མའོ། །ཐུབ་པ་ལ་པད་རྐྱང་ངོ་། །སྒོ་བ་ལ་རྡོ་རྗེ་བྲག་གི་སྟེང་ན་ཉི་མ་རྐྱང་པའོ། །ནམ་མཁའ་ལྡིང་གི་ཁྲི་ཆེན་ལ། །བྱང་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྟགས་སུ་འཕྲིན་ལས་སྣ་ཚོགས་པ་མཚོན་པས། ཤང་ཤང་ནམ་མཁའ་ལྡིང་གི་གདན། ལུས་པོ་སེར་ལ་གཤོག་པ་གཡུར་སྣང་བའོ། །ཉི་ཤེས་རབ་སྟོང་པ་མཚོན་པ་ཉི་མའི་གདན་ནོ། །ཟླ་ཐབས་མ་འགགས་པ་མཚོན་པ་ཟླ་བའི་གདན་ནོ། །པད་མ་སྐྱོན་གྱིས་མ་གོས་པ་མཚོན་པ་གདན་སྣ་ཚོགས་པའི་པད་མའོ། །རིན་པོ་ཆེ། །དགོས་འདོད་སྣ་ཚོགས་འབྱུང་བ་རིན་པོ་ཆེ་འབར་བའི་གདན་ནོ། ༈ །ཨ་ནི་སྐྱེ་མེད་དེ་བཞིན་ཉིད། །རྒྱུའི་ཏིང་ངེ་འཛིན་གྱི་ཨ་དེ་དབུས་ཀྱི་གདན་སྟེངས་སུ་བབས་པ་སྟེ། ཨའི་དོན་ཆོས་ཉིད་སྐྱེ་བ་མྱེད་པ་ཡིན་ལ། རྟགས་ཀུན་ཏུ་བཟང་པོའི་ས་བོན་ནོ། །ངོ་བོ་དེ་བཞིན་ཉིད་ཀུན་གཞིའི་ཆོས་ཀྱི་དབྱིངས་ཀྱི་རང་བཞིན་ནོ། །ཀྵ་ནི་ཐུགས་ཀྱི་ཡེ་ཤེས་ཤར། །ཨ་དེ་ལས་ཀྵ་གཡས་སུ་འཕྲོས་པའི་དོན་ནི། ཐུགས་རིག་པའི་ཡེ་ཤེས་ཤར་བའོ། །རྟགས་ཀུན་ཏུ་བཟང་པོའི་ས་བོན་ནོ། །ངོ་བོ་ཡིད་རང་འབྱུང་གི་ཡེ་ཤེས་བདེ་བར་གཤེགས་པའི་ཐུགས་སོ། །དེ་ལས་ཆོ་འཕྲུལ་གསུམ་གྱི་སྐྱེད། །ཨ་དང་ཀྵ་གཉིས་སུ་གསལ་བ་གསུང་ཡིག་འབྲུའི་ཆོ་གའོ། །དེ་འཕྲོ་འདུས་པས་རྡོ་རྗེ་དང་དྲིལ་བུ་གཉིས་སུ་གྱུར། པ་ནི་ཐུགས་ཕྱག་མཚན་གྱི་ཆོ་གའོ། །དེ་འཕྲོ་འདུས་པ་ལས་སྐུ་ཕྲ་མོར་གྱུར་པ་ལས་སྐུ་ཕྲ་མོར་གྱུར་པ་ནི་སྐུ་ཡོངས་སུ་རྫོགས་པའི་ཆོ་གའོ། །དེ་འཕྲོ་འདུས་པ་ལས་སྔགས་བརྗོད་པས་ཀུན་བཟང་ཡབ་ཡུམ་དུ་བསྐྱེད་པའོ། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་འགྱུར་མཉམ་རྫོགས་པད་མོའི་དཀྱིལ། །སྐུ་ཕྲ་མོ་དེ་ལ། ཧཱུྃ་ཧཱུྃ་ཧཱུྃ་བཛྲ་ཙིཏ་ཧཱུྃ་ཞེས་བརྗོད་པས། ཀུན་ཏུ་བཟང་པོ་ཕྱག་གཉིས་ཞབས་གཉིས་དཀྱིལ་ཀྲུང་མཉམ་བཞག་ཏུ་བཞུགས་པ། རྒྱན་ཐམས་ཅད་ཀྱིས་རྒྱན་པའོ། །སྐུ་མཐིང་ཀ་ཕྱག་མཉམ་བཞག་གི་ཕྱག་རྒྱ་ཅན་དགོངས་པ་མཉམ་བཞག་ཏུ་བཞུགས་པའོ། །སོར་མོ་སོ་སོར་གསལ་བ་ནི། ཡེ་ཤེས་འཕྲོ་ཞིང་གསལ་བའི་དོན་ཡིན་ནོ། །ཕྱག་རྒྱ་ཆེན་པོའི་སྐུ་གཉིས་རྫོགས། །ཨ་ཨ་ཨ་བཛྲ་ས་ཏྭ་ས་མ་ཡ་སྟྭཾ། ཞེས་བརྗོད་པས། ཡུམ་ཀུན་ཏུ་བཟང་མོ་ཞལ་གཅིག་ཕྱག་གཉིས་པ། སྐུ་མཐིང་ཀ་ཡབ་ལ་འཁྲིལ་བ་ཞབས་པད་མའི་དཀྱིལ་ཀྲུང་དུ་བཞུགས་པ། ཡབ་དང་སྐུ་མཉམ་པར་རྫོགས་པ། ཉེས་པའི་སྐྱོན་དང་བྲལ་བའི་དོན་ནོ། །བདག་ཉིད་སངས་རྒྱས་ཐམས་ཅད་ཀྱི། །སྐུ་དང་གསུང་ཐུགས་དང་ཀྱི་རྡོ་རྗེའི་བདག་པོ་ཡིན་པས་ན ། ཕྱོགས་དུས་དཀྱིལ་འཁོར་བདག་ཉིད་ཆེན་པོ་ཡིན་པས་ན། ཀུན་ཏུ་བཟང་པོར་ཡེ་ནས་ཡིན་པའི་ཕྱིར་རོ། །རྣལ་འབྱོར་པ་བདག་ཉིད་དཔལ་ཀུན་ཏུ་བཟང་པོར་བསྐྱེད་པ་དེ་ཡང་། འཕྲལ་ལ་བྱས་པ་ལྟ་བུ་མྱིན་ཏེ། ཡེ་ནས་སངས་རྒྱས་ཀྱི་རང་བཞིན། དཔལ་ཀུན་ཏུ་བཟང་པོ་ཡིན་པའི་ཕྱིར་ན། བདག་གི་སྲས་སུ་དེ་བཞིན་གཤེགས་པ་བྱའོ། ༈ །བདག་སྔོན་གྱི་སངས་རྒྱས་ཡིན་པའི་ཕྱིར་ན་བདག་གི་སྲས་སུ་དེ་བཞིན་གཤེགས་པ་བྱ་བ་ནི་ལྔ་སྟེ། སངས་རྒྱས་གང་དང་སྦྱར་བ་དང་། དོན་གང་དང་མཐུན་པ་དང་། སྒོ་གང་ནས་འཇུག་པ་དང་། དོན་གང་རྟོགས་པ་དང་། ཡེ་ཤེས་གང་ཐོབ་པའོ། །སངས་རྒྱས་ནི་རང་བཞིན་ལྷུན་གྱིས་གྲུབ་པའི་སངས་རྒྱས་དང་སྦྱར། དེ་ཡང་བདག་རང་བཞིན་ལྷུན་གྱིས་གྲུབ་པའི་སངས་རྒྱས་ཡིན་པས་ན་རང་བཞིན་གྱི་ལྷར་བསྒོམ་པའོ། །དོན་གང་དང་མཐུན་ན། ཡེ་ཡིན་པ་དང་། དོན་དང་མཐུན་པའོ། །ཡེ་ཡིན་པ་ནི། དཔེར་ན་འཇིག་རྟེན་སྲིད་པའི་མེས་པོ་ལྷ་གཤེད་བུ་དང་གཤེད་ལ་ཡིན་པ་ལྟར། སངས་རྒྱས་ཐམས་ཅད་ཀྱི་མེས་པོ་རང་བཞིན་ལྷུན་གྲུབ་ཀྱི་སངས་རྒྱས་ཏེ་དཔལ་ཀུན་ཏུ་བཟང་པོའོ། །སྒོ་གང་ནས་འཇུག་པ་ནི། མ་ཧཱ་ཡོ་ག་ཨ་ཏི་ཡོ་ག་དང་སྦྱར་ནས་འཇུག་པའོ། །དོན་གང་རྟོགས་པ་ནི། རིག་པ་ཡེ་ནས་སངས་རྒྱས་པའི་དོན་དེ་རྟོགས་པའོ། །ཡེ་ཤེས་གང་རྟོགས་པ་ནི། རིག་པ་རང་གསལ་གྱི་ཡེ་ཤེས་ཐོབ་པའོ། །འོ་ན་བདག་དཔལ་ཀུན་ཏུ་བཟང་པོ་ཡབ་ཡུམ་གཉིས་པོ་སྔོན་གྱི་སངས་རྒྱས་ཡིན་ན། འབུ་ཏ་བཞི་བཅུ་པོ་དེ་ལྷ་འཕྲལ་བྱུང་གི་སངས་རྒྱས་ཡིན་ནམ་ཞེ་ན། དེ་བྱས་ན་བློ་བུར་བ་ཡིན་པས་དོན་མི་གྲུབ་པས་མི་འཐད་དོ། །དེ་མ་ཡིན་ན་སྔོན་གྱི་སངས་རྒྱས་ཞེས་ཅི་ལ་གདགས་ཞེ་ན་ཞེས་དྲིས་པ་ན། དེའི་ལན་དུ་དེ་ནི་འདི་ལྟར་ཤེས་པར་བྱ་སྟེ། རང་བཞིན་ལྷུན་གྱིས་གྲུབ་པའི་སངས་རྒྱས། ཡེ་ཇི་བཞིན་པའི་ཀུན་ཏུ་བཟང་པོར་མ་ཤེས་ན། རིག་པ་སངས་རྒྱས་སུ་ཐག་མི་ཆོད་པས་ན། དེ་སྐད་ཅེས་བྱ། རྟོགས་པ་མངོན་གྱུར་གྱི་སངས་རྒྱས། རྒྱུད་དག་པའི་སངས་རྒྱས་མྱེད་ན། རིགས་ནུབ། བདེའ་གཤེགས་རྒྱུན་ཆད་པའི་ཕྱིར་ན། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར། བདག་གི་སྲས་སུ་དེ་བཞིན་གཤེགས་པ་བྱ་བའོ། །དོན་གོ་དྲིལ་ན། འབུ་ཏ་བཞི་བཅུ་རྩ་གཉིས་ལ་སྔར་ཕྱི་མྱེད་ཀྱང་། གདུལ་བྱའི་བློ་དང་མཐུན་པར་བསྟན་པའོ། །དེ་བས་ན་བདག་སངས་རྒྱས་ནས་གཞན་དོན་བྱེད་པས་ན། འབུ་ཏ་ཉིད་ལ་འབུ་ཏ་ཉིད་ཀྱིས་དོན་བསྐུལ་བའོ། ༈ །ཐབས་དང་ཤེས་རབ་དགྱེས་སྤྲིན་ལས། །ཡབ་ཐབས་ཀྱི་རང་བཞིན་ཀུན་ཏུ་བཟང་པོའི་མཁའ་ནི། རྡོ་རྗེ་རྩེ་ལྔ་པ་མཆུའ་སྦུབས་སུ་ཨཱོཾ་གྱིས་མཚན་པའོ། །ཡུམ་ཤེས་རབ་ཀུན་ཏུ་བཟང་མོའི་མཁའ་ནི་པད་མ་འདབ་མ་བརྒྱད་པར་བསྒོམས་པའི་ལྟེ་བ་ལ་ༀ་བསམ། དེ་ལྟར་ཡབ་ཡུམ་གཉིས་སུ་མྱེད་པར་རོལ་པའི་བྱང་ཆུབ་སེམས་སྤྲིན་ལྟ་བུ་ཟག་པ་མྱེད་པའི་ཐིག་ལེ་བདེ་བ་ཆེན་པོ་ལས། བྱང་ཆུབ་སེམས་ཚོགས་རྒྱུ་འཁོར་ལོ། །ཡབ་ཡུམ་རོལ་པའི་བྱང་ཆུབ་སེམས་ཀྱི་ཚོགས་སུ་བྱུང་བ་ནི། ལྷ་བསྐྱེད་པའི་རྒྱུ་འཁོར་ལོ་ལྟར་འབྱུང་ངོ་། །འབྲས་བུ་རྒྱལ་བ་སྨིན་གྲུབ་བྱེད། །དེ་ལྟ་བུའི་ཡི་གེ་རྣམས་ལ། སྐྱེད་པ་རྐྱེན་གྱི་སྔགས་བརྗོད་ན། ཡི་གེའི་འབྲས་བུ་ནི། འབུ་ཏ་རྒྱལ་བ་བཞི་བཅུ་རྩ་གཉིས་སུ་སྨིན་ཅིང་གྲུབ་པར་བྱེད་པའོ། །ངོ་མཚར་མིང་ཚོགས་བཞི་བཅུ་གཉིས། །དེ་ལས་རྒྱུ་ཡི་གེ་འབྲས་བུ་སངས་རྒྱས་སུ་གྲུབ་པ་ནི་ངོ་མཚར་ཏོ། །མིང་ཚོགས་ནི་ཡི་གེའོ། །བཞི་བཅུ་རྩ་གཉིས་ནི་གྲངས་ཀྱི་རྣམ་གྲངས་སོ། ༈ །ཡི་གེ་འདི་རྣམས་ལ་སྤྱི་དོན་གསུམ་སྟེ། ཡི་གེ་འབྱུང་བའི་གནས་དང་། ཡི་གེའི་ངོ་བོ་དང་། ཡི་གེ་ལྷ་དང་ངོ་སྦྱར་བའོ། །ལྷ་དང་ངོ་སྦྱར་བ་ནི་གསུམ་སྟེ། ཕྱི་རྟོག་ཚོགས་བཞི་བཅུ་རྩ་གཉིས་སུ་ངོ་སྤྲད་པ་དང་། ནང་རྩ་གནས་ཀྱི་ཐིག་ལེ་དང་སྦྱར་བ་དང་། གསང་བ་ཡབ་ཡུམ་གྱི་བྱང་སེམས་དང་སྦྱར་བའོ། །དེ་ཡང་གཞི་ཐིག་ལེར་གནས་པ་ལས། བྱང་སེམས་ཡི་གེར་བབས་པ་ལས་ལྷར་བསྐྱེད་པའོ། །ཨ་ཁོང་ནས་འབྱུང་། སྐྱེ་བ་མྱེད་པའི་དོན་ཀུན་གཞིའ་ཆོས་ཀྱི་དབྱིངས། ཡུམ་ཀུན་ཏུ་བཟང་མོའི་རྒྱུའོ། །ཀ་སའི་སྙིང་པོ་ཁ་ཕྱག་རྡོར་ག་སྤྱན་རས་གཟིགས་གྷ་ནམ་མཁའ་སྙིང་པོ་ང་། གཤིན་རྗེ་གཤེད། ལྕེ་རྩེ་ལས་འབྱུང་། ལ་སེ་མ་ཙ་ནིར་ཏི་མ་ཚ་གྷིར་ཏི་མ་ཛ་མ་ལེ་མ་ཛྷ་སྟོབས་པོ་ཆེ་ཉ། ལྕེ་རྩེ་དང་ཁོག་པ་ལས་འབྱུང་། རྣམ་སྣང་ཊ་མྱི་བསྐྱོད་པ་ཋ་རིན་འབྱུང་ཌ་སྣང་མཐའ་ཌྷ་དོན་གྲུབ་ཎ། ལྕེ་རྩེ་ལས་འབྱུང་། སངས་རྒྱས་སྤྱན་ཏ་དབྱིངས་ཕྱུག་མ་ཐ་མ་མ་ཀི་ད་གོས་དཀར་མོ་དྷ་དམ་ཚིག་སྒྲོལ་མ་ན། མཆུའ་ལས་འབྱུང་། བྱམ་པ་པ་སྒྲིབ་སེལ་ཕ་ཀུན་བཟང་བ་འཇམ་དཔལ་བྷ་རྟ་མགྲིན་མ། ཡ་དུ་པེ་སྤོས་མ་ར་སྤུས་པེ་མེ་ཏོག་མ་ལ་ཨ་ལོ་ཀེ་མར་མེ་མ་ཝ། གྷན་དྷེ་དྲི་ཆབ་མ། ཤ་ལྕགས་ཀྱུ་མ་ཥ་ཞགས་པ་མ་ས་ལྕགས་སྒྲོག་མ་ཧ། དྲིལ་བུ་མ། ཀྵ་ཡིད་ཀུན་ཏུ་བཟང་པོ། ཨི་ལྷའི་ཐུབ་པ་ཨཱི་ལྷ་མ་ཡིན་གྱི། ཨུ་མིའི་ཨཱུ་བྱོལ་སོང་གི། ཨེ་ཡི་དྭགས་ཨཱེ་དམྱལ་བ། ཨོ་ཨཱ། བདུད་རྩི་འཁྱིལ་པ་ལུས་ཀྱི་རེག་བྱ་གཞིའ་རེག་པར་འདུས་པ་ཡི་གེ་གཉིས་འབྱུང་བའོ། ༈ །ཨ་ཉིད་སྣ་ཚོགས་པར་སྣང་བའི། །ཡི་གེ་ཨ་ནི་སེམས་ཅན་ལ་གནས་པའི་དུས་ཀུན་གཞིའ། དོན་དུ་ན་ཆོས་ཀྱི་ཡེ་ཤེས། ཡི་གེ་ཐམས་ཅད་ཀྱི་འབྱུང་གནས་ཡིན་པས་ན། ཨ་ལས་ཡི་གེ་སྣ་ཚོགས་པ་འབྱུང་བའོ། །གང་འབྱུང་ཞེ་ན། ཀ་ལ་སོགས་པའི་བཞི་བཅུ་གཉིས། །ཀ་ལ་སོགས་པའི་ཡི་གེ་བཞི་བཅུ་རྩ་གཉིས་སུ་འབྱུང་བ་ནི། འབྱུང་བའི་གནས། གཞིའི་ཡི་གེ་ཨ་ལས་འབྱུང་བའོ། །སྒྲའི་མིང་གིས་ཐམས་ཅད་སྡུས། །དེ་ཡང་ཡི་གེ་ལས་སྒྲ་འབྱུང་། སྒྲ་ལས་མིང་འབྱུང་། མིང་ལས་ཚིག་འབྱུང་། ཚིག་ལས་དོན་གསལ་ཞིང་རྟོགས་པས་ཚིག་ལས་དོན་བྱུང་ནས་དེས་ཆོས་ཐམས་ཅད་བསྡུས་པའོ། །མངོན་རྫོགས་རྒྱལ་པོ་དེ་ཉིད་ངེས། །རྒྱུའི་ཡི་གེ་བཞི་བཅུ་རྩ་གཉིས་ཉིད། འབྲས་བུ་རྒྱལ་བ་བཞི་བཅུ་རྩ་གཉིས་སུ་རྫོགས་པར་འབྱུང་ལ། རྒྱལ་བ་དེ་དག་ཡང་ལོངས་སྤྱོད་རྫོགས་པའི་སྐུ་འཁོར་ལོ་སྒྱུར་བའི་རྒྱལ་པོ་ལྟར་འབྱུང་བ་ནི། སྤྲུལ་པའི་སྐུ་ལྟ་བུ་ཡིན་ནོ། །དེ་ལ་རྐྱེན་གྱི་སྔགས་ཀྱིས་བསྐུལ། །ཀུན་ཏུ་བཟང་པོ་ཡབ་ཡུམ་གྱི་མཁའ་གསང་ནས་གདན་སྟེངས་སུ་ཡི་གེ་འཕྲོས་པ་ལས། ཧཱུྃ་བཛྲ་འདྲིག་ལས་སྐྱེད་པའི་རྐྱེན་གྱི་སྔགས་ཀྱིས་སྐུལ་བས། ལྷ་སོ་སོའི་སྐུ་ཡོངས་སུ་རྫོགས་པར་བསྐྱེད་དོ། ༈ །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །ཕྱི་ནང་གསང་བ་དེ་ཁོ་ན་ཉིད་དང་བཞི་ལས། འདི་རྣམས་གསང་བ་སྒྱུ་འཕྲུལ་དྲ་བ་ཡིན་ནོ། །དྲ་བའི་དཀྱིལ་འཁོར་མངོན་རྫོགས་གསལ། །འདི་རྣམས་ནི་རྣལ་འབྱོར་སྒྱུ་འཕྲུལ་དྲ་བ་སྟེ། ཆོས་ཉིད་ཀྱི་གཟུགས་བརྙན་ཡུམ་གྱི་སྐུར་འབྱུང་བ་དང་། ཡེ་ཤེས་ཀྱི་གཟུགས་བརྙན་ཡབ་ཀྱི་སྐུར་འབྱུང་བ་གཉིས། ཡེ་ནས་དབྱིངས་དང་ཡེ་ཤེས་གཉིས་སུ་མྱེད་པར་འབྲེལ་བའི་ཕྱིར། ལྷག་པ་ཏིང་ངེ་འཛིན་གྱི་དཀྱིལ་འཁོར་ན་རིག་པ་མངོན་སུམ་དུ་གསལ་བའོ། །འདུས་མ་བྱས་ཉིད་འདུས་བྱས་སྣང་། །དོན་དམ་པར་ཆོས་ཉིད་འདུས་མ་བྱས་པའི་ངང་ལས་མ་གཡོས་ཀྱང་། ཀུན་རྫོབ་ཙམ་དུ་ལྷའི་སྐུ་འདུས་བྱས་ལྟར་སྣང་བའོ། །རྡོ་རྗེའི་དཀྱིལ་འཁོར་འབྱིན་པའི་དམ། །དེ་ཁོ་ན་ཀུན་རྫོབ་དོན་དམ་པར་སྣང་ཡང་། དོན་གྱི་ངོ་བོ་ལ་བདེན་པ་དབྱེར་མྱེད་པའི་ཏིང་ངེ་འཛིན་གྱི་དཀྱིལ་འཁོར་རོ། །དབང་མྱེད་རྒྱུ་རྐྱེན་འཚོགས་པའི་མཐུའ་ཆེན་ཡིན། །དེ་ཡང་དཔེར་ན། རྒྱུ་ས་བོན་ལ་རྐྱེན་ཆུ་ལུད་འཛོམ་ན་འབྲས་བུ་རང་དབང་མྱེད་པར་འབྱུང་བ་ལྟར། རྒྱུ་ཟག་མྱེད་ཀྱི་བྱང་ཆུབ་སེམས་ཡི་གེར་སྣང་བ་དང་། རྐྱེན་བསྐྱེད་པའི་སྔགས་ཀྱིས་ནུས་པ་འཚོགས་ན། འབྲས་བུ་ལྷའི་སྐུ་རང་དབང་མྱེད་པར་འབྱུང་སྟེ། གསང་སྔགས་གསང་བའི་ནུས་མཐུའ་ཡིན་ནོ། །དེ་ཡན་ཅད་ཀྱིས་བདག་སྔོན་གྱི་སངས་རྒྱས་ཡིན་པའི་ཕྱིར། བདག་གི་སྲས་སུ་དེ་བཞིན་གཤེགས་པ་བྱ་བའོ། ༈ །རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར། དེ་བཞིན་གཤེགས་པའི་སྲས་སུ་བདག་བྱ་བ་ལ་ལྔ་སྟེ། སངས་རྒྱས་གང་དང་སྦྱར་བ་དང་། དོན་གང་དང་མཐུན་པ་དང་། སྒོ་གང་ནས་འཇུག་པ་དང་། དོན་གང་ཐོབ་ཅིང་རྟོགས་པ་དང་། ཡེ་ཤེས་གང་རྟོགས་པའོ། །སངས་རྒྱས་གང་དང་སྦྱར་ན། རྟོགས་པ་མངོན་གྱུར་གྱི་སངས་རྒྱས་དང་སྦྱར། དེ་ཡང་རྟོགས་པ་མངོན་དུ་གྱུར་པའི་དཀྱིལ་འཁོར་བསྐྱེད་པའོ། །དོན་གང་དང་མཐུན་ན། ཕ་མས་བུ་ཚ་བསྐྱེད་པ་དང་འདྲའོ། །སྒོ་གང་ནས་འཇུག་ན། མ་ཧཱ་ཡོ་གའི་ཨ་ནུ་ཡོ་ག་ནས་འཇུག་གོ། །དོན་གང་རྟོགས་ན། རང་འབྱུང་གིི་ཡེ་ཤེས་ཆེན་པོ་རྟོགས་པའོ། །རང་རིག་པ་ལ་རང་གིས་རྟོགས་པ་མངོན་དུ་གྱུར། རྒྱུད་དག་པའི་ཀུན་ཏུ་བཟང་པོར་བྱས། རིག་པ་དང་རྟོགས་པ་དབྱེར་མྱེད། དེ་ཅི་ལས་བྱུང་ན། རང་རིག་པ་སངས་རྒྱས་ཡིན་པ་ལ། ཡིན་པར་ཤེས་ནས། དེའི་སྲས་སུ་བདག་བྱས་པ་ལས་འབྱུང་ངོ་། ༈ །དེ་ནས་བཅོམ་ལྡན་དགྱེས་ཆེན་རིགས། །དཀྱིལ་འཁོར་དང་པོ་བསྐྱེད་པ་དེ་ནས་བཅོམ་ལྡན་འདས་ཀུན་ཏུ་བཟང་པོ་རིགས་ཀྱི་བདག་པོ་ཡབ་ཡུམ་གཉིས་སུ་མྱེད་པ་ལས་སོ། །ལྷུན་གྱིས་གྲུབ་པར་བྱ་བའི་ཕྱིར། །ལྷུན་གྱིས་གྲུབ་པར་ཡོད་ཀྱང་། རང་བཞིན་ལྷུན་གྲུབ་དེ་རྟོགས་པ་མངོན་དུ་གྱུར་པར་བྱ་བའི་ཕྱིར་ན། རང་སྣང་དབྱེར་མྱེད་དཀྱིལ་འཁོར་ལ། །རང་བཞིན་ལྷུན་གྲུབ་དང་། རང་སྣང་རིག་པའི་དཀྱིལ་འཁོར་གཉིས་དབྱེར་མྱེད་པའི་དཀྱིལ་འཁོར་དུ་བྱ་བའི་ཕྱིར་ན། རྟོགས་པས་ལྷུན་གྲུབ་ཏུ་བྱ་བའི་ཕྱིར། དེ་བཞིན་གཤེགས་པའི་སྲས་སུ་བདག་བྱ་བའོ། །འཇུག་པའི་མཚན་ཉིད་མཉམ་སྦྱོར་བས། །གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དེ། རྐྱེན་འཇུག་པའི་ལམ་གྱི་མཚན་ཉིད་ཀྱིས་ཉམས་སུ་བླངས་ལ། གཞིའ་དེ་རང་གི་བློ་ལ་མཉམ་པར་སྦྱར་རོ། །རང་གི་ངང་ཚུལ་དེ་བཟུང་ནས། །བསྐུལ་ཚིག་འདི་ཡང་རབ་ཏུ་བརྗོད། །དབུས་ཀྱི་གཙོའ་བོའི་ཐུགས་ཀ་ནས་རང་གི་རྣམ་པར་སྨིན་པའི་ལུས་འདི་འདྲ་བའི་ཚངས་པ་ཕྲུ་གུའི་ཆ་བྱད་ཅན་གཅིག་བྱུང་ནས་སོ། །དེ་བྱུང་ནས་བར་ཁྱམས་ནས་དཀྱིལ་འཁོར་གྱི་ལྷ་ལ་སྐོར་བ་བྱས་ནས། ནུབ་སྒོར་འདུག་སྟེ་རྐྱང་ཕྱག་ལན་གསུམ་འཚལ་ནས། སྤུས་མོ་བཙུགས་ཏེ་དཀྱིལ་འཁོར་གྱི་ལྷ་ལ་གསོལ་བ་ལན་གསུམ་འདེབས་པ་འདི་སྐད་དོ། ༈ །ཨཱོཾ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་འཕྲིན་ལས་རྨད་པོ་ཆེ། །རང་འབྱུང་ཡེ་ཤེས་ཀྱི་ངོ་བོ་དཔལ་ཀུན་ཏུ་བཟང་པོ་ནི། ཐམས་ཅད་དུ་དབང་བསྐུར་བའི་ཕྱིར་ན་རྒྱལ་པོའོ། །སྐུའི་རིགས་རྣམ་པར་སྣང་མཛད་དང་། གསུང་གི་རིགས་སྣང་བ་མཐའ་ཡས། ཐུགས་ཀྱི་རིགས་མི་བསྐྱོད་པ། ཡོན་ཏན་གྱི་རིགས་རིན་འབྱུང་། འཕྲིན་ལས་ཀྱི་རིགས་དོན་ཡོད་གྲུབ་པའོ། །དེ་ཡང་རྒྱལ་བ་ལྔ་སོ་སོར་བྱུང་བ་ནི་མ་ཡིན་ཏེ། རྒྱལ་བ་གཅིག་ལས་ཡོན་ཏན་སྐུ་གསུང་ཐུགས་འཕྲིན་ལས་རེ་རེ་དང་ལྡན་པས་ན་རྨད་པོ་ཆེ་ཞེས་བྱའོ། །ད་ལྟ་ཉིད་དུ་མཉམ་སྦྱོར་བས། །དེ་ལྟ་བུ་དེ་བདག་ལ་དུས་ད་ལྟ་ཉིད་དུ་ཁྱེད་དང་དབྱེར་མྱེད་པར་སྦྱོར་བས་ན། དུས་ཕྱི་མ་ལ་མི་ལྟོས་པའི་དུས་ད་ལྟ་ཉིད་དུ་སྦྱོར་བའོ། །ཕྱག་རྒྱ་ཆེན་པོར་བདག་སྦྱོར་ཅིག །ཁྱེད་ཀྱིས་ཕྱག་རྒྱ་ཆེན་པོར་བདག་སྦྱོར་ཅིག །ཅེས་པ་སྟེ། ཇི་ལྟར་བདག་རང་བཞིན་ལྷུན་གྲུབ་ཀྱི་སངས་རྒྱས་དང་། ཁྱེད་རྟོགས་པ་མངོན་འགྱུར་གྱི་སངས་རྒྱས་གཉིས་དབྱེར་མྱེད་པར་གྱུར་ལ། བདག་ཉིད་ཀྱང་རྟོགས་པ་མངོན་གྱུར་གྱི་སངས་རྒྱས་སུ་སྦྱོར་ཅིག་པའོ། །དེ་ལྟར་གསོལ་བ་བཏབ་པས། དཀྱིལ་འཁོར་གྱི་ལྷ་ཡབ་ཡུམ་ཐབས་དང་ཤེས་རབ་གཉིས་སུ་མྱེད་པའི་སྦྱོར་བ་མཛད་པས། སྦྱོར་མཚམས་ནས་བྱང་ཆུབ་ཀྱི་སེམས་རྣོ་ལ་མྱུར་བ་གྲངས་མྱེད་པ་བྱུང་བས། བདག་གི་ལུས་ཀྱི་སྡིག་པ་ཐམས་ཅད་བྱ་སྒྲོ་ལ་མེས་སྲེགས་པ་བཞིན་དུ་སྦྱངས་ནས། སེམས་གསེར་ཞུན་མ་བཞིན་དུ་གནས་པའོ། །དེ་ལ་ལྷ་རྣམས་ཀྱིས་གཟིགས་ཏེ། སེམས་རྟེན་གྱི་གནས་སུ་ཡི་གེ་ཨཱོཾ་ཨཱ ཿཧཱུྃ་གསུམ་འཕྲོས་པས། འོད་ཀྱི་རང་བཞིན་ལྷའི་སེམས་དེ་ཡི་གེ་གསུམ་དུ་གྱུར་ཏོ། །ཡི་གེ་ཡང་འཕྲོ་འདུས་པས་ཧཱུྃ་དུ་ཐིམ། དེས་བར་ཁྱམས་ནས་སྐོར་བ་ལན་གསུམ་བྱས་ནས། གཙོའ་བོའི་ཐུགས་ཁར་ཐིམ། སྐུའི་དབྱིབས་སུ་གྱུར། རྡོ་རྗེ་ལམ་དུ་བྱུང་ནས། ཡུམ་གྱི་མཁའ་ལ་བབས་པའོ། །ཐབས་དང་ཤེས་ཡུམ་རབ་གཉིས་མྱེད་སྦྱར་པའི། །ཡེ་ཤེས་ལྷའི་འོད་ཟེར་གྱིས་བདག་གི་ལུས་ཀྱི་རྟོག་པ་སྦྱངས། །གསེར་དཔེའ་ཞུན་ལྟ་བུའི་བདག་གི་སེམས་དག་ལས། །གསུམ་ཨཱོཾ་ཨཱཿཧཱུྃ་གྱི་བྱིན་བརླབས་འོད་ཀྱི་འབྲུ། །ཐུགས་ཀར་ཐིམ་ནས་སྐུའི་དབྱིག །རྡོ་རྗེའི་ལམ་བྱུང་ཡུམ་གྱི་མཁའ། །ཡུམ་གྱི་མཁའ་ལ་བབ་པ་དང་། ཧཱུྃ་གི་འོད་ཀྱིས་ཡུམ་ཡང་འོད་དུ་ཞུ། ཆོས་སྐུ་བྱང་ཆུབ་སེམས་སུ་གནས། །སྣང་ལ་རང་བཞིན་མྱེད་པའི་སྐུ། གསལ་ལ་རྟོག་པ་མྱེད་པའི་ཐུགས་སུ་གནས་སོ། །ལྷ་རྣམས་སོ་སོའི་སྙིང་པོའི་སྒྲ། །དཀྱིལ་འཁོར་གྱི་ལྷ་གཞན་རྣམས་ཀྱང་རང་རང་གི་ཡི་གེའི་སྒྲ་ཙམ་བྱུང་བས། བཞི་བཞི་རྩ་གཉིས་སྒྲ་བྱུང་བས། །སྔགས་ཀྱི་སྒྲས་བསྐུལ་ནས་གནས་པ་དེ། བྱང་ཆུབ་སེམས་སུ་གཅིག་པར་ཐིམ། །དབུས་ཀྱི་གཙོའ་བོའི་འོད་ཕུང་ལ་གཅིག་པར་ཐིམ་མོ། ༈ །དེ་ནས་སྙིང་པོ་དྲན་ཙམ་གྱིས། །ལྷ་ཐམས་ཅད་འོད་དུ་ཞུ་ནས་འོད་ཀྱི་གོང་བུ་ཅིག་ཏུ་གནས་པ་དེ་ལ། ཨ་དང་ཀྴ་དང་གཉིས་ཀྱི་སྙིང་པོ་དྲན་ཙམ་གྱིས། ཨ་ཀྴ་གསུང་གི་ཕྱག་རྒྱ་གཉིས། །འོད་ཀྱི་གོང་བུ་དེ་གསུང་གི་ཡི་གེ་ཨ་ཀྴ་གཉིས་སུ་གྱུར་ཏེ། དེ་ལས་སྐུ་བསྐྱེད་པའི་རང་བཞིན་ལས་མི་འདའ་བས་ན་ཕྱག་རྒྱ་གཉིས་ཞེས་བྱའོ། །ཆོ་ག་གསུམ་གྱི་སྦྱོར་བ་ཡིས། །འོད་ཀྱི་གོང་བུ་ལས་ཨ་དང་ཀྴ་གཉིས་སུ་གྱུར་པ་ནི། གསུང་ཡིག་འབྲུའི་ཆོ་གའོ། །དེས་འཕྲོ་འདུས་པ་ལས་རྡོ་རྗེ་དང་དྲིལ་བུར་གྱུར་པ་ནི་ཐུགས་ཕྱག་མཚན་གྱི་ཆོ་གའོ། །དེ་འཕྲོ་འདུས་པ་ལས་སྐུ་ཕྲ་མོར་གྱུར་པའོ། །ཕྱག་རྒྱ་ཆེན་པོའི་སྐུ་གཉིས་རྫོགས། །སྐུ་ཕྲ་མོ་འཕྲོ་འདུས་པ་ལས་སྔགས་བརྗོད་པས་དཔལ་ཀུན་ཏུ་བཟང་པོ་ཡབ་ཡུམ་དུ་གྱུར་པར་བསྒོམ་པ་ནི། སྐུ་མདོག་མཐིང་ཀ་ཞལ་གཅིག་ཕྱག་ག ཉིས་པ། ཞབས་རྡོ་རྗེའི་དཀྱིལ་ཀྲུང་། ཕྱག་མཉམ་བཞག་ཏུ་གནས་པའོ། །རྒྱན་ཐམས་ཅད་ཀྱིས་བརྒྱན་པར་བསྒོམ་མོ། ༈ །འབྲུ་གསུམ་འབྲུ་ལྔའི་བྱིན་བརླབས་དབང་། །ཡབ་ཀྱི་གསང་བ་ཧཱུྃ་ལས་རྡོ་རྗེ་རྩེ་ལྔ་པ་ཆུ་སྦུགས་སུ་ཡི་གེ་ༀ་གྱིས་མཚན་མར་བསྐྱེད་དོ། ༈ །ཧཱུྃ་ལས་རྡོ་རྗེ་རྩེ་ལྔ་ཨཱོཾ། ཡང་ན་རྩ་བར་ཨཱོཾ་སྐེད་པར་ཧཱུྃ་རྩེ་མོར་ཕཊ་བསམ་པར་བྱའོ། །པྃ་ལས་པད་མ་འདབ་བརྒྱད་ཨྃ། །ཡུམ་གྱི་མཁའ་པྃ་ལས་པད་མ་འདབ་བརྒྱད་དུ་གྱུར་པའི་དབུས་སུ་ཉི་མའི་དཀྱིལ་འཁོར། དེའི་སྟེང་དུ་ༀ་བསམ་པར་བྱའོ། །ཀུན་ཏུ་བཟང་པོའི་དབུའི་གནས་ལྔར། རིན་པོ་ཆེའི་ཁང་བུ་ལྔའི་ནང་དུ་ཡི་གེ་ལྔ་བཀོད་པས། འོག་མིན་ནས་རིགས་ལྔ་སྤྱན་དྲངས་ཏེ། མདུན་གྱི་ནམ་ཀ་ལ་བཞུགས་པ་དེའི་ཐབས་དང་ཤེས་རབ་གཉིས་སུ་མྱེད་པ་དེའི་བྱང་ཆུབ་སེམས་དབུའི་ཡི་གེ་ལྔ་ལ་ཐིམ་པ་དང་དོན་ཡེ་ཤེས་ལྔར་དབང་སྐུར་ཏེ། མ་ཧཱ་ཤུ་ཉ་ཏ་ལ་སོགས་ཏེའི་སྔགས་ཀྱིས་ང་རྒྱལ་བྱའོ། །དེ་ནས་ནམ་མཁའི་རིགས་ལྔ་དབུའི་ཁང་བུ་ལྔའི་ནང་དུ་སྤྱན་དྲངས་ལ་དབུའ་རྒྱན་དུ་བཞུགས་སུ་གསོལ་ལོ། །བྱིན་གྱིས་བརླབ་པ་ནི། ལྷ་རྣམས་ཀྱི་སྤྱི་བོ་དང་མགྲིན་པ་དང་སྙིང་ཀར། ཉི་མ་དང་ཟླ་བ་དང་། པད་མའི་གདན་བསམས་ལ། དེའི་སྟེང་དུ་སྤྱི་བོར་ༀ་མགྲིན་པར་ཨྃ་ཐུགས་ཁར་ཧཱུྃ་བསམ། དེ་ལས་འོད་འཕྲོ་འདུས་པ་ལས། རྣམ་སྣང་དང་། སྣང་མཐའ་དང་། རྡོ་རྗེ་སེམས་དཔར་བསྐྱེད་ལ། སྔགས་ཀྱིས་ང་རྒྱལ་བྱའོ། །བརྗེས་སུ་ཆགས་པས་དེ་བཞིན་བསྐུལ། །ཡུམ་གྱིས་ཡབ་ལ་སྐུལ་བ། དེ་བཞིན་གཤེགས་པ་ཐམས་ཅད་ཀྱིས་རྗེས་སུ་ཆགས་པའི་བདག་ཉིད་མའམ། ཡུལ་ང་ཡི་ཡིན་ཞེས་བ བསྐུལ་ལོ། །ཡབ་ཀྱིས་ཡུམ་ལ་ལན་བྱིན་པ་ནི། དེ་བཞིན་གཤེགས་པ་ཐམས་ཅད་ཀྱི་མཆོད་པ་ཆེན་པོའི་རྡོ་རྗེའི་རང་བཞིན་ངའམ་བདག་ཉིད་ཡིན་ཞེས་ལན་དུ་བསྐུལ་བའོ། །ཨཱོཾ་སརྦ་ཐམས་ཅད་ཏ་དེ་བཞིན་གཤེགས་པ་ཐཱ་ག་ཏ་མ་ཆེན་པོ་ཧཱ་ཨ་ནུ་རྗེས་སུ་ཆགས་པ་ར་ག་བཛྲ་རྡོ་རྗེ་སྭ་བྷ་བ་ངོ་བོ་ཉིད་ཨད་བདག་ཉིད་མ་ཀོ་ངའོ་ཧཾ། ཨཱོཾ་སརྦ་ཐམས་ཅད་ཏ་དེ་བཞིན་གཤེགས་པ་ཐཱ་ག་ཏ་མ་ཧཱ་ཆེན་པོ་པུ་ཙ་མཆོད་པ་བཛྲ་རྡོ་རྗེ་སྭ་བྷ་ངོ་བ ོ་ཉིད་བ་ཨད་བདག་ཉིད་མ་ཀོ་ཧཾ་ངའོ། །ཡུམ་གྱི་པད་མོའི་དཀྱིལ་འཁོར་དུ། །ཡུམ་ཀུན་ཏུ་བཟང་མོའི་མཁའ་པད་མ་འདབ་བརྒྱད་པའི་དལ་དུ་བ་ག་བདེ་སྟོང་གི་ཉམས་དང་ལྡན་པ་དེ། བདེའ་བ་ཐུགས་ཀྱི་དཀྱིལ་འཁོར་སྤྲོ། །ཡབ་ཀུན་ཏུ་བཟང་པོའི་ལྷག་པ་བྱང་ཆུབ་ཀྱི་སེམས་ཐུགས་ཡང་དག་པའི་བདེའ་བ་དེ ། ཡབ་ཀྱིས་ཡུམ་ལ་དཀྱིལ་འཁོར་གྱི་ལྷའི་རྒྱུར་སྤྲོ་བའོ། །གཞལ་ཡས་ཐིག་གདབ་སྙིང་པོ་བཀོད། །ཡུམ་གྱི་མཁར་བྱང་ཆུབ་སེམས་དང་པོ་སྤྲོས་པས་དལ་དུ་གྱུར། གཉིས་པ་སྤྲོས་པས་ཐིག་གདབ། གསུམ་པས་དལ་ཡོངས་སུ་རྫོགས། བཞི་པས་གདན་གསལ། ལྔ་པས་གསུང་ཡིག་འབྲུ། བཞི་བཅུ་རྩ་གཉིས་སུ་གསལ་ལོ། །དེ་ལས་སྤྲོ་དང་བསྡུ་བ་ཡིས། །དེ་ནས་འཕྲོས་པས་སྙིང་པོ་ཀ་ཁ་བཞི་བཅུ་རྩ་གཉིས་སུ་གྱུར་པའོ། །ཐུགས་ཀྱི་ཕྱག་རྒྱ་བཞི་བཅུ་གཉིས། །དེ་ཕར་འཕྲོས་ཚུར་འདུས་པ་ལས། ཐུགས་མཚན་བཞི་བཅུ་རྩ་གཉིས་སུ་གྱུར་པའོ། །དེ་ལས་ཕྲ་མོའི་སྐུ་འཕྲོ་འདུས། །དེ་ལས་ཡང་ཕར་འཕྲོས་ཚུར་འདུས་པ་ལས་སྐུ་ཕྲ་མོ་བཞི་བཅུ་རྩ་གཉིས་སུ་གྱུར་པའོ། །སོ་སོའི་སྔགས་ཀྱིས་སྐྱེད་ཅིང་གདོན། །དེ་ནས་ཡུམ་གྱི་མཁའི་ནང་ན་གནས་པའི་སྐུ་ཕྲ་མོ་དེ་རང་རང་གི་སྔགས་བརྗོད་པས་ཕྱི་ལ་གདོན་པར་བྱའོ། །དབུས་སུ་ཧཱུྃ་བཛྲ་འདྲིག །གཙོའ་བོ་ཡབ་ཡུམ་གྱི་སྔགས་བསྟན། ཞེས་བརྗོད་པས་དབུས་སུ་བཅོམ་ལྡན་འདས་རྡོ་རྗེ་སེམས་དཔའ། ཞལ་གསུམ་ཕྱག་དྲུག་པ། གཡས་དཀར་གཡོན་དམར་དབུས་མཐིང་ཀའི་ཞལ། རྡོ་རྗེ་འཁོར་ལོ་རིན་ཆེན་གཡས། དྲིལ་བུ་པད་མ་རལ་གྲི་གཡོན་ན་སྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རྫོགས་པའི་སྐྱིལ་དཀྲུང་དུ་བཞུགས་པའོ། །ཤར་དུ་ཨཱོཾ་ཛི་ན་འཛིག །ཅེས་པས་ཤར་དུ་རྣམ་པར་སྣང་མཛད། ཞལ་གསུམ་ཕྱག་དྲུག་གཡས་དམར་གཡོན་སྔོ་དབུས་དཀར་ཞལ། འཁོར་ལོ་རིན་ཆེན་རྡོ་རྗེ་གཡས། དྲིལ་བུ་པད་མ་རལ་གྲི་གཡོན། ཞབས་རྫོགས་པའི་སྐྱིལ་དཀྲུང་དུ་བཞུགས་སོ། །ལྷོར་སྭཱ་རད་ན་འདྲིག །ཅེས་པས་ལྷོར་རིན་ཆེན་འབྱུང་ལྡན་ཞལ་གསུམ་ཕྱག་དྲུག་པ། གཡས་སྔོ་གཡོན་དམར་དབུས་སེར་ཞལ། རིན་ཆེན་འཁོར་ལོ་རྡོ་རྗེ་གཡས། དྲིལ་བུ་པད་མ་རལ་གྲི་གཡོན་ན་སྣམས་སོ། །ནུབ་ཏུ་ཨཱོཾ་ཨ་རོ་ལིག་ཅེས་པས་ནུབ་ཏུ་སྣང་བ་མཐའ་ཡས་ཞལ་གསུམ་ཕྱག་དྲུག་པ། གཡས་སྔོ་གཡོན་དཀར་དབུས་དམར་ཞལ། པད་མ་འཁོར་ལོ་རྡོ་རྗེ་གཡས། དྲིལ་བུ་རིན་ཆེན་རལ་གྲི་གཡོན་ན་སྣམས་པའོ། །བྱང་དུ་ཧ་པྲད་ཉ་འདྲིག །ཅེས་པས་བྱང་དུ་དོན་ཡོད་གྲུབ་པ་ཞལ་གསུམ་ཕྱག་དྲུག་པ། གཡོས་དཀར་གཡོན་དམར་དབུས་ལྗང་ཞལ། རལ་གྲི་འཁོར་ལོ་རྡོ་རྗེ་གཡས་དྲིལ་བུ་པད་མ་རིན་ཆེན། དབུས་མུཾ་དྷ་དུ་ཤྭ་རི། དབྱིངས་ཕྱུག་མ་མཐིང་ཀ་གཡས་ཡབ་ལ་འཁྱུད་པ། གཡོན་དྲིལ་བུ་སྣམས་པའོ། །ལཾ་ཏེ་ཤ་ར་ཏི། ཤར། སངས་རྒྱས་སྤྱན་དཀར་མོ་གཡས་ཡབ་ལ་འཁྱུད་པ་གཡོན་དྲིལ་བུ་སྣམས་པའོ། །མཾ་མོ་ཧ་ར་ཏི། ལྷོ། མ་མ་ཀི་སེར་མོ་གཡས་པ་ཡབ་ལ་འཁྱུད་པ་གཡོན་པ་དྲིལ་བུ་སྣམས་པའོ། །པྱཾ་ར་ག་ར་ཏི། ནུབ། གོས་དཀར་མོ་དམར་མོ་གཡས་པ་ཡབ་ལ་འཁྱུད་པ། གཡོན་པ་དྲིལ་བུ་སྣམས་པའོ། །ཏཾ་བཛྲ་ར་ཏི། བྱང་། དམ་ཚིག་སྒྲོལ་མ་ལྗང་ཁུ་གཡས་པ་ཡབ་ཡ་འཁྱུད་པ། གཡོན་དྲིལ་བུ་སྣམས་པའོ། ༈ །ནང་གི་སེམས་དཔའ། ཀྵི་ཧི་ར་ཙ་ཡ། ཤར་ལྷོའི་རྩིབས་འཆན་ལ། སའི་སྙིང་པོ་གཡས་རིན་ཆེན་མྱུ་གུ། གཡོན་དྲིལ་བུ་སྣམས་པའོ། །ཏྲཾ་ཨ་ཀ་ར་རྦ་ཡ། ལྷོ་ནུབ་ཀྱི་རྩིབས་འཆན་ལ། ནམ་མཁའི་སྙིང་པོ་སེར་པོ་གཡས་རལ་གྲི་གཡོན་དྲིལ་བུ་སྣམས་པའོ། །ཧྲི་པད་མ་བན་དྷ་ཡ། ནུབ་བྱང་གི་རྩིབས་འཆན་ལ། སྤྱན་རས་གཟིགས་དམར་པོ་གཡས་པད་མ་དཀར་པོ་གཡོན་དྲིལ་བུའོ། །ཛིམ་ཀུ་རུ་པ་ན་ཧྲི། བྱང་ཤར་གྱི་རྩིབས་འཆན་ལ། ཕྱག་ན་རྡོ་རྗེ་ལྗང་ཁུ་གཡས་རྡོ་རྗེ་གཡོན་དྲིལ་བུ་སྣམས་པའོ། །ཧཱུྃ་ལ་སེ་ས་མ་ཡ་སྟཾ། ལ་སེ་སྒེག་མོ་དཀར་མོ་གཡས་མེ་ལོང་ཐོགས་པ། གཡོན་འགིང་བག་གི་ཚུལ་ཅན་སེམས་པ་ས་སྙིང་གི་ཡུམ་འཁྲིལ་སྦྱོར་དུ་གནས་སོ། །ཏྲཾ་མ་ལེ་ས་མ་ཡ་ཧོ། མ་ལེ་མ་སེར་མོ་འཕྲེང་བ་སྤྱི་བོར་འདྲེན་པ་ནམ་མཁའ་སྙིང་པོ་དང་འཁྲིལ་སྦྱོར་དུ་གནས་སོ། །ཧྲི་གྷིར་ཏི་ར་གོ་ཡ་ཧཾ། དབྱངས་མ་དམར་མོ་པི་ཝང་སྦྲེང་བ་སྤྱན་རས་གཟིགས་ཀྱི་ཡུམ་མོ། །ཨ་ནི་ར་ཏི་ར་གོ་ཡ་མི། གར་མ་ལྗང་ཁུ་ཕྱག་རྒྱ་གར་སྒྱུར་མ་ཕྱག་ན་རྡོ་རྗེ་ཡུམ་མོ། ༈ །ཕྱིའི་སེམས་དཔའ་ཡབ་ཡུམ་བསྟན། མེ་དྷ་ར་ནི་སྭཱ་ཧཱ། བྱམས་པ་དཀར་པོ་ཀླུ་ཤིང་གཡས། གཡོན་དྲིལ་བུ། ཤར་ལྷོའི་གྲུ་ཆད་ལའོ། །ཐླྷིཾ་སྭ་ར་བ་ཡ་སྭཱ་ཧཱ། ལྷོ་ནུབ་ཏུ་སྒྲིབ་སེལ་སེར་པོ་ཆོས་ཀྱི་འཁོར་ལོ་དང་དྲིལ་བུ་སྣམས་པའོ། །ཧཱུྃ་སྭ་ར་རྩ་ཡ་སྭཱ་ཧཱ། ནུབ་བྱང་གི་གྲུ་ཆད་ལ་ཀུན་བཟང་དམར་པོ་གཡས་རིན་ཆེན་སྙེ་མ་གཡོན་དྲིལ་བུའོ། །མུཾ་ཤྲི་ཨ་རཾ་ག་སྭཱ་ཧཱ། བྱང་ཤར་གྲུ་ཆད་ལ་འཇམ་དཔལ་ལྗང་ཁུ་གཡས་ཨུད་དཔལ། གཡོན་དྲིལ་བུའོ། ༈ །ཛ་དུ་པ་པྲ་བེ་ཤ །དུ་པེ་མ་དཀར་མོ་སྤོས་ཕོར་ཐོགས་པ་བྱམས་པའི་ཡུམ་ཡིན་ནོ། །ཧཱུྃ་པུས་པ་ཨ་བེ་ཤ །པུཥྤེ་མ་སེར་མོ་མེ་ཏོག་ཐོགས་པ་སྒྲིབ་སེལ་གྱི་ཡུམ་མོ། །བཾ་དི་པ་སུ་ཀི་ནི། ཨ་ལོ་ཀེ་དམར་མོ་མར་མེ་ཐོགས་པ་སྒྲིབ་སེལ་གྱི་ཡུམ་མོ། །ཧོ་གྷན་དྷེ་ཙི་ཏ་ཧོ། །གྷན་དྷེ་མ་ལྗང་ཁུ་དྲི་ཆབ་ཐོགས་པ་འཇམ་དཔལ་གྱི་ཡུམ་མོ། ༈ །སྒོ་བ་ཡབ་ཡུམ་གྱི་སྔགས། ཧཱུྃ་ཡ་མན་ཏ་ཀྲིད་ཕཊ། ཤར་སྒོར་གཤིན་རྗེ་གཤེད་ཞལ་གསུམ་ཕྱག་དྲུག་པ། གཡས་ལྗང་གཡོན་སྔོན་དབུས་དཀར་ཞལ། དང་པོ་གཉིས་མི་འགོ་མནན་པ། གཡས་གཏུན་ཤིང་རྡོ་རྗེ། གཡོན་དབྱུག་ཐོ་དགྲའ་སྟྭའོ། །ཧཱུྃ་བིག་ནན་ཏ་ཀྲིད་ཕཊ། ལྷོར་སྟོབས་པོ་ཆེ་ཞལ་གསུམ་ཕྱག་དྲུག་པ་གཡས་དཀར་གཡོན་དམར་དབུས་སྔོ་ཞལ། གཡས་གཡོན་དང་པོ་གཉིས་རྡོ་རྗེ་གནོན་པ། གཡས་རིན་ཆེན་རྡོ་རྗེ། གཡོན་ལྕགས་ཀྱུ་རལ་གྲིའོ། །ཧཱུྃ་པད་མ་ཏ་ཀྲིད་ཕཊ། ནུབ་ཏུ་རྟ་མགྲིན་ཞལ་གསུམ་ཕྱག་དྲུག་པ། གཡས་སྔོ་གཡོན་དཀར་དབུས་དམར་ཞལ། གཡས་གཡོན་དང་པོ་གཉིས་ཐོད་པ་སྦྲུལ་གྱིས་རྒྱན་པའོ། །གཡས་པད་མ་རྡོ་རྗེ་གཡོན་རལ་གྲི་སྡིག་འཇུག་གོ། །ཧཱུྃ་པྲད་ཉ་ཏ་ཀྲིད་ཕཊ། བྱང་དུ་བདུད་རྩི་འཁྱིལ་བ་གཡས་དམར་གཡོན་དཀར་དབུས་ལྗང་ཞལ། གཡས་གཡོན་དང་པོ་གཉིས་རྡོ་རྗེ་རྒྱ་གྲམ། གཡས་གཉིས་ན་རལ་གྲི་རྡོ་རྗེ ། གཡོན་དྲིལ་བུ་དགྲའ་སྟྭའོ། ༈ །ཨཱོཾ་བཛྲ་མ་ཧཱ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། ཤར་དུ་གཤིན་རྗེ་གཤེད་པོའི་ཡུམ་ལྕགས་ཀྱུ་མའི་སྔགས་སོ། །ཨཱོཾ་མ་ཧཱ་རད་ན་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། ལྷོར་སྟོབས་པོ་ཆེའི་ཡུམ་སེར་མོ་ཞགས་པ་མའི་སྔགས་སོ། །ཨཱོཾ་མ་ཧཱ་པད་མ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། ནུབ་ཏུ་རྟ་མགྲིན་གྱི་ཡུམ་དམར་མོ་ལྕགས་སྒྲོག་མའི་སྔགས་སོ། །ཨཱོཾ་མ་ཧཱ་ཀ་ར་མ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ། བྱང་དུ་བདུད་རྩི་འཁྱིལ་བའི་ཡུམ་ལྗང་ཁུ་དྲིལ་བུ་མའི་སྔགས་སོ། ༈ །ཀུན་བཟང་ཡབ་ཡུམ་གྱི་སྔགས་བསྟན་པའོ། །ཧཱུྃ་ཧཱུྃ་ཧཱུྃ་བཛྲ་ཙིཏ་ཧཱུྃ། དཀྱིལ་འཁོར་ཤར་གྱི་བར་ཁྱམས་སུ་ཀུན་ཏུ་བཟང་པོ་མཐིང་ཀ་སྐྱིལ་དཀྲུང་མཉམ་བཞག་ཅན་དུ་གནས་སོ། །ཨ་ཨ་ཨ་བཛྲ་པ་ཏྲ་ས་མ་ཡ་ཨཱོཾ། དཀྱིལ་འཁོར་ནུབ་ཀྱི་བར་ཁྱམས་སུ་ཀུན་བཟང་མོ་མཐིང་སྔོན་མཉམ་བཞག་གི་ཕྱག་རྒྱ་ཅན་ནོ། ༈ །ཐུབ་པ་དྲུག་གི་སྔགས་བསྟན་པའོ། །ཨཱོཾ་མུ་ནེ་ཀྲིང་སྭཱ་ཧཱ། བྱང་ཤར་མཚམས་སུ་ལྷའི་ཐུབ་པ་སེར་པོ་པི་ཝང་ཐོགས་པའོ། །ཨཱོཾ་མུ་ནེ་ཧཱུྃ་ཀྲུཾ་སྭཱ་ཧཱ། ཤར་ལྷོ་མཚམས་སུ་ལྷ་མ་ཡིན་གྱི་ཐུབ་པ་སེར་པོ་གོ་ཆ་ཐོགས་པའོ། །ཨཱོཾ་མུ་ནེ་སྲུཾ་སྭཱ་ཧཱ། ལྷོ་ན་མིའི་ཐུབ་པ་སེར་པོ་སྲེག་ཤང་དང་པར་བུ་ཐོགས་པའོ། ༈ །ཐུབ་དྲུག་སྤྱིའི་ནི་སེར་པོ། སྒོ་སྒོར་གང་ལ་གང་འདུལ་བའོ། །ཨཱོཾ་མུ་ནེ་ཀྵཾ་སྭཱ་ཧཱ། ལྷོ་ནུབ་བྱོལ་སོང་གི་ཐུབ་པ་སེར་པོ་པོ་ཏི་ཐོགས་པའོ། །ཨཱོཾ་མུ་ནེ་བྲཾ་སྭཱ་ཧཱ། ནུབ་བྱང་དུ་ཡི་དྭགས་ཀྱི་ཐུབ་པ་སེར་པོ་རད་ནའི་སྒྲོམ་བུ་ཐོགས་པའོ། །ཨཱོཾ་མུ་ནེ་ཡེ་སྭཱ་ཧཱ། བྱང་དུ་དམྱལ་བའི་ཐུབ་པ་སེར་པོ་མེ་ཆུ་ཐོགས་པའོ། །གདན་ལ་རྫོགས་དང་སེམས་དཔའི་ཚུལ། །གདན་ནི། རྒྱལ་བ་རིགས་ལྔ་ལ་གདན་ལྔ་རྩེགས་ཉི་ཤུ་རྩ་ལྔའོ། །སེམས་དཔའ་སེམས་མ་ལ་ཉི་ཟླ་པད་མ་སུམ་རྩེགས་སོ། །ཐུབ་པ་ལ་པད་མ་རྐྱང་པའོ། །ཀུན་བཟང་ཡབ་ཡུམ་ལ་ཉི་ཟླ་པད་མའོ། །སྒོ་བ་ལ་རྡོ་རྗེ་བྲག་གི་སྟེང་ན་ཉི་མ་རྐྱང་པས་སོ། །རྫོགས་དང་ཞེས་པས་རིགས་ལྔ་རྫོགས་པའི་སྐྱིལ་དཀྲུང་ཞེས་བྱ་སྟེ། རྡོ་རྗེའི་སྐྱིལ་དཀྲུང་དུ་བཞུགས་པའོ། །སེམས་དཔའི་ཚུལ་ཅེས་པ། སེམས་དཔའ་རྣམས་མཛད་པ་མ་རྫོགས་པས་ཕྱེད་སྐྱིལ་ལ། བབས་ཞོན་ནམ། སེམས་དཔའི་བཞུགས་ཚུལ་ལོ། །ཐུབ་པ་འགྲེང་བུའོ། །སྒོ་བ་གྱད་ཀྱི་དོར་ཐབས་སོ། །ཡུམ་རྣམས་པད་མའི་སྐྱིལ་དཀྲུང་ངོ་། །ཀུན་ཏུ་བཟང་པོ་མཉམ་པའི་སྐྱིལ་དཀྲུང་། ཀུན་ཏུ་བཟང་མོ་པད་མའི་སྐྱིལ་དཀྲུང་ངོ་། ༈ །འཁོར་ལོར་རྒྱལ་པོ་རྒྱལ་མོ་དང་། །རིགས་ལྔ་ཡབ་ཡུམ་བསྟན། རྒྱལ་པོ་ནི་རིགས་ལྔ་སྟེ། རྣམ་ཤེས་ལས་རྒྱལ་བ་རྡོ་རྗེ་སེམས་དཔའ། གཟུགས་ཀྱི་ཕུང་པོ་ལས་རྒྱལ་བ་རྣམ་སྣང་། ཚོར་བ་ལས་རྒྱལ་བ་རིན་འབྱུང་། འདུ་ཤེས་ལས་རྒྱལ་བ་སྣང་མཐའ། འདུ་བྱེད་ལས་རྒྱལ་བ་དོན་ཡོད་གྲུབ་པའོ། །རྒྱལ་མོ་ནི་ཡུམ་ལྔ་སྟེ། ནམ་ཀ་ལས་རྒྱལ་བ་དབྱིངས་ཕྱུག་མ། ས་སངས་རྒྱས་སྤྱན། ཆུ་མ་མ་ཀི། མེ་གོས་དཀར་མོ། རླུང་ལས་རྒྱལ་བ་དམ་ཚིག་སྒྲོལ་མ། དེ་རྣམས་དབུས་ན་འཁོར་ལོ་རྩིབས་བཞིའ། ལྟེ་བ་དང་ལྔ་ལ་བཞུགས་པའོ། །ནང་གི་སེམས་དཔའ་བསྟན། གཡས་ནས་མཐོང་ཐོས་སྣོམ་པ་དང་། །རྡོ་རྗེ་སེམས་དཔའི་གཡས་ཀྱི་རྩིབས་འཆན་ལ། མཐོང་བ་དམྱིག་གི་རྣམ་པར་ཤེས་པ་སའི་སྙིང་པོ་དང་། ཐོས་པ་རྣ་བའི་རྣམ་པར་ཤེས་པ་ཕྱག་ན་རྡོ་རྗེ་དང་། སྣམ་པ་སྣའི་རྣམ་པར་ཤེས་པ་སྤྱན་རས་གཟིགས་དང་། མྱོང་བ་ལྕེའི་རྣམ་པར་ཤེས་པ་ནམ་མཁའི་སྙིང་པོའོ། །འཁོར་ལོའི་རྩིབས་འཆན་བཞི་ལ་བཞུགས་པའོ། །ནང་གི་སེམས་དཔའ་ཞེས་བྱ་བའོ། །མྱོང་དང་བཙུན་མོའི་ཚོགས་སུ་བཅས། །སྤྱད་པར་བྱ་བའི་ཕྱིར་ན་བཙུན་མོ་སྟེ། དམྱིག་གིས་གཟུགས་ལ་སྤྱོད་པས་ན་བཙུན་མོའོ། །དེ་ཡང་སའི་སྙིང་པོའི་ཡུམ་ལ་སེ་མའོ། །དེ་བཞིན་དུ་མ་ལེ་མ་དང་། གྷིར་ཏི་དང་། ནིར་ཏི། སྤྱད་བྱའི་ཡུལ་དུ་གྱུར་པས་ན་བཙུན་མོ། གཉིས་སུ་མྱེད་པར་འཁྲིལ་བའི་ཚུལ་དུ་བཞུགས་སོ། ༈ །ཕྱིའི་སེམས་དཔའ་བསྟན། གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །གྲུ་ཆད་ལ་ནི་ཕྱིའི་སེམས་དཔའ་བཞུགས་པ་སྟེ། དམྱིག་གི་དབང་པོ་ནི་མཐོང་བྱེད་ལ། དེ་གནས་འགྱུར་བ་ནི་བྱམས་པའོ། །དེ་བཞིན་དུ་ཐོས་བྱེད་རྣ་བའི་དབང་པོ་སྒྲིབ་སེལ། སྣོམ་བྱེད་སྣའི་དབང་པོ་ཀུན་བཟང་། མྱོང་བྱེད་ལྕེའི་དབང་པོ་འཇམ་དཔའ་རྣམས་ནི་གྲུ་ཆད་བཞི་ལ་བཞུགས་སོ། །དེ་བས་བཞི་པོ་དེ་རྣམས་ཞེས་སོ། །དེ་དབང་པོའི་ཕྱི་ན་ཡོད་པས་ཕྱིའི་སེམས་དཔའ་ཞེས་ཀྱང་བྱའོ། །དོན་དུ་ན་ལྷ་ལ་ཕྱི་ནང་མྱེད་དེ། སེམས་ཅན་གྱི་རྟོག་ཚོགས་ལ་དགོངས་པས་ན། སེམས་དཔའ་ལ་ཡང་ཕྱི་ནང་གཉིས་སོ། །བཙུན་མོའི་ཚོགས་དང་ལྡན་པར་གནས། །སྤྱད་པར་བྱ་བའི་ཡུལ་དུ་གྱུར་པས་ན་བཙུན་མོ་སྟེ། འདས་པ་དང་། ད་ལྟར་དང་། མ་འོངས་པ་དང་། འབྱུང་བར་མ་ངེས་པ། དབྱར་དགུན་སྟོན་དཔྱིད་བཞི་ལ་དབང་བས་ན། དུ་པེ་མ་དང་། པུས་པེ་མ་དང་། ཨ་ལོ་ཀེ་དང་། གྷན་དྷེ་མ་རྣམས་འཁྲིལ་ལོ། །བར་ཁྱམས་ལ་ནི་ཐུབ་དྲུག་དང་། །ཐུབ་པ་བསྟན། བྱང་ཤར་དུ་ལྷའི་ཐུབ་པ། ཤར་ལྷོར་ལྷ་མ་ཡིན་གྱི་ཐུབ་པ། ལྷོར་མྱིའི་ཐུབ་པ། ལྷོ་ནུབ་ཏུ་བྱོལ་སོང་གི་ཐུབ་པ། ནུབ་བྱང་དུ་ཡི་དྭགས་ཀྱི་ཐུབ་པ། བྱང་དུ་དམྱལ་བའི་ཐུབ་པའོ། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །ཀུན་བཟང་ཡབ་ཡུམ། བར་ཁྱམས་ཀྱི་ཤར་ནུབ་གཉིས་སུ་ཀུན་བཟང་ཡབ་ཡུམ་གཉིས་བཞུགས་པ་ནི། རྡོ་རྗེ་སེམས་དཔའི་མདུན་ངོས་སུ་བྱེད་པ་པོ་ཀུན་ཏུ་བཟང་པོ་གནས་ཏེ། ཡིད་ཀྱི་རྣམ་པར་ཤེས་པ་གནས་འགྱུར་བ་ཡིན་པས་ན། སེམས་ཅན་གྱི་དུས་ན་བྱེད་པ་པོ་ཐམས་ཅད་ཡིད། སངས་རྒྱས་ཀྱི་དུས་ན་རྒྱུད་དང་དཀྱིལ་འཁོར་གྱི་བྱེད་པ་པོ་ཐམས་ཅད་ཀུན་ཏུ་བཟང་པོ་ཡིན་ནོ། །རྡོ་རྗེ་སེམས་དཔའི་རྒྱབ་ངོས་ན་བྱ་བ་མོ་ཀུན་ཏུ་བཟང་མོ་གནས་པའོ། །དེ་ཡང་སེམས་ཅན་གྱི་དུས་ན་བྱ་བའི་གཞིར་གྱུར་པ་ཀུན་གཞིའོ། །སངས་རྒྱས་དུས་ན་ཡང་ཆོས་ཀྱི་དབྱིངས་སོ། །དེས་ཡིད་བྱེད་པ་པོ་ཀུན་ཏུ་བཟང་པོ་དང་། ཆོས་བྱ་བ་མོ་ཀུན་ཏུ་བཟང་པོ་གཉིས། ཡིད་ཀྱི་སྤྱད་བྱ་ཀུན་གཞི་ཡིན་པས་ན། ཀུན་བཟང་ཡབ་ཡུམ་གཉིས་སོ། །སྒོ་ཁྱུད་བཞི་ལ་འཇོམས་པ་ནི། །སྒོ་བ་ཡབ་ཡུམ་བརྒྱད་བསྟན། སྒོ་ཁྱུད་བཞི་ལ་ཞེས་པ་ནི། གཡས་གཡོན་གྱི་སྒོ་ཁྱུད་ལ་སྒོ་བ་བཞི་གནས་པ་སྟེ། འཇོམས་པ་ནི། རེག་པའི་རྟོག་པ་འཇོམས་པ་གཤིན་རྗེ་གཤེད རེག་བྱ་སྟོབས་པོ་ཆེ། རེག་བྱེད་རྟ་མགྲིན། རེག་ཤེས་ཀྱི་རྟོག་པ་འཇོམས་པ་བདུད་རྩི་འཁྱིལ་བའོ། །ཁྲོ་བོའི་ཚུལ་དུ་གནས་པས་ན་འཇོམས་པའོ་ཞེས་སོ། །བཙུན་མོའི་ཚོགས་དང་ལྡན་པར་གནས། །བཙུན་མོ་ནི་སྤྱད་བྱའི་ཡུལ་དུ་གྱུར་པ་སྟེ། ལུས་ཀྱི་དབང་པོ་བཞི་སྟེ། རྟག་པ་དང་ཆད་པ་དང་། བདག་དང་མཚན་མ་བཞི་ལ་དབང་བས་ན་བཞི་པོ་དེ་གནས་སུ་དག་པས་ནི། ལྕགས་ཀྱུ་མ་དང་། ཞགས་པ་མ་དང་། ལྕགས་སྒྲོག་མ་དང་། དྲིལ་བུ་མའོ། །དེ་བས་ན་དབང་པོ་ལྔའི་ལས་བྱེད་ལྟ་བུ་ནི་ལུས་ཀྱི་དབང་པོ་ཡིན་ལ། ལྷའི་ལས་བྱེད་པ་ཡིན་པས་ན་ཆོས་མཐུན་པའོ། ༈ །ཞི་བའི་ལྷ་འབུ་ཏ་བཞི་བཅུ་རྩ་གཉིས་ཞེས་བཞེད་པ་ཡིན་པ་ལ། ཁྲོ་བོ་ཡབ་ཡུམ་བརྒྱད་ཡོད་པས། ཁྲོ་བོ་རྣམས་ཞི་བའི་ལྷར་འགྲོའམ་མི་འགྲོ་ཞེ་ན། སྤྱིར་རྣལ་འབྱོར་པས་གྲུབ་པར་བྱ་བའི་ཞི་བའི་ལྷ་བཞི་བཅུ་རྩ་གཉིས་ཀྱི་སྐུ་གསུང་ཐུགས་ཀྱི་རྒྱུད་ཞི་བས་ན་ཞི་བ་ཟེར་ལ། སྐུ་ཁྲོ་ཚུལ་དང་བཅས། འབར་བའི་གར་དགུས་ཁྱབ། ཁྲོ་རྟགས་དྲུག་ཅུ་རྩ་བརྒྱད་དང་ལྡན་པས་ཁྲོ་བོ་ཟེར་རོ། །འོ་ན་སྐུ་གསུང་ཐུགས་ཀྱི་རྒྱུད་ཞི་ན་སྒོ་བ་ལ་ཁྲོ་བོའི་མིང་མྱེད་ཞེ་ན། འདི་ལྟར་བཞེད་དེ། ཞི་བ་ལས་ལྟོས་ན་ཁྲོ་བོ་ཡིན་ཡང་། ཁྲོ་བོའི་གར་དགུའ་དང་ཁྲོ་རྟགས་མྱེད་དེ། སྐུ་ཁྲོ་ཚུལ་དང་བཅས་པར་སྣང་བའོ། །དེས་ན་འགལ་བ་མྱེད་དེ། དེ་བས་ན་ཅུང་ཟད་ཁྲོ་བོ་ལྷ་བརྒྱད་ཞེས་བྱ་སྟེ། སྟག་དང་སྦྲུལ་གྱི་རྒྱན་ཙམ་མ་བཀག་གོ། །དངོས་སུ་སྐུ་གསུང་ཐུགས་ཀྱི་རྒྱུད་ཞི་བར་གནས་སོ། །དེ་བས་ན་ཁྲོ་བོ་མི་ཟེར་ཏེ་འཇོམས་པ་ཞེས་བཤད་དོ། །ཡུམ་རྣམས་ཀྱི་གཡས། ཡབ་རྣམས་ཀྱི་གཡོན་དང་པོ་ན་སྣམས་སོ། ༈ །རྡོ་རྗེ་མི་བསྐྱོད་པ་འཁོར་ལོ་རྣམ་སྣང་གི་རིན་པོ་ཆེ། །རིན་འབྱུང་གི་རིགས་ལྔ་སྤྱིའི་ཕྱག་མཚན། པད་མ་སྣང་མཐའི་རལ་གྲི་དོན་གྲུབ་ཀྱི་དྲིལ་བུ་འབར། །སྤྱིར་གནས་འཕྲོག་རྩིས་ན་ཞལ་གསུམ་ཕྱག་དྲུག་ཏུ་བྱེད་པ་ནི་གོང་བཞིན་ནོ། །འདི་གཡས་གཡོན་གྱི་དང་པོ་རྣམས་བཤད་པ་སྟེ། མི་བསྐྱོད་པའི་གཡས་དང་པོ་ན་རྡོ་རྗེ་འཛིན་པ་ནི། ཡེ་ཤེས་ལྔ་དང་ལྡན་པའི་རྟགས་སོ། །རྣམ་པར་སྣང་མཛད་ཀྱི་གཡས་དང་པོ་ན་འཁོར་ལོ་སྣམས་པ་ནི། ཉོན་མོངས་པ་ཐམས་ཅད་གཅོད་པའི་རྟགས་སོ། །རིན་འབྱུང་གི་གཡས་དང་པོ་ན་རིན་པོ་ཆེ་འཛིན་པ་ནི་དགོས་འདོད་རེ་བ་ཐམས་ཅད་སྐོང་བའོ། །སྣང་བ་མཐའ་ཡས་ཀྱི་གཡས་དང་པོ་ན་པད་མ་སྣམས་པ་ནི། ཉེས་པའི་སྐྱོན་གྱིས་མ་གོས་པའི་རྟགས་སོ། །དོན་ཡོད་གྲུབ་པའི་གཡས་དང་པོ་ན་རལ་གྲི་སྣམས་པ་ནི། རྟོག་པ་ཐམས་ཅད་རྩད་ནས་གཅོད་ཅིང་། མཁྱེན་པའི་ཡེ་ཤེས་དང་ལྡན་པའི་རྟགས་སོ། །གཡོན་གྱི་ཕྱག་ན་དྲིལ་བུ་སྣམས་པ་ནི། ཤེས་རབ་སྤྲོས་པ་མྱེད་པས་ཆོས་ཀྱི་དབྱིངས་ལས་མ་གཡོས་པའི་རྟགས་སོ། །བར་མ་དང་ཐ་མ་རྣམས་ནི་དེ་དག་ལས་གོང་འོག་ཏུ་སྒྱུར་ཏེ་གནས་འཕྲོག་རྩིས་ནས་བྱེད་པའོ། །དྲིལ་བུ་ཡུམ་རྣམས་ཀྱི་གཡོན་ན་འཛིན་ནོ། །གཡས་པ་རྣམས་རང་རང་གི་ཡབ་ལ་འཁྱུད་པའོ། །ཨུད་དཔལ་བྱང་ཤར་མཚམས་ཀྱི་གྲུ་ཆད་ལ་འཇམ་དཔལ་གྱི་ཀླུ་ཤིང་ལ་སོགས་ཤར་ལྷོ་མཚམས་གྲུ་ཆད་ལ་བྱམས་པའི་མཚན། །རིན་ཆེན་མྱུ་གུ་ཤར་ལྷོ་མཚམས་ཀྱི་རྩིབས་མཆན་ལ་སའི་སྙིང་པོ་རལ་གྲི་ལྷོ་ནུབ་མཚམས་ཀྱི་རྩིབས་མཆན་ལ་ནམ་ཀ་སྙིང་པོ་འབར། །པད་མ་དཀར་པོ་ནུབ་བྱང་གི་རྩིབས་མཆན་ལ་སྤྱན་རས་གཟིགས་རྡོ་རྗེ་བྱང་ཤར་གྱི་རྩིབས་མཆན་ཕྱག་ན་རྡོ་རྗེ་འབར། །ཆོས་ཀྱི་འཁོར་ལོ་ལྷོ་ནུབ་གྲུ་ཆད་ལ་སྒྲིབ་སེལ་གྱི་རིན་ཆེན་ནུབ་བྱང་གྲུ་ཆད་ལ་ཀུན་ཏུ་བཟང་པོའི་སྙེ། །འདིར་སེམས་དཔའ་རྣམས་ཀྱི་ཕྱག་མཚན་གྱི་སྐབས་སུ། གཞུང་འཁྲུགས་པ་སྡེབ་སྟེ་བཤད་ན། རྣམ་པར་ཤེས་པའི་སེམས་དཔའ་སྤྱིའི་ཕྱག་མཚན་ནི། སའི་སྙིང་པོ་རིན་པོ་ཆེའི་མྱུ་གུ་འཛིན་པ་ནི། དགོས་འདོད་ཟད་པ་མྱེད་པ་འབྱུང་བའོ། །ནམ་མཁའི་སྙིང་པོ་རལ་གྲི་འཛིན་པ་ནི། ཉོན་མོངས་པ་ཐམས་ཅད་གཅོད་པའོ། །སྤྱན་རས་གཟིགས་པད་མ་དཀར་པོ་སྣམས་པ་ནི། ཉོན་མོངས་པའི་སྐྱོན་གྱིས་མ་གོས་པའི་རྟགས་སོ། །ཕྱག་ན་རྡོ་རྗེ་སྣམས་པ་ནི། ཡེ་ཤེས་ལྔ་ཡིས་ཉོན་མོངས་པ་འཇོམས་པའི་སྟོབས་དང་ལྡན་པའི་རྟགས་སོ། །དེ་རྣམས་ནི་ནང་གི་སེམས་དཔའ་བཞིའོ། །དབང་པོའི་སེམས་དཔའ་ནི། བྱམས་པའི་ཕྱག་ན་ཀླུ་ཤིང་གི་མེ་ཏོག་སྣམས་པ་ནི། ཉོན་མོངས་པའི་གདུང་བ་ཐམས་ཅད་ཟིལ་གྱིས་མ་ནོན་པའི་རྟགས་སོ། །སྒྲིབ་པ་རྣམ་པར་སེལ་བ་ཆོས་ཀྱི་འཁོར་ལོ་སྣམས་པ་ནི། རྟོག་པའི་དྲས་ཐག་ཐམས་ཅད་གཅོད་པའི་རྟགས་སོ། །ཀུན་ཏུ་བཟང་པོ་རིན་པོ་ཆེའི་སྙེ་མ་སྣམས་པ་ནི། སེམས་ཅན་ཐམས་ཅད་ལ་དགོས་འདོད་རེ་བ་ཡིད་བཞིན་དུ་སྐོང་བའི་རྟགས་སོ། །འཇམ་དཔལ་ཨུད་དཔལ་སྣམས་པ་ནི། ཆོས་སྤྱི་དང་རང་གི་མཚན་ཉིད་ཐམས་ཅད་ལ་འགག་པ་མྱེད་པར་མཁྱེན་ཅིང་། ཉེས་པའི་སྐྱོན་དང་བྲལ་བའི་རྟགས་སོ། །ལ་སོགས་མཚན་ནི། གཡོན་རྣམས་ན་དྲིལ་བུ་སྣམས་པའོ། །འབར་ཞེས་པ་ནི། ཕྱག་མཚན་དེ་དག་ཡང་སྣང་ལ་རང་བཞིན་མྱེད་པ། གསལ་ལ་རྟོག་པ་མྱེད་པ། འགུལ་འགུལ་ལྡེག་ལྡེག་ལྟར་གསལ་བ། ཡེ་ཤེས་ཀྱི་འོད་ཟེར་འཕྲོ་བའོ། །གཟུགས་མཛེས་ལ་སེ་མ་རིན་ཆེན་འཕྲེང་བ་མ་ལེ་མ་དང་། །སེམས་མའི་ཕྱག་མཚན། པི་ཝང་གྷིརྟི་གར་མཁན་ནི རྟི་མཆོག་ཉིད་དེ། །ལྷ་མོ་ལ་སེ་མ་གཟུགས་མཛེས་མེ་ལོང་སྣམས་ནས་འགྱིང་བག་ཏུ་བཞུགས་པ་ནི། སའི་སྙིང་པོ་དང་གཉིས་སུ་མྱེད་པའི་བདེའ་བས་དགྱེས་པའོ། །མ་ལེ་མ་འཕྲེང་བ་ཐོགས་པ་ནི། ནམ་མཁའི་སྙིང་པོ་དང་བདེའ་བ་རྒྱུན་མི་ཆད་པའི་རྟགས་སོ། །གྷིར་ཏི་མ་པི་ཝང་ཐོགས་པ་ནི། སྤྱན་རས་གཟིགས་དང་གཉིས་སུ་མྱེད་པའི་བདེའ་བའི་སྒྲ་སྒྲོགས་པའི་རྟགས་སོ། །ནིར་ཏི་མ་གར་སྒྱུར་བ་ནི། ཕྱག་ན་རྡོ་རྗེ་དང་གཉིས་སུ་མྱེད་པའི་ཡེ་ཤེས་ལ་དབང་སྒྱུར་བའི་རྟགས་སོ། །ནང་གི་སེམས་མ་ཡིན་པས་ན། ནང་གི་མཆོད་རྫས་ཕྱག་ན་སྣམས་པའོ། །མེ་ཏོག་པུ ཥྤེ་འཕྲེང་དང་སྤོས་མཆོག་དྷུ་ཥྤེ་མ། །མར་མེ་ཨ་ལོ་ཀེ་བྱུག་པ་གྷན་དྷེ་ལ་སོགས་པའི། །དྷུཥྤེ་མ་སྤོས་ཐོགས་པ་ནི། བྱམས་པ་དང་གཉིས་སུ་མྱེད་པའི་བདེ་བའི་འོད་ཟེར་འཕྲོས་པའོ། །པུ ཥྤེ་མ་མེ་ཏོག་ཐོགས་པ་ནི། སྒྲིབ་པ་རྣམ་པར་སེལ་བ་དང་གཉིས་སུ་མྱེད་པའི་བདེ་བའི་མཚན་པར་བྱེད་པའོ། །ཨ་ལོ་ཀེ་མར་མེ་ཐོགས་པ་ནི། ཀུན་ཏུ་བཟང་པོ་དང་གཉིས་སུ་མྱེད་པའི་བདེའ་བ་གསལ་བའོ། །གན་དྷེ་མ་དྲི་ཆབ་ཐོགས་པ་ནི། འཇམ་དཔལ་དང་གཉིས་སུ་མྱེད་པའི་བདེའ་བས་གསིལ་བར་བྱེད་པའོ། །དེས་ན་ཕྱིའི་སེམས་མ་ཡིན་པས་ན། ཕྱིའི་མཆོད་སྣམས་པའི་ཚུལ་ལོ། །ལས་ཡབ་ལ་འཁྲིལ་ཡུམ་ཞིང་ཆོས་ཡུམ་ལ་ཡབ་ཞལ་བསྟན། །ཡུམ་རྣམས་ཡབ་ཀྱི་སྐུ་ལ་འཁྲིལ་ཞིང་། ཡབ་རྣམས་ཡུམ་ཆོས་ཀྱི་རང་བཞིན་ལ་ཞལ་བསྟན་ནས། གཅིག་ལ་གཅིག་འདུད་པའི་ཚུལ་ལོ། །དབུའ་ཡབ་ཀྱི་རྣམས་འབྱོ་ཡ་ཞལ་ཞིང་འདུད་ཡུམ་གྱི་དབུའ་རྣམས་མ་ཞལ་པའི་ཚུལ། །གོང་གི་ཕྱག་རྒྱ་ཆེན་པོ་ལས་ལ་འཁྲིལ་ཞིང་ཆོས་ལ་བསྟན་པའི་སྐབས་ཀྱི་བཞིན། །གཉིས་ཡབ་ཡུམ་མྱེད་ཆོས་ཀྱི་དབྱིངས་ཀྱི་ངང་དུ་འཁྲིལ་ལོ། །ལྷ་མོ་དེ་དག་ནི་ཡབ་རེ་རེ་དང་ཡུམ་རེ་རེ་ཐབས་དང་ཤེས་རབ་གཉིས་སུ་མྱེད་པར་སྦྱོར་བ་རེ་རེ་ལ་ཡང་རང་བཞིན་གྱིས་ཚང་བར་བྱའོ། །དེ་ལྟར་སེམས་དཔའ་དང་སེམས་མ་ཡབ་ཡུམ་དེ་དག་ཀྱང་། ཡུམ་རྣམས་ཡབ་ཀྱི་སྐུ་ལ་གཉིས་སུ་མྱེད་པར་འཁྲིལ་བ་དང་། ཡབ་ཡུམ་གཉིས་གཅིག་ལ་གཅིག་བཞིན་གྱི་དཀྱིལ་འཁོར་ལ་འཛུམ་པའི་མདངས་ཀྱིས་ལྟ་བ་དང་། འདུད་པ་དང་། མཛེས་པའི་ཚུལ་གྱིས། དབྱིངས་དང་ཡེ་ཤེས་ཐ་མི་དད་པར་སྙོམས་པར་འཇུག་པའོ། །སྒོ་བཞི་ཁྲོ་བོའི་ཕྱག་རྒྱ་ནི། །སྒོ་བ་བཞིའི་ཕྱག་རྒྱ་བསྟན། ནྲིར་ཤར་དུ་གཤིན་རྗེའི་མགོའ་བསྡེངས་དང་རྡོ་རྗེ་ལྷོར་སྟོབས་པོ་ཆེའི་ནོན། །ཐོད་སྤྲུལ་ཆེན་ནུབ་ཏུ་རྟ་མགྲིན་གྱི་པོ་མནོན་པ་དང་། །རྡོ་རྗེ་རྒྱ་གྲམ་ལས་བྱང་དུ་བདུད་རྩི་འཁྱིལ་པའི་ཀྱིས་མནོན། །གཤིན་རྗེ་གཤེད་མི་འགོའི་དབྱུག་པ་ཐོགས་པ་ནི། ཉོན་མོངས་པ་དང་བགེགས་དང་ལོག་རྟོགས་ཤིང་འཇོམས་པའོ། །སྟོབས་པོ་ཆེ་རྡོ་རྗེས་ས་གནོན་པ་ནི། ཉོན་མོངས་པ་དང་བགེགས་ཐམས་ཅད་ལྡང་མི་ནུས་པའོ། །རྟ་མགྲིན་ཐོད་པ་སྦྲུལ་གྱིས་རྒྱན་པ་ཐོགས་པ་ནི། བགེགས་ཀྱིས་ཞེ་སྡང་གནས་སུ་དག་ནས་ཆོས་ཀྱི་དབྱིངས་སུ་མཁྱེན་པའོ། །བདུད་རྩི་འཁྱིལ་པ་རྡོ་རྗེ་རྒྱ་གྲམ་ཐོགས་པ་ནི། འཕྲིན་ལས་རྣམ་བཞིས་ཐམས་ཅད་ཀྱི་དོན་མཛད་པའོ། །དེ་བས་ན་ཕྱག་གཡས་གཡོན་དང་པོ་གཉིས་ན་ིདེ་ལྟར་གནས་ལ། གཞན་མ་ཞལ་གསུམ་ཕྱག་དྲུག་ཏུ་བྱེད་ན་གོང་དུ་བཤད་པ་བཞིན་ནོ། །ལྕགས་ཀྱུ་ཤར་གྱི་སྒོ་མའི་ཞགས་པ་ནུབ་ཀྱི་ལྕགས་སྒྲོག་སྤོ་ཏ་བྱང་གི་དྲིལ་བུ་ཧོ། །ལྷ་མོ་ལྕགས་ཀྱུ་མ་ནི། ཐུགས་རྗེས་སེམས་ཅན་མྱ་ངན་ལས་འདས་སུ་འདྲེན་པའོ། །ཞགས་པ་མ་ནི། སེམས་ཅན་ཐུགས་རྗེས་དྲངས་ནས་འཁོར་བར་མི་གཏོང་བའི་རྡའོ། །ལྕགས་སྒྲོག་མ་ནི་སེམས་ཅན་དེ་དག་བདེའ་བར་གཤེགས་པའི་ཐུགས་ཡེ་ཤེས་དབྱེར་མེད་པའི་ས་ལ་འགོད་པའོ། །དྲིལ་བུ་མ་ནི་སེམས་ཅན་དེ་དག་ཕྱིར་ལྡོག་པའི་ས་ལ་བཀོད་ནས། བདེ་བ་ཆེན་པོས་མཉེས་པ་དང་ཚིམ་པར་བྱེད་པའི་བརྡར་བ སྟན་ནོ། ༈ །སྒོ་བཞིར་ཁྲོ་བོ་ཡབ་ཡུམ་གནས་པ་དེ་དག་ཀྱང་། །འདུད་ཡུམ་ཚུལ་ཡབ་འཁྲིལ་བ་གོང་མ་སེམས་དཔའ་བཞིན་ནོ། །ཁྲོ་བོ་ཡབ་ཡུམ་དེ་དག་ཀྱང་། ཐབས་དང་ཤེས་རབ་གཉིས་སུ་མྱེད་པར་བཞུགས་པ་ནི། ཡབ་ཀྱིས་ཡུམ་ལ་འདུད་པ་དང་། ཡུམ་ཡབ་ཀྱི་སྐུ་ལ་གཉིས་སུ་མྱེད་པར་འཁྲིལ་བའོ། །དེ་ཡང་གོང་དུ་བསྟན་པའི་རིགས་ལྔ་སེམས་དཔའ་དང་འདྲའོ། །ཡབ་ཡུམ་གཉིས་སུ་མྱེད་པ་སྒོ་བཞིར་གནས་པའོ། ༈ །ཐུབ་ལུས་ངག་ཡིད་དྲུག་གྲངས་ཕྱག་རྒྱ་སྣ་ཚོགས་མ་ངེས་ཏེ། །ཐུབ་པའི་ཕྱག་མཚན་བསྟན། མདོར་བསྡུས་བསྒོམ་བདེའ་བས་ན་ཕྱག་རྒྱ་དྲུག་ཏུ་བསྟན། །ཐུབ་པ་ནི་སྐུ་གསུང་ཐུགས་ཐུབ་པ་སྟེ། དེ་ཡང་སྐུ་ཐུབ་པ་རྟག་དང་བྱ་བྱེད་སྤངས་པ་དང་། གསུང་ཐུབ་པ་ནི་ངག་མི་དགའ་བ་བཞི་སྤངས་པ་དང་། ཐུགས་ཐུབ་པ་ནི་ཡིད་ཀྱི་མི་དགེའ་བ་གསུམ་སྤངས་པའོ། །དེ་དག་ནི་གདུལ་བྱ་གང་ལ་གང་ལྟར་མོས་པ་བཞིན་དུ་དོན་མཛད་པས། ཕྱིར་ཕྱག་རྒྱ་མ་ངེས་པའོ། །དེ་ཡང་དལ་དུ་བསྒོམ་པའི་དུས་སུ། ཏིང་ངེ་འཛིན་གྱི་དམིགས་པ་གསལ་བའི་ཕྱིར། མདོའ་དྲུག་བ སྡུས་ནས་བསྟན་པ་ནི་སྲེག་པར་ལོགས་པའོ། ༈ །ཐུབ་པ་དྲུག་གི་ཡབ་ཡུམ་ལ། དོན་གྱི་ཡུམ་དང་རྟགས་ཀྱི་ཡུམ་གཉིས་ལས། སྤྲུལ་པའི་སྐུ་དེ་དག་ནི། གྲོགས་མི་བདེའ་བ་སྤོང་ཞིང་། འདོད་པ་སྤངས་པའི་ཕྱིར་། རྟགས་ཀྱི་ཡུམ་ནི་མ་བ སྟན་ནོ། །དོན་གྱི་ཡུམ་ནི་ཆོས་ཀྱི་དབྱིངས་དང་དུས་ཐམས་ཅད་དུ་འདུ་འབྲལ་མྱེད་པར་བཞུགས་པའོ། །བསྲེག་མིའི་ཐུབ་པའི་ཕྱག་མཚན་དཔར་དང་ནི་པི་ལྷའི་ཐུབ་པའི་ཝང་དང་། །གོ་ཆ་ལྷ་མ་ཡིན་གྱི་ཐུབ་པའི་པོ་ཏི་བྱོལ་སོང་གི་ཐུབ་པའི་རིན་ཆེན་ཡི་དྭགས་ཐུབ་པའི་སྒྲོམ། །མེ་དང་དམྱལ་བའི་ཐུབ་པ་ཆུ་ནི་རབ་ཏུ་བསྟན། །ཡུམ་རྟགས་ཀྱི་ཡུམ་ནི་དམིགས་དངོས་སུ་མྱེད་ཆོས་དེ་དོན་གྱི་ཡུམ་ཀྱི་དབྱིངས། ༈ །ལྷའི་ཐུབ་པའི་པི་ཝང་ཐོགས་པ་ནི། ལྷ་རོལ་མོ་ལ་དགའ་བ་དེ་དག་ལ། འདུལ་བྱེད་ཀྱི་གདུལ་བྱ་དང་འཐུན་པར་འདུལ་བའོ། །དེ་ཡང་དེ་དག་གི་ལེ་ལོ་དང་གཡེང་བ་ལས་བཟློག་ནས། བསམ་གཏན་གྱི་ཕ་རོལ་ཏུ་ཕྱིན་པ་ལ་འགོད་པར་མཛད་དོ། །ལྷ་མ་ཡིན་གྱི་ཐུབ་པ་གོ་ཆ་ཐོགས་པ་ནི། དེ་དག་འཐུན་པར་བསྟན་པ་ནི། འཁྲུག་པའི་བློ་ཟློག་ནས། བརྩོན་འགྲུས་ཀྱི་ཕ་རོལ་དུ་ཕྱིན་པ་ལ་འགོད་པར་མཛད་དོ། །མིའི་ཐུབ་པ་སྲེག་ཤང་དང་པར་བུ་ཐོགས་པ་ནི། འདོད་ཆགས་ལས་བློ་ཟློག་ནས། ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་འགོད་པར་མཛད་དོ། །བྱོལ་སོང་གི་ཐུབ་པ་པོ་ཏི་ཐོགས་པ་ནི། གཏིའ་མུག་གི་མུན་པ་དེ་དག་པར་མཛད་ནས། ཤེས་རབ་ཀྱི་ཕ་རོལ་དུ་ཕྱིན་པ་ལ་འགོད་པར་མཛད་དོ། །ཡི་དྭགས་ཀྱི་ཐུབ་པ་རིན་པོ་ཆེའི་སྒྲོམ་བུ་ཐོགས་པ་ནི། སེར་སྣའི་འདུད་པ་ལས་བློ་ཟློག་ནས། སྦྱིན་པའི་ཕ་རོལ་དུ་ཕྱིན་པ་ལ་འགོད་པར་མཛད་དོ། །དམྱལ་བའི་ཐུབ་པ་མེ་ཆུ་ཐོགས་པ་ནི། ཞེ་སྡང་གི་ངོ་བོ་ལས་བློ་ཟློག་ནས། བཟོད་པའི་ཕ་རོལ་དུ་ཕྱིན་པ་ལ་འགོད་པར་མཛད་དོ། །ཀུན་བཟང་མཚན་མཉམ་བཞག་ཕྱག་རྒྱ་ཡེ་ཤེས་ཕྱག་མཚན་འཕྲོ། །ཀུན་བཟང་ཡབ་ཡུམ་བསྟན། ཡུམ་ཡུམ་འགྱུར་མཉམ་ཕྱག་རྒྱ་རྫོགས་པད་མོའི་ཞབས་དཀྱིལ། །གཞན་ཡང་ཕྱག་རྒྱ་སྣ་ཚོགས་མ་ངེས་པ་ཏེ། །ཡང་ན་དེ་བཞིན་གཤེགས་པ་ཉིད ། །ཡང་ན་རྡོ་རྗེ་ཐལ་མོ་ཉིད། །ཀུན་ཏུ་བཟང་པོ་ནི་ཞབས་བརྟུལ་ཞུགས་ཀྱི་དཀྱིལ་མོ་ཀྲུང་དུ་བཞུགས་པ་ནི། ཕྱག་མཉམ་བཞག་ཏུ་གནས་པའོ། །མཉམ་བཞག་སྟེང་ན་ཕྱག་སོར་ལ་ཡེ་ཤེས་ལྔའི་འོད་ཟེར་འཕྲོ་བའོ། །དེའི་ཡུམ་དུ་གྱུར་པ་ནི་ཀུན་ཏུ་བཟང་མོ་སྟེ། ཞབས་པད་མའི་དཀྱིལ་ཀྲུང་ཞབས་མཐིལ་གཉིས་སྤྲད་ནས་བཞུགས་པ། ཕྱག་མཉམ་པར་བཞག་པ་ལས་མཛུབ་མོ་གཉིས་རྩེ་སྤྲད་ནས་བཞུགས་པའོ། །གཞན་ཡང་ཕྱག་རྒྱ་སྣ་ཚོགས་གནས་ཏེ། རིགས་ལྔ་སྤྱིའི་ཕྱག་རྒྱའམ། ཡང་ན་དེ་བཞིན་གཤེགས་པ་རྣམ་སྣང་གི་ཕྱག་རྒྱའམ། ཡང་ན་རྡོ་རྗེ་ཐལ་མོའི་ཕྱག་རྒྱའི་བཅིང་ངོ་། །མཐིང་ཀ་རྡོ་རྗེའི་རིགས་དཀར་པོ་དེ་བཞིན་རིགས་སེར་རིན་ཆེན་རིགས་ལེའུ་བརྒན་པད་མའི་རིགས། ལྗང་ཁུ་ལས་ཀྱི་རིགས་ལ་སོགས་སོ་སོ་ལྷ་གྲངས་དང་སྦྱར་བའོ་སྣ་ཚོགས་པའི། ༈ །སྤྱིར་སྐུ་མདོག་ལ་གཉིས་ཏེ། རང་བཞིན་གྱི་སྐུ་མདོག་དང་། རིགས་ཀྱི་སྐུ་མདོག་གོ། །དེ་ལ་རང་བཞིན་གྱི་སྐུ་མདོག་ནི། སྣུམ་པ་དང་། འདྲིལ་བ་དང་། གསལ་བ་དང་། མཚེར་བ་སྟེ། དེ་ཡང་ཉེས་པའི་སྐྱོན་གྱིས་མ་གོས་པ་དུང་ལྟ་བུ་དང་། སྣུམ་ལ་འདྲིལ་བ་མེ་ཏོག་ཀུ་མུ་ཏ་ལྟ་བུ་དང་། གསལ་བ་ཉི་མ་ལྟ་བུ། དང་ཞིང་གསལ་བ་ཟླ་བ་ལྟ་བུ། མཚེར་བ་གངས་ལ་ཉི་མ་ཤར་བ་ལྟ་བུའོ། །དེ་རྣམས་ནི་སྤྱིར་ཁྱབ་ལ། རིགས་ཀྱི་སྐུ་མདོག་ནི། རིགས་ལྔ་དང་། རིགས་ཆུང་ངོ་། །རིགས་ལྔ་ནི། མཐིང་ཀ་དོན་ཆོས་ཀྱི་དབྱིངས་ལ་ཉོན་མོངས་པས་མ་སླད་པས་མི་འགྱུར་བའོ། །དེ་ཡང་ཀུན་ཏུ་བཟང་པོ་ཡབ་ཡུམ་དང་། མི་བསྐྱོད་པ་ཡབ་ཡུམ་སྐུ་མདོག་མཐིང་ཀར་བཞུགས་སོ། །དེ་ནི་རྡོ་རྗེ་རིགས་ཀྱི་སྐུ་མདོག་གོ། །དཀར་པོ་ནི། ཉེས་པའི་སྐྱོན་གྱིས་མ་གོས་པ་སྟེ། རྣམ་སྣང་ཡབ་ཡུམ་དང་། སའི་སྙིང་པོ་ཡབ་ཡུམ་དང་། ལྷའི་ཐུབ་པའིསྐུ་མདོག་གོ། །དེ་བཞིན་གཤེགས་པའི་རིགས་སོ། །སེར་པོ་ནི་ཆེ་བའི་ཡོན་ཏན་རྒྱས་པའི་རྟགས་ཏེ། རིན་ཆེན་འབྱུང་ལྡན་ཡབ་ཡུམ་དང་། ནམ་མཁའི་སྙིང་པོ་ཡབ་ཡུམ་དང་། མིའི་ཐུབ་པའི་སྐུ་མདོག་སྟེ། དེ་ནི་རིན་པོ་ཆེའི་རིགས་སོ། །དམར་པོ་ནི་ཐུགས་རྗེའི་འགྲོ་བའི་དོན་ལ་ཆགས་པའི་རྟགས་ཏེ། སྣང་བ་མཐའ་ཡས་ཡབ་ཡུམ་དང་། སྤྱན་རས་གཟིགས་ཡབ་ཡུམ་དང་། ཡི་དྭགས་ཀྱི་ཐུབ་པའི་སྐུ་མདོག་སྟེ། དེ་ནི་པད་མའི་རིགས་སོ། །ལྗང་ཁུ་ནི་འཕྲིན་ལས་བཞིས་འགྲོ་བ་ཐམས་ཅད་ཀྱི་དོན་མཛད་པའི་རྟགས་ཏེ། དོན་ཡོད་གྲུབ་པ་ཡབ་ཡུམ་དང་། རྡོ་རྗེ་ཡབ་ཡུམ་དང་། དམྱལ་བའི་ཐུབ་པའི་སྐུ་མདོག་སྟེ། དེ་ནི་ལས་ཀྱི་རིགས་སོ། །རིགས་ཆུང་ནི། ཁ་དོག་ཉི་ཤུ་རྩ་ལྔའམ་ཡང་ན་མཐིང་ཀ་རྡོ་རྗེ་སེམས་དཔའ་ཡབ་ཡུམ། ནམ་མཁའི་སྙིང་པོ་ཡབ་ཡུམ། སྒྲིབ་སེལ་ཡབ་ཡུམ། ཀུན་བཟང་ཡབ་ཡུམ་མོ། །དཀར་པོ་ནི་རྣམ་སྣང་ཡབ་ཡུམ་དང་། ས་སྙིང་དང་བྱམས་པའོ། །སེར་པོ་ནི་རིན་འབྱུང་དང་ཐུབ་པ་དྲུག་གོ། །དམར་པོ་ནི་སྣང་བ་མཐའ་ཡས་དང་། སྤྱན་རས་གཟིགས་དང་། ཀུན་བཟང་ངོ་། །ལྗང་ཁུ་ནི་དོན་ཡོད་གྲུབ་པ་དང་། ཕྱག་ན་རྡོ་རྗེ་དང་། འཇམ་དཔའ་ཡབ་ཡུམ་གྱིའོ། །སྒོ་བ་བཞི་ཕྱོགས་མཐུན་ནོ། །སྣ་ཚོགས་པ་ནི་རང་རང་མ་འདྲེས་པ་གསལ་ལོ། །སྐུའི་ཚུལ་རྣམ་པ་ལྔ། ཡུམ་གྱི་ཚུལ་ཡང་ཟེར། གཉེན་ཞེ་སྡང་དག་པས་ལྕུག་ཁོང་ཁྲོ་དག་པས་འཁྲིལ་འདོད་ཆགས་དག་པས་ལྡེམ་ང་རྒྱལ་དག་པས་གཞོན་ཚུལ་གཏིའ་མུག་དག་པས་ཅན། །ཡབ་ཡུམ་སྤྱིའི་ཚུལ་བསྟན། སྐུ་མདོག་ནི་ཚུལ་བསྟན། ཡབ་ཀྱི་ཚུལ་ཡང་ཟེར། གསལ་འཕྲག་དོག་དག་པས་མཚེར་སེར་སྣ་དག་པས་ལྷུན་གདུག་བདག་འཛིན་དག་པས་གཟིའ་བརྗིད་ཞེན་པ་དག་པས་ལྡན། ༈ །དེ་ལ་ཞི་བའི་ཚུལ་དགུའ་ནི། གཉེན་པ་ནི་རིན་པོ་ཆེ་གསེར་ལྟ་བུ་སྟེ། གྱོང་བོ་དང་ཁེངས་པ་ལྟ་བུ་ནི་མ་ཡིན་ནོ། །ལྕུག་པ་ནི། འབྲས་ས་ལུའི་ལྗང་པ་ལྟ་བུ་སྟེ། དེ་ཡང་རེངས་པ་ལྟ་བུ་ནི་མ་ཡིན་ནོ། །འཁྲིལ་བ་ནི་དཔེར་ན་སྦྲུལ་ལྟ་བུ་སྟེ། ཡབ་ཡུམ་ཐབས་དང་ཤེས་རབ་གཉིས་སུ་མྱེད་པར་བཞུགས་པའོ། །སོ་སོར་བཞུགས་པ་ལྟ་བུ་ནི་མ་ཡིན་ནོ། །ལྡེམ་པ་ནི། ལྗོན་ཤིང་ལྟ་བུ་སྟེ། སྐྱོག་པོ་དང་ཡོན་པོ་ལྟ་བུ་ནི་སྤངས་པའོ། །གཞོན་པ་ནི། བྱིས་པ་ལོ་བརྒྱད་ལོན་པ་ལྟ་བུ་སྟེ། གཞོན་ཤ་ཆགས་པའོ། །རྒན་པོ་ཁོགས་པོ་ལྟ་བུ་ནི་མ་ཡིན་ནོ། །གསལ་བ་ནི། ཚེས་བཅོའ་ལྔའི་ཟླ་བ་ལྟ་བུ་སྟེ། མོག་མོག་པོའམ་ནག་ནག་པོ་ནི་མ་ཡིན་ནོ། །མཚེར་བ་ནི། ཉི་མའི་སྙིང་པོ་ལྟ་བུ་སྟེ། ཕྱོགས་གཅིག་པའམ་མི་གཅིག་པ་ལྟ་བུ་ནི་མ་ཡིན་ནོ། །ལྷུན་གདུག་པ་ནི། རི་བོ་ལྟ་བུ་སྟེ། སྟུར་སྟུར་པོ་ནི་མ་ཡིན་ནོ། །གཟིའ་བརྗིད་དང་ལྡན་པ་ནི། ནོར་བུ་ལྟ་བུ་སྟེ། མ་འདྲེས་ལ་གསལ་བའོ། །ནོར་བུ་འཆིང་བུ་ལྟ་བུ་ནི་མ་ཡིན་ནོ། །ལྷ་ཚོགས་རྣམས་ཀྱི་སྐུ་ནི་དེ་ལྟར་བས་ཆོག་མི་ཤེས་པར་བཞུགས་པའོ། །འོད་གཟེར་འཕྲོ་བའི་ཚོགས་ཆེན་པོ། །ཞི་བའི་སྤྲུལ་པའོ། །དེ་ཡང་སྐུའི་བ་སྤུའི་བུ་ག་གཅིག་ནས་ཡང་འོད་ཟེར་བྱེ་བ་ཕྲག་ཁྲིག་བརྒྱ་སྟོང་དྲུག་ཅུ་དྲུག་ཅུ་འབྱུང་བ་དང་། ཞལ་གྱི་མཛོད་སྤུ་ནས་འོད་ཟེར་ཁ་དོག་མི་འདྲ་བ་ཉི་ཤུ་རྩ་ལྔའི་ཚོགས་སུ་འཕྲོ་བའོ། །དེ་ཉིད་གནས་འགྱུར་བས་ཁྲོ་བོའི་དུས་ཀྱི་མེ་དཔུང་། འབར་བའི་འཕྲེང་བ་འཁྲིགས་པའི་སྟེང་། །ཁྲོ་བོའི་སྤྲུལ་པ། སྒོ་བཞིན་གནས་པའི་ཁྲོ་བོ་བཞི་ལས་ཀྱང་། ཉོན་མོངས་པ་བསྲེག་པའི་མེ་དཔུང་སྐལ་པ་འཇིག་པའི་དུས་ཀྱི་མེ་ལྟ་བུ་ཡེ་ཤེས་ཀྱི་མེ་དཔུང་འབར་བ་དང་། དེ་ཡང་ཡེ་ཤེས་ཀྱི་མེ་ཡིན་པས་ན་མེ་ལྕེ་འཕྲེང་བ་ལྟར་རྒྱུས་ནས་མེ་དཔུང་དུ་འཁྲིལ་ཞིང་འབར་བའོ། །མཐའ་དབུས་མྱེད་པར་ཁྱབ་པའི། །དཀྱིལ་འཁོར་བསམ་ཡས་ལྷུན་གྱིས་རྫོགས། །ཕྱི་རོལ་ན་ཡང་ཡེ་ཤེས་ཀྱི་མེ་དཔུང་འབར་བའོ། །དེ་ཡང་ནམ་མཁའ་གར་ཁྱབ་པ་ཆོས་དབྱིངས་ཀྱིས་ཁྱབ་ལ། ཆོས་ཀྱི་དབྱིངས་ཀྱིས་གར་ཁྱབ་པར་ཆོས་ཀྱི་དབྱིངས་ཀྱི་ཡེ་ཤེས་རྟོགས་པའི་རྟགས་སུ་ལྷའི་གཞལ་ཡས་ཁང་གིས་ཁྱབ་པའོ། །དེ་བས་ན་རང་བཞིན་གྱི་དཀྱིལ་འཁོར་དུ་ལྷུན་གྱིས་རྫོགས་པའོ། །ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏ་མ་ཀོ ྅་ཧཾ། བདག་གི་སྤྱི་བོར་རིན་པོ་ཆེའི་ཁང་བུ་ནང་དུ། ཉི་མའི་སྟེང་དུ་རྣམ་པར་སྣང་མཛད། སྐུ་མཚོན་གང་བ་གཅིག་ལ་སྐུ་མདོག་དཀར་པོ་བྱང་ཆུབ་མཆོག་གི་ཕྱག་རྒྱ་ཅན་བསམ་མོ། །ༀ་མ་ཧཱ་ཨ་ཏ་རི་ཤ་ཛྙ་ན་བཛྲ་སྭ་བྷཱ་ཝ་ཨད་མ་ཀོ྅་ཧཾ། བདག་གི་དཔྲལ་བ་དངོས་སུ་རིན་པོ་ཆེའི་ཁང་བུའི་ནང་དུ། ཉི་ཟླ་པད་མའི་སྟེང་དུ ། རྡོ་རྗེ་སེམས་དཔའི་མཐིང་ག་ས་གནོན་གྱི་ཕྱག་རྒྱ་ཅན་བསམ་མོ། །ༀ་མ་ཧཱ་ས་མན་ཏ་ཛྙ་ན་བཛྲ་སྭ་བྷཱ་བ་ཨད་མ་ཀོ྅་ཧཾ། བདག་གི་ལྡན་པ་གཡས་སུ་རིན་པོ་ཆེའི་ཁང་བུ་ནང་དུ། ཉི་ཟླ་པད་མའི་སྟེང་དུ། རིན་འབྱུང་སེར་པོ་སྦྱིན་གཏོང་གི་ཕྱག་རྒྱ་ཅན་བསམ་མོ། །ༀ་མ་ཧཱ་པྲ་ཏ་པྲ་བེ་ཤ་ཛྙཱ་ན་བཛྲ་སྭ་བྷ་བ་ཨད་མ་ཀོ྅་ཧཾ། བདག་གི་ལྟག་ཁུང་དུ་རིན་པོ་ཆེའི་ཁང་བུའི་ནང་དུ། ཉི་ཟླ་པད་མའི་གདན་སྟེངས་སུ་སྣང་བ་མཐའ་ཡས་དམར་པོ་མཉམ་བཞག་གི་ཕྱག་རྒྱ་ཅན་བསམ་མོ། །ༀ་མ་ཧཱ་ཀྲི་ཏ་ཨ་ནུ་ཏ་ཛྙཱ་ན་སྭ་བྷཱ་བ་ཨད་མ་ཀོ྅་ཧཾ། བདག་གི་ལྡན་པ་གཡོན་དུ་རིན་པོ་ཆེའི་ཁང་བུ་ནང་དུ། ཉི་ཟླ་པད་མའི་གདན་སྟེངས་སུ། དོན་ཡོད་གྲུབ་པ་སྐྱབས་སྦྱིན་གྱི་ཕྱག་རྒྱ་ཅན་བསམ་མོ། །ༀ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷ་བ་ཨད་མ་ཀོ྅་ཧཾ། བདག་གི་ཀླད་པའི་དུང་ཁང་དུ་འཁོར་ལོ་རྩིབས་བརྒྱད་ཀྱི་སྟེང་དུ་རྣམ་པར་སྣང་མཛད་དུ་བསམ་མོ། །ༀ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་བ་ཨད་མ་ཀོ྅་ཧཾ། བདག་གི་ལྕེ་སྟེངས་སུ་པད་མ་འདབ་བརྒྱད་ཀྱི་སྟེངས་སུ་སྣང་བ་མཐའ་ཡས་བསམ་མོ། །ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨད་མ་ཀོ྅་ཧཾ། བདག་གི་ཐུགས་ཀྱི་དཔལ་བེའུ་ཟུར་བརྒྱད་སྟེངས་སུ་རྡོ་རྗེ་སེམས་དཔའ་བསམ་མོ། ༈ ། བདག་གི་སྤྱི་བོ་ལ་སོགས་པའི་གནས་ལྔར། རིན་པོ་ཆེའི་ཁང་བུ་ལྔའི་ནང་དུ། ༀ་ཨཱཿ ཧཱུྃ་སྭཱ་ཧཱ་ལྔ་ལས་རིགས་ལྔ་བསམ། སྐུ་གསུང་ཐུགས་ཀྱི་ལྷར་བསམ་མོ། །དེ་ནས་ཡབ་ཡུམ་སྦྱོར་བ་བྱས་པའི་སྦྱོར་འཚམས་ནས། ཡེ་ཤེས་ཀྱི་འོད་ཟེར་འཕྲོས་པས། འོག་མིན་ནས་རིགས་ལྔ་མདུན་གྱི་ནམ་མཁར་སྤྱན་དྲངས་ནས། ཡབ་ཡུམ་སྦྱོར་བ་བྱས་པའི་བྱང་སེམས་ལས་རིག་པའི་ལྷ་མོ་བུམ་པ་ཐོགས་པ་མང་པོས་བདག་ལ་ཆུ་བླུགས་ཏེ། དབང་བསྐུར་བས། དབང་རྟགས་སུ་རིགས་ལྔའི་དབུའ་རྒྱན་བཞུགས་པར་བསམ་མོ། །བདེའ་བར་གཤེགས་པའི་རིགས་ལྔས་ཡེ་ཤེས་ལྔའི་དབང་སྐུར། སྐུ་གསུང་ཐུགས་ཀྱི་བྱིན་བརླབས་བསྡུས། ལྷ་ཚོགས་ཐམས་ཅད་འོད་དུ་གསལ་བར་གྱུར་པའོ། །དེ་ལ་ལྷ་རེ་རེ་ལ་དབུའ་རྒྱན་ལྔ་བསམ་སྟེ། རང་རང་གི་རིགས་ཀྱིས་གཙོའ་བོ་བྱས་པ་ལྔ་ལྔ་བསམ་མོ། །ཐུབ་པ་དྲུག་ལ་མི་བྱེད་དེ། ཅིའི་ཕྱིར་ཞེ་ན། རྒྱུད་ལས། ཐུབ་དྲུག་སྤྲུལ་པའི་སྐུར་གནས་པས། བྱིན་བརླབས་ཨུར་རྒྱན་མ་གསུངས་སོ། །ཞེས་པས། འདོད་པའི་ཡོན་ཏན་སྤངས་པའི་ཚུལ་ཡིན་པས། ཆགས་ལམ་གྱི་དབང་མི་བཞེད་པ་དང་། སྤྲུལ་སྐུའི་ཚུལ་དུ་བཞུགས་པས། དབུའ་རྒྱན་མི་བཞེད་པ་ལ་དགོངས་པའོ། །སྐུ་གསུང་ཐུགས་དང་ཡེ་ཤེས་ལྔ། །དབང་གི་ངོ་བོ་བསྟན། དབང་དང་ཡེ་ཤེས་ལྔ་བྱིན་བརླབས་སྐུ་གསུང་ཐུགས་ཀུན་བསྡུས་ཐིམ། །དཀྱིལ་འཁོར་ཀུན་ཏུ་གསལ་བར་འགྱུར། །ཡོན་ཏན་བསྟན། ས་ལ་སོགས་ལ་ཕྱག་རྒྱར་བྱས། །དཔེའ་བསྟན་པ་ནི། རྣམ་གྲོལ་རིམ་པ་ཐོབ་འགྱུར་ན། །དོན་བསྟན་པ་ནི། ས་ལ་སྐུ་གདུང་གཏབ་པ་དང་། ལྟེར་མཚོ་བྱས་པ་དང་། རས་སམ་དར་ལ་རིས་སུ་བྲིས་པའམ། ཐགས་སུ་བཏགས་པའམ། རྡོའམ་ཤིང་ལ་འབུར་དུ་སྐོས་པ་དང་། གསེར་དངུལ་ཟངས་ལྕགས་ལ་ལུགས་སུ་བླུགས་ནས། ལྷའི་ཕྱག་རྒྱ་བྱས་པས་ཀྱང་། དེའི་དོན་གྱིས་འཁོར་བའི་སྡུག་བསྔལ་ལས་གྲོལ་ནས། འབྲས་བུ་མྱ་ངན་ལས་འདས་པའི་གོ་འཕང་ཐོབ་པར་འགྱུར་ན་ཞེས་དཔེའོ། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །འདི་དང་པོ་དེ་བཞིན་ཉིད་ཀྱི་ཏིང་ངེ་འཛིན་གྱིས། ཆོས་ཐམས་ཅད་རང་བཞིན་མྱེད་པ་དོན་དམ་པ་ཆོས་ཀྱི་དབྱིངས་སུ་སྦྱངས་པ་དང་། ཀུན་ཏུ་སྣང་གི་དངོས་པོ་ཐམས་ཅད་རང་བཞིན་མྱེད་པ་ཡེ་ཤེས་སྒྱུ་མར་བྱས་པ་དང་། རྒྱུའི་ཏིང་ངེ་འཛིན་གྱིས་ཡིག་འབྲུར་སྦྱངས་པ་དང་། ཕྱག་རྒྱ་གཅིག་པས་རང་གི་ལུས་ངག་ཡིད་གསུམ་སྐུ་གསུང་ཐུགས་སུ་སྦྱངས་པ་དང་། སྤྲོས་པའི་ཏིང་ངེ་འཛིན་གྱིས་སྤྱོད་ཡུལ་ཐམས་ཅད་ལྷ་དང་ལྷ་མོའི་རང་བཞིན་དུ་སྦྱངས་ནས་འབྲས་བུ་ཐོབ་པ་ལྟ་ཅི་སྨོས་ཏེ། ཏིང་ངེ་འཛིན་དེ་མངོན་དུ་གྱུར་པ་དེ་ཁོ་ན་ཉིད་འབྲས་བུ་ཡེ་ཤེས་ཡིན་པས། འབྲས་བུ་གཞན་ནས་རྩལ་དུ་གཞན་མྱེད་དོ། །དེ་བས་ན་སྨོས་ཅི་དགོས་ཏེ་དེ་ཉིད་ཡིན་ནོ། །ཕྱག་རྒྱའི་དཀྱིལ་འཁོར་གསལ་བསྐྱེད་ལ། །དེ་ལྟར་ཕྱག་རྒྱ་ལྷའི་དཀྱིལ་འཁོར་དམ་ཚིག་པ་གསལ་བར་བསྐྱེད་པ། དེ་ལ་ཡེ་ཤེས་ལྔས་དབང་སྐུར་བ་དང་། སྐུ་གསུང་ཐུགས་སུ་བྱིན་གྱིས་བརླབ་པ་རྫོགས་པར་བྱས་ལ་སྤྱན་དྲངས་པའོ། །དབང་བསྐུར་བྱིན་བརླབས་རྫོགས་བྱས་ཏེ། །སྟོང་གསུམ་ཉུངས་འབྲུར་བཞུག་ཚུལ་དུ། །ཏིང་ངེ་འཛིན་གྱིས་བསྐྱེད་པའི་གཞལ་ཡས་ཁང་དེར། དེ་བཞིན་གཤེགས་པའི་དཀྱིལ་འཁོར་མི་ཤོང་ཞེ་ན། ལྷའི་རྫུ་འཕྲུལ་གྱིས་སྟོང་གསུམ་གྱི་སྟོང་ཆེན་པོ། མི་འཇེད་འཇིག་རྟེན་གྱི་ཁམས་ཐམས་ཅད་ཉུངས་འབྲུ་གཅིག་གི་ནང་དུ་བཅུག་ཀྱང་། ཉུངས་འབྲུ་ཡང་ཆེར་མ་འཕེལ་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡང་ཆུང་ངུ་མི་འགྲོ་བར་ཆུད་པ་བཞིན་དུ། ཏིང་ངེ་འཛིན་གྱིས་བསྐྱེད་པའི་གཞལ་ཡས་ཁང་དེར། ཡེ་ཤེས་ཀྱི་དཀྱིལ་འཁོར་བཞི་བཅུ་རྩ་གཉིས་སྤྱན་དྲངས་ནས་བཞུགས་ནས་ཀྱང་། གཞལ་ཡས་ཁང་ཆེར་མ་འཕེལ་ལ། ཡེ་ཤེས་ཀྱི་དཀྱིལ་འཁོར་དེ་དག་ཆུང་ངུ་འགྲིབས་པ་མ་ཡིན་ནོ། །དེའི་ཕྱིར་ན་གསང་བའི་དཀྱིལ་འཁོར་ངོ་མཚར་ཆེ་བ་ཡིན་ནོ། །དབྱིངས་ནས་དཀྱིལ་འཁོར་སྤྱན་དྲངས་མཆོད། །འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། རང་བཞིན་ལྷུན་གྱིས་གྲུབ་པའི་དཀྱིལ་འཁོར་སྤྱན་དྲངས་ལ། མཆོད་པའི་བྱེ་བྲག་བསམ་གྱིས་མི་ཁྱབ་པས་མཆོད་པར་བྱའོ། །ཕྱོགས་དུས་དཀྱིལ་འཁོར་བདག་ཉིད་ཆེ། །གང་སྤྱན་དྲངས་ན། ཕྱོགས་བཅུ་དང་དུས་བཞིས་བསྡུས་པའི་དཀྱིལ་འཁོར་ནི་བདག་ཉིད་ཆེན་པོའི་རང་བཞིན་ལྷུན་གྲུབ་ཏུ་གནས་པ་སྟེ། གཞན་ལས་འཕགས་པའོ། །དེ་ཡང་ཕྱོགས་བཅུ་དང་དུས་བཞིའི་དཀྱིལ་འཁོར་མ་ལུས་པ་ཐམས་ཅད་ནི། བདག་ཉིད་ཆེན་པོར་སངས་རྒྱས་པའི་བཞི་བཅུ་རྩ་གཉིས་པོ་ཐམས་ཅད་སྤྱན་དྲངས་སོ། །མྱི་དམིགས་ཐུགས་ཀྱི་དཀྱིལ་འཁོར་ནས། །ཡུལ་གང་ནས་སྤྱན་དྲངས་ན། ཆོས་ཀྱི་དབྱིངས་ལ་ཕན་ཚུན་དང་ཡུལ་ཅན་ལྟ་བུ་མྱེད་པ་དང་། རང་བཞིན་སྤྲོས་བྲལ་ཆོས་ཀྱི་དབྱིངས་ཀྱི་ཡེ་ཤེས་ཉིད་ཡེ་ཤེས་ལྔར་སྣང་བ་དེ་ནི། དུས་གསུམ་གྱི་རྒྱལ་བ་ཐམས་ཅད་བཞུགས་པའི་གནས་ཡིན་ནོ། །གཟུང་འཛིན་དང་བྲལ་བའི་ཡེ་ཤེས་ཉིད། དེ་བཞིན་གཤེགས་པ་ཀུན་གྱི་གནས་ཞེས་སོ། །དཀྱིལ་འཁོར་ཐམས་ཅད་སྤྱན་དྲང་ངོ་། །ངོ་བོ་གང་སྤྱན་དྲང་ན། དཀྱིལ་རྡོ་རྗེ་སེམས་དཔའ་ལ། འཁོར་བྷུ་ཏ་བཞི་བཅུ་ཐམ་པས་སྐོར་བའི་འབུ་ཏ་བཞི་བཅུ་རྩ་གཉིས་པོ་ཐམས་ཅད་སྤྱན་དྲངས་བའོ། །རང་སྣང་དབྱེར་མྱེད་དཀྱིལ་འཁོར་ལ། །གང་དུ་སྤྱན་དྲངས་ན། རང་རིག་པའི་སྣང་བ་ལས་བྱུང་དམ་ཚིག་གི་དཀྱིལ་འཁོར་དང་། ཡེ་ཤེས་ཀྱི་དཀྱིལ་འཁོར་དབྱེར་མེད་པར་གཅིག་པ་ཡིན་ལ། འཇུག་པའི་མཚན་ཉིད་མཉམ་སྦྱོར་བས། །དགོས་ཆེད་ཅིའི་ཕྱིར་སྤྱན་དྲང་ན། རིག་པ་ལ་རིག་པ་འཇུག །དམ་ཚིག་པ་དང་ཡེ་ཤེས་པ་མཉམ་པར་སྦྱོར་བས་སོ། །དེ་ཡང་རང་སྣང་ལ་ཡེ་ཤེས་ཀྱི་ལྷ་འཇུག་པའི་མཚན་ཉིད་དམ་འཇུག་ལུགས་ནི་བདག་དང་ལྷ་མཉམ་པར་སྦྱོར་བའོ། །ཕྱོགས་དུས་ཀུན་ནས་གཤེགས་པའི། །ཕྱོགས་བཅུ་དུས་བཞིར་འགྲོ་བའི་དོན་ཡོངས་སུ་རྫོགས་པར་མཛད་པའི་རྒྱལ་བ་སངས་རྒྱས་བཞི་བཅུ་རྩ་གཉིས་པོ་དེ་དག་ཐམས་ཅད་ལ། བསྙེན་པའི་དཀྱིལ་འཁོར་ཀུན་ཏུ་རྫོགས། །བདག་གིས་ཚེ་སྔ་མའི་དུས་ཕན་ཅད་དུ་ལྷ་དང་བསྙེན་པ་རྫོགས་པར་ཕུལ་བས་ན། ཉེར་བར་གྱུར་པའི་དམ་ཚིག་མཆོག །ད་ལྟར་གྱི་དུས་ན་བདག་དཀྱིལ་འཁོར་གྱི་ལྷ་དང་ཉེ་བར་གྱུར་པ་དང་། རྒྱལ་བ་དེ་དག་འགྲོ་བའི་དོན་མཛད་པར་ཐུགས་དམ་དུ་ཞལ་གྱིས་བཞེས་པ་ལས་མི་འདའ་བར་བདག་གི་དོན་མཛད་པའི་ཕྱིར་གནས་འདིར་བྱོན་པ་ཡིན་ནོ། །ཨཱོྂ་ཀྱེ་ཚུར་སྦྱོར་ཨེ་ཨ་ཧ་ཧི་བཅོམ་ལྡན་འདས་བ་ག་བན། མ་ཧཱ་ཐུགས་རྗེ་ཆེན་པོས་ཀ་རུ་ནི་ཀ་ཏྲི་གཟིགས་ཤིག་ཤ་ཧོ། ས་མ་ཡ་དམ་ཚིག་ལ་དགོངས་སྟོམ། ཛ་ལྷ་མོ་བཞི་ཧཱུྃ་བཾ་ཧོ། ཨཱོྂ་དམ་ཚིག་གི་ལྷའི་ཐུགས་ཀ་ནས་ལྷ་མོ་བཞི་འཕྲོས་པས། བཛྲ་རྡོ་རྗེ་ས་མ་ཡ་དམ་ཚིག་ཨཱོྂ་སྐུ། ཨཱྃ་བཛྲ་རྡོ་རྗེ་ས་མ་ཡ་དམ་ཚིག་ཨཱྃ་གསུང་། ཧཱུྃ་བཛྲ་རྡོ་རྗེ་ས་མ་ཡ་དམ་ཚིག་ཧཱུྃ་ཐུགས། འོག་མིན་ནས་མདུན་གྱི་ནམ་ཀ་ལ་ཡེ་ཤེས་ཀྱི་སངས་རྒྱས་བཞི་བཅུ་རྩ་གཉིས་སྤྱན་དྲངས་ནས། དབྱར་གྱི་སྤྲིན་ཕུང་ལྟར་འོད་ཟེར་འདབ་འབྱོར་དུ་བཞུགས་པའོ། །དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་དབྱེར་མེད་པར་གསལ་བ་ལ་རིག་པའི་མེ་ཏོག་དོར་ཞེས་བྱའོ། ༈ །སྐུ་རྡོ་རྗེ་དང་དབྱེར་མྱེད་པར་གྱུར་ཅིག །གསུང་རྡོ་རྗེ་དང་དབྱེར་མྱེད་པར་གྱུར་ཅིག །ཐུགས་རྡོ་རྗེ་དང་དབྱེར་མེད་པར་གྱུར་ཅིག །ཡོན་ཏན་རྡོ་རྗེ་དང་དབྱེར་མྱེད་པར་གྱུར་ཅིག །འཕྲིན་ལས་རྡོ་རྗེ་དང་དབྱེར་མྱེད་པར་གྱུར་ཅིག །སྭཱ་བཛྲ་རྡོ་རྗེ་ས་མ་ཡ་དམ་ཚིག་སྭཱ་ཡོན་ཏན། ཧཱ་བཛྲ་རྡོ་རྗེ་ས་མ་ཡ་དམ་ཚིག་ཧཱ་འཕྲིན་ལས། ༈ །ཨཱོྂ་ཡེ་ཤེས་ལྔ་བཛྲ་རྡོ་རྗེ་ས་མ་ཡ་དམ་ཚིག་ཧཱུྃ་སྡུ་བ། དངོས་གྲུབ་སྐུལ་བའི་སྔགས་སོ། །ནམ་མཁའ་ཡེ་ཤེས་ཀྱི་དཀྱིལ་འཁོར་གྱི་དངོས་གྲུབ་གསོལ། ཨཱོྂ་ཡེ་ཤེས་ལྔ་བཛྲ་རྡོ་རྗེ་ས་མ་ཡ་དམ་ཚིག་སྟོཾ་སྦྱོར་བ། དངོས་གྲུབ་གསོལ་བའི་དུས་ལ་བབ་བོ། །ཨཱོྂ་ཡེ་ཤེས་ལྔ་བཛྲ་རྡོ་རྗེ་ས་མ་ཡ་དམ་ཚིག་ཧོ་དགྱེས་པར་རོལ། དངོས་གྲུབ་གསོལ་བ་ལ་དགྱེས་པར་དགོངས་ཤིག །ཛཿཧཱུྃ་བྃ་ཧོཿ ཕྱག་རྒྱ་བཞིས་དགུག་བཞུག་བྱ་ཞིང་དགྱེས་པ་སྐྱེད་པའོ། །མེ་ཏོག་དོར་ལ་དངོས་གྲུབ་གསོལ། །རིག་པའི་མེ་ཏོག་ལྷ་ལ་དོར་ལ། རང་ལ་སྐུ་གསུང་ཐུགས་ཀྱི་དངོས་གྲུབ་བསྐུལ་བར་བྱ་བའོ། །གཉིས་མྱེད་ཐིམ་བཞུགས་མཉེས་པར་བྱ། །དེ་ལྟར་མདུན་གྱི་ནམ་མཁའ་ལ་བྱོན་པ་ལ། རིག་པའི་མེ་ཏོག་དོར་བས། ལྷ་དང་བདག་དབྱེར་མྱེད་པར་རྟོགས་ནས། སྐུ་གསུང་ཐུགས་ཀྱི་དངོས་གྲུབ་གསོལ་བའི་ཕྱིར། གཉིས་སུ་མྱེད་པར་ཐིམ། བདག་དངོས་གྲུབ་མ་ཐོབ་བར་དུ་བསྟན་པར་བཞུགས་སུ་གསོལ་ནས། མ་སྐྱེས་རྡོ་རྗེ་ཐབས་ཀྱི་ཡེ་ཤེས་ནི་ཞེས་པས་ཕྱག་འཚལ་ལ་མཉེས་པར་བྱའོ། །སྒྱུ་ཡུམ་འཕྲུལ་ཡབ་དྲ་འབྲེལ་པ་བའི་མངོན་རྫོགས་པའི། །ཕྱག་རྒྱའི་དོན་གནས་ཐབས་བསྟན། དབང་དེ་ལྟར་རྟོགས་ན་པོའི་ཡུལ་དུ་གང་གྱུར་པ་རྣམས། །ལམ་རྟོགས་ཐབས་བསྟན། མཉམ་པའི་ཐབས་ཤེས་རབ་ངང་དུ་རྟོགས་ལྟ་བས་གསལ་ཏིང་ངེ་ན། །འབྲས་བུའི་ངོ་བོ། ཐམས་ཅད་བྱང་ཆུབ་རིག་པ་མཆོག་གི་རྒྱ། །འཁོར་འདས། རྒྱལ་བ་བཞི་བཅུ་རྩ་གཉིས་པོ་ཐབས་ཤེས་རབ་དབྱེར་མེད་པའི་དོན་དེ། རང་རིག་པའི་མངོན་སུམ་དུ་གསལ་བའི་དུས་ན། ཕུང་པོ་དང་དབང་པོ་དང་རྣམ་པར་ཤེས་པ་ཐམས་ཅད། ཐབས་ཀྱི་རང་བཞིན་ཡབ་ཀྱི་དཀྱིལ་འཁོར་ལ། འབྱུང་བ་དང་ཡུལ་དང་དུས་ཐམས་ཅད་ནི། ཤེས་རབ་ཀྱི་རང་བཞིན་ཡུམ་གྱི་དཀྱིལ་འཁོར། དེ་དག་ཐམས་ཅད་ཐབས་ཤེས་རབ་གཉིས་སུ་མྱེད་པ་བྱང་ཆུབ་སེམས་མཉམ་པའི་ངང་དེར་རྟོགས་པར་གསལ་ན། ཆོས་ཐམས་ཅད་དེ་ལྟར་རྟོགས་པའི་ངང་དེ་ལས་མི་འདའ་བ་ལ་བྱང་ཆུབ་མཆོག་གི་ཕྱག་རྒྱ་ཞེས་བྱའོ། །སྐྱོད་ལུས་ཀྱི་ཡན་ལག་གོ་ཆེན་འཁོར་ལོའི་གཞལ་ཡས་བཞུགས་གནས་སོ་སུ། །ཐབས་ལྷ་ཡབ་ཡུམ་དང་ཤེས་རབ་འཁོར་བཅས་ཐམས་ཅད་ཀུན། །ངོ་བོ་གང་སྒོམ་ན། གསལ་ལྷའི་སྐུར་ཞིང་འོད་ཟེར་སྤྲུལ་པ་འཕྲོ་བསྒོམས་ན། །རྣམ་པ་ཇི་ལྟར་སྒོམ་ན། བསྒུལ་རང་གི་ལུས་ཀྱིས་བསྐྱོད་ཅིང་བྱས་པ་ཐམས་ཅད་ཕྱག་རྒྱ་ལྷའི་ཡིན། །སྒོམ་པའི་ཡོན་ཏན་གང་ཡིན་ན། སྐྱོད་ཆེན་ནི་ལུས་ཀྱི་ཡན་ལག་ལྔའོ། །དེ་ལྟར་འཁོར་ལོ་རྩིབས་བཞི་མུ་ཁྱུད་དང་བཅས་པའི་གཞལ་ཡས་ཁང་བསྒོམ། དེའི་ནང་དུ་ཐབས་ཡབ་དང་ཤེས་རབ་ཡུམ་ཐམས་ཅད། དེའི་འཁོར་བཅས་ཀུན་བསྒོམ་པ་ནི། དབུའ་ལ་དེ་བཞིན་གཤེགས་པའི་རིགས་ཡབ་ཡུམ་བཅུ། ལག་པ་གཡས་པ་ལ་རྡོ་རྗེའི་རིགས་ཡབ་ཡུམ་བཅུ། ལག་པ་གཡོན་པ་ལ་རིན་པོ་ཆེའི་རིགས་ཡབ་ཡུམ་བཅུ། རྐང་པ་གཡས་པ་ལ་ལས་ཀྱི་རིགས་ཡབ་ཡུམ་བཅུ། རྐང་པ་གཡོན་པ་ལ་པད་མའི་རིགས་ཡབ་ཡུམ་བཅུ་བསྒོམ་མོ། །དེ་ཡང་རྔམ་ཀློག་འཁོར་ལོ་བཀོད་པའི་མདོའ་ལས། ལག་གཡས་རྡོ་རྗེ་མི་བསྐྱོད་པ། །ལག་གཡོན་རིན་ཆེན་སེམས་དཔའ་སྟེ། རྐང་གཡས་ལས་ཀྱི་སེམས་དཔའ་ལ། །རྐང་གཡོན་པད་མའི་སེམས་དཔའ་ཡིན། །དབུས་ནི་དེ་བཞིན་གཤེགས་པའི་རིགས། །ཞེས་སོ། །སྐུ་དེ་དག་ཡང་གསལ་ཞིང་འོད་ཟེར་འཕྲོ་བར་བསྒོམས་ནས་གསལ་ན། རང་གི་ལུས་ཀྱིས་བསྒུལ་སྐྱོད་བྱས་པ་ཐམས་ཅད་ཡང་ལྷའི་ཕྱག་རྒྱ་ཡིན་ནོ། །ཅི་སྟེ་ན། རིག་པ་ལུས་ཀྱི་ཡན་ལག་ལྷ་ཡི་དམ་ལྷའི་སྐུར་གསལ་བའི་ངང་ལས་མི་འདའ་བའི་ཕྱིར་རོ། །གསང་དེ་ལྟ་བུ་དེ་ནི་བ་དེ་ཁོ་ན་ཉིད་ངེས་པའི་དོན་བྷ་ཞིག་ཡིན་པས་ལས། །ཁུངས་གང་ཡིན་ན། སྙིང་ཆོས་ཐམས་ཅད་པོའི་ཕྱག་རྒྱ་ལྷའི་སྐུར་གསལ་བ་ལས་འདའ་དེ་ལས་མི་འདའ་བའི་ཕྱིར་ན་ཀའོ། །ངེས་ཚིག་ཇི་ལྟར་ཡིན་ན། སྤྱོད་ཡུལ་ཐམས་ཅད་ལྷའི་དཀྱིལ་འཁོར་དུ་གསལ་བ་སྟེ། སྐྱེ་བོ་དང་ཐེག་པ་འོག་མ་ཐམས་ཅད་ཀྱི་སྤྱོད་ཡུལ་དུ་མ་གྱུར་པ་དང་། དེ་ནི་རྒྱུ་འབྲས་སུ་གཉིས་སུ་མྱེད་པའི་དོན་བྷ་ཞིག་ཡིན་པའི་ཕྱིར་ན། ཆོས་ཐམས་ཅད་དོན་གྱི་སྙིང་པོའི་ངང་དེ་ལས་མི་འདའ་བའི་ཕྱིར་ན་འདའ་ཀའོ། །མི་བསྐྱོད་རྡོ་རྗེ་སེམས་དཔའ་ཉི་མའི་གདན་དཀྱིལ་འབྲུ་ལྔ་ཡི་གེ། །རིན་ཆེན་འབྱུང་ལྡན་ཟླ་བའི་གདན་དཀྱིལ་འབྲུ་ལྔ་ཡི་གེ། །ལྔ་ལག་པ་གཡས་གཡོན་གཉིས་ཟུང་དུ་སྤྲོས་པ་བསྡུས་ལས། །སྦྱར་ཡབ་ཡུམ་ཐབས་ཤེས་རབ་བས་ཕྱག་འབྱུང་བའི་རྒྱུ། །ལག་པ་གཡས་པ་མི་བསྐྱོད་པའི་རང་བཞིན་གྱི་སོར་མོའི་བྲེ་ག་ལྔ་ལ་ཉི་མའི་དལ་སེན་མོའི་ཙམ་པ་ལྔ་བསྒོམ། དེའི་སྟེང་དུ་གུང་མོ་ལ་ༀ་མཛུབ་མོ་ལ་ཧཱུྃ། སྲིན་ལག་ལ་ཧཱ། ཐེའུ་ཆུང་ལ་སྭཱ། མཐེ་འོང་ལ་ཧཱ་བསམ་མོ། །ལག་པ་གཡོན་པ་རིན་ཆེན་འབྱུང་ལྡན་གྱི་རང་བཞིན་དུ་བསྒོམས་པའི། སོར་མོའི་བྲེ་ག་ལྔ་ལ་ཟླ་བའི་དལ་སེན་ཟླུམ་ཙམ་པ་ལྔའི་སྟེང་དུ། གུང་མོ་ལ་ལཾ། མཛུབ་མོ་ལ་མུཾ། སྲིན་ལག་ལ་པཾ། ཐེའུ་ཆུང་ལ་མཾ། ཐེ་འོང་ལ་ཏཾ། བསམ་མོ། །དེ་ལྟར་གཉིས་པོ་དེ་ནས་འོད་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་པ་ལས་ཡི་གེ་བཅུ་ལ་ཐིམ་པས་འོད་དུ་འབར་རོ། །དེ་ཐུགས་ཁར་ཐལ་མོ་སྦྱར་བས་ཡབ་ཡུམ་སྦྱོར་བ་བྱེད་པར་བསམ་སྟེ། དེ་ལྟར་ཡབ་ཡུམ་ཐབས་ཤེས་རབ་སྦྱོར་བྱེད་པ་དེས་ནི། ཕྱག་རྒྱ་འབྱུང་བའི་རྒྱུ་རྡོ་རྗེ་ཐལ་མོ་ཡིན་ནོ། །ཨཱོྂ་དང་མུཾ་གཉིས་རྩེ་སྦྱར་ཏེ། །འབྱུང་བའི་རྒྱུ། འབྲུ་བརྒྱད་བསྣོལ་ནས་རྩེ་སྤྲད་པ། །བཅའ་བའི་ཐབས། རྒྱལ་བ་ཀུན་དང་མཉམ་སྦྱོར་བས། །སྒྱུར་བའི་དོན་བསྟན། བདེའ་བ་ཆེན་པོ་འབྱིན་པའི་རྒྱའ། །ཕྱག་རྒྱའི་དོན་བསྟན། བདག་ཀུན་ཏུ་བཟང་པོ་བསྒོམ། མཁའ་རྡོ་རྗེ་རྩེ་ལྔར་བསྒོམ། རྡོ་རྗེའི་རྩེ་མོར་ༀ། རཱ་པྲག་ཏུ་ཧཱུྃ་དང་ཨ་དང་ཧ་བསམ། ཡུམ་ཀུན་ཏུ་བཟང་མོར་བསྒོམ། མཁའ་པད་མ་འདབ་བཞིར་བསྒོམ། དབུས་སུ་མུཾ་བསམ། འདབ་མ་བཞི་ལ་ལཾ་མཾ་པཾ་ཏཾ་བསམ། དེ་ནས་རྡོ་རྗེ་དང་པད་མ་རྩེ་སྤྲད་པས། ༀ་དང་མུཾ་འབྱོར། པད་མ་དང་རཱ་འབྱོར། འབྲུ་བརྒྱད་པོ་སྣོལ་མར་རྩེ་སྤྲད་པ་ནི། དུས་གསུམ་གྱི་རྒྱལ་བ་ཀུན་དང་མཉམ་པར་སྦྱོར་བ་བྱས་པས། བདེའ་བ་ཆེན་པོ་བྱང་ཆུབ་ཀྱི་སེམས་འབྱིན་པའི་ཕྱག་རྒྱའོ། །དེ་ནི་ལྷག་པ་བྱང་ཆུབ་སེམས་ཀྱིས་དབང་བསྐུར་བའི་ཕྱག་རྒྱ་ཡིན་ལ། འདིར་ལག་པ་གཡས་གཡོན་སོར་མོ་སྣོལ་ལ་རྩེ་སྤྲད་ལ་བསྒོམ་པར་བྱའོ། །འབྲུ་བཞི་སྦས་ནས་ཐུགས་ཀར་བཀན། །བཅིང་བ་དམ་ཚིག་གི་ཕྱག་རྒྱ་བསྟན། ལག་པ་གཡས་པ་མི་སྐྱོད་པའི་རང་བཞིན་གྱི་སོར་མོའི་སྟེང་གི། ༀ་སྭ་ཧཱ་ཨའི་ཡིག་འབྲུ་བཞི་ཁུ་ཚུར་ནང་དུ་སྦས་ནས། ཐུགས་ཁར་གཟུང་སྟེ། མཛུབ་མོ་སྒྲེང་ནས་ཕྱིར་ལ་བཀན་པའི་ཚུལ་གྱིས་གཟུང་བ་ནི་དམ་ཚིག་གི་ཕྱག་རྒྱའོ། །ཧཱུྃ་བསྒྲེང་རྩེ་མོ་རྡོ་རྗེ་འབར། །བསམ་པ་ཆོས་ཀྱི་ཕྱག་རྒྱ་བ སྟན། མཛུབ་མོ་སྒྲེང་བའི་རྩེ་མོ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པར་བསམ་པ་ནི་ཆོས་ཀྱི་ཕྱག་རྒྱའོ། །ཟླ་བཏུལ་འབྲུ་སྦས་དྲིལ་བསིལ་ཞིང་། །བྱེད་པ་ལས་ཀྱི་ཕྱག་རྒྱ། ལག་པ་གཡོན་པ་བཟླ་བའི་དཀྱིལ་འཁོར་ཁུ་ཚུར་བཅངས་ནས་འབྲུ་ལྔ་ནང་དུ་སྦས་ཏེ། དྲིལ་བུ་བསིལ་ཞིང་རང་གི་ཡུལ་ལ་འཁྲིལ་བ་ནི། བྱེད་པ་ལས་ཀྱི་ཕྱག་རྒྱའོ། །འཁྲིལ་བའི་ཚུལ་གྱིས་ཆོས་ལ་བསྟན། །སྐུར་བསྒོམ་པ་ཕྱག་རྒྱ་ཆེན་པོ་བསྟན། ཡབ་ལས་ཀྱི་རང་བཞིན་ཡུམ་ལ་འཁྲིལ་ནས། ཞལ་ཡུམ་ཆོས་ཀྱི་རང་བཞིན་ལ་འདུད་པ་ནི། ཕྱག་རྒྱ་ཆེན་པོའོ། ༈ །སྤྱིར་ཕྱག་རྒྱ་ལ་བཞི་སྟེ། ཕྱག་རྒྱ་བཅའ་བའི་གནས་ལྟ་ཟུར་གཡས་གཡོན་ནོ། །ཕྱག་རྒྱ་འབྱུང་བའི་རྒྱུ་རྡོ་རྗེ་ཐལ་མོའོ། །ཕྱག་རྒྱ་འབྱུང་བའི་ཐབས་ཐུགས་ཀ་དང་། ཕྱག་རྒྱ་དགྲོལ་བའི་དོན་སྟོང་ཉིད་དོ། །དེ་ལ་ཕྱག་རྒྱ་སྒྱུར་བའི་ཐབས་ལ་གསུམ་སྟེ། ཕྱི་ལུས་ཀྱི་ཡན་ལག་བྱིན་གྱིས་བརློབ་པའི་ཕྱག་རྒྱ་དང་། ནང་ལག་པ་གཡས་གཡོན་ལ་ཐབས་ཤེས་རབ་ཀྱི་ཡི་གེ་བགོད་པ་དང་། གསང་བ་རྡོ་རྗེ་པད་མ་རྩེ་སྤྲད་པའི་ཕྱག་རྒྱའོ། །དེ་ལ་ནང་ལ་བཞི་སྟེ། བཅིང་བ་དམ་ཚིག་གི་ཕྱག་རྒྱ་དང་། བསམ་པ་ཆོས་ཀྱི་ཕྱག་རྒྱ་དང་། བྱེད་པ་ལས་ཀྱི་ཕྱག་རྒྱ་དང་། བསྒོམ་པ་ཕྱག་རྒྱ་ཆེན་པོའོ། །དེ་བཞིས་ལྷ་སོ་སོའི་ཕྱག་རྒྱ་ཐམས་ཅད་ཁྱབ་པར་བཅིང་ངོ་། །ཕྱག་རྒྱ་དགྲོལ་བ་ནི། སྟོང་ཉིད་དུ་དགྲོལ་བའོ། །རྒྱས་པ་ལས། གཟུང་དང་འཛིན་པ་རྣམ་གཉིས་པོ། །དག་པར་དོར་བ་ཕྱག་རྒྱ་ཡིན། །ཞེས་སོ། །དེ་ལྟར་ལས་འདི་ནི། ཕྱག་རྒྱ་དེ་དག་ཐམས་ཅད་གཅིག་ཏུ་ཚང་བར་བཅིངས་ནས་བྱེད་པའོ། །དེ་བས་ན་ཐུན་མོང་མ་ཡིན་པའི་ཕྱག་རྒྱ་ཞེས་བྱ་བར་ཡང་འགྲོའོ། །འབྲུ་བཞི་སྦས་ནས་ཐུགས་ཀར་བཀན། །བཅིང་བ་དམ་ཚིག་གི་ཕྱག་རྒྱ་བསྟན། ལག་པ་གཡོན་པ་ཟླ་བའི་དཀྱིལ་འཁོར་གྱི་སྟེང་གི། ལཾ་མཾ་པཾ་ཏཾ་བཞི་ཁུ་ཚུར་བཅངས་ནས་སྦས་ཏེ། ཐུགས་ཀར་ཕྱིར་གན་དུ་བཀན་ནས་བཅིངས་པ་ནི། དམ་ཚིག་གི་ཕྱགརྒྱའོ། །མུཾ་སྒྲེང་རྩེ་མོ་དྲིལ་བསིལ་འབར། །བསམ་པ་ཆོས་ཀྱི། མཛུབ་མོ་སྒྲེང་བའི་རྩེ་མོར་ཡི་གེ་མུཾ་བསམ། དེ་ལས་དྲིལ་བུ་འབར་བ། གཅིག་ཏུ་གསལ་ན་དྲིལ་བུ་བསིལ་བ་ནི། བསམ་པ་ཆོས་ཀྱི་ཕྱག་རྒྱའོ། །ཉི་མ་འབྲུ་ལྔ་ལས་སུ་འཁྲིལ། །བྱེད་པ་ལས་ཀྱི་ཕྱག་རྒྱ་བསྟན། ལག་པ་གཡས་པ་ཉི་མའི་དཀྱིལ་འཁོར་གྱི་སྟེང་གི་ཡིག་འབྲུ་ལྔ་པོས་ལས་ཡབ་ཀྱི་རང་བཞིན་ལ་འཁྲིལ་བ་ནི། བྱེད་པ་ལས་ཀྱི་ཕྱག་རྒྱའོ། །བསྟུད་དེ་འཛུམ་པའི་མདངས་ཀྱིས་ལྟ། །སྒོམ་པ་ཕྱག་རྒྱ་ཆེན་པོ་བསྟན། ཡུམ་གྱི་དབུ་ལ་སྟུད་དེ། ཞལ་འཛུམ་པའི་མདངས་དང་བཅས་ནས་ལྟའོ། །དེ་ལྟར་ཡུམ་གྱི་སྐུར་ལྷག་གིས་གསལ་བ་ནི། སྒོམ་པ་ཕྱག་རྒྱ་ཆེན་པོའོ། །ཡུམ་དེ་གཉིས་ཀྱིས་ལྷ་ཚོགས་ཐམས་ཅད་འདྲེ་བར་ཤེས་པར་བྱའོ། །འབྲུ་བཞི་ༀ་མ་རྟོགས་པའི་ཡིག་འབྲུ་བཞི་སྦས་ནས་ཐུགས་ཀར་བཀན། །བཅིང་བ་དམ་ཚིག་ༀ་གསུང་ཡིག་འབྲུ་སྒྲེང་རྩེ་མོ་འཁོར་ཐུགས་ཕྱག་མཚན་ལོ་འབར། །ཆོས། ཟླ་བཏུལ་འབྲུ་ཡུམ་གྱི་འབྲུ་ལྔ་སྦས་པའོ་སྦས་དྲིལ་བསིལ་ཞིང་། །བྱེད་པ་ལས་འཁྲིལ་བའི་ཚུལ་གྱིས་སྐུར་སྒོམ་པ་ཕྱག་རྒྱ་ཆེན་པོ་ཆོས་ལ་བསྟན། ༈ །འབྲུ་མཾ་ལཾ་པྱཾ་ཏཾ་བཞི་སྦས་ནས་ཐུགས་ཀར་བཅིང་བ་དམ་ཚིག་བཀན། །ལམ་སྒྲེང་རྩེ་མོ་དྲིལ་བསིལ་བསམ་པ་ཆོས་འབར། །ཉི་མ་དཔའ་བོ་འབྲུ་ལྔ་ལས་སུ་འཁྲིལ་བྱེད་པ་ལས་ཀྱི། བསྟུད་ཏེ་འཛུམ་པའི་མདངས་སྐུ་ཕྱག་རྒྱ་ཆེན་པོ་ཀྱིས་ལྟ། །འབྲུ་བཞི་ༀ་ཧཱུྃ་ཨཾ་ཧ་བཞི་སྦས་ནས་ཐུགས་བཅིང་བ་དམ་ཚིག་ཀར་བཀན། །སྭ་རྩེ་འབར་བ་རིན་པོ་ཆེ། །བསམ་པ་ཆོས། ཟླ་བཏུལ་བྱེད་པ་ལས་འབྲུ་སྦས་དཔའ་བོ་དྲིལ་བསིལ་ཞིང་། །འཁྲིལ་བའི་སྐུ་ཕྱག་རྒྱ་ཆེན་པོ་ཚུལ་གྱིས་ཆོས་ལ་བསྟན། ༈ །འབྲུ་བཞི་མཾ་ལཾ་པྱཾ་ཏཾ་སྦས་ནས་ཐུགས་ཀར་བཀན་བཅིང་བ་དམ་ཚིག །མཾ་སྒྲེང་རྩེ་མོར་དྲིལ་བསིལ་བསམ་པ་ཆོས་འབར། །ཉི་མ་དཔའ་བོ་འབྲུ་ལྔ་ལས་སུ་བྱེད་པ་ལས་ཀྱི་འཁྲིལ། །སྟུད་དེ་འཛུམ་སྐུ་ཕྱག་རྒྱ་ཆེན་པོ་པའི་མདངས་ཀྱིས་ལྟ། ༈ །ༀ་ཧཱུྃ་སྭ་ཧཱ་འབྲུ་བཞི་སྦས་ནས་ཐུགས་ཀར་བཅིང་བ་དམ་ཚིག་བཀན། །ༀ་སྒྲེང་རྩེ་བསམ་པ་ཆོས་མོ་པད་མ་འབར། །ཟླ་བཏུལ་དཔའ་མོ་འབྲུ་སྦས་དྲིལ་བསིལ་བྱེད་པ་ལས་ཞིང་། །འཁྲིལ་བའི་ཚུལ་གྱིས་ཆོས་ལ་སྐུ་ཕྱག་རྒྱ་ཆེན་པོ་བསྟན། །འབྲུ་བཞི་དཔའ་མོ་སྦས་ནས་ཐུགས་ཀར་བཀན། །བཅིང་བ་དམ་ཚིག །པྱཾ་སྒྲེང་རྩེ་མོ་བསམ་པ་ཆོས་དྲིལ་བསིལ་འབར། །ཉི་མ་དཔའ་བོ་འབྲུ་ལྔ་ལས་སུ་བཅིང་བ་དམ་ཚིག་འཁྲིལ། །བསྟུད་དེ་འཛུམ་པའི་མདངས་སྐུ་ཕྱག་རྒྱ་ཆེན་པོ་མདངས་ཀྱིས་ལྟ། ༈ །འབྲུ་བཞི་སྦས་ནས་ཐུགས་ཀར་བཅིང་བ་དམ་ཚིག་བཀན། །ཧ་སྒྲེང་རྩེ་མོར་བསམ་པ་ཆོས་རལ་གྲི་འབར། །ༀ་ཨཱ་ཧཱུྃ་སྭ་ཟླ་བཏུལ་དཔའ་མོ་འབྲུ་སྦས་དྲིལ་བསིལ་བྱེད་པ་ལས་ཞིང་། །འཁྲིལ་བའི་ཚུལ་གྱིས་ཆོས་ལ་སྐུ་ཕྱག་རྒྱ་ཆེན་པོ་བསྟན། ༈ །འབྲུ་མཾ་ལཾ་པྱཾ་མཾ་བཞི་སྦས་ནས་ཐུགས་བཅིང་བ་དམ་ཚིག་ཀར་བཀན། །ཏཾ་སྒྲེང་རྩེ་མོ་བསམ་པ་ཆོས་དྲིལ་བསིལ་འབར། །ཉི་མ་དཔའ་བོ་འབྲུ་ལྔ་ལས་སུ་བྱེད་པ་ལས་འཁྲིལ། །སྟུད་དེ་འཛུམ་སྐུ་ཕྱག་རྒྱ་ཆེན་པོ་པའི་མདངས་ཀྱིས་ལྟ། ༈ །མཆོད་པའི་ཕྱག་རྒྱ་ཆེན་པོ་ནི། །སྤྱིར་ན་མཆོད་པ་ལ་གཉིས་ཏེ། དངོས་སུ་འབྱོར་བ་དང་། སེམས་ཀྱིས་དམིགས་པའོ། །དེ་ལས་འདིར་ནི་སེམས་ཀྱིས་དམིགས་པའོ། །ནང་མཆོད་པའི་ཕྱག་རྒྱ་ཆེན་པོ་ཏིང་ངེ་འཛིན་གྱི་མཆོད་པ་ཟེར་རོ། །སེམས་ཀྱིས་ཡིད་བཞིན་སྤྲིན་ཚོགས་ཀྱིས། །རང་རིག་པ་བྱང་ཆུབ་ཀྱི་སེམས་ནི། ཇི་ལྟར་དམིགས་པ་བཞིན་དུ་གྲུབ་པས་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བས། མཆོད་པ་མང་ཉུང་གི་ཚད་སྤྲིན་གྱི་ཚོགས་ཙམ་པ་སྤྲུལ་ན་དབུལ་ལོ། །ཕྱོགས་བཅུ་ཐམས་ཅད་སངས་རྒྱས་ཞིང་། །འཇིག་རྟེན་གྱི་ཁམས་ཞིང་ཁམས་སུ་དབུལ་བསྟན། དེ་ཡང་ཇི་ལྟར་སྤྲུལ་ཞེ་ན། ཕྱོགས་བཅུའི་འཇིག་རྟེན་གྱི་ཁམས་འདི་ཐམས་ཅད་སངས་རྒྱས་ཀྱི་ཞིང་ཁམས་རྣམ་པར་དག་པ། བརྒྱའམ་བཀོད་པ། མནན་ན་ནེམ་སྙོམ་བྱེད་པ། གཏེག་ན་འཕར་མཉམ་བྱེད་པར་སྤྲུལ་ལོ། །གཉེན་འཇམ་རེག་ན་བདེའ་བའི། །ཞིང་ཁམས་དེའི་མཚན་ཉིད་ཅི་ཞེ་ན། གཉེན་ལ་འཇམ་པ་དང་། རེག་ན་ཟག་མྱེད་ཀྱི་བདེའ་བ་ཁྱད་པར་ཅན་སྐྱེ་བའོ། །སྣ་ཚོགས་རིན་པོ་ཆེའི་གཞིའི། །དེའི་གཞི་གང་ཞེ་ན། གཞིའ་རིན་པོ་ཆེ་རྣམ་པ་སྣ་ཚོགས་ལས་གྲུབ་པ། བསྟན་ཞིང་འདོད་པ་འབྱུང་བ་དང་། དྭངས་ཤིང་མཛེས་པར་སྣང་བའོ། །མཛེས་པར་བྲིས་ཤིང་སྤྲས་པ་དང་། །ཞིང་ཁམས་དེའི་རྒྱན་ནི་ཅི་ཞེ་ན། བར་བར་དུ་རིན་པོ་ཆེའི་དམིག་མང་རིས་སུ་བྲིས་པ་དང་། དེའི་དམྱིག་ཏུ་གསེར་གྱི་སོར་གདུབ་ལ། གཡུའི་འཕྲ་བཅུག་པ་ལྟར། རིན་པོ་ཆེའི་ཟ་རང་ཚགས་དང་། སྣ་འཕྱོང་དང་། ཆུན་འཕྱང་གི་ལྡ་ལྡིའི་རིས་སུ་སྤྲས་པ་དང་། དེ་ལྟ་བུ་ཡང་དཀྱིལ་འཁོར་གྱི་ལྷ་ལ་དབུལ་ལོ། །ཀུན་འབྱུང་རིན་ཆེན་ཕུང་པོ་འབར། །འཇིག་རྟེན་གྱི་རི་ཐམས་ཅད་ཏྲཾ་ལས་རིན་པོ་ཆེའི་ཕུང་པོ། ཁ་དོག་མཛེས་པའི་འདོད་པའི་ཡོན་ཏན་ཀུན་ལྡན་པ་འོད་འཕྲོ་ཞིང་འོད་ཟེར་འབར་བར་དམིགས་ལ་དབུལ་ལོ། །དབྱིབས་ལེགས་རྫིང་བུ་རོ་མཆོག་བསིལ། །ཆུ་བདུད་རྩིར་དབུལ་བ། འཇིག་རྟེན་གྱི་ཁམས་ཀྱི་མཚོའ་དང་རྫིང་བུ་དང་། འབབ་ཆུ་དང་སྟེང་ཁ་དང་། ཆུ་ཀླུང་ཆེན་པོ་ཐམས་ཅད། བདུད་རྩི་རོ་མཆོག་བརྒྱད་དང་ལྡན་པ། དབྱིབས་ལེགས་པ་བསིལ་ལ་འཇམ་པའི་བདུད་རྩིའི་ཆུ་རྒྱུན་དུ་དམྱིགས་ལ་དབུལ་ལོ། །རིན་ཆེན་ཁང་པ་སྣ་ཚོགས་དང་། །ཁང་པ་གཞལ་ཡས་ཁང་རྒྱན་དང་བཅས་པར་དབུལ་བར་བ སྟན། འཇིག་རྟེན་གྱི་ཁམས་ན་སྦྲ་དང་གུར་དང་། ཁང་པ་ལ་སོགས་པ་ཐམས་ཅད་རྣམས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་། རྒྱན་ཐམས་ཅད་ཀྱིས་བརྒྱན་པ། ཕྱི་ནང་མྱེད་པ་དཔེར་ན་ཤེལ་གྱི་ཕོར་པ་ལྟ་བུར་གསལ་བ་ཟང་ཐལ་བར་དམྱིགས་ལ་དབུལ་ལོ། །རྒྱན་དང་དཔག་བསམ་ལྗོན་པའི་འཚལ། །འཇིག་རྟེན་གྱི་ཁམས་ན་རྩི་ཤིང་ཇི་སྙེད་ཡོད་པ་རྣམས། དཔག་བསམ་གྱི་ལྗོན་ཤིང་གི་འཚལ། དགོས་འདོད་ཐམས་ཅད་འབྱུང་བའི་རྒྱན་དུ་དམྱིགས་ལ་དབུལ་ལོ། །གླུ་དབྱངས་ཚིགས་སུ་བ ཅད་པའི་སྒྲ། །འཇིག་རྟེན་གྱི་ཁམས་ན་གླུ་ལེན་པ་དང་། དབྱངས་དང་ཚིགས་སུ་བཅད་པའི་སྒྲ་ཇི་སྙེད་ཡོད་པ་ཐམས་ཅད ། བདེའ་བར་གཤེགས་པ་ལ་ཚིགས་སུ་བཅད་པའི་བསྟོད་པ་བྱེད་པར་བསམས་ལ་དབུལ་ལོ། །བླ་རེ་རྒྱལ་མཚན་ན་བཟའ་གདུགས། །འཇིག་རྟེན་གྱི་ཁམས་ཀྱི་གོས་ཀྱི་རྣམ་པ་ཇི་སྙེད་ཡོད་པ་ཐམས་ཅད་ནི། བདེ་བར་གཤེགས་པ་ལ། བླ་རེ་དང་། རྒྱལ་མཚན་དང་། ན་བཟའ་དང་། གདུགས་དང་བ་དན་ལ་སོགས་པར་བསམས་ལ་དབུལ་བར་བྱའོ། ༈ །དོ་ཤལ་དཔུང་རྒྱན་སེ་མོ་དོ། །གཟུགས་ལྷ་དང་ལྷ་མོར་རྒྱན་གྱིས་བརྒྱན་ནས། འཇིག་རྟེན་གྱི་ཁམས་ན་ནོར་བུ་དང་། ཕྱག་གདུབ་དང་། ཞབས་གདུབ་དང་། རྒྱན་ཇི་སྙེད་ཡོད་པ་ཐམས་ཅད་ནི། བདེའ་བར་གཤེགས་པ་ལ་དབུའ་རྒྱན་དང་། ཕྱག་གདུབ་དང་། ཞབས་གདུབ་དང་། འགུར་ཆུ་དང་། དོ་ཤལ་དང་། དཔུང་རྒྱན་དང་། སེ་མོ་དོ་དང་། རྒྱན་རྣམ་པ་སྣ་ཚོགས་པར་བསམས་ལ་དབུལ་ལོ། །མཛེས་པའི་རྒྱན་རྣམས་སྣ་ཚོགས་དང་། །འཇིག་རྟེན་གྱི་ཁམས་ན་གོས་ཡོད་པ་རྣམས་ནི། བདེའ་བར་གཤེགས་པ་ལ་སྐུའི་སྟོད་གཡོགས་དང་། གསུང་གི་སྨད་དཀྲིས་དང་། ཐུགས་ཀྱི་ཟི་ལྡིར་དང་། ཡོན་ཏན་གྱི་ཆོས་གོས་དང་། མཛད་པ་ལས་ཀྱི་ཕུ་དུང་དང་། འགུར་ཆུ་ཟེ་པྲོག་དང་། སྐེད་ཆིངས་ནོར་བུའི་རྩར་འཕྱོང་ལ་སོགས་པ་དབུལ་ལོ། །བཟའ་དང་བཏུང་བའི་མཆོག་རྣམས་དང་། །འཇིག་རྟེན་གྱི་ཁམས་ན་བཟའ་བ་དང་། བཅའ་བ་དང་། བཏུང་བ་དང་། མུར་བ་དང་། ལྡག་པའི་ལོངས་སྤྱོད་ཇི་སྙེད་ཡོད་པ་ཐམས་ཅད་ནི། བདེའ་བར་གཤེགས་པ་ལ་རོ་མཆོག་བརྒྱ་དང་ལྡན་པའི་བདུད་རྩིར་བསམས་ལ་དབུལ་ལོ། །རང་ལ་མཛེས་པར་བརྒྱན་པའི། །ལྷ་དང་ལྷ་མོ་རྡུལ་སྙེད་ཀྱི། །བྲོ་གར་ལ་སོགས་བསམ་ཡས་ཀྱིས། །འཇིག་རྟེན་གྱི་ཁམས་ན་སྐྱེས་པ་དང་བུད་མྱེད་དང་། བུ་མོ་དང་། བུ་ཕོ་དང་། ཇི་སྙེད་ཡོད་པ་ཐམས་ཅད། རང་རང་གི་རྒྱན་མཛེས་པར་བརྒྱན་པ། གྲངས་བསམ་གྱིས་མི་ཁྱབ་པ་ནམ་མཁའི་རྡུལ་ཕྲ་མོ་སྙེད་དང་གྲངས་མཉམ་པ། དེ་དག་ཐམས་ཅད་ཀྱང་རྐང་པས་སྟབས་མཛེས་པའི་བྲོ་བརྡུང་བ་དང་། ལག་པས་ཕྱག་རྒྱ་མཛེས་པའི་གར་བྱེད་པར་བསམས་ལ་དབུལ་ལོ། །ཕྱོགས་བཅུ་ནམ་མཁའི་ཁམས་བཀང་ནས། །གོང་མ་ལྟ་བུའི་ཏིང་ངེ་འཛིན་གྱི་མཆོད་པ་དེས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་གང་བར་དམིགས་ལ། དཀྱིལ་འཁོར་ཀུན་ལ་རྒྱས་པར་དབུལ། །དཀྱིལ་འཁོར་གྱི་ལྷ་ཚོགས་རེ་རེ་ཞིང་ལ་རྒྱས་པར་དབུལ་བར་བྱའོ། ༈ །སྐལ་ལྡན་གསལ་བའི་ཁྱད་པར་གྱིས། །རིམས་ཀྱིས་ཡང་ན་ཅིག་ཆར་དུ། །ཚད་དང་དབུལ་ཐབས་བསྟན་པ། དབུལ་བའི་ཐབས་ནི་མ་ཧཱ་ཡོ་གའི་སྒོར་ཞུགས་པའི་རྣལ་འབྱོར་པ་དེ་ནི་སངས་རྒྱ་བའི་སྐལ་བ་དང་ལྡན་པ་སྟེ། དེ་ལ་ཏིང་ངེ་འཛིན་གསལ་མི་གསལ་གྱི་ཁྱད་པར་གྱིས། མཆོད་པ་ཡང་གསལ་ན་ཅིག་ཆར་དུ་དབུལ་ལ། མི་གསལ་ན་རིམས་ཀྱིས་དབུལ་ལོ། །བློ་ཆེ་ན་ཅིག་ཆར་རམ་དུས་གཅིག་ལ་དབུལ་ལ། བློ་ཆུང་ན་རིམས་ཀྱིས་དབུལ་ལོ། །བློ་ཤིན་ཏུ་ཆུང་ན་རིམ་པའམ་མོས་པས་དབུལ་བར་བྱའོ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །ནམ་མཁས་གར་ཁྱབ་པར་ཆོས་ཀྱི་དབྱིངས་ཀྱིས་ཁྱབ། ཆོས་ཀྱི་དབྱིངས་ཀྱིས་གར་ཁྱབ་པར་བདེའ་བར་གཤེགས་པས་ན། མཆོད་པ་དང་བདེའ་བར་གཤེགས་པ་མཉམ་པར་སྦྱོར་ཞིང་དབུལ་ལོ། །དེ་ནི་རྩོལ་བ་དང་བཅས་པའི་མཆོད་པ་མྱིན་ཏིང་ངེ་འཛིན་གྱིས་འབུལ་བས་ན་མཆོད་པའི་ཕྱག་རྒྱ་ཆེན་པོར་བསྒོམ་པའོ། །ཐོག་མར་བདག་ཉིད་རྟོགས་གོམས་བསྒྲལ། །རྟོགས་པས་བདག་བསྒྲལ་བ་བསྟན། ཐོག་མ་ནི་བདག་དང་གཞན་གཉིས་ལས། ཐོག་མར་བདག་བ སྒྲལ་ལོ། །བདག་ཉིད་ནི་རང་ལུས་སོ། །རྟོགས་པ་ནི་དབང་པོ་ཡུལ་གྱི་སྒྲོལ་བ་སྟེ། ཡུལ་དུ་སྣང་བ་ཐམས་ཅད་ཡུམ་གྱི་དཀྱིལ་འཁོར། ཤེས་པ་འཇུག་པ་ཐམས་ཅད་ཡབ་ཀྱི་དཀྱིལ་འཁོར་བསམ་མོ། །བསྒོམ་པ་ནི་རང་ལུས་སྐྱེ་བ་མྱེད་པར་སྒོམ། མ་རིག་པ་དང་ལོག་ལྟ་དང་བདག་འཛིན་ལ་སོགས་པ་ཕྱིན་ཅི་ལོག་གི་སྣང་བ་གང་ཡིན་པ་ཐམས་ཅད་མཆོད་པར་དབུལ་ལོ། །དེ་ནས་གཉིས་མྱེད་བློ་ཡིས་ནི། །ཐུགས་རྗེས་གཞན་སྒྲལ་བ་བསྟན། དེ་ལྟར་རྟོགས་པས་བདག་བ སྒྲལ་བ་དེ་ནས། ཐུགས་རྗེས་གཞན་བ སྒྲལ་བ་ནི། བདག་རྣལ་འབྱོར་པ་དབྱིངས་དང་ཡེ་ཤེས་གཉིས་སུ་མྱེད་པ་དང་། ཐབས་དང་ཤེས་རབ་གཉིས་སུ་མྱེད་པའི་དོན་རྟོགས་པའི། གང་ཟག་དེ་ཡིས་ནི། ཞེས་སོ། །བློ་ངན་འཇིག་རྟེན་སྙིང་རེ་རྗེ། །བློ་ཆུང་བའམ་སེམས་གཉིས་སུ་མྱེད་པའི་གཉིས་སུ་འཛིན་པ་དེ་དག །སྙིང་རྗེ་ཆེན་པོའི་ཡུལ་དུ་དམྱིགས་ལ། འཇིག་རྟེན་ན་གནས་པའི་སེམས་ཅན་ཐམས་ཅད་སྙིང་རྗེའི་འདུ་ཤེས་ཀྱིས། གཉིས་སུ་མྱེད་པར་བསྒྲལ་བར་བྱ། །བདག་ཉིད་སྒྲོལ་བའི་ལྷ་ཏ་ཀི་ར་ཙར་གསལ་བ་དང་། གྲི་འཇམ་དཔལ་ཡེ་ཤེས་སེམས་དཔར་གསལ་བ་དང་། བསྒྲལ་བའི་སེམས་ཅན་ཐམས་ཅད་དེ་དག་ཏུ་རུ་ཏྲ་གསལ་བར་བྱས་ལ། བདག་ཏུ་རྟོག་པ་རྩད་ནས་བཅད་ནས། སེམས་འོག་མིན་དུ་བསྒྲལ་བ་དང་། ཕུང་པོ་འདོད་ཡོན་གྱི་ལྷ་མོར་བྱས་ལ། དཀྱིལ་འཁོར་གྱི་ལྷ་ལ་དབུལ་བར་བྱའོ། །དེ་བས་ན་བདག་དང་གཞན་གཉིས་སུ་མྱེད་པར་བསྒྲལ་བར་བྱའོ། ༈ །གསལ་ལྡན་མའམ་བྱིན་བརླབས་ལ། །སྦྱོར་བའི་མཆོད་པ་ནི་ལྔ་ལས། འདི་མངོན་དུ་ཕྱུང་བ་སྦྱོར་བའི་མཆོད་པ་སྟེ། དེ་ཡང་ཡུམ་དེ་རང་གི་ཏིང་ངེ་འཛིན་བསྒོམ་ཤེས་ན་གསལ་ལྡན་མ་ཞེས་བྱ་སྟེ། རྣལ་འབྱོར་པས་བྱིན་གྱིས་བརླབས་མི་དགོས། ཏིང་ངེ་འཛིན་བསྒོམ་མི་ཤེས་ན། རྣལ་འབྱོར་པས་བྱིན་གྱིས་བརླབས་ལ་བྱའོ། །ཐབས་ཡབ་དང་ཤེས་རབ་ཡུམ་གཉིས་མྱེད་པའི། །ཐབས་ཡབ་རྡོ་རྗེ་སེམས་དཔར་བསྒོམ། མཁའ་རྡོ་རྗེ་རྩེ་ལྔ་པར་སྒོམ། རྩ་བར་ༀ། སྐེད་པར་ཧཱུྃ། རྩེ་མོར་ཕཊ་བསམ་མོ། །ཤེས་རབ་ཡུམ་དབྱིངས་ཕྱུག་མར་བསྐྱེད། མཁའ་པད་མ་འདབ་བརྒྱད་དུ་བསམ། དཀྱིལ་དུ་ཧཱུྃ་དགོད་པར་བྱ། ཡབ་ཡུམ་གཉིས་མྱེད་དུ་སྦྱོར་བ་བྱེད་པ་ནི། ཡུམ་གྱིས་ས་མ་ཡ་ཧོ། ས་མ་ཡ་སྟྭོཾ། ས་མ་ཡ་ཧཱུྃ་ཞེས་བརྡས་སྐུལ། ཡབ་ཀྱིས་ར་ག་ཡ་ཧོ། ཞེས་ལན་བྱིན་ནོ། །འཁྲིལ་སྦྱོར་བ་བའི་མཆོད་ཆེན་མཉམ་དུས་གསུམ་སངས་རྒྱས་དང་སྦྱོར་བས། །ཡབ་ཡུམ་ཐབས་དང་ཤེས་རབ་གཉིས་སུ་མྱེད་པའི་མཆོད་པ་མཛད་ནས། རིག་པ་ནང་དུ་བཟུང་བས། དགའ་བ་དང་། མཆོག་དགའ་དང་། ལྷན་ཅིག་སྐྱེས་པའི་དགའ་བ་དང་། དགའ་བྲལ་གྱི་དགའ་བ་ཆེན་པོས་རང་ལུས་བདེའ་བས་རྒྱས་པར་བྱ། དེ་ནས་བྱང་སེམས་ཕྱིར་བྱུང་བ་དང་། བདག་ཉིད་མཉེས་པས་མཉེས་པར་བྱ། །ལྷག་པ་བྱང་ཆུབ་སེམས་ཕར་ལ་འཕྲོས་པས་དཀྱིལ་འཁོར་གྱི་ལྷ་ལ་མཆོད་པའི་ཕུལ། བདག་ཉིད་ཡབ་ཡུམ་ལ་ཐིམ་པས། རང་གི་རྟོག་ཚོགས་ཉིད་དཀྱིལ་འཁོར་དུ་གསལ་བ་ལ་མཉེས་པའི་མཆོད་པ་དབུལ་ལོ། ༈ །སྤྱིར་སྒྲོལ་བའི་མཆོད་པ་ལ་ལྔ་སྟེ། རང་བཞིན་གྱིས་སྒྲོལ་བ་དང་། ཏིང་ངེ་འཛིན་གྱི་དང་། དཔའ་བོ་ཡུལ་གྱི་དང་། ཐབས་ཆེན་པོའི་དང་། མངོན་དུ་ཕྱུང་བའི་དང་ལྔ་ལས། འདིར་རང་བཞིན་གྱི་སྒྲོལ་བའོ། །དང་པོ་ནི་ཕུང་པོ་ཁམས་དང་སྐྱེ་མཆེད་ཐམས་ཅད་དོན་དམ་པར་མ་སྐྱེས་པ། ཀུན་རྫོབ་ཏུ་ཡེ་ཤེས་ཀྱི་དཀྱིལ་འཁོར་སངས་རྒྱས་པའོ། །དེ་བས་ན་མཆོག་གི་མཆོད་པ་ནི། མཆོད་པ་ཐམས་ཅད་ཀྱི་ཐོག་མར་འགྲོ་བའོ། །རང་རིག་པ་ཉིད་རྟོགས་ནས། མ་རིག་པའི་མུན་པ་རྣམས་མཆོད་པར་འབུལ་བའོ། །དོན་གྱི་ངོ་བོ་ལ་སྒྲོལ་བར་མ་གྱུར་བའམ། མཆོད་པར་མ་གྱུར་པ་གང་ཡང་མྱེད་པའོ། །མཉམ་པའི་སྒྲུབ་རྫས་ཆེན་པོ་དག །བདག་དང་མཉམ་པའི་ཚོགས་དབུལ། །རྫས་ཀྱི་མཆོད་པ་ནི་གསུམ་སྟེ། ངོ་བོ་དང་། གྲུབ་པ་བཞིས་རྒྱན་པ་དང་། དབུལ་ཐབས་སོ། །ངོ་བོ་ནི། དྲི་ཆེན་དྲི་ཆུ་མཾ་ས་རག་ཏ་ལྷག་པའི་བྱང་སེམས་དང་ལྔའོ། །གྲུབ་པ་བཞིས་རྒྱན་པ་ནི། ཆོས་ཉིད་རང་བཞིན་གྱིས་གྲུབ་པ་དང་། ཆོས་ཅན་ངོ་བོས་གྲུབ་པ་དང་། མཐུའ་ཅན་ལས་ཀྱིས་གྲུབ་པ་དང་། བྱིན་བརླབས་ནུས་པས་གྲུབ་པའི་རྫས་སོ། །དེ་ལྟ་བུའི་གྲུབ་རྫས་ཆེན་པོ་ནི། རང་བཞིན་གྱིས་མཉམ། ལས་ཀྱིས་མཉམ་པའི་ཕྱིར་ན། མཉམ་པའི་གྲུབ་རྫས་ཏེ། བདག་དམ་ཚིག་སེམས་དཔའ་དང་། ལྷ་ཡེ་ཤེས་སེམས་དཔའ་མཉམ་ཞིང་དབྱེར་མྱེད་པའི་ཚོགས་ལ། མཆོད་པ་བླ་ན་མྱེད་པའི་དམ་རྫས་དག་པའི་མཆོད་པ་འབུལ་བའོ། །བཟའ་དང་བཅའ་དང་བཏུང་དང་བགོའ། །རྒྱུའི་རྫས། བཟའ་བ་ཟས་ཀྱི་རྣམ་པ། བཅའ་བ་ཟུས་པའི་རྣམ་པ་དང་། བཏུང་བ་ཆང་གི་རྣམ་པ་དང་། བགོའ་བ་གོས་ཀྱི་རྣམ་པ་རྣམས་ནི། ལོངས་སྤྱོད་རྫས་ཀྱི་མཆོད་པ་ཆེན་པོར་དབུལ་ལོ། །ལོངས་སྤྱོད་ལྔ་ལྡན་ཐམས་ཅད་ཀུན། །བྱིན་གྱིས་རླབས་པ་བསྟན། དམྱིག་གཟུགས་ཀྱི་ལོངས་སྤྱོད་དང་། རྣ་བ་སྒྲའི། སྣ་དྲིའི། ལྕེ་རོ་ལུས་རེག་བྱའི་ལོངས་སྤྱོད་དང་། ལྔ་ནི་རང་ལ་གང་ཡོད་ལྡན་ན་དངོས་སུ་དབུལ། མ་ལྡན་ན་ཏིང་ངེ་འཛིན་གྱིས་སྤྲུལ་ལ་དབུལ་ཏེ། ལོངས་སྤྱོད་ལྔ་པོ་ཐམས་ཅད་ཀུན་དབུལ་ལོ། །དཀྱིལ་འཁོར་ཡེ་ཤེས་ལྷའི་ལ་ནི་དཀྱིལ་འཁོར་མཆོད་པ་ལྷ་མོའི་ཐིམ། །དབུལ་བཅས་བསྟན། ཡེ་ཤེས་ལྷའི་དཀྱིལ་འཁོར་དབུལ་བྱ་ལ། འབུལ་བྱེད་བདག་གི་ཐུགས་ཀ་ནས་འདོད་ཡོན་ལྷ་མོ་མང་པོ་སྤྲོས་ནས་ཐིམ་པའོ། །དེ་ལ་ནི་ཡེ་ཤེས་ལ་ཡེ་ཤེས་རོལ་ཞེས་བྱ། ཆོས་ཉིད་ལ་ཆོས་ཉིད་ཐིམ་ཞེས་བྱ། ལྷ་ལ་ལྷ་རོལ་ཞེས་བྱའོ། །ཨ་ལི་ཨུ་ལི་སྔགས་ཀྱིས་དབུལ་ལོ། །ཨཱོཾ་ཕྱོགས་བཅུ་དུས་བཞི་རྫོགས་པའི། །སྐུ་ལྔར་མངོན་པ་ཉིད་ཡི་གེ་ཨཱོཾ་དེའི་ཕྱིར་འགོའ་དྲངས་པའོ། །མངོན་པར་བྱང་ཆུབ་པའི་སྐུ་ལ་བསྟོད་པ། ཕྱོགས་བཅུ་དུས་བཞིར་མངོན་པར་རྫོགས་པ་སངས་རྒྱས་པའི་ལྷ། གནས་དང་དུས་ཀུན་ཏུ་ཐུགས་དམ་གྱི་དབང་གིས་འགྲོ་བའི་དོན་རྫོགས་པར་མཛད་པ་ནི། རྒྱལ་བ་ཡབ་ཡུམ་ལྔ་ཡང་སྐུ་ལྔར་འདུས། རང་འབྱུང་ཡེ་ཤེས་ཉིད་རང་འབྱུང་ལ་མ་འགགས་པར་གསལ་བ་ནི། མངོན་པར་བྱང་ཆུབ་པའི་སྐུའོ། །ཡེ་ཤེས་དཀྱིལ་འཁོར་ཐིག་ལེ་ཆེ། །ཆོས་ཀྱི་སྐུ་ལ་བསྟོད་པ། ཡེ་ཤེས་ལྔ་མི་རྟོག་པའི་ཡེ་ཤེས་སུ་གསལ་བ་ནི། དཀྱིལ་འཁོར་དེ་ཉིད་ཁྱབ་བརྡལ་ཆེན་པོར་གནས་པ་ནི་ཐིག་ལེའོ། །དེ་ཡང་ཆོས་ཉིད་ཀྱི་སྐུ་ནི་སྤྲོས་པའི་མཚན་མ་ཐམས་ཅད་བྲལ་བའི་ཆོས་ཉིད་ཡིན་ཏེ། དེ་ལྟར་སྣང་བའོ། །བསོད་ནམས་དཀྱིལ་འཁོར་སྐུའི་ཚོགས། །ལོངས་སྤྱོད་རྫོགས་པའི་སྐུ་ལ་བསྟོད་པ། གང་ཡང་མ་སྤངས་པར་ཟག་པ་མྱེད་པའི་བསོད་ནམས་རང་སྣང་བ་ནི། དཀྱིལ་འཁོར་ལྟ་བུ་སྟེ། འབྲས་བུ་ཡེ་ཤེས་ཀྱི་ཚོགས་ལས་ངེས་པར་འབྱུང་བ་ལོངས་སྤྱོད་རྫོགས་པའི་སྐུ་མཚན་དང་དཔེའ་བྱད་དུ་ལྡན་པའོ། །རྒྱུ་བསོད་ནམས་ཀྱི་ཚོགས་བར་ཆད་མྱེད་པ་ལས་འབྲས་བུ་ངེས་པར་འབྱུང་བ་ནི། ལོངས་སྐུ་དེ་དག་ལས་འཁོར་སྤྲུལ་སྐུའི་ཚོགས་འགྲོ་བ་རིགས་དྲུག་གི་དོན་སྤྲུལ་སྐུ་མང་པོར་མཛད་དོ། །སྣང་སྟོང་ཐིག་ལེ་ཀུན་ཏུ་རྫོགས་ཧོ། །སྤྲུལ་པའི་སྐུ་ལ་བསྟོད་པ། སྣང་བ་རྟགས་སྟོང་པ་དོན། དེ་གཉིས་སུ་མེད་པས་ཐིག་ལེ། ཀུན་ཏུ་རྫོགས་པས་གཉིས་སུ་མྱེད་པས་བྲག་ཆ་ལྟ་བུའོ། །དེ་སྐུ་གསུང་ཐུགས་དབྱེར་མེད་པ་རང་གི་ངོ་བོ་མཉམ་པ་ཉིད་འཇིགས་པ་ཐམས་ཅད་དང་བྲལ་བར་རང་བཞིན་གྱིས་གྲུབ་པ་ནི་རྡོ་རྗེའི་སྐུའོ། །དེ་སྐུ་ལྔ་ལ་དགྱེས་པས་ན་ཧོ་ཞེས་པའོ། །ཨཱོཾ་རྡོ་རྗེ་བསོད་ནམས་ཐིག་ལེ་ཆེ། །ཆོས་སྐུ་སྐྱེ་མྱེད་དོན་གྱི་གསུང་། ལོངས་སྐུ་དགོངས་པ་བརྡའི་གསུང་། གསུང་ལྔར་མངོན་པ་ཉིད་ཡི་གེ་ཨོཾ་དེའི་ཕྱིར་མགོ་དྲངས་པའོ། །རྡོ་རྗེ་བསོད་ནམས་ཀྱི་ངོ་བོ་སྒྲ་མ་སྤངས་པའི་ཕྱིར་ན། བརྡས་སྟོན་ཏེ། ལོངས་སྤྱོད་རྫོགས་པའི་སྐུ་ཉིད། ཕྱག་དང་ཞབས་དང་སྤྱན་དང་ལྗགས་ཀྱི་བརྡས། བྱང་ཆུབ་སེམས་དཔའི་འཁོར་ལ་བརྡ་གོ་བ་སྤྲོད་པ་དང་། སྒྲིབ་པ་སེལ་བས་ན་རྡོ་རྗེ། འབྲས་བུ་ཡེ་ཤེས་ཀྱི་བསོད་ནམས་ལས་གྲུབ་པས་ན་ལོངས་སྐུའོ། །ཞེས་བྱའོ། །སྤྲོས་པ་མྱེད་པའི་ཐིག་ལེ་བརྗོད་དུ་མྱེད་པས། དོན་གྱི་གསུང་ཆེན་པོས་ཏེ་ཆོས་ཀྱི་སྐུར་གནས་པའོ། །རྡོ་རྗེ་ཡེ་ཤེས་དཀྱིལ་འཁོར་ལྡན། །མངོན་པར་བྱང་ཆུབ་པའི་སྐུ་རིག་པ་སྒྱུ་མའི་གསུང་ངོ་། །རྡོ་རྗེ་ནི་སྟོང་ན། ཡེ་ཤེས་ནི་སྟོང་པའི་དོན་ཤེས་པ། དཀྱིལ་འཁོར་ནི་དོན་རྟོགས་པ། ལྡན་པ་ནི་སྟོང་པའི་དོན་ཡེ་ཤེས་སུ་ལྡན་པ། ཡེ་ཤེས་དཀྱིལ་འཁོར་དུ་ལྡན་པའོ། །དེ་ལྟ་བུ་དེས་མ་བརྗོད་པར་ཐམས་ཅད་གསལ་བར་བརྡ་སྤྲོད་པའི་ཕྱིར་ན་རིག་པའི་གསུང་ངོ་། །དེ་ནི་མངོན་པར་བྱང་ཆུབ་པའི་གསུང་ངོ་། །རྡོ་རྗེ་སྒྲ་ཆེན་མཐའ་ཡས་པ། །སྤྲུལ་སྐུ་སྣ་ཚོགས་ཚིག་གི་གསུང་ངོ་། །རྡོ་རྗེ་སྟོང་པ་སྒྲ་ཆེན་ཚངས་པའི་གསུང་། མཐའ་ཡས་སྣ་ཚོགས་སུ་སྣང་བ་སྟེ་སྤྲུལ་པའི་སྐུའི་ཚངས་པའི་གསུང་གིས། འཇིག་རྟེན་དྲུག་གི་ཕྱོགས་བཅུ་ཐམས་ཅད་ཀྱིས་གོ་བར་སྤྱོད་པ་དང་། དེ་དག་གི་ཉོན་མོངས་པའི་སྒྲིབ་པ་ཐམས་ཅད་གཏན་ནས་འཇོམས་པར་བྱེད་དོ། །གཅིག་ལ་མང་པོ་གྲགས་པའི་ཕྱིར་ན། ཚངས་པའི་གསུང་ངོ་། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །རྡོ་རྗེའི་སྐུ་གྲགས་སྟོང་དབྱེར་མྱེད་ཀྱི་གསུང་། །གསུང་གྲགས་སྟོང་དབྱེར་མྱེད་ཉིད་ཀྱིས་ཐམས་ཅད་ལ་དབང་དུ་བསྒྱུར་བ་དང་། གྲགས་སྟོང་ནི་སོ་སོའི་སྤྱོད་པ་ཐམས་ཅད་དང་བྲལ་བའི་ཕྱིར། ཚིག་མྱེད་པ་ཉིད་བརྗོད་པ་དང་འདྲ་བར་གསལ་བ་གསུང་གི་རང་བཞིན་ཡིན་པས་ན། རྡོ་རྗེའི་གསུང་ངོ་། །དེ་ལྟ་བུའི་དོན་ལ་དགྱེས་པས་ན་ཧོ་ཞེས་པའོ། །ཨཱོཾ་སྐུ་གསུང་ཐུགས་ཀྱི་རྫོགས་པ་ཆེ། །ཆོས་དབྱིངས། སོར་རྟོག །མེ་ལོང་། སྐུ་ནི་ཆོས་སྐུ་ཟག་བྲལ་ཏེ། དེའི་ཐུགས་ནི་མཉམ་པ་ཆེན་པོ་ཡིན་ལ། དེ་ཉིད་ཆོས་ཀྱི་ཡེ་ཤེས་སོ། །གསུང་ནི་མངོན་པར་བྱང་ཆུབ་པ་སྟེ། མི་གཡོའ་བའི་ཐུགས་ཡིན་ལ། དེ་ནི་སོ་སོར་རྟོག་པའི་ཡེ་ཤེས་སོ། །ཐུགས་ནི་ལོངས་སྤྱོད་རྫོགས་པའི་སྐུ་སྟེ། མྱེ་ལོང་ལྟ་བུའི་ཡེ་ཤེས། མི་གཡོའ་བའི་རང་བཞིན། མ་འགགས་པའི་ཐུགས་སོ། །དེ་གསུམ་དབྱེར་མྱེད་པས་ན་རྫོགས་པའོ། །མཆོག་ཏུ་གྱུར་པས་ན་ཆེན་པོར་གནས་པའོ། །ཡོན་ཏན་ཕྲིན་ལས་ཀུན་ཏུ་རྫོགས། །མཉམ་ཉིད། བྱ་གྲུབ། ཡོན་ཏན་ནི་རྡོ་རྗེའི་ཐུགས་ཏེ། མཉམ་པ་ཉིད་ཀྱི་ཡེ་ཤེས་སོ། །འཕྲིན་ལས་ནི་འགྲོ་བ་སྒྲོལ་བའི་ཐུགས་ཏེ། བྱ་བ་གྲུབ་པའི་ཡེ་ཤེས་སོ། །དེ་རྣམས་གཅིག་ཏུ་གནས་པས་ན་ཀུན་ཏུ་རྫོགས་ཞེས་སོ། །ཡེ་ནས་སྐུ་གསུང་ཐུགས་ཡོན་ཏན་འཕྲིན་ལས་ཉེར་ལྔར་རྫོགས་པའོ། །ཡེ་ནས་ལྷུན་རྫོགས་ཀུན་ཏུ་བཟང་། །རིགས་ལྔའི་ཐུགས་ནི་ཡེ་ཤེས་ལྔར་གནས་ཏེ། དེ་ཡང་དེ་རེ་རེ་ལ་ཡང་ཡེ་ཤེས་ལྔ་ལྔར་ལྷུན་གྱིས་གྲུབ་པར་གནས་པས་ན་ཡེ་ནས་ལྷུན་རྫོགས་ཞེས་བྱ། མ་བཙལ་བར་སྐུ་ལྔ་ཡེ་ནས་ལྷུན་གྲུབ་ཏུ་རྫོགས་པ་ན། རང་བཞིན་ཀུན་ཏུ་བཟང་པོ་ཞེས་དེ་ལ་བྱའོ། །འདུས་པའི་ཚོགས་ཆེན་ཐིག་ལེ་ཆེ་ཧོ། སེམས་དཔའ་དང་སེམས་མ་ཐམས་ཅད་ཀྱང་། རང་རང་གི་རིགས་ཀྱི་ཡེ་ཤེས་ལྔའི་རང་བཞིན་དུ་འདུས་པས་ན། རྫོགས་ཞེས་བྱ་བའི་རྒྱལ་བ་ཉིད་དང་དབྱེར་མྱེད་པའི་ཕྱིར་ན། ཐིག་ལེ་ཆེན་པོའོ། །དེ་ལྟ་བུ་ལ་དགྱེས་པས་ན་ཧོ་ཞེས་བྱ་བའོ། ༈ །ཆོས་ཀྱི་དབྱིངས་དང་རང་རིག་པའི་ངོ་བོ་ཉིད་དམིགས་པ་ཉིད། རང་རིག་པའི་ཡེ་ཤེས་ཀྱི་གཞལ་ཡས་ཁང་དུ་ཤར་བ་སྟེ། དེ་ཕྱི་ནང་མྱེད་པར་གསལ་བའི་ཕྱིར། ཡེ་ཤེས་རིན་པོ་ཆེའི་གཞལ་ཡས་ཁང་ངོ་། །མྱི་དམྱིགས་པའི་རིག་པ་ཉིད་སྒྱུ་འཕྲུལ་སྣ་ཚོགས་སུ་སྣང་བས ། སྣང་སྟོང་དབྱེར་མྱེད་མཉམ་པའི་དབྱིངས་ཕྱི་ནང་དང་རྒྱ་ཆེ་ཆུང་མྱེད་པའི་གཞལ་ཡས་ཁང་ངོ་། །ཨཱོཾ་མྱི་དམྱིགས་སྒྱུ་འཕྲུལ་མཉམ་པའི་དབྱིངས། །གཞལ་ཡས་ཁང་། ཞིང་ཁམས། ཆོས་ཀྱི་དབྱིངས་ནི་ཡེ་ནས་རང་གི་ངོ་བོས་སྣང་སྟོང་དབྱེར་མྱེད་པར་མཉམ་པས་ཏེ། དེས་ཐམས་ཅད་དུ་ཁྱབ་པ་ནི་ནམ་མཁའ་དང་མཉམ་པ་མུ་མཐའ་མྱེད་པའི་ཕྱིར་སངས་རྒྱས་ཀྱི་ཞིང་ངོ་། །དེ་ལྟ་བུའི་གཞལ་ཡས་ཁང་དེ་ནི། དེ་བཞིན་གཤེགས་པའི་བཞུགས་གནས་སོ། །མཐའ་ཡས་ཀུན་ནས་སྣ་ཚོགས་འཕྲོ། །འོད་ཟེར། མཐའ་ཡས་ཀུན་ནས་ནི་སྐུའི་གནས་ཀྱི་བ་སྤུའི་བུ་ག་གནས་སོ། །སྣ་ཚོགས་འཕྲོ་ནི་འོད་ཟེར་བསམ་གྱིས་མྱི་ཁྱབ་པ་འཕྲོས་པས་ཁམས་གསུམ་གྱི་སེམས་ཅན་ཐམས་ཅད་ཀྱི་སྒྲིབ་པ་མ་ལུས་པ་སྦྱོང་བར་བྱེད་པའོ། །མཐའ་ཡས་ཀུན་ནས་ལྷུན་གྱིས་ཐིམ། །འདོད་པའི་ཡོན་ཏན་ལྔའི་ལོངས་སྤྱོད་ཐམས་ཅད་ནི། མཆོད་པའི་ལྷ་མོ་ལྔར་ལྷུན་གྱིས་གྲུབ་ནས་མཆོད་པ་དབུལ་བ་དང་། ལྷ་ལ་ལྷ་ཐིམ་ཞེས་བྱའོ། དེ་ཡང་མཐའ་ཡས་པའི་འདོད་ཡོན་ཀུན་ལ་མྱོང་བ་མྱེད་པའི་ཚུལ་གྱིས་སྤྱོད་པས་ན་ལོངས་སྤྱོད་པའོ། །སྣ་ཚོགས་སྐུ་གསུང་ཐུགས་ཆེན་པོ་ཧོ། །གདན་ཁྲི། སྣ་ཚོགས་ཞེས་པ་ནི། སེང་གེ་ལ་སོགས་པ་འབྲས་བུའི་བྱང་ཆུབ་སེམས་དཔའ་རེ་རེ་ཡང་བརྒྱད་བརྒྱད་དུ་སྣང་ནས་རྒྱལ་བའི་གདན་ཁྲི་འདེགས་པ་དང་། སྐུ་སྣང་ལ་རང་བཞིན་མྱེད་པའམ་གསལ་བ་ཉི་ཟླ་དང་། གསུང་ཉེས་པའི་སྐྱོན་གྱིས་མ་གོས་པས་པད་མའི་གདན་དང་། ཐུགས་རིགས་པའི་ཡེ་ཤེས་སུ་རང་སྣང་བའི་བརྟགས་སུ་དགོས་འདོད་འབྱུང་བ་རིན་པོ་ཆེའི་གདན་ནོ། །ཨཱོཾ་ཕྱོགས་བཅུའི་འཇིག་རྟེན་རྡུལ་སྙེད་དུ། །ཞི་བའི་འཕྲིན་ལས། འཕྲིན་ལས་ལྔ་ཚོགས་པའི་ཕྱིར་ཨཱོཾ་གྱིས་སྣ་དྲངས་ནས་སོ། །ཕྱོགས་བཅུའི་འཇིག་རྟེན་གྱི་ཁམས་ནི། མང་ཉུ ང་གི་ཚད་རྡུལ་ཕྲ་རབ་དང་མཉམ་པས་ན་སེམས་ཅན་ཡང་རྡུལ་ཕྲ་རབ་དང་མཉམ་པ་དེ་རྣམས་ནི་དོན་བྱའི་ཡུལ་ལོ། །དེ་ཡང་གདུལ་བྱའི་གནས་ཕྱོགས་བཅུའི་འཇིག་རྟེན་ཚད་རྡུལ་ཕྲ་རབ་དང་། ངོ་བོ་དག་པ་དང་མ་དག་པའི་གདུལ་བྱའོ། །དེ་དག་ནི་ཉོན་མོངས་པ་ཞི་བར་བྱེད་པས་ན་ཞི་བའི་འཕྲིན་ལས་སོ། །རྒྱལ་བའི་དོན་རྣམས་རྡུལ་ཕྲན་སྙེད། །རྒྱས་པའི་ལས། དེ་དག་ཏུ་རྒྱལ་བའི་སྤྲུལ་པས་འགྲོ་བའི་དོན་བྱེད་པ་ཡང་རྡུལ་ཕྲ་རབ་དང་མཉམ་པའོ། །དེ་བས་ན་རྒྱལ་བའི་དོན་རྣམས་ནི་འདུལ་བྱེད་དོ། །རྡུལ་ཕྲན་སྙེད་ནི་འདུལ་ཐབས་སོ། །དེ་རྣམས་འགྲོ་དོན་དཔག་ཏུ་མཛད་པས་ན། རྒྱས་པའི་འཕྲིན་ལས་ཡིན་ནོ། །སྤྲུལ་པ་རྡུལ་ཕྲན་བསམ་ཡས་ཀྱིས། །དབང་གི་ལས། འདུལ་བྱེད་ཚད་ནི། བདེའ་བར་གཤེགས་པའི་སྤྲུལ་པ་ཐུབ་པ་དྲུག་གིས། གྲངས་རྡུལ་ཕྲན་ཙམ་ལ། འདུལ་ཐབས་ཞི་ཁྲོ་སྣ་ཚོགས་སུ་སྣང་བས་བསམ་ཡས་པའོ། །དེ་རྣམས་ཀྱིས་འགྲོ་བ་རྣམས་དབང་དུ་བྱེད་པས་ན་དབང་གི་འཕྲིན་ལས་སོ། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །དྲག་པོའི་ལས། ལྷུན་གྲུབ། དོན་གྲུབ་ཚུལ་ནི། སྐད་ཅིག་གམ་ཡུད་ཙམ་མམ་ཐང་ཅིག་གིས་དོན་བྱེད་པ་དེ་ན་དྲག་པོའོ། །བཏུལ་བའི་ཚད་ནི་མ་བཙལ་བར་ལྷུན་གྱིས་གྲུབ་པའི་འཕྲིན་ལས་སོ། །དེ་ཡང་དོན་མཛད་པས་དེ་མ་ཐག་པའི་འཕྲིན་ལས་ཀྱིས་ཇི་ལྟར་བཏུལ་བ་བཞིན་དུ་ལྷུན་གྱིས་གྲུབ་པར་བྱེད་པས་ན། དྲག་པོ་དང་ལྷུན་གྲུབ་ཀྱི་འཕྲིན་ལས་སོ། །ཨཱོཾ་ཐམས་ཅད་མ་ལུས་སྐུ་གསུང་ཐུགས། །འཁོར་འདས་ཀྱི་དངོས་པོ་གཉིས་ཀྱིས་བསྡུས་པའི་ཆོས་ཐམས་ཅད་སྐུ་གསུང་ཐུགས་སུ་གནས་ལ། སྐུ་གསུང་ཐུགས་ཀྱི་རོལ་པས་ཡོན་ཏན་འཕྲིན་ལས་སུ་རང་ཤར་ཏེ། སྐུ་གསུང་ཐུགས་ཡོན་ཏན་འཕྲིན་ལས་ལྔར་གནས་སོ། །སྐུ་གསུང་ཐུགས་ཀྱི་བདག་ཉིད་ཆེ། །དེ་ལྟར་སྐུ་གསུང་ཐུགས་ཀྱང་རིག་པའི་ཡེ་ཤེས་ཀྱི་བདག་ཉིད་དུ་རང་ཤར་བ་ཡིན་ཏེ། དེ་དག་གི་ངོ་བོ་ནི་བདག་ཉིད་ཆེན་པོ་དཔལ་ཀུན་ཏུ་བཟང་པོའོ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །བདག་ཉིད་ཆེན་པོས་ཐམས་ཅད་ལ་ཁྱབ་པ་ལྟར་གནས་པ་ཉིད་ན་དེས་ཅི་མཛད་ཞེ་ན། འཁོར་འདས་རྣམས་ལ་ཁྱབ་པར་མཛད་པའོ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། ༈ །སྐུ་གསུང་ཐུགས་ཀྱིས་ཀྱང་དངོས་པོ་ཐམས་ཅད་ལ་མ་ཁྱབ་པ་གང་ཡང་མྱེད་དོ། །ཐམས་ཅད་ལ་ཁྱབ་ཀྱང་བདག་ཉིད་ཆེན་པོར་སྦྱོར་བའི་ཕྱིར། སྤྲོས་པ་ཐམས་ཅད་དང་བྲལ་བས་ན་ཐིག་ལེ་ཆེ་ཞེས་བྱ་བའོ། །དེ་ལྟ་བུའི་དོན་ལ་དགྱེས་པས་ན་ཧོ་ཞེས་གསུངས་སོ། །སྒྱུ་འཕྲུལ་དྲ་བར་མངོན་རྫོགས་པའི། །སྒྱུ་ཡུམ་སྟེ་ཆོས་ཀྱི་དབྱིངས། འཕྲུལ་ཡབ་སྟེ་མ་འགགས་པར་སྣང་བ། དྲ་བ་འབྲེལ་པ་སྟེ་ཐབས་ཤེས་རབ་ཟུང་དུ་འབྲེལ་པའོ། །མངོན་རྫོགས་ནི་ཏིང་ངེ་འཛིན་གསལ་བའི་རིག་པ་ལ་མངོན་དུ་རྫོགས་པའོ། །ཏིང་ངེ་འཛིན་བསྟན་པའི་ཡོན་ཏན ། དཀྱིལ་འཁོར་བསྟན་པའི་ཏིང་ངེ་འཛིན། །དེ་ལྟར་ལྷའི་དཀྱིལ་འཁོར་གསལ་བར་རྫོགས་པ་དང་། ཤིན་ཏུ་ཏིང་ངེ་འཛིན་ལ་བརྟན་པ་ཐོབ་པའི་རྣལ་འབྱོར་གྱི་དབང་ཕྱུག་ཆེན་པོ་ཕོ་མོ་རྣམས་སོ། །བྲོ་གར་འདུ་འཕྲོའི་ཡོ་བྱད། བྲོ་གར་འདུ་འཕྲོའི་ཕྱག་རྒྱ་ཡིས། །རྣམ་པར་སྣང་མཛད་ཀྱི་དངོས་གྲུབ། འཛུལ་ལམ་ནམ་མཁར་འགྲོ་བར་འགྱུར། ༈ །དེ་ལྟ་བུའི་རྣལ་འབྱོར་ཕོ་མོ་རྣམས་ཀྱི་ཡན་ལག་ལྔ་ལ་ཚོམ་བུ་ལྔའི་དཀྱིལ་འཁོར་དུ་གསལ་བར་བསྒོམས་ལ། རྐང་པས་བྲོ་བརྡུང་བ་དང་། ལག་པས་གར་བྱ་བ་དང་། ཡིད་ཀྱིས་ལྷ་རྣམས་ལ་བྱང་ཆུབ་སེམས་འཕྲོས་པས། ལྷའི་སྐུ་གསུང་ཐུགས་མཉེས་པ་དང་། སེམས་ཅན་གྱི་དོན་བྱས་ནས་ཚུར་ལ་འདུས་པས། བདག་གིས་དངོས་གྲུབ་ཐོབ་པ་ནི། རིགས་ལྔའི་དངོས་གྲུབ་སྟེ། ཚེ་འདིར་ནམ་མཁའ་ལ་བྱ་བཞིནདུ་འཕུར་བ་དང་། ས་ལ་བྱི་བཞིན་དུ་འཛུལ་བ་དང་། ཆུ་ལ་མི་འབྱིང་བའི་དངོས་གྲུབ་འཐོབ་བོ། །གླུ་ཚིག་སྒྲའི་ཡོ་བྱད། གླུ་ཚིག་སྒྲ་ཡི་ཕྱག་རྒྱ་ཡིས། །རྣལ་འབྱོར་པ་ཕོ་མོ་རྣམས་ལྟ་བ་དང་ཏིང་ངེ་འཛིན་གསལ་བས་རྡོ་རྗེའི་གླུ་བླང་བ་དང་། དོན་ལྡན་རྡོ་རྗེ་ཡི་ཚིག་གིས་བདེ་བར་གཤེགས་པ་མཉེས་པར་བྱེད་པ་ལས་མི་འདའ་བའི་ཕྱིར་ན་ཕྱག་རྒྱའོ། །སྣང་བ་མཐའ་ཡས་གསུང་གི །ཆོས་ཀྱི་དངོས་གྲུབ་ཐོབ་པར་འགྱུར། །ཆོས་ཉིད་ཀྱི་གསུང་དང་བསྟན་པ་ཐམས་ཅད་དུས་གཅིག་ཏུ་མཁྱེན་པའི་དངོས་གྲུབ་འཐོབ་བོ། །རྒྱན་དང་བགོའ་བའི་ཡོ་བྱད། རྒྱན་དང་བགོའ་བའི་ཕྱག་རྒྱ་ཡིས། །རྣལ་འབྱོར་ཕོ་མོ་རྣམས་ལྷར་གསལ་བ་ལས། ལུས་ལ་རིན་པོ་ཆེའི་རྒྱན་སྣ་ཚོགས་གདགས་པ་དང་། དར་དང་ཟ་འོག་ལ་སོགས་པའི་གོས་སྣ་ཚོགས་བགོ་བའོ། །མི་བསྐྱོད་པའི་དངོས་གྲུབ། འབར་བའི་རྒྱལ་པོ་ཐུབ་མེད་འགྲུབ། །ལོངས་སྤྱོད་དེའི་ཡོན་ཏན་ནི། སྐུ་གང་གིས་ཀྱང་ཟིལ་གྱིས་མི་ནོན་པའི་དངོས་གྲུབ་འཐོབ་པའོ། །བཟའ་དང་བཏུང་བའི་ཡོ་བྱད། བཟའ་དང་བཏུང་བའི་ཕྱག་རྒྱ་ཡིས། །རྣལ་འབྱོར་པ་རྣམས་ལོངས་སྤྱོད་ཐམས་ཅད་བདུད་རྩིའམ་འདོད་ཡོན་གྱི་ལྷ་མོར་བྱིན་གྱིས་རླབས་ནས་བཟའ་བཏུང་ལོངས་སྤྱོད་ནས་ཕུལ་ཞིང་དངོས་གྲུབ་བླངས་པ་ཡིས། རིན་ཆེན་འབྱུང་ལྡན་གྱི་དངོས་གྲུབ། ཡིད་བཞིན་སྐུ་དང་བདུད་རྩི་འགྲུབ། །ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བའི་སྐུ། ལོངས་སྤྱོད་ཐམས་ཅད་བདུད་རྩིར་འགྲུབ་པར་འགྱུར་རོ། །ཨ་ལི་ཀ་ལིའི་ཡོ་བྱད། ཨ་ལི་ཀ་ལིའི་ཕྱག་རྒྱ་ཡིས། །སྒྲོལ་བ་དང་སྦྱོར་བའི་མཆོད་པ་ཚུལ་བཞིན་དུ་ཕུལ་ལ། ཐབས་ཤེས་རབ་གཉིས་སྙོམས་འཇུག་གི་ཕྱག་རྒྱར་གྱུར་པས་ཐབས་ཤེས་རབ་གཉིས་སུ་མྱེད་པར་གནས་པ་དེ་ཡང་། དོན་ཡོད་གྲུབ་པའི་དངོས་གྲུབ། ཐམས་ཅད་ཐམས་ཅད་འགྲུབ་པར་འགྱུར། །ཐུན་མོང་དང་ཐུན་མོང་མ་ཡིན་པའི་དངོས་གྲུབ་ཐམས་ཅད་ཚུལ་བཞིན་དུ་འགྲུབ་པར་འགྱུར་རོ། །དེ་ཡང་ཆད་སྦྱོར་ལམ་བསྟན་ནོ། ༈ །གང་བཟླས་ན། དེའི་བཟླས་པ་འཕྲུལ་ཆེན་ནི། །གོང་དུ་བསྐྱེད་པའི་དཀྱིལ་འཁོར་གྱི་ལྷའི་བཟླས་པ་བྱ་བ་ཡང་ཕར་འཕྲོ་བ་དང་ཚུལ་བསྟུད་པའི་ཏིང་ངེ་འཛིན་གྱི་ཆོ་འཕྲུལ་ཏེ། བདག་ལས་ཡེ་ཤེས་ཀྱི་ལྷ་མདུན་དུ་དབྱེའོ། །རྣམ་གསུམ་ཚུལ་གྱིས་མ་འཁྲུལ་བར། །བདག་དམ་ཚིག་གི་ལྷ་གསལ་བ་དང་། མདུན་ན་ཡེ་ཤེས་ཀྱི་ལྷ་གསལ་བ་དང་། བར་དུ་སྔགས་ཀྱི་འཕྲོ་འདུ་གསལ་བ་སྟེ། ཡིད་མ་འཁྲུལ་ན་གསལ་བའོ། །སྔགས་བཟླས་འཕྲོ་འདུ་བར་མི་གཅད། །སྔགས་བཟླས་པས་ཕར་འཕྲོས་པས་ཡེ་ཤེས་ལྷའི་ཐུགས་དམ་བསྐུལ་བ་དང་། སླར་འདུས་པས་བདག་ལ་དངོས་གྲུབ་གསོལ་བར་དམྱིགས་པ་དང་། ཏིང་ངེ་འཛིན་གྱི་འཕྲོ་འདུའི་བར། རྣམ་པར་རྟོག་པས་མི་གཅད་པའོ། །སྔགས་ཀྱི་བར་མྱི་ཚིག་གིས་མི་གཅད་པར་བཟླས་པར་བྱའོ། །འདྲིས་གསལ་བརྟན་པ་མཆོག་གིས་བྱ། །དེ་ཡང་རང་ལྷའི་རྣལ་འབྱོར་ལ་འདྲིས་པ་དང་། འཕྲོ་འདུའི་ཏིང་ངེ་འཛིན་གསལ་བ་དང་། རྣམ་པར་རྟོག་པའི་རླུང་གིས་མ་སྐྱོད་པར་བརྟན་པར་བྱའོ། །དེ་ནི་མཆོག་གི་བཟླས་པའོ། ༈ །དེ་ལ་བཟླས་པ་ལ་གསུམ་སྟེ། འཛབ་ཁང་བསྐྱེད་པ་དང་། ལྷ་དབྱེའ་བ་དང་། བཟླས་པ་བྱ་བའོ། །དང་པོ་ནི་མདུན་གྱི་བར་སྣང་ལ། བྲུཾ་བི་ཤ་བི་ཤུད་དྷེ་བཛྲ་གཉའ་ན་ཙག་སུར་རྱ་རད་ན་པད་མ་མ་དྷ་ལ་ཞེས་བརྗོད་པས་གཞལ་ཡས་ཁང་བསམ་མོ། །དེ་ནས་ལྷ་དབྱེའ་བ་ནི། ཧཱུྃ་ཞེས་ལན་གསུམ་བརྗོད་པས། ཧཱུྃ་དང་པོས་སྣང་སྲིད་གསལ་བར་བྱས། ཧཱུྃ་གཉིས་པས་ཐམས་ཅད་བདག་ལ་བསྡུས། ཧཱུྃ་གསུམ་པས་བདག་དམ་ཚིག་པ་དང་། ལྷ་ཡེ་ཤེས་པ་གཉིས་སུ་དབྱེའ་སྟེ། བདག་དམ་ཚིག་གི་ལྷའི་དཀྱིལ་འཁོར་མདུན་ན། ལྷ་ཡེ་ཤེས་པའི་དཀྱིལ་འཁོར་གསལ་ཏེ། མར་མེ་གཅིག་ལས་གཉིས་སུ་དབྱེའ་བ་ལྟར་བསམ་མོ། །བཟླས་པ་ལ་ལྔ་སྟེ། ངོ་བོ་དང་། བཟླས་ཐབས་དང་། སྤྲོ་བསྡུ་དང་། གྲངས་ཚད་དང་། སྐྱོན་སྤང་བའོ། །ངོ་བོ་ནི་གཉིས་ཏེ། སྤྱི་བསྙེན་དང་། སྒོས་བསྙེན་ནོ། །སྤྱི་བསྙེན་ནི་རིགས་ཐམས་ཅད་རྡོ་རྗེ་སེམས་དཔའ་འདུས་པས། ཧཱུྃ་བཛྲ་འདྲིག །མུཾ་དྷ་དུ་ཤྭ་རི། ཞེས་པའོ། །སྤྱིར་དྲིལ་བ་ནི། ༀ་བོ་དེ་ཙི་ཏ་མ་ཧ་སུ་ཀ་གཉའ་ན་དྷ་དུ་ཨ་ཞེས་བཟླས་སོ། །སྒོས་བསྙེན་ནི། ལྷ་རང་རང་གི་སྔགས་ཐད་ཀར་བཟླས་སོ། །བཟླས་ཐབས་ལ་གསུམ་སྟེ། ཕྱི་ལུས་དམྱིགས་པའི་བཟླས་པ་དང་། ནང་རྩ་ལ་དམྱིགས་པའི་བཟླས་པ་དང་། གསང་བ་མཁའ་དབྱིངས་ལ་དམྱིགས་པའི་བཟླས་པའོ། །ཕྱི་ལྟར་བཟླས་པ་ནི། བདག་གི་ཐུགས་ཁ་ན་ཉི་ཟླ་པད་མའི་གདན། དེའི་སྟེང་ན་རྡོ་རྗེ་སེམས་དཔའ་ཚོན་གང་བ། གཡས་གསེར་གྱི་རྡོ་རྗེ་ནས་ཙམ་པ། གཡོན་གཡུའི་དྲིལ་བུ་ཁུ་འཕངས་ཙམ་འཛིན་པ། སྐུ་སྟོད་དར་དཀར་གསེར་གྱི་ངང་རིས་ཅན་གྱི་སྐུའི་སྟོད་གསོལ་བ། སྐུ་སྨད་པ་ཏི་སྨུག་པོའི་གསུང་གི་སྨད་དཀྲིས་གསོལ་བ། དར་ཆེན་ས་དར་རིས་ཀྱིས་ཐུགས་ཀྱི་ཟིའུ་ལྡིར་གསོལ་བ། རྡུར་ཁ་ངང་མྱིག་རིས་ཀྱི་ཡོན་ཏན་གྱི་ཆོས་གོས་གསོལ་བ། ཆུ་དར་སྔོན་པོས་མཛད་པ་ལས་ཀྱི་ཕུ་རུང་བྱས་པ། རིན་པོ་ཆེའི་རྒྱན་རྣམ་པ་སྣ་ཚོགས་པས་སྤྲས་པ། འོད་དང་འོད་ཟེར་དཔག་ཏུ་མྱེད་པ་འཕྲོ་བ་བསམས་ལ། དེའི་ཐུགས་ཁར་ཉི་མ། དེའི་སྟེང་ན་རྡོ་རྗེ་ནས་ཙམ་པ། དེའི་ལྟེ་བ་ལ་ཧཱུྃ་མཐིང་ཀ་ཉུངས་འབྲུ་ཙམ་པ། དེའི་མཐའ་མ་ན་ཕར་ལ་སྔགས་ཀྱིས་སྐོར་བར་བསམ། མདུན་དུ་ཡང་དེ་ལྟར་བསམས་ལ། བཟླས་པའི་བདག་དང་མདུན་གྱི་གཉིས་ལ་སྤྲོ་བསྡུ་བྱའོ། །ནང་ལྟར་བཟླས་པ་ནི། བདག་གི་སྤྱི་བོ་བདེ་བ་ཆེན་པོའི་འཁོར་ལོ་ན་རྩ་འདབ་མ་སུམ་ཅུ་རྩ་གཉིས། མགྲིན་པ་ལོངས་སྤྱོད་ན་བཅུ་དྲུག །སྙིང་ཀ་ཆོས་ཀྱི་འཁོར་ལོ་ན་བརྒྱད། ལྟེ་བ་སྤྲུལ་པའི་འཁོར་ལོ་ན་དྲུག་ཅུ་རྩ་བཞི། གསང་གནས་རླུང་གི་འཁོར་ལོ་གཞུའ་ལྟ་བུ་དང་ལྔ་ལ། སྤྱི་བོར་རྣམ་སྣང་། མགྲིན་པར་སྣང་མཐའ། ཐུགས་ཁར་མི་བསྐྱོད། ལྟེ་བ་རིན་འབྱུང་། གསང་བར་དོན་གྲུབ་རྣམས་བསྒོམ། དེ་དག་གི་ཐུགས་ཁར་ཡེ་ཤེས་པ་རེ་རེ། དེའི་ཐུགས་ཁར་རྡོ་རྗེ་དང་འཁོར་ལོ་སོགས་པའི་ཕྱག་མཚན། དེའི་ལྟེ་བ་ལ་ཧཱུྃ་དང་ༀ་ལ་སོགས་པའི་རང་རང་གི་སྔགས་ཀྱིས་སྐོར་བའོ། །དེ་ལ་དམྱིགས་ནས་བཟླས་པས་འོད་གཟེར་བདག་ལས་ཆད། སྤྱི་བོར་ཕོག །བྱང་སེམས་གཞུའ་མགྲིན་པར་བབས། དེ་ནས་སྙིང་ཀ །དེ་ནས་ལྟེ་བ། དེ་ནས་གསང་གནས་སུ་བྱུང་། ཕྱིར་འཕྲོས་བདག་གི་སྤྱི་བོར་ཕོག །དེ་བཞིན་དུ་འགལ་མེ་བཞིན་དུ་བྱའོ། །གསང་བ་ལྟར་བཟླས་པ་ནི། བདག་གིས་བཟླས་པ་བྱས་པས། ཐུགས་ཁའི་སྔགས་སྲོག་རྩ་ནས་ན་ཡར་ལ་སོང་། སྤྱི་བོར་ཐིམ། སྒལ་ཚིགས་ཀྱི་རྟ་རྒྱུད། རྡོ་རྗེའི་ལམ་དུ་བྱུང་། ཡུམ་གྱི་མཁའ་ལ་འཕྲོས། མདུན་གྱི་ཐུགས་ཁར་ཐིམ། དེ་བཞིན་དུ་བཟླས་པའོ། །སྤྲོ་བསྡུའ་ནི་བསྙེན་པའི་དུས་སུ་འོད་དཀར་པོ་ཕར་ལ་ཉི་རྩེ་བ་སྤྲོ། ཉེ་བསྙེན་གྱི་དུས་སུ་འོད་སེར་པོ་ཕར་ལ་འཕྲོས་པའི་འགྲོ་བའི་སྒྲིབ་པ་སྦྱོང་། བསྒྲུབ་པའི་དུས་སུ་འོད་དམར་པོ་ཕར་ལ་འཕྲོས་པས་སེམས་ཅན་གྱི་སྒྲིབ་པ་སྦྱོང་། ཚུར་འདུས་ནས་དངོས་གྲུབ་སྡུད་དོ། །བསྒྲུབ་པ་ཆེན་པོའི་དུས་སུ་འོད་ལྗང་ཁུ་ཕར་ལ་མི་སྤྲོ་བར་ཚུར་ལ་སྐུ་གསུང་ཐུགས་ཀྱི་དངོས་གྲུབ་ཐམས་ཅད་བསྡུད་དོ། །གྲངས་ཚད་ནི། གྲངས་ཀྱི་བསྙེན་པ་འབུམ་ཚོ་དྲུག །དུས་ཀྱི་བསྙེན་པ་དབང་པོ་རབ་ཟླ་བ་དྲུག །འབྲིང་ཟླ་བ་བཅུ་བཞི། ཐ་མ་ཟླ་བ་བཅུ་དྲུག་གོ། །མཚན་མ་ནི་རབ་ཡི་དམ་ལྷའི་ཞལ་མཐོང་། འབྲིང་བསྒྲུབ་རྫས་ལ་རྟགས་ཐོན། ཐ་མ་ཉམས་དང་རྨི་ལམ་གསལ་ལོ། །སྐྱོན་ནི་ཏིང་ངེ་འཛིན་མི་གསལ་བ་དང་། བཟླས་པ་སྒྲ་མ་དག་པ་དང་། ལེ་ལོ་དང་། གཡེང་བ་སྤང་ངོ་། །དེས་གྲུབ་བོ། །ཤེས་ལྟ་བ་རྒྱུ་འཇུག་བསྒོམ་པ་ལམ་མཚན་གཞི་ལམ་ཉིད་འབྲས་བུ་འབྱོར་པའི་འབྲེལ་པ་གཟུངས། །མངོན་དུ་གྱུར་པ་འབྲས་བུ་སྨིན་འབྲས་བུ་བྱེད་རྒྱུ་དང་ལམ་རྐྱེན། །གཞིའ་ཤེས་པའི་མཚན་ཉིད་ལྟ་བ་ནི། ལམ་གྱི། རྒྱུ་ལྟ་བུ། རྐྱེན་འཇུག་པའི་མཚན་ཉིད་བསྒོམ་པ་ནི། ལམ་གྱི་རྐྱེན་ལྟ་བུ། མངོན་དུ་གྱུར་པའི་འབྲས་བུའི་མཚན་ཉིད་ནི་འབྲས་བུའོ། །འབྱོར་བའི་གཟུངས་ནི་འབྲེལ་པ་སྟེ། གཞིའ་དང་ལམ་ནི་ཤེས་བྱ་དང་ཤེས་བྱེད་ཀྱི་འབྲེལ་པ་སྟེ། ལམ་དང་འབྲས་བུ་ནི་ཐོབ་བྱེད་ཀྱི་འབྲེལ་བའོ། །དེ་ལ་གཞིའ་ཤེས་པའི་མཚན་ཉིད་ལྟ་བ་ནི། ལྟ་བ་བདེན་པ་དབྱེར་མྱེད། རིག་པ་སྦྱོར་ཡུལ་དང་བྲལ། སྐོར་བདུན་ངོ་བོ་ཉིད་ཀྱི་རྒྱུར་གནས་པའོ། །རྐྱེན་འཇུག་པའི་མཚན་ཉིད་སྒོམ་པ་ནི། རང་རང་གི་ལུས་རྟོག་ཚོགས་འབུ་ཏ་བཞི་བཅུ་རྩ་གཉིས་ལས། ཡེ་ཤེས་ཀྱི་ལྷ་བཞི་བཅུ་རྩ་གཉིས་བསྒོམས་པའོ། །མངོན་དུ་གྱུར་པ་འབྲས་བུའི་མཚན་ཉིད་ནི། ལམ་གྱི་ཏིང་ངེ་འཛིན་ནུས་པ་མཐུའ་ཅན་དུ་གྱུར་པས། ཉེ་སྦྱོར་གྱི་འབྲས་བུ་རིག་འཛིན་བཞི་དང་། མཐར་ཐུག་གི་འབྲས་བུ་སྐུ་ལྔ་ལྷུན་གྲུབ་བོ། །དེ་བས་ན་གཞིའ་དང་ལམ་དུ་འབྱོར། ལམ་དང་འབྲས་བུར་འབྱོར། འབྲས་བུ་རྒྱུན་གྱི་ཏིང་ངེ་འཛིན། མི་བརྗེད་པའི་གཟུངས་དང་། རྡོ་རྗེ་ལྟ་བུའི་སྐུ། གཡུང་དྲུང་ལྟ་བུའི་ཚེ། ཐོབ་པ་དེ་ཁོ་ན་སྨིན་བྱེད་དོ། །འབྲས་བུ་ཐོབ་ལུགས་བསྟན། ནུས་མཐུའ་ཅན་དུ་གང་གྱུར་པ། །ཐུན་མོང་གི་འབྲས་བུ། རིག་འཛིན་རྒྱལ་བའི་ཞིང་དུ་གྲགས། ༈ །ཁྱད་པར་གྱི་འབྲས་བུ། ལམ་གྱི་ཏིང་ངེ་འཛིན་ནུས་པ་མཐུའ་ཅན་དུ་གྱུར་པ་དེ་ལ་འབྲས་བུ་ཞེས་བཏགས་ལ། གཞན་ནས་འོངས་པ་མ་ཡིན་ནོ། །རིག་འཛིན་ནི། དང་པོ་དེ་ལས་བྱུང་བ་དང་། བར་དུ་དེའི་བྱ་བ་བྱེད་པ་དང་། ཐ་མར་དེའི་རྒྱུད་འཛིན་པའོ། །རྒྱལ་བའི་ཞིང་ནི། རྣམ་པར་དག་པའི་ཡི་གེ་འཁོར་ལོ་ཚོགས་ཆེན་གྱི་སའོ། །དེ་ལྟ་བུ་ཐུབ་བོ། །འདིར་རིག་འཛིན་བཞི་ལས། རྣམ་པར་སྨིན་པའི་རིག་འཛིན་ཁོ་ན་འགྲུབ་བོ། །འབྲས་བུ་ནི་གཉིས་ཏེ། ཐུན་མོང་གི་རིག་འཛིན་དང་། ཁྱད་པར་སངས་རྒྱས་སོ། །རིག་འཛིན་ནི་བཞི་སྟེ། རྣམ་པར་སྨིན་པའི་རིག་འཛིན་དང་། ཚེ་ལ་དབང་བའི་རིག་འཛིན་དང་། ཕྱག་རྒྱ་ཆེན་པོ་དང་། ལྷུན་གྱིས་གྲུབ་པའོ། །རྣམ་པར་སྨིན་པ་ནི། རང་ལུས་ཀྱི་རྣམ་པ་ལྷའི་སྐུར་སྨིན་པ་སྟེ། ཡིད་ཀྱིས་ལྷའི་གཟུགས་འཛིན་པའོ། །ཚེ་ལ་དབང་བ་ནི་རང་དོན་དུ་ལོ་སྟོང་དྲུག་བརྒྱ་བཞུགས་ནས། གཞན་དོན་མཛད་དགོས་པ་བྱུང་བ་ན་བརྒྱའ་བརྒྱ་ན་མར་ལ་མནུར་ནས་བྱིས་པ་ལོ་བརྒྱད་པ་ལྟ་བུར་གནས་ནུས་པའོ། །ཕྱག་རྒྱ་ཆེན་པོ་ནི། ལུས་ལྷ་སྐུ་དང་ཁྱད་པར་མྱེད་པ་སྟེ། ལུས་རྡོ་རྗེ་སེམས་དཔའི་སྐུ་གཟུགས་སུ་གནས་པའོ། །ལྷུན་གྲུབ་ནི་རྒྱལ་བ་ཉིད་དང་མཉམ་པའོ། །དེ་ནས་སྐུ་ལྔ་ལྷུན་གྲུབ་ལ་སྦྱོར་བར་བྱེད་དེ། རྣམ་སྨིན་གྱི་རིག་འཛིན་ནི་ལམ་གྱི་འབྲས་བུའོ། །བསྙེན་པ་རྫོགས་ནས་དཀྱིལ་འཁོར་ཀུན། །བསྙེན་པ་རྫོགས་ནས་ཚོགས་བྱ། ལྷག་ཆོག་བྱ། གཏོར་མ་གཏང་། དེ་ནས་དཀྱིལ་འཁོར་བསྡུ་སྟེ། དམ་ཚིག་གི་དཀྱིལ་འཁོར་རང་ལ་བསྡུའ། ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ། ཧཱུྃ་ཞེས་བརྗོད་ཅིང་ཐུགས་ཀར་བསྡུའ། །བདག་ཉིད་གཙོའ་བོའི་ཐུགས་ཀ་ནས་ཧཱུྃ་འཕྲོས་པས། ལྷ་དང་གཞལ་ཡས་ཁང་དང་བཅས་པ་ཐམས་ཅད་འོད་དུ་ཞུ་ནས། གཙོའ་བོའི་ཐུགས་ཁར་ཐིམ་པ་དང་། སྐྱེ་མྱེད་མཉམ་རྫོགས་དབྱིངས་སུ་ཐིམ། །བདག་ཉིད་ཀྱང་འོད་དུ་ཞུ་ནས་ཆོས་ཀྱི་དབྱིངས་སྐྱེ་བ་མྱེད་པའི་ངང་དུ་ཐིམ་པར་གྱུར་ཏོ། །དེ་ནི་སྟོང་པའི་གོ་ཆ་སྟེ། ཅིས་ཀྱང་མི་ཤིགས་པའོ། །དེ་ནི་རྟག་པ་ཡི་མཐའ་དང་བྲལ་བའི་ཕྱིར་ན། རྫོགས་པའི་རིམ་པ་སྒོམ་པའོ། །སྟོང་པའི་གོ་ཆས་ལུས་བསྲུང་སྟེ། །དེ་ལྟར་བསྒོམ་པ་ནི་སྟོང་པའི་གོ་ཆས་ཏེ། ཅིས་ཀྱང་མི་ཚུགས་པའོ། །དེ་ནས་ཀཾ་ལས་རྡོ་རྗེའི་གོ་ཁྲབ་དང་། ཧཾ་ལས་རྒྱུན་ཐག་དང་། ༀ་ལས་རྡོ་རྗེ་དང་། ཧཱུཾ་ལས་རིན་པོ་ཆེའི་ཐག་པ་རེ་གུང་འཛུག་ལ་བསམས་ལ་བཅིང་ངོ་། །རད་ན་མ་ལེ་ཨ་བེ་ཤིན་ཙ་ཞེས་པས་རིན་པོ་ཆེའི་ཕྲེང་བས་བཅིང་ངོ་། །པ་ཏ་ལམ་ཞེས་པས་དར་སྤྱངས་དཀར་པོ་གཡས་སུ་འཕུར་བ་དང་། ཨ་བི་ཤིན་ཙ་མཾ་ཞེས་པས་དར་སྤྱངས་དམར་པོ་གཡོན་དུ་འཕུར་བའོ། །སྤྱོད་ལམ་ཀུན་ཏུ་བརྩལ་མྱེད་པར། །དུས་ཀུན་ཏུ་སྤྱོད་ལམ་བྱ་བ་ཡང་། རང་ལས་མ་རྟོགས་པའི་ལྷ་སྐུ་རྩལ་དུ་མྱེད་དེ། རང་ལ་ཡེ་ནས་ཡོད་པ་དེ་ཉིད་སྤྱོད་ལམ་དུ་བྱེད་པའོ། །དཀྱིལ་འཁོར་ལྡན་པའི་དཀྱིལ་འཁོར་གྱིས། །ཞེས་པ་རང་བཞིན་གྱི་དཀྱིལ་འཁོར་དེ། ཤེས་པར་བྱེད་པའི་དལ་གྱིས་ཤེས་པར་བྱ་ཞེས་སོ། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དེ་ལྟར་རང་བཞིན་གྱི་དཀྱིལ་འཁོར་ལ་ནི། ཏིང་ངེ་འཛིན་གྱི་དཀྱིལ་འཁོར་བསྒོམ་པ་སྟེ་རྟོགས་པར་བྱེད་པའོ། །དཀྱིལ་འཁོར་དཀྱིལ་འཁོར་ལས་བྱུང་བའི། །ཞེས་རང་བཞིན་གྱི་དཀྱིལ་འཁོར་ལས་བྱུང་བ་ནི། ཏིང་ངེ་འཛིན་གྱི་དཀྱིལ་འཁོར་རོ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག ༈ །ཞེས་པ་ཏིང་ངེ་འཛིན་གྱི་དཀྱིལ་འཁོར་གྱི་དཀྱིལ་གྱི་གཙོ་བོ་ནི་མཆོག་གི་རྡོ་རྗེ་སེམས་དཔའ་ཡིན་པས་སྤྱོད་ལམ་ཐམས་ཅད་དུ་རྡོ་རྗེ་སེམས་དཔའ་བསྒོམ་པའོ། །དེ་རྣམས་ནི་སྐུ་བསྒོམ་པར་འདོད་པ་ཁོ་ནའོ། །འགྲོ་དང་འདུག་དང་ཉལ་བ་དང་། །མ་ཉམས་དེའི་དབྱིངས་སུ་གནས། །འགྲོ་ཉལ་འདུག་སྡོད་ཐམས་ཅད་དུ་ཡང་སྟོང་པ་ཉིད་ཀྱི་ངང་ལས་མ་གཡོས་པས། དེའི་ངང་ལ་གནས་པ་དང་། ཅུང་ཟད་བློ་ཆུང་བ་འདྲ་ན་དེའི་ངང་ལས་རང་ལྷའི་སྐུར་བསྐྱེད་ནས་ལུས་བསྲུང་བ་དང་། གོ་བགོའ་བ་དང་། བྱས་ལ། སྤྱོད་ལམ་ཐམས་ཅད་ལྷའི་སྐུར་གསལ་བར་བསྒོམ་མོ། ༈ །ཡང་ན་ནང་གི་རྫོགས་རིམས་སུ་བཤད་ན། དཀྱིལ་འཁོར་ལྡན་པ་ནི། རང་ལ་སྤྱི་བོ་བདེའ་བ་ཆེན་པོའི་འཁོར་ལོ་ན་རྩ་འདབ་མ་སུམ་ཅུ་རྩ་གཉིས་དང་། མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་འདབ་མ་བཅུ་དྲུག་དང་། སྙིང་ཁ་ཆོས་ཀྱི་འཁོར་ལོ་ན་རྩ་འདབ་མ་བརྒྱད་དང་། ལྟེ་བ་སྤྲུལ་པའི་འཁོར་ལོ་ན་རྩ་འདབ་མ་དྲུག་ཅུ་རྩ་བཞིར་གནས་པ་དང་། སྲོག་ཤིང་རྩ་གཡས་རོ་མ་དང་། གཡོན་རྐྱང་མ་དང་། དབུས་ཀུན་དྷར་མ་དང་རྣམས་རང་ལ་གནས་པའོ། །དཀྱིལ་འཁོར་གྱིས་ནི་དེ་ལྟར་གནས་པ་དེ་ཤེས་པར་གྱིས་སོ། །དཀྱིལ་འཁོར་ནི་གནས་པ་དེ་ལའོ། །བསྒོམ་པ་ནི་དཀྱིལ་འཁོར་དེ་རྣམས་བསྒོམ་པའོ། །དཀྱིལ་འཁོར་དཀྱིལ་འཁོར་ལས་བྱུང་བ་ནི། སྤྱི་བོ་ན་ཡི་གེ་ཧཾ་མགོའ་ཐུར་དུ་ལྟ་བ་བྱུང་བས། མགྲིན་པར་བྱུང་། དེ་ནས་བྱང་སེམས་སྙིང་ཁར་བྱུང་བའོ། །ཐུགས་ཀྱི་དཀྱིལ་འཁོར་དཀྱིལ འཁོར་མཆོག་ནི། སྙིང་ཀ་ན་རྩ་འདབ་མ་བརྒྱད་ལ། རིགས་ལྔ་དང་། ཡུམ་ལྔ་དང་། སེམས་དཔའ་བརྒྱད་དང་། སེམས་མ་བརྒྱད་དང་རྣམས་གནས་པར་བསྟན་པའོ། །དེ་བས་ན་གདམ་ངག་ཏུ་བྱས་པའོ། །དེ་ཡིས་བྱང་ཆུབ་སྙིང་པོ་ལེན། །དེ་ལྟར་བསྒོམ་ན། བླ་ན་མྱེད་པའི་བྱང་ཆུབ་ཀྱི་འབྲས་བུ་ཆོས་སྐུ་མྱུར་དུ་ཐོབ་བོ། །ཆོ་ག་སྔགས་དང་ཡོ་བྱད་རྣམས། །དང་པོ་ཆོ་ག་ལྔ་རྫོགས་པར་བསྒོམ་སྟེ། དེ་བཞིན་ཉིད་དང་། ཀུན་ཏུ་སྣང་དང་། རྒྱུ་དང་སྐུར་བསྐྱེད་པདང་། ཡེ་ཤེས་པ་སྒྲུབ་ལྔ་རྫོགས་པར་བྱ་སྟེ། དེ་ནས་སྔགས་ཀྱི་ཡན་ལག་ལྔ་ནི། རྩ་བའི་ལྷ་ཡབ་ཡུམ་དང་། ཐབས་༼བཞི་བཅུ་སོ་སོར་བསྒོམ་༽ ཀྱི་ལྷ་དང་། ཤེས་༼ཡེ་ཤེས་སེམས་དཔའ་༽རབ་ཀྱི་ལྷ་དང་། རྡོ་༼སྐུ་གསུང་ཐུགས༽རྗེ་གསུམ་གྱི་ལྷ་དང་། བདག་༼དབུའ་རྒྱན་༽པོའི་ལྷ་ལྔའོ། །བྲོ་གར་འདུ་འཕྲོ་དང་། རྒྱན་དང་བགོའ་བ་དང་། བཟའ་དང་བཏུང་བ་དང་། ཨ་ལི་ཀ་ལི་ཡོ་བྱད་དང་ལྔའོ། །རྣལ་འབྱོར་འཚོགས་པའི་དཀྱིལ་འཁོར་གྱིས། །དེ་ལ་དང་པོ་ཆོ་ག་ལྔས་སྐུ་གསལ་བར་བྱེད། དེ་ནས་སྔགས་ཀྱི་ཡན་ལག་ལྔས་ཉི་ཁྲི་བཞི་སྟོང་ལ་རིག་པ་རྩལ་སྦྱང་། དེ་ནས་ཡོ་བྱད་ལྔས་མཆོད་པ་དབུལ་ལོ། །དེ་ལྟར་རིག་པ་རྩལ་འབྱོངས་ནས། ཚོགས་དཔོན་བྱ་སྟེ། ཕུན་སུམ་ཚོགས་ལྔས་སྒྲུབ་པའི་གཞིའི་གཟུང་། བསྙེན་སྒྲུབ་རྣམ་པ་བཞི་ལམ་གྱི་གཞུང་སྲང་། ཚོགས་ལྷག་གཉིས་ཀྱིས་མཆོད་པའི་འབྲེལ་བ་ཐ་མ་འབྲས་ལ་སྦྱོར་བའོ། །ཞག་ནི་སུམ་ཅུ་ཕྲག་དྲུག་གམ། །ཞག་སུམ་ཅུ་ཕྲག་དྲུག་ནི་ཟླ་བ་དྲུག་ཡིན་ཏེ། དབང་པོ་རབ་ཀྱིས་ཟླ་བ་དྲུག་ན་འགྲུབ་བོ། །བཅུ་གཉིས་བཅུ་བཞི་བཅུ་དྲུག་གིས། །དབང་པོ་འབྲིང་གིས་ཟླ་བ་བཅུ་གཉིས་སམ་བཅུ་བཞི་ན་འགྲུབ། དབང་པོ་ཐ་མས་ཀྱང་། ཟླ་བ་བཅུ་དྲུག་གིས་འགྲུབ་བོ། །དབང་བསྒྱུར་རིགས་ཀྱི་དམ་པ་འགྲུབ། །ཚེ་ལ་དབང་བའི་རིག་འཛིན་ཐོབ་པར་འགྱུར་ཏེ། ཚོགས་བསྒྲུབ་པའི་འབྲས་བུའོ། །དེ་ཚེ་བཅུ་དྲུག་ཚུན་གཅད་ཀྱིས། །ཚེ་ལ་དབང་བའི་རིག་འཛིན་ཐོབ་པ་དེ་ཁོ་ནའི་ཚེ་ན་ཕྱག་རྒྱ་ཆེན་པོའི་རིག་འཛིན་ཡང་། དེའི་སྟེང་དུ་ཟླ་བ་བཅུ་དྲུག་ཚུན་ཆད་བསྒྲུབ་ན། སྒྲུབ་པ་ཐོབ་པར་ངེས་ཏེ། དེ་ནས་ལྷུན་གྱིས་གྲུབ་པའི་རིག་འཛིན་ལ་སྦྱོར་བའོ། །སྐུ་ལྔ་ལྷུན་གྱིས་རྫོགས་པ་ནི། །སྐུ་ལྔ་ལྷུན་གྲུབ་རྟོགས་ཚུལ་བསྟན། དེ་ཡང་ཡང་དག་པར་རྫོགས་པའི་སངས་རྒྱས་སྐུ་ལྔ་ལྷུན་གྲུབ་ཏུ་རྫོགས་པ་ནི། རིག་འཛིན་ཉིད་ལས་སྒྲས་དཔགས་པ་ཙམ་དུ་འགྱུར་བའོ། །སྒྲིབ་པ་དག་པའི་ཡེ་ཤེས་ཉིད་མ་རྩལ་བར་ལྷུན་སྐུ་གསུང་ཐུགས་ཡོན་ཏན་འཕྲིན་ལས་ཉི་ཤུ་རྩ་ལྔར་རྫོགས་པའོ། །དེ་ནི་མཐར་ཐུག་པའི་ལྷུན་གྱིས་རྫོགས་པའོ། །ཡེ་ཤེས་ཐིག་ལེ་དེ་ཉིད་ལས། །ཇི་ལྟར་ཐོབ་ན། ཡེ་ཤེས་ནི་ལྷུན་གྱིས་རྫོགས་པའི་རིག་འཛིན་ནོ། །ཐིག་ལེ་ནི་སྐུ་གསུང་ཐུགས་ཡོན་ཏན་འཕྲིན་ལས་དབྱེར་མྱེད་པའོ། །དེ་ཉིད་ནི་རིག་འཛིན་ནོ། །དེ་ལས་ཁྱད་པར་དུ་བྱས་པའོ། །ཡེ་ཤེས་ཐིག་ལེ་ཉིད་སྣང་བ། །ཡེ་ཤེས་ཐིག་ལེ་དེ་ཉིད་ནི། གཞིའ་དངོས་པོ་གནས་ལུགས་སོ། །གནས་ལུགས་དེ་ནི་རྡོ་རྗེ་སེམས་དཔའོ། །ཐིག་ལེ་ཉིད་སྣང་བ་ནི། རིག་པས་དོན་དེ་ཉིད་རྟོགས་པའོ། །བསམ་གྱིས་མྱི་ཁྱབ་མཐའ་ཡས་མཆོག །དེ་རྣམས་གཞན་ནས་བྱུང་བ་མ་ཡིན་ཏེ། གཞིའ་རང་འབྱུང་གི་ཡེ་ཤེས་སྤྲོས་པ་ཐམས་ཅད་དང་བྲལ་བ་དེ་ཉིད་ལས། ཡེ་ཤེས་ཀྱི་རོལ་པ་མ་འགགས་པར་སྣང་བའོ། །ཡེ་ཤེས་ཀྱི་ཆེ་བའི་ཡོན་ཏན་སྟོབས་དང་མི་འཇིགས་པ་དང་། གཟུངས་དང་ཏིང་ངེ་འཛིན་དང་མཚན་དང་དཔེའ་བྱད་ཐམས་ཅད་ལྷུན་གྱིས་གྲུབ་པའི་ཡི་གེ་འཁོར་ལོ་ཚོགས་ཆེན་གྱི་ས་མངོན་དུ་བྱས་པའོ། །ཕྱོགས་བཅུ་དུས་བཞི་མངོན་རྫོགས་པའི། །ལྷ་དང་གཞལ་ཡས་ཁང་བཞུགས་ཚུལ་བསྟན། ཕྱོགས་བཅུ་དང་དུས་བཞིས་བསྡུས་པའི་མངོན་པར་རྫོགས་པ་སངས་རྒྱས་པའི་བདག་ཉིད། སྐུ་ལྔ་ལྷུན་གྱིས་གྲུབ་པ་དེའི་བཞུགས་གནས་ཁྱད་པར་ཅན་ནོ། །ཞིང་ཁམས་གཞལ་ཡས་རྣམ་དག་དང་། །སངས་རྒྱས་ཀྱི་ཞིང་ཁམས་རྣམ་པར་དག་པ། ཕྱི་ཆོས་ཀྱི་དབྱིངས་སྤྲོས་པ་དང་བྲལ་བ། ནང་འོག་མིན་གྱི་གནས་ལྟ་བུར་སྣང་བ། གསང་བ་ཡུམ་གྱི་མཁའ་བདེ་སྟོང་གི་ཉམས་ཅན་ནོ། །རྒྱ་དང་བྲལ་བའི་གཞལ་ཡས་ཁང་། །གཞལ་ཡས་ཁང་རྣམ་པར་དག་པ་རྒྱ་ཡོངས་སུ་མ་ཆད་པ་ནི་ཆེ་ཆུང་གི་ཚད་དང་རྒྱ་དང་བྲལ་ལོ། །འཁོར་ལོའི་རྒྱན་དང་རོལ་མོའི་ཚོགས། །གཞལ་ཡས་ཁང་དེ་ན། རིན པོ་ཆེའི་རྒྱན་མང་པོ་བསམ་གྱིས་མི་ཁྱབ་པ་དང་། འདོད་པའི་ཡོན་ཏན་གྱི་ལྷ་མོ་གྲངས་མྱེད་པས་བརྒྱན་པའོ། །དཀྱིལ་འཁོར་མ་ལུས་ཐམས་ཅད་ཀུན། །གནས་དེ་ནི་རང་བཞིན་ལྷུན་གྱིས་གྲུབ་པའི་དཀྱིལ་འཁོར། རྒྱུད་ཡོངས་སུ་དག་པའི་བདེ་བར་གཤེགས་པ་བཞུགས་པས། དཀྱིལ་འཁོར་མ་ལུས་པ་ཐམས་ཅད་དེ་ན་གནས་པའོ། །མཐོང་ནས་ཉེ་བར་མཉེས་པ་དང་། འོག་མིན་གྱི་གནས་ཀྱི་དུས་གསུམ་གྱི་བདེའ་བར་གཤེགས་པ་དེའི་ཞལ་མཐོང་ནས། ཡིད་དགའ་བ་དང་བྲོད་པ་ཁྱད་པར་ཅན་སྐྱེས་པ་དང་། རྒྱ་ཆེན་གསུང་ལས་དོན་བྱུང་བ། །དེ་ལྟ་བུའི་སྒྲིབ་པ་ཤིན་ཏུ་ཆ་ཕྲ་བ་དེ་བཅོམ་ལྡན་འདས་དཔལ་ཀུན་ཏུ་བཟང་པོའི་བྱིན་གྱིས་རླབས་ལས་དོན་གྱི་གསུང་བྱུང་བ་ཡིས། མཐུན་པའི་ཡེ་ཤེས་རང་སྣང་བའོ། །སྒྲིབ་པ་དེ་བཅོམ་ནས། གསུང་རང་བཞིན་གྱི་ཡེ་ཤེས་ཇི་ལྟར་བར་བཟོད་པ་ཐོབ་སྟེ། ཡེ་ཤེས་རང་སྣང་བར་འགྱུར་རོ། །གཅིག་དང་དུ་མ་བྲལ་བའི། །དངོས་པོ་རྟོགས་པར་དཀའ་བ་བསྟན། གོང་དུ་བསྟན་པ་ཉིད་རང་རིག་པར་ཅིག་པ་དང་། རང་ཉིད་གཅིག་དང་དུ་མའི་མཐའ་ཐམས་ཅད་དང་བྲལ་ཞིང་གྲོལ་བའི་ཕྱིར། རང་རིག་པ་ཉིད་ཐམས་ཅད་དུ་མ་འགགས་པར་ཤར་བས། གཅིག་དང་དུ་མའི་མ་སྤངས་པར་བྲལ་བའོ། །མཐའ་དང་དབུས་མྱེད་དེ་བཞིན་ཉིད། །དེ་ལྟར་མཐའ་མ་གྲུབ་པས་དབུས་ཀྱང་མ་གྲུབ་པའི་ཕྱིར། མཐའ་མྱེད་དབུས་མྱེད་དེ་བཞིན་ཉིད་ཡིན་ནོ། །སངས་རྒྱས་ཉིད་ཀྱིས་མི་གཟིགས་ཏེ། །དེ་ནི་བདེ་བར་གཤེགས་པའི་ཡེ་ཤེས་ཀྱི་སྤྱན་གྱིས་ཀྱང་མི་གཟིགས་ཏེ། གཟིགས་རྒྱུ་མྱེད་པའོ། །རང་འབྱུང་ཡེ་ཤེས་གནས་མྱེད་སྣང་། །འོ་ན་མྱེད་དོ་མཉམ་པ་ལ། རང་འབྱུང་ཡེ་ཤེས་ཉིད་རྟེན་གནས་མྱེད་པར་སྣང་བའོ། །ཅིའི་ཕྱིར་ན་དག་པ་ལ་རྟེན། ཕྱོགས་བཅུ་དུས་བཞིར་མངོན་རྫོགས་པའི། །དེ་ལྟར་བརྟན་པའི་འབྲས་བུ་དེ་ནི། ཕྱོགས་བཅུ་དང་དུས་བཞིས་བསྡུས་པ་ཐམས་ཅད་དུ་མངོན་པར་རྫོགས་པ་སངས་རྒྱས་པའོ། །སྐུ་ལྔ་ལྷུན་གྱིས་གྲུབ་པའི་སངས་རྒྱས་སོ། །བདེའ་གཤེགས་ཡོན་ཏན་རྨད་པོ་ཆེ། །དེ་ནི་ལམ་བདེའ་བར་གཤེགས་པ། ཡོན་ཏན་གསང་བ་རྨད་དུ་བྱུང་བ་དང་། བདེའ་བར་གཤེགས་པ་ཐམས་ཅད་གཅིག་ཏུ་བསྡུས་པའི་ངོ་བོ། སྐུ་གསུང་ཐུགས་ཡོན་ཏན་འཕྲིན་ལས་ཀྱི་བདག་པོའོ། །གཞན་ན་ཡོད་པ་མ་ཡོད་པ་མ་ཡིན་ཏེ། །དེ་ལྟར་བསྟན་པའི་འབྲས་བུ་དེ་དག་ཡང་། གཞན་ན་ཡོད་པ་སྙེད་པ་ལྟ་བུ་མ་ཡིན་ཏེ། རང་རིག་པ་ཉིད་དེ་ལྟར་རང་ཤར་བས་ལས་མ་རྟོགས་པ་གཞན་མྱེད་ཅེས་སོ། །ལྷ་སྲིན་ལ་སོགས་སྨོས་ཅི་དགོས། །དེ་ལྟ་བུའི་འབྲས་བུ་དེ་ཐོབ་པ་མ་མི་ཐོབ་པ་མ་བདེན་ནམ་མི་བདེན་ནམ་མཉམ་ན། དཔེར་ན་འཇིག་རྟེན་གྱི་ལྷ་བསྒྲུབས་པས་གྲུབ་རྟགས་བྱུང་ན། འདི་ལ་ཅི་སྨོས། འཇིག་རྟེན་ལྷ་ལ་ཡང་ཡོན་ཏན་ཡོད་ན། འདི་ལ་ལྟ་ཅི་སྨོས་ཞེས་པའོ། །རྒྱུད་ཀྱི་དོན་ལས་སྒྲུབ་པའི་ཐབས། །རྒྱུད་དཔལ་གསང་བ་སྙིང་པོ་ལས། ཞི་བའི་བསྒྲུབ་ཐབས་འདི་བསྟུས་པས་སོ། །དེའི་མཚན་ཅི་ཞེ་ན། རིན་ཆེན་དྲྭ་བ་འདི་བསྟུས་པས། །གང་བ་བསྟུས་ན། རིན་པོ་ཆེ་ལྟར་དགོས་འདོད་འབྱུང་། དྲྭ་བ་ལྟར་ཐབས་ཤེས་དུ་འབྲེལ། རྒྱུད་ལས་ལོགས་སུ་བཀོལ་ནས་བསྟུས་པས། བཅོམ་ལྡན་ཀུན་བཟང་སྐུ་གསུང་ཐུགས། །བཅོམ་ལྡན་དཔལ་ཀུན་ཏུ་བཟང་པོའི་སྐུ་གསུང་ཐུགས་ཀྱི་བཅུད་དངོས་གྲུབ་ཀྱི་བཅུད་དམ་པ་རྣམས། སེམས་ཅན་ཀུན་གྱིས་ཐོབ་པར་ཤོག ༈ །བདག་དང་མཐའ་ཡས་པའི་སེམས་ཅན་རྣམས་ཀྱིས་ཐོབ་པར་ཤོག །ཞི་བ་རིན་ཆེན་དྲ་བ་ཞེས་བྱ་བ། །སློབ་དཔོན་སངས་རྒྱས་གསང་བས་མཛད་པ། རྫོགས་ས྄ཧོ྅྅྅།། །།རྒྱ་གར་གྱི་པཎྜི་ཏ་སངས་རྒྱས་གསང་བ་དང་། བོད་ཀྱི་ལོ་ཙཱ་བ་བྲན་ཀ་མུ་རི་ཏ་དང་། བྷ་མན་འཛུ་ཤྲི་ཝར་མས་བསྒྱུར་ཅིང་ཞུས་ཏེ་གཏན་ལ་ཕབ་བོ། །སྟོན་པ་ཡེ་ཤེས་རྡོ་རྗེའི། །ཕྱག་དཔེ་རིན་ཆེན་དྲ་བ་ལས། །ཤིན་ཏུ་ཟབ་པ་བློ་གྲོས་ཡིན། །དགེ་བ་རང་གཞན་ཀུན་ལ་བསྔོ། །སརྦ་མདྒ་ལཾ།། །། ཞི་བའི་བསྡུས་དོན་འབྱེད་འགྲེལ།༈ ཞི་བའི་བསྡུས་དོན་འབྱེད་འགྲེལ། སློབ་དཔོན་སངས་རྒྱས་གསང་བས་མཛད་པའི་ཞི་བ་རིན་ཆེན་དྲྭ་བ་འདི་ལ་གསུམ་སྟེ། ཀླད་དང་། གཞུང་དང་མཇུག་གོ། །ཀླད་ལ་གཉིས་ཏེ། ཕྱག་དང་། དམ་བཅའ་བའོ། །གཞུང་ལ་གསུམ་སྟེ། དང་པོ་མངོན་དུ་བྱ་བའི་ལས་དང་། བར་དུ་ཏིང་ངེ་འཛིན་བསྒོམ་པ་དང་། ཐ་མར་ཚོགས་སྒྲུབ་པའོ། །དང་པོ་སྔོན་དུ་བྱ་བའི་ལས་ལ་དྲུག་སྟེ། སྦྱིན་༼ཐོས་བསམ་༽པའི་སྣོད་དང་། སྣོད་ངན་པ་ལ་༼སློབ་དཔོན་༽ བྱིན་པའི་སྐྱོན་དང་། མཉམ་པའི་༼མཉམ་ལ་༽དམ་ཚིག་བསྲུང་བ་དང་། དངོས་གྲུབ་༼དུས་བཞི་༽ སེམས་ཡིན་པས་ལོགས་ན་མྱེད་པ་དང་། མཉམ་བཞག་༼གང་གིས་༽ བསྒོམ་པ་ལས་འབྲས་བུ་འབྱུང་བ་དཔེའ་བསྟན་པ་དང་། བསྒོམ་པའི་༼དགོན་པ་༽གནས་བསྟན་པའོ། །བར་དུ་ཏིང་ངེ་འཛིན་བསྒོམ་པ་ལ་དྲུག་སྟེ། ཏིང་ངེ་འཛིན་གྱི་དཀྱིལ་འཁོར་བསྐྱེད་པ་དང་། ཡེ་ཤེས་ཀྱི་དཀྱིལ་འཁོར་སྤྱན་དྲངས་བ་ལ་སོགས་པ་དང་། མཇུག་གི་ལས་སོ། །ཏིང་ངེ་འཛིན་གྱི་དཀྱིལ་འཁོར་ལ་བཞི་སྟེ། བྱང་ཆུབ་ཏུ་སེམས་བསྐྱེད་པ་དང་། ཏིང་ངེ་འཛིན་གསུམ་བསྒོམ་པ་དང་། དཀྱིལ་འཁོར་དངོས་བསྒོམ་པ་དང་། བསྒོམ་༼པ་ལ་སོགས་ལ་༽པའི་ཆེ་བའོ། །སེམས་བསྐྱེད་པ་ལ་གཉིས་ཏེ། དམ་བཅའ་༼བདག་དང་༽བ་དང་། སེམས་༼ཨེ་མའོ་༽ ཡེ་ཤེས་ལྔར་བསྐྱེད་པའོ། །ཏིང་ངེ་འཛིན་ལ་བཞི་སྟེ། ཏིང་ངེ་༼སྒྲུབ་པའི་༽འཛིན་གྱི་དགོངས་པ་དཔེས་སྟན་པ་དང་། དེ་བཞིན་༼དངོས་རྣམས་༽ ཉིད་དང་། ཀུན་ཏུ་༼དེ་བཞིན་༽སྣང་དང་། རྒྱུའི་ཏིང་ངེའོ། །དེ་ལ་བཞི་སྟེ། དམ་༼གཞིའ་རྩ་༽ བཅའ་བ་དང་། ཡི་གེ་༼ཨ་རབ་ཏུ་༽ཨ་ལ་སེམས་སྦྱང་བ་དང་། མིང་ཚོགས་༼དེ་ལས་མིང་༽ གཞན་ལ་སེམས་སྦྱང་པ་དང་། མིང་ཚོགས་གཞན་ལ་སེམས་ལ་སྦྱང་བ་དང་། སེམས་སྦྱངས་༼འདི་ནི་༽བའི་ཡོན་ཏན་ནོ། །དཀྱིལ་འཁོར་དངོས་བསྒོམ་པ་ལ་གཉིས་ཏེ། རྟེན་གཞལ་ཡས་ཁང་དང་། རྟེན་པ་ལྷའོ། །རྟེན་གཞལ་ཡས་ཁང་ལ་གཉིས་ཏེ། འབྱུང་བ་༼དེ་ལས་༽ དབང་ཆེན་དང་། གཞལ་ཡས་ཁང་ངོ་། །དེ་ལ་གསུམ་སྟེ། བསྐྱེད་པའི་༼བྲུྃ་༽སྔགས་དང་། ཅིག་ཆར་༼ ཡེ་ཤེས་ཕྱོགས་༽བའི་དཀྱིལ་འཁོར་དང་། རིམས་བསྐྱེད་པའོ། །དེ་ལ་གསུམ་སྟེ། དཀྱིལ་འཁོར་༼འཁོར་ལོ་༽ གྱི་མཚན་ཉིད་དང་། རྒྱན་༼རོལ་མོ་༽དང་། གདན་༼སེང་གེ་༽ ནོ། །རྟེན་པ་ལྷ་ལ་གཉིས་ཏེ། བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་དང་། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བའོ། །བདག་སྲས་ལ་ལྔ་སྟེ། གཙོ་བོ་༼ཨ་ནི༽བསྐྱེད་པ་དང་། བདག་སྲས་༼བདག་ཉིད་སངས་རྒྱས་༽ ཀྱི་གཏན་ཚིགས་དང་། གསང་༼ཐབས་དང་༽ བའི་དཀྱིལ་འཁོར་བསྐྱེད་པ་དང་། སྔགས་༼དེ་ལ་རྐྱེན་༽ ཀྱིས་ཕྱིར་གདོན་པ་དང་། དེ་དག་རྒྱུ་རྐྱེན་༼སྒྱུ་འཕྲུལ་༽འཚོགས་པ་ལས་འབྱུང་བར་བསྟན་པའོ། །དེ་བཞིན་གཤེགས་པའི་སྲས་སུ་བདག་བྱ་བ་གཉིས་ཏེ། འཇུ་འདུལ་བྱ་བ་དང་། དཀྱིལ་འཁོར་བསྐྱེད་པའོ། །འཇུ་འདུལ་བྱ་བ་ལ་བཞི་སྟེ། སྐུལ་བར་༼དེ་ནས་༽དམ་བཅའ་བ་དང་། བསྐུལ་༼ཨཱོཾ་༽བ་དངོས་དང་། རྟོག་པ་སྦྱངས་༼ཐབས་དང་༽པའི་དང་། ལྷ་༼ལྷ་རྣམས་༽ཀུན་འོད་དུ་ཞུ་བའོ། །དཀྱིལ་འཁོར་བསྐྱེད་པ་ལ་བཞི་སྟེ། གཙོའ་བོ་བསྐྱེད་པ་དང་། འཁོར་བསྐྱེད་པ་དང་། ལྷའི་ཚུལ་བསྟན་པ་དང་། ནུས་པ་༼ༀ་མ་ཧཱ་༽དང་ལྡན་པར་བྱའོ། །གཙོའ་བོ་བསྐྱེད་པ་ལ་བཞི་སྟེ། ཡབ་ཡུམ་བསྐྱེད་༼དེ་ནས་སྙིང་པོ་དྲན་༽པ་དང་། དབང་དང་༼འབྲུ་གསུམ་༽ བྱིན་བརླབས་བྱ་བ་དང་། ༼སེང་ཕྲུག་ཡོད་༽མཁའ་༼ཧཱུྃ་ལས་༽ འདས་བྱིན་གྱིས་བརླབས་ཏེ་བརྡས་བསྐུལ་བ་དང་། བྱང་སེམས་༼ༀ་སརྦ་༽ སྤྲོས་ཏེ་ཆགས་མཆོད་བྱ་བའོ། །འཁོར་བསྐྱེད་པ་ལ་གཉིས་ཏེ། ཡུམ་གྱི་མཁར་༼ཡུམ་གྱི་པད་མ་༽བྱང་ཆུབ་སེམས་ལས་ལྷར་བསྐྱེད་པ་དང་། སྔགས་ཀྱིས་༼སོ་སོའི་སྔགས་༽ ཕྱིར་གདོན་པའོ། །ལྷའི་ཚུལ་ལ་དྲུག་སྟེ། བཞུགས་༼གདན་ལ་༽ ཚུལ་དང་། བཞུགས་༼འཁོར་ལོ་༽གནས་དང་། ཕྱག་མཚན་༼རྡོ་རྗེ་འཁོར་ལོ་༽དང་། སྐུ་མདོག་༼མཐིང་ཀ་༽དང་། ཞི་བའི་༼གཉེན་ལྕུག་༽ཚུལ་དགུའ་དང་། འོད་གཟེར་༼འོད་ཟེར་༽ རོ། །ཡེ་ཤེས་ཀྱི་དཀྱིལ་འཁོར་སྤྱན་དྲངས་བ་ལ་སོགས་པ་ལ་གཉིས་ཏེ། སྤྱན་དྲང་བ་དང་། མཆོད་པའོ། །སྤྱན་དྲངས་བ་ལ་དྲུག་སྟེ། དམ་༼ཕྱག་རྒྱའི་༽བཅའ་བ་དང་། ཚིག་གིས་སྤྱན་དྲངས་བ་དང་། ༼ཨཱོཾ་ཨེ་ཧ་༽སྔགས་ཀྱིས་སྤྱན་དྲངས་བ་དང་། རིག་པའི་མེ་ཏོག་༼མེ་ཏོག་དོར་ལ་༽དོར་བ་དང་། དངོས་གྲུབ་བསྐུལ་བ་༼ༀ་བཛྲ་༽ དང་། གཉིས་༼ཛ་ཧཱུྃ་༽ མྱེད་དུ་བསྟིམ་པའོ། །མཆོད་པ་ལ་བརྒྱད་དེ། ཕྱག་རྒྱ་གར་གྱི་མཆོད་པ་དང་། ལྷག་པ་ཏིང་ངེ་འཛིན་གྱི་དང་། སྟ་ན་༼ཐོག་མར་༽ སྒྲོལ་བའི་འགའ་ན་༼གསལ་ལྡན་༽སྦྱོར་བའི་དང་། བདུད་རྩིའི་༼མཉམ་པའི་༽ དང་། ཚོགས་༼བཟའ་དང་༽ ཀྱི་དང་། བསྟོད་པ་དང་། བཟླས་༼དེའི་༽ པའི་མཆོད་པའོ། །༼སེང་ཕྲུག་༽ཕྱག་རྒྱ་ལ་གསུམ་སྟེ། ཅིག་ཆར་༼སེང་ཕྲུག་༽བར་ཕྱིའི་ཕྱག་རྒྱ་དང་། སྙོམས་འཇུག་༼ཨཱོཾ་དང་མུཾ་༽གསང་བའི་ཕྱག་རྒྱ་དང་། རིམས་ཀྱིས་པ་ནང་གི་ཕྱག་རྒྱའོ། །ཅིག་ཆར་བ་ལ་གཉིས་ཏེ། སེམས་༼སྒྱུ་འཕྲུལ་༽ཀྱི་ཕྱག་རྒྱ་དང་། ལུས་ཀྱི་༼སྐྱོད་ཆེན་༽ དང་། ཕྱག་རྒྱ་སྤྱིའི་ངེས་༼གསང་བ་དེ་ཉིད་༽ཚིག་ཞར་བྱུང་ངོ་། །རིམས་ཀྱིས་པ་ལ་གཉིས་ཏེ། ཕྱག་རྒྱ་འབྱུང་༼མི་བསྐྱོད་༽བའི་རྒྱུ་དང་། ལྷ་སོ་སོའི་ཕྱག་༼འབྲུ་བཞིའ་༽རྒྱ་བཅའ་ཐབས་སོ། །ལྷག་པ་ཏིང་ངེ་འཛིན་གྱི་མཆོད་པ་ལ་གཉིས་ཏེ། ལྷག་པའི་༼མཆོད་པའི་༽ཏིང་ངེ་འཛིན་དངོས་དང་། འབྱུང་༼སྐལ་ལྡན་༽ཚུལ་ལོ། །བསྟོད་པ་ལ་དྲུག་སྟེ། སྐུ་ལ་༼ཨཱོཾ་ཕྱོགས་༽བསྟོད་པ་དང་། གསུང་༼ཨཱོཾ་༽ལ་དང་། ཐུགས་༼ཨཱོཾ་༽ ལ་དང་། ཡོན་༼ཨཱོཾ་༽ ཏན་ལ་དང་། འཕྲིན་༼ཨཱོཾ་༽ལས་ལ་དང་། སྤྱིར་༼ཨཱོཾ་༽ དང་བསྡུས་ཏེ་བསྟོད་པའོ། །འཇུག་ལས་ལ་གསུམ་སྟེ། དཀྱིལ་འཁོར་༼བསྙེན་པ་༽ བསྡུའ་བ་དང་། རྒྱུན་༼ སྟོང་པའི་༽གྱི་སྤྱོད་༼འགྲོ་ཉལ་༽ ལམ་དང་། རྩ་འཁོར་༼དཀྱིལ་འཁོར་༽ལོའི་རྫོགས་རིམས་སོ། །ཐ་མར་ཚོགས་བསྒྲུབ་པའི་ལ་བདུན་ཏེ། མཚན་༼སེང་ཕྲུག་༽ ཉིད་གསུམ་གྱིས་གཞིའ་༼ཤེས་འཇུག་༽གཟུང་བ་དང་། ཡོ་བྱད་དང་དུ་བླངས་༼སྒྱུ་འཕྲུལ་དྲ་བ་༽ཤིང་སྤྱོད་པའི་ཡོན་ཏན་དང་། ཚོགས་༼ཆོ་ག་སྔགས་དང་༽བསྒྲུབས་པས་ཚེ་དབང་ཐོབ་པ་དང་། དེས་༼དེ་ཚེ་བཅུ་དྲུག་༽ ཕྱག་རྒྱ་ཆེན་པོའི་རིག་འཛིན་ཐོབ་དུས་དང་། དེས་ལྷུན་གྲུབ་ཐོབ་པའི་༼ཕྱོགས་བཅུ་དུས་བཞི་༽པའི་མཚན་ཉིད་དང་། དེས་འབྲས་བུ་༼གཅིག་དང་དུ་མར་༽ཆོས་སྐུ་ཐོབ་པ་དང་། ཡོན་ཏན་དེ་གཞན་ནས་མ་༼ཕྱོགས་བཅུ་དུས་བཞི་༽བྱུང་བར་བསྟན་པའོ། །ཞི་བའི་བསྡུས་དོན་འབྱེད་འགྲེལ་རྫོགས་ས྄ོཧ྅྅྅། །སརྦ་མདྒ་ལཾ། །དགེའོ།། །། དེ་ཁོ་ན་ཉིད་སྣང་བ་དམ་པ་རྒྱན་མཆན་ཊིག་ཅན།དེ་ཁོ་ན་ཉིད་སྣང་བ་དམ་པ་རྒྱན་མཆན་ཏིག་ཅན་དུ་བཞུགས་སོ། །ཕྱག་ལ་གསུམ་སྟེ། དགོས་དོན་དང་། བསྡུས་དོན་དང་། ཚིག་དོན་ནོ། །དགོས་པ་ནི་གཉིས་ཏེ། ཡི་དམ་ལྷ་ལ་དབང་མི་ཟ་བ་དང་། བསྟན་ཆོས་རྩོམ་པ་ལ་བར་ཆད་མི་ཡོང་བའི་དགོས་པ་ཡོད། བསྟུས་པའི་དོན་ལ་བཞི་སྟེ། གང་ཟག་གང་གིས་བརྩལ། ལུས་གང་ལ་བརྩལ། དགོས་ཆེད་ཅིའི་ཕྱིར་བརྩལ། ཚུལ་ལམ་ཐབས་ཇི་ལྟར་བརྩལ་ལོ། །གང་ཟག་ནི་མངོན་འབྱུང་དུ་སངས་རྒྱས་གསང་བས་སོ། །རྗེས་འཇུག་ཏུ་བཤད་པ་པོ་གང་ཡིན་གྱིས་སོ། །ཡུལ་ནི་ཁྲག་འཐུང་ཁྲོ་བོའི་ལྷའོ། །དགོས་ཆེད་ནི། རྟོགས་པ་དོན་གྱི་ཕྱག་བཙལ་བས་མཆོག་གི་དངོས་གྲུབ་འཐོབ་ལ། ཀུན་རྫོབ་བརྡའི་ཕྱག་བཙལ་བས་ཐུན་མོང་གི་དངོས་གྲུབ་འཐོབ་པའོ། །ཚུལ་ལམ་ཐབས་ནི་གསུམ་སྟེ། ཡི་དམ་དོན་དུ་གཉེར་བའི་ཚུལ་དང་། གདུལ་བྱ་གུས་པ་བསྐྱེད་པའི་ཚུལ་དང་། ཡ་རབས་དང་གོ་བསྟུན་པའི་ཚུལ་ལོ། །ཚིག་གི་དོན་ནི་གསུམ་སྟེ། དབང་པོ་རབ་ངེས་ཤེས་སྐྱེད་པའི་ཕྱིར་ན་སྐུ་ལྔ་དང་སྦྱར་ཏེ་བཤད་པ་དང་། དབང་པོ་འབྲིང་ངེས་ཤེས་སྐྱེད་པའི་ཕྱིར་ན་སྐུ་གསུམ་དང་སྦྱར་ཏེ་བཤད་པ་དང་། དབང་པོ་ཐ་མ་ངེས་ཤེས་སྐྱེད་པའི་ཕྱིར་ན་སྒྲ་བརྒྱད་དང་སྦྱར་ཏེ་བཤད་པའོ། །ཡང་ན་རང་དོན་ཆོས་སྐུ་དང་སྦྱར་ཏེ་བཤད། གཞན་དོན་སྐུ་གཉིས་དང་སྦྱར་ཏེ་བཤད་པའོ། །དོན་བཅུ་དང་ཡང་སྦྱར་ཏེ་བཤད་དོ། ༈ །རང་དོན་ཆོས་སྐུ་དང་སྦྱར་ཏེ་བཤད་ན། ཐམས་ཅད་འཁོར་བ་དང་མྱ་ངན་ལས་འདས་པ་དང་། གཞིའ་ལམ་འབྲས་བུ་གསུམ་གྱིས་བསྡུས་པའི་ཆོས་ཐམས་ཅད་དོ། །ངོ་བོ་ངོ་བོ་དེའི་རང་བཞིན་ཏེ། སེམས་འོད་གསལ་ལོ། །དེ་ནི་ཆ ོས་ཉིད་བྱང་སེམས་རང་སྣང་བའོ། །མཉམ་ཉིད་ནི་གཟུང་བ་དང་འཛིན་པའི་ལ་སོགས་པའི་མཐའ་ཐམས་ཅད་བྲལ་བ། ཆོས་ཉིད་རང་གི་ངོ་བོ་བདེན་པ་དབྱེར་མྱེད་པའི་ཕྱིར་རོ། །སྐུ། །ནི་ཆོས་ཀྱི་སྐུའོ། །དེ་ནི་རང་དོན་ཕུན་སུམ་འཚོགས་པའོ། །བདེའ་ཆེན་ཆོས་སྐུ་དེ་ལས། གདུལ་བྱའི་དོན་དུ་ལོངས་སྤྱོད་དེ་ཡང་བདེ་བ་མི་ཟད་པ་དང་། བདེ་བ་ཆེ་བ་དང་། བདེའ་བ་གྱ་ནོམ་པ་དང་ལྡན་པར་རོ། །གར་དབང་ནི་སྤྲུལ་པའི་སྐུ་སྟེ། གདུལ་བྱ་ལ་དཔེའ་གར་མཁན་ལྟ་བུས་དབང་དུ་སྡུད་པའོ། །སྐུ་གསུང་ཐུགས། །སྤྲུལ་སྐུ་དེ་ཉིད་བཤད་པ་ནི། སྐུ་མི་བཟད་པ་རྒྱན་གྱི་འཁོར་ལོ་ནི། ཐུབ་པ་དྲུག་ལ་སོགས་པའོ། །གསུང་མི་བཟད་པ་རྒྱན་གྱི་འཁོར་ལོ་ནི། ཐེག་པ་རིམ་པ་དགུའ་འམ་ཆོས་ཀྱི་སྒོ་མོ་སྟོང་ཕྲག་བརྒྱད་ཅུ་རྩ་བཞིའོ། །ཐུགས་མི་བཟད་པ་རྒྱན་གྱི་འཁོར་ལོ་ནི། ཡེ་ཤེས་ཀྱི་རོལ་པ་སྣ་ཚོགས་པར་སྣང་བའོ། ༈ །སྐུ་ལྔ་དང་སྦྱར་ན། ཐམས་ཅད་མངོན་པར་བྱང་ཆུབ་པའི་སྐུ། ངོ་བོ་ཆོས་སྐུ། མཉམ་ཉིད་རྡོ་རྗེའི་སྐུ། བདེ་ཆེན་ལོངས་སྐུ། གར་དབང་སྤྲུལ་སྐུ། ཧེ་རུ་ཀ་རེ་རེ་ལ་ཡང་ཚང་ངོ་། །མི་ཟད་པར་ལྡན་རྒྱན་གྱི་འཁོར་ལོའི། །སྐུ་གསུང་ཐུགས་ཡོན་ཏན་འཕྲིན་ལས། སྐུ་མི་ཟད་པ་རྒྱན་གྱི་འཁོར་ལོ་ནི། གསང་སྙིང་ལས། དེ་བཞིན་ཉིད་ལས་མ་གཡོས་ཀྱང་། །ཡང་དག་ཐར་པའི་གཟུགས་སྐུ་དང་། །འགྲོ་བ་མ་ལུས་འདུལ་བའི་ཕྱིར། །མཐུན་པས་སྐུ་ནི་སྣ་ཚོགས་སྟོན། །ཅེས་སོ། །གསུང་མི་ཟད་པ་རྒྱན་གྱི་འཁོར་ལོ་ནི། ཐམས་ཅད་པད་མོའི་ངང་གྱུར་ནས། །གྲོལ་ཐར་ལམ་དང་པད་མོའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཐེག་པ་འཐོ་དམན་ཐམས་ཅད དང་། །ལོག་འགྲོ་མ་ལུས་ཐམས་ཅད་སྐད། །ཅེས་སོ། །ཐུགས་མི་ཟད་པ་རྒྱན་གྱི་འཁོར་ལོ་ནི། སྟོང་ཉིད་བདག་མྱེད་ཡེ་མཁྱེན་རང་རིག་ཐུགས། །དམྱིགས་བྱ་དམྱིགས་བྱེད་མྱེད་པར་དྲན་དབང་སྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལས། །གཞན་ན་མྱེད་དེ་དེ་ཉིད་དེ་ལྟར་ཡིན་ཅེས་སོ། །དེ་གསུམ་ཁོ་ན་ཡོན་ཏན་འཕྲིན་ལས་ཀྱང་དེ་ཉིད་ཡིན་ནོ། །ཧེ་ཧེ་ནི་ཆོས་སྐུ་༼སྐུ་གསུམ་སྦྱར་བ་༽མཚོན་དང་བྲལ། སྒྲ་བརྒྱད་དང་སྦྱར་ན། ཧེ་ཧེ་ཀ་ན་དགྱེས་པ་སྟེ་ཆོས་སྐུ། ཧེ་ཧེ་དུ་ན་རྒྱུ་སྟེ་སྙིང་རྗེ་ཆེན་པོའོ། །དགྱེས་པའི་སྙིང་རྗེའོ། །རུ་རུ་ནི་ལོངས་སྐུ་བདེ་བ་ཆེ། རུ་ར་ག་ན་ཆགས་པ་སྟེ། འགྲོ་བའི་དོན། རུ་ར་ག་ཏ་ན་ཁྲག །གསོལ་བ་སྟེ། རྡོ་རྗེ་གནོད་སྦྱིན་གྱིས་རུ་ཏྲའི་ཁྲག་གསོལ་བའོ། །ཀ་ཀ་ནི་མཛད་པ་སྤྲུལ་པའི་སྐུ། ཀ་རུ་ནི་ཀ་ནི་དོན་དམ་པ་སྟེ་བྱང་ཆུབ་ཀྱི་སེམས་ཀ་ཀར་མ་ན་འཕྲིན་ལས་པ་ཕུན་ནོ། །ཡང་ཧེ་རུ་གཅིག་མ་བྱུང་ན་མ་བྱུང་ན་དཔལ་གཅིག་རང་བཞིན་གྱིས་ཤུགས་ལ་ཡོད་དེ། ཨད་མ་ཤྲི་ན་རྟོགས་པ་བདག་གི་དཔལ། པ་ར་ཤྲི་ན་ཐུགས་རྗེ་གཞན་གྱི་དཔལ་ལོ། །ཕྱག་ཕྱག་ནི་ཉོན་མོངས་དྲི་མ་མྱེད། །འཚལ་ཏེ། །འཚལ་ཞེས་དེ་ལ་བརྗོད་པ་ཡིན་ཏེ་ནི་ལྷག་མ་ཡོད་པའི་ཚིག་ཅེས་སོ། ༈ །དེ་ལྟར་གཞན་དོན་ཕུན་སུམ་ཚོགས་པ་དེ་ལྟ་བུ་ཡིན་ཞེ་ན། ཧེ་རུ་ཀ་སྟེ། དཔལ་ཁྲག་འཐུང་ཞེས་བྱའོ། །དེ་ལ་ཤྲི་ཞེས་པའི་སྒྲའི་དོན་ནི། ཁོང་ནས་འདོན་པ་སྟེ། དངོས་བདག་དང་གཞན་གྱི་དཔལ་ལོ། །ཧེ་ནི་ཧེ་ཧེ་ཀྲིར་ཐ་སྟེ། སྤྱོད་ཅིང་བརྩོན་པའི་དོན་ཡིན་པས་ན། ཡེ་ཤེས་ཕུན་སུམ་ཚོགས་པའོ། །རུ་ནི་རུ་ཏི་ར་སྟེ། ཁྲག་བྱ་སྟེ་འོ། །ཁྲག་གི་སྒྲ་ནི་ཡང་བྱ་སྟེ་ཉོན་མོངས་པའོ། །ཀ་ནི་བདག་པོའི་སྐྱོན་ཏེ། ཁྲག་ལ་རོལ་པས་ན་ཧེ་རུ་སྟེ། སྤངས་པ་དང་ཡེ་ཤེས་ཕུན་སུམ་འཚོགས་པ་དང་ལྡན་པ་དེ་ཀ་ལ་བཤད་པའོ། །ཡང་ན་ཀ་ནི། ཀ་པ་ལ་སྟེ་ཐོད་པའི་སྟུལ་ཤུགས་དང་ལྡན་པའོ། །དེ་ལྟར་ན། ཐོད་པ་ཁྲག་གིས་སྐང་བ་ལ་རོལ་པའི་སྟུལ་ཤུགས་དང་ལྡན་པའི་ཧེ་རུ་ཀ་ཞེས་བཤད་དོ། །ཡི་གེ་ཡན་ལག་གི་དོན་དུ་བཤད་ན། ཤྲི་ནི་ཤུགས་ལ་ཡོད་དེ། ཨད་མ་ཤྲི་ན་བདག་གི་དཔལ་ལོ། །ཧེ་རུ་ན་རྒྱུད། ཧེ་ཀ་དོན། རྒྱུ་དབྱིངས་ལ་དོན་ཡེ་ཤེས་དགྱེས་པའོ། །རུ་ར་ག་ན་ཆགས་པ། རུ་རག་ཏ་ན་ཁྲག །ཆགས་པས་ཁྲོ་བོར་བྱུང་བའོ། །ཀ་ཀར་མ་ན་འཕྲིན་ལས། ཀ་ཀ་རུ་ན་ཐུགས་རྗེ། ཁྲོ་བོའི་འཕྲིན་ལས་དེ་དག་ཡང་སྙིང་རྗེས་མཉམ་མཉོམས་སུ་མཛད་པའོ། །གཞན་ཡང་གཟུང་འཛིན་གཉིས་མྱེད་དང་། ཚད་མྱེད་བཞི་དང་། རྡ་དགད་དྲག་པོ་དང་། རྣམ་པར་ཐར་པའི་སྒོ་གསུམ་ལ་ཡང་འཇུག་གོ། །དེ་བས་ན་སྒྲ་སྐད་སོར་བཞག་སྟེ། མ་སྒྱུར་བ་ཡིན་ནོ། །དེ་ནི་ཧེ་རུ་ཀའི་དོན་བཅུ་དང་སྦྱར་ཏེ་བཤད་པའོ་ཡིན་ནོ། ༈ །བཤད་པར་དམ་བཅའ་བ་ལ་གཉིས་ཏེ། དགོས་པའི་དོན་དང་། བསྡུས་པའི་དོན་དང་། ཚིག་གི་དོན་ནོ། །དགོས་པ་ནི་སེམས་བསྐྱེད་མི་ཉམས་པའི་དགོས་པ་ཡོད། གདུལ་བྱ་དོན་དུ་གཉེར་བའི་དགོས་པ་ཡོད། བསྟན་ཆོས་རྩམ་པ་མཐར་ཕྱིན་པའི་དགོས་པ་ཡོད། བསྡུས་དོན་ནི་གསུམ་སྟེ། ཆོས་གང་བཤད་ན། སྣང་བ་དམ་པ་རྒྱན་བཤད། གང་ཟག་གང་གིས་བཤད་ན། སངས་རྒྱས་གསང་བས་བཤད་ཐབས་ཇི་ལྟར་བཤད་ན། ཕྱག་བཙལ། དམ་བཅས་ནས། འགྲོ་བ་ཡེ་ཤེས་ཀྱི་ལུས་སུ་བྱ་བའི་ཕྱིར་བཤད་དོ། །ཚིག་གི་དོན་ནི། སྒྱུ་འཕྲུལ་དྲ་བའི་རྒྱུད་དག་ལས་ཞེས་པས་ཏེ། གང་ལས་བསྡུས་སྒྱུ་འཕྲུལ་དྲྭ་བའི་རྒྱུད་དག་ལས། །རྒྱུ་དོན་དམ་སྟེ་ཤེས་རབ། འཕྲུལ་ཀུན་རྫོབ་སྟེ་ཐབས། དྲ་བ་གཉིས་མྱེད་དེ་ཟུང་དུ་འབྲེལ་བ། རྒྱུད་ལམ་ཡི་གེའི་རྒྱུད། དག་ངོས་བཟུང་བ་སྟེ། གསང་སྙིང་དང་ཐབས་ཞགས་ལས་བསྟུས་སོ། །དེ་ཡང་རྒྱུད་ནི། ཞལ་ནས་གསུངས་པ་དང་། ཆོ་ག་ཚང་བ་དང་། འབྲེལ་ཆགས་པ་དང་། ཀྲུགས་པ་དང་། མངོན་པར་འབྱུང་བས་ན་རྒྱུད་དོ། །དེ་ཡང་སྒྱུ་འཕྲུལ་གསུམ་ལས། རྡོ་རྗེ་སེམས་དཔའི་སྒྱུ་འཕྲུལ་དྲ་བའི་རྒྱུད་ལས། གསང་སྙིང་ལས་སོ། ། གང་བསྟུས་ན། ལྷའི་རྣལ་འབྱོར་རིམ་པ་ཞིག །རང་བཞིན་ལྷུན་གྲུབ་གཞིའི་ལྷ་དང་། ཉེ་བར་བསྙེན་པ་རྟགས་པ་ལམ་གྱི་ལྷ་དང་། རྟོགས་པ་མངོན་གྱུར་འབྲས་བུའི་ལྷ་དང་གསུམ་དབྱེར་མྱེད་པར་ལམ་གྱི་རྣལ་འབྱོར་པས། རྟེན་དང་རྟེན་བཅས་གོ་རིམ་བཞིན་དུ་སྒོམ་པའི་རིམ་པ་བཞིན་ཏེ། ལམ་གྱི་རྣལ་འབྱོར་པ་རྣམས་ཀྱི་དོན་དུ། དཔལ་ཧེ་རུ་ཀ་སྒོམ་པ་དང་། འཕྲིན་ལས་ཀྱི་རིམ་པ་བཞིན་དུ་བྱའོ། །དགོས་ཆེད་ཅིའི་ཕྱིར། སེམས་ཅན་ཡེ་ཤེས་སྐྱེད་པའི་ཕྱིར། །ཚོགས་བརྒྱད་དང་ལྡན་པའི་སེམས་ཅན་དེ་ཡེ་ནས་ཡེ་ཤེས་ལྔའི་རང་བཞིན་ཡིན་པ་ལ། ཡིན་པར་མ་ཤེས་པ་དེ་ཡེ་ཤེས་ལྔར་སྐྱེད་པའི་ཕྱིར་རམ། སེམས་ཅན་རྣམས་ལ་ནི་གཏི་མུག་གི་མུན་པས་བསྒྲིབས་ནས་ཡེ་ཤེས་ཀྱི་སྣང་བ་མ་སྐྱེས་པ་ལ་ཡེ་ཤེས་སྐྱེད་ཕྱིར། ཇི་ལྟར་བསྟུས་ན། ལེགས་པར་བསྟུས་ཏེ་བསྟན་པར་བྱའོ། །ཚིག་ཏུ་མི་མང་། དོན་དུ་མི་ཉུང་བར་ལེགས་པར་བསྟུས་ཏེ། མ་འོངས་པའི་གང་ཟག་རྣམས་ལ་བསྟན་པར་བྱའོ། །དེ་ཡང་མན་ངག་འདི་སློབ་དཔོན་གྱིས་འཕྲིན་ལས་སུ་མ་ཚང་མྱེད་པར། ལེའུ་བཅོ་ལྔ་པ་ལ་སོགས་པ་ནས་བསྟུས་སོ། །ཡང་གང་གིས་བསྟུས་ན། སངས་རྒྱས་གསང་བས་སོ། །གང་ནས་བསྟུས་ན། གསང་སྙིང་ལས་སོ། །ཅིའི་ཕྱིར་བསྟུས་ན། སེམས་ཅན་ཡེ་ཤེས་སོ། །གང་བསྟུས་ན། སྒྲུབ་ཐབས་འདི་ཉིད་དོ། །གང་མཉེས་པར་བྱ་ན་བླ་མ་སློབ་དཔོན་མཉེས་པར་མ་བྱས་ཤིང་། །སྤྱིར་སློབ་དཔོན་དྲུག་ལས། མན་ངག་ལུང་གི་སློབ་དཔོན་དང་། དམ་ཚིག་དབང་བསྐུར་བའི་སློབ་དཔོན་དང་། ཕྱི་སྒོ་གསུམ་གྱིས་མཉེས་པར་བྱ་སྟེ། ཟང་ཟིང་དབུལ། ནང་བསྒྲུབ་པས་མཉེས་པར་བྱ་སྟེ། སློབ་མ་སྣོད་བཟང་པོའོ། །དེ་ལ་མཉེས་པའི་རྐྱེན་གྱིས་ཅི་ཞེ་ན། མཉེས་ནས་ཅི་བྱེད་ན། །དབང་རྣམས་ཐོབ་པར་མ་བྱས་ན། །ཕྱི་ཕན་པའི་དབང་བཅུ་ལུས་ལ་སྐུར་བ་དང་། ནང་ནུས་པའི་དབང་ལྔ་སེམས་ལ་སྐུར་བ་དང་། གསང་བ་ཟབ་མོའི་དབང་གསུམ་རིག་པ་ལ་སླབ་པ་དང་། དབང་བཅོའ་བརྒྱད་པོ་རྣམས་སློབ་མས་ཐོབ་པར་མ་བྱས་ན། མཉེས་པའི་བྱ་བ་གང་འགྲུབ་ལས་བྱ་བ་གོ་བ་དེའོ། །ཉན་པ་ལ་སོགས་བརྩོམ་པ་རྣམས། །དབང་དེ་དག་མ་ཐོབ་པར། རང་ཉན་པ་དང་། གཞན་ལ་འཆད་པ་དང་། ལྷ་བསྒོམ་ཞིང་སྒྲུབ་པ་དང་། འཕྲིན་ལས་དང་། རྡོ་རྗེ་སློབ་དཔོན་གྱི་ས་གཟུང་ནས་དེའི་བྱ་བ་བྱེད་ཀྱང་། བྱ་བ་ཅི་ཐོབ་ན་འབྲས་བུ་ཡོད་པར་འགྱུར། འབྲས་བུ་མྱེད་ཅིང་བརླག་པར་འགྱུར ། དེ་དག་གི་འབྲས་བུ་མཆོག་དང་ཐུན་མོང་གི་འབྲས་བུ་མྱེད་ཀྱི་ཕ་རོལ་ཏུ། སླར་ངན་སོང་གི་གནས་སུ་རང་རྒྱུད་རླག་པར་འགྱུར་བས་ན། བླ་མ་གཉེས་ཤིང་ཕྱི་ནང་གི་དབང་རྣམས་ཐོབ་པར་བྱས་ནས་བསྟོད་པ་ལ་སོགས་པ་བྱའོ་ཞེའོ། །དེ་བས་ན་གོ་མ་དེ་དག་ལས་ཟློག་སྟེ་བཤད་པའོ། །གང་གིས་མཚོན་ཡི་གེ་སྒྲ་ཏགས་མིང་ཚོགས་ལ། །ཡི་གེ་ཨ་ལི་ཀ་ལི་གཉིས་ལ། གེའུ་གུ་འགྲེང་བུ་དང་ན་རོའི་སྒྲ་ཏགས་ནས། ཚོག་ཤད་ཀྱིས་ཕྱེ་བ་ནི། ཡི་གེའི་ཚོགས་ལས་སྒྲ་བྱུང་། སྒྲ་འདུས་པ་ལས་མིང་བྱུང་། མིང་འདུས་པ་ལས་ཚིག་ཏུ་འདུས་པའོ། །ཇི་ལྟར་མཚོན། རྟེན་པའི་ཚིག་གིས་རབ་མཚོན་ཏེ། །ཚིག་ལ་རྟེན་ནས་དོན་མཚོན་པར་བྱེད་དེ། ཚིག་གི་སྒྲོན་མེས་དོན་གྱི་གསེར་མཚོལ་བ་ནི། དོན་གབ་པ་མུན་པའི་རྫས་དང་འདྲ། ཚིག་གིས་མཚོན་པ་ནི་སྒྲོན་མེ་དང་འདྲ་བ་ཡིན་ནོ། །གང་མཚོན། ཁོང་ནས་གབ་སྦས་དོན་འབྱིན་པ། །དེས་གང་མཚོན་པར་བྱེད་ཅེ་ན། གཞི་རང་བཞིན་གྱི་རྒྱུད་ལ་གབ་པ་ཀུན་ཏུ་བཟང་པོས་འབྱིན་ལ། ལམ་རྐྱེན་གྱི་རྒྱུད་ལ་སྦས་པ་སློབ་དཔོན་གྱིས་འབྱིན་ནོ། །དེ་ཡང་གཞི་རང་བཞིན་གྱི་རྒྱུད་ལ་གབ་པ་སེམས་ཉིད་ཡིན་ཏེ། ཁོང་ན་གབ། དེ་སྟོན་པའི་གདམ་ངག་ལམ་རྐྱེན་གྱི་རྒྱུད་ཡིན་ཏེ། ཡི་གེ་རིས་སུ་སྦས་སོ། །ཚིག་དང་ཡི་གེའི་རྒྱུད་དེ་ཡང་སྐུས་ལ་གབ་སྟེ། རྡ་ཆོད་དང་ཟུ་ལུམས་བྱེད་པ་རྣམས་ཀྱི་དོན་དུ་རྒྱུད་བཀྲུགས་པའོ། །བཀྲུགས་པ་དེའི་དོན་འདིར་ཕྱིན་ཅི་མ་ལོག་པར་བསྟུས་ནས་སྟོན་ནོ། །སུས་མཚོན་ཅི་འཛིན། སྟོན་པ་རྡོ་རྗེའི་ཐུགས་ལ་གནས། །དེ་འབྱིན་པའི་ཁུངས་གང་ལ་ཐུག་ན། སྟོན་པ་ཀུན་ཏུ་བཟང་པོ་རྒྱུད་སྟོན་པའི་བདག་ཉིད་དམ། དཔལ་རྡོ་རྗེ་སེམས་དཔའ་རྒྱུད་འཆད་པའི་སྐྱེས་བུའམ། སློབ་དཔོན་སངས་རྒྱས་གསང་བ་བསྟན་ཆོས་རྩམ་པའི་མཁན་པོ་གསུམ་གྱི་ཐུགས་ལ་གབ་པ་ནི། དེ་ལྟ་བུར་གནས་ཤིང་རག་ལུས་པས་ན། སློབ་དཔོན་མཉེས་པར་བྱ་དགོས་པའོ། །དེ་ཡང་དོན་༼སྟོན་པ་རྡོ་རྗེ་༽དེ་གང་ལ་ཡོད། གང་གིས་༼ཁོང་ནས་༽ འབྱིན་༼བདེན་པའི་༽པ་ལ་ཅི་དགོས། དགོས་པ་དེ་གང་གིས་གྲུབ་ཞེ་ན། ཐོབ་བྱ་ཉིད་འདི་ཡིན་པས་འདི་ལ་འབད་པར་བསྟན་འདི་ནི་གསང་ཆེན་ངེས་པའི། །རྒྱུད་གསང་བ་སྙིང་པོའི་མན་ངག་འདི་ནི། གསང་བ་བཞིས་ཆོད་པའི་གང་ཟག །གྲོལ་བའི་ཕྱིར་གསུངས་པས། དྲང་དོན་མ་ཡིན་པས་ངེས་པའི་དོན་གྱི་མན་ངག་འདི་བློ་དམན་པས་མི་རྟོགས་ཏེ་ཤིན་ཏུ་ཟབ་པའི་ཕྱིར་རོ། །འདི་ནི་ངེས་པའི་དོན་ཕྱིན་ཅི་མ་ལོག་པར་སྟོན་པ་སྟེ། འབྲས་བུ་ལམ་དུ་གྱུར་པ་ཡིན། །དེ་ཡང་ད་ལྟར་རྒྱུའི་དུས་འདི་ཉིད་ན་འབྲས་བུ་སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པར་སྟོན་ཏེ། དེའི་དོན་རྟོགས་ནས་དེ་ཉིད་ལམ་དུ་ཕྱིན་པའི་ཕྱིར་རོ། །འབྲས་བུ་ནི་རྒྱལ་པོ་ཕྲུ་གུའམ། ཤིང་སྣའི་མེ་དང་འདྲ་ལ། ལམ་དུ་གྱུར་པ་ནི་རྒྱུ་འབྲས་གཉིས་མྱེད་པ་ཡིན་པས་སོ། །དེ་བས་ན་འབྲས་བུ་རྡོ་རྗེའི་ཐེག་པ་ཞེས་པ་ཡིན་ནོ། །རྒྱལ་བའི་དཀྱིལ་འཁར་མ་ལུས་ལ། །ཕྱོགས་བཅུ་དུས་གསུམ་གྱི་རྒྱལ་བའི་དཀྱིལ་འཁོར་ཐམས་ཅད་པ་ཡང་། མན་ངག་འདི་ལས་མ་རྟོགས་པའི་དགོས་པ་མྱེད་དེ། རྒྱལ་བ་ནི་འཁོར་བ་ལས་སོ། །དཀྱིལ་ནི་བཛྲ་ཧེ་རུ་ཀའོ། །འཁོར་ནི་རིགས་བཞིའི་ཧེ་རུ་ཀའོ། །མ་ལུས་པ་ནི་ལྷག་མ་མ་ལུས་པའོ། །འདི་ལས་གསང་བའི་ངེས་དོན་མྱེད། །རྒྱལ་བ་ཐམས་ཅད་ཀྱང་མན་ངག་འདི་ལས་བྱུང་བ་དང་། དེའི་ངང་ལ་བཞུགས་པའི་ཕྱིར་དང་། འདི་ལས་ལྷག་པའི་གསང་བའི་ངེས་དོན་གཞན་མྱེད་དེ། མན་ངག་འདི་ཉིད་ལས་མི་འདའ་བ་ཡིན་ནོ། །བཙལ་ཀྱང་རྒྱལ་བས་མི་སྙེམས་སོ། །མི་ལ་སོགས་པ་སྒྲིབ་ཏུ་རེ་གཞན་གྱིས་ལྟ་ཅི་སྨོས་ཏེ། འདི་ལས་ལྷག་པ་རྒྱལ་བའི་དཀྱིལ་འཁོར་དང་བཅས་པས་ཀྱང་མི་རྙེད་དོ། །ཀུན་གྱི་ཕྱག་རྒྱ་ཆེན་པོའི་རྒྱུ། །དེ་བཞིན་གཤེགས་པ་ཀུན་གྱི་ཕྱག་རྒྱ་ནི། ཡབ་ཕྱག་རྒྱ་ཆེན་པོ། ཡུམ་དམ་ཚིག་གི་ཕྱག་རྒྱ་གཉིས་མྱེད་ཆོས་ཀྱི་ཕྱག་རྒྱ། འཕྲོ་འདུའ་ལས་ཀྱི་ཕྱག་རྒྱ། དེ་ལས་མི་འདའ་བས་ན་ཕྱག་རྒྱ། དེ་ལྟ་བུས་དབྱིངས་དང་ཡེ་ཤེས་གཉིས་སུ་མྱེད་པ་ཐོབ་ཅིང་སྐྱེད་པའི་རྒྱུ་ཡིན་པས་ན་འདི་ལ་འབད་དོ། །སྦྱངས་པས་སྣོད་དུ་གྱུར་པ་བསྟན། སྦྱིན་པའི་སྣོད་བསྟན། ཐོས་བསམ་བསྒོམ་ལ་རབ་སྦྱངས་པའི། །ཐོས་པའི་ཤེས་རབ་ཀྱི་དུས་སུ་སྣོད་ཁ་སྤྲུབ་ཀྱི་སྐྱོན། བསམ་པའི་དུས་སུ་ཞབས་རྡོལ་སྤང་། སྒོམ་པའི་དུས་སུ་དུག་ཅན་སྤང་། དེ་ལྟ་བུས་རང་གི་ཤེས་རྒྱུད་སྦྱང་ངོ་། །འདིའི་དོན་འདོད་པའི་གང་ཟག་ནི། ཐུན་མོང་གི་ཐེག་པ་ལ་སྔོན་དུ་བློ་སྦྱངས་པ་བྱས་པ་གཅིག་དགོས་པའོ། །ཤེས་རབ་མིག་ལྡན་རྣམས་ཀྱིས་ཟུང་། །དེ་ལྟར་སྔོན་དུ་བློ་སྦྱངས་པས། སྒྲིབ་པ་ཐམས་ཅད་དག་ནས་བློ་རྣོ་བར་གྱུར་ཏེ། དེས་འདི་རྟོགས་པས་ན། ཤེས་རབ་ཀྱི་སྤྱན་དང་ལྡན་པ་རྣམས་ཀྱིས། འདི་ཟུང་ཅིག །གཞན་སྦྱངས་པ་སྔོན་དུ་མ་སོང་བ་དང་། བློ་དམན་པས་འདིའི་དོན་མ་རྟོགས་པས་བསྟན་པར་མི་བྱ་བའི་ཕྱིར་ན། ༈ །རང་བཞིན་གྱིས་སྣོད་དུ་རུང་བར་བསྟན། སྣོད་ལྡན་ངང་ཚུལ་བཟང་ལ་བསྟན། །སྣོད་དང་ལྡན་པ་ནི་སྐྱོན་མྱེད་པ་སྟེ། ལྡན་པ་ཆུ་སྲིན་གྲེ་བ་དང་འདྲ་སྟེ། མན་ངག་གསང་ཐུབ་པ། ངང་རིང་བ་ཆུ་བོའི་རྒྱུན་ལྟ་བུ་སྟེ། རྡོ་རྗེ་སློབ་དཔོན་དང་། མཆེད་ལྕམ་དྲལ་དང་། སེམས་ལ་ཁོང་ཁྲོ་བ་མྱེད་པ་དང་། ཚུལ་ཤེས་པ་དགེ་སློང་གསར་པ་ལྟ་བུ་སྟེ་སྒོ་གསུམ་སྐྱོན་གྱིས་མ་གོས་པ་དང་། རང་བཞིན་བཟང་བ་གསེར་ལྟ་བུ་སྟེ། ཐམས་ཅད་དུ་ཕྱོགས་རིས་མི་འབྱེད་པའི་སྙིང་རྗེ་ཆེན་པོ་དང་ལྡན་པ་སྟེ་ཀུན་ལ་ཁྱབ་པ་ཉི་མ་ལྟ་བུ་དང་། བློ་རྟན་པ་རི་བོ་ལྟ་བུ་སྟེ། རྡོ་རྗེ་ཐེག་པ་འདིའི་སྒོར་ཞུགས་ནས་མདོའ་སྡེ་ལ་སོགས་སུ་མི་ལྡོག་པར་རིགས་རྟན་ཞིང་མི་འགྱུར་བའོ། །ལུས་དང་ལོངས་སྤྱོད་གཏོང་ལ་སྦྱིན། །རྐྱེན་གྱིས་སྣོད་དུ་རུང་བ་བསྟན། མྱེད་ན་རང་ལུས་འབུལ་བ་ནི། ཡོད་ན་ལོངས་སྤྱོད་འབུལ་བ་སྟེ། རྡོ་རྗེ་སློབ་དཔོན་དང་མཆེད་དང་སེམས་ཅན་ཐམས་ཅད་ཀྱི་དོན་དུ། རང་གི་ལུས་སྲོག་ལ་ཡང་མི་ལྟ་བར། ལོངས་སྤྱོད་ལ་སོགས་པ་གཏོང་བ་དེ་ལྟ་བུ་ལ་མན་ངག་འདི་སྦྱིན་པར་བྱའོ། །དེ་སྐད་དུ་ཡང་སྙིང་པོ་ལས། རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་ཞེས་དང་ཡིད་འཐད་དབུལ། །ཅེས་སོ། །གཞན་དུ་ནམས་ཀྱང་སྦྱིན་མི་བྱ། །གོང་དུ་བསྟན་པའི་སྣོད་དང་ལྡན་པ་དེ་དག་མྱེད་པ་ལ། མན་ངག་འདི་ནམ་ཡང་བསྟན་པར་མྱི་བྱ་སྟེ། སྣོད་ངན་ན་བུ་ལ་ཡང་མི་སྦྱིན་ནོ། །གོང་ལས་ཟློག་པས་བཤད་དེ། ཐོས་བསམ་སྒོམ་ལ་མ་སྦྱངས་དང་། །ཤེས་རབ་མིག་ལྡན་མྱི་ལྡན་ཞིང་། །ཞེས་བྱའོ། །རྨོངས་ལ་འཕྱར་བས་གལ་ཏེ་སྦྱིན། །གལ་ཏེ་སློབ་མ་བློ་མ་སྦྱངས་པས། གཏིའ་མུག་གིས་ཤེས་རབ་རྨོངས་པ་དག་ལ། སློབ་དཔོན་འཕྱར་བས། ཐེག་པ་ཆུང་རྒྱུད་ཀྱི་མན་ངག་སྦྱིན་རྒྱུ་མྱེད་པས། གལ་ཏེའམ་རྒྱ་ལམ་ན་བྱིན་ན། དེའི་ཉེས་པ་ནི། དུས་མིན་པར་ནི་སྲོག་ཟད་ནས། །འཆིའ་བའི་དུས་མིན་པར་འཆི་བའི་དུས་བྱས་ནས། མ་མོ་དང་མཁའ་འགྲོ་མ་རྣམས་ཀྱིས་འཆད་པ་བཅད་དེ། སྲོག་ཟད་ནས་བེམས་རིག་བྲལ་བར་འགྱུར་རོ། །སྲེགས་དང་སྦྲེེབས་ལ་ཡུན་རིང་གནས། །ཤི་ནས་ཡང་། སྲེག་པ་ཚ་བའི་དམྱལ་བ་བརྒྱད་དང་། དྲང་བའི་དམྱལ་བ་བརྒྱད་དང་། སྦྲེབས་པ་སྟེ། ཡི་དྭགས་ཕྱི་ནང་གི་སྒྲིབ་པ་ཅན་དང་། སྒོས་ཁུར་གི་སྒྲིབ་བ་ཅན་དུ། སྐལ་བ་དུ་མ་དང་སྟོང་ཕྲག་མང་པོར་གནས་པའི་ཕྱིར་ན་སུ་ལ་ཡང་མྱི་སྦྱིན་ནོ། །གང་རྣལ་འབྱོར་ཞིག་གླང་རང་སེམས་ཆེན་མྱོས་འདྲའི་སེམས། །མཉམ་པར་བཞག་ལས་བསྟུལ་འདུལ་ཐབས་མཁས་པས་རྟོག་པ་ཡེ་ཤེས་སུ་ནས་སུ། །སྔགས་གསུམ་དང་ཕྱག་རྒྱས་རབ་བཞི་བསྟན་ན། །དངོས་མཆོག་ཏུ་ཐུན་མོང་གི་གྲུབ་ཡ་མཚན་ཆེན་པོར་འགྱུར་བསམ་པ་མཉམ་པར་བཞག་ཅེས་སོ། ༈ །རྒྱ་གར་གྱི་གླང་པོ་ཆེ་སྙོན་པ་ནི་ཆོས་གསུམ་དང་ལྡན་པ་སྟེ། གནས་མ་ཡིན་པར་གནས་པ། འགྱུ་མ་ཡིན་པར་འགྱུ་བ། བྱེད་དུ་མ་བཅུག་པའི་ལས་བྱེད་པའོ། །དེ་ཡང་གནས་མ་ཡིན་པར་གནས་ཏེ་གྲོང་འདུན་དུ་སྡོད། འགྱུས་མ་ཡིན་པར་འགྱུ་སྟེ། ལམ་སྲང་གྲོང་བར་དུ་འགྱུ། བྱ་བ་མ་ཡིན་པས་ལས་བྱེད་དེ། གྲོང་ཁྱེར་འཆིག་གོ། །དེ་དང་རང་གི་སེམས་ཀྱང་འདྲ་སྟེ། གནས་མ་ཡིན་པར་གནས་ཏེ། བདག་འཛིན་ལ་གནས། འགྱུ་ས་མ་ཡིན་ཏེ་གཟུང་འཛིན་ལ་འགྱུ། བྱེད་དུ་མ་བཅུག་པའི་ལས་བྱེད་དེ། འདོད་ཆགས་ཞེ་སྡང་ལ་སོགས་པའི་ལས་བྱེད་དོ། །དེ་ཡང་གླང་པོ་ཆེ་དེ་འདུལ་བའི་དུས་སུ། ཁོ་རྒྱུ་བའི་ལམ་སྲང་ངམ་གྲོག་པོར་དོང་སྐོས་ཏེ། དེར་རྒུན་འབྲུམ་གྱི་ཆང་བླུགས་ཏེ་བཞག་པས། ཁོ་རྒྱུ་བའི་དུས་སུ་ཚོར་ཏེ་འཐུངས་པས། མྱོས་ནས་འགྲོ་བ། དེ་ལ་སྣ་ནས་ལྕགས་ཀྱུས་གཟུང་ནས། སྙན་པའི་ཚིག་གླུ་དང་གར་ལ་སོགས་པ་བྱས། སྟེང་དུ་ཞོན་ནས་ཐོ་བས་དལ་བུས་ཏོལ་ཏོང་ཞག་བཅུ་གཅིག་དཀུག་པས་ཐུལ་ལོ། །དེ་ནས་རང་གི་སྲིད་བསྲུང་བ་དང་། དགྲའི་དཔུང་གཞོམ་པ་ལ་སོགས་པའི་ཡོན་ཏན་འབྱུང་ངོ་། །རང་གི་སེམས་དེ་དག་འདྲ་བ་དེ་ཡང་། རྒུན་ཆང་དང་འདྲ་བའི་ཏིང་ངེ་འཛིན་གསུམ་ལ་བློ་གཞག་པས། སྟུལ་ནས། ལྕགས་ཀྱུ་དང་ཐོ་བ་དང་གླུ་ལ་སོགས་པ་དང་། འདྲ་བའི། རྒྱུ་མ་ནོར་བའི་རྩ་བའི་སྔགས་ལ་སོགས་པའི་སྔགས་གསུམ་བསྟན་པ་དང་། ཕྱག་རྒྱ་བཞི་བསྟན་པར་བྱ་སྟེ་མངོན་དུ་བྱས་ནས། རང་གི་རྟོག་ཚོགས་ལྷའི་དལ་དུ་ཤར་བས། མཆོག་དང་ཐུན་མོང་གི་དངོས་གྲུབ་འབྱུང་ངོ་། །དེ་བས་ན་མཉམ་པར་བཞག་ཅེས་སོ། །དུར་མི་རོ་ཡོད་པ་ཁྲོད་ཆེན་པོ་གནས་བརྒྱད་རབ་དབེན་དུ་འཛེམ་པས་པའི། །རི་དགྲས་མི་ཚུགས་པའི་བོས་བསྐོར་བའི་ལྗོན་ཤིང་ལྕུག་མ་དང་། །མེ་ཏོག་གི་སྣམ་བུ་བར་མ་ཆད་པའི་འཕྲེང་བས་རབ་རྒྱན་པའི། །དབེན་དཔག་ཚད་ཀྱིས་པའི་གནས་སུ་འདུག་བསྒོམ་ཞེས་སོ་ནས་ནི། ༈ གནས་ལ་བཞི་སྟེ། ཕྱི་ཡུལ་གྱི་གནས་དང་སྦྱར་ཏེ་བཤད་པ་དང་། ནང་ལུས་ཀྱི་གནས་དང་སྦྱར་ཏེ་བཤད་པ་དང་། གསང་བ་ཡུམ་གྱི་གནས་དང་སྦྱར་ཏེ་བཤད་པ་དང་། དེ་ཁོ་ན་ཉིད་རྩའི་གནས་དང་སྦྱར་ཏེ་བཤད་པའོ། །དང་པོ་ལྟར་ན། དུར་ཕུང་པོའི་གླིང་ལ། ཁྲོད་བམ་གྱི་ཀློང་སྟེ། མི་རོ་གསར་སྙིང་མང་པོ་གནས་པའོ། །ཆེན་པོ་ནི་དུར་ཁྲོད་ཆེན་པོའི་གནས་བརྒྱད་ལྟ་བུའོ། །རབ་དབེན་པ་ནི། བསམ་གཏན་གྱི་འདུ་འཛི་ལས་དབེན་པ་དང་། དམ་རྫས་སྐྱེ་བོ་ལས་དབེན་པ་དང་། འཇིགས་པ་དགྲའ་རྐུན་ལས་དབེན་པ་དང་། བར་ཆད་རྐྱེན་བགེགས་ལས་དབེན་པའོ། །རི་བོས་སྐོར་བ་ནི། གནས་དེའི་འཐའ་མ་རིས་སྐོར་བས་དགྲས་མི་ཚུགས་པ་དང་། ལྕུག་མ་ལྗོན་ཤིང་གི་ནགས་ཚལ་ཡོད་པ་དང་། མེ་ཏོག་གི་རྣམ་བུ་ཡོད་པ་དང་། དཔག་ཚད་དང་རྒྱང་གྲགས་ལས་དབེན་པ་སྟེ། གནས་དེ་ན། ནམ་མཁའ་གྲུ་གསུམ་མམ། ཤར་རི་མཉམ་པ། ལྷོ་རི་བཞོལ་བ། ནུབ་རི་འཐོའ་བ། བྱང་རི་འདུད་ལ་སྐོར་བ། ཤིང་ཙན་དན་ལ་སོགས་པ་དྲི་ཞིམ་པོ་ཡོད་པ། དེ་ལྟ་བུར་འདུག་ནས་ནི། ས་ཆོག་བྱ། མ་དྷ་ལ་བྱ། སྟ་གོན་བྱ། དམ་རྫས་དགྲམ། སྔོན་འགྲོ་གནས་སྐབས་དང་སྦྱར་རོ། །ནང་ལུས་ཀྱི་གནས་དང་སྦྱར་ཏེ་བཤད་ན། རང་གི་ལུས་ཉིད་དུར་ཁྲོད་ཀྱི་གནས་བརྒྱད་དེ། ཡན་ལག་ལྔ། མཚན་མ་དང་དྲུག །ཁོག་པ་དང་བདུན། ནང་རོལ་དང་བརྒྱད་དོ། །ལུས་དེ་གཞན་དབང་དུ་མ་སོང་བས་དབེན་པ་དང་། ཁོག་པ་རི་བོ་དང་འདྲ་བ་ལ་ཡན་ལག་གིས་སྐོར་བས་སོ། །སྐྲ་དང་སྤུ་ནི་ལྕུག་ཕྲན་ནོ། །མིག་ལ་སོགས་པའི་དབང་པོ་ལྔ་ནི་མེ་ཏོག་གོ། །ལུས་འཛིན་པ་དང་བྲལ་བས་བདེའ་བའི་གནས་སུ་གྱུར་པ་དེར། རྣམ་པར་ཤེས་པའི་ཚོགས་བརྒྱད་འདུས་ལ་ཡེ་ཤེས་ལྔའི་ཁྲོ་བོ་སྒྲུབ་པར་བྱའོ། །དེར་ཀུན་གཞིའི་རྣམ་པར་ཤེས་པ་མ་དལ་དུ་བྱས། རྣམ་པར་ཤེས་པའི་ཚོགས་བརྒྱད་ཀྱི་ཐིག་གཏབ། ཕུང་པོ་ཉོན་མོངས་པ་ལྔའི་དམ་རྫས་བཀྲམ། ཡེ་ཤེས་ལྔའི་ལྷ་བསྒོམ་མོ། །གསང་བ་ཡུམ་གྱི་མཁའ་དང་སྦྱར་ཏེ་བཤད་ན། མཁའ་ནི་དུར་ཁྲོད་དེ། དུར་ནི་བྱང་སེམས་སྡུད་པའོ། །ཁྲོད་ནི་བྱང་སེམས་འབྱིན་པའོ། །དབེན་པ་ནི་རྩ་ཁ་ཁ་མུ་ཁའི་སྣ་རྩེ་ཨ་བ་འདུ་ཏི་ནས་སོར་གཅིག་གིས་དཔགས་པའོ། །རི་བོ་ནི་ཡུམ་གྱི་སྣ་རྩེའོ། །སྐོར་བ་ནི་རྩ་སྟེ། རྩའི་འདུད་པ་བརྒྱད་དུ་གནས་པའོ། །མེ་ཏོག་གི་ཡུམ་གྱི་པད་མ་རག་ཏའོ། །ལྕུག་མ་ནི་བ་སྤུ་རིང་པོའོ། །གནས་ནི། ཡུམ་མཁའ་ཕྱི་ཁྱམས་གྲུ་བཞི་རྒྱས་པ། སྐྱེ་གནས་ཟླ་ཁམ་དབང་། སྣ་ཚོགས་འདུད་པ་ཟླུམ་པོ། བཞི་པ། སྣ་རྩེ་ཟུར་གསུམ་དྲག་པོ། གནས་དེར་གསང་བའི་རྡོ་རྗེ་འདུག་ནས། ས་བླང་བ་ལྟ་བུའི་གཡའ་བླང་། ས་ཆོག་ལྟ་བུའི་རྩ་བརྩལ། དཀྱིལ་འཁོར་འབྲི་བ་ལྟ་བུའི་སྦྱོར་བའི་བརྡ་བསྐུལ་ལ། རོལ་པས་སྒྲུབ་པ་བྱ། དངོས་གྲུབ་ཡུམ་གྱི་མཁའ་ལ་བླང་། གསང་བའི་དབང་སྐུར། འབྲས་བུ་ལྷན་ཅིག་སྐྱེས་པའི་ཡེ་ཤེས་ངོས་བཟུང་ངོ་། །དེ་ཁོ་ཉིད་རྩ་དང་སྦྱར་ཏེ་བཤད་ན། དུར་ཁྲོད་ནི་རྩ་ན་ལུ་སྟོང་ཕྲག་བདུན་ཅུ་རྩ་བཞིའོ། །རི་བོ་ནི་སྙིང་ངོ་། །སྐོར་བ་ནི་རྩ་འཁོར་ལོ་བཞིའོ། །ལྕུག་མ་ནི་རྩའོ། །མེ་ཏོག་ནི་རྩའི་ནང་གི་ཐིག་ལེའོ། །གནས་ནི་དཀྱིལ་ཀྲུང་བཅའ་བའོ། །འདུག་ནས་ནི་གཏུམ་མོ་སྤར་ཏེ་ནམ་མཁའི་བ་བཞོ་བར་བྱའོ། །དེ་ལྟར་བསྟན་པའི་གནས་བཞི་པོ་དེའི་དགོས་པ་ནི། ཕྱི་བསྐྱེད་རིམས་བསྒོམ་པའི་གནས་དང་། ནང་རྫོགས་རིམས་བསྒོམ་པའི་གནས་དང་། གསང་བ་གསང་དབང་སྐུར་བའི་གནས་དང་། རྩ་གནས་གསང་དབང་དང་རྫོགས་རིམས་ལ་དགོས་པའི་གནས་ཡིན་ནོ། །གདུལ་བྱ་རུ་ཏྲའི་རྒྱུད་བསྟན། རུ་ཏྲའི་སྡུག་བསྔལ་སྤྱོད་ཚུལ། འཛིན་པའི་དབང་གིས་སྡུག་བསྔལ་ཞི། །རུ་ཏྲའི་མཐུའ་བསྟན། གདུག་པས་སྲིད་གསུམ་འདུལ་བའི། །འདུལ་བྱེད་བསྟན། ང་རྒྱལ་ཆེན་པོ་བསྟན་པའི་ཕྱིར། །རྗེས་འཇུག་བསྟན་སྒྱུ་འཕྲུལ་དྲ་བའི་ཏིང་འཛིན་བསྒོམ། །སྔོན་འབྱུང་གི་དུས་ན། སྐལ་པ་ཀུན་བཀོད་བྱ་བ་ལ། ཞིང་ཁམས་མངོན་པར་དགའ་བ་ཞེས་བྱ་བ་བྱུང་། དེ་ལ་སློབ་དཔོན་དགེ་སློང་ཐུགས་ཀར་གཞོན་ནུ་བྱ་བ་ལ། སློབ་མ་དགེ་སློང་ཐར་པ་ནག་པོ་བྱ་བ་དང་། དེའི་གཡོན་དན་ཕག་བྱ་བས་ཆོས་ཉན་པས། དགེ་སློང་ལགས་ན། ཁྱོད་ཐེག་པ་ཆེན་པོ་གསང་སྔགས་ཀྱི་ཆོས་ལ་མཁས་པར་གྲགས་ན། སྔགས་ཀྱི་ལུགས་ཀྱི་ཉོན་མོངས་པ་ལྔ་འཇོལ་ཉན་དུ་སྤྱད་ནས་སངས་རྒྱ་བའི་ལམ་མཆིས་སམ་ཞེས་ཞུས་པས། མཆིས་གསུང་ནས་བཤད་པ། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་བཅས་ཀྱང་། །ནམ་མཁའ་ལ་ནི་སྤྲིན་དེངས་བཞིན། །རྣལ་འབྱོར་དེ་ཉིད་དམ་པའི་ལམ། །ཞེས་བཤད་པས། དགེ་སློང་ཐར་པ་ནག་པོས་མ་རྟོགས་ཏེ། ཕྱི་གཟུང་བའི་ཡུལ་ལ། ནང་འཛིན་པའི་སེམས་ཀྱིས་བཟུང་བས། དེ་གཉིས་ཀྱིས་ཕྱིན་ཅི་ལོག་ཏུ་བལྟས་ནས། གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་མཆལ་ནས། གསང་སྔགས་ལོགས་པར་སྤྱད་པའི་དབང་གིས། རྡོ་རྗེ་དམྱལ་བར་བསྐལ་པ་སྟོང་ཕྲག་བཅུ་གཉིས་སུ་ཚ་བ་དང་གྲང་བའི་སྡུག་བསྔལ་ཉམས་སུ་མྱོང་བ་དང་། དེ་ལས་ཐར་ནས་ཡི་དྭགས་བཀྲེས་སྐོམ་གྱི་སྡུག་བསྔལ་བསྐལ་པ་སྟོང་ཕྲག་དྲུག་ཏུ་ཉམས་སུ་མྱོང་བ་དང་། དེ་ལས་ཐར་བ་དང་ལས་ཀྱི་སྲིན་པོ་བྱའི་གཤོག་པ་ཅན། དུར་ཁྲོད་ཀྱི་བདག་པོ་ཆེན་པོར་སྐྱེས་ནས། རུ་ཏྲ་ལུས་ངག་ཡིད་གསུམ་གདུག་པའི་མཐུས། གཟུགས་ཀྱི་སྲིད་པ་དང་། འདོད་པའི་སྲིད་པ་དང་། གཟུགས་མྱེད་པའི་སྲིད་པ་གསུམ་དབང་དུ་བསྡུས་སོ། །སྲིད་གསུམ་འཇོམས་པའི་རུ་ཏྲ་དེ་འདུལ་བའི་ཕྱིར། དེ་བཞིན་གཤེགས་པ་རྣམས་བཀའ་སྒྲོས་ནས། བཅོམ་ལྡན་འདས་ལ་འདུལ་བར་བགོའ་བས་མ་ཐུལ་། དཔལ་རྟ་མགྲིན་ལ་བགོའ་བས་མ་ཐུལ་ནས། དཔལ་ཆེན་པོ་ལ་འདུལ་བར་ཞུས་པས་ཐུལ་ལོ། །སྔོན་འབྱུང་དེ་བཞིན་དུ་རྟུལ་བ་ལྟར། ད་ལྟར་གྱི་སྒྲལ་བའི་ཞིང་བཅུ་འདུལ་ན། དཔལ་ཆེན་པོའི་ང་རྒྱལ་སྐུ་ཆེ་བའི་གཟིའ་བརྗིད་ཅན་བསྟན་པའི་ཕྱིར་ན། སྒྱུ་འཕྲུལ་དྲ་བའི་ཏིང་ངེ་འཛིན་བསྒོམ་མོ། །དེ་བསྒོམ་པས་གཟུང་འཛིན་གྱི་རྟོག་པ་ཞི་སྟེ། ལུས་ངག་ཡིད་གསུམ་དེ་བཞིན་གཤེགས་པའི་སྐུ་གསུང་ཐུགས་སུ་བྱའོ། །ཨེ་མའོ་ངོ་མཚར་རྨད་ཀྱི་ཆོས། །ཨེ་མའོ་ནི་དོན་དམ་པ་ལ་རྔམ་པ་སྟེ། དོན་དམ་སྐྱེ་མྱེད་ཆོས་ཀྱི་དབྱིངས་རྟོགས་པའོ། །ངོ་མཚར་ནི། ཀུན་རྫོབ་ལ་རྔམ་པ་སྟེ། ཀུན་རྫོབ་ཡེ་ཤེས་དཔལ་གྱི་སྐུ་བྱུང་བའོ། །རྨད་ཀྱི་ཆོས་ནི་དབྱེར་མྱེད་པ་ལ་རྔམ་པ་སྟེ། དབྱིངས་དང་ཡེ་གཉིས་སུ་མྱེད་པའོ། །དེ་བས་ན་ངོ་མཚར་བའོ། །རྫོགས་པའི་སངས་རྒྱས་ཀུན་གྱི་གསང་། །དེ་གང་གི་སྤྱོད་ཡུལ་ཡིན་དེ། རྫོགས་པའི་སངས་རྒྱས་ཀྱི་སྤྱོད་ཡུལ་ཡིན་ཏེ། རྫོགས་པ་ནི་ཚོགས་གཉིས་རྫོགས་པའོ། །སངས་པ་ནི་འཁོར་བའི་སྐྱོན་དུག་ལྔ་སངས་པའོ། །རྒྱས་པ་ནི་ཆེ་བའི་ཡོན་ཏན་ཡེ་ཤེས་ལྔ་རྒྱས་པའོ། །ཀུན་ནི་ཕྱོགས་བཅུ་དུས་བཞིའི་སངས་རྒྱས་ཐམས་ཅད་དོ། །གསང་བ་ནི་སྤྱོད་ཡུལ་མ་ཡིན་པ་ལ་གསང་ངོ་། །སྐྱེ་བ་མྱེད་ལས་ཐམས་ཅད་སྐྱེས། །དོན་དམ་པར་རང་བཞིན་གྱི་སྐྱེ་བ་མྱེད་པ་ལས། ཀུན་རྫོབ་མ་འགགས་པར་སྒྱུ་མའི་མཚན་ཉིད་ཅིར་ཡང་སྣང་བ་དང་། སྐྱེས་པ་ཉིད་ན་སྐྱེ་བ་མྱེད། །བདེན་པ་གཉིས་ཀ་རང་གི་ངོ་བོས་དབྱེར་མྱེད་པ་ནི། དབྱེར་མེད་འདུས་མ་བྱས་པའོ། །ཨེ་མ་ཀུན་ཏུ་བཟང་པོའི། ཨེ་མ་ངོ་མཚར་བ་དེ་མ་བཙལ་མ་སྒྲུབས་པར་རང་ལས་འབྱུང་བའི། ངོ་མཚར་ཏེ། དེ་ཀ་ཀུན་ཏུ་བཟང་པོའི་དགོས་པའོ། །བདེ་ཆེན་སྤྲོས་མྱེད་ཐིག་ལེ་ལས། །བདེའ་ཆེན་ནི་དེ་བཞིན་ཉིད་དོ། །སྤྲོས་མྱེད་ནི་ཆོས་ཀྱི་དབྱིངས་སོ། །ཐིག་ལེ་ནི་སྤྲོས་པའི་མཐའ་ཐམས་ཅད་དང་ངང་གིས་བྲལ་བར་གནས་པའོ། །སྟོང་པ་ཉིད་དུ་རབ་གསལ་བའི། །གཟུང་འཛིན་གྱི་སྟོང་པ་ཉི་ཚེ་བ་མ་ཡིན་ཏེ། ཆོས་ཐམས་ཅད་ཀྱི་ངོ་བོ་ཉིད་དུ་ལྷུན་གྱིས་གྲུབ་པ་ཉིད་རང་སྣང་ནམ་ཀ་ལྟ་བུའོ། །སྙིང་རྗེའི་ཡུམ་ནི་བསྒོམ་པར་བྱ། །དེ་ལྟར་མ་རྟོགས་པའི་སེམས་ཅན་ལ། སྙིང་རྗེ་བུ་གཅིག་པའི་མ་ལྟ་བུར་ཁྱབ་པར་བསྒོམ། འགྲོ་དོན་གྱི་མངོན་དུ་སྙིང་རྗེ་འགྲོ་བ་སྟེ། སྙིང་རྗེ་མྱེད་པར་གཞན་དོན་མི་ཡོང་ངོ་། །ཧཱུྃ་ངེས་པ་ལས་ནི་རྡོ་རྗེ་ཆེ། །སྙིང་རྗེ་སྒྱུ་མ་ཙམ་དེ་ལས་རང་རིག་པ་ཡི་གེ་ཧཱུྃ་མཐིང་ནག་ཏུ་བྱུང་། ཧཱུྃ་དེ་ངེས་པར་གསལ་བ་ལས་རྡོ་རྗེ་སེམས་དཔར་གསལ་ལོ། །དེ་ཡང་ཁ་དོག་ངེས་པ་མཐིང་ཀ་དབྱིབས་ངེས་ཧཱུྃ་ངོ་། །དེ་ལས་དཔལ་ཆེན་ཧེ་རུ་ཀ །རྡོ་རྗེ་དེ་འཕྲོ་འདུས་པས་ལས་སྐུ་རགས་པའི་ཧེ་རུ་ཀ་ཞལ་གཅིག་ཕྱག་གཉིས་པ་གཡས་རྡོ་རྗེ། གཡོན་ཐོད་པ་བསྣམས་པའོ། །འབར་བ་ཆེན་པོ་གར་དགུའི། །བདག་དོན་དུ་རྟོགས་པ་འབར་བའི་དང་། གཞན་དོན་དུ་ཐུགས་རྗེ་འབར་བའོ། །གར་དགུའ་ནི། སྐུ་སྒེག་པ། དཔའ་བ། འཇིགས་སུ་རུང་བའོ། །གསུང་རྒོད་པ་བཤེའ་བ་འཇིགས་པར་སྒྲོགས་པའོ། །ཐུགས་སྙིང་རྗེ་རྔམ་པ། ཞི་བའོ། །སྐུ་ལ་བསྐལ་པའི་དུས་མཐའི་མེ་ལྟར་འབར་བའོ། །དེའི་ཐུགས་ཀ་ན་ཡེ་ཤེས་སེམས་དཔའ་དཔལ་བེའུ་རྡོ་རྗེའི་ལྟེ་བ་ལ་ཧཱུྃ་དེ་ལས་སྐྱེད་པའམ་རྒྱུ་བྱ་བའོ། །འཇིག་པའི་ནི་དུས་ལྟར་གྲག །སྐུ་དེ་ལས་བསྐལ་པ་འཇིག་པའི་མེ་ལྟ་བུ་འབར་བར་གྲགས་སོ། །བྲུྃ་བི་ཤ་ཤུད་དྷེ། བྲུྃ་ནི་བི་ཤ བི་ཤུད་དྷེ་ནི་གཞལ་ཡས་ཁང་གི་རྒྱུའོ། །བི་ཤ་ནི་སྣ་ཚོགས་དག་པ། བྷི་ཤུད་དྷེ་ནི། དག་བྱེད། གཞལ་ཡས་ཁང་བསྐྱེད་པའོ། །དེ་ཡང་ཇི་ལྟར་ཞེ་ན། ༈ །ཏིང་ངེ་འཛིན་གསུམ་པོ་འདི་ལ་ཆོས་རྣམ་པ་དགུ་སྟེ། སྦྱང་གཞིའ་རྣམ་པ་གསུམ་དང་། སྦྱོར་བྱེད་གསུམ་དང་། སྦྱང་ཐབས་གསུམ་མོ། །སྦྱང་གཞིའ་གསུམ་ནི། ཤི་བ་དོན་དམ་པའི་བདེན་པའི་སྦྱང་བ་དང་། སྐྱེ་བ་བར་མ་དོ་སྒྱུ་མ་ལྟ་བུ་སྦྱང་བ་དང་། སྐྱེས་པ་ཀུན་རྫོབ་རགས་པ་སྦྱང་བའོ། །དེ་བས་ན་སྦྱང་གཞིའི་ཤི་བ་དང་བར་དོ་དང་སྐྱེས་པ་གསུམ་ལས་མྱེད་དོ། །སྦྱོང་བྱེད་གསུམ་ནི། ཤི་བ་སྦྱོང་བ་དེ་ཏིང་། བར་དོ་སྦྱོང་བ་ཀུན་སྣང་། སྐྱེས་པ་སྦྱོང་བ་ཀུན་ཏིང་ངོ་། །སྦྱང་ཐབས་གསུམ་ནི། དེ་བཞིན་ཉིད་སྟོང་པ་ཉིད་དུ་སྒོམས་པས། ཤི་བ་དྲན་སེམས་མ་སྐྱེས་པ་དེ་ཆོས་སྐུར་སྦྱངས། དེ་འབྱོངས་ན་ཆོས་སྐུ་འཐོབ། ཀུན་ཏུ་སྣང་སྙིང་རྗེ་སྒྱུ་མ་ཙམ་དུ་སྒོམས་པས། བར་དོར་རིག་པ་གྱུ་གྱུ་དེ་ལོངས་སྐུར་སྦྱང་། དེ་འབྱོངས་ན་ལོངས་སྐུ་འཐོབ། རྒྱུའི་ཏིང་ངེ་ཆོ་ག་གསུམ་ལས་རྒྱུའི་ཧེ་རུ་ཀར་སྒོམ། དེའི་འབྱོངས་ན་སྤྲུལ་སྐུ་འཐོབ། དེ་བས་ན་ཐེག་པ་ཆེན་པོ་སྦྱོང་ཐབས་དེ། ཆོས་སྐུ་ནམ་མཁའ་དང་འདྲ་སྟེ་སྟོང་། ལོངས་སྐུ་མ་དང་འདྲ་སྟེ་སྣང་། སྤྲུལ་སྐུ་ཅིར་ཡང་མ་ངེས་པར་དོན་བྱེད་པ་ཡིན་ནོ། ༈ །གདུལ་བྱ་ལ་དགོངས་ནས་རུ་ཏྲའི་གནས་རང་སྒྱུར་དུ་སྒྱུར་བས། འབྱུང་བ་རིམ་རྩེགས་རང་འགྱུར་དུ་སྣང་། དུར་ཁྲོད་ཆེན་པོར་རབ་འཇིགས་པར། །གཞལ་ཡས་ཁང་གི་རྒྱུ་ནི་དུར་ཁྲོད་དེ། ཕྱིའི་དུར་ཁྲོད་རོ་བཞི་སྐྱལ་བ་ཡན་ཆད་དེ། དུར་ཁྲོད་ཆེན་པོའི་གནས་བརྒྱད་དང་། ནང་གི་དུར་ཁྲོད་ལུས་ཀྱི་གནས་བརྒྱད་དང་། གསང་བའི་དུར་ཁྲོད་ནི། དཔལ་ཆེན་པོའི་ཐུགས་ཡེ་ཤེས་ལ། རྣམ་རྟོག་སྤྲིན་དང་འདྲ་བ་བྲལ་བའོ། །གདུག་པ་ཐམས་ཅད་འདུལ་བའི་རྟགས་སུ་རབ་ཏུ་འཇིགས་པར་གནས་སོ། །ཁྲག་གི་རྒྱ་མཚོའི་འཁྲུག་པའི་དཀྱིལ། །དུར་ཁྲོད་དེའི་སྟེང་དུ། ར་དམར་པོ་ལས་ཁྲག་གི་རྒྱ་མཚོའ་དམར་ནག་ཏུ་འཁྲུགས་པའོ། །དེ་ཡང་རྟགས་ནི་ཁྲག་ཆགས་པ་རྣམ་པ་གཉིས་དང་ལྡན་པའོ། །དོན་ནི་ཡེ་ཤེས་ཅིག་ལས་ཡེ་ཤེས་མང་པོ་དང་ལྡན་པས་འཁྲུག་པའོ། །ཀེང་རུས་ཆེན་པོའི་རི་རབ་ཀྱི། །ཀེཾ་སྔོ་སྐྱ་ལས་ཀེཾ་རུས་ཀྱི་རི་རབ་བསམ་མོ། །དེ་ཡང་ཡེ་ཤེས་སྲ་ཞིང་འཁྲེགས་པས་ཕྱིན་ཅི་ལོག་གི་སྐྱོན་དང་བྲལ་བའི་བརྟགས་སོ། །སྟེང་གི་འབར་བའི་ཀློང་དཀྱིལ་ན། །ཉོན་མོངས་པ་སྲེགས་པའི་བརྟགས་སུ། རཾ་ལས་རི་རབ་ཀྱི་སྟེང་དུ་མེ་དཔུང་འབར་བར་སྒོམ་མོ། །དེའི་མེ་ལོང་ངམ་དཀྱིལ་དུ་དཔལ་ཆེན་པོའི་བཞུགས་གནས་སྒོམ་པ་ཡང་། ༈ སེམས་ཅན་སྐྱེ་བའི་རིམ་པ་དང་སྦྱར་ནས་སྐྱེད་པ་ནི་ནང་པའི་ལུས་ཏེ། དེ་ལ་ཞི་བ་བསྐྱེད་པ་ནི། ལྷ་གཞལ་ཡས་ཁང་ནས་འདོད་པའི་ལོངས་སྤྱོད་ལ་རྩེ་བའི་ཚུལ་ཡིན་ལ། ཁྲོ་བོའི་གནས་སྐབས་འདིར་ནི། དཔེར་ན། མནར་མྱེད་པའི་སེམས་ཅན་དམྱལ་བའི་ལྕགས་ཀྱི་ཁང་སྒྲོམ་འབར་བ་ན། དམྱལ་སྲུངས་གསད་བཅད་ཀྱི་ལས་བྱེད་པ་དང་། ཆ་སྟུན་ཏེ་སྐྱེད་པ་ཡིན་པས། དབང་དྲག་གི་གཞལ་ཡས་ཁང་དུར་ཁྲོད་ཀྱི་ཁང་པ་ན། དཔལ་ཆེན་པོ་ཡབ་ཡུམ་འཁོར་དང་བཅས་པ། དམྱལ་སྲུངས་སམ་སྲིན་པོ་ལྟར་སྒོམ་མོ། །སྤྱིར་སེམས་ཅན་གྱི་བྱེད་སྤྱོད་དང་། སངས་རྒྱས་ཀྱི་མཛད་སྤྱོད་གཉིས་ཆ་མཐུན་དུ་བྱ་སྟེ། ཉོན་མོངས་པ་གནས་བསྒྱུར། ཐ་མལ་པའི་རྟོག་པ་བཅོམ་ནས་སྒྲིབ་པ་གཅོད་པ་ཡིན་ནོ། །སེམས་ཅན་ལས་ལོགས་སུ་བྱ་རྒྱུ་མྱེད་དོ། །དེ་ནི་མན་ངག་གོ། ༈ །སྤྱིར་དཀྱིལ་འཁོར་ལ་གསུམ་སྟེ། རང་བཞིན་གྱི་དཀྱིལ་འཁོར་དམྱིགས་པའི་ཡུལ་དུ་བྱ་བ་དང་། ཏིང་ངེ་འཛིན་གྱི་དཀྱིལ་འཁོར་ཉམས་སུ་བླང་བ་དང་། གཟུགས་བརྙན་གྱི་དཀྱིལ་འཁོར་དམྱིགས་པའི་རྟེན་དུ་བྱའོ། །དང་པོ་ནི་གཉིས་ཏེ། རང་བཞིན་གྱི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་པའི་དཀྱིལ་འཁོར་རོ། །གཉིས་པ་ལ་གཉིས་ཏེ། བསྐྱེད་རིམས་ལྷའི་དཀྱིལ་འཁོར་དང་། རྫོགས་རིམས་རྩའི་དཀྱིལ་འཁོར་རོ། །གསུམ་པ་ལ་གཉིས་ཏེ། རྡུལ་མཚོན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་རོ། །དེ་ལ་གསུམ་སྟེ། རྒྱུ་རས་བལ་ཐིག་གུ་ལ་ཐགས་སུ་བཏགས་པ་དང་། གསེར་དངུལ་ཟངས་ལྕགས་ལ་ལུགས་སུ་བླུགས་པ་དང་། རཱའམ་ཤིང་རྡོ་ལ་འབུར་དུ་རྐོས་པའོ། །དེ་རྣམས་ལས་འདིར་ནི་ཏིང་ངེ་འཛིན་གྱི་དཀྱིལ་འཁོར་རོ། །དེ་ལས་ཅུང་བསྐྱེད་རིམས་གཙོར་སྟོན། རྫོགས་རིམས་ཞར་ལ་བསྟན་ནོ། །ཡེ་ཤེས་འབར་བའི་གཞལ་ཡས་ཁང་། །རྒྱུ་ཡེ་ཤེས་རིན་པོ་ཆེ་ལས་གྲུབ་པ། རྟགས་འབར་བ་ཁྲག་འཐུང་གི་ནས་སུ་བྱུང་བ། དོན་ཡེ་ཤེས་ཀྱི་གཞལ་ཡས་ཁང་སྟེ། བློས་གཞལ་བ་ལས་འདས་སོ། །དེ་གང་ཞེ་ན། ཕྱོགས་བཅུར་རྒྱ་ཡོངས་མ་ཆད་པའི། །ཡེ་ཤེེས་དེས་ཐམས་ཅད་དུ་ཁྱབ་པས། གཞལ་ཡས་ཁང་གི་ཚད་ཀྱང་རྒྱ་ཕྱོགས་བཅུ་ཡོངས་སུ་མ་ཆད་པ། ནམ་མཁས་གར་ཁྱབ་པར་གཞལ་ཡས་ཁང་གིས་ཡང་ཁྱབ་པར་གནས་སོ། །ཕྱི་དང་ནང་མྱེད་ཀུན་ཏུ་ནང་། །ཐམས་ཅད་ཡེ་ཤེས་རང་སྣང་དུ་ཡིན་པ་དང་། ཐུགས་ཡེ་ཤེས་ལ་ཕྱི་ནང་མྱེད་པ་དང་། བྱང་ཆུབ་སེམས་སུ་གཅིག་པས་ན། ཕྱི་ནས་བལྟས་ན་ནང་གསལ་ལ། ནང་ནས་ལྟས་ན་ཕྱི་གསལ་བའོ། །འབར་བའི་འཁོར་ལོ་རྩིབས་བཞི་པ། །གཞལ་ཡས་ཁང་གི་དབུས་འཁོར་ལོ་རྩིབས་བཞི་མཐིང་ནག་ཏུ་གནས་པ་ནི་རང་བཞིན་རྟོགས་པ་དང་ཡེ་ཤེས་འབར་བས། ལས་དང་ཉོན་མོངས་པ་གཅོད་པ། རྟགས་འཁོར་ལོ་བཞི། དོན་ཡེ་ཤེས་ལྔ་ལྡན་ནོ། །རྩིབས་མཆན་དམར་པོ་ཁམས་གསུམ་རབ་ཏུ་སྡུད་པའོ། །གྲུ་ཆད་བཞི་ཡིས་རྣམ་པར་བརྒྱན། །འཕྲིན་ལས་རྣམ་བཞི་ལྷུན་གྱིས་གྲུབ་པའི་རྟགས་སུ་གྲུ་ཆད་བཞི་ལྗང་ཁུའོ། །སྐུ་གསུམ་མཚོན་པའི་བརྡར་ཐོད་པ་གསུམ་གྱི་རྩིག་པའོ། །རྩིག་པ་གྲུ་ཆད་ཀྱིས་མཛེས་པས་ན་རྒྱན་ཅེས་བྱའོ། །གྲུ་བཞི་སྒོ་ཁྱུད་བཞི་དང་ལྡན། །ཐུགས་ཡེ་ཤེས་བཞི་དང་ལྡན་པའི་རྟགས་སུ་གྲུ་ཆད་བཞི་ནི་ཆེ་བའི་ཡོན་ཏན་ཐམས་ཅད་རྒྱས་པའོ། །རྣམ་ཐར་མཚོན་པའི་སྒོ་བཞི་དང་། ཡེ་ཤེས་ལྔ་ལྡན་གྱི་རྩིག་པ་སྒོ་ཁྱུད་བྱས་པ། ཐེག་པ་རིམ་པ་བརྒྱད་མཚོན་པའི་རྟ་བབས་བརྒྱད་དང་ལྡན་པའོ། །འབར་བའི་བར་ཁམས་གཉིས་ཀྱིས་མཛེས། །བདེན་པ་གཉིས་མེད་དབྱེར་མྱེད་པའམ། འཁོར་འདས་དབྱེར་མྱེད་དུ་གནས་པས་ན་འབར་བ་ཁྲོ་བོ་ད་ལ། བར་ཁྱམས་གཉིས་སུ་བྱུང་བ་སྟེ། བར་ཁྱམས་དང་པོ་འཕྲིན་མྱེན་མའི་ཁྱམས་སོ། །གཉིས་པ་དབང་ཕྱུག་མའི་གནས་སོ། །བར་ཁྱམས་དང་སྒོ་ཕྱོགས་མཚོན་དུ་གནས་སོ། །མཛེས་པ་ནི་གནས་ཐབས་སོ། །ཐོད་སྤྲུལ་སྣ ཚོགས་ཉི་ཟླས་བརྗིད། །གཞལ་ཡས་ཁང་ལ། ཐོད་པ་རྣམ་གསུམ་གྱིས་རྩིག་པ་བྱས་པ་ནི་སྐུ་གསུམ་མཚོན་པའོ། །སྦྲུལ་རིགས་བཞིས་ཐོད་པའི་དམྱིག་ནས་རྒྱུས་པ་ནི་ཞེ་སྡང་མ་སྤངས་ལྷུན་གྱིས་གྲུབ་པའོ། །ཉི་མ་དང་ཟླ་བའི་མཐོངས་ཁུང་བྱས་པ་ནི་ལོག་ལྟའི་སྐྱོན་གསལ་བའོ། །རྒྱན་དེ་གསུམ་གྱིས་གཞལ་ཡས་ཁང་ལ་རྒྱན་པས་བརྗིད་པའི་ཡིན་ནོ། །འབར་བའི་འཕྲོ་བ་མང་པོ་འཁྲུག ། ཐུགས་ཡེ་ཤེས་ཀྱི་མེ་འབར་བས་ཉོན་མོངས་པ་སྲེག་པའི་རྟགས་སུ། ཕྱི་ནང་ཀུན་ནས་རྡོ་རྗེའི་མེ་དཔུང་འབར་བ་ལས། མེའི་ཁྲོ་བོ་མང་པོ་འཕྲོ་འདུ་བྱེད་ཅིང་འཁྲུག་པའོ། །ཞི་བ་ལས་ཁྱད་པར་དུ་བྱས་པས་ན་འབར་བའི་འཕྲོ་བ་མང་པོ་ཞེས་བྱའོ། །ཁྱུ་མཆོག་མ་ཧེ་གཟིག་དང་སྟག །སྟུམ་པའི་དོམ་གྱི་སྤར་བས་ནི། །ཁྱུ་མཆོག་ནི་གླང་པོ་ཆེ་སྟེ། གཏིའ་མུག་གནས་སུ་དག་པའི་རྟགས་སུ། ཤར་འབུ་ཏའི་གདན་ནོ། །དེས་ཆོས་དབྱིངས་ཡེ་ཤེས་མཚོན་ནོ། །ང་རྒྱལ་དག་པའི་རྟགས་སུ། ལྷོ་རཏ་ན་ལ་མ་ཧེའི་གདན་ནོ། །དེས་མཉམ་ཉིད་ཡེ་ཤེས་མཚོན་ནོ། །འདོད་ཆགས་དག་པའི་རྟགས་སུ། །ནུབ་ཏུ་གཟིག་པད་མའི་གདན་ནོ། །དེས་སོ་སོར་རྟོག་པའི་ཡེ་ཤེས་མཚོན་ནོ། །འཕྲག་དོག་དག་པའི་རྟགས་སུ། བྱང་དུ་སྟག་སྐར་མའི་གདན་ནོ། །དེས་བྱ་བ་གྲུབ་པའི་ཡེ་ཤེས་མཚོན། ཞེ་སྡང་མ་སྤངས་གནས་སུ་དག་པའི་རྟགས་མེ་ལོང་ལྟ་བུའི་ཡེ་ཤེས་མཚོན་པའི་རྟགས་སུ་དབུས་བཛྲ་ཧེ་རུ་ཀའི་གདན་ནི་སྟུམ་ཐུང་དོམ་གྱི་གདན་ནོ། །སེམས་ཅན་གྱི་གདན་ལྔ་པོའི་དེའི་སྤར་བས་ནི། ལྷ་ཆེན་པོ་རྣམས་མནན་དེ་གཟུང་བའོ། །དབང་ཕྱུག་ལྷ་ཆེན་ལ་སོགས་གཟུང་། །དུག་ལྔ་དག་ནས་འཕྲིན་ལས་མཛད་པ་ནི། སེམས་ཅན་ལྔའི་འོག་ན། དབུས་ན་དབང་ཕྱུག་ཆེན་པོ་ཡབ་ཡུམ་གཉིས། ཤར་དྲི་ཟ། ལྷོར་གཤིན་རྗེ། ནུབ་སྲིན་པོའམ་ཀླུ། བྱང་གནོད་སྦྱིན་ཕོ་མོ། བྱི་ཆིབས་སུ་བཅིངས་ནས། རྨིག་པས་རྫིས། སྡེར་མོས་བཟུང་། རང་གི་ཞོན་པས་རྫིས་ཏེ། ང་རྒྱལ་བཅག་པའོ། །དྲེགས་པ་རྣམས་འཕྲིན་ལས་ནན་དུར་གྱིས་སྟན་པར་བྱ་བའི་ཕྱིར་རོ། །བདག་ཉིད་སངས་རྒྱས་ཐམས་ཅད་ཀྱི། །རྣལ་འབྱོར་པ་བདག་ཉིད་ནི། ཕྱོགས་བཅུ་དུས་བཞིའི་སངས་རྒྱས་ཐམས་ཅད་ཀྱི་བདག་པོ་སྟེ། ཅིའི་ཕྱིར་ན། བདག་རྒྱུའི་ཧེ་རུ་ཀ་དེ་ལས་ཐམས་ཅད་སྐྱེས་པའི་ཕྱིར་རོ། །སྐུ་གསུང་ཐུགས་ཀྱི་རྡོ་རྗེའི་བདག་དེ་ཡང་སྐུ་རྡོ་རྗེ་སྐྱེ་འཇིག་མྱེད་པ། གསུང་རྡོ་རྗེ་འགག་པ་མྱེད་པ་དང་། ཐུགས་རྡོ་རྗེ་རྟོག་པ་མྱེད་པ་ལ་མངའ་སྙེམས་པའི་ཕྱིར། བདག་པོ་བཛྲ་ཧེ་རུ་ཀའོ། །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་ནི་ཁྲོ་བོ་ཆེན་པོ་ཡེ་ནས་ཡིན་ཏེ། འཕྲ་ལ་སྐྱེད་པར་གྱུར་པ་ལྟ་བུ་ནི་མ་ཡིན་ནོ། །དེ་ཤེས་རབ་ཀྱི་རྟོགས་ནས་ཏིང་ངེ་འཛིན་གྱི་སྒོམ་པའོ། །དེ་མྱེད་ན་སྒོམ་པས། མི་ཡོང་སྟེ། སོལ་བ་ལ་བྱི་དོར་བྱས་པས་དཀར་པོ་མི་ཡོང་སྟེ། དེའི་ཕྱིར་ན་བདག་སངས་རྒྱས་ཐམས་ཅད་ཀྱི་ཡབ་ཡིན་པའི་ཕྱིར་བདག་གི་སྲས་སངས་རྒྱས་ཡིན་པའོ། །དེ་བཞིན་ཉིད་ཀྱི་དབྱིངས་ནས་ནི། །དཔལ་ཧེ་རུ་ཀའི་ཐུགས་དེ་བཞིན་ཉིད་ཆོས་ཀྱི་དབྱིངས་ཀྱི་ངང་དུ་འབྱུང་བ་སྟེ། ཡབ་ཀྱི་ཐུགས་ཀ་ནས་ཡུམ་ལུས་དང་གྲིབ་མ་ལྟར་རམ་མར་མེ་གཅིག་ལས་གཉིས་སུ་ཆད་པ་ལྟར་བསྐྱེད་པ་ནི། ཁྲོ་མོ་དབང་ཕྱུག་མངོན་ཕྱུང་སྟེ། །ཡུམ་རྡོ་རྗེ་དབྱིངས་ཕྱུག་མ་གཡོན་ངོས་སུ་རྫོགས་ཚུལ་དུ་སྐྱེད་པ་ནི། ཞལ་གཅིག་ཕྱག་གཉིས་པ་གཡས་རྡོ་རྗེ་གཡོན་བན་དྷ་རྒྱན་ཆ་ལུགས་ཡབ་དང་མཐུན་ནོ། །ཧི་ཧི་དགྱེས་པའི་གཟིའ་མདངས་ཀྱིས། །སྦྱོར་བ་བྱས་ན་དགྱེས་པས། ཡབ་ལ་སྐུ་གསུང་ཐུགས་དགྱེས་པའི་གཟིའ་མདངས་དང་ལྡན་པར་བཞུགས་ཏེ། ཞལ་ནས་ཧི་ཧི་ཞེས་པ་དང་། སྤྱན་གྱི་གཟིའ་བརྗིད་དང་། ཞལ་གྱི་མདངས་ཕྱུང་ནས་ཡབ་ལ་འདུད་པའོ། །རིན་ཆེན་པདྨ་རྒྱས་མཛད་དེ། །ཡབ་ཀྱི་མཁའ་ནི། ཆེ་བའི་ཡོན་ཏན་འབྱུང་བས་དགོས་འདོད་རེ་བ་ཡིད་བཞིན་དུ་སྐོང་བའི་ཕྱིར་རིན་པོ་ཆེའོ། །ཡུམ་གྱི་མཁའ་ནི་ཆགས་པས་མ་གོས་པས་པད་མའོ། །དེ་ལ་ཡུམ་གྱི་པད་མ་འདབ་བརྒྱད་པར་བྱིན་བརླབ། ཡབ་ཀྱི་མཁའ་རྡོ་རྗེ་རྩེ་ལྔ་པར་བྱིན་བརླབ། དེ་གཉིས་ཀྱིས་སྦྱོར་བ་རྒྱས་པར་མཛད་དེ། གཉིས་མྱེད་འཁྲིལ་བའི་དགྱེས་པས་ཐིམ། །དབྱིངས་ཡེ་ཤེས་གཉིས་སུ་མྱེད་པའི་རྟགས། ཐབས་དང་ཤེས་རབ་ཀྱི་སྤྱོད་པས། ཐམས་ཅད་བདེའ་བ་ཆེན་པོའི་ཡེ་ཤེས་སུ་གསལ་བ་ལས། ཡབ་ཡུམ་གཉིས་མྱེད་དུ་འཁྲིལ་ནས། ཡབ་ཀྱི་བྱང་ཆུབ་སེམས་ཡུམ་གྱི་མཁར་ཐིམ་པའོ། །བྱང་ཆུབ་སེམས་སྤྲིན་སྤྲོས་པ་ལས། །ཡབ་ཀྱི་ལྷུན་པ་བྱང་ཆུབ་སེམས་དབྱར་གྱི་སྤྲིན་ཕུང་ལྟ་བུ་ཡུམ་གྱི་མཁར་སྤྲོས་པ་ལས། ཡབ་ཡུམ་དགྱེས་པའི་ལྷག་པའི་བྱང་ཆུབ་སེམས་དཀར་དམར་འདྲེས་པ་ལས། ཁྲོ་བོའི་དཀྱིལ་འཁོར་སྤྲིན་ཕུང་སྤྲོ། །དཀྱིལ་འཁོར་ཐམས་ཅད་སྤྲིན་དང་མཁའ་ནས་ཁྲོ་བོ་འཆོལ་པ་སྤྲིན་ཕུང་དང་འདྲ་བ་སྤྲོ་བའོ། ༈ །ཁྲོ་བོ་འཆོལ་པ་འདོན་པ་ལ་ལྔ་སྟེ། འབྱུང་བའི་རྒྱུ་དང་། རྐྱེན་དང་། ངོ་བོ་དང་། རང་བཞིན་དང་། དགོས་པའམ་འབྲས་བུའོ། །ཁྲོ་བོ་འཆོལ་པ་སྤྲོ་བ་སྟོན། ཧཱུྃ་ཧཱུྃ་ཧཱུྃ། སྐུ་རྡོ་རྗེ་ཁྲོ་བོ་སྤྲོ། གསུང་རྡོ་རྗེ་ཁྲོ་བོ་སྤྲོ། ཐུགས་རྡོ་རྗེ་ཁྲོ་བོ་སྤྲོ། སྐུ་གསུང་ཐུགས་ཀྱི་ཁྲོ་བོ་འཆོལ་བ་སྤྲོ། རྒྱུ་ནི་ཡབ་ཡུམ་བྱང་སེམས་སོ། །རྐྱེན་ནི་སྤྲོ་བར་བྱེད་པའི་སྔགས་སོ། །ངོ་བོ་ནི་ཁྲོ་བོ་འཆོལ་པ་སྤྲོས་པ་རྣམས་སོ། །རང་བཞིན་ནི་ཡེ་ཤེས་ཀྱི་སྤྲུལ་པའོ། །དགོས་པའམ་འབྲས་བུ་ནི། གདུག་པ་ཅན་འདུལ་བའི་དགོས་པ་ཡོད་ལ། རིགས་ལྔ་ཁྲག་འཐུང་སྐྱེས་པའི་འབྲས་བུ་ཡོད། དེ་བས་ན་ཁྲོ་བོ་འཆོལ་བ་སྤྲོས་ནས་དྲག་པོ་ལས་ཀྱི་ཁྲོ་བོར་གསལ་ལོ། །བི་ཤ་སྣ་ཚོགས་བཛྲ་རྡོ་རྗེེ་ཀྲོ་ཏ་ཁྲོ་བོ་ཛྭ་ལ་མན་འབར་བ་དྷ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་དཀྱིལ་འཁོར་སྐུ་ལས་སྤྲོས་གསུང་། ཐུགས་ཀྱི་གསུང་གི་ཐུགས་ཀྱི་གཉིས་སུ་མྱེད་པར་དབང་དུ་མཛོད་ཅིག །ཧཱུྃ། ༈ །འཇིག་རྟེན་དྲུག་གི་ཕྱོགས་བཅུ་ནས། །འགྲོ་བ་རིགས་དྲུག་གི་འཇིག་རྟེན་ཁམས་ཀྱི་ཕྱོགས་བཅུ་ན། འགྲོ་བ་ལས་དང་བག་ཆགས་སྦྱང་བའི་ཕྱིར། ཁྲོ་བོ་འཆོལ་པ་སྤྲོ་བར་བྱེད་པ་ཡིན་ནོ། །མཐའ་ཡས་ཁྱབ་པར་ཁྲོ་བོ་ཡིས། །ཕྱོགས་བཅུ་མཐའ་ཡས་པར་ཁྲོ་བོའི་དཀྱིལ་འཁོར་སྤྲོ་བའོ། །དེ་ཡང་ཤེས་རབ་ཆེན་པོའི་ཁྲོ་བོ། ཡེ་ཤེས་ཆེན་པོ་ཁྲོ་བོ། ཕྱག་རྒྱ་ཆེན་པོའི་ཁྲོ་བོ་གསུམ་སྤྲོ་བའོ། །དཀྱིལ་འཁོར་སྟོང་གསུམ་འཇིག་རྟེན་ཙམ། །ཁྲོ་བོ་འཆོལ་པའི་དཀྱིལ་འཁོར་དེ་དག་ཡང་རེ་རེ་ལ་ཡང་ཆེ་ཆུང་སྟོང་གསུམ་གྱི་སྟོང་ཆེན་པོ་ཙམ་མོ། ༈ ཁྲོ་བོ་འཆོལ་པ་སྤྲོ་བ་ནི་རྫུ་འཕྲུལ་བཞི་སྟེ། ཀུན་བརྗོད་པའི་ཆོ་འཕྲུལ་དང་། རྫུ་འཕྲུལ་གྱི་ཆོ་འཕྲུལ་དང་། བྱིན་གྱིས་རླབས་ཀྱི་ཆོ་འཕྲུལ་དང་། ཆོས་སྣང་བའི་ཆོ་འཕྲུལ་ལོ། །དང་པོ་ནི། བདག་བཛྲ་ཧེ་རུ་ཀས་སྔགས་བརྗོད་པས། སྟོང་གསུམ་སྔགས་ཀྱི་སྒྲས་ཁེངས་པའོ། །གཉིས་པ་ནི། ཤེས་རབ་ཆེན་པོའི་ཁྲོ་བོ་དང་། ཡེ་ཤེས་ཆེན་པོའི་ཁྲོ་བོ་དང་། ཕྱག་རྒྱ་ཆེན་པོའི་ཁྲོ་བོ་གསུམ་གྱི་ངོ་བོ་ལས་ཁྲོ་བོ་གྲངས་མྱེད་པ་འཆོལ་པར་སྤྲོའོ། །གསུམ་པ་ནི། ཁྲོ་བོ་དེ་དག་གིས་བགེགས་ཐམས་ཅད་བཅོམ། བསད་ནས། གདུག་པའི་སེམས་དེ་དག་ཐམས་ཅད་ཞི་ནས། བྱང་ཆུབ་སེམས་སུ་བྱིན་བརླབ་བོ། །དེ་ཡང་སྒྱུ་འཕྲུལ་རྡོ་རྗེ་ལས། ཡང་དག་ཤེས་རབ་ཆེན་པོ་ནི། །མཚན་མ་འཇོམས་ཕྱིར་ཁྲོ་བོའི་མཆོག ། རང་རིག་ཡེ་ཤེས་རྒྱལ་པོ་ནི། །ཕྱོགས་བཅུའི་ཁམས་རྣམས་དབང་བསྡུས་ནས། །ཀུན་ཀྱང་མྱི་དམྱིགས་དབྱིངས་སུ་ཐིམ། །ཐམས་ཅད་ཁྲོ་བོའི་ཚོགས་སུ་འགྱུར། །ཕྱོགས་བཅུ་ཐམས་ཅད་སྐུ་གསུང་ཐུགས། །དཔལ་ཆེན་འབར་བའི་ཕྱག་རྒྱར་གསལ། །ཅེས་སོ། །བཞི་པ་ནི། ཁྲོ་བོ་དེ་དག་གིས། རིགས་དྲུག་གི་འཇིག་རྟེན་ན། རུ་ཏྲ་ལ་སོགས་པ་དྲེགས་པ་ཅན་རྣམས་ལ། སྤྲུལ་པ་དེ་རྣམས་ཀྱིས་གདུག་པ་ཅན་དྲག་པོས་བསྟུལ་ནས་ཆོས་སྣང་བའོ། །ཕྱོགས་བཅུའི་རྡུལ་སྙེད་ཐོན་པར་འགྱུར། །དེ་དག་གི་གྲངས་མང་ཉུང་ནི། རྡུལ་ཕྲ་མོའི་བྱེ་མ་སྙེད་ཀྱི་གྲངས་ཙམ་ཐོན་པར་གྱུར་ནས། བར་སྣང་ལ་འཁྲུག་པ་ལྟ་བུས། གདུག་པ་ཅན་རྣམས་ཀྱི་ལུས་ངག་ཡིད་གསུམ་འདུལ་བ་དང་། དབང་དུ་སྡུད་པ་དང་བསྒྲལ་བ་བྱས་སོ། །དེ་ནས་བཅོམ་ལྡན་དགྱེས་ཆེན་རིགས། །རིགས་གང་གི་ཡིན། གོང་དུ་ཁྲོ་བོ་འཆོལ་པ་སྤྲོས་པ་དེ་ནས་རིགས་ལྔ་ཁྲག་འཐུང་གི་སྐུ་བ སྐྱེད་པ་ནི། ལྷ་ཆེན་པོ་འོག་ཏུ་རྫིས་པས་བདུད་བཞི་བཅོམ་པའོ། །དེ་དག་གནས་སུ་དག་པས་མེ་ལོང་ལྟ་བུའི་ཡེ་ཤེས་ཐུགས་སུ་ཆུད། རྣམ་པར་ཤེས་པའི་ཕུང་པོ་གནས་འགྱུར་བས་ཁྲོ་བོའི་སྐུར་སྣང་བས་ན་ལྡན་ནོ། །ཡབ་ཡུམ་ཁ་སྦྱོར་དུ་བཞུགས་པས་དགྱེས། ཕྱོགས་བཅུ་ཁྲོ་བོ་འཆོལ་པ་དེའི་རིགས་ཡིན་པས་བསྡུའ་བའོ། །དབུའ་དང་ཕྱག་ཞབས་སྟོང་ཁམས་ཀྱི། །མཚན་ཉིད་ཅི་ཞེ་ན། རྡུལ་སྙེད་མཚོན་ཆ་འཛིན་པ་དེ། །ཕྱག་མཚན་གང་འཛིན་ན། དབུའ་གསུམ་ཕྱག་དྲུག་ཞབས་བཞིར་གྱུར། །ཚུལ་ཇི་ལྟར་བསྡུ་ཞེ་ན། དེ་ཡང་ཁྲོ་བོ་འཆོལ་པ་དེ་དག་གི་མཚན་ཉིད་ཅི་ཞེ་ན། དབུའ་མ་ངེས། ཕྱག་མ་ངེས། ཞབས་མ་ངེས། དྲངས་མ་ངེས་ཏེ། རྡོ་རྗེའི་རིགས་དང་། རིན་པོ་ཆེ་དང་། པད་མ་དང་། ལས་དང་། དེ་བཞིན་རིགས་ལྔ་ཡང་འཆོལ་པར་སྤྲོ་བའོ། །དེ་ཡང་ཆེ་ཆུང་སྟོང་གསུམ་གྱི་སྟོང་ཙམ་ལ། དྲངས་རྡུལ་ཕྲ་རབ་སྙེད་དུ་སྤྲོས་པ། ཕྱག་ན་མཚོན་ཆ་སྣ་ཚོགས་པ་དེ་དག་བསྡུས་པའི་དུས་ན། དབུའ་གསུམ་ཕྱག་དྲུག་ཞབས་བཞི་པའོ། །དབུའ་གསུམ་ནི་སྐུ་གསུང་ཐུགས་དང་། རྣམ་ཐར་སྒོ་གསུམ་མཚོན་པའོ། །ཕྱག་དྲུག་ནི་ཕ་རོལ་ཏུ་ཕྱིན་པ་དྲུག་གམ་ཡེ་ཤེས་དྲུག་གོ། །ཞབས་བཞི་ནི། ཚད་མྱེད་པ་བཞིའམ་རྫུ་འཕྲུལ་གྱི་རྐང་པ་བཞིའོ། །འབར་ཆེན་ཀློང་གི་འཁོར་ལོའི་དཀྱིལ། །གནས་གང་དུ་བསྡུ་ན། ཁྲོ་བོ་དེ་དག་གནས་གང་དུ་བསྡུ་ཞེ་ན། འབར་ཆེན་ནི་ཁྲོ་བོའི་གནས་སོ། །ཀློང་ནི་མེ་དཔུང་འབར་བའོ། །འཁོར་ལོ་ནི་དབུས་ཕོ་བྲང་རྩིབས་བཞིའོ། །དཀྱིལ་ནི་གཙོའ་བོ་རྣམས་བཞུགས་པའི་གནས་སོ། །གནས་དེ་ན་གྲུ་གསུམ་མཐིང་ནག་འབར་བའོ། །དབང་ཕྱུག་ཆེ་དང་དུར་ཁྲོད་ཀྱི། །གནས་གང་དུ་བཞུགས་ན། གདན་གང་ལ་བཞུགས་ཞེ་ན། དབུས་ན་དབང་ཕྱུག་ཆེན་པོ་ཡབ་ཡུམ། ཤར་དྲི་ཟ། ལྷོ་གཤིན་རྗེ། ནུབ་ཀླུའམ་སྲིན་པོ། བྱང་གནོད་སྦྱིན་ཡབ་ཡུམ་མོ། །དེ་ལྔ་ནི་དུར་ཁྲོད་ཀྱི་བདག་པོ་དྲེགས་པ་ཁྱོ་ཤུགས་ཀྱི་ཞེས་བྱའོ། །བདག་པོ་དྲེགས་པ་ཁྱོ་ཤུགས་ཀྱི། །གདན་འདི་ས་ཚུལ་གང་ཞེ་ན། དུར་ཁྲོད་ཀྱི་བདག་པོ་དྲེགས་པ་དེ་དག་རྣམས་ཕོ་ཁ་ནུབ་མོ་གན་རྐྱལ། བྱི་ཆིངས་སྣོལ་མ། མི་རོ་སྐྲའི་སྐུད་པས་བཅིངས་སོ། །རང་རང་གི་ཞོན་པ་སྟེང་ནས་བ རྫིས་པའོ། །གདན་ལ་བརྐྱང་བསྐུམ་ཚུལ་དུ་བཞུགས། །བཞུགས་ཚུལ་ཇི་ལྟར་བཞུགས་ཞེ་ན། གདན་ལ་བཞུགས་ཚུལ་གང་ཞེ་ན། ཞབས་བཞི་པ་གཡས་བརྐྱང་གཡོན་བསྐུམ་དུ་བཞུགས་སོ། །གཡས་བསྐུམ་པ་ཐབས་ཀྱི་རང་བཞིན་མ་འགགས་པ། གཡོན་བརྐྱང་པ་ཤེས་རབ་ཀྱི་ངོ་བོ་བདེའ་བའོ། །ཁྲོ་བོའི་དཀྱིལ་འཁོར་སྤྲིན་ཕུང་ཡང་། །རྒྱུ་གང་ཡིན་ཞེ་ན། ཁྲོ་བོ་འཆོལ་པའི་དཀྱིལ་འཁོར་སྤྲིན་ཕུང་དེ་ལྟ་བུ་དག །ཚུལ་འདུས་པས་གདན་སྟེངས་ན་གནས་སོ། །དེ་ལས་རིགས་སོ་སོར་ཕྱེ་ནས་གདན་ལ་བཞུགས་པའི་ཚུལ་ནི། དཔལ་ཆེན་ཁྲག་འཐུང་ཆེན་པོ་ནི། །རིགས་སུ་ཇི་ལྟར་འདུས་ཞེ་ན། དབུས་རྒྱུའི་ཧེ་རུ་ཀ་ལ་བཛྲ་ཧེ་རུ་ཀའི་རིགས་ཐིམ་པས། མེ་ལོང་ལྟ་བུའི་ཡེ་ཤེས་ཀྱི་ངོ་བོ། ཞལ་གསུམ་ཕྱག་དྲུག་ཏུ་གྱུར་ཏོ། །ཤར་གྱི་གདན་སྟེངས་སུ་སྟོང་པ་ཉིད་ཀྱི་ཡེ་ཤེས་ལས་ཅིག་ཏུ་འདུས་པས་ཁྲག་འཐུང་ཆེན་པོ་འབུ་ཏ་ཧེ་རུ་ཀ་ཞལ་གསུམ་ཕྱག་དྲུག་པར་བསྒོམ་མོ། །རིན་པོ་ཆེ་དང་པད་མ་དང་། །བྱང་དུ་ལས་ཀྱི་རིགས་ཀྱི་ཁྲོ་བོ་རྣམས་འདུས་པ་ལས། ཀར་མ་ཧེ་རུ་ཀ་ཞལ་གསུམ་ཕྱག་དྲུག་པ་བྱ་བ་གྲུབ་པའི་ཡེ་ཤེས་ཀྱི་རང་བཞིན་ནོ། །དེ་རྣམས་རང་རང་གི་གདན་ལ་བཞུགས་པའོ། །ཕྱོགས་བཞི་ཞེས་པ་དབུས་རྒྱུའི་ཧེ་རུ་ཀ་དང་པོ་ནས་ཡོད་པའི་དབང་དུ་རྩིས་པ་ཡིན་ནོ། །དེ་ཀུན་འཇིགས་བྱེད་ཆེན་པོའི། །དེ་ཀུན་ནི་ཁྲོ་བོ་རྣམས་སོ། །འཇིགས་བྱེད་ནི་གདུག་པ་ཅན་རྣམས་སོ། །ཆེན་པོ་ནི་སྐུ་ཆེ་ལ་ཡན་ལག་རགས་པའོ། །ཡང་ན་ཁྲོ་བོ་དེ་ཀུན་ཡང་རྒྱུའི་ཧེ་རུ་ཀ་ལྟར་འབར་བའི་གར་དགུའ་དང་ལྡན་པའོ། །ཆ་ལུགས་རྔམ་པའི་ང་རོ་ཡིས། །ཆ་ལུགས་གང་ཞེ་ན། ཆ་ལུགས་ནི། དུར་ཁྲོད་ཀྱི་ཆས་དགུས་བརྒྱན་པའོ། །དེ་ཡང་ཐུགས་ཡེ་ཤེས་ཆེན་པོས་རྟག་ཆད་ཀྱི་མཐའ་སེལ་བ་སྟེ། ཐུགས་གཏུམ་ཞིང་རྔམ་པའི་ང་རོ་རུ་ལུ་རུའི་སྒྲ་ཆེན་པོ་འབྱིན་པའི་ཚུལ་ལོ། །འབར་བའི་ཀློང་ན་དབུའ་གསུམ་པོ། །སྐལ་པའི་མེ་དཔུང་འབར་བའི་ཀློང་ན། རྒྱུ་ཉོན་མོངས་པ་དུག་གསུམ་ཟད་ནས། ལམ་ཁམས་གསུམ་གྱི་ཟག་པ་བཅོམ་པས། འབྲས་བུ་སྐུ་རྣམ་པ་གསུམ་མཚོན་པའི་རྟགས་སུ་དབུའ་གསུམ་པ་དང་། ཕྱག་དྲུག་ཞབས་བཞི་དྲི་ཟ་དང་། །གདན་ཅི་ལ་བཞུགས་ན། རྒྱུ་ཉོན་མོངས་པ་དྲུག་ཟད་ནས། ལམ་འགྲོ་བ་རིགས་དྲུག་སྦྱངས་ཏེ། ཕ་རོལ་དུ་ཕྱིན་པ་དྲུག་དང་ལྡན་པས་ཡེ་ཤེས་དྲུག་གི་ཕྱག་དྲུག་ཏུ་བྱུང་བའོ། །རྒྱུ་ཚད་མྱེད་པ་བཞི་དང་ལྡན། ལམ་རྫུ་འཕྲུལ་གྱི་རྐང་པ་བཞིར་དབྱེར་བས་འབྲས་བུ་རྣམ་པར་ཐར་པ་བཞིའི་ཞབས་སོ། །ཞབས་དེས་ཤར་དྲི་ཟ་ཕོ་མོ་རྫིས་སོ། །གནོད་སྦྱིན་གཤིན་རྗེ་སྲིན་པོ་ལས། །བྱང་གནོད་སྦྱིན་ཕྲག་དོག་སྤངས་པས་མནན། ལྷོར་གཤིན་རྗེ་ང་རྒྱལ། ནུབ་སྲིན་པོ་འདོད་ཆགས་སྤངས་པའི་ལྷ་པད་མ་ཧེ་རུ་ཀའི་གདན་ནོ། །ལ་སོགས་པ་ཁྱོ་ཤུགས་གདན་ལ་བཞུགས། །ལ་སོགས་ནི་དབུས་དབང་ཕྱུག་ཆེན་པོ་ཡབ་ཡུམ་མོ། ལྷ་དེ་དག་ཡང་ཡབ་ཡུམ་གྱི་ཆིངས་སུ་བྱས་པ་ནི་ཁྱོ་ཤུགས་སོ། །གདན་དེ་དག་ལ་མནན་ནས་བཞུགས་པའོ། །བཙུན་མོ་ཁྲག་འཐུང་ཆེན་མོ་རྣམས། །ཡུམ་གང་ཞེ་ན། སོ་སོའི་སྐུ་ལ་འཁྲིལ་ཏེ་གནས། །སྤྱད་པར་བྱ་བས་ན་བཙུན་མོ་སྟེ། ཁྲག་འཐུང་ནི་ཁྲོ་མོའོ། །ཆེན་མོ་ནི་ཡུམ་ལྔའོ། །སོ་སོ་ནི་ཡབ་པོ། སྐུ་ལ་འཁྲིལ་བ་ནི་ཐབས་དང་ཤེས་རབ་ཏུ་གནས་སོ། །དེ་ཡང་ཡུམ་གཉིས་ཏེ། རང་བཞིན་དབྱིངས་ཀྱི་ཡུམ་ཁྲོ་མོ་ལྔ་དང་། གདུལ་བྱ་དབང་དུ་སྡུད་པའི་ཡུམ་དབང་ཕྱུག་མ་ཉི་ཤུ་རྩ་བརྒྱད་དོ། །དེ་ལ་སྐབས་འདིར་ནི། རང་བཞིན་དབྱིངས་ཀྱི་ཡུམ་རང་གི་ཐུགས་ཁར་སྦས་ནས། དྲེག་པ་འོག་ཏུ་མནན། དབང་མོ་ལ་སྦྱོར་བ་བྱས། སྲས་གནས་ཡུལ་གྱི་མ་མོ་སྟོན་ནས། དབང་མོ་རང་རང་གནས་སྐྱེ་ནས། རང་གི་ཡུམ་ལུས་དང་གྲིབ་མ་བཞིན་དུ་སྡོད་སྐུ་ལ་འཁྲིལ་བའོ། ༈ །ཁྲག་འཐུང་དེ་རྣམས་ལ་གསུམ་སྟེ། རྒྱུ་སེམས་ཅན་གྱི་ལྡན་ཚུལ་དང་། ལམ་ཞི་ཁྲོ་གནས་འགྱུར་དང་། འབྲས་བུ་ཡེ་ཤེས་རྟོགས་ཚུལ་ལོ། །རྒྱུ་ནི་སེམས་ཅན་ལ་ཕུང་པོ་ལྔ། དེ་ལ་གནས་པའི་ཉོན་མོངས་པ་ལྔ། དེ་སྐྱེད་པའི་ཤ་ཁྲག་རུས་པ་རླུང་ལྔ་ཡོད་པའོ། །ལམ་ནི། རྒྱལ་བ་རིགས་ལྔ། གདུལ་བྱ་ལ་དགོངས་ནས་ཁྲག་འཐུང་རིགས་ལྔར་གནས་འགྱུར་བའོ། །འབྲས་བུ་ནི་ཡེ་ཤེས་ཆེན་པོ་ལྔ་རྟོགས་སོ། །དེ་ནས་དགྱེས་ཏེ་ཧ་བརྗོད་པས། །ཡུམ་སྐྱེད་པ་དེ་ནས། ཡབ་ཡུམ་ཐབས་ཤེས་རབ་སྦྱོར་བ་བྱས་པས། དགྱེས་པའི་སྒྲ་ཧ་བརྒྱད་ཞལ་ནས་བརྗོད་པའོ། །བྱང་ཆུབ་སེམས་ཀྱི་སྤྲིན་དག་ལས། །ཡབ་ཡུམ་སྦྱོར་བ་བྱས་པའི་བྱང་ཆུབ་སེམས་ནི། ནམ་མཁའི་སྤྲིན་ཕུང་ལྟ་བུ་ལས། ཡི་གེ་ཧར་གྱུར་ནས། གནས་ཀྱི་མ་མོ་བརྒྱད་རིམས་ཀྱིས་བསྐྱེད་པའོ། །དཀར་མོའི་ཚོགས་དང་རྐུན་མོའི་ཚོགས། །ནང་རྣམ་ཤེས་ཀྱི་རྣལ་འབྱོར་མ་བཞི། ཐུགས་ཀྱི་མཚན་དུ་བཏགས་པ་ཀོའུ་རི་མ་ནི། ཉོན་མོངས་པའི་སྐྱོན་གྱིས་མ་གོས་པས་དཀར་མོ། །ཆོས་ཉིད་ལ་ཉེས་པའི་སྐྱོན་གྱིས་མ་གོས་པས་དཀར། ཡང་དག་པའི་དོན་ལ་གཞན་གྱིས་སྒྱུར་མི་ནུས་པས་རྟགས་སྔོན་མོའོ། །ལས་ཞི་བའི་ལས་བྱེད་དོ། །ཉོན་མོངས་པ་འཁོར་བའི་གནས་ནས་བསྟུས་ཏེ། བླ་མྱེད་གནས་སུ་འདྲེན་པས་ན་རྐུན་མོ། །ལས་རྒྱས་པའི་ལས་བྱེད་དོ། །དེ་ནི་ཙོའི་རི་མའོ། ༈ །དཔལ་ཆེན་པོ་ལ་འཁོར་གྱི་མ་མོ་རྣམ་པ་གཉིས་ཏེ། ནང་གི་རྣལ་འབྱོར་མ་དང་། ཕྱིའི་སྒྲུབ་པ་མོའོ། །ནང་གི་རྣལ་འབྱོར་མ་ནི། དབང་པོ་དང་རྣམ་ཤེས་གནས་འགྱུར་ཏེ། ཚོགས་བརྒྱད་དེ་ཁོ་ན་ཉིད་གཅིག་པའི་མ་མོ་བརྒྱད། སྤྱད་བྱ་ཡུལ་གྱི་ཞེན་པ་གནས་འགྱུར་བ་མཆེའ་གཤོག་ཅན་གྱི་མ་མོ་བརྒྱད་དེ་བཅུ་དྲུག །བརྟག་ཆད་མུ་བཞིའི་མཐའ་བཀག་ནས་ཚད་མྱེད་བཞིར་རྒྱས་འདེབས་པ་སྒོ་མ་བཞི་སྟེ་ཉི་ཤུ་པོ་རྣམས་ཏེ། དོན་ཆོས་ཉིད་རྣལ་མ་ལ་བློ་རིག་པའི་ཡེ་ཤེས་འབྱོར་བས་ན་ནང་གི་རྣལ་འབྱོར་མ་ཞེས་བྱའོ། །སྤྱིར་ལས་ལས་གྲུབ་པ་དབང་ཕྱུག་མ་ཉི་ཤུ་རྩ་བརྒྱད་ནི། ཕྱིའི་སྒྲུབ་པ་མོ་ཞེས་བྱའོ། །དེ་རྣམས་ནི་དཔལ་གྱི་འཁོར་རོ། །དེ་བས་ན་ནང་གི་བསྒྲུབ་པ་མོ་རྣམས་བསྐྱེད་པའི་ཕྱིར་རོ། །རྨོངས་མོ་དང་ནི་ཐལ་བྱེད་མ། །པྲ་མ་ཧོ་ནི། གཞན་དབང་དུ་བསྡུས་ནས་རྨོངས་ཤིག་སྐུགས་པར་བྱེད་པ་ལས་ནི་དབང་གི་ལས་བྱེད་དོ། །པྲེ་ཏ་ལིས་ནི་བགེགས་དང་ལོག་འདྲེན་ཐལ་བར་བརླག་གོ། །ལས་ནི་དྲག་པོའི་ལས་བྱེད་དོ། ༈ །རྒྱུ་སེམས་ཅན་གྱི་ལྡན་ཚུལ་ནི། རྣམ་པར་ཤེས་པ་བཞི་དང་། དབང་པོ་རྣམ་བཞི་སྟེ། རྣམ་ཤེས་ཚོགས་བརྒྱད་དུ་འདུས་པས་ན་ཡི་གེ་ཧ་བརྒྱད་དོ། །ཞི་ཁྲོ་གནས་སྒྱུར་ན། བྱང་ཆུབ་སེམས་དཔའ་བརྒྱད་པོ་དེ་མ་མོ་བརྒྱད་དོ། །དེའི་ཕྱིར་ན་མ་མོ་བརྒྱད་དོ། །འབྲས་བུ་ཐོབ་ཚུལ་ནི། རིགས་ཀྱི་ཁ་འཛིན་པས་ན་ཡེ་ཤེས་ལྔ་པོ་ཉིད་ཐོབ་པའོ། །ཕྱི་དབང་པོའི་རྣལ་འབྱོར་མ་བཞི། སྦོས་མོ་དང་ནི་གཏུམ་མོ་དང་། །སྤོས་མོ་ནི་པུ་ཀ་སི་སྟེ། ཆེ་བའི་ཡོན་ཏན་དང་ལྡན་པའོ། །ཉོན་མོངས་པ་རྩད་ནས་གཅད་དེ་རྒྱས་པའི་ལས་བྱེད། གཏུམ་མོ་ཀས་མ་ཧྲི་ཏེ། འཁོར་ལ་གཏུམ་དྲག་ལས་བྱེད་པའོ། །སྨེ་ཤ་ཅན་དང་མ་ཚོགས་མ། །སྨེ་ཤ་ནི་ནི། སྲིན་པོ་ཉང་ཤ་རྟིང་གིས་ཟ་བ་སྨེ་ཤ་ཅན་གྱི་ཡུལ་ན་གནས་པ་སྟེ། འགྲོ་དོན་སྤང་བླང་མྱེད་པར་བྱེད་པ། ལས་གང་ཡང་རུང་བ་གྲུབ་པར་བྱེད་པའོ། །མ་ཚོགས་མ་ཏི། ཙན་དྷ་ལི་སྟེ། མ་མོ་དེ་དག་ལ་སྤྲུལ་པ་མང་པོ་འབྱུང་བ་དང་། རྣལ་འབྱོར་པའི་རྒྱུད་འཕེལ་བའི་ལས་བྱེད་པའོ། །ཚོགས་རྣམས་རང་གི་ལག་ཆ་དང་། །ལྷ་མོ་དེ་རྣམས་ཡང་། ཞལ་གཅིག་ཕྱག་གཉིས་པ་སྟེ། ཞབས་མ་མོའི་འགྱིངས་སྟབས་ཀྱིས་བཞུགས་པ། རང་རང་གི་ཕྱག་མཚན་དང་བཅས་པའོ། །དེ་ཡང་སྐུ་མདོག་ཕྱག་མཚན་འོག་ནས་ལེགས་པར་སྟོན་ནོ། །ངོ་མཚར་ཆས་ནས་རྔམ་ཐོན་ཏེ། །ཁྲོ་མོ་དེ་ཡང་ངོ་མཚར་དང་བཅས་ནས་སྐུ་གསུང་ཐུགས་རྔམ་པའི་མདངས་དང་བཅས་ནས་སྟོན་ཏེ། འབར་ཆེན་འཁོར་ལོའི་ཤར་མཚམས་ནས། །སྐལ་པའི་མེ་ལྟར་འབར་བའི་ཀློང་། འཁོར་ལོའི་ཤར་ལྷོ་མཚམས་ནས་འཁོར་པའོ། །ཤར་ལྷོ་ཀོའུ་རི། ལྷོ་ནུབ་ཏུ་ཙོའུ་རི། ནུབ་བྱང་དུ་ཕྲ་མོ་ཧ། བྱང་ཤར་དུ་བེ་ཏ་ལེ། ཤར་ལྷོའི་གྲུ་ཆད་ལ་ཀ་སྨ་ཧྲི། ནུབ་བྱང་དུ་སྨེ་ཤ་ནི། བྱང་ཤར་དུ་ཙན་དྷ་ལི། འཁོར་བ་འཇིགས་པའི་གཟུགས་ཀྱི་འཁོད། །དོན་ཆོས་ཉིད་ལས། འཁོར་བར་སེམས་ཅན་གྱི་དོན་མཛད་པ་ལ། འཇིགས་པའི་གཟུགས་དང་། བཅས་ནས་བྱིན་ཏེ། ཁྲོ་བོའི་དཀྱིལ་འཁོར་དུ་འཁོད་པའོ། །གདན་ཞིང་རྐྱང་རེ་རེ་ལ་བཞུགས་པའོ། ༈ །རྒྱུ་སེམས་ཅན་གྱི་ལྡན་ཚུལ་ནི། དབང་པོ་དང་རྣམ་ཤེས་ཀྱི་ཁྱད་པར་སྤྱད་བྱ་ཡུལ་དུ་གྱུར་པ་རྣམས་སོ། །ཞི་ཁྲོ་གང་སྒྱུར་བ་ནི། ཕྱི་ནང་གི་སེམས་མ་རྣམས་སོ། །དེ་བས་ན་ཡུལ་གྱི་མ་མོ་བརྒྱད་ཞེས་བྱའོ། །འབྲས་བུ་ཡེ་ཤེས་ཀྱི་ཐོབ་ཚུལ་ནི། ཡུལ་དག་པ་ཆོས་ཀྱི་དབྱིངས་ཡིན་ལ། དེ་ལ་ཡེ་ཤེས་ལྔའི་རོལ་པ་མ་འགགས་པར་གནས་པ་ཐོབ་པའོ། །དེ་ནས་དགྱེས་ཏེ་ཧེ་བརྗོད་པས། །དེ་ནས་འཕྲ་མྱེན་མ་བརྒྱད་བསྐྱེད་པ་ནི། དཔལ་ཆེན་པོ་ཡབ་ཡུམ་གྱི་བྱང་ཆུབ་སེམས་དགྱེས་པའི་སྤྲིན་ལས་། ཧེ་བརྒྱད་ཕྱོགས་མཚམས་སུ་ཞིང་གི་གདན་སྟེངས་སུ་འཕྲོས་པས་སྐྱེས་པའོ། །ཕྱོགས་ཀྱི་རྣལ་འབྱོར་མ་གཅན་ཟན་གྱི་འོག་ཅན་བཞི། སེང་གདོང་ཆེན་མོའི་ཚོགས་དང་ནི། །ལྷ་མོ་སིང་ང་མུ་ཀ་ནི་སེངགེའི་གདོང་ཅན་ཏེ། དྲེགས་པ་ཅན་ཐམས་ཅད་ཟིལ་གྱིས་གནོན་པ་སྟེ། ཡེ་ཤེས་ཀྱི་རྣམ་པར་རྟོག་པ་འཇོམས་པ་ལ། ཚུར་མི་ཚུགས་པའི་དོན་ནོ། །སྟག་དང་ཝ་དང་ཁྱི་དང་བཞད། །བྱང་ནྲི་མ་སྟག་གི་མགོའ་ཅན། འཕྲིན་ལས་དཔའ་སྟུལ་ཆེ་བའོ། །ཀྲི་ལ་ཝའི་མགོ་ཅན་སྣ་སྣོའི་ཐབས་མཁས་པས་འགྲོ་བའི་དོན་མཛད་དོ། །ཤོ་ན་ཁྱིའི་མགོའ་ཅན་རྣམ་རྟོག་འཇོམས་སོ། །ཀྲི་ཏ་བྱ་རྒོད་ཀྱི་མགོ་སྟེ། ཤེས་བྱ་ལ་ཐོགས་པ་མྱེད་པས་བཞད་མགོའོ། །མཚམས་ཀྱི་རྣལ་འབྱོར་མ་འདབ་ཆགས་ཀྱི་མགོའ་ཅན་མ་བཞི་ནི། ཀང་ཀ་དུར་བྱ་འུག་གདོང་ཆེ། །ཀང་ཀ་དུར་བྱའི་མགོའ་ཅན་དེ་འཁོར་བ་དང་དུ་ལེན་ནོ། །ཁ་ཁ་མུ་ཁ་བྱ་རོག་གི་མགོའ་ཅན་དེ་འཁོར་འདས་མཉམ་པ་ཉིད་དུ་མཁྱེན་པའི་ཡེ་ཤེས་ལྡན་པ་དེ། ཧུ་ལུ་ཀ་འུག་པའི་མགོ་སྟེ། ཡེ་ཤེས་ཀྱི་སྤྱན་དང་ལྡན་པས་གདུལ་བྱ་ཕྲ་མོ་ཡལ་ན་མི་དོར། ཚོགས་རྣམས་རང་གི་ལག་ཆ་དང་། །མ་ཚོགས་དེ་རྣམས་ཡང་། འཕྲ་མྱེན་ཁྱིའི་མགོའ་ཅན་ཞལ་གཅིག་ཕྱག་གཉིས་པ། རང་རང་གི་ཕྱག་ཆ་དང་བཅས་པ་སྟེ། སིང་ང་ཁ་རོ་ལ་སོགས་ཏེ། འོག་ཏུ་སྟོན་ནོ། །ངོ་མཚར་ཆས་ནས་རྔམ་ཐོན་ཏེ། །སྐུ་གསུང་ཐུགས་རྔམ་པའི་མདངས་ཀྱིས་ཐོན་ཏེ། འབར་བའི་དཀྱིལ་འཁོར་དུ་གནས་པའོ། །དེ་ཡང་སེམས་ཅན་གྱི་རང་བཞིན་སངས་རྒྱས་ཡིན་པ་ལ་དེ་ལྟར་མ་རྟོགས་པ་ལ་ངོ་མཚར་ཆེ་ཞེས་རྔམ་མོ། །འབར་བ་ཆེན་པོའི་འཁོར་ལོའི། །ཕྱི་རོལ་ཤར་གྱི་ཕྱོགས་དག་ནས། །ཁྲོ་བོའི་གཞལ་ཡས་ཁང་ནི། འབར་བ་ཆེན་པོའོ། །དེའི་འཁོར་ལོའི་ཕྱི་རོལ། བར་ཁྱམས་དང་པོ་ལ་འགོད་པའོ། །ཤར་དུ་སིང་ཧ། ལྷོར་བྱང་ཀྲི། ནུབ་ཏུ་པྲི་ལ། བྱང་དུ་ཤོ་ན་སྟེ། གཅན་ཟན་གྱི་མགོའ་ཅན་མ་བཞིའོ། །ཤར་ལྷོར་ཀྲི་ཏ། ལྷོ་ནུབ་ཏུ་ཀང་ཀ །ནུབ་བྱང་དུ་ཁ་ཁ། བྱང་ཤར་དུ་ཧུ་ལུ་ཀ་སྟེ། འདབ་ཆགས་ཀྱི་མགོའ་ཅན་མ་བཞིའོ། །འཁོར་བར་རྔམ་པའི་མདངས་ཀྱིས་འཁོད། །བར་ཁྱམས་དང་པོའི་ཕྱོགས་མཚམས་རྣམས་སུ་གདན་ཞིང་རྐྱང་རེ་རེའི་སྟེང་དུ། འཁོར་བ་གདུལ་བྱའི་ཞིང་དུ་གཟིགས་ནས་སྐུ་གསུང་ཐུགས་རྔམ་པའི་མདངས་ཀྱིས་འཁོད་དོ། །དེ་ནས་དགྱེས་ཏེ་ཕཊ་བརྗོད་པས། །འཕྲ་མྱེན་མ་བརྒྱད་བསྐྱེད་པའི་རྗེས་དེ་ནས། སྒོ་མ་བཞི་བསྐྱེད་པ་ནི། དཔལ་ཆེན་པོ་ཐབས་ཤེས་རབ་གཉིས་སུ་མྱེད་པའི་བྱང་ཆུབ་སེམས་ལས། ཕཊ་བཞི་སྒོ་བཞི་འཕྲོས་པ་ལས་བསྐྱེད་པའོ། །རྡོ་རྗེ་སྲིང་འགྲོ་མ་ཚོགས་དང་། །ཤར་དུ་ལྕགས་ཀྱུ་མ་ནི་རྟའི་མགོའ་ཅན་ཏེ། རྟ་མགྱོགས་ཤིང་ཤུགས་དྲག་པ་དང་འདྲ་བར། ཐུགས་རྗེ་མགྱོགས་ཤིང་ཤུགས་དྲག་པས། འཁོར་བ་མ་སྟོངས་ཀྱི་བར་དུ་འགྲོ་དོན་མཛད་པའོ། །འཁོར་བར་མི་སྟོང་འཛིན་ཅེས་ཀྱང་བྱའོ། །གདོང་མོ་འཇིག་རྟེན་རོ་ལངས་མ། །ལྷོར་ཞགས་པ་མ་ནི། ཕག་གི་མགོའ་ཅན་དེ། ཕག་དང་འདྲ་བར། ཉོན་མོངས་པའི་ཐལ་བ་རློག །འཕྲིན་ལས་སྟོང་ཚུགས་སུ་བྱེད་དེ། ནུབ་ལྕགས་སྒྲོག་མ་ནི། དྲེད་ཀྱི་མགོའ་ཅན་དེ། ཉི་མ་དང་འདྲ་བས་དགྲ་བགེགས་སྲེག་པས་ན། ཉི་ཟླ་དམར་མོ་འཇིག་རྟེན་མའོ། །བྱང་དྲིལ་བུ་ནི་སྤྱང་ཁུའི་མགོ་ཅན་དེ་ཁམས་གསུམ་གྱི་སེམས་ཅན་རོ་དང་འདྲ་བ་དེ་རྣམས་ལ། ཡེ་ཤེས་དྲན་པ་བ སྐྱེད་པར་བྱེད་དེ། སྤྱང་གདོང་ཁམས་གསུམ་སླར་འཚོའ་མའོ། །ཚོགས་རྣམས་རང་གི་ལག་ཆ་དང་། །དེ་དག་ཡང་རང་རང་གི་སྤྲུལ་པ་དང་བཅས་ནས་རང་རང་གི་ལག་ཆ་ལྕགས་ཀྱུ་ལས་བསོགས་པ་རྣམ་པའོ། །ངོ་མཚར་ཆས་ནས་འཇིགས་ཐོན་ཏེ། །སེམས་ཅན་ཐམས་ཅད་ཀྱི་ལུས་ཀྱི་དབང་པོ་སྒོ་མ་བཞི་ཡིན་པ་ལ། ཡིན་པར་རྟོགས་པ་ངོ་མཚར་ནས། འཇིག་རྟེན་སེམས་ཅན་མ་རུངས་པ་རྣམས་གདུལ་བྱར་བྱས་ནས་བྱུང་བའོ། །དཀྱིལ་འཁོར་བསྒོའ་བཞིར་རྔམ་གཟུགས་གནས། །དཀྱིལ་འཁོར་གྱི་སྒོ་བཞིའི་ནང་ན། གདན་ཞིང་སྤགས་རེ་རེའི་སྟེང་ན། སྐུ་གསུང་ཐུགས་རྔམ་པའི་གཟུགས་དང་བཅས་ནས་བཞུགས་པའོ། །དེ་ཡན་ཅད་ནི་ནང་གི་རྣལ་འབྱོར་མ་རྣམས་སོ། །དགྱེས་པའི་སྤྲིན་དག་ཕྱོགས་བཅུ་ནས། །ཕཊ་ཅེས་སྒྲགས་པས་ཐམས་ཅད་འཁྲོས། །དེ་ལྟར་ཕོ་རྣམས་འོག་ཏུ་མནན་ནས། དབང་མོ་ཉི་ཤུ་རྩ་བརྒྱད་ལ་སྦྱོར་བ་བྱས་ཤིང་སྲས་གཏོན་ནས། ཡབ་ཡུམ་གྱི་བྱང་ཆུབ་སེམས་ལས་ཕཊ་ཅེས་པའི་སྒྲ་ཕྱོགས་བཅུར་ནས་བྱུང་ནས། དབང་ཕྱུག་རྣམས་འཁྲོས་ཏེ། གནག་རྒོད་ལ་རྫིས་གཏབ་པ་ལྟར། འཁྲོས་ནས་རང་རང་གི་གནས་གང་ཡིན་པ་དེར་སོང་ངོ་། །དཔལ་ཆེན་པོ་རིགས་ལྔ་ཡབ་ཡུམ་རྣམས་ལ། རང་རང་གི་ཡུམ་ལུས་དང་གྲིབ་མ་ལྟ་བུར་སྐུ་ལ་འཁྲིལ་ནས་བཞུགས་སོ། །དེ་ནས་དཔལ་ཆེན་ཁྲོ་བོའི་རིགས། །བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བའི་རྗེས་དེ་ནས། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བ་ནི། དཔག་ཆེན་པོ་བཛྲ་ཧེ་རུ་ཀའི་རང་བཞིན་ཁྲོ་བོའི་རིགས་ཡིན་ཏེ། ལྷུན་གྱིས་གྲུབ་པར་བྱ་བའི་ཕྱིར། །དེ་ཡེ་ནས་རང་གི་ཕུང་པོ་དང་འབྱུང་བ་དང་ཁམས་སྐྱེ་མཆེད་ཀྱི་རང་བཞིན་ལྷའི་ད་ལ་རུ་ཡེ་ནས་སངས་རྒྱས་པ་ཡིན་ཀྱང་། རྟོགས་པར་མ་གྱུར་ཏེ། མ་རྟོགས་པ་རྟོགས་པར་བྱ་བ་དང་། མ་གྲུབ་པ་གྲུབ་པར་བྱ་བའི་ཕྱིར། དེ་བཞིན་གཤེགས་པའི་སྲས་སུ་བདག་བྱའོ། །རང་གི་ངང་ཚུལ་དེ་བཟུང་ནས། །བཛྲ་ཧེ་རུ་ཀའི་ཐུགས་ཀ་ནས། རང་སེམས་ཅན་གྱི་ལུས་འདི་ཁོ་འདྲ་བ་གཅིག་བྱུང་ནས། དཀྱིལ་འཁོར་གྱི་བར་ཁྱམས་ནས་ལྷ་ལ་སྐོར་བ་ལན་གསུམ་བྱས་ནས། བསྐུལ་ཚིག་འདི་ཡང་རབ་ཏུ་བརྗོད། །ནུབ་ཕྱོགས་ཀྱི་སྒོར་འདུག་སྟེ། རྣལ་འབྱོར་ཆེན་པོའི་རྐྱང་ཕྱག་ལན་གསུམ་དུ་བཙལ་ནས། ཐལ་མོ་སྦྱར། ལོང་བུ་བཤིབས། རྐང་པ་ས་ལ་སྦྱར་ནས་གསོལ་བ་བཏབ་པ་ནི་འདི་སྐད་དོ། ༈ །རང་གི་ངང་ཚུལ་སློབ་དཔོན་ལ་ལ་ནི། རང་ཐ་མལ་གྱི་ལུས་གཟུང་བར་བྱ་སྟེ། ལྷར་བྱས་ན་རྟོག་པ་བྱ་རྒྱུ་རང་ཅི་ཡོད་གསུང་ལོ། །སྒྱུ་འཕྲུལ་ཡོང་གྲགས་པ་ལ་ལ་ན་རེ། རང་ལྷའི་བུའམ་ཚངས་པ་ཕྲུ་གུ་ལྟར་བྱ་སྟེ། ལྷ་བསོད་ནམས་ཆེ་བས་གྲུབ་ཐག་ཉེ་བའི་དགོས་པ་ཡོད་གསུང་ངོ་། །སྒྱུ་འཕྲུལ་བཀའ་ལུགས་པ་ནི། རང་གི་ངང་ཚུལ་ཟེར་བས་ན། རང་རྡོ་རྗེ་སྲིན་ཕྲུག་ཞེས་བྱ་བ། ཁྲོ་ཆུང་སྲིན་པོ་ཕྲུ་གུ་ལྟར་བྱ་སྟེ། ལུས་ཐ་མལ་གྱི་ལུས་ཡིན་ཡང་། ཆ་བྱད་སྲིན་པོ་ལྟ་བུ་ཅིག །ཡི་དམ་ལྷའི་ཐུགས་ཀ་ནས་ཐོན་ནས། གཞལ་ཡས་ཁང་ལ་སྐོར་བ་ལན་གསུམ་བྱས་ནས། ནུབ་སྒོར་འདུག་ནས། ཞལ་ཤར་དུ་གཟིགས་ནས། རྐྱང་ཕྱག་ལན་གསུམ་བྱ་སྟེ། བདག་སངས་རྒྱས་ཡིན་པ་ལ། ཡིན་པར་མ་ཤེས་པས། ད་ཡི་དམ་ལྷ་དང་། བདག་གིས་དབུའ་གཟུང་བའི་སེམས་ཅན་ཐམས་ཅད་མཉམ་པར་སྦྱོར་རོ་ཞེས་གསོལ་བ་འདེབས་པའོ། །དེ་ཡང་གདུལ་བྱ་དྲག་པོ་ལ་དགོངས་པ་ནི་ནད་ཀས་ཁྲོ་ཆུང་དུ་འདུད་དོ། །དེ་གསུམ་གང་བྱས་ཀྱང་འདྲ་སྟེ། ཚངས་པ་ནི་ཞི་བ་ཡིན་པས་ན། ཕྱི་ལ་བཀའ་ལུགས་ལྟར་འཐད་གསུང་ངོ་། །ཨཱོཾ་སྔོན་གྱི་ཐུགས་དམ་ཆེན་པོ་ནི། དུས་ཅི་ཙམ་ན་སྒྲལ་བར་དམ་བཅའ། དཀྱིལ་འཁོར་གྱི་ལྷ་ཁྱེད་ཀྱིས་སྔོན་གྱི་ཐུགས་དམ་དུ་ཞལ་གྱིས་བཞེས་པ་ནི། བྱང་ཆུབ་མཆོག་ཏུ་སེམས་སྐྱེད་ནས་དམ་བཅས་པ་སྟེ་ཇི་ལྟར་བཅས་ན། འཇིག་རྟེན་མ་ལུས་ཐམས་ཅད་ཀུན། །གང་སྒྲལ་བར་དམ་བཅའ། ཕྱི་སྣོད་དང་། ནང་བཅུད་ཀྱི་འཇིག་རྟེན་གྱི་ཁམས་མ་ལུས་པ་ཐམས་ཅད་ཀུན། དག་པ་ཡེ་ཤེས་ཀྱི་སྣང་བར་བྱས་ཏེ། མ་དག་པ་འཁྲུལ་པའི་སྣང་བ་སྤོང་བར་བྱེད་པའི་ཕྱིར། རྒྱལ་འཁོར་བ་བའི་ལས་རྒྱལ་བ་ཞིང་ཞིང་དུ་སྦྱོར་བས་ན། །གང་དུ་སྒྲལ་བར་དམ་བཅའ། རྒྱལ་བའི་ཞིང་དུ་སྒྲལ་བར་ཞལ་གྱིས་བཞེས་པས། ད་ཁྱེད་ཀྱིས་ཁོངས་སུ་རྣལ་འབྱོར་པ་བདག་ཀྱང་རྟོགས་པར་བྱེད། ཕྱག་རྒྱ་ཆེན་པོར་བདག་སྦྱོར་ཅིག །དེ་ཇི་ལྟར་སྒྲོལ་ཞེ་ན། རྣལ་འབྱོར་པ་བདག་ཀྱང་ཁྱེད་ཀྱི་སྐུ་གསུང་ཐུགས་ཀྱི་ཕྱག་རྒྱ་ཆེན་པོ་དང་། དབྱེར་མེད་པར་སྦྱོར་ཅིག །ཅེས་གསོལ་བ་གདབ་པའོ། །ཐབས་དང་ཤེས་རབ་གཉིས་མྱེད་པའི། །དེ་ལྟར་གསོལ་བ་གཏབ་པས། དཀྱིལ་འཁོར་གྱི་ལྷ་རྣམས་ཐམས་དང་། ཤེས་རབ་གཉིས་མྱེད་སྦྱོར་བར་མཛད་པས། བྱང་ཆུབ་སེམས་ཀྱི་རྒྱུན་ཡབ་ལས་བྱུང་སྟེ་ཡུམ་ལ་ཐིམ། ཡེ་ཤེས་གཟེར་གྱི་ལུས་བརྟོག་སྦྱངས། །ཡུམ་མཁའ་ནས་ཡེ་ཤེས་ཀྱི་འོད་གཟེར་དུ་འཕྲོས་པས། བདག་གི་ལུས་ངག་ཡིད་གསུམ་གྱི་རྟོག་པ་ཐམས་ཅད་བྱ་སྒྲོ་མེས་སྲེགས་པ་བཞིན་ཚིག་ནས་སྡིག་སྒྲིབ་ངན་པ་ཐམས་ཅད་བག་ངན་པ་ཐམས་ཅད་གཏན་ནས་སྦྱངས་ནས། གསེར་ཞུན་ལྟ་བུའི་སེམས་དག་ལ། །རིག་པ་བྱང་ཆུབ་ཀྱི་སེམས་དེ། དཔེར་ན་གསེར་ཞུན་མ་ཞིག་སྐོང་བུ་ན་གནས་པ་ལྟར། ལྟེམ་ལྟེམ་ཞུ་ནས་གནས་པའི་ཀུན་གཞིའ་བྱང་ཆུབ་སེམས་ཀྱི་གཟུགས་བརྙན་དེ་ལ། གསུམ་གྱི་བྱིན་བརླབས་འོད་ཀྱི་འབྲུ། །ཡང་ལྷ་རྣམས་ཀྱི་སྐུ་གསུང་ཐུགས་ཀྱི་གནས་ནས་ཡིག་འབྲུ་གསུམ་འཕྲོས་ནས། འོད་དེ་ཐིམ། འོད་དེ་རྣམས་ལ་རང་བཞིན་མྱེད་པའི་ཡི་གེ་ཨཱོཾ་ཨཾཿཧཱུྃ་གསུམ་དུ་གྱུར་ཏེ། ཡི་གེ་དེ་གསུམ་ཡང་ཧཱུྃ་དུ་གྱུར། ཧཱུྃ་འོད་ཀྱི་ཡིག་འབྲུ་སྒྱུ་མ་ཙམ་པ་དེའོ། །ཐུགས་ཀར་ཐིམ་ནས་སྐུའི་དབྱིག །ཡི་གེ་ཧཱུྃ་དེ་ཡང་བར་ཁྱམས་ནས་སྐོར་བ་ལན་གསུམ་བྱས་ནས་བུང་བ་མེ་ཏོག་ལ་ལྡིང་བ་ལྟ་བུ་སྟེ། གཙོའ་བོའི་ཐུགས་ཀར་ཐིམ་མོ། །དེ་སྐུའི་དབྱིག་ཏུ་གྱུར་པ་ཡིན་ནོ། །རྡོ་རྗེ་ལམ་བྱུང་ཡུམ་གྱི་མཁའ། །སྤྲིན་མྱེད་ཉི་མའི་འོད་ཟེར་ལྟར་དྲིལ་ནས། སྐུའི་དབྱིག་ནས་སྒལ་ཚིགས་ཀྱི་རྟ་རྒྱུད། རྡོ་རྗེའི་ལམ་དུ་བྱུང་། ཡུམ་གྱི་མཁའ་ལ་བབས་ནས་འོད་གཟེར་དང་བཅས་ནས་གནས་སོ། །ཆོས་སྐུ་བྱང་ཆུབ་སེམས་སུ་གནས། །ཧཱུྃ་དེའི་འོད་གཟེར་གྱིས། ཡབ་ཡུམ་ཡང་འོང་དུ་ཞུ་ནས། ཆོས་ཀྱི་སྐུའི་ངོ་བོ། རིག་པ་བྱང་ཆུབ་སེམས་ཀྱི་རང་བཞིན། སྤྲིན་མྱེད་ཉི་མའི་འོད་ལྟར་གསལ་ལོ། །ལྷ་རྣམས་སོ་སོའི་སྙིང་པོའི་སྒྲ། །དཀྱིལ་འཁོར་གྱི་ལྷ་རྣམས་ཀྱང་། སོ་སོའི་སྙིང་པོ་ཧཱུྃ་ཧ་ཧེ་ཕཊ་ཅེས་པའི་སྒྲ་བྱུང་ནས། འོད་དུ་ཞུ་བའོ། །ཧཱུྃ་ཧ་ཧེ་ཕཊ་ཅེས་བྱུང་ནས་ནི། རིགས་ལྔའི་སྔགས་ཧཱུྃ། གནས་ཀྱིས་མ་བརྒྱད་ཧ་ཞེས། ཡུལ་གྱི་ཧེ་ཞེས། སྒོ་མ་བཞིའི་ཕཊ་ཅེས་བརྗོད་ནས་འོད་དུ་ཞུ་བའོ། །རིགས་ལྔའི་ཧཱུྃ་གི་སྒྲ་སྒྲོགས་ཤིང་འོད་དུ་ཐིམ་མོ། །དེས་ཀུན་འདྲེ་བ་ཡིན་ནོ། །བྱང་ཆུབ་སེམས་སུ་ཅིག་པར་ཐིམ། །འོད་དེ་རྣམས་ཀྱང་དབུས་ཀྱི་འོད་ལ་ཐིམ་སྟེ། དཀྱིལ་འཁོར་གྱི་དབུས་ན། འོད་ཀྱི་གོང་བུ་གཅིག་ཏུ་གནས་པར་གྱུར་ཏེ། འོད་དེ་ནི་སྙིང་པོ་ཆོས་ཀྱི་སྐུའོ། །དེ་ནས་སྙིང་པོ་དྲན་ཙམ་གྱིས། །དེ་ནས་ཡི་གེ་ཧཱུྃ་ཡིད་ལ་བྲེངས་ཀྱིས་དྲན་པ་ཙམ་གྱིས། ཡི་གེ་ཧཱུྃ་ལོག་པ་གཉིས་སུ་གྱུར་རོ། །གསུང་གི་ཕྱག་རྒྱ་གཉིས་རྫོགས་ནས། །གསུང་ཡིག་འབྲུའི་ཆོ་ག་ནི། ཡི་གེ་ཧཱུྃ་སྒྲིལ་མ་གཉིས་སུ་གསལ་བའོ། །ཧཱུྃ་བསྟན་པར་གསལ་བ་ནི། ཡོངས་སུ་རྫོགས་པའོ། །འོད་གཟེར་འཕྲོ་འདུའི་སྦྱོར་བ་ཡིས། །ཧཱུྃ་དེ་ལས་འོད་ཕར་འཕྲོས་པས། བདེའ་བར་གཤེགས་པའི་ཐུགས་དམ་རྒྱུད་སྐུལ། འགྲོ་བ་སེམས་ཅན་གྱི་བག་ཆགས་དང་རྟོག་སྒྲིབ་སྦྱངས་ནས་ཧཱུྃ་ལ་ཐིམ་པས། ཐུགས་ཀྱི་ཕྱག་རྒྱ་རབ་ཏུ་འབར། །རྡོ་རྗེ་དང་དྲིལ་བུའམ་བན་དྷ་གཉིས་སུ་གྱུར། དེ་འོད་དུ་འབར་ནས་འཕྲོས་ཤིང་འདུས་པ་ལས། ཧེ་རུ་ཀ་ཡབ་ཡུམ་གྱི་སྐུ་འཕྲ་མོར་གྱུར་ཏོ། །དེ་ནས་ཕྲ་མོའི་སྐུ་འཕྲོས་འདུས། །སྐུ་ཕྲ་མོ་ཞལ་གསུམ་ཕྱག་དྲུག་པ་ཞབས་བཞི་བསྒྲད་པ། ཡུམ་དང་འཁྲིལ་ནས་བཞུགས་པའོ། །དེ་ཡང་སྤྲོས་བསྡུས་པས། ཕྱག་རྒྱ་ཆེན་པོའི་སྐུ་གཉིས་རྫོགས། །དཔལ་ཆེན་ཞལ་གཡས་དཀར་བ། གཡོན་དམར་བ། དབུས་མ་མཐིང་ཀ །རྡོ་རྗེ་འཁོར་ཡུག་ཐོང་བཤོལ་གཡས་བན་དྷ་པད་མ་རལ་གྲི་གཡོན་འཛིན་པ། ཡུམ་ཞལ་གཅིག་ཕྱག་གཉིས་པ། སྐུ་མཐིང་ཀ །གཡས་ཡབ་ལ་འཁྱུད་པ། གཡོན་ཐོད་པ་གཙོའ་ལ་སྟོབ་པའོ། ༈ །ཡེ་ཤེས་ལྔའི་དབང་སྐུར་བ་བ སྟན། ཡེ་ཤེས་ལྔ་ཨཱོཾ་མ་ཆེན་པོ་ཧཱ་ཤུ་ཉ་སྟོང་པ་ཉིད་ཏ་ཛྙ་ཡེ་ཤེས་ན་བཛྲ་རྡོ་རྗེ་སྭ་བ་བྷ་ཨད་ངོ་བོ་ཉིད་མ་ཀོ྅་ང་འོ་དེས་འདྲེ་ཧཾ། སྤྱི་བོ་ན་ཐོད་པའི་གཞལ་ཡས་ཁང་ན། བཅོམ་ལྡན་འདས་འབུ་ཏ་ཧེ་རུ་ཀ །ཞལ་གཅིག །ཕྱག་གཉིས་པ་སྐུ་མདོག་སྨུག་ནག །གཡས་འཁོར་ཡུག །གཡོན་བན་དྷ་སྣམས་པ། ཡུམ་སྨུག་ནག །གཡས་རྡོ་རྗེ་གཡོན་ཐོད་པ་སྟོབ་པ་གཅིག་བསམ་མོ། །ཨཱོཾ་མ་ཧཱ་ཨ་ཏ་རི་ཤ་མེ་ལོང་ལྟ་བུའི་ཡེ་ཤེས། ཛྙ་ན་བཛྲ་སྭ་བ་བྷཱ་ཨད་མ་ཀོ྅་ཧཾ། བདག་གི་དཔྲལ་བ་ན། ཐོད་པའི་ཁང་བུའི་ནང་ན། བཅོམ་ལྡན་འདས་བཛྲ་ཧེ་རུ་ཀ་མཐིང་ནག་ཞལ་གཅིག་ཕྱག་གཉིས་པ། གཡས་ན་རྡོ་རྗེ། གཡོན་ན་བན་དྷ་སྣམས་པ། ཡུམ་མཐིང་ནག་གཡས་རྡོ་རྗེ་གཡོན་བན་དྷ་སྟོབ་པར་བསམས་ལ། སྔགས་ཀྱི་ང་རྒྱལ་བྱའོ། །ཨཱོཾ་མ་ཧཱ་པྲ་མཉམ་པ་ཉིད་པྲ་ཏ་པྲ་བེ་ཤ་ཛྙཱ་ན་བཛྲ་སྭ་བ་བྷ་ཨད་མ་ཀོ྅་ཧཾ། རྣ་བརྟག་གཡས་སུ་ཐོད་པའི་ཁང་བུ་ནང་དུ་བཅོམ་ལྡན་འདས་རཏ་ན་ཧེ་རུ་ཀ་སེར་ནག ། གཡས་ཐོང་བཤོལ། གཡོན་བན་དྷ་ཡུམ་ཐོད་པ་སྟོབ་པར་བསམ་མོ། ༈ །བདག་ཡབ་ཡུམ་གྱི་མཁའ་ལས་ལྷ་མོ་བཞིའི་འཕྲོ་ལས། འོག་མིན་ནས་རིགས་ལྔ་ཁྲག་འཐུང་སྦྱན་དྲངས་ནས། མདུན་གྱི་ནམ་མཁའ་ལ་བྱོན་པར་བསམ་མོ། །ཡབ་ཡུམ་ཐབས་ཤེས་རབ་གཉིས་སུ་མྱེད་པའི་ཆུ་རྒྱུན་གྱིས་དབང་སྐུར་ཏེ། དབང་རྟགས་སུ་རིགས་ལྔ་ཁྲོ་བོས་དབུས་རྒྱན་པར་བསམ་མོ། །དེ་ལྟར་བདག་ཉིད་དལ་རྫོགས་པ་ལ་དབང་སྐུར་བ་དང་། གཉིས་སུ་མྱེད་པའི་བྱང་ཆུབ་སེམས་ཀྱིས་སྦྱངས་ནས་སེམས་ཅན་མ་ཡིན་སངས་རྒྱས་ཡིན་ཏེ། འོ་ན་སངས་རྒྱས་ལ་སྐུ་གསུང་ཡོན་ཏན་འཕྲིན་ལས་ཀྱི་ཡེ་ཤེས་དང་ལྡན་ན། བདག་ལ་ལྡན་ནམ་ཞེ་ན། ལྡན་པར་བྱིན་གྱིས་བརླབ་པ་ཡིན་ནོ། །ཨཱོཾ་མ་ཧཱ་ས་སོ་སོར་རྟོག་པ་མན་ཏ་ཛྙ་ན་བཛྲ་སྭ་བ་བྷ་ཨད་མ་ཀོ྅་ཧཾ། ལྟག་ཁུང་དུ་ཐོད་པའི་ཁང་བུ་ནང་ན། བཅོམ་ལྡན་འདས་པད་མ་ཧེ་རུ་ཀ་དམར་ནག ། གཡས་དགྲའ་སྟྭ་གཡོན་བན་དྷ་སྣམས་པ། ཡུམ་གཡས་གཡོན་རྡོ་རྗེ་གཡོན་བན་དྷ་གཙོའ་ལ་སྟོབ་པ་བསམས་ལ། སྔགས་ཀྱིས་ང་རྒྱལ་བྱ། སོ་སོར་རྟོག་པའི་ཡེ་ཤེས་ཀྱིས་དབང་སྐུར་བའོ། །ཨཱོཾ་མ་ཧཱ་ཀྲི་ཏ་བྱ་བ་གྲུབ་པ་ཨ་ནུ་ཏ་ན་བཛྲ་སྭ་བ་བྷ་ཨད་མ་ཀོ྅་ཧཾ། རྣ་ལྟག་གཡོན་དུ་ཐོད་པའི་ཁང་བུ་ནང་དུ། བཅོམ་ལྡན་འདས་ཀར་མ་ཧེ་རུ་ཀ་སྐུ་མདོག་ལྗང་ནག །གཡས་རལ་གྲི། གཡོན་བན་དྷ་སྣམས་པ། ཡུམ་རྡོ་རྗེ་ཐོད་པ་གཙོའ་ལ་སྟོབ་པར། སྔགས་ཀྱིས་ང་རྒྱལ་བྱ། བྱ་བ་གྲུབ་པའི་ཡེ་ཤེས་སུ་དབང་སྐུར་རོ། །དེ་རྣམས་ཡི་གེ་ཧཱུྃ་ལྔ་ལས་བ སྐྱེད་དོ། །སྐུ་གསུང་ཐུགས་སུ་བྱིན་གྱིས་རླབས་པ་བསྟན། ༀ་ཐམས་ཅད་སརྦ་ཏ་ཐཱ་ག་ཏ་ཀ་དེ་བཞིན་གཤེགས་པ་ཡ་སྐུ་བཛྲ་རྡོ་རྗེ་སྭ་བ་ངོ་བོ་ཉིད་བྷ་ཨད་མ་བདག་ཉིད་ཀོ྅་ཧཾ་ངའོ། །སྤྱི་བོ་ཀླད་པའི་དུང་ཁང་ནང་དུ། ༀ་ལས་འབུ་ཏ་ཧེ་རུ་ཀ་གཡས་སྔོ་གཡོན་དམར་དབུས་སྨུག་ཞལ། འཁོར་ཡུག་རྡོ་རྗེ་དུང་ཆེན་གཡས། རལ་གྲི་དགྲ་སྟྭ་ཐོང་བཤོལ་གཡོན་ན་སྣམས་པ་བསྐྱེད། སྔགས་ཀྱིས་ང་རྒྱལ་བྱའོ། །ཨཱོཾ་སརྦ་ཐམས་ཅད་ཏ་ཐཱ་ག་ཏ་བག་དེ་བཞིན་གཤེགས་པ་བཛྲ་སྭ་བ་བྷ་ཨད་མ་ཀོ྅་ཧཾ། མགྲིན་པར་པད་མའི་སྟེང་དུ་ཨཾ་ལས། བཅོམ་ལྡན་འདས་པད་མ་ཧེ་རུ་ཀ་གཡས་སྔོ་གཡོན་དཀར་དབུས་དམར་ཞལ། རལ་གྲི་རྡོ་རྗེ་འཁོར་ཡུག་གཡས། དུང་དམར་དགྲ་སྟྭ་ཐོང་གཤོལ་གཡོན་ནའོ། །ༀ་སརྦ་ཏ་ཐ་ག་ཏ་ཙིཏྟ་བཛྲ་སྭ་བ་བྷ་ཨད་མ་ཀོ྅་ཧཾ། ཐུགས་ཀ་ཉི་མའི་སྟེང་དུ་ཧཱུྃ་ལས། བཅོམ་ལྡན་འདས་བཛྲ་ཧེ་རུ་ཀ་གཡས་དཀར་གཡོན་དམར་དབུས་མཐིང་ཞལ། རྡོ་རྗེ་འཁོར་ཡུག་དུང་ཆེན་གཡས། རལ་གྲི་དགྲ་སྟྭ་ཐོང་གཤོལ་གཡོན་ནོ། །ཡུམ་མཐུན། སྔགས་ཀྱིས་ང་རྒྱལ་བྱ། བྱིན་གྱིས་བརླབ་པའོ། །ཨཱོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་ཛྙཱ་ན་བཛྲ་སྭ་བ་བྷ་ཨད་མ་ཀོ྅་ཧཾ། སྐྱོ་སྟོན་ཤག་ཡེ་ཤེས་ནི། ལྟེ་བར་རིན་པོ་ཆེའི་སྟེང་ན། རད་ན་ཧེ་རུ་ཀ་གཡས་དམར་གཡོན་དཀར་དབུས་སེར་ཞལ། དུང་ཆེན་རྡོ་རྗེ་འཁོར་ཡུག་གཡས། རལ་གྲི་དགྲ་སྟྭ་ཐོང་གཤོལ་གཡོན་ན་འཛིན་པ་སྒོམ་མོ། །གསུང་བ་ཡིན་སྐད་དོ། །ༀ་སརྦ་ཏ་ཐཱ་ག་ཏ་མ་ཧཱ་མཆོད་པ་པུ་ཙ་བཛྲ་སྭཱ་བྷ་ཨད་མ་ཀོ྅་ཧཾ། གསང་བ་རྡོ་རྗེ་རྒྱ་གྲམ་སྟེང་ན། ཧ་ལས་ཀར་མ་ཧེ་རུ་ཀ །གཡས་དམར་གཡོན་དཀར་དབུས་ལྗང་ཞལ། དགྲ་སྟྭ་རྡོ་རྗེ་འཁོར་ཡུག་གཡས། དུང་ཆེན་རལ་གྲི་ཐོང་གཤོལ་གཡོན་ནོ། །དེ་ལྟར་བསམས་ཀྱང་འགལ་བ་མྱེད་དོ། །འདི་སྔོས་ནི་བྱང་ཆུབ་སེམས་ཀྱི་སྔགས་ཡིན་ནོ། །རྡོ་རྗེ་ཡབ་པད་མ་ཡུམ་བྱིན་བརླབ་པ། །ཧཱུྃ་ལས་རྡོ་རྗེ་མཐིང་ཀ་རྩེ་ལྔ་པ། །པ་ལས་པད་མར་དམར་པོ་གྱུར་ཆོས་ཀྱི་དབྱིངས་ཀྱི་རང་བཞིན་ལས་ཕྱིན་ཅི་ལོག་གི་སྐྱོན་གྱིས་མ་གོས་པའི་པའི་དབུས། །མ་ལས་ཉི་མའི་དཀྱིལ་འཁོར་བསྒོམ། །ཡབ་ཀྱི་མཁན་ནི། ཧཱུྃ་བཛྲ་ཞེས་པས་ཐུགས་ཡེ་ཤེས་ལྔ་དང་ལྡན་པའི་རྟགས་སུ་རྡོ་རྗེ་རྩེ་ལྔ་པར་བསྒོམ་མོ། །ཡུམ་གྱི་མཁའ་པད་མ་འདབ་མ་བརྒྱད་པར་གྱུར་པའི་དབུས་སུ། བདེའ་བར་གཤེགས་པ་ཐམས་ཅད་སྐྱེད་པའི་རྟགས་སུ་ཉི་མའི་དཀྱིལ་འཁོར་གྱི་སྟེང་དུ་མ་དམར་མོ་གཅིག་བསམ་མོ། །དེ་ནས་བརྡས་བསྐུལ་བ་ནི། ཡུམ་གྱིས་ས་མ་ཡ་ཧཱུྃ་ཞེས་བསྐུལ། ཡབ་ཀྱིས་ས་མ་ཡ་སྟོམ་ཞེས་བསྐུལ། ཡུམ་གྱིས་ཨ་ནུ་ར་ག་ཡ་མི་ཞེས་བརྗོད། ཡབ་ཀྱིས་ཨ་ནུ་ར་ག་ཡ་ཧཾ་ཞེས་བརྗོད་ནས། ཡབ་ཡུམ་བརྡའ་སྣོལ་མར་བསྐུལ་ཏེ། གླུ་དྲུག་གིས་དགྱེས་པ་སྐྱེད་པས་བྱང་ཆུབ་སེམས་ཕབ་ལ། སྔགས་གཉིས་པོས་མཆོད་པ་བྱའོ། །རྗེས་སུ་ཆགས་པའི་སྔགས་ཀྱིས་ནང་དུ་སེམས་བཟུང་། མཆོད་པ་པུ་ཙའི་སྔགས་ཀྱིས་ཕྱོགས་བསྡུས་བདེའ་བར་གཤེགས་པ་མཆོད་པའོ། །ཤ་ཏ་པ་ལས་བསོགས་པའི་ཀླུས། །ཤ་ཏ་༼རྩ་བའི་རིང་ལ་༽ གཉིས་པ་དང་། གར་ཏ་པ་༼འབྲིང་པོ་གཉིས་༽དང་། བྲེང་ངེ་བ་དང་། དུང་ངེ་བ་དང་། པང་ཀ་དེའུ་དང་། ཅང་ཀ་དེའུ་ཀླུའོ། །དེ་རེ་རེ་ལ་ཡོན་ཏན་བཅུ་བཅུ་དང་ལྡན་ཏེ། འདུས་ཤེས་བ སྐྱེད་པ་དང་། རྣམ་པར་རིག་པ་དང་། སྙན་པར་འོས་པ་དང་། མྱི་མཐུན་མྱེད་པ་དང་། ཤིན་ཏུ་ཟབ་པ་དང་། རྗེས་སུ་འབྱུང་བ་དང་། གང་གིས་མི་ཚུགས་པ་དང་། རྣར་སྙན་པ་དང་། རྣམ་པར་མི་འཁྲུགས་པ་དང་། ཤིན་ཏུ་གསང་བའོ། །བཅུ་པོ་དེ་རེ་རེ་ལ་ཡང་གླུ་དྲུག་དྲུག་པོས་ཁྱབ་པ་སྟེ། དྲུག་ཅུ་ཚན་དྲུག་གོ། །དེ་ལ་གསུང་དབྱངས་ཡན་ལག་དྲུག་ཅུ་ཞེས་བྱ་སྟེ། དེ་ལྟ་བུའི་གླུ་ཡབ་ཡུམ་རང་རང་ཆགས་པ་བྱེད་པའི་བདེ་བ་སྐྱེད་པར་སྐུལ་བར་རབ་ཏུ་བྱའོ། །བསྐུལ་ས་མ་ཡ་ཧོ་ལ་སོགས་བ་དག་ཀྱང་གསུང་དབྱངས་ཡན་ལག་དྲུག་ཅུའོ་རབ་ཏུ་བྱ། །བསྙེན་པ་དང་ནི་ཉེ་བསྙེན་པོ། །ཡུམ་བསྐྱེད་ཅིང་མཁའ་གསང་བྱིན་གྱིས་བརླབས་པ་ནི་བསྙེན་པའོ། །བརྡའ་སྣོལ་མར་བསྐུལ་བ་ནི་ཉེ་བའི་བསྙེན་པའོ། །བསྒྲུབ་པ་དང་ནི་བསྒྲུབ་ཆེན་པོ། །ཕྱག་རྒྱ་བཞིས་རོལ་པ་སྟེ། ཐབས་དང་ཤེས་རབ་སྦྱོར་བ་ནི་སྒྲུབ་པའོ། །བདེའ་བ་ཉམས་སུ་མྱོང་སྟེ། ལྷག་པ་བྱང་ཆུབ་སེམས་བབས་པ་ནི་བསྒྲུབ་པ་ཆེན་པོའོ། ༈ །སྤྱིར་བསྙེན་བསྒྲུབ་ལ་གསུམ་སྟེ། ཕྱི་དང་། ནང་དང་། གསང་བའོ། །ཕྱི་ནི་ལམ་ལ་བསྙེན་བསྒྲུབ་བཞི་སྟེ། ལྟ་བ་ཚོལ་བ་ནས་ཀུན་སྣང་ཡན་ཆད་བསྙེན་པ། ཕྱག་རྒྱ་གཅིག་པ་ཡན་ཆད་ནས་སྤྲོས་པ་ཡན་ཆད་ཉེ་བསྙེན། བར་ཆད་མྱེད་པ་ནས་ཕྱག་རྒྱ་ཆེན་པོའི་རིག་འཛིན་ཡན་ཆད་སྒྲུབ་པ། ལྷུན་གྱིས་གྲུབ་པ་ནས་སངས་རྒྱས་ལ་སྦྱར་བ་སྒྲུབ་པ་ཆེན་པོ། ནང་གི་བཞི་ནི། དང་པོ་ཡོ་བྱད་བསག་པ་ནས་ནུབ་དང་པོ་ཡན་ཆད་བསྙེན་པ། དེ་ནས་ཇི་ཙམ་བྱེད་པའི་ཕྱེད་ཚུན་ཆད་ཉེ་བསྙེན། ནུབ་བར་མ་སྒྲུབ་པ། ནུབ་ཐ་མའི་དུས་སུ་དངོས་གྲུབ་ལེན་པ་སྒྲུབ་པ་ཆེན་པོ། དེ་ནི་སྒྲུབ་པ་དུས་ཀྱི་བསྙེན་བསྒྲུབ་བོ། །གསང་བ་ལ་གཉིས་ཏེ། སྒྲོལ་དང་། སྦྱོར་བའོ། །སྒྲོལ་བ་བཞི་ནི། དང་པོ་གཞིའི་ཚོལ་བ་ནས་དབང་སྐུར་བསྙེན་པ། སྒྲལ་བ་བཞི་དང་ལྡན་པ་ཉེ་བསྙེན། ཁོག་པ་དྲལ་བ་སྒྲུབ་པ། ཉོན་མོངས་པ་རྒྱུན་བཅད་དེ་སྒྲལ་བ་ནི་སྒྲུབ་ཆེན་པོ། སྦྱོར་བ་ནི། ཡུམ་ཚོལ་བ་ནས་ཆས་སུ་ཞུགས་པ་བསྙེན་པ། གཡེམ་ལ་སྐྱེད་པ་ཉེ་བསྙེན། རོལ་བ་སྒྲུབ་པ། ཐིག་ལེ་གཅིག་ཤོར་གཉིས་གནས་ཀྱི་དུས་སྒྲུབ་པ་ཆེན་པའོ། །དེས་འདི་སྦྱོར་བའི་ཁོངས་སུ་འགྲོ། དེ་ལ་གཉིས་ཏེ། ལྷ་བསྐྱེད་པ་དང་། དབང་སྐུར་བ་ལས། འདིར་ལྷ་བསྐྱེད་པའི་བསྙེན་བསྒྲུབ་བཞི་ནི། ཡུམ་གྱི་པད་མའི་དཀྱིལ་འཁོར་དུ། །ཡུམ་གྱི་མཁར་ལྷག་པ་བྱང་ཆུབ་སེམས་གསལ་བ་དང་། རྟོག་པ་མྱེད་པར་བྱས་ཏེ། རྒྱལ་བའི་དཀྱིལ་འཁོར་མ་ལུས་པ་ཐམས་ཅད་ལ་ཡང་། བདེ་བ་ཐུགས་ཀྱི་དཀྱིལ་འཁོར་སྤྲོ། །བྱང་ཆུབ་སེམས་བདེ་བ་ཡེ་ཤེས་ཀྱི་བདག་ཉིད་ཀྱིས་བདེ་བར་གཤེགས་པ་མ་ལུས་པ་ཐམས་ཅད་ལ་ཡང་སྤྲོའོ། །དེ་ཡང་ཇི་ལྟར་ན། སངས་རྒྱས་སྤྲིན་ཚོགས་མ་ལུས་ལ། །ནམ་མཁའི་ཁམས་གང་བར། སྟོང་གསུམ་ཉུངས་འབྲུར་འཇུག་ཚུལ་དུ་སྤྱན་དྲངས་ལ། བདག་ཡབ་ཡུམ་གྱི་སྐུ་ལ་སྟིམ། གོང་གི་སྔགས་གཉིས་པོ་འཆད་དེ། དགྱེས་མཉམ་མཆོག་གི་སྦྱིན་པས་སྟིམ། །མཉེས་པའི་མཆོད་པ་ཕུལ་ནས། སངས་རྒྱས་དགྱེས་ནས། སེམས་ཅན་དགའ་བར་བྱས་ཏེ། སེམས་ཅན་དོན་བྱས་ནས། ཡུམ་གྱི་མཁའ་གཞལ་ཡས་ཁང་གི་ནང་དུ་སྟིམས་པས། དེ་ནས་དཀྱིལ་འཁོར་གསལ་བར་དགོད། །མཁར་ཡིག་འབྲུར་གྱུར། དེ་ལས་ཕྱག་མཚན་དུ་གྱུར། དེ་ལས་སྐུ་ཕྲ་མོར་གྱུར། དེ་སྔགས་ཀྱི་ཕྱིར་གཞལ་ཡས་ཁང་དུ་བཏོན་ཏེ་དགོད་པའོ། །ཡེ་ཤེས་ཨཱོཾ་སརྦ་ཏ་ཐམས་ཅད་ཐཱ་ག་དེ་བཞིན་གཤེགས་པ་ཏ་མ་ཧཱ་ཆེན་པོ་ཤྲི་དཔལ་ཧེ་རུ་དགྱེས་པ་ཀ་མ་ཧཱ་ཆེན་པོ་གཏུམ་པ་ཙན་དྷ་སརྦ་ཐམས་ཅད་དུས་ཊན་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། འབུ་ཏ་ཧེ་རུ་ཀ་ཞལ་གསུམ་ཕྱག་དྲུག་སྟེ། སྡང་བ་ཏོགས་རྒྱོབ་ཆོད་ཆོམ་སྐུ་གསུང་ཐུགས་བསྟུས་ལ་སྤྲོས་གཅིག་པའོ། །འདྲེའོ། །གཡས་ལྗང་གཡོན་སེར་དབུས་སྨུག་ཞལ། འཁོར་ཡུག་རྡོ་རྗེ་ཐོང་གཤོལ་གཡས། དུང་དམར་དགྲ་སྟྭ་རལ་གྲི་གཡོན་ནོ། །སྔགས་འདིས་ཤར་གྱི་གདན་སྟེངས་སུ་དགོས་དོ། །ཨཱོཾ་བཛྲ་མ་ཧཱ་ཤྲི་ཧེ་རུ་ཀ་མ་ཧཱ་ཙན་དྷ་སརྦ་དུས་ཊན་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། དབུས་སུ་བཛྲ་ཧེ་རུ་ཀ་གཡས་སྨུག་གཡོན་དམར་དབུས་རྡོ་རྗེ་སྔོ་ཞལ། རྩ་སྔགས། ལས་སྔགས། རྡོ་རྗེ་འཁོར་ཡུག་ཐོང་གཤོལ་གཡས། དུང་དམར་དགྲའ་སྟྭ་རལ་གྲི་གཡོན། ཡུམ་སྔོ་ནག །གཡས་རྡོ་རྗེ། གཡོན་བན་དྷ་གཙོའ་ལ་སྟོབ་པའོ། །ཨཱོཾ་རད་ན་མ་ཧཱ་ཤྲི་ཧེ་རུ་ཀ་མ་ཧཱ་ཙན་དྷ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ལྷོར་རད་ན་ཧེ་རུ་ཀ་གཡས་སྨུག་ནག་གཡོན་དམར་དབུས་སེར་ཞལ། ཐོང་གཤོལ་རྡོ་རྗེ་འཁོར་ཡུག་གཡས། དུང་དམར་དགྲ་སྟྭ་རལ་གྲི་གཡོན། ཨཱོཾ་པད་མ་མ་ཧཱ་ཤྲི་ཧེ་རུ་ཀ་མ་ཧཱ་ཙན་དྷ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ནུབ་ཏུ་པད་མ་ཧེ་རུ་ཀ་གཡས་སེར་གཡོན་ལྗང་དབུས་དམར་ཞལ། དགྲ་སྟྭ་རྡོ་རྗེ་འཁོར་ཡུག་གཡས། དུང་དམར་གཤོལ་དང་རལ་གྲི་གཡོན་ནོ། །ཨཱོཾ་ཀར་མ་མ་ཧཱ་ཤྲི་ཧེ་རུ་ཀ་མ་ཧཱ་ཙན་དྷ་སརྦ་དུས་ཊན་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། བྱང་དུ་ཀར་མ་ཧེ་རུ་ཀ་གཡས་དམར་གཡོན་སྨུག་དབུས་ལྗང་ཞལ། རལ་གྲི་རྡོ་རྗེ་འཁོར་ཡུག་གཡས། དུང་དམར་གཤོལ་དང་དགྲ་སྟྭ་གཡོན་ནོ། །ཨཱོཾ་སརྦ་ཏ་ཐཱ་ག་ཏ་མ་ཧཱ་ཀྲོ་ཏི་ཤྭ་རི་སརྦ་དུཥྚན་ཧཱུྃ་ཕཊ། ཡུམ་ཁྲོ་མོ་དབང་ཕྱུག་མ་སྨུག་ནག །གཡས་འཁོར་ལོ། གཡོན་བན་དྷ་སྣམས་པའོ། །ཨཱོཾ་བཛྲ་དྷ་ར་མ་ཧཱ་ཀྲོ་ཏི་ཤྭ་རི་ཛ་ལ་ནི་ཧཱུྃ་ཕཊ། ཡུམ་བཛྲ་ཀྲོ་ཏི་ཤྭ་རི་མ་མཐིང་ནག །གཡས་རྡོ་རྗེ་གཡོན་བན་དྷ་སྣམས་པའོ། །ཨཱོཾ་སུརྱ་རད་ན་མ་ཧཱ་ཀྲོ་ཏི་ཤྭ་རི་བི་ད་མ་ཧཱུྃ་ཕཊ། ཡུམ་རད་ན་ཀྲོ་ཏི་ཤྭ་རི་མ་སེར་མོ། གཡས་རིན་ཆེན་གཡོན་བན་དྷའོ། །ཉི་མ་རིན་ཆེན་ཨཱོཾ་ཧྲི་ཤ་ཏ་བི་ད་མ་བ་མུ་ཀ་མ་ཧཱ་ཀྲོ་ཏི་ཤྭ་རི་ཁའི་ཧཱུྃ་ཕཊ། ཡུམ་པད་མ་ཀྲོ་ཏི་ཤྭ་རི་མ་དམར་མོ་གཡས་པད་མ་གཡོན་བན་དྷ་སྣམས་པའོ། །པད་མའི་སྟོང་པ། ཨཱོཾ་ཨ་མོ་ཀ་ཀྲོ་ཏི་ཤྭ་རི་བི་ཤྭ་ཧཱུྃ་ཕཊ། ཡུམ་ཀར་མ་ཀྲོ་ཏི་ཤྭ་རི་ལྗང་ཁུ་གཡས་རྒྱ་གྲམ་གཡོན་བན་དྷ་སྣམས་པའོ། ༈ །གནས་ཀྱི་མ་མོ་བརྒྱད་ཕྱིར་གདོན་པའི་སྔགས་ནི། ཨཱོཾ་བཛྲ་ཀོའུ་རི་ཧ། ཤར་གྱི་རྩིབས་མཆན་ལ་ཀོའུ་རི་མ་སྔོན་མོ་གཡས་བྱིས་པའི་དབྱུག་པ། གཡོན་བན་དྷ་དམར་གྱིས་སྐང་བའོ། །ཨཱོཾ་བཛྲ་ཙོའུ་རི་ཧ། ལྷོ་ནུབ་རྩིབས་མཆན་ལ་གཙོའུ་རི་མ་སེར་མོ་མདའ་གཞུའ་འགེངས་པའོ། །ཨཱོཾ་བཛྲ་པྲ་མོ་ཧ། ནུབ་བྱང་གི་རྩིབས་མཆན་ལ་པྲ་མོ་ཧ་དམར་མོ་ཆུ་སྲིན་རྒྱལ་མཚན་འཕྱར་རོ། །ཨཱོཾ་བཛྲ་པེ་ཏ་ལི་ཧ། བྱང་ཤར་གྱི་རྩིབས་མཆན་ལ། བེ་ཏ་ལི་ནག་མོ་གཡས་རྡོ་རྗེ་འཕྱར་བ། གཡོན་བྱིས་པའི་རོ་ཟ་བའོ། །ཨཱོཾ་བཛྲ་པུ་ཀ་སི་ཧ། ཤར་ལྷོའི་གྲུ་ཆད་ལ་པུ་ཀ་སི་དམར་སེར་བྱིས་པའི་རྒྱུ་མ་གཡས་ཀྱིས་འདྲེན་པའོ། །ཨཱོཾ་བཛྲ་ཀ་སྨ་ཧྲི་ཧ། ལྷོ་ནུབ་གྲུ་ཆད་ལ་ཀ་མ་ཧྲི་ལྗང་ཁུ་རྡོ་རྗེ་གཡས ། གཡོན་དུང་ཆེན་དམར་གྱིས་སྐང་ནས་གསོལ་བའོ། །ཨཱོཾ་བཛྲ་སྨ་ཤ་ནི་ཧ། ནུབ་བྱང་གྲུ་ཆད་ལ་སྨ་ཤ་ནི་མཐིང་ནག །བྱིས་པའི་སྙིང་ཕྱུང་ནས་ཟ་བའོ། །ཨཱོཾ་བཛྲ་ཙན་དྷ་ལི་ཧ། བྱང་ཤར་གྲུ་ཆད་ལ། ཙན་དྷ་ལི་སེར་སྐྱ་མཆོག་གི་མགོའ་ལུས་འབྲེལ་བའོ། ༈ །ཡུལ་གྱི་འཕྲ་མྱེན་མ་བརྒྱད་ཕྱིར་གདོན་པའི་སྔགས་ནི། བཛྲ་སིང་ང་མུ་ཀ་ཧེ། བར་ཁྱམས་དང་པོའི་ཤར་དུ། སིང་ང་མ་སེང་གེའི་མགོ་ཅན། དཀར་མོ་ཕྱག་གཉིས་གྱེན་དུ་སྣོལ་ཏེ་ཁ་ན་རོ་ཟ་བའོ། །བཛྲ་བྱ་གྲི་མུ་ཀ་ཧེ། ལྷོར་བྱང་ཀྲི་མ་སེར་མོ། སྟག་གི་མགོའ་ཅན། ཕྱག་གཉིས་ཐུར་དུ་སྣོལ་ཏེ་ཞིང་ལ་འབྲི་ཚུགས་ལྟའོ། །བཛྲ་ཀྲི་ལ་མུ་ཀ་ཧེ། ནུབ་ཏུ་ཀྲི་ལ་མུ་ཀ་ནག་མོ་ཝའི་མགོའ་ཅན། བྱིས་པའི་ཁོག་པ་ཁ་ཕྱེ་ནས་འདག་གོ། །བཛྲ་ཤྭ་ན་མུ་ཀ་ཧེ། བྱང་ཕྱོགས་སུ་ཤྭ་ན་མ། མཐིང་ཀ་སྤྱང་ཁུའི་མགོ་ཅན། ཞིང་གི་ཁོག་པ་དྲལ་གནས་ལྟའོ། །བཛྲ་ཀྲི་ཏ་མུ་ཀ་ཧེ། ཤར་ལྷོར་ཀྲི་ཏ་མ་དཀར་མོ་བྱ་རྒོད་ཀྱི་མགོ་ཅན་གཡས་གྲི་གཡོན་བན་དྷའོ། །བཛྲ་ཀང་ཀ་མུ་ཀ་ཧེ། ལྷོ་ནུབ་ཏུ་ཀང་ཀ་མ་སྐུ་མདོག་དམར་སྐྱ་ལ། ཞིང་འཕྲག་ལ་སྐལ་ནས་ཁུར་ནའོ། །དུར་བྱ་ཀང་ཀའི་མགོའ་ཅན་ནོ། །བཛྲ་ཁ་ཁ་མུ་ཀ་ཧེ། ནུབ་བྱང་དུ་ཁ་ཁ་མ། ནག་མོ་བྱ་རོག་མགོའ་ཅན། གཡས་གྲི་གཡོན་བན་དྷ་སྣམས་པའོ། །བཛྲ་ཧུ་ལུ་མུ་ཀ་ཧེ། བྱང་ཤར་དུ་ཧུ་ལུ་ཀ་འུག་པའི་མགོའ་ཅན་སྐུ་མདོག་སྣ་ཚོགས་མདོག་ཁྲ་མོ་གཡས་རྡོ་རྗེ་ལྕགས་ཀྱུ། གཡོན་བན་དྷ་དམར་གྱིས་སྐང་བའོ། ༈ །སྒོ་མ་བཞི་གདོན་པའི་སྔགས། བཛྲ་ཨརྱ་ཏེ་ཛ་ཏེ་ང་ཛ། ཤར་གྱི་སྒོ་ནང་དུ། རྟ་གདོང་མ་དཀར་མོ་ལྕགས་ཀྱུ་མ་འདྲེན་པའི་ཚུལ་ལོ། །བཛྲ་ཨ་མུ་ཀ་ཧཱུྃ། ལྷོར་ཕག་གདོང་མ་སེར་མོ། ཞགས་པ་ཐོགས་པའོ། །བཛྲ་ལོ་ཀ་བྃ། ནུབ་ཏུ་རྡོ་རྗེ་འཇིག་རྟེན་མ་དམར་མོ་དྲེད་ཀྱི་མགོའ་ཅན་ལྕགས་སྒྲོག་གི་དམིག་ཉི་མ་སྐང་བ་ཕྱག་ན་སྣམས་པའོ། །བཛྲ་པ་སྨི་པ་ལ་ཡ་བ་ཏོ་ཧོ། །བྱང་དུ་ཐལ་བྱེད་མ། ལྗང་ཁུ་དྲིལ་བུ་ཀྲོལ་བ་སྤྱང་ཁུའི་མགོའ་ཅན་མའོ། ༈ །དབང་མོ་ཉི་ཤུ་རྩ་བརྒྱད་བསྐྱེད་པའི་སྔགས་བསྟན། བྷྱོ་བྷྱོ་བྷྱོ་བྷྱོ་བྷྱོ་བྷྱོ་ཤར་གྱི། བྷྱོ་བྷྱོ་བྷྱོ་བྷྱོ་བྷྱོ་བྷྱོ་ལྷོའི ། བྷྱོ་བྷྱོ་བྷྱོ་བྷྱོ་བྷྱོ་བྷྱོ་ནུབ་ཀྱི། བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྱང་དུ། བྷྱོ་བྷྱོ་བྷྱོ་བྷྱོ་སྒོ་བཞིར་བསྐྱེད་དོ ། ༈ །དབང་མོ་ལས་ལས་གྲུབ་པ་ཡིན་པས། མཁའ་ནས་མི་བསྐྱེད་པར་རྩ་སྔགས་ཀྱིས་བྷྱོ་ཉི་ཤུ་རྩ་བརྒྱད་བརྗོད་པས་བྱོན་པར་བསམ་མོ། །དེ་ལ་གསུམ་མོ། །ཕྱི་སྲིན་མོའི་ཆ་ལུགས་སུ་གནས་པ་དང་། ནང་མགོའ་བརྙན་གྱི་ཆ་ལུགས་སུ་དང་། གསང་བ་ཁྲོ་མོའི་ཆ་ལུགས་སུ་བསྟན་པའོ། །ཕྱི་སྲིན་མོའི་ཆ་ལུགས་ནི། སྲིན་མོ་སྨུག་ནག་རྡོ་རྗེ་ཐོད་རློན་འཆང་། ཞེས་པ་ལ་སོགས་པ་སྟེ། ཧེ་རུ་ཀའི་གལ་པོ་ལས་བཤད་པའོ། །ནང་མགོའ་བརྙན་གྱི་ཆ་ལུགས་ནི། མི་སྲིན་དམར་སེར་ཏྲི་ཤུལ་ཞིང་ཆེན་གཡག་ཅེས་པ་ལ་སོགས་པའོ། །གསང་བ་ཁྲོ་མོའི་ཆ་ལུགས་སུ་བཤད་པ་ནི། ཞལ་གསུམ་ཕྱག་དྲུག་ཏུ་བཤད་པ་སྟེ། ལྷ་མོ་སྒྱུ་འཕྲུལ་ནས་བཤད་པའོ། །འདིར་ནི་བྱོན་ཚུལ་གང་ཡང་འདྲ་སྟེ། རུ་ཏྲ་འདུལ་བའི་དུས་སྲིན་མོར་གནས་པས། ཁྲོ་བོ་འཆོལ་པའི་དུས་སུ་སྲིན་པོར་བྱ། རྣལ་འབྱོར་པས་བ སྒྲུབས་ཏེ་ལས་ལ་མངགས་པའི་དུས་སུ་མགོའ་བརྙན་དུ་གནས་ཏེ། མགོའ་བརྙན་དུ་བྱ། གསང་བ་རང་སེམས་རྟོགས་པའི་དུས་ན། ཁྲོ་མོ་ཉི་ཤུ་རྩ་བརྒྱད་དུ་བྱའོ། ༈ །དཔེའ་བ སྟན། ས་ལ་སོགས་པ་ཕྱག་རྒྱར་བྱས། །རྣམ་གྲོལ་རིམ་པས་ཐོབ་པར་འགྱུར་ན། །ཕྱག་རྒྱ་བྱ་བའི་རྒྱུ་ནི། རབ་གསེར་དང་། དངུལ་དང་། ཟངས་དང་། ལྕགས་ལ་བྱའོ། །འབྲིང་ནི། དར་རམ། རས་སམ་ཟ་འོག་གམ། ཤིང་ལ་བྱའོ། །ཐ་མ་ནི། རྡོ་དང་། ས་དང་། རྭ་ལ་བྱའོ། །དེ་ལ་ལྡེ་ཚོའི་བྲིས་སམ་ཚ་ཚ་བྱས་ནས། རབ་ཏུ་གནས་པ་བྱས་ན། རྒྱུ་བཟང་ངན་དང་། བསམ་པ་དག་མ་དག་གི་དབང་གིས། རིམ་པས་རྣམ་པར་གྲོལ་བའི་འབྲས་བུ་ཐོབ་པར་འགྱུར་བ་ཡིན་ནོ། །དོན་བསྟན། དག་པའི་ཡེ་ཤེས་ཀྱིས་སྦྱངས་པའི། །སྨོས་ཅི་དགོས་ཏེ་དེ་ཉིད་ཡིན། །འདིར་ལྟ་བ་རྟོགས་ནས། དེ་བཞིན་ཉིད་ཀྱི་དུས་ན་རྣམ་པར་མི་རྟོག་པའི་ཡེ་ཤེས་ཀྱིས་སྦྱང་བ་དང་། ཀུན་ཏུ་སྣང་གི་དུས་ན་སྙིང་རྗེ་སྒྱུ་མའི་ཏིང་ངེས་སྦྱང་བ་དང་། རྒྱུའི་དུས་ན་ཡི་གེའི་འཕྲོ་དུ་སྦྱང་བ་དང་། ཕྱག་རྒྱ་གཅིག་པའི་དུས་ན་སྒོ་གསུམ་རྡོ་རྗེ་གསུམ་དུ་སྦྱང་བ་དང་། ཕྱག་རྒྱ་སྤྲོས་པའི་དུས་ན་རྟོག་ཚོགས་ཐམས་ཅད་ལྷའི་དལ་དུ་སྦྱང་བ་དང་། དེ་ལྟར་སྦྱངས་པའི་འབྲས་བུ་ཐོབ་པར་ལྟ་ཅི་སྨོས་ཏེ། ཏིང་ངེ་འཛིན་རང་རིག་པ་ཉིད་མངོན་སུམ་དུ་གསལ་བ་བྱུང་བ་ཉིད་འབྲས་བུ་ཡིན་པས་གཞན་དུ་རྩལ་མྱེད་དོ། ༈ །ཡུལ་གང་ནས་སྤྱན་དྲང་། ཕྱོགས་དུས་དཀྱིལ་འཁོར་བདག་ཉིད་ཆེ། །ཕྱོགས་བཅུ་དང་། དུས་བཞི་དང་། ཕྱི་ནང་ཆོས་ཐམས་ཅད་གནས་སུ་དག་པ་ནི། བདག་ཉིད་དང་གཉིས་སུ་མྱེད་པ་སྟེ། ཆོས་ཀྱི་དབྱིངས་དེ་དམིགས་པ་ལས་འདས་པ་ཡིན་ནོ། །ངོ་བོ་གང་སྤྱན་དྲངས་ན། མྱི་དམིགས་ཐུགས་ཀྱི་དཀྱིལ་འཁོར་ལས། །ཅིའི་ངོ་བོར་ཡང་མྱི་དམྱིགས་པའི་ཐུགས་རང་འབྱུང་གི་ཡེ་ཤེས་ནི་ཆོས་ཀྱི་དབྱིངས་ཀྱི་དཀྱིལ་འཁོར་རོ། །ཆོས་ཀྱི་དབྱིངས་སྤྲོས་པ་མྱེད་པའི་དཀྱིལ་འཁོར་དེ། བདེའ་བར་གཤེགས་པ་ཐམས་ཅད་བཞུགས་པའི་གནས་དང་། གཟིགས་པའི་གནས་ཡིན་པས། དེ་ནས་སྤྱན་དྲངས་པའོ། །གང་སྤྱན་དྲངས་ན། དཀྱིལ་འཁོར་ཐམས་ཅད་སྤྱན་དྲང་ངོ་། །དེ་ལྟར་རྟོགས་པའི་རིག་པའི་ཡེ་ཤེས་དང་ལྡན་པའི་ཕྱིར། ཕྱོགས་བཅུ་དུས་བཞིའི་བདག་ཆེན་པོ། དཔལ་ཁྲག་འཐུང་གི་དཀྱིལ་འཁོར་མ་ལུས་ཤིང་ལུས་པ་མྱེད་པ་ཐམས་ཅད་སྤྱན་དྲང་བར་བྱ་བ་ཡིན་ནོ། །གང་དུ་སྤྱན་དྲངས་ན། རང་སྣང་དབྱེར་མྱེད་དཀྱིལ་འཁོར་ལ། །སེམས་ཅན་གྱི་རིག་པ་རང་སྣང་བ་དང་། དེ་བཞིན་གཤེགས་པའི་ཐུགས་ཡང་དག་པའི་ཡེ་ཤེས་ནི་རིག་པ་རང་སྣང་བའི་ཏིང་ངེ་འཛིན་གྱིས། དཀྱིལ་འཁོར་སྣང་ལ་རང་བཞིན་མྱེད་པའི་གནས་འདིར་སྤྱན་དྲངས་བ་ཡིན་ནོ། །དུས་ཇི་ཙམ་ན། ཚུལ་ལམ། ཐབས་ཇི་ལྟར་སྤྱན་དྲངས། འཇུག་པའི་མཚན་ཉིད་མཉམ་སྦྱོར་བས། །ལྟ་བ་རྟོགས་པའི་དོན་ལ། རྣལ་འབྱོར་པའི་ཏིང་ངེ་འཛིན་རྐྱེན་འཇུག་པ་ལས། འབུ་ཏའི་མཚན་ཉིད་དང་། རྣལ་འབྱོར་པའི་མཚན་ཉིད་མཉམ་པར་སྦྱོར་བ་ནི། ཤེས་རབ་དང་ཏིང་ངེ་འཛིན་སྦྱར་ནས། བསྐལ་པའི་སྒྲིབ་པ་སྦྱོང་བ་དང་། ཚོགས་བ སོག་པའི་རྟེན་དུ། དུས་ད་ལྟ་ཁོ་ན་སྤྱན་འདྲེན་པའོ། །ཚུལ་ཇི་ལྟར་སྤྱན་དྲངས། ཕྱོགས་དུས་ཀུན་ནས་གཤེགས་པའི། །ཕྱི་པ་ལྟར་ལྷ་ཡེ་ཤེས་སེམས་དཔའ་དང་། བདག་དམ་ཚིག་སེམས་དཔའ་དང་། སྤུན་དང་གྲོགས་པོ་ལྟར་ལྟ་བ་མ་ཡིན་ཏེ། ཕྱོགས་བཅུ་དུས་བཞི་ནས་འགྲོ་དོན་དུ་གཤེགས་པ་རྣམས་རང་རིག་པ་རང་སྣང་བས་བདག་དང་ལྷ་གཉིས་སུ་མྱེད་པས་སྤྱན་དྲང་བར་བྱའོ། །སྤྱན་དྲངས་པས་བྱོན་པ་ནི། བསྙེན་པའི་དཀྱིལ་འཁོར་རབ་ཏུ་རྫོགས། །བདག་གི་རྒྱལ་བའི་དཀྱིལ་འཁོར་ལ། །ཚེ་སྔ་མར་བསྙེན་པ་རྫོགས་པར་ཕུལ་བ་དང་། ད་ལྟ་བདག་དང་། དཀྱིལ་འཁོར་གྱི་ལྷ་དང་། ཉེ་བར་གྱུར་པ་དང་། བསྙེན་པ་རབ་ཏུ་རྫོགས་པར་བྱ་བའི་ཕྱིར་ན། ཉེ་བར་གྱུར་པའི་དམ་ཚིག་མཆོག །ད་ལྟ་བདག་དང་ཉེ་བར་གྱུར་པ་ནི། བདེའ་བར་གཤེགས་པ་ཡང་འགྲོ་དོན་མཛད་པར་ཐུགས་དམ་དུ་ཞལ་གྱིས་བཞེས་པ་ལས་མི་འདའ་བའི་དམ་ཚིག་གི་དབང་གིས་བྱོན་པ་ཡིན་ནོ། །ཨཱོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། ༀ་ཡེ་ཤེས་ལྔ་སྟེ་རིགས་ལྔ་ཡབ་ཡུམ་གྱི་སྙིང་པོ། རུ་ལུ་གནས་ཀྱི་མ་བརྒྱད། རུ་ལུ་འོག་མ་ཡུལ་གྱི་འཕྲ་མེན་བརྒྱད། ཧཱུྃ་སྒོ་མ་བཞི། བྷྱོ་དབང་མོ་ཉི་ཤུ་རྩ་བརྒྱད། ཧཱུྃ་བསྡུ་བའོ། །དེ་བས་ན་དཔལ་ཆེན་པོ་འཁོར་དང་བཅས་པའི་སྙིང་པོའོ། །ཨེ་ཧ་ཧི་ཨ་ན་ཡ་བཛྲ། ཨེ་ཧ་ཧི་ནི་ཀྱེ་ཀྱེ་ཞེས་བོས་པའོ། །ཨ་ན་ཡ་ན་ཚུར་གཤེགས་ཞེས་སྤྱན་དྲང་ངོ་། །ཛཿཧཱུྃ་དེ་ཡང་མདུན་གྱི་ནམ་ཀ་ལ་སྤྲིན་ཕུང་བཞིན་དུ་མེ་རི་འདབ་འབྱོར་ཙམ་དུ་སྤྱན་དྲང་ངོ་བྃ་ཧོཿ ཛཿཧཱུྃ་བཾ་ཧོཿནི་བདག་གི་ཏིང་ངེ་འཛིན་གྱི་ལྷའི་ཐུགས་ཀ་ནས། ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་དྲིལ་བུས་སྤྱན་དྲང་ངོ་། །རཾ། དེ་ཡང་མདུན་གྱི་ནམ་མཁའ་ལ་སྤྲིན་ཕུང་བཞིན་དུ་མེ་རི་འདབ་འབྱོར་ཙམ་དུ་སྤྱན་དྲང་བའོ། །ཨཱོཾ་བཛྲ་ཀྲོ་ཏ་ས་མ་ཡ་ཧཱུྃ། ཨཱོཾ་བཛྲ་ཀྲོ་ཏ་ས་མ་ཡ་ཕཊ། བདག་དམ་ཚིག་པ་དང་ལྷ་ཡེ་ཤེས་པ་གཉིས་ཀ །སྐུ་དང་ཡེ་ཤེས་ཙམ་དུ་གསལ་ལ་རྟོག་པ་ནི། རིག་པའི་མེ་ཏོག་དོར་བའོ། །དེ་ཡང་བདག་ཡེ་ནས་སངས་རྒྱས་ཡིན་པ་ལ། མ་རིག་པས་སྒྲིབས་པས་མ་ཤེས་ཏེ། དེའི་དོན་ད་ལྟ་ཁོ་ན་རིག་པས། བདག་ལ་སྤྱན་འདྲེན་ནོ་མཉམ་པ་ཁོ་ན་ལ་རིག་པའི་མེ་ཏོག་དོར་བ་ཞེས་གདགས་སོ། །ཨཱོཾ་འཁྲོ་ལ་འཁྲོས་པས་ཞི་མཛད་པ། །རུ་ཏྲ་དྲེགས་པ་ཅན་ལས་དང་ཉོན་མོངས་པའི་དང་ཁྲོ་བོ་དེ་ལ། དཔལ་ཆེན་པོས་ཁྲོ་བོའི་སྐུར་བསྟན་ནས། ཁོའི་ཞེ་སྡང་གི་དབང་གིས་ཁྲོ་བོ་དེ་སྟུལ་ནས། རུ་ཏྲ་དེའི་གཟུང་འཛིན་གྱིས་སྤྲོས་པ་ཞི་བར་མཛད་པའོ། །ཐུགས་ཡང་ན་ཁོའི་མགོན་དུ་གྱུར་པས་ན་རྗེ་འཁྲོས་སྒྲལ་བྱ་དེ་དག་བླ་ན་མྱེད་པའི་ས་ལ་བཀོད་པས་དཔལ་དང་གྲགས་པ་དང་ཕུན་སུམ་འཚོགས་པའོ། །དཔལ་རྔམ་པའི་ཚོགས། །དེ་ལྟར་ཁྲོ་བོའི་སྐུར་སྟོན་པ་དེ་ཡང་ཞེ་སྡང་གི་དབང་གིས་འཁྲོས་པ་ལྟ་བུ་མ་ཡིན་ཏེ། སེམས་ཅན་ཞེ་སྡང་གི་དབང་དུ་གྱུར་པ་ལ་ཐབས་གཞན་གྱིས་ཐུལ་བར་མ་གྱུར་པ་དེ་ལྟ་བུ་ལ་ཐུགས་རྗེའི་དབང་གིས་ཁྲོ་བོའི་སྐུར་བསྟན་པ་ཡིན་ནོ། །བྱིན་བརླབ་ཀྱི་ངོ་བོ་བསྟན། འབར་བའི་བྱིན་བརླབས་རྨད་པོ་ཆེ། །རྟོགས་པ་དང་ཐུགས་རྗེའི་རྟགས་སུ་མེ་འབར་བའི་ཀློང་ན་བཞུགས་པ། དེ་ལྟ་བུ་ཕྱིན་ཅི་ལོག་གི་འཇིག་རྟེན་གསུམ་ན་མྱེད་པས་རྨད་པོ་ཆེའོ། །བྱིན་རླབས་ཞུ་ལུགས། དེ་ཉིད་དུ་ནི་བདག་ལ་གསོལ། །སྐུ་གསུང་ཐུགས་ཤིན་ཏུ་རྔམ་པའི་ང་རོ་དང་བཅས་པའི་དཔལ་ཆེན་པོའི་འཁོར་གྱི་ཚོགས་དང་བཅས་པས་སྐུ་གསུང་ཐུགས་བསམ་གྱིས་མི་ཁྱབ་པ་དང་ལྡན་པའི་བྱིན་རླབས་རྨད་དུ་བྱུང་བ་དེ་དུས་ད་ལྟ་ཉིད་དུ་བདག་གི་ཏིང་ངེ་འཛིན་གྱི་དལ་ལ་གསོལ་ཅིག་པའོ། །སྒྲུབ་པ་པོ་ལ་དུས་ཕྱིས་མ་ལགས་ཏེ་དུས་ད་ལྟ་ཉིད་དུ་སྐུ་གསུང་ཐུགས་ཀྱི་དངོས་གྲུབ་བདག་ལ་གསོལ་ཞེས་ལྷ་རྣམས་ལ་བསྐུལ་ལོ། །དམ་ཚིག་སྐུལ་བས་དགྱེས་པ། ཨཱོཾ་བཛྲ་ཀྲོ་ཏ་ས་མ་ཡ་སྟོམ། །ཡེ་ཤེས་ཁྲོ་བོས་དམ་ཚིག་གསལ་བའི་དུས་ལ་བབ། ཨཱོཾ་བཛྲ་ཀྲོ་ཏ་ས་མ་ཡ་ཕཊ། ཡེ་ཤེས་ཁྲོ་བོའི་དམ་ཚིག་གིས་བགེགས་རླག་པར་མཛོད་ཅིག །ཨཱོཾ་བཛྲ་ཀྲོ་ཏ་ས་མ་ཡ་ཧཱུྃ། ཡེ་ཤེས་ཁྲོ་བོའི་དམ་ཚིག་གིས་བགེགས་བརླག་པར་མཛོད་ཅིག ༈ །ཨ་ལི་བཟའ་བ་དང་བཅའ་བ་ཨུ་ལི་བཏུང་བ་ཏ་ལི་སྤྱན་གཟིགས་ཏ་པ་ཏི་མུར་བ་དང་ཤཾ་མཆེའ་བ་ཅན། བཟའ་བ་དང་། བཅའ་བ་དང་། བཏུང་བ་དང་། མུར་བའི་རྣམ་པ་ཉིད་འདོད་ཡོན་གྱི་ལྷ་མོར་བྱིན་གྱིས་བརླབས་ཏེ། ཞལ་འབར་བའི་ཚོགས་དང་ཡོན་ཏན་དྲག་མོ་རྣམས་གསོལ་ཅིག་ཞེས་འབུལ་བའི་རིམ་པའོ། །འགཱོ་ཡུམ་ན་ཡོན་ཏན་རོའུ་དབང་མོ་ཏྲི་དྲག་མོ། ཁ་རཾ་གསོལ་ཡོ་གི་རྣལ་འབྱོར་མ་ནི་ཁ་ཧི་གསོལ་ཧོ་དགྱེས། ཧཱུྃ་རིགས་ལྔའི་ཧ་མ་མོའི་ཧེ་འཕྲ་མྱེན་ཕཊ་སྒོ་མ་བྷྱོ་དབང་མོ་རཾ། སྨུག་ནག་འབུ་ཏ་ཧེ་རུ་ཀ་སྨུག་ནག་སྟེ་ཞི་བའི་འཕྲིན་ལས་རྫོགས་ཤིང་མཐར་ཕྱིན་པར་མཛད་པའོ། །སྔོ་ནག་བཛྲ་ཧེ་རུ་ཀ་མཐིང་ནག་དེ་ཆོས་ཀྱི་དབྱིངས་མི་འགྱུར་བས་ནག་གོ། །སེར་ནག་རད་ན་ཧེ་རུ་ཀ་སེར་ནག་སྟེ་རྒྱས་པའི་ལས་མཛད་དང་། དམར་ནག་པད་མ་ཧེ་རུ་ཀ་དམར་ནག་སྟེ། དབང་གི་ལས་མཛད་དོ། །ལྗང་ནག་ཀར་མ་ཧེ་རུ་ཀ་ལྗང་ནག་སྟེ། དྲག་པོའི་ལས་མཛད་པའོ། །དབུའ་དབུས་མ་སྐུ་དང་མཐུན་ནོ། །གཡས་གཡོན་གཉིས་ནི་གནས་འཕྲོག་རྩི་སྟེ། འབུ་ཏ་ཞལ་གཡས་སྐར་མའི། གཡོན་རད་ནའི་འཕྲོག །དེས་ཀུན་འདྲ་བ་ཡིན་ནོ། །འཇིགས་པའི་སྐུ། ༈ །སྤྱིར་སྐུ་མདོག་ལ་གསུམ་སྟེ། རང་བཞིན་གྱི་སྐུ་མདོག་དང་། འཕྲིན་ལས་དང་། རིགས་སོ། །དེ་ལ་རང་བཞིན་ནི། སྣུམ་པ་དང་། འདྲིལ་བའོ། །རིགས་ཀྱི་མདོག་ནི། སྨུག་པ་དང་། སྔོ་བ། སེར་བ། དམར་བ། ལྗང་ཁུའོ། །འཕྲིན་ལས་ནི། ལས་ཐམས་ཅད་ཞི་དྲག་བཞི་པོར་བྱེད་པས་ན་ནག་ཅེས་འབྱུང་ངོ་། །དབུའ་གསུམ་ཕྱག་དྲུག་ཞབས་བཞིར་བསྒྲད། །གཡས་ཐམས་ཅད་ཆོས་སྐུ་མཚོན། གཡོན་ཐམས་ཅད་སྤྲུལ་སྐུ་མཚོན། དབུས་ཐམས་ཅད་ལོངས་སྐུ་མཚོན་ཏེ། གནས་འཕྲོག་རྩིས་པའོ། །ཚད་མྱེད་བཞིའམ་རྫུ་འཕྲུལ་གྱི་རྐང་པ་བཞིའོ། །ཡེ་ཤེས་དྲུག་གམ་ཕ་རོལ་ཏུ་ཕྱིན་པ་དྲུག་མཚོན་ནོ། །ཀོ་རློན་གོས་ནི་སྣ་ཚོགས་གྱོན། །དཀོན་པའི་གོས་གསུམ་ནི། ཁྱད་པར་ཐུགས་རྗེའི་གོས། གླང་པོ་ཆེའི་ཀོ་རློན་དང་། ཕྱི་ནང་གསང་བ་གསུམ་དུ་སྡུད་པའི་གོས། ཞིང་གི་གཡང་གཞིའ་དང་། མཛད་པ་འཕྲིན་ལས་ཀྱི་གོས་སྟག་གི་ཤམ་ཐབས་སོ། །གདབ་པའི་ཚོམ་བུ་གསུམ་ནི། དོན་དམ་བཅུད་ཀྱི་ཐིག་ལེ། ཞལ་འགྲམ་དུ་ཞག་གི་ཟོ་རིས་དང་། འདུལ་བྱེད་དཔྲལ་བར་ཐལ་ཆེན་ཐིག་ལེ་དང་། དམ་སྲི་བྲན་དུ་འཁོལ་བ་སྣ་རྩེ་ལ་རག་ཏའི་ཐིག་ལེའོ། །རྔམ་པའི་སྒྲ་ཆེན་འཇིགས་པར་སྒྲོགས། །གསུང་ཤིན་ཏུ་རྔམ་པའི་འབྱུང་པོ་ཐམས་ཅད་ཞེ་གཅོད་པའོ། །དེ་ཡང་ཨ་ཨ་ད་ཧ་ལ་དང་། ཕཊ་ཕཊ་དང་བྷྱོ་བྷྱོ་ཞེས་རྔམ་པའི་སྒྲ་སྐད་འཇིགས་པ་སྒྲོག་པའོ། །སྦྲུལ་དང་ཐོད་འཕྲེང་ཉི་ཟླ་བཅས། །གདགས་པའི་རྒྱན་གསུམ་ནི། དུག་ལྔ་མ་སྤངས་གནས་སུ་དག་པས། སྦྲུལ་རིགས་བཞིས་དབུའ་དང་། དཔུང་པ་དང་། ཕྱག་དང་། ཞབས་དང་། སྐུ་རགས་བྱས་པའོ། །སྐུ་གསུམ་མཚོན་པའི་རྟགས་སུ། ཐོད་རློན་གྱི་འཕྲེང་བ་དང་། ཐོད་སྐམ་གྱི་དབུའ་རྒྱན་དང་། ཐོད་པ་ར་རིས་སེ་རལ་ཁར་སྦྱོར། ཐབས་ཤེས་རབ་མཚོན་པའི་རྟགས་སུ། དབུའ་ལ་ཉི་མའི་དལ་འབུལ་འབྱེད་པའོ། །འབུ་ཏ་ཧེ་རུ་ཀའི། སྟོང་གི་འཇིག་རྟེན་འཁོར་ཡུག་བཅས། །བཛྲ་ཧེ་རུ་ཀའི། རྡོ་རྗེ་དུང་ཆེན་གཡོན་ཐམས་ཅད་དང་ཡུམ་གྱི་གང་བ་དང་། །ཀར་མ་ཧེ་རུ་ཀའི། རལ་གྲི་དགྲ་སྟྭ་པད་མའི་བཤོལ་རཏྣའི་ལ་སོགས། །རིགས་ལྔ་དང་གནས་ཡུལ་གྱི་མ་མོ། རང་གི་ལག་ཆ་སྣ་ཚོགས་སྣམས། །ཡུམ་རྣམས་སྐུ་མདོག་སོ་སོའི་གཙོའ་དང་མཐུན། བཙུན་མོ་གཡས་ཡབ་ལ་འཁྱུད་གཡོན་བན་དྷ་སྟོབ་པའོ། །འཇིགས་པའི་ཚོགས་དང་འཁྲིལ། ༈ སྤྱིར་ཁྲོ་བོ་གདུལ་བྱ་དང་མཐུན་པར་དོན་མཛད་པས། ཕྱག་མཚན་ཡང་མ་ངེས་པར་སྣམས་པ་སྟེ། གང་ཟག་ལམ་པ་རྣམས་སྒོམ་བདེའ་བའི་ཕྱིར་ན། རྩ་རྒྱུད་དུ་གནས་འཕྲོག་རྩི་བ་དང་། བཤད་རྒྱུད་ཀྱིས་ཁ་སྐང་བ་གཉིས་སོ། །རྩ་རྒྱུད་དུ་གནས་འཕྲོག་རྩི་ན། རང་རྟགས་ཀྱི་ཕྱག་མཚན་དང་པོར་སྟོན་ཏེ། གཞན་གནས་འཕྲོག་གོ། །བཤད་རྒྱུད་ཀྱི་ཁ་སྐང་ན། སྒྱུ་འཕྲུལ་རྡོ་རྗེ་དང་། བླ་མ་དང་། ལྷ་མོ་སྒྱུ་འཕྲུལ་ནས་རྒྱས་པར་བཤད་དོ། །དེ་ལ་དགོངས་པའི་དབང་དུ་བྱས་ན། ཆོས་ཉིད་རང་རྟགས་ཀྱི་ཕྱག་མཚན་དོན་སྐྱེ་མྱེད་སྟོན་པར་དགོངས་པ་དང་། རྒྱལ་དཔའ་རྟགས་ཀྱི་ཕྱག་མཚན་རུ་ཏྲ་གདུག་པ་ཆོམ་པར་དགོངས་པ་དང་། འདུལ་ཐབས་མཚན་མའི་ཕྱག་མཚན་གང་ལ་གང་མོས་སུ་སྣམས་པའོ། །དེ་ལས་འདིར་རྩ་རྒྱུད་ནས་བསྟུས་པས་གནས་འཕྲོག་རྩིའོ། །དེ་ལ་སྟོང་གི་འཇིག་རྟེན་འབུ་ཏའོ། །རྡོ་རྗེ་བཛྲ་རོ། །དུང་ཆེན་ཡབ་ཀྱི་གཡས་དང་ཡུམ་གྱིའོ། །རལ་གྲི་ཀར་མའོ། །དགྲ་སྟྭ་པད་མའོ། །བཤོལ་རད་ནའོ། །སོགས་ཞེས་ནི། གནས་ཡུལ་གྱི་ཆ་བསྙེན་ནོ། །གནས་ཡུལ་གྱི་མ་མོ་བཅུ་དྲུག་བསྟན། གནས་དང་ཡུལ་གྱི་ཕྱག་རྒྱ་དང་། གནས་ནི་རྣམ་པར་ཤེས་པའི་ཚོགས་བརྒྱད་དེ། དེའི་རང་བཞིན་ཡེ་ནས་ཁྲོ་མོ་བརྒྱད་ཡིན་ལ། དེ་ལྟར་རྟོགས་པ་བསྒོམ་པའི་དུས་ན་ཡང་ཁྲོ་མོ་བརྒྱད་དུ་སྣང་བའོ། །ཡུལ་གྱི་ཕྲ་མྱེན་བརྒྱད་ནི། ལྟ་བར་བྱ་བའི་ཡུལ་གཟུགས་སྒྲ་ལ་སོགས་པ་བརྒྱད་དོ། །དེའི་རང་བཞིན་འཕྲ་མྱེན་མ་བརྒྱད་དེ། ཡེ་ནས་གནས་པ་མངོན་དུ་བྱས་པ་དང་། སྒོམ་པའི་དུས་ན་ཡང་དེ་ལྟར་དུ་སྣང་ངོ་། །སྒོ་མ་བཞི་བསྟན། སྒོ་བཞིའི་ཕྱག་རྒྱ་རབ་མཛེས་ཤིང་། །ཡན་ལག་བཞི་ནི། སྒོ་མ་བཞིའི་རང་བཞིན་ཏེ། ལུས་ཀྱི་དབང་པོ་གཞིའ་ལ་གནས་པ་དང་། དེའི་རང་བཞིན་སྒོ་མ་བཞི་ཡིན་པ་དང་། ཡེ་ནས་གནས་པ་དེ་མངོན་དུ་བྱས་ཏེ། སྒོམ་པ་དེ་ལྟར་སྣང་ངོ་། །དབང་མོ་ཉི་ཤུ་རྩ་བརྒྱད་བསྟན། སླས་དང་བྱི་མོ་བྲན་མོའི་ཚོགས། །དཔལ་ཆེན་པོས་རུ་ཏྲ་སྒྲལ་བའི་དུས་ན་སྲིན་མོ་རྣམས་དང་རོལ་པ་མཛད་པས་བྱི་མོའོ། །སླས་ནི་ཆུང་མར་བྱས་ནས་བར་ཁྱམས་ལ་བཀོད་པའོ། །བྲན་མོ་ནི་བྲན་དུ་ཁས་བླངས་ནས་ལྷག་མ་བྱིན་པར་བྱས་པའོ། །ཚོགས་ནི་གང་ཞེ་ན། བཅུ་གཉིས་དང་ནི་བརྒྱད་ཀྱིས་མཛེས། །བཅུ་གཉིས་ལ་ཉི་ཤུ་རྩ་བརྒྱད་དེ། དབང་ཕྱུག་མ་ཉི་ཤུ་རྩ་བརྒྱད་ནི་བར་ཁྱམས་ཕྱི་མ་ལ་རང་རང་གི་གནས་ན་མཛེས་པར་གནས་ཤིང་འཁོད་དོ། །རང་གི་གཏན་དང་ལག་ཆ་དང་། །དེ་རྣམས་ནི་གདན་ཞིང་རྐྱང་རེ་རེ་དང་བཅས་ནས། འཕྲིན་ལས་ཀྱི་ལས་མཛད་པའི་ཕྱག་རྒྱ་དང་། ཕྱག་མཚན་དུ་བཅས་ནས་བྱོན་ཏེ། དབང་མོའི་འཕྲིན་ལས་བསྟན། ཅི་བགྱིའ་ཞེས་ནི་ཆས་ཏེ་གནས། །འཕྲིན་ལས་ཇི་ལྟར་འདོད་པ་བདག་ཅག་གིས་བགྱི་ཟེར་ནས་བར་ཁྱམས་ཕྱི་མ་ལ་རང་རང་གི་གདན་སྟིང་བའི་སྟེང་དུ་རང་རང་གི་ལག་ཆ་དང་བཅས་ནས་བཞུགས་པའི་ཕྱིར་ན་གནས་ཞེས་བྱའོ། །དེ་ལྟར་དཀྱིལ་འཁོར་གསལ་བཀོད་ནས། །གོང་དུ་བསྟན་པ་དེ་ལྟར་ལྷའི་དཀྱིལ་འཁོར་རྣམས་གསལ་བར་བཀོད་ནས། སྐུ་མདོག་དང་ཕྱག་མཚན་དང་ཆ་ལུགས་གསལ་བར་སྒོམ་མོ། །མཐའ་དབུས་མེད་པར་ཁྱབ་པའི། །ཆོས་ཀྱི་དབྱིངས་ནི་ནམ་མཁས་གར་ཁྱབ་པར་ཁྱབ་ལ། ནམ་མཁའ་ནི། མཐའ་དབུས་མྱེད་པ་ཆོས་ཀྱི་དབྱིངས་སོ། །འཇིག་རྟེན་དྲུག་གི་ཕྱོགས་བཅུ་ན། །འཇིག་རྟེན་དྲུག་ནི་རིགས་དྲུག་གི་འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ་དཀྱིལ་འཁོར་གསལ་བར་སྣང་བ་ནི། དཀྱིལ་འཁོར་བསྟན་པའོ། །འབར་བའི་དཀྱིལ་འཁོར་གསལ་བར་སྣང་། །དོན་དབྱིངས་དང་ཡེ་ཤེས་གཉིས་སུ་མྱེད་པའི་རྟགས། ཁྲོ་བོའི་དཀྱིལ་འཁོར་གསལ་བར་སྣང་བའོ། །འདི་སྣང་བ་རྣམ་འབྱེད་ཀྱི་ཏིང་ངེ་འཛིན་ཞེས་བྱའོ། ༈ །ཐབས་ཤེས་རབ་གཉིས་སུ་མྱེད་པའི་རྒྱུད་ལས། དཀྱིལ་འཁོར་དཀྱིལ་འཁོར་ཞེས་བྱ་བ། །བྱང་ཆུབ་སེམས་ལས་མ་ཡེངས་ན། །དཀྱིལ་འཁོར་སྙིང་པོ་ལྷུན་གྲུབ་པས། །ཐམས་ཅད་དུས་གཅིག་བསྒོམ་པར་འགྱུར། །ཞེས་སོ། །སྐུ་ལྔ་ལ་བསྟོད་པའོ། །ཧཱུྃ་གཏུམ་ཆེན་དུས་མཐའི་མེ་ལྟར་འབར། །ཧཱུྃ་ནི་སྐུ་ལྔ་ལྷུན་གྱིས་གྲུབ་པའི་ཕྱིར་འགོའ་འདྲེན་པའོ། །སྟུམ་པ་ནི་གཟིའ་བརྗིད་ཆེན་པོ་སྐུ་སྟུམ་པ་དང་། འཇིགས་བྱེད་ཆེན་པོའི་གསུང་སྟུམ་པ་དང་། སྟོང་པ་ཆེན་པོའི་ཐུགས་སྟུམ་པ་དང་། སྒྲོལ་བྱེད་ཆེན་པོའི་ཕྱག་སྟུམ་པ་དང་། ཟ་བྱེད་ཆེན་པོའི་མཆེའ་བ་སྟུམ་པ་སྟེ། དེ་ཡང་དུས་མཐའི་བསྐལ་པ་འཇིག་པའི་དུས་ཀྱི་མེ་ལྟ་བུར་འབར་བའི་ཀློང་ན་བཞུགས་པའོ། །འོད་ཟེར་ཉི་མ་འབུམ་གྱི་གཟིའི། །ཐབས་མཁས་པའི་འོད་ཟེར། བ་སྤུའི་བུ་ག་རེ་རེ་ནས་དུ་མ་འབྱུང་བའོ། །གདུག་པ་སེལ་བའི་འོད་ཟེར། གསལ་བས་སེམས་ཅན་གྱི་གཏིའ་མུག་གི་མུན་པ་སེལ་བའོ། །ཐུགས་རྗེ་ཆེན་པོའི་འོད་ཟེར། ཐམས་ཅད་དུ་ཁྱབ་པར་མཛད་པའོ། །དེ་ནི་དཔེར་ན་ཉི་མ་འབུམ་དུས་གཅིག་ལ་ནམ་མཁའ་ལ་ཤར་བ་ལྟ་བུའོ། །ཁྲོ་གཉེར་གློག་སྟོང་འགྱུ་བ་བཞིན། །དབང་དུ་བསྡུས་པའི་ཁྲོ་གཉེར་ནི། བསྡུས་པ་དང་། ཐབས་ལ་མཁས་པའི་ཁྲོ་གཉེར་ནི། གཡོའ་བ་དང་ཟིལ་གྱིས་གནོན་པའི་ཁྲོ་གཉེར་ནི་འདྲེང་བའོ། །དེ་དག་ཀྱང་དཔེར་ན་གློག་སྟོང་དུས་གཅིག་ལ་ནམ་མཁའ་ལ་འབྱུང་བ་བཞིན་ནོ། །མཆེའ་བ་ཟང་ཡག་ཟ་བྱེད་ཆེ་ཧོ། །གདུག་པ་འདུལ་བའི་མཆེའ་བ་ནི་དཀར་ལ་རྩ་དམར་བའི་མདངས་ཆགས་པ་དང་། ཟ་བྱེད་ཆེན་པོའི་མཆེའ་བ་ནི་རྩིགས་པ། སྐྱེ་ཤི་རྩད་ནས་གཅོད་པའི་མཆེའ་བ་ནི་རྣོ་ལ་དཀར་བའོ། །གསུང་ལ་བསྟོད་པ་བསྟན། ཧཱུྃ་རྔམ་པའི་ང་རོ་འབྲུག་སྟོང་འདིར། །ཧཱུྃ་ལ་གསུང་ལྔ་ལྷུན་གྱིས་གྲུབ་པའི་ཕྱིར། ཧཱུྃ་གིས་མགོའ་དྲངས་པའོ། །དཔལ་ཁྲག་འཐུང་གི་གསུང་རྔམ་པའི་ང་རོ་ནི། དཔེར་ན་ནམ་མཁའ་ལ་འབྲུག་སྟོང་དུས་གཅིག་ལ་འདིར་བ་ལྟ་བུའོ། །དེ་ཡང་ཞལ་གསུམ་ནས། གཡས་ཆོས་སྐུ་སྐྱེ་མྱེད་དོན་གྱི་གསུང་གིས་སེམས་ཅན་བདེའ་བ་ལ་འགོད་པ་དང་། གཡོན་ལོངས་སྐུ་གསུང་བྲག་ཆ་ལྟ་བུར་ཟིལ་གྱིས་མནོན་པ་དང་། དབུས་སྤྲུལ་སྐུའི་གསུང་གང་ལ་གང་འདུལ་དུ་མཛད་པའི་ཚུལ་ཡིན་ནོ། །བསྟུག་ཆོམ་རི་རབ་འབུམ་སྙིལ་སྐད། །ལྷ་གཤེགས་པའི་སྟུག་ཆེམ་ནི། ལྡིར་བ་དང་། སྤྲུལ་པ་འགྱེད་པའི་སྟུག་ཆེམ་ནི་རིང་བ་དང་། འཕྲིན་ལས་མཛད་པའི་སྟུག་ཆེམ་ནི་དྲག་པའོ། །དེ་དག་ནི་དཔེར་ན་རི་རབ་འབུམ་དུས་གཅིག་ལ་ཉིལ་བའི་སྒྲ་སྐད་དང་འདྲ་བའོ། །ཨ་ཨ་ཧ་ལའི་གད་རྒྱངས་ཆེ། །རྔམ་པའི་གད་མོ་ཨ་ལ་ལའོ། །སྟུམ་པའི་གད་མོ་ཧ་ལའོ། །དགྱེས་པའི་གད་མོ་ཧ་ཧ་ཞེས་གད་རྒྱངས་ཆེན་པོ་སྒྲོག་པའོ། །དབྱུགས་པའི་མཐོར་རླུང་གཡེང་བ་ཆེ་ཧོ། འཁོར་སྡུད་པའི་བཤུགས་པ་ནི་སྙན་པ་དང་། གདུག་པ་འདུལ་བའི་བཤུགས་པ་ནི་དྲག་པ་དང་། བྱིན་འབེབས་པའི་བཤུཊ་པ་མཚེར་ལ་རིང་བ་སྟེ། བཤུགས་པ་དེ་དག་ལ་རླུང་ནག་བྱུང་བས། འཇིག་རྟེན་གྱི་ཁམས་རྣམས་ཀུན་ཏུ་གཡེང་བར་བྱེད་པའོ། །ཐུགས་བསྟོད་པ་ནི། ཧཱུྃ་ཁྲོ་བོའི་ཤེས་རབ་འོད་པོ་ཆེ། །མཉམ་པ་ཉིད་ཀྱི་ཤེས་རབ་ཀྱིས་དོན་རྟོགས་པ། ཐབས་ལ་མཁས་པའི་ཤེས་རབ་ཀྱིས་སྤྲུལ་པ་སྣ་ཚོགས་སུ་འགྱེད་པ་དང་། རིགས་སུ་འབྱེད་པའི་ཤེས་རབ་ཀྱིས་ཚད་མ་བཀའ་གཞུང་གསུངས་པ་དང་། དེས་ན་ཤེས་རབ་ཆེན་པོ་སྟོང་པ་ཉིད་ཀྱི་ཁྲོ་བོ་སྟེ། ལྟ་ངན་འཇོམས་པའོ། །དེ་ལ་ཅིས་ཀྱང་མ་སྒྲིབས་པས་ན་འོད་ཆེན་པོའོ། །ཡེ་ཤེས་དཀྱིལ་འཁོར་ཀུན་ཏུ་རྫོགས། །གཞིའ་ཡེ་ཤེས་རྣམ་ཤེས་ཚོགས་བརྒྱད་དང་། ལམ་གྱི་ཡེ་ཤེས་ཡེ་ཤེས་རྣམ་པ་ལྔ་དང་། འབྲས་བུའི་ཡེ་ཤེས་ཆོས་ཀྱི་སྐུའོ། །དེ་དག་ནི་ཡེ་ཤེས་ཆེན་པོའི་ཁྲོ་བོ་སྟེ། མ་སྒྲིབས་པར་འོད་གསལ་བའོ། །དེ་ཡང་ཡེ་ཤེས་ལྔ་ལྷུན་གྱིས་གྲུབ་པ་ཉིད་ཕྱི་ནང་མྱེད་པར་གསལ་བ་ཡིན་ནོ། །འབར་བའི་ཡེ་ཤེས་ཀུན་ཏུ་འཇོམས། །ཁྲོ་བོའི་ཡེ་ཤེས་ནི་སྲེག་པའི་མེ་ལྟར་འབར་བ་སྟེ་ཡེ་ཤེས་མེས་ལས་དང་ཉོན་མོངས་པ་ཀུན་འཇོམས། ཅིར་སྣང་ཐུགས་ཡེ་ཤེས་སུ་འབར་རོ། །ཡེ་ཤེས་དག་གིས་བགེགས་ཐམས་ཅད་བུད་ཤིང་དང་འདྲ་བར་འཇོམས་པའོ། །སྣ་ཚོགས་ཡེ་ཤེས་ཐིག་ལེ་ཆེ་ཧོ། །སྣ་ཚོགས་སུ་སྣང་ཡང་ཆོས་ཀྱི་དབྱིངས་ལས་མ་གཡོས་པས་ན་ཡེ་ཤེས་སོ། །དེ་ལ་དབྱེར་མྱེད་པས་ན་ཐིག་ལེའོ། །དེ་ཡང་སྣ་ཚོགས་སུ་སྣང་བ་ཉིད་རང་འབྱུང་གི་ཡེ་ཤེས་སྤྲོས་པ་དང་བྲལ་བ་ཉིད་རང་སྣང་བའི་ཐུགས་རྗེ་སྟེ། དེ་ལ་དགྱེས་པའོ། །ཡོན་ཏན་ལ་བསྟོད་པ། ཧཱུྃ་ཁྲོ་བོའི་རྒྱལ་པོ་སྤྲིན་ཆེན་པོ། །ཡེ་ཤེས་ཆེན་པོའི་སྐུ་རྔམ་པའི་ཕྱིར། ཁྲོ་བོ་གཞན་ལ་དབང་སྒྱུར་བ་སྟེ། བདུད་དང་མུ་སྟེགས་ལ་སོགས་པ་ཁྲོ་བོ་དེ་ལས་རྒྱལ་བའོ། །དེ་དག་གི་ཡོན་ཏན་འབྱུང་བའི་ཕྱིར་སྤྲིན་ཆེན་པོའོ། །དེ་ཡང་སྤྲིན་ཆེན་པོ་ལས་ཆར་འབབ་པ་ལྟར། འཁྲོས་པའི་དཀྱིལ་འཁོར་ཆར་ཆེན་འབེབས། །དེ་དག་ཡང་ཐུགས་རྗེའི་དབང་གིས་འཁྲོས་པའི་དུས་ན། ཁྲོ་བོའི་ཚོགས་ནམ་མཁའ་གང་བར་ཆར་དུ་འབེབས་པར་བྱེད་དོ། །ཇི་ལྟར་ན། འཁྲོས་པའི་སྤྲུལ་པ་ནི་ཁྲོ་བོ་སྟེ། དེ་ནི་སྤྲུལ་པའི་དཀྱིལ་འཁོར་ཏེ། ཆར་ཆེན་པོ་ལྟ་བུ་འབེབས་པར་བྱེད་དོ། །དཀྱིལ་འཁོར་ཡིད་བཞིན་འབྱུང་བའི་གཏེར། །ཁྲོ་བོའི་དཀྱིལ་འཁོར་སྤྲུལ་པ་དང་བཅས་པའོ། །ཇི་ལྟར་འདོད་པ་བཞིན་འབྱུང་བ་སྟེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེའི་གཏེར་དང་འདྲ་སྟེ། སྤྲིན་ལྟ་བུར་སྣང་བའོ། །སྣ་ཚོགས་འཁྲོས་པའི་ཐིག་ལེ་ཆེ་ཧོ། །ཡོན་ཏན་སྣ་ཚོགས་མངའ་བའི་ཁྲོ་བོ་ཐམས་ཅད་ཀྱང་། དོན་སྤྲོས་པ་དང་བྲལ་བའི་ཡེ་ཤེས་སུ་གཅིག་གོ། །དཀྱིལ་འཁོར་མང་པོ་དེར་གཅིག་པས་ན་ཐིག་ལེའོ། །དེ་ལྟ་བུའི་དོན་ཡང་དག་པ་དེ་ལ་རབ་ཏུ་དགྱེས་པས་ན་ཧོ་ཞེས་སོ། །འཕྲིན་ལས་ལ་བསྟོད་པ། ཧཱུྃ་བདུད་ཀུན་གྱི་ནི་བདུད་ཆེན་པོ། །བདུད་ནི་རུ་ཏྲ་སྟེ། དེའི་ཡང་བདུད་དུ་གྱུར་པ་ནི། དཔལ་ཆེན་པོའོ། །ཇི་ལྟར་ན། རུ་ཏྲས་སེམས་ཅན་ཐམས་ཅད་གསད་པས་ན་སེམས་ཅན་གྱི་བདུད་དོ། །དེ་དཔལ་ཆེན་པོས་བཏུལ་ཏེ་ལུས་གདན་དུ་བྱས་པས་ན་བདུད་ཆེན་པོའོ། །བདུད་ཀྱི་བདུད་ཏེ་བདུད་རྣམས་འཇོམས། །བདུད་ནི་རུ་ཏྲ་ལ། དེའི་བདུད་ནི་ཧེ་རུ་ཀའོ། །བདུད་རྣམས་ནི་རུ་ཏྲ་འཁོར་བཅས་སོ། །འཇོམས་པ་ནི་བདུད་དེ་དག་སྒྲལ་ནས་ཤ་ཁྲག་གསོལ། སེམས་འོག་མིན་དུ་གནས་སྤར་ནས། བདུད་ཀྱི་ཚོགས་ཐམས་ཅད་རབ་ཏུ་འཕམ་པར་བྱས་ནས་བཅོམ་པའོ། །འཇིགས་པའི་ཚོགས་ཀྱང་འཇིགས་པར་བྱེད། །འཇིགས་པའི་ཚོགས་ནི་རུ་ཏྲ་འཁོར་བཅས་སོ། །དེ་དག་ཀྱང་འཇིགས་པར་བྱེད་པ་ནི་ཧེ་རུ་སྟེ། ཇི་ལྟར་ན། རུ་ཏྲ་རྣམས་ཀྱི་མགོའ་དང་ཡན་ལག་མང་པོ་དང་། དུར་ཁྲོད་ཀྱི་རྒྱན་མང་པོ་རྟོགས་ནས་འཇིགས་འཇིགས་འདྲ་བ་ལ། དེ་དཔལ་ཆེན་པོའི་སྐུའི་ཆ་ལུགས་ཀྱིས་བྲེད་ཅིང་རྔངས་ནས་འཇིགས་པར་བྱེད་པ་ཡིན་ནོ། །འཇིགས་བྱེད་ཆེན་པོ་ཐིག་ལེ་ཆེ་ཧོ། །དེ་ལྟར་འཇིགས་བྱེད་ཆེན་པོའི་སྐུར་བསྟན་ཀྱང་། ཆོས་ཀྱི་དབྱིངས་ལས་མ་གཡོས་པའོ། །དེ་ལྟ་བུ་དེ་ཆོས་ཉིད་ཀྱི་དོན་ལས་མ་གཡོས་པར་འཇིགས་འཇིགས་འདྲ་བར་འབྱུང་བ་ལ། དེ་དག་ཐམས་ཅད་རང་འབྱུང་གི་ཡེ་ཤེས་སུ་འདུག་པས་ན་ཐིག་ལེ་ཆེན་པོའོ། །དོན་ལ་ཅི་ཡང་མྱེད་པས་དེ་ལ་དགྱེས་པ་ཧོ་ཞེའོ། །སྤྱིར་བསྟོད་པའོ། །ཧཱུྃ་རྡོ་རྗེ་བྲག་ཆེན་སྲ་བ་པོ། །ཧཱུྃ་ནི་འབྱུང་བ་བཞི་སྟེ་བདག་ཉིད་དེ། དེ་ཡང་འབྱུང་བ་བཞི་པོ་གནས་སུ་དག་པས་ཡུམ་བཞི། ཡུམ་བཞི་པོ་ཡང་ཆོས་ཉིད་སྐྱེ་འཇིག་དང་བྲལ་བས་དོན་ཆོས་ཉིད་སྐྱེ་འཇིག་དང་བྲལ་བས་དོན་ཆོས་ཉིད་ཀྱི་ངང་དུ་ཐིམ་མོ། །དེའི་ཕྱིར་ཧཱུྃ་གིས་འགོ་དྲངས་པ་ཡིན་ནོ། །རྡོ་རྗེ་ཆུ་བོ་བསྡུད་ཆེན་པོ། །དེ་ལྟར་ཡིན་ཡང་ཐུགས་རྗེ་ཆེན་པོའི་གླན་གྱིས། སེམས་ཅན་ཐམས་ཅད་སེམས་ཀྱི་བག་ཆགས་འཁྲུ་བས་ན་ཡེ་ཤེས་ཆེན་པོའི་ཆུ་ཡིན་ནོ། །རྡོ་རྗེ་མེ་ཏོག་ཀུན་འབར་ཆེ། །ཡེ་ཤེས་ཆེན་པོ་མེ་དང་འདྲ་བ་ཡིས་ཉོན་མོངས་པ་སྲེག་པར་མཛད་པ་དང་། དེ་ཡང་འཁོར་བ་མ་སྟོངས་ཀྱི་བར་དུ་ཡེ་ཤེས་ཀྱི་མེ་འབར་བའོ། །རྡོ་རྗེ་རླུང་སྟེ་མཐོར་རླུང་ཆེ་ཧོ། །གདུལ་བྱ་རྣམས་འཁོར་བའི་གནས་ནས། མྱ་ངན་ལས་འདས་པའི་དབྱིངས་སུ། ཐུགས་རྗེ་ཆེན་པོས་སྤྱོད་པ་མཛད་པ་དང་། འགྲོ་བ་རིགས་དྲུག་གི་སེམས་ཅན་ཐམས་ཅད་རྡོ་རྗེའི་རླུང་གིས་འཐོར་ནས། མྱ་ངན་ལས་འདས་པའི་ས་ལ་འདོད་པའོ། །དེ་ལྟར་སེམས་ཅན་གྱི་དོན་བྱེད་པ་དེ་གཞན་གང་གི་ཡང་འོག་ཏུ་མ་གྱུར་བས་ན་ཆེན་པོའོ། །དེ་བཞིན་གཤེགས་པའི་སྤྲུལ་པ་རླུང་གིས་སེམས་ཅན་གྱི་དོན་བྱེད་པས་ན་དེ་ལ་དགྱེས་པས་ཧོ་ཞེས་པའོ། ༈ །བསྟོད་པ་འདི་ལ་གསུམ་སྟེ། བསྐལ་པའི་འཕྲིན་ལས་ལ་བསྟོད་པ་དང་། འབྱུང་བ་དག་བྱེད་ལ་བསྟོད་པ་དང་། མཚན་ཉིད་ཡོན་ཏན་ལ་བསྟོད་པའོ། །དང་པོ་ནི། བསྐལ་པ་མེ་བདུན་ཆུ་གཅིག་གིས་འཇིག་པ་དེ། སངས་རྒྱས་ཀྱི་འཕྲིན་ལས་ཡིན་ཏེ། ཇི་ལྟར་ན། སེམས་ཅན་གྱི་ལས་ངན་པ་རྒྱུན་བཅད་ནས། གནས་ངན་པ་ལས་སྒྲོལ་བའོ། །ཇི་ལྟར་སྒྲོལ་ན། སྲ་བ་རྟེན་པའི་བསྐལ་པར་ཐམས་ཅད་གནས། །ཞི་གནས་ཆུའི་བ སྐལ་པས་ཐམས་ཅད་འཁྲུས། །ལྷག་འཐོང་མེའི་བསྐལ་པས་ཐམས་ཅད་སྲེགས། །ཡེ་ཤེས་རླུང་གི་སྐལ་པས་ཐམས་ཅད་འཐོར། །ཤེས་རབ་ནམ་ཀའི་བསྐལ་པས་རྒས་རྒུད་སྟོངས། །ཞེས་མདོའི་དགོངས་པ་འདུས་པ་ལས་གསུངས་སོ། །རྒྱུད་གཞན་ལས་ཡང་གསུངས་སོ། །གཉིས་པ་ནི། འབུ་ཏ་ཧེ་རུ་ཀའི་ཐུགས་ཡེ་ཤེས་ནི་འབྱུང་བ་པ་ཡིན། དེས་པ་ཐ་མལ་པ་འཇོམས་པས་འབུ་ཏ་ཀྲོ་ཏིའི་མཁའ་ཀློང་རྣམ་པར་དག་པའོ། །དེ་ལྟར་རད་ན་ཆུ། པད་མ་མེ། ཀར་མ་རླུང་ངོ་། །གསུམ་པ་ནི། དེ་ཡང་དཔལ་ཁྲག་འཐུང་ལ་རྡོ་རྗེ་ལྟ་བུའི་སྐུ་མངའ་བས། མཚན་ཉིད་སྐྱེ་འཇིག་ལས་འདས་པའོ། །དེ་ཁོ་ན་དཔེར་ན་བྲག་དང་འདྲ་སྟེ་སྲ་བའོ། །ཡོ་བྱད་ཕུན་སུམ་ཚོགས་པ་བསྟན། ཡན་ལག་མ་ཉམས་ཡོ་བྱད་ལྡན། །རྩ་བའི་དམ་ཚིག་དྲུག་ལ། བྱང་ཆུབ་སེམས་རྣམ་པ་གཉིས། སློབ་དཔོན་དྲུག །མཆེད་བཞི། སྔགས་གསུམ། ཕྱག་རྒྱ་བཞི། གསང་བ་བཅུ། ཡན་ལག་གི་དམ་ཚིག་ལྔ་ནི། སྤྱད་པར་བྱ་བ་དང་། མི་སྤང་བ་དང་། དང་དུ་བླང་བ་དང་། ཤེས་པར་བྱ་བ་དང་། སྒྲུབ་པར་བྱ་བ་མ་ཉམས་པའོ། །ཡོ་བྱད་ལྔ་ནི། བྲོ་གར་འདུ་འཕྲོའི་ཡོ་བྱད་དང་། བཟའ་དང་སྟུང་བའི་དང་། གླུ་ཚིག་སྒྲའི་ཡོ་བྱད་དང་། རྒྱན་དང་བགོའ་བའི་དང་། ཨ་ལི་ཀ་ལིའི་ཡོ་བྱད་ལྔ་སྟེ་ལྡན་པའོ། །ཡང་ན་སྔགས་ཀྱི་ཡན་ལག་ལྔ་སྟེ། རྩ་བའི་ལྷ་དང་། ཐབས་ཀྱི་ལྷ་དང་། ཤེས་རབ་ཀྱི་ལྷ་དང་། བསམ་གྱིས་མི་ཁྱབ་པའི་ལྷ་དང་། ཡེ་ཤེས་ཀྱི་དཀྱིལ་འཁོར་རོ། །སྟོན་པ་ཕུན་པ། ཆོ་ག་རྫོགས་པར་ཤེས་པ་ཡིས། །ཆོ་ག་ལྔ་ནི། དེ་བཞིན་ཉིད་སྟོང་པ་ཆེན་པོའི་ཆོ་ག་དང་། ཀུན་ཏུ་སྣང་སྒྱུ་མ་སྙིང་རྗེའི་ཆོ་ག་དང་། རྒྱུའི་ཏིང་ངེ་འཛིན་སྐུ་གསུང་ཐུགས་ཀྱི་ཆོ་ག་དང་། ཕྱག་རྒྱ་གཅིག་པ་ལྷ་འགེར་ཉན་པའི་ཆོ་ག་དང་། ཕྱག་རྒྱ་སྤྲོས་པ་རྣལ་འབྱོར་རྩལ་སྦྱོང་བའི་ཆོ་ག་རྣམས་ཡོངས་སུ་རྫོགས་པར་ཤེས་པ་ཡིས། འཁོར་ཕུན་པ། རྣལ་འབྱོར་འཚོགས་པའི་དཀྱིལ་འཁོར་གྱིས། །རྣལ་འབྱོར་པ་ནི། སྟོན་པ་རྡོ་རྗེ་རྒྱལ་པོ་ཡབ་ཡུམ་དང་། རྡོ་རྗེ་རྒྱལ་ཐེབ་ཡབ་ཡུམ་དང་། ལས་ཀྱི་ཀར་མ་ཡབ་ཡུམ་དང་། རྡོ་རྗེ་བྱ་རོག་ཡབ་ཡུམ་དང་། རྡུལ་ཕྱགས་སྐྱེ་བོའོ། །དེ་རྣམས་འཚོགས་ནས་སྒྲུབ་པའི་དཀྱིལ་འཁོར་ནི། ཚོམ་བུ་མང་ཉུང་ལྷ་གྲངས་དང་མི་གྲངས་སུ་སྦྱར་ནས། དཔའ་བོ་དང་དཔའ་མོར་བསྟུན་ནས་སྒྲུབས་པ་ཡིས། དུས་ཕུན་པ། ངེས་པར་ལེགས་པའི་དགོངས་པ་འགྲུབ། །དེ་ནི་དྲང་དོན་མ་ཡིན་ཏེ་ངེས་པའི་དོན་ཡིན་པས། ངེས་པར་ཐེ་ཚོམ་མྱེད་པར་འགྲུབ་བོ། །གང་འགྲུབ་ན། མྱ་ངན་ལས་འདས་པ་འབུ་ཏའི་དངོས་གྲུབ་ལེགས་པར་འགྲུབ། སངས་རྒྱས་ཀྱི་དགོངས་པ་གང་ཡིན་པ་དེ་འགྲུབ། མཆོག་དང་ཐུན་མོང་གི་དངོས་གྲུབ་རྣམ་པ་གཉིས་ཀྱང་ལེགས་པར་འགྲུབ་པར་འགྱུར་རོ། །ཁྲོ་བོ་ཁྲོ་མོའི་ཚོགས་ཆེན་དང་། །དེ་ཡང་འགྲུབ་པ་དེ་རང་གང་ཞེ་ན། ཁྲོ་བོ་ནི་ཁྲག་འཐུང་རྒྱལ་བ་རིགས་རྣམ་པ་ལྔའོ། །ཁྲོ་མོ་ནི་ཡུམ་ལྔའོ། །ཚོགས་ཆེན་ནི། ཡབ་ཡུམ་བཅུ་པོ་དེ་ཡོན་ཏན་གྱི་ཚོགས་མང་པོ་དང་ལྡན་པས། འཁོར་ཡེ་ཤེས་དང་ལས་ལས་གྲུབ་པ་མང་པོ་ཡོད་པའོ། །དེའི་ཡང་འཁོར་གང་ཞེ་ན། ཕོ་ཉ་ཕྱག་བརྙན་བཀའ་ཉན་ཚོགས། །ཕོ་ཉ་ནི་ཀོའུ་རི་མ་བརྒྱད་དེ། བཅོལ་བའི་ལས་རྣམས་བྱེད་པའོ། །ཕྱག་བརྙན་ནི་སིང་ང་མ་བརྒྱད་དེ། མངག་པའི་ལས་ལ་མགྱོགས་པའོ། །བཀའ་ཉན་ནི་སྒོ་མ་བཞི་སྟེ། འགུགས་འདྲེན་གྱི་ལས་ལ་མཁས་པའོ། །ཚོགས་ནི་རང་རང་གི་སྤྲུལ་པ་རྣམས་སོ། །ཅི་བགྱིའ་ལ་སོགས་ཚོགས་རྣམས་ཀྱིས། །ཅི་བགྱི་ནི་དབང་ཕྱུག་མ་སྟེ། རྗེ་དཔལ་ཆེན་པོའི་ཡིན་པའི་ཕྱིར་ན། མ་བཅོལ་ཡང་ལས་ཅི་བགྱི་ཟེར་ནས་འོང་བའོ། །སོགས་ནི། དབང་མོ་ཉི་ཤུ་རྩ་བརྒྱད་པའོ། །ཚོགས་རྣམས་ནི། ཡང་སྤྲུལ་དང་བ ཅས་པ་རྣམས་སོ། །དངོས་གྲུབ་ལས་རྣམས་རྫོགས་པར་བྱེད། །དེ་རྣམས་ཀྱི་རྣལ་འབྱོར་པའི་དངོས་གྲུབ་རབ་འབྲིང་གསུམ་དང་། ལས་རྣམ་པ་བཞི་པོ་རྣམས། མ་ལུས་པར་འགྲུབ་པར་བྱེད། ཐུན་མོང་གི་འབྲས་བུ་རིག་འཛིན་བཞིན་སྒྲོད་པར་བྱེད། མཆོག་གི་འབྲས་བུ་ཡང་དག་པར་རྫོགས་པའི་སངས་རྒྱས་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་དོ། །དེ་ནས་དཀྱིལ་འཁོར་ཐམས་ཅད་ཀུན། །རང་གི་སྙིང་ཀར་བསྡུས་ནས་ནི། །ཡེ་ཤེས་ཀྱི་དཀྱིལ་འཁོར་ལ་མཆོད་བསྟོད་བཟླས་པ་རྫོགས་པ་དེ་ནས། དམ་ཚིག་གི་དཀྱིལ་འཁོར་ཀུན་བསྡུ་བ་ནི། བདག་གི་ཐུགས་ཀ་ནས་ཡི་གེ་ཧཱུྃ་ལས་འོད་ཟེར་འཕྲོས་པས། ལྷ་དང་གཞལ་ཡས་ཁང་དང་བཅས་པ་འོད་དུ་ཞུ་ནས། འོད་དེ་ཡང་གཞལ་ཡས་ཁང་གི་འོད་ལྷའི་འོད་ལ་འདུས། ལྷ་རྣམས་ཀྱི་འོད་རིམས་ཀྱིས་བདག་ལ་འདུས། བདག་ཀྱང་འོད་དུ་ཞུ་ནས་མྱི་དམྱིགས་པར་གྱུར་ཏེ། མ་བསྡུས་ན་དངོས་གྲུབ་གཡེལ་བར་འགྱུར་བས་བསྡུའ་བར་བྱའོ། །དེ་ནས་ཡེ་ཤེས་ཀྱི་དཀྱིལ་འཁོར་འོད་དུ་གསལ་བར་བྱའོ། །ཧཱུྃ་ཧཱུྃ་ཞེས་ནི་རབ་བརྗོད་པས། །འདུས་པ་དེ་དག་ཅི་བདེར་སྤྱད་། །དང་པོ་ཡང་ཧཱུྃ་ལས་བྱུང་བས། ཐ་མ་ཡང་ཧཱུྃ་ལ་སྡུད་པའོ། །དེ་ལྟར་མྱི་དམྱིགས་དེའི་ངང་ལས། སྐད་ཅིག་གིས་ལྷའི་སྐུར་སྐྱེད་ལ། ཀཾ་ལས་རྡོ་རྗེའི་གོ་ཁྲབ་ཀྱིས་ལུས་ལ་རྡོ་རྗེའི་གོ་བགོའ། ཧཾ་ལས་རྡོ་རྗེའི་རྒྱུན་ཐག་གིས་སྡམ། ཨ་ལས་རིན་པོ་ཆེ་དང་། ཧཱུྃ་ལས་རྡོ་རྗེའི་ཐག་པ་གཉིས་མཛུབ་མོ་ལ་གསལ་ལ་བཅིང་ངོ་། །རད་ན་མ་མེ་ཨ་བི་ཤིན་ཙ་ཞེས་པས་རིན་པོ་ཆེའི་འཕྲེང་བས་བཅིང་། པ་ཏ་ལམ་ཞེས་པས་དར་དཔྱངས་དཀར་པོ་གཡས་སུ་འཕུར་བར་བསམ་མོ། །ཨ་བི་ཤི་ན་ཙ་ལམ་ཞེས་པས་དར་དཔྱངས་དམར་པོ་གཡོན་དུ་འཕུར་བར་བསམ་མོ། །དེ་ནས་དཀྱིལ་འཁོར་བསྡུས་ནས་ཀྱང་། །དམ་ཚིག་གི་དཀྱིལ་འཁོར་བདག་ལ་བསྡུས། ཡེ་ཤེས་ཀྱི་དཀྱིལ་འཁོར་འོག་མིན་དུ་གཤེགས་པ་དེ་ནས། སྤྱོད་ལམ་བྱ་བར་བསྟན་པ་དེ་ཡང་། རྣལ་འབྱོར་བདག་ཉིད་ཆེན་པོ་ཡིས། །བློ་རྣལ་མ་ལ་རིག་པ་ལྷའི་སྐུར་འབྱོར་བས། རྣལ་འབྱོར། སྐུ་གསུང་ཐུགས་ཀྱི་བདག་ཉིད་སངས་རྒྱས་དང་སྐལ་བ་མཉམ་པར་ཆེན་པོ། དེ་ཡིས་ཇི་ལྟར་ཞེ་ན། བོར་ནས་བཞག་པ་ལྟ་བུ་ནི་མ་ཡིན་ཏེ། སྤྱོད་ལམ་ཀུན་ཏུ་མ་ཉམས་པར། །ལྷ་ཉིད་དུ་ནི་རྟག་ཏུ་བསྒོམ། །འགྲོ་བ་དང་། ཉལ་བ་དང་། འདུག་པ་དང་། ཟ་བའི་དུས་ཀུན་ཏུ་ཡང་། ལྷའི་ཏིང་ངེ་འཛིན་ལས་མ་ཉམས་པར། རང་ཉིད་ཡི་དམ་ལྷའི་ཏིང་ངེ་འཛིན་དུ་རྟག་ཏུ་བསྒོམ་མོ། །ཇི་ལྟར་ན། འགྲོ་ན་རྐང་པའི་མཐིལ་དུ་རྡོ་རྗེ་སྒོམས་ནས་འགྲོ་དེས་སེམས་ཅན་རྡོག་པའི་འགྲོ་ལ་ཤི་བོ་གནས་ངན་པར་མི་སྐྱེ། ཉལ་ན་ཨ་ཞེས་སྟོང་ཉིད་དུ་ཉལ། རྨི་ལམ་སྒྱུ་མ་ཙམ་ལ་སེམས་འཛིན། དེས་སྣང་བ་རྨི་ལམ་ཙམ་དུ་ཤེས། འདུག་ན་ཕྱི་སྣོད་གཞལ་ཡས་ཁང་ལ། ནང་བཅུད་ལྷའི་སྐུར་འདུག །དེས་རྟོག་པ་གནས་འགྱུར་བ་དག་པར་བྱེད། ཟ་ན་ཡོ་བྱད་ཚོགས་སུ་རོལ་ཏེ། ཟས་ཀྱི་རྣལ་འབྱོར་བྱ། དེ་རྣམས་གང་བྱེད་ཀྱང་ལྷ་སྒོམ་དགོས་པས་ན། ལྷ་ཉིད་དུ་ནི་རྟག་ཏུ་བསྒོམ་ཞེས་གསུངས་པ་ཡིན་ནོ། །ཕུང་པོ་ལྔ་ཉིད་ཁྲོ་རྒྱལ་གཙོའ། །ཞེས་པ་གཟུགས་ཀྱི་ཕུང་པོ་༼རྣམ་སྣང་༽འབུ་ཏ་ཧེ་རུ་ཀའོ། །རྣམ་པར་ཤེས་པའི་ཕུང་པོ་༼རྡོ་རྗེ་སེམས་དཔའ་༽བཛྲ་ཧེ་རུ་ཀའོ། །ཚོར་བའི་ཕུང་པོ་༼རིན་འབྱུང་༽ རད་ན་ཧེ་རུ་ཀའོ། །འདུ་ཤེས་ཀྱི་ཕུང་པོ་༼སྣང་བ་མཐའ་ཡས་༽པད་མ་ཧེ་རུ་ཀའོ། །འདུ་བྱེད་ཀྱི་ཕུང་པོ་དོན་ཡོད་གྲུབ་པ་ཉིད་ཀར་མ་ཧེ་རུ་ཀར་ཡིན་ནོ། །ཆེན་པོ་ལྔ་ཉིད་དབང་ཕྱུག་ཡུམ། །ཞེས་པ་འབྱུང་བ་ལྔ་ནི་ཡུམ་སྟེ། བཛྲ་ཀྲོ་ཏ་ཤྭ་རི་མ་སྟེ། རྣམ་པར་ཤེས་པའི་རང་བཞིན་གྱི་སྤྱད་བྱ་སྟེ་ཡུམ་མོ། །འབྱུང་བ་ནམ་མཁའ་ནི་ཡུམ་འབུ་ཏ་ཀྲོ་ཏི་སྟེ་ནམ་མཁའི་རང་བཞིན་ནོ། །ཆུ་ནི་རད་ན་ཀྲོ་ཏི་སྟེ་ཚོར་བའི་ཡུམ་མོ། །འདུ་ཤེས་མོའི་ཡུམ་པད་མ་ཀྲོ་ཏིའོ། །འདུ་བྱེད་རླུང་གི་རང་བཞིན་གྱིས་སྤྱད་བྱའི་ཡུལ་དུ་གྱུར་པས་ན། ཡུམ་ཀར་མ་ཀྲོ་ཏི་ཤྭ་རི་མའོ། །དེ་བས་ན་ཕུང་པོ་ལྔ་ཡབ། འབྱུང་བ་ལྔ་ཡུམ་གྱི་རང་བཞིན་ནོ། །སྐྱེ་མཆེད་གནས་ཀྱི་མ་བརྒྱད་ཁམས་ཡུལ་གྱི་འཕྲ་མེན་རེ་རེ་ལ་གཉིས་གཉིས་རྩིས་པ་རྣམས་མང་པོ་ཀུན། །སངས་རྒྱས་ཀྱི་ཐུགས་རྗེ་རྔམ་པའི་འཁྲོས་པའི་དཀྱིལ་བཛྲ་ལ་འཁོར་ལ་ཚོགས་མང་པོ། །མྱིག་གི་རྣམ་ཤེས་ཀྭོའུ་རི། རྣ་བའི་རྣམ་ཤེས་ཙོའུ་རི། སྣ་བའི་རྣམ་ཤེས་པྲ་མོ་ཧ། ལྕེའི་རྣམ་ཤེས་པེ་ཏ་ལི། མིག་གི་དབང་པོ་པུ་ཀ་སི། རྣ་བའི་དབང་པོ་ཀ་རྨ་ཧྲི། སྣའི་དབང་པོ་སྨན་ཤ་ནི། ལྕེའི་དབང་པོ་ཙན་དྷ་ལིའོ། །དེ་བས་ན་རྣམ་པ་བཞི་དང་། དབང་པོ་བཞི་ནི་རང་རང་གི་གནས་ལ་སྤྱོད་པས་ན། གནས་ཀྱི་མ་མོ་བརྒྱད་དོ། །དེ་རྣམས་ལ་སྐྱེ་མཆེད་བརྒྱད་ཞེས་བྱའོ། །ཁམས་ནི། མྱིག་གི་གཟུགས་ཀྱི་ཁམས་ཏེ། སིང་ང་མ། རྣ་བའི་ཡུལ་སྒྲའི་ཁམས་ཏེ་བྱང་ཏྲི་མ། སྣའི་ཡུལ་དྲིའི་ཁམས་ཏེ་ཀྲི་ལ་མ། ལྕེའི་ཡུལ་རོའི་ཁམས་ཏེ་ཤོ་ན་མ། མྱིག་གི་དབང་དབང་པོ་སྤྱད་བྱ་འདས་པ་སྟེ་ཀྲི་ཏ་མ། རྣའི་ད་ལྟ་སྟེ་ཀང་ཀ་མ། སྣ་མ་བྱོན་པ་སྟེ་ཁ་ཁ་མ། ལྕེ་འབྱུང་བར་མ་ངེས་པ་སྟེ་ཧུ་ལུ་མ། ལུས་ཀྱི་དབང་པོ་བཞི་ནི། སྒོ་མ་བཞི་ཡིན་ནོ། །རྒྱུ་ཅིག་པར་རྟོགས་པ་དང་། རྒྱུ་ཅིག་པ་དང་དེ་ཡང་སངས་རྒྱས་དང་སེམས་ཅན་རིགས་པར་རྒྱུ་ཅིག་ཡིག་འབྲུའི་ཚུལ། །ཡིག་འབྲུའི་ཚུལ་དུ་རྟོགས་པ་དང་། རྒྱུ་དེ་ཡི་གེ་ༀ་ཨཱཿཧཱུྃ་གིས་སྐུ་གསུང་ཐུགས་མཚོན་ཚུལ་ལོ། །བྱིན་གྱིས་རླབས་ཀྱིས་རྟོགས་པ་དང་། བྱིན་གྱིས་རླབས་དང་ཡི་གེ་གསུམ་གྱིས་ལུས་ངག་ཡིད་གསུམ་སྐུ་གསུང་ཐུགས་སུ་བྱིན་རླབས་མངོན་སུམ་པ། །མངོན་སུམ་པར་རྟོགས་པ་དང་། ཐེ་ཚོམ་མེད་པར་མངོན་པར་བྱས་པའོ། །རབ་ཏུ་རྟོགས་དང་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །འདིར་རིག་འཛིན་བསྡུའོ། །དེ་ལྟར་དུ་རྒྱུ་གཅིག་པ་དེ་ཏིང་དང་། ཡིག་འབྲུ་རྒྱུ་ཏིང་དང་། བྱིན་གྱིས་རླབས་ཀུན་ཏིང་དང་། མངོན་སུམ་པ་ལྷའི་སྐུར་རྟོགས་ནས། དེ་ལ་རབ་ཏུ་གོམས་པར་རྟོགས་ན། ཆོས་ཐམས་ཅད་རང་རིག་ཏུ་མངོན་པར་རྫོགས་པ་སངས་རྒྱས་དེ། འཁོར་བ་ལས་རྒྱལ་བ་ནི། དུས་ཐམས་ཅད་དུ་མངོན་པར་རྫོགས་པ་སངས་རྒྱས་སོ། ༈ །རྟོགས་པ་རྣམ་པ་བཞི་ལ་དོན་བཞི་སྟེ། ལྟ་བ་དང་སྦྱར་བའི་རྟོགས་པ་བཞི་དང་། སྐྱེད་རིམས་དང་སྦྱར་བ་དང་། རྫོགས་རིམས་དང་སྦྱར་བ་དང་། གྲུབ་མཐའ་དང་སྦྱར་བའོ། །ལྟ་བ་དང་སྦྱར་བའི་རྟོགས་པ་བཞི་ལ་རེ་རེ་ལ་དོན་གསུམ་གསུམ་སྟེ། དེ་ལ་རྒྱུ་ཅིག་པར་རྟོགས་པའི་གཞལ་བྱ་ནི། འཁོར་འདས་ཀྱི་ཞེན་སྣང་ལ་འཇོལ་བའོ། །བཞི་ཀ་མཐུན་ནོ། །གོ་བའམ་རྟོགས་པ་གང་སྐྱེ་བ་ནི། འཁོར་འདས་སེམས་ཉིད་དུ་རྒྱུ་ཅིག་པར་རྟོགས་པའོ། །ཞེན་པ་གང་གྲོལ་བ་ནི། འཁོར་འདས་ཐ་དད་དུ་ཞེན་པ་གྲོལ་པའོ། །ཡིག་འབྲུའི་ཚུལ་དུ་རྟོགས་པའི་གོ་བའམ་རྟོགས་པ་གང་སྐྱེད་པ་ནི། ཡི་གེ་འབྲུ་གསུམ་གྱི་སྒོ་ནས་ལུས་ངག་ཡིད་གསུམ་སྐུ་གསུང་ཐུགས་སུ་རྟོགས་པའོ། །ཞེན་པ་ནི། འབྲས་བུ་གཞན་ནས་ཐོབ་བམ་མཉམ་ནས་གཞན་ནས་ཚོལ་བའི་ཞེན་པ་གྲོལ་ལོ། །བྱིན་གྱིས་རླབས་ཀྱིས་རྟོགས་པའི་རྟོགས་པ་གང་སྐྱེ་བ་ནི། རྒྱུ་གཅིག་པ་དང་། ཡིག་འབྲུའི་ཚུལ་གྱིས། སྐུ་གསུང་ཐུགས་སུ་རྟོགས་པའི་མཐུའ་ངོ་ཤེས་ནས་བརྟན་པར་རྟོགས་པའོ། །ཞེན་པ་མི་བརྟན་པའི་ཞེན་པ་ལས་གྲོལ་ནས་བརྟན་པའོ། །མངོན་སུམ་པར་རྟོགས་པ་ནི། མཐུའ་ངོ་ཤེས་མི་རྟན་པ་རྟན་པར་རྟོགས་པ། དེ་སྒྲ་ཙམ་མ་ཡིན་པར་བློ་གཏིང་དུ་གོ་བའོ། །ཞེན་པ་གང་གྲོལ་བ་ནི། སྒྲ་ཇི་བཞིན་དུ་འཛིན་པའི་ཞེན་པ་ལས་གྲོལ་ལོ། །བསྐྱེད་རིམ་དང་སྦྱར་ན། རྒྱུ་གཅིག་པར་རྟོགས་པ་ནི། དེ་བཞིན་ཉིད་ཀྱི་ཏིང་ངེ་འཛིན་ནོ། །བྱིན་གྱིས་བརླབས་ནི་ཀུན་ཏུ་སྣང་གི་ཏིང་ངེ་འཛིན་ནོ། །ཡིག་འབྲུའི་ཚུལ་ནི་རྒྱུའི་ཏིང་ངེ་འཛིན་ནོ། །མངོན་སུམ་པར་རྟོགས་པ་ནི་ལྷའི་སྐུ་བསྐྱེད་པའོ། །ལྷ་གསལ་བ་ལ་རབ་ཏུ་རྟོགས་པ་ཞེས་བཞེད་དོ། །རྫོགས་རིམས་དང་སྦྱར་ན། རྒྱུ་ཅིག་པ་ནི། སྤྱི་བོ་བདེའ་བ་ཆེན་པོའི་འཁོར་ལོ་ན། ཐམས་ཅད་བྱང་སེམས་ཀླད་པར་རྒྱུ་ཅིག་པའོ། །ཡིག་འབྲུ་ནི། མགྲིན་པ་ལོངས་སྤྱོད་ཀྱི་འཁོར་ལོ་ན། གསུང་དབྱངས་ཡན་ལག་དྲུག་ཅུ་འབྱུང་བ་ཡི་གེ་ཨ་ལི་བཅུ་དྲུག་གོ། །བྱིན་གྱིས་རླབ་པ་ནི། རང་རིག་པ་བདེའ་གཤེགས་ཀྱི་ཐུགས་སུ་བྱིན་གྱིས་བརླབ་པ་སྙིང་ཁ་ཆོས་ཀྱི་འཁོར་ལོ་ན་གནས་སོ། །མངོན་སུམ་པ་ནི། ལྟེ་བ་སྤྲུལ་པའི་འཁོར་ལོ་ནས་མེ་རླུང་གཡོས་ནས་བྱང་སེམས་ཕབ་པའི་དུས་ན། བདེའ་བ་མངོན་སུམ་དུ་འཆར་བའོ། །གྲུབ་མཐའ་དང་སྦྱར་ན། རེ་རེ་ལ་ཡང་ཆོས་བཞི་བཞི་སྟེ། གཞལ་བྱ་དང་། གཏན་ཚིགས་དང་། འཇལ་ཚུལ་དང་། གྲུབ་མཐའོ། །དེ་ལ་རྒྱུ་གཅིག་པའི་གཞལ་བྱ་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དེ་ཕྱི་ནང་གི་དངོས་པོ་འདིའོ། །གཏན་ཚིགས་ནི། རྒྱུ་སྐྱེ་བ་མྱེད་པའི་ཕྱིར། སྟོང་པར་རྟོགས་པར་བྱེད་པའོ། །འཇལ་ཚུལ་ནི། བློ་ཆེ་ན་ཅིག་ཆར་དུ་རྟོགས། ཆུང་ན་རིམས་ཀྱིས་གཞལ་ནས་རྟོགས་སོ། །གྲུབ་མཐའ་ནི་དོན་སྐྱེ་མྱེད་རྟོགས་པའོ། །ཡིག་འབྲུའི་ཚུལ་གྱི་གཞལ་བྱ་ནི། གོང་གི་དོན་དམ་དེ་རང་ངོ་། །གཏན་ཚིགས་ནི། ཡི་གེ་ཨ་ཨོ་ཨཾ་ནི་ལ་སོགས་རྣམས་ཀྱིས། སྒྱུ་མར་རྟོགས་པར་བྱེད་པའོ། །འཇལ་ཚུལ་ནི། ཀུན་རྫོབ་སྒྱུ་མ་བློ་ཆེ་ཆུང་གི་རིམ་པ་དང་ཅིག་ཆར་དུ་རྟོགས་པའོ། །གྲུབ་མཐའ་ཀུན་རྫོབ་དོན་དམ་དུ་རྟོགས་ཏེ། ཀུན་ཏུ་སྣང་གི་ཏིང་ངེ་འཛིན་ཏོ། །བྱིན་གྱིས་རླབས་ཀྱི་གཞལ་བྱ་ནི། གོང་གི་དོན་དམ་དང་ཀུན་རྫོབ་གཉིས་པོ་རང་ངོ་། །གཏན་ཚིགས་ནི། བདེན་པ་གཉིས་དབྱེར་མྱེད་དུ་རྟོགས་པར་བྱེད་པའོ། །འཇལ་ཚུལ་ནི། བདེན་པ་དབྱེར་མྱེད་རྟོགས་ཚབ་ཆེ་ཆུང་དུ་འདུག་པའོ། །གྲུབ་པའི་མཐའ་ནི། བདེན་པ་དབྱེར་མྱེད་དུ་རྟོགས་པ་དེ་རང་ངོ་། །མངོན་སུམ་པར་རྟོགས་པའི་གཞལ་བྱ་ནི། གོང་གི་བདེན་པ་དབྱེར་མྱེད་དེ་རང་ངོ་། །གཏན་ཚིགས་ནི་བར་སྣང་སྟོང་པ་ལྟ་བུ། སྣང་ལ་རང་བཞིན་མྱེད་པའོ། །འཇལ་ཚུལ་ནི། ཀུན་ལ་ཡུལ་དུ་མི་འབྱེད་པ་དེ་ལ་བློ་ཆེ་ཆུང་དུ་འདུག་པའོ། །གྲུབ་མཐའ་ནི། དབྱེར་མྱེད་སྤྱོད་ཡུལ་དང་བྲལ་བའོ། །དེ་ལྟར་ཡོད་པ་ལས་འདིར་ནི། བསྐྱེད་རིམས་ལ་དགོངས་པ་གཙོའ་ཆེ་སྟེ། བསྐྱེད་རྫོགས་གཉིས་པོ་རྟོགས་པར་བྱེད་པ་ལ་དེ་མ་ཡིན་པ་རྣམས་ཀྱང་དགོས་པའོ། །དེ་རྣམས་ལ་ནི་རབ་ཏུ་རྟོགས་པ་རྣམ་པ་བཞི་ཞེས་བྱའོ། །ཕྱོགས་བཅུ་དུས་བཞིར་རྫོགས་པའི། །ཕྱོགས་བཅུ་དང་དུས་བཞིས་བསྡུས་པའི་མངོན་པར་རྫོགས་པར་སངས་རྒྱས་པའི་འབྲས་བུ་ཐོབ་སྟེ། དེའི་ངོ་བོའམ་ཡོན་ཏན་གང་ཞེ་ན། འདི་རྣམས་ཡིན་ཏེ། སྐུ་གསུང་ཡོན་ཏན་འཕྲིན་ལས་ཐུགས། །སྐུ་ལྔ་ནི། ཆོས་སྐུ་དང་། མངོན་པར་བྱང་ཆུབ་པའི་སྐུ་དང་། ལོངས་སྐུ་དང་། སྤྲུལ་སྐུ་དང་། རྡོ་རྗེའི་སྐུའོ། གསུང་ལྔ་ནི། སྐྱེ་མྱེད་དོན་གྱི་གསུང་དང་། རིག་པ་རང་སྣང་གི་གསུང་དང་། དགོངས་པ་བརྡའི་གསུང་དང་། སྣ་ཚོགས་ཚིག་གི་གསུང་དང་། གྲག་སྟོང་དབྱེར་མྱེད་ཀྱི་གསུང་ངོ་། །ཡོན་ཏན་ལྔ་ནི། གཞལ་ཡས་ཁང་དང་། ཞིང་ཁམས་དང་། རྒྱན་དང་། འོད་ཟེར་དང་། གདན་ཁྲིའོ། །འཕྲིན་ལས་ལྔ་ནི། ཞི་བ་དང་། རྒྱས་པ་དང་། དབང་དང་། དྲག་པོ་དང་། ལྷུན་གྲུབ་བོ། །ཐུགས་ལྔ་ནི། ཆོས་ཀྱི་དབྱིངས་མི་རྟོག་པའི་ཐུགས་དང་། མེ་ལོང་ལྟ་བུ་ས་ལེར་མཁྱེན་པ་དང་། མཉམ་པ་ཉིད་མ་གཡོས་པ་དང་། སོ་སོར་རྟོག་པ་མ་འགགས་པ་དང་། བྱ་བ་གྲུབ་པ་འགྲོ་བ་སྒྲོལ་བའི་ཐུགས་སོ། །དེ་རྣམས་དབྱེར་མྱེད་པ་ནི་སྐུ་ལྔ་ལྷུན་གྱིས་གྲུབ་པ་ཞེས་བྱའོ། །མ་ལུས་བདག་ཉིད་ཞལ་མཐོང་བས། །སྣང་སྲིད་མ་ལུས་པར་རྣམ་པར་དག་པའི་སྐུ་ནི་སྐུ་ལྔ་ལྷུན་གྲུབ་ཀྱི་སངས་རྒྱས་ལ། དེའི་ཞལ་བདག་གིས་མཐོང་བ་ནི། འབྲས་བུ་དེ་ཉིད་ཐོབ་པའོ། །དེ་ཡང་སྒྱུ་འཕྲུལ་རྡོ་རྗེ་ལས། རང་བཞིན་གནས་པས་གཞན་ནས་འོངས་པ་མྱེད། ཞེན་པ་ལོག་པས་བདག་ཞལ་བདག་གིས་མཐོང་། ཞེས་སོ། །དབང་སྐུར་མཆོག་ཉིད་དམ་པ་ཡིན། །ཞལ་མཐོང་བ་དེ་ལ་ཉེས་པ། སྒྲིབ་པར་གྱུར་པས་སྒྲིབ་པ་ཡིན་ཏེ། སྒྲིབ་པ་དེ་ཞལ་མཐོང་ནས། དབང་སྐུར་བས་སྒྲིབ་པ་དག་སྟེ། སངས་རྒྱས་ཀྱི་དགོངས་པའི་དམ་པ་དེ་ཡིན་ནོ། ༈ །འདིར་ནི་འབྲས་བུའི་ཐོབ་ལུགས་རྣམ་པ་གཉིས་ཏེ། ཐུན་མོང་དུ་རིག་འཛིན་ཐོབ་པ་དང་། ཁྱད་པར་དུ་སྐུ་ལྔ་ལྷུན་གྲུབ་ཐོབ་པའོ། །དེ་ལ་རིག་འཛིན་ལ་བཞི་སྟེ། རྣམ་པར་སྨིན་པའི་རིག་འཛིན་དང་། ཚེ་ལ་དབང་པའི་དང་། ཕྱག་རྒྱ་ཆེན་པོ་དང་། ལྷུན་གྲུབ་པའོ། །དེ་ལ་རྣམ་པར་སྨིན་པའི་རིག་འཛིན་ལ་གཉིས་ཏེ། རྒྱུས་བསྡུས་པའི་རྣམ་སྨིན་དང་། འབྲས་བུས་བསྡུས་པ་ལས། འདི་འབྲས་བུས་བསྡུས་པའོ། །དེའི་ངོ་བོ་ནི། ནང་ཡིད་ཀྱི་ལྷའི་སྐུ་གཟུགས་གཟུང་ནས། ཕྱི་ལུས་ཀྱི་དྲ་བས་སྒྲིབས་པས་ཏེ། དཔེར་ན་སྐོར་ཕོར་འདག་པ་ལྟ་བུས་སྟེ། འདག་པ་ནང་ན་ཚ་ཚའི་གཟུགས་སུ་གནས་ཡང་། ཕྱིའི་སྐོར་ཕོར་གྱིས་སྒྲིབ་པའོ། །རང་ཡིད་ཀྱི་རྣམ་པ་ལྷའི་སྐུར་སྨིན་པས་ན་རྣམ་སྨིན་ནོ། །ཚེ་ལ་དབང་བ་ལ་བཞི་སྟེ། བདུད་རྩི་སྨན་ལས་གྲུབ་པའི་ཚེ་དབང་དང་། སྒྲོན་མ་རླུང་ལས་གྲུབ་པའི་ཚེ་དབང་དང་། ཐབས་ལམ་རྩ་རླུང་ཐིག་ལེ་ལས་གྲུབ་པའི་ཚེ་དབང་དང་། གྲོལ་ལམ་བསྐྱེད་རྫོགས་ལས་གྲུབ་པའི་ཚེ་དབང་ལས། འདི་ཕྱི་མའོ། །དེའི་ངོ་བོ་ནི། མི་དང་ལྷའི་ཆ་བྱད་དུ་གནས་ནས། ལོ་སྟོང་ལྔ་བརྒྱ་ཐུབ། གཞན་དོན་དུ་གནས་ན། ལོ་བརྒྱ་བརྒྱ་ན་མར་ལ་མནུར་ནས་བྱིས་པ་ལོ་བརྒྱད་ལོན་པ་ལྟར་ཡོང་ངོ་། །ཕྱག་རྒྱ་ཆེན་པོའི་རིག་འཛིན་ནི་བཞི་སྟེ། ཀྲི་ཡའི་ཕྱག་རྒྱ་ཆེན་པོའི་རིག་འཛིན་དང་། ཨུ་པ་ཡའི་དང་། ཡོ་གའི་དང་། མ་ཧཱ་ཡོ་གའི་འོ། །འདི་མ་ཧཱའོ། །དེའི་ངོ་བོ་ནི། རང་གིས་རང་སྒོམས་པའི་ལྷའི་སྐུ་དེའི་ལུས་སུ་གནས་ནས། བདག་གཞན་གྱི་དོན་བྱེད་པའོ། །ལྷུན་གྱིས་གྲུབ་པའི་རིག་འཛིན་ལ་གསུམ་སྟེ། བྱ་བའི་ལྷུན་གྲུབ་དང་། རྣལ་འབྱོར་གྱི་ལྷུན་གྲུབ་དང་། མ་ཧཱའི་ལྷུན་གྲུབ་བོ། །འདི་མ་ཧཱའོ། །དེའི་ངོ་བོ་ནི། ལུས་སྐུ་ལྔའི་ངོ་བོ་གནས། ཕྱོགས་བཅུར་འགྲོ་དོན་གྱི་སྤྲུལ་པ་སྤྲོ་བར་གནས་པའོ། །ཁྱད་པར་སྐུ་ལྔ་ལྷུན་གྲུབ་ལ་སྦྱོར་བ་ནི། ཕྱོགས་བཅུ་དུས་བཞི་ཞེས་པ་ལ་སོགས་པའོ། །བསྒྲུབ་པའི་ཐབས་འདི་བསྡུས་པ་ཡིས། །ཁྲོ་བོ་སྒྲུབ་པའི་ཐབས་འདི། རྒྱུད་གསང་བ་སྙིང་པོ་ལས་བསྡུས་པ་ཡིན་ནོ། །བསོད་ནམས་བདག་གིས་གང་ཐོབ་པ། །འདི་ཙམས་པའི་བསོད་ནམས་སངས་རྒྱས་གསང་བ་བདག་གིས་གང་ཐོབ་པ་དེ། དགེ་བར་བསྔོ་སྟེ་གང་ཞེ་ན། དཔལ་ཆེན་ཀུན་བཟང་སྐུ་གསུང་ཐུགས། །བཅོམ་ལྡན་འདས་དཔལ་ཆེན་པོ་ཀུན་ཏུ་བཟང་པོའི་སྐུ་གསུང་ཐུགས་ཡང་དག་པ་དེ། སེམས་ཅན་ཀུན་གྱིས་ཐོབ་པར་ཤོག །ཁམས་ག སུམ་གྱི་སེམས་ཅན་ཐམས་ཅད་ཀུན་གྱིས་ཐོབ་པར་ཤོག་ཅིག་ཅེས་སྨོན་ལམ་གདབ་བོ། །དེ་ཁོ་ན་ཉིད་དོན་དམ་པ་སྟེ། སྐུ་ལྔ་ལྷུན་གྲུབ་ཉིད་དཔལ་ཧེ་རུ་ཀའི་དོན་ཡིན་པའོ། །སྣང་བ་དེ་ཁོ་ན་གདུལ་བྱ་ལམ་པའི་དོན་དུ་སྐུར་སྣང་བའོ། །དམ་པ་སྣང་བ་དེ་ཁོ་ན་མི་སླུ་ངེས་པས་དོན་དམ་པ་ཡིན་ངེས་པའོ། །རྒྱན། །དེ་ནི་རྣལ་འབྱོར་པ་རྣམས་ཀྱི་རྒྱན་དུ་གྱུར་པ་སྟེ། སྒོམས་ན་ལེགས་པར་འབྱུང་ཞིང་མཛེས་པས་ན་རྒྱན་ནོ། །སློབ་དཔོན་སངས་རྒྱས་གསང་བས་མཛད་པ། རྫོགས་ས྄ཧོ།྅྅྅ །རྒྱ་གར་གྱི་པཎྜི་ཏ་སངས་རྒྱས་གསང་བ་དེ་ཉིད་དང་། བོད་ཀྱི་ལོ་ཙཱ་བ་དགེ་སློང་བྲན་ཀ་མུ་རི་ཏ་དང་། བྷ་མན་འཛུ་ཤྲི་ཝར་མས་བསྒྱུར་ཞིང་ཞུས་ཏེ་གཏན་ལ་ཕབ་པའོ། །དགེའོ།། །། སྒྱུ་འཕྲུལ་ཞི་བ་རིན་ཆེན་དྲྭ་བའི་མཆན་འགྲེལ་མི་བསྐྱོད་རྡོ་རྗེའི་དགོངས་རྒྱན། ཆོས་ཀྱི་བློ་གྲོས།སྒྱུ་འཕྲུལ་ཞི་བ་རིན་ཆེན་དྲྭ་བའི་མཆན་འགྲེལ་མི་བསྐྱོད་རྡོ་རྗེའི་དགོངས་རྒྱན་ཅེས་བྱ་བ་བཞུགས་སོ། །ན་མོ་གུ་རུ་བཛྲ་ས་ཏྭ་ཡེ། གཉིས་སུ་མི་ཕྱེད་རྡོ་རྗེའི་ཐུགས་ནི་ནམ་མཁའི་དབྱིངས་ལྟར་རབ་ཡངས་ཤིང་། །རྒྱ་མཚོ་ལྟ་བུར་ཟབ་པའི་གསུང་གིས་ཆོས་ཀྱི་སྒྲ་དབྱངས་རྟག་ཏུ་སྒྲོགས། །སྒྱུ་འཕྲུལ་བདེ་ཆེན་རྡོ་རྗེའི་སྐུ་ནི་ལོངས་སྤྱོད་ཡོངས་རྫོགས་འཁོར་ལོར་ཤར། །དཔལ་ལྡན་བླ་མ་རིགས་ཀུན་ཁྱབ་བདག་རྡོ་རྗེ་སེམས་དཔའི་ཞབས་ལ་འདུད། །ལུང་བསྟན་རྡོ་རྗེ་ཀུ་ཀུ་རཱ་ཛ་དང་། །སྒེག་རྡོར་སངས་རྒྱས་གསང་བ་བི་མ་ལ། །གཉགས་ལོ་སོ་ཟུར་གནུབས་དང་སྒྲོ་ཕུག་སོགས། །སྒྱུ་འཕྲུལ་བརྒྱུད་པའི་བླ་མ་རྣམས་ལ་འདུད། །ཀུན་བཟང་རྡོ་རྗེ་འཆང་གི་སྔགས་རྒྱུད་ཆེའི། །ཡང་རྩེ་གཉིས་མེད་སྒྱུ་འཕྲུལ་དྲྭ་བ་ཡི། །བསྐྱེད་རིམ་རྩ་བ་ཞི་བ་རིན་ཕྲེང་གི། །མཆན་འགྲེལ་རིག་འཛིན་གྲུབ་པའི་གསུང་བཞིན་དབྱེ། །དེ་ལ་ཏནྟྲ་ཆེན་པོ་སྡེ་བཅོ་བརྒྱད་ཀྱི་རྩ་བའམ་སྤྱི་རྒྱུད་སྒྱུ་འཕྲུལ་དྲྭ་བ་རྡོ་རྗེ་སེམས་དཔའ་གསང་བའི་སྙིང་པོའི་དཀྱིལ་འཁོར་གྱི་ལྷ་ཡི་མངོན་པར་རྟོགས་པ་ཞི་ཁྲོ་གཉིས་ལས་བདེ་གཤེགས་ཞི་བའི་ལྷ་སྔགས་རྒྱས་པར་བསྟན་པའི་ཞི་བ་རིན་ཆེན་དྲྭ་བ་ཞེས་པ་འདི་ཉིད་གང་ཞིག་རྡོ་རྗེ་ཐེག་པའི་བསྟན་པའི་ཤིང་རྟ་འཕགས་ཡུལ་པཎ་གྲུབ་རྒྱ་མཚོའི་གཙུག་རྒྱན་སློབ་དཔོན་ཆེན་པོ་སངས་རྒྱས་གསང་བས་མཛད་པ་འདི་ལ་གསུམ་སྟེ། ཀླད་དང་། གཞུང་དང་། མཇུག་གོ། །དང་པོ་ཀླད་ལ་གསུམ་སྟེ། མཚན་དང་། ཕྱག་དང་། དམ་བཅའ་བའོ། །དང་པོ་ནི། ཞི་བ་རིན་ཆེན་དྲྭ་བ་ཞེས་བྱ་སྟེ། ཐུགས་ཆོས་ཉིད་ཀྱི་ངང་ལས་དམིགས་པ་མེད་པའི་སྙིང་རྗེ་ཆེན་པོས་རྟག་ཏུ་ཞི་བ་དེ་ཡི་ངང་ལས་རྡོ་རྗེ་སེམས་དཔའ་མི་བསྐྱོད་རྒྱལ་པོ་ལ་སོགས་པ་ལོངས་སྤྱོད་རྫོགས་པ་ཆེན་པོ་དང་སྤྲུལ་པའི་སྐུར་སྣང་བ་དེ་ནི་སྲིད་དང་ཞི་བར་ནོར་བུ་རིན་པོ་ཆེ་ལྟར་འབྱུང་བར་དཀོན་པ་སོགས་ཡོན་ཏན་དྲུག་དང་ལྡན་ཞིང་འཁོར་འདས་ཀྱི་དཔལ་ཡོན་ཐམས་ཅད་དེ་ལས་འབྱུང་བ་དང་། དེའང་ཕྱོགས་དུས་རེས་འགའ་བ་མ་ཡིན་པར་བརྟན་གཡོ་ཀུན་ལ་ཁྱབ་ཅིང་འབྲེལ་བས་དྲྭ་བའམ་ཡང་ན་ཐབས་དང་ཤེས་རབ་གཉིས་སུ་མེད་པའི་དོན་གྱིས་ན་དྲྭ་བ་ཞེས་གསུངས་ལ་ཞེས་བྱ་བ་ནི་མཚན་དེ་སྐད་འདོགས་པ་དང་། དེ་ལྟར་མཚན་བསྟན་པའི་དགོས་པ་ནི་དབང་པོ་རབ་ཀྱིས་མཚན་བསྟན་པ་ཙམ་གྱིས་དབུ་ཞབས་ཀྱི་དོན་ཐམས་ཅད་ཁོང་དུ་ཆུད་པ་དང་། འབྲིང་ལ་མཚན་གྱི་དོན་བཤད་པས་དོན་གྱི་ཕྱོགས་ཙམ་ཁོང་དུ་ཆུད་པ་དང་། ཐ་མས་ཀྱང་སྨན་ལ་ཁ་བྱང་གདགས་པ་ལྟར་གླེགས་བམ་བཙལ་སླ་བའི་དགོས་པ་ཡོད་དོ། །གཉིས་པ་མཆོད་པར་བརྗོད་པའི་ཕྱག་ལ་ནི་གསུམ་སྟེ། དགོས་པའི་དོན། བསྡུས་པའི་དོན། ཚིག་གི་དོན་ནོ། །དང་པོ་དགོས་པའི་དོན་ལ་གསུམ་སྟེ། མན་ངག་རྩོམ་པ་ལ་བར་ཆད་ཀྱི་བགེགས་ཞི་བར་བྱ་བའི་དགོས་པ་དང་། ཡ་རབས་དམ་པ་དང་ཚུལ་བསྟུན་པའི་སྒོ་ནས་དད་པའི་རྒྱུར་འགྱུར་བའི་དགོས་པ་དང་། ཡི་དམ་གྱི་ལྷ་མི་གཡེལ་བའི་དགོས་པ་ཡོད་པའོ། །གཉིས་པ་བསྡུས་པའི་དོན་ནི་བཞི་སྟེ། ཡུལ་གང་ལ་འཚལ། གང་ཟག་གང་གིས་འཚལ། ཚུལ་ལམ་ཐབས་ཇི་ལྟར་འཚལ། འཚལ་བ་ལ་དོན་ཆེད་ཅི་ཡོད་དོ། །དེ་ལ་ཡུལ་གང་ལ་ཞེ་ན། དཔལ་ཀུན་ཏུ་བཟང་པོ་རྒྱལ་བ་དྲུག་པ་ལའོ། །གང་ཟག་གང་གིས་ན་སྔོན་བྱུང་དུ་སློབ་དཔོན་སངས་རྒྱས་གསང་བའོ། །རྗེས་འཇུག་ཏུ་བཤད་པ་པོ་རྣམས་ཀྱིས་སོ། །ཚུལ་ལམ་ཐབས་ནི་ལུས་གུས་པ་དང་ངག་སྙན་པ་དང་སེམས་དད་པ་དང་བཅས་ནས་བཙལ་བའོ། །བཙལ་བའི་དགོས་ཆེད་ནི་དོན་གྱི་ཕྱག་བཙལ་བས་རིག་པ་ཉིད་ཀུན་ཏུ་བཟང་པོར་རྟོགས་པའོ། །ཚིག་གི་ཕྱག་བཙལ་བས་མཆོག་དང་ཐུན་མོང་གི་རྒྱུར་འགྱུར་བའི་དོན་ནོ། །གསུམ་པ་ཚིག་གི་དོན་ནི། དེ་བཞིན་གཤེགས་པ་ཀུན་གྱི་བདག །ཡེ་ཤེས་རྒྱ་མཚོ་རབ་ཟབ་ཐུགས། །དཀྱིལ་འཁོར་ཡིད་བཞིན་འབྱུང་བའི་གཏེར། །རྡོ་རྗེ་ཡིད་ལ་ཕྱག་འཚལ་ཏེ། །ཞེས་སོ། །འདི་ལ་གཉིས་ཏེ་རྒྱུད་དང་དཀྱིལ་འཁོར་གྱི་བདག་པོ་ངོས་བཟུང་བ་དང་། དེའི་ཆེ་བ་ལ་སྐུ་ལྔ་ལྷུན་གྲུབ་ཏུ་བསྟན་པའོ། །དང་པོ་རྒྱུད་དང་དཀྱིལ་འཁོར་གྱི་བདག་པོ་ངོས་བཟུང་བ་ལ་གསུམ་སྟེ། རང་བཞིན་དང་། དགོངས་སྤྱོད་དང་། ངོ་བོའོ། །དེ་དག་ནི་རིམ་པ་བཞིན་དུ་ཚིག་རྐང་སྔ་མ་གཅིག་དང་། དེ་ནས་རྐང་པ་གཉིས་དང་། ཕྱི་མ་ནི་ཚིག་རྐང་བཞི་པས་སྟོན་ལ། གཉིས་པ་དེའི་ཆེ་བ་སྐུ་ལྔ་ནི་ཚིག་རྐང་དང་པོས་ཆོས་སྐུ་དང་། ཡེ་ཤེས་རྒྱ་མཚོ་སོགས་ཀྱིས་ལོངས་སྐུ་དང་། ཐུགས་ཀྱིས་མངོན་པར་བྱང་ཆུབ་པའི་སྐུ་དང་། གཏེར་གྱིས་མི་འགྱུར་རྡོ་རྗེའི་སྐུ་དང་། དཀྱིལ་འཁོར་གྱིས་སྤྲུལ་པའི་སྐུ་སྟོན་པའོ། །ཚིག་དོན་དངོས་ནི། དེ་མ་ནོར་བཞིན་མ་བཅོས། དེའི་ངང་དུ་གཤེགས་པ་ནི་གཉིས་ཏེ། གྲོལ་ལམ་དུ་གཤེགས་པ་དང་། ཐབས་ལམ་དུ་གཤེགས་པའོ། །གྲོལ་ལམ་ནི་རང་བྱུང་ཡེ་ཤེས་སྐུ་ཉམས་སུ་བསྟར་བའོ། །ཐབས་ལམ་དུ་གཤེགས་པ་ནི་ལྷན་ཅིག་སྐྱེས་པའི་ཡེ་ཤེས་སྐུ་ཉམས་སུ་བསྟར་བའོ། །ཀུན་གྱི་ནི་དེ་བཞིན་གཤེགས་པ་ཐམས་ཅད་ཕྱིར་བསྡུས་པའོ། །བདག་ནི་ཆོས་ཉིད་ཡེ་ནས་མ་བཅོས་མ་བསླད་པའི་དོན་ཇི་ལྟ་བར་རང་གིས་མངོན་སུམ་དུ་བྱས་པ་ནི་དཔལ་ཀུན་ཏུ་བཟང་པོ་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་རྒྱལ་བ་དྲུག་པ་སྟེ། དངོས་སུ་མཉམ་པ་ཉིད་ཀྱི་ཆོས་ཀྱི་སྐུའི་རང་བཞིན་དུ་གནས་པའོ། །ཡེ་ཤེས་ནི་གཉིས་ཏེ། གྲོལ་ལམ་རང་བྱུང་གི་ཡེ་ཤེས་ཆེན་པོ་དང་། ཐབས་ལམ་ལྷན་ཅིག་སྐྱེས་པའི་ཡེ་ཤེས་སོ། །དེ་གཉིས་ཇི་ལྟར་བར་རྟོགས་པས་ན་ཡེ་ཤེས་སོ། །དེའི་དཔེ་ནི་རྒྱ་མཚོ་སྟེ་གཏིང་དཔག་པར་དཀའ་བས་ཟབ་པའོ། །དེ་དང་ཀུན་བཟང་གི་ཐུགས་འདྲ་བས་ན་ཐུགས་སོ། །དེ་བས་ན་དེ་བཞིན་གཤེགས་པའི་ཐུགས་རང་བྱུང་གི་ཡེ་ཤེས་ནི་རབ་ཏུ་ཟབ་པའི་ཕྱིར་གདུལ་བྱས་དཔག་པར་དཀའ་བ་ནི་དཔེ་རྒྱ་མཚོ་ལྟ་བུའོ། དེ་ནི་ལོངས་སྤྱོད་རྫོགས་སྐུ་འབྱུང་ངོ་། །ཐུགས་ཡང་དག་པའི་ཡེ་ཤེས་དེ་ལས་མ་གཡོས་པར་ཞི་བ་དང་ཁྲོ་བོའི་དཀྱིལ་འཁོར་ཐམས་ཅད་མ་ལུས་མ་བཙལ་བར་གདུལ་བྱ་ཡི་སྣང་བ་ལ་འབྱུང་བ་ནི། དཔེར་ན་ཡིད་བཞིན་གྱི་ནོར་བུ་རིན་པོ་ཆེའི་གཏེར་དང་འདྲའོ། །དེ་ཡང་ཟད་མི་ཤེས་ཤིང་འདོད་དགུར་འབྱུང་བ་ནི་སྤྲུལ་པའི་སྐུའོ། །ཆོས་ཉིད་འདུས་མ་བྱས་པ་ཡིན་པས་ཐམས་ཅད་དུ་སྣང་བ་ནི་མ་བཙལ་བའི་ཕྱིར་ན་རྡོ་རྗེ་ཡིད་དོ། །དེ་ཡང་རྡོ་རྗེ་ནི་དཔལ་རྡོ་རྗེ་སེམས་དཔའ་སྟེ་དལ་གྱི་གཙོ་བོའོ། །ཡིད་ནི་ཀུན་ཏུ་བཟང་པོ་སྟེ་རྒྱུད་ཀྱི་སྟོན་པའོ། །ལ་ནི་གཞི་སྟེ་དེ་གཉིས་ཡུལ་དུ་བྱས་པའོ། །ཕྱག་ནི་དོན་དང་ཚིག་ཏུ་བཙལ་བའོ། །སྟེ་ནི་ལྷག་མ་ཅན་གྱི་ཚིག་སྟེ། རྒྱུད་ཀྱི་དོན་བསྡུས་སྙིང་པོ་ཙམ་ཞིག་བཤད་པར་དམ་བཅའ་བ་དང་འབྲེལ་བ་ཡིན་ནོ། །གསུམ་པ་བཤད་པར་དམ་བཅའ་བ་ལ་གསུམ་སྟེ། དགོས་པའི་དོན་དང་། བསྡུས་པའི་དོན་དང་། ཚིག་གི་དོན་ནོ། །དགོས་པའི་དོན་ནི་དམ་བཅས་པས་གདུལ་བྱ་ཡལ་བར་མི་འདོར་བ་དང་། བསྟན་ཆོས་རྩོམ་པ་མཐར་ཕྱིན་པའི་དགོས་པ་ཡོད་དོ། །བསྡུས་པའི་དོན་ནི་གང་གིས་བཤད། གང་བཤད། ཚུལ་ལམ་ཐབས་ཇི་ལྟར་བཤད། བཤད་པའི་དགོས་པ་ཅི་ཡོད་པའོ། །དེ་ཡང་གང་གིས་བཤད་ན་སངས་རྒྱས་གསང་བས་བཤད་དོ། །གང་བཤད་ན་ཞི་བ་རིན་ཆེན་དྲྭ་བའོ། །ཚུལ་ལམ་ཐབས་ནི་ཕྱག་འཚལ་ནས་བཤད་པར་དམ་བཅའ་བའོ། །དགོས་པ་ནི་བདེ་བར་གཤེགས་པའི་སྙིང་པོ་མ་རིག་པར་རང་གི་རྣམ་རྟོག་གིས་བཅིངས་པའི་སེམས་ཅན་རྣམས་རང་བྱུང་གི་ཡེ་ཤེས་ཆེན་པོ་རྒྱུད་ལ་བསྐྱེད་པའི་དགོས་པ་ཡོད། ཚིག་གི་དོན་ནི། ཨེ་མ་ཧོ་བདེ་གཤེགས་སྙིང་པོ་ལས། རང་གི་རྣམ་རྟོག་ལས་ཀྱིས་བཅིངས། །རང་བྱུང་ཡེ་ཤེས་བསྐྱེད་པའི་ཕྱིར། །རྒྱུད་ཀྱི་དོན་བསྡུས་སྙིང་པོ་བརྩམ། །ཞེས་པ་སྟེ། ཨེ་མའོ་ནི་ངོམ་ཞིང་ངོ་མཚར་བ་སྟེ་ངོ་གང་ལ་མཚར་ན་སེམས་ཅན་གྱི་སེམས་ཉིད་བདེ་བར་གཤེགས་པའི་སྙིང་པོར་གནས་པ་དེ་མ་རྟོགས་པར་གནས་པ་དེ་ལ་ངོ་མཚར་བའོ། །དེ་བས་ན་ཁམས་གསུམ་ན་གནས་པའི་སེམས་ཅན་ལ་སྙིང་པོ་བྱང་ཆུབ་ཀྱི་སེམས་རང་ལ་རང་ཆས་སུ་ཡོད་ཀྱང་ངེས་པའི་ཤེས་པ་མ་སྐྱེས་པའི་ཕྱིར་དེ་ལས་འཁྲུལ་པ་ནི་ངོ་མཚར་ཏེ། སྙིང་པོ་བྱང་ཆུབ་ཀྱི་སེམས་མ་རྟོགས་པ་ཉིད་འཁོར་བར་བརྒྱུད་པའི་རྒྱུར་གྱུར་པའོ། །ཞེས་འདིས་ནི་གཞི་རིག་པའི་གནས་ཐབས་བསྟན་ལ། བརྒྱུད་པའི་རྒྱུར་གྱུར་པ་དེ་ཁོ་ན་རང་གི་རྣམ་རྟོག་སྟེ་ལྷན་ཅིག་སྐྱེས་པའི་མ་རིག་པ་ཞེས་ཀྱང་བྱའོ། །རྒྱུ་དེ་ལ་རྐྱེན་ནི་ལས་དང་ཉོན་མོངས་པ་གཉིས་ཀྱི་དབང་གིས་རང་གི་རྒྱུད་བཅིངས་ནས་འབྲས་བུ་འགྲོ་བ་རིགས་དྲུག་གི་རྟོག་པས་བཅིངས་ཏེ་ཐར་པའི་དུས་མེད་དོ་ཞེས་ལམ་རྐྱེན་གྱིས་འཁྲུལ་པ་བསྟན། འགྲོ་དྲུག་ནས་ཐར་དུས་མེད་པ་དེ་ལྟ་བུ་ལ་རང་བྱུང་ཡེ་ཤེས་ཀྱི་སྣང་བ་སྔར་མ་སྐྱེས་པ་དེ་བསྐྱེད་པ་སྟེ་བསྐྱེད་པའི་ཕྱིར་སློབ་དཔོན་སངས་རྒྱས་གསང་བས་རྒྱུད་གསང་བ་སྙིང་པོའི་དོན་བསྡུས་ནས་རྩོམ་པའོ་ཞེས་འབྲས་བུའི་ཡེ་ཤེས་བསྐྱེད་ཐབས་བསྟན་ལ། ཇི་ལྟར་རྩོམ་ན་རྒྱུད་ཀྱི་དོན་ཞེས་སྦྱར་ཏེ་རྒྱུད་ནི་དཔལ་གསང་བའི་སྙིང་པོ་ལ་དེ་ཉིད་ཀྱི་དོན་ནི་བདུན་ཏེ། ལྟ་བ་དང་། སྤྱོད་པ་དང་། དབང་དང་། དམ་ཚིག་དང་། འཕྲིན་ལས་དང་། སྒྲུབ་པ་དང་། དལ་དང་། བདུན་གྱི་དོན་མན་ངག་འདིར་བསྡུས་པས་ན་མན་ངག་གི་སྙིང་པོ་ལྟ་བུའོ། །དེ་བས་ན་རྒྱུད་དོན་གྱི་མན་ངག་འདིར་བསྡུས་ནས་སྙིང་པོ་བརྩམས་སོ་ཞེས་རང་བཟོ་སྤངས་པའི་ཕྱིར་བསྡུས་པའི་རྒྱུད་ཀྱི་ཁུངས་བསྟན་པའོ། །གཉིས་པ་གཞུང་གི་དོན་ལ་གསུམ་སྟེ། དང་པོ་སྔོན་དུ་བྱ་བའི་ལས་དང་། བར་དུ་ཏིང་ངེ་འཛིན་སྒོམ་པ་དང་། ཐ་མར་ཚོགས་སྒྲུབ་པའོ། །དང་པོ་སྔོན་དུ་བྱ་བའི་ལས་ལ་དྲུག་སྟེ། སྦྱིན་པའི་སྣོད་དང་། སྣོད་ངན་ལ་བྱིན་པའི་སྐྱོན་དང་། མཉམ་པའི་དམ་ཚིག་བསྲུང་བ་དང་། དངོས་གྲུབ་སེམས་ཡིན་པས་ལོགས་ན་མེད་པ་དང་། མཉམ་བཞག་བསྒོམས་པ་ལས་འབྲས་བུ་འབྱུང་བ་དཔེས་བསྟན་པ་དང་། བསྒོམ་པའི་གནས་བསྟན་པའོ། །དང་པོ་ནི། ཐོས་བསམ་བསྒོམས་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་བཟུང་། །སྣོད་ལྡན་ངང་ཚུལ་བཟང་ལ་བསྟན། །ལུས་དང་ལོངས་སྤྱོད་གཏོང་ལ་སྦྱིན། །ཞེས་གསུངས་ཏེ་གཞི་རིག་པའི་གནས་ཐབས་བསྟན་པ་ནི་སོ་སོ་སྐྱེ་བོ་རིག་པའི་རྩལ་སྦྱོང་ན་ཤེས་རབ་རྣམ་པ་གསུང་ནི་སྒྲ་དང་དོན་ཡུལ་དུ་བྱས་པ་ལས་སྐྱེ་བ་ཡིན་ཏེ། དེ་ཡང་སྒྲ་ཡུལ་དུ་བྱས་པ་ལས་ཐོས་པའི་ཤེས་རབ་སྐྱེ་བ་དང་། སྒྲ་དོན་གཉིས་ཀ་ཡུལ་དུ་བྱས་པ་ལས་བསམ་པའི་ཤེས་རབ་སྐྱེ་བ་དང་། སྒྲ་སྤངས་ནས་དོན་འབའ་ཞིག་ཡུལ་དུ་བྱས་པ་ལས་སྒོོམ་པའི་ཤེས་རབ་སྐྱེའོ། །དེའི་དུས་སུ་སྣོད་ཀྱི་སྐྱོན་བཞི་སྤངས་ཏེ། སྣོད་ཁ་སྦུབ་དང་། གཞོག་རལ་དང་། ཞབས་རྡོལ་དང་། དུག་ཅན་ནོ། །དེ་བས་ན་དང་པོ་ཐོས་པའི་ཤེས་རབ། བར་དུ་བསམ་པའི་ཤེས་རབ། ཐ་མར་སྒོམ་པའི་ཤེས་རབ་སྟེ་ཐོས་བསམ་སྒོམ་གསུམ་ལ་བློ་རབ་ཏུ་སྦྱངས་པའི་ཞེས་པའོ། །སྔོན་དུ་ཐེག་པ་འོག་མ་ལ་བློ་སྦྱང་བར་བསྟན་པ་ནི་དེ་ལྟར་ཤེས་རབ་གསུ མ་གྱིས་ཐུན་མོང་གི་ཐེག་པ་ལ་ཚེ་སྔ་མའམ་སྔོན་དུ་བློ་སྦྱངས་བས་དུས་ད་ལྟ་ཤེས་རབ་ཀྱི་མིག་དང་ལྡན་པའམ་བློ་མཆོག་ཏུ་གྱུར་པ་དེ་ལྟ་བུའི་གང་ཟག་རྣམས་ཀྱིས་འདི་ཟུང་ཞིག །དེ་མ་ཡིན་པའི་གཞན་སྦྱངས་པ་སྔོན་དུ་མ་སོང་བ་དང་ཤེས་རབ་དང་མི་ལྡན་པ་རྣམས་ཀྱིས་འདིའི་དོན་མི་རྟོགས་པའོ། །དེ་བས་ན་སྣོད་ལྡན་ངང་ཚུལ་བཟང་ལ་བསྟན་ཞེས་བྱའོ། །དེ་རྣམས་ནི་སྦྱངས་པའི་ཡོན་ཏན་ནོ། །སྦྱངས་པ་ཅན་གྱི་གང་ཟག་དེ་ཉིད་སྣོད་དང་ལྡན་པར་བསྟན་པ་ནི། དེ་ལྟར་སྣོད་དང་ལྡན་པར་གྱུར་པ་དེ་ནི་ངང་རིང་བ་ཆུ་བོའི་རྒྱུན་ལྟ་བུ་སྟེ་བཟོད་པ་ཁྱད་པར་ཅན་ཐོབ་པ་དང་། ཚུལ་ཞི་བ་དགེ་སློང་གསར་པ་ལྟ་བུ་སྟེ་ཐོ་ཅོ་དང་བབ་ཅོལ་གྱི་སྤྱོད་པ་སྤངས་པ་དང་། རང་བཞིན་གྱིས་བཟང་བ་ཉི་མ་ལྟ་བུ་སྟེ་སེམས་ཅན་ལ་སྙིང་རྗེ་ཆེན་པོ་དང་ལྡན་པས་ཕྱོགས་སུ་འཛིན་པ་ཐམས་ཅད་སྤངས་པ་དང་། རིགས་བརྟན་པས་རི་བོ་ལྟ་བུ་སྟེ་གསང་བའི་ཐེག་པའི་སྒོར་ཞུགས་ནས་ཕྱིས་ཐེག་པ་དམན་པ་ལ་མི་ལྡོག་པ་དེ་ལྟ་བུ་ལ་ཆོས་བསྟན་པར་བྱའོ། །དེ་རྣམས་ནི་རང་བཞིན་གྱི་ཡོན་ཏན་ཡིན་ནོ། །སྤྱིར་ན་བླ་མ་མཉེས་པའི་ཡོ་བྱད་གསུམ་སྟེ། རབ་ཤེས་རབ་ཀྱིས་མཉེས་པ་དང་། འབྲིང་ལུས་ཀྱིས་མཉེས་པ་དང་། ཐ་མ་ལོངས་སྤྱོད་ཀྱིས་མཉེས་པའོ། །རབ་ནི་ཐེག་པ་འོག་མ་པ་ལ་བློ་སྦྱངས་པས་ཤེས་རབ་ཀྱི་སྤྱན་དང་ལྡན་པའོ། །འབྲིང་ནི་བླ་མ་ལ་ལུས་སྲོག་འབུལ་བའོ། །ཐ་མ་ནི་བླ་མ་ལ་ནོར་འབུལ་བའོ། །མདོར་ན་མཆེད་ལྕམ་དང་སློབ་དཔོན་གྱི་དོན་དུ་རང་གི་ལུས་དང་ལོངས་སྤྱོད་གཏོང་ནུས་པ་སྟེ། དེ་ལྟ་བུའི་གང་ཟག་ལ་མན་ངག་འདི་སྦྱིན་ནོ། །དེས་ཀྱང་བླ་མ་མཉེས་པའི་ཡོན་འབུལ་ལོ། །གཉིས་པ་ནི། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་བརྩོན་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་གསུངས་ཏེ་འདིར་ཚིག་རྐང་དང་པོས་དབང་སྒོ་ཡོན་གྱིས་འབྱེད་པ་དང་། གཉིས་པས་ཆོས་སྒོ་དབང་གིས་འབྱེད་པ་དང་། གསུམ་པས་དབང་རིམ་པར་ནོད་པ་དང་། བཞི་པས་དེ་རྣམས་མ་བྱས་ན་སྐྱོན་ཆེ་བར་བསྟན་པ་རྣམས་རིམ་པ་བཞིན་དུ་ཕྱིར་སློབ་དཔོན་ལ་དྲུག་སྟེ་སྤྱིའི་སློབ་དཔོན་དང་། འདྲེན་པའི་སློབ་དཔོན་དང་། དབང་བསྐུར་བའི་སློབ་དཔོན་དང་། །ཉམས་ཆག་སྐོང་བའི་སློབ་དཔོན་དང་། །ཤེས་རྒྱུད་འགྲོལ་བའི་སློབ་དཔོན་དང་། །མན་ངག་ལུང་གི་སློབ་དཔོན་ལས་འདིར་རྡོ་རྗེ་སློབ་དཔོན་དེ་ལ་རྡོ་རྗེ་སློབ་དཔོན་གྱི་ལུས་ངག་ཡིད་གསུམ་རྫས་དང་ཡོ་བྱད་ཤེས་རབ་རྣམ་པ་གསུམ་གྱིས་མཉེས་པར་མ་བྱས་ཤིང་། དབང་རྣམས་ནི་དབང་བཅོ་བརྒྱད་དེ་ཕྱིའི་དབང་བཅུ་ནི་ཕན་དབང་དང་། ནང་དབང་ནི་ནུས་པའི་དབང་ལྔ་དང་། གསང་བའི་དབང་ནི་ཟབ་མོའི་དབང་གསུམ་སྟེ་དབང་བཅོ་བརྒྱད་པོ་རིམ་པར་ཐོབ་པར་མ་བྱས་ན་དབང་མ་ཐོབ་པར་གསང་བ་བླ་ན་མེད་པའི་དོན་ལ་ཉན་པ་དང་འཆད་པ་དང་འཕྲིན་ལས་དང་བསྒོམ་བསྒྲུབ་དང་། གཞན་གྱི་སློབ་དཔོན་བྱེད་པ་ལ་སོགས་པར་བརྩོན་པ་རྣམས་ནི་གསང་སྔགས་ལ་རས་ཆོད་དང་གཟུ་ལུམས་སུ་འགྲོ་བས་དབང་ཐོབ་པ་ཅེས་ཀྱང་རབ་ཏུ་གཅེས་པར་གདམས་པའོ། །གཞན་དུ་དང་པོར་བླ་མ་མཉེས་པར་མ་བྱས། བར་དུ་དབང་མ་མནོས། ཐ་མར་རས་ཆོད་དང་གཟུ་ལུམ་སུ་བྱས་པས་ནི་ཚེ་འདིར་བྱས་པ་རྣམས་ནི་འབྲས་བུ་མེད་ཅིང་ཕྱི་མ་ལ་བྱས་པ་ཆུད་ཟོས་ཏེ་བཀའ་བཞིན་དུ་མ་སྤྱད་པས་འབྲས་བུ་ངན་སོང་དུ་སྐྱེ་ཞིང་བརླག་པར་འགྱུར་བས་ན་བདེ་གཤེགས་སྙིང་པོ་འཁོར་བར་གནས་པར་འགྱུར་བའོ། །དེ་བས་ན་ཤིན་ཏུ་སྐྱོན་ཆེ་བར་བསྟན་པའོ། །དེ་ལྟར་སྐྱོན་ཆེ་བ་དེ་བས་ན་འབྲས་བུ་ཆོས་སྐུ་ཐོབ་བར་འདོད་རྐྱེན་བསྒོམ་བསྒྲུབ་ལ་རགས་ལས། །དེ་ཆོས་སྒོ་ལ་རགས་ལས་ཆོས་སྒོ་དབང་གིས་འབྱེད་དབང་སྒོ་ཡོན་གྱིས་བསླུ་བས་ན། དང་པོ་སློབ་དཔོན་མཉེས་པར་བྱ་དེ་མཉེས་ན་དབང་ཐོབ་དབང་ཐོབ་ནས་ཉན་བཤད་མཐར་དབྱུང་དེ་མཐར་ཕྱིན་པས་འབྲས་བུ་མཆོག་དང་ཐུན་མོང་འགྲུབ་པར་འགྱུར་རོ། །དེས་ན། སློབ་དཔོན་མཉེས་པར་རབ་བྱས་ནས། །དབང་རྣམས་ཐོབ་པར་གྱུར་པ་ནི། །ཉན་པ་ལ་སོགས་བརྩམས་པ་རྣམས། །མཆོག་དང་ཐུན་མོང་འབྲས་བུ་འགྲུབ། ། ཅེས་སོ། །གསུམ་པ་ནི། མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་བསྔགས། །མཉམ་རྫོགས་ཆེན་པོ་ཐོབ་པར་འགྱུར། །འདས་ན་སངས་རྒྱས་མ་ཡིན་ནོ། །ཞེས་པས་བསྟན། མཉམ་པའི་དོན་ལ་གསུམ་སྟེ་དོན་དམ་པར་མ་སྐྱེས་པར་མཉམ་པ་དང་ཀུན་རྫོབ་སྒྱུ་མར་མཉམ་པ་དང་དོན་དམ་ཀུན་རྫོབ་དབྱེར་མེད་དུ་མཉམ་པའོ། །དང་པོ་ནི་ཆོས་ཐམས་ཅད་ཡེ་ཤེས་ཀྱི་རང་བཞིན་ཏེ་ཐོག་མ་ནས་ཆོས་ཐམས་ཅད་མ་སྐྱེས་པར་མཉམ་པའོ། །གཉིས་པ་ནི་ཀུན་རྫོབ་ཏུ་ཕུང་པོ་ལྔ་རིགས་ལྔ་མཉམ། འབྱུང་བ་ལྔ་ཡུམ་ལྔར་མཉམ། རྣམ་པར་ཤེས་པའི་ཚོགས་བརྒྱད་སེམས་དཔའ་སེམས་མར་མཉམ། ལུས་ཀྱི་རེག་བྱ་བཞི་སྒོ་བར་མཉམ། ཉོན་མོངས་པ་དྲུག་ཐུབ་པར་མཉམ་པའོ། །གསུམ་པ་ནི་ཀུན་རྫོབ་དོན་དམ་ངོ་བོ་གཅིག་པར་མཉམ་པར་སྦྱོར་བ་སྟེ་ལྟ་བ་བདེན་པ་དབྱེར་མེད། རིག་པ་སྤྱོད་ཡུལ་དང་བྲལ་བ། སྐོར་བདུན་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་ནས་གནས་སོ། །དེ་ཡིས་མཉམ་པའི་ངོ་བོ་བསྟན་པའོ། །དེ་ལྟར་ཆོས་ཐམས་ཅད་མཉམ་པ་ཉིད་དུ་རྟོགས་པའི་རང་བཞིན་ལས་མི་འདའ་བར་དུས་གསུམ་དུ་གནས་ན་རང་བཞིན་ལྟ་བའི་དམ་ཚིག་སྟེ་འབྲས་བུ་དེ་ཉིད་མངོན་དུ་བྱེད་པར་བསྔགས་སོ། །དེ་ཡང་གསལ་བཀྲ་ལས། དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །ཞེས་སོ། །དེའི་མཉམ་པའི་དགོས་པ་བསྟན་ནོ། །དོན་དམ་སྐྱེ་མེད་དུ་མཉམ་ཀུན་རྫོབ་སྒྱུ་མར་མཉམ་དེ་གཉིས་དབྱེར་མེད་དུ་མཉམ་པར་རྫོགས་པ་དེ་ལ་ནི་ཆེན་པོ་ཞེས་བྱ་སྟེ། དེ་ལྟ་བུའི་མཉམ་རྫོགས་ཆེན་པོའི་ལྟ་བ་ལ་གནས་ན་རྟེན་གྱི་གང་ཟག་གིས་ཚེ་འདི་ཉིད་ལ་མངོན་པར་རྫོགས་པར་སངས་རྒྱས་པ་ཐོབ་པར་འགྱུར་རོ་ཞེས་མཉམ་པའི་ཡོན་ཏན་བསྟན་པའོ། །དེ་ལྟ་བུའི་དམ་ཚིག་ལས་འདས་ན་ཡང་དག་པར་རྫོགས་པའི་སངས་རྒྱས་མ་ཡིན་ནོ་ཞེས་བྱ་སྟེ་ཆོས་ཐམས་ཅད་མཉམ་པ་ཆེན་པོར་མ་ཤེས་ཏེ་ཐེག་པ་འོག་མ་ལྟར་དོན་དམ་ཀུན་རྫོབ་ཐ་དད་དུ་མར་འཛིན་པ་ནི་དེ་ལས་འདས་པའོ། །དེ་བས་ན་ཐ་དད་ཀྱི་གཉིས་འཛིན་གྱིས་སངས་རྒྱས་ཐོབ་པར་མི་འགྱུར་རོ་ཞེས་མཉམ་པ་མ་རྟོགས་པའི་སྐྱོན་བསྟན་པའོ། །དེས་ན་མཉམ་པ་ཆེན་པོའི་ལྟ་བས་ཐག་ཆོད་པ་བྱ་བ་གལ་ཆེའོ། །བཞི་པ་ནི། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྟོགས་ན་སངས་རྒྱས་པས། །སངས་རྒྱས་གཞན་དུ་མ་ཚོལ་ཅིག །ཅེས་གསུངས། དེ་ལ་གནས་གང་ནས་བཙལ་ན་དུས་དང་ཕྱོགས་ཀུན་ནས་ཏེ། དེ་ཡང་དུས་བཞི་ནི་རྒྱུ་རྐྱེན་འཚོགས་ནས་འབྲས་བུ་སྤྱད་ཟིན་པ་ནི་འདས་པའི་དུས། རྒྱུ་རྐྱེན་འཚོགས་པ་ལས་འབྲས་བུ་མ་སྤྱད་པ་ནི་ད་ལྟ་བ། རྒྱུ་ཙམ་ཡོད་པ་ནི་འབྱུང་བར་མ་ངེས་པའི་དུས། རྒྱུ་རྐྱེན་གང་ཡང་མ་འཚོགས་པ་ནི་མ་འོངས་པའི་དུས་སོ། །ཕྱོགས་བཅུ་ནི་གནས་པ་རང་བཞིན་གྱི་ཕྱོགས་བཅུ་དང་། སྒྲུབ་པ་པོ་དམིགས་པས་བཟུང་བའི་ཕྱོགས་བཅུའོ། །དེ་ལྟར་ཕྱོགས་དང་དུས་ཀྱིས་བསྡུས་པ་གང་ནས་ཀྱང་ངོ་བོ་གང་བཙལ་ན་རྫོགས་པའི་སངས་རྒྱས་ཏེ་དེ་ཉིད་གཞན་ནས་བཙལ་ཀྱང་ཡང་དག་པར་རྫོགས་པའི་སངས་རྒྱས་ཀྱི་འབྲས་བུ་ཞིག་མི་རྙེད་དོ། །དེས་ན་གང་ལས་བཙལ་ཞེ་ན་རང་གི་སེམས་ལས་བཙལ་ལོ། །བཙལ་བའི་ཐབས་ཇི་ལྟར་བཙལ་ན་རང་གི་སེམས་ཉིད་རིག་པ་བྱང་ཆུབ་ཀྱི་སེམས་ནི་ཡེ་ནས་འབྲས་བུ་ཆོས་ཀྱི་སྐུའི་ངོ་བོ་ཡིན་ཏེ་དེའི་དོན་རྟོགས་པ་མངོན་དུ་གྱུར་པ་ལ་འབྲས་བུ་ཐོབ་ཅེས་གདགས་ཀྱིས་དེ་ལས་གཞན་དུ་སངས་རྒྱས་མ་ཚོལ་ཅིག །མཉམ་པ་མ་རྟོགས་པའི་སྐྱོན་ནི་རང་རིག་པ་དེ་ལས་མ་གཏོགས་པ་མེད་པ་ལ་རིག་པ་དེ་ལས་སངས་རྒྱས་གཞན་དུ་ཚོལ་ན་ནི་རྒྱ་མཚོའི་ངོས་ནས་སོང་སྟེ་སྨིག་རྒྱུའི་ཆུ་ལ་བསྙེགས་པ་དང་འདྲའོ། །དེ་མི་རྙེད་པའི་ཕྱིར་ན་དེ་ལས་མ་གཏོགས་པ་མེད་པས་མ་ཚོལ་ཅིག་ཅེས་གདམས་སོ། །ལྔ་པ་ནི། གང་ཞིག་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་ཏེ། དཔེར་ན་གླང་པོ་ཆེ་སྨྱོན་པ་འདུལ་བའི་དུས་ན། སྐྱེས་བུ་གོས་དམར་པོ་གྱོན་དབྱངས་སྙན་པ་བླངས་ནས་ལག་པ་གཡོན་དུ་སྤོས་དུད་ཐོགས་གཡས་སུ་ལྕགས་ཀྱུ་ཐོགས་ནས་གླང་ཁྲིད་དེ་རྩར་བྱུང་ཙ་ན་ལྕགས་ཀྱུས་གླང་སྣ་ནས་བཟུང་ནས་འབྲས་ཆང་བླུད་པས་གླང་མྱོས་པ་ལ་དམག་མང་པོ་བཞོན་ནས་བཏུལ་ཏེ། དེ་ཐུལ་ཙམ་ན་གཞན་གྱི་དམག་དཔུང་འཇོམས་པའོ། །དཔེ་དེ་བཞིན་དུ་རྣལ་འབྱོར་པ་གང་ཞིག་གི་འཁྲུལ་པའི་སེམས་ནི་གླང་པོ་ཆེ་སྨྱོན་པ་དང་འདྲ་བ་དེ་འདུལ་ཐབས་ནི། སྔགས་དང་ཕྱག་རྒྱས་མཉམ་པར་བཞག །ཅེས་པ་ལྟར་བླ་མ་དམ་པའི་གདམས་ངག་ལྕགས་ཀྱུ་དང་འདྲ་བས་བཟུང་ནས་ཆོས་ཉིད་རྣམ་པར་མི་རྟོག་པའི་ངང་ལ་བློ་མཉམ་པར་བཞག་པ་དང་། གཟུང་འཛིན་གྱི་རྣམ་པར་རྟོག་པ་དེ་དག་བཏུལ་ནས་སུ་སེམས་དང་ཡེ་ཤེས་ཀྱི་ཕྱག་རྒྱས་ཐམས་ཅད་དུ་སྣང་བར་འགྱུར་རོ། །དེ་ཡང་རྒྱུ་མ་ནོར་བ་རྩ་བའི་སྔགས་ཀྱིས་བསྐྱེད་པའི་རྒྱུ་བྱེད། བསྐྱེད་པ་རྐྱེན་གྱི་སྔགས་ཀྱིས་གསལ་བར་བྱེད་པ་དང་། བཟླས་པ་ལས་ཀྱི་སྔགས་ཀྱིས་བརྟན་པར་བྱེད་པའོ། །སྔགས་དེ་གསུམ་གྱིས་ལྷའི་སྐུ་གསལ་བ་དེ་ལ་ནི་ཕྱག་རྒྱ་ཆེན་པོ་བཞི་དང་ལྡན་པ་ཞེས་པ་སྟེ་དམ་ཚིག་གི་ཕྱག་རྒྱ་དང་། ལས་ཀྱི་དང་། ཆོས་ཀྱི་དང་། སྐུ་ཕྱག་ཆེན་པོ་རབ་ཏུ་བརྟན་ན་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་དང་། ཡ་མཚན་ཆེན་པོ་ལ་སོགས་པའི་ཡོན་ཏན་ཐམས་ཅད་ཐོབ་པར་འགྱུར་རོ། །དྲུག་པ་ནི། དགོན་པ་ཆེན་པོའི་ས་ཕྱོགས་སུ། །ཙན་དན་ནགས་དང་མེ་ཏོག་ཚལ། །ཡིད་འོང་བཀྲ་ཤིས་ཉམས་དགའ་བའི། །བདག་དབང་བར་ཆད་མེད་པའི་གནས། །ཞེས་པས་བསྟན། སྤྱིར་གནས་ལ་གསུམ་སྟེ་ཕྱིའི་གནས་དང་། ནང་གི་གནས་དང་། གསང་བའི་གནས་སོ། །ཕྱིའི་གནས་ལ་གཉིས་ཏེ་ཚུལ་ཤིས་པའི་གནས་དང་ཚུལ་དང་མཐུན་པའི་གནས་སོ། །ཚུལ་ཤིས་པའི་གནས་ནི་གསུམ་སྟེ་དང་པོ་བདེ་བར་གཤེགས་པའི་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས་རྒྱ་གར་རྡོ་རྗེ་གདན་དང་རི་མ་ལ་ཡ་དང་འཕགས་པ་ཤིང་ཀུན་ལ་སོགས་པ་ལྟ་བུའོ། །གཉིས་པ་ནི། དང་པོ་གྲུབ་པ་ཐོབ་པས་བཀྲ་ཤིས་པའི་གནས་ནི་ལི་ཡུལ་ལྕང་ར་སྨུག་པོའམ། སྤ་གྲོ་སྟག་ཚང་ངམ། ལྷོ་བྲག་མཁར་ཆུ་ལྟ་བུའོ། །དེ་ལྟ་བུ་རྣལ་འབྱོར་པས་གྲུབ་པ་ཐོབ་པའོ། །གསུམ་པ་ནི་རང་ཡིད་དུ་འོང་བས་ཉམས་དགའ་བའི་གནས་སོ། །ཚུལ་དང་མཐུན་པའི་གནས་ནི་ཞི་བའི་དགོན་གནས་དང་། རྒྱས་པའི་འཕེལ་གནས་དང་། དབང་གི་འདུ་གནས་དང་། དྲག་པོའི་འགྱེད་གནས་དང་། ལྷུན་གྲུབ་ཀུན་འབྱུང་གི་གནས་སོ། །ནང་གི་གནས་ནི་རང་གི་རིག་པས་ངོ་ཤེས་ཏེ་ཉམས་དགའ་བའོ། །གསང་བའི་གནས་ནི་ཡུམ་མཚན་ལྡན་ནོ། །དེ་ལ་འདིར་བསྒྲུབ་པའི་གནས་ཀྱི་རིང་ཐུང་གི་ཚད་ནི་དགོན་པ་སྟེ་གྲོང་ཡུལ་ལས་དཔག་ཚད་དང་རྒྱང་གྲགས་ཀྱིས་རིང་བར་གྱུར་པ་སྟེ། དེའི་དགོས་པ་ནི་བསམ་གཏན་གྱི་དགྲ་མི་འབྱུང་བའི་ཕྱིར་རོ། །དེ་བས་ན་ཆེན་པོ་ཞེས་སོ། །དགོན་པ་ཆེན་པོ་ནི་ཡུམ་ལ་ཟེར་བ་ཡང་ཡོད་དོ། །གཞན་མ་རང་གི་གནས་སྐབས་སུ་ངོས་བཟུང་བའོ། །དེ་ནི་ཕྱིའི་གནས་གཙོ་ཆེ་བའོ། །གནས་དེར་ས་གཞི་བརྟགས་པ་ནི་གནམ་འཁོར་ལོ་རྩིབས་བརྒྱད་འདྲ་བ་ས་གཞི་པདྨ་འདབ་བརྒྱད་འདྲ་བ། ས་སྣུམ་ལ་བཀྲག་ཆགས་པའོ། །གནས་དེར་ཕྱོགས་བརྟགས་པ་ནི་ཤར་འཇམས་པ། ལྷོ་གཞོལ་བ། ནུབ་མཐོ་བ། བྱང་འདུད་པའོ། །དེ་བས་ན་ས་ཕྱོགས་སུ་ཞེས་པའོ། །གནས་ཀྱི་དབྱིབས་བསྟན་པ་ནི་ས་ཕྱོགས་དེར་སྔོན་བཀྲ་ཤིས་པའི་གནས་ཙན་དན་གྱི་ནགས་ཚལ་དང་། མདུན་ན་མེ་ཏོག་གི་གླིང་ཆགས་པ་སྟེ་བཀྲ་ཤིས་པའི་ཡན་ལག་གོ། །དེ་རྣམས་ནི་སྔར་སྨོས་པ་ལྟར་རྣལ་འབྱོར་བས་ཡིད་དུ་འོང་ཞིང་བཀྲ་ཤིས་པ་འཕྲལ་ཉམས་དགའ་བའི་གནས་ཏེ། དེས་གནས་ཀྱི་རང་བཞིན་བསྟན་པ་ཡིན་ནོ། །གནས་དེ་བདག་གི་དབང་དུ་བྱེད་པའི་ཕྱིར་ས་སླང་བ་ནི་སྣང་བ་དང་མི་སྣང་བ་ལ་རིན་སྩལ་ལ་བདག་གི་དབང་དུ་བྱ་བ་དང་གནས་དེར་ཧ་ཅང་ཐག་རིང་ན་རྫས་ཀྱི་བར་ཆད་འབྱུང་། གཡེལ་ན་དགྲའི་བར་ཆད་འབྱུང་། ལྷ་འདྲེའི་ལམ་ཆོད་ན་བགེགས་ཀྱི་བར་ཆད་འབྱུང་བས་ན་བཀྲ་ཤིས་ལ་ཡིད་དུ་འོང་བ་ཕྱི་ནང་གི་བར་ཆད་གང་ཡང་མི་འབྱུང་བའི་གནས་བཙལ་བར་བྱའོ་ཞེས་གནས་ཀྱི་སྐྱོན་བསལ་བར་བསྟན་པའོ། །གཉིས་པ་བར་དུ་ཏིང་ངེ་འཛིན་སྒོམ་པ་ལ་གསུམ་སྟེ། ཏིང་ངེ་འཛིན་གྱི་དཀྱིལ་འཁོར་བསྐྱེད་པ་དང་། ཡེ་ཤེས་ཀྱི་དཀྱིལ་འཁོར་སྤྱན་དྲང་བ་ལ་སོགས་པ་དང་། མཇུག་གི་ལས་སོ། །དང་པོ་ཏིང་ངེ་འཛིན་གྱི་དཀྱིལ་འཁོར་ལ་བཞི་སྟེ། བྱང་ཆུབ་ཏུ་སེམས་བསྐྱེད་པ་དང་། ཏིང་ངེ་འཛིན་གསུམ་སྒོམ་པ་དང་། དཀྱིལ་འཁོར་དངོས་སྒོམ་པ་དང་། བསྒོམ་པའི་ཆེ་བའོ། །དང་པོ་སེམས་བསྐྱེད་པ་ལ་གཉིས་ཏེ། དམ་བཅའ་བ་དང་། སེམས་ཡེ་ཤེས་ལྔར་བསྐྱེད་པའོ། །དང་པོ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་སོ། །སྤྱིར་ན་སེམས་བསྐྱེད་པ་ལ་གཉིས་ཏེ། ཀུན་རྫོབ་བྱང་ཆུབ་མཆོག་ཏུ་སེམས་བསྐྱེད་པ་དང་། དོན་དམ་བྱང་ཆུབ་མཆོག་ཏུ་སེམས་བསྐྱེད་པའོ། །ཀུན་རྫོབ་བྱང་ཆུབ་མཆོག་ཏུ་སེམས་བསྐྱེད་པ་ནི། སྨོན་པ་འབྲས་བུར་སེམས་བསྐྱེད་པ་དང་། འཇུག་པ་རྒྱུར་སེམས་བསྐྱེད་པའོ། །དོན་དམ་བྱང་ཆུབ་མཆོག་ཏུ་སེམས་བསྐྱེད་པ་ནི། གནས་པ་བྱང་ཆུབ་ཀྱི་སེམས་དང་། བརྟན་པ་བྱང་ཆུབ་ཀྱི་སེམས་དང་། མཐར་ཕྱིན་པ་བྱང་ཆུབ་མཆོག་ཏུ་སེམས་བསྐྱེད་པའོ། །འདིར་ནི་ཀུན་རྫོབ་གཞན་ལས་ཁྱད་པར་དུ་བྱས་པས་ན་བྱང་ཆུབ་མཆོག་ཏུ་བསྐྱེད། དོན་དམ་པ་འོག་གསལ་མངོན་དུ་བྱས་པས་ན་ཡེ་ཤེས་ལྔར་སེམས་བསྐྱེད་པའོ། །འདི་ལྔ་དོན་དམ་ཀུན་རྫོབ་དབྱེར་མེད་སྟོན་པར་འདུག་པས་འདོམས་སོ་ཞེ་ན་བརྩམ་གཞི་སོ་སོ་ལས་བརྩམ་བྱ་ཐ་དད་པར་དང་། བརྗོད་བྱ་སོ་སོ་ལ་དོན་སོ་སོར་སྟོན་པའི་ཚིག་ཡིན་ནོ། །དེ་ལ་འདིར་གང་གིས་སེམས་བསྐྱེད་ན་སྒྲུབ་པ་པོས་བདག་རང་དང་བསམ་གྱིས་མི་ཁྱབ་ཅིང་མཐའ་ཡས་པའི་སེམས་ཅན་འགྲོ་བ་དྲུག་གིས་བསྡུས་པ་ཐམས་ཅད་རྣམས་སོ། །དེ་རྣམས་ཡེ་ཐོག་མ་ཉིད་ནས་སྐུ་ལྔ་ཡེ་ཤེས་ལྔར་སངས་རྒྱས་པ་ཡིན་མོད་ཀྱང་ཞེའམ་ཡང་ན་རང་བཞིན་ལྷུན་གྱིས་གྲུབ་པའི་སངས་རྒྱས་གཅིག་ཡིན་ཀྱང་དེ་ལྟར་མ་རྟོགས་པའི་དབང་གིས་བུདྡྷ་ཡིན་ཀྱང་ངོ་མ་ཤེས་པའོ། །དེ་ལ་ཚུལ་ཇི་ལྟར་སེམས་བསྐྱེད་ན་དེ་ལྟར་མ་རྟོགས་པས་བདག་དང་བདག་གིར་རྟོག་པའི་དབང་གིས་འཁོར་བ་མཐོ་དམན་དུ་འཁོར་བ་ལས་ད་ལྟར་ཉིད་དུ་སྐུ་ལྔ་ཡེ་ཤེས་ལྔར་སངས་རྒྱས་པར་སེམས་བསྐྱེད་པ་སྟེ། དགོས་པ་གང་གི་ཕྱིར་སེམས་བསྐྱེད་ན་བདག་ཀྱང་ཁམས་གསུམ་ལས་ཐར་བར་བྱ་བ་དང་བདག་ཉིད་ཐར་ནས་ཀྱང་སེམས་ཅན་ཐར་བར་བྱའོ་ཞེས་བྱང་ཆུབ་མཆོག་ཏུ་ངོ་བོ་གང་བསྐྱེད་ན་སྐུ་ལྔ་ཡེ་ཤེས་ལྔར་སངས་རྒྱས་པ་ཡིན་པར་རྟོགས་པར་སེམས་བསྐྱེད་དོ། །གཉིས་པ་ལ་ལྔ་ལས་ཆོས་ཀྱི་སྐུ་དང་སྟོང་པ་ཉིད་ཀྱི་ཡེ་ཤེས་སུ་སེམས་བསྐྱེད་པར་བསྟན་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པས་བསྟན་ཏེ། ཨེ་མའོ་ནི་ངོམ་པ་སྟེ་དེ་ཡང་གང་ལ་ངོམ་ན་ཆོས་ཐམས་ཅད་སྐུ་ལྔ་ཡེ་ཤེས་ལྔའི་རང་བཞིན་དུ་སངས་རྒྱས་པ་ཡིན་པ་ལ་སེམས་ཅན་རྣམས་ཀྱིས་དེ་ལྟར་མ་རྟོགས་པ་ལ་ངོམ་ཞིང་ངོ་མཚར་བའོ། །རྨད་ཀྱི་ཆོས་ནི་ཚིག་ངོ་མཚར་ཅན་ལས་དོན་རྨད་དུ་བྱུང་བའི་དོན་སྟོན་པ་ལ་བྱའོ། །ཆོས་དེ་གང་གིས་གསུངས་ན་རྒྱུ་བསོད་ནམས་དང་འབྲས་བུ་ཡེ་ཤེས་ཀྱི་ཚོགས་རྫོགས་པའི་སངས་རྒྱས་སྐུ་ལྔ་ཡེ་ཤེས་ལྔར་ལྷུན་གྱིས་གྲུབ་པ་དེས་གསུངས་ལ་སངས་རྒྱས་ཉིད་ཀྱི་ཐུགས་ཀྱི་བརྣག་བྱ་ཡང་འདི་ཡིན་པས་ན་གསང་བའོ། །སྟོང་པ་ཉིད་ཀྱི་ཡེ་ཤེས་ཀྱི་རང་བཞིན་ནི་ཆོས་ཐམས་ཅད་ཀྱི་ངོ་བོ་སྟོང་ཞིང་བདག་མེད་པ་དེ་ལ་རྒྱུ་གང་ལས་སྐྱེ་བ་མེད་པའོ། །དེ་ལྟར་དོན་དམ་པར་རྒྱུ་ལས་སྐྱེ་བ་མེད་པས་ཀུན་རྫོབ་ཏུ་ཆོས་ཐམས་ཅད་རྒྱུ་ལས་སྐྱེས་པ་ལྟར་སྣང་ལ། དེ་ལྟར་ཀུན་རྫོབ་ཏུ་སྐྱེས་པ་ལྟར་སྣང་བའི་དུས་ཉིད་ན་དོན་དམ་པར་མ་སྐྱེས་པའི་ངང་ལས་མ་གཡོས་པ་ནི་སྟོང་པ་ཉིད་ཀྱི་ཡེ་ཤེས་དང་ཆོས་ཀྱི་སྐུར་སེམས་བསྐྱེད་པའོ། །གཉིས་པ་མེ་ལོང་ལྟ་བུའི་ཡེ་ཤེས་དང་ལོངས་སྐུར་སེམས་བསྐྱེད་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཅེས་སོ། །ཨེ་མའོ་ནི་ངོམ་ཞིང་ངོ་མཚར་བ་སྟེ་ངོ་གང་ལ་མཚར་ན་རང་སེམས་སྟོང་པ་སྐྱེ་མེད་དུ་གཏན་ལ་འབེབས་པའི་དེ་ཁོ་ན་ལ་ངོ་མཚར། དེ་གང་གི་ཆོས་ལུགས་ཡིན་ན་གསང་བ་རྨད་དུ་བྱུང་བ་མ་ཧཱ་ཡོ་གའི་ཆོས། དེ་གང་གི་གསུང་ཡིན་ན་རྫོགས་པའི་སངས་རྒྱས་དཔལ་ཀུན་ཏུ་བཟང་པོ་རྒྱལ་བ་དྲུག་པའི་གསུང་བློ་དམན་དང་ཐེག་པ་འོག་མ་བའི་སྤྱོད་ཡུལ་དུ་མ་གྱུར་པས་ན་གསང་བའོ། །ཆོས་ཐམས་ཅད་གསལ་ལ་རྟོག་པ་མེད་པའམ་གསལ་ལ་འགག་པ་མེད་པ་ཡིན་པ་དེ་ལས་མ་གཡོས་བཞིན་དུ་ཆོས་ཐམས་ཅད་ཀྱི་སྐྱོན་དུ་གྱུར་པ་འགག་པ་ལྟར་སྣང་ངོ་། །དེ་ལྟར་ཀུན་རྫོབ་ཏུ་འགགས་པ་ལྟར་སྣང་བའི་དུས་ཉིད་ན་དོན་དམ་པར་འགགས་པ་ཅི་ཡང་མེད་དོ། །དེ་ལྟར་རྟོགས་པ་ནི་མེ་ལོང་ལྟ་བུའི་ཡེ་ཤེས་དང་ལོངས་སྤྱོད་རྫོགས་པའི་སྐུར་སེམས་བསྐྱེད་པ་ཡིན་ནོ། །གསུམ་པ་མཉམ་པ་ཉིད་ཀྱི་ཡེ་ཤེས་དང་མངོན་པར་བྱང་ཆུབ་པའི་སྐུར་སེམས་བསྐྱེད་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཅེས་སོ། །ཨེ་མའོ་ནི་ངོམ་ཞིང་ངོ་མཚར་བ་སྟེ་གང་ལ་ངོ་མཚར་ན་རང་སེམས་མཉམ་པ་ཉིད་ཆེན་པོར་སྟོན་པས་ངོ་མཚར་བའོ། །དེ་གང་གི་ཆོས་ལུགས་ཡིན་ན་གསང་བ་རྨད་དུ་བྱུང་བ་སྒྱུ་འཕྲུལ་དྲྭ་བའི་ཆོས། དེ་གང་གི་གསུང་ཡིན་ན་ཡང་དག་པར་རྫོགས་པའི་སངས་རྒྱས་ཀུན་གྱི་གསང་བའོ། །ཆོས་ཉིད་དོན་དམ་པར་གཟུང་བ་དང་འཛིན་པ་མེད་པར་གནས་པ་ཡིན་པ་ལ་ཀུན་རྫོབ་ཏུ་ཆོས་ཐམས་ཅད་གཟུང་འཛིན་གྱིས་གནས་པ་ལྟར་སྣང་ཡང་སྣང་བའོ། །དེ་ལྟར་ཀུན་རྫོབ་ཏུ་གནས་པ་ལྟར་སྣང་བའི་དུས་ཉིད་ན་དོན་དམ་པར་གནས་པ་མེད་དེ་དེ་ཉིད་མཉམ་པ་ཉིད་ཀྱི་ཡེ་ཤེས་དང་ངོ་བོ་ཉིད་ཀྱི་སྐུར་སེམས་བསྐྱེད་པ་ཡིན་ནོ། །བཞི་པ་སོ་སོར་རྟོག་པའི་ཡེ་ཤེས་དང་སྤྲུལ་སྐུར་སེམས་བསྐྱེད་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཅེས་གསུང་སྟེ། ཨེ་མའོ་ངོམ་ཞིང་ངོ་མཚར་བ་སྟེ་དེ་ཡང་ངོ་གང་ལ་མཚར་ན་རང་སེམས་ཡེ་ཤེས་སུ་རྟོགས་པ་དེ་ལའོ། །དེ་གང་གི་ཆོས་ཡིན་ན་མ་ཧཱ་ཡོ་གའི་འོ། །དེ་གང་གི་གསུང་ཡིན་ན་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོའི་གསུང་ངོ་། །ཆོས་ཐམས་ཅད་རང་དང་སྤྱིའི་མཚན་ཉིད་མ་འདྲེས་པར་མཁྱེན་ལ་རང་དང་སྤྱིའི་མཚན་ཉིད་དོན་དམ་པར་དམིགས་པ་མེད་དོ། །དེ་ལས་མ་གཡོས་བཞིན་དུ་ཆོས་ཐམས་ཅད་ཀུན་རྫོབ་ཏུ་དམིགས་པར་ཤར་ནས་སྣང་བ་ཡིན་ནོ། །དེ་ལྟར་ཀུན་རྫོབ་ཏུ་དམིགས་པའི་དུས་ཉིད་ན་དོན་དམ་པར་དམིགས་པ་མེད་པ་ལས་མ་གཡོས་པ་དེ་ནི་སོ་སོར་རྟོག་པའི་ཡེ་ཤེས་དང་སྤྲུལ་པའི་སྐུར་སེམས་བསྐྱེད་པ་ཡིན་ནོ། །ལྔ་པ་བྱ་བ་གྲུབ་པའི་ཡེ་ཤེས་དང་རྡོ་རྗེའི་སྐུར་སེམས་བསྐྱེད་པར་བསྟན་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ཅེས་པས་བསྟན་ཏེ། ཨེ་མའོ་ནི་ངོམ་ཞིང་ངོ་མཚར་བ་སྟེ་ངོ་གང་ལ་མཚར་ན་རང་སེམས་ཡེ་ཤེས་སུ་རྟོགས་པ་ལའོ། །དེ་ནི་གསང་བ་མ་ཧཱ་ཡོ་གའི་ཆོས་ཡིན་ནོ། །འཁོར་འདས་སེམས་ཉིད་དུ་རྫོགས་པས་ན་རྫོགས་པའི་ལྟ་བ་ངན་པའི་དྲི་མ་དང་བྲལ་བས་སངས་ལ་ཡེ་ཤེས་མཐའ་དབུས་མེད་པར་རྒྱས་པས་ན་རྒྱས་ཕྱོགས་བཅུ་དུས་བཞིའི་སངས་རྒྱས་ཀུན་གྱི་བདག་པོ་ཡིན་པས་ན་ཀུན་གྱིས་རྟོགས་པར་དཀའ་བས་ན་གསང་ངོ་། །བྱ་བ་གྲུབ་པའི་ཡེ་ཤེས་ཀྱིས་བདག་དང་གཞན་གྱི་དོན་ཐམས་ཅད་གྲུབ་ཅིང་མཐར་ཕྱིན་པར་མཛད་ཀྱང་དོན་དམ་པར་བདག་དང་གཞན་གྱི་དོན་ལ་སྤྲུལ་པ་ཕར་འགྲོ་བ་དང་ཚུར་འོང་བ་མེད་དོ། །ཀུན་རྫོབ་ཏུ་སྤྲུལ་པ་ཕར་འགྲོ་བ་དང་ཚུར་འོང་བར་སྣང་ངོ་། །དེ་ལྟར་རྟོགས་ཙམ་ཉིད་ན་དོན་དམ་པར་འགྲོ་འོང་མེད་པ་ནི་བྱ་བ་ནན་ཏན་གྱི་ཡེ་ཤེས་དང་རྡོ་རྗེའི་སྐུར་སེམས་བསྐྱེད་པའོ། །གཉིས་པ་ཏིང་ངེ་འཛིན་ལ་བཞི་སྟེ། ཏིང་ངེ་འཛིན་གྱི་དགོས་པ་དཔེས་བསྟན་པ་དང་། དེ་བཞིན་ཉིད་དང་། ཀུན་ཏུ་སྣང་དང་། རྒྱུའི་ཏིང་ངེའོ། །དང་པོ་ནི། བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་བྱེད་པར་འགྱུར། །གསེར་འགྱུར་སྨན་དང་མུན་སེལ་བཞིན། །རྟོག་པའི་དབང་བསྒྱུར་ཏིང་འཛིན་ཡིན། །དེ་ཕྱིར་ཏིང་འཛིན་རིམ་པར་བསྒོམ། །ཞེས་གསུང་སྟེ་ཐུན་མོང་གི་བསྒྲུབ་པ་དང་ཐུན་མོང་མ་ཡིན་པའི་བསྒྲུབ་པ་ལས་གཙོ་བོར་གང་བྱེད་ཀྱང་ཏི ང་ངེ་འཛིན་མེད་ན་འབྲས་བུ་མི་འབྱུང་བས་དེའི་ཕྱིར་གཙོ་བོར་ཏིང་ངེ་འཛིན་ཁོ་ན་བསྔགས་པ་ཡིན་པས་སོ། །དེ་བས་ན་མཆོག་དང་ཐུན་མོང་གི་སྒྲུབ་ཐབས་ཐམས་ཅད་ཏིང་འཛིན་འདི་ཡིས་བྱེད་པར་འགྱུར་བ་ཡིན་པས་ན་ཏིང་ངེ་འཛིན་འདི་དང་ལྡན་པས་ཐམས་ཅད་འགྲུབ་པར་འགྱུར་བ་ཡིན་ནོ། །དཔེར་ན་ལྕགས་ལ་གསེར་འགྱུར་གྱི་རྩི་བཏང་ན་ལྕགས་གསེར་དུ་འགྱུར་བ་དང་། དུག་ལ་སྨན་མ་ཀི་ཏ་བཏབ་ན་དུག་སྨན་དུ་འགྱུར་བ་དང་མུན་པ་ལ་སྒྲོན་མ་བྱུང་ན་མུན་པ་སེལ་བའི་དཔེ་དེ་བཞིན་དུ་ཆོས་ཉིད་རྣམ་པར་མི་རྟོག་པ་དེ་བཞིན་ཉིད་ཀྱི་ཏིང་ངེ་འཛིན་བསྒོམས་པས་རྟོག་པ་ཐམས་ཅད་ཆོས་ཉིད་དུ་འགྱུར། ཡེ་ཤེས་སྒྱུ་མའི་ཏིང་ངེ་འཛིན་ཐམས་ཅད་དུ་ཀུན་ཏུ་སྣང་བར་བསྒོམས་པས་ཕྱོགས་གཅིག་པའི་མུན་པ་སེལ། སྐུ་དང་ཡེ་ཤེས་དབྱེར་མེད་ཕྱག་རྒྱ་རྒྱུ་ཏིང་དུ་བསྒོམས་པས་ཕུང་པོ་ཁམས་དང་སྐྱེ་མཆེད་གནས་འགྱུར་བའོ། །དེ་ལྟར་ཏིང་འཛིན་གཙོ་བོའི་ཕྱིར་ན་དེ་ཏིང་ལ་སོགས་པ་གོང་མ་རྣམས་གསལ་བའི་སྟེང་ལ་འོག་མ་རིམ་པར་སྒོམ་མོ། །དེ་ལྟར་མདོར་ན་ཚིག་རྐང་ལྔས་བསྒྲུབ་པའི་གཙོ་བོ་གང་ཡིན་དང་དབང་ཇི་ལྟར་བསྒྱུར་བ་དང་དཔེ་གང་གིས་མཚོན་པ་དང་དགོས་པ་ཅི་ཡོད་པ་དང་གཏན་ཚིགས་ཀྱིས་གདབ་པ་རྣམས་གོ་རིམ་བཞིན་དུ་སྟོན་པའོ། །གཉིས་པ་དེ་བཞིན་ཉིད་ཀྱི་ཏིང་འཛིན་ནི། དངོས་རྣམས་ཉིད་ན་དངོས་མེད་པས། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་དོ། །ཞེས་གསུངས་། དང་པོ་དེ་བཞིན་ཉིད་ཀྱི་ཏིང་ངེ་འཛིན་ལ་དྲུག་སྟེ་སྦྱང་བྱ་ནི་ཤི་བ་རྣམ་རྟོག་མེད་པས་སོ། །སྦྱོང་བྱེད་ནི་དེ་བཞིན་ཉིད་ཀྱི་ཏིང་ངེ་འཛིན་ནོ། །ངོ་བོ་ནི་སྟོང་པ་ཆེན་པོའོ། །རྣམ་གྲངས་ནི་མ་ནོར་བའི་དེ་བཞིན་ཉིད། མ་བཅོས་པའི་དེ་བཞིན་ཉིད། དངོས་པོ་མེད་པའི་དེ་བཞིན་ཉིད། གཞན་མ་ཡིན་པའི་དེ་བཞིན་ཉིད་དོ། །སྒོམ་ཐབས་ནི་སྟོང་པ་ཉིད་མཐའ་བརྒྱད་དང་བྲལ་བའོ། །འབྲས་བུ་ནི་ཆོས་ཀྱི་སྐུ་ཐོབ་པའོ། །དེ་ཡང་ཕྱི་ནང་སྣོད་བཅུད་ཀྱི་དངོས་པོ་སྣ་ཚོགས་སུ་སྣང་བ་འདི་རྣམས་གཞན་མ་ཡིན་ཏེ་རིག་པ་བྱང་ཆུབ་ཀྱི་སེམས་ཉིད་རང་སྣང་བའོ། །བྱང་ཆུབ་ཀྱི་སེམས་ཉིད་སྣང་བའི་དུས་ཉིད་ན་རང་གི་ངོ་བོ་ཅིར་ཡང་མ་གྲུབ་པས་སྣང་བའི་དངོས་པོར་མེད་པའོ། །དཔེར་ན་མཚལ་དམར་ན་ཁུ་བ་ཡང་དམར་བ་ལྟར་དངོས་པོའི་རྟོག་པ་མ་གྲུབ་པའི་ཕྱིར་ན་དངོས་འཛིན་སྨྲ་བསམ་མེད་དེ་དོན་སེམས་ཉིད་ལ་རྟོག་པ་དང་ཐ་སྙད་ཐམས་ཅད་རང་བཞིན་གྱིས་བྲལ་བ་ནི་འཛིན་པའི་ཡུལ་ལས་འདས་པའོ། །མ་ནོར་བའི་དེ་བཞིན་ཉིད་དངོས་པོ་མེད་པས་ཆོས་ཀྱི་དབྱིངས། མ་བཅོས་པ་ཡིན་པས་ཡེ་ཤེས་དེ་ཐམས་ཅད་དུ་ཁྱབ་པར་གནས་པ་ཡིན་པས་ན་མཐར་དང་དབུས་མེད་དེ་ཆོས་ཀྱི་དབྱིངས་སོ། །དེ་ཡི་ཕྱིར་ན་དངོས་པོར་སྣང་བ་ཉིད་དངོས་པོ་མེད་པ་ཉིད་དོ། །གསུམ་པ་ཀུན་སྣང་གི་ཏིང་ངེ་འཛིན་ནི། དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་ཕྱིར། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །ཞེས་སོ། །ཀུན་སྣང་གི་ཏིང་ངེ་འཛིན་ལ་དྲུག་ལས། སྦྱང་བྱ་ནི་བར་དོའི་སྣང་བའོ། །སྦྱོང་བྱེད་ནི་ཀུན་དུ་སྣང་ངོ་། །ངོ་བོ་ནི་ཡེ་ཤེས་སྒྱུ་མའོ། །རྣམ་གྲངས་ནི་ཀུན་ཏུ་སྣང་ཞེས་བྱ། ཡེ་ཤེས་སྒྱུ་མ་ཞེས་བྱ། མཚམས་སྦྱོར་ཆེན་པོའི་ཏིང་ངེ་འཛིན་ཞེས་བྱ་བའོ། །བསྒོམ་པའི་ཐབས་ནི་མ་ཧཱ་ཡོ་ག་ཆོས་ཉིད་ཡེ་ཤེས་སྒྱུ་མ་བསྒོམ་ལ། ཨ་ནུ་ཡོ་ག་བ་རང་གི་སྨིན་མཚམས་སུ་འོད་དམར་སྨུག་ཚོན་གང་བ་ལས་འོད་འཕྲོས་པས་འཇིག་རྟེན་ཐམས་ཅད་འོད་ཀྱིས་ཁེངས་པར་བསྒོམ་མོ། །འདིར་ནི་ཆོས་ཉིད་ཡེ་ཤེས་སྒྱུ་མར་བསྒོམ་པའོ། །འབྲས་བུ་ནི་ལོངས་སྤྱོད་རྫོགས་པའི་སྐུ་འཐོབ་པའོ། །དེ་ལ་དེ་བཞིན་ཉིད་ནི་སྤྲོས་པ་མེད་པས་ཐམས་ཅད་ལ་ཁྱབ་པ་ཡིན་ཀྱང་རང་བཞིན་ཀུན་ཏུ་སྣང་བའི་ཕྱིར་ཆོས་ཀྱི་དབྱིངས་སོ། །དེ་ལྟ་བུའི་དོན་མ་རྟོགས་པའི་སེམས་ཅན་ཀུན་ལ་སྙིང་བརྩེ་བ་ཆེན་པོ་ཕྱོགས་རིས་མེད་པར་འབྱུང་བའི་ཕྱིར་ཆོས་ཀྱི་དབྱིངས་ནམ་མཁའ་དང་འདྲ་བ་ཀུན་ལ་ཁྱབ་པ་ལ་སྙིང་རྗེ་ཆེན་པོ་ཡང་ནི་ནམ་མཁའ་དེ་ལྟར་བསྒོམ་མོ། །བཞི་པ་རྒྱུའི་ཏིང་ངེ་འཛིན་ལ་བཞི་སྟེ། དམ་བཅའ་བ་དང་། ཡི་གེ་ཨ་ལ་སེམས་སྦྱངས་བ་དང་། མིང་ཚོགས་གཞན་ལ་སེམས་སྦྱངས་པ་དང་། སེམས་སྦྱངས་པའི་ཡོན་ཏན་ནོ། །དང་པོ་ནི། གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་མཆོག་ནི་བསྒོམ་པར་བྱ། །ཞེས་སོ། །རྒྱུའི་ཏིང་ངེ་འཛིན་ལ་དྲུག་སྟེ་སྦྱང་བྱ་ནི་མངལ་དུ་འཇུག་པའོ། །སྦྱོང་བྱེད་ནི་རྒྱུའི་ཏིང་ངེ་འཛིན་ནོ། །ངོ་བོ་ནི་ཡི་གེ་ཨའོ། །རྣམ་གྲངས་ནི་ཧཱུཾ་དང་ཨ་ལས་འདིར་ཨའོ། །བསྒོམ་ཐབས་ནི་ཨ་དཀར་པོ་རྒྱུ་སྐར་མ་ཡས་པ་ལ་ཁར་ཤར་བ་ལྟ་བུའོ། །འབྲས་བུ་ནི་སྤྲུལ་པའི་སྐུ་འཐོབ་པའོ། །དེ་ལ་རྒྱུའི་ཏིང་ངེ་འཛིན་གྱི་ངོ་བོ་གང་ཡིན་ན་གནས་པའི་གཞི་མེད། བརྟེན་པའི་རྩ་བ་མེད་པའི་ངོ་བོ་དེ་ལ་མཚོན་པ་ཙམ་དུ་སེམས་ཞེས་བྱ་སྟེ་ཉིད་ནི་ཆོས་ཉིད་དོ། །ཆོས་ཉིད་ནི་བརྟེན་པ་དང་གནས་པའི་ཐ་སྙད་དང་བྲལ་བའོ། །དེས་ལས་ཅི་བྱེད་ན་དེ་ཉིད་དངོས་པོ་ཡོད་མེད་གཉིས་ཀྱིས་བསྡུས་པའི་ཆོས་རྣམས་ཐམས་ཅད་ཀུན་གྱི་རྩ་བ་ཡིན་ཏེ་རིག་པ་བྱང་ཆུབ་ཀྱི་སེམས་རྟེན་གཞི་དང་བྲལ་བ་ཉིད་དོ། །རང་བཞིན་ཅི་ཡིན་ན་རིག་པ་སེམས་ཉིད་རྟེན་གཞི་དང་བྲལ་བ་ཉིད་གནས་ཀྱི་ཡེ་ཤེས་རང་སྣང་བ་ནི་ཡི་གེའི་རང་བཞིན་ཨ་དཀར་པོ་ཉིད་དོ། །ཨའི་སྒྲ་ནི་ཆོས་ཉིད་སྐྱེ་བ་མེད་པའི་དོན་བསྒོམ་མོ། །ཐབས་ཇི་ལྟར་སྒོམ་ན་ཨའི་དབྱིངས་ལས་ཡི་གེ་ཐམས་ཅད་འབྱུང་བའི་ཕྱིར་ན་ཨ་ནི་ཡི་གེ་མཆོག་སྟེ་དེ་ལ་དམིགས་པ་རྩེ་གཅིག་ཏུ་བརྟན་པ་ལ་ནི་བསྒོམ་པ་ཞེས་བྱའོ། །གཉིས་པ་ནི། ཨ་རབ་ཏུ་བརྟན་འགྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་འཕྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེེལ་འགྲིབ་མེད་པར་བརྟན། །རྩ་བའི་ཡི་གེ་ཨ་ལས་སྤྲོ་བསྡུ་བྱ་བར་བསྟན་པ་ནི་རྒྱུའི་ཏིང་ངེ་འཛིན་ཨ་དཀར་པོ་དེ་རྐྱེན་དབང་དུ་མི་འགྲོ་བར་བརྟན་པ་དང་འོད་སྤྲོས་ཏེ་ཨ་ནི་ཆོས་ཉིད་ཀྱི་རང་བཞིན་རིག་པ་བྱང་ཆུབ་སེམས་སོ། །རབ་ཏུ་བརྟན་པར་གྱུར་པ་ནི་དམིགས་པ་རྩེ་གཅིག་པས་གསལ་བར་གྱུར་པའོ། །གཞིའི་ཨ་དཀར་པོ་དེ་ལས་ཤིན་ཏུ་ཕྲ་བའི་ཨ་མང་པོ་རྣམས་ཕར་སྤྲོས་ཤིང་འཕྲོ་བའོ། །ཡན་ལག་གི་ཡི་གེ་དབྱངས་དང་གསལ་བྱེད་པ་ལ་སྤྲོ་བསྡུ་བྱ་བར་བསྟན་པ་ནི་ཡི་གེ་ཨ་ཕྱོགས་བཅུར་སྤྲོས་པས་ཕྱོགས་བཅུ་ཨས་གང་བར་དམིགས་ནས་ཡི་གེ་ཨ་གསལ་བར་གྱུར་ནས་འོད་སྤྲོ་བསྡུ་བྱའོ། །འོད་ཟེར་གྱིས་དངོས་པོར་སྣང་བ་ཐམས་ཅད་སྲེག་སྦྱངས་ནས་ཆོས་ཐམས་ཅད་དོན་དམ་པའི་བདེན་པར་བྱས་ཚུར་ལ་འདུས་པས་ཨའི་གཞི་མ་ལ་ཐིམ་མོ། །དེ་ལྟར་བྱས་པས་ཕར་ལ་སྤྲོས་ཀྱང་ཨ་ཆུང་ངུ་མ་སོང་ཚུར་བསྡུས་ཀྱང་ཆེར་མ་སོང་བས་བསྡུས་ཀྱང་འཕེལ་འགྲིབ་མེད་པར་བརྟན་པའོ། །གསུམ་པ་ནི། དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །ཨ་དེ་ལས་མིང་གི་ཡི་གེའི་ཚོགས་ནི། ཀ་ཁ་ག་གྷ་ང་ལ་སོགས་དང་ཨ་ཨཱ་ཨི་ཨཱི་ལ་སོགས་པ་དེ་དག་ཡིད་ལ་གསལ་བ་དང་ཁ་དོག་འོད་ཟེར་འབར་བར་བསྒོམ་པའོ། །དེ་ནི་ཀུན་རྫོབ་བདེན་པའི་ཡི་གེའོ། །དེ་རྣམས་ལས་སྤྲོ་ཞིང་བསྡུ་བའང་སྔར་ཨ་ལས་ཡི་གེ་དབྱིབས་དང་འོད་ཟེར་ཅན་དུ་འཕྲོས་པས་སྣོད་བཅུད་སྦྱངས་པས་ཨ་ཆུང་དུ་མ་སོང་བསྡུས་པས་ཀྱང་ཆེར་མ་སོང་བ་དེ་བཞིན་བྱ་བ་ཡིན་ནོ། །དེ་ཡང་ཆོས་ཉིད་ཡིན་པས་འཕེལ་འགྲིབ་དང་བྲལ་ལོ། །བཞི་པ་ནི། འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །ཞེས་གསུངས་ཏེ། ཡི་གེ་འདི་ནི་དོན་སྐྱེ་བ་མེད་པའི་ཡི་གེ་རྟགས་ནི་ཡི་གེ་ཨ་འབྲས་བུ་སྐུ་གསུང་ཐུགས་རྡོ་རྗེ་གསུམ་གྱི་དངོས་གྲུབ་ཐམས་ཅད་འབྱུང་བའོ། །ཏིང་ངེ་འཛིན་བརྟན་པ་ལས་བྱུང་བ་ནི་སྐུ་དང་ཡེ་ཤེས་ཐམས་ཅད་ཀྱི་འབྱུང་བའི་རྒྱུའམ་བསྐྱེད་པའི་རྐྱེན་ཡང་ཡི་གེ་ཡིན་ནོ། །གསུམ་པ་དཀྱིལ་འཁོར་དངོས་བསྒོམ་པ་ལ་གཉིས་ཏེ། རྟེན་གཞལ་ཡས་ཁང་དང་། བརྟེན་པ་ལྷའོ། །རྟེན་གཞལ་ཡས་ཁང་ལ་གཉིས་ཏེ། འབྱུང་བ་དབང་ཆེན་དང་། གཞལ་ཡས་ཁང་ངོ་། །དང་པོ་ནི། དེ་ལས་རྒྱལ་བའི་བཞུགས་གནས་རྟེན། །དབང་ཆེན་དཀྱིལ་འཁོར་རིམ་བཞིན་བསྒོམ། །ཨེ། ཡཾ། བཾ། སུཾ། ལཾ། ཞེས་སོ། །འདིར་འབྱུང་བ་རིམ་བརྩེགས་ལ་ཡང་དྲུག་སྟེ་སྦྱང་བྱ་ནི་སྣོད་ཀྱི་འཇིག་རྟེན་ནོ། །སྦྱོང་བྱེད་ནི་འབྱུང་བ་རིམ་བརྩེགས་སོ། །ངོ་བོ་ནི་འབྱུང་བ་ལྔའོ། །རྣམ་གྲངས་ནི་འདུས་བྱས་ཀྱི་འབྱུང་བ་དང་ཆོས་ཉིད་ཀྱི་འབྱུང་བའོ། །བསྒོམ་ཐབས་ནི་རྒྱུའི་ཏིང་ངེ་འཛིན་གསལ་ཞིང་བརྟན་པ་དེ་ལས་རྒྱལ་བའི་ཚོགས་རྣམས་བཞུགས་པའི་གནས་སམ་རྟེན་དུ་གྱུར་པ་སྒོམ་པ་ནི་འབྱུང་བ་ལྔ་རང་བཞིན་གྱིས་སངས་རྒྱས་པས་ན་དབང་ཆེན་གྱི་དཀྱིལ་འཁོར་སྟེ་དེ་དག་རིམ་པ་བཞིན་བསྒོམ་པའི་ཚུལ་ཨ་ལས་ཨེ་ཆད་དེ་ཡོངས་སུ་གྱུར་པ་ལས་ཨེ་གྲུ་གསུམ་ཆོས་ཀྱི་འབྱུང་གནས་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བ་གཅིག་བསྒོམ། དེ་ཡང་འབྱུང་བ་ནམ་མཁའ་ཡུམ་ཀུན་ཏུ་བཟང་མོའི་བྷ་ག་རྣམ་པར་དག་པས་ནང་དུ་ན་ཀུན་གཞི་སྦྱོང་ཞིང་ཉོན་མོངས་པ་གཏི་མུག་དག ། ཡེ་ཤེས་ལྔ་ལས་ཆོས་ཀྱི་དབྱིངས་ཀྱི་ཡེ་ཤེས་སོ། །ཡྃ་ལས་རླུང་གི་དཀྱིལ་འཁོར་དབྱིབས་ཟླ་གམ་མདོག་ལྗང་གུ་འབྱུང་བ་རླུང་དང་ཡུམ་དམ་ཚིག་སྒྲོལ་མ་ནང་དུ་ན་ཕུང་པོའི་དབུགས་ཉོན་མོངས་ཕྲག་དོག་བྱ་བ་གྲུབ་པའི་ཡེ་ཤེས་རྣམས་སོ། །བཾ་ལས་ཆུ་ཡི་དཀྱིལ་འཁོར་དབྱིབས་ཟླུམ་པོ་མདོག་དཀར་པོ་འབྱུང་བ་ཆུ་ཡུམ་མ་མ་ཀི་ལུས་ལ་སྦྱར་ན་ཁྲག་ཉོན་མོངས་ང་རྒྱལ་མཉམ་པ་ཉིད་དོ། །སུྃ་ལས་གསེར་གྱི་ས་གཞི་དབྱིབས་གླུ་བཞི་མདོག་སེར་པོ་འབྱུང་བ་ས་ཡུམ་སངས་རྒྱས་སྤྱན་ཕུང་པོ་ནི་ཤ་ཉོན་མོངས་ཞེ་སྡང་མེ་ལོང་ལྟ་བུའི་ཡེ་ཤེས་སོ། ལཾ་ལས་རིན་པོ་ཆེའི་རི་རབ་དབྱིབས་གྲུ་བཞི་མཁར་ཐབས་མདོག་ཡེ་ཤེས་ལྔ་ལྡན་འདི་ཡང་ཡུམ་སངས་རྒྱས་སྤྱན་འབྱུང་བ་ས་ཕུང་པོ་ནི་ཤ་ཉོན་མོངས་ཞེ་སྡང་མེ་ལོང་ཡེ་ཤེས་སོ། །དེའི་སྟེང་དུ་རཾ་ལས་མེའི་དཀྱིལ་འཁོར་དབྱིབས་གྲུ་གསུམ་ཁ་མདོག་སྣ་ཚོགས་འབྱུང་བ་ནི་མེ་ཡུམ་གོས་དཀར་མོ་ཕུང་པོའི་དྲོད་ཉོན་མོངས་འདོད་ཆགས་ཡེ་ཤེས་ནི་སོ་སོར་རྟོག་པའི་ཡེ་ཤེས་དང་སྦྱར་རོ། །འབྲས་བུ་ནི་འབྱུང་ལྔ་ཡེ་ནས་སངས་རྒྱས་པའོ། །གཉིས་པ་གཞལ་ཡས་ཁང་ལ་གསུམ་སྟེ་བསྐྱེད་པའི་སྔགས་དང་། ཅིག་ཆར་བའི་དཀྱིལ་འཁོར་དང་། རིམ་པས་བསྐྱེད་པའོ། །དང་པོ་ནི། བྷྲུཾ་བི་ཤྭ་བི་ཤུད་དྷེ། ཞེས་ཏེ། རིན་པོ་ཆེའི་རི་རབ་ཀྱི་སྟེང་དུ་ཡི་གེ་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཕྱི་ནས་བལྟས་ན་ནང་གསལ་བ་ནང་ནས་བལྟས་ན་ཕྱི་གསལ་བ་གང་ཡང་མི་སྒྲིབ་པའི་རང་བཞིན་ཅན་ནོ། །གཉིས་པ་ནི། ཡེ་ཤེས་ཕྱོགས་ཁ་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་ཀ་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ག་ཆེན་པོར་སྤྱོད་། །ཅེས་སོ། །གང་རྟོགས་པར་བྱ་ན་མཚོན་བྱེད་ནི་འཁོར་ལོ་རྩིབས་བཞི་དབུས་དང་ལྔའོ། །མཚོན་བྱ་ནི་ཡེ་ཤེས་ལྔ་སྟེ་དབུས་ཆོས་ཀྱི་དབྱིངས་ཀྱི་ཡེ་ཤེས། ཤར་མེ་ལོང་། ལྷོར་མཉམ་པ་ཉིད། ནུབ་སོ་སོར་ཀུན་རྟོག །བྱང་བྱ་བ་གྲུབ་པའི་ཡེ་ཤེས་རྣམས་ལ་ཕྱོགས་བཞི་དབུས་དང་ལྔར་བརྟགས་པ་སྟེ་དེ་ཡང་ཕྱོགས་མཐུན་པ་དང་གྲངས་དང་མཐུན་པ་དང་དོན་མཐུན་པ་དང་རྟགས་མཐུན་པས་སོ། །དེ་ཇི་ལྟར་རྟོགས་པར་བྱ་ན་དཀྱིལ་རྡོ་རྗེ་སེམས་དཔའ་ལ་འཁོར་བཞི་བཅུ་ཐམ་པས་བསྐོར་བ་ནི་གདུལ་བྱའི་བློ་བསམ་ཡས་ཀྱང་བློ་ཆེ་བ་ལ་རང་བཞིན་ལྷུན་གྲུབ་ཏུ་གནས་པ་ནི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་རོ། །དེ་གང་གིས་རྟོགས་པར་བྱ་ན་སྒྲུབ་པ་པོ་རྟེན་གྱི་གང་ཟག་བློ་མཆོག་ཏུ་གྱུར་པ་སྟེ། དེས་ཆོས་ཐམས་ཅད་ཡེ་ནས་ལམ་དང་གཉེན་པོས་མ་བཅོས་པ་སྐུ་དང་ཡེ་ཤེས་སུ་སངས་རྒྱས་པའི་རང་བཞིན་དུ་རྒྱུད་ཀྱི་དོན་རྫོགས་པ་ཆེན་པོའི་དོན་རྟོགས་པའི་རྣལ་འབྱོར་པས་སོ། །རྟོགས་པའི་དོན་ཅི་ཞེ་ན་བུདྡྷ་བཞི་བཅུ་རྩ་གཉིས་དང་པོ་ནས་རང་ལ་ལྷུན་གྱིས་གྲུབ་པའི་ཕྱིར་ན་རིག་པ་ལས་བུདྡྷ་ཀུན་འབྱུང་བ་རྒྱ་མཚོ་ལས་གཟའ་སྐར་འཆར་བ་བཞིན་དུ་དུས་གཅིག་ལ་རྫོགས་པར་བསྒོམ་པ་ཡིན་པས་དཀྱིལ་འཁོར་ཆེན་པོར་སྤྱོད་ཅེས་སོ། །གསུམ་པ་རིམ་གྱིས་བསྐྱེད་པ་ལ་གསུམ་སྟེ། དཀྱིལ་འཁོར་གྱི་མཚན་ཉིད་དང་། རྒྱན་དང་། གདན་ནོ། །དང་པོ་ནི། འཁོར་ལོ་རྩིབས་བཞི་མུ་ཁྱུད་བཅས། །ལྷག་པའི་ཡེ་ཤེས་གློ་འབུར་ཅན། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །ཞེས་གསུངས་ཏེ། སྤྱིར་གཞལ་ཡས་ཁང་ལ་གསུམ་སྟེ། ཆོས་ཉིད་རང་བཞིན་གྱི་དཀྱིལ་འཁོར་དང་། དམིགས་པ་གཟུགས་བརྙན་དང་། བསམ་པ་ཏིང་ངེ་འཛིན་ནོ། །རང་བཞིན་ལ་གཉིས་ཏེ་རང་བཞིན་གྱི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་པའི་དཀྱིལ་འཁོར་རོ། །གཟུགས་བརྙན་ལ་གཉིས་ཏེ་གཟུགས་བརྙན་དང་། ལྷག་པའི་གཟུགས་བརྙན་ནོ། །ཏིང་ངེ་འཛིན་གྱི་དཀྱིལ་འཁོར་ལ་གཉིས་ཏེ་ཏིང་ངེ་འཛིན་གྱི་དཀྱིལ་འཁོར་དང་། ལྷག་པ་ཏིང་ངེ་འཛིན་གྱི་དཀྱིལ་འཁོར་རོ། །དེའི་སྟེང་དུ་བྱང་ཆུབ་སེམས་ཀྱི་དཀྱིལ་འཁོར་དང་། མཆོད་པ་ཚོགས་ཀྱི་དཀྱིལ་འཁོར་རོ། །དེ་ལས་འདིར་རང་བཞིན་གྱི་དཀྱིལ་འཁོར་ཏེ་གཞལ་ཡས་ཁང་ནི་དབུས་ལྟེ་བ་ཟླུམ་པོ་ཆོས་ཀྱི་དབྱིངས་ཏེ་མཐིང་གའོ། །རྩིབས་བཞི་ནི་ཡེ་ཤེས་བཞི་སྟེ་གསེར་གྱི་འཁོར་ལོ་རྩིབས་བཞི་པ། སྤྲོས་པ་མེད་པའི་མུ་ཁྱུད་ཟླུམ་པོ་རྡོ་རྗེའི་རྩིགས་པ་དང་བཅས་པའོ། །ཐམས་ཅད་དབང་དུ་བསྡུད་པའི་རྩིབས་མཆན་དམར་པོ་ཕྲིན་ལས་བཞི་དང་ལྡན་པས་ན་གྲུ་ཆད་ལྗང་གུའོ། །ཡེ་ཤེས་རེ་རེ་ལ་ཡང་ལྷག་པའི་ཡེ་ཤེས་བསམ་གྱིས་མི་ཁྱབ་པའི་རྟགས་སུ་གློ་འབུར་བཞི་སྟེ་ཤར་ན་དུང་གི། ལྷོ་ན་གསེར་གྱི། ནུབ་ན་ཟངས་ཀྱི། བྱང་ན་གཡུ་ཡི་གློ་འབུར་དུ་སྣང་ངོ་། །དེ་ཡང་ཡེ་ཤེས་གཞན་ལས་ཁྱད་པར་དུ་གྱུར་ཏེ་སྤང་ནས་ལྷག་པའི་རྟགས་ཅན་ནོ། །ཕྲིན་ལས་བཞིའི་གྲུ་ཆད་བཞིས་དབུས་ཀྱི་ཕོ་བྲང་ལ་བརྒྱན་པའོ། །དབྱེར་མེད་པའི་དོན་ལ་མཁས་པས་བདེན་པར་ཚུལ་གཅིག་ཏུ་འདུས་ཏེ་དོན་དམ་ཀུན་རྫོབ་དབྱེར་མེད་པས་ན་བར་ཁྱམས་ཕྱོགས་མཐུན་དང་། རང་རིག་པ་ཉིད་ལ་སངས་རྒྱས་ཀྱི་ཆེ་བའི་ཡོན་ཏན་ཐམས་ཅད་ལྷུན་གྱིས་གྲུབ་པའི་རྟགས་སུ་ཕྱིའི་དབྱིབས་ཀུན་ཏུ་གྲུ་བཞིར་གྱུར་པའོ། །དེ་ཡང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བའི་ཕྱིར་ན་སྒོ་ཁྱུད་བཞི་དང་ལྡན་པ་ཐེག་པ་རིམ་པ་བརྒྱད་ཡོད་པའི་གནས་སུ་གྱུར་པས་རྟ་བབས་བརྒྱད་ཡོད་པ། སྟོང་ཉིད་མི་ཤིགས་པའི་རྟགས་སུ་རྡོ་རྗེའི་ར་བས་བསྐོར་བ། གདུག་པ་ཅན་འཇོམས་པའི་རྟགས་སུ་མེ་དཔུང་འབར་བས་འཁྲིགས་པ་ཅན་ནོ། །གཉིས་པ་ནི། རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །ཞེས་པ་སྟེ། འདི་ལ་སྤྲུལ་པའི་རྒྱན་དང་བདག་པོའི་རྒྱན་གཉིས་ལས། དང་པོ་ནི། གཞལ་ཡས་ཁང་དེ་ལ་པན་ཙ་ར་གའི་རྩིགས་པ་དང་རིན་ཆེན་ཕ་གུའི་བར་ན་འདོད་ཡོན་སྣམ་བུ་དམར་པོ་ལ་རོལ་མོ་ལ་སོགས་པའི་མཆོད་རྫས་སྣ་ཚོགས་ཐོགས་པའི་འདོད་པའི་ཡོན་ཏན་ལྔའི་ལྷ་མོ་སྣ་ཚོགས་པའི་གཟུགས་ཅན་སྤྲིན་ཕུང་བཞིན་དུ་འཁྲིགས་པ་སྟེ་སྣང་ལ་རང་བཞིན་མེད་པ་གསལ་ལ་མི་སྒྲིབ་པའོ། །གཉིས་པ་བདག་པོའི་རྒྱན་ནི། །གཞལ་ཡས་ཁང་གི་བདག་པོ་ནི་དཀྱིལ་འཁོར་གྱི་ལྷ་ཚོགས་རྒྱལ་བ་བཞི་བཅུ་རྩ་གཉིས་སོ། །འོ་ན་དཀྱིལ་འཁོར་གྱི་རྒྱན་དུ་ལྷ་འགྲོ་བའི་འཐད་པ་ཅི་ཞེ་ན་སྤྱིར་རྒྱན་ལ་དུ་མ་ཡོད་ཀྱང་འདིར་རང་བཞིན་ལྷུན་གྱིས་གྲུབ་པའི་དབང་དུ་བྱས་ན་གཞལ་ཡས་ཁང་དང་ལྷ་ལ་སྔ་ཕྱི་མེད་ལ། འདིར་སྔ་ཕྱི་བྱུང་བ་ནི་གདུལ་བྱའི་བསམ་པ་ལ་དགོངས་ནས་གདུལ་བྱ་བློ་ཆུང་བས་དུས་སྐད་ཅིག་ལ་མི་ལྕོགས་པར་རིམ་པས་སྨོས་པ་ཡིན་ཏེ། དེ་བས་ན་སྔོན་ལ་གཞལ་ཡས་ཁང་བསྐྱེད་ནས་དེ་ནས་ལྷ་ཕྱི་ལ་བསྐྱེད་པ་ལ་དགོངས་ནས་རྒྱན་ཟེར་རོ། །ལྷ་བཞི་བཅུ་རྩ་གཉིས་ཀྱི་ཆ་བྱད་ཅན་སྤྲུལ་པ་བཞི་བཅུ་རྩ་གཉིས་ཀྱིས་བརྒྱན་ཟེར་རོ། །ཡང་ན་གཞལ་ཡས་ཁང་གི་རྒྱན་དུ་ལྷ་འགྱུར་ཏེ་ཁང་སྟོང་ལ་བདག་པོས་བརྒྱན་པ་ལྟ་བུའོ། །གསུམ་པ་ནི། སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲོ་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་པས་བསྟན། འདིར་གདན་ལ་གསུམ་ལས་རྟགས་ཀྱི་ཆེ་བས་ཁེངས་པ་བཅོམ་པའི་གདན་ནི་སེམས་ཅན་བརྒྱད་བརྒྱད་མཇུག་མ་ནང་དུ་བསྣོལ་ནས་གདན་འོག་ན་རྣ་བས་ཆོས་ཉན་པ་སྟེ་བྱང་ཆུབ་སེམས་དཔའ་ཤེས་བྱའི་སྒྲིབ་པ་སྦྱོང་བས་ལུས་གདན་དུ་ཕུལ་བའོ། །དེ་ཡང་དབུས་ཤེས་རབ་ཀྱི་ཕ་རོལ་ཏུ་ཕྱིན་པས་མི་འཇིགས་པ་བཞི་ཐོབ་པའི་རྟགས་སུ་སེང་གེ་ཡི་གདན་ནོ། །ཤར་དུ་བསམ་གཏན་གྱི་ཕ་རོལ་ཏུ་ཕྱིན་པས་མི་འགྱུར་བའི་རྟགས་སུ་སྟོབས་བཅུ་མངའ་བས་གླང་ཆེན་གྱི་གདན་དཀར་པོའོ། །ལྷོར་སྤྱིན་པའི་ཕ་རོལ་ཏུ་ཕྱིན་པས་རྫུ་འཕྲུལ་རྐང་པ་བཞི་མཚོན་པའི་རྟགས་སུ་རྟ་མཆོག་གི་གདན་སྔོན་པོ་དང་། ནུབ་ཏུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མཚོན་པའི་རྟགས་སུ་དབང་བཅུ་མཚོན་པ་མཛེས་པའི་ཁྱུང་རྨ་བྱའི་གདན་སྣ་ཚོགས། བྱང་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྟགས་སུ་འཕྲིན་ལས་སྣ་ཚོགས་པ་མཚོན་པའི་ཤང་ཤང་ནམ་མཁའ་ལྡིང་གི་ཁྲི་ཆེན་ནམ་གདན་ལུས་སོ་སོ་ལ་གཤོག་པ་གཡུར་སྣང་བའོ། །གཉིས་པ་སའི་ཁྱད་པར་བསྒྲོད་པའི་གདན་ནི། བཅུ་གཅིག་ཀུན་ཏུ་འོད་དང་བཅུ་གཉིས་མ་ཆགས་པདྨ་ཅན་དང་བཅུ་གསུམ་ཡི་གེ་འཁོར་ལོ་ཚོགས་ཆེན་གྱི་ས་ནོན་པས་ཤེས་རབ་སྟོང་པ་མཚོན་པ་ཉི་མའི་གདན་དང་། ཐབས་མ་འགགས་པ་མཚོན་པ་ཟླ་བའི་གདན་དང་། སྐྱོན་གྱིས་མ་གོས་པ་མཚོན་པ་གདན་སྣ་ཚོགས་པའི་པདྨའོ། །གསུམ་པ་ཆོས་ཀྱི་འཁོར་ལོ་བསྐོར་བའི་གདན་ནི། འོག་གཞི་ཆོས་ཀྱི་འཁོར་ལོ་རྩིབས་བཞིའམ་རིན་པོ་ཆེ་འབར་བའི་ཁྲི་རྐང་ལ་དགོས་འདོད་སྣ་ཚོགས་འབྱུང་བ་དང་འོག་གཞི་འཁོར་ལོ་ལ་ཆོས་ཀྱིས་འགྲོ་བ་འདུལ་བར་བསྟན་པའོ། །དེ་བས་ན་རྒྱལ་བ་རིགས་ལྔ་ལ་དོན་དང་རྟགས་སུ་ལྡན་པའི་གདན་ལྔ་བརྩེགས་སོ། །ཀུན་བཟང་ཡབ་ཡུམ་དང་སེམས་དཔའ་སེམས་མ་ལ་ཉི་ཟླ་པདྨའོ། །ཐུབ་པ་ལ་པད་རྐྱང་ངོ་། །སྒོ་བ་ལ་རྡོ་རྗེ་བྲག་གི་སྟེང་ན་ཉི་མ་རྐྱང་པའོ། །གཉིས་པ་བརྟེན་པ་ལྷ་སྒོམ་པ་ལ་གཉིས་ཏེ། བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བ་དང་། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བའོ། །དང་པོ་བདག་སྲས་ལ་ལྔ་སྟེ། གཙོ་བོ་བསྐྱེད་པ་དང་། བདག་སྲས་ཀྱི་གཏན་ཚིགས་དང་། གསང་བའི་དཀྱིལ་འཁོར་བསྐྱེད་པ་དང་། སྔགས་ཀྱིས་ཕྱིར་གདོན་པ་དང་། དེ་དག་རྒྱུ་རྐྱེན་འཚོགས་པ་ལས་འབྱུང་བར་བསྟན་པའོ། །དང་པོ་ནི། ཨ་ནི་སྐྱེ་མེད་དེ་བཞིན་ཉིད། །ཀྵ་ནི་ཐུགས་ཀྱི་ཡེ་ཤེས་ཤར། །དེ་ལས་ཆོ་འཕྲུལ་གསུམ་གྱིས་བསྐྱེད། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པད་མོའི་དཀྱིལ། །ཕྱག་རྒྱ་ཆེན་པོའི་སྐུ་གཉིས་རྫོགས། །ཞེས་པ་སྟེ། བདག་སྔོན་གྱི་སངས་རྒྱས་ཡིན་པའི་ཕྱིར་ན་བདག་གི་སྲས་སུ་དེ་བཞིན་གཤེགས་པ་བྱ་བ་ནི་ལྔ་སྟེ། སངས་རྒྱས་གང་དང་སྦྱར་བ་དང་། དོན་གང་དང་མཐུན་པ་དང་། སྒོ་གང་ནས་འཇུག་པ་དང་། དོན་གང་རྟོགས་པ་དང་། ཡེ་ཤེས་གང་ཐོབ་པའོ། །དེ་ལ་སངས་རྒྱས་ནི་རང་བཞིན་ལྷུན་གྱིས་གྲུབ་པའི་སངས་རྒྱས་དང་སྦྱར། དེ་ཡང་བདག་རང་བཞིན་ལྷུན་གྱིས་གྲུབ་པའི་སངས་རྒྱས་ཡིན་པས་ན་རང་བཞིན་གྱི་ལྷར་བསྒོམ་པའོ། །དོན་གང་དང་མཐུན་ན་ཡེ་ཡིན་པ་དང་དོན་དང་མཐུན་པའོ། །ཡེ་ཡིན་པ་ནི་དཔེར་ན་འཇིག་རྟེན་སྲིད་པའི་མེས་པོ་ལྷ་དབང་ཕྱུག་ཆེན་པོ་ཡབ་ཡུམ་ཡིན་པ་ལྟར་སངས་རྒྱས་ཐམས་ཅད་ཀྱི་མེས་པོ་དཔལ་ཀུན་ཏུ་བཟང་པོའོ། །སྒོ་གང་ནས་འཇུག་པ་ནི་མ་ཧཱ་ཡོ་ག་ཨ་ཏི་ཡོ་ག་དང་སྦྱར་ནས་འཇུག་པའོ། །དོན་གང་རྟོགས་པ་ནི་རིག་པ་ཡེ་ནས་སངས་རྒྱས་པའི་དོན་དེ་རྟོགས་པའོ། །ཡེ་ཤེས་གང་རྟོགས་པ་ནི་རིག་པ་རང་གསལ་གྱི་ཡེ་ཤེས་ཐོབ་པའོ། །འོ་ན་བདག་དཔལ་ཀུན་ཏུ་བཟང་པོ་ཡབ་ཡུམ་གཉིས་པོ་སྔོན་གྱི་སངས་རྒྱས་ཡིན་ན་བུདྡྷ་བཞི་བཅུ་པོ་དེ་ལྷ་འཕྲལ་བྱུང་གི་སངས་རྒྱས་ཡིན་ནམ་ཞེ་ན། དེ་བྱས་ན་གློ་བུར་བ་ཡིན་པས་དོན་མི་འགྲུབ་པས་མི་འཐད་དོ། །དེ་མ་ཡིན་ན་སྔོན་གྱི་སངས་རྒྱས་ཞེས་ཅི་ལ་གདགས་ཞེ་ན་ཞེས་དྲིས་པ་ན། དེའི་ལན་དུ་དེ་ནི་འདི་ལྟར་ཤེས་པར་བྱ་སྟེ་རང་བཞིན་ལྷུན་གྱིས་གྲུབ་པའི་སངས་རྒྱས་ཡེ་ཇི་བཞིན་པའི་ཀུན་ཏུ་བཟང་པོ་མ་ཤེས་ན་རིག་པ་སངས་རྒྱས་སུ་ཐག་མི་ཆོད་པས་ན་དེ་སྐད་ཅེས་བྱ། རྟོགས་པ་མངོན་གྱུར་གྱི་སངས་རྒྱས་རྒྱུད་དག་པའི་སངས་རྒྱས་མེད་ན་རིགས་ནུབ་ཅིང་བདེ་གཤེགས་རྒྱུན་ཆད་པའི་ཕྱིར་ན་རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བའོ། །དོན་གོ་དྲིལ་ན་བུ དྡྷ་བཞི་བཅུ་རྩ་གཉིས་ལ་སྔ་ཕྱི་མེད་ཀྱང་གདུལ་བྱའི་བློ་དང་མཐུན་པར་བསྟན་པའོ། །དེ་བས་ན་བདག་སངས་རྒྱས་ནས་གཞན་དོན་བྱེད་པས་ན་བུདྡྷ་ཉིད་ལ་བུདྡྷ་ཉིད་ཀྱིས་དོན་བསྐུལ་བའོ། །དེ་ལྟར་ངེས་པར་བྱས་ནས་འདི་ལྟར་རྒྱུའི་ཏིང་ངེ་འཛིན་གྱི་ཨ་དེ་དབུས་ཀྱི་གདན་སྟེངས་སུ་བབས་པ་སྟེ་ཨའི་དོན་ནི་ཆོས་ཉིད་སྐྱེ་བ་མེད་པ་ཡིན་ལ་རྟགས་ཀུན་ཏུ་བཟང་མོའི་ས་བོན་ནོ། །ངོ་བོ་དེ་བཞིན་ཉིད་ཀུན་གཞི་ཆོས་ཀྱི་དབྱིངས་ཀྱི་རང་བཞིན་ནོ། །ཨ་དེ་ལས་ཀྵ་གཡས་སུ་འཕྲོས་པའི་དོན་ནི་ཐུགས་ཀྱི་ཡེ་ཤེས་སམ་ཐུགས་རིག་པའི་ཡེ་ཤེས་ཤར་བའོ། །རྟགས་ཀུན་ཏུ་བཟང་པོའི་ས་བོན་ནོ། །ངོ་བོ་ཡིད་རང་བྱུང་གི་ཡེ་ཤེས་བདེ་བར་གཤེགས་པའི་ཐུགས་སོ། །དེ་ལས་ཆོ་འཕྲུལ་གསུམ་གྱིས་ལྷར་བསྐྱེད་པའི་ཚུལ་ནི་ཨ་དང་ཀྵ་གཉིས་སུ་གསལ་བ་གསུང་ཡིག་འབྲུའི་ཆོ་གའོ། །དེ་འཕྲོ་འདུས་པས་རྡོ་རྗེ་དང་དྲིལ་བུ་གཉིས་སུ་གྱུར་པ་ནི། ཐུགས་ཕྱག་མཚན་གྱི་ཆོ་གའོ། །དེ་འཕྲོ་འདུས་པ་ལས་སྐུ་ཕྲ་མོར་གྱུར་པ་ནི་སྐུ་ཡོངས་སུ་རྫོགས་པའི་ཆོ་གའོ། །དེ་འཕྲོ་འདུས་པ་ལས་སྔགས་བརྗོད་པས་ཀུན་བཟང་ཡབ་ཡུམ་དུ་བསྐྱེད་པའི་ཚུལ་ནི་སྐུ་ཕྲ་མོ་དེ་ལ་ཧཱུྃ་ཧཱུྃ་ཧཱུྃ་བཛྲ་ཙིཏྟ་ཧཱུཾ་ཞེས་བརྗོད་པས་ཀུན་ཏུ་བཟང་པོ་ཞབས་གཉིས་དཀྱིལ་ཀྲུང་མཉམ་བཞག་ཏུ་བཞུགས་པ་རྒྱན་ཐམས་ཅད་ཀྱིས་བརྒྱན་པ་སྐུ་མཐིང་ཀ་ཕྱག་གཉིས་མཉམ་བཞག་གི་ཕྱག་རྒྱ་ཅན་དགོངས་པ་མཉམ་བཞག་ཏུ་བཞུགས་པའོ། །སོར་མོ་སོ་སོར་གསལ་བ་ནི་ཡེ་ཤེས་འཕྲོ་ཞིང་གསལ་བའི་དོན་ཡིན་ནོ། །ཨ་ཨ་ཨ་བཛྲ་བྷ་དྲ་ས་མ་ཡ་སྟྭཾ་ཞེས་བརྗོད་པས་ཡུམ་ཀུན་ཏུ་བཟང་མོར་གྱུར་བ་ནི་ཞལ་གཅིག་ཕྱག་གཉིས་པ་སྐུ་མཐིང་ཀ་ཡབ་ལ་འཁྲིལ་བ་ཞབས་པ ད་མའི་སྐྱིལ་ཀྲུང་དུ་བཞུགས་པ་ཡབ་དང་སྐུ་མཉམ་པར་རྫོགས་པ་ཞབས་པད་མོའི་སྐྱིལ་ཀྲུང་དུ་བཞུགས་པ་ནི་ཉེས་པའི་སྐྱོན་དང་བྲལ་བའི་དོན་ནོ། །དེ་ལྟར་ལྷ་སྐུ་ཕྱག་རྒྱར་བསྒོམ་པ་འདི་ནི་དཀྱིལ་འཁོར་ཐམས་ཅད་ཀྱི་སྤྲོ་གཞི་དང་ཁྱབ་བདག་ཡིན་པས་ཕྱག་རྒྱ་ཆེན་པོའི་སྐུ་ཞེས་པ་ཀུན་བཟང་ཡབ་ཡུམ་གཉིས་རྫོགས་པར་བསྒོམ་པའོ། །གཉིས་པ་ནི། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཕྱོགས་དུས་དཀྱིལ་འཁོར་བདག་ཉིད་ཆེ། །ཀུན་བཟང་ཡེ་ནས་ཡིན་པའི་ཕྱིར། །ཞེས་གསུངས་ཏེ། རྣལ་འབྱོར་པ་བདག་ཉིད་དཔལ་ཀུན་ཏུ་བཟང་པོར་བསྐྱེད་པ་དེ་ཡང་འཕྲལ་ལ་བྱས་པ་ལྟ་བུ་མིན་ཏེ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེའི་བདག་པོའམ་རང་བཞིན་དང་ཕྱོགས་བཅུ་དུས་བཞིའི་དཀྱིལ་འཁོར་ཐམས་ཅད་ཀྱི་བདག་ཉིད་ཆེན་པོ་དཔལ་ཀུན་ཏུ་བཟང་པོ་ཉིད་ཡེ་ནས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱའོ། །གསུམ་པ་ནི། ཐབས་དང་ཤེས་རབ་དགྱེས་སྤྲིན་ལས། །བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བ་སྨིན་གྲུབ་བྱེད། །ངོ་མཚར་མིང་ཚོགས་བཞི་བཅུ་གཉིས། །ཨ་ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵ། ཨི་ཨཱི། ཨུ་ཨཱུ། ཨེ་ཨཱེ། ཨོ་ཨཱ། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོ་དེ་ཉིད་ངེས། །ཞེས་གསུངས་ཏེ། ཡབ་ཐབས་ཀྱི་རང་བཞིན་ཀུན་ཏུ་བཟང་པོའི་མཁའ་ནི་རྡོ་རྗེ་རྩེ་ལྔ་པ་མཆུ་སྦུབས་སུ་ༀ་གྱིས་མཚན་པ་དང་། ཡུམ་ཤེས་རབ་ཀུན་ཏུ་བཟང་མོའི་མཁའ་ནི་པདྨ་འདའ་མ་བརྒྱད་པར་བསྒོམ་པའི་ལྟེ་བ་ལ་ཨཾ་བསམ། དེ་ལྟར་ཡབ་ཡུམ་གཉིས་སུ་མེད་པར་དགྱེས་པར་རོལ་པའི་བྱང་ཆུབ་སེམས་སྤྲིན་ལྟ་བུ་ཟག་པ་མེད་པའི་ཐིག་ལེ་བདེ་བ་ཆེན་པོ་ལས་ཡབ་ཡུམ་རོལ་པའི་བྱང་ཆུབ་སེམས་ཀྱི་ཚོགས་སུ་བྱུང་བ་ནི་ལྷ་བསྐྱེད་པའི་རྒྱུ་འཁོར་ལོ་ལྟར་འབྱུང་ངོ་། །དེ་ལྟ་བུའི་ཡི་གེ་རྣམས་ལ་བསྐྱེད་པ་རྐྱེན་གྱི་སྔགས་བརྗོད་ན་ཡི་གེའི་འབྲས་བུ་ནི་བུདྡྷ་རྒྱལ་བ་བཞི་བཅུ་རྩ་གཉིས་སུ་སྨིན་ཅིང་གྲུབ་པར་བྱེད་པའོ། །རྒྱུ་ཡི་གེ་དེ་ལས་འབྲས་བུ་སངས་རྒྱས་སུ་གྲུབ་པ་ནི་ངོ་མཚར་ཏོ། །མིང་ཚོགས་ནི་ཡི་གེའོ། །བཞི་བཅུ་རྩ་གཉིས་ནི་གྲངས་ཀྱི་རྣམ་གྲངས་སོ། །དེ་ཡང་ཡི་གེ་འདི་རྣམས་ལ་སྤྱི་དོན་གསུམ་སྟེ་ཡི་གེ་འབྱུང་བའི་གནས་དང་། ཡི་གེའི་ངོ་བོ་དང་། ཡི་གེ་ལྷ་དང་སྦྱོར་བའོ། །ཡི་གེ་འབྱུང་བའི་གནས་ནི་ཨ་ཁོང་ནས་འབྱུང་། ཀ་སྡེ་མགྲིན་པ་ནས་འབྱུང་། ཙ་སྡེ་ལྕེ་རྩེ་དང་སོ་ལས་འབྱུང་། ཊ་སྡེ་ལྕེ་རྩེ་དང་རྐན་ལས་འབྱུང་། ཏ་སྡེ་ལྕེ་ལས་འབྱུང་། པ་སྡེ་མཆུ་ལས་འབྱུང་། ཝ་ཡ་མཆུ་ལས་སོ། །ར་ལྕེ་ལས་སོ། །ལ་ལྕེ་དང་སོ་ལས་སོ། །ཤ་དང་ས་ནི་ལྕེ་དང་སོ་ལས་སོ། །ཀྵ་ལྟེ་བ་ནས་སོ། །ཨི་ཨཱི་སྤྱི་བོ་ནས་སོ། །ཨུ་མཆུ་ལས་སོ། །ཨེ་གྲེ་བ་ནས་སོ། །ཨོ་ཨཱོ་མཆུ་ལས་སོ། །ངོ་བོ་ནི་སེམས་ཀྱི་རང་བཞིན་སྐྱེ་བ་མེད་པ་ལས་གདངས་འགགས་མེད་དུ་ཤར་བའོ། །ལྷ་དང་ངོ་སྦྱར་བ་ནི་གསུམ་སྟེ། ཕྱི་རྟོག་ཚོགས་བཞི་བཅུ་རྩ་གཉིས་སུ་ངོ་སྤྲད་པ་དང་། ནང་རྩ་གནས་ཀྱི་ཐིག་ལེ་དང་སྦྱར་བ་དང་། གསང་བ་ཡབ་ཡུམ་གྱི་བྱང་སེམས་དང་སྦྱར་བའོ། །དེ་ཡང་གཞི་ཐིག་ལེར་གནས་པ་ལས་བྱང་སེམས་ཡི་གེར་བབས་པ་ལས་ལྷར་བསྐྱེད་པ་ནི་ཨ་སྐྱེ་བ་མེད་པའི་དོན་ཀུན་གཞི་ཆོས་ཀྱི་དབྱིངས་ཡུམ་ཀུན་ཏུ་བཟང་མོའི་རྒྱུའོ། །ཀ་ས་ཡི་སྙིང་པོ། ཁ་ཕྱག་ན་རྡོ་རྗེ། ག་སྤྱན་རས་གཟིགས། གྷ་ནམ་མཁའི་སྙིང་པོ། ང་གཤིན་རྗེ་གཤེད། ཙ་ལ་སེ་མ། ཚ་ནིར་ཏི་མ། ཛ་གིར་ཏི་མ། ཛྷ་མ་ལེ་མ། ཉ་སྟོབས་པོ་ཆེ། ཊ་རྣམ་སྣང་། ཋ་མི་བསྐྱོད་པ། ཌ་རིན་འབྱུང་། ཌྷ་སྣང་མཐའ། ཎ་དོན་གྲུབ། ཏ་སངས་རྒྱས་སྤྱན། ཐ་དབྱིངས་ཕྱུག་མ། ད་མ་མ་ཀི། དྷ་གོས་དཀར་མོ། ན་དམ་ཚིག་སྒྲོལ་མ། པ་བྱམས་པ། ཕ་སྒྲིབ་སེལ། བ་ཀུན་བཟང་། བྷ་འཇམ་དཔལ། མ་རྟ་མགྲིན། ཡ་དྷུ་པེ་བདུག་སྤོས་མ། ར་པུཥྤེ་མེ་ཏོག་མ། ལ་ཨ་ལོ་ཀེ་མར་མེ་མ། ཝ་གྷན་དྷེ་དྲི་ཆབ་མ། ཤ་ལྕགས་ཀྱུ་མ། ཥ་ཞགས་པ་མ། ས་ལྕགས་སྒྲོག་མ། ཧ་དྲི་བུ་མ། ཀྵ་ཡིད་ཀུན་ཏུ་བཟང་པོ། ཨི་ལྷའི་ཐུབ་པ། ཨཱི་ལྷ་མ་ཡིན་གྱི། ཨུ་མིའི། ཨཱུ་བྱོལ་སོང་གི། ཨེ་ཡི་དྭགས། ཨཱེ་དམྱལ་བ། ཨོ་ཨཱོ་བདུད་རྩི་འཁྱིལ་བ་ལུས་ཀྱི་རེག་བྱ་བཞི་རེག་པར་འདུས་པ་ཡི་གེ་གཉིས་སུ་བྱུང་བའོ། །ཡི་གེ་ཨ་ནི་སེམས་ལ་གནས་པའི་ཀུན་གཞི་དོན་དུ་ན་ཆོས་ཀྱི་དབྱིངས་ཀྱི་ཡེ་ཤེས་ཡི་གེ་ཐམས་ཅད་ཀྱི་འབྱུང་གནས་ཡིན་པས་ན་ཨ་ཉིད་ལས་ཡི་གེ་སྣ་ཚོགས་པ་འབྱུང་བའོ། །གང་འབྱུང་ཞེ་ན་གསལ་བྱེད་དུ་སྣང་བའི་ཀ་ལ་སོགས་པའི་ཡི་གེ་བཞི་བཅུ་རྩ་གཉིས་སུ་འབྱུང་བ་ནི་འབྱུང་བའི་གནས་གཞིའི་ཡི་གེ་ཨ་ལས་འབྱུང་བའོ། །དེ་ཡང་སྒྲ་ཡི་འབྱུང་གནས་ཡི་གེ་ཡིན་ལ་སྒྲ་ལས་མིང་འབྱུང་། མིང་ལས་ཚིག་འབྱུང་ཚིག་གིས་དོན་གསལ་ཞིང་རྟོགས་པས་ཚིག་ལས་དོན་བྱུང་ནས་དེས་ཆོས་ཐམས་ཅད་བསྡུས་པའོ། །རྒྱུའི་ཡི་གེ་བཞི་བཅུ་རྩ་གཉིས་ཉིད་འབྲས་བུ་མངོན་པར་རྫོོགས་པར་སངས་རྒྱས་པའི་རྒྱལ་བ་བཞི་བཅུ་རྩ་གཉིས་སུ་རྫོགས་པར་འབྱུང་ལ་རྒྱལ་བ་དེ་དག་ཉིད་ཀྱང་ལོངས་སྤྱོད་རྫོགས་པའི་སྐུ་འཁོར་ལོ་བསྒྱུར་བའི་རྒྱལ་པོ་ལྟར་འབྱུང་བ་དེ་ཉིད་ནི་སྤྲུལ་པ་ལྟ་བུ་ཡིན་པར་ངེས་སོ། །བཞི་པ་ནི། དེ་ལ་རྐྱེན་གྱི་སྔགས་ཀྱིས་བསྐུལ། །ཀུན་ཏུ་བཟང་པོ་ཡབ་ཡུམ་གྱི་མཁའ་གསང་ནས་གདན་སྟེངས་སུ་ཡི་གེ་འཕྲོས་པ་ལ་དེ་ལ་ཧཱུཾ་བཛྲ་དྷྲི་ག་ལ་སོགས་པའི་བསྐྱེད་པ་རྐྱེན་གྱི་སྔགས་ཀྱིས་བསྐུལ་བས་ལྷ་སོ་སོའི་སྐུ་ཡོངས་སུ་རྫོགས་པར་བསྐྱེད་དོ། །ལྔ་པ་ནི། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་གསལ། །འདུས་མ་བྱས་ཉིད་འདུས་བྱས་སྣང་། །རྡོ་རྗེའི་དཀྱིལ་འཁོར་འབྱིན་པའི་དམ། །དབང་མེད་རྒྱུ་རྐྱེན་འཚོགས་པའི་མཐུ་ཆེན་ཡིན། །ཞེས་པས་བསྟན་ཏེ། སྒྱུ་ནི་ཡིག་འབྲུ་བཞི་བཅུ་རྩ་གཉིས་ལ་འཕྲུལ་བ་ནི་དེ་ལས་དཀྱིལ་འཁོར་གྱི་ལྷ་བཞི་བཅུ་རྩ་གཉིས་སུ་བསྒོམ་པའོ། །ཕྱི་ནང་གསང་བ་དེ་ཁོ་ན་ཉིད་བཞི་ལས་འདི་རྣམས་གསང་བ་སྒྱུ་འཕྲུལ་དྲྭ་བའམ་རྣལ་འབྱོར་སྒྱུ་འཕྲུལ་དྲྭ་བ་སྟེ་ཆོས་ཉིད་ཀྱི་གཟུགས་བརྙན་ཡུམ་གྱི་སྐུར་བྱུང་བ་དང་ཡེ་ཤེས་ཀྱི་གཟུགས་བརྙན་ཡབ་ཀྱི་སྐུར་བྱུང་བ་གཉིས་ཡེ་ནས་དབྱིངས་དང་ཡེ་ཤེས་གཉིས་སུ་མེད་པར་འབྲེལ་བའི་ཕྱིར་དྲྭ་བའི་ལྷག་པ་ཏིང་ངེ་འཛིན་གྱི་དཀྱིལ་འཁོར་ན་རིག་པ་མངོན་སུམ་དུ་རྫོགས་པར་གསལ་བའོ། །དོན་དམ་པར་ཆོས་ཉིད་འདུས་མ་བྱས་པའི་ངང་ལས་མ་གཡོས་ཀྱང་ཀུན་རྫོབ་ཙམ་དུ་ལྷའི་སྐུ་ཉིད་འདུས་བྱས་ལྟར་སྣང་བ་ནི་དེ་ཁོ་ན་ཀུན་རྫོབ་དང་དོན་དམ་པར་སྣང་ཡང་དོན་གྱི་ངོ་བོ་ལ་བདེན་པ་དབྱེར་མེད་པའི་ཕྱིར་རྡོ་རྗེའི་དཀྱིལ་འཁོར་རམ་ཏིང་ངེ་འཛིན་གྱི་དཀྱིལ་འཁོར་འབྱིན་པའི་ཚུལ་ལས་མི་འདའ་བ་ནི་དམ་ཚིག་གོ། །དེ་ཡང་དཔེར་ན་རྒྱུ་ས་བོན་ལ་རྐྱེན་ཆུ་ལུད་འཛོམ་ན་འབྲས་བུ་རང་དབང་མེད་པར་འབྱུང་བ་ལྟར་རྒྱུ་ཟག་མེད་ཀྱི་བྱང་ཆུབ་སེམས་ཡི་གེར་སྣང་བ་དང་རྐྱེན་བསྐྱེད་པའི་སྔགས་ཀྱི་ནུས་པ་འཚོགས་ན་འབྲས་བུ་ལྷའི་སྐུ་རང་དབང་མེད་པར་འབྱུང་སྟེ་གསང་སྔགས་གསང་བའི་ནུས་མཐུ་ཆེན་པོ་ཡིན་ནོ། །དེ་ཡན་ཆད་ཀྱིས་བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱའོ། །གཉིས་པ་ལ་འཇུ་འདུལ་བྱ་བ་དང་། དཀྱིལ་འཁོར་བསྐྱེད་པའོ། །དང་པོ་ལ་བཞི་སྟེ་བསྐུལ་བར་དམ་བཅའ་བ་དང་། བསྐུལ་བ་དངོས་དང་། རྟོག་པ་སྦྱངས་པ་དང་། ལྷ་ཀུན་འོད་དུ་ཞུ་བའོ། །དང་པོ་ནི། དེ་ནས་བཅོམ་ལྡན་དགྱེས་ཆེན་རིགས། །ལྷུན་གྱིས་གྲུབ་པར་བྱ་བའི་ཕྱིར། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །རང་གི་ངང་ཚུལ་དེ་བཟུང་ནས། །བསྐུལ་ཚིག་འདི་ཡང་རབ་ཏུ་བརྗོད། །ཅེས་གསུངས་ཏེ། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བ་ལ་ལྔ་སྟེ། སངས་རྒྱས་གང་དང་སྦྱར་བ། དོན་གང་དང་མཐུན་པ། སྒོ་གང་ནས་འཇུག་པ། དོན་གང་ཐོབ་ཅིང་རྟོགས་པ། ཡེ་ཤེས་གང་རྟོགས་པའོ། །སངས་རྒྱས་གང་དང་སྦྱར་ན་རྟོགས་པ་མངོན་གྱུར་གྱི་སངས་རྒྱས་དང་སྦྱར། དེ་ཡང་རྟོགས་པ་མངོན་དུ་གྱུར་པའི་དཀྱིལ་འཁོར་བསྐྱེད་པའོ། །དོན་གང་དང་མཐུན་ན་ཕ་མས་བུ་ཚ་བསྐྱེད་པ་དང་འདྲའོ། །སྒོ་གང་ནས་འཇུག་ན་མ་ཧཱ་ཡོ་གའི་ཨ་ནུ་ཡོ་ག་ནས་འཇུག་གོ། །དོན་གང་རྟོགས་ན་རང་བྱུང་གི་ཡེ་ཤེས་ཆེན་པོ་རྟོགས་པའོ། །རང་རིག་པ་ལ་རང་གིས་རྟོགས་པ་མངོན་དུ་གྱུར། རྒྱུད་དག་པའི་ཀུན་ཏུ་བཟང་པོར་བྱས་རིག་པ་དང་རྟོགས་པ་དབྱེར་མེད། དེ་ཅི་ལས་བྱུང་ན་རང་རིག་པ་སངས་རྒྱས་ཡིན་པ་ལ་ཡིན་པར་ཤེས ནས་དེའི་སྲས་སུ་བདག་བྱེད་པ་ལས་འབྱུང་ངོ་། །དེ་ཡང་དཀྱིལ་འཁོར་དང་པོ་བསྐྱེད་པ་དེ་ནས་བཅོམ་ལྡན་འདས་དགྱེས་པ་ཆེན་པོ་དཔལ་ཀུན་ཏུ་བཟང་པོ་རིགས་ཀྱི་བདག་པོ་ཡབ་ཡུམ་གཉིས་སུ་མེད་པ་ལྷུན་གྱིས་གྲུབ་པར་ཡོད་ཀྱང་རང་བཞིན་ལྷུན་གྲུབ་དེ་རྟོགས་པ་མངོན་དུ་གྱུར་པས་བྱ་བའི་ཕྱིར་ན་རང་བཞིན་ལྷུན་གྲུབ་དང་རང་སྣང་རིག་པའི་དཀྱིལ་འཁོར་གཉིས་དབྱེར་མེད་པའི་དཀྱིལ་འཁོར་དུ་བྱ་ལ་དེ་རྟོགས་པས་ལྷུན་གྲུབ་ཏུ་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བའོ། །གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དེ་རྐྱེན་འཇུག་པའི་ལམ་གྱི་མཚན་ཉིད་ཀྱིས་ཉམས་སུ་བླངས་ལ་གཞི་དེ་རང་གི་བློ་ལ་མཉམ་པར་སྦྱོར་བས་སྒོམ་མོ། །དབུས་ཀྱི་གཙོ་བོའི་ཐུགས་ཀ་ནས་རང་གི་རྣམ་པར་སྨིན་པའི་ལུས་འདི་འདྲ་བའི་ངང་ཚུལ་དེ་བཟུང་བའི་ཚངས་པ་ཕྲུ་གུའི་ཆ་བྱད་ཅན་གཅིག་བྱུང་ནས་སོ། །དེ་བྱུང་ནས་བར་ཁྱམས་ནས་དཀྱིལ་འཁོར་གྱི་ལྷ་ལ་བསྐོར་བ་བྱས་ནས་ནུབ་སྒོར་འདུག་སྟེ་བརྐྱང་ཕྱག་ལན་གསུམ་འཚལ་ནས་པུས་མོ་བཙུགས་ཏེ་དཀྱིལ་འཁོར་གྱི་ལྷ་ལ་བསྐུལ་ཚིག་འདི་ཡང་རབ་ཏུ་བརྗོད་ཅིང་གསོལ་བ་ལན་གསུམ་འདེབས་པ་འདི་སྐད་དོ། །གཉིས་པ་ནི། ༀ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །ད་ལྟ་ཉིད་དུ་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་སོ། །དེ་ལ་ཡེ་ཤེས་ལྔ་དང་ལྡན་པའི་ཡི་གེ་ༀ་གྱིས་མགོ་དྲངས་ནས་རང་བྱུང་ཡེ་ཤེས་ཀྱི་ངོ་བོ་དཔལ་ཀུན་ཏུ་བཟང་པོ་ནི་ཐམས་ཅད་དུ་དབང་བསྐུར་བའི་ཕྱིར་ན་རྒྱལ་པོའོ། །སྐུའི་རིགས་རྣམ་པར་སྣང་མཛད་དང་གསུང་གི་རིགས་སྣང་བ་མཐའ་ཡས་ཐུགས་ཀྱི་རིགས་མི་བསྐྱོད་པ་ཡོན་ཏན་རིན་འབྱུང་འཕྲིན་ལས་དོན་ཡོད་གྲུབ་པའོ། །དེ་ཡང་རྒྱལ་བ་ལྔ་སོ་སོར་བྱུང་བ་ནི་མ་ཡིན་ཏེ་རྒྱལ་བ་གཅིག་ལས་ཡོན་ཏན་སྐུ་གསུང་ཐུགས་འཕྲིན་ལས་རེ་རེ་དང་ལྡན་པས་ན་རྨད་པོ་ཆེ་ཞེས་བྱའོ། །དེ་ལྟ་བུ་དེ་བདག་ལ་ད་ལྟ་ཉིད་དུ་ཁྱེད་དང་དབྱེར་མེད་པར་མཉམ་པར་སྦྱོར་བས་ན་དུས་ཕྱི་མ་ལ་མི་ལྟོས་པར་དུས་ད་ལྟ་ཉིད་དུ་སྦྱོར་བའོ། །ཁྱེད་ཀྱི་ཕྱག་རྒྱ་ཆེན་པོར་བདག་སྦྱོར་ཅིག་ཅེས་པ་སྟེ་ཇི་ལྟར་ན་བདག་རང་བཞིན་ལྷུན་གྲུབ་ཀྱི་སངས་རྒྱས་དང་ཁྱེད་རྟོགས་པ་མངོན་གྱུར་གྱི་སངས་རྒྱས་གཉིས་དབྱེར་མེད་པར་གྱུར་ལ་བདག་ཉིད་ཀྱང་རྟོགས་པ་མངོན་གྱུར་གྱི་སངས་རྒྱས་སུ་སྦྱོར་ཅིག་པའོ། །གསུམ་པ་ནི། ཐབས་དང་ཤེས་རབ་གཉིས་མེད་པའི། །ཡེ་ཤེས་ཟེར་གྱིས་ལུས་རྟོག་སྦྱངས། །གསེར་ཞུན་ལྟ་བུའི་སེམས་དག་ལས། །གསུམ་གྱི་བྱིན་བརླབས་འོད་ཀྱི་འབྲུ། །ཐུགས་ཀར་ཐིམ་ནས་སྐུ་ཡི་དབྱིག །རྡོ་རྗེའི་ལམ་བྱུང་ཡུམ་གྱི་མཁའ། །ཆོས་སྐུ་བྱང་ཆུབ་སེམས་སུ་གནས། །ཞེས་སོ། །དེ་ལྟར་གསོལ་བ་བཏབ་པས་དཀྱིལ་འཁོར་གྱི་ལྷ་ཡབ་ཡུམ་ཐབས་དང་ཤེས་རབ་གཉིས་སུ་མེད་པའི་སྦྱོར་བ་ཚད་མེད་པས་སྦྱོར་མཚམས་ནས་བྱང་ཆུབ་ཀྱི་སེམས་རྣོ་ལ་མྱུར་བ་གྲངས་མེད་པ་བྱུང་བའི་ཡེ་ཤེས་ཀྱི་ཟེར་གྱིས་བདག་གི་ལུས་ཀྱི་རྟོག་པ་དང་སྡིག་པ་ཐམས་ཅད་བྱ་སྒྲོ་མེས་སྲེགས་པ་བཞིན་དུ་སྦྱངས་ནས་དཔེ་གསེར་ཞུན་མ་ལྟ་བུའི་ཚུལ་དུ་བདག་གི་སེམས་དག་པར་གནས་པ་ལས། དེ་ལ་ལྷ་རྣམས་ཀྱིས་གཟིགས་ཏེ་སེམས་རྟེན་གྱི་གནས་སུ་གསང་བ་གསུམ་གྱི་བྱིན་བརླབས་འོད་ཀྱི་ཡིག་འབྲུ་ༀ་ཨཱཿཧཱུཾ་གསུམ་འཕྲོས་པས་འོད་ཀྱི་རང་བཞིན་ལྷའི་སེམས་དེ་ཡི་གེ་འབྲུ་གསུམ་དུ་གྱུར་ཏོ། །ཡི་གེ་ཡང་འཕྲོ་འདུས་པས་ཧཱུཾ་དུ་ཐིམ། དེས་བར་ཁྱམས་ནས་བསྐོར་བ་ལན་གསུམ་བྱས་ནས་གཙོ་བོའི་ཐུགས་ཀར་ཐིམ་ནས་སྐུའི་དབྱིག་ཏུ་གྱུར་སྒལ་ཚིགས་ཀྱི་རྟ་བརྒྱུད་རྡོ་རྗེའི་ལམ་དུ་བྱུང་ནས་ཡུམ་གྱི་མཁའ་ལ་བབས་པ་དང་ཧཱུཾ་གི་འོད་ཀྱིས་ཡུམ་ཡང་འོད་དུ་ཞུ་སྣང་ལ་རང་བཞིན་མེད་པའི་སྐུ་གསལ་ལ་རྟོག་པ་མེད་པའི་ཐུགས་ཆོས་སྐུ་བྱང་ཆུབ་སེམས་སུ་གནས་སོ། །བཞི་པ་ནི། ལྷ་རྣམས་སོ་སོའི་སྙིང་པོའི་སྒྲ། །བཞི་བཅུ་རྩ་གཉིས་སྒྲ་བྱུང་བས། །བྱང་ཆུབ་སེམས་སུ་གཅིག་པར་ཐིམ། །ཞེས་ཏེ། དཀྱིལ་འཁོར་གྱི་ལྷ་གཞན་རྣམས་ཀྱང་རང་རང་སོ་སོའི་སྙིང་པོའི་སྒྲའམ་ཡི་གེ་བཞི་བཅུ་རྩ་གཉིས་ཀྱི་སྒྲ་ཙམ་བྱུང་བས་སྔགས་ཀྱི་སྒྲས་བསྐུལ་ནས་གནས་པ་དེ་དབུས་ཀྱི་གཙོ་བོའི་འོད་ཕུང་བྱང་ཆུབ་སེམས་སུ་གནས་པ་ལ་གཅིག་པར་ཐིམ་མོ། །གཉིས་པ་དཀྱིལ་འཁོར་བསྐྱེད་པ་ལ་བཞི་སྟེ། གཙོ་བོ་བསྐྱེད་པ་དང་། འཁོར་བསྐྱེད་པ་དང་། ལྷའི་ཚུལ་བསྟན་པ་དང་། ནུས་པ་དང་ལྡན་པར་བྱ་བའོ། །དང་པོ་གཙོ་བོ་བསྐྱེད་པ་ལ་བཞི་སྟེ་ཡབ་ཡུམ་བསྐྱེད་པ་དང་། དབང་དང་བྱིན་བརླབས་བྱ་བ་དང་། མཁའ་གསང་བྱིན་གྱིས་བརླབས་ཏེ་བརྡས་བསྐུལ་བ་དང་། བྱང་སེམས་སྤྲོས་ཏེ་ཆགས་མཆོད་བྱ་བའོ། །དང་པོ་ནི། དེ་ནས་སྙིང་པོ་དྲན་ཙམ་གྱིས། །ཨ་ཀྵ་གསུང་གི་ཕྱག་རྒྱ་གཉིས། །ཆོ་ག་གསུམ་གྱི་སྦྱོར་བ་ཡིས། །ཕྱག་རྒྱ་ཆེན་པོའི་སྐུ་གཉིས་རྫོགས། །ཞེས་པ་སྟེ། ལྷ་ཐམས་ཅད་འོད་དུ་ཞུ་ནས་འོད་ཀྱི་གོང་བུ་གཅིག་ཏུ་གནས་པ་དེ་ནས་ཨ་དང་ཀྵ་གཉིས་ཀྱི་སྙིང་པོ་དྲན་ཙམ་གྱིས་འོད་ཀྱི་གོང་བུ་དེ་ཨ་ཀྵ་གསུང་གི་ཡི་གེ་གཉིས་སུ་གྱུར་ཏེ། དེ་ལས་སྐུ་བསྐྱེད་པའི་རང་བཞིན་ལས་མི་འདའ་བས་ན་ཕྱག་རྒྱ་གཉིས་ཞེས་བྱའོ། །འོད་ཀྱི་གོང་བུ་ཨ་ཀྵ་གཉིས་སུ་གྱུར་པ་ནི་གསུང་ཡིག་འབྲུའི་ཆོ་གའོ། །དེ་འཕྲོ་འདུས་པ་ལས་རྡོ་རྗེ་དང་དྲིལ་བུར་གྱུར་པ་ནི་ཐུགས་ཕྱག་མཚན་གྱི་ཆོ་གའོ། །དེ་འཕྲོ་འདུས་པ་ལས་སྐུ་ཕྲ་མོར་གྱུར་པ་སྟེ་དེ་ལྟར་ཆོ་ག་གསུམ་གྱི་སྦྱོར་བ་ཡིས་སྐུ་ཕྲ་མོ་འཕྲོ་འདུས་པ་ལས་སྔགས་བརྗོད་པས་ཕྱག་རྒྱ་ཆེན་པོའི་སྐུ་དཔལ་ཀུན་ཏུ་བཟང་པོ་ཡབ་ཡུམ་གཉིས་ཡོངས་རྫོགས་སུ་གྱུར་པར་སྒོམ་པ་ནི་སྐུ་མདོག་མཐིང་ཀ་ཞལ་གཅིག་ཕྱག་གཉིས་པ་ཞབས་རྡོ་རྗེའི་སྐྱིལ་ཀྲུང་ཕྱག་མཉམ་བཞག་ཏུ་གནས་པ་རྒྱན་ཐམས་ཅད་ཀྱིས་བརྒྱན་པར་བསྒོམ་མོ། །གཉིས་པ་ནི། འབྲུ་གསུམ་འབྲུ་ལྔའི་བྱིན་བརླབས་དབང་། ཞེས་པ་སྟེ། བྱིན་གྱིས་བརླབས་པ་ནི་ལྷ་རྣམས་ཀྱི་སྤྱི་བོ་དང་མགྲིན་པ་དང་སྙིང་གར་ཉི་མ་དང་ཟླ་བ་དང་པདྨའི་གདན་བསམ་ལ་དེའི་སྟེང་དུ་སྤྱི་བོར་ༀ་མགྲིན་པར་ཨཱཿཐུགས་ཀར་ཧཱུཾ་སྟེ་འབྲུ་གསུམ་བསམ་དེ་ལས་འོད་འཕྲོ་འདུས་པ་ལས་རྣམ་སྣང་སྣང་མཐའ་རྡོ་རྗེ་སེམས་དཔར་བསྐྱེད་ལ་སྔགས་ཀྱིས་ང་རྒྱལ་བྱའོ། །དབང་བསྐུར་བ་ནི་ཀུན་ཏུ་བཟང་པོའི་དབུའི་གནས་ལྔར་རིན་པོ་ཆེའི་ཁང་བུ་ལྔའི་ནང་དུ་ཡི་གེ་འབྲུ་ལྔ་བཀོད་པའི་བྱིན་བརླབས་འོད་ཟེར་གྱི་རྣམ་པས་འོག་མིན་ནས་རིགས་ལྔ་སྤྱན་དྲངས་ཏེ། མདུན་གྱི་ནམ་མཁའ་ལ་བཞུགས་པ་དེའི་ཐབས་དང་ཤེས་རབ་གཉིས་སུ་མེད་པ་དེ་བྱང་ཆུབ་སེམས་དབུའི་ཡི་གེ་ལྔ་ལ་ཐིམ་པ་དང་དོན་ཡེ་ཤེས་ལྔར་དབང་བསྐུར་ཏེ་མ་ཧཱ་ཤཱུ་ནྱ་ཏ་ལ་སོགས་པའི་སྔགས་ཀྱིས་ང་རྒྱལ་བྱའོ། །དེ་ནས་ནམ་མཁའི་རིགས་ལྔ་དབུའི་ཁང་བུ་ལྔའི་ནང་དུ་སྤྱན་དྲངས་ལ་དབུ་རྒྱན་དུ་བཞུགས་སུ་གསོལ་ལོ། །གསུམ་པ་ནི། ཧཱུྃ་ལས་རྡོ་རྗེ་རྩེ་ལྔ་ༀ། །པཾ་ལས་པདྨ་འདབ་བརྒྱད་ཨཾ། །རྗེས་སུ་ཆགས་པས་དེ་བཞིན་བསྐུལ། །ཞེས་པས་བསྟན། ཡབ་ཀྱི་གསང་བ་ཧཱུྃ་ལས་རྡོ་རྗེ་རྩེ་ལྔ་པ་ཆུ་སྦུགས་སུ་ཡི་གེ་ༀ་གྱིས་མཚན་པར་བསྐྱེད་དོ། །ཡང་ན་རྩ་བར་ༀ་རྐེད་པར་ཧཱུཾ་རྩེ་མོར་ཕཊ་བསམ་པར་བྱའོ། །ཡུམ་གྱི་མཁའ་པཾ་ལས་པདྨ་འདབ་བརྒྱད་དུ་གྱུར་པའི་དབུས་སུ་ཉི་མའི་དཀྱིལ་འཁོར་དེའི་སྟེང་དུ་ཨཾ་བསམ་པར་བྱའོ། །ཡུམ་གྱིས་ཡབ་ལ་བསྐུལ་བ་དེ་བཞིན་གཤེགས་པ་ཐམས་ཅད་ཀྱིས་རྗེས་སུ་ཆགས་པའི་བདག་ཉིད་ངའམ་ཡུལ་ང་ཉིད་ཡིན་ཞེས་བསྐུལ་བས་ཡབ་ཀྱིས་ཡུམ་ལ་ལན་བྱིན་པ་ནི་དེ་བཞིན་གཤེགས་པ་ཐམས་ཅད་ཀྱི་མཆོད་པ་ཆེན་པོའི་རྡོ་རྗེའི་རང་བཞིན་ངའམ་བདག་ཉིད་ཡིན་ཞེས་ལན་དུ་བསྐུལ་བའོ། །བཞི་པ་ནི། ༀ་སརྦ་ཏ་ཐ་ག་ཏ་མ་ཧཱ་ཨ་ནུ་ར་ག་བཛྲ་སྭ་བྷ་ཝ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་པུ་ཙ་བཛྲ་སྭ་ཝ་ཨཏྨ་ཀོ྅་ཧཾ། སྟེ་དེ་ལ་ༀ་ནི་སྔགས་ཀྱི་མགོ་འདྲེན་པ་སརྦ་ཐམས་ཅད་ཏ་ཐཱ་ག་ཏ་དེ་བཞིན་གཤེགས་པ་མ་ཧཱ་ཆེན་པོ་ཨ་ནུ་ར་ག་རྗེས་སུ་ཆགས་པ་བཛྲ་རྡོ་རྗེ་སྭ་བྷ་བ་ངོ་བོ་ཉིད་ཨཏྨ་ཀོ྅་ཧཾ་བདག་ཉིད་ངའོ། །ༀ་སརྦ་ཐམས་ཅད་ཏ་ཐ་ག་ཏ་དེ་བཞིན་གཤེགས་པ་མ་ཧཱ་ཆེན་པོ་པཱུ་ཙ་མཆོད་པ་བཛྲ་རྡོ་རྗེ་སྭ་བྷ་བ་ངོ་བོ་ཉིད་ཨཏྨ་ཀོ྅་ཧཾ་བདག་ཉིད་ངའོ། །གཉིས་པ་འཁོར་བསྐྱེད་པ་ལ་གཉིས་ཏེ་ཡུམ་གྱི་མཁར་བྱང་ཆུབ་སེམས་ལས་ལྷར་བསྐྱེད་པ་དང་། སྔགས་ཀྱིས་ཕྱིར་གདོན་པའོ། །དང་པོ་ནི། ཡུམ་གྱི་པད་མོའི་དཀྱིལ་འཁོར་དུ། །དེ་བ་ཐུགས་ཀྱི་དཀྱིལ་འཁོར་སྤྲོ། །གཞལ་ཡས་ཐིག་གདབ་སྙིང་པོ་བཀོད། །དེ་ལས་སྤྲོ་དང་བསྡུ་བ་ཡིས། །ཐུགས་ཀྱི་ཕྱག་རྒྱ་བཞི་བཅུ་གཉིས། །དེ་ལས་ཕྲ་མོའི་སྐུ་འཕྲོ་འདུས། །ཞེས་པས་བསྟན་ཏེ་ཡུམ་གྱི་ཞེས་ཀུན་ཏུ་བཟང་མོའི་མཁའ་པད་མ་འདབ་མ་བརྒྱད་པའི་དཀྱིལ་འཁོར་དུ་བྷ་ག་བདེ་སྟོང་གི་ཉམས་དང་ལྡན་པ་དེ་ཡབ་ཀུན་ཏུ་བཟང་པོའི་ལྷག་པ་བྱང་ཆུབ་ཀྱི་སེམས་བདེ་བ་ཐུགས་ཀྱི་རང་བཞིན་ནམ་ཐུགས་ཡང་དག་པའི་བདེ་བ་དེ་ཡབ་ཀྱིས་ཡུམ་ལ་དཀྱིལ་འཁོར་གྱི་ལྷའི་རྒྱུར་སྤྲོ་བའོ། །དེ་ཡང་ཡུམ་གྱི་མཁར་བྱང་ཆུབ་སེམས་དང་པོ་སྤྲོས་པས་གཞལ་ཡས་ཁང་གི་དལ་དུ་གྱུར། གཉིས་པ་སྤྲོས་པས་ཐིག་གདབ། གསུམ་པ་སྤྲོས་པས་དལ་ཡོངས་སུ་རྫོགས། བཞི་པ་སྤྲོས་པས་གདན་གསལ། ལྔ་པས་སྙིང་པོ་གསུང་ཡིག་འབྲུ་བཞི་བཅུ་རྩ་གཉིས་སུ་གསལ་ཞིང་བཀོད་པའོ། །དེ་ལས་འོད་ཟེར་སྤྲོ་བ་དང་བསྡུ་བ་ཡིས་ཐུགས་ཀྱི་ཕྱག་རྒྱའམ་ཕྱག་མཚན་བཞི་བཅུ་རྩ་གཉིས་སུ་གྱུར་པའོ། །དེ་ལས་ཡང་ཕར་འཕྲོས་ཚུར་འདུས་པ་ལས་ཕྲ་མོའི་སྐུའམ་སྐུ་ཕྲ་མོ་བཞི་བཅུ་རྩ་གཉིས་སུ་གྱུར་པའོ། །གཉིས་པ་ནི། སོ་སོའི་སྔགས་ཀྱིས་བསྐྱེད་ཅིང་གདོན། །སོགས་ནས་ༀ་མུ་ནེ་ཡེ་སྭཱ་ཧཱ་ཞེས་པའི་བར་གྱིས་བསྟན་པ་སྟེ། དེ་ནས་ཡུམ་གྱི་མཁའི་ནང་ན་གནས་པའི་སྐུ་ཕྲ་མོ་དེ་རྣམས་ལས་འཕྲོ་འདུས་པ་དང་སོ་སོའི་སྔགས་བརྗོད་པའི་རྐྱེན་ཉིད་ཀྱི་ལྷ་ཡོངས་རྫོགས་སུ་བསྐྱེད་ཅིང་ཕྱིར་ལ་གདོན་པར་བྱའོ། །དེ་ཡང་གཙོ་བོ་ཡབ་ཡུམ་གྱི་སྔགས་ཧཱུྃ་བཛྲ་དྷྲིག་ཅེས་བརྗོད་པས་དབུས་སུ་བཅོམ་ལྡན་འདས་རྡོ་རྗེ་སེམས་དཔའ་ཞལ་གསུམ་ཕྱག་དྲུག་པ་གཡས་དཀར་གཡོན་དམར་དབུས་མཐིང་ཀའི་ཞལ། རྡོ་རྗེ་འཁོར་ལོ་རིན་ཆེན་གཡས་དང་དྲིལ་བུ་པདྨ་རལ་གྲི་གཡོན་ན་བསྣམས་པ་རྒྱན་ཐམས་ཅད་ཀྱིས་བརྒྱན་པ་ཞབས་རྫོགས་པའི་སྐྱིལ་ཀྲུང་དུ་བཞུགས་པའོ། །དེ་བཞིན་དུ་ༀ་ཛི་ན་ཛིཀ་ཅེས་བརྗོད་པས་ཤར་དུ་རྣམ་པར་སྣང་མཛད་ཞལ་གསུམ་ཕྱག་དྲུག་གཡས་དམར་གཡོན་སྔོ་དབུས་དཀར་ཞལ། འཁོར་ལོ་རིན་ཆེན་རྡོ་རྗེ་གཡས། དྲིལ་བུ་པདྨ་རལ་གྲི་གཡོན། ཞབས་རྫོགས་པའི་སྐྱིལ་ཀྲུང་དུ་བཞུགས་པའོ། །སྭ་རཏྣ་དྷྲིག་ཅེས་པས་ལྷོར་རིན་ཆེན་འབྱུང་ལྡན་ཞལ་གསུམ་ཕྱག་དྲུག་པ་གཡས་སྔོ་གཡོན་དམར་དབུས་སེར་ཞལ། རིན་ཆེན་འཁོར་ལོ་རྡོ་རྗེ་གཡས་དྲིལ་བུ་པདྨ་རལ་གྲི་གཡོན་ན་བསྣམས་པའོ། །ཨཾ་ཨ་རོ་ལིཀ་ཞེས་པས་ནུབ་ཏུ་སྣང་བ་མཐའ་ཡས་ཞལ་གསུམ་ཕྱག་དྲུག་པ་གཡས་སྔོ་གཡོན་དཀར་དབུས་དམར་ཞལ། པདྨ་འཁོར་ལོ་རྡོ་རྗེ་གཡས་དང་དྲིལ་བུ་རིན་ཆེན་རལ་གྲི་གཡོན་ན་བསྣམས་པའོ། །ཧ་པྲད་ཉ་དྷྲིག་ཅེས་པས་བྱང་དུ་དོན་ཡོད་གྲུབ་པ་ཞལ་གསུམ་ཕྱག་དྲུག་པ་གཡས་དཀར་གཡོན་དམར་དབུས་ལྗང་ཞལ། རལ་གྲི་འཁོར་ལོ་རྡོ་རྗེ་གཡས་དང་དྲིལ་བུ་པདྨ་རིན་ཆེན་གཡོན་ན་བསྣམས་པའོ། །མཱུཾ་དྷ་དུ་ཤྭ་རི་ཞེས་པས་དབུས་སུ་དབྱིངས་ཕྱུག་མ་མཐིང་ཀ་གཡས་ཡབ་ལ་འཁྱུད་པ་གཡོན་དྲིལ་བུ་བསྣམས་པའོ། །ལཾ་ཏེ་ཤ་ར་ཏི་ཞེས་པས་ཤར་དུ་སངས་རྒྱས་སྤྱན་དཀར་མོ་གཡས་ཡབ་ལ་འཁྱུད་པ་གཡོན་པ་དྲིལ་བུ་བསྣམས་པའོ། །མཾ་མོ་ཧ་ར་ཏི་ཞེས་པས་ལྷོར་མ་མ་ཀི་སེར་མོ་གཡས་པ་ཡབ་ལ་འཁྱུད་པ་གཡོན་པ་དྲིལ་བུ་བསྣམས་པའོ། །པྱཾ་ར་ག་ར་ཏི་ཞེས་པས་ནུབ་ཏུ་གོས་དཀར་མོ་དམར་མོ་གཡས་ཡབ་ལ་འཁྱུད་པ་གཡོན་དྲིལ་བུ་བསྣམས་པའོ། །ཏཾ་བཛྲ་ར་ཏི་ཞེས་པས་བྱང་དུ་དམ་ཚིག་སྒྲོལ་མ་ལྗང་གུ་གཡས་པ་ཡབ་ལ་འཁྱུད་པ་གཡོན་པ་དྲིལ་བུ་བསྣམས་པའོ། །ནང་གི་སེམས་དཔའ་བཞི་ནི་ཀྵི་ཧི་ར་ཙ་ཡ་ཞེས་པས་ཤར་ལྷོའི་རྩིབས་མཆན་ལ་སའི་སྙིང་པོ་དཀར་པོ་གཡས་རིན་ཆེན་མྱུ་གུ་གཡོན་དྲིལ་བུ་བསྣམས་པའོ། །ཏྲྃ་ཨ་ཀརྦྷ་ཡ་ལྷོ་ནུབ་ཀྱི་རྩིབས་མཆན་ལ་ནམ་མཁའི་སྙིང་པོ་སེར་པོ་གཡས་རལ་གྲི་གཡོན་དྲིལ་བུ་བསྣམས་པའོ། །ཧྲཱི་པདྨ་བན་དྷ་མ་ནུབ་བྱང་གི་རྩིབས་མཆན་ལ་སྤྱན་རས་གཟིགས་དམར་པོ་གཡས་པདྨ་དཀར་པོ་གཡོན་དྲིལ་བུ་བསྣམས་པའོ། །ཛིམ་ཀུ་རུ་པ་ཎི་ཧྲི་བྱང་ཤར་གྱི་རྩིབས་མཆན་ལ་ཕྱག་ན་རྡོ་རྗེ་ལྗང་གུ་གཡས་རྡོ་རྗེ་གཡོན་དྲིལ་བུ་བསྣམས་པའོ། །ཧཱུཾ་ལ་སེ་ས་མ་ཡ་སྟྭཾ་ལ་སེ་སྒེག་མོ་དཀར་མོ་གཡས་མེ་ལོང་ཐོགས་པ་གཡོན་འགྱིང་བག་གི་ཚུལ་ཅན་སེམས་དཔའ་ས་ཡི་སྙིང་པོའི་ཡུམ་འཁྲིལ་སྦྱོར་དུ་གནས་སོ། །ཏྲྃ་མ་ལེ་ས་མ་ཡ་ཧོ་མ་ལེ་མ་སེར་མོ་འཕྲེང་བ་སྤྱི་བོར་འདྲེན་པ་ནམ་མཁའི་སྙིང་པོ་དང་འཁྲིལ་སྦྱོར་དུ་གནས་སོ། །ཧྲཱི་གྷིར་ཏི་ར་གོ་ཡ་ཧཾ་དབྱངས་མ་དམར་མོ་པི་ཝཾ་སྦྲེང་བ་སྤྱན་རས་གཟིགས་ཀྱི་ཡུམ་མོ། །ཨ་ནིར་ཏི་ར་གོ་ཡ་མི་གར་མ་ལྗང་གུ་ཕྱག་རྒྱ་གར་བསྒྱུར་མ་ཕྱག་ན་རྡོ་རྗེའི་ཡུམ་མོ། །ཕྱིའི་སེམས་དཔའ་ཡབ་ཡུམ་ནི་མེ་དྷ་ར་ནི་སྭཱ་ཧཱ་བྱམས་པ་དཀར་པོ་གཡས་ཀླུ་ཤིང་གཡོན་དྲིལ་བུ་ཅན་ཤར་ལྷོའི་གྲུ་ཆད་ལའོ། །ཐླྷིཾ་ས་རཾ་པ་ཡ་སྭཱ་ཧཱ་ལྷོ་ནུབ་ཏུ་སྒྲིབ་སེལ་སེར་པོ་ཆོས་ཀྱི་འཁོར་ལོ་དང་དྲིལ་བུ་བསྣམས་པའོ། །ཧཱུཾ་སྭ་ར་ཙ་ཡ་སྭཱ་ཧཱ་ནུབ་བྱང་གི་གྲུ་ཆད་ལ་ཀུན་བཟང་དམར་པོ་གཡས་རིན་ཆེན་སྙེ་མ་གཡོན་དྲིལ་བུའོ། །མཱུཾ་ཤྲཱི་ཨ་རཾ་ག་ཡ་སྭཱ་ཧཱ་བྱང་ཤར་གྱི་གྲུ་ཆད་ལ་འཇམ་དཔལ་ལྗང་གུ་གཡས་ཨུ ཏྤལ་གཡོན་དྲིལ་བུའོ། །ཛ་དྷུ་པེ་པྲ་བེ་ཤ་དྷུ་པེ་མ་དཀར་མོ་སྤོས་ཕོར་ཐོགས་པ་བྱམས་པའི་ཡུམ་ཡིན་ནོ། །ཧཱུཾ་པུ ཥྤུ་ཨ་བེ་ཤ་པུཥྤེ་མ་སེར་མོ་མེ་ཏོག་ཐོགས་པ་སྒྲིབ་སེལ་གྱི་ཡུམ་མོ། །བཾ་དི་པཾ་སུ་ཀི་ནི་ཨ་ལོ་ཀེ་དམར་མོ་མར་མེ་ཐོགས་པ་ཀུན་བཟང་གི་ཡུམ་མོ། །ཧོ་གྷནྡྷེ་ཙིཏྟ་ཧོ་གྷ ནྡྷེ་མ་ལྗང་གུ་དྲི་ཆབ་ཐོགས་པ་འཇམ་དཔལ་གྱི་ཡུམ་མོ། ། སྒོ་བ་ཡབ་ཡུམ་ནི་ཧཱུཾ་ཡ་མནྟ་ཀྲིད་ཕཊ་ཤར་སྒོར་གཤིན་རྗེ་གཤེད་ཞལ་གསུམ་ཕྱག་དྲུག་པ་གཡས་ལྗང་གཡོན་སྔོ་དབུས་དཀར་ཞལ། ཕྱག་དང་པོ་གཉིས་མི་མགོ་གནོན་པ་གཡས་གཏུན་ཤིང་རྡོ་རྗེ་གཡོན་དབྱུག་ཏོ་དགྲ་སྟྭའོ། །ཧཱུཾ་བིག་ནནྟ་ཀྲིད་ཕཊ་ལྷོར་སྟོབས་པོ་ཆེ་ཞལ་གསུམ་ཕྱག་དྲུག་པ་གཡས་དཀར་གཡོན་དམར་དབུས་སྔོ་ཞལ་གཡས་གཡོན་དང་པོ་གཉིས་རྡོ་རྗེ་གནོན་པ་གཡས་རིན་ཆེན་རྡོ་རྗེ་གཡོན་ལྕགས་ཀྱུ་རལ་གྲིའོ། །ཧཱུཾ་པདྨ་ཏ་ཀྲིད་ཕཊ་ནུབ་ཏུ་རྟ་མགྲིན་ཞལ་གསུམ་ཕྱག་དྲུག་པ་གཡས་སྔོ་གཡོན་དཀར་དབུས་དམར་ཞལ་གཡས་གཡོན་དང་པོ་གཉིས་ཐོད་པ་སྦྲུལ་གྱིས་བརྒྱན་པ་གཡས་པདྨ་རྡོ་རྗེ་གཡོན་རལ་གྲི་སྡིགས་མཛུབ་བོ། །ཧཱུཾ་པྲད་ཛྙཱནྟ་ཀྲིད་ཕཊ་བྱང་དུ་བདུད་རྩི་འཁྱིལ་བ་ཞལ་གསུམ་ཕྱག་དྲུག་པ་གཡས་དམར་གཡོན་དཀར་དབུས་ལྗང་ཞལ་གཡས་གཡོན་དང་པོ་གཉིས་རྡོ་རྗེ་རྒྱ་གྲམ་གཡས་གཉིས་ན་རལ་གྲི་རྡོ་རྗེ་གཡོན་དྲིལ་བུ་དགྲ་སྟའོ། །ༀ་མ་ཧཱ་བཛྲ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུཾ་ཕཊ། ཤར་དུ་གཤིན་རྗེ་གཤེད་པོའི་ཡུམ་ལྕགས་ཀྱུ་མའི་སྔགས་སོ། །ༀ་མ་ཧཱ་རཏྣ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུཾ་ཕཊ་ལྷོར་སྟོབས་པོ་ཆེའི་ཡུམ་སེར་མོ་ཞགས་པ་མའི་སྔགས་སོ། །ༀ་མ་ཧཱ་པདྨ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུྃ་ཕཊ་ནུབ་ཏུ་རྟ་མགྲིན་གྱི་ཡུམ་དམར་མོ་ལྕགས་སྒྲོག་མའི་སྔགས་སོ། །ༀ་མ་ཧཱ་ཀརྨ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུཾ་ཕཊ་བྱང་དུ་བདུད་རྩི་འཁྱིལ་བའི་ཡུམ་ལྗང་གུ་དྲིལ་བུ་མའི་སྔགས་སོ། །ཀུན་བཟང་ཡབ་ཡུམ་ནི་ཧཱུཾ་ཧཱུཾ་ཧཱུཾ་བཛྲ་ཙིཏྟ་ཧཱུཾ། དཀྱིལ་འཁོར་ཤར་གྱི་བར་ཁྱམས་སུ་ཀུན་ཏུ་བཟང་པོ་མཐིང་ཀ་སྐྱིལ་ཀྲུང་མཉམ་བཞག་ཅན་དུ་གནས་སོ། །ཨ་ཨ་ཨ་བཛྲ་བྷ་དྲ་ས་མ་ཡ་ༀ། དཀྱིལ་འཁོར་ནུབ་ཀྱི་བར་ཁྱམས་སུ་ཀུན་ཏུ་བཟང་མོ་མཐིང་སྔོན་མཉམ་བཞག་གི་ཕྱག་རྒྱ་ཅན་ནོ། །ཐུབ་དྲུག་གི་སྔགས་ནི། ༀ་མུ་ནེ་ཀྲིཾ་སྭཱ་ཧཱ་བྱང་ཤར་མཚམས་སུ་ལྷའི་ཐུབ་པ་སེར་པོ་པི་ཝཾ་ཐོགས་པའོ། །ༀ་མུ་ནེ་ཧཱུཾ་ཏྲུཾ་སྭཱ་ཧཱ་ཤར་ལྷོར་ལྷ་མ་ཡིན་གྱི་ཐུབ་པ་སེར་པོ་གོ་ཆ་ཐོགས་པའོ། །ༀ་མུ་ནེ་སྲུཾ་སྭཱ་ཧཱ་ལྷོར་མིའི་ཐུབ་པ་སེར་པོ་གསེག་ཤིང་དང་པར་བུ་ཐོགས་པའོ། །ༀ་མུ་ནེ་ཀྵཾ་སྭཱ་ཧཱ་ལྷོ་ནུབ་ཏུ་བྱོལ་སོང་གི་ཐུབ་པ་སེར་པོ་པོ་ཏི་ཐོགས་པའོ། །ༀ་མུ་ནེ་བྲཾ་སྭཱ་ཧཱ་ནུབ་བྱང་དུ་ཡི་དྭགས་ཀྱི་ཐུབ་པ་སེར་པོ་རཏྣའི་སྒྲོམ་བུ་ཐོགས་པའོ། །ༀ་མུ་ནེ་ཡེ་སྭཱ་ཧཱ་བྱང་དུ་དམྱལ་བའི་ཐུབ་པ་སེར་པོ་མེ་ཆུ་ཐོགས་པའོ། །གསུམ་པ་ལྷའི་ཚུལ་ལ་དྲུག་སྟེ་བཞུགས་ཚུལ་དང་། བཞུགས་གནས་དང་། ཕྱག་མཚན་དང་། སྐུ་མདོག་དང་། ཞི་བའི་ཚུལ་དགུ་དང་། འོད་ཟེར་རོ། །དང་པོ་ནི། གདན་ལ་རྫོགས་དང་སེམས་དཔའི་ཚུལ། །ཞེས་གསུངས་ཏེ། གདན་ལ་ནི་རྒྱལ་བ་རིགས་ལྔ་ལ་གདན་ལྔ་བརྩེགས་ཉི་ཤུ་རྩ་ལྔའོ། །སེམས་དཔའ་སེམས་མ་ལ་ཉི་ཟླ་པདྨ་སུམ་བརྩེགས་སོ། །ཐུབ་པ་ལ་པདྨ་རྐྱང་པའོ། །ཀུན་བཟང་ཡབ་ཡུམ་ལ་ཉི་ཟླ་པདྨའོ། །སྒོ་བ་ཡབ་ཡུམ་ལ་རྡོ་རྗེའི་བྲག་གི་སྟེང་ན་ཉི་མ་རྐྱང་པའོ། །རྫོགས་དང་ཞེས་པས་རིགས་ལྔ་རྫོགས་པའི་སྐྱིལ་ཀྲུང་ཞེས་བྱ་སྟེ་རྡོ་རྗེའི་སྐྱིལ་ཀྲུང་དུ་བཞུགས་པའོ། །སེམས་དཔའི་ཚུལ་ཅེས་པ་སེམས་དཔའ་རྣམས་མཛད་པ་མ་རྫོགས་པས་ཕྱེད་དཀྱིལ་ལམ་བབས་ཞོན་ནམ་སེམས་དཔའི་བཞུགས་ཚུལ་ཐུབ་པ་འགྲེང་བུའོ། །སྒོ་བ་བརྒྱད་ཀྱི་དོར་ཐབས་སོ། །ཡུམ་རྣམས་པདྨའི་སྐྱིལ་ཀྲུང་ངོ་། །ཀུན་ཏུ་བཟང་པོ་མཉམ་པའི་སྐྱིལ་ཀྲུང་ཀུན་ཏུ་བཟང་མོ་པདྨའི་སྐྱིལ་ཀྲུང་ངོ་། །གཉིས་པ་ནི། འཁོར་ལོར་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའིཚོགས་དང་ལྡན་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །ཞེས་པ་སྟེ། དེ་ལ་འཁོར་ལོར་ནི་བཞུགས་གནས་སོ། །རྒྱལ་པོ་ནི་རིགས་ལྔ་སྟེ་རྣམ་ཤེས་ལས་རྒྱལ་བ་རྡོ་རྗེ་སེམས་དཔའ། གཟུགས་ཀྱི་ཕུང་པོ་ལས་རྒྱལ་བ་རྣམ་སྣང་། ཚོར་བ་ལས་རྒྱལ་བ་རིན་འབྱུང་། འདུ་ཤེས་ལས་རྒྱལ་བ་སྣང་མཐའ། འདུ་བྱེད་ལས་རྒྱལ་བ་དོན་ཡོད་གྲུབ་པའོ། །རྒྱལ་མོ་ནི་ཡུམ་ལྔ་སྟེ་ནམ་མཁའ་ལས་དབྱིངས་ཕྱུག་མ། ས་སངས་རྒྱས་སྤྱན། ཆུ་མ་མ་ཀི། མེ་གོས་དཀར་མོ། །རླུང་ལས་རྒྱལ་བ་དམ་ཚིག་སྒྲོལ་མ་དེ་རྣམས་དབུས་ན་འཁོར་ལོ་རྩིབས་བཞི་ལྟེ་བ་དང་ལྔ་ལ་བཞུགས་པའོ། །རྡོ་རྗེ་སེམས་དཔའ་གཡས་ནས་ཞེས་གཡས་ཀྱི་རྩིབས་མཆན་ལ་མཐོང་བ་མིག་གི་རྣམ་པར་ཤེས་པ་སའི་སྙིང་པོ་དང་དེ་ནས་གཡས་བསྐོར་གྱི་ཚུལ་དུ་ཐོས་པ་རྣ་བའི་རྣམ་པར་ཤེས་པ་ཕྱག་ན་རྡོ་རྗེ་དང་། སྣོམ་བ་སྣའི་རྣམ་པར་ཤེས་པ་སྤྱན་རས་གཟིགས་དང་། མྱོང་བ་ལྕེའི་རྣམ་པར་ཤེས་པ་ནམ་མཁའི་སྙིང་པོ་མ རྣས་འཁོར་ལོའི་རྩིབས་མཆན་བཞི་ལ་བཞུགས་པའོ། །དེ་རྣམས་ནང་ན་གནས་པས་ན་ནང་གི་སེམས་དཔའ་ཞེས་བྱའོ། །དེ་དང་དེས་སྤྱད་པར་བྱ་བའི་ཡུལ་དུ་གྱུར་པས་ན་བཙུན་མོའི་སྒྲས་བསྟན་ཏེ་མིག་གིས་གཟུགས་ལ་སྤྱོད་པས་ན་བཙུན་མོའི་འོ། །ཚོགས་སུ་བཅས་ཞེས་པ་ནི་དེ་རྣམས་དང་ལྷན་ཅིག་བཞུགས་པའི་དོན་ཏེ་དེ་ཡང་སའི་སྙིང་པོའི་ཡུམ་ལ་སེ་མའོ། །དེ་བཞིན་དུ་མ་ལེ་མ་དང་གིར་ཏི་དང་ནིར་ཏི་རྣམས་དང་གཉིས་སུ་མེད་པར་འཁྲིལ་བའི་ཚུལ་དུ་བཞུགས་སོ། །གྲུ་ཆད་ལ་ནི་ཕྱིའི་སེམས་དཔའ་བཞུགས་པ་སྟེ་མིག་གི་དབང་པོ་ནི་མཐོང་བྱེད་ལ་དེ་གནས་གྱུར་པ་ནི་བྱམས་པ་དང་དེ་བཞིན་དུ་ཐོས་བྱེད་རྣ་བའི་དབང་པོ་སྒྲིབ་སེལ་སྣོམ་བྱེད་སྣའི་དབང་པོ་ཀུན་བཟང་མྱོང་བྱེད་ལྕེའི་དབང་པོ་འཇམ་དཔལ་རྣམས་ནི་གྲུ་ཆད་བཞི་ལ་བཞུགས་སོ། །དེ་བས་དེ་བས་བཞི་པོ་དེ་རྣམས་ཞེས་སོ། །དེ་དབང་པོའི་ཕྱི་ན་ཡོད་པས་ཕྱིའི་སེམས་དཔའ་ཞེས་ཀྱང་བྱའོ། །དོན་དུ་ན་ལྷ་ལ་ཕྱི་ནང་མེད་དེ་སེམས་ཅན་གྱི་རྟོག་ཚོགས་ལ་དགོངས་པས་ན་སེམས་དཔའ་ལ་ཡང་ཕྱི་ནང་གཉིས་སོ། །སྤྱད་པར་བྱ་བའི་ཡུལ་དུ་གྱུར་པས་ན་བཙུན་མོ་སྟེ་འདས་པ་དང་ད་ལྟར་དང་མ་འོངས་པ་དང་འབྱུང་བར་མ་ངེས་དབྱར་དགུན་སྟོན་དཔྱིད་བཞི་ལ་དབང་བས་ན་དྷུ་པེ་མ་དང་པུ ཥྦེ་མ་དང་ཨ་ལོ་ཀེ་དང་གྷ ནྡྷེ་མའི་ཚོགས་རྣམས་དང་འཁྲིལ་སྦྱོར་དང་ལྡན་པར་གནས་སོ། །བར་ཁྱམས་ཀྱི་བྱང་ཤར་ལ་ནི་ལྷའི་ཐུབ་པ། ཤར་ལྷོ་ལྷ་མ་ཡིན་གྱི་ཐུབ་པ། ལྷོར་མིའི་ཐུབ་པ། ལྷོ་ནུབ་ཏུ་བྱོལ་སོང་གི་ཐུབ་པ། ནུབ་བྱང་དུ་ཡི་དྭགས་ཀྱི་ཐུབ་པ། བྱང་དུ་དམྱལ་བའི་ཐུབ་པ་སྟེ་དྲུག་དང་། བར་ཁྱམས་ཀྱི་ཤར་ནུབ་གཉིས་སུ་ཀུན་བཟང་ཡབ་ཡུམ་གཉིས་བཞུགས་པ་ནི་མདུན་དང་རྒྱབ་ཏུ་ཞེས་པས་བསྟན་ཏེ་ཇི་ལྟར་ན་རྡོ་རྗེ་སེམས་དཔའི་མདུན་ངོས་སུ་བྱེད་པ་པོ་ཀུན་ཏུ་བཟང་པོ་གནས་ཏེ་ཡིད་ཀྱི་རྣམ་པར་ཤེས་པ་གནས་གྱུར་པ་ཡིན་པས་ན་སེམས་ཅན་གྱི་དུས་ན་བྱེད་པ་པོ་ཐམས་ཅད་ཡིད་སངས་རྒྱས་ཀྱི་དུས་ན་རྒྱུད་དང་དཀྱིལ་འཁོར་གྱི་བྱེད་པ་པོ་ཐམས་ཅད་ཀུན་ཏུ་བཟང་པོ་ཡིན་ནོ། །རྡོ་རྗེ་སེམས་དཔའི་རྒྱབ་ངོས་ན་བྱ་བ་མོ་ཀུན་ཏུ་བཟང་མོ་གནས་པའོ། །དེ་ཡང་སེམས་ཅན་གྱི་དུས་ན་བྱ་བའི་གཞིར་གྱུར་པ་ཀུན་གཞིའོ་སངས་རྒྱས་ཀྱི་དུས་ན་ཡང་ཆོས་ཀྱི་དབྱིངས་སོ། །དེས་ཡིད་བྱེད་པ་པོ་ཀུན་ཏུ་བཟང་པོ་དང་ཆོས་བྱ་བ་མོ་གཉིས་ཡིད་ཀྱི་སྤྱད་བྱ་ཀུན་གཞི་ཡིན་པས་ན་ཀུན་བཟང་ཡབ་ཡུམ་དག་ཏུ་ནི་གནས་པར་བསྟན་ཏོ། །སྒོ་ཁྱུད་བཞི་ལ་ཞེས་པ་ནི་གཡས་གཡོན་སྒོ་ཁྱུད་ལ་སྒོ་བ་བཞི་གནས་པ་སྟེ་འཇོམས་པ་ནི་རེག་པའི་རྟོག་པ་འཇོམས་པ་གཤིན་རྗེ་གཤེད་རེག་བྱ་སྟོབས་པོ་ཆེ་རེག་བྱེད་རྟ་མགྲིན་རེག་ཤེས་ཀྱི་རྟོག་པ་འཇོམས་པ་བདུད་རྩི་འཁྱིལ་བའོ། །བཙུན་མོ་ནི་སྤྱད་བྱའི་ཡུལ་དུ་གྱུར་པ་སྟེ་ལུས་ཀྱི་དབང་པོ་བཞི་རྟག་པ་དང་ཆད་པ་དང་བདག་དང་མཚན་མ་བཞི་ལ་དབང་བས་ན་བཞི་པོ་དེ་གནས་སུ་དག་པས་ནི་ལྕགས་ཀྱུ་མ་དང་ཞགས་པ་མ་དང་ལྕགས་སྒྲོག་མ་དང་དྲིལ་བུ་མ་བཞིའི་ཚོགས་དང་ལྡན་པར་གནས་སོ། །དེ་བས་ན་དབང་པོ་ལྔའི་ལས་བྱེད་ལྟ་བུ་ནི་ལུས་ཀྱི་དབང་པོ་ཡིན་ལ་ལྷའི་ལས་བྱེད་པ་ཡིན་པས་ན་ཆོས་མཐུན་པའོ། །ཞི་བའི་ལྷ་བུདྡྷ་བཞི་བཅུ་རྩ་གཉིས་ཞེས་བཞེད་པ་ཡིན་པ་ལ་ཁྲོ་བོ་ཡབ་ཡུམ་བརྒྱད་ཡོད་པས་ཁྲོ་བོ་རྣམས་ཞི་བའི་ལྷར་འགྲོའམ་མི་འགྲོ་ཞེ་ན། ཕྱིར་རྣལ་འབྱོར་པས་སྒྲུབ་པར་བྱ་བའི་ཞི་བའི་ལྷ་བཞི་བཅུ་རྩ་གཉིས་ཀྱི་སྐུ་གསུང་ཐུགས་ཀྱི་རྒྱུད་ཞི་བས་ན་ཞི་བ་ཟེར་ལ། སྐུ་ཁྲོ་ཚུལ་དང་བཅས་འབར་བའི་གར་དགུས་ཁྱབ་ཁྲོ་རྟགས་དྲུག་ཅུ་རྩ་བརྒྱད་དང་ལྡན་པས་ཁྲོ་བོ་ཟེར་རོ། །འོ་ན་སྐུ་གསུང་ཐུགས་ཀྱི་རྒྱུད་ཞི་ན་སྒོ་བ་ལ་ཁྲོ་བོའི་མིང་མེད་དམ་ཞེ་ན། འདི་ལྟར་བཞེད་དེ་ཞི་བ་ལ་ལྟོས་ན་ཁྲོ་བོ་ཡིན་ཡང་ཁྲོ་བོའི་གར་དགུ་དང་ཁྲོ་རྟགས་མེད་དེ་སྐུ་ཁྲོ་ཚུལ་དང་བཅས་པར་སྣང་བའོ། །དེས་ན་འགལ་བ་མེད་དེ་དེ་བས་ན་ཅུང་ཟད་ཁྲོ་བོ་ལྷ་བརྒྱད་ཅེས་བྱ་སྟེ་སྟག་དང་སྦྲུལ་གྱི་རྒྱན་ཙམ་མ་བཀག་གོ། །དངོས་སུ་སྐུ་གསུང་ཐུགས་ཀྱི་རྒྱུད་ཞི་བར་གནས་སོ། །དེ་བས་ན་ཁྲོ་བོ་མི་ཟེར་ཏེ་འཇོམས་པ་ཞེས་བཤད་དོ། །གསུམ་པ་ཕྱག་མཚན་ནི། རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུད་དཔལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེ། །གཟུགས་མཛེས་རིན་ཆེན་འཕྲེང་བ་དང་། །པི་ཝང་གར་མཁན་མཆོག་ཉིད་དེ། །མེ་ཏོག་ཕྲེང་དང་སྤོས་མཆོག་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བསྟན། །དབུ་རྣམས་འབྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞི་ཁྲོ་བོའི་ཕྱག་རྒྱ་ནི། །ནྲིར་མགོ་གདེངས་དང་རྡོ་རྗེ་གནོན། །ཐོད་སྦྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྤོ་ཊ་ཧོ། །སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཏུ་བསྟན། །གསེག་པར་དང་ནི་པི་ཝང་དང་། །གོ་ཆ་པོ་ཏི་རིན་ཆེན་སྒྲོམ། །མེ་དང་ཆུ་ནི་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པད་མོའི་དཀྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་པ་ཉིད། །ཡང་ན་རྡོ་རྗེ་ཐལ་མོ་ཉིད། ། ཅེས་པས་བསྟན་ཏེ་ཕྱིར་གནས་འཕྲོག་བརྩིས་ན་ཞལ་གསུམ་ཕྱག་དྲུག་ཏུ་བྱེད་པ་ནི་གོང་བཞིན་ནོ། །འདིར་གཡས་གཡོན་གྱི་དང་པོ་རྣམས་བཤད་པ་སྟེ་མི་བསྐྱོད་པའི་གཡས་དང་པོ་ན་རྡོ་རྗེ་འཛིན་པ་ནི་ཡེ་ཤེས་ལྔ་དང་ལྡན་པའི་རྟགས་སོ། །རྣམ་པར་སྣང་མཛད་ཀྱི་གཡས་དང་པོ་ན་འཁོར་ལོ་བསྣམས་པ་ནི་ཉོན་མོངས་པ་ཐམས་ཅད་གཅོད་པའི་རྟགས་སོ། །རིན་འབྱུང་གི་གཡས་དང་པོ་ན་རིན་པོ་ཆེ་འཛིན་པ་ནི་དགོས་འདོད་རེ་བ་ཐམས་ཅད་སྐོང་བའོ། །སྣང་བ་མཐའ་ཡས་ཀྱི་གཡས་དང་པོ་ན་པདྨ་བསྣམས་པ་ནི་ཉེས་པའི་སྐྱོན་གྱིས་མ་གོས་པའི་རྟགས་སོ། །དོན་ཡོད་གྲུབ་པའི་གཡས་དང་པོ་ན་རལ་གྲི་བསྣམས་པ་ནི་རྟོག་པ་ཐམས་ཅད་རྩད་ནས་གཅོད་ཅིང་མཁྱེན་པའི་ཡེ་ཤེས་དང་ལྡན་པའི་རྟགས་སོ། །གཡོན་གྱི་ཕྱག་ན་དྲིལ་བུ་བསྣམས་པ་ནི་ཤེས་རབ་སྤྲོས་པ་མེད་པས་ཆོས་ཀྱི་དབྱིངས་ལས་མ་གཡོས་པའི་རྟགས་སོ། །བར་མ་དང་ཐ་མ་རྣམས་ནི་དེ་དག་ལས་གོང་འོག་ཏུ་བསྒྱུར་ཏེ་གནས་འཕྲོག་བརྩིས་ནས་བྱེད་པའོ། །དྲིལ་བུ་འབར་བ་ཡུམ་རྣམས་ཀྱི་གཡོན་ན་འཛིན་ནོ། །གཡས་པ་རྣམས་རང་རང་གི་ཡབ་ལ་འཁྱུད་པའོ། །སེམས་དཔའ་བརྒྱད་ཀྱི་ཕྱག་མཚན་ནི་བྱང་ཤར་མཚམས་ཀྱི་གྲུ་ཆད་ལ་འཇམ་དཔལ་གྱིས་ཨུད་དཔལ་བསྣམས་པ་དང་། ཤར་ལྷོ་མཚམས་ཀྱི་གྲུ་ཆད་ལ་བྱམས་པས་ཀླུ་ཤིང་དང་ལ་སོགས་མཚན་ཞེས་པས་གཡོན་དྲིལ་བུ་བསྣམས་པ་སྟོན་ལ། ཤར་ལྷོ་མཚམས་ཀྱི་རྩིབས་མཆན་ལ་སའི་སྙིང་པོ་རིན་ཆེན་མྱུ་གུ་དང་། ལྷོ་ནུབ་མཚམས་ཀྱི་རྩིབས་མཆན་ལ་ནམ་མཁའི་སྙིང་པོ་རལ་གྲི་འབར་བ་དང་། ནུབ་བྱང་གི་རྩིབས་མཆན་ལ་སྤྱན་རས་གཟིགས་པདྨ་དཀར་པོ་དང་། བྱང་ཤར་གྱི་རྩིབས་མཆན་ལ་ཕྱག་ན་རྡོ་རྗེ་རྡོ་རྗེ་འབར་བ་དང་། ལྷོ་ནུབ་གྲུ་ཆད་ལ་སྒྲིབ་སེལ་གྱིས་ཆོས་ཀྱི་འཁོར་ལོ་དང་། ནུབ་བྱང་གི་གྲུ་ཆད་ལ་ཀུན་ཏུ་བཟང་པོས་རིན་ཆེན་སྙེ་མ་བསྣམས་པའོ། །འདིར་སེམས་དཔའ་རྣམས་ཀྱི་ཕྱག་མཚན་གྱི་སྐབས་སུ་གཞུང་འཁྲུགས་པ་སྡེབས་ཏེ་བཤད་ན་རྣམ་པར་ཤེས་པའི་སེམས་དཔའ་སྤྱིའི་ཕྱག་མཚན་ནི་སའི་སྙིང་པོ་རིན་པོ་ཆེའི་མྱུ་གུ་འཛིན་པ་ནི་དགོས་འདོད་ཟད་པ་མེད་པ་འབྱུང་བའོ། །ནམ་མཁའི་སྙིང་པོ་རལ་གྲི་འཛིན་པ་ནི་ཉོན་མོངས་པ་ཐམས་ཅད་གཅོད་པའོ། །སྤྱན་རས་གཟིགས་པདྨ་དཀར་པོ་འཛིན་པ་ནི་ཉོན་མོངས་པའི་སྐྱོན་གྱིས་མ་གོས་པའི་རྟགས་སོ། །ཕྱག་ན་རྡོ་རྗེ་རྡོ་རྗེ་བསྣམས་པ་ནི་ཡེ་ཤེས་ལྔ་ཡིས་ཉོན་མོངས་པ་འཇོམས་པའི་སྟོབས་དང་ལྡན་པའི་རྟགས་སོ། །དེ་རྣམས་ནི་ནང་གི་སེམས་དཔའ་བཞིའོ། །དབང་པོའི་སེམས་དཔའ་ནི་བྱམས་པའི་ཕྱག་ན་ཀླུ་ཤིང་གི་མེ་ཏོག་བསྣམས་པ་ནི་ཉོན་མོངས་པའི་གདུང་བ་ཐམས་ཅད་ཟིལ་གྱིས་གནོན་པའི་རྟགས་སོ། །སྒྲིབ་པ་རྣམ་པར་སེལ་བ་ཆོས་ཀྱི་འཁོར་ལོ་བསྣམས་པ་ནི་རྟོག་པའི་དྲྭ་བ་ཐམས་ཅད་གཅོད་པའི་རྟགས་སོ། །ཀུན་ཏུ་བཟང་པོ་རིན་པོ་ཆེའི་སྙེ་མ་བསྣམས་པ་ནི་སེམས་ཅན་ཐམས་ཅད་ལ་དགོས་འདོད་རེ་བ་ཡིད་བཞིན་དུ་སྐོང་བའི་རྟགས་སོ། །འཇམ་དཔལ་ཨུད་དཔལ་བསྣམས་པ་ནི་ཆོས་སྤྱི་དང་རང་གི་མཚན་ཉིད་ཐམས་ཅད་ལ་འགག་པ་མེད་པར་མཁྱེན་ཅིང་ཉེས་པའི་སྐྱོན་དང་བྲལ་བའི་རྟགས་སོ། །ལ་སོགས་མཚན་ནི་གཡོན་རྣམས་ན་དྲིལ་བུ་བསྣམས་པའོ། །འབར་ཅེས་པ་ནི་ཕྱག་མཚན་དེ་དག་ཐམས་ཅད་སྣང་ལ་རང་བཞིན་མེད་པ་གསལ་ལ་རྟོག་པ་མེད་པ་འགུལ་འགུལ་ལྡེག་ལྡེག་ལྟར་གསལ་བ་ཡེ་ཤེས་ཀྱི་འོད་ཟེར་འཕྲོ་བའོ། །སེམས་མ་བརྒྱད་ཀྱི་ཕྱག་མཚན་ནི་ལྷ་མོ་ལ་སེ་མ་གཟུགས་མཛེས་མེ་ལོང་བསྣམས་ནས་འགྱིང་བག་ཏུ་བཞུགས་པ་ནི་སའི་སྙིང་པོ་དང་གཉིས་སུ་མེད་པའི་བདེ་བས་དགྱེས་པའོ། །མ་ལེ་མ་རིན་ཆེན་འཕྲེང་བ་ཐོགས་པ་ནི་ནམ་མཁའི་སྙིང་པོ་དང་བདེ་བ་རྒྱུན་མི་འཆད་པའི་རྟགས་དང་། གི རྟི་མ་པི་ཝང་ཐོགས་པ་ནི་སྤྱན་རས་གཟིགས་དང་གཉིས་སུ་མེད་པའི་བདེ་བའི་སྒྲ་སྒྲོགས་པའི་རྟགས་སོ། །ནིརྟི་མ་གར་མཁན་མཆོག་ཉིད་དེ་གར་བསྒྱུར་བ་ནི་ཕྱག་ན་རྡོ་རྗེ་དང་གཉིས་སུ་མེད་པའི་ཡེ་ཤེས་ལ་དབང་བསྒྱུར་བའི་རྟགས་སོ། །དེ་དག་ནང་གི་སེམས་མ་ཡིན་པས་ན་ནང་གི་མཆོད་རྫས་ཕྱག་ན་བསྣམས་པའོ། །པུཥྤེ་མ་མེ་ཏོག་གི་འཕྲེང་བ་ཐོགས་པ་ནི་སྒྲིབ་པ་རྣམ་པར་སེལ་བ་དང་གཉིས་སུ་མེད་པའི་བདེ་བས་མཚོན་པར་བྱེད་པའོ། །སྤོས་མཆོག་མའམ་དྷུ་པེ་མ་སྤོས་ཐོགས་པ་ནི་བྱམས་པ་དང་གཉིས་སུ་མེད་པའི་བདེ་བའི་འོད་ཟེར་འཕྲོས་པའོ། །ཨ་ལོ་ལོ་ཀེ་མར་མེ་ཐོགས་པ་ནི་ཀུན་ཏུ་བཟང་པོ་དང་གཉིས་སུ་མེད་པའི་བདེ་བ་གསལ་བའོ། །གྷན་དྷེ་མ་དྲི་ཆབ་ཀྱི་བྱུག་པ་ཐོགས་པ་ནི་འཇམ་དཔལ་དང་གཉིས་སུ་མེད་པའི་བདེ་བས་བསིལ་བར་བྱེད་པའོ། །དེས་ན་ཕྱིའི་སེམས་མ་ཡིན་པས་ན་ཕྱིའི་མཆོད་རྫས་བསྣམས་པའི་ཚུལ་ལོ། །དེ་ལ་སོགས་པའི་ཡུམ་རྣམས་ཡབ་ལས་ཀྱི་སྐུ་ལ་འཁྲིལ་ཞིང་ཡབ་རྣམས་ཡུམ་ཆོས་ཀྱི་རང་བཞིན་ལ་ཞལ་བསྟན་ནས་གཅིག་ལ་གཅིག་འདུད་པའི་ཚུལ་ལོ། །ལྷ་མོ་དེ་དག་ནི་ཡབ་རེ་རེ་དང་ཡུམ་རེ་རེ་ཐབས་དང་ཤེས་རབ་གཉིས་སུ་མེད་པར་སྦྱོར་བ་རེ་རེ་ལ་ཡང་རང་བཞིན་གྱིས་ཚང་བར་བྱའོ། །དེ་ལྟར་སེམས་དཔའ་དང་སེམས་མ་དེ་དག་ཀྱང་ཡུམ་རྣམས་ཡབ་ཀྱི་སྐུ་ལ་གཉིས་སུ་མེད་པར་འཁྲིལ་བ་དང་ཡབ་ཀྱི་དབུ་རྣམས་ཞལ་འབྱོ་ཞིང་ཡུམ་གྱི་དབུ་རྣམས་མ་ཞས་འདུད་པའི་ཚུལ་གྱིས་ཡབ་ཡུམ་གཉིས་གཅིག་ལ་གཅིག་བཞིན་གྱི་དཀྱིལ་འཁོར་ལ་འཛུམ་པའི་མདངས་ཀྱིས་ལྟ་བ་དང་འདུད་པ་དང་མཛེས་པའི་ཚུལ་གྱིས་དབྱིངས་དང་ཡེ་ཤེས་ཐ་མི་དད་པར་སྙོམས་པར་འཇུག་པའོ། །མདོར་ན་གོང་གི་ཕྱག་རྒྱ་ཆེན་པོ་རིགས་ལྔ་ཡབ་ཡུམ་རྣམས་ལས་ལ་འཁྲིལ་ཞིང་ཆོས་ལ་བསྟན་པའི་སྐབས་བཞིན་སེམས་དཔའ་ཡབ་ཡུམ་རྣམས་ཀྱང་ཡབ་ཡུམ་གཉིས་མེད་ཆོས་ཀྱི་དབྱིངས་ཀྱི་ངང་དུ་འཁྲིལ་ལོ། །སྒོ་བ་བཞིའི་ཕྱག་རྒྱ་ནི་ཤར་དུ་གཤིན་རྗེ་གཤེད་ནྲི་མགོའམ་མི་མགོའི་དབྱུག་པ་གདེངས་པ་ནི་ཉོན་མོངས་པ་དང་བགེགས་དང་ལོག་རྟོག་སྐྱེ་ཤི་འཇོམས་པའི་རྟགས་དང་། ལྷོར་སྟོབས་པོ་ཆེ་རྡོ་རྗེས་ས་གནོན་པ་ནི་ཉོན་མོངས་པ་དང་བགེགས་ཐམས་ཅད་ལྟ་མི་ནུས་པའོ། །ནུབ་ཏུ་རྟ་མགྲིན་གྱིས་ཐོད་པ་སྦྲུལ་ཆེན་པོ་ཡིས་བརྒྱན་པ་གནོན་ཐབས་སུ་འཛིན་པ་ནི་བགེགས་ཀྱི་ཞེ་སྡང་གནས་སུ་དག་ནས་ཆོས་ཀྱི་དབྱིངས་སུ་མཁྱེན་པ་དང་། བྱང་དུ་བདུད་རྩི་འཁྱིལ་བ་རྡོ་རྗེ་རྒྱ་གྲམ་ཐོགས་པ་ནི་འཕྲིན་ལས་རྣམ་བཞི་ཉིད་ཀྱིས་ཐམས་ཅད་ཀྱི་དོན་མཛད་པ་སྟེ་དེ་ཡང་གནོན་ཐབས་སུ་འཛིན་པའོ། །དེ་བས་ན་ཕྱག་གཡས་གཡོན་དང་པོ་གཉིས་ནི་དེ་ལྟར་གནས་ལ་གཞན་ལ་ཞལ་གསུམ་ཕྱག་དྲུག་ཏུ་བྱེད་ན་གོང་དུ་བཤད་པ་བཞིན་ནོ། །ལྷ་མོ་ལྕགས་ཀྱུ་མ་ནི་ཐུགས་རྗེས་སེམས་ཅན་མྱ་ངན་ལས་འདས་པའི་དབྱིངས་སུ་འདྲེན་པའོ། །ཞགས་པ་མ་ནི་སེམས་ཅན་ཐུགས་རྗེས་དྲངས་ནས་འཁོར་བར་མི་གཏོང་བའི་བརྡའི་སྥོ་ཊ་སྟེ་ལྕགས་སྒྲོག་མ་ནི་སེམས་ཅན་དེ་དག་བདེ་བར་གཤེགས་པའི་ཐུགས་ཡེ་ཤེས་དབྱེར་མེད་པའི་ས་ལ་འགོད་པའོ། །ཧོ་ཞེས་པ་དྲིལ་བུ་མ་ནི་སེམས་ཅན་དེ་དག་ཕྱིར་མི་ལྡོག་པའི་ས་ལ་བཀོད་ནས་བདེ་བ་ཆེན་པོས་མཉེས་པ་དང་ཚིམ་པར་བྱེད་པའི་བརྡར་བསྟན་ནོ། །སྒོ་བཞིར་གནས་པ་ཁྲོ་བོ་ཡབ་ཡུམ་དེ་དག་ཀྱང་ཐབས་དང་ཤེས་རབ་གཉིས་སུ་མེད་པར་བཞུགས་པ་ནི་ཡབ་ཀྱིས་ཡུམ་ལ་འདུད་པའི་ཚུལ་དང་ཡུམ་རྣམས་ཡབ་ཀྱི་སྐུ་ལ་གཉིས་སུ་མེད་པར་འཁྲིལ་བ་ནི་གོང་མ་རིགས་ལྔ་དང་སེམས་དཔའ་རྣམས་ཀྱི་སྐབས་སུ་བསྟན་པ་བཞིན་ཡབ་ཡུམ་གཉིས་སུ་མེད་པ་སྒོ་བཞིར་གནས་པའོ། །ཐུབ་པ་ནི་སྐུ་གསུང་ཐུགས་ཐུབ་པ་སྟེ་དེ་ཡང་སྐུ་ཐུབ་པ་རྟགས་དང་བྱ་བྱེད་སྤངས་པ་དང་གསུང་ཐུབ་པ་ནི་ངག་མི་དགེ་བ་བཞི་སྤངས་པ་དང་ཐུགས་ཐུབ་པ་ནི་ཡིད་ཀྱི་མི་དགེ་བ་གསུམ་སྤངས་པའོ། །དྲུག་ནི་གྲངས་ཡིན་ལ་དེ་དག་ནི་གདུལ་བྱ་གང་ལ་གང་ལྟར་མོས་པ་བཞིན་དུ་དོན་མཛད་པས་ཕྱག་རྒྱ་སྣ་ཚོགས་མ་ངེས་པ་སྟེ་དེ་ཡང་དལ་དུ་སྒོམ་པའི་དུས་སུ་སྒོམ་བདེ་ཞིང་ཏིང་ངེ་འཛིན་གྱི་དམིགས་པ་གསལ་བའི་ཕྱིར་མདོར་བསྡུས་ནས་ཕྱག་རྒྱ་དྲུག་ཏུ་བསྟན་པ་མིའི་ཐུབ་པ་གསེགས་ཤིང་དང་པར་བུ་ཐོགས་པ་ནི་མི་རྣམས་འདོད་ཆགས་ལས་བློ་ལྡོག་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་འགོད་པར་མཛད་པའི་རྟགས་དང་ནི། ལྷའི་ཐུབ་པས་པི་ཝང་ཐོགས་པ་ནི་ལྷ་རོལ་མོ་ལ་དགའ་བ་དེ་དག་ལ་འདུལ་བྱེད་ཀྱང་གདུལ་བྱ་དང་མཐུན་པར་འདུལ་བ་སྟེ་དེ་ཡང་དེ་དག་གི་བློ་ལེ་ལོ་དང་གཡེང་བ་ལས་ལྡོག་ནས་བསམ་གཏན་གྱི་ཕ་རོལ་ཏུ་ཕྱིན་པ་ལ་འགོད་པར་མཛད་པ་དང་། །ལྷ་མ་ཡིན་གྱི་ཐུབ་པ་གོ་ཆ་ཐོགས་པ་ནི་དེ་དག་ལ་མཐུན་པ ར་བསྟན་ནས་འཁྲུག་པའི་བློ་བཟློག་སྟེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་འགོད་པར་མཛད་དོ། །བྱོལ་སོང་གི་ཐུབ་པ་པོ་ཏི་ཐོགས་པ་ནི་གཏི་མུག་གི་མུན་པ་དེ་དག་པར་མཛད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་འགོད་པར་མཛད་དོ། །ཡི་དྭགས་ཀྱི་ཐུབ་པ་རིན་པོ་ཆེའི་སྒྲོམ་བུ་ཐོགས་པ་ནི་སེར་སྣའི་མདུད་པ་ལས་ལྡོག་ནས་སྦྱིན་པའི་ཕ་རོལ་ཏུ་ཕྱིན་པ་འགོད་པར་མཛད་དོ། །དམྱལ་བའི་ཐུབ་པ་མེ་དང་ཆུ་ནི་འཛིན་ཚུལ་རབ་ཏུ་བསྟན་པ་ནི་ཞེ་སྡང་གི་ངོ་བོ་ལས་བློ་ལྡོག་ནས་བཟོད་པའི་ཕ་རོལ་ཏུ་ཕྱིན་པ་ལ་འགོད་པར་མཛད་དོ། །ཐུབ་དྲུག་གི་ཡུམ་ལ་དོན་གྱི་ཡུམ་དང་རྟགས་ཀྱི་ཡུམ་གཉིས་ལས། སྤྲུལ་པའི་སྐུ་དེ་དག་ནི་གྲོགས་མི་བདེ་བ་སྤོངས་ཤིང་འདོད་པ་སྤངས་པའི་ཕྱིར་རྟགས་ཀྱི་ཡུམ་ནི་དངོས་སུ་དམིགས་སུ་མེད་པས་མ་བསྟན་ལ་དོན་གྱི་ཡུམ་ནི་ཆོས་ཀྱི་དབྱིངས་དང་དུས་ཐམས་ཅད་དུ་འབྲལ་བ་མེད་པར་བཞུགས་པའོ། །ཀུན་བཟང་ཡབ་ཡུམ་གྱི་ཕྱག་རྒྱ་ལ་ཀུན་ཏུ་བཟང་པོ་ནི་ཕྱག་མཉམ་བཞག་གི་སྟེང་ན་ཕྱག་སོར་ལས་ཡེ་ཤེས་ལྔའི་འོད་ཟེར་འཕྲོ་ཞིང་ཞབས་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པའོ། །དེའི་ཡུམ་དུ་གྱུར་པ་ནི་ཀུན་ཏུ་བཟང་མོ་སྟེ་ཕྱག་མཉམ་རྫོགས་སམ་མཉམ་པར་བཞག་པ་ལས་མཛུབ་མོ་གཉིས་རྩེ་སྤྲད་ནས་བཞུགས་ཤིང་ཞབས་པད་མོའི་སྐྱིལ་ཀྲུང་སྟེ་ཞབས་མཐིལ་གཉིས་སྤྲད་ནས་བཞུགས་པའོ། །གཞན་ཡང་ཕྱག་རྒྱ་མ་ངེས་སྣ་ཚོགས་གནས་པ་སྟེ་རིགས་ལྔ་སྤྱིའི་ཕྱག་རྒྱའམ་ཡང་ན་དེ་བཞིན་གཤེགས་པ་རྣམ་པར་སྣང་མཛད་ཀྱི་ཕྱག་རྒྱ་ཉིད་དམ་ཡང་ན་རྡོ་རྗེ་ཐལ་མོ་ཡི་ཕྱག་རྒྱ་ཉིད་བཅིང་ངོ་། །བཞི་པ་སྐུ་མདོག་ནི། མཐིང་ཀ་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །ཞེས་པས་བསྟན། སྤྱིར་སྐུ་མདོག་ལ་གཉིས་ཏེ། རང་བཞིན་གྱི་སྐུ་མདོག་དང་། རིགས་ཀྱི་སྐུ་མདོག་གོ། །དེ་ལ་རང་བཞིན་གྱི་སྐུ་མདོག་ནི་སྣུམ་པ་དང་། འདྲིལ་བ་དང་། གསལ་བ་དང་། འཚེར་བ་སྟེ། དེ་ཡང་ཉེས་པའི་སྐྱོན་གྱིས་མ་གོས་པ་དུང་ལྟ་བུ་དང་། སྣུམ་ལ་འདྲིལ་བ་མེ་ཏོག་ཀུ་མུད་ཏ་ལྟ་བུ་དང་། གསལ་བ་ཉི་མ་ལྟ་བུ། དང་ཞིང་གསལ་བ་ཟླ་བ་ལྟ་བུ། འཚེར་བ་གངས་ལ་ཉི་མ་ཤར་བ་ལྟ་བུའོ། །དེ་རྣམས་ནི་སྤྱིར་ཁྱབ་ལ་རིགས་ཀྱི་སྐུ་མདོག་ནི་རིགས་ལྔ་དང་རིགས་ཆུང་ངོ་། །རིགས་ལྔ་ནི་མཐིང་ཀ་ནི་དོན་ཆོས་ཀྱི་དབྱིངས་ལ་ཉོན་མོངས་པས་མ་བསླད་པས་མི་འགྱུར་བའོ། །དེ་ཡང་ཀུན་ཏུ་བཟང་པོ་ཡབ་ཡུམ་དང་མི་བསྐྱོད་པ་ཡབ་ཡུམ་སྐུ་མདོག་མཐིང་ཀར་བཞུགས་པའོ། །དེ་ནི་རྡོ་རྗེའི་རིགས་ཀྱི་སྐུ་མདོག་གོ། །དཀར་པོ་ནི་ཉེས་པའི་སྐྱོན་གྱིས་མ་གོས་པ་སྟེ་རྣམ་སྣང་ཡབ་ཡུམ་དང་སའི་སྙིང་པོ་ཡབ་ཡུམ་དང་ལྷའི་ཐུབ་པའི་སྐུ་མདོག་གོ། །དེ་ནི་དེ་བཞིན་གཤེགས་པའི་རིགས་སོ། །སེར་པོ་ནི་ཆེ་བའི་ཡོན་ཏན་རྒྱས་པའི་རྟགས་ཏེ་རིན་ཆེན་འབྱུང་ལྡན་ཡབ་ཡུམ་དང་ནམ་མཁའི་སྙིང་པོ་ཡབ་ཡུམ་དང་མིའི་ཐུབ་པའི་སྐུ་མདོག་སྟེ་དེ་ནི་རིན་ཆེན་རིགས་སོ། །ལེ་བརྒན་ནམ་དམར་པོ་ནི་ཐུགས་རྗེས་འགྲོ་བའི་དོན་ལ་ཆགས་པའི་རྟགས་ཏེ་སྣང་བ་མཐའ་ཡས་ཡབ་ཡུམ་དང་སྤྱན་རས་གཟིགས་ཡབ་ཡུམ་དང་ཡི་དྭགས་ཀྱི་ཐུབ་པའི་སྐུ་མདོག་སྟེ་དེ་ནི་པད་མའི་རིགས་སོ། །ལྗང་གུ་ནི་འཕྲིན་ལས་བཞིས་འགྲོ་བ་ཐམས་ཅད་ཀྱི་དོན་མཛད་པའི་རྟགས་ཏེ་དོན་ཡོད་གྲུབ་པ་ཡབ་ཡུམ་དང་ཕྱག་ན་རྡོ་རྗེ་ཡབ་ཡུམ་དང་དམྱལ་བའི་ཐུབ་པའི་སྐུ་མདོག་སྟེ་དེ་ནི་ལས་ཀྱི་རིགས་སོ། །རིགས་ཆུང་ནི་ལ་སོགས་ཞེས་པས་ཁ་དོག་ཉི་ཤུ་རྩ་ལྔའམ་ཡང་མཐིང་ཀ་རྡོ་རྗེ་སེམས་དཔའ་ཡབ་ཡུམ་ནམ་མཁའི་སྙིང་པོ་ཡབ་ཡུམ་སྒྲིབ་སེལ་ཡབ་ཡུམ་ཀུན་བཟང་ཡབ་ཡུམ་མོ། །དཀར་པོ་ནི་རྣམ་སྣང་ཡབ་ཡུམ་དང་ས་སྙིང་དང་བྱམས་པའོ། །སེར་པོ་ནི་རིན་འབྱུང་དང་ཐུབ་པ་དྲུག་གོ། །དམར་པོ་ནི་སྣང་བ་མཐའ་ཡས་དང་སྤྱན་རས་གཟིགས་ཀུན་བཟང་ངོ་། །ལྗང་གུ་ནི་དོན་ཡོད་གྲུབ་པ་དང་ཕྱག་ན་རྡོ་རྗེ་དང་འཇམ་དཔལ་ཡབ་ཡུམ་གྱིའོ། །སྒོ་བ་བཞི་ཕྱོགས་མཐུན་ནོ། །སྣ་ཚོགས་པའི་ཞེས་པ་ནི་རང་རང་མ་འདྲེས་པར་གསལ་བའོ། །ལྔ་པ་ཞི་ཚུལ་དགུ་ནི། མཉེས་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བརྗིད་ལྡན། །ཞེས་པ་སྟེ། དེ་ལ་ཞི་བའི་ཚུལ་དགུ་ལས་སྐུའི་ཚུལ་རྣམ་པ་ལྔ་ནི་མཉེན་པ་ནི་ཞེ་སྡང་དག་པས་རིན་པོ་ཆེ་གསེར་ལྟ་བུ་སྟེ་གྱོང་པོ་དང་ཁེངས་པ་ལྟ་བུ་ནི་མ་ཡིན་ནོ། །ལྕུག་པ་ནི་ཁོང་ཁྲོ་དག་པས་འབྲས་ས་ལུའི་ལྗང་བུ་ལྟ་བུ་སྟེ་དེ་ཡང་རེངས་པ་ལྟ་བུ་ནི་མ་ཡིན་ནོ། །འཁྲིལ་བ་ནི་འདོད་ཆགས་དག་པས་དཔེར་ན་སྦྲུལ་ལྟ་བུ་སྟེ་ཡབ་ཡུམ་ཐབས་དང་ཤེས་རབ་གཉིས་སུ་མེད་པར་བཞུགས་པའོ། །སོ་སོར་བཞུགས་པ་ལྟ་བུ་ནི་མ་ཡིན་ནོ། །ལྡེམ་པ་ནི་ང་རྒྱལ་དག་པས་ལྗོན་ཤིང་ལྟ་བུ་སྟེ་ཀྱོག་པོ་དང་ཡོན་པོ་ལྟ་བུ་ནི་སྤངས་པའོ། །གཞོན་ཚུལ་ཅན་ནི་གཏི་མུག་དག་པས་བྱིས་པ་ལོ་བརྒྱད་ལོན་པ་ལྟ་བུ་སྟེ་གཞོན་ཤ་ཆགས་པའོ་རྒན་པོ་ཁོགས་པ་ལྟ་བུ་ནི་མ་ཡིན་ནོ། །སྐུ་མདོག་གི་ཚུལ་ནི་གསལ་བ་ནི་ཕྲག་དོག་དག་པས་ཚེས་བཅོ་ལྔའི་ཟླ་བ་ལྟ་བུ་སྟེ་མོག་མོག་པོའམ་ནག་ནག་པོ་ནི་མ་ཡིན་ནོ། །འཚེར་བ་ནི་སེར་སྣ་དག་པས་ཉི་མའི་སྙིང་པོ་ལྟ་བུ་སྟེ་ཕྱོགས་གཅིག་པའམ་མི་གཅིག་པ་ལྟ་བུ་ནི་མ་ཡིན་ནོ། །ལྷུན་སྡུག་པ་ནི་བདག་འཛིན་དག་པས་རི་བོ་ལྟ་བུ་སྟེ་སྟུར་སྟུར་པོ་ནི་མ་ཡིན་ནོ། །གཟི་བརྗིད་དང་ལྡན་པ་ནི་ཞེན་པ་དག་པས་ནོར་བུ་ལྟ་བུ་སྟེ་མ་འདྲེས་ལ་གསལ་བའི་ནོར་བུ་འཆིང་བུ་ལྟ་བུ་ནི་མ་ཡིན་ནོ། །ལྷ་ཚོགས་རྣམས་ཀྱི་སྐུ་ནི་དེ་ལྟར་ལྟ་བས་ཆོག་མི་ཤེས་པར་བཞུགས་པའོ། །དྲུག་པ་འོད་ཟེར་ནི། འོད་ཟེར་འཕྲོ་བའི་ཚོགས་ཆེན་པོ། །འབར་བའི་འཕྲེང་བ་འཁྲིགས་པ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་རྫོགས། །ཞེས་པ་སྟེ། དེ་ཡང་སྐུའི་བ་སྤུའི་བུ་ག་གཅིག་ནས་ཡང་འོད་ཟེར་བྱེ་བ་ཁྲག་ཁྲིག་བརྒྱ་སྟོང་དྲུག་ཅུ་དྲུག་ཅུ་འབྱུང་ཞིང་འཕྲོ་བ་དང་ཞལ་གྱི་མཛོད་སྤུ་ནས་འོད་ཟེར་ཁ་དོག་མི་འདྲ་བ་ཉི་ཤུ་རྩ་ལྔའི་ཚོགས་ཆེན་པོ་འཕྲོ་བའོ། །དེ་ནི་ཞི་བའི་སྤྲུལ་པ་སྟེ་དེ་ཉིད་གནས་གྱུར་པས་ཁྲོ་བོའི་དུས་ཀྱི་མེ་དཔུང་ནི་སྒོ་བཞི་ན་གནས་པའི་ཁྲོ་བོ་བཞི་ལས་ཀྱང་ཉོན་མོངས་པ་བསྲེག་པའི་མེ་དཔུང་བསྐལ་པ་འཇིག་པའི་དུས་ཀྱི་མེ་ལྟ་བུ་ཡེ་ཤེས་ཀྱི་མེ་དཔུང་རབ་ཏུ་འབར་བའི་འཕྲེང་བ་འཁྲིལ་པ་སྟེ། དེ་ཡང་ཡེ་ཤེས་ཀྱི་མེ་ཡིན་པས་ན་མེ་ལྕེ་འཕྲེང་བ་ལྟར་བརྒྱུས་ནས་མེ་དཔུང་དུ་འཁྲིལ་ཞིང་འབར་བའོ། །ཕྱི་རོལ་ན་ཡང་ཡེ་ཤེས་ཀྱི་མེ་དཔུང་འབར་བའོ། །དེ་ཡང་ནམ་མཁས་གར་ཁྱབ་སར་ཆོས་ཀྱི་དབྱིངས་ཀྱིས་ཁྱབ་ལ་ཆོས་ཀྱི་དབྱིངས་ཀྱིས་གར་ཁྱབ་སར་ཆོས་ཀྱི་དབྱིངས་ཀྱི་ཡེ་ཤེས་རྟོགས་པའི་རྟགས་སུ་ལྷའི་གཞལ་ཡས་ཁང་གིས་མཐའ་དང་དབུས་མེད་པར་ཁྱབ་པ་ཡི་ཚུལ་དུ་སྣང་སྟེ་དེ་བས་ན་རང་བཞིན་གྱི་དཀྱིལ་འཁོར་དེ་ཉིད་བློས་བསམ་གྱིས་མི་ཁྱབ་པས་མཐའ་ཡས་ཞིང་འབད་རྩོལ་མེད་པར་ལྷུན་གྱིས་རྫོགས་པའོ། །བཞི་པ་ནུས་པ་དང་ལྡན་པར་བྱ་བ་ནི། ༀ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨད་མ་ཀོ྅་ཧཾ། ཞེས་པས་བདག་གི་སྤྱི་བོར་རིན་པོ་ཆེའི་ཁང་བུའི་ནང་དུ་ཉི་མའི་དཀྱིལ་འཁོར་ལ་ༀ་ལས་རྣམ་པར་སྣང་མཛད་སྐུ་ཚོན་གང་བ་གཅིག་ལ་སྐུ་མདོག་དཀར་པོ་བྱང་ཆུབ་མཆོག་གི་ཕྱག་རྒྱ་ཅན་བསམ་མོ། །ༀ་མ་ཧཱ་ཨ་དཪྴ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ། བདག་གི་དཔྲལ་བའི་ངོས་སུ་རིན་པོ་ཆེའི་ཁང་བུའི་ནང་དུ་ཉི་ཟླ་པདྨའི་སྟེང་དུ་ཧཱུཾ་ལས་རྡོ་རྗེ་སེམས་དཔའ་མཐིང་ག་ས་གནོན་གྱི་ཕྱག་རྒྱ་ཅན་བསམ་མོ། །ༀ་མ་ཧཱ་ས་མནྟ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ། བདག་གི་ལྟག་པ་གཡས་སུ་རིན་པོ་ཆེའི་ཁང་བུའི་ནང་དུ་ཉི་ཟླ་པདྨའི་གདན་ལ་སྭ་ལས་རིན་ཆེན་འབྱུང་ལྡན་སེར་པོ་སྦྱིན་གཏོང་གི་ཕྱག་རྒྱ་ཅན་བསམ་མོ། །ༀ་མ་ཧཱ་པྲ་ཏྱ་བེ་ཀྵ་ན་ཛྙཱ་ན་བཛྲ་སྭ་བྷ་བ་ཨད་མ་ཀོ྅་ཧཾ། བདག་གི་ལྟག་ཁུང་དུ་རིན་པོ་ཆེའི་ཁང་བུའི་ནང་དུ་ཉི་ཟླ་པདྨའི་གདན་སྟེང་དུ་ཨ་ལས་སྣང་བ་མཐའ་ཡས་དམར་པོ་མཉམ་བཞག་གི་ཕྱག་རྒྱ་ཅན་བསམ་མོ། །ༀ་མ་ཧཱ་ཀྲི་ཏྱ་ཨ་ནུ་ཏ་ན་ཛྙཱ་ན་བཛྲ་སྭ་བྷ་ཝ་ཨཏྨ་ཀོ ྅་ཧཾ། བདག་གི་ལྟག་པ་གཡོན་དུ་རིན་པོ་ཆེའི་ཁང་བུའི་ནང་དུ་ཉི་ཟླ་པདྨའི་གདན་སྟེང་དུ་ཧ་ལས་དོན་ཡོད་གྲུབ་པ་ལྗང་གུ་སྐྱབས་སྦྱིན་གྱི་ཕྱག་རྒྱ་ཅན་བསམ་མོ། །ༀ་སརྦ་ཏ་ཐཱ་ག་ཏ་ཀ་ཡ་བཛྲ་སྭ་བྷ་ཝ་ཨཏྨ་ཀོ྅་ཧཾ། བདག་གི་ཀླད་པའི་དུང་ཁང་དུ་འཁོར་ལོ་རྩིབས་བརྒྱད་ཀྱི་སྟེང་དུ་ༀ་ལས་རྣམ་པར་སྣང་མཛད་དུ་བསམ་མོ། །ༀ་སརྦ་ཏ་ཐཱ་ག་ཏ་ཝཀྐ་བཛྲ་སྭ་བྷ་ཝ་ཨཏྨ་ཀོ྅་ཧཾ། བདག་གི་ལྕེ་སྟེངས་སུ་པདྨ་འདབ་བརྒྱད་ཀྱི་སྟེང་དུ་ཨ་ལས་སྣང་བ་མཐའ་ཡས་བསམ་མོ། །ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷ་ཝ་ཨཏྨ་ཀོ྅་ཧཾ། བདག་གི་ཐུགས་ཀྱི་དཔལ་བེའུ་ཟུར་བརྒྱད་སྟེང་དུ་ཧཱུཾ་ལས་རྡོ་རྗེ་སེམས་དཔའ་བསམ་མོ། །སྐུ་གསུང་ཐུགས་དང་ཡེ་ཤེས་ལྔ། །དབང་དང་བྱིན་རླབས་ཀུན་བསྡུས་ཐིམ། །དཀྱིལ་འཁོར་ཀུན་ཏུ་གསལ་བར་གྱུར། །ཞེས་པས་དེ་ནས་ཡབ་ཡུམ་སྦྱོར་བ་བྱས་པའི་སྦྱོར་མཚམས་ནས་ཡེ་ཤེས་ཀྱི་འོད་ཟེར་འཕྲོས་པས་འོག་མིན་ནས་རིགས་ལྔ་མདུན་གྱི་ནམ་མཁར་སྤྱན་དྲངས་ནས་ཡབ་ཡུམ་སྦྱོར་བ་བྱས་པའི་བྱང་སེམས་ལས་རིག་པའི་ལྷ་མོ་བུམ་པ་ཐོགས་པ་མང་པོས་བདག་ལ་ཆུ་བླུག་སྟེ་དབང་བསྐུར་བས་དབང་རྟགས་སུ་རིགས་ལྔའི་དབུ་རྒྱན་བཞུགས་པར་བསམ། བདེ་བར་གཤེགས་པ་རིགས་ལྔས་ཡེ་ཤེས་ལྔའི་དབང་བསྐུར་བ་དང་། སྐུ་གསུང་ཐུགས་ཀྱི་བྱིན་རླབས་ཀུན་བསྡུས་ནས་ཐིམ་པ་དང་། དཀྱིལ་འཁོར་གྱི་ལྷ་ཚོགས་ཐམས་ཅད་འོད་ཀྱི་རང་བཞིན་དུ་ཀུན་ཏུ་གསལ་བར་གྱུར་པའོ། །དེ་ལ་ལྷ་རེ་རེ་ལ་དབུ་རྒྱན་ལྔ་བསམ་སྟེ་རང་རང་གི་རིགས་ཀྱིས་གཙོ་བོ་བྱས་པ་ལྔ་ལྔ་བསམ་མོ། །ཐུབ་པ་དྲུག་ལ་མི་བྱེད་དེ་ཅི་ཕྱིར་ཞེ་ན། རྒྱུད་ལས། ཐུབ་དྲུག་སྤྲུལ་པའི་སྐུར་གནས་པས། །བྱིན་རླབས་དབུ་རྒྱན་མ་གསུངས་སོ། །ཞེས་པས་འདོད་པའི་ཡོན་ཏན་སྤངས་པའི་ཚུལ་ཡིན་པས་ཆགས་ལམ་གྱི་དབང་མི་བཞེད་པ་དང་སྤྲུལ་སྐུའི་ཚུལ་དུ་བཞུགས་པས་དབུ་རྒྱན་མི་བཞེད་པ་ལ་དགོངས་སོ། །བཞི་པ་བསྒོམ་པའི་ཆེ་བ་ནི། ས་ལ་སོགས་ལས་ཕྱག་རྒྱར་བྱས། །རྣམ་གྲོལ་རིམ་པ་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་བས། །སྨོས་ཅི་དགོས་ཏེ་དེ་ཉིད་ཡིན། །ཞེས་པ་སྟེ། ས་ལ་སྐུ་གདུང་བཏབ་པ་དང་། ལྡེར་ཚོ་བྱས་པ་དང་རས་སམ་དར་ལ་རིས་སུ་བྲིས་པ་དང་ཐགས་སུ་བཏགས་པའམ་རྡོའམ་ཤིང་ལ་འབུར་དུ་བརྐོས་པ་དང་གསེར་དངུས་ཟངས་ལྕགས་ལ་ལུགས་སུ་བླུགས་ནས་ལྷས་ཕྱག་རྒྱར་བྱས་པས་ཀྱང་དེའི་དོན་ལས་འཁོར་བའི་སྡུག་བསྔལ་ལས་རྣམ་པར་གྲོལ་ནས་འབྲས་བུ་མྱ་ངན་ལས་འདས་པའི་གོ་འཕང་གི་རིམ་པ་ཐོབ་པར་འགྱུར་ན། འདིར་དང་པོར་དེ་བཞིན་ཉིད་ཀྱི་ཏིང་ངེ་འཛིན་གཟུང་འཛིན་དག་པའི་ཡེ་ཤེས་ཀྱིས་ཆོས་ཐམས་ཅད་རང་བཞིན་མེད་པ་དོན་དམ་པ་ཆོས་ཀྱི་དབྱིངས་སུ་སྦྱངས་པ་དང་། ཀུན་ཏུ་སྣང་གིས་དངོས་པོ་ཐམས་ཅད་རང་བཞིན་མེད་པ་ཡེ་ཤེས་སྒྱུ་མར་སྦྱངས་པ་དང་། རྒྱུའི་ཏིང་ངེ་འཛིན་གྱིས་ཡིག་འབྲུར་སྦྱངས་པ་དང་། ཕྱག་རྒྱ་གཅིག་པས་རང་གི་ལུས་ངག་ཡིད་གསུམ་སྐུ་གསུང་ཐུགས་སུ་སྦྱངས་པ་དང་། སྤྲོས་པའི་ཏིང་ངེ་འཛིན་གྱིས་སྤྱོད་ཡུལ་ཐམས་ཅད་ལྷ་དང་ལྷ་མོའི་རང་བཞིན་དུ་སྦྱངས་པས་ན་འབྲས་བུ་ཐོབ་པ་ལྟ་སྨོས་ཀྱང་ཅི་དགོས་ཏེ་ཏིང་ངེ་འཛིན་ཏེ་མངོན་དུ་གྱུར་པ་དེ་ཁོ་ན་ཉིད་འབྲས་བུ་ཡེ་ཤེས་ཡིན་པས་འབྲས་བུ་གཞན་ནས་བཙལ་དུ་མེད་པའི་ཕྱིར་རོ། །གཉིས་པ་ཡེ་ཤེས་དཀྱིལ་འཁོར་སྤྱན་དྲངས་པ་ལ་སོགས་པ་ལ་གཉིས་ཏེ། སྤྱན་དྲངས་པ་དང་། མཆོད་པའོ། །དང་པོ་སྤྱན་དྲངས་པ་ལ་དྲུག་སྟེ། དམ་བཅའ་བ་དང་། ཚིག་གིས་སྤྱན་དྲངས་པ་དང་། སྔགས་ཀྱིས་སྤྱན་དྲངས་པ་དང་། རིག་པའི་མེ་ཏོག་དོར་བ་དང་། དངོས་གྲུབ་བསྐུལ་བ་དང་། གཉིས་མེད་དུ་བསྟིམས་པའོ། །དང་པོ་དམ་བཅའ་བ་ནི། ཕྱག་རྒྱའི་དཀྱིལ་འཁོར་གསལ་བསྐྱེད་ལ། །དབང་བསྐུར་བྱིན་རླབས་རྫོགས་བྱས་ཏེ། །སྟོ ང་གསུམ་ཉུངས་འབྲུར་གཞུགས་ཚུལ་གྱིས། །དབྱིངས་ནས་དཀྱིལ་འཁོར་སྤྱན་དྲངས་མཆོད། །ཅེས་པ་སྟེ། དེ་ལྟར་ཕྱག་རྒྱ་ལྷའི་དཀྱིལ་འཁོར་དམ་ཚིག་པ་གསལ་བར་བསྐྱེད་ལ་དེ་ལ་ཡེ་ཤེས་ལྔས་དབང་བསྐུར་བ་དང་སྐུ་གསུང་ཐུགས་སུ་བྱིན་གྱིས་བརླབས་པ་རྫོགས་པར་བྱས་ལ་སྤྱན་དྲངས་པའོ། །ཏིང་ངེ་འཛིན་གྱིས་བསྐྱེད་པའི་གཞལ་ཡས་ཁང་དེར་དེ་བཞིན་གཤེགས་པའི་དཀྱིལ་འཁོར་མི་ཤོང་ཞེ་ན། ལྷའི་རྫུ་འཕྲུལ་གྱིས་སྟོང་གསུམ་གྱི་སྟོང་ཆེན་པོ་མི་མཇེད་འཇིག་རྟེན་གྱི་ཁམས་ཐམས་ཅད་ཉུང་འབྲུར་ཏེ་ཉུང་འབྲུ་གཅིག་གི་ནང་དུ་གཞུགས་ཀྱང་ཉུང་འབྲུ་ཡང་ཆེར་མ་འཕེལ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་ཆུང་དུ་མི་འགྲོ་བར་ཆུད་པ་དེའི་ཚུལ་དུ་ཏིང་ངེ་འཛིན་གྱིས་བསྐྱེད་པའི་གཞལ་ཡས་ཁང་དེར་ཡེ་ཤེས་ཀྱི་དཀྱིལ་འཁོར་བཞི་བཅུ་རྩ་གཉིས་སྤྱན་དྲངས་ནས་བཞུགས་ཀྱང་གཞལ་ཡས་ཁང་ཆེར་མ་འཕེལ་ལ་ཡེ་ཤེས་ཀྱི་དཀྱིལ་འཁོར་དེ་ཆུང་དུ་འགྲིབ་པ་མ་ཡིན་ནོ། །དེའི་ཕྱིར་ན་གསང་བའི་དཀྱིལ་འཁོར་ངོ་མཚར་ཆེ་བ་ཡིན་ནོ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་སྤྱན་དྲངས་ལ་མཆོད་པའི་བྱེ་བྲག་བསམ་གྱིས་མི་ཁྱབ་པས་མཆོད་པར་བྱའོ། །གཉིས་པ་ནི། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲངས་སོ། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་ཀུན་ཏུ་རྫོགས། །ཉེ་བར་གྱུར་པའི་དམ་ཚིག་མཆོག ། ཅེས་པ་སྟེ། གང་སྤྱན་དྲངས་ན་ཕྱོགས་བཅུ་དུས་བཞིས་བསྡུས་པའི་དཀྱིལ་འཁོར་ནི་བདག་ཉིད་ཆེ་བའམ་ཆེན་པོའི་རང་བཞིན་ལྷུན་གྲུབ་ཏུ་གནས་པ་སྟེ་གཞན་ལས་འཕགས་པའོ། །དེ་ཡང་ཕྱོགས་བཅུ་དུས་བཞིའི་དཀྱིལ་འཁོར་མ་ལུས་པ་ཐམས་ཅད་ནི་བདག་ཉིད་ཆེན་པོར་སངས་རྒྱས་པའི་བཞི་བཅུ་རྩ་གཉིས་པོའི་རྣམ་པར་སྤྱན་དྲང་ངོ་། །ཡུལ་གང་ནས་སྤྱན་དྲངས་ན་ཕན་ཚུན་དང་ཡུལ་དང་ཡུལ་ཅན་ལྟ་བུ་མི་དམིགས་པའི་རང་བཞིན་སྤྲོས་བྲལ་ཆོས་ཀྱི་དབྱིངས་ཀྱི་ཡེ་ཤེས་ཉིད་ནི་ཐུགས་ཀྱི་དཀྱིལ་འཁོར་ཡེ་ཤེས་ལྔར་སྣང་བ་སྟེ་དེ་ནི་དུས་གསུམ་གྱི་རྒྱལ་བ་ཐམས་ཅད་བཞུགས་པའི་གནས་ཡིན་ཏེ། གཟུང་འཛིན་བྲལ་བའི་ཡེ་ཤེས་ཉིད། །དེ་བཞིན་གཤེགས་པ་ཀུན་གྱི་གནས། །ཞེས་སོ། །གནས་དེ་ནས་ངོ་བོ་གང་སྤྱན་དྲངས་ན་དཀྱིལ་རྡོ་རྗེ་སེམས་དཔའ་ལ་འཁོར་བུདྡྷ་བཞི་བཅུ་ཐམ་པས་བསྐོར་བའི་བུདྡྷ་བཞི་བཅུ་རྩ་གཉིས་པོ་ཐམས་ཅད་སྤྱན་དྲང་ངོ་། །གང་དུ་སྤྱན་དྲངས་ན་རང་རིག་པའི་སྣང་བ་ལས་བྱུང་བ་དམ་ཚིག་གི་དཀྱིལ་འཁོར་འདིར། དགོས་ཆེད་ཅིའི་ཕྱིར་སྤྱན་དྲངས་ན་དམ་ཚིག་པ་དང་ཡེ་ཤེས་ཀྱི་དཀྱིལ་འཁོར་གཉིས་དབྱེར་མེད་པའི་དཀྱིལ་འཁོར་ལ་རིག་པ་ལ་རིག་པ་འཇུག་དམ་ཚིག་པ་དང་ཡེ་ཤེས་པ་མཉམ་པར་སྦྱོར་བའི་ཕྱིར་ཏེ་དེ་ཡང་རང་སྣང་ལ་ཡེ་ཤེས་ཀྱི་ལྷ་འཇུག་པའི་མཚན་ཉིད་དམ་འཇུག་ལུགས་ནི་བདག་དང་ལྷ་མཉམ་པར་སྦྱོར་བས་སོ། །འབྲས་བུ་ཅི་འགྲུབ་ན་ཕྱོགས་བཅུ་དུས་བཞི་ཀུན་ནས་གཤེགས་པ་ཡི་འགྲོ་བའི་དོན་ཡོངས་སུ་རྫོགས་པར་མཛད་པའི་རྒྱལ་བ་བཞི་བཅུ་རྩ་གཉིས་པོ་དེ་དག་ཐམས་ཅད་བདག་གིས་ཚེ་སྔ་མའི་དུས་ཕན་ཆད་དུ་བསྙེན་བསྙེན་བསྒྲུབས་བསྒྲུབས་པའི་དཀྱིལ་འཁོར་ཡིན་པས་ལྷ་དང་བསྙེན་པ་ཀུན་ཏུ་རྫོགས་པར་ཕུལ་བས་ན་ད་ལྟར་གྱི་དུས་ན་བདག་དཀྱིལ་འཁོར་གྱི་ལྷ་དང་ཉེ་བར་གྱུར་པའི་ཕྱིར་དང་རྒྱལ་བ་དེ་དག་འགྲོ་བའི་དོན་མཛད་པར་ཐུགས་དམ་དུ་ཞལ་གྱིས་བཞེས་པ་ལས་མི་འདའ་བའི་དམ་ཚིག་མཆོག་གི་དབང་གིས་བདག་གི་དོན་མཛད་པའི་ཕྱིར་གནས་འདིར་བྱོན་པ་ཡིན་ནོ། །གསུམ་པ་ནི། ༀ་ཨེ་ཧ་ཡ་ཧི་བྷ་ག་ཝན། མ་ཧཱ་ཀ་རུ་ཎི་ཀ་དྲི་ཤ་ཡ་ཧོ། ས་མ་ཡ་སྟྭཾ། ཛཿཧཱུཾ་བཾ་ཧོ། ཞེས་པ་སྟེ། ༀ་ཨེ་ཧ་ཡ་ཧི་ནི་ཀྱེ་ཚུར་སྤྱོན་བྷ་ག་ཝན་བཅོམ་ལྡན་འདས་མ་ཧཱ་ཀ་རུ་ཎི་ཀ་ཐུགས་རྗེ་ཆེན་པོས་དྲི་ཤ་ཡ་ཧོ་གཟིགས་ཤིག །ས་མ་ཡ་སྟྭཾ་དམ་ཚིག་ལ་དགོངས། ཛཿཧཱུཾ་བཾ་ཧོ༔ ལྷ་མོ་བཞིའོ། །བཞི་པ་ནི། མེ་ཏོག་དོར་ལ་དངོས་གྲུབ་གསོལ། །གཉིས་མེད་ཐིམ་བཞུགས་ཉེས་པར་བྱ། །ༀ་བཛྲ་ས་མ་ཡ་ༀ། ཨཾ་བཛྲ་ས་མ་ཡ་ཨཾ། ཧཱུཾ་བཛྲ་ས་མ་ཡ་ཧཱུཾ། སྭ་བཛྲ་ས་མ་ཡ་སྭ། ཧ་བཛྲ་ས་མ་ཡ་ཧ། ཞེས་པ་སྟེ། རིག་པའི་མེ་ཏོག་དོར་ལ་རང་ལ་སྐུ་གསུང་ཐུགས་ཀྱི་དངོས་གྲུབ་བསྐུལ་བར་བྱ་བ་སྟེ། དེ་ལྟར་མདུན་གྱི་ནམ་མཁར་བྱོན་པ་ལ་རིག་པའི་མེ་ཏོག་དོར་བས་ལྷ་དང་བདག་དབྱེར་མེད་པར་རྟོགས་ནས་སྐུ་གསུང་ཐུགས་ཀྱི་དངོས་གྲུབ་གསོལ་ཕྱིར་གཉིས་སུ་མེད་པར་ཐིམ་ནས་བདག་དངོས་གྲུབ་མ་ཐོབ་བར་དུ་བརྟན་པར་བཞུགས་སུ་གསོལ་ནས་མ་སྐྱེས་རྡོ་རྗེ་ཐབས་ཀྱི་ཡེ་ཤེས་ནི་ཞེས་པས་ཕྱག་འཚལ་ལ་མཉེས་པར་བྱའོ། །དེ་ཡང་དཀྱིལ་ལ་འཁོར་གཉིས་ཀྱི་སྐུ་གསུང་ཐུགས་ཡོན་ཏ ན་འཕྲིན་ལས་དབྱེར་མེད་པར་གསལ་བ་ལ་རིག་པའི་མེ་ཏོག་དོར་ཞེས་བྱ་སྟེ་སྔགས་ནི་ༀ་བཛྲ་རྡོ་རྗེ་ས་མ་ཡ་དམ་ཚིག་ༀ་སྐུ་སྟེ་དོན་དུ་སྐུ་རྡོ་རྗེ་དང་དབྱེར་མེད་པར་གྱུར་ཅིག་པའོ། །དེ་བཞིན་དུ་ཨཾ་བཛྲ་རྡོ་རྗེ་ས་མ་ཡ་དམ་ཚིག་ཨཾ་གསུང་སྟེ་གསུང་རྡོ་རྗེ་དང་དབྱེར་མེད་པར་གྱུར་ཅིག །ཧཱུཾ་བཛྲ་རྡོ་རྗེ་ས་མ་ཡ་དམ་ཚིག་ཧཱུཾ་ཐུགས་ཏེ་ཐུགས་རྡོ་རྗེ་དང་དབྱེར་མེད་པར་གྱུར་ཅིག །སྭ་བཛྲ་ཡོན་ཏན་རྡོ་རྗེ་ས་མ་ཡ་དམ་ཚིག་སྭ་ཡོན་ཏན་ཏེ་ཡོན་ཏན་རྡོ་རྗེ་དང་དབྱེར་མེད་པར་འགྱུར་ཅིག །ཧ་བཛྲ་རྡོ་རྗེ་ས་མ་ཡ་དམ་ཚིག་ཧ་ཕྲིན་ལས་ཏེ་འཕྲིན་ལས་རྡོ་རྗེ་དང་དབྱེར་མེད་པར་གྱུར་ཅིག་ཅེས་སོ། །ལྔ་པ་ནི། ༀ་བཛྲ་ས་མ་ཡ་ཧཱུཾ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧོ། ཞེས་གསུངས་ཏེ། ༀ་ཡེ་ཤེས་ལྔ་བཛྲ་རྡོ་རྗེ་ས་མ་ཡ་དམ་ཚིག་ཧཱུཾ་བསྡུ་བ་སྟེ་ནམ་མཁའ་ཡེ་ཤེས་ཀྱི་དཀྱིལ་འཁོར་གྱི་དངོས་གྲུབ་གསོལ་ཞེས་དངོས་གྲུབ་བསྐུལ་བའི་སྔགས་སོ། །ༀ་ཡེ་ཤེས་ལྔ་བཛྲ་རྡོ་རྗེ་ས་མ་ཡ་དམ་ཚིག་སྟྭཾ་སྦྱོར་བ་སྟེ་དངོས་གྲུབ་གསོལ་བའི་དུས་ལ་བབས་པའོ། །ༀ་ཡེ་ཤེས་ལྔ་བཛྲ་རྡོ་རྗེ་ས་མ་ཡ་དམ་ཚིག་ཧོ་དགྱེས་པར་རོལ་པ་སྟེ་དངོས་གྲུབ་གསོལ་བ་ལ་དགྱེས་པར་དགོངས་ཤིག་ཅེས་སོ། །དྲུག་པ་ནི། ཛཿཧཱུཾ་བཾ་ཧོ། ཞེས་ཕྱག་རྒྱ་བཞིས་དགུག་གཞུག་བྱ་ཞིང་དགྱེས་པ་བསྐྱེད་པའོ། །གཉིས་པ་མཆོད་པ་ལ་བརྒྱད་དེ། ཕྱག་རྒྱ་གར་གྱི་མཆོད་པ་དང་། །ལྷག་པ་ཏིང་ངེ་འཛིན་གྱི་དང་། ཏ་ན་སྒྲོལ་བའི་དང་། ག་ན་སྦྱོར་བའི་དང་། བདུད་རྩིའི་དང་། ཚོགས་ཀྱི་དང་། བསྟོད་པ་དང་། བཟླས་པའི་མཆོད་པའོ། །དང་པོ་ཕྱག་རྒྱ་ལ་གསུམ་སྟེ་ཅིག་ཆར་བ་ཕྱིའི་ཕྱག་རྒྱ་དང་། སྙོམས་འཇུག་གསང་བའི་ཕྱག་རྒྱ་དང་། རིམ་གྱིས་པ་ནང་གི་ཕྱག་རྒྱའོ། །དང་པོ་ཅིག་ཆར་བ་ལ་གསུམ་སྟེ། སེམས་ཀྱི་ཕྱག་རྒྱ་དང་། ལུས་ཀྱི་ཕྱག་རྒྱ་དང་། ཕྱག་རྒྱ་སྤྱིའི་ངེས་ཚིག་ཞར་བྱུང་ངོ་། །དང་པོ་ནི། སྒྱུ་འཕྲུལ་དྲྭ་བའི་མངོན་རྫོགས་པའི། །དབང་པོའི་ཡུལ་དུ་གང་གྱུར་པ། །མཉམ་པའི་ངང་དུ་རྟོགས་གསལ་ན། །ཐམས་ཅད་བྱང་ཆུབ་མཆོག་གི་རྒྱ། །ཞེས་པས་བསྟན། དེ་ལ་སྒྱུ་མ་ནི་ཤེས་རབ་ཡུམ་གྱི་ཆ་འཕྲུལ་པ་ནི་ཐབས་ཡབ་ཀྱི་ཆ་དྲྭ་བ་ནི་དེ་གཉིས་འབྲེལ་བའི་དོན་ཡིན་པས་རྒྱལ་བ་བཞི་བཅུ་རྩ་གཉིས་པོ་ཐམས་ཅད་ཐབས་ཤེས་རབ་དབྱེར་མེད་པར་མངོན་པར་རྫོགས་པར་སངས་རྒྱས་པའི་དོན་ཏེ་རང་རིག་པས་མངོན་སུམ་དུ་གསལ་ཞིང་རྟོགས་པ་ན་དབང་པོའི་ཡུལ་དུ་གང་གྱུར་པ་ཡི་ཆོས་ཐམས་ཅད་སངས་མ་རྒྱས་པ་གཅིག་ཀྱང་མེད་དེ། དེ་ཡང་ཕུང་པོ་དང་དབང་པོ་དང་རྣམ་པར་ཤེས་པ་ཐམས་ཅད་ཐབས་ཀྱི་རང་བཞིན་ཡབ་ཀྱི་དཀྱིལ་འཁོར་ལ། འབྱུང་བ་དང་ཡུལ་དང་དུས་ཐམས་ཅད་ནི་ཤེས་རབ་ཀྱི་རང་བཞིན་ཡུམ་གྱི་དཀྱིལ་འཁོར་ཏེ་དེས་ན་དེ་དག་ཐམས་ཅད་ཐབས་ཤེས་རབ་གཉིས་སུ་མེད་པ་བྱང་ཆུབ་སེམས་མཉམ་པའི་ངང་དུ་ལྟ་བས་རྟོགས་ཤིང་ཏིང་ངེ་འཛིན་གྱིས་གསལ་ན་འཁོར་འདས་ཀྱི་ཆོས་ཐམས་ཅད་དེ་ལྟར་རྟོགས་པའི་ངང་དེ་ལས་མི་འདའ་བ་ལ་བྱང་ཆུབ་མཆོག་གི་ཕྱག་རྒྱ་ཞེས་བྱའོ། །དེ་ཡང་ཚིག་རྐང་དང་པོས་ཕྱག་རྒྱའི་དོན་གནས་ཐབས་དང་ཚིག་རྐང་བར་མ་གཉིས་ཀྱི་ལམ་རྟོགས་ཐབས་དང་ཐ་མས་འབྲས་བུའི་ངོ་བོ་བསྟན་པའོ། །གཉིས་པ་ནི། བསྐྱོད་ཆེན་འཁོར་ལོའི་གཞལ་ཡས་སུ། །ཐབས་དང་ཤེས་རབ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །ཞེས་པ་སྟེ་ངོ་བོ་གང་སྒོམ་ན་བསྐྱོད་ཆེན་ནི་ལུས་ཀྱི་ཡན་ལག་ལྔའོ། །དེ་ལྟར་འཁོར་ལོ་རྩིབས་བཞི་མུ་ཁྱུད་དང་བཅས་པའི་གཞལ་ཡས་ཁང་དུ་བསྒོམ་པ་ནི་བཞུགས་པའི་གནས་སོ། །གཞལ་ཡས་ཁང་དེ་རྣམས་སུ་ཐབས་ཡབ་དང་ཤེས་རབ་ཡུམ་ཐམས་ཅད་དེའི་འཁོར་དང་བཅས་པ་ཀུན་བསྒོམ་པ་ནི་དབུ་ལ་དེ་བཞིན་གཤེགས་པའི་རིགས་ཡབ་ཡུམ་བཅུ། ལག་པ་གཡས་པ་ལ་རྡོ་རྗེའི་རིགས་ཡབ་ཡུམ་བཅུ། ལག་པ་གཡོན་པ་ལ་རིན་པོ་ཆེའི་རིགས་ཡབ་ཡུམ་བཅུ། རྐང་པ་གཡས་པ་ལ་ལས་ཀྱི་རིགས་ཡབ་ཡུམ་བཅུ། རྐང་པ་གཡོན་པ་ལ་པདྨའི་རིགས་ཡབ་ཡུམ་བཅུ་བསྒོམ་མོ། །དེ་ཡང་རྔམ་གློག་འཁོར་ལོ་བཀོད་པའི་མདོ་ལས། ལག་གཡས་རྡོ་རྗེ་མི་བསྐྱོད་པ། །ལག་གཡོན་རིན་ཆེན་སེམས་དཔའ་སྟེ། །རྐང་གཡས་ལས་ཀྱི་སེམས་དཔའ་ལ། །རྐང་གཡོན་པདྨའི་སེམས་དཔའ་ཡིན། །དབུ་ནི་དེ་བཞིན་གཤེགས་པའི་རིགས། །ཞེས་སོ། །རྣམ་པ་ཇི་ལྟར་སྒོམ་ན་སྐུ་དེ་ཡང་གསལ་ཞིང་འོད་ཟེར་འཕྲོ་བར་བསྒོམས་ཤིང་གསལ་ན་དེ་ལྟར་བསྒོམས་པའི་ཡོན་ཏན་ནི་རང་གི་ལུས་ཀྱིས་བསྒུལ་བསྐྱོད་བྱས་པ་ཐམས་ཅད་ལྷའི་ཕྱག་རྒྱ་ཡིན་ནོ། །ཅི་སྟེ་ན་རིག་པ་ནི་ལུས་ཀྱི་ཡན་ལག་ཐམས་ཅད་ཡི་དམ་ལྷའི་སྐུར་གསལ་བའི་ངང་ལས་མི་འདའ་བའི་ཕྱིར་རོ། །གསུམ་པ་ནི། གསང་བ་དེ་ཉིད་ངེས་པ་ལས། སྙིང་པོའི་ཕྱག་རྒྱ་འདའ་དཀའ་འོ། །ཞེས་པ་སྟེ། གོང་དུ་བཤད་པ་དེ་ལྟ་བུའི་སྤྱོད་ཡུལ་ཐམས་ཅད་ལྷའི་དཀྱིལ་འཁོར་དུ་གསལ་བ་ནི་སྐྱེ་བོ་དང་ཐེག་པ་འོག་མ་ཐམས་ཅད་ཀྱི་སྤྱོད་ཡུལ་དུ་མ་གྱུར་པས་གསང་བ་དང་། དེ་ཁོ་ན་ཉིད་ངེས་པའི་དོན་རྒྱུ་འབྲས་ལས་འདས་པའི་རང་བཞིན་ཡིན་ལ་དེ་ནི་ཕྱག་རྒྱ་ཐམས་ཅད་འབྱུང་བའི་རྒྱུར་གྱུར་པས་ན་ཕྱག་རྒྱའི་སྙིང་པོའམ་སྙིང་པོའི་ཕྱག་རྒྱ་སྟེ། ཆོས་ཐམས་ཅད་དོན་གྱི་སྙིང་པོའི་ངང་དེ་ལས་མི་འདའ་བའི་ཕྱིར་ན་འདའ་དཀའ་འོ། །དེ་ཡང་ཚིག་རྐང་དང་པོས་ཁུངས་གང་ཡིན་དང་གཉིས་པས་ངེས་ཚིག་ཇི་ལྟར་ཡིན་བསྟན་པའོ། །གཉིས་པ་སྙོམས་འཇུག་གསང་བའི་ཕྱག་རྒྱ་ནི། ༀ་དང་མུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བས། །བདེ་བ་ཆེན་པོ་འབྱིན་པའི་རྒྱ། །ཞེས་པ་སྟེ། བདག་ཀུན་ཏུ་བཟང་པོར་བསྒོམ་མཁའ་རྡོ་རྗེ་རྩེ་ལྔར་བསྒོམ་རྡོ་རྗེའི་རྩེ་མོར་ༀ་དང་རྭ་ལྟག་ཏུ་ཧཱུཾ་དང་སྭ་དང་ཨ་དང་ཧ་བསམ། ཡུམ་ཀུན་ཏུ་བཟང་མོར་བསྒོམ་མཁའ་པདྨ་འདབ་བཞིར་བསྒོམ་དབུས་སུ་མུཾ་བསམ་འདབ་མ་བཞི་ལ་ལཾ་མཾ་པཾ་ཏཾ་བསམ་དེ་ནས་རྡོ་རྗེ་དང་པདྨ་གཉིས་རྩེ་སྦྱར་བས་ༀ་དང་མུཾ་སྦྱར་པདྨ་དང་རྭ་འབྱོར་ཏེ་འབྲུ་བརྒྱད་བསྣོལ་ནས་རྩེ་སྤྲད་པ་ནི་དུས་གསུམ་གྱི་རྒྱལ་བ་ཀུན་དང་མཉམ་པར་སྦྱོར་བ་བྱས་པས་བདེ་བ་ཆེན་པོ་བྱང་ཆུབ་ཀྱི་སེམས་འབྱིན་པའི་ཕྱག་རྒྱའོ། །དེ་ནི་ལྷག་པ་བྱང་ཆུབ་སེམས་ཀྱིས་དབང་བསྒྱུར་བའི་ཕྱག་རྒྱ་ཡིན་ལ། འདིར་ལག་པ་གཡས་གཡོན་སོར་མོ་བསྣོལ་ལ་རྩེ་སྤྲད་ནས་བསྒོམ་པར་བྱའོ། །གསུམ་པ་རིམ་གྱིས་པ་ལ་གཉིས་ཏེ། ཕྱག་རྒྱ་འབྱུང་བའི་རྒྱུ་དང་། ལྷ་སོ་སོའི་ཕྱག་རྒྱ་བཅའ་ཐབས་སོ། །དང་པོ་ནི། མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲོས་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ཞེས་སོ། །ལག་པ་གཡས་པ་མི་བསྐྱོད་པའི་རང་བཞིན་གྱི་སོར་མོའི་བྲེ་ཁ་ལྔ་ལ་ཉི་མའི་དཀྱིལ་འཁོར་སེན་ཟླུམ་ཙམ་པ་ལྔ་སྒོམ། དེའི་སྟེང་དུ་གུང་མོ་ལ་ཡི་གེ་ༀ་མཛུབ་མོ་ལ་ཧཱུཾ་སྲིན་ལག་ལ་ཨ་ཐེའུ་ཆུང་ལ་སྭ་མཐེ་བོང་ལ་ཧ་བསམ་མོ། །ལག་པ་གཡོན་པ་རིན་ཆེན་འབྱུང་ལྡན་གྱི་རང་བཞིན་དུ་བསྒོམས་པའི་སོར་མོའི་བྲེ་ཁ་ལྔ་ལ་ཟླ་བའི་དཀྱིལ་འཁོར་སེན་ཟླུམ་ཙམ་པ་ལྔའི་སྟེང་དུ་གུང་མོ་ལ་ཡི་གེ་ལཾ་མཛུབ་མོ་ལ་མུཾ་སྲིན་ལག་ལ་པཾ་མཐེའུ་ཆུང་ལ་མཾ་མཐེ་བོང་ལ་ཏཾ་བསམ་མོ། །དེ་ལྟར་སོར་མོ་གཡས་ཀྱི་དཔའ་བོ་འབྲུ་ལྔ་དང་གཡོན་གྱི་དཔའ་མོ་འབྲུ་ལྔ་གཉིས་ཟུང་དུ་སྦྱར་བ་ལས་འོད་སྤྲོས་པ་དེས་འཕགས་པ་མཆོད་སེམས་ཅན་གྱི་དོན་བྱས་ཚུར་འདུས་པ་ལས་ཡི་གེ་བཅུ་ལ་ཐིམ་པས་འོད་དུ་འབར་རོ། །དེ་ཐུགས་ཀར་ཐལ་མོ་སྦྱར་བས་ཡབ་ཡུམ་སྦྱོར་བ་བྱེད་པར་བསམ་སྟེ་དེ་ལྟར་ཡབ་ཡུམ་ཐབས་ཤེས་རབ་སྦྱོར་བ་བྱེད་པ་དེ་ནི་ཕྱག་རྒྱ་འབྱུང་བའི་རྒྱུ་རྡོ་རྗེ་ཐལ་མོ་ཡིན་ནོ། །གཉིས་པ་ནི། །འབྲུ་བཞི་སྦས་ནས་ཐུགས་ཀར་བཀན། །ཧཱུཾ་བྲེང་རྩེ་མོ་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །མུཾ་བསྒྲེང་རྩེ་མོ་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོ་འཁོར་ལོ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །ལཾ་སྒྲེང་རྩེ་མོ་དྲིལ་བསིལ་ཞིང་། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །སྭ་རྩེ་འབར་བ་རིན་པོ་ཆེ། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །མཾ་སྒྲེང་རྩེ་མོ་དྲིལ་གསིལ་འབར། །ཉི་མར་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨཾ་སྒྲེང་རྩེ་མོ་པདྨ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་ཀན། །པཾ་སྒྲེང་རྩེ་མོ་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཧ་སྒྲེང་རྩེ་མོ་རལ་གྲི་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟན། །འབྲུ་བཞི་སྦས་ནས་ཐུགས་ཀར་བཀན། །ཏཾ་སྒྲེང་རྩེ་མོ་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཞེས་གསུངས་ཏེ། སྤྱིར་ཕྱག་རྒྱ་ལ་བཞི་སྟེ་ཕྱག་རྒྱ་བཅའ་བའི་གནས་སྟ་ཟུར་གཡས་གཡོན་ནོ། །ཕྱག་རྒྱ་འབྱུང་བའི་རྒྱུ་རྡོ་རྗེ་ཐལ་མོའོ། །ཕྱག་རྒྱ་འབྱུང་བའི་ཐབས་ཐུགས་ཀ་དང་། ཕྱག་རྒྱ་དགྲོལ་བའི་དོན་སྟོང་ཉིད་དོ། །དེ་ལ་ཕྱག་རྒྱ་བསྒྱུར་བའི་ཐབས་ལ་གསུམ་སྟེ་ཕྱི་ལུས་ཀྱི་ཡན་ལག་བྱིན་གྱིས་རློབས་པའི་ཕྱག་རྒྱ་དང་། ནང་ལག་པ་གཡས་གཡོན་ལ་ཐབས་ཤེས་རབ་ཀྱི་ཡི་གེ་བཀོད་པ་དང་། གསང་བ་རྡོ་རྗེ་དང་པདྨ་རྩེ་སྤྲད་པའི་ཕྱག་རྒྱའོ། །དེ་ལ་ནང་གི་ཕྱག་རྒྱ་ལ་བཞི་སྟེ་བཅིང་བ་དམ་ཚིག་གི་ཕྱག་རྒྱ་དང་། བསམ་པ་ཆོས་ཀྱི་ཕྱག་རྒྱ་དང་། བྱེད་པ་ལས་ཀྱི་ཕྱག་རྒྱ་དང་། བསྒོམ་པ་ཕྱག་རྒྱ་ཆེན་པོའོ། །དེ་བཞིས་ལྷ་སོ་སོའི་ཕྱག་རྒྱ་ཐམས་ཅད་ཁྱབ་པར་བཅིང་ངོ་། །ཕྱག་རྒྱ་དགྲོལ་བ་ནི་སྟོང་ཉིད་དུ་དཀྲོལ་བའོ། །རྒྱས་པ་ལས་གཟུང་དང་འཛིན་པ་རྣམ་གཉིས་པོ། དག་པར་དོར་བ་ཕྱག་རྒྱ་ཡིན། །ཞེས་སོ། །དེ་ལྟར་ལས་འདིར་ནི་ཕྱག་རྒྱ་དེ་དག་ཐམས་ཅད་གཅིག་ཏུ་ཚང་བར་བཅིང་ནས་བྱེད་པའོ། །དེ་བས་ན་ཐུན་མོང་མ་ཡིན་པའི་ཕྱག་རྒྱ་ཞེས་བྱ་བར་ཡང་འགྲོའོ། །དེ་ཡང་ལག་པ་གཡས་པ་མི་བསྐྱོད་པའི་རང་བཞིན་གྱི་སོར་མོའི་སྟེང་གི་ༀ་སྭ་ཧ་ཨའི་ཡིག་འབྲུ་བཞི་ཁུ་ཚུར་ནང་དུ་སྦས་ནས་ཐུགས་ཀར་བཟུང་སྟེ་མཛུབ་མོ་སྒྲེང་ནས་ཕྱིར་ལ་བཀན་པའི་ཚུལ་གྱིས་བཟུང་བ་ནི་བཅའ་བ་དམ་ཚིག་གི་ཕྱག་རྒྱའོ། །ཧཱུཾ་བསམ་པའི་མཛུབ་མོ་བསྒྲེང་བའི་རྩེ་མོ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་འོད་འབར་བ་གསལ་བ་ནི་བསམ་པ་ཆོས་ཀྱི་ཕྱག་རྒྱའོ། །ལག་པ་གཡོན་པ་ཟླ་བའི་དཀྱིལ་འཁོར་ཁུ་ཚུར་ནང་དུ་བཅངས་ནས་བཏུལ་ཞིང་འབྲུ་ལྔ་ནང་དུ་སྦས་ཏེ་དྲིལ་བུ་བསིལ་ཞིང་རང་གི་ཡུམ་ལ་འཁྲིལ་བ་ནི་བྱེད་པ་ལས་ཀྱི་ཕྱག་རྒྱའོ། །ཡབ་ལས་ཀྱི་རང་བཞིན་ཡུམ་ལ་འཁྲིལ་བའི་ཚུལ་གྱིས་ཞལ་ཡུམ་ཆོས་ཀྱི་རང་བཞིན་ལ་བསྟན་ཅིང་འདུད་པ་ནི་བསྒོམ་པ་ཕྱག་རྒྱ་ཆེན་པོའོ། །ལག་པ་གཡོན་པ་ཟླ་བའི་དཀྱིལ་འཁོར་གྱི་སྟེང་གི་ལཾ་མཾ་པྱཾ་ཏཾ་སྟེ་འབྲུ་བཞི་ཁུ་ཚུར་བཅངས་ཏེ་སྦས་ནས་ཐུགས་ཀར་ཕྱིར་གན་དུ་བཀན་ནས་བཅངས་པ་ནི་དམ་ཚིག་གི་ཕྱག་རྒྱའོ། །མུཾ་གསལ་བའི་མཛུབ་མོ་བསྒྲེང་བའི་རྩེ་མོ་ལ་ཡི་གེ་མུཾ་ལས་དྲིལ་བུ་འབར་བ་གཅིག་གསལ་ནས་དྲིལ་བུ་བསིལ་བ་དྲིལ་བསིལ་འབར་ཞེས་པ་བསམ་པ་ཆོས་ཀྱི་ཕྱག་རྒྱའོ། །ལག་པ་གཡས་པ་ཉི་མ་ལ་གནས་པའི་ཡིག་འབྲུ་ལྔ་པོས་ལས་སུ་ཞེས་པ་ཡབ་ཀྱི་རང་བཞིན་ལ་འཁྲིལ་བ་ནི་བྱེད་པ་ལས་ཀྱི་ཕྱག་རྒྱའོ། །ཡུམ་གྱི་དབུ་ཡབ་ལ་བཏུད་དེ་ཞལ་འཛུམ་པའི་མདངས་ཀྱིས་བལྟ་བའོ། །དེ་ལྟར་ཡུམ་གྱི་སྐུ་ལྷག་གིས་གསལ་བ་ནི་སྒོམ་པ་ཕྱག་རྒྱ་ཆེན་པོའོ། །ཡབ་ཡུམ་དེ་གཉིས་ཀྱིས་ལྷ་ཚོགས་ཐམས་ཅད་ལ་འགྲེ་བར་ཤེས་པར་བྱའོ། །ༀ་མ་གཏོགས་པའི་འབྲུ་བཞི་སྦས་ནས་ཐུགས་ཀར་བཀན་པ་ནི་བཅངས་པ་དམ་ཚིག་གི་ཕྱག་རྒྱ། གསུང་ཡིག་འབྲུ་ༀ་བསྒྲེང་རྩེ་མོ་ཐུགས་ཕྱག་མཚན་འཁོར་ལོ་འོད་འབར་བ་གསལ་བ་ནི་བསམ་པ་ཆོས་ཀྱི་ཕྱག་རྒྱ། ཟླ་བ་བཏུལ་ཞིང་ཡུམ་གྱི་འབྲུ་ལྔ་སྦས་ནས་དྲིལ་བུ་བསིལ་ཞིང་ཡུམ་ལ་འཁྲིལ་བ་ནི་བྱེད་པ་ལས་རྒྱ། འཁྲིལ་བའི་ཚུལ་གྱིས་ཆོས་ལ་ཞལ་བསྟན་པ་ནི་སྐུར་སྒོམ་པ་ཕྱག་རྒྱ་ཆེན་པོའོ། །མུཾ་མཾ་པྱཾ་ཏཾ་སྟེ་འབྲུ་བཞི་སྦས་ནས་ཐུགས་ཀར་བཀན་པ་བཅངས་པ་དམ་ཚིག་གི་ཕྱག་རྒྱ། ལཾ་བསྒྲེང་རྩེ་མོ་དྲིལ་བསིལ་འབར་བ་གསལ་བ་བསམ་པ་ཆོས་རྒྱ། ཉི་མ་ཡི་དཔའ་བོ་འབྲུ་ལྔ་ལས་སུ་འཁྲིལ་བ་ནི་བྱེད་པ་ལས་ཀྱི་ཕྱག་རྒྱ། བཏུད་དེ་འཛུམ་པའི་མདངས་ཀྱིས་ལྟ་བ་སྐུ་ཕྱག་རྒྱ་ཆེན་པོའོ། །ༀ་ཧཱུཾ་ཨ་ཧ་སྟེ་འབྲུ་བཞི་སྦས་ནས་ཐུགས་ཀར་བཀན་པ་བཅངས་པ་དམ་ཚིག །སྭ་བསྒྲེང་རྩེ་མོ་འོད་འབར་བ་ཡི་རིན་པོ་ཆེ་སྒོམ་པ་བསམ་པ་ཆོས་རྒྱ། ཟླ་བཏུལ་འབྲུ་ལྔ་སྦས་ནས་དྲིལ་བུ་བསིལ་ཞིང་ཡུམ་ལ་འཁྲིལ་བ་བྱེད་པ་ལས་རྒྱ། འཁྲིལ་བའི་ཚུལ་གྱིས་ཞལ་ཆོས་ལ་བསྟན་པ་སྐུ་ཕྱག་རྒྱ་ཆེན་པོའོ། །མུཾ་ལཾ་པྱཾ་ཏཾ་སྟེ་འབྲུ་བཞི་སྦས་ནས་ཐུགས་ཀར་བཀན་པ་བཅངས་པ་དམ་ཚིག །མཾ་བསྒྲེང་རྩེ་མོ་ལ་དྲིལ་བསིལ་འབར་བ་བསམ་པ་ཆོས་རྒྱ། ཉི་མ་ཡི་དཔའ་བོ་འབྲུ་ལྔ་ལས་སུ་འཁྲིལ་བ་བྱེད་པ་ལས་རྒྱ། བཏུད་དེ་འཛུམ་པའི་མདངས་ཀྱིས་ལྟ་བ་སྐུ་ཕྱག་རྒྱ་ཆེན་པོའོ། །ༀ་ཧཱུཾ་སྭ་ཧ་སྟེ་འབྲུ་བཞི་སྦས་ནས་ཐུགས་ཀར་བཀན་པ་བཅངས་པ་དམ་ཚིག ། ཨཾ་བསྒྲེང་རྩེ་མོ་པད་མ་འབར་བ་བསམ་པ་ཆོས་རྒྱ། ཟླ་བ་བཏུལ་བས་དཔའ་མོ་འབྲུ་ལྔ་སྦས་ནས་དྲིལ་བུ་བསིལ་ཞིང་འཁྲིལ་བ་བྱེད་པ་ལས་རྒྱ། འཁྲིལ་བའི་ཚུལ་གྱིས་ཆོས་ལ་བསྟན་པ་སྐུ་ཕྱག་རྒྱ་ཆེན་པོའོ། །དཔའ་མོ་འབྲུ་བཞི་སྦས་ནས་ཐུགས་ཀར་བཀན་པ་བཅིང་བ་དམ་ཚིག །པྱཾ་བསྒྲེང་རྩེ་མོ་དྲིལ་བསིལ་འབར་བ་བསམ་པ་ཆོས་རྒྱ། ཉི་མ་དཔའ་བོ་འབྲུ་ལྔ་ལས་སུ་འཁྲིལ་བ་བྱེད་པ་ལས་རྒྱ། བཏུད་དེ་འཛུམ་པའི་མདངས་ཀྱིས་ལྟ་བ་སྐུ་ཕྱག་རྒྱ་ཆེན་པོའོ། །ༀ་ཨ་ཧཱུཾ་སྭ་སྟེ་འབྲུ་བཞི་སྦས་ནས་ཐུགས་ཀར་བཀན་པ་བཅངས་པ་དམ་ཚིག །ཧ་བསྒྲེང་རྩེ་མོ་རལ་གྲི་འབར་བ་བསམ་པ་ཆོས་རྒྱ། ཟླ་བཏུལ་དཔའ་མོ་འབྲུ་བཞི་སྦས་ནས་དྲིལ་བུ་བསིལ་ཞིང་ཆོས་ལ་འཁྲིལ་བ་བྱེད་པ་ལས་རྒྱ། འཁྲིལ་བའི་ཚུལ་གྱིས་ཆོས་ལ་བསྟན་པ་སྐུ་ཕྱག་རྒྱ་ཆེན་པོའོ། །མུཾ་ལཾ་པྱཾ་མཾ་སྟེ་འབྲུ་བཞི་སྦས་ནས་ཐུགས་ཀར་བཀན་པ་བཅངས་པ་དམ་ཚིག །ཏཾ་བསྒྲེང་རྩེ་མོ་དྲིལ་བསིལ་འབར་བ་བསམ་པ་ཆོས་རྒྱ། ཉི་མ་དཔའ་བོ་འབྲུ་ལྔ་ལས་སུ་འཁྲིལ་བ་བྱེད་པ་ལས་རྒྱ། བཏུད་དེ་འཛུམ་པའི་མདངས་ཀྱིས་ལྟ་བ་སྐུ་ཕྱག་རྒྱ་ཆེན་པོའོ། །གཉིས་པ་ལྷག་པ་ཏིང་ངེ་འཛིན་གྱི་མཆོད་པ་ལ་གཉིས་ཏེ། ལྷག་པའི་ཏིང་ངེ་འཛིན་དངོས་དང་། འབྱུང་ཚུལ་ལོ། །དང་པོ་ནི། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཤིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་རོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །མཛེས་པའི་རྒྱན་རྣམས་སྣ་ཚོགས་དང་། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱི། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །ཞེས་པ་སྟེ། སྤྱིར་ན་མཆོད་པ་ལ་གཉིས་ཏེ་དངོས་སུ་འབྱོར་པ་དང་སེམས་ཀྱིས་དམིགས་པའོ། །དེ་ལས་འདིར་ནི་སེམས་ཀྱིས་དམིགས་པའོ། །ནང་མཆོད་པའི་ཕྱག་རྒྱ་ཆེན་པོ་ནི་ཏིང་ངེ་འཛིན་གྱི་མཆོད་པ་ཟེར་རོ། །རང་རིག་པ་བྱང་ཆུབ་ཀྱི་སེམས་ནི་ཇི་ལྟར་དམིགས་པ་བཞིན་དུ་འགྲུབ་པར་འགྱུར་བ་ཉིད་ཀྱི་ཕྱིར་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བས་མཆོད་པ་མང་ཉུང་གི་ཚད་སྤྲིན་ཚོགས་ཀྱི་ཕུང་པོ་ཙམ་སྤྲུལ་ནས་འབུལ་ལོ། །དེ་ཡང་ཏིང་ངེ་འཛིན་གྱིས་ཇི་ལྟར་སྤྲུལ་ཞེ་ན་ཕྱོགས་བཅུའི་འཇིག་རྟེན་གྱི་ཁམས་འདི་ཐམས་ཅད་སངས་རྒྱས་ཀྱི་ཞིང་ཁམས་རྣམ་པར་དག་པ་རྒྱན་བཀོད་པ་མནན་ན་ནེམ་སྙམ་བྱེད་པ་བཏེག་ན་འཕར་བ་སྙམ་བྱེད་པར་སྤྲུལ་ལོ། །ཞིང་ཁམས་དེའི་མཚན་ཉིད་ཅི་ལྟ་བུ་ཞེ་ན་མཉེན་ལ་འཇམ་པ་དང་རེག་ན་ཟག་མེད་ཀྱི་བདེ་བ་ཁྱད་པར་ཅན་བསྐྱེད་པར་བྱེད་པ་ཡི་རང་བཞིན་ཅན་ནོ། །དེའི་གཞི་གང་ཞེ་ན་རྣམ་པ་སྣ་ཚོགས་པའི་རིན་པོ་ཆེའི་རང་བཞིན་ལས་གྲུབ་པའི་ས་གཞི་བརྟན་ཅིང་འདོད་པ་འབྱུང་བ་དང་དྭངས་ཤིང་མཛེས་པར་སྣང་བའོ། །ཞིང་ཁམས་དེའི་རྒྱན་ནི་ཅི་ཞེ་ན་བར་བར་དུ་ཤིན་ཏུ་མཛེས་པར་སྣང་བའི་མིག་མང་རིས་སུ་བྲེས་ཤིང་། དེའི་མིག་ཏུ་གསེར་གྱི་སོར་གདུབ་ལ་གཡུ་ཡི་ཕྲ་བཅུག་པ་ལྟར་རིན་པོ་ཆེའི་ཟ་ར་ཚགས་དང་སྣ་འཕྱང་དང་ཆུན་འཕྱང་གི་ལྡ་ལྡི་རིས་སུ་སྤྲས་པ་དང་དེ་ལྟ་བུ་ཡང་དཀྱིལ་འཁོར་གྱི་ལྷ་ལ་འབུལ་ལོ། །འཇིག་རྟེན་གྱི་རི་ཐམས་ཅད་ཏྲཾ་ལས་འདོད་པའི་ཡོན་ཏན་ཀུན་འབྱུང་བའི་རིན་པོ་ཆེའི་ཕུང་པོ་ཁ་དོག་མཛེས་པ་འོད་འཕྲོ་ཞིང་འོད་ཟེར་འབར་བར་དམིགས་ལ་དབུལ་ལོ། །འཇིག་རྟེན་གྱི་ཁམས་ཀྱི་དབྱིབས་ལེགས་ཤིང་ཡིད་དུ་འོང་བའི་རྫིང་བུ་དང་འབབ་ཆུ་དང་ལྟེང་ཀ་དང་ཆུ་ཀླུང་ཆེན་པོ་ཐམས་ཅད་བདུད་རྩི་རོ་མཆོག་བརྒྱད་དང་ལྡན་པ་དབྱིབས་ལེགས་པ་བསིལ་ལ་འཇམ་པའི་བདུད་རྩིའི་ཆུ་རྒྱུན་དུ་དམིགས་ལ་འབུལ་ལོ། །འཇིག་རྟེན་གྱི་ཁམས་ན་སྦྲ་དང་གུར་དང་ཁང་པ་ལ་སོགས་པ་ཐམས་ཅད་རྣམས་རིན་ཆེན་སྣ་ཚོགས་ལས་གྲུབ་པའི་གཞལ་ཡས་ཁང་པ་རྒྱན་གྱི་རིགས་སྣ་ཚོགས་ཀྱིས་བརྒྱན་པ་དང་ཕྱི་ནང་མེད་པ་དཔེར་ན་ཤེལ་གྱི་ཕོར་པ་ལྟ་བུར་གསལ་བ་ཟང་ཐལ་བར་དམིགས་ལ་དབུལ་ལོ། །འཇིག་རྟེན་གྱི་ཁམས་ན་རྩི་ཤིང་ཇི་སྙེད་ཡོད་པ་རྣམས་དགོས་འདོད་ཐམས་ཅད་འབྱུང་བའི་རྒྱན་དང་ལྡན་པའི་དཔག་བསམ་གྱི་ཤིང་ལྗོན་པའི་ཚལ་དུ་དམིགས་ལ་འབུལ་ལོ། །འཇིག་རྟེན་གྱི་ཁམས་ན་གླུ་ལེན་པ་དང་དབྱངས་དང་ཚིགས་སུ་བཅད་པའི་སྒྲ་ཇི་སྙེད་ཡོད་པ་ཐམས་ཅད་བདེ་བར་གཤེགས་པ་ལ་ཚིགས་སུ་བཅད་པའི་བསྟོད་པ་བྱེད་པར་བསམ་ལ་དབུལ་ལོ། །འཇིག་རྟེན་ཁམས་ཀྱི་གོས་ཀྱི་རྣམ་པ་ཇི་སྙེད་ཡོད་པ་ཐམས་ཅད་ནི་བདེ་བར་གཤེགས་པ་ལ་བླ་རེ་དང་རྒྱལ་མཚན་དང་ན་བཟའ་དང་གདུགས་དང་བ་དན་ལ་སོགས་པར་བསམ་ལ་དབུལ་བར་བྱའོ། །འཇིག་རྟེན་གྱི་ཁམས་ན་ནོར་བུ་དང་ཕྱག་གདུབ་དང་ཞབས་གདུབ་དང་རྒྱན་ཇི་སྙེད་ཡོད་པ་ཐམས་ཅད་བདེ་བར་གཤེགས་པ་ལ་དབུ་རྒྱན་དང་ཕྱག་གདུབ་དང་ཞབས་གདུབ་དང་མགུལ་ཆུ་དང་དོ་ཤལ་དང་དཔུང་རྒྱན་དང་སེ་མོ་དོ་དང་མཛེས་པའི་རྒྱན་རྣམ་པ་སྣ་ཚོགས་པར་བསམ་ལ་དབུལ་ལོ། །འཇིག་རྟེན་གྱི་ཁམས་ན་གོས་ཡོད་པ་རྣམས་ནི་བདེ་བར་གཤེགས་པ་ལ་སྐུའི་སྟོད་གཡོགས་དང་གསུང་གི་སྨད་དཀྲིས་དང་ཐུགས་ཀྱི་ཟིལ་ལྡིར་ཡོན་ཏན་གྱི་ཆོས་གོས་དང་མཛད་པ་ལས་ཀྱི་ཕུ་དུང་དང་མགུལ་ཆུ་ཟེའུ་འཕྲོག་དང་སྐེད་ཆིངས་ནོར་བུའི་རྩར་འཕྱང་ལ་སོགས་པར་འབུལ་ལོ། །འཇིག་རྟེན་གྱི་ཁམས་ན་བཟའ་བ་དང་བཅའ་བ་དང་བཏུང་བ་དང་ལྡག་པ་དང་མུར་བའི་ལོངས་སྤྱོད་ཇི་སྙེད་ཡོད་པ་ཐམས་ཅད་ནི་རོ་མཆོག་བརྒྱད་དང་ལྡན་པའི་བདུད་རྩིར་བསམ་ལ་བདེ་བར་གཤེགས་པ་རྣམས་ལ་དབུལ་བ་དང་། འཇིག་རྟེན་གྱི་ཁམས་ན་སྐྱེས་པ་དང་བུད་མེད་དང་བུ་དང་བུ་མོ་ཇི་སྙེད་ཡོད་པ་ཐམས་ཅད་རང་རང་ལ་རྒྱན་སྣ་ཚོགས་ཀྱིས་མཛེས་པར་བརྒྱན་པ་ཡི་ལྷ་དང་ལྷ་མོ་གྲངས་བསམ་གྱིས་མི་ཁྱབ་པ་ནམ་མཁའི་རྡུལ་ཕྲ་མོ་སྙེད་ཀྱི་གྲངས་དང་མཉམ་པ་དེ་དག་ཐམས་ཅད་ཀྱང་རྐང་པས་སྟབས་མཛེས་པའི་བྲོ་བརྡུང་བ་དང་། ལག་པས་ཕྱག་རྒྱ་མཛེས་པའི་གར་བྱེད་པ་ལ་སོགས་པ་བསམ་ཡས་གྲངས་མེད་པའི་ཚོགས་ཀྱིས་མཆོད་པར་བསམ་མོ། །དེ་ལྟར་གོང་དུ་བསྟན་པ་དེ་ལྟ་བུའི་ཏིང་ངེ་འཛིན་གྱི་མཆོད་པ་དེས་ཕྱོགས་བཅུ་ནམ་མཁའི་ཁམས་ཐམས་ཅད་གང་བར་དམིགས་ནས་དཀྱིལ་འཁོར་གྱི་ལྷ་ཚོགས་ཀུན་ལ་རེ་རེ་ཞིང་ཡང་རྒྱས་པར་འབུལ་བར་བྱའོ། །གཉིས་པ་ནི། སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཆར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །ཞེས་པ་སྟེ། དབུལ་བའི་ཐབས་ནི་མ་ཧཱ་ཡོ་གའི་སྒོར་ཞུགས་པའི་རྣལ་འབྱོར་པ་དེ་ནི་སངས་རྒྱ་བའི་སྐལ་བ་དང་ལྡན་པ་སྟེ་དེ་ལ་ཏིང་ངེ་འཛིན་མི་གསལ་བ་དང་གསལ་བའི་ཁྱད་པར་གྱིས་མཆོད་པ་ཡང་རིམས་ཀྱིས་སམ་ཡང་ན་ཅིག་ཆར་དུ་འབུལ་ཏེ། དེ་ཡང་རྣལ་འབྱོར་པ་བློ་ཆེ་ན་ཅིག་ཆར་དུ་དུས་གཅིག་ལ་འབུལ་ལོ། །བློ་ཆུང་ན་རིམས་ཀྱིས་དབུལ་བ་དང་བློ་ཤིན་ཏུ་ཆུང་ན་རིམས་པའི་མོས་པས་དབུལ་བར་བྱའོ། །ནམ་མཁས་གར་ཁྱབ་པར་ཆོས་ཀྱི་དབྱིངས་ཀྱིས་ཁྱབ་པ་དང་ཆོས་ཀྱི་དབྱིངས་ཀྱིས་གར་ཁྱབ་པར་བདེ་བར་གཤེགས་པས་ཁྱབ་པས་ན་མཆོད་པ་དང་བདེ་བར་གཤེགས་པ་མཉམ་པར་སྦྱོར་ཞིང་དབུལ་ལོ། །དེ་ནི་རྩོལ་བ་དང་བཅས་པའི་མཆོད་པ་མིན་ཏེ་ཏིང་ངེ་འཛིན་གྱིས་འབུལ་བས་ན་མཆོད་པའི་ཕྱག་རྒྱ་ཆེན་པོར་བསྒོམས་པའོ། །གསུམ་པ་སྒྲོལ་མཆོད་ནི། ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞེས་པ་སྟེ། སྤྱིར་སྒྲོལ་བའི་མཆོད་པ་ལ་ལྔ་སྟེ། རང་བཞིན་གྱིས་སྒྲོལ་བ་དང་། ཏིང་ངེ་འཛིན་གྱིས་དང་། དབང་པོ་ཡུལ་གྱི་དང་། ཐབས་ཆེན་པོའི་དང་། མངོན་དུ་ཕྱུང་བའི་དང་ལྔ་ལས་འདིར་རང་བཞིན་གྱི་སྒྲོལ་བའོ། །དང་པོ་ནི་ཕུང་པོ་ཁམས་དང་སྐྱེ་མཆེད་ཐམས་ཅད་དོན་དམ་པར་མ་སྐྱེས་པ་ཀུན་རྫོབ་ཏུ་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པའོ། །དེ་བས་ན་མཆོག་གི་མཆོད་པ་ནི་མཆོད་པ་ཐམས་ཅད་ཀྱི་ཐོག་མར་འགྲོ་བའོ། །རང་རིག་པ་ཉིད་རྟོགས་ནས་མ་རིག་པའི་མུན་པ་རྣམས་མཆོད་པར་འབུལ་བའོ། །དོན་གྱི་ངོ་བོ་ལ་སྒྲོལ་བར་མ་གྱུར་པའམ་མཆོད་པར་མ་གྱུར་པ་གང་ཡང་མེད་པའོ། །ཐོག་མ་ནི་བདག་དང་གཞན་གཉིས་ལས་ཐོག་མར་བདག་བསྒྲལ་ལོ། །བདག་ཉིད་ནི་རང་ལུས་སོ། །རྟོགས་པ་ནི་དབང་པོ་ཡུལ་གྱི་སྒྲོལ་བ་སྟེ་ཡུམ་དུ་སྣང་བ་ཐམས་ཅད་ཡུམ་གྱི་དཀྱིལ་འཁོར་ཤེས་པ་འཇུག་པ་ཐམས་ཅད་ཡབ་ཀྱི་ད་ལར་བསམ་མོ། །སྒོམ་པ་ནི་རང་ལུས་སྐྱེ་བ་མེད་པར་སྒོམ། མ་རིག་པ་དང་ལོག་ལྟ་དང་བདག་འཛིན་ལ་སོགས་པ་ཕྱིན་ཅི་ལོག་གི་སྣང་བ་གང་ཡིན་པ་ཐམས་ཅད་མཆོད་པར་འབུལ་ལོ་ཞེས་དེས་རྟོགས་པས་བདག་བསྒྲལ་བ་བསྟན་ནས་ཐུགས་རྗེས་གཞན་བསྒྲལ་བ་ནི་དེ་ལྟར་རྟོགས་པས་བདག་བསྒྲལ་བ་དེ་ནས་བདག་རྣལ་འབྱོར་པ་དབྱིངས་དང་ཡེ་ཤེས་གཉིས་སུ་མེད་པ་དང་ཐབས་དང་ཤེས་རབ་གཉིས་སུ་མེད་པའི་དོན་རྟོགས་པའི་བློ་དང་ལྡན་པའི་གང་ཟག་དེ་ཡིས་ནི་གཉིས་སུ་མེད་པའི་དོན་ལ་གཉིས་སུ་འཛིན་པའི་བློ་ངན་གྱི་སེམས་ཅན་འཇིག་རྟེན་ན་གནས་པ་དེ་དག་ཐམས་ཅད་སྙིང་རེ་རྗེ་ཞེས་སྙིང་རྗེས་འདུ་ཤེས་ཀྱིས་བདག་ཉིད་སྒྲོལ་བའི་ལྷ་ཊ་ཀི་ར་ཙར་གསལ་བ་དང་གྲི་འཇམ་དཔལ་ཡེ་ཤེས་སེམས་དཔར་གསལ་བ་དང་བསྒྲལ་བྱའི་སེམས་ཅན་དེ་དག་ཐམས་ཅད་རུ་ཏྲར་གསལ་བར་བྱས་ལ་བདག་ཏུ་རྟོག་པ་རྩད་ནས་བཅད་ནས་སེམས་འོག་མིན་དུ་བསྒྲལ་བ་དང་ཕུང་པོ་འདོད་ཡོན་གྱི་ལྷ་མོར་བྱས་ལ་དཀྱིལ་འཁོར་གྱི་ལྷ་ལ་འབུལ་བར་བྱའོ། །དེ་བས་ན་བདག་དང་གཞན་གཉིས་སུ་མེད་པར་བསྒྲལ་བར་བྱའོ། །བཞི་པ་སྦྱོར་མཆོད་ནི། གསལ་ལྡན་མའམ་བྱིན་བརླབས་ལ། །ཐབས་དང་ཤེས་རབ་གཉིས་མེད་པའི། །འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །ཞེས་པ་སྟེ་སྦྱོར་བའི་མཆོད་པ་ལ་ལྔ་ལས་འདིར་མངོན་དུ་ཕྱུང་བའི་སྦྱོར་བའི་མཆོད་པ་སྟེ། དེ་ཡང་ཡུམ་དེ་རང་གིས་ཏིང་ངེ་འཛིན་སྒོམ་ཤེས་ན་གསལ་ལྡན་མ་ཞེས་བྱ་སྟེ་རྣལ་འབྱོར་པས་བྱིན་གྱིས་བརླབས་མི་དགོས་པ་དེའམ་ཏིང་ངེ་འཛིན་བསྒོམ་མི་ཤེས་ན་རྣལ་འབྱོར་པས་བྱིན་གྱིས་བརླབས་ལ་བྱའོ། །ཐབས་ཡབ་རྡོ་རྗེ་སེམས་དཔར་བསྒོམ། མཁའ་རྡོ་རྗེ་རྩེ་ལྔ་པར་བསྒོམ། རྩ་བར་ༀ་སྐེད་པ་ཧཱུཾ་རྩེ་མོར་ཕཊ་བསམ་པ་དང་ཤེས་རབ་ཡུམ་དབྱིངས་ཕྱུག་མར་བསྐྱེད། མཁའ་པདྨ་འདབ་བརྒྱད་དུ་བསམ། དཀྱིལ་དུ་ཧཱུཾ་དགོད་པར་བྱ། ཡབ་ཡུམ་གཉིས་སུ་མེད་པའི་སྦྱོར་བ་བྱེད་པ་ནི་ཡུམ་གྱིས་ས་མ་ཡ་ཧོ་ས་མ་ཡ་སྟྭཾ། ས་མ་ཡ་ཧཱུཾ་ཞེས་བརྡས་བསྐུལ། ཡབ་ཀྱིས་ར་ག་ཡ་ཧོ་ཞེས་ལན་བྱིན་ནོ། །ཡབ་ཡུམ་ཐབས་དང་ཤེས་རབ་གཉིས་སུ་མེད་པར་འཁྲིལ་བའི་མཆོད་པ་མཛད་ནས་རིག་པ་ནང་དུ་བཟུང་བས་དགའ་བ་དང་མཆོག་དགའ་དང་ལྷན་ཅིག་སྐྱེས་པའི་དགའ་བ་དང་དགའ་བྲལ་གྱི་དགའ་བ་ཆེན་པོས་རང་ལུས་བདེ་བས་རྒྱས་པར་བྱ། དེ་ནས་བྱང་སེམས་ཕྱིར་བྱུང་བ་དང་ལྷག་པ་བྱང་ཆུབ་སེམས་ཕར་ལ་འཕྲོས་པས་དཀྱིལ་འཁོར་གྱི་ལྷ་ལ་མཆོད་པ་ཕུལ་བ་སྟེ། དེ་ལྟ་བུའི་མཆོད་པ་དེ་གང་ལས་བྱུང་ན་ཡབ་ཡུམ་དགོངས་པ་ཐམས་ཅད་ཚང་བའི་དབང་པོ་མཉམ་པར་སྦྱོར་བ་ལས་བྱུང་བས་ན་སྦྱོར་བའི་མཆོད་པ་ཞེས་གསུངས་ལ། དེ་ནས་བྱང་ཆུབ་ཀྱི་སེམས་ཚུར་བདག་ཉིད་ཡུམ་ལ་ཐིམ་པས་རང་གི་རྟོག་ཚོགས་ཉིད་དཀྱིལ་འཁོར་དུ་གསལ་བ་ཡང་བདེ་བ་ཆེན་པོས་མཉེས་པས་དེ་དག་རྣམས་ལ་ཡང་མཉེས་པར་བྱ་བའི་མཆོད་པ་ཕུལ་བ་ཡིན་ནོ། །ལྔ་པ་བདུད་རྩིའི་མཆོད་པ་ནི། མཉམ་པའི་སྒྲུབ་རྫས་ཆེན་པོ་དག ། བདག་དང་མཉམ་པའི་ཚོགས་ལ་འབུལ། །ཞེས་པས་བསྟན་ཏེ། རྫས་ཀྱི་མཆོད་པ་ནི་གསུམ་སྟེ་ངོ་བོ་དང་། གྲུབ་པ་བཞིས་བརྒྱན་པ་དང་། དབུལ་ཐབས་སོ། །ངོ་བོ་དྲི་ཆེན་དྲི་ཆུ་མཾ་ས་རཀྟ་ལྷག་པའི་བྱང་སེམས་དང་ལྔའོ། །གྲུབ་པ་བཞིས་བརྒྱན་པ་ནི་ཆོས་ཉིད་རང་བཞིན་གྱིས་གྲུབ་པ་དང་། ཆོས་ཅན་ངོ་བོས་གྲུབ་པ་དང་། མཐུ་ཅན་ལས་ཀྱི་གྲུབ་པ་དང་། བྱིན་བརླབས་ནུས་པས་གྲུབ་པའི་རྫས་སོ། །དེ་ལྟ་བུའི་གྲུབ་རྫས་ཆེན་པོ་ནི་རང་བཞིན་གྱིས་མཉམ། ལས་ཀྱིས་མཉམ་པའི་ཕྱིར་ན་མཉམ་པའི་སྒྲུབ་རྫས་ཏེ། རྫས་དེ་ཉིད་སངས་རྒྱས་རིགས་ལྔ་དང་དབྱེར་མེད་པར་ལུས་ལ་ཁམས་བདུད་རྩིར་གནས་པས་ན་ཆེན་པོའོ། །དབུལ་བའི་ཐབས་ནི་དེ་ལྟ་བུའི་བླ་ན་མེད་པའི་དམ་རྫས་དག་པའི་མཆོད་པ་དེ་བདག་དམ་ཚིག་སེམས་དཔའ་དང་ལྷ་ཡེ་ཤེས་སེམས་དཔའ་མཉམ་ཞིང་དབྱེར་མེད་པའི་ཚོགས་ལ་འབུལ་བར་བྱའོ། །དྲུག་པ་ཚོགས་མཆོད་ནི། བཟའ་དང་བཅའ་དང་བཏུང་དང་བགོ། ལོངས་སྤྱོད་ལྔ་ལྡན་ཐམས་ཅད་ཀུན། །དཀྱིལ་འཁོར་ལ་ནི་དཀྱིལ་འཁོར་ཐིམ། །ཞེས་པ་སྟེ་བཟའ་བ་ཟས་ཀྱི་རྣམ་པ་དང་བཅའ་བ་རུས་པའི་རྣམ་པ་དང་བཏུང་བ་ཆང་གི་རྣམ་པ་དང་བགོ་བ་གོས་ཀྱི་རྣམ་པ་རྣམས་ནི་ལོངས་སྤྱོད་རྫས་ཀྱི་མཆོད་པ་ཆེན་པོར་འབུལ་ལོ། །མིག་གཟུགས་ཀྱི་ལོངས་སྤྱོད་དང་། རྣ་བ་སྒྲའི་སྣ་དྲིའི་ལྕེ་རོ་འདུས་རེག་བྱའི་ལོངས་སྤྱོད་དང་ལྔ་ནི་རང་ལ་གང་ཡོད་ལྡན་ན་དངོས་སུ་དབུལ། མ་ལྡན་ན་ཏིང་ངེ་འཛིན་གྱིས་སྤྲུལ་ལ་དབུལ་ཏེ་ལོངས་སྤྱོད་ལྔ་པོ་ཐམས་ཅད་ཀུན་དབུལ་ལོ། །དབུལ་ཐབས་ནི་ཡེ་ཤེས་ལྷའི་དཀྱིལ་འཁོར་དབུལ་བྱ་ལ་དབུལ་བྱེད་ནི་བདག་གི་ཐུགས་ཀ་ནས་མཆོད་པའི་ལྷ་མོའི་དཀྱིལ་འཁོར་རམ་འདོད་ཡོན་གྱི་ལྷ་མོ་མང་པོ་སྤྲོས་ནས་ཐིམ་པའོ། །དེ་ལ་ནི་ཡེ་ཤེས་ལ་ཡེ་ཤེས་རོལ་ཞེས་བྱ་ཆོས་ཉིད་ལ་ཆོས་ཉིད་ཐིམ་ཞེས་བྱ་ལྷ་ལ་ལྷ་རོལ་ཞེས་བྱའོ་ཨ་ཨི་ཨུ་ལི་སྔགས་ཀྱི་དབུལ་ལོ། །བདུན་པ་བསྟོད་པ་ལ་དྲུག་སྟེ་སྐུ་ལ་བསྟོད་པ་དང་། གསུང་ལ་དང་། ཐུགས་ལ་དང་། ཡོན་ཏན་ལ་དང་། ཕྲིན་ལས་ལ་དང་། སྤྱིར་བསྡུས་ཏེ་བསྟོད་པའོ། །དང་པོ་ནི། ༀ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས། ། ཧོ། ཞེས་གསུངས། སྐུ་ལྔ་མངོན་པ་ཉིད་ཀྱི་ཕྱིར་ཡི་གེ་ༀ་གྱིས་འགོ་དྲངས་པའོ། །ཕྱོགས་བཅུ་དུས་བཞི་རྒྱུ་མངོན་པར་རྫོགས་པར་སངས་རྒྱས་པའི་གནས་དང་དུས་ཀུན་ཏུ་ཐུགས་དམ་གྱི་དབང་གིས་འགྲོ་བའི་དོན་རྫོགས་པར་མཛད་པ་ནི་རྒྱལ་བ་ཡབ་ཡུམ་ལྔ་ཡང་སྐུ་ལྔར་འདུས་རང་བྱུང་ཡེ་ཤེས་ཉིད་རང་བྱུང་ལ་མ་འགགས་པར་གསལ་བ་ནི་མངོན་པར་བྱང་ཆུབ་པའི་སྐུའོ། །ཡེ་ཤེས་ལྔ་མི་རྟོག་པའི་ཡེ་ཤེས་སུ་གསལ་བ་ནི་དཀྱིལ་འཁོར་དེ་ཉིད་ཁྱབ་བརྡལ་ཆེན་པོར་གནས་པ་ནི་ཐིག་ལེ་ཆེའོ། །དེ་ཡང་ཆོས་ཉིད་ཀྱི་སྐུ་ནི་སྤྲོས་པའི་མཚན་མ་ཐམས་ཅད་བྲལ་བའི་ཆོས་ཉིད་ཡིན་ཏེ་དེ་ལྟར་སྣང་བའོ། །གང་ཡང་མ་སྤངས་པར་ཟག་པ་མེད་པའི་བསོད་ནམས་རང་སྣང་བ་ནི་དཀྱིལ་འཁོར་ལྟ་བུ་སྟེ་འབྲས་བུ་ཡེ་ཤེས་ཀྱི་ཚོགས་ལས་ངེས་པར་འབྱུང་བ་ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་དུ་བསྟན་པའོ། །རྒྱུ་བསོད་ནམས་ཀྱི་ཚོགས་བར་ཆད་མེད་པ་ལས་འབྲས་བུ་ངེས་པར་འབྱུང་བ་ནི་ལོངས་སྐུ་དེ་དག་ལས་འཁོར་སྤྲུལ་སྐུ་ཡི་ཚོགས་འགྲོ་བ་རིགས་དྲུག་གི་དོན་སྤྲུལ་སྐུ་མང་པོས་མཛད་དོ། །སྣང་བ་རྟགས་སྟོང་པ་དོན་དེ་གཉིས་སུ་མེད་པས་ཐིག་ལེ་ཀུན་ཏུ་རྫོགས་པས་གཉིས་སུ་མེད་པ་བྲག་ཆ་ལྟ་བུའོ། །དེ་སྐུ་གསུང་ཐུགས་དབྱེར་མེད་པ་རང་གི་ངོ་བོ་མཉམ་པ་ཉིད་འཇིགས་པ་ཐམས་ཅད་དང་བྲལ་བར་རང་བཞིན་གྱིས་གྲུབ་པ་ནི་རྡོ་རྗེའི་སྐུའོ། །དེ་ལྟར་སྐུ་ལྔ་ལ་དགྱེས་པས་ཧོ་ཞེས་པའོ། །གཉིས་པ་ནི། ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ཞེས་པ་སྟེ་གསུང་ལྔ་མངོན་པ་ཉིད་ཡི་གེ་ༀ་དེའི་ཕྱིར་མགོ་དྲངས་པའོ། །རྡོ་རྗེ་བསོད་ནམས་ཀྱི་ངོ་བོ་སྒྲ་མ་སྤངས་པའི་ཕྱིར་ན་བརྡས་སྟོན་ཏེ་ལོངས་སྤྱོད་རྫོགས་པའི་སྐུ་ཉིད་ཕྱག་རྒྱ་དང་ཞབས་དང་སྤྱན་དང་ལྗགས་ཀྱི་བརྡས་བྱང་ཆུབ་སེམས་དཔའི་འཁོར་ལ་བརྡ་གོ་བ་སྤྲོད་པ་དང་སྒྲིབ་པ་སེལ་བས་ན་རྡོ་རྗེ་འབྲས་བུ་ཡེ་ཤེས་ཀྱི་བསོད་ནམས་ལས་གྲུབ་པས་ན་ལོངས་སྐུ་དགོངས་པ་བརྡའ་གསུང་ངོ་། །སྤྲོས་པ་མེད་པའི་ཐིག་ལེ་བརྗོད་དུ་མེད་པས་དོན་གྱི་གསུང་ཆེ་བའམ་ཆེན་པོས་ཏེ་ཆོས་སྐུ་སྐྱེ་མེད་དོན་གྱི་གསུང་ངོ་། །རྡོ་རྗེ་ནི་སྟོང་པ་ཡེ་ཤེས་ནི་སྟོང་པའི་དོན་ཤེས་པ་དཀྱིལ་འཁོར་ནི་དོན་རྟོགས་པ་ལྡན་པ་ནི་སྟོང་པའི་དོན་ཡེ་ཤེས་སུ་ལྡན་པ་ཡེ་ཤེས་དཀྱིལ་འཁོར་དུ་ལྡན་པའོ། །དེ་ལྟ་བུ་དེས་མ་བརྗོད་པར་ཐམས་ཅད་གསལ་བར་བརྡ་སྤྲོད་པའི་ཕྱིར་ན་རིག་པའི་གསུང་ངོ་། །དེ་ནི་མངོན་པར་བྱང་ཆུབ་པའི་རིག་པ་སྒྱུ་མའི་གསུང་ངོ་། །རྡོ་རྗེ་སྟོང་པ་སྒྲ་ཆེན་ཚངས་པའི་མཐའ་ཡས་པ་སྣ་ཚོགས་སུ་སྣང་བ་སྟེ་སྤྲུལ་པའི་སྐུའི་ཚངས་པའི་གསུང་གིས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཀྱིས་གོ་བར་སྤྱོད་པ་དང་དེ་དག་གི་ཉོན་མོངས་པའི་སྒྲིབ་པ་ཐམས་ཅད་གཏན་ནས་འཇོམས་པར་བྱེད་དོ། །གཅིག་ལ་མང་པོར་གྲགས་པའི་ཕྱིར་ན་སྤྲུལ་སྐུ་སྣ་ཚོགས་ཚངས་པའི་གསུང་ངོ་། །རྡོ་རྗེ་ནི་གྲགས་སྟོང་དབྱེར་མེད་པ་དེ་ཉིད་ཀྱིས་ཐམས་ཅད་ལ་དབང་བསྒྱུར་བས་རྒྱལ་པོ་དང་། གྲགས་སྟོང་ནི་སོ་སོའི་སྤྱོད་པ་ཐམས་ཅད་དང་བྲལ་བའི་ཕྱིར་ཐིག་ལེ་ཆེའོ་ཚིག་མེད་པ་ཉིད་བརྗོད་པ་དང་འདྲ་བར་གསལ་བ་གསུང་གི་རང་བཞིན་པས་ན་རྡོ་རྗེའི་སྐུ་གྲགས་སྟོང་དབྱེར་མེད་ཀྱི་གསུང་ངོ་། །དེ་ལྟ་བུའི་དོན་ལ་དགྱེས་པས་ན་ཧོ་ཞེས་པའོ། །གསུམ་པ་ནི། ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་འཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ། །ཞེས་གསུང་སྟེ། ཐུགས་ལྔ་མངོན་པ་ཉིད་ཡི་གེ་ༀ་དེའི་ཕྱིར་མགོ་དྲངས་པའོ། །སྐུ་ནི་ཆོས་སྐུ་ཟག་བྲལ་ཏེ་དེའི་ཐུགས་ནི་མཉམ་པ་ཆེན་པོ་ཡིན་ལ་དེ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །གསུང་ནི་མངོན་པར་བྱང་ཆུབ་པ་སྟེ་མི་གཡོ་བའི་ཐུགས་ཡིན་ལ་དེ་ནི་སོ་སོར་རྟོག་པའི་ཡེ་ཤེས་སོ། །ཐུགས་ནི་ལོངས་སྤྱོད་རྫོགས་པའི་སྐུ་སྟེ་དེ་ཉིད་ཀྱི་ཐུགས་ནི་མེ་ལོང་ལྟ་བུའི་ཡེ་ཤེས་མི་གཡོ་བའི་རང་བཞིན་མ་འགགས་པའི་ཐུགས་སོ། །དེ་གསུམ་དབྱེར་མེད་པས་ན་རྫོགས་པའོ་མཆོག་ཏུ་གྱུར་པས་ན་ཆེ་བའམ་ཆེན་པོར་གནས་པའོ། །ཡོན་ཏན་ནི་རྡོ་རྗེའི་ཐུགས་ཏེ་མཉམ་པ་ཉིད་ཀྱི་ཡེ་ཤེས་སོ། །འཕྲིན་ལས་ནི་འགྲོ་བ་སྒྲོལ་བའི་ཐུགས་ཏེ་བྱ་བ་གྲུབ་པའི་ཡེ་ཤེས་སོ། །དེ་རྣམས་གཅིག་ཏུ་གནས་པས་ན་ཀུན་ཏུ་རྫོགས་ཞེས་སོ། །ཡེ་ནས་སྐུ་གསུང་ཐུགས་ཡོན་ཏན་འཕྲིན་ལས་ཉེར་ལྔར་རྫོགས་པའོ། །རིགས་ལྔའི་ཐུགས་ནི་ཡེ་ཤེས་ལྔར་གནས་ཏེ་དེ་ཡང་དེ་རེ་རེ་ལ་ཡང་ཡེ་ཤེས་ལྔ་ལྔར་ལྷུན་གྱིས་གྲུབ་པར་གནས་པས་ན་ཡེ་ནས་ལྷུན་རྫོགས་ཞེས་བྱ། མ་བཙལ་བར་སྐུ་ལྔ་ཡེ་ནས་ལྷུན་གྲུབ་ཏུ་རྫོགས་པས་ན་རང་བཞིན་ཀུན་ཏུ་བཟང་པོ་ཞེས་དེ་ལ་བྱའོ། །སེམས་དཔའ་དང་སེམས་མ་ཐམས་ཅད་ཀྱང་རང་རང་གི་རིགས་ཀྱི་ཡེ་ཤེས་ལྔའི་རང་བཞིན་དུ་འདུས་པའི་ཕྱིར་ན་ཚོགས་ཆེན་ཞེས་བྱ་བའི་རྒྱལ་བ་ཉིད་དང་དབྱེར་མེད་པའི་ཕྱིར་ན་ཐིག་ལེ་ཆེ་བའམ་ཆེན་པོའོ། །དེ་ལྟ་བུ་ལ་དགྱེས་པས་ན་ཧོ་ཞེས་བྱ་བའོ། །བཞི་པ་ནི། ༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོ། །ཞེས་པ་སྟེ་ཡོན་ཏན་ལྔ་མཚོན་པའི་ཡི་གེ་ༀ་གྱིས་ཐོག་དྲངས་ནས་ཆོས་ཀྱི་དབྱིངས་དང་རང་རིག་པའི་ངོ་བོ་ཉིད་དམིགས་པ་ཉིད་རང་རིག་པའི་ཡེ་ཤེས་ཀྱི་གཞལ་ཡས་ཁང་དུ་ཤར་བ་སྟེ་དེ་ཕྱི་ནང་མེད་པར་གསལ་བའི་ཕྱིར་ཡེ་ཤེས་རིན་པོ་ཆེའི་གཞལ་ཡས་ཁང་ངོ་། །མི་དམིགས་པའི་རིག་པ་ཉིད་སྒྱུ་འཕྲུལ་སྣ་ཚོགས་སུ་སྣང་བས་སྣང་སྟོང་དབྱེར་མེད་མཉམ་པའི་དབྱིངས་ཕྱི་ནང་དང་རྒྱ་ཆེ་ཆུང་མེད་པའི་གཞལ་ཡས་ཁང་ངོ་། །ཆོས་ཀྱི་དབྱིངས་ནི་ཡེ་ནས་རང་གི་ངོ་བོས་སྣང་སྟོང་དབྱེར་མེད་པར་མཉམ་པས་ཏེ་དེས་ཐམས་ཅད་ལ་ཁྱབ་པ་ནི་ནམ་མཁའ་དང་མཉམ་པ་མུ་མཐའ་མེད་པའི་ཕྱིར་སངས་རྒྱས་ཀྱི་ཞིང་ངོ་། །དེ་ལྟ་བུའི་གཞལ་ཡས་ཁང་དེ་ནི་དེ་བཞིན་གཤེགས་པའི་བཞུགས་གནས་སོ། །མཐའ་ཡས་ཀུན་ནས་ནི་སྐུའི་གནས་ཀྱི་བ་སྤུའི་བུ་ག་ནས་སོ། །སྣ་ཚོགས་འཕྲོ་ནི་འོད་ཟེར་བསམ་གྱིས་མི་ཁྱབ་པ་འཕྲོས་པས་ཁམས་གསུམ་གྱི་སེམས་ཅན་ཐམས་ཅད་ཀྱི་སྒྲིབ་པ་མ་ལུས་པ་སྦྱོང་བར་བྱེད་པའོ། །ཕྱོགས་བཅུའི་ཞིང་ཁམས་མཐའ་ཡས་པ་ཀུན་སྣང་བའི་འདོད་པའི་ཡོན་ཏན་ལྔའི་ལོངས་སྤྱོད་ཐམས་ཅད་ནི་ཡེ་ནས་མཆོད་པའི་ལྷ་མོ་ལྔར་ལྷུན་གྱིས་གྲུབ་ནས་མཆོད་པ་འབུལ་བ་དང་ལྷ་ལ་ལྷ་ཐིམ་ཞེས་བྱའོ། །དེ་ཡང་མཐའ་ཡས་པའི་འདོད་ཡོན་ཀུན་ལ་མྱོང་བ་མེད་པའི་ཚུལ་གྱིས་སྤྱོད་པས་ན་ལོངས་སྤྱོད་པའོ། །སྣ་ཚོགས་ཞེས་པ་ནི་སེང་གེ་ལ་སོགས་པ་འབྲས་བུའི་བྱང་ཆུབ་སེམས་དཔའ་རེ་རེ་ཡང་བརྒྱད་བརྒྱད་དུ་སྣང་ནས་རྒྱལ་བའི་གདན་ཁྲི་འདེགས་པ་དང་སྐུ་སྣང་ལ་རང་བཞིན་མེད་པའམ་གསལ་བ་ཉི་ཟླ་དང་གསུང་ཉེས་པའི་སྐྱོན་གྱིས་མ་གོས་པས་པདྨའི་གདན་དང་ཐུགས་རིག་པའི་ཡེ་ཤེས་ཆེན་པོ་རང་སྣང་བའི་རྟགས་སུ་དགོས་འདོད་ཀུན་འབྱུང་བ་རིན་པོ་ཆེའི་གདན་ཏེ་དེ་ལ་དགྱེས་པས་ཧོ་ཞེས་སོ། །ལྔ་པ་ནི། ༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །ཞེས་པ་སྟེ་འཕྲིན་ལས་ལྔ་འཚོགས་པའི་ཕྱིར་ༀ་གྱིས་སྣ་དྲངས་ནས་སོ། །ཕྱོགས་བཅུའི་འཇིག་རྟེན་གྱི་ཁམས་ནི་མང་ཉུང་གི་ཚད་རྡུལ་ཕྲ་རབ་སྙེད་དང་མཉམ་པས་ན་དེ་ཉིད་དུ་གནས་པའི་སེམས་ཅན་ཡང་རྡུལ་ཕྲ་རབ་དང་མཉམ་པ་དེ་རྣམས་ནི་དོན་བྱ་བའི་ཡུལ་ལོ། །དེ་ཡང་གདུལ་བྱའི་གནས་ཕྱོགས་བཅུའི་འཇིག་རྟེན་ཚད་རྡུལ་ཕྲ་རབ་དང་ངོ་བོ་དག་པ་དང་མ་དག་པའི་གདུལ་བྱའོ། །དེ་དག་ནི་ཉོན་མོངས་པ་ཞི་བར་བྱེད་པས་ན་ཞི་བའི་འཕྲིན་ལས་སོ། །དེ་དག་ཏུ་རྒྱལ་བའི་སྤྲུལ་པས་འགྲོ་བའི་དོན་བྱེད་པ་ཡང་རྡུལ་ཕྲ་རབ་དང་མཉམ་པའོ། །དེ་བས་ན་རྒྱལ་བའི་དོན་རྣམས་ནི་འདུལ་བྱེད་དོ། །རྡུལ་ཕྲན་སྙེད་ནི་འདུལ་ཐབས་སོ་དེ་རྣམས འ་གྲོ་དོན་དཔག་ཏུ་མེད་པ་མཛད་པས་ན་རྒྱས་པའི་ཕྲིན་ལས་ཡིན་ནོ། །འདུལ་བྱེད་ཀྱི་ཚད་ནི་བདེ་བར་གཤེགས་པའི་སྤྲུལ་པ་ཐུབ་པ་དྲུག་གིས་གྲངས་རྡུལ་ཕྲན་ཙམ་ལ་གདུལ་ཐབས་ཞི་ཁྲོ་སྣ་ཚོགས་སུ་སྣང་བས་བསམ་ཡས་པའོ། །དེ་རྣམས་ཀྱིས་འགྲོ་བ་རྣམས་དབང་དུ་བྱེད་པས་ན་དབང་གི་འཕྲིན་ལས་སོ། །དོན་གྲུབ་ཚུལ་ནི་སྐད་ཅིག་གམ་ཡུད་ཙམ་མམ་ཐང་ཅིག་ལ་དོན་བྱེད་པ་དེ་ནི་དྲག་པས་ན་དྲག་པོའོ། །བཏུལ་བའི་ཚད་ནི་མ་བཙལ་བར་ལྷུན་གྱིས་གྲུབ་པའི་འཕྲིན་ལས་སོ། །དེ་ཡང་དོན་མཛད་པས་དེ་མ་ཐག་པའི་འཕྲིན་ལས་ཀྱིས་ཇི་ལྟར་བཏུལ་བ་བཞིན་དུ་ལྷུན་གྱིས་གྲུབ་པར་བྱེད་པས་ན་དྲག་པོ་དང་ལྷུན་གྱིས་གྲུབ་པའི་འཕྲིན་ལས་ཏེ་དགྱེས་པས་ཧོ་ཞེས་སོ། །དྲུག་པ་ནི། ༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། །ཞེས་སྐུ་གསུང་ཐུགས་ཡོན་ཏན་འཕྲིན་ལས་ལྔ་ཚོགས་པའི་ཡི་གེ་ༀ་གྱིས་མགོ་དྲངས་ནས་འཁོར་འདས་ཀྱི་དངོས་པོ་གཉིས་ཀྱིས་བསྡུས་པའི་ཆོས་ཐམས་ཅད་མ་ལུས་ཤིང་ལུས་པ་མེད་པར་སྐུ་གསུང་ཐུགས་སུ་གནས་ལ་སྐུ་གསུང་ཐུགས་ཀྱི་རོལ་པས་ཡོན་ཏན་འཕྲིན་ལས་སུ་རང་ཤར་ཏེ་སྐུ་གསུང་ཐུགས་ཡོན་ཏན་འཕྲིན་ལས་ལྔར་གནས་སོ། །དེ་ལྟར་སྐུ་གསུང་ཐུགས་ཀྱང་རིག་པའི་ཡེ་ཤེས་ཀྱི་བདག་ཉིད་དུ་རང་ཤར་བ་ཡིན་ཏེ། དེ་དག་གི་ངོ་བོ་ནི་བདག་ཉིད་ཆེ་བའམ་བདག་ཉིད་ཆེན་པོ་དཔལ་ཀུན་ཏུ་བཟང་པོའོ། །སྐུ་གསུང་ཐུགས་ཀྱི་རང་བཞིན་བདག་ཉིད་ཆེན་པོ་དེ་ཉིད་ཀྱི་ཐམས་ཅད་ལ་ཁྱབ་པ་ལྟར་གནས་པ་ཉིད་ན་དེས་ཅི་མཛད་ཅེ་ན་འཁོར་འདས་ཀུན་ཏུ་ཁྱབ་པར་མཛད་པའོ། །སྐུ་གསུང་ཐུགས་ཀྱིས་ཀྱང་དངོས་པོ་ཐམས་ཅད་ལ་མ་ཁྱབ་པ་གང་ཡང་མེད་དོ་ཐམས་ཅད་ལ་ཁྱབ་ཅིང་བདག་ཉིད་ཆེན་པོར་སྦྱོར་བ་དེ་ཉིད་ཀྱི་ཕྱིར་སྤྲོས་པ་ཐམས་ཅད་བྲལ་བས་ན་ཐིག་ལེ་ཆེ་ཞེས་བྱ་བའོ། །དེ་ལྟ་བུའི་དོན་ལ་དགྱེས་པས་ན་ཧོ་ཞེས་གསུངས་སོ། །བརྒྱད་པ་བཟླས་པའི་མཆོད་པ་ནི། དེ་ཡི་བཟླས་པ་འཕྲུལ་ཆེན་ནི། །རྣམ་གསུམ་ཚུལ་གྱིས་མ་འཁྲུལ་བར། །སྔགས་བཟླས་འཕྲོ་འདུ་བར་མི་བཅད། །འདྲེས་གསལ་བརྟན་པ་མཆོག་གིས་བྱ། །ཞེས་སོ། །དེ་ལ་བཟླས་པ་ལ་གསུམ་སྟེ། ཛབ་ཁང་བསྐྱེད་པ་དང་། ལྷ་དབྱེ་བ་དང་། བཟླས་པ་བྱའོ། །དང་པོ་ནི་མདུན་གྱི་བར་སྣང་ལ་བྷཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་སུརྱ་རཏྣ་པདྨ་མཎྜ་ལ་ཞེས་བརྗོད་པས་གཞལ་ཡས་ཁང་བསམ་མོ། །དེ་ནས་ལྷ་དབྱེ་བ་ནི་ཧཱུཾ་ཞེས་ལན་གསུམ་བརྗོད་པས་ཧཱུཾ་དང་པོས་སྣང་སྲིད་གསལ་བར་བྱས་ཧཱུཾ་གཉིས་པས་ཐམས་ཅད་བདག་ལ་བསྡུས་ཧཱུཾ་གསུམ་པས་བདག་དམ་ཚིག་པ་དང་ལྷ་ཡེ་ཤེས་པ་གཉིས་སུ་དབྱེ་སྟེ་བདག་དམ་ཚིག་པའི་ལྷའི་དཀྱིལ་འཁོར་གྱི་མདུན་ན་ལྷ་ཡེ་ཤེས་པའི་དཀྱིལ་འཁོར་གསལ་ཏེ་མར་མེ་གཅིག་ལས་གཉིས་སུ་དབྱེ་བ་ལྟར་བསམ་མོ། །བཟླས་པ་ལ་ལྔ་སྟེ། ངོ་བོ་དང་། བཟླས་ཐབས་དང་། སྤྲོ་བསྡུ་དང་། གྲངས་ཚད་དང་། སྐྱོན་སྤངས་པའོ། །ངོ་བོ་ནི་གཉིས་ཏེ་སྤྱི་བསྙེན་དང་སྒོས་བསྙེན་ནོ། །སྤྱི་བསྙེན་ནི་རིགས་ཐམས་ཅད་རྡོ་རྗེ་སེམས་པར་འདུས་པས་ཧཱུཾ་བཛྲ་དྷྲིཀ་མུཾ་དྷ་དུ་ཤྭ་རི་ཞེས་པའོ། །སྤྱིར་དྲིལ་བཞི་ༀ་བོ་དྷི་ཙིཏྟ་མ་ཧཱ་སུ་ཀ་ཛྙཱ་ན་དྷ་དྷུ་ཨ་ཞེས་བཟླས་སོ། །སྒོས་བསྙེན་ནི་ལྷ་རང་རང་གི་སྔགས་ཐད་ཀར་བཟླས་སོ། །བཟླས་ཐབས་ལ་གསུམ་སྟེ་ཕྱི་ལུས་ལ་དམིགས་པའི་བཟླས་པ་དང་། ནང་རྩ་ལ་དམིགས་པའི་བཟླས་པ་དང་། གསང་བ་མཁའ་དབྱིངས་ལ་དམིགས་པའི་བཟླས་པའོ། །ཕྱི་ལྟར་བཟླས་པ་ནི་བདག་གི་ཐུགས་ཀ་ན་ཉི་ཟླ་པདྨའི་གདན། དེའི་སྟེང་ན་རྡོ་རྗེ་སེམས་དཔའ་ཚོན་གང་བ་གཡས་གསེར་གྱི་རྡོ་རྗེ་ནས་ཙམ་པ། གཡོན་གཡུ་ཡི་དྲིལ་བུ་ཁུ་འཕངས་ཙམ་འཛིན་པ་སྐུ་སྟོད་ལ་དར་དཀར་གསེར་གྱི་ངང་རིས་ཅན་གྱི་སྐུའི་སྟོད་གཡོགས་གསོལ་བ། སྐུ་སྨད་ལ་བ་ཏི་སྨུག་པོའི་གསུང་གི་སྨད་དཀྲིས་གསོལ་བ། དར་ཆེན་པ་དར་རིས་ཀྱིས་ཐུགས་ཀྱི་ཟིལ་དིར་གསོལ་བ། དུར་ཁ་ངང་མིག་རིས་ཀྱི་ཡོན་ཏན་གྱི་ཆོས་གོས་གསོལ་བ། ཆུ་དར་སྔོན་པོས་མཛད་པ་ལས་ཀྱི་ཕུ་དུང་བྱས་པ། རིན་པོ་ཆེའི་རྒྱན་རྣམ་པ་སྣ་ཚོགས་པས་སྤྲས་པ་འོད་དང་འོད་ཟེར་དཔག་ཏུ་མེད་པ་འཕྲོ་བ་བསམ་ལ་དེའི་ཐུགས་ཀར་ཉི་མ་དེའི་སྟེང་ན་རྡོ་རྗེ་ནས་ཙམ་པ་དེའི་ལྟེ་བ་ལ་ཧཱུཾ་མཐིང་ཀ་ཉུང་འབྲུ་ཙམ་པ་དེའི་མཐའ་མ་ན་ཕར་ལ་སྔགས་ཀྱིས་བསྐོར་བར་བསམ། མདུན་དུ་ཡང་དེ་ལྟར་བསམ་ལ་བཟླས་པའི་འོད་བདག་དང་མདུན་དཀྱིལ་གཉིས་ལ་སྤྲོ་བསྡུ་བྱའོ། །ནང་ལྟར་བཟླས་པ་ནི་བདག་གི་སྤྱི་བོ་བདེ་བ་ཆེན་པོའི་འཁོར་ལོ་ན་རྩ་འདབ་མ་སུམ་ཅུ་རྩ་གཉིས། མགྲིན་པ་ལོངས་སྤྱོད་ན་བཅུ་དྲུག །སྙིང་ག་ཆོས་ཀྱི་འཁོར་ལོ་ན་བརྒྱད། ལྟེ་བ་སྤྲུལ་པའི་འཁོར་ལོ་ན་དྲུག་ཅུ་རྩ་བཞི་གསང་གནས་རླུང་གི་འཁོར་ལོ་གཞུ་ལྟ་བུ་དང་ལྔ་ལ་སྤྱི་བོར་རྣམ་སྣང་། མགྲིན་པར་སྣང་མཐའ། ཐུགས་ཀར་མི་བསྐྱོད། ལྟེ་བར་རིན་འབྱུང་། གསང་བར་དོན་གྲུབ་རྣམས་བསྒོམ། བདག་གི་ཐུགས་ཀར་ཡེ་ཤེས་པ་རེ་རེ། དེའི་ཐུགས་ཀར་རྡོ་རྗེ་དང་འཁོར་ལོ་ལ་སོགས་པའི་ཕྱག་མཚན་དེའི་ལྟེ་བ་ལ་ཧཱུཾ་དང་ༀ་ལ་སོགས་པ་རང་རང་གི་སྔགས་ཀྱིས་བསྐོར་བའོ། །དེ་ལ་དམིགས་ནས་བཟླས་པས་འོད་ཟེར་བདག་ལས་ཆད་སྤྱི་བོར་ཕོག་བྱང་སེམས་ཞུ་མགྲིན་པར་བབས་དེ་ནས་སྙིང་ག་དེ་ནས་ལྟེ་བ་དེ་ནས་གསང་གནས་སུ་བྱུང་ཕྱིར་འཕྲོས་བདག་གི་སྤྱི་བོར་ཕོག་དེ་བཞིན་དུ་མགལ་མེ་བཞིན་དུ་བྱའོ། །གསང་བ་ལྟར་བཟླས་པ་ནི་བདག་གིས་བཟླས་པ་བྱས་པས་ཐུགས་ཀའི་སྔགས་སྲོག་རྩ་ནང་ནས་ཡར་ལ་སོང་སྤྱི་བོར་ཐིམ་སྒལ་ཚིགས་ཀྱི་རྟ་བརྒྱུད་རྡོ་རྗེའི་ལམ་དུ་བྱུང་ཡུམ་གྱི་མཁའ་ལ་འཕྲོས་མདུན་གྱི་ལྷའི་ཐུགས་ཀར་ཐིམ་པར་མོས་པ་བཟླས་པའོ། །སྤྲོ་བསྡུ་ནི་བསྙེན་པའི་དུས་སུ་འོད་དཀར་པོ་ཕར་ལ། ཉེ་བསྙེན་གྱི་དུས་སུ་འོད་ཟེར་སེར་པོ་ཕར་ལ་འཕྲོས་པས་འགྲོ་བའི་སྒྲིབ་པ་སྦྱོང་། བསྒྲུབ་པའི་དུས་སུ་འོད་དམར་པོ་ཕར་ལ་འཕྲོས་པས་སེམས་ཅན་གྱི་སྒྲིབ་པ་སྦྱོང་ཚུར་བསྡུས་ནས་དངོས་གྲུབ་སྡུད་དོ། །སྒྲུབ་པ་ཆེན་པོའི་དུས་སུ་འོད་ལྗང་གུ་ཕར་ལ་མི་སྤྲོ་བར་ཚུར་ལ་སྐུ་གསུང་ཐུགས་ཀྱི་དངོས་གྲུབ་ཐམས་ཅད་སྡུད་དོ། །གྲངས་ཚད་ནི། གྲངས་ཀྱི་བསྙེན་པ་འབུམ་ཚོ་དྲུག །དུས་ཀྱི་བསྙེན་པ་དབང་པོ་རབ་ཟླ་བ་དྲུག་འབྲིང་ཟླ་བ་བཅུ་བཞི་ཐ་མ་ཟླ་བ་བཅུ་དྲུག་གོ། །མཚན་མ་ནི་རབ་ཡི་དམ་ལྷའི་ཞལ་མཐོང་འབྲིང་བསྒྲུབ་རྫས་ལ་རྟགས་ཐོན་ཐ་མ་ཉམས་དང་རྨི་ལམ་གསལ་ལོ། །སྐྱོན་ནི་ཏིང་ངེ་འཛིན་མི་གསལ་བ་དང་བཟླས་པ་སྒྲ་མ་དག་པ་དང་ལེ་ལོ་དང་གཡེང་བ་སྤང་ངོ་དེས་གྲུབ་པའོ། །དེ་ལྟར་གོང་དུ་བསྐྱེད་པའི་དཀྱིལ་འཁོར་གྱི་ལྷ་དེ་ཡི་བཟླས་པ་བྱ་བ་ཡང་ཕར་འཕྲོ་བ་དང་ཚུར་སྡུད་པའི་ཏིང་ངེ་འཛིན་གྱི་ཆོ་འཕྲུལ་ཆེན་པོ་སྟེ་དེ་ལ་ནི་བདག་ལས་ཡེ་ཤེས་ཀྱི་ལྷ་མདུན་དུ་དབྱེ་ཞིང་བདག་དམ་ཚིག་གི་ལྷར་གསལ་བ་དང་མདུན་ན་ཡེ་ཤེས་ཀྱི་ལྷ་གསལ་བ་དང་བར་དུ་སྔགས་ཀྱི་འཕྲོ་འདུ་གསལ་བ་སྟེ་རྣམ་པ་གསུམ་གྱི་ཚུལ་གྱིས་ཡིད་མ་འཁྲུལ་བར་གསལ་བའོ། །སྔགས་བཟླས་པས་འཕྲོ་འདུ་བྱ་ཚུལ་ཀྱང་ཕར་འཕྲོས་པས་ཡེ་ཤེས་ལྷའི་ཐུགས་དམ་བསྐུལ་བ་དང་སླར་འདུས་པས་བདག་ལ་དངོས་གྲུབ་གསོལ་བར་དམིགས་པ་དང་ཏིང་ངེ་འཛིན་གྱིས་འཕྲོ་འདུའི་བར་རྣམ་པར་རྟོག་པས་མི་བཅད་ཅིང་སྔགས་ཀྱི་བར་མི་ཚིག་གིས་མི་གཅད་པར་བཟླས་པར་བྱའོ། །དེ་ཡང་རང་ལྷའི་རྣལ་འབྱོར་ལ་འདྲིས་པ་དང་འཕྲོ་འདུའི་ཏིང་ངེ་འཛིན་གསལ་བ་དང་རྣམ་པར་རྟོག་པའི་རླུང་གིས་མི་བསྐྱོད་པར་བརྟན་པར་བྱའོ། །དེ་ནི་མཆོག་གིས་བཟླས་པར་བྱ་བའོ། །གསུམ་པ་མཇུག་གི་ལས་ལ་གསུམ་སྟེ། དཀྱིལ་འཁོར་བསྡུ་བ་དང་། རྒྱུན་གྱི་སྤྱོད་ལམ་དང་། རྩ་འཁོར་ལོའི་རྫོགས་རིམས་སོ། །དང་པོ་ནི། བསྙེན་པ་རྫོགས་ནས་དཀྱིལ་འཁོར་ཀུན། །ཧཱུཾ་ཞེས་བརྗོད་ཅིང་ཐུགས་ཀར་བསྡུ། །སྐྱེ་མེད་མཉམ་རྫོགས་དབྱིངས་སུ་ཐིམ། །ཞེས་པ་སྟེ་བསྙེན་པ་རྫོགས་ནས་ཚོགས་མཆོད་དང་ལྷག་ཆོག་བྱ། གཏོར་མ་གཏོང་། དེ་ནས་དཀྱིལ་འཁོར་ཀུན་བསྡུ་སྟེ་དམ་ཚིག་གི་དཀྱིལ་འཁོར་ལ་བསྡུ་ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ། དེ་ནས་ཧཱུཾ་ཞེས་བརྗོད་ཅིང་བདག་ཉིད་གཙོ་བོའི་ཐུགས་ཀ་ནས་ཧཱུཾ་འཕྲོས་པས་ལྷ་དང་གཞལ་ཡས་ཁང་དང་བཅས་པ་ཐམས་ཅད་འོད་དུ་ཞུ་ནས་གཙོ་བོའི་ཐུགས་ཀར་བསྡུ་ཞིང་ཐིམ་པ་དང་བདག་ཉིད་འོད་དུ་ཞུ་ནས་ཆོས་ཀྱི་དབྱིངས་སྐྱེ་མེད་མཉམ་རྫོགས་ཆེན་པོའི་དབྱིངས་སུ་ཐིམ་པར་གྱུར་ཏོ། །དེ་ནི་སྟོང་པའི་གོ་ཆ་སྟེ་ཅིས་ཀྱང་མི་ཤིགས་པའོ། །དེ་ནི་རྟག་པ་ཡི་མཐའ་དང་བྲལ་བའི་ཕྱིར་ན་རྫོགས་པའི་རིམ་པ་སྒོམས་པའོ། །གཉིས་པ་ནི། སྟོང་པའི་གོ་ཆས་ལུས་བསྲུང་སྟེ། །སྤྱོད་ལམ་ཀུན་ཏུ་བཙལ་མེད་པར། །འགྲོ་དང་འདུག་དང་ཉལ་བ་དང་། །མཉམ་པ་དེ་ཡི་དབྱིངས་སུ་གནས། །ཞེས་པས་བསྟན། དེ་ལྟར་བསྒོམ་པ་ནི་སྟོང་པའི་གོ་ཆས་ལུས་བསྲུང་བ་སྟེ། ཅིས་ཀྱང་མི་ཚུགས་པའོ། །དེ་ནས་ཀཾ་ལས་རྡོ་རྗེའི་གོ་ཁྲབ་དང་ཧཾ་ལ་རྒྱུན་ཐག་དང་ཨཾ་ལས་རྡོ་རྗེ་དང་ཧཱུཾ་ལས་རིན་པོ་ཆེའི་ཐག་པ་རོ་གུང་མཛུབ་ལ་བསམ་ལ་བཅིང་ངོ་རཏྣ་མ་ལེ་ཨ་བེ་ཤིན་ཙ་ཞེས་པས་རིན་པོ་ཆེའི་ཕྲེང་བས་བཅིང་ངོ་། །ས་ཏ་ལཾ་ཞེས་པས་དར་དཔྱངས་དཀར་པོ་གཡས་སུ་འཕུར་བ་དང་ཨ་བི་ཤིན་ཙ་མཾ་ཞེས་པས་དར་དཔྱངས་དམར་པོ་གཡོན་དུ་འཕུར་བའོ། །སྤྱོད་ལམ་བྱ་བ་ཡང་དུས་ཀུན་ཏུ་རང་ལས་མ་གཏོགས་པའི་ལྷ་སྐུ་བཙལ་དུ་མེད་པར་རང་ལ་ཡེ་ནས་ཡོད་པ་དེ་ཉིད་སྤྱོད་ལམ་དུ་བྱེད་པའོ། །འགྲོ་བ་དང་འདུག་པ་དང་ཉལ་བ་དང་སྡོད་པའི་གནས་སྐབས་ཐམས་ཅད་དུ་ཡང་སྟོང་པ་ཉིད་ཀྱི་གནས་ལུགས་དེ་མ་ཉམས་པའམ་དེ་ཡི་ངང་ལས་མ་གཡོས་པས་དེའི་དབྱིངས་སུ་གནས་པ་དང་ཅུང་ཟད་བློ་ཆུང་བ་འདྲ་ན་དེའི་ངང་ལས་རང་ལྷའི་སྐུར་བསྐྱེད་ནས་ལུས་བསྲུང་བ་དང་གོ་བགོ་བ་བྱས་ལ་སྤྱོད་ལམ་ཐམས་ཅད་ལྷའི་སྐུ་གསལ་བར་བསྒོམ་མོ། །གསུམ་པ་ནི། དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བའི། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །དེ་ཡིས་བྱང་ཆུ བ་སྙིང་པོ་ལེན། །ཞེས་པ་སྟེ། གཞི་དངོས་པོའི་གནས་ལུགས་རང་བཞིན་གྱི་དཀྱིལ་འཁོར་བདག་ལ་གནས་ཤིང་ལྡན་པའི་དོན་དེ་ཤེས་པར་བྱེད་པའི་དཀྱིལ་འཁོར་གྱིས་ཤེས་པར་བྱ་ཞིང་རང་བཞིན་གྱི་དཀྱིལ་འཁོར་ལ་ནི་ཏིང་ངེ་འཛིན་གྱི་དཀྱིལ་འཁོར་བསྒོམ་པ་སྟེ་རྟོགས་པར་བྱེད་པའོ། །དཀྱིལ་འཁོར་ཞེས་པ་རང་བཞིན་གྱི་དཀྱིལ་འཁོར་ལས་བྱུང་བའི་ཏིང་ངེ་འཛིན་གྱི་དཀྱིལ་འཁོར་ཏེ་ཐུགས་ཀྱི་དཀྱིལ་འཁོར་ཞེས་པ་ཏིང་ངེ་འཛིན་གྱི་དཀྱིལ་འཁོར་དེ་ཉིད་ཀྱི་གཙོ་བོ་མཆོག་ནི་རྡོ་རྗེ་སེམས་དཔའ་ཡིན་པས་སྤྱོད་ལམ་ཐམས་ཅད་དུ་རྡོ་རྗེ་སེམས་དཔའ་སྒོམ་པའོ། །དེ་རྣམས་ནི་སྐུ་བསྒོམ་པར་འདོད་པ་ཁོ་ནའོ། །ཡང་ན་ནང་གི་རྫོགས་རིམ་དུ་བཤད་ན་དཀྱིལ་འཁོར་ལྡན་པ་ནི་རང་ལ་སྤྱི་བོ་བདེ་བ་ཆེན་པོའི་འཁོར་ལོ་ན་རྩ་འདབ་མ་སུམ་ཅུ་རྩ་གཉིས་དང་། མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་འདབ་མ་བཅུ་དྲུག་དང་། སྙིང་ག་ཆོས་ཀྱི་འཁོར་ལོ་ལ་རྩ་འདབ་མ་བརྒྱད་དང་། ལྟེ་བ་སྤྲུལ་པའི་འཁོར་ལོ་ན་རྩ་འདབ་མ་དྲུག་ཅུ་རྩ་བཞི་གནས་པ་དང་། སྲོག་ཤིང་རྩ་གཡས་རོ་མ་དང་། གཡོན་རྐྱང་མ་དང་དབུས་ཀུན་དྷར་མ་རྣམས་རང་ལ་གནས་པའོ། །དཀྱིལ་འཁོར་གྱིས་ནི་དེ་ལྟར་གནས་པ་དེ་ཤེས་པར་གྱིས་སོ། །དཀྱིལ་འཁོར་ནི་གནས་པ་དེ་ལའོ། །བསྒོམ་པ་ནི་དཀྱིལ་འཁོར་དེ་རྣམས་བ སྒོམ་པའོ། །དཀྱིལ་འཁོར་དཀྱིལ་འཁོར་ལས་བྱུང་བ་ནི་སྤྱི་བོ་ན་ཡི་གེ་ཧཾ་མགོ་ཐུར་དུ་ལྟ་བ་དེ་ལས་བྱང་སེམས་ཞུ་བས་མགྲིན་པར་བྱུང་དེ་ནས་བྱང་སེམས་སྙིང་གར་བྱུང་བའོ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག་ནི་སྙིང་ག་ན་རྩ་འདབ་མ་བརྒྱད་ལ་རིགས་ལྔ་དང་ཡུམ་ལྔ་དང་སེམས་དཔའ་བརྒྱད་དང་སེམས་མ་བརྒྱད་རྣམས་གནས་པར་བསྟན་པའོ། །དེ་བས་ན་གདམས་ངག་ཏུ་བྱས་པའོ། །དེ་ལྟར་སྒོམ་པའི་ལམ་དེ་ཡིས་བླ་ན་མེད་པ་བྱང་ཆུབ་ཀྱི་སྙིང་པོ་འབྲས་བུ་ཆོས་ཀྱི་སྐུ་མྱུར་དུ་འཐོབ་ཅིང་རང་རྒྱུད་ལ་ལེན་པར་བྱེད་དོ། །རྩ་བའི་ས་བཅད་གསུམ་པ་ཐ་མར་ཚོགས་བསྒྲུབ་པ་ལ་བདུན་ཏེ། མཚན་ཉིད་གསུམ་གྱིས་གཞི་བཟུང་བ་དང་། ཡོ་སྤྱད་དང་དུ་བླང་ཞིང་སྤྱད་པའི་ཡོན་ཏན་དང་། ཚོགས་བསྒྲུབ་པས་ཚེ་དབང་ཐོབ་པ་དང་། དེས་ཕྱག་རྒྱ་ཆེན་པོའི་རིག་འཛིན་ཐོབ་དུས་དང་། དེས་ལྷུན་གྲུབ་ཐོབ་པའི་མཚན་ཉིད་དང་། དེས་འབྲས་བུ་ཆོས་སྐུ་ཐོབ་པ་དང་། ཡོན་ཏན་དེ་གཞན་ནས་མ་བྱུ ང་བར་བསྟན་པའོ། །དང་པོ་ནི། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པ་སྟེ། དེ་ལ་གཞི་ཤེས་པའི་མཚན་ཉིད་ལྟ་བ་ནི་ལམ་གྱི་རྒྱུ་ལྟ་བུ། རྐྱེན་འཇུག་པའི་མཚན་ཉིད་སྒོམ་པ་ནི་ལམ་གྱི་རྐྱེན་ལྟ་བུ། མངོན་དུ་གྱུར་པ་འབྲས་བུའི་མཚན་ཉིད་ནི་འབྲས་བུའོ། །འབྱོར་བའི་གཟུང་ནི་འབྲེལ་བ་སྟེ་གཞི་དང་ལམ་ནི་ཤེས་བྱ་དང་ཤེས་བྱེད་ཀྱི་འབྲེལ་ལམ་དང་འབྲས་བུ་ནི་ཐོབ་བྱ་དང་ཐོབ་བྱེད་ཀྱིས་འབྲེལ་པའོ། །དེ་ལ་གཞི་ཤེས་པའི་མཚན་ཉིད་ལྟ་བ་ནི་ལྟ་བ་བདེན་པ་དབྱེར་མེད། རིག་པ་སྤྱོད་ཡུལ་དང་བྲལ་བ། སྐོར་བདུན་ངོ་བོ་ཉིད་ཀྱི་རྒྱུར་གནས་པའོ། །རྐྱེན་འཇུག་པའི་མཚན་ཉིད་སྒོམ་པ་ནི་རང་རང་གི་ལུས་རྟོག་ཚོགས་བུདྡྷ་བཞི་བཅུ་རྩ་གཉིས་ལས་ཡེ་ཤེས་ཀྱི་ལྷ་བཞི་བཅུ་རྩ་གཉིས་སྒོམ་པའོ། །དེ་ལྟ་བུའི་ལྟ་བསྒོམ་གཉིས་པོ་དེ་ནི་མངོན་དུ་གྱུར་པ་འབྲས་བུ་སྨིན་པར་བྱེད་པའི་རྒྱུ་དང་རྐྱེན་ཡིན་ལ་མངོན་དུ་གྱུར་པ་འབྲས་བུའི་མཚན་ཉིད་ནི་ལམ་གྱི་ཏིང་ངེ་འཛིན་ནུས་པ་མཐུ་ཅན་དུ་གང་གྱུར་པ་དེ་ཡིས་ཉེ་སྦྱོར་གྱི་འབྲས་བུ་རིག་འཛིན་བཞི་དང་མཐར་ཐུག་གི་འབྲས་བུ་སྐུ་ལྔ་ལྷུན་གྱིས་འགྲུབ་པའོ། །དེ་བས་ན་གཞི་དང་ལམ་དུ་འབྱོར་ལམ་དང་འབྲས་བུར་འབྱོར་འབྲས་བུ་རྒྱུན་གྱི་ཏིང་ངེ་འཛིན་མི་བརྗེད་པའི་གཟུངས་དང་རྡོ་རྗེ་ལྟ་བུའི་སྐུ་གཡུང་དྲུང་ལྟ་བུའི་ཚེ་ཐོབ་པ་དེ་ཁོ་ན་སྨིན་བྱེད་དོ། །འབྲས་བུ་དེའང་གཞན་ནས་འོང་བ་མ་ཡིན་ནོ། །རིག་འཛིན་ནི་དང་པོ་དེ་ལས་བྱུང་བ་དང་བར་དུ་དེའི་བྱ་བ་བྱེད་པ་དང་ཐ་མར་དེའི་རྒྱུད་འཛིན་པའོ། །རྒྱལ་བའི་ཞིང་དུ་གྲགས་པ་ནི་རྣམ་པར་དག་པའི་ཡི་གེ་འཁོར་ལོ་ཚོགས་ཆེན་གྱི་སའོ། །དེ་ལྟ་བུའོ། །འདིར་རིག་འཛིན་བཞི་ལས་རྣམ་པར་སྨིན་པའི་རིག་འཛིན་ཁོ་ན་འགྲུབ་པའོ། །འབྲས་བུ་ནི་གཉིས་ཏེ་ཐུན་མོང་གི་རིག་འཛིན་དང་ཁྱད་པར་གྱི་འབྲས་བུ་སངས་རྒྱས་སོ། །རིག་འཛིན་ནི་བཞི་སྟེ་རྣམ་པར་སྨིན་པའི་རིག་འཛིན་དང་། ཚེ་ལ་དབང་བའི་རིག་འཛིན་དང་། ཕྱག་རྒྱ་ཆེན་པོ་དང་། ལྷུན་གྱིས་གྲུབ་པའོ། །རྣམ་པར་སྨིན་པ་ནི་རང་ལུས་ཀྱི་རྣམ་པ་ལྷའི་སྐུར་སྨིན་པ་སྟེ་ཡིད་ཀྱིས་ལྷའི་གཟུགས་འཛིན་པའོ། །ཚེ་ལ་དབང་བ་ནི་རང་དོན་དུ་ལོ་སྟོང་དྲུག་བརྒྱ་བཞུགས་ནས་གཞན་དོན་མཛད་དགོས་པ་བྱུང་ན་བརྒྱ་བརྒྱ་ན་མར་ལ་མནུར་ནས་བྱིས་པ་ལོ་བརྒྱད་པ་ལྟ་བུར་གནས་ནུས་པའོ། །ཕྱག་རྒྱ་ཆེན་པོ་ནི་ལུས་ལྷ་སྐུ་དང་ཁྱད་པར་མེད་པ་སྟེ་ལུས་རྡོ་རྗེ་སེམས་དཔའི་སྐུ་གཟུགས་སུ་གནས་པའོ། །ལྷུན་གྲུབ་ནི་རྒྱལ་བ་ཉིད་དང་མཉམ་པའོ། །དེ་ནས་སྐུ་ལྔ་ལྷུན་གྲུབ་ལ་སྦྱོར་བར་བྱེད་དེ་རྣམ་སྨིན་གྱི་རིག་འཛིན་ནི་ལམ་གྱི་འབྲས་བུའོ། །གཉིས་པ་ནི། སྒྱུ་འཕྲུལ་དྲྭ་བར་མངོན་རྫོགས་པའི། །དཀྱིལ་འཁོར་བསྟན་པའི་ཏིང་ངེ་འཛིན། །བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁར་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨ་ལི་ཀ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཞེས་གསུངས་ཏེ་སྒྱུ་ཡུམ་སྟེ་ཆོས་ཀྱི་དབྱིངས་འཕྲུལ་ཡབ་སྟེ་མ་འགགས་པར་སྣང་བ་དྲྭ་བ་འབྲེལ་བ་སྟེ་ཐབས་ཤེས་རབ་དབྱེར་མེད་པར་རམ་ཟུང་དུ་འབྲེལ་པའོ། །མངོན་རྫོགས་པའི་ནི་ཏིང་ངེ་འཛིན་གསལ་བའི་རིག་པ་མངོན་དུ་རྫོགས་པའོ། །དེ་ལྟར་ལྷའི་དཀྱིལ་འཁོར་གསལ་བར་རྫོགས་པ་དང་ཤིན་ཏུ་བརྟན་པ་ཐོབ་པའི་ཏིང་ངེ་འཛིན་དང་ལྡན་པའི་རྣལ་འབྱོར་གྱི་དབང་ཕྱུག་ཆེན་པོ་ཕོ་མོ་རྣམས་ཀྱིས་ཡན་ལག་ལྔ་ལ་ཚོམ་བུ་ལྔའི་དཀྱིལ་འཁོར་དུ་གསལ་བར་བསྒོམས་ལ་རྐང་པས་བྲོ་བརྡུང་བ་དང་ལག་པས་གར་བྱ་བ་དང་ཡིད་ཀྱིས་འདུ་འཕྲོའི་ཕྱག་རྒྱ་སྟེ་ལྷ་རྣམས་ལ་བྱང་སེམས་ཕར་འཕྲོས་པས་ལྷའི་སྐུ་གསུང་ཐུགས་མཉེས་པ་དང་། སེམས་ཅན་གྱི་དོན་བྱས་ནས་ཚུར་འདུས་པས་བདག་གིས་དངོས་གྲུབ་ཐོབ་པ་སྟེ། དེ་ཡིས་ཚེ་འདིར་ས་ལ་བྱི་བ་བཞིན་དུ་འཛུལ་ལམ་ནམ་མཁར་བྱ་བཞིན་དུ་འཕུར་ནས་འགྲོ་བར་འགྱུར་བ་དང་ཆུ་ལ་མི་བྱིང་བའི་དངོས་གྲུབ་ཐོབ་པ་ནི་རྣམ་པར་སྣང་མཛད་ཀྱི་དངོས་གྲུབ་བོ། །རྣལ་འབྱོར་པ་ཕོ་མོ་རྣམས་ལྟ་བ་དང་ཏིང་ངེ་འཛིན་གསལ་བས་རྡོ་རྗེའི་གླུ་བླང་བ་དང་དོན་ལྡན་རྡོ་རྗེ་ཡི་ཚིག་དང་སྒྲ་ཡིས་བདེ་བར་གཤེགས་པ་མཉེས་པར་བྱེད་པ་ལས་མི་འདའ་བའི་ཕྱིར་ན་ཕྱག་རྒྱ་སྟེ་དེ་ཡིས་ཆོས་ཉིད་ཀྱི་གསུང་དང་བསྟན་པ་ཐམས་ཅད་དུས་གཅིག་ཏུ་མཁྱེན་པའི་དངོས་གྲུབ་ཐོབ་པར་འགྱུར་བ་ནི་སྣང་བ་མཐའ་ཡས་གསུང་གི་དངོས་གྲུབ་བོ། །རྣལ་འབྱོར་ཕོ་མོ་རྣམས་ལྷར་གསལ་བ་ལས་ལུས་ལ་རིན་པོ་ཆེའི་རྒྱན་སྣ་ཚོགས་གདགས་པ་དང་དར་དང་ཟ་འོག་ལ་སོགས་པའི་གོས་སྣ་ཚོགས་བགོ་བའི་ཕྱག་རྒྱ་ཡིས་སྐུ་གང་གིས་ཀྱང་ཟིལ་གྱིས་མི་ནོན་པས་ལུས་ལ་འོད་འབར་བའི་ལྷ་དང་མིའི་རྒྱལ་པོ་རྣམས་ཀྱིས་ཀྱང་ཐུབ་པ་མེད་པ་འགྲུབ་པར་འགྱུར་བ་ནི་མི་བསྐྱོད་རྡོ་རྗེའི་དངོས་གྲུབ་བོ། །རྣལ་འབྱོར་པ་རྣམས་ལོངས་སྤྱོད་ཐམས་ཅད་བདུད་རྩིའམ་འདོད་ཡོན་གྱི་ལྷ་མོར་བྱིན་གྱིས་བརླབས་ནས་བཟའ་བ་དང་བཏུང་བའི་ཚོགས་ལ་ལོངས་སྤྱད་ནས་ཕུལ་ཞིང་དངོས་གྲུབ་བླང་བའི་ཕྱག་རྒྱ་ཡིས་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བའི་སྐུ་དང་ལོངས་སྤྱོད་ཐམས་ཅད་བདུད་རྩིར་འགྲུབ་པར་འགྱུར་བ་ནི་རིན་ཆེན་འབྱུང་ལྡན་གྱི་དངོས་གྲུབ་བོ། །ཨ་ལི་སྦྱོར་བ་དང་ཀ་ལི་སྒྲོལ་བའི་མཆོད་པ་ཚུལ་བཞིན་དུ་ཕུལ་ལ་ཐབས་ཤེས་རབ་གཉིས་སྙོམས་འཇུག་གི་ཕྱག་རྒྱ་ཡིས་ཐབས་ཤེས་རབ་གཉིས་སུ་མེད་པར་གནས་པ་དེ་ཡང་ཐུན་མོང་གི་དངོས་གྲུབ་ཐམས་ཅད་དང་ཐུན་མོང་མ་ཡིན་པའི་དངོས་གྲུབ་ཐམས་ཅད་ཚུལ་བཞིན་དུ་འགྲུབ་པར་འགྱུར་བ་དེ་ནི་དོན་ཡོད་གྲུབ་པའི་དངོས་གྲུབ་སྟེ་དེ་ཡན་ཆད་ཀྱིས་སྦྱོར་ལམ་བསྟན་ནོ། །གསུམ་པ་ནི། ཆོ་ག་སྔགས་དང་ཡོ་སྤྱད་རྣམས། །རྣལ་འབྱོར་ཚོགས་ཀྱི་དཀྱིལ་འཁོར་གྱིས། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་པས་བསྟན་ཏེ། དང་པོ་ཆོ་ག་ལྔ་རྫོགས་པར་སྒོམ་སྟེ། དེ་བཞིན་ཉིད་དང་། ཀུན་ཏུ་སྣང་དང་། རྒྱུ་དང་། སྐུར་བསྐྱེད་པ་དང་། ཡེ་ཤེས་པ་སྒྲུབ་པ་དང་ལྔ་རྫོགས་པར་བྱ་སྟེ་དེ་ནས་སྔགས་ཀྱི་ཡན་ལག་ལྔ་ནི་ཡབ་ཡུམ་རྩ་བའི་ལྷ་དང་བཞི་པོ་སོ་སོར་སྒོམ་པ་ཐབས་ཀྱི་ལྷ་དང་། ཡེ་ཤེས་སེམས་དཔའ་ཤེས་རབ་ཀྱི་ལྷ་དང་། སྐུ་གསུང་ཐུགས་རྡོ་རྗེ་གསུམ་གྱི་ལྷ་དང་། དབུ་རྒྱན་བདག་པོའི་ལྷ་ལྔའོ། །ཡོ་སྤྱད་རྣམས་ནི་བྲོ་གར་འདུ་འཕྲོ་དང་། གླུ་ཚིག་སྒྲ་དང་། རྒྱན་དང་བགོ་བ་དང་། བཟའ་དང་བཏུང་བ་དང་། ཨ་ལི་ཀ་ལིའི་ཡོ་སྤྱད་དང་ལྔའོ། །དེ་ལ་དང་པོ་ཆོ་ག་ལྔས་སྐུ་གསལ་བར་བྱེད་དེ་ནས་སྔགས་ཀྱི་ཡན་ལག་ལྔས་ཉི་ཁྲི་ཆིག་སྟོང་ལ་རིག་པ་རྩལ་སྦྱང་དེ་ནས་ཡོ་སྤྱད་ལྔས་མཆོད་པ་འབུལ་ལོ། །དེ་ལྟར་རིག་པ་རྩལ་འབྱོངས་ནས་ཚོགས་དཔོན་བྱ་སྟེ་རྣལ་འབྱོར་པ་རྣམས་ལྷན་དུ་འཚོགས་པའི་དཀྱིལ་འཁོར་གྱིས་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་། བསྙེན་སྒྲུབ་རྣམ་པ་བཞིས་ལམ་གྱི་གཞུང་བསྲང་། ཚོགས་ལྷག་གཉིས་ཀྱིས་མཆོད་པའི་འབྲེལ་བཅའ། ཐ་མ་འབྲས་བུ་ལ་སྦྱོར་བའོ། །དེ་ཡང་ཞག་ནི་སུམ་ཅུ་ཕྲག་དྲུག་ནི་ཟླ་བ་དྲུག་ཡིན་ཏེ་དབང་པོ་རབ་ཀྱིས་ཟླ་བ་དྲུག་གམ་དབང་པོ་འབྲིང་གིས་ཟླ་བ་བཅུ་གཉིས་སམ་བཅུ་བཞི་ན་འགྲུབ་དབང་པོ་ཐ་མས་ཀྱང་ཟླ་བ་བཅུ་དྲུག་གིས་འགྲུབ་བོ། །གང་འགྲུབ་ན་ཆོས་ཐམས་ཅད་ལ་ཇི་ལྟར་འདོད་པ་བཞིན་དུ་དབང་བསྒྱུར་བའི་རིགས་ཀྱི་དམ་པ་ཚེ་ལ་དབང་བའི་རིག་འཛིན་འགྲུབ་པར་འགྱུར་ཏེ་ཚོགས་བསྒྲུབས་པའི་འབྲས་བུའོ། །བཞི་པ་ནི། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལས། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཅེས་པ་སྟེ་ཚེ་ལ་དབང་བའི་རིག་འཛིན་ཐོབ་པ་དེ་ཁོ་ནའི་ཚེ་ན་ཕྱག་རྒྱ་ཆེན་པོའི་རིག་འཛིན་ཡང་དེའི་སྟེང་དུ་ཟླ་བ་བཅུ་དྲུག་ཚུན་ཆད་ཀྱིས་སྒྲུབ་ན་གྲུབ་པ་ཐོབ་པར་ངེས་ཏེ་དེ་ནས་ལྷུན་གྱིས་གྲུབ་པའི་རིག་འཛིན་ལ་སྦྱོར་བའོ། །དེ་ཡང་དག་པར་རྫོགས་པའི་སངས་རྒྱས་སྐུ་ལྔ་ལྷུན་གྱིས་རྫོགས་པ་ནི་རིག་འཛིན་ཉིད་ལས་སྒྲས་དཔགས་པ་ཙམ་དུ་འགྱུར་བའོ། །སྒྲིབ་པ་དག་པའི་ཡེ་ཤེས་མ་བཙལ་བར་ལྷུན་གྲུབ་སྐུ་གསུང་ཐུགས་ཡོན་ཏན་འཕྲིན་ལས་ཉི་ཤུ་རྩ་ལྔར་རྫོགས་པའོ། །དེ་ནི་མཐར་ཐུག་པའི་ལྷུན་གྱིས་རྫོགས་པའོ། །དེ་ཇི་ལྟར་ཐོབ་ན་ཡེ་ཤེས་ནི་ལྷུན་གྱིས་རྫོགས་པའི་རིག་འཛིན་ནོ། །ཐིག་ལེ་ནི་སྐུ་གསུང་ཐུགས་ཡོན་ཏན་འཕྲིན་ལས་དབྱེར་མེད་པའོ། །དེ་ཉིད་ནི་རིག་འཛིན་ནོ་དེ་ལས་ཁྱད་པར་དུ་བྱས་པའོ། །ཡེ་ཤེས་ཐིག་ལེ་དེ་ཉིད་ནི་གཞི་དངོས་པོའི་གནས་ལུགས་སོ། །གནས་ལུགས་དེ་ནི་རྡོ་རྗེ་སེམས་དཔའོ། །ཐིག་ལེ་ཉིད་སྣང་བ་ནི་རིག་པས་དོན་དེ་ཉིད་རྟོགས་པའོ། །དེ་རྣམས་གཞན་ནས་བྱུང་བ་མ་ཡིན་ཏེ་གཞི་རང་བྱུང་གི་ཡེ་ཤེས་སྤྲོས་པ་ཐམས་ཅད་དང་བྲལ་བ་དེ་ཉིད་ལས་ཡེ་ཤེས་ཀྱི་རོལ་པ་མ་འགགས་པར་སྣང་བའོ། །ཡེ་ཤེས་ཀྱི་ཆེ་བའི་ཡོན་ཏན་བསམ་གྱིས་མི་ཁྱབ་ཅིང་མཐའ་ཡས་པ་མཆོག་སྟོབས་དང་མི་འཇིགས་པ་དང་མ་འདྲེས་པ་གཟུང་དང་ཏིང་ངེ་འཛིན་དང་མཚན་དང་དཔེ་བྱད་ཐམས་ཅད་ལྷུན་གྱིས་གྲུབ་པའི་ཡི་གེ་འཁོར་ལོ་ཚོགས་ཆེན་གྱི་སར་མངོན་དུ་བྱས་པའོ། །ལྔ་པ་ནི། ཕྱོགས་བཅུ་དུས་བཞི་མངོན་རྫོགས་པའི། །ཞིང་ཁམས་གཞལ་ཡས་རྣམ་དག་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་ཐམས་ཅད་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེན་གསུང་ལས་དོན་བྱུང་བ། །མཐུན་པའི་ཡེ་ཤེས་རང་སྣང་བའོ། །ཞེས་པ་སྟེ་ཕྱོགས་བཅུ་དང་དུས་བཞི་ཡིས་བསྡུས་པའི་མངོན་པར་རྫོགས་པ་སངས་རྒྱས་པ་ཡི་བདག་ཉིད་སྐུ་ལྔ་ལྷུན་གྱིས་གྲུབ་པ་དེའི་བཞུགས་གནས་ཁྱད་པར་ཅན་ནི་སངས་རྒྱས་ཀྱི་ཞིང་ཁམས་དང་གཞལ་ཡས་ཁང་རྣམ་པར་དག་པ་སྟེ་དེ་ཡང་ཞིང་ཁམས་ནི་ཕྱི་ཆོས་ཀྱི་དབྱིངས་སྤྲོས་པ་དང་བྲལ་བ་ནང་འོག་མིན་གྱི་གནས་ལྟ་བུར་སྣང་བ་གསང་བ་ཡུམ་གྱི་མཁའ་བདེ་སྟོང་གི་ཉམས་ཅན་དང་གཞལ་ཡས་ཁང་རྣམ་པར་དག་པ་རྒྱ་ཡོངས་སུ་མ་ཆད་པ་ནི་ཆེ་ཆུང་གི་ཚད་དང་རྒྱ་དང་བྲལ་བའི་རང་བཞིན་ནོ། །གཞལ་ཡས་ཁང་དེ་ན་དབུས་སུ་འཁོར་ལོའི་གདན་དང་གཞན་ཡང་རིན་པོ་ཆེའི་རྒྱན་མང་པོ་བསམ་གྱིས་མི་ཁྱབ་པ་དང་འདོད་པའི་ཡོན་ཏན་གྱི་ལྷ་མོ་གྲངས་མེད་པའི་རོལ་མོའི་ཚོགས་ཀྱིས་བརྒྱན་པའོ། །གནས་དེ་ནི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་རྒྱུད་ཡོངས་སུ་དག་པའི་བདེ་བར་གཤེགས་པ་བཞུགས་པས་དཀྱིལ་འཁོར་མ་ལུས་པ་ཐམས་ཅད་ཀུན་དེ་ན་གནས་པའོ། །འོག་མིན་གྱི་གནས་ཀྱི་དུས་གསུམ་གྱིས་བདེ་བར་གཤེགས་པ་དེའི་ཞལ་མཐོང་ནས་ཡིད་དགའ་བ་དང་བྲོད་པ་ཁྱད་པར་ཅན་སྐྱེ་བ་དང་མཆོད་པའི་སྤྲིན་བསམ་གྱིས་མི་ཁྱབ་པ་སྤྲོས་ནས་ཉེ་བར་མཉེས་པར་བྱེད་པ་དང་། སངས་རྒྱས་ཀྱི་གསུང་གཅིག་ལ་ཡན་ལག་བསམ་གྱིས་མི་ཁྱབ་པ་མངའ་བས་རྒྱ་ཆེན་པོ་གསུང་ལས་ཆོས་ཀྱི་དོན་བྱུང་བས་སམ་བཅོམ་ལྡན་འདས་དཔལ་ཀུན་ཏུ་བཟང་པོའི་བྱིན་གྱིས་བརླབས་པ་ལས་དོན་གྱི་གསུང་བྱུང་བ་ཡིས་སྒྲིབ་པ་ཤིན་ཏུ་ཆ་ཕྲ་བ་དེ་བཅོམ་ནས་གསུང་རང་བཞིན་གྱི་ཡེ་ཤེས་ཇི་ལྟ་བ་དང་མཐུན་པའི་བཟོད་པ་ཐོབ་སྟེ་ཡེ་ཤེས་རང་སྣང་བར་འགྱུར་བའོ། །དྲུག་པ་ནི། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཉིད་ཀྱིས་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་གསུངས་ཏེ་གོང་དུ་བསྟན་པ་ཉིད་རང་རིག་པར་གཅིག་པ་དང་། རང་ཉིད་གཅིག་དང་དུ་མའི་མཐའ་ཐམས་ཅད་དང་བྲལ་ཞིང་གྲོལ་བའི་ཕྱིར་རང་རིག་པ་ཉིད་ཐམས་ཅད་དུ་མ་འགགས་པར་ཤར་བས་གཅིག་དང་དུ་མའི་མཐའ་མ་སྤངས་བར་བྲལ་བའོ། །དེ་ལྟར་མཐའ་མ་གྲུབ་པ་ཡི་ཕྱིར་ན་དབུས་ཀྱང་མ་གྲུབ་པའི་ཕྱིར་མཐའ་དང་དབུས་མེད་དེ་བཞིན་ཉིད་ཡིན་ནོ། །དེ་ནི་བདེ་བར་གཤེགས་པ་སངས་རྒྱས་ཀྱི་ཡེ་ཤེས་ཀྱི་སྤྱན་གྱིས་ཀྱང་མི་གཟིགས་ཏེ་གཟིགས་རྒྱུ་མེད་པའོ། །འོ་ན་མེད་དོ་སྙམ་པ་ལ་རང་བྱུང་ཡེ་ཤེས་ཉིད་རྟེན་གནས་མེད་པར་སྣང་བའོ། །ཞེས་ཕྱིར་ན་དག་པ་ལ་བརྟེན། བདུན་པ་ཡོན་ཏན་དེ་གཞན་ནས་མ་བྱུང་བར་བསྟན་པ་ནི། ཕྱོགས་བཅུ་དུས་བཞིར་མངོན་རྫོགས་པའི། །བདེ་གཤེགས་ཡོན་ཏན་རྨད་པོ་ཆེ། །གཞན་ཡོད་པ་མ་ཡིན་ཏེ། །ལྷ་སྲིན་ལ་སོགས་སྨོས་ཅི་དགོས། །ཞེས་པ་སྟེ་དེ་ལྟར་བསྟན་པའི་འབྲས་བུ་དེ་ནི་ཕྱོགས་བཅུ་དང་དུས་བཞིར་ཏེ་དུས་བཞིས་བསྡུས་པ་ཐམས་ཅད་དུ་མངོན་པར་རྫོགས་པར་སངས་རྒྱས་པའོ། །སྐུ་ལྔ་ལྷུན་གྱིས་གྲུབ་པའི་སངས་རྒྱས་སོ། །དེ་ནི་ལམ་བདེ་བར་གཤེགས་པ་ཡོན་ཏན་གསང་བ་རྨད་པོ་ཆེའམ་རྨད་དུ་བྱུང་བ་བདེ་བར་གཤེགས་པ་ཐམས་ཅད་གཅིག་ཏུ་བསྡུས་པའི་ངོ་བོ་སྐུ་གསུང་ཐུགས་ཡོན་ཏན་འཕྲིན་ལས་ཀྱི་བདག་པོའོ། །དེ་ལྟར་བསྟན་པའི་འབྲས་བུ་དེ་དག་ཀྱང་གཞན་ན་ཡོད་པ་སྙེད་པ་ལྟ་བུ་མ་ཡིན་ཏེ་རང་རིག་པ་ཉིད་དེ་ལྟར་རང་ཤར་བ་ལས་མ་གཏོགས་པ་གཞན་ན་མེད་ཞེས་སོ། །དེ་ལྟ་བུའི་འབྲས་བུ་དེ་ཐོབ་བམ་མི་ཐོབ་བམ་བདེན་ནམ་མི་བདེན་ནམ་སྙམ་ན་དཔེར་ན་འཇིག་རྟེན་གྱི་ལྷ་སྲིན་ལ་སོགས་པ་བསྒྲུབ་པས་གྲུབ་རྟགས་ཕྱུང་ན་འདི་ལ་ཅི་སྨོས། འཇིག་རྟེན་ལྷ་ལ་ཡང་ཡོན་ཏན་ཡོད་ན་འདི་ལ་ལྟ་སྨོས་ཀྱང་ཅི་དགོས་ཞེས་པའོ། །གསུམ་པ་མཇུག་གི་དོན་ལ་བསྟན་བཅོས་བརྩམ་པའི་དགེ་བ་བསྔོ་བ་དང་། བསྟན་བཅོས་མཛད་པ་པོའི་བསྟན་པ་དང་། འགྱུར་བྱང་སྨོས་པའོ། །དང་པོ་ནི། རྒྱུད་ཀྱི་དོན་ལས་སྒྲུབ་བའི་ཐབས། །རིན་ཆེན་དྲྭ་བ་འདི་བསྡུས་པས། བཅོམ་ལྡན་ཀུན་བཟང་སྐུ་གསུང་ཐུགས། །སེམས་ཅན་ཀུན་གྱིས་ཐོབ་པར་ཤོག །ཅེས་པ་སྟེ་གསང་བ་སྙིང་པོའི་རྒྱུད་ཀྱི་དོན་ལས་ཞི་བ་བསྒྲུབ་པའི་ཐབས་འདི་བསྡུས་པས་སོ། །དེའི་མཚན་ནི་ཅི་ཞེ་ན་རིན་ཆེན་དབང་གི་རྒྱལ་པོ་ལྟར་དགོས་འདོད་འབྱུང་དྲྭ་བ་ལྟར་ཐབས་ཤེས་སུ་འབྲེལ་བ་འདི་རྒྱུད་ལས་ལོགས་སུ་བཀོལ་ནས་བསྡུས་པས་བཅོམ་ལྡན་འདས་དཔལ་ཀུན་ཏུ་བཟང་པོའི་སྐུ་གསུང་ཐུགས་ཀྱི་བཅུད་དངོས་གྲུབ་ཀྱི་བཅུད་དམ་པ་རྣམས་བདག་དང་མཐའ་ཡས་པའི་སེམས་ཅན་ཀུན་གྱིས་ཐོབ་པར་ཤོག །གཉིས་པ་ནི། ཞི་བ་རིན་ཆེན་དྲྭ་བ་ཞེས་བྱ་བ་སློབ་དཔོན་སངས་རྒྱས་གསང་བས་མཛད་པ་རྫོགས་སོ། །གསུམ་པ་ནི། རྒྱ་གར་གྱི་པཎྜི་ཏ་སངས་རྒྱས་གསང་བ་དང་བོད་ཀྱི་ལོ་ཙཱ་བ་བྲ་ཀ་མུ་དྲི་ཏ། ཝ་ས་མ ནྟུ་ཤྲི་ཝར་མས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སླར་ཡང་སྨྲས་པ། ལེགས་བྱས་ཤར་རིའི་ཕྲག་པ་ནས་འཐོན་པའི། །བསིལ་ལྡན་འབུམ་ཕྲག་བརྒྱ་ཡི་ཟེར་གྱིས་ཀྱང་། །ཆ་ཙམ་བསྐྲུན་དུ་མེད་པའི་དགེ་ཚོགས་རྣམས། །གཅིག་ཏུ་བཟླུམ་སྟེ་བསྟན་པ་རྒྱས་ཕྱིར་བསྔོ། །ཞི་བ་རྡོ་རྗེ་དབྱིངས་ཀྱི་ལྷ་ཚོགས་རྣམས། །དཀྱིལ་འཁོར་གཅིག་སྒྲུབ་རིན་ཆེན་དྲྭ་བ་ཡི། །བསྟན་བཅོས་ཆེན་པོ་ཉི་ཟླ་གནས་ཀྱི་བར། །དར་ཞིང་རྒྱས་ལ་མི་ནུབ་ཡུན་གནས་ཤོག །འདི་ཉིད་འཆད་དང་འཛིན་སེམས་སྒོམ་པ་ལ། །བླ་མ་སྒྱུ་འཕྲུལ་དྲྭ་བའི་ལྷ་ཚོགས་ཀྱིས། །རྟག་ཏུ་དགོངས་ཤིང་བཀྲ་ཤིས་བྱིན་བརླབ་ཀྱི། །འོད་ཟེར་སྙིང་དབུས་པདྨོར་སིམ་གྱུར་ཅིག །ཅེས་སློབ་དཔོན་ཆེན་པོ་སངས་རྒྱས་གསང་བས་མཛད་པའི་ཞི་བ་རིན་ཆེན་དྲྭ་བའི་བསྟན་བཅོས་ལ་དབུས་གྲུ་མཁས་པ་སྨོན་ལམ་སེངྒེའི་མཆན་ཏིག་རྩ་མཆན་སྡེབས་ཤིང་བསྡུས་དོན་དཀྱུས་སུ་བཀོད་དེ་འཇམ་དབྱངས་ཆོས་ཀྱི་བློ་གྲོས་པས་གསལ་བར་བྱས་པའི་ཡི་གེའི་མཐུན་འགྱུར་མགོ་ཚ་མཁན་སྡེ་སྣོད་འཛིན་པ་གཞན་ཕན་བཟང་པོས་བགྱིས་པ་འདིས་ཀྱང་གསང་བ་སྙིང་པོའི་བསྟན་པ་རིན་པོ་ཆེ་ཕྱོགས་བཅུར་འཕེལ་བའི་རྒྱུར་གྱུར་ཅིག །སརྦ་དཱ་མངྒལཾ།། །། དཔལ་སྒྱུ་འཕྲུལ་དྲྭ་བའི་ཁྲོ་བོ་དམ་པ་རྒྱན་གྱི་མཆན་ཊིག་ཧེ་རུ་ཀའི་དགོངས་རྒྱན། ཆོས་ཀྱི་བློ་གྲོས།དཔལ་སྒྱུ་འཕྲུལ་དྲྭ་བའི་ཁྲོ་བོ་དམ་པ་རྒྱན་གྱི་མཆན་ཊིག་ཧེ་རུ་ཀའི་དགོངས་རྒྱན་ཅེས་བྱ་བ་བཞུགས་སོ། །ན་མས་ཤྲི་བཛྲ་ཧེ་རུ་ཀ །སྙིང་རྗེའི་ངང་ལས་རབ་ཁྲོས་བཅོམ་ལྡན་འདས། །སྲིད་ཞིའི་སྤྱི་དཔལ་རྡོ་རྗེ་ཁྲོ་བོའི་རྒྱལ། །ཧེ་རུ་ཀ་དཔལ་འབར་བ་ཆེན་པོ་ལ། །རབ་གུས་དགྱེས་པའི་གར་གྱིས་ཕྱག་བགྱིའོ། །གང་དེའི་སྒྲུབ་ཐབས་དེ་ཉིད་སྣང་བ་ལ། །དམ་པའི་རྒྱན་གྱུར་གསང་ཆེན་ཟབ་མོའི་གཏེར། །བསྟན་བཅོས་ཆེན་པོ་མཁས་གྲུབ་ཞལ་ལུང་གི། །མཆན་ཊིག་ཉུང་ངུ་རྣམ་གསལ་དབྱེ་བར་བྱ། །དེ་ལ་འདིར་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཁྲོ་བོའི་དཀྱིལ་འཁོར་རབ་ཏུ་གསལ་བར་བྱེད་པའི་བསྟན་བཅོས་ཆེན་པོ་དེ་ཁོ་ན་ཉིད་སྣང་བ་དམ་པའི་རྒྱན་འདི་ཉིད་འཆད་པ་ལ་གསུམ་སྟེ། ཀླད་དོན། གཞུང་དོན། མཇུག་གི་དོན་ནོ། །དང་པོ་ལ་མཚན་སྨྲོས་པ་དང་། ཕྱག་གིས་མཆོད་པར་བརྗོད་པ། རྩམ་པར་དམ་བཅའ་བ་གསུམ་ལས། དང་པོ་ནི། དེ་ཁོ་ན་ཉིད་སྣང་བ་དམ་པ་རྒྱན་ཅེས་གསུངས་ཏེ། དེ་ཁོ་ན་ཉིད་ཅེས་པ་རྟོག་ཚོགས་ཐམས་ཅད་རང་རིག་པ་ལས་མི་གཞན་པའི་ཕྱིར་སྣང་སྟོང་གཉིས་མེད་རང་བྱུང་གི་ཡེ་ཤེས་ལ་སྒོམ་བྱེད་ཀྱི་བློ་མ་བཅོས་པར་བཞག་པ་རྒྱུ་ཡི་དེ་ཁོ་ན་ཉིད་དང་། དེ་སྒོམས་པ་ལས་འབྲས་བུ་སྐུ་དང་ཡེ་ཤེས་རང་སྣང་བ་འབྲས་བུའི་དེ་ཁོ་ན་ཉིད་དམ་མ་ནོར་བའི་དེ་ཁོ་ན་ཉིད་དང་། འབྲས་བུ་དེའང་སྒྲིབ་བྱེད་དག་པའི་ཚེ་རང་ལས་སྣང་བ་ལས་གཞན་ནས་བྱུང་བ་མ་ཡིན་པའི་ཕྱིར་རྒྱུ་འབྲས་ཀྱི་དབྱེ་བ་ཙམ་ཡང་མ་གྲུབ་པས་གཉིས་སུ་མེད་པའི་དེ་ཁོ་ན་ཉིད་དོ། །དེ་ལྟ་བུའི་རང་བྱུང་རིག་པའི་ཡེ་ཤེས་དེ་ཁོ་ན་ཉིད་ཐུན་མོང་མིན་པའི་གཏན་ཚིགས་ཆེན་པོ་རྣམས་ཀྱིས་གཏན་ལ་དབབ་པས་དོན་སྤྱིའི་ཚུལ་དུ་གོ་བ་དང་། སྣོད་བཅུད་རྒྱུད་རྣམས་དཀྱིལ་འཁོར་གསུམ་དུ་སྒོམས་པ་སོགས་ཀྱིས་རང་རིག་པའི་ཡེ་ཤེས་ཀྱིས་མངོན་སུམ་དུ་སྣང་བ་དེ་ནི་གང་ཞིག་བསྒོམ་པར་བྱ་བ་ཐམས་ཅད་ཀྱི་ནང་ནས་དམ་པའི་མཆོག་ཏུ་གྱུར་པ་ཡིན་ལ། དེ་གཏན་ལ་དབབ་བྱེད་ཀྱི་རྒྱུད་ཐམས་ཅད་ཀྱི་རྒྱལ་པོ་གསང་བའི་སྙིང་པོ་དེ་ཁོ་ན་ཉིད་དེས་པའི་རང་བྱུང་རིག་པ་ཁྲོ་བོའི་དཀྱིལ་འཁོར་སྒོམ་པའི་རིམ་པ་གསལ་བར་བྱེད་པའི་རྒྱན་ཅེས་བྱ་བའོ། །མཚན་སྨོས་པའི་དགོས་པ་ནི། ཇི་སྐད་དུ། རབ་ལ་མཚན་བསྟན་འབྲིང་ལ་དབྱེ། །ཐ་མ་འབྲུ་གཉེར་དཀྲོལ་བའོ། །ཞེས་དབང་རབ་ཀྱིས་མཚན་བསྟན་པས་རྒྱུད་དང་བསྟན་བཅོས་ཀྱི་དོན་བདེ་བླག་ཏུ་རྟོགས་པ་སོགས་ཀྱི་དགོས་པ་ཡོད་དོ། །གཉིས་པ་ཕྱག་ལ་གསུམ་སྟེ། དགོས་དོན་དང་། བསྡུས་དོན་དང་། ཚིག་དོན་ནོ། །དགོས་པ་ནི་གཉིས་ཏེ་ཡི་དམ་ལྷ་ལ་དབང་མི་ཟ་བ་དང་། བསྟན་ཆོས་རྩོམ་པ་ལ་བར་ཆད་མི་ཡོང་བའི་དགོས་པ་ཡོད་དོ། །བསྡུས་པའི་དོན་ལ་བཞི་སྟེ་གང་ཟག་གང་གིས་བཙལ། ཡུལ་གང་ལ་བཙལ། དགོས་པ་ཅིའི་ཕྱིར་འཚལ། ཚུལ་ལམ་ཐབས་ཇི་ལྟར་བཙལ་བའོ། །གང་ཟག་ནི་སྔོན་བྱུང་དུ་སངས་རྒྱས་གསང་བས་སོ། །རྗེས་འཇུག་ཏུ་བཤད་པ་པོ་གང་ཡིན་གྱིས་སོ། །ཡུམ་ནི་ཁྲག་འཐུང་ཁྲོ་བོའི་ལྷའོ། །དགོས་ཆེད་ནི་རྟོགས་པ་དོན་གྱི་ཕྱག་བཙལ་བས་མཆོག་གི་དངོས་གྲུབ་ཐོབ་ལ་ཀུན་རྫོབ་བརྡའི་ཕྱག་བཙལ་བས་ཐུན་མོང་གི་དངོས་གྲུབ་ཐོབ་པའོ། །ཚུལ་ལམ་ཐབས་ནི་གསུམ་སྟེ་ཡི་དམ་དོན་དུ་གཉེར་བའི་ཚུལ་དང་གདུལ་བྱ་གུས་པ་བསྐྱེད་པའི་ཚུལ་དང་། ཡ་རབ་དང་གོ་བསྟུན་པའི་ཚུལ་ལོ། །ཚིག་གི་དོན་ནི། ཐམས་ཅད་ངོ་བོ་མཉམ་ཉིད་སྐུ། །དབང་ཆེན་གར་དབང་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་ཡི། །ཧེ་རུ་ཀ་ལ་ཕྱག་འཚལ་ཏེ། །ཞེས་པ་རང་དོན་ཆོས་སྐུ་དང་སྦྱར་ཏེ་བཤད་པ་གཞན་དོན་གཟུགས་སྐུ་དང་སྦྱར་ཏེ་བཤད་པ། དོན་བཅུ་ལ་སྦྱར་ཏེ་བཤད་པའམ་ཡང་ན་དབང་པོ་རབ་ངེས་ཤེས་བསྐྱེད་པའི་ཕྱིར་སྐུ་ལྔ་དང་སྦྱར་ཏེ་བཤད་པ་དང་། དབང་པོ་འབྲིང་ངེས་ཤེས་བསྐྱེད་པའི་ཕྱིར་ན་སྐུ་གསུམ་དང་སྦྱར་ཏེ་བཤད་པ་དང་། དབང་པོ་ཐ་མ་ངེས་ཤེས་བསྐྱེད་པའི་ཕྱིར་ན་སྒྲ་བརྒྱད་དང་སྦྱར་ཏེ་བཤད་པའོ། །དེ་ལ་རང་དོན་ཆོས་སྐུ་དང་སྦྱར་ཏེ་བཤད་ན་ཐམས་ཅད་ནི་འཁོར་བ་དང་མྱ་ངན་ལས་འདས་པ་དང་གཞི་ལམ་འབྲས་བུ་གསུམ་གྱིས་བསྡུས་པའི་ཆོས་ཐམས་ཅད་དོ། །ངོ་བོ་དེའི་རང་བཞིན་ཏེ་སེམས་ཉིད་འོད་གསལ་ལོ། །དེ་ནི་ཆོས་ཉིད་བྱང་ཆུབ་ཀྱི་སེམས་རང་སྣང་བའོ། །མཉམ་ཉིད་ནི་ཆོས་ཀྱི་སྐུའོ། །དེ་ནི་རང་དོན་ཕུན་སུམ་ཚོགས་པའོ། །བདེ་ཆེན་ནི་ཆོས་སྐུ་དེ་ལས་གདུལ་བྱའི་དོན་དུ་ལོངས་སྤྱོད་རྫོགས་པའི་སྐུ་ཡབ་ཡུམ་ཐབས་དང་ཤེས་རབ་གཉིས་སུ་མེད་པའི་ངང་ལས་དུས་ཐམས་ཅད་དུ་འདུ་འབྲལ་མེད་པར་བཞུགས་པའོ། །དེ་ཡང་བདེ་བ་མི་ཟད་པ་དང་བདེ་བ་ཆེ་བ་དང་བདེ་བ་གྱ་ནོམ་པ་དང་ལྡན་པར་རོ། །གར་དབང་ནི་སྤྲུལ་པའི་སྐུ་སྟེ་གདུལ་བྱ་ལ་དཔེ་གར་མཁན་ལྟ་བུས་དབང་དུ་སྡུད་པའོ། །སྤྲུལ་སྐུ་དེ་ཉིད་བཤད་པ་ནི་སྐུ་གསུང་ཐུགས་ཡོན་ཏན་འཕྲིན་ལས་མི་ཟད་པ་རྒྱན་གྱི་འཁོར་ལོ་ཡི་རང་བཞིན་ཏེ། དེ་ཡང་སྐུ་མི་ཟད་པ་རྒྱན་གྱི་འཁོར་ལོ་ནི་ཐུབ་པ་དྲུག་ལ་སོགས་པ་སྟེ། གསང་སྙིང་ལས། དེ་བཞིན་ཉིད་ལས་མ་གཡོས་ཀྱང་། །ཡང་དག་ཐར་བའི་གཟུགས་སྐུ་དང་། །འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །ཅེས་སོ། །གསུང་མི་ཟད་པ་རྒྱན་གྱི་འཁོར་ལོ་ནི་ཐེག་པ་རིམ་པ་དགུའམ་ཆོས་ཀྱི་སྒོ་མོ་སྟོང་ཕྲག་བརྒྱད་ཅུ་རྩ་བཞི་སྟེ། དེ་ཉིད་ལས། ཐམས་ཅད་པདྨོའི་ངང་གྱུར་ནས། །གྲོལ་ཐར་ལམ་དང་པདྨོའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཐེག་པ་མཐོ་དམན་ཐམས་ཅད་དང་། །ལོག་འགྲོ་མ་ལུས་ཐམས་ཅད་སྐད་། །ཅེས་སོ། །ཐུགས་མི་ཟད་པ་རྒྱན་གྱི་འཁོར་ལོ་ནི་ཡེ་ཤེས་ཀྱི་རོལ་པ་སྣ་ཚོགས་པར་སྣང་བ་སྟེ། སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་བསྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་སོ། །དེ་གསུམ་ཁོ་ན་ཡོན་ཏན་འཕྲིན་ལས་ཀྱང་དེ་ཉིད་ཡིན་ནོ། །དེ་ལྟར་གཞན་དོན་ཕུན་སུམ་ཚོགས་པ་དེ་སུ་ཡིན་ཞེ་ན་ཧེ་རུ་ཀ་སྟེ་དཔལ་ཁྲག་འཐུང་ཞེས་བྱའོ། །དེ་ལ་ཤྲི་ཞེས་པའི་སྒྲའི་དོན་ནི་ཁོང་ནས་འདོན་པ་སྟེ་དང་པོ་བདག་དང་གཞན་གྱི་དཔལ་ལོ། །ཧེ་ནི་ཧེ་ཧེ་ཀྲི་ར་ཐ་སྟེ་སྤྱོད་ཅིང་བརྩོན་པའི་དོན་ཡིན་པས་ན་ཡེ་ཤེས་ཕུན་སུམ་ཚོགས་པའོ། །རུ་ནི་རུ་ཏི་ར་སྟེ་ཁྲག་གོ། །ཁྲག་གི་སྒྲ་ནི་སྤང་བྱ་སྟེ་ཉོན་མོངས་པའོ་ཀ་ནི་བདག་པོའི་རྐྱེན་ཏེ་ཁྲག་ལ་རོལ་པས་ན་ཧེ་རུ་སྟེ་སྤངས་པ་དང་ཡེ་ཤེས་ཕུན་སུམ་ཚོགས་པ་དང་ལྡན་པ་དེ་ཀ་ལ་བཤད་པའོ། །ཡང་ན་ཀ་ནི་ཀ་པ་ལ་ཏེ་ཐོད་བའི་བརྟུལ་ཞུགས་དང་ལྡན་པའོ། །དེ་ལྟར་ན་ཐོད་པ་ཁྲག་གིས་བཀང་བ་ལ་རོལ་པའི་བརྟུལ་ཞུགས་དང་ལྡན་པའི་ཧེ་རུ་ཀ་ཞེས་བཤད་དོ། །ཡི་གེ་ཡན་ལག་གི་དོན་དུ་བཤད་ན་ཤྲི་ནི་ཤུགས་ལ་ཡོད་དེ་ཨད་མ་ཤྲི་ན་བདག་གི་དཔལ་ལོ། །ཧེ་དུ་ན་རྒྱུ་ཧེ་རུ་ཀ་དོན་རྒྱུ་དབྱིངས་ལ་དོན་ཡེ་ཤེས་དགྱེས་པའོ། །རུ་ར་ག་ན་ཆགས་པ་རུ་རག་ཏ་ན་ཁྲག་ཆགས་པས་ཁྲོ་བོར་བྱུང་བའོ། ཀ་ཀར་མ་ན་འཕྲིན་ལས་ཀ་ཀ་རུ་ན་ཐུགས་རྗེ་ཁྲོ་བོའི་འཕྲིན་ལས་དེ་དག་ཡང་སྙིང་རྗེས་མཉམ་སྙོམས་སུ་མཛད་པའོ། །གཞན་ཡང་གཟུང་འཛིན་གཉིས་མེད་དང་ཚད་མེད་བཞི་དང་བརྡ་སྐད་དྲག་པོ་དང་རྣམ་པར་ཐར་པའི་སྒོ་གསུམ་ལ་ཡང་འཇུག་གོ། །དེ་བས་ན་སྒྲ་སྐད་སོར་བཞག་སྟེ་མ་སྒྱུར་བ་ཡིན་ནོ། །དེ་ནི་ཧེ་རུ་ཀའི་དོན་བཅུ་དང་སྦྱར་ཏེ་བཤད་པའང་ཡིན་ནོ། །སྐུ་ལྔ་དང་སྦྱར་ན་ཐམས་ཅད་མངོན་པར་བྱང་ཆུབ་པའི་སྐུ་ངོ་བོ་ཆོས་སྐུ་མཉམ་ཉིད་རྡོ་རྗེའི་སྐུ་བདེ་ཆེན་ལོངས་སྐུ་གར་དབང་སྤྲུལ་སྐུ་ཧེ་རུ་ཀ་རེ་རེ་ལ་ཡང་ཚང་ངོ་། །སྐུ་གསུམ་དང་སྦྱར་ན། ཧེ་ནི་ཆོས་སྐུ་མཚན་དང་བྲལ། །རུ་ནི་ལོངས་སྐུ་བདེ་བ་ཆེ། །ཀ་ནི་མཛད་པ་སྤྲུལ་པའི་སྐུ། །ལ་ནི་ཡུལ་དུ་བྱས་པ་སྟེ། །ཕྱག་ནི་ཉོན་མོངས་དྲི་མ་མེད། །འཚལ་ཞེས་དེ་ལ་བརྗོད་པ་ཡིན། །ཏེ་ནི་ལྷག་མ་ཡོད་པའི་ཚིག །ཅེས་སོ། །སྒྲ་བརྒྱད་དང་སྦྱར་ན་ཧེ་ཧེ་ཀ་ན་དགྱེས་པ་སྟེ་ཆོས་སྐུ་ཧེ་ཧེ་དུ་ན་རྒྱུ་སྟེ་སྙིང་རྗེ་ཆེན་པོ་སྟེ་དགྱེས་པའི་སྙིང་རྗེའོ། །རུ་ར་ག་ན་ཆགས་པ་སྟེ་འགྲོ་བའི་དོན་རུ་རཀྟ་ན་ཁྲག་གསོལ་བ་སྟེ་རྡོ་རྗ ེ་གནོད་སྦྱིན་གྱིས་རུ་ཏྲའི་ཁྲག་གསོལ་བའོ། །ཀ་རུ་ནི་ཀ་ནི་དོན་དམ་པ་སྟེ་བྱང་ཆུབ་ཀྱི་སེམས་ཀ་ཀརྨ་ན་ཕྲིན་ལས་མཛད་པ་ཀུན་ནོ། །ཡང་ཧེ་རུ་གཅིག་བྱུང་ན་དཔལ་གཅིག་རང་བཞིན་གྱིས་ཤུགས་ལ་ཡོད་དེ་ཨདྨ་ཤྲི་ན་རྟོགས་པ་བདག་གི་དཔལ་ས་ར་ཤྲི་ན་ཐུགས་རྗེ་གཞན་གྱི་དཔལ་ལོ། །གསུམ་པ་བརྩམ་པར་དམ་བཅའ་བ་ལ་གསུམ་སྟེ་དགོས་པའི་དོན་དང་། བསྡུས་པའི་དོན་དང་། ཚིག་གི་དོན་ནོ། །དགོས་པ་ནི་སེམས་བསྐྱེད་མི་ཉམས་པའི་དགོས་པ་ཡོད། གདུལ་བྱ་དོན་དུ་གཉེར་བའི་དགོས་པ་ཡོད། བསྟན་ཆོས་རྩོམ་པ་མཐར་ཕྱིན་པའི་དགོས་པ་ཡོད། བསྡུས་དོན་ནི་གསུམ་སྟེ་ཆོས་གང་བཤད་ན་སྣང་བ་དམ་པ་རྒྱན་བཤད། གང་ཟག་གང་གིས་བཤད་ན་སངས་རྒྱས་གསང་བས་བཤད། ཐབས་ཇི་ལྟར་བཤད་ན་ཕྱག་བཙལ་དམ་བཅས་ནས་འགྲོ་བ་ཡེ་ཤེས་ཀྱི་ལུས་སུ་བྱ་བའི་ཕྱིར་བཤད་དོ། །ཚིག་གི་དོན་ནི། སྒྱུ་འཕྲུལ་དྲྭ་བའི་རྒྱུད་དག་ལས། །ལྷ་ཡི་རྣལ་འབྱོར་རིམ་པ་ཞིག །སེམས་ཅན་ཡེ་ཤེས་བསྐྱེད་པའི་ཕྱིར། །ལེགས་པར་བསྡུས་ཏེ་བསྟན་པར་བྱའོ། །ཞེས་གསུངས་ཏེ། དེ་ལ་གཞུང་འདི་གང་ལས་བསྡུས་ན་སྒྱུ་དོན་དམ་སྟེ་ཤེས་རབ་འཕྲུལ་ཀུན་རྫོབ་སྟེ་ཐབས་དྲྭ་བའི་དོན་གཉིས་མེད་དེ་ཟུང་དུ་འབྲེལ་བ་རྒྱུད་ལམ་ཡི་གེའི་རྒྱུད་དག་ངོས་བཟུང་བ་སྟེ་གསང་སྙིང་དང་ཐབས་ཞགས་ལས་བསྡུས་པའོ། །དེ་ཡང་རྒྱུད་ནི་ཞལ་ནས་གསུངས་པ་དང་ཆོ་ག་ཚང་བ་དང་འབྲེལ་ཆགས་པ་དང་དཀྲུགས་པ་དང་མངོན་པར་འདུས་པས་ན་རྒྱུད་དོ། །དེ་ཡང་སྒྱུ་འཕྲུལ་གསུམ་ལས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་ལས་གསང་སྙིང་ལས་སོ། །གང་བསྡུས་ན་རང་བཞིན་ལྷུན་གྲུབ་གཞིའི་ལྷ་དང་། ཉེ་བར་བསྙེན་པ་བརྟགས་པ་ལམ་གྱི་ལྷ་དང་། རྟོགས་པ་མངོན་གྱུར་འབྲས་བུ་ཡི་ལྷ་དང་གསུམ་དབྱེར་མེད་པར་ལམ་གྱི་རྣལ་འབྱོར་པས་རྟེན་དང་བརྟེན་བཅས་གོ་རིམ་བཞིན་དུ་སྒོམ་པའི་རིམ་པ་ཞིག་སྟེ་ལམ་གྱི་རྣལ་འབྱོར་པ་རྣམས་ཀྱི་དོན་དུ་དཔལ་ཧེ་རུ་ཀ་སྒོམ་པ་དང་འཕྲིན་ལས་ཀྱི་རིམ་པ་བཞིན་དུ་བྱ་བའོ། །དགོས་ཆེད་ཅི་ཕྱིར་བསྡུས་ན་ཚོགས་བརྒྱད་དང་ལྡན་པའི་སེམས་ཅན་ཏེ་ཡེ་ནས་ཡེ་ཤེས་ལྔའི་རང་བཞིན་ཡིན་པ་ལ་ཡིན་པར་མ་ཤེས་པ་དེ་ཡེ་ཤེས་ལྔར་བསྐྱེད་པའི་ཕྱིར་རམ་སེམས་ཅན་རྣམས་ལ་ནི་གཏི་མུག་གི་མུན་པས་བསྒྲིབས་ནས་ཡེ་ཤེས་ཀྱི་སྣང་བ་མ་སྐྱེས་པ་ལ་ཡེ་ཤེས་བསྐྱེད་པའི་ཕྱིར། ཇི་ལྟར་བསྡུས་ན་ཚིག་ཏུ་མི་མང་དོན་དུ་མི་ཉུང་བར་ལེགས་པར་བསྡུས་ཏེ་མ་འོངས་པའི་གང་ཟག་རྣམས་ལ་བསྟན་པར་བྱའོ། །དེ་ཡང་མན་ངག་འདི་སློབ་དཔོན་གྱིས་འཕྲིན་ལས་སུ་མ་ཚང་བ་མེད་པར་ལེའུ་བཅོ་ལྔ་པ་ལ་སོགས་པ་ནས་བསྡུས་པའོ། །ཡང་གང་གིས་བསྡུས་ན་སངས་རྒྱས་གསང་བས་སོ། །གང་ནས་བསྡུས་ན་གསང་སྙིང་ལས་སོ། །ཅིའི་ཕྱིར་བསྡུས་ན་སེམས་ཅན་ཡེ་ཤེས་བསྐྱེད་ཕྱིར་རོ། །གང་བསྡུས་ན་སྒྲུབ་ཐབས་འདི་ཉིད་དོ། །གཉིས་པ་གཞུང་དོན་ལ་དཀྱིལ་འཁོར་སྒོམ་པའི་སྔོན་དུ་འགྲོ་བའི་རིམ་པ་དང་། གཞུང་དོན་དངོས་གཉིས་ལས། དང་པོ་ལ་བདུན་ཏེ། རྒྱུད་ཉན་པ་ལ་སོགས་པའི་སྔོན་དུ་དབང་བསྐུར་ནོད་དགོས་པར་བསྟན་པ། རྒྱུད་དོན་མཚོན་པར་བྱེད་པའི་སྒོ་བསྟན་པ། རྒྱུད་ཀྱི་ཆེ་བ་བརྗོད་པ། དེས་ན་སྣོད་ལྡན་པ་ལ་སྟོན་པར་གདམས་པ། སྣོད་ངན་ལ་བྱིན་པའི་སྐྱོན་བསྟན་པ། མཆོག་ཐུན་གྱི་དངོས་གྲུབ་ཐོབ་པའི་རྒྱུ་སེམས་འདུལ་བར་བསྟན་པ། གང་དུ་སྒྲུབ་པའི་གནས་བསྟན་པའོ། །དང་པོ་ནི། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་བརྩོན་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་པ་སྟེ། སྤྱིར་སློབ་དཔོན་དྲུག་ལས་མན་ངག་ལུང་གི་སློབ་དཔོན་དང་དམ་ཚིག་དབང་གི་སློབ་དཔོན་དག་ཕྱི་སྒོ་གསུམ་གྱིས་མཉེས་པར་བྱས་ཏེ་ཟང་ཟིང་དབུལ། ནང་སྒྲུབ་པས་མཉེས་པར་བྱ་སྟེ་སློབ་མ་སྣོད་བཟང་པོའོ། །དེ་ལ་མཉེས་པའི་རྐྱེན་གྱིས་ཅི་ཞེ་ན་དབང་རྣམས་ལེགས་པར་ཐོབ་པར་འགྱུར་ལ་གལ་ཏེ་སློབ་དཔོན་མཉེས་པར་མ་བྱས་ཤིང་། ཕྱི་ཕན་པའི་དབང་བཅུ་ལུས་ལ་བསྐུར་བ་དང་། ནང་ནུས་པའི་དབང་ལྔ་སེམས་ལ་བསྐུར་བ་དང་། གསང་བ་ཟབ་མོའི་དབང་གསུམ་རིག་པ་ལ་བསླབ་པ་དང་དབང་བཅོ་བརྒྱད་པོ་རྣམས་སློབ་མས་ཐོབ་པར་མ་བྱས་ན། དབང་དེ་དག་མ་ཐོབ་པར་རང་ཉན་པ་དང་ལ་སོགས་པའི་ཁོང་ནས་གཞན་ལ་འཆད་པ་དང་ལྷ་སྒོམ་ཞིང་སྒྲུབ་པ་དང་འཕྲིན་ལས་དང་རྡོ་རྗེ་སློབ་དཔོན་གྱི་ས་བཟུང་ནས་དེའི་བྱ་བ་བྱེད་ཅིང་བརྩོན་པ་རྣམས་དེ་དག་གི་འབྲས་བུ་མཆོག་དང་ཐུན་མོང་གི་འབྲས་བུ་མེད་ཅིང་ཕ་རོལ་ཏུ་སླར་ངན་སོང་གི་གནས་སུ་རང་རྒྱུད་བརླག་པར་འགྱུར་བས་ན་བླ་མ་མཉེས་ཤིང་ཕྱི་ནང་གི་དབང་རྣམས་ཐོབ་པར་བྱས་ནས་སྡོད་ཉན་པ་ལ་སོགས་པ་ལ་བརྩོན་པར་བྱའོ་ཞེའོ། །དེ་བས་ན་གོང་མ་དེ་དག་ལས་ལྡོག་སྟེ་བཤད་པའོ། །གཉིས་པ་ནི། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་པ་སྟེ། དེ་ཡང་གང་གིས་མཚོན་ན་ཡི་གེ་ཨ་ལི་ཀ་ལི་གཉིས་ལ་གི་གུ་འགྲེང་བུ་ན་རོའི་སྒྲ་བཏགས་ནས་ཚེག་ཤད་ཀྱིས་ཕྱེ་བ་ནི་ཡི་གེའི་ཚོགས་ལས་སྒྲ་འབྱུང་སྒྲ་འདུས་པ་ལས་མིང་གི་ཚོགས་བྱུང་ལ་མིང་འདུས་པ་ལ་བརྟེན་པའི་སྒོ་ནས་ཚིག་ཏུ་འདུས་པའོ། །ཇི་ལྟར་མཚོན་ན་ཚིག་ལ་བརྟེན་ནས་དོན་མཚོན་པར་བྱེད་དེ་ཚིག་གི་སྒྲོན་མེས་དོན་གྱི་གསེར་མཚོན་པ་ནི་དོན་གབ་པ་མུན་པའི་རྫས་དང་འདྲ་ཚིག་གིས་རབ་ཏུ་མཚོན་ཏེ་གསལ་བ་ནི་སྒྲོན་མེ་དང་འདྲ་བ་ཡིན་ནོ། །དེས་གང་མཚོན་པར་བྱེད་ཅེ་ན་ཁོང་ནས་གབ་སྦས་ཞེས་པ་གཞི་རང་བཞིན་གྱི་རྒྱུད་ལ་གབ་པ་ཀུན་ཏུ་བཟང་པོས་འབྱིན་ལ་ལམ་རྐྱེན་གྱི་རྒྱུད་ལ་སྦས་པའི་དོན་སློབ་དཔོན་གྱིས་འབྱིན་པ་ཡིན་ནོ། །དེ་ཡང་གཞི་རང་བཞིན་གྱི་རྒྱུད་ལ་གབ་པ་སེམས་ཉིད་ཡིན་ཏེ་ཁོང་ན་གབ། དེ་སྟོན་པའི་གདམས་ངག་ལམ་རྐྱེན་གྱི་རྒྱུད་ཡིན་ཏེ་ཡི་གེའི་རིས་སུ་སྦས་སོ། །ཚིག་དང་ཡི་གེའི་རྒྱུད་དེ་ཡང་དཀྱུས་ལ་གབ་སྟེ་བརྡ་ཆོད་དང་གཟུ་ལུམ་བྱེད་པ་རྣམས་ཀྱི་དོན་དུ་རྒྱུད་དཀྲུགས་པའོ། །དཀྲུགས་པ་དེའི་དོན་འདིར་ཕྱིན་ཅི་མ་ལོག་པར་བསྡུས་ནས་སྟོན་ནོ། །དེ་འབྱིན་པའི་ཁུངས་གང་ལ་ཐུག་ན་སྟོན་པ་ཀུན་ཏུ་བཟང་པོ་རྒྱུད་སྟོན་པའི་བདག་ཉིད་དམ་དཔལ་རྡོ་རྗེ་སེམས་དཔའ་རྒྱུད་འཆད་པའི་སྐྱེས་བུའམ་སློབ་དཔོན་སངས་རྒྱས་གསང་བ་བསྟན་བཅོས་རྩོམ་པའི་མཁན་པོ་གསུམ་གྱི་ཐུགས་ལ་གབ་པ་ནི་དེ་ལྟ་བུར་གནས་ཤིང་རགས་ལས་པས་ན་སློབ་དཔོན་མཉེས་པར་བྱ་དགོས་པའོ། །དེ་ཡང་དོན་ཏེ་གང་ལ་ཡོད་ན་སྟོན་པ་རྡོ་རྗེ་སོགས་ཀྱི་སྟོན་ལ། གང་གིས་འབྱིན་པ་ནི་ཁོང་ནས་གབ་སྦས་སོགས་དང་འབྱིན་པ་ལ་ཅི་དགོས་བརྟེན་པའི་ཚིག་སོགས་དང་དགོས་པ་དེ་གང་གིས་འགྲུབ་ཞེ་ན་ཡི་གེ་སྒྲ་བཏགས་སོགས་ཀྱིས་སྟོན་ནོ། །གསུམ་པ་ནི། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་བརྙེད་དོ། །ཀུན་གྱི་ཕྱག་རྒྱ་ཆེན་པོའི་རྒྱུ། །ཞེས་པ་སྟེ། རྒྱུད་གསང་བ་སྙིང་པོའི་མན་ངག་འདི་ནི་གསང་བ་ཆེན་པོ་བཞིས་ཆོད་པའི་གང་ཟག་གྲོལ་བའི་ཕྱིར་གསུངས་པས་དྲང་དོན་མ་ཡིན་པས་ངེས་པའི་དོན་གྱི་མན་ངག་འདི་བློ་དམན་པས་མི་རྟོགས་ཏེ་ཤིན་ཏུ་ཟབ་པའི་ཕྱིར་རོ། །འདི་ནི་ངེས་པའི་དོན་ཕྱིན་ཅི་མ་ལོག་པ་སྟོན་པ་སྟེ་དེ་ཡང་ད་ལྟར་རྒྱུའི་དུས་འདི་ཉིད་ན་འབྲས་བུ་སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པར་སྟོན་ཏེ་དེ་ཡི་དོན་རྟོགས་ནས་དེ་ཉིད་ལམ་དུ་ཕྱིན་པའི་ཕྱིར་རོ། །འབྲས་བུ་ནི་རྒྱལ་པོའི་ཕྲུ་གྲུའམ་ཤིང་སྣའི་མེ་དང་འདྲ་ལ་ལམ་དུ་གྱུར་པ་ནི་རྒྱུ་འབྲས་གཉིས་མེད་པ་ཡིན་པས་སོ། །དེ་བས་ན་འབྲས་བུ་རྡོ་རྗེའི་ཐེག་པ་ཞེས་པ་ཡིན་ནོ། །ཐོབ་བྱ་འདི་ཉིད་ཡིན་པས་འདི་ལ་འབད་པར་བསྟན་ནོ། །ཕྱོགས་བཅུ་དུས་གསུམ་གྱི་རྒྱལ་བའི་དཀྱིལ་འཁོར་མ་ལུས་པ་ལ་ཡང་མན་ངག་འདི་ལས་མ་གཏོགས་པའི་དགོས་པ་མེད་དེ་རྒྱལ་བ་ནི་འཁོར་བ་ལས་སོ་དཀྱིལ་ནི་བཛྲ་ཧེ་རུ་ཀའོ་འཁོར་ནི་རིགས་བཞིའི་ཧེ་རུ་ཀའོ་མ་ལུས་པ་ནི་ལྷག་མ་མ་ལུས་པའོ། །རྒྱལ་བ་ཐམས་ཅད་ཀྱང་མན་ངག་འདི་ལས་བྱུང་བ་དང་དེའི་ངང་ལ་བཞུགས་པའི་ཕྱིར་དང་འདི་ལས་ལྷག་པའི་གསང་བའི་ངེས་དོན་གཞན་མེད་དེ་མན་ངག་འདི་ཉིད་ལས་མི་འདའ་བ་ཡིན་ནོ། །མི་ལ་སོགས་པ་གཞན་གྱིས་བཙལ་ཀྱང་ལྟ་ཅི་སྨོས་ཏེ་འདི་ལས་ལྷག་པ་རྒྱལ་བའི་དཀྱིལ་འཁོར་དང་བཅས་པས་ཀྱང་མི་རྙེད་དོ། །དེ་བཞིན་གཤེགས་པ་ཀུན་གྱི་ཕྱག་རྒྱ་ནི་ཡབ་ཕྱག་རྒྱ་ཆེན་པོ་ཡུམ་དམ་ཚིག་གི་ཕྱག་རྒྱ་གཉིས་མེད་ཆོས་ཀྱི་ཕྱག་རྒྱ་འཕྲོ་འདུ་ལས་ཀྱི་ཕྱག་རྒྱ་དེ་ལས་མི་འདའ་བས་ན་ཕྱག་རྒྱ་དེ་ལྟ་བུའི་དབྱིངས་དང་ཡེ་ཤེས་གཉིས་སུ་མེད་པ་ཐོབ་ཅིང་བསྐྱེད་པའི་རྒྱུ་ཡིན་པས་ན་འདི་ལ་འབད་དོ། །བཞི་པ་ནི། ཐོས་བསམ་བསྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུངས། །སྣོད་ལྡན་དང་ཚུལ་བཟང་ལ་བསྟན། །ལུས་དང་ལོངས་སྤྱོད་གཏོང་ལ་སྦྱིན། །ཞེས་པ་སྟེ། དེ་ཡང་ཐོས་པའི་ཤེས་རབ་ཀྱི་དུས་སུ་སྣོད་ཁ་སྦུབ་ཀྱི་སྐྱོན་སྤང་བསམ་པའི་དུས་སུ་ཞབས་རྡོལ་སྤང་སྒོམ་པའི་དུས་སུ་དུག་ཅན་སྤང་དེ་ལྟ་བའི་རང་གི་ཤེས་རྒྱུད་སྦྱང་ངོ་། །འདིའི་དོན་འདོད་པའི་གང་ཟག་ནི་ཐུན་མོང་གི་ཐེག་པ་ལ་སྔོན་དུ་བློ་རབ་ཏུ་སྦྱངས་པ་བྱས་པའི་གང་ཟག་གཅིག་དགོས་པའོ་ཞེས་སྦྱངས་པས་སྣོད་དུ་གྱུར་པ་བསྟན། དེ་ལྟར་སྔོན་དུ་བློ་སྦྱངས་པས་སྒྲིབ་པ་ཐམས་ཅད་དག་ནས་བློ་རྣོ་བར་གྱུར་པ་དེས་འདི་རྟོགས་པས་ན་ཤེས་རབ་ཀྱི་མིག་ལྡན་ནམ་སྤྱན་དང་ལྡན་པ་རྣམས་ཀྱིས་འདི་ཟུངས་ཤིག་ཅེས་སྦྱིན་པའི་སྣོད་བསྟན། གཞན་སྦྱངས་པ་སྔོན་དུ་མ་སོང་བ་དང་བློ་དམན་པས་འདིའི་དོན་མི་རྟོགས་པས་བསྟན་པར་མི་བྱ་བའི་ཕྱིར་ན་སྣོད་དང་ལྡན་པ་ནི་སྐྱོན་མེད་པ་སྟེ་ལྡན་པ་ཆུ་སྲིན་གྲེ་བ་དང་འདྲ་སྟེ་མན་ངག་གསང་ཐུབ་པ་ངང་རིང་བ་ཆུ་བོའི་རྒྱུན་ལྟ་བུ་སྟེ་རྡོ་རྗེ་སློབ་དཔོན་དང་མཆེད་ལྕམ་དྲལ་དང་སེམས་ལ་ཁོང་ཁྲོ་བ་མེད་པ་དང་། ཚུལ་ཤིས་པ་དགེ་སློང་གསར་པ་ལྟ་བུ་སྟེ་སྒོ་གསུམ་སྐྱོན་གྱིས་མ་གོས་པ་དང་། རང་བཞིན་བཟང་བ་གསེར་ལྟ་བུ་སྟེ་ཐམས་ཅད་དུ་ཕྱོགས་རིས་མི་འབྱེད་པའི་སྙིང་རྗེ་ཆེན་པོ་དང་ལྡན་པ་སྟེ་ཀུན་ལ་ཁྱབ་པ་ཉི་མ་ལྟ་བུ་དང་། བློ་བརྟན་པ་རི་བོ་ལྟ་བུ་སྟེ་རྡོ་རྗེ་ཐེག་པ་འདིའི་སྒོར་ཞུགས་ནས་མདོ་སྡེ་ལོགས་སུ་མི་ལྡོན་པར་རིགས་བརྟན་ཞིང་མི་འགྱུར་བའོ་ཞེས་རང་བཞིན་གྱིས་སྣོད་དུ་རུང་བར་བསྟན་ནོ། །དེ་ལྟ་བུའི་གང་ཟག་ལ་བསྟན་པར་བྱའོ། །མེད་ན་རང་ལུས་འབུལ་བ་དང་ཡོད་ན་ལོངས་སྤྱོད་འབུལ་བ་སྟེ་རྡོ་རྗེ་སློབ་དཔོན་དང་མཆེད་དང་སེམས་ཅན་ཐམས་ཅད་ཀྱི་དོན་དུ་རང་གི་ལུས་སྲོག་ལ་ཡང་མི་ལྟ་བར་ལོངས་སྤྱོད་ལ་སོགས་པ་གཏོང་བ་དེ་ལྟ་བུ་ལ་མན་ངག་འདི་སྦྱིན་པར་བྱའོ། །དེ་སྐད་དུ་ཡང་སྙིང་པོ་ལས། རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །ཅེས་སོ། །དེས་ནི་རྐྱེན་གྱིས་སྣོད་དུ་རུང་བ་བསྟན་ནོ། །ལྔ་པ་ནི། གཞན་དུ་ནམ་ཡང་སྦྱིན་མི་བྱ། །རྨོངས་ལ་འཕྱར་བས་གལ་ཏེ་སྦྱིན། །དུས་མིན་པར་ནི་སྲོག་ཟད་ནས། །བསྲེགས་དང་སྦྲེབས་ལ་ཡུན་རིང་གནས། །ཞེས་གསུངས་ཏེ། གོང་དུ་བསྟན་པའི་སྣོད་དང་ལྡན་པ་དེ་ལས་གཞན་དུ་མཚན་ཉིད་དེ་དག་མེད་པ་ལ་མན་ངག་འདི་ནམ་ཡང་སྦྱིན་པར་མི་བྱ་སྟེ་སྣོད་ངན་ན་བུ་ལ་ཡང་མི་སྦྱིན་ནོ། །གོང་ལས་ཟློག་པས་བཤད་དེ། ཐོས་བསམ་སྒོམ་ལ་མ་སྦྱངས་དང་། །ཤེས་རབ་མིག་དང་མི་ལྡན་ཞིང་། །ཞེས་བྱའོ། །གལ་ཏེ་སློབ་མ་བློ་མ་སྦྱངས་པས་གཏི་མུག་གིས་ཤེས་རབ་རྨོངས་པ་དག་ལ་སློབ་དཔོན་འཕྱར་བས་ཐེག་པ་ཆུང་རྒྱུན་གྱི་མན་ངག་སྦྱིན་རྒྱུ་མེད་པས་གལ་ཏེའམ་རྒྱ་ལམ་ན་སྦྱིན་པར་བྱས་ན་དེའི་ཉེས་པ་ནི་འཆི་བའི་དུས་མིན་པར་ནི་འཆི་བའི་དུས་བྱས་ནས་མ་མོ་དང་མཁའ་འགྲོ་མ་རྣམས་ཀྱིས་ཆད་པ་བཅད་དེ་སྲོག་ཟད་ནས་བེམ་རིག་བྲལ་བར་འགྱུར་རོ། །ཤི་ནས་ཡང་བསྲེགས་པ་ཚ་བའི་དམྱལ་བ་བརྒྱད་དང་གྲང་བའི་དམྱལ་བ་བརྒྱད་དང་སྦྲེབས་པ་སྟེ་ཡི་དྭགས་ཕྱི་ནང་གི་སྒྲིབ་པ་ཅན་དང་སྒོས་ཁུར་གྱི་སྒྲིབ་པ་ཅན་དུ་སྐྱེ་ལ་དེར་ཡུན་རིང་པོ་བསྐལ་པ་དུ་མ་དང་སྟོང་ཕྲག་མང་པོར་གནས་པའི་ཕྱིར་ན་སུ་ལ་ཡང་མི་སྦྱིན་ནོ། །དྲུག་པ་ནི། གང་ཞིག་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། དངོས་གྲུབ་ཡ་མཚན་ཆེན་པོར་འགྱུར། །ཞེས་པ་སྟེ། རྒྱ་གར་གྱི་གླང་པོ་ཆེ་སྨྱོན་པ་ནི་ཆོས་གསུམ་དང་ལྡན་པ་སྟེ་གནས་མ་ཡིན་པར་གནས་པ་རྒྱུ་ས་མ་ཡིན་པར་རྒྱུ་བ་བྱེད་དུ་མ་བཅུག་པའི་ལས་བྱེད་པའོ། །དེ་ཡང་གནས་མ་ཡིན་པས་གནས་ཏེ་གྲོང་ཡུལ་དུ་སྡོད་རྒྱུ་བ་མ་ཡིན་པར་རྒྱུ་སྟེ་ལམ་སྲང་དང་གྲོང་བར་དུ་རྒྱུ་བྱ་བ་མ་ཡིན་པའི་ལས་བྱེད་དེ་གྲོང་ཁྱེར་བཤིག་གོ། །དེ་དང་རང་གི་སེམས་འདྲ་སྟེ་གནས་མ་ཡིན་པར་གནས་ཏེ་བདག་འཛིན་ལ་གནས་འགྱུ་བ་མ་ཡིན་པར་འགྱུ་སྟེ་གཟུང་འཛིན་ལ་འགྱུ་བྱེད་དུ་མ་བཅུག་པའི་ལས་བྱེད་དེ་འདོད་ཆགས་ཞེ་སྡང་ལ་སོགས་པའི་ལས་བྱེད་དོ། །དེ་ཡང་གླང་པོ་ཆེ་དེ་འདུལ་བའི་དུས་སུ་ཁོ་རྒྱུ་བའི་ལམ་སྲང་ངམ་གྲོག་པོར་དོང་བརྐོས་ཏེ་དེར་རྒུན་འབྲུམ་གྱི་ཆང་བླུགས་ཏེ་བཞག་པས་ཁོ་རྒྱུ་བའི་དུས་སུ་ཚོར་ཏེ་འཐུང་ནས་མྱོས་ནས་འགྲོ་བ་དེ་ལ་སྣ་ནས་ལྕགས་ཀྱུས་བཟུང་ནས་སྙན་པའི་ཚིག་གླུ་གར་ལ་སོགས་པ་བྱས་སྟེང་དུ་བཞོན་ནས་ཐོ་བས་དལ་བུས་བརྡེགས་ནས་ཞག་བཅུ་གཅིག་བཀུག་པས་ཐུལ་ལོ། །དེ་ནས་རང་གི་སྲིད་བསྲུང་བ་དང་དགྲའི་དཔུང་གཞོམ་པ་ལ་སོགས་པའི་ཡོན་ཏན་འབྱུང་ངོ་། །དེ་བཞིན་དུ་རྣལ་འབྱོར་པ་གང་ཞིག་གིས་གླང་ཆེན་མྱོས་པ་དང་འདྲ་བའི་རང་གི་སེམས་དེ་རྒུན་ཆང་དང་འདྲ་བའི་ཏིང་ངེ་འཛིན་གསུམ་ལ་བློ་མཉམ་པར་གཞག་པས་བཏུལ་ནས་སུ་ལྕགས་ཀྱུ་དང་འདྲ་བའི་རྒྱུ་མ་ནོར་བ་རྩ་བའི་སྔགས་ལ་སོགས་པའི་སྔགས་གསུམ་བརྟན་པ་དང་ཕྱག་རྒྱ་བཞི་རབ་ཏུ་བརྟན་པར་བྱ་སྟེ་མངོན་དུ་བྱས་ན་རང་གི་རྟོག་ཚོགས་ལྷའི་དལ་དུ་ཤར་བས་མཆོག་དང་ཐུན་མོང་གི་དངོས་གྲུབ་ཡ་མཚན་ཆེན་པོར་འབྱུང་བར་འགྱུར་རོ། །དེ་བས་ན་མཉམ་པར་བཞག་ཅེས་སོ། །བདུན་པ་ནི། དུར་ཁྲོད་ཆེན་པོ་རབ་དབེན་པའི། །རི་བོས་བསྐོར་བའི་ལྕུག་མ་དང་། །མེ་ཏོག་འཕྲེང་བས་བརྒྱན་པ་ཡི། །དབེན་པའི་གནས་སུ་འདུ ག་ནས་ནི། །ཞེས་པའི་དོན། གནས་ལ་བཞི་སྟེ་ཕྱི་ཡུལ་གྱི་གནས་དང་སྦྱར་ཏེ་བཤད་པ་དང་ནང་ལུས་ཀྱི་གནས་དང་སྦྱར་ཏེ་བཤད་པ་དང་གསང་བ་ཡུམ་གྱི་གནས་དང་སྦྱར་ཏེ་བཤད་པ་དང་དེ་ཁོ་ན་ཉིད་རྩའི་གནས་དང་སྦྱར་ཏེ་བཤད་པའོ། །དང་པོ་ལྟར་ན་དུར་ཕུང་པོའི་གླིང་ལ་ཁྲོད་བམ་གྱི་ཀློང་སྟེ་མི་རོ་གསར་རྙིང་མང་པོ་གནས་པའོ། །ཆེན་པོ་ནི་དུར་ཁྲོད་ཆེན་པོའི་གནས་བརྒྱད་ལྟ་བུའོ། །རབ་དབེན་པ་ནི་བསམ་གཏན་གྱི་འདུ་འཛི་ལས་དབེན་པ་དང་། དམ་རྫས་སྐྱེ་བོ་ལས་དབེན་པ་དང་། འཇིགས་པ་དགྲ་རྐུན་ལས་དབེན་པ་དང་། བར་ཆད་རྐྱེན་བགེགས་ལས་དབེན་པའི་གནས་སོ། །རི་བོས་བསྐོར་བ་ནི་གནས་དེའི་མཐའ་མ་རིས་བསྐོར་བས་དགྲས་མི་ཚུགས་པ་དང་ལྕུག་མ་ལྗོན་ཤིང་གི་ནགས་ཚལ་ཡོད་པ་དང་མེ་ཏོག་གི་སྣམ་བུ་བར་མ་ཆད་པའི་འཕྲེང་བས་བརྒྱན་པ་ཡི་གནས་དཔག་ཚད་དང་རྒྱང་གྲགས་ལས་དབེན་པའི་གནས་ཏེ་ནང་ནམ་མཁའ་གྲུ་གསུམ་མམ་ཤར་རི་མཉམ་པ་ལྷོ་རི་གཞོལ་བ་ནུབ་རི་མཐོ་བ་བྱང་རི་འདུད་ལ་བསྐོར་བ་ཤིང་ཙནྡ་ལ་སོགས་པ་དྲི་ཞིམ་པ་ཡོད་པ་དེ་ལྟ་བུའི་གནས་སུ་འདུག་ནས་ནི། ས་ཆོག་བྱ་མ་ཊ་དྷ་ལ་བྱ་སྟ་གོན་བྱ་དམ་རྫས་དགྲམ་སྔོན་འགྲོ་གནས་སྐབས་དང་སྦྱར་རོ། །ནང་ལུས་ཀྱི་གནས་དང་སྦྱར་ཏེ་བཤད་ན་རང་གི་ལུས་ཉིད་དུར་ཁྲོད་ཀྱི་གནས་བརྒྱད་དེ་ཡན་ལག་ལྔ་མཚན་མ་དང་དྲུག་ཁོག་པ་དང་བདུན་ནང་རོལ་དང་བརྒྱད་དོ། །ལུས་ཏེ་གཞན་དབང་དུ་མ་སོང་བས་དབེན་པ་དང་། ཁོག་པ་རི་བོ་དང་འདྲ་བ་ལ་ཡན་ལག་གིས་བསྐོར་བས་སོ། །སྐྲ་དང་སྤུ་ནི་ལྕུག་ཕྲན་ནོ། །མིག་ལ་སོགས་པའི་དབང་པོ་ལྔ་ནི་མེ་ཏོག་གོ། །ལུས་འཛིན་པ་དང་བྲལ་བས་བདེ་བའི་གནས་སུ་གྱུར་པ་དེར་རྣམ་པར་ཤེས་པའི་ཚོགས་བརྒྱད་འདུས་ལ་ཡེ་ཤེས་ལྔའི་ཁྲོ་བོ་སྒྲུབ་པར་བྱའོ། །དེར་ཀུན་གཞིའི་རྣམ་པར་ཤེས་པ་མནྜལ་དུ་བྱས། རྣམ་པར་ཤེས་པའི་ཚོགས་བརྒྱད་ཀྱི་ཐིག་གདབ། ཕུང་པོ་ཉོན་མོངས་པ་ལྔའི་དམ་རྫས་བཀྲམ། ཡེ་ཤེས་ལྔའི་ལྷ་སྒོམ་མོ། །གསང་བ་ཡུམ་གྱི་མཁའ་དང་སྦྱར་ཏེ་བཤད་ན་མཁའ་ནི་དུར་ཁྲོད་དེ་དུར་ནི་བྱང་སེམས་སྡུད་པའོ། །ཁྲོད་ནི་བྱང་སེམས་འབྱིན་པའོ། །དབེན་པ་ནི་རྩ་ཁ་ཁ་མུ་ཁའི་སྣ་རྩེ་ཨ་བ་དྷུ་ཏི་ནས་སོར་གཅིག་གིས་དཔག་པའོ། །རི་བོ་ནི་ཡུམ་གྱི་སྣ་རྩེའོ་བསྐོར་བ་ནི་རྩ་སྟེ་རྩའི་མདུད་པ་བརྒྱད་དུ་གནས་པའོ། །མེ་ཏོག་ནི་ཡུམ་གྱི་པདྨ་རཀྟའོ། །ལྕུག་མ་ནི་བ་སྤུ་རིང་པོའི་གནས་ནི་ཡུམ་མཁའ་ཕྱི་ཁྱམས་གྲུ་བཞི་རྒྱས་པ་སྐྱེ་གནས་ཟླ་གམ་དབང་སྣ་ཚོགས་འདུད་པ་ཟླུམ་པོ་ཞི་བ་སྣ་རྩེ་ཟུར་གསུམ་སྲོག་གནས་དེར་གསང་བའི་རྡོ་རྗེ་འདུག་ནས་ས་བླང་བ་ལྟ་བུའི་གཡའ་བླང་། ས་ཆོག་ལྟ་བུའི་རྩ་བཙལ་དཀྱིལ་འཁོར་འབྲི་བ་ལྟ་བུའི་སྦྱོར་བའི་བརྡས་བསྐུལ་ལ་རོལ་བས་སྒྲུབ་པ་བྱ་དངོས་གྲུབ་ཡུམ་གྱི་མཁའ་ལ་བླང་གསང་བའི་དབང་བསྐུར་འབྲས་བུ་ལྷན་ཅིག་སྐྱེས་པའི་ཡེ་ཤེས་ངོས་བཟུང་ངོ་། །དེ་ཁོ་ན་ཉིད་རྩ་དང་སྦྱར་ཏེ་བཤད་ན་དུར་ཁྲོད་ནི་ལུས་ན་རྩ་སྟོང་ཕྲག་བདུན་ཅུ་རྩ་བཞིའོ། །རི་བོ་ནི་སྙིང་ངོ་བསྐོར་བ་ནི་རྩ་འཁོར་ལོ་བཞིའོ། །ལྕུག་མ་ནི་རྩའོ་མེ་ཏོག་ནི་རྩའི་ནང་གི་ཐིག་ལེའོ། །གནས་ནི་སྐྱིལ་ཀྲུང་བཅའ་བའོ། །ང་འདུག་ནས་ནི་གཏུམ་མོ་སྦར་ཏེ་ནམ་མཁའི་བ་བཞོ་བར་བྱའོ། །དེ་ལྟར་བསྟན་པའི་གནས་བཞི་པོ་དེའི་དགོས་པ་ནི་ཕྱི་བསྐྱེད་རིམ་སྒོམ་པའི་གནས་དང་ནང་རྫོགས་རིམ་སྒོམ་པའི་གནས་དང་གསང་བ་གསང་དབང་བསྐུར་བའི་གནས་དང་རྩ་གནས་གསང་དབང་དང་རྫོགས་རིམ་ལ་དགོས་པའི་གནས་ཡིན་ནོ། །གཉིས་པ་གཞུང་དོན་དངོས་ལ་དཀྱིལ་འཁོར་ཇི་ལྟར་སྒྱུབ་པའི་ཚུལ་བསྟན་པ་དང་། དག་མཉམ་བདེན་པ་དབྱེར་མེད་རང་བཞིན་ལྷུན་གྲུབ་ཀྱི་དཀྱིལ་འཁོར་བསྟན་པ་གཉིས་ལས་དང་པོ་ལ་ཏིང་ངེ་འཛིན་གྱི་དཀྱིལ་འཁོར་བསྐྱེད་པ་དང་། ཡེ་ཤེས་ཀྱི་དཀྱིལ་འཁོར་སྤྱན་དྲངས་པ་ལ་སོགས་པ་དང་། དེ་ཉིད་ཚོགས་སྒྲུབ་ཀྱི་སྒོ་ནས་སྒྲུབ་ཚུལ་བསྟན་པ་དང་། མཇུག་གི་ལས་བསྟན་པ་དང་བཞི་ལས། དང་པོ་ལ་ལྔ་སྟེ། སྒྱུ་འཕྲུལ་དྲྭ་བའི་ཏིང་འཛིན་སྒོམ་པའི་དགོས་པ་བསྟན་པ་དང་། བྱང་ཆུབ་མཆོག་ཏུ་སེམས་བསྐྱེད་པ་དང་། ཏིང་འཛིན་གསུམ་དང་ལྡན་པས་རྒྱུའི་ཧེ་རུ་ཀ་སྒོམ་པ་དང་། དཀྱིལ་འཁོར་དངོས་སྒོམ་པ་དང་། བསྒོམས་པའི་ཆེ་བ་བསྟན་པའོ། །དང་པོ་ནི། འཛིན་པའི་དབང་གིས་སྡུག་བསྔལ་ཞིང་། །གདུག་པས་སྲིད་གསུམ་འདུལ་བ་ཡི། །ང་རྒྱལ་ཆེན་པོ་བསྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་སྒོམ། །ཞེས་པ་སྟེ། སྔོན་བྱུང་གི་དུས་ན་བསྐལ་པ་ཀུན་བཀོད་བྱ་བ་ལ་ཞིང་ཁམས་མངོན་པར་དགའ་བ་ཞེས་བྱ་བ་བྱུང་། དེ་ལ་སློབ་དཔོན་དགེ་སློང་ཐུབ་དཀའ་གཞོན་ནུ་བྱ་བ་ལ་སློབ་མ་དགེ་སློང་ཐར་པ་ནག་པོ་བྱ་བ་དང་དེའི་གཡོག་དན་ཕག་བྱ་བས་ཆོས་ཉན་པས། དགེ་སློང་ལགས་ན་ཁྱོད་ཐེག་པ་ཆེན་པོ་གསང་སྔགས་ཀྱི་ཆོས་ལ་མཁས་པར་གྲགས་ན་སྔགས་ཀྱི་ལུགས་ཀྱི་ཉོན་མོངས་པ་ལྔ་འཇོལ་ཉོག་ཏུ་སྤྱད་ནས་སངས་རྒྱས་པའི་ལམ་མཆིས་སམ་ཞེས་ཞུས་པས། མཆིས་གསུངས་ནས་བཤད་པ། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་བཅས་ཀྱང་། །ནམ་མཁའ་ལ་ནི་སྤྲིན་དེངས་བཞིན། །རྣལ་འབྱོར་དེ་ཉིད་དམ་པའི་ལམ། །ཞེས་བཤད་པས་དགེ་སློང་ཐར་པ་ནག་པོས་མ་རྟོགས་ཏེ་ཕྱི་གཟུང་བའི་ཡུལ་ལ་ནང་འཛིན་པའི་སེམས་ཀྱིས་བཟུང་བས་དེ་གཉིས་ཀྱིས་ཕྱིན་ཅི་ལོག་ཏུ་བལྟས་ནས་གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་འཆོལ་ནས་གསང་སྔགས་ལོག་པར་སྤྱད་པའི་དབང་གིས་རྡོ་རྗེ་དམྱལ་བར་བསྐལ་པ་སྟོང་ཕྲག་བཅུ་གཉིས་སུ་ཚ་བ་དང་གྲང་བའི་སྡུག་བསྔལ་ཉམས་སུ་མྱོང་བ་དང་དེ་ལས་ཐར་ནས་ཡི་དྭགས་བཀྲེས་སྐོམ་གྱི་སྡུག་བསྔལ་བསྐལ་པ་སྟོང་ཕྲག་དྲུག་ཏུ་ཉམས་སུ་མྱོང་ཞིང། དེ་ལས་ཐར་བ་དང་ལས་ཀྱི་སྲིན་པོ་བྱའི་གཤོག་པ་ཅན་དུར་ཁྲོད་ཀྱི་བདག་པོ་ཆེན་པོར་སྐྱེས་ནས་རུ་ཏྲའི་ལུས་ངག་ཡིད་གསུམ་གདུག་པའི་མཐུས་གཟུགས་ཀྱི་སྲིད་པ་དང་འདོད་པའི་སྲིད་པ་དང་གཟུགས་མེད་པའི་སྲིད་པ་གསུམ་དབང་དུ་བསྡུས་པའོ། །སྲིད་གསུམ་འཇོམས་པའི་རུ་ཏྲ་དེ་འདུལ་བ་ཡི་ཕྱིར་དེ་བཞིན་གཤེགས་པ་རྣམས་བཀའ་བགྲོས་ནས་བཅོམ་ལྡན་འདས་ལ་འདུལ་བར་བསྒོ་བས་མ་ཐུལ། དཔལ་རྟ་མགྲིན་ལ་བགོ་བས་མ་ཐུལ་ནས་དཔལ་ཆེན་པོ་ལ་འདུལ་བར་ཞུས་པས་ཐུལ་ལོ། །སྔོན་འབྱུང་དེ་བཞིན་དུ་བཏུལ་བ་ལྟར་ད་ལྟར་གྱི་བསྒྲལ་བའི་ཞིང་བཅུ་འདུལ་ན་དཔལ་ཆེན་པོའི་ང་རྒྱལ་སྐུ་ཆེ་བའི་གཟི་བརྗིད་ཆེན་པོ་བསྟན་པའི་ཕྱིར་ན་སྒྱུ་འཕྲུལ་དྲྭ་བའི་ཏིང་འཛིན་བསྒོམ་མོ། །དེ་བསྒོམས་པས་གཟུང་འཛིན་གྱི་རྟོག་པ་ཞི་སྟེ་ལུས་ངག་ཡིད་གསུམ་དེ་བཞིན་གཤེགས་པའི་སྐུ་གསུང་ཐུགས་སུ་བྱའོ། །གཉིས་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པ་སྟེ། ཨེ་མའོ་ནི་དོན་དམ་པ་ལ་ངོམས་པ་སྟེ་དོན་དམ་སྐྱེ་མེད་ཆོས་ཀྱི་དབྱིངས་རྟོགས་པའོ། །ངོ་མཚར་ནི་ཀུན་རྫོབ་ལ་ངོམས་པ་སྟེ་ཀུན་རྫོབ་ཡེ་ཤེས་དཔལ་གྱི་སྐུ་བྱུང་བའོ། །རྨད་ཀྱི་ཆོས་ནི་དབྱེར་མེད་པ་ལ་ངོམ་པ་སྟེ་དབྱིངས་དང་ཡེ་ཤེས་གཉིས་སུ་མེད་པའོ། །དེ་བས་ན་ངོ་མཚར་བའོ། །དེ་གང་གི་སྤྱོད་ཡུལ་ཡིན་ན་རྫོགས་པའི་སངས་རྒྱས་ཀྱི་སྤྱོད་ཡུལ་ཡིན་ཏེ་རྫོགས་པ་ནི་ཚོགས་གཉིས་རྫོགས་པའོ། །སངས་པ་ནི་འཁོར་བའི་སྐྱོན་དུག་ལྔ་སངས་པའོ། །རྒྱས་པ་ནི་ཆེ་བའི་ཡོན་ཏན་ཡེ་ཤེས་ལྔ་རྒྱས་པའོ། །ཀུན་གྱི་ནི་ཕྱོགས་བཅུ་དུས་བཞིའི་སངས་རྒྱས་ཐམས་ཅད་དོ། །གསང་བ་ནི་སྤྱོད་ཡུལ་མ་ཡིན་པ་ལ་གསང་ངོ་། །དོན་དམ་པར་རང་བཞིན་གྱི་སྐྱེ་བ་མེད་པ་ལས་ཀུན་རྫོབ་ཏུ་ཆོས་ཐམས་ཅད་སྐྱེས་པ་མ་འགགས་པར་སྒྱུ་མའི་མཚན་ཉིད་ཅིར་ཡང་སྣང་བ་དང་། དེ་ལྟར་ཀུན་རྫོབ་ཏུ་སྐྱེས་པ་ཉིད་ན་དོན་དམ་པར་སྐྱེ་བ་མེད་པས་བདེན་པ་གཉིས་ཀ་རང་གི་ངོ་བོས་དབྱེར་མེད་པ་ནི་དབྱེར་མེད་འདུས་མ་བྱས་པའོ། །གསུམ་པ་ནི། ཨེ་མ་ཀུན་ཏུ་བཟང་པོ་ཡི། །བདེ་ཆེན་སྤྲོས་མེད་ཐིག་ལེ་ལས། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་པར་བྱ། །ཞེས་པ་སྟེ། ཨེ་མ་ངོ་མཚར་བ་སྟེ་མ་བཙལ་མ་སྒྲུབ་པར་འབྱུང་བ་ནི་ངོ་མཚར་ཏེ་དེ་ཀ་ཀུན་ཏུ་བཟང་པོ་ཡི་དགོངས་པའོ། །བདེ་ཆེན་ནི་དེ་བཞིན་ཉིད་དོ། །སྤྲོས་མེད་ནི་ཆོས་ཀྱི་དབྱིངས་སོ། །ཐིག་ལེ་ནི་སྤྲོས་པའི་མཐའ་ཐམས་ཅད་དང་ངང་གིས་བྲལ་བར་གནས་པའོ། །དེ་ལས་སྟོང་པ་ཉིད་དུ་རབ་ཏུ་གསལ་བའི་ཚུལ་ནི་གཟུང་འཛིན་གྱི་སྟོང་པ་ཉི་ཚེ་བ་མ་ཡིན་ཏེ་ཆོས་ཐམས་ཅད་ཀྱི་ངོ་བོ་ཉིད་དུ་ལྷུན་གྱིས་གྲུབ་པ་ཉིད་རང་སྣང་ནམ་མཁའ་ལྟ་བུའོ། །སྙིང་རྗེའི་ཡུལ་དེ་ལྟར་མ་རྟོགས་པའི་སེམས་ཅན་རྣམས་ལ་ནི་སྙིང་རྗེ་བུ་གཅིག་པའི་མ་ལྟ་བུར་ཁྱབ་པར་བསྒོམ་པར་བྱ་བ་ནི་འགྲོ་དོན་གྱི་སྔོན་དུ་སྙིང་རྗེ་འགྲོ་བ་སྟེ་སྙིང་རྗེ་མེད་པར་གཞན་དོན་མི་ཡོང་ངོ་། །སྙིང་རྗེ་སྒྱུ་མ་དེ་ལས་རང་རིག་པ་ཡི་གེ་ཧཱུྃ་མཐིང་ནག་ཏུ་བྱུང་དེ་ཡང་ཁ་དོག་ངེས་པ་མཐིང་ཀ་དབྱིབས་ངེས་པ་ཧཱུཾ་ངོ་། །ཧཱུྃ་དེ་ངེས་པར་གསལ་བ་ལས་ཐུགས་གཉིས་སུ་མེད་པའི་ཡེ་ཤེས་རིག་སྟོང་ཡེ་ཤེས་ཀྱི་རྡོ་རྗེ་ཆེ་བའི་བདག་ཉིད་རྡོ་རྗེ་རུ་གསལ། རྡོ་རྗེ་དེ་འཕྲོ་འདུས་པ་ལས་སྐུ་རགས་པ་དཔལ་ཆེན་པོ་ཧེ་རུ་ཀ་ཞལ་གཅིག་ཕྱག་གཉིས་པ་གཡས་རྡོ་རྗེ་གཡོན་ཐོད་པ་བསྣམས་པའོ། །འབར་བ་ཆེན་པོ་ནི་བདག་དོན་དུ་རྟོགས་པ་འབར་བ་དང་གཞན་དོན་དུ་ཐུགས་རྗེ་འབར་བའོ། །གར་དགུ་ཡི་རང་བཞིན་ནི་སྐུ་སྒེག་པ་དཔའ་བ་འཇིགས་སུ་རུང་བའོ། །གསུང་རྒོད་པ་གཤེ་བ་འཇིགས་པར་སྒྲོགས་པའོ། །ཐུགས་སྙིང་རྗེ་རྔམ་པ་ཞི་བའོ། །དེའི་ཐུགས་ཀ་ཡེ་ཤེས་སེམས་དཔའ་དཔལ་བེའུ་རྡོ་རྗེའི་ལྟེ་བ་ལ་ཧཱུྃ་དེ་ལས་བསྐྱེད་པའི་རྒྱུ་བྱའོ། །སྐུ་དེ་ལས་བསྐལ་པ་འཇིག་པ་ཡི་ནི་དུས་ཀྱི་མེ་ལྟར་འབར་བར་གྲགས་པའོ། །དེ་ལྟ་བུའི་ཏིང་འཛིན་གསུམ་པོ་འདི་ལ་ཆོས་རྣམ་པ་དགུ་སྟེ་སྦྱང་གཞི་རྣམ་པ་གསུམ་དང་། སྦྱོར་བྱེད་གསུམ་དང་། སྦྱང་ཐབས་གསུམ་མོ། །སྦྱང་གཞི་གསུམ་ནི་ཤི་བ་དོན་དམ་པའི་བདེན་པས་སྦྱང་བ་དང་། སྐྱེ་བ་བར་མ་དོ་སྒྱུ་མ་ལྟ་བུར་སྦྱང་བ་དང་། སྐྱེས་པ་ཀུན་རྫོབ་རགས་པ་སྦྱང་བའོ། །དེ་བས་ན་སྦྱང་གཞི་ཤི་བ་དང་བར་དོ་དང་སྐྱེས་པ་གསུམ་ལས་མེད་དོ། །སྦྱོང་བྱེད་གསུམ་ནི་ཤི་བ་སྦྱོང་བ་དེ་ཏིང་བར་དོ་སྦྱོར་བ་ཀུན་སྣང་སྐྱེས་པ་སྦྱོར་བ་ཀུན་ཏིང་ངོ་། །སྦྱང་ཐབས་གསུམ་ནི། དེ་བཞིན་ཉིད་སྟོང་པ་ཉིད་དུ་སྒོམས་པས་ཤི་བ་དྲན་སེམས་མ་སྐྱེས་པ་དེ་ཆོས་སྐུར་སྦྱངས་དེ་འབྱོངས་ན་ཆོས་སྐུ་འཐོབ། ཀུན་ཏུ་སྣང་སྙིང་རྗེ་སྒྱུ་མ་ཙམ་དུ་སྒོམས་པས་བར་དོའི་རིག་པ་གྱ་གྱུ་དེ་ལོངས་སྐུར་སྦྱངས་དེ་འབྱོང་ན་ལོངས་སྐུ་འཐོབ། །རྒྱུའི་ཏིང་ངེ་འཛིན་ཆོ་ག་གསུམ་ལས་རྒྱུའི་ཧེ་རུ་ཀར་སྒོམ་དེ་འབྱོངས་ནས་སྤྲུལ་སྐུ་འཐོབ། དེ་བས་ན་ཐེག་པ་ཆེན་པོ་སྦྱོང་ཐབས་ཏེ་ཆོས་སྐུ་ནམ་མཁའ་དང་འདྲ་སྟེ་སྟོང་ལོངས་སྐུ་ཉི་མ་དང་འདྲ་སྟེ་སྣང་སྤྲུལ་སྐུ་ཅིར་ཡང་མ་ངེས་པར་དོན་བྱེད་པ་ཡིན་ནོ། །བཞི་པ་དཀྱིལ་འཁོར་དངོས་སྒོམ་པ་ལ་རྟེན་གཞལ་ཡས་ཁང་སྒོམ་པ་དང་། བརྟེན་པ་ལྷ་སྒོམ་པ་གཉིས་ལས། དང་པོ་ལ་གཉིས་ཏེ་བསྐྱེད་པའི་སྔགས་དང་། དེ་ལས་གཞལ་ཡས་ཁང་དངོས་སུ་བསྐྱེད་པའོ། །དང་པོ་ནི། བྷཱུྃ་བི་ཤྭ་བི་ཤུདྷེ། ཞེས་པས་བསྟན། བྷྲཱུྃ་ནི་གཞལ་ཡས་ཁང་གི་རྒྱུའོ་བི་ཤྭ་ནི་སྣ་ཚོགས་རྣམ་པར་དག་པ་བི་ཤུད་དྷེ་ནི་དག་བྱེད་གཞལ་ཡས་ཁང་བསྐྱེད་པའོ། །དེ་ཡང་ཇི་ལྟ་ཞེ་ན། གཉིས་པ་གཞལ་ཡས་ཁང་དངོས་སུ་བསྐྱེད་པ་ལ། གང་དུ་བསྐྱེད་པའི་གནས་ཀྱི་ཁྱད་པར་དང་། གཞལ་ཡས་ཁང་གི་རང་བཞིན་དང་། རྒྱན་དང་། གདན་བསྐྱེད་པའོ། །དང་པོ་ནི། དུར་ཁྲོད་ཆེན་པོ་རབ་འཇིགས་པ། །ཁྲག་གི་རྒྱ་མཚོ་འཁྲུལ་པའི་དཀྱིལ། །ཀེང་རུའི་ཆེན་པོའི་རི་རབ་ཀྱི། །སྟེང་གི་འབར་བའི་ཀློང་དཀྱིལ་ན། །ཞེས་པ་སྟེ། སེམས་ཅན་སྐྱེ་བའི་རིམ་པ་དང་སྦྱར་ནས་བསྐྱེད་པ་ནི་ནང་པའི་ལུགས་ཏེ། དེ་ལ་ཞི་བ་བསྐྱེད་པ་ནི་ལྷ་གཞལ་ཡས་ཁང་ནས་འདོད་པའི་ལོངས་སྤྱོད་ལ་རྩེ་བའི་ཚུལ་ཡིན་ལ་ཁྲོ་བོའི་གནས་སྐབས་འདིར་ནི་དཔེར་ན་མནར་མེད་པའི་སེམས་ཅན་དམྱལ་བའི་ལྕགས་ཀྱི་ཁང་སྒྲོམ་འབར་བ་ན་དམྱལ་སྲུངས་བསད་བཅད་ཀྱི་ལས་བྱེད་པ་དང་ཆ་བསྟུན་ཏེ་བསྐྱེད་པ་ཡིན་པས་དབང་དྲག་གི་གཞལ་ཡས་ཁང་དུར་ཁྲོད་ཀྱི་ཁང་པ་ན་དཔལ་ཆེན་པོ་ཡབ་ཡུམ་འཁོར་དང་བཅས་པ་དམྱལ་སྲུང་ངམ་སྲིན་པོ་ལྟར་སྒོམ་མོ། །སྤྱིར་སེམས་ཅན་གྱི་བྱེད་སྤྱོད་དང་སངས་རྒྱས་ཀྱི་མཛད་སྤྱོད་གཉིས་ཆ་མཐུན་དུ་བྱ་སྟེ་ཉོན་མོངས་པ་གནས་བསྒྱུར་ཐ་མལ་བའི་རྟོག་པ་བཅོམ་ནས་སྒྲིབ་པ་གཅོད་པ་ཡིན་ནོ། །སེམས་ཅན་ལས་ལོགས་སུ་བྱ་རྒྱུ་མེད་དོ་དེ་ནི་མན་ངག་གོ། །དེ་ལ་གཞལ་ཡས་ཁང་གི་རྒྱུ་ནི་དུར་ཁྲོད་དེ་ཕྱིའི་དུར་ཁྲོད་རོ་བཞི་བསྐྱལ་བ་ཡན་ཆད་དེ་དུར་ཁྲོད་ཆེན་པོ་ཡི་གནས་བརྒྱད་དང་། ནང་གི་དུར་ཁྲོད་ལུས་ཀྱི་གནས་བརྒྱད་དང་གསང་བའི་དུར་ཁྲོད་ནི་དཔལ་ཆེན་པོའི་ཐུགས་ཡེ་ཤེས་ལ་རྣམ་རྟོག་སྤྲིན་དང་བྲལ་བའོ། །གདུག་པ་ཐམས་ཅད་འདུལ་བའི་རྟགས་སུ་རབ་ཏུ་འཇིགས་པར་གནས་པའོ། །དུར་ཁྲོད་དེའི་སྟེང་དུ་ར་དམར་པོ་ལས་ཁྲག་གི་རྒྱ་མཚོ་དམར་ནག་ཏུ་འཁྲུགས་པའོ། ། དེ་ཡང་རྟགས་ནི་ཁྲག་ཆགས་པ་རྣམ་པ་གཉིས་དང་ལྡན་པའོ། །དོན་ནི་ཡེ་ཤེས་གཅིག་ལས་ཡེ་ཤེས་མང་པོ་དང་ལྡན་པས་འཁྲུགས་པའི་རྣམ་པ་ཅན་ནོ། །དེའི་དཀྱིལ་དུ་ཀེཾ་སྔོ་སྐྱ་ལས་ཀེཾ་རུས་ཆེན་པོའི་རི་རབ་བསམ་མོ་དེ་ཡང་ཡེ་ཤེས་སྲ་ཞིང་མཁྲེགས་པས་ཕྱིན་ཅི་ལོག་གི་སྐྱོན་དང་བྲལ་བའི་རྟགས་སོ། །ཉོན་མོངས་པ་བསྲེགས་པའི་རྟགས་སུ་རཾ་ལས་རི་རབ་ཀྱི་སྟེང་གི་ཆར་མེ་དཔུང་འབར་བར་སྒོམ་མོ། །དེའི་མེ་ཀློང་ངམ་དཀྱིལ་དུ་ན་དཔལ་ཆེན་པོའི་བཞུགས་གནས་སྒོམ་པ་ཡང་། ཞེས་སོ། །གཉིས་པ་ནི། ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡོངས་མ་ཆད་པའི། །ཕྱི་དང་ནང་མེད་ཀུན་ཏུ་ནང་། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞི་ཡི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁམས་གཉིས་ཀྱིས་མཛེས། །ཞེས་པ་སྟེ། སྤྱིར་དཀྱིལ་འཁོར་ལ་གསུམ་སྟེ་རང་བཞིན་གྱི་དཀྱིལ་འཁོར་དམིགས་པའི་ཡུལ་དུ་བྱ་བ་དང་། ཏིང་ངེ་འཛིན་གྱི་དཀྱིལ་འཁོར་ཉམས་སུ་བླང་བ་དང་། གཟུགས་བརྙན་གྱི་དཀྱིལ་འཁོར་དམིགས་པའི་རྟེན་དུ་བྱ་བའོ། །དང་པོ་ནི་གཉིས་ཏེ་རང་བཞིན་གྱི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་པའི་དཀྱིལ་འཁོར་རོ། །གཉིས་པ་ལ་གཉིས་ཏེ་བསྐྱེད་རིམ་ལྷའི་དཀྱིལ་འཁོར་དང་། རྫོགས་རིམ་རྩའི་དཀྱིལ་འཁོར་རོ། །གསུམ་པ་ལ་གཉིས་ཏེ་རྡུལ་ཚོན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་རོ། །དེ་ལ་གསུམ་སྟེ་རྒྱུ་རས་བལ་ཐིག་གུ་ལ་ཐགས་སུ་བཏགས་པ་དང་། གསེར་དངུལ་ཟངས་ལྕགས་ལ་ལུགས་སུ་བླུགས་པ་དང་། རྭའམ་ཤིང་རྡོ་ལ་འབུར་དུ་བརྐོས་པའོ། །དེ་རྣམས་ལས་འདིར་ནི་ཏིང་ངེ་འཛིན་གྱི་དཀྱིལ་འཁོར་རོ། །དེ་ལས་ཀྱང་བསྐྱེད་རིམ་གཙོ་བོར་སྟོན་རྫོགས་རིམ་ཞོར་ལ་སྟོན་ནོ། །དེ་ཡང་རྒྱུ་ཡེ་ཤེས་རིན་པོ་ཆེ་ལས་གྲུབ་པ་རྟགས་འབར་བ་ཁྲག་འཐུང་རྣམས་བཞུགས་པའི་གནས་སུ་བྱུང་བ། དོན་ཡེ་ཤེས་ཀྱི་གཞལ་ཡས་ཁང་སྟེ་བློས་གཞལ་བ་ལས་འདས་པའོ། །ཡེ་ཤེས་དེས་ཐམས་ཅད་དུ་ཁྱབ་པས་གཞལ་ཡས་ཁང་གི་ཚད་ཀྱང་ཕྱོགས་བཅུར་རྒྱ་ཡོངས་སུ་མ་ཆད་པའི་ཕྱིར་ནམ་མཁས་གར་ཁྱབ་སར་གཞལ་ཡས་ཁང་གིས་ཀྱང་ཁྱབ་པར་གནས་པའོ། །ཐམས་ཅད་ཡེ་ཤེས་རང་སྣང་དུ་ཡིན་པ་དང་ཐུགས་ཡེ་ཤེས་ལ་ཕྱི་དང་ནང་མེད་པ་དང་བྱང་ཆུབ་སེམས་སུ་གཅིག་པས་ན་ཕྱི་ནས་བལྟས་ན་ནང་གསལ་བ་ནང་ནས་བལྟས་ན་ཕྱི་གསལ་བ་ཀུན་ཏུ་ཡང་ནང་དུ་གྱུར་པའོ། །འབར་བའི་གཞལ་ཡས་ཁང་གི་དབུས་འཁོར་ལོ་རྩིབས་བཞི་པ་མཐིང་ནག་ཏུ་གནས་པ་ནི་རང་བཞིན་རྟོགས་པ་དང་ཡེ་ཤེས་འབར་བས་ལས་དང་ཉོན་མོངས་པ་གཅོད་པ་རྟགས་འཁོར་ལོ་རྩིབས་བཞི་དོན་ཡེ་ཤེས་ལྔ་ལྡན་ནོ། །རྩིབས་མཆན་དམར་པོ་ཁམས་གསུམ་དབང་དུ་སྡུད་པའོ། །འཕྲིན་ལས་རྣམ་བཞི་ལྷུན་གྱིས་གྲུབ་པའི་རྟགས་སུ་གྲུ་ཆད་བཞི་ཡིས་རྣམ་པར་བརྒྱན་པ་སྟེ་ཁ་དོག་ནི་ལྗང་གུའོ། །སྐུ་གསུམ་མཚོན་པའི་བརྡར་ཐོད་པ་གསུམ་གྱི་རྩིག་པའོ། །རྩིག་པ་གྲུ་ཆད་ཀྱིས་མཛེས་པས་ན་བརྒྱན་ཅེས་བྱའོ། །ཐུགས་ཡེ་ཤེས་བཞི་དང་ལྡན་པའི་རྟགས་སུ་གྲུ་བཞི་ནི་ཆེ་བའི་ཡོན་ཏན་ཐམས་ཅད་རྒྱས་པའོ། །རྣམ་ཐར་མཚོན་པའི་སྒོ་བཞི་དང་ཡེ་ཤེས་ལྔ་ལྡན་གྱི་རྩིག་པ་སྒོ་ཁྱུད་བཞི་བྱས་པ་ཐེག་པ་རིམ་པ་བརྒྱད་མཚོན་པའི་རྟ་བབས་བརྒྱད་དང་ལྡན་པའོ། །བདེན་པ་གཉིས་དབྱེར་མེད་པའམ་འཁོར་འདས་དབྱེར་མེད་དུ་གནས་པས་འབར་བའི་ཁྲོ་བོའི་དལ་བར་ཁྱམས་གཉིས་ཀྱིས་མཛེས་པ་སྟེ་བར་ཁྱམས་དང་པོ་ཕྲ་མེན་མའི་ཁྱམས་དང་གཉིས་པ་དབང་ཕྱུག་མའི་གནས་སོ། །བར་ཁྱམས་དང་སྒོ་ཕྱོགས་མཚོན་དུ་གནས་ལ་མཛེས་པ་ནི་གནས་ཐབས་སོ། །གསུམ་པ་ནི། ཐོད་སྤྲུལ་སྣ་ཚོགས་ཉི་ཟླས་བརྗིད། །འབར་བའི་འཕྲོ་བ་མང་པོ་འཁྲུགས། །གཞལ་ཡས་ཁང་ལ་ཐོད་པ་རྣམ་གསུམ་གྱིས་རྩིག་པ་བྱས་པ་ནི་སྐུ་གསུམ་མཚོན་པའོ། །སྦྲུལ་རིགས་སྣ་ཚོགས་སམ་བཞིས་ཐོད་པའི་མིག་ནས་བརྒྱུས་པ་ནི་ཞེ་སྡང་མ་སྤངས་ལྷུན་གྱིས་གྲུབ་པའོ། །ཉི་མ་དང་ཟླ་བའི་མཐོང་ཁུང་བྱས་པ་ནི་ལོག་ལྟའི་སྐྱོན་བསལ་བའོ། །རྒྱན་དེ་གསུམ་གྱི་གཞལ་ཡས་ཁང་ལ་བརྒྱན་པས་བརྗིད་པ་ཡིན་ནོ། །ཐུགས་ཡེ་ཤེས་ཀྱི་མེ་འབར་བས་ཉོན་མོངས་པ་བསྲེགས་པའི་རྟགས་སུ་ཕྱི་ནང་ཀུན་ནས་རྡོ་རྗེ་མེ་དཔུང་འབར་བའི་ཀློང་ནས་མེའི་ཁྲོ་བོ་འཕྲོ་བ་དེ་ཡང་མང་པོ་འཕྲོ་འདུ་བྱེད་ཅིང་འཁྲུགས་པའོ། །ཞི་བ་ལས་ཁྱད་པར་དུ་བྱས་པ་ན་འབར་བའི་འཕྲོ་བ་མང་པོ་ཞེས་བྱའོ། །བཞི་པ་ནི། ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྤར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །ཞེས་པ་སྟེ། ཁྱུ་མཆོག་ནི་གླང་པོ་ཆེ་སྟེ་གཏི་མུག་གནས་སུ་དག་པའི་རྟགས་སུ་ཤར་བུདྡྷའི་གདན་ནོ། །དེའི་ཆོས་དབྱིངས་ཡེ་ཤེས་མཚོན་ནོ། །ང་རྒྱལ་དག་པའི་རྟགས་སུ་ལྷོར་རཏྣ་ལ་མ་ཧེ་ཡི་གདན་ནོ་དེའི་མཉམ་ཉིད་ཡེ་ཤེས་མཚོན་ནོ། །འདོད་ཆགས་དག་པའི་རྟགས་སུ་ནུབ་ཏུ་གཟིག་པདྨའི་གདན་ནོ་དེས་སོ་སོར་རྟོག་པའི་ཡེ་ཤེས་མཚོན་པ་དང་། ཕྲག་དོག་དག་པའི་རྟགས་སུ་བྱང་དུ་སྟག་ཀར་མའི་གདན་ནོ་དེས་བྱ་བ་གྲུབ་པའི་ཡེ་ཤེས་མཚོན། ཞེ་སྡང་མ་སྤངས་གནས་སུ་དག་ཅིང་མེ་ལོང་ལྟ་བུའི་ཡེ་ཤེས་མཚོན་པའི་རྟགས་སུ་དབུས་བཛྲ་ཧེ་རུ་ཀའི་གདན་ནི་གཏུམ་ཐུང་ངམ་གཏུམ་པ་དོམ་གྱི་གདན་ནོ། །སེམས་ཅན་གྱི་གདན་ལྔ་པོ་དེའི་སྤར་བས་ནི་དབང་ཕྱུག་ལ་སོགས་པའི་ལྷ་ཆེན་པོ་རྣམས་མནན་ཏེ་བཟུང་བའོ། །དེ་ཡང་དུག་ལྔ་དག་སྟེ་འཕྲིན་ལས་མཛད་པ་ནི་སེམས་ཅན་ལྔའི་འོག་ན་དབུས་ན་དབང་ཕྱུག་ཆེན་པོ་ཡབ་ཡུམ་གཉིས་ལ་སོགས་པའི་ཁོང་ནས་ཤར་དྲི་ཟ། ལྷོར་གཤིན་རྗེ། ནུབ་སྲིན་པོའམ་ཀླུ། བྱང་གནོད་སྦྱིན་ཕོ་མོ་བྱི་ཆིངས་སུ་བཅིངས་ནས་རྨིག་པས་བརྫིས་སྡེར་མོས་བཟུང་རང་གི་ཞོན་པས་བརྫིས་ཏེ་རྒྱལ་བཅག་པའོ། །དྲེགས་པ་རྣམས་འཕྲིན་ལས་ནན་དུར་གྱིས་འདུལ་བར་བྱ་བའི་ཕྱིར་རོ། །གཉིས་པ་བརྟེན་པ་ལྷ་སྒོམ་ཚུལ་ལ་བདག་སྲས་དང་། གཞན་སྲས་གཉིས་ལས། དང་པོ་ལ་བདག་སྲས་ཀྱི་གཏན་ཚིགས་དང་། བདག་སྲས་དངོས་གཉིས་སོ། །དང་པོ་ནི། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ཤེས་ཡིན་པའི་ཕྱིར། །ཞེས་པ་སྟེ། རྣལ་འབྱོར་པ་བདག་ཉིད་ནི་ཕྱོགས་བཅུ་དུས་བཞིའི་སངས་རྒྱས་ཐམས་ཅད་ཀྱི་བདག་པོ་སྟེ། ཅིའི་ཕྱིར་ན་བདག་རྒྱུའི་ཧེ་རུ་ཀ་དེ་ལས་ཐམས་ཅད་བསྐྱེད་པའི་ཕྱིར་རོ། །དེ་ཡང་སྐུ་རྡོ་རྗེ་འཇིག་པ་མེད་པ། གསུང་རྡོ་རྗེ་འགག་པ་མེད་པ། ཐུགས་ཀྱི་རྡོ་རྗེའི་རང་བཞིན་རྟོག་པ་མེད་པ་ལ་མངའ་བརྙེས་པའི་ཕྱིར བདག་པོ་བཛྲ་ཧེ་རུ་ཀའོ། །དེ་ནི་ཁྲོ་རྒྱལ་ཆེན་པོ་ཡེ་ནས་ཡིན་ཏེ་འཕྲལ་ལ་བསྐྱེད་པར་གྱུར་པ་ལྟ་བུ་ནི་མ་ཡིན་ནོ། །དེ་ཤེས་རབ་ཀྱིས་རྟོགས་ནས་ཏིང་ངེ་འཛིན་གྱིས་སྒོམ་པའོ། །དེ་མེད་ན་སྒོམ་པས་མི་ཡོང་སྟེ་སོལ་བ་ལ་བྱི་དོར་བྱས་པས་དཀར་པོ་མི་ཡོང་སྟེ་དེའི་ཕྱིར་ན་བདག་སངས་རྒྱས་ཐམས་ཅད་ཀྱི་ཡབ་ཡིན་པའི་ཕྱིར་བདག་གི་སྲས་སངས་རྒྱས་ཡིན་པའོ། །གཉིས་པ་བདག་སྲས་དངོས་ལ་གཙོ་བོ་ཡབ་ཡུམ་མཉམ་པར་སྦྱོར་བས་བྱང་སེམས་བསྟིམ་པ་དང་། དེ་ལས་ཁྲོ་བོའི་སྤྲིན་སྤྲོ་བ་དང་། བསྡུས་ཏེ་ཁྲག་འཐུང་རིགས་ལྔར་བསྐྱེད་ཚུལ་དང་། ཁྲག་འཐུང་ཆེན་པོ་རྣམས་གདུལ་བྱ་དབང་དུ་སྡུད་པའི་ཡུམ་དང་སྦྱོར་བ་དང་། དེ་ལས་སྲས་ཀྱི་ཚོགས་རྣམས་བཏོན་པ་དང་། ཡུམ་རྣམས་རང་གི་གནས་སུ་བཀྱེ་བ་དང་དྲུག་གོ། །དང་པོ་ནི། དེ་བཞིན་ཉིད་ཀྱི་དབྱིངས་ནས་ནི། །ཁྲོ་མོ་དབང་ཕྱུག་མངོན་ཕྱུང་སྟེ། །ཧི་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་དེ། །གཉིས་མེད་འཁྲིལ་བའི་དགྱེས་པས་ཐིམ། །ཞེས་པ་སྟེ། དཔལ་ཧེ་རུ་ཀའི་ཐུགས་དེ་བཞིན་ཉིད་ཆོས་ཀྱི་དབྱིངས་ཀྱི་ངང་དུ་བྱུང་བ་སྟེ་ཡབ་ཀྱི་ཐུགས་ཀ་ནས་ནི་ཡུམ་ཁྲོ་མོ་རྡོ་རྗེ་དབྱིངས་ཕྱུག་མ་ལུས་དང་གྲིབ་མ་ལྟར་རམ་མར་མེ་གཅིག་ལས་གཉིས་སུ་ཆད་པ་ལྟར་མངོན་དུ་ཕྱུང་སྟེ་ཡབ་ཀྱི་གཡོན་ངོས་སུ་རྫོགས་ཚུལ་དུ་བསྐྱེད་པ་ནི་ཞལ་གཅིག་ཕྱག་གཉིས་པ་གཡས་རྡོ་རྗེ་གཡོན་བྷནྡ་རྒྱན་ཆ་ལུགས་ཡབ་དང་མཐུན་ནོ། །དེ་ཡང་ཡབ་ལ་སྐུ་གསུང་ཐུགས་དགྱེས་པའི་གཟི་མདངས་དང་ལྡན་པར་བཞུགས་ཏེ་ཞལ་ནས་ཧི་ཧི་ཞེས་དགྱེས་པའི་བཞད་སྒྲ་དང་སྤྱན་གྱི་གཟི་བརྗིད་དང་ཞལ་གྱི་མདངས་དབྱུང་ཉིད་ཀྱིས་ཡབ་ལ་འདུད་པའོ། །ཡབ་ཀྱི་མཁའ་ནི་ཆེ་བའི་ཡོན་ཏན་འབྱུང་བས་དགོས་འདོད་རེ་བ་ཡིད་བཞིན་དུ་སྐོང་བའི་ཕྱིར་རིན་ཆེན་ནམ་རིན་པོ་ཆེའོ། །ཡུམ་གྱི་མཁའ་ནི་ཆགས་པས་མ་གོས་པས་པདྨའོ། །དེ་ལ་ཡུམ་གྱི་མཁའ་པདྨ་འདབ་བརྒྱད་པར་བྱིན་གྱིས་བརླབ་ཡབ་ཀྱི་མཁའ་རྡོ་རྗེ་རྩེ་ལྔ་པར་བྱིན་གྱིས་བརླབ། དེ་གཉིས་ཀྱིས་སྦྱོར་བ་རྒྱས་པར་མཛད་དེ་དབྱིངས་ཡེ་ཤེས་གཉིས་སུ་མེད་པའི་རྟགས་ཡབ་ཡུམ་གཉིས་མེད་དུ་འཁྲིལ་བའི་ཚུལ་གྱིས་ཐབས་དང་ཤེས་རབ་ཀྱི་སྤྱོད་པས་དགྱེས་པས་ཐམས་ཅད་བདེ་བ་ཆེན་པོའི་ཡེ་ཤེས་སུ་གསལ་བ་ལས་ཡབ་ཀྱི་བྱང་ཆུབ་སེམས་ཡུམ་གྱི་མཁར་ཐིམ་པའོ། །གཉིས་པ་ནི། བྱང་ཆུབ་སེམས་སྤྲིན་སྤྲོས་པ་ལས། །ཁྲོ་བོའི་དཀྱིལ་འཁོར་སྤྲིན་ཕུང་སྤྲོ། །ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་ཏ་ཛྭ་ལ་མན་དྷ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། འཇིག་རྟེན་དྲུག་གི་ཕྱོགས་བཅུ་ནས། །མཐའ་ཡས་ཁྱབ་པར་ཁྲོ་བོ་ཡི། །དཀྱིལ་འཁོར་སྟོང་གསུམ་འཇིག་རྟེན་ཙམ། །ཕྱོགས་བཅུའི་རྡུལ་སྙེད་ཐོན་པར་གྱུར། །ཞེས་པ་སྟེ། ཁྲོ་བོ་འཆོལ་བ་འདོན་པ་ལ་ལྔ་སྟེ། འབྱུང་བའི་རྒྱུ་དང་། རྐྱེན་དང་། ངོ་བོ་དང་། རང་བཞིན་དང་། དགོས་པའི་འབྲས་བུའོ། །རྒྱུ་ནི་ཡབ་ཡུམ་གྱི་བྱང་སེམས་སོ། །རྐྱེན་ནི་སྤྲོ་བར་བྱེད་པའི་སྔགས་སོ། །ངོ་བོ་ནི་ཁྲོ་བོ་འཆོལ་བ་སྤྲོས་པ་རྣམས་སོ། །རང་བཞིན་ནི་ཡེ་ཤེས་ཀྱི་སྤྲུལ་པའོ། །དགོས་པའི་འབྲས་བུ་ནི་གདུག་པ་ཅན་འདུལ་བའི་དགོས་པ་ཡོད་ལ་རིགས་ལྔ་ཁྲག་འཐུང་བསྐྱེད་པའི་འབྲས་བུ་ཡོད། དེ་བས་ན་ཁྲོ་བོ་འཆོལ་བ་སྤྲོས་ནས་དྲག་པོ་ལས་ཀྱི་ཁྲོ་བོ་གསལ་ལོ། །ཡབ་ཀྱི་ལྷག་པ་བྱང་ཆུབ་སེམས་དབྱར་གྱི་སྤྲིན་ཕུང་ལྟ་བུ་ཡུམ་གྱི་མཁར་སྤྲོས་པ་ལས་ཡབ་ཡུམ་དགྱེས་པའི་ལྷག་པའི་བྱང་ཆུབ་སེམས་དཀར་དམར་འདྲེས་པ་ལས་ཁྲོ་བོའི་དཀྱིལ་འཁོར་ཐམས་ཅད་ཡུམ་གྱི་མཁའ་ནས་སྤྲིན་ཕུང་དང་འདྲ་བར་སྤྲོ་བ་སྟེ་དེ་ཡང་ཁྲོ་བོ་འཆོལ་བའི་ཚོགས་སུ་སྤྲོ་བའོ། །སྔགས་དོན་ནི་ཧཱུཾ་དང་པོས་སྐུ་རྡོ་རྗེ་ཁྲོ་བོ་སྤྲོ་ཧཱུཾ་གཉིས་པས་གསུང་རྡོ་རྗེ་ཁྲོ་བོ་སྤྲོ་ཧཱུཾ་གསུམ་པས་ཐུགས་རྡོ་རྗེ་ཁྲོ་བོ་སྤྲོ་བ་སྟེ་སྐུ་གསུང་ཐུགས་ཀྱི་ཁྲོ་བོ་འཆོལ་བ་སྤྲོ་བའོ། །བི་ཤྭ་སྣ་ཚོགས་བཛྲ་ཀྲོ་ཏ་རྡོ་རྗེ་ཁྲོ་བོ་ཛྭ་ལ་འབར་བ་མན་དྷ་ལ་དཀྱིལ་འཁོར་ཕཊ་སྐུ་ལས་སྤྲོས་ཕཊ་གསུང་ལས་སྤྲོས་ཕཊ་ཐུགས་ལས་དང་ཧ་ལ་སྐུའི་དུག་བཅོམ་ཧ་ལ་གསུང་གི་ཧ་ལ་ཐུགས་ཀྱི་དུག་བཅོམ་ཧཱུཾ་གཉིས་སུ་མེད་པར་དབང་དུ་མཛད་ཅིག་པའོ། །འཇིག་རྟེན་གྱི་ཁམས་འགྲོ་བ་རིགས་དྲུག་གི་གནས་ཀྱིས་བསྡུས་པའི་ཕྱོགས་བཅུ་ནས་འགྲོ་བའི་ལས་དང་བག་ཆགས་སྦྱང་བའི་ཕྱིར་ཁྲོ་བོ་འཆོལ་བ་སྤྲོ་བར་བྱེད་པ་ཡིན་ནོ། །ཕྱོགས་བཅུ་མཐའ་ཡས་པ་ཁྱབ་པར་ཁྲོ་བོ་ཡི་དཀྱིལ་འཁོར་སྤྲོ་བའོ། །དེ་ཡང་ཤེས་རབ་ཆེན་པོའི་ཁྲོ་བོ། ཡེ་ཤེས་ཆེན་པོའི་ཁྲོ་བོ། ཕྱག་རྒྱ་ཆེན་པོའི་ཁྲོ་བོ་གསུམ་སྤྲོ་བའོ། །ཁྲོ་བོ་འཆོལ་བའི་དཀྱིལ་འཁོར་དེ་ད ག་རེ་རེ་ལ་ཡང་ཆེ་ཆུང་སྟོང་གསུམ གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་མོ། །དེ་དག་གི་གྲངས་མང་ཉུང་ནི་ཕྱོགས་བཅུའི་འཇིག་རྟེན་གྱི་རྡུལ་ཕྲ་མོའི་བྱེ་མ་སྙེད་ཀྱི་གྲངས་ཙམ་ཐོན་པར་གྱུར་ནས་བར་སྣང་ལ་འཁྲུག་པ་ལྟ་བུས་གདུག་པ་ཅན་རྣམས་ཀྱི་ལུས་ངག་ཡིད་གསུམ་འདུལ་བ་དང་། དབང་དུ་སྡུད་པ་དང་བསྒྲལ་བར་བྱས་པའོ། །དེ་ལྟར་ཁྲོ་བོ་འཆོལ་བ་སྤྲོ་བ་ནི་རྫུ་འཕྲུལ་བཞི་སྟེ་ཀུན་བརྗོད་པའི་ཆོ་འཕྲུལ་དང་། རྫུ་འཕྲུལ་གྱི་ཆོ་འཕྲུལ་དང་། བྱིན་གྱིས་རླབས་ཀྱི་ཆོ་འཕྲུལ་དང་། ཆོས་སྣང་བའི་ཆོ་འཕྲུལ་ལོ། །དང་པོ་ནི་བདག་བཛྲ་ཧེ་རུ་ཀས་སྔགས་བརྗོད་པས་སྟོང་གསུམ་སྔགས་ཀྱི་སྒྲས་ཁེངས་པའོ། །གཉིས་པ་ནི། ཤེས་རབ་ཆེན་པོའི་ཁྲོ་བོ་དང་ཡེ་ཤེས་ཆེན་པོའི་ཁྲོ་བོ་དང་ཕྱག་རྒྱ་ཆེན་པོའི་ཁྲོ་བོ་གསུམ་གྱི་ངོ་བོ་ལས་ཁྲོ་བོ་གྲངས་མེད་པ་འཆོལ་བར་སྤྲོ་བའོ། །གསུམ་པ་ནི། ཁྲོ་བོ་དེ་དག་གིས་བགེགས་ཐམས་ཅད་བཅོམ་བསད་དེ་གདུག་པའི་སེམས་དེ་དག་ཐམས་ཅད་ཞི་ནས་བྱང་ཆུབ་སེམས་སུ་བྱིན་གྱིས་བརླབས་པའོ། །དེ་ཡང་སྒྱུ་འཕྲུལ་རྡོ་རྗེ་ལས། ཡང་དག་ཤེས་རབ་ཆེན་པོ་ནི། །མཚན་མ་འཇོམས་ཕྱིར་ཁྲོ་བོའི་མཆོག །རང་རིག་ཡེ་ཤེས་རྒྱལ་པོ་ནི། །ཕྱོགས་བཅུའི་ཁམས་རྣམས་དབང་བསྡུས་ནས། །ཀུན་ཀྱང་མི་དམིགས་དབྱིངས་སུ་ཐིམ། །ཐམས་ཅད་ཁྲོ་བོའི་ཚོགས་སུ་འགྱུར། །ཕྱོགས་བཅུ་ཐམས་ཅད་སྐུ་གསུང་ཐུགས། །དཔལ་ཆེན་འབར་བའི་ཕྱག་རྒྱར་གསལ། །ཅེས་སོ། །བཞི་པ་ནི། ཁྲོ་བོ་དེ་དག་གིས་རིགས་དྲུག་གི་འཇིག་རྟེན་ན་རུ་ཏྲ་ལ་སོགས་པ་དྲེགས་པ་ཅན་རྣམས་ལ་སྤྲུལ་པ་དེ་རྣམས་ཀྱིས་གདུག་བ་ཅན་དྲག་པོས་བཏུལ་ནས་ཆོས་སྣང་བའོ། །གསུམ་པ་ཁྲག་འཐུང་རིགས་ལྔར་བསྐྱེད་ཚུལ་ལ། གཙོ་བོ་དང་། རིགས་བཞིའི་ཁྲག་འཐུང་བསྐྱེད་ཚུལ་གཉིས་ལས། དང་པོ་ནི། དེ་ནས་བཅོམ་ལྡན་དགྱེས་ཆེན་རིགས། །དབུ་དང་ཕྱག་ཞབས་སྟོང་ཁམས་ཀྱི། །རྡུལ་སྙེད་མཚོན་ཆ་འཛིན་པ་དེ། །དབུ་གསུམ་ཕྱག་དྲུག་ཞབས་བཞིར་གྱུར། །འབར་ཆེན་ཀློང་གི་འཁོར་ལོའི་དཀྱིལ། །དབང་ཕྱུག་ཆེ་དང་དུར་ཁྲོད་ཀྱི། །བདག་པོ་དྲེགས་པ་ཁྱོ་ཤུགས་ཀྱི། །གདན་ལ་བརྐྱང་བསྐུམ་ཚུལ་དུ་བཞུགས། །ཞེས་གསུངས་ཏེ། གོང་དུ་ཁྲོ་བོ་འཆོལ་པ་སྤྲོས་པ་དེ་ནས་རིགས་ལྔ་ཁྲག་འཐུང་གི་སྐུ་བསྐྱེད་པ་ནི་ལྷ་ཆེན་པོ་འོག་ཏུ་བརྫིས་པས་བདུད་བཞི་བཅོམ་པའོ། །དེ་དག་གནས་སུ་དག་པས་མེ་ལོང་ལྟ་བུའི་ཡེ་ཤེས་ཐུགས་སུ་ཆུད་རྣམ་པར་ཤེས་པའི་ཕུང་པོ་གནས་འགྱུར་བས་ཁྲོ་བོའི་སྐུར་སྣང་བས་ན་ལྡན་ནོ། །ཡབ་ཡུམ་ཁ་སྦྱོར་དུ་བཞུགས་པས་དགྱེས་པ་ཆེན་པོ། ཕྱོགས་བཅུ་ཁྲོ་བོ་འཆོལ་བ་དེའི་རིགས་ཡིན་པས་བསྡུ་བའོ། །དེ་ཡང་ཁྲོ་བོ་འཆོལ་བ་དེ་དག་གི་མཚན་ཉིད་ཅི་ཞེ་ན་དབུ་མ་ངེས་པ་དང་། ཕྱག་མ་ངེས་པར་དང་། ཞབས་མ་ངེས་པ་དང་། གྲངས་མ་ངེས་པ་སྟེ་རྡོ་རྗེ་རིགས་དང་། རིན་ཆེན་དང་། པདྨ་དང་། ལས་དང་། དེ་བཞིན་གཤེགས་པའི་རིགས་ལྔ་ཡང་འཆོལ་བར་སྤྲོ་བའོ། །དེ་ཡང་ཆེ་ཆུང་སྟོང་གསུམ་གྱི་སྟོང་ཆེན་པོའི་ཁམས་ཀྱི་ཚད་ཙམ་གྲངས་རྡུལ་ཕྲ་རབ་སྙེད་དུ་སྤྲོས་པ་ཕྱག་ན་མཚོན་ཆ་སྣ་ཚོགས་པ་འཛིན་པ་དེ་དག་ཚུར་བསྡུས་པའི་དུས་ན་དབུ་གསུམ་ཕྱག་དྲུག་ཞབས་བཞིར་གྱུར་པའོ། །དབུ་གསུམ་ནི་སྐུ་གསུང་ཐུགས་དང་རྣམ་ཐར་སྒོ་གསུམ་མཚོན་པའོ། །ཕྱག་དྲུག་ནི་ཕ་རོལ་ཏུ་ཕྱིན་པ་དྲུག་གམ་ཡེ་ཤེས་དྲུག་གོ། །ཞབས་བཞི་ནི་ཚད་མེད་པ་བཞིའམ་རྫུ་འཕྲུལ་གྱི་རྐང་པ་བཞིའོ། །ཁྲོ་བོ་དེ་དག་གནས་གང་དུ་བསྡུ་ཞེ་ན་འབར་ཆེན་ནི་ཁྲོ་བོའི་གནས་སོ་ཀློང་གི་ཞེས་པ་ནི་མེ་དཔུང་འབར་བའོ་འཁོར་ལོའི་ཞེས་པ་ནི་དབུས་ཕོ་བྲང་རྩིབས་བཞིའི་དཀྱིལ་ནི་གཙོ་བོ་རྣམས་བཞུགས་པའི་གནས་སོ། །གནས་དེ་ན་གྲུ་གསུམ་མཐིང་ནག་འབར་བའོ། །གདན་གང་ལ་བཞུགས་ཞེ་ན་དབུས་ན་དབང་ཕྱུག་ཆེན་པོ་ཡབ་ཡུམ་དང་ཤར་དྲི་ཟ་ལྷོར་གཤིན་རྗེ་ནུབ་ཀླུའམ་སྲིན་པོ་བྱང་གནོད་སྦྱིན་ཡབ་ཡུམ་མོ། །དེ་ལྔ་ནི་དུར་ཁྲོད་ཀྱི་བདག་པོ་དྲེགས་པ་ཁྱོ་ཤུགས་ཀྱི་གདན་ཅེས་བྱའོ། །གདན་འདིངས་ཚུལ་ནི་དྲེགས་པ་དེ་དག་ཕོ་ཁ་སྦུབ་མོ་གན་རྐྱལ་བྱི་ཆིངས་སྣོལ་མ་མི་རོ་སྐྲའི་སྐུད་པས་བཅིངས་པའོ། །རང་རང་གི་བཞོན་པས་སྟེང་ནས་བརྫིས་པའོ། །གདན་ལ་བཞུགས་ཚུལ་གང་ཞེ་ན་ཞབས་བཞི་ཡང་གཡས་བརྐྱང་གཡོན་བསྐུམ་གྱིས་ཚུལ་དུ་བཞུགས་པའོ། །གཡས་བརྐྱང་བ་ཐབས་ཀྱི་རང་བཞིན་མ་འགགས་པ་གཡོན་བ སྐུམ་པ་ཤེས་རབ་ཀྱི་ངོ་བོ་བདེ་བའོ། །གཉིས་པ་ནི། ཁྲོ་བོའི་དཀྱིལ་འཁོར་སྤྲིན་ཕུང་ཡང་། །དཔལ་ཆེན་ཁྲག་འཐུང་ཆེན་པོ་དང་། །རིན་པོ་ཆེ་དང་པདྨ་དང་། །ལས་སུ་གྱུར་ནས་ཕྱོགས་བཞིར་བཞུགས། །དེ་ཀུན་འཇིགས་བྱེད་ཆེན་པོ་ཡི། །ཆ་ལུགས་རྔམ་པའི་ང་རོ་ཡིས། །འབར་བའི་ཀློང་ན་དབུ་གསུམ་པ། །ཕྱག་དྲུག་ཞབས་བཞི་དྲི་ཟ་དང་། །གནོད་སྦྱིན་གཤིན་རྗེ་སྲིན་པོ་ལ། །སོགས་པ་ཁྱོ་ཤུགས་གདན་ལ་བཞུགས། །ཞེས་པ་སྟེ། ཁྲོ་བོ་འཆོལ་བའི་དཀྱིལ་འཁོར་སྤྲིན་ཕུང་དེ་ལྟ་བུ་དག་སླར་ཡང་ཚུར་འདུས་པས་གདན་སྟེང་ན་གནས་པའོ། །དེ་ལས་རིགས་སོ་སོར་ཕྱེ་ནས་གདན་ལ་བཞུགས་པའི་ཚུལ་ནི་དབུས་རྒྱུའི་ཧེ་རུ་ཀ་ལ་དཔལ་ཆེན་པོ་བཛྲ་ཧེ་རུ་ཀའི་རིགས་ཐིམ་པས་མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཞལ་གསུམ་ཕྱག་དྲུག་ཏུ་གྱུར་ཏོ། །ཤར་གྱི་གདན་སྟེངས་སུ་སྟོང་པ་ཉིད་ཀྱི་ཡེ་ཤེས་ལས་གཅིག་ཏུ་འདུས་པས་ཁྲག་འཐུང་ཆེན་པོ་བུདྡྷ་ཧེ་རུ་ཀ་ཞལ་གསུམ་ཕྱག་དྲུག་པར་གྱུར་པ་དང་། ལྷོར་རིན་པོ་ཆེ་ཡི་རིགས་རྣམས་འདུས་པས་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་རཏྣ་ཧེ་རུ་ཀ་ཞལ་གསུམ་ཕྱག་དྲུག་པ་དང་། ནུབ་ཏུ་པདྨའི་རིགས་འདུས་པས་སོ་སོར་རྟོག་པའི་ཡེ་ཤེས་པདྨ་ཧེ་རུ་ཀ་དང་། བྱང་དུ་ལས་ཀྱི་རིགས་རྣམས་གཅིག་ཏུ་འདུས་པའམ་གཉིས་སུ་མེད་པར་གྱུར་ནས་ཀརྨ་ཧེ་རུ་ཀ་ཞལ་གསུམ་ཕྱག་དྲུག་པ་བྱ་བ་གྲུབ་པའི་ཡེ་ཤེས་ཀྱི་རང་བཞིན་ནོ། །དེ་རྣམས་རང་རང་གི་གདན་ལ་བཞུགས་པའོ། །ཕྱོགས་བཞིར་ཞེས་པ་ནི་དབུས་རྒྱུའི་ཧེ་རུ་ཀ་དང་པོ་ནས་བཞུགས་ཡོད་པའི་དབང་དུ་བརྩིས་པ་ཡིན་ནོ། །དེ་ཀུན་ནི་ཁྲོ་བོ་དེ་རྣམས་སོ་འཇིགས་བྱེད་ནི་གདུག་པ་ཅན་རྣམས་སོ། །ཆེན་པོ་ནི་སྐུ་ཆེ་ལ་ཡན་ལག་རགས་པའོ། །ཡང་ན་ཁྲོ་བོ་དེ་ཀུན་ཀྱང་རྒྱུའི་ཧེ་རུ་ཀ་ལྟར་འབར་བའི་གར་དགུ་དང་ལྡན་པ་ཡི་ཞེས་པའོ། །ཆ་ལུགས་ནི་དུར་ཁྲོད་ཀྱི་ཆས་དགུས་བརྒྱན་པའོ། །དེ་ཡང་ཐུགས་ཡེ་ཤེས་ཆེན་པོས་རྟག་ཆད་ཀྱི་མཐའ་སེལ་བ་སྟེ་ཐུགས་གཏུམ་ཞིང་རྔམ་པའི་ང་རོ་ཡིས་རུ་ལུ་རུ་ལུའི་སྒྲ་ཆེན་པོ་འབྱིན་པའི་ཚུལ་ལོ་བསྐལ་པའི་མེ་དཔུང་འབར་བའི་ཀློང་ན་རྒྱུ་ཉོན་མོངས་པ་དུག་གསུམ་ཟད་ནས་ལམ་ཁམས་གསུམ་གྱི་ཟག་པ་བཅོམ་པས་འབྲས་བུ་སྐུ་རྣམ་པ་གསུམ་མཚོན་པའི་རྟགས་སུ་དབུ་གསུམ་པ་དང་། རྒྱུ་ཉོན་མོངས་པ་དྲུག་ཟད་ནས་ལམ་འགྲོ་བ་རིགས་དྲུག་སྦྱངས་ཏེ་ཕ་རོལ་ཏུ་ཕྱིན་པ་དྲུག་དང་ལྡན་པས་ཡེ་ཤེས་དྲུག་གི་ཕྱག་དྲུག་ཏུ་བྱུང་བའོ། །རྒྱུ་ཚད་མེད་པ་བཞི་དང་ལྡན་ལམ་རྫུ་འཕྲུལ་གྱི་རྐང་པ་བཞིར་དབྱེ་བས་འབྲས་བུ་རྣམ་པར་ཐར་པ་བཞིའི་ཞབས་བཞིའོ། །ཞབས་དེས་ཤར་དྲི་ཟ་ཕོ་མོ་བརྫིས་པ་དང་དེ་ནི་ཞེ་སྡང་སྤངས་པའོ། །བྱང་དུ་གནོད་སྦྱིན་ཕྲག་དོག་སྤངས་པས་མནན། ལྷོར་གཤིན་རྗེ་ང་རྒྱལ་ནུབ་སྲིན་པོ་འདོད་ཆགས་སྤངས་པའི་ལྷ་པདྨ་ཧེརུ་ཀའི་གདན་ནོ། །ལ་སོགས་པ་ནི་དབུས་དབང་ཕྱུག་ཆེན་པོ་ཡབ་ཡུམ་མོ་ལྷ་དེ་དག་ཡབ་ཡུམ་བྱི་ཆིངས་སུ་བྱས་པ་ནི་ཁྱོ་ཤུགས་སོ། །གདན་དེ་དག་ལ་མནན་ནས་བཞུགས་པའོ། །ཁྲག་འཐུང་དེ་རྣམས་ལ་གསུམ་སྟེ་རྒྱུ་སེམས་ཅན་གྱི་ལྡན་ཚུལ་དང་། ལམ་ཞི་ཁྲོ་གནས་འགྱུར་དང་། འབྲས་བུ་ཡེ་ཤེས་རྟོགས་ཚུལ་ལོ། །རྒྱུ་ནི་སེམས་ཅན་ལ་ཕུང་པོ་ལྔ་དེ་ལ་གནས་པའི་ཉོན་མོངས་པ་ལྔ་དེས་བསྐྱེད་པའི་ཤ་ཁྲག་རུས་པ་རླུང་ལྔ་ཡོད་པའོ། །ལམ་ནི་རྒྱལ་བ་རིགས་ལྔ་གདུལ་བྱ་ལ་དགོངས་ནས་ཁྲག་འཐུང་རིགས་ལྔར་གནས་འགྱུར་བའོ། །འབྲས་བུ་ནི་ཡེ་ཤེས་ཆེན་པོ་ལྔ་རྟོགས་པའོ། །བཞི་པ་ནི། བཙུན་མོ་ཁྲག་འཐུང་ཆེན་མོ་རྣམས། །སོ་སོའི་སྐུ་ལ་འཁྲིལ་ཏེ་གནས། །ཞེས་པ་སྟེ། སྤྱད་པར་བྱ་བས་ན་བཙུན་མོ་སྟེ་ཁྲག་འཐུང་ནི་ཁྲོ་མོའོ། །ཆེན་མོ་ནི་ཡུམ་ལྔ་རྣམས་སོ། །ཡབ་སོ་སོའི་སྐུ་ལ་འཁྲིལ་བ་ནི་ཐབས་དང་ཤེས་རབ་ཏུ་གནས་པའོ། །དེ་ཡང་ཡུམ་གཉིས་ཏེ་རང་བཞིན་དབྱིངས་ཀྱི་ཡུམ་ཁྲོ་མོ་ལྔ་དང་གདུལ་བྱ་དབང་དུ་སྡུད་པའི་ཡུམ་དབང་ཕྱུག་ཉི་ཤུ་རྩ་བརྒྱད་དོ། །དེ་ལ་སྐབས་འདིར་ནི་རང་བཞིན་དབྱིངས་ཀྱི་ཡུམ་རང་གི་ཐུགས་ཀར་སྦས་ནས་དྲེགས་པ་འོག་ཏུ་མནན་དབང་མོ་ལ་སྦྱོར་བ་བྱས་ཏེ། སྲས་གནས་ཡུལ་གྱི་མ་མོ་བཏོན་ནས་དབང་མོ་རང་རང་གི་གནས་སུ་བཀྱེ་ནས་རང་གི་ཡུམ་ལུས་དང་གྲིབ་མ་བཞིན་དུ་གདོད་སྐུ་ལ་འཁྲིལ་བའོ། །ལྔ་པ་སྲས་མོའི་ཚོགས་རྣམས་ཕྱིར་འདོན་པ་ལ་གསུམ་སྟེ། གནས་མ་བརྒྱད་དང་། ཡུལ་མ་བརྒྱད་དང་། སྒོ་མ་བཞིན་རྣམས་འདོན་པའོ། །དང་པོ་ནི། དེ་ནས་དགྱེས་ཏེ་ཧ་བརྗོད་པས། །བྱང་ཆུབ་སེམས་ཀྱི་སྤྲིན་དག་ལས། །དཀར་མོའི་ཚོགས་དང་རྐུན་མོའི་ཚོགས། །རྨོངས་མོ་དང་ནི་ཐལ་བྱེད་མ། །སྦོས་མོ་དང་ནི་གཏུམ་མོ་དང་། །སྨེ་ཤ་ཅན་དང་མ་ཚོགས་མ། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་རྔམ་ཐོན་ཏེ། །འབར་ཆེན་འཁོར་ལོའི་ཤར་མཚམས་ནས། །འཁོར་བ་འཛིན་པའི་གཟུགས་ཀྱི་འཁོར། །ཅེས་པ་སྟེ། དཔལ་ཆེན་པོ་ལ་འཁོར་གྱི་མ་མོ་རྣམ་པ་གཉིས་ཏེ་ནང་གི་རྣལ་འབྱོར་མ་དང་ཕྱིའི་སྒྲུབ་པ་མོའོ། །ནང་གི་རྣལ་འབྱོར་མ་ནི་དབང་པོ་དང་རྣམ་ཤེས་གནས་གྱུར་ཏེ་ཚོགས་བརྒྱད་དེ་ཁོ་ན་ཉིད་དུ་དག་པའི་མ་མོ་བརྒྱད། སྤྱད་བྱ་ཡུལ་གྱི་ཞེན་པ་གནས་འགྱུར་བ་མཆེ་གཤོག་ཅན་གྱི་མ་མོ་བརྒྱད་དེ་བཅུ་དྲུག །རྟག་ཆད་མུ་བཞིའི་མཐའ་བཀག་ནས་ཚད་མེད་བཞིར་རྒྱས་འདེབས་པ་སྒོ་མ་བཞི་སྟེ་ཉི་ཤུ་པོ་རྣམས་ཏེ་དོན་ཆོས་ཉིད་རྣལ་མ་ལ་བློ་རིག་པའི་ཡེ་ཤེས་འབྱོར་བས་ན་ནང་གི་རྣལ་འབྱོར་མ་ཞེས་བྱའོ། །སྤྱིར་ལས་ལས་གྲུབ་པ་དབང་ཕྱུག་ཉི་ཤུ་རྩ་བརྒྱད་ནི་ཕྱིའི་སྒྲུབ་པ་མོ་ཞེས་བྱའོ། །དེ་རྣམས་ནི་དཔལ་གྱི་འཁོར་རོ། །དེ་བས་ན་ནང་གི་སྒྲུབ་པ་མོ་རྣམས་བསྐྱེད་པའི་ཕྱིར་རོ། །ཡུམ་བསྐྱེད་པ་དེ་ནས་ཡབ་ཡུམ་ཐབས་དང་ཤེས་རབ་སྦྱོར་བ་བྱས་པས་དགྱེས་ཏེ་ཧ་བརྒྱད་ཞལ་ནས་བརྗོད་པས་ཡབ་ཡུམ་སྦྱོར་བ་བྱས་པའི་བྱང་ཆུབ་སེམས་ཀྱི་ཚོགས་སྤྲིན་ཕུང་ལྟ་བུ་དག་ལས་ཡི་གེ་ཧར་གྱུར་ནས་གནས་ཀྱི་མ་མོ་བརྒྱད་རིམས་ཀྱིས་བསྐྱེད་པའོ། །དེ་ཡང་ནང་རྣམ་ཤེས་ཀྱི་རྣལ་འབྱོར་མ་བཞི་ལས་ཐུགས་ལས་མཚན་དུ་བཏགས་པ་ཀེའུ་རི་མ་ནི་ཉོན་མོངས་པའི་སྐྱོན་གྱིས་མ་གོས་པས་དཀར་མོའི་ཚོགས་ཏེ་ཆོས་ཉིད་ལ་ཉེས་པའི་སྐྱོན་གྱིས་མ་གོས་པས་དཀར་ཡང་དག་པའི་དོན་ལ་གནས་གཞན་གྱིས་བསྒྱུར་མི་ནུས་པས་རྟགས་སྔོན་མོའོ། །ལས་ཞི་བའི་ལས་བྱེད་པ་དང་། ཉོན་མོངས་པ་འཁོར་བའི་གནས་ནས་བརྐུས་ཏེ་བླ་མེད་གནས་སུ་འདྲེན་པས་ན་རྐུན་མོའི་ཚོགས་ཏེ་ལས་རྒྱས་པའི་ལས་བྱེད་དོ། །དེ་ནི་ཙོ་རི་མའོ། །རྨོངས་མོའམ་པྲ་མོ་ཧ་ནི་གཞན་དབང་དུ་བསྡུས་ནས་རྨོངས་ཤིང་ལྐུགས་པར་བྱེད་པ་སྟེ་ལས་ནི་དབང་གི་ལས་བྱེད་པ་དང་ནི། ཐལ་བྱེད་མའམ་བེ་ཏ་ལི་ནི་བགེགས་དང་ལོག་འདྲེན་ཐལ་བར་རློགས་ཤིང་ལས་ནི་དྲག་པོའི་ལས་བྱེད་དོ། །སྦོས་མོ་ནི་པུས་ཀ་སི་སྟེ་ཆེ་བའི་ཡོན་ཏན་དང་ལྡན་པའི་ཉོན་མོངས་པ་རྩད་ནས་བཅད་དེ་རྒྱས་པའི་ལས་བྱེད་པ་དང་ནི། གཏུམ་མོ་ནི་ཀརྨ་རི་སྟེ་འཁོར་ལ་གཏུམ་དྲག་གི་ལས་བྱེད་པ་དང་། སྨ་ཤ་ནི་སྲིན་པོ་ཉིང་ཤ་ཉིང་གིས་ཟ་བ་སྨེ་ཤ་ཅན་གྱི་ཡུལ་ན་གནས་པ་སྟེ་འགྲོ་དོན་སྤང་བླང་མེད་པར་བྱེད་པ་དང་ལས་གང་ཡང་རུང་བ་གྲུབ་པར་བྱེད་པའོ། །མ་ཚོགས་མ་ནི་ཙནྡྷ་ལི་སྟེ་མ་མོ་དེ་དག་ལ་སྤྲུལ་པ་མང་པོ་འབྱུང་བ་དང་རྣལ་འབྱོར་པའི་རྒྱུད་འཕེལ་བའི་ལས་བྱེད་པ་སྟེ་དེ་དག་ནི་ཕྱི་དབང་པོའི་རྣལ་འབྱོར་མ་བཞིའོ། །ལྷ་མོའི་ཚོགས་དེ་རྣམས་ཀྱང་ཞལ་གཅིག་ཕྱག་གཉིས་པ་སྟེ་ཞབས་མ་མོའི་འགྱིངས་སྟབས་ཀྱིས་བཞུགས་པ་རང་རང་གི་ལག་ཆའམ་ཕྱག་མཚན་དང་བཅས་པའོ། །དེ་ཡང་སྐུ་མདོག་ཕྱག་མཚན་འོག་ནས་ལེགས་པར་སྟོན་ནོ། །ཁྲོ་མོ་དེ་རྣམས་ཀྱང་ངོ་མཚར་དང་བཅས་ནས་སྐུ་གསུང་ཐུགས་རྔམས་པའི་དམངས་དང་བཅས་ནས་ཏེ་ཐོན་ཏེ་བསྐལ་པའི་མེ་ལྟར་འབར་བའི་ཀློང་ཆེན་པོར་འཁོར་ལོའི་ཤར་ལྷོ་མཚམས་ནས་འཁོད་པའོ། །ཤར་ལྷོ་ཀོའུ་རི། ལྷོ་ནུབ་ཏུ་ཙོ་རི། ནུབ་བྱང་དུ་པྲ་མོ་ཧ། བྱང་ཤར་དུ་པེ་ཏ་ལི། ཤར་ལྷོའི་གྲུབ་ཆད་ལ་པུསྐ་སི། ལྷོ་ནུབ་ཏུ་ཀསྨ་རི། ནུབ་བྱང་དུ་སྨེ་ཤ་ནི། བྱང་ཤར་དུ་ཙནྡྷ་ལི་རྣམས་དོན་ཆོས་ཉིད་ལས་འཁོར་བ་རུ་སེམས་ཅན་གྱི་དོན་མཛད་པ་ལ་འཇིགས་པའི་གཟུགས་དང་བཅས་པ་ཉིད་ཀྱིས་བྱོན་ཏེ་ཁྲོ་བོའི་དཀྱིལ་འཁོར་དུ་འཁོད་པའོ། །གདན་ཞིང་རྐྱང་པ་རེ་རེ་ལ་བཞུགས་པའོ། །དེ་ཡང་རྒྱུ་སེམས་ཅན་གྱི་ལྡན་ཚུལ་ནི་རྣམ་པར་ཤེས་པ་བཞི་དང་དབང་པོ་རྣམ་བཞི་སྟེ་རྣམ་ཤེས་ཚོགས་བརྒྱད་དུ་འདུས་པས་ན་ཡི་གེ་ཧ་བརྒྱད་དོ། །ཞི་ཁྲོ་གནས་བསྒྱུར་ན་བྱང་ཆུབ་སེམས་དཔའ་བརྒྱད་པོ་དེ་མ་མོ་བརྒྱད་དོ། །འབྲས་བུ་ཐོབ་ཚུལ་ནི་རིགས་ཀྱི་ཆ་འཛིན་པས་ན་ཡེ་ཤེས་ལྔ་པོ་ཉིད་ཐོབ་པའོ། །གཉིས་པ་ནི། དེ་ནས་དགྱེས་ཏེ་ཧེ་བརྗོད་པས། །སེང་གདོང་ཆེན་མོའི་ཚོགས་དང་ནི། །སྟག་དང་ཝ་དང་ཁྱི་དང་བཞད། །ཀང་ཀ་དུར་བྱ་འུག་གདོང་ཆེ། །ཚོགས་རྣམས་རང་གི་ལག་ཆ་དང་། །ངོ་མཚར་བཅས་ནས་རྔམ་ཐོན་ཏེ། །འབར་བ་ཆེན་པའི་འཁོར་ལོ་ཡི། །ཕྱི་རོལ་ཤར་གྱི་ཕྱོགས་དག་ནས། །འཁོར་བར་རྔམས་པའི་མདངས་ཀྱིས་འཁོད། །ཅེས་པ་སྟེ། དེ་ནས་ཕྲ་མེན་མ་བརྒྱད་བསྐྱེད་པ་ནི་དཔལ་ཆེན་པོ་ཡབ་ཡུམ་སྦྱོར་བས་དགྱེས་ཏེ་ཧེ་ཞེས་བརྗོད་པས་བྱང་ཆུབ་སེམས་ཀྱི་སྤྲིན་ལས་ཧེ་བརྒྱད་ཕྱོགས་མཚམས་སུ་ཞིང་གི་གདན་སྟེངས་སུ་འཕྲོས་པས་བསྐྱེད་པའོ། །དེ་ཡང་ཕྱོགས་མཚམས་ཀྱི་རྣལ་འབྱོར་མ་གཅན་གཟན་གྱི་མགོ་ཅན་བཞི་ནི་ལྷ་མོ་སེང་ཧ་མུ་ཀ་ནི་སེང་གདོང་ཆེན་མོའི་ཚོགས་ཏེ་དྲེགས་པ་ཅན་ཐམས་ཅད་ཟིལ་གྱིས་གནོན་པ་དང་ཡེ་ཤེས་ཀྱིས་རྣམ་པར་རྟོག་པ་འཇོམས་པ་ལ་ཚུར་མི་ཚུགས་པའི་དོན་དང་ནི། བྱ་གྲི་མ་སྟག་གི་མགོ་ཅན་འཕྲིན་ལས་དཔལ་བརྟུལ་ཆེ་བ་དང་། སྲི་ལ་ཝ་ཡི་མགོ་ཅན་སྣ་སྣེའི་ཐབས་མཁས་པས་འགྲོ་བའི་དོན་མཛད་པ་དང་། ཤྭ་ན་ཁྱི་ཡི་མགོ་ཅན་རྣམ་རྟོག་འཇོམས་པ་དང་། མཚམས་ཀྱི་རྣལ་འབྱོར་མ་འདབ་ཆགས་ཀྱི་མགོ་ཅན་བཞི་ནི། ཀྲི་ཏ་བཞད་གདོང་མ་བྱ་རྒོད་ཀྱི་མགོ་ཅན་ཤེས་བྱ་ལ་ཐོགས་པ་མེད་པས་བཞད་མགོའོ། །ཀང་ཀ་དུར་བྱ་ཡི་མགོ་ཅན་ཏེ་འཁོར་བ་དང་དུ་ལེན་ནོ། །ཁ་ཁ་མུ་ཁ་བྱ་རོག་གི་མགོ་ཅན་ཏེ་འཁོར་འདས་མཉམ་པ་ཉིད་དུ་མཁྱེན་པའི་ཡེ་ཤེས་དང་ལྡན་པ། འུག་གདོང་ཆེ་ཞེས་པ་ཧུ་ལུ་ཀ་འུག་པའི་མགོ་སྟེ་ཡེ་ཤེས་ཀྱི་སྤྱན་དང་ལྡན་པས་གདུལ་བྱ་ཕྲ་མོ་ཡལ་བར་མི་འདོར་རོ། །མ་ཚོགས་དེ་རྣམས་ཀྱང་ཕྲ་མེན་གྱི་མགོ་ཅན་ཞལ་གཅིག་ཕྱག་གཉིས་པ་རང་རང་གི་ལག་ཆ་དང་བཅས་པ་སྟེ་སེང་ཧ་ཁ་རོ་ལ་སོགས་ཏེ་འོག་ཏུ་སྟོན་ནོ། །དེ་རྣམས་ངོ་མཚར་དང་བཅས་ནས་སྐུ་གསུང་ཐུགས་རྔམས་པའི་མདངས་ཀྱིས་ཐོན་ཏེ་འབར་བའི་དཀྱིལ་འཁོར་དུ་གནས་པའོ། །དེ་ཡང་སེམས་ཅན་གྱི་རང་བཞིན་སངས་རྒྱས་ཡིན་པ་ལ་དེ་ལྟར་མ་རྟོགས་པ་ངོ་མཚར་ཆེ་ཞེས་རྔམ་མོ། །ཁྲོ་བོའི་གཞལ་ཡས་ཁང་ནི་འབར་བ་ཆེན་པོའོ། །དེའི་འཁོར་ལོའི་ཕྱི་རོལ་བར་ཁྱམས་དང་པོ་ལ་ཤར་གྱི་ཕྱོགས་དག་ནས་རིམས་པས་འགོད་པ་སྟེ་ཤར་དུ་སེང་ཁ། ལྷོར་བྱ་གྲི། ནུབ་ཏུ་སྲི་ལ། བྱང་དུ་ཤྭ་ན་སྟེ་གཅན་གཟན་གྱི་མགོ་ཅན་མ་བཞིའོ། །ཤར་ལྷོར་ཀྲི་ཏ། ལྷོ་ནུབ་ཏུ་ཀང་ཀ །ནུབ་བྱང་དུ་ཁ་ཁ། བྱང་ཤར་དུ་ཧུ་ལུ་ཀ་སྟེ་འདབ་ཆགས་ཀྱི་མགོ་ཅན་མ་བཞིའོ། །དེ་ལྟར་བར་ཁྱམས་དང་པོའི་ཕྱོགས་མཚམས་རྣམས་སུ་གདན་ཞིང་རྐྱང་རེ་རེའི་སྟེང་དུ་འཁོར་བར་གདུལ་བྱའི་ཞིང་དུ་གཟིགས་ནས་སྐུ་གསུང་ཐུགས་རྔམ་པའི་མདངས་ཀྱིས་འཁོད་དོ། །དེ་ཡང་རྒྱུ་སེམས་ཅན་གྱི་ལྡན་ཚུལ་ནི་དབང་པོ་དང་རྣམ་ཤེས་ཀྱི་ཁྱད་པར་སྤྱད་བྱ་ཡུལ་དུ་གྱུར་པ་རྣམས་སོ། །ཞི་ཁྲོ་གནས་བསྒྱུར་བ་ནི་ཕྱི་ནང་གི་སེམས་མ་རྣམས་སོ། །དེ་བས་ན་ཡུལ་གྱི་མ་མོ་བརྒྱད་ཅེས་བྱའོ། །འབྲས་བུ་ཡེ་ཤེས་ཀྱི་ཐོབ་ཚུལ་ནི་ཡུལ་དག་པ་ཆོས་ཀྱི་དབྱིངས་ཡིན་ལ་དེ་ལ་ཡེ་ཤེས་ལྔའི་རོལ་པ་མ་འགགས་པར་གནས་པ་ཐོབ་པའོ། །གསུམ་པ་ནི། དེ་ནས་དགྱེས་ཏེ་ཕཊ་བརྗོད་པས། །རྡོ་རྗེ་སྲིང་འགྲོ་མ་ཚོགས་དང་། །གདོང་མོ་འཇིག་རྟེན་རོ་ལངས་མ། །ཚོགས་རྣམས་རང་གི་ལག་ཆ་དང་། །ངོ་མཚར་ཆས་ནས་འཇིགས་ཐོན་ཏེ། །དཀྱིལ་འཁོར་སྒོ་བཞིར་རྔམ་གཟུགས་གནས། །ཞེས་པ་སྟེ། ཕྲ་མེན་མ་བརྒྱད་བསྐྱེད་པའི་རྗེས་དེ་ནས་སྒོ་མ་བཞི་བསྐྱེད་པ་ནི་དཔལ་ཆེན་པོ་དགྱེས་ཏེ་ཕཊ་བརྗོད་པས་ཐབས་ཤེས་གཉིས་སུ་མེད་པའི་བྱང་ཆུབ་སེམས་ལས་ཕཊ་བཞི་སྒོ་བཞིར་འཕྲོས་པ་ལས་བསྐྱེད་པ་སྟེ་ཤར་དུ་རྡོ་རྗེ་སྲིངས་འགྲོ་མའམ་ལྕགས་ཀྱུ་མའི་ཚོགས་ནི་རྟའི་མགོ་ཅན་ཏེ་རྟ་མགྱོགས་ཤིང་ཤུགས་དྲག་པ་དང་འདྲ་བར་ཐུགས་རྗེ་མགྱོགས་ཤིང་ཤུགས་དྲག་པས་འཁོར་བ་མ་སྟོང་གི་བར་དུ་འགྲོ་དོན་མཛད་པའོ། །འཁོར་བར་མི་གཏོང་འཛིན་ཆེས་ཀྱང་བྱའོ། །ལྷོར་གདོང་མོའམ་ཞགས་པ་མ་ནི་ཕག་གི་མགོ་ཅན་ཏེ་ཕག་དང་འདྲ་བར་ཉོན་མོངས་པའི་ཐ་བ་ཀློག་འཕྲིན་ལས་གདོང་ཚུགས་སུ་བྱེད་དོ། །ནུབ་ཏུ་འཇིག་རྟེན་མའམ་ལྕགས་སྒྲོག་མ་ནི་དྲེད་ཀྱི་མགོ་ཅན་ཏེ་ཉི་མ་དང་འདྲ་བར་དགྲ་བགེགས་ཐམས་ཅད་བསྲེག་པས་ན་ཉི་ཟླ་དམར་མོ་འཇིག་རྟེན་མའོ། །བྱང་དུ་རོ་ལངས་མའམ་དྲིལ་བུ་མ་ནི་སྤྱང་ཁུའི་མགོ་ཅན་ཏེ་ཁམས་གསུམ་གྱི་སེམས་ཅན་རོ་དང་འདྲ་བ་དེ་རྣམས་ལ་ཡེ་ཤེས་ཀྱི་དྲན་པ་བསྐྱེད་པར་བྱེད་དེ་སྤྱང་གདོང་ཁམས་གསུམ་སླར་འཚོ་མའོ། །འདི་བཞིའི་གསང་མཚན་ལ་མི་ཕམ་མ། རལ་གཅིག་མ། ཁྲོ་གཉེར་མ། རོ་ལངས་མ་བཞི་ཞེས་གསུངས་སོ། །དེ་དག་ཀྱང་རང་རང་གི་སྤྲུལ་པའི་ཚོགས་རྣམས་དང་བཅས་ནས་རང་རང་གི་ལག་ཆ་ལྕགས་ཀྱུ་ལ་སོགས་པ་བསྣམས་པ་དང་བཅས་སེམས་ཅན་ཐམས་ཅད་ཀྱི་ལུས་ཀྱི་དབང་པོ་སྒོ་མ་བཞི་ཡིན་པ་ལ་ཡིན་པར་མ་རྟོགས་པ་ལ་ངོ་མཚར་དང་བཅས་ཏེ་ཆས་ནས་འཇིག་རྟེན་སེམས་ཅན་མ་རུང་བ་རྣམས་གདུལ་བྱར་གཟིགས་ནས་འཇིགས་པའི་གཟུགས་ཀྱིས་ཐོན་ཏེ་དཀྱིལ་འཁོར་གྱི་སྒོ་བཞིར་རམ་སྒོ་བཞིའི་ནང་ན་ཞིང་པགས་རེ་རེའི་སྟེང་དུ་སྐུ་གསུང་ཐུགས་རྔམ་པའི་གཟུགས་དང་བཅས་ནས་གནས་ཤིང་བཞུགས་པའོ། །དེ་ཡན་ཆད་ནི་ནང་གི་རྣལ་འབྱོར་མ་རྣམས་སོ། །དྲུག་པ་ནི། དགྱེས་པའི་སྲིན་དག་ཕྱོགས་བཅུ་ནས། །ཕཊ་ཅེས་བསྒྲགས་པས་ཐམས་ཅད་ཁྲོས། །ཞེས་པ་སྟེ། དེ་ལྟར་ཕོ་རྣམས་འོག་ཏུ་མནན་ནས་དབང་མོ་ཉི་ཤུ་རྩ་བརྒྱད་ལ་སྦྱོར་བ་བྱས་ཤིང་སྲས་བཏོན་ནས་ཡབ་ཡུམ་དགྱེས་པར་རོལ་པའི་བྱང་ཆུབ་སེམས་ཀྱི་སྤྲིན་དག་ལས་ཕྱོགས་བཅུ་ནས་ཕཊ་ཅེས་པའི་སྒྲ་བསྒྲགས་པའམ་བྱུང་བས་དབང་ཕྱུག་མ་ཐམས་ཅད་ཁྲོས་ཏེ་གནག་རྒོད་ལ་རྫས་བཏབ་པ་ལྟར་ཁྲོས་ནས་རང་རང་གི་གནས་གང་ཡིན་པ་དེར་སོང་ངོ་། །དཔལ་ཆེན་པོ་རིགས་ལྔ་ཡབ་རྣམས་ལ་རང་རང་གི་ཡུམ་ལུས་དང་གྲིབ་མ་ལྟ་བུར་སྐུ་ལ་འཁྲིལ་ནས་བཞུགས་པའོ། །གཉིས་པ་གཞན་སྲས་ལ་གཉིས་ཏེ་འཇུ་འདུལ་བྱ་བ་དང་། དཀྱིལ་འཁོར་བསྐྱེད་པའོ། །དང་པོ་ལ་བསྐུལ་བར་དམ་བཅའ་བ་དང་། བསྐུལ་བ་དངོས་དང་། རྟོག་པ་སྦྱང་བ་དང་། ལྷ་ཀུན་འོད་དུ་ཞུ་བ་དང་བཞིའོ། །དང་པོ་ནི། དེ་ནས་དཔའ་ཆེན་པོ་ཁྲོ་བོའི་རིགས། །ལྷུན་གྱིས་གྲུབ་པར་བྱ་བའི་ཕྱིར། །རང་གི་ངང་ཚུལ་དེ་བཟུང་ནས། །བསྐུལ་ཚིག་འདི་ཡང་རབ་ཏུ་བརྗོད། །ཅེས་པ་སྟེ། བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བའི་རྗེས་དེ་ནས་རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བ་ནི་དཔལ་ཆེན་པོ་བཛྲ་ཧེ་རུ་ཀའི་རང་བཞིན་ཁྲོ་བོའི་རིགས་ཡིན་ཏེ། དེ་ཡེ་ནས་རང་གི་ཕུང་པོ་དང་འབྱུང་བ་དང་ཁམས་སྐྱེ་མཆེད་ཀྱི་རང་བཞིན་ལྷའི་དལ་དུ་ལྷུན་གྱིས་གྲུབ་པར་སངས་རྒྱས་པ་ཡིན་ཀྱང་རྟོགས་པར་མ་གྱུར་པ་དེ་མ་རྟོགས་པ་རྟོགས་པར་བྱ་བའི་ཕྱིར་དང་མ་གྲུབ་པ་གྲུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱའོ། །བཛྲ་ཧེ་རུ་ཀའི་ཐུགས་ཀ་ནས་རང་གི་ངང་ཚུལ་དེ་བཟུང་བའམ་རང་སེམས་ཅན་གྱི་ལུས་འདི་ཁོ་ན་འདྲ་བ་གཅིག་བྱུང་ནས་དཀྱིལ་འཁོར་གྱི་བར་ཁྱམས་ནས་ལྷ་ལ་བསྐོར་བ་ལན་གསུམ་བྱས་ནས་ནུབ་ཕྱོགས་ཀྱི་སྒོར་འདུག་སྟེ་རྣལ་འབྱོར་ཆེན་པོའི་རྐྱང་ཕྱག་ལན་གསུམ་དུ་བཙལ་ནས་ཐལ་མོ་སྦྱར་ལོང་བུ་གཤིབས་རྐང་པ་ས་ལ་སྦྱར་ནས་གསོལ་བ་འདེབས་པའི་ངག་གམ་བསྐུལ་ཚིག་འདི་ཡང་རབ་ཏུ་བརྗོད་དོ། །འདིར་རང་གི་ངང་ཚུལ་སློབ་དཔོན་ལ་ལ་ནི་རང་ཐ་མ ལ་གྱི་ལུས་བཟུང་བར་བྱ་སྟེ་ལྷར་བྱས་ན་རྟོག་པ་སྦྱར་རྒྱུ་རང་ཅི་ཡོད་གསུངས་ལ། སྒྱུ་འཕྲུལ་ཡོངས་གྲགས་པ་ལ་ལ་ན་རེ་རང་ལྷའི་བུའམ་ཚངས་པའི་ཕྲུ་གུ་ལྟར་བྱ་སྟེ་ལྷ་བསོད་ནམས་ཆེ་བས་གྲུབ་ཐག་ཉེ་བའི་དགོས་པ་ཡོད་གསུངས་སོ། །སྒྱུ་འཕྲུལ་བཀའ་ལུགས་པ་ནི་རང་གི་ངང་ཚུལ་ཟེར་བས་ན་རང་རྡོ་རྗེ་སྲིན་ཕྲུག་ཞེས་བྱ་བ་ཁྲོ་ཆུང་སྲིན་པོ་ཕྲུ་གུ་ལྟར་བྱ་སྟེ་ལུས་ཐ་མལ་གྱི་ལུས་ཡིན་ཡང་ཆ་བྱད་སྲིན་པོ་ལྟ་བུ་ཞིག་ཡི་དམ་ལྷའི་ཐུགས་ཀ་ནས་ཐོན་ནས་གཞལ་ཡས་ཁང་ལ་བསྐོར་བ་ལན་གསུམ་བྱས་ནས་ནུབ་སྒོར་འདུག་སྟེ་ཞལ་ཤར་དུ་གཟིགས་ནས་རྐྱང་ཕྱག་ལན་གསུམ་བྱ་སྟེ་བདག་སངས་རྒྱས་ཡིན་པ་ལ་ཡིན་པར་མ་ཤེས་པས་ད་ཡི་དམ་ལྷ་དང་བདག་གིས་དབུ་བཟུང་བའི་སེམས་ཅན་ཐམས་ཅད་མཉམ་པར་སྦྱོར་རོ་ཞེས་གསོལ་བ་འདེབས་པའོ། །དེ་ཡང་གདུལ་བྱ་དྲག་པོ་ལ་དགོངས་པའི་གནད་ཀས་ཁྲོ་ཆུང་དུ་འདོད་དོ། །དེ་གསུམ་གང་བྱས་ཀྱང་འདྲ་སྟེ་ཚངས་པ་ནི་ཞི་བ་ཡིན་པས་ན་ཕྱི་ལ་བཀའ་ལུགས་ལྟར་འཐད་གསུངས་སོ། །གཉིས་པ་ནི། ༀ། སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་པས་བསྟན་ཏེ། དེ་ལ་ཡི་གེ་ༀ་གྱིས་མགོ་དྲངས་ནས་དཀྱིལ་འཁོར་གྱི་ལྷ་ཁྱེད་ཀྱིས་སྔོན་གྱི་ཐུགས་དམ་ཆེན་པོ་ཞལ་གྱིས་བཞེས་པ་ནི་བྱང་ཆུབ་མཆོག་ཏུ་སེམས་བསྐྱེད་ནས་དམ་བཅས་པ་སྟེ་ཇི་ལྟར་བཅས་ན་ཕྱི་སྣོད་དང་ནང་བཅུད་ཀྱི་འཇིག་རྟེན་གྱི་ཁམས་མ་ལུས་པ་ཐམས་ཅད་ཀུན་དག་པ་ཡེ་ཤེས་ཀྱི་སྣང་བར་བྱས་ཏེ་མ་དག་འཁྲུལ་པའི་སྣང་བ་སྤོང་བར་བྱེད་པའི་ཕྱིར་འཁོར་བ་ལས་རྒྱལ་བས་རྒྱལ་བའི་ཞིང་དུ་སྒྲོལ་བའམ་སྦྱོར་བར་ཞལ་གྱིས་བཞེས་པས་ན་ད་ཁྱེད་ཀྱི་ཁོངས་སུ་རྣལ་འབྱོར་པ་བདག་ཀྱང་རྟོགས་པར་བྱེད། ཁྱེད་ཀྱི་སྐུ་གསུང་ཐུགས་ཀྱི་ཕྱག་རྒྱ་ཆེན་པོར་རྣལ་འབྱོར་པ་བདག་ཀྱང་དབྱེར་མེད་པར་སྦྱོར་ཅིག་ཅེས་གསོལ་བ་གདབ་པའོ། །དེ་ཡང་ཚིག་རྐང་དང་པོས་དུས་ཅི་ཙམ་ན་བསྒྲལ་བར་དམ་བཅས་པ་དང་གཉིས་པས་གང་བསྒྲལ་བར་དམ་བཅའ་བ་དང་གསུམ་པས་གང་དུ་བསྒྲལ་བར་དམ་བཅའ་བ་དང་བཞི་པས་དེ་ཇི་ལྟར་སྒྲོལ་བར་བསྟན་པའོ། །གསུམ་པ་ནི། ཐབས་དང་ཤེས་རབ་གཉིས་མེད་པའི། །ཡེ་ཤེས་ཟེར་གྱིས་ལུས་རྟོག་སྦྱངས། །གསེར་ཞུན་ལྟ་བུའི་སེམས་དག་ལས། །གསུམ་གྱི་བྱིན་རླབས་འོད་ཀྱི་འབྲུ ། །ཐུགས་ཀར་ཐིམ་ནས་སྐུ་ཡི་དབྱིག །རྡོ་རྗེའི་ལམ་བྱུང་ཡུམ་གྱི་མཁའ། །ཆོས་སྐུ་བྱང་ཆུབ་སེམས་སུ་གནས། །ཞེས་པ་སྟེ། དེ་ལྟར་གསོལ་བ་བཏབ་པས་དཀྱིལ་འཁོར་གྱི་ལྷ་མས་ཐབས་དང་ཤེས་རབ་གཉིས་སུ་མེད་པའི་སྦྱོར་བ་མཛད་པས་བྱང་ཆུབ་སེམས་ཀྱི་རྒྱུ་ཡབ་ལས་བྱུང་སྟེ་ཡུམ་ལ་ཐིམ་ཡུམ་གྱི་མཁའ་ནས་ཡེ་ཤེས་འོད་ཟེར་གྱི་རྣམ་པར་འཕྲོས་པས་བདག་གི་ལུས་ངག་ཡིད་གསུམ་གྱི་རྟོག་པ་ཐམས་ཅད་བྱ་སྒྲོ་མེ་ལ་བསྲེགས་པ་བཞིན་ཚིག་ནས་སྡིག་སྒྲིབ་དང་བག་ཆགས་ངན་པ་ཐམས་ཅད་གཏན་ནས་སྦྱངས་ཏེ་རིག་པ་བྱང་ཆུབ་ཀྱི་སེམས་དེ་དཔེར་ན་གསེར་ཞུན་མ་ཞིག་སྐོང་བུ་ན་གནས་པ་ལྟ་བུའི་ཚུལ་དུ་ལྟེམ་ལྟེམ་ཞུ་ནས་གནས་པའི་ཀུན་གཞི་བྱང་ཆུབ་སེམས་ཀྱི་གཟུགས་བརྙན་དེ་དག་ལ། ཡང་ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་གསུམ་གྱི་བྱིན་བརླབས་འོད་ཀྱི་ཡི་གེ་འབྲུ་གསུམ་འཕྲོས་ནས་འོད་དེ་ཐིམ་འོད་དེ་རྣམས་ལ་རང་བཞིན་མེད་པའི་ཡི་གེ་ༀ་ཨཱཿཧཱུཾ་གསུམ་དུ་གྱུར་ཏེ་ཡི་གེ་དེ་གསུམ་ཡང་ཧཱུྃ་དུ་གྱུར། ཧཱུྃ་འོད་ཀྱི་ཡིག་འབྲུ་སྒྱུ་མ་ཙམ་དེའོ། །ཡི་གེ་ཧཱུྃ་དེ་ཡང་བར་ཁྱམས་ནས་བསྐོར་བ་ལན་གསུམ་བྱས་ནས་བུང་བ་མེ་ཏོག་ལ་ལྡིང་བ་ལྟ་བུ་སྟེ་གཙོ་བོའི་ཐུགས་ཀར་ཐིམ་ནས། དེ་སྐུའི་དབྱིག་ཏུ་གྱུར་པ་ཡིན་ནོ། །སྐུ་ཡི་དབྱིག་ནས་སྒལ་ཚིགས་ཀྱི་རྟ་བརྒྱུད་རྡོ་རྗེའི་ལམ་དུ་བྱུང་ཡུམ་གྱི་མཁའ་ལ་བབས་ནས་སྤྲིན་མེད་ཉི་མའི་འོད་ཟེར་ལྟར་དྲིལ་ནས་གནས་སོ། །ཧཱུཾ་དེའི་འོད་ཟེར་གྱིས་ཡབ་ཡུམ་ཡང་འོད་དུ་ཞུ་ནས་ཆོས་ཀྱི་སྐུ་ཡི་ངོ་བོ་རིག་པ་བྱང་ཆུབ་སེམས་སུ་གནས་པ་སྤྲིན་མེད་ཉི་མའི་འོད་ལྟར་གསལ་ལོ། །བཞི་པ་ནི། ལྷ་རྣམས་སོ་སོའི་སྙིང་པོའི་སྒྲ། །ཧཱུཾ་ཧ་ཧེ་ཕཊ་ཅེས་བྱུང་ནས་ནི། །བྱང་ཆུབ་སེམས་སུ་གཅིག་པར་ཐིམ། །ཞེས་པ་སྟེ། དཀྱིལ་འཁོར་གྱི་ལྷ་རྣམས་ཀྱང་སོ་སོའི་སྙིང་པོའི་སྒྲ་ཧཱུཾ་ཧ་ཧེ་ཕཊ་ཅེས་པ་བྱུང་ནས་འོད་དུ་ཞུ་བའོ། །རིགས་ལྔའི་སྔགས་ཧཱུཾ་གནས་ཀྱི་མ་བརྒྱད་ཧ་ཡུལ་གྱི་མ་བརྒྱད་ཧེ་སྒོ་མ་བཞི་ཕཊ་ཅེས་བྱུང་ནས་ནི་འོད་དུ་ཞུ་བའོ། །རིགས་ལྔའི་ཧཱུཾ་གི་སྒྲ་སྒྲོགས་ཤིང་འོད་དུ་ཐིམ་མོ། །དེས་ཀུན་འགྲེ་བ་ཡིན་ནོ། །འོད་དེ་རྣམས་ཀྱང་དབུས་ཀྱི་འོད་བྱང་ཆུབ་སེམས་སུ་གཅིག་པར་ཐིམ་སྟེ་དཀྱིལ་འཁོར་གྱི་དབུས་ན་འོད་ཀྱི་གོང་བུ་གཅིག་ཏུ་གནས་ཏེ་དེ་ནི་སྙིང་པོ་ཆོས་ཀྱི་སྐུའོ། །གཉིས་པ་དཀྱིལ་འཁོར་བསྐྱེད་པ་ལ་གཉིས་ཏེ། གཙོ་བོ་བསྐྱེད་པ་དང་། འཁོར་བསྐྱེད་པའོ། །དང་པོ་ལ་ལྔ་སྟེ་ཡབ་ཡུམ་བསྐྱེད་པ་དང་། དབང་དང་གནས་གསུམ་བྱིན་རླབས་བྱ་བ་དང་། རྗེས་ཆགས་ཀྱི་གླུ་ཡིས་ང་རྒྱལ་བཟུང་ཞིང་མཁའ་གསང་བྱིན་གྱིས་བརླབས་ཏེ་སྙོམས་འཇུག་གི་གླུས་བསྐུལ་བ་དང་། རྗེས་ཆགས་ལ་བསྙེན་སྒྲུབ་རྣམ་བཞི་ཚང་བར་བསྟན་པ་དང་། བྱང་ཆུབ་སེམས་སྤྲིན་ཡུམ་མཁའ་ནས་སྤྲོས་ཏེ་མཉེས་མཆོད་ཕུལ་ནས་བསྟིམ་པའོ། །དང་པོ་ནི། དེ་ནས་སྙིང་པོ་དྲན་ཙམ་གྱིས། །གསུང་གི་ཕྱག་རྒྱ་གཉིས་རྫོགས་ནས། །འོད་ཟེར་འཕྲོ་འདུས་སྦྱོར་བ་ཡིས། །ཐུགས་ཀྱི་ཕྱག་རྒྱ་རབ་ཏུ་འབར། །དེ་ནས་ཕྲ་མོའི་སྐུ་འཕྲོས་འདུས། །ཕྱག་རྒྱ་ཆེན་པོའི་སྐུ་གཉིས་རྫོགས། །ཞེས་གསུངས་ཏེ། དེ་ནས་སྙིང་པོ་ཡི་གེ་ཧཱུཾ་ཡིད་ལ་བྲེངས་ཀྱིས་དྲན་པ་ཙམ་གྱིས་ཡི་གེ་ཧཱུཾ་ལོག་པ་དང་མ་ལོག་པ་གཉིས་སུ་གྱུར་ཏོ། །དེ་ལྟར་གསུང་གི་ཕྱག་རྒྱ་ཧཱུཾ་སྒྲིལ་མ་གཉིས་སུ་གསལ་བ་ནི་གསུང་ཡིག་འབྲུའི་ཆོ་ག་སྟེ་ཧཱུཾ་བརྟན་པར་གསལ་བ་ནི་ཡོངས་སུ་རྫོགས་པའོ། །དེ་ནས་ཧཱུཾ་དེ་ལས་འོད་ཟེར་ཕར་འཕྲོ་བས་བདེ་བར་གཤེགས་པའི་ཐུགས་རྒྱུད་བསྐུལ་འགྲོ་བ་སེམས་ཅན་གྱི་བག་ཆགས་དང་རྟོག་སྒྲིབ་སྦྱངས་ནས་ཚུར་འདུས་པས་ཧཱུཾ་ལ་ཐིམ་པའི་སྦྱོར་བ་ཡིས་ཐུགས་ཀྱི་ཕྱག་རྒྱ་རྡོ་རྗེ་དྲིལ་བུའམ་བྷནྡྷ་གཉིས་སུ་གྱུར་པ་ནི་ཐུགས་ཕྱག་མཚན་གྱི་ཆོ་གའོ། །དེ་ལས་འོད་རབ་ཏུ་འབར་ནས་འཕྲོས་ཤིང་འདུས་པ་ལས་ཧེ་རུ་ཀའི་སྐུ་ཕྲ་མོ་ཞལ་གསུམ་ཕྱག་དྲུག་ཞབས་བཞི་བསྒྲད་པ་ཡུམ་དང་འཁྲིལ་ནས་བཞུགས་པ་ཞིག་ཏུ་གྱུར་པ་ནི་སྐུ་ཕྱག་རྒྱའི་ཆོ་གའོ། །དེ་ནས་ཕྲ་མོའི་སྐུ་དེ་ལས་འོད་ཟེར་འཕྲོ་འདུས་པ་ལས། ལྷ་སྐུ་ཕྱག་རྒྱ་ཆེན་པོའི་སྐུ་གཉིས་རྫོགས་པར་སྒོམ་པ་ནི་དཔལ་ཆེན་པོ་ཞལ་གཡས་དཀར་བ་གཡོན་དམར་བ་དབུས་མ་མཐིང་ཀ་རྡོ་རྗེ་འཁོར་ཡུག་ཐོང་གཤོལ་གཡས་བྷནྡྷ་པདྨ་རལ་གྲི་གཡོན་ན་འཛིན་པ་ཡུམ་ཞལ་གཅིག་ཕྱག་གཉིས་པ་སྐུ་མདོག་མཐིང་ཀ་གཡས་ཡབ་ལ་འཁྱུད་པ་གཡོན་ཐོད་པ་གཙོ་ལ་སྟོབ་པའོ། །གཉིས་པ་ནི། ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་བ་ཨཏྨ་ཀོ྅་ཧཾ། ༀ་མ་ཧཱ་ཨ་དཪྴ་ཛྙཱ་ན་བཛྲ་སྭ་བྷ་བ་ཨཏྨ་ཀོ྅་ཧཾ། ༀ་མ་ཧཱ་པྲ་ཏྱ་བེ་ཤ་ཛྙཱ་ན་བཛྲ་སྭ་བྷ་བ་ཨཏྨ་ཀོ྅་ཧཾ། ༀ་མ་ཧཱ་ས་མན་ཏ་ཛྙཱ་ན་བཛྲ་སྭ་བྷ་བ་ཨཏྨ་ཀོ྅་ཧཾ། ༀ་མ་ཧཱ་ཀྲི་ཏྱ་ནུ ཥྛ་ན་ཛྙཱ་ན་བཛྲ་སྭ་བྷ་བ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་ཀ་ཡ་བཛྲ་སྭ་བྷ་བ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་ཝཀྐ་བཛྲ་སྭ་བྷ་བ་ཨཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷ་བ་ཨཏྨ་ཀོ྅་ཧཾ། ཞེས་པ་སྟེ་བདག་ཡབ་ཡུམ་གྱི་མཁའ་ལས་ལྷ་མོ་བཞི་འཕྲོས་པས་འོག་མིན་ནས་རིགས་ལྔ་ཁྲག་འཐུང་སྤྱན་དྲངས་ནས་མདུན་གྱི་ནམ་མཁའ་ལ་བྱོན་པར་བསམ་མོ། །ཡབ་ཡུམ་ཐབས་ཤེས་རབ་གཉིས་སུ་མེད་པའི་ཆུ་རྒྱུན་གྱིས་དབང་བསྐུར་ཏེ་དབང་རྟགས་སུ་རིགས་ལྔ་ཁྲོ་བོས་དབུ་བརྒྱན་པར་བསམ་མོ། །དེ་ལྟར་བདག་ཉིད་དལ་རྫོགས་པ་ལ་དབང་བསྐུར་བ་དང་གཉིས་སུ་མེད་པའི་བྱང་ཆུབ་སེམས་ཀྱིས་སྦྱངས་ནས་སེམས་ཅན་མ་ཡིན་སངས་རྒྱས་ཡིན་ཏེ་འོ་ན་སངས་རྒྱས་ལ་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ཡེ་ཤེས་དང་ལྡན་ན་བདག་ལ་ལྡན་ནམ་ཞེ་ན་ལྡན་པར་བྱིན་གྱིས་བརླབས་པ་ཡིན་ནོ། །སྔགས་དོན་ནི་ༀ་ཡེ་ཤེས་ལྔ་མ་ཧཱ་ཆེན་པོ་ཤུ་ནྱ་ཏ་སྟོང་པ་ཉིད་ཛྙཱ་ན་ཡེ་ཤེས་བཛྲ་རྡོ་རྗེ་སྭ་བྷ་ཝ་ངོ་བོ་ཉིད་ཨཏྨ་ཀོ྅་ཧཾ་བདག་ཉིད་ངའོ། །དེས་འོག་མ་རྣམས་ལ་ཡང་འགྲེའོ། །སྤྱི་བོ་ན་ཐོད་པའི་གཞལ་ཡས་ཁང་ན་བཅོམ་ལྡན་འདས་བུདྡྷ་ཧེ་རུ་ཀ་ཞལ་གཅིག་ཕྱག་གཉིས་སྐུ་མདོག་སྨུག་ནག་གཡས་འཁོར་ཡུག་གཡོན་བྷནྡྷ་བསྣམས་པ་ཡུམ་སྨུག་ནག་གཡས་རྡོ་རྗེ་གཡོན་ཐོད་པ་སྟོབ་པ་གཅིག་བསམ་མོ། །དེ་བཞིན་དུ་ཐོག་མཐའ་སྔ་མ་ལྟར་ལ་ཨ་དཪྴ་མེ་ལོང་ལྟ་བུ་སྟེ་བདག་གི་དཔྲལ་བ་ན་ཐོད་པའི་ཁང་བུའི་ནང་དུ་བཅོམ་ལྡན་འདས་བཛྲ་ཧེ་རུ་ཀ་མཐིང་ནག་ཞལ་གཅིག་ཕྱག་གཉིས་པ་གཡས་ན་རྡོ་རྗེ་གཡོན་ན་བྷནྡྷ་བསྣམས་པ་ཡུམ་མཐིང་ནག་གཡས་རྡོ་རྗེ་གཡོན་བྷནྡྷ་སྟོབ་པར་བསམ་ལ་སྔགས་ཀྱིས་ང་རྒྱལ་བྱའོ། །པྲ་ཏྱ་བེ་ཤ་མཉམ་པ་ཉིད་དོ་རྣ་ལྟག་གཡས་སུ་ཐོད་པའི་ཁང་བུའི་ནང་དུ་བཅོམ་ལྡན་འདས་རཏྣ་ཧེ་རུ་ཀ་སེར་ནག་གཡས་ཐོང་གཤོལ་གཡོན་བྷནྡྷ་ཡུམ་ཐོད་པ་སྟོབས་པར་བསམ་མོ། །ས་མནྟ་སོ་སོར་རྟོག་པ་སྟེ་ལྟག་ཁུང་དུ་ཐོད་པའི་ཁང་བུའི་ནང་ན་བཅོམ་ལྡན་འདས་པདྨ་ཧེ་རུ་དམར་ནག་གཡས་དགྲ་སྟ་གཡོན་བྷནྡྷ་བསྣམས་པ་ཡུམ་གཡས་རྡོ་རྗེ་གཡོན་བྷནྡྷ་གཙོ་ལ་སྟོབ་པ་བསམ་ལ་སྔགས་ཀྱིས་ང་རྒྱལ་བྱ་སོ་སོར་རྟོག་པའི་ཡེ་ཤེས་ཀྱིས་དབང་བསྐུར་བའོ། །ཀྲི་ཏྱ་ནུས་ཋ་ན་བྱ་བ་གྲུབ་པ་སྟེ་རྣ་ལྟག་གཡོན་དུ་ཐོད་པའི་ཁང་བུའི་ནང་དུ་བཅོམ་ལྡན་འདས་ཀརྨ་ཧེ་རུ་ཀ་སྐུ་མདོག་ལྗང་ནག་གཡས་རལ་གྲི་གཡོན་བྷནྡྷ་བསྣམས་པ་ཡུམ་རྡོ་རྗེ་དང་ཐོད་པ་གཙོ་ལ་སྟོབ་པར་སྔགས་ཀྱིས་ང་རྒྱལ་བྱ་བྱ་བ་གྲུབ་པའི་ཡེ་ཤེས་སུ་དབང་བསྐུར་རོ། །དེ་རྣམས་ཡི་གེ་ཧཱུཾ་ལྔ་ལས་བསྐྱེད་དོ། །དེ་ཡན་ཆད་ཀྱིས་ཡེ་ཤེས་ལྔས་དབང་བསྐུར་བསྟན། །སྐུ་གསུང་ཐུགས་སུ་བྱིན་གྱིས་བརླབ་པ་ནི། ༀ་སྔགས་ཀྱི་མགོ་འདྲེན་པ་སརྦ་ཐམས་ཅད་ཏ་ཐཱ་ག་ཏ་དེ་བཞིན་གཤེགས་པ་ཀ་ཡ་སྐུ་བཛྲ་རྡོ་རྗེ་སྭ་བྷ་ཝ་ངོ་བོ་ཉིད་ཨཏྨ་ཀོ་ཧཾ་བདག་ཉིད་ངའོ། །དེ་ཡང་སྤྱི་བོ་ཀླད་པ་དུང་ཁང་ནང་དུ་ༀ་ལས་བུདྡྷ་ཧེ་རུ་ཀ་གཡས་སྔོ་གཡོན་དམར་དབུས་སྨུག་ཞལ། འཁོར་ཡུག་རྡོ་རྗེ་དུང་ཆེན་གཡས་རལ་གྲི་དགྲ་སྟ་ཐོང་གཤོལ་གཡོན་ན་བསྣམས་པ་བསྐྱེད་སྔགས་ཀྱིས་ང་རྒྱལ་བྱའོ། །དེ་བཞིན་དུ་ༀ་སརྦ་ཐམས་ཅད་ཏ་ཐཱ་ག་ཏ་དེ་བཞིན་གཤེགས་པ་ཝ ཀྐ་བཛྲ་གསུང་རྡོ་རྗེ་སྭ་བྷ་ཝ་ངོ་བོ་ཉིད་ཨཏྨ་ཀོ་ཧཾ་བདག་ཉིད་ངའོ། །མགྲིན་པར་པདྨའི་སྟེང་དུ་ཨཾ་ལས་བཅོམ་ལྡན་འདས་པདྨ་ཧེ་རུ་ཀ་གཡས་སྔོ་གཡོན་དཀར་དབུས་དམར་ཞལ་རལ་གྲི་རྡོ་རྗེ་འཁོར་ཡུག་གཡས་དུང་དམར་དགྲ་སྟྭ་ཐོང་གཤོལ་གཡོན་ན་བསྣམས་པའོ། །ༀ་སརྦ་ཏ་ཐཱ་ག་ཏ་སྔར་ལྟར་ལ་ཙིཏྟ་བཛྲ་ཐུགས་རྡོ་རྗེ་སྭ་བྷ་ཝ་ཨཏྨ་ཀོ་ཧཾ་ཡང་སྔར་ལྟར་རོ། །ཐུགས་ཀར་ཉི་མའི་སྟེང་དུ་ཧཱུཾ་ལས་བཅོམ་ལྡན་འདས་བཛྲ་ཧེ་རུ་ཀ་གཡས་དཀར་གཡོན་དམར་དབུས་མཐིང་ཞལ་རྡོ་རྗེ་འཁོར་ཡུག་དུང་ཆེན་གཡས་རལ་གྲི་དགྲ་སྟྭ་ཐོང་གཤོལ་གཡོན་ཡུམ་མཐུན་སྔགས་ཀྱིས་ང་རྒྱལ་བྱ་བ་ནི་བྱིན་གྱིས་བརླབས་པའོ། །གསུམ་པ་ནི། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་ཛྙཱ་ན་བཛྲ་སྭ་བྷ་ཝ་ཨཏྨ་ཀོ་ཧཾ། ༀ་སརྦ་ཏ་ཐཱ་ག་ཏ་མ་ཧཱ་པུ་ཙ་བཛྲ་སྭ་བྷ་ཝ་ཨཏྨ་ཀོ་ཧཾ། རྡོ་རྗེ་པདྨ་བྱིན་བརླབས་པ། །ཧཱུཾ་ལས་རྡོ་རྗེ་རྩེ་ལྔ་པ། །བཾ་ལས་པདྨར་གྱུར་པའི་དབུས། །མ་ལས་ཉི་མའི་དཀྱིལ་འཁོར་སྒོམ། །ཤ་ཏ་པ་ལ་སོགས་པའི་གླུས། །བསྐུལ་བདག་ཀྱང་རབ་ཏུ་བྱ། །ཞེས་པས་བསྟན། འདིར་སྔགས་མཚན་གཉིས་ཀྱི་དོན་སྐྱོ་སྟོན་ཤག་ཡེ་ཤེས་ནི་སྔ་མས་ལྟེ་བར་རིན་པོ་ཆེའི་སྟེང་ན་རཏྣ་ཧེ་རུ་ཀ་གཡས་དམར་གཡོན་དཀར་དབུས་སེར་ཞལ་དུང་ཆེན་རྡོ་རྗེ་འཁོར་ཡུག་གཡས་རལ་གྲི་དགྲ་སྟྭ་ཐོང་གཤོལ་གཡོན་ན་འཛིན་པ་སྒོམ་ཕྱི་མས་གསང་བར་རྡོ་རྗེ་རྒྱ་གྲམ་སྟེང་ན་ཧ་ལས་ཀརྨ་ཧེ་རུ་ཀ་གཡས་དམར་གཡོན་དཀར་དབུས་ལྗང་ཞལ་དགྲ་སྟྭ་རྡོ་རྗེ་འཁོར་ཡུག་གཡས་དུང་ཆེན་རལ་གྲི་ཐོང་གཤོལ་གཡོན་ན་བསྣམས་པ་སྒོམ་པར་གསུངས་པ་ཡིན་སྐད་དོ། །དེ་ལྟར་བསམས་ཀྱང་འགལ་བ་མེད་དོ། །དངོས་ནི་བྱང་ཆུབ་སེམས་ཀྱི་སྔགས་ཡིན་ནོ། །མཁའ་གསང་རྡོ་རྗེ་དང་པདྨར་བྱིན་གྱིས་བརླབ་པ་ནི་ཡབ་ཀྱི་མཁའ་ནི་ཧཱུཾ་བཛྲ་ཞེས་པས་ཐུགས་ཡེ་ཤེས་ལྔ་དང་ལྡན་པའི་རྟགས་སུ་ཧཱུཾ་ལས་རྡོ་རྗེ་མཐིང་ཀ་རྩེ་ལྔ་པར་སྒོམ་མོ། །ཡུམ་གྱི་མཁའ་པཾ་ལས་པད་མ་འདབ་མ་བརྒྱད་པར་གྱུར་པའི་དབུས་སུ་བདེ་བར་བཤེགས་པ་ཐམས་ཅད་བསྐྱེད་པའི་རྟགས་སུ་མ་ལས་ཉི་མའི་དཀྱིལ་འཁོར་གྱི་སྟེང་དུ་མ་དམར་མོ་གཅིག་བསྒོམ་མོ། །དེ་ནས་བརྡས་བསྐུལ་བ་ནི་ཡུམ་གྱིས་ས་མ་ཡ་ཧཱུཾ་ཞེས་བསྐུལ། ཡབ་ཀྱིས་ས་མ་ཡ་སྟྭཾ་ཞེས་བསྐུལ། ཡུམ་གྱིས་ཨ་ནུ་ར་ག་ཡ་མི་ཞེས་བརྗོད། ཡབ་ཀྱིས་ཨ་ནུ་ར་ག་ཡ་ཧཾ་ཞེས་བརྗོད་ནས་ཡབ་ཡུམ་བརྡའ་བསྣོལ་མས་བསྐུལ་ཏེ་ཤ་ཏ་པ་ལ་སོགས་པའི་གླུ་དྲུག་གིས་དགྱེས་པ་བསྐྱེད་པས་བྱང་ཆུབ་སེམས་ཕབ་ལ་སྔགས་གཉིས་པོས་མཆོད་པ་བྱའོ། །རྗེས་སུ་ཆགས་པའི་སྔགས་ཀྱིས་ནང་དུ་སེམས་བཟུང་། མཆོད་པ་པུ་ཙའི་སྔགས་ཀྱི་ཕྱོགསབཅུའ་བདེ་བར་གཤེགས་པ་མཆོད་པའོ། །གླུ་དྲུག་ནི་ཤ་ཏ་པ་དང་གར་ཏ་པ་གཉིས་རྩ་བའི་རིགས་པ་གཉིས་དང་བྲེང་ངེ་བ་དང་དུང་ངེ་བ་གཉིས་འབྲིང་པོ་གཉིས་དང་སང་ཀ་དེའུ་དང་ཅང་ཀ་དེའུ་ཡི་གླུ་གཉིས་ཐུང་བ་གཉིས་ཏེ་དྲུག་གོ། །དེ་རེ་རེ་ལ་ཡོན་ཏན་བཅུ་བཅུ་དང་ལྡན་ཏེ་འདུ་ཤེས་བསྐྱེད་པ་དང་། རྣམ་པར་རིག་པ་དང་། ཉན་པར་འོས་པ་དང་། མི་མཐུན་མེད་པ་དང་། ཤིན་ཏུ་ཟབ་པ་དང་། རྗེས་སུ་འབྱུང་བ་དང་། གང་གིས་མི་ཚུགས་པ་དང་། རྣ་བར་སྙན་པ་དང་། རྣམ་པར་མི་འཁྲུགས་པ་དང་། ཤིན་ཏུ་གསལ་བའོ། །བཅུ་པོ་དེ་རེ་རེ་ལ་ཡང་གླུ་དྲུག་དྲུག་པོས་ཁྱབ་པ་སྟེ་དྲུག་ཅུ་ཚན་དྲུག་གོ། །དེ་ལ་གསུང་དབྱངས་ཡན་ལག་དྲུག་ཅུ་ཞེས་བྱ་སྟེ། དེལྟ་བུའི་གླུས་ཡབ་ཡུམ་རང་རང་ཆགས་པ་བྱེད་པའི་བདེ་བ་བསྐྱེད་པར་བསྐུལ་བ་དག་ཀྱང་རབ་ཏུ་བྱའོ། །བཞི་པ་ནི། བསྙེན་པ་དང་ནི་ཉེ་བསྙེན་དང་། བསྒྲུབ་པ་དང་ནི་བསྒྲུབ་ཆེན་པོ། །ཞེས་པ་སྟེ་སྤྱིར་བསྙེན་བསྒྲུབ་ལ་གསུམ་སྟེ་ཕྱི་དང་ནང་དང་གསང་བའོ། །ཕྱི་ནི་ལམ་ལ་བསྙེན་སྒྲུབ་བཞི་སྟེ་ལྟ་བ་ཚོལ་བ་ནས་ཀུན་སྣང་ཡན་ཆད་བསྙེན་པ། ཕྱག་རྒྱ་གཅིག་པ་ཡན་ཆད་ནས་སྤྲོས་པ་ཡན་ཆད་ཉེ་བསྙེན། བར་ཆད་མེད་པ་ནས་ཕྱག་རྒྱ་ཆེན་པོའི་རིག་འཛིན་ཡན་ཆད་སྒྲུབ་པ། ལྷུན་གྱིས་གྲུབ་པ་ནས་སངས་རྒྱས་ལ་སྦྱོར་བ་སྒྲུབ་པ་ཆེན་པོའོ། །ནང་གི་བཞི་ནི་དང་པོ་ཡོ་བྱད་བསགས་པ་ནས་ནུབ་དང་པོ་ཡན་ཆད་བསྙེན་པ། དེ་ནས་ཅི་ཙམ་བྱེད་པའི་བྱེད་ཚུན་ཆད་ཉེ་བསྙེན། ནུབ་བར་མ་སྒྲུབ་པ། ནུབ་ཐ་མའི་དུས་སུ་དངོས་གྲུབ་ལེན་པ་སྒྲུབ་པ་ཆེན་པོ་དེ་ནི་སྒྲུབ་པ་དུས་ཀྱི་བསྙེན་སྒྲུབ་བོ། །གསང་བ་ལ་གཉིས་ཏེ་སྒྲོལ་བ་དང་སྦྱོར་བའོ། །སྒྲོལ་བ་བཞི་ནི་དང་པོ་གཞི་ཚོལ་བ་ནས་དབང་བསྐུར་བ་བསྙེན་པ། བསྒྲལ་བ་བཞི་དང་ལྡན་པ་ཉེ་བསྙེན། ཁོག་པ་དྲལ་བ་སྒྲུབ་པ། ཉོན་མོངས་པ་རྒྱུན་བཅད་དེ་བསྒྲལ་བ་ནི་སྒྲུབ་ཆེན་ནོ། །སྦྱོར་བ་ནི་ཡུམ་ཚོལ་བ་ནས་ཆས་སུ་ཞུགས་པ་བསྙེན་པ། གཡེམ་ལ་བསྐྱེད་པ་ཉེ་བསྙེན་རོལ་བ་སྒྲུབ་པ། ཐིག་ལེ་གཅིག་ཤོར་གཉིས་གནས་ཀྱི་དུས་སྒྲུབ་པ་ཆེན་པོའོ། །དེ་ལས་འདི་སྦྱོར་བའི་ཁོངས་སུ་འགྲོ། དེ་ལ་གཉིས་ཏེ་ལྷ་བསྐྱེད་པ་དང་། དབང་བསྐུར་བ་ལས་འདིར་ལྷ་བསྐྱེད་པའི་བསྙེན་བསྒྲུབ་བཞི་ནི་ཡུམ་བསྐྱེད་ཅིང་མཁའ་གསང་བྱིན་གྱིས་བརླབ་པ་བསྙེན་པ་དང་ནི། བརྡ་བསྣོལ་མར་བསྐུལ་བ་ཉེ་བའི་བསྙེན་པ་དང་། ཕྱག་རྒྱ་བཞིས་རོལ་བ་སྟེ་ཐབས་དང་ཤེས་རབ་སྦྱོར་བ་ནི་སྒྲུབ་པ་དང་ནི། བདེ་བ་ཉམས་སུ་མྱོང་སྟེ་ལྷག་པ་བྱང་ཆུབ་སེམས་བབས་པ་ནི་སྒྲུབ་པ་ཆེན་པོའོ། །ལྔ་པ་ནི། ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །ཞེས་པ་སྟེ། ཡུམ་གྱི་མཁའ་པདྨ་འདབ་མ་བརྒྱད་པའི་དཀྱིལ་འཁོར་དུ་ལྷག་པ་བྱང་ཆུབ་ཀྱི་སེམས་གསལ་བ་དང་རྟོག་པ་མེད་པར་བྱས་ཏེ། དེ་ལྟ་བུའི་བྱང་ཆུབ་སེམས་བདེ་བ་ཐུགས་ཡེ་ཤེས་ཀྱི་བདག་ཉིད་ཀྱིས་བདེ་བར་གཤེགས་པའི་དཀྱིལ་འཁོར་མ་ལུས་པ་ཐམས་ཅད་ལ་ཡང་སྤྲོའོ། །དེ་ཡང་ཇི་ལྟར་ན་ནམ་མཁའི་ཁམས་གང་བར་དུས་གསུམ་སངས་རྒྱས་མང་པོ་སྤྲིན་ཚོགས་འཐིབ་པ་ལྟར་མ་ལུས་པ་སྟོང་གསུམ་ཡུངས་འབྲུར་གཞུག་ཚུལ་དུ་སྤྱན་དྲངས་ལ་བདག་ཉིད་ཡབ་ཡུམ་གྱི་སྐུ་ལ་བསྟིམ། གོང་གི་སྔགས་གཉིས་པོ་འཆད་དེ། ལྷག་པ་བྱང་ཆུབ་ཀྱི་སེམས་བདེ་བའི་མཆོད་པས་དགྱེས་པར་བྱེད་དེ་དེ་ཡང་ཡབ་ཡུམ་མཉམ་པར་སྦྱོར་བ་ལས་བྱུང་ཞིང་མཆོད་པ་ཀུན་གྱི་ནང་ནས་ཟག་མེད་བདེ་བ་ཆེན་པོ་མཆོག་གི་མཆོད་པ་ཡིན་ལ་དེ་ལྟ་བུའི་སྦྱིན་པའམ་མཆོད་པས་སེམས་ཅན་རྣམས་ཀྱང་དགའ་བར་དོན་བྱས་ནས་ཡུམ་གྱི་མཁའ་གཞལ་ཡས་ཁང་གི་ནང་དུ་བསྟིམ་མོ། །གཉིས་པ་འཁོར་བསྐྱེད་པ་ལ་གཉིས་ཏེ། དཀྱིལ་འཁོར་དགོད་པ་དང་། སྔགས་ཀྱིས་ཕྱིར་བཏོན་ཏེ་ལྷ་སོ་སོར་སྒོམ་པའོ། །དང་པོ་ནི། དེ་ནས་དཀྱིལ་འཁོར་གསལ་བར་དགོད། །ཅེས་པ་སྟེ། དེ་ལྟར་བྱང་ཆུབ་སེམས་ཡུམ་གྱི་མཁར་བསྟིམ་པ་དེ་ཡིག་འབྲུར་གྱུར། དེ་ལས་ཕྱག་མཚན་དུ་གྱུར་དེ་ལས་སྐུ་ཕྲ་མོར་གྱུར་དེ་ནས་སྔགས་ཀྱིས་ཕྱིར་གཞལ་ཡས་ཁང་དུ་བཏོན་ཏེ་དཀྱིལ་འཁོར་གསལ་བར་དགོད་པའོ། །གཉིས་པ་ནི། ༀ་སརྦ་ཏ་ཐཱ་ག་ཏ་སོགས་ཀྱི་བསྟན། ༀ་ཡེ་ཤེས་ལྔ་སརྦ་ཐམས་ཅད་ཏ་ཐཱ་ག་ཏ་དེ་བཞིན་གཤེགས་པ་མ་ཧཱ་ཆེན་པོ་ཤྲི་དཔལ་ཧེ་རུ་ཀ་དགྱེས་པ་མ་ཧཱ་ཆེན་པོ་ཙཎྜ་གཏུམ་པ་སརྦ་ཐམས་ཅད་དུཥྚན་སྡང་བ་ཏ་ཀ་རྟོགས་ཧ་ན་རྒྱབ་བོ་ད་ཧ་ཆོད་པ་པ་ཙ་ཆོམ་ཧཱུཾ་ཧཱུཾ་ཧཱུཾ་སྐུ་གསུང་ཐུགས་བསྡུས་ལ་ཕཊ་སྤྲོས་ཤིག་པའོ། །དེ་ཡང་བུདྡྷ་ཧེ་རུ་ཀ་ཞལ་གསུམ་ཕྱག་དྲུག་སྟེ་གཡས་ལྗང་གཡོན་སེར་དབུས་སྨུག་ཞལ་འཁོར་ཡུག་རྡོ་རྗེ་ཐོང་གཤོལ་གཡས་དུང་དམར་དགྲ་སྟྭ་རལ་གྲི་གཡོན་ན་བསྣམས་པ་སྔགས་འདིས་ཤར་གྱི་གདན་སྟེངས་སུ་འགོད་དོ། །ༀ་བཛྲ་མ་ཧཱ་ཤྲི་ཧེ་རུ་ཀ་མ་ཧཱ་ཙནྜ་སརྦ་དུ ཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པ་གཞན་གོང་དང་འདྲ་ལ་བཛྲ་རྡོ་རྗེ་སྟེ་དབུས་སུ་བཛྲ་ཧེ་རུ་ཀ་གཡས་སྨུག་གཡོན་དམར་དབུས་སྔོ་ཞལ་རྡོ་རྗེ་འཁོར་ཡུག་ཐོང་གཤོལ་གཡས་དུང་དམར་དགྲ་སྟྭ་རལ་གྲི་གཡོན་ཡུམ་སྔོ་ནག་གཡས་རྡོ་རྗེ་གཡོན་བྷ ནྡྷ་གཙོ་ལ་སྟོབས་པའོ། །ༀ་རཏྣ་མ་ཧཱ་ཤྲི་ཧེ་རུ་ཀ་མ་ཧཱ་ཙནྜ་ས རྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པས་རཏྣ་རིན་པོ་ཆེ་སྟེ་ལྷོར་རཏྣ་ཧེ་རུ་ཀ་གཡས་སྨུག་གཡོན་དམར་དབུས་སེར་ཞལ་ཐོང་གཤོལ་རྡོ་རྗེ་འཁོར་ཡུག་གཡས་དུང་དམར་དགྲ་སྟྭ་རལ་གྲི་གཡོན་ན་བསྣམས་པར་བསྐྱེད་དོ། །ༀ་པདྨ་མ་ཧཱ་ཤྲི་ཧེ་རུ་ཀ་མ་ཧཱ་ཙནྚ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པས་ནུབ་ཏུ་པདྨ་ཧེ་རུ་ཀ་གཡས་སེར་གཡོན་ལྗང་དབུས་དམར་ཞལ་དགྲ་སྟྭ་རྡོ་རྗེ་འཁོར་ཡུག་གཡས་དུང་དམར་གཤོལ་དང་རལ་གྲི་གཡོན་ན་བསྣམས་པར་བསྐྱེད་དོ། །ༀ་ཀརྨ་མ་ཧཱ་ཤྲི་ཧེ་རུ་ཀ་མ་ཧཱ་ཙནྜ་སརྦ་དུཥྚ ན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པས་ཀརྨ་ནི་ལས་ཏེ་སྤྱིར་སྔགས་འདི་རྣམས་ཀྱི་ཧེ་རུ་ཀ་ཞེས་པ་ཡན་ཆད་རྩ་སྔགས་དང་དེ་མན་ཆད་ལས་སྔགས་སོ། །དེ་ཡང་བྱང་དུ་ཀརྨ་ཧེ་རུ་ཀ་གཡས་དམར་གཡོན་སྨུག་དབུས་ལྗང་ཞལ་རལ་གྲི་རྡོ་རྗེ་འཁོར་ཡུག་གཡས་དུང་དམར་གཤོལ་དང་དགྲ་སྟྭ་གཡོན་ན་བསྣམས་པར་སྒོམ་མོ། །ༀ་སརྦ་ཏ་ཐཱ་ག་ཏ་མ་ཧཱ་ཀྲོ་ཏི་ཤྭ་རི་སརྦ་དུཥྚ ན་ཧཱུཾ་ཕཊ། ཅེས་པས་ཡུམ་ཁྲོ་མོ་དབང་ཕྱུག་མ་སྨུག་ནག་གཡས་འཁོར་ལོ་གཡོན་བྷནྡྷ་བསྣམས་པའོ། །ༀ་བཛྲ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནི་ཧཱུཾ་ཕཊ་ཡུམ་བཛྲ་ཀྲོ་ཏི་ཤྭ་རི་མ་མཐིང་ནག་གཡས་རྡོ་རྗེ་དང་གཡོན་བྷནྡྷ་བསྣམས་པའོ། །ༀ་སུ རྱ་རཏྣ་མ་ཧཱ་ཀྲོ་ཏི་ཤྭ་རི་བི་ད་མ་ཧཱུཾ་ཕཊ་ཡུམ་རཏྣ་ཀྲོ་དྷི་ཤྭ་རི་མ་སེར་མོ་གཡས་རིན་ཆེན་གཡོན་བྷནྡྷའོ། །ༀ་ཤྲུ་ཏ་ས་མནྟ་པདྨ་བ་མུ་ཀ་མ་ཧཱ་ཀྲོ་ཏི་ཤྭ་རི་ཁ་ཧི་ཧཱུཾ་ཕཊ་ཡུམ་པདྨ་ཀྲོ་ཏི་ཤྭ་རི་མ་དམར་མོ་གཡས་པདྨ་གཡོན་བྷནྡྷ་བསྣམས་པའོ། །ༀ་སརྦ་ཨ་མོ་གྷ་ཀྲོ་ཏི་ཤྭ་རི་བི་ཤྭ་ཧཱུཾ་ཕཊ་ཡུམ་ཀརྨ་ཀྲོ་ཏི་ཤྭ་རི་ལྗང་གུ་གཡས་རྒྱ་གྲམ་གཡོན་བྷནྡྷ་བསྣམས་པའོ། །གནས་ཀྱི་མ་མོ་བརྒྱད་ཕྱིར་གདོན་པའི་སྔགས་ནི་ༀ་བཛྲ་ཀའུ་རི་ཧ། ཞེས་པས་ཤར་ལྷོའི་རྩིབས་མཆན་ལ་ཀོ་རི་མ་སྔོན་མོ་གཡས་བྱིས་པའི་དབྱུག་པ་གཡོན་བྷནྡྷ་དམར་གྱིས་བཀང་བའོ། །ༀ་བཛྲ་ཙོ་རི་ཧ་ལྷོ་ནུབ་རྩིབས་མཆན་ལ་ཙོ་རི་མ་སེར་མོ་མདའ་གཞུ་འགེངས་པའོ། །ༀ་བཛྲ་པྲ་མོ་ཧ་ནུབ་བྱང་གི་རྩིབས་མཆན་ལ་པྲ་མོ་ཧ་དམར་མོ་ཆུ་སྲིན་རྒྱལ་མཚན་འཕྱར་བའོ། །ༀ་བཛྲ་བེ་ཏ་ལི་ཧ་བྱང་ཤར་གྱི་རྩིབས་མཆན་ལ་བེ་ཏ་ལི་ནག་མོ་གཡས་རྡོ་རྗེ་འཕྱར་བ་གཡོན་བྱིས་པའི་རོ་ཟ་བའོ། །ༀ་བཛྲ་པུསྐ་སི་ཧ་ཤར་ལྷོའི་གྲུ་ཆད་ལ་པུསྐ་སི་དམར་སེར་བྱིས་པའི་རྒྱུ་མ་གཡས་ཀྱིས་འདྲེན་པའོ། །ༀ་བཛྲ་ཀ སྨ་རི་ཧ་ལྷོ་ནུབ་གྲུ་ཆད་ལ་ཀསྨ་རི་ལྗང་གུ་གཡས་རྡོ་རྗེ་གཡོན་དུང་ཆེན་དམར་གྱིས་བཀང་ནས་གསོལ་བའོ། །ༀ་བཛྲ་སྨ་ཤ་ནི་ཧ་ནུབ་བྱང་གྲུ་ཆད་ལ་སྨ་ཤ་ནི་མཐིང་ནག་བྱིས་པའི་སྙིང་ཕྱུང་ནས་ཟ་བའོ། །ༀ་བཛྲ་ཙནྡྷ་ལི་ཧ་བྱང་ཤར་གྱི་གྲུ་ཆད་ལ་ཙནྡྷ་ལི་སེར་སྐྱ་མཆོག་གི་མགོ་ལུས་ཕྲལ་བའོ། །ཡུལ་གྱི་ཕྲ་མེན་བརྒྱད་ཕྱིར་གདོན་པའི་སྔགས་ནི་བཛྲ་སེང་ཧ་མུ་ཀ་ཧེ་ཞེས་པ་བར་ཁྱམས་དང་པོའི་ཤར་དུ་སེང་ཧ་མ་སེང་གེའི་མགོ་ཅན་དཀར་མོ་ཕྱག་གཉིས་གྱེན་དུ་བསྣོལ་ཏེ་ཁ་ན་རོ་ཟ་བའོ། །བཛྲ་བྱ་གྷྲི་མུ་ཁ་ཧེ་ལྷོར་བྱ་གྲི་མ་སེར་མོ་སྟག་གི་མགོ་ཅན་ལག་གཉིས་ཐུར་དུ་བསྣོལ་ཏེ་ཞིང་ལ་འབྲུ་ཚུགས་སུ་བལྟ་བའོ། །བཛྲ་སྲི་ལ་མུ་ཀ་ཧེ་ནུབ་ཏུ་སྲི་ལ་མུ་ཀ་ནག་མོ་ཝ་ཡི་མགོ་ཅན་བྱིས་པའི་ཁོག་པ་ཁ་ཕྱེས་ནས་ལྡག་པའོ། །བཛྲ་ཤྭ་ན་མུ་ཀ་ཧེ་བྱང་ཕྱོགས་སུ་ཤྭ་ན་མ་མཐིང་ཀ་སྤྱང་ཁུའི་མགོ་ཅན་ཞིང་གི་ཁོག་པ་དྲལ་ནས་བལྟ་བའོ། །བཛྲ་གྲི་དྷ་མུ་ཀ་ཧེ་ཤར་ལྷོར་ཀྲི་ཏ་མ་དཀར་མོ་བྱ་རྒོད་ཀྱི་མགོ་ཅན་གཡས་རལ་གྲི་གཡོན་བྷནྡྷའོ། །བཛྲ་ཀངྐ་མུ་ཀ་ཧེ་ལྷོ་ནུབ་ཏུ་ཀང་ཀ་མ་སྐུ་མདོག་དམར་སྐྱ་ལ་ཞིང་ཕྲག་ལ་བཀལ་ནས་ཁུར་བ་དུར་བྱ་ཀང་ཀའི་མགོ་ཅན་ནོ། །བཛྲ་ཁ་ཁ་མུ་ཁ་ཧེ་ནུབ་བྱང་དུ་ཁ་ཁ་མ་ནག་མོ་བྱ་རོག་མགོ་ཅན་གཡས་གྲི་གཡོན་བྷནྡྷ་བསྣམས་པའོ། །བཛྲ་ཧུ་ལུ་མུ་ཀ་ཧེ་བྱང་ཤར་དུ་ཧུ་ལུ་ཀ་འུག་པའི་མགོ་ཅན་སྐུ་མདོག་སྣ་ཚོགས་གཡས་རྡོ་རྗེ་ལྕགས་ཀྱུ་གཡོན་བྷནྡྷ་དམར་གྱིས་བཀང་བའོ། །སྒོ་མ་བཞི་འདོན་པའི་སྔགས་ནི་བཛྲ་ཨརྱ་ཏེ་ཛ་ཏེ་ཛ་ཤར་གྱི་སྒོ་ནང་དུ་རྟ་གདོང་མ་དཀར་མོ་ལྕགས་ཀྱུ་འདྲེན་པའི་ཚུལ་ལོ། །བཛྲ་ཨ་མུ་ཀ་ཧཱུཾ་ལྷོར་ཕག་གདོང་མ་སེར་མོ་ཞགས་པ་ཐོགས་པའོ། །བཛྲ་ལོ་ཀ་བཾ་ནུབ་ཏུ་རྡོ་རྗེ་འཇིག་རྟེན་མ་དམར་མོ་དྲེད་ཀྱི་མགོ་ཅན་ལྕགས་སྒྲོག་གི་དམིགས་ཉི་མ་སྐང་བ་ཕྱག་ན་བསྣམས་པའོ། །བཛྲ་བ་སྨི་པ་ལ་ཡ་བ་ཏོ་ཧོ་བྱང་དུ་ཐལ་བྱེད་མ་ལྗང་ཁུ་དྲིལ་བུ་དཀྲོལ་བ་སྤྱང་གུའི་མགོ་ཅན་མའོ། །དབང་མོ་ཉི་ཤུ་རྩ་བརྒྱད་བསྐྱེད་པའི་སྔགས་ནི། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོབྷྱོ། བྷྱོ་བྷྱོ་བྷྱོ་བྷྱོ། དབང་མོ་ལས་ལས་གྲུབ་པ་ཡིན་པས་མཁའ་ནས་མི་བསྐྱེད་པར་རྩ་སྔགས་ཀྱི་བྷྱོ་ཉི་ཤུ་རྩ་བརྒྱད་བརྗོད་པས་བྱོན་པར་བསམ་མོ། །དེ་ལ་གསུམ་སྟེ་ཕྱི་སྲིན་མོའི་ཆ་ལུགས་སུ་གནས་པ་དང་། ནང་མགོ་བརྙན་གྱི་ཆ་ལུགས་སུ་དང་། གསང་བ་ཁྲོ་མོའི་ཆ་ལུགས་སུ་བསྟན་པའོ། །ཕྱི་སྲིན་མོའི་ཆ་ལུགས་ནི་སྲིན་མོ་སྨུག་ནག་རྡོ་རྗེ་ཐོད་རློན་འཆང་ཞེས་པ་ལ་སོགས་པ་སྟེ་ཧེ་རུ་ཀའི་གལ་པོ་ལས་བཤད་པའོ། །ནང་མགོ་བརྙན་གྱི་ཆ་ལུགས་ནི་མི་སྲིན་དམར་སེར་ཏྲི་ཤུལ་ཞིང་ཆེན་གཡག་ཅེས་པ་ལ་སོགས་པའོ། །གསང་བ་ཁྲོ་མོའི་ཆ་ལུགས་སུ་བཤད་པ་ནི་ཞལ་གསུམ་ཕྱག་དྲུག་ཏུ་བཤད་པ་སྟེ་ལྷ་མོ་སྒྱུ་འཕྲུལ་དྲྭ་བ་ལས་བཤད་པའོ། །འདིར་ནི་བྱོན་ཚུལ་གང་ཡང་འདྲ་སྟེ་རུ་ཏྲ་འདུལ་བའི་དུས་སྲིན་མོར་གནས་པས་ཁྲོ་བོ་འཆོལ་བའི་དུས་སུ་སྲིན་མོར་བྱ། རྣལ་འབྱོར་པས་སྒྲུབ་སྟེ་ལས་ལ་མངགས་པའི་དུས་སུ་མགོ་བརྙན་དུ་བྱས་ཏེ་མགོ་བརྙན་དུ་བྱ། གསང་བ་རང་སེམས་རྟོགས་པའི་དུས་ན་ཁྲོ་མོ་ཉི་ཤུ་རྩ་བརྒྱད་དུ་བྱའོ། །ལྔ་པ་བསྒོམས་པའི་ཆེ་བ་བསྟན་པ་ནི། ས་ལ་སོགས་ལ་ཕྱག་རྒྱར་བྱས། །རྣམ་གྲོལ་རིམ་པས་ཐོབ་པར་འགྱུར། །དག་པའི་ཡེ་ཤེས་ཀྱིས་སྦྱངས་པའི། །སྨོས་ཅི་དགོས་ཏེ་དེ་ཉིད་ཡིན། །ཞེས་པ་སྟེ་ཕྱག་རྒྱ་བྱ་བའི་རྒྱུ་ནི་ས་ལ་སོགས་པ་ཞེས་པས་རབ་གསེར་དང་དངུལ་དང་ཟངས་དང་ལྕགས་ལ་བྱའོ། །འབྲིང་ནི་དར་རམ་རས་སམ་ཟ་འོག་གམ་ཤིང་ལ་བྱའོ། །ཐ་མ་ནི་རྡོ་དང་ས་དང་རྭ་ལ་བྱའོ། །དེ་ལ་ལྡེར་ཚོའམ་བྲིས་སམ་ཚ་ཚའམ་ཕྱག་རྒྱར་བྱས་ནས་རབ་ཏུ་གནས་པ་བྱས་ན་རྒྱུ་བཟང་ངན་དང་བསམ་པ་དག་མ་དག་གི་དབང་གིས་རྣམ་པར་གྲོལ་བའི་འབྲས་བུ་རིམ་པས་ཐོབ་པར་འགྱུར་བ་ཡིན་ན་ཞེས་དཔེ་བསྟན་ནས། འདིར་ལྟ་བ་རྟོགས་ནས་དེ་བཞིན་ཉིད་ཀྱི་དུས་དག་པའི་རང་བཞིན་རྣམ་པར་མི་རྟོག་པའི་ཡེ་ཤེས་ཀྱིས་སྦྱངས་པ་དང་། ཀུན་སྣང་གི་དུས་ན་སྙིང་རྗེ་སྒྱུ་མའི་ཏིང་ངེ་འཛིན་གྱིས་སྦྱངས་པ་དང་། རྒྱུས་དུས་ན་ཡི་གེའི་འཕྲོ་འདུས་སྦྱངས་པ་དང་། ཕྱག་རྒྱ་གཅིག་པའི་དུས་ན་སྒོ་གསུམ་རྡོ་རྗེ་གསུམ་དུ་སྦྱངས་པ་དང་། ཕྱག་རྒྱ་སྤྲོས་པའི་དུས་ན་རྟོག་ཚོགས་ཐམས་ཅད་ལྷའི་དལ་དུ་སྦྱངས་པ་སྟེ། དེ་ལྟར་སྦྱངས་པའི་འབྲས་བུ་ཐོབ་པར་འགྱུར་བ་ལྟ་སྨོས་ཀྱང་ཅི་དགོས་ཏེ་ཏིང་ངེ་འཛིན་མངོན་སུམ་དུ་ཕྱུང་བ་དེ་ཉིད་འབྲས་བུ་ཡིན་པས་གཞན་ནས་བཙལ་དུ་མེད་དོ་ཞེས་དོན་བསྟན་པའོ། །གཉིས་པ་ཡེ་ཤེས་ཀྱི་དཀྱིལ་འཁོར་སྤྱན་དྲངས་པ་ལ་སོགས་པ་ལ་བདུན་ཏེ། སྤྱན་དྲངས་པ་དང་། རིག་པའི་མེ་ཏོག་དོར་བ་དང་། དངོས་གྲུབ་བསྐུལ་བ་དང་། སྔགས་ཀྱིས་མཆོད་པ་འབུལ་བ་དང་། དམ་ཡེ་གཉིས་མེད་དུ་བསྟིམ་པ་དང་། ལྷ་ཡི་སྒོམ་ཚུལ་དང་། དཀྱིལ་འཁོར་གྱི་ཚད་བསྟན་པ་དང་། བསྟོད་པ་བྱ་བའོ། །དང་པོ་ནི། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་བའི་དམ་ཚིག་མཆོག །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨེ་ཧ་ཡ་ཧི་ཨ་ན་ཡ་ཛཿཧཱུཾ་བཾ་ཧོ། རཾ། ཞེས་པའི་བར་གྱིས་བསྟན་ཏེ། དེ་ལ་ངོ་བོ་གང་སྤྱན་དྲངས་ན་ཕྱོགས་བཅུ་དང་དུས་བཞི་དང་ཕྱི་ནང་གི་ཆོས་ཐམས་ཅད་ཡེ་ནས་སྐུ་གསུང་ཐུགས་ཀྱི་དཀྱིལ་འཁོར་དུ་སངས་རྒྱས་པའི་བདག་ཉིད་དུ་གཉིས་སུ་མེད་ཅིང་ཐ་མི་དད་པས་ན་བདག་ཉིད་ཆེ་བའམ་ཆེན་པོའོ། །ཡུལ་གང་ལས་སྤྱན་དྲངས་ན་ཅིའི་ངོ་བོར་ཡང་མི་དམིགས་པའི་ཐུགས་རང་བྱུང་གི་ཡེ་ཤེས་ནི་ཆོས་ཀྱི་དབྱིངས་ཀྱི་དཀྱིལ་འཁོར་རོ། །ཆོས་ཀྱི་དབྱིངས་སྤྲོས་པ་མེད་པའི་དཀྱིལ་འཁོར་དེ་བདེ་བར་གཤེགས་པ་ཐམས་ཅད་བཞུགས་པའི་གནས་དང་གཟིགས་པའི་གནས་ཡིན་པས་དེ་ནས་སྤྱན་དྲངས་པའོ། །གང་སྤྱན་དྲང་ན་དེ་ལྟར་རྟོགས་པའི་རིག་པའི་ཡེ་ཤེས་དང་ལྡན་པའི་ཕྱིར་ཕྱོགས་བཅུ་དུས་བཞིའི་བདག་ཉིད་ཆེན་པོ་དཔལ་ཁྲག་འཐུང་གི་དཀྱིལ་འཁོར་མ་ལུས་ཤིང་ལུས་པ་མེད་པ་ཐམས་ཅད་སྤྱན་དྲང་ངོ་། །གང་དུ་སྤྱན་དྲང་ན་སེམས་ཅན་གྱི་རིག་པ་རང་སྣང་བ་དང་དེ་བཞིན་གཤེགས་པའི་ཐུགས་ཡང་དག་པའི་ཡེ་ཤེས་དབྱེར་མེད་པའི་རིག་པ་རང་སྣང་བའི་ཏིང་ངེ་འཛིན་གྱི་དཀྱིལ་འཁོར་སྣང་ལ་རང་བཞིན་མེད་པའི་གནས་འདིར་སྤྱན་དྲང་བ་ཡིན་ནོ། །དུས་ཇི་ཙམ་ན་ཚུལ་ལམ་ཐབས་ཇི་ལྟར་སྤྱན་དྲང་ན་ལྟ་བ་རྟོགས་པའི་དོན་ལ་རྣལ་འབྱོར་བའི་རྐྱེན་འཇུག་པའི་མཚན་ཉིད་ཏིང་ངེ་འཛིན་ལས་བུདྡྷའི་མཚན་ཉིད་དང་རྣལ་འབྱོར་པའི་མཚན་ཉིད་མཉམ་པར་སྦྱོར་བ་ནི་ཤེས་རབ་དང་ཏིང་ངེ་འཛིན་སྦྱར་ནས་བསྐལ་བའི་སྒྲིབ་པ་སྦྱོང་བ་དང་ཚོགས་གསོག་པའི་རྟེན་དུ་དུས་ད་ལྟ་ཁོ་ནར་སྤྱན་དྲངས་པའོ། །ཕྱི་པ་ལྟར་ལྷ་ཡེ་ཤེས་སེམས་དཔའ་དང་བདག་དམ་ཚིག་སེམས་དཔའ་གཉིས་སྤུན་དང་གྲོགས་པོ་ལྟར་ལྟ་བ་མ་ཡིན་ཏེ་ཕྱོགས་བཅུ་དུས་བཞི་ཀུན་ནས་འགྲོ་དོན་དུ་གཤེགས་པ་ཡི་དེ་བཞིན་གཤེགས་པ་རྣམས་རང་རིག་པ་རང་སྣང་བས་བདག་དང་ལྷ་གཉིས་སུ་མེད་པས་སྤྱན་དྲང་བར་བྱའོ། །བདག་གིས་རྒྱལ་བའི་དཀྱིལ་འཁོར་ལ་ཚེ་སྔ་མ་བ སྙེན་པའི་རིམ་པ་རྫོགས་པར་ཕུལ་བ་དང་། ད་ལྟ་བདག་དང་དཀྱིལ་འཁོར་གྱི་ལྷ་ཉེ་བར་གྱུར་པ་དང་བསྙེན་པ་རབ་ཏུ་རྫོགས་པར་བྱ་བའི་ཕྱིར་ཏེ་ད་ལྟ་བདག་དང་ཉེ་བར་གྱུར་པ་ནི་བདེ་བར་གཤེགས་པ་ཡང་འགྲོ་དོན་མཛད་པར་ཐུགས་དམ་དུ་ཞལ་གྱིས་བཞེས་པ་ལས་མི་འདའ་བའི་དམ་ཚིག་མཆོག་གི་དབང་གིས་བྱོན་པ་ཡིན་ནོ། །ༀ་ཡེ་ཤེས་ལྔ་སྟེ་ཁྲག་འཐུང་རིགས་ལྔ་ཡབ་ཡུམ་གྱི་སྙིང་པོ་རུ་ལུ་གནས་ཀྱི་མ་བརྒྱད་རུ་ལུ་འོག་མ་ཡུལ་གྱི་ཕྲ་མེན་བརྒྱད་ཧཱུཾ་སྒོ་མ་བཞི་བྷྱོ་དབང་མོ་ཉི་ཤུ་རྩ་བརྒྱད་ཧཱུྃ་བསྡུ་བའོ། །དེ་བས་ན་དཔལ་ཆེན་པོ་འཁོར་དང་བཅས་པའི་སྙིང་པོའོ། །ཨེ་ཧྱ་ཡ་ཧི་ཀྱེ་ཀྱེ་ཞེས་བོས་པའོ་ཨ་ན་ཡ་ནི་ཚུར་གཤེགས་ཞེས་སྤྱན་དྲང་ངོ་། །ཛཿཧཱུཾ་བཾ་ཧོ་ནི་བདག་གི་ཏིང་ངེ་འཛིན་གྱིས་ལྷའི་ཐུགས་ཀ་ནས་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུས་སྤྱན་དྲང་ངོ་། །དེ་ཡང་རཾ་ཞེས་པས་མདུན་གྱི་ནམ་མཁའ་ལ་སྤྲིན་ཕུང་བཞིན་དུ་མེ་རི་འདབ་འབྱོར་ཙམ་དུ་སྤྱན་དྲང་བའོ། །གཉིས་པ་ནི། ༀ་བཛྲ་ཀྲོ་ཏ་ས་མ་ཡ་ཧཱུཾ། ༀ་བཛྲ་ཀྲོ་ཏ་ས་མ་ཡ་ཕཊ། ཞེས་པ་སྟེ་བདག་དམ་ཚིག་པ་དང་ལྷ་ཡེ་ཤེས་པ་གཉིས་ཀ་སྐུ་དང་ཡེ་ཤེས་ཙམ་དུ་གསལ་ལ་རྟོག་པ་ནི་རིག་པའི་མེ་ཏོག་དོར་བའོ། །དེ་ཡང་བདག་ཡེ་ནས་སངས་རྒྱས་ཡིན་པ་ལ་མ་རིག་པས་སྒྲིབས་པས་མ་ཤེས་ཏེ་དེའི་དོན་ད་ལྟ་ཁོ་ན་རིག་པས་བདག་ལ་སྤྱན་འདྲེན་ནོ་སྙམ་པ་ཁོ་ན་ལ་རིག་པའི་མེ་ཏོག་དོར་བ་ཞེས་གདགས་སོ། །གསུམ་པ་ནི། ༀ་ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམ་པའི་ཚོགས། །འབར་བའི་བྱིན་བརླབས་རྨད་པོ་ཆེ། །ད་ལྟ་ཉིད་དུ་བདག་ལ་གསོལ། །ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཕཊ། ༀ་བཛྲ་ས་མ་ཡ་ཧཱུཾ། ཞེས་པ་སྟེ་ༀ་ནི་ཡེ་ཤེས་ལྔའི་རང་བཞིན་ཐུགས་རྒྱུད་བསྐུལ་བའོ། །རུ་ཏྲ་དྲེགས་པ་ཅན་ལས་དང་ཉོན་མོངས་པས་ཁྲོ་བ་དེ་ལ་དཔལ་ཆེན་པོས་ཁྲོས་པའི་སྐུར་བསྟན་པས་ཁོའི་ཞེ་སྡང་གི་དབང་གིས་ཁྲོ་བ་དེ་བཏུལ་ནས་རུ་ཏྲ་དེའི་གཟུང་འཛིན་གྱི་སྤྲོས་པ་ཞི་བར་མཛད་པའོ། །དེ་ལྟར་ཁྲོ་བོའི་སྐུར་སྟོན་པ་དེ་ཡང་ཞེ་སྡང་གི་དབང་གིས་ཁྲོས་པ་ལྟ་བུ་མ་ཡིན་ཏེ་སེམས་ཅན་ཞེ་སྡང་གི་དབང་དུ་གྱུར་པ་ལ་ཐབས་གཞན་གྱིས་ཐུལ་བར་མི་འ གྱུར་བས་ཐུགས་རྗེའི་དབང་གིས་ཁྲོ་བོའི་སྐུ་དཔལ་ཆེན་པོ་རྔམ་པའི་ཚོགས་སུ་བསྟན་པ་ཡིན་ནོ། །ཡང་ན་ཁོའི་མགོན་དུ་གྱུར་པས་ན་ཐུགས་རྗེ་བསྒྲལ་བྱ་དེ་དག་བླ་ན་མེད་པའི་ས་ལ་བཀོད་པས་དཔལ་དང་གྲགས་དང་ཕུན་སུམ་ཚོགས་པའོ། །རྟོགས་པ་དང་ཐུགས་རྗེའི་རྟགས་སུ་མེ་འབར་བའི་ཀློང་ན་བཞུགས་པ་དེ་ལྟ་བུའི་བྱིན་རླབས་ནི་འཇིག་རྟེན་གསུམ་ན་མེད་པས་རྨད་པོ་ཆེའོ། །དེ་ལྟ་བུའི་སྐུ་གསུང་ཐུགས་ཤིན་ཏུ་རྔམས་པའི་ང་རོ་དང་བཅས་པའི་དཔལ་ཆེན་པོ་འཁོར་གྱི་ཚོགས་དང་བཅས་པས་སྐུ་གསུང་ཐུགས་བསམ་གྱིས་མི་ཁྱབ་པ་དང་ལྡན་པའི་བྱིན་རླབས་རྨད་དུ་བྱུང་བ་དེ་དུས་ད་ལྟ་ཉིད་དུ་བདག་གི་ཏིང་ངེ་འཛིན་གྱི་དལ་ལ་གསོལ་ཅིག་ཅེས་ལྷ་རྣམས་ལ་བསྐུལ་ལོ། །ༀ་བཛྲ་ཀྲོ་ཏ་ཡེ་ཤེས་ཁྲོ་བོས་ས་མ་ཡ་སྟྭཾ་དམ་ཚིག་གསལ་བའི་དུས་ལ་བབ་ཅེས་དང་ༀ་བཛྲ་ཀྲོ་ཏ་ས་མ་ཡ་ཕཊ་ཡེ་ཤེས་ཁྲོ་བའི་དམ་ཚིག་གིས་བགེགས་བརླག་པར་མཛོད་ཅིག །ༀ་བཛྲ་ཀྲོ་ཏ་ས་མ་ཡ་ཧཱུྃ་ཡེ་ཤེས་ཁྲོ་བོའི་དམ་ཚིག་གིས་དངོས་གྲུབ་སྩོལ་ཅིག་ཞེས་པའོ། །བཞི་པ་ནི། ཨ་ལི་ཨུ་ལི་ཏ་ལི་ཏ་པ་ལི་དཾ་ཥྚཾ་གྷོ་ཎ་རོའུ་ཏྲི་ཁ་རཾ་ཡོ་གི་ནི་ཁ་ཧི་ཧོ། ཞེས་པ་སྟེ་ཨ་ལི་བཟའ་བ་དང་བཅའ་བ་ཨུ་ལི་བཏུང་བ་ཏ་ལི་སྤྱན་གཟིགས་ཏ་པ་ལི་མུར་བ་དཾཥྚཾ་མཆེ་བ་ཅན་གྷོ་ན་ཡོན་ཏན་རོའུ་དབང་མོ་ཏྲི་རག་མོ་ཁ་རཾ་གསོལ་ཡོ་གི་ནི་རྣལ་འབྱོར་མ་ཁ་ཧི་གསོལ་ཧོ་དགྱེས་པ་སྟེ། དོན་དུ་བཟའ་བ་དང་བཅའ་བ་དང་བཏུང་བ་དང་མུར་བའི་རྣམ་པ་ཉིད་འདོད་ཡོན་གྱི་ལྷ་མོར་བྱིན་གྱིས་བརླབས་ཏེ་ཞལ་འབར་བའི་ཚོགས་དང་ཡོན་ཏན་དྲག་མོ་རྣམས་གསོལ་ཅིག་ཞེས་འབུལ་བའི་རིམ་པའོ། །ལྔ་པ་ནི། ཧཱུཾ་ཧ་ཧེ་ཕཊ་བྷྱོ་རཾ། ཞེས་པ་སྟེ། ཧཱུཾ་རིགས་ལྔ་ཧ་མ་མོ་ཧེ་ཕྲ་མེན་ཕཊ་སྒོ་མ་བྷྱོ་དབང་མོ་རཾ་ཞེས་པས་མེ་རི་འདབ་འབྱོར་དུ་བཞུགས་ཡོད་པ་དེ་དབྱེར་མེད་དུ་བསྟིམ་ནས་དམ་ཡེ་གཉིས་མེད་དུ་སྒོམ་པའོ། །དྲུག་པ་ནི། སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞིར་བསྒྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་བར་སྒྲོགས། །སྦྲུལ་དང་ཐོད་ཕྲེང་ཉི་ཟླ་བཅས། །སྟོང་གི་འཇིག་རྟེན་འཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་བསྣམས། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱ་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་གདན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །དེ་ལྟར་དཀྱིལ་འཁོར་གསལ་བཀོད་ནས། །མཐའ་དབུས་མེད་པར་ཁྱབ་པ་ཡི། །འཇིག་རྟེན་དྲུག་གི་ཕྱོགས་བཅུ་ན། །འབར་བའི་དཀྱིལ་འཁོར་གསལ་བར་སྣང་། །ཞེས་པའི་བར་གྱིས་བསྟན་ཏེ་སྤྱིར་སྐུ་མདོག་ལ་གསུམ་སྟེ་རང་བཞིན་གྱི་སྐུ་མདོག་དང་། འཕྲིན་ལས་དང་རིགས་སོ། །དེ་ལ་རང་བཞིན་ནི་སྣུམ་པ་དང་འདྲིལ་བའོ། །རིགས་ཀྱི་མདོག་ནི་སྨུག་པ་དང་སྔོ་བ་དང་སེར་བ་དང་དམར་བ་དང་ལྗང་ཁུའོ། །འཕྲིན་ལས་ནི་ལས་ཐམས་ཅད་ཞི་དྲག་བཞི་པོར་བྱེད་པས་ན་ནག་ཞེས་འབྱུང་ངོ་། །དེ་ལ་བུདྡྷ་ཧེ་རུ་ཀ་སྨུག་ནག་སྟེ་ཞི་བའི་འཕྲིན་ལས་རྫོགས་ཤིང་མཐར་ཕྱིན་པར་མཛད་པའོ། །བཛྲ་ཧེ་རུ་ཀ་སྔོ་ནག་གམ་མཐིང་ནག་སྟེ་ཆོས་ཀྱི་དབྱིངས་མི་འགྱུར་བས་ནག་གོ། །རཏྣ་ཧེ་རུ་ཀ་སེར་ནག་སྟེ་རྒྱས་པའི་ལས་མཛད་པ་དང་། པདྨ་ཧེ་རུ་ཀ་དམར་ནག་སྟེ་དབང་གི་ལས་མཛད་དོ། །ཀརྨ་ཧེ་རུ་ཀ་ལྗང་ནག་སྟེ་དྲག་པོའི་ལས་མཛད་པའོ། །དེ་དག་ཐམས་ཅད་ཤིན་ཏུ་ཁྲོས་པ་འཇིགས་གཟུགས་རྔམ་པའི་སྐུ་ཡི་རྣམ་པ་ཅན་ནོ། །དབུ་གསུམ་གྱི་གཡས་ཐམས་ཅད་ཆོས་སྐུ་མཚོན་གཡོན་ཐམས་ཅད་སྤྲུལ་སྐུ་མཚོན་དབུས་ཐམས་ཅད་ལངས་སྐུ་མཚོན་ཏེ་ཁ་དོག་ནི་དབུས་མ་ཐམས་ཅད་རང་རང་གི་སྐུ་དང་མཐུན་ནོ། །གཡས་གཡོན་གཉིས་ནི་གནས་འཕྲོག་བརྩི་སྟེ་བུདྡྷའི་ཞལ་གཡས་ཀརྨའི་གཡོན་རཏྣའི་འཕྲོག་དེས་ཀུན་འགྲེའོ། །ཕྱག་དྲུག་ནི་ཡེ་ཤེས་དྲུག་གམ་ཕ་རོལ་ཏུ་ཕྱིན་པ་དྲུག་མཚོན་ནོ། །ཞབས་བཞིར་བསྒྲད་པ་ནི་ཚད་མེད་བཞིའམ་རྫུ་འཕྲུལ་གྱི་རྐང་པ་བཞིའོ། །བགོ་བའི་གོས་གསུམ་ནི་ཁྱད་པར་ཐུགས་རྗེའི་གོས་གླང་པོ་ཆེའི་ཀོ་རློན་དང་། ཕྱི་ནང་གསང་བ་གསུམ་དུ་སྡུད་པའི་གོས་ཞིང་གི་གཡང་གཞི་དང་། མཛད་པ་འཕྲིན་ལས་ཀྱི་གོས་ནི་སྟག་གི་ཤམ་ཐབས་སོ། །གཞན་ཡང་དབང་གི་བསེ་ཁྲབ་སོགས་གོས་སྣ་ཚོགས་གྱོན་པ་དང་། གསུང་ཤིན་ཏུ་རྔམ་པས་འབྱུང་པོ་ཐམས་ཅད་ཞེ་གཅོད་པའོ། །དེ་ཡང་ཨ་ལ་དང་ཧ་ལ་དང་ཕཊ་ཕཊ་དང་བྷྱོ་བྷྱོ་ཞེས་རྔམ་པའི་སྒྲ་སྐད་ཆེན་པོ་འཇིགས་པར་སྒྲོགས་པའོ། །གདབ་པའི་ཚོམ་བུ་གསུམ་ནི་དོན་དམ་བཅུད་ཀྱི་ཐིག་ལེ་ཞལ་འགྲམ་དུ་ཞག་གི་ཟོ་རིས་དང་འདུལ་བྱེད་འཕྲིན་ལས་ཀྱི་རྒྱན་དཔྲལ་པར་ཐལ་ཆེན་ཐིག་ལེ་དང་དམ་སྲི་བྲན་དུ་འཁོལ་བ་སྣ་རྩེ་ལ་རཀྟའི་ཐིག་ལེའོ། །གདགས་པའི་རྒྱན་གསུམ་ནི་དུག་ལྔ་མ་སྤངས་གནས་སུ་དག་པས་སྤྲུལ་རིགས་བཞིས་དབུ་དང་དཔུང་པ་དང་ཕྱག་དང་ཞབས་དང་སྐུ་རགས་བྱས་པའོ། །སྐུ་གསུམ་མཚོན་པའི་རྟགས་སུ་ཐོད་རློན་གྱི་འཕྲེང་བ་དང་ཐོད་སྐམ་གྱི་དབུ་རྒྱན་དང་ཐོད་པ་ར་རིས་སེ་རལ་ཁར་བྱས་པའོ། །ཐབས་དང་ཤེས་རབ་མཚོན་པའི་རྟགས་སུ་དབུ་ལ་ཉི་མ་དང་ཟླ་བའི་རྒྱན་དང་བཅས་པའོ། །ཕྱིར་ཁྲོ་བོ་གདུལ་བྱ་དང་མཐུན་པར་དོན་མཛད་པས་ཕྱག་མཚན་ཡང་མ་ངེས་པར་བསྣམས་པ་སྟེ་གང་ཟག་ལམ་པ་རྣམས་སྒོམ་བདེ་བའི་ཕྱིར་ན་རྩ་རྒྱུད་དུ་གནས་འཕྲོག་རྩི་བ་དང་བཤད་རྒྱུད་ཀྱིས་ཁ་བསྐང་བ་གཉིས་སོ། །རྩ་རྒྱུད་དུ་གནས་འཕྲོ་རྩི་ན་རང་རྟགས་ཀྱི་ཕྱག་མཚན་དང་པོར་སྟོན་ཏེ་གཞན་གནས་འཕྲོག་གོ། །བཤད་རྒྱུད་ཀྱི་ཁ་བསྐང་བ་ནི་སྒྱུ་འཕྲུལ་རྡོ་རྗེ་དང་བླ་མ་དང་ལྷ་མོ་སྒྱུ་འཕྲུལ་ནས་རྒྱས་པར་བཤད་དོ། །དེ་ལ་དགོངས་པའི་དབང་དུ་བྱས་ན་ཆོས་ཉིད་རང་རྟགས་ཀྱི་ཕྱག་མཚན་དོན་སྐྱེ་མེད་སྟོན་པར་དགོངས་པ་དང་། རྒྱལ་བྱེད་དཔའ་རྟགས་ཀྱི་ཕྱག་མཚན་རུ་ཏྲ་གདུག་པ་ཆོམ་པར་དགོངས་པ་དང་། འདུལ་ཐབས་མཚན་མའི་ཕྱག་མཚན་གང་ལ་གང་མོས་སུ་བསྣམས་པའོ། །དེ་ལས་འདིར་རྩ་རྒྱུད་ནས་བསྡུས་པས་གནས་འཕྲོག་རྩིའོ། །དེ་ལ་སྟོང་གི་འཇིག་རྟེན་འཁོར་ཡུག་བཅས་པ་ནི་བུདྡྷ་ཧེ་རུ་ཀའི་འོ། །རྡོ་རྗེ་བཛྲ་ཧེ་རུ་ཀའི་དང་དུང་ཆེན་གང་བ་ཡབ་ཀྱི་གཡོན་ཐམས་ཅད་དང་ཡུམ་གྱིའོ། །རལ་གྲི་ཀརྨ་ཧེ་རུ་ཀའི་དགྲ་སྟྭ་པདྨའི་ཐོང་གཤོལ་རཏྣའི་ལ་སོགས་ཞེས་པ་ནི་གནས་ཡུལ་གྱི་ཕྱག་མཚན་ཏེ་རིགས་ལྔ་དང་གནས་ཡུལ་གྱི་མ་མོ་རྣམས་ཀྱིས་རང་རང་གི་ལག་ཆ་སྣ་ཚོགས་པ་བསྣམས་པའོ། །ཡུམ་རྣམས་ལ་སྤྱད་པར་བྱ་བའི་དོན་གྱིས་ན་བཙུན་མོའི་ཞེས་གསུང་ལ་ཁྲོ་མོའི་གཟུགས་སུ་སྣང་བས་ན་འཇིགས་པའི་ཚོགས་ཏེ་སྐུ་མདོག་ནི་སོ་སོའི་གཙོ་བོ་དང་མཐུན་གཡས་ཡབ་ལ་འཁྱུད་ཅིང་གཡོན་བྷནྡྷ་བསྣམས་ནས་ཡབ་ཡུམ་གཉིས་མེད་དུ་འཁྲིལ་བའོ། །གནས་ནི་རྣམ་པར་ཤེས་པར་ཚོགས་བརྒྱད་དེ་དེའི་རང་བཞིན་ཡེ་ནས་ཁྲོ་མོ་བརྒྱད་ཡིན་ལ་དེ་ལྟར་རྟོགས་ནས་སྒོམས་པའི་དུས་ན་ཡང་ཁྲོ་མོ་བརྒྱད་དུ་སྣང་བ་དང་། ཡུལ་གྱི་ཕྱག་རྒྱ་ཕྲ་མེན་བརྒྱད་ནི་བལྟ་བར་བྱ་བའི་ཡུལ་གཟུགས་སྒྲ་ལ་སོགས་པ་བརྒྱད་དོ། །དེའི་རང་བཞིན་ཕྲ་མེན་མ་བརྒྱད་དེ་ཡེ་ནས་གནས་པ་མངོན་དུ་བྱས་པ་དང་སྒོམ་པའི་དུས་ན་ཡང་དེ་ལྟར་དུ་སྣང་བའོ། །ཡན་ལག་བཞི་ནི་སྒོ་མ་བཞིའི་སྐུའམ་ཕྱག་རྒྱ་རུ་རབ་ཏུ་མཛེས་ཤིང་གསལ་བ་སྟེ་ལུས་ཀྱི་དབང་པོ་བཞི་ལ་གནས་པ་དང་དེའི་རང་བཞིན་སྒོ་མ་བཞི་ཡིན་པ་དང་ཡེ་ནས་གནས་པ་དེ་མངོན་དུ་བྱས་ཏེ་སྒོམ་པ་དེ་ལྟར་སྣང་ངོ་། །སླས་ནི་དབང་མོ་ཉེར་བརྒྱད་ཆུང་མར་བྱས་ནས་བར་ཁྱམས་ལ་བཀོད་པ་དང་དཔལ་ཆེན་པོས་རུ་ཏྲ་བསྒྲལ་བའི་དུས་ན་སྲིན་མོ་རྣམས་དང་རོལ་བ་མཛད་པས་བྱི་མོའམ་བྲན་མོ་ནི་བྲན་དུ་ཁས་བླངས་ནས་ལྷག་མ་བྱིན་པར་བྱས་པའོ། །དེའི་ཚོགས་ནི་གང་ཞེ་ན་བཅུ་གཉིས་དང་ནི་བརྒྱད་སྡོམ་པས་ཉི་ཤུ་རྩ་བརྒྱད་དེ་དབང་ཕྱུག་མ་ཉི་ཤུ་རྩ་བརྒྱད་ཀྱིས་དཀྱིལ་འཁོར་མཛེས་པར་བྱས་ཤིང་བར་ཁྱམས་ཕྱི་མ་ལ་རང་རང་གི་གནས་ན་མཛེས་པར་གནས་ཤིང་འཁོད་དོ། །དེ་རྣམས་ནི་རང་རང་གི་གདན་ཞིང་རྐྱང་རེ་དང་བཅས་ནས་འཕྲིན་ལས་ཀྱི་ལས་མཛད་པའི་ལག་ཆ་དང་བཅས་འཕྲིན་ལས་ཇི་ལྟར་འདོད་པ་བཞིན་བདག་ཅག་གིས་སྒྲུབ་ན་ཅི་བགྱི་ཞེས་ཟེར་ནས་ནི་ཆས་ཏེ་བར་ཁྱམས་ཕྱི་མ་ལ་རང་རང་གི་གདན་བཏིང་བའི་སྟེང་དུ་བཞུགས་པའི་ཕྱིར་ན་གནས་ཞེས་བྱའོ། །གོང་དུ་བསྟན་པ་དེ་ལྟར་ལྷའི་དཀྱིལ་འཁོར་རྣམས་གསལ་བར་བཀོད་ནས་སྐུ་མདོག་དང་ཕྱག་མཚན་རྒྱན་དང་ཆ་ལུགས་གསལ་བར་སྒོམ་མོ། །ཆོས་ཀྱི་དབྱིངས་ནི་མཐའ་དབུས་མེད་པར་ནམ་མཁས་གར་ཁྱབ་སར་ཁྱབ་ལ་ནམ་མཁའ་ནི་མཐའ་དབུས་མེད་པ་ཆོས་ཀྱི་དབྱིངས་སོ། །དེ་ལྟར་ཆོས་ཀྱི་དབྱིངས་ཀྱིས་གར་ཁྱབ་པ་ཡི་འཇིག་རྟེན་དྲུག་ནི་རིགས་དྲུག་གི་འཇིག་རྟེན་དྲུག་གི་ཕྱོགས་བཅུ་ཐམས་ཅད་ན་དཀྱིལ་འཁོར་གསལ་བར་སྣང་བ་ནི་དཀྱིལ་འཁོར་བསྟན་པའོ། །དོན་དབྱིངས་དང་ཡེ་ཤེས་གཉིས་སུ་མེད་པའི་རྟགས་མེ་དཔུང་འབར་བའི་ཀློང་ན་ཁྲོ་བོའི་དཀྱིལ་འཁོར་གསལ་བར་སྣང་བའོ། །འདི་སྣང་བ་རྣམ་འབྱེད་ཀྱི་ཏིང་ངེ་འཛིན་ཞེས་བྱའོ། །ཐབས་དང་ཤེས་རབ་གཉིས་སུ་མེད་པའི་རྒྱུད་ལས། དཀྱིལ་འཁོར་དཀྱིལ་འཁོར་ཞེས་བྱ་བ། །བྱང་ཆུབ་སེམས་ལས་མ་ཡེངས་ན། །དཀྱིལ་འཁོར་སྙིང་པོ་ལྷུན་གྲུབ་པས། །ཐམས་ཅད་དུས་གཅིག་སྒོམ་པར་འགྱུར། །ཞེས་སོ། །བདུན་པ་བསྟོད་པ་ལ་བདུན་ལས་དང་པོ་སྐུ་ལ་བསྟོད་པ་ནི། ཧཱུཾ། གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟང་ཡག་ཟ་བྱེད་ཆེ་ཧོ། །ཞེས་པ་སྟེ་ཧཱུཾ་ནི་སྐུ་ལྔ་ལྷུན་གྱིས་གྲུབ་པའི་ཕྱིར་མགོ་འདྲེན་པའོ། །གཏུམ་པ་ནི་གཟི་བརྗིད་ཆེན་པོའི་སྐུ་གཏུམ་པ་དང་། འཇིགས་བྱེད་ཆེན་པོའི་གསུང་གཏུམ་པ་དང་། སྟོབས་པོ་ཆེའི་ཐུགས་གཏུམ་པ་དང་། སྒྲོལ་བྱེད་ཆེན་པོའི་ཕྱག་གཏུམ་པ་དང་། ཟ་བྱེད་ཆེན་པོའི་མཆེ་བ་གཏུམ་པ་སྟེ་དེ་ཡང་དུས་མཐའི་བསྐལ་བ་འཇིག་པའི་དུས་ཀྱི་མེ་ལྟར་འབར་བའི་ཀློང་ན་བཞུགས་པའོ། །ཐབས་མཁས་པའི་འོད་ཟེར་བ་སྤུའི་བུ་ག་རེ་རེ་ནས་དུ་མ་འབྱུང་བའོ། །གདུག་པ་སེལ་བའི་འོད་ཟེར་གསལ་བས་སེམས་ཅན་གྱི་གཏི་མུག་གི་མུན་པ་སེལ་བ་དང་ཐུགས་རྗེ་ཆེན་པོའི་འོད་ཟེར་ཐམས་ཅད་དུ་ཁྱབ་པར་མཛད་པའོ། །དེ་ནི་དཔེར་ན་ཉི་མ་འབུམ་དུས་གཅིག་ལ་ནམ་མཁའ་ལ་ཤར་བའི་གཟི་བརྗིད་ལྟ་བུའོ། །དབང་དུ་བསྡུས་པའི་ཁྲོ་གཉེར་ནི་བསྡུས་པ་དང་། ཐབས་ལ་མཁས་པའི་ཁྲོ་གཉེར་ནི་གཡོ་བ་དང་། ཟིལ་གྱིས་གནོན་པའི་ཁྲོ་གཉེར་ནི་འགྲེང་བའོ། །དེ་དག་ཀྱང་དཔེར་ན་གློག་སྟོང་དུས་གཅིག་ལ་ནམ་མཁའ་ལ་འགྱུ་བ་བཞིན་ནོ། །མཆེ་བ་ཟང་ཡག་ཏུ་གཙིགས་པ་ལས་གདུག་པ་འདུལ་བའི་མཆེ་བ་ནི་དཀར་ལ་རྩ་དམར་བའི་མདངས་ཆགས་པ་དང་། ཟ་བྱེད་ཆེན་པོའི་མཆེ་བ་ནི་གཙིགས་པ་དང་། སྐྱེ་ཤི་རྩད་ནས་གཅོད་པའི་མཆེ་བ་ནི་རྣོ་ལ་དཀར་བའོ། །དེ་ལྟ་བུའི་ཆེ་བའི་ཡོན་ཏན་ལ་དགྱེས་པས་ཧོ་ཞེས་པའོ། །གཉིས་པ་གསུང་ལ་བསྟོད་པ་ནི། ཧཱུཾ། རྔམ་པའི་ང་རོ་འབྲུག་སྟོང་ལྡིར། །སྟུག་ཆོམ་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱང་ཅན། །ཤུགས་པའི་འཐོར་རླུང་གཡེང་བ་ཆེ་ཧོ། །ཞེས་པ་སྟེ་ཧཱུཾ་ལ་གསུང་ལྔ་ལྷུན་གྱིས་གྲུབ་པའི་ཕྱིར་ཧཱུཾ་གིས་མགོ་དྲངས་པའོ། །དཔལ་ཁྲག་འཐུང་གི་གསུང་རྔམ་པའི་ང་རོ་ནི་དཔེར་ན་ནམ་མཁའ་ལ་འབྲུག་སྟོང་དུས་གཅིག་ལ་ལྡིར་བ་ལྟ་བུའོ། །དེ་ཡང་ཞལ་གསུམ་ནས་གཡས་ཆོས་སྐུ་སྐྱེ་མེད་དོན་གྱི་གསུང་གིས་སེམས་ཅན་བདེ་བ་ལ་འགོད་པ་དང་། གཡོན་ལོངས་སྐུའི་གསུང་བྲག་ཆ་ལྟ་བུའི་ཟིལ་གྱིས་གནོན་པ་དང་། དབུས་སྤྲུལ་སྐུའི་གསུང་གང་ལ་གང་འདུལ་དུ་མཛད་པའི་ཚུལ་ཡིན་ནོ། །ལྷ་གཤེགས་པའི་སྟུག་ཆོམ་ནི་ལྡིར་བ་དང་། སྤྲུལ་པ་འགྱེད་པའི་སྟུག་ཆོམ་ནི་རིགས་པ་དང་། འཕྲིན་ལས་མཛད་པའི་སྟུག་ཆོམ་ནི་དྲག་པོའོ། །དེ་དག་ནི་དཔེར་ན་རི་རབ་འབུམ་དུས་གཅིག་ལ་བསྙིལ་པའི་སྒྲ་སྐད་དང་འདྲ་བའོ། །རྔམ་པའི་གད་མོ་ཨ་ལ་ལའོ། །གཏུམ་པའི་གད་མོ་ཧ་ལའོ། །དགྱེས་པའི་གད་མོ་ཧ་ཧ་ཞེས་པའི་གད་རྒྱང་ཆེ་བའམ་ཆེན་པོ་སྒྲོགས་པའོ། །འཁོར་སྡུད་པའི་བཤུགས་པ་ནི་སྙན་པ་དང་གདུག་པ་འདུལ་བའི་བཤུགས་པ་ནི་དྲག་པ་དང་བྱིན་འབེབས་པའི་བཤུགས་པ་མཚེར་ལ་རིང་བ་སྟེ་བཤུགས་པའི་སྒྲ་དེ་དག་ལ་འཐོར་རླུང་ངམ་རླུང་ནག་འབྱུང་བས་འཇིག་རྟེན་གྱི་ཁམས་རྣམས་ཀུན་ཏུ་གཡེང་བར་བྱེད་པས་ཆེ་ཧོ་ཞེས་སོ། །གསུམ་པ་ཐུགས་ལ་བསྟོད་པ་ནི། ཧཱུཾ། ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་རྫོགས། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོ། །ཧཱུཾ་ནི་ཐུགས་ཡེ་ཤེས་ལྔ་ལྷུན་གྱིས་གྲུབ་པའོ། །ཁྲོ་བོ་ནི་ཤེས་རབ་ཆེན་པོ་སྟོང་པ་ཉིད་ཀྱི་ཁྲོ་བོ་སྟེ་ལྟ་བ་ངན་པ་འཇོམས་པའོ། །དེ་ཡང་མཉམ་པ་ཉིད་ཀྱི་ཤེས་རབ་ཀྱི་དོན་རྟོགས་པ་ཐམས་ལ་མཁས་པའི་ཤེས་རབ་ཀྱིས་སྤྲུལ་པ་སྣ་ཚོགས་སུ་འགྱེད་པ་དང་རིགས་སུ་འབྱེད་པའི་ཤེས་རབ་ཀྱིས་ཚད་མ་བཀའ་གཞུང་གསུངས་པ་སྟེ་དེ་ལ་ཅིས་ཀྱང་མི་སྒྲིབས་པས་ན་འོད་པོ་ཆེ་བའོ། །ཐུགས་ཡེ་ཤེས་དཀྱིལ་ལྟ་བུ་ལ་ཡེ་ཤེས་བཞིའི་འཁོར་དང་ལྡན་པ་དེ་ལ་དུས་དང་གནས་སྐབས་ཀུན་ཏུ་གཟུང་འཛིན་གྱིས་མ་སྒྲིབ་པས་གསལ་བའོ། །ཡང་ན་གཞིའི་ཡེ་ཤེས་རྣམ་ཤེས་ཚོགས་བརྒྱད་དང་ལམ་གྱི་ཡེ་ཤེས་རྣམ་པ་ལྔ་དང་འབྲས་བུའི་ཡེ་ཤེས་ཆོས་ཀྱི་སྐུའོ། །དེ་དག་ནི་ཡེ་ཤེས་ཆེན་པོའི་ཁྲོ་བོ་སྟེ་མ་སྒྲིབས་པར་འོད་གསལ་བའོ། །དེ་ཡང་ཡེ་ཤེས་ལྔ་ལྷུན་གྱིས་གྲུབ་ཅིང་རྫོགས་པ་ཉིད་ཕྱི་ནང་མེད་པར་གསལ་བ་ཡིན་ནོ། །ཁྲོ་བོའི་ཡེ་ཤེས་ནི་བསྲེག་པའི་མེ་ལྟར་འབར་བའི་ཡེ་ཤེས་ཀྱི་མེས་ལས་དང་ཉོན་མོངས་པ་ཀུན་ཏུ་འཇོམས་ཤིང་ཅིར་སྣང་ཐམས་ཅད་ཐུགས་ཡེ་ཤེས་སུ་འབར་རོ། །ཡེ་ཤེས་དག་གིས་བགེགས་ཐམས་ཅད་བུད་ཤིང་དང་འདྲ་བར་འཇོམས་པའོ། །སྣ་ཚོགས་སུ་སྣང་ཡང་ཆོས་ཀྱི་དབྱིངས་ལས་མ་གཡོས་པས་ན་ཡེ་ཤེས་སོ་དེ་ལ་དབྱེར་མེད་པས་ན་ཐིག་ལེ་ཆེའོ། །དེ་ཡང་སྣ་ཚོགས་སུ་སྣང་བ་ཉིད་རང་སྣང་རང་བྱུང་གི་ཡེ་ཤེས་སྤྲོས་པ་དང་བྲལ་བ་ཉིད་རང་སྣང་བའི་ཐུགས་རྗེ་སྟེ་ཧོ་ནི་དེ་ལ་དགྱེས་པའོ། །བཞི་པ་ཡོན་ཏན་ལ་བསྟོད་པ་ནི། ཧཱུཾ། ཁྲོ་བོའི་རྒྱལ་པོ་སྤྲིན་ཆེན་པོ། །ཁྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ། །ཞེས་ཡོན་ཏན་ལྔ་ལྷུན་གྱིས་གྲུབ་པའི་ཧཱུཾ་གིས་མགོ་དྲང་སྟེ་ཡེ་ཤེས་ཆེན་པོའི་སྐུ་རྔམ་པའི་ཕྱིར་ཁྲོ་བོ་གཞན་ལ་དབང་བསྒྱུར་བ་སྟེ་བདུད་དང་མུ་སྟེགས་ལ་སོགས་པ་ཁྲོ་བོ་དེ་ལས་རྒྱལ་བས་ན་ཁྲོ་བོའི་རྒྱལ་པོའོ། །དེ་དག་གི་ཡོན་ཏན་འབྱུང་བའི་ཕྱིར་སྤྲིན་ཆེན་པོའོ། །དེ་ཡང་སྤྲིན་ཆེན་པོ་ལས་ཆར་འབབ་པ་ལྟར་དེ་དག་ཀྱང་ཐུགས་རྗེ་དབང་གིས་ཁྲོས་པའི་དུས་ན་ཁྲོ་བོའི་ཚོགས་ནམ་མཁའ་གང་བར་ཆར་དུ་འབེབས་པར་བྱེད་དོ། །ཇི་ལྟར་ན་ཁྲོས་པའི་སྤྲུལ་པ་ནི་ཁྲོ་བོ་སྟེ་དེ་ནི་སྤྲུལ་པའི་དཀྱིལ་འཁོར་སྟེ་ཆར་ཆེན་པོ་ལྟ་བུར་འབེབས་པར་བྱེད་དོ། །ཁྲོ་བོ་དཀྱིལ་འཁོར་སྤྲུལ་པ་དང་བཅས་པ་ཇི་ལྟར་འདོད་པ་བཞིན་དུ་འབྱུང་བ་ནི་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་དགོས་འདོད་ཐམས་ཅད་འབྱུང་བའི་གཏེར་དུ་གྱུར་པ་དང་འདྲ་སྟེ་སྤྲིན་ལྟ་བུར་སྣང་བའོ། །ཡོན་ཏན་སྣ་ཚོགས་མངའ་བའི་ཁྲོས་པའམ་ཁྲོ་བོ་ཐམས་ཅད་ཀྱང་དོན་སྤྲོས་པ་དང་བྲལ་བའི་ཡེ་ཤེས་སུ་གཅིག་གོ། །དཀྱིལ་འཁོར་མང་པོ་དེར་གཅིག་པས་ན་ཐིག་ལེ་ཆེའོ། །དེ་ལྟ་བུའི་དོན་ཡང་དག་པ་དེ་ལ་དགྱེས་པས་ན་ཧོ་ཞེས་སོ། །ལྔ་པ་འཕྲིན་ལས་ལ་བསྟོད་པ་ནི། ཧཱུཾ། བདུད་ཀུན་གྱི་ནི་བདུད་ཆེན་པོ། བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་པར་བྱེད། །འཇིགས་བྱེད་ཆེན་པོ་ཐིག་ལེ་ཆེ་ཧོ། །ཞེས་པ་སྟེ་ཧཱུཾ་ནི་འཕྲིན་ལས་ལྔ་ལྷུན་གྱིས་གྲུབ་པས་མགོ་དྲང་བ་ཡིན་ལ་བདུད་ནི་རུ་ཏྲ་སྟེ་དེ་འཁོར་དང་བཅས་པ་ཀུན་གྱི་ཡང་བདུད་དུ་གྱུར་པ་ནི་དཔལ་ཆེན་པོའོ། །ཇི་ལྟར་ན་རུ་ཏྲས་སེམས་ཅན་ཐམས་ཅད་བསད་པས་ན་སེམས་ཅན་གྱི་བདུད་དོ་དེ་དཔལ་ཆེན་པོས་བཏུལ་དེ་ལུས་གདན་དུ་བྱས་པས་ན་བདུད་ཆེན་པོའོ། །བདུད་ནི་རུ་ཏྲ་ལ་དཔལ་ཧེ་རུ་ཀ་ནི་དེ་ཉིད་ཀྱི་བདུད་སྟེ་བདུད་རྣམས་ནི་རུ་ཏྲ་འཁོར་བཅས་སོ། །འཇོམས་པ་ནི་བདུད་དེ་དག་བསྒྲལ་ནས་ཤ་ཁྲག་གསོལ་སེམས་འོག་མིན་དུ་གནས་སྤར་ནས་བདུད་ཀྱི་ཚོགས་ཐམས་ཅད་རབ་ཏུ་ཕམ་པར་བྱས་ནས་བཅོམ་པའོ། །འཇིགས་པའི་ཚོགས་ནི་རུ་ཏྲ་འཁོར་བཅས་སོ། །དེ་དག་ཀྱང་འཇིགས་པར་བྱེད་པ་ནི་ཧེ་རུ་ཀ་སྟེ་ཇི་ལྟར་ན་རུ་ཏྲ་རྣམས་ཀྱི་མགོ་དང་ཡན་ལག་མང་པོ་དང་དུར་ཁྲོད་ཀྱི་རྒྱན་མང་པོ་བཏགས་ནས་འཇིགས་འཇིགས་འདྲ་བ་ལ་དེ་དཔལ་ཆེན་པོའི་སྐུའི་ཆ་ལུགས་ཀྱི་བྲེད་ཅིང་དངངས་ནས་འཇིགས་པར་བྱེད་པ་ཡིན་ནོ། །དེ་ལྟར་འཇིག་བྱེད་ཆེན་པོའི་སྐུ་བསྟན་ཀྱང་ཆོས་ཀྱི་དབྱིངས་ལས་མ་གཡོས་པའོ། །དེ་ལྟ་བུ་དེ་ཆོས་ཉིད་ཀྱི་དོན་ལས་མ་གཡོས་པར་འཇིགས་འཇིགས་འདྲ་བར་འབྱུང་བ་ལ་དེ་དག་ཐམས་ཅད་རང་བྱུང་གི་ཡེ་ཤེས་སུ་འདུག་པས་ན་ཐིག་ལེ་ཆེན་པོའོ། །དོན་ལ་ཅི་ཡང་མེད་པས་དེ་ལ་དགྱེས་པས་ཧོ་ཞེའོ། །དྲུག་པ་སྦྱིར་བསྟན་པ་ནི། ཧཱུཾ། རྡོ་རྗེ་བྲག་ཆེན་སྲ་བ་པོ། །རྡོ་རྗེའི་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་ལུང་སྟེ་འཐོར་རླུང་ཆེ་ཧོ། །ཞེས་པ་སྟེ་བསྟོད་པ་འདི་ལ་གསུམ་སྟེ་བསྐལ་པའི་འཕྲིན་ལས་ལ་བསྟོད་པ་དང་། འབྱུང་བ་དག་བྱེད་ལ་བསྟོད་པ་དང་། མཚན་ཉིད་ཡོན་ཏན་ལ་བསྟོད་པའོ། །དང་པོ་ནི་བསྐལ་པ་མེ་བདུན་ཆུ་གཅིག་གིས་འཇིག་པ་དེ་སངས་རྒྱས་ཀྱི་འཕྲིན་ལས་ཡིན་ཏེ། ཇི་ལྟར་ན་སེམས་ཅན་གྱི་ལས་ངན་རྒྱུན་བཅད་ནས་གནས་ངན་ལས་སྒྲོལ་བའོ། །ཇི་ལྟར་སྒྲོལ་ན་སྲ་བ་བརྟན་པའི་བསྐལ་བར་ཐམས་ཅད་གནས་ཞི་གནས་ཆུ་ཡི་བསྐལ་པས་ཐམས་ཅད་འཁྲུད་ལྷག་མཐོང་མེ་ཡི་བསྐལ་པས་ཐམས་ཅད་བསྲེགས་ཡེ་ཤེས་རླུང་གིས་བསྐལ་བས་ཐམས་ཅད་འཐོར་ཤེས་རབ་ནམ་མཁའི་བསྐལ་པས་རྒས་རྒུད་སྟོངས། ཞེས་མདོ་དགོངས་པ་འདུས་པ་ལས་གསུངས་སོ། །རྒྱུད་གཞན་ལས་ཀྱང་གསུངས་སོ། །གཉིས་པ་ནི་བུདྡྷའི་ཧེ་རུ་ཀའི་ཐུགས་ཡེ་ཤེས་ནི་འབྱུང་བ་ས་ཡིན། དེས་ས་ཐ་མལ་པ་འཇོམས་པས་བུདྡྷ་ཀྲོ་ཏིའི་མཁའ་ཀློང་རྣམ་པར་དག་པའོ། །དེ་ལྟར་རཏྣ་ཆུ་པདྨ་མེ་ཀརྨ་རླུང་ངོ་། །གསུམ་པ་ནི་ཧཱུཾ་ནི་འབྱུང་བ་བཞིའི་བདག་ཉིད་དེ་དེ་ཡང་འབྱུང་བ་བཞི་པོ་གནས་སུ་དག་པས་ཡུམ་བཞི། ཡུམ་བཞི་པོ་ཡང་ཆོས་ཉིད་སྐྱེ་འཇིག་དང་བྲལ་བས་དོན་ཆོས་ཉིད་ཀྱི་ངང་དུ་ཐིམ་མོ། །དེའི་ཕྱིར་ཧཱུཾ་གིས་མགོ་དྲངས་པ་ཡིན་ནོ། །དེ་ཡང་དཔལ་ཁྲག་འཐུང་ལ་རྡོ་རྗེ་ལྟ་བུའི་སྐུ་མངའ་བས་མཚན་ཉིད་སྐྱེ་འཇིག་ལས་འདས་པའོ། །དེ་ཁོ་ན་དཔེར་ན་བྲག་ཆེན་པོ་དང་འདྲ་བས་སྲ་བ་པོ་ཞེས། དེ་ལྟར་ཡིན་ཡང་ཐུགས་རྗེ་ཆེན་པོའི་རླན་གྱིས་སེམས་ཅན་ཐམས་ཅད་ཀྱི་སེམས་ཀྱི་བག་ཆགས་འཁྲུ་བས་ན་ཡེ་ཤེས་ཆེན་པོ་རྡོ་རྗེའི་ཆུ་བོ་ཡིན་ལ་དེས་ཆུ་ཐ་མལ་པ་ཡང་སྡུད་པར་བྱེད་པས་ན་སྡུད་ཆེན་པོ་ཞེས་སོ། །ཡེ་ཤེས་ཆེན་པོ་རྡོ་རྗེ་ཡི་མེ་དང་འདྲ་བ་སྟེ་ཉོན་མོངས་པ་ཀུན་བསྲེག་པར་མཛད་པ་དང་དེ་ཡང་འཁོར་བ་མ་སྟོངས་ཀྱི་བར་དུ་ཡེ་ཤེས་ཀྱི་མེ་འབར་བས་ན་ཆེ་བའམ་ཆེན་པོའོ། །གདུལ་བྱ་རྣམས་འཁོར་བའི་གནས་ནས་མྱ་ངན་ལས་འདས་པའི་དབྱིངས་སུ་ཐུགས་རྗེ་ཆེན་པོས་བསྐྱོད་པར་མཛད་པ་དང་འགྲོ་བ་རིགས་དྲུག་གི་སེམས་ཅན་ཐམས་ཅད་རྡོ་རྗེ་ཡི་རླུང་གིས་འཐོར་ནས་མྱ་ངན་ལས་འདས་པའི་ས་ལ་འདོགས་པའོ། །དེ་ལྟར་སེམས་ཅན་གྱི་དོན་བྱེད་པ་དེ་གཞན་གང་གི་ཡང་འོག་ཏུ་མ་གྱུར་བས་ན་རླུང་ཆེ་བའོ། །དེ་བཞིན་གཤེགས་པའི་སྤྲུལ་པ་རླུང་གིས་སེམས་ཅན་གྱི་དོན་བྱེད་པས་ན་དེ་ལ་དགྱེས་པས་ཧོ་ཞེས་པའོ། །གསུམ་པ་དེ་ཉིད་ཚོགས་སྒྲུབ་ཀྱིས་བསྒྲུབ་པར་བསྟན་པ་ལ་དངོས་དང་། དེ་ལྟར་བསྒྲུབས་པས་དངོས་གྲུབ་འཐོབ་ཚུལ་བསྟན་པའོ། །དང་པོ་ནི། ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡིས། །རྣལ་འབྱོར་འཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོངས་པ་འགྲུབ། །ཅེས་པས་བསྟན་ཏེ། རྩ་བའི་དམ་ཚིག་དྲུག་ལ་བྱང་ཆུབ་སེམས་རྣམ་པ་གཉིས་སློབ་དཔོན་དྲུག་མཆེད་བཞི་སྔགས་གསུམ་ཕྱག་རྒྱ་བཞི་གསང་བ་བཅུ་ཡན་ལག་གི་དམ་ཚིག་ལྔ་སྤྱད་པར་བྱ་བ་དང་། མི་སྤང་བ་དང་། དང་དུ་བླང་བ་དང་། ཤེས་པར་བྱ་བ་དང་། སྒྲུབ་པར་བྱ་བ་མ་ཉམས་པའོ། །ཡོ་བྱད་ལྔ་ནི་བྲོ་གར་འདུ་འཕྲོའི་ཡོ་བྱད་དང་། བཟའ་དང་བཏུང་བའི་དང་། གླུ་ཚིག་སྒྲ་ཡི་ཡོ་བྱད་དང་། རྒྱན་དང་བགོ་བའི་དང་། ཨ་ལི་ཀ་ལིའི་ཡོ་བྱད་ལྔ་དང་ལྡན་པའོ། །ཡང་ན་སྔགས་ཀྱི་ཡན་ལག་ལྔ་སྟེ་རྩ་བའི་ལྷ་དང་ཐབས་ཀྱི་ལྷ་དང་ཤེས་རབ་ཀྱི་ལྷ་དང་བསམ་གྱིས་མི་ཁྱབ་པའི་ལྷ་དང་ཡེ་ཤེས་ཀྱི་དཀྱིལ་འཁོར་རོ། །དེས་ཡོ་བྱད་ཕུན་སུམ་ཚོགས་པ་བསྟན་ནོ། །ཆོ་ག་ལྔ་ནི་དེ་བཞིན་ཉིད་སྟོང་པ་ཆེན་པོའི་ཆོ་ག་དང་། ཀུན་ཏུ་སྣང་སྒྱུ་མ་སྙིང་རྗེའི་ཆོ་ག་དང་། རྒྱུའི་ཏིང་ངེ་འཛིན་སྐུ་གསུང་ཐུགས་ཀྱི་ཆོ་ག་དང་། ཕྱག་རྒྱ་གཅིག་པ་ལྷ་བཞེངས་པའི་ཆོ་ག་དང་། ཕྱག་རྒྱ་སྤྲོས་པ་རྣལ་འབྱོར་རྩལ་སྦྱོར་བའི་ཆོ་ག་རྣམས་རྫོགས་པར་ཤེས་པ་ཡིས་ཞེས་གཙོ་བོ་སྟོན་པ་ཕུན་སུམ་ཚོགས་པ་བསྟན་ལ། རྣལ་འབྱོར་པ་ནི་སྟོན་པ་རྡོ་རྗེ་རྒྱལ་པོ་ཡབ་ཡུམ་དང་རྡོ་རྗེ་རྒྱལ་ཐེབ་ཡབ་ཡུམ་དང་ལས་ཀྱི་གར་མ་ཡབ་ཡུམ་དང་རྡོ་རྗེ་བྱ་རོག་ཡབ་ཡུམ་དང་རྡུལ་ཕྱགས་སྐྱེ་བོའོ། །དེ་རྣམས་འཚོགས་ནས་སྒྲུབ་པའི་དཀྱིལ་འཁོར་ནི་ཚོམ་བུ་མང་ཉུང་ལྷ་གྲངས་དང་མི་གྲངས་སུ་སྦྱར་ནས་དཔའ་བོ་དང་དཔའ་མོར་བསྟུན་ནས་སྒྲུབ་པའི་དཀྱིལ་འཁོར་གྱིས་ཞེས་གཙོ་བོ་འཁོར་ཕུན་སུམ་ཚོགས་པ་བསྟན་པའོ། །དེ་ནི་དྲང་དོན་མ་ཡིན་ཏེ་ངེས་པའི་དོན་ཡིན་པས་ངེས་པར་ཐེ་ཚོམ་མེད་པར་འགྲུབ་པའོ། །གང་འགྲུབ་ན་མྱ་ངན་ལས་འདས་པ་བུདྡྷའི་དངོས་གྲུབ་ལེགས་པར་འགྲུབ། དོན་གཉིས་ལྷུན་གྱིས་གྲུབ་པའི་སངས་རྒྱས་ཀྱི་དགོངས་པ་གང་ཡིན་པ་དེ་འགྲུབ། མཆོག་དང་ཐུན་མོང་གི་དངོས་གྲུབ་རྣམ་པ་གཉིས་ཀྱང་ལེགས་པར་འགྲུབ་པར་འགྱུར་རོ། །ཞེས་དུས་ཕུན་ཚོགས་བསྟན་པའོ། །གཉིས་པ་ནི། ཁྲོ་བོ་ཁྲོ་མོའི་ཚོགས་ཆེན་དང་། །ཕོ་ཉ་ཕྱག་བརྙན་བཀའ་ཉན་ཚོགས། །ཅི་བགྱི་ལ་སོགས་ཚོགས་རྣམས་ཀྱིས། །དངོས་གྲུབ་ལས་རྣམས་རྫོགས་པར་བྱེད། །ཅེས་པ་སྟེ། དེ་ཡང་འགྲུབ་པ་དེ་རང་གང་ཞེ་ན་ཁྲོ་བོ་ནི་ཁྲག་འཐུང་རྒྱལ་བ་རིགས་རྣམ་པ་ལྔའོ། །ཁྲོ་མོའི་སྒྲས་ནི་ཡུམ་ལྔའོ། །ཚོགས་ཆེན་ནི་ཡབ་ཡུམ་བཅུ་པོ་དེ་ཡོན་ཏན་གྱི་ཚོགས་མང་པོ་དང་ལྡན་པས་འཁོར་ཡེ་ཤེས་དང་ལས་ལས་གྲུབ་པ་མང་པོ་ཡོད་པའོ། །དེ་ཡང་འཁོར་གང་ཞེ་ན་ཕོ་ཉ་ནི་ཀོའུ་རི་མ་བརྒྱད་དེ་བཅོལ་བའི་ལས་རྣམས་བྱེད་པའོ། །ཕྱག་བརྙན་ནི་སེང་ཧ་མ་བརྒྱད་དེ་མངག་པའི་ལས་ལ་མགྱོགས་པའོ། །བཀའ་ཉན་ནི་སྒོ་མ་བཞི་སྟེ་འགུགས་འདྲེན་གྱི་ལས་ལ་མཁས་པའོ། །ཚོགས་ནི་རང་རང་གི་སྤྲུལ་པ་རྣམས་སོ། །ཅི་བགྱི་ནི་དབང་ཕྱུག་མ་སྟེ་རྗེ་དཔལ་ཆེན་མོའི་བྲན་ཡིན་པའི་ཕྱིར་ན་མ་བཅོལ་ཡང་ལས་ཅི་བགྱི་ཟེར་ནས་ཡོང་བའོ། །ལ་སོགས་ནི་དབང་མོ་ཉི་ཤུ་རྩ་བརྒྱད་པའོ། །ཚོགས་རྣམས་ནི་ཡང་སྤྲུལ་དང་བཅས་པ་རྣམས་སོ། །དེ་རྣམས་ཀྱིས་རྣལ་འབྱོར་བའི་དངོས་གྲུབ་རབ་འབྲིང་གསུམ་དང་ལས་རྣམ་པ་བཞི་པོ་རྣམས་མ་ལུས་པར་འགྲུབ་པར་བྱེད། ཐུན་མོང་གི་འབྲས་བུ་རིག་འཛིན་བཞི་བསྒྲོད་པར་བྱེད། མཆོག་གི་འབྲས་བུ་ཡང་དག་པར་རྫོགས་པའི་སངས་རྒྱས་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་དོ། །བཞི་པ་མཇུག་གི་ལས་ལ་དཀྱིལ་འཁོར་བསྡུ་བ་དང་། རྒྱུན་གྱི་སྤྱོད་ལམ་མོ། །དང་པོ་ནི། དེ་ནས་དཀྱིལ་འཁོར་ཐམས་ཅད་ཀུན། །རང་གི་སྙིང་ཀར་བསྡུ་ན་ནི། །ཧཱུཾ་ཧཱུཾ་ཞེས་ནི་རབ་བརྗོད་པས། །འདུས་པ་དེ་དག་ཅི་བདེར་སྤྱད། །ཞེས་གསུངས་ཏེ། ཡེ་ཤེས་ཀྱི་དཀྱིལ་འཁོར་ལ་མཆོད་བསྟོད་བཟླས་པ་རྫོགས་པ་དེ་ནས་དམ་ཚིག་གི་དཀྱིལ་འཁོར་ཐམས་ཅད་ཀུན་བསྡུ་བ་ནི་བདག་གི་ཐུགས་ཀ་ནས་ཡི་གེ་ཧཱུཾ་ལས་འོད་ཟེར་འཕྲོས་པས་ལྷ་དང་གཞལ་ཡས་ཁང་དང་བཅས་པ་འོད་དུ་ཞུ་ནས་འོད་དེ་ཡང་གཞལ་ཡས་ཁང་གི་འོད་ལྷའི་འོད་ལ་འདུས་ལྷ་རྣམས་ཀྱི་འོད་རིམས་ཀྱིས་རང་གི་སྙིང་ཀར་བསྡུས་ནས་ནི་བདག་ཀྱང་འོད་དུ་ཞུ་ནས་མི་དམིགས་པར་གྱུར་ཏེ་མ་བསྡུས་ན་དངོས་གྲུབ་གཡེལ་བར་འགྱུར་བས་བསྡུ་བར་བྱའོ། །དེ་ནས་ཡེ་ཤེས་ཀྱི་དཀྱིལ་འཁོར་འོད་དུ་གསལ་བར་བྱའོ། །དེ་ཡང་དང་པོ་ཡང་ཧཱུཾ་ལས་བྱུང་བས་ཐ་མ་ཡང་ཧཱུཾ་ཞེས་ནི་རབ་ཏུ་བརྗོད་པས་ཧཱུཾ་ལ་སྡུད་པའོ། །དེ་ལྟར་མི་དམིགས་པ་དེའི་ངང་ལས་སྐད་ཅིག་གིས་ལྷའི་སྐུར་བསྐྱེད་ལ་ཀཾ་ལས་རྡོ་རྗེའི་གོ་ཁྲབ་ཀྱིས་ལུས་ལ་རྡོ་རྗེའི་གོ་བགོས། ཧཾ་ལས་རྡོ་རྗེའི་རྒྱུན་ཐག་གིས་བསྡམ་ཨ་ལས་རིན་པོ་ཆེ་དང་ཧཱུཾ་ལས་རྡོ་རྗེའི་ཐག་པ་གཉིས་མཛུབ་མོ་ལ་གསལ་ལ་བཅིང་ངོ་། །རཏྣ་མ་ལེ་ཨ་བི་ཥིཉྩ་ཞེས་པས་རིན་པོ་ཆེའི་འཕྲེང་བས་བཅིང་། ས་ཏ་ལཾ་ཞེས་པས་དར་དཔྱངས་དཀར་པོ་གཡས་སུ་འཕུར་བར་བསམ་མོ། །ཨ་བྷི་ཥིཉྩ་ལཾ་ཞེས་པས་དར་དཔྱངས་དམར་པོ་གཡོན་དུ་འཕུར་བར་བསམ་མོ། །འདུས་པ་དེ་དག་རྟག་མཐའ་བསལ་ནས་སྟོང་ཉིད་དུ་ཆད་མཐའ་བསལ་བའི་ཕྱིར་ཅི་བདེར་སྤྱོད་དོ། །གཉིས་པ་ནི། དེ་ནས་དཀྱིལ་འཁོར་བསྡུས་ནས་ཀྱང་། །རྣལ་འབྱོར་བདག་ཉིད་ཆེན་པོ་ཡིས། །སྤྱོད་ལམ་ཀུན་ཏུ་མ་ཉམས་པར། །ལྷ་ཉིད་དུ་ནི་རྟག་ཏུ་བསྒོམ། །ཞེས་པ་སྟེ་དཀྱིལ་འཁོར་བསྡུ་བར་བསྟན་པའི་རྗེས་དེ་ནས་དམ་ཚིག་གི་དཀྱིལ་འཁོར་བདག་ལ་བསྡུས་ཡེ་ཤེས་ཀྱི་དཀྱིལ་འཁོར་འོག་མིན་དུ་གཤེགས་ཟིན་ནས་ཀྱང་སྤྱོད་ལམ་བྱ་བར་བསྟན་པ་དེ་ཡང་བློ་རྣལ་མ་ལ་རིག་པ་ལྷའི་སྐུ་འབྱོར་བས་རྣལ་འབྱོར་སྐུ་གསུང་ཐུགས་ཀྱི་བདག་ཉིད་སངས་རྒྱས་དང་སྐལ་བ་མཉམ་པས་ཆེན་པོ་དེ་ཡིས་ཇི་ལྟར་ཞེ་ན་བོར་ནས་བཞག་པ་ལྟ་བུ་མ་ཡིན་ཏེ་འགྲོ་བ་དང་ཉལ་བ་དང་འདུག་པ་དང་ཟ་བའི་སྤྱོད་ལམ་ཀུན་ཏུ་ཡང་ལྷའི་ཏིང་ངེ་འཛིན་ལས་མ་ཉམས་པར་རང་ཉིད་ཡི་དམ་ལྷ་ཡི་ཏིང་ངེ་འཛིན་ཉིད་དུ་ནི་རྟག ཏུ་བསྒོམ་མོ། །ཇི་ལྟར་ན་འགྲོ་ན་རྐང་པའི་མཐིལ་དུ་རྡོ་རྗེ་སྒོམས་ནས་འགྲོ་དེས་སེམས་ཅན་ལྟོག་པའི་འགྲོ་ལ་ཤི་བོ་གནས་ངན་པར་མི་སྐྱེ། ཉལ་ན་ཨ་ཞེས་སྟོང་ཉིད་དུ་ཉལ་རྨི་ལམ་སྒྱུ་མ་ཙམ་ལ་སེམས་འཛིན་དེས་སྣང་བ་རྨི་ལམ་ཙམ་དུ་ཤེས། འདུག་ན་ཕྱི་སྣོད་གཞལ་ཡས་ཁང་ལ་ནང་བཅུད་ལྷའི་སྐུར་འདུག་དེས་རྟོག་པ་གནས་འགྱུར་བ་དག་པར་བྱེད། ཟ་ན་ཡོ་བྱད་ཚོགས་སུ་རོལ་ཏེ་ཟས་ཀྱི་རྣལ་འབྱོར་བྱ། དེ་རྣམས་གང་བྱེད་ཀྱང་ལྷ་སྒོམ་དགོས་པས་ན་ལྷ་ཉིད་དུ་ནི་རྟག་ཏུ་སྒོམ་ཞེས་གསུངས་པ་ཡིན་ནོ། །གཉིས་པ་དག་མཉམ་བདེན་པ་དབྱེར་མེད་རང་བཞིན་ལྷུན་གྲུབ་ཀྱི་དཀྱིལ་འཁོར་བསྟན་པ་ལ་གསུམ་སྟེ་ཀུན་རྫོབ་དག་པ་ཆེན་པོའི་རང་བཞིན་དུ་བསྟན་པ་དང་། དེ་ཉིད་གཏན་ཚིགས་རྣམ་པ་བཞིས་དོན་དམ་མཉམ་པ་ཆེན་པོ་དང་དབྱེར་མེད་དུ་བསྟན་པ་དང་། དེ་ལྟར་དག་མཉམ་དབྱེར་མེད་རྟོགས་པའི་འབྲས་བུ་བསྟན་པའོ། །དང་པོ་ནི། ཕུང་པོ་ལྔ་ཉིད་ཁྲོ་རྒྱལ་གཙོ། །ཆེན་པོ་ལྔ་ཉིད་དབང་ཕྱུག་ཡུམ། །སྐྱེ་མཆེད་ཁམས་རྣམས་མང་པོ་ཀུན། །ཐུགས་རྗེ་རྔམ་པའི་དཀྱིལ་འཁོར་ཚོགས། །ཞེས་པ་སྟེ་ཕུང་པོ་ལྔ་ཉིད་ནི་གཟུགས་ཀྱི་ཕུང་པོ་བུདྡྷ་ཧེ་རུ་ཀའོ། །རྣམ་ཤེས་ཀྱི་ཕུང་པོ་བཛྲ་ཧེ་རུ་ཀའོ། །ཚོར་བའི་ཕུང་པོ་རཏྣ་ཧེ་རུ་ཀའོ། །འདུ་ཤེས་ཀྱི་ཕུང་པོ་པདྨ་ཧེ་རུ་ཀའོ། །འདུ་བྱེད་ཀྱི་ཕུང་པོ་ཀརྨ་ཧེ་རུ་སྟེ་ཁྲོ་རྒྱལ་གཙོ་བོ་ལྔ་ཡིན་ལ། ཆེན་པོ་ལྔ་ཉིད་ནི་ཡུམ་སྟེ་དེ་ཡང་འབྱུང་བ་ས་ནི་བཛྲ་ཀྲོ་ཏི་ཤྭ་རི་མ་སྟེ་རྣམ་པར་ཤེས་པའི་རང་བཞིན་གྱི་སྤྱད་བྱ་སྟེ་ཡུམ་མོ། །འབྱུང་བ་ནམ་མཁའ་ནི་ཡུམ་བུདྡྷ་ཀྲོ་ཏི་སྟེ་ནམ་མཁའི་རང་བཞིན་ནོ། །ཆུ་ནི་རཏྣ་ཀྲོ་ཏི་སྟེ་ཚོར་བའི་ཡུམ་མོ། །འདུ་ཤེས་མེའི་ཡུམ་པདྨ་ཀྲོ་ཏིའོ། །འདུ་བྱེད་རླུང་གི་རང་བཞིན་གྱིས་སྤྱད་བྱའི་ཡུལ་དུ་གྱུར་པས་ན་ཡུམ་ཀརྨ་ཀྲོ་ཏི་ཤྭ་རི་མའོ། །དེ་བས་ན་ཕུང་པོ་ལྔ་ཡབ་འབྱུང་བ་ལྔ་དབང་ཕྱུག་ཡུམ་ལྔའི་རང་བཞིན་ནོ། །སྐྱེ་མཆེད་ནི་གནས་ཀྱི་མ་བརྒྱད་དང་ཁམས་རྣམས་མང་པོ་ཀུན་ཞེས་པས་ཡུམ་གྱི་ཕྲ་མེན་བརྒྱད་དེ་རེ་རེ་ལ་གཉིས་གཉིས་བརྩིས་པས་མིག་གི་རྣམ་ཤེས་ཀོའུ་རི་རྣ་བའི་རྣམ་ཤེས་ཙོ་རི་སྣའི་རྣམ་ཤེས་པྲ་མོ་ཧ་ལྕེའི་རྣམ་ཤེས་པེ་ཏ་ལི། མིག་གི་དབང་པོ་པུཥྐ་སི་རྣ་བའི་དབང་པོ་ཀསྨ་རི་སྣའི་དབང་པོ་སྨ་ཤ་ནི་ལྕེའི་དབང་པོ་ཙནྡྷ་ལིའོ། །དེ་བས་ན་རྣམ་པ་བཞི་དང་། དབང་པོ་བཞི་ནི་རང་རང་གི་གནས་ལ་སྤྱོད་པས་ན་གནས་ཀྱི་མ་མོ་བརྒྱད་དོ། །དེ་རྣམས་ལ་སྐྱེ་མཆེད་བརྒྱད་ཅེས་བྱའོ། །ཁམས་ནི་མིག་གི་ཡུལ་ནི་གཟུགས་ཀྱི་ཁམས་ཏེ་སེང་ཧ་མ་རྣ་བའི་ཡུལ་སྒྲའི་ཁམས་ཏེ་བྱ་ཏྲི་མ་སྣའི་ཡུལ་དྲིའི་ཁམས་ཏེ་སྲི་ལ་མ་ལྕེའི་ཡུལ་རོའི་ཁམས་ཏེ་ཤྭ་ན་མ་མིག་གི་དབང་པོའི་སྤྱད་བྱ་འདས་པ་སྟེ་ཀྲི་ཏ་མ་རྣ་བའི་ད་ལྟ་སྟེ་ཀང་ཀ་མ་སྣའི་མ་བྱོན་པ་སྟེ་ཁ་ཁ་མ་ལྕེ་འབྱུང་བར་མ་ངེས་པར་སྟེ་ཧུ་ལུ་མ། ལུས་ཀྱི་དབང་པོ་བཞི་ནི་སྒོ་མ་བཞི་ཡིན་ནོ། །དེ་ལྟར་ན་སངས་རྒྱས་ཀྱི་ཐུགས་རྗེ་ཁྲོས་ཤིང་རྔམ་པའི་དཀྱིལ་བཛྲ་ཧེ་རུ་ཀ་ལ་འཁོར་མ་ཚོགས་མང་པོ་དེ་ཡེ་ནས་རང་ཆས་སུ་ལྷུན་གྱིས་གྲུབ་པ་ཡིན་ནོ། །གཉིས་པ་ནི། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་རླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་པ་སྟེ། དེ་ཡང་རྟོགས་པ་རྣམ་པ་བཞི་ལ་དོན་བཞི་སྟེ་ལྟ་བ་དང་སྦྱར་བའི་རྟོགས་པ་བཞི་དང་། བསྐྱེད་རིམ་དང་སྦྱར་བ་དང་། རྫོགས་རིམ་དང་སྦྱར་བ་དང་། གྲུབ་མཐའ་དང་སྦྱར་བའོ། །ལྟ་བ་དང་སྦྱར་བའི་རྟོགས་པ་བཞི་ལ་རེ་རེ་ལ་དོན་གསུམ་གསུམ་སྟེ། དེ་ལ་རྒྱུ་གཅིག་པར་རྟོགས་པའི་གཞལ་བྱ་ནི་འཁོར་འདས་ཀྱི་ཞེན་སྣང་ལ་འཇོག་པའོ་བཞི་ཀ་མཐུན་ནོ། །གོ་བའམ་རྟོགས་པ་གང་སྐྱེ་བ་ནི་འཁོར་འདས་སེམས་ཉིད་དུ་རྒྱུ་གཅིག་པར་རྟོགས་པའོ། །ཞེན་པ་གང་གྲོལ་བ་ནི་འཁོར་འདས་ཐ་དད་དུ་ཞེན་པ་གྲོལ་བའོ། །ཡིག་འབྲུའི་ཚུལ་དུ་རྟོགས་པའི་གོ་བའམ་རྟོགས་པ་གང་བསྐྱེད་པ་ནི་ཡི་གེ་འབྲུ་གསུམ་གྱི་སྒོ་ནས་ལུས་ངག་ཡིད་གསུམ་སྐུ་གསུང་ཐུགས་སུ་རྟོགས་པའོ། །ཞེན་པ་ནི་འབྲས་བུ་གཞན་ནས་བྲོབ་བམ་སྙམ་ནས་གཞན་ནས་ཚོལ་བའི་ཞེན་པ་གྲོལ། བྱིན་གྱི་རླབས་ཀྱིས་རྟོགས་པའི་རྟོགས་པ་གང་སྐྱེ་བ་ནི་རྒྱུ་གཅིག་པ་དང་ཡིག་འབྲུའི་ཚུལ་གྱིས་སྐུ་གསུང་ཐུགས་སུ་རྟོགས་པའི་མཐུ་ངོ་ཤེས་ནས་ལྡན་པར་རྟོགས་པའོ། །ཞེན་པ་མི་ལྡན་པའི་ཞེན་པ་ལས་གྲོལ་ནས་ལྡན་པའོ། །མངོན་སུམ་པར་རྟོགས་པ་ནི་མཐུ་ངོ་ཤེས་མི་ལྡན་པ་ལྡན་པར་རྟོགས་པ་དེ་སྒྲ་ཙམ་མ་ཡིན་པར་བློ་གཏིང་དུ་གོ་བའོ། །ཞེན་པ་གང་གྲོལ་བ་ནི་སྒྲ་བཞིན་དུ་འཛིན་པའི་ཞེན་པ་ལས་གྲོལ་ལོ། །བསྐྱེད་རིམ་དང་སྦྱར་ན་རྒྱུ་གཅིག་པར་རྟོགས་པ་ནི་དེ་བཞིན་ཉིད་ཀྱི་ཏིང་ངེ་འཛིན་ནོ། །བྱིན་གྱིས་བརླབས་ནི་ཀུན་སྣང་གི་ཏིང་ངེ་འཛིན་ནོ། །ཡིག་འབྲུའི་ཚུལ་ནི་རྒྱུའི་ཏིང་ངེ་འཛིན་ནོ། །མངོན་སུམ་པར་རྟོགས་པ་ནི་ལྷའི་སྐུ་བསྐྱེད་པའོ། །ལྷ་གསལ་བ་ལ་རབ་ཏུ་རྟོགས་པ་ཞེས་བཞེད་དོ། །རྫོགས་རིམ་དང་སྦྱར་ན་རྒྱུ་གཅིག་པ་ནི་སྤྱི་བོ་བདེ་བ་ཆེན་པོའི་འཁོར་ལོ་ལ་ཐམས་ཅད་བྱང་ཆུབ་སེམས་ཀླད་པར་རྒྱུ་གཅིག་པའོ། །ཡིག་འབྲུ་ནི་མགྲིན་པ་ལོངས་སྤྱོད་ཀྱི་འཁོར་ལོ་ན་གསུང་དབྱངས་ཡན་ལག་དྲུག་ཅུ་འབྱུང་བ་ཡི་གེ་ཨ་ལི་བཅུ་དྲུག་གོ། །བྱིན་གྱིས་བརླབས་པ་ནི་རང་རིག་པ་བདེ་གཤེགས་ཀྱི་ཐུགས་སུ་བྱིན་གྱིས་བརླབས་པ་སྙིང་ག་ཆོས་ཀྱི་འཁོར་ལོ་ན་གནས་སོ། །མངོན་སུམ་པ་ནི་ལྟེ་བ་སྤྲུལ་པའི་འཁོར་ལོ་ནས་མེ་རླུང་གཡོས་ནས་བྱང་སེམས་ཕབ་པའི་དུས་ན་བདེ་བ་མངོན་སུམ་དུ་འཆར་བའོ། །གྲུབ་མཐའ་དང་སྦྱར་ན་རེ་རེ་ལ་ཡང་ཆོས་བཞི་བཞི་སྟེ་གཞལ་བྱ་དང་། གཏན་ཚིགས་དང་། འཇལ་ཚུལ་དང་གྲུབ་མཐའོ། །དེ་ལ་རྒྱུ་གཅིག་པའི་གཞལ་བྱ་ནི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དེ་ཕྱི་ནང་གི་དངོས་པོ་འདིའོ། །གཏན་ཚིགས་ནི་རྒྱུ་སྐྱེ་བ་མེད་པའི་ཕྱིར་སྟོང་པར་རྟོགས་པར་བྱེད་པའོ། །འཇལ་ཚུལ་ནི་བློ་ཆེན་ཅིག་ཆར་དུ་རྟོགས་ཆུང་ན་རིམ་གྱིས་གཞལ་ནས་རྟོགས་སོ། །གྲུབ་མཐའ་ནི་དོན་སྐྱེ་མེད་རྟོགས་པའོ། །ཡིག་འབྲུའི་ཚུལ་གྱིས་གཞལ་བྱ་ནི་གོང་གི་དོན་དམ་དེ་རང་ངོ་། །གཏན་ཚིགས་ནི་ཡི་གེ་ཨ་ཨོ་ཨཾ་ནི་ལ་སོགས་རྣམས་ཀྱིས་སྒྱུ་མར་རྟོགས་པར་བྱེད་པའོ། །འཇལ་ཚུལ་ནི་ཀུན་རྫོབ་སྒྱུ་མ་བློ་ཆེ་ཆུང་གིས་རིམ་དང་ཅིག་ཆར་དུ་རྟོགས་པའོ། །གྲུབ་མཐའ་ཀུན་རྫོབ་དོན་དམ་དུ་རྟོགས་ཏེ་ཀུན་སྣང་གི་ཏིང་ངེ་འཛིན་ནོ། །བྱིན་གྱིས་རླབས་ཀྱིས་གཞལ་བྱ་ནི་གོང་གི་དོན་དམ་དང་ཀུན་རྫོབ་གཉིས་པོ་རང་ངོ་། །གཏན་ཚིགས་ནི་བདེན་པ་གཉིས་དབྱེར་མེད་དུ་རྟོགས་པར་བྱེད་པའོ། །འཇལ་ཚུལ་ནི་བདེན་པ་དབྱེར་མེད་རྟོགས་ཚུལ་ཆེ་ཆུང་དུ་འདུག་པའོ། །གྲུབ་པའི་མཐའ་ནི་བདེན་པ་དབྱེར་མེད་དུ་རྟོགས་པ་དེ་རང་ངོ་། །མངོན་སུམ་པར་རྟོགས་པའི་གཞལ་བྱ་ནི་གོང་གི་བདེན་པ་དབྱེར་མེད་དེ་རང་ངོ་། །གཏན་ཚིགས་ནི་བར་སྣང་སྟོང་པ་ལྟ་བུ་སྣང་ལ་རང་བཞིན་མེད་པའོ། །འཇལ་ཚུལ་ནི་ཀུན་ལ་ཡུལ་དུ་མི་འབྱེད་པ་དེ་ལ་བློ་ཆེ་ཆུང་དུ་འདུག་པའོ། །གྲུབ་མཐའ་ནི་དབྱེར་མེད་སྤྱོད་ཡུལ་དང་བྲལ་བའོ། །དེ་ལྟར་ཡོད་པ་ལས་འདིར་ནི་བསྐྱེད་རིམ་ལ་དགོངས་པ་གཙོ་ཆེ་སྟེ་བསྐྱེད་རྫོགས་གཉིས་པོ་རྟོགས་པར་བྱེད་པ་ལ་དེ་མ་ཡིན་པ་རྣམས་སྤང་དགོས་པའོ། །དེ་ཡང་སངས་རྒྱས་དང་སེམས་ཅན་རིག་པར་རྒྱུ་གཅིག་པ་དང་། རྒྱུ་དེ་ཡིག་འབྲུའི་ཚུལ་ༀ་ཨཱཿ ཧཱུཾ་གིས་སྐུ་གསུང་ཐུགས་སུ་མཚོན་ཚུལ་ལོ། །ཡི་གེ་གསུམ་གྱིས་ལུས་ངག་ཡིད་གསུམ་སྐུ་གསུང་ཐུགས་སུ་བྱིན་གྱིས་བརླབ་པ་དང་། དེ་ཐེ་ཚོམ་མེད་པར་མངོན་སུམ་དུ་བྱས་པའོ། །དེ་ལྟར་དུ་རྒྱུ་གཅིག་པ་དེ་ཏིང་དང་ཡིག་འབྲུ་རྒྱུ་ཏིང་དང་། བྱིན་གྱིས་རླབས་ཀུན་ཏིང་དང་མངོན་སུམ་པ་ལྷའི་སྐུར་རྟོགས་པ་དེ་རྣམས་ལ་ནི་རབ་ཏུ་རྟོགས་པ་རྣམ་པ་བཞི་ཞེས་བྱའོ། །དེ་ལ་རབ་ཏུ་གོམས་པར་རྟོགས་པ་ཡིས་ཆོས་ཐམས་ཅད་རང་རིག་ཏུ་མངོན་པར་རྫོགས་པ་སངས་རྒྱས་ཏེ་འཁོར་བ་ལས་རྒྱལ་བས་རྒྱལ་པོ་ཆེ་ཞེས་དུས་ཐམས་ཅད་དུ་མངོན་པར་རྫོགས་པ་སངས་རྒྱས་སོ། །གསུམ་པ་ནི། ཕྱོགས་བཅུ་དུས་བཞིར་རྫོགས་པ་ཡི། །སྐུ་གསུང་ཡོན་ཏན་འཕྲིན་ལས་ཐུགས། །མ་ལུས་བདག་ཉིད་ཞལ་མཐོང་བས། །དབང་བསྐུར་མཆོག་ཉིད་དམ་པ་ཡིན། །ཞེས་འདིར་ནི་འབྲས་བུའི་ཐོབ་ལུགས་རྣམ་པ་གཉིས་ཏེ་ཐུན་མོང་དུ་རིག་འཛིན་ཐོབ་པ་དང་། ཁྱད་པར་དུ་སྐུ་ལྔ་ལྷུན་གྲུབ་ཐོབ་པའོ། །དེ་ལ་རིག་འཛིན་ལ་བཞི་སྟེ་རྣམ་པར་སྨིན་པའི་རིག་འཛིན་དང་། ཚེ་ལ་དབང་བ་དང་། ཕྱག་རྒྱ་ཆེན་པོ་དང་། ལྷུན་གྱིས་གྲུབ་པའོ། །དེ་ལ་རྣམ་པར་སྨིན་པའི་རིག་འཛིན་ལ་གཉིས་ཏེ་རྒྱུས་བསྡུས་པའི་རྣམ་སྨིན་དང་། འབྲས་བུས་བསྡུས་པ་ལས་འདི་འབྲས་བུས་བསྡུས་པའོ། །དེའི་ངོ་བོ་ནི་ནང་ཡིད་ཀྱིས་ལྷའི་སྐུ་གཟུགས་བཟུང་ནས་ཕྱི་ལུས་ཀྱི་ར་བས་སྒྲིབས་པས་ཏེ་དཔེར་ན་སྐོར་ཕོར་འདག་པ་ལྟ་བུའི་སྟེ་འདག་པ་ནང་ན་ཚྭ་ཚའི་གཟུགས་སུ་གནས་ཀྱང་ཕྱིའི་སྐོར་ཕོར་གྱི་སྒྲིབ་པའོ། །རང་ཡིད་ཀྱི་རྣམ་པ་ལྷའི་སྐུར་སྨིན་པས་ན་རྣམ་སྨིན་ནོ། །ཚེ་ལ་དབང་བ་ལ་བཞི་སྟེ་བདུད་རྩི་སྨན་ལས་གྲུབ་པའི་ཚེ་དབང་དང་། སྒྲོན་མ་རླུང་ལས་གྲུབ་པའི་ཚེ་དབང་དང་། ཐབས་ལམ་རྩ་རླུང་ཐིག་ལེ་ལས་གྲུབ་པའི་ཚེ་དབང་དང་། གྲོལ་ལམ་བསྐྱེད་རྫོགས་ལས་གྲུབ་པའི་ཚེ་དབང་ལས་འདི་ཕྱི་མའོ། །དེའི་ངོ་བོ་ནི་མི་དང་ལྷའི་ཆ་བྱད་དུ་གནས་ནས་ལོ་སྟོང་ལྔ་བརྒྱ་ཐུབ་གཞན་དོན་དུ་གནས་ན་ལོ་བརྒྱ་བརྒྱ་ན་མར་ལ་ནུར་ནས་བྱིས་པ་ལོ་བརྒྱད་ལོན་པ་ལྟར་ཡོང་ངོ་། །ཕྱག་རྒྱ་ཆེན་པོའི་རིག་འཛིན་ནི་བཞི་སྟེ་ཀྲི་ཡའི་ཕྱག་རྒྱ་ཆེན་པོའི་རིག་འཛིན་དང་། ཨུ་པ་ཡའི་དང་། ཡོ་གའི་དང་། མ་ཧཱ་ཡོ་གའི་འོ། །འདི་མ་ཧཱའོ། །དེའི་ངོ་བོ་ནི་རང་གིས་རང་སྒོམས་པའི་ལྷའི་སྐུ་དེའི་ལུས་སུ་གནས་ནས་བདག་གཞན་གྱི་དོན་བྱེད་པའོ། །ལྷུན་གྱིས་གྲུབ་པའི་རིག་འཛིན་ལ་གསུམ་སྟེ་བྱ་བའི་ལྷུན་གྲུབ་དང་རྣལ་འབྱོར་གྱི་ལྷུན་གྲུབ་དང་། མ་ཧཱའི་ལྷུན་གྲུབ་བོ། །འདི་མ་ཧཱའོ། །དེའི་ངོ་བོ་ནི་ལུས་སྐུ་ལྔའི་ངོ་བོར་གནས། ཕྱོགས་བཅུར་འགྲོ་དོན་གྱི་སྤྲུལ་པ་སྤྲོ་བར་གནས་པའོ། །ཁྱད་པར་སྐུ་ལྔ་ལྷུན་གྲུབ་ལ་སྦྱོར་བ་ནི་ཕྱོགས་བཅུ་དང་དུས་བཞིར་ཏེ་དུས་བཞིས་བསྡུས་པའི་མངོན་པར་རྫོགས་པར་སངས་རྒྱས་པ་ཡི་འབྲས་བུ་ཐོབ་སྟེ། དེའི་ངོ་བོའམ་ཡོན་ཏན་གང་ཞེ་ན་འདི་རྣམས་ཡིན་ཏེ། སྐུ་ལྔ་ནི་ཆོས་སྐུ་དང་མངོན་པར་བྱང་ཆུབ་པའི་སྐུ་དང་ལོངས་སྐུ་དང་སྤྲུལ་སྐུ་དང་རྡོ་རྗེའི་སྐུའོ། །གསུང་ལྔ་ནི་སྐྱེ་མེད་དོན་གྱི་གསུང་དང་རིག་པ་རང་སྣང་གི་གསུང་དང་དགོངས་པ་བརྡའི་གསུང་དང་སྣང་སྟོང་ཚིག་གི་གསུང་དང་གྲགས་སྟོང་དབྱེར་མེད་ཀྱི་གསུང་ངོ་། །ཡོན་ཏན་ལྔ་ནི་གཞལ་ཡས་ཁང་དང་ཞིང་ཁམས་དང་རྒྱན་དང་འོད་ཟེར་དང་གདན་ཁྲིའོ། །འཕྲིན་ལས་ལྔ་ནི་ཞི་བ་དང་རྒྱས་པར་དང་དབང་དང་དྲག་པོ་དང་ལྷུན་གྲུབ་བོ། །ཐུགས་ལྔ་ནི་ཆོས་ཀྱི་དབྱིངས་མི་རྟོག་པའི་ཐུགས་དང་མེ་ལོང་ལྟ་བུ་ས་ལེ་མཁྱེན་པ་དང་། མཉམ་པ་ཉིད་མ་གཡོས་པ་དང་སོ་སོར་རྟོག་པ་མ་འགགས་པ་དང་བྱ་བ་གྲུབ་པ་འགྲོ་བ་སྒྲོལ་བའི་ཐུགས་སོ། །དེ་ལྔ་དབྱེར་མེད་པ་ནི་སྐུ་ལྔ་ལྷུན་གྱིས་གྲུབ་པ་ཞེས་བྱའོ། །སྣང་སྲིད་མ་ལུས་པར་རྣམ་པར་དག་པའི་སྐུ་ནི་སྐུ་ལྔ་ལྷུན་གྲུབ་ཀྱི་སངས་རྒྱས་ལ་བདག་ཉིད་ཀྱིས་དེའི་ཞལ་མཐོང་བ་ནི་འབྲས་བུ་དེ་ཉིད་ཐོབ་པའོ། །དེ་ཡང་སྒྱུ་འཕྲུལ་རྡོ་རྗེ་ལས། རང་བཞིན་གནས་པས་གཞན་ནས་འོང་བ་མེད། །ཞེན་པ་ལོག་པས་བདག་ཞལ་བདག་གིས་མཐོང་། །ཞེས་སོ། །ཞལ་མཐོང་བ་དེ་ལ་ཉེས་པ་དང་སྒྲིབ་པར་གྱུར་བས་སྒྲིབ་པ་ཡིན་ཏེ་སྒྲིབ་པ་དེ་ཞལ་མཐོང་ནས་དབང་བསྐུར་བས་སྒྲིབ་པ་དག་སྟེ་སངས་རྒྱས་ཀྱི་དགོངས་པའི་མཆོག་ཉིད་དམ་པ་ཐོབ་པ་ཡིན་ནོ། །གསུམ་པ་མཇུག་གི་དོན་ལ་གསུམ་སྟེ་བསྟན་བཅོས་བརྩམ་པའི་དགེ་བ་བསྔོ་བ་དང་། སློབ་དཔོན་གང་གིས་བརྩམ་པའི་མཛད་བྱང་། ལོ་པཎ་གང་གིས་བསྒྱུར་བའི་འགྱུར་བྱང་ངོ་། །དང་པོ་ནི། བསྒྲུབ་པའི་ཐབས་འདི་བསྡུས་པ་ཡིས། །བསོད་ནམས་བདག་གིས་གང་ཐོབ་པ། །དཔལ་ཆེན་ཀུན་བཟང་སྐུ་གསུང་ཐུགས། །སེམས་ཅན་ཀུན་གྱིས་ཐོབ་པར་ཤོག །ཅེས་ཁྲོ་བོ་སྒྲུབ་པའི་ཐབས་འདི་རྒྱུད་གསང་བ་སྙིང་པོ་ལས་བསྡུས་པ་ཡིན་ནོ། །དེ་ལྟར་བརྩམ་པ་ཡིས་བསོད་ནམས་སངས་རྒྱས་གསང་བ་བདག་གིས་གང་ཐོབ་པ་དེ་དགེ་བར་བསྔོ་སྟེ་གང་ཞེ་ན་བཅོམ་ལྡན་འདས་དཔལ་ཆེན་པོ་ཀུན་ཏུ་བཟང་པོའི་སྐུ་གསུང་ཐུགས་ཡང་དག་པ་དེ་ཁམས་གསུམ་གྱི་སེམས་ཅན་ཐམས་ཅད་ཀུན་གྱིས་ཀྱང་ཐོབ་པར་ཤོག་ཅིག་ཅེས་སྨོན་ལམ་བཏབས་པའོ། །གཉིས་པ་ནི། དེ་ཁོ་ན་ཉིད་སྣང་བ་དམ་པ་རྒྱན་སློབ་དཔོན་སངས་རྒྱས་གསང་བས་མཛད་པ་རྫོགས་སོ། །ཞེས་དེ་ཁོ་ན་ཉིད་ནི་དོན་དམ་པ་སྟེ་སྐུ་ལྔ་ལྷུན་གྲུབ་ཉིད་དཔལ་ཧེ་རུ་ཀའི་དོན་ཡིན་པའོ། །དེ་ཁོ་ན་གདུལ་བྱ་ལམ་པའི་དོན་དུ་སྐུར་སྣང་བའོ། །སྣང་བ་དེ་ཁོ་ན་མི་བསླུ་ངེས་པས་དོན་དམ་པ་ཡིན་ངེས་པའོ། །དེ་ནི་རྣལ་འབྱོར་པ་རྣམས་ཀྱི་རྒྱན་དུ་གྱུར་པ་སྟེ་སྒོམས་ན་ལེགས་པ་འབྱུང་ཞིང་མཛེས་པས་ན་རྒྱན་ནོ། །སློབ་དཔོན་སངས་རྒྱས་གསང་བ་ནི་མཛད་པ་པོའི་མཚན་དང་རྫོགས་སོ་ཞེས་པ་མཐར་ཕྱིན་པའི་དོན་ནོ། །གསུམ་པ་ནི། རྒྱ་གར་གྱི་པཎྜི་ཏ་སངས་རྒྱས་གསང་བ་དེ་ཉིད་དང་བོད་ཀྱི་ལོ་ཙཱ་བ་དགེ་སློང་བྲན་ཀ་མུ་རི་ཏ་དང་བྷས་མནྫུ་ཤྲི་ཝར་མས་བ སྒྱུར་ཅིང་ཞུས་ཏེ་གཏན་ལ་ཕབ་པའོ། །སླར་སྨྲས་པ། འདི་ལྟར་འབད་པའི་དགེ་ཚོགས་རིན་ཆེན་རྡུལ། །གཅིག་ཏུ་སྤུངས་པའི་ལྷུན་པོ་བལྟར་མི་མངོན། །ཡེ་ཤེས་འོད་ཟེར་དྲྭ་བས་བརྒྱན་པ་ཡི། །བསྟན་བཅོས་ཆེན་པོའི་མཆན་ཊིག་བཀོད་པའི་མཐུས། །རྒྱལ་བསྟན་སྤྱི་དང་ངེས་གསང་སྙིང་པོ་ཡི། །བཤད་དང་སྒྲུབ་པ་དར་ཞིང་རྒྱས་པ་དང་། །རིམ་གཉིས་ལ་བརྩོན་རིག་འཛིན་བཞི་མཐར་ཕྱིན། །འགྲོ་ཀུན་ཧེ་རུ་ཀ་དཔལ་འཐོབ་ཕྱིར་བསྔོ། །ནག་པོའི་ཕྱོགས་འཇོམས་དཀར་པོའི་སྣང་བ་རྒྱས། །བསྟན ད་ང་བསྟན་འཛིན་དབུ་འཕང་རབ་མཐོ་ཞིང་། །ཕྱོགས་ལས་རྣམ་རྒྱལ་ལྷ་ཡི་རྔ་སྒྲ་ཡིས། །འཇིག་རྟེན་ཀུན་ཏུ་ཁྱབ་པའི་བཀྲ་ཤིས་ཤོག །ཅེས་ཁྲོ་བོ་དམ་པ་རྒྱན་ལ་དབུས་གྲུ་སྨོན་ལམ་སེདྒེའི་མཆན་ཊིག་ལ་གཞི་བྱས་བསྡུས་དོན་རང་བློས་གང་དཔོག་བཀོད་དེ་འཇམ་དབྱངས་ཆོས་ཀྱི་བློ་གྲོས་པས་གསལ་བར་བྱས་པའི་ལྷན་ཅིག་བྱེད་རྐྱེན་མགོ་ཚ་མཁན་གཞན་ཕན་བཟང་པོས་བགྱིས་པ་དགེ་ལེགས་སུ་གྱུར་ཅིག །མདྒ་ལཾ།། །། |