སྔ་འགྱུར་བཀའ་མའི་ཆོས་སྡེའི་གླེགས་བམ་གྱ་བདུན་པ།

གླེགས་བམ། ཤུ༽

སློབ་དཔོན་མཚོ་སྐྱེས་རྡོ་རྗེ།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

གྲུབ་མཐའ་ཆེན་པོ་བཞིའི་རྣམ་པར་གཞག་པ་མདོ་ཙམ་ཕྱེ་བ་ངེས་དོན་དགོངས་པ་གསལ་བྱེད།

གྲུབ་མཐའ་ཆེན་པོ་བཞིའི་རྣམ་པར་གཞག་པ་མདོ་ཙམ་ཕྱེ་བ་ངེས་དོན་དགོངས་པ་གསལ་བྱེད་ཅེས་བྱ་བ་མཆིས་སོ། །བི་ཛ་ཡནྟུ། ཐམས་ཅད་མཁྱེན་པ་དང་དབྱེར་མེད་པའི་དཔལ་ལྡན་བླ་མའི་ཞབས་ལ་ཕྱག་འཚལ་ལོ། །ཇི་ལྟ་ཇི་སྙེད་ཤེས་བྱ་ཀུན་མཁྱེན་ཅིང་། །མཐའ་ཡས་འགྲོ་ལ་ལེགས་པའི་ལམ་སྟོན་པ། །རྒྱལ་དང་དེ་སྲས་ངོ་བོ་གཅིག་འདུས་པའི། །རྗེ་བཙུན་བླ་མའི་ཞབས་རྡུལ་སྤྱི་བོས་མཆོད། །རྣམ་མང་ཆོས་སྒོ་འགྲོ་བའི་བླ་མ་ཡི། །དགོངས་པ་ཇི་བཞིན་འདོམས་མཛད་འཕགས་བོད་ཀྱི། །བཤེས་གཉེན་ཚོགས་ལ་དད་པས་ཕྱག་བགྱིས་ཏེ། །གྲུབ་མཐའི་རྣམ་བཞག་མདོ་ཙམ་འདིར་བརྗོད་བྱ། །དེ་ལ་རེ་ཞིག་ནང་པ་སངས་རྒྱས་པའི་གྲུབ་མཐའ་བཞི་ལས་བརྩམས་ཏེ་ངེས་དོན་དབུ་མ་ཆེན་པོའི་གནས་ལུགས་ཕྱོགས་ཙམ་བརྗོད་པར་བྱའོ། །དེ་ཡང་དང་པོ་བདག་ཅག་རྣམས་ཀྱི་སྟོན་པ་ཐབས་ལ་མཁས་ཤིང་ཐུགས་རྗེ་ཚདམེད་པའི་བདག་ཉིད་ཅན་དེ་ཉིད་ཀྱིས་གདུལ་བྱ་དམན་འབྲིང་མཆོག་གི་བློ་རིམ་དང་མཐུན་པར་ཆོས་ཀྱི་སྒོ་དང་ཐེག་པའི་རིམ་པ་སྐས་ཀྱི་གདང་བུ་ལྟར་བསྟན་པ་ཡིན་ཏེ། དང་པོ་རང་དོན་ཡིད་བྱེད་ཀྱི་གདུལ་བྱ་བློ་དམན་པ་རྣམས་ལ་བཀའ་དང་པོ་བདེན་པ་བཞི་ལན་གསུམ་བཟླས་པའི་ཆོས་འཁོར་ལོ་བསྐོར་བར་མཛད་དེ། དེའང་བཟླས་པ་དང་པོ་སྡུག་བསྔལ་བ། ཀུན་འབྱུང་བ། འགོག་ལམ་གྱི་ལ་བདེན་པ་བཞི་སོ་སོའི་ངོ་བོ་བསྟན་པ་དང་། གཉིས་པ་སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ། འགོག་པ་མངོན་དུ་བྱ། ལམ་བསྒོམ་པར་བྱ། གསུམ་པ་བདག་གིས་སྡུག་བསྔལ་འཕགས་པའི་བདེན་པ་ཤེས་པར་བྱས་སོ། །ཀུན་འབྱུང་སྤངས་སོ། །འགོག་པ་མངོན་དུ་བྱས་སོ། །ལམ་བསྒོམས་སོ། །ཞེས་པས་བདེན་བཞིའི་མངོན་རྟོགས་གདུལ་བྱའི་རྒྱུད་ལ་བསྐྱེད་པར་མཛད་པའོ། །སྡུག་བསྔལ་འཕགས་པའི་བདེན་པ་ཞེས་པའི་དོན་བྱིས་པ་རྣམས་ཀྱིས་སྡུག་བསྔལ་དུ་མི་ཤེས། འཕགས་པ་རྣམས་ཀྱིས་སྲིད་རྩའི་གནས་ཀྱང་མེའི་འོབས་ལྟ་བུར་གཟིགས་ཤིང་མཁྱེན་པའི་ཕྱིར་སྡུག་བསྔལ་འཕགས་པའི་བདེན་པ་ཞེས་བརྗོད་དོ། །དེ་ལྟར་བསྟན་པའི་མཚན་གཞི་ནི་ཐེག་དམན་གྱི་འདུལ་བ། མདོ་སྡེ། མངོན་པར་རྣམས་སོ། །དེ་ལ་སངས་རྒྱས་ཞལ་བཞུགས་པའི་སྐབས་གྲུབ་མཐའ་ཐ་དད་དུ་མེད་ལ། མྱ་ངན་ལས་འདས་པའི་རྗེས་དགྲ་བཅོམ་པ་བདུན་གྱིས་མཛད་པའི་མངོན་པ་སྡེེ་བདུན་བྱུང་ཞིང་བསྟན་བཅོས་ཐམས་ཅད་ཀྱི་ཐོག་མ་དེ་ཡིན་ལ། འདི་ཡང་བྱེ་སྨྲ་བ་རྣམས་ཀྱིས་བཀའ་ཡིན་པར་འདོད་དེ། འཕགས་པ་ཉེས་སྦས་ཀྱི་དུས་ཙམ་དུ་དགྲ་བཅོམ་པ་རྣམས་ཀྱིས་གསུང་རྒྱུན་གླེགས་བམ་ལ་བཀོད་པ་ཡིན་ཡང་ཟེར། དེར་མ་ཟད་བྱེ་བྲག་བཤད་པའི་མཚོ་ཞེས་བྱ་བ་བྱུང་ཞིང་། ཐེག་དམན་གྱི་སྡེ་སྣོད་དང་བསྟན་བཅོས་དེའི་རྗེས་འབྲངས་བྱེ་བྲག་ཏུ་སྨྲ་བ་དང་། མདོ་སྡེ་པའི་གྲུབ་མཐའ་གཉིས་བྱུང་ངོ་། །མངོན་པ་སྡེ་བདུན་དང་བྱེ་བྲག་བཤད་མཚོའི་དོན་ཐམས་ཅད་བསྡུས་ནས་སློབ་དཔོན་དབྱིག་གཉེན་གྱིས་མངོན་པ་མཛོད་ཀྱི་བསྟན་བཅོས་མཛད་ཅིང་བྱེ་མདོ་གཉིས་ཀྱི་གྲུབ་མཐའི་དོན་སྟོན་པ་སྟེ། བྱེ་སྨྲའི་འདོད་པ་སྒེར་རྣམས་ཟུར་གསལ་དུ་མཛད། སློབ་དཔོན་རང་ཉིད་ཐེག་ཆེན་པ་ཡིན་ཡང་མདོ་སྡེ་པའི་འདོད་པ་ཕལ་ཆེར་བཞེད་པ་ཡིན། དེ་ལ་ཆོས་ཐམས་ཅད་ཟག་བཅས་ཟག་མེད་གཉིས་སུ་དབྱེ་བས་ལམ་བདེན་མ་གཏོགས་པའི་འདུས་བྱས་ཐམས་ཅད་ཟག་བཅས་ཡིན་ཏེ། རང་ལ་ཟག་པ་དམིགས་པ་དང་མཚུངས་ལྡན་གང་རུང་གི་སྒོ་ནས་རྒྱས་པར་འགྱུར་བའི་ཆོས་ཡིན་པས་སོ། །འདུས་བྱས་དེ་གང་ལ་ཟེར་ན་ཕུང་པོ་ལྔས་བསྡུས་ཀྱི་ཆོས་རྣམས་སོ། །དེས་ན་འདུས་བྱས་དེ་ཉིད་དུས་ཡིན་ཏེ་འདས་མ་འོངས་ད་ལྟའི་དུས་གསུམ་ཀྱང་དེ་ལ་ལྟོས་ནས་བཞག་པས་སོ། །འདུས་བྱས་གང་ཡིན་པའི་ཕུང་པོ་ལྔ་རྣམས་འདས་པའི་དུས་སོགས་སུ་བཏགས་པ་ཡིན་ཡང་བྱེ་སྨྲས་དུས་གསུམ་རྫས་སུ་འདོད་པའི་ཕྱིར་ན། དེ་ཡང་བུམ་པ་བུམ་པའི་འདས་པའི་དུས་སུ་ཡོད། མ་འོངས་པའི་དུས་སུའང་ཡོད་པར་འདོད། གོང་དུ་ལམ་བདེན་མ་གཏོགས་ཞེས་གསུངས་པའི་ཟག་བཅས་དེ་དག་ཉེར་ལེན་གྱི་ཕུང་པོ་ཡང་ཡིན་ཏེ། ཉེ་བར་ལེན་པ་ནི་ཉོན་མོངས་པ་ཡིན་ལ། དེ་ཟག་བཅས་པས་འབྱུང་བས་མེ་ཏོག་དང་འབྲས་བུ་འབྱུང་བའི་ཤིང་ལྟ་བུའི་ཕྱིར། ཟག་བཅས་ཀུན་ཉེར་ལེན་གྱི་ཕུང་པོ་ཡིན་པའམ། ཉོན་མོངས་པ་ལ་བརྟེན་ནས་ཟག་པ་དང་། བཅས་པའི་སྲིད་པ་མཐའ་དག་ཉེར་བར་ལེན་ཅིང་འགྲུབ་པར་བྱེད་ལ། སྡུག་བསྔལ་ཀུན་དེ་ལས་འབྱུང་བས་ཀུན་འབྱུང་ཡང་ཡིན། མི་རྟག་པ་དང་གཉེན་པོས་འཇིག་པར་འགྱུར་བས་འཇིག་རྟེན་དང་། འཇིག་ཚོགས་ལ་ལྟ་བའི་ལྟ་དོན་དྲུག་ཅུ་རྩ་གཉིས་སོགས་ལྟ་བ་ཀུན་དེ་ལས་འབྱུང་བས་ལྟ་གནས་སམ་འདི་ལ་བདག་ཏུ་ལྟ་བར་འགྱུར་བའི་ལྟ་བ་ཐམས་ཅད་རྒྱས་པར་འགྱུར་བས་ལྟ་གནས། སྐྱེ་ཞིང་འབྱུང་བས་སྲིད་པ་སྟེ། དེ་ཀུན་ཉེར་ལེན་ཕུང་ལྔ་གང་དག་གིས་བསྡུས་པའི་འདུས་བྱས་སོ། །ཟག་མེད་ནི། ལམ་བདེན་དང་འདུས་མ་བྱས་གསུམ་རྣམས་སོ། །དེ་ལ་ལམ་བདེན་ནི་རྒྱུ་རྐྱེན་གྱིས་འདུས་བྱས་པ་དང་མི་རྟག་པ་ཉིད་ཀྱི་ཕྱིར་འདུས་བྱས་ཡིན་ཡང་ཟག་བཅས་མ་ཡིན་ཏེ། གང་ལ་དམིགས་ནས་སྤང་བྱ་རྣམས་སྤོང་བར་བྱེད་པའོ། །གཞན་གསུམ་ནི། ནམ་མཁའ་དང་། སོ་སོར་བརྟགས་འགོག་དང་། སོ་སོར་བརྟགས་མིན་འགོག་གསུམ་མོ། །དེ་ལ་ནམ་མཁའ་ནི། མི་སྒྲིབ་ཅིང་གཟུགས་ཅན་སྐྱེ་བའི་གོ་འབྱེད་པ་སྟེ་རེག་ཐོགས་མེད་པའི་བར་སྣང་སྟོང་པ་ཉིད་ཡིན་ལ། ནམ་མཁའ་སྔོན་པོ་ནི་མིན་ནོ། །སོ་སོར་བརྟགས་འགོག་ནི། སྤང་བྱའི་འདོད་ཆགས་ལྟ་བུ་ལ་མཚོན་ན། དེ་ཉིད་ཆོས་རྣམ་འབྱེད་ཀྱི་ཤེས་རབ་ཀྱིས་ཆགས་ཡུལ་དང་ཆགས་མཁན་ལ་སོ་སོར་བརྟགས་པའི་སྟོང་གིས་དེ་དང་བྲལ་བ་སྟེ་སླར་མི་སྐྱེ་བའི་འགོག་པ་ཐོབ་པ་དེའོ། །སོ་སོར་བརྟགས་མིན་ཕྱི་འགོག་པ་ནི། ཆེད་དུ་མ་བརྟགས་ཤིང་མ་བཀག་ཀྱང་རྐྱེན་མཚང་བས་རང་བཞིན་གྱིས་ཐོབ་པ་སྟེ། སླར་མི་སྐྱེ་བ་ངེས་པའོ། །རྟགས་ནས་རྟགས་ཀྱི་བར་འདི་མེད་པའང་འདུག །མཆན། བསྐལ་པ་སྔ་མ་ཞིག་ནས་རྗེས་མ་མ་ཆགས་པའི་བར་དེ་ཆུ་མེད་པའི་ལུང་སྐམ་ལྟ་བུའོ། །ཟེར་ཏེ་གོ་བ་ཞན་ཞེས་པ་གོ་བ་དམན་པའི་ཕྱོགས་དང་། དོན་དུ་ཟག་མེད་ཀྱི་ཚོར་བའི་ཕུང་པོ་ཤེས་རབ་ཀྱིས་མ་བརྟགས་ཀྱང་འགོག་སྙོམས་སུ་ཞུགས་དུས་ལྟ་བུར་མི་སྐྱེ་བའི་ཆོས་ཅན་དུ་རང་བཞིན་གྱིས་འགག་འགྲོ་བ་ཡོད་པས་དེ་ལྟ་བུ་སོ་སོར་བརྟགས་མིན་གྱི་འགོག་པ་ཐོབ་པ་ཡིན་ནོ། །འདི་ཐེག་ཆེན་གྱི་མཉམ་གཞག་གི་ངོ་བོ་ལ་བཤད་དུ་རུང་ཡང་སྐབས་འདིར་མི་འཇོང་པ་ཡིན་ནོ། །དེས་ཟག་བཅས་ཟག་མེད་ཀྱི་དབྱེ་བ་ཕྱོགས་ཙམ་སོང་ངོ་། །དེ་ལ་བྱེ་བྲག་སྨྲ་བ་རྣམས་ཤེས་བྱ་ཐམས་ཅད་གཞི་ལྔར་འདུས་པར་འདོད་དེ། སྣང་གཟུགས་ཀྱི་གཞི། གཙོ་བོ་སེམས་ཀྱི་གཞི། འཁོར་སེམས་བྱུང་གི་གཞི། མི་ལྡན་པའི་འདུ་བྱེད་ཀྱི་གཞི། འདུས་མ་བྱས་ཀྱི་གཞི་དང་ལྔའོ། །དང་པོ་སྣང་བ་གཟུགས་ཀྱི་གཞི་ནི། ཕྱི་རོལ་གྱི་འབྱུང་བ་ས་ཆུ་མེ་རླུང་གི་རྡུལ་ཕྲན་ཆ་ཤས་སོ་སོར་བལ་མ་དུ་མི་བཏུབ་ཅིང་ཤིན་ཏུ་ཕྲ་བ་དབང་ཤེས་ཀྱི་ཡུལ་ལས་འདས་པ་དབུས་རྡུལ་དང་ཕྱོགས་སྡུལ་དྲུག་གིས་བསྐོར་བ་རེག་ལ་མ་འབྱར་བའི་བར་དང་བཅས་པ་འདུས་པ་ལས་རགས་པའི་རྡུལ་དང་རགས་པའི་དངོས་པོ་གྲུབ་པ་སྟེ། དབང་ཤེས་ཀྱི་ཡུལ་དུ་གྱུར་ཅིང་སྒྲིབ་བྱེད་ཀྱི་བྱ་བ་བྱེད་པ་དེ་ལ་རྡུལ་ཕྲ་རབ་ཅེས་འདོད། ཕྲ་རབ་བདུན་ལ་རྡུལ་ཕྲན་དུ་འདོད། རྡུལ་ཕྲན་བདུན་ལ་གསེར་དངུལ་ཟངས་ལྕགས་ལ་སོགས་པའི་རྩོམ་གཞིའི་རྡུལ་ལྕགས་རྡུལ་ཞེས་བྱ་བ་དང་། དེ་བདུན་ལ་འབབ་ཆུ་ལ་སོགས་པ་ཆུའི་རྩོམ་གཞིར་གྱུར་པའི་ཆུ་རྡུལ་གཅིག་གོ། །དེ་བདུན་ལ་རི་བོང་གི་ཤ་ཁྲག་ལ་སོགས་པའི་རྩོམ་གཞིའི་རྡུལ་གཅིག །དེ་བདུན་ལུག་རྡུལ་གཅིག །དེ་བདུན་ལ་གླང་རྡུལ་གཅིག །དེ་གཉིས་ཀྱང་རང་རང་གི་ཤ་ཁྲག་གི་རྩོམ་གཞིའི་རྡུལ་དུ་ཤེས་པར་བྱ་ཞིང་། དེ་བདུན་ལ་ཉི་ཟེར་གྱི་རྡུལ་གཅིག །དེ་བདུན་ལ་སྲོ་མ་གཅིག །དེ་བདུན་གྱིས་ཤིག་གཅིག །དེ་བདུན་ལ་ནས། ནས་བདུན་སོར་ཚིགས་སུ་འགྱུར། སོར་མོ་ཉི་ཤུ་རྩ་བཞི་ཁྲུ་སོགས་སུ་འགྱུར་བའོ། །དེ་དག་གིས་གཟུགས་སོགས་གྲུབ་པ་སྟེ། དེ་ལྟར་གྲུབ་པའི་གཟུགས་ནི། མཛོད་ལས། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་པའི། མིག །རྣ་བ། སྣ། ལྕེ། ལུས་ཏེ་དབང་པོ་ལྔ་དང་། དེའི་ཡུལ་གཟུགས་སྒྲ། དྲི། རོ། རེག་བྱ་སྟེ་དོན་ལྔ་རྣམས་ཡིན་ལ། རྣམ་པར་རིག་བྱེད་མ་ཡིན་པའི་གཟུགས་ཏེ་བཅུ་གཅིག་པོ་དེ་ལ་གཟུགས་ཀྱི་ཕུང་པོ་ཞེས་བཞག །དབང་དོན་རྣམས་ཀྱི་རྩོམ་གཞིའི་རྡུལ་ཕྲན་ཀྱང་ཕྱི་རོལ་ན་འབྱུང་བ་བཞི་དང་། ཁ་དོག་དྲི་རོ་རེག་བྱའི་རྡུལ་བཞི་སྟེ་བརྒྱད་དུ་འདུས་ལ། ལུས་ཀྱི་དབང་པོ་ལ་བརྒྱད་པོ་དང་། དེ་ཉིད་ཀྱི་རྡུལ་ཏེ་དགུར་གནས། མིག་སོགས་དབང་པོ་གཞན་ལ་དགུ་པོའི་སྟེང་དུ་མིག་སོགས་དབང་པོ་སོ་སོའི་རྡུལ་དང་བཅུ་གནས་པ་ཡིན་ནོ། །གཟུགས་ཅན་བཅུ་པོ་དེ་རྣམས་རྡུལ་ཕྲན་བསགས་པའི་གཟུགས་སོ། །རྣམ་པར་རིག་བྱེད་མ་ཡིན་པའི་གཟུགས་ནི། སྡོམ་པ་དང་། སྡོམ་མིན་དང་། བར་མས་བསྡུས་པ་གསུམ་སྟེ། དང་པོ་སྡོམ་པ་ནི། སྐབས་འདིར་སོ་ཐར་རིགས་བདུན་གང་རུང་ནོད་པའི་གང་ཟག་དེ་ཡང་ལུས་ཙོག་པུར་འདུག་ནས་ཐལ་མོ་སྦྱར་བ་སོགས་ལུས་ཀྱི་རྣམ་རིག་དང་། སྐྱབས་འགྲོ་བརྗོད་པ་སོགས་ངག་གི་རྣམ་པར་རིག་བྱེད། མཁན་སློབ་སོགས་ཀྱང་ལུས་བསྲངས་སྐྱིལ་ཀྲུང་སོགས་ལུས་ཀྱི་རྣམ་རིག །སྡོམ་པ་འབོགས་ཆོག་འདོན་པ་སོགས་ངག་གི་རྣམ་རིག་གི་སྒོ་ནས་སྡོམ་པ་དེ་སྐད་ཅིག་དང་པོ་ལ་རྣམ་པར་རིག་བྱེད་དང་རིག་མིན་གྱི་གཟུགས་སུ་སྐྱེ། སྐད་ཅིག་གཉིས་པ་ཕན་ཆད་ནས་རྣམ་རིག་མ་ཡིན་པའི་གཟུགས་སུ་གནས། སྡོམ་པ་གཏོང་བའི་རྒྱུ་མ་བྱུང་བར་གཡེངས་བ་དང་སེམས་མེད་ཀྱི་སྐབས་སུ་ཡང་སྡོམ་པ་དེ་ཡོད། སྡོམ་པའི་ངོ་བོ་ནི་དགེ་བ་ཡིན་པ་ལྟ་བུའོ། །སྡོམ་མིན་ཞེས་པ་མི་དགེ་བའི་ལས་ལམ་གྱི་དངོས་གཞི་སྡོམ་མིན་དང་། དེ་ཇི་ལྟར་ཐོབ་ན། ལུས་ངག་གི་སྤོང་བ་བདུན་ལས་ལྡོག་ཕྱོགས་སྲོག་གཅོད་པ་སོགས་ཚང་བ་ལས་ཐོབ་ཅིང་། བཤད་པ་ལ་སོགས་པའི་རིགས་སུ་སྐྱེ་བ་དེས་འཐོབ་སླ་ཞིང་གསོད་སྤྱོད་ཀྱི་བྱ་བ་དེ་རྩོམ་པ་ཙམ་ན་ཐོབ། རིགས་སུ་མ་སྐྱེས་ཀྱང་སྲོག་གཅོད་ལ་སོགས་པའི་བྱ་བས་འཚོ་བར་བྱའོ། །ཞེས་དམ་བཅས་པའང་ཁངས་བླངས་བ་ལས་འཐོབ་པར་འགྱུར་རོ། །བར་མའི་རིག་མིན་གྱི་གཟུགས་ནི། བསོད་ནམས་ཀྱི་ཚོགས་བསགས་པར་ཁས་བླངས་ནས་ཐོག་ཏུ་མ་ཁེལ་བ་ལྟ་བུ་དེ་དགེ་བའི་རིག་མིན་བར་མ་དང་། དེ་ལས་ལྡོག་པ་མི་དགེ་བ་སྟེ་སྲོག་གཅོད་པར་ཁས་བླངས་པ་ཐོག་ཏུ་མ་ཁེལ་བ་ལྟ་བུ་མི་དགེ་བའི་རིག་མིན་བར་མའོ། །འགའ་ཞིག་མི་དགེ་བའི་སྦྱོར་འཇུག་གཉིས་ལ་འདོད་པའང་ཡོད་དོ། །བྱེ་སྨྲས་བདེན་པ་གཉིས་པོ་འདོད་ཚུལ། རགས་པའི་དངོས་པོ་ཆོས་གང་ཞིག་དབྱིབས་དང་གཟུགས་སུ་ཐོ་བ་ལ་སོགས་པས་ཆ་ཤས་སུ་བཅོམ་ཟིན་པའི་ཕྱིས་ནས་དེའི་བློ་མི་འཇུག་པ་བུམ་པ་ལྟ་བུ་དང་། བློ་ནི་ཤེས་རབ་སྟེ་དེས་བརྟགས་ཤིང་དཔྱད་པས་བློའི་ཆ་ཤས་བསལ་བས་མི་རྙེད་ཅིང་མ་གྲུབ་པ་ཆུ་ཀླུང་ལྟ་བུ་སྟེ། གཞན་དུ་གཡག་རྔ་དང་ནེའུ་སེང་ལྟ་བུ་ཞེས་ཀུན་རྫོབ་ཀྱི་བདེན་པ་འདོད། རྡུལ་ཕྲ་རབ་གཉེན་པོས་བཅོམ་པ་དང་། རིགས་པས་གཞིག་སྟེ་བསལ་ཡང་རྡུལ་རབ་ཏུ་འཛིན་པའི་བློ་མི་འདོར་བ་རྡུལ་ཕྲན་ཕྱོགས་ཆས་བསལ་དུ་མི་བཏུབ་པ་དང་། ཤེས་པ་སྐད་ཅིག་མ་དུས་ཀྱི་ཆ་ཤས་སུ་དབྱེར་མི་བཏུབ་པ་དོན་དམ་བདེན་པའི་མཚན་ཉིད་དུ་གནས་པ་ནི་བྱེ་སྨྲའི་གྲུབ་མཐའ་སྟེ། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་སོ། །གཉིས་པ་སེམས་ཀྱི་གཞི་ནི། མིག །རྣ་བ། སྣ། ལྕེ། ལུས། ཡིད་ཀྱི་རྣམ་ཤེས་དང་དྲུག་གོ། །ཚོགས་དྲུག་པོ་ལ་རྣམ་ཤེས་ཀྱི་ཕུང་པོར་བཞག་གོ། །རྣམ་ཤེས་དེ་དག་གི་ངོ་བོ་ནི་དམིགས་པ་ཡུལ་དང་རྣམ་པ་དང་སྟོབས་ཀྱིས་དོན་ཙམ་སོ་སོར་རིག་པ་སྟེ། མཛོད་ལས། རྣམ་ཤེས་སོ་སོར་རྣམ་རིག་པ། །ཞེས་སོ། །དེས་ན་མཐོང་ཙམ། ཐོས་ཙམ། ཚོར་ཙམ། མྱོང་ཙམ། རེག་ཙམ། དྲན་ཙམ་དྲུག་པོ་གང་ཡིན་ཀྱང་ཚོར་བ་སོགས་སེམས་བྱུང་གི་སྟོབས་ལ་མ་རག་པ་ཙམ་ལ་འདོད་ཅིང་། རྣམ་ཤེས་འདི་རྣམས་ཀྱི་ངོ་བོ་དགེ་མི་དགེ་གཉིས་ཀ་མིན་པའི་ལུང་མ་བསྟན་ཡིན། དེ་དང་དུས་མཉམ་པའི་ཚོར་བ་འདུ་ཤེས་སོགས་སེམས་བྱུང་རྣམས་འཁོར་མཚུངས་པར་ལྡན་པས་ཡུལ་ལ་བྱ་བ་བྱས་པས་དགེ་མི་དགེའི་སེམས་སུ་འགྱུར་བ་ཡིན་ལ། ཡིད་ཀྱི་རྣམ་ཤེས་ཀྱིས་འདས་མ་འོངས་དང་དངོས་པོའི་རབ་ཏུ་དབྱེ་བ་ལ་སོགས་པའང་ངེས་པར་བྱེད་དོ། །དེ་ལྟར་ན། མིག །རྣ་བ། སྣ། ལྕེ། ལུས། ཡིད་དབང་སྟེ་རྟེན་དབང་པོ་དྲུག་ག ི་ཁམས་དང་། མིག་རྣ་བ་སྣ་ལྕེ་ལུས་ཡིད་ཀྱི་རྣམ་པར་ཤེས་པ་སྟེ་བརྟེན་པ་རྣམ་ཤེས་ཀྱི་ཁམས་དྲུག །གཟུགས་སྒྲ་དྲི་རོ་རེག་བྱ། ཆོས་ཀྱི་ཁམས་ཏེ་དམིགས་པ་ཡུལ་གྱི་ཁམས་དྲུག་སྟེ། དྲུག་ཚན་གསུམ་པོ་དེ་དག་ལ་ཁམས་བཅོ་བརྒྱད་དུ་འདོད་དོ། །ཡང་། རྣམ་ཤེས་ཚོགས་དྲུག་དང་ཡུལ་དྲུག་པོ་དེ་ལ་སྐྱེ་མཆེད་བཅུ་གཉིས་སུ་འདོད། དེ་རྣམས་ལས་བསྟན་དུ་ཡོད་ལ་ཐོགས་པ་དང་བཅས་པའི་གཟུགས་ནི། རྡུལ་ཕྲན་ཆ་མེད་འདུས་པ་ལས་རགས་པ་གྲུབ་པའི་གཟུགས་ཁམས་གཅིག་པུ་སྟེ། དེ་ནི་འདི་ནའོ། །ཆེ་གེ་མོ་ཞིག་གོ། །ཞེས་པ་ལྟ་བུ། དངོས་སུ་གཞན་ལ་བསྟན་དུ་ཡོད་ལ། དེ་ཐོགས་བཅས་ཀྱང་ཡིན་ཏེ་རང་ཡོད་པའི་གོ་ས་ན་དངོས་པོ་གཞན་སྐྱེ་མི་ནུས་པ་དང་། ནང་ན་ཡོད་པའི་མིའི་མིག་གིས་ཕྱི་རོལ་གྱི་གཟུགས་མི་མཐོང་བས་ཐོགས་ཤིང་སྒྲིབ་པ་ལྟ་བུའོ། །བསྟན་དུ་མེད་ལ་ཐོགས་པ་དང་བཅས་པའི་གཟུགས་ནི། མིག་རྣ་བ་སྣ་ལྕེ་ལུས་ཏེ་དབང་པོ་ལྔ་དང་། སྒྲ་དྲི་རོ་རེག་བྱ་སྟེ། དེ་རྣམས་ནི་སྒྲིབ་པ་ཡོད་ལ་ཐོགས་པ་དང་བཅས་པའོ། །བསྟན་དུ་མེད་ལ་ཐོགས་པ་མེད་པའི་གཟུགས་ནི། རྣམ་པར་རིག་བྱེད་མ་ཡིན་པའི་གཟུགས་ཏེ་སྡོམ་པ་སོགས་གོང་དུ་སྨོས་པ་ལྟར་རོ། །ཚོར་བའི་ཕུང་པོ་ནི། དཔེར་ན་ཡུལ་གཟུགས་དང་། ཡུལ་ཅན་མིག་དབང་རྣམ་ཤེས་དང་བཅས་པ་འདུས་ཏེ་རེག་པ་ལ་བརྟེན་ནས། ཡུལ་གྱི་གཟུགས་དེ་མཛེས་པ་ཞིག་ན་ཚོར་བ་བདེ་བའི་ངོ་བོར་ཉམས་སུ་མྱོང་། མི་མཛེས་ཤིང་ཡིད་དུ་མི་འོང་བ་ཞིག་ན་ཚོར་བ་སྡུག་བསྔལ་གྱི་ངོ་བོར་མྱོང་། མཛེས་མི་མཛེས་ཡིད་དུ་འོང་མི་འོང་བར་མ་ཞིག་ན་ཚོར་བ་བཏང་སྙོམས་ཀྱི་ངོ་བོར་ཉམས་སུ་མྱོང་རྒྱུ་དེ་ནི་ཚོར་བའོ། །དེ་བཞིན་དུ་རྣ་བ་སྣ་ལྕེ་ལུས་ཡིད་ཀྱི་འདུས་ཏེ་རེག་པའི་རྐྱེན་ལས་བྱུང་བའི་ཚོར་བ་བདེ་སྡུག་བཏང་སྙོམས་ཀྱི་བར་དུ་ཤེས་པར་བྱའོ། །འདུ་ཤེས་ཀྱི་ཕུང་པོ་ནི། མཚན་མར་འཛིན་པའི་བདག་ཉིད་དེ། ཡུལ་དྲུག་གང་རུང་ལ་དམིག་ནས་འདི་ནི་དཀར་པོའོ། །འདི་ནི་ནག་པོའོ། །འདི་ནི་རིང་བའོ། །འདི་ནི་ཐུང་བའོ། །འདི་ནི་ཕོ། འདི་ནི་མོ། འདི་དགྲ། འདི་གཉེན། འདི་བདེ་བ། འདི་སྡུག་བསྔལ་ལོ་སྙམ་པ་སོགས་ཡུལ་ལ་མཚན་མར་འཛིན་པ་དེའོ། །དབྱེ་ན་མིག་གི་འདུས་ཏེ་རེག་པ་ནས་ཡིད་ཀྱི་བར་འདུ་ཤེས་ཚོགས་དྲུག་སྟེ་ཚོར་བའི་སྐབས་བཞིན་ནོ། །གསུམ་པ་སེམས་བྱུང་གི་གཞི་ནི། རེག་པ་དང་། ཡིད་ལ་བྱེད་པ་དང་། ཚོར་བ་དང་། འདུ་ཤེས་དང་། སེམས་པ་དང་། འདུན་པ་དང་། མོས་པ་དང་། དྲན་པ་དང་། ཏིང་ངེ་འཛིན་དང་། ཤེས་རབ་དང་། དད་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པ་དང་། བརྩོན་འགྲུས་དང་། ཤིན་ཏུ་སྦྱངས་པ་དང་། བག་ཡོད་པ་དང་། བཏང་སྙོམས་དང་། རྣམ་པར་མི་འཚེ་བ་དང་། འདོད་ཆགས་དང་། ཁོང་ཁྲོ་དང་། ང་རྒྱལ་དང་། མ་རིག་པ་དང་། འཇིག་ཚོགས་ལ་ལྟ་བ་དང་། ཐེ་ཚོམ་དང་། ཁྲོ་བ་དང་། ཁོན་དུ་འཛིན་པ་དང་། འཆབ་པ་དང་། འཚིག་པ་དང་། སྒྱུ་དང་། གཡོ་དང་། ཕྲག་དོག་དང་། སེར་སྣ་དང་། རྒྱགས་པ་དང་། རྣམ་པར་འཚེ་བ་དང་། ངོ་ཚ་མེད་པ་དང་། ཁྲེལ་མེད་པ་དང་། རྨུགས་པ་དང་། རྒོད་པ་དང་། མ་དད་པ་དང་། ལེ་ལོ་དང་། བག་མེད་པ་དང་། བརྗེད་ངས་པ་དང་། རྣམ་གཡེང་དང་། ཤེས་བཞིན་མ་ཡིན་པ་དང་། འགྱོད་པ་དང་། གཉིད་དང་། རྟོག་པ་དང་། དཔྱོད་པ་སྟེ། སེམས་བྱུང་ལྔ་བཅུ་རྩ་གཅིག་རྣམས་སོ། །དེ་དག་ལས་ཚོར་བ་འདུ་ཤེས་གཉིས་ཕྲི་བའི་ལྷག་མ་བཞི་བཅུ་རྩ་དགུ་ནི་འདུ་བྱེད་ཀྱི་ཕུང་པོར་བཞག་སྟེ་མཚུངས་ལྡན་རྣམས་སོ། །དེ་ལ་རེག་པ་ནི། ཡུལ། དབང་པོ། རྣམ་ཤེས་གསུམ་འདུས་ནས་ཡུལ་གྱི་འགྱུར་བ་སྤྱོད་པའོ། །ཡིད་ལ་བྱེད་པ་ནི། སེམས་དམིགས་པ་ལ་གཏོད་ཅིང་འཇུག་པའོ། །སེམས་པ་ནི། སེམས་མངོན་པར་འདུ་བྱེད་པའམ་ཡུལ་ལ་འགྱུ་བར་བྱེད་པ། བདུན་པ་ནི། བྱེད་འདོད་པའམ་དམིགས་ཡུལ་ཐོབ་འདོད་བོ། མོས་པ་ནི། དམིགས་ཡུལ་ལ་ཡོན་ཏན་དུ་འཛིན་པའི་འདོད་པའོ། །དྲན་པ་ནི། དམིགས་པ་མི་བརྗེད་པར་འཛིན་པའོ། །ཏིང་ངེ་འཛིན་ནི། སེམས་རྩེ་གཅིག་པ་བྱེད་པའོ། །ཤེས་རབ་ནི། ཟག་བཅས་ཟག་མེད་ཀྱི་ཆོས་རྣམས་པར་འབྱེད་པའི་བློ་གྲོས་སོ། །དད་པ་ནི། སེམས་ཉོན་མོངས་དང་ཉེ་ཉོན་གྱི་རྙོག་པ་དང་བྲལ་བར་བྱེད་པའི་དང་པའོ། །ངོ་ཚ་ཤེས་པ་ནི། ཡོན་ཏན་དང་ཡོན་ཏན་ཅན་ལ་གུས་པའི་ངོ་ཚ་ཤེས་པའོ། །ཁྲེལ་ཡོད་པ་ནི། ཁ་ན་མ་ཐོ་བ་ལ་འཛོམ་པའི་ཁྲེལ་ཡོད་པའོ། །མ་ཆགས་པ་དང་ཞེ་སྡང་མེད་པ་ནི། དེ་གཉིས་མེད་པའི་དགེ་རྩ་སྟེ་ཉོན་མོངས་དེ་དག་གི་གཉེན་པོའོ། །གཏི་མུག་མེད་པ་ནི། ཤེས་རབ་ཡིན་ཏེ་སྨོས་ཟིན་ཏོ། །བརྩོན་འགྲུས་ནི་དགེ་བའི་བྱ་བ་ལ་སེམས་མངོན་པར་སྤྲོ་བའོ། །ཤིན་ཏུ་སྦྱངས་པ་ནི། སེམས་ལས་སུ་རུང་བའོ། །བག་ཡོད་ནི། དགེ་བའི་ཆོས་ལ་གཅེས་སྤྲས་སུ་བྱེད་པ་ཡིན། བཏང་སྙོམས་ནི། ཚོར་བ་བཏང་སྙོམས་དང་། ཚད་མེད་བཞིའི་ནང་གི་བཏང་སྙོམས་པ་དང་། འདུ་བྱེད་བཏང་སྙོམས་གསུམ་ལས་འདིར་ཕྱི་མ་སྟེ། སེམས་བྱིང་རྒོད་དང་བྲལ་བའི་མཉམ་པ་ཉིད་དོ། །རྣམ་པར་མི་འཚེ་བ་ནི། སྙིང་བརྩེ་བས་ཐོ་མི་འཚམ་པའོ། །འདོད་ཆགས་ནི། དབྱེ་ན་འདོད་པའི་འདོད་ཆགས་དང་སྲིད་པའི་འདོད་ཆགས་གཉིས་སོ། །དང་པོ་འདོད་ཁམས་ལྷ་མའི་ཆགས་པ་སྤྱིའོ། །གཉིས་པ་ནི་ཁམས་གོང་མ་གཉིས་ལ་ཡོད་པ་ནང་ཏིང་ངེ་འཛིན་གྱི་སྙོམས་འཇུག་གི་རྟེན་དང་བཅས་པ་ལ་ཆགས་པའོ། །ཁོང་ཁྲོ་ནི། གཞན་ལ་མནར་སེམས་སོ། །ང་རྒྱལ་ནི། དབྱེ་ན་བདུན་ཏེ། ཕ་རོལ་དམན་པ་ལས་རང་ཉིད་རིགས་གཟུགས་ཡོན་ཏན་སོགས་ཐམས་ཅད་དམ་གང་རུང་ཞིག་གིས་ལྷག་གོ་སྙམ་པ་དང་པོ། མཉམ་པ་ལས་བདག་ལྷག་གོ་སྙམ་པ་གཉིས་པ། ལྷག་པ་བས་ཀྱང་བདག་ལྷག་གོ་སྙམ་དུ་རློམ་པ་གསུམ་པ། ཉེར་ལེན་གྱི་ཕུང་པོ་ལ་དམིགས་ནས་ངའོ་སྙམ་དུ་རློམ་པ་བཞི་པ། མངོན་ཤེས་ལ་སོགས་མ་ཐོབ་པ་ཐོབ་པོ་སྙམ་དུ་རློམ་པ་ལྔ་པ། མཆོག་ལས་བདག་ཅུང་ཟད་དམན་ནོ་སྙམ་པ་དྲུག་པ། སྐྱོན་དང་ལྡན་པ་ལ་ཡོན་ཏན་དུ་རློམ་པ་བདུན་པའོ། །མ་རིག་པ་ནི། མི་གསལ་བའི་རྣམ་པ་ཅན་ཏེ་རིག་པའི་མི་མཐུན་ཕྱོགས་ཡང་དག་པའི་དོན་ལ་རྨོངས་པའོ། །འཇིག་ཚོགས་ལ་ལྟ་བ་ནི། ཕུང་པོ་ལྔ་ལ་བདག་དང་བདག་གི་བར་འཛིན་པའོ། །ཐེ་ཚོམ་ནི་སེམས་རྩེ་གཉིས་པའམ་དོགས་པའི་རྣམ་པ་ཅན་ནོ། །ཁྲོ་བ་ནི། གནོད་བྱེད་ཀྱི་སེམས་ཅན་སོགས་སེམས་ཁོང་ནས་འཁྲུགས་པའོ། །ཁོན་དུ་འཛིན་པ་ནི། ཁྲོས་པའི་འོག་ཏུ་ཡང་དེ་ཉིད་སེམས་ལ་འཇོག་པའོ། །འཆབ་པ་ནི། ཉེས་པ་སྦེད་ཅིང་གསང་བའོ། །འཚིག་པ་ནི། སྡིག་པ་ལ་ཞེན་ནས་དམ་དུ་འཁྱུད་པའོ། །སྒྱུ་ནི། བསྙེན་བཀུར་གྱི་དོན་དུ་རང་ལ་ཡོན་ཏན་མེད་བཞིན་ཡོད་པ་ལྟར་བཅོས་པའོ། །གཡོ་ནི། ཉེས་པ་ཁས་མི་ལེན་པའི་སེམས་གྱ་གྱུའི་རྣམ་པ་ཅན་ནོ། །གཡོ་སྒྱུ་དང་གཅིག་པར་བཤད་པའང་ཡོད། ཕྲག་དོག་ནི། གཞན་གྱི་ཕུན་ཚོགས་ལ་སེམས་མི་བཟོད་པའོ། །སེར་སྣ་ནི། ཆོས་དང་ཟང་ཟིང་གི་དངོས་པོ་ལ་ཆགས་ནས་གཞན་ལ་གཏོང་མི་བྲ་བའོ། །རྒྱགས་པ་ནི། རང་ལ་ཡོད་པའི་རིགས་གཟུགས་ཡོན་ཏན་སོགས་ལ་སེམས་ཆགས་ནས་རང་རྩིས་སུ་བྱེད་པ་ལ་སེམས་ཟད་དུ་འཇུག་པའོ། །རྣམ་འཚེ་ནི། སེམས་ཅན་སྡུག་བསྔལ་བར་འདོད་པའོ། །ངོ་ཚ་མེད་པ་ནི། ཚུལ་ཁྲིམས་ཏིང་ངེ་འཛིན་ཤེས་རབ་སོགས་ཡོན་ཏན་དང་ཡོན་ཏན་དེ་དང་ལྡན་པའི་གང་ཟག་མཁན་པོ་སོགས་ལ་བརྙས་པའི་སེམས་བྱུང་མ་གུས་པ་སྟེ་བསྐུར་སྟི་མི་བྱེད་པའོ། །ཁྲེལ་མེད་པ་ནི། དམ་པ་རྣམས་ཀྱིས་སྨད་པའི་ལས་ལ་འཇིགས་པར་མི་ལྟ་བའོ། །རྨུགས་པ་ནི་ལུས་སེམས་ལྕི་ཞིང་ལས་སུ་མི་རུང་བ་ཉིད་དོ། །རྒོད་པ་ནི། སེམས་རྣམ་པར་མ་ཞི་བའོ། །མ་དད་པ་ནི། དད་པའི་མི་མཐུན་ཕྱོགས་ལོག་ལྟའི་རྒྱུ་མཐུན་མ་དད་པའོ། །བག་མེད་ནི། བག་ཡོད་ཀྱི་མི་མཐུན་ཕྱོགས་དགེ་བའི་ཆོས་ལ་གཅེས་སྤྲས་མི་བྱེད་པ་ཟད་ཅིང་བརླག་ཏུ་འཇུག་པའོ། །ལེ་ལོ་ནི། བརྩོན་འགྲུས་ཀྱི་མི་མཐུན་ཕྱོགས་དགེ་བ་ལ་སེམས་མངོན་པར་མི་སྤྲོ་བའོ། །བརྗེད་ངས་ནི། དྲན་པས་མ་ཟིན་པའོ། །རྣམ་གཡེང་ནི། ཏིང་ངེ་འཛིན་ལ་བར་དུ་གཅོད་པའོ། །ཤེས་བཞིན་མ་ཡིན་པ་ནི། ཤེས་རབ་ཀྱི་མི་མཐུན་ཕྱོགས་སོ། །འགྱོད་པ་ནི་དགེ་མི་དགེའི་ལས་གང་རུང་ལ་འགྱོད་པའོ། །གཉིད་ནི་གོ་སླའོ། །རྟོག་པ་དང་དཔྱོད་པ་ནི། མཛོད་ལས། རྟོག་དང་དཔྱོད་པ་རྩིང་ཞིག་ཉིད། །ཅེས་པས། དོན་གྱི་ངོ་བོ་དང་ཁྱད་པར་གྱི་རྣམ་པ་ཅན་གྱི་འཇུག་པའི་སེམས་བྱུང་རྩིང་བ་ནི་རྟོག་པ་དང་། ཞིབ་པ་ནི་དཔྱོད་པ་ཡིན་ནོ། །བྱེ་བྲག་ཏུ་སྨྲ་བས་སེམས་དང་སེམས་བྱུང་གཉིས་ཀའང་ཕྱི་རོལ་རིག་པ་ལས་མ་གཏོགས་པར་རང་རིག་པ་མེད་པར་སྨྲའོ། །བཞི་པ་མི་ལྡན་པའི་འདུ་བྱེད་ཀྱི་གཞི་ནི། མདོར་བསྡུ་ན་རྣམ་གྲངས་བཅུ་བཞི་སྟེ། ཐོབ་པ་དང་། མ་ཐོབ་པ་དང་། སྐལ་མཉམ་དང་། འདུ་ཤེས་མེད་པ་དང་། འདུ་ཤེས་མེད་པའི་དང་། འགོག་པའི་སྙོམས་འཇུག་དག་སྟེ་གཉིས་དང་། སྲོག་དང་། མཚན་ཉིད་བཞི་རྣམས་དང་། མིང་གི་ཚོགས་དང་། དེའི་སོགས་ཁོངས་ནས་ཚིག་དང་ཡི་གེའི་ཚོགས་པ་ཡང་བསྟན། ཡང་གི་སྒྲས། དགེ་འདུན་གྱི་དབྱེན་དང་། ཆུད་མི་ཟ་བའི་རྫས་ཀྱང་སྡུད་དོ། །དེ་དག་ལ་མི་ལྡན་པའི་འདུ་བྱེད་ཅིའི་ཕྱིར་ཟེར་ན། སེམས་དང་མཚུངས་པར་ལྡན་པ་ཡང་མིན་ལ། གཟུགས་ཀྱི་རང་བཞིན་ཡང་མ་ཡིན་པས་ན་ཕུང་པོ་ལྔའི་ནང་ཚན་གྱི་འདུ་བྱེད་གང་ཞིག་ཁོང་རང་གི་ངོ་བོ་བེམ་ཤེས་གང་རུང་མ་ཡིན་པའོ། །དང་པོ་ཐོབ་པ་ལ་རྙེད་ཐོབ་དང་ལྡན་ཐོབ་གཉིས། རྙེད་ཐོབ་ལའང་གསར་དུ་རྙེད་པ་དང་། ཉམས་ནས་རྙེད་པ་གཉིས། སྔ་མ་ནི། སྦྱོར་ལམ་ཆོས་མཆོག་ཆེན་པོའི་རྗེས་ཀྱིས་ཟག་མེད་སྐད་ཅིག་དང་པོའི་མཐོང་ལམ་ལྟ་བུ་ལ་བྱེད། ཉམས་ནས་རྙེད་པ་བསམ་གཏན་དང་གཟུགས་མེད་ཀྱི་ཏིང་ངེ་འཛིན་གྱི་དངོས་གཞི་རྙེད་པའི་ཚེ་སྔར་ཉམས་པའི་ཏིང་ངེ་འཛིན་རྣམས་ཀྱང་རྙེད་པ་ལྟ་བུའོ། །ལྡན་ཐོབ་ནི་རྒྱུན་ལྡན་དང་ཡེ་ལྡན་གཉིས་རྒྱུན་ལྡན་སོར་སྡོམ་ཐོབ་པའི་སྐད་ཅིག་གཉིས་པ་ནས་གཏོང་རྒྱུ་མ་བྱུང་བའི་བར་ལྟ་བུ་ལ་བྱེད། ཡེ་ལྡན་གདོད་མ་ནས་ལྡན་པ་སྟེ་སྔོན་ནས་ཡོད་པ་ལ་འཇུག་མོད། སོ་སྐྱེ་ལ་སྲིད་རྩའི་ཉོན་མོངས་པ་ཐོག་མ་ནས་ལྡན་པ་ལྟ་བུ་ལ་བྱེད་དོ། །གཉིས་པ་མ་ཐོབ་པ་ནི། ངོ་བོ་མ་བསྒྲིབས་ལུང་མ་བསྟན་ཁོ་ན་སྟེ། ཉོན་མོངས་པ་སྤངས་བ་དང་དགེ་རྩ་ཆང་པའི་གང་ཟག་གཉིས་ཀ་ལ་ལྡན་པས་དགེ་སྡིག་གང་རུང་མ་ཡིན་པའི་ཕྱིར་ཐོབ་པའི་འགལ་ཕྱོགས་སུ་གྱུར་པའི་མ་བསྒྲིབས་ལུང་མ་བསྟན་ནོ། །མ་ཐོབ་པ་ཟག་མེད་ནི་འགའ་ཡང་མེད་ཅིང་། ཟག་མེད་ལམ་གྱི་མ་ཐོབ་པ་རྒྱུད་ལྡན་ནི་སོ་སོ་སྐྱེ་བོར་འདོད་དེ། འཕགས་པའི་ཆོས་མ་སྐྱེས་པའི་རྒྱུད་སོ་སྐྱེ་དག་སྐྱེས་པའི་རྒྱུད་ནི་འཕགས་པའི་གང་ཟག་ཡིན་ནོ། །གསུམ་པ་སྐབས་མཉམ་ནི། སེམས་ཅན་རྣམས་སྤྱོད་པ་དང་རང་བཞིན་དང་བསམ་པ་ལ་སོགས་པ་མཚུངས་ཤིང་འདྲ་བར་བྱེད་པའོ། །མཚན་ཉིད་སེམས་ཅན་འདྲ་བ་སྐྱེད་པའི་རྫས་སོ། །དབྱེ་བ་ཐ་དད་མ་ཡིན་པ་དང་། ཐ་དད་པ་གཉིས་ལས། དང་པོ་ནི། སེམས་ཅན་ཐམས་ཅད་སེམས་ཅན་དུ་རིགས་གཅིག་པ་ལྟ་བུའོ། །གཉིས་པ་ནི་སྐྱེ་གནས་དང་རིགས་དང་ཕོ་མོ་དང་དགེ་བསྙེན་དང་དགེ་སློང་དང་སློབ་པ་དང་མི་སློབ་པ་སོགས་འབྱེད་ཆོས་ཐ་དད་པས་སོ་སོར་རིགས་འདྲ་བའོ། །བཞི་པ་འདུ་ཤེས་མེད་པ་ནི། འདུ་ཤེས་མེད་པའི་ལྷའི་རྒྱུད་ཀྱི་སེམས་དང་སེམས་བྱུང་འགོག་པ་གང་ཡིན་པ་སྟེ་ལྷ་དེ་དག་གཟུགས་ཁམས་བསམ་གཏན་བཞི་པའི་ནང་ཚན་འབྲས་བུ་ཆེ་བ་ཞེས་བྱ་བའི་ཕྱོགས་གཅིག་ན་གནས་ཀྱི། གནས་རིགས་གཞན་ན་མེད་ལ། དེར་སྐྱེས་པ་ན་སེམས་དང་སེམས་བྱུང་མ་འོངས་པ་རྣམས་བསྐལ་པ་ཆེན་པོ་ལྔ་བརྒྱར་འགོག་པའི་རྫས་གང་ཡིན་པའོ། །འདུ་ཤེས་མེད་པའི་སྙོམས་འཇུག་བསྒོམས་པའི་རྣམ་སྨིན་གྱི་འབྲས་བུ་ཁོ་ནའོ། །འདི་ནི་ལྷ་ཚེ་རིང་པོ་ཡིན་ཏེ། མི་ཁོམ་པའི་གནས་བརྒྱད་ཀྱི་གྲངས་སུ་འཇོག་པའི་ཀླ་ཀློ་ཚེ་རིང་ལྷ་དང་ནི། ཞེས་བཤད་པའི་དེའོ། །ལྔ་པ་འདུ་ཤེས་མེད་པའི་སྙོམས་འཇུག་ནི། གང་སྨོས་འདུ་ཤེས་མེད་པ་དེ་བཞིན་དུ་འདུ་ཤེས་མེད་པའི་སྙོམས་པར་འཇུག་པ་གང་ཡིན་པ་དེ་ཡང་སེམས་དང་སེམས་བྱུང་རྣམས་འགོག་པ་ཡིན་ཏེ། འདུ་ཤེས་མེད་པའི་རྒྱུ་ཡིན་པའི་ཕྱིར། ས་གང་ཡིན་ཞེ་ན་བསམ་གཏན་བཞི་པར་གཏོགས་ཏེ། སྙོམས་འཇུག་འདིའི་རྣམ་སྨིན་འབྲས་བུ་ཆེ་བའི་ནང་དུ་སྨིན་པའི་ཕྱིར་རོ། །འོན་ཀྱང་ཐར་པའི་ལམ་ཡིན་པར་རློམས་ནས་སྒོམས་བས་ཀུན་སློང་གི་བསམ་པ་དགེ་བས་ལས་དགེ་བར་གཏོགས། སྙོམས་འཇུག་འདི་ལ་སོ་སྐྱེ་ཁོ་ནས་འཇུག་གི། འཕགས་པ་རྣམས་ཀྱིས་ནི་ལམ་གོལ་དུ་གཟིགས་པའི་ཕྱིར་མི་འཇུག་གོ། །དྲུག་པ་འགོག་པའི་སྙོམས་འཇུག་ནི། གོས་སྨོས་ལྟར་སེམས་སེམས་བྱུང་འགོག་པ་ཉིད་ཡིན་ལ། འདི་ལ་འཇུག་པའི་གང་ཟག་ཀྱང་འཕགས་པ་ཁོ་ན་ཡིན་གྱི། སོ་སྐྱེ་དག་གིས་འཇུག་མི་ནུས་སོ། །དེར་འཇུག་པའི་ཀུན་སློང་གི་ཡིད་བྱེད་ཀྱང་ཐར་པའི་གོ་འཕང་འདོད་པས་མ་ཡིན་གྱི་འདུ་ཤེས་དང་ཚོར་བ་མ་ཞི་བ་སེམས་ཟིང་ཟིང་པོ་རྣམས་ཞི་ནས་ཞི་བར་གནས་པའི་དོན་དུ་སྙོམས་པར་འཇུག་པ་ཡིན་ཞིང་། འཕགས་པ་ཡང་མཐོང་བའི་ཆོས་ལ་མྱ་ངན་ལས་འདའ་བར་ནུས་པ་རྣམས་སོ། །སྐྱེ་བའི་རྟེན་ནི་སྲིད་རྩེ་སྟེ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཁོ་ན་ལས་བསྐྱེད་པས་དེ་སྐྱེས་པ་ཁོ་ནས་འཇུག་གོ། །ལུས་ཀྱི་རྟེན་ནི་འདོད་ཁམས་ལའང་ཡོད་དོ། །ཐེག་ཆེན་བྱང་ཆུབ་སེམས་དཔའ་རྣམས་འདི་ལ་སྙོམས་པར་བཞུགས་ན་སེམས་རྒྱུན་མེད་པའི་ཕྱིར་གཞན་དོན་ཉམས་པར་འགྱུར་བ་ལ་དགོངས་ནས་ཞག་བདུན་ལས་རིང་བར་མི་འཇུག་ཅིང་བཀག་པ་ཡིན་ནོ། །ད་ལྟ་མཁས་བླུན་རྣམས་ཀྱིས་ཉན་ཐོས་འགོག་པ་ཞེས་རླུང་ལྟར་བརྗོད་པ་དེའང་འདོད་ཁམས་པའི་ལུས་རྟེན་ཅན་སྙོམས་འཇུག་འདི་ལ་ཞུགས་པའི་གང་ཟག་ཡིན་ནོ། །སྙོམས་འཇུག་དེ་གཉིས་ཀའང་འདོད་པ་དང་གཟུགས་ཁམས་ཀྱི་རྟེན་ཅན་ཡིན་གྱི་གཟུགས་མེད་ལ་བརྟེན་པ་ནི་མེད་དོ། །བདུན་པ་སྲོག་གི་དབང་པོ་ནི། ཁམས་གསུམ་པའི་ཚེ་ལ་ཟེར་ཏེ། ཚེ་དེ་ཉིད་གང་ཞེ་ན་དྲོད་དང་རྣམ་ཤེས་རྒྱུན་ཆགས་སུ་གནས་པའི་རྟེན་ནས་ནམ་རྒྱུ་ཡིན་ནོ། །དེ་ཡང་ཁམས་འོག་མར་དེ་གཉིས་ཀ་དང་། གཟུགས་མེད་ན་རྣམ་ཤེས་ཁོ་ནའི་རྟེན་བྱེད་དོ། །དེ་ཡང་ཁམས་གསུམ་སོ་སོའི་ལས་ཀྱི་མཐུས་ཚེ་ཇི་ཙམ་ཞིག་འཚོ་བའི་དུས་ཀྱི་རིས་མཐུན་འཕངས་པ་དེ་སྲིད་དུ་གནས་པ་དེ་ལ་ཚེ་ཞེས་བྱའོ། །བརྒྱད་པ་འདུས་བྱས་ཀྱི་མཚོན་བཞི་ནི། མཛོད་ལས། མཚན་ཉིད་དག་ནི་སྐྱེ་བ་དང་། །རྒ་དང་གནས་དང་མི་རྟག་ཉིད། །ཅེས་པས། འདུ་བྱས་ཀྱི་ཆོས་རྣམས་སྐྱེད་པར་བྱེད་པའི་སྐྱེ་བ་དང་། རྙིང་པར་བྱེད་པའི་རྒ་བ་དང་། གནས་པར་བྱེད་པའི་གནས་པ་དང་། འཇིག་པར་བྱེད་པའི་མི་རྟག་པ་སྟེ་བཞིའོ། །སྐྱེ་བ་ལའང་། སྐྱེ་བའི་སྐྱེ་བ། སྐྱེ་བའི་རྒ་བ། སྐྱེ་བའི་གནས་པ། སྐྱེ་བའི་མི་རྟག་པ་དང་བཞི་སྟེ། བུམ་སོགས་མཚན་གཞི་གང་ཡིན་དེ་དང་སྐྱེ་བའི་སྐྱེ་བ་སོགས་ཆོས་བརྒྱད་པོ་ཀུན་ཀྱང་འདུས་བྱས་ཡིན་པས་མ་སྐྱེས་པ་མེད་པའི་ཕྱིར་སྐྱེ་བའི་སྒྲ་རེ་སྦྱར་བའོ། །སྐྱེ་སྐྱེ་བའི་རྒྱུ་ཁོ་རང་ཡིན་པས་རྫས་གཞན་མེད་དེ་སྐྱེ་བ་གཅིག་ལ་འཇུག་གོ། །དེ་བཞིན་དུ་རྒ་སོགས་ལའང་ཤེས་པར་བྱའོ། །ཀ་བུམ་ལ་སོགས་མཚན་གཞིར་གྱུར་པའི་འདུས་བྱས་སྐྱེ་བ་དང་ལྡན་པར་བྱེད་པའི་རྫས་དེ་སྐྱེ་བའི་མཚན་ཉིད། འདུས་བྱས་གང་དག་རྙིངས་པ་དང་ལྡན་པར་བྱེད་པའི་རྫས་དེ་རྒ་བའི་མཚན་ཉིད། འདུས་བྱས་གང་ཞིག་གནས་པ་དང་། ལྡན་པར་བྱེད་པའི་རྫས་དེ་གནས་པའི་མཚན་ཉིད། འདུས་བྱས་གང་ཞིག་འཇིག་པ་དང་ལྡན་པར་བྱེད་པའི་རྫས་དེ་མི་རྟག་པའི་མཚན་ཉིད་ཡིན་པའི་ཕྱིར་རོ། །བཅུ་གཉིས་པ་མིང་ནི། དོན་གྱི་ངོ་བོ་ཙམ་རྗོད་པར་བྱེད་པའི་མི་ལྡན་འདུ་བྱེད་དེའོ། །མཚན་གཞི་ནི་ཀ་བ་བུམ་པ་ལ་སོགས་པའོ། །བཅུ་གསུམ་པ་ངག་དང་ཚིག་གཉིས་དོན་གཅིག་མིང་གི་རྣམ་གྲངས་ཡིན་ཏེ། དེ་ཇི་ལྟ་བུ་ཞེ་ན། འདུས་བྱས་ཐམས་ཅད་མི་རྟག་པའོ། །ཞེས་པ་ལྟ་བུའོ། །བཅུ་བཞི་པ་ཡི་གེའི་མཚན་ཉིད་ནི། མིང་དང་ཚིག་གཉིས་ཀའི་གདགས་གཞིར་གྱུར་བ་སྟེ། ཇི་ལྟ་བུ་ཞེ་ན། ཨ་ཞེས་པ་དང་ཀ་ཞེས་པ་ལྟ་བུའོ། །དགེ་འདུན་གྱི་དབྱེན་ནི་གོ་སླ་སྟེ། སྟོན་པ་བཞུགས་པའི་དུས་ལྷས་བྱིན་གྱིས་སྟོན་པ་མ་ཡིན་པར་སྟོན་པར་བཅོས་ནས་སྟོན་པའི་བསྟན་པ་ལས་གཞན་དུ་གྱུར་པའི་ཆོས་བསྟན་པ་ལྟ་བུ་སྟེ། དེ་ཡང་འོ་མ་མི་བཏུང་བ། ཤ་མི་ཟ་བ། ལན་ཚྭ་མི་སྤྱོད་པ། གོས་མ་དྲས་བ་བགོ་བ། གྲོང་གི་གཙུག་ལག་ཁང་དུ་གནས་པ་སྟེ་གཞི་ལྔ་བསྟན་པས་དགེ་འདུན་རྣམས་ལྟ་སྤྱོད་མ་མཐུན་པ་ལྟ་བུ་འཁོར་ལོའི་དབྱེན་ཞེས་བྱའོ། །དགེ་བ་ལ་སོགས་པའི་ལས་བྱས་པ་ནའང་ཆུད་མི་ཟ་བའི་རྫས་ཞེས་བྱ་བ་ཐོབ་པ་ཡིན་ནོ། །ཞེས་པ་ཙམ་ལས་ཕྱི་མ་དེ་གཉིས་ལ་རྒྱས་བཤད་པ་བྱས་སོ། །ལྔ་པ་འདུས་མ་བྱས་ཀྱི་གཞི་ནི། གོང་ཟག་མེད་ཀྱི་སྐབས་སུ་སྨོས་པའི། ནམ་མཁའ་དང་། སོ་སོར་བརྟགས་འགོག་སོ་སོར་བརྟགས་མིན་འགོག་སྟེ་གསུམ་མོ། །དེ་དག་གིས་བྱེ་སྨྲའི་གྲུབ་མཐའ་ཐོགས་ཙམ་བརྗོད་ཟིན་ཏོ། ༈ །གཉིས་པ་མདོ་སྡེ་པའི་གྲུབ་མཐའ་ནི། ཕལ་ཆེ་བ་བྱེ་བྲག་སྨྲ་བ་དང་མཐུན་པ་ལས། ཁྱད་པར་སྔར་བཤད་གཟུགས་ཀྱི་གཞི་རྣམས་ལས། རིག་མིན་གྱི་གཟུགས་ནི་སྤོང་སེམས་རྒྱུན་ཆགས་པ་ལ་སོགས་ཡིན་པས་གཟུགས་མ་ཡིན་ཏེ། གཟུགས་ཅན་ལ་བརྟེན་པའི་ཕྱིར་གཟུགས་སུ་བཏགས་པར་འདོད་དོ། །རིག་མིན་གྱི་གཟུགས་དེ་དང་དུས་གསུམ་རྫས་སུ་མི་འདོད་དེ་བཏགས་ཡོད་ཙམ་དུ་འདོད་དོ། །རིག་མིན་མ་གཏོགས་པའི་མིག་སོགས་དབང་པོ་རྣམས་ནི་རྣམ་ཤེས་ཀྱི་བདག་པོའི་རྐྱེན་དང་། ཡུལ་གཟུགས་སོགས་རྣམས་ཀྱང་ཤེས་པ་ལ་རྣམ་པ་གཏོད་པས་དམིགས་པའི་རྐྱེན་དུ་འདོད་དོ། །རྡུལ་ཕྲ་རབ་ཆ་མེད་རེག་ལ་མ་འབྱར་བ་འདུས་པ་ལས་རགས་པ་རྩོམ་པར་འདོད་དོ། །དེ་ཡང་གཟུགས་སྒྲ་དྲི་རོ་སོགས་ཕྱི་རོལ་གྱི་དོན་རགས་པའི་གཟུང་འཛིན་ནི་མི་འདོད་དེ། གཟུགས་སོགས་ལྐོག་གྱུར་རམ་ཕག་ན་མོའི་ཚུལ་གྱིས་བག་ཉལ་ལྟ་བུར་འདོད་ལ། སེམས་དང་སེམས་བྱུང་གི་གཞི་སྒོ་ལྔའི་རྣམ་ཤེས་དང་། དེའི་འཁོར་གྱི་སེམས་ལས་བྱུང་བས་ཡུལ་གཟུགས་ལ་དམིགས་ཏེ་གཟུགས་སོགས་ཡུལ་ལྔ་མཐོང་བ་མེད་ཀྱང་མིའི་བཞིན་གྱིས་མེ་ལོང་ལ་རང་འདྲའི་རྣམ་པ་གཏད་པ་ལྟར། ཡུལ་གྱིས་ཤེས་པ་སྐད་ཅིག་གཉིས་པར་ཡུལ་དེ་རང་དང་འདྲ་བའི་རྣམ་པ་གཏད་པ་ལས་བྱུང་བའོ། །དེའང་རྣམ་པ་མ་གཏད་བར་དུ་གཟུགས་སོགས་ལྐོག་ཏུ་གྱུར་པ་ཡིན་ལ། རྣམ་པ་གཏོད་བྱེད་དེས་ཕྱི་རོལ་དུ་རྣམ་པ་གཏད་པས་གཟུགས་སོགས་མིག་སོགས་ལ་པར་བཏབ་པ་ལྟ་བུར་མངོན་དུ་བྱེད་པ་སྟེ། ཤེས་པ་དོན་གྱི་རྣམ་པར་ཤར་ནས་དོན་དང་འདྲ་བ་ཉམས་སུ་མྱོང་བ་ལ་དོན་མཐོང་ཞེས་རྣམ་པར་འཇོག་སྟེ། རྣམ་ངེས་ལས། འདྲ་བ་ཉམས་སུ་མྱོང་བ་ལ། །དོན་མྱོང་ཞེས་ནི་རྣམ་པར་བརྗོད། །ཅེས་སོ། །མདོ་སྡེ་པ་འདིས་ཞེན་དོན་ལ་སྣང་སེམས་གཞི་མཐུན་པས་སློབ་དཔོན་ཁ་ཅིག་ཐེག་ཆེན་དུ་བཞེད་པའང་ཡོད་པར་མངོན་ལ། རྣམ་པ་གཏད་པས་རང་འདྲ་བར་ཤར་བ་ལ་ཡུལ་དུ་འདོད་པའི་ཕྱིར་རྣམ་པ་དེ་ཉིད་སེམས་ཀྱི་བག་ཆགས་ལས་འོས་མེད་རུང་ཐེག་དམན་གྱི་སྐབས་འདིར་ཀུན་གཞི་དང་བག་ཆགས་དངོས་སུ་མི་འདོད་དོ། །ཤེས་པ་ཐམས་ཅད་གསལ་བར་མྱོང་བ་རང་རིག་པ་ནི་མ་འཁྲུལ་བ་ཡིན་པར་འདོད་ལ། འདི་པས་ལྡན་མིན་འདུ་བྱེད་རྣམས་ཀྱང་ཐལ་མོ་བསྐུམས་པའི་གནས་སྐབས་སུ་ཁུར་ཚུར་ཡིན་པ་བཞིན། གཟུགས་དང་། སེམས་དང་། སེམས་བྱུང་གི་གནས་སྐབས་ཡིན་པས་དེ་གསུམ་ལས་རྫས་ཐ་དད་དུ་གྱུར་པ་ནི་མེད་དོ། །ཞེས་འདོད། བདེན་པ་གཉིས་ཀྱི་འཇོག་ཚུལ་བྱེ་སྨྲ་དང་མཐུན་ནོ། །བྱེ་མདོ་གཉིས་ཀའི་ལམ་སྒོམ་པ་ནི། བདེན་པ་བཞི་པོའི་སྡུག་བདེན་ལ། མི་རྟག །སྡུག་བསྔལ། སྟོང་པ། བདག་མེད་བཞི། ཀུན་འབྱུང་ལ། རྒྱུ། ཀུན་འབྱུང་རབ་སྐྱེ། རྐྱེན་བཞི། འགོག་པ་ལ། འགོག་པ། ཞི་བ། གྱ་ནོམ་པ། ངེས་འབྱུང་བཞི། ལམ་ལ། ལམ། རིགས་པ། སྒྲུབ་པ། ངེས་འབྱིན་བཞི་སྟེ། དེ་ཡང་འདི་ལྟར་སྡུག་བསྔལ་ནི་རྐྱེན་ལ་རག་ལས་པའི་ཕྱིར་མི་རྟག་པའོ། །གནོད་པའི་བདག་ཉིད་ཅན་ཡིན་པའི་ཕྱིར་སྡུག་བསྔལ་བའོ། །བདག་གིར་ལྟ་བའི་མི་མཐུན་ཕྱོགས་ཀྱིས་ན་སྟོང་པའོ། །བདག་ཏུ་ལྟ་བའི་མི་མཐུན་པའི་ཕྱོགས་ཀྱིས་ན་བདག་མེད་པའོ། །ཀུན་འབྱུང་ནི་ས་བོན་གྱི་ཆོས་ཀྱི་ཚུལ་གྱིས་རྒྱུའོ། །འབྱུང་བའི་ཚུལ་གྱིས་ན་ཀུན་འབྱུང་པའོ། །འབྲེལ་བའི་ཚུལ་གྱིས་རབ་ཏུ་སྐྱེ་བའོ། །མངོན་པར་བསྒྲུབ་པའི་དོན་གྱིས་ན་རྐྱེན་ནོ། །འགོག་པ་ནི། ཕུང་པོ་ཞིག་པའི་ཕྱིར་འགོག་པའོ། །འདོད་ཆགས་ཞེ་སྡང་གཏི་མུག་གི་མེ་གསུམ་ཞི་བའི་ཕྱིར་ཞི་བའོ། །འཚེ་བ་མེད་པའི་ཕྱིར་གྱ་ནོམ་པའོ། །སྐྱོན་ཐམས་ཅད་དང་བྲལ་བའི་ཕྱིར་ངེས་པར་འབྱུང་བའོ། །ལམ་ནི། བགྲོད་པའི་དོན་གྱིས་ལམ་མོ། །འཐད་པ་དང་ལྡན་པའི་ཕྱིར་རིགས་པའོ། །ཡང་དག་པར་སྒྲུབ་པའི་དོན་གྱིས་སྒྲུབ་པའོ། །ཤིན་ཏུ་ཡང་དག་པར་འདའ་བར་བྱེད་པའི་ཕྱིར་ངེས་པར་འབྱིན་པར་བྱེད་པའོ། །དེ་ལྟར་བདེན་པ་རེ་རེ་ལའང་ཁྱད་ཆོས་བཞི་རེ་སྦྱར་ནས་སྒོམ་པ་ཡིན་ལ། ལམ་གྱི་སྤང་བྱ་ནི། ཉོན་མོངས་ཅན་དང་ཉོན་མོངས་ཅན་མ་ཡིན་པའི་མི་ཤེས་པ་གཉིས་ལས། སྔ་མ་ཐར་པ་འཐོབ་པའི་བར་ཆད་གང་ཟག་གི་བདག་འཛིན་དང་། དེ་ལས་བྱུང་བའི་དུག་གསུམ་ས་བོན་དང་བཅས་པ་ལྟ་བུའོ། །ཕྱི་མ་ནི། སངས་རྒྱས་ཀྱི་ཆོས་ཟབ་ཅིང་ཕྲ་བ་མི་ཤེས་པའི་ཉོན་མོངས་ཅན་མ་ཡིན་པའི་སྒྲིབ་པའོ། །སྒྲིབ་པ་དེ་གཉིས་ལས་ཤེས་སྒྲིབ་མི་འདོད་དོ། །ལམ་གྱི་རང་བཞིན་ནི། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་སྟེ་ལམ་གྱི་བྱང་ཆུབ་མངོན་དུ་མཛད་པའི་གནས་ནི་འདོད་ཁམས་ཁོ་ནར་ངེས་ཏེ་སྤྲུལ་སྐུའི་ཞིང་སྟོང་གསུམ་མི་མཇེད་ཀྱི་ཁམས་འདི་ལས། སྟུག་པོ་བཀོད་པ་སོགས་ལོངས་སྐུའི་ཞིང་དང་ལོངས་སྐུ་ཁས་མི་ལེན་ལ། རྣམ་མཁྱེན་གྱི་ཡེ་ཤེས་ཀྱང་མི་འདོད་དོ། །གཉིས་ཀས་ཐེག་ཆེན་སངས་རྒྱས་ཀྱི་བཀར་མི་འདོད། བྱེ་སྨྲས་སངས་རྒྱས་ཀྱི་གཟུགས་སྐུ་ནི་སྔར་བྱང་སེམས་སྦྱོར་ལམ་པའི་ལུས་རྟེན་དང་ཚེ་གཅིག་གིས་བསྡུས་པའི་ཕྱིར་སངས་རྒྱས་དཀོན་མཆོག་མིན་ཡང་སངས་རྒྱས་སུ་ཁས་ལེན། སངས་རྒྱས་དཀོན་མཆོག་ནི་དེའི་ཐུགས་རྒྱུད་ཀྱི་ཟད་དང་མི་སྐྱེ་བ་མཁྱེན་པའི་ཡེ་ཤེས་ལ་འདོད། མདོ་སྡེ་པས་རྟེན་གཟུགས་སྐུ་དང་བརྟེན་པ་ཆོས་སྐུ་གཉིས་ཀ་སངས་རྒྱས་དང་དགེ་འདུན་དཀོན་མཆོག་ཏུ་འདོད། དགེ་འདུན་ཡང་སློབ་པ་འཕགས་པ་རྣམས་ཟག་བཅས་ཡིན་པས་དགེ་འདུན་དཀོན་མཆོག་མིན་ཡང་དགེ་འདུན་ཡིན་ལ། དགེ་འདུན་དཀོན་མཆོག་ནི་དེའི་ཐུགས་རྒྱུད་ཀྱི་ལམ་བདེན་ལ་འདོད་དོ། །ཆོས་དཀོན་མཆོག་ཀྱང་སངས་རྒྱས་དང་ཉན་རང་གཉིས་ཀའི་རྒྱུད་ཀྱི་མྱང་འདས་གསུམ་དང་ཉོན་མོངས་པ་དང་སྡུག་བསྔལ་མ་ལུས་པ་ཞི་བའི་འགོག་བདེན་ལ་འཇོག་གོ། །གཞན་ཡང་སངས་རྒྱས་ཀྱི་གཟུགས་ཀྱི་སྐུ་སངས་རྒྱས་ཡིན་ཞིང་། ཐུགས་ནི་སྟོང་ཉིད་སྤྲོས་པ་དང་བྲལ་བའི་ཆོས་སྐུ་སྟེ། མྱ་ངན་ལས་འདས་པའི་ངོ་བོ་བློ་ཡིས་ཟད་པའི་སྟོང་ཉིད་དེ་མར་མེ་ཤི་བ་ལྟ་བུ་འདོད་པ་དང་། སྡེ་པ་བཅོ་བརྒྱད་ཀྱི་གནས་མ་བུ་སོགས་གྲུབ་མཐའ་དམན་པ་འགའ་ཞིག་གིས་ལས་འབྲས་ཀྱི་རྟེན་དུ་རྫས་སུ་གྲུབ་པའི་གང་ཟག་གི་བདག་ཀྱང་ཡོད་པར་འདོད་ལ། གཉིས་ཀས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་། ཐེག་དམན་གྱི་སྡེ་སྣོད་གསུམ་ལ་སོ་སོའི་སེམས་བསྐྱེད་རྒྱ་ཆེ་ཆུང་གིས་འབྱུང་བར་འདོད་དོ། །དེ་དག་གིས་མདོ་སྡེ་པའི་གྲུབ་མཐའི་འདོད་ཚུལ་ཕྱོགས་ཙམ་བརྗོད་ཟིན་ཏོ། ༈ །ཐེག་པ་ཆེན་པོ་ལ་དབུ་མ་སེམས་ཙམ་གཉིས་ཀྱི་གྲུབ་མཐའ་བྱུང་ཞིང་། དེ་ལ་ཐེག་པ་ཆེ་ཆུང་གི་ཁྱད་པར་ནི། དམིགས་པ་རང་གི་དོན་གྱི་ཉི་ཞིབ་སྒྲུབ་པ་ནི་ཆུང་ངུ་ཡིན་ལ། གཞན་དོན་འབའ་ཞིག་སྒྲུབ་པ་ནི་ཆེན་པོའོ། །སྒྲུབ་པ་ནི་ཐབས་ཤེས་ཁྱད་པར་ཅན་ཟུང་དུ་འབྲེལ་བ་ནི་ཆེན་པོ་དང་། དེ་དང་བྲལ་བ་ནི་ཆུང་ངུ་སྟེ། སྡུད་པ་ལས། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྟུང་། །ཞེས་པས། ཐབས་སྙིང་རྗེ་ཆེན་པོས་ཞི་བའི་མཐའ་སྟེ་འགོག་སྙོམས་ལྟ་བུ་རང་ཞི་བདེ་གཅིག་པུའི་མཐར་མི་གནས་ཤིང་ཤེས་རབ་ཟབ་མོས་རྟག་ཆད་ཀྱི་མཐའ་གཉིས་སུ་མི་གནས་པས། སྲིད་ཞི་གཉིས་ལས་འདའ་བར་བྱེད་པའོ། །ཡེ་ཤེས་ཀྱང་གང་ཟག་གི་བདག་མེད་ཙམ་དང་། ཆོས་ཀྱི་བདག་མེད་ཕྱེད་གཟུང་བ་རང་བཞིན་མེད་པར་རྟོགས་པ་ཉན་རང་གི་ཡེ་ཤེས་ཏེ་ཆུང་ངུ། བདག་གཉིས་ཀྱིས་སྟོང་པར་རྟོགས་པ་ནི་བྱང་ཆུབ་སེམས་དཔའི་ཡེ་ཤེས་ཏེ་ཐེག་པ་ཆེན་པའོ། །བརྟག་གཉིས་ལས། གང་ཤེས་རབ་དང་སྙིང་རྗེ་ཆེ་བ་ནི་ཐེག་པ་ཆེན་པོ་ཡིན་ལ། གང་ཆུང་བ་རྣམས་ནི་ཐེག་པ་ཆུང་ངུའོ། །ཞེས་གསུངས་པ་ལྟར་རོ། །ཐེག་པ་ཆེན་པོ་དེ་ལ་གྲུབ་མཐའི་སྒོ་ནས་དབྱེ་ན་སེམས་ཙམ་དབུ་མ་གཉིས་ལས། དང་པོ་སེམས་ཙམ་པའི་ཕྱོགས་ལ། རྒྱལ་བ་མྱ་ངན་ལས་འདས་ནས་བཀའ་བསྡུ་གསུམ་པའི་འཇུག་ཏུ། ས་ར་ཧ་དང་ཀླུ་སྒྲུབ་མ་བྱོན་པའི་གོང་དུ་བཀའ་ཐ་མའི་མདོ་སྡེ། ཕལ་པོ་ཆེ་དང་དཀོན་བརྩེགས་སོགས་མི་ཡུལ་དུ་བྱོན་ཞིང་། དེ་ལ་བརྟེན་ནས་ཨ་བི་ཏརྐ་ཛྙཱ་ན་ཏ་ལ་སོགས་ཐེག་ཆེན་གྱི་སློབ་དཔོན་ལྔ་བརྒྱ་བྱོན་ནས་རྣམ་རིག་སྨྲ་བའི་ལྔའི་རྣམ་གཞག་ཁས་ལེན་ཀྱང་ས་བཅུའི་ཡེ་ཤེས་མི་འདོད་དོ། །ལམ་བདེན་ལ་ཤེས་པས་མ་ཁྱབ་སྟེ། ཟག་མེད་ཀྱི་ཕུང་པོ་ལྔ་ལམ་བདེན་ཡིན་པའི་ཕྱིར་རོ། །ཟག་མེད་ཀྱི་ཕུང་པོ་ལྔ་ནི། ཆོས་རྣམ་འབྱེད་ཀྱི་ཤེས་རབ་གཙོ་བོར་གྱུར་པའི་འཁོར་དུ། ཚུལ་ཁྲིམས་ཀྱི་ཕུང་པོ། ཏིང་ངེ་འཛིན་གྱི་ཕུང་པོ། རྣམ་པར་གྲོལ་བའི་ཕུང་པོ། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་སྟེ་ལྔའོ། །འབྲས་བུ་ནི། ཉན་ཐོས་ཀྱི་རིགས་ཅན་རྣམས་ཀྱིས་བདེན་བཞི་མི་རྟག་སོགས་བཅུ་དྲུག་པོ་དེ་བསྒོམས་པས་མཐར་སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས། ཉོན་མོངས་པ་ཅན་གྱི་སྒྲིབ་པ་བཅོམ་སྟེ་དགྲ་བཅོམ་པའི་འབྲས་བུ་འཐོབ་བོ། །ཉན་ཐོས་རྒྱུན་དུ་ཞུགས་པ་ལ། ཞུགས་པ་དང་གནས་པ་གཉིས། ལན་ཅིག་ཕྱིར་འོང་ལ་ཞུགས་གནས་གཉིས། ཕྱིར་མི་འོང་བ་ལ་ཞུགས་གནས་གཉིས། དགྲ་བཅོམ་པ་ལ་ཞུགས་གནས་གཉིས་ཏེ་ཟུང་བཞི་ཡ་བརྒྱད་དུ་བརྗོད་ཅིང་ཞུགས་གནས་བརྒྱད་པོ་གང་རུང་ལ་འཕགས་པས་ཁྱབ་པར་འདོད་དོ། །རང་རྒྱལ་ནི། ཐེག་དམན་གྱི་སྡེ་སྣོད་གསུམ་ལ་བརྟེན་ནས་བསྒོམས་པས་དབང་པོ་རྣོ་རྟུལ་གྱི་ཁྱད་པར་ལས་བྱུང་སྟེ། བསེ་རུ་ལྟ་བུའི་རང་རྒྱལ་རྣམས་ཀྱིས་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པའི་ལྟ་བ་དེ་བསྐལ་ཆེན་བརྒྱ་ལ་སོགས་པའི་བསོད་ནམས་ཀྱི་ཚོགས་དང་སྤྲེལ་ཏེ། ཚོགས་ལམ་ཆེན་པོ་མན་ཆད་དུ་ཉམས་སུ་བླངས་ནས་སྦྱོར་ལམ་དྲོད་ནས་མི་སློབ་ལམ་གྱི་བར་སྟན་ཐོག་གཅིག་ལ་མངོན་དུ་བྱེད་དོ། །ཉན་ཐོས་པས་གང་ཟག་གི་བདག་མེད་པར་ཁས་བླངས་ཀྱང་། གཟུང་ཡུལ་གྱི་དངོས་པོ་རྡུལ་ཕྲན་ཆ་མེད་དོན་དམ་དུ་འདོད་ལ། རང་རྒྱལ་གྱིས་གང་ཟག་གི་བདག་མེད་རྟོགས་པའི་སྟེང་། གཟུང་བ་ཕྱི་རོལ་གྱི་དོན་ཡང་བདེན་མེད་དུ་རྟོགས་པས། བདག་མེད་ཕྱེད་དང་གཉིས་རྟོགས་པར་བྱེད་ལ། འཛིན་པའི་སེམས་བདེན་མེད་དུ་མ་རྟོགས་ཏེ། རྒྱན་ལས། གཟུང་དོན་རྟོག་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱིས་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་སོ། །ལམ་བགྲོད་ཚུལ་ཕལ་ཆེར་ཉན་ཐོས་དང་མཚུངས་སོ། །བྱང་སེམས་རྣམས་ཀྱིས་ཚོགས་ལམ་གྱི་གནས་སྐབས་སུ་བསྐལ་ཆེན་གྲངས་མེད་གསུམ་གྱི་ཚོགས་རྫོགས་པར་བྱེད་ཅིང་། དེ་ནས་བསྐལ་པ་བརྒྱར་མཚན་བཟང་གི་རྒྱུ་བསྒྲུབས་ཏེ་སྲིད་པ་ཐ་མའི་ཚེ་བྱང་ཆུབ་ཀྱི་ཤིང་དྲུང་དུ་སྲོད་ལ་ལྷའི་བུའི་བདུད་བཏུལ་གུང་ལ་མཉམ་པར་བཞག་པའི་ཚེ། སྦྱོར་ལམ། མཐོང་ལམ། སྒོམ་ལམ་གསུམ་མངོན་དུ་བྱས་ནས། ཐོ་རངས་སྐྱ་རེངས་ཤར་བ་ཙམ་ན་མི་སློབ་ལམ་མངོན་དུ་བྱེད་དོ། །དེས་ན་སྲོད་ལ་བདུད་བཏུལ་བ་ཡན་ཆད་སོ་སྐྱེའི་གནས་སྐབས་དང་། བྱང་སེམས་ཀྱི་སྦྱོར་མཐོང་སྒོམ་གསུམ་ལ་མཉམ་བཞག་ཁོ་ནས་ཁྱབ་པར་འདོད་ཅིང་། མཛད་པ་བཅུ་གཉིས་ཀྱི་དང་པོ་དགུ་བྱང་སེམས་དང་། ཕྱི་མ་གསུམ་སངས་རྒྱས་མཛད་པར་ཁས་ལེན་ནོ། །ཆོས་འཁོར་ལ་མཐོང་ལམ་གྱིས་ཁྱབ་པ་དང་། ལུས་ཀྱི་ཆོས་འཁོར་ལ་བདེན་བཞིའི་ཆོས་འཁོར་གྱིས་ཁྱབ་པར་འདོད་དོ། །བྱེ་སྨྲས་མངོན་པ་སྡེ་བདུན་སངས་རྒྱས་ཀྱིས་གསུངས་པའི་བཀའ་ཁས་ལེན་ཅིང་། བཀའ་ལ་སྒྲ་ཇི་བཞིན་པས་ཁྱབ་བོ། །ཆོས་ཀྱི་ཕུང་པོ་བརྒྱད་ཁྲི་ལས། བཞི་སྟོང་གི་རྣམ་བཞག་ཁས་མི་ལེན་ཏེ། མཛོད་ལས། ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུང་དེ་དག །ཅེས་གསུངས་སོ། །སངས་རྒྱས་ལུགས་འདི་དར་ཞིང་རྒྱས་པར་མཛད་པ་ཡིན་ལ། ཀླུ་སྒྲུབ་བྱོན་ནས་བཟུང་སེམས་ཙམ་ལུགས་དེ་ནུབ་ནས་ཐེག་ཆེན་དབུ་མས་ས་སྟེང་ཁྱབ་པར་མཛད་པ་ཡིན་ལ། སེམས་ཙམ་ལུགས་ཀྱི་བསྟན་བཅོས་གངས་རིའི་ལྗོངས་སུ་བྱུང་བ་མེད་དོ། །འདིའི་ལུགས་སུ་བདེ་གཤེགས་སྙིང་པོ་གནས་ལུགས་དོན་གྱི་ཀུན་གཞི་ཆོས་ཀྱི་དབྱིངས་རང་བཞིན་གྱིས་འོད་གསལ་བ་སེམས་ཅན་གྱི་ཁམས་སུ་བཞུགས་ཤིང་། དེའི་སྟེང་ན་ཐོག་མ་མེད་པའི་མ་རིག་པ་ཉོན་མོངས་པ་ཐམས་ཅད་ཀྱི་རྩ་བར་གྱུར་པ་དགེ་མི་དགེ་གཉིས་ཀའི་ཕྱོགས་སུ་མ་ཆད་པས་ལུང་དུ་མ་བསྟན་པའི་ཆ་ལ་བག་ཆགས་སྣ་ཚོགས་པའི་ཀུན་གཞི་ཞེས་བྱ་ཞིང་ངོ་བོ་རྟོག་མེད་ཡུལ་ལ་མི་འཛིན་པ་སྟེ། དེའི་ངང་དུ་གོམས་ན་གཟུགས་མེད་པའི་ཁམས་སུ་འཕེན་པའི་ལས་ཅན་ནོ། །ཀུན་གཞིའི་རྣམ་ཤེས་ནི། སྒོ་ལྔ་ཡིད་དང་བཅས་པར་མ་གྱུར་པའི་ཤེས་པ་གསལ་བ་སྟེ། དེའི་ངང་དུ་གོམས་ན་གཟུགས་ཁམས་སུ་འཕེན་པའི་ལས་ཅན་ནོ། །དེ་ནི་རྡོ་རྗེ་ལྟ་བུའི་ཏིང་ངེ་འཛིན་མངོན་དུ་མ་བྱས་ཀྱི་བར་དུ་ཆུ་བོའི་རྒྱུན་བཞིན་རྒྱུན་མི་ཆད་པར་འཇུག་སྟེ། རྒྱུན་མཐའི་རྡོར་ཏིང་མངོན་དུ་བྱས་ནས་མེ་ལོང་ལྟ་བུའི་ཡེ་ཤེས་སུ་གནས་འགྱུར་བ་ཡིན་ནོ། །འདི་ནི་ཀུན་གཞི་དང་ཀུན་གཞིའི་རྣམ་ཤེས་གཉིས་སོ་སོར་ཕྱེ་བའི་ལུགས་ཡིན་ལ། མ་ཕྱེས་པའི་ཚེ་ཀུན་གཞིའི་རྣམ་ཤེས་ཁོ་ན་ལས་ཀུན་གཞི་ལོགས་སུ་བཤད་པ་མེད་དོ། །ཆོས་ཐམས་ཅད་མཚན་ཉིད་གསུམ་དུ་འདུས་པར་བཞེད་དེ། ཀུན་བརྟགས། གཞན་དབང་། ཡོངས་གྲུབ་གསུམ་མོ། །དེ་ཡང་གཟུང་འཛིན་གཉིས་ལྟར་དུ་སྣང་བ་གཞན་དབང་སྟེ་སེམས་ཀྱི་བག་ཆགས་སྣ་ཚོགས་པའི་དབང་ལས་སོ། །དེ་ལྟར་སྣང་བའི་ཡུལ་ཕྱི་རོལ་དུ་བློས་བརྟགས་ཤིང་སྒྲོ་བཏགས་པ་ནི་ཀུན་བརྟགས་ཏེ་དོན་དུ་མེད་པས་རྫུན་པ་སྟེ་ཀུན་རྫོབ་དང་། གཞན་དབང་ཀུན་བརྟགས་གཉིས་ཀའང་སེམས་ཀྱི་སྣང་ཆ་ཙམ་ལས་ཕྱི་རོལ་དུ་མེད་པར་ཤེས་ནས་སེམས་སུ་རྟོགས་པ་ཡོངས་གྲུབ་ཏུ་འདོད་ཅིང་། སེམས་བདེན་མེད་དུ་ནི་འདིས་མི་འདོད་དོ། །དེ་ལྟར་ཤེས་པ་གཟུང་འཛིན་གཉིས་མེད་ཡིན་ལ་གཟུང་འཛིན་གཉིས་མེད་ཀྱི་ཡེ་ཤེས་དོན་དམ་པའི་བདེན་པར་གསུངས་ཞེས། གསལ་རིག་ཙམ་གྱི་སེམས་དོན་དམ་བདེན་པ་འདོད་པ་ཡིན་ལ། དེ་ལྟར་ཕྱི་རོལ་གྱི་དོན་རྟོགས་ཚུལ་མ་ནོར་མོད་གཟུང་འཛིན་གཉིས་མེད་དུ་འདོད་ཀྱང་ཤེས་པའི་ངོ་བོར་རྫས་གཅིག་ཏུ་སོང་ཞིང་། རྣམ་ཤེས་ལ་དོན་དམ་བདེན་པར་འདོད་པའི་ཕྱིར་ཆོས་ཀྱི་བདག་མེད་ཇི་བཞིན་པ་མ་རྟོགས་ཏེ། མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱིས་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་རང་རྒྱལ་དང་ཕྱོགས་མཚུངས་པའི་ཕྱིར་ཉན་རང་སེམས་ཙམ་གསུམ་དངོས་པོར་སྨྲ་བའི་གྲུབ་མཐར་བཞག་པ་ཡིན་ནོ། །དེ་ལ་ནང་གསེས་ཀྱི་འདོད་ཚུལ་མི་འདྲ་བ་དུ་མ་ཡོད་དེ། རྣམ་བདེན་པ་དང་། རྣམ་རྫུན་པ་གཉིས། དང་པོས་ཁ་དོག་སྔོན་པོར་འཛིན་པའི་ཚེ་མིག་ཤེས་ལ་སྔོན་པོ་སྔོན་པོར་སྣང་བ་ལྟར་གྲུབ་པར་ཁས་ལེན། གཉིས་པས་སྔོན་པོར་སྣང་བ་དེ་ལྟར་མ་གྲུབ་པར་ཁས་ལེན། ཡང་རྣམ་བདེན་པས་སྔོན་པོར་འཛིན་པའི་མིག་ཤེས་ལ་སྔོན་པོ་ཕྱི་རོལ་དོན་དུ་སྣང་བ་ལ་མ་རིག་པས་བསླད་པ་བཞུགས་པར་འདོད་ལ། རྣམ་རྫུན་པས་སྔོན་པོ་ཕྱི་དོན་དུ་སྣང་བར་མ་ཟད། སྔོན་པར་སྣང་བ་དང་། སྔོན་པོར་རགས་སྣང་གཉིས་ཀ་ལ་མ་རིག་པས་བསླད་པར་འདོད། དེས་ན་དབང་ཤེས་ལ་རགས་པར་སྣང་བ་དེ་སྣང་བ་ལྟར་གྲུབ་པར་ཁས་ལེན་པ་རྣམ་བདེན་པ་དང་། དབང་ཤེས་ལ་རགས་པར་སྣང་བ་སྣང་བ་ལྟར་མ་གྲུབ་པར་འདོད་པ་རྣམ་རྫུན་པའོ། །རྣམ་བདེན་པ་ལའང་དབྱེ་ན། གཟུང་འཛིན་གྲངས་མཉམ་པ། སྒོ་ང་ཕྱེད་ཚལ་པ། སྣ་ཚོགས་གཉིས་མེད་པ་གསུམ་ལས། ཡུལ་ཁ་པོ་ཞིག་ལ་འཛིན་པའི་ཚེ་ཁ་དོག་སོ་སོའམ་ཐ་དད་པའི་ཡུལ་གྱི་རྣམ་པ་གཏད་པས། ཡུལ་ཅན་གྱི་ངོས་ནས་ཀྱང་མི་འདྲ་བ་རེ་རེའི་རྣམ་པ་རྣམ་བདེན་དུ་སྐྱེ་བར་འདོད་པ་དང་པོ་དང་། ཡུལ་གྱིས་ངོས་ནས་དེ་ལྟར་མི་འདྲ་བ་རེ་རེའི་རྣམ་པ་གཏད་པ་ལ་ཡུལ་ཅན་གྱི་ངོས་ནས་མི་འདྲ་བ་རེ་རེའི་རྣམ་པ་རྣམ་མེད་དུ་སྐྱེ་བར་འདོད་པ་གཉིས་པ་དང་། ཡུལ་གྱི་ངོས་ནས་མི་འདྲ་བ་རེ་རེའི་རྣམ་པ་མ་གཏད་ཅིང་ཁྲ་ཙམ་གྱི་རྣམ་པ་གཏད། ཡུལ་ཅན་གྱི་ངོས་ནས་ཀྱང་ཁྲ་ཙམ་གྱི་རྣམ་པ་རྣམ་མེད་དུ་སྐྱེ་བར་འདོད་པ་གསུམ་པའི་མཚན་ཉིད་དོ། །གཟུང་འཛིན་གྲངས་མཉམ་པ་ལ་རྣམ་ཤེས་ཚོགས་བརྒྱད་འདོད་པ་དང་། ཚོགས་དྲུག་འདོད་པ་གཉིས། སྣ་ཚོགས་གཉིས་མེད་པ་ལ་རྣམ་ཤེས་ཚོགས་དྲུག་དང་། རྣམ་ཤེས་གཅིག་བུར་སྨྲ་བ་གཉིས་སོ། །རྣམ་རྫུན་པ་ལ་དབྱེ་ན། དྲི་བཅས་པ་དང་། དྲི་མེད་པ་གཉིས། སེམས་ཀྱི་ངོ་བོ་ལ་མ་རིག་པའི་བག་ཆགས་ཀྱི་དྲི་མས་བསླད་པར་འདོད་པ་དྲི་བཅས་པ་དང་། སེམས་ཀྱི་ངོ་བོ་ལ་མ་རིག་པའི་བག་ཆགས་ཀྱི་དྲི་མས་ཅུང་ཟད་ཀྱང་མ་བསླད་པར་འདོད་པ་དྲི་མེད་པ་གཉིས་སོ། །སེམས་ཙམ་པས་གཟུགས་སོགས་དོན་ལྔ་པོ་ཕྱི་རོལ་དོན་མ་གྲུབ་སྟེ། བྱེ་མདོ་གཉིས་ཀྱིས་རྡུལ་རྫས་ལས་གྲུབ་པར་འདོད་པ་དེའང་རྡུལ་རྫས་ཕྱོགས་ཆ་དང་ཤེས་པ་དུས་ཆས་ཕྱེས་པས་བདེན་པར་གྲུབ་པ་མེད་དོ། །རྨི་ལམ་ཡུལ་གྱི་གཟུགས་སྒྲ་ལ་སོགས་པའི་ལོངས་སྤྱོད་བཞིན། འདི་ཐམས་ཅད་ཀུན་གཞིའི་རྣམ་ཤེས་ཀྱི་སྟེང་དུ་བག་ཆགས་བཞག་པའི་མཐུས་སེམས་ཀྱི་སྣང་ཆ་ཙམ་དུ་སྐྱེས་པ་ཡིན་ཏེ། རྒྱལ་བས། ཁམས་གསུམ་པོ་འདི་ནི་སེམས་ཙམ་མོ། །ཞེས་གསུངས་པའི་ཕྱིར་རོ། །ཚོགས་བརྒྱད་འདོད་པའི་ཚེ་ཀུན་གཞིའི་རྣམ་ཤེས་གང་ཟག་གི་གདགས་གཞིར་ཁས་ལེན། ཁ་ཅིག་ཡིད་ཀྱི་རྣམ་ཤེས་གང་ཟག་གི་གདགས་གཞིར་འདོད་པའང་ཡོད། ཀུན་གཞིའི་རྣམ་ཤེས་ནི་བག་ཆགས་སྣ་ཚོགས་འཇོག་པའི་གནས་ཡིན་ལ། ངོ་བོ་དགེ་མི་དགེ་གཉིས་ཀ་མིན་ཞིང་ཐར་པ་ལ་མི་སྒྲིབ་པའི་ཕྱིར་མ་བསྒྲིབས་ལུང་མ་བསྟན་དང་། གྲོགས་ཚོར་བ། འདུ་ཤེས། སེམས་པ། རེག་པ། ཡིད་བྱེད་དེ་ཀུན་འགྲོ་ལྔ་དང་མཚུངས་པར་ལྡན་པའོ། །ཉོན་ཡིད་ནི་ཀུན་བཞི་ལ་དམིགས་ཏེ་ཁ་ནང་བལྟས་ང་བདག་ཏུ་འཛིན་པ། འཁོར་བདག་ཏུ་ལྟ་བ་དང་། བདག་ཏུ་རྨོངས་པ་དང་། བདག་ཏུ་ང་རྒྱལ་བ་དང་། བདག་ལ་ཆགས་པ་དང་། ཀུན་འགྲོ་ལྔར་བཅས་པས་ལས་གསོག་པ་པོ་སྟེ་ངོ་བོ་ཐར་པ་ལ་སྒྲིབ་པར་བྱེད་པས་བསྒྲིབས་ལུང་མ་བསྟན་པ་ལ་འདོད་དོ། །དེ་ཡང་ཀུན་གཞི་དང་ཀུན་གཞིའི་རྣམ་ཤེས་སོ་སོར་དབྱེ་བ་ལྟར་ན་གོང་དུ་སྨོས་པ་ལྟར་རོ། ༈ །གཉིས་པ་བཀའ་འཁོར་ལོ་བར་བའི་དངོས་བསྟན་ཆོས་ཐམས་ཅད་སྟོང་པ་ཉིད་དུ་གཏན་ལ་ཕབ་པ་ཡུམ་རྒྱས་འབྲིང་བསྡུས་གསུམ་སོགས་ཤེར་ཕྱོགས་རྣམས་དང་། དགོངས་འགྲེལ་གྱི་བསྟན་བཅོས་འཕགས་པ་ཀླུའི་རིགས་ཚོགས་དྲུག་དང་། ཟླ་བའི་འཇུག་པ་སོགས་སུ་བཀྲལ་བའི་ཐེག་ཆེན་དབུ་མ་ལ་གནས་སྐབས་དང་མཐར་ཐུག་གཉིས་ལས། དང་པོ་ནི་རང་སྟོང་པ་སྟེ། བདེན་པར་གྲུབ་པའི་ཆོས་རྡུལ་ཙམ་ཡང་མེད་པར་ཁས་ལེན་པའོ། །དེ་བཞིན་དུ་བདེན་པར་གྲུབ་པའི་ངོ་བོ་ཉིད་མེད་པར་སྨྲ་བས་ན་ངོ་བོ་ཉིད་མེད་པའི་དབུ་མ་པ་ཞེས་འདོད་དོ། །དེ་ལ་དབྱེ་བ་དང་། རང་རྒྱུད་པ་དང་ཐལ་འགྱུར་བ་གཉིས་ཡོད། དེ་ལ་རང་རྒྱུད་པས་ཆོས་ཐམས་ཅད་ཐ་སྙད་ཙམ་དུ་རང་གི་མཚན་ཉིད་ཀྱིས་གྲུབ་པར་ཁས་ལེན། དེ་ལ་དབྱེ་ན་རྣལ་འབྱོར་སྤྱོད་པའི་དབུ་མ་རང་རྒྱུད་པ་དང་། མདོ་སྡེ་སྤྱོད་པའི་དབུ་མ་རང་རྒྱུད་པ་གཉིས་སོ། །རྣལ་འབྱོར་སྤྱོད་པའི་དབུ་མ་པས་ཀུན་རྫོབ་ཏུ་ཤེས་པ་ལ་གསལ་ལོ་ཅོག་ཐམས་ཅད་ཤེས་པའི་དངོས་པོ་ཡིན་ཏེ། ཕྱི་རོལ་གྱི་དོན་དུ་མེད་དོ་ཞེས་སེམས་ཙམ་རྣམ་བཅས་པ་དང་མཐུན་པར་འདོད་པ་སྟེ། མཁན་པོ་ཞི་བ་འཚོ་སོགས་ཀྱིས་བཞེད་པ་ཡིན་ནོ། །མདོ་སྡེ་སྤྱོད་པའི་དབུ་མ་པ་ནི། ཉན་ཐོས་མདོ་སྡེ་པའི་འདོད་པ་ལྟར་ཁས་ལེན་ཏེ། ཤེས་པ་ལ་ཕྱི་རོལ་གྱི་དོན་ཉིད་དངོས་སུ་མི་སྣང་ཡང་དོན་གྱི་ཤེས་པ་ལ་རང་གི་རྣམ་པ་གཏད་པས་ཤེས་པ་དོན་དང་འདྲ་བའི་རྣམ་པར་སྐྱེས་པ་ལ་དོན་རིག་གོ་ཞེས་དམིགས་པའི་ཚུལ་གྱིས་དོན་ཡོངས་སུ་སྤྱོད་པ་དུས་ཐ་དད་པའི་གཟུང་འཛིན་ཀུན་རྫོབ་ཏུ་གནས་སོ་ཞེས་སྨྲ་བ་ནི་སློབ་དཔོན་ལེགས་ལྡན་འབྱེད་སོགས་སོ། །རྣལ་འབྱོར་སྤྱོད་པའི་དབུ་མ་རང་རྒྱུད་པ་ལའང་རྣམ་བདེན་པ་དང་མཚུངས་པ་ཞི་མཚོ་དང་ཀ་མ་ལ་ཤཱི་ལ་སོགས་སོ། །རྣམ་རྫུན་པ་དང་མཐུན་པར་ཁས་ལེན་པ་ཡེ་ཤེས་སྙིང་པོ་སོགས་སོ། །གྲུབ་མཐའི་འདོད་ཚུལ་གཞི་ལམ་འབྲས་གསུམ་ལས། གཞི་ལ་ཡུལ་དང་ཡུལ་ཅན་གཉིས། ཡུལ་ཤེས་བྱ་ལ། ཀུན་རྫོབ་དང་དོན་དམ་གཉིས། དང་པོ་ནི་སྒྲིབ་པར་བྱེད་པས་ན་ཀུན་རྫོབ་སྟེ། གང་ལ་སྒྲིབ་ཅེ་ན། ཡང་དག་པའི་དོན་ལ་སྒྲིབ་པར་བྱེད་པ་འཁྲུལ་པའི་ཤེས་པའོ། །འཁྲུལ་ཤེས་དེ་ཉིད་ཀྱི་ཡུལ་དུ་བདེན་པས་ན་བདེན་པ་ཞེས་བཏགས་ཏེ་གཟུགས་སྒྲ་སོགས་སྣ་ཚོགས་པའི་ཆོས་སྣང་ཚོད་རྨི་ལམ་ལྟ་བུར་ཤར་བ་ཐམས་ཅད་དོ། །མཚན་ཉིད་ཀྱང་། ཀུན་རྫོབ་ཀྱི་ཆོས་ཐམས་ཅད་རང་གི་ངོ་བོ་བདེན་པས་སྟོང་ཞིང་རང་བཞིན་མེད་པ། རིགས་པས་དགག་པར་ནུས་པས་དཔྱད་མི་བཟོད་པ་ཟེར། གཉིས་པ་ནི། ངེས་ལེགས་དོན་དུ་གཉེར་བྱའི་འབྲས་བུ་ཡིན་པས་དོན་དམ་པ་དེ་ཉིད་བློ་མ་འཁྲུལ་བའི་ངོ་བོ་རིགས་པའི་ཤེས་པ་ཡིན་ཅིང་། གྱ་ནོམ་མཆོག་ཏུ་གྱུར་པས་ཀྱང་དམ་པ་སྟེ། བློ་མ་འཁྲུལ་བ་དེའི་ཡུལ་དུ་བདེན་པས་ན་བདེན་པ་སྟེ་དེ་བཞིན་ཉིད་དོ། །མཚན་གཞི་ནི། བུམ་པ་བདེན་པས་སྟོང་པ་དོན་དམ་གྱི་མཚན་གཞི། བུམ་པར་སྣང་བ་ཀུན་རྫོབ་ཀྱི་མཚན་གཞི། དབྱེ་ན། ཀུན་རྫོབ་ལ་ཡང་དག་ཀུན་རྫོབ་དང་། ལོག་པའི་ཀུན་རྫོབ་གཉིས་ལས། དང་པོ་ནི། སྣང་ལ་དོན་བྱེད་ནུས་པ་ཆུ་དང་ཟླ་བ་ལྟ་བུ། གཉིས་པ་ནི། སྣང་ཡང་དོན་བྱེད་མི་ནུས་པ་སྨིག་རྒྱུ་དང་ཆུ་ཟླ་ལྟ་བུའོ། །དོན་དམ་ལ་དབྱེ་ན། སྐྱེ་བ་ལ་སོགས་བཀག་ཙམ་ལས་སྐྱེ་མེད་ཀྱི་སྤྲོས་པ་ལས་མ་གྲོལ་བ་རྣམ་གྲངས་པའི་དོན་དམ་དང་། སྐྱེ་བ་དང་སྐྱེ་མེད་ལ་སོགས་པའི་སྤྲོས་པ་ཐམས་ཅད་ལས་གྲོལ་བ་རྣམ་གྲངས་མ་ཡིན་པའི་དོན་དམ་གཉིས་སོ། །ཡུལ་ཅན་ལ། ཡིད་ཀྱི་རྣམ་ཤེས་གང་ཟག་གི་གདགས་གཞིར་འདོད་ཅིང་། ཀུན་གཞི་དང་ཉོན་ཡིད་ཁས་མི་ལེན་ཞིང་རྣམ་ཤེས་ཚོགས་དྲུག་འདོད་པའོ། །སྐྱེ་འགག་ལ་སོགས་མེད་པར་ངེས་པ་ཡང་གཏན་ཚིགས་ཆེན་པོ་ལྔས་ཁོང་དུ་བསྡུ་པར་འདོད་དེ། རྒྱུ་ལ་དཔྱོད་པ་རྡོ་རྗེ་གཟེགས་མ་དང་། འབྲས་བུ་ལ་དཔྱོད་པ་ཡོད་མེད་སྐྱེ་འགོག །རྒྱུ་འབྲས་གཉིས་ཀ་ལ་དཔྱོད་པ་མུ་བཞི་སྐྱེ་འགོག །མ་ཡིན་དགག་གཏན་ཚིགས་སུ་བཀོད་ནས་འགོག་པ་རྟེན་འབྲེལ་ཆེན་པོ། མེད་དགག་གཏན་ཚིགས་སུ་བཀོད་པ་གཅིག་དང་དུ་བྲལ་ལོ། །དང་པོ་ནི། ཆོས་ཐམས་ཅད་རང་དང་གཞན་དང་གཉིས་ཀ་དང་གཉིས་ཀ་མ་ཡིན་པ་ལས་མ་སྐྱེས་པ་དེ་ཉིད་སྐྱེ་བའི་དངོས་པོས་སྟོང་སྟེ། དངོས་པོ་མེད་པའི་དོན་སྤྱི་བཞིན་ནོ། །གཉིས་པ་ནི། རྒྱུ་ལས་འབྲས་བུ་ཡོད་པ་དང་མེད་པ་སྐྱེ་བས་སྟོང་པ་དེ། སྐྱེ་བའི་དངོས་པོ་མཐའ་དག་གིས་སྟོང་སྟེ། དངོས་པོ་མེད་པའི་དོན་སྤྱི་བཞིན་ནོ། །གསུམ་པ་ནི། གང་གཅིག་ལས་གཅིག་དང་། གཅིག་ལས་དུ་མ་དང་། དུ་མ་ལས་གཅིག་དང་། དུ་མ་ལས་དུ་མ་སྐྱེ་བས་སྟོང་པ་དེ། སྐྱེ་བའི་དངོས་པོ་མཐའ་དག་གིས་སྟོང་སྟེ། དངོས་པོ་མེད་པའི་དོན་སྤྱི་བཞིན་ནོ། །འདི་ལྟར་སྣང་བའང་དོན་དམ་པར་གཅིག་ལས་གཅིག་དང་དུ་མ་དང་། དུ་མ་ལས་དུ་མ་དང་གཅིག་ཅིག་སྐྱེ་བ་སྟེ་མུ་བཞིའི་སྐྱེ་བས་སྟོང་པས་སོ། །བཞི་པ་ནི། གང་སྣང་བ་ཐམས་ཅད་རྟེན་ཅིང་འབྲེལ་བར་འབྱུང་བ་ཡིན་པས་བདེན་པའི་རང་བཞིན་གྱིས་སྟོང་སྟེ། དཔེར་ན་གཟུགས་བརྙན་བཞིན་ནོ། །ལྔ་པ་ནི། གང་གཅིག་དང་དུ་མ་དང་བྲལ་བས་ཁྱབ་པ་དེ་བདེན་པའི་དངོས་པོས་སྟོང་པས་ཁྱབ་སྟེ། དཔེར་ན་དངོས་པོ་མེད་པའི་དོན་སྤྱི་བཞིན་ནོ། །གཟུགས་སོགས་འདི་ལྟར་སྣང་བའང་། དོན་དམ་པའི་གཅིག་དང་དུ་བྲལ་ཁྱབ་བྱེད་དུ་ཡོད་པའི་ཕྱིར་རོ། །གཏན་ཚིགས་དེ་རྣམས་ཀྱིས་བསྒྲུབ་བྱ་སྒྱུ་མ་ཙམ་དུ་ཡོད་ཀྱི་ངེས་པའི་དོན་དུ་མེད་པར་ཡོངས་གཅོད་མ་ཡིན་དགག་མིན་ཞིང་། བདེན་པའི་དངོས་པོ་བཀག་པ་ཙམ་རྣམ་གཅོད་མེད་དགག་སྒྲུབ་པ་ཡིན། ལུགས་འདིས་རིག་ཤེས་རྗེས་དཔག་གི་རང་བཞིན་སྐྱེ་མེད་སྤྲོས་བྲལ་དཔྱད་བཟོད་དོན་དམ་བདེན་པའི་མཚན་ཉིད་དུ་དབུ་མ་རང་རྒྱུད་པ་འདོད་པ་ཡིན་ནོ། །འདི་མཐར་ཐུག་གི་དབུ་མ་མ་ཡིན་ཏེ། དོན་དམ་པར་མེད་ལ་ཀུན་རྫོབ་ཏུ་ཡོད་པར་འདོད་པས་རྟག་ཆད་ཀྱི་དངོས་པོ་ལས་མ་འདས་ཤིང་། བློས་བཅད་པའི་རིགས་ཤེས་ཙམ་རྟོག་པ་ཉིད་ལས་ཡང་དག་པའི་དོན་དམ་དུ་མི་རུང་ཞིང་། འཇམ་དཔལ་གྱིས་ལྟ་འདོད་མདོར་བསྟན་དུ། ཕུང་པོ་རྣམ་དཔྱོད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །ཅེས་གསུངས་པ་དང་། སྤྲོས་པ་བཀག་ཙམ་དེའང་སྤྲོས་པའི་བྱེ་བྲག་ལས་མ་འདས་པ་སོགས་དང་། སློབ་དཔོན་ཀླུས། གང་ཀུན་རྫོབ་ཏུ་ཡོད་པར་ཁས་བླངས་པ་དེའི་ཚེ་རྟག་པར་འགྱུར་ལ། དོན་དམ་པར་མེད་པར་འདོད་པ་དེའི་ཚེ་ཆད་པར་འགྱུར་རོ། །ཞེས་གསུངས་པའི་ཕྱིར་རོ། །རང་རྒྱུད་པ་འདིས། རིགས་ཤེས་ཀྱི་དཔྱད་པས་བསྒྲུབ་བྱ་མེད་དགག་ཁོ་ན་སྤྲོས་བྲལ་ནམ་མཁའ་ལྟ་བུ་ངེས་དོན་མཐར་ཐུག་ཏུ་འདོད་ལ། མྱ་ངན་ལས་འདས་པའི་སངས་རྒྱས་ཀྱི་སྐུ་དང་ཞིང་ཁམས་སོགས་དང་། འཁོར་བའི་གཟུགས་སྒྲ་ལ་སོགས་ཐམས་ཅད་ཀུན་རྫོབ་རྟེན་ཅིང་འབྲེལ་འབྱུང་ཙམ་སྟེ། སྟོང་པ་དང་རྟེན་འབྱུང་མི་འགལ་བར་འདོད་ལ། དོན་དམ་པར་སྐུ་དང་ཞིང་ཁམས་སོགས་ཀྱང་གདུལ་བྱ་གཞན་སྣང་ཡིན་པ་ལས། སངས་རྒྱས་རང་སྣང་ལ་མེད་པར་སྨྲ་ཞིང་། སངས་རྒྱས་ཀྱི་གནས་སྐབས་སུ་སེམས་ཀྱི་རྒྱུན་ཐམས་ཅད་འགགས་པས་ཡེ་ཤེས་ཀྱང་མི་འདོད་དེ་སྤྲོས་པ་ཐམས་ཅད་ཞི་བའི་འགོག་པ་དམ་པ་ལ་གནས་པར་བཤད་དེ། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགགས་པ་དེ་སྐུ་ཡིས་མངོན་སུམ་མཛད། །ཅེས་པ་དང་མཐུན་ནོ། །གཟུགས་སྐུ་གཉིས་གཞན་དོན་དུ་འཆར་བའི་རྒྱུ་ནི་སྔར་གཞན་དོན་དུ་ཐུགས་བསྐྱེད་ནས་ཚོགས་ལམ་པའི་སྐབས་སོགས་སུ་སྦྱིན་སོགས་བསོད་ནམས་ཀྱི་ཚོགས་བསགས་པ་ལས་བྱུང་བར་འདོད། ལམ་དང་། འབྲས་བུ་སོགས་གཞི་ཐེག་ཆེན་ལ། ལམ་ལྔ་དང་ས་བཅུ་བགྲོད་ནས་འབྲས་བུ་སངས་རྒྱས་ཀྱི་སྐུ་བཞི་སོགས་ཁས་ལེན། གང་ཟག་རྟག་གཅིག་རང་དབང་ཅན་དང་། གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་གང་ཟག་གི་བདག་མེད་རགས་ཕྲ་དང་། གཟུང་འཛིན་རྫས་གཞན་གྱི་སྟོང་པ་ཆོས་ཀྱི་བདག་མེད་རགས་པ་དང་། ཆོས་ཐམས་ཅད་བདེན་གྲུབ་ཀྱིས་སྟོང་པ་ཆོས་ཀྱི་བདག་མེད་ཕྲ་མོར་འདོད། སྤང་བྱ་ནི། གང་ཟག་གི་བདག་འཛིན་ཉོན་སྒྲིབ་དང་། ཆོས་ཀྱི་བདག་འཛིན་ཤེས་སྒྲིབ་ཏུ་འདོད། བཀའ་འཁོར་ལོ་བར་པ་ངེས་དོན་མཐར་ཐུག་ཏུ་འདོད་ཅིང་། དང་པོ་དྲང་དོན། ཐ་མ་དྲང་ངེས་ཅི་རིགས་སུ་འདོད་པ་དང་། སེམས་ཅན་གྱི་རྒྱུད་ལ་སངས་རྒྱས་ཡོད་པར་གསུངས་པ་དྲང་དོན་ཡིན་ཞིང་། དེ་སྟོན་པའི་འཁོར་ལོ་ཐ་མའི་མདོ་དགོངས་འགྲེལ་དང་བཅས་པ་དྲང་དོན་དུ་འདོད་ཅིང་བྱམས་ཆོས་བཞི་དང་ཐོགས་མེད་སྐུ་མཆེད་ཀྱི་བསྟན་བཅོས་རྣམས་ལ་སེམས་ཙམ་རྣམ་རྫུན་པ་དང་། ཕྱོགས་གླང་སོགས་རྣམ་བདེན་པ་ཡིན་ཞེས་ཟེར་རོ། ༈ །གཉིས་པ་དབུ་མ་ཐལ་འགྱུར་པ་ནི། བློ་མ་འཁྲུལ་བ་དང་འཁྲུལ་པའི་དབྱེ་བ། དེ་ལ་ལྟོས་ནས་བདེན་གཉིས་ཀྱི་འདོད་ཚུལ་ལོ། །དང་པོ་ནི། སློབ་དཔོན་ཀླུ་སྒྲུབ་ཀྱི་བཞེད་པ་ཐུན་མོང་མིན་པ་འཛིན་པ་སློབ་དཔོན་ཟླ་བ་གྲགས་པ་སོགས་ཀྱིས་འདི་ལྟར་བཞེད་དེ། ས་ཐོབ་པའི་མཉམ་གཞག་དང་སངས་རྒྱས་ཀྱིས་ན་ཤེས་བྱ་དང་ཤེས་བྱེད་ལ་སོགས་པའི་ཡུལ་དང་ཡུལ་ཅན་གྱི་གཟུང་འཛིན་དུ་སྣང་བ་གང་ཡང་མ་གྲུབ་པས། ཡུལ་ཅན་ཡེ་ཤེས་ཀྱི་འཇུག་པའང་ཞེ་བ་སྟེ། དེའི་ཚེ་སེམས་བྱུང་གི་འཇུག་པ་ཐམས་ཅད་རྒྱུན་ཆད་དེ་སྨྲ་བསམ་བརྗོད་དུ་མེད་པའི་ཡེ་ཤེས་ལ་ཆོས་ཉིད་རྟོགས་པ་ཡང་དག་པའི་བློ་མ་འཁྲུལ་བ་ཞེས་བྱ་བར་བཏགས་ཏེ། འཇུག་པ་ལས། གང་ཚེ་སྐྱེ་མེད་དེ་ཉིད་ཡིན་ཞིང་བློ་ཡང་སྐྱེ་བ་དང་བྲལ་བ། དེ་ཚེ་དེ་རྣམ་བསྟེན་ལས་དེ་ཡིས་དེ་ཉིད་རྟོགས་པ་ལྟ་བུ་སྟེ། ཇི་ལྟར་སེམས་ནི་གང་གི་རྣམ་པ་ཅན་དུ་འགྱུར་བ་དེ་ཡིས་ཡུལ། དེ་ཡོངས་ཤེས་པ་དེ་བཞིན་ཐ་སྙད་བརྟེན་ནས་རིག་པ་ཡིན། ཞེས་དང་ཚིགས་གསལ་ལས་ཀྱང་། འདིར་སེམས་དང་སེམས་ལས་བྱུང་བའི་སྤྲོས་པ་ཡང་རྒྱུན་ཆད་དེ། ཞེས་སོ། །དེའི་གནས་སྐབས་ནི་དོན་དམ་པའི་བདེན་པ་རྟོགས་པ་ཞེས་བཏགས་སོ། །དེའི་ཡུལ་ནི་གཤིས་ཀྱི་གནས་ལུགས་ཆོས་ཀྱི་དབྱིངས་རང་བཞིན་གྱིས་དག་པ་ཡིན་ནོ། །མཐོང་བ་བརྫུན་པ་བློ་འཁྲུལ་པ་ནི་སོ་སྐྱེ་མ་རིག་པའི་བག་ཆགས་ཀྱིས་མིག་ལྡོངས་པས་རབ་རིབ་དང་སྐྲ་ཤད་འཛག་པ་ལ་དོན་དུ་ཞེན་པ་ལྟར། འགྲོ་བ་དྲུག་གི་གནས་ལུས་ལོངས་སྤྱོད་བདེ་སྡུག་སྣ་ཚོགས་སུ་སྣང་བ་འཁྲུལ་པ་རྟེན་ཅིང་འབྲེལ་བར་འབྱུང་བའི་གཟུང་འཛིན་གྱི་རྣམ་པ་རྣམས་དང་། ས་ཐོབ་པའི་རྗེས་ཐོབ་ནི་གཞན་དང་ཐུན་མོང་དུ་སྣོད་བཅུད་ལ་སོགས་པར་སྣང་བ་རྣམས་སོ། །བདེན་པ་གཉིས་ཀྱི་མཚན་གཞི་ནི། སྤྱི་ཐུན་མོང་གི་དབྱེ་གཞི་མཚན་ཉིད་པ་མེད་ཅིང་སྟོང་པ་ཉིད་ཡིན་ཏེ་དོན་དུ་མ་གྲུབ་པའི་ཕྱིར་རོ། །འོན་ཀྱང་འཇིག་རྟེན་པའི་བློ་ངོ་ན་བདེན་པ་མ་ཡིན་པ་ལས་ལོག་ཙམ་གྱི་བདེན་པ་ཙམ་ཞིག་གནས་པ་ལ་བྱ་སྟེ། ཀླུ་ཞབས་ཀྱིས། བདེན་པ་གཉིས་སུ་འཇིག་རྟེན་པའི་བློ་ལ་ལྟོས་ནས་འཇོག་གོ། །ཞེས་སོ། །ཀུན་རྫོབ་བདེན་པའི་མཚན་གཞི་ནི་རྣམ་ཤེས་དྲུག་པོ་སྣང་བའི་ཡུལ་དང་བཅས་པའི་རྣམ་པ་རྣམས་སོ། །དབུ་མ་པས་རྣམ་ཤེས་དྲུག་ཏུ་འཇོག་ཚུལ་ཉན་ཐོས་དང་འདྲའོ། །དོན་དམ་བདེན་པ་ནི། ཆོས་ཀྱི་དབྱིངས་ངོ་བོ་ཉིད་ཀྱིས་དག་པའོ། །མཚན་ཉིད་ཀྱང་། ཀུན་རྫོབ་ཀྱི་མཚན་ཉིད་གཟུང་འཛིན་སྤྲོས་པ་དང་བཅས་པའི་རྣམ་པར་སྣང་བ་སྒྲིབ་པའི་རྣམ་པར་སྐྱེ་བ་སྟེ། འཇུག་པ་ལས། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །དེས་གང་བཅོས་མ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པ་དེས་གསུངས་སོ། །ཞེས་སོ། །དེའང་འཁོར་བའི་ཆོས་སེམས་དང་སེམས་ལས་བྱུང་བ་ཡུལ་གྱི་རྣམ་པ་སྣང་བ་དང་བཅས་པ་ཐམས་ཅད་ཀུན་རྫོབ་ཡིན་ལ། ས་ཐོབ་ཀྱང་སེམས་སེམས་བྱུང་མ་འགགས་པའི་ཆ་ཡུལ་མ་དག་པ་གཟུགས་ཚོགས་དྲུག་སྣང་བ་དང་བཅས་པ་སྤང་བྱར་གྱུར་ཏོ་ཅོག་ཀུན་རྫོབ་ཀྱི་ཕྱོགས་སུ་བསླན་ནས་འཁྲུལ་པར་བཞག་གོ། །དོན་དམ་པའི་བདེན་པའི་མཚན་ཉིད་ནི་གཟུང་འཛིན་སྤྲོས་པ་དང་བྲལ་བའི་ངོ་བོ་སྟེ། དེའང་སྒྲ་ཚིག་ལ་སོགས་པས་དངོས་སུ་མི་རྟོགས་པའི་ཆ་ནས་གཞན་ལས་ཤེས་པ་མ་ཡིན་པ། སེམས་སེམས་བྱུང་གི་རྙོག་པ་ཆོས་ཀྱི་དབྱིངས་སུ་ཞེས་པ་རྣམ་རྟོག་ལས་འདས་པ། སྤྲོས་པ་ཐམས་ཅད་དང་བྲལ་བ། གྲུབ་པའི་མཐས་མ་རེག་པ་སྟེ། རྩ་བ་ཤེས་རབ་ལས། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མིན། །དེ་ནི་དེ་ཡི་མཚན་ཉིད་དོ། །ཞེས་སོ། །དེའང་དོན་གཅིག་པ་དང་ཐ་དད་པ་ལ་སོགས་པ་ནི་དངོས་པོར་སྨྲ་བ་དག་གི་གྲུབ་མཐའ་ཡིན་པས་དེས་མ་རེག་པ་ཙམ་དུ་མ་ཟད། སྤྲོས་པ་དང་བྲལ་བ་དབུ་མ་པའོ་ཞེས་པར་ཡང་མ་གྲུབ་པ་ཡིན་ནོ། །མདོར་ན་མྱ་ངན་ལས་འདས་པའི་ཆོས་ཟབ་པ་དང་ཞི་བ་རང་བཞིན་གྱིས་རྣམ་པར་དག་པའི་དབྱིངས་དང་། དེ་རྟོགས་པའི་བློ་སྒྲིབ་པ་ཐམས་ཅད་དང་བྲལ་བ་སངས་རྒྱས་ཀྱི་ཡེ་ཤེས་ཡུལ་རྣམ་པར་དག་པ་འགྱུར་བ་མེད་པར་སྣང་བ་དང་། ས་ཐོབ་པའི་མཉམ་གཞག་གི་ཡེ་ཤེས་དང་། དེའི་ངོ་བོ་གཅིག་ཏུ་གནས་པའི་རྗེས་ཐོབ་སྣང་བ་ལྷག་མཐོང་གི་རྣམ་པར་གྱུར་ཏོ་ཅོག་དོན་དམ་པའི་བདེན་པའོ། །ཀུན་རྫོབ་ལ། མིག་སྐྱོན་ལྡན་ལ་སྐྲ་ཤད་དུ་སྣང་བ་མིག་དག་པས་ཅིར་ཡང་མ་མཐོང་བ་བཞིན་དུ། བློ་འཁྲུལ་པ་ལ་སྣ་ཚོགས་སུ་སྣང་བ་ཉིད་འཕགས་པའི་མཉམ་བཞག་དང་འཁྲུལ་པ་ཟད་པའི་སངས་རྒྱས་ལ་ཅིར་ཡང་དམིགས་པར་བྱ་བ་མེད་པས་ད་ལྟར་གྱི་འཁྲུལ་སྣང་རང་ག་མ་ཆ་དང་བཅས་པའི་མི་སྣང་བར་འདོད་དེ། དེ་ཉིད་ལས། རབ་རིབ་མཐུ་ཡིས་སྐྲ་ཤད་ལ་སོགས་པའི། ངོ་བོ་ལོག་པ་གང་ཞིག་རྣམ་བརྟགས་པ། །དེ་ཉིད་བདག་ཉིད་གང་དུ་མིག་དག་པས། །མཐོང་དེ་དེ་ཉིད་དེ་བཞིན་འདིར་ཤེས་གྱིས། །ཞེས་སོ། །འོ་ན་སེམས་ཅན་གྱི་དོན་ཇི་ལྟར་མཛད་ཅེ་ན། གདུལ་བྱའི་བསོད་ནམས་དད་མོས་པ་དང་སངས་རྒྱས་ཀྱི་ཐུགས་རྗེ་ལས་སྣང་བའི་སྤྲུལ་པས་དོན་མཛད་པ། དཔེར་ན། རྨི་ལམ་ནང་དུ་གཉིད་དུ་མ་སོང་བས་སྤྲུལ་པ་བཏང་ནས་ཆོས་འཆད་པ་ལ་སོགས་རང་སྣང་དང་མཐུན་པར་དོན་མཛད་དུས། གདུལ་བྱའི་སྣང་ངོའི་རྨི་ལམ་ཡང་མ་འགགས་པར་འཆར་བ་དངོས་སུ་དེ་ཉིད་ལ་སྣང་བ་མཁྱེན་དུས། རང་ཉིད་ལ་རྨི་ལམ་མེད་དེ་གཉིད་དུ་མ་སོང་བའི་ཕྱིར་ན། ཚུལ་དེ་བཞིན་དུ་སེམས་ཅན་ལ་འཁྲུལ་སྣང་ཤར་བར་མཁྱེན་ནས་དོན་མཛད་ཀྱང་རང་ཉིད་ལ་འཁྲུལ་སྣང་ཅུང་ཟད་ཀྱང་སྣང་བ་མེད་དོ། །བདེན་གཉིས་ཀྱི་ངེས་ཚིག་ནི། རང་རྒྱུད་ཀྱི་སྐབས་སུ་སྨོས་པ་ལྟར་ལ། བདེན་པ་ཞེས་པ་མ་དཔྱད་ན་བདེན་པར་སྣང་ཙམ་ཀུན་རྫོབ་དང་། དཔྱད་ན་གནོད་མེད་དུ་གནས་པ་དོན་དམ་མོ། །ངེས་བྱེད་ཀྱི་ཚད་མ་ནི། ཆོས་དབྱིངས་དོན་དམ་པ་ཆོས་ཅན། སྤྲོས་པ་ལས་གྲོལ་བར་ཐལ། དམིགས་བཅས་ཀྱི་བློ་ཡི་སྤྱོད་ཡུལ་མ་ཡིན་པའི་ཕྱིར། དེའང་ཡེ་ཤེས་ཀྱིས་ནི་དམིགས་པ་མོད་པའི་ཚུལ་གྱིས་རྟོགས་སོ། །ཆོས་ཅན་ཀུན་རྫོབ་པ་རྣམས་ཆོས་ཅན། སྤྲོས་པ་དང་བཅས་པར་ཐལ། དམིགས་བཅས་ཀྱི་བློའི་སྤྱོད་ཡུལ་ཡིན་པའི་ཕྱིར། ཁྱབ་པ་ཡོད་དེ། དམིགས་བཅས་ཀྱི་བློ་དང་། དེའི་ཡུལ་རྣམས་ནི་ཀུན་རྫོབ་ཡིན་པའི་ཕྱིར་རོ། །དེ་ལྟར་ཤེས་ནས་ཉམས་སུ་བླང་བའི་ཚུལ་ནི། སྦྱོར་བ་བྱང་ཆུབ་ཏུ་སེམས་བསྐྱེད་ནས། ཆོས་ཐམས་ཅད་གང་དུའང་མ་གྲུབ་པར་ལྟ་བས་ཐག་བཅད་པའི་ངང་དེར་སེམས་སྤྲོ་བསྡུ་དང་བྲལ་བར་བསྒོམ་པ་སྟེ། སྤྱོད་འཇུག་ལས། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་པས། དེའི་ངང་ལ་ཅི་ཙམ་གནས་ཀྱི་བར་བཞག་ནས་བསྔོ་བ་བྱ་བ་ནི་དོན་དམ་བདེན་པའི་བླང་ཚུལ་ལོ། །ཀུན་རྫོབ་བླང་ཚུལ་ནི་མཉམ་བཞག་པས་ལངས་པའི་རྗེས་ཐོབ་ཏུ་ཆོས་ཐམས་ཅད་སྒྱུ་མའི་དཔེ་བརྒྱད་དུ་ཤེས་པས་བསོད་ནམས་ཀྱི་ཚོགས་བསག་གོ། །དེ་ལྟར་མཉམ་རྗེས་ཐབས་དང་ཤེས་རབ་ཟུང་དུ་འབྲེལ་པས་ཡེ་ཤེས་དང་བསོད་ནམས་ཀྱི་ཚོགས་བསགས་པས་མཐར་ཆོས་སྐུ་དང་གཟུགས་སྐུ་དམ་པ་གཉིས་ཐོབ་སྟེ། དེའང་གཞི་དབུ་མ་བདེན་གཉིས་ཟུང་འཇུག །ལམ་དབུ་མ་ཚོགས་གཉིས་ཟུང་འཇུག །འབྲས་བུ་དབུ་མ་སྐུ་གཉིས་ཟུང་འཇུག་ཏུ་འདུས་པ་ཡིན་ནོ། །ཐལ་འགྱུར་བའི་སྤྲོས་པ་གཅོད་ཚུལ་ཡང་སྔར་སྨོས་གཏན་ཚིགས་ལྔས་ཆོས་ཐམས་ཅད་རང་བཞིན་མེད་པར་གཞལ་ལ། རང་རྒྱུད་པ་ལྟར་ཀུན་རྫོབ་བདེན་པ་བཀག་ནས་རྫུན་པར་སྒྲུབ་པ་དང་། དོན་དམ་ལ་སྤྲོས་པ་བཀག་ནས་སྤྲོས་མེད་སྒྲུབ་པ་ལྟར་མ་ཡིན་ཏེ། གང་དུ་ཞེན་པ་དེ་དངོས་སུ་བཀག་ཀྱང་ཤུགས་ལ་བསྒྲུབ་བྱ་གང་གང་ཡང་མི་སྒྲུབ་པས་ཕ་རོལ་གྱི་ལོག་རྟོགས་ཟློག་པར་བྱེད་དོ། །ཐལ་འགྱུར་འདིས་གྲུབ་པའི་མཐའ་ཐམས་ཅད་བཀག་ནས་རང་ལས་སྤྲོས་པའི་གྲུབ་མཐའ་ཁས་མི་ལེན་ཏེ། རྩོད་བཟློག་ལས། གལ་ཏེ་ངས་དམ་བཅས་འགའ་ཡོད། དེ་ཚེ་ང་ལ་སྐྱོན་དེ་ཡོད། ང་ལ་དམ་བཅའ་མེད་པས་ན། ང་ནི་སྐྱོན་མེད་ཁོ་ན་ཡིན། །ཞེས་སོ། །དེས་ན་ཐལ་འགྱུར་པས་ཡོད་མེད་ཡིན་མིན་གང་དུའང་བརྗོད་དུ་མེད་པ་ལ་དེ་ཉིད་རྟོགས་པར་འཇོག་སྟེ། ཀླུ་སྒྲུབ་ཀྱིས། ཁས་བླངས་པ་ཡི་དངོས་པོ་ནི། །ཕྲ་རབ་ཙམ་ཡང་ཡོད་མིན་ཏེ། །གདོད་ནས་སྐྱེ་བ་མེད་པའི་ཕྱིར། །མོ་གཤམ་གྱི་ནི་བུ་བཞིན་ནོ། །དཔེར་ན་བུད་མེད་མོ་གཤམ་ལ། །ཁྱོད་ཀྱི་བུ་ནི་གང་ཡིན་དྲིས། །དེ་ལ་དེ་ནི་ཡོད་མིན་པས། །སྨྲ་བར་ནུས་པ་མ་ཡིན་ནོ། །ཞེས་གསུངས་ཤིང་། དོན་གྱི་ངོ་བོ་ཡེ་གདོད་མའི་གནས་ལུགས་སམ་གཤིས་ལུགས་མ་བཅོས་པ་སྤྲོས་པ་ཐམས་ཅད་དང་བྲལ་བ་སྟེ། རྫོགས་ཆེན་དུ་ཆོས་ཐམས་ཅད་ཡེ་ནས་སངས་རྒྱས་པར་གསུངས་པ་དང་དོན་གཅིག་པ་ཉིད་དོ། །དེ་ལྟར་ན་བདེན་གཉིས་ལ་སོགས་པའི་རྣམ་གཞག་ཀྱང་ཇི་ལྟར་བྱ་ཞེ་ན། འཇིག་རྟེན་པས་སྒྲོ་བཏགས་པ་ཙམ་དུ་འདོགས་པར་བྱེད་ཀྱི། གྲུབ་མཐའ་བདེན་པར་ཞེན་པ་ལྟར་མ་ཡིན་ཏེ། འཇུག་པ་ལས། ཇི་ལྟར་ཁྱོད་ཀྱིས་གཞན་དབང་དངོས་འདོད་ལྟར། །ཀུན་རྫོབ་ཀྱང་ནི་བདག་གིས་ཁས་མ་བླངས། །ཞེས་སོ། །སྒྲོ་གདགས་པའི་ཚུལ་ནི། ཏིང་འཛིན་རྒྱལ་པོ་ལས། ཡི་གེ་མེད་པའི་ཆོས་རྣམས་ལ། །ཉན་པ་གང་དང་སྟོན་པ་གང་། །འགྱུར་བ་མེད་ལ་སྒྲོ་བཏགས་ནས། །ཉན་ཅིང་སྟོན་པར་བྱེད་པའང་ཡིན། །ཅེས་སོ། །སྣང་སྲིད་འཁོར་འདས་ཀྱི་ཆོས་ཐམས་ཅད་སྒྱུ་མའི་རང་བཞིན་བདེན་པར་མེད་པས་སྐྱེ་འགག་ལྟར་སྣང་ཙམ་གྱི་འཇིག་རྟེན་པའི་སྣང་བ་མི་འགོག་སྟེ། རྩ་ཤེས་ལས། རྨི་ལམ་ཇི་བཞིན་སྒྱུ་མ་བཞིན་། དྲི་ཟའི་གྲོང་ཁྱེར་ཇི་བཞིན་དུ། དེ་བཞིན་སྐྱེ་དང་དེ་བཞིན་གནས། དེ་བཞིན་དུ་ནི་འཇིགས་པར་གསུངས། །ཞེས་སོ། །འདི་ལྟར་བདེན་པ་གཉིས་ཀྱི་རྣམ་གཞག་མ་ཤེས་ན་བྱང་ཆུབ་མི་འགྲུབ་སྟེ། རྩ་ཤེས་ལས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་བསྟན་མི་ནུས། །དམ་པའི་དོན་ནི་མ་རྟོགས་པར། །མྱ་ངན་འདས་པ་ཐོབ་མི་འགྱུར། །ཞེས་སོ། །ཐལ་རང་གཉིས་པོ་དེ་ཨཱརྱ་དེ་བས། བསོད་ནམས་མ་ཡིན་དང་པོར་བཟློག །བར་དུ་བདག་ནི་བཟློག་པ་སྟེ། །ཐ་མར་ལྟ་གཞི་ཀུན་བཟློག་པ། །གང་གིས་ཤེས་དེ་མཁས་པ་ཡིན། །ཞེས་པས། བར་པ་བདག་བཟློག་གི་འཁོར་ལོ་འཕགས་པ་ཡབ་སྲས་ཀྱི་དགོངས་པ་ཐལ་འགྱུར་མ་འཁྲུལ་བ་ཀུན་མཁྱེན་ཆོས་ཀྱི་རྒྱལ་པོའི་བཞེད་པ་ཇི་ལྟ་བ་བཀོད་པ་ཡིན་ལ། མཚན་ཉིད་ཐེག་པ་ཀུན་གྱི་ལྟ་བའི་རྩེ་མོ་མཐར་ཐུག་པར་བཞེད་པ་ཡིན་ནོ། །འདི་ཉིད་བོད་དུ་པ་ཚབ་ལོ་ཙཱ་བ་རྗེས་འབྲངས་བཅས་པ་དང་། ས་པཎ་གོ་རམས་པ་བསོད་ནམས་སེང་གེ། གཡག་ཕྲུག་པ་སངས་རྒྱས་དཔལ་རྗེས་འབྲངས་བཅས་པའི་ས་སྐྱ་པ་ཕལ་ཆེར་བཞེད་ཅིང་། རོང་སྟོན་ཤཱཀྱ་རྒྱལ་མཚན་ནི་དབུ་མ་རང་རྒྱུད་པ་བཞེད་ལ། མི་བསྐྱོད་རྡོ་རྗེ་མན་ཆད་ཀྱི་ཀར་ལུགས་ཕྱི་མ་རྣམས་ཐལ་འགྱུར་ལྟར་བཞེད། རྗེ་ཙོང་ཁ་བ་རྗེས་འབྲངས་དང་བཅས་པས་ཐལ་འགྱུར་རྩལ་འདོན་དུ་མཛད་དོ། །འོན་ཀྱང་སྔ་མ་དང་མི་མཐུན་པའི་ཀུན་རྫོབ་ཚད་མས་གྲུབ་པ་དང་། དེ་ཉིད་སངས་རྒྱས་ཀྱི་ཇི་སྙེད་མཁྱེན་པའི་ཡེ་ཤེས་ཀྱི་ཡུལ་དུ་བཞེད་པ་དང་། སངས་རྒྱས་ཀྱི་ཡེ་ཤེས་ཀྱིས་འཁྲུལ་སྣང་གཟིགས་པར་བཞེད་པ་དང་། དོན་དམ་པ་སྒྲ་རྟོག་གིས་གཞལ་བྱར་བཞེད་པས། གནས་ལུགས་བསམ་གྱིས་མི་ཁྱབ་པ་རྟོག་གེས་གཞལ་བྱ་མཛད་པ་སོགས་ཐལ་འགྱུར་སྔ་མ་དང་མི་མཐུན་པ་མང་ཡོད་དོ། །དེ་དག་གིས་རང་སྟོང་གི་རྣམ་གཞག་མདོ་ཙམ་བཤད་ཟིན་ཏོ། ༈ །གཉིས་པ་ནི། སློབ་དཔོན་ཆེན་པོ་བྷ་བྱའི་དབུ་མ་རིན་ཆེན་སྒྲོན་མ་ལས་དེ་བས་དེ་དག་བདག་གིས་གཞུང་ཆེན་པོ་མང་པོ་དག་བཀོད་པ་ནི། ཕྱི་རོལ་གྱི་དབུ་མ་ཡིན་ནོ་ཞེས་ཤེས་པར་བྱའོ། །ཕ་རོལ་རྒོལ་བ་བཟློག་པ་དང་། །བསྟན་བཅོས་ཆེན་པོའི་གཞུང་དང་ནི། །རྩོད་པ་ཆེན་པོ་བྱུང་དུས་སུ། །རགས་པའི་དབུ་མའི་གཞུང་སྨྲ་བྱ། །དེ་ཉིད་དོན་ལ་གཙོར་བྱེད་ཅིང་། །རྣལ་འབྱོར་ཉམས་སུ་ལེན་དུས་སུ། །ཕྲ་བའི་རྣལ་འབྱོར་བསྒོམ་པར་བྱ། །ཞེས་གསུངས་པས་ཐལ་རང་གི་དབུ་མ་རགས་པའི་ཕྱིའི་དབུ་མར་བཞག་ནས་ཕྱི་རོལ་པ་དང་རྩོད་པའི་ཆེད་དང་གཞུང་ཆེན་པོ་སྨྲ་བ་ལ་སོགས་པར་དགོས་པར་བསྟན་ལ། ནང་གི་རྣལ་འབྱོར་ཉམས་སུ་བླང་བྱ་ཕྲ་བའི་དབུ་མ་ཞེས་བཞེད་པས་དེ་ནི་འཁོར་ལོ་ཐ་མའི་དགོངས་པ་ངེས་དོན་དབུ་མ་ཆེན་པོ་འདི་ཉིད་ཡིན་ལ། དེ་ཡང་རྒྱལ་བའི་བཀའ་འཁོར་ལོ་ཐ་མའི་ངེས་དོན་སྙིང་པོའི་མདོ་བཅུ་སོགས་དང་། གསང་སྔགས་ཀྱི་རྒྱུད་སྡེ། རྒྱལ་ཚབ་མ་ཕམ་པའི་རྒྱུད་བླ་མ་སོགས་བྱམས་ཆོས། ཀླུ་སྒྲུབ་ཡབ་སྲས་ཀྱི་མཐར་ཐུག་གི་དགོངས་པ་བསྟོད་ཚོགས་དང་། ཐེག་ཆེན་ཉི་ཤུ་པ། མདོ་སྡེ་ཀུན་ལས་བཏུས། དབུ་མ་སྐྱེ་མེད་རིན་པོ་ཆེའི་མཛོད། སྲིད་པ་འཕོ་བ་སོགས་དང་། ཨཱརྱ་དེ་བའི་སྙིང་པོ་བརྒྱ་པ་དང་། དབུ་མ་བཞི་བརྒྱ་པ་གཞན་སྟོང་དུ་བཀྲལ་བའང་ཡོད། ཐོགས་མེད་སྐུ་མཆེད་ཀྱི་བསྟན་བཅོས་རྣམས་དང་། རྗེས་འབྲངས་ཕྱོགས་གླང་། ཆོས་གྲགས། ཙནྡྲ་གོ་མི་སོགས་པཎྜི་ཏ་དང་། གྲུབ་ཐོབ་ཆེན་པོ་མདའ་བསྣུན་ཞབས། པདྨ་འབྱུང་གནས་སོགས་གྲུབ་ཐོབ་པ་གྲངས་ཀྱིས་མི་ལངས་པ་ཐམས་ཅད་ཀྱི་དགོངས་པ་ཟབ་མོ་སྔགས་ཀྱི་ལྟ་བ་རང་བྱུང་གི་ཡེ་ཤེས་དང་། སེམས་ཀྱི་རྡོ་རྗེ། སེམས་ཀྱི་ཕྱག་རྒྱ། གཉུག་མའི་སེམས། ཀུན་ཏུ་བཟང་པོ། དང་པོའི་སངས་རྒྱས། རྒྱུའི་རྡོར་འཛིན། ཕྱག་རྒྱ་ཆེན་པོ། རྫོགས་པ་ཆེན་པོ། འཁོར་འདས་དབྱེར་མེད་ཀྱི་ལྟ་བ་སོགས་ལམ་འབྲས་པ་ལ་གྲགས་པ། རྒྱུའི་རྒྱུད། གཞི་ལམ་འབྲས་གསུམ་གྱི་དབྱེ་བ། གནས་ཡོངས་སུ་གྱུར་པའི་ཡེ་ཤེས། ཐིག་ལེ་ཉག་གཅིག །སོ་སོ་རང་གི་རིག་པ་སོགས་མཚན་སྣ་ཚོགས་ཀྱིས་བསྙད་པའི་གཞི་གང་ཡིན་པ་དབུ་མ་ཆེན་པོ་འདི་ལས་མ་འདས་ཤིང་། མཚན་ཉིད་གསུམ་དང་སེམས་ཀྱི་སྒྲ་ཙམ་བསྟན་པ་ཐམས་ཅད་དངོས་པོར་སྨྲ་བ་རྣམ་རིག་གི་གྲུབ་མཐའ་ཙམ་དུ་འདོད་ན་རྒྱལ་བ་སྲས་དང་བཅས་པ་ལ་སྐུར་འདེབས་ཀྱི་ཕུང་པོར་འགྱུར་བས་ཤིན་ཏུ་ཡང་པའི་གནས་སོ། །དེ་ཡང་འཁོར་ལོ་ཐ་མར་ཆོས་ཐམས་ཅད་མཚན་ཉིད་གསུམ་དུ་འདུས་པར་བསྟན་ཏེ། ཀུན་བརྟགས། གཞན་དབང་། ཡོངས་གྲུབ་གསུམ་མོ། །དང་པོ། ཀུན་བརྟགས་ལ་དབྱེ་ན་གཉིས་ཏེ། རྣམ་གྲངས་པའི་ཀུན་བརྟགས་ནི། མིང་ཚིག་ཡི་གེའི་རྣམ་པར་བརྟགས་པ། བརྗོད་བྱ་རྗོད་བྱེད། ཕུང་པོ་ཁམས་སྐྱེ་མཆེད། ཤར་ནུབ། མཐའ་དབུས། ཆེ་ཆུང་། མཐོ་དམན་སྟེང་འོག །བསྟོད་སྨད་སོགས། བློས་བཀོད་ཅིང་སྒྲོ་བཏགས་པའི་ཆ་རྣམས་ཀུན་རྫོབ་ཏུའང་མེད་ལ། མཚན་ཉིད་ཡོངས་སུ་ཆད་པའི་ཀུན་བརྟགས་ནི། ཟླ་བ་གཉིས་ལྟ་བུ་མེད་པ་གསལ་སྣང་དང་། བདག་གཉིས་ལྟ་བུའོ། །གཞན་དབང་ལའང་མ་དག་གཞན་དབང་དང་། དག་པ་གཞན་དབང་གཉིས། དང་པོ་ནི། ལས་དང་བག་ཆགས་སྣ་ཚོགས་པའི་རྐྱེན་གཞན་ལ་ལྟོས་པས་གཞན་དབང་ཞེས་བཞག་ལ། དེ་ཡང་བག་ཆགས་སྣ་ཚོགས་པའི་དབང་གིས་སེམས་སྣང་ཕྱི་ནང་སྣོད་བཅུད་སྣ་ཚོགས་པའི་རྣམ་པར་ཤར་བ་ཡུལ། དོན། ལུས་དང་བཅས་པ་ཀུན་རྫོབ་ཏུ་ཡོད་ལ། དོན་དམ་མེད། དག་པའི་གཞན་དབང་ནི། ཤིན་ཏུ་དག་པའི་ཞིང་དང་སྐུ་ལ་སོགས་པ་སྟེ། སྒྲིབ་པ་དག་སྟོབས་ཀྱི་དབང་གིས་འགྱུར་བའོ། །ཡོངས་སུ་གྲུབ་པ་ལའང་གཉིས་ཏེ། འགྱུར་མེད་ཡོངས་གྲུབ་ནི། གནས་ལུགས་དོན་གྱི་ཀུན་གཞི་ཆོས་དབྱིངས་རང་བཞིན་གྱིས་འོད་གསལ་བ་གཞན་དབང་ཀུན་བརྟགས་གཉིས་ཀྱིས་སྟོང་པའི་བདེ་གཤེགས་སྙིང་པོ་སྟེ། རྒྱུད་བླ་ལས། ཇི་ལྟར་སྔར་བཞིན་གྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་དང་། མདོ་སྡེ་རྒྱན་ལས། སྔ་མ་ཕྱི་མར་ཁྱད་མེད་ཀྱང་། །སྒྲིབ་པ་ཀུན་གྱི་དྲི་མེད་པ། །དེ་བཞིན་ཉིད་ནི་སངས་རྒྱས་འདོད། །ཞེས་སོ། །ཕྱི་ཅི་མ་ལོག་པའི་ཡོངས་གྲུབ་ནི། །དག་བྱའི་དྲི་མ་ཐམས་ཅད་དང་དག་པའི་མཐར་བྱིན་གྱི་འབྲས་བུ་ལ་འདོད་ཅིང་། གཟུང་འཛིན་གཉིས་ཀྱིས་སྟོང་པའི་རང་བཞིན་གྱིས་འོད་གསལ་བའི་ཡེ་ཤེས་དེ་ཉིད་ཀུན་རྫོབ་ཏུ་མེད་ལ་དོན་དམ་དུ་ཡོད་དོ། །དེས་ན་ངེས་དོན་འཁོར་ལོ་ཐ་མར་བསྟན་པའི་བདེ་གཤེགས་སྙིང་པོ་ནི་འགྱུར་མེད་ཡོངས་གྲུབ་སྟེ། དེའི་ཚུལ་ནི། རྒྱུད་བླ་མ་ལས། སེམས་ཀྱི་རང་བཞིན་འོད་གསལ་གང་ཡིན་པ། དེ་ནི་ནམ་མཁའ་བཞིན་དུ་འགྱུར་མེད་དེ། གློ་བུར་དྲི་མས་དེ་ཉོན་མོངས་མི་འགྱུར། །ཞེས་པས་དབྱིངས་རང་བཞིན་གྱིས་རྣམ་པར་དག་པ་དོན་དམ་པའི་བདེན་པ་རང་བྱུང་གི་ཡེ་ཤེས་དེ་ནི། དྲི་མ་གློ་བུར་བ་དང་ལྡན་པའི་དུས་ན་རིགས་སམ་ཁམས་སམ་དེ་བཞིན་གཤེགས་པའི་སྙིང་པོ་ཞེས་བྱ་ལ། དྲི་མ་དང་བྲལ་བའི་ཚེ་དེ་བཞིན་གཤེགས་པའམ་སངས་རྒྱས་ཞེས་བྱའོ། །དེའང་དབྱིངས་སྙིང་པོ་དེའི་ངོ་བོ་ལ་དོར་བྱའི་དྲི་མ་ཡེ་ནས་མེད་དེ་རང་བཞིན་གྱི་འོད་གསལ་ཞིང་དྲི་མ་མེད་པའི་ཕྱིར་རོ་སྔར་མེད་ཀྱི་ཡོན་ཏན་ཕྱི་ནས་གསར་དུ་བསྒྲུབ་པའང་མེད་དེ། ཡོན་ཏན་ལྷུན་གྲུབ་ཡིན་པའི་ཕྱིར། སྔ་མ་ལས། ལས་དང་ཉོན་མོངས་དང་ལྡན་ཕྱིར། །ཀུན་ནས་ཉོན་མོངས་མེད་དག་ཕྱིར། །རྣམ་པར་དབྱེ་བ་མེད་ཆོས་ཕྱིར། །ལྷུན་གྲུབ་རྣམ་པར་མི་རྟོགས་ཕྱིར། །ཞེས་སོ། །དེའི་ཕྱིར་སྙིང་པོའི་ངོ་བོ་ལ་ལྟོས་ནས་དྲི་མ་དང་སྐྱོན་གྱི་དངོས་པོ་རྣམ་དབྱེ་དང་བཅས་པས་སྟོང་ལ། གདོད་ནས་རང་ཆས་སུ་ཡོད་པའི་ཡོན་ཏན་གྱིས་མི་སྟོང་པ་སྟེ། དེ་ཉིད་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་སོ། །དེས་ན་རིགས་ཁམས་བདེར་གཤེགས་སྙིང་པོ་དེས་སེམས་ཅན་ཐམས་ཅད་ལ་ཁྱབ་པར་བཞུགས་ཏེ། དཔལ་ཕྲེང་གི་མདོ་ལས། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །ཅེས་དང་། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་སོ། །དེའང་སྒྲིབ་བྱེད་ཀྱི་དྲི་མ་གློ་བུར་བ་དེ་མ་དག་པ་དང་། ཅུང་ཟད་དག་པ། ཤིན་ཏུ་རྣམ་དག་གི་གོ་རིམ་བཞིན། སེམས་ཅན། འཕགས་པ། རྫོགས་སངས་ཀྱི་རིམ་པར་བཞག་པ་ལས་སྙིང་པོ་ཆོས་ཀྱི་དབྱིངས་ལ་འགྱུར་བ་མེད་དེ། རྒྱུད་བླ་མར། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་པ་ཞེས་བརྗོད་དོ། །ཞེས་གསུངས་ཏེ། ས་བུམ། ཟངས་བུམ། གསེར་བུམ་ནང་གི་ནམ་མཁའ་ལ་བཟང་ངན་མེད་པ་དང་མཚུངས་སོ། །རྒྱལ་བས་འཁོར་ལོ་དང་པོ་དང་བར་པ་རྣམས་སུ་བདག་མེད་དང་སྟོང་པ་ཉིད་ཁོ་ན་བསྟན་པ་བདག་དང་ཉོན་མོངས་པ་བཟློག་པའི་ཐབས་སུ་གསུངས་ཤིང་བདེ་གཤེགས་སྙིང་པོ་ཆོས་ཀྱི་དབྱིངས་དང་ཡེ་ཤེས་མེད་པར་སྟོན་པ་མིན་ཏེ། འཕགས་པ་ཀླུ་སྒྲུབ་ཀྱིས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང་། །དེ་དག་ཀུན་གྱིས་ཉོན་མོངས་བཟློག །དབྱིངས་དེ་ཉམས་པར་བྱེད་མ་ཡིན། །ཞེས་དང་། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་། གུར་ལས། རིན་ཆེན་སེམས་ལས་མ་གཏོགས་པའི། །སངས་རྒྱས་མེད་ཅིང་སེམས་ཅན་མེད། །ཅེས་དང་། བརྟག་གཉིས་ལས། འདི་ཉིད་འཁོར་བ་ཞེས་བྱ་ལ། །འདི་ཉིད་མྱ་ངན་འདས་པ་ཞེས། །འཁོར་བ་སྤངས་པའི་ཕ་རོལ་ན། །མྱ་ངན་འདས་པ་ཡོད་མ་ཡིན། །ཞེས་འཁོར་འདས་མཉམ་ཉིད་ཀྱི་ལྟ་བ་གསུངས་པའང་དབྱིངས་དེ་ཉིད་ཀྱིས་ཁྱབ་པས་ངོ་བོར་དབྱེར་མེད་པ་ལ་དགོངས་པ་ཡིན་ཏེ། དབྱིངས་ཡེ་ཤེས་གཉིས་ལས་སྣང་སྟོང་གི་དབྱེ་བས། སྟོང་ཆའི་དབྱིངས་ཆོས་སྐུ་ངོ་བོ་ཉིད་སྐུའི་བྲལ་རྒྱུ་རྟེན་དང་། ཡེ་ཤེས་སྣང་ཆ་མཚན་དཔེ་དང་བཅས་པ་རྟེན་པ་གཟུགས་སྐུ་གཉིས་ཀྱི་བྲལ་རྒྱུར་གནས་ཏེ། མདོ་སྡེ་རྒྱན་ལས། རང་བཞིན་དང་ནི་རྒྱས་པ་དག །དེ་ནི་རྟེན་དང་བརྟེན་པ་དང་། །ཞེས་སོ། །རིགས་དེ་གཉིས་གཞི་ལ་རང་བཞིན་ལྷུན་གྲུབ་ཏུ་ཡོད་པ་ལ་རང་བཞིན་གནས་རིགས་དང་། དེའི་སྟེང་དུ་སེམས་དང་པོ་བསྐྱེད་པ་ནས་བཟུང་ས་བཅུ་རྒྱུན་མཐའི་བར་གྱི་དགེ་རྩ་ཚོགས་གཉིས་ཀྱིས་བསྡུས་པ་ཐམས་ཅད་ནི་རྒྱས་འགྱུར་གྱི་རིགས་ཞེས་བྱ་ལ། དགེ་བ་དེའང་གློ་བུར་གྱི་སྒྲིབ་པའི་གཉེན་པོ་གསར་དུ་བླངས་པ་ཅན་གནས་རིགས་ཀྱི་དྲི་མ་བསལ་སྟོབས་ཀྱིས་རང་ལ་ཡོད་པའི་ཡོན་ཏན་གསལ་བར་བྱེད་པའི་ཕྱིར་རོ། །དེ་ལྟ་བུའི་སངས་རྒྱས་ཀུན་ཀྱང་བྲལ་བའི་འབྲས་བུ་ལས་བསྐྱེད་བྱ་སྐྱེད་བྱེད་ཀྱི་རྒྱུས་འབྲས་བུ་བསྒྲུབས་པ་མིན་ཏེ་ཡེ་ནས་ལྷུན་གྱིས་གྲུབ་པའི་ཕྱིར་ཏེ། རྒྱུད་བླ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་གསུངས་པའི་ཕྱིར་རོ། །སངས་རྒྱས་ཀྱི་སའི་རྒྱས་འགྱུར་གྱི་རིགས་སྣང་ཆ་ལོངས་སྐུ། དེའི་སྟོང་ཆ་ཆོས་སྐུ་རང་བཞིན་གྱི་རིགས་གཉིས་དབྱེར་མེད་པའི་བྱིན་རླབས་ལས། གདུལ་བྱའི་སྣང་ངོར་རང་སྐལ་དང་འཚམས་པའི་སྤྲུལ་སྐུར་སྣང་བ་ཉིད། ནམ་མཁའ་ལ་འཁོར་ལོས་སྒྱུར་བའི་རྒྱལ་པོ་སྣང་བའི་གཟུགས་བརྙན་གསེར་གྱི་རིའི་ངོས་ལ་འཆར་བ་བཞིན་ནོ། །བདེ་གཤེགས་སྙིང་པོ་སེམས་ཅན་ལ་བཞུགས་པ་དེ་ཡང་སྒྲིབ་བར་བྱེད་པའི་གློ་བུར་གྱི་དྲི་མའི་སྦུབས་སུ་བཞུགས་ཚུལ་དང་དེ་ལས་སད་ཚུལ་འཁོར་ལོ་ཐ་མའི་དགོངས་པ་ངེས་པ་དོན་གྱི་བསྟན་བཅོས་རྣམས་སུ་བཀྲལ་བ། ཀླུ་སྒྲུབ་ཀྱིས་ཆོས་ཀྱི་དབྱིངས་སུ་བསྟོད་པར། ཇི་ལྟར་འོ་མ་རྣམ་སྦྱངས་པས། མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམས་སྦྱངས་པས། ཆོས་དབྱིངས་ཤིན་ཏུ་དྲི་མེད་འགྱུར། ཞེས་པ་ལ་སོགས་པས། མར་དང་། མར་མེ། ནོར་བུ་དང་། གསེར་དང་། འབྲུ་དང་། ཤིང་འབྲས་ཀྱི་རིམ་པས་གཞི་ལམ་འབྲས་གསུམ་མཚོན་ནས་གསུངས་པ་དང་། རྒྱལ་བ་བྱམས་པས། པདྨའི་ནང་དུ་སངས་རྒྱས་གཏུམས་པ་སོགས་དཔེ་དགུའི་སྒོ་ནས། བྱིས་པ་དང་། ཉན་རང་དགྲ་བཅོམ། ཐེག་ཆེན་སྐྱེ་འཕགས། ས་བཅུའི་མ་དག་ས་བདུན། དག་ས་གསུམ་གྱི་མཐོང་སྒོམ་གྱི་སྤང་བྱ་རྣམས་དཔེ་དང་དོན་གྱི་སྒོ་ནས་བསྟན་པ་ཡིན་ལ། དེ་ལྟ་བུའི་བདེ་གཤེགས་སྙིང་པོ་དོན་དམ་བདེན་པ་དེ་ཉིད་ཚོགས་སྦྱོར་དུ་ཡོད་དོ་སྙམ་དུ་ཡིད་དཔྱོད་ཀྱི་མོས་པ་ལམ་བྱེད་ཙམ་ལས་མངོན་སུམ་དུ་མི་མཐོང་། མཐོང་ལམ་ནས་ཕྱོགས་རེ་མཐོང་། སངས་རྒྱས་ཀྱི་སར་རང་བཞིན་ཅི་ཡིན་པ་མངོན་སུམ་དུ་གྱུར་ནས་གཟིགས་སོ། །དེའང་ཉི་མ་ཤར་ཡང་མིག་མེད་པས་མི་མཐོང་ལ། ཡོད་པས་མཐོང་བ་བཞིན་ཏེ། བྱམས་པས། རང་བྱུང་རྣམས་ཀྱི་དོན་དམ་དེ། །དད་པ་ཉིད་ཀྱིས་རྟོགས་བྱ་ཡིན། །ཉི་མའི་དཀྱིལ་འཁོར་འོད་འབར་ཡང་། །མིག་མེད་པས་ནི་མཐོང་བ་མེད། །ཅེས་སོ། །དེའི་ཕྱིར་ཉན་རང་བྱང་སེམས་ཀྱི་འཕགས་པ་གསུམ་གྱིས་ཇི་བཞིན་མི་མཐོང་ལ། སངས་རྒྱས་ཀྱིས་རྫོགས་པར་གཟིགས་པའོ། །དེ་ཡང་དོན་དམ་པའི་བདེན་པ་ཆོས་ཀྱི་དབྱིངས་ཡིན་ལ། འདིའི་རང་བཞིན་མཐོང་བས་དོན་དམ་བདེན་པ་མཐོང་ཞེས་བྱ་ཡི། ཅི་ཡང་མེད་པའི་སྟོང་པ་ཉིད་དོན་དམ་བདེན་པ་མ་ཡིན། དེའང་བྱིས་པ་དང་། ལས་དང་པོ་པ་བདག་ཏུ་ཞེན་པའི་གཉེན་པོ་བདག་མེད་པ་ལ་སོགས་པ་བསྟན་པ་ཡིན་གྱི། དོན་ལ་དབྱིངས་འོད་གསལ་བ་འདུས་མ་བྱས་ཤིང་ལྷུན་གྲུབ་ཏུ་ཡོད་པ་ཤེས་པར་བྱ་སྟེ། དེའང་རྒྱུད་བླའི་འགྲེལ་པར། མདོར་བསྡུ་ན། གང་ཟག་བཞི་པོ་འདི་ནི་དེ་བཞིན་གཤེགས་པའི་སྙིང་པོ་མཐོང་བ་ལ་མིག་དང་མི་ལྡན་པར་བཞག་སྟེ། བཞི་གང་ཞེ་ན་འདི་ལྟ་སྟེ། སོ་སོ་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སྟེ། ཇི་སྐད་དུ། བཅོམ་ལྡན་འདས་དེ་བཞིན་གཤེགས་པའི་སྙིང་པོ་འདི་ནི། འཇིག་ཚོགས་ལ་ལྟ་བར་ལྷུང་བ་རྣམས་དང་། ཕྱིན་ཅི་ལོག་ལ་མངོན་པར་དགའ་བ་རྣམས་དང་། སྟོད་པ་ཉིད་ལས་སེམས་རྣམ་པར་གཡེངས་པ་རྣམས་ཀྱི་སྤྱོད་ཡུལ་མ་ལགས་སོ། །ཞེས་གསུངས་པ་བཞིན་ནོ། །ཞེས་སོ། །ཡང་ཁ་ཅིག་གིས། བཀའ་བར་པས་ཆོས་ཐམས་ཅད་མི་རྟག་པ་སྤྲིན་ལྟ་བུ། མི་བདེན་པ་རྨི་ལམ་ལྟ་བུ། རྒྱུ་རྐྱེན་ཚོགས་ཀྱང་རང་བཞིན་མེད་པ་སྒྱུ་མ་ལྟ་བུར་གསུངས་ན། བཀའ་ཐ་མར་ཡེ་ནས་འགྱུར་མེད་དུ་ཡོད་པས་རྟག་པ་དང་། རང་བཞིན་དུ་གནས་པས་བདེན་པ། རྒྱུ་རྐྱེན་གྱིས་མ་བསྐྱེད་པས་འདུས་མ་བྱས་སུ་བསྟན་པ་འགལ་ལོ་སྙམ་ན། མི་འགལ་ཏེ། སྙིང་པོ་འདིའང་སྐྱོན་དང་འདུས་བྱས་འཁོར་བའི་ཆོས་ཐམས་ཅད་ཀྱིས་སྟོང་པའི་ཕྱིར་སྟོང་པ་ཡིན་ལ། མྱ་ངན་ལས་འདས་པའི་ཆོས་ཐམས་ཅད་ཀྱིས་མི་སྟོང་བ་ཡིན་ཏེ། བྱམས་པས། རྣམ་དབྱེར་བཅས་པའི་མཚན་ཉིད་ཅན། སོགས་གོང་དུ་དྲངས་པ་ལྟར་རོ། །འདིས་ཀྱང་ཀུན་རྫོབ་ཀྱི་ཆོས་ཐམས་ཅད་རང་གི་ངོ་བོས་སྟོང་པ་དང་། དོན་དམ་བདེན་པ་ལ་ལྟོས་ནས་གཞན་སྟོང་པའི་ཚུལ་གསལ་བར་གསུངས་པ་ཤེས་པར་བྱ་དགོས་སོ། །དེས་ན། མི་རྟག་སྟོང་པ། བདག་མེད་སོགས་བསྟན་པས་བདག་གཉིས་སུ་ཞེན་པའི་གཉེན་པོ་བྱེད་པས་ཆོས་ཐམས་ཅད་སྟོང་པ་ཉིད་དུ་རྟོགས་པར་བྱེད་ལ། དེའི་འོག་ཏུ་བཀའ་ཐ་མར་སྟོང་ཉིད་ལ་མཐར་འཛིན་པའི་སྒྲོ་སྐུར་དུ་ཞེན་པ་ལ་སོགས་པའི་ཉེས་པ་ལྔ་འབྱུང་བས་དེ་དག་བསལ་བའི་ཕྱིར་དོན་དམ་བདེ་གཤེགས་སྙིང་པོ་བསྟན་པ་ཡིན་ཏེ། ཉེས་པ་ལྔ་ནི། སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མི་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤང་དོན་དུ་གསུངས། །ཞེས་སོ། །དེའང་བྱང་ཆུབ་སྙིང་པོ་རང་ལ་ཡོད་པར་མ་མཐོང་བས། བདག་ལྟ་བུས་སངས་རྒྱས་མི་ཐོབ་ཅེས་སེམས་ཞུམ་ནས་བྱང་ཆུབ་ཏུ་སེམས་མི་བསྐྱེད་པ་དང་། བསྐྱེད་ཀྱང་བདག་བྱང་ཆུབ་སེམས་དཔའ་གཞན་ཐ་མལ་པ་ཞེས་སེམས་ཅན་ལ་བརྙས་པས་ལམ་གོང་མ་ཐོབ་པའི་གེགས་བྱེད་པ་དང་། སྟོང་ཉིད་མཐར་འཛིན་གྱི་དབང་གིས་དོན་དམ་པའི་རང་བཞིན་ཆོས་ཀྱི་དབྱིངས་ལ་མི་འཇུག་པས་ཡང་དག་པར་མི་འཛིན་པ་དང་། རྟག་ཆད་དུ་ལྷུང་བས་ཡང་དག་པའི་ཆོས་ལ་སྐུར་བ་འདེབས་པ་དང་། བདག་དང་སེམས་ཅན་མཉམ་པར་མ་མཐོང་བས། བདག་གཞན་དུ་འཛིན་པའི་ཉེས་པ་འབྱུང་བའི་ཕྱིར་རོ། །འདི་ལྟ་བུའི་ཁམས་དང་གཞན་ལ་ཡོད་པར་ཤེས་ན། རང་གི་སེམས་ཐར་པར་བསྒྲུབ་པ་ལ་དཀའ་བ་མེད་པར་ཤེས་ཏེ་སྤྲོ་བ་དང་། སེམས་ཅན་ཐམས་ཅད་ལ་སངས་རྒྱས་བཞིན་དུ་གུས་པས་འཚེ་བ་དང་གནོད་པ་མེད་ཀྱི་སྟེང་དུ་ཕན་འདོགས་པ་དང་། དོན་དམ་པའི་དབྱིངས་རྟོགས་པའི་ཤེས་རབ་དང་། གནས་ལུགས་མཐོང་བའི་ཡེ་ཤེས་དང་། བྱམས་པ་ཚད་མེད་པའི་དཀྱིལ་འཁོར་རྒྱས་པས་གཞན་དོན་སྒྲུབ་པར་ནུས་པ་སྟེ། འདི་ལྟར་དེ་ནི་ཐོས་པ་ལས། །སྤྲོ་དང་སྟོན་པ་བཞིན་གུས་དང་། །ཤེས་རབ་ཡེ་ཤེས་བྱམས་ཆེན་སྐྱེ། །ཆོས་ལྔ་སྐྱེ་ཕྱིར་དེ་ལས་ནི། །ཁ་ན་མ་མཐོ་མེད་མཚུངས་ལྟ། །སྐྱོན་མེད་ཡོན་ཏན་ལྡན་པ་དང་། །བདག་དང་སེམས་ཅན་མཚུངས་བྱམས་ལས། །སངས་རྒྱས་ཉིད་ནི་མྱུར་དུ་འཐོབ། །ཅེས་སོ། །དེ་བས་ན་བདེ་གཤེགས་སྙིང་པོའི་རང་བཞིན་ཤིན་ཏུ་རྒྱས་པར་གསུངས་པའི་བཀའ་དང་བསྟན་བཅོས་རྣམས་དྲང་དོན་དུ་མི་བལྟ་བར་ངེས་པའི་དོན་འབའ་ཞིག་ཏུ་བཟུང་སྟེ་ཤེས་པར་བྱའོ། །དེ་ལས་ལྡོག་ན་གོང་དུ་སྨོས་པའི་བཀའ་མདོ་རྒྱུད་དང་། དེ་སྟོན་པའི་བསྟན་བཅོས་བཅས་ཐམས་ཅད་དྲང་དོན་དུ་ཁས་ལེན་དགོས་པར་འགྱུར་བས་འདི་ལྟ་བུའི་གཏམ་ལ་རྣ་བ་དགབ་པར་བྱའོ། །དེ་ནས་འཕགས་པ་ལྷས། བསོད་ནམས་མ་ཡིན་དང་པོར་བཟློག་སོགས་གང་དུ་དྲངས་པ་ལྟར་གྱི་དོན་ཇི་ལྟ་བར་ཤེས་ན། འཁོར་ལོ་བར་ཐ་དགོངས་པ་མི་འགལ་ཏེ། བར་བས་བདག་བཟློག་པས་ཆོས་ཐམས་ཅད་སྟོད་ཉིད་དུ་གཏན་ལ་ཕབ་ནས། ཐ་མས་མཐར་འཛིན་སྒྲོ་སྐུར་སོགས་ཀྱི་ལྟ་བའི་གཞི་ཐམས་ཅད་བཟློག་ནས་ཆོས་ཀྱི་དབྱིངས་སྟོང་པ་ཉིད་དེ་ཉིད་སེམས་ཅན་ལ་འཇིག་རྟེན་ལས་འདས་པར་རང་བཞིན་གཤིས་ཀྱི་བཞུགས་ཚུལ་གཏན་ལ་ཕབ་ནས་གསུངས་པ་ཡིན་ནོ། །ཞེས་འཆད་པའི་ཕྱིར་རོ། །ཡང་གཞུང་གཞན་ལས་འདི་ཕྱི་རོལ་གྱི་ཆོས་ཐམས་ཅད་སེམས་ཀྱི་སྣང་བར་བསྟན་པས་སེམས་ཙམ་གྱི་གྲུབ་མཐའ་སྟོན་ནོ་ཟེར་བའང་མིན་ཏེ། གོང་དུ་སྨོས་པ་ལྟར་བློ་འཁྲུལ་པའི་གཞན་དབང་གི་འཁོར་བའི་ཆོས་རྣམས་དང་། དེ་ལ་བརྟེན་པའི་སྒྲོ་བཏགས་ཀུན་བརྟགས་ཀྱི་ཆོས་ཀུན་དོན་དུ་མེད་པར་བསྟན་པ་ཡིན་ཏེ། ལང་གཤེགས་ལས། སེམས་ཙམ་ཡིན་ཏེ་སྣང་བ་མེད། །སྣང་བ་མེད་པས་མི་སྐྱེ་སྟེ། །དབུ་མ་ཡི་ནི་ལམ་འདི་ཡང་། །ང་དང་གཞན་དག་གིས་ཀྱང་བཤེད། །ཅེས་སེམས་ཙམ་ལས་འདས་པའི་དབུ་མ་བསྟན་པ་དང་། ཡང་ལང་གཤེགས་ལས། སེམས་ཙམ་དུ་ནི་རྟོག་པ་དང་། །ཕྱི་རོལ་དངོས་པོ་རྣམ་བསལ་བས། །རྣམ་པར་རྟོག་པ་རྣམ་ལྡོག་སྟེ། །ལམ་དེ་ཉིད་ནི་དབུ་མའོ། །ཞེས་པས་ཕྱི་རོལ་གྱི་དོན་དང་རྣམ་རིག་གཉིས་ཀ་བཀག་སྟེ་གཞན་སྟོང་དབུ་མའི་ལམ་ཉིད་བསྟན་པ་དང་། ཀླུའི་ཐེག་ཆེན་ཉི་ཤུ་པ་ལས། །སྒྱུ་མས་སྤྲུལ་པ་སྒྱུ་མར་མཐོང་། །གང་ཚེ་འདུས་པ་དེ་ཡི་ཚེ། །ཅུང་ཟད་ཡོད་པ་མ་ཡིན་ཏེ། །དེ་ནི་ཆོས་རྣམས་ཆོས་ཉིད་ཡིན། །འདི་དག་ཐམས་ཅད་སེམས་ཙམ་སྟེ། །སྒྱུ་མ་ལྟ་བུར་གནས་པ་ཡིན། །དགེ་དང་མི་དགེའི་ལས་རྣམས་ཀྱིས། །དེ་ཡིས་བཟང་ངན་སྐྱེ་བ་རྣམས། །སེམས་ཀྱི་འཁོར་ལོ་འགགས་པ་ཡིས། །ཆོས་རྣམས་ཐམས་ཅད་འགག་པ་ཉིད། །འདིར་ནི་གང་ཡང་སྐྱེ་བ་མེད། །གང་ཡང་འགག་པ་ཡོད་མ་ཡིན། །སེམས་ཀྱི་རང་བཞིན་རྣམ་གནས་པ། །ཆོས་རྣམས་ཉིད་ནི་ཤེས་པར་བྱ། །མིག་ལ་སོགས་དང་ཡུལ་རྣམས་ཉིད། །ཡེ་ཤེས་ལྔ་པོ་ཉིད་དག་སྟེ། །ཕྱི་དང་ནང་དུ་རྣམ་ཕྱེ་བ། །ཐམས་ཅད་སེམས་ལས་གཞན་མ་ཡིན། །ཞེས་དང་། འཕགས་པ་ལྷས། ཕྱི་རོལ་དོན་ནི་ཡོད་མིན་ཏེ། །རང་གི་སེམས་ནི་མཐོང་བར་འགྱུར། །དེ་ཡང་སྒྱུ་མར་བསྒོམ་བྱ་ཞིང་། །དེ་བཞིན་ཉིད་ཀྱང་རྗེས་དྲན་བྱ། །ཞེས་དང་། གཟུགས་སོགས་ལྔ་དང་དེ་བཞིན་སྐྱེ་མཆེད་བཅུ་གཉིས་དང་། །བཅོ་བརྒྱད་ཁམས་ཞེས་བཤད་པ་དེ་རྣམས་དང་། །ཤེས་པ་ལྔ་དང་འགྲོ་བ་མ་ལུས་པ། །ཐམས་ཅད་རང་གི་སེམས་ཡིན་གཞན་མ་ཡིན། །གང་ཡང་རི་བརྒྱད་དང་ནི་མཚོ་རྣམས་དང་། །གླིང་ལ་སོགས་དང་དམྱལ་བ་ལ་སོགས་དབྱེ། །གང་ཡང་བརྟེན་དང་གཡོ་བ་ཉིད་མཐོང་བ། །ཐམས་ཅད་རང་གི་སེམས་ཡིན་གཞན་མ་ཡིན། །ཞེས་དང་། སློབ་དཔོན་ཟླ་བས་ཀྱང་། དེ་བས་ན་ཕྱི་རོལ་གྱི་དངོས་པོ་ལྟ་བུ་དམིགས་སུ་མེད་ཅིང་ཡོད་པ་མ་ཡིན་ཏེ། སེམས་ཀྱི་རང་བཞིན་ཡིན་པའི་ཕྱིར་རོ། །ཞེས་དང་། ཆོས་ཐམས་ཅད་སེམས་ལས་ཕྱི་རོལ་ན་མི་གནས་ཏེ། མིག་ཡོར་ཙམ་དུ་སྣང་བ་གང་ཡིན་པ་ཐམས་ཅད་རང་གི་སེམས་ཏེ། རང་གི་སེམས་ཉིད་ལས་གཞན་ཅི་ཡང་མེད་དོ། །ཞེས་སོགས་མཐའ་ཡས་པ་གསུངས་པས། ཁྱེད་རང་གིས་སེམས་ཞེས་པའི་སྒྲ་བྱུང་ཚད་སེམས་ཙམ་གྱི་གྲུབ་མཐར་ཁས་ལེན་ན། སློབ་དཔོན་འདི་རྣམས་ཀྱང་སེམས་ཙམ་དུ་སྨྲ་བར་འདོད་དགོས་པར་འགྱུར་ལ། གཞན་ཡང་ཆོས་འཁོར་བསྐོར་བའི་གོ་རིམ་ལྟར་གསུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་ལས་ནོར་བུ་སྦྱངས་པའི་དཔེས་བསྟན་པའི་རིམ་པ་ཡང་། དང་པོ་དྲང་དོན། བར་པ་ངེས་དོན། ཐ་མ་མཐར་ཐུག་ངེས་དོན་དུ་འཐད་དེ། དང་པོ་དྲང་དོན། བར་པ་ངེས་དོན། ཐ་མ་དྲང་ངེས་ཅི་རིགས་པར་བཤད་ན། བར་པས་ངེས་དོན་བསྟན་པའི་ཕྱི་ནས་སླར་ཡང་དྲང་དོན་སྟོན་པ་མི་འཐད་ཅིང་གོ་རིམ་འཁྲུགས་པར་འགྱུར་བ་དང་། དང་པོ་བར་པ་གཉིས་སུ་རྣམ་ཤེས་ཚོགས་དྲུག་ལས་མ་གསུངས་ཤིང་། ཀུན་གཞི་མ་བསྟན་པ་དང་། དེ་བཞིན་དུ་བདེ་གཤེགས་སྙིང་པོའམ་མ་གསུང་པ་ནི། དགོངས་པ་ངེས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་ཀླུང་བཞིན་འབབ། །བདག་ཏུ་རྟོག་པར་གྱུར་ན་མི་རུང་བས། །ངས་འདི་བྱིས་པ་རྣམས་ལ་མ་བསྟན་ཏོ། །ཞེས་གསུངས་པས་བྱིས་པ་རྣམས་ཀྱིས་བདག་ཏུ་འཁྲུལ་བར་གཟིགས་ནས་སྙིང་པོའི་གཏམ་འདི་དང་པོ་གཉིས་སུ་མ་བསྟན་ཅིང་། དེ་གཉིས་ཀྱིས་རྒྱུད་སྦྱངས་པའི་ཕྱི་ནས་བློ་ཆེན་པོ་རྣམས་ལ་འདི་ཉིད་བསྟན་པར་བཞེད་ལ། དེའི་ཕྱིར་ཆོས་འཁོར་དང་པོ་གཉིས་ནི། བླ་ན་མཆིས་ཤིང་། སྐབས་མཆིས་པ། དྲང་བའི་དོན་རྩོད་པའི་གཞིར་གྱུར་པ་དང་། ཕྱི་མ་ནི། བླ་ན་མ་མཆིས་པ། སྐབས་མ་མཆིས་པ། རྩོད་པའི་གཞིར་མ་གྱུར་པ། ངེས་པའི་དོན་འབའ་ཞིག་གོ། །ཞེས་བསྟན་པས་ཀྱང་ཐ་མ་ངེས་དོན་མཐར་ཐུག་རྒྱལ་བས་མདོ་སྡེ་དགོངས་པ་ངེས་འགྲེལ་ལས་གསུངས་པའི་ཕྱིར་དང་། དེའང་བཀའ་ཐ་མ་ངེས་དོན་ཕྱིར་མི་ལྡོག་པའི་འཁོར་ལོར་གསུངས་ཤིང་སངས་རྒྱས་ཉིད་ཀྱིས་དྲང་ངེས་ཕྱེ་བར་མཛད་པ་དང་། དེར་མ་ཟད་རྒྱལ་བས་དྲང་ངེས་འབྱེད་པར་ལུང་བསྟན་པའི་འཕགས་པ་ཐོགས་མེད་ཀྱིས་དྲང་ངེས་རྣམ་པར་ཕྱེ་བ་ལ་ཚད་མར་མི་བྱེད་ན། སངས་རྒྱས་ལས་ཚད་མར་གྱུར་པ་འཇིག་རྟེན་དུ་མེད་པས་དེས་དྲང་ངེས་ཕྱེས་ཤིང་དྲང་ངེས་དབྱེ་བར་ལུང་བསྟན་པ་དོན་གྱིས་དབེན་པར་འགྱུར་རོ། །དེས་ན་བཀའ་མདོ་རྒྱུད་རྣམས་དང་། ས་བཅུའི་བྱང་སེམས་འཕགས་པ་སངས་རྒྱས་གཉིས་པ་ལྟ་བུ་དེ་རྣམས་ཀྱིས་མདོའི་འགྲེལ་པ་བྱམས་ཆོས་ལྔ་དང་། སྔགས་ཀྱི་སེམས་འགྲེལ་སྤྱན་རས་གཟིགས་ཀྱི་དྲི་མེད་འོད་དང་། རྡོ་རྗེ་སྙིང་པོའི་དགྱེས་རྡོར་གྱི་འགྲེལ་པ། ཕྱག་ན་རྡོ་རྗེའི་བདེ་མཆོག་གི་འགྲེལ་པ་རྣམས་སུ་གསུངས་པའི་ངེས་དོན་དབུ་མ་ཆེན་པོ་དེ་བོད་ཀྱི་ལྗོངས་སུ་གཟུ་དགའ་རྡོར་དང་བཙན་ཁ་པོ་ཆེ་རྣམ་གཉིས་ཀྱིས་མི་ཏྲི་པའི་བརྒྱུད་འཛིན་ཁ་ཆེ་རིན་རྡོར་དང་། སཛྫ་ན་ལས་རྒྱུད་བླ་སོགས་བྱམས་ཆོས་མན་ངག་ལྟར་གྱི་བཤད་པ་གསན་ནས་སྤེལ་ཞིང་། ཀུན་མཁྱེན་རང་བྱུང་རྡོ་རྗེས་དེ་ཉིད་རྩལ་དུ་བཏོན་ནས། རྣམ་ཤེས་ཡེ་ཤེས་དབྱེ་བ་དང་། སྙིང་པོ་བསྟན་པ། ཟབ་མོ་ནང་དོན་སོགས་མཛད། དེ་ཉིད་ཀྱི་སློབ་མར་གྱུར་པ་ཀུན་མཁྱེན་ཀློང་ཆེན་པས་འཁོར་ལོ་ཐ་མའི་བདེ་གཤེགས་སྙིང་པོའི་རྣམ་གཞག་རྒྱས་པར་བཀྲལ་ནས་དེ་ཉིད་ངེས་དོན་མཐར་ཐུག་ཏུ་བཞེད་ཅིང་། རྫོགས་ཆེན་གྱི་གཞི་འབྲས་དང་མཐུན་པར་ཆོས་སྐད་ཅི་རིགས་པའི་སྒོ་ནས་རྫོགས་ཆེན་དང་མཚམས་སྦྱོར་བའི་ངེས་དོན་གྱི་དགོངས་པ་མ་ནོར་བར་བཀྲལ་བར་མཛད་ལ། གཞན་སེང་གེའི་སྒྲས་ས་སྟེང་ཁྱབ་པར་མཛད་པ་པོ་ནི་ཀུན་མཁྱེན་དོལ་པོ་ཤེས་རབ་རྒྱལ་མཚན། པ་སྟེ་ཐོག་མར་ཐལ་འགྱུར་བཞེད་པ་ལ་རང་བྱུང་ཞབས་ཀྱིས་ཁྱོད་ཀྱི་ད་ལྟའི་འདི་མིན་པའི་ལྟ་བ་ཞིག་དང་འཕྲད་པར་འགྱུར། གསུངས་པ་བཞིན་བྱམས་ཆོས་མན་ངག་གི་བཤད་པ་གསན་ཞིང་སྦྱོར་བ་ཡན་ལག་དྲུག་པ་ཉམས་སུ་བཞེད་པས་ཐུག་དམན་འཕར་ནས་གཞན་སྟོང་གི་ལྟ་བ་ཐུགས་ལ་འཁྲུངས་ཤིང་བྱམས་ཆོས་ཀྱི་འགྲེལ་པ་དང་། དེས་རྒྱ་མཚོ་སོགས་དེ་སྟོན་པའི་བསྟན་བཅོས་མང་དུ་མཛད། གཞན་སྟོང་ཞེས་པ་གྲུབ་ཐོབ་ཡུ་མོ་པས་གསར་དུ་རྙེད་པ་ལས་ཁུངས་གཞན་མེད་ཚུལ་མཁས་པ་འགའ་ཞིག་གིས་གསུངས་ཀྱང་གཞན་སྟོང་གི་མཚན་གཞི། རྒྱལ་བ་བྱམས་པས། རྣམ་དབྱེར་བཅས་པའི་སོགས་ཀྱིས་དངོས་སུ་བསྟན་པའི་ཕྱིར། དེའང་སྟོང་ཉིད་མེད་དགག་ཏུ་སྨྲ་བའི་ལུགས་ལ་ཐུགས་ཞེན་ཆེ་བའི་རྣམ་འགྱུར་ཙམ་དུ་ཟད། དེའི་ལུགས་སུ་སངས་རྒྱས་རང་སྣང་ལ་སྐུ་དང་ཡེ་ཤེས་ཀྱང་མེད་པར་བཞེད་པ་ལྟར་ན་ཆོས་ཀྱི་སྐུ་ནམ་མཁའ་ལྟ་བུའི་ཅང་མེད་ཅིག་ཏུ་འདོད་དགོས་པར་འགྱུར་ལ། དེ་ལྟར་ན་སྡུད་པ་ལས། ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། རྒྱ་མཚོ་འདྲ་བའི་སངས་རྒྱས་ཆོས་ཀྱང་ཡོད་མ་ཡིན། ཞེས་གསུངས་པ་དང་། རྡོ་རྗེ་སྙིང་འགྲེལ་ལས། ལུས་ལ་གནས་པའི་ཡེ་ཤེས་ནི། །དངོས་པོ་ཀུན་ལ་ཁྱབ་པ་པོ། །ལུས་ལ་གནས་ཀྱང་ལུས་སྐྱེས་མིན། །ཇི་ལྟར་བུམ་པ་ཞིག་གྱུར་ཀྱང་། །ནམ་མཁའ་ལ་ནི་འཇིག་པ་མེད། །དེ་ལྟར་ལུས་ནི་ཞིག་གྱུར་ཀྱང་། །ཡེ་ཤེས་ལ་ནི་འཇིག་པ་མེད། །ཅེས་དང་། དུས་ཀྱི་འཁོར་ལོ་ལས། བུམ་པའི་རྒྱུ་ནི་ལེན་པར་བྱེད་པ་ན་ཡང་ནམ་མཁའ་འགྲོ་བ་མིན་པ་ཇི་ལྟ་བར། མཁའ་ཁྱབ་མཁའ་ཡི་རྡོ་རྗེ་ཅན་དེ་ཡུལ་དང་རྣམ་པར་བྲལ་བ་ལུས་ཀྱི་དབུས་སུ་དེ་བཞིན་ནོ། །ཞེས་དང་། ཧེ་བཛྲ་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་སྟེ། །ལུས་གནས་ལུས་ལས་མ་སྐྱེས་པའོ། །ཞེས་དང་། འདུས་པའི་བཤད་རྒྱུད་རྡོ་རྗེ་ཕྲེང་བ་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ནོ། །ཞེས་དང་། སམྦུ་ཊི་ལས། ཆ་མེད་མཆོག་ཏུ་ཕྲ་བ་སྟེ། །ཐིག་ལེའི་གཟུགས་ཅན་ཡིད་ཀྱི་དངོས། །གཟི་བརྗིད་ཆེན་པོའི་འོད་དང་ལྡན། །རྟག་ཏུ་སྙིང་གི་དབུས་ན་གནས། །ཞེས་དང་། དྲི་མེད་ཤེལ་དང་མཚུངས་པའི་འོད། །བྱང་ཆུབ་སེམས་ནི་འོད་གསལ་བ། །ཡེ་ཤེས་ལྔ་ཡི་དངོས་པོ་ཉིད། །ཅེས་པ་ལ་སོགས་རྒྱས་པར་གསུངས་པས་ཡེ་ཤེས་དེ་ཉིད་ས་བོན་གྱི་ཚུལ་ཙམ་བསྟན་པ་རྫོགས་ཆེན་གྱི་རྒྱུད་རྣམས་སུ་སྙིང་དབུས་སུ་གཞོན་ནུ་བུམ་སྐུའི་ཚུལ་གྱིས་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་བཞུགས་པ་དང་། དེའི་རྩལ་སྤྱི་བོར་ཁྲག་འཐུང་ཁྲོ་བོའི་དཀྱིལ་འཁོར་བཞུགས་ཤིང་ལྷུན་གྲུབ་ཉམས་ལེན་གྱི་དུས་སུ་སྣང་བ་བཞིའི་འཆར་གཞི་སྙིང་དབུས་ནས་དབང་པོའི་སྒོར་འཆར་བའི་ཚུལ་སོགས་ཤིན་ཏུ་རྒྱས་པར་བསྟན་པ་ཡིན་ཏེ། མགོན་པོ་བྱམས་པས། ནང་གི་དམ་པ་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཞེས་སོགས་གསུངས་པ་དང་དགོངས་པ་གཅིག་གོ། །གཞན་ཡང་དྲི་མེད་འོད་ལས། ནམ་མཁའི་ཁམས་ལ་རྣམ་པ་ཐམས་ཅད་པའི་སྟོང་པ་ཉིད་མེ་ལོང་གི་ཕྲ་ཕབ་པ་བཞིན་དུ་སྐྱེ་བ་མེད་པའི་ཆོས་རྣམས་ངེས་པར་མཐོང་ལ། རང་གི་སེམས་ཀྱིས་སྤྲོས་པའི་རབ་ཏུ་སྣང་བ་རྨི་ལམ་དང་མཚུངས་པའི་དོན་དུ་སེམས་རྡུལ་ཕྲ་རབ་ཚོགས་པའི་བདག་ཉིད་ཀྱི་ཆོས་རྣམ་པར་དཔྱད་པའི་སྟོང་པ་ཆད་པའི་སྟོང་པ་ཉིད་ལས་རིང་དུ་བྱས་པ། ནང་གི་བདེ་བ་རང་རིག་པར་བྱ་བའི་ཆོས་ལ་རྗེས་སུ་ཆགས་པ། ཕྱི་རོལ་གྱི་དབང་པོས་རིག་པར་བྱ་བའི་བདེ་བའི་ཆོས་ཡོངས་སུ་སྤངས་པ། ཞེས་གསུངས་པ་འདིས་ནི་ཕུང་པོ་རྣམ་དཔྱད་ཀྱི་སྟོང་པ་ཉིད་དང་། སྔགས་སུ་དབང་གསུམ་པའི་དཔེའི་ཡེ་ཤེས་ཀྱང་བཀག་གནས། ནང་རིག་མི་འགྱུར་བའི་བདེ་བ་བསྟན་ཅིང་། ས་ར་ཧས། མཁས་པ་རྣམས་ཀྱིས་བསྟན་བཅོས་འཆད་པ་ན། ལུས་ལ་ཡེ་ཤེས་ཡོད་པ་མ་རྟོགས་སོ། །ཞེས་གསུངས་པ་སོགས་ངེས་དོན་གྱི་མདོ་རྒྱུད་བསྟན་བཅོས་ཐམས་ཅད་དུ་ཟབ་གསལ་བདེ་སྟོང་གཉིས་མེད་ཀྱིས་ཡེ་ཤེས་ཁོ་ན་བསྟན་ཅིང་། དེ་རྟོགས་པའི་ཐབས་བླ་མའི་མན་ངག་དང་དད་པ་བསོད་ནམས་ཀྱི་ཚོགས་བསགས་པ་སྤྲེལ་ནས་རྟོགས་པར་བྱ་བ་ལས་ཐབས་གཞན་གྱིས་མི་རྟོགས་པར་གསུངས་བ་དང་རྟོག་དཔྱོད་ཀྱིས་དོན་དམ་པའི་བདེན་པ་མི་རྟོགས་པ་ནི། ཞི་བ་ལྷས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་དང་། མེ་ཏྲི་པས། བླ་མའི་ངག་གིས་མ་བརྒྱན་པའི། །དབུ་མའང་འབྲིང་པོ་ཙམ་ཉིད་དོ། །ཞེས་དང་། ཀྱཻ་རྡོར་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་རྙེད་མིན་ཏེ། །བླ་མའི་དུས་ཐབས་མན་ངག་དང་། །རང་གི་བསོད་ནམས་ལས་ཤེས་བྱ། །ཞེས་པ་ལ་སོགས་རྒྱ་ཆེར་བསྟན་པའི་ཕྱིར་ཕྱིས་སུ་བླ་མའི་མན་ངག་ལ་ཡིད་མི་ཆེས་ཤིང་སྔགས་ཀྱི་ལྟ་བ་ཐུན་མོང་མ་ཡིན་པ་རང་རིག་པའི་ཡེ་ཤེས་ལ་ལོག་པར་ལྟ་ཞིང་དབུ་མའི་རིགས་པ་ཁོ་ནས་རྟོགས་པར་བྱ་བ་ལས་རྟོགས་བྱེད་ཐབས་ཀྱི་མན་ངག་གཞན་རྣམ་དག་ཏུ་མི་འདོད་པ་ནི་གོང་གི་མདོ་རྒྱུད་ཀྱི་དགོངས་པ་ཟབ་མོ་རྣམས་ལས་ཕྱིར་ཕྱོགས་པར་འགྱུར་རམ་མི་འགྱུར་དཔྱོད་ལྡན་རྣམས་ཀྱིས་རྟོགས་ཤིག །སྤྱིར་ཐོས་བསམ་ལས་བྱུང་བའི་ཤེས་རབ་ཀྱིས་གོ་ཡུལ་གྱི་ལྟ་བ་ཙམ་རྟོགས་པ་ཤིང་རྟ་ཆེན་པོའི་རང་ལུགས་མ་ནོར་བ་ཡིན་པས་ཁོ་བོ་ཅག་དེ་ལ་མི་གུས་པ་མ་ལགས་མོད་ཀྱི། དེས་རྟོགས་པ་ནི་ཆོས་སྤྱིའི་ལྟ་བ་རྗེས་དཔག་ཙམ་གྱི་རིགས་ཤེས་ཀྱི་ཡུལ་ཡིན་པ་དང་། སྔགས་སུ་བཤད་པའི་ལྟ་བ་རང་བྱུང་གི་ཡེ་ཤེས་ཐོས་བསམ་ཙམ་ལ་རག་མ་ལུས་ཤིང་བླ་མ་མཚན་ཉིད་དང་ལྡན་པར་རིམ་པས་བརྒྱུད་པའི་མན་ངག་འདོམས་སུ་ཡོད་པ་དང་། བྱིན་རླབས་ཀྱི་བཀའ་བབས་གཞིར་བཞག་ནས་དབང་དང་རིམ་གཉིས་ཀྱི་སྒོ་ལ་བརྟེན་ནས་རྟོགས་པར་བྱར་ཡོད་པས། སྲོལ་འདི་གཉིས་འགལ་བར་འདུ་བར་མི་བསམ་པ་ནི་ཤིན་ཏུ་གལ་ཆེ་བའི་གནས་སུ་ཤེས་པར་བྱ་དགོས་ཤིང་། སྔགས་ཀྱི་ཡེ་ཤེས་དེ་ཉིད་སྤྲོས་བྲལ་གྱི་ཆ་ནས་དབུ་མའི་དགོངས་པ་དང་གཅིག་མོད་ཀྱང་། བདེ་སྟོང་ཟུང་འཇུག་དང་རྣམ་པ་ཐམས་ཅད་པའི་སྐུ་དང་ཡེ་ཤེས་ཀྱི་འཆར་གཞི་གྱུར་པ་སོགས་ཁྱད་པར་དུ་མས་འཕགས་པ་ཡིན་ནོ། །དེས་ན་ཡང་དག་པའི་ལྟ་བ་དེ་ཉིད་དགག་ཕྱོགས་དང་སྒྲུབ་ཕྱོགས་ནས་དགོངས་པ་ལེན་ལུགས་ཆེས་མི་མཚུངས་པས་འགལ་འདུར་སེམས་པ་དང་། རང་བྱུང་གི་ཡེ་ཤེས་རྟོག་དཔྱོད་ཀྱི་རིགས་པ་ལྟར་སྣང་བ་དགོས་པར་འདོད་པ་སོགས་ཉ་དང་ཉུངས་མ་བསྲེས་པར་ཟད་དོ། །ཡང་འགའ་ཞིག་འདི་སྙམ་དུ། ཁྱེད་ཅག་གིས་ཐོས་བསམ་གྱི་ཤེས་རབ་སྤངས་པར་ཐལ་ལོ་ཞེ་ན། ཐོས་བསམ་གཏན་མི་དགོས་པར་སྨྲ་བའང་མིན་མོད་ཀྱི། བླ་མའི་བྱིན་རླབས་དང་། ཐབས་ཀྱི་རིམ་པས་སྒོ་གསུམ་ལ་གནད་དུ་བསྣུན་པར་ངོ་སྤྲོད་ཀྱི་གནད་གསང་ལ་བརྟེན་ནས་རྣལ་འབྱོར་པས་རང་རིག་མངོན་སུམ་ཡུལ་བྲལ་གྱི་ཡེ་ཤེས་ཉམས་སུ་མྱོང་བར་བྱར་ཡོད་པ་དེས་མ་རིག་པའི་མུན་པ་སྟུག་པོ་བསལ་བར་ནུས་པས་སྒོམ་བྱུང་གི་ཤེས་རབ་བླ་ན་མེད་པར་གྲུབ་ཅིང་། དེ་ཉིད་ཆོས་རབ་རྣམ་འབྱེད་ཀྱི་ཤེས་རབ་ཏུ་སོང་བས་ཤེས་བྱ་ཀུན་ལ་རྨོངས་པ་མེད་པས་ཤེས་རབ་ཀྱི་ཕར་ཕྱིན་ཀྱང་ཡིན་ཏེ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོར་རང་རིག་ཡེ་ཤེས་སྤྱོད་ཡུལ་བ། །ཞེས་གསུངས་ཤིང་བདེ་མཆོག་སྡོམ་འབྱུང་ལས་ཀྱང་། །གང་ཚེ་དེ་ཉིད་ལ་རེག་པ། །བསམ་པ་ཐམས་ཅད་བསམ་དུ་མེད། །གང་ཚེ་བསམ་དུ་མེད་སེམས་པ། །དེ་ཚེ་བསམ་མི་ཁྱབ་པར་འགྱུར། །སེམས་ཅན་ཇི་ལྟར་བསམ་མེད་དེ། །བསམ་མེད་ཇི་ལྟར་རྒྱལ་བའང་། །གང་ཕྱིར་བསམ་བྲལ་སངས་རྒྱས་ཀྱིས། །བསམ་པ་འདི་ནི་རབ་ཏུ་བཤད། །བསམ་དུ་མེད་པའི་སེམས་དེ་ལ། །བསམ་པ་ཀུན་གྱིས་བགྲོད་དང་བྲལ། །སྣ་ཚོགས་སྒྲོ་འདོགས་སྒྲོ་འདོགས་མེད། །ཆགས་མེད་བདེ་བ་ཆེན་པོའོ། །རྣམ་པ་ཐམས་ཅད་ཀྱི་ནི་མཆོག །དབང་པོ་ཀུན་འདུས་རྣམ་པ་མེད། །དངོས་དང་དངོས་མེད་བདག་ཉིད་ཀྱང་། །དངོས་དང་དངོས་མེད་རྣམ་པར་སྤངས། །བེམ་པོ་མིན་ཕྱིར་རང་རིག་པ། །ཤེས་པ་མ་ཡིན་མཐོང་བ་མིན། །གཟུགས་མེད་ཕྱིར་ན་གར་མི་གནས། །འགྱུར་བ་མེད་པས་དེ་རྟག་པ། །ཞེས་སོགས་ཕུང་ལྔ་དང་ཚོགས་བརྒྱད་ཀྱི་ཤེས་པ་ལས་འདས་པའི་སོ་སོ་རང་གི་རིག་པ་གསུངས་ཤིང་། ཧེ་བཛྲ་ལས་ཀྱང་། རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཞེས་སོགས་ལུང་མཐའ་ཡས་སོ། །དེས་ན་ཤེས་རབ་ཀྱི་དཔྱད་པ་ཐམས་ཅད་རྗེས་ཐོབ་ཏུ་ལྟ་བ་གཏན་ལ་དབབ་པའི་ཐབས་སུ་གསུངས་པ་ལས་མཉམ་གཞག་ལ་རྟོག་དཔྱོད་དགོས་པར་ཚད་ལྡན་གྱི་མདོ་རྒྱུད་རྣམས་ལས་གསུངས་པ་མེད་ཅིང་། མན་ངག་སྙེ་མ་ལས། ཡན་ལག་འདི་རྣམས་ནི་ལངས་པ་ཁོ་ནའི་སྟེ། ལམ་ལ་མཉམ་པར་གཞག་པ་ལ་ནི་ཡང་དག་པའི་རྟོགས་པ་དང་། ངག་དང་། ལས་ཀྱི་མཐའ་རྣམས་དང་། ཚོར་བ་དང་། དྲན་པ་རྣམས་མི་སྲིད་དོ། །ཞེས་པ་ལ་སོགས་མདོ་རྒྱུད་ཐམས་ཅད་དུ་བསམ་ངོ་དང་བྲལ་བའི་མཉམ་གཞག་ཁོ་ན་བསྟན་པའི་ཕྱིར་རོ། །དེ་ལྟར་མ་ཡིན་པར་མཉམ་པར་བཞག་པའི་ལྷག་མཐོང་གི་ཡེ་ཤེས་དེ་ཉིད་རྟོག་དཔྱོད་སོགས་སེམས་བྱུང་རྣམ་རྟོག་གི་ཕྲེང་བ་ཞིག་ཏུ་འདོད་ན་མ་རིག་པའི་མུན་པ་སེལ་བ་ལྟ་ཅི་རྣམ་རྟོག་ཉིད་མ་རིག་པའི་རང་བཞིན་ཡིན་པའི་ཕྱིར། ཏིང་འཛིན་རྒྱལ་པོ་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །རྟོག་མེད་ཏིང་འཛིན་ལ་གནས་པ། །ནམ་མཁའ་བཞིན་དུ་རྟོག་མེད་གསལ། །ཞེས་འབྱུང་བའི་ཕྱིར་རོ། །ཡང་དབུ་མའི་ལྟ་བ་རྟོགས་པ་དེ་སྔགས་ཀྱི་སྐྱོན་དུ་མི་འགྱུར་ཏེ། འཕགས་ཡུལ་གྱི་གྲུབ་ཐོབ་འགའ་ཞིག་ཀྱང་ཐོག་མར་ཐོས་བསམ་ལ་བརྟེན་པས་ཆོས་སྤྱིའི་ལྟ་བ་ཉམས་འོག་ཏུ་ཆུད་ནས་སྔགས་ལ་ཞུགས་པའི་ཚེ་དེ་ཉིད་རང་བྱུང་གི་ཡེ་ཤེས་སུ་ངོ་འཕྲོད་ནས་ཐབས་ལམ་སྣ་ཚོགས་ཀྱིས་བོག་དབྱུང་སྟེ་དངོས་གྲུབ་མཆོག་ཐོབ་པའང་ཡོད་དོ། །ཕྱག་རྒྱ་ཆེན་པོ་ཡང་ངེས་དོན་དབུ་མ་ཆེན་པོ་དང་གཉིས་སུ་མེད་པ་ཡིན་ཏེ། སློབ་དཔོན་ཡེ་ཤེས་གྲགས་པའི་དེ་ཁོ་ན་ཉིད་ལ་འཇུག་པ་ལས། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱི་མཚན་གཞན་ནི་ཕྱག་རྒྱ་ཆེན་པོ་སྟེ། དེ་ནི་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཡིན་པའི་ཕྱིར་རོ། །བཅོམ་ལྡན་འདས་ཀྱང་ཆོས་ཀྱི་སྐུའི་བདག་ཉིད་ཅན་ཏེ། བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པའི་ངོ་བོ་ཉིད་གོང་དེ་ཉིད་དོ། །ཞེས་བསྟན་པའི་ཕྱིར་རོ། །དེས་ན་གངས་ཅན་ལྗོངས་འདིར་མར་མི་དག་གསུམ། འགྲོ་བའི་མགོན་པོ་ཕག་མོ་གྲུབ་པ་འབྲི་སྟག་འབྲུག་པ། ཀཾ་ཚང་སོགས་བཀའ་བརྒྱུད་སྔོན་བྱོན་ཐམས་ཅད་ཟབ་མོའི་དོན་འདི་ཉིད་བཞེད་པ་ཡིན་པས་དོན་གྱིས་གཞན་སྟོང་དབུ་མ་ཆེན་པོ་ལས་མ་འདས་ཤིང་། ས་སྐྱ་པཎྜི་ཏས་ཆོས་སྐད་ཐལ་འགྱུར་བཞེད་ཀྱང་དགོངས་པ་ཐུན་མོང་མིན་པ་ནི་བདག་མེད་བསྟོད་པའི་འགྲེལ་བར་གསུངས་པ་ལྟར་སྙིང་པོའི་ཡེ་ཤེས་ཀྱི་བཞུགས་ཚུལ་རྒྱས་པར་འཆད་པ་འཁོར་ལོ་ཐ་མ་དང་གཅིག་གོ། །དེས་ན་རྒྱུའི་རྒྱུད་སོགས་གསུམ་དང་། སྦྱང་གཞི་སྦྱོང་བྱེད་སྦྱོངས་འབྲས། རྒྱུའི་རྡོ་རྗེ་འཛིན་པ་དང་། དང་པོའི་སངས་རྒྱས་སོགས་གསང་སྔགས་ཀྱི་བསྐྱེད་པའི་རིམ་པ་དང་རྫོགས་པའི་རིམ་པ། སྨིན་བྱེད་དང་གྲོལ་བྱེད་ཐམས་ཅད་འཁོར་ལོ་ཐ་མ་གཞིར་བཞག་ནས་འཆད་དགོས་པའི་ཕྱིར་མཁས་གྲུབ་ཚད་ལྡན་ཐམས་ཅད་ཀྱི་དགོངས་པ་མཐར་ཐུག་དབུ་མ་འདི་ལས་མི་འདའོ། །རྫོགས་པ་ཆེན་པོ་ནི་ཡིད་དཔྱོད་ཀྱི་གྲུབ་མཐར་བཞག་པའི་བློ་དང་ཚིག་གི་སྤྲོས་པ་ལས་གྲོལ་བས་ལམ་བདེན་འདུ་བྱས་ཀྱི་ཆོས་སུ་མི་གནས་པའི་ཕྱིར་ཚིག་དང་ཐ་སྙད་ཀྱི་ལམ་དུ་མི་གནས་ཏེ། ཀུན་བྱེད་ལས། ཡོ་ག་ཤིན་ཏུ་རྣལ་འབྱོར་རྫོགས་ཆེན་ལ། །རྒྱུ་དང་འབྲས་བུ་ཡོད་ཟེར་སྨྲ་བྱེད་ན། །དེ་ནི་རྫོགས་ཆེན་རྟོགས་པའི་དོན་མི་ལྡན། །དོན་དམ་ཀུན་རྫོབ་གཉིས་སུ་སྨྲ་བྱེད་ན། །སྒྲོ་དང་སྐུར་པ་འདེབས་པའི་ཚིག་ཡིན་ཏེ། །དེ་ཡིས་གཉིས་སུ་མེད་པ་རྟོགས་པ་མེད། །དུས་གསུམ་སངས་རྒྱས་རྣམས་ཀྱི་རྟོགས་པ་ཡང་། །གཉིས་སུ་མ་མཐོང་རྣལ་གཞག་གཅིག་ཏུ་རྟོགས། །ཞེས་གསུངས་པས་དབུ་མ་ཐལ་འགྱུར་པས་བཞེད་པའི་ཁས་ལེན་ཐམས་ཅད་དང་བྲལ་བའི་དགོངས་པ་ཀ་དག་གི་ངོ་བོའི་བཞུགས་ཚུལ་དང་མཐུན་ཞིང་། དེ་ཉིད་ལས། ཡེ་ནས་རང་རྒྱུད་དག་པའི་དཀྱིལ་འཁོར་ལ། །རྒྱུ་ལས་འབྲས་བུ་ལྷ་ཡི་དཀྱིལ་འཁོར་དེ། །བསྙེན་སྒྲུབ་ཡན་ལག་བཞི་ཡིས་རྫོགས་བྱས་ནས། །འཕྲོ་འདུས་བདག་ཉིད་ལྷུན་གྱིས་གྲུབ་པར་ལྟ། །ཞེས་གསུངས་པས་སྐུ་གསུམ་ཡོན་ཏན་དང་བཅས་པ་ཐམས་ཅད་གཞི་ལ་བཞུགས་པའི་ལྷུན་གྲུབ་ཀྱི་ཆ་ནས་འཁོར་ལོ་ཐ་མ་དང་བྱམས་ཆོས་ཀྱི་དགོངས་པ་ཇི་ལྟ་བར་གནས་ཤིང་། མྱ་ངན་ལས་འདས་པའི་ཡོན་ཏན་ཉི་མ་དང་འོད་ཟེར་བཞིན་ཡེ་ནས་ལྷན་ཅིག་ཏུ་གནས་ཏེ། སྣང་བའི་ཡོན་ཏན་སྐུ་དང་། འོད་ཟེར་དང་ཞིང་ཁམས་དང་གཞལ་ཡས་ཁང་ལ་སོགས་པ་དང་། རིག་པའི་ཡོན་ཏན་སྟོབས་དང་མི་འཇིགས་པ་ལ་སོགས་པ་ལྷུན་གྲུབ་ཏུ་བཞུགས་པའི་ཚུལ་ཤིན་ཏུ་རྒྱས་པ་སངས་རྒྱས་ཕལ་པོ་ཆེའི་མདོ་ལས་གསུངས་པ་བཞིན་དང་། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །ཞེས་སོགས་དང་། རང་བྱུང་རྣམས་ཀྱི་དོན་དམ་དེ། །དད་པ་ཉིད་ཀྱིས་རྟོགས་བྱ་ཡིན། །ཞེས་རྗེས་དཔག་སོགས་ཀྱི་བློས་མི་རྟོགས་པར་བསྟན་པ་སོགས་རྫོགས་ཆེན་གྱི་ལམ་ཇི་བཞིན་པར་བསྟན་པ་ཡིན་ནོ། །གཞན་ཡང་སློབ་དཔོན་ཡེ་ཤེས་ཞབས་ཀྱི་འཇམ་དཔལ་ཞལ་ལུང་ལས། རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། །ཡོངས་སུ་དག་སྐུ་རྡོ་རྗེ་འཆང་ཆེན་པོ། །དཔལ་ལྡན་ཀུན་གྱི་ངོ་བོ་རིམ་གཉིས་འདིས། །སྡུག་བསྔལ་ལམ་བཅས་བསྐལ་པ་གསུམ་དུ་ཡང་། །རང་གི་རྗེས་མཐུན་བྱང་ཆུབ་བླ་དང་བཅས། །ཐོབ་ནས་དེ་བདེ་ཅུང་ཙམ་རབ་ཚོགས་པ། །རྣལ་འབྱོར་དེ་ཡིས་ཅི་ཕྱིར་དེ་མི་སྒོམ། །ཞེས་པས་ཕར་ཕྱིན་སོགས་ལམ་འོག་མས་གྲངས་མེད་གསུམ་དུ་ངལ་དུབ་དང་བཅས་པ་བསྒོམས་པས་རང་གི་བྱང་ཆུབ་རྗེས་མཐུན་པ་རེ་ཐོབ་ཏུ་ཟིན་ཀྱང་། ད་དུང་དེའི་གོང་དུ་ཐོབ་བྱ་གཞན་ཡོད་པའི་ཕྱིར་གཏན་གྱི་འབྲས་བུ་མ་ཡིན་པས། དེའི་ཕྱིར་ན་རྫོགས་པ་ཆེན་པོའི་ལམ་གོང་ན་མེད་པ་འདི་ཅིའི་ཕྱིར་མི་སྒོམ་སྟེ་བསྒོམ་བར་བྱ་བ་ཉིད་དོ། །ཞེས་བསྟན་པའོ། །བུ་སྟོན་ཆེན་པོའི་ཤེར་ཕྱིན་གྱི་ཊཱི་ཀ་དང་། རྡོ་རྗེ་འབྱུང་བ། དཔལ་མཆོག་དང་པོའི་རྒྱུད་འབྲེལ་རྒྱུད་སྡེ་སྤྱི་རྣམ་དུ་རྒྱུའི་རྒྱུད་འཆད་པའི་སྐབས་དང་། བདེ་གཤེགས་སྙིང་པོའི་མཛེས་རྒྱན་རྣམས་སུ་སྙིང་པོའི་བཞུགས་ཚུལ་འཁོར་ལོ་ཐ་མ་དང་གཞན་སྟོང་དབུ་མ་ལྟར་རྒྱས་པར་བཤད་ཅིང་། རྗེ་བཙུན་རེད་མདའ་པས་དང་པོ་བྱམས་ཆོས་སེམས་ཙམ་གྱི་བསྟན་བཅོས་སུ་མཛད་ནས་སེམས་ཙམ་དང་མཐུན་པའི་ཊཱི་ཀ་ཡང་མཛད་ཕྱིས་དབེན་པ་བསྟེན་ནས་གཞན་སྟོང་གི་ལྟ་བ་ཐུགས་ལ་འཁྲུངས་ཤིང་། ཇི་སྐད་དུ། དེ་ཕྱིར་རང་སེམས་རིག་སྟོད་དབྱེར་མེད་འདི། །སེམས་ཅན་ཀུན་ལ་ཁྱབ་པར་ཡོད་གཟིགས་ནས། །ས་འོག་གཏེར་དང་སྦྲུམ་མའི་མངལ་སོགས་དཔེས། །འགྲོ་ཀུན་བདེ་གཤེགས་སྙིང་པོ་ཅན་དུ་གསུངས། །ཞེས་བྱ་བའི་ཉམས་མགུར་བླངས། ཀུན་མཁྱེན་པདྨ་དཀར་པོ་ནི་ཟུང་འཇུག་རབ་ཏུ་མི་གནས་པའི་དབུ་མ་བཞེད་ཅིང་། ཟུང་འཇུག་དངོས་ནི་གཞི་དུས་འོད་གསལ་གྱི་སེམས་དེ་ཉིད་སྒྱུ་མའི་སྣང་བར་ཤར་བ་ལ་གསལ་བ་དང་། སྣང་བ་དེ་ཉིད་དེར་མ་གྲུབ་པའི་སྟོང་པ་སྟེ་རབ་ཏུ་མི་གནས་ཤིང་རྣམ་པར་མི་རྟོག་པ་ཞེས་བྱ་ཞིང་། འབྲས་དུས་དབུ་མ་སྐུ་གཉིས་ཟུང་འཇུག་ཀྱང་སྐུ་དང་ཞིང་ཁམས་ཟུང་དུ་འཇུག་པ་ལ་འདོད་དགོས་པས་རང་སྟོང་ཙམ་ལ་དེ་ལྟ་བུ་མེད་དོ། །བོ་དོང་པཎ་ཆེན་ཀྱང་ངེས་དོན་དབུ་མ་ཆེན་པོ་འདི་ཉིད་གཞུང་འཛུགས་པར་མཛད་པ་ཡིན་ནོ། །ཞེས་གྲགས་སོ། །གཞན་ཡང་རྗེ་ཙོང་ཁ་པའི་བླ་མ་མཁན་ཆེན་ཤུད་པུ་པ་ལས་ཀྱི་རྡོ་རྗེ་ལ་གསང་བའི་བདག་པོས་གསུངས་པ་ལས། ཡབ་ཀུན་ཏུ་བཟང་པོའི་དགོངས་པ། ཡུམ་ཀུན་ཏུ་བཟང་མོའི་སྙིང་གཏམ། རྡོ་རྗེ་འཛིན་པ་བདག་གི་གསང་ཚིག །སྨན་ཆེན་པོ་སྒྲུབ་པ་ལ་སེམས་ཉིད་འོད་གསལ་རྩད་ཆོད་ཅིག །ཅེས་གསུངས་ཤིང་དེ་ཉིད་ཀྱི་སྙན་བརྒྱུད་ཀྱི་ཆོས་སྐོར་ཐམས་ཅད་རྫོགས་ཆེན་གྱི་ཁྲིད་ཡིག་ཁོ་ནར་གསལ་བར་བཞུགས་སོ། །གཞན་ཡང་ཀླུ་ཐོག་རྣམ་གཉིས་སྔ་ཕྱིའི་རིམ་པའང་། ཀླུ་སྒྲུབ་མི་ཡུལ་དུ་མ་བཞུགས་པའི་ཕྱི་མོ་ཞིག་ཏུ་ཐོགས་མེད་སྐུ་མཆེད་བྱོན་པས་འཕགས་པ་ཡབ་སྲས་ཀྱི་བསྟན་བཅོས་རྣམས་སུ་ཕྱོགས་སྔར་བཀོད་པ་གྲུབ་མཐའ་བཞིའི་ནང་གི་རྣམ་རིག་སྨྲ་བ་ཁོ་ན་ཡིན་ལ། བྱམས་ཆོས་དང་ཐོགས་མེད་སྐུ་མཆེད་ཀྱི་གཞུང་བཀོད་པ་མིན་པ་ཕྱུགས་རྫི་རྒན་པོས་ཀྱང་ཤེས་སླ་བ་དེར་ཟད། བྱམས་ཆོས་ལྔས་གྲུབ་མཐའ་ཐ་དད་སྟོན་པར་འདོད་པའང་མི་རིགས་ཏེ། མངོན་རྟོགས་རྒྱན་གྱིས་འཕགས་པ་གསུམ་གྱི་ཐུགས་རྒྱུད་ལ་ཡུམ་དོན་མངོན་པར་རྟོགས་ཚུལ་གྱི་རིམ་པ་གསུངས་པ་ཡིན་ཅིང་། གཞན་བཞི་པོས་བདེ་གཤེགས་སྙིང་པོའི་བཞུགས་ཚུལ་རྒྱས་པར་བསྟན་པ་ལ། སྔ་མ་རང་སྟོང་དང་གཞན་བཞི་པོ་སེམས་ཙམ་དུ་འདོད་པའང་རྣམ་པར་འཁྱམས་པས་ལོག་རྟོག་དང་སྐུར་འདེབས་གཉིས་ཆབས་ཅིག་ཏུ་གྲུབ་པ་ཡིན་ནོ། །འཕགས་པ་རྣམ་གཉིས་དགོངས་པ་དབུ་མ་གཉིས་མི་འགལ་བར་བཞེད་པ་རྒྱ་གར་དུ་སློབ་དཔོན་རིན་འབྱུང་ཞི་བ་དང་། གསེར་གླིང་པ་དང་། མི་ཏྲི་པ། ཇོ་བོ་ཨ་ཏི་ཤ་སོགས་ཀྱིས་བཞེད་ལ། བོད་འདིར། པཎ་ཆེན་གསེར་མདོག་ཅན་པ་ཤཱཀྱ་མཆོག་ལྡན་དང་། ཀརྨ་པ་ཆོས་གྲགས་རྒྱ་མཚོ་གཏེར་ཆེན་འགྱུར་མེད་རྡོ་རྗེ། ལོ་ཆེན་ངག་དབང་ཆོས་དཔལ་སོགས་དང་། སི་ཏུ་ཆོས་ཀྱི་འབྱུང་གནས་སློབ་མའི་ཚོགས་ཀྱང་དེ་ལྟར་བཞེད་པ་ཡིན་ནོ། །སླར་ཡང་སྨྲས་པ། རྒྱལ་དང་དེ་སྲས་ཚོགས་ཀྱི་གསུང་རབ་རྣམས། །རྡུལ་དང་མུན་པའི་གནས་སུ་ངལ་གསོས་ནས། །ཀློག་པ་ཙམ་ཡང་མེད་ན་བདག་འདྲ་ཡིས། །འདི་བ རྗོད་རང་ཉིད་ངལ་བའི་རྒྱུ་རུ་ཟད། །འོན་ཀྱང་རྗེ་བཙུན་མཆོག་གི་སྤྲུལ་པའི་སྐུས། །བཀའ་ནན་ཐོད་བཅིངས་དོན་གཉེས་ཅན་འགས་ཀྱང་། །བསྐུལ་ཕྱིར་གཞན་ལ་ཕན་འདོད་ཁོ་ན་ཡིས། །ངལ་བས་བྲིས་འདི་དོན་མེད་མ་གྱུར་ཅིག །བདག་བློས་མ་ཡིན་བཀའ་དང་དགོངས་འགྲེལ་དོན། །ཇི་བཞིན་མ་ནོར་གཟིགས་པའི་མཁས་རྣམས་ཀྱི། །གཞུང་བཟང་ལ་བརྟེན་གོ་བདེར་བཤད་པ་ལ། །ནོངས་པར་འགྱུར་ན་སྙིང་ནས་མཐོལ་བགྱིད་ཅིང་། །འདིས་ཀྱང་གསུང་རབ་དོན་ལ་རྨོངས་པའི་མུན། །རབ་བསལ་ཆོས་རབ་རྣམ་འབྱེད་ཤེས་རབ་ལས། །རྟོན་པ་རྣམ་བཞིའི་རྡུལ་ཕྲན་སྤྱན་ཐོབ་སྟེ། །ཀུན་མཁྱེན་གནས་སུ་བདེ་བླག་འཇུག་གྱུར་ཅིག །དེ་ལྟར་ནང་པའི་གྲུབ་མཐའ་བཞིའི་གནས་ལུགས་གསལ་བར་བྱེད་པའི་ཡི་གེ་ཉུང་ངུ་ཞིག་ཅིས་ཀྱང་དགོས་ཞེས། ༈ སྐྱབས་མགོན་རྗེ་བཙུན་བཀའ་དྲིན་མཚུངས་ཟླ་མ་མཆིས་པ་དེ་ཉིད་ཀྱི་མཆོག་གི་སྤྲུལ་པའི་སྐུ་འཇིགས་མེད་རིག་འཛིན་མགོན་པོའི་བཀའ་སྩལ་གསེར་གྱི་མེ་ཏོག་གཙུག་གིས་མཆོད་དེ་གྱི་འདའ་བ་ལ་འགྱུར་མེད་ཚེ་དབང་མཆོག་གྲུབ་ངེས་དོན་བསྟན་འཕེལ་ཞེས་པས། ༈ རྒྱལ་བ་གཉིས་པ་ཀུན་མཁྱེན་ངག་གི་དབང་པོ་གཙོ་བོར་གྱུར་པ་ཚད་མའི་སྐྱེས་མཆོག་རྣམས་ཀྱི་ཞལ་ལུང་བཞིན་གོ་བདེར་ཅུང་ཟད་བཀྲལ་བའི་ཡི་གེ་པ་ནི་སྔགས་རམས་པ། །འགྱུར་མེད་མཆོག་ལྡན་གྱིས་འདུ་བྱས་པ་འདིས་ཀྱང་ཆོས་རྣམས་ལ་རྨོངས་པ་མེད་པའི་ཤེས་རབ་ཀྱིས་སྲིད་མཚོ་བརྒལ་ནུས་པར་གྱུར་ཅིག །རྒྱས་པར་ནི་གཞུང་ཆེན་པོ་ལས་རྟོགས་པར་བྱ་དགོས་སོ།། །།

གསང་སྔགས་བླ་ན་མེད་པའི་ཏནྟྲའི་དོན་གྱི་རྣམ་དབྱེ་གསལ་བྱེད།

གསང་སྔགས་བླ་ན་མེད་པའི་ཏནྟྲའི་དོན་གྱི་རྣམ་དབྱེ་གསལ་བྱེད་བཞུགས་སོ། །ཨོ་རྒྱན་རྡོ་རྗེ་འཆང་ལ་ཕྱག་འཚལ་ལོ། །གསང་སྔགས་བླ་ན་མེད་པའི་ཏནྟྲའི་དོན་གྱི་གོ་བ་འདི་ལྟར་ཤེས་པར་བྱ་སྟེ། སྤྱིར་རྒྱུའི་ཐེག་པ་ལས་འབྲས་བུའི་ཐེག་པ་ནི་ཐབས་མང་བ་དང་མྱུར་བ་དང་ཤེས་རབ་ཟབ་པ་དག་གིས་ཕྱེ་ལ། ཁྱད་པར་སྔགས་ཕྱི་བ་ལས་ནང་པ་ནི་ལྟ་བ་དང་ཏིང་ངེ་འཛིན་དང་སྤྱོད་པས་ཕྱེ་བར་ཤེས་དགོས། སྔགས་ནང་པ་ལ་ཡང་ཕ་མ་གཉིས་མེད་ཀྱི་རྒྱུད་གསུམ་དུ་དབྱེ་བའང་། གཙོ་བོར་རྫོགས་རིམ་གྱི་ཁྱད་པར་ལས་འཇོག་ལ། དེ་ཡང་ཐབས་རང་ལུས་ལ་བརྟེན་པ་དང་། ཤེས་རབ་གཞན་ལུས་ལ་བརྟེན་པ་དང་། ཐབས་ཤེས་གཉིས་མེད་ཀྱི་འབྲས་བུ་ལྷན་སྐྱེས་གཙོ་བོར་སྟོན་པའི་སྒོ་ནས་འཇོག །གཙོ་བོར་སྟོན་ལུགས་ཀྱང་། སྟོན་པས་རྒྱུད་དེ་དང་དེར་དངོས་བསྟན་རྒྱ་ཆེ་ཆུང་དང་། རྗེས་འཇུག་ལམ་པས་མོས་པ་དང་དབང་པོའི་ཁྱད་པར་གྱིས་ཉམས་ལེན་གྱི་གཞུང་ཤིང་གང་ལ་བྱེད་པ་དག་གི་སྒོ་ནས་འབྱེད་པ་ལས། དོན་ལ་གང་ཟག་གཅིག་གི་ཉམས་ལེན་དུ་གསུམ་ཁ་རྒྱུ་འབྲས་ཀྱི་ཚུལ་དུ་ཚང་དགོས་པ་ལས་གང་རུང་གཅིག་ཡ་བྲལ་བས་འགྲུབ་པ་མ་ཡིན་ནོ། །བསྐྱེད་རིམ་རྒྱས་བསྡུས་ཀྱི་སྒོ་ནས་ཕྱེ་བ་ནི་རག་པ་ཙམ་ལས་ཞིབ་པར་ནི་མིན་ཏེ། ཕ་རྒྱུད་དུ་གྲགས་པ་གསང་འདུས་དང་གཤེད་སྐོར་མ་རྒྱུད་དུ་གྲགས་པ་བདེ་མཆོག །ཀྱཻ་རྡོ་རྗེ། སངས་རྒྱས་མཉམ་སྦྱོར། ཡང་དག་སོགས་དང་། གཉིས་མེད་རྒྱུད་དུ་གྲགས་པ་དུས་འཁོར་དང་། འཇམ་དཔལ་སྒྱུ་དྲྭ། རྡོར་སེམས་སྒྱུ་དྲྭ་སོགས་ལ་བསྐྱེད་རིམ་ཤས་ཆེ་ཆུང་གི་ཁྱད་པར་མི་འབྱུང་བ་མངོན་སུམ་པས་གསལ་ལོ། །དེ་ལས་སྔ་འགྱུར་བའི་ཆོས་སྐད་ཐུན་མོང་མ་ཡིན་པ་བསྐྱེད་པ་མ་ཧཱ། རྫོགས་པ་ཨ་ནུ། རྫོགས་ཆེན་ཨ་ཏི་ཞེས་གསུམ་དུ་ཕྱེ་བ་ཡང་། ཕ་མ་གཉིས་མེད་ཀྱི་རྒྱུད་གསུམ་སོ་སོར་ཐད་དྲང་དུ་སྦྱར་བའང་འོལ་སྤྱི་ཙམ་ཏེ་མ་ཧཱའི་ཏནྟྲ་བཅོ་བརྒྱད་ལ་ཡང་ནང་གསེས་ཀྱི་ཕ་མ་གཉིས་མེད་ཀྱི་རྒྱུད་གསུམ་དུ་དབྱེར་ཡོད་པ་དང་། དེ་མཚུངས་ཨ་ནུ་དང་ཨ་ཏི་གཉིས་ལ་ཡང་ནང་གསེས་ཀྱི་རྣམས་འབྱེད་ཕྲ་མོ་ཡོད་པ་ཡིན་ནོ། །དེས་ན་འདིར་ནི་བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུ། རྫོགས་པ་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུ། རྫོགས་ཆེན་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ། །ཞེས་ཇི་སྐད་གསུང་བ་བཞིན་དུ། ཕ་མ་གཉིས་མེད་ཀྱི་རྒྱུད་གསུམ་པོ་རེ་རེ་བཞིན་ཡང་བསྐྱེད་རྫོགས་རྫོགས་ཆེན་གསུམ་རེ་ཡོད་པར་ཤེས་དགོས་སོ། །སྔགས་ནང་པར་གཏོགས་པའི་ལམ་ཚང་ལ་མ་ནོར་བ་ཞིག་ཡིན་ཕྱིན། སྦྱང་གཞི་སྦྱོང་བྱེད་ཚང་བའི་བསྐྱེད་རིམ་ཞིག་དང་། གསལ་བདེ་མི་རྟོག་པའི་ཐབས་ལ་བརྟེན་པའི་རྒྱུའི་རྫོགས་རིམ་ཞིག་དང་། ཐབས་བྱུང་འབྲས་བུའི་རྫོགས་རིམ་མམ་རྫོགས་པ་ཆེན་པོ་སྟེ་ལམ་གྱི་སྐྱེལ་སོ་མཐར་ཐུག་ཞིག་དང་གསུམ་མེད་དུ་མི་རུང་བའི་ཕྱིར་རོ། །འོ་ན་ཡོ་ག་སྡེ་གསུམ་ལ་རྒྱུད་སྡེ་དང་ཐེག་པའི་རྣམ་བཞག་སོ་སོ་བ་མི་རུང་ངམ་ཞེ་ན། རྡོ་རྗེ་འཆང་གིས་དངོས་བསྟན་གྱི་ལམ་རིམ་རྒྱ་ཆེ་ཆུང་དང་། གང་ཟག་གིས་གནས་སྐབས་དེ་དང་དེའི་ལམ་བགྲོད་བྱེད་ཡིན་པས་ཀླན་ཀ་མེད་དོ། །ལམ་གཅིག་ལ་ཡོ་ག་གསུམ་ཀ་རྫོགས་དགོས་ན་རྫོགས་ཆེན་གྱི་རྒྱུད་ལས་མ་ཧཱ་དང་ཨ་ནུ་གོལ་སར་བསྟན་པ་དེ་གང་སྙམ་ན་སྐབས་དེ་དང་དེའི་ལྟ་བསྒོམ་ལ་མཆོག་འཛིན་ཆེན་མཐར་ཐུག་གི་ལམ་ལ་ཁ་འགྱང་བ་དང་། བྱ་རྩོལ་དང་བྲལ་བའི་ལམ་ལ་སླེབ་ཟིན་པ་ལ་བྱ་རྩོལ་གྱི་ལམ་དོན་མེད་པར་སྟོན་པའི་ཆེད་ཡིན་ཏེ། དེ་འདྲ་བ་དེ་ལམ་གྱི་ཐོག་མ་ངེས་འབྱུང་དང་། གྲུབ་མཐའི་ཐོག་མ་བྱེ་སྨྲ་ནས་བརྩམས་ཏེ། མཐར་ཐུག་ཐེག་མཆོག་རྒྱལ་པོ་འདི་ལ་ཐུག་གི་བར་དུ་ལམ་དང་གྲུབ་མཐའི་བྱེ་བྲག་ཐམས་ཅད་ལ་ཐད་ཀ་ཐད་ཀའི་ཁྱད་འབྱེད་རེ་ཡོད་པ་ནི་ཤེས་ཀྱང་སླ་བ་ཡིན་ནོ། །དེ་ལྟར་སྤྱིར་ཤེས་པར་བྱས་ནས་ལམ་དངོས་ལ་འཇུག་པ་ནི། གདུལ་བྱའི་གང་ཟག་རང་རང་གི་ཁམས་དབང་མོས་པའི་བྱེ་བྲག་ལས་ཕ་མ་གཉིས་མེད་ཀྱི་རྒྱུད་སྡེ་གསུམ་པོ་གང་རུང་ཞིག་ལ་ཞུགས་ཏེ་བསྐྱེད་རྫོགས་རྫོགས་ཆེན་གསུམ་གྱི་ལམ་གནད་ཚང་ལ་མ་འཁྲུལ་བར་ཉམས་སུ་ལེན་ཤེས་དགོས་སོ། །དེ་ཡང་དེ་གསུམ་ཉམས་སུ་ལེན་ཚུལ་ལ་མཐའ་གཅིག་ཏུ་འདྲ་བ་མ་ཡིན་ཏེ། གང་ཟག་ལ་དབང་པོ་རྣོ་རྟུལ་གྱི་ཁྱད་པར་དང་། རྣོན་པོ་ལ་ཡང་རྒྱུ་དང་སྦྱངས་པའི་རྣོན་པོ། རྟུལ་པོ་ལ་ཡང་རང་བཞིན་དང་ལས་ཀྱིས་སྒྲིབ་པའི་རྟུལ་པོ་སོགས་གདུལ་བྱའི་ཁམས་དབང་ནི་རྒྱལ་བའི་ཡེ་ཤེས་ཀྱི་ཡུལ་ལྟར་རྒྱ་ཆེ་ལ། དེའི་ཕྱིར་སློབ་མའི་རྒྱུད་ལ་རྟོགས་པ་སྐྱེ་ངེས་ཀྱི་གདམས་ངག་འདེབས་པ་ལ་འཕགས་ལམ་དང་མངོན་ཤེས་ཐོབ་པའི་སློབ་དཔོན་དགོས་པར་གཞུང་མན་ངག་ཐམས་ཅད་ནས་ནན་ཆེར་གསུངས་པ་ཡང་གནད་འདི་ཀས་ཡིན་ནོ། །དེ་ལྟར་གདུལ་བྱའི་ཁྱད་པར་གྱི་ལམ་བགྲོད་ཚུལ་ཀྱང་མཐའ་ཡས་པ་ཞིག་ཡོད་དེ། མཐར་གྱིས་འཇུག་པ་དང་ཐོད་རྒལ་པ་གཉིས། མཐར་གྱིས་པ་ལ་མྱུར་བུལ་གྱི་སྒོ་ནས་རིམ་གྱིས་པ་དང་། གཅིག་ཆར་བ་གཉིས། ཐོད་རྒལ་བ་ལ་བློ་སྟོབས་ཆེ་ཆུང་གིས་ཐོད་རྒལ་ཆུང་འབྲིང་ཆེན་པོའི་རྣམ་བཞག་དང་། སློབ་ཚུལ་གྱི་སྒོ་ནས་མོས་སློབ་དང་སྨིན་སློབ་གཉིས། ས་མཚམས་ཀྱི་སྒོ་ནས་ཟག་བཅས་དང་ཟག་མེད་གཉིས་སོགས་ལམ་གྱི་དབྱེ་བ་ནི་མང་ཞིག་ཡོད་ལ། དེ་ཐམས་ཅད་ལམ་གྱི་ངོ་བོའི་སྒོ་ནས་ཐབས་ཀྱི་ལམ་དང་། ཤེས་རབ་ཀྱི་ལམ་གཉིས་སུ་འདུས་པ་ཡིན་ནོ། །དེ་གཉིས་ཀྱི་སོ་སྐྱེའི་ལམ་དུ་གཙོ་བོར་འདོན་ལུགས་ཀྱི་སྒོ་ནས་བཞག་པ་མ་གཏོགས་གང་རུང་ཡ་བྲལ་བའི་ལམ་གྱིས་ནི་མཆོག་འགྲུབ་པ་མེད་དོ། །ཐབས་གྲོལ་ལམ་གྱི་ཐབས་ཅེས་པ་ནི། སྤྱིར་ཐབས་ཀྱི་ཕྱོགས་སུ་གཏོགས་པའི་ཆ་མང་ཡང་དངོས་ནི་དབང་གསུམ་པའི་ལམ་ཡིན་ནོ། །ཤེས་རབ་ཅེས་པ་ལ་ཕྱོགས་མང་ཡང་དངོས་ནི་ཐོས་བསམ་སྒོམ་པའི་ཤེས་རབ་གསུམ་ཡིན་ནོ། །དེས་ན་ཐབས་ལམ་ལ་ཤེས་རབ་ཀྱིས་མ་ཟིན་ན་འདོད་ཆགས་ཆོས་སུ་སྨྲ་བ་དབང་ཕྱུག་གི་ལམ་དང་ཁྱད་མེད་པ་དང་། ཤེས་རབ་ཐབས་ལམ་གྱིས་མ་ཟིན་ན་རྒྱུའི་ཐེག་ཆེན་དང་མཚུངས་པ་ལས་གསང་ཆེན་ཐབས་ཀྱིས་ཆེ་བའི་ལམ་དུ་མི་འགྲུབ་བོ། །ཞེས་རྒྱུད་ལས་བཤད་པ་ལྟར་རོ། །ཐབས་ལམ་ལ་དབང་བཞི་ཆར་འཇོག་དགོས་པ་མིན་ནམ། ཅིའི་ཕྱིར་གསུམ་པ་ཁོ་ན་སྨྲོས་ཅེ་ན་བདེན་མོད་དེ། འདིར་གཙོ་བོ་ངོས་བཟུང་བ་ཡིན་གྱི་དེའི་རྒྱུར་བུམ་གསང་དང་འབྲས་བུར་བཞི་བ་འོང་བས་དེར་བསྡུས་པའོ། །དེ་བཞིན་དུ་གྲོལ་ལམ་གྱི་གཙོ་བོ་ཡང་། དངོས་སྒོམ་བྱུང་གི་ཤེས་རབ་མངོན་སུམ་རང་གསལ་བློའི་ཡུལ་དང་བྲལ་བ་ཡིན་ཀྱང་དེའི་རྒྱུར་ཐོས་བསམ་གྱི་ཤེས་རབ་དང་གྲོགས་ཏིང་ངེ་འཛིན་དག་བསྡུས་པ་ཡིན་ནོ། །དེ་ལྟར་ན་ཐབས་ལམ་ནི་ལམ་གྱི་རྒྱུའམ་རྐྱེན་དང་གྲོལ་ལམ་ནི་འབྲས་བུར་འོང་བ་ཡིན་ནོ། །ཐབས་ལམ་དང་གྲོལ་ལམ་གཉིས་འཕགས་ལམ་འཐོབ་པ་ལ་གང་མྱུར་ཞེ་ན་རྣམ་པར་ཕྱེ་ནས་ལན་གདབས་པར་བྱ་བ་སྟེ་གྲོལ་ལམ་གཅིག་ཆར་བ་ནི་ཐབས་ལམ་གཅིག་ཆར་བ་ལས་ཀྱང་མྱུར་ལ། གྲོལ་ལམ་རིམ་གྱིས་པ་ནི་ཐབས་ལམ་རིམ་གྱིས་པ་ལས་ཀྱང་བུལ་བ་ཡིན་ཏེ། ཀསྟུ་བྷ་དང་། མ་ཀྵི་ཀའི་དཔེ་བཞིན་ནོ། །ད་མདོ་ཧྲིལ་གྱིས་དྲིལ་ན་སྔགས་བླ་མེད་ཀྱི་ལམ་ཐམས་ཅད་བསྐྱེད་རྫོགས་རྫོགས་ཆེན་གསུམ་དུ་འདུ། གསུམ་ཀ་དབང་བཞི་ཡོངས་རྫོགས་གཅིག་གི་ལམ་དུ་འདུ། དེ་ཡང་ཐབས་གྲོལ་གྱི་ལམ་གཉིས་སུ་འདུ། འཕགས་ལམ་ལ་ལམ་གྱི་རྣམ་བཞག་ཐ་དད་པ་མེད། དབང་གསུམ་པའི་ལམ་མ་བརྟེན་པར་སྔགས་བླ་མེད་ཀྱི་མཐོང་ལམ་དང་མཐར་ཐུག་གི་འབྲས་བུ་ལ་སྦྱོར་མི་སྲིད། དབང་གསུམ་པའི་ལམ་ཡིན་ན་ཤེས་རབ་མར་བརྟེན་དགོས་པས་ཁྱབ་ཀྱང་། ཤེས་རབ་མ་ཡིན་ན་ལས་ཀྱི་ཕྱག་རྒྱ་ཡིན་དགོས་པ་མ་ཁྱབ། རྒྱུ་མཚན་དེའི་ཕྱིར་ན་གྲོལ་ལམ་པ་དང་། བྱེ་བྲག་རྫོགས་ཆེན་པ་རིག་པ་རང་སྣང་གི་བློ་ཅན་རྣམས་ལ་དབང་བཞིའི་ལམ་ཡོངས་རྫོགས་ཡོད་ཀྱང་དེས་ཐབས་ལམ་པ་ཡིན་པར་མི་འགྱུར། སྤྱིར་སྔགས་ལམ་ལ་ཐབས་ཀྱི་ཐེག་པ་ཅེས་པའི་ཐབས་དང་། བྱེ་བྲག་ཐབས་གྲོལ་ལམ་གྱི་ཐབས་གཉིས་ལ་སྤྱིར་བཏང་དང་དམིགས་བསལ་ལམ་ཐུན་མོང་དང་ཐུན་མིན་གྱི་ཁྱད་པར་ཡོད་པ་ཤེས་དགོས། དེས་ན་རྒྱུད་ཀྱི་རྒྱལ་པོ་དཔལ་ལྡན་གསང་བའི་སྙིང་པོ་ལྟ་བུ་ནི་སྤྱི་རྒྱུད་ཡིན་པས་ན་ཕམ་གཉིས་མེད་ཀྱི་རྒྱུད་གང་ལྟར་བཤད་ཀྱང་ཆོག་པ་དང་། བསྐྱེད་རྫོགས་རྫོགས་ཆེན་གསུམ་གང་ལྟར་བཀྲལ་ཀྱང་འགལ་བ་མེད་ལ་དེ་ལྟར་ཡིན་པ་ཡང་ངེས་པའི་དོན་དང་སྒྲ་ཇི་བཞིན་པ་ཡིན་ནོ། །ཐབས་ལམ་དང་གྲོལ་ལམ་གྱི་ཁྱད་པར་ཡང་རྩ་རྒྱུད་ནི་གང་གི་ཕྱོགས་སུ་ཡང་མ་ལྷུང་ཞིང་བཤད་རྒྱུད་སྡེ་བཞི་སོ་སོའི་དགོངས་པས་ཐབས་གྲོལ་སོ་སོར་འཆད་ནུས་པ་ཉིད་དོ། །སྤྱིར་རྒྱུད་དོན་ལ་གཞི་ལམ་འབྲས་བུའི་རྒྱུད་གསུམ་ལས། གཞི་རྒྱུད་ནི་ཤེས་བྱ། ལམ་རྒྱུད་ནི་ཉམས་སུ་ལེན་བྱ། འབྲས་རྒྱུད་ནི་ཐོབ་བྱ་ཡིན་ལ། དེའི་ནང་ནས་ཀྱང་གཞི་ཤེས་བྱེད་དང་འབྲས་བུ་ཐོབ་བྱེད། ཉམས་ལེན་གྱི་ངོ་བོ་དངོས་ནི་ལམ་རྒྱུད་ཡིན་པས་དེའི་རང་བཞིན་ཤེས་པ་གལ་ཆེ། དེ་ཡང་ལྟ་སྤྱོད་དཀྱིལ་འཁོར་སོགས་རྒྱུད་ཀྱི་དངོས་པོ་བཅུ་འཁོར་དང་བཅས་པ་ཡིན་ཀྱང་དེའི་ནང་ནས་ཀྱང་གཙོ་བོ་ཆེ་ཤོས་ལྟ་བ་དང་ཏིང་འཛིན་གཉིས་ཡིན། ལྟ་བ་ནི་ལྷག་པའི་བདེན་པ་དབྱེར་མེད་བློས་སྤྱོད་ཡུལ་དང་བྲལ་བ་དེ་ཡིན་ཀྱང་། དེ་འཕགས་པའི་ཡེ་ཤེས་མངོན་སུམ་པའི་ཡུལ་ཡིན་ཕྱིར་སོ་སྐྱེས་བློས་ཇི་བཞིན་པར་གཏན་ལ་འབེབས་མི་ནུས། དེས་ན་འཁོར་བ་དང་མྱང་འདས་སུ་བཏགས་པའི་ཞེན་སྣང་འདི་ཉིད་ལམ་ཐུན་མོང་དང་ཐུན་མིན་གྱི་གཏན་ཚིག་རྣམས་ཀྱིས་གཞལ་བས་རྗེས་དཔག་གི་ཚད་མས་གཞི་རྒྱུད་ཀྱི་དོན་སྤྱི་ཙམ་ངེས་པ་དེ་ལྟ་བར་བཞག་ནས་ཏིང་ངེ་འཛིན་བསྒོམ་དགོས། ཏིང་ངེ་འཛིན་དེ་ནི་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་བསྐྱེད་པའི་རིམ་པ་དེ་ཡང་། རྣལ་འབྱོར་ལྔའི་ཆིང་གིས་བཅིང་པ་དང་། བསྙེན་བསྒྲུབ་ཡན་ལག་བཞིའི་ཆིང་གིས་བཅིང་བ་གང་ལྟར་ཡང་འདྲའོ། །བསྐྱེད་རིམ་གྱི་ཆོ་ག་ནི་རྩ་རྒྱུད་ལས་ཡི་གེ་འཁོར་ལོའི་སྤྲིན་ལས་སྒྱུ་འཕྲུལ་དྲྭ་བའི་ཏིང་ངེ་འཛིན་དུ་སྒྲུབ་པ་ཙམ་ལས་མི་གསལ་ཡང་། བཤད་རྒྱུད་དང་སྒྲུབ་ཐབས་སོགས་ཀྱི་དགོངས་པས། བདག་སྲས་གཞན་སྲས་ཀྱི་ཆོ་ག་དང་། མངོན་བྱང་ལྔ་བསྐྱེད། རྡོ་རྗེའི་ཆོ་ག་གསུམ་བསྐྱེད་སོགས་གང་ལྟར་བྱས་ཀྱང་འགལ་བ་མེད་པའོ། །རྫོགས་རིམ་ནི་གྲོལ་ལམ་བསྐྱེད་རིམ་ལྟར་རྣལ་འབྱོར་ལྔའི་ཆིང་གིས་བཅིང་བ་དང་། ཐབས་ལམ་སྟེང་འོག་གི་སྒོ་ཐུན་མོང་བ་ལྟར་དགའ་བཞིའི་ཆིངས་སུ་བཅིང་པ་དང་། ཐུན་མོང་མ་ཡིན་པ་འཁོར་ལོ་བཞིར་མན་ངག་བཞིའི་རྫོགས་རིམ་སྒོམ་ཚུལ་བཱི་མ་ལའི་གསང་ཐིག་ནས་འབྱུང་བ་ལྟར་བསྒོམ་པའི་རིམ་པ་རྣམས་སོ། །གྲོལ་ལམ་རྣལ་འབྱོར་ལྔའི་ཆིང་གིས་བཅིང་བ་ཟུར་པའི་བཤད་སྲོལ་ལས་བྱུང་བ་ནི་ལམ་གྱི་ངོ་བོར་རིམ་ལྔ་དང་ཕྱོགས་མཚུངས་ལ། རོང་ཟོམ་ཆེན་པོའི་དཀོན་མཆོག་འགྲེལ་དུ་གསུང་བ་ནི་རྫོགས་ཆེན་ཁྲེགས་ཆོད་ཀྱི་གདམས་པ་དང་ཕྱོགས་མཚུངས་པའོ། །བསྐྱེད་རིམ་ནས་རྫོགས་རིམ་ལ་འཇུག་ཚུལ་ནི། གྲོལ་ལམ་གཅིག་ཆར་བ་བསྐྱེད་རྫོགས་ཆིག་ཆོད་དུ་སོང་ནས་ལམ་དངོས་འཕགས་ལམ་ཟུང་འཇུག་གི་ངོ་བོར་གྱུར་པའོ། །གྲོལ་ལམ་རིམ་གྱིས་པ་དང་། ཐབས་ལམ་པ་རྣམས་ནི་བསྐྱེད་རྫོགས་རིམ་ཅན་དུ་སྦྱང་དགོས་པ། དེ་ཡང་བསྐྱེད་རིམ་ཕྱག་རྒྱ་སྤྲོས་བཅས་རྫོགས་ནས་རྫོགས་རིམ་གསང་དབང་གི་ལམ་ནས་རིམ་བཞིན་འཇུག་པ་དང་། ཕྱག་རྒྱ་གཅིག་སྤྲོས་ཀྱི་རྟེན་ལ་གསང་དབང་གི་ལམ་སྦྱངས་ནས་སྒྱུ་ལུས་དང་འོད་གསལ་མངོན་དུ་བྱས་ཏེ་ཚོགས་སྒྲུབ་ཤེར་དབང་ལམ་གྱི་ཉེ་རྒྱུས་རླུང་སེམས་ལས་གྲུབ་པའི་སྒྱུ་ལུས་ཀྱི་ལྷ་སྐུ་དོན་གྱི་འོད་གསལ་དུ་བསྡུས་ནས་ཟུང་འཇུག་གི་ལྷ་སྐུར་ལྡང་བ་དང་། ཉིན་མོ་སྟོང་ཆེན་རྣལ་འབྱོར་བསྒོམས་ནས་མཚན་མོ་གཉིད་ཀྱི་འོད་གསལ་དང་སྦྲེལ་ཏེ་ངུ་བ་སོགས་ཀྱི་མཚན་མ་མཐོང་བ་ནས་དཔེའི་འོད་གསལ་བསྐྱེད་པ་རྫོགས་རིམ་གྱི་སྟོང་ཆེན། སྙིང་རྗེ་སྒྱུ་མའི་འཕེན་པས་ཉིན་མོ་ཕྱག་རྒྱ་གཅིག་སྤྲོས་ཀྱི་རྣལ་འབྱོར་བསྒོམ་པ་དང་འབྲེལ་བར་དཔེའི་འོད་གསལ་ལས་སྙིང་རྗེ་སྒྱུ་མའི་འཕེན་པས་སྒྱུ་ལུས་ཀྱི་ལྷ་སྐུ་ཕྱག་རྒྱ་གཅིག་སྤྲོས་སུ་ལྡང་བ་དེ་དང་། དེའི་རྣལ་འབྱོར་ཚུལ་དེ་ལྟར་བསྐྱེད་རྫོགས་ཟུང་འཇུག་གི་ལམ་གྱིས་སྦྱོར་ལམ་ཆོས་མཆོག་གི་བར་བགྲོད་ནས་རྟེན་དེ་ལ་ཚོགས་སྒྲུབ་ཀྱི་ཉེ་རྒྱུས་འཕགས་ལམ་ལ་སྦྱོར་བར་བཤད་པ་སོགས་བཤད་སྲོལ་དུ་མ་ཡོད། གང་ལྟར་རུང་ཕྱག་རྒྱ་གཅིག་སྤྲོས་ཀྱིས་བསྡུས་པའི་བསྐྱེད་རིམ་ལྷའི་རྣལ་འབྱོར་ལ་ངེས་པ་ཅི་རིགས་རྙེད་པའི་ཚེ་དེ་དག་དང་སྦྲེལ་ནས་གསང་དབང་གི་ལམ་རླུང་གི་རྣལ་འབྱོར་དང་ཤེར་དབང་གི་ལམ་གདམས་ངག་སྟེང་སྒོ་དང་འོག་སྟེ་ཡེ་ཤེས་ཀྱི་ཕྱག་རྒྱ་ལ་རྩལ་སྦྱངས་པ་སོགས་བྱས་པས་སྟོང་བཞི་དང་། དགའ་བཞི་ཐབས་ཀྱི་ཁྱད་པར་ཙམ་ལས་ལམ་གྱི་མངོན་རྟོགས་སྦྱོར་ལམ་བཞི་དང་དོན་གཅིག་པ་སྐྱེ། དེ་ནས་ལས་རྒྱ་དངོས་ལ་བརྟེན་ནས་མཐོང་ལམ་ལ་སྦྱོར་བ་ལ་སྤྲོས་བཅས་སྤྲོས་མེད་ཀྱི་སྤྱོད་པ་དུས་ཚོད་དང་འབྲེལ་བར་བསྐྱངས་པས་ཆོག་གམ་སྙམ། ཤེས་དབང་གི་ལམ་རྟེན་ཁྱིམ་པ་དང་རབ་བྱུང་གང་ཡིན་ཀྱང་ཐབས་ཀྱིས་མ་ཟིན་ན་འཆིང་བ་མཉམ་ལ། ཟིན་ན་ཐབས་ཀྱི་ལམ་དུ་མཉམས་པས་གཞུང་ཇི་ལྟ་བ་བཞིན་བསྙེགས་ན་འགལ་བ་མེད་དམ་སྙམ། བཅས་རང་གི་ཁ་ན་མ་ཐོ་བ་འབྲས་བུ་དང་བཅས་པ་ཐོབ་མིན་གྱི་ཁྱད་པར་འདུ་ཤེས་གསུམ་སྒྲ་ཇི་བཞིན་པ་ལམ་དུ་སློང་མིན་དང་ཆགས་རྟོག་གི་ངོ་བོ་བདེ་སྟོང་དུ་གྲོལ་མིན་གྱིས་ཕྱེ་བ་དོན་གནས་དང་། འཕགས་ལམ་དངོས་དང་དེ་དང་བར་ཆད་མེད་པའི་ལམ་ལ་སྦྱངས་ནས་བཟོད་ཐོབ་ངན་སོང་ལྟུང་མིན་སོགས་དང་བཤད་སྦྱར་མཛད་པ་ནི་གསང་སྔགས་ཐབས་ཀྱི་ཆེ་བ་དང་མ་སྦྱར་ཞིང་རྒྱུ་འབྲས་དང་ས་ལམ་གྱི་རྣམ་བཞག་སྤྱིར་བཏང་བ་དང་བསྟུན་པས་ཇོ་བོའི་བྱང་ཆུབ་ལམ་སྒྲོན་དང་ཧ་ལམ་དགོངས་པ་མཐུན་ནམ་སྙམ། སྤྱིར་ས་ལམ་འབྲས་བུའི་རྣམ་བཞག་ཐམས་ཅད་ཤེས་དགོས་ཀྱང་། ཁྱད་པར་ལས་དང་པོ་པས་ཚོགས་སྦྱོར་དང་། མཐོང་ལམ་ལ་སྦྱོར་ཚུལ་ཚུན་ཆད་འདི་ཞིབ་པར་ཤེས་པ་གལ་ཆེ། སྤྱིར་གྱིས་སྔགས་ལམ་དང་ཁྱད་པར་རྫོགས་ཆེན་ལམ་གྱི་མྱུར་ཁྱད་དང་ཐབས་ཀྱི་ཆེ་བ་ཐམས་ཅད་མཐོང་ལམ་ཚུན་ཆད་དུ་འདོན་ཤེས་དགོས་ཀྱི། དེ་ཕན་ཆད་ནི་ཐེག་ཆེན་ཡིན་ཕྱིན་ཁྱད་པར་ཅུང་ཟད་ཙམ་ཡང་ཡོད་ཅེས་མི་སྨྲའོ། །རྒྱལ་བའི་དགོངས་གསང་རྒྱལ་སྲས་མཆོག་གི་ཡུམ། །རྒྱལ་བའི་ལམ་བཟང་རྡོ་རྗེའི་ཐེག་པ་ལ། །ཉམ་ཆུང་བློ་ཡིས་དཔྱད་བཟོད་ལྟ་ཅི་ཞིག །དོགས་པ་གཅོད་འདོད་བྲིས་ལ་ཉེས་པ་མེད། །ཅེས་པའང་པདྨ་བཛྲ་དུ་འབོད་པས་བྲིས་པ་དགེའོ།། །།

དུར་ཁྲོད་ཁུ་བྱུག་རོལ་པའི་རྒྱ་ཆེར་བཤད་པ་བདུད་རྩི་ཐིགས་པ། སློབ་དཔོན་མཚོ་སྐྱེས་རྡོ་རྗེ།

དུར་ཁྲོད་ཁུ་བྱུག་རོལ་པའི་རྒྱ་ཆེར་བཤད་པ་བདུད་རྩི་ཐིགས་པ་ཞེས་བྱ་བ་བཞུགས་སོ། །རྒྱ་གར་སྐད་དུ། ཨ་མྲྀ་ཏསྟ་ཐ་ན་མ། བོད་སྐད་དུ། བདུད་རྩི་ཐིགས་པ་ཞེས་བྱ། དཔལ་ཧེ་རུ་ཀ་ལ་ཕྱག་འཚལ་ལོ། །བཅོམ་ལྡན་བདེར་གཤེགས་ཐུགས་ཀྱི་ཐུགས། །གསང་གསུམ་དོན་ལས་བྱུང་བ་ཡི། །མཐར་ཕྱིན་དོན་ལ་རབ་ཟབ་པ། །རྡོ་རྗེ་གཞོན་ནུ་རབ་ཟབ་ཐུགས། །སྤྲུལ་སྐུའི་ངོ་བོར་གནས་པའི་ཚེ། །འཁོར་ལོ་བཞི་ཡི་བདག་ཉིད་ཅན། འབར་བའི་འོད་ཀྱིས་འཁྲིགས་པ་ཡི། །དོན་དམ་ཟབ་མོའི་སྐུ་མཆོག་ལ། །ལུས་ངག་ཡིད་ཀྱིས་ཕྱག་འཚལ་ནས། །རྣལ་འབྱོར་བརྒྱུད་ཀྱི་རྗེས་འབྲངས་ནས། །ཡང་དག་དོན་ཆེན་ཟབ་མོའི་འགྲེལ། །བདུད་རྩིའི་ཐིགས་ལྟར་བདག་གིས་བཀྲོལ། །སྔགས་ཀྱི་སྐུ་ལ་གསལ་འཇུག་པ། །དེ་ནི་བསྐྱེད་པའི་རིམ་པའོ། །སེམས་ལ་དམིགས་པ་ཙམ་ཞིག་ནི། །བསྐྱེད་པའི་རིམ་པ་རྫོགས་པའོ། །དེ་གཉིས་ཀུན་རྫོབ་བདེན་པའོ། །ཟུང་འཇུག་དོན་ལས་གང་བྱུང་དང་། །མཐར་ཕྱིན་མན་ངག་རབ་ཟབ་སྟོན། །དོན་དམ་བདེན་པ་ཞེས་སུ་གསུངས། །སྔགས་དང་དམ་ཚིག་སྤྱོད་པ་དང་། །འཁྲུལ་འཁོར་རྫས་ཏེ་ཐམས་ཅད་ཀུན། །ཀུན་རྫོབ་བདེན་པའི་གྲངས་སུའོ། །ཟུང་འཇུག་རིམ་དང་དོན་དམ་པ། །བྱང་ཆུབ་སེམས་ཀྱི་ངོ་བོ་རྒྱུ། །དོན་དམ་བདེན་པའི་གྲངས་སུའོ། །བདེན་གཉིས་དོན་ལ་རབ་གནས་པ། །རྒྱུད་ཀུན་གྱི་ནི་དོན་བསྡུས་པའོ། །བྱང་ཆུབ་སེམས་ཏེ་ཀུན་གྱི་དངོས། །གསང་བ་སྦས་པའི་དོན་རབ་གསལ། །དཔལ་ལྡན་རྡོར་གཞན་རྒྱུད་ཡིན་ཏེ། །དེ་བས་རྒྱུད་རྒྱལ་ཀུན་གྱི་རྩེ། །ཚིག་ཉུང་བ་ལ་དོན་ཟབ་པ། །རྡོར་གཞན་རྒྱུད་ནི་རྙེད་དཀའ་ཞིང་། །ཟུང་འཇུག་དོན་ནི་རྟོགས་དཀའ་བས། །ཁམས་གསུམ་སེམས་ཅན་ཐམས་ཅད་འཁོར། །དེ་བས་བླ་མའི་བཀའ་དྲིན་གྱིས། །ཡོངས་སུ་འབད་དེ་ཤེས་ནས་ནི། །ཟུང་འཇུག་དོན་ལ་རབ་གནས་ཀྱིས། །གླེང་གཞིའི་དོན་ནི་རྒྱུ་རུ་གསུངས། །གླེང་སློང་བ་ནི་རྐྱེན་དུ་གསུངས། །བཤད་པའི་ཚིག་ནི་འབྲས་བུ་སྟེ། །རྒྱུ་རྐྱེན་འབྲས་བུ་གསུམ་དུ་གསུངས། །དགོས་འབྲེལ་རྣམ་པ་བཞིར་ཡོད་དེ། །མི་ཡིས་སྐྱེ་བ་འཁྲུལ་བའི་ཚེ། །རྒྱུད་ཅེས་བརྗོད་དེ་བརྗོད་པ་ཡིན། །བཙུན་མོ་པདྨའི་ནང་ནས་བྱུང་། །གླེང་གཞིར་འདོད་དེ་འབྲེལ་བའོ། །སྔགས་ལ་སྡོམ་པར་བསྟན་པ་ནི། །ངེས་པའི་ཚིག་ཏེ་དགོས་པ་ཡི། །ཟུང་འཇུག་འདོད་པས་ཆོས་སྤྱོད་པའོ། །དེ་ནི་འདོད་ཆགས་བྲལ་ཆོས་ཏེ། །ཡོང་དགོས་ཡིན་ཞེས་རྒྱལ་བས་གསུངས། །འདོད་ཆགས་ཅན་ལ་འདི་ལྟར་གསུངས། །རིགས་ལྔའི་ངོ་བོར་བསྐྱེད་པ་ནི། །རྒྱུད་ཅེས་བྱ་སྟེ་བརྗོད་པའོ། །ལྔ་པོ་རིགས་གཅིག་གྱུར་པ་ནི། །གླེང་གཞི་ཡིན་ཏེ་བྲལ་བའོ། །སྐུ་གསུང་ཐུགས་ཀྱི་རྡོ་རྗེ་ནི། །ངེས་པའི་ཚིག་ཏེ་དགོས་པའོ། །བཙུན་མོ་ལ་སོགས་སྤྱོད་པ་ནི། །རྒྱུད་ཅེས་བྱ་སྟེ་ཡང་དགོས་སོ། །སྐྱེ་བོ་དོན་ལ་འཇུག་པ་ལ། །ཡིད་ཆེས་ཕྱིར་ན་དགོས་འབྲེལ་བསྟན། །ཚིག་གི་ཚོགས་ལ་དགའ་བ་དང་། །དངོས་པོ་སྤྱོད་ལ་དད་པ་དང་། །རྟོག་པའི་ཆོས་ལ་བཟློག་པའི་ཕྱིར། །དེ་ལ་ཀུན་རྫོབ་བདེན་པ་བསྟན། །ཡང་དག་དོན་ལ་མོས་པ་དང་། །ཟབ་མོའི་ཆོས་ལ་དད་པ་དང་། །བྱང་ཆུབ་སེམས་ཀྱི་དོན་ལ་མོས། །དེ་ལ་དོན་དམ་བདེན་པ་བསྟན། །རིིམ་པ་གཉིས་པ་བསྟན་ནས་ནི། །བཤད་པའི་དབྱེ་བ་གསུངས་པ་ཡིན། །འཇིག་རྟེན་བློ་རྣམས་དཔག་མེད་པས། །གང་ཟག་རྣམ་པ་ལྔར་འདོད་དེ། །ཨུད་པ་ལ་འདྲའི་གང་ཟག་དང་། །པད་དཀར་འདྲ་བའི་གང་ཟག་དང་། །པདྨ་དམར་འདྲའི་གང་ཟག་དང་། །ཙནྡན་འདྲ་བའི་གང་ཟག་དང་། །རིན་པོ་ཆེ་ཡི་གང་ཟག་གོ། །རང་བཞིན་གཅིག་ཏེ་ཐ་དད་མིན། །ཐམས་ཅད་མཁྱེན་པས་གསུངས་པའོ། །འཛིན་པ་མཁས་པའི་བརྗེད་འགྱུར་བ། །ཨུད་པལ་ཞེས་བྱའི་གང་ཟག་གོ། །མང་པོ་ཐོས་ཤིང་སྟོན་མི་ནུས། །པད་དཀར་ཞེས་བྱའི་གང་ཟག་གོ། །དད་ལྡན་ཐོས་བརྩོན་སྙིང་རྗེ་ཆེ། །པད་དམར་ཞེས་བྱའི་གང་ཟག་གོ། །ཐོས་མེད་ང་རྒྱལ་མང་དུ་སྨྲ། །རྗེས་སུ་གཟུང་བའི་དོན་མེད་པ། །ཙན་དན་ཞེས་བྱའི་གང་ཟག་གོ། །དམ་ཚིག་དག་ཅིང་ཤེས་རབ་ལྡན། །རྒྱུད་ཐོས་ལེགས་པར་སྟོན་པ་ནི། །རིན་ཆེན་ཞེས་བྱའི་གང་ཟག་གོ། །དམ་ཚིག་དག་ཅིང་ཤེས་རབ་ལྡན། །རྒྱུད་ཐོས་ལེགས་པར་སྟོན་པ་ནི། །རིན་ཆེན་ཞེས་བྱའི་གང་ཟག་གོ། །ཨུད་པལ་པད་དཀར་པད་དམར་ཙན་དན་བཞི། །ཀུན་རྫོབ་བདེན་པ་བསྟན་པའི་གང་ཟག་གོ། །རྫོགས་པའི་རིམ་ལ་དད་པ་དང་། །རྟག་ཏུ་སྤྱོད་པས་སློབ་དཔོན་འཁུར། །རིན་ཆེན་འདྲ་བའི་གང་ཟག་སྟེ། །དེ་ལ་དོན་དམ་བདེན་པ་བཤད། །དེ་ལྟར་སྣོད་ཀྱི་རིམ་བརྟགས་ནས། །བླ་མ་དམ་པ་མཁས་པ་ཡིས། །བཤད་པ་རྣམ་པ་གཉིས་བྱའོ། །དེ་ལྟར་འདུས་པའི་དོན་བསྟན་ནས། །ད་ནི་ཡན་ལག་གི་དོན་རྣམ་པར་དབྱེ་བའི་ཕྱིར། །གཞུང་ཉིད་ལ་འཇུག་པར་བྱ་སྟེ། །འདིར་སྡུད་པར་བྱེད་པ་རྡོ་རྗེའི་ཆོས་ཀྱིས་ཇི་སྐད་དུ་ཐོས་པ་ཐུགས་ལ་བཞག་ནས། གདུལ་བྱ་རྣམས་ལ་བསྟན་པའི་ཕྱིར། འདི་སྐད་བདག་གིས་ཐོས་པ་ཞེས་བྱ་བ་གསུངས་ཏེ། འདི་སྐད་ཅེས་བྱ་བ་ནི། རྒྱུད་ཀྱི་དོན་མ་ལུས་པར་སྟོན་པའི་ཚིག་སྟེ། སྟོན་པའི་བཀའོ། །བདག་གི་ཞེས་བྱ་བ་ནི། སྡུད་པ་པོ་བདག་ཉིད་ཀྱིས་སྟོན་པ་ལས་མངོན་སུམ་དུ་ཐོས་ཀྱི། གཞན་དག་ལས་བརྒྱུད་ཅིང་བརྒྱུད་ནས་ཐོས་པ་ནི་མ་ཡིན་ནོ། །དུས་གཅིག་ནས་ཞེས་པ་ནི། ཚེས་གྲངས་དང་ཟླ་བ་དང་ལོ་དང་དུས་ནི་ངེས་པ་མེད་དོ། །དེ་ཅི་ཕྱིར་ཞེས་ན། སེམས་ཅན་རྣམ་རྟོག་བསྐྱེ་བའི་ཕྱིར། ངེས་པ་མེད་དོ། །ཐོས་པའི་དུས་ནི་ངེས་པ་མེད་དོ། །སྟོན་པའི་ཞལ་ནས་གསུངས་པའི་དུས་གཅིག་གི་ཚེ་ན་བདག་གིས་འདི་ཐོས་ལ་གཞན་དུ་ནི་གཞན་དག་ཐོས་པའམ། ཡང་ན་དུས་གཅིག་སྟེ་སྐད་གཅིག་མ་ལ་ཐོས་སོ་ཞེས་པ་སྟེ། འདི་དག་གིས་ནི་བདག་ཉིད་ཐོས་པ་མང་བ་དང་། ཤེས་རབ་ཕུལ་དུ་བྱུང་བ་ཡིན་པར་སྟོན་ཏོ། །གང་ལས་གང་དུ་གང་དང་ལྷན་ཅིག་ཐོས་ཞེས་གླེང་གཞི་བསྟན་པའི་ཕྱིར། བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་ཞེས་པ་ནི། སྟོན་པ་ཕུན་སུམ་ཚོགས་པ་བསྟན་པ་ཡིན་ཏེ། དོན་ཟབ་མོ་ཕུན་སུམ་ཚོགས་པ་དང་། མི་མཐུན་པའི་ཕྱོགས་བཅོམ་པས་ན་བཅོམ་ལྡན་འདས་སོ། །དེ་ནི་ཀུན་རྫོབ་ཀྱི་བདེན་པའོ། །དོན་དམ་པའི་བདེན་པ་བསྟན་པའི་ཕྱིར། གསང་བ་མཆོག་གི་དབང་པོ་ཞེས་བྱ་བ་ལ་སོགས་པ་གསུངས་སྟེ། གསང་བ་མཆོག་གི་བདག་པོ་ཞེས་པ་ནི། སྐུའི་འཁོར་ལོའི་སྒོ་བཞི་པ་དང་། གསུང་གི་འཁོར་ལོའི་སྒོ་བརྒྱད་པ་དང་། ཐུགས་ཀྱི་འཁོར་ལོའི་སྒོ་དགུ་པ་དང་། བདེ་བ་ཆེན་པོའི་སྒོ་དྲུག་པ་རྣམས་ནི་རྣལ་འབྱོར་ཕྱི་མའི་རྒྱུད་ལ། མེད་པས་གསང་བའོ། །དཀྱིལ་འཁོར་བཞི་པོ་འདི་ཀུན་གྱི་མཆོག་ཡིན་པ་དང་། བཞི་པོའི་མཆོག་ཀྱང་བདེ་བ་ཆེན་པོའི་ཕོ་བྲང་ངོ་། །ཕོ་བྲང་དེ་ནི་བཅོམ་ལྡན་འདས་བྱང་ཆུབ་ཀྱི་སེམས་ཀྱི་རང་བཞིན་དུ་བཞུགས་སོ། །དེའི་དུས་ན་ཁམས་གསུམ་གྱི་སེམས་ཅན་ཀུན་ཀྱང་བྱང་ཆུབ་ཀྱི་སེམས་ཀྱི་རང་བཞིན་དུ་གྱུར་ཏོ། །འཁོར་རྣམས་ལ་ཡང་ཅང་མི་གསུང་བའི་ཚུལ་གྱིས་ཆོས་སྟོན་ཏོ། །དེ་ལྟར་བཞུགས་པའི་ཕྱིར་བདག་པོའོ། །སྐུའི་ཕོ་བྲང་ན་བཞུགས་པ་བསྟན་པའི་ཕྱིར། ཐིག་ལེ་བྱང་ཆུབ་ཀྱི་སེམས་རྡོ་རྗེ་ཞེས་པ་གསུངས་ཏེ། བདེ་བ་ཆེན་པོའི་གནས་ནས་ལྷ་མོ་བཞིའི་མཚན་ཉིད་བསླང་སྟེ། སྤྱན་དྲངས་པའི་དུས་ན། འོད་ཀྱི་གོང་བུ་ཐིག་ལེའི་གཟུགས་སུ་ཤེས་ཏེ། དེའི་མཚན་ཉིད་ལ་ནི། བྱང་ཆུབ་ཀྱི་སེམས་རྡོ་རྗེ་ཞེས་བྱའོ། །སྐུ་དེའི་མཚན་ཉིད་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རྣམ་པར་དག་པའི་མཚན་ཉིད་ཅེས་པ་གསུངས་ཏེ། དེ་བཞིན་གཤེགས་པའི་གནས་སུ། གཤེགས་ཤིང་གཤེགས་པས་ན། དེ་བཞིན་གཤེགས་པ་སྟེ། དེ་ལྟ་བུའི་སྐུ་གདོས་པ་ཅན་དུ་བཞུགས་པ་ནི་བཞུགས་པ་མ་ཡིན་ཏེ། རང་བཞིན་གྱིས་རྣམ་དག་པའི་བདག་ཉིད་དུ་བཞུགས་སོ། །དེ་ལྟར་བཞུགས་ནས་ཀྱང་འཁོར་རྣམས་ལ་ཏིང་ངེ་འཛིན་གྱི་སྒོ་ནས་ཆོས་སྟོན་ཏོ། །གསུང་གི་ཕོ་བྲང་ན་བཞུགས་པ་བསྟན་པའི་ཕྱིར། པདྨོ་ཆེན་པོ་རྣམ་པར་དག་པའི་གསུང་ཞེས་པ་ལ་སོགས་པ་གསུངས་ཏེ། པདྨོ་ཆེན་པོ་ཞེས་པ་ནི། ཕོ་བྲང་སྟེ་ཕོ་བྲང་དེ་ཡེ་ནས་རྣམ་པར་དག་པར་འདོད་པའོ། །འཇིག་རྟེན་པའི་གནས་དང་རྟེན་པའི་གནས་དང་། རྟེན་གྱི་གནས་གཞལ་ཡས་ལས་ཁྱད་པར་དུ་འཕགས་པས་ཆེའོ། །དེའི་གནས་སྤྲུལ་པའི་སྐུ་མཚན་ཉིད་དུ་བཞུགས་ཏེ། གསུང་རྡོ་རྗེ་ལྟ་བུའི་ཏིང་ངེ་འཛིན་ལ་མངའ་བརྙེས་ནས་བཞུགས་སོ། །དེའི་དུས་ན་འགྲོ་བ་རིགས་དྲུག་ལ་ཇི་ལྟར་འཚམས་པའི་ཆོས་སྟོན་ཏོ། །ཐུགས་ཀྱི་ཕོ་བྲང་ན་བཞུགས་པའི་བསྟན་པའི་ཕྱིར། ཡིད་བཞིན་གྱི་ནོར་བུ་རིན་པོ་ཆེ་ཞེས་བྱ་བ་ལ་སོགས་པ་གསུངས་ཏེ། ཐུགས་ཀྱི་ཕོ་བྲང་གི་ཕྱི་མོ་ནས་རང་བཞིན་གྱིས་གྲུབ་པའི་ཡི་གེ་ཨ་གཅིག་གནས་ཏེ། དེའི་དབུས་ན་བཅོམ་ལྡན་འདས་ཐུགས་ཀྱི་རང་བཞིན་ཧཱུྃ་གི་དབྱིངས་སུ་བཞུགས་ཏེ། དྲན་རྟོག་ཐམས་ཅད་དེ་ལས་འབྱུང་སྟེ། ཤེས་པ་ཀུན་གྱི་གནས་སོ། །དེ་ལ་ནི་ཡིད་བཞིན་གྱི་ནོར་བུ་རིན་པོ་ཆེ་ཞེས་བྱའོ། །དེ་ནི་ཀུན་གྱི་མཆོག་ཏུ་གྱུར་པས་རྒྱལ་པོ་དེའི་མཚན་ཉིད་ནི་ཐམས་ཅད་དུ་རང་བཞིན་གྱིས་འོད་གསལ་བའི་ཤེས་པ་རང་བརྗོད་པའི་མཐའ་ལས་འདས་པའི་ཡོན་ཏན་དེ་ལྟར་བུར་བཞུགས་ནས། མཉམ་པ་ཆེན་པོར་ཀུན་ཏུ་ཁྱབ་པར་མཛད་པའི་སྒོ་ནས་ཆོས་སྟོན་ཏོ། །ཐབས་གང་གི་སྒོ་ནས་ཀུན་འདུས་པའི་ཕྲིན་ལས་ཀྱིས་འདུལ་བའི་སྒོ་ཡངས་པར་ཀུན་ཏུ་མཛད་དོ། །དེ་དག་ཀུན་གྱི་དོན་བསྡུས་པ་བསྟན་པའི་ཕྱིར། སྐུ་གསུང་ཐུགས་ཡོན་ཏན་དམ་ཚིག་ཆེན་པོར་ལས་པའི་བདག་ཉིད་ཆེན་པོ་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་འཁོར་ལོ་ཡང་མངའ་བརྙེས་པའི་ཡོན་ཏན་གྱི་སྒོ་ནས་སེམས་ཅན་གྱི་དོན་མཛད་དེ། དམ་ཚིག་ཆེན་པོ་མ་ལུས་པའི་བདག་པོར་གྱུར་པ་ནི། བདག་ཉིད་ཆེན་པོའོ། །ཕྱི་དང་ནང་དུ་སྣང་བའི་ཆོས་གཅིག་གི་ངོ་བོར་བསྟན་པའི་ཕྱིར། དུས་གསུམ་གྱི་ཆོས་མ་ལུས་མི་ལུས་ལུས་པ་མེད་པའི་ཆོས་ཐམས་ཅད་ཅེས་པ་ལ་སོགས་པ་གསུངས་ཏེ། དུས་གསུམ་གྱི་སྔར་འདས་པ་དང་ད་ལྟར་དང་ཕྱིས་སོ། །དེ་ལྟར་སྣང་བ་ཐམས་ཅད་སྐུ་གསུང་ཐུགས་ཀྱི་གསང་བར་འདུས་པས་ན། མ་ལུས་ཏེ། སྔར་འདས་པ་མི་ལུས་ཏེ་ད་ལྟར་བཞུགས་པ་ལུས་པ་མེད་པ་སྟེ། ཕྱིས་བྱོན་པ་དེ་རྣམས་ཀྱི་དངོས་པོ་ཐམས་ཅད་བཅོམ་ལྡན་འདས་བདེ་བ་ཆེན་པོའི་གནས་སུ་མངོན་པར་འདུ་བར་མཛད་དེ། གཉིས་སུ་མེད་པའི་རང་བཞིན་ལས་ཐབས་མཁས་པའི་རོལ་པའི་རྫུ་འཕྲུལ་རྣམ་པ་སྣ་ཚོགས་པ་ཇི་ལྟར་འདུལ་བ་ལ་སྒྲའི་ཚུལ་དུ་སྤྲུལ་ནས་དོན་མཛད་དེ། དེ་ལྟ་བུའི་དོན་ལ་མངའ་བརྙེས་པ་ནི་བཅོམ་ལྡན་འདས་དཔལ་ཀུན་ཏུ་བཟང་པོའོ། །དེ་ནི་སྟོན་པ་ཕུན་སུམ་ཚོགས་པ་སྟེ། དོན་དམ་པའོ། །གནས་ཕུན་སུམ་ཚོགས་པ་བསྟན་པའི་ཕྱིར། འོག་མིན་གནས་གསང་བ་མཆོག་གི་དཀྱིལ་འཁོར་ཆེན་པོ་ཞེས་བྱ་བ་ལ་སོགས་པ་གསུངས་ཏེ། འོག་མིན་གནས་ཞེས་པ་ནི་གོང་ནས་གོང་དུ་གྱུར་པ་སྟེ། འཇིག་རྟེན་པའི་གནས་ལས་ཡུམ་ལྔའི་མཁའ་ནི་ཁྱད་པར་དུ་འཕགས་སོ། །ཉན་ཐོས་དང་རང་རྒྱལ་བ་དང་རྣལ་འབྱོར་པ་ཕྱི་ལ་གསང་བའི་གནས་ཀུན་གྱི་ཐུན་མོང་མ་ཡིན་པའི་མཆོག་དམ་པའི་དཀྱིལ་འཁོར་ཆེན་པོ་སྟེ། གོང་དུ་བཤད་ཟིན་ཏོ། །གསང་བའི་གནས་བསྟན་པའི་ཕྱིར། བཙུན་མོ་ཞེས་བྱ་བ་ལ་སོགས་པ་གསུངས་ཏེ། བཙུན་མོ་ནི་སངས་རྒྱས་ཀྱི་ཤེས་རབ་མ་སྟེ། དེ་ཉིད་ནི་ཉོན་མོངས་པ་རྣམས་འཇོམས་པས་ན་བྷ་གའོ། །དེ་ལྟ་བུའི་བྷ་ག་དེ་ནི་ལས་དག་པའི་ཕོ་བྲང་རང་བཞིན་ལྷུན་གྱིས་གྲུབ་པ་དེ་ཐམས་ཅད་འདུས་ཤིང་འབྱུང་བས། དུར་ཁྲོད་ཀྱི་གཞལ་ཡས་ཁང་བརྩེགས་པ་དེ་ལ་པདྨ་སྣ་ཚོགས་ཀྱིས་སྟེང་དང་འོག་མེད་པར་བརྒྱན་པར་པདྨ་དེ་རྣམས་ཀྱང་དབྱིབས་སྣ་ཚོགས་པདྨ་ཁ་དོག་སྣ་ཚོགས་པ་ལ་སོགས་པའི་འདོད་པའི་ཡོན་ཏན་ལྔའི་མི་མཐུན་ཁྱད་པར་རིན་པོ་ཆེ་སྣ་ཚོགས་ཀྱི་རྣམ་གྲངས་ལས་འདས་པ་དང་། དཔེ་དང་ཚད་མེད་པ་རྣམས་ཀྱི་གཞལ་ཡས་ཁང་གི་ཕྱི་དང་ནང་མེད་པར་ཕྱོགས་བཅུར་འཁྲིགས་ཤིང་རྣམ་པར་ཀླུབས་པར་ཐོག་མ་དང་ཐ་མ་མེད་པར་ཡེ་ནས་རང་བྱུང་གི་གནས་ན་འོད་ཀྱི་ཚུལ་དུ་བཅོམ་ལྡན་འདས་བཞུགས་སོ། །དེ་ནི་གནས་ཕུན་སུམ་ཚོགས་པ་སྟེ། དོན་དམ་ཀུན་རྫོབ་གཉིས་ཀའོ། །འཁོར་ཕུན་སུམ་ཚོགས་པ་བསྟན་པའི་ཕྱིར། རྣལ་འབྱོར་གྱི་དབང་ཕྱུག་ཆེན་པོ་རྒྱལ་བ་སངས་རྒྱས་ཞེས་པ་ལ་སོགས་པ་གསུངས་ཏེ། འདི་ནས་མར་འཁོར་རྣམ་པ་ལྔར་ཤེས་པར་བྱའོ། །དེ་ཅིའི་ཕྱིར་ཞེ་ན། དཀྱིལ་འཁོར་ལྔ་ཡོད་པའི་ཕྱིར། འཁོར་མང་པོ་བསྟན་པའི་ཕྱིར། རྣལ་འབྱོར་གྱི་དབང་ཕྱུག་ཆེན་པོ་ཞེས་གསུངས་ཏེ། ཡང་དག་པའི་ཡེ་ཤེས་ལ་མངའ་བརྙེས་པའི་ཕྱིར། རྣལ་འབྱོར་པ་ཕྱི་དང་ནང་དུ་སྣང་བའི་མཚན་ཉིད་ལ་དབང་བསྒྱུར་ཞིང་ཐམས་ཅད་ཀྱི་བདག་ཉིད་ཆེན་པོར་གྱུར་པའི་རྒྱལ་བ་སངས་རྒྱས་བརྗོད་དུ་མེད་པ། བགྲང་བ་ལས་འདས་པ་ཡོན་ཏན་ཆེན་པོས་ཀླུབས་པ་ནམ་མཁའི་མཐའ་ཀླས་པ་འཁོར་བ་མེད་པའི་ཚུལ་གྱིས་བསྐོར་ནས་བཞུགས་སོ། །བདེ་བ་ཆེན་པོའི་འཁོར། སྐུའི་ཕོ་བྲང་གི་ཚུལ་བསྟན་པའི་ཕྱིར། རྣལ་འབྱོར་མ་ཆེན་མོ་ཞེས་བྱ་བ་བསྟན་ཏེ། སའི་མཚན་ཉིད་རྣལ་འབྱོར་མ་ཆེན་མོ་སངས་རྒྱས་སྤྱན་དང་། མེ་ཡི་མཚན་ཉིད་རྣལ་འབྱོར་མ་ཆེན་མོ་གོས་དཀར་མོ་དང་། ཆུའི་མཚན་ཉིད་རྣལ་འབྱོར་མ་ཆེན་མོ་མཱ་མ་ཀཱི་དང་། རླུང་གི་མཚན་ཉིད་རྣལ་འབྱོར་མ་ཆེན་མོ་དམ་ཚིག་སྒྲོལ་མ་ལ་སོགས་པ་གྲངས་མེད་པས་བསྐོར་ནས་བཞུགས་སོ། །སྐུའི་འཁོར་རོ། །ཐུགས་ཀྱི་ཕོ་བྲང་གི་འཁོར་བསྟན་པའི་ཕྱིར། རྣལ་འབྱོར་ཆེན་པོ་སེམས་དཔའ་ཆེན་པོ་ཞེས་པ་ལ་སོགས་པས་བསྟན་ཏེ། རྣལ་འབྱོར་ཆེན་པོ་ཞེས་པ་ནི། ཡང་དག་པའི་ཡེ་ཤེས་ཕྱིན་ཅི་མ་ལོག་པའི་རྣལ་འབྱོར་དམ་པ་ཡང་དག་པའི་དོན་ལ་རྩེ་གཅིག་ཏུ་སེམས་པའི་སེམས་དཔའ་ཆེན་པོ་བཙུན་མོ་སེམས་མ་དང་བཅས་པར་བརྗོད་དུ་མེད་པ་གྲངས་ལས་འདས་པ་སྟེ། བརྗོད་དུ་མེད་པ་ཡང་བརྗོད་དུ་མེད་པའི་ཞིང་གི་རྡུལ་སྙེད་ཀྱིས་བསྐོར་བ་མེད་པའི་ཚུལ་གྱིས་བསྐོར་ནས་བཞུགས་སོ། །ཐུགས་ཀྱི་ཕོ་བྲང་གི་འཁོར་རོ། །གསུང་གི་ཕོ་བྲང་འཁོར་བསྟན་པའི་འཁོར། གཞན་ཡང་ཞེས་བྱ་བ་ལ་སོགས་པ་གསུངས་ཏེ། གཞན་ཡང་ཞེས་པ་ནི་ཐུགས་ཀྱི་ཕོ་བྲང་གི་འཁོར་ལས་གཞན་པ་སྟེ་གསུང་གི་འཁོར་ལོ་ཞེས་པ་ཐ་ཚིག་གོ། །ཧེ་རུ་ཀ་རོལ་པའི་ཚོགས་ཞེས་པ་ནི། ཏེ་ནི་ཡང་དག་པའི་དོན་ལ་དགྱེས་པའོ། །རུ་ནི་ཡང་དག་པའི་དོན་གྱི་ཡུལ་དེ་ལ་ཆགས་པའོ། །ཀ་ནི་སྤྱོད་པར་བྱེད་པའི་འཕྲིན་ལས་སོ། །དེ་ལྟ་བུའི་ངང་དུ་རོལ་པའི་ཚོགས་ཀྱིས་འཁོར་གྲངས་མེད་པ་བརྗོད་དུ་མེད་པ་རྣམས་ཀྱིས་བསྐོར་བ་མེད་པའི་ཚུལ་གྱིས་བསྐོར་ནས་བཞུགས་སོ། །གསུང་གི་ཕོ་བྲང་གི་འཁོར་རོ། །གསང་བའི་ཕོ་བྲང་གི་འཁོར་བསྟན་པའི་ཕྱིར། སྤྲུལ་པ་ཆེན་པོ་སྲས་ཀྱི་འཁོར་ཇི་སྙེད་པ་ལ་སོགས་པ་ཞེས་པས་བསྟན་ཏེ། དེ་བཞིན་གཤེགས་པའི་སྐུ་དང་གསུང་དང་ཐུགས་ལས་སྤྲུལ་པས་སྤྲུལ་པ་ཆེན་པོ་སྟེ། དེ་བཞིན་གཤེགས་པ་སྲས་ཀྱི་འཁོར་ཇི་སྙེད་པ་ལ་སོགས་པ་དང་སེམས་དང་སེམས་ལས་བྱུང་བ་སྟེ། རིག་པ་ལས་བསྐྱེད་པའི་སྲས་ཀྱི་འཁོར་དང་འབྱུང་བ་དང་འབྱུང་བ་ལས་བྱུང་བ་སྟེ། རྣལ་འབྱོར་མའི་ཚོགས་མང་པོའི་འཁོར་དང་། ཡང་དག་པའི་གོང་མའི་འཁོར་ཇི་ལྟ་བ་དང་གསང་བའི་འདི་ཉིད་ཀྱིས་འཁོར་ཇི་སྙེད་པ་རྣམས་དང་། བཅོམ་ལྡན་འདས་ཐབས་གཅིག་ཏུ་རྣམ་པར་རྟོག་པས། བསྙེངས་པ་མི་མངའ་བར་ཕོ་བྲང་ན་བཞུགས་པའི་ཚུལ་ནི་དཔེར་ན་ཡུངས་འབྲུ་སྣུམ་གྱིས་གང་བ་བཞིན་དུ་གང་ནས་ཁྱབ་པར་བཞུགས་སོ། །ཞེས་པ་ནི་གནས་པར་མཛད་པའོ། །བཅོམ་ལྡན་འདས་ཀྱི་བཙུན་མོ་ནི་ཡུམ་ཀུན་ཏུ་བཟང་མོ་ཡིན་ཏེ། བཅོམ་ལྡན་འདས་ཉིད་ཀྱི་སྐུ་ལ་གཉིས་སུ་མེད་པར་འཁྲིལ་བའི་ཚུལ་གྱིས་བྱང་ཆུབ་ཀྱི་སེམས་ཀྱི་ངོ་བོར་སྙིལ་བ་མི་མངའ་བར་ཐམས་ཅད་དབྱིངས་སུ་བསྡུ་བར་མཛད་དོ། །དེ་ཡན་ཆད་དུ་འཁོར་ལྔའི་མཚན་ཉིད་བསྟན་ནས། ད་ནི་སྡུད་པ་པོ་ཕུན་སུམ་ཚོགས་པ་བསྟན་པའི་ཕྱིར། འཁོར་གྱི་དཀྱིལ་འཁོར་དེ་ཉིད་ཀྱི་ནི་ཞེས་པ་ལ་སོགས་པ་གསུངས་ཏེ། འཁོར་གྱི་དཀྱིལ་འཁོར་དུ་གསུངས་པ་དེ་ཉིད་ཀྱི་ནང་ན་སྡུད་པ་པོ་རྣལ་འབྱོར་གྱི་དབང་ཕྱུག་རྒྱལ་བ་སངས་རྒྱས་ཉིད་ལས་མི་གཞན་པའི་རྡོ་རྗེ་ཡིད་ཀུན་ཏུ་བཟང་པོ་ཡང་སྟོན་པའི་མཚན་ཉིད་བཙུན་མོ་ཀུན་ཏུ་བཟང་མོ་དང་གཉིས་སུ་མེད་པའི་ཚུལ་གྱིས་སྟོན་པ་བཅོམ་ལྡན་འདས་ཀྱི་སྤྱན་སྔར་བྲན་རྗེ་བོ་ལ་བཀའ་ནོད་པའི་ཚུལ་དུ་སྤོབས་པ་ཅན་དུ་བཞུགས་སོ། །སྡུད་པ་པོ་ཕུན་སུམ་ཚོགས་པ་སྟེ་ཀུན་རྫོབ་དོན་དམ་གཉིས་སོ། །སྟོན་པ་དེས་ཐམས་ཅད་ལ་རྫུ་འཕྲུལ་གྱི་སྤྱན་གྱིས་གཟིགས་པར་བསྟན་ཏེ། དེའི་ཕྱིར་དེ་ནས་ཞེས་པ་ལ་སོགས་པ་གསུངས་ཏེ། དེ་ནས་ཞེས་པ་ནི་དེ་མ་ཐག་པའོ། །ཉོན་མོངས་པ་བཞི་བཅོམ་ཞིང་ལེགས་པའི་ཡོན་ཏན་དྲུག་དང་ལྡན་པས་ན་བཅོམ་ལྡན་ནོ། །རྟག་པ་དང་ཆད་པའི་མཐའ་ལ་མི་གནས་པས་འདས་པ་སྟེ། དེ་ལྟ་བུའི་ངང་ཚུལ་མངའ་བའི་སྟོན་པ་གསང་བ་མཆོག་གི་བདག་པོ་དེས་ཕྱི་དང་ནང་དུ་སྣང་བ་ལ་འདི་ལྟར་གཟིགས་སོ། །སེམས་དང་སེམས་ལས་བྱུང་བ་ནི་རྟེན་ཅན་གྱི་རང་བཞིན་དུ་གཟིགས་པ་མེད་པའི་ཚུལ་དུ་གཟིགས་ལ་འབྱུང་བ་དང་འབྱུང་བ་ལས་གྱུར་པ་ནི་རྟེན་གྱི་རང་བཞིན་ཏེ་ཡུམ་ལྔའི་མཁའ་རང་བཞིན་དུ་གཟིགས་ཏེ། དུས་གསུམ་དང་སྲིད་གསུམ་གྱིས་བསྡུས་པའི་ཆོས་དེ་ཡང་དག་པའི་ངོ་བོ་ཉིད་བྱང་ཆུབ་ཀྱི་སེམས་སུ་གཟིགས་སོ། །གཞན་ཡང་བསམ་གཏན་ཏེ། བསམ་གཏན་གསུམ་པའི་ལྷའི་རིས་ལ་སོགས་པ་དང་། སྙོམས་པར་འཇུག་པ་སྟེ་ཉན་ཐོས་ཞི་བའི་ཕྱོགས་ལ་འཇུག་པ་དང་། འགོག་པ་སྟེ། ཉན་ཐོས་ཚོགས་དྲུག་བཀག་ནས་ཡུལ་དྲུག་ལས་འགོག་པ་དང་། སའི་ཁྱད་པར་ལ་སོགས་པས་དང་པོ་ནས་བཅུའི་བར་དུ་སྟེ། དེ་ལྟར་བྱེ་བྲག་ཏུ་སྣང་བའི་ཆོས་རང་རེ་ངོ་གང་ལ་སྣང་བར་གྲགས་ལ་བཅོམ་ལྡན་འདས་དཔལ་ཀུན་ཏུ་བཟང་པོས་ནི་རྫུ་འཕྲུལ་གྱི་སྤྱན་གྱིས་རང་བཞིན་གྱིས་འོད་གསལ་བ་ཀུན་ཏུ་ཁྱབ་པར་གཉིས་མེད་པའི་ངང་དུ་གཟིགས་སོ། །ཕྱིན་ཅི་མ་ལོག་པར་རྣམ་པར་གཟིགས་སོ། །འོག་མའི་ཆོས་རྣམས་ལ་གཟིགས་པ་དེ་བཞིན་དུ་ས་བཅུ་གཅིག་པ་ལ་གནས་པའི་ཕྱོགས་བཅུ་དུས་གསུམ་གྱི་རྒྱལ་བ་གྲངས་མེད་པ་རྣམས་ལ་བཅོས་པའི་སྤྱན་གྱིས་གཟིགས་སོ། །ངོ་བོ་ཉིད་ཀྱིས་རྣམ་པར་གཟིགས་ནས་ཕྱི་དང་ནང་དུ་སྣང་བའི་ཆོས་ཐམས་ཅད་ཡེ་ནས་རྣམ་པར་དག་ཅིང་མ་བཅོས་པ་བྱང་ཆུབ་ཀྱི་སེམས་སྟོང་པ་ཆེན་པོར་གཟིགས་ཏེ། ཉིད་ཀྱང་སྟོང་པ་ཆེན་པོའི་དོན་ལ་བརྣལ་ཏེ་སྨྲ་བསམ་ལས་འདས་པ་བཅོས་མ་མ་ཡིན་པ་དེ་བཞིན་ཉིད་ཀྱི་ཏིང་ངེ་འཛིན་ལ་སྙོམས་པར་བཞུགས་སོ། །སྟོན་པ་དེ་བཞིན་ཉིད་ཀྱི་ཏིང་ངེ་འཛིན་ལས་གནས་པ་དེའི་ཚེ་འཁོར་བ་སྟེ། ཁམས་གསུམ་གྱི་སེམས་ཅན་མྱ་ངན་ལས་འདས་པ་ནི་རྣམ་པར་དག་པའི་ཆོས་ཐམས་ཅད་ཡང་དག་པའི་ཡེ་ཤེས་སྟོང་པ་ཆེན་པོར་གྱུར་ཏེ། དཔེར་ན་ནམ་མཁའི་མཚན་ཉིད་ཙམ་དུ་འདི་ཡིན་ནོ། །བསྒྲུབ་དུ་ཡོད་པ་མ་ཡིན་ནོ། །དེ་ལྟར་ཆོས་ཀྱི་དབྱིངས་ན་བཞུགས་པ་དེས་སེམས་ཅན་གྱི་དོན་མི་མཛད་པར་ཡུམ་ཀུན་ཏུ་བཟང་མོས་གཟིགས་ཏེ། དེ་ལས་བསླང་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི། བཅོམ་ལྡན་འདས་ཆོས་ཀྱི་དབྱིངས་སུ་རྣལ་བའི་དེ་མ་ཐག་པ་དེ་ལ་དེ་ནས་ཞེས་བྱ་སྟེ། བསྐུལ་ལོ་བར་འབྲེལ་ལོ། །སངས་རྒྱས་ཀྱི་ཡུམ་ཀུན་ཏུ་བཟང་མོ་དེས་སེམས་ཅན་གྱི་དོན་ལ་དགོངས་ནས་བཅོམ་ལྡན་འདས་གསང་བ་མཆོག་གི་བདག་པོས། དགོངས་པ་ཆོས་ཀྱི་དབྱིངས་ལ་བརྣལ་ནས་བཞུགས་པ་ལ་ཡུམ་ཀུན་ཏུ་བཟང་མོས་གླུ་འདི་བསྐུལ་ལོ་ཞེས་པ་སྟེ། འོག་ནས་འབྱུང་བའི་གླུ་འདིའོ། །ཨེ་ཞེས་པ་ནི་ཆོས་འབྱུང་བའི་གནས་ན་བཞུགས་པ་སྟེ། དེའི་མཚན་ཉིད་བསྟན་པའི་ཕྱིར། ཨེ་མའོ་སྟོང་ཉིད་བདག་མེད་ཅེས་པ་ལ་སོགས་པ་གསུངས་ཏེ། ཨེ་མ་ཞེས་པ་ནི་ཨེ་མ་ཁམས་གསུམ་གྱི་སེམས་ཅན་ལ་ཐུགས་རྗེའི་སྤྱན་ཐག་བཅད་ནས་བཞུགས་པ་འདི་སྙམ་པ་སྟེ། ཡི་ཆད་པའོ། །སྟོང་ཉིད་བདག་མེད་རྣམ་དག་ཀློང་ཡངས་ནས་ཞེས་པ་ནི་སྟོང་པ་ཉིད་ཀྱང་ཡིན་ལ་བདག་མེད་པ་ཡིན་པས་ན། སྟོང་ཉིད་བདག་མེད་དེ་ཡེ་ནས་རྣམ་པར་དག་པ་མ་བཅོས་པའི་ཡང་ཀློང་ཡངས་པ་དེ་ནས་ཁམས་གསུམ་གྱི་སེམས་ཅན་ཀུན་ལ་སྙོམས་པའི་ཐུགས་རྗེ་ཁྱོད་ཀྱིས་འབྱུང་བ་མི་དམིགས་ཀྱང་། བདག་ནི་ཤེས་རབ་མ་སྟེ། སེམས་ཅན་གྱི་དོན་བྱ་བར་དགའ་བའི་ཆེད་དུ་ཡེ་ནས་མ་བཅོས་པའི་ཆོས་ཀྱི་སྐུ་དག་པ་ལས་མ་གཡོས་པར་ཐབས་མཁས་པའི་མཛད་སྤྱོད་ཀྱིས་ཁམས་གསུམ་གྱི་སེམས་ཅན་ལ་སྙིང་རྗེ་ནམ་མཁའ་བཞིན་དུ་ཀུན་ལ་ཁྱབ་པར་སྟོན། ཅེས་ཡུམ་ཀུན་ཏུ་བཟང་མོས་བསྐུལ་བས་གསང་བ་མཆོག་གི་བདག་པོ་དེས་ཡུམ་ཀུན་ཏུ་བཟང་མོས་བསྐུལ་བར་མཁྱེན་ནས། སྟོང་པ་ཉིད་ཀྱི་ངང་ལ་རྣལ་བ་དེ་བཞིན་ཉིད་དེ་དེ་ལས་ཀུན་ཏུ་སྣང་གི་ཏིང་ངེ་འཛིན་འཁོར་བའི་ཆོས་ཐམས་ཅད་ལ་ཁྱབ་པ་ཆེན་པོའི་སྙིང་རྗེ་བསྐྱེད་པའི་ཏིང་ངེ་འཛིན་ལ་སྙོམས་པར་བཞུགས་སོ། །འཁོར་བའི་ཆོས་རྣམས་ལ་ཁྱབ་པའི་སྙི ང་རྗེ་བསྐྱེད་པར་གཡོས་པ་དེའི་ཚེ་ཕྱི་དང་ནང་དུ་སྣང་བའི་ཆོས་ཐམས་ཅད་ཁྱབ་པའི་སྙིང་རྗེ་ནམ་མཁའ་མཚན་ཉིད་ཙམ་དུ་གནས་པར་གྱུར་ཏོ། །ཞེས་པ་དེ་དེ་བཞིན་ཉིད་ལས་ནི་སྙིང་རྗེ་རྐྱེན་གྱིས་མ་གཡོས་ཡི་གེའི་གཟུགས་སུ་ནི་མ་བྱུང་བྱུང་ལ་ཁད་པ་ཙམ་དེའི་སྐབས་སུ་གླུས་བསྐུལ་ཏེ། དེའི་ཕྱིར་དེ་ནས་ཡང་ཡུམ་ཀུན་ཏུ་བཟང་མོས་ཞེས་པ་ལ་སོགས་པ་གསུངས་ཏེ། དེ་བཞིན་ཉིད་ལས་བསྐུལ་པའི་དེ་མ་ཐག་པ་དེ་ནས་ཡང་བསྐུལ་བའི་དུས་ལ་བབ་པོ་ཞེས་བྱ་སྟེ་ཚིག་གི་འཕྲད་དོ། །ཡུམ་ཀུན་ཏུ་བཟང་མོ་སྟོང་པ་ཉིད་ནམ་མཁའ་ཙམ་དུ་གནས་པའི་ངང་ལས། འོག་ནས་འབྱུང་བའི་གླུ་འདིས་བསྐུལ་ལོ། །ཨེ་མའོ་མ་ལྟར་བྱམས་པའ་ིསྙིང་རྗེ་ཆེན་པོ་ནི། ཞེས་བྱ་བ་ལ་སོགས་པ་གསུངས་ཏེ། ཨེ་མའོ་འདིའི་དོན་ནི་གང་དུ་བཤད་ཟིན་ཏོ། །མ་ལྟར་བྱམས་པའི་སྙིང་རྗེ་ཆེན་པོ་ནི་ཞེས་པས་ཁམས་གསུམ་གྱི་སེམས་ཅན་ལ་བུ་གཅིག་པ་ལ་མ་བྱམས་པ་བཞིན་དུ་ཁྱབ་པའི་སྙིང་རྗེ་ཆེན་པོ་འགའ་ལ་བྱམས་པ་ལྟ་བུ་མ་ཡིན་ནོ། །དེ་ལྟར་ཀུན་ལ་ཁྱབ་པའི་མཚན་ཉིད་དེ་ལ་ནི་ནམ་མཁའ་ལྟར་གོ་ཡང་འབྱེད་ཅིང་ཀུན་ལ་ཁྱབ་པ་ཞེས་གསུངས་པ་གསུངས་པ་ཡིན་ཏེ། ནམ་མཁའི་རང་བཞིན་ལས་རིག་པའི་སྙིང་རྗེ་ལོངས་སྤྱོད་རྫོགས་པའི་སྐུ་མཆོག་ཀུན་ཏུ་བཟང་མོ་བདག་ལ་བསྟན་དུ་གསོལ། ཞེས་རྣམ་པར་བསྐུལ་ལོ། །ཡུམ་ཀུན་ཏུ་བཟང་མོས་བསྐུལ་བ་དེ་མ་ཐག་པ་དེ་ནས་བཅོམ་ལྡན་འདས་གསང་བ་མཆོག་གི་བདག་པོས་ཡུམ་གྱི་བསྐུལ་བ་ལ་བྱོན་ནས། ཁམས་གསུམ་གྱི་སེམས་ཅན་རྣམས་ལ་སྙིང་རྗེ་བསྐྱེད་དེ། ནམ་མཁའི་ངང་ལས་ཡང་དག་པའི་རིག་པའི་ཆོ་འཕྲུལ་ཡི་གེ་ཧཱུྃ་གི་རང་བཞིན་དུ་རྣམ་པར་སྤྲུལ་ཏེ་ཡི་གེ་དེ་ཡོངས་སུ་གྱུར་པ་ལས་ནམ་མཁའི་དབྱིངས་རུམ་ནས་ཞེས་གསུངས་པ་ཡིན་ཏེ་ལས་བཅོམ་ལྡན་འདས་ཀྱི་སྐུ་བཞེངས་པ་སྟེ། དེ་ལ་ནི་སྙིང་རྗེའི་སྐུ་མངོན་དུ་ཕྱུང་སྟེ་ཞེས་གསུངས་ཏེ། སྐུ་དེ་ལས་ཡེ་ཤེས་དང་ལྡན་པའི་རྟགས་སུ་སྐུ་ལས་འོད་ཟེར་ལྔ་རྣམ་པར་འཁྲིགས་པའི་ཕྱིར། དཔེར་ན་ནམ་མཁའི་དབྱིངས་རུམ་ནས་ཉི་མ་འབུམ་དུས་གཅིག་ཏུ་ཤར་བའི་གཟི་བརྗིད་ལྟ་བུའོ་ཞེས་གསུངས་པ་ཡིན་ནོ། །བཅོམ་ལྡན་དེའི་སྐུ་མདོག་དང་ཕྱག་མཚན་གསལ་བར་བསྟན་པའི་ཕྱིར། ཡུམ་ཀུན་ཏུ་བཟང་མོས་བཅོམ་ལྡན་འདས་ཀྱི་སྐུ་ཡོངས་སུ་རྫོགས་པར་མཛད་པ་བསྐུལ་བ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་བཅོམ་ལྡན་འདས་ཀྱི་སྐུ་བཞེངས་པའི་དེ་མ་ཐག་པ་དེ་ནས་སོ། །ཡུམ་ཀུན་ཏུ་བཟང་མོས་སྨིན་རིང་བསྒྱུར་ཏེ། ཞེས་པ་ནི་བཅོམ་ལྡན་འདས་ཀྱིས་ཤེས་རབ་ཐམས་ཅད་ཆོས་ཀྱི་དབྱིངས་ལས་བྱུང་ཡུམ་སྟེ། དེས་ཤིན་ཏུ་ཆགས་པའི་སྨིན་རིང་བསྒྱུར་ཏེ་ཤིན་ཏུ་མཛེས་པའི་སྤྱན་གྱི་བཅོམ་ལྡན་འདས་ལ་བལྟས་ནས་ཡོངས་སུ་རྫོགས་པར་འདོད་པའི་ཕྱིར་རྨད་དུ་བྱུང་བའི་གང་རྣམ་པ་སྣ་ཚོགས་པ་དང་གླུ་སྟེ་གསང་གསུམ་གྱི་གླུ་དང་དེ་མ་བས་ཏེ་གླུའི་བྱེ་བྲག་མང་པོས་རྣམ་པར་བསྐུལ་བའི་ཕྱིར། འོག་ནས་འབྱུང་བའི་གླུ་འདི་བླངས་སོ། །ཨེ་མའོ་ཡིད་བཞིན་སྐུ་མཆོག་ཉི་མ་ལྟ་བུ་ལས། ཞེས་པ་གསུངས་ཏེ། ཨེ་མའོ་ཞེས་པའི་ནི་ཡང་དག་པའི་ཆོས་དབྱིངས་ཀྱི་ངང་ལས་ལོངས་སྤྱོད་རྫོགས་པའི་སྐུ་འདི་ལྟ་བུ་བྱུང་བ་ནི་ངོ་མཚར་རོ། །ཞེས་པ་ནི་དམ་པའི་ཚིག་གོ། །སྐུ་དེ་ལྟ་བུ་ལས་མཚན་དང་དཔེ་བྱད་ཀྱི་བརྒྱན་པའི་ཕྱིར། ཡིད་བཞིན་སྐུ་མཆོག་ཉི་མ་ལྟ་བུ་ལས་ཞེས་པ་གསུངས་པ་ཡིན་ནོ། །བཅོམ་ལྡན་འདས་དེ་ཡང་འགྲོ་བ་མཐའ་དག་ལ་སྤྲུལ་པའི་ཆོ་འཕྲུལ་ཇི་ལྟར་འདུལ་བ་བཞིན་དུ་སྟོན་ཏེ་སྟོན་པའི་དུས་ན་ཡང་དབྱིངས་རྣམ་པར་དག་པ་ལས་མ་གཡོས་ཏེ། དེའི་ཕྱིར་རྡོ་རྗེ་གང་མཛད་ཅིང་ཞེས་གསུངས་སོ། །དེ་ལྟ་བུའི་སྐུ་མཚན་དང་དཔེ་བྱད་ཀྱིས་བརྒྱན་པ་ཤིན་ཏུ་བརྗིད་པའི་སྐུ་མཆོག་རྒྱན་ཐམས་ཅད་ཡོངས་སུ་རྫོགས་པའི་སྐུ་འོད་ཟེར་འབར་བས་འཁྲིགས་པའི་སྐུ་མཆོག་ཀུན་ཏུ་བཟང་མོ་བདག་ལ་བསྟན་དུ་གསོལ། ཨ་ལ་ལ་ཧོ་ཞེས་ཡང་ནས་ཡང་དུ་རྣམ་པར་བསྐུལ་བས། བཅོམ་ལྡན་འདས་ཀྱི་ཡུམ་ཀུན་ཏུ་བཟང་མོས་བསྐུལ་བར་ཐུགས་སུ་ཆུད་དོ། །རོལ་པའི་སྐུ་ཞལ་གསུམ་པ་ལྟ་བུར་སྣང་བ། ཞལ་གསུམ་པར་སྣང་བ་ནི་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། རང་བཞིན་གྱིས་འོད་གསལ་བ་གསུམ་མངའི་རྟགས་སོ། །ཞལ་གསུམ་པོ་ཡང་གཡས་དཀར་བ། གཡོན་དམར་བ། དབུས་མཐིང་ནག་དུ་བཞུགས་སོ། །གཡས་དཀར་བ་ནི་ཉོན་མོངས་པའི་དྲི་མས་མ་གོས་པའི་རྟགས་སོ། །གཡོན་དམར་བ་ཐུགས་རྗེའི་སྤྱང་ཐག་གིས་འགྲོ་བ་མཐའ་དག་འདྲེན་པའི་རྟགས་སོ། །དབུས་མཐིང་བ་ནི་ཆོས་ཉིད་ལ་རྣམ་པར་རྟོག་པ་གང་གིས་ཀྱང་མ་གོས་པའི་རྟགས་སོ། །ཕྱག་དྲུག་སྟེ་ཕ་རོལ་ཏུ་ཕྱིན་པ་དྲུག་མངའ་བའི་རྟགས་སོ། །གཡས་ཀྱི་དང་པོ་ན་ཡེ་ཤེས་ཀྱི་རྡོ་རྗེ་རྩེ་དགུ་པ་སྣམས་པ་ནི། ཡེ་ཤེས་དགུ་ལས་མངའ་བརྙེས་པའི་རྟགས་སོ། །དེ་ལྟ་བུའི་སྐུ་འབར་བ་ལྟ་བུའི་དུས་གསུམ་གྱི་སངས་རྒྱས་རྣམས་ཀྱི་གཟིགས་པར་འགྱུར་རོ། །དེ་ནི་ཡོངས་སུ་རྫོགས་པའི་ཏིང་ངེ་འཛིན་ཏོ། །ད་ནི་འཁོར་སྡུད་པའི་ཏིང་ངེ་སྟོན་ཏེ། དེའི་ཕྱིར་དེ་ནས་བཅོམ་ལྡན་འདས་གསང་བ་མཆོག་གི་བདག་པོར་དེས། རྟེན་ཅན་གྱི་འཁོར་བསྐྱེད་པའི་ཕྱིར་ཧཱུྃ་ཞེས་ལྟེ་བའི་དཀྱིལ་ནས་དྲངས་ཏེ་བརྗོད་པས་གོང་མའི་འཁོར་གྱི་དཀྱིལ་འཁོར་དེ་དག་ཉིད་ཀྱི་སྐུ་ལ་བསྡུ་བ་མཛད་དོ། །བསྡུ་བ་མཛད་ནས་བདེ་བ་ཆེན་པོའི་གནས་ན་བཞུགས་པར་གྱུར་ཏོ། །དེ་ནི་འཁོར་འོག་མའི་རྒྱུའོ། །འཁོར་སྡུད་པའི་ཏིང་ངེ་འཛིན་ཏོ། །འདི་ནས་མར་ཡབ་ཀྱི་གླེངས་བསླང་བ་བསྟན་ཏེ། བཅོམ་ལྡན་འདས་ཉིད་ཀྱིས་སྐུས་སྦྱོར་བའི་ཡན་ལག་རྣམ་པ་སྣ་ཚོགས་ཀྱི་གླུ་དང་གསང་བའི་གླུ་དང་གར་སྟེང་སྒོའི་གར་དང་ལག་པའི་གར་དང་རྐེད་པའི་གར་དང་། སྟེག་པ་སྟེ་གནས་དགུ་རུ་སེན་མོས་བྲུང་པ་དང་། བསྟིམ་པ་སྟེ་ཆུ་བཞིབ་པ་དང་། སྦྱོར་བ་སྟེ་དབང་པོ་གཉིས་སྦྱོར་བ་དང་། འཁྱུད་པ་སྟེ་སྟོད་སྨད་ནས་བསྡོམས་པའི་ཚུལ་གྱིས་ཡུམ་ཀུན་ཏུ་བཟང་མོ་ལ་མཛེས་པའི་ཚུལ་གྱིས་སྨིན་རིང་བསྒྱུར་ཞིང་ཆགས་པའི་སྤྱན་ཟིན་བག་གི་ཚུལ་གྱིས་གཟིགས་ཏེ། སྤྱན་ཧར་ཧར་ལྟ་བུའི་མ་ཡིན་ཏེ། ཤིན་ཏུ་མཛེས་པའི་ཏིང་ངེ་འཛིན་ལ་སྙོམས་པར་ཞུགས་ཏེ། གནས་ནས་ཅང་མི་གསུང་བར་གྱུར་ཏོ། །དེའི་དུས་སུ་ཡུམ་ཀུན་ཏུ་བཟང་མོས་ཆགས་པར་མཁྱེན་ནས་གླེང་འདིར་བསླང་ངོ་། །ཨེ་མའོ་རོལ་མོའི་ཆོ་འཕྲུལ་འབར་བའི་སྐུ་མཆོག་ལས་ཞེས་པ་ལ་སོགས་པས་གླེང་བསླང་སྟེ་ཤིན་ཏུ་ངོ་མཚར་བའི་ཕྱིར། ཨེ་མའོ་རོལ་མོའི་ཆོ་འཕྲུལ་འོད་ཟེར་གྱིས་འཁྲིགས་པའི་ཤིན་ཏུ་མཛེས་པའི་འབར་བའི་སྐུ་མཆོག་ལས་བྱང་ཆུབ་སེམས་ཀྱི་རང་བཞིན་ཀུན་ལ་ཁྱབ་པའི་བྱིན་རླབས་ཏེ། གང་ནས་ཇི་ལྟར་གནས་པ་བསྟན་ཏེ། སྤྲུལ་པའི་འཁོར་ལོ་འདབ་མ་དྲུག་ཅུ་རྩ་བཞི་པ་དང་ཆོས་ཀྱི་འཁོར་ལོ་འདབ་མ་བརྒྱད་པ་དང་། ལོངས་སྤྱོད་རྫོགས་པའི་འཁོར་ལོ་འདབ་མ་བཅུ་དྲུག་པ་དང་། བདེ་བ་ཆེན་པོའི་འཁོར་ལོ་འདབ་མ་སུམ་ཅུ་རྩ་གཉིས་དཀྱིལ་ན། བྱང་ཆུབ་སེམས་བཞུགས་པ་དེའི་མཚན་ཉིད་ལ་རྡོ་རྗེ་ཞེས་བྱ་སྟེ་གནས་ནས་བསྐྱེད་པར་བྱེད་པའི་རྐྱེན་ཕྱག་རྒྱ་བཞིའི་གར་མཛད་ཅིང་ཞེས་སོ། །བྱང་ཆུབ་སེམས་དེ་གཤེགས་པའི་གནས་པ་བསྟན་པའི་ཕྱིར་གསང་བའི་བྷ་ག་ཞེས་བྱ་བ་ལ་སོགས་པ་གསུངས་ཏེ། གསང་བའི་བྷ་ག་ནི་ཡུམ་གྱི་པདྨ་སྟེ། ཐབས་ལས་ཁྱད་པར་དུ་འཕགས་པའི་གནས་ཏེ། བཅོམ་ལྡན་འདས་ཀྱི་བཞུགས་གནས་ཤིན་ཏུ་ཡངས་པའི་མཁའ་དཀྱིལ་དུ། བཅོམ་ལྡན་འདས་ཀྱིས་བདག་རེ་བ་བསྐོངས་པའི་ཡང་དག་པའི་བདུད་རྩི་ཆར་ཆེན་པོ་བཅོམ་ལྡན་འདས་ཀྱིས་བདག་ལ་དབབ་ཏུ་གསོལ་ལོ་ཨ་ལ་ལ་ཧོ། །ཞེས་རྣམ་པར་བསྐུལ་ལོ་ཞེས་པ་སྟེ། ཡུམ་གྱི་གླེང་བསླང་བའོ། །དེ་ནས་ཡབ་ཀྱི་གླེང་བསླང་བའི་ཕྱིར། བཅོམ་ལྡན་འདས་གསང་བ་མཆོག་གི་བདག་པོ་དེས་ཞེས་པ་ལ་སོགས་པ་གསུངས་ཏེ། རྡོ་རྗེའི་གླུ་འདི་བླངས་སོ། །ཞེས་པར་འགྲེལ་ཏེ། གང་བླང་ཞེ་ན། འོག་ནས་འབྱུང་བ་འདི་ལྟ་སྟེ། ཨ་ཧོ་བདེ་མཆོག་འདུ་འབྲལ་མེད་པའི་དབྱིངས་ཉིད་ནི། ཞེས་པ་ལ་སོགས་པ་གསུངས་ཏེ། དེའི་དོན་ཐུགས་སུ་ཆུད་ཅིང་རིག་པ་ལ་མངའ་བའི་ཕྱིར་ཨ་ཧོ་ཞེས་གསུངས་ཏེ། བྱང་ཆུབ་སེམས་ཀྱི་སེམས་དེ་ནི་བདེ་བ་ཡང་ཡིན་ལ་མཆོག་ཀྱང་ཡིན་པས་བདེ་མཆོག་གོ། །དེའི་གནས་འདུ་འབྲལ་མེད་པའི་ཡུམ་གྱི་པདྨ་སྟེ་དབྱིངས་ཉིད་དོ། །དེ་ལྟ་བུའི་གནས་ཤིན་ཏུ་མཛེས་པའི་ཕྱིར་འཛུམ་པ་སྟེ་རྒྱན་ཐམས་ཅད་ཀྱིས་བརྒྱན་པས་འཁྲིལ་པ། ཉོན་མོངས་པས་མ་གོས་པས་པདྨ་ཤིན་ཏུ་ཡངས་པས་བྷ་ག་སྟེ། དེ་ལྟ་བུའི་གནས་སུ་ཆགས་པའི་ཕྱིར། རུ་ཞེས་གསུངས་ཏེ། དེ་ལྟ་བུ་རུ་གསང་བའི་རྡོ་རྗེ་བཞུགས་པར་བྱ་བའི་དགའ་མཆོག་རྡོ་རྗེ་གསང་བའི་བྱང་ཆུབ་སེམས་ཞེས་པ་ལ་སོགས་པ་གསུངས་ཏེ། དགའ་མཆོག་ཅེས་པ་ནི་དགའ་བ་རྣམ་པ་བཞི་སྟེ། དགའ་བ་དང་། མཆོག་ཏུ་དགའ་བ་དང་། རང་བཞིན་གྱིས་དགའ་བ་དང་། བྲལ་བའི་དགའ་བ་དང་བཞིའོ། རྡོ་རྗེ་སྟེ་གསང་བའི་རྡོ་རྗེ་རྣལ་འབྱོར་ཕྱི་པ་ལ་མེད་པས་ན་གསང་བའོ། །བྱང་ཆུབ་ཀྱི་སེམས་གཤེགས་པའི་ཤུལ་དང་། དགའ་བ་བཞི་ཉམས་སུ་མྱོང་བའི་གནས་པ་ཡིན་པ་དང་། ཁུ་བ་དང་ལྷན་ཅིག་སྐྱེས་པའི་རང་བཞིན་གྱི་དགའ་བའི་གནས་ཡིན་པས་ན་རྡོ་རྗེ་ཞེས་བྱའོ། །བདེ་བ་ཆེན་པོའི་གནས་ནས་དྲི་མ་མེད་པའི་བྱང་ཆུབ་ཀྱི་སེམས་དེ་དགའ་བ་བཞི་དང་ལྡན་ཏེ་རྡོ་རྗེའི་རྩ་བ་དང་དབུས་དང་རིན་པོ་ཆེ་ཡི་གནས་ནས་འོང་བ་དང་ནི་སོས་ཀའི་ཆར་བཞིན་དུ་རྡོ་རྗེའི་རྩེ་མོ་ནས་འབབ་སྟེ་བྲལ་བའི་དགའ་བའོ། །དེ་གང་དུ་འབབ་ཅེ་ན། རྒྱུན་མི་ཆད་པར་ཡུམ་གྱི་པདྨ་ལ་འབབ་པའོ། །རྒྱུན་མི་ཆད་ན་འོ་ན་ཅི་རྟག་པར་ཆུ་བོ་ཆེན་པོའི་རྒྱུན་བཞིན་དུ་འོང་ངམ་ཅི་ཞེ་བརྒལ་བ་དང་། འོན་ཏེ་དེ་ལྟར་ནི་མ་ཡིན་ཏེ། རྟག་པ་འབབ་པ་ཞིག་ཡིན་ནི་རླུང་ལ་སོགས་པའི་རྐྱེན་གྱིས་བྱ་རྒྱུ་མེད་དེ་དེ་བས་ན་རྟག་ཏུ་འབབ་པ་ནི་མ་ཡིན་ནོ། །བརྒལ་བ་འོ་ན་གཞུང་ཉིད་ལས་ཀྱང་སོས་ཀའི་ཆར་བཞིན་དུ་རྒྱུན་མི་འཆད་པར་འབབ་བོ་ཞེས་ཟེར་ན་ཁྱོད་ཀྱི་དེ་ལྟར་མ་ཡིན་ན་ནི་གཞུང་དང་འགལ་ལོ་ཞེ་ན། འོན་ཏེ་དེ་ལྟར་མ་ཡིན་ཏེ་སོས་ཀ་ཞེས་སྨོན་པ་ནི་སོས་ཀའི་དུས་ཀྱང་ཉམས་དགའ་བའི་དུས་ཏེ། བྱང་ཆུབ་སེམས་ཀྱང་འབབ་པའི་དུས་ན་མི་དགའ་བ་ལྟ་བུ་མ་ཡིན་ཏེ་ཉམས་དགའ་བའི་ཕྱིར་མཐུན་པའི་དཔེས་སོ། །ཞེས་སྨོས་པ་ཡིན་ནོ། །ཆར་བཞིན་དུ་ཞེས་པ་ནི་སོས་ཀའི་ཆར་པ་ཡང་རྒྱ་མཚོའི་རླངས་བས་བསྐྱོད་དོ། །བསྐྱོད་ནས་འབབ་པ་མ་ཡིན་པ་དུས་རྟག་ཏུ་འབབ་པ་མ་ཡིན་ནོ། །དེ་བས་ན་བྱང་ཆུབ་སེམས་ཀྱང་རྐྱེན་རྣམ་པ་གཉིས་ཀྱིས་བསྐྱོད་པའི་དུས་སུ་འབབ་དུས་རྟག་ཏུ་འབབ་པ་ནི་མ་ཡིན་ནོ། །བརྒལ་བ་འོན་ཏེ་ཁྱོད་ཀྱིས་དེ་ལྟར་ཡིན་རྒྱུན་མི་ཆད་ཟེར་བ་དང་འགལ་ལོ། །མི་འགལ་ཏེ་རྒྱུན་མི་ཆད་ཟེར་བ་ནི་བྱང་ཆུབ་ཀྱི་སེམས་དེའི་མཚན་ཉིད་ཡེ་ནས་མ་བཅོས་པ་ཞེས་པ་དང་། བརྗོད་པའི་མཐའ་ལས་འདས་པའི་དུས་གསུམ་དུ་རྟག་ཏུ་གནས་པ་ཡིན་པས་དེ་ལ་དགོངས་ནས་གསུངས་པ་མི་འགལ་ལོ། །ཞེས་ཐེ་ཚོམ་བཅད་དོ། །དེའི་དོན་ལ་ངམ་པའི་ཕྱིར་ཧོ་ཞེས་ཐབས་མཆོག་ཡབ་ཀྱིས་གསུངས་སོ། །དེ་ནས་ཡང་བྱང་ཆུབ་ཀྱི་སེམས་དེ་ལ་ཡུམ་གྱིས་གླེང་བསླང་བའི་ཕྱིར། དེ་ནས་ཆགས་པ་ཡུམ་གྱི་བྱང་ཆུབ་སེམས་ཀྱི་ཞེས་པ་ལ་སོགས་པ་གསུངས་ཏེ། དེ་ནས་ཞེས་པ་ནི་གསལ་ལོ། །ཆགས་པ་སྟེ་ཡུམ་ཡབ་ཀྱི་རྗེས་སུ་ཆགས་པས་ན་ཆགས་པའོ། །ཡུམ་གྱི་བྱང་ཆུབ་ཀྱི་སེམས་ཐུགས་སུ་ཆུད་ནས། དེའི་དོན་གྱི་ཐབས་མཆོག་ཡབ་ཡུམ་གྱི་བྱང་ཆུབ་ཀྱི་སེམས་ལ་བསྐུལ་བའི་ཆོ་འཕྲུལ་སྒྲ་འོག་ནས་འབྱུང་བ་འདི་སྐད་སྒྲགས་སོ། །ཨ་ཧོ་ཆགས་པ་ཆེན་པོ་ཡུམ་གྱི་བྱང་ཆུབ་ཀྱི་སེམས་ཞེས་པ་ལ་ཨ་ཧོ་ཞེས་པ་ནི་ཨ་ཉིད་ཆོས་ཉིད་ཡེ་ནས་སྐྱེ་བ་མེད་པ་དེ་ལ་ཧོ་སྟེ་ཆགས་པའོ། །ཉོན་མོངས་པའི་དབང་ལ་ཆགས་པ་མ་ཡིན་པའི་ཕྱིར་ཆེན་པོའོ། །ཕྱི་དང་ནང་དུ་སྣང་བའི་ཆོས་དབང་དུ་བསྡུས་པས་དབང་། གཉིས་མེད་པའི་ཡེ་ཤེས་སུ་འགྱུར་བས་བྱང་ཆུབ་ཀྱི་སེམས་དེ་ལྟ་བུའི་བྱང་ཆུབ་སེམས་དེ་ལས་དུས་གསུམ་གྱི་བདེ་བར་གཤེགས་པ་རྣམས་ཀྱང་དེ་ལས་བསྐྱེད་ཅིང་ཀུན་གྱི་འབྱུང་གནས་སུ་གྱུར་པའི་ཕྱིར་རྩ་བཞི་མཆོག་གོ། །ཡུམ་གྱི་སེམས་དེ་ལ་འཁོར་བའི་སྐྱོན་གང་གིས་ཀྱང་མ་གོས་པའི་ཕྱིར། དྲི་མེད་སྐྱོན་བྲལ་ཞེས་གསུངས་པ་ཡིན་ཏེ། བྱང་ཆུབ་ཀྱི་སེམས་ཀྱི་རྟེན་གནས་དེའི་དབྱིབས་པདྨར་གནས་པའི་ཕྱིར་པདྨ། པདྨ་དེའི་ཟེའུ་འབྲུ་ནས་བྱང་ཆུབ་སེམས་འོད་ཟེར་གྱི་ཚུལ་དུ་བྱུང་སྟེ། དེའི་གནས་སུ་ཐབས་མཆོག་ཡབ་ཀྱི་བྱང་ཆུབ་ཀྱི་སེམས་མུ་ཏིག་དཀར་པོ་དྲི་མ་མེ་ད པ་ཉོན་མོངས་པ་གསལ་བའི་ཕྱིར། བསིལ་བའི་འོད་ཟེར་བདག་གིས་པདྨའི་འོད་ཟེར་འབྲུལ་སྤྲོ་རུ་གསོལ་ཏོ། །ཞེས་མཚན་ཉིད་ཀྱི་སྒོ་ནས་གླེང་བསླང་བའོ། །ཡབ་ཀྱི་བྱང་ཆུབ་ཀྱི་སེམས་ཀྱི་མཚན་ཉིད་ལ་གླེང་བསླང་བའི་ཕྱིར། ཡང་ཐབས་མཆོག་ཡབ་ཀྱི་ཞེས་པ་ལ་སོགས་པ་གསུངས་ཏེ། འདི་སྐད་ཅེས་བསྒྲགས་སོ། །ཞེས་པར་འབྲེལ་ཏེ། ཨ་ཧོ་གསལ་ཞིང་དག་པའི་ཟླ་བའི་དཀྱིལ་འཁོར་ནི་ཞེས་པ་ནི། བྱང་ཆུབ་ཀྱི་སེམས་དེ་རང་བཞིན་གྱིས་གསལ་བས་ན། གསལ་ཞིང་རྣམ་པར་རྟོག་པའི་སྐྱོན་གྱིས་མ་གོས་པས་དག་པ། ཀུན་རྫོབ་བྱང་ཆུབ་ཀྱི་སེམས་ཀྱི་ཁ་དོག་དཀར་པོར་ཡོད་པས་ཟླ་བའི་དཀྱིལ་འཁོར་དེ་ནི་སྐྱོན་གྱིས་མ་གོས་པ་ཡེ་ནས་རྣམ་པར་དག་པའི་བྱང་ཆུབ་ཀྱི་སེམས་དེ་ནི་དུས་གསུམ་གྱི་རྒྱལ་བ་རྣམས་ཀྱི་ཇི་ལྟར་གནས་པ་ཐུགས་སུ་ཆུད་དེ། དེ་ལྟ་བུའི་བྱང་ཆུབ་ཀྱི་སེམས་དེ་ནི་བསིལ་བ་སྟེ། འོད་ཟེར་གྱི་ཚུལ་དུ་ཡུམ་གྱི་པདྨའི་ཟེའུ་འབྲུའི་གནས་བྱང་ཆུབ་ཀྱི་སེམས་སྤྲོ་བར་བྱའོ། །ཧོ་ཞེས་རྣམ་པར་བསྐུལ་ལོ། །དེ་ལྟར་ཡབ་ཡུམ་གཉིས་ཀྱིས་གླེང་བསླང་ནས་བྱང་ཆུབ་ཀྱི་སེམས་གནས་སུ་དྲངས་ནས་སྤྲོ་བ་དང་བསྡུ་བའི་ཏིང་ངེ་འཛིན་འདི་གསུངས་སོ། །དེ་ནས་བཅོམ་ལྡན་འདས་ཞེས་པ་དང་། འདི་སྐད་བརྗོད་དོ་ཞེས་པ་ནི་གོ་སླའོ། །ཨེ་མའོ་བདེ་མཆོག་བདེ་བའི་ཞེས་པ་ནི་བྱང་ཆུབ་ཀྱི་སེམས་གནས་ནས་གྲངས་ནས་བདེ་བ་རྙེད་པ་དེ་ནི་བདེ་བ་ཀུན་གྱི་མཆོག་ཡིན་ཏེ། དེ་རྡོ་རྗེ་ལས་བར་ཡུམ་གྱི་པདྨར་སྤྲོ། ཡུམ་གྱི་བ་སྤུའི་བུ་ག་ནས་ཕར་བྱང་ཆུབ་ཀྱི་སེམས་རབ་ཏུ་སྤྲོས་པས་ཁམས་གསུམ་གྱི་སེམས་ཅན་ཐམས་ཅད་ཀྱི་ལུས་ལ་ཕོག་པས་ཉོན་མོངས་པ་ཐམས་ཅད་དག་པར་བྱས་པ་ལ་ནི་འགྲོ་བ་ཀུན་གྱི་རྒྱུད་སྤྱངས་ཏེ་ཞེས་དུས་དེ་ཉིད་ཀྱི་སྐབས་སུ་དུས་གསུམ་གྱི་སངས་རྒྱས་ཀུན་ཐུགས་ལ་ཕོག་པས་བྱང་ཆུབ་ཀྱི་སེམས་མཆོད་པ་ཕུལ། སླར་སངས་རྒྱས་ཀྱི་འོད་ཟེར་བསྐུལ་ཞིང་སླར་ཡུམ་གྱི་དབྱིངས་སུ་འདུས་ཤིང་ཐིམ་པ་ལས་བྱང་ཆུབ་ཀྱི་སེམས་ཐིག་ལེའི་གཟུགས་སུ་ཡུམ་གྱི་པདྨ་ལ་གསལ་བར་གྱུར་ཏོ། །དེས་དེ་ཉིད་དུ་ཐིག་ལེའི་འོད་ཀྱིས་ཀུན་ལ་ཁྱབ་པས་དེའི་ཕྱིར་བྱང་ཆུབ་ཀྱི་སེམས་ཀྱིས་ཀུན་ལ་ཁྱབ་ཅེས་བཅོམ་ལྡན་འདས་ཀྱིས་གསུངས་སོ། །བྱང་ཆུབ་སེམས་ཀྱི་འོད་ཟེར་དེས་འགྲོ་བ་རྣམས་སྦྱངས་པ་རྣམས་དེའི་ཚེ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བྱང་ཆུབ་ཀྱི་སེམས་འབའ་ཞིག་དུ་གནས་སོ། །དེ་ལྟར་རྟེན་ཅན་གྱི་རྒྱུ་སྒྲུབ་ནས་ཐོག་མ་ཉིད་དུ་བསྙེན་བསྒྲུབ་བྱ་བའི་ཕྱིར། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས། ཞེས་པ་ལ་སོགས་པ་གསུངས་ཏེ། དེ་ནས་ཞེས་པ་ནི་བཅོམ་ལྡན་འདས་ཀྱི་སྐུ་ལོངས་སྤྱོད་རྫོགས་པའི་ཚུལ་དུ་བཞུགས་པ་དེ་མ་ཐག་པ་དེ་ནས་རྟེན་གྱི་དཀྱིལ་འཁོར་བསྐྱེད་དེ། བཅོམ་ལྡན་འདས་ལོངས་སྤྱོད་རྫོགས་པའི་སྐུར་བཞུགས་པའི་སྐུ་ལས་འོད་ཟེར་ལས་ཡི་གེ་ཨ་འཕྲོས་པ་ལས། ཨ་དེ་ཡོངས་སུ་གྱུར་པ་ལས་ཆོས་འབྱུང་བའི་ཕྱག་རྒྱར་གསལ་ཏེ། ཡུམ་ཀུན་ཏུ་བཟང་མོའི་མཁའི་རང་བཞིན་གྲུ་གསུམ་པ་སྟེ། སྟེང་ནས་སྟེངདུ་ཡོངས་སུ་རྒྱས་པའི་འཕྲལ་གཏིང་ཟབ་པའོ། །དེའི་ནང་དུ་རིག་པའི་བྱིན་རླབས་ལས་ཡི་གེ་ཡཾ་སྔོན་པོ་འཕྲོས་པ་ལས། ཡཾ་དེ་ཡོངས་སུ་གྱུར་པ་ལས་རླུང་གི་དཀྱིལ་འཁོར་སྔོན་པོ་དབྱིབས་སྦྱངས་ཀྱི་ཞལ་ལྟ་བུ་ཕྱོགས་བཞི་ན་བ་དན་བཞིས་མཚན་པ་ཅིས་ཀྱང་མི་ཤིག་པའོ། །དེའི་སྟེང་དུ་གོང་མ་ཇི་ལྟ་བ་བཞིན་དུ་རཾ་དམར་སེར་འཕྲོས་པ་ལས། རཾ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་པའོ། །དེའི་སྟེང་དུ་ཆུའི་དཀྱིལ་འཁོར་དབྱིབས་ཟླུམ་པོ། ཁ་དོག་དཀར་པོའོ། །དེའི་སྟེང་དུ་སུ་སེར་པོ་ལས་གསེར་གྱི་ས་གཞིའོ། །དེའི་སྟེང་དུ་ལཾ་ལས་རིན་པོ་ཆེ་སྣ་ལྔ་ལས་གྲུབ་པའི་རི་རབ་ཟུར་བརྒྱད་པ་ཞིག་བསྐྱེད་དེ། འབྱུང་བ་བཞི་ནི་ཡུམ་སངས་སྤྱན་མ་ལ་སོགས་པའི་རང་བཞིན་དེ་དེའི་ཕྱིར་བཙུན་མོའི་བྷ་ག་ཞེས་གསུངས་ཏེ། དེ་ལས་རྟེན་གྱི་རང་བཞིན་གྲུབ་པ་བྱ་བའི་ཕྱིར། དམ་ཚིག་ཆེན་པོའི་ཕོ་བྲང་གྲུ་བཞི་པར་བྱིན་གྱིས་བརླབ་པའི་ཕྱིར། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་འདི་བྱུང་ངོ་ཞེས་པ་སྟེ། གང་བྱུང་ཞེ་ན་ཡི་གེ་འབྲུ་འདི་རི་རབ་ཀྱི་སྟེང་དུ་རི་རབ་ལས་ཕྱུང་ཏེ་བཞག་པ་ལས་དེ་ཡོངས་སུ་གྱུར་པ་ལས་འཁོར་ལོ། འཁོར་ལོ་ཡོངས་སུ་གྱུར་པ་ལས། རྣམ་པར་སྣང་མཛད་ཀྱི་སྐུར་གྱུར་ཏེ། དེ་ལས་འོད་ཟེར་འཕྲོས་པས་དེ་བཞིན་གཤེགས་པའི་གཞལ་ཡས་ཁང་གི་རང་བཞིན་ཀུན་བསྡུས་ནས་སླར་ཉིད་ཀྱི་སྐུ་ལ་བཞུགས་པས་སྐུ་ཉིད་ཀྱང་འོད་དུ་ཞུ། རླུང་དང་མེས་གཞུ་སྟེ་འོད་ཀྱི་གོང་བུ་གཅིག་ཏུ་གྱུར་ཏོ། །དེ་ལས་གཞལ་ཡས་ཁང་དཔག་ཅིང་གཞལ་བ་ལས་འདས་པ་སངས་རྒྱས་དང་སེམས་ཅན་མཉམ་པའི་ཕྱིར་ཟུར་བཞིར་བྱུང་བ་ལ་སོགས་པའི་ཡོན་ཏན་འོག་ནས་འབྱུང་བས་བརྒྱན་པ། ཀ་བ་བརྒྱད་ཀྱིས་བཏེག་པ་ལ་སོགས་པའི་ཕོ་བྲང་དེ་ཉིད་ནང་ནས་སེང་གེ་ལ་སོགས་པའི་ཡོན་ཏན་དང་ལྡན་པའི་སེམས་ཅན་ལྔའི་ཁྲི་སྟེངས་ནས། ཉི་མ་ཟླ་བ་དེའི་སྟེང་ན་པདྨ་དེའི་སྟེང་ན་རིན་པོ་ཆེ། རང་བྱུང་དུ་གྲུབ་པའི་གཞལ་ཡས་ཁང་། དེ་ལ་འདི་སྐད་ཅེས་གསུངས་སོ། །ཨེ་མ་སངས་རྒྱས་ཐམས་ཅད་ཀྱི་ཞེས་པ་ནས། སྣ་ཚོགས་སངས་རྒྱས་ཀུན་གྱི་གནས་ཞེས་གསུངས་སོ། །ཞེས་པའི་བར་གྱི་སྟོན་ཏེ་གོ་སླའོ། །དེ་ནས་གཞལ་ཡས་བསྐྱེད་པའི་དེ་མ་ཐག་པ་དེ་ནས་ཡང་བཅོམ་ལྡན་འདས་བྱང་ཆུབ་ཀྱི་སེམས་ཀྱི་རྡོ་རྗེའི་ཞལ་ནས། སྟི་ཏ་བཛྲ་ཨ་ཞེས་བརྗོད་དེ། དཀྱིལ་འཁོར་ཆེན་པོ་དབུས་ཀྱི་གདན་སྟེངས་སུ་བཞུགས་པར་འགྱུར་རོ། །དེ་ལྟར་ཡུམ་ཀུན་ཏུ་བཟང་མོ་ཡང་འཁྲིལ་བའི་ཚུལ་གྱིས་གཉིས་སུ་མེད་པར་བཞུགས་སོ། །དེ་ནས་ཡང་འཁོར་བསྐྱེད་པའི་ཏིང་ངེ་འཛིན་བསྟན་ཏེ་དེའི་ཕྱིར། དེ་ནས་ཡང་གཉིས་སུ་མེད་པའི་ཞེས་པ་ལ་སོགས་པ་གསུངས་ཏེ། ཐོག་མ་བྱང་ཆུབ་ཀྱི་སེམས་ཇི་སྐད་བརྗོད་པའི་དེ་མ་ཐག་པའི་དེ་ནས་འཁོར་བསྐྱེད་དེ། ཡུམ་གྱི་མཁའ་ལ་བྱང་ཆུབ་ཀྱི་སེམས་ཀྱི་ཐིག་ལེའི་ངོ་བོར་དེ་གནས་པ་དེ་ལས། ཕྱོགས་དང་མཚམས་སུ་ཡི་གེའི་ངོ་བོར་གྱུར་ཏེ་དབུས་སུ་མཐའ་གཉིས་ཟེའུ་འབྲུ་ལའོ། །ཤར་ཕྱོགས་ཏ་གཉིས། ལྷོ་ཕྱོགས་སུ་ད་གཉིས། ནུབ་ཕྱོགས་སུ་དྷ་གཉིས། བྱང་ཕྱོགས་སུ་ན་གཉིས། བྲག་པོ་དང་ཐུང་ངུ་གཉིས་ཏེ། རིགས་ལྔའི་ས་བོན་ནོ། །ཤར་ཕྱོགས་སུ་ཀ །ལྷོ་ཕྱོགས་སུ་ཁ། ནུབ་ཕྱོགས་སུ་ཐུང་ངུ་། བྱང་ཕྱོགས་སུ་རིང་པོ། དེ་ནི་ཕྱོགས་ཀྱི་སེམས་དཔའ་རྣམས་ཀྱི་ས་བོན་ནོ། །ཤར་ལྷོ་མཚམས་སུ་པ། ལྷོ་ནུབ་མཚམས་སུ་ཕ། ནུབ་བྱང་མཚམས་སུ་བ་ཐུང་ངུ་། བྱང་ཤར་མཚམས་སུ་བ་རིང་པོ་སྟེ་འདི་དག་ནི་མཚམས་ཀྱི་སེམས་དཔའི་ས་བོན་ནོ། །ཡང་ཤར་ཕྱོགས་སུ་ཙ། ལྷོ་ཕྱོགས་སུ་ཚ། ནུབ་ཕྱོགས་སུ་ཛ་ཐུང་ངུ་། བྱང་ཕྱོགས་སུ་ཛ་རིང་པོ་སྟེ། དེ་ལ་སོགས་པ་ཕྱོགས་ཀྱི་སེམས་མ་ཡུམ་གྱི་ས་བོན་ནོ། །ཤར་ལྷོ་མཚམས་སུ་ཡ། ལྷོ་ནུབ་མཚམས་སུ་ར། ནུབ་བྱང་མཚམས་སུ་ལ། བྱང་ཤར་མཚམས་སུ་ཤ །སྟེང་དུ་སེལ་བའི་ས་བོན་ཏེ་མཚམས་ཀྱི་སེམས་དཔའི་ཡུམ་རྣམས་སོ། །ཤར་ཕྱོགས་ང་། ལྷོ་ཕྱོགས་ཉ། ནུབ་ཕྱོགས་མ། བྱང་ཕྱོགས་སུ་ས་སྟེ་སྒོ་བཞིའི་ས་བོན་ནོ། །དེ་ལྟར་ཡི་གེའི་དངོས་པོ་རྣམས་ཡོངས་སུ་གྱུར་པ་ལས། རྡོ་རྗེ་དང་འཁོར་ལོ་དང་། རིན་པོ་ཆེ་དང་པདྨ་དང་། རལ་གྲི་ལ་སོགས་པ་སོ་སོའི་ཕྱག་མཚན་དུ་གྱུར་ཏོ། །ཕྱག་མཚན་དེ་ཡོངས་སུ་གྱུར་པ་ལས། ཆོས་ཀྱི་དབྱིངས་ཀྱི་གཟུགས་བརྙན་དུ་གྱུར་ཏེ་གཙོ་བོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་གསང་བའི་སྙིང་པོ་འདི་བརྗོད་དོ། །ཧཱུྃ་བཛྲ་དྷྲིག་དེ་བརྗོད་མ་ཐག་ཏུ་དེ་བཞིན་གཤེགས་པ་ཐམས་ཅད་ཞེ་སྡང་ཆེན་པོའི་སྐུར་རྗེས་སུ་དྲན་ཏོ། །སྐུར་གྱུར་ཏོ། །ཞེས་བཤད་པ་ཆོ་ག་གསུམ་གྱིས་དོན་འདི་ནས་མར་བསྟན་ཏེ་དེའི་ཕྱིར། སྔགས་ཀྱི་ཡི་གེ་འཕྲོ་འདུས་པ་ལས་ཞེས་པ་ལ་སོགས་པ་བསྟན་ཏེ། སྔགས་ཀྱི་ཡི་གེ་ཞེས་པ་ནི་ཐའོ། །དེ་འཕྲལ་འདུས་པའི་ཡིག་འབྲུ་ལས་ཆོ་འཕྲུལ་གྱི་སྒྲ་འོག་ནས་འབྱུང་བ་འདི་སྐད་ཅེས་བསྒྲགས་སོ། དུས་གསུམ་གྱི་སངས་རྒྱས་ཐམས་ཅད་ཀྱི་གསུང་རྣམ་པར་དག་པའི་རང་བཞིན་ཡི་གེའི་གཟུགས་སུ་གནས་པ་དེའི་ཕྱིར། ཨེ་མའོ་ཞེས་པ་ནས་བསྒྲགས་སོ་ཞེས་པའི་བར་གྱིས་བསྟན་ཏེ། རིགས་ནི་ཞེ་སྡང་གི་སངས་རྒྱས་རྣམས་ཀྱི་གསུང་ངོ་། །དེ་ནས་ཐུགས་ཀྱི་ཆོ་ག་བསྟན་ཏེ། དུས་གསུམ་གྱི་སངས་རྒྱས་རྣམས་ཀྱི་ཐུགས་ཀྱི་ངོ་བོ་རྡོ་རྗེའི་རང་བཞིན་དུ་གྱུར་ཏེ། དེའི་མཚན་ཉིད་བསྟན་པའི་ཕྱིར་དེ་ནས་སྙིང་པོ་ཡི་གེ་དེ་ཞེས་པ་ནས་ཐུགས་ནི་བསྟན་པའོ། །ཞེས་པའི་བར་གྱིས་བསྟན་པའོ། །དེ་ནས་ཡི་གེ་རྡོ་རྗེའི་བུམ་པའི་ནང་ན་ཡོད་པ་ལས། རྡོ་རྗེར་འཕྲོས་སྐུར་འདུས་པ་ལས་འོད་ཀྱི་གོང་བུར་གྱུར་ཏེ་དེའི་སྐབས་སུ་གང་དུ་གསུངས་པའི་སྔགས་ཧཱུྃ་བཛྲ་དྷྲིག་བརྗོད་པས་སྐུ་ཡོངས་སུ་རྫོགས་ཏེ། འཇིག་རྟེན་གྱི་ཁམས་སུ་གསང་བའི་དཀྱིལ་འཁོར་ནས། འཐོན་ཏེ་སྤྲོས་པས་སེམས་ཅན་ཞེ་སྡང་ཅན་གྱི་རྒྱུད་སྦྱང་ནས་སླར་འདུས་པ་ལས། ཨ་ཞེས་བརྗོད་པས་གཙོ་བོ་ཉིད་ལ་ཐིམ་པར་གྱུར་ཏོ། །དེའི་ཕྱིར་དེ་ནས་ཐུགས་དེ་ཉིད་ཅེས་པ་ནས་བདག་པོ་སྐུ་གསུང་ཐུགས་ཉིད་ལ་བཞུགས་སོ། །ཞེས་པའི་བར་གྱིས་བསྟན་ཏེ་གོ་སླའོ། །ཕུང་པོ་ལྔ་ལས་རྣམ་པར་ཤེས་པའི་ཕུང་པོ་རྣམ་པར་དག་པའོ། །འདི་ཇི་ལྟར་རྒྱས་པར་བསྟན་པ་བཞིན་འོག་མ་རྣམས་ལ་ཡང་ཤེས་པར་བྱའོ། །དེ་ནས་དང་པོའི་བྱང་ཆུབ་སེམས་ལས་བྱུང་བའི་ཕྱིར། དེ་ནས་གཉིས་སུ་མེད་པའི་ཞེས་པ་ནས་སྙོམས་པར་བཞུགས་ནས་ཞེས་པའི་བར་གྱིས་བསྟན་ཏོ། །སྐུ་ཡོངས་སུ་རྫོགས་པར་བྱ་བའི་རྐྱེན་གྱིས་བསྟན་པའི་ཕྱིར། ཉིད་ཀྱི་སྐུ་གསུང་ཐུགས་ཞེས་པ་ནས་གཏི་མུག་ཆེན་པོའི་སྐུ་རྗེས་སུ་དྲན་ཏེ། ཞེས་པའི་བར་གྱིས་བསྟན་ཏོ། །གཏི་མུག་ཆེན་པོའི་གསུང་གི་མཚན་ཉིད་བསྟན་པའི་ཕྱིར། གསུང་ཡིག་འབྲུ་ལས་ཞེས་པ་ནས་གསུང་དྲི་མ་མེད་ཅེས་པའི་བར་གྱིས་བསྟན་ཏོ། །ཡི་གེ་དེ་ཡོངས་སུ་གྱུར་པ་ལས། ཐུགས་ཕྱག་མཚན་འཁོར་ལོར་གྱུར་པ་བསྟན་པའི་ཕྱིར། སྙིང་པོའི་ཡི་གེ་ཞེས་པ་ནས་ཟུར་བརྒྱད་པ་ལྟ་བུ་ཞེས་པའི་བར་གྱིས་བསྟན་ཏོ། །གཙོ་བོའི་ཡོན་ཏན་གྱི་སྒོ་ནས་ཇི་ལྟར་འབྱུང་བ་བསྟན་པའི་ཕྱིར། དེའི་ཚེ་འཁོར་ཞེས་པ་ནས་སྐུའི་ཐུགས་ནི་བསྟན་པའོ། །ཞེས་པའི་བར་གྱིས་བསྟན་ཏོ། །དེ་ནས་འཁོར་ལོ་དེ་ཡོངས་སུ་གྱུར་པ་ལས་སྔགས་གོང་མ་བརྗོད་པ་ལས་སྣང་མཛད་ཆེན་མོའི་སྐུ་མདོག་དཀར་པོ་རྒྱན་ཐམས་ཅད་ཀྱིས་བརྒྱན་པ་གཡས་ན་འཁོར་ལོ་གཡོན་ན་དྲིལ་བུ་བསྣམས་ཏེ་གསང་བའི་དཀྱིལ་འཁོར་ནས་འཐོན་ཏེ་འཕྲོ་བ་དང་འདུས་པས་གོང་མ་བཞིན་དུ་བྱས་ཏེ། ཨ་ཞེས་བརྗོད་པས་ཤར་ཕྱོགས་སུ་བཞུགས་སོ། །སྐུ་ལྔ་ལས་ནི་ཕུང་པོ་རྣམ་པར་དག་པའི་སྐུ་སྟེ། བྱང་ཆུབ་ཀྱི་སེམས་དེས་ཕྱི་དང་ནང་དུ་སྣང་བ་ཐམས་ཅད་ལ་སྣང་བར་མཛད་པས་ན་རྣམ་པར་སྣང་མཛད་དོ། །གཙོ་བོའི་བྱང་ཆུབ་ཀྱི་སེམས་དེ་ལས་དགོས་འདོད་རེ་བ་ཡིད་བཞིན་དུ་བསྐོང་བ་དེའི་ཕྱིར། དེ་ནས་ཡང་གཉིས་སུ་མེད་པའི་བདག་ཉིད་ཆེན་པོས་རིན་པོ་ཆེ་དཔལ་ཞེས་པ་ན་ཡོན་ཏན་ཕྱག་རྒྱ་བསྟན་པ་དང་། གཡས་ཕྱོགས་སུ་བཞུགས་སུ་ཞེས་པའི་བར་གྱིས་བསྟན་ཏེ། སྐུ་མདོག་ནི་སྔོ་བས་དེས་ཕྱག་གཡས་ནི་རིན་པོ་ཆེ་གཡོན་ན་དྲིལ་བུའོ། །ཕུང་པོ་ལྔ་ལས་ཚོར་བའི་ཕུང་པོ་རྣམ་པར་དག་པའོ། །དེ་ནས་ཡང་བྱང་ཆུབ་ཀྱི་སེམས་ཀྱི་མཚན་ཉིད་ཀྱིས་ཕྱི་དང་ནང་དུ་སྣང་བ་ལས་མཐའ་ཡས་པར་ཁྱབ་པས་སྣང་བ་མཐའ་ཡས་ཏེ་དེ་བསྟན་པའི་ཕྱིར། གསལ་བའི་སྒྲོན་མ་ཞེས་བྱ་བ་ནས། ཨེ་ཞེས་པ་བརྗོད་ཅིང་རྒྱབ་ཕྱོགས་སུ་བཞུགས་སོ། །ཞེས་བྱ་བའི་བར་གྱིས་བསྟན་ཏེ། དེ་ཡང་སྐུ་མདོག་དམར་པོ་ཕྱག་གཡས་ན་པདྨ་གཡོན་ན་དྲིལ་བུའོ། །ཕུང་པོ་ལྔ་ལས་ནི་འདུ་ཤེས་ཀྱི་ཕུང་པོ་རྣམ་པར་དག་པའོ། །དེ་ནས་ཡང་བྱང་ཆུབ་ཀྱི་སེམས་དེའི་ངང་དུ་ཕྱི་དང་ནང་དུ་སྣང་བ་ཐམས་ཅད་འདུས་ཤིང་ཡེ་ནས་རྣམ་པར་དག་པར་བྱས་ཏེ། འདི་ནི་བྱས་སོ། །འདི་ནི་མ་བྱས་སོ། །ཞེས་བྱ་བ་མེད་དེ་ཐམས་ཅད་ཀྱི་དོན་གཅིག་གི་ངང་དུ་བསྒྲུབས་ཏེ། བསྟན་པའི་ཕྱིར་རྡོ་རྗེ་འཕྲོ་བ་ཞེས་བྱ་བ་ནས་ལས་ཀྱི་ཕྱག་རྒྱ་བསྟན་པའོ་ཞེས་པ་དང་། གཡོན་ཕྱོགས་སུ་བཞུགས་སོ་ཞེས་པའི་བར་གྱིས་བསྟན་ཏོ། །སྐུ་མདོག་ནི་ལྗང་གུ་ཕྱག་གཡས་ན་རལ་གྲི་གཡོན་ན་དྲིལ་བུའོ། །ཕུང་པོ་ལྔ་ལས་ནི་འདུ་བྱེད་ཀྱི་ཕུང་པོ་རྣམ་པར་དག་པའོ། །དེ་ནས་བྱང་ཆུབ་ཀྱི་སེམས་དེ་ནི་གང་གི་ངོ་བོར་ཡང་མ་གྲུབ་པར་བསྟན་པའི་ཕྱིར། དེ་ནས་བཅོམ་ལྡན་འདས་ཞེས་པ་ནས་ནམ་མཁའ་ལྟ་བུའོ་ཞེས་པ་དང་རྡོ་རྗེ་འཛིན་པའི་སྐུ་ལ་འཁྲིལ་བའི་ཚུལ་གྱིས་སོ། །ཞེས་པའི་བར་གྱིས་བསྟན་ཏེ་སྐུ་མདོག་ཡབ་དང་མཐུན་ཕྱག་གཡས་གཙོ་བོ་ལ་འཁྱུད་གཡོན་བགྲང་ཕྲེང་ངོ་། །འབྱུང་བ་ལྔ་ལས་ནི་ནམ་མཁའི་རང་བཞིན་ནོ། །དེ་ནས་བྱང་ཆུབ་ཀྱི་སེམས་དེ་ནས་དུས་གསུམ་དུ་རྣམ་པར་རྟོག་པ་གང་གིས་ཀྱང་བསྐྱོད་པ་མ་ཡིན་ཞིང་བསྟན་པར་བསྟན་པའི་ཕྱིར་བསྟན་པ་ཞེས་པ་ནས་སྣང་མཛད་སེམས་དཔའི་སྐུ་ལ་འཁྲིལ་བའི་ཚུལ་གྱིས་བཞུགས་སོ། །ཞེས་པས་བསྟན་ཏེ་སྐུ་མདོག་གཙོ་བོ་དང་མཐུན། གཡས་དྲིལ་བུ་གཡོན་ཕྲེང་བ་ཀུན་ལ་ཤེས་པར་བྱའོ། །འབྱུང་བ་ལས་ནི་སའི་རང་བཞིན་ནོ། །བྱང་ཆུབ་ཀྱི་སེམས་དེའི་ངང་དུ་ཕྱི་དང་ནང་དུ་སྣང་བ་ཐམས་ཅད་སྡུད་པས་ན་དེའི་མཚན་ཉིད་བསྟན་པའི་ཕྱིར་སྡུད་མ་རྡོ་རྗེ་ཞེས་པ་ནས། རིན་ཆེན་སེམས་མའི་སྐུ་ལ་ཞེས་པའི་བར་གྱིས་བསྟན་ཏེ། འབྱུང་བ་ལས་ཆུ་ཡིས་རང་བཞིན་ནོ། །དེ་ནས་ཡང་བྱང་ཆུབ་ཀྱི་སེམས་དེས་ཉོན་མོངས་པ་སྲེག་ཅིང་ཡང་དག་པའི་དབྱིངས་སུ་སྨིན་པའི་པར་བསྟན་པའི་ཕྱིར། འབར་བའི་ཞེས་པ་ནས་ཆོས་ཀྱི་སེམས་པའི་སྐུ་ལ་ཞེས་པའི་བར་གྱིས་བསྟན་ཏེ། འབྱུང་བ་ལྔ་ལས་མེའི་རང་བཞིན་ནོ། །དེ་ནས་ཡང་བྱང་ཆུབ་ཀྱི་སེམས་འདིའི་ངང་དུ་ཕྱི་དང་ནང་དུ་སྣང་བ་ཐམས་ཅད་ལ་ཐུགས་རྗེས་གཡོས་ཤིང་བསྡུད་པས་ན། དེ་བསྟན་པའི་ཕྱིར་གཡོ་བ་རྡོ་རྗེ་ཞེས་བྱ་བ་ནས་ལས་ཀྱི་སེམས་དཔའི་སྐུ་ལ་ཞེས་པའི་བར་གྱིས་བསྟན་ཏེ། དེ་ལྟར་འབྱུང་བ་རླུང་གི་རང་བཞིན་ཏེ་དེ་ལྟར་འབྱུང་བ་ལྔ་དང་རིགས་ལྔའི་མཚན་ཉིད་ཇི་ལྟར་ཡིན་པ་བསྒོམ་ན། ཇི་ལྟར་འདོད་པ་བཞིན་དུ་འགྲུབ་བོ། །དེ་ནས་བྱང་ཆུབ་ཀྱི་སེམས་དེ་ནམ་མཁའི་མཚན་ཉིད་དུ་གནས་པས་ན་ནམ་མཁའི་སྙིང་པོའོ། །བྱང་ཆུབ་ཀྱི་སེམས་དེ་མཐའ་གཉིས་སུ་མི་ལྡང་ཞིང་ཡང་དག་པར་མ་བསྟན་པས་ན་སའི་སྙིང་པོའོ། །བྱང་ཆུབ་ཀྱི་སེམས་ལས་སྒྲའི་ཚུལ་དུ་སྐུ་ཉིད་བྱུང་ནས་སེམས་ཅན་གྱི་དོན་མཛད་པས་སྤྱན་རས་གཟིགས་དབང་ཕྱུག་གོ། །བྱང་ཆུབ་ཀྱི་སེམས་དེའི་ངང་ལས་བཟང་ངན་མེད་པས་ན་ཀུན་ཏུ་བཟང་པོའོ། །བྱང་ཆུབ་ཀྱི་སེམས་དེས་ཀུན་ལ་ཁྱབ་པས་བྱམས་པའོ། །བྱང་ཆུབ་ཀྱི་སེམས་དེའི་ངང་ལས་ཉོན་མོངས་པ་མེད་པས་ན་སྒྲིབ་པ་རྣམ་པར་སེལ་བའོ། །བྱང་ཆུབ་ཀྱི་སེམས་དེའི་ངང་དུ་སྡུད་པས་ན་འཇམ་དཔལ་དུས་རྟག་ཏུ་དེ་དང་མི་འབྲལ་བས་ན་ཕྱག་ན་རྡོ་རྗེའོ། །བྱང་ཆུབ་ཀྱི་སེམས་དེ་དབྱིངས་རྣམ་པར་དག་པས་ན་ལ་སེ། དེའི་ངང་ལས་འགག་པ་མེད་པར་འབྱུང་བས་མ་ལེའོ། །དེའི་ངང་ལས་ཇི་ལྟ་བའི་སྒོ་ནས་ཆོས་བསྟན་པའི་གི་ཏིའོ། །བྱང་ཆུབ་ཀྱི་སེམས་དེ་མཉེས་ཤིང་མཉེས་པ་དུ་པེ། ཆོས་ཀྱི་དབྱིངས་སུ་སྤྲོས་པས་པུཥྤེ། དབྱིངས་གསལ་བར་གྱུར་པས་མར་མེ་མ་ཤིན་ཏུ་མཉེས་པས་གནྡེ་མའོ། །བྱང་ཆུབ་སེམས་ཀྱི་རྐྱེན་ཆོས་ཀྱི་དབྱིངས་པས་ལྕག་ཀྱུ་མ། སྟོད་སྨད་ནས་འཁྱུད་པས་ཞགས་པ་མ། རྡོ་རྗེ་དང་པདྨར་ཡང་དག་པར་ལྡན་པས་ལྕགས་སྒྲོག་མའོ། །ཤིན་ཏུ་དགྱེས་པའི་རོལ་སྟབས་པས་དྲིལ་བུ་མའོ། །བྱང་ཆུབ་ཀྱི་སེམས་དེས་འཁོར་བའི་སྐྱོན་དག་པས་ཡ་མཱནྟ་ཀྲིད་དེ་ལ་འཆི་བ་མེད་དེ་འཆི་བདག་གི་བདུད་བཅོམ་པས་བིགྷྣནྟ་ཀྲིད་བྱང་ཆུབ་ཀྱི་སེམས་དེའི་ངང་དུ་གཉིས་སུ་མི་ཕྱེད་ཅིང་ལྷའི་བུའི་བདུད་བཅོམ་པས་པདྨནྟ་ཀྲིད་དེའི་ངང་ལས་ཉོན་མོངས་པ་རྡུལ་ཙམ་ཡང་མི་མངའ་བས་པྲཛྙཱནྟ་ཀྲིད་དོ། །དེའི་ཕྱིར་གཞན་ཡང་སེམས་པ་དང་ཞེས་པ་ལ་སོགས་གསུངས་ཏེ། གཞན་ཡང་རིགས་ལྔ་ཡབ་ཡུམ་ལས་གཞན་པ་སེམས་དཔའ་ལ་སོགས་པ་སྟེ། དེའི་ཕྱིར་སེམས་དཔའ་སྟེ་སའི་སྙིང་པོ་ལ་སོགས་པ་བརྒྱད་དང་། སེམས་མ་སྟེ་ལ་སོགས་པ་བརྒྱད་དོ། །ཁྲོ་བོ་དང་ཞེས་པ་ནི་ཡ་མཱན་ཏ་ཀྲིད་ལ་སོགས་པ་སྟེ་བཞིའོ། །ཁྲོ་བོ་སྒོ་སྐྱོང་འདྲ་སྟེ་ལྕགས་ཀྱུ་མ་ལ་སོགས་པ་བཞིའོ། །སྤྲུལ་སྐུ་ལ་སོགས་པ་ནི་བྱང་ཆུབ་སེམས་ལས་སྤྲུལ་པ་སྟེ། ཐུབ་པ་ཆེན་པོ་དྲུག་སྟེ་དེ་རྣམས་བསྐྱེད་པ་དང་། ས་བོན་དང་ཕྱག་མཚན་ལ་སོགས་པ་ནི་སྒྱུ་འཕྲུལ་གྱི་རྒྱུད་ལས་ཇི་ལྟར་གྲགས་པ་བཞིན་གྱི་རིམ་པ་ཇི་ལྟ་བར་རོ། །དེ་ལྟར་དཀྱིལ་འཁོར་དུ་བཀོད་པ་དེ་རྣམས་ཀྱང་གང་ལས་འབྱུང་ཞེ་ན་དེ་བསྟན་པའི་ཕྱིར། གཉིས་མེད་བདག་པོ་བྱིན་རླབས་ལས་ཞེས་གསུངས་ཏེ། ཡབ་ཡུམ་གཉིས་སུ་མེད་པའི་བྱིན་གྱིས་རླབས་ལས་བྱུང་ངོ་། །འོག་གནས་དང་ལྷ་དང་འདི་ལྟར་གནས་པས་རང་བཟོ་མིན་ནམ་ཞེ་ན་མིན་ཏེ་ཇི་སྐད་དུ། གནས་དག་ཏུ་ནི་དཀྱིལ་འཁོར་དང་། །འགྲོ་རྣམས་དགོད་པར་ཇི་ལྟ་བར། །དེ་ལྟར་སྟོན་པ་མཆོག་གིས་མཛད་ཅེས་སོ། །དེ་བཞིན་གཤེགས་པ་ཐམས་ཅད་ཀྱི་ཞེས་པ་ནི། དེ་བཞིན་ཉིད་ཀྱི་གནས་སུ་གཤེགས་ཤིང་གཤེགས་པས་ན། དེ་བཞིན་གཤེགས་པ་སྟེ། དེ་མ་ལུས་པ་ཐམས་ཅད་ཀྱི་སྐུ་གསང་བ་གསུང་གསང་བ་ཐུགས་གསང་བ་སྟེ། དེའི་ངང་དུ་ཐམས་ཅད་གནས་ཤིང་བསྡུད་པས་ན་དུར་ཁྲོད། ཤིན་ཏུ་དཀོན་པས་ན་ཁུ་བྱུག །དེའི་ངང་ལ་རོལ་པས་ན་རོལ་པ། དེ་སྟོན་པ་ཉིད་ཀྱི་ཞལ་ནས་གསུང་པས་ན་མདོ་སྡེ་སྟེ། དེ་ལས་ཏིང་ངེ་འཛིན་ནི་དོན་དམ་པའི་བདེན་པ་དང་། ཀུན་རྫོབ་རིམ་པར་བཀོད་པའི་དོན་དེ། དོན་དམ་པ་དང་། ཀུན་རྫོབ་ཀྱི་ཚུལ་གྱིས་ཇི་ལྟར་ཡིན་པར་ཤེས་པར་བྱའོ། །ལེའུ་ཞེས་པ་ཇི་ལྟར་གོས་ཀྱི་སྣལ་མ་མང་པོ་བསྡོམས་ནས་གཅིག་ཏུ་བྱས་ཏེ། གོན་ན་སྦྲང་བུ་དང་སྡིག་པ་ལ་སོགས་ཏེ་འཚེ་བའི་རྣམ་པ་དང་རླུང་དང་གྲང་བ་ལ་སོགས་པ་སྟེ། གནོད་པ་ཐམས་ཅད་བཟློག་པ་དེ་བཞིན་དུ། རྒྱུད་ཀྱི་དོན་འདིས་ཉོན་མོངས་པ་ལྔ་དང་འཁོར་བའི་སྐྱེ་གནས་དང་། ཕྱིན་ཅི་ལོག་གི་འཚེ་བ་ལས་ཡང་དག་པའི་དབྱིངས་སུ་བཟློག་པས་ན་གོས་འདྲ་བའི་ཕྱིར་ལེའུའོ། །རྒྱུད་ཀྱི་དོན་འདི་ལེན་ཅིང་འཛིན་པས་སྟོན་པའི་གཞུང་གི་ཚིག་ལའང་ལེའུ་ཞེས་བྱའོ། །བདུད་རྩིའི་ཐིགས་པ་ཞེས་བྱ་བའི་རྒྱ་ཆེར་འགྲེལ་པ་ལས་བདེན་པ་གཉིས་བཤད་པའི་ལེའུ་སྟེ། དང་པོའོ། །དེ་ལྟར་ལེའུ་དང་པོར་ཐམས་ཅད་བསྐྱེད་ནས། མཐར་ཕྱིན་པའི་དོན་གསལ་བར་བསྟན་པའི་ཕྱིར། དེ་ནས་ཞེས་པ་ལ་སོགས་པ་བྱང་ཆུབ་ཀྱི་སེམས་ཀྱི་ལེའུ་གཉིས་གསུངས་ཏེ། བཅོམ་ལྡན་འདས་ལ་ཕྱག་འཚལ་ནས། འདི་སྐད་གསལ་བ་བཏབ་བོ། །ཞེས་བྱ་བར་སྦྱར་རོ། །བཅོམ་ལྡན་འདས་སྐུ་གསང་བ་གསུང་གསང་བ་ཐུགས་གསང་བ་ཀུན་གྱི་མཆོག་དམ་པའི་བདག་པོ་ལ་མཆོད་པ་དང་ཕྱག་བཙལ་ནས་འོག་ནས་འབྱུང་བའི་བསྟོད་པས་བསྟོད་དེ། བྱང་ཆུབ་ཀྱི་སེམས་དོན་འོག་ནས་འབྱུང་བའི་འདི་སྐད་ཅེས་སྡུད་པ་པོ་རྡོ་རྗེ་ཆོས་ཀྱིས་བཅོམ་ལྡན་འདས་ལ་གསོལ་བ་གདབ་བོ། །བཅོམ་ལྡན་འདས་ལ་བསྟོད་པའི་ཕྱིར། ཨེ་མའོ་བདེར་གཤེགས་བཅོམ་ལྡན་འདས་ཞེས་པ་ལ་སོགས་པ་གསུངས་ཏེ། ཨེ་མའོ་ཞེས་པས་བསྟོད་པ་ལས་སྡུད་པ་པོ་ངོ་མཚར་བའི་ཚིག་གོ། །བདེར་གཤེགས་ཀྱི་དོན་ནི་གོང་དུ་བཤད་ཟིན་ཏོ། །བཅོམ་ལྡན་འདས་ཞེས་པ་ནི་ཉོན་མོངས་པ་ཐམས་ཅད་བཅོམ་པས་ན་བཅོམ་ལྡན་འདས་ཏེ་སྟོན་པ་ལ་འབོད་པའི་ཚིག་གོ། །གསང་མཆོག་དགྱེས་པ་ཆེ་ཞེས་བྱ་བ་ནི་བྱང་ཆུབ་ཀྱི་སེམས་ཀྱི་ངོ་བོར་གྱུར་པ་ལ་དགྱེས་པ་ཆེ་ཞེས་བརྗོད་དོ། །རྣམ་པར་དག་པའི་ལམ་ཞེས་བྱ་བ་ནི་བདེ་བ་ཆེན་པོའི་འཁོར་ལོ་ལ་སོགས་པའི་བདག་ཉིད་དུ་གྱུར་པས་ལམ་ཞེས་བརྗོད་དོ། །ངོ་མཚར་འབྱུང་བ་ཁྱོད་ལ་འདུད་ཅེས་བྱ་བ་ནི་བྱང་ཆུབ་སེམས་ནོར་བུའི་ནང་དུ་གནས་པའི་སྐབས་ན་ལྷན་ཅིག་སྐྱེས་པའི་དགའ་བ་འབྱུང་བའི་བདག་པོར་གྱུར་པ་ངོ་མཚར་རོ་ཁྱོད་ལ་བདག་འདུད་པས་སོ་འཁོར་རྣམས་ཀྱི་དོན་དུ་ལུས་ངག་ཡིད་གསུམ་གྱིས་འདུད་དོ། །བཏུད་ནས་ཅི་བྱེད་ཅེ་ན་རྟེན་དང་བརྟེན་ཅན་དུ་སྣང་བའི་དེ་ཁོ་ན་ཉིད་ཀྱི་དོན་དང་། དོན་དམ་པ་དང་ཀུན་རྫོབ་ཀྱི་བྱང་ཆུབ་ཀྱི་སེམས་ནི་དོན་ཞུ་བ་དེའི་ཕྱིར་དཀྱིལ་འཁོར་རྣམས་ཀྱི་དོན། བྱང་ཆུབ་སེམས་ཀྱི་མཚན་ཉིད་དེ་སྡུད་པ་པོ་དག་དང་འཁོར་རྣམས་ལ་བཤད་དུ་གསོལ། ཞེས་འཁོར་གྱིས་གླེང་བསླང་བའོ། །དཀྱིལ་འཁོར་གྱི་དེ་ཁོ་ན་ཉིད་དང་། བྱང་ཆུབ་སེམས་ཀྱི་མཚན་ཉིད་བསྟན་པའི་ཕྱིར། དེ་ནས་གསང་བ་མཆོག་གི་བདག་པོས་རྡོ་རྗེ་ཡིད་ཀུན་ཏུ་བཟང་པོ་ལ་སྟོན་པས་བཀའ་སྩལ་པ། སེམས་དཔའ་ཆེན་པོ་ཞེས་བོས་ནས་ངས་ཁྱོད་ལ་བཤད་ཀྱིས་ལུས་ངག་ཡིད་གསུམ་གྱི་སྒོ་ནས་ཉོན་ཅིག་ཅེས་བཀའ་སྩལ་ཏོ། །སྡུད་པ་པོ་ཡིད་ཀུན་ཏུ་བཟང་པོ་ཁྱོད་ཀྱིས་སྤོབས་པ་བསྐྱེད་ནས་འཁོར་གྱི་དོན་དུ་ཞུ་བ་ལེགས་སོ་ལེགས་པར་ཞུགས་སོ་ཞེས་ལན་བྱིན་ཏེ། དཀྱིལ་འཁོར་གྱི་དེ་ཁོ་ན་ཉིད་ཀྱི་དོན་ཁོ་ན་ཉིད་དང་། བྱང་ཆུབ་སེམས་ཀྱི་དེ་ཁོ་ན་ཉིད་དང་། བྱང་ཆུབ་སེམས་ཀྱི་མཚན་ཉིད་འདི་ནི་སྔོན་གྱི་རྒྱལ་བ་སངས་རྒྱས་ཐམས་ཅད་དང་། ད་ལྟར་གྱི་རྒྱལ་བ་སངས་རྒྱས་ཐམས་ཅད་དང་། ཕྱི་མ་འབྱུང་བའི་རྒྱལ་བ་སངས་རྒྱས་རྣམས་ཀྱི་དོན་འདི་ལ་མ་གསུང་པ་གསུང་པར་འགྱུར་བ་ཡིན་ཏེ། དེ་ཅིའི་ཕྱིར་ཞེ་ན། དཀྱིལ་འཁོར་གྱི་དེ་ཁོ་ན་ཉིད་དང་། བྱང་ཆུབ་སེམས་ཀྱི་མཚན་ཉིད་ནི་བརྗོད་དུ་ཡང་མེད་ལ། སྣོད་དུ་གྱུར་པ་ཡང་དཀོན་པའི་ཕྱིར་རོ། །སེམས་དཔའ་ཆེན་པོ་དེ་བས་ན་ཁྱོད་ཉིད་ལ་དྲིས་ཤིག་ཅེས་སྟོན་པས་བཀའ་སྩལ་ཏེ། ཅང་མི་གསུང་བར་བཞུགས་སོ། །ཞེས་པ་ནི་དེ་ཁོ་ན་ཉིད་དང་སེམས་ཀྱི་མཚན་ཉིད་ནི་བརྗོད་པ་ལས་འདས་ཤིང་། གང་གི་ངོ་བོར་མ་གྲུབ་པའི་ཕྱིར། ཅང་མི་གསུང་པའོ། །དེ་ལྟར་མ་གསུང་པའི་དོན་གྱིས་འཁོར་རིགས་ལྔ་དང་དེ་མ་བས་ཏེ། དེ་བཞིན་གཤེགས་པ་ཐམས་ཅད་ཀྱི་སྡུད་པ་པོ་རྡོ་རྗེ་ཆོས་ལ་ཞུས་ཤིག་པར་བསྐུལ་བ་བསྟན་པའི་ཕྱིར། དེ་ནས་མི་བསྐྱོད་པ་ཞེས་པ་ནས་བཀའ་གསལ་བ་ལས་ཞེས་པའི་བར་གྱིས་བསྟན་ཏོ། །དེ་ནས་སྡུད་པ་པོ་རྡོ་རྗེ་ཡིད་ཀུན་ཏུ་བཟང་པོས་རིགས་ལྔའི་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་བསྐུལ་བར་ཐུགས་སུ་ཆུད་ནས། འཁོར་མང་པོ་རྣམས་བྱང་ཆུབ་སེམས་ཀྱི་སྣོད་དུ་རུང་བར་བྱིན་གྱིས་བརླབས་ནས་སྟོན་པ་ཀུན་ཏུ་བཟང་པོའི་ཞལ་དུ་བལྟས་ནས་གནས་སོ། །ཞལ་དུ་བལྟས་ནས་གནས་པ་ཡང་སྟོན་པ་ཡང་སྟོན་པས་ཀྱང་ཐུགས་སུ་ཆུད་དེ། བདེ་བ་བསྟན་པའི་ཕྱིར། དེ་ནས་བཅོམ་ལྡན་འདས་ཞེས་པ་ལ་སོགས་པ་བསྟན་ཏེ། བཀའ་སྩལ་ཏོ་ཞེས་པར་འབྲེལ་ཏོ། །ཞུས་པའི་དོན་བསྟན་པའི་ཕྱིར། རྡོ་རྗེ་ཡིད་ཀུན་ཏུ་བཟང་པོ་ལ་སོགས་པ་འདུས་པའི་འཁོར་ཚོགས་རྣམས་ཉོན་ཅིག་ཅེས་གནད་ནས་བསྐུལ་ཏེ་སྟོན་པས་གླེང་བསླང་ངོ་། །དེ་ནས་སྟོན་པས་འདི་སྐད་གསུངས་སོ། །ཞེས་བྱ་བའི་དོན་བསྟན་པའི་ཕྱིར། བྱང་ཆུབ་སེམས་ཞེས་བྱ་བ་ནི་ཞེས་པ་ལ་སོགས་པས་བསྟན་ཏེ། བྱང་ཆུབ་ཀྱི་སེམས་དེའི་མཚན་ཉིད་གང་ཡིན་ཞེ་ན། འདི་ལྟ་སྟེ་བརྗོད་དང་སྨྲ་བསམ་ཡུམ་ལས་འདས་ཞེས་བྱ་སྟེ། བྱང་ཆུབ་ཀྱི་སེམས་གནས་ནས་བསྐྱོད་དེ་ནོར་བུའི་ནང་དུ་གནས་ཙམ་ན་ཁུ་བ་དང་ལྷན་ཅིག་ཏུ་སྐྱེ་བའི་དགའ་བ་འབྱུང་སྟེ། དེ་ལ་ཡུན་རིང་དུ་གནས་པའི་དུས་ན་ཕྱི་དང་ནང་དུ་སྣང་བ་འདི་ཉིད་རང་བཞིན་གྱིས་སྟོང་པའི་མཚན་ཉིད་དུ་མཐོང་སྟེ། སྟོང་པའི་མཚན་ཉིད་དེ་ལ་ནི་བརྗོད་དང་སྨྲ་བསམ་ཡུལ་ལས་འདས་ཞེས་གསུངས་ཏེ། དུས་དེ་ཉིད་དུ་བྱང་ཆུབ་སེམས་ཀྱི་མཚན་ཉིད་འདི་ཡིན། འདི་ལྟ་བུ་ཞིག་ཡོད་དོ་ཞེས་བྱ་རྟེན་དང་བརྟེན་པ་མེད་དེ། བརྗོད་པ་ལས་འདས་སོ། །དེ་ལྟ་བུའི་སྐབས་སུ་དོན་དམ་པ་ཞེས་པ་དང་། ཀུན་རྫོབ་ཅེས་བྱ་བའི་ཐ་སྙད་ཐམས་ཅད་དང་བྲལ་བས། དོན་དམ་ཀུན་རྫོབ་ཐ་མི་དད་ཅེས་གསུང་པ་ཡིན་ནོ། །རང་ལུས་ངག་ཡིད་རྡོ་རྗེ་སྟེ་ཞེས་བྱ་བ་ནི། རང་གི་ལུས་དང་ངག་དང་ཡིད་གསུམ་ཡང་རང་བཞིན་གྱི་ཡེ་ནས་རྣམ་པར་དག་སྟེ་ཆོས་ཀྱི་དབྱིངས་སུ་གྱུར་པས་རྡོ་རྗེ་ཞེས་གསུངས་པ་ཡིན་ནོ། །གཅིག་གིས་གཉིས་ཀྱི་ལས་བྱེད་པ་ཞེས་བྱ་བ་ནི་གཅིག་ཅེས་ཏེ་བྱང་ཆུབ་སེམས་ཀྱི་ངོ་བོའོ། །ལས་བྱེད་པས་ཞེས་པ་ནི། རྟེན་དང་བརྟེན་ཅན་གཉིས་ཀྱིས་ལས་བྱེད་ཅིང་བསྐྱེད་དེ་ལྷའི་དཀྱིལ་འཁོར་དུ་སྣང་བ་ཐམས་ཅད་ནི་དོན་ཡོད་པར་མ་ཡིན་ཏེ། ཇི་སྐད་དུ་སྒྱུ་འཕྲུལ་ལམ་ཆེན་མོའི་ནང་ནས་ཀྱང་ཨེ་མའོ་རྡོ་རྗེ་ཕུང་པོའི་ཡན་ལག་ནི། རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་དེ། །ས་ཆུ་སྤྱན་དང་མ་མ་ཀི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་རྣམ་པར་དག ། ཅེས་གསུངས་ཏེ། དེའི་ཕྱིར། ལུས་དང་ངག་ཡིད་མ་གྲུབ་པར་གསུངས་ཏེ། དེ་ལྟར་ལྷའི་གཟུགས་སུ་ལུས་ངག་ཡིད་གསུམ་གནས་ཀྱང་དོན་དམ་པར་མ་གྲུབ་སྟེ། ཆོས་ཀྱི་དབྱིངས་སུ་རྟོག་པའི་རིག་པའི་སྐྱེས་བུ་གང་སུ་ཡོད་རུང་བ་དེའི་དོན་དམ་པར་བྱང་ཆུབ་ཀྱི་སེམས་བསྐྱེད་པ་ཡིན་ཞེས་བཅོམ་ལྡན་འདས་ཀྱིས་གསུངས་སོ། །དེ་ནི་དོན་དམ་པའི་བདེན་པ་སྟེ། དེ་གསུངས་མ་ཐག་ཏུ་འཁོར་རྣམས་ཀྱིས་ཀྱང་ཐུགས་སུ་ཆུད་དེ། རང་རང་གི་ལུས་ངག་ཡིད་གསུམ་ལ་སེམས་ནས་ཅད་མི་སྨྲ་བར་འཁོད་དོ། །དེ་ནས་བཅོམ་ལྡན་འདས་ལ་སྡུད་པ་པོ་ལ་སོགས་པའི་འཁོར་རྣམས་ཀྱིས་རྟོག་ཚད་དབུལ་བའི་ཕྱིར། དེ་ནས་ཡིད་ཀུན་ཏུ་བཟང་པོ་ལ་སོགས་པའི་རྟོགས་ཚད་འབུལ་ཏེ། སྔོན་ལ་སྡུད་པ་པོས་རྟོགས་ཚད་ཕུལ་བ། །ཨེ་མའོ་བདེར་གཤེགས་བཅོམ་ལྡན་འདས། །སངས་རྒྱས་ཀུན་གྱི་བྱང་ཆུབ་སེམས། །རྟོགས་པར་དཀའ་བའི་སྙིང་པོ་འདི། །རབ་ཏུ་མི་རྟོག་གནས་མེད་དོ། །ཞེས་བྱ་བ་ལས། ཨེ་མའོ་ཞེས་པ་ནི། སྡུད་པ་པོས་ཡིད་ཀུན་ཏུ་བཟང་པོར་དེ་བྱང་ཆུབ་ཀྱི་སེམས་ཐུགས་སུ་ཆུད་དེ་དམ་པའི་ཚིག་གོ། །བདེར་གཤེགས་བཅོམ་ལྡན་འདས། ཞེས་བྱ་བ་ནི་བོས་པའི་ཚིག་སྟེ། གཉིས་སུ་མེད་པའི་གནས་ནི་བདེ་བ་སྟེ། དེ་རུ་གཤེགས་པའི་ངང་ལ་བཞུགས་པ་ནི། ཀྱེ་བཅོམ་ལྡན་འདས་ཞེས་བོས་པའོ། །སངས་རྒྱས་ཀུན་གྱི་བྱང་ཆུབ་སེམས་ཞེས་བྱ་བ་ནི། གཟུང་བ་དང་འཛིན་པའི་མཐའ་ལས་འདས་པ་ནི་སངས་རྒྱས་ཀུན་གྱི་བྱང་ཆུབ་ཀྱི་སེམས་ཡིན་ཏེ་དེ་རབ་ཏུ་རྟགས་དཀའ་བ་བརྗོད་པ་ཐམས་ཅད་དང་བྲལ་བ་དེ་ལ་ནི། རྟག་པར་དཀའ་བའི་སྙིང་པོ་འདི་ཞེས་གསུངས་སོ། །མཐའ་རྣམ་པ་གཉིས་དང་བྲལ་ཏེ་མི་རྟོག་པའི་ཡེ་ཤེས་དེ་ལ་རྣམ་པར་རྟོག་པ་གང་གིས་ཀྱང་བསྐྱོད་པ་མ་ཡིན་པ་སྟེ་རྟོགས་པར་དཀའ་བས། རབ་ཏུ་མི་རྟོགས་གནས་མེད་པའོ། །ཞེས་གསུངས། རང་གི་ལུས་ངག་ཡིད་གསུམ་ལ་སེམས་ནས་འདུག་གོ། །དེ་ནས་འཁོར་རིགས་ལྔའི་རྟོགས་ཚད་ཕུལ་བ་སྟོན་ཏེ། སྔོན་ལ་མི་བསྐྱོད་པ་རྟོགས་ཚད་ཕུལ་བ། ཨེ་མའོ་གཟུང་འཛིན་རྣམས་སྤངས་པ། །ཚིག་དང་ཡི་གེའི་སྤྱོད་ཡུལ་མིན། །ཆོས་བདག་མེད་པའི་མཉམ་པ་ཉིད། །རང་སེམས་གདོད་ནས་མ་སྐྱེས་བའོ། །ཞེས་བྱ་བ་ནི། གཟུང་འཛིན་རྣམས་སྤངས་པ་ཞེས་པ་ནི། ཕྱི་གཟུང་བར་བྱ་བའི་ཡུལ་ནི་ནང་འཛིན་པར་བྱེད་པའི་སེམས་ཉིད་སྣང་བ་ལས་མ་གཏོགས་པ་ཡུལ་ལོགས་ཤིག་ན་གྲུབ་པ་མེད་དོ། །འོ་ན་ནང་འཛིན་པར་བྱེད་པའི་སེམས་ཉིད་ཡོད་དམ་ཞེ་ན། མེད་དེ་ནང་འཛིན་པའི་སེམས་ཉིད་ཀྱང་སྐད་ཅིག་མས་གཤིག་པར་རང་བཞིན་མེད་དོ། །འོ་ན་སྐད་ཅིག་མའི་ཆོས་གཞིགས་པ་ནི་སྔ་མ་ནི་འགགས་ཕྱི་མ་ནི་མ་བྱུང་ད་ལྟར་ནི་མི་གནས་པས་སྟོང་པའི་རང་བཞིན་དུ་གྲུབ་སྟེ། སྟོང་པ་ནི་སྟོང་པའི་སེམས་ཞུགས་ནས་རྟག་པའི་སྐྱོན་ཡིན་ན། གཟུང་བ་དང་འཛིན་པ་ཇི་ལྟར་སྤང་དུ་བཏུབ་མི་བཏུབ་བོ། །ལན་དུ་དེ་ལྟར་མ་ཡིན་ཏེ། གཟུང་བར་བྱ་བ་དང་འཛིན་པར་བྱེད་པ་གཉིས་ཀ་མ་གྲུབ་སྟེ། སྟོང་ཞིང་བདག་མེད་པར་གྲུབ་ལ་སྟོང་ཞིང་བདག་མེད་པ་ཞེས་བྱ་བ་དེ་ལ་ཡང་གནས་པ་མ་ཡིན་ཏེ། ཤེས་པ་དང་བརྗོད་པའི་མཐའ་ལས་འདས་པའི་ཕྱིར། གཟུང་འཛིན་རྣམས་སྤངས་ཞེས་པ་ནས། རང་སེམས་གཟོད་ནས་མ་སྐྱེས་པའོ། །ཞེས་མི་བསྐྱོད་པས་གསུངས་སོ། །དེ་ནས་རྣམ་པར་སྣང་མཛད་ཀྱིས་རྟོགས་ཚད་ཕུལ་བའི་འདི་སྐད་དུ་གསུངས་སོ། །ཨེ་མའོ་ཆོས་ཀུན་སྟོང་པའི་བདག །རང་གི་ངོ་བོ་བརྗོད་དུ་མེད། །བརྗོད་མེད་དེ་ཉིད་སྣ་ཚོགས་པའི། །ཆོས་རྣམས་ཀུན་ལ་ཁྱབ་པར་གནས། །ཞེས་བྱ་བ་ལ། ཆོས་ཀུན་སྟོང་པའི་བདག་ཅེས་བྱ་བ་ནི་ཕྱི་ནང་དུ་སྣང་བའི་ཆོས་ཐམས་ཅད་ནི། ངོ་བོ་ཉིད་ཀྱིས་སྟོང་སྟེ། མེ་མེ་ཡིས་སྟོང་། ཆུ་ཆུ་ཡིས་སྟོང་། ས་སས་སྟོང་། རླུང་རླུང་གིས་སྟོང་། གཟུགས་གཟུགས་ཀྱིས་སྟོང་། ཞེས་པ་ལ་སོགས་པས་རྒྱལ་བ་ཡུམ་ཆེན་མོ་ལས་རྒྱ་ཆེར་གསུངས་ཏེ། དེའི་ཕྱིར། ཆོས་ཀུན་སྟོང་པའི་བདག་ཅེས་གསུངས་ཏེ། རང་གི་ངོ་བོ་མ་སྐྱེས་པ་དེ་ལ་ནི། སོ་སོའི་ངོ་བོ་འདི་ལྟ་བུ་ཡིན་བྱ་བ་བརྗོད་དུ་མེད་རང་བཞིན་གྱི་འོད་གསལ་བ་དེའི་ཕྱིར། རང་གི་ངོ་བོ་བརྗོད་དུ་མེད་ཅེས་གསུངས་སོ། །འོ་ན་རང་གི་ངོ་བོ་མ་སྐྱེས་པ་དེ་ལ་འདི་ལྟར་སྣང་བ་ལ་མ་ཁྱབ་བམ་ཞེ་ན། ཁྱབ་སྟེ་མ་སྐྱེས་པ་སྟེ། སྟོང་པ་གཏིང་ཆད་པ་ནི་མ་ཡིན་ཏེ་གང་ལ་ཡང་འགག་པ་མེད་པར་རང་འབྱུང་སྟེ། འབྱུང་བའི་དངོས་པོ་ཐམས་ཅད་ལ་ཡང་མར་མེ་དང་འོད་ཀྱི་ཚུལ་དུ་ཁྱབ་ནས་གནས་ཏེ། དེའི་ཕྱིར། བརྗོད་མེད་དེ་ཉིད་སྣ་ཚོགས་པའི། །ཆོས་རྣམས་ཀུན་ལ་ཁྱབ་པར་གནས། །ཞེས་བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་སོ། །དེ་ནས་ཡང་རིན་ཆེན་སེམས་པས་རྟོགས་ཚད་ཕུལ་བ་འདི་གསུངས་སོ། །ཨེ་མའོ་ངོ་བོ་མཉམ་ཉིད་བྱང་ཆུབ་སེམས། །མིང་དུ་བཏགས་པའི་ཆོས་རྣམས་ཀུན། །མཉམ་པ་ཉིད་ལ་གནས་བཅས་ཕྱིར། །མཉམ་པ་ཉིད་ལས་གཞན་མེད་དོ། །ཞེས་བྱ་བ་ལ། མཉམ་ཉིད་བྱང་ཆུབ་སེམས་ཞེས་པ་ནི་འདི་ལྟར་སྣང་བ་ཐམས་ཅད་ཡེ་ཕྱི་མོ་ཉིད་ནས་མ་སྐྱེས་པ་ཆོས་ཀྱི་དབྱིངས་ཡིན་ལ། དེའི་ངང་ལ་ནི་སངས་རྒྱས་སེམས་ཅན་གཉིས་མེད་དེ། དེའི་ངང་ལ་དུས་རྟག་ཏུ་གནས་བཅས་ཤིང་གནས་པ་ན། མཉམ་པ་ཉིད་ལས་གཞན་མེད་དོ། །ཞེས་རིན་ཆེན་སེམས་པས་གསུངས་སོ། །དེ་ནས་ཡང་ཆོས་ཀྱི་སེམས་པས་རྟོགས་ཚད་ཕུལ་བ་འདི་གསུངས་སོ། །ཆོས་སུ་སྣང་བ་ཐམས་ཅད་ཀུན། །རང་གི་ངོ་བོས་བརྗོད་དུ་མེད། །དེ་ཉིད་བྱང་ཆུབ་སེམས་སུ་ནི། །མཁས་པས་བསྒོམས་ན་རྟོགས་པར་འགྱུར། ཞེས་པ་ལ་ཆོས་སུ་སྣང་བ་ཐམས་ཅད་ཀུན་ཞེས་པ་ནི་ཕྱི་འབྱུང་བ་ལྔ་ལས་གྲུབ་པ་བསྟན་པའི་རང་བཞིན་ཅན་གྱི་ཆོས་དང་། ནང་ཕུང་པོ་ལྔ་ལས་གྲུབ་པའི་གཡོ་བར་སྣང་བ་ཐམས་ཅད་ཀུན། ཡེ་ནས་མ་སྐྱེས་པ་ཡིན་ཏེ་བརྗོད་པ་ལས་འདས་པ་དེའི་ཕྱིར། རང་གི་ངོ་བོ་བརྗོད་དུ་མེད་ཅེས་གསུངས་ཏེ། སྤྲོས་པའི་མཐའ་བརྒྱད་དང་བྲལ་བ་ནི་བྱང་ཆུབ་ཀྱི་སེམས་ཏེ། དེ་ལས་བྱང་ཆུབ་ཀྱི་སེམས་ཡིན་ཞེས་བརྗོད་པས་འབྲས་བུ་མི་ཐོབ་སྟེ། དེའི་ངང་དུ་ཡང་ནས་ཡང་དུ་མཁས་པས་ཉམས་སུ་བླངས་ནས་གཉིས་སུ་མེད་པའི་ཡེ་ཤེས་གདོད་རྟོགས་པར་འགྱུར་བ་དེའི་ཕྱིར། དེ་ཉིད་བྱང་ཆུབ་སེམས་སུ་ནི། །མཁས་པས་བསྒོམས་ན་རྟོགས་པར་འགྱུར། །ཞེས་ཆོས་ཀྱི་སེམས་པས་གསུངས་སོ། །དེ་ནས་ཡང་ལས་ཀྱི་སེམས་པས་རྟོགས་ཚད་ཕུལ་བ་འདི་གསུངས་སོ། །ཆོས་ཀུན་བྱང་ཆུབ་སེམས་ཉིད་དེ། །ངེས་པ་མེད་དེ་དངོས་རྟོག་བྲལ། །དེ་ཉིད་དག་པའི་རང་བཞིན་བས། །མཁས་པས་ཅི་དགར་བསྒོམས་ནས་འགྲུབ་ཅེས་བྱ། །ཆོས་ཀུན་བྱང་ཆུབ་སེམས་ཉིད་དེ་ཞེས་པ་ནི། ཕྱི་དང་ནང་དུ་སྣང་བའི་ཆོས་ཀུན། ཡེ་ནས་མ་བཅོས་པས་བྱང་ཆུབ་ཀྱི་སེམས་ཉིད་ཡིན་ཏེ། བརྟགས་པའི་དངོས་པོ་ནི་གསོག་གསོབ་ཡ་མ་བརླ་ཡིན་པས་དེས་ན། ངེས་པ་མེད་དེ་དངོས་རྟོགས་བྲལ། །དེ་ཉིད་དག་པའི་རང་བཞིན་བས། །མཁས་པས་ཅི་དགར་བསྒོམས་ན་འགྲུབ། །ཅེས་ལས་ཀྱི་སེམས་པས་གསུངས་སོ། །དོན་དམ་པའི་བདེན་པ་འབའ་ཞིག་བསྟན་པའོ། །བྱང་ཆུབ་ཀྱི་སེམས་རབ་ཏུ་བསྡོམ་པའི་ལེའུ་ནི་བྱང་ཆུབ་ཀྱི་སེམས་ཀྱི་ལེའུའོ། །བདུད་རྩི་ཐིགས་པ་ཞེས་བྱ་བའི་རྒྱ་ཆེར་འགྲེལ་པ་བཤད་པ་ལས། ལེའུ་གཉིས་པའོ། །དེ་ལྟར་བྱང་ཆུབ་ཀྱི་སེམས་ཀྱི་མཚན་ཉིད་བསྟན་པ་དང་ལས་དང་པོའི་དང་པོ་རྣམས་ལ་གཟུགས་ཀྱི་དཀྱིལ་འཁོར་བསྟན་པའི་ཕྱིར། དེ་ནས་ཞེས་པ་ལ་སོགས་པས་བསྟན་ཏེ། དེ་ནས་ཞེས་པ་ནི་སྔར་གྱི་ལེའུ་འདས་པའི་དེ་མ་ཐག་པ་དེ་ནས་སོ། །ཡང་ཡིད་ཀུན་ཏུ་བཟང་པོས་བཅོམ་ལྡན་འདས་གསང་བ་མཆོག་གི་བདག་པོ་འོག་ནས་འབྱུང་བའི་ཚིག་འདི་སྐད་གསོལ་བ་བཏབ་པའོ། །དེ་ནས་འདོད་པའི་ཕྱིར་གསོལ་བ་བཏབ་ཅེ་ན། བསྙན་མའི་དཀྱིལ་འཁོར་མ་འདྲིས་པར་འདོད་པའི་ཕྱིར། ཨེ་མ་བདེར་གཤེགས་རྒྱལ་བའི་གཙོ། །ཞེས་པ་ནས་བདེ་བར་གཤེགས་པ་བཤད་དུ་གསོལ། ཨ་ལ་ལ་ཧོ་ཞེས་པའི་བར་གྱིས་བསྟན་ཏེ་གོ་སླའོ། །ཞུས་པའི་ལན་བསྟན་པའི་ཕྱིར། དེ་ནས་སྟོན་པ་རྒྱལ་མཆོག་གིས། །ཞེས་པ་ལ་སོགས་པ་གསུངས་ཏེ། དེ་ནས་སྟོན་པ་མཐའ་རྣམ་པ་གཉིས་ལ་རྒྱལ་བའི་རྒྱལ་མཚན་བཙུགས་ཤིང་ཀུན་གྱི་མཆོག་ཏུ་གྱུར་པ་དེས། སྡུད་པ་པོ་ཀུན་ཏུ་བཟང་པོས་ཞུས་པའི་ཚིག་གསན་ནས། སྙན་མའི་དཀྱིལ་འཁོར་ཐུགས་དང་པོའི་སྒོ་ནས་འཁོར་རྣམས་ལ་རབ་ཏུ་བཤད་དེ་ཕྱི་པའི་གང་ཟག་ལས་དང་པོའི་དང་པོ་པ་རྣལ་འབྱོར་ལ་འཇུག་པར་འདོད་པའི་ཆེད་དུའོ། །དེ་ཡང་ལས་དང་པོ་པ་གང་ཟག་རྣམ་པ་ལྔ་པོས་ཀྱང་སློབ་དཔོན་གྱི་མཚན་ཉིད་ཇི་ལྟ་བུས་བྱ་བ་བརྟག་པར་བྱ་བའི་ཕྱིར། སློབ་དཔོན་བྱེད་དང་རྗེས་འབྲང་པས་ཞེས་པ་ལ་སོགས་པ་བསྟན་ཏེ། སློབ་དཔོན་བྱེད་དང་ཞེས་པ་ནི་གང་ཟག་ལྔ་པོ་འདྲེན་པར་བྱེད་པའི་ཕྱིར། སློབ་དཔོན་བྱེད་དང་ཞེས་བྱ་བ་སྟེ། སྔོན་བདེ་བར་གཤེགས་པས་ཇི་ལྟར་མཛད་པའི་རྗེས་སུ་འབྲང་བའི་སློབ་དཔོན་མཚན་ཉིད་བཤད་པར་བྱ་སྟེ། དེའི་ཕྱིར་བློ་ཡངས་རྒྱུད་ལ་གོམས་པ་དང་ཞེས་པ་ལ་སོགས་བསྟན་ཏེ། བློ་ཡངས་རྒྱུད་ལ་གོམས་པ་དང་། ཞེས་པ་ནི་ཕྱི་དང་ནང་དུ་སྣང་བའི་ཆོས་ལ་རྟོག་པ་མི་སྐྱེ་ཞིང་བློ་ཡངས་པར་མཛད་པ། རྣལ་འབྱོར་གྱི་རྒྱུད་དང་། རྣལ་འབྱོར་བླ་ན་མེད་པའི་རྒྱུད་ལ་གོམས་ཤིང་མཁས་པ་དང་། བླ་མའི་ཉམས་ཀྱིས་མན་ངག་ཐོབ་ཅིང་ཏིང་ངེ་འཛིན་ལས་སུ་རུང་བ་དང། སྟོན་པའི་བཀའ་ཕྱི་ནང་གི་ཆོས་སྡེ་སྣོད་གསུམ་ལ་མ་རྨོངས་ཤིང་། ཐེ་ཚོམ་མི་ཟ་བ་དང་ཡང་དག་པའི་ཏིང་ངེ་འཛིན་ལ་སྲན་ཐུབ་ཅིང་ལྟ་བ་མི་ལྡོག་པ་དང་། ཡང་དག་པའི་ཆོས་ལ་དད་པའི་དད་པ་ཆེ་བ་དང་། ཕྱིན་ཅི་མ་ལོག་པ་ལ་ཡིད་ཆེས་པའི་དད་པ་ཆེ་བ་དང་། ཡང་དག་པའི་ཆོས་ལ་དད་པ་ཆེ་བ་དང་ལ་སོགས་པའི་དད་པ་མངའ་བ་གསང་བ་སྟེ། འཁོར་ལོ་བཞིའི་བྱེ་བྲག་དང་། སྦས་པ་སྟེ། ཤེས་རབ་མ་རབ་འབྲིང་ཐ་མ་གསུམ་ལ་ཇི་ལྟར་བྱ་བའི་ཐབས་མཆོག་རྣམས། སྣོད་ངན་པ་གང་ཟག་འཕྱང་པོ་གསང་མི་ཐུབ་པ་རྣམས་ལ་མི་སྟེར་བ་དང་། བླ་མ་ལས་མཐར་ཕྱིན་པའི་དབང་མཆོག་རྣམས་ཐོབ་པ་ནི། རྡོ་རྗེ་འཛིན་པའི་དཀྱིལ་འཁོར་གྱི་ལས་ཀུན་ཀྱང་བྱ་བ་ཐམས་ཅད་ལ་ཡངས་ཤིང་། དེ་ལྟ་བུའི་མཚན་ཉིད་དང་ལྡན་པའི་སློབ་དཔོན་དེ་རྡོ་རྗེ་འཛིན་པའི་སྙན་མའི་སློབ་དཔོན་ནོ། །དེ་ནས་འཁོར་ལོ་ཅན་གྱི་སློབ་དཔོན་བསྟན་པའི་ཕྱིར། ཡན་ལག་དམ་ཚིག་མ་ཉམས་དང་། །ཞེས་བྱ་བ་ལ་སོགས་པས་བསྟན་ཏེ། ཡན་ལག་དམ་ཚིག་ཅེས་བྱ་བ་ནི་འོག་ནས་འབྱུང་བའི་དམ་ཚིག་བཅོ་ལྔ་མ་ཉམས་ཤིང་། མདོག་དང་སྟེ་ཤིན་ཏུ་མདོག་སེར་ལ་འཚེར་བ་དང་། གཟུགས་དང་སྟེ་གཟུགས་ཤིན་ཏུ་བཟང་བ་སྟོད་སྨད་ཕྱེད་པའོ། །སྟོབས་དང་ལྡན་ཏེ་ཤིན་ཏུ་མི་འོས་པའི་སྟོབས་ཡོད་པའོ། །འཁོར་ལོ་སྒྱུར་བའི་མཚན་ཡོད་པའི་ལག་པ་གཡོན་པའི་སྲིན་ལག་གི་སྦབ་ན་འཁོར་ལོ་རྩིབས་བརྒྱད་ཡོད་པ། ལུས་དྲི་ཞིམ་པོ་ཨ་ཀ་རུ་ལ་སོགས་པའི་དྲི་ཞིམ་པོའི་ངད་དང་ལྡན་པ། དེ་ལྟ་བུའི་མཚན་མ་ཡོད་པ་དེ་ནི་སངས་རྒྱས་འཁོར་ལོ་ཅན་གྱི་དཀྱིལ་འཁོར་གྱི་སློབ་དཔོན་ཡིན་པར་རབ་ཏུ་གསུངས་སོ། །དེ་ནས་ཡང་རིན་པོ་ཆེའི་སློབ་དཔོན་གྱི་མཚན་ཉིད་སྟན་པའི་ཕྱིར་ཤེས་པ་ཆེ་ཞིང་ཡོན་ཏན་ལྡན་ཞེས་པ་ལ་སོགས་པ་གསུངས་ཏེ། ཤེས་པ་ཆེ་ཞིང་ཡོན་ཏན་ལྡན་ཞེས་པ་ནི་ཕྱི་དང་ནང་གི་ཆོས་ལ་མ་རྨོངས་པ་དང་། བཟོ་དང་རིག་པའི་གནས་ལ་མཁས་པ་དང་། ཡོན་ཏན་སྒོ་ཡངས་ཏེ་ཅི་ལ་ཡང་མ་འགགས་པར་བྱེད་པ་དང་སྤྱོད་ལམ་དག་སྟེ། ཆོས་སྤྱོད་རྣམ་པ་བཅུ་སྤྱོད་པ་དང་། རྡོ་རྗེ་སློབ་དཔོན་སྤུན་ལ་གདུངས་ཏེ་ཅི་འཚམ་པའི་སྒོ་ནས་སློབ་དཔོན་ཁུར་ཞིང་མཆེད་ལ་གདུང་བ་དེ་ལྟ་བུའི་ངང་ཚུལ་གང་ལ་ཡོད་པའི་གང་ཟག་དེ་ནི་རིན་པོ་ཆེའི་སློབ་དཔོན་ནོ། །དེ་ནས་ཡང་པདྨའི་སློབ་དཔོན་གྱི་མཚན་ཉིད་བསྟན་པའི་ཕྱིར། རྟག་ཏུ་བཟླས་པ་བརྩོན་པ་དང་ཞེས་པ་ནས། པདྨོ་ཅན་བླ་མར་གཟུང་ཞེས་པས་བསྟན་ཏེ་གོ་སླའོ། །དེ་ནས་ཡང་ལས་ཀྱི་རིགས་ཀྱི་སློབ་ཀྱི་མཚན་ཉིད་བསྟན་པའི་ཕྱིར། བྱ་བའི་ལས་ལ་མ་རྨོངས་ཤིང་ཞེས་པ་ནས། སྣ་ཚོགས་ལས་ཀྱི་བླ་མར་ཡིན་ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་དཀྱིལ་འཁོར་སྤྱིའི་སློབ་དཔོན་གྱི་མཚན་ཉིད་བསྟན་པའི་ཕྱིར། དེ་དག་ཡོན་ཏན་མ་ལུས་ལྡན་ཞེས་བྱ་བ་ལ་སོགས་པ་གསུངས་ཏེ། དེ་དག་ཡོན་ཏན་མ་ལུས་ལྡན་ཞེས་བྱ་བ་ནི། གོང་མ་ཇི་སྙེད་བརྗོད་པའི་ཡོན་ཏན་ཀུན་དང་ལྡན་པའོ། །ཐེག་པ་ཀུན་ལ་འབྱམ་པ་ནི། ཕྱི་ནང་གི་ཐེག་པ་ཀུན་ལ་མཁས་ཤིང་གོམས་པ་ནི་སྤྱིའི་སྙན་མའི་དཀྱིལ་འཁོར་གྱི་སློབ་དཔོན་ནོ། །དེ་ནས་ཡང་སློབ་དཔོན་གྱི་སློབ་མའི་མཚན་ཉིད་མ་བརྟགས་ན་སྣོད་ངན་པས་གཉིས་ཀ་བརླག་པར་འགྱུར་ཏེ། དེའི་ཕྱིར་བླ་མ་ལུང་བསྟན་དེས་ཀྱང་ནི། སློབ་མའི་མཚན་ཉིད་བརྟགས་པར་གཅེས། །ཞེས་གསུངས་སོ། །དེ་ནི་འདི་ནས་མར་སོ་སོའི་མཚན་ཉིད་བསྟན་ཏེ། དེའི་ཕྱིར་རྐྱེན་ཐུབ་མི་ལྡོག་དམ་ཚིག་གནས། །ཞེས་པ་ནས་རྡོ་རྗེ་ཅན་གྱི་སློབ་མ་རུང་ཞེས་པའི་བར་གྱིས་བསྟན་ཏེ་གོ་སླའོ། །འཁོར་ལོ་ཅན་གྱི་སློབ་མ་བསྟན་པའི་ཕྱིར། །ལུས་དང་ཡན་ལག་མཛེས་ལྡན་དང་། །ཞེས་པ་ནས། སངས་རྒྱས་འཁོར་ལོ་ཅན་གྱི་བཤད་ཅེས་བཤད་པའི་བར་གྱིས་བསྟན་ཏེ་མཚན་ཉིད་གོ་སླའོ། །རིན་པོ་ཆེའི་སློབ་མ་བསྟན་པའི་ཕྱིར། སྤྱོད་ལམ་རྣམ་བཞི་ལྷུན་སྟུག་ཅིང་ཞེས་པ་ནས། རིན་ཆེན་དཀྱིལ་འཁོར་དག་གིའོ། །ཞེས་པའི་བར་གྱིས་བསྟན་ཏེ་གོ་སླའོ། །པདྨའི་སློབ་བུ་བསྟན་པའི་ཕྱིར། ངག་གི་སྒོ་ནས་ཤིན་ཏུ་སྔར་ས་ཞེས་པ་ནས། པདྨ་འཛིན་པའི་སྣོད་དུ་བཤད་ཅེས་པའི་བར་གྱིས་བསྟན་ཏོ། །ལས་ཀྱི་སློབ་མ་བསྟན་ཏེ། དེའི་ཕྱིར་ལས་ལ་གུས་ཤིང་ཞེས་པ་ནས་སྣ་ཚོགས་རྡོ་རྗེ་ལྟ་བུ་ཡིན་ནོ། །ཞེས་པའི་ཚིག་བཞི་པས་བསྟན་ཏོ། །སྤྱིའི་དཀྱིལ་འཁོར་སློབ་མ་བསྟན་པའི་ཕྱིར། ཡོན་ཏན་དེ་ཀུན་ལྡན་པ་ལ། ཀུན་གྱི་བསྐུལ་ཞིང་ཤིན་ཏུ་མཛེས། །ཡིད་དུ་འོང་ཞིང་སྤྱོད་པ་བཟོ། །སྤྱི་ཡི་དཀྱིལ་འཁོར་དག་ལ་ཤིས། །ཞེས་པའི་ཚིག་བཞི་པོ་དེས་བསྟན་ཏེ་གོ་སླའོ། །དེ་ནས་ཡང་དཀྱིལ་འཁོར་བྱ་བའི་གནས་ཀྱི་མཚན་ཉིད་བསྟན་ཏེ། དེ་ལ་ཡང་གཉིས་ཏེ། བླང་བར་བྱ་བ་དང་། སྤངས་བར་བྱ་བ་གཉིས་སོ། །བླང་བར་བྱ་བ་ལ་སོ་སོའི་མཚན་ཉིད་རྣམས་ཏེ་བྱེ་བྲག་དྲུག་གོ། །སྔོན་ལ་སྤང་བར་བྱ་བའི་གནས་བསྟན་པའི་ཕྱིར། གནོད་སྦྱིན་མོའི་སྤང་རྗེས་དང་། ཞེས་པ་ལ་སོགས་པས་བསྟན་ཏེ། གནོད་སྦྱིན་མོའི་སྤང་རྗེས་ནི་བྲག་ལ་གཅན་གཟན་གྱིས་བྲད་པ་འདྲ་བ་ཡོད་པས། གྲོགས་པོ་ཤར་ཤོར་མང་བ ། གཡོན་ན་གཡའ་མཆིས་རིས་འདྲ་བ་ཡོད་པ། གཡས་ན་གཡའ་སྔོན་པོ་རལ་གྲི་འདྲ་བའམ་མདུང་འདྲ་བའམ། དགྲ་སྟ་འདྲ་བ་ཡོད་པ་ནི་གནོད་སྦྱིན་མཚོན་ཆའི་བཤལ་རྗེས་དང་ཞེས་བྱའོ། །འབྱུང་པོ་དག་གི་རྒྱུ་ས་དང་། ཞེས་པ་ནི་རི་ཐལ་བར་གཏོར་བའམ། མང་པོ་སྣ་ཐུག་པ་དེ་ལྟ་བུའོ། །ཀླུ་གདུག་དག་གི་རྒྱུ་གསང་དང་ཞེས་བྱ་བ་ནི། ཀླུ་གདུག་པ་ཡོད་པའི་ཆུ་མིག་འགྲམ་མམ། རྒྱུ་གསང་དེ་བཙན་རྒྱུ་བའི་གོང་སུམ་མོ། །རྟེན་དང་འབྲེལ་བའི་གནས་དག་དང་ཞེས་བྱ་བ་བརྟེན་ཏེ། ཡུལ་གྱི་ལྷ་འདྲེ་གཉེན་པོའི་རྟེན་བྲག་གམ་ཤིང་ལ་སོགས་པའི་འབྲེལ་པ་ནི་ཤིང་དང་བྲག་དང་ལྷ་འདྲེ་འབྲེལ་བའི་གནས་ཏེ་དེ་ལ་སོགས་པའི་གནས་རྣམས་སུ་བསྒྲུབ་ན། ཁ་ན་མ་ཐོ་དང་བཅས་པར་འགྱུར་ཏེ། ཉེར་ཚེའི་འདུ་བྱེད་བྱེད་པར་འགྱུར་རོ། །དེ་སྤངས་ན་དངོས་གྲུབ་ཅི་འདོད་པ་མྱུར་བར་འོང་ངོ་། །ད་ནི་བླང་བར་བྱ་བའི་གནས་རྣམས་བསྟན་པའི་ཕྱིར། རྡོ་རྗེ་བྲག་ཆེན་ལ་གཏམས་པའམ་ཞེས་བྱ་བ་ལ་སོགས་པས་བསྟན་ཏེ། དེ་ཡང་སྔོན་ལ་རྡོ་རྗེ་འཛིན་པའི་གནས་བསྟན་པའི་ཕྱིར། འོག་ནས་འབྱུང་བའི་མཚན་ཉིད་འདི་གསུངས་སོ། །རྡོ་རྗེ་བྲག་ཆེན་གཏམ་པའམ་ཞེས་བྱ་བ་ནི་ཤིན་ཏུ་བྲག་རྡོ་རྗེའམ་སྲ་བ་དང་། མཁྲེགས་པ་དང་། ལྷུན་སྡུག་པའམ། རི་བོ་འདུས་པའི་རྩེ་རྣམས་ཞེས་བྱ་བ་ནི་རིན་པོ་ཆེ་སྤུང་པ་འདྲ་བའི་རྩེ་མོའོ། །མདངས་བཟང་གངས་རི་བྲག་ཏུ་ཞེས་བྱ་བ་ནི། མདངས་དགའ་བའི་གནས་དང་། གངས་རི་སྟེ་བྲག་དཀར་པོ་གངས་རི་དཀར་པོ་རྩེ་ལ་ཡོད་པ་དང་བྲག་དཀར་ལ་ལྷུན་སྡུག་པ་ཡོད་པའི་གནས་དེ་རྣམས་སུ་རྡོ་རྗེ་འཛིན་པའི་རྣལ་འབྱོར་པའི་སྒྲུབ་པའི་གནས་སོ། །འཁོར་ལོ་ཅན་གྱི་གནས་བསྟན་པའི་ཕྱིར། ཕུག་དང་དགོན་པའི་རི་དྭགས་དང་ཞེས་པ་ལ་སོགས་བསྟན་ཏེ། ཕུག་དངདགོན་པའི་རི་དྭགས་དང་། ཞེས་པ་ནི་སྤང་ཕུག་བཟང་པོ་ཁ་ཤར་དུ་བལྟས་པའམ། སྔོན་གྱི་རྣལ་འབྱོར་པས་བསྒྲུབས་པའི་དགོན་པའི་གནས་སམ་སྤང་རི་ཟླུམ་པོ་ཤར་དུ་ཁ་བལྟས་པའོ། །ནགས་ཚལ་དྲ་བ་གཏིབས་པའམ། ཞེས་བྱ་བ་ནི་ལུང་པ་ཁ་ཤར་དུ་བལྟས་པའི་ནང་ན་ཚལ་ཆེན་པོས་གཏིབས་ནས་ཡོད་པའམ་འོན་ཏེ་ཤར་ཕྱོགས་ཀྱི་ངོས་ནས་གཏིབས་ནས་ཡོད་པའོ། །མདངས་བཟང་ཤར་དུ་གཞོལ་བའི་ཞེས་བྱ་བ་ནི། ཤིན་ཏུ་མདངས་དགའ་བའི་གནས་དེ་ལྟ་བུའི་སངས་རྒྱས་འཁོར་ལོ་ཅན་གྱི་གནས་སོ། །རིན་པོ་ཆེའི་གནས་བསྟན་པའི་ཕྱིར་འོག་ནས་འབྱུང་བ་འདི་གསུངས་སོ། །རིན་ཆེན་སྣ་ལྔའི་ཁ་དོག་གམ། །ཞེས་བྱ་བ་ནི། ཤར་དཀར་བ་ལྷོ་སེར་བ་ནུབ་དམར་བ་བྱང་ལྗང་བ་དབུས་སྔོ་བའི་མཚན་ཉིད་དམ། ཡང་ན་གནས་དེ་ཉིད་ནས་ཚོན་སྣ་ཚོགས་པ་ཡོད་པའོ། །རིན་པོ་ཆེ་ཟུར་བརྒྱད་དབྱིབས་འདྲ་བར་ཞེས་བྱ་བ་ནི། རི་ཉིད་རིན་པོ་ཆེ་ཟུར་བརྒྱད་པ་ལྟ་བུ་ཡོད་པ་དང་། ཡང་བྲག་རིན་པོ་ཆེ་སྤུངས་པ་འདྲ་བ་དང་། ཡང་ན་ས་ཡིས་དབྱིབས་སུ་རིན་པོ་ཆེ་འདྲ་བའི་གནས། དེ་ནི་རིན་པོ་ཆེ་བསྒྲུབ་པའི་གནས་ཡིན་པར་བཤད་དོ། །དེ་ནས་པདྨའི་གནས་བསྟན་པའི་ཕྱིར། ཙན་དན་ཞེས་པ་ནས་པདྨོ་བསྒྲུབ་པར་དེ་ཤིས་སོ་ཞེས་པས་བསྟན་ཏེ། གོ་སླ་བ་སྟེ་པདྨའི་གནས་སོ། །ལས་ཀྱི་གནས་བསྟན་ཏེ། དུར་ཁྲོད་ཅེས་བྱ་བ་ནས་སྣ་ཚོགས་རྡོ་རྗེ་ཅན་གྱི་ཞེས་པ་བསྟན་ཏེ། སྣ་ཚོགས་རྡོ་རྗེ་ཅན་གྱི་སྒྲུབ་པའི་གནས་སོ། །སྤྱིའི་གནས་བསྟན་ཏེ། རི་བྲག་མང་པོ་འདུས་པའི་སྤྱི། རི་བོས་བསྐོར་བའི་ལྷུན་ཕྲེང་འཚལ་ཞེས་པས་བསྟན་ཏེ། སྤྱིའི་དཀྱིལ་འཁོར་བསྒྲུབ་པའི་གནས་སོ། །ཡང་ན་རིགས་ཐམས་ཅད་ཀྱི་ཡོན་ཏན་ཆ་དང་ལྡན་པས་བཤད་ཅེས་བྱ་བ་ནི། གནས་ལྔའི་མཚན་ཉིད་ཚང་བ་ནི་སྤྱིའི་དཀྱིལ་འཁོར་བསྒྲུབ་པའི་སའོ། །བླ་མ་དང་སློབ་མའི་གནས་རྣམས་ཀྱི་མཚན་ཉིད་མ་བརྟགས་ན་མི་འགྲུབ་པའི་ཉེན་དང་ཁ་ན་མ་ཐོ་བའི་ཡར་ཁར་བཅས་པ་སྟེ། དངོས་སྒྲུབ་རིང་བས་དེའི་ཕྱིར་དངོས་གྲུབ་རིང་ཞེས་གསུངས་སོ། །དེའི་མཚན་ཉིད་ཤེས་པའི་རྣལ་འབྱོར་པས་སྤང་བླང་གཉིས་བྱ་བའི་ཕྱིར་བློ་ཅན་གྱི་ཤེས་ནས་སྤང་བར་བྱ་བ་ཡིན་ཞེས་བྱ་བ་ཡིན་གསུངས་སོ། །དེ་ནས་ཡང་ཏིང་ངེ་འཛིན་དང་ལྡན་མི་ལྡན་གྱི་སྐྱོན་ཏེ། རྣལ་འབྱོར་བློ་མཆོག་མི་ལྡན་ན་ཞེས་པ་དང་། བདེར་གཤེགས་རྒྱལ་བ་ཀུན་གྱི་གསུངས་ཞེས་པའི་བར་གྱིས་བསྟན་ཏེ་གོ་སླའོ། །ཏིང་ངེ་འཛིན་དང་ལྡན་གནས་དང་། སློབ་མ་ལ་སོགས་པ་གཞུང་དང་མཐུན་པ་མེད་ཀྱང་འགྲུབ་པར་བསྟན་པའི་ཕྱིར། བློ་དང་ལྡན་པའི་རྣལ་འབྱོར་པས་ཞེས་པ་ནས། འགྲུབ་འགྱུར་འདི་ལ་ཐེ་ཚོམ་མེད་ཅེས་པས་བསྟན་ཏོ། །ཏིང་ངེ་འཛིན་དང་གནས་ལ་སོགས་པ་གཉིས་ཆར་འཕྲུགས་ན་དངོས་གྲུབ་མྱུར་བར་བསྟན་པའི་ཕྱིར། འོན་ཀྱང་གནས་དང་སློབ་མ་དང་། །མཚན་ཉིད་རྣམས་ནི་བཤད་པ་ཡིན། །ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་གནས་ལ་སོགས་པ་བརྙེས་ནས་སའི་འདུ་བར་བྱ་བ་བསྟན་པའི་ཕྱིར། ཞེས་པ་ལ་སོགས་པས་བསྟན་ཏེ། མཚན་མས་དངོས་པོ་གཞོལ་བའི་ཕྱིར། ཞེས་པ་ནི་ལྷའི་དཀྱིལ་འཁོར་རོ། །དེའི་དངོས་པོ་རྫས་སུ་སྣང་བ་གཞོལ་བའོ། །ལྷའི་དཀྱིལ་འཁོར་བསྒོམས་པའི་གནས་དང་། དེ་ཡང་རིགས་རྣམས་སོ་སོའི་གནས་དང་ས་དང་བར་སྣང་དང་། དེ་ཡང་རིགས་རྣམས་སོ་སོ་གནས་ཀྱི་མཚན་མ་ལྟར། བརྟགས་ཏེ་རྙེད་ནས་ངེས་པར་གཟུང་བའོ། །དེ་ནས་ས་སྦྱངས་ཏེ་ཏིང་ངེ་འཛིན་བྱ་བའི་ཕྱིར། ཏིང་ངེ་འཛིན་རྩེ་གཅིག་པ་ཞེས་པས་བསྟན་ཏེ། བདག་ཉིད་ཡི་དམ་གྱི་ལྷར་དྲན་པ་བྱ་བ་ནི། ཏིང་ངེ་འཛིན་གཅིག་གོ་དེས་ས་སྦྱང་བ་སྟེ། དེ་ལ་ཡང་གཉིས་ཡོད་དོ། །ཕྱིས་སྦྱང་བ་དང་ནང་གི་སྦྱང་བ་གཉིས་སོ། །ཕྱིའི་སྦྱང་བ་ནི་འབྱུང་བ་གསུམ་གྱིས་ཇི་ལྟར་སྦྱང་བའོ། །ནང་གི་སྦྱང་བ་ནི་སའི་དངོས་པོ་ཐམས་ཅད་རང་བཞིན་མེད་དེ་སྟོང་པ་བསྒོམ་མོ། །ས་དང་པོ་མེད་པ་དེས་ཀྱང་། ས་སྦྱང་བའི་ལས་སུ་འགྱུར་ཞེས་སོ། །དེ་ནས་ཡང་ས་གཞི་བྱིན་གྱིས་བརླབས་ཏེ། དེའི་ཕྱིར་དབང་འགྱུར་ལྷ་མོ་དེ་ཞེས་གསུངས་ཏེ། ས་གཞི་བྱིན་གྱིས་བརླབས་པ་དེའི་ཚེ་བདག་ཉིད་ཀྱི་སའི་ལྷ་མོ་སྤྱན་དྲངས་ཏེ་ཐུགས་ཀའི་ཧཱུྃ་ལས་འོད་ཟེར་འཕྲོས་པ་དེ་ལས་ལྕགས་ཀྱུར་གྱུར་ཏེ། ལྕགས་ཀྱུས་སའི་ལྷ་མོ་སྤྱན་དྲངས་ནས་རྣལ་འབྱོར་གྱི་མདུན་ན་གནས་པར་བསམ་མོ། །དེ་ལ་མཆོད་པ་འབུལ་བའི་ཕྱིར་མཆོད་པ་སྟེ། སྦྲན་པ་བྱས་ན་ཞེས་གསུངས་ཏེ། སའི་ལྷ་མོ་དེ་ལ་མཆོད་པ་རྣམས་དབུལ་ལོ། །དེའི་རྗེས་ལྷ་མོའི་དགའ་མདངས་ཀྱིས་ཁྱོད་དཀྱིལ་འཁོར་གྱིས་གསུངས་ནས། ལྷ་མོ་ཉིད་འོད་དུ་ཞུ་ནས་ས་ལ་ཐིམས་པས་ས་ཡང་རིན་པོ་ཆེའི་ས་གཞིར་གྱུར་ཏེ་དེ་ཀ་ལ་སྦྲན་པ་ཞེས་བྱའོ། །རུ་ཋ་རྒོལ་བས་མི་ཚུགས་ཤིང་བྱིན་དང་ལྡན་པས་དེར་འགྱུར་རོ། །ཞེས་པ་ནི་དེ་ལྟར་ས་གཞི་བྱིན་གྱིས་བརླབ་པ་ན། རྣམ་པར་རྟོག་པ་མེད་ཅིང་བསོད་ནམས་ཀྱི་ཚོགས་བསགས་པའི་གཞིར་འགྱུར་རོ། །དེ་ནས་ས་གཞི་དེ་བསླང་སྟེ། དེའི་ཕྱིར་བྱིན་དང་ལྡན་པའི་ས་གཞི་ཞེས་པ་ལ་སོགས་བསྟན་ཏེ། བྱིན་དང་ལྡན་པའི་ས་གཞི་དེ་ཞེས་པ་ནི་རིགས་དང་མཐུན་པའི་ས་གཞི་རྙེད་པའི་བྱིན་བརླབས་ཅན་གྱིས་གནས་དེ་ལྟ་བུ་དེ་སྣང་བ་དང་སྟེ་ས་བདག་གི་རྒྱལ་པོ་ལ་སོགས་པ་སླང་བའོ། །མི་སྣང་བ་སྟེ་སའི་བདག་པོ་ལ་སྟེ་ས་བདག་ལྷ་ཀླུའོ། །དེ་གཉིས་ལ་སླང་སྟེ། རྒྱལ་པོ་ལ་སོགས་པ་ལ་བདེན་པ་སྨྲ་ཞིང་ངག་འཇམ་པས་རིན་བཅས་ཏེ་སླང་ངོ་། །ས་བདག་ལྷ་ཀླུ་ལ་གཏོར་མ་བྱིན་ལ་བདེན་པ་བདར་ལ་ས་སླང་བའི་ཕྱིར། ཐུགས་ཐུབ་དང་རས་ཆོད་མ་ཡིན་པར། རིན་དང་བདེན་པས་སྒོ་ལ་སླང་། ཞེས་གསུངས་པ་ཡིན་ནོ། །དེ་ནས་སྟེགས་བུའི་ལས་བསྟན་པའི་ཕྱིར། དེ་སྟེགས་བུ་གྲུ་བཞི་ལ། ཞི་བ་ལ་སོགས་པས་བསྟན་ཏེ། དེ་ནས་ཞེས་པ་ནི་ཆུའི་བྲ་དང་སའི་བྲ་རྟགས་པ་དེ་མ་ཐག་པ་དེ་ནས་སྟེགས་བུ་གྲུ་བཞི་པར་བརྩིག་གོ་ཞེས་བྱའོ། །སྟེགས་བུ་དེ་ལ་བ་སྤུ་བྱ་སྟེ་གང་གི་བྱ་ཞེ་ན་བདུད་རྩི་རྣམ་ལྔས་ཀྱང་ནུལ་བྱ་ཞེས་པས་བསྟན་ཏེ། བདུད་རྩི་ལྔ་དང་ས་བཞག་མོ་བསྲེས་ལ་ཤིན་ཏུ་འཐས་པར་བྱ་སྟེ། འཐུག་སྲབ་པའི་ཀོ་བ་ཙམ་བྱའོ། །དེ་ནས་ཐིག་གདབ་པའི་ལས་བསྟན་པའི་ཕྱིར། གོས་བརྒྱན་མཛེས་མའི་གྲོགས་མཆོག་མ་ཞེས་བྱ་བ་ལ་སོགས་པས་བསྟན་ཏེ། གོས་རྒྱན་མཛེས་མའི་གྲོགས་མཆོག་མ་ཞེས་པ་ནི། ཤིན་ཏུ་མཛེས་མའི་གྲོགས་མཆོག་མ་དེས་ཁྲུས་བྱས་པ། རྒྱན་རྣམ་པ་སྣ་ཚོགས་པས་བརྒྱན་ཏེ། དེ་ལ་སྐུ་གསུང་ཐུགས་སུ་བྱིན་གྱིས་བརླབས་ལ། སའི་ཐིག་སྐུད་བཀལ་དུ་ཞུགས་ཏེ། དེའི་ཕྱིར་གསལ་བར་ལྡན་ནམ་བྱིན་བརླབས་ལ་ཞེས་གསུངས་པ་ཡིན་ཏེ། ཐིག་སྐུད་རིང་ཐུང་གི་ཚད་ནི་དཀྱིལ་འཁོར་རྒྱ་ཉིད་འགྱུར་རོ། །དེ་བས་ཚད་ལྡན་རྡོ་རྗེ་སྲེད་བུའི་ཞེས་བརྗོད་དོ། །ཐིག་གདབ་པའི་སྦྱོར་བ་བྱ་ཞེས་པ་ནི། རས་བལ་དཀར་པོ་ལ་ཚོན་རྩི་ལྔ་པོས་ཁ་དོག་བསྒྱུར་ལ། དེ་མཉམ་པོར་བཀལ་ཏེ། ཡི་གེ་ལྔ་བཀོད་ལ་འཕྲོ་འདུས་སོ་སོར་བསྐུར་བསྐྱེད་དེ། དེ་ལ་ཡེ་ཤེས་ཀྱི་རིགས་ལྔ་དགུ་པ་དང་གཞུགས་པ་དང་། བཅིང་པ་དང་བསྟན་པ་བྱས་ནས། དེ་ལ་མཆོད་པ་འབུལ་བར་བྱའོ། །དེའི་རྗེས་ལ་འོད་དུ་ཞུ་སྟེ་སྲད་བུ་ལ་ཐིམ་མོ། །སྲད་བུ་དེ་གྲོགས་པོ་ལ་གཏད་དེ་འགུ་རུ་ཆུ་བདག་ཏུ་འདུག་ཅིང་ཤི་ཤ་བྱད་དུ་འདུག་སྟེ་འདི་སྐད་བརྗོད་དོ། །དགོངས་ཤིག་རྒྱལ་བ་འཁོར་དང་བཅས། །ནམ་མཁའ་གང་བའི་བདེར་གཤེགས་རྣམས། །ཐིག་གི་སྒྲ་ཡིས་བསྐུལ་ནས་ནི། །དུས་འདི་སེམས་ཅན་དོན་རྣམས་མཛོད། །ཅེས་བརྗོད་ལ། ཡེ་ཤེས་ཐིག་གདབ་སྟེ། སྔོན་ལ་ཚང་ཐིག་གཉིས་གདབ། དེ་ནས་ཟུར་ཐིག་གདབ། དེ་ནས་ཤར་ཕྱོགས་ལ་སོགས་པའི་ཕྱོགས་ཀྱི་ཐིག་རྣམས་ཇི་ལྟར་འདོད་པ་བཞིན་དུ་ཆ་བགོ་ཞིང་གདབ་བོ། །དེའི་ཕྱིར་ཐིག་གདབ་པའི་སྦྱོར་བ་བྱ་ཞེས་གསུངས་པ་ཡིན་ནོ། །དེ་ནས་དཀྱིལ་འཁོར་བྲི་བའི་ཐབས་བསྟན་ཏེ། འགྲོ་བ་བློ་རྨོངས་མི་ཤེས་པ་ཞེས་བྱ་བ་ནི། འགྲོ་བ་བློ་རྨོངས་ཤིང་མི་ཤེས་པ་བསྟན་པའི་ཕྱིར། བསྙན་པའི་དཀྱིལ་འཁོར་བྲི་སྟེ། རྣལ་འབྱོར་པ་བདག་ཉིད་ལྷའི་ཏིང་ངེ་འཛིན་དུ་འཇུག་པའི་ཕྱིར། དང་པོ་ལས་ཀྱི་སྒོར་ཞུགས་ལ་ཞེས་གསུངས་པ་ཡིན་ནོ། །དེ་ནས་ཚོན་བྱིན་གྱིས་བརླབས་པ་ལ་སོགས་པ་བྱས་ནས། རབ་འབྲིང་ཐ་མ་གསུམ་སྟེ། རབ་ནི་རིན་པོ་ཆེ་སྣ་ལྔའོ། །འབྲིང་ནི་འབྲས་ལ་སོགས་པ་ལ་ཚོན་གྱི་ཁ་དོག་བསྒྱུར་བའོ། །ཐ་མ་ནི་ས་ལ་བྱིན་གྱིས་བརླབས་པའོ། ། དེའི་ཕྱིར་ཁ་དོག་ཉི་ཤུ་རྩ་ལྔའམ། ལྔའི་ཚོན་གྱིས་བྲི་བར་བཤད། ཁ་དོག་སོ་སོའི་དཀྱིལ་འཁོར་བྱང་ཤར་གྱི་མཚམས་ནས་མཛུབ་གང་མཉམ་པོར་དྲངས་ཏེ་བྱིན་གྱིས་བརླབས་ནས་འདྲེན་ཀར་འདི་བརྗོད་དོ། །ཧཱུྃ་འདི་ནི་ཆོས་དབྱིངས་དག་པ་སྟེ། །དེ་ཕྱུང་རིགས་ལྔའི་ངོ་བོར་སྣང་། །སེམས་ཅན་མ་ལུས་དོན་བྱའི་ཕྱིར། །ཚོན་གྱི་ལས་ནི་བདག་གིས་བརྩམས། །ཞེས་བརྗོད་ལ་རི་མོ་འདི་བྲིའོ། །རི་མོ་དེ་མཐོ་དམན་དུ་སོང་ན་དངོས་གྲུབ་མེད་པའི་ལྟས་སོ། །ཡོན་པོར་གྱུར་ན་བགེགས་ཡོད་པའི་བལྟས་སོ། །ཆད་པར་གྱུར་ན་སློབ་དཔོན་སློབ་མ་གཉིས་ཀ་འཆི་བའི་བལྟས་སོ། །རི་མོ་དེ་ལོག་པར་གྱུར་པ་གང་ཡིན་པ་འབྱུང་བའི་དུས་དེ་ན། ཕུར་པ་གདབ་པར་བྱ་བ་ཡིན་ཏེ། དེ་ཡང་ཕུར་པ་སྒྲོལ་བདག་ཏུ་བྱིན་གྱིས་བརླབས་ལ། ཧཱུྃ་བཛྲ་ཀཱི་ལི་ཀཱི་ལ་ཡ་སརྦ་ཤ་ཏྲུཾ་ཕཊ་ཅེས་བརྗོད་པས་ཕུར་པ་གདབ་བོ། །དེ་ནས་རྣམ་ལྔའི་ཚོན་གྱིས་དཀྱིལ་འཁོར་དམ་པ་དེ་བྲི་བར་བྱའོ། །དེ་ནས་རྡོ་རྗེ་འཛིན་པའི་དཀྱིལ་འཁོར་བཤད་པའི་ཕྱིར། རབ་ཏུ་ཟླུམ་པོའི་དཀྱིལ་འཁོར་ལ་ཞེས་པ་ལ་སོགས་པ་གསུངས་ཏེ། རབ་ཏུ་ཟླུམ་པོའི་དཀྱིལ་འཁོར་ལ་ཞེས་བྱ་བ་ནི། དབུས་ཀྱི་ཕོ་བྲང་བསྟན་པ་ཡིན་ཏེ། རབ་ཏུ་ཟླུམ་པོ་བྲི་བ་སྟེ། ལྷ་རྣམས་ཀྱི་ནང་རོལ་ཆ་ཆུང་ཕྱེད་ནས་བསྐོར། །དེའི་ནང་རོལ་ཆ་ཆུང་ཞིག་ལ་བསྐོར་ཏེ་བསྡོམས་པས་ཆ་ཆུང་ཕྱེད་དང་གཉིས་ལ་རྡོ་རྗེ་ར་བའོ། །ཐིག་བཞི་གདབ་པས་དཀྱིལ་འཁོར་དགུ་ཞེས་བྱ་བ་ནི། རྡོ་རྗེ་ར་བའི་དབུས་སུ་ཆ་ཆུང་ངུ་རེ་རེ་བཞག་སྟེ། སོ་སོའི་ཐིག་གཞན་མ་ཕྱིས་པས་ཕྱོགས་བཞི་མཚམས་བཞི་སྟེ་བརྒྱད་དོ། །དབུས་དགུའོ། །ཆ་ཆུང་རེ་རེ་བཞག་དེ་རྣམས་ལ་རྡོ་རྗེའི་གདུང་བཞི་དང་། རྡོ་རྗེ་ཀ་བ་བརྒྱད་གནས་སོ། །གྲུ་ཆད་བར་ཁྱམས་སྒོ་ཁྱུད་བཅས། །ཞེས་བྱ་བ་ནི་གྲུ་ཆད་ལྷ་རྣམས་ཀྱི་ནང་རོལ། རྡོ་རྗེ་བུམ་པའི་ཕྱི་རོལ། བར་ཁྱམས་ནི་ལྷ་རྣམས་ཉིད་དོ། །སྒོ་ཁྱུད་ལ་སོགས་པ་རྟ་བབས་དང་། རིན་པོ་ཆེའི་རྒྱན་རྣམ་པ་སྣ་ཚོགས་ཀྱིས་བརྒྱན་ཏ་ལའི་སྐྱེ་ཤིང་དང་བྱ་ངང་པ་ལ་སོགས་པ་རྒྱས་པར་བྲིའོ། །དེ་ནས་དཀྱིལ་འཁོར་ལ་ཕྱག་མཚན་དགོད་པ་ནི་སྤྱིའི་དཀྱིལ་འཁོར་དུ་གསུམ་པའི་རིམ་པ་ཇི་བཞིན་ནོ། །སོ་སོའི་ཁ་དོག་དང་བཞུགས་ཐབས་བསྟན་པ་ནི། དབུས་སུ་སངས་རྒྱས་རྡོ་རྗེ་འཛིན་པ་ཞེས་བྱ་བ་ལ་སོགས་པ་གསུངས་ཏེ། དབུས་སུ་སངས་རྒྱས་རྡོ་རྗེ་འཛིན་ཞེས་པ་ནི་ལེའི་ཚེའི་དབུས་མ་གང་ཡིན་པའི་གཞུགས་གནས་ཏེ། དེའི་གནས་སུ་ཉོན་མོངས་པ་ཐམས་ཅད་སྤང་བའི་སངས་རྒྱས་ཕྱིན་ཅི་མ་ལོག་པའི་དོན་དམ་པ་དང་། དུས་རྟག་ཏུ་མི་འབྲལ་བས་རྡོ་རྗེ་འཛིན་པ་དེ་ལྟ་བུའི་ངང་ཚུལ་དང་ལྡན་པ་དེ་བཞུགས་སོ། །ནམ་མཁའི་དབྱིངས་དང་འཁྲིལ་བའི་ཚུལ་ཞེས་བྱ་བ་ནི་སྟོང་པ་དང་སྙིང་རྗེ་དབྱེར་མེད་པའི་ཕྱིར་ནམ་མཁའི་དབྱིངས་ཕྱུག་མ། འཁྲིལ་བའི་ཚུལ་དུ་བཞུགས་པ་དེ་གདན་བཞུགས་པ་ཞེ་ན། ཕོ་བྲང་གི་དབུས་སེང་གེའི་གདན་སྟེང་ཉི་ཟླ་པདྨ་རིན་པོ་ཆེའི་གདན་ལ། ཡང་དག་པར་གནས་སོ། །རྣམ་པའི་མཆོག་རྣམས་རྫོགས་པར་ཡང་གསལ་ཞེས་བྱ་བ་ནི། མགུར་ཆུ་དང་དཔུང་རྒྱན་དང་སེ་མོ་དོ་དང་དོ་ཤལ་ལ་སོགས་པའི་རྣམ་པའི་རྒྱན་གྱིས་མཆོག་རྣམས་ཡོངས་སུ་རྫོགས་ཤིང་གསལ་བར་བྱའོ། །སྐུ་མདོག་ནི་མཐིང་ནག་སྟེ། འོད་ཟེར་ལྔས་འཁྲིགས་པར་ཡིད་ཀྱིས་བལྟའོ། །དེའི་སྤྱན་སྔར་སྣང་མཛད་སེམས་ཞེས་བྱ་བ་ནི། རྡོ་རྗེ་འཛིན་པ་དེའི་སྤྱན་སྔར་ནི་ཤར་ཕྱོགས་ཀྱི་ལེའུ་ཚེ་དེའི་གནས་སུ་བསྒོམ་པར་བྱའོ། །རྡོ་རྗེ་དབྱིངས་དང་ཐབས་ཅིག་ཏུ་ཞེས་བྱ་བ་ནི། རྡོ་རྗེ་དབྱིངས་ཕྱུག་མ་དང་འཁྲིལ་བའི་ཚུལ་གྱིས། སྟོབས་གླང་པོ་ཆེའི་གདན་ལ་ཡང་དག་པར་གནས་པ་སྟེ། སྐུ་མདོག་དཀར་པོ་འོད་ཟེར་ལྔས་འཁྲིགས་པ་ཁ་དོག་དཀར་པོ་འོད་འབར་བའོ། །ཞེས་གསུངས་པ་ཡིན་ནོ། །རིན་ཆེན་སེམས་དཔའ་གཡས་སུ་སྟེ། །ཞེས་བྱ་བ་ནི་རྡོ་རྗེ་འཛིན་པ་ཞལ་ཤར་དུ་གཟིགས་པ་སྟེ། དེའི་གཡས་གང་ཡིན་པ་ནི་ལྷོ་ཕྱོགས་ཀྱི་ལེའུ་ཙེ་སྟེ་དེའི་གནས་སུ་བསྒོམ་པར་བྱའོ། །རིན་ཆེན་དབྱིངས་ཕྱུག་མ་དང་བཅས་པ་ཞེས་བྱ་བ་ནི། སེམས་ཅན་དགོས་འདོད་རེ་བ་ཡིད་བཞིན་དུ་སྐོང་བའི་རིན་ཆེན་དབྱིངས་ཕྱུག་མ་དེ་དང་། འཁྲིལ་བའི་ཚུལ་གྱིས་རྫུ་འཕྲུལ་རྟའི་ཁྲི་ལ་ཡང་དག་པར་བཞུགས་སོ། །འཛམ་བུ་ན་ཏའི་གསེར་འོད་འདྲ་ཞེས་བྱ་བ་ནི། སྐུ་མདོག་སེར་པོ་གསེར་གྱི་འོད་འདྲ་བ་སྟེ། འོད་ཟེར་ལྔས་འཁྲིལ་བའི་རྒྱབ་ཏུ་ཆོས་ཀྱི་སེམས་དཔའ་སྟེ། ཞེས་བྱ་བ་ནི། རྡོ་རྗེ་འཛིན་པའི་རྒྱབ་ནི་ནུབ་སྟེ། ནུབ་ཀྱི་ལེའུ་ཙེ་ལ་ཆོས་ཀྱི་སེམས་པ་བསམ་པར་བྱ་བའི་གནས་ཡིན་ཏེ། དེའི་གནས་སུ་བསམ་པར་བྱའོ། །ཆོས་ཀྱི་སེམས་མར་བཅས་པ་དང་ཞེས་བྱ་བ་ནི། སེམས་ཅན་གྱི་དོན་མཛད་ཀྱང་འཁོར་བའི་སྐྱོན་གྱིས་མ་གོས་པའི་ཆོས་ཀྱི་སེམས་མ་དེ་དང་འཁྲིལ་བའི་ཚུལ་དུ་དབང་རྨ་བྱའི་ཁྲི་ལ་ཡང་དག་པར་བཞུགས་སོ། །སྐུ་མདོག་དཀར་པོ་རྒྱན་ཐམས་ཅད་ཀྱིས་བརྒྱན་པ་སྟེ། དེའི་ཕྱིར་དམར་པོ་པདྨ་ར་གའི་མདོག་ཅེས་བསྟན་པ་ཡིན་ནོ། །ལས་ཀྱི་སེམས་པའི་གཡོན་དུ་སྟེ། ཞེས་བྱ་བ་ནི། རྡོ་རྗེ་འཛིན་པའི་གཡོན་གང་ཡིན་པ་དེ་བྱང་གི་ཕྱོགས་ཀྱི་ལེའུ་ཙེ་སྟེ། གནས་དེ་རུ་ལས་ཀྱི་སེམས་པ་བསམ་པར་བྱའོ། །ལས་ཀྱི་དབྱིངས་ཕྱུག་མ་དངའཁྲིལ་ཞེས་བྱ་བ་ནི། ཆོས་ཐམས་ཅད་རང་གི་ངོ་བོ་ལས་སྐྱེས་པའི་ངང་དུ་མཛད་པའི་ལས་ཀྱི་དབྱིངས་ཕྱུག་མ་དང་འཁྲིལ་བའི་ཚུལ་གྱིས་ནམ་མཁའ་ལྡིང་གི་ཁྲི་ཆེན་ལ་ཡང་དག་པར་བཞུགས་སོ། །སྐུ་མདོག་ལྗང་གུ་ཨིནྡྲ་ནི་ལའི་མདོག་འདྲའོ། །ཕྱི་ནང་སེམས་པ་སེམས་མ་རྣམས་ཞེས་བྱ་བ་ནི་དཀྱིལ་འཁོར་གྱི་བར་གྱི་ཁྱམས་ལ་བསམ་པར་བྱ་བ་སྟེ། ཤར་ཕྱོགས་ཀྱི་ཁྱམས་ལ་པདྨ་དཀར་པོའི་གདན་སྟེངས་སུ་བྱང་ཆུབ་སེམས་དཔའ་སའི་སྙིང་པོ་སྐུ་མདོག་དཀར་པོ་ཕྱག་གཡས་ན་རིན་པོ་ཆེ་འབར་བ། གཡོན་པས་རྩ་བ་བཟུང་ནས་ལ་སེ་དཀར་མོ་དང་། འཁྲིལ་བའི་ཚུལ་གྱིས་བཞུགས་སོ། །ལྷོ་ཕྱོགས་ཀྱི་འཁྱམས་ལ་ནམ་མཁའི་སྙིང་པོ་སྐུ་མདོག་སྔོན་པོ་ཕྱག་ན་རལ་གྲི་བསྣམས་ནས་མ་ལེ་སྔོན་མོ་དང་འཁྲིལ་བའི་ཚུལ་གྱིས་པདྨ་སྔོན་མོའི་གདན་ལ་བཞུགས་སོ། །ནུབ་ཕྱོགས་ཀྱི་ཁྱམས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྐུ་མདོག་དམར་མོ། ཕྱག་ན་པདྨ་བསྣམས་པ་གིར་ཏི་དམར་མོ་སྐུ་ལ་འཁྲིལ་ནས་པདྨ་དམར་པོའི་གདན་ལ་བཞུགས་སོ། །བྱང་ཕྱོགས་ཁྱམས་ལ་བྱང་ཆུབ་སེམས་དཔའ་ཕྱག་ན་རྡོ་རྗེ་སྐུ་མདོག་ལྗང་གུ་ཕྱག་ན་རྡོ་རྗེ་རྒྱ་གྲམ་བསྣམས་ནས་ནིར་ཏི་ལྗང་གུའི་སྐུ་ལ་འཁྲིལ་བའི་ཚུལ་གྱིས་པདྨ་ལྗང་གུའི་གདན་ལ་བཞུགས་སོ། །དེ་ནི་ནང་གི་སེམས་དཔའ་དང་སེམས་མའོ། །ཤར་ལྷོ་མཚམས་ཀྱི་ཁྱམས་ལ་བྱང་ཆུབ་སེམས་དཔའ་བྱམས་པ་མཻ་ཏྲི་སྐུ་མདོག་དཀར་སྐྱ་ཕྱག་ན་ཀླུ་ཤིང་བསྣམས་ནས། དྷུ་པེ་དཀར་མོ་སྐུ་ལ་འཁྲིལ་ནས་པདྨ་དཀར་སྐྱའི་གདན་ལ་བཞུགས་སོ། །ལྷོ་ནུབ་ཀྱི་ཁྱམས་ལ་བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བ་སྐུ་མདོག་སེར་པོ་ཕྱག་ན་པུ་ཏི་བསྣམས་ནས་པུཥྤེ་སེར་མོའི་སྐུ་ལ་འཁྲིལ་ནས་པད་སེར་གདན་ལ་བཞུགས་སོ། །ནུབ་བྱང་གི་ཁྱམས་ལ་བྱང་ཆུབ་སེམས་དཔའ་ཀུན་ཏུ་བཟང་པོ་སྐུ་མདོག་དམར་པོ། ཕྱག་ན་རིན་པོ་ཆེ་བསྣམས་ནས་ཨ་ལོ་ཀེ་དམར་མོ་སྐུ་ལ་འཁྲིལ་ནས་པདྨ་དམར་པོའི་གདན་ལ་བཞུགས་སོ། །བྱང་ཤར་མཚམས་ཀྱི་ཁྱམས་ལ་བྱང་ཆུབ་སེམས་དཔའ་འཇམ་དཔལ་གཞོན་ནུ་སྐུ་མདོག་ལྗང་གུ་ཕྱག་ན་ཨུད་པ་ལ་བསྣམས་ནས་གེནྡེ་ལྗང་གུའི་སྐུ་ལ་འཁྲིལ་ཏེ་པདྨ་ལྗང་གུའི་ཁྲི་ལ་བཞུགས་སོ། །དེའི་ཕྱི་ནི་སེམས་དཔའ་དང་སེམས་མའོ། །དེ་རྣམས་བསྟན་པ་ལ་ནི་ཕྱི་ནང་སེམས་དཔའ་སེམས་མ་རྣམས་ཞེས་གསུངས་པ་ཡིན་ནོ། །ཕྱི་ནང་གང་ལའང་དེ་བཞིན་བྲི་ཞེས་པ་ནི་ནང་གི་སེམས་དཔའ་དང་སེམས་མ་རྣམས་ཀྱི་དཀྱིལ་འཁོར་འབྲི་བའི་དུས་ན་ནང་གི་གྲུ་ཆད་ལ་བྲི་བར་བྱའོ། །ཕྱིའི་སེམས་དཔའ་དང་སེམས་མ་རྣམས་ནི་ཕྱིའི་གྲུ་ཆད་ལ་བྲི་བར་བྱའོ། །བསྒོམ་པར་བྱ་བའི་གནས་སྐབས་ན་ནི་ཁྱམས་ཐབས་ཕྱོགས་དང་མཚམས་སུ་བསྒོམས་པར་བྱ། བར་ཁྱམས་དག་ལ་སྤྲུལ་སྐུ་དང་ཞེས་བྱ་བ་ནི་བར་ཁྱམས་ཀྱི་ཤར་ཕྱོགས་སུ་པདྨ་སེར་པོའི་གདན་ལ་སྤྲུལ་སྐུ་ཤཱཀྱ་ཐུབ་པ་སྐུ་མདོག་སེར་པོ་ཕྱག་ན་གསེག་པ་བསྣམས་ནས་བཞུགས་སོ། །ཤར་ལྷོའི་ཕྱོགས་ཀྱི་ཁྱམས་ལ་པདྨ་དཀར་པོའི་གདན་ལ་སྤྲུལ་སྐུ་བརྒྱ་བྱིན་ཐུབ་པ་ནི། སྐུ་མདོག་དཀར་པོ་ཕྱག་ན་པི་ཝང་བསྣམས་ནས་བཞུགས་སོ། །ལྷོའི་ཁྱམས་ལ་པདྨ་མཐིང་གའི་གདན་ལ་སྤྲུལ་སྐུ་དམྱལ་བའི་ཐུབ་པ་ནི་སྐུ་མདོག་མཐིང་ནག་གཤིན་རྗེའི་ཞེས་བྱ་བ་ཕྱག་ན་མེ་ཆུ་བསྣམས་པའོ། །ནུབ་ཕྱོགས་ཀྱི་ཁྱམས་ལ་སྤྲུལ་སྐུ་བྱོལ་སོང་གི་ཐུབ་པ་ནི། སྐུ་མདོག་སྨུག་པོ་ཨ་བ་གླང་མགོ་ཅན་ཞེས་བྱ་བ་ནི་ཕྱག་ན་པོ་ཏི་བསྣམས་ནས་པདྨ་སྨུག་པོའི་གདན་ལ་བཞུགས་སོ། །ནུབ་བྱང་གི་ཁྱམས་ལ་སྤྲུལ་སྐུ་ལྷ་མ་ཡིན་གྱི་ཐུབ་པ་སྐུ་མདོག་སྔོན་པོ་ཐག་བཟངས་རིས་ཞེས་བྱ་བ་ཕྱག་ན་རལ་གྲི་བསྣམས་ནས་པདྨ་སྔོན་པོའི་གདན་ལ་བཞུགས་སོ། །བྱང་ཕྱོགས་ཀྱི་ཁྱམས་ལ་སྤྲུལ་སྐུ་ཡི་དྭགས་ཀྱི་ཐུབ་པ་ཁ་འབར་མ་ཞེས་བྱ་བ་སྐུ་མདོག་ལྗང་གུ་ཕྱག་ན་རིན་པོ་ཆེའི་སྒྲོམ་བུ་བསྣམས་ནས་པདྨ་ལྗང་གུའི་གདན་ལ་བཞུགས་སོ། །ཤར་ཕྱོགས་ཀྱི་ཁྱམས་དང་ནུབ་ཕྱོགས་གཉིས་ཀྱི་ཁྱམས་ལ་ཀུན་ཏུ་བཟང་པོ་ཡབ་ཡུམ་གཉིས་བསྒོམས་ཏེ། སྐུ་མདོག་དཀར་པོ་ཕྱག་ན་རྡོ་རྗེ་བསྣམས་སོ། །ཡུམ་གྱི་ཕྱག་ན་དྲིལ་བུའོ། །སྒོར་ནི་སྒོ་མ་དང་བཅས་པ་ཞེས་བྱ་བ་ནི། ཤར་ཕྱོགས་ཀྱི་སྒོར་ཁྲོ་བོ་རྣམ་པར་རྒྱལ་བ་སྐུ་མདོག་མཐིང་ནག་ཕྱག་ན་མི་མགོ་གདེངས་པ་བསྣམས་ནས། མེ་དཔུང་འབར་བའི་དཀྱིལ་ན་རྟ་གདོང་ལྕགས་ཀྱུ་མ་སྐུ་ལ་འཁྲིལ་ནས་བཞུགས་སོ། །ལྷོ་ཕྱོགས་ཀྱི་སྒོར་ནི་ཁྲོ་བོ་གཤིན་རྗེ་གཤེད་སྐུ་མདོག་དུད་ཀ་ཕྱག་ན་བེ་ཅོན་བསྣམས་ནས། ཡུམ་ཕག་གདོང་ཞགས་པ་མ་དང་གཉིས་འཁྲིལ་བའི་ཚུལ་གྱིས་མེ་དཔུང་གི་དབུས་ན་བཞུགས་སོ། །ནུབ་ཕྱོགས་ཀྱི་སྒོར་ནི་ཁྲོ་བོ་རྟ་མགྲིན་སྐུ་མདོག་དམར་པོ་ཕྱག་ན་ཐོད་སྦྲུལ་དང་ཞགས་པའོ། །ཡུམ་ཉི་ཟླ་ལྕགས་སྒྲོག་མ་དང་འཁྲིལ་བའི་ཚུལ་གྱིས་མེ་དཔུང་ནང་ན་བཞུགས་སོ། །བྱང་ཕྱོགས་ཀྱི་སྒོར་ནི་ཁྲོ་བོ་བདུད་རྩི་འཁྱིལ་པ་སྐུ་མདོག་ལྗང་གུ་ཕྱག་ན་རྡོ་རྗེ་རྒྱ་གྲམ་བསྣམས་ནས། ཡུམ་ཐལ་བྱེད་དྲིལ་བུ་མ་སྐུ་ལ་འཁྲིལ་ནས་མེ་དཔུང་ནང་དུ་བཞུགས་སོ། །འདི་ཇི་ལྟར་རྒྱས་པར་བསྟན་པ་བཞིན་དུ་དཀྱིལ་འཁོར་ཕྱི་མ་རྣམས་ལ་ཡང་དེ་བཞིན་དུ་ཤེས་པར་བྱ་སྟེ། དཀྱིལ་འཁོར་འདི་ནི་དཀྱིལ་འཁོར་དམ་པ་ཡིན་ཏེ། དཀྱིལ་འཁོར་ཐམས་ཅད་འདི་ལས་འབྱུང་བའི་ཕྱིར་ན། སངས་རྒྱས་རྡོ་རྗེ་འཛིན་པའི་དཀྱིལ་འཁོར་ཉམས་དགའ་དམ་པའོ། །ཞེས་གསུངས་པ་སྟེ། རིན་པོ་ཆེ་འབར་བའི་གང་ཟག་ལ་བསྟན་པའོ། །དེ་ནས་པདྨ་དཀར་འདྲའི་གང་ཟག་ལ་བསྟན་པའི་ཕྱིར། སངས་རྒྱས་འཁོར་ལོ་ཅན་གྱི་དཀྱིལ་འཁོར་གསུངས་ཏེ། གཙོ་བོ་གང་ཡིན་པ་བསྒྱུར་བར་ཤེས་པར་བྱ་སྟེ། བྲི་བ་དང་ལྷའི་སྐུ་མདོག་ལ་སོགས་པ་རྒྱས་པར་གོང་དུ་གསུངས་པས་ཀུན་ལ་ཤེས་པར་བྱའོ། །འཁོར་ལོ་ཅན་གྱི་དཀྱིལ་འཁོར་བསྟན་པའི་ཕྱིར། སངས་རྒྱས་འཁོར་ལོ་ཅན་གྱིས་གསུངས་ཞེས་པ་ནས། རྡོ་རྗེ་འཛིན་པ་འདྲ་བ་ཡིན་ཞེས་པའི་བར་གྱིས་བསྟན་ཏོ། །དེ་ནས་པདྨ་འདྲ་བའི་གང་ཟག་ལ་རིན་ཆེན་དཀྱིལ་འཁོར་བསྟན་པའི་ཕྱིར། རིན་ཆེན་དཀྱིལ་འཁོར་དམ་པ་ནི་ཞེས་པ་ནས་རྡོ་རྗེ་འཛིན་པའི་ལྷོ་ཕྱོགས་སུ་ཞེས་པའི་ཚིག་ལྔས་བསྟན་ཏོ། །དེ་ནས་ཙན་དན་འདྲ་བའི་གང་ཟག་ལ། །པདྨའི་དཀྱིལ་འཁོར་བསྟན་པའི་ཕྱིར། །པདྨ་འདབ་མ་བརྒྱད་པ་ལ། །ཞེས་པའི་ཚིག་བཞིས་བསྟན་ཏོ། །དེ་ནས་ཨུད་པ་ལ་འདྲ་བའི་གང་ཟག་ལ། ལས་ཀྱི་དཀྱིལ་འཁོར་བསྟན་པའི་ཕྱིར། །སྣ་ཚོགས་ལས་ཀྱི་དཀྱིལ་འཁོར་ཞེས་པ་ནས་གཞན་ཡང་དེ་བཞིན་རྒྱས་པར་བྲི་ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་དཀྱིལ་འཁོར་དེ་དག་ལ་རྒྱན་བཀོད་པ་བསྟན་པའི་ཕྱིར། དཀྱིལ་འཁོར་ཉམས་དགའ་དེ་དག་ལ། ཞེས་པ་ལ་སྩོགས་གསུངས་ཏེ། བུམ་པ་བརྒྱད་དང་བརྒྱད་ཉིད་ལ་ཞེས་བྱ་བ་ནི་བུམ་པ་བརྒྱད་དང་། ཡང་བཅུ་དྲུག་ཏུ་བྱས་ལ་དེའི་ནང་བླུགས་པའི་རྫས་བསྟན་པའི་ཕྱིར། ཅི་འབྱོར་གཏུང་བ་སྣུམ་པོའམ། ཞེས་པ་ལ་སོགས་པ་གསུངས་ཏེ། ཅི་འབྱོར་གཏུང་བ་བསྣུམ་པོའམ་ཞེས་བྱ་བ་ནི། འབྱོར་པ་བཟང་བའི་བྱེ་བྲག་བུ་རམ་ལ་སོགས་པ་ཅི་འབྱོར་པ་བླུགས་ཏེ་ཆེ་བའི་ཡོན་ཏན་གྱིས་བརྒྱན་པའི་རྟགས་སོ། །བདུད་རྩི་ལྔའམ་རིན་ཆེན་བཅས་ཞེས་བྱ་བ་ནི། སྨན་ལྔ་བླུགས་པ་དེ་བྱང་ཆུབ་ཀྱི་སེམས་ཀྱི་རྟགས་སོ། །འབྲུ་ལྔའི་ལྷ་རྣམས་ཀྱི་མཚན་མའི་རྟགས་སོ། །རིན་པོ་ཆེ་ལྔ་ནི་ལྷའི་སྐུ་མདོག་གི་རྟགས་སོ། །གང་བའི་རིན་ཆེན་བུམ་པ་ནི་ཞེས་བྱ་གོང་མའི་རྫས་རྣམས་ཀྱིས་གང་བའོ། །དང་པོ་གསེར་གྱི་བུམ་པར་ཡང་བཤད་ཅེས་བྱ་བ་ནི། རྡོ་རྗེ་འཛིན་པའི་དཀྱིལ་འཁོར་ལ་བརྒྱན་པར་བྱའོ། །གཉིས་པ་ཤེལ་དང་དངུལ་གྱི་དེ་ཞེས་བྱ་བ་ནི། སངས་རྒྱས་འཁོར་ལོ་ཅན་གྱིའོ། །གསུམ་པ་བཻ་ཌཱུརའི་ཞེས་བྱ་བ་ནི་རིན་པོ་ཆེའི་རྒྱན་ནོ། །བཞི་པ་ཟངས་ཀྱི་བུམ་པར་བྱ་ཞེས་བྱ་བ་ནི། པདྨའི་དཀྱིལ་འཁོར་གྱི་རྒྱན་ནོ། །ལྔ་པ་ལྕགས་ཀྱི་བུམ་པར་བཤད་ཅེས་བྱ་བ་ནི། སྣ་ཚོགས་ལས་ཀྱི་དཀྱིལ་འཁོར་གྱིའོ། །དྲུག་པ་ལ་ནི་སྣ་ཚོགས་པ། །བུམ་པ་གང་བར་བཞག་པར་བྱ། །ཞེས་བྱ་བ་ནི་སྤྱིའི་དཀྱིལ་འཁོར་གྱི་བུམ་པའོ། །གཞན་ཡང་རྒྱན་གྱི་ཁྱད་པར་དང་། །རོལ་མོ་ཡིད་འོང་ཅི་འབྱོར་དང་། །ཞེས་བྱ་བ་ནི་བུམ་པར་མ་ཟད་དེ་བླ་རེ་དང་ཕན་དང་གདུགས་རྒྱལ་མཚན་དང་བ་དན་དང་དར་གྱི་ལྡ་ལྡི་དང་རྒྱན་གྱི་ཁྱད་པར་མང་པོས་བརྒྱན་ནོ། །དེར་མ་ཟད་དེ་སྤོས་དང་གར་དང་གླུ་དང་རྔ་དང་རྔ་བོ་ཆེ་དང་རྫ་རྔ་དང་པི་ཝང་དང་། གླིང་བུ་དང་ཅང་ཏིའུ་དང་ཆ་ལང་དང་། དྲིལ་བུ་ལ་སོགས་པ་གྲངས་མང་པོ་ཐོགས་ལ་དཀྱིལ་འཁོར་ལ་བསྐོར་བ་བྱའོ། །མཆོད་པའི་ཡོ་བྱད་ཐམས་ཅད་དང་། གཏོར་མ་ལ་སོགས་མཛེས་པར་དགྲམ་ཞེས་བྱ་བ་ནི་མཆོད་པའི་ཡོ་བྱད་དེ་སྤོས་དང་མེ་ཏོག་དང་མར་མེ་དང་དྲི་ཆབ་དང་ཨརྒ་ལ་སོགས་པ་རིམ་པ་མ་ནོར་བཀྲམ་མོ། །གཏོར་མ་ལ་སོགས་པ་ནི་ཕྱོགས་སྐྱོང་གི་གཏོར་མ་ལ་སོགས་པ་མང་པོ་བཀྲམ་མོ། །དེ་ནས་རྣལ་འབྱོར་པས་བསྒོམ་པའི་རིམ་པས་བྱ་བ་བསྟན་པའི་ཕྱིར། དེ་ནས་རྣལ་འབྱོར་ཅན་གྱིས་ཞེས་བྱ་བ་ལ་སོགས་པས་བསྟན་ཏེ། དེ་ནས་རྣལ་འབྱོར་ཅན་གྱིས་ནི་ཞེས་བྱ་བ་ནི། དཀྱིལ་འཁོར་འཁོར་ལོའི་རྒྱན་ལ་སོགས་པ་ཐམས་ཅད་བཀྲམ་པའི་དེ་མ་ཐག་པ་དེ་ནས། རྣལ་འབྱོར་བས་ཏིང་ངེ་འཛིན་བསྒོམ་པའི་རིམ་པ་བྱའོ། །དེ་ཡང་ཇི་ལྟར་བྱ་ཞེ་ན། དང་པོར་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པར་བྱ་བ་དང་། གཉིས་པ་ཀུན་ཏུ་སྣང་གི་ཏིང་ངེ་འཛིན་བསྒོམ་པར་བྱ་བ་དང་། གསུམ་པ་རྒྱུའི་ཏིང་ངེ་འཛིན་བསྒོམ་པར་བྱ་བ་སྟེ། རྒྱུ་ཡི་གེར་གནས་པའི་སྐབས་ཉིད་ནི། དབང་ཆེན་གྱི་དཀྱིལ་འཁོར་བསྐྱེད་པའི་གོང་དུ་གསུངས་པའི་རིམ་པས་བསྐྱེད་པ་སྟེ། རྟེན་གྱི་དཀྱིལ་འཁོར་གདན་དང་བཅས་པའི་རྗེས་ཐོགས་སུ་རྟེན་ཅན་གྱི་དཀྱིལ་འཁོར་བསྐྱེད་དེ། གོང་མའི་རིག་པ་ཇི་བཞིན་དུ་བྱ་བ་སྟེ། རྟེན་ཅན་གྱི་འཁོར་ལོ་རྫོགས་པའི་རྗེས་ཐོགས་སུ་སྐུ་གསུང་ཐུགས་སུ་བྱིན་གྱིས་བརླབས་ནས། ཕྱག་རྒྱ་བཞིས་རྒྱས་གདབ་བོ། །དེ་ནས་དབང་ནོད་པ་དེ་དབུ་རྒྱན་ལ་སོགས་པ་ལ་རིགས་ལྔ་ཆར་གྱིས་བརྒྱན་པའོ། །ལྷག་མ་རྣམས་ནི་རང་རེ་རིགས་ལྔ་སོ་སོའི་རྒྱན་ཁོ་ནའོ། །དེ་ཡན་ཆད་དུ་བསྙེན་བསྒྲུབ་ཡན་ལག་བཞི་ཚང་སྟེ། གཙོ་བོའི་སྐུ་ཡན་ལག་དང་བཅས་པ་རྫོགས་པ་ནི་བསྙེན་པའོ། །འཁོར་གྱི་སྐུ་བསྐྱེད་པ་ནི་ཉེ་བའི་བསྙེན་པའོ། །སྐུ་གསུང་ཐུགས་བྱིན་གྱིས་བརླབས་པ་ནི་བསྒྲུབ་པའོ། །ཡེ་ཤེས་སེམས་དཔའ་བསྒོམ་པ་ནི་བསྒྲུབ་པ་ཆེན་པོ་སྟེ། སྤྱིར་བསྙེན་བསྒྲུབ་བཞིའོ། །དེ་ནས་ཡེ་ཤེས་སེམས་དཔའི་དཀྱིལ་འཁོར་སྤྱན་དྲངས་ཏེ། བདག་ཉིད་ཀྱི་ཐུགས་ཀར་ཡི་གེ་ཧཱུྃ་ལས་འོད་ཟེར་འཕྲོས་པས། འོད་ཟེར་རམ། ལྷ་མོ་ལྕགས་ཀྱུ་མ་གྱུར་ཏེ། ལྷ་མོའི་རང་བཞིན་གྲུབ་པའི་གནས་ནས་ཡེ་ཤེས་ཀྱི་དཀྱིལ་འཁོར་ཕོ་བྲང་དང་བཅས་པར་མདུན་གྱི་ནམ་མཁར་བྱོན་པ་དང་། དེ་ལ་ཕྱི་ནང་མཆོད་པས་མཆོད་དོ། །མཆོད་པའི་རྗེས་ལ་བསྟོད་པ་ཡང་བྱ་སྟེ་རྡོ་རྗེའི་ཚིག་ཏུ་འདི་སྐད་བརྗོད་དོ། །ཧཱུྃ། ཆོས་སྐུ་ཡེ་ནས་དག་པ་ལ། །འཁྲུལ་པའི་མཚན་མ་མེད་པ་སྟེ། །སེམས་ཅན་འཁོར་བར་འཁྱམས་དོན་དུ། །གཟུགས་བརྙན་སྟོན་པ་ཁྱོད་ལ་བསྟོད། །ཅེས་བརྗོད་དོ། །ཞགས་པ་མས་ལྷོར་སྒོར་ཞུགས་པ་དང་། ལྕགས་སྒྲོག་མས་བསྟིམ་པ་དང་། དྲིལ་བུ་མས་དགྱེས་པར་བྱ་སྟེ། ནམ་སེམས་ཅན་གྱི་དོན་མ་འགྲུབ་ཀྱི་བར་དུ་བསྟན་པར་བྱའོ། །དེ་ལྟར་ཏིང་ངེ་འཛིན་གྱི་རིམ་པ་བྱ་བའི་ཕྱིར། དབྱིངས་ནས་དཀྱིལ་འཁོར་སྤྱན་དྲངས་མཆོད་ཅེས་གསུངས་པ་ཡིན་ནོ། །དེ་ནས་དམ་ཚིག་གི་དཀྱིལ་འཁོར་དང་། ཡེ་ཤེས་ཀྱི་དཀྱིལ་འཁོར་ཅིག་ཏུ་འགྱུར་བ་དེ་ལ་མཆོད་པ་དབུལ་ཏེ། བདག་ཉིད་ཀྱི་ཐུགས་ཀ་ནས་འོད་ཟེར་འཕྲོས་པས། འོད་ཟེར་ལས་ལྷ་མོའི་ཚོགས་ལ་སེ་ལ་སོགས་མང་པོ་སྤྲུལ་ཏེ། དེ་བཞིན་གཤེགས་པ་ཐམས་ཅད་ལ་སླར་ཐིམ། དེ་བཞིན་གཤེགས་པ་རྣམས་ཀྱི་ཐུགས་ཀ་ནས། ལྷ་མོ་མང་པོ་སླར་འཐོན་ནས། བདག་ཉིད་དཀྱིལ་འཁོར་དང་བཅས་པ་ལ་མཆོད་པ་དང་བསྟོད་པ་བྱེད་པ་དེའི་ཕྱིར། མཉེས་ནས་ཉེ་བར་གྱུར་པའི་ངང་ཞེས་གསུངས་སོ། །ལས་བཞིའི་མཆོད་པ་ཙམ་བྱས་ཏེ། ཞེས་བྱ་བ་ནི། མི་འདྲ་བ་བཞི་སྟེ། གཟུགས་སྒྲ་དྲི་རོ་རེག་ལ་སོགས་པའོ། །དབྱིབས་དང་ཁ་དོག་མཚན་མར་བཅས་ཞེས་བྱ་བ་ནི། དབྱིབས་རིང་པོ་དང་ཐུང་ངུ་དང་ཟླུམ་པོ་དང་གྲུ་བཞི་དང་ངོ་། །ཁ་དོག་དཀར་པོ་དང་སེར་པོ་དང་དམར་པོ་ལ་སོགས་པའོ། །ལྷ་སོ་སོའི་ཕྱག་ན་འདོད་པའི་ཡོན་ཏན་བསྣམས་ནས་མཆོད་པའི་ཕྱིར། གཟུགས་སྒྲ་དྲི་རོ་རེག་བྱ་ཡིས་ཞེས་གསུངས་པ་ཡིན་ནོ། །མཆོད་པའི་ལྷ་མོ་དེ་རྣམས་ཀྱིས། བདག་དཀྱིལ་འཁོར་བ་རྣམས་ལ་མཆོད་པའི་ཕྱིར། མཆོད་སྦྱིན་སྟོབས་པའི་ལས་རྣམས་བྱ་ཞེས་གསུངས་པ་ཡིན་ནོ། །ཀུན་རྫོབ་ཀྱི་བདེན་པ་འབའ་ཞིག་བསྟན་པའོ། །དེ་ནས་སློབ་མ་ལ་དབང་བསྐུར་བའི་རིམ་པ་བསྟན་པའི་ཕྱིར། དེ་ནས་རིག་ཀྱི་བུ་མཆོག་དེ་ཞེས་པ་ལ་སོགས་པ་གསུངས་ཏེ། དེ་ནས་རིགས་ཀྱི་བུ་མཆོག་དེ་ཞེས་པ་ནི། སློབ་དཔོན་གྱི་རང་བཞིན་གྱི་དཀྱིལ་འཁོར་དུ་དབང་ནོས་པ་དེའི་དེ་མ་ཐག་པ་དེ་ནས་གཞུང་མཐུན་པའི་སློབ་མ་དེ་སྟེ། རིགས་སོ་སོའི་མཚན་ཉིད་གང་ལྡན་པ་དེ་ལ་དབང་བསྐུར་བར་བརྩམ་པར་བྱའོ། །གསང་བའི་དཀྱིལ་འཁོར་བསྟན་པར་ཞེས་བྱ་བ་ནི། ཉན་ཐོས་ལས་གསང་བའི་ཕྱིར་གསང་བ་སྟེ། བརྙན་མའི་དཀྱིལ་འཁོར་དེ་བསྟན་པར་བྱའོ། །ཅི་དགའ་ཞེས་དྲིས་ནས་ནི་ཞེས་བྱ་བ་ནི། སློབ་དཔོན་གྱིས་བྲིས་པའི་བཀའ་ལུང་དེ་གནང་བ་གསལ་བའི་ཚིག་གོ། །བདག་ནི་འདི་ལ་དགའ་བའོ། །ཞེས་བྱ་བ་ནི། སློབ་མའི་བདག་ནི་གསང་བའི་དཀྱིལ་འཁོར་ལ་བལྟ་བར་འཚལ་ལགས་སོ། །ཞེས་པ་སྟེ་ཞུས་ཚིག་གོ། །འཇུག་པ་པོས་ཀྱང་ལན་དུ་སྦྱིན་ཞེས་པ་སྟེ། གོང་གི་ཚིག་ཉིད་ལ་བསྙགས་སོ། །དེ་ནས་མནའ་དགག་པའི་ཕྱིར། །བླ་མ་ལུང་ལྡན་དམ་པ་དེས། །མནའ་ཡི་རྡོ་རྗེ་སྦྱིན་པའི་ཕྱིར། །བཟླས་པའི་ཆུ་ནི་གླུད་པར་བྱ། །ཞེས་གསུངས་ཏེ། བླ་མ་ལུང་དང་ལྡན་པའི་དམ་པ་དེས། །སློབ་མ་ལས་མི་འདའ་བར་བྱ་བའི་ཕྱིར། །པདྨའི་ནང་དུ་བདུད་རྩི་ལྔ་སྦྱར་བ། །དེ་ལ་སྔགས་འདི་བརྒྱ་རྩ་བརྒྱད་དུ་བཟླས་ལ་བླུད་དོ། །ༀ་སརྦ་པཉྩ་ཨ་མྲྀ་ཏ་ཀུན་ད་ལི་ཧཱུྃ་ཞེས་བརྗོད་ལ། དེ་ནས་བླུད་དེ་རྡོ་རྗེ་ཚིག་ཏུ་ཡང་འདི་སྐད་ཡང་བརྗོད་དོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་རྒྱུ། །རྡོ་རྗེ་བདུད་རྩིའི་ཆུ་འདིས་འགྲུབ། །ཅེས་བརྗོད་ལ་བླུད་དེ། དེ་ནས་དམ་ཚིག་བསྟན་པའི་ཕྱིར། གསང་བའི་དམ་ཚིག་སྒྲགས་ཞེས་བྱ་བ་ལ་སོགས་པ་གསུངས་ཏེ། གསང་བའི་དམ་ཚིག་འོག་ནས་འབྱུང་བ་འདི་དག་སྒྲགས་སོ། །སྐལ་དང་ལྡན་པའི་རིགས་ཀྱི་བུ། །ཁྱོད་ཀྱིས་བསྲུང་བར་བྱ་བ་ནི། །ཆོས་ཉན་པའི་སྐལ་དང་ལྡན་པ་རིགས་ཀྱི་བུ་ཞེས་སློབ་མ་ལ་བོས་ནས་ཁྱོད་ཀྱིས་བསྲུང་བར་བྱ་བ་ནི་འོག་ནས་འབྱུང་བ་འདི་རྣམས་བསྟན་ཏོ། །ཞེས་བསྟན་པར་བྱ་བའི་ཕྱིར། ལྷ་དང་བླ་མ་སྤུན་མི་སྤངས་ཞེས་པ་ལ་སོགས་པ་གསུངས་ཏེ། ལྷ་དང་བླ་མ་སྤུན་མི་སྤངས་ཞེས་བྱ་བ་ནི་ཡི་དམ་གྱི་ལྷ་དང་རྟག་ཏུ་འགྲོག་པར་བྱ་བ་དང་། རྡོ་རྗེ་སྤུན་རྟག་ཏུ་མི་འབྲལ་བ་དང་། རྡོ་རྗེ་སློབ་དཔོན་བླ་མ་དམ་པ་སྟེ་མི་སྤང་སྟེ་རྟག་ཏུ་རྟེན་པར་བྱའོ། །སྔགས་དང་ཕྱག་རྒྱ་དེ་བཞིན་དེ་ཞེས་བྱ་བ་ནི་གསང་བའི་སྔགས་བཟླས་པ་དང་། དེ་བཞིན་གཤེགས་པའི་ཕྱག་རྒྱ་བཅའ་བ་དང་མི་འབྲལ་བར་བྱའོ། །གསང་བ་གཞན་ལ་སྤེལ་མི་བྱ་ཞེས་བྱ་བ་ནི། གསང་བའི་མན་ངག་འདི་ལྟ་བུ་ཡིན་ཞེས་སྣོད་ངན་པ་ལ་བསྒྲགས་པར་བྱ་བ་མ་ཡིན་ནོ། །བསྒྲུབ་པའི་རྫས་ནི་རྣམ་པ་ལྔ་རྟག་ཏུ་བཟའ་ཞིང་བཅའ་བར་བྱ་ཞེས་བྱ་བ་ནི། བསྒྲུབ་པའི་རྫས་རྣམ་པ་ལྔ་ནི། ཟླ་བ་ཉི་མ་ཆུ་སྨར་དྲི་དང་ལྔ་སྟེ། དུས་རྟག་ཏུ་བཟའ་ཞིང་སྤྱད་པར་བྱའོ། །ཤ་ལྔ་དང་ནི་ཆང་ལྔ་དང་། །འདོད་པ་རྣམས་ནི་རྟག་ཏུ་བསྟེན། །ཞེས་བྱ་བ་ནི། ཤ་ལྔ་ནི་གླང་པོ་ཆེའི་ཤ་དང་། རྟའི་ཤ་དང་། ཁྱིའི་ཤ་དང་། ནམ་མཁའ་ལྡིང་གི་ཤ་དང་། ཤ་ཆེན་ཏེ་ལྔའོ། །འདོད་པ་རྣམས་ནི་འདོད་ཆགས་ཆེན་པོ་དང་། ཞེ་སྡང་ཆེན་པོ་དང་། གཏི་མུག་ཆེན་པོ་དང་། ང་རྒྱལ་ཆེན་པོ་དང་། ཕྲག་དོག་ཆེན་པོ་དང་། དེ་རྣམས་ནི་མི་སྤང་སྟེ། རྟག་ཏུ་བརྟེན་པར་བྱའོ། །སྦྱོར་དང་སྒྲོལ་དང་འཕྲ་མ་དང་། མི་སྙན་སྐུ་དང་སྤྱད་པར་བྱ་ཞེས་བྱ་བ་ནི། སྦྱོར་བའི་ཡང་དག་པའི་དོན་ལ་སྦྱོར་བ་བྱའོ། །སྒྲོལ་བ་ནི་གཉིས་མེད་པའི་ངང་དུ་ཁམས་གསུམ་གྱི་སེམས་ཅན་སྒྲོལ་བའོ། །འཕྲ་མ་དེ་ཕྱིན་ཅི་ལོག་དང་བྲལ་བའོ། །མི་སྙན་པ་ནི་ཡང་དག་པའི་དོན་ལ་ཡིད་ཆེས་པའི་ཚིག་སྨྲའོ། །སྐུ་ནི་གཉིས་སུ་མེད་པའི་དོན་ཏེ་གཞན་གྱིས་མ་བྱིན་ཀྱང་བླང་བར་བྱའོ། །སྤྱད་པར་བྱ་བ་ནི་གཉིས་སུ་མེད་པའི་བྱང་ཆུབ་ཀྱི་སེམས་དེ་ནི་སྤྱད་པར་བྱའོ། །དཀའ་ཐུབ་དཀའ་བ་སྤྱད་མི་བྱ། །ཁྲིམས་དང་བསྡོམ་པས་བཅིངས་པ་མིན། །ཞེས་བྱ་བ་ནི་ཡང་དག་པའི་དོན་ལ་ཡིད་ཆེས་པ་མེད་ན་དཀའ་ཐུབ་ཁྲིམས་ཉིས་བརྒྱ་ལྔ་བཅུ་བསྲུང་བར་ཡང་ལུས་ངག་ཡིད་གསུམ་གྱི་སྡོམ་པ་བྱས་ཀྱང་རྣམ་པར་རྟོག་པས་བཅིངས་པ་སྟེ། དེ་ལྟར་བྱས་པ་མ་ཡིན་ནོ། །ཡང་དག་པའི་དོན་ལ་ཡིད་མ་ཆེས་ན་ནི་ཇི་ལྟར་བྱས་པ་རྟོག་པའི་དོན་ཡིན་ནོ། །སྙིང་ནས་སློབ་དཔོན་སྨོད་པ་ནི། བསྒྲུབས་ཀྱང་འགྲུབ་པར་མི་འགྱུར་རོ། །ཞེས་བྱ་བ་ནི། སྙིང་གི་གཏིང་ནས་ཞེ་སྡང་སྐྱེས་ཏེ། སློབ་དཔོན་ཐབས་གཡོ་ཡིས་སྨོད་ན་ཐབས་ཀྱི་སྒོ་ནས་བསྒྲུབ་ཀྱང་དངོས་གྲུབ་ཐོབ་པར་མི་འགྱུར་རོ། །དེ་ནི་དཀྱིལ་འཁོར་དུ་བཞུགས་པའི་རིམ་པ་སྟེ། དཀྱིལ་འཁོར་དང་པོ་བསྒྲུབས་པའི་དབང་ཞེས་བྱའོ། །དེ་ནས་དཀྱིལ་འཁོར་བསྟན་པའི་རྗེས་སུ་བུམ་པའི་དབང་བསྐུར་བ་བརྩམ་སྟེ། བུམ་བརྒྱད་དམ་བཅུ་དྲུག་རྣམས་གཅིག་ཏུ་བསྡོམ་པའམ། འོན་ཏེ་རང་ལས་བྱ་སྟེ། ཧཱུྃ་ལས་རྡོ་རྗེར་འགྱུར། རྡོ་རྗེ་ལས་མི་བསྐྱོད་པའི་སྐུར་བསྐྱེད་དོ། །དེ་ལ་དགུག་དང་བཞུགས་དང་གཏིམ་བྱས་ནས། མཆོད་པ་དང་བསྟོད་པ་བྱ་བའི་རྗེས་ལ་མི་བསྐྱོད་པ་ཞུ་ནས་ཆུའི་གཟུགས་སུ་གྱུར་ཏེ། དེས་དབང་བསྐུར་བ་ནི། གཉིས་པ་རྡོ་རྗེ་རྒྱལ་པོའི་དབང་ཞེས་བྱ་བའོ། །དེ་ནས་ཅོད་པན་གྱིས་དབང་བསྐུར་ཏེ། སྭ་ལས་རིན་པོ་ཆེ་ལས་རིན་ཆེན་འབྱུང་ལྡན་གྱི་སྐུར་གྱུར་ཏེ། དེ་ལ་ཡང་དགུག་པ་དང་བསྟོད་པ་ཡན་ཆད་བྱ་སྟེ། དེ་ཡོངས་སུ་གྱུར་པ་ལས་ཅོད་པན་གྱི་གཟུགས་སུ་གྱུར་ཏེ། དེས་དབང་བསྐུར་བ་ནི་གསུམ་པ་གསང་བའི་གསང་བ་ཉན་པའི་དབང་ཞེས་བྱའོ། །དེ་ནས་རྡོ་རྗེའི་དབང་སྦྱིན་ཏེ། ཨཾ་ལས་པདྨ་ལས་སྣང་བ་མཐའ་ཡས་ཀྱི་སྐུར་གྱུར་ཏེ། དེ་ལ་མཆོད་བསྟོད་བྱ་སྟེ། དེ་ཡོངས་སུ་གྱུར་པ་ལས་རྡོ་རྗེར་གྱུར་ཏེ་དེས་དབང་བསྐུར་བ་ནི་བཞི་བར་ཆད་པའི་དབང་ཡང་སྦྱིན་ཞེས་བྱའོ། །དེ་ནས་དྲིལ་བུའི་དབང་བསྐུར་ཡི་གེ་ཧ་ལས་རལ་གྲི་དེ་ཡོངས་སུ་གྱུར་པ་ལས་དོན་ཡོད་གྲུབ་པའི་སྐུར་གྱུར་ཏེ། དེ་ལ་མཆོད་བསྟོད་བྱ་སྟེ། དེ་ཡོངས་སུ་གྱུར་པ་ལས་དྲིལ་བུར་གྱུར་ཏེ། དེས་དབང་བསྐུར་བ་ནི་ལས་ཀྱི་དབང་ནི་ལྔ་པར་སྦྱིན་ཞེས་བྱའོ། །དེ་ནས་མིང་གི་དབང་བསྐུར་ཏེ། སློབ་དཔོན་གྱིས་ལག་པ་སློབ་མའི་མགོར་བཞག་སྟེ། རྡོ་རྗེ་ཚིག་ཏུ་ཡང་འདི་སྐད་བརྗོད་དེ། ཁྱོད་ནི་སངས་རྒྱས་དངོས་ཡིན་ཏེ། །རབ་ཏུ་བསྔགས་པའི་གསང་བའི་མིང་། །རྡོ་རྗེ་ཆེ་གེ་མོ་ཞེས་བྱ་བ། དེ་རིང་ཁྱོད་ལ་དབང་བསྐུར་རོ། །ཞེས་པ་ནི་དྲུག་པ་རབ་འབྱམས་རྒྱལ་པོའི་དབང་ཞེས་བྱའོ། །དེ་ནས་སློབ་དཔོན་གྱི་དབང་བསྐུར་བ་དང་། གསང་བའི་དབང་དང་ཤེས་རབ་ཀྱི་དབང་དང་ཡེ་ཤེས་ཀྱི་དབང་སྟེ། དེ་རྣམས་ལ་སོགས་པའི་དབང་རྣམས་ཇི་སྙེད་པ་ཚང་བར་བསྐུར་དུ་རུང་བར་བཤད་ཅེས་གསུངས་སོ། །དེ་ནས་དྲིན་ལ་ལན་གྱིས་གླན་པའི་ཕྱིར་ཡོན་དབུལ་བར་བསྟན་ཏེ། དེའི་ཕྱིར་ནས་དབང་ཐོབ་བྱའི་ཕྱིར་ཞེས་བྱ་བ་ལ་སོགས་པ། བསྟན་དེ་དེ་ནས་དབང་མཆོག་ཐོབ་བྱའི་ཕྱིར་ཞེས་བྱ་བ་ནི། དབང་བསྐུར་བའི་དེ་མ་ཐག་པ་དེ་ནས། དེ་དབང་གི་མཆོག་རྣམས་ཐོབ་པར་བྱ་བའི་ཕྱིར། ཡོན་དབུལ་ལོ། །རིགས་ཀྱི་བུ་མཆོག་དེ་དག་གིས་ཞེས་བྱ་བ་ནི། རིགས་སོ་སོའི་མཚན་ཉིད་དང་ལྡན་པའི་བུ་མཆོག་གང་ཡིན་པ་དེ་དག་གིས། ཡོན་གྱི་མཆོག་རང་གི་བྱེ་བྲག་གི་དབུལ་ཏེ། དེ་ཡང་སྲོག་ལུས་ལམ་འཇུངས་པའི་སེམས་ཀྱིས་དབུལ་ཏེ། དེའི་ཕྱིར་ཡོན་མཆོག་དག་ནི་དབུལ་བར་ངེས། སྲོག་ལུས་མན་ཆད་རྫས་ཀྱི་རྣམས། །མ་འཇུངས་པའི་སེམས་ཀྱིས་དབུལ་ཏེ། །ཞེས་པ་ལ་སོགས་པ་ཡིན་ནོ། །དེ་ནས་རྡོ་རྗེ་འཛིན་པའི་ཡོན་བཤད་པའི་ཕྱིར། རང་གི་ལུས་དང་སེམས་དག་དང་ཞེས་པས་བསྟན་ཏེ། རང་གི་ལུས་དང་སེམས་དགའ་དང་ཞེས་བྱ་བ་ནི་རང་གི་ལུས་དབུལ་གྱིས་བཞེས་ཤིག་བདག་གི་སེམས་དབུལ་གྱིས་བཞེས་ཤིག་པ་སྟེ། ལུས་ངག་ཡིད་གསུམ་གྱི་སྒོ་ནས་སློབ་དཔོན་དམ་པ་མཉེས་པར་བྱེད་པའོ། །སྙིང་ཡང་ཡོན་གྱི་མཆོག་ཡིན་ཏེ། །ཞེས་བྱ་བ་ནི། སྙིང་བརྩེ་ཞིང་གདུང་བ་ཡིན་གྱི་མཆོག་དམ་པའོ། །སེམས་ཀྱི་དགོངས་པ་གང་དང་གང་ཞེས་བྱ་བ་ནི། སློབ་དཔོན་དམ་པ་དེའི་ཐུགས་དང་ཇི་ལྟར་འཚམས་པ་གང་དང་གང་སྟེ། དེ་དང་དེ་རུ་དབུལ་བར་བྱའོ། །གོང་དུ་བསྟན་པའི་ཡོན་རྣམས་ནི། །རྡོ་རྗེ་འཛིན་གྱི་ཡོན་དུ་བཤད་དོ། །དེ་ནས་སངས་རྒྱས་འཁོར་ལོ་ཅན་གྱི་ཡོན་བསྟན་ཏེ། མི་ཆེན་དག་ནི་འདོད་པ་བཞིན། །ཡོན་ཏན་སྣ་ཚོགས་དབུལ་བ་ནི། །ཞེས་བྱ་བ་ནི་མི་ཆེན་ནི་བྲན་གྱི་ནང་ནས་སྙིང་ཉེ་དབུལ་བ་དང་། རྫས་སྡུག་པ་དབུལ་བ་དང་། འདོད་པའི་ཡོན་ཏན་ལྔ་ལ་སོགས་པ་དབུལ་བ་ནི། སངས་རྒྱས་འཁོར་ལོ་ཅན་གྱི་ཡིན་ནོ། །དེ་ནས་རིན་པོ་ཆེའི་ཡོན་བསྟན་ཏེ། རིན་པོ་ཆེ་དང་ནོར་གྱི་དབྱིག །ཇི་སྙེད་ཡོད་པ་ཐམས་ཅད་ནི། །ཞེས་བྱ་བ་ནི། རིན་པོ་ཆེ་སྣ་ལྔ་ལ་སོགས་པ་ཐམས་ཅད་དང་། ནོར་གྱི་དབྱིག་ཕངས་པ་ཐམས་ཅད་དང་། ཅི་འོས་ཤིང་འཚམས་པའི་ནོར་ཇི་སྙེད་ཡོད་པ་ཐམས་ཅད་ནི། རིན་ཆེན་འཛིན་གྱི་ཡོན་ཡིན་ནོ། །དེ་ནས་པདྨའི་ཡོན་བསྟན་ཏེ། མ་དང་བུ་མོ་ཆུང་མ་དང་། ཞེས་བྱ་བ་ནི་མ་ལས་ཞེས་པ་མེད་དེ་བུ་མོ་དང་ཆུང་མ་དང་སྙིང་དུ་སྡུག་པ་དབུལ་ལོ། །སྲིང་མོ་ཤིན་ཏུ་བརྒྱན་པ་དང་ཞེས་བྱ་བ་སྲིང་མོ་ལ་གཟི་གཡུ་ལ་སོགས་པ་རིན་པོ་ཆེ་སྣ་པས་བརྒྱན་ལ་དབུལ་བར་བྱའོ། །མིའི་མིང་དང་མཚན་མ་ཅན་ཞེས་བྱ་བ་ནི། ཏ་ལ་སོགས་པ་མིའི་མཚན་མ་ཡོད་པ་དང་། དུད་འགྲོའི་རིགས་མོའི་མཚན་མ་ཡོད་པ་དེ་རྣམས་པདྨ་ཅན་གྱི་ཡོན་ཡིན་ནོ། །དེ་ནས་ལས་ཀྱི་ཡོན་བསྟན་ཏེ། གླང་པོ་རྟ་དང་ཤིང་རྟ་དང་། །ཞེས་བྱ་བ་ནི། གླང་པོ་ཆེ་དང་རྟ་བཟང་པོ་དང་། ཤིང་རྟ་ལེགས་མོ་དང་། དེར་མ་ཟད་དེ་བྱོལ་སོང་ཇི་ལྟར་འདེགས་ཆེ་བ་རྣམས་དབུལ་བའི་ཕྱིར་རོ། །ཚོགས་རྣམ་པ་སྣ་ཚོགས་དང་། ཐེག་པའི་བྱེ་བྲག་སྣ་ཚོགས་ཀུན་ཞེས་པ་གསུངས་ཏེ། སྣ་ཚོགས་རྡོ་རྗེའི་ཡོན་ཡིན་ནོ། །དེ་ནས་སྤྱིའི་དཀྱིལ་འཁོར་གྱི་ཡོན་ནི་སངས་རྒྱས་ཀུན་ལ་ཞེས་པ་ནས། སྤྱིའི་དཀྱིལ་འཁོར་དག་ཏུ་དབུལ་ཞེས་པ་ཚིག་ལྔས་བསྟན་གོ་སླའོ། །དེ་ནས་ཡོན་དེ་རྣམས་སློབ་དཔོན་ལ་ཕུལ་བར་མ་ཟད་དེ། ཤེས་རབ་མ་ལ་ཡང་དབུལ་བར་བསྟན་པའི་ཕྱིར། དཀྱིལ་འཁོར་དག་གི་དེ་དག་ཏུ་ཞེས་པ་ལ་སོགས་པ་གསུངས་ཏེ། གོང་དུ་གསུངས་པའི་དཀྱིལ་འཁོར་དེ་དག་དུ་སྦས་པ་དང་། གསང་བའི་དབང་བསྐུར་ན། དེའི་རྐྱེན་གཟུགས་མེད་དང་དེ་དག་ལ་ཡང་གོང་དུ་གསུངས་པའི་ཡོན་གྱི་བྱེ་བྲག་དེ་དང་དེ་དག་དབུལ་ལོ། །དེ་ནས་དབང་རྟགས་སྦྱིན་པ་བསྟན་པའི་ཕྱིར་དབང་མཆོག་ཐོབ་པའི་བུ་མཆོག་ལ་ཞེས་པ་ལ་སོགས་པ་གསུངས་པ་བསྟན་ཏེ། དབང་མཆོག་ཐོབ་པའི་རིགས་ཀྱི་བུ་མཆོག་དེ་ལ་ནི་དང་པོ་ཁོ་ནར་སེམས་བསྐྱེད་པ་རྫོགས་པར་བྱ་ཞིང་འདི་ལྟ་བའི་རྒྱུ་དེས་འབྲས་བུ་འདི་ལྟ་བུ་ཐོབ་པའི་གཏན་ཚིགས་སྦྱིན་དེ་དེའི་ཕྱིར་དང་པོ་སེམས་ཀྱི་གཏན་ཚིགས་སྦྱིན་ཞེས་གསུངས་སོ། །གཉིས་པ་ཕྱག་རྒྱ་བསྒོམ་པ་གཏད་ཅེས་བྱ་བ་ནི། དབང་གཉིས་པ་ཐོབ་པའི་རྟགས་ནི་རྟེན་དང་བརྟེན་དུ་སྣང་བསྒོམ་པའོ། །གསུམ་པ་གསང་བའི་ངེས་དོན་བཤད། ཅེས་བྱ་བ་ནི། དབང་གསུམ་པའི་རྟགས་སུ་ཡོན་ཏན་གྱི་ཆ་རྣམས་ཏེ། རྟེན་གྱི་ཡོན་ཏན་དང་བརྟེན་ཅན་གྱི་ཡོན་ཏན་བསྒྲགས་པའོ། །བཞི་པ་ཆོས་ཀྱི་གླེགས་བམ་བཤད་ཅེས་བྱ་བ་ནི། དབང་བཞི་པ་ཐོབ་པའི་རྟགས་ནི་གསུང་རྣམ་པར་དག་པ་སྟེ། གཞན་དང་གཞན་དག་ལ་རྒྱུ་ཆོས་བསྟན་པའོ། །ལྔ་པར་ལས་བཞིའི་རྒྱ་རྟགས་སྦྱིན་ཞེས་བྱ་བ་ནི། དབང་རྫོགས་པའི་རྟགས་སུ་འཕྲིན་ལས་རྣམ་པ་བཞི་པའི་རྟགས་སྦྱིན་པའོ། །དྲུག་པར་རིན་ཆེན་བདུན་ནམ། རྫས་ཀྱི་ཁྱད་པར་ཅན་དག་དང་། ཡང་ན་སྣ་ཚོགས་ཚང་བར་སྦྱིན་ཞེས་བྱ་བ་ནི། དབང་དྲུག་པ་རྫོགས་པའི་རྟགས་སུ་རྡོ་རྗེ་ལ་སོགས་དྲངས་བའི་མིང་ཏེ། རིན་པོ་ཆེ་སྣ་བདུན་གྱིས་མཇུག་བསྡུས་པའི་མིང་གདགས་པ་སྟེ། གསང་བའི་མིང་ངོ་། །དེར་མ་ཟད་དེ་རྫས་ཀྱི་ཁྱད་པར་རིན་པོ་ཆེ་སྣ་བདུན་ཉིད་དུ་ཡང་སྦྱིན་པར་བྱའོ། །དེར་མ་ཟད་དེ་ཡང་སྣ་ཚོགས་པའི་རྟགས་སྦྱིན་པར་བྱའོ། །དེ་ནས་དབང་ཇི་ལྟར་ཐོབ་པའི་རྨི་བལྟས་བསྟན་པའི་ཕྱིར། དབང་མཆོག་ཐོབ་པའི་རྨི་བལྟས་ནི་ཞེས་བྱ་བ་ལ་སོགས་པས་གསུངས་ཏེ། སློབ་མ་སྟ་གོན་ལ་གནས་ནས་ཀུ་ཤའི་སྟན་ལ་སེང་གེའི་ཉལ་ཐབས་ཀྱིས་ཉལ་བའི་དུས་ན། དབང་ཇི་ལྟར་ཐོབ་པར་འདོད་པའི་རྨི་བལྟས་དག་དང་འབྱུང་བར་ངེས་ཏེ། དེ་ཡང་འོག་ནས་འབྱུང་བ་འདི་རྣམས་ཏེ། དེ་ལ་ཡང་སྔོན་ལ་ཡང་རྡོ་རྗེ་འཛིན་པའི་དབང་ཐོབ་པའི་རྨི་བལྟས་བསྟན་པའི་ཕྱིར། རང་གི་སེམས་ལ་དབང་ཐོབ་དང་ཞེས་བྱ་བ་ནས། མཐོང་ནས་རྡོ་རྗེ་འཛིན་པའི་དབང་ཐོབ་པའི་སྔ་བལྟས་ཡིན་པར་ངེས་ཞེས་པས་བསྟན་ཏེ། དགྲོལ་མི་དགོས་དཀྱུས་ཉིད་ན་གསལ་ལོ། །དེ་ནས་སངས་རྒྱས་འཁོར་ལོ་ཅན་གྱི་དབང་ཐོབ་ནས་འོང་བའི་སྔ་ལྟས་བསྟན་པའི་ཕྱིར། ལུས་ཀྱི་རྫུ་འཕྲུལ་ཐོབ་པ་དང་ཞེས་པ་ནས་འཁོར་ལོ་ཅན་གྱི་དབང་ཐོབ་ལྟས་ཞེས་པའི་བར་གྱིས་བསྟན་ཏེ། དཀྱུས་ཉིད་གསལ་ལོ། །དགྲོལ་མི་དགོས་སོ། །དེ་ནས་རིན་པོ་ཆེའི་དབང་ཐོབ་པའི་སྔ་ལྟས་བསྟན་པའི་ཕྱིར། རིན་ཆེན་སྣ་ཚོགས་སྤྱོད་པ་དང་ཞེས་པ་ནས། རིན་ཆེན་རིགས་ཀྱི་དབང་ཐོབ་ལྟས། ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་པདྨའི་དབང་ཐོབ་ནས་འོད་བའི་སྔ་ལྟས་བསྟན་པའི་ཕྱིར། པདྨའི་རྫིང་ན་རྩེ་བ་དང་ཞེས་པ་ནས། རྡོ་རྗེ་ཆོས་ཀྱི་དབང་ཐོབ་ཡིན། །ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་ཕྱིའི་དབང་ཐོབ་པའི་སྔ་ལྟས་བསྟན་པའི་ཕྱིར། རྨི་ལམ་མཚན་མ་ཇི་སྙེད་པ་ལ་སོགས་པ་གསུངས། གོང་དུ་བསྟན་པའི་རྨི་ལྟས་དང་མཚན་མ་དང་ཇི་ལྟར་རྨིས་ཤིང་མཐོང་བ་དེ་རྣམས་སྤྱིའི་དབང་ཐོབ་པའི་རྟགས་སོ། །ཡང་ན་ཅི་ཡང་མ་མཐོང་བའམ་ཞེས་པ་ནི་གོང་དུ་བསྟན་པའི་ལྟས་རྣམས་མེད་དོ། །རྨི་ལམ་ཆོས་ཉིད་སྟོང་པ་འདི་ལྟ་བུ་ཡིན་ནོ་ཞེས་སྟོན་ཅིང་བདག་གི་ཀྱང་བསྟན་པའི་རྨི་ལམ་ན་གཏོགས་པའོ། །མངོན་སུམ་གསང་བ་ཐམས་ཅད་ཀུན་ཞེས་བྱ་བ་ནི་རྨི་ལམ་དུ་མངོན་སུམ་དང་འདྲ་བར་ཁྱོད་ཀྱིས་ལུས་ལ་ནི་འཁོར་ལོ་རྣམ་པ་བཞི་ཡོད་དོ། །ཞེས་སྟོན་པ་དང་རང་གིས་ཀྱང་ཡིད་ཀྱི་ཡུལ་དུ་གསང་བ་མཐོང་བ་དེ་ནི་ཅིའི་དཀྱིལ་འཁོར་གྱི་དབང་ཐོབ་པའི་སྔ་ལྟས་སུ་རུང་བར་བཤད་དོ། །དེ་ནས་དབང་ཐོབ་པའི་ཡོན་ཏན་བསྟན་པའི་ཕྱིར། གང་ཞིག་དཀྱིལ་འཁོར་འདི་དག་ཏུ། །ཞེས་པ་ལ་སོགས་པས་བསྟན་ཏེ། གང་ཞིག་དཀྱིལ་འཁོར་འདི་དག་ཏུ་ཞེས་བྱ་བ་ནི་རིགས་ཀྱི་བུ་གང་སུ་རུང་བའི་དཀྱིལ་འཁོར་གོང་དུ་གསུངས་པའི་བྱེ་བྲག་དེ་དག་ཏུ་ཞུགས་ནས་དབང་ཐོབ་པའི་གང་ཟག་དེའི་ཡོན་ཏན་ནི་འོག་ནས་འབྱུང་བ་འདི་རྣམས་སོ། །འཇིག་རྟེན་གཙོ་དང་འཁོར་གྱིས་བསྐུར་ཞེས་བྱ་བ་ནི། འཇིག་རྟེན་འདི་ན་དབང་ཆེ་བའི་གཙོ་བོ་དང་། དེའི་འཁོར་རྣམས་ཀྱིས་བཀུར་སྟི་བྱེད་པར་འགྱུར་རོ། །ཚེ་རིང་བདེ་བ་ཕུན་སུམ་ཚོགས་པར་ཞེས་བྱ་བ་ནི། འཇིག་རྟེན་འདི་རུ་ཚེ་རིང་ཞིང་ལོངས་སྤྱོད་ཕུན་སུམ་ཚོགས་པར་འགྱུར་རོ། །ཀུན་གྱི་བསྟོད་ཅིང་བཀུར་བ་ད ང་ཞེས་པ་ནི། འཇིག་རྟེན་པ་ཀུན་གྱིས་བསྟོད་པ་དབུལ་ཞིང་ཐམས་ཅད་ཀྱིས་བཀུར་སྟི་བྱེད་པའོ། །སྡུག་ཅིང་བསྔགས་པ་བརྗོད་པ་དང་ཞེས་བྱ་བ་ནི། ཀུན་གྱི་ཡིད་དུ་འོང་ཞིང་ཡོན་ཏན་གྱི་བྱེ་བྲག་བརྗོད་པའོ། །ནད་མེད་ལང་ཚོ་བདེ་བ་དང་ཞེས་བྱ་བ་ནི། ནད་མེད་ཅིང་ཤིན་ཏུ་གཞོན་པར་གྱུར་པ་དང་། ཤེས་རབ་ཕུལ་དུ་ཕྱུང་བའི་ལང་ཚོ་བ་དང་། ལུས་ཡང་ཞིང་བདེ་བ་ཕུན་སུམ་ཚོགས་པའོ། །འཇིག་རྟེན་མཐུ་ཆེན་འདུལ་བ་དང་། ཞེས་བྱ་བ་ནི། འཇིག་རྟེན་འདི་ན་མཐུ་ཆེ་བའི་གནོད་སྦྱིན་ལ་སོགས་པ་འདུལ་བའོ། །སངས་རྒྱས་ཀུན་གྱི་སྲས་སུ་དགོངས་ཞེས་བྱ་བ་ནི། དུས་གསུམ་སངས་རྒྱས་ཀུན་གྱིས་ཀྱང་དུས་དམ་པར་ཐུགས་ཀྱིས་དགོངས་སོ། །རྒྱལ་སྲས་རྣམས་ཀྱི་གྲོགས་མཐོང་ཞེས་བྱ་བ་ནི། རྒྱལ་བའི་སྲས་པོ་རྣམས་ཀྱིས་སྤུན་དང་གྲོགས་སུ་མཐོང་ངོ་། །དེ་ལ་སོགས་ཏེ་བསམ་གྱིས་མི་ཁྱབ་ཅེས་པ་ལ་སོགས་པ་ནི། འཇིག་རྟེན་འདིའི་ཡོན་ཏན་མང་པོ་འབྱུང་ཞིང་། མི་དང་ལྷ་དང་ལྷ་མ་ཡིན་དང་གནོད་སྦྱིན་ལ་སོགས་པས་ཀྱང་བཀུར་བསྟི་བྱེད་དོ། །དེ་ནས་སྐུའི་དཀྱིལ་འཁོར་དང་ཐུགས་ཀྱི་དཀྱིལ་འཁོར་དང་གསུང་གི་དཀྱིལ་འཁོར་དང་གསུམ་པོ་གང་ཡང་རུང་སྟེ། ཞུགས་པའི་ཡོན་ཏན་འདྲ་བར་བསྟན་པའི་ཕྱིར། སངས་རྒྱས་དག་ནི་ཐམས་ཅད་ཀྱི། ཞེས་པ་ལ་སོགས་པ་གསུངས་ཏེ། གོང་དུ་གསུངས་པའི་དཀྱིལ་འཁོར་དུ་འཇུག་ཀྱི་ནང་ནས། སྐུའི་དཀྱིལ་འཁོར་ཙ་ཀ་ལི་བཀོད་པ་ལས། དེའི་དཀྱིལ་འཁོར་དུ་ཞུགས་ནས། རྣམ་པ་ཐམས་ཅད་འགྲུབ་པར་འགྱུར་ཏེ། ཇི་ལྟར་བསམ་པ་བཞིན་དུ་འགྲུབ་བོ། །གསུང་གི་དཀྱིལ་འཁོར་དུ་འཇུག་པའི་ཡོན་ཏན་བསྟན་པའི་ཕྱིར། གཞན་ཡང་སངས་རྒྱས་ཐམས་ཅད་ཀྱི་ཞེས་པ་ལ་སོགས་པ་བསྟན་ཏེ། གོང་དུ་གསུངས་པའི་སངས་རྒྱས་ཀྱི་གསུང་གི་དཀྱིལ་འཁོར་ཡི་གེར་བཀོད་པའི་ཕྱིར། ཡི་གེ་གསུང་གི་དཀྱིལ་འཁོར་བྲིས་པ་ལས་ཞེས་གསུངས་ཏེ། སོ་སོའི་གདན་སྟེངས་སུ་སོ་སོའི་ཡི་གེར་གསལ་བར་བཀོད་པའི་ཕྱིར། ཡི་གེ་གསུང་གི་ཕྱག་རྒྱ་ཚོགས། ཇི་བཞིན་གསལ་བར་བཀོད་པའོ་ཞེས་གསུངས་ཏེ། དེ་ལྟར་བཀོད་པའི་གསུང་གི་དཀྱིལ་འཁོར་དེར་ཞུགས་པའི་ཡོན་ཏན་ཡང་གོང་མ་དང་འདྲ་བའི་ཕྱིར། དཀྱིལ་འཁོར་དག་ཏུ་སློབ་མ་རྣམས། །ཞུགས་པ་ཡང་ནི་དེ་བཞིན་ནོ། །ཞེས་པས་བསྟན་ཏེ། དེ་ནས་ཐུགས་ཀྱི་དཀྱིལ་འཁོར་དུ་ཞུགས་པའི་ཡོན་ཏན་ཀུན་འདྲ་བར་བསྟན་ཏེ། ཐུགས་ཀྱི་དཀྱིལ་འཁོར་དམ་པ་དེ་ནི་ཕྱག་མཚན་དགོད་པ་སྟེ། དེ་བསྟན་པའི་ཕྱིར་ཐུགས་ཀྱི་དཀྱིལ་འཁོར་དམ་པ་ནི་ཞེས་པ་ལ་སོགས་པ་གསུངས་ཏེ། བསྟན་པའི་དཀྱིལ་འཁོར་སྐུའི་འཁོར་ལོ་དགོད་པ་དང་། གསུང་ཡིག་འབྲུ་དགོད་པ་དང་། ཐུགས་ཕྱག་མཚན་དགོད་པ་གསུམ་གྱི་དམ་པར་གྱུར་པ་ཐུགས་ཀྱི་དཀྱིལ་འཁོར་བྲི་བར་བསྟན་ཏེ། འཇིག་རྟེན་གྱི་དཀྱིལ་འཁོར་བྲིས་ནས་ཀྱང་ཞེས་གསུངས་པ་ཡིན་ནོ། །བརྙན་མའི་དཀྱིལ་འཁོར་སོ་སོའི་བཞུགས་གནས་སུ་སོ་སོ་ཕྱག་མཚན་བྲི་བའི་ཕྱིར། སོ་སོའི་རང་རྟགས་ཕྱག་མཚན་རྣམས། ཇི་བཞིན་གནས་སུ་དགོད་པ་རུ། ཞུགས་པ་ལ་སོགས་བྱས་པ་ན། །ཡོན་ཏན་དེ་དང་འདྲ་བ་ཐོབ། ཅེས་གསུངས་སོ། །དེ་ནས་དཀྱིལ་འཁོར་གསུམ་དུ་ངེས་པ་མེད་པར་བསྟན་པའི་ཕྱིར། སྐུ་དང་གསུང་དང་ཐུགས་ཀྱི་རྣམས་ཞེས་པ་ལ་སོགས་ཏེ། སྐུའི་དཀྱིལ་འཁོར་ལ་ཡང་གསུམ། གསུང་གི་དཀྱིལ་འཁོར་ལ་ཡང་གསུམ། ཐུགས་ཀྱི་དཀྱིལ་འཁོར་ལ་ཡང་གསུམ་སྟེ་དེའི་ཕྱིར། གཅིག་ལ་ཡང་གསུམ་གསུམ་ཡོད་པ་ཡིན་ཞེས་གསུངས་སོ། །གསུམ་པོ་རེ་རེ་ཡང་གསུམ་དུ་འགྱུར་ཏེ། དེ་བས་ན་རྣལ་འབྱོར་པ་བློ་དང་ལྡན་པས་ནི་དཀྱིལ་འཁོར་ལ་ངེས་པ་མེད་པར་ཤེས་པར་བྱའོ། །ཞེས་སྟོན་པས་གསུངས་སོ། །སྐུ་གསུང་ཐུགས་ཀྱི་གཟུགས་ཀྱི་དཀྱིལ་འཁོར་བསྟན་པས་ན་གཟུགས་ཀྱིི་དཀྱིལ་འཁོར་གྱི་ལེའུ། བདུད་རྩི་ཐིགས་པ་ཞེས་བྱ་བ་རྒྱ་ཆེར་འགྲེལ་པ་ལས། ཀུན་རྫོབ་ཀྱི་བདེན་པ་འབའ་ཞིག་གི་བཤད་པའི་ལེའུ་སྟེ་གསུམ་པའོ།། །།དེ་ལྟར་གཟུགས་ཀྱི་དཀྱིལ་འཁོར་བསྟན་ཀྱང་ཏིང་ངེ་འཛིན་གྱི་དཀྱིལ་འཁོར་མ་ཤེས་ན། རྟག་པའི་མཐའ་ལ་གནས་པ་དེ་གསལ་བའི་ཕྱིར། དེ་ནས་ཞེས་པ་ལ་སོགས་པ་གསུངས་ཏེ། གཟུགས་ཀྱི་ལེའུ་བཤད་པ་དེ་མ་ཐག་པ་དེ་ནས་ཏིང་ངེ་འཛིན་གྱི་དཀྱིལ་འཁོར་བཤད་དེ་གསུངས་པ། དེའི་ཕྱིར། དེ་ནས་རྒྱལ་བ་རྡོ་རྗེ་འཛིན་ཞེས་བྱ་བ་ནི། སྟོན་པའི་ངོ་བོ་ཉིད་དེ་ཡང་དག་པའི་དོན་དང་གཉིས་མི་འབྲལ་བས་རྡོ་རྗེ་འཛིན་ཞེས་བརྗོད་དོ། །ཐམས་ཅད་མི་འགྱུར་ནམ་མཁའ་ཆེ་ཞེས་བྱ་བ་ནི། སྟོན་པའི་ངོ་བོ་ཉིད་དེ། ཕྱི་ནང་དུ་སྣང་བའི་ཆོས་ཐམས་ཅད་སྐུ་གསུང་ཐུགས་ཀྱི་དཀྱིལ་འཁོར་དེ་ཡང་དོན་དམ་པར་ཡོད་པ་མ་ཡིན་ཏེ། དེ་སྣང་ལ་རང་བཞིན་མེད་པའོ། །རང་བཞིན་མེད་པ་དེ་ནས་གསུམ་དུ་འགྱུར་བ་མེད་དེ། བརྗོད་པ་དང་བྲལ་བ་ནམ་མཁའ་བཞིན་ནོ། །དེ་ལྟར་གསུམ་གྱི་དཀྱིལ་འཁོར་གསུམ་དུ་གསུངས་པ་དོན་དམ་པ་དང་རང་བཞིན་མེད་པར་བསྟན་པ་ནི། གསུམ་རྣམ་པར་དག་སྟེ་དེའི་ཕྱིར་རྣམ་པར་དག་གསུང་མཆོག་རྒྱལ་པོ་དེས། གསུང་ནི་འདི་སྐད་བཀའ་སྩལ་ཏོ། །མགོ་ནས་འབྱུང་བའི་འདི་སྐད་བཀའ་སྩལ་ཏེ། དེ་ཡང་ཏིང་ངེ་འཛིན་གྱིས་མ་ཟིན་ན་ཇི་ལྟར་བྱས་པ་དེ་ཐམས་ཅད་སྐྱོན་དུ་འགྱུར་བ་དེ་བསྟན་པའི་ཕྱིར། རྡོ་རྗེ་ཐིག་ནི་བཏབ་པ་དང་། ཞེས་པ་ལ་སོགས་པ་གསུངས་ཏེ། རྡོ་རྗེ་ཐིག་ནི་བཏབ་པ་དང་ཞེས་བྱ་བ་ནི། དང་པོ་བརྟག་པ་ད ང་མཇུག་ཐིག་གདབ་པའི་བར་དུ་ཇི་ལྟར་བྱས་པ་ལས་སོ། །ཚོན་རྩི་དག་ནི་དགྱེ་བའི་བརྙན་མའི་དཀྱིལ་འཁོར་ཏེ་ཞེས་བྱ་བ་ནི་ཚོན་གྱི་དགྱེ་བའི་ལས་དང་ཕྱག་མཚན་དང་ཡིག་འབྲུ་དང་། སྐུ་ལ་སོགས་པ་དགོད་པའི་བརྙན་མའི་དཀྱིལ་འཁོར་དེ། རྣལ་འབྱོར་པ་ཡང་དག་པའི་དོན་ལ་སེམས་མི་བྱའོ་བྱས་ན་སྐྱོན་ཅི་ཡོད་ཅེ་ན། ཡོད་དེ་བསྙན་མའི་དཀྱིལ་འཁོར་བྱས་ན་དངོས་པོ་ལ་མངོན་པར་ཞེན་པའི་སྐྱོན་ཡོད་པས་གཉིས་སུ་མེད་པའི་དངོས་གྲུབ་རྙེད་པར་དཀའ་བའི་ཕྱིར། བྱས་ན་དངོས་གྲུབ་བརྙེད་པར་དཀའ་ཞེས་གསུངས་པ་ཡིན་ནོ། །དེ་ནས་ཏིང་ངེ་འཛིན་གཙོ་བླང་བའི་ཕྱིར། དེ་བས་ཏིང་ངེ་འཛིན་ནན་ཏན་བསྒོམ་ཞེས་གསུངས་སོ། །དེ་ནས་སོ་སོའི་ཏིང་ངེ་འཛིན་བསྒོམ་པ་བསྟན་པའི་ཕྱིར། ནམ་མཁའ་དབྱིངས་ཀྱི་དབུས་གནས་པར་ཞེས་པ་ལ་སོགས་པ་སྟེ། ནམ་མཁའ་དབྱིངས་ཀྱི་དབུས་གནས་པར་ཞེས་བྱ་བ་ནི། ནམ་མཁའ་དབྱིངས་ཀྱི་དབུས་དབྱིངས་ཏེ། ཡི་གེ་ཨེ་ལས་གྲུབ་པའི་ཆོས་འབྱུང་བའི་གནས་ཏེ། དེའི་དབུས་སུ་བསྒོམ་པར་བྱའོ། །ཅི་བསྒོམ་ཞེ་ན། དབང་ཆེན་དཀྱིལ་འཁོར་བསྒོམ་པར་བྱ། །ཞེས་གསུངས་ཏེ། ཆོས་འབྱུང་བའི་ནང་དུ་རླུང་གི་དཀྱིལ་འཁོར་ཨེ་ལས་གྲུབ་པ་དང་། མེའི་དཀྱིལ་འཁོར་ཡི་གེ་རཾ་ལས་གྲུབ་པ་དང་། ཆུའི་དཀྱིལ་འཁོར་ཡི་གེ་བཾ་ལས་གྲུབ་པ་དང་། སའི་དཀྱིལ་འཁོར་ཡི་གེ་སུམ་ལས་གྲུབ་པ་དང་། རིན་པོ་ཆེའི་རི་རབ་ཡི་གེ་ལཾ་ལས་གྲུབ་པ་དེ་རྣམས་བསྒོམ་པར་བྱའོ། །གཞལ་ཡས་ཁང་མེ་འབར་བ་བསྒོམ་ཞེས་བྱ་བ་ནི། དཔག་ཅིང་གཞལ་བ་ལས་ཞེས་པས་གཞལ་ཡས་ཏེ། ཡི་གེ་བྷྲུཾ་ལས་གྲུབ་པའི་གཞལ་ཡས་ཁང་། རྟ་བབས་ལ་སོགས་པ་རྒྱན་སྣ་ཚོགས་པས་འཁྲིགས་ཤིང་གཞལ་ཡས་དེའི་ཕྱི་རོལ་ན་ཧཱུྃ་ལས་གྲུབ་པའི་རྡོ་རྗེ་གུར་ལ་མེ་འོད་འབར་བ་སྟེ། དེས་འཁྲིགས་པའོ། །འཁོར་ལོའི་རྒྱན་དང་རོལ་མོའི་ཚོགས་ཞེས་བྱ་བ་ནི་ཆོས་ཀྱི་འཁོར་ལོས་བརྒྱན་པ་དང་། གང་དུ་བརྒྱན་ཞེ་ན། རྟ་བབས་ཀྱི་སྟེང་དུ་བརྒྱན་པའོ། །རོལ་མོ་ནི་འདོད་པའི་ལྷ་མོ་སྟེ། གཟུགས་ཀྱི་ལྷ་མོ་གར་མཁན་མ་ལ་སོགས་པས་བརྒྱན་པའོ། །གང་དུ་བརྒྱན་ན་རྨང་གི་ཕྱག་ལ་བརྒྱན་ནོ། །དེ་ནི་རང་སྔགས་བདག་པོ་བསྒོམ་ཞེས་བྱ་བ་ནི། གཞལ་ཡས་ཁང་གདན་དང་བཅས་པ་དེར་ནི་རང་གི་སྔགས་ཀྱི་བདག་མོའི་འཁོར་དང་བཅས་པ་བསྒོམ་མོ། །འདིར་ཇི་ལྟར་གསུངས་པ་བཞིན་དུ་འོག་མ་རྣམས་ལ་ཡང་སྦྱར་བར་བྱ་སྟེ། སྤྱིའི་ཚིག་དེ་ཀུན་ལ་ཁྱབ་པའོ། །དེ་ནས་རྡོ་རྗེ་འཛིན་པའི་ཏིང་ངེ་འཛིན་བསྟན་པའི་ཕྱིར། ནམ་མཁའི་དབྱིངས་ཀྱི་དབུས་ནི་རྡོ་རྗེ་དཀྱིལ་འཁོར་བསྒོམ་པར་བྱ་ཞེས་བྱ་བ་ནི། ཆོས་འགྱུར་བའི་ཕྱག་རྒྱ་དེ་ནི་ནམ་མཁའ་སྟེ་དེའི་དབུས་སུ་གཞལ་ཡས་ཁང་བསྒོམ་པ་དེ། དེའི་ནང་དུ་རྡོ་རྗེ་དཀྱིལ་འཁོར་བསྒོམ་པར་བྱའོ། །རང་སྔགས་རྡོ་རྗེ་ཅན་གྱིས་གཟུགས་ཞེས་བྱ་བ་ནི་རང་གི་ཀུན་གཞི་རྣམ་པར་ཤེས་པ་རྡོ་རྗེ་འཛིན་པའི་སྐུ་བསྒོམས་ན། འཕགས་པའི་གནས་ཐོབ་པའི་དུས་སུ་གཉིས་སུ་མེད་པའི་རྡོ་རྗེ་ཅན་དུ་འགྱུར་རོ། །ཞེས་སྟོན་པས་གསུངས་སོ། །དེ་ནས་འཁོར་ལོ་ཅན་གྱི་ཏིང་ངེ་འཛིན་བསྟན་པའི་ཕྱིར། ནམ་མཁའ་དབྱིངས་ཀྱི་དབུས་སུ་ནི་ཞེས་བྱ་བ་ལ་སོགས་པ་གསུངས་ཏེ། བསྒོམ་ན་འཁོར་ལོ་ཅན་དུ་འགྱུར་ཞེས་བསྟན་ཏོ། །དེ་ནས་རིན་པོ་ཆེའི་ཏིང་ངེ་འཛིན་བསྟན་པའི་ཕྱིར། རིན་ཆེན་དཀྱིལ་འཁོར་བསྒོམ་པར་བྱ་ཞེས་པ་དང་། རིན་ཆེན་འཛིན་པས་བསྟན་ཏོ། །པདྨོའི་ཏིང་ངེ་འཛིན་བསྟན་པའི་ཕྱིར། པདྨོ་ཞེས་པ་ནས་པདྨོ་ཅན་དུ་འགྱུར་ཞེས་པས་བསྟན་ཏོ། །ལས་ཀྱི་ཏིང་ངེ་འཛིན་བསྟན་པའི་ཕྱིར། ལས་ཀྱི་ཞེས་པ་ནས། ལས་ཀྱི་སེམས་པར་འགྱུར་ཞེས་པས་བསྟན་ཏོ། །དེ་ནས་སྤྱིའི་དཀྱིལ་འཁོར་དུ་བསྟན་ཅིང་ཏིང་ངེ་འཛིན་བསྟན་པའི་ཕྱིར། སངས་རྒྱས་ཀུན་གྱི་ཞེས་པ་ནས་སངས་རྒྱས་ཀུན་དང་མཉམ་པར་འགྱུར་ཞེས་པས་བསྟན་ཏེ། ཡེ་ཤེས་དྲུག་པའི་ངོ་བོ་ཉིད་དོ། །དེ་ནས་ཏིང་ངེ་འཛིན་དེ་བསྒོམ་པར་བྱ་བའི་གནས་བསྟན་པའི་ཕྱིར། རབ་ཏུ་དབེན་པའི་གནས་དག་གམ་ཞེས་པ་ལ་སོགས་པས་བསྟན་ཏེ། རབ་ཏུ་དབེན་པའི་ནས་ནི་དུར་ཁྲོད་དེ་ལ་མ་མོའི་དབེན་པ་དང་། རི་བོ་ནི་སྦྲུལ་གདུག་པ་ཡོད་པས་དབེན་པ་དང་། ཆུ་གླིང་གི་ཆུ་སྲིན་གྱིས་དབེན་པ་དང་། ནགས་འདབས་ནི་སྟག་དང་དོམ་གྱིས་འཇིགས་པ་མི་འོང་བས་དེ་ལྟ་བུའི་གནས་སུ་ཏིང་ངེ་འཛིན་བསྒོམས་ན་ནི། རྣལ་འབྱོར་པ་ཉིད་ཇི་ལྟར་འདོད་པའི་དངོས་གྲུབ་ཐོབ་པར་འགྱུར་རོ། །དེ་ཅི་ཙམ་དུ་བསྒོམས་ན་ཐོབ་པའི་ཚད་བསྟན་པའི་ཕྱིར། རྣལ་འབྱོར་ཅན་གྱི་ཟླ་དྲུག་ཏུ། བསྒོམས་ན་དངོས་གྲུབ་ཐོབ་པར་འགྱུར་ཞེས་པས་བསྟན་ཏེ། ཡང་དག་པའི་ཏིང་ངེ་འཛིན་དང་། འབྱོར་པའི་རྣལ་འབྱོར་པས་ཟླ་བ་དྲུག་ཏུ་བསྒོམས་ན་ངེས་པར་ཇི་ལྟར་འདོད་པ་འགྲུབ་པར་འགྱུར་རོ། །དེ་ནས་རྣལ་འབྱོར་ལ་གནས་པའི་དུས་སུ། ནང་གི་སྦྱིན་སྲེག་བྱ་བ་བསྟན་པའི་ཕྱིར། གླང་པོའི་ཤ་ལ་སོགས་པའི་ཞེས་བྱ་བ་ལ་སོགས་པས་བསྟན་ཏེ། ཨ་ལས་བྷནྡ་དཀར་པོ་སྒོ་ང་བཅས་པ་འདྲ་བ་ཞིག་བསྐྱེད་དོ། །དེའི་འོག་ཏུ་རཾ་ལས་མེའི་དཀྱིལ་འཁོར་གྲུ་གསུམ་པ་ཞིག་བསྐྱེད་དོ། །དེའི་འོག་ཏུ་ཡཾ་ལས་རླུང་གི་དཀྱིལ་འཁོར་གཞུ་དབྱིབས་འདྲ་བ་སྔོན་པོ་བ་དན་བཞིས་མཚན་པ་ཞིག་བསྐྱེད་དོ། །དེ་ནས་བྷནྡའི་ནང་དུ་གླང་པོའི་ཤ་དང་རྟ་ཤ་དང་ནམ་མཁའ་ལྡིང་གི་ཤ་དང་ཁྱིའི་ཤ་དང་བྱའི་ཤ་སྟེ་ལྔ་བསམ་མོ། །དེའི་སྟེང་དུ་དྲི་ཆེན་དང་དྲི་ཆུ་དང་། པདྨ་རཀྟ་དང་། མང་ས་དང་། བྱང་ཆུབ་ཀྱི་སེམས་དང་ལྔ་བསམ་པར་བྱའོ། །དེའི་སྟེང་དུ་ཨ་ལས་ཟླ་བའི་དཀྱིལ་འཁོར་ལྔ་བསམ་པར་བྱའོ། །དེའི་སྟེང་དུ་ༀ་ཨཾ་དང་ཧཱུྃ་སྭ་དང་ཧ་རྣམས་སོ། །སའི་ཕྱོགས་སུ་བསམ་པར་བྱའོ། །བྷནྡ་དེའི་ནམ་མཁའ་ལ་ཟླ་བའི་དཀྱིལ་འཁོར་དེའི་སྟེང་དུ་ཧཱུྃ་ལས་རྡོ་རྗེ། རྡོ་རྗེའི་བུམ་པའི་ནང་དུ་ཡང་ཧཱུྃ་ངོ་། །ཡིག་འབྲུ་ལྔ་པ་དེ་ལས་འོད་ཟེར་འཕྲོས་པས། དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ལ་ཕོག་པས། ཐུགས་དམ་གྱི་རྒྱུད་བསྐུལ་ཏེ། སླར་ཡིག་འབྲུ་ལ་ཐིམ་པས། ཡི་གེ་དང་བདུད་རྩི་ལྔ་རྣམས་ཡོངས་སུ་གྱུར་པ་ལས། རིགས་ལྔའི་སྐུ་མདོག་དང་ཕྱག་མཚན་དང་རྒྱན་རྣམས་ཤིན་ཏུ་གསལ་བར་བལྟའོ། །ཤ་ལྔ་ལས་ནི་གླང་པོ་ཆེའི་ཤ་གླང་པོ་ཆེའི་གདན་ལ་སོགས་པའི་གདན་ལྔར་གྱུར་ཏེ། གླང་པོ་ཆེའི་ཤ་ལས་ནི་གླང་པོ་ཆེའི་གདན་དུ་གྱུར་རོ། །རྟ་ཤ་ལས་ནི་རྟའི་གདན་ཉིད་དུ་འགྱུར་རོ། །བྱ་ཤ་ལས་ནི་བྱའི་གདན་དུ་འགྱུར་རོ། །ནམ་མཁའ་ལྡིང་གི་ཤ་ལས་ནི་ཤང་ཤང་གི་གདན་དུ་འགྱུར་རོ། །ཁྱི་ཤ་ལས་ནི་སེང་གེའི་གདན་དུ་འགྱུར་རོ། །དེ་ནས་རྡོ་རྗེ་བུམ་པའི་ནང་ན་གནས་པའི་ཧཱུྃ་ལས་འོད་ཟེར་འཕྲོས་པས། བདེ་བར་གཤེགས་པ་ཐམས་ཅད་རིགས་ལྔའི་མཚན་ཉིད་དུ་མཛད་དེ། དེ་སྤྱན་དྲངས་ནས་བསྟིམ་ནས་དེ་ལ་མཆོད་པ་རྣམ་ལྔ་དབུལ་བར་བྱའོ། །དེའི་རྗེས་ལ་སོ་སོ་རང་རང་གི་ཐུགས་ཀ་ནས་འོད་ཟེར་ལྕགས་ཀྱུ་འཕྲོས་པས། དེ་དུས་གསུམ་གྱི་སངས་རྒྱས་ཐམས་ཅད་ཀྱི་བདུད་རྩིའི་ངོ་བོར་སྤྱན་དྲངས་ཏེ། རིགས་ལྔ་ལ་ཐིམ་པས་རིགས་ལྔ་གདན་དང་བཅས་པར་བདུད་རྩིའི་ངོ་བོར་ཞུ་བར་གྱུར་ཏོ། །དེའི་སྐབས་ཉིད་དུ་རྡོ་རྗེའི་ཧཱུྃ་ལས་འོད་ཟེར་གོང་མ་བཞིན་དུ་འཕྲོས་པས་བདུད་རྩི་ཡང་དགུག་སྟེ་བསྟིམ་པའི་རྗེས་ལ། ཧཱུྃ་གིས་འོད་ཟེར་གྱིས་རླུང་གི་དཀྱིལ་འཁོར་བསྐྱེད་དོ། །དེས་མེའི་དཀྱིལ་འཁོར་སྦར། མེས་བྷནྡ་བསྐོལ་ཏེ། གཅིག་གིས་གཅིག་བསྐྱེད་པས། རྡོ་རྗེ་ཡང་ལྷུང་སྟེ་བདུད་རྩིའི་ངོ་བོར་འགྱུར་ཏེ། བྷན་དྷ་དང་རྡོ་རྗེ་གཉིས་ཐབས་དང་ཤེས་རབ་བོ། །དེ་ལས་བདུད་རྩི་དཀར་ལྷུང་ལྷུང་གནས་པ་དེ་ལས་ཡི་གེ་གསུམ་གྱིས་བྱིན་གྱིས་བརླབས་ཏེ། ༀ་ཨཱ་ཧཱུྃ་གསུམ་གྱིས་བྷན་དྷ་ཁ་གཅོད་པའོ། །དེ་ནི་བདུད་རྩི་བྱིན་གྱིས་བརླབས་པའོ། །དེ་ནས་བཟའ་བའི་ཏིང་ངེ་འཛིན་བསྟན་ཏེ། བདག་ཉིད་ཀྱི་ཡེ་ཤེས་སེམས་དཔའི་ཐུགས་ཀར་དཀྱིལ་འཁོར་འཁོར་ལོ་སྐད་ཅིག་མའི་ཏིང་ངེ་འཛིན་གྱིས་བསྐྱེད་ལ། བདག་ཉིད་ཀྱི་ལྕེ་ལ་ཧཱུྃ་ལས་རྡོ་རྗེའི་བུམ་པའི་ནང་ན་ཧཱུྃ་གནས་པ་དེའི་འོད་ཟེར་གྱིས་དྲངས་ནས་བཟའ་བར་བསམ། ལས་ཀྱི་རྡོ་རྗེ་བྱིན་ལ་བཟའ་བ་དང་། གཉིས་སུ་ཤེས་པར་བྱའོ། །དེ་ལྟར་རྣལ་འབྱོར་པས་བཟའ་བར་བསྟན་པའི་ཕྱིར། ཤ་ལྔ་དག་ལ་བྱིན་གྱིས་བརླབས། ཟས་ཕྱིར་འདི་དག་བཟའ་བར་བྱ་སྟེ། ཁ་ཟས་གཞན་ལ་ཆགས་མི་བྱ། ཞེས་པ་ལ་སོགས་པ་གསུངས་ཏེ། བདུད་རྩིའི་ཟས་བཟའ་བ་ལས་མ་རྟགས་པར་ཟས་ཕལ་པ་ལ་ཆགས་པར་བྱ་བ་ནི་མ་ཡིན་ནོ། །བདུད་རྩི་དེས་བདག་ཉིད་ཀྱི་ཐུགས་ཀའི་འཁོར་ལོ་ཚིམ་པར་བསམ་པ་ནི། ནང་གི་སྦྱིན་སྲེག་བྱ་ཞེས་བྱ་བ་སྟེ། ཟ་བའི་ཏིང་ངེ་འཛིན་ཏོ། །དེ་ནས་ཡང་སྐུ་གསུང་ཐུགས་ཀྱི་དཀྱིལ་འཁོར་བསྒོམ་པར་བསྟན་ཏེ། དེ་ཡང་སྔོན་ལ་སྐུའི་དཀྱིལ་འཁོར་བསྒོམ་པར་བསྟན་པའི་ཕྱིར། ནམ་མཁའ་དབྱིངས་ཀྱི་དབུས་གནས་པར། །རང་སྔགས་སྐུ་ནི་རྣམ་པ་ཀུན། །ཇི་ལྟར་བསྒོམ་ན་འགྲུབ་པར་འགྱུར། །ཞེས་པ་ལ་སོགས་པ་གསུངས་ཏེ། ཆོས་འབྱུང་བའི་དབུས་སུ་གོང་གི་རིམ་པ་ཇི་བཞིན་པའི་གནས་སུ་སྐུའི་དཀྱིལ་འཁོར་བསྒོམས་ན། འཕགས་པའི་གནས་སུ་གྱུར་པའི་དུས་ན། མཚན་དང་དཔེ་བྱད་དུ་ལྡན་པར་འགྱུར་ཏེ། ཡོངས་སུ་རྫོགས་པའི་ཏིང་ངེ་འཛིན་ཏོ། །དེ་ནས་གསུང་གི་ཏིང་ངེ་འཛིན་བསྒོམ་པ་བསྟན་ཏེ། དེའི་ཕྱིར་ནམ་མཁའ་དབྱིངས་ཀྱི་དབུས་གནས་པར། རང་སྔགས་ཡི་གེ་རྣམ་པ་ཀུན། །ཇི་བཞིན་བསྒྲུབ་ན་འགྲུབ་པར་འགྱུར། །ཞེས་པ་ནི། འཕགས་པའི་དུས་ན་གསུང་འགག་པ་མེད་པའི་ཏིང་ངེ་འཛིན་ལ་མངའ་བརྙེས་པ་སྟེ། ཆོས་ཀྱི་ཕྱག་རྒྱ་དང་ལྡན་པའོ། །དེ་ནས་ཡང་ཐུགས་ཀྱི་དཀྱིལ་འཁོར་བསྟན་པའི་ཕྱིར། ནམ་མཁའི་དབྱིངས་ཀྱི་ཞེས་པ་ནས་འགྲུབ་འགྱུར་འདི་ལ་ཐེ་ཚོམ་མེད་ཅེས་པས་བསྟན་ཏེ། ལས་དང་པོ་པས་ཏིང་ངེ་འཛིན་གོམས་པས་ལན་ཅིག །འཕགས་པའི་སྐུ་ཐོབ་པའི་དུས་ན་ཐུགས་སྤྲོས་པ་མེད་པའི་ཏིང་ངེ་འཛིན་ལ་དབང་བསྒྱུར་རོ། །དེ་ནས་ཏིང་ངེ་འཛིན་བསྒོམ་ལ་སྙན་ལ་སོགས་པའི་རྫས་དང་། ཡོ་བྱད་ལ་སོགས་པ་མེད་ཀྱང་འགལ་བ་མེད་ཅིང་བསྒྲུབ་པར་བསྟན་པའི་ཕྱིར། རྩེ་གཅིག་པའི་ཏིང་ངེ་འཛིན་ཞེས་པ་ནི། གོང་དུ་གསུངས་པའི་ཏིང་ངེ་འཛིན་ལ་གཞན་དུ་མི་གཡོ་བས་རྩེ་གཅིག་པ་སྟེ། དེ་ལ་གནས་ཤིང་བསྒོམས་ན། གོང་འདོད་པ་ལས་བྱེད་པས་ན་དེ་ལ་ནི་ཆོ་ག་སྟེ་བསྐྱེད་པའི་རིམ་པ་དང་། རྫས་དང་ཡོ་བྱད་རྣམས་ཚོགས་ན་ཡང་ནི་གཙོ་བོར་བཤད་དོ། །ཏིང་ངེ་འཛིན་དང་ལྡན་ན་ངེས་པར་འགྲུབ་པ་སྟེ། དེ་བས་ཏིང་ངེ་འཛིན་ལ་ནན་ཏན་ཆེར་བསྐྱེད་དེ། ཡང་ནས་ཡང་དུ་ཏིང་ངེ་འཛིན་གྱི་དཀྱིལ་འཁོར་བསྒོམ་པར་བྱའོ། །དེ་ནས་ཏིང་ངེ་འཛིན་གྱི་སེམས་འདུལ་བའི་ཐབས་དཔེ་བསྟན་པའི་ཕྱིར། དཔེར་ན་གླང་ཆེན་སྨྱོན་པ་དག །གདུལ་ཐབས་ལྕགས་ཀྱུས་འདུལ་བ་ལྟར་ཞེས་བྱ་བས་བསྟན་ཏེ། དཔེར་ན་གླང་པོ་ཆེ་སྨྱོན་པ་དག་འདུལ་བའི་དུས་ན། སྐྱེས་བུ་རྩལ་པོ་ཆེས་ལྕགས་ཀྱུས་དཔྲལ་བ་ནས་གཟུང་ནས་འདུལ་བ་ལྟར། བྱང་ཆུབ་ཀྱི་སེམས་ཀྱང་འདུལ་བར་བསྟན་པའི་ཕྱིར། རང་སེམས་རྨུ་རྒོད་འདུལ་དཀའ་ཡང་ཞེས་བྱ་བ་ལ་སོགས་པ་གསུངས་ཏེ། རང་སེམས་རྨུ་རྒོད་འདུལ་དཀའ་ཡང་ཞེས་བྱ་བ་ནི། རང་གི་སེམས་ནི་རླུང་ལ་ཞོན་ནས་ཀུན་ནས་འགྲོ་སྟེ་ཤིན་ཏུ་འདུལ་བར་དཀའ་བའོ། །འོན་ཏེ་གང་གིས་ཐུབ་པར་འགྱུར་ཞེ་ན། མཉམ་བཞག་ཏིང་འཛིན་རྩེ་གཅིག་གིས། བཏུལ་ནས་དངོས་གྲུབ་ཡ་མཚན་འགྱུར། །ཞེས་བྱ་བར་བསྟན་ཏེ། དང་པོ་རང་གི་སེམས་དབུགས་ཀྱི་རྟ་ལ་ཞོན་ནས་མི་ཐུབ་པར་ཡུལ་ཕྱིན་པའི་དུས་སུ། རྟེན་གྱི་རིགས་ཐམས་ཅད་གཞལ་ཡས་ཁང་གི་རང་བཞིན་དུ་བསྟན། བརྟེན་གྱི་རིགས་ཐམས་ཅད་ལྷའི་སྐུར་བསྟན་ཏེ། དེས་སེམས་བརྟས་པར་བྱ་བའི་ལས་ཏེ། ཀུན་རྫོབ་ཀྱི་བདེན་པའོ། །སེམས་དེ་བསྐྱེད་པའི་རིམ་པ་ལ་བསྟན་པར་གྱུར་ཙམ་ན། རྫོགས་པའི་རིམ་པ་ལ་གནས་པར་བྱ་སྟེ། ལྟ་བའི་དངོས་པོ་ཐམས་ཅད་ཀྱང་སྣང་ལ་རང་བཞིན་མེད་དེ། བྱང་ཆུབ་ཀྱི་སེམས་འབའ་ཞིག་ཏུ་འགྱུར་རོ། །བྱང་ཆུབ་ཀྱི་སེམས་འབའ་ཞིག་ཏུ་གྱུར་ཙམ་ན་སེམས་འཕྲོ་བར་གྱུར་པའི་བྱ་བའི་ཡུལ་མེད་དེ། མཉམ་པ་ཉིད་དུ་འགྱུར་རོ། །དེའི་ཕྱིར་མཉམ་བཞག་ཏིང་ངེ་འཛིན་རྩེ་གཅིག་གི་ཞེས་བྱ་བ་ཡིན་ཏེ། དེའི་ངང་ལ་གནས་ཤིང་གནས་པའི་དུས་ན། གཉིས་སུ་མེད་པའི་ཡེ་ཤེས་ཐོབ་པར་འགྱུར་ཏེ། དེ་ལ་ནི་བཏུལ་ནས་དངོས་གྲུབ་ཡ་མཚན་དུ་འགྱུར་ཞེས་གསུངས་པ་ཡིན་ནོ། །དེ་ནས་མཚན་མ་ལ་སོགས་པ་བསྒོམ་ནས་གཉིས་སུ་མེད་པའི་ཡེ་ཤེས་མི་འབྱུང་ངམ་ཞེ་ན། མི་འབྱུང་བར་བསྟན་པའི་ཕྱིར། མཚན་མ་དག་གི་གཟུགས་བརྙན་དང་ཞེས་པ་ལ་སོགས་པས་བསྟན་ཏེ། མཚན་མ་དག་གི་གཟུགས་བརྙན་དང་ཞེས་བྱ་བ་ནི། མཚན་མའི་གཟུགས་བརྙན་ལྷའི་སྐུ་རུ་བསྒོམ་པ་དང་། གསུང་གི་མཚན་མ་ཡིག་འབྲུ་བསྒོམ་པ་དང་། ཐུགས་ཀྱི་མཚན་མ་ཕྱག་མཚན་དུ་བསྒོམ་པ་ལ་སོགས་པ་བྱས་ཀྱང་གཉིས་སུ་མེད་པའི་ཡེ་ཤེས་མི་འབྱུང་སྟེ། རྟག་པའི་སྐྱོན་གྱིས་བཅིང་པའི་ཕྱིར་རོ། །དེར་མ་ཟད་དེ་ལུགས་མ་ལ་སོགས་པ་ཕྱག་རྒྱ་ལ་སོགས་པས་ཀྱང་གཉིས་སུ་མེད་པའི་ཡེ་ཤེས་མི་སྐྱེ་སྟེ། དེའི་ཕྱིར་མཚན་མའི་ཏིང་ངེ་འཛིན་བསྒོམ་བྱས་ནས་ཀྱང་། རང་གི་རྣལ་འབྱོར་མི་འབྱུང་སྟེ་ཞེས་གསུངས་པ་ཡིན་ནོ། །འོ་ན་རྣལ་འབྱོར་གང་ལས་བྱུང་ཞེ་ན། དེ་བསྟན་པའི་ཕྱིར། བྱང་ཆུབ་སེམས་ལ་གཞོལ་བའི་མིས་ཞེས་པ་ལ་སོགས་པས་གསུངས་ཏེ། བྱང་ཆུབ་ཀྱི་སེམས་ལ་ཡང་གཉིས་ལས་དོན་དམ་པའི་བྱང་ཆུབ་ཀྱི་སེམས་དང་། ཀུན་རྫོབ་བྱང་ཆུབ་ཀྱི་སེམས་ཀྱི་དོན་དམ་པ་བྱང་ཆུབ་ཀྱི་སེམས་མཚོན་པ་ཡིན་ཏེ། བྱང་ཆུབ་ཀྱི་སེམས་བདེ་བ་ཆེན་པོའི་གནས་ནས་དྲངས་པའི་དུས་ན། ནོར་བུའི་ནང་དུ་རིན་པོ་ཆེའི་གནས་སུ་གཟུང་བ་དང་། ཡེ་ཤེས་བསྐྱེད་དེ་དེ་ལ་ནི། རང་གི་རྣལ་འབྱོར་ལྡན་འགྱུར་རོ་ཞེས་གསུངས་ཏེ། བདེ་བ་ཆེན་པོའི་ལྷ་ཞེས་བྱའོ། །ཡེ་ཤེས་ལ་ནི་ཁུ་བ་དང་ལྷན་ཅིག་སྐྱེས་པའི་ཡེ་ཤེས་ཞེས་བྱའོ། །དེའི་ངང་ལས་ཡང་ནས་ཡང་དུ་འདྲིས་པ་དང་། དུས་ནམ་ཞིག་ན་རང་བཞིན་ལྷན་ཅིག་སྐྱེས་པའི་ཡེ་ཤེས་རྟོགས་པར་འགྱུར་ཏེ། དེའི་ཕྱིར་དེ་བས་ནན་ཏན་རྩེ་གཅིག་གིས། མཚན་མ་མེད་ལ་བརྩོན་པར་འབད་ཅེས་གསུངས་སོ། །ཞེས་པས་བསྟན་ཏེ་དོན་དམ་པའི་བདེན་པའོ། །ཏིང་ངེ་འཛིན་གྱི་དཀྱིལ་འཁོར་དངོས་སུ་སྟོན་པའི་ལེའུ་ནི་ཏིང་ངེ་འཛིན་གྱི་དཀྱིལ་འཁོར་གྱི་ལེའུའོ། །བདུད་རྩི་ཐིགས་པ་རྒྱ་ཆེར་བཤད་པ་ལས། བདེན་པ་གཉིས་ཀྱི་བཤད་པའི་ལེའུ་སྟེ་བཞི་པའོ།། །།དེ་ལྟར་གཟུགས་བརྙན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་བསྟན་ཀྱང་། སྔགས་དང་ཕྱག་རྒྱ་མ་གསུངས་ན། སེམས་ཅན་གྱི་དོན་མི་འགྲུབ་པའི་ཕྱིར། དེ་ནས་ཞེས་པ་ལ་སོགས་པས་བསྟན་ཏེ། བཅོམ་ལྡན་འདས་གསང་བ་མཆོག་གི་བདག་པོ་ལ་སྡུད་པ་པོས་སྔགས་དང་ཕྱག་རྒྱའི་དོན་ཞུས་པ་བསྟན་པའི་ཕྱིར། དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་ལ་རྡོ་རྗེ་ཡིས་ཀུན་ཏུ་བཟང་པོ་ལ་གསོལ་བ་ཞེས་པ་ནི་བཤད་པར་བྱ་བའི་ཚིག་ཕྲད་དོ། །ཅི་ཞིག་གསོལ་ཞེ་ན་འོག་ནས་འབྱུང་བའི་ཚིག་འདི་དག་རྣམས་སོ། །བཅོམ་ལྡན་འདས་སངས་རྒྱས་ཐམས་ཅད་ཀྱི་སྔགས་དང་ཕྱག་རྒྱ་རྣམས་ཀྱི་མཚན་ཉིད་སེམས་ཅན་ཐམས་ཅད་ལ་སྨན་པའི་སླད་དུ་བཤད་དུ་གསོལ་ཞེས་པས་ཞུས་པའི་ཚིག་སྟེ། བཅོམ་ལྡན་འདས་ཞེས་བོས་ནས། སངས་རྒྱས་ཐམས་ཅད་ཀྱི་སྔགས་བཟླས་པས་ཅི་ལྟར་འགྱུར། ཕྱག་རྒྱ་བཅས་པས་ཇི་ལྟར་འགྱུར། སྔགས་དང་ཕྱག་རྒྱའི་མཚན་ཉིད་དེ་ཕྱི་རབས་ཀྱི་རྣལ་འབྱོར་པ་དང་སེམས་ཅན་རྣམས་ལ་སྨན་པའི་སླད་དུ་བཅོས་ནས་བཅོམ་ལྡན་འདས་ཀྱིས་བཤད་དུ་གསོལ་ཞེས་སྡུད་པ་པོས་ཞུས་པའི་ཚིག་གོ། །དེ་ཞུས་པའི་ཚིག་དེ་ལ་ལན་གླན་པའི་ཕྱིར། དེ་ནས་བཅོམ་ལྡན་འདས་གསང་བ་མཆོག་གི་བདག་པོས་སྔགས་དང་ཕྱག་རྒྱ་འདི་དག་བཤད་དོ། །ཞེས་པ་ལ་སོགས་པས་བསྟན་ཏེ། བཅོམ་ལྡན་འདས་ཀྱིས་བཤད་དོ་ཞེས་པའི་ཚིག་གི་འཕྲད་དོ། །སེམས་དཔའ་ཆེན་པོ་ཉོན་ཅིག་ཅེས་བྱ་བ་ནི་བོད་པའི་ཚིག་སྟེ། སེམས་དཔའ་ཆེན་པོ་ཞེས་སྡུད་པ་པོ་ལ་བོས་ནས། སྔགས་དང་ཕྱག་རྒྱའི་དོན་འདི་བཤད་ཀྱིས་ལུས་ངག་ཡིད་གསུམ་གྱི་སྒོ་ནས་ཚུར་ཉོན་ཅིག་ཅེས་པའོ། །དེ་ནས་སྔགས་དང་ཕྱག་རྒྱའི་དོན་བསྟན་པའི་ཕྱིར། འདི་ནི་སངས་རྒྱས་ཐམས་ཅད་ཀྱི་ཞེས་པ་ལ་སོགས་པ་གསུངས་ཏེ། འདི་ནི་སངས་རྒྱས་ཐམས་ཅད་ཀྱི་ཞེས་འབྱུང་བ་འོག་ནས་འབྱུང་བའི་སྔགས་འདི་ནི་སངས་རྒྱས་ཐམས་ཅད་ཀྱི་དཀྱིལ་འཁོར་གང་ཡིན་པ་བསྒོམ་ཞིང་སེམས་བརྟག་པར་བྱས་ཏེ་སྔགས་འདི་བཟླས་ནས་ཕྱག་རྒྱས་བཅས་ན་ཇི་ལྟར་ཡང་འགྲུབ་པར་འགྱུར་ཏེ། དེའི་ཕྱིར་ལས་གང་བསྒྲུབ་པའི་སྙིང་པོ་ཡིན་ཞེས་གསུངས་སོ། །འདི་ལ་གང་ཞིག་དད་མོས་པ། །སྣང་མཛད་སེམས་དཔའ་ཉིད་འདྲར་འགྱུར། །ཞེས་བྱ་བ་ནི་སྔགས་དང་ཕྱག་རྒྱ་འདི་ལ་མོས་པའི་གང་ཟག་དེས་དང་པོ་ལྷའི་རྣལ་འབྱོར་ལ་སེམས་བསྟན་པར་བྱས་ལ། དེ་ནས་བདག་ཉིད་ཀྱི་སྙིང་ཁ་ནས་པདྨ་འདབ་མ་བརྒྱད་པའི་སྟེང་ན་ཟླ་བའི་དཀྱིལ་འཁོར་དེའི་སྟེང་ན་ཉི་མའི་དཀྱིལ་འཁོར་དེ་གཉིས་ཀྱི་བར་ན་འཁོར་ལོའི་ལྟེ་བའི་ནང་ན་ཟླ་བའི་དཀྱིལ་འཁོར་དེའི་དབུས་ན་ༀ་གནས་ཏེ་ལྷག་མ་ཡི་གེ་རྣམས་ཀྱིས་ལངས་པའི་ཐབས་སུ་གཡས་ནས་བསྐོར་བར་གནས་ཏེ། དེ་ནས་དབུགས་འབྱུང་བའི་དུས་ན་རྩ་གཡས་ནས་ཞུགས་ཏེ། སྣ་བུག་གཡས་ནས་བྱུང་ནས་ཇི་ཙམ་དུ་དབུགས་བྱུང་བའི་ཡི་གེའི་ཕྲེང་བ་དེ་ལྟ་བུའོ། །ནང་དུ་དབུགས་འཇུག་པའི་དུས་ན་ཡང་སྣ་བུག་གཡོན་ནས་འཇུག་སྟེ། རྩ་གཡོན་པའི་གནས་ནས་ཡང་བཞི་པོ་ལ་ཐིམ་སྟེ་ཅི་སྲིད་ནང་ན་གནས་པའི་བར་དུ་གཟུང་བར་བྱའོ། །དེ་ལྟར་བྱས་ཤིང་ཡང་ནས་ཡང་དུ་གོམས་པ་དང་། འཇུག་ཇི་སྲིད་འདོད་པ་བཞིན་དུ་འགྲུབ་སྟེ། བདེ་བར་གཤེགས་པ་མཆོད་པར་འདོད་པའི་དུས་ན་བདེ་བར་གཤེགས་པ་ལ་དམིགས་ནས་ཕྱག་རྒྱ་བཅས་སྔགས་བཟླས་པས་སྔགས་དང་ཕྱག་རྒྱ་ལས་མཆོད་པའི་ལྷ་མོ་མང་པོ་འཐོན་ནས་མཉེས་པ་དབུལ་བར་འགྱུར་རོ། །སེམས་ཅན་གྱི་དོན་བྱེད་པར་འདོད་ན་གང་ཡིན་པའི་སེམས་ཅན་དེ་ལ་ཕྱག་རྒྱ་གཏད་ནས་སྔགས་བཟླས་པས་བླ་ན་མེད་པའི་ཡེ་ཤེས་ཀྱི་ས་ཐོབ་པར་འགྱུར་རོ། །སྔགས་དང་ཕྱག་རྒྱ་དེ་ལས་རྣམ་པ་གཉིས་གཉིས་སུ་གྲུབ་པའི་ཕྱིར། ༀ་བྷུད་དྷ་བཻ་རོ་ཙ་ན་ༀ་ཞེས་པ་ནས་བྱང་ཆུབ་མཆོག་ཏུ་གདོན་མི་ཟའི་ཞེས་པའི་བར་གྱིས་བསྟན་ཏེ། བདག་ཉིད་ཀྱི་འབྲས་བུ་ཇི་ལྟ་བུ་ཐོབ་པའི་ཏིང་ངེ་འཛིན་གྱི་ལེའུ་ལས་བསྟན་ཏེ། འདིར་མ་བཀོད་དོ། །ལས་གཉིས་ནི་འཕགས་པ་མཆོད་པའི་ལས་དང་། སེམས་ཅན་གྱི་ལས་བྱ་བའི་ལས་གཉིས་ལས། མཉེས་ཤིང་མཉེས་པ་ཞེས་པས་འཕགས་པ་མཆོད་པའི་ལས་སོ། །བྱང་ཆུབ་མཆོག་ཏུ་གདོན་མི་ཟའོ། །ཞེས་པས་སེམས་ཅན་གྱི་དོན་ནོ། །ཇི་ལྟར་འདིར་རྒྱས་པར་བསྟན་པ་བཞིན་དུ་འོག་མ་རྣམས་ལ་ཡང་ཤེས་པར་བྱའོ། །ཕྱག་རྒྱའི་མཚན་ཉིད་ནི་དཀྱུས་ཉིད་གསལ་ལོ། །དེ་ནས་ཡང་རྡོ་རྗེ་འཛིན་པའི་སྔགས་དང་ཕྱག་རྒྱ་བསྟན་པའི་ཕྱིར། གཞན་ཡང་རྡོ་རྗེ་འཛིན་ཉིད་ཀྱི་ཞེས་པ་ན་རྡོ་རྗེ་མི་འཁྲུགས་པ་ཕྱག་རྒྱར་བཤད། ཅེས་པས་བསྟན་ཏེ། བསྒོམ་པའི་རིམ་པ་ནི་གོང་དུ་གསལ་བར་བསྟན་ཏེ། དབུས་ཀྱི་སྙིང་པོ་ནི་ཧཱུྃ་དེ་སོ་སོའི་སྙིང་པོ་དང་ཕྱག་མཚན་ཉིད་དོ། །ལས་ཉིད་བསྟན་པའི་ཕྱིར་རོ། །སྔགས་དང་ཕྱག་རྒྱ་འདི་ཡིས་ནི། །སངས་རྒྱས་གྲགས་པ་ཆེན་པོ་ཡང་ཞེས་པ་ལ་སོགས་པ་བསྟན་ཏེ། གྲུབ་པའི་དུས་ན་ཕྱག་རྒྱ་གཏད། སྔགས་བཟླས་པས། དུས་གསུམ་གྱི་སངས་རྒྱས་ཀྱང་བསྐྲག་ཅིང་འདར་བར་གྱུར་ན། བདུད་རྣམས་ལྟ་སྨོས་ཀྱང་ཅི་དགོས་ཞེས་པའོ། །དེ་ནས་རིན་ཆེན་འཛིན་པའི་སྔགས་དང་ཕྱག་རྒྱ་བསྟན་པའི་ཕྱིར། གཞན་ཡང་རིན་ཆེན་འཛིན་པའི་ཞེས་པ་ནས། རིན་ཆེན་འཛིན་པའི་ཕྱག་རྒྱ་ཡིན་ཞེས་པས་བསྟན་ཏེ་གོ་སླའོ། །ལས་གཉིས་པ་བསྟན་པའི་ཕྱིར། སྔགས་དང་ཕྱག་རྒྱ་འདིས་ནི་བདེ་བ་མཆོག་རྣམས་སྦྱིན་པར་བྱེད་ཅེས་པ་སྟེ། གོང་དུ་གསུངས་པའི་སྔགས་དང་ཕྱག་རྒྱ་འདིས་གྲུབ་པའི་དུས་ན། ཕྱག་རྒྱ་གཏད་སྔགས་བཟླས་པས་འཆི་བའི་དུས་ལས་བཟློག་པ་སྟེ། ཤིན་ཏུ་བདེ་བའི་མཆོག་རྩ་རྒྱས་པར་བྱེད་པའི་ཕྱིར། གང་དགའ་བ་ཡང་རབ་འགེངས་ན་ཞེས་གསུངས་པ་ཡིན་ཏེ། ཚེ་ཟད་པ་ཡང་འགེངས་ན་བགེགས་ལས་ཕྱུང་བ་སྨོས་ཅི་དགོས་ཞེས་སོ། །དེ་ནས་ཡང་ཆོས་ཀྱི་སེམས་དཔའི་སྔགས་དང་ཕྱག་རྒྱ་བསྟན་པའི་ཕྱིར། གཞན་ཡང་ཆོས་ཀྱི་སེམས་དཔའི་ཞེས་པ་ནས་པདྨ་སེམས་དཔའི་ཕྱག་རྒྱ་བསྟན་པ་ཡིན་ཞེས་པའི་བར་གྱིས་བསྟན་ཏེ། དཀྱུས་ཉིད་གསལ་ལོ། །ལས་ཉིད་བསྟན་པའི་ཕྱིར་སྔགས་དང་ཕྱག་རྒྱ་འདི་ཡིས་ནི་ཞེས་པ་ལ་སོགས་པ་གསུངས་ཏེ། གོང་དུ་གསུངས་པའི་ཕྱག་རྒྱ་འདི་ཡིས་ནི། དུས་གསུམ་གྱི་སངས་རྒྱས་གྲགས་པ་ཆེན་པོ་ཀུན་ཀྱང་ཕྱག་རྒྱ་གཏང་བསྔགས་བཟླས་པས་དབང་དུ་གྱུར་པར་གདོན་མི་ཟ་བར་ཁམས་གསུམ་གྱི་སྐྱེ་བོ་སྨོས་ཀྱང་ཅི་དགོས་ཏེ། མི་དགོས་སོ་ཞེས་པའི་ཐ་ཚིག་གོ། །དེ་ནས་ཡང་ལས་ཀྱི་སེམས་དཔའི་སྔགས་དང་ཕྱག་རྒྱ་བཤད་པའི་ཕྱིར། གཞན་ཡང་ལས་ཀྱི་སེམས་དཔའི་ཞེས་པ་ནས་ལས་ཀྱི་ཡིན་ཞེས་པའི་བར་གྱིས་བསྟན་ཏེ་གོ་སླའོ། །ལས་གཉིས་བསྟན་པའི་ཕྱིར། སྔགས་དང་ཕྱག་རྒྱ་འདི་ཡིས་ནི། །ལས་རྣམས་ཐམས་ཅད་བྱེད་པར་འགྱུར་ཞེས་པས་བསྟན་ཏེ། སྔགས་འགྲུབ་པའི་དུས་ན་ཕྱག་རྒྱ་དང་སྔགས་བཟླས་པས་འཕགས་པ་མཆོད་པ་དང་སེམས་ཅན་གྱི་དོན་ཇི་ལྟར་འདོད་བཞིན་འགྲུབ་སྟེ། གྲུབ་པ་ཐོབ་པའི་དུས་སུའོ། །དེ་ནས་ཡང་ཡུམ་རྣམས་ཀྱི་སྔགས་དང་ཕྱག་རྒྱ་བསྟན་ཏེ། དེ་ཡང་སྔོན་ལ་དབྱིངས་ཕྱུག་མའི་སྔགས་དང་ཕྱག་རྒྱ་བསྟན་པའི་ཕྱིར། དེ་ནས་གཞན་ཡང་བཤད་བྱ་ཞེས་པ་ལ་སོགས་པ་བསྟན་ཏེ། ཐབས་ལས་ནི་གཞན་པ་ཤེས་རབ་མི་བཤད་པའོ། །དབྱིངས་ཕྱུག་མའི་སྔགས་འདི་ཡིན་ཞེས་བྱ་བ་ནི་དབྱིངས་ཕྱུག་མའི་གསང་བའི་སྔགས་ནི་འོག་ནས་འབྱུང་བ་འདི་ཡིན་ཏེ། དེ་ཡང་ཐབས་ལ་ཇི་སྐད་གསུངས་པ་བཞིན་འདི་ཡང་ངོ་། །ༀ་བྷུད་དྷ་ལོ་ཙ་ན་ༀ་ཞེས་བྱ་བའི་སྔགས་གང་ཡིན་པ་དང་། སྦྱར་བར་བྱའོ། །ཕྱག་རྒྱ་ནི་གོ་སླ་སྟེ་མ་བཀྲོལ་ལོ། །དེ་ནས་མཆོད་པར་བྱ་བ་དང་། སེམས་ཅན་གསོ་བར་བྱ་བ་ནི། རྡོ་རྗེ་དབྱིངས་ཕྱུག་མའི་སྔགས་དང་ཕྱག་རྒྱ་བསྟན་ཏེ། སེམས་ཅན་ཐམས་ཅད་བསྲུང་བར་བྱ་བ་ནི། མ་མ་ཀིའི་སྔགས་དང་ཕྱག་རྒྱ་བསྟན་ཏེ། དེ་ནས་ཡང་ཆོས་ཀྱི་གསུང་རྣམ་པར་དག་པ་སེམས་ཅན་གྱི་དོན་ཐོབ་པར་བྱ་བ་པདྨའི་དབྱིངས་ཕྱུག་མའི་སྔགས་དང་ཕྱག་རྒྱ་བསྟན་ཏོ། །དེ་ནས་ཡངས་སངས་རྒྱས་དང་སེམས་ཅན་གཉིས་དབང་དུ་བྱ་བ་དེ་བསྟན་པའི་ཕྱིར། ལས་ཀྱི་དབྱིངས་ཕྱུག་མའི་སྔགས་དང་ཕྱག་རྒྱ་བསྟན་ཏོ། །དེ་ནས་ཡང་སྐུ་གསུང་ཐུགས་ཀྱི་ཕྱག་རྒྱ་བསྟན་ཏེ། དེ་ཡང་སྔོན་ལ་སྐུའི་ཕྱག་རྒྱ་བསྟན་ཏེ། སེམས་ཅན་གང་ལ་བྱིན་གྱིས་བརླབས་པ་དེ་སྐུའི་གནས་སུ་ཡི་གེ་ༀ་དཀར་པོ་ལ་རྣམ་པར་སྣང་མཛད་ཀྱི་སྐུ་ཡོངས་སུ་རྫོགས་པར་བསྐྱེད་ནས་བྱིན་གྱིས་བརླབས་ཏེ། སྐུའི་སྔགས་དང་ཕྱག་རྒྱ་བྱིན་གྱིས་བརླབས་པའོ། །དེ་ནས་ཡང་གསུང་གི་བྱིན་གྱིས་བརླབས་པ་ནི། གསུང་གི་གནས་རྟ་མགྲིན་གྱི་འཁོར་ལོའི་དབུས་ཡི་གེ་ༀ་དམར་པོ་ལས། སྣང་བ་མཐའ་ཡས་ཀྱི་སྐུར་བྱིན་གྱིས་བརླབས་པ་སྟེ། གསུང་གི་སྔགས་དང་ཕྱག་རྒྱས་བསྟན་ཏོ། །དེ་ནས་ཡང་ཐུགས་ཀྱི་བྱིན་གྱིས་བརླབས་པ་བསྟན་ཏེ། དེ་ཡང་ཐུགས་ཀྱི་གནས་སྙིང་གི་རྩ་གསུམ་གྱི་གཡས་པའི་ནང་དུ་ཡི་གེ་ཧཱུྃ་ལས་མི་བསྐྱོད་པའི་སྐུར་བསྐྱེད་ལ་བྱིན་གྱིས་བརླབས་ཏེ། ཐུགས་ཀྱི་ཡང་སྔགས་དང་ཕྱག་རྒྱས་བསྟན་ཏེ། དེ་ནས་ཡང་སྔགས་དང་ཕྱག་རྒྱ་བརྗོད་པ་ལས་འདས་པ་བསྟན་ཏེ། དེའི་ཕྱིར་དེ་ལ་སོགས་ཏེ་མཐའ་ཡས་མཆོག་པས་ལ་སོགས་པ་གསུངས་ཏེ། གོང་དུ་གསུང་པའི་སྔགས་དང་ཕྱག་རྒྱ་དེ་ལ་སོགས་པ་བགྲངས་བ་ལས་བསམ་ཡས་པ་གང་གིས་ཡང་བགྲངས་ཞིང་དཔག་པ་ལས་འདས་པ་ལས་ནི་མཆོག་སྟེ། དེ་ནི་ཆོས་དབྱིངས་མཉམ་དང་མི་མཉམ་ཞེས་བརྗོད་པ་ནི། འདི་ནི་ཆོས་ཀྱི་དབྱིངས་དངམཉམ་པ་ཡིན་ལ། འདི་ནི་མི་མཉམ་པ་ཡིན་ཞེས་བརྗོད་པར་བྱ་བ་དང་བྲལ་ཏེ། དེའི་ཕྱིར་ནམ་མཁའ་དབྱིངས་ཀྱི་མཐའ་ཀླས་པ་ཞེས་གསུངས་པ་ཡིན་ཏེ། ནམ་མཁའ་ནི་དཔག་པ་ལས་འདས་པ་ཡིན་ཏེ། དེའི་དབྱིངས་ནི་ཆོས་ཀྱི་དབྱིངས་རྣམ་པར་དག་པ་ཡིན་པས། བརྗོད་མེད་བརྗོད་དུ་མེད་པའི་ཞེས་གསུངས་ཏེ། ནམ་མཁའ་དབྱིངས་ནི་བརྗོད་མེད་དེ་ལས་འདས་ཏེ། ཤེས་པ་དང་བརྗོད་པ་ལས་འདས་པ་ནི་བརྗོད་དུ་མེད་པ་སྟེ། དེའི་ཡོན་ཏན་མཐའ་ཀླས་པ་བསམ་གྱིས་མི་ཁྱབ་པ་འབྱུང་ཞེས་སྟོན་པས་གསུངས་སོ། །སྔགས་དང་ཕྱག་རྒྱ་སྤྲོ་བ་སྟོན་པ་ལ། སྔགས་དང་ཕྱག་རྒྱ་སྤྲོས་པའི་ལེའུའོ། །བདུད་རྩི་ཐིགས་པ་ལས་ཞེས་བྱ་བ་རྒྱ་ཆེར་བཤད་པ་ལས་བདེན་པ་གཉིས་བཤད་པའི་ལེའུ་ལྔ་པའོ།། །།དེ་ནས་ཡང་རིགས་ལྔའི་དཀྱིལ་འཁོར་དང་། སྐུ་གསུང་ཐུགས་ཀྱི་དཀྱིལ་འཁོར་རྣམས་ནི་སྟོན་པས་གསུངས་པ་ཡིན་ལ། དེ་ལས་གཞན་ནི་མ་གསུངས་སོ། །སྙོམ་མའི་བློ་འཁོར་རྣམས་ལ་སྐྱེ་སྟེ། དེ་གསལ་བའི་ཕྱིར། དེ་ནས་ཞེས་པ་ལ་སོགས་པ་བསྟན་ཏེ། སྔགས་དང་ཕྱག་རྒྱ་བསྟན་པའི་དེ་མ་ཐག་པ་དེ་ནས་སྡུད་པ་པོ་རྡོ་རྗེ་ཡིད་ཀུན་ཏུ་བཟང་པོས་སྟོན་པ་བཅོམ་ལྡན་འདས་གསང་བ་མཆོག་གི་བདག་པོ་ལ་འོག་ནས་འབྱུང་བ་འདི་སྐད་བཤད་དོ། །ཨེ་མའོ་རྣམ་དག་སྟོང་པའི་ལམ་ཞེས་པ་ལ་སོགས་པ་གསུངས་ཏེ། ཨེ་མའོ་རྣམ་དག་སྟོང་པའི་ལམ་ཞེས་པ་ནི། ཨེ་མའོ་ནི་ངོ་མཚར་བའི་ཆོ་ག་སྟེ། གང་ལ་ངོ་མཚར་རང་གི་ལུས་ལ་སྟོང་པའི་ལམ་ཡོད་པ་ངོ་མཚར་བའོ། །རྣམ་དག་ནི་ཡེ་ནས་མ་བཅོས་པ་སྟོང་པའི་ལམ་འདི་ནི་རང་ལ་རང་ཆས་སུ་ཡོད་པ་འདི་ལྟ་བུའོ། །ཞེས་པའི་སྟོང་པའི་ལམ་ནི་བྱང་ཆུབ་ཀྱི་སེམས་ཀྱི་ལམ་སྟེ། དེ་ཡང་ཇི་ལྟར་ཡིན་ཞེ་ན་འཁོར་ལོ་རྣམ་པ་བཞི་སྟེ། སྤྲུལ་པའི་འཁོར་ལོའི་འདབ་མ་དྲུག་ཅུ་རྩ་བཞི་པ་དང་། ཆོས་ཀྱི་འཁོར་ལོ་འདབ་མ་བརྒྱད་པ་དང་། ལོངས་སྤྱོད་ཀྱི་འཁོར་ལོ་འདབ་མ་བཅུ་དྲུག་པ་དང་། བདེ་བ་ཆེན་པོའི་འཁོར་ལོ་འདབ་མ་སུམ་ཅུ་རྩ་གཉིས་པའོ། །འོན་ཏེ་དེ་རྣམས་གང་ན་གནས་ཞེ་ན། དཔལ་རྡོ་རྗེ་རྩེ་མོའི་རྒྱུད་ལས་ཀྱང་། ཀུན་རྗོབ་བརྗོད་པ་མ་ཡིན་ཏེ། །ལྟོ་བ་མཐའ་ཟད་ཤེས་རབ་ལ། །ཐབས་ནི་ཟེའུ་འབྲུའི་རྩེར་ཞེས་བྱ། །རྩ་བ་འདབ་མ་དྲུག་ཅུ་བཞི། །མ་སྐྱེས་པ་ཡི་སྙིང་པོ་ཅན། །ས་དབུས་ཆོས་སུ་བསྟན་པ་སྟེ། །ཀུན་འབྱུང་ལམ་ཆེན་བརྒྱད་ཡོད་པ། །སྔོན་ལ་བརྒྱད་ཆ་གཉིས་ཡོད་པ། །རྩ་བཞི་ནང་གི་མ་མོ་བཞི། །ཕྱོགས་བཞི་རྩ་བཞི་ཐབས་བཞི་སྟེ། །བཅུད་ནི་ཕུང་པོར་འབྱུང་བར་བཤད། །རྟག་པར་ཆོས་སུ་འདི་བསྟན་ཏེ། །སྙིང་པོའམ་ཆོས་ཀྱི་སྐུ་ཞེས་བྱ། །དེ་ཉིད་ཡེ་ཤེས་སྙིང་པོ་ཡིན། །འདི་ཡི་འཁོར་ལོ་ནམ་མཁའི་ཁམས། །ཐམས་ཅད་ཀུན་ལ་ཁྱབ་ཆེན་པོ། །དེ་གཉིས་སྟེང་དུ་ལོངས་སྤྱོད་དེ། །སྔོན་ལས་བརྒྱད་ཆ་གཉིས་ཡོད་པ། །འབྱུང་བཞི་བར་ཡང་སྟོང་པའོ། །ཡེ་ཤེས་ལྔ་ཡི་སྙིང་པོ་ཅན། །ཆགས་པ་རྟག་ཏུ་སྒྲལ་བར་དགའ། །འབྱུང་འཇུག་སྒོ་གསུམ་ཐར་བར་འགྱུར། །བདེ་ཆེན་མཚན་ལྡན་པདྨ་མཛེས། །རྟག་པར་གཞོལ་མེད་ཡི་གེ་ཧཱུྃ། །རང་བཞིན་ཆོས་སྐུར་མང་ཞེས་བྱ། །ཏིང་འཛིན་གོམས་པའི་ཡེ་ཤེས་ཀྱིས། །ས་གནས་ཀུན་ཏུ་བདེ་བ་ཆེ། །བདེ་ཆེན་མགོ་བོར་གནས་ཕྱིར་རོ། །དཀྱིལ་འཁོར་ཡན་ལག་བཅས་སྤྲུལ་སྐུ། །དེ་གཉིས་བདེ་བ་བསྡུ་བྱས་སྟེ། །གཡས་དང་གཡོན་དང་དབུས་དང་གསུམ། །རིམ་གྱིས་སྟོང་པར་འཇུག་པ་སྟེ། །ཡེ་ཤེས་སྐྱེ་བ་ངེས་པ་མེད། །སེམས་ཉིད་བདེ་ལ་གང་གནས་པ། །གོམས་པའི་འོད་ཀྱང་མི་དམིགས་ཤིང་། །སྐྲའི་རྩེ་མོ་བརྒྱར་བཤགས་བྱ། །མཐར་ནི་དམིགས་པར་མི་འགྱུར་ཏེ། །བདེ་བ་ཡིད་ཀྱི་མི་བྱ་ཞིང་། །མཐའ་ནི་ཅི་ལའང་མི་གནས་ཏེ། །འགྲོ་དོན་འདོད་པའི་སྐུ་གཉིས་ཀྱང་། །སྒྲ་ཡིས་ཚུལ་ལས་ཐོས་པ་མེད། །ར་བཞིན་དང་བའི་ཡེ་ཤེས་ནི། །སྣང་སྟོང་གཉིས་སུ་མ་ཡིན་པས། །རྟག་ཏུ་ཐིག་ལེ་ཆེན་པོ་གསུངས། །སྟོང་པའི་ལམ་ཞེས་དེ་ལ་བྱའོ། །ཞེས་གསུངས་སོ། །སངས་རྒྱས་ཀུན་གྱི་སྐུ་མཆོག་ཞེས་བྱ་བ་ནི། དུས་གསུམ་སངས་རྒྱས་ཐམས་ཅད་ཀྱི་སྐུ་མཆོག་ནི་ཆོས་སྐུ་སྟེ། ཆོས་སྐུ་དེ་ལ་ཐམས་ཅད་འབྱུང་བའི་བདག་པོར་གྱུར་པའི་ཕྱིར། སྣ་ཚོགས་ལས་བྱུང་ཁྱོད་ལ་འདུད། །ཅེས་བསྟོད་པའོ། །སངས་རྒྱས་ཀུན་གྱི་གསུང་གི་མཆོག་ཅེས་བྱ་བ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་གསུང་རྣམ་པར་དག་པར་འབྱུང་བའི་དོན་གསལ་བའི་སྒྲ་ཆེན་ཁྱོད་ལ་འདུད། ཅེས་གསུང་གི་སྒོ་ནས་བསྟོད་པའོ། །སངས་རྒྱས་ཀུན་གྱི་ཐུགས་ཆེན་པོ་ཞེས་བྱ་བ་ནི། དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་རྣམ་པར་མི་རྟོག་པའི་ཡེ་ཤེས་ཀྱི་མངའ་བདག་གི་གཙོ་བོ་ཁྱོད་ལ་ཕྱག་འཚལ་འདུད་ཅེས་ཐུགས་ཀྱི་སྒོ་ནས་བསྟོད་པའོ། །སངས་རྒྱས་ཡེ་ཤེས་རྡོ་རྗེ་ཅན་ཞེས་བྱ་བ་ནི། དུས་གསུམ་སངས་རྒྱས་ཐམས་ཅད་ཀྱི་ཡང་དག་པའི་ཡེ་ཤེས་མངའ་བའི་རྟགས་སུ་རྡོ་རྗེ་འཛིན་པ་བསྟོད་དེ་སྟོན་པའི་ངོ་བོར་རྡོ་རྗེ་འཛིན་པ་ཁྱོད་ལ་འདུད་ཅེས་པས་བསྟོད་པའོ། །ཆོས་ཀྱི་འཁོར་ལོ་རབ་བསྒྱུར་བ་ཞེས་བྱ་བ་ནི། སྟོན་པའི་ཐུགས་ཡང་དག་པའི་ཡེ་ཤེས་ཀྱིས་ཕྱི་དང་ནང་དུ་སྣང་བ་ཐམས་ཅད་ལ་གསལ་ཞིང་ཆོས་ཀྱི་འཁོར་ལོ་བསྐོར་བས་དེའི་ཕྱིར་སངས་རྒྱས་འཁོར་ལོ་ཁྱོད་ལ་འདུད་ཅེས་བསྟོད་པའོ། །ནོར་བུ་འཛིན་པ་ཁྱོད་ལ་འདུད་ཅེས་བྱ་བ་ནི། སྟོན་པའི་ཐུགས་ཡེ་ཤེས་ཀྱི་སེམས་ཅན་གྱི་དགོས་འདོད་རེ་བ་ཡིད་བཞིན་སྐོང་བས་ནོར་བུ་འཛིན་ཞེས་བརྗོད་པའོ། །དེ་ལྟར་སྟོན་པས་སེམས་ཅན་གྱི་དོན་མཛད་ཀྱང་འཁོར་བའི་སྐྱོན་གྱིས་མ་གོས་པས་དེའི་ཕྱིར་པདྨོ་འཆང་ལ་འདུད་ཅེས་པའོ། །དེ་ལྟར་ཕྱི་ནང་གི་དོན་གང་ལ་ཡང་མ་འགགས་པས་དོན་ཡོངས་སུ་གྲུབ་སྟེ། སྣ་ཚོགས་ལས་ལ་ཕྱག་འཚལ་འདུད་ཅེས་སྡུད་པ་པོས་སྟོན་པ་ལ་གསོལ་བ་བཏབ་བོ། །དོན་དམ་པའི་བདེན་པའོ། །འཁོར་གྱི་རྟོག་པ་དེ་གསལ་བའི་ཕྱིར། དེ་ནས་བཅོམ་ལྡན་འདས་ཞེས་པ་ལ་སོགས་པ་བསྟན་ཏེ། སྟོན་པ་ཐུགས་སྤྲོས་པ་མེད་པའི་དབྱིངས་སུ་སྐུ་གནས་སྐུ་གསུང་ཐུགས་ཀྱི་སྤྲུལ་པ་བསམ་ཡས་པར་དགྱེས་པའི་ཕྱིར། དེ་བཞིན་ཉིད་ལ་དམིགས་ནས་ཅང་མི་སྨྲ་བར་བཞུགས་སོ། །ཞེས་པ་སྟེ། ཐུགས་སྤྲོས་པ་མེད་པའོ། །དེ་ལྟར་སྟོན་པས་སྐུ་གསུང་ཐུགས་ཀྱི་སྤྲུལ་པ་དགྱེ་བ་དེའི་ཚེ། རིགས་ལྔ་བདེ་བར་གཤེགས་པ་ཐམས་ཅད་དང་འཁོར་རྒྱ་མཚོ་དང་བཅས་པ་རྣམས་ཀྱིས། བཅོམ་ལྡན་འདས་ཀྱིས་སྤྲུལ་པ་དགྱེ་བ་ལ་འདི་ལྟར་གཟིགས་པའི་ཕྱིར། འདུལ་བའི་ཐབས་ནི་སྣ་ཚོགས་ཀྱིས་ཞེས་པ་ལ་སོགས་པ་གསུངས་ཏེ། འདུལ་བའི་ཐབས་སྣ་ཚོགས་ཞེས་བྱ་བ་ནི། འགྲོ་བ་རིགས་དྲུག་ལ་སོགས་པའི་འདུལ་བའི་ཐབས་སྣ་ཚོགས་པས་འདུལ་ཏེ་དེའི་ཕྱིར། འགྲོ་རྣམས་ཚོགས་འདུལ་བར་འགྱུར་ཞེས་གསུངས་པ་ཡིན་ནོ། །ལ་ལས་སྐུའི་དོན་མཛད་འགྱུར་ཞེས་པ་ནི། སོ་སོའི་འདུལ་སྐལ་གྱིས། སྐུ་ཡིས་དོན་མཛད་པར་འགྱུར་རོ། །འགྲོ་རྣམས་ཀུན་ལ་སྡིག་སྤང་གཟུགས་ཞེས་བྱ་བ་ནི། འགྲོ་བ་རིགས་དྲུག་ཆར་ལ་དོན་མཛད་ཀྱང་ལོག་པའི་སྤྱོད་པས་དོན་མ་མཛད་དེ། ཕྱིན་ཅི་མ་ལོག་ཅིང་སྡིག་པ་ཐམས་ཅད་སྤངས་ནས། ཡང་དག་པའི་ཡེ་ཤེས་དང་ལྡན་པའི་སྒོ་ནས་དོན་མཛད་དོ། །སྤྲུལ་པས་སོ་སོར་འདུལ་བ་རྣམས་ནི་ཞེས་པ་ནི་སོ་སོར་ལས་ཀྱི་མཐོང་བ་བཞིན་དུ་འདུལ་ལོ། །དེ་ཡང་སྐུས་སོ་སོར་འདུལ་བ་བསྟན་པའི་ཕྱིར། དམྱལ་བ་རྣམས་ལ་གཤེགས་པོས་འདུལ་ཞེས་པ་ནས། འཐུན་བྱས་སྐུ་ནི་སྣ་ཚོགས་འདུལ་ཞེས་བྱ་བས་བསྟན་ཏེ་གོ་སླའོ། །དེ་ནས་གསུང་སྤྲོས་པ་མེད་པའི་སྒོ་ནས་དོན་མཛད་པ་བསྟན་པའི་ཕྱིར། ཆོས་ཀྱི་འཁོར་ལོ་སྣ་ཚོགས་ནི་ཞེས་པ་ནས། དེ་སྙེད་སྒྲ་སྐད་ཐ་དད་བསྟན་ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་ཡང་སྐུ་ལྟམས་པ་ལ་སོགས་པས་འདུལ་བར་བསྟན་པའི་ཕྱིར། ལ་ལར་ལྷུམས་སུ་གཤིགས་པའི་ཚུལ་ཞེས་པ་ནས་བྱིན་བརླབས་ཆོ་འཕྲུལ་དེ་ལྟར་བསྟན་ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་ཡང་སོ་སོར་འདུལ་ཞིང་ཆོས་ཀྱི་འཁོར་ལོ་བསྐོར་བའི་བྱིན་གྱིས་བརླབས་ཀྱི་སེམས་ཅན་རྣམས་ཇི་ལྟར་མོས་པར་འགྱུར་བ་བསྟན་པའི་ཕྱིར་རོ། །དེ་ཚེ་འགྲོ་རྣམས་ཐམས་ཅད་དང་ཞེས་པ་ལ་སོགས་བསྟན་ཏེ། དེ་ཡང་སྟོན་པས་སྐུ་གསུང་གི་ཆོ་འཕྲུལ་རྣམ་པའི་བྱེ་བྲག་གིས། འགྲོ་བ་རྣམས་ལ་སོ་སོར་ཆོས་ཀྱི་འཁོར་ལོ་བསྐོར་བ་དེའི་ཚེ། འགྲོ་བ་རིགས་དྲུག་ཐམས་ཅད་ཀྱང་ཡང་དག་པའི་བྱང་ཆུབ་ལ་ངང་པར་འགྱུར་ཏེ། འོ་ན་མ་དད་པ་གང་ཡིན་ཞེ་ན་དེ་བསྟན་པའི་ཕྱིར། ལས་ཀྱི་སྟོབས་ཀྱིས་དབང་བསྒྱུར་བ། ལོག་པ་ཅན་གྱི་རུ་ཏྲ་རྣམས། ལོག་ལྟའི་མཐུ་བསྙེམ་མ་རྟོགས་པ་ཞེས་པ་བསྟན་ཏེ། སྔོན་གསང་བའི་ཟབ་མོ་ནི་སྒྲོས་ཡང་དག་པའི་ལྟ་བ་ནི་མ་ཤེས་པའི་ལས་ཀྱི་སྟོབས་ཀྱིས་དབང་གིས་ཚེ་འདི་ཉིད་ལ་ལྡོག་པ་ལ་དགའ་བ་ཡང་དག་པའི་དོན་ལ་སྨོད་པའི་རུ་ཏྲ་རྣམས་ནི་ལོག་པར་བལྟ་བ་འཇིག་རྟེན་འདིར་ནི་མཐུ་ཆེ་བ་ངག་གཏུམ་ཚིག་ཏུ་སྨྲ་བ་དེ་ནི་མ་རྟོགས་པ། ཚོགས་པར་བསྟན་པར་འཁོར་རྣམས་ཀྱིས་གཟིགས་པས་གོང་གི་ཐེ་ཚོམ་སྐྱེས་པའི་རྟོགས་པ་གསལ། ལྷག་པའི་སེམས་ཅན་རྣམས་སངས་རྒྱས་ཀྱི་བསྟན་པ་ལ་དད་པར་འགྱུར་ཏེ། བྱང་ཆུབ་སྤྱོད་པའི་སྒོ་ཇི་སྙེད་པའི་སྒོ་ནས་སྤྱོད་པ་ཁམས་གསུམ་གྱི་སེམས་ཅན་དེ་སྙེད་འབྲས་བུ་བདེ་ལ་འགོད་དེ། ཡང་དག་པའི་ས་ལ་གནས་པར་འགྱུར་རོ། །དེ་ལྟར་སོ་སོའི་སྒོ་ནས་འདུལ་བའི་ཆོ་འཕྲུལ་སྣ་ཚོགས་པར་བསྟན་པར་འཁོར་རྣམས་ཀྱིས་གཟིགས་པ་གོང་གི་ཐེ་ཚོམ་སྐྱེས་པའི་རྟོག་པ་གསལ་ཏེ། གཉིས་སུ་མེད་པའི་དོན་ལ་སེམས་ནས་གནས་སོ། །དེ་ནས་འདུལ་བའི་འཁོར་ཚོགས་རྣམས་ཀྱིས་སྡུད་པ་པོ་ལ་བསྟན་པའི་ཕྱིར། དེ་ནས་འཁོར་ལོ་དེར་འདུས་པའི་ཞེས་པ་ལ་སོགས་པས་བསྟན་ཏེ། སྟོན་པའི་ཆོ་འཕྲུལ་འཁོར་རྣམས་ལ་བསྟན་ཟིན་པའི་དེ་མ་ཐག་པ་དེ་ནས་སྟོན་པའི་འཁོར་དེར་འདུས་པ་རྣམས་སྡུད་པོ་ཡིད་ཀུན་ཏུ་བཟང་པོས་སྟོན་པ་ལས་བསྐུལ་ནས་ཆོ་འཕྲུལ་རྣམ་པ་སྣ་ཚོགས་པས་འགྲོ་བའི་དོན་མཛད་པ་དེ་ལ་ངོ་མཚར་དུ་གྱུར་ཏེ། སྡུད་པ་པོས་རྡོ་རྗེ་ཡིད་ཀུན་ཏུ་བཟང་པོ་ལ་འཁོར་རྣམས་ཀྱིས་འོག་ནས་འབྱུང་བའི་དོན་འདི་སྐད་ཅེས་གསོལ་ཏོ། །ཨེ་མའོ་ཞེས་པ་ནི་ངོ་མཚར་བའི་ཚིག་གོ། །ཨེ་མའོ་རྡོ་རྗེ་ཀུན་ཏུ་བཟང་པོ་ཞེས་བྱ་བ་ནི་སྟོན་པའི་སྤྲུལ་པར་གྱུར་ཅིང་སྟོན་པ་ཉིད་སྡུད་པ་པོ་ཡིན་འཁོར་རྣམས་ཀྱང་རྟོགས་ཏེ་དེའི་ཕྱིར་ཀུན་བཟང་ཞེས་བོས་པའོ། །ངོ་མཚར་ཁྱོད་ལ་ཕྱག་འཚལ་འདུད་ཅེས་བྱ་བ་ནི། སྟོན་པ་ལས་ཐ་མི་དད་པར་གྱུར་པ་ནི་ངོ་མཚར་ཏེ། ཁྱོད་ལ་ངེད་འཁོར་རྣམས་ཀྱང་ཕྱག་འཚལ་ལོ་ཞེས་སོ། །ཨེ་མ་གསང་སྔགས་ཡ་མཚན་ཆེ་ཞེས་བྱ་བ་ནི། གསང་བའི་སྔགས་ནི་གསང་སྔགས་ཏེ། ཡང་དག་པའི་ཡེ་ཤེས་སོ། །ཨེ་མའོ་སྟོན་པ་ཆོ་འཕྲུལ་ཆེ་ཞེས་པ་ནི། ཐེ་ཚོམ་སྐྱེ་བ་བསམ་པས་ངོ་མཚར་རོ། །ཨེ་མའོ་སྔགས་ཀྱི་མི་འདུལ་མེད་ཅེས་བྱ་བ་ནི། ཉོན་མོངས་པ་ལྔའི་གཉེན་པོར་མཛད་པའོ། །འདི་ནི་ངོ་མཚར་ཡ་མཚན་ནོ། །ཞེས་བྱ་བ་ནི་གོང་དུ་སྟོན་པས་མཛད་པ་འདི་ནི་ཤིན་ཏུ་ངོ་མཚར་ལགས་སོ། །ཞེས་འཁོར་རྣམས་ཀྱིས་སྡུད་པ་པོ་ལ་གསོལ་བ་དང་། དེ་ནས་སྡུད་པ་པོས་འཁོར་གྱི་བྱང་ཆུབ་སེམས་དཔའ་ཐོས་པའི་ཐེ་ཚོམ་སྐྱེས་པའི་རྒྱུ་བསྟན་པའི་ཕྱིར། རྡོ་རྗེ་ཡིད་ཀྱིས་བཀའ་རྩལ་པ་ཞེས་པ་ལ་སོགས་པ་གསུངས་ཏེ། རིགས་ཀྱི་བུ་ཁྱོད་ཚུར་ཉོན་ཅིག་ཅེས་བྱ་བ་ནི། འདས་པའི་འཁོར་ཚོགས་ཡང་དག་པར་བྱང་ཆུབ་ཀྱི་སེམས་ཀྱི་རིགས་ཀྱི་བུ་རྣམས་ཉོན་ཅིག་ཅེས་བསྐུལ་བའི་ཚིག་གོ། །གསང་བའི་ཐེག་པ་འདི་ཉིད་ལ་སུ་ཞིག་མོས་པའི་སྐྱེས་བུ་དེས་ཞེས་བྱ་བ་ནི། གསང་བའི་ཐེག་པ་བླ་ན་མེད་པ་དེ་ལ་རྣལ་འབྱོར་པ་གང་སུ་ཡང་རུང་པ་ཞིག་མོས་པས་འཇུག་ན་རྣལ་འབྱོར་པ་དེས་མི་བྱ་བ་ནི་གང་ཡང་མེད་དོ། །མི་འགྲུབ་པ་ནི་གང་ཡང་མེད་ཅེས་བྱ་བ་ནི་གསང་བའི་རྡོ་རྗེ་ཐེག་པ་འདི་ལ་ཞུགས་པའི་རྣལ་འབྱོར་པས་ནི་འོག་ནས་འབྱུང་བའི་ལས་འདི་རྣམས་བྱའོ། །དེ་ཡང་ལྡེམ་པོ་ངག་གི་སྒོ་ནས་གསུངས་ཏེ། དོན་དམ་པའི་བདེན་པ་བསྟན་པའི་ཕྱིར། རྟག་ཏུ་གསོད་ལ་བརྩོན་པ་དང་ཞེས་བྱ་བ་ལ་སོགས་པ་བསྟན་ཏོ། །དེ་ཡང་ཇི་ལྟར་ཞེ་ན་རྟག་ཏུ་གསོད་ལ་བརྩོན་པ་དང་ཞེས་བྱ་བ་ནི། བདག་ཉིད་ཀྱི་སྙིང་ལ་རྩའི་དངས་མ་བརྒྱད་གནས་ཏེ། དེ་ཡང་གསུང་ཆོས་ཀྱི་རྩའོ། །གཅིག་ཡེ་ཤེས་ཀྱི་རྩའོ། །གསུམ་རང་རྒྱུད་ཀྱི་རྩའོ། །གཅིག་ནི་ཡོན་ཏན་གྱི་རྩའོ། །དེ་ལྟར་རྩ་ཕྲ་མོ་བརྒྱད་ཡོད་དོ། །ཆོས་ཀྱི་རྩ་ལ་ནི། འོད་སེར་པོ་གཅིག་གནས་སོ། །དབྱིབས་ཅི་འདྲ་ན་ཟླུམ་པོའོ། །ཚུལ་ནི་དངུལ་ཆུ་ཞུན་མར་གཞོལ་མར་གྱི་ཟོལ་སོང་བ་དང་འདྲའོ། །སྙིང་པོ་ནི་ༀ་མོ། །ས་བོན་ནི་སུ་དང་ཏྲིའོ། །དེ་གསུམ་གྱི་ཁ་དོག་ནི་ཟ་འོག་གུར་ཕུབ་པ་འདྲའོ། །ཡེ་ཤེས་ཀྱི་རྩ་ལ་ནི་འོད་མཐིང་ག་ཞིག་གནས་ཏེ། དབྱིབས་ཅི་འདྲ་ཞེ་ན་ཞགས་པའམ་སྦྲུལ་འཁྱིལ་བ་ལྟ་བུའོ། །ཚུལ་ནི་དར་སྐུད་ལེ་བརྒན་ལ་ཤེལ་སྒོང་བརྒྱུད་པ་ལྟ་བུའོ། །སྙིང་པོ་ནི་ཧཱུྃ་ངོ་། །ས་བོན་ནི་ཨ་དང་ནྲིའོ། །རང་རྒྱུད་ཀྱི་རྩ་ལ་ནི་འོད་དམར་པོ་གཅིག་གནས་ཏེ། དབྱིབས་ནི་ཟླ་གམ་དམར་པོ་ལྟ་བུའོ། །ཚུལ་ནི་སོས་ཀའི་ཆུ་ལ་སྨིག་རྒྱུ་བའམ། རྩི་སྐྱ་བའི་ཁ་ལ་ཟིལ་པ་ཆགས་པ་ལྟ་བུའོ། །ཁ་དོག་ནི་ཟངས་མའི་ཞུན་མ་ལ་ར་གན་གྱི་ཟོལ་སོང་བ་ལྟ་བུའོ། །སྙིང་པོ་ནི་ཨའི་ས་བོན་ནྲི་པྲེ་དང་དུའོ། །དེ་ཡང་མ་རྟོགས་པའི་དུས་ན་འཁོར་བའི་རྒྱུ་སྟེ། ཨ་དང་ནི་ལ་སོགས་པའོ། །རྟོགས་པའི་དུས་ན་ཡེ་ཤེས་ཏེ། ༀ་ལ་སོགས་པའོ། །དེ་ཡང་ཇི་ལྟར་སྲོག་ཅེ་ན། འོད་སེར་པོ་ལ་ཀུན་གཞི་རྣམ་པར་ཤེས་པ་གནས་པ་དང་། འོད་མཐིང་ག་ལ་ཡིད་ཀྱི་རྣམ་པར་ཤེས་པ་གནས་པ་དང་། འོད་དམར་པོ་ལ་ཉོན་མོངས་པ་ཅན་གྱི་ཡིག་གནས་སོ། །དམར་ནག་ལ་སྒོ་ལྔའི་རྣམ་པར་གནས་སོ། །དེ་ཡང་ལྷ་མི་གཉིས་སུ་སྐྱེ་བའི་ཁ་འཛིན་ནི་ཡིད་ཀྱི་རྣམ་པར་ཤེས་པས་བྱས་ཨ་དང་ནི་ལ་སོགས་པའོ། །ལྷ་མ་ཡིན་དང་བྱོལ་སོང་དུ་སྐྱེ་བའི་ཁ་འཛིན་ནི་ཀུན་གཞི་རྣམ་པར་ཤེས་པས་བྱས་ནས་ས་བོན་སུ་དང་ཏྲི་གཉིས་ལ་སོག་གོ། །ཡི་དྭགས་དམྱལ་བར་སྐྱེ་བའི་ཁ་འཛིན་ནི་སྒོ་ལྔའི་རྣམ་པར་ཤེས་པ་དང་། ཉོན་མོངས་པ་ཅན་གྱི་ཡིད་ཀྱིས་བྱས་ནས་པྲེ་དང་དུ་ལ་སོག་གོ། །དེ་ལྟར་གནས་པ་འདི་འགྲོ་བ་རིགས་དྲུག་གི་སེམས་ཅན་ལ་རང་ཆས་སུ་ཡོད་པའོ། །དེ་ལྟ་བུར་རྩ་ཕྲ་མོ་བརྒྱད་པོ་དེ་ཡང་ཐག་པ་ཁུག་པ་གཞན་གནས་པའོ། །དེ་ལྟ་བུ་བརྒྱད་འདོམ་པའི་དབུས་ན་རྩའི་དངས་མའི་ཡང་དངས་མ་དར་གྱི་སྐུད་པ་ལྟ་བུ་ལ་དབྱིབས་པ་ཐག་ཁུག་པ་འདྲ་བ་གཅིག་ཡོད་དོ། །དེའི་སྦོམ་ཕྲ་ནི་རྟ་རྔ་བཅུ་རུ་བཤགས་པ་ཙམ་གྱིས་འབྲེལ་དར་དཀར་གྱི་སྐུད་པ་ལྟ་བུ་དེ་ལ། དབུགས་ཀྱི་དངས་མ་གསེར་ས་འོག་ན་གོན་པའི་རླངས་པ་ཙམ་ཅིག་རྒྱུའོ། །དབུགས་ཀྱི་དངས་མ་དེ་ལ་ཁ་དོག་རྣམ་པ་སྣ་ཚོགས་པ་གནས་སོ། །དེའི་དཀྱིལ་ན་བྱང་ཆུབ་ཀྱི་སེམས་ཐིག་ལེ་ཆེན་པོར་བཞུགས་སོ། །དེའི་དཔེ་ཇི་ལྟ་བུ་ཞེ་ན། གསེར་ཞུན་མའི་སྦུབས་ཀྱི་ནང་ནོར་བུ་རིན་པོ་ཆེ་ཀེ་ཀེ་རུ་བྱ་བཅུག་པ་ལྟ་བུའོ། །ཁ་དོག་ནི་ཉི་མ་ཤར་བའི་དཀྱིལ་འདྲ་བའོ། །དེ་ནི་ཆོས་ཀྱི་དབྱིངས་སོ། །རྩའི་དངས་མའི་ཡང་དངས་མ་དར་དཀར་གྱི་སྐུད་པ་ལྟ་བུ་ལ་གདོད་མ་ནས་ཕུང་པོ་རྟེན་བྱེད་པས་ན་འབྱུང་བའི་དངས་མ་དེས་ལྷར་སྣང་བ་ཡུམ་སངས་རྒྱས་སྤྱན་དུ་གསོལ་བ་ཡོད་པའོ། །དེའི་སྟོང་པ་ཆེན་པོའི་ཡེ་ཤེས་ཏེ། ཁམས་ཐམས་ཅད་དབྱིངས་རྣམ་པར་དག་པའི་ངང་དུ་གྱུར་པ་མེད་པའི་རྟེན་བྱེད་པའི། དར་དཀར་གྱི་སྐུད་པ་ལྟ་བུ་དེ་ལ་ཁྲག་གི་དངས་མ་ལྟ་བུ་གནས་པའི་གདོད་མ་ནས་ཕུང་པོ་ལོང་འདོག་པས་འབྱུང་བའི་མདངས་མ་ཆུ་ལྟར་སྣང་བ་སྟེ། ཡུམ་མཱ་མ་ཀིའི་དེ་ཉིད་མཉམ་པ་ཉིད་ཀྱི་ཡེ་ཤེས་ཏེ། ཐམས་ཅད་བཀོལ་བ་མེད་པའི་དབྱིངས་ཅིག་ཏུ་བསྡུས་པས་སོ། །དེ་ཉིད་ལ་དབུགས་ཀྱི་དངས་མ་ས་ལེ་སྦྲམ་ས་འོག་ན་གནས་པའི་རླངས་པ་ཙམ་ཞིག་གནས་པའི་གདོད་མ་ནས་ཕུང་པོ་ཡང་ཞིང་གཡོ་བའི་རྒྱུ་བྱེད་པས་འབྱུང་བ་རླུང་དུ་སྣང་བའོ། །དེ་ནི་བྱ་བ་གྲུབ་པའི་ཡེ་ཤེས་ཏེ། བྱ་བ་ཐམས་ཅད་ལ་གཡོ་བས་ནའོ། །བྱང་ཆུབ་ཀྱི་སེམས་དེ་ནི་ཐབས་དང་ཤེས་རབ་སྙོམ་པ་ཡང་ཡོད་ལ། ཁམས་གསུམ་པར་ཡང་ཡོད་དེ། ཐིག་ལེ་དེ་ཨ་ནི་ལ་སོགས་པའི་ཡི་གེ་རྣམས་བསྡུས་ཤིང་བྱང་ཆུབ་ཀྱི་སེམས་ཐིག་ལེའི་ངོ་བོར་བརྟགས་པས་སངས་རྒྱས་ཡེ་ཤེས་ནམ་མཁའི་རང་བཞིན་ལྟ་བུ་སྐྱེ་ཞིང་འགྲོ་བ་རིགས་དྲུག་རྒྱུན་གཅོད་པའོ། །དེ་ཡང་ཇི་ལྟར་གཅད་ཅེ་ན། ཐིག་ལེ་བྱང་ཆུབ་ཀྱི་སེམས་ལས་སུ་རུང་ནས། འོད་དང་ལྡང་བའི་ངོ་བོར་གྱུར་ཙམ་ན། ཨ་གི་གང་དང་འོག་ནས་སུ་དང་ཏྲི་གནས་པ་དང་། ཧཱུྃ་གི་གང་དང་འོག་ན་ཨ་དང་ནྲི་གནས་པ་དང་། ཨའི་གང་འོག་ན་པྲེ་དུ་གཉིས་གནས་པ་འོད་དུ་འབར་ཏེ། ཐིག་ལེ་ལ་རང་བཞིན་མེད་པར་ཐིམ་ཞིང་སོང་བས། ཐིག་ལེ་ཡང་རང་བཞིན་མེད་པར་དར་གྱི་སྐུད་པ་ལྟ་བུར་རྟ་རྔ་བཅུ་རུ་བཤགས་པ་ཙམ་ལ་ཐིམ་ནས་མཚལ་ཅོ་ག་ལ་མའི་མདངས་མ་ཙམ་དུ་གནས་ཏེ། བདེ་བ་ཆེན་པོ་ཆགས་པར་བྱེད་པ་ཡིན་ནོ། །དེ་ཡང་འོད་དུ་འབར་ཞིང་འབར་བས་དབུགས་ཀྱི་དངས་མ་གསེར་ས་འོག་ན་གནས་པའི་རླངས་པ་ཙམ་ཞིག་གནས་པ་དེ་བདེ་བ་ཆེན་པོར་གཡོ་སྟེ་འབར་བར་བྱེད་དོ། །དེའི་འོག་ཏུ་འབར་བས་དེར་དྲོད་ཀྱི་དངས་མ་མེ་ལོང་ཉི་མ་ལ་བཞག་པའི་ངད་ཙམ་ཞིག་གནས་པ་དེ་གདོད་མ་མེད་པ་ནས་ཕུང་པོ་སྨིན་པར་བྱེད་པའི་རང་བཞིན་འབྱུང་བ་མེ་ལྟར་སྣང་བའི་རང་བཞིན ཏ་ེ་འོད་ཁ་དོག་ལྔའོ། །དེ་ནི་སོ་སོར་རྟོག་པའི་ཡེ་ཤེས་ཏེ། ཐམས་ཅད་བདེ་བ་ཆེན་པོའི་དབྱིངས་སུ་རྟོགས་པའི་སྒྲོན་མའོ། །འོད་དེའི་དཀྱིལ་ན་ཡི་གེ་མེད་པའི་ཐིག་ལེ་ཆེན་པོའི་བྱང་ཆུབ་ཀྱི་སེམས་བཞུགས་པ་དེ་ནི་དངས་མ་ཆེན་པོའོ། །དེའི་གདོད་མ་ནས་ཕུང་པོ་གསལ་བར་བྱེད་པའི་རྟེན་བྱེད་པའི་འབྱུང་བའི་དངས་མ་དེ་རྩ་བུག་རྣམས་དང་། ནམ་མཁའ་ལྟར་སྣང་བའོ། །དེ་ནི་ཁྱབ་པ་ཆེན་པོའི་ཡེ་ཤེས་ཡུམ་ཀུན་ཏུ་བཟང་མོར་གསལ་བ་སྟེ། ཐམས་ཅད་ཡང་དག་པའི་དབྱིངས་སུ་གསལ་བའི་སྒོ་ནས་གོ་སྐབས་འབྱེད་པའོ། །དེ་ལྟར་ཐིག་ལེ་གསེར་ཞུན་མ་ལྟ་བུ་ནི་ཤེས་རབ་སྟེ། ཡུམ་ཐམས་ཅད་ཀྱི་ངོ་བོའོ། །དེར་རིན་པོ་ཆེ་ཀེ་ཀེ་རུ་བཅུག་པ་དང་འདྲ་བ་ནི། ཐབས་ཀྱི་རྒྱལ་པ་སྟེ། ཀུན་ཏུ་བཟང་མོ་ལ་སོགས་པ་ཡབ་རྣམས་ཀྱིའོ། །དེ་ནི་མེ་ལོང་ལྟ་བུའི་ཡེ་ཤེས་བྱང་ཆུབ་ཀྱི་སེམས་ཐིག་ལེ་ཆེན་པོ་འདི་ལ་མེ་ལོང་ལྟ་བུའི་ཡེ་ཤེས་ཏེ། ལྟ་བ་ནི་མཐོང་བ་མེད་པའི་ཚུལ་དུ་མཐོང་བའོ། །དེའི་ཡབ་གང་ཡིན་པ་ཡུམ་ཡིན་ལ་ཡུམ་གང་ཡིན་པ་ཡབ་ཡིན་ཞིང་། འོད་ཀྱི་གོང་བུ་དེར་ཐ་དད་པ་མ་ཡིན་མཐོང་ངོ་། །དང་མ་ཆེན་པོའི་ཐིག་ལེ་ཉིད་ཀྱང་རང་བཞིན་མེད་པར་སོང་སྟེ། ཡེ་ནས་ལྷུན་གྱིས་གྲུབ་པ་ནམ་མཁའི་གཟུགས་སུ་བྱུང་བ་དེ་ཉིད་ནི་ཐིག་ལེ་ཆེན་པོ་བྱང་ཆུབ་ཀྱི་སེམས་ཞེས་བྱ་བ་ཆོས་ཉིད་ཀྱི་སྐུའོ། །དེ་ལྟར་གྱུར་པའི་ངང་ལ་ནི་འགྲོ་བ་རིགས་དྲུག་གི་སེམས་ཅན་རྩད་གཅོད་པ་ཞེས་བྱའོ། །དེ་ལ་རྟག་པར་ཏིང་ངེ་འཛིན་གནས་པ་ནི། རྟག་ཏུ་བསོད་ལ་བརྩོན་པ་དང་ཞེས་གསུངས་པའོ། །མ་བྱིན་ལེན་དང་མི་ཚངས་སྤྱོད་ཅེས་བྱ་བ་ནི། བྱང་ཆུབ་ཀྱི་སེམས་དེ་ནི་མ་བྱིན་པར་ཡང་དག་པར་བླང་བ་པོ་བྱའོ། །ཡང་དག་པའི་དོན་དེ་དུས་རྟག་ཏུ་སྤྱད་པར་བྱའོ། །རྫུན་དང་ཚིག་རྩུབ་སྨྲ་བ་དང་། ཞེས་པ་ནི། རྫུན་ཡང་སྨྲ་བར་བྱ་བ་ཡིན་ཏེ། བརྗོད་དང་བྲལ་བའི་དོན་འདི་ལྟ་བུ་ཡིན་ནོ། ཞེས་སྟོན་པ་ནི་རྫུན་དུ་སྨྲ་བའོ། །ངག་རྩུབ་སྨྲ་བ་གང་ཡིན་ཏེ། རྣམ་པར་རྟོག་པའི་ཤེས་པ་མེད་པས་ངག་རྩུབ་སྨྲ་བའོ། །དེ་ནས་བདུད་རྩི་ལྔ་བཟའ་བ་བསྟན་ཏེ། ཟས་སུ་ཤ་དང་། བཤང་གཅི་དང་། རྣག་ཁྲག་དྲོན་མོ་འཐུང་བ་དང་ཞེས་བྱ་བ་ནི། ཤ་ཆེན་དང་བཤད་པ་སྟེ། དྲི་ཆེན་དང་གཅི་བ་སྟེ། དྲི་ཆུ་དང་རྣག་སྟེ། བྱང་ཆུབ་ཀྱི་སེམས་ཁྲག་སྟེ། པདྨ་རཀྟ་ཏེ་བདུད་རྩི་ལྔའི་ངོ་བོ་རུ་བཟའ་ཞིང་བཏུང་བའོ། །ངན་ཟོས་ངན་སྤྱད་ཐམས་ཅད་ཀྱིས། །གསང་བ་འདི་ཉིད་འགྲུབ་པར་འགྱུར། །ཞེས་བྱ་བ་ནི། བདུད་རྩི་ལྔ་ནི་ཟོས་ཤིག་སྤྱད་པས་གསང་བའི་དོན་འདི་ཉིད་འགྲུབ་པར་འགྱུར་ཏེ། དམ་ཚིག་གོ། །ཕ་དང་ཁུ་བོ་མེས་པོ་དང་། །བུ་དང་སྤུན་དང་ཚ་བོ་རྣམས། །ཞེས་བྱ་བ་ནི། ཕ་སྟེ་འདོད་ཆགས་དང་། ཁུ་བོ་སྟེ་ཞེ་སྡང་དང་། མེས་པོ་སྟེ་གཏི་མུག་དང་། བུ་སྟེ་ང་རྒྱལ་དང་། སྤུན་སྟེ་ཕྲག་དོག་དང་ལྔའོ། །ཚ་བོ་རྣམས་ནི་དེ་ཀུན་གྱི་སྤྱིའི་མཚན་ཉིད་དོ། །ཞེ་སྡང་སེམས་ཀྱིས་གསང་བྱས་ནས། །རྡོ་རྗེ་རིགས་ཀྱི་ཞིང་དུ་འཁྲུས། །ཞེས་བྱ་བ་ནི་ཉོན་མོངས་པ་ལྔ། སྤྱིའི་མཚན་ཉིད་དང་། དྲུག་པོ་ནི་མེ་ལོང་ལྟ་བུའི་ཡེ་ཤེས་ལ་སོགས་པ་ལྔ་སྟོང་པ་ཆེན་པོའི་ཡེ་ཤེས་དང་དྲུག་གི་ངང་དུ་ཞེ་སྡང་ཆེན་པོའི་ཏིང་ངེ་འཛིན་གྱིས་གསད་ན་གཉིས་སུ་མེད་པའི་ཡེ་ཤེས་མེད་པའི་ཡེ་ཤེས་མ་བཅོས་པ་རྡོ་རྗེ་རིགས་སུ་འགྱུར་རོ། །དོན་དམ་པའི་བདེན་པའོ། །དེ་ནས་བྱང་ཆུབ་ཀྱི་སེམས་བདེ་བ་ཆེན་པོ་ཕོ་བྲང་ནས་བསྐྱོད་པ་ལ་རྐྱེན་གཉིས་ཏེ། ཏིང་ངེ་འཛིན་གྱིས་བསྐྱེད་པ་དང་ཤེས་རབ་མའི་རྐྱེན་གྱིས་བསྐྱོད་པའོ། །དེ་ལ་ཏིང་ངེ་འཛིན་གྱི་སྐྱོན་གྱིས་བསྐྱོད་པའི་ལེའུ་འདི་ཉིད་ཀྱི་སྟོད་ནས་གསུངས་སོ། །ཤེས་རབ་མའི་རྐྱེན་གྱིས་དབབ་པ་བསྟན་པའི་ཕྱིར། མ་དང་བུ་མོ་སྲིང་མོ་དང་གདོལ་པ་མོ་ཕྱལ་པ་ལ་ཞེས་པས་བསྟན་ཏེ། མ་ནི་རྡོ་རྗེ་རིགས་མའོ། །བུ་མོའི་འཁོར་ལོའི་རིགས་མའོ། །སྲིང་མོ་ནི་རིན་པོ་ཆེའི་རིགས་མའོ། །གདོལ་པ་མོ་སྟེ་ལས་ཀྱི་རིགས་མའོ། །ཕྱལ་པ་སྟེ་པདྨའི་རིགས་རྣམས་ལ་བྱང་ཆུབ་ཀྱི་སེམས་རྟོགས་པར་འདོད་པའི་རིགས་ཀྱིས་སྤྱན་ན་འབྱུང་བ་བཞིའི་རྐྱེན་གྱིས་དྲངས་ནས། དགའ་བ་དང་མཆོག་ཏུ་དགའ་བ་དང་། བྲལ་བའི་དགའ་རྣམས་ནི་ཉམས་སུ་བླང་བར་བྱ་བ་མ་ཡིན་ཏེ། ཁུ་བ་དང་ལྷན་ཅིག་སྐྱེས་པའི་ཡེ་ཤེས་བྱ་བ་རང་བཞིན་དགའ་བ་དང་ཉམས་སུ་བླང་བར་བྱའོ། །དེ་ཡང་གནས་གང་དུ་ཉམས་སུ་བླང་ཞེ་ན། རྡོ་རྗེ་བུམ་པའི་དབུས་སུ་སྟེ་ཡི་གེ་བཞིའི་དབུས་སུའོ། །འོ་ན་ཡི་གེ་བཞིའི་དབུས་སུ་ནི་བཟུང་ལ་གཞན་དུ་མི་གཟུང་བ་ཅི་སྟེ་ན་ཡི་གེ་བཞིའི་དབུས་སུ་གཟུང་སྟེ་ཡི་གེ་གསུམ་ཕར་མ་འདས་ན་ནི་ཁུ་བ་དང་ལྷན་ཅིག་སྐྱེས་པའི་ཡེ་ཤེས་མི་སྐྱེ་བ་ཡི་གེ་བཞི་ལ་སློབས་ན་ནི་མི་ཟིན་པའི་སྐྱོན་ཡོད་པས་དབུས་སུ་བཟུང་བར་བྱ་བ་ཁོ་ན་ཡིན་ནོ། །འོ་ན་ཡི་གེ་བཞི་རང་གང་ཡིན་ཞེ་ན། ཡི་གེ་ནི་འདི་རྣམས་སོ། །ༀ་ཨཾ༔ཧཱུྃ་ཕཊ་ཅེས་པ་རྣམས་སོ། །འོ་ན་ཡི་གེ་ལྔ་འདུག་ན་བཞི་ཞེས་བྱ་བ་མི་འགལ་ལམ་ཞེ་ན། མི་འགལ་ཏེ། འབྱུང་བ་བཞི་དང་སྦྱར་ན། ༀ་ནི་སའི་རང་བཞིན་ཡིན་པ་དང་། ཧཱུྃ་ནི་མེའི་རང་བཞིན་ཡིན་པ་དང་། ཨཾ་ནི་ཆུའི་རང་བཞིན་ཡིན་པ་དང་། ཕཊ་ནི་རླུང་གི་རང་བཞིན་བྱང་ཆུབ་ཀྱི་སེམས་ནི་ནམ་མཁའི་རང་བཞིན་པའི་ཕྱིར་མི་འགལ་བའི་ཕྱིར་རོ། །འོ་ན་འབྱུང་བ་ལྔ་དེ་རུ་སྨོས་ན་ཅི་དགོས་ཞེ་ན། དགོས་པ་མེད་པ་མ་ཡིན་ཏེ། རྡོ་རྗེ་རྩེ་མོའི་ནང་ནས་ཀྱང་། བྱང་ཆུབ་སེམས་ནི་རབ་ཟབ་པ། །བདེ་བའི་གནས་ནས་སྤྱན་དྲངས་ནས། །རིན་པོ་ཆེ་ཡི་གནས་སུ་ནི། །འབྱུང་བ་གསུམ་གྱིས་བཟུང་བར་བྱ། །ཞེས་གསུངས་ཏེ་མི་འགལ་ལོ། །དེ་ལྟར་བྱང་ཆུབ་ཀྱི་སེམས་ཉམས་སུ་ལེན་པའི་དུས་ན་ཡང་དག་པའི་ཡེ་ཤེས་སུ་འགྱུར་ཏེ། འཁོར་བའི་སྐྱོན་གྱིས་མ་གོས་པས་པདྨའི་རིགས་སུ་ངེས་པར་སྐྱེ་ཞེས་གསུངས་པ་ཡིན་ནོ། །དེ་ལྟ་བུའི་དོན་ལ་དགོངས་ཏེ་གསུངས་པའི་ཚིག་དེ་ལ་འཁོར་བྱང་ཆུབ་ཏུ་སེམས་བསྐྱེ་བ་རྣམས་བཅོམ་ལྡན་འདས་འདི་ལྟ་བུའི་ཚིག་ངན་པ་སྨྲ་བ་སྙམ་ནས། བྱང་ཆུབ་སེམས་དཔའ་རྣམས་སྐྲག་སྟེ། རབ་ཏུ་བརྒྱལ་ནས་ས་ལ་འགྱེལ་བར་འགྱུར་རོ། །དེ་ནས་ཡང་འཁོར་དེ་རྣམས་ཀྱི་ཐེ་ཚོམ་གསལ་བའི་ཕྱིར། དེ་ནས་ཡང་རྡོ་རྗེ་ཡིད་ཀུན་ཏུ་བཟང་པོས། བཅོམ་ལྡན་འདས་གསང་བ་མཆོག་གི་བདག་པོ་ལ་བལྟས་ཏེ། བཅོམ་ལྡན་འདས་བྱང་ཆུབ་སེམས་དཔའ་འདི་རྣམས་སྔོན་གྱི་འདུ་ཤེས་ངན་པ་ཡིད་ལ་དྲན་ནས་བརྒྱལ་ནས་འགྱེལ་ན་འདི་དག་སླར་གསོ་བར་གསོལ་ཞེས་གསོལ་བ་བཏབ་པ་དང་། དེ་བསླང་བའི་ཕྱིར། བཅོམ་ལྡན་འདས་ཀྱིས་བྱང་ཆུབ་ཀྱི་འོད་ཟེར་གྱི་ཞིང་འཁྱིལ་བས་འཁོར་དེ་དག་བསྟིམས་ཏེ། བྱང་ཆུབ་ཀྱི་སེམས་ཀྱིས་བྱིན་གྱིས་བརླབས་མཛད་དོ། །བྱང་ཆུབ་ཀྱི་སེམས་བསྟིམས་ཤིང་བྱིན་གྱིས་བརླབས་པ་དེས། བྱང་ཆུབ་སེམས་དཔའ་རྣམས་སླར་དྲན་བ་རྙེད་དེ། ས་ལས་ལངས་ནས་བཅོམ་ལྡན་འདས་གསང་བ་མཆོག་གི་བདག་པོའི་ཞལ་དུ་མིག་མི་འཛུམ་པར་ལྟ་སྟེ་འཁོད་དོ། །དེ་ནས་འཁོར་གྱི་ཐེ་ཚོམ་དེ་བསལ་བའི་ཕྱིར། དེ་ནས་བཀའ་སྩལ་ཏོ་ཞེས་བྱ་བར་སྦྱར་རོ། །དེ་ནས་ཡང་ལུང་སྒོ་བའི་ཕྱིར། རིགས་ཀྱི་བུ་རྣམས་རང་རང་གི་འདུ་བྱེད་ངན་པ་དེ་རྣམས་ཐོང་ཞིག་ཅེས་གསུངས་ཏེ། ཐོང་ཞེས་པ་ནི་ཟློག་པ་སྟེ། ཁྱེད་རྣམས་ཀྱི་བསམ་པ་མང་པོས་ཅི་ཞིག་བྱ། བཅོམ་ལྡན་འདས་ངས་དགོངས་པ་བཤད་པའི་ཚིག་ལ་ཁྱེད་རྣམས་ཀྱིས་དྲང་པོར་བཟུང་བས་ཚིག་ངན་པར་འགྲོ་སྟེ། དེའི་བསམ་པ་ངན་པ་རྣམས་མ་སྨྲ་བར་མཐོང་ཞིག་པའོ། །བྱང་ཆུབ་སྤྱོད་པའི་གནས་འདི་ཡིན་ཞེས་པ་ལ་སོགས་པ་སྟོན་པ་ཡི། འཁོར་རྣམས་ཀྱི་ཐེ་ཚོམ་བསལ་བའི་ཚིག་གོ། །བྱང་ཆུབ་སྤྱོད་པའི་གནས་འདི་ཡིན་ཏེ་ཞེས་བྱ་བ་ནི། བྱང་ཆུབ་སྤྱོད་པ་དེའི་གནས་ན་བདེ་བ་ཆེན་པོའི་གནས་དེ་ཉིད་ཡིན་ནོ། །ཐམས་ཅད་ནམ་མཁའི་རང་བཞིན་ཏེ་ཞེས་བྱ་བ་ནི། བདེ་བ་ཆེན་པོའི་དོན་དེ་ཐམས་ཅད་ནམ་མཁའ་མཚན་ཉིད་ཡིན་ཏེ། མཚན་ཉིད་དེ་ལ་ཡང་མ་གནས་པའི་ཕྱིར་ཏེ། ནམ་མཁའ་ལ་ཡང་མཚན་ཉིད་མེད་ཅེས་བརྗོད་པ་ཡིན་ནོ། །དེ་ཉིད་འཇིག་རྟེན་སྣ་ཚོགས་སོགས་ཏེ་ཞེས་བྱ་བ་ནི། མཚན་ཉིད་མེད་པ་དེ་ཉིད་འདི་ལྟར་རྣམ་པ་སྣ་ཚོགས་པ་སྣང་སྟེ། སྣང་བ་དེ་ཉིད་ཀྱང་གཟུགས་སུ་སྣང་བ་ཐམས་ཅད་དེ། དེ་བཞིན་གཤེགས་པའི་སྐུ་རང་བཞིན་ཡིན་པ་དང་། སྒྲ་རུ་གྲགས་པ་ཐམས་ཅད་དེ་བཞིན་གཤེགས་པའི་གསུང་གི་རང་བཞིན་ཡིན་པའི་ཕྱིར་ཏེ། ཕྱག་རྒྱའི་ཚོགས་ཆེན་དེ་ཉིད་དོ། །ཞེས་གསུངས་པ་ཡིན་ནོ། །དེ་ལྟར་ཕྱི་དང་ནང་དུ་སྣང་བ་ཡང་སྒྱུ་མ་ཙམ་དུ་སྣང་ལ་དོན་དམ་པར་དེ་བཞིན་གཤེགས་པའི་ཐུགས་སྤྲོས་པ་མེད་པ་ཡིན་པའི་ཕྱིར། ཆོས་སྐུ་སྒྱུ་མར་དབང་བསྒྱུར་བ། དེ་ལ་དངོས་པོ་ག་ལ་ཡོད། ཅེས་གསུངས་པ་ཡིན་ནོ། །ཅི་སྤྱོད་ཅི་བསྒྲུབ་ཅི་བསྒོམས་ཀྱང་། བྱང་ཆུབ་ཉིད་དེ་ལྷུང་གནས་མེད་ཅེས་བྱ་བ་སྒོམ་བསྒྲུབ་ལ་སོགས་པ་ཇི་ལྟར་སྤྱོད་ཀྱང་དོན་དམ་པའི་དབྱིངས་ལས་མ་གཡོས་པར་ཤེས་ན་བྱང་ཆུབ་ཉིད་དེ་ལྷུང་གནས་མེད་དོ། །ལྷུང་གནས་ཉིད་ཡང་དག་པའི་ཡེ་ཤེས་སུ་འགྱུར་བ་བསྟན་པའི་ཕྱིར། དམྱལ་བའི་གནས་ཉིད་བླ་མེད་གནས་ཞེས་གསུངས་ཏེ། དམྱལ་བའི་གནས་སུ་གདག་པའི་གནས་མེད་དེ། ཡེ་ནས་རྣམ་པར་དག་པའི་གནས་སོ། །དེ་ནས་ཡང་ཁམས་གསུམ་གྱི་སྡུག་བསྔལ་ཉིད་གཉིས་སུ་མེད་པའི་ཡེ་ཤེས་ཡིན་པའི་ཕྱིར། སྡུག་བསྔལ་ཉིད་ནི་བྱང་ཆུབ་ལ། འཁོར་བ་ཉིད་ན་མྱ་ངན་འདས། སྒྲིབ་པ་ཉིད་ན་མངོན་སངས་རྒྱས་ཞེས་གསུངས་པ་ཡིན་ཏེ། ཁམས་གསུམ་གྱི་སྡུག་བསྔལ་ནི་ཡང་དག་པའི་ཡེ་ཤེས་ཡིན་ཏེ། མ་བཅོས་པའི་བྱང་ཆུབ་ཀྱི་སེམས་ཏེ། དེ་ལྟར་ངོ་བོ་ཉིད་ཀྱིས་སངས་རྒྱས་པའི་རང་བཞིན་འཁོར་བ་ཞེས་བྱ་བ་ག་ལ་ཡོད་དེ་མྱ་ངན་ལས་འདས་པའོ། །དེ་ལྟར་ངེས་པའི་དོན་དེ་ལ་སེམས་རྩེ་གཅིག་ཏུ་གནས་པར་བྱ་བའི་ཕྱིར། ངེས་དོན་དེ་ལ་འདུད་པར་སྦྱོར་ཞེས་བཅོམ་ལྡན་འདས་ཀྱིས་གསུངས་པས། བྱང་ཆུབ་སེམས་དཔའ་དེ་སོམ་ཉིད་དང་བྲལ་ནས་རང་རང་གི་དེ་བཞིན་ཉིད་ལ་དམིགས་ནས། བརྗོད་པ་ལས་འདས་ཏེ། ཅང་མི་སྨྲ་བར་འཁོད་དོ། །ཞེས་དོན་དམ་པའི་བདེན་པའོ། །ཐུགས་རྗེས་འདུལ་བའི་སྟོན་པའི་ལེའུ་ལ་ཐུགས་རྗེས་འདུལ་བའི་ལེའུའོ། །བདུད་རྩིའི་ཐིགས་པ་ཞེས་བྱ་བ་རྒྱ་ཆེར་བཤད་པ་ལས། བདེན་པ་གཉིས་ཀྱིས་བཤད་པའི་ལེའུ་སྟེ་དྲུག་པའོ།། །།དེ་ལྟར་ཐུགས་རྗེས་འདུལ་བ་བསྟན་ཀྱང་ལོག་པའི་ལམ་ལ་དྲེགས་པས་མྱོས་པ་དེ་ཞི་བས་མི་འདུལ་ཏེ། དེ་ལ་ཁྲོས་པའི་ཚུལ་གྱིས་འདུལ་བར་འཁོར་རྣམས་ཀྱིས་སྟོན་པ་ལ་བསྐུལ་བ་བསྟན་པའི་ཕྱིར། དེ་ནས་ཞེས་པ་ལ་སོགས་པ་བསྟན་ཏེ། དེ་ནས་བཅོམ་ལྡན་འདས་རིགས་ལྔའི་བདེ་བར་གཤེགས་པ་ལ་སོགས་པ་ཐམས་ཅད་དགོངས་པ་གཅིག་ཏུ་གྱུར་ཏེ་ཞེས་བྱ་བ་ནི་རིགས་ལྔའི་བདེ་བར་གཤེགས་པའི་འཁོར་གྱི་བྱང་ཆུབ་སེམས་དཔའ་ཐམས་ཅད་དགོངས་པ་ཆོས་ཀྱི་དབྱིངས་གཅིག་ཏུ་གྱུར་ཏེ་སོ་སོ་མ་ཡིན་པའོ། །ལོག་པའི་ལམ་པ་དངོས་པོ་ལ་མངོན་པར་འཆེལ་བ། སྔོན་པའི་ང་རྒྱལ་གྱི་མཐུ་བསྙེམས་ནས་སངས་རྒྱས་ཀྱི་བསྟན་པ་ལ་མངོན་པར་མ་དད་པས། འཇིག་རྟེན་ཕུང་བར་བྱེད་པ་རྣམས་ཞེས་བྱ་བ་ནི། སྔོན་གསང་སྔགས་ཟབ་མོའི་དོན་དང་ལྟ་སྤྱོད་ལ་སོགས་པ་ཐོབ་ཀྱང་ཡང་དག་པའི་ཤེས་རབ་ཀྱིས་མ་ཟིན་པས་དེ་བཞིན་གཤེགས་པའི་སྐུ་མདོག་དང་ཕྱག་མཚན་རང་རྒྱུད་དུ་གཟུང་བས་སྐྱེ་བ་ཕྱི་མ་ལ་གཟུགས་འཇིགས་པ་ལག་ཆ་གདུག་པའི་རུ་ཏྲར་གྱུར་ཏེ། ཤིན་ཏུ་ང་རྒྱལ་གྱི་མཐུ་བསྙེམས་ནས་གནས་པའོ། །སྔགས་ཧཱུྃ་྄ཧཱུྃ་ཕཊ་ཕཊ་ལ་སོགས་པའི་དོན་གསུང་རྣམ་པར་དག་པ་མ་རྟོགས་པས། ངག་གཏུམ་ཚིག་སོད་ཆོད་ལ་སོགས་པའི་སྒྲས་སེམས་ཅན་བརྒྱ་ལ བར་བྱེད་པ་སྒྲོག་པའོ། །ཐུགས་སྤྲོས་པ་མེད་པའི་མ་རྟོགས་པས། ཞེ་སྡང་མནར་སེམས་དང་ལྡན་པའི་རུ་ཏྲར་དྲེགས་པས་མྱོས་པས་དངོས་པོ་ལ་འཆེལ་བ་སངས་རྒྱས་ཀྱི་བསྟན་པ་ལ་ཤིན་ཏུ་ཡང་མ་དད་པ་དེ་ལ་ཞི་བས་འདུལ་བའི་སྐབས་ལ་མ་བབ་སྟེ། དེ་བཞིན་གཤེགས་པའི་མཛད་སྤྱོད་ཀྱིས་འདུལ་བར་འཁོར་རྣམས་ཀྱང་གཟིགས་ནས། བཅོམ་ལྡན་འདས་གསང་བ་མཆོག་གི་བདག་པོ་ལ་འོག་ནས་འབྱུང་བའི་དོན་འདི་སྐད་ཅེས་འཁོར་རྣམས་ཀྱིས་གསོལ་བ་བཏབ་བོ། །ཨེ་མའོ་ལོག་པའི་ལམ་གྱིས་མནར་བ་ལ། །ཞི་བས་ཕན་པར་མི་འགྱུར་ཏེ། །ཞེས་པ་ལ་སོགས་པ་གསུངས་ཏེ། ལོག་པར་ལྟ་བས་མནར་བ་དེ་ལ་ཞི་བས་ཕན་པར་འདི་ཉིད་ལ་མི་འགྱུར་ཏེ། ཕྱིས་ཀྱང་ངུ་འབོད་ཀྱི་གནས་སུ་ལྷུང་བའི་ཕྱིར། འོ་དོད་འབོད་པ་ལྷུང་བར་འགྱུར་ཞེས་གསུངས་ཏེ། ལུས་ངག་ཡིད་གསུམ་གྱི་སྒོ་ནས་ཁྲོ་ཞིང་གཏུམ་པར་གནས་པའི་ཕྱིར། ཤིན་ཏུ་ཁྲོ་གཏུམ་གཏུམ་པ་ལ་ཞེས་གསུངས་པ་ཡིན་ཏེ། དེ་ལ་ནི་གང་གིས་ཀྱང་འདུལ་བར་མི་འགྱུར་ཏེ། ཡེ་ཤེས་ཁྲོས་པས་འདུལ་བར་འགྱུར་པ་དེ་བས་ན། སངས་རྒྱས་བཅོམ་ལྡན་འདས་ཀྱི་འཁོར་རྣམས་མངོན་པར་འདུ་བར་མཛད་པར་རིགས་ཞེས་འཁོར་རྣམས་ཀྱིས་གསོལ་བ་དང་། གདུག་པ་ཅན་དེ་ཁྲོ་བོས་འདུལ་བར་བཅོམ་ལྡན་འདས་ཀྱིས་ཐུགས་སུ་ཆུད་ནས་འཁོར་རྣམས་ལ་སྤྱན་གྱིས་གཟིགས་ཏེ། ཧཱུྃ་ཧཱུྃ་ཧཱུྃ་ཞེས་བརྗོད་པས་རིགས་ལྔ་བདེ་བར་གཤེགས་པ་ལ་སོགས་པའི་འཁོར་ཐམས་ཅད་སྟོང་པ་ཉིད་ཀྱི་བ་སྤུའི་བུ་ག་ནས་ཐུགས་ཀར་ཐིམ་བསྡུས་ཏེ་གཉིས་སུ་མེད་པའི་དབྱིངས་སུ་མི་སྣང་བར་མཛད་དོ། །དེ་ནས་གནས་ཀྱི་དཀྱིལ་འཁོར་ལ་སོགས་པ་ཐམས་ཅད། བཅོམ་ལྡན་ཉིད་ཀྱི་སྐུའི་དབྱིབས་ལ་བསྡུས་ཏེ་དངོས་པོ་མི་སྣང་བར་མཛད་དོ། །དེ་ནས་བཅོམ་ལྡན་འདས་ཉིད་ཀྱིས་ཡང་དག་པའི་དབྱིངས་སུ་ཐིམ་ཏེ། དེ་བཞིན་ཉིད་ཀྱི་ཏིང་ངེ་འཛིན་གནས་པར་འགྱུར་རོ། །དེ་ཡང་ཅི་མངོན་ཞེ་ན། དཔལ་བདུད་རྩི་རྒྱུད་ལས། ཞི་བས་མ་འདུལ་ལས་འདི་ལ། །དྲག་པོས་ཁྲོས་པས་འདུལ་འགྱུར་ཏེ། །ཏིང་འཛིན་གསུམ་ལ་རབ་གནས་ནས། །དེ་བྱུང་ཁྲོས་པས་གཟུགས་རྟག་གོ་ཞེས་གསུངས་སོ། །ཏིང་ངེ་འཛིན་གསུམ་ནི་ཇི་ལྟར་ཡིན་ཞེ་ན། ཇི་སྐད་བཤད་པའི་རྒྱུད་ཀྱི་རྗེས་སུ་འབྲངས་ནས། རྡོ་རྗེ་ཁྲོས་པས་ཞེ་སྡང་གཅོད། །མཚོན་ཆེན་སྔོན་པོ་འབར་བ་ནི། །ནམ་མཁའི་དཀྱིལ་ནས་ཐིག་པ་ཤར། །ཞེས་གསུངས་སོ། །བཅོམ་ལྡན་འདས་དེ་བཞིན་ཉིད་ལ་གནས་པའི་དུས་ན་རྡོ་རྗེ་སྟེ། དེ་བཞིན་ཉིད་ཀྱི་ཏིང་ངེ་འཛིན་ཏེ་རྒྱུའི་རྣམ་པའོ། །དེ་ལ་དྲེགས་པ་ཅན་འདུལ་བར་དགོངས་པའི་ཏིང་ངེ་འཛིན་གྱིས་གཡོས་པ་ནི། ཀུན་ཏུ་སྣང་བའི་ཏིང་ངེ་འཛིན་ཏེ། རྐྱེན་ནི་དེ་ལ་ཁྲོས་པས་ཞེ་སྡང་གཅོད་པའོ། །དེ་ནས་འབྲས་བུའི་ཏིང་ངེ་འཛིན་ཏེ་ཁྲོས་པས་བསྐུལ་བ་ནི། ཡི་གེ་ཧཱུྃ་སྔོན་པོ་འབར་བ་འབྱུང་སྟེ་དེ་ནི་ཁྲོས་པའི་རྒྱལ་པོའི་ཐུགས་མཚོན་པས་ཆེན་པོ་སྟེ། ཡི་གེ་ལ་འོད་རྣམ་པ་ལྔ་འཕྲོས། ཡི་གེ་ཡོངས་སུ་གྱུར་པ་ལས། ཉིད་ཀྱི་སྐུ་ཁྲོ་བོར་འདུལ་བར་མཛད་པའི་ཕྱིར་ཧཱུྃ་མཛད་ཀྲོ་ཏ་མ་ཧ་ར་ཙ་ཕཊ་ཅེས་སྒྲ་བརྗོད་ཅིང་རྡོ་རྗེ་ཁྲོ་བོ་ཏིང་ངེ་འཛིན་ལ་སྙོམས་པར་བཞུགས་ཏེ་ཞེས་བྱ་བ་ནི་སྔགས་ཀྱི་སྒྲ་གྲགས་པ་ནི་ཤིན་ཏུ་ཁྲོས་པས་བསྐུལ་ཏེ་རྡོ་རྗེ་སྐུར་གྱུར་པ་དེ། ཡེ་ཤེས་ཀྱི་རྡོ་རྗེ་རྩེ་དགུ་པ་ཅན་ལ་ནི་སྙོམས་པར་བཞུགས་པའོ། །རྡོ་རྗེ་ཡོངས་སུ་གྱུར་པ་ལས་སྔགས་ཀྱི་བསྐུལ་ཏེ་བསླང་བས། ཁྲོས་པའི་སྐུ་མངོན་པར་འདུ་མཛད་དེ། དབུ་དང་ཞབས་དང་ཕྱག་སྟོང་ཁམས་ཀྱི་རྡུལ་སྙེད་རབ་ཏུ་འཇིགས་པ་མཐའ་ཡས་པར་སྣང་བར་མི་ཟད་པ་འཐོན་པར་འགྱུར་རོ། །དེ་ཡོངས་སུ་རྫོགས་པའི་འབྲས་བུའི་ཏིང་ངེ་འཛིན་ཏོ། །དེ་ནས་གཞལ་ཡས་ཁང་བྱིན་གྱིས་བརླབས་པ་བསྟན་ཏེ། དེའི་ཕྱིར་ཐུགས་ཀ་ནས་ཞེས་གསུངས་པ་ཡིན་ཏེ། ཁྲོས་པའི་རྒྱལ་པོའི་ཐུགས་ཀ་ནས། ཧཱུྃ་འཕྲོས་ཏེ་ཧཱུྃ་ལས་རྡོ་རྗེར་གྱུར་ཏེ་ཕྱོགས་དང་མཚམས་ཀུན་རྡོ་རྗེར་གཏམས་པའི་སྟེང་དང་འོག་དང་རྡོ་རྗེ་ས་གཞི་དང་གུར་རོ། །དེའི་དབུས་སུ་ཡི་གེ་ཨེ་ལས། ཆོས་འབྱུང་བའི་ཕྱག་རྒྱ་ཡུམ་ཀུན་ཏུ་བཟང་མོའི་མཁའ་གྲུ་གསུམ་པ་སྟེ། ཡོངས་སུ་བརྟག་པར་བྱ་བའི་དེའི་དབུས་སུ་ཡུམ་བཞིའི་ངོ་བོར་ཇི་ལྟར་རྒྱས་པར་གཞན་ནས་བསྟན་པ་སྟེ། རིམ་པ་ཇི་ལྟར་སྦྱོར། དེ་ན་ཀེང་རུས་ཀྱི་རི་རབ་ཀྱི་སྟེང་དུ་རིག་པའི་བྷྲཱུྃ་སྨུག་ནག་ཡོངས་སུ་གྱུར་པ་ལས་འབྱུང་བའི་གཞལ་ཡས་ཁང་སྟེ། དེ་ཡང་རླུང་ནག་རྡོ་རྗེའི་དཀྱིལ་འཁོར་ལ་བརྟེན་པ་དང་ཁྲག་གི་རྒྱ་མཚོ་འཁྲུག་པའི་དཀྱིལ་ན། ཀེང་རུས་ཆེན་པོ་རི་རབ་འབར་བའི་སྟེང་ན་དྲག་པོ་ཨེའི་གཞལ་ཡས་ཁང་བྷྲཱུྃ་གྱི་དབུས་སུ་བྱུང་སྟེ། དེ་ཡང་རྒྱན་ནམ་མཁའི་རྒྱ་དང་མཉམ་པ་རྡོ་རྗེའི་གུར་ལས་ཀྱང་འབར་བའི་འཕྲོ་བས་འཁྲུག་པ་གཞལ་ཡས་ཁང་ལས་ཀྱང་འོད་ཟེར་ལྔ་འཕྲོས་ཞིང་འཁྲིག་པར་འགྱུར་རོ། །དེ་ནས་ཁྲོས་པའི་རྒྱལ་པོའི་ཡུམ་བསྐྱེད་པའི་ཕྱིར། དེ་ནས་ཞེས་པ་ལ་སོགས་པ་གསུངས་ཏེ། ༀ་བཛྲ་མ་ཧཱ་ཀྲོ་ཏི་ཞེས་ཁྲོས་པའི་རྒྱལ་པོ་བརྗོད་པས། དེ་བཞིན་ཉིད་ཀྱི་དབྱིངས་ལས་ཁྲོ་མོ་དབང་ཕྱུག་མ་མངོན་པར་ཕྱུང་སྟེ། ཐབས་དང་ཤེས་རབ་འཇུག་པའི་ཕྱིར། ༀ་སརྦ་ཏ་ཐཱ་ག་ཏ་ཨ་ནུ་ར་ག་བཛྲ་སྭ་བྷ་བ་ཨཱཏྨ་ཀོ྅་ཧཾ། ཞེས་པ་སྟེ། ཆགས་པའི་རང་བཞིན་ནོ། །དེ་ནས་པདྨ་དང་། རྡོ་རྗེ་ཡང་དག་པར་ལྡན་པ་ལ། གཉིས་སུ་མེད་པ་བྱང་ཆུབ་ཀྱི་སེམས་བྱུང་བ་ལས། ཧཱུྃ་ཧཱུྃ་ཧཱུྃ་ཧཱུྃ་བྷི་ཤྭ་ཀྲོཏྟ་ཛྭ་ལ་མཎྜལ་ལ་ཕཊ་ཕཊ་ཕཊ་ཧ་ལ་ཧ་ལ་ཧཱུྃ་ཕཊ་ཅེས་ཁྲོས་པའི་རྒྱལ་པོས་བརྗོད་པས། ཕྱོགས་བཅུའི་སངས་རྒྱས་ཐམས་ཅད་སྔོན་གྱི་སྨོན་ལམ་བསྐུལ་བ་ཡིས། ཞེ་སྡང་རྡོ་རྗེ་སྐུ་རྗེས་སུ་དྲན་ནས་དབུ་སྟོང་ཕྱག་སྟོང་མངའ་བ་དང་། སྤྱན་སྟོང་མངའ་བ་ཕྱག་ན་གདུག་པའི་མཚོན་ཆ་ཁ་ཊཾ་ག་ལ་སོགས་པ་བསྣམས་ནས། འཇིག་རྟེན་དྲག་ཏུ་འཐོན་པར་འགྱུར་རོ། །ཁྲོ་བོ་རྣམས་ཀྱི་ཞལ་ནས་ཀྱང་། ཧཱུྃ་ཧཱུྃ་ཕཊ་ཕཊ་ད་ཧ་ད་ཧ་ལ་སོགས་པའི་སྒྲ་མང་པོ་བརྗོད་པ་དེའི་ཚེ། འཇིག་རྟེན་དྲུག་གི་ཕྱོགས་མཚམས་ཐམས་ཅད་གཡོས་རབ་ཏུ་གཡོས་སོ། །ཀུན་ཏུ་རབ་ཏུ་གཡོས་པར་འགྱུར་རོ། །ཞབས་ས་ལ་བརྡབས་པས་ཀྱང་། འཁྲུག་རབ་ཏུ་འཁྲུག་ཀུན་ཏུ་འཁྲུགས་སོ། །སྤྱན་གྱི་འོད་ཟེར་གྱིས་ཀྱང་ཚིག་རབ་ཏུ་ཚིག་ཀུན་ཏུ་ཚིག་གོ། །ཤངས་ཀྱི་རླུང་གིས་ཀྱང་འཐོར་རབ་ཏུ་འཐོར་རོ། །ཀུན་ཏུ་འཐོར་རོ། །དེ་ལྟར་ཁྲོ་བོའི་བྱིན་རླབས་བྱུང་བ་དེའི་ཚེ། འཇིག་རྟེན་ཕུང་བར་བྱེད་པའི་དྲེགས་པ་ཆེན་པོ་དང་། ལྷའི་དབང་པོ་བརྒྱ་བྱིན་དང་འཇིག་རྟེན་གྱི་མེས་པོ་ཚངས་པ་དང་། ལྷ་མ་ཧཱ་དེ་བ་དང་། ལྷ་ཁྱབ་འཇུག་རྣམས་དང་། རང་རང་མཐུ་དང་སྟོབས་དང་ཆེ་བ་སྟོན་ཅིང་ཤིན་ཏུ་ཁྲོ་གཏུམ་མོ། །དེ་ནས་ཡང་ལས་ཀྱི་ལྷ་སྲས་མཆོག་རྡོ་རྗེ་གཞོན་ནུས་དྲེགས་པ་ཇི་ལྟ་བསྒྲལ་བ་བསྟན་པའི་ཕྱིར། དེ་ནས་ཞེས་པ་ལ་སོགས་པས་བསྟན་ཏེ། འཇིག་རྟེན་དྲུག་གི་ཕྱོགས་མཚམས་གཡོས་པའི་དེ་མ་ཐག་པ་དེ་ནས་འཇིགས་བྱེད་ཆེན་པོས་ཧཱུྃ་ཧཱུྃ་ཧཱུྃ་བཛྲ་ཀྲོཏྟ་སརྦ་བིག་ནན་ཕཊ་ཧཱུྃ་ཞེས་གོང་དུ་སྤྲོས་པའི་ཁྲོ་བོ་དབུ་དང་ཕྱག་སྟོང་མངའ་བའི་ཁྲོ་བོ་འ ཆོལ་པ་དེ་དག་གིས་ཕྱོགས་བཅུ་ནས་གནས་པའི་དྲེགས་པ་བསྒྲལ་ལོ། །དེ་ནས་ཡང་ཧཱུྃ་ཧཱུྃ་ཞེས་འཇིགས་བྱེད་ཆེན་པོས་བརྗོད་པས་ཁྲོ་བོ་དེ་དག་སླར་འདུས་ཏེ་ཁྲག་འཐུང་ཆེན་པོའི་མདུན་དུ་སྲས་མཆོག་རྡོ་རྗེ་གཞོན་ནུའི་སྐུ་མཐིང་ནག་དམར་ནག་དེ་དབུས་མཐིང་ནག་གཡས་ལྗང་ནག་གཡོན་དམར་ནག་གི་ཚུལ་གྱིས་ཞལ་རྔམ་པ་ཕ་རོལ་དུ་ཕྱིན་པ་དྲུག་གི་རྟགས་སུ་ཕྱག་དྲུག་ཞབས་བཞི་ཤིན་ཏུ་བགྲད་པས་སྟང་ཚུལ་དུ་བཞུགས་པས། རྡོ་རྗེ་གཤོགས་པས་གཏམ་པས་སངས་རྒྱས་ལྔ་དབུ་ལ་རྫོགས་ཤིང་སྐྲ་ཁམས་ནག་གྱེན་དུ་འཁྱིལ་ཞིང་སྐུ་ལ་དུར་ཁྲོད་ཀྱི་རྒྱན་གྱིས་བརྒྱན་པ། སྟོད་རྡོ་རྗེའི་ཆ་ལག་པ་སྨད་རྡོ་རྗེའི་ཕུར་པས་གཏམས་པས་དུར་ཁྲོད་ཀྱི་མེ་འབར་བའི་དཀྱིལ་ན་ཡུམ་རལ་གཅིག་མ་དང་འཁྲིལ་བའི་ཚུལ་གྱིས་གནས་པ་གཅིག་ཏུ་གྱུར་ཏེ། བཀའ་ནོད་པའི་ཚུལ་དུ་ཁྲག་འཐུང་ཆེན་པོ་ལ་ཕྱོགས་ནས། གནས་ཤིང་དྲེགས་པ་ཀུན་ཞབས་འོག་ཏུ་བརྫིས་ཏེ་གནས་པ་ལས། ཁྲག་འཐུང་གི་རྒྱལ་པོས་ཕྱོགས་བཅུ་ནས། སྲས་མཆོག་རྡོ་རྗེ་གཞོན་ནུ་ལ། །དབང་བསྐུར་བའི་ཕྱིར་བྱང་ཆུབ་སེམས་ཀྱི་འོད་ཟེར་གྱི་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཞེ་སྡང་རྡོ་རྗེས་བསྐུལ་ཏེ་བཀུག་ནས་མདུན་གྱི་དཀྱིལ་འཁོར་ན་གནས་པ་ལས། བཤད་པའི་རྒྱུད་ཀྱི་རྗེས་འབྲངས་ནས། །རྡོ་རྗེ་གཞོན་ནུའི་རིག་འཛིན་རྣམས། །སྲིད་པའི་ཕུར་བུ་གྲུབ་མཛད་ཅིག །སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་ཟད་པ། །སྐུ་ཡི་དབྱིངས་སུ་རྫོགས་གྱུར་ཅིག །ཐབས་ཀྱི་སྤྱོད་པས་འགྲོ་དོན་དུ། །བྱམས་དང་སྙིང་རྗེ་གང་འདུལ་བ། །སངས་རྒྱས་ཕྲིན་ལས་རྫོགས་བྱས་ནས། །དབང་དང་བྱིན་རླབས་འདིར་སྩོལ་ཅིག །ཅེས་པས་དབང་བསྐུར་བར་མཛད་དོ། །དེ་ནས་ཡེ་ཤེས་ཀྱི་དཀྱིལ་འཁོར་གྱིས་དབང་བསྐུར་ཏེ། ཕྱི་ནང་གསང་བའི་དབང་རྫོགས་པར་བསྐུར་ཏེ་དེའི་ཕྱིར། ཁྲོས་པའི་རྒྱལ་པོ་དབང་བསྐུར་བའི་ཕྱིར། ཞེས་གསུངས་པ་ཡིན་ཏེ། དབང་ཐོས་པའི་རྟགས་སུ་ཧཱུྃ་བཛྲ་ཀྲོ་ཏ་ཛྙཱ་ན་བཛྲ་ཞེས་བརྗོད་ནས། ལས་ཀྱི་རྡོ་རྗེ་རྩེ་དགུ་པ་ནི་ཕྱག་གཡས་དང་པོར་བྱིན། ཡེ་ཤེས་ཀྱི་རྡོ་རྗེ་རྩེ་ལྔ་པ་ནི། གཡས་པར་མར་བྱིན་ནས། དབང་སྟེ་རང་བཞིན་གྲུབ་པའི་གནས་སུ་གཤེགས་སོ། །དེ་ནས་སྲས་རྡོ་རྗེ་གཞོན་ནུ་ཉིད་ཀྱིས་གོང་དུ་བཏུལ་བའི་དྲེགས་པ་དེ་དག་ལ་ཁ་ཊཾ་ག་ཕྱག་གཡོན་གྱིས་བར་མར་འཕྲོས་ནས། ལོག་པའི་ལམ་པ་ལས་རྒྱལ་བའི་རྟགས་སུ་བསྣམས་པའོ། །དེ་ནས་ཡང་ཁྲག་འཐུང་ཆེན་པོས་སྲས་ཕུར་པ་ལྔ་བསྐྱེད་ནས་དྲེགས་པ་ཅན། ཉོན་མོངས་པ་ལྔ་བསྒྲལ་བའི་ཕྱིར། དེ་ནས་ཡང་ཁྲག་འཐུང་ཆེན་པོས་ཞེས་པ་ལ་སོགས་པ་གསུངས་ཏེ། ཁྲག་འཐུང་ཆེན་པོས། ཐུགས་ཀ་ནས་འོད་ཟེར་འཕྲོས་ཏེ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཞེ་སྡང་རྡོ་རྗེ་གཞོན་ནུ་དང་། ང་རྒྱལ་རྡོ་རྗེ་གཞོན་ནུ་དང་། འདོད་ཆགས་རྡོ་རྗེ་གཞོན་ནུ་དང་། ཕྲག་དོག་རྡོ་རྗེ་གཞོན་ནུ་དང་། གཏི་མུག་རྡོ་རྗེ་གཞོན་ནུ་ལ་སོགས་པ་བཀུག་སྟེ། བྱང་ཆུབ་སེམས་ཀྱི་ལམ་ནས་ཕྱུང་ནས་དེ་ནས་ཧཱུྃ་ལྔར་འགྱུར་ཏེ། ཡོངས་སུ་གྱུར་པ་ལས་སྲས་ཕུར་པ་ལྔར་གྱུར་ཏེ། དེ་བསྟན་པའི་ཕྱིར། རྡོ་རྗེ་ལས་འཐོན་ཏེ་ཞེས་པ་ནས་ཐུགས་ཀ་ནས་ཡེ་ཤེས་སེམས་དཔའ་དང་ལྡན་པ་ཞེས་པའི་བར་གྱིས་བསྟན་ཏེ། དཀྱུས་ཉིད་གསལ་ལོ། །དེ་ནས་ཡུམ་གྱི་མཁའ་ལ་གདོན་པ་བསྟན་པའི་ཕྱིར། རྡོ་རྗེ་ལས་འཐོན་ཏེ། ཞེས་པ་ནས་ཐུགས་ཀ་ནས་ཡེ་ཤེས་སེམས་དཔའ་དང་ལྡན་པའི་ཞེས་པའི་བར་གྱིས་བསྟན་ཏེ་དཀྱུས་ཉིད་གསལ་ལོ། །དེ་ནས་ཡུམ་གྱི་མཁའ་ལ་གདོན་པ་བསྟན་པའི་ཕྱིར། ཨེའི་གདན་ལ་ཞེས་པས་བསྟན་ཏེ། ཤེས་རབ་མ་ལ་འབྱུང་བའི་ཕྱིར། ཨེའི་གདན་ལ་སྲས་མཆོག་རྡོ་རྗེ་གཞོན་ནུའི་སྤྱན་མངའ་ན། བཀའ་ནང་པའི་ཚུལ་དུ་བཞུགས་སོ། །དེ་ནས་མཆོག་རྡོ་རྗེ་གཞོན་ནུའི་ཞབས་འོག་ནས་གཟིར་བའི་དྲེགས་པ་ཅན་དེ་རྣམས། བསྒྲལ་བའི་ཁྲག་འཐུང་ཆེན་པོས་བསྐུལ་བ་ནི། ཧཱུྃ་མཐིང་ནག་གྲུ་གསུམ་ཞེས་པའི་ཚིག་བཞིས་བསྟན་ཏེ། ཐོབ་ཅེས་པའི་བར་དུའོ། །དེ་ནས་སྲས་མཆོག་རྡོ་རྗེ་གཞོན་ནུས་ཀྱང་། བསྒྲལ་བ་བསྟན་པའི་ཕྱིར། ཁྲོ་བོ་ལས་ཀྱི་སྐྱེ་གནས་བཟུང་། དེ་ཞེས་པ་ནས་རིམ་པ་ཇི་ལྟ་བར་ཁྱབ་འཇུག་ཕོ་མོ་འཁོར་དང་བཅས་པ་བསྒྲལ་ལོ། །ཞེས་པའི་བར་གྱིས་བསྟན་ཏེ་དཀྱུས་ཉིད་གསལ་ལོ། །དེ་ནས་ཡང་ཁྲག་འཐུང་ཆེན་པོས་སྲས་མཆོག་རྡོ་རྗེ་གཞོན་ནུ་ལ་སྐུ་ཟ་བྱེད་ཆེན་པོས་དབང་བསྐུར་ཞིང་བྱིན་གྱིས་བརླབས་པའི་ཕྱིར། ཁྲག་འཐུང་ཆེན་པོས་ཛྭ་ལ་རཾ་ཞེས་བརྗོད་པས་མེ་དཔུང་དུད་ཁ་འབར་ཞིང་འཕྲོ་བ་སྲས་མཆོག་རྡོ་རྗེ་གཞོན་ནུ་ཕྱག་གཡས་དང་པོར་ཕུལ་ཏེ་སྒྲོལ་བའི་དབང་བསྐུར། དྲེགས་པ་ཅན་བསྒྲལ་བའོ་ཉོན་མོངས་པ་ཐམས་ཅད་བསྲེགས་སྦྱངས། སྙིང་དང་ནང་གྲོལ་དང་ཕུང་པོ་རྣམས་ཧ་ཧ་ཞེས་ཞལ་དུ་གསོལ་ནས་ཕུང་པོ་ལྷག་མ་དང་བཅས་པར་མཛད་དོ། །དེ་ནས་ཡང་སྲས་མཆོག་རྡོ་རྗེ་གཞོན་ནུས་ཕྱོགས་བཅུའི་ཁྲོ་བོ་དང་། ཁྲོ་མོ་བཅུ་མཐོན་ནས་ཁྲོ་མོས་བསྒྲལ་བ་དང་བསྟན་པའི་ཕྱིར། དེའི་ཚེ་ཞེས་པས་བསྟན་ཏེ། ཁྲག་འཐུང་ཆེན་པོས་སྲས་མཆོག་རྡོ་རྗེ་གཞོན་ནུས་དབང་བསྐུར་བ་དེའི་ཚེ། སྲས་མཆོག་རྡོ་རྗེ་གཞོན་ནུ་ཡབ་ཡུམ་གཉིས་སུ་མེད་པའི་བྱང་ཆུབ་སེམས་ཀྱི་སྤྲིན་ལས་གསང་བའི་པདྨ་ལ་འོད་ཟེར་དུ་འཕྲོས་འོད་ཟེར་ལ་ཡི་གེ་ཧཱུྃ་ཧཱུྃ་ལ་སོགས་པ་བཅུ་རུ་གྱུར་ཛཿཧཱུྃ་དང་བཾ་དང་ཧོ་རྣམས་གསལ་བར་འགྱུར་ཏེ། ཡི་གེ་རྣམས་ཡོངས་སུ་གྱུར་པ་ལས་རྡོ་རྗེ་དྲིལ་བུ་དང་། ལྕགས་ཀྱུ་ཞགས་པ་ལྕགས་སྒྲོགས་དང་དྲིལ་བུ་རྣམས་སུ་གྱུར་ཏོ། །ཕྱག་མཚན་དེ་རྣམས་ཡོངས་སུ་གྱུར་པ་ལས་གཙོ་བོའི་སྔགས་ཀྱི་ལེའུ་ནས་བྱུང་བའི། ༀ་བཛྲ་ཀྲོ་ཏ་ཧཱུྃ་ཀ་ར་ཧཱུྃ་ཞེས་བྱ་བ་ལ་སོགས་པའི་ཁྲོ་བོ་བཅུའི་བསྐྱེད་པའི་སྔགས་བརྗོད་པས་སོ། །སོ་སོའི་སྐུ་ཡོངས་སུ་རྫོགས་པར་བསྐྱེད་དེ་ཡང་ཇི་ལྟར་ཞེ་ན་ཁྲོ་བོ་ཧཱུྃ་ཀ་ར་ཞེས་བྱ་བ་ནི་ཁྲོ་བོ་ཆེན་པོ་ཧཱུྃ་ཀ་ར་དབུ་གསུམ་ཕྱག་དྲུག་པ་དབུ་གསུམ་པ་སྐུ་དང་ཞལ་དབུས་མ་སྔོ་སྐྱ་གཡས་དཀར་གཡོན་དམར་བའི། ཕྱག་དྲུག་ལ་གཡས་གཡོན་དང་པོ་གཉིས་རྡོ་རྗེ་དུང་ཆེན་དམར་གྱིས་བསྐང་བ་འཁྲུག་ཅིང་གསོལ་བའོ། །བར་མ་གཉིས་ན་མདའ་གཞུ་འགེངས་པ་དང་། ཐ་མ་གཉིས་ན་རི་རབ་ཕུར་བུ་འདྲིལ་བའོ། །རྣམ་པར་རྒྱལ་བ་དང་ཞེས་པའི་ཞལ་དབུས་དཀར་བའོ། །གཡས་སྔོན་པོ་གཡོན་ལྗང་སེར་ཕྱག་བར་མ་གཉིས་རྡོ་རྗེ་དང་འཁོར་ལོའོ། །དབྱུག་པ་སྔོན་པོ་ཞེས་བྱ་བ་ནི་སྐུ་དང་ཞབས་དབུས་སྔོ་སྐྱ་གཡས་དཀར་གཡོན་དམར་སྐྱའོ། །ཕྱག་བར་མ་གཉིས་ན་དབྱུག་པ་རིན་པོ་ཆེ་དང་། མེ་དབལ་བསྣམས་བའོ། །གཤིན་རྗེ་གཤེད་པོ་དང་ཞེས་པ་ནི་སྐུ་དང་ཞལ་དབུས་སྔོན་པོ་གཡས་སྔོ་སྐྱ་གཡོན་ལྗང་ནག །ཕྱག་བར་མ་གཉིས་ན་དབྱུག་པ་མི་མགོ་ཅན་དང་། དགྲ་སྟ་བསྣམས་པའོ། །མི་གཡོ་མགོན་པོ་དང་ཞེས་པ་ནི། སྐུ་དང་ཞལ་དབུས་ལྗང་གཡས་སྔོན་པོ། གཡོན་སྨུག་ནག་ཕྱག་བར་མ་གཉིས་ན་རྡོ་རྗེ་དང་ཞགས་པའོ། །རྟ་མགྲིན་དང་ཞེས་པ་ནི་སྐུ་དང་ཞལ་དབུས་དམར་ནག །གཡས་དཀར་གཡོན་སྔོན་པོ་ཕྱག་བར་མ་གཉིས་ན་རལ་གྲི་དང་སྦྲུལ་གྱི་ཞགས་པའོ། །གཞན་གྱིས་མི་ཐུབ་པ་དང་ཞེས་བྱ་བ་ནི། སྐུ་དང་ཞབས་དབུས་དམར་སྐྱ་གཡས་སེར་པོ་གཡོན་ལྗང་གུ་ཕྱག་བར་མ་གཉིས་ན་བྷན་དྷ་དང་རྔ་ཡབ་བོ། །བདུད་རྩི་འཁྱིལ་པ་ཞེས་བྱ་བ་ནི། སྐུ་དང་ཞལ་དབུས་མ་ལྗང་ནག་གཡས་སེར་པོ་གཡོན་དུད་ཀ་ཕྱག་བར་མ་གཉིས་ན་རྡོ་རྗེ་རྒྱ་གྲམ་དང་རིན་པོ་ཆེ་དབྱུག་པའོ། །ཁམས་གསུམ་རྣམ་པར་རྒྱལ་བ་དང་ཞེས་བྱ་བ་ནི། སྐུ་ཞལ་དབུས་སེར་པོ་གཡས་དཀར། གཡོན་ལྗང་གུ་ཕྱག་བར་མ་གཉིས་ན་འཁོར་ལོ་དང་མདའ་གཞུའོ། །སྟོབས་པོ་ཆེ་རྣམས་སོ། །ཞེས་བྱ་བ་ནི་སྐུ་དང་ཞལ་དབུས་དུད་ཀ་གཡས་ནག་པོ་གཡོན་དམར་པོ་ཕྱག་བར་མ་གཉིས་ན་ཞགས་པ་དང་ཐོ་བ་བསྣམས་པའོ། །ཁྲོ་མོ་རྡོ་རྗེ་སྒྲ་འབྱིན་མ་རྣམས་དང་། ཞེས་པ་ལ་སོགས་པ་སྐུ་མདོག་ཡབ་དང་འདྲ་ཁྱད་པར་ནི་ཕྱག་གཉིས་ནི་དྲིལ་བུ་ཐོགས་ནས་མགུལ་པ་ནས་འཁྱུད་ནས་གནས་པའི་ཕྱིར། འཁྱིལ་བའི་ཚུལ་གྱིས་འཐོན་ཏེ། ཞེས་གསུངས་ཏེ། གསང་བའི་དཀྱིལ་འཁོར་ནས་འཐོན་ཏེ། ཕྱོགས་བཅུར་སེམས་ཅན་གྱི་དོན་ལ་སྐྱེ་སྟེ། ཕྱོགས་སྐྱོང་འོག་ནས་འབྱུང་བ་ཡང་སྐབས་འདི་ཉིད་དུ་བསྒྲལ་བར་རིག་པར་བྱའོ། །སླར་འདུས་ནས་ཕྱི་རོལ་གྱི་དཀྱིལ་འཁོར་དུ་རང་རང་སོ་སོའི་གདན་འོག་ནས་གསུངས་པ་རྣམས་ལ་བཞུགས་སོ། །ཚུལ་ཇི་ལྟར་བཞུགས་ཤེ་ན་དེ་བསྟན་པའི་ཕྱིར། དབུ་གསུམ་ཕྱག་དྲུག་ཞབས་ཐུར་དུ་གཏམས་པ་གདུག་པའི་ཞེ་ས་ལ་སོགས་པ་ཤ་སྟག་སྟེ། ཞེས་པའི་བར་གྱིས་བསྟན་ཏེ་དེ་ལྟར་ཏེ་དེ་ལྟར་བཞུགས་སོ། །དེ་ནས་འཁོར་གྱི་འཕྲ་མེན་མ་སྐྱེད་པར་བྱ་སྟེ། ཕྱོགས་བཅུའི་ཁྲོ་བོ་ཡབ་ཡུམ་གཉིས་སུ་མེད་པ་བྱང་ཆུབ་ཀྱི་སེམས་ལས་སྤྲུལ་པ་ལྕམ་དྲལ་བསྐྱེད་དེ། ཐབས་དང་ཤེས་རབ་ཀྱི་ཆ་སོ་སོར་སྨིན་པར་འགྱུར་ཏེ། མཆེ་བ་ཅན་གཡས་སུའོ། །གཤོགས་པ་ཅན་གཡོན་དུའོ། །དེ་ལྟར་སྤྲུལ་པ་ལྕམ་དྲལ་བསྐྱེད་ནས་འཁོར་གནས་བསྟན་པའི་ཕྱིར། དེ་དག་གི་འཁོར་ན་ཞེས་པ་ནས་རླུང་ཡང་མི་ཤོར་བར་གཏམས་ནས་ཞེས་བྱ་བའི་བར་གྱིས་བསྟན་ཏོ། །ཁྲོ་བོ་རྣམས་ཀྱི་གདན་བསྟན་པའི་ཕྱིར། ཉི་ཟླ་དང་ཞེས་པ་ནས་གོང་མ་ལྟར་བསྒྲལ་ལོ། །ཞེས་པའི་བར་གྱིས་བསྟན་ཏེ། ཉི་མ་དང་ཟླ་བ་ནི་ཐབས་ཀྱིས་ཤེས་རབ་རྟགས་སོ། །ཕྱོགས་སྐྱོང་བ་བཅུ་ཡིས་ནི་གདན་མཛད་པ་ནི་མི་དགེ་བ་བཅུ་རྣམ་པར་དག་ནས་དགེ་བ་བཅུ་ལ་གནས་པའི་རྟགས་སོ། །དེ་ཡན་ཆད་དུ་ནི་རྩ་བའི་དཀྱིལ་འཁོར་གསུངས་སོ། །སྐྲ་ཀའི་མགོ་ཅན་ལ་སོགས་བཞི་ཡན་ཆད་དོ། །ད་ནི་ལས་ལ་བཏང་བའི་ལྷ་བསྐྱེད་པར་བྱ་སྟེ། དེའི་ཕྱིར་དེ་ནས་ཞེས་པ་ལ་སོགས་པ་གསུངས་ཏེ། དཔལ་ཁྲག་འཐུང་ཆེན་པོས་གསང་བ་རོལ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞེས་བྱ་བ་ནི། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པའི་ངང་ཚུལ་ཅན་དེ་ནི་དཔལ་དེའི་ངང་དུ་ཁམས་གསུམ་གྱི་ཉོན་མོངས་བསྡུད་པའི་རྟགས་སུ། ཁྲག་འཐུང་བས་ཁྲག་འཐུང་གཞན་ལས་ཁྱད་པར་དུ་འཕགས་པ་ཆེན་པོ། །དེའི་ཐབས་དང་ཤེས་རབ་ཀྱི་རྗེས་སུ་ཆགས་པའི་གསང་བ་གཉིས་སུ་མེད་པར་རོལ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ཉིད་དུ་ཡང་ཁམས་གསུམ་ཐམས་ཅད་མཉམ་ཉིད་ཀྱིས་རྒྱས་བཏབ་པར་འགྱུར་རོ། །དེ་ནས་དྲེགས་པ་ཆེན་པོའི་མ་དང་བུ་མོ་དང་། ཆུང་མ་རྣམས་དབང་དུ་བསྡུ་བའི་ཕྱིར། འོད་ཟེར་ལྕགས་ཀྱུ་འཕྲོས་པས་སྤྲོ་ཞིང་ཧཱུྃ་ཧཱུྃ་ཨེ་ཨ་ར་ལི་རུ་ལུ་རུ་ལུ་ཧཱུྃ་ཛ། ཞེས་ཁྲག་འཐུང་ཆེན་པོས་བརྗོད་པས་དྲེགས་པ་ཆེན་པོའི་མ་དང་བུ་མོ་དང་ཆུང་མའི་ཚོགས་ཀྱི་གཙོ་མོ་ནི་ཉི་ཤུ་རྩ་བརྒྱད་འཁོར་གྲངས་མེད་པ་དང་བཅས་ནས། ཁྲག་འཐུང་ཆེན་པོའི་ཐད་དུ་ཡུད་ཙམ་གྱིས་འདས་པར་འགྱུར་རོ། །དེ་ནས་ཡང་ཁྲག་འཐུང་ཆེན་པོས་ཨེ་ཨ་ར་ལི་ཧོ། ཞེས་བརྗོད་པས་འདུས་པ་རྣམས་གཉིས་ཀྱི་སྐུ་ལ་འཁྱིལ་ཏེ། དགྱེས་པའི་སྤྲིན་ལ་ཧོ། ཞེས་བརྗོད་པ་རྫོགས་པའི་ཚུལ་དུ་སྐད་ཅིག་རེ་རེ་ལ་སལ་སལ་བསྐྱེད་དོ། །སྐུ་མདོག་ཕྱག་མཚན་ནི་སྒྱུ་འཕྲུལ་ལས་ཇི་སྐད་གསུངས་པ་བཞིན་ནོ། །དེ་ནས་ཡང་སེང་གདོང་མ་ལ་སོགས་པ་བསྐྱེད་དོ། དགྱེས་པའི་སྤྲིན་ལས་ཧེ་ཧེ་ཞེས་བརྗོད་པས་བརྗོད་པའི་དེ་མ་ཐག་པ་དེ་ཉིད་དུ་སྐུ་རྫོགས་པར་གསལ་བྱ་སྟེ། དཀྱིལ་འཁོར་གྱི་ཕྱི་མཚམས་སུ་འཁོད་དོ། །དེ་ནས་ཡང་དེ་འདྲེན་པར་བྱེད་པ་ལ་སོགས་པའི་ཕོ་ཉ་འབྱེད་པའི་ཕྱིར། ཡང་དགྱེས་པའི་སྤྲིན་ལས་ཕཊ་ཅེས་བརྗོད་པས་སྐད་ཅིག་མ་རེ་རེ་ལ་གསལ་བར་བྱས་ལ་སྒོ་སྒོར་འཁོད་དོ། །དེ་རྣམས་ནི་ལས་ཀྱི་ལྷ་ཡིན་པར་ཤེས་པར་བྱའོ། །དེ་ནས་ཡང་མ་མོ་དེ་རྣམས་རང་གི་གནས་སུ་བསྐྲད་པའི་ཕྱིར། ཁྲག་འཐུང་ཆེན་པོ་རབ་ཏུ་འཕྲོས་པའི་ཏིང་ངེ་འཛིན་གྱིས་ཕཊ་ཅེས་པས་བསྐྲད་དེ། མ་མོ་དེ་རྣམས་རང་རང་གི་གནས་ག་ལ་བ་དེ་ཡུད་ཙམ་གྱིས་ཕྱིན་པར་དགྱེའོ། །དེ་ནས་སྔར་གྱི་དྲེགས་པ་རྣམས་མྱོས་ནས་ཡོད་པ་དེ་རྣམས་སླར་མྱོས་པར་བྱ་བའི་ཕྱིར། དེ་ནས་ཁྲོ་བོ་རྣམས་ཕྱག་བྲང་ལ་བསྣོལ་ཏེ་བཙིར་བས་མི་གཙང་བའི་ཕྱག་རྒྱ་རྒྱ་མཚོར་འཁྱིལ་ཏེ། དྲན་པ་མེད་པར་བྱས་སོ། །དེ་ནས་ཡང་དྲན་པ་མེད་པ་དེ་རྣམས་གསོ་བར་བྱ་བའི་ཕྱིར། ཁྲག་འཐུང་ཆེན་པོས་ཐུགས་རྗེས་བདུད་རྩི་འབྱུང་བའི་ཏིང་ངེ་འཛིན་ལ་སྙོམས་པར་ཞུགས་ནས། སྣམས་ནས་ཁྲོ་མོ་སྨེ་ཤ་འཐོན་ཏེ། དེས་མི་གཙང་བའི་རྒྱ་མཚོ་བརྡུབས་པས་རྒྱ་མཚོ་དེ་དྲེགས་པ་དེ་དག་སླར་དྲན་པ་ཐོབ་སྟེ། ཀུན་རྫོབ་ཀྱི་བདེན་པ་མཐོང་། དེ་ནས་ཕྱོགས་སྐྱོང་དེ་དག་གིས་ཀྱང་དཔལ་ཆེན་པོ་འབངས་སུ་མནའ་བོར་ཏེ་ཁས་བླངས་སོ། །དེ་ནས་ཡང་ལུས་ཁྲོ་བོ་རྣམས་ཀྱི་གདན་ཁྲིར་ཕུལ་ཏེ། བདག་གི་ལུས་ཉོན་མོངས་པ་འདི་ཁྲོ་བོ་རྣམས་ལ་གདན་དུ་དབུལ་གྱིས་བཞེས་སུ་གསོལ་བདག་གི་སེམས་ཅན་ཀྱིས་ནི་ཕྱི་རབ་ཀྱི་རྣལ་འབྱོར་པ་ཕྱོགས་སྐྱོང་བར་བགྱིད་ལགས་སོ། །ཞེས་ཁས་བླང་ཞིང་དམ་བཅས་སོ། །དེ་ལྟར་བཏུས་ཤིང་དབང་དུ་བསྡུས་པས། དེའི་ཚེ་གདན་ཕྱོགས་སྐྱོང་བ་རྣམས་ཁྲོ་བོ་རྣམས་ཀྱི་ཞབས་འོག་ཏུ་བཞག་པ་ཡིན་ནོ། །དེའི་དུས་ན་མ་དང་བུ་མོ་དང་ཆུང་མ་རྣམས་ཀྱང་དཔལ་ཆེན་པོའི་འཁོར་དུ་འཕུལ་ཏེ། དཔལ་ཁྲག་འཐུང་གི་རྒྱལ་པོས་ཀྱང་མ་དང་བུ་མོ་རྣམས་ལ་ལྕེ་ལ་བདུད་རྩི་བཞག་སྟེ། དམ་ཚིག་ཕོག་སྟེ་ཕྱི་རབ་ཀྱི་རྣལ་འབྱོར་པས་ཅི་བ སྒོ་བའི་ལས་བྱ་བར་ཁས་བླངས་ནས་དམ་ཡང་བཅའོ། །དེ་ནས་ལས་ཀྱི་ལྷ་རུ་དབང་བསྐུར་ཏེ། གཞལ་ཡས་ཁང་གི་མུ་རན་ལ་བཞག་གོ། །དྲེགས་པ་ཅན་བཏུལ་བའི་ལེའུའོ། །བདུད་རྩིའི་ཐིགས་པ་ཞེས་བྱ་བ་རྒྱ་ཆེར་བཤད་པ་ལས་ཀུན་རྫོབ་ཀྱི་བདེན་པ་འབའ་ཞིག་གིས་བཤད་པའི་ལེའུ་སྟེ་བདུན་པའོ།། །།དེ་ལྟར་གདུག་པ་ཅན་བཏུལ་བ་དང་། ཇི་ལྟར་ཕུར་པ་གདབ་པ་བསྟན་པ་ཡང་ལས་དང་པོས་བསྟན་པའི་དཀྱིལ་འཁོར་ལ་བསྟེན་ནས་བཏུབ་དགོས་པའི་ཕྱིར་དེ་ནས་ཞེས་པ་ལ་སོགས་པ་གསུངས་ཏེ། དེ་ནས་བཅོམ་ལྡན་འདས་ལས་ཕྱུང་ཞེས་པར་བྱ་བར་འབྲེལ་ཏེ་ཅི་བྱུང་ཞེ་ན་ཉིད་ཀྱི་དཀྱིལ་འཁོར་འདི་ཕྱུང་ངོ་། །གང་ནས་ཕྱུང་ཞེ་ན། སྐུ་གསུང་ཐུགས་ལས་ཕྱུང་ངོ་ཞེས་བྱའོ། །ཅིའི་ཕྱིར་ན་གདུག་པ་ཅན་བསྒྲལ་བའི་ཕྱིར་ཕྱུང་བའོ། །དེ་ནས་དཀྱིལ་འཁོར་བྱ་བའི་གནས་བསྟན་པའི་ཕྱིར། དུར་ཁྲོད་དང་ནི་ངན་གྲོགས་གནས། །ཞེས་པ་ལ་སོགས་པས་བསྟན་ཏེ། དུར་ཁྲོད་ནི་མ་མོ་འདུས་པའི་གནས་ཡིན་པས། དྲག་པོ་བསྒྲུབ་པའི་ལས་ལ་ཤིས་པའོ། །ངམ་གྲོག་གི་གནས་ནི་ཀླུ་བཙན་གདུག་པ་ཅན་གནས་པ་དེར་བྱའོ། །སྐད་གཅིག་ཤིང་ནི་རྐང་གཅིག་སྟེ། ཐེའུ་རང་གི་འདུ་བའི་གནས་ཡིན་པས། དེར་ཤིས་པའོ། །སུམ་མདོ་ནི་ལམ་གྱི་སུམ་མདོ་སྟེ། ཐེའུ་རང་གི་ལྷ་འདྲེ་ཐམས་ཅད་རྒྱུ་བའི་སྲང་སྟེ་དེར་བསྒྲུབ་པའོ། །ཁང་སྟོང་ནི་བུད་མེད་འདུ་བའི་གནས་ཏེ། དེར་བསྒྲུབ་པར་བྱའོ། །གནས་དེ་རྣམས་སུ་རྡོ་རྗེ་དྲག་པོའི་དཀྱིལ་འཁོར་བྱའོ། །དེའི་དབྱིབས་ཇི་ལྟར་བྱ་ཞེ་ན། དེ་བསྟན་པའི་ཕྱིར། འབར་བའི་འཁོར་ལོ་རྩིབས་བརྒྱད་པ། །ཞེས་པ་ལ་སོགས་པས་བསྟན་ཏེ། དཔལ་ཁྲག་འཐུང་ཆེན་པོའི་ཐུགས་ལས། རྣམ་པར་ཐར་པ་བརྒྱད་ཀྱི་སྒོ་ནས་ཉོན་མོངས་པ་བསྒྲལ་བའི་ཕྱིར། འཁོར་ལོ་རྩིབས་བརྒྱད་པར་ཕྱུང་བའོ། །གྲུ་ཆད་བཞི་ནི་འཁོར་ལོའི་ཕྱི་རོལ་ཁྱམས་ཀྱི་ནང་གང་ཡིན་པའོ། །གྲུ་བཞིའི་སྒོ་ཁྱུད་བཞི་དང་ལྡན་ཞེས་བྱ་བ་ནི་ཁྱམས་ཏེ། ལྷ་སྣམ་མོ། །སྒོ་ཁྱུད་བཞི་ནི་ཕྱོགས་བཞིའོ། །འབར་བའི་བར་ཁྱམས་གཉིས་ཀྱིས་མཛེས་ཞེས་བྱ་བ་ནི་སྒོའི་ཕྱི་རོལ་དུ་ཁྱམས་གཉིས་བྱ་བ་སྟེ། དེར་ཡང་མེ་རི་བྲི་བའོ། །དབུས་ཀྱི་ལྟེ་བ་ཟླུམ་པོ་ལ་ཞེས་བྱ་བ་ནི་འཁོར་ལོའི་ལྟེ་བ་ཟླུམ་པོ་སྟེ། དེ་ལ་ཐིག་བཞི་བཏབ་པས་ལེའུ་ཚེ་བརྒྱད་དུ་འགྱུར་ཏེ། དེའི་ལེའུ་ཚེ་དབུས་དང་ཕྱོགས་གཉིས་ཏེ། ཤར་ཕྱོགས་ནུབ་ཕྱོགས་དབུས་དང་ཕྱོགས་གསུམ་པོ་དེ་དག་ལ་ནི་མཐིང་ནག་གི་གྲུ་གསུམ་པ་མཐའ་མེ་རི་འོད་འབར་བ་བྲི་བ་སྟེ། འཁོར་ལོ་རྩིབས་རྣམས་ལ་ཡང་བྲི་བར་བྱའོ། །དྲ་བ་དང་དྲ་བ་ཕྱེད་པ་ནི་རིན་པོ་ཆེ་ཕ་གུ་ལ་སོགས་པའི་རྒྱན་ཐམས་ཅད་རྒྱས་པར་བྲི་བ་ནི། རྒྱུད་གཞན་དག་ལས་ཇི་ལྟར་རྒྱས་པར་བསྟན་པ་བཞིན་བྲི་བར་བྱའོ། །དེ་ནས་ལྷ་དགོད་པའི་རིམ་པ་བསྟན་པ་སྟེ། དེའི་ཕྱིར་དབུས་སུ་དྲེགས་པའི་གདན་དག་ལ། ཞེས་པ་ལ་སོགས་པ་བསྟན་ཏེ། དབུས་སུ་དྲེགས་པའི་གདན་ལ་རྡོ་རྗེ་གཞོན་ནུ་ཡབ་ཡུམ་དགོད་ཅེས་བྱ་བ་ནི། བསྙེན་པའི་དཀྱིལ་འཁོར་ལ་ཡང་དགོད་པར་བྱ་བ་ཡིན་ལ། དྲེགས་པ་བསྒྲལ་བའི་འོག་དུས་སུ་ཡང་གནས་པའོ། །སྤྱན་སྔ་ཉིད་དུ་ཕྱོགས་བཞི་རུ། །གྲུ་གསུམ་མེ་འོད་འབར་བ་ལས། །སྲས་མཆོག་ཕུར་པ་ལྔ་པོ་དགོད་ཅེས་བྱ་བ་ནི་སྤྱན་སྔའི་བཅོམ་ལྡན་འདས་རྡོ་རྗེ་གཞོན་ནུའི་མདུན་ཉིད་དོ། །ཕྱོགས་ནི་ཤར་ཕྱོགས་ལ་སོགས་པ་བཞིའོ། །དེའི་གནས་རྣམས་སུ་གྲུ་གསུམ་པའི་ཕྱི་རོལ་ན་མེ་འབར་བས་བསྐོར་བ་དེས་སྲས་མཆོག་ཕུར་པ་ལྔ་དགོད་པ་སྟེ། སྔོན་དྲེགས་པ་ཅན་བསྒྲལ་བའི་དུས་སུ་བཀོད་ལ། བསྒྲུབ་པའི་སྐབས་སུ་བགེགས་བསྐྲད་པའི་ཆེད་དུ་བྱ་བ་སྟེ། རྡོ་རྗེ་གུར་བྱས་པའི་དེ་མ་ཐག་པར་རོ། །འཁོར་ལོ་རྩིབས་བརྒྱད་པ་ལ་ནི། རྣམ་རྒྱལ་ཞེས་པ་ནས་གདན་ལ་བརྐྱང་བསྐུམ་ཚུལ་དུ་གནས་ཞེས་པའི་བར་གྱིས་བསྟན་ཏེ། དཀྱུས་ཉིད་གསལ་ལོ། །ནང་དང་ཕྱིའི་གྲ་རྣམས་སུ། ཞེས་པ་ནི་ནང་གི་འཁོར་ལོའི་ཕྱི་རོལ་དུ། ཕྱི་ནི་ལྷ་རྣམས་ལ་ཇི་ལྟར་དཀྱུས་ནས་གསལ་བར་བསྟན་པའི་ལྷ་རྣམས་ལས་གཏོང་བའི་ལྷ་སྟེ་ལས་ཀྱི་དུས་སུ་ཤེས་པར་བྱའོ། །ཕྱི་རོལ་མེ་འཁྱམས་དང་པོ་ལ་ཞེས་བྱ་བ་ནི་སྒོའི་ཕྱི་རོལ་གྱི་ཁྱམས་དང་པོ་ལ། ཕོ་ཉ་དྲུག་ཅུ་གནས་པར་རྟག་པ་སྟེ། དེ་ཡང་ལས་ཀྱི་དུས་སུ་སྤྱོད་ཅིང་བསྒྲུབ་པའི་དུས་ཉིད་དུ་ཐབས་ཀྱིས་གཡས་ཤེས་རབ་གཡོན་གང་ཡིན་པ་ནས་ལས་བྱེད་པ་སྟེ། ཞོར་ལས་བྱུང་བའི་ཏིང་ངེ་འཛིན་ཏོ། །སྒོ་བཞི་དག་དུ་སྒོ་སྲུངས་ཀྱིས་དགོད་ཅེས་བྱ་བ་ནི། སྒོ་ནི་ཤར་ཕྱོགས་ལ་སོགས་པ་བཞིའོ། །སྒོ་སྲུངས་ནི་ལྕགས་ཀྱུ་མ་ལ་སོགས་པ་བཞིའོ། །ཕྱི་རོལ་མེ་ཁྱམས་བར་མ་ལ་ཞེས་པ་ནི་སྒོའི་ཕྱི་རོལ་གྱི་ཁྱམས་གཉིས་པ་ལ། སླས་དང་བྱི་མོའི་ཚོགས་ཀྱིས་གཙོ་བོ་བཅུ་དང་བརྒྱད་ཀྱིས་སྒོར་ཞེས་བྱ་བ་ནི། བཅུ་པ་གཉིས་ལ་ཉི་ཤུ་ཐམ་པ། དེའི་སྟེང་དུ་བརྒྱད་ཀྱིས་བསྣན་པས་ཉི་ཤུ་རྩ་བརྒྱད་དགོད་པར་བྱའོ། །དེ་ཡང་ལས་ཀྱི་དུས་སོ། །དེའི་ཕྱི་རོལ་གྱི་ཁྱམས་ལ་དམ་ཅན་ལྷ་མོ་འཁོར་དང་བཅས་པ་དང་། བདག་ཉིད་ཆེན་མོ་ཡང་ཤོ་ན་མུ་ཀ་ཡང་བསམ་པར་བྱ་བ་སྟེ། ལས་དུས་སུ་དེ་ནས་ཡང་དཀྱིལ་འཁོར་ལ་རྒྱན་གྱིས་བརྒྱན་པའི་ཕྱིར། དུར་ཁྲོད་ཐོད་པ་དགུ་ནང་དུ་ཞེས་པ་ལ་སོགས་པ་བསྟན་ཏེ། དུར་ཁྲོད་ཐོད་པ་དགུ་ནང་དུ་ཞེས་བྱ་བ་ནི། ཐོད་པའི་ལེ་དགུའི་ནང་ཚིལ་ཆེན་གྱི་མེ་མར་དགུ་བྱས་ལ་དུར་ཁྲོད་ཀྱི་རས་ལ་སྡོང་བུ་བྱས་ལ། མེ་མར་ཁ་དགུ་གཏང་སྟེ། ཐོད་པ་ནི་ནང་དང་བདག་མེད་པའི་རྟགས་ལ། མར་མེ་ཡེ་ཤེས་ཀྱི་དབྱིངས་རྟོགས་པའི་རྟགས་སོ། །རྡོ་རྗེ་ཤ་ཆེན་ཐང་མལ་བརྡལ་དམར་གྱི་རག་ཏ་རྒྱ་མཚོ་དཀྱིལ་ཞེས་བྱ་བ་ལ་སོགས་པ་གསུངས་པ། ཤ་ཆེན་ཐང་མལ་བརྡལ་བ་ནི། མ་མོ་དང་མཁའ་འགྲོ་མའི་དམ་རྫས་ཏེ། དམར་ལ་སོགས་པའི་ཡང་དེ་བཞིན་དུ་ཤེས་པར་བྱའོ། །ཕྱོགས་བཞི་མཚམས་བཞི་སྟེ། བརྒྱད་དུ་ཡང་རྟག་གི་རྒྱལ་མཚན་དང་ཤུན་ཆེན་བསེའི་རྒྱལ་མཚན་ཏེ། ཆུ་སྲིན་གྱི་རྒྱལ་མཚན་ཞིང་གི་རྒྱལ་མཚན་ཏེ་དེ་རེ་རེ་ལ་གཉིས་གཉིས་ཏེ་བརྒྱད་ཟུག་པར་བྱའོ། །ཞིང་ལྤགས་གཡང་གཞི་སྤྲིན་ལྟར་གཏིབས་ཞེས་བྱ་བ་ནི། བླ་བྲེ་ཞིང་གི་གཡང་གཞིས་བྲེ་བར་བྱའོ། །དེ་ལ་སོགས་པ་རྒྱན་གྱི་རྣམས། །ཅི་རིགས་པར་ནི་བྲེ་བར་བྱའོ། །ཞེས་བྱ་བ་ནི་དར་མཐིང་ནག་གི་ཡོལ་བ་བྲེ་བ་དང་། ཞིང་གི་ཕྲན་ཕྱོགས་གནས་གདག་པ་དང་། བྷནྜ་བགེགས་པ་ཕྱོགས་ནས་བཞག་པ་ཡང་ངོ་། །དེ་ནས་ཡང་དཀྱིལ་འཁོར་ལ་ལྷ་རྣམས་ཀྱི་རང་རང་མཚན་མར་རྫས་བཞག་པས་བསྟན་པར་བྱ་བའི་ཕྱིར། འབར་བའི་ཚོགས་ཀྱི། ཞེས་པ་ལ་སོགས་པ་གསུངས་ཏེ། འབར་བའི་ཚོགས་ཀྱི་བདག་པོ་རྣམས། །རང་རང་སྐོས་སོ་བཞག་པར་བྱ། །ཞེས་བྱ་བ་ནི། དཀྱིལ་འཁོར་གྱི་ལྷ་རྣམས་ཀྱི་རང་རང་རྫས་སུ་བཞག་པར་བྱ་བ་ནི། མགོ་ནས་འབྱུང་བ་འདིའོ། །མཚན་ལྡན་བྷནྡ་ལྕང་ལོ་ཅན། །དབང་པོ་ལྔ་དང་ལྡན་པ་ནི། །གཙོ་བོ་ཡབ་འམ་མཚན་མར་བཞག །ཅེས་བྱ་བ་ནི་མཚན་དང་ལྡན་པའི་བན་ད་གླིང་གསུམ་པའམ་བུ་གཅིག་པ་སྟེ། དེའི་ནང་དུ་དབང་པོ་ལྔ་བླུགས་ལ་དཀྱིལ་འཁོར་གྱི་དབུས་སུ་བཞག་པར་བྱའོ། །དུར་ཁྲོད་སྒང་གི་ཕུང་པོ་ལྔ། སྲས་མཆོག་ཕུར་པའི་མཚན་མར་དགོད་ཅེས་བྱ་བ་ནི། བགེགས་གདོན་པའི་དུས་སོ། །དུར་ཁྲོད་ཀྱི་ཕུར་པ་ལྔ་ལ་སྲས་མཆོག་ཏུ་བྱིན་གྱིས་བརླབས་ནས་མཆོད་པ་ཕུལ་ཕྱོགས་བཞི་དང་དབུས་དང་ལྔར་གཟུགས་པར་བྱ་སྟེ། བསྒྲུབ་པ་འདི་མ་ཐོན་གྱི་བར་དུ། བར་ཆད་ཀྱི་བགེགས་མ་བཏང་ཞེས་བརྗོད་ལ་མཚམས་བཅད་དོ། །ཐོད་པའི་དུམ་བུ་བཅུ་དྲུག་གི། །ཞེས་བྱ་བ་ནི་ཐོད་པའི་ལེའུ་ཚེ་བཅུ་དྲུག་ནི། འཕྲ་མེན་མ་བཅུ་དྲུག་ནི་མཚན་མར་དགོད་པ་སྟེ། ལས་ཀྱི་ལྷའོ། །ཡན་ལག་ནི་སེམས་ཅན་ཐམས་ཅད་ནི། ཁྲོ་བོ་ཁྲོ་མོ་རྣམས་ཀྱི་རྫས་ཞེས་བྱ་བ་ནི། སོར་མོ་ཉི་ཤུ་ན་ཁྲོ་བོ་དང་ཁྲོ་མོ་རྣམས་ཀྱི་རྫས་སོ། །སོ་དང་ནེའུ་རྩེག་འབར་བ་རྣམས་ཕོ་ཉ་རྣམས་ཀྱི་མཚན་མར་བཞག་ཅེས་བྱ་བ་ནི། རུས་པའི་མགོ་ཀུན་བཞག་པར་བྱའོ། །སྒལ་ཚིགས་ལ་སོགས་རྣམས་ཀྱི་རྫས། །ཅི་བགྱི་ཚོགས་ཀྱི་རྫས་སུ་བཞག་ཅེས་བྱ་བ་ནི། སྒལ་ཚིགས་ཉི་ཤུ་རྩ་བརྒྱད་ནི། །སླས་དང་བྱི་མོའི་རྫས་སུའོ། །ཡན་ལག་བཞིའི་མཚན་མ་ནི། །ཞེས་བྱ་བ་ནི། ལག་གཉིས་རྐང་པ་གཉིས་བཞི་ནི་སྒོ་བཞིར་བཞག་པ་སྟེ། དེ་ཡང་རྫས་རྣམས་ལ་བྲི་བར་བྱ་བའི་ཐབས་བསྟན་ཏེ། སོ་སོ་གསུང་གི་ཡི་གེ་འབྲུ་རྣམས་ནི། རང་རང་རིགས་ཀྱི་མཚན་མ་ལ། །ཡབ་ཡུམ་བྱང་ཆུབ་སེམས་ཀྱི་བྲི་ཞེས་བྱ་བ་ནི། ཡིག་འབྲུ་ཧཱུྃ་ལ་སོགས་པའི་སོ་སོ་རང་རང་གི་མཚན་མ་གང་ཡིན་པ་ལ་བྱང་ཆུབ་སེམས་ཀྱི་བྲི་བར་བྱ་སྟེ། དུར་ཁྲོད་ཀྱི་སྙུག་གུས་སོ། །དེ་ནས་ཡང་ཏིང་ངེ་འཛིན་བསྟན་ཏེ། བླ་མ་ལུང་ལྡན་དེས་ཀྱང་ནི། ཁྲོས་པས་དྲག་པོའི་རྣལ་འབྱོར་བྱ་ཞེས་བྱ་བ་ནི་བསྒྲུབ་པར་བྱ་བ་དང་ལས་གཉིས་ཀའི་དུས་སུ་ཤིན་ཏུ་ཁྲོས་པའི་ཏིང་ངེ་འཛིན་བྱ་བ་ཡིན་གྱི། བསྙེན་པའི་དུས་སུ་མ་ཡིན་ནོ། །དེ་ནས་དྲག་པོའི་དཀྱིལ་འཁོར་བསྟན་ཏེ། དབང་ལྡན་ཕྱོགས་ཀྱི་གྲྭ་ལ་ཡང་། ཞེས་བྱ་བ་ནི། སྲས་ཕུར་པའི་དཀྱིལ་འཁོར་གྱི་བྱང་ཤར་གྱི་མཚམས་སུ་བྱའོ། །ཅི་བྱ་ཞེ་ན། འབྲུབ་ཁུང་ལས་ཀྱི་དཀྱིལ་འཁོར་ནི་ཞེས་བྱ་བ་ནི། གང་བཟས་པ་པོ་དེ་བརླག་པར་བྱ་བའི་གནས་ལ།འབྲུབ་ཁུང་ཞེས་བྱའོ། །དབྱིབས་ཇི་ལྟར་བྱ་ཞེ་ན། དྲག་པོའི་ཧོམ་ཁུང་དབྱིབས་འདྲ་ལ་ཞེས་གསུངས་ཏེ། ཟུར་གསུམ་བསྐོར་བ་བྱ་བ་སྟེ། ཕྱོགས་རེ་རེ་ལ་སོར་ཉི་ཤུའོ། །ཟབས་སུ་སོར་བཅུ་བསྐོར་བའོ། །དེའི་ཕྱོགས་རེ་རེ་ལ་སོར་ཉི་ཤུའོ། །ཟབས་སུ་སོར་བཅུ་བསྐོར་བའོ། །དེའི་ཕྱོགས་ཇི་ལྟར་བསྒོ་ཞེ་ན། རྩེ་མོ་ལྷོ་ཕྱོགས་སྟོན་ཞེས་གསུངས་ཏེ། རྩེ་མོ་ནི་ལྷོ་ཕྱོགས་སུ་བསྟན་ལ་བསྐོའོ། །འོ་ན་དེ་ལ་བརྒྱན་པར་བྱ་བ་མེད་དམ་ཞེ་ན། ཧཱུྃ་ཧཱུྃ་དང་ཕཊ་གྱིས་བསྐོར་བར་བྱ་ཞེས་གསུངས་ཏེ། གྲུ་གསུམ་ཉིད་ནག་པོས་ཕྱག་པའི་མཁའ་ལ། ཧཱུྃ་དང་ཕཊ་ཀྱིས་སྤེལ་ལ་བྲི་བར་བྱའོ། །དེའི་ནང་དུ་བཞུགས་པར་བྱ་བའི་རྫས་བསྟན་པའི་ཕྱིར། དུས་ལ་བབ་ཅིང་ཞེས་པ་ལ་སོགས་པས་བསྟན། དུས་ལ་བབ་པའི་སེམས་ཅན་ནི། ལས་ལ་བབ་པའི་རྣལ་འབྱོར་པས། །མཚན་མ་མིང་དུ་བཅས་པར་བྱ། །ཞེས་བྱ་བ་ནི། བསྒྲལ་བར་བྱ་བའི་དུས་ལ་བབ་པའི་སེམས་ཅན་དེ་ཉམས་དང་ལྡན་པའི་རྣལ་འབྱོར་པ་དེས། མཚན་མ་དང་བཅས་པར་བྱ་བ་ཡིན་ཏེ། དེའི་རྒྱུ་ནི་སྲུབ་མོའི་ལོ་མ་དང་གྲོག་མཁར་གྱི་ས་དང་། ཁྲེ་དང་ཆུ་མེའི་ཕུབ་མ་དང་། བ་རུ་དང་། གླང་རུ་དང་། རྟ་རུ་མིག་རྣམས་ནི་བོང་བུའི་བདུད་རྩིའི་སྤྲུས་ལ་གཟུགས་བྱས་ཏེ། ཞིང་གི་རས་མའམ་ཤུན་ལ་ཞིང་གི་བམ་ཁྲག་གིས་བཛྲ་ཀཱི་ལ་ཡ་ཆེ་གེ་མོ་མཱ་ར་ཡ་ཕཊ་ཅེས་བྱ་བ་བྲིས་ལ་སྙིང་གར་བླན་པ་དེའི་ཕྱིར་མཚན་མའི་མིང་དུ་བཅས་པར་བྱ་ཞེས་གསུངས་སོ། །འོ་ན་དེ་ལ་ཇི་ལྟར་བཞག་ཅེ་ན། དེ་བསྟན་པའི་ཕྱིར། མགོ་ནི་ལྷོ་ནུབ་མཚམས་སུ་བཞག །རྐང་པ་བྱང་ཤར་མཚམས་སུ་བསྟན། །ཧོམ་ཁུང་ནང་དུ་བཞག་པར་བྱ་ཞེས་གསུངས་སོ། །མགོ་ལྷོ་ནུབ་མཚམས་སུ་བསྟན་པ་ནི། སྲིན་པོ་ཡོད་པའི་གནས་ཡིན་པས་སོ། །རྐང་པ་བྱང་ཤར་མཚམས་སུ་བསྟན་པའི་ཕྱིར་སྒྲོལ་བ་ལས་ཀྱི་བདག་མོའི་གནས་ཡོད་པའི་ཕྱིར་བསྟན་པའོ། །ཧོམ་ཁུང་གི་གནས་གན་དུ་བཞག་པ་ནི། བསྒྲལ་བའི་གནས་ཡིན་པས་གཞུག་པའོ། །འོ་ན་ཧོམ་ཁུང་གྲུ་གསུམ་ནི་བསྒྲལ་བའི་གནས་ཡིན་ལ་གཞན་ནི་མ་ཡིན་པ་ཅི་ཞེ་ན། ལན་དུ་ཧོམ་ཁུང་གྲུ་གསུམ་ནི་བསྒྲལ་བར་བྱ་བ་ཁོ་ནའི་གནས་ཡིན་ཏེ། ཟུར་གསུམ་དུ་འབྱུང་བ་ནི། ལོག་པར་ལྟ་བ་སྒྲོལ་བའི་རྟགས་སུ་འབྱུང་བ་དྲག་པོའི་གནས་སོ། །འོ་ན་ཅི་ཟུར་གསུམ་དུ་བྱ་བ་ཐམས་ཅད་བསྒྲལ་བའི་གནས་ཡིན། ཆོས་འབྱུང་བའི་ནང་དུ་རྟེན་གྱི་དཀྱིལ་འཁོར་བསྒོམ་པ་དེ་ཡང་འགལ་ཏེ། ཆོས་འབྱུང་བ་སྒྲལ་བའི་གནས་སུ་འགྲོ་བའི་སྐྱོན་ཡོད་འགལ་ལོ། །ལན་དུ་མི་འགལ་ཏེ་ཆོས་འབྱུང་ཉིད་དུ་བསྒྲལ་བའི་གནས་ཡིན་ཏེ། ཅིའི་ཕྱིར་ཞེ་ན། ཆོས་འབྱུང་བའི་དབྱིངས་ཡིན་པའི་ཕྱིར། ཁམས་གསུམ་གྱི་སེམས་ཅན་དེའི་དབྱིངས་སུ་བསྒྲལ་བས། ཆོས་འབྱུང་བའི་བསྒྲལ་བར་བྱ་བའི་གནས་ཁོ་ན་ཡིན་ཞེས་གསུངས་སོ། །དེ་ནས་རྣལ་འབྱོར་པས་ཡེ་ཤེས་ཀྱི་དཀྱིལ་འཁོར་སྤྱན་དྲངས་པ་བསྟན་པའི་ཕྱིར། དེ་ནས་ཞེས་པ་ལ་སོགས་པས་བསྟན་ཏེ། གདེང་དང་ལྡན་པའི་རྣལ་འབྱོར་དེས་ཞེས་བྱ་བ་ནི། བདག་ཉིད་དམ་ཚིག་སེམས་པའི་དཀྱིལ་འཁོར་དུ་གྱུར་པ་དེས་སོ། །རྡོ་རྗེ་སྤྲུགས་པ་བླངས་ནས་ནི་ཞེས་བྱ་བ་ནི་ཧཱུྃ་རིང་པོ་ནི་རྡོ་རྗེ་སྤྱུགས་པ་ནི། ཐུགས་ཀའི་ཧཱུྃ་ལས་ཧཱུྃ་བྱུང་བའོ། །ཁྲག་འཐུང་ཚོགས་ཀྱིས་སྤྲིན་ཕུང་རྣམས་ཞེས་བྱ་བ་ནི། དུས་གསུམ་གྱི་སངས་རྒྱས་ཐམས་ཅད་བཅོམ་ལྡན་འདས་རྡོ་རྗེ་གཞོན་ནུའི་དཀྱིལ་འཁོར་རྟེན་དང་རྟེན་དུ་བྱས་པ་གནས་པའོ། །རྡོ་རྗེའི་གཡབ་མོས་སྤྱན་དྲངས་ཏེ། ཞེས་བྱ་བ་ནི། རྡོ་རྗེ་བུམ་པའི་ནང་ན་ཧཱུྃ་གནས་པ་དེ་ལས་འོད་ཟེར་འབྱུང་བ་ནི་རྡོ་རྗེའི་གཡབ་མོའོ། །དེ་ལས་ལྷ་མོ་ལྕགས་ཀྱུ་མར་གྱུར་ཏེ། དེས་རང་བཞིན་གྲུབ་པའི་གནས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ། མདུན་གྱི་ནམ་མཁའ་ལ་བྱོན་པར་ལྟའོ། །དེ་ནས་ཡང་དམ་ཚིག་གི་དཀྱིལ་འཁོར་ལ་བསྟིམ་པར་བསྟན་པའི་ཕྱིར། གཉིས་མེད་བརྟན་པར་གཏིམ་ནས་ནི་ཞེས་གསུངས་ཏེ། ཞགས་པ་མ་དང་ལྕགས་སྒྲོག་མ་དང་། དྲིལ་བུ་མས་རིམ་པ་ཇི་ལྟར་བར་བསྟན་པ་བྱས་ནས། དེ་ནས་ཡང་ལྷ་ལ་དབང་བསྐུར་བའི་ཕྱིར། བདག་ཉིད་ཀྱི་ཐུགས་ཀ་ནས་འོད་ཟེར་འཕྲོས་པས། འོད་ཟེར་ལྷ་མོའི་ཚོགས་སུ་གྱུར་ཏེ། སྐུ་ལ་ཐིམ་ནས་གསང་བའི་མཆོད་པ་ཕུལ། དབང་བསྐུར་ཅིག་པར་བསྐུལ། སླར་ལ་ཕྱོགས་བཅུའི་བདེ་བར་གཤེགས་པའི་ཐུགས་ཀ་ནས་ལྷ་མོའི་ཚོགས་མང་པོ་བྱུང་སྟེ། ལ་ལས་ནི་སྐྲ་སྐྲོལ། ལ་ལ་ནི་བྱུག་པ་བྱེད། ལ་ལ་ནི་ཙན་དན་གྱི་ཆར་འབེབས། ལ་ལ་ནི་གདུག་དང་རྒྱལ་མཚན་འཛིན། ལ་ལ་ནི་བུཾ་པ་ཐོགས་ཏེ་སྤྱི་བོར་བླུགས་པ་ནི་དབང་གི་རྒྱུའོ། །དབང་གི་འབྲས་བུ་ནི་སོ་སོ་རིགས་ཀྱི་དབུ་བརྒྱན་པའོ། །སློབ་དཔོན་ལ་ལ་ནི་ཡེ་ཤེས་ཀྱི་དཀྱིལ་འཁོར་བསྟིམ་པས་ཡོངས་སུ་རྫོགས་པར་འགྱུར་བས་དེས་ཆོག་གསུངས་སོ། །དེ་ནས་ཡང་ཡོངས་སུ་རྫོགས་པའི་དཀྱིལ་འཁོར་དེ་ལ་མཆོད་པ་དབུལ་བ་བསྟན་པའི་ཕྱིར། རྨད་དུ་བྱུང་བའི་མཆོད་པ་བརྩམ། འདོད་པའི་ཡོན་ཏན་ལྔ་ཡིས་མཆོད་ཅེས་གསུངས་ཏེ། རྨད་དུ་བྱུང་བའི་མཆོད་པ་ནི། བདག་ཉིད་ཀྱི་ཐུགས་ཀ་ནས་འོད་ཟེར་རྣམ་པ་ལྔ་འཕྲོས་པས། འོད་ཟེར་ལྔ་ལས་ལྷ་མོའི་ཚོགས་མང་པོ་འབྱུང་བ་སྟེ། བདེ་བར་གཤེགས་པའི་སྐུ་ལ་བཞུགས་པས་མཆོད་པའི་རྒྱུད་བསྐུལ། བདེ་བར་གཤེགས་པའི་ཐུགས་ཀ་ནས་ལྷ་མོ་མང་པོ་སླར་འཐོན་ཏེ། བདག་གི་དཀྱིལ་འཁོར་ལ་བསྐོར་ནས་ཕྱིའི་མཆོད་པའི་རྣམ་པ་དང་། ནང་གི་མཆོད་པའི་རྣམ་པ་དང་། གསང་བའི་མཆོད་པའི་རྣམ་པ་རྣམས། །བདག་ལ་གནས་ཕུལ་བསྟོད་པའི་འདི་སྐད་བརྗོད་དོ། །ཧཱུྃ་བསྐལ་པ་མེ་ལྟར་འབར་བ་ཡིས། །འོད་ཟེར་འདུ་འཕྲོའི་ཀློང་དཀྱིལ་ན། །ཁྲོ་བོ་ཁྲོ་མོ་རྣམས་བཞུགས་པ། །སྐུ་ནི་ཅིར་ཡང་འགྱུར་བའི་གཟུགས། །ཧཱུྃ་དབུ་སྐྲ་ཁམས་ནག་རལ་པ་ཅན། །གྱེན་དུ་འཁྱིལ་ཞིང་སྲིད་རྩེར་འབར། །མི་ཉམས་ཁྲོ་གཉེར་སྡང་མིག་ནི། །ལོག་པར་ལྟ་བ་འདུལ་བའི་སྤྱན། །ཧཱུྃ་མཆེ་བ་ཟངས་ཡག་བརྩིགས་པ་ནི། །སྐྱེ་ཤི་རྩད་ནས་གཅོད་པའི་ཚུལ། །སྐུ་གསུང་ཐུགས་ཀྱི་བྱིན་རླབས་ལས། །ཕྱག་མཚན་སྣ་ཚོགས་ཅིར་ཡང་སྣང་། །ཧཱུྃ་ཐུགས་རྗེའི་བྱིན་རླབས་སྤྲིན་ལྟར་གཏིབས། །བྱམས་པའི་འོད་ཟེར་གློག་བཞིན་འཁྱུག །རྔམས་པའི་སྒྲ་སྐད་འབྲུག་ལྟར་སྒྲོགས། །སྤྲུལ་པའི་ཐོག་ཐོག་ཆར་ལྟར་འབེབས། །ཧཱུྃ་ཐུགས་རྗེ་ཆེན་པོའི་བྱིན་བརླབས་ཀྱིས། །བདག་ལ་བྱིན་གྱིས་བརླབས་མཛད་ཅིང་། །བདག་གི་ལྷག་པའི་བསམ་པ་རྣམས། །གྲུབ་པར་བྱིན་གྱིས་རླབས་དུ་གསོལ། །ཧཱུྃ་འཁྱིལ་ཅིང་རྒྱུན་དང་འཁྱིལ་བ་ཡི། །སེམས་ལ་བརྗོད་མེད་སྐུ་མི་མངའ། །སྒྲ་ལས་འདས་པའི་སྦྱོར་བ་སྟེ། །བསམ་དང་བྲལ་བའི་ཡེ་ཤེས་ལག །ཧཱུྃ་སྲིད་གསུམ་འཇོམས་པའི་ལྷ་ལ་ཕྱག་འཚལ་བསྟོད། །མཉམ་ཉིད་ངང་གི་ཁྲོས་ལ་ཕྱག་འཚལ་བསྟོད། །ཁྲོས་པས་ལོངས་སྤྱོད་མཛད་ལ་ཕྱག་འཚལ་བསྟོད། །རྡོ་རྗེ་འདུ་འཕྲོ་ཚོགས་ལ་ཕྱག་འཚལ་བསྟོད། །ཅེས་གསུངས་ཏེ། དེ་ནས་སྒྲའི་ཚུལ་དུ་ལྷ་མོའི་ཚོགས་རྣམས་མི་སྣང་བར་གྱུར་ཏོ། །དེ་ནས་ཡང་ནས་ཡང་དུ་བསྒྲུབ་པ་དང་། གྲུབ་པའི་རྟགས་འོང་སྟེ། དེ་ཡང་རབ་འབྲིང་གསུམ་ལས། བསྙེན་པ་གསུམ་ནི་ལྷའི་དཀྱིལ་འཁོར་གསལ་བ་དང་། ཞལ་འཛུམ་པ་དང་བཞད་པའོ། །དེ་ལྟ་བུའི་མཚན་མ་མཐོང་ན་གདོད་བསྒྲུབ་པ་ལ་འཇུག་པར་བྱའོ། །བསྒྲུབ་པའི་རྟགས་གསུམ་ནི་ཕུར་པ་ལས་འོད་འབྱེད་པ་དང་། ཕུར་བུ་ལྡེག་པ་དང་འཕར་བ་གསུམ་མོ། །དེ་ལྟར་རྟགས་འབྱུང་ཞིང་ལས་སུ་རུང་བ་ནི་མཉེས་ནས་ཉེ་བར་འགྱུར་བ་དང་། ཞེས་གསུངས་པ་ཡིན་ནོ། །དེ་ནས་གྲུབ་པའི་རྟགས་བྱུང་བ་དང་། དྲག་པོའི་ལས་ལ་འཇུག་པར་བྱ་སྟེ། དེ་གང་ལ་དམིགས་པར་བྱ་བ་བསྟན་པའི་ཕྱིར། རྡོ་རྗེ་སློབ་དཔོན་བརྙས་བྱེད་དང་། ཞེས་པ་ནས། རྣལ་འབྱོར་ཅིའི་དགྲར་གྱུར་པ། །ཞེས་པའི་བར་གྱིས་བསྟན་ཏེ། དཀྱུས་ཉིད་གསལ་ལོ། །དེ་ནས་དམིགས་པར་བྱ་བ་དེ་གནས་ནས་དུས་ཅི་ལྟར་དགུག་པ་བསྟན་པའི་ཕྱིར། བརྣག་པའི་ནན་ཐུར་བྱ་བ་ཞེས་པ་ལ་སོགས་པས་བསྟན་ཏེ། ཁྲོ་བོ་གསུམ་པའི་སྦྱོར་བའམ། ཞེས་པའི་ཁྲོ་བོ་ལྕགས་ཀྱུ་ཐོགས་པས་གཟས་པ་པོ་གང་ཡིན་པ་དེ་རླུང་གི་དཀྱིལ་འཁོར་གྱི་སྟེང་དུ་བཞག་ནས་རླུང་གི་ལྕགས་ཀྱུས་གཟུང་ནས་དྲངས། ཁྲོ་བོ་ལ་ལ་ཕྱག་ན་རྡོ་རྗེ་དང་ཐོ་བ་ཐོགས་ནས་རང་དབང་མེད་པར་རྟོག་ཅིང་འདོད་དེ། རྣལ་འབྱོར་པས་ཀྱང་སྔགས་བཟླས་པས་བྱ་བའི་སྔགས་ནི་འདིའོ། །ཧཱུྃ་སཾ་བྷ་ནེ་སུཾ་བྷ་ནེ་ཧཱུྃ། གྲི་ཧྣ་གྲི་ཧྣ་ཧཱུྃ། གྲི་ཧྣ་པ་ཡ་གྲི་ཧྣ་པ་ཡ་ཧཱུྃ། ཨཱ་ན་ཡ་ཧོ་བྷ་ག་བན་བིདྱར་ཙ་ཡ་ཧཱུྃ་ཕཊ་ཅེས་བརྗོད་ཅིང་། བདག་ཉིད་ཀྱི་ཐུགས་ཀ་ནས་ཡེ་ཤེས་ཀྱི་སེམས་དཔའི་ཐུགས་ཀ་ནས་རྡོ་རྗེ་རྡོ་རྗེའི་ནང་ན་ཟླ་བའི་དཀྱིལ་འཁོར་ལ་ཧཱུྃ་གནས་པ་དེ་ལས་ཁྲོ་བོ་དམར་པོ་རྒྱུད་དམར་ཕྱུང་ལ་དགུག་པ་བྱ་སྟེ། གཟུགས་ལ་བསྟིམ་པའི་ལས་བྱའོ། །ཡང་ལྕགས་ཀྱུས་རྣལ་འབྱོར་གྱིས་ཞེས་བྱ་བ་ནི་འོན་ཏེ་ཁྲོ་བོ་སུམ་བྷ་ནིའི་སྦྱོར་བ་མི་བྱེད་ན་ཡང་འདི་ཡིས་དགུག་སྟེ། བདག་ཉིད་ཀྱི་ཧཱུྃ་ལས་ཛ་བརྩེགས་མར་ཕྱུང་སྟེ། དེ་ལས་ལྷ་མོ་ལྕགས་ཀྱུ་ཅན་དུ་གྱུར་ཏེ། ཕོ་ཡིན་ན་ཁ་ནས་སྦུབས་ལ་ཞོན་ནས་སྙིང་དཀར་ནག་མཚམས་ནས་ཤེས་པ་དེ་དགུག །མོ་ཡིན་ན་མཚན་མ་ནས་ཡར་རྩའི་བུ་གུ་ནས་ཞུགས་ནས། མས་དགུག་པ་བྱ་བ་སྟེ་བསྟིམས་ལ་བསྒྲལ་བའོ། །ཡང་ན་ཡུམ་གྱི་པདྨ་ལ་ཛ་བརྩེགས་གཅིག་བཞག་ལ། ཡབ་ཀྱི་བྱང་ཆུབ་ཀྱི་སེམས་ཀྱིས་བསྐུལ་བས། ཛ་ལས་འོད་འཕྲོས་འོད་ལ་འཕྲ་མེན་མས་ལྕགས་ཀྱུ་ནན་ཏན་དུ་གྱུར་ཏེ། རྩའི་བུ་ག་ནས་ཤེས་པ་དྲངས་ཏེ་བསྟིམ་པར་བྱའོ། །དགུག་པའི་དུས་བསྟན་པའི་ཕྱིར། །ཉིན་མཚན་གུང་ལ་རབ་བཀུག་སྟེ། །ཞེས་གསུངས་ཏེ། ཉིན་མོ་དང་མཚན་མོའི་གུང་ལ་ཤེས་པ་ཉམས་ནས་ཡོད་པས་དེར་དགུག་པར་བྱའོ། །ཡང་ན་ནམ་སྟོང་དང་ཉི་མ་དྲོས་འབྱམས་ཙམ་ན། ཤེས་པ་ཉམས་ནས་ཡོད་པས་དུས་དེ་རུ་སུ་བཟླས་པ་ནི་ཤིག་ལ་བྱའོ། །དེའི་རྣམ་ཤེས་རླུང་འདྲ་བ། །མཚན་མའི་མིང་དུ་བཅས་པ་ལ། །སྲིན་བུ་མེ་ཁྱེར་འདྲར་བཅུག་སྟེ། །གཟུགས་ལ་ཕབ་ཅིང་སྒྲོག་གིས་བཅིང་ཞེས་བྱ་བ་དེ་བཟས་པ་པོ་གང་ཡིན་པ་དེའི་རྣམ་པར་ཤེས་པ་སྙིང་གི་དབུགས་རྩ་གསུམ་པའི་དབུས་གང་ཡིན་པ་དེ་ན་ཤེས་པ་གནས་ཏེ། ཤེས་པ་དེའི་བརྡའ་ནི་རླུང་ཡིན་ཏེ། རླུང་དེ་ལ་བསྐྱོད་པ་བཀུག་སྟེ་དེའི་དུས་ཉིད་ན་ཡང་ཐོགས་པ་མེད་པའི་གཟུགས་དང་དབང་པོ་ཚང་བ་སྟེ། མཚན་མ་མིང་དུ་བཅས་པར་དགུག་གོ། །དེ་ཡང་རླུང་གི་དཀྱིལ་འཁོར་ལ་བསྐྱོན་ཏེ། ཐོགས་པ་མེད་པར་དགུག་པ་ནི། སྲིན་བུ་མེ་ཁྱེར་བ་བཞིན་དུ་དགུག་སྟེ། གཟུགས་ལ་ཕབ་སྟེ་དེ་ཡང་བདག་ཉིད་ཀྱིས་སྔགས་བཟླ་ཞིང་ཞགས་པའི་སྒྲོག་གིས་བཅིང་བར་བྱའོ། །དེ་ནས་རི་རབ་ལ་སོགས་པ་ཕྱག་རྒྱ་བཞིའི་རྒྱས་གདབ་པར་བྱ་སྟེ། ཏིང་ངེ་འཛིན་ནང་སྔགས་ཀྱི་སྦྱོར་བ་བྱ་སྟེ། བླ་མའི་བཀའ་ལས་ཤེས་པར་བྱའོ། །དེ་ནས་འགོ་བའི་ལྷ་དང་དབྲལ་བའི་ཕྱིར། ལྕེ་པོ་གནག་པོའི་དུད་པས་དགུག །འགོ་བའི་ལྷ་དང་དབྲལ་བར་བྱ་ཞེས་གསུངས་ཏེ། ལྕེ་པ་གནག་པོའི་ནི་གུ་གུལ་ནག་པོའི་དུད་པས་འགོ་བའི་ལྷ་ཡང་ཡིན་པ་དེ། དུད་པས་བདུག་ཅིང་དེས་བརྒྱལ་བར་འགྱུར་ཏེ་བྲལ་ནས་འགྲེའོ། །དེ་ཡང་སྔགས་ཀྱི་སྦྱོར་བ་བྱ་བའོ། །དེའི་ལུས་ཚ་བ་བསྐྱེད་པའི་ཕྱིར་ལུས་ངན་སྐེ་ཚེ་ཚ་བ་དུག་གིས་དག་པ་ཞེས་གསུངས་ཏེ། བཟས་པ་པོ་དེའི་ལུས་ཀྱི་ནང་དུ་ཚ་བ་བསྐྱེད་དེ། དུག་གི་གཏོར་མར་བྱིན་གྱིས་བརླབས་ལ་ཁོང་དུ་འཐུང་དུ་གཞུག་པར་བྱའོ། །དུག་དེ་འགྱང་པས་རྩའི་བུ་གུ་ནས་རྒྱས་ཏེ་ཤེས་པས་མ་ཉམས་ཀྱི་བར་དུ་ཚ་བ་དང་ན་བའི་སྡུག་བསྔལ་བསམ་པར་འབྱུང་བར་བསམ་སྟེ། དེ་ནས་ཤེས་པ་ཉམས་ན་རང་གིས་མི་རིགས་པའི་ལས་བྱས་དྲན་ནས་འགྱོད་པ་དྲག་པོ་བྱེད་པར་བསམ་པར་བྱའོ། །དུག་གིས་བསྒྲལ་ཞིང་ཤེས་པར་བྱ་བ་ཇི་ལྟར་བསྡུ་བ་ནི། གབ་པའི་འཁོར་ལོ་ལས་ཤེས་པར་བྱའོ། །དེ་ནས་ཕུར་པ་རྫས་ཀྱི་དཀྱིལ་འཁོར་ལས་བསྐྱེད་དེ་གདབ་པར་བྱའོ། །དེ་ནས་ཕུར་པ་རྫས་ཀྱི་དཀྱིལ་འཁོར་ནི། གྲུབ་པའི་རྟགས་བྱུང་བ་དང་། ཕུར་པ་རྫས་ཀྱི་དཀྱིལ་འཁོར་བཞེངས་སུ་གསོལ་བར་བྱ་བ་ཡིན་ཏེ། དེ་ཡང་དབུས་ཀྱི་ཕོ་བྲང་ནས་གྲུ་གསུམ་མཐིང་ནག་ཉི་ཤུ་རྩ་གཅིག་ཏུ་བྲི་བར་བྱའོ། །ཐ་མའི་རྒྱན་རྣམས་ནི། བསྒྲུབ་པའི་དུས་ཉིད་དང་འདྲའོ། །བྱང་ཤར་གྱི་མཚམས་རྡོ་རྗེ་གུར་གྱི་ནང་དུ་དྲག་པོའི་དཀྱིལ་འཁོར་གང་དུ་གསུངས་པ་བྲི་བར་བྱ་བ་སྟེ། དྲག་པོའི་དཀྱིལ་འཁོར་དེའི་གྲྭའི་ཕྱོགས་སུ་སྤུངས་ཏེ་བཞག་ཅེས་གོང་ནས་གསུངས་ཏེ། ཁྲོ་བོའི་ཕུར་པ་མང་པོ་ཀུན་ཞེས་བྱ་བ་ནི། སྲས་ཕུར་པ་སོ་སོའི་རིགས་ཏེ། སྐུ་གསུང་ཐུགས་ཀྱི་རིགས་ལས་བྱུང་བ་ཉི་ཤུ་རྩ་གཅིག་གོ། །དེ་ལ་མང་པོ་ཀུན་ཞེས་གསུངས་སོ། །གྲྭའི་ཕྱོགས་ཞེས་བྱ་བ་ནི། ཕོ་བྲང་ན་བཞུགས་པའོ། །སྤུངས་ཏེ་བཞག་ཅེས་པ་ནི། ལས་ཀྱི་བཟླས་པའི་དུས་སུ་ཕུར་པ་གཟི་བྱིན་བསྐྱེད་པར་སྟེ། ཕུར་པ་དེ་རེ་རེ་ལ་ཀི་ལི་ཀི་ལི་ཞེས་བྱ་བའི་སྔགས་ཉི་ཤུ་རྩ་གཅིག་བཟླས་པར་བྱ་བ་སྟེ། དེ་བཟླས་ཤིང་ཕུར་པ་འདྲིལ་བས་བདག་ཉིད་ཀྱི་ཐུགས་ཀ་ནས་འོད་ཟེར་མཐིང་ནག་ཏུ་འཕྲོས་ཕུར་པ་ལས་ཀྱང་འོད་ཟེར་འཕྲོས་པས་དུས་གསུམ་གྱི་སངས་རྒྱས་ཐམས་ཅད་ལ་དྲག་པོའི་དུས་ལ་བབ་བོ་བར་བསྐུལ་བས། དེ་དག་གི་ཐུགས་ཞེ་སྡང་རྗེས་སུ་དྲན་ཐུགས་ཀ་ནས་ཁྲོ་བོ་གདུག་པ་ཅན་དང་བཅས་པ་མང་པོ་འཕྲོ་ཞིང་ཕུར་པ་ལ་ཐིམ་པས། ཕུར་པ་ཤིན་ཏུ་དྲག་པོའི་འོད་ཟེར་འབར་ཞིང་བསྒྲལ་བའི་མཐུ་དང་ལྡན་པར་གྱུར་པ་དེ། ཕུར་པ་ཀུན་ལ་བྱ་བ་ཡིན་ཏེ། རང་རེ་ལས་ཀྱི་སྔགས་དང་བསྒྲགས་ཤིང་། དེའི་ཕུར་པ་གཟི་བྱིན་བསྐྱེད་པ་དེ་ཕུར་པ་གསོ་བའོ། །དེ་ནས་གདབ་པའི་གནས་ཀྱི་གཙོ་བོ་རྣམས་བསྟན་པའི་ཕྱིར། རྡོ་རྗེ་དྲག་པོའི་ཕུར་པ་ཡིས། །ལྟེ་བ་སྙིང་མགྲིན་དཔུང་མགོ་དང་། །གསང་གནས་ཡན་ལག་ལྔ་ལ་གདབ། །ཅེས་གསུངས་ཏེ། ལྟེ་བ་སྙིང་ག་དང་མགྲིན་པ་དང་། དཔུང་མགོ་དང་གསང་གནས་ལྔ་རྣམས་ནི་གནས་ཀྱི་གཙོ་བོ་ལྔའོ། །ཡན་ལག་ནི་རྣམ་པར་ཤེས་པ་ནི་ཚོགས་གཞན་དག་གོ། །གདབ་པ་ནི་མགོ་ནས་གསལ་ལོ། །ཡུངས་དཀར་མཚོན་ཆའི་ཆར་གྱིས་དབབ་ཅེས་པ་ནི། འཕྲ་མེན་དྲུག་པའི་སྔགས་ཀྱིས་ཡུངས་དཀར་བརྒྱབ་པས། ཡུངས་དཀར་ལས་མཚོན་ཆ་གདུག་པ་མང་པོར་གྱུར་ཏེ། གཟས་པ་པོའི་ལུས་ལ་ལྷག་པར་ཡང་གཟེར་ནས་བསྒྲལ་བར་བྱའོ། །དེ་ནས་མཚན་མའི་དངོས་པོ་བཞི་སྟེ། མཚོན་ཆའི་རབ་ཏུ་བརྩོན་པ་ཡིས། །རྐང་པ་གཡས་གཡོན་གང་ཡིན་ནས། །རྡུལ་དུ་གཏུབ་ཅིང་སྦྱིན་སྲེག་བྱའོ། །ཞེས་བྱ་བ་ནི། གཏུབ་པའི་ལས་བསྟན་ཏེ། ཕུར་པ་གདབ་པའི་མཚན་མའི་དངོས་པོ་ཞིག་དེ་ལ་ཁྲོ་བོ་རབ་ཏུ་འབར་བས་མཚོན་ཆའི་ཆར་བརྩོན་པར་རབ་ཏུ་ཕབ་སྟེ། ཕོ་ཡིན་ན་གཡས་ནས་གཏུབས། མོ་ཡིན་ན་གཡོན་རྡུལ་དུ་གཏུབ་པར་བསམས་པའོ། །གཏུབ་པའི་དུམ་བུ་དེ་བསྲེག་པར་བསྟན་ཏེ་དེའི་ཕྱིར། དྲག་པོའི་ཧོམ་གྱི་དཀྱིལ་འཁོར་དུ། ཚེར་མ་ཅན་གྱི་མེ་སྦར་ཏེ། ལྷའི་ཚོགས་ལ་ཐིམ་པར་དབུལ་ཞེས་གསུངས་པ་ཡིན་ཏེ། དྲག་པོ་ཧོམ་གྱི་ནང་དུ་ཚེར་མ་ཅན་གྱི་ཤིང་ལ་མེ་སྦར་ཏེ། དེར་དྲག་པོའི་སྐབས་ནས་འབྱུང་བའི་ཏིང་ངེ་འཛིན་བྱས་ཏེ་ལྷ་ལ་ཕུལ་ན། སངས་རྒྱས་ཉིད་ཀྱང་འཇིགས་པར་འགྱུར་ན། སེམས་ཅན་རྣམས་ལྟ་སྨོས་ཀྱང་ཅི་དགོས་ཏེ་མི་དགོས་སོ། །ཞེས་སྟོན་པས་གསུངས་སོ། །དྲག་པོའི་དཀྱིལ་འཁོར་སྟོན་པའི་ལེའུ་ལ་ནི། དྲག་པོའི་དཀྱིལ་འཁོར་བསྟན་པའི་ལེའུའོ། །བདུད་རྩི་ཐིགས་པ་ཞེས་བྱ་བ་རྒྱ་ཆེར་བཤད་པ་ལས། ཀུན་རྫོབ་ཀྱི་བདེན་པ་འབའ་ཞིག་བཤད་པའི་ལེའུ་བརྒྱད་པའོ།། །།དེ་ལྟར་དྲག་པོའི་དཀྱིལ་འཁོར་བསྟན་ཀྱང་སྔགས་དང་ཕྱག་རྒྱ་མ་བསྟན་པར་མི་འགྲུབ་པས་དེ་བསྟན་པའི་ཕྱིར། དེ་ནས་ཞེས་པ་ལ་སོགས་པ་གསུངས་ཏེ། བཅོམ་ལྡན་འདས་དེས་བཤད་དོ་ཞེས་སྦྱར་རོ། །དེ་ནས་ཡང་སྔོན་ལ་ཁྲགའཐུང་ཆེན་པོའི་སྔགས་དང་། ཕྱག་རྒྱ་བསྟན་ཏེ་དེའི་ཕྱིར། ༀ་ཤྲི་བཛྲ་ཀུ་མ་ར་ཡཀྵ་ཧཱུྃ། ཞེས་པ་ལ་སོགས་པས་བསྟན་ཏེ། བདག་ཉིད་ཀྱི་ཐུགས་ཀའི་ཡེ་ཤེས་སེམས་དཔའི་རྡོ་རྗེའི་ནང་ན་ཟླ་བ་ཉི་མ་ཁ་སྦྱར་གྱི་དབུས་ན། ཧཱུྃ་ལས་སྔགས་ཀྱི་ཕྲེང་བ་གཡོན་བསྐོར་དུ་བསྐོར་ནས ། གནས་པ་ལ། ཟླ་བ་དང་ཉི་མ་ནི་འབྱུང་བ་བཞི་ཡིན་པས་དེས་བསྐྱེད་དེ། རྩ་གཡས་ནས་འགྲོ་སྟེ། ཇི་ལྟར་སྤྲོ་བ་དང་བསྡུ་བ་བསྟན་པའི་རིམ་པར་འགྱུར་བའམ། ཡང་ན་སྔགས་མང་པོ་བཟླས་པས་ཡི་གེ་མངོན་པར་མཐོང་བའམ། ཡང་ན་ཡི་གེ་འཕྲོ་འདུ་བྱས་ཤིང་སྔགས་བཟླས་པས། གྲུབ་པའི་ཚད་མེ་ཏོག་ལ་སྔགས་བཟླས་ནས་ནམ་མཁའ་བསྒྱུར་བ་དང་སླར་ལ་མི་ལྷུང་བ་ནམ་མཁའ་ལ་འདུག་པ་ནི། འགྲུབ་པའི་ཚད་དོ། །དེ་ལྟར་གྲུབ་པ་དང་། ལས་འདི་ལྟར་འགྲུབ་པར་འགྱུར་ཏེ། ཕྱག་རྒྱ་བཅས་ནས་གང་ཡིན་པ་ལ་གདོད་ནས་སྔགས་བཟླས་པ་དང་ཇི་ལྟར་འདོད་པ་བཞིན་དུ་འགྲུབ་སྟེ། སྔགས་ཀྱི་འགྲུབ་སྟེ་མཐར་ཕྱིན་པའོ། །ཇི་ལྟར་རྒྱས་པར་བཤད་པ་བཞིན། འོག་མ་རྣམས་ལའང་ཤིས་པར་བྱའོ། །ཁྲོས་པའི་སྟེང་དུ་གནས་ནས་ཀྱང་ཞེས་བྱ་བ་ནི་རབ་ཏུ་སྤྱན་བཟློག་པ་ལ་བྱའོ ། གཡས་པ་རྡོ་རྗེ་གདེངས་པའི་ས་ཞེས་བྱ་བ་ནི། ལག་པ་གཡས་པ་རྡོ་རྗེ་གཟུང་སྟེ་ཕྱར་བའོ། ལག་པ་གཡོན་པ་ཕུར་པ་འདེབས་ཚུལ་དུ་ཞེས་བྱ་བ་ནི། ལག་པ་གཡོན་པས་ཕུར་པ་འདེབས་ཚུལ་དུ་ཁུ་ཚུར་བཅངས་ལ་ཕར་གཏད་པའི་ཚུལ་དུ་བྱའོ། །ཞབས་གཉིས་ནི་གཡས་པ་བསྐྱང་གཡོན་པ་བསྐུམ་པའི་ཚུལ་དུ་གནས་པར་བྱ་བ་ནི། དཔལ་ཁྲག་འཐུང་ཆེན་པོའི་སྔགས་དང་ཕྱག་རྒྱ་ཡིན་པར་བཤད་དོ། །གོང་དུ་གསུངས་པའི་སྔགས་དང་ཕྱག་རྒྱ་གྲུབ་པའི་དུས་འདི་ཡིས་ནི། སངས་རྒྱས་རྡོ་རྗེ་འཛིན་པ་ཡང་རབ་ཏུ་བསྒྲལ་ཏེ། འཆི་བར་འགྱུར་ན། ཁམས་ཀྱི་སྐྱེ་བོ་སྨོས་ཀྱང་ཅི་དགོས་ཏེ། འཆི་བར་འགྱུར་རོ་ཞེས་པའི་ཐ་ཚིག་གོ། །དེ་ཡང་ཁྲོས་པའི་རྒྱལ་མོའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཨེ་ཀ་བཛྲ་ཧཱུྃ་ཡ་ཞེས་བྱ་བ་ནི། ཁྲོ་མོའི་སྔགས་སོ། །ཕྱག་རྒྱ་ཉིད་དཀྱུས་ཉིད་གསལ་ལོ། །དབང་དུ་འགྱུར་བར་ངེས་ཞེས་བྱ་བ་ནི་རྡོ་རྗེ་གསང་བ་བཀའ་ནོད་པའི་ནང་ནས་ཀྱང་། མོ་གཟུགས་འཇིག་རྟེན་དབང་དུ་འགྱུར་ཞེས་གསུངས་ཏེ། མོའི་གཟུགས་དེས་སེམས་ཅན་འདོད་ཆགས་ཅན་དབང་དུ་འདུ་བའོ། །དེ་ནས་སྲས་ཕུར་པའི་སྔགས་དང་། ཕྱག་རྒྱ་བསྟན་ཏེ། ༀ་བཛྲ་ཀཱི་ལི་ཀཱི་ལ་ཞེས་པ་ནས། ཁམས་གསུམ་སྐྱེ་བོ་སྨོས་ཅི་དགོས་ཞེས་པའི་བར་གྱིས་བསྟན་ཏེ་གོ་སླའོ། །དེ་ནས་ཧཱུྃ་ཀ་རའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཧཱུྃ་ཀ་ར་ཧཱུྃ་ཞེས་བསྐྱེད་པ་རྐྱེན་གྱི་སྔགས་སོ། །གརྫ་གརྫ་ཧཱུྃ་ཕཊ། ཅེས་པ་ནི་བཟླས་པ་ལས་ཀྱི་སྔགས་སོ། །སྔགས་འདི་ལས་ཀྱི་དུས་སུ་རྩའི་སྔགས་དང་འགྲོགས་ཏེ། བཟླས་པ་ལས་ཁྲོ་བོ་ཧཱུྃ་ཀ་རའི་ཧཱུྃ་ལས་སྐུ་གསུང་ཐུགས་ཀྱི་ཁྲོ་མོ་མང་པོ་རྒྱུད་པར་བྱུང་ནས་ལག་ན་ལྕགས་ཀྱུ་ཐོགས་ནས་དགུག་པར་བྱེད་པའོ། །དེའི་ཕྱག་རྒྱ་ནི་གོ་སླའོ། །དེ་ནས་རྣམ་པར་རྒྱལ་བའི་སྔགས་དང་ཕྱག་རྒྱ་བསྟན་པའི་ཕྱིར། ༀ་བཛྲ་ཀྲོ་ཏ་བི་ཛ་ཡ་ཧཱུྃ་ཞེས་པ་ནི་བསྐྱེད་པའི་རྐྱེན་གྱི་སྔགས་སོ། །ཧ་ན་ཧ་ན་ཧཱུྃ་ཕཊ་ཅེས་པ་ནི་བཟླས་པ་ལས་ཀྱི་སྔགས་སོ། །བསྔགས་ཤིང་བཟླས་ཤིང་གནས་ན་གྲུབ་པའི་དུས་ན་ཅི་ཡང་བཟློག་པར་བྱེད་དོ། །དྲག་པོའི་དུས་སུ་སྔགས་བཟླས་པས་གཟས་པ་པོ་ལ་གྲོགས་བྱེད་པའི་ལྷ་ཀླུ་གང་ཡིན་པ་དེ་བཟློག་པར་བྱེད་པ་སྟེ། དད་ནས་འགྲོ་བའོ། །དེ་ནས་དབྱུག་པ་སྔོན་པའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ནཱི་ལ་དཎྜ་ཧཱུྃ་ཞེས་བསྐྱེད་པ་རྐྱེན་གྱི་སྔགས་སོ། །ད་ཧ་ད་ཧ་ཧཱུྃ་ཕཊ་ཅེས་པ་ནི་བཟླས་པ་ལས་ཀྱི་སྔགས་ཏེ། སྔགས་འདི་བཟླས་པའི་དུས་ན་དབྱུག་པ་སྔོན་པོ་ལས་ཁྲོ་བོ་འཆོལ་བ་མང་པོ་འཐོན་ཏེ། གཟས་པ་པོ་གང་ཡིན་ཏེ་གསོད་པའོ། །ཕྱག་རྒྱ་དཀྱུས་ཉིད་གསལ་ལོ། །དེ་གཤིན་རྗེ་གཤེད་པའི་སྔགས་ཕྱག་རྒྱ་བསྟན་ཏེ། ༀ་བཛྲ་ཡ་མཱནྟ་ཀ་ཧཱུྃ་ཞེས་པ་ནི་བསྐྱེད་པ་རྐྱེན་གྱི་སྔགས་སོ། །པ་ཙ་པ་ཙ་ཧཱུྃ་ཕཊ་ཅེས་པ་བཟླས་པ་ལས་ཀྱི་སྔགས་སོ། །སྔགས་འདི་བཟླས་ཤིང་ཕྱག་རྒྱ་བཅིངས་པའི་དགུག་པར་བྱ་བའི་དུས་ན་ལྕགས་ཀྱུ་ཅན་དུ་འཕྲོ་བ་དང་བསད་པར་བྱ་བའི་དུས་ན་མཚོན་ཆས་གདུག་པ་ཅན་ཐོག་པ་འཕྲོ་བ་དང་། དབྱེ་བའི་དུས་ན་གདུག་པ་ལ་སོགས་པ་སྤྲོ་བ་དང་། སྐྲད་པའི་དུས་ན་རྔ་མོ་ལ་བསྐྱོན་ནས་འགྲོ་བའི་ལས་བྱེད་པའོ། །དེ་ནས་ཡང་མི་གཡོ་མགོན་པོའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཨརྱ་ཨ་ཙ་ལེ་ཧཱུྃ་ཞེས་པ་ནི། བསྐྱེད་པ་རྐྱེན་གྱི་སྔགས་སོ། །བནྡྷ་བནྡྷ་ཧཱུྃ་ཕཊ་ཅེས་པ་བཟླས་པ་ལས་ཀྱི་སྔགས་སོ། །སྔགས་འདི་བཟླས་ཤིང་ཕྱག་རྒྱས་བཅས་པས་ལྷ་དང་ཀླུ་དང་གནོད་སྦྱིན་ཐམས་ཅད་ཅི་བསྒོ་བའི་ལས་ཐམས་ཅད་བྱེད་པར་འགྱུར་ཏེ། བགེགས་གསལ་བྲེག་ཅིང་བརྒྱལ་བར་འགྱུར་རོ། །དེ་ནས་ཡང་རྡོ་རྗེ་རྟའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཧ་ཡ་གྲྭི་བ་ཧཱུྃ་བསྐྱེད་པ་རྐྱེན་གྱི་སྔགས་སོ། །ཧུ་ལུ་ཧུ་ལུ་ཧཱུྃ་ཕཊ་ཅེས་པ་ནི། བཟླས་པ་ལས་ཀྱི་སྔགས་སོ། །སྔགས་བཟླས་ཕྱག་རྒྱ་བཅིངས་ཏེ། གཏད་པས་དུག་འཇོམས་པར་འདོད་པའི་དུས་ན་རྟ་མགྲིན་ཡབ་ཡུམ་གྱི་བདུད་རྩི་དུག་གི་ཟིན་པའི་བུ་གར་དྲངས་ཞིང་བསྟིམ་པས་དུག་སེལ་བར་གྱུར་ཏོ། །སེར་བ་བཟློག་པའི་དུས་ན་བ་སྤུའི་བུ་ག་ནས་ཀྱང་ཁྲོ་བོ་རལ་གྲི་ཐོག་པ་མང་པོ་བྱུང་སྟེ། སྤྲིན་རལ་བར་བསམ་མོ། །བདག་ཉིད་ཀྱིས་ཀྱང་མིག་བཟློག་ལ་སྔགས་བཟླས་སོ། །ནད་པ་བསྲུང་བར་འདོད་ན། བདུད་རྩིའི་ཆུ་རྒྱུན་སེང་གེའི་སྒོ་ནས་དྲངས་ལ་ནད་པ་ལ་བསྟིམ་སྟེ་ནད་ཐམས་ཅད་བྱང་དཀྲུས་པར་བསམ་མོ། །ཡང་གཞན་གྱི་མི་ཐུབ་པའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཨ་པ་ར་ཙི་ཏ་ཧཱུྃ། བསྐྱེད་པ་རྐྱེན་གྱི་སྔགས་སོ། །ཏིསྟ་ཏིསྟ་ཧཱུྃ་ཕཊ་ཅེས་པ་ནི་བཟླས་པ་ལས་ཀྱི་སྔགས་སོ། །སྔགས་བཟླས་ཕྱག་རྒྱ་བཅིངས་ནས་གཏད་པས་གདོན་ལ་སོགས་པ་ཐམས་ཅད་གཟིར་བྱེད་པའོ། །དེ་ནས་ཡང་བདུད་རྩི་འཁྱིལ་པའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཧཱུྃ་ཨ་མྲྀ་ཏ་ཀུནྡ་ལི་ཧཱུྃ་ཞེས་པ་ནི་བསྐྱེད་པ་རྐྱེན་གྱི་སྔགས་སོ། །ཚི་ན་ཚི་ན་ཧཱུྃ་ཕཊ་ཅེས་པ་ནི་བཟླས་པ་ལས་ཀྱི་སྔགས་སོ། །སྔགས་བཟླས་ཕྱག་རྒྱ་གཏད་པས་སངས་རྒྱས་དང་བྱང་ཆུབ་སེམས་དཔའ་ཡང་བསྐྱོད་པར་ནུས་ན་གཞན་བསྐྲད་པ་ལྟ་སྨོས་ཀྱང་ཅི་དགོས་སོ། །དེ་ནས་ཡང་ཁམས་གསུམ་རྣམ་པར་རྒྱལ་བའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཏྲི་ལོ་ཀྱ་བི་ཙ་ཡ་ཧཱུྃ་ཞེས་བསྐྱེད་པ་རྐྱེན་གྱི་སྔགས་སོ། །བིནྡྷ་བིནྡྷ་ཧཱུྃ་ཕཊ་ཅེས་པ་ནི་བཟླས་པ་ལས་ཀྱི་སྔགས་སོ། །སྔགས་བཟླས་ཕྱག་རྒྱ་བཅིངས་ཏེ། བདག་གི་ཐུགས་ཀ་ནས་ཁྲོ་བོའི་ཞགས་པ་ཐོགས་པ་བཅིང་བར་བྱེད་དོ། །དེ་ནས་སྟོབས་པོ་ཆེའི་སྔགས་དང་ཕྱག་རྒྱ་བསྟན་ཏེ། ༀ་བཛྲ་ཀྲོ་ཏ་ཧཱུྃ་མ་ཧ་བ་ལ་ཧཱུྃ་ཞེས་པ་བསྐྱེད་པ་རྐྱེན་གྱི་སྔགས་སོ། །སྥོ་ཏ་ཡ་སྥོ་ཏ་ཡ་ཧཱུྃ་ཕཊ་ནི་བཟླས་པ་ལས་ཀྱི་སྔགས་སོ། །སྔགས་བཟླས་ཕྱག་རྒྱ་གཏད་པས་ཐན་པ་བྱུང་བའི་དུས་ན་ཀླུ་ཐམས་ཅད་བྲེག་ཅིང་བརྒྱལ་ནས་ཆར་འབེབས་པར་བྱེད་དོ། །ཧ་ཅང་ཡང་ཆར་ཆེས་ན་དུར་ཁྲོད་ཀྱི་རས་ལ་འདུག་ནས། སྔགས་འཇུག་ནས་བཟློག་སྟེ་བཟླས་ན་ཆར་པ་ཆད་པར་འགྱུར་རོ། །དེ་ནས་ཡང་ཁྲོ་མོ་རྣམས་ཀྱི་མཚན་ཉིད་ཐབས་ཀྱི་ལས་ཇི་ལྟར་ཡིན་པ་ལྟར་ཤེས་པར་བྱའོ། །དཀྱུས་ནི་སྒྲོལ་མི་དགོས་སོ། །གཞན་ཡང་སྤྲུལ་པའི་ཕོ་ཉ་དང་ཞེས་པ་ལ་སོགས་པ་རྣམས་ནི། ངེས་པ་མེད་པ་རྒྱལ་བས་གསུངས་སོ། །སྔགས་དང་ཕྱག་རྒྱའི་ལེའུ་ལས་ནི་སྔགས་དང་ཕྱག་རྒྱའི་ལེའུའོ། །བདུད་རྩི་ཐིགས་པའི་རྒྱ་ཆེར་བཤད་པ་ལས་ཀུན་རྫོབ་ཀྱི་བདེན་པ་འབའ་ཞིག་གིས་བཤད་བའི་ལེའུ་སྟེ་དགུ་པའོ།། །།དེ་ལྟར་སྔགས་དང་ཕྱག་རྒྱ་ལ་སོགས་གསུངས་ཀྱང་སྲས་བསྐྱེད་པ་ལ་སོགས་པའི་ཏིང་ངེ་འཛིན་གྱི་རིམ་པར་ཆེ་བ་མེད་ན་ལས་ཀྱི་སྒོ་སྐབས་ཀྱི་མི་ཕྱེད་པས། ཏིང་ངེ་འཛིན་གྱི་རིམ་པར་ཕྱེ་བ་བསྟན་པའི་ཕྱིར། དེ་ནས་ཞེས་པ་ལ་སོགས་པ་གསུངས་ཏེ། བཅོམ་ལྡན་འདས་ཀྱི་འདི་གསུངས་སོ། །ཞེས་བྱ་བར་སྦྱར་རོ། །གང་གསུངས་ཤེ་ན། ཐབས་འོག་ནས་འབྱུང་བ་འདི་གསུངས་སོ། །ནམ་མཁའི་དབྱིངས་ཀྱི་དབུས་གནས་པར། ཉི་མའི་དཀྱིལ་འཁོར་བསྒོམ་པར་བྱ་ཞེས་བྱ་བ་ནི། ནམ་མཁའི་དབྱིངས་ནི་ཆོས་ཀྱི་འབྱུང་གནས་ཏེ། དེའི་ནང་དུ་ཡི་གེ་བསམས་ལ་དེ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་བསྒོམ་མོ། །དེ་དབུས་བདག་པོའི་གཟུགས་བསམ་སྟེ། ལས་རྣམས་ཐམས་ཅད་བརྩམ་པར་བྱ་ཞེས་བྱ་བ་ནི་ཉི་མའི་དཀྱིལ་འཁོར་དེའི་དབུས་སུ་ཡི་གེ་ཧཱུྃ་ཧཱུྃ་དེ་ལས་རྡོ་རྗེ་རྩེ་དགུ་པ་དེ་ལས་བདག་པོའི་གཟུགས་སུ་བསྐྱེད་དེ། སྐུ་ཡོངས་སུ་རྫོགས་པ་དང་། ལས་ཐམས་ཅད་བརྩམ་པར་བྱའོ། །ནམ་མཁའ་འཁོར་ལོ་དབང་བསྒྱུར་བས་ཞེས་བྱ་བ་ནི། ནམ་མཁའི་གཉིས་མེད་ཡེ་ཤེས་སྟོང་པ་ཉིད་ཡིན་ལ། དེའི་འཁོར་བཅོམ་ལྡན་འདས་རྡོ་རྗེ་གཞོན་ནུས་བསྒྱུར་བ་ལས་རྣམ་པ་ཐམས་ཅད་བྱེད་པར་འགྱུར་ཏེ། མི་བྱ་བ་གང་ཡང་མེད་དོ། །དོན་དམ་པ་བྱང་ཆུབ་ཀྱི་སེམས། དེ་ནས་སྲས་ཕུར་པ་བསྐྱེད་པའི་ཏིང་ངེ་འཛིན་བསྟན་པའི་ཕྱིར། དེ་ནས་ཞེས་པ་ལ་སོགས་པ་གསུངས་ཏེ། ཕུར་པ་ཀུན་གྱི་ཏིང་ངེ་འཛིན་འདི་གསུངས་སོ། །ཞེས་བྱ་བ་མགོ་ནས་འབྱུང་བ་འདི་རྣམས་སོ། །གདེང་དང་ལྡན་པའི་རྣལ་འབྱོར་པས། ཞེས་བྱ་བ་ནི་ཡང་དག་པའི་ཏིང་ངེ་འཛིན་དང་དུས་རྟག་ཏུ་མི་འབྲལ་ཞིང་། སེམས་བདེ་བའི་ཉམས་ཡོད་པ་ནི། གདེང་དང་ལྡན་པའི་རྣལ་འབྱོར་པས། དེས་བསྒོམ་པར་བྱ་བ་ནི། འདི་ལྟ་སྟེ་དང་པོ་དངོས་མེད་བྱང་ཆུབ་སེམས། སྟོང་པ་ཆེན་པོའི་ཏིང་འཛིན་ལས། །ཞེས་བྱ་བ་ནི། དང་པོ་ཆོས་ཀྱི་དབྱིངས་སྤྲོས་པའི་མཐའ་བརྒྱད་དང་བྲལ་བ་དེ་ཉམས་སུ་བླངས་ནས་བསྒོམས་ཏེ། དངོས་པོ་ཅི་ཡང་མེད་པའི་ངང་ལ་རྫས་ཀྱི་ཕུར་པ་ཁྲོ་བོའི་གཟུགས་སུ་བསྟན་ཏེ། དེ་ཡང་ཇི་ལྟར་རྟག་ཅེ་ན། རྒྱ་མདུད་སྟེང་དུ་གཞལ་ཡས་ཁང་། །ཁྲག་འཐུང་ཚོགས་ཀྱིས་རྣམ་པར་བསྒོམ། །ཞེས་པའི་བར་གྱིས་བསྟན་ཏེ། རྒྱ་མདུད་དབུ་མའི་སྟེང་རིན་པོ་ཆེ་ཟུར་བརྒྱད་པའི་ནང་དུ་གཞལ་ཡས་ཁང་བསྒོམ་པར་བྱའོ། །རྒྱན་ལ་སོགས་པ་གཞུང་གཞན་ལས་གསུངས་པ་ཇི་བཞིན་པའི་རིམ་པའོ། །གཞལ་ཡས་ཁང་དེའི་ནང་དུ་ཞིང་རྣམས་ཀྱི་གདན་སྟེངས་སུ་གསལ་བའི་སྟེང་སྟེ། ཉི་མ་དང་ཟླ་བ་གཉིས་བརྩེགས་པའི་སྟེང་དུ་ཁྲག་འཐུང་གི་ཚོགས་འོད་ཟེར་གྱིས་སྤྱན་དྲངས་ནས། གཞལ་ཡས་ཁང་གི་ནང་དུ་རྒྱས་པར་བསྒོམ་མོ། །དེ་ལ་ཏིང་ངེ་འཛིན་གྱི་མཆོད་པ་དབུལ་ལོ། །དེ་ལས་སྲས་མཆོག་ལ་ཡང་ཞེས་བྱ་བ་ནི། རྟེན་དང་བརྟེན་ཅན་དུ་དེ་ལས་སྲས་མཆོག་ཀི་ལ་ཡ་ཞེས་བྱ་བ་ནི། རྟེན་དང་བརྟེན་ཅན་དུ་བཅས་པའི་ཕུར་པ་དེ་ལས་རྟེན་དང་བརྟེན་ཅན་དུ་བཅས་པའི་བདག་གི་ཞལ་དུ་ཐིམ་ནས་ལྟེ་བའི་དབུས་སུ་ཡེ་ཤེས་ཀྱི་མེས་གཞུ་ནས། ཡུམ་གྱི་པདྨ་ལ་གསང་བ་རྡོ་རྗེ་ཡིས་འཕྲོས་པ་སྲས་ཕུར་བུ་བསྙེན་བསྒྲུབ་གཉིས་ལ་ནི་གཅིག་ཏུ་འགྱུར། ལས་ཀྱི་དུས་སུ་ཉི་ཤུ་རྩ་གཅིག་གོ། །དེ་ཡང་འོད་དཔུང་ལས་ཕྱག་མཚན་ལས་སྐུར་བསྐྱེད་དོ། །ཞལ་གཅིག་ཕྱག་བཞི་པའོ། །དབུ་སྐྲ་ཁམས་ནག་གྱེན་དུ་འབར་བ་སྤྱན་གསུམ་པ་ཅན། དེ་ལས་སྲས་མཆོག་ཀི་ལ་ཡ་ཞེས་བྱ་བའོ། །རྒྱ་མདུད་མན་ཆད་ཁྲོ་བོའི་གཟུགས་ཞེས་བྱ་བ་ནི། ཟུར་གསུམ་པར་གནས་པའོ། །ཕུར་པའི་ལྷ་ཉིད་གསལ་བར་བསྒོམ་ཞེས་བྱ་བ་ནི། ཕུར་པའི་ཐུགས་ཀ་ནས་ཧཱུྃ་ལས་ཡི་གེའི་ཕྲེང་བས་བསྐོར་བར་གནས་ཏེ། ཡིད་ཀྱི་གསལ་བར་བྲིས་ལྟ་བར་བྱའོ། །དེ་ཉིད་བྱིན་དང་ལྡན་པའི་ཕྱིར་ཞེས་བྱ་བ་ནི། སྲས་ཕུར་པ་དེ་ཉིད་བྱིན་དང་ལྡན་པར་བྱ་བའི་ཕྱིར། ༀ་ཧྲི་ཕཊ་ཅེས་ཡིག་འབྲུ་གསུམ་ཞེས་བྱ་བ་ནི། ཡི་གེ་གསུམ་པའོ། །ཡོངས་སུ་བསམ་པར་བྱ་བའོ། །དེ་གང་དུ་བསམ་ཞེ་ན། སྤྱི་བོ་རྐེད་པ་རྩེ་མོ་ལ་ཞེས་གསུངས་ཏེ། སྤྱི་བོ་ༀ་དཀར་པོ། རྐེད་པ་ཧྲཱི་དམར་པོ། རྩེ་ལ་ཕཊ་མཐིང་ནག་པོ། དེ་ལྟར་བཀོད་པ་ཇི་ལྟར་བསྒོམ་ཞེ་ན། སྐུ་གསུང་ཐུགས་སུ་བསྒོམ་པར་བྱ་ཞེས་གསུངས་ཏེ། ༀ་ལས་ཟླ་བའི་དཀྱིལ་འཁོར་གྱི་སྟེང་དུ་སྐུའི་རྡོ་རྗེ་བསྒོམ་མོ། །ཧྲི་ལས་པདྨ་འདབ་བརྒྱད་པའི་སྟེང་དུ་གསུང་གི་རྡོ་རྗེ་བསྒོམ་མོ། །ཕཊ་ལས་ཉི་མའི་དཀྱིལ་འཁོར་གྱི་སྟེང་དུ་ཐུགས་ཀྱི་རྡོ་རྗེ་བསྒོམ་སྟེ། སྐུའི་སྐུ་རྣམ་པར་དག་ཅིང་བརྗོད་པར་བྱིན་གྱིས་བརླབས་པ་དང་། གསུང་གིས་གསུང་རྣམ་པར་དག་ཅིང་དྲག་པོའི་གདངས་སྒྲ་དང་ལྡན་པར་བྱིན་གྱིས་བརླབས་པ་དང་། ཐུགས་ཀྱི་ཐུགས་རྣམ་པར་དག་ཅིང་ཞེ་སྡང་ཆེན་པོས་སྒྲོལ་བའི་མཐུ་དང་ལྡན་པའོ། །དེ་ནས་ཡེ་ཤེས་ལྔ་དང་ལྡན་པར་བྱིན་གྱིས་བརླབས་ཏེ། ཡེ་ཤེས་ལྔའི་ཡི་གེ་ལྔ་ཞེས་བྱ་བ་ནི། མེ་ལོང་ལྟ་བུའི་ཡེ་ཤེས་ལ་སོགས་པ་ལས་བྱུང་བའི་ཡི་གེ་འོག་ནས་འབྱུང་བ་འདི་ལྔའོ། །ༀ་ཨཾ་ཧཱུྃ་སྭ་ཧ། ལྔ་པོ་འདིའོ། །དེ་གང་དུ་བསྒོམ་ཞེ་ན། སྤྱི་བོ་ལྕེ་དང་སྙིང་ག་དང་རྐེད་པ་ཡན་ལག་དག་ལ་སྟེ། ཞེས་བྱ་བ་ནི། སྤྱི་བོ་སྟེ། སྟེང་གི་སྒོར་ༀ་བསྒོམ་མོ། །དེའི་ཆོས་ཀྱི་དབྱིངས་ཀྱི་ཡེ་ཤེས་ལས་བྱུང་བ་སྟེ། དེ་དང་ལྡན་པར་བྱིན་གྱིས་བརླབ་པའོ། །ལྕེ་ལ་ཨ་སྟེ་སོ་སོར་རྟོག་པའི་ཡེ་ཤེས་ལས་བྱུང་བ་སྟེ། དེ་དང་ལྡན་པར་བྱིན་གྱིས་བརླབས་པའོ། །རྐེད་པ་སྭ་སྟེ་མཉམ་པ་ཉིད་ཀྱི་ཡེ་ཤེས་ལས་འབྱུང་། དེ་དང་ལྡན་པར་བྱིན་གྱིས་བརླབ་པའོ། །སྙིང་གར་ཧཱུྃ་སྟེ་མེ་ལོང་ལྟ་བུའི་ཡེ་ཤེས་ལས་བྱུང་བ་སྟེ། དེ་དང་ལྡན་པར་བྱིན་གྱིས་བརླབ་པའོ། །ཡན་ལག་གི་རྐེད་མཚན་དུ་ཧ་སྟེ། བྱ་བ་གྲུབ་པའི་ཡེ་ཤེས་ལས་བྱུང་བ་སྟེ། དེ་དང་ལྡན་པར་བྱིན་གྱིས་བརླབ་པའོ། །དེ་ལྟར་ཡེ་ཤེས་ལྔ་དང་ལྡན་པར་བྱིན་གྱིས་བརླབས་ནས། ད་ནི་སྤྲོ་བསྡུས་ཡི་གེ་ཐུགས་ཡེ་ཤེས་རྩེ་གཅིག་པར་བྱིན་གྱིས་བརླབས་ཏེ། དེ་བསྟན་པའི་ཕྱིར། སྤྲོ་དང་བསྡུ་བའི་ཡི་གེ་སྟེ། ཧཱུྃ་གསུམ་དང་ནི་ཕཊ་གསུམ་གྱིས། གསུངས་ཏེ་སྤྲོ་བར་བྱ་བ་སྟེ་ཕཊ་ཏོ། །བསྡུ་བའི་ཡི་གེ་ཧཱུྃ་ངོ་། །དེ་ལྟ་བུའི་ཡི་གེ་དྲུག་པོ་གང་དུ་བཀོད་ཅེ་ན། ངོས་གསུམ་དང་ཟུར་གསུམ་ལ་རྩེ་མོ་གཅིག་ཏུ་བསྒོམ་པར་བྱའོ་ཞེས་གསུངས་ཏེ། ངེས་གསུམ་ལ་ཧཱུྃ་གསུམ། ཟུར་གསུམ་ལ་ཕཊ་གསུམ། ངོས་ཀྱི་ཧཱུྃ་གསུམ་ནི། ཐུགས་ཀྱི་རང་བཞིན་ལ་རྣམ་པར་ཐར་བའི་སྒོ་སྟོང་པ་ཉིད་དང་། མཚན་མ་མེད་པ་དང་། རང་བཞིན་གྱི་འོད་གསལ་བ་གསུམ་མངའ་བས་ཧཱུྃ་གསུམ་སྟེ། དེས་ཉོན་མོངས་འཇོམས་པའི་རྟགས་སུ། ཟུར་གསུམ་ལ་ཕཊ་གསུམ་དུ་བྱའོ། །དེ་ནས་གསུང་བའི་དཀྱིལ་འཁོར་ནི། སྐུ་ཤིན་ཏུ་བརྟས་པ་དེའི་ཕྱི་རོལ་གྱི་ཨེའི་གདན་ལ་གདོན་པར་བྱ་སྟེ། ༀ་བཛྲ་ཀཱི་ལི་ཀཱི་ལ་ཡ་ཏི་བ་ཏ་ཙ་ཀྲ་ཧཱུྃ་ཛ་ཞེས་བརྗོད་པས། གསང་བའི་གནས་ནས་ཨེའི་གདན་ལ་བཞུགས་སུ་གསོལ་ལོ། །བཞུགས་པ་དེ་ལ་དབང་བསྐུར་བར་བྱ་སྟེ། དེ་བསྟན་པའི་ཕྱིར་རིགས་ཀྱི་དབང་མཆོག་ཐོབ་བྱའི་ཕྱིར། ཞེས་པ་ལ་སོགས་གསུངས་ཏེ། རང་གི་རིགས་ཀྱི་དབང་བསྐུར་ཏེ། །ཞེས་བྱ་བ་ནི་རང་གི་རིགས་སོ་སོའི་དབང་བསྐུར་ཏེ། དེ་ཡང་ཇི་ལྟར་ཞེ་ན། འཆོལ་བར་སྤྲོས་ལ་སོ་སོར་བསྟན། །ཞེས་གསུངས་ཏེ། འཆོལ་བར་སྤྲོས་པ་ནི་སྐུའི་རིགས་ལ་ཡང་སྐུ་གསུང་ཐུགས་སྤྲོས་ལ། སྐུ་གསུང་ཐུགས་ལ་ཡང་དེ་བཞིན་ནོ། །དེ་ལྟར་འཆོལ་བར་སྤྲོས་པས་དུས་གསུམ་གྱི་སངས་རྒྱས་ཐམས་ཅད་ལ་མཆོད་པ་ཕུལ་ནས་སྐུ་གསུང་ཐུགས་སུ་དབང་བསྐུར་ཅིག་པར་བསྐུར། ཁམས་གསུམ་གྱི་ཉོན་མོངས་པ་སྦྱངས་སླར་ལ་རང་རང་གི་རིགས་མ་འཆོལ་བར་བསྡུས་ནས་བསྟིམས་པས། སོ་སོའི་དབང་ཐོབ་སྟེ། བྱིན་དང་ལྡན་པར་འགྱུར་རོ། །དེ་ནས་ཡང་བྱང་ཆུབ་ཀྱི་སེམས་ཀྱི་དབང་བསྐུར་ཞིང་། བྱིན་དང་ལྡན་པར་བྱ་བའི་ཕྱིར། གཡས་གཡོན་ཐབས་དང་ཤེས་རབ་ལས། ཞེས་པ་ལ་སོགས་པ་གསུངས་ཏེ། ལག་པ་གཡས་པ་ཐབས་ཀྱི་རང་བཞིན་ཏེ། དེའི་མཐིལ་དུ་མ་བསམ་ལ། དེ་ལས་ཉི་མའི་དཀྱིལ་འཁོར་དེའི་སྟེང་དུ། ཨ་བསམ་ཨ་ལས་ཀུན་ཏུ་བཟང་པོའི་སྐུ་བསྐྱེད་དེ། ལག་པ་གཡོན་པ་ཤེས་རབ་ཀྱི་རང་བཞིན་ཏེ། དེའི་མཐིལ་དུ་ཨ་བསམ། དེ་ལས་ཟླ་བའི་དཀྱིལ་འཁོར་དེའི་སྟེང་དུ། ཨ་བསམ་དེ་ལས་ཀུན་ཏུ་བཟང་མོའི་སྐུར་བསྐྱེད་དོ། །དེའི་རྗེས་ལས་གཡས་གཡོན་གཉིས་ཀའི་སོར་མོའི་མཐིལ་བཅུ་ལ་ཟླ་བའི་དཀྱིལ་འཁོར་བསམ་པར་བྱའོ། །དེ་ནས་ཐལ་མོ་མཉམ་པོར་སྦྱར་བ་ལ་སུ་ར་ཏ་སྡོམ་ཞེས་བརྗོད་པས་ཀུན་ཏུ་བཟང་པོ་ཡབ་ཡུམ་སྦྱོར་བ་མཛད་པས། བྱང་ཆུབ་སེམས་འོད་ཟེར་དུ་འཕྲོས་ཏེ། ཟླ་བའི་དཀྱིལ་འཁོར་དག་གི་སྟེང་དུ་གནས་པར་གྱུར་ཏེ། གཡས་པའི་ལྔ་ལ་གུང་མོ་ལ་ཨཾ་ཐེ་བོང་ལ་ཧཱུྃ་མཛུབ་མོ་ལ་ཏྲ། སྲིན་ལག་ལ་ཏྲི། མཐེ་ཆུང་ལ་ཧ་བསམ་པར་བྱའོ། །གཡོན་པ་རྣམས་ལ་ཡང་དེ་རྣམས་བསམ་པར་བྱའོ། །དེ་ལས་སྐུ་ཡོངས་སུ་རྫོགས་པར་བསྐྱེད་དེ་ལས་སོར་མོ་ཡབ་ཡུམ་བཅུར་སྒོམ་ཞེས་གསུངས་པའོ། །ཡབ་ཡུམ་བཅུ་པོ་སྦྱོར་བའི་བརྡའ་བསྐུལ་ཏེ། ༀ་བཛྲ་ཨ་ཙ་ལ་ཧཱུྃ་ཞེས་བརྗོད་པས། ཡབ་ཡུམ་རྡོ་རྗེ་དང་པདྨ་ཕྲད་པ་སྟེ། སོར་མོ་ཅུང་ཟད་བསྣོལ་ལ་ༀ་བཛྲ་བ་ན་ཧཱུྃ་ཞེས་བརྗོད་པས་ཡབ་ཡུམ་སྟོད་སྨད་འཁྱུད་པ་སྟེ། སོར་མོ་རྒྱབ་ཏུ་བསྣོལ་ཏེ་བསྡམ་པའོ། །དེ་ནས་བྱང་ཆུབ་ཀྱི་སེམས་ཡུམ་གྱི་མཁའ་ལ་གནས་པ་ལ། ༀ་སརྦ་ཏ་ཐ་ག་ཏ་པུ་ཙ་ཛྙཱ་ན་བཛྲ་སོ་བྷ་བ་ཨཏྨ་ཀོ་ཧཾ་ཞེས་བརྗོད་པས། ཡུམ་གྱི་བ་སྤུའི་བུ་ག་ནས་བྱང་ཆུབ་ཀྱི་སེམས་འཕྲོས་ཏེ། དུས་གསུམ་གྱི་བདེ་བར་གཤེགས་པ་ལ་མཆོད་པ་ཕུལ། སྲས་ཕུར་པ་འདི་ལ་བྱང་ཆུབ་སེམས་ཀྱིས་དབང་བསྐུར་ཅིག་པའི་བྱིན་རླབས་འོད་འཕྲོས་པས། ཞེས་གསུངས་པ་ཡིན་ནོ། །དེ་ནས་ཕུར་པ་ལག་པས་བླངས་ལ་ས་མ་ཡ་སྟཾ་ཞེས་བརྗོད་ལ་བླང་། མཐེ་བོང་དང་སྲིན་ལག་གུང་མོ་ནི་སྐུ་གསུང་ཐུགས་གསུམ་གྱི་དབུས་སུ་བཙུག་ལག་པའི་རྟིང་པ་ཕྱེ་སྟེ། སོར་མོ་རྣམས་ཀྱིས་ཕུར་པ་དྲིལ་ཞིང་། ༀ་བཛྲ་ཨ་བེ་ཤ་ཡ་ཨ་ཞེས་བརྗོད་པས་དུས་གསུམ་གྱི་བདེ་བར་གཤེགས་པ་ཡབ་ཡུམ་གྱི་བྱང་ཆུབ་ཀྱི་སེམས་མུ་ཏིག་དཀར་པོ་དྲི་མ་མེད་པ་ལྟར། སྲས་ཕུར་ལ་ཐིམ་སྟེ། ཐིམ་པས་བྱང་ཆུབ་སེམས་ཀྱི་དབང་ཐོབ་ནས་ཤིན་ཏུ་འོད་འཕྲོ་བར་འགྱུར་རོ། །དེ་ལ་ནི་འདུ་བྱེད་ལས་ཀྱིས་བྱིན་གྱིས་བརླབས་ཞེས་གསུངས་ཏེ། ལག་པ་གཡས་གཡོན་གྱི་ཐབས་ཤེས་རབ་གཉིས་ཀྱི་འདུ་བྱེད་ཀྱིས་བསྐུལ་ཏེ། བྱིན་གྱིས་བརླབས་པའོ། །ཕྱོགས་བཅུ་རྒྱལ་བ་ཡབ་ཡུམ་གྱི་བྱང་ཆུབ་ཀྱི་སེམས་ཀྱི་སྲས་དེས་བསྟིམས་པས་དེ་ལ་ནི། ཕྱོགས་བཅུའི་རྒྱལ་བ་ཡབ་ཡུམ་གཉིས་མེད་སྦྱོར་བའི་བྱང་ཆུབ་སེམས་བར་མ་ཆད་པར་དེ་ལ་བསྟིམས། ཞེས་གསུངས་ཏེ། སྲས་ཕུར་པ་དེ་ལ་བར་མ་ཆད་པར་བསྟིམས་ཞིང་དབང་བསྐུར་བའོ། །དེས་ཀྱང་བྱིན་ཆེན་འདུས་པར་འགྱུར་ཞེས་བྱ་བ་ནི། བྱང་ཆུབ་སེམས་ཀྱི་དབང་བསྐུར་བ་དེས་ཀྱང་དུས་གསུམ་གྱི་བདེ་བར་གཤེགས་པའི་བྱང་ཆུབ་ཀྱི་སེམས་ཀྱིས་བྱིན་བརླབས་ཐམས་ཅད་སྲས་ཕུར་པ་ལ་འདུས་པར་གྱུར་ཏོ། །དེ་ནས་ཡང་སྐུ་གསུང་ཐུགས་དབང་སྟེ། དེའི་ཕྱིར་དེ་ནས་སྐུ་གསུང་ཐུགས་ཉིད་དུ། བྱིན་གྱིས་བརླབས་ཤིང་བསྟན་བྱ་སྟེ། ཞེས་གསུངས་ཏེ། སྔོན་ལ་ཐུགས་སུ་བྱིན་གྱིས་བརླབས་ཤིང་དབང་བསྐུར་བ་བསྟན་ཏེ། བདག་ཉིད་ལས་ཐུགས་ཕྱག་མཚན་མང་པོ་སྤྲོས་པས་ལས་གཉིས་བྱས་ཏེ་སེམས་ཅན་གྱི་ཀུན་གཞི་ལ་གནས་པའི་བག་ཆགས་སྦྱངས། བདེ་བར་གཤེགས་པས་སྒྲས་ཕུར་པ་ལ། ཐུགས་རྗེས་བྱིན་གྱིས་རློབས་ཤིག་པས་བསྐུལ་ནས། ཕར་འཕྲོས་པས་སླར་འདུས་པ་དང་དུས་གསུམ་གྱི་བདེ་བར་གཤེགས་པའི་ཐུགས་ཀ་ནས་ཀྱང་ཕྱག་མཚན་མང་པོ་སྲས་ཕུར་པ་ལ་གཉིས་སུ་མེད་པར་བསྟིམས་པས་སྲས་ཕུར་པའི་ཐུགས་ཀའི་ཧཱུྃ་ལ་ཐིམ་པས་ཤིན་ཏུ་ཐུགས་བསྟན་ཞིང་འོད་འཕྲོ་བར་འགྱུར་ཏེ། ཕྱག་རྒྱ་བཅས་ཏེ། ༀ་བཛྲ་སྭ་ཏ་ར་ཙ་ཧཱུྃ་ཞེས་བརྗོད་ཅིང་བསྟིམ་པའོ། །དེས་ན་ཐུགས་ཉིད་རྡོ་རྗེ་འགྱུར་ཞེས་གསུངས་ཏེ། བརྟན་པའི་ཕྱིར་རྡོ་རྗེའོ། །དེ་ནས་གསུང་གིས་དབང་བསྐུར་ཞིང་བྱིན་གྱིས་བརླབས་ཏེ་ལག་གཉིས་སོར་མོ་རྩེ་སྤྲད་དེ་ཞེས་བྱ་བ་ནི། ལག་པའི་སོར་མོ་ཀུན་སྤྲད་ཅིང་མ་སྤྲད་པ་ཁད་པ་ཙམ་བྱ་སྟེ། པདྨ་ལྟ་བུར་བྱས་པའི་ཕུར་པ་ལག་པའི་རྟིང་པའི་བར་དུ་བཅུག་སྟེ། རྟིང་པས་ཕུར་བུ་དྲིལ་བར་བྱ་ཞིང་། རྣལ་འབྱོར་རྡོ་རྗེའི་ཚིག་ཏུ་བརྗོད་པའི་སྔགས་འདི་ཡིན་ཏེ། ༀ་བུ་བུ་བྷ་ཏ་ཕཊ། ཅེས་བརྗོད་པས་བདག་ཉིད་ཀྱི་ཐུགས་ཀ་ནས་ཧཱུྃ། མང་པོ་འཕྲོས་ཏེ་ལས་གཉིས་བྱས་ཏེ། སེམས་ཅན་དག་གི་མི་དགེ་བ་ཐམས་ཅད་སྦྱངས་དུས་གསུམ་གྱི་སངས་རྒྱས་བདེ་བར་གཤེགས་པ་ཐམས་ཅད་ལ་སྲས་ཕུར་པ་ལ་གསུང་གིས་དབང་བསྐུར་ཞིང་བྱིན་གྱིས་རློབས་ཤིག་པར་བསྐུལ་བས། ཧཱུྃ་འཕྲོས་པ་ཉིད་དང་བདེ་བར་གཤེགས་པའི་ཐུགས་ཀ་ནས་གསུང་ཡིག་འབྲུ་མང་པོ་སླར་འདུས་ནས་སྲས་པོའི་གསུང་གི་གནས་སུ་བྱིན་གྱིས་བརླབས་ཅིང་བསྟིམ་མོ། །དེ་ནི་གསུང་ཉིད་རྡོ་རྗེར་གྱུར་ཞེས་ཏེ། དབང་བསྐུར་ཞིང་བྱིན་གྱིས་བརླབས་པས་གསུང་བརྟན་ཞིང་ཁྲོས་པའི་གདངས་དང་ལྡན་པའོ། །དེ་ནས་ཡང་སྐུའི་དབང་བསྐུར་ཞིང་བྱིན་བརླབ་པ་སྟོན་ཏེ། ལག་གཉིས་སོར་མོ་རྒྱབ་བསྣོལ་ཏེ། མཐེ་བོང་གཤིབས་པའི་ཆང་བ་རུ་ཞེས་བྱ་བ་ནི། ལག་པ་གཉིས་བསྣོལ་ཐལ་མོ་སྦྱར་ལ་སོར་མོ་རྣམས་བརྒྱབ་ཏུ་བསྣོལ་ཏེ། མཐེ་བོང་གཉིས་གཤིབས་ཏེ། དེའི་བར་དུ་ཕུར་པ་བཅུག་ལ་རྡོ་རྗེ་བཅུག་ལ་རྡོ་རྗེ་ཕུར་བུ་དེ་འདྲིལ་བར་བྱས་ཤིང་རྣལ་འབྱོར་པས་ཀྱང་། རྡོ་རྗེ་ཚིག་ཏུ་བརྗོད་པའི་སྔགས་འོག་ནས་འབྱུང་བ་འདིའོ། །ༀ་ཧ་ན་ཧ་ན་སྟི་སྟ་ཙཀྲ་ཧཱུྃ་ཕཊ་ཅེས་བརྗོད་པས་བདག་ཉིད་ཀྱི་ཐུགས་ཀ་ནས་སྐུ་མང་པོ་སྤྲོས་པ་ལས་གཉིས་བྱས་ཏེ། སེམས་ཀྱི་ལུས་ཀྱི་མི་དགེ་བ་ཐམས་ཅད་སྦྱངས། བདེ་བར་གཤེགས་པས་སྲས་ཕུར་པ་ལ་དབང་བསྐུར་ཅིག་པར་བསྐུལ་བས་སྐུ་འཕྲོས་པ་དེ་ཉིད་དང་བདེ་བར་གཤེགས་པའི་ཐུགས་ནས། སྐུ་མང་པོ་བྱུང་ནས་སྲས་ཕུར་པ་ལས་ཐིམ་པས་སྐུའི་གནས་གང་ཡིན་པ་དེ་ལ་བྱིན་གྱིས་བརླབས་ཤིང་དབང་བསྐུར་བས་དེས་ནི་ལུས་ཉིད་རྡོ་རྗེར་འགྱུར། དེ་ནས་སྲས་ཕུར་པ་དེ་ལ་མཆོད་པ་བྱ་བ་བསྟན་ཏེ། དེའི་ཕྱིར་དེ་ནས་ཕུར་བུ་རྒྱན་གྱི་ཏིང་ངེ་འཛིན་འདི་གསུངས་སོ། །ཞེས་བྱ་བ་ནི། སྲས་ཕུར་པ་ལ་དབང་བསྐུར་བའི་དེ་མ་ཐག་པ་དེ་ནས་མཆོད་པ་བྱ་བ་འོག་ནས་འབྱུང་བ་འདི་གསུངས་སོ། །ཨེ་ཡི་གདན་ལ་བཞུགས་པ་ཡི ། །ཁྲོས་པའི་རྒྱལ་པོ་དེ་ཉིད་ལ། ཞེས་བྱ་བ་ནི། ཨེའི་གདན་ལ་བཞུགས་པ་ནི་ཤེས་རབ་ལས་བྱུང་བའི་རྟགས་ཏེ། ཁྲོས་པའི་རྒྱལ་པོ་དེ་ཉིད་ལ་མཆོད་པ་དབུལ་བར་བྱ་བ་ཡིན་ཏེ། བདག་ཉིད་ཀྱི་ཐུགས་ཀ་ནས་དི་བེ་ལ་སོགས་པའི་ལྷ་མོ་རྣམས་བསྟན་ནས། དེས་ཕྱིའི་མཆོད་པ་དབུལ་བའོ། ལ་སེ་ལ་སོགས་པ་ནང་གི་མཆོད་པ་དབུལ་བའོ། །ཡུངས་དཀར་རྒྱལ་པོས་བརྡེག་བྱ་ཞིང་། ཞེས་པ་ནི། ལག་མཐིལ་གཉིས་ལ་ཉི་མ་དང་ཟླ་བ་བསམས་ལ། ཉི་མ་དང་ཟླ་བ་ནི་ཐབས་དང་ཤེས་རབ་ཀྱི་རང་བཞིན་ཏེ། གཉིས་ཀྱི་དབུས་སུ་ཡུངས་དཀར་བཞག་པས་ཐབས་དང་ཤེས་རབ་ཀྱི་མཐུས་ཡུངས་དཀར་ཁྲོ་ཆུང་དུ་གྱུར་ཏེ། དེས་ཕུར་པ་ལ་བརྡེག་པས་ཁྲོ་ཆུང་ཕུར་པ་ལ་ཐིམ་པས་ཤིན་ཏུ་རྣོ་ཞིང་དཔལ་དང་ལྡན་དེ་འོད་ཟེར་འབར་བར་གྱུར་ཏེ། རྩེ་གཅིག་རྡོ་རྗེར་བྱིན་གྱིས་བརླབས་ཞེས་གསུངས་སོ། །ལག་མཐིལ་གཡས་སུ་སྦྱར་བ་ཡི། །གུ་གུལ་དུད་པ་སྤྲིན་ཕུང་གིས། །གཏུག་ཆེན་མཆོད་པས་མཆོད་པར་བསྒོམ། །ཞེས་བྱ་བ་ནི། ལག་མཐིལ་གཡས་སུ་ཡི་གེ་ཧོ་བསམ་ལ། ཡི་གེ་ཡོངས་སུ་གྱུར་པ་ལས་མེ་དཔུང་འབར་བར་བསམ་པ་དེ་ལ་གུ་གུལ་བསྲེག་དེ། སྲས་ཕུར་པ་ལ་གཏུགས་པས་གུ་གུལ་གྱི་དུད་པས་མཆོད་པ་ཕུལ་བར་བསམ། ཧོ་ལས་འབྱུང་བ་མེའི་དུར་ཁྲོད་ཀྱི་མེ་དཔུང་གི་དཀྱིལ་ན་བཞུགས་པར་བསམ་མོ། །ཕྱི་ནང་མཆོད་པ་ཅི་འབྱོར་པས། །མཆོད་དེ་ལས་གང་བསྒོམ་པར་བྱ། །ཞེས་བྱ་བ་ནི། ཕྱི་ནང་གི་མཆོད་པ་གང་དུ་གསུངས་སོ། །དེ་ལྟར་མཆོད་པ་བྱས་པའི་རྗེས་ལ། བསྟོད་པ་ནི། ཧཱུྃ་བསྐལ་པ་མེ་ལྟར་འབར་བའི་ཀློང་དཀྱིལ་ནས། །མཐིང་ནག་གྲུ་གསུམ་འབར་བའི་དཀྱིལ་འཁོར་དུ། །བཛྲ་འདུས་པའི་སྲས་མཆོག་ཀི་ལ་ཡ། །ཐུགས་རྗེ་མཉམ་པའི་དབྱིངས་ནས་སྤྲུལ་པ་འགྱེད། །ཞེ་སྡང་བདུད་འདུལ་སྐུ་ལ་ཕྱག་འཚལ་བསྟོད། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །མཐིང་ནག་གྲུ་གསུམ་འབར་བའི་དཀྱིལ་འཁོར་དུ། །བྷུད་ཏ་འདུལ་བའི་སྲས་མཆོག་ཀཱི་ལ་ཡ། །སྐུ་མཆོག་རྫོགས་པའི་སྐུ་ལ་འོད་ཟེར་འཕྲོ། །གཏི་མུག་བདུད་འདུལ་སྐུ་ལ་ཕྱག་འཚལ་བསྟོད། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །མཐིང་ནག་གྲུ་གསུམ་འབར་བའི་དཀྱིལ་འཁོར་དུ། །རཏ་ན་འདུལ་བའི་སྲས་མཆོག་ཀི་ལ་ཡ། །ཡོན་ཏན་རྒྱ་མཚོ་འཁྱིལ་ཞིང་དབྱིངས་ནས་གསལ། །ང་རྒྱལ་བདུད་འདུལ་སྐུ་ལ་ཕྱག་འཚལ་བསྟོད། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །མཐིང་ནག་གྲུ་གསུམ་འབར་བའི་དཀྱིལ་འཁོར་དུ། །པདྨ་འདུས་པའི་སྲས་མཆོག་ཀཱི་ལ་ཡ། །གསུང་མཆོག་སྒྲག་པས་འགྲོ་བ་མཐའ་དག་འདུལ། །འདོད་ཆགས་བདུད་འདུལ་སྐུ་ལ་ཕྱག་འཚལ་ལོ། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །མཐིང་ནག་གྲུ་གསུམ་འབར་བའི་དཀྱིལ་འཁོར་དུ། །ཀརྨ་འདུས་པའི་སྲས་མཆོག་ཀི་ལ་ཡ། །འཕྲིན་ལས་དྲག་པོས་ལོག་ལྟ་འདུལ་མཛད་ཅིང་། །ཕྲག་དོག་བདུད་འདུལ་སྐུ་ལ་ཕྱག་འཚལ་ལོ། །ཞེས་བསྟོད་ནས་བདག་གི་བསྣག་པའི་ལས་འདི་ལྟ་བུ་གྲུབ་པར་མཛོད་ཅིག །ཅེས་བསྒོའོ། །དེ་ནས་ཡང་སྟོན་པས་བཟླས་མཆོག་རྒྱུན་གྱི་ཏིང་ངེ་འཛིན་འདི་གསུངས་སོ། །བདག་ཉིད་དང་པོ་རྣལ་འབྱོར་དུ་འདུག་སྟེ། སྙིང་གར་ཉི་མའི་དཀྱིལ་འཁོར་ལ། ཞེས་བྱ་བ་ནི། བདག་ཉིད་དང་པོ་བདག་ལ་མཆོད་པ་དང་བསྟོད་པ་བྱས་པའི་དེ་མ་ཐག་པར། ལྷའི་རྣལ་འབྱོར་ལས་མ་འཕོས་པར། །བདག་ཉ ིད་ཀྱི་ཡེ་ཤེས་སེམས་དཔའི་ཐུགས་ཀ་ནས་རྡོ་རྗེའི་ནང་ན་ཉི་མའི་དཀྱིལ་འཁོར་བསྒོམ་མོ། །དེའི་སྟེང་དུ་མཐིང་ནག་འབར་བའི་ཧཱུྃ་བསྒོམ་མོ། །ཧཱུྃ་དེ་ལ་ༀ་བཛྲ་ཀཱི་ལི་ཀཱི་ལ་ཡ། ཧཱུྃ་ཕཊ། ཅེས་པ་ནི་བསྙེན་པའི་དུས་སུ་བསྐོར་ལ་བྱའོ། །བསྒྲུབ་པའི་དུས་སུ་ཤར་ལ་འབྱུང་བ་བྱའོ། །ལས་ཀྱི་དུས་སུ་ཞར་ལ་འབྱུང་བ་བྱ་བའོ། །ལས་ཀྱི་དུས་སུ་གང་གི་སྤྲོ་བའོ། །དེ་ལ་བསྐོར་བ་ལ་ནི། སྔགས་ཀྱི་ཡི་གེ་རབ་བསྐོར་ཞེས་གསུངས་པའོ། །ཕུར་པ་ལ་ཡང་དེ་བཞིན་ཏེ། ཞེས་བྱ་བ་ནི། ཕུར་པ་ལ་ཡང་གོང་དུ་བསྟན་པ་བཞིན་དུ་བྱའོ། །རང་སྔགས་ཚིགས་སུ་བརྗོད་པ་ལ་ཞེས་བྱ་བ་ནི། ཡི་གེ་བསྐུལ་བ་དང་སྤྲོ་བའི་སྔགས་ཏེ། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ། ཅེས་རྡོ་རྗེའི་ཚིག་ཏུ་བརྗོད་པས། ཧཱུྃ་ཡན་ཆད་ནི་བསྐུལ་བའོ། །ཕཊ་ཀྱིས་བསྐུལ་བ་ནི་སྤྲོ་བའོ། །དེ་ལྟར་སྔགས་དྲག་དལ་བྱེད་པར་བཟླས་པས། ཡི་གེ་ལས་འོད་དུ་འཕྲོས་པས། འོད་དེ་རྩ་གཡས་ན་ཞུགས་སྣའི་བུ་གུ་གཡས་ནས་འཐོན། སྲས་ཕུར་པའི་སྣ་གཡོན་ནས་སྙིང་གའི་ཡི་གེ་རྣམས་བསྐུལ་སྲས་ཕུར་པ་ཉིད་ཤིན་ཏུ་འོད་ཟེར་འཕྲོ་བ་བྱས། རྩ་དབུས་མ་ནས་མར་ཞུགས་ལྟེ་བའི་དབུས་ནས་འབྱུང་བདག་ཉིད་ཀྱི་ལྟེ་བའི་སྦུ་གུ་ནང་ཞུགས་བདག་གི་ལུས་འོད་ཟེར་ཅན་དུ་བྱས་སྙིང་གའི་ཡི་གེ་བསྐུལ་རྩ་གཡས་པ་ནས་འོད་དུ་འབར་དེ་བཞིན་དུ་མགལ་མེ་ཆད་པ་ལ་བསྐོར་བ་ཇི་བཞིན་ཏེ། སྤྲོ་བ་དང་བསྡུ་བའི་ཡི་གེའི་ལས་ཀྱི་སྐབས་ཀྱིས་འཁོར་རོ། །དེའི་ཞར་ལ་བྱུང་བའི་ཏིང་ངེ་འཛིན་བསྙེན་པའི་དུས་སུ་འོད་ཟེར་ཕར་འཕྲོ་བ་ཙམ་ན། དེ་ལས་འོད་ཟེར་མགར་མེའི་ཚ་ཚ་བཞིན་དུ་ཕྱོགས་བཅུར་འཕྲོས་པ་དེའི་ལས་གཉིས་བྱས་ཏེ། ཁམས་གསུམ་གྱི་སེམས་ཅན་ལོག་པར་ལྟ་བ་རྣམས་བསྒྲལ་བདེ་བར་གཤེགས་པ་རྣམས་ལ་དྲག་པོའི་ཕུར་པ་འདི་བྱིན་གྱིས་རློབ་ཤིག་པར་བསྐུལ་བས། དུས་གསུམ་གྱི་བདེ་བར་གཤེགས་པའི་ཐུགས་ཀ་ནས་ཕུར་པ་ཕྲ་མོའི་སྐུར་འཕྲོས་ཏེ། སྲས་ཕུར་བུ་རབ་ཏུ་ཁྲོས་པའི་སྙིང་གར་བསྟིམས་ལ་བྱས་ནས་གཟི་བྱིན་བསྐྱེད་ཅིང་མཐུ་བསྐྱེད་པར་བྱའོ། །སྒྲུབ་པའི་དུས་སུ་ཞོར་ལས་བྱུང་བའི་ཏིང་ངེ་འཛིན་འདི་ལས་ཁྲོ་ཆུང་ལྕགས་ཀྱུ་ཅན་དུ་གྱུར་ཏེ། དེས་གཟས་པ་པོ་གང་ཡིན་པའི་རྣམ་ཤེས་དེ་བཀུག་ནས་སྲས་ཕུར་བུའི་འོག་ཏུ་ཆུད་པར་བསམ་པའོ། །ལས་ཀྱི་དུས་ནི་བདག་དང་ཕུར་བུ་གཉིས་དང་། ཕྱོགས་བཅུའི་ཁྲོ་བོ་མདུན་གྱི་ཐུགས་ཀ་ནས་སྤྲོ་ཞིང་དགུག་པར་བྱ་བའོ། །གྲངས་ཀྱི་བསྙེན་པའི་དུས་སུ་ནི་ས་ཡའོ། །བསྒྲུབ་པའི་དུས་སུ་ནི་འབུམ་མམ་ཉིས་འབུམ་མམ། སུམ་འབུམ་མོ། །ལས་ཀྱི་དུས་སུ་ནི་རེ་རེ་ལ་བརྒྱ་རྩ་བརྒྱད་བརྒྱད་དོ། །དེ་ལྟ་བུའི་གྲངས་ཀྱི་བསྙེན་པ་ཚང་བ་ནི། མཚན་མ་དབྱུང་བར་གདོན་མི་ཟ་ཞེས་བྱ་བའི་མཚན་མ་རྣམ་པ་ལྔ་སྟེ། དང་པོ་དུ་བ་འདྲ་བ་དང་། གཉིས་པ་མར་མེ་འདྲ་བ་དང་། ཞེས་པ་ལ་སོགས་པ་འབྱུང་ངོ་། །མདོར་ན་རྟགས་སྐུའི་མཚན་མ་བྱུང་ནའོ། །དྲག་པོའི་རྟགས་སུ་གསུམ་ནི། རབ་ཀྱི་མངོན་དུ་འཁྲུག་པ་དང་། འབྲིང་གིས་ལིང་གར་ཁུགས་པ་དང་། ཐ་མས་མཚན་མ་རྟག་ཏུ་འོང་སྟེ། དེ་ལྟ་བུའི་མཚན་མ་བྱུང་སྟེ། བསྙེན་པ་གྲངས་ཚད་ནའོ། །དུས་ཀྱི་མཚན་མ་ནི་ཟླ་གྲངས་ལོ་གྲངས་དང་ཞག་གྲངས་ཀྱི་དུས་སུའོ། །མཚན་མའི་བསྙེན་པ་ནི་མཚན་མ་ནམ་བྱུང་གི་བར་དུ་སྟེ། མཚན་མ་མཐོང་བ་ན་བསྙེན་པ་ཚང་བའོ། །དེ་ལྟར་བསྙེན་པ་དང་བསྒྲུབ་པ་དང་ལས་ཀྱི་མཚན་མ་བྱུང་བ་དང་། གདོད་ལས་འོག་ནས་འབྱུང་བ་ལ་སྦྱར་བའོ། །དེ་ནས་ཕུར་པ་གདབ་པའི་ཏིང་ངེ་འཛིན་བསྟན་ཏེ། དེའི་ཕྱིར་དེ་ནས་གདབ་པར་རྒྱུན་གྱི་ཏིང་ངེ་འཛིན་འདི་གསུངས་སོ། །ཞེས་པ་ལ་སོགས་པས་བསྟན་ཏེ། ཏི་བ་ཏ་ཙཀྲ་ཕུར་པའི་ལྷ། ཞེས་བྱ་བ་ནི། སྲས་ཕུར་པ་ཉིད་ལ་བྱ་སྟེ། རྫས་ཀྱི་ཕུར་པའི་ལྷའོ། །ཁྲོས་པ་མི་ཟད་འབར་བ་ཡི། སྲས་ཕུར་པ་དེ་ཤིན་ཏུ་ཡང་ཁྲོས་པ་མི་ཟད་པའི་འོད་ཟེར་འབར་བའོ། །རྐེད་ནས་ལག་གཡོན་འདེབས་ཚུལ་དུ་ཞེས་བྱ་བ་ནི། ཕུར་པའི་རྐེད་པ་ནས་ལག་པ་གཡོན་པས་བཟུང་སྟེ། འདེབས་པའི་ཚུལ་དུ་གཟས་པ་པོའི་གཡས་པའི་ཐོ་བས་རྡེག་ཚུལ་དུ་བྱ་ཞེས་པ་ནི། གཡས་པའི་ཐོ་བས་འབྱར་ཚུལ་གྱིས་བརྡེག་པ་སྟེ་འབྱོར་པའོ། །རྡོ་རྗེ་སྡེར་མོའི་སྔགས་འདི་ཡིས། བདུན་ནམ་ཉི་ཤུ་རྩ་གཅིག་ཏུ་ཞེས་བྱ་བ་ནི། འདེབས་པའི་དུས་དུས་སུ། སོ་སོའི་སྔགས་དང་སྒྲོགས་ལ་གྲངས་ནི་བདུན་ནམ་ཉི་ཤུ་རྩ་གཅིག་བཟླས་པས་གདབ་པའོ། །རྡོ་རྗེ་སྡེར་མོའི་སྔགས་འདིའོ། །ༀ་ན་མ་ས་མནྟ་ཀ་ཡ་བཀྲུ་ཏྟ་ནན། ༀ་གྷ་གྷ་གྷ་ཏ་ཡ་སརྦ་དུསྟན་མཱ་ར་ཡ་ཕཊ་ཀཱི་ལི་ཀཱི་ལ་ཡ་སརྦ་པཱ་པཾ་ཕཊ་ཧཱུྃ་ཧཱུྃ་ཧཱུྃ་བཛྲ་ཀི་ལ་ཡ་ཏ་རོད་ཨཱ་ཛྙ་པ་ཡ་ཏི་ཀ་ཡ་བཀྐ་ཙིཏྟ་བཛྲ་ཀི་ལ་ཡ་ཧཱུྃ་ཕཊ། དྲག་ཏུ་བརྗོད་ཅིང་གབ་པར་བྱ་ཞེས་བྱ་བ་ནི། སྔགས་སོ་སོ་དང་སྒྲོགས་པ་སྟེ་ཅི་དྲག་ཏུ་བརྗོད་ལ་གནས་སུ་གདབ་པ་སྟེ། སྔོན་ལ་སྙིང་ལ་གདབ་པ་སྟེ། སྐབས་དེ་རུ་ཚེ་ལུང་ཁྲུས་ལུང་གཉིས་བྱ་བ་སྟེ། སྔགས་འོག་ནས་འབྱུང་བས་བྱའོ། །དེ་ནས་གཟུགས་དེ་ཉིད་བཀུག་ཅིང་བསྟན་པར་བྱའོ། །བསྟན་པར་བྱ་ཞིང་གདབ་པའི་ཕྱིར། ཞེས་བྱ་བ་ལ་སོགས་པ་གསུངས་ཏེ། གཟུགས་ལ་བསྡུ་ཞིང་མཚན་མར་གདབ་པར་བྱ་བའི་ཕྱིར། རྡོ་རྗེ་ཚིག་ཏུ་འོག་ནས་འབྱུང་བ་འདི་བརྗོད་དོ། །དམ་ཚིག་ཅན་གྱི་དུས་ལ་བབ་ཅེས་བྱ་བ་ནི། བདག་ཉིད་ཆེན་མོའི་སྔོན་བཅོམ་ལྡན་འདས་ཀྱི་སྤྱན་སྔར་དུ་རང་གི་སྲོག་གི་སྙིང་པོ་མདོང་གསོལ་དུ་ཕུལ་ནས་རྣལ་འབྱོར་པའི་གྲོགས་བྱ་བར་ཁས་བླངས་ཤིང་དམ་བཅས་པའི་དམ་ཚིག་ཅན་དང་། ཤོ་ན་མུ་ཀ་སྔོན་གདུག་པ་ཅན་འཇོམས་པའི་དུས་ན་ཟངས་ཀྱི་ཝ་མོ་ལ་ཟངས་ཀྱི་མི་མོ་ཞོན་ནས་ལྕགས་ཀྱི་སྤྱང་ཀི་བརྒྱད་ནི་གཡོན་ན་ཁྲིད་དཔལ་གྱི་ཁྱི་བརྒྱད་ནི་གཡས་ན་ཁྲིད་ནས་ཁྲག་འཐུང་གི་རྒྱལ་པོ་ཅི་བགྱི་བཀའ་སྩལ་དུ་གསོལ་ཞེས་ཞིང་འོང་བའི་དུས་སུ་དམ་ཚིག་ཕོ་གཅིག་དམ་ལ་བཏགས་པའི་དམ་ཚིག་ཅན་དང་། ས་བདག་ཆེན་མོའི་ཕུར་བུའི་སྲུང་མར་ཁས་བླངས་ཤིང་དམ་བཅས་ཏེ། དབང་བསྐུར་བས་མོས་པའི་ས་ལ་དབང་པས་བདག་སྟེ་དེའི་དུས་སུ་དམ་ཚིག་ཕོ་ཅིག་སུ་དམ་ལ་བཏགས་པའི་དམ་ཚིག་ཅན་དང་། དེ་རྣམས་ཀྱི་སྲོག་གི་སྙིང་པོའི་དམ་ལ་མ་འདའ་བར་ལས་ཀྱིས་ཤིག་པ་སྟེ། དགུག་པའི་ལས་བསྐུལ་ཞིང་བཏང་བའོ། །དེ་ཡང་ཇི་ལྟར་བཏང་ཞེ་ན། བདག་ཉིད་ཆེན་མོ་ནི་མཐུའི་བདག་ཉིད་དུ་གྱུར་པ་རེ་མ་ཏི་བསྐུལ་ཏེ། བསྒྲུབ་པའི་དུས་སུ་ཤ་ཆེན་དང་གསུར་ཆེན་གླ་བ་ཤིང་ཀུན་ཙན་དན་དཀར་དམར་རྣམས་ཀྱིས་མཆོད་པ་དབུལ་ཞིང་། གཞུང་གཞན་ནས་བྱུང་བའི་ཚིག་བཤད་ཀྱིས་བཅོལ་བ་བྱ་ཞིང་སྲོག་གི་སྙིང་པོ་ནས་དྲང་ཞིང་ལས་ལ་བཏང་ངོ་། །དེ་ནས་ཡང་ཤོ་ན་མུ་ཀའི་བསྐུལ་བ་ནི། ཉི་མའི་མཆོད་པ་ཕུལ་ལ་ལས་བཅོལ་བ་ནི། དེ་ཡང་ཅིའི་ཕྱིར་ཞེ་ན་བཤད་པའི་རྒྱུད་ཀྱི་རྗེས་འབྲངས་ནས། ཤོ་ན་མུ་ཀ་བསྐུལ་པ་ནི། ཉི་མའི་མཆོད་པ་ཕུལ་ཏེ་བསྐུལ་ཞེས་པ་སྟེ། དེ་ཡང་སྲོག་གི་སྙིང་པོ་ནས་དྲངས་ཤིང་ལས་བཅོལ་ལོ། །དེ་ནས་ཡང་ས་བདག་ཆེན་མོ་ལ་ལས་བཅོལ་ཏེ། སྣོད་ཀྱི་ཁྲག་སྣོད་ཀྱི་ཤ་ལས་གཞི་བླང་བའི་གཏོར་མ་བྱིན་ལ་སྔོན་གྱི་ལོ་རྒྱུས་དང་། དམ་ཇི་ལྟར་གསལ་བ་ཡང་བརྗོད་ལ་སྲོག་གི་སྙིང་པོ་ནས་དྲངས་ལ་ལས་བཅོལ་ལོ། །དེ་ནས་ཕྲ་མེན་ལ་ལས་བསྐུལ་ཏེ། སྙིང་སྣ་མང་པོ་དང་། ཁྲག་སྣ་མང་པོ་དང་། གཏོར་མ་བྱས་ཏེ། མིང་ནས་བོས་ལ་ཕྲ་མེན་མ་བཅུ་དྲུག་ལས་ལ་བཏང་ངོ་། །དེ་ནས་ཡང་སྲིན་མོའི་ཚོགས་ལ་ལས་བཅོལ་ཏེ། སྙིང་གི་རྩ་བ་ནི་སྲོག་པ་རྩ་སྟེ། དེ་ལས་གཞི་བླངས་ཏེ་གཏོར་མ་བྱས་ལ་མཚན་ཚིག་ནས་བོས་ལ་གཏོར་མ་བྱིན་ལ་ལས་བཅོལ་བ་སྟེ། གཏོར་མ་བྱིན་གྱིས་བརླབས་པ་སྟེ་བདུད་རྩིར་བྱིན་གྱིས་བརླབས་པ་སྟེ། གོང་ནས་གསུངས་པའི་རིམ་པའོ། །དེ་ནི་བསྒྲུབ་པའི་དུས་སུ་སྦྱོར་ཅིག །དྲག་པོའི་དུས་སུ་ནི་ལས་ཀྱི་སྔགས་བཟླས་ཤིང་ཁྲག་སྤུངས་ཀྱི་བརྡེག་པའོ། །བསྙེན་པའི་དུས་སུ་ན་གཏོར་མ་བྱིན་གྱི་ལས་བཅོལ་བ་ནི་མ་ཡིན་ནོ། །དེ་ལྟར་གཏོར་མ་བྱིན་ནས་ལས་བཅོལ་བ་ནི། ཅི་ལ་དགོས་ཞེ་ན། དེ་བསྟན་པའི་ཕྱིར། བྱང་ཆུབ་མཆོག་ཏུ་སེམས་བསྐྱེད་ཅིང་ཞེས་པ་ལ་སོགས་པ་བསྟན་ཏེ། དེ་ཡང་ཆོས་ཀྱི་དབྱིངས་སུ་བསྒོམ་པའི་དོན་དམ་པ་བྱང་ཆུབ་མཆོག་ཏུ་སེམས་བསྐྱེད་པ་དང་། སྐུ་གསུང་ཐུགས་ཀྱི་དཀྱིལ་འཁོར་དུ་སྐུ་ཕྱག་རྒྱ་ཆེན་པོར་བསྒོམ་ཀུན་རྫོབ་ཀྱང་བྱང་ཆུབ་མཆོག་ཏུ་སེམས་བསྐྱེད་ཅིང་། དུས་གསུམ་གྱི་རྒྱལ་བ་སངས་རྒྱས་ཐམས་ཅད་ཀྱི་གདུང་ཚོ བ་ཅིང་བདེ་བར་གཤེགས་པའི་སྐུའི་རིགས་དང་། གསུང་གི་རིགས་དང་། ཐུགས་ཀྱི་རིགས་དང་། རྣལ་འབྱོར་པའི་ལུས་ངག་ཡིད་གསུམ་གྱིས་འཛིན་ཅིང་བསྒོམ་པའི་རྣལ་འབྱོར་པ་བདག་ཅག་རྣམས་ལ་ནི། བདག་གི་སྒོམ་ལ་གནོད་ཅིང་ལུས་དང་ཚེ་ལ་གདུག་པའི་དགྲ་དང་བགེགས་སམ་གང་ཡིན་པ་དང་། འོན་ཏེ་བདུད་དང་སྟེ་སྲོག་གི་བར་དུ་གཅོད་པ་དང་། དགྲ་སྟེ་དགེ་བ་ལ་བར་དུ་གཅོད་པ་རྣམས་ནི། བསྒྲལ་བའི་གནས་དེའི་བདུད་ཀྱི་ས་ནི་དངོས་གྲུབ་འཕྲོག་པར་བྱེད་ལ། དགྲས་ནི་རྣམ་པར་འཚེ་བར་བྱེད་དེ། དེ་རྣམས་དབང་དུ་བསྡུ་བའི་ཕྱིར། ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་དེ་བཀུག་ནས། །མངོན་སྤྱོད་ཚུལ་བཞིན་བསྒྲལ་བ་དང་། །ལུས་ངག་རྡུལ་དུ་བཤིག་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། །ཅེས་གསུངས། ཁྲོ་མོ་ཆེན་མོ་བཅོམ་ལྡན་འདས་རྡོ་རྗེ་གཞོན་ནུའི་བྱིན་བརླབས་ཀྱིས་བདག་ཉིད་ཆེན་མོ་དང་། ཤོ་ན་མུ་ཀ་དང་། ས་བདག་ཆེན་མོ་དང་། ཕྲ་མེན་མ་དང་། ཟ་བྱེད་མ་དང་། མཆེ་བ་ཅན་དང་། གཤོག་པ་ཅན་ལ་སོགས་པའི་ཕོ་ཉའི་ཚོགས་ཀྱིས་སེ་གོལ་གཏོགས་པ་ཙམ་གྱིས་འདུལ་བར་བྱ་བའི་ཞིང་གང་ཡིན་པ་དེ་གནས་ནས་འདིར་བཀུག་ནས། དབང་པོའི་མངོན་སུམ་དུ་དྲག་པོའི་ལས་ཀྱི་མངོན་སྤྱོད་ཀྱི་ཚུལ་བཞིན་དུ་བསྒྲལ་ནས། ཀུན་གཞི་རྣམ་པར་ཤེས་པ་རྒྱལ་བའི་སྲས་སུ་བྱ་བ་དང་། ཉོན་མོངས་པའི་བག་ཆགས་ཉེ་བར་ལེན་པའི་ཕུང་པོ་བཤིག་པའི་ཕྱིར་འབྱུང་བ་བཞིའི་བསྐྱེད་པའི་ལུས་ངག་ཡིད་གསུམ་གྱིས་རྡུལ་དུ་བཤིག་ནས་ཀྱང་། ལས་དང་ཉོན་མོངས་པའི་སྒྲིབ་པ་སྦྱངས་པའི་ཕྱིར། མནན་ཅིང་གཟིར་བའི་སྡུག་བསྔལ་གཟས་པ་པོ་གང་ཡིན་པའི་ལུས་ངག་ཡིད་གསུམ་གྱིས་ཉམས་སུ་མྱོང་བར་མཛོད་ཅིག །ཅེས་པ་ལས་བཅོལ་ཏེ། འོན་ཏེ་ལས་བྱེད་དུ་མ་འདོད་ན་བདག་ཉིད་ཀྱིས་བསྙེན་ཕུར་དྲིལ་ཞིང་བདག་ཉིད་ཀྱི་ལྕེ་ལ་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་དེ་ལས་རྡོ་རྗེ་བུམ་པའི་ནང་ན་ཧཱུྃ་གནས་པ་དེའི་འོད་ཟེར་གདུག་པ་དེ་བདག་ཉིད་ཆེན་མོ་ལ་སོགས་པའི་སྟེང་གི་སྒོ་ནས་རྩའི་བུ་ག་ཀུན་ནས་ཕར་ཟུག་སྟེ། འོད་ཟེར་དེས་བདག་ཉིད་ཆེན་མོ་ལ་སོགས་པའི་སྙིང་ཁྲག་ཞལ་དུ་རྔུབས་པས་བདག་ཉིད་ཆེན་མོ་ལ་སོགས་པར་རབ་ཏུ་མྱོས་ནས་འགྱེལ་བར་བསམ་མོ། །དེའི་ཕུར་པ་དང་གཉི་ག་ལས་འོད་འཕྲོ་བའོ། །དེ་ནས་ཡང་ཕུར་པའི་རྩེ་མོ་དམ་ཅན་རྣམས་ལ་གཏད་དེ་དྲིལ་ཞིང་བདག་ཉིད་བདུད་རྩི་འབྱུང་བའི་ཏིང་ངེ་འཛིན་དུ་ཞུགས་ཏེ། དམ་ཅན་རྣམས་གན་རྐྱལ་དུ་འགྱེལ་བའི་སྙིང་ཀར་གཏད་པས་ཕུར་པ་ལས་བདུད་རྩི་དཀར་ལ་དག་པའི་ཆུ་རྒྱུན་འབྱུང་བས་མ་མོ་རྣམས་ཀྱི་ལུས་བསོས་ཏེ། གཟི་མདངས་ཅན་དུ་བྱས་ནས། བདག་གི་དམ་ཚིག་ནི་གང་ལགས་ལས་ནི་ཅི་བགྱིས་ཞེས་ཟེར་ཞིང་འདུག་པར་སྨྲ་བའོ། །དེ་ལས་བདག་ཉིད་ཀྱི་ལས་ནི་དམ་ཅན་རྣམས་ཀྱིས་ཁ་རུ་བདུད་རྩི་བླུད་དེ། ༀ་ཨ་མྲྀ་ཏ་ས་མ་ཡ་ཧ་ཧ་ན་ན་ར་ག་ན་ཞེས་བླུད་པས་སྔོན་ཇི་ལྟར་དམ་བཅས་ཤིང་ཁས་བླངས་པ་དེ་རྗེས་སུ་དྲན་ནས་རྣལ་འབྱོར་པ་ཇི་ལྟར་འདོད་པའི་ལས་བྱེད་པར་འགྱུར་རོ། །དེ་ནི་དམ་ཅན་རྣམས་ཐུགས་དམ་གནས་ལ་ཕབ་ལ་དྲག་པོའི་ལས་ལ་བསྐུལ་བའོ། །དེ་ནས་མནན་པར་བྱ་བའི་སྙིང་པོ་གསུང་སྟེ་དེའི་ཕྱིར། ༀ་ལཾ་ཞེས་བྱ་བ་ལ་སོགས་པ་གསུངས་ཏེ། དེའི་ༀ་ལཾ་ཞེས་གསུངས་པ་ནི། གཟས་པ་པོ་གང་ཡིན་པའི་སྤྱི་བོ་ཡི་སྟེང་དུ་ལཾ་བསམ་པར་བྱའོ། །ལཾ་དེ་ཡོངས་སུ་གྱུར་པ་ལས། གསེར་གྱི་རི་རབ་ཤིན་ཏུ་བརྗིད་ཆེ་ཞིང་ལྕི་བ་ཞིག་བསྐྱེད་པ་སྟེ། དེ་ནི་ༀ་ལཾ་སྟེ་དངོས་པོ་རི་རབ་བོ། །དངོས་པོ་དེ་ཡང་བཅོམ་ལྡན་འདས་ཀྱི་ཐུགས་རྣམ་པར་མི་རྟོག་པ་ལས་མ་གཡོས་པའི་ཕྱིར་ཧཱུྃ་ལཾ་མོ། །དེ་ལྟ་བུ་དང་ལྡན་པའི་རི་རབ་དེས་གཟིར་བའི་ཕྱིར་ན་བསྟན་པ་ནི་ཞེས་པས་གཟིར་ཅིག་པའོ། །དངོས་པོ་རི་རབ་དེས་དངོས་སྣང་ལྷང་ངེ་སྣང་བའི་སྐུའི་རང་བཞིན། དེ་ལས་འོད་ཟེར་འཕྲོས་པ་གསུང་གི་རང་བཞིན། དེ་ལས་དོན་དམ་པར་རང་བཞིན་མེད་པ་ཐུགས་ཀྱི་རང་བཞིན་དེའི་ཕྱིར་མོ་ཧ་བྷ་ག་བན་ད་ན་ཞེས་གསུངས་པ་ཡིན་ཏེ། མོ་ཧ་ན་སྐུ་དང་ལྡན་པའི་རི་རབ། གཡོན་གསུང་འོད་ཟེར་དང་ལྡན་པའི་རི་རབ། བྷ་ག་ན་བཱན་ད་ན་ཐུགས་སྤྲོས་པ་དང་བྲལ་བ་བཅོམ་ལྡན་འདས་དང་ལྡན་པའི་རི་རབ་བོ། །སྐུ་གསུང་ཐུགས་དང་ལྡན་པའི་རི་རབ་དེས་གཟས་པ་པོ་ལས་དང་ཉོན་མོངས་གཟིར་བའི་ཕྱིར། ཤྲི་ཀྲི་བྷི་ཀྲི་ཞེས་གསུངས་པ་ཡིན་ཏེ། ལས་གཟིར་བ་ནི་ཤྲི་ཀྲི། ལས་ཀྱིས་བསྐྱེད་པའི་ཉོན་མོངས་པ་གཟིར་བ་ནི་བི་ཀྲིའོ། །དེ་ཡང་གཟིར་བའི་ལས་ལ་བྱིན་ཅན་དུ་བྱ་བའི་ཕྱིར་བཛྲ་ཧཱུྃ་ཀ་ར་ཏེ། རི་རབ་དེའི་སྟེང་དུ་མ་བསམ་སྟེ་དེ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་དེའི་སྟེང་དུ་ཧཱུྃ་བསམ་སྟེ། ཡོངས་སུ་གྱུར་པ་ལས། རྡོ་རྗེ་རྒྱ་གྲམ་དུ་གྱུར། དེའི་སྟེང་དུ་ཉི་མའི་དཀྱིལ་འཁོར་དེའི་སྟེང་དུ་ཧཱུྃ་ཡོངས་སུ་གྱུར་པ་ལས། རྡོ་རྗེ་དེ་ལས་ནི། ཧཱུྃ་ཀ་རའི་སྐུ་ཡོངས་སུ་གྱུར་པར་བསྐྱེད་དེ། བསྐྱེད་པའི་སྔགས་བཛྲ་ཧཱུྃ་ཀ་ར་ཞེས་པས་སྐུ་གསལ་བར་བསྐྱེད་དེ། དེའི་ཞལ་ནས་གདུག་པའི་སྔགས་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཅེས་སྒྲོགས་ཤིང་། གཟས་པ་པོ་གང་ཡིན་པ་དེས། འབྲོས་སུ་མི་གནང་བར་ཟིལ་གྱིས་གནོན་པའོ། །དེ་ནས་ཡང་འདྲེན་པར་བྱེད་པའི་སྔགས་སྒྲས་བསྟན་ཏེ་དེའི་ཕྱིར། ༀ་བཛྲ་ཀཱི་ལི་ཀཱི་ལ་ཡ་ཛཿ ཧཱུྃ་བཾ་ཧོཿཞེས་གསུངས་ཏེ། འཁོར་བའི་གནས་ནས་དྲང་བའི་ཕྱིར་སྔགས་འདི་བརྗོད་པས། བདག་གི་ཐུགས་ཀ་ནས་ཡེ་ཤེས་སེམས་དཔའི་ཧཱུྃ་ལས་རྡོ་རྗེ། རྩེག་མར་བྱུང་སྟེ་དེ་ལས་ཕྲ་མེན་མ་ལྕགས་ཀྱུ་ཐོགས་པ་དང་། རྒྱུད་མར་བྱུང་ནས་དགུག་པ་སྟེ། ལེའུ་བརྒྱད་པ་ནས་འབྱུང་བ་དང་སྦྱར་རོ། །དེ་ནས་ཡང་ཚེ་ལུང་དང་ཁྲུས་ལུང་བསྟན་ཏེ། དེའི་ཕྱིར་རྡོ་རྗེའི་ཚིག་ཏུ་བརྗོད་ནས་ནི། བཀྲག་དང་གཟི་མདངས་བདག་ལ་བསྟིམ་ཞེས་པ་ལ་སོགས་པ་གསུངས་ཏེ། རྡོ་རྗེའི་ཚིག་ཏུ་འོག་ནས་འབྱུང་བའི་སྔགས་འདི་བརྗོད་ནས་ཁོའི་བཀྲག་དང་གཟི་མདངས་ཕྲོགས་ནས་བདག་ལ་ཐིམ་པར་བྱ་སྟེ། དེ་ཡང་བསྙེན་ཕུར་གདབ་པས་ཕུར་པའི་འོད་ཟེར་གྱིས་གཟས་པ་པོའི་སྙིང་དཀར་ནག་གི་མཚམས་སུ་བཏབ་པས་ཚེ་རབས་ཐོགས་མ་མེད་པའི་དུས་ནས་ཀུན་གཞི་ལ་བག་ཆགས་ངན་པ་བསགས་པ་སྟེ་ཕུར་པའི་འོད་ཟེར་གྱིས་བསྲེགས་པར་བསམ་མོ། །དེའི་སྐབས་ལས་ནི་རྣམ་པར་བྱང་བའི་བྱང་ཆུབ་སེམས་ཞེས་བྱ་སྟེ་ཁྲུས་ལུང་ངོ་། །དེ་ནས་ཀུན་གཞིའི་རྣམ་པར་ཤེས་པ་ཤེལ་དག་པའི་རང་བཞིན་དུ་གནས་པ་སྟེ། ཕུར་པའི་འོད་ཟེར་གྱིས་བཞུ་ནས་དངུལ་ཆུ་ཞུན་མ་བཞིན་དུ་གནས་པ་སྟེ། ཕུར་པའི་རྩེ་མོ་ལ་འུབས་ཀྱིས་འདུས་ནས་ཨའི་རང་བཞིན་གནས་ཏེ། དེའི་དུས་སུ་རི་རབ་ཀྱི་སྟེང་ན་བཞུགས་པའི་ཁྲོ་བོ་ཧཱུྃ་ཀ་ར་བཞེངས་ནས་གནས་པ་དེ་ལ་བདག་ཉིད་ཀྱི་ཕུར་པ་དམ་ཚིག་གི་ཕྱག་རྒྱས་བསྟན་ནས། ༀ་སརྦ་བིགྷ་ནན་ཀི་ལ་ཡ་ཧཱུྃ་ཧཱུྃ་ཕཊ་ཕཊ་ཅེས་པ་ནི་གཞན་དུ་མན་ངག་གིས་སྦྱར་བར་བྱའོ། །ༀ་བཛྲ་ཧཱུྃ་ཀ་ར་ཧཱུྃ་ཨ་ཞེས་བརྗོད་ནས། ཧཱུྃ་ཀ་ར་ལ་གཏད་པས་ཧཱུྃ་ཀ་ར་བཞེངས་པ་དེས། བླངས་ནས་བདག་ཉིད་ཀྱི་སྟེང་གི་སྒོ་ནས་མར་ཐིམ་པར་བྱ་སྟེ། གཟས་པ་ཕོའི་ཚེ་ཕྲོགས་ནས། བདག་གི་ཚེར་གྱུར་པར་བསམ་མོ། །དེ་ནི་ཡང་དག་པའི་ཡེ་ཤེས་ཞེས་བྱ་བ་སྟེ། དོན་དམ་པ་བྱང་ཆུབ་ཀྱི་སེམས་སོ། །ལུང་ལས་ནི་ཚེ་ལུང་ཞེས་བྱའོ། །དེ་ཡང་དཀྱུས་ཉིད་ལས། ཨ་ཉིད་བྱང་ཆུབ་སེམས་ཀྱི་ཁྲུས། །ཕུར་པ་ཉིད་ཀྱང་གཟི་བྱིན་བསྐྱེད། །འོད་དང་མཐུ་དཔུང་ལྷག་པར་བསྐྱེད། །ཅེས་གསུངས་ཏེ། བདག་ཉིད་ཀྱི་སྙིང་གི་དཀྱིལ་ནས་ཡེ་ཕྱི་མོ་ནས་གྲུབ་པའི་ཡེ་ཤེས་ཨ་ནི་ཀུན་གཞིའི་རང་བཞིན་ཏེ་ཡེ་ནས་རྣམ་པར་དག་པར་གནས་པ་ཉིད་བྱང་ཆུབ་ཀྱི་སེམས་ཀྱི་ཁྲུས་ཡིན་པར་བསྟན་ཏེ། དེར་ཕུར་པ་ལ་འདུས་པ་ནི་བྱང་ཆུབ་སེམས་དབང་དུ་བསྡུ་སྟེ། ཕུར་པ་ཉིད་ཀྱང་གཟི་བྱིན་ཅན་དུ་གྱུར་པའོ། །དེ་ནས་ཡང་དབུ་ཞབས་ཀྱི་ཚིག་གསལ་བར་བསྟན་པའི་ཕྱིར། དེ་ནས་ཕྱོགས་བཅུའི་ཁྲོ་བོ་ལ་ཞེས་པ་ལ་སོགས་པས་བསྟན་ཏེ། རྡོ་རྗེའི་ཚིག་གིས་འོག་ནས་འབྱུང་བ་འདི་སྐད་བསྐུལ་ལོ། །དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཞེས་བྱ་བ་ནི། སྐུ་གསུང་ཐུགས་ཀྱི་དཀྱིལ་འཁོར་ལ། གནས་ཤིང་མི་གནས་པའི་ཡེ་ཤེས་ཆེན་པོའི་དངོས་གྲུབ་བསྒྲུབ་པའི་བར་དུ་གཅོད་པའི་བགེགས་དང་ཡང་དག་པའི་ཏིང་ངེ་འཛིན་ལ་གནས་པའི་ཞེ་སྡང་གི་སེམས་ཀྱིས་གདུག་ཅིང་ཕྲག་དོག་གི་སེམས་ཀྱི་སྡང་བའི་སེམས་དང་ལྡན་པའི་གཟས་པ་པོ་དེ་འཁོར་བའི་གནས་ནས་དྲངས་པའི་ཕྱིར་ཟུང་ཞིག་པ་དེ། ཁྲོ་བོ་རྣམ་པར་རྒྱལ་བའི་བྱིན་རླབས་ལས་བསྐུལ་བ་སྟེ། ཛ་དང་སྦྱར་རོ། །གཟས་པ་པོ་དེ་རང་གི་བདེ་བའི་གནས་ནས་བསྐུལ་བའི་ཕྱིར། རྒྱོབ་ཅིག་པ་དེ་རྣམ་པར་རྒྱལ་བའི་རིགས་དབྱུག་པ་སྔོན་པོ་ཅན་གྱིས་རྒྱབ་ནས་རྒྱོབ་ཅིག །དབང་པོའི་ཡུལ་ལ་མི་གཏང་བ་དང་། ཡན་ལག་འཁུམ་མི་ནུས་པར་བྱ་བའི་ཕྱིར། རྣམ་པར་ཆིངས་ཤིག་ཅེས་པ་སྟེ། ཁྲོ་བོ་གཤིན་རྗེ་གཤེད་པོའི་བྱིན་གྱིས་བརླབས་ལས་བསྐུལ་བ་སྟེ། ཧཱུཾ་དང་སྦྱར་དེ་ནས་ཡང་བག་ཆགས་ཀྱི་ཕུང་པོ་ཕུར་པ་བཏབ་ནས་ཡང་དག་གི་ཤེས་པ་དང་ནི་ཕྲལ་ལོག་པའི་ཤེས་པ་བསྒྲལ་བ་དེ་མཚོན་གྱིས་བཏུབ་པའི་ལས་བྱས་ནས་གནས་པ་དེ་བརླག་པར་བྱ་བའི་ཕྱིར། གཏོགས་ཤིག་པ་སྟེ། གཤིན་རྗེ་གཤེད་པོའི་རིགས་ཅན། ཁྲོ་བོ་མི་གཡོ་མགོན་པོ་ཡིས། ཕུང་པོ་གཏུམ་ཞིང་འཕྲག་གིས་བརྡུངས་པ་སྟེ། ཁ་ཐམ་དང་སྦྱར་བའོ། །གཟས་པོ་དེ་ལ་སྟེང་པ་དང་། གྲོགས་བྱེད་སྲོག་ལ་སྐྱོབ་པའི་ལྷ་འདྲེ་གང་ཡིན་པ་དེ་དང་འདྲ་བའི་ཕྱིར། གྲོགས་དང་འབྲལ་བར་གྱི་ཞེས་གསུངས་པ་སྟེ། རྟ་མགྲིན་གྱི་རིགས་གཞན་གྱི་མི་ཐུབ་པའི་བྱིན་གྱིས་བརླབས་པའི་གྲོགས་དང་བྲལ་བ་སྟེ། ཧ་ས་ཡ་ར་ན་དང་སྦྱར་རོ། །མྱུར་དུ་བསྒྲལ་ཞིང་དབང་དུ་འདུས་འདུས་ནས་རིགས་གང་ཡིན་མིན་སྨྲ་ཏུ་གཞུགས་པའི་ཕྱིར་རེངས་པར་ཁུགས་ལ་སྨྲ་ཆུག་ཅིག །ཅེས་པ་སྟེ། ཁྲོ་བོ་བདུད་རྩི་འཁྱིལ་པའི་བྱིན་གྱིས་བརླབས་ལས་སྨྲ་གཞུག་པ་སྟེ། ཛ་ལ་པ་ཡ་དང་སྦྱར། གཟས་པ་པོའི་ཤེས་པ་སྲིན་བུ་མེ་ཁྱེར་བཞིན་དུ་བཀུག་པ་སྟེ། གཟུགས་དང་རི་མོ་ལ་དབབ་པའི་ཕྱིར། ཕོབ་ཅིག་ཅེས་པ་སྟེ། ཁྲོ་བོ་རྟ་མགྲིན་གྱིས་བྱིན་གྱིས་བརླབས་ལས་ཕྱུང་བའི་བཾ་སྟེ། ཨ་བེ་ཤ་དང་སྦྱར། གཟས་པ་པོའི་ལས་དང་ཉོན་མོངས་པ་གཟིར་བའི་ཕྱིར། རྣམ་པར་གཟིར་བར་བྱོས་གསུངས་ཏེ། ཧཱུྃ་ཀ་རའི་བྱིན་བརླབས་ལས་བྱུང་བ་སྟེ། ༀ་ལཾ་དང་སྦྱར་རོ། །གཟས་པ་པོ་དེའི་དཀྱིལ་འཁོར་དུ་ཆུད་ངེས་པར་བྱ་བའི་ཕྱིར། དེའི་དབང་དུ་གྱུར་ནས་ཞེས་གསུངས་ཏེ་རྡོ་རྗེ་རིགས་ཁྲོ་བོ་སྟོབས་པོ་ཆེའི་དབང་དུ་བྱས་ནས། དེའི་རིགས་ཁམས་གསུམ་རྣམ་པར་རྒྱལ་བ་ཡི། བསྒོ་བའི་བཀའ་རྣམས་ཉན་པར་གྱིས། ཞེས་པ་ལ་སོགས་བསྟན་ཏེ། དྲག་པོའི་སྤྱིའི་ཚིག་གོ། །དེ་ནས་བསོད་པའི་ལས་ཀྱི་སྔགས་བསྟན་པའི་ཕྱིར། ཧཱུྃ་བར་བིད་དན་ཞེས་པ་ལ་སོགས་པ་གསུངས་ཏེ། ཧཱུྃ་པར་བིད་ཏན་ཞེས་བྱ་བ་ནི། རྡོ་རྗེ་གཞོན་ནུས་བསོད་པའི་ལས་ཀྱི་སྔགས་ཏེ། ཀཱི་ལ་ཡ་བཅོ་བརྒྱད་དང་སྦྱར་ཏེ། ཀུན་གཞི་རྩད་ནས་ཕྱུང་བའི་དུས་སུ་སྦྱར་བར་བྱའོ། །ཚིན་དྷ་ཚིན་དྷ་བཛྲ་ཧཱུྃ་ཕཊ་ཅེས་བདུད་རྩི་འཁྱིལ་པའི་བསོད་པའི་ལས་ཀྱི་སྔགས་ཏེ་སྔགས་འདི་བརྗོད་ཅིང་ལྟེ་བའི་དཀྱིལ་འཁོར་དུ་བརྒྱབ་པས་བདུད་རྩི་འཛག་པའི་སྒོ་གཅད་དེ། དེ་ཡང་ཡེ་ཤེས་སུ་བྱས་པའོ། །བིནྡ་བིནྡ་བཛྲ་ཕཊ་ཅེས་པ་ནི། ཁམས་གསུམ་རྣམ་རྒྱལ་གྱི་བསད་པའི་ལས་ཀྱི་སྔགས་ཏེ། སྔགས་འདི་བཟློས་ཤིང་ཁམས་གསུམ་རྣམ་པར་རྒྱལ་བའི་ཆ་ལས་བྱུང་བའི་ཕུར་པས་པུས་མོའི་ལྷ་ངའི་ལྟག་ན་སྟོབས་བསྐྱེད་པའི་རྩ་ཡོངས་ལ་བཏབ་སྟེ། རྩའི་སྦུབས་ནས་སྟོབས་འཕྲོག་སྟེ། ཡེ་ཤེས་སུ་བྱའོ། །དེ་ནས་ཡང་གྲི་ན་གྷྲི་ན་བཛྲ་ཧཱུྃ་ཕཊ་ཅེས་བྱ་བ་རྡོ་རྗེ་ཏའི་གསོད་པ་ལས་ཀྱི་སྔགས་ཏེ། སྔགས་འདི་བརྗོད་ཅིང་རྡོ་རྗེ་རྟའི་ཆ་ལས་བྱུང་བའི་ཕུར་པ་དེས། མགྲིན་པ་ངག་གི་གནས་སུ་བཏབ་པས། རོའི་ལོངས་སྤྱོད་ཐམས་ཅད་ཕྲོག་ནས་ཡེ་ཤེས་སུ་བྱས་པའོ། །དེ་ནས་ཡང་ཧ་ན་ཧ་ན་བཛྲ་ཧཱུྃ་ཕཊ་རྣམ་པར་རྒྱལ་བའི་ཆ་ལས་བྱུང་བའི་ཕུར་པ་དེས་སྔགས་འདི་བརྗོད་ཅིང་མིག་ལ་བཏབ་པས་མིག་གི་རྣམ་པར་ཤེས་པ་དབང་དུ་བསྡུས་ཡེ་ཤེས་སུ་བྱའོ། །དེའི་རྣམ་པར་རྒྱལ་བའི་སྲིད་པའི་ལས་ཀྱི་ཕྱག་རྒྱའོ། །དེ་ནས་ཡང་མི་གཡོ་མགོན་པོའི་གསོད་པའི་ལས་ཀྱི་སྔགས་བསྟན་པའི་ཕྱིར། བནྡ་བནྡ་བཛྲ་ཧཱུྃ་ཕཊ་ཅེས་གསུངས་པ་སྟེ། སྔགས་འདི་བཟླས་ཤིང་མི་གཡོ་མགོན་པའི་ཆ་ལས་བྱུང་བའི་ཕུར་པ་བླངས་ནས་ལྕེའི་དབུས་ཟླ་བ་ཁམ་པ་འདྲ་བའི་དབུས་སུ་བཏབ་པས་ལྕེའི་རྣམ་པར་ཤེས་པ་ཕྲོགས་ཏེ་ཡེ་ཤེས་སུ་བསྐྱེད་པའོ། །དེ་ནས་ཡང་སྟོབས་པོ་ཆེའི་བསོད་པའི་ལས་ཀྱིས་བསྔགས་བསྟན་པའི་ཕྱིར། ཏདྱ་ཐཱ་བཛྲ་ཧཱུྃ་ཕཊ་ཅེས་པ་ཡིན་ཏེ་སྔགས་འདི་ཟོས་ཤིང་སྟོབས་པོ་ཆེའི་ཆ་ལས་བྱུང་བའི་ཕུར་པ་རྐང་མཐིལ་ནས་བསྐྱེད་པར་བྱེད་པའི་རྩ་ལ་སྟོབས་བསྐྱེད་པའི་སྟོབས་ཕྲོགས་ནས་ཡེ་ཤེས་སུ་བསྐྱེད་པའོ། །དེ་ནས་དབྱེ་བ་བྱེད་པའི་ལས་ཀྱིས་སྔགས་བསྟན་པའི་ཕྱིར་ཧ་ས་ཡ་ར་ནི་ཧྲི་ད་ན་ཧཱུྃ་ཕཊ་ཅེས་བྱ་བ་ཡིན་ཏེ། སྟོངས་གྲོགས་དང་བྲལ་བར་བྱ་བའི་དུས་སུ་སྦྱོར་ཅིག །དེ་ནས་བཅིང་བར་བྱེད་པ་ལས་ཀྱི་སྔགས་བསྟན་པའི་ཕྱིར། ཤྲི་ཀྲི་ན་ཨ་ན་ཡ་ཧཱུྃ་ཕཊ་ཅེས་པ་ཡིན་ཏེ། འཆིང་བར་བྱེད་པའི་སྐབས་གང་ཡིན་པའི་དུས་སུ་སྦྱོར་ཅིག །དེ་ནས་སྨྲ་བར་བྱེད་པའི་སྙིང་པོ་བསྟན་པའི་ཕྱིར། ཛྭ་ལ་པ་ཡ་ཛྭ་ལ་པ་ཡ་ཧཱུྃ་ཕཊ། ཅེས་པ་ཡིན་ཏེ། ཡུངས་ཀར་ལ་སྔགས་ལ་རྡོ་རྗེ་སྤྱན་དམིགས་རྣོ་ལ་གཏོང་ལ་གོང་དུ་གསུངས་པའི་རིགས་ལ་སོགས་པའི་གང་ཡིན་པའི་འདྲི་བའོ། །དེ་ནས་འབེབས་པར་བྱེད་པའི་སྙིང་པོ་བསྟན་པའི་ཕྱིར། ཨ་བེ་ཤ་ཡ་ཨ་བེ་ཤ་ཡ་ཧཱུྃ་ཕཊ། ཅེས་བྱ་བ་ནི་འབེབ་པའི་སྐབས་གང་ཡིན་པར་སྦྱར་རོ། །གཟུགས་དང་གཉིས་སུ་མེད་པར་བྱའོ། །དེ་ནས་དབྱེ་བའི་སྔགས་བསྟན་པའི་ཕྱིར། བི་ད་ཡ་བི་ད་ཡ་ཧཱུྃ་ཕཊ་ཅེས་པ་ཡིན་ཏེ། གཏུང་བའི་ཕུང་པོ་དེ་ཞལ་དུ་བཏབས་པའི་ཕྱིར་ཞལ་ཕྱེ་ཞིག་པ་སྟེ། བསྟན་པའི་དུས་སུའོ། །དེ་ནས་ཡང་རྡོ་རྗེ་ཕྲ་མེན་ཚོགས་རྣམས་ལ་བསྐུལ་བར་བསྟན་པའི་ཕྱིར། རྡོ་རྗེ་ཕྲ་མེན་ཚོགས་རྣམས་ལ། ཞེས་པ་ལ་སོགས་པ་བསྟན་ཏེ། རྡོ་རྗེ་ལས་བྱུང་བ་རྡོ་རྗེ་ཕྲ་མེན་མའོ། །མངག་པའི་ཕྱིར་ཚོགས་རྣམས་ལ་རྡོ་རྗེའི་ཚིག་གིས་བསྐུལ་བར་བྱ་སྟེ། ཐབས་དང་ཤེས་རབ་ལས་བྱུང་ཞིང་། ཐབས་ཀྱི་བཅོལ་ཞིང་སེམས་ཅན་གྱི་དོན་ལ་བརྩོན་པར་འབད་པའི་ཕྱིར་ན་བྲན་ཞེས་བྱ་བ། ཐེག་ཆེན་ཆོས་ཀྱི་དབྱིངས་ལས་འབྱུང་ཞིང་རིམ་པ་ནས་སྤྲུལ་ཞིང་མངག་པར་བྱ་བའི་ཕྱིར་གནས་སུ་ཕྱིན་པར་འགྲོ་བའི་ཕྱིར་ན། ཕོ་ཉ་གཙོ་བོ་རྣམས་ཀྱིས་ཇི་ལྟར་བཅོལ་ཞིང་བཀའ་སྩལ་ནས་ཞི་བ་དང་རྒྱས་པ་དང་། དབང་དུ་བྱ་བ་དང་། སྐྲད་པར་བྱ་བ་དང་། བསད་པར་བྱ་བ་དང་བསྒོ་བ་ཉན་པས་བཀའ་ཉན་ཏེ། ལས་ཀྱི་ལྷ་རྣམས་ཀྱིས་མངོན་སྤྱོད་ཀྱི་འཕྲིན་ལས་བྱ་བའི་དུས་ལ་བབ་ཅེས་བྱའོ། །ཁྱེད་ཀྱི་དམ་ཚིག་དུས་ལ་བབ་ཅེས་པ་ནི། ལས་ཀྱི་ལྷ་ཁྱེད་ཀྱི་དམ་ཚིག་དུས་ལ་བབ་ཅེས་པའོ། །ཐ་ཚིག་ཇི་ལྟར་བཅས་པ་བཞིན་ཞེས་བྱ་བ་ནི། སྔོན་བཅོམ་ལྡན་འདས་ཀྱི་སྤྱན་སྔ་རུ་ཇི་ལྟར་དམ་བཅས་ཤིང་ཁས་བླང་བཞིན་དུ་དྲག་པོའི་འཕྲིན་ལས་མྱུར་དུ་བྱོས་ཞེས་བཅོལ་བའོ། །གལ་ཏེའམ་འོན་ཏེ་ལས་བྱེད་དུ་མི་འདོད་ཅིང་ཐ་ཚིག་ལས་འདས་པར་གྱུར་ན། རྡོ་རྗེ་ཆུ་ཡིས་བརྡེག་པར་ངེས་ཞེས་བྱ་སྟེ། ལས་ཀྱི་ལྷ་ལ་ཕུར་པ་གཏད་ཅིང་དྲིལ་ལ་གནད་ལ་དབབ་པ་སྟེ། གོང་དུ་གསུངས་པའོ། །དེ་ནས་ཡང་གཞན་གྱིས་མི་ཐུབ་པའི་སྔགས་བསྟན་པའི་ཕྱིར། ཧ་ན་ཧ་ན་བཛྲ་ཧཱུྃ་ཕཊ་ཅེས་པ་ཡིན་ཏེ། སྔགས་འདི་བཟླས་ཤིང་གཞན་གྱིས་མི་ཐུབ་པའི་ཆ་ལས་བྱུང་བའི་ཕུར་པ་སྟེ་དེ་བླང་སྟེ་དྲིལ་ནས་བུད་པའི་རྩལ་གྱེན་དུ་འགྲེང་བ་སྟེ། གཡས་ཀྱི་རྩ་དང་གཡོན་གྱི་རྩ་གཉིས་ལ་བཏབ་པས་ཐབས་ཤེས་རབ་རྒྱུ་བ་རྒྱུན་གཅད་དེ། ཡེ་ཤེས་སུ་བྱ་བའོ། །དེ་ནས་ཡང་དབྱུག་པ་སྔོན་པོའི་ལས་ཀྱི་སྔགས་བསྟན་པའི་ཕྱིར། ད་ཧ་ད་ཧ་བཛྲ་ཧཱུྃ་ཕཊ་ཅེས་པ་ཡིན་ཏེ། འདི་བཟློས་ཤིང་དབྱུག་པ་སྔོན་པོའི་ཆ་ལས་བྱུང་བའི་ཕུར་པ་བླངས་ཏེ། དྲིལ་ནས་རྣ་བའི་རྣམ་པར་ཤེས་པ་ལས་བཏབ་པས་རྣ་བའི་རྣམ་པར་ཤེས་པ་དབང་དུ་བསྡུས་ནས། ཡེ་ཤེས་སུ་བྱའོ། །དེ་ནས་ཡང་གཤིན་རྗེ་གཤེད་ཀྱི་གསོད་པ་ལས་ཀྱི་སྔགས་བསྟན་པའི་ཕྱིར། པ་ཙ་པ་ཙ་ཧཱུྃ་ཕཊ་ཅེས་པ་ཡིན་ཏེ། སྔགས་འདི་བཟློས་ཤིང་གཤིན་རྗེ་གཤེད་ཀྱི་ཆ་ལས་བྱུང་བའི་ཕུར་པ་བླངས་ཏེ་དྲིལ་བས་རྣ་བའི་རྣམ་པར་ཤེས་པ་དབང་དུ་བསྡུས་ནས་བཏབ་པས་སྣའི་རྣམ་པར་ཤེས་པ་དབང་དུ་འདུས་ནས་ཡེ་ཤེས་སུ་བྱ་བའོ། །དེ་ནས་ཡང་བདག་ཉིད་ཆེན་མོ་གསོད་པའི་ལས་ཀྱི་སྔགས་བསྟན་པའི་ཕྱིར། མ་ཏ་མ་ཏ་བཛྲ་ཧཱུྃ་ཕཊ་ཅེས་པ་ཡིན་ཏེ། བདག་ཉིད་སྐུ་ལ་སྔགས་འདི་བཟླས་ཤིང་ཁྲག་དང་ཉུང་ནག་གིས་བརྒྱབ་ནས་གཟུགས་དང་དཔུང་ཐལ་བར་བརླག་པར་བསམ་སྟེ། མ་མོའི་ཐུན་ནོ། །དེ་ནས་ཡང་ཤོ་ན་མུ་ཀའི་གསོད་པའི་ལས་ཀྱི་སྔགས་བསྟན་པའི་ཕྱིར། ཛྭ་ལ་ཛྭ་ལ་བཛྲ་ཧཱུྃ་ཕཊ། ཅེས་པ་ཡིན་ཏེ། ཤོ་ན་མུ་ཀ་བསྐུལ་ལ་སྔགས་འདི་བཟློས་ཤིང་ཡུངས་ནག་གི་བརྒྱབ་པས། གཟུགས་ཀྱི་ཕུང་པོ་དེ་ལ་འཕར་སྤྱང་ལ་སོགས་པ་མང་པོ་སྟོད་ཅིང་ཟ་བར་བསམ་མོ། །དེ་ནས་མཆེ་བ་ཅན་གྱི་གསོད་པའི་ལས་ཀྱི་སྔགས་བསྟན་པའི་ཕྱིར། སུ་རུ་སུ་རུ་བཛྲ་ཧཱུྃ་ཕཊ་ཅེས་པ་ཡིན་ཏེ། སྔགས་འདི་བཟློས་ཤིང་མཆེ་བ་ཅན་བསྐུལ་ནས། ཡུངས་ནག་གཟུགས་ལ་བརྒྱབ་པས་མཆེ་བ་ཅན་གྱི་ཚོགས་གྲངས་མེད་པས་གཟུགས་ལ་སྟོད་ཅིང་ཟ་བའོ། །དེ་ནས་ཡང་གཤོག་པ་ཅན་གྱི་གསོད་པའི་ལས་ཀྱི་སྔགས་བསྟན་པའི་ཕྱིར། མུ་རུ་མུ་རུ་བཛྲ་ཧཱུྃ་ཕཊ་ཅེས་པ་ཡིན་ཏེ། བསྐུལ་ལ་སྔགས་འདི་བཟློས་ཤིང་ཡུངས་ནག་བརྒྱབ་པས་གཟུགས་ཀྱི་ཕུང་པོ་དེ་ལ་གཤོག་པ་ཅན་གྱི་ཚོགས་སྟོད་ཅིང་ཟ་བར་བསམ་མོ། །དེ་ནས་ཡང་དཔལ་ལྷ་མོ་དབང་གི་གསོད་པ་ལས་ཀྱི་སྔགས་བསྟན་པའི་ཕྱིར། ཀ་ཏ་ཀ་ཏེ་ཞེས་པ་ཡིན་ཏེ། དཔལ་ལྷ་མོ་དབང་བསྐུར་ལ་སྔགས་བཟློས་ཤིང་ཡུངས་ནག་གི་བརྒྱབ་པས་གཟུགས་ཀྱི་ཕུང་པོ་དེ་ལ་ཐོ་བའི་ཆར་ཕབ་པར་བསམ་མོ། །དེ་ནས་ཡང་ལྷ་མོ་དབང་གི་གསོད་པ་ལས་ཀྱི་སྔགས་བསྟན་པའི་ཕྱིར། ཛ་ཡ་བི་ཛ་ཡ་ཞེས་གསུངས་པ་ཡིན་ཏེ། ལྷ་མོ་དབང་བསྐུར་ལ་སྔགས་འདི་བཟླས་ཤིང་ཡུངས་ནག་གི་བརྒྱབ་པས་གཟུགས་ཀྱི་ཕུང་པོ་དེ་ཡང་ལྷག་པར་ཡང་དུམ་བུ་དུམ་བུར་གྱུར་པར་བསམ་མོ། །དེ་ནས་ཡང་ཀླུ་མོ་དབང་གི་གསོད་པ་ལས་ཀྱི་སྔགས་བསྟན་པའི་ཕྱིར། ཨ་ཙི་ན་ཏེ། ཨ་པ་ར་ཙི་ཏ་མ་ར་ས་ན་ཞེས་པ་ཡིན་ཏེ། ཀླུ་མོ་དབང་བསྐུར་ལ་སྔགས་འདི་བཟློས་ཤིང་ཡུངས་ནག་གིས་འཕངས་པས་གཟུགས་ཀྱི་ཕུང་པོ་དེ་ལྷག་པར་ཡང་ཐལ་བར་འགྱུར་བར་བསམ་མོ། །དེ་ནས་ཡང་ལེགས་མོ་དབང་གིས་གསོད་པ་ལས་ཀྱི་སྔགས་བསྟན་པའི་ཕྱིར། བྲ་མ་ར་ཏ་ན་ཡ་ཧཱུྃ་ཕཊ་ཅེས་པ་ཡིན་ཏེ། ལེགས་མོ་དབང་བསྐུར་ལ་སྔགས་འདི་བཟླས་ཤིང་ཡུངས་ནག་གིས་བརྒྱབ་པས་གཟུགས་ཀྱི་ཕུང་པོ་དེ་ལྷག་པར་ཆུ་སྲིན་བྱེད་པས་གཉིས་པར་བསམ་མོ། །དེས་ཀྱང་བསྟན་པའི་ལས་སུ་འགྱུར་ཞེས་བྱ་བ་ནི་ཕུར་པ་བཏབ་པའི་ལས་ཀྱི་བསྒྲལ་ནས། དེའི་སྟེང་ལ་ཁྲག་དང་ཡུངས་ནག་དང་། ལས་ཀྱི་ལྷའི་སྒྲོལ་སྔགས་ཀྱིས་བརྒྱབ་པས་ལྷག་པར་ཡང་གསོད་པའི་ལས་ཏེ་བརྟན་པ་འགྱུར་རོ། །དེ་ནས་ཡང་གཟུགས་དེ་གདབ་པར་བྱ་བའི་ཕྱིར་དེ་ནས་སྲས་མཆོག་བསྐུལ་བར་བྱ་ཞེས་པ་སོགས་ལ་པ་གསུངས་ཏེ། དེ་ནས་སྲས་མཆོག་བསྐུལ་བར་བྱ་ཞེས་བྱ་བ་ནི། སྲས་མཆོག་སྤྲུལ་པ་བསྐུལ་བར་བྱ་བ་ཡིན་ཏེ། བདག་ཉིད་དཀྱིལ་འཁོར་གྱི་ལྷ་འཁོར་དང་བཅས་པའི་ཐུགས་ཀ་ནས། ཁྲོ་བོ་མང་པོ་འཕྲོས་ཏེ། དེ་རྣམས་ཀྱི་ལག་ན་རལ་གྲི་དང་། དགྲ་སྟ་དང་། འཁོར་ལོ་དང་། བེ་ཅོན་ལ་སོགས་པའི་མཚོན་ཆ་གདུག་པ་མང་པོ་ཐོགས་ཏེ་ལུས་དུམ་བུར་དུམ་བུར་བཏུབ་པར་བྱ་བའི་ཕྱིར། རྡོ་རྗེ་གསང་བའི་བཀའ་ལས་ནི། སྡིག་ཅན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་པ་ཚར་བ་བརྒྱ་རུ་ཁོས། །ཞེས་པ་གསུངས་ཏེ། རྡོ་རྗེ་གཞོན་ནུའི་གསང་བའི་བཀའ་ལས་ནི་མི་དགེ་བཅུ་བྱེད་པའི་སྡིག་ཅན་དང་། མཚམས་མེད་ལྔ་བྱེད་པའི་ཕ་གསོད་པ་དང་། མ་གསོད་པ་དང་། རྣལ་འབྱོར་གྱི་སྐུ་ལ་ཚར་འདོད་པ་དང་། ལག་ཁང་གི་སྐུ་འཁོར་ལ་རྐུ་བ་དང་། མཐུན་པའི་བར་དུ་དབྱེན་འཇུག་པ་ལ་སོགས་པའི་ལས་བྱེད་ཅིང་ཐུགས་རྗེ་སྤྱང་ཐག་ཆད་ཅིང་ངན་སོང་གསུམ་དུ་སྐྱེ་ངེས་པའི་སྡིག་ཅན་གང་ཞིག་འདའ་བར་བྱེད་པ་དང་། བཅོམ་ལྡན་འདས་དཔལ་རྡོ་རྗེ་གཞོན་ནུ་འཁོར་དང་བཅས་པ་རྣམས་ཀྱི་ཡེ་ཤེས་ཀྱི་སྟོབས་དང་། དབྱིངས་ཀྱི་དོན་ཆེན་པོ་དང་ལྡན་པའི་ཁྲོ་བོ་ཆེན་པོ་ལས་ཉོན་མོངས་པའི་བག་ཆགས་སྦྱངས་ཤིང་མ་རིག་པའི་རྒྱ་མོ་བྲལ་བའི་ཕྱིར་ཡེ་ཤེས་ལྔའི་མཚོན་ཆའི་ཆར་ཕབ་ནས། ཀླད་པ་ཚར་པ་རྒྱ་རུ་བཀས་པ་དང་། ལུས་དུམ་བུ་སྟོང་དུ་གཏུབས་ཤིག་པའོ། །ཉོན་ཅིག་བགེགས་དང་ལོག་འདྲེན་རྣམས། །རྡོ་རྗེ་བཀའ་ལས་འདའ་མ་བྱེད་ཅེས་བྱ་བ་ནི། རྡོ་རྗེ་གཞོན་ནུའི་བྱིན་གྱིས་བརླབས་ཀྱིས་ལས་དང་ཉོན་མོངས་པའི་བག་ཆགས་བྱང་ནས་ཆོས་ཐོས་པའི་སྐལ་བ་དང་ལྡན་པའི་ཕྱིར། རྣ་བའི་དབང་པོས་ཉོན་ཅིག་དགེ་བ་དང་སྲོག་གི་བར་དུ་གཅོད་པའི་བགེགས་དང་། སྐུ་གསུང་ཐུགས་ཀྱི་དངོས་གྲུབ་བསྒྲུབ་པ་ལ་རྣམ་པར་འཚེ་བར་བྱེད་ཅིང་ལོག་པར་འདྲེན་པའི་ཚོགས་རྣམས་བཅོམ་ལྡན་འདས་རྡོ་རྗེ་གཞོན་ནུའི་བཀའ་ལ་འདའ་བར་མ་བྱེད་ཅིག་ཅེས་བརྗོད་ཅིང་། རྣལ་འབྱོར་པ་བདག་ཉིད་ཀྱིས་ཀྱང་ཕྱག་ཏུ་རལ་གྲི་ཐོགས་ནས་སྔགས་འདི་བརྗོད་ཅིང་བཏུབ་བོ། །ཧཱུྃ་མ་མ་བ་ཤི་ཀུ་རུ་མ་ཏཾ་ཛྙཱ་ན་ཀ་ར་ཨི་དན་དེ་མ་མ་ཀ་ར་མ་ཤྲི་ཀྲྂ་རེ་སྭ་ཧཱ། ཞེས་པ་ནི་མ་མོ་རྣམས་ཀྱི་གདུག་པའི་སྔགས་ཏེ། སྔགས་འདི་བརྗོད་ཅིང་ལིང་ག་དུམ་བུ་དུམ་བུར་བཏུབ་པར་བྱའོ། །དེ་ནས་སྟོང་གྲོགས་བྱེད་པའི་ལྷ་དང་དཔྲལ་བ་བསྟན་པའི་ཕྱིར། དེ་ནས་དབྱེ་བ་རྒྱུན་གྱི་ཏིང་ངེ་འཛིན་འདི་གསུངས་སོ། །ཞེས་པ་ལ་སོགས་པ་བསྟན་ཏེ། གསུང་ངོ་ཞེས་བྱ་བ་ནི། འོག་མ་འདིའོ། །གདུག་ཅིང་སྡང་སེམས་ལྡན་པ་ཡི། །ལྷ་འམ་འོན་ཏེ་བདུད་ཀྱང་རུང་། དེ་ཡི་མཐུ་དཔུང་བྱེད་པ་རྣམས། །མཐུ་དང་རྫུ་འཕྲུལ་མེད་པར་མཛོད། །ལོག་པར་ལྟ་བའི་སེམས་ཅན་དེའི། །ལུས་ཀྱི་སྒོ་དང་ངག་གི་སྒོ་ནས་གདུག་ཅིང་ཡིད་ཀྱི་སྒོ་ནས། ཞེ་སྡང་གི་སེམས་བྱེད་པའི་གདུག་པ་ཅན་གྱི་ཚོགས་ཚངས་པ་དང་། བརྒྱ་བྱིན་དབང་ཕྱུག་ཆེན་མོ་མ་ཧ་དེ་བ་དང་ཁྱབ་འཇུག་ཆེན་མོ་དང་། སྲིན་པོ་ལང་ཀ་མགྲིན་བཅུ་ལ་སོགས་པའི་འཇིག་རྟེན་པའི་བདུད་དམ་འོན་ཏེ་ལྷ་ཡང་རུང་བའམ། འཇིག་རྟེན་འདི་ན་མཐུ་ཆེ་བ་སྟོན་པ་སུ་ཡང་རུང་བ་སྒྲུབ་པ་པོའི་བཀའ་གཞུང་བཞིན་དུ་བྱེད་པའི་རྣལ་འབྱོར་པ་ལ་བར་ཆད་བྱེད་པའི་དགྲ་བགེགས་རྣམས། གཞན་ལ་གནོད་པར་བྱེད་པ་དེའི་མཐུ་དཔུང་བྱེད་པ་རྣམས་ཀྱི་ཕ་རོལ་པོས་ཉམས་སུ་བླངས་དུ་མི་འདོད་པའི་རྫུ་འཕྲུལ་སྟོན་པ་དེ་གཉིས་མེད་པར་གྱིས་ཤིག་ཅེས་པ་སྟེ། ཧ་ས་ར་ཧྲི་ན་ཞེས་པ་དང་སྦྱར་རོ། །རྫུ་འཕྲུལ་འཕྲོག་པའི་སྙིང་པོ་ནི། ཏདྱ་ཐ་ཧཱུྃ་ཕཊ་ཅེས་པ་ཡིན་ཏེ། སྔགས་འདི་བརྗོད་ཅིང་གོང་དུ་གསུངས་པའི་བདུག་པས་གདུག་པའོ། དེ་ནས་ཡང་ཧཱུྃ་ཀ་རའི་གསོད་པའི་ལས་ཀྱི་སྔགས་བསྟན་པའི་ཕྱིར། སརྦ་ན་མ་ཡ་བཛྲ་ཧཱུྃ་ཕཊ་ཅེས་པ་ཡིན་ཏེ། ཧཱུྃ་ཀ་རའི་ཆ་ལས་བྱུང་བའི་ཕུར་པ་བླངས་ཏེ་དྲིལ་ཏེ། སྔགས་འདི་བརྗོད་ཅིང་ཚང་བའི་བུ་གར་གདབ་པས་ལུས་མགོ་མཇུག་བཅུ་དང་བྲལ་ནས་ཡང་དག་པའི་ཡེ་ཤེས་སུ་བྱས་སོ། །དེ་ནས་ཡང་བཏུབས་པའི་ཕུང་པོ་བཏུང་བའི་ཕྱིར་རོ། །དེ་ནས་བཏུང་བ་རྒྱུན་གྱི་ཏིང་ངེ་འཛིན་འདི་གསུངས་སོ། །ཞེས་པ་ལ་སོགས་པ་བསྟན་ཏེ། གསུང་ངོ་ཞེས་བྱ་བ་འོག་མ་འདིའོ། །ཁྲོ་མོ་རྣམས་ཀྱི་དཀྱིལ་འཁོར་དུ་ཞེས་བྱ་བ་ནི། ཁྲོ་མོ་རྣམས་ཀྱི་མཁའ་གྲུ་གསུམ་པའི་ནང་དུའོ། །རྡོ་རྗེ་ཐོ་བ་བསྐོམ་བྱ་ཞིང་ཞེས་བྱ་བ་ནི་རྡོ་རྗེ་ཐོ་བ་ནི་ཐབས་ཀྱི་གསལ་བའི་རྡོ་རྗེའོ། །དངོས་པོར་གྱུར་པའི་གནས་ཆེན་ཀུན་ཞེས་བྱ་བ་ནི་བཏུབ་པའི་དངོས་པོ་མ་ལུས་པ་ཀུན། རྡུལ་ཕྲན་བཞིན་དུ་བརྡུང་བར་བྱ་ཞེས་གསུངས་པ་སྟེ། རྡོ་རྗེ་ཚིག་གི་བསྐུལ་བར་བྱ་བ་ནི། འོག་ནས་འབྱུང་བ་འདིའོ། །བརྡུངས་ཤིག་རྡོ་རྗེ་འབར་བའི་གཏུན་ཞེས་བྱ་བ་ནི་ཉོན་མོངས་པའི་སྒྲིབ་པ་མང་པོ་འབྱོངས་པར་ཡོད་པ་དེ་སྦྱངས་ཤིང་བག་ཆགས་ཀྱི་ཕུང་པོ་གཤིག་པའི་ཕྱིར། གང་ཡིན་པའི་ཕུང་པོ་དེ། རྡོ་རྗེ་ཐོ་བས་བརྡུངས་ཤིང་། ཡེ་ཤེས་ཀྱི་རྡོ་རྗེ་དེ་ལའོ། །འབར་བ་དང་ཁྲོ་བོའི་དབྱིངས་ལ་འོད་འབར་བའི་གཏུན་དུ། བརྡུངས་བར་བྱ་བ་ནི། དུས་གསུམ་གྱི་བདེ་བར་གཤེགས་པའི་བཀའ་ལས་འདའ་བར་བྱེད་ཅིང་ལུས་ངག་ཡིད་གསུམ་གྱིས་མི་དགེ་བ་བྱེད་པའི་སྡིག་ཅན་རྣམས་ཡང་དག་པའི་གསང་བའི་རྡོ་རྗེ་ལས་བྱུང་བའི་མེ་དབལ་དང་ཆས་པའི་རྡོ་རྗེ་གཟས་པ་པོ་གང་ཡིན་པའི་གདུག་པའི་སྙིང་བསྲེགས་ནས་རྣམ་པར་རྟོག་པ་རྟགས་པའི་སྒྱུ་མའི་ལུས་ངག་རྡུལ་ཕྲན་བཞིན་དུ་བརྡུངས་ཤིག་པའོ། །འོན་ཏེ་གང་དུ་བརྡུང་ཞེ་ན། དེ་བསྟན་པའི་ཕྱིར། ཁྲོ་མོ་འབར་བའི་གཏུན་ཁུང་དུ། རྡོ་རྗེ་ཐོ་བས་བརྡུང་བྱས་སྟེ། ཞེས་བྱ་བ་གསུངས་ཏེ། ཁྲོ་མོ་ཁམས་གསུམ་གྱི་གཏུན་དུ། ཐབས་ཁྲོ་བོ་གསང་བའི་རྡོ་རྗེ་ཐོ་བས་བརྡུང་བར་བྱས་ནས། ལྷ་ཡང་རུང་སྟེ་བརླག་པར་བྱེད་ཅེས་གསུངས་ཏེ། འཇིག་རྟེན་གྱི་ཚངས་པ་དང་བརྒྱ་བྱིན་ལ་སོགས་པ་ཡང་བརླག་པར་འགྱུར་ན། གཞན་སེམས་ཅན་ལྟ་སྨོས་ཅི་དགོས་ཏེ་བརླག་པར་འགྱུར་རོ། །ཞེས་པ་འདི་བརྡུང་བར་བྱེད་པའི་སྙིང་པོ་ནི་འདི་ཡིན་ཏེ། ཁ་ཐཾ་ཁ་ཐཾ་ཁ་ཐཾ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཅེས་གསུངས་ཏེ། སྔགས་དེ་ཡང་གསུམ་གདེབས་སུ་བྱས་ནས་བཟླས་ཤིང་། རྣལ་འབྱོར་པས་དངོས་སུ་ཡང་གཏུན་གྲུ་གསུམ་དུ་ཐོ་བས་བརྡུང་བར་བྱའོ། །དེ་ནས་ཡང་བརྡུང་བའི་ལྷག་རོལ་དེ་ཁྲོ་མོ་རྣམས་ཀྱི་ཞལ་དུ་བཏབ་པས་བསྟན་པའི་ཕྱིར། བསྟབས་པ་རྒྱུན་གྱི་ཏིང་ངེ་འཛིན་འདི་གསུངས་སོ། །ཞེས་བྱ་བ་ལ་སོགས་པ་བསྟན་ཏེ། རྡོ་རྗེ་ཁྲོ་བོ་འབར་བ་དང་། ཞེས་བྱ་བ་ནི། རྡོ་རྗེ་ནི་ཡང་དག་པའི་རྡོ་རྗེ་སྟེ། སྟོང་པ་ཉིད་ཀྱི་ཡེ་ཤེས་སོ། །དེ་ལས་བྱུང་བའི་ཁྲོ་བོ་ནི། བཅོམ་ལྡན་འདས་རྡོ་རྗེ་གཞོན་ནུའི་སྐུ་ལ་འོད་འབར་བ་སྟེ། དེའི་ཞལ་དུ་བསྟབས་པའོ། །རྡོ་རྗེ་ཟ་བྱེད་སྲིན་མོ་དང་ཞེས་བྱ་བ་ནི། བཅོམ་ལྡན་འདས་དཔལ་རྡོ་རྗེ་གཞོན་ནུའི་བྱིན་རླབས་ལས་བྱུང་བའོ། །ཁྲོ་བོ་རབ་ཏུ་རྔམ་པའི་མི་ཟད་པ་མཆེ་བ་གཙིག་པ་ལོག་པར་ལྟ་བ་ཟ་བར་བྱེད་པ་དེ་ཡི་ཞལ་དུ་བཏབས་པར་བྱ་བ་སྟེ། དེ་ཡང་ཁྲོ་མོ་དང་ཟ་བྱེད་ཕོ་ཉ་བཅུ་སྤྲུལ་པ་དང་ལྕམ་དྲལ་རྣམས་ལ་བསྟབས་པར་བྱའོ། །དེ་རྡོ་རྗེ་གནོད་སྦྱིན་ཞལ་གདངས་པར་ཞེས་བྱ་བ་ནི། གཉིས་མེད་པའི་ཡེ་ཤེས་ལས་མ་གཡོས་པ་ནི་རྡོ་རྗེ་སྟེ། དེ་ལས་འབྱུང་བའི་བདག་ཉིད་ཆེན་མོ་དང་། ས་བདག་ཆེན་མོ་ལ་སོགས་པའི་ཞལ་དུ་བསྟབས་པའོ། །མཚན་མའི་དངོས་པོ་བསྟིམས་པར་བསྒོམ་ཞེས་བྱ་བ་ནི། མཚོན་གྱིས་གཏུབས་པའི་དུམ་བུ་མཚན་མར་སྣང་བའི་དངོས་པོ་དེ་ཁྲོ་བོ་དང་ཁྲོ་མོ་དང་འཕྲ་མེན་མའི་བདག་ཉིད་ཆེན་མོའི་ཞལ་དུ་བསྟབས་པས། དེ་རྣམས་ཀྱིས་ཐིམ་པར་གསོལ་བར་བསམ་མོ། །དེ་ཡང་ཞལ་དུ་བསྟབས་པའི་དུས་སུ། རྡོ་རྗེའི་ཚིག་འོག་ནས་འབྱུང་བ་འདིས་བསྐུལ་བར་བྱ་སྟེ། ནམ་མཁའི་ཁྲོ་མོ་ཞལ་གདངས་སུ་ཞེས་བྱ་བ་ནི་ཆོས་ཉིད་མ་བཅོས་པའི་དོན་གྱིས་ངོ་བོ་ནི་ནམ་མཁའ་སྟེ། དེ་ལས་བྱུང་བའི་ཁྲོ་བོ་མི་ཟད་པ་ཞལ་སྡང་པ་རུ་ཁམས་གསུམ་གྱི་སེམས་ཅན་ཉོན་མོངས་པ་ལྔ་ཡིས་བཅིངས་ནས་ངན་སོང་གསུམ་དུ་འཁོར་བ་དེ་ཐུགས་རྗེ་ཆེན་པོས་བྱིན་གྱིས་བརླབས་ཀྱིས། ཐང་གཅིག་ཡུད་ཙམ་གཅིག་ལ་འགྲོ་བ་ཀུན་ཞལ་དུ་ཕྲ་མེན་མ་ངས་བསྟབས་པས། ཁྲོ་བོ་རོལ་པའི་ཚོགས་ཁྱོད་ཀྱི་ཞལ་དུ་ཡུད་ཙམ་ལ་གཏིམ་པར་མཛོད་ཅིག་པའོ། །དེ་ནས་ཞལ་དུ་འཁོར་བ་མཐའ་དག་གསོལ་བའི་གཏིང་ལ། དགྱེས་ནས་དཀྱིལ་དུ་བཅས་པ་དུས་གཅིག་ཏུ་བཞད་པ་དེའི་ཕྱིར། རོལ་པས་དགྱེས་པའི་གད་རྒྱངས་སྒྲོགས་ཞེས་གསུངས་པ་ཡིན་ནོ། །སྡུས་ཤིང་བསྲེག་ལ་མྱུར་དུ་ཟོ་བྱ་བ་ནི་ཁམས་གསུམ་གྱི་འཁོར་བ་མ་ལུས་པར་བསྡུས་ཤིང་། འོད་ཟེར་གྱི་བསྲེགས་ལ་ཉུང་ངུ་ཟའོ། །ཞེས་པ་སྟེ། སྟབས་པར་བྱ་བའི་བསྔགས་ནི་འདི་ཡིན་ཏེ། བི་ད་ཡའི་སྔགས་བརྗོད་པའི་རྗེས་ལ་བཛྲ་ཀྲོ་ཏ་ཡ་ག་ཤ་རཀ་ཤ་ཀྲོ་ཏ་ཁ་ཧི་ཁ་ཧི། ཞེས་པས་ཞལ་དུ་གསོལ་ནས། གསོལ་བའི་གཏིང་ལ་དགྱེས་པའི་གད་མོ་འདི་ཡིན་ཏེ། ཧ་ཧ་ཧ་ཞེས་བཞད་ནས། དེ་ནས་གནས་ཕྱི་མོ་དང་ཕྲད་པའི་ཕྱིར། ཧཱུྃ་ཧཱུྃ་ཧཱུྃ་ཞེས་པས་རྣམ་པར་ཤེས་པ་ཧཱུྃ་དུ་བསྡུས་ནས་ལྟེ་བའི་དབུས་སུ་ཡེ་ཤེས་ཀྱི་མེས་བཞུ་ནས་ཕཊ་ཕཊ་ཕཊ་ཅེས་པས་ཡུམ་གྱི་པདྨ་ལ་སྤྲོས་པས་ཡུམ་གྱི་པདྨ་དེ་ནི་གནས་ཕྱི་མོ་སྟེ། དེ་ནི་གནས་ཕྱི་མོ་དང་ཕྲད་པའོ། །དེའི་གནས་སུ་བཅོམ་ལྡན་འདས་རྡོ་རྗེ་འཛིན་པར་བསྐྱེད་དེ། དེ་ལ་དབང་ཚད་མར་བསྐུལ་ནས་འཇིག་རྟེན་གྱི་ཁམས་སུ་སེམས་ཅན་གྱི་དོན་ལ་བཏང་ངོ་། །དེ་ནི་ལས་བྱ་བ་ལ་འབྲས་བུ་ཡོད་པ་ཞེས་བྱ་སྟེ། སངས་རྒྱས་ཀྱི་སྲས་སོ། །དེ་ལྟར་བྱས་པའི་གནས་ཀྱི་མན་ངག་སྟེ། ལས་མ་འགྲུབ་བར་དུ་བྱ་བ་མ་ཡིན་ནོ། །བྱས་ན་སྐྱོན་ཅི་ཡོད་ཅེ་ན། བྱང་ཆུབ་སེམས་ཀྱི་འཁོར་ལ་དབང་བསྐུར་བས། རྣལ་འབྱོར་དམ་པ་ཡིན་པའི་གྲལ་དུ་འགྲོ་བས་རྣལ་འབྱོར་པ་ཉིད་དམ་ཚིག་ཉམས་པ་དང་། ལས་མི་འགྲུབ་པའི་སྐྱོན་ཡོད་དོ། །འགྲུབ་ངེས་པ་དང་གནས་ཀྱི་མན་ངག་དེ་ལྟར་ལས་མཐར་ཕྱིན་པར་བྱ་བའོ། །དེ་ནས་ཡང་དེ་ལྟར་མ་ཡིན་ནས་ཕུང་པོ་ལྷག་རོལ་དེ་སྲེག་པ་ཞིག་ཡིན་ན། ཧོམ་གྱི་ལས་བསྟན་པའི་ཕྱིར་དེ་ནས། བསྲེག་རྒྱུན་གྱི་ཏིང་ངེ་འཛིན་འདི་གསུངས་སོ། །ཞེས་པ་ལ་སོགས་པ་བསྟན་ཏེ། འདི་གསུངས་སོ། །ཞེས་པ་མི་བསྲེག་པར་བྱ་བའི་དོན་སྟོན་པའི་ཞལ་ནས་འོག་ནས་འབྱུང་བ་འདི་གསུངས་སོ། །ཀློང་ཡངས་འཁྱིལ་པའི་ཧོམ་ཁུང་དུ། །ཞེས་བྱ་བ་ནི། ཆོས་ཀྱི་དབྱིངས་དང་མཉམ་པའི་ཧོམ་ཁུང་དུ། ཆོས་འབྱུང་བའི་ཕྱག་རྒྱ་སྟེ། དབྱིངས་རྣམ་པར་དག་པའི་ངང་དུ་འཁྱིལ་པའི་ཧོམ་ཁུང་དུ། འབར་བ་རབ་ཏུ་འཁྲུག་པ་གདུག་པ་ཅན་གྱི་མེ་སྤར་ཏེ། བསྐྱེད་པ་མེ་ལྷ་དང་ཡེ་ཤེས་དང་དབྱེར་མེད་པར་བྱས་པའི་འབར་བའི་མེ་དཔུང་གི་དངོས་པོར་གྱུར་པ་གཟུགས་དུམ་བུ་རྣམས་ཡེ་ཤེས་ཀྱི་མེའི་ནང་དུ་བསྲེག་པར་བྱ་སྟེ། རྡོ་རྗེ་ཚིག་ཏུ་བསྒྲལ་བར་བྱ་བ་ནི། འོག་ནས་འབྱུང་བ་འདིའོ། །རཾ་མེ་དཔུང་འབར་པའི་ཀློང་དཀྱིལ་དུ། །མཚན་མར་གྱུར་པའི་དངོས་པོ་འདི། །བསྲེག་པས་དངོས་པོ་ཀུན་བརླག་སྟེ། །སླར་མི་ལྡོག་པར་བསྲེག་པར་འགྱུར་ཞེས་གསུངས་ཏེ། རཾ་ཞེས་པ་ནི་དང་པོ་མེ་ལྷའི་ས་བོན་ནོ། །དེ་ལ་ཡང་སྐུ་ཡོངས་སུ་རྫོགས་པའི་དུས་ན། སྐུ་ལས་འོད་ཟེར་འབར་བས་མེ་དཔུང་འབར་བ་སྟེ། དེ་ལྟ་བུའི་མེ་ལྷའི་ཀློང་དཀྱིལ་དུ། བརྡུངས་པའི་ཕྱེ་མར་སྣང་བའི་དངོས་པོ་འདི། བསྲེགས་སམ་ཕྱེ་མར་སྣང་བ་ཀུན་བརླག་ནས་སླར་མི་ལྡོག་པར་བསྲེགས་པས་ཐལ་བར་གྱུར་པ་རྟག་གོ། །མི་སྤར་བར་བྱ་བའི་སྔགས་ནི་འདི་ཡིན་ཏེ། རཾ་ཛྭ་ལ་ཛྭ་ལ་པ་ར་ན་ཧཱུྃ་ཕཊ་ཅེས་པས་མེ་སྦར་ལ། ཚེར་མ་ཅན་གྱི་སྲེག་ཤིང་གི་ནང་དུ་བཞུགས་པར་བྱའོ། །དེ་ནས་བསྲེག་པའི་ཐལ་བ་དེ་གཏད་ཁྲམ་བྱ་ཞིང་མནན་པར་བྱ་བ་བསྟན་པའི་ཕྱིར། དེ་ནས་མནན་པ་རྒྱུན་གྱི་ཏིང་ངེ་འཛིན་གསུངས་སོ། །ཞེས་བྱ་བ་ལ་སོགས་པ་བསྟན་ཏེ། ནམ་མཁའ་རྡོ་རྗེའི་དཀྱིལ་འཁོར་དུ་ཞེས་བྱ་བ་ནི། ནམ་མཁའ་ནི་འབྱུང་བ་སྟེ། གྲུ་གསུམ་དུ་གནས་པའོ། །དེ་ལྷའམ་ཀླུའམ་གནོད་སྦྱིན་ནམ་ཐེའུ་རང་མམ། མ་མོ་ལ་སོགས་པ་གང་ལ་འདོད་པའི་གནས་སུ་ཆོས་འབྱུང་བ་དགོས་པ་དེའི་ནང་དུ་བཞུག་པའོ། །དེ་གང་གཞུག་ཅེ་ན་གཟས་པ་པོ་དེ་གཞུགས་པའོ། །ཇི་ལྟར་གཞུགས་ཅེ་ན། གང་ལ་གཏོད་པའི་གཞུག་གི་རྒྱབ་ཏུ་ན་ལ་གཟུགས་བྱས་ལ་གཞུག་པ་སྟེ། དེ་ཡང་རེ་བ་ནི་དྲག་པོའི་ལས་ལ་ཤེས་པ་ཡིན་པས་དེའི་ནང་དུ་གཏུམས་ལ་ར་རོག་དང་ཁྱི་དཀར་པོའི་སྦུ་ལ་བསྒྲིལ་བ་ཡི་དཀར་ནག་གིས་བཅིངས་ལ། རྡོ་རྗེ་རྒྱ་གྲམ་གྱིས་ནི་དྲག་པོའི་ལས་ཀྱི་རྒྱ་སྟེ། དེས་རྒྱས་བཏབ་ལ་ཧོམ་ཁུང་དུ་གཞུགས་པར་བྱའོ། །དེའི་སྟེང་དུ་གཡམ་པ་སྔོན་པོ་ལ་ཡང་རྡོ་རྗེ་རྒྱ་གྲམ་བྲིས་ལ་ཁ་བཅད་པ་བཞག་པར་བྱ་སྟེ། རླུང་གི་དཀྱིལ་འཁོར་རྟག་པར་བྱའོ། །དེའི་སྟེང་དུ་རཾ་ལས་མེའི་དཀྱིལ་འཁོར་རྟག་པར་བྱའོ། །དེའི་སྟེང་དུ་བཾ་ལས་ཆུའི་དཀྱིལ་འཁོར་བརྟག་གོ། །དེའི་སྟེང་དུ་སུ་ལས་སའི་དཀྱིལ་འཁོར་བསྐྱེད་དེའི་ཕྱིར་དབང་ཆེན་དཀྱིལ་འཁོར་བསྒོམ་པར་བྱ་ཞེས་གསུངས་སོ། །དབང་ཆེན་དཀྱིལ་འཁོར་སྟེང་དུ་ལམ་ལས་རི་རབ་ཟུར་བརྒྱད་པ་ཤིན་ཏུ་མཛེས་ཅིང་བརྟན་པ་གཅིག་བསྐྱེད་དོ། །དེའི་སྟེང་དུ་མ་ལས་ཉི་མའི་དཀྱིལ་འཁོར་དུ་གྱུར་པའི་སྟེང་དུ་ཡི་གེ་ཧཱུྃ་ལས་རྡོ་རྗེ་རྒྱ་གྲམ་དུ་གྱུར། རྡོ་རྗེ་རྒྱ་གྲམ་གྱི་ལྟེ་བ་ལ་ཉི་མའི་དཀྱིལ་འཁོར་བརྟག་པར་བྱ་བ་སྟེ། དེའི་མཐའ་མ་ཡང་མེ་ལྕེའི་ཕྲེང་བས་བསྐོར་ནས་གནས་པའོ། །དེའི་ཕྱི་རི་རབ་སྟེང་དུ་རྡོ་རྗེ་བསྐྱེད། རྒྱ་གྲམ་སྟེང་དུ་བསམ་པ་ནི་ཞེས་གསུངས་པ་ཡིན་ནོ། །ཉི་མའི་དཀྱིལ་འཁོར་དེའི་དབུས་སུ་ཧཱུྃ་བསམ་ཧཱུྃ་ཡོངས་སུ་གྱུར་པ་ལས། རྡོ་རྗེ་བསྒོམ་པར་བྱའོ། །ལས་ཀྱི་རྡོ་རྗེ་དེ་ཡོངས་སུ་གྱུར་པ་ལས་བཅོམ་ལྡན་འདས་དོན་ཡོད་གྲུབ་པ་དེ་བ སྐྱེད་པར་བྱའོ། །བཅོམ་ལྡན་འདས་དེའི་འཁོར་ན་ཡང་གདུག་པའི་འཁོར་གྲངས་མེད་པ་མེ་དཔུང་གི་ནང་ན་བཞུགས་པར་བསྒོམ་སྟེ། དེ་ལྟར་བསྒོམ་པའི་དེས་སྐྱེ་འགྲོ་གདུག་པ་ཅན་གྱི་ལས་དང་ཉོན་མོངས་པ་མནན་ནམ། བསྐལ་པ་མཐའི་བར་དུ་ཐར་བའི་དུས་མེད་པར་བརྟག་པའི་ཕྱིར། ལས་ཀྱི་རྡོ་རྗེའི་དཀྱིལ་འཁོར་བསྒོམ། །སྐྱེ་འགྲོ་ཐམས་ཅད་མནན་པར་བསམ། །ཞེས་གསུངས་སོ། །དེ་ནས་གནོད་པའི་དུས་དེ་ཉིད་དུ། རྡོ་རྗེ་ཚིག་ཏུ་བརྗོད་པ་ནི། འོག་ནས་འབྱུང་བ་འདིའོ། །ཧཱུྃ་ལས་ཀྱི་རྡོ་རྗེ་འཁོར་དངབཅས། འཇིག་རྟེན་ཁམས་ནི་རབ་འབྱམས་ན། ལོག་པར་ལྟ་བའི་སེམས་ཅན་རྣམས། །སྐད་ཅིག་ཡུད་ལ་མནན་པར་ཤོག །ཅེས་བརྗོད་པར་བྱ་བ་སྟེ། ལས་ཀྱི་རྡོ་རྗེའི་དཀྱིལ་འཁོར་དུ་བཅས་པ་ཡིས། ཁམས་གསུམ་གྱི་ཉོན་མོངས་པ་ཐམས་ཅད་ཐང་ཅིག་ཡུད་ལ་གནོན་ཅིག་པའོ། །དེ་ཡང་རི་རབ་བསྐྱེད་པའི་སྔགས་ནི་འདིའོ། །ༀ་བཛྲ་སུ་མེ་ཏྲུཾ་ཞེས་པས་བསྐྱེད་པའོ། །ལས་ཀྱི་རྡོ་རྗེ་བསྐྱེད་པའི་སྔགས་འདིའོ། །ཧཱུྃ་ས་མ་ཡ་ཏྭཾ་ཞེས་པ་སྟེ། ལས་ཀྱི་རྡོ་རྗེ་བསྐྱེད་དེ། དེ་ནས་ཏིང་ངེ་འཛིན་ཡོངས་སུ་གསལ་ཞིང་གོམས་པའི་ནུས་མཐུ་བསྟན། དེའི་ཕྱིར། དཀྱིལ་འཁོར་དག་ནི་ཐམས་ཅད་དུ། །ཏིང་འཛིན་དཀྱིལ་འཁོར་མཐའ་ཡས་མཆོག །ལས་སུ་རུང་བའི་རྣལ་འབྱོར་པས། །དེ་ཡིས་མི་འགྲུབ་གང་ཡང་མེད། །མི་བྱ་བ་ནི་གཅིག་ཀྱང་མེད། །ཅེས་བྱ་བ་འདི་གསུངས་ཏེ། བརྙན་པའི་དཀྱིལ་འཁོར་ཐམས་ཅད་ལ། །ཏིང་ངེ་འཛིན་གྱི་དཀྱིལ་འཁོར་མཐའ་ཡས་པ་མེད་ན་དོན་མི་འགྲུབ་སྟེ། རྟག་པའི་ནང་དུ་འགྱུར་རོ། །ཏིང་ངེ་འཛིན་ཏེ་དཀྱིལ་འཁོར་དེའི་དང་དུ་ཡང་ནས་ཡང་དུ་འདྲིས་སེམས་ལས་སུ་རུང་བའི་རྣལ་འབྱོར་པ་དེ་ལས་ཇི་ལྟར་འདོད་པ་བཞིན་དུ་འགྲུབ་པ་གང་ཡང་མེད་དོ། །ཞི་བ་དང་རྒྱས་པ་དང་དབང་གི་ལས་དང་། བསྐྲད་པ་དང་བསད་པའི་ལས་མི་བྱ་བ་ནི་གཅིག་ཀྱང་མེད་དོ། །དེ་ནས་ཡང་ཏིང་ངེ་འཛིན་ལ་གནས་པའི་རྣལ་འབྱོར་པ་དེ་བདེ་བར་གཤེགས་པ་ཡིན་པར་བསྟན་པའི་ཕྱིར། ཏིང་ངེ་འཛིན་ཀློང་དུ་འདྲིས་པ་ཡིས། །མི་ཞེས་བྱ་བ་བདེར་གཤེགས་ཡིན། །སངས་རྒྱས་ཞེས་ནི་གུད་ན་མེད། །ཅེས་གསུངས་ཏེ། ཏིང་ངེ་འཛིན་ལ་དུས་རྟག་ཏུ་གནས་ཤིང་ཀློང་དུ་གྱུར་པའི་མེ་དེ་ནི། བདེ་བར་གཤེགས་པ་ཉིད་ཡིན་ཏེ། །དེ་ཅིའི་ཕྱིར་ཞེ་ན། བདེ་བའི་གནས་ནི་ཆོས་ཀྱི་དབྱིངས། །སྤྲོས་པ་དང་བྲལ་བ་ཡིན་ལ། །ཏིང་ངེ་འཛིན་ནི་གཉིས་སུ་མེད་པའི་ཡེ་ཤེས་ཏེ། དེ་ལ་གནས་པ་ནི་སྤྲོས་པ་དང་བྲལ་བའི་ཡེ་ཤེས་ཀྱི་རྒྱུ་ལས་བཞུགས་པ་དེའི་ཕྱིར་བདེ་བར་གཤེགས་པའོ། །དེ་ལྟར་གཉིས་སུ་མེད་པའི་ཤེས་པ་དེ་ལ་གནས་ཤིང་གནས་པས། དུས་ནམ་ཞིག་ན་སྤྲོས་པ་དང་བྲལ་བ་མངོན་དུ་རྟོགས་པར་འགྱུར་ཏེ། དེའི་དུས་ན་ཉོན་མོངས་པ་ཐམས་ཅད་ནི། ཡེ་ཤེས་ཀྱི་ངོ་བོར་གྱུར། སངས་རྒྱས་ཀྱི་ཆེ་བའི་ཡོན་ཏན་ནི་ཡོངས་སུ་རྒྱས་པ་དེ་ཉིད་ལ། སངས་རྒྱས་ཞེས་ནི་གུད་ན་མེད་ཅེས་སྟོན་པ་དཔལ་ཀུན་ཏུ་བཟང་པོས་གསུངས་སོ། །དེ་ནི་དོན་དམ་པའིི་བདེན་པའོ། །རྒྱུན་གྱི་ཏིང་ངེ་འཛིན་རིམ་པར་ཕྱེ་བས་སོ་སོར་བསྟན་པའི་ལེའུ་ལ་ནི། རྒྱུན་གྱི་ཏིང་ངེ་འཛིན་རིམ་པ་ཕྱེ་བའི་ལེའུའོ། །བདུད་བརྩིའི་ཐིགས་པ་ཞེས་བྱ་བ་རྒྱ་ཆེར་བཤད་པ་ལས། དོན་དམ་པའི་བདེན་པ་དང་། ཀུན་རྫོབ་ཀྱི་བདེན་པ་གཉིས་བཤད་པའི་ལེའུ་སྟེ་བཅུ་པའོ།། །།དེ་ནས་རྒྱུན་གྱི་ཏིང་ངེ་འཛིན་ལ་སོགས་པ་གསུངས་ཀྱང་། འཕྲིན་ལས་བཞིའི་བྱེ་བྲག་འདི་མ་བསྟན་ན། སེམས་ཅན་གྱི་དོན་མི་འགྲུབ་པས་དེ་བསྟན་པའི་ཕྱིར། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས། ལྷུན་གྱིས་གྲུབ་པའི་འཕྲིན་ལས་ཀྱིས་རྣམ་པར་སྦྱོང་བ་འདི་གསུངས་སོ། །ཞེས་པ་སྟེ། གསུངས་པའི་དོན་ནི་འོག་ནས་འབྱུང་བ་འདི་ཀུན་ཏུ་སྣ་ཚོགས་ལས་ཀྱི་རྣམས་ཞེས་བྱ་བ་ནི། ཞི་བ་བསྒྲུབ་པ་སྟེ། སངས་རྒྱས་འཁོར་ལོ་ཅན་གྱི་བསྒྲུབ་པའི་གཞུང་གང་ཡིན་པ་བསྒྲུབས་ཞི་བའི་ལས་བྱ་བ་དང་། རིན་པོ་ཆེའི་བསྒྲུབ་པ་བྱས་ལ། རྒྱས་པའི་ལས་བྱ་བ་དང་། པདྨའི་ལས་བྱ་བ་དང་། དབང་གི་ལས་བྱ་བ་དང་། གདོན་མི་ཟའི་བསྒྲུབ་པ་བྱས་ལ། དྲག་པོའི་ལས་བྱ་བ་དང་། ཀུན་ཏུ་སྣ་ཚོགས་རྣལ་འབྱོར་དང་གྱིས་བྱ་བ་ནི། ཀུན་ཏུ་སྣ་ཚོགས་ཀྱི་དཀྱིལ་འཁོར་སྤྱིའི་ཁ་དོག་ཇི་ལྟ་བ་བཞིན་དུ། ཏིང་ངེ་འཛིན་དུ་བདག་གནས་ནས། སེམས་ཅན་གྱི་དོན་དུ་ཞི་བ་དང་དབང་དང་མངོན་སྤྱོད་ལ་སོགས་པ་སྣ་ཚོགས་ཀྱི་སེམས་ཅན་གྱི་དོན་བྱའོ། །དེ་ལྟར་སྤྱིའི་ཚིག་བསྟན་ནས། འདི་ནས་མར་ནི་འཕྲིན་ལས་སོ་སོའི་གཞུང་བསྟན་ཏེ། སྔོན་ལ་ཕྱི་ནང་དུ་སྣང་བའི་རྣམ་པར་རྟོགས་པ་སྦྱང་ཞིང་ཞི་བར་བྱ་བའི་ཕྱིར། ཞི་བའི་ལས་སྔོན་ལས་བསྟན་པའི་ཕྱིར། འཇིག་རྟེན་ཁམས་ནི་རབ་འབྱམས་ན་ཞེས་པ་ལ་སོགས་པ་བསྟན་ཏེ། འཇིག་རྟེན་ཁམས་གསུམ་གྱི་སེམས་ཅན་རབ་ཏུ་རྨུགས་ཤིང་ཡིད་ཐིམ་པར་ཡོད་པ་དང་གལ་ཏེ་ཕ་རོལ་གནོད་པ་བྱེད་ཅིང་རྨུགས་པར་བྱེད་པའི་སེམས་ཅན་ལ། དེ་གསལ་བར་བྱ་བའི་ཕྱིར། སྣ་ཚོགས་ལས་ཀྱིས་ཞི་བ་སྦྱར་བར་བྱའོ། །དེ་ཡང་ཇི་ལྟར་ཞེ་ན། བཀྲ་ཤིས་དབེན་པའི་གནས་དག་ཏུ། །ཞེས་བྱ་བ་ནི། ལེའུ་གསུམ་པ་ལས་གསུངས་པའི་སངས་རྒྱས་འཁོར་ལོ་ཅན་གྱི་གནས་གང་ཡིན་དེ་རུ་བསྒྲུབ་པར་བྱའོ། །བཀྲ་ཤིས་མཚན་ལྡན་ཡུམ་མཆོག་གཟུངས་ཞེས་བྱ་བ་ནི། དང་པོ་བསྒྲུབ་པའི་དུས་སུ་བཀྲ་ཤིས་པའི་ཡུམ་ནི་ཤ་དཀར་ལ་སྲབ་པ་རྐེད་པ་ཕྲ་ལ། མིག་དཀྱུས་རིང་ལ་སྨིན་མ་བར་མ་ཆད་པ་སོར་མོ་ཕྲ་ལ་རིང་བ། སྨང་ཞིང་ཆེ་བ་རིང་ཐུང་གཉིས་སྤྲངས་པའི་ཡུམ་མཆོག་དེ། གཟུངས་བར་བྱའོ། །ལས་ཀྱི་དུས་སུ་ནི་གཡོན་ཕྱོགས་སུ་བཞག་པ་ལས་བརྩམ་པར་བྱའོ། །རྣམ་པར་སྣང་མཛད་ཀྱི་རྣལ་འབྱོར་རམ། མི་བསྐྱོད་ཕྱག་རྒྱ་བདག་གནས་ལ་ཞེས་བྱ་བ་ནི། རྣམ་པར་སྣང་མཛད་ཀྱི་དཀྱིལ་འཁོར་གསལ་བར་བསྒྲུབ་པའམ། ཡང་ན་མི་བསྐྱོད་པའི་དཀྱིལ་འཁོར་བསྒྲུབས་ལ། འོད་ཟེར་དཀར་པོ་བདུད་རྩིའི་ཆུ་རྒྱུན་འབབ་ཅིང་སེམས་ཅན་གང་ཡིན་པ་ལ་བསྟིམས་པས། དེའི་བག་ཆགས་ངན་པ་སྦྱང་ནས་སོ་སོའི་ལས་གང་ཡིན་པ་དེ་གསལ་བར་འགྱུར་རོ། །དཀར་ལ་ཟླུམ་པའི་དཀྱིལ་འཁོར་ལ་ཞེས་བྱ་ནི། ཞི་བའི་ཐབ་ཁུང་ནི་ཁ་དོག་དཀར་པོར་བྱུག་པའོ། །དབྱིབས་ནི་ཟླུམ་པོའོ། །ཆེ་ཆུང་ནི་ཁྲུ་གང་དུ་བྱས་པའོ། །ཟབས་སུ་ནི་ཁྲུ་ཕྱེད་བརྐོ་བའོ། །ཁ་ཁྱེར་སོར་བཞི་བསྐོར་བར་བྱ་སྟེ། དབུས་ཀྱིི་ཁ་ཁྱེར་ལ། རྡོ་རྗེ་འོད་འཕྲོས་བས་བརྒྱན། ཞེས་བྱ་བ་སྟེ། རྡོ་རྗེ་ར་བ་གཏད་པར་བྱའོ། །དེའི་ཕྱི་རོལ་གྱི་སོར་བཞི་ཡོད་པ་ལ་དཔང་དུ་སོར་གཅིག་ཡོད་པའི་ཆ་དེ་ལ་འཁོར་ལོས་བསྐོར་བར་བྱའོ། །དེ་ནི་མ་ཐབ་བཅའ་ཐབས་སོ། །དེ་ནས་ཡང་ཕུར་པ་དགོད་པའི་རིམ་པ་ནི། ཞི་བའི་ཕུར་པ་གཞུང་དུ་བྱེད་ན། ལྷའི་མཚན་ཉིད་ཀུན་ཀྱང་སྐུ་མདོག་དཀར་པོ་ཞལ་གཅིག་ཕྱག་གཉིས་པ་བསྒྲུབ་པའི་དུས་སུ་བསྙེན་པ་ཡང་དཀར་པོ་ལ་བྱ་བ་སྟེ། དེ་བསྟན་པའི་ཕྱིར། རིན་ཆེན་ཁ་དོག་དཀར་པོའོ། །དཀར་པོ་ཤེལ་ལས་བྱས་པའི་ཞེས་པ་ནི། རིན་ཆེན་ཁ་དོག་དཀར་པོ་དངུལ་ལ་བྱས་པ་སྟེ། དེ་ལ་ཕུར་པ་བྱ་བའམ་ཡང་ན་དེ་མེད་ན་འོ་མ་ཅན་གྱི་ཤིང་དཀར་པོ་ལ་བྱ་སྟེ། དེ་ལ་ཕུར་པ་བྱས་ལ་འོད་ཟེར་ཡང་དཀར་པོ་སྤྲོ་བར་བྱའོ། །དེ་ནི་བསྒྲུབ་པའི་དུས་སུ་ནི་ཕུར་པ་ཟླུམ་པོ་དྲུག་གདབ་སྟེ། ཞེས་བྱ་བ་ནི། སྲས་ཕུར་པ་ཟླུམ་པོའི་རྩེ་མོ་ཟླུམ་པོ་དྲུག་གདབ་སྟེ་ལས་བྱའོ། །གང་དུ་གདབ་ཅེ་ན། བདེ་བར་གཤེགས་པའི་སྒོ་དྲུག་ཏུའོ། །དེར་གཏབ་པས་ཅིར་འགྱུར་ཞེ་ན། ཕུར་པའི་འོད་ཟེར་དཀར་པོ་ཡིས་ཁང་པ་ཆེན་པོའི་སྒོ་དྲུག་ནས་ཞུགས་ནས། སེམས་ཅན་ཉོན་མོངས་པས་འཐིབས་ནས་རྨུགས་པ་དེ་དེང་། ནད་པ་ལ་སོགས་པ་ནད་རྣམ་པ་མང་པོ་གང་ཡིན་པ་དང་། སེམས་ཅན་གདུག་པ་ཅན་ཡིན་ན་སེམས་ལ་གདུག་པའི་ཞེ་སྡང་ཡོད་པ་དེ། ཡེ་ཤེས་ཀྱིས་ཆུས་བཀྲུས་ནས། ཡང་དག་པའི་ཡེ་ཤེས་དང་ལྡན་པར་བྱས་པའོ། །དེ་ནི་ལས་ཀྱི་དུས་སུ་སྦྱར་བའོ། །དེ་ནས་མེ་ལྷ་བསྐྱེད་པའི་རིམ་པ་བསྟན་པ་ཏེ། དེ་ལ་ཡང་གཉིས་ལས་ཐབ་ཁུང་ཉིད་གཞལ་ཡས་ཁང་དུ་བྱས་ནས། འཇིག་རྟེན་པའི་མེ་དེ་མེ་ལྷའི་སྐུར་བསྐྱེད་ནས། དེ་ལ་རང་བཞིན་གྲུབ་པའི་གནས་ནས་ཡེ་ཤེས་ཀྱི་མེ་ལྷ་སྤྱན་དྲངས་ཏེ་བསྟིམས་ནས། མཆོད་པ་ཕུལ་ནས་ཞི་བའི་ལས་བཅོལ་ལོ། །ཡེ་ཤེས་ཀྱི་མེ་ལྷ་གཤེགས་སུ་གསོལ་ལ། དམ་ཚིག་གི་མེ་ལྷའི་ཐུགས་ཀར་ཞི་བའི་ལྷ་ཉིད་ཀྱི་གཞུང་གང་ཡིན་པ་བསྐྱེད་དེ། དེ་ལ་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་བསྟིམས་པའི་ཕྱིར། ཞི་བའི་ལྷ་ཚོགས་སྤྱན་དྲངས་ཞེས་གསུངས་སོ། །ཡང་ཐབ་ཁུང་གོང་མ་འདྲ་བར་གཞལ་ཡས་སུ་བྱས་ལ་དེའི་ནང་དུ་དམ་ཚིག་སེམས་དཔའི་དཀྱིལ་འཁོར་གཞུང་གཉིས་གང་ཡིན་པ་བསྐྱེད་པ་ལ། ལྷ་རྣམས་ཀྱི་ཞལ་ཉིད་འཇིག་རྟེན་པའི་མེ་ཡིན་པར་བསམ་ལ། དེ་ནི་མེ་ལྷ་ཞལ་དུ་བྱ་བ་ཡིན་ཏེ། དེ་ལས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ། བསྟིམས་ལ་མཆོད་པ་དབུལ་བར་བྱའོ། །སྙིང་རྗེ་བྱམས་པའི་མཆོད་སྦྱིན་བྱ་ཞེས་བྱ་བ་ནི། ཁམས་གསུམ་གྱི་སེམས་ཅན་རྨུགས་པ་ལ་སོགས་པ་སྙིང་རྗེ་བསྐྱེད་དེ། དེ་ལ་བྱམས་པས་མཆོད་པར་བྱ་བ་དང་། མི་དགེ་བ་བཅུ་སྤངས་ནས་དགེ་བ་བཅུ་ལ་གནས་པའི་ཕྱོགས་སྐྱོངས་བཅུ་ལ་ལས་བཅོལ་བའི་ཕྱིར། བསྲེག་རྫས་སྦྱིན་པར་བྱའོ། །ཡམ་ཤིང་དཀར་པོ་སྦར་བའི་མེ་ཞེས་བྱ་བ་ནི། ཡམ་ཤིང་གི་རིམ་པ་བསྟན་ཏེ། རློན་ལ་སྦོམ་དང་བཅས་རྩེ་མོ་ཆ་ལས་བྱུང་བ་ཆུར་འཛུབ་གང་ཡོད་པ། སྦམས་སུ་ཆག་པ་གང་ཡོད་པ། མངར་ཞིང་འོ་མ་ཡོད་པའི་ཤིང་ལ་བྱའོ། །ཤིང་དེ་མ་གས་མི་འཁྱོག་པ་འབུས་མ་ཟོས་པ་ལ་བྱའོ། །འོ་ན་གས་པ་ལ་སོགས་བྱུང་ན་སྐྱོན་ཅི་ཡོད་ཅེ་ན། ཡོད་དེ་གས་པར་གྱུར་ན་ཤ་བཀྲ་ཅན་དུ་སྐྱེ་བ་དང་། ཡོན་པོར་སོང་ན་དབང་པོ་མ་ཚང་བར་སྐྱེ་བ་དང་། འབུས་ཟོས་ན་ཡན་ལག་མ་ཚང་བར་སྐྱེ་བས་སྐྱོན་ཡོད་པས། གཟབས་ལ་ལེགས་པར་བྱའོ། །འོན་ཏེ་འཁྱོགས་པ་ལས་མ་བརྙེད་པ་ཞིང་ཡིན་ན། བདུད་རྩི་འཁྱིལ་པའི་སྔགས་ཀྱིས་བྱིན་གྱིས་བརླབས་ལ་བྱའོ། །དཀར་ལ་སྦྱར་བའི་མེ་ཞེས་པ་ནི་དངུལ་ལམ་དཀར་པོའི་གནོད་སར་པར་ཤིང་དཀར་པོ་ལེགས་མོ་བླུགས་བཙུགས་པའམ། དཀོན་པའི་གནས་ནས་མེ་བླངས་ནས། ཤོང་བའི་ཤིང་ནང་དུ་བླུགས་ལ་གོང་དུ་གསུངས་པའི་སྔགས་ཀྱིས་མེ་སྦར་བར་བྱ་སྟེ། རླུང་ཡབ་ཀྱིས་བུད་པར་བྱའོ། །དེ་ལྟར་མིགས་པར་སྦར་ནས་བུད་ཤིང་གི་ནང་དུ་མར་བླུགས་པར་བྱའོ། །དཀར་ལ་མངར་བའི་རྫས་རྣམས་ཀྱིས། །ཞི་བའི་ཚུལ་དུ་སྦྱིན་བསྲེག་བྱ། །ཞེས་བྱ་བ་ནི། ཞི་བ་ལ་སྔོན་ལ་མར་དབུལ་བར་བྱ་བ་ཡིན་ཏེ། ༀ་བཛྲ་ཀི་ལི་ཀི་ལ་ཡ་ཤན་ཏིང་ཀུ་རུ་སྭཱ་ཧཱ། ཞེས་དབུལ་བར་བྱའོ། །གཞུང་གཅིག་ཏུ་བྱ་བ་ཡིན་ན། ༀ་ན་མ་ས་མནྟ་བུདྡྷ་ནམ་རུ་རུ་པུ་རུ་ཛྭཱ་ལ་ནི་ཏཱི་ཏ་ལོ་ཙ་ནི་སརྦ་ཨ་ཧོ་ན་ཡེ་ཤིནྟཾ་ཀུ་རུ་སྭཱ་ཧཱ། ཞེས་པས་མར་དབུལ་བར་བྱ་བ་ཡིན་ཏེ། གཞུང་གཉིས་སོ། །ༀ་སརྦ་སཾ་བ་དེ་སྭཱ་ཧཱ། ཞོ་ཅན་གྱིའོ། །ༀ་སརྦ་ག་ག་ད་ཧ་ནི་བཛྲ་ཡ་སྭཱ་ཧཱ། ཞེས་པ་ནི་ཏི་ལའོ། །ༀ་བཛྲ་ཨཱ་ཡུ་ཤེ་སྭཱ་ཧཱ། ཞེས་པ་ནི་དུར་བའི་འོ། །ༀ་བཛྲ་པུ་ཤ་ཡེ་སྭཱ་ཧཱ། ཞེས་པ་ནི་འབྲས་སོ་བའི་འོ། །ༀ་པྲ་ཏི་ཧ་ན་ཡ་བཛྲ་སྭཱ་ཧཱ། ཞེས་པ་ནི་ཀུ་ཤ་དབུལ་བའོ། །ༀ་བཛྲ་བི་ཛ་ཡ་སྭཱ་ཧཱ། འབྲས་ལག་པར་དབུལ་བའོ། །ༀ་མ་ཧ་བེ་ག་ཡ་སྭཱ་ཧཱ། ཞེས་པ་ནས་ཆན་ནོ། །ༀ་མ་ཧཱ་བ་ལ་ཡ་སྭཱ་ཧཱ། ཞེས་པས་འབྲས་ཅན་ནོ། །ༀ་ཀས་མ་རི་སྭཱ་ཧཱ། གྲོ་ཅན་ནོ། །ༀ་བཛྲ་ཨ་ཛྙ་པྲ་ད་ཡ་ཤེ་ན་ག་ཡ་སྭཱ་ཧཱ། ཡམ་ཤིང་གིའོ། །རྫས་རྣམས་ཐམས་ཅད་གཡས་སུ་དགྲམ། མཆོད་རྫས་རྣམས་ནི་གཡོན་དུའོ། །རྫས་དང་མཆོད་རྫས་ཀུན་ལ་མངར་གསུམ་བླུགས་པར་བྱའོ། །ཁ་དོག་ཀུན་ཀྱང་དཀར་པོར་བྱུག །དངུལ་ཕྱེ་འབྲས་ཅན་དཀར་པོ་ལ་གཏོར་མ་བྱས་ཏེ་སྦྱིན་པར་བྱའོ། །ཞེས་བྱ་བ་ནི། དངུལ་ཕྱེ་དང་། འབྲས་ཅན་དང་འོ་མ་མར་དཀར་ལ་གཏོར་མ་བྱས་ཏེ་ལས་ཀྱི་ལྷ་ལ་བྱིན་ལ་ལས་བཅོལ་ཏེ། བསྒྲུབ་པའི་དུས་སུ་ཡང་ངོ་། །བཾ་གྱི་ཚོགས་ཀྱི་དཀྱིལ་འཁོར་དུ། གཏི་མུག་ལས་ཀྱིས་འཆལ་བ་རྣམས་ཞི་བས་གྱུར་པར་དབྱིངས་སུ་རོལ་ཞེས་བྱ་བ་ནི། བཾ་ནི་ཟླུམ་པོར་ཏེ་ཟླུམ་པོར་བྱས་པའི་དཀྱིལ་འཁོར་དུ་ཞི་བའི་ལྷ་ཚོགས་སྤྱན་དྲངས་ཤིང་། མཆོད་པ་ཕུལ་ཞིང་ལོ་སེར་གྱིས་གཏི་མུག་ལས་ཀྱིས་འཆལ་པ་རྣམས། བསང་ཞིང་སྦྱངས་པ་རྨུགས་པ་ལ་སོགས་པའི་སེམས་ཅན་ཉོན་མོངས་པའི་སྦྱངས་ཤིང་། ཞི་བར་གྱུར་པ་ཡང་དག་པའི་དོན་རྟོགས་ཤིང་རྣམ་པར་རྟོག་པ་མེད་པར་འགྱུར་རོ། །དེ་ནི་ཞི་བའི་འབྲས་བུ་སྟེ་དོན་དམ་པའི་བདེན་པའོ། །ཡམ་ཤིང་ལ་སོགས་པ་ནི་ཀུན་རྫོབ་ཀྱི་བདེན་པའོ། །དོན་དམ་པའི་འབྲས་བུ་སྐྱེ་བ་མི་སླུ་བའི་བདེན་པའོ། །དེ་ནི་ཞི་བའི་ལས་སོ། །དེ་ནས་རྒྱས་པའི་ལས་བསྟན་པའི་ཕྱིར། འཇིག་རྟེན་ཁམས་ནི་རབ་འབྱམས་ན། ཞེས་པ་ལ་སོགས་པ་བསྟན་ཏེ། འཇིག་རྟེན་ཁམས་ནི་ཁམས་གསུམ་གྱི་སེམས་ཅན་ལོག་འཕོངས་པར་གྱུར་པ་གཉིས་ཡོད་པ་ལས། ཆོས་འཕོངས་པ་དང་ཟས་ནོར་གྱིས་འཕོངས་པའོ། །ཆོས་འཕོངས་པ་ལ་གཉིས་རང་གི་ཆོས་འཕོངས་པ་དང་བུ་ཚའི་ཆོས་འཕོངས་པའོ། །དེ་ལྟར་འཕངས་པ་ཡོད་པ་དེ་ལ་ནི་འཕངས་པར་འགྱུར་པའི་འགྲོ་གང་ལ་ཞེས་པ་གསུངས་པ་ཡིན་ཏེ། དེ་ལྟ་བུའི་ཆེད་དུ། སྣ་ཚོགས་ལས་ཀྱི་ས་རྒྱས་པར་སྒྱུར་བར་བྱ་བ་ཡིན་ཏེ། དེ་ཡང་གང་དུ་བྱ་ཞེ་ན། ཙན་དན་ནགས་ཚལ་མེ་ཏོག་དང་། ཉམས་དགའ་སྐྱིད་མོ་ཚལ་དུ་ཞེས་བྱ་བ་ནི། ཙན་དན་གྱི་ནགས་ཚལ་དེ་དྲི་ཞིམ་པོ་སྣ་ཚོགས་པ་ཡོད་པའི་གནས་སམ། མེ་ཏོག་དྲི་ཞིམ་པ་ཡོད་པའི་གནས་སམ། ཉམས་དགའ་ཞིང་སྐྱེས་མོས་ཚལ་མང་པོ་ཡོད་པའི་གནས་སུ་བྱའོ། །གནས་ཀྱི་དམ་པ་དེར་ལྕག་ཕྲན་མ་ཡུམ་མཆོག་གཟུངས་ཞེས་བྱ་བ་ནི། ལོ་བཅུ་དྲུག་མའི་ཡུམ་མཆོག་གཟུང་ལ་བསྒྲུབ་པར་བྱའོ། །ལས་ཀྱི་དུས་སུ་གཡོན་དུ་བཞག་པར་བྱའོ། །རིན་ཆེན་སེམས་པར་བདག་གནས་པར། ཞེས་བྱ་བ་ནི། རིན་ཆེན་སེམས་མའི་དཀྱིལ་འཁོར་གསལ་བར་བརྟག་ཅིང་རྒྱས་པའི་ལས་བསྒྲུབ་པར་བྱའོ། །དེ་ཡང་འོད་ཟེར་ཡང་སེར་པོ་འཕྲོས་པ་ཚེའི་གནས་སུ་བསྟན་པ་དང་། ནོར་ཟས་ལ་སོགས་སོ། །སའི་གནས་སུ་བསྟིམ་པར་བྱའོ། །སེར་པོ་གྲུ་བཞིའི་དཀྱིལ་འཁོར་ལ་ཞེས་བྱ་བ་ནི། མེ་ཐབ་བྱ་བ་བསྟན་ཏེ། ཁ་དོག་སེར་པོར་བྱུག །ཁྲུ་དོ་གྲུ་བཞི་པ་སྟེ་ཁྲུ་གང་ཟབས་སུ་བརྐོ་བའོ། །བརྐོས་པའི་ས་ལས་འཕང་སོར་བཞིར་བསྐྱེད་ལ། ཁ་ཁྱེར་སོར་བཞི་པར་བྱའོ། །ཞེང་དང་དཔངས་གཉིས་ག་སོར་བཞི་བཞིར་བྱའོ། །རིན་ཆེན་ཆུ་སྐྱེས་དག་གིས་བརྒྱན། །ཞེས་བྱ་བ་ནི། དབུས་ཀྱི་ཁ་ཁྱེར་ལ་རིན་པོ་ཆེ་བཏང་བར་བྱའོ། །ནང་དུ་པདྨའི་འབྲས་བུའོ། །ཕྱི་རོལ་གྱི་སོར་བཞི་ལ་པདྨས་བསྐོར་བར་བྱའོ། །སློབ་དཔོན་ཁ་གཅིག་གི་གཞུང་ནས་རྒྱས་པར་བྱེད་པ་ཡིན་ལ། དབུས་ཀྱི་ཁ་ཁྱེར་ལ་རྡོ་རྗེ་ར་བ་གཏང་པར་བྱ་བ་ཡིན་ན། ཕྱི་རོལ་སོར་བཞི་ལ་ཡང་འཁོར་ལོའི་འཕྲེང་བ་བཏང་བར་བྱ་བ་ཡིན་ཞེས་གསུངས་ཏེ། དེ་ལས་ཀྱི་བྱེ་བྲག་གིས་བརྒྱན་པ་ཡིན་ནོ། །དེ་ནས་ཡང་ལས་གཉིས་པའི་གཞུང་བསྟན་པའི་ཕྱིར། རིན་ཆེན་ཁ་དོག་སེར་པོའམ་ཞེས་བྱ་བ་ནི། རིན་པོ་ཆེ་གསེར་ཏེ་དེ་ལ་ཕུར་པའི་རྒྱུ་བྱས་ཏེ། བསྒྲུབ་པའི་དུས་སུ་ལྷ་རྣམས་ཀྱང་ཁ་དོག་སེར་པོར་བྱ་བ་ཡིན་ནོ། །འོད་ཟེར་ཡང་སེར་པོར་སྤྲོས་པ་དེ་ལས་གང་ཡིན་པ་དེ་བྱ་བ་ཡི། སེར་པོའི་ལས་བྱས་པའི་ཕུར་པ་བཞི་པ་བཞི་བཏབ་སྟེ་ཞེས་བྱ་བ་ནི་ལས་ཀྱི་དུས་སུ་ནི་བྱ་བ་སྟེ། སྲས་ཕུར་པའི་ཤིང་ལས་བྱུང་བ་བཞིན་ནི་ཆ་ལས་འབྱུང་བ་སྟེ། བདེ་བ་ཆེན་པོའི་གནས་ཀྱི་སྒོར་བཞིར་བཏབ་པས། ཕུར་པ་ལས་འོད་སེར་པོ་འཕྲོས་དེའི་ཚེའི་གནས་གང་ཡིན་པ་དེ་རུ་ཟླ་བ་དང་ཉི་མ་ག་བུར་གནས་པའི་ནང་དུ་ཚེ་བསྟིམ་ཞིང་བསྟན་པར་བྱས་ཤིང་རྒྱས་པར་ལྟའོ། །སྤྱོད་པ་རྒྱས་པར་འདོད་ན་ཕུར་པ་ལས་འོད་འཕྲོས་པས་འཇིག་རྟེན་གྱི་ཁམས་ཁེངས་པའི་ནོར་ཕྱུགས་ཀུན་བཀུག་ཅིང་རང་རང་གི་གནས་ཀྱི་ནོར་ཕྱུག་ལ་བསྟིམས་ཏེ། ཕུར་པ་ཡང་ཁང་པའི་ཕྱོགས་བཞིར་གདབ་བོ། །བུ་ཚ་འཕེལ་བར་འདོད་ན། ཕུར་པ་ལས་འོད་འཕྲོས་པ་ལས་ཚངས་རིགས་མན་ནི་གདབ་ཀྱི་ཕོའི་མཚན་ཐམས་ཅད་འགུགས་ཏེ། ཕོའི་སྐྱེ་གནས་ལ་བསྟིམས་པ་བུ་ཚ་འཕེལ་བར་འདོད་དོ། །རྒྱས་པའི་ལྷ་ཚོགས་སྤྱན་དྲངས་ཞེས་བྱ་བ་ནི། ཡེ་ཤེས་ཀྱི་དཀྱིལ་འཁོར་སྤྱན་དྲངས་པའི་རིམ་པ་སྟེ། ཚོགས་ཀྱི་དཀྱིལ་འཁོར་གྱི་རིམ་པ་དང་། དམ་ཚིག་གི་མེ་ལྷ་བསྐྱེད་པའི་གཞུང་གཉིས་ཀ་གང་དུ་གསུངས་པའོ། །ལས་ཁ་དོག་སེར་པོར་ཡོད་པའོ། །དེ་ནས་ཡེ་ཤེས་ཀྱི་མེ་ལྷ་དང་། ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་བསྟིམས་ལ་མཆོད་པ་ཕུལ་ལ། དེའི་རྗེས་ལ་དད་པའི་སེམས་ཀྱིས་མཆོད་དོ། །དཀྱིལ་འཁོར་ལྷ་ལའོ། །སྦྱིན་ཞེས་བྱ་བ་ནི། ཕྱོགས་སྐྱོངས་ལ་སྦྱིན་པར་བྱས་ནས་རྒྱས་པའི་ལས་བཅོལ་བའོ། །སེར་པོའི་ཤིང་ལས་སྦྱར་བའི་མེ་ཞེས་བྱ་བ་ནི། སེར་པོའི་ཤིང་ལ་ཡམ་ཤིང་ལ་བྱ་བ་ཡིན་ཏེ། གྲུ་བཞི་པ་ཆུར་ཁྲུ་གང་པ་སྒོམ་དུ་ཆག་པ་གང་ཡོད་པ་དབུས་ཀྱི་ཆ་ལས་བྱུང་བའོ། །མེ་སྦར་བའི་མེ་ཞེས་བྱ་བ་ནི་གསེར་རམ་སེར་པོའི་ཤིང་སྣོད་སར་པར་སེར་པོའི་ཤིང་ལེགས་མོ་བླངས་ལ། ཤར་རྒྱལ་པོའི་ཁྱིམ་ནས་མ་བླངས་ཏེ། སྤར་བར་བྱ་བའི་མེ་དེ་བུད་ཤིང་གི་ནང་དུ་བླུགས་པར་བྱའོ། །ཁ་པའི་རོ་ལྡན་སེར་པོའི་རྫས་རྒྱས་པའི་ཚུལ་དུ་སྦྱིན་བསྲེགས་བྱ་ཞེས་བྱ་བ་ནི། རོ་ཁང་པ་ཡོད་པ་ཁ་དོག་རྫས་ཐམས་ཅད་སེར་པོར་བྱས་པའོ། །རྒྱས་པའི་ཚུལ་དུ་སྦྱིན་བསྲེག་བྱ་ཞེས་བྱ་བ་ནི། རྒྱས་པའི་སྣ་དྲངས་པའི་ནི་ཞོའི་ས་དྲངས་ལ་ལྷག་མ་རྣམས་ནི་རིམ་བཞིན་དུ་དབུལ་བའོ། །སྔགས་ནི་ༀ་བཛྲ་ཀཱི་ལི་ཀཱི་ལ་ཡ་བཱ་བྷྱོ་སྭ་ཆེ་གེ་མོ་རྒྱས་པར་གྱུར་ཅིག །ཧ་ཐམས་ཅད་ཅེས་པས་དབུལ་ལོ། །གཞུངས་གཅིག་གི་ༀ་ན་མ་ས་མན་ཏ་བུདྡྷ་ནན་བཱ་བྷྱོ་སྭ་ཆེ་གེ་མོ་རྒྱས་པར་གྱུར་ཅིག་ཅེས་དབུལ་ཏེ། རྫས་ལྷག་མ་རྣམས་ནི་གོང་དུ་ཇི་ལྟར་གསུངས་པའི་རིམ་པས་དབུལ་བར་བྱའོ། །དེ་ནས་གཏོར་མ་བྱ་བའི་རྒྱུ་བསྟན་པའི་ཕྱིར། གསེར་ཕྱེ་འབྲུ་རྣམས་སེར་པོ་ལ། །གཏོར་མ་བྱས་ཏེ་རྒྱས་པར་བྱ། །ཞེས་བྱ་བ་ནི། བསྒྲུབ་པའི་དུས་སུ་བྱ་བ་སྟེ། གསེར་ཕྱེ་དང་འབྲུ་ལས་བྱས་པའི་གཏོར་མ་བྱས་པ་ཐམས་ཅད་ཁ་དོག་སེར་པོར་བྱས་ལ། གཏོར་མ་འདི་ལས་ཀྱི་ལྷ་ལ་བསྔོ་སྟེ། བྱིན་ལ་རྒྱས་པའི་ལས་བཅོལ་ལོ། །དེ་ནས་ཡང་དཀྱིལ་འཁོར་དུ་ཇི་ལྟར་བྱ་བ་བསྟན་པའི་ཕྱིར། མ་མོའི་ཚོགས་ཀྱི་དཀྱིལ་འཁོར་དུ། །ང་རྒྱལ་ལས་ཀྱི་ཆེ་བ་རྣམས། །རྒྱས་པར་གྱུར་བ་གདོན་མི་ཟ། །ཞེས་གསུངས་སོ། །མ་ནི་གྲུ་བཞི་སྟེ་དེའི་དཀྱིལ་འཁོར་དུ་རྒྱས་པའི་ལྷ་ཚོགས་གཞུང་གཉིས་པའི་ལྷ་རྣམས་གསལ་བར་བསྒོམ་ཞིང་། རྒྱས་པའི་དོན་གང་ཡིན་པ་བསྒྲུབ་ན་འགྲུབ་པ་དང་ང་རྒྱལ་གྱིས་འཆེལ་བའི་སེམས་ཅན་རྣམས་ཀྱི་འདོད་པ་རྒྱས་པར་གྱུར་ཏེ། བསམ་པ་རང་མ་ནས་ཡང་དག་པའི་དབྱིངས་སུ་རོལ་པར་གྱུར་ཏོ། །དབྱིངས་ལས་མ་གཡོས་པར་ཏེ་ཡང་དག་པའི་དབྱིངས་སུ་གཉིས་མེད་པའི་ཡེ་ཤེས་ཀྱི་པ་སྟེ། བདེན་པ་གཉིས་སུ་ཤེས་པར་བྱ་བ་སྟེ། རྒྱས་པའི་ལས་སོ། །དེ་ནས་ཡང་དབང་གི་ལས་བསྟན་པའི་ཕྱིར། འཇིག་རྟེན་ཁམས་ནི་ཐམས་ཅད་ཀུན། །ཞེས་པ་ལ་སོགས་པས་བསྟན་ཏེ། འཇིག་རྟེན་གྱི་ཁམས་འདི་ན་གང་དང་གང་ལ་ཆགས་པར་འགྱུར་བའི་སེམས་ཅན་དེའི་དོན་དུ། དབང་དུ་བྱ་བ་འདི་སྦྱར་བར་བྱའོ་གསུངས་སོ། །དེ་ནས་གང་དུ་བྱ་ཞེ་ན། དེ་བསྟན་པའི་ཕྱིར། ཟླ་མཚན་ཅན་གྱི་ཆུ་གླིང་དུ་ཞེས་གསུངས་ཏེ། ལྷར་བུ་གཡོན་སམ། སྲུབ་མའི་འབྲས་བུ་ཡོད་པའི་ཆུ་གླིང་དུ་བསྒྲུབ་པར་བྱ་བ་ཡིན་ཏེ། གང་དུ་བསྒྲུབ་ཅེ་ན། སྡོང་ཅིག་མའི་གཟུངས་མ་གཟུངས་ཞེས་གསུངས་ཏེ། སྡོང་ཅིག་མ་ནི་ཞེས་བྱ་བ་ནི། རབས་ཆད་མོ་དེ་དབང་དུ་བྱ་བའི་སྐུ་མཆོག་ཏུ་ཤེས་པས། དེ་དང་གྲོགས་ལ་བསྒྲུབ་པར་བྱའོ། །ལས་ཀྱི་དུས་སུ་ནི་གཡོན་དུ་བཞག་པར་བྱ་བ་ཡིན། སྣང་བ་མཐའ་ཡས་པའི་དཀྱིལ་འཁོར་བསྒོམ་པར་བསྟན་པའི་ཕྱིར། སྣང་བ་མཐའ་ཡས་རྣལ་འབྱོར་རམ། །ཞེས་བྱ་བ་གསུངས་ཏེ། སྣང་བ་མཐའ་ཡས་ཀྱི་དཀྱིལ་འཁོར་གསལ་བར་བསྒོམས་ལ། བསྒྲུབས་ཏེ་འོད་ཟེར་འཕྲོ་ཞིང་གང་ཡིན་པའི་ལས་བྱ་བའོ། །གཞུང་གཉིས་པ་བསྟན་པའི་ཕྱིར། རྡོ་རྗེ་ལྟར་ནི་རྣམ་པར་བསྒོམ་ཞེས་གསུངས་ཏེ། དབང་གི་བསྒྲུབ་པ་བྱེད་པའི་དུས་སུ་དབུས་ཀྱི་གཙོ་བོ་ནི་རྟ་སྟེ་དེའི་མགོ་གང་ཡིན་པ་རུ་བཅོམ་ལྡན་འདས་ཉིད་བཞུགས་པ་སྟེ། དེའི་དཀྱིལ་འཁོར་གྱི་ལྷ་རྣམས་ཀྱི་སྐུ་མདོག་དང་ཀུན་དམར་པོར་བྱ་བ་སྟེ། འོད་ཟེར་ཡང་དམར་པོར་འཕྲོས་ཤིང་གང་ཡིན་པ་དབང་དུ་བྱ་བའོ། །དེ་ནས་ཡང་དབང་གི་མེ་ཐབས་བསྟན་པའི་ཕྱིར། ཟླ་གམ་དམར་པོའི་དཀྱིལ་འཁོར་ལ། །འོད་ཟེར་འཕྲོ་བ་མདའ་གཞུ་བརྒྱན། །ཞེས་གསུངས་པ་ཡིན་ཏེ། དེ་དབང་གི་ཐབ་ཁུང་ནི་དབྱིབས་ཟླ་གམ་དུ་འདུག་པ་སྟེ། ཟླ་གམ་གྱི་མཁའ་ལ་སོར་ཉི་ཤུ་ཡོད་པ། རྒྱབ་ལ་སོར་བཞི་བཅུ་ཡོད་པའོ། །ཟབས་སུ་སོར་བཅུ་བསྐོར་བ་བྱ་བ་སྟེ། ཁ་དོག་ནི་དམར་པོའི་ཁ་ཁྱེར་ནི་སོར་གསུམ་གཏང་ཞེས་པ་དང་། དཔངས་སུ་སོར་གསུམ་མོ། །དབུས་ཀྱི་ཁ་ཁྱེར་ལ་མདའ་གཞུ་དང་ལྕོགས་ལས་ཤིན་ཏུ་འོད་ཟེར་འཕྲོས་པས་བརྒྱན་པར་བྱའོ། །དེའི་ཕྱི་རོལ་གྱི་སོར་གསུམ་ལ་ཞགས་པས་བརྒྱན་པར་བྱའོ། །ཟངས་ལ་སོགས་པའི་རིན་ཆེན་ནམ། དམར་བའི་ཤིང་ལས་བྱས་པའི་ཞེས་བྱ་བ་ནི། གཞུང་གཉིས་པ་བསྒྲུབ་པའི་དུས་སུ་ཟངས་སམ་དམར་པོའི་ཤིངལས་བསྙེན་ཕུར་ལ་འོད་དུ་འཕྲོ་བའི་འོད་ཟེར་དམར་པོས་སྤྲོ་ཞིང་། ལས་གང་དབང་དུ་བྱ་བ་དེ་འདུས་པར་བསམ་མོ། །ལས་ཀྱི་དུས་སུ་ནི་ཕུར་པ་ཟླ་གམ་ལྔ་བཏབ་སྟེ། དམར་པོ་རྒྱུད་ལས་བྱས་པའི་ཕུར་པ་རྩེ་མོ་ཟླ་གམ་དུ་འདུག་པ་རིམ་པ་ལྔའི་ཆ་ལས་བྱུང་བའི་ཕུར་པ་དེ་གང་དབང་དུ་བྱས་པའི་གནས་ལྔ་རུ་གཏུབས་ཤིང་བཏབ་པས། གང་གི་གནས་ལྔ་ནས་བསྐུལ་ཏེ་དབང་དུ་འགྱུར་རོ། །དེ་ནས་ཡང་ཡེ་ཤེས་ཀྱི་དཀྱིལ་འཁོར་སྤྱན་དྲངས་པ་བསྟན་པའི་ཕྱིར། དམར་སྨུག་འཕྲོ་བའི་ལྷ་མཆོག་རྣམས། །རྡོ་རྗེ་སྤྱུགས་པས་སྤྱན་དྲངས་ཏེ། །ཞེས་བྱ་བ་གསུངས་ཏེ། བསྐྱེད་པའི་རིམ་པ་ནི། གོང་དུ་རྒྱས་པར་གསུངས་སོ། །དམ་ཚིག་གི་མེ་ལྷ་ནི། གསུམ་པ་ལྡིར་བ་རལ་པ་མཆོད་ཕྱིར་ཕྱང་བ་ཕྱག་ན་འགུན་དེ་ལ་སོགས་པ་བསྣམས་པ་སྟེ། མདོག་ནི་ལས་ཀྱི་བྱེ་བྲག་དང་སྦྱར་བར་བྱའོ། །དེ་ལ་ཡེ་ཤེས་ཀྱི་དཀྱིལ་འཁོར་དང་ཡེ་ཤེས་ཀྱི་མེ་ལྷ་དམར་ལ་སྨུག་པའི་མདངས་སྟོན་པའི་སྐུ་མདོག་དང་འོད་ཟེར་འཕྲོ་བ་དེས་རྡོ་རྗེ་སྤྱུག་པས་སྤྱན་དྲངས་ཏེ། བསྟིམས་ཏེ་དེ་ལ་མཆོད་པ་བྱ་སྟེ། དེ་ཡང་ཤིན་ཏུ་དགའ་ཞིང་ཆགས་པའི་ཡིད་ཀྱིས་མཆོད་པར་བྱ་བ་སྟེ། དཀྱིལ་འཁོར་གྱི་ལྷས་སྦྱིན་ཞེས་བྱ་བ་ནི། ཕྱོགས་སྐྱོང་བཀུག་ལ་བསྲེག་རྫས་བྱིན་ལ་ལས་བཅོལ་བའོ། །དེ་ནས་ཡམ་ཤིང་དང་མེ་སྦར་བའི་རིམ་པ་བསྟན་པའི་ཕྱིར། དམར་པོའི་ཤིང་ལས་སྤར་བའི་མེ་ཞེས་གསུངས་ཏེ། དམར་པོའི་ཤིང་ལས་ཞེས་བྱ་བ་ནི་ཡམ་ཤིང་ལ་བྱ་བ་སྟེ། དམར་པོའི་ཤིང་ལ་དབྱིབས་ཟླ་གམ་དུ་བྱས་པ། མཆུར་སོར་ལྔ་སྦོམས་སུ་ཆག་གང་ཡོད་པ་དེ་ལྟ་བུ་བྱ་བའོ། །སྦར་བའི་མེ་ཞེས་བྱ་བ་ནི་ཟངས་གཞོང་སོང་བའི་ནང་དུ་དམར་བའི་ཤིང་ལེགས་པར་བརྫངས་ལ་ཚོས་མའི་ཁྱིམ་ནས་མེ་བསླངས་ཏེ། སྦར་བའི་མེ་དེ་བུད་ཤིང་གི་ནང་དུ་བླུགས་པར་བྱའོ། །དེ་ནས་ཡང་རྫས་དབུལ་བའི་རིམ་པ་བསྟན་པའི་ཕྱིར། སྐྱུར་ཞིང་དམར་བའི་རྫས་རྣམས་ཀྱིས། །དབང་གི་ཚུལ་དུ་སྦྱིན་བསྲེག་བྱ་ཞེས་གསུངས་ཏེ། རྫས་ཀུན་ཀྱང་ཁ་དོག་དམར་པོར་བསྒྱུར་ཞིང་། ཡུང་བ་ལས་སྣ་དྲངས་ལ་དབུལ་བར་བྱ་སྟེ། དབུལ་པའི་སྔགས་ནི་འདིའོ། །ༀ་བཛྲ་ཀི་ལི་ཀི་ལ་ཡ་པུ་ཏི་ཧཱུྃ་ཆེ་གེ་མོ་དབང་དུ་འདུས་པར་གྱུར་ཅིག་ཧཱུྃ་ཞེས་པས་དབུལ་ལོ། །གཞུང་གོང་མའི་སྔགས་ནི་ༀ་ན་མ་ས་མནྟ་བུ་ཏ་ནན་པུ་ཏི་ཧཱུྃ་ཆེ་གེ་མོ་དབང་དུ་འདུས་པར་གྱུར་ཅིག་ཧཱུྃ་ཞེས་པས་དབུལ་ལོ། །གཞན་གོང་དུ་བསྟན་པའོ། །དེ་ནས་ཡང་གཏོར་མའི་རྒྱུ་བསྟན་པའི་ཕྱིར། ཟངས་ཕྱེ་འབྲུ་རྣམས་དམར་པོ་ལ། །གཏོར་མ་བྱ་སྟེ་དབང་དུ་བསྡུ་བའོ། །ཞེས་བྱ་བ་གསུངས་ཏེ། བསྒྲུབ་པའི་དུས་སུ་ཟངས་ཕྱེ་དང་འབྲུ་རྣམས་ལ་སོགས་པའི་གཏོར་མ་ཀུན་དམར་པོར་བྱས་ཏེ། ལས་ཀྱི་ལྷ་ལ་བྱིན་ལ་དབང་གི་ལས་འདི་ཁྱོད་ཀྱིས་གྲུབ་པར་གྱིས་ཤིག་ཅེས་བགོའོ། །གང་དབང་དུ་བྱ་བ་དེ་དབང་དུ་འདུའོ། །དེ་ནས་ཡང་དཀྱིལ་འཁོར་དུ་ཇི་ལྟར་བྱ་བ་བསྟན་པའི་ཕྱིར། མ་ཡི་ཚོགས་ཀྱི་དཀྱིལ་འཁོར་དུ། །འདོད་ཆགས་ལས་ཀྱི་ཆེ་བ་རྣམས། །དབང་དུ་བསྡུས་པས་དབྱིངས་སུ་རོལ་ཞེས་གསུངས་ཏེ། མེའི་དཀྱིལ་འཁོར་ནི་ཟླ་གམ་སྟེ། དཀྱིལ་འཁོར་དམར་པོ་རུ། དབང་གི་ལྷ་རྣམས་གསལ་བསྒོམ་ཞིང་། དེའི་འོད་ཟེར་གྱིས་འདོད་ཆགས་ལ་དད་པའི་སེམས་ཅན་བསྡུས་ནས་དབང་དུ་བྱས་ཏེ་བྱང་ཆུབ་སེམས་ཀྱི་རྒྱས་བཏབ་པ་དེ་ནི་དབྱིངས་སུ་རོལ་ལ་སྟེ། དོན་དམ་པའི་བདེན་པའོ། །རྫས་ལ་སོགས་པའི་བྱེ་བྲག་གིས་ཀུན་རྫོབ་ཀྱི་བདེན་པ་སྟེ། དབང་གི་ལས་སོ། །དེ་ནས་ཡང་དྲག་པོའི་ལས་བསྟན་པའི་ཕྱིར། འཇིག་རྟེན་ཁམས་ནི་རབ་འབྱམས་ན་ཞེས་བྱ་བ་ལ་སོགས་པ་གསུངས་ཏེ། འཇིག་རྟེན་གྱི་ཁམས་འདི་ན། ཤིན་ཏུ་གདུག་པའི་སེམས་ཅན་ལ་དྲག་ཤུལ་གྱི་སྤྱོད་པ་སྦྱར་བྱས་ནས་ཞེས་བྱ་བ་ནི་ཤིན་ཏུ་གདུག་ཅིང་ལོག་པར་ལྟར་བའི་སེམས་ཅན་དེ་ལ་ཞི་བས་འདུལ་བ་མ་ཡིན་ཏེ། དྲག་ཤུལ་སྤྱོད་པ་སྦྱར་བྱས་ནས་འདུལ་བར་བྱའོ། །དེ་ཡང་གནས་གང་དུ་བྱ་ཞེ་ན། རྐང་གཅིག་ཅན་ནམ་དུར་ཁྲོད་དུ་ཞེས་གསུངས་ཏེ། མཚན་ཉིད་གོང་དུ་གསུངས་པ་དང་སྦྱར་བར་བྱའོ། །རིགས་ངན་དམེ་ཤ་ཅན་ལ་སོགས། །མི་རེག་མའི་གཟུང་མ་གཟུངས་ཞེས་བྱ་བ་ནི། བསྒྲུབ་པའི་དུས་སུ་ནི་རིགས་ངན་དམེ་ཤ་ཅན་ནི་གསོད་བྱེད་བཤན་པའི་རིགས་ཏེ། དྲག་པོའི་ལས་བྱེད་པའི་བསྒྲུབ་པའི་དུས་སུ་བསྟོན་པར་བྱའོ། །མི་རེག་མ་ནི་ཡུགས་ས་མ་སྟེ། དེ་ནི་གདུག་པའི་གཟུངས་མ་སྟེ། ལས་ཀྱི་དུས་སུ་གཡོན་དུ་བཞག་པའོ། །རྡོ་རྗེ་ཁྲོ་བོར་བདག་གནས་ལ། །ཞེས་བྱ་བ་ནི། བཅོམ་ལྡན་འདས་རྡོ་རྗེ་གཞོན་ནུ་ཉིད་དུ་བདག་གནས་པར་བྱས་ལ། དཀྱིལ་འཁོར་གྱི་ལྷ་རྣམས་ཀྱང་སྐུ་མདོག་མཐིང་ནག་ཁྲོས་པའི་ཞལ་གདངས་ཤིང་མཆེ་བ་གཙིགས་པའོ། །དེ་ནས་མེ་ཐབ་ཀྱི་རིམ་པ་བསྟན་པའི་ཕྱིར། ནག་པོ་གྲུ་གསུམ་དཀྱིལ་འཁོར་ལ། རྩང་ཐོད་རྒྱན་གྱིས་བརྒྱན་པར་བྱའོ་ཞེས་གསུངས་ཏེ། དྲག་པོའི་མེ་ཐབ་ནི་ཟུར་གསུམ་པའོ། །ཁ་དོག་ནག་པོར་བྱུག་པ་སྟེ། ངོས་རེ་ལ་སོར་ཉི་ཤུ་ཉི་ཤུའོ། །ཟབས་སུ་སོར་བཅུ་བསྐོར་སོར་གསུམ་གྱི་དགྱེ། ཞེང་དུ་དཔངས་གཉིས་སོར་གསུམ་མོ། །དེའི་ཕྱི་རོལ་དུ་སོར་གསུམ་དུ་བཏབ་པར་བྱ་བ་སྟེ། དབུས་ཀྱི་ཁ་ཁྱེར་ལ་ཐོད་པས་བསྐོར། དེའི་ཕྱི་རོལ་དུ་རྡོ་རྗེ་རྩེ་དགུ་པ་དང་། མདའ་གཞུ་དང་མདུང་རྩེ་གསུམ་པ་པ་དང་། དགྲ་སྟ་དང་། ཁ་ཊྃ་ག་དང་གདུག་པའི་མཚོན་ཆ་ཀུན་ཀ་སྟི་ལ་ལ་ཡང་བཏང་། དེའི་ཕྱི་རོལ་གྱི་དཀྱིལ་འཁོར་ཕྱི་མྱུར་ན་ལ་རྩང་དམར་པོས་བསྐོལ་བར་བྱའོ། །དེ་ནས་སྲོག་ཆགས་གསོད་པའི་རྒྱུ་བསྟན་པའི་ཕྱིར། ལྕགས་སམ་ནག་པོའི་ཤིང་རྣམས་ལ། །ཚེར་མ་ཅན་གྱི་ཤིང་རྣམས་སམ། །མིའི་རུས་པའི་ཕུར་པ་ཞེས་བྱ་བ་གསུངས་ཏེ། ལྕགས་སྣལ་ཕུར་པ་བྱས་ཏེ། གནམ་ལྕགས་དང་ཁྲོ་ཆུང་དང་སྒོ་གསེར་དང་། སྲོག་ཆག་གསོད་པའི་མདུང་རྩེ་དང་། སྲོག་ཆགས་གསོད་པའི་དགྲ་སྟ་དང་། ལྔ་ལ་བྱའོ། །ཡང་ན་ནག་པོའི་ཤིང་ནི་དུག་ཤིང་སྟེ། དུར་ཚེར་ཡོད་པའི་ཤིང་ལ་ཕུར་པ་བྱ་བའོ། །དེ་མེད་ན་ཚེར་མ་གདུག་པ་ཡོད་པའི་ཤིང་ལ་ཕུར་པ་བྱའོ། །མི་རྐང་གི་ཕུར་པ་ལ་སོགས་པའི་རྣམས་ཀྱི་རྩེ་མོ་ཟུར་གསུམ་བྱས་ལ་བསྙེན་ཕུར་གྱི་དུས་སུ་ནི་གཅིག་གི་བྱ་བ་ཡིན་ལ། ལས་ཀྱི་དུས་སུ་ནི་གསུམ་དུ་གདབ་སྟེ་ཞེས་གསུངས་ཏེ། སྐུ་གསུང་ཐུགས་ཀྱི་ཆ་ལས་ཕྱུང་བའི་ཕུར་པ་རྣམས་སོ། །གདབ་པའི་གནས་དང་ཇི་ལྟར་གདབ་པ་སྟེ། ཏིང་ངེ་འཛིན་གྱི་རིམ་པ་ཕྱེ་བ་ལ་སོགས་པ་གསུང་པ་ཇི་ལྟར་རོ། །དེ་ནས་ཡེ་ཤེས་ཀྱི་དཀྱིལ་འཁོར་དང་། ཡེ་ཤེས་ཀྱི་མེ་ལྷ་སྤྱན་དྲངས་པ་བསྟན་པའི་ཕྱིར། མཐིང་ནག་གྲུ་གསུམ་འབར་བའི་ལྷ་ཚོགས་རྣམས། དྲེག་པ་གདུལ་ཕྱིར་སྤྱན་དྲངས་ཏེ། །ཞེས་བྱ་བ་གསུངས་ཏེ། མཐིང་ནག་འཁྲུགས་པའི་ཡེ་ཤེས་ཀྱི་ལྷ་ཚོགས་རྣམས་གདུག་པ་ཅན་བསྒྲལ་ཞིང་ཞལ་དུ་གསོལ་བའི་ཕྱིར། སྤྱན་དྲངས་ཏེ། དམ་ཚིག་གི་དཀྱིལ་འཁོར་བ་བསྟིམས་ལ་བཏང་སྙོམས་ཁྲོས་པའི་མཆོད་པ་བྱའོ་སྦྱིན་པའི་ལས་ཀྱི་ལྷ་རྣམས་དང་། ཕྱོགས་སྐྱོང་ལ་བྱིན་ལ་ལས་བཅོལ་ལོ། །དེ་ལས་ཡང་མེ་སྦར་བ་དང་ཡམ་ཤིང་གི་གོ་རིམ་བསྟན་པའི་ཕྱིར། ཚེར་མའི་ཤིང་ལས་ཞེས་བྱ་བ་གསུངས་ཏེ། ཚེར་མ་ཅན་གྱི་ཤིང་ལ་བྱས་ཏེ། ཆུ་རུ་སོར་བཞི་སྦོམས་སུ་ཆག་པ་ཕྱེད་ཡོད་པ། རྩ་བའི་ཆ་ལས་བྱུང་བའི་གདུག་པའི་ཤིང་ལས་བྱ་བའོ། །སྦར་པའི་མེ་ཞེས་བྱ་བ་ནི། ལྕགས་གང་སར་པའི་ནང་བཤན་པའི་ཁྱིམ་ནས་མེ་བླངས་ནས་སྦར་པ་དེ་བསྲེག་ཤིང་གི་ནང་དུ་བླུགས་པའོ། །དེ་ནས་ཡང་རྫས་རྩུབ་པའི་རིམ་པ་བསྟན་པའི་ཕྱིར། ནག་པོའི་ཚི་ཤིང་རྩུབ་པ་ཡིས། །དྲག་པོའི་ཚུལ་དུ་སྦྱིན་བསྲེག་བྱ་ཞེས་གསུངས་ཏེ། དྲག་པོའི་རྫས་ཀུན་ཀྱང་ཁ་དོག་ནག་པོར་བྱ་བ་ཡི། རྫས་ཀྱི་རོ་ཀུན་ཀྱང་རྩ་བཞི་རྩུབ་པར་བསམ་ཡོད་པར་བསམ་པའོ། །སྣ་དྲངས་པ་ནི་གདུག་པའི་ཚེར་མ་ཅན་གྱི་སྣ་དྲངས་ལ། དབུལ་བ་སྟེ་དབུལ་བའི་སྔགས་ནི། ༀ་བཛྲ་ཀཱི་ལི་ཀཱི་ལ་ཡ་སུམ་པ་ཧཱུྃ་ཆེ་གེ་མོ་མ་ར་ཡ་ཕཊ་ཅེས་པས་དབུལ་བའོ། །དེ་ནས་ཡང་དྲག་པོ་གཏོར་མའི་རྒྱུ་བསྟན་པའི་ཕྱིར། ལྕགས་ཕྱེ་འབྲུ་ནག་ཤ་ཁྲག་ལས། སྦྱར་བའི་གཏོར་མས་དྲག་ཤུལ་སྤྱོད། །ཅེས་གསུངས་ཏེ། ལྕགས་ཕྱེ་དང་འབྲུ་ནག་པོ་ལས་བྱས་པའི་གཏོར་མ་དེ་དྲག་པོའི་དུས་སུ་ཕྲ་མེན་མ་དང་སྲིང་མོའི་ཚོགས་དང་བདག་ཉིད་ཆེན་མོ་དང་། ས་བདག་ཆེན་མོ་ལ་སོགས་བསྐུལ་ལ་གཏོར་མ་དེ་གཟུགས་ལ་བརྟེག་ཅིང་གསད་པའི་ལས་བྱའོ། །ཤ་ཁྲག་སྣ་ཚོགས་ལས་བྱས་པའི་གཏོར་མ་ནི་ལས་ཀྱི་ལྷ་འཁོར་དང་བཅས་པ་ལ་བསྔོས་ལ་བཏང་ངོ། །དེ་ནས་ཡང་དཀྱིལ་འཁོར་དུ་ཇི་ལྟར་བྱ་བ་བསྟན་པའི་ཕྱིར། ཨེ་ཡི་ཚོགས་ཀྱི་དཀྱིལ་འཁོར་དུ། །ཞེ་སྡང་ལས་ཀྱི་འཚེ་བ་རྣམས། །བརླག་པར་འགྱུར་བའི་དབྱིངས་སུ་རོལ་ཞེས་གསུངས་ཏེ། ཨེ་ནི་ཆོས་འབྱུང་བའི་དཀྱིལ་འཁོར་ཏེ་དེའི་གནས་སུ་བཅོམ་ལྡན་འདས་ཁྲག་འཐུང་གི་ཚོགས་གསལ་བར་བསྒོམས་ལ། དེའི་ནང་དུ་སྟོང་ཁམས་ཀྱི་སེམས་ཅན་ཞེ་སྡང་ལས་ཀྱིས་འཆེལ་བ་རྣམས་ཞལ་དུ་གསོལ་ནས། དངོས་པོ་ཕུང་པོར་རགས་པར་བྱས་ནས། ཡང་དག་པའི་ཡེ་ཤེས་ནི་དབྱིངས་སུ་གསལ་བར་བྱ་སྟེ། བཞུགས་པ་ནི་དོན་དམ་པའི་བདེན་པའོ། །རྫས་ལ་སོགས་པ་ནི་འབྲས་བུ་ལོངས་སྤྱོད་མི་བསླུ་བས་བདེན་པ་སྟེ་ཀུན་རྫོབ་བོ། །དེ་ནས་བསྐྲད་པ་ཡང་བྱ་སྟེ། དུར་ཁྲོད་ཀྱི་རས་མ་ལ། འཁོར་ལོ་རྩིབས་བརྒྱད་པ་བྲིས་ལ་དེའི་དབུས་སུ་རྔ་མོའི་གཟུགས་ཤིག་བྲིས་ལ། དེ་ལ་གཟས་པ་པོ་གང་ཡིན་པ་བསྐྱོན་ལ་དབང་གི་དགོས་པ་ཇི་ལྟར་བཞིན་དུ་བྱ་སྟེ། གཟུགས་དེ་ལ་བསྟིམས་ནས་འཁོར་ལོའི་རྩིབས་རྣམས་ལ་ཡང་། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཛ་ཛ་ཞེས་པ་བྲིས་ཏེ་འོག་གི་ཐད་དཀར་ནས་གཡོན་བསྐོར་དུ་བསྐོར་ནས་བྲིས་ཏེ། རྣལ་འབྱོར་པའི་ཟིལ་གྱིས་ཀྱང་། བཟླས་པའི་སྔགས་པའི་སྡེ་ཉིད་ཡིན་ཏེ། ཏིང་ངེ་འཛིན་གྱིས་ཀྱང་ཁོའི་ཁང་ཕྱི་ཁྱིམ་གྱི་འོག་ཏུ་རླུང་གི་དཀྱིལ་འཁོར་བསྒོམས་ལ། དེའི་བ་དན་བཞི་བསྐྱོད་པས་རྔ་མོའི་རྨིག་བཞི་རང་དབང་མེད་པར་བསྐྱེད་ནས་ཁྲོ་བོའི་ལས་ལ་ནི་སྔགས་ཏེ། ཁྲིད་ལ་ལས་ནི་ཐོ་བ་དང་རལ་གྲི་དང་དགྲ་སྟ་དང་ཐོགས་ནས་དེད་ནས་འགྲོ་བར་དམིགས་ལ། བརྟན་པ་ཡང་ཐོན་པ་དང་། སྒྲུབ་པ་ལ་འཇུག་སྟེ། འཛབ་གྲངས་ཐོན་པ་དང་ལས་ལ་སྦྱར་ཏེ། ལས་ཀྱི་དུས་སུ་སྟོང་ཐོན་པ་དང་། དུར་ཁྲོད་ཀྱི་རས་མ་བཏགས་ལ། དབང་གི་ཚུལ་གི་ཚུལ་དུ་སྦྱིན་བསྲེག་བྱས་ལ། བསྐུལ་བའི་སྔགས་བསྐྲད་པའི་སྔགས་ཉིད་ཀྱིས་བྱ་སྟེ། སྦྱིན་བསྲེག་ཟིན་པ་དང་སྒོའི་ཐེམ་པའི་འོག་ཏུ་སྦས་ལ་བཞག་གོ། །དེའི་རྗེས་ལ་ལྷོ་ཕྱོགས་ཀྱི་གཤིན་རྗེ་གཤེད་པོའི་ཡུལ་དུ་བསྐྱལ་བར་བསམ་སྟེ། གནས་བསྐྱོད་པའི་མན་ངག་གོ། །དེ་ནས་རྟགས་ཐོན་པ་དང་རྫས་ལྷར་ལ་དབྱུང་བར་བྱའོ། །དེ་ནི་བསྐྲད་པའི་མན་ངག་གོ། །དེ་ནས་འཕྲིན་ལས་བསམ་ཡས་པ་ཡོད་པར་བསྟན་པའི་ཕྱིར། ཇི་སྙེད་འཕྲིན་ལས་བསམ་ཡས་ཀུན། །འགྲོ་བ་བསམ་ཡས་བསམ་པ་རྣམས། །ཇི་སྙེད་འདུལ་བའི་ཐབས་ཚུལ་དུ། །བསམས་ཡས་འཕྲིན་ལས་རྣམ་པར་སྤྲོས་ཞེས་གསུངས་ཏེ། སངས་རྒྱས་ཀྱི་སྐུ་གསུང་ཐུགས་ལས་ཕྲིན་ལས་བསམ་ཡས་ཕར་ཀུན་གསུངས་ཤིང་མཛད་པ་ཡང་། འགྲོ་བ་རིགས་དྲུག་གི་བསམ་པ་བསམ་ཡས་པར་ཡོད་པ་དེ། དེ་རྣམས་གདུག་པའི་ཐབས་སམ་མཐུན་པའི་ཚུལ་དུ་སངས་རྒྱས་ཀྱི་སྐུ་གསུང་ཐུགས་ལས་འཕྲིན་ལས་བསམ་ཡས་པ་རྣམས་སྤྲོས་སོ། །དེ་ནས་ཡང་འཕྲིན་ལས་སྤྲོ་བ་དེ་རྣམས་ཡང་དག་པའི་ངང་དུ་ལྷུན་གྱིས་གྲུབ་པར་བསྟན་པའི་ཕྱིར། མཉམ་ཉིད་དབྱིངས་ཀྱི་ངང་ཉིད་ལས། ལས་ཀྱི་བྱེ་བྲག་རྩིས་ལས་འདས། །བྱ་མེད་ངང་དུ་ལྷུན་གྱིས་གྲུབ་ཅེས་གསུངས་ཏེ། མཉམ་ཉིད་གཉིས་སུ་མེད་པའི་ངང་ཉིད་ལས། ཕྱི་དང་ནང་དུ་སྣང་བ་ཐམས་ཅད་འབྱུང་ཡང་། ལས་ཀྱི་བྱེ་བྲག་བགྲང་ལས་འདས་ཏེ། དེ་ཐམས་ཅད་ཀྱང་ཡེ་ནས་མ་བཅོས་པ་བརྗོད་པའི་ཐ་སྙད་དང་བྲལ་བའི་ངང་དུ་ཡེ་ནས་ལྷུན་གྱིས་གྲུབ་པ་སྟེ། མ་བཅོས་པའི་དོན་དམ་པའི་བདེན་པའོ། །འཕྲིན་ལས་སོ་སོའི་འདུལ་ཚད་ནི། ཀུན་རྫོབ་ཀྱི་བདེན་པ་རྣམ་པར་གཉིས་སུ་འདུ་ཤེས་བཅོམ་ལྡན་འདས་དཔལ་ཀུན་ཏུ་བཟང་པོས་དེ་སྐད་ཅེས་གསུངས་སོ། །ལས་ཀྱི་རིམ་པར་ཕྱེ་ནས་བསྟན་པ་ལ་ནི་ལས་ཀྱི་རིམ་པ་ཕྱེ་བའི་ལེའུའོ། །བདུད་རྩི་ཐིགས་པ་ཞེས་རྒྱ་ཆེར་བཤད་པ་ལས། བདེན་པ་གཉིས་ཀྱི་བཤད་པའི་ལེའུ་སྟེ་བཅུ་གཅིག་པའོ།། །།དེ་ནས་ཡང་ལས་ཀྱི་རིམ་པ་ཕྱེ་བ་ལ་སོགས་པ་གསུངས་ཀྱང་དམ་ཚིག་འདི་མ་བསྲུང་ན་འབྲས་བུ་འགྲུབ་པར་མི་འགྱུར་བས་དེ་བསྟན་པའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། དམ་ཚིག་གསང་བ་འདི་གསུངས་སོ། །ཞེས་བྱ་བ་ནི། མི་འདའ་བའི་ཕྱིར་དམ་ཚིག་སྟེ། རྟོགས་འདུལ་དམ་ཚིག་དེ་སྐད་སྤྲོས། །སྤྲོས་མེད་དབྱིངས་ལ་གཡོས་པ་མེད། །ཅེས་བྱ་བ་གསུངས་སོ། །འདི་ནས་མར་སྤྱིའི་དམ་ཚིག་གསུངས་ཏེ། ཨེ་མའོ་ཞེས་པ་ནི་ངོ་མཚར་བའི་ཚིག་སྟེ། གང་ལ་ངོ་མཚར་ན་སྐུ་གསུང་ཐུགས་ཀྱི་དམ་ཚིག་རྩ་བ་དང་ཡན་ལག་ཏུ་བཅས་པ་ལ་ངོ་མཚར་བའོ། །སྣ་ཚོགས་ལོག་རྟོག་བསམ་ཡས་ལ་ཞེས་བྱ་བ་ནི། སེམས་ཅན་གྱི་བསམ་པ་ལོག་པར་རྟོག་པ་མི་མཐུན་བསམ་ཡས་པ་ལ། དེ་རྣམས་ཀྱི་རྟོག་པ་འདུལ་བའི་ཕྱིར། རྩ་བ་དང་ཡན་ལག་ཏུ་བཅས་པའི་དམ་ཚིག་དེ་སྙེད་ཅིག་སྤྲོས་ཏེ། ཆོས་ཉིད་ཀྱི་དོན་གྱི་ངོ་བོ་ལ་ནི་སྤྲོས་པ་མེད་དེ། ཡང་དག་པའི་དབྱིངས་ལ་གཡོས་པ་མེད་དོ། །གཉིས་སུ་མེད་པའི་ཡེ་ཤེས་དེ་ནི་སྔགས་ཀྱིས་འདུལ་བ་ཆེན་པོ་སྟེ། བསྲུང་བ་མེད་པའི་བསྲུང་བ་ཆེན་པོའི་འོ། །འདི་ནི་དམ་ཚིག་རྡོ་རྗེ་སྟེ། ཞེས་བྱ་བ་ནི་གོང་དུ་གཉིས་མེད་པའི་ཡེ་ཤེས་འདི་ཉིད་དམ་ཚིག་སྟེ། དེ་ཅིའི་ཕྱིར་ཞེ་ན། རྣམ་པར་རྟོ་ག པར་མི་འགྱུར་བའི་ཕྱིར་རོ། །དེ་ཉིད་རྡོ་རྗེ་སྟེ་དངོས་པོ་མཚན་མས་མི་ཤིགས་པའི་ཕྱིར་རོ། །སྐུ་གསུང་ཐུགས་ཀྱི་དམ་ཚིག་ནི། །གྲུབ་ནས་འཇིག་པའི་དུས་མཐའ་མེད། །ཅེས་བྱ་བ་ནི། སྐུའི་དམ་ཚིག་ནི་སྐུར་སྣང་ཐམས་ཅད་དེ་བཞིན་གཤེགས་པའི་སྐུ་སྟེ། བཟང་བ་དང་ངན་པ་དང་། རིང་བ་དང་ཐུང་བ་ལ་ཐ་སྙད་བཏགས་ན་དེ་བཞིན་གཤེགས་པའི་སྐུ་ལ་སྨད་པས་སྐུའི་དམ་ཚིག་ཉམས་པ་ཡིན་ཏེ། དེ་ལྟར་བྱ་བ་མ་ཡིན་ནོ། །གསུང་གི་དམ་ཚིག་ནི་སྒྲར་གྲགས་པ་ཐམས་ཅད་དེ་བཞིན་གཤེགས་པའི་གསུངས་ཏེ། སྒྲ་སྙན་པ་དང་མི་སྙན་པ་ལ་སོགས་པ་ལ་ཐ་སྙད་བཏགས་ན། དེ་བཞིན་གཤེགས་པའི་གསུང་ལ་སྨད་པས་ན། གསུང་གི་དམ་ཚིག་ཉམས་པས། དེ་ལྟར་བྱ་བ་མ་ཡིན་ནོ། །ཐུགས་ཀྱི་དམ་ཚིག་ནི་གཉིས་སུ་མེད་པ་སྟེ། སྤྲོས་པ་དང་བྲལ་བའོ། །དེ་ལ་ཡོད་མེད་དུ་བརྟགས་ན་སྒྲོ་སྐུར་བཏབ་པ་སྟེ། ཐུགས་ཀྱི་དམ་ཚིག་ཉམས་པས་ཡེ་ནས་མ་བཅོས་པ་དང་། བརྗོད་པ་ལས་འདས་པའི་ངང་ལས་མ་གཡོས་པར་བཞག་པའོ། །སྐུ་གསུང་ཐུགས་ཀྱི་དམ་ཚིག་དེ་ལྟར་འགྲུབ་པ་ལ་ནི། འཇིག་པའི་དུས་མཐའ་མེད་དེ། དེའི་ཕྱིར་འགྲུབ་ན་འཇིག་པའི་དུས་མཐའ་མེད་ཅེས་གསུངས་པ་ཡིན་ནོ། །སྐུ་གསུང་ཐུགས་ཀྱི་དམ་ཚིག་དེ་དུས་གསུམ་དུ་ཡེ་ནས་གནས་པའི་ཕྱིར། རྡོ་རྗེ་དམ་ཚིག་ལུ་གུ་རྒྱུད་ཅེས་གསུངས་ཏེ། མི་འབྲལ་བའི་ཕྱིར་རོ། །སྐུ་གསུང་ཐུགས་ལས་རྣལ་འབྱོར་པ་དུས་རྟག་ཏུ་མི་འདའ་བས། རྣལ་འབྱོར་དཀའ་ཐུབ་དམ་ཚིག་ཅེས་གསུངས་ཏེ། རྣལ་འབྱོར་པའི་ལུས་ངག་ཡིད་གསུམ་གྱི་སྡོམ་པའོ། །རྣལ་འབྱོར་པས་སྐུ་གསུང་ཐུགས་དང་བྲལ་ན། སྲོག་དང་འདྲ་བའི་གཉིས་མེད་པའི་ཡེ་ཤེས་མི་འགྲུབ་པ་དེའི་ཕྱིར། དུ་མ་གཅིག་ཏུ་བསྡུས་པའི་སྲོག་ཅེས་གསུངས་ཏེ། སྤྲོས་པ་དང་བྲལ་བ་སྟེ། བཅོས་མ་མ་ཡིན་པའི་དོན་དམ་པའོ། །ཡན་ལག་དམ་ཚིག་འདའ་བར་དཀའ་ཞེས་བྱ་བ་ནི། སྐུ་གསུང་ཐུགས་ཀྱི་དམ་ཚིག་མ་ཉམས་ན་ཡན་ལག་དམ་ཚིག་ཉམས་ཀྱང་མི་ཉམས་པའི་ཕྱིར། འདའ་བར་དཀའ་ཞེས་གསུངས་པའོ། །དེ་ལྟར་སྤྱིར་བསྟན་ནས། ད་འདི་ནས་མར་ནི། རྩ་བའི་དམ་ཚིག་རྒྱས་པར་བསྟན་པའི་ཕྱིར། རྡོ་རྗེ་བླ་མ་སློབ་དཔོན་ཞེས་པ་ལ་སོགས་པ་བསྟན་ཏེ། རྡོ་རྗེ་བླ་མ་སློབ་དཔོན་ལ་ཞེས་བྱ་བ་ནི། སྐུའི་དམ་ཚིག་བསྟན་ཏེ། སློབ་དཔོན་ནི་བཀའ་གཞན་གྱི་བཅག་པར་བྱ་བ་མ་ཡིན་པའི་ཕྱིར། རྡོ་རྗེ་སྤྱི་གཙུག་བསྐུར་བའི་ཕྱིར་བླ་མའི་མན་ངག་བསྟན་པའི་ཕྱིར། སློབ་དཔོན་དེ་ལ་སློབ་མས་སྲོག་ལ་བབ་ཀྱང་བཀུར་བར་བྱའོ། །དེ་ནས་ཡང་སློབ་དཔོན་གྱི་རིམ་པ་བསྟན་པའི་ཕྱིར། དམ་ཚིག་དབང་དང་ཤེས་རྒྱུད་དང་། མན་ངག་འབྲས་བུ་སློབ་དཔོན་ལ་ཞེས་པ་ལ་སོགས་པ་གསུངས་ཏེ། དམ་ཚིག་དབང་གི་སློབ་དཔོན་ནི། དང་པོ་བདག་ལ་དབང་བསྐུར་ཞིང་དམ་ཚིག་སྒྲོག་པའི་སློབ་དཔོན་ནོ། །ཤེས་རབ་རྒྱུད་ཀྱི་སློབ་དཔོན་ནི་བདག་གི་རིགས་ལ་སོགས་པ་ཆོས་སྟོན་པ་སྟེ། ཆོས་སྟོན་པའི་སློབ་དཔོན་ནོ། །མན་ངག་འབྲས་བུའི་སློབ་དཔོན་ནི། ཤེས་རབ་ཀྱི་ཡེ་ཤེས་ཀྱི་སྒོ་ནས་ཁུ་བ་དང་ལྷན་ཅིག་སྐྱེས་པའི་ཡེ་ཤེས་བསྟན་ཅིང་། རང་བཞིན་ལྷན་ཅིག་སྐྱེས་པ་རྟོགས་པར་བྱེད་པའི་སློབ་དཔོན་གསུམ་གྱི་བྱེ་བྲག་དེ་ལ་ཇི་བཀུར་བར་བྱ་བ་ཡིན་ནམ། གཅིག་གི་མཚན་ཉིད་ཡིན་མཉམ་པ་ལ་དེ་བསལ་བར་བྱ་བའི་ཕྱིར། ལྟ་ཞིང་བཀུར་བར་བྱ་བ་ནི། ཕ་དང་མ་དང་མིག་འབྲས་ལྟར། །བཀུར་ཞིང་གཅེས་པར་བྱ་བ་ཡིན། །ཞེས་གསུངས་ཏེ། དམ་ཚིག་དབང་གི་སློབ་དཔོན་ལ། །བཀུར་བར་བྱ་བའི་རིམ་པ་ནི། །འཇིག་རྟེན་ཕ་ལས་གཅེས་པ་མེད་པས་ཕ་བཞིན་དུ་བཀུར་བར་བྱའོ། །ཤེས་རབ་ཀྱི་རྒྱུད་ཀྱི་སློབ་དཔོན་ལ་ནི་འཇིག་རྟེན་ན་ཕ་ལས་གཅེས་ཤིང་གཉེན་པ་མེད་པས་ན། ཕ་བཞིན་དུ་བཀུར་བར་བྱའོ། །མན་ངག་འབྲས་བུའི་སློབ་དཔོན་ལ་ནི། མིག་གི་འབྲས་བུ་ལྟར་བཀུར་བར་བྱའོ། །ཅིའི་སྒོ་ནས་ཀྱང་བཀུར་ཞིང་གཅེས་པར་བྱ་བ་ཡིན་ནོ། །དེའི་ཕྱི་བཞིན་བེའུ་ལྟར་འབྲང་ཞེས་བྱ་བ་ནི། སློབ་དཔོན་གསུམ་ག་ལ་ཡང་སྟེ། ལྷག་པར་ཡང་མན་ངག་སྟོན་པའི་སློབ་དཔོན་དེའི་ཕྱི་ནས་བེའུ་བཞིན་འབྲང་པ་སྟེ་མཐུན་པའི་དཔེའོ། །སྣ་ཚོགས་སྣ་ཚོགས་ཅི་བསྒོ་ནས། །མཉེས་ཤིང་དགོངས་པ་བསྐང་བ་ཡིན་ཞེས་བྱ་བ་ནི། སློབ་དཔོན་གྱི་ཐུགས་ཀ་དང་ཇི་ལྟར་འཚམ་པ་བཞིན་བྱ་བ་ཡིན་ཏེ། མཉེས་པར་བྱ་བའི་ཐ་ཚིག་གོ། །བླ་མ་སྤུན་དང་མིང་སྲིང་ལ། །མན་ངག་བྱ་བའི་སེམས་བོར་ཏེ། །རྡོ་རྗེ་ཐེག་པའི་སྤུན་ཡིན་པས། །གཅིག་ལ་གཅིག་ནི་མིག་བཞིན་ལྟ། །ཞེས་བྱ་བ་ནི། བླ་མའི་སྤུན་ཟླ་དང་རང་གི་ཉལ་རོག་ཕོ་མོ་གང་ཡིན་པ་དེ་ལ་མངན་བྱ་བ་མ་ཡིན་ཏེ། ཕྱིན་ཅི་ལོག་གི་སེམས་དོར་བར་བྱའོ། །དེ་ལ་མངན་མི་བྱ་བ་ཅི་ཕྱིར་ཞེ་ན། རྡོ་རྗེ་ཐེག་པའི་སྤུན་ཡིན་པས། ཞེས་གསུངས་ཏེ་གསང་སྔགས་རྡོ་རྗེ་ཐེག་པ་སྤུན་ཡིན་པས། དེ་ལ་ནི་མངན་བྱ་བ་ཡང་སྤང་བར་བྱའོ། །འོ་ན་ཇི་ལྟར་བལྟ་ཞེ་ན། གཅིག་ལ་གཅིག་ནི་མིག་བཞིན་བལྟ་ཞེས་གསུངས་ཏེ། གཅིག་ལ་གཅིག་ནི་མིག་གི་ནང་དུ་རྡུལ་སོང་ན་མི་བཟོད་པ་དེ་ལ་རྡུལ་སོང་གི་དོགས་ནས་བསྲུང་བར་ལྟར། གཅིག་ལ་གཅིག་ཉེས་པས་བསྲུང་ཞིང་ལྟ་བར་བྱའོ། །འདི་ནི་སྐུའི་ས་མ་ཡའོ། །ཞེས་བྱ་བ་ནི། འོར་གསུངས་པ་དེ་ནི་སྐུའི་དམ་ཚིག་གོ། །དེ་ནས་ཡང་གསུང་གི་དམ་ཚིག་ནི། ༀ་བཛྲ་ཀཱི་ལི་ཀཱི་ལ་ཡ་སུམ་བྷ་ནི་ཧཱུྃ་ཆེ་གེ་མོ་མ་ར་ཡ་ཕཊ་ཅེས་དབུལ་བར་བྱ་བའོ། །དེ་ནས་ཡང་དྲག་པོའི་གཏོར་མ་བསྟན་པའི་ཕྱིར། ལྕགས་ཕྱེ་དང་འབྲུ་ནག་པོ་ལ་བྱས་པའི་གཏོར་མ་དེ་དྲག་པོའི་དུས་སུ་ཕྲ་མེན་མ་བརྒྱད་དང་། སྲིན་མོའི་ཚོགས་དང་། བདག་ཉིད་ཆེན་མོ་དང་། ས་བདག་ཆེན་མོ་ལ་སོགས་པ་བསྐུལ་ལ་གཏོར་མ་དེ་གཟུགས་ལ་བརྡེག་ཅིང་། གསོད་པའི་ལས་བྱའོ། །ཤ་ཁྲག་སྣ་ཚོགས་ལ་བྱས་པའི་གཏོར་མ་ནི་ལས་ཀྱི་ལྷ་འཁོར་དང་བཅས་པ་ནི་བསྔོས་པས་ལས་ལ་བཏང་ངོ་། །དེ་ནས་ཡང་དཀྱིལ་འཁོར་དུ་ཇི་ལྟར་བྱ་བ་བསྟན་པའི་ཕྱིར། ཨེའི་ཚོགས་ཀྱི་དཀྱིལ་འཁོར་དུ་ཞེས་ལས་ཀྱིས་འཆེལ་བ་རྣམས་བརླག་པར་གྱུར་པས་དབྱིངས་སུ་རོལ་ཞེས་བྱ་བ་གསུངས་ཏེ། ཨེ་ནི་ཆོས་འབྱུང་བའི་དཀྱིལ་འཁོར་ཏེ། དེའི་གནས་སུ་བཅོམ་ལྡན་འདས་ཁྲག་འཐུང་གི་ཚོགས་གསལ་བར་བསྒོམས་ནས། དེའི་ངང་དུ་ཁམས་གསུམ་གྱི་སེམས་ཅན་ཞེ་སྡང་ལས་ཀྱིས་འཆེལ་བ་རྣམས། ཞལ་དུ་གསོལ་ནས། དངོས་པོའི་ཕུང་པོ་བརླག་པར་བྱ་བ་ནས་ཡང་དག་པའི་ཤེས་པ་ནི་ཡེ་ཤེས་ཀྱི་དབྱིངས་སུ་གསལ་བར་བྱས་ཏེ། བཞུགས་པའི་དོན་དམ་པའི་བདེན་པའོ། །རྫས་ལ་སོགས་པས་འབྲས་བུ་ལོངས་སྤྱོད་མི་བསླུ་བས་བདེན་པ་སྟེ། ཀུན་རྫོབ་བོ། །དེ་ནས་ཡང་བཀྲད་པ་ཡང་བྱ་སྟེ། དུར་ཁྲོད་ཀྱི་རས་མ་ལ་འཁོར་ལོ་རྩིབས་བརྒྱད་བྲིས་པ་དེའི་དབུས་སུ། རྔ་མོའི་གཟུགས་གཅིག་བྲིས་པ་དེ་ལ་གཟས་པ་པོ་གང་ཡིན་པ་སྐྱོན་ལ། དབང་གིས་དགོངས་པ་ཇི་ལྟ་བ་བཞིན་དུ་བྱས་ཏེ། གཟུགས་ལ་བསྟིམ་ལ། འཁོར་ལོ་རྩིབས་བརྒྱད་རྣམས་ལ་ཡང་། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཛ་ཛ་ཞེས་པ་བྲིས་ཏེ། འོག་གི་ཐོད་ཀ་ནས་གཡོན་བསྐོར་དུ་བསྐོར་ནས་ཏེ། རྣལ་འབྱོར་པ་ཉིད་ཀྱིས་བཟླས་པའི་སྔགས་དེ་ཡིན་ནོ། །ཏིང་ངེ་འཛིན་གྱིས་ཀྱང་ཁོའི་ཁང་ཁྱིམ་གྱི་འོག་ཏུ་རླུང་གི་དཀྱིལ་འཁོར་བསྒོམས་ལ། དེའི་མནར་བཞི་བསྐྱེད་པའི་རྔ་མོའི་མིག་བཞི་རང་དབང་མེད་པར་བསྐྱོད་ནས། ཁྲོ་བོ་ལ་ལས་ནི་རྔ་མོའི་སྣ་ནས་དྲངས་ཏེ་ཁྲིད་ལ་ལས་ནི་ཐོ་བ་དང་རལ་གྲི་དང་དགྲ་སྟ་ཐོགས་ནས་དེད་ནས་འགྲོ་བར་དམིགས་ལ་བསྙེན་པ་ཐོན་པ་དང་། བསྒྲུབ་པ་ལ་འཇུག་སྟེ། འཛབ་གྲངས་ཁྲི་ཐོན་པ་དང་ལས་ལ་སྦྱར་ཏེ། ལས་ཀྱི་དུས་སུ་སྟོང་ཐོན་པ་ཡང་དུར་ཁྲོད་ཀྱིས་མ་ཡལ་བཏུབ་ལ། དབང་གི་ཚུལ་དུ་སྦྱིན་སྲེག་བྱ་སྟེ། བསྐུལ་བའི་སྔགས་བསྐྲད་པའི་སྔགས་ཉིད་ཀྱིས་བྱ་སྟེ། སྦྱིན་སྲེག་ཟིན་པ་དང་། སྒོའི་ཐོན་པའི་འོག་ཏུ་སྦས་ལ་བཞག་གོ། །དེའི་རྗེས་ལ་ལྷོ་ཕྱོགས་ཀྱི་ཁམས་གཤིན་རྗེ་རྒྱལ་པོའི་ཡུལ་དུ་བསྐྱལ་བར་བསམ་སྟེ། གནས་བསྐྱོད་པའི་མན་ངག་གོ། ། དེ་ནས་སྔགས་ཐོན་པ་དང་། རྫས་དེ་སླར་ལ་དབྱུང་བར་བྱའོ། །དེ་ནི་བསྐྲད་པའི་མན་ངག་གོ། །དེ་ནས་ཡང་འཕྲིན་ལས་བསམ་ཡས་པར་ཡོད་པར་བསྟན་པའི་ཕྱིར། ཇི་སྙེད་ཕྲིན་ལས་བསམ་ཡས་ཀུན། །འགྲོ་བ་བསམ་ཡས་བསམ་པ་རྣམས། །ཇི་སྙེད་འདུལ་བའི་ཐབས་ཚུལ་དུ། །བསམ་ཡས་ཕྲིན་ལས་རྣམ་པར་སྤྲོ། །ཞེས་གསུངས་ཏེ། སངས་རྒྱས་ཀྱི་སྐུ་གསུང་ཐུགས་ཀྱི་འཕྲིན་ལས་བསམ་ཡས་པ་གསུངས་ཤིང་མཛད་པ་ཡང་འགྲོ་བ་རིགས་དྲུག་གི་བསམ་ཡས་ཡོད་པ་དེ་རྣམས་འདུལ་བའི་ཐབས་སམ་མཐུན་པའི་ཚུལ་དུ། སངས་རྒྱས་ཀྱི་སྐུ་གསུང་ཐུགས་ལས་ཕྲིན་ལས་བསམ་ཡས་པར་སྤྲོས་པའོ། །དེ་ནས་ཡང་འཕྲིན་ལས་སྤྲོས་པ་དེ་རྣམས་ཡང་དག་པའི་ངང་དུ་ལྷུན་གྱིས་གྲུབ་པར་བསྟན་པའི་ཕྱིར། མཉམ་ཉིད་དབྱིངས་ཀྱི་ངང་ཉིད་ལས། ལས་ཀྱི་བྱེ་བྲག་རྩིས་ལས་འདས། །བྱ་མེད་ངང་དུ་ལྷུན་གྱིས་གྲུབ་ཅེས་གསུངས་ཏེ། མཉམ་པ་ཉིད་ཀྱི་དབྱིངས་གཉིས་སུ་མེད་པ་བསྟན་པའི་ཕྱིར། དང་པོ་ཐ་ཚིག་བཅས་པ་ལྟར། ཞེས་བྱ་བ་ལ་སོགས་པ་བསྟན་ཏེ། དང་པོ་ཐ་ཚིག་བཅས་པ་ལྟར་ཞེས་བྱ་བ་ནི། དང་པོ་དབང་བསྐུར་བའི་དུས་སུ་ཇི་ལྟར་དམ་བཞིན་དུ་སྔགས་རྣམས་དུས་རྟག་ཏུ་རྒྱུན་མི་ཆད་པ་དང་ལྷའི་སྐུ་ཕྱག་རྒྱ་དུས་རྟག་ཏུ་བཅས་པ་ནི་ཐུན་མོང་དང་བཅས་ཐུན་མོང་མ་ཡིན་པའི་དངོས་གྲུབ་འབྱུང་བའི་རྒྱུ་ཡིན་པས་སྔགས་དང་ཕྱག་རྒྱ་འདི་དག་ལུས་ངག་ཡིད་གསུམ་གྱིས་སྒོ་ནས་དུས་རྟག་ཏུ་བརྟན་པོར་གཟུང་ནས་མི་འབྲལ་བ་ནི་གསུང་གི་ས་མ་ཡ་རུ་སྟོན་པས་བཤད་དོ། །དེ་ནི་གསུང་གི་དམ་ཚིག་གོ། །དེ་ནས་ཡང་ཐུགས་ཀྱི་དམ་ཚིག་བསྟན་པའི་ཕྱིར། ཕྱི་གསང་བཞི་དང་བར་གསང་བཞི། །ཞེས་པ་ལ་སོགས་པ་གསུངས་ཏེ། ཕྱི་གསང་བཞི་དང་བར་གསང་བཞི་ཞེས་བྱ་བ་ནི། དཀྱིལ་འཁོར་གྱི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་ཕྱག་རྒྱའི་མཚན་ཉིད་རྣམས་ནི་ཕྱི་གསང་བཞིའོ། །བར་གསང་བཞི་ནི། བདེ་བ་ཆེན་པོའི་འཁོར་ལོ་དང་། ལོངས་སྤྱོད་ཀྱི་འཁོར་ལོ་དང་། ཆོས་ཀྱི་འཁོར་ལོ་དང་། སྤྲུལ་པའི་འཁོར་ལོ་དང་བཞིའོ། །ཡང་གསང་བར་འོས་པ་དང་ཞེས་བྱ་བ་ནི། དགའ་བ་བཞི་ཡིས་མཚན་ནས་ཡང་དག་པའི་ཡེ་ཤེས་ཉམས་སུ་ལེན་པའི་གསང་བར་འོས་པའོ། །དེ་ལྟ་བུའི་དོན་གཞན་ལ་མ་སྨྲ་ཞིག་ཅེས་དང་སློབ་དཔོན་གྱི་གཉེར་བའི་གསང་བའི་མན་ངག་འབྲས་བུ་རྣམས་གཞན་དང་གཞན་དག་འདི་ལྟ་བུ་ཡིན་ནོ། །ཞེས་སྣོད་ངན་པ་ཕལ་ལ་མི་སྤེལ་བ་འདི་ནི་ཐུགས་ཀྱི་ས་མ་ཡའོ། །དེ་ལྟ་བུ་སྐུ་གསུང་ཐུགས་ཀྱི་དམ་ཚིག་འདི་ནི། ཁམས་གསུམ་དུ་འཇིག་པའི་དུས་མཐའ་མེད་དེ། བསྲུང་བར་བྱ་བའོ། །སྤྱིར་ས་མ་ཡ་ནི་རྡོ་རྗེ་སྟེ་ཞེས་གསུངས་སོ། །དེ་དག་ཉམས་པར་གྱུར་ན་ནི། །རྩ་བ་ཉམས་ཏེ་རིགས་རླག་འགྱུར། །ཞེས་བྱ་བ་ནི་སྐུ་གསུང་ཐུགས་ཀྱི་དམ་ཚིག་དེ་ཉམས་པར་གྱུར་ན། རྩ་བའི་དམ་ཚིག་ཉམས་ཏེ། འབྲས་བུ་དེ་བཞིན་གཤེགས་པའི་རིགས་བརླག་པར་འགྱུར་རོ། །དེ་ནི་ཉམས་པའི་སྐྱོན་ནོ། །དེ་ནས་ཡང་ཕ་རོལ་པའི་དམ་ཚིག་ཉམས་པའི་རྣལ་འབྱོར་པའི་སྐྱོན་བསྟན་པར་བྱ་སྟེ། དེའི་ཕྱིར་ཉམས་འགྱུར་ཉེས་པ་བརྗོད་མི་ལོང་ཞེས་བྱ་བ་གསུངས་ཏེ། ཕ་རོལ་པོས་སྐུ་གསུང་ཐུགས་ཀྱི་དམ་ཚིག་ཉམས་ན་དེའི་ཉེས་པ་བརྗོད་ཀྱིས་མི་ལང་སྟེ། དེ་ནི་རྩ་བའི་དམ་ཚིག་ཉམས་པ་ཡིན་པས་དམ་ལ་གནས་པའི་རྣལ་འབྱོར་པ་དེ་དང་ཉམས་པ་གཉིས་སྐད་ཅིག་ཙམ་ཡང་ཡུད་ཙམ་ཡང་སྨྲ་བར་མི་བྱའོ། །སྨྲས་ན་སྐྱོན་ཅི་ཡོད་ཅེ་ན། དེ་བསྟན་པར་བྱ་བའི་ཕྱིར། སྨྲས་ན་འབྲས་བུ་ཉམས་པར་འགྱུར་ཞེས་གསུངས་ཏེ། སྨྲས་པས་ཉིད་ཀྱིས་རྩ་བའི་དམ་ཚིག་ཉམས་པར་འགྱུར་རོ། །དེ་ནས་ཡང་ཡན་ལག་གི་དམ་ཚིག་བསྟན་པའི་ཕྱིར། འདོད་ཆགས་ཞེ་སྡང་གཏི་མུག་དང་། ཞེས་བྱ་བ་ལ་སོགས་པས་བསྟན་ཏེ། འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ཆེན་པོ་ནི། །བདེར་གཤེགས་ལྔའི་རང་བཞིན་པས་ཞེས་བྱ་བ་ནི། འདོད་ཆགས་ནི་འདོད་ཅིང་ཆགས་པ་སྟེ། དེ་སྤངས་ན་གྲོལ་བ་མ་ཡིན། འདོད་ཆགས་ཀྱི་མཚན་ཉིད་ནི། གཉིས་སུ་མེད་པའི་ཡེ་ཤེས་འདོད་ཅིང་། ཆོས་ཉིད་ལ་ཆགས་པས་རྣམ་པར་དག་སྟེ། འོད་དཔག་མེད་ཀྱི་རང་བཞིན་པས་མི་སྤང་ངོ་། །ཞེ་སྡང་ནི་ཕ་རོལ་ཞེ་སྡང་བ་དེ། དེ་སྤངས་པས་གྲོལ་བ་ནི་མ་ཡིན་ཏེ། ཞེ་སྡང་གི་མཚན་ཉིད་ནི། ཕྱིན་ཅི་ལོག་གི་ཉོན་མོངས་པ་ལ་ཞེ་སྡང་ཞིང་མེད་པར་བྱེད་པས་ཞེ་སྡང་རྣམ་པར་དག་པ་སྟེ། མི་བསྐྱོད་པའི་རང་བཞིན་པས་མི་སྤང་ངོ་། །གཏི་མུག་ནི་མི་ཤེས་ཤིང་ཚོར་བ་མེད་པ་སྟེ། དེ་སྤངས་ནས་གྲོལ་བ་མ་ཡིན་ཏེ། གཏི་མུག་གི་མཚན་ཉིད་ནི་ཕྱིན་ཅི་ལོག་གི་རྟོག་པ་གང་ཡང་འབྱུང་བ་མ་ཡིན་ཞིང་། ཤེས་པ་དང་བརྗོད་པ་ལས་འདས་ཤིང་བྲལ་བས་ན་གཏི་མུག་རྣམ་པར་དག་པ་སྟེ། རྣམ་པར་སྣང་མཛད་ཀྱི་རང་བཞིན་པས་མི་སྤང་བ་དང་། ང་རྒྱལ་ནི་མ་རིགས་པས་སྨྲ་བ་སྟེ། དེ་ཡང་སྤང་ནས་གྲོལ་བ་མ་ཡིན་ཏེ། ང་རྒྱལ་གྱི་མཚན་ཉིད་དེ་ནི། ཆོས་ཉིད་གཉིས་སུ་མེད་པའི་དོན་ལ་གནས་ཤིང་། ཕྱི་ཅི་ལོག་གི་དོན་ལ་ཉོན་མོངས་པ་ནི་མི་གནས་པས་ང་རྒྱལ་བ་སྟེ། ང་རྒྱལ་རྣམ་པར་དག་པ་སྟེ་རིན་ཆེན་འབྱུང་ལྡན་ཀྱི་རང་བཞིན་པས་མི་སྤང་བ་དང་། ཕྲག་ནི་གཞན་གྱི་ཡོན་ཏན་ཕྲག་དོག་སྟེ། དེ་སྤང་ནས་གྲོལ་བ་མ་ཡིན་ཏེ། ཕྲག་གི་མཚན་ཉིད་ནི། ཆོས་ཀྱི་དབྱིངས་སྤྲོས་པའི་མཐའ་བརྒྱད་དང་བྲལ་བས། སྤྲོས་པ་མེད་པར་ཕྲག་དོག་སྟེ། ཕྲག་དོན་རྣམ་པར་དག་པས་གདོན་མི་ཟ་བར་འགྲུབ་པའི་རང་བཞིན་བས་མི་སྤང་བ་སྟེ། དེའི་ཕྱིར་ཆེན་པོ་ཞེས་གསུངས་ཏེ། ཆུང་ངུ་རྣམ་པར་དཀར་བའོ། །དེ་ནི་མི་སྤང་བའི་དམ་ཚིག་ལྔའོ། །དེ་ནས་ཡང་དོར་བར་མི་བྱ་བའི་དམ་ཚིག་བསྟན་པའི་ཕྱིར། ཤ་ཆེན་བཤང་གཅི་ཁུ་བ་ཁྲག །དབང་བའི་རྒྱུ་སྟེ་བདུད་རྩི་སྤོས། དོར་བར་མི་བྱ་ས་མ་ཡ་ཧོ། །ཞེས་གསུངས་ཏེ། ཤ་ཆེན་དང་བཤང་བ་དང་། གཅི་བ་དང་ཁུ་བ་དང་། ཁྲག་ལྔ་ནི་རྣམ་པར་རྟོག་པས་མི་གཙང་བ་དང་། སོགས་པས་བདུད་རྩི་སྟེ་དེ་ལས་ཟློག་པའི་ཕྱིར། དག་པའི་རྒྱུ་སྟེ་བདུད་རྩི་དངོས་ཞེས་གསུངས་ཏེ། ཤ་ཆེན་ལ་སོགས་པ་ལྔ་ནི་ཡེ་ནས་རྣམ་པར་དག་པའི་ཡེ་ཤེས་ལྔའི་དངོས་པོ་སྟེ། དེ་རྣམ་པར་རྟོག་པའི་བདུད་ལས་ཟློག་ནས་བདུད་རྩི་ཡེ་ཤེས་ལྔའི་རང་བཞིན་ཏེ། མི་གཙང་བ་དེ་ནས་དོར་བར་བྱ་བ་མ་ཡིན་ཏེ། ཡེ་ཤེས་ལྔའི་རང་བཞིན་པས་དོར་བར་མི་བྱ་བའི་ས་མ་ཡའོ། །དེ་ནི་དོར་བར་མི་བྱ་བའི་དམ་ཚིག་ལྔའོ། །དེ་ནས་སྤྱད་པར་བྱ་བའི་དམ་ཚིག་བསྟན་པའི་ཕྱིར། རྫུན་དང་ཚིག་རྩུབ་སྨྲ་བ་དང་། སྦྱོར་དང་སྒྲོལ་བའི་དམ་ཚིག་ནི། བདེར་གཤེགས་ལྔའི་མཛོད་སྤྱོད་པས། །རྟག་ཏུ་སྤྱོད་པའི་དམ་ཚིག་གོ། །ཞེས་གསུངས་ཏེ། བརྫུན་ནི་ཆོས་ཉིད་དངོས་པོ་མེད་པའི་རང་བཞིན་ལ། འདི་ལྟ་བུ་ཡིན་ནོ་ཞེས་དྲང་བའི་དོན་དུ་སྟོན་པའི་རྫུན་ཏེ། མི་སྤྱོད་པའི་མཛད་པ་ཡིན་པས་རྣལ་འབྱོར་པས་ཀྱང་སྤྱོད་པར་བྱ་བ་ཡིན་པ་དང་། ཚིག་རྩུབ་པ་ནི་འདི་ལྟར་སྣང་བ་ཐམས་ཅད་འཁྲུལ་པ་ཡིན་ཏེ། ཡོད་པ་མ་ཡིན་ནོ། །ཞེས་འབྱུང་བ་ནི། ཚིག་རྩུབ་མོ་སྟེ་རྣམ་པར་སྣང་མཛད་ཀྱི་མཛད་སྤྱོད་ཡིན་པས། རྣལ་འབྱོར་པས་ཀྱང་སྤྱད་པར་བྱ་བ་ཡིན་པ་དང་། རྐུ་བ་ནི་འདི་ལྟར་སྣང་བའི་ཆོས་ཐམས་ཅད་ཡེ་ནས་མ་བཅོས་པའི་རང་བཞིན་འོད་གསལ་བ་དེ་ནི་རིན་པོ་ཆེ་འདྲ་བ་ཡིན་པ་འདི་ནི་རྟོགས་པ་བྱ་བ་ཡིན་ཞིང་འདི་ནི་ཉམས་སུ་བླང་བའོ། །ཞེས་ཕྱིན་ཅི་ལོག་ཐམས་ཅད་ཡང་དག་པའི་དབྱིངས་སུ་རྐུ་བ་ནི། རིན་ཆེན་འབྱུང་ལྡན་གི་མཛད་སྤྱོད་དེ། རྟག་ཏུ་རྣལ་འབྱོར་པས་སྤྱོད་པར་བྱའོ། །སྦྱོར་བ་ནི་འདི་ལྟར་སྣང་བ་ཐམས་ཅད་ཀུན་རྫོབ་ཏུ་ལྷ་དང་ལྷ་མོའི་ངང་དུ་འབྱོར་ལ། དོན་དམ་པར་སྐྱེ་བ་མེད་པའི་ངང་དུ་འབྱོར་པ་ནི། འོད་དཔག་ཏུ་མེད་པའི་མཛད་སྤྱོད་དོ། །རྣལ་འབྱོར་པས་རྟག་ཏུ་སྤྱད་པར་བྱའོ། །སྒྲོལ་བ་ནི་ཁམས་གསུམ་གྱི་སེམས་ཅན་ཐམས་ཅད་རྣམ་པར་རྟོག་པས་བཅིངས་པ་ཐམས་ཅད་སྐྱེ་བ་མེད་པའི་ངང་དུ་སྒྲོལ་ལ། སྐྱེ་བ་མེད་ཅེས་བྱ་བ་དེ་ཡང་མི་གནས་པར་སྒྲོལ་བ་ནི། གདོན་མི་ཟ་བར་འགྲུབ་པའི་མཛད་སྤྱོད་དོ། །རྣལ་འབྱོར་པས་དུས་རྟག་ཏུ་སྤྱད་པར་བྱ་བའི་ཕྱིར། བདེ་བར་གཤེགས་པ་ལྔའི་མཛད་སྤྱོད་པས་རྟག་ཏུ་སྤྱད་པའི་དམ་ཚིག་གོ། །ཞེས་གསུངས་ཏེ། དེ་ནི་སྤྱད་པར་བྱ་བའི་དམ་ཚིག་ལྔའོ། །མི་སྤང་མི་དོར་སྤྱོད་པར་བྱ་ཞེས་བྱ་བ་ནི། ཉོན་མོངས་པ་ལྔ་བདེ་བར་གཤེགས་པ་ལྔའི་རང་བཞིན་པས། མི་སྤང་བ་དང་། བདུད་རྩི་ལྔ་ཡེ་ཤེས་ཀྱི་རང་བཞིན་པས་མི་དོར་བ་དང་། བརྫུན་དང་ཚིག་རྩུབ་ལ་སོགས་པ་བདེ་བར་གཤེགས་པའི་མཛད་སྤྱོད་ཡིན་པས། སྤྱད་པར་བྱ་བའོ། །ཡན་ལག་བཅོ་ལྔའི་དམ་ཚིག་ནི། །ཞེས་བྱ་བ་ནི། མི་སྤང་བར་བྱ་བའི་དམ་ཚིག་ལྔ་དང་། མི་དོར་བར་བྱ་བའི་དམ་ཚིག་ལྔ་དང་། སྤྱད་པར་བྱ་བའི་དམ་ཚིག་ལྔ་སྟེ་བཅོ་ལྔའོ། །སྲོག་གི་ཕྱིར་ཡང་མི་གཏོང་ཞེས་བྱ་བ་ནི། རང་ལ་ཕན་པའི་སྲོག་ཡིན་ཏེ། སྲོག་མ་ཆད་ན་མི་འཆི་བ་དང་འདྲ་བར་གཉིས་མེད་པའི་ཡེ་ཤེས་ཏེ། རྟོག་ཤིང་ཁོང་དུ་ཆུད་ནས་སྐྱེ་བ་མེད་པའི་དབྱིངས་རྣམ་པར་དག་སྟེ། དེ་ལ་འཆི་བ་ག་ལ་ཡོད་དེ། འབྲས་བུ་དེ་ཐོབ་པ་བྱ་བའི་ཕྱིར་མི་བཏོང་། གང་མི་གཏང་ཞེ་ན། རྩ་བ་དང་ཡན་ལག་ཏུ་བཅས་པའི་དམ་ཚིག་ཏུ་ནི་གཉིས་མེད་པའི་ཡེ་ཤེས་ཐོབ་པར་བྱ་བའི་གཞིའམ་རྨང་ཡིན་པའི་ཕྱིར་ན་མི་བཏང་བའོ། །བཏང་ན་སྐྱོན་ཅི་ཡོད། དེ་བསྟན་པའི་ཕྱིར། བཏང་ན་འབྲས་བུ་ག་ལ་འབྱུང་ཞེས་གསུངས་ཏེ། རྩ་བ་དང་ཡན་ལག་ཏུ་བཅས་པའི་དམ་ཚིག་མེད་ཅིང་མ་བསྲུངས་ན། སྲོག་དང་འདྲ་བའི་འབྲས་བུ་ག་ལ་འབྱུང་སྟེ། མི་འབྱུང་སྟེ་བརླག་པར་འགྱུར་བའི་ཐ་ཚིག་གོ། །དེའི་ཉེས་པ་བརྗོད་ལས་འདས་ཞེས་པ་ནི། རྩ་བ་དང་ཡན་ལག་ཏུ་བཅས་པའི་དམ་ཚིག་ཉམས་པའི་ཉེས་པ་ནི། བརྗོད་པ་ལས་འདས་ཏེ་བརླག་པར་འགྱུར་བའི་ཐ་ཚིག་གོ། །དེ་ནས་ཡང་དམ་ཚིག་ཉམས་པ་དེ་ཐུགས་རྗེས་མ་གཟུང་ན་དམྱལ་བར་འགྲོ་བས། དེ་ཐུགས་རྗེས་གཟུང་བའི་ཕྱིར། སྙིང་ནས་སློབ་དཔོན་སྨོད་པ་དང་། །ཞེས་པ་ལ་སོགས་པ་བསྟན་ཏེ། སྙིང་ནས་སློབ་དཔོན་སྨོད་པ་དང་། །ཞེས་བྱ་བ་ནི། དང་པོ་ཤེས་པ་སློབ་བུའི་དུས་ན་སློབ་དཔོན་དེ་ལ་ཁ་འཇམ་དང་། སྤྱོད་པ་ལེགས་མོས་འདྲིས་པར་བྱེད་ཅིང་། ཤེས་པ་ལོབས་ནས་སློབ་དཔོན་དེ་ཡིས་བྱ་བ་མེད་པའི་སྤྱོད་པ་བྱེད་ཅིང་། ཆོས་དང་སློབ་དཔོན་དེ་ལས་མ་འོངས་བར་གཞན་ལ་འོང་བ་བསྐུར་ཟེར་ཞིང་རང་གི་ཤེས་པ་ལས་སློབ་དཔོན་གྱིས་མི་ཤེས་པ་སྐད་ཟེར་བ་ནི། སྙིང་ནས་སློབ་དཔོན་སྨོད་པ་དང་། དེ་མ་བསྒྲལ་ན་མནར་མེད་དུ་ལྷུང་བའོ། །སངས་རྒྱས་བསྟན་པ་ལ་གནས་པ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་ལ་གནས་པར་བྱས་ནས། སྤྱོད་པ་ཕྱིན་ཅི་ལོག་བཞི་བྱེད་ཅིང་རྫུན་དང་རྐུ་བ་དང་སྒྱུ་དང་གཡོ་ལ་སོགས་པ་དེ་ནི་ཐུགས་རྗེས་མ་གཟུང་ན། མནར་མེད་པར་ནི་ལྷུང་བའོ། །ཐེག་པ་ཆེན་པོ་སྨོད་པ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་ཐེག་པ་ཆུང་ངུ་ལ་གནས་པར་བྱས་ནས། ཐེག་པ་ཆེན་པོའི་ནང་ནས་ཀྱང་། རྣལ་འབྱོར་བླ་ན་མེད་པའི་ཐེག་པ་སྨོད་པ་ནི། མནར་མེད་པའི་དམྱལ་བར་འགྲོ་བས། དེ་ཐུགས་རྗེས་གཟུང་བའོ། །སེམས་ཅན་ཡོངས་ལ་གནོད་དང་ཞེས་བྱ་བ་ནི། དང་པོ་སངས་རྒྱས་ཀྱི་བསྟན་པ་ལ་དད་ཅིང་ཞུགས་ནས། ཕྱིས་དེ་ལས་ནི་ལོག་ནས། སངས་རྒྱས་ཀྱི་བསྟན་པ་ལ་ཡང་སྨད་སེམས་ཅན་ཡོངས་ལ་འཚེ་བར་བྱེད་པའི་གང་ཟག་དེ། མནར་མེད་པར་ལྷུང་བ་སྟེ། དེ་ཐུགས་རྗེས་གཟུང་བའོ། །རྣལ་འབྱོར་སྤྱོད་པའི་དགྲར་འགྱུར་ཞེས་བྱ་བ་ནི། ཆོས་འཁོར་གཉེན་པོ་བཤིག་པ་དང་། དབེན་རིས་གཉེན་པོ་འཇོམས་པ་དང་། གཙུག་ལག་ཁང་གི་དཀོར་རྐུ་བ་དགེ་འདུན་པའི་བར་དུ་དབྱེན་འཛུད་པ་ལ་སོགས་པ་སྟེ། དེ་ནི་རྣལ་འབྱོར་སྤྱི་དགྲ་ཡིན། དེ་ལྟ་བུའི་རིགས་རྣམས་ལ་མྱུར་དུ་བསྒྲིམ་སྟེ་མ་བསྒྲལ་ན། རྩ་བ་དང་ཡན་ལག་ཏུ་བཅས་པའི་རྡོ་རྗེའི་ཚིག་ཉམས་པས་ན། རྣལ་འབྱོར་པས་ལུས་ངག་ཡིད་གསུམ་གྱི་སྒོ་ནས། གྲིམས་ཕྱུང་ལས་སྔགས་དང་ཕྱག་རྒྱའི་ཤུགས་ཀྱིས་བསྒྲལ་བར་བྱའོ། །དེ་ལྟར་བསྒྲལ་ན་ཡང་དག་པའི་གནས་དང་འཕྲད་པ་དེ་ནི། ཐུགས་རྗེས་གཟུང་ངོ་། །དེ་ནས་ཡང་དམ་ཚིག་གི་ཡོན་ཏན་བསྟན་པའི་ཕྱིར། དམ་ཚིག་འདི་ནི་སྨད་པོ་ཆེ་ཞེས་པ་ལ་སོགས་པ་གསུངས་ཏེ། དམ་ཚིག་འདི་ནི་སྨད་པོ་ཆེ་ཞེས་བྱ་བ་ནི། རྩ་བ་དང་ཡན་ལག་ཏུ་བཅས་པའི་དམ་ཚིག་འདི་ནི་ཡང་དག་པའི་ཡེ་ཤེས་བསྒྲུབ་པའི་གཞི་ཡིན་པའི་ཕྱིར་ན་སྨད་བོ་ཆེ་སྟེ། དེའི་ཕྱིར་སངས་རྒྱས་བསྒྲུབ་པའི་རྒྱུ་དང་བཞི། ཞེས་གསུངས་པ་ཡིན་ནོ། །དེ་ནས་ཡང་དམ་ཚིག་གི་ངོ་བོ་བསྟན་པའི་ཕྱིར། ཡིད་བཞིན་ནོར་བུ་རིན་པོ་ཆེ་ཞེས་གསུངས་ཏེ། དམ་ཚིག་གི་ངོ་བོ་ནི་ཡིད་བཞིན་གྱི་ནོར་བུ་རིན་པོ་ཆེ་སྟེ། མ་བཅོས་པའི་དོན་དམ་པ་བྱང་ཆུབ་ཀྱི་སེམས་ནི། དམ་ཚིག་གི་ངོ་བོའོ། །དེ་ནས་ཡང་དམ་ཚིག་བསྲུངས་བའི་ཡོན་ཏན་བསྟན་པའི་ཕྱིར། དམ་ཚིག་ནས་རྣམས་མ་བཏང་བ་ཞེས་བྱ་བ་ལ་སོགས་པ་གསུངས་ཏེ། རྩ་བ་དང་ཡན་ལག་ཏུ་བཅས་པའི་དམ་ཚིག་གི་གནས་རྣམས་བསྲུང་ཞིང་མི་གཏོང་བའི་རྣལ་འབྱོར་པ་དེ་ནི། ལེགས་པའི་ཡོན་ཏན་བརྗོད་ཀྱི་མི་ལང་བ་འབྱུང་སྟེ། སངས་རྒྱས་ཀྱི་རྒྱུ་ལ་གནས་པས་ན། སངས་རྒྱས་ཉིད་འདྲ་བར་འགྱུར་རོ། །ཞེས་གསུངས་སོ། །དངོས་གྲུབ་གཞན་ལྟ་ཅི་སྨོས་དགོས་ཞེས་བྱ་བ་ནི། རྩ་བ་དང་ཡན་ལག་ཏུ་བཅས་པའི་དམ་ཚིག་བསྲུངས་ན་སངས་རྒྱས་དང་འདྲ་བར་འགྱུར་ན་གཞན་གྱིས་དངོས་གྲུབ་སྨོས་ཀྱང་ཅི་དགོས་ཏེ། དེ་ལྟར་ཐོབ་པའི་ཕྱིར་ཡེ་ནས་ནན་ཏན་བསྐྱེད་དེ། རྩ་བ་དང་ཡན་ལག་གི་དམ་ཚིག་བསྲུང་། ཞེས་སྟོན་པ་དང་དཔལ་ཀུན་ཏུ་བཟང་པོ་གསུངས་སོ། །དམ་ཚིག་རིམ་པར་ཕྱེ་ནས་སྟོན་པ་ལ་དམ་ཚིག་རིམ་པར་ཕྱེ་བའི་ལེའུའོ། །བདུད་རྩི་ཐིགས་པ་ཞེས་བྱ་བ་རྒྱ་ཆེར་བཤད་པ་ལས། བདེན་པ་གཉིས་ཀྱིས་བཤད་པའི་ལེའུ་སྟེ་བཅུ་གཉིས་པའོ།། །།དེ་ལྟར་དམ་ཚིག་ལ་སོགས་པ་བསྟན་ཀྱང་དོན་བསྡུས་ནས་སོ་སོའི་དོན་རེ་རེ་ལ་གོལ་དུ་དོགས་པའི་ཕྱིར། དེ་ནས་ཞེས་བྱ་བ་ལ་སོགས་པ་བསྟན་ཏེ། དེ་ཡང་སྔོན་ལ་གོང་དུ་གསུངས་པའི་ལེའུ་བཅུ་གཉིས་ཡན་ཆད་ཀྱི་དོན་ལ་ངམ་ཤིང་སྟོན་པ་ལ་ཡི་རང་བསྟན་པའི་ཕྱིར། ཡིད་ཀུན་ཏུ་བཟང་པོ་ལ་སོགས་པ་འདུས་པའི་འཁོར་ཚོགས་མ་ལུས་པ་རྣམས་རང་རང་གི་བསམ་པ་རངས་པར་གྱུར་ཏེ། ཞེས་བྱ་བ་ནི་འཁོར་ཐམས་ཅད་གཉིས་སུ་མེད་པའི་བྱང་ཆུབ་སེམས་སུ་མངོན་དུ་གྱུར་ནས། སྟོན་པ་ལ་འཁོར་རྣམས་ཀྱིས་གཙུག་གི་འདུས་པས་རྣལ་འབྱོར་མཆོག་གི་ཚུལ་དུ་ཕྱག་བྱ་བ་སྟེ། བཅོམ་ལྡན་འདས་ཀྱི་སྐུ་གསང་བ་གསུང་གསང་བ་ཐུགས་གསང་བར་བཞུགས་པའི་བདག་པོ་ལ་འཁོར་རྣམས་ཀྱིས་མདུན་གྱིས་ལྟས་ཏེ། སྟོན་པ་ལ་ངོ་མཚར་ནས་རྨད་དུ་བྱུང་བའི་ཚིག་གིས་འོག་ནས་འབྱུང་བ་འདི་སྐད་ཅེས་བསྒྲགས་སོ། །ཨེ་མའི་ངོ་མཚར་རྨད་དུ་བྱུང་བའི་མཉམ་ཉིད་དབྱིངས་མཆོག་ནས། ཐུགས་རྗེ་ཆེན་པོ་གསལ་ལ་མ་འདྲེས་པ་ཀུན་ཏུ་ཁྱབ་པར་བརྡལ་ཞེས་བྱ་བ་ནི། རྨད་དུ་བྱུང་བའི་ཆོས་ཉིད་མ་བཅོས་པའི་དབྱིངས་ཉིད་ནས་ཁམས་གསུམ་གྱི་སེམས་ཅན་གྱིས་དག་པའི་ཆོས་ཉིད་མ་རྟོགས་པ་ལས་ཐུགས་རྗེ་ཆེན་པོས་ལྟ་བ་དང་སྤྱོད་པ་དང་དམ་ཚིག་ལ་སོགས་པ་སོ་སོར་གསལ་ཞིང་མ་འདྲེས་པར་བསྟན་ཅིང་ཀུན་ཏུ་ཁྱབ་བརྡལ་བའི་ཕྱིར། སྐུ་དང་གསུང་དང་ཐུགས་ཡོན་ཏན་འཕྲིན་ལས། ཕྱག་རྒྱའི་དཀྱིལ་འཁོར་བརྗོད་མི་ལང་ཞེས་གསུངས་ཏེ། སྐུའི་དཀྱིལ་འཁོར་ལ་ཡང་གསུམ། གསུང་གི་དཀྱིལ་འཁོར་ལ་ཡང་གསུམ། དེ་བཞིན་དུ་ཐུགས་དང་ཡོན་ཏན་ཕྲིན་ལས་ལ་ཡང་གསུམ་གསུམ་སྟེ། ཕྱག་རྒྱའི་དཀྱིལ་འཁོར་བརྗོད་མི་ལོང་བ་ཞིག་གསུངས་པ་ཡང་འགྲོ་བ་རིགས་དྲུག་གི་བསམ་པ་མི་མཐུན་པ་བསམ་ཡས་པ་ཡོད་པའི་ཆེད་དུ་སྟེ། དེའི་བསམ་པ་རྣམས་རློག་པའི་ཕྱིར། ཕྱག་རྒྱའི་དཀྱིལ་འཁོར་བསམ་ཡས་པ་ཞིག་གསུངས་སོ། །དེ་ལྟར་ཐུགས་རྗེ་ཆེན་པོས་འགྲོ་བ་རྣམས་གཟུང་བའི་ཕྱིར། འགྲོ་བ་བསམ་ཡས་རྣམ་རྟོག་དེ་སྙེད། ཐུགས་རྗེས་ཕྱོགས་པ། ཨེ་མའོ་ངོ་མཚར་ཆེའོ། །ཞེས་གསུངས་སོ། །དེ་ནས་ཡང་སྟོན་པའི་བྱིན་རླབས་ལས་དོན་དམ་ཀུན་རྫོབ་གཉིས་ལ་ངོ་མཚར་བར་བསྟན་པའི་ཕྱིར། ཨེ་མའོ་རྨད་དུ་བྱུང་བའི་ཆོས། ནམ་མཁའ་དང་ནི་མཉམ་པ་ལས། སྒྱུ་འཕྲུལ་རྣམ་པར་འཕྲུལ་བ་རྣམས། ཀུན་རྫོབ་ཙམ་དུ་བསྟན་པ་མཐར་ཞེས་བྱ་བ་ནི། སྟོན་པའི་ཐུགས་རྣམ་པར་མི་རྟོག་པའི་ཡེ་ཤེས་དེ་ལས། སྐུའི་དཀྱིལ་འཁོར་ལ་སོགས་སྒྱུ་འཕྲུལ་རྣམ་པར་འཕྲུལ་བ་བསམ་ཡས་པ་རྣམས། དོན་དམ་པ་ཆོས་ཉིད་ལས་མ་གཡོས་ཀུན་རྫོབ་ཏུ་སྒྱུ་མ་ཙམ་དུ་བསྟན་པ་ངོ་མཚར་ཆེའོ་ཞེས་འཁོར་རྣམས་ཀྱིས་སྟོན་པ་ལ་ཆེད་དུ་གླེངས་སོ། །དེའི་ཚེ་བཅོམ་ལྡན་འདས་གསང་བ་མཆོག་གི་བདག་པོ་ནི། བརྗོད་དུ་མེད་པའི་དགོངས་པ་དུས་བཞི་མཉམ་པ་ཉིད་ཀྱི་དབྱིངས་ལ་དགོངས་ནས་ཅང་མི་གསུངས་པར་བཞུགས་སོ། །དེ་ནས་ཡང་སྡུད་པ་པོ་སྟོན་པ་ལ་དོན་བསྡུས་པར་གསོལ་བ་བཏབ་པར་བསྟན་པའི་ཕྱིར། དེ་ནས་རྡོ་རྗེ་ཡིད་ཀུན་ཏུ་བཟང་པོས་གསོལ་བ་བཏབ་བོ་ཞེས་བྱ་བར་འབྲེལ་ཏེ། གསོལ་བ་བཏབ་པའི་ཚིག་ནི། བཅོམ་ལྡན་འདས་ཞེས་བོས་ནས། བསྒོ་བར་གསོལ་བ་བཏབ་པའོ། །དེ་ནས་ཡང་སྟོན་པས་གོང་དུ་གསུངས་པའི་དོན་ཀུན་མདོར་བསྡུས་ནས་བཤད་པར་གནང་བར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། གསང་བ་མཆོག་གི་བདག་པོས་འདི་སྐད་ཅེས་བཀའ་སྩལ་ཏོ། །ཞེས་བྱ་བར་འབྲེལ་ཏོ། །གསུངས་པའི་ཚིག་ནི་འདི་སྟེ། སེམས་དཔའ་ཆེན་པོ་ཞེས་བོས་ནས་ལུས་ངག་ཡིད་གསུམ་གྱིས་ཉོན་ཅིག་ཅེས་གནང་བ་གསོལ་ཏོ། །རྒྱུད་ཀྱི་རྒྱལ་པོ་ཆོས་ཀྱི་དོན་འདི་ཉིད་སྟོན་པ་ངས་གསུངས་དོན་བསྡུས་ཏེ་ཁྱོད་ལ་བཤད་པར་བྱའོ། །ཞེས་གསུངས་ཏེ། བཤད་པའི་གསུངས་ནི་འདིའོ། །ཨེ་མའོ་ཆོས་རྣམས་ཐམས་ཅད་སེམས་ཀྱི་འཁྲུལ་པ་སྟེ། སེམས་ལས་མ་རྟོགས་ཆོས་འགའ་ཙམ་ཡང་ཡོད་དམ་ཡིན་ཞེས་བྱ་བ་ནི། ཕྱི་དང་ནང་དུ་སྣང་བའི་ཆོས་ཐམས་ཅད་ནི། ཚེ་རབས་ཐོག་མ་མེད་པའི་དུས་ནས་རྟོག་པའི་དབང་གིས། བརྟག་པའི་ངོ་ལ་འཁྲུལ་བར་སྣང་བ་སྟེ། ཆོས་སུ་སྣང་བ་ཡང་ནང་གི་ཤེས་པ་ཉིད་སྣང་བ་ལས་མ་གཏོགས་པ། ཡུལ་ལོག་ཞིག་ན་གྲུབ་པ་མེད་དོ། །བར་བསྟན་པའི་ཕྱིར། སེམས་ལས་མ་གཏོགས་ཆོས་འགའ་ཙམ་ཡང་ཡོད་མ་ཡིན་ཞེས་གསུངས་སོ། །དེ་ནས་ཡང་སྟོན་པས་དཀྱིལ་འཁོར་ལ་སོགས་པ་གསུངས་པ། དེ་ཡང་འཁྲུལ་པའི་ངོ་ལ་སྣང་གི་ཡང་དག་པའི་བློ་ཅན་ལ་མི་སྣང་བར་བསྟན་པའི་ཕྱིར། འཁྲུལ་པ་བཟློག་ཕྱིར་རྒྱལ་བས་ཆོས་སྟོན་པ། དེ་སྒྱུ་འཕྲུལ་སྒྱུ་འདྲ་འཁྲུལ་པ་སྣང་། ཞེས་གསུངས་ཏེ། ཁམས་གསུམ་གྱི་སེམས་ཅན་གྱི་ཡེ་ནས་མེད་པའི་རང་བཞིན་པ་ལ། སེམས་འཁྲུལ་པའི་དབང་གིས་མཚན་མར་གཟུང་བ་དེ་ལ་བཟློག་པའི་ཕྱིར། ལྷའི་དཀྱིལ་འཁོར་སྒྱུ་མ་ཙམ་དུ་བསྟན་ཏེ། རགས་པའི་མཚན་མ་མི་གནས་པར་བྱ་བའི་ཕྱིར་བསྟན་ཏོ། །ལྷའི་དཀྱིལ་འཁོར་སྒྱུ་མ་འདྲ་བ་སྟོན་པའི་དེ་ཉིད་ཀྱང་འཁྲུལ་བ་ལ་སྣང་བར་ཟད་ཀྱི་ཡང་དག་པའི་ཤེས་པ་ནི་སྣང་བ་མེད་དོ། །འཁྲུལ་དང་འཁྲུལ་ལ་སྣང་བའི་ཆོས་རྣམས་ཀུན། རང་གི་སེམས་ཡིན་སྣང་བར་ཟད་ཅེས་བྱ་བ་ནི། ཕྱིའི་ཡུལ་མེད་པ་ལ་འཁྲུལ་པ་ཡོད་པས་བཟུངས་བས་འཁྲུལ་བ། དེ་ལས་ཟློག་ན་ལྷའི་དཀྱིལ་འཁོར་དུ་སྟོན་པ་དེ་ཡང་འཁྲུལ་པ་ལ་སྣང་བ་ཡིན་ཏེ། དེ་ལྟར་སྣང་བའི་ཆོས་རྣམས་ཀུན་རང་གི་སེམས་ཉིད་ཡིན་ཏེ་སེམས་ཉིད་སྣང་བ་ལ་མ་གཏོགས་པ་ཡུལ་ལོག་ཞིག་ན་སྣང་རྒྱུ་མེད་པའོ། །དེ་ནས་ཡང་སེམས་ཉིད་མ་གྲུབ་པ་བསྟན་པའི་ཕྱིར། སེམས་ཀྱི་རང་བཞིན་དངོས་པོ་མ་གྲུབ་སྟེ། སྔ་ཕྱི་གསེས་ནས་རང་བ ཞིན་ཡོངས་ཀྱིས་མེད་ཅེས་གསུངས་ཏེ། སེམས་ཀྱི་རང་བཞིན་དེ་དངོས་པོར་གྲུབ་པ་མ་ཡིན་ཏེ། སྐད་ཅིག་མ་སྔ་ཕྱིས་གསེས་པས་སྔ་མ་ནི་འགགས། ཕྱི་མ་ནི་མ་བྱུང་། ད་ལྟ་ནི་མི་གནས་པས། རང་བཞིན་མེད་པར་གྱུར་པས་ནང་གི་སེམས་དངོས་པོར་མ་གྲུབ་པའོ། །དེ་ནས་ཡང་སེམས་མ་གྲུབ་ཅེས་བྱ་བ་དེ་ལ་མི་གནས་པ་བསྟན་པའི་ཕྱིར། གཟོད་ནས་མ་སྐྱེས་ཡེ་ནས་རྣམ་པར་དག །ཡི་གེ་མེད་ཅིང་སྒྲ་དང་ཐ་སྙད་བྲལ་ཞེས་གསུངས་པ་ཡིན་ཏེ། སེམས་མ་གྲུབ་པ་དེ་ཡང་སེམས་ཡོད་པ་ལས་རྐྱེན་གྱིས་བྱས་ནས་མེད་པ་ནི་མ་ཡིན་གཟོད་མ་ནས་མ་སྐྱེས་ཤིང་ཡེ་ཕྱི་མོ་ནས་རྣམ་པར་དག་པ་སྟེ། རྣམ་པར་དག་པ་དེ་ལ་ཡི་གེས་བརྗོད་པ་མེད་ཅིང་། ཚིག་གི་སྒྲ་དང་ཐ་སྙད་དང་བྲལ་བའོ། །དེ་ནས་ཡང་སྒྲ་དང་ཐ་སྙད་དང་བྲལ་ཞེས་པ་ནི། སྟོང་པ་ཉིད་དེ་སྟོང་པ་ཉིད་ཅེས་པ་དེ་ཉིད་བརྟགས་པ་སྟེ། དེ་ལས་ཀྱང་འདས་པར་བསྟན་པའི་ཕྱིར། སྟོང་པའི་སྤྱོད་པའི་སྤྱོད་པ་ཉིད་དེ་སྟོང་པའི་ཡུལ་ལས་འདས། ཞེས་གསུངས་ཏེ། སྟོང་པའི་སྟོང་པ་ནི་སྟོང་པའི་ཡུལ་ཏེ་དེ་ལ་ཡང་མི་གནས་ཏེ། མི་གནས་པའི་ཡེ་ཤེས་ཆེན་པོ་མཐར་ཕྱིན་པའི་མན་ངག་སྟེ། བཅོས་མ་མ་ཡིན་པའི་དོན་དམ་པའོ། །དེ་ལྟར་འཁྲུལ་པ་དང་ཡང་དག་པ་གཉིས་ཀ་སེམས་ལས་བྱུང་བའི་ཕྱིར་སེམས་ནི་ཆོས་ཀྱི་རྩ་བ་སྟེ། རྩ་བ་དེ་ཉིད་སྲིད་པ་དང་གྲོལ་བར་སྣང་ཞེས་གསུངས་ཏེ། འཁྲུལ་པར་སྣང་བ་ནི་རང་གི་སེམས་སྣང་བས་སེམས་ཉིད་ཡིན་ལ། སེམས་དེ་ཉིད་ཡིད་ཡེ་ནས་མ་བཅོས་པར་གནས་པ་སྟེ། རྩ་བའོ། །རྩ་བ་དེ་ཉིད་རང་བཞིན་གྱིས་འོད་གསལ་བ་སྲིད་པ་དང་གྲོལ་བར་སྣང་ཞེས་སྟོན་པས་འཁོར་བ་རྩ་བས་བཅད་དེ། དགྱེས་པ་མེད་པ་དགྱེས་པའི་ཚུལ་གྱིས་དགྱེས་པར་བསྟན་ཏེ། ཧོ་ཞེས་གསུངས་སོ། །དེ་ནས་ཡང་གོང་དུ་གསུངས་པའི་དོན་ཀུན་མི་གནས་པའི་ཡེ་ཤེས་ཆེན་པོ་ཉིད་ཀྱི་ངང་དུ་བསྟན་ལ་མི་གནས་པའི་ཡེ་ཤེས་ཆེན་པོ་དེ་ལ་ཅི་ཡང་མེད་པར་བསྟན་པའི་ཕྱིར། དེ་ལ་ཨེ་མའོ་སེམས་ཉིད་སྟོང་པ་ཆེན་པོའི་ཡེ་ཤེས་ལ་ཞེས་པ་ལ་སོགས་པས་བསྟན་ཏེ། ཡེ་ནས་མ་བཅོས་པའི་དབྱིངས་ཉིད་ལ་ནི་གནས་དང་སྟོན་པ་འཁོར་ཞེས་གར་ཡོད་ཅེས་གསུངས་ཏེ། གནས་ཞེས་བྱ་དང་། སྟོན་པ་ཞེས་བྱ་བ་དང་། བསྟན་པ་ཞེས་བྱ་བ་ཀུན་རྫོབ་ཀྱི་བདེན་པ་ཡིན་ཏེ། དོན་དམ་པའི་བདེན་པ་ལ་ནི་ག་ལ་ཡོད་དེ་མེད་དོ། །ཏིང་ངེ་འཛིན་དང་ཡིག་འབྲུ་ཕྱག་མཚན་དང་། རྫོགས་པ་དང་བཞུགས་ཐབས་རིམ་དུ་བསྒྲང་དུ་མེད་ཅེས་བྱ་བ་ནི། ཏིང་ངེ་འཛིན་རྣམ་པ་གསུམ་དང་ལྷ་རྣམས་བསྐྱེད་པའི་ཡིག་འབྲུ་དང་། ཡིག་འབྲུ་ལས་གྱུར་པའི་ཕྱག་མཚན་དང་། ཕྱག་མཚན་དེ་ལ་སྐུ་ཡོངས་སུ་རྫོགས་པ་དང་རྫོགས་ནས་གདན་ལ་བཞུགས་པའི་ཐབས་རྣམས་རིམ་དུ་བགྲང་བ་དེ་ནི་ཀུན་རྫོབ་ཀྱི་བདེན་པ་སྟེ། རྣམ་པར་རྟོག་པ་བཟློག་པ་ལ་མི་བསླུ་བས་བདེན་པའོ། །བཅོས་མ་མ་ཡིན་པའི་དོན་དམ་པ་ལ་ནི་བསྒྲང་དུའང་མེད་པའོ། །སྟོང་ཉིད་སྙིང་རྗེ་བྱང་ཆུབ་སེམས་བསྐྱེད་མེད་ཅེས་བྱ་བ་ནི། སྟོང་པ་ཉིད་བསྒོམ་ཞེས་བྱ་བ་དང་། དེའི་ངང་ལས་ཁམས་གསུམ་གྱི་སེམས་ཅན་སྙིང་རྗེ་བསྐྱེད་ཅེས་བྱ་བ་ནི། བྱང་ཆུབ་ཀྱི་སེམས་རྣམ་པ་གཉིས་བསྐྱེད་ཅེས་གསུངས་པ་ནི། ཀུན་རྫོབ་ཀྱི་བདེན་པའོ། །བཅོས་མ་མ་ཡིན་པའི་དོན་དམ་པ་ལ་ནི་བསྐྱེ་བ་ལ་སོགས་པ་ཡང་མེད་དོ། །གཟུགས་བརྙན་མེད་ཅིང་ཏིང་འཛིན་བསམ་དང་བྲལ། ཞེས་བྱ་བ་ནི། གཟུགས་བརྙན་དེ་བརྙན་མའི་དཀྱིལ་འཁོར་ལ་སོགས་པ་དང་། ཏིང་ངེ་འཛིན་གྱི་དཀྱིལ་འཁོར་གསུངས་པ་རྣམས་ནི། ཀུན་རྫོབ་ཀྱི་བདེན་པའོ། །བཅོས་མ་མ་ཡིན་པའི་དོན་དམ་པ་ལ་ནི་བསམ་པར་བྱ་བ་དང་། བསམ་པར་བྱེད་པ་མེད་པས་ཏིང་ངེ་འཛིན་བསམ་དང་བྲལ་ཞེས་གསུངས་སོ། །སྔགས་དང་ཕྱག་རྒྱ་མེད་ཅིང་ཐུགས་རྗེས་འདུལ་བའང་མེད་ཅེས་པ་ནི། སྔགས་ནི་སོ་སོའི་སྔགས་ཀྱིས་ལས་བསྟན་པ་དང་། ལྷ་སོ་སོའི་ཕྱག་རྒྱ་དང་། ཕྱག་རྒྱའི་ལས་བསྟན་པ་དང་། ཁམས་གསུམ་གྱི་སེམས་ཅན་སོ་སོའི་འདུལ་ཚད་བསྟན་པ་ནི་ཀུན་རྫོབ་ཀྱི་བདེན་པའོ། །མ་བཅོས་པའི་དོན་གྱི་ངོ་བོ་ལ་ནི། ཐུགས་རྗེས་འདུལ་བ་ཡང་མེད་དོ། །མ་རུངས་གདུལ་དུ་མེད་ཅིང་དྲག་པོའི་དཀྱིལ་འཁོར་མེད། སྙིང་པོ་བསྟང་ཚུལ་མེད་ཅིང་རྒྱུན་གྱི་ཏིང་འཛིན་མེད། བྱ་བ་མེད་ཅིང་སྡོམ་པ་ཀུན་ལས་འདས། །ཞེས་བྱ་བ་ནི། མ་རུང་བ་ལོག་པར་བལྟ་བའི་དྲེག་པ་ཅན་གདུལ་བ་དང་། དྲག་པོའི་དཀྱིལ་འཁོར་གྱི་བྱེ་བྲག་གསུངས་པ་དང་། སོ་སོར་དྲག་པོའི་སྙིང་པོ་གསུངས་པ་དང་ཁྲོ་བོ་སོ་སོའི་སྟངས་ཐབས་གསུངས་པ་དང་། རྒྱུན་གྱི་ཏིང་ངེ་འཛིན་གྱི་རིམ་པ་གསུངས་པ་རྣམས་ནི་ཀུན་རྫོབ་ཀྱི་བདེན་པའོ། །མ་བཅོས་པའི་དོན་དམ་པའི་བདེན་པ་ལ་ནི་དེ་ལྟར་གོང་དུ་གསུངས་པའི་རིམ་པར་བྱ་བ་མེད་ཅིང་སྡོམ་ཀུན་ལས་འདས་པ་སྟེ། གོང་དུ་གསུངས་པའི་རྣམ་གྲངས་དེ་ཀུན་ཅིག་ཚིག་གི་ཐ་སྙད་ཡིན་ཏེ་དོན་དམ་པར་མེད་དོ། །འོ་ན་དཀྱིལ་འཁོར་ལ་སོགས་པ་ཇི་སྙེད་པ་གསུངས་པ་དེ་ཡིས་ཅི་བྱ་ཞེ་ན། དེ་གསལ་བར་བྱ་བའི་ཕྱིར། འཁྲུལ་པ་བཟློག་ཕྱིར་ཀུན་རྫོབ་ཙམ་དུ་བསྟན། །ཞེས་གསུངས་པའོ། །འོ་ན་ལྷའི་དཀྱིལ་འཁོར་ལ་ཀུན་རྫོབ་ཙམ་དུ་བསྟན་པ་འདི་དོར་བར་བྱ་བ་མ་ཡིན་ནམ་ཞེ་ན། དེ་གསལ་བར་བྱ་བའི་ཕྱིར། དེ་བས་བསྟན་པ་འདི་ལ་རབ་བསྟན་ཏེ། དོན་དམ་བདེན་པ་ངེས་པར་རིགས་པར་བྱ་ཞེས་གསུངས་ཏེ། ཀུན་རྫོབ་ཙམ་དུ་ལྷའི་དཀྱིལ་འཁོར་དུ་བསྟན་པ་འདི་ལ་རྣལ་འབྱོར་པ་ལས་དང་པོ་པས་སེམས་སྦྱང་བར་བྱ་བའི་ཕྱིར། སྒྱུ་མ་ཙམ་དུ་བསྟན་པ་འདི་ལ་བརྟན་པར་བྱ་བ་ནི་དེ་བས་ན་བསྟན་པ་སྒྱུ་མ་འདི་ལ་རབ་ཏུ་བསྟན་ཏེ་སྦྱངས་ལ་དོན་དམ་པའི་བདེན་པ་ཁོ་ན་རིགས་པར་བྱའོ། །དེ་ནས་མ་རྟོགས་པའི་དུས་ན་ལྷའི་དཀྱིལ་འཁོར་ལ་སོགས་པ་ཐམས་ཅད་དོན་དམ་པའི་བདེན་པ་ཐབས་སུ་བསྟན་ལ། དོན་དམ་པའི་བདེན་པ་རྟོགས་པའི་དུས་ན། བརྗོད་པར་བྱ་བ་ཀུན་སྒྲིབ་པ་ཡིན་པར་བསྟན་པའི་ཕྱིར། སེམས་ལས་འདས་པའི་ཆོས་ཀྱི་རང་བཞིན་ནི། ཚིག་དང་ཡི་གེ་ཐ་སྙད་ཀུན་ལས་འདས། །མཐུན་པའི་དཔེས་ཀྱང་དེ་ལ་མཚན་དུ་མེད། །ཅེས་བྱ་བ་གསུངས་ཏེ། དང་པོ་སྒྱུ་མ་ཙམ་དུ་བསྟན་པའི་ལྷའི་དཀྱིལ་འཁོར་ལ། སེམས་སྦྱངས་ནས། སེམས་ལས་སུ་རུང་བར་བྱས་པ་ལས་སུ་རུང་བའི་སེམས་དེ་ཡང་དོན་དམ་པར་རང་བཞིན་མེད་པ་སྟེ། རང་བཞིན་མེད་པའི་སེམས་དེ་ལས་འདས་པའི་ཆོས་ཉིད་ཀྱི་རང་བཞིན་ནི། ཚིག་གིས་བརྗོད་པ་དང་ཡི་གེས་མཚན་པ་དང་། ཐ་སྙད་ཀྱིས་འདི་ལྟར་ཡོད་བྱ་བ་མེད་དོ། །ཐ་སྙད་ཀུན་ལས་འདས་པ་ཡི། དེ་ལ་ནི་མཐུན་པའི་དཔེ་ནམ་མཁའ་སྟེ་ནམ་མཁའ་དེས་ཀྱང་མཚོན་དུ་ནུས་པ་མ་ཡིན་ཏེ། མཚོན་དུ་མེད་དེ་མཚོན་པར་མི་ནུས་པའི་གཏན་ཚིགས་དེ་ལས་གང་དུ་བསྟན་པའི་རིམ་པ་དེ་ཀུན་དོན་དམ་པའི་བདེན་པ་རྟོགས་པའི་དུས་ན་ཀུན་སྒྲིབ་པ་ཡིན་པའོ། །མཚོན་མེད་བློ་ལྡན་དེ་ལ་དད་མི་འགྱུར་བྱ་བ་ནི། མཚོན་དུ་མེད་པའི་བློ་དང་ལྡན་པ་དེ་ནི་སྒྲིབ་པ་དང་བྱ་བ་དང་། རྣམ་པར་བྱང་བ་དང་ཞེས་བྱ་བ་དང་། དོན་དམ་ཀུན་རྫོབ་ཅེས་བྱ་བ་དེ་ལ་དད་པར་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་གང་གི་ངོ་བོར་ཡང་མ་གྲུབ་པའི་ཕྱིར་རོ། །འོ་ན་བདེན་པ་གཉིས་གང་གི་ངོ་ལ་སྣང་ཞེ་ན། བདེན་གཉིས་བློ་ལྡན་དེ་ལ་སྣང་བར་ཟད། །ཅེས་བྱ་བ་ནི། སེམས་ཅན་གྱི་བསམ་པ་ལ་བདེན་པ་རྣམ་པ་གཉིས་སྣང་བར་ཟད་དེ། རྒྱུ་དང་འབྲས་བུ་ཡིན་པས་སོ། །ཞེས་སྟོན་པས་གསུངས་པས་འཁོར་རྣམས་སྟོན་པའི་བཀའ་བསམ་པ་རང་ནས་རབ་ཏུ་དགའ་སྟོན་པའི་འཁོར་དུ་འདུས་པའི་འཁོར་ཚོགས་མ་ལུས་པ་རྣམས་བཅོས་མ་མ་ཡིན་པའི་དེ་ཁོ་ན་ཉིད་དོན་ལ་སེམས་ཤིང་གནས་ནས་ཅང་མི་སྨྲ་བར་གྱུར་ཏེ་གནས་སོ། །དེ་ནས་ཡང་བསྡུད་པ་པོ་ལ་དབང་བསྐུར་བར་བསྟན་པའི་ཕྱིར། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་ཞེས་པ་ལ་སོགས་གསུངས་ཏེ། སྡུད་པོ་རྡོ་རྗེ་ཡིད་ཀུན་ཏུ་བཟང་པོའི་ལྕེ་ལ་པདྨོའི་སྟེང་དུ་སྟོན་པས་ཡི་གེ་ཧཱུྃ་དེ་ཡོངས་སུ་གྱུར་པ་ལས། ལས་ཀྱི་རྡོ་རྗེ་རྒྱ་གྲམ་གཅིག་ཏུ་གྱུར། །ལས་ཀྱི་རྡོ་རྗེ་ཡོངས་སུ་གྱུར་པ་ལས། །ལྕེ་པདྨ་དེ་ལ་ཐིམ་སྟེ། དོན་བསྡུས་པའི་ནུས་མཐུ་དང་ལྡན་པར་བྱིན་གྱིས་བརླབས་ཤིང་། དབང་བསྐུར་ཞིང་དུས་དེ་ཉིད་དུ་མིང་རྡོ་རྗེ་ཆོས་སུ་བཏགས་པ་དེའི་ཕྱིར། རྡོ་རྗེ་ཆོས་སུ་དབང་བསྐུར་ཏེ། དོན་བསྡུ་བར་བྱིན་གྱིས་བརླབས་ནས། འོག་ནས་འབྱུང་བའི་ཚིག་འདི་སྟོན་པས་བཀའ་སྩལ་པས། སེམས་དཔའ་ཆེན་པོ་ཞེས་བོས་ནས། དང་པོར་མངོན་པར་རྫོགས་པར་སངས་རྒྱས་མཇུག་མདོར་བཤད་ཀྱི་བར་དུ་སེམས་ཅན་གྱི་དོན་དུ་ཚིག་ཅིག་ཙམ་ཡང་བཤད་ཅིང་བརྗོད་པ་མེད་དོ། །དེ་ཅིའི་ཕྱིར་ཞེ་ན། དྲིས་པ་དང་ཆོས་ཐམས་ཅད་ནི་བཤད་ཅིང་བརྗོད་པ་དང་བྲལ་བའི་ཕྱིར་རོ། །བཤད་ཅིང་བརྗོད་པ་དང་བྲལ་བའི་དོན་དེ་ལྟར་སུས་རྟོགས་པར་འགྱུར་ཞེས་བྲིས་པ་དང་། ལན་དུ་ཕྱོགས་བཅུ་དུས་བཞིའི་སངས་རྒྱས་རྣམས་ནི་བཤད་ཅིང་བརྗོད་པ་དང་བྲལ་བའི་དོན་ཐུགས་སུ་ཆུད་ནས། མངོན་པར་རྫོགས་པ་སངས་རྒྱས་པའོ། །སྔར་སངས་རྒྱས་པ་དེ་བས་ན་ད་ཡང་མ་འོངས་པའི་རྣལ་འབྱོར་དད་པ་ཅན་རྣམས་ཀྱིས་ཀྱང་། བརྗོད་པ་དང་བྲལ་བའི་དོན་དེ་བདེ་བླག་ཏུ་རྟོགས་ཤིང་ཐུགས་སུ་ཆུད་པར་བྱ་བའི་ཕྱིར། མདོ་འདི་ངས་བཤད་དོ། །རྣལ་འབྱོར་པ་ཕྱི་མའི་དོན་དུ་ངས་བརྗོད་དེ་སེམས་དཔའ་ཆེན་པོ་ཞེས་བོས་ནས། བསྒོ་བ་བྱ་བའི་ཚིག་འདི་གསུངས་སོ། །ད་སྡུད་པ་པོ་ཁྱོད་ཀྱང་མ་འོངས་པའི་རྣལ་འབྱོར་པའི་དོན་དུ་ངས་བཤད་པའི་མདོ་འདིའི་དོན་བསྡུས་ལ། རྣལ་འབྱོར་ཕྱི་མ་ལ་མི་ནུས་པར་བྱ་བའི་ངོ་བོ་གསུང་ཆོས་ཀྱི་ཡི་གེ་སྣང་ཞིང་མི་ནུས་པར་གྱིས་ཤིག །ང་ཡིས་གསུངས་པའི་མདོ་འདི་ཡང་དག་པའི་ལམ་དེ། རྣལ་འབྱོར་ཕྱི་མས་ལམ་འདི་ལ་བརྟེན་ནས་ཆོས་ཉིད་མ་བཅོས་པར་དེ་ཁོ་ན་ཉིད་རྣལ་འབྱོར་ཕྱི་མ་དེ་དག་གིས་ཁོང་དུ་ཆུད་པ་བསྡུད་པ་པོ་ཁྱོད་ཀྱི་གྱིས་ཤིག །དེ་ལྟར་ཁྱོད་ཀྱིས་ངས་བཤད་པའི་དོམ་འདི་རྣལ་འབྱོར་ཕྱི་མ་དད་པ་ཅན་གྱི་དོན་དུ་གསུང་ཆོས་ཀྱི་ཡི་གེར་སྣང་བར་བྱས་པ་ན། འོན་ཏང་ན་དད་པ་ཅན་གྱི་རྣལ་འབྱོར་པ་ཕྱི་མ་དེ་དག་གི་ནི་གསང་བ་རྡོ་རྗེ་ཐེག་པའི་དོན་ལ་ཡིད་ཆེས་ནས། གཏིང་འཇུག་ཤིང་རྣལ་འབྱོར་གྱི་དབང་ཕྱུག་ཆེན་པོའི་རྒྱུད་འཛིན་པར་འགྱུར་རོ། །སེམས་དཔའ་ཆེན་པོ་ཞེས་བོས་ནས་གོང་དུ་གསུངས་པའི་གཏན་ཚིགས་དེ་བས་ན། ངས་བཤད་པའི་མདོ་འདི་ནི་རྣལ་འབྱོར་ཕྱི་མ་རྣམས་ཀྱི་ཡང་དག་པའི་ཉེ་ལམ་ཆེན་མོ་ཉིད་ཡིན་པར་ཁྱོད་ཀྱིས་ཤེས་པར་བྱའོ། །ཞེས་སྟོན་པས། བསྒོ་བ་མེད་པའི་ཚུལ་གྱིས་བསྡུད་པ་པོ་ལ་བསྒོ་བ་དང་། དེའི་ཚེ་སྡུད་པ་པོས་ཀྱང་སྟོན་པ་ལ་སྟོད་ཅིང་བསྡུད་པར་ཁས་བླངས་པའི་ཕྱིར། རྡོ་རྗེ་ཡིད་ཀུན་ཏུ་བཟང་པོས་ཞེས་པ་ལ་སོགས་པས་བསྟན་ཏེ། རྡོ་རྗེ་ཆོས་རབ་ཏུ་དགའ་བའི་ཡིད་ཀྱིས་ཞེས་བྱ་བ་ནི་ཆགས་པའི་ཡིད་ཀྱིས་སོ། །རང་གི་རྡོ་རྗེ་གནས་སུ་གསོལ་ཞིང་ཞེས་བྱ་བ་ནི། རང་གི་རང་ཉིད་དོ། །རྡོ་རྗེ་ནི་གསང་བའི་རྡོ་རྗེ་སྟེ། དེའི་གནས་ནི་ཡུམ་གྱི་བྷ་ག་སྟེ། བཙུན་མོ་བྱ་བ་མོ་དང་གཉིས་སུ་མེད་པའི་ཚུལ་གྱིས། བཅོམ་ལྡན་འདས་ལ་བྱང་སེམས་ཀྱི་མཆོད་པ་ཕུལ་ནས་འོག་ནས་འབྱུང་བ་འདི་སྐད་ཅེས་བསྟོད་དོ། །ཨེ་མའོ་བཅོམ་ལྡན་འདས་དགྱེས་པ་ཆེ། མི་ནུབ་རྒྱལ་མཚན་ཡོངས་ཀྱི་བདག །བདེར་གཤེགས་ཀུན་གྱི་ཐུགས་ཀྱི་ཐུགས། །བྱང་ཆུབ་སེམས་ལ་ཕྱག་འཚལ་བསྟོད་ཅེས་བྱ་བ་ནི། བྱང་ཆུབ་སེམས་ཀྱི་ངོ་བོ་ལ་བསྟོད་པ་སྟེ། འཁོར་ལོ་རྣམ་པ་བཞི་དང་དགའ་བ་རྣམ་པ་བཞིས་ཇི་ལྟར་བྱང་ཆུབ་ཀྱི་སེམས་ཕབས་ཅིང་རང་བཞིན་གྱིས་དགའ་བའོ། །དེ་ལ་ཕྱག་འཚལ་ཞིང་བསྟོད་ནས་དོན་ཞུ་བའོ། །དོན་བསྡུ་བར་བྱེད་པའི་ཕྱིར། བཅོམ་ལྡན་འདས་ཞེས་པ་ལ་སོགས་པ་གསུངས་ཏེ། བཅོམ་ལྡན་འདས་ཞེས་བསྡུད་པ་པོ་རྡོ་རྗེ་ཆོས་ཀྱིས་བོས་ནས། རྣལ་འབྱོར་གྱི་དབང་ཕྱུག་སྔར་འདས་པ་དང་། ད་ལྟར་ཞུགས་པ་དང་། ཕྱིས་མ་འོངས་པའི་ལམ་ཆེན་མོ་ལྟ་བུར་སྟོན་པས་གསུངས་ཏེ། བཅོམ་ལྡན་འདས་ཞེས་སྡུད་པ་པོ་རྡོ་རྗེ་ཆོས་ཀྱིས་བོས་ན། མདོ་ཆེན་པོ་འདི་བདག་ལ་སྣང་བ་ལག་པས་ན། དེ་བདག་ཅག་གིས་ཀྱང་མདོ་འདི་མི་ནུབ་པའི་རྒྱལ་མཚན་ཆེན་པོར་གནས་པར་བགྱིའོ། །རྣལ་འབྱོར་ཕྱི་མའི་དོན་དུ་བདག་གིས་གསུང་ཆོས་ཀྱི་ཡི་གེར་ཡང་གནས་པར་བགྱིའོ། །བཅོམ་ལྡན་འདས་གསང་བ་མཆོག་གི་བདག་ཉིད་དུ་ཡང་བདག་གི་གནས་པར་བགྱིའོ། །མདོ་འདིའི་དོན་འཚལ་ཞིང་སྟོན་པའི་གང་ཟག་སྐྱེས་བུ་དམ་པ་དེས་གཞན་ལ་ཕན་འདོགས་པར་ཡང་བདག་གིས་གནས་པར་བགྱིའོ། །མདོ་འདིའི་དོན་འཆད་ཅིང་སྟོན་པའི་གང་ཟག་སྐྱེས་བུ་དམ་པ་དེས་གཞན་ལ་ཕན་འདོག་པར་ཡང་བདག་གིས་གནས་པར་བགྱིའོ། །རྣལ་འབྱོར་པའི་དགོས་པ་བསྐོང་བས་ཡིད་བཞིན་གྱི་ནོར་བུ་རྒྱལ་པོ་ལྟ་བུ་ཡང་བདག་གི་གནས་པར་བགྱིའོ། །མུ་སྟེགས་ལ་སོགས་པ་གཞན་གྱི་སྡེ་པས་རབ་ཏུ་མི་ཆོད་པ་ཡང་བདག་གིས་བགྱིའོ། །ཞེས་སྡུད་པ་པོ་རྡོ་རྗེ་ཆོས་ཀྱིས་ཁས་བླངས་ཤིང་སྟོན་པ་ལ་གསོལ་ཏོ། །དེའི་ཚེ་བཅོམ་ལྡན་འདས་གསང་བ་མཆོག་གི་བདག་པོ། གཉིས་སུ་མེད་པའི་ངང་ལ་རྣལ་ཏེ། ཅང་མི་གསུངས་བར་གྱུར་ཏོ། །རྒྱུད་ཡོངས་སུ་གཏོད་ཅིང་སྔ་མ་བཞིན་དུ་གོང་དང་འདྲ་བའི་ཕྱིར་ན། ལེའུའོ། །བདེ་བར་གཤེགས་པའི་གསང་གསུམ་སྟོན་པའི་རབ་ཟབ་རྒྱུད། བདེན་གཉིས་དོན་རྟོགས་བཤད་ཚུལ་ཡང་དག་ཤེས། །ཚུལ་དེས་ཉོན་མོངས་པ་ལ་བདུད་རྩིའི་ཐིགས་པ་ལྟར། །བདག་གི་རྒྱུད་ཀྱི་དོན་ཉིད་མཐར་ཐུག་བཤད་བྱས་པས། །བདག་གི་དགེ་བ་གང་ཐོབ་ཐོབ་དེ་ནི་བདུད་རྩིའི་ཐིགས་པ་ལྟར། །འགྲོ་བ་རྟོག་པའི་ནད་ཀྱིས་གདུང་བ་རྣམས་ལས་རྒྱས་པར་ཤོག །བདུད་རྩི་ཐིགས་པ་ཞེས་བྱ་བའི་རྒྱ་ཆེར་བཤད་པ་ལས་ལེའུ་བཅུ་གསུམ་པའི་བདེན་པ་གཉིས་ཀྱིས་བཤད་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གསང་བ་དུར་ཁྲོད་ཁུ་བྱུག་རོལ་པའི་རྒྱ་ཆེར་བཤད་པ། བདུད་རྩི་ཐིགས་པ་ཞེས་བྱ་བ་སློབ་དཔོན་མཚོ་སྐྱེས་རྡོ་རྗེས་མཛད་པ་རྫོགས་སོ། །རྒྱ་གར་ནི་མཁན་པོ་པདྨའི་ཐོད་ཕྲེང་གི་ཞལ་སྔ་ནས། ཞུ་ཆེན་གྱི་ལོ་ཙཱ་བ་ཛྙཱ་ན་ཀུ་མ་རས་ཞུས་ནས་བསྒྱུར་ཏེ་གཏན་ལ་ཕབ་པའོ།། །།སརྦ་མངྒ་ལཾ།།

སྠི་ར་མ་ཏིའི་སྐབས་འགྲེལ་བྱེ་བྲག་ཏུ་བཤད་པ།

སྠི་ར་མ་ཏིའི་སྐབས་འགྲེལ་བྱེ་བྲག་ཏུ་བཤད་པ་བཞུགས་སོ། །མི་འཁྲུགས་པ་ལ་ཕྱག་འཚལ་ལོ། །རྒྱུད་ལས་འབྱུང་བའི་སྐབས་བཤད་བྱ། །དེ་ཡང་རྒྱུད་ཉིད་ལས། ས་དང་གནས་སྐབས་ཡེ་ཤེས་དང་། །སྒྲིབ་དང་གོལ་ས་རྟོག་པ་དང་། །སྤྱོད་དང་ཏིང་འཛིན་དམ་ཚིག་དང་། །དུས་དང་དངོས་གྲུབ་མཐར་ཕྱིན་དང་། །ལྟ་བའི་ཁྱད་པར་གནས་འགྱུར་རྣམས། །ཐམས་ཅད་གཅིག་ལས་མེད་ན་ཡང་། །གྲངས་སམ་དབྱེ་བའི་བྱེ་བྲག་རྣམས། །སྣོད་ཀྱི་རྩལ་དང་སྦྱར་ནས་ནི། །ཆོས་རྣམས་ཀུན་གཞིར་གཅིག་པ་ལ། །ཀུན་གཞི་གནས་འགྱུར་རྣམ་པ་ལྔ། །བྱེ་བྲག་ལམ་ལྔའི་ཆོས་སུ་སྣང་། །ཞེས་གསུངས་པས། ལྔར་བརྗོད་པས་འདི་ནི་སྣོད་ཀྱི་རིམ་པས་བཅུར་ཡང་འགྱུར་བར་དགོངས་སོ། །དེ་ལ་ལྔར་བགྲངས་པ་ནི་བཅུའི་ཡང་རྩ་བར་འགྱུར་བའི་ཕྱིར། བློ་རིམས་སུ་སྦྱོར་བའི་རབ་ཀྱི་ཆེད་དུ་བསྟན་ཏེ། གང་ཞེ་ན་ས་དང་ཞེས་པ། འགྱུར་བ་མ་ངེས་པའི་ས་ནི། རྐྱེན་ལ་རག་ལུས་པ་དང་། རིགས་ཐམས་ཅད་པ་ཡིན་ཏེ། འཇུག་ལྡོག་ལྟུང་བ་དང་བཅས་པས། ཀུན་ཏུ་འཁོར་ཞིང་མ་ངེས་པའོ། །ཞེས་བཀའ་ལས་སྣང་ངོ་། །གཉིས་པ་གལ་ཆེན་སྦྱོང་བའི་ས་ནི། ཆེད་དུ་བརྩོན་འགྲུས་ལ་མ་འབད་ན། ལེགས་ཉེས་འབྱུང་བའི་ཉེས་དབང་དུ་འགྲོ་བས། བསླབ་པ་བཅུ་ལ་འཇུག་ཅིང་སྦྱོར་བ་ལ་རྟེན་པའི་ཕྱིར་རོ། །ཡང་འདི་སྐད་དུ། དགེ་དང་མི་དགེའི་ལས་རྣམས་ཀུན། །གཅོད་སྤྱོད་སྦྱོར་བའི་ཚུལ་ཉིད་ཀྱིས། །ལེགས་ཉེས་སྟོབས་ཆེན་འགྱེད་པའོ། །ཞེས་སྣང་ངོ་། །གསུམ་པ་མི་ལྡོག་གནས་པའམ། རྟེན་པས་ཁྱད་པར་འགྲོ་བའི་ས་ནི། མཐོང་ལམ་ཐོབ་པས་འཇིགས་པ་ལྔ་དང་བྲལ་བའི་ཕྱིར་ཏེ། མཐོང་བ་ལ་བརྟན་ནས་བོགས་སུ་འགྲོ་བའི་རྟེན་གནས་ཉིད་ཡིན་པའི་ཕྱིར་རོ། །འདི་སྐད་དུ། བདུན་ཉིད་རྫོགས་པས་འགྲོ་བ་སྟེ། །ཞེས་པ་དང་། ངལ་བསོ་བ་ལས་ཐམས་ཅད་མཐོང་། །མི་ལྡོག་པ་ལ་གོམས་བྱར་མེད། །ཅེས་སྣང་ངོ་། །བཞི་པ་དམིགས་པ་འབྲས་བུ་སྐྱེ་བའི་ས་ནི། བསྒོམ་པའི་ལམ་སྟེ། འདིར་གསང་སྔགས་ཀྱི་གཞུང་གིས་སྤྱོད་ཡུལ་མི་དམིགས་པར་ཐ་སྙད་འདོགས་ཏེ། མཐོང་བའི་དོན་ལ་བློ་ཤིན་ཏུ་དམིགས་པས་འབྲས་བུ་འབྱིན་པའི་གཞིའི་ཕྱིན་ཏེ། འདི་སྐད་དུ། ཁྱད་པར་རྩལ་འཕངས་ཀུན་རྫོགས་ཤིང་། །ཏིང་ངེ་འཛིན་གྱི་སྦྱོར་བའོ། །ཞེས་སྣང་ངོ་། །ལྔ་པ་རྩལ་ཆེན་རྫོགས་པའི་ས་ནི། །རྒྱལ་ཚབ་སྐྱེས་བུར་གྱུར་པའི་ཕྱིར་དང་། མཐར་ཕྱིན་པའི་ལམ་པ་ཡིན་པའི་ཕྱིར། ནུས་པའི་རྩལ་རྫོགས་པས། སངས་རྒྱས་ལ་སྦྱོར་བར་བྱེད་པའི་གནས་ཡིན་པའི་ཕྱིར་རོ། །འདི་སྐད་དུ། ཕྱག་རྒྱ་ཆེན་པོ་སྒྱུ་མ་ཡིན། །འཁོར་ལོ་སྒྱུར་བའི་རྒྱལ་ཆེན་ཡིན། །མཐོང་བའི་གནས་ན་བཅུ་དྲུག་པ། །ཞེས་སྣང་བས། ཆོ་འཕྲུལ་འགྱེད་ནུས་ཤིང་ཕྱག་རྒྱ་ཆེན་པོའི་རིག་འཛིན་ཡང་ཡིན་པའི་ཕྱིར་རོ། །གནས་སྐབས་ཞེས་པ། རྩ་བའི་རྒྱུད་ཀྱི་དབང་དུ། གནས་དང་སྐབས་གཅིག་ཏུ་སྟོན་ཏེ། བཞེད་ཚིག་ཏུ་ཡོན་ཏན་མཐོང་ཐོས་རྐྱེན་ཕྲད་དང་། བྱིན་རླབས་འབྲེལ་ཅིང་མཚུངས་ལྡན་པས། །གཡོ་སེམས་འབྱུང་ཞིང་མདུན་སྐྱེ་བའི། །དུས་ཀྱི་ཐད་ལ་བབ་ཕྱིར་སྐབས་ཞེས་བྱའོ། །བསླབ་པ་འཇུག་པའི་སྐབས་གཉིས་པའང་། འདི་སྐད་དུ། གཡོ་སྨོན་རྒྱུ་ཡི་བསླབ་བཅུ་ལ། །དེར་མི་སྡོད་པར་ལྡང་སེམས་ཀྱིས། །བཅུ་ལ་འཇུག་པའི་གཞི་དང་དུས། །ཐད་དུ་བབ་ཕྱིར་མིང་ཐོབ་པའོ། །ཞེས་བྱའོ། །གསུམ་པོ་རོ་མྱོང་བའི་སྐབས་ནི། འདི་སྐད་དུ། སེམས་གསུམ་རྒྱུ་ཡི་བསླབ་རྫོགས་ནས། །འཇུག་པའི་སེམས་རྒྱུས་བདེན་མཐོང་བ། །ཇི་བཞིན་ཉིད་ཀྱི་རོ་མྱོང་བའི། །གནས་དུས་ངེས་པས་སྐབས་སུ་བརྗོད། །ཅེས་བྱའོ། །བཞི་པ་ཡུལ་ལ་འཇུག་པའི་གནས་སྐབས་ནི། འདི་སྐད་དུ། མཐོང་བའི་ཤེས་པ་ཡུམ་པ་ལ། །དགྲ་དབང་མི་འགྱུར་ལྷག་སེམས་ཀྱིས། །རང་རིག་གཉིས་མེད་མི་གཡོ་བར། །བྱེད་ལ་འཇུག་པའི་སྐབས་སུ་སྨྲ། །ཞེས་བྱའོ། །ལྔ་པ་རྟོག་པ་ཆེན་ལ་ཕེབས་པའི་གནས་སྐབས་ནི། འཇུག་པའི་རྣལ་འབྱོར་མངོན་སུམ་རྒྱུས། །རང་རིག་མངོན་སུམ་རིག་སེམས་སྐྱེས། །ཡང་དག་དོན་མཐིང་ཐིལ་ཕེབས་ཕྱིར། །དེ་ལ་འདི་སྐད་བརྗོད་པ་ཡིན། །ཞེས་བྱའོ། །བཤད་རྒྱུད་ཀྱི་དབང་དུ། གནས་དང་སྐབས་སོ་སོ་སྟེ། དེ་ལ་གནས་ཞེས་པ། འདོད་པ་གྲུབ་པ་མཐར་ཕྱིན་པའི་གནས་ནི། ཇི་སྐད་དུ། རྐྱེན་གྱི་རྣལ་འབྱོར་བྱ་བྱེད་དང་། །ཕྱི་པའི་རྟོགས་ལམ་རྫོགས་པ་དང་། །འདི་ཉིད་སྔར་སྤྱད་ཐམས་ཅད་ཀྱི། །འདོད་པའི་གསང་ལམ་རྙེད་པ་ནི། །ལས་མཐར་ཕྱིན་པས་འདིར་འཕྲད་ཅིང་། །དེ་ལ་རྟེན་ཕྱིར་གནས་སུ་བརྗོད། །ཅེས་བྱའོ། །གཉིས་པ་བཟོད་པ་གྲུབ་པ་འཕགས་པའི་གནས་ནི། ཇི་སྐད་དུ། ཡང་དག་དོན་ལ་མི་སྐྲག་བཟོད། །དེ་ཕྱིར་རིགས་ངེས་གཟུངས་སྔགས་ཡོད། །དེ་ཕྱིར་འཕགས་པ་ཞེས་བྱ་སྟེ། །སྐྱེ་བོ་ས་ལས་འདས་པའི་གནས། །ཞེས་བྱའོ། །གསུམ་པ་བདེན་པ་གྲུབ་པ་ཡང་དག་པའི་གནས་ནི། ཇི་སྐད་དུ། སྒྲོ་སྐུར་མེད་པའི་གཉིས་མེད་དོན། །མཐོང་བ་མཐར་ཕྱིན་མི་བསླུ་ཞིང་། །ཕྱིན་ཅི་མ་ལོག་ལ་བརྟེན་ཕྱིར། །དང་པོའི་དབུགས་ཆེན་ཕྱིན་པའི་གནས། །ཞེས་བྱའོ། །བཞི་པ་ལས་སུ་རུང་བའི་སྦྱོར་བའི་གནས་ནི། ཇི་སྐད་དུ། མཐོང་ནས་གོམས་པ་མི་གཡོ་བའི། །གཉིས་མེད་གསལ་ལ་མི་གཡོ་བའི། །ཏིང་འཛིན་གོམས་པས་འབྲས་བུར་སྦྱོར། །མཐར་ལམ་ཐོབ་ལ་མ་རག་པའོ། །ཞེས་བྱའོ། །ལྔ་པ་ལྷུན་གྱིས་གྲུབ་པ་མཉམ་པའི་གནས་ནི་ཇི་སྐད་དུ། མཐོང་གོམས་སྟོབས་སུ་གྱུར་པ་ཡིས། །འབྲས་བུ་ཐོབ་པའི་སྐབས་ཡིན་ཞིང་། །ཤིང་འབྲས་ཚོས་ཀྱི་དཔེ་ལྟ་བུ། །ཡོན་ཏན་རྫོགས་པས་བླང་དོར་མེད། །ཅེས་བྱའོ། །སྐབས་ཞེས་པ་ལྔ་སྟེ། སེམས་ཅན་གྱི་སྐབས་ནི། རས་བལ་ས་བོན་ལྟ་བུའི་གཞི། །གཡོ་བས་སྒྲ་ཡིས་རྣལ་འབྱོར་གྱིས། །བསྒོམ་བྱ་ཡིད་ལ་བྱེད་པའི་གཞི། །ད་དུང་མ་ངེས་དྲན་ཙམ་མོ། །ཞེས་བྱའོ། །གཉིས་པ་འཕགས་པའི་སྐབས་ནི། ཇི་སྐད་དུ། དད་པས་མོས་པས་ལམ་འགྲོ་ཞིང་། །སློབ་པ་ས་འདི་བཟོད་ཐོབ་ཕྱིར། །འདུ་ཤེས་རིགས་དེས་ཁྱད་པར་འཕགས། །ཡང་དག་རྒྱུད་དུ་ངེས་ཕྱིར་རོ། །གསུམ་པ་ཐོབ་པའི་སྐབས་ནི། འདི་སྐད་དུ། མི་སློབ་ཆོས་མིག་རྡུལ་བྲལ་ཞིང་། །དབུགས་ཆེན་ཕྱི་ནས་མི་ལྟོག་པའི། །ཏིང་འཛིན་ཐོབ་པའི་དུས་ངེས་ཕྱིར། །དེ་ལ་མཚན་དུ་དེ་སྐད་བརྗོད། །ཅེས་བྱའོ། །བཞི་པ་རིག་འཛིན་བྱང་ཆུབ་ཐོབ་པའི་སྐབས་ནི། བྱང་ཆུབ་སེམས་དཔའ་སེམས་ཆེན་པོར། །བདག་ཕྱིར་བཟློག་མེད་གཞན་དོན་དུ། །ཕྱིར་འོང་རང་དབང་སྐྱེ་སྤྱོད་ཕྱིར། །རྒྱལ་བའི་སྲས་པོ་གདུང་འཚོབ་སྐབས། །ཞེས་བྱའོ། །ལྔ་པ་འབྲས་བུ་ཐོབ་པའི་སྐབས་ནི། ཇི་སྐད་དུ། བྱང་ཆུབ་ཆེན་པོར་རྫོགས་སེམས་སྐྱེས། །རྒྱལ་ཚབ་སྐྱེས་བུར་རྩལ་རྫོགས་པ། །ལམ་དུ་གྱུར་པའི་འབྲས་བུའི་ཕྱིར། །འབྲས་བུའི་སྐབས་ཞེས་མཚན་ངེས་པའོ། །ཞེས་བྱའོ། །ཡེ་ཤེས་དང་ཞེས་བྱ་བ་ནི། མཉམ་པར་དག་པ་རེ་རེ་ལ། །ཡེ་ཤེས་རེ་རེ་འཆར་བའོ། །ཞེས་སྣང་བས། སྐབས་ལྔར་སེམས་ལྔ་བསྒོམ་ཤར་གྱི། །ཡེ་ཤེས་ལྔ་སྟེ། ཇི་སྐད་དུ། ཡང་དག་བདེན་པ་གཉིས་མེད་དོན། །ཡིད་བྱེད་གཡོ་བའི་ཡེ་ཤེས་དང་། །བཟོད་ཐོབ་འཇུག་སློབ་ཡེ་ཤེས་དང་། །མ་ནོར་མཐོང་དགའི་ཡེ་ཤེས་དང་། །དེ་ཉིད་མི་འགྱུར་གནས་ཡེ་ཤེས། །དེ་མཐར་རྫོགས་སེམས་ཡེ་ཤེས་སོ། །ཞེས་བྱའོ། །སྒྲིབ་དང་ཡེ་ཤེས་པ་འདི་སྐད་དུ། སོ་སོ་ཐུན་མོང་མ་ཡིན་པའི། །སྒྲིབ་པས་ས་ཞེས་རྩི་བྱེད་ཅིང་། །ཞེས་སྣང་བས། ལྔ་སྟེ། འདི་སྐད་དུ། སའམ་རྣལ་འབྱོར་རྣམ་ལྔ་པོ། །རང་རང་མཐོང་ལ་ཞེན་པ་ཡིས། །གང་མ་གང་མ་མ་མཐོང་ཕྱིར། །ལམ་གྱི་དབྱེ་བས་སྒྲིབ་པའང་ལྔའོ། །ཞེས་བྱའོ། །གོལ་པ་ཞེས་པ་ནི་འདི་སྐད་དུ། ཐུན་མོང་ཆུ་ཡི་ལམ་ལྔར་གོལ། །ཁྱད་པར་སྒྲིབ་ལ་ལྟོས་ཚུལ་གྱི། །ལམ་ལྔ་གོང་དམིགས་འོག་ལྟ་ཅན། །ལྟུང་ནོར་ཕྱིར་ན་སྒྲ་འཇུག་པའོ། །ཞེས་བྱའོ། །རྟོག་པ་དང་ཞེས་པ་ནི། ཆེད་དུ་བྱས་པའི་རྟོག་པ་སྟེ། །འདི་སྐད་དུ། ས་ལྔ་དང་པོ་ཚིག་ལ་རྟོག །གཉིས་པ་ཡི་གེ་གསུམ་པ་མིང་། །བཞི་བརྡ་ཐ་སྙད་ལྔ་པར་རྟོགས། །བག་ཆགས་ལྔ་ཡོད་སྤྱོད་པའི་ཕྱིར། །ལྟོས་ན་ཕྱག་རྒྱ་འཕྲོ་འདུ་དང་། །ཤེས་ཡུལ་རྣམས་ལ་གནས་ཕྱིར་རྟོག །ཅེས་བྱའོ། །སྤྱོད་དང་ཞེས་པ་ནི། བཞི་ཕྱིིར་སྤྱོད་པའང་སྐབས་ཀྱི་བདག་གཞན་དོན་དུ། སྔོན་འབྱུང་དང་རྗེས་འཇུག་ཚུལ་དུ་འགྱུར་རོ། །དེ་ལ་ས་དང་པོར་ནི། རྩོལ་བ་དང་ཚོགས་ཀྱི་ལམ་ཡིན་པའི་ཕྱིར། །རྩོལ་ཚོགས་གཉིས་ལའང་ཤིན་ཏུ་འབད། །བྱིན་རླབས་དབང་བསྒྱུར་ཐབས་ཚུལ་གྱིས། །གཞན་དོན་མཐའ་འགའ་སྩོལ་བས་སྤྱོད། །གཉིས་པ་བདག་ཕྱིར་ལེགས་ཉེས་ལ། །གཅོད་སྦྱོང་སྟོབས་ཕྱིར་ཤིན་ཏུའང་། །བརྩོན་སྤྱོད་དབེན་ལས་ཕྱོགས་གཅིག་སྤྱོད། །སློབ་སྤྱོད་བདག་གཞན་དོན་ཀྱང་བྱེད། །གསུམ་པར་མི་དམིགས་ཤར་བ་ཡིས། །འདོད་པའི་དངོས་པོ་དབྱིངས་སྦྱོར་ཕྱིར། །བདག་ཕྱིར་མི་དམིགས་གཞན་ཆེད་དུ། །འཁོར་ལོ་བསྒྱུར་བས་གསང་སྔགས་སྟོན། །བཞི་པར་བདག་ཕྱིར་རྣལ་འབྱོར་སྤྱོད། །གཞན་ལ་ཕྱིར་འོང་བ་ཡིན་ཕྱིར། །རང་དབང་ཅན་དུ་སྐྱེ་ཞེས་ནས། །ཇི་ལྟར་འདོད་ལྟར་ཐབས་མཆོག་སྦྱོར། །ལྔ་པར་ཏིང་འཛིན་རྩལ་རྫོགས་ཕྱིར། །དབང་བསྒྱུར་ཐབས་ཀྱི་སྤྱོད་པ་ཡིས། །ཆོ་འཕྲུལ་བཞི་སོགས་སྣ་ཚོགས་སྟོན། །གདུལ་བྱ་སྨིན་ཅིང་འཁོར་ལོའང་བསྐོར། །ཞེས་བྱའོ། །དམ་ཚིག་ཅེས་བྱ་བ། སྐབས་ཀྱི་ཆེད་དུ་བྱེད་པ་ལས། །བརྟགས་ཀྱི་རྩ་བ་ཡན་ལག་རྣམས། །ཀུན་སྲུང་བྱེ་བྲག་དང་པོར་ནི། །བདུད་ལྔ་དགྲ་བཞི་བཟློག་པ་དང་། །སྤྱོད་པ་རྒྱུན་ནམ་བཞི་ལ་གནས། །འདུན་ཅིང་ཡི་རངས་མ་ཉམས་བྱེད། །གཉིས་པ་བསླབ་པ་བཅུ་བྱེད་ལས། །མི་འདའ་བཟོད་ལས་མི་ཉམས་བྱེད། །གསུམ་པར་ལྟ་བའི་དམ་ཚིག་བྱེད། །མཐོང་བ་མི་གནས་བརྩོན་པར་བྱེད། །འདི་སྐད་དུ། ནམ་མཁའ་ལྟ་བུའི་རྣལ་འབྱོར་པས། །ནམ་མཁའ་ལྟ་བུའི་དམ་ཚིག་སྲུང་། །ཞེས་གསུངས་སོ། །བཞི་པར་ཏིང་ངེ་འཛིན་གྱི་སོ་ཉིད་ལས། །མི་ཉམས་མ་ཡེངས་མི་འདའ་བའོ། །འདི་སྐད་དུ། བརྗེད་པ་མེད་པའི་ཏིང་འཛིན་གྱིས། །བསྲུང་བ་མེད་པའི་ངང་དུ་བསྡམ། །ཞེས་གསུངས་ཏེ། གཞན་དུ་ནི། ཕྱིར་ནོང་པར་དམ་བཅས་པ་གང་ཡིན་པའོ། །ལྔ་པར་མེད་དང་ཕྱལ་བ་གཅིག་པུ་དང་། །ལྷུན་གྱིས་གྲུབ་པ་རྣམ་བཞི་པའོ། །ཏིང་འཛིན་དང་ཞེས་པའང་ལྔ་སྟེ། རྣམ་པར་མི་རྟོག་ལྷ་བསྒོམ་པའང་། །གང་རུང་དང་པོར་ཡིད་ལ་བྱེད། །གཉིས་པ་འཕྲོ་འདུ་གཅིག་པ་དང་། །གསུམ་པ་ཡོངས་སུ་མི་ལྡོག་ཅིང་། །བཞི་པར་དེ་བཞིན་ཉིད་བསྒོམ་དང་། །ལྔ་པར་ཀུན་ཏུ་སྣང་བ་བསྒོམ། །དེ་ཕྱིར་རྣལ་འབྱོར་རྣལ་འབྱོར་ཡིན། །ཞེས་བྱའོ། །དུས་དང་ཞེས་པའང་ལྔ་སྟེ། གསང་སྔགས་ཡིད་ལ་བྱེད་ཙམ་ཡོད། །དེ་ཕྱིར་དྲན་པ་ཐོབ་པར་སྨྲ། །གསང་བའི་བསླབ་བཅུ་ཐོབ་པའི་དུས། །གཉིས་མེད་རྟོགས་པ་ཐོབ་པ་དུས། །དེ་ཉིད་བསྒོམ་པ་གོམས་པའི་དུས། །དེ་མངོན་གྱུར་པས་མཐར་ཕྱིན་དུས། །ཞེས་བྱའོ། །དངོས་གྲུབ་ཅེས་པ། དང་པོ་འདོད་པ་གྲུབ་པ་དང་། །གཉིས་པ་བཟོད་པ་གྲུབ་པ་དང་། །གསུམ་པ་བདེན་གྲུབ་བཞི་པ་ལས། །རུང་བ་གྲུབ་པའོ། །ལྔ་པ་ནི། ལྷུན་གྱིས་གྲུབ་པའི་རིགས་ཐོབ་པའོ། །འོན་ཏེ་དང་པོ་གཉིས་པ་ནི། དམིགས་པ་གྲུབ་པའོ། །གསུམ་པ་ནི། དོན་དམ་བཅུད་ཀྱི་རྣམ་ཤེས་རྒྱས། །བཞི་པ་འཁོར་བའི་དབྱིངས་སུ་འགྲུབ། །ལྔ་པ་ཐམས་ཅད་འགྲུབ་པར་གསུངས། །མཐར་ཕྱིན་དང་ཞེས་པ། དགེ་བའི་ལས་མཐའ་གསང་སྔགས་ལ། །འདིར་འཕྲད་དང་པོ་གཉིས་པ་ནི། །བསླབ་མཐའ་བཅུ་ལ་བསླབ་ཕྱིར་རོ། །གསུམ་པ་མཐོང་མཐར་གསང་སྔགས་མཐོང་། །དེ་རྒྱུས་བཞི་པར་གསང་སྔགས་དོན། །མཐོང་བ་གོམས་བྱ་དེ་ཉིད་མཐར། །ཕྱིན་པའོ། །ལྔ་པར་མཐར་ལམ་འབྲས་རྫོགས་ཕྱིར་འབྲས་བུ་ཀུན་གྱི་མཐར། རྩལ་ཆེན་རྫོགས་པ་ཐོབ་པའོ། །ལྟ་བའི་ཁྱད་པར་ཞེས་པ་ལྔ་སྟེ། དང་པོ་འདུན་པའི་རྣལ་འབྱོར་ནི། གཡོ་སྨོན་གྱིས་གསང་སྔགས་ལ་ཉན་དབང་ནོས་ནས། སློབ་བུ་ཟད་ཀྱང་། ཚིག་གི་ཚོགས་པ་སྒྲའི་རྣལ་འབྱོར་ཡིན་པའི་ཕྱིར། བློ་དམན་པས་གསང་སྔགས་ཀྱི་དོན་ཚིག་ཏུ་སྨྲ་ཞིང་མཐོང་བ་མེད་དེ། ཡིད་ལ་བྱེད་པའི་ལྟ་བའོ། །འོན་ཀྱང་ཕྱོགས་ལས། ད་དུང་བཟོད་པའང་མ་ཐོབ་བོ། །དེའང་འདི་སྐད་དུ། བཙལ་བ་ལས་ཀྱི་རྣལ་འབྱོར་པས། །འདུན་པའི་སེམས་དཔའི་རྣལ་འབྱོར་ལས། །སོགས་པའི་རྣལ་འབྱོར་རྣམ་དྲུག་གོ། །ཤེས་རབ་རྩལ་གྱི་འཕང་སྨས་པས། །ཏིང་འཛིན་རྩལ་ཡང་ཆུང་བ་སྟེ། །དོན་ལ་མཐོང་བར་མི་འགྱུར་བས། །ཞེས་གསུངས་སོ། །རིགས་ཆེན་འབྱེད་པའི་ལྟ་བ་ནི། །བཅུ་ཡིས་ས་གསུམ་འདུས་པ་སྟེ། །འདིར་ཕྱེད་ནས། བསླབ་པ་བཅུའི་ཚེ་བཟོད་པ་ཐོབ་སྟེ། བདེན་པ་རྣམ་གཉིས་དབྱེར་མེད་པ་བསྟན་པ་ལ། མི་སྐྲག་ཅིང་སླར་སྤྱོད་པས། རང་གི་མཚན་ཉིད་དུ་ཐོས་བསམ་གྱི་སྒོ་ནས་ཤེས་ཏེ། འདི་སྐད་དུ། དོན་ལ་མི་སྐྲག་ངོ་མཚར་སྐྱེ། །དཔྱོད་སེམས་འཇུག་པའི་སེམས་དཔའ་དེ། །ངན་སོང་མི་ལྡོག་དགོན་པར་འཇུག །ཅེས་གསུངས་སོ། །དབུགས་ཆེན་འབྱིན་པའི་ལྟ་བ་ནི། ས་ལྔ་པར་བསྒོམས་པས་ཆོས་ཉིད་ཇི་ལྟར་མཐོང་སྟེ། མི་ལྡོག་པའི་ལྟ་བའོ། །དེ་ཡང་ངལ་བསོ་བ་ལས་ཐམས་ཅད་མཐོང་། །ཞེས་གསུངས་སོ། །ལུང་ཆེན་གྱི་ཐོབ་པའི་རྣལ་འབྱོར་གྱི་ལྟ་བ་ནི། མི་གཡོ་བའི་ལྟ་བ་སྟེ། དེ་ལྟར་མཐོང་བའོ། །རྩལ་ཆེན་རྫོགས་པའི་ལྟ་བ་ནི། རང་བྱུང་ཡེ་ཤེས་སུ་བསྒོམས་པས་མངོན་དུ་འགྱུར་བ་སྟེ། འདི་སྐད་དུ། རང་བྱུང་རང་རིག་མངོན་སུམ་སྣང་དུས་ན། །རང་བྱུང་ཡེ་ཤེས་དེ་ཉིད་མཐོང་ཞེས་བྱ། །ཞེས་གསུངས་སོ། །ལ་ལ་དག་ནི་འདི་སྐད་དུ། །ལྟ་བ་ལྔ་ནི་ཤེས་པ་ལྔ། །གསང་སྔགས་འདོད་པ་འདམ་ཤེས་དང་། །རྣམ་པར་ཤེས་པ་སློབ་བཅུ་དང་། །བཟོད་ཐོབ་རང་གི་མཚན་ཉིད་ཤེས། །ཐམས་ཅད་མ་སྐྱེས་ཡེ་ཤེས་དང་། །དེ་ལས་ཡོངས་སུ་མི་གཡོར་ཤེས། །ཤེས་པ་ཆེན་པོ་ཀུན་ཏུ་སྣང་། །མཐོང་བ་དམ་པའི་ལྟ་བ་ཡིན་ཞེས་སྨྲའོ། །གནས་འགྱུར་རྣམས་ཞེས་པ། སྐབས་ལྔ་ཀུན་གཞི་ལྔ་བག་ཆགས་ལྔ་དང་བཅས་པ་གནས་འགྱུར་བ་སྟེ། དྲན་པ་ཐོབ་པས་དུས་སེམས་ཅན་གྱི་སྐབས་སུ་སྐྱེ་བོའི་ཤེས་པ་མ་རིག་པ་ལས་སེམས་གཡོ་བ་འབྱུང་བས། ལམ་གྱི་གཞིར་གྱུར་པས་རྐྱེན་གྱིས་བསྒྱུར་བ་ལས་ཀྱི་བག་ཆགས་གནས་ཏེ། སྦྱོང་ཞིང་འདོད་པ་ཤེས་པར་འགྱུར་བའི་ཕྱིར་དང་པོའོ། །སྤྱོད་པ་ཐོབ་པའི་དུས་འཕགས་པའི་སྐབས་སུ་བསླབ་པ་བཅུ་ཡང་དག་པའི་དོན་ལ་སྦྱོར་བའི་ཕྱིར། སྦྱོར་བ་འདུན་པའི་ཀུན་གཞིར་འགྱུར་ཏེ། མངོན་དུ་རྒྱུ་བ་གནས་ཏེ་སྦྱོང་ངོ་། །རྟོགས་པ་ཐོབ་པའི་ཚུལ། ས་ཐོབ་པའི་སྐབས་སུ། འོག་གི་འབད་པས་བདེན་པ་མཐོང་བའི་ཕྱིར། སྣང་བ་དོན་གྱི་ཀུན་གཞིར་གནས་འགྱུར་ཏེ། དེའི་ཚེ་ཀུན་ཏུ་རྒྱུའི་བག་ཆགས་གནས་ཏེ་སྦྱོང་བའོ། །རིག་འཛིན་བྱང་ཆུབ་སེམས་དཔའི་སྐབས་གོམས་པའི་ཐོབ་པའི་དུས་སུ་མཐོང་བ་ལ་གོམས་པས་སེམས་མི་གཡོ་བའི་ཕྱིར། འགྱུར་མེད་གནས་པའི་ཀུན་གཞིར་གནས་འགྱུར་ཏེ། བག་ཆགས་ལྷན་ཅིག་སྐྱེས་པའི་གནས་དེ་སྤྱོད་པའོ། །མཐར་ཕྱིན་པའི་དུས་བྱང་ཆུབ་ཆེན་པོའི་འབྲས་བུ་ཐོབ་པའི་སྐབས་སུ། སྔར་གོམས་པས་མངོན་དུ་གྱུར་པའི་ཕྱིར། བཙལ་མེད་གནས་པའི་ཀུན་གཞིར་གནས་འགྱུར་ཏེ། བག་ལ་ཉལ། གནས་པ་སྦྱོང་བའོ། །ཞེས་འཆད་ན། ཁོ་བོ་ནི། དང་པོ་རིགས་མ་ངེས་པ་དང་། ཆོས་ཉིད་མ་ཤེས་པའི་ཕྱིར་དེར་འགྱུར་ཞེས་མི་འདོགས་པའི་ཕྱིར། དང་པོ་ནས་གཉིས་པར་འགྱུར་བ་ནས། ལྔ་པ་ནས་སངས་རྒྱས་ཉིད་དུ་འགྱུར་བ་དང་ལྔ་སྟེ། ལམ་ལྔ་རང་རིག་ཏིང་ངེ་འཛིན་བརྟན་པས་ཡེ་ཤེས་སྐྱེས་པས་སྒྲིབ་པ་རེ་སྦྱོང་བ་སྐད་ཅིག་མ་ཕྱི་མ་ལ་ལམ་ལྔར་སྐབས་ལྔའི་ཕྱིར། ཀུན་གཞིའི་གནས་འགྱུར་རྣམ་པ་ལྔས། །བྱེ་བྲག་ལམ་ལྔའི་ཆོས་སུ་བཤད། །ཅེས་གསུངས་སོ། །བག་ཆགས་ལྔ་ནི་སྒྲིབ་པ་ལྔར་ཡང་གསུངས་ཏེ། དེ་དག་ནི་རྒྱུ་འབྲས་ཀྱི་ཕྱིར་ཁྱད་པར་ཡོད་དེ། འདི་སྐད་དུ། དེ་དག་རེ་ཞིང་རྒྱུ་འབྲས་གཉིས། །སྔ་མ་སྔ་མ་གང་དང་གང་། །ཕྱི་མ་ཕྱི་མ་སྨིན་པའི་རྒྱུ། །དེ་བཞིན་ཀུན་ཏུ་འཁོར་བར་འགྱུར། །ཞེས་གསུངས་ཏེ། འཆད་པའི་བཅུ་པོའང་རྒྱུ་འབྲས་འགྱུར་བར་དགོངས་སོ། །ཡངས་བཅུར་བཤད་པར་བྱ་བ་ནི། ས་དང་ཞེས་པ་འགྱུར་དབང་མ་ངེས་པའི་ས་དང་། རྟེན་པ་གཞིའི་ས་དང་། གལ་ཆེན་སྦྱོང་བའི་ས་དང་། བསླབ་པ་རྒྱུན་གྱི་ས་དང་། བསོད་ནམས་གཏེར་གྱི་ས་དང་། རྟེན་པས་ཁྱད་པར་དུ་འགྲོ་བའི་ས་དང་། དམིགས་པས་འབྲས་བུ་སྐྱེ་བའི་ས་དང་། གནས་པ་མི་འགྱུར་བའི་ས་དང་། བདལ་བ་ཆོས་ཉིད་ཀྱི་ས་དང་། རྫོགས་པ་སྤྱིར་ཆིབས་ཀྱི་སའོ། །དེ་ཡང་བཅུར་བསྟན་པ་ནི། གསང་སྔགས་རིམ་འཇུག་གི་འབྲིང་གི་ཡུལ་ལོ། །བཞི་བཅུར་དེ་ལས་སྤྲོས་པ་ནི། ཐ་མའི་དབང་དུ་གསུངས་པའོ། །དེ་ལས་ལྔ་ནི་ལྔའི་སྐབས་སུ་བཤད་དེ། སྔར་ལྔའི་སྐབས་སུ་མ་བཤད་པ་རྣམས་ཅུང་ཞིག་ཏུ་དགྲོལ་བ་ནི་གང་ཞེ་ན། དང་པོ་གཉིས་པ་རྟེན་པ་གཞིའི་ས་ནི། འདི་སྐད་དུ། དང་པོ་གསང་བའི་བསླབ་པ་ལ། །རྩོལ་བར་སྦྱོང་བ་ལ་བརྟེན་ནས། །དང་པོའི་ལས་ཀྱི་རྣལ་འབྱོར་ཏེ། །ས་རྣམས་ཀུན་གྱི་གཞི་རྟེན་ནོ། །ཞེས་གསུངས་སོ། །གལ་ཆེན་བཤད་ཟིན་ཏོ། །དེའི་ཆ་བསླབ་པ་རྒྱུན་གྱི་ས་ནི། འདིར་བསླབ་པ་བཅུ་ལ་ཞུགས་ནས་མི་གཏོང་བར་རྒྱུན་དུ་འབད་པས་བོགས་སུ་བྱེད་པའི་གནས་ཡིན་པའི་ཕྱིར་རོ། །འདི་སྐད་དུ། བསླབ་པའི་མཐའ་བཅུ་མཐར་ཕྱིན་ཅིང་། །ཇི་ལྟར་ཟླ་བ་ཡར་གསལ་བཞིན། །བསླབ་པའི་ཡེ་ཤེས་འཕེལ་འགྱུར་ཏེ། །ཞེས་གསུངས་ཏེ། བསོད་ནམས་གཏེར་གྱིས་ནི། འདི་སྐད་དུ། བསླབ་པ་བཅུ་པོ་མཐར་ཕྱིན་པའི། །བསོད་ནམས་ཡོན་ཏན་ཟད་མི་ཤེས། །སློབ་པའི་མཐར་ཕྱིན་བསྒོམས་པའི་ས། །མཐོང་ལམ་ཐོབ་ལ་མ་རག་པའོ། །ཞེས་གསུངས་སོ། །དྲུག་པ་དང་བདུན་པ་དང་བརྒྱད་པ་གསུམ་བཤད་ཟིན་ཏོ། །དགུ་པ་ལྔ་པ་ལས་འཕྲོས་པ་བདལ་བ་ཆོས་ཉིད་ནི། རང་གི་ཀུན་གཞི་ཆོས་ཉིད་དབྱིངས་དང་ཡེ་ཤེས་གཉིས་སུ་མེད་པ་དེས་བགོས་པ་མེད་པར་ཀུན་ཁྱབ་པར་རྟོགས་པའི་གནས་ཡིན་པའི་ཕྱིར་རོ། །དེ་ཡང་ཡུལ་དོན་ཡེ་ཤེས་དེ་སྦྱར་བས། །ཤེས་པར་བྱས་པ་ཐམས་ཅད་རྫོགས། །ཞེས་གསུངས་སོ། །བཅུ་པ་རྫོགས་པ་སྤྱིར་ཆིབ་པ་ནི། འདི་སྐད་དུ། བཅུ་པའི་ཐ་མ་དང་པོ་ལས། །མཐར་རྫོགས་ཀུན་གྱི་ཏོག་ཡིན་ཏེ། །ཀློང་ཡངས་ནམ་མཁའི་སྙིང་པོ་ལ། །སྤྲིན་མེད་ཉི་མ་འབུམ་གྱིས་བདལ། །ཅིར་སྣང་ཅི་ཡང་མ་ཡིན་པའི། །མི་སྐྱེ་མི་འགག་ངོ་བོ་ལས། །ཇི་ལྟར་བལྟས་དགུ་དེར་སྣང་བས། །ཐེག་མཆོག་སྤྱི་རྒྱ་རླབས་ཀྱིས་བཅད། །ཅེས་གསུངས་སོ། །གནས་སྐབས་ཞེས་པ་དེ་གཉིས་ཀུན་འདུས་ལྟར། གནས་སྐབས་བཅུར་ཡང་སྦྱར་ཏེ་འདུན་པ་སྐྱེ་བའི་གནས་སྐབས་དང་། ཞེས་པ་ལ་སོགས་པས་མངོན་ནོ། །དགོངས་འདུས་ལྟར་སོ་སོར་བཤད་ན། དང་པོ་བཤད་ཟིན་ཏེ། གཉིས་པའི་གནས་ནི། རྟེན་པ་གྲུབ་པ་ལམ་གྱི་གནས་ཏེ། ལམ་རྣམས་ཀྱི་གཞིར་གྱུར་པའི་ཕྱིར་རོ། །གསུམ་པ་བཤད་ཟིན་ཏོ། །བཞི་པ་ནི་བཟོད་པ་གྲུབ་པ་སློབ་པའི་གནས་ཏེ། ཟབ་མོའི་དོན་ལ་བཟོད་པ་ཐོབ་པས། ཡེ་ཤེས་འཕེལ་བར་བྱ་བའི་ཕྱིར། བསླབ་པ་བཅུ་ལ་སློབ་པའི་ས་ཡིན་པའི་ཕྱིར་རོ། །ལྔ་པ་བསླབ་པ་གྲུབ་པ་ཅིར་ཆིས་པའི་གནས་དེ་བསླབ་པ་བཅུ་ཁོང་དུ་ཆུད་ཅིང་ཅེར་ཆིབ་པའི་ས་ཡིན་པའི་ཕྱིར་རོ། །དྲུག་པ་བདུན་པ་བརྒྱད་པ་བཤད་ཟིན་ཏོ། །གདེང་དུ་གྱུར་པ་ཆོས་ཉིད་ཀྱི་གནས་དགུ་པར་བསྒོམས་པས་ཕེབས་པ་སྟོབས་སུ་གྱུར་པ་དེ་འདིར་ཆོས་ཉིད་གདེང་དུ་གྱུར་པའི་ཕྱིར་རོ། །བཅུ་པ་འབྲས་བུ་གྲུབ་པ་རྫོགས་པའི་གནས་ནི། མཐར་ཕྱིན་པའི་ཕྱིར་རོ། །སྐབས་ཞེས་པ། དང་པོ་བཤད། གཉིས་པ་རྩོམ་པ་སྦྱོར་བའི་སྐབས་ཏེ། སྨོན་པས་བསླབ་པ་ལ་རྩོལ་བའི་ཕྱིར་རོ། །གསུམ་པ་བཤད། བཞི་པ་འདུ་ཤེས་འགྱུར་བའི་སྐབས་ནི་རིགས་ཕྱེད་པས་སྦྱོར་བའི་སེམས་ཀྱིས་འདུ་ཤེས་ཡང་དག་པའི་ཡེ་ཤེས་སུ་འགྱུར་ཏེ་ཡེ་ཤེས་འཕེལ་བར་བྱེད་པའི་ཕྱིར་རོ། །ལྔ་པ་སྦྱོར་ཆེན་ལ་འཇུག་པའི་སྐབས་ནི། བསླབ་བཅུས་ཆིབ་པས་ཐོས་སེམས་ཀྱིས་མཐོང་བའི་དོན་བསྒོམ་པ་ལ་འཇུག་པའི་ཕྱིར་རོ། །དྲུག་པ་བདུན་པ་བརྒྱད་པ་བཤད་ཟིན་ཏོ། །དགུ་པ་གདེང་དུ་གྱུར་པའི་སྐབས་དེ། རྟགས་ཆེན་ཐོབ་པའི་ཕྱིར་རོ། །བཅུ་པ་ལས་སུ་རུང་བའི་སྐབས་ཏེ། རྫོགས་སེམས་བསྐྱེད་པས་བསྐྱེད་དུ་བྱ་བའི་ལམ་མེད་པའི་ཕྱིར་རོ། །ཡེ་ཤེས་དང་ཞེས་པ་སྔར་བརྗོད་པའི་གཏན་ཚིགས་ཀྱིས། སྐབས་བཅུར་སེམས་བཅུས་སྐྱེས་པས་སེམས་དང་ཆོས་འཕྲད་པའི་ཡེ་ཤེས་གྲོལ་ཐར་པ་ཐང་རེའོ། །དེ་ལ་དང་པོ་བརྗོད་ཟིན། སྨོན་པས་ཁོང་དུ་ཆུད་འདོད་པའི། །བདེན་གཉིས་མགོ་མཐོང་ཡིད་ལ་བྱེད། །སྨོན་པའི་ཡེ་ཤེས་གོང་མའི་རྒྱུ། །དེ་རྒྱུས་དེར་མི་བརྟན་པར་ལྡང་། །བདེན་གཉིས་རང་གི་མཚན་ཉིད་དུ། །ཤེས་པ་གཅོད་སྦྱོང་སྦྱོར་བ་ཡིས། །བསླབ་པའི་ཡེ་ཤེས་ཡེ་ཤེས་གསུམ། །བཞི་པ་དེ་རྒྱུས་སྦྱོར་སེམས་ཀྱིས། །ལྷག་པའི་བདེན་གཉིས་དབྱེར་མེད་དོན། །ཐོས་ལ་མི་སྐྲག་སྤྱོད་ཅིང་འཕེལ། །བཟོད་ཐོབ་ཡེ་ཤེས་ཕྱི་མའི་རྒྱུ། །ལྔ་པ་དེ་རྒྱུས་ཡེ་ཤེས་སྐྱེས། །བདེན་པ་དབྱེར་མེད་ཐོས་བསམ་གྱིས། །གོ་བའི་དོན་ལ་འཇུག་སེམས་པས། །མཐོང་ལ་སྦྱོར་བའི་ཡེ་ཤེས་སོ། །དྲུག་དང་བདུན་པ་བརྗོད་ཟིན་ཏེ། །བརྒྱད་པར་འདི་སྐད་དུ། མཚན་མའི་ཆོས་རྣམས་ཐམས་ཅད་ཀུན། །མཉམ་པ་ཆེན་པོའི་ངང་དུ་གསལ། །ཞེས་གསུངས་ཏེ། རིག་པའི་སེམས་ཀྱིས་མཉམ་ཉིད་མཐོང་བའི་ཡེ་ཤེས་སོ། །དགུ་པར་གནས་པའི་སེམས་ཀྱི་དབྱིངས་དང་ཡེ་ཤེས་དབྱེར་མེད་པའི་དོན་ཤར་བ་སྟེ། འདི་སྐད་དུ། སྲིད་པའི་སེམས་ཅན་ཐམས་ཅད་དང་། །ཐར་པའི་ཆོས་ཀྱི་རྣམ་གྲངས་ཀུན། །སོ་སོར་ཐམས་ཅད་སྣང་བ་སྟེ། །ཀུན་ཀྱང་མཉམ་པའི་ངང་དུ་གསལ། །ཞེས་གསུངས་སོ། །བཅུ་པ་རྫོགས་པའི་སེམས་ཀྱིས་རང་བྱུང་ཡེ་ཤེས་རྫོགས་པར་ཤར་བ་སྟེ། འདི་སྐད་དུ། ས་ཆུ་མེ་རླུང་སྣོད་བཅུད་རྣམས། །ཀུན་ཀྱང་རང་བཞིན་ཆོས་ཉིད་དོན། །ཆོས་ཉིད་དོན་ལས་གཞན་མེད་པས། །རང་བྱུང་ཡེ་ཤེས་གསལ་བའོ། །ཞེས་གསུངས་སོ། །སྒྲིབ་དང་ཞེས་པ་བཅུ་སྟེ། ས་འོག་མ་བཅུས་གོང་མའི་ལྟ་བ་རྣམས་ཡུལ་དུ་མ་གྱུར་པ་བརྗོད་ཟིན་ཏོ། །ཡང་ལས་ཀྱི་བག་ཆགས་ཕྲ་རགས་ནི། གཉིས་པ་དང་པོ་ག་ལ་སྒྲིབ། །མངོན་དུ་རྒྱུ་བ་རབ་འབྲིང་གསུམ། །གསུམ་པ་བཞི་དང་ལྔ་ལ་སྒྲིབ། །ཀུན་ཏུ་རྒྱུ་བ་དྲུག་པ་སྟེ། །ལྷན་ཅིག་སྐྱེས་པ་བདུན་ལ་གནས། །བག་ལ་ཉལ་བ་ཕྲ་རགས་འབྲིང་། །བརྒྱད་དང་དགུ་དང་བཅུ་ལ་གནས། །ཞེས་གསུངས་སོ། །གོལ་ས་ཞེས་པ། འདི་སྐད་དུ། རྒྱུ་ཡི་ཚོགས་དང་དྲོད་རྩེ་མོ། །བཟོད་དང་འཇིག་རྟེན་ཆོས་མཆོག་དང་། །མཐོང་སྒོམ་མཐར་ལམ་རྣམས་སུ་གོལ། །ཡང་ན་འོག་མ་འོག་མ་ཉིད། །ཅེས་གསུངས་སོ། །རྟོག་པ་དང་ཞེས་པ་བཅུ་སྟེ། འདི་སྐད་དུ། བག་ཆགས་ལྔ་ཡི་ཕྲ་རགས་བཅུ། །ས་བཅུར་ལྡན་པས་ཆོས་ཉིད་ལ། །ཆེད་དུ་བྱེད་དང་ཕྱག་རྒྱ་ཡང་། །ཁྱོན་དང་འཕྲོ་འདུའི་རྟོག་ཚོགས་བཅུ། །ཞེས་གསུངས་སོ། །སྤྱོད་དང་ཞེས་པ་བཅུ་སྟེ། དང་པོ་བཤད་ཟིན་ཏོ། །གཉིས་པ་ནི་འདི་སྐད་དུ། བསླབ་པ་སྦྱོང་དང་ངེས་པ་ལ། །དག་དང་མ་དག་གིས་སྤྱོད་པའོ། །ཞེས་འབྱུང་བས་ཕྲ་མེན་གྱི་སྤྱོད་པའོ། །གསུམ་པ་བཤད་ཟིན་ཏོ། །བཞི་པ་ནི། ངན་སོང་མི་ལྡོག་དགོན་པར་འཇུག །བར་ཆད་དག་ཀྱང་དེ་ལས་འབྱུང་། །ཞེས་གསུངས་པས། ཕྱོགས་གཅིག་པ་བསྒོམ་པའི་སྤྱོད་པའོ། །ལྔ་པ་ནི། སྤྱོད་པ་རྒྱུན་གྱི་རྣལ་འབྱོར་ཡིན། །ཞེས་འབྱུང་བས། རྒྱུན་གྱི་སྤྱོད་པའོ། །དྲུག་པ་ནི། བདག་དོན་ཤེས་རབ་དང་མཐུན་པའོ། །གཞན་དོན་དུ་འདི་སྐད་དུ། སྒྱུ་མས་སྦྱོང་བའི་སྐྱེས་བུ་དེ། །འཁོར་ལོ་བསྒྱུར་བའི་ཆ་བྱད་དུ། །རིན་ཆེན་བདུན་དང་དཔུང་ཚོགས་ཀྱིས། །དབང་བསྒྱུར་ཐབས་ཀྱི་ཐེག་པ་སྟོན། །ཞེས་གསུངས་སོ། །བདུན་པ་ནི་ཏིང་ངེ་འཛིན་གྱི་སྦྱོར་བའོ། །ངེས་འབྱུང་བས་བདག་དོན་གཞན་དོན་དུ་འདི་སྐད་དུ། དེ་བས་སྐྱེས་བུ་དམ་པ་དེ། །འབྲས་བུ་ཉིད་ལས་ལམ་ཤེས་པས། །ལམ་གྱི་ཡན་ལག་བདེ་རྫོགས་ཏེ། །གཞན་དག་སྨིན་པར་བྱ་བའི་ཕྱིར། །ཇི་ལྟར་འདོད་པ་ཐབས་མཆོག་སྦྱོར། །ཞེས་གསུངས་སོ། །བརྒྱད་པ་བདག་དོན་སྦྱོར་བའི་སྤྱོད་པ་སྟེ། ཏིང་ངེ་འཛིན་མང་པོ་ལ་བསྒོམ་པའི་ཕྱིར་རོ། །གཞན་དོན་འདི་སྐད་དུ། དེ་བས་རྒྱལ་ཚབ་སྐྱེས་བུ་དེ། །ཆོས་ཀྱི་རྒྱལ་པོ་གང་དེ་ཡི། །གདུང་འཚོབ་དགའ་ལྡན་ཐེག་ཆེན་སྟོན། །མི་གནས་བཅུ་དུས་ཆོ་འཕྲུལ་སྣང་། །ཞེས་གསུངས་སོ། །དགུ་པ་ནི། སྒྱུ་མའང་མ་ཡིན་སྤྱོད་པའོ། །ཞེས་གསུངས་པས། ཡེ་ཤེས་སྒྱུ་མའི་སྤྱོད་པའོ། །བཅུ་པ་ནི་ལྷུན་གྱིས་གྲུབ་པའི་སྤྱོད་པའོ། །ཡང་ཀུན་འདུས་ལས། ས་བརྒྱད་འདི་སྐད་དུ། སྦྱོར་དང་སྒྲོལ་བར་བྱེད་པ་དང་། །མ་ཡིན་ལེན་དང་ངག་སྤྲུལ་བྱེད། །རྣལ་འབྱོར་དམ་ཚིག་སྤྱོད་པའི་མཆོག །སྤྱད་པར་བྱ་བའི་ལས་ཡིན་ནོ། །ཞེས་གསུངས་སོ། །དགུ་པ་ནི། ཐམས་ཅད་མཉམ་པའི་ངང་ལ་གནས། །ཏིང་ངེ་འཛིན་གྱི་ཆོ་འཕྲུལ་ལས། །དངོས་སུ་སྦྱོར་བ་ཐམས་ཅད་བྱ། །དེ་ནི་དམ་ཚིག་ཆེན་པོ་ཡིན། །ཞེས་གསུངས་སོ། །བཅུ་པ་ནི། སྤྱོད་དང་སྤྱོད་པར་བྱ་མེད་པས། །སྲིད་དང་མུ་སྟེགས་འཇིག་རྟེན་པའི། །སྤྱོད་པར་སྣང་བ་ཐམས་ཅད་ཀུན། །ལྷུན་གྱིས་གྲུབ་པའི་མཛད་སྤྱོད་དོ། །ཞེས་གསུངས་སོ། །དམ་ཚིག་ཅེས་པ། ཞེས་ཚིག་ལས། རང་རང་སྤྱོད་ལས་མི་འདའ་བའི། །དམ་བཅའ་བཅུ་ནི་དམ་ཚིག་གོ། །ཞེས་གསུངས། དེའི་ཕྱིར་དང་པོ་བཤད་ཟིན་ཏོ། །གཉིས་པ་རྩོལ་བ་ལས་མི་འདའ། །བཞི་པ་བསླབ་པ་ལས་མི་འདའ། །ལྔ་པ་འཇུག་སྒོ་ལས་མི་འདའ། །དགུ་པ་ཆོས་ཉིད་དམ་ཚིག་གསུམ། །བརྒྱད་པ་དངོས་པོ་བཞི་ལས་སྤྱོད་པ་ལས་མི་འདའ། བཅུ་པ་བཞི་ལས་མི་འདའོ། །བརྒྱད་པ་འདི་སྐད་དུ། འདོད་པས་ཆགས་པ་འཇོམས་པ་དང་། །གཏི་མུག་ང་རྒྱལ་ཕྲག་དོག་རྣམས། །རྣལ་འབྱོར་ཆེན་པོའི་དམ་ཚིག་སྟེ། །དོན་དང་ལྡན་པའི་སྐྱེས་བུས་སྤྱོད། །དགུ་པ་ནི། དམ་ཚིག་དམ་པ་གང་ཞེ་ན། །རྟོགས་པ་དམ་པས་དམ་ཚིག་སྟེ། །རྟོགས་པར་བྱེད་པ་གང་ཡིན་པ། །དེ་ནི་དམ་ཚིག་ཆེན་པོའོ། །བཅུ་པ་ནི། མེད་པ་ཕྱལ་བ་གཅིག་པུ་དང་། །ལྷུན་གྱིས་རྫོགས་པའི་དམ་ཚིག་ཆེ། །འདི་ཞེས་རིས་སུ་ཆད་མེད་པ། །འདི་ནི་བསྲུང་བའི་དམ་ཚིག་གོ། །ཞེས་གསུངས་སོ། །ཏིང་ངེ་འཛིན་ཞེས་པའང་བཅུ་སྟེ། དང་པོ་ཡིད་ལ་བྱེད་ཐོབ་ནས། །གཉིས་པ་དེ་གོམས་བརྟན་པའོ། །གསུམ་པ་འཕྲོ་འདུ་གཅིག་པ་ཐོབ། །བཞི་པ་ལ་གོམས་ལྔ་པར་བསྟན། །དྲུག་པར་མི་ལྡོག་བདུན་དེ་ཉིད། །བརྒྱད་པར་ཀུན་སྣང་ཐོབ་ནས་ནི། །དགུ་པ་གོམས་ནས་བཅུ་པར་ནི། །དེ་བརྟན་ལས་སུ་རུང་བའོ། །ཞེས་གསུངས་སོ། །སློབ་དཔོན་བདེ་བ་གསལ་མཛད་ཀྱིས་ནི། འདི་སྐད་དུ། དང་པོ་ཡིད་ལ་བྱེད་པ་སྟེ། །བརྟན་པས་ཡོན་ཏན་འབྱུང་བཞིའི་ཕྱིར། །རིན་ཆེན་མྱུ་གུའི་ཏིང་འཛིན་ཐོབ། །གསུམ་པ་ཉེས་པ་གཅོད་སྦྱོང་སྤྱིར། །དུག་འཇོམས་སྨན་གྱི་ཏིང་ངེ་འཛིན། །བཞི་པ་བར་ཆད་འབྱུང་བའི་ཕྱིར། །རྩེ་གཅིག་འཕྲོ་བའི་ཏིང་ངེ་འཛིན། །ལྔ་པ་བསོད་ནམས་གཏེར་གྱི་ཕྱིར། །ཚོགས་ཆེན་རྫོགས་པའི་ཏིང་ངེ་འཛིན། །དྲུག་པ་ཆོས་མིག་རྡུལ་བྲལ་ཕྱིར། །མངོན་པར་རྟོགས་པའི་ཏིང་ངེ་འཛིན། །བསྒོམ་པས་ཡོན་ཏན་འབྱུང་བའི་ཕྱིར། །མི་ཟད་མཛོད་ནི་བདུན་པའོ། །བརྒྱད་པ་ཆོ་འཕྲུལ་འབྱུང་བའི་ཕྱིར། །འབྱུང་ཆེན་སྤྲུལ་པའི་ཏིང་ངེ་འཛིན། །དགུ་པ་ཆོས་ཉིད་བདལ་བའི་ཕྱིར། །རྣམ་དག་དབྱིངས་ཀྱི་ཏིང་ངེ་འཛིན། །བཅུ་པར་མ་ལུས་ལྷུན་རྫོགས་ཕྱིར། །ཐམས་ཅད་རྫོགས་པའི་ཏིང་འཛིན་དང་། །སྣང་གསལ་ཡེ་འཕྱོའི་ཏིང་ངེ་འཛིན། །ཞེས་གསུངས་པའོ། །དུས་དང་ཞེས་པ། ལྔ་ནི་བཤད་པ་དང་ཡང་མཐུན་ནོ། །བཞེད་ཚིག་ལས་དང་པོ་རྗེས་སུ་ཡི་རང་ཕྱིར། །འདུན་པ་སྐྱེ་བའི་དུས་ཞེས་བྱ། །གཉིས་པ་སློབ་པ་ལ་བརྩོན་ཕྱིར། །རྩོལ་བ་སྦྱོར་བའི་དུས་ཉིད་དོ། །གསུམ་པ་གལ་ཆེན་སྦྱོར་བའི་ཕྱིར། །བསླབ་པ་འཇུག་པའི་དུས་སུ་བརྗོད། །བཞི་པ་རིགས་ཆེན་འབྱེད་པའི་ཕྱིར། །བསླབ་གནས་འདུ་ཤེས་འགྱུར་བའི་དུས། །ལྔ་པ་མཐོང་དོན་སྦྱོར་བའི་ཕྱིར། །སྦྱོང་ཆེན་འཇུག་པའི་དུས་ཆེན་ཡིན། །དྲུག་པ་ཐམས་ཅད་མཐོང་བའི་ཕྱིར། །དང་པོ་དབུགས་ཆེན་ཕྱིན་པའི་དུས། །བདུན་པ་དེ་དོན་གོམས་བྱའི་བྱིར། །ཡུལ་ལ་འཇུག་པའི་དུས་སུ་བརྗོད། །བརྒྱད་པ་ངེས་དོན་ཕེབས་པའི་ཕྱིར། །རྟོག་ཆེན་ཉིད་ལ་ཕེབས་པའི་དུས། །དགུ་པ་དེ་སྟོབས་གྱུར་པའི་ཕྱིར། །གདེང་དུ་གྱུར་པའི་དུས་ཞེས་བྱ། །བཅུ་པ་ཤིན་ཏུ་མཐར་ཕྱིན་ཕྱིན། །ལས་རུང་ཐ་མའི་དབུགས་ཕྱིན་དུས། །ཞེས་གསུངས་སོ། །དངོས་གྲུབ་ཅེས་པའང་བཅུ་སྟེ། ས་བཅུ་འོག་མ་འོག་མ་ཡིས། །གོང་མ་གོང་མ་ཐོབ་པ་ཉིས། །སྐབས་ཀྱི་རྒྱུ་འབྲས་ཡོད་པའི་ཕྱིར། །གནས་སྐབས་ཞུགས་པའི་དངོས་གྲུབ་བོ། །འདི་ལྟར་ཡང་འཆད་དེ། དང་པོས་འདོད་པའི་དངོས་གྲུབ་དང་། །གཉིས་པས་སྦྱོར་བའི་དངོས་གྲུབ་དང་། །གསུམ་པས་སྦྱོང་སྤྱོད་དངོས་གྲུབ་དང་། །བཞི་པས་དྲོད་རྟགས་དངོས་གྲུབ་དང་། །ལྔ་པར་སློབ་རྫོགས་དངོས་གྲུབ་དང་། །དྲུག་པར་རྟོགས་པ་གྲུབ་པ་དང་། །བདུན་པ་མི་གཡོ་ཐོབ་པ་དང་། །བརྒྱད་པ་ཆོ་འཕྲུལ་གྲུབ་པ་དང་། །དགུ་པར་ཡེ་ཤེས་སྒྱུ་མ་འགྲུབ། །བཅུ་པར་རང་བྱུང་ཡེ་ཤེས་ཉིད། །ཅེས་གསུངས་སོ། །མཐར་ཕྱིན་དང་ཞེས་པ། འདུན་པའི་ནང་ནས་འདིར་འདུན་པ། །འབྲས་བུ་འདུན་ཕྱིར་མཐར་ཕྱིན་པའོ། །དེ་བཞིན་རྩོོལ་བ་ཐམས་ཅད་ཀྱིས། །མཆོག་འདི་རྩོལ་བ་མཐར་ཕྱིན་པའོ། །ངེས་དོན་གྲུབ་ལ་བརྩོན་པའི་ཕྱིར། །བརྩོན་པའི་མཐར་ཕྱིན་གསུམ་པར་ཐོབ། །བཟོད་པའི་ནང་ནས་མཆོག་འགྱུར་ཕྱིར། །གསང་དོན་བཟོད་པ་མཐར་ཕྱིན་མཆོག །བསླབ་པ་ལྷག་པ་བཅུ་ཉིད་ཕྱིར། །བསླབ་པ་མཐར་ཕྱིན་ལྔ་པ་ཉིད། །གཉིས་མེད་བདེན་རྟོགས་མཆོག་ཡིན་ཕྱིར། །དྲུག་པས་མཐོང་བ་མཐར་ཕྱིན་ནོ། །རང་རིག་དོན་གོམས་མཆོག་ཡིན་ཕྱིར། །བདུན་པར་ཏིང་འཛིན་གོམས་མཐར་ཕྱིན། །དེ་ཉིད་སྟོབས་ཀྱི་རང་རིག་པ། །རིག་པའི་ནང་ནས་མཐར་ཕྱིན་པའོ། །དབྱིངས་དང་ཡེ་ཤེས་གཉིས་མེད་ལ། །རིག་པ་གདེང་གྱུར་གནས་མཐར་ཕྱིན། །ཐམས་ཅད་རང་བྱུང་ཀློང་བརྡལ་ཕྱིར། །གོང་ན་མེད་པའི་འབྲས་མཐར་ཕྱིན། །ཞེས་གསུངས་སོ། །ལྟ་བའི་ཁྱད་པར་ཞེས་པ། དང་པོ་ཚིག་སོགས་སྒྲའི་རྣལ་འབྱོར་ཡིན་པའི་ཕྱིར། །ཚིག་ཙམ་ལྟ་བའོ། །གཉིས་པ་ལྷག་པའི་བདེན་པ་གཉིས། །ཡིད་ལ་བྱེད་པའི་ལྟ་བའོ། །གསུམ་པས་བདེན་གཉིས་རང་མཚན་དུ། །མགོ་མཐོང་གཉིས་མེད་བཟོད་པ་ཐོབ། །བཞི་པ་གཉིས་སུ་མེད་པ་ལ། །མི་སྐྲག་སྤེལ་བྱེད་གཡོ་དང་ཐོབ། །ལྔ་པར་བསླབ་བཅུ་སྤྱིར་ཆིབས་པས། །གཉིས་མེད་ཐག་ཆོད་དེ་ལ་འཇུག །དྲུག་པ་དེ་རྒྱུས་ཇི་བཞིན་མཐོང་། །དེ་ཡང་འདི་སྐད་དུ། རྒྱུད་ཉིད་ལས། ཆོས་ཀུན་མི་མཐོང་ཆོས་ཉིད་ཀྱང་། །མི་མཐོང་སེམས་ཅན་སེམས་མི་མཐོང་། །སངས་རྒྱས་མི་མཐོང་གང་མཐོང་བ། །དེས་ནི་ཡང་དག་བདེན་པ་མཐོང་། །ཞེས་གསུངས་སོ། །བདུན་པ་དེ་ཉིད་གོམས་པ་ཡིས། །མི་གཡོ་ལྟ་བ་ཤེས་རབ་ཅན། །བརྒྱད་པ་རང་རིག་འབྲས་བུ་སྐུ་གསུང་ཐུགས་ཀྱི་བདག་ཉིད་དུ་གོམས་པའི་རྒྱུ ས་མཐོང་སྟེ། འདི་སྐད་དུ། སངས་རྒྱས་སེམས་ཅན་ཐམས་ཅད་དང་། །དངོས་པོར་བརྟགས་པ་ཐམས་ཅད་ཀུན། །དོན་གྱི་ངང་དུ་གཅིག་པ་སྟེ། །དེ་ཉིད་སྐུ་གསུང་ཐུགས་ཀྱི་བདག །ཅེས་གསུངས་སོ། །དགུ་བར་དབྱིངས་དང་ཡེ་ཤེས་ཡབ་ཡུམ་དབྱེར་མེད་པའི་བདེ་བ་ཆེན་པོ་གདེང་དུ་གྱུར་ཏེ། འདི་སྐད་དུ། སྣོད་དུ་གྱུར་པ་ཡུན་གྱི་དབྱིངས། །བཅུད་རྣམས་རྒྱལ་བ་ཡབ་ཀྱི་མཁའ། །འབྱུང་འཇུག་རིག་པས་ལོངས་སྤྱོད་དེ། །འདི་ནི་རྡོ་རྗེའི་དམ་ཚིག་ཡིན། །ཞེས་གསུངས་སོ། །བཅུ་པའི་ལྟ་བ་གཟའ་གཏད་དང་བྲལ་བ་སྟེ། འདི་སྐད་དུ། མ་སྤངས་བཞིན་དུ་ལྷུན་གྲུབ་པས། །དབྱེར་མེད་པ་ནི་ཆོས་ཀྱི་དབྱིངས། །དབྱིངས་ལས་གཞན་དུ་ལྟ་ཡུལ་མེད། །འདི་ནི་ལྟ་བའི་དམ་ཚིག་གོ། །ཞེས་གསུངས་སོ། །གནས་འགྱུར་རྣམས་ཞེས་པ། ལྔའི་བཟླས་བཅུར་གྱུར་ཏེ། བཞེད་ཚིག་ལས། ས་བཅུར་སེམས་བཅུར་སྐྱེས་པ་ཡིས། །ཏིང་འཛིན་སྟོབས་ལྡན་ཡེ་ཤེས་རེ། །ཤར་བའི་སྐད་ཅིག་སྔ་མ་ཡིས། །རང་རང་སྒྲིབ་བཅོལ་ཕྱི་མ་ལ། །གོང་ནས་གོང་དུ་སངས་རྒྱས་ས། །གནས་འགྱུར་བཅུ་ལ་ལམ་སྟེགས་བཅུ། །ཞེས་གསུངས་སོ། །འོན་ཏེ་ཀུན་གཞིའི་གནས་འགྱུར་བ་ནི། སྐྱེ་བོ་ནས་འདུན་པའི་རྣལ་འབྱོར་དུ་གནས་འགྱུར་ན་ཡང་། དེ་བཞིན་གཤེགས་པ་རྩལ་ཆེན་རྫོགས་པའི་སྐད་ཅིག་མ་ལ་བག་ལ་ཉལ། རྡོ་རྗེ་ལྟ་བུའི་ཡེ་ཤེས་ཀྱིས་བཅོམ་ནས། ཕྱི་མ་ལ་སྐུ་ལྔ་མངོན་དུ་བྱས་ཏེ། གཏན་དུ་བར་གནས་འགྱུར་བ་དང་དྲུག་ཏུ་འགྲོ་བས། ཀུན་གཞིའི་གནས་འགྱུར་རྣམ་པ་ལྔས། །བྱེ་བྲག་ལམ་ལྔའི་ཆོས་སུ་སྣང་། །ཞེས་པ་དང་འགལ། འོན་ཏེ་འདུན་པའི་རྣལ་འབྱོར་དུ་གནས་འགྱུར་ཏོ་ཞེ་ནའང་འདུན་པའི་རྣལ་འབྱོར་བ་ལ། ཡིད་ལ་བྱེད་པའི་ཏིང་ངེ་འཛིན་གྱིས་ལྷའི་སྐུ་རང་གི་ཆ་ག་ཙམ་དུ་ཕྱོགས་པ་དང་། གཡོ་བའི་སེམས་སྐྱེས་པ། གླེགས་བམ་བཅུ་གཉིས་ཀྱི་དབང་ཐོབ་པས། བདག་ཉིད་ནམ་མཁའ་ལ་འགྲོ་བའི་ལྟས་མཐོང་བས། དེ་དག་སྐྱེ་བོ་ལ་མེད་ལ། །ས་འདི་ས་ལ་ཡོད་པའི་ཕྱིར། །གནས་མ་གྱུར་ན་རིག་པ་དང་འགལ་ལོ། །ཞེས་ཐེ་ཚོམ་སྐྱེ་བ་ལ། དེ་འདི་ལྟར་སྤྱད་པར་བྱ་སྟེ། དེ་ལྟར་སྣང་མོད་ཀྱི། འདུན་པ་བ་ནི་སྐྱེ་བོ་ལས་འཕགས་མོད་ཀྱང་། དེར་གནས་འགྱུར་ཞེས་མི་བྱ་སྟེ། སྐྱེ་བོའི་ཚེ་རྒྱུ་རྐྱེན་མེད་ལ་མ་ཡིན་ཡང་། ངེས་པའི་ཤེས་པས་སྦྱངས་པས། འདུན་པ་ཐོབ་པ་མ་ཡིན་པའི་ཕྱིར་དེར་གནས་འགྱུར་ན། གནས་འགྱུར་འབྲས་བུར་གྱུར་པའི་ངང་དྲུག་ཏུ་འགྱུར་བས། གོང་དུ་ལྔས་ཞེས་པའི་ལུང་དང་ཡང་འགལ། རིགས་པས་ལམ་ལྔར་གནས་འགྱུར་ནས་རྩལ་ཆེན་རྫོགས་པར་བརྗོད་ན་དེ་ནི་ལྷུན་གྱིས་གྲུབ་པའི་རིག་འཛིན་ཡིན་གྱི། རྒྱལ་བ་སངས་རྒྱས་ཉིད་མ་ཡིན་པའི་ཕྱིར། རྒྱལ་བར་འགྱུར་དགོས་པས། རིགས་པ་དང་འགལ་ལོ། །དེའི་ཕྱིར་འདུན་པ་བདེ། ཆོས་ཉིད་ལ་ད་དུང་བཟོད་པ་ཙམ་ཡང་མ་ཐོབ་སྟེ། མ་མཐོང་བའི་ཕྱིར། སྐྱེ་བོ་ལས་འཕགས་ཀྱང་གནས་འགྱུར་ཞེས་མི་བྱའོ། །དེས་ན་འདུན་པར། མོས་པའི་ལྷ་བརྟན་པར་བསྒོམས་པས། མཐུ་བརྟན་ཙམ་ན། འདུ་ཤེས་ཀླུངས་སུ་ཞུགས་པས་ལས་བག་ཆགས་བསྲབས་བཀག་སྦྱངས་ནས། སྦྱོར་བ་འདུན་པའི་ཀུན་གཞི་ཐོབ་པ་གནས་འགྱུར་བ་དང་པོའོ། །དེ་བཞིན་དུ་ས་འོག་ནས་གོང་དུ་འགྱུར་བཞིན། རྩལ་ཆེན་ནས་བདེར་གཤེགས་སུ་འགྱུར་བ་དང་ལྔའོ། །དེའི་ཕྱིར་འདུན་པ་ནས་ཡར་སངས་རྒྱས་སུ་ཀུན་གཞི་ལྔ་ལན་ལྔར་འགྱུར་བའི་ཕྱིར་ལམ་ལྔར་སྣང་སྟེ། དེར་འགྱུར་བར་བྱས་པའོ། །དེས་ན་གོང་གི་ལུང་ཉིད་དང་མི་འགལ་ལ། མཐར་སངས་རྒྱས་ཆེན་པོ་ཉིད་དུ་གནས་འགྱུར་བའི། རིགས་པ་དང་ཡང་མི་འགལ་ལོ། །བཀའ་འགྲེལ་རྒྱུད་ཀྱི་སྐབས་ཚིག་དཀའ་བ་དཀྲོལ། །ལུང་དང་རིགས་པས་མདུན་བསུ་རྒྱབ་སྦྱར་ནས། །དཀའ་བས་བསྡུས་པའི་དགེ་རྩ་ཅི་མཆིས་ས། །མཐའ་ཡས་རྒྱུད་ལ་སྨིན་ཅིང་གྲོལ་ཐོབ་ཤོག །སློབ་དཔོན་སྠི་ར་ཏིས་སྦྱར་བའི། སྐབས་འགྲེལ་བྱེ་བྲག་རྣམ་པར་བཤད་པ་ཞེས་བྱ་བ་རྫོགས་སོ།། །།

སློབ་དཔོན་དྷརྨ་བྷོ་དྷིས་མཛད་པའི་གསང་བའི་དོན་བསྡུས།

སློབ་དཔོན་དྷརྨ་བྷོ་དྷིས་མཛད་པའི་གསང་བའི་དོན་བསྡུས་ཞེས་བྱ་བ་བཞུགས་སོ། །བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ། །མཉམ་ཉིད་ཆོས་སྐུ་གསང་བའི་སྐུ། །ལོངས་སྤྱོད་རྫོགས་སྐུ་སྤྲུལ་པའི་སྐུ། །སྐུ་ལྔའི་བདག་ཉིད་བཅོམ་ལྡན་འདས། །ཀུན་བཟང་ངང་ལ་ཕྱག་བཙལ་ཏེ། །རྒྱལ་བའི་དགོངས་པ་ཀུན་འདུས་ལས། །མདོ་དོན་ཆོས་ཀྱི་རྣམ་གྲོལ་སྒོ། །དེ་ཤེས་དེ་འཇུག་བདེ་སྒྲུབ་ཕྱིར། །མི་འགལ་ཙམ་དུ་བསྡུས་ཏེ་བཤད། །ཀུན་བཟང་ཐུགས་རྗེས་འགྲོ་དོན་དུ། །ཐེག་པ་གསུམ་སྣང་འདུལ་མཛད་པའི། །དོན་དམ་ངེས་པའི་ཐེག་མཆོག་ལས། །གསང་སྒོ་མཚོན་པའི་མདོ་རྒྱུད་དོན། །རྣམ་པ་གསུམ་དུ་ཤེས་བྱ་སྟེ། །བྱ་བའི་གཞི་དང་བྱེད་པའི་རྐྱེན། །བྱ་བྲལ་འབྲས་བུའི་མཐར་ཕྱིན་དག །ཇི་སྙེད་ཆོས་ཀྱི་རྩ་བར་བཤད། །ཕྱི་ནང་བྱེ་བྲག་ཇི་སྙེད་པའི། །ཆོས་རྣམས་ཐམས་ཅད་བྱང་ཆུབ་སེམས། །ཇི་བཞིན་ངང་དུ་ཡེ་གནས་པ། །ཤེས་པར་བྱ་བའི་རྒྱུད་དོན་ཡིན། །རྩོལ་བྱས་སྤྲོས་པས་འདྲེས་འཇུག་པའི། །ཐེག་པ་དེ་ནི་བྱ་བྱེད་རྐྱེན། །གཞན་དུ་འབྲས་བུ་རེ་རྩོལ་མེད། །བསྒྲུབ་བྱ་ཉིད་ལ་ལམ་གནས་པས། །ཐབས་ཆེན་ཐེག་འདི་བྱ་བྲལ་བའོ། །དེ་ཡང་ཕྱི་ནང་གཉིས་ལ་ཡང་། །གཞི་དང་ཐབས་དང་འབྲས་བུ་ཡི། །ཚུལ་གསུམ་བྱེ་བྲག་ཆོས་སུ་བཤད། །གཞི་ནི་སྔ་མའི་དོན་ཉིད་དེ། །ཐབས་ནི་ལམ་ཡིན་རྣམ་པ་གསུམ། །གོལ་སྒྲིབ་ངོ་བོ་ཡན་ལག་སྟེ། །གོལ་ས་ལྟུང་བའི་སྒོ་དགུ་དང་། །ཉོན་མོངས་ཤེས་བྱའི་སྒྲིབ་སོགས་དང་། །ཐུན་མོང་རྟོག་པ་བརྒྱད་ཅུ་གཅིག །དགུ་བཅུ་ལ་སོགས་སྐྱོན་རྣམས་དང་། །ཤེས་པའི་བྱེ་བྲག་དྲུག་ལ་སོགས། །མི་མཐུན་གོལ་སྒྲིབ་ཕྱོགས་སུ་བཤད། །ངོ་བོ་ཐབས་དང་ཤེས་རབ་སྟེ། །རོལ་པའི་ཀ་ར་ལ་སོགས་པའི། །མན་ངག་ཐབས་ཀྱི་བདེར་འཇུག་དང་། །ཐོས་བསམ་སྒོམ་པའི་ཚུལ་འགྲོ་བའོ། །དེ་ནི་འཇུག་པ་རྣམ་གསུམ་སྟེ། །རྟོག་དཔྱོད་དོན་དང་ཡི་གེ་ཡི། །རྗེས་འཇུག་དང་པོ་སྔོན་འགྲོ་ཉིད། །བློ་ཡི་སྟོབས་ཀྱིས་རྣམ་པ་གཉིས། །ལུས་ལས་སྣང་བའི་ཆོས་རྣམས་ལ། །རིག་པའི་གཏན་ཚིགས་མཐའ་དག་དང་། །མན་ངག་ངེས་པའི་ཚད་མ་ཡིས། །སོ་སོར་རྟོག་དང་རྩོལ་མེད་པར། །རིམ་དང་གཅིག་ཅར་གཏན་ལ་འབེབས། །དེ་ནས་འཇུག་པའི་ཚུལ་སྒོ་ནི། །དོན་ལ་རིམ་དང་གཅིག་པའོ། །དོན་ནི་ཆོས་ཉིད་སྙིང་པོ་ལ། །རྗེས་སུ་འཇུག་པ་སེམས་མིན་ཏེ། །དེ་ཡང་སྐབས་ཀྱི་ཁྱད་པར་གྱིས། །ལམ་ལྔའི་སྐབས་དང་བཅུར་འགྱུར་བས། །རིམ་པར་བགྲོད་པའི་ལམ་དུ་བཤད། །བློ་གཞན་རིམ་གྱིས་འཇུག་པའང་། །ཡུལ་དང་ཤེས་པའི་ཚུལ་ལྟར་བུ། །ཇི་བཞིན་པ་ལ་བློ་བཞག་པས། །རིག་པའི་ཁྱད་པར་སྐབས་སུ་འཕགས། །གསལ་དང་བརྟན་དང་ཡུན་རིང་དང་། །ཤིན་ཏུ་རིགས་དང་ཚད་ལས་འདས། །མི་མཐུན་ཕྱོགས་དང་ཕྲད་པའི་ཚེ། །དེ་དབང་གྱུར་དང་ཅུང་ཟད་དུ། །མི་འགྱུར་ཐང་ཅིག་གནས་པ་དང་། །གསལ་བར་བརྟན་པའི་རིམ་གོམས་དང་། །རང་དབང་གྱུར་ནས་ཆེས་བརྟན་དང་། །སྤྱོད་ལམ་ཀུན་ཏུ་རླུང་གནས་ཡིན། །དེ་དག་ཟག་བཅས་བསམ་གཏན་ཏེ། །གཉིས་མེད་ཡུལ་བྲལ་དེ་མཐོང་མིན། །མཉམ་ཉིད་གསང་བའི་བདེ་དོན་ལ། །དད་དང་མོས་དང་དེར་རྩོལ་དང་། །དེས་དེ་གཡོས་དང་ཆེར་གཡོས་དང་། །མཐོང་དང་འདྲ་བར་འགྱུར་ཡིན་ཏེ། །སྐར་ཕྲན་འབྲིང་དང་ཆེན་པོ་དང་། །གཅིག་པ་གཉིས་པའི་ཟླ་བ་འདྲ། །རང་གི་མཚན་ཉིད་མངོན་སུམ་དུ། །གསལ་བར་མཐོང་བས་དབུགས་ཕྱིན་ཏེ། །ཟག་པ་ཟད་ནས་འཇིག་རྟེན་འདས། །གསུམ་པའི་རི་བོང་སྤྱན་འདྲ་ཡིན། །མཐོང་བའི་དོན་ལ་མཉམ་གནས་པས། །བརྟན་པར་འགྱུར་ཏེ་ལུང་ཆེན་ཐོབ། །འབྲས་བུ་ཆེར་འབྱུང་བཞི་པ་འདྲ། །རང་དང་སྤྱི་ཡི་ཐ་སྙད་བྲལ། །དམིགས་མེད་ཀུན་གསལ་ཡེ་ཤེས་ཉིད། །གཡོ་དང་ཐོབ་དང་བརྟན་རྫོགས་པའི། །རིམ་པས་མཐར་ཕྱིན་གསུམ་དུ་སྣང་། །ལྔ་བརྒྱད་བཅུ་དྲུག་ཚུལ་དུ་གསལ། །དེ་དག་པ་དང་རྣལ་འབྱོར་སྐབས། །སེམས་ལམ་བཅུ་དང་ལྔ་ཞེས་བྱ། །ཡང་དག་བློ་ཆེན་མངོན་རྟོགས་པས། །མཉམ་ཉིད་ཡུལ་བྲལ་རང་གསལ་བར། །མི་གཡོ་ཅིག་ཆར་གང་འཇུག་པ། །ས་དང་ལམ་གྱི་གྲངས་རྩོལ་མེད། །ཡེ་ཤེས་མཚན་མའི་རྣལ་འབྱོར་དག །བློ་ཡི་ཁྱད་པར་ཆེས་ཕྲ་བའི། །ཐམས་ཅད་གསལ་རྫོགས་ཅིག་ཆར་དང་། །ལྔ་དང་བཅུ་ལ་སོགས་པར་སྣང་། །ལམ་ལྔ་རྣལ་འབྱོར་རིག་འཛིན་གྱིས། །ས་དང་གནས་སྐབས་ཡེ་ཤེས་དང་། །སྒྲིབ་དང་གོལ་ས་རྟོགས་པ་དང་། །སྤྱོད་དང་ཏིང་འཛིན་དམ་ཚིག་དང་། །དུས་དང་དངོས་གྲུབ་མཐར་ཕྱིན་དང་། །ལྟ་བའི་ཁྱད་པར་གནས་འགྱུར་སོགས། །བྱེ་བྲག་ལམ་ལྔའི་ཆོས་སུ་སྣང་། །རྣལ་འབྱོར་ས་བཅུའི་ལམ་རྣམས་ལའང་། །ཁྱད་པར་དེ་དག་རྣམ་བཅུར་གསལ། །ལྷ་ཡི་ཕྱག་རྒྱ་གཅིག་པ་དང་། །གཉིས་འབྲེལ་ཡན་ལག་རྫོགས་པ་དང་། །འཁོར་ལོ་གཅིག་དང་རྣམ་སྤྲོས་དང་། །ཤིན་ཏུ་རྣམ་སྤྲོས་དཀྱིལ་འཁོར་དང་། །གླིང་གཅིག་གང་དང་སྟོང་གསུམ་དང་། །གྲངས་མེད་ཤིན་ཏུ་གྲངས་མེད་དང་། །ཆོས་དབྱིངས་མཐའ་ཡས་རབ་གསལ་རྫོགས། །དེ་དག་རྣམ་པའི་ཁྱད་པར་ཡང་། །རྟོག་དང་མཚན་མའི་རྣམ་པར་དང་། །ཆུ་ཟླ་ལྟ་བུར་བཟུང་མེད་དང་། །གཟུང་འཛིན་གཉིས་བྲལ་དེ་ཉིད་དང་། །ཅི་ལའང་མི་གནས་མཉམ་ཉིད་དང་། །རང་གི་མཚན་ཉིད་གསལ་ངེས་དང་། །ཟག་པ་མེད་དང་ལྷུན་གྲུབ་པའི། །རབ་འབྲིང་ཐ་མའི་རིམ་པ་ཡིས། །ཐོབ་དང་ཤིན་ཏུ་ཐོབ་པ་དང་། །བསྟན་རྫོགས་ཉིད་དེ་རྣམ་བཅུའོ། །ཙད་ཀྱང་གྲུ་བཞི་བརྒྱད་ཅུ་དྲུག །སུམ་ཅུ་གཉིས་དང་དྲུག་ཅུ་བཞི། །དེ་བཞིན་འགྱུར་སོགས་ཆོས་དབྱིངས་རྣམས། །ལྷར་གསལ་འཕྲོ་འདུ་དབུགས་ཡུལ་དང་། །དྲི་སྒྲ་གཟུགས་སོགས་རིམ་བཞིན་འཕགས། །དེ་དག་བློ་ཡི་རྩལ་ཡིན་ཏེ། །ཤེས་རབ་ལ་སོགས་ཀུན་དེ་བཞིན། །ཁྱད་པར་འགྱུར་ཞིང་རྣམ་པར་འཕེལ། །དོན་དང་ཡི་གེ་གང་དེ་ཡང་། །སོ་སོའི་གནས་སྐབས་ལམ་བདག་ཉིད། །བགྲོད་དང་དེ་ཆོས་ལྡན་པ་དང་། །རྒྱུད་མི་གཏོང་དང་རྟེན་བྱེད་དང་། །དུས་དེ་སྐབས་དང་འབྲས་བུ་དང་། །གགས་དང་འདྲ་བའི་ལྟུང་གནས་དང་། །རྩོལ་ཞིང་བགྲོད་པའི་ལམ་སེམས་དང་། །སྤྱོད་ལམ་དང་ནི་བློ་གནས་དང་། །མི་འདའ་བསྲུང་དང་དུས་ཉིད་དང་། །ཡོན་ཏན་མཐུ་དང་བྱ་བྲལ་དང་། །ཤེས་རབ་སྟོབས་དང་ཁྱད་པར་ལས། །ཐ་སྙད་བྱེ་བྲག་རྣམས་སུ་གསུངས། །གཞན་ཡང་སེམས་བསྐྱེད་སྔགས་ལ་སོགས། །ལམ་གྱི་ཆོས་སྒོ་ཐ་སྙད་ཀུན། །ལྔ་དང་བཅུ་སོགས་གྲགས་པ་ཡིན། །དང་པོ་གཉིས་ལ་གནས་པ་ནི། །གསང་ཆེན་འབྲས་བུ་ལམ་གྱི་རྟེན། །དེ་བཞིན་རིམ་པར་བགྲོད་གནས་ན། །ལྟུང་ཡང་གཟུགས་ཀྱི་ཟིན་པ་དང་། །ལུས་ངན་མི་སྲིད་བདེ་འགྲོ་ཡིས། །ཡང་དག་གནས་དང་འདོད་རིགས་སོགས། །བདེ་འགྲོའི་གནས་ངན་མི་སྲིད་དང་། །ཁམས་གསུམ་འཇིག་ཚོགས་ཟག་བྲལ་དང་། །མི་ལྡོག་མི་གནས་ཕྱིར་འོང་དང་། །མི་ཤེས་སྐྱོན་བྲལ་མཐའ་རྫོགས་ནས། །ས་སར་མི་ལྡོག་སངས་རྒྱས་སར། །ཐོགས་མེད་མངོན་གྱུར་ལྷུན་གྱིས་གྲུབ། །དེ་ཕྱིར་ལམ་གྱི་མཆོག་ཏུ་བརྗོད། །དེ་རྐྱེན་ཡན་ལག་རྣམ་པ་གཉིས། །སྒྲུབ་བྱེད་རྐྱེན་དང་ཤེས་བྱེད་པའི། །ལམ་གྱི་ཡན་ལག་སུམ་ཅུ་གཉིས། །མདོ་དང་གཞི་དང་བསླབ་པའི་མཐའ། །མདོ་ནི་བཅུ་གཉིས་འཇུག་སྒོ་དང་། །དམ་ཚིག་ལྟ་བ་ཏིང་འཛིན་དང་། །དམིགས་པ་བཟླས་པ་ཕྲན་ལས་དང་། །སྤྱོད་པ་དང་ནི་ཐོབ་བྱའི་དབང་། །རིག་འཛིན་ས་དང་སངས་རྒྱས་ས། །ངེས་འབྱེད་ཡན་ལག་དག་ཏུ་བཤད། །གཞི་ནི་རྣམ་བཅུ་སྒྲུབ་པ་དང་། །གསང་སྔགས་མིང་དང་སྤྱོད་པ་དང་། །དངོས་གྲུབ་གནས་དང་བཟླས་པའི་སྒྲ། །ཕྱག་རྒྱ་ཏིང་འཛིན་ལྟ་བ་དང་། །ཆོ་འཕྲུལ་དག་སྟེ་དེ་དག་སྟོན། །དཔེ་བཅུས་མཚོན་ནས་རབ་ཏུ་ཤེས། །བསླབ་པའི་མཐའ་ནི་རྣམ་བཅུ་སྟེ། །དམ་ཚིག་གཞི་དང་རྒྱུད་དགྲོལ་དང་། །སྒོ་མོ་བསྡུར་དང་ཕུལ་དབྱུང་དང་། །ཐག་བཅད་པ་དང་ཉམས་བླངས་དང་། །ལ་དོར་སྤྱོད་དང་དབང་རིམ་དང་། །མན་ངག་དོན་དང་མདོར་བསྡུས་རྣམས། །རྣལ་འབྱོར་བསླབ་པའི་མཐའ་བཅུར་བཤད། །གཞི་འཛིན་ས་ནི་དམ་ཚིག་སྟེ། །སྒོ་གསུམ་སྡམ་པར་གནས་པའི་དོན། །རྩ་བ་ཡན་ལག་ལ་སོགས་པའི། །བསྲུང་དང་སྒྲུབ་པ་དེ་ཉིད་དོ། །རྒྱུད་དགྲོལ་བ་ནི་ཐོས་བསམ་སྟེ། །མཁས་ལྡན་དམ་པའི་བླ་མ་ལ། །དད་དང་སྲིད་ཞུ་གུས་པ་ཡིས། །དོན་གང་ཉན་འཛིན་རྟོག་བྱེད་འགྲོལ། །སྒོ་བསྡུར་བ་ནི་ཐེག་པ་རྣམས། །ཤེས་པར་བྱེད་དང་རྩོལ་བ་སྟེ། །གོལ་སྒྲིབ་ཕྱོགས་སུ་གང་གསུང་དག །གཅད་ཕྱིར་དེ་དག་རིག་ཤེས་འབྱེད། །ཕུལ་དུ་དབྱུང་བ་འདི་དོན་ཉིད། །མཁས་ཤིང་རབ་ཏུ་ཤེས་པའོ། །ཐག་བཅད་པ་ནི་ལྟ་བ་སྟེ། །ཇི་བཞིན་མ་ནོར་ཤེས་རབ་ཉིད། །རེ་དོགས་མེད་པར་བསྔོ་འགྲོ་དོན། །ཉམས་བླང་བ་ནི་ཏིང་འཛིན་ཏེ། ཕྱག་རྒྱ་བཞི་སོགས་སྤྲོས་པ་དང་། །སྤྲོས་མེད་ལ་སོགས་བསམ་གཏན་ཡིན། །ལ་དོར་བ་ནི་སྤྱོད་པ་སྟེ། །དཀྱིལ་འཁོར་བཞི་དང་ལས་བཞི་དང་། །སྒྲུབ་པ་ལ་སོགས་བྱེ་བྲག་དང་། །ཐུན་མོང་ཐབས་ཀྱི་མཛད་སྤྱོད་ཉིད། །དབང་ནི་རིམ་པར་བགྲོད་བྱེད་པའི། །ལྔ་དང་ལྔ་སོགས་ནུས་མཐུ་བསྐྱེད། །མན་ངག་དོན་སྒྲུབ་ཐབས་ཀྱི་མཆོག །གསེར་འགྱུར་བདུད་རྩི་ལྟ་བུའི་ཚུལ། །མདོར་བསྡུ་བ་ནི་སེམས་ཀྱི་དོན། །ཇི་བཞིན་ངང་རྟོགས་ཀུན་འདུས་པའི། །ཤེས་བྱེད་ཡན་ལག་རྣམ་པ་གཉིས། །མཚོན་བྱེད་ཚིག་དོན་ཡི་གེའི་སྒྲ། །རྒྱུད་དོན་ཡན་ལག་རྣམ་དྲུག་དང་། །དེ་འགྲེལ་གཏན་པ་འབེབས་བྱེད་པའི། །ལྡེ་མིག་ཅེས་སུ་གྲགས་པ་དེ། །རྒྱུད་ནི་བྱིན་རླབས་འབྱུང་བ་དང་། །ལུང་བསྟན་བརྒྱུད་པ་རྣམ་གཉིས་ཕྱིར། །དེ་འགྲེལ་བ་ཡང་རྣམ་པ་གཉིས། །བྱིན་རླབས་སྐུ་བཞི་བསྟན་པ་དག །བཤད་ཐབས་ལྡེ་མིག་རྣམ་གཉིས་ཏེ། །དཔྱོད་པའི་འདྲེན་སྒོ་རྣམ་འགྲེལ་གསུམ། །འབྱེད་པ་དུག་དང་འགྲོལ་བ་བཞི། །ངེས་པ་འབྱིན་པ་རྣམ་གསུམ་མོ། །སྒོ་གཉིས་སྤྱི་དང་ཁྱད་པར་ཏེ། །སྤྱི་ཡི་རྣམ་གསུམ་ཡན་ལག་མདོ། །རྩ་བ་དག་གིས་འགྲེལ་བར་བྱེད། །ཁྱད་པར་གསང་སྒོའི་རྣམ་འགྲེལ་ཡང་། །ཡན་ལག་མདོ་དང་རྩ་བ་ཡིས། །འབྱེད་འགྲེལ་ངེས་པར་འབྱིན་པར་བྱེད། །བྱེད་པ་རྒྱུ་དང་རྩ་བ་དང་། འབྲེལ་དང་ཚིག་དང་ངེས་པར་སྦྱོར། །རྒྱུ་ནི་གླིང་བཞི་དྲུག་ཡིན་ཏེ། །དོན་གང་གང་ཚེ་གང་ཉིད་ཀྱིས། །གང་དུ་གང་ལ་བཤད་བརྗོད་པའོ། །རྩ་བ་གླེང་བསླང་རྐྱེན་ཉིད་དང་། །ཇི་ལྟར་བསླངས་ནས་ཞུས་བཤད་ཚུལ། །འགྲེལ་བ་གང་བརྗོད་གང་གིས་བརྗོད། །གང་ཕྱིར་གང་གི་སྟོབས་ཀྱིས་བཤད། །འདྲེན་པ་བརྗོད་པའི་རྒྱུ་འདི་དག །ཇི་ལྟར་བཤད་པའི་ཚུལ་བཅུ་སྟེ། །རང་བཞིན་ལྟ་བའི་ངེས་དོན་དང་། །སྤྱི་དོན་སྡུད་དང་རྣམ་པར་དབྱེ། །ཚིག་དོན་འབྲེལ་དང་འབྲེལ་ཤུགས་སྦྱོར། །རང་ལུགས་ཉིད་དང་བརྒལ་ལན་དང་། །ལྡེམ་དགོངས་བརྡ་དང་དཔེས་མཚོན་དང་། །མན་ངག་གབ་སྦས་འབྱིན་སྡེབས་རྣམས། །དཔེ་བཅུ་ལྟ་བུར་བཤད་པའོ། །ངེས་པ་གཏན་ཚིགས་རྣམ་བཅུ་གཉིས། །སྣོད་སྒོ་བཞི་ལ་བསྟན་པ་བཞི། །འཚམ་བར་སོ་སོར་ངེས་འབྱེད་དང་། །ལུས་དང་དོན་དང་རིག་པ་དང་། །མཚོན་དཔེ་གཏན་ཚིགས་མཐའ་དག་གིས། །སྣང་དང་མི་འགལ་རྒྱས་འཐད་སྦྱར། །དེ་དག་རེ་རེའང་དགོས་པ་དང་། །ངོ་བོ་ངེས་ཚིག་དམིགས་བཟུང་བཅས། །རྣམ་བཅུ་གཉིས་ཀྱི་ངེས་འབྱེད་ཤེས། །སྦྱོར་བ་བྱང་ཆུབ་ཡན་ལག་སྟེ། །རྟོགས་པ་བཞི་དང་མཚན་ཉིད་བཞི། །དགོས་འབྲེལ་བཞི་དང་ཡན་ལག་བཞི། །དེར་ལུང་བཞི་དང་མཚན་དཔེ་བཞི། །བསྙེན་སྒྲུབ་ཡན་ལག་བཞི་དག་དང་། །མཚན་ཉིད་ཚུལ་དང་སྦྱོར་བ་ནི། །རྣམ་པ་སུམ་ཅུ་རྩ་གཉིས་རྣམས། །གཞི་ཉིད་འགྲེལ་དང་ཟག་བཅས་དང་། །མཐོང་དང་སྒོམ་དང་མཐར་ཕྱིན་དང་། །སངས་རྒྱས་ས་དང་རྣམ་དྲུག་ཏུ། །བསྡུས་ཏེ་དེ་ཡི་ཡན་ལག་ཡིན། །ཆོ་འཕྲུལ་བཞི་དང་མངོན་ཤེས་ལྔ། །ཐབས་དང་ཐབས་སྦྱར་ལྔ་ལྔ་དང་། །རང་བཞིན་ལྔ་དང་ཕྲིན་ལས་བཞི། །གཞན་དོན་སྤྱོད་པའི་ཡན་ལག་སྟེ། །བླ་མེད་སྦྱོར་བའི་ཆོས་འགྲེལ་ཡིན། །མདོ་བཞི་ཐོས་མཐོང་མངོན་སུམ་དང་། །བྱ་བ་མེད་དང་རྣམ་བཞིར་འགྲེལ། །རྩ་བ་ངེས་པའི་མན་ངག་གསུམ། །མི་མཐུན་ཕྱོགས་རྣམས་བཅད་པ་དང་། །དོན་མཐུན་འགྲོ་བའི་དཔེས་མཚོན་དང་། །ངེས་པའི་དོན་ལ་གནས་པ་ཡི། །དོན་གསུམ་ཚུལ་གྱིས་རྣམ་འགྲེལ་འབྱིན། །ལུང་བསྟན་བརྒྱུད་པའི་བསྟན་པ་ཡང་། །དེ་བཞིན་ཚུལ་དུ་འགྲེལ་བ་སྟེ། །རྒྱུད་དོན་རྣམ་གསུམ་ཁུངས་དང་རྒྱུ། །ངོ་བོ་ཉིད་དེ་དང་པོ་ནི། །ཐུན་མོང་བཅས་གཞི་སྤྱི་རྒྱུད་དོ། །གདམས་ངག་ལུང་བསྟན་རྩ་བའི་རྒྱུད། །གླེང་གཞི་སྤྱི་ཡི་རྒྱུད་ཅེས་བྱ། །འཁོར་འདུས་སྨྲས་དང་བསྐུལ་ཞེས་པས། །བསྟན་པ་འབྱུང་བའི་རྒྱུ་རྐྱེན་ཏེ། །ངོ་བོ་ཚོགས་པ་དྲུག་ཉིད་དོ། །གླེང་བསླང་ལ་སོགས་དྲུག་རྣམས་དང་། །མདོ་བཞི་རྩ་བ་གསུམ་ལ་སོགས། །ཚུལ་བཞིན་རྗེས་སུ་སྦྱར་བ་བྱ། །དེ་དག་འབྲས་བུའི་ལམ་དུ་བཤད། །འབྲས་བུ་ཉིད་ནི་རྫོགས་སངས་རྒྱས། །སྐུ་གསུང་ཐུགས་དང་ཡོན་ཏན་དང་། །ཉི་ཤུ་ལྔར་བསྡུས་མཐའ་ཡས་རྣམས། །ལྷུན་རྫོགས་རྣམ་ཀུན་མཁྱེན་པའོ། །གསང་མཆོག་གསང་དག་བཀའ་ལུང་མདོ་རྒྱུད་དོ། །གསང་བསྡུས་གསལ་བཤད་མདོ་ཙམ་ཕྱོགས་བརྗོད་པ། མ་ནོར་མི་འགལ་ཙམ་དུ་ཉམས་ཀྱིས་བསྟན། །དེ་ཡི་དགེ་བ་གང་མཆིས་ཡོངས་ལ་བསྔོ། །གསང་བའི་མདོ་དོན་བསྡུས་པ་སློབ་དཔོན་དྷརྨ་བྷོ་དྷིས་མཛད་པ་རྫོགས་སོ། །མངྒ་ལཾ།། །།

སྠི་ར་མ་ཏིས་མཛད་པའི་བྱང་ཆུབ་སེམས་ཀྱི་ལྗོན་ཤིང་།

སྠི་ར་མ་ཏིས་མཛད་པའི་བྱང་ཆུབ་སེམས་ཀྱི་ལྗོན་ཤིང་ཞེས་བྱ་བ་བཞུགས་སོ། །དཔལ་རྡོ་རྗེ་མི་བསྐྱོད་པ་ལ་ཕྱག་འཚལ་ལོ། །དང་པོ་ལས་ཅན་རྣལ་འབྱོར་ལ། སྩོགས་པའི་རྣལ་འབྱོར་བཅུ་པོ་རྣམས། །ཡི་གེ་རྟོག་དཔྱོད་དོན་ལ་འཇུག །དེ་འདིར་ངེས་པར་རྣམ་གཉིས་ཀྱིས། །དོན་འཇུག་བྱང་ཆུབ་ལྗོན་པའི་ཤིང་། །བསྐྱེད་ཕྱིར་ལེགས་པར་བསྟན་པར་བྱའོ། །དེ་ལ་བློ་གྲོས་ཞེན་ཅན་ཕྱིར། །ཤེས་རབ་ཐབས་ཀྱིས་ངེས་གསུངས་པའི། །ཐོག་མར་བློ་གྲོས་ལྡན་པ་ཡིས། །སོ་སོར་རྟོག་པ་མངོན་འགྲོ་བས། །མཐའ་བཅུ་སློབ་ཅིང་དེ་ཉིད་ལ། །ངོ་བོ་ངེས་ཚིག་དགོས་པ་དང་། །གལ་པོ་ཆེ་རེའང་ཆོས་རྟགས་དང་། །ལྡན་པས་དེ་འདིར་ཐག་བཅད་དགོས། །དེ་ཡིས་དོན་འགྱུར་གཞི་ཡི་ཕྱིར། །གནས་དང་ཆ་རྐྱེན་ལྡན་བྱས་ནས། །སྔོན་འགྲོ་ལས་རྣམས་རྫོགས་བྱས་ཏེ། །ལྗོན་ཤིང་བསྐྱེད་པའི་ལས་ལ་འབད། །རྣལ་འབྱོར་ལྔ་ཡང་ཁྱད་པར་ལས། །རྣལ་འབྱོར་ཆེན་པོའི་སྐབས་བཅུ་སེམས། །སྔ་མ་ཕྱི་མ་རྒྱུ་འབྲས་ཚུལ། །གྱུར་པ་བཅུ་དྲུག་རྒྱུན་གྱིས་རྫོགས། །འདུན་པ་སྐྱེ་བའི་སྐབས་དག་ལ། །མུན་པའི་སྤྲིན་ལས་སྐར་ཕྲེང་གཟེར། །སྣང་བ་ལྟ་བུར་གསལ་བ་ཡིས། །དོན་མཆོག་ཐོས་དང་རྟོག་དཔྱོད་པས། །ལྷག་པའི་གསང་བའི་བདེན་གཉིས་ཚུལ། །རང་མིན་སྤྱིའི་མཚན་ཉིད་དུ། །སྒྲ་ལ་བརྟེན་ནས་གཡོས་ལ་བསྒོམ། །བདག་དོན་འཇུག་པ་དང་པོའི་ཚེ། །བྱིང་རྒོད་ལ་སོགས་གཉེན་པོས་སྤོང་། །ཉམས་གསུམ་མཐའ་ལ་འཇུག་པའི་དྲུག །ནང་དུ་དུ་བས་གཟེར་འཕྲོ་མཐོང་། །ཉེར་མཚོན་རྟགས་ཚུལ་གཉིས་ཀར་སྦྱར། །རྩོལ་བ་སྦྱོང་བའི་སྐབས་དག་ལ། །མཐའ་བཅུ་ཉིད་ལ་འཇུག་པར་རྩོལ། །གཡོ་བའི་རྒྱུ་ནི་ཆོས་རྣམས་ཀུན། །བདེན་གཉིས་རང་གི་མཚན་ཉིད་དུ། །རྟོག་པར་སྨོན་པས་ཁྱད་པར་ཕྱིར། །མ་ངེས་སེམས་ལས་ལྷག་པར་བསྒོམ། །དེ་ཚེ་རང་མཚན་ཉམས་རིམ་མཐའ། །སྐར་མ་ཕལ་པར་རབ་རིབ་མཐོང་། །དང་པོ་ལས་ཀྱི་རྣལ་འབྱོར་འདི། །ཡང་དག་ཚོལ་ལ་བརྩོན་བྱ་དགོས། །སེམས་རྐྱེན་གཡེང་སྤོང་བསྐྲུན་བྱས་ནས། །ངན་སོང་ལས་རྣམས་གཅོད་པར་འགྱུར། །བསླབས་པ་འཇུག་པའི་སྐབས་དག་ལ། །མཐའ་བཅུར་ཞུགས་ཏེ་གཅོད་སྦྱོང་ཞིང་། །དེ་ཚེ་ལྷག་པའི་བདེན་གཉིས་ཀྱང་། །སྨོན་རྒྱུ་བཅུ་རྐྱེན་ལྡན་པ་ཡིས། །གཉིས་མེད་རྟོགས་པས་གཡོ་ཞིང་ལྡང་། །དབྱེར་མེད་རང་གི་མཚན་ཉིད་དུ། །ལྡང་བའི་སེམས་བསྒོམས་འཕེལ་སྟོབས་ཀྱིས། །མེ་གཟེར་སྐར་ཆེན་ལྟ་བུའང་མཐོང་། །འདུ་ཤེས་འགྱུར་བའི་སྐབས་དག་ལ། །བཅུ་མཐར་གནས་པས་འདུ་ཤེས་ཀྱང་། །དོན་ལ་བཟོད་པ་ཐོབ་པར་འགྱུར། །གཉིས་མེད་དོན་ལ་སྦྱོར་སེམས་སྐྱེ། །ཡུལ་དང་དབང་པོ་རྣམ་ཤེས་ཆོས། །འཁོར་དང་མྱ་ངན་འདས་པའི་ཆོས། །རང་རིག་སྣང་ཕྱིར་སྣང་ཀུན་སེམས། །ཡུལ་མེད་སེམས་ཀྱང་དབྱིབས་མདོག་མཚན། །ཡོད་མེད་བྲལ་བས་རིགས་རྒྱུད་མིན། །དེ་ཕྱིར་མ་སྐྱེས་སྣང་སྟོང་མཐའ། །དབྱེར་མེད་བསྒོམས་པའི་ཉམས་མཐའ་ལ། །འགལ་མེད་འཁོར་ལོ་ཟླ་ཚེས་སྣང་། །སྦྱོར་ཆེན་འཇུག་པའི་སྐབས་དག་ལ། །ངན་སོང་མི་ལྡོག་སྔོན་ཐོབ་ཅིང་། །མཐའ་བཅུ་ཅིར་ཆིབ་གཉིས་མེད་དོན། །རྟོགས་མཐར་ཕྱིན་ལ་མ་རག་ལ། །བརྟན་པས་དེ་དོན་མཇུག་སེམས་སྐྱེ། །ཉམས་གསུམ་མཐའ་ལ་སྒྲོན་མེའམ། །ཟླ་ཚེས་གཉིས་པའི་རྟགས་མཐོང་འགྱུར། །དབུགས་ཕྱིན་མཐོང་ལ་མ་རག་ཀྱང་། །ལེ་ལོས་ཡུལ་ལ་མ་བརྩོན་ན། །མཐོང་ལམ་མི་ཐོབ་ལྷ་མིན་མིའི། །གནས་བཟློག་ཟག་པས་ཅུང་ཟད་འཁོར། །བསྒྲུབ་པའི་རིག་འཛིན་གང་དེ་ལའང་། །བདག་གི་དོན་འཇུག་སུམ་ཅུ་གཉིས། །རང་རང་ཤེས་འཇུག་འབྱོར་པ་སྔོན། །ཚོལ་ཐོས་བཞི་བཞིར་སྐབས་ལའང་སྦྱར། །འོ་ན་མདོ་ཀྱང་སེམས་ལྔ་ཡི། །རིམ་པ་ཇི་བཞིན་ཁྱད་པར་འགྱུར། །རོ་མྱོང་ས་ཡི་སྐབས་དག་ལ། །དགའ་བ་ལྷག་པའི་སེམས་འབྱུང་སྟེ། །ཅི་ཕྱིར་སྔོན་དུ་བཅུ་མཐར་བས། །གཉན་བསམ་བསྒོམ་ལས་ཆོས་ཉིད་དོན། །མ་མྱོང་མ་མཐོང་སུ་ཤེས་མྱོང་། །ཆོས་ཀུན་མི་མཐོང་ཆོས་ཉིད་ཀྱང་། །མི་མཐོང་སེམས་ཅན་སེམས་མི་མཐོང་། །སངས་རྒྱས་མི་མཐོང་གང་མཐོང་བ། །དེས་ནི་ཡང་དག་བདེན་པ་མཐོང་། །འཇིགས་པ་ལྔ་བྲལ་བདེ་བའི་སེམས། །བསྒོམས་པ་བུམ་པ་མར་མེའི་ཚུལ། །དེ་ཉིད་མཐོང་དང་ཆོས་གསུམ་མཐོང་། །དེ་ཉིད་མཐོང་བའི་ཁྱད་པར་གྱིས། །སྤྱོད་ལམ་དངོས་གཞིར་གང་སྤྱོད་ཀྱང་། །འཆིང་བར་མི་འགྱུར་གྲོལ་འགྱུར་ཐབས། །ཐམས་ཅད་དེར་སྦྱང་ལམ་གནས་མཆོག །ཡུལ་ལ་འཇུག་པའི་སྐབས་དག་ལ། །མི་འགྱུར་ལྷག་པའི་སེམས་འབྱུང་བ། །ཇི་ལྟར་ཇི་བཞིན་ཉིད་མཐོང་ནས། །ཤེས་རབ་དངོས་ཡུལ་དེ་ཉིད་ལ། །རྣལ་འབྱོར་ཡང་དག་འཇོག་པའི་ཚེ། །གཉིས་མེད་རང་གི་མི་གཡོ་བར། །མཐོང་ལམ་འདུ་བྱེད་དང་བྲལ་བ། །ཕྲ་མོའི་བྱིང་རྒོད་དབང་གྱུར་བྲལ། །ཤིན་ཏུ་མི་གཡོ་སེམས་ལྡན་པས། །བཞི་པའི་རི་བོང་ཅན་མཐོང་འཕེལ། །ལམ་བྱས་པ་ཡི་ལྔ་ལྟས་དག །རང་བྱུང་ཆེན་པོའི་རྟགས་མཆོག་ཉེ། །གདུལ་བྱའི་འདོད་པ་ཇི་ལྟ་བར། །ཕྱིར་འོང་སྔོན་དང་སྨད་འཚོང་སྟོན། །རྟོག་ཆེན་དག་གི་སྐབས་དག་ལ། །རིག་པ་ལྷག་པའི་སེམས་འབྱུང་སྟེ། །རྣལ་འབྱོར་ཡང་དག་འཇོག་པའི་རྒྱུས། །དངོས་གཉིས་སེམས་ཀྱི་ཆོ་འཕྲུལ་ཕྱིར། །བདག་ཉིད་ཆེན་པོ་གསལ་བར་རིགས། །རྣལ་འབྱོར་ཡུལ་འདས་རིག་པ་ཡི། །མངོན་སུམ་སྐབས་ཀྱི་བྱས་པའི་ཕྱིར། །ལམ་རིམ་གདེང་ཆུད་རྟགས་ཆེན་སོ། །རང་བྱུང་ཡེ་ཤེས་ཉེ་བར་བསྟན། །གདུང་འཚོབ་དགའ་ལྡན་ཐེག་ཆེན་སྟོན། །གདེང་དུ་གྱུར་པའི་སྐབས་དག་ལ། །གནས་པ་ལྷག་པའི་སེམས་འབྱུང་བའང་། །ཆོས་རྣམས་མ་ལུས་ཐམས་ཅད་ཀུན། །རང་རིག་དབྱིངས་ཀྱི་རྩལ་སྣང་ཕྱིར། །ཡུལ་དོན་ཡེ་ཤེས་དེ་སྦྱར་བས། །ཤེས་པར་བྱ་བ་ཐམས་ཅད་རྫོགས། །བདེ་ཆེན་སྟོབས་ལྡན་ཐེ་ཚོམ་མེད། །སྤྱོད་ཡུལ་ཆོས་ཉིད་གདལ་གནས་ས། །རང་བྱུང་ཡེ་ཤེས་རྟོགས་ཐོབ་པས། །དོན་གསལ་བརྟན་པའི་སྒྲོན་མེ་འདྲ། །དེ་མཐོང་བརྒྱད་པའི་སྐར་འཛིན་མཐོའོ། །རྟགས་ཆེན་ཡེ་ཤེས་གྲུབ་ཕྱིར་ཐོབ། །ལས་སུ་རུང་བའི་སྐབས་དག་ལ། །རྫོགས་པ་ལྷག་པའི་སེམས་འབྱུང་སྟེ། །ཅི་ཕྱིར་མཐའ་བཅུ་ས་བཅུ་ཡི། །ཅིར་ཆིབས་ཆོས་ཀུན་རང་རིག་ཉིད། །རང་བྱུང་རང་སྣང་རྒྱུ་རྐྱེན་བྲལ། །དེ་ཉིད་མ་འདྲེས་ཡོངས་སུ་རྫོགས། །ཡེ་ཤེས་དབྱིངས་ཞེས་བྱ་བའི་དོན། །ཐ་སྙད་ཙམ་དུ་རྟོགས་ཆུད་ནས། །ཐམས་ཅད་རྫོགས་པའི་སྤྱིར་ཆིབ་པས། ཐ་མའི་དབུགས་ཆེན་འདི་ཚེ་འབྱུང་། །མཉམ་གཞག་མ་བཞག་སྙད་ལས་འདས། །རང་རིག་མངོན་སུམ་ཆེན་པོ་ཡི། །ས་བཅུ་རྣལ་འབྱོར་ཕྲ་མོ་རྣམས། །རང་སེམས་གཅིག་ལ་གཡོ་ཐོབ་བརྟན། །རིམ་པས་གསལ་དང་མི་གསལ་བའི། །སྟོབས་ཀྱི་ཁྱད་པར་གྱུར་པ་ཡིན། །རྫོགས་སེམས་རྗེས་གསུམ་རིམ་གྱི་ས། །ཀློང་ཡངས་ཆུབ་ལ་མངོན་སངས་རྒྱས། །ཇི་སྙེད་ཉིད་ཀྱི་སྐུ་གསུང་ཐུགས། །མངོན་བྱས་ངོ་བོ་ཉིད་སྐུ་ཐོབ། །འདུས་བྱས་སྐུ་སོགས་ལྔར་སྣང་སྒྲོལ། །འདུས་མ་བྱས་པའི་སངས་རྒྱས་སོ། །ཕྱེད་སྣང་གནས་དང་ཆགས་ཅན་ཕྱིར། །གཡེམ་ལ་གཡེམ་སྟོན་ཆགས་ལ་ཆགས། །ཇི་ལྟར་དུག་གིས་དུག་ནད་ལྟར། །ཐབས་ཀྱི་ཆགས་པས་ངེས་བྱའི་ཕྱིར། །ཆགས་ཆུས་གསང་སེམས་ཤིང་སྐྱེད་པའང་། །བསྙེན་སྒྲུབ་བཞི་སོགས་བདག་དོན་ལྡན། །མཚན་ལྡན་བཀྲ་ཤིས་གསང་བའི་ཡུམ། །དཀའ་བས་བཙལ་ལ་ཆགས་པས་བསྟེན། །འདོད་ཡོན་ལྔ་ཡིས་མཆོད་བྱས་ཏེ། །གཉིས་སུ་མེད་པར་ནན་ཏན་བྱ། །བཅས་དཀའ་བྲལ་བའི་བཀྲ་ཤིས་གནས། །བརྩལ་ལ་སྔོན་དུ་བྱས་རྣམས་ལ། །བསྙེན་པ་དག་གི་དུས་སུ་ནི། །གང་ཟག་མིའི་ཟས་ལ་བརྟེན། །ཉེ་བའི་བསྙེན་པའི་ཚེ་ན་ནི། །བཅུད་ཀྱི་མཆོག་གིས་འཚོ་བྱས་ཏེ། །དམ་ཕོག་ཆོས་བཤད་བརླབས་བསྐུལ་སོགས། །ལེགས་བྱས་བཅུ་གཉིས་གསུམ་འཆོས་བྱ། །ཕན་ཚུན་བསྣོལ་མས་འབད་བྱས་ཏེ། །དེ་ནས་དབང་པོ་བསྲུབས་པ་ཡིས། །མཚོན་བྱས་ཤིང་བཅུ་བསྐྱེད་བརྟག་བྱ། །དེ་དེའི་རིམ་པ་འདི་ལྟ་སྟེ། །བདེ་བའི་མཚན་རྫོགས་རིག་མ་ལ། །མཐོང་བས་འདུན་སྐྱེ་གཡོ་བ་སྟེ། །ལུས་ཀུན་ལ་གནས་ཐིག་ལེ་ཉིད། །རྡུལ་བྱུང་ཕལ་པོ་གཡོ་བར་བྱེད། །སེམས་རྩོལ་འདོད་པ་རྩེ་གཅིག་གིས། །སྨོན་ནས་ཆོ་འཕྲུལ་འཇུག་བྱེད་པ། །འབྲིང་པོ་རྩ་ཡི་ཐིག་ལེ་ནི། །རྡུལ་འདུས་སྲོ་མའི་མཚན་ཉིད་འབྱུང་། །ཐ་མལ་པ་རུ་དེ་བརྗོད་དོ། །ཕྲད་པའི་རེག་པས་ཆ་ཕྲ་བའི། །རྡུལ་ཕྲན་ལྡན་པར་གྱུར་པའི་མཐུས། །དངུལ་ཆུ་ལྟ་བུའི་ཉུངས་དཀར་ནི། །ལྟོས་པས་ཆེན་པོར་ངེས་པར་འགྱུར། །དེ་ཉིད་བདེ་བའི་ལམ་སླེབས་པས། །རྩོལ་བྲལ་བདེ་བར་བློ་སྦྱར་བ། །ཐིག་ལེ་ངོ་བོ་ཟླ་གཅིག་ཚུལ། །གང་ཞིག་རྟགས་འཛིན་རྩོལ་བྱས་སྐབས། །གཟུང་འཛིན་ཆོ་འཕྲུལ་སེམས་བཅུ་པ། །ཐིག་ལེ་དངོས་དང་ཡེ་ཤེས་ཀྱང་། །ཅུང་ཟད་ཀྱིས་འཕགས་ཀུན་ལ་བལྟ། །ཅུང་ཟད་ཕྱེད་འདས་བདེ་བ་མྱོང་། །སྤྲོས་པ་ཉེར་ཞི་དགའ་བའི་མཆོག །ཆས་བགེས་པས་ན་གསུམ་ཉིད་དེ། །གཟུང་དང་ཡེ་ཤེས་དེ་བཞིན་ཤེས། །བདེ་བ་ཆོས་ཀྱི་མི་དམིགས་ཡུལ། །གར་མཐོང་ངོ་བོ་འགྱུར་མེད་དེ། །རིམ་པ་ཇི་ཞི་ཇི་ཞི་བ། །མཚན་ཉིད་གཉིས་འཕགས་དེ་བཞིན་ནོ། །སྟོང་ཉིད་མི་གཡོ་རྣམ་རྟོག་སྟེ། །རང་རིག་ངོ་བོ་རང་གསལ་བ། །རྡུལ་ཕྲན་ལྔ་པ་མྱ་ངན་འདས། །རྩེ་མོ་དབུས་སུ་གང་གནས་སེམས། །གོམས་པ་གདེང་དང་བཅས་པ་ནི། །ཡེ་ཤེས་ཚོགས་ཀྱི་བཅུ་དྲུག་ཕྱེད། །ཕྱེད་རྫོགས་ཚོགས་འཕེལ་དེ་ཕན་ཆད། །མི་དམིགས་ཆོས་ལ་བློ་སྦྱངས་ཡིན། །ཇེ་ཞི་ཇེ་ཕྲ་མི་དམིགས་པ། །མཚན་མ་ཤེས་བྱ་བསྲབ་པ་སྟེ། །མཉམ་པས་སྟོང་པར་གྱུར་པས་ན། །ཐམས་ཅད་ཆོས་སྐུར་རྫོགས་པའོ། །གང་ཞིག་འདྲེན་པའི་ཆོ་ག་ནི། །ལས་སུ་བྱང་བ་ཀུན་གྲུབ་ཕྱིར། །རྩལ་བྱ་རྩོལ་བྱེད་གཉིས་རྫོགས་པ། །བཅུ་དྲུག་ཚོགས་ཀྱིས་རྫོགས་པས་ན། །མཛེས་པའི་ཉི་མ་བཅུ་དྲུག་གིས། །ཟླ་དཀྱིལ་འོད་ཀྱི་ཕྱག་རྒྱ་ལ། །མཛེས་པས་སྤྲས་པའི་བདེ་བ་དེ། །བཅུ་དྲུག་ཚོགས་ཀྱི་བསོད་ནམས་བསྐྲུན། །དུས་དེ་ཉིད་དུ་ཉི་ཟླ་འཆར། །མཐའ་རྫོགས་སེམས་སུ་རྒྱལ་བས་གསུངས། །དེ་ལྟར་ཉམས་དང་འཕྲོད་ལྡན་པ། །བསྒྲུབ་པ་དག་གི་དུས་སུ་ནི། །ཁམས་ལས་གྱུར་པའི་བཅུད་ཀྱིས་འཚོ། །རྡོ་རྗེ་ཚེ་གཅིག་ལྟ་བུར་འགྱུར། །བསྒྲུབ་པ་ཆེན་པོར་ཟག་པ་ཟད། །ཁམས་ཀྱི་ཟས་དང་བྲལ་གྱུར་ཡང་། །དབང་པོ་གཟི་མདངས་གསལ་འགྱུར་ཞིང་། །ནམ་མཁར་འགྲོ་བར་ཐེ་ཚོམ་མེད། །ཆོ་འཕྲུལ་བཞི་སོགས་སྟོན་པར་ནུས། །མཐར་རྫོགས་རྒྱས་ལ་ཐེ་ཚོམ་མེད། །བྱང་ཆུབ་སེམས་ཀྱི་ཆུ་མེད་ན། །རྒྱལ་བ་རྣམས་ཀྱི་སྐམ་པར་འགྱུར། །བྱང་ཆུབ་སེམས་ཀྱི་ཆུ་བོ་འདིས། །སྔོན་ཞེན་མཐའ་དང་སྔོ་བསྐམས་བརླན། །ནོར་བུ་རིན་ཆེན་གང་སྲེལ་བ། །དབུལ་བའི་འཇིགས་པ་མེད་པ་ལྟར། །གསང་བའི་དོན་གསང་གང་སྲེལ་བ། །ལྟུང་གནས་འཁོར་བའི་འཇིགས་པ་མེད། །སེང་གེའི་ཕྲུ་གུའི་དྲིས་ནི་གར་ཁྱབ་པར། །གང་དག་མི་བཟོད་ཐམས་ཅད་འབྲེས་པར་འགྱུར། །སྙིང་པོའི་དོན་ལ་རིག་པའི་མཐུ་མེད་ཀྱང་། །སེམས་བསྐྱེད་ཙམ་གྱིས་དབུ་མ་ཟིལ་གྱིས་གནོན། །ལོག་པའི་དགྲ་རྣམས་ཟིལ་གནོན་སྐྲག་འགྱུར་ཞིང་། །རང་རང་གནས་སུ་ཟུག་རྔུས་གཟིར་བར་འགྱུར། །དཀར་པོ་མཐར་ཐུག་བསོད་ནམས་ཀུན། །སེན་མོ་ཐོག་གི་རྡུལ་ཙམ་དུ། །རྡོ་རྗེ་སྙིང་པོར་གཅིག་བསྐྱེད་པ། །ས་ཡི་དཀྱིལ་འཁོར་ཆེན་པོ་ཙམ། །གསང་ཉིད་སྙིང་པོའི་བྱིན་རླབས་ནི། །གང་དུ་རྣམ་པར་མི་རྟོག་བཞིན། །འདོད་པ་འབྱུང་བའི་བྱ་བ་བྱེད། །དེ་ལ་བྱེད་པ་ཅི་ཡང་མེད། །ཀུན་འབྱུང་བྱང་ཆུབ་ཤིང་གིས་ཀུན་ཁྱབ་ཀྱང་། །དྲ་བ་བཞིར་ཆུད་ལྔ་ལ་ལྗོན་ཤིང་མེད། །དེ་འདིར་གསང་ཆེན་སྦྱོར་བའི་ལྡེམ་དགོངས་ཀྱིས། དྲངས་བཅུག་ངེས་བྱའི་གདུལ་བྱར་ཀུན་གྱུར་ཀྱང་། །གསང་བའི་ལྗོན་ཤིང་ཡལ་ག་ལོ་འདབ་དང་། །མེ་ཏོག་འབྲས་བུ་རྒྱས་བྱེད་འདི་བསྡུས་པའི། །ངལ་བའི་དགེ་རྩས་དྲ་བ་བཞི་བོར་ནས། །བྱང་ཆུབ་ཆེན་པོའི་ཆུས་བརླན་སངས་རྒྱས་ཤོག །བྱང་ཆུབ་སེམས་ཀྱི་ལྗོན་ཤིང་། སྠི་ར་མ་ཏིས་མཛད་པ་རྫོགས་སོ།། །།

མདོ་དབང་གི་ལག་ལེན་ཟབ་མོ།

མདོ་དབང་གི་ལག་ལེན་ཟབ་མོ་བཞུགས། ལམ་རིམ་ཕྲེང་བའི་དབུའོ། །གུ་རུ་ན་མོ། ལྷ་དང་མི་ཡི་ཐེག་པའི་སྐབས་སུ་རྣམ་པར་སྣང་མཛད་བསྒོམ། ན་མོ་བྷ་ག་ཝ་ཏེ་བཟླས། མི་རྟག་པ་བསྒོམ། ཀ་སྨད་ཀྱི་དབང་བསྐུར། བསྙེན་གནས་ཀྱི་སྡོམ་པ་དབོག །ཉན་ཐོས་ཀྱི་སྐབས་སུ་ཤཱཀྱ་ཐུབ་པ་བསྐྱེད། གང་ཟག་གི་བདག་མེད་བསྒོམ། ཀང་ཀ་ནི་བགྲང་། གསེག་ཤང་པར་བུའི་དབང་བསྐུར། ཉན་ཐོས་ཀྱི་སྡོམ་པ་དབོག །རང་རྒྱལ་གྱི་སྐབས་སུ་ཤཱཀྱ་ཐུབ་པ་དང་། མཆོག་ཆེན་པོ་བཅུ་གཉིས་བསྒོམ། ཡེ་དྷརྨ་བགྲང་། རྟེན་འབྲེལ་བཅུ་གཉིས་ཀྱི་དབང་བསྐུར། རང་རྒྱལ་བའི་སྡོམ་པ་འབོག །བྱང་ཆུབ་སེམས་དཔའི་སྐབས་སུ་ཡུམ་ཆེན་མོ་བསྐྱེད། ག་ཏེ་ག་ཏེ་བཟླས། བྱམས་སྙིང་རྗེ་བསྒོམ། མཛད་པ་ཉི་ཤུའི་དབང་བསྐུར། བྱང་ཆུབ་སེམས་དཔའི་སྡོམ་པ་དབོག །ཀྲི་ཡའི་སྐབས་སུ་རིགས་གསུམ་གང་རུང་བསྐྱེད། རིགས་གསུམ་གྱི་སྙིང་པོ་གང་རུང་བཟླས། ཀྲི་ཡའི་དབང་ཉི་ཤུ་རྩ་དྲུག་བསྐུར། ཁྲུས་དང་གཙང་སྒྲའི་སྡོམ་པ་དབོག །ཡོ་གའི་སྐབས་སུ་རིགས་ལྔ་གང་རུང་བསྐྱེད། བུདྡྷ་བཻ་རོ་ཙ་ན་ༀ། བཛྲ་ཨཀྵོ་བྷྱ་ཧཱུཾ། རཏྣ་སཾ་བྷ་ཝ་ཏྲཾ། ཨ་མི་དེ་ཝ་ཧྲི། ཨ་ཨ་མོ་སིདྡྷི་ཨ། བཀྲ་ཤིས་དྲུག་ཅུ་རྩ་གཉིས་ཀྱི་དབང་བསྐུར། ཡོ་གའི་སྡོམ་པ་དབོག །ལྷ་སྣང་ལ་རང་བཞིན་མེད་པར་སྒོམ་དུ་གཞུག །མ་ཧཱ་ཡོ་གའི་སྐབས་སུ་ཞི་ཁྲོ་གཉིས་ལས། ཞི་བའི་སྐབས་སུ་རྡོ་རྗེ་སེམས་དཔའ་བསྒོམ། སྙིང་པོ། ཨ་ཨཱ། ཨི་ཨཱུ། ཨ་ཨཱུ། ཨེ་ཨཻ། ཨོ་ཨ། ཨཾ་ཨཱཿ བོ་དྷི་ཙིཏྟ་ཛྙཱ་ན་དྷ་ཏུ་ས་ཏྭ་ཀོདྷ་ཨ་ཞེས་བཟླས། ལྷ་དང་བདག་དབྱེར་མེད་དུ་བསམ། དབང་བཅོ་ལྔ་བསྐུར། མ་ཧཱ་ཡོ་གའི་དམ་ཚིག་དབོག །ཁྲོ་བོ་སྐབས་སུ་ཆེ་མཆོག་བསྐྱེད་རུ་ལུ་བཟླས། ཕྱི་ནང་སྒྲུབ་པ་གསུམ་གྱི་དབང་བསྐུར། ཞི་ཁྲོ་དབྱེར་མེད་དུ་བསམ། ཨ་ནུ་ཡོ་གའི་སྐབས་ཀུན་ཏུ་བཟང་པོ་བསྐྱེད། སྙིང་པོ་གྲ་ཡ་ཛྙཱ་ན་བཟླས། ལྷ་ལྔ་བརྒྱ་དང་བརྒྱད་ཅུའི་དབང་བསྐུར། ཨ་ནུ་རང་གི་དམ་ཚིག་དབོག །མ་འདྲེས་ཡོངས་རྫོགས་ཀྱི་གསལ་འདེབས་བྱ། ཨཐྎ། ཨ་ཏི་ཡོ་གའི་སྐབས་སུ་ལྷ་གང་བསྐྱེད་ཀྱང་འདྲ། རིག་པ་རྩལ་གྱི་དབང་བསྐུར། གདམས་ངག་ཆོས་ཐམས་ཅད་སེམས་སུ་ངོ་སྤྲད། སེམས་ཆོས་ཉིད་དུ་ངོ་སྤྲད། ཆོས་ཉིད་བདེ་བ་ཆེན་པོར་ངོ་སྤྲད་དོ། །སྙིང་པོ་ནི། ཨ་ༀ་ཧཱུཾ་ཞེས་བཟླས་སོ། །དམ་ཚིག་ནི་མེད་པ་ལ་སོགས་བཞི་བསྲུང་། གསང་དབང་གི་སྐབས་སུ་ལྷ་ཀུན་བཟང་ཡབ་ཡུམ་བསྒོམ། སྙིང་པོ་ནི། ༀ་ཤྲཱི་བཛྲ་མ་ཧཱ་སུ་ཁ་ཧོ། ཞེས་བཟླས་སོ། །གདམས་ངག་བདེ་ལ་མི་རྟོག་པ་དབོག །སྦྱོར་ཐབས་ཀྱི་དམ་ཚིག་དབོག །རིག་འཛིན་གྱི་སྐབས་སུ། སློབ་དཔོན་དགའ་རབ་ལ་སོགས་པའི་བརྒྱུད་པ་བསམ། སྙིང་པོ། ༀ་མ་ཧཱ་ཤ་རི་རམ་གི་ལི་ཧཱུཾ་ཞེས་བཟླས། གདམས་ངག་རིག་འཛིན་གོང་མ་འོད་དུ་ཞུ་ནས་བདག་གི་ལུས་ལ་ཐིམ་པས། ལུས་ངག་གི་སྒྲིབ་པ་ཐམས་ཅད་དག་པར་བྱེད་པར་བསམ། དམ་ཚིག་བླ་མ་ལ་མོས་གུས་བསྐྱེད། རང་གི་ལུས་ཀྱི་བཀྲ་ཤིས་སྒོ་མངས་ཀྱི་མཆོད་རྟེན་དུ་བསྒོམ། དེ་ནི་ཐེག་པ་རིམ་པ་དགུ་ཀ་ལམ་དུ་ཁྱེར་བའི་དབང་གསོ་བ་ཡིན་ནོ། །ཨཐྎ། བླ་མ་རྣམས་ལ་ན་མོ། ཞི་ཁྲོ་གཉིས་ལམ་དུ་ཁྱེར་ན། གདམས་ངག་ལས། ལུས་ལ་ལྷ་བསྐྱེད། ཡིད་ཀྱིས་གསལ་གདབ་ལ། ན་མོ་ཧཱུཾ་གིས་གཟི་བྱིན་བསྐྱེད། གསུངས་པས། ཞི་བ་ལྟར་ཉམས་སུ་ལེན་ན། རང་གི་སྤྱི་བོ་ལ་སོགས་པར་རིགས་ལྔ་ཡབ་ཡུམ་བསྒོམ། དེའི་སྙིང་པོ་བཟླས། རང་གི་མིག་ལ་སོགས་པའི་རྩ་ནང་དུ། ནང་གི་སེམས་དཔའ་ཡབ་ཡུམ་བསྒོམ། དེའི་སྙིང་པོ་བཟླས། མིག་ལ་སོགས་པའི་ཕྱིར་ཕྱིའི་སེམས་དཔའ་ཡབ་ཡུམ་བསྒོམ། དེའི་སྙིང་པོ་བཟླས། ཡན་ལག་བཞི་ལ་སྒོ་བ་ཡབ་ཡུམ་བཞི་བསྒོམ། དེའི་སྙིང་པོ་བཟླས། སྙིང་ཁ་དང་སོགས་ཕྲག་གཉིས་སུ་ཀུན་བཟང་ཡབ་ཡུམ་བསྒོམ། དེའི་སྙིང་པོ་བཟླས། དཔྲལ་བ། ལྐོག་མ་སྙིང་ག་ལྟེ་བ་གསང་གནས་རྐང་མཐིལ་དུ། ཐུབ་པ་དྲུག་བསམ། དེའི་སྙིང་པོ་བཟླས། ཡེ་ཤེས་ལྷའི་ཐུགས་དམ་གྱི་རྒྱུད་བསྐུལ། བདག་ལ་ཐིམ། བདག་གི་ལུས་ངག་གི་སྒྲིབ་པ་དང་ལྟ་བ་དམན་པའི་སྒྲིབ་པ་དག་པར་བསམ། དེ་ནས་མཆོད། དེ་ནས་བསྟོད་པ་བྱའོ། །དེ་ནི་ཞི་བའི་ལམ་ཁྱེར་རོ། །ཨཐྎ། ཁྲོ་བོའི་ལམ་དུ་ཁྱེར་བ་ནི། གདམས་ངག་ལྟར་དུ་དབང་ཆེན་གྱི་དལ་དང་། མགོ་བོ་དང་ཤ་རུས་ལ་སོགས་པ་ལུས་ཁྲོ་བོའི་གཞལ་ཡས་ཁང་དུ་བསྒོམ། ལུས་ལ་ལྷ་དགོད་ལུགས་ནི། རང་གི་ལུས་སྤྱི་ཆེ་མཆོག་ཏུ་གསལ། སྙིང་པོ། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ། ༀ་ཀ་ཏ་མ་ཧཱ་ཀྲོ་དྷི་ཤྭ་རི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་བཟླས། རུ་ཏྲ་རྣམ་གསུམ་ལ་ཧཱུཾ་དགུ་བཟླས། ཧེ་རུ་ཀ་དགུ་ཀློང་དུ་བསྒོམ། དེའི་སྙིང་པོ་ནི། ༀ་བཛྲ་ཤྲཱི་ཧེ་རུ་ཀ །བཛྲ་མ་ཧཱ་ཀྲོ་དྷི་ཤྭ་རི་ཧཱུཾ། ཨཱོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་བཟླས་སོ། །བཛྲ་ཧེ་རུ་ཀ་མཚེར་པ་ལ་བསམ། བུདྡྷ་ཧེ་རུ་ཀ་གྲོད་པ་ལ་བསམ། སྙིང་པོ་ནི། བུདྡྷ་འགྲེ། མཆིན་པ་ལ་རཏྣ་བསམ། ལྟེ་བ་སྤྲུལ་པའི་ཙཀྲ་བང་རིམ་བཞིར་བསྒོམ། སྙིང་ག་ཆོས་ཀྱི་ཙཀྲ་བུམ་པ། མགྲིན་པ་ལོངས་སྤྱོད་ཀྱི་ཙཀྲ་བྲེ་དང་འཁོར་ལོ་རིམ་པ་བཅུ་གསུམ་བསྒོམ། སྤྱི་གཙུག་བདེ་ཆེན་གྱི་ཙཀྲ་མཆོད་རྟེན་གྱི་གདུགས་སུ་བསྒོམ། །རྩ་ཀུན་དྷརྨ་སྦོམ་ཕྲ་མདའ་སྨྱུག་ཙམ་པ་མཆོད་རྟེན་གྱི་སྲོག་ཤིང་དུ་བསམ། སྤྱི་བོའི་སྟེང་དུ་ཡི་གེ་ཧཾ་གི་རང་བཞིན་ཐིག་ལེ་སྲན་མ་ཙམ་ཞིག་བསམ། ཐིག་ལེ་དེ་ཉིད་ཡོངས་སུ་གྱུར་པ་ལས་བླ་མ་གདུགས་ཀྱི་ཏོག་ཏུ་བསྒོམ། དེའི་ངང་ལས་མ་གཡེངས་པར་ཡི་དམ་ལྷའི་སྙིང་པོ་སྐྱེལ་ཚད་དུ་བཟླས། དེ་ལ་ཤེས་པ་གཏད་དེ་བསྒོམས་པས་བླ་མ་དང་ཙཀྲ་འོད་དུ་ཞུ་ནས་སེམས་ཉིད་ཀྱི་དངོས་པོ་ཡོད་དམ་སྙམ་པ་དང་རུག་གི་འདྲེས་པའི་ངང་ལ་བློ་བསྒྱུར་ལ་བཞག་གོ། །གཟུགས་སྣང་ཟབ་སྒྲོགས་སྙིང་པོ་ཅན། མཆོད་གནས་ཡིད་བརྟེན་དམ་པའི་ཆོས། །འགྲོ་མགོན་རྡོ་རྗེ་སེམས་དཔས་གསུངས། །ཞེས་གསུངས་སོ། །ཐེག་པ་ལས་ཨ་ནུའི་ཐེག་པ། ལྷ་ལས་ཀུན་ཏུ་བཟང་པོ་དང་། ཆེ་མཆོག་གང་གསལ་དུ་བསྒོམ། སྙིང་པོ་ནི། ཨཱོཾ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ་ཧཱུཾ། ངང་སྒོམ་ནི། རང་གི་སྙིང་གི་དཀྱིལ་དུ་ཐིག་ལེ་ཁ་དོག་དཀར་པོ་ལྕོག་སྒོང་ཙམ་ཞིག་བསྒོམ། དེ་སྐར་མདའ་འཕོ་བའི་ཚུལ་དུ་སྤྱི་བོའི་གཙུག་ཏུ་འོད་དུ་འཕོས་ཏེ། ཐེག་ལེ་གཅིག་ལས་ཐིག་ཕྲན་རྣམས་འདུས་ནས་ཐིག་ལེ་གཞི་མ་ལ་ཐིམ་ནས་དབྱིངས་དང་ཡེ་ཤེས་གཉིས་སུ་མེད་པའི་ངང་ལ་བློ་གནས་པར་བྱའོ། །གསང་དབང་ལ་ལྷ་ཀུན་ཏུ་བཟང་མོ་བསྒོམ། སྙིང་པོ་ལ། ༀ་ཤྲཱི་བཛྲ་བོ་དྷི་མ་ཧཱ་སུ་ཁ་ཧཱུཾ་ཧོ། ཐེག་པ་ལས་ཨ་ཏི། ལྷ་གང་བསྐྱེད་ཀྱང་རུང་། སྙིང་པོ་ཨཱཿༀ་ཧཱུཾ། ཨས་སྣང་སྲིད་ཐམས་ཅད་སྐྱེ་མེད་དུ་ངོ་སྤྲད། ༀ་གྱིས་འགའ་མེད་དུ་ངོ་སྤྲད་དོ། །རིག་འཛིན་ལ་བསྒོམ་ཐབས་བརྒྱུད་པའི་བླ་མ་རྣམས་བསྒོམ། སྙིང་པོ། ༀ་མ་ཧཱ་ཤ་རི་རཾ་གྱི་ལི་ཧཱུཾ། གདམས་ངག་ནི་ཆོས་ཐམས་ཅད་སེམས་སུ་ངོ་སྤྲད། སེམས་ཆོས་ཉིད་དུ་ངོ་སྤྲད། ཆོས་ཉིད་བདེ་བ་ཆེན་པོར་ངོ་སྤྲད། དེ་ཡང་རིག་འཛིན་གོང་མ་གོང་མ་འོད་དུ་ཞུ་ནས་འོག་མ་འོག་མ་ལ་ཐིམ་པར་བསམ། དེ་ཡང་འོད་ཀྱི་རང་བཞིན་རང་གི་སྤྱི་བོའི་གཙུག་ཏུ་ཐིམ་པས་ལུས་ངག་ཡིད་གསུམ་གྱི་སྡིག་སྒྲིབ་བྱ་སྒྲོ་མེས་བཤུར་བ་བཞིན་ནམ་ན་བུན་རྫིས་བསྐྱོད་པ་བཞིན་སོང་བར་བསམ། དེ་ཡང་ལུས་ཤེལ་སྒོང་དག་པ་ལྟ་བུར་བསམ་མོ། །འདུས་པ་མདོའི་ལག་ལེན་ཆོག་ཁྲིགས་ཡི་གེར་བཀོད་པའོ། །ཤིན་ཏུ་གསང་བའོ།། །།

ཨ་ནུ་ཡོ་ག་ལུང་བདུན་གྱི་སྒོ་ནས་འཆད་ཚུལ་ཟུང་འཇུག་གྲུབ་པའི་རྣ་རྒྱན།

ཨ་ནུ་ཡོ་ག་ལུང་བདུན་གྱི་སྒོ་ནས་འཆད་ཚུལ་ཟུང་འཇུག་གྲུབ་པའི་རྣ་རྒྱན་ཅེས་བྱ་བ་བཞུགས་སོ། །རིགས་དང་དཀྱིལ་འཁོར་ཀུན་གྱི་ཁྱབ་བདག་དཔལ་ལྡན་བླ་མ་དམ་པ་ལ་ཕྱག་འཚལ་ཞིང་སྐྱབས་སུ་མཆིའོ། །བདག་རྒྱུད་སྨིན་གྲོལ་ལ་འགོད་པར་མཛད་དུ་གསོལ། འདིར་གསང་སྔགས་ཀྱི་ཐེག་པ་རྒྱུད་སྡེ་བཞིར་གྲགས་པའི་ནང་ཚན་བླ་མེད་ཀྱི་རྒྱུད་ལས་ཕ་མ་གཉིས་མེད་ཀྱི་རྒྱུད་གསུམ་ལས་སྔ་འགྱུར་རང་སྐད་ལ་ཡོ་ག་རྣམ་གསུམ་ཞེས་གྲགས་པ་དེའི་འཆད་ཐབས་ལ་རྒྱུད་མ་ཧཱ་ཡོ་ག་རྒྱན་བདུན་དང་། ཨ་ནུ་ཡོ་ག་ལུང་བདུན། ཨ་ཏི་ཡོ་ག་སྤྱི་དོན་རྣམ་དྲུག་གི་སྒོ་ནས་སོ་སོར་འཆད་པར་བཤད་པ་ལས། འདིར་ཨ་ནུ་ཡོ་ག་ལུང་བདུན་གྱི་སྒོ་ནས་འཆད་ཚུལ་ཅུང་ཟད་ཕྱེ་ན། ཧེ་རུ་ཀ་གལ་པོའི་རྒྱུད་ལས། སྣང་སྲིད་ཡེ་སངས་རྒྱས་པ་ལྟ་བའི་ལུང་། །ལྷ་སྐུ་ཕྱག་རྒྱར་གསལ་བ་བསྐྱེད་རིམ་ལུང་། །བཟླས་བརྗོད་བསྙེན་པར་འབད་པ་སྔགས་ཀྱི་ལུང་། །ཆོས་དབྱིངས་ཡུམ་དུ་རོལ་པ་སྦྱོར་བའི་ལུང་། །ཞིང་བཅུ་རྩད་ནས་གཅོད་པ་སྒྲོལ་བའི་ལུང་། །ཚོགས་ཀྱི་འཁོར་ལོ་ཞལ་ཟས་མཆོད་པའི་ལུང་། །དབང་བསྐུར་དངོས་གྲུབ་ལེན་པ་སྒྲུབ་ཆེན་ལུང་། །ཞེས་པར་ལྟར་བདུན་ལས། དང་པོ་ནི། སྣང་སྲིད་ཡེ་སངས་རྒྱས་པ་ལྟ་བའི་ལུང་། །ཞེས་སེམས་ཉིད་ཀྱི་ངོ་བོ་ཡེ་གདོད་མ་ནས་སངས་རྒྱས་སུ་གནས་པ་དེ་ཉིད་ལྷན་སྐྱེས་མ་རིག་པས་བསྒྲིབ་ནས་ཀུན་བརྟགས་མ་རིག་པས་ཕྱོགས་སུ་བཅད་པའི་གཟུང་འཛིན་གྱི་སྣང་བས་ཕྱི་རོལ་དུ་ཡུལ་སྣང་བཟང་ངན་སྣ་ཚོགས་སུ་སྲིད་པ་འདི་དག་ཀྱང་ངེས་དོན་དུ་བརྟགས་ན་བདེན་གཉིས་ཀྱི་དོན་ལ་དངོས་པོར་འཛིན་པའི་ཆ་ཤས་རྡུལ་ཕྲན་ཙམ་ཡང་མ་གྲུབ་པར་རང་རང་གི་ངོ་བོས་སྟོང་སྟེ། སེམས་འགྲེལ་ལས། ཀུན་རྫོབ་ལས་ནི་ལོགས་ཤིག་ལ། །དོན་དམ་ཉེར་བར་མ་དམིགས་དང་། །སྟོང་ཉིད་གང་ཡིན་ཀུན་རྫོབ་ལ། །ཀུན་རྫོབ་གང་ཡིན་སྟོང་ཉིད་དོ། །ཞེས་དང་། ཡུམ་ལས་རབ་འབྱོར་ཆོས་ཐམས་ཅད་ནི་བདེན་པའམ་རྫུན་པ་གང་དུའང་མེད་དེ། རང་བཞིན་གྱི་ངོ་བོ་ནི་མེད་པའི་ཕྱིར་དང་། ཞེས་དང་། དེ་ཡང་བློ་ལས་འདས་པས། སྣང་བས་གང་ཡང་མ་གྲུབ་ཉམས་པ་ཙམ་ཡང་མ་དམིགས་ཏེ། །ཏིང་ངེ་འཛིན་རྒྱལ་པོ་ལས། རྟག་དང་ཆད་པ་འདི་ཡང་མཐའ་ཡིན་ཏེ། །ཡོད་དང་མེད་ཅེས་བྱ་བ་གཉིས་ཀ་མཐའ། །གང་ཡང་གཉིས་པོ་དག་ནི་མི་ཤེས་ནས། །མཁས་པས་དབུས་ལའང་གནས་པར་མི་བྱའོ། །ཞེས་དང་། ཀླུ་སྒྲུབ་ཀྱིས་དབུ་མའང་དམིགས་སུ་ཡོད་མ་ཡིན། ཞེས་པས་དོན་དམ་སྤྲོས་བྲལ་རང་བྱུང་གི་ཡེ་ཤེས་ནི་གཤིས་གང་དུའང་མ་གྲུབ་ཀྱང་རྩལ་སྣ་ཚོགས་སུ་སྣང་བ་ཡོད་མེད་སྤྲོས་པའི་སྒྲོ་སྐུར་གྱི་མཐའ་དང་བྲལ་བ། ཡེ་ནས་སངས་རྒྱས་ཀྱི་སྙིང་པོ་འཁོར་འདས་ཀུན་གྱི་ངོ་བོར་བཞུགས་པ་ཡིན་ཏེ། གསང་སྙིང་ལས། བཅིངས་མེད་རྣམ་པ་གྲོལ་མེད་པ། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་དང་། སྲིང་གསུམ་ཡེ་ནས་སངས་རྒྱས་ཞིང་། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་རྙེད་དོ། །ཞེས་གསུངས་པས་དུས་གསུམ་གྱི་རྒྱལ་བ་ཀུན་གྱི་ཐུགས་ཀྱི་བཞེད་ཕུག་ལྟ་བ་བླ་ན་མེད་པ་ཡིན་ཏེ། སྔ་མར་འདི་ལས་གསང་བའི་ངེས་དོན་མེད། །ཅེས་སོ། །གཉིས་པ་ནི། ལྷ་སྐུ་ཕྱག་རྒྱར་གསལ་བའི་བསྐྱེད་རིམ་ལུང་། ཞེས་པ་དེ་ལྟར་གང་དུ་ལྟ་བ་གཏན་ལ་ཕབས་ནས་བསྒོམ་པས་ཉམས་སུ་ལེན་ཐབས་ནི་ལྷ་བསྒོམས་པ་སྟེ། ཨ་བྷི་དྷ་ན་ལས། མི་འཆི་དཔའ་དང་ལྷག་པར་བསྟན། །འདོད་དོན་སྟེར་དང་ཞི་བ་དང་། །ལུས་གནས་ཕན་པ་གྲུབ་པ་དང་། །བཀུར་བར་འོས་ཕྱིར་ལྷ་ཞེས་བྱ། །ཞེས་པས་དེ་ལའང་འདས་མ་འདས་ཀྱི་མཚམས་གཉིས་ལས་འདིར་ནི་ཡེ་ཤེས་ཀྱི་ལྷ་ཡིན་ཏེ། ལྷ་དེའི་ངོ་བོ་ཆོས་སྐུ་ལས་མ་གཡོས་བཞིན་གདུལ་བྱ་མཆོག་དམན་གྱི་ངོར་གཟུགས་སྐུ་ལོངས་སྤྲུལ་རྣམ་པར་བཞེངས་པ་དེ་ཉིད་རྣལ་འབྱོར་པས་རང་རིག་རྟོགས་པ་མངོན་དུ་གྱུར་པའི་བརྡའི་ཕྱག་རྒྱར་ཕན་ཚུན་རྒྱར་ཐེབས་པར་བྱས་ནས་སྒོམ་དོན། སྦྱང་གཞི། སྦྱོང་བྱེད། སྦྱོང་འབྲས་ཀྱི་དོན་ལ་མོས་པ་རྩེ་གཅིག་པས་གསལ་བཏབ་ཅིང་བསྐྱེད་རིམ་སྒོམ་པ་སྟེ། དེ་ལྟ་བསྒོམ་པའི་ཡོན་ཏན་ཡང་། རྒྱལ་པོ་ལུང་བསྟན་རྡོ་རྗེས། ལྷ་ཡི་སྐུ་ནི་གསལ་བསྒོམ་ན། །བསོད་ནམས་ཚོགས་ཆེན་ཐོབ་པར་འགྱུར། །དེ་ཉིད་གཟུགས་བརྙན་ཚུལ་ཤེས་ན། །ཡེ་ཤེས་ཚོགས་ཆེན་རྫོགས་པར་འགྱུར། །ཞེས་སོ། །གསུམ་པ་ནི། བཟླས་བརྗོད་བསྙེན་པར་འབད་པ་སྔགས་ཀྱི་ལུང་། །ཞེས་བསྐྱེད་རིམ་གྱིས་ལུས་ལྷ་སྐུར་སྨིན་ནས་གསུང་རྡོ་རྗེར་དག་བྱེད་བཟླས་པ་ལ་འཇུག་སྟེ་ལྷ་སྔགས་དེ་ཉིད་མ་ཡེངས་པར་ཡང་ཡང་བཟླས་ཤིང་། དེ་ཉིད་ངག་གི་བརྗོད་པ་དང་། བརྗོད་བྲལ་གཉིས་ཀྱི་སྒོ་ནས་རབ་ཏུ་བསྙེན་ཅིང་རྩེ་གཅིག་ཏུ་འབད་དགོས་པ་ཉིད་སྣོད་མིན་ལ་གསང་སྟེ་རང་གིས་ལེགས་པར་སྔགས་པའི་དོན་ཏེ། ལུང་གི་སྒོ་བཞིའི་ནང་ནས་ཐུགས་དམ་གནད་བསྐུལ་གསང་བ་སྔགས་ཀྱི་སྒོ། ཞེས་སོ། །སྤྱིར་ངག་བཟླས། ཡིད་བཟླས། རྡོར་བཟླས། སྐྱེ་མེད་རྡོ་རྗེའི་བཟླས་པ་སོགས་བྱ་ཞིང་། ངག་གི་བཟླས་པ་ལ་སྐྱོན་བཅུ་སྤངས་ཏེ། བར་མ་ཆད་དུ་བཟླས་པ་ངག་བཟླས། ལྕེ་མཆུའི་སྦྱོར་བ་ལ་མ་ལྟོས་པར་གསང་སྔགས་ཡིད་ལ་མ་ཡེངས་པར་དྲན་པ་ཡིད་བཟླས། རླུང་གི་འགྲོ་འོང་དང་བསྟུན་ཏེ་འབྲུ་གསུམ་སྒྲར་བཅས་སུ་བཟླ་བ་བརྡར་གྱུར་རྡོ་རྗེའི་བཟླས་པ། མ་ཡེངས་མ་ཡེངས་གཡེང་བར་མི་འགྱུར་བར་གནས་ལུགས་སྤྲོས་པ་དང་བྲལ་བ་ནམ་མཁའ་ལྟ་བུའི་ངང་ནས་ལུས་ངག་གི་བརྗོད་པ་དང་བྲལ་བར་བཟླ་བ་སྐྱེ་མེད་རྡོ་རྗེའི་བཟླས་པ་རྡོ་རྗེའི་རྣམས་སོ། །བཞི་པ་ནི། ཆོས་དབྱིངས་ཡུམ་དང་རོལ་པ་སྦྱོར་བའི་ལུང་། །ཞེས་ངག་རླུང་གསུང་རྡོ་རྗེར་དག་ནས། ཡིད་ཆོས་ཐུགས་རྡོ་རྗེར་སྨིན་བྱེད་རྫོགས་པའི་རིམ་པ་སྟེ་སྲིད་ཞིའི་མཐར་ཞེན་གྱི་རྣམ་རྟོག་གི་ཆོས་རྣམས་འཁོར་འདས་མཉམ་ཉིད་མཁའ་དབྱིངས་སྤྲོས་བྲལ་གྱི་ཀློང་། རྒྱལ་བ་ཀུན་གྱི་ཡུམ་དུ་གྱུར་པ་སྟེ་དེ་ཉིད་དང་འདུ་འབྲལ་མེད་པར་རྟག་ཏུ་རོལ་ཞིང་རྟོགས་གོམས་ཀྱི་སྦྱོར་བས་གདོད་མའི་གཏན་སྲིད་ཟིན་པར་བྱེད་པ་ལ། བཤད་ཚུལ་མང་ཡང་འདིར་དབང་བཞི་དང་སྦྱར་ནས་བཤད་པར། སྣང་བ་ཐབས་ཀྱི་རང་བཞིན་སྟོང་ཆ་ཤེས་རབ་ཀྱི་རང་བཞིན་ཏེ། སྣང་སྟོང་སོ་སོ་མ་ཡིན་ཐ་མི་དད་དུ་བསྒོམ་པས་བུམ་དབང་གི་རྟོགས་པ་བསྐྱེད། ངག་གི་རླུང་འགྲོ་འོང་བརྗོད་པ་ཐབས་ཀྱི་རང་བཞིན་ལ། དེའི་ངོ་བོ་གྲགས་ཙམ་ཉིད་ནས་མཚན་མར་མ་གྲུབ་པའི་ཕྱིར་ཤེས་རབ་སྟེ། གྲགས་སྟོང་དབྱེར་མེད་གཞི་བྲལ་ནཱ་དའི་དབྱིངས་སུ་སྦྱོར་བས་གསང་དབང་གི་རྟོག་པ་སྐྱེད། དབུ་མའི་མར་སྣར་ཤེས་རབ་ཀྱི་ཉི་མ་ཨ་ཐུང་འབར་བའི་མེ་དྲོད་ཀྱིས། སྤྱི་བོ་ཐབས་མཆོག་ཧཾ་ཡིག་གི་ཟླ་བ་བདུད་རྩིར་ཞུ་བ་ན་བདེ་བ་གཉིས་ཞེན་བྲལ། སྟོང་ཉིད་དུ་རྒྱས་ཐེབས་པས་བདེ་སྟོང་གཉིས་མེད་ཟག་བྲལ་ལམ་ལ་བརྟེན་ནས་ཤེར་དབང་གི་རྟོག་པ་བསྐྱེད། སྣང་རིག་འགྱུ་གསུམ་གྱི་རྟོག་པ་ཐམས་ཅད་ཐབས་ཡིན་ལ། དེ་ཉིད་དོན་དམ་སྤྲོས་བྲལ་བདེ་བ་ཆེན་པོར་འཛིན་མེད་དུ་འཆར་བས་འཁོར་བའི་གཟུང་འཛིན་འཆིང་བ་ཀུན་དང་བྲལ་ཏེ་རིག་སྟོང་ཆོས་སྐུའི་ཤེས་རབ་ཀྱི་བོག་ཐོན་པས་བཞི་པའི་རྟོག་པ་བསྐྱེད་པར་བྱེད་པའོ། །ལྔ་པ་ནི། ཞིང་བཅུ་རྩད་ནས་གཅོད་པ་སྒྲོལ་བའི་ལུང་ཞེས་པ་རང་གི་ལུས་ངག་ཡིད་ཐ་མལ་པ་དེ་ཉིད་རྒྱལ་བ་རྣམས་ཀྱི་སྐུ་གསུང་ཐུགས་རྡོ་རྗེར་བྱང་ཆུབ་པས་གཞན་དོན་ཕྲིན་ལས་ཀྱིས་འགྲོ་བ་སྒྲོལ་བ་ཡིན་ཏེ། བསྒྲལ་བའི་ཞིང་གཉིས་འཛིན་འཁྲུལ་སྣང་ལ་རྣམ་རྟོག་གི་དབྱེ་ན་བཅོས་ཏེ། དགྲར་གཉེན་ལྟར་སྣང་བའི་གནོད་བྱེད་དུ་གྱུར་པ་གཙོ་ཆེར། ཞིང་བཅུ་སྟེ་མི་ཡི་འགྲོ་བ་བདུན་དང་། ངན་སོང་གསུམ་བསྣན་པས་བཅུ་ཡིན་ལ། དེ་རྣམས་འཁོར་བར་སྐྱེ་འགྱུར་གྱི་རྩ་བ་རྩད་ནས་ཡོངས་སུ་གཅོད་པ་ཉིད་སྲིད་པ་ལས་སྒྲོལ་བའི་ཐབས་ཡིན་པ་གང་ཞིག །སེམས་ཅན་གྱི་བློ་ཡི་རིམ་པ་དང་བསྟུན་ནས་ཕྲིན་ལས་བཞི་གང་མཚམས་སུ་བྱ་བ་ལས། འདིར་དྲག་པོ་མངོན་སྤྱོད་སྐབས་སུ་འབྲེལ་བའི་དབང་དུ་བྱས་ན། རྫོང་འཕྲང་སྲོག་གསུམ་དང་ལྡན་པ་སྟེ། རྣལ་འབྱོར་པ་སྟོང་ཉིད་སྙིང་རྗེ་ཟུང་དུ་འཇུག་པའི་ལྟ་བ་རང་བྱན་ཚུན་པས་ཀུན་སློང་ཞིང་བཅུ་སྒྲོལ་བའི་ཞེ་སྡང་ལྡན་པ་ནི་ལྟ་བའི་རྫོང་། རྫས་སྔགས་ཚང་ཞིང་གསལ་བ་གསུམ་དང་ལྡན་པའི་ཏིང་ངེ་འཛིན་དང་ཁ་སྦྱོར་དབྱེ་བའི་ཆོ་ག་བྱ་བ་སྒོམ་པའི་འཕྲང་། བསྒྲལ་བྱ་སྒྲོལ་བྱེད་སྒྲོལ་མཁན་རྣམས་འཁོར་གསུམ་རྣམ་པར་མི་རྟོག་པའི་རྩིས་ཟིན་པ་སྤྱོད་པའི་སྲོག་ཅེས་བྱའོ། །དྲུག་པ་ནི། ཚོགས་ཀྱི་འཁོར་ལོ་ཞལ་ཟས་མཆོད་པའི་ལུང་། །ཞེས་སངས་རྒྱས་ཀྱི་གོ་འཕང་སྒྲུབ་པར་བྱེད་པ་ལ་ཚོགས་གཉིས་བསགས་དགོས་ཏེ། ཚོགས་སྔ་མས་ཕྱི་མ་རྫོགས་པའི་ཉེར་ལེན་དུ་འགྲོ་བ་ནི། གསང་སྔགས་ཐབས་ལ་མཁས་པས་འདོད་ཡོན་ལམ་བྱེད་ཚོགས་ཀྱི་མཆོད་པ་ཡིན་ཏེ། དེ་ཡང་ཚོགས་རྫས་ཀྱི་ཡོ་བྱད་ཐམས་ཅད་ཚོགས་པས་ལྷ་རྣམས་ལ་མཆོད་པ་བར་མེད་དུ་འཁོར་བའི་ཚུལ་གྱིས་འབུལ་ལོ། །ཞེས་པའི་དོན་ཡིན་ལ། ཞལ་ལ་སོགས་པའི་དབང་པོ་རྣམས་ཟས་ཀྱི་མཆོད་པས་དགྱེས་ཤིང་ཚིམ་པར་བལྟས་པས་དངོས་གྲུབ་དམ་པ་ཐོབ་པར་འགྱུར་ལ། རྒྱ་གར་དུ་ཚོགས་ཀྱི་འཁོར་ལོ་དང་། ལོངས་སྤྱོད་ཅེས་གྲགས་པར། དང་པོ་ནི། གསེར་སྲང་ལྔ་བརྒྱའི་རིན་ཐང་དུ་བཅལ་བའི་ཡོ་བྱད་རྣམས་དྲོད་ཚད་དང་ལྡན་པའི་རྣལ་འབྱོར་ཕོ་མོ་བརྡ་དང་བརྡའི་ལན་ལ་མཁས་པས་ཚོགས་པ་མང་ཉུང་ལ་དཔག་ནས་ཕོ་ཚོགས་དང་མོ་ཚོགས་ཞེས་བཏགས་ལ། དོན་དུ་ཚོགས་ཀྱི་ཉེ་རྒྱུའི་སྤྱོད་པ་ལ་བརྟེན་ནས་ཚོགས་གཉིས་ཀྱི་འབྲས་བུ་མངོན་དུ་འབྱིན་པའོ། །ཕྱི་མ་ནི། མཱཾ་ས་དང་། མ་དཱ་ན་གཙོར་གྱུར་ཚོགས་རྫས་གང་འཛོམས་པ་ཙམ་གྱིས་མཆོད་པ་ནི་ལོངས་སྤྱོད་དོ། །བདུན་པ་ནི། དབང་བསྐུར་དངོས་གྲུབ་ལེན་པ་སྒྲུབ་ཆེན་ལུང་། ཞེས་པ་མཐར་ཐུག་གི་འབྲས་བུ་དུས་མི་རིང་བར་མྱུར་དུ་འགྲུབ་པར་འདོད་ན། རང་རྒྱུད་སྨིན་བྱེད་དབང་གི་བྱ་བ་རྣམས་རྡོ་རྗེ་སློབ་དཔོན་དང་དབང་རྫས་སོགས་རྒྱུ་རྐྱེན་ཚོགས་པས་བསྐུར་ནས། འདོད་པའི་འབྲས་བུ་ཚེ་འདིར་དངོས་སུ་འགྲུབ་པར་བྱེད་པའི་ཐབས་སྤྱིར་བཏང་མིན་པར་ལམ་ཁྱད་པར་ཅན་ལ་ཞུགས་ཤིང་དང་དུ་ལེན་པས་དེའི་རེ་འབྲས་ཚེ་འདིར་ཐོབ་ནས་དབང་བསྐུར་བས་སྒྲུབ་པ་ཆེན་པོ་ཞེས་བཏགས་པ་ཡིན་ཞིང་། དབྱེ་ན་གསང་སྙིང་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་སྤྱིར་དབང་ལ་རྣམ་པ་བཞི་གསུངས་ཤིང་། མ་འོངས་པ་ན་འབྲས་བུ་ཐོབ་པར་བྱེད་པའི་ས་བོན་རྒྱུད་ལ་ཐེབས། དེ་བསྐུར་བར་བྱེད་པར་བསྙེན་བསྒྲུབ་ཡན་ལག་རྣམ་བཞིའི་ཆོ་གའི་ཡན་ལག་མ་ཉམས་པར་ལྡན་པས་དངོས་གྲུབ་བླང་ནས་ཐུན་མོང་དང་མཆོག་གི་དངོས་གྲུབ་ཚེ་འདིར་ཐོབ་པ་ལ་ཅིག་ཅར་བ་དང་། དེ་ལས་ལྡོག་པའི་དབང་པོ་འབྲིང་རྟུལ་རྣམས་བར་དོ་རྣམ་པ་གསུམ་གང་རུང་དང་། ཚེ་ཕྱི་མར་མཆོག་གི་དངོས་གྲུབ་ལ་སྦྱོར་བ་ཡིན་ནོ། །དེ་ལྟར་ལུང་བདུན་གྱི་དང་པོས་ལྟ་བ་གཏན་ལ་འབེབ། གཉིས་གསུམ་བཞིས་སྒོམ་པའི་རིམ་པ་སྟོན། ལྔ་པ་གཞན་དོན་དྲུག་པས་སྒྲུབ་པའི་སྤྱོད་པ། བདུན་པས་མཐར་ཐུག་གི་འབྲས་བུ་གྲུབ་ཚུལ་བསྟན་པས་གསང་སྔགས་སྤྱི་ཡི་སྡོམ་དེ་ཙམ་དུ་འདུས་པར་བསྟན་པའོ། །དེ་ལྟར་མཁའ་ལྡིང་བུང་བ་ཡི། །རྗེས་བསྙེགས་དཔེ་མཚུངས་བཀོད་འདི་ནི། །བསྐུལ་བ་པོ་དག་དགོངས་པ་ཉིད། །མ་ལྡོག་སེམས་དགའི་དོན་ལྟར་བརྗོད། །དེང་དུས་མཁས་ལས་བླུན་པོ་རྣམས། །ལྷག་པའི་དཔེ་དོན་དངོས་གྱུར་འདིར། །ནོངས་མཆིས་མཁས་རྣམས་བཟོད་བཞེས་ལ། །དགེ་དངོས་བྱང་ཆེན་རྒྱུ་རུ་བསྔོ། །ཐོས་པས་ཤེས་རབ་རྒྱ་མཚོ་ཡིས། །བསམ་པའི་གྲུབ་གཟིངས་ལགས་བསྐྱོད་དེ། །བསྒོམ་པ་དེད་དཔོན་ཆེན་པོ་ཡིས། །རྣམ་མཁྱེན་རིན་ཆེན་ལོན་པར་ཤོག །མཆོག་གསུམ་ཐུགས་རྗེའི་ཉི་འོད་ཀྱིས། །ཟེར་ཕྲེང་ཕྱོགས་བརྒྱར་རབ་འཕྲོ་བས། །བློ་གསལ་པདྨོ་རབ་རྒྱས་ཏེ། །ཡེ་ཤེས་སྣང་བ་འབར་གྱུར་ཅིག །དེ་ལྟར་ལུང་ཨ་ནུ་ཡོ་ག་ལུང་བདུན་གྱི་གཞུང་འགྲེལ་འཆད་ཐབས་ཅུང་ཟད་ཕྱེ་བ་འདི་ནི། རྒྱུད་དོན་ལུང་རིག་སྨྲ་བ་དགེ་བཤེས་ཞེ་ཆེན་མཆོག་སྤྲུལ་རིན་པོ་ཆེ་བསྟན་འཛིན་འཕེལ་རྒྱས་དང་། དགེ་སྦྱོང་སྔགས་རམ་ཆོས་དབང་ཟུང་གིས་ལྷ་རྫས་དང་རིན་འཁོར་གྱི་སྐྱེས་བཅས་བསྐུལ་མ་གནང་བར་བརྟེན་ཤཱཀྱའི་དགེ་བསྙེན་མ་རྨོང་བརྟུལ་ཕྲིན་ལས་ཆོས་སྒྲོན་གྱིས་ཤིང་བྱ་མགོ་ཟླ་བའི་དཀར་ཕྱོགས་ཀྱི་རྒྱལ་བ་དང་པོའི་ཐུན་གསེང་ཤར་མར་སྤེལ་བ་འདིས་ཀྱང་འགྲོ་ཀུན་ཐོས་བསམ་སྒོམ་པའི་འབྲས་བུ་མངོན་དུ་རྟོགས་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་ཤུ་བྷནྟུ།། །།

མདོ་ཁོག་རིན་ཆེན་སྒྲོན་མ།

མདོ་ཁོག་རིན་ཆེན་སྒྲོན་མ་ཞེས་བྱ་བ་བཞུགས་སོ། །གསང་འཛིན་བརྩོན་སེང་བས་བཀོད་པ། གུ་རུ་ལ་ན་མོ། སྤང་བཅོམ་རྟོགས་ལྡན་བློ་ཡི་ཡུལ་ལས་འདས། །གྲུབ་སྣང་འབྱུང་བའི་དཔལ་ལྡན་ཀུན་སྒྲོལ་བྱེད། །གཉིས་མེད་ཐུགས་རྗེའི་རྒྱལ་པོ་གཞན་དབང་སྒྱུར། །ཤིན་ཏུ་རྣམ་གྲོལ་ལྷུན་གྲུབ་ཉིད་ལ་འདུད། །དུས་གསུམ་སངས་རྒྱས་ཀུན་གྱི་དགོངས་པའི་དོན། །དཀྱིལ་འཁོར་གསུམ་འདུས་རྩ་བ་བྱང་ཆུབ་སེམས། །གསང་སྒོ་གསུམ་མཚོན་རྒྱུད་རྒྱལ་མདོ་ཡི་དོན། །གསལ་བྱེད་ཁོག་དབུབ་རིན་ཆེན་སྒྲོན་མ་བྲིའོ་དེ་ལ་ཐེག་པ་ཐམས་ཅད་ཀྱི་ཡངས་རྩེ། བསྟན་པ་ཐམས་ཅད་ཀྱི་འབྱུང་གནས། རྒྱུད་ཐམས་ཅད་ཀྱི་རྒྱལ་པོ་ལུང་ཐམས་ཅད་ཀྱི་སྤྱི་འགྲེལ། མན་ངག་ཐམས་ཅད་ཀྱི་རྩ་བ་དོན་ཐམས་ཅད་ཀྱི་མཇུག་སྡུད། ཆོས་ཐམས་ཅད་ཀྱི་མེ་ལོང་། དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཞེ་ཕུག །འབྲས་བུ་ཐམས་ཅད་ཀྱི་ཐུགས། རྒྱལ་བ་ཐམས་ཅད་ཀྱི་གཤེགས་ཤུལ། མ་འོངས་པའི་རྣལ་འབྱོར་པ་དང་། ད་ལྟར་གྱི་རྣལ་འབྱོར་པ་ཐམས་ཅད་ཀྱི་ལམ་ཆེན་པོ། གསང་བ་བས་ཀྱང་ཆེས་གསང་བ། ཡང་གསང་རྨད་དུ་བྱུང་བ་རྒྱུད་ཀྱི་རྒྱལ་པོ་ཆེན་པོ་སངས་རྒྱས་ཐམས་ཅད་ཀྱི་དགོངས་པ་འདུས་པ་འདིའི་ལུགས་ཀྱིས། ཤེས་བྱ་ཚུལ་ལྔའི་སྒོ་ནས་སྟོན་པར་བྱེད་པ་ལས། དང་པོ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད། དཀྱིལ་འཁོར་རྣམ་གསུམ་དབྱེར་མེད་དུ་སངས་རྒྱས་པའི་ཚུལ་དང་གཅིག་སངས་དེ་ལྟར་དུ་རྒྱས་ཀྱིས་ཀྱང་། ཁམས་གསུམ་གྱི་སེམས་ཅན་གྱིས་དེ་ལྟར་མ་རྟོགས་པའི་ཚུལ་དང་གཉིས། མ་རྟོགས་ཤིང་སྡུག་བསྔལ་གྱི་ཉམ་ཐག་པ་དེ་ལ། ཡང་དག་པར་རྫོགས་པའི་སངས་རྒྱས་ཀྱི་ཐམས་ཅད་མཁྱེན་པའི་ཡེ་ཤེས་ཀྱིས་གཟིགས་པའི་ཚུལ་དང་གསུམ། གཟིགས་ནས་ཐུགས་རྗེ་སྐྱེས་པའི་ཚུལ་དང་བཞི། སྐྱེས་ནས་དོན་མཛད་ཚུལ་དང་ལྔའོ། །དང་པོ་ནི། སེམས་ཉིད་སྐྱེ་བ་མེད་པ་ཡེ་ཇི་བཞིན་པའི་དཀྱིལ་འཁོར་རྟགས་སུ་ཡི་གེ་མཾ་གྱིས་མཚོན་པར་གནས་ལ། སྐྱེ་བ་མེད་པ་ཉིད་འགགས་པ་མེད་པར་ཤར་བ་རང་བཞིན་གྱིས་གྲུབ་པའི་དཀྱིལ་འཁོར་རྟགས་སུ་ཡི་གེ་ༀ་གྱིས་མཚོན་པར་ཤར་རོ། །དེ་གཉིས་ཀྱང་གཉིས་སུ་མེད་དེ། རྩ་བ་བྱང་ཆུབ་སེམས་ཀྱི་དཀྱིལ་འཁོར་རྟགས་སུ་ཡི་གེ་ཧཱུཾ་གིས་མཚོན་པར་འདུས་སོ། །དེ་ཡང་ལེའུ་བཅུ་དགུ་པ་ལས། ཐམས་ཅད་དེ་ཉིད་རོ་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་པས་སྟོན་ནོ། །གཉིས་པ་སངས་རྒྱས་ཀྱིས་ཀྱང་། ཁམས་གསུམ་གྱི་སེམས་ཅན་གྱིས་མ་རྟོགས་པའི་ཚུལ་ལ་གསུམ་སྟེ། དང་པོ་ལྷན་ཅིག་སྐྱེས་པའི་མ་རིག་པས་ངོ་མ་ཤེས་པ་ནི། རྒྱལ་པོའི་ཕྲུ་གུ་དམངས་སུ་འཁྱམས་པ་ལྟ་བུའོ། །དེ་མདོ་བསྲེས་ལས། དཀྱིལ་འཁོར་གསུམ་དུ་སངས་རྒྱས་ཀྱང་། །མུན་པས་སྒྲིབས་པས་དེ་མ་ཤེས། །ཞེས་སོ། །གཉིས་པ་ཀུན་ཏུ་བརྟགས་པའི་མ་རིག་པས་ལོག་པར་བཟུང་བ་ནི། རྒྱལ་ཕྲུ་གུ་དམངས་ཀྱི་སྤྱོད་པ་བྱེད་པ་ལྟ་བུའོ། །དེ་ཡང་ཉེར་གཉིས་པ་ལས། བདག་འཛིན་བདག་གི་རྟོག་པ་ཡིས། །ཕྱིན་ཅི་ལོག་རྟོག་བརྩོན་འགྲུས་ཀྱིས། །གནས་ངན་ལེན་དེ་དད་དཔོན་བྱེད། །ཅེས་པས་མངོན་ནོ། །གསུམ་པ་མཚོན་པར་བྱེད་པའི་ཐབས་ལམ་དང་བྲལ་བ་ནི། རྒྱལ་བུ་སྟོན་མཁན་མེད་པ་ལྟ་བུ་སྟེ། དེ་ཡང་ལེའུ་བཅོ་ལྔ་པ་ལས། མུན་པ་མུན་ནག་སྨན་རུམ་འཁྱམས། །སྒྲོད་པར་བྱེད་པའི་ལམ་ཡང་སྟོར། །ཅེས་པས་མངོན་ནོ། །གསུམ་པ་སྡུག་བསྔལ་གྱིས་ཉམ་ཐག་པ་དེ་ལ། ཐུགས་རྗེས་གཟིགས་པའི་ཚུལ་ལ་གསུམ་སྟེ། ཤེས་བྱ་ཇི་ལྟ་བ་མཁྱེན་པའི་ཡེ་ཤེས་ཀྱི་ཆོས་ཐམས་ཅད་སྐྱེ་མེད་དུ་གཟིགས་པ་དང་། མཆན། ཡང་ན་འཁྲུལ་བ་ལ་བརྒྱད་དེ་རྒྱུ་རྐྱེན་ངོ་བོ་འཁོར་ཚུལ་ཉེས་པ་དུས་དཔེ་རང་བཞིན་ནོ། །དེ་ལ་རྒྱུ་མ་རིག་པ། རྐྱེན་ལས་དང་ཉོན་མོངས་སམ། ངོ་བོ་སྣོད་བཅུད། འཁོར་ཚུལ་རྟེན་འབྲེལ་བཅུ་གཉིས་ཉེས་པ་སྡུག་བསྔལ། དཔེ་ཟོ་ཆུང་། དུས་ཁམས་གསུམ་སྤྱི་མཚན་དུ་ཐོག་མཐའ་མེད་དོ། །རང་བཞིན་ཆོས་ཉིད་ཅེས་པར་སྙད་དོ། །རྒྱས་པ་ལ་དགའ་བ་ལ་དེ་ལྟར་སྙད་དོ། །གཟིགས་པ་དེ་ཡུལ་དུ་བྱས་ན་གཟུང་འཛིན་ཅན་དུ་ཐལ། མ་བྱས་ན་མེད་པ་གཟིགས་པས་འཁྲུལ་པ་ཐལ། དབྱེར་མེད་ལ་གཟིགས་བྱ་གཟིགས་བྱེད་མེད་དོ་ཞེ་ན། ཡོད་པར་མཁྱེན་ལ། གསལ་ལ་མི་རྟོགས་པས་གཟུང་འཛིན་དུ་མི་འགྲེའོ། །ཡུལ་ཡང་དག་ཏུ་མེད་པ་ལ་མེད་པར་གཟིགས་པས་འཁྲུལ་པ་ཡང་། མི་འགྲོའོ། །དགོས་པ་དབང་དུ། དབྱེར་མེད་ལ་གཟིགས་བྱ་གཟིགས་བྱེད་མི་འཐད་དོ་ཞེ་ན། གཟིགས་བྱ་གཟིགས་བྱེད་ཐ་དད་དུ་གྲུབ་པ་མེད་དོ་དབྱེར་མེད་དུ་རྟོགས་པའི་ངང་ལས་ཕན་གདགས་པའི་གཞིར་གྱུར་པ་དེ་ཐུགས་རྗེའོ། །དེ་ཡང་སངས་རྒྱས་སེམས་ཅན་གཉིས་མེད་གཅིག་ཏུ་རྟོགས་ན། ཐུགས་རྗེ་ཆེན་པོ་སྐྱེས་ཞེས་དེ་ལ་བྱས་ཞེས་སོ། །ཇི་སྙེད་པ་མཁྱེན་པའི་ཡེ་ཤེས་ཀྱིས་འགག་པ་མེད་པར་གཟིགས་པ་དང་། དབྱེར་མེད་མཁྱེན་པ་ཡེ་ཤེས་ཀྱིས་ཆོས་ཐམས་ཅད་གཉིས་སུ་མེད་པར་གཟིགས་པའོ། །དེ་ཡང་ཞེ་གཉིས་པ་ལས། གང་དམ་པ་རྣམས་ཀྱི་དེ་ཁོ་ན་ཉིད་ལས་མ་གཡོས་པར། སེམས་ཅན་གྱི་ཁམས་མཐའ་ཐུགས་པ་མེད་པ་དང་། གཟུགས་དང་སྒྲ་དང་སྤྱོད་པ་མཐའ་ཐུག་པ་མེད་པ་རྣམས་མི་མཁྱེན་པ་དང་། མི་གསན་པ་དང་། མི་གཟིགས་པ་དང་། མི་འགྲེལ་པ་ནི་གང་ཡང་མེད་དོ། །དེ་ཅིའི་ཕྱིར་ཞེ་ན། སྙིང་པོ་བྱང་ཆུབ་ཉིད་ལ་མ་འདྲེས་པར་ཡོངས་སུ་རྫོགས་པའི་ཕྱིར་རོ། །ཞེས་པའི་དོན་གྱིས་མཁྱེན་ལུགས་གསུམ་སྟེ། མ་འདྲེས་པར་མཁྱེན་པའོ། །ཇི་སྙེད་མཁྱེན་པའི་ཡེ་ཤེས་ཀྱིས་ཅིར་ཡང་མ་འགགས་ས་ལེར་མཁྱེན་པ་དང་། ཡོངས་རྫོགས་མཁྱེན་པའམ། ཇི་ལྟ་བ་མཁྱེན་པའི་ཡེ་ཤེས་ཀྱིས་ཅིར་ཡང་དམིགས་པ་མེད་པར་མཁྱེན་པ་དང་། མ་འདྲེས་ཡོངས་རྫོགས་སམ་ཇི་ལྟ་བ་དང་ཇི་སྙེད་པ་དབྱེར་མེད་མཁྱེན་པའི་ཡེ་ཤེས་ཀྱིས་མ་འགགས་མ་དམིགས་དབྱེར་མེད་དུ་མཁྱེན་པའོ། །བཞི་པ་གཟིགས་ནས་ཐུགས་རྗེ་སྐྱེས་པའི་ཚུལ་ནི། དོན་འདུས་ལས། ཀུན་བཟང་ཐུགས་རྗེ་ཞེས་པས་དོན་གྱིས། ཐུགས་རྗེའི་སྐྱེས་ཚུལ་རྣམ་པ་བཞི་སྟེ། རྟག་པ་རྒྱུན་དུ་ཐུགས་རྗེ་སྐྱེ་བ། རང་བཞིན་ཤུགས་ཀྱིས་ཐུགས་རྗེ་སྐྱེ་བ། ཡུལ་དང་ཕྲད་པས་ཐུགས་རྗེ་སྐྱེ་བ། བསྐུལ་ཞིང་གསོལ་བ་བཏབ་པས་ཐུགས་རྗེ་སྐྱེ་བའོ། །རྟག་པ་རྒྱུན་དུ་ཐུགས་རྗེ་སྐྱེ་བ་ནི། ཆུ་བོ་ཆེན་པོའི་རྒྱུན་དང་འདྲ་བས་སོ་དེ་ཡང་ཞེ་བཞི་པ་ལས། འབྱུང་བ་རྒྱུན་གྱི་བཅོམ་ལྡན་འདས། །ཐུགས་རྗེ་རྟག་པའི་སངས་རྒྱས་དེ། །རང་བཞིན་ཀུན་ལ་ཁྱད་པར་གནས། །ཞེས་པ་དང་། ཡང་སྤྲུལ་པ་ནི་མི་འབྱུང་མ་མྱོང་རྒྱུན་དུ་བྱུང་བའོ། །ཞེས་པས་མངོན། གཉིས་པ་རང་བཞིན་ཤུགས་ཀྱིས་ཐུགས་རྗེ་སྐྱེ་བ་ནི། ཉི་མ་ལ་དྲོད་རང་བཞིན་གྱིས་འབྱུང་བ་དང་འདྲ་སྟེ། དེ་ཡང་ཀུན་འདུས་ལས། ཡེ་ཤེས་སྐུ་མཆོག་རང་བཞིན་དཀྱིིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེ་ཉིད་གསལ་འོད་བཞིན་སྙོམས་མཛད་པ། །ཞེས་པས་མངོན་ནོ། །གསུམ་པ་ཡུལ་དང་ཕྲད་ནས་ཐུགས་རྗེ་སྐྱེ་བ་ནི། དཔེར་ན་དགོན་པ་ཁ་ལྷོ་ལྟས་སུ་ཉི་མ་འཆར་བ་བཞིན་ཏེ། ལེའུ་ཉེར་དྲུག་པ་ལས། དེ་ནས་མཐུན་འཇུག་སྐྱེས་བུ་དེ། །མཐུན་པའི་སྤྱན་གྱིས་གང་གཟིགས་ན། །ལས་ཀྱི་ཡིད་དགས་དྲག་པོ་དེ། །ཞེས་པས་མངོན་ནོ། །བཞི་པ་བསྐུལ་ཞིང་གསོལ་བ་བཏབ་པས་ཐུགས་རྗེ་སྐྱེ་བ་ནི། རྒྱལ་པོ་ལ་ལོངས་སྤྱད་སློང་བ་དང་འདྲ་སྟེ། དེ་ཡང་ལེའུ་གསུམ་པར་གདུང་བ་ཉེར་གསུམ་བཏོན་པས། ཐུགས་རྗེ་སྐྱེས་པ་ནི། ལེའུ་བཞི་པར་གསང་བདག་གིས་གདུང་བ་བསལ་བར་ཞལ་གྱིས་བཞེས་པའོ། །ལྔ་པ་ཐུགས་རྗེ་སྐྱེས་ནས་དོན་མཛད་ཚུལ་ནི། རྟེན་ཅན་གྱི་དོན་བྱེད་པ་བྲམ་ཟེ་མཆོད་སྡོང་གིས་གྲུབ་པ་ལྟ་བུ། རྟེན་མེད་ཀྱིས་དོན་བྱེད་པ་དྲང་སྲོང་མོད་པ་གྲུབ་པ་ལྟ་བུ། ངོ་བོ་ཉིད་ཀྱིས་དོན་མཛད་པ་ནམ་མཁའ་ལྟ་བུ་ལ་སོགས་མ་ངེས་ཀྱིས་ཀྱང་། མདོ་དགོངས་པ་འདུས་པ་འདིའི་ལུགས་ཀྱིས། གདུལ་བྱ་རྣམ་པ་གསུམ་ལ། ཐེག་པ་རྣམ་པ་གསུམ་གྱིས། འདུལ་ཐབས་གསུམ་གྱིས་སྒོ་ནས་དོན་མཛད་པ་ལས། དོན་འདུས་ལས། འགྲོ་དོན་དུ། ཞེས་པ་དང་། ཐེག་པ་གསུམ་སྣང་འདུལ་མཛད་པའོ། །ཞེས་པ་དང་། ཞེ་བཞི་པ་ལས། གང་ཞིག་འདེགས་པའི་ཡུལ་རྣམས་ནི། །གསུམ་དུ་ངེས་པར་སྣང་བ་ནི། །འདོད་ལ་ཞེན་དང་ངེས་པར་འབྱུང་། །གདུལ་དཀའ་དྲག་པོའི་གདུལ་བྱ་གསུམ། །ཞེས་སོ། །ཐེག་པ་གསུམ་ནི། གང་ཞིག་འདེགས་པ་རྩལ་གསུམ་ནི། །འཁོར་ལོ་རྒྱུན་དང་དོན་དམ་ངེས། །ཆོ་འཕྲུལ་མངོན་པར་འབྱུང་བ་གསུམ། །རང་བཞིན་ཡེ་ནས་སྣང་བ་ཡིན། །ཞེས་སོ། །འདུལ་ཐབས་གསུམ་ནི། ཇི་ལྟར་འདེགས་པ་ཐེག་རྣམས་ནི། བསམ་གྱིས་མི་ཁྱབ་གསུམ་ཉིད་དུ། །སྣང་བ་དེ་ཉིད་གང་ཡིན་པ། །རང་བཞིན་ཤུགས་དང་གཉེན་པོ་ཐེབས། །ལས་རྒྱུན་གཅད་པ་འབའ་ཞིག་གོ། །ཞེས་པའི་དོན་གྱིས་གདུལ་བྱ་གསུམ་ལས་འདོད་པ་ལ་ཞེན་པའི་གདུལ་བྱ་ནི། འཚོ་བའི་ཟས་འདོད། རྟེན་པའི་གནས་འདོད། མཐུན་པའི་གྲོགས་འདོད་པ་རྩམ་ལས། བྱང་ཆུབ་སྒྲུབ་པའི་བསམ་པ་ཡང་རྒྱུད་ལ་མ་སྐྱེས། ཉོན་མོངས་པ་དྲག་པོ་ཡང་རྒྱུད་ལ་མ་སྐྱེས་པའོ། །ངེས་པར་འབྱུང་བའི་གདུལ་བྱ་ནི། ཁམས་གསུམ་འཁོར་བའི་སྡུག་བསྔལ་བརྒྱད་དང་བཅུ་གཅིག་ལ་སོགས་པ་ལ་འཇིགས་ནས། ཁམས་གསུམ་ལས་ངེས་པར་འབྱུང་བར་འདོད་པའོ། །གདུལ་དཀའ་དྲག་པའི་གདུལ་བྱ་ནི། འདོད་ཆགས་ཚལ་དང་གར་སྦྱིན་ལྟར་དུ་འཐས། ཞེ་སྡང་མེ་ལྟར་འབར། གཏི་མུག་མུན་པ་ལྟར་འཐིབས་པ་ལ་སོགས་པའི་ཉོན་མོངས་པ་དྲག་པོ་སྐྱེས་པའོ། །དེ་ལྟར་གདུལ་བྱ་རྣམ་པ་གསུམ་ལས། འདོད་པ་ལ་ཞེན་པའི་གདུལ་བྱ་ལ། ཐེག་པ་རྣམ་པ་གསུམ་ལས། འཁོར་ལོ་རྒྱུན་གྱི་ཐེག་པས། གདུལ་ཐབས་རྣམ་པ་གསུམ་ལས། རང་བཞིན་ཤུགས་ཀྱིས་འདུལ་ཐབས་ཀྱིས་དོན་བྱེད་པའོ། །འབྱུང་བ་ལྔ་ཡིས་བརྟེན་པའི་གནས་བྱེད་སྐྱེད་པའི་རྒྱུ་བྱེད། འཚོ་བའི་རྐྱེན་བྱེད་པའོ། །ངེས་པར་འབྱུང་བའི་གདུལ་བྱ་དོན་དམ་ངེས་པའི་ཐེག་པས་གཉེན་པོ་ཐབས་ཀྱི་འདུལ་ཐབས་ཀྱིས་དོན་བྱེད་པ་ནི། ཞེ་བཞི་པ་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་སྣང་བ་ནི། །ཀུན་འབྱུང་འདྲེན་དང་དཀའ་ཐུབ་རིགས། །དབང་བསྒྱུར་ཐབས་ཀྱི་ཐེག་པའོ། །ཞེས་པའི་དོན་གྱིས་བློ་ཆུང་བ་ལ་ཀུན་འབྱུང་སྐོལ་མདོ་དང་སྦྱར་དུ་རུང་ངོ་། །འདྲེན་པའི་ཐེགས་པ་མཚན་ཉིད་སྡེ་གསུམ་གྱིས་འདུལ། འབྲིང་ལ་དཀའ་ཐུབ་རིགས་བྱེད་ཀྱི་ཐེག་པ་ཕྱི་པ་སྡེ་གསུམ་གྱིས་འདུལ། བློ་རབ་ལ་དབང་བསྒྱུར་ཐབས་ཀྱི་ཐེག་པ་ནང་པ་བསྐྱེད་རྫོགས་གསུམ་གྱིས་འདུལ་ལོ། །གདུལ་དཀའ་དྲག་པོའི་གདུལ་བྱ་ལ། ཆོ་འཕྲུལ་སྔོན་འབྱུང་གི་ཐེག་པས་ལས་རྒྱུན་གཅོད་པའི་གདུལ་ཐབས་ཀྱིས་དོན་བྱེད་པ་ནི། ཕྱི་ནང་གི་སྐལ་པ་ཟུང་གསུམ་དུ་འབར་མུ་གེའི་ནད་ཀྱི་མཚོན་གྱི་ནས། འགྲོ་བ་སེམས་ཅན་གྱི་ལས་རྒྱུན་གཅོད་པར་བྱེད་པའོ། །འོ་ན་སེམས་ཅན་གྱི་ལས་ཀྱི་རྒྱུན་བཅད་པ་དེ་ཐུགས་རྗེར་འགྲོའམ་ཞེ་ན། ཞེ་བཞི་པ་ལས། ལས་ངན་མྱུར་དུ་རྒྱུན་བཅད་ན། །གནས་ངན་དག་ལས་མྱུར་དུ་གྲོལ། །ཅེས་སོ། །དེ་ལྟར་ཐེགས་པ་གསུམ་གྱི་ནང་ནས། དོན་བསྡུས་ནས། དོན་དམ་ངེས་པའི་ཐེག་མཆོག་ལས། གསང་སྒོ་གསུམ་མཚན་མདོ་རྒྱུད་དོ། །རྣམ་པ་གསུམ་དུ་ཤེས་བྱ་སྟེ། །བྱ་བའི་གཞི་དང་བྱེད་པའི་རྐྱེན། །བྱ་བྲལ་འབྲས་བུའི་རྣམ་པར་དག །ཅེས་པས། ཐེག་པ་གསུམ་གྱི་ནང་ནས་དོན་དམ་ངེས་པའི་ཐེག་པ་དེའི་ནང་ནས་ཀྱང་གསང་སྒོ་གསུམ་མཚོན་པར་བྱེད་པ་མདོ་རྒྱུད་འདི་ལ། རྣལ་འབྱོར་རྣམ་པ་གསུམ་གྱིས་བཤད་དེ། བྱ་བ་གཞིའི་རྣལ་འབྱོར་བྱེད་པ་རྐྱེན་གྱི་རྣལ་འབྱོར། བྱ་བྲལ་འབྲས་བུའི་རྣལ་འབྱོར་རོ། །དེ་ལ་བྱ་བ་གཞིའི་རྣལ་འབྱོར་ནི། དོན་བསྡུས་ལས། ཕྱི་ནང་བྱེ་བྲག་ཇི་སྙེད་པའི། །ཆོས་རྣམས་ཐམས་ཅད་བྱང་ཆུབ་སེམས། །ཇི་བཞིན་ངང་དུ་ཡེ་གནས་པས། །ཤེས་པར་བྱེད་པའི་རྒྱུད་དོན་ཡིན་ཞེས་པའི་དོན་གྱིས། ཤེས་བྱ་ཕྱི་ནང་གི་ཆོས་གཞི་དངོས་པོ་གཤིས་ཀྱི་གནས་ལུགས་མ་བཅོས་མ་བསླད་པ། ཡེ་ཇི་བཞིན་ཡིན་པའོ། །ལེའུ་བརྒྱད་པ་ནས། དེ་བཞིན་ཉིད་ལ་ནི་སངས་རྒྱས་དང་སེམས་ཅན་དབྱེ་བ་ཅུང་ཟད་ཀྱང་མེད་དོ་ཞེས་པ་ལ་སོགས་པས་མངོན་ནོ། །བྱེད་པ་རྐྱེན་གྱི་རྣལ་འབྱོར་ནི། དོན་བསྡུས་ལས། རྩོལ་བཅས་སྤྱོད་པ་འདྲེན་འཇུག་པའི། །ཐེག་པ་དེ་ནི་བྱ་བྱེད་རྐྱེན། །ཞེས་པས་དོན་གྱིས་རྒྱུ་ལས་འབྲས་བུ་སྒྲུབ་པའི་རྩོལ་བ་དང་བཅས་པས། རྣམ་པར་དཀར་བའི་སྤྱོད་པ་གདུལ་བྱ་ཁམས་གསུམ་འཁོར་བ་ནས་འདྲེན་ཅིང་། མྱ་ངན་ལས་འདས་པ་ལ་འཇུག་པར་བྱེད་པ་མཚན་ཉིད་སྡེ་གསུམ་མོ། །བྱ་བྲལ་འབྲས་བུའི་རྣལ་འབྱོར་ནི། །གཞན་དུ་འབྲས་བུ་རེ་རྩོལ་མེད། །བསྒྲུབ་བྱ་ཉིད་ལ་ལམ་གནས་པས། །ཐབས་ཆེན་ཐེག་འདི་བྱ་བྲལ་བའོ། །ཞེས་སོ། །འབྲས་བུའི་རྣལ་འབྱོར་ཉིད་ལ་ཡང་དེ་ཉིད་ཕྱི་ནང་ཞེས་པས། གསང་སྔགས་ཕྱི་རྒྱུད་སྡེ་གསུམ་དང་ནང་པའི་སྡེ་གསུམ་མོ། །ནང་པའི་རྒྱུད་ཀྱི་ནང་ནས་མདོ་ཨ་ནུ་ཡོ་གའི་དགོངས་འདུས་འདི་ལ། གཞི་དང་ཐབས་དང་འབྲས་བུ་ཡི། །ཚུལ་གསུམ་བྱེ་བྲག་ཆོས་སུ་བཤད། །ཅེས་པའི་སྟོན་གྱིས། གཞི་ལམ་འབྲས་བུ་དང་གསུམ་མོ། །གཞི་ནི་མའི་དོན་ཉིད་དེ། ཞེས་པས། གཤིས་ཀྱི་གནས་ལུགས་ཡིན་ཏེ། བྱ་བ་གཞིའི་རྣལ་འབྱོར་དང་འདྲའོ། །ལམ་ནི་ཐབས་ནི་ལམ་ཡིན་རྣམ་པ་གསུམ། གོལ་སྒྲིབ་ངོ་བོ་ཡན་ལག་སྟེ། ཞེས་པས། གསུམ་གསུམ་སྟེ། ལམ་གྱི་མི་མཐུན་པའི་ཕྱོགས་གོལ་སྒྲིབ་དང་གཅིག །ངོ་བོ་དང་གཉིས་རྐྱེན་ཡན་ལག་དང་གསུམ་མོ། །གོལ་སྒྲིབ་བསྟན་པ་ལ་གསུམ། གོལ་ས་སྒྲིབ་པ། གོལ་སྒྲིབ་ཐུན་མོང་བའོ། །གོལ། གོལ་ས་ནི། དོན་བསྡུས་ལས། གོལ་ས་ལྟུང་བའི་སྒོ་དགུ་བདུད་དུ་ལྟུང་བའི་སྲིན་པོར་མུ་སྟེགས་སུ་ངནསོང་དུ་༣ཚན་ཆེན་དུ། རུ་ཏྲར་ལྷ་ཆེན་དུ་དང་། །ཞེས་དང་། སྒྲིབ་པ་ནི། ཉོན་མོངས་དུག་ལྔ་བརྟེན་པའི་བག་ཆགས་ཀྱི་དོན་མཐོང་དུ་མི་སྟེར་རོ། །ཤེས་བྱའི་སྒྲིབ་སོགས་ཉོན་མོངས་པ་མ་ཡིན་པས་ཤེས་བྱ་ལ་སྒྲིབ་ཅིང་ཡེ་ཤེས་འཕེལ་བའི་གེགས་སུ་གྱུར་པའོ། །ཞེས་སོ། །ཐུན་མོང་ནི། ཐུན་མོང་རྟོག་པ་བརྒྱད་ཅུ་སྦྱོར་༼ཏྲི༽བའི། ཞེན་༼ཏྲི༽པའི། དངོས་༼ཏྲི༽གཞིའི། སྐྱེད་༼༡༥༽ པའི། རྐྱེན་༼ ༤༽སྤྱི། ལུས་༼༦༽ཀྱི། མཚན་༼ཏྲི༽མི། མངོན་༼༡༦༽པའི། སྤྱོད་༼༣༠༽པའི། རྟགས་ཀྱི་རྟོག་༼བདུན༽པའོ་གཅིག །དགུ་བཅུ་ལ་སོགས་སྐྱོན་རྣམས་དང་། །ཤེས་པའི་བྱེ་བྲག་དྲུག་ལ་སོགས། །མི་མཐུན་གོལ་སྒྲིབ་ཕྱོགས་སུ་བཤད། །ཅེས་སོ། །ལམ་གྱི་ངོ་བོ་ནི། ངོ་བོ་ཐབས་དང་ཤེས་རབ་ཟེར་གྱིས་ཀྱང་། རྒྱུད་འདི་ཉིད་དང་འགྲེལ་པ་དང་། སྒྲུབ་ཐབས་ལ་སོགས་པས། སྔོན་བྱུང་གི་ལམ་དང་རྗེས་འཇུག་གི་ལམ་གཉིས་སུ་བཤད་དོ། །སྔོན་བྱུང་གི་ལམ་ནི། སྐུ་གསུམ་འཁོར་གྱི་ལམ་བགྲོད་ཚུལ་ལེའུ་དང་པོའོ། །རྒྱལ་ཚབ་སྐྱེས་བུའི་ལམ་བགྲོད་ཚུལ་ལེའུ་བཅུ་གཅིག་པ། རུ་ཏྲ་འཁོར་བཅས་ཀྱིས་ལམ་བགྲོད་ཚུལ་ལེའུ་ཉེར་བརྒྱད་ནས་སོ་གཅིག་མན་ཆད། སངས་རྒྱས་སྤྲུལ་པའི་ལམ་བགྲོད་ཚུལ་ཞེ་བརྒྱད་པའོ། །རྗེས་འཇུག་གི་ལམ་ལ་གཉིས་ཏེ། ཐུན་མོང་པ་སྤྱིའི་ལམ་དང་། ཁྱད་པར་མདོ་འདི་ཉིད་ཀྱི་ལམ་མོ། །ཐུན་མོང་སྤྱིའི་ལམ་ནི། སྤྱོད་པ་འདྲེན་སྒོ་མཚན་ཉིད་སྡེ་གསུམ་ཐབས་ཀྱི་སྦྱོར་སྒོ་ཕྱི་པ་སྡེ་གསུམ། ངེས་པའི་གསང་སྒོ་ནང་པ་སྡེ་གསུམ། དེ་རེ་རེ་ལ་ཡང་། ལྡེ་མིག་གསུམ་གསུམ་སྟེ། འབྱེད་དགྲོལ་འབྱིན་པར་བྱེད་པའོ། །དེ་ལྟར་ཐེག་པ་དགུ་ཀ་ལམ་དུ་ཁྱེར་ནས་འབྲས་བུ་ལ་སྦྱོར་བའོ། །ཁྱད་པར་འདི་ཉིད་ཀྱི་ལམ་ལ་གཉིས་ཏེ། ཐབས་ལམ་གཙོ་བོར་ཐབས་དང་གདམ་ངག་གི་སྒོ་ནས་ཉམས་སུ་ལེན་པའོ། །ཤེས་གཙོ་བོར་དཔྱད་གསུམ་གྱིས་རྒྱུད་གྲོལ་བའོ། །རབ་གྲོལ་བའི་ལམ་མོ། །དང་པོ་ནི། རོལ་པའི་ཀ་ར་ལ་སོགས་པ། མན་ངག་ཐབས་ཀྱིས་དེར་འཇུག་དང་། ཞེས་པས། རིམ་གྱིས་པ་སྟེང་སྒོ་འཁོར་ལོ་བཞི་བསྒོམ་པའི་ཐབས་དང་ཅིག་ཆར་བ་འོག་སྒོ་མཁའ་གསང་གཉིས་ལ་བརྟེན་ཏེ་སྒོམ་པའི་ཐབས་སོ། །གཉིས་པ་གྲོལ་ལམ་ནི། ཐོས་བསམ་སྒོམ་པའི་ཚུལ་འགྲོ་བའི། །དེ་ནི་འཇུག་པ་རྣམ་གསུམ་སྟེ། །རྟོག་དཔྱོད་དོན་དུ་ཡི་གེ་དེ། །རྗེས་འཇུག་ཅེས་པས་གསུམ་དུ་བཤད་ཀྱང་། དོན་བཞིར་ཤེས་པར་བྱ་སྟེ། རྟོག་དཔྱོད་ཀྱི་རྗེས་སུ་འཇུག་པ་ལྟ་བ་གཏན་ལ་དབབ་པ་དང་། དོན་གྱི་རྗེས་སུ་འཇུག་པ་རྣམ་པར་མི་རྟོག་པ་བསྒོམ་པ་དང་། ཡི་གེ་རྗེས་སུ་འཇུག་པ་མཚན་བཅས་ལྷ་བསྒོམ་པ་དང་། དོན་དུ་ཡི་གེ་ཐུན་མོང་གི་རྗེས་སུ་འཇུག་པའོ། །དང་པོ་ལ་ཡང་། དོན་བསྡུས་ལས། དང་པོ་སྔོན་འགྲོ་ཉིད་བློ་ཡི་སྟོབས་ཀྱི་རྣམ་པ་གཉིས། ཞེས་པས། བླ་མ་དམ་པའི་མན་ངག་གིས། རྩོལ་བ་མེད་པར་ཅིག་ཅར་དུ་གཏན་ལ་དབབ་པ་དང་། བློ་ཆུང་བས་རིགས་པའི་གཏན་ཚིག་གིས་བརྟགས་དཔྱད་བྱས་ནས། རིམས་ཀྱིས་གཏན་ལ་དབབ་པའོ། །དེ་ཡང་། ལུང་ལས་གྲགས་པའི་དོན་རྣམས་ལ། །རིགས་པའི་གཏན་ཚིགས་མཐའ་དག་ཏུ། །མན་ངག་ངེས་པའི་ཚད་མ་ཡིན། །སོ་སོར་རྟོག་དང་རྩོལ་མེད་པར། །རིམས་དང་ཚིག་ཆར་གཏན་ལ་འབེབས། ཞེས་སོ། །གཉིས་པ་དོན་གྱི་རྗེས་སུ་འཇུག་པ་ལ་ཡང་གཉིས་ཏེ། དོན་ལ་འཇུག་པའི་ཚུལ་སྒོ་ནས། དོན་ལའང་། རིམ་དང་ཅིག་ཆར་བའོ། །ཞེས་པས་རིམ་གྱིས་པ་དང་། ཅིག་ཆར་བའོ། །རིམ་གྱིས་པ་ལ་ཟག་བཅས་དང་། ཟག་མེད་གཉིས་སོ། །ཟག་བཅས་ལ་སོགས་ལམ་དང་སྦྱོར་ལམ་གཉིས་སོ། །ཟག་མེད་ལ་མཐོང་ལམ། སྒོམ་ལམ། མཐར་ཕྱིན་ལམ་གསུམ་མོ། །དེ་ལ་ཟག་བཅས་ལ་དོན་རྣམ་པ་གསུམ་ཞེའོ་སྟེ། ཏིང་ངེ་འཛིན་གྱིས་ངོ་བོའི་ཁྱད་པར་དང་། སེམས་སྐྱེ་ལུགས་ཀྱི་ཁྱད་པར་དང་། སྐྱོན་གྱིས་དབང་དུ་འགྱུར་མི་འགྱུར་གྱི་ཁྱད་པར་དང་། དཔེའམ་རྟགས་ཀྱི་ཁྱད་པར་བསྟན་པའོ། །དང་པོ་ནི། དོན་བསྡུས་ལས། གསལ་འགྱུར་བ་མ་ངེས་པའི་ས་དང་བརྟན་རྟེན་པ་བཞིའི་ས་དང་ཡུན་རིང་གལ་ཆེན་སྦྱོར་བའི་ས་དང་། ཤིན་ཏུ་བསླབ་པ་རྒྱུན་གྱིས་ཡུན་རིང་ཚད་ལས་བསོད་ནམས་གཏེར་གྱིས་འདས་ཞེས་སོ། །སྐྱོན་གྱི་དབང་དུ་འགྱུར་མི་འགྱུར་གྱི་ཁྱད་པར་ནི། དོན་བསྡུས་ལས་མི་མཐུན་ཕྱོགས་དང་ཕྲད་པའི་ཚེ། དེ་འདུན་པ་སེམས་པའི་རྣལ་འབྱོར་དང་པོ་ལ་གནས་པའི་དུས་སུ་དབང་དུ་འགྱུར་དང་། ཅུང་ཟད་དུ་ལས་དོང་བ་མི་འགྱུར། ས་གཉིས་པ་ཐང་ཅིག་གནས་པ་དང་། གསལ་རིགས་ཆེན་འབྱེད་པའི་བར་བརྟན་པའི་ས་གསུམ་པ་ལ་རིགས་གོམས་དང་། །མཚན་མ་རྟགས་ཀྱི་རང་དབང་འགྱུར་དང་ཆེར་ས་བཞི་པ་ལ་བརྟན་དང་། །སྤྱོད་ལམ་ཀུན་ཏུ་སྤྱོད་པ་རྒྱུན་གྱིས་ལྔ་པ་ལ་རླུང་གནས་ཡིན། །ཞེས་སོ། །སེམས་སྐྱེ་ལུགས་ཀྱི་ཁྱད་པར་ནི། མཉམ་ཉིད་གསང་བའི་བདེ་དོན་ལ། །ས་དང་པོ་ལ་དད་དང་མོས་དང་དེར་ས་གཉིས་པ་ལ་བརྩོན་དང་། །དེ་དེར་ས་གསུམ་པ་ལ་གཡོ་དང་ས་བཞི་པ་ལ་ཆེར་གཡོས་དང་། །ས་ལྔ་པ་ལ་མཐོ་དང་འདྲ་བར་འགྱུར་ཡིན་ཏེ། །ཞེས་སོ། །དཔེའམ་རྟགས་ཀྱི་ཁྱད་པར་ནི། སྐར་ཚོགས་ལམ་བདུན་པ་སེམས་ཀྱི་རྣལ་འབྱོར་གྱི་དུས་སུ་འཕྲན་ལྟར་དུ་མཐོང་འབྲིང་དང་ལས་དང་པོ་འདི་དང་ཆེན་པོ་རིགས་ཆེན་འབྱེད་པའི་དང་། །མཚན་མ་རྟགས་ཀྱི་ཅིག་པ་གཉིས་པའི་སྤྱོད་པ་རྒྱུན་གྱི་རྣལ་འབྱོར་གྱི་དུས་སུ་ཟླ་བ་འདྲ་བར་མཐོང་ངོ་། །ཞེས་སོ། །ཟག་བཅས་ཡིན་པའི་རྒྱུ་མཚན་ནི། །དེ་དག་ཟག་བཅས་བསམ་གཏན་ཏེ། །གཉིས་མེད་ཡུལ་བྲལ་དེར་ཐ་མིན། །ཞེས་སོ། །ཟག་མེད་ལ་དོན་གསུམ་སྟེ། དང་པོ་མཐོང་ལམ་གྱི་ཏིང་ངེ་འཛིན་གྱི་ངོ་བོའི་ཁྱད་པར་ནི། རང་གི་མཚན་ཉིད་མངོན་སུམ་དུ་གསལ་བར་ས་དྲུག་པ་རྟེན་པའི་ཁྱད་པར་དུ་སྤྲོ་བའི་ས་ལ་གནས་པའི་དུས་སུ་མཐོང་བས་ཡོན་ཏན་གྱི་ཁྱད་པར་ནི། དབུགས་དབུགས་ཆེན་འབྱིན་པའི་རྣལ་འབྱོར་དབུགས་ཕྱིན་ཏེ་ཟག་པ་ཟད་ནས་འཇིག་རྟེན་འདས། དཔེ་ཡི་ཁྱད་པར་ནི། གསུམ་པའི་རི་བོ་ཅན་འདྲ་ཡིན། །ཞེས་སོ། །སྒོམ་ལམ་གྱི་ཏིང་ངེ་འཛིན་གྱི་ངོ་བོ་དམིགས་པའི་ཁྱད་པར་དུ་འགྲོ་བའི་ས་ནི། རྣལ་འབྱོར་ནི་ལུང་ཆེན་ཐོབ་པའི། མཐོང་བའི་དོན་ལ་མཉམ་གནས་པས། །བརྟན་པར་གྱུར་ཏེ། ཡོན་ཏན་གྱི་ཁྱད་པར་ནི། ལུང་ཆེན་ཐོབ། འབྲས་བུ་ཆེར་འབྱུང་། དཔེ་ནི། བཞི་པ་འདྲ། ཞེས་སོ། །མཐར་ལམ་གྱི་ཏིང་ངེ་ས་གསུམ་སྟེ་འཛིན་གྱི་ངོ་བོའི་ཁྱད་པར་ནི། རང་དང་སྤྱིའི་ཐ་སྙད་བྲལ། །དམིགས་མེད་ཀུན་གསལ་ཡེ་ཤེས་ཉིད། །ཡོན་ཏན་གྱི་ཁྱད་པར་ནི། གནས་པ་མི་འགྱུར་བའི་ས་གཡོ་དང་བརྡལ་བ་ཆོས་ཉིད་ཐོབ་དང་གནས་རྫོགས་པའི་རྫོགས་པ་སྤྱིའི་ཁྱབ་ཀྱི་ས། རིམ་པས་མཐར་ཕྱིན་གསུམ་དུ་གནས། །དཔེ་ནི། ལྔ་པ་བརྒྱད་དང་། བཅུ་དྲུག་ཚུལ་དུ་གསལ་ཞེས་པས་སོ། །དོན་གྱི་རྗེས་སུ་འཇུག་པའི་ཅིག་ཆར་བ་ནི། དོན་བསྡུས་ལས། གང་དག་བློ་ཆེན་མངོན་རྟོགས་པས། །མཉམ་ཉིད་ཡུལ་བྲལ་རང་གསལ་བ། །མི་གཡོ་ཅིག་ཅར་གང་འཇུག་པ། །ས་དང་ལམ་གྱི་གྲངས་རྩོལ་མེད། །ཅེས་པ་དང་། རྒྱུད་ཉིད་ལས་དགོངས་འདུས་ལས། དཔེ་ན་མཐའ་དབུས་མཉམ་ཉིད་ལ། །བསྡུད་དེ་ཅིག་ཅར་གང་འཇུག་པ། །ཏིང་འཛིན་གནས་ཡུན་རིང་ཐུང་དང་། །ལས་འཕྲོ་ཡོད་དང་མེད་པ་ཡི། །ནམ་འགྲུབ་མཉམ་པའི་ཁ་མ་ལུས། །ཞེས་པའི་དོན་གྱིས། རྟོགས་པ་གྲོལ་བ་དུས་གཅིག་པའོ། །གསུམ་པ་ཡི་གེའི་རྗེས་སུ་འཇུག་པ་ནི། ཡི་གེ་མཚན་མའི་རྣལ་འབྱོར་དག །བློ་ཡི་ཁྱད་པར་ཆེས་ཕྲ་ཡིས། །ཐམས་ཅད་གསལ་རྫོགས་ཅིག་ཅར་དང་། ལྔ་པ་གསུམ་ལ་སོགས་པར་སྣང་། །ཞེས་པའི་དོན་གྱིས། རིམ་གྱིིི་པ་དང་། ཅིག་ཆར་བ་གཉིས་སོ། །དེ་ལ་རིམ་གྱིིས་པ་ལ། ལམ་ལྔ་ས་བཅུ་དང་སྦྱོར་ནས་བཤད་དེ། ཚོགས་ལམ་ལ་ས་གཉིས། སྦྱོར་ལམ་ལ་ས་གསུམ། མཐོང་ལམ་ལ་ས་གཅིག །སྒོམ་ལམ་ལ་ས་གཅིག །མཐར་ལམ་ལ་ས་གསུམ་མོ། །དེ་རེ་རེ་ལ་ཡང་ཆོས་བཞི་བཞི་དང་ལྡན་པར་བྱ་སྟེ། ཚོམ་བུའི་གྲང་དང་རྣམ་པའི་ཁྱད་པར་དང་། ཕྱག་རྒྱའི་ཁྱོན་དང་། འཕྲོ་འདུའི་ཚད་དོ། །ཚོམ་བུའི་གྲངས་ནི། ས་དང་པོ་པ་འདུན་པ་སེམས་དཔའ་བས་བརྒྱད་པ་བདེ་བ་ཆེན་པོའི་ལྷའི་ཕྱག་རྒྱ་གཅིག་པ་དང་། །གཉིས་འབྲེལ་ས་གཉིས་པ་ལས་དང་པོ་པའི་ཡན་ལག་རྫོགས་པ་དང་། །ས་གསུམ་པ་འཁོར་རྣལ་འབྱོར་ནི་རིག་ཆེན་འབྱེད་པ་ལོ་གཅིག་དང་རྣམ་ས་བཞི་པ་མཚན་མ་རྟགས་སྤྲོས་དང་། །ཤིན་ཏུ་ས་ལྔ་པ་སྤྱོད་པ་རྒྱུན་རྣམ་སྤྲོས་དཀྱིལ་འཁོར་དང་། །ས་དྲུག་པ་དབུགས་ཆེན་འབྱིན་པ་གླིང་གཅིག་གང་དང་སྟོང་ས་བདུན་པ་ལུང་ཆེན་ཐོབ་པའི་གསུམ་གང་། །གྲངས་མེད་ནམ་མཁའ་ཁྱབ་ཚད་ལྷུན་གྱིས་གྲུབ་པ་ཆོས་ཀྱི་དབྱིངས་ཀྱི་ཁྱབ་ཚད་ཤིན་ཏུ་གྲངས་མེད་པ་ས་དགུ་པ་རྩལ་ཆེན་རྫོགས་པའི། ཆོས་དབྱིངས་ས་བཅུ་པ་ལྷུན་གྱིས་གྲུབ་པའི་དཀྱིལ་འཁོར་དུ་གྱུར་པའི་དུས་སུ་མཐའ་ཡས་རང་གསལ་རྫོགས། ཞེས་སོ། །གཉིས་པ་རྣམ་པའི་ཁྱད་པར་ནི། ཡང་ས་དང་པོ་ལ་རྟོག་དང་ཚོགས་ལམ་པ་མཚན་ས་གཉིས་པ་ལ་མའི་རྣལ་འབྱོར་དང་། །སྤྱོད་ལམ་དང་ཆུ་ཟླ་ས་གསུམ་པ་ལ་ལྟ་བུར་བཟུང་མེད་དང་། །ས་བཞི་པ་གཟུང་འཛིན་གཉིས་བྲལ་དེ་ཉིད་དང་། །ས་ལྔ་པ་ལ་ཅི་ལའང་མི་གནས་མཉམ་ཉིད་དང་། །མཐོང་ལམ་པ་རང་གི་མཚན་ཉིད་ས་དྲུག་པ་ལ་གསལ་ངེས་དང་། །བསྒོམ་ལམ་པ་ས་བདུན་པ་ལ་ཟག་པ་མེད་དང་ལྷུན་གྲུབ་པའི། །ས་བརྒྱད་པ་ལ་ཐོབ་དང་ཤིན་ཏུ་མཐར་ལམ་ས་དགུ་པ་ཐོབ་པ་རྒྱུན་དང་། །ས་བཅུ་པ་བརྟན་རྫོགས་ཉིད་དེ་རྣམ་བཅུའོ། །ཞེས་སོ། །གསུམ་པ་ཕྱག་རྒྱའི་ཁྱོན་ནི། ཚད་ཀྱང་ཁྲུ་བཞི་འདུན་པ་སེམས་པའི་དུས་སུ་བརྒྱད་ཅུ་ལས་དང་པོ་དྲུག་རིགས་ཆེན་འབྱེད་པའི། སུམ་ཅུ་མཚན་མ་རྟགས་ཀྱི་གཉིས་དང་དྲུག་ཅུ་སྤྱོད་པ་རྒྱུན་གྱི་བཞི། །དེ་བཞིན་སྒྱུར་དབུགས་ཆེན་འབྱིན་པའི་འཁོར་ཡུག་སོགས་ཆོས་དབྱིངས་རྣམས་ལྷ་གསལ། །ཞེས་སོ། །བཞི་པ་འཕྲོ་འདུའི་ཚད་ནི། ས་དང་པོ་ལ་གནས་དུས་འཕྲོ་འདུ་དབུགས་ཡུལ་དང་། གཉིས་པ་དྲི་དང་གསུམ་པ་སྒྲ་དང་། བཞི་པ་གཟུགས་སོགས་རིམ་བཞིན་འཕགས། ས་ལྔ་པའི་དུས་སུ་གིང་གཅིག །དྲུག་པའི་དུས་སུ་འཁོར་ཡུག །བདུན་པའི་སྟོང་གསུམ། བརྒྱད་པ་ལ་སེམས་ཀྱི་ཁྱབ་ཚད། ནམ་མཁས་ཁྱབ་ཚད། ལྷུན་གྱིས་གྲུབ་པ་ཆོས་ཀྱི་དབྱིངས་ཀྱི་ཁྱབ་ཚད། དགུ་པ་ལ་ནམ་མཁའ་ཁྱབ་ཚད། བཅུ་པ་རྫོགས་པ་སྤྱིར་ཆིབ་ཀྱི་ས་ནོན་པའི་དུས་སུ་ཆོས་ཀྱི་དབྱིངས་ཀྱིས་ཁྱབ་ཚད་དུ་འཕྲོ་འདུ་བྱེད་ནུས་སོ། །ཡི་གེའི་རྗེས་སུ་འཇུག་པའི་ཅིག་ཆར་བ་ནི། དོན་བསྡུས་ལས་ཐམས་ཅད་གསལ་རྫོགས་ཅིག་ཅར་དང་། །ལྔ་དང་བཅུ་ལ་སོགས་པར་སྣང་། །ཞེས་པ་དང་། ལེའུ་དོན་ལྔ་པ་ལས། གཏན་ཡུལ་དཀྱིལ་འཁོར་ཕྱག་རྒྱ་རྫོགས། ། རྟོག་འཛིན་སྒྲ་སྐད་ཏིང་འཛིན་སྔགས། ཞེས་པའི་དོན་གྱིས། ཕྱི་སྣོད་ཀྱི་འཇིག་རྟེན་གཞལ་ཡས་ཁང་། ནང་བཅུད་ཀྱི་སེམས་ཐམས་ཅད་ཕྱག་རྒྱ་ལྷ་དང་ལྷ་མོའི་དཀྱིལ་འཁོར་དུ་བསྒོམ་པ་ཡིན་ཏེ། བཞུགས་གནས་དང་བཞུགས་ཚུལ། རྒྱན་དང་ཆ་ལུགས། སྐུ་མདོག་དང་ཕྱག་མཚན་མ་འདྲེས་ལ་ཡོངས་སུ་རྫོགས་པར་བསྒོམ་པའོ། །བཞི་པ་དོན་དང་ཡི་གེ་ཐུན་མོང་གི་རྗེས་སུ་འཇུག་པ་ལ་གསུམ་སྟེ། རིམས་ཀྱིས་པ་བློ་ཆེ་ཤོས་ལ་ལྔ་ལྔ་དབྱེ་བ་དང་། འབྲིང་ལ་བཅུ་བཅུར་དབྱེ་བ་དང་། ཐ་མ་ལ་སུམ་ཅུ་སོ་དྲུག་གམ་བཞི་བཅུར་དབྱེ་བར་བཤད་དོ། །དེ་དག་ལ་ཡང་གསུམ་སྟེ། མི་བསྟན་པ་དོན་བསྟན་པ། ལམ་ལྔ་ལ་གནས་པའི་ཡོན་ཏན་གྱི་ཁྱད་པར་བསྟན་པའོ། །དེ་ལ་མི་བསྟན་པ་ནི། ལམ་ལྔ་རྣལ་འབྱོར་རིག་འཛིན་དང་། །ས་དང་གནས་སྐབས་ཡེ་ཤེས་དང་། །སྒྲིབ་དང་གོལ་ས་རྟོག་པ་དང་། །སྤྱོད་དང་ཏིང་འཛིན་དམ་ཚིག་དང་། །དུས་དང་དངོས་གྲུབ་མཐར་ཕྱིན་དང་། །ལྟ་བའི་ཁྱད་པར་གནས་འགྱུར་རྣམས། །བྱེ་བྲག་ལམ་ལྔའི་ཆོས་སྐུ་སྣང་། །རྣམ་པར་ས་བཅུའི་ལམ་རྣམས་ལ། །ཁྱད་པར་དེ་དག་རྣམ་བཅུར་གསལ། །ཞེས་སོ། །དེའི་དོན་རྣམ་ངེས་ཚིག་ནི། དོན་དང་ཡི་གེ་གང་དེ་ཡང་། །སོ་སོའི་གནས་སྐབས་ལམ་དག་ཉིད། །བགྲོད་དང་དེ་ཆོས་ལྡན་པ་ཅིའི་ཕྱིར་ལམ་ཞེ་ན་བགྲོད་པས་ན་ལམ་དང་། །རྒྱུད་མི་གཏོང་བས་ནི་རིག་འཛིན་དང་རྟེན་བྱེད་པས་ན་སའོ་དང་། །དུས་དེ་སྐབས་ཞེས་པའི་ཐད་ལ་བབ་པ་ན་དང་སྐབས་སོ་འབྲས་བུ་ཇི་ལྟ་བ་བཞིན་རྟོགས་པའི་ཡེ་ཤེས་དང་། །གེགས་སུ་གྱུར་པས་ན་སྒྲིབ་པའོ་དང་འདྲ་བའི་ལྟུང་གནས་སུ་གྱུར་པས་ན་གོལ་ས་དང་། །རྩོལ་ཞིང་མ་བྲལ་བས་རྟོགས་པའི་སྒྲོད་པའི་ལམ་སེམས་དང་། །སྤྱོད་ལམ་ལྟ་བ་དང་ཏིང་འཛིན་རྗེས་སུ་མཐུན་པར་སྤྱོད་པས་ནའོ་ཀུན་ཏུ་བློ་གནས་པས་ན་ཏིང་ངེའོ། །དང་། །མི་འདའ་སྲུང་པས་ན་དམ་ཚིག་གོ་དང་དུས་ཉིད་དེ་ཉིད་དུ་ངེས་པས་ན་དུས་སུ་དང་། །ཡོན་ཏན་མཐུ་དང་ལྡན་པས་ན་དངོས་གྲུབ་བོ་བྱ་བྲལ་མཐར་ཐུག་པས་ན་དང་། །ཤེས་རབ་སྟོབས་དང་ཤེས་རབ་ཆེ་ཆུང་གི་ལྟ་བ་ལ་ཁྱད་པར་བྱུང་ཞིང་ཁྱད་པར་ལས། །ཐ་སྙད་ཐ་སྙད་ཀྱི་སྒོ་ནས་ཀུན་གཞིའི་གནས་འགྱུར་བསྟན་པའོ་བྱེ་བྲག་རྣམ་གསུམ་གསུངས། །ཞེས་སོ། །ཤིན་ཏུ་རྒྱས་པར་དབྱེ་ན། གཞན་ཡང་སེམས་བསྐྱེད་སྔགས་ལ་སོགས། །ལམ་གྱི་ཆོས་སྒོ་ཐ་དད་ཀུན། །ལྔ་དང་བཅུ་སོགས་གྲགས་པ་ཡིན། །ཞེས་སོ། །གསུམ་པ་ལམ་ལྔ་ལ་གནས་པའི་ཡོན་ཏན་གྱི་ཁྱད་པར་ནི། ས་དང་པོ་དང་གཉིས་པ་ལ་གནས་པས་གསང་ཆེན་གྱི་འབྲས་བུ་ཐོབ་པར་བྱེད་པའི་ལམ་གྱི་རྟེན་བྱེད་པ་གསུམ་པ་ལ་གནས་པའི་རྐྱེན་གྱིས་ངན་སོང་དུ་ལྟུང་ཡང་། ལྟ་བསྒོམ་རྟོག་པའི་གཟུངས་ཀྱི་ཟིན། ས་བཞི་པ་ལ་གནས་པས་ནི། ལུས་ངན་པ་ལེན་མི་སྲིད་དེ་བདེ་འགྲོ་ལྷ་དང་མིའི་འབྲས་བུ་ཐོབ། ས་ལྔ་པ་ལ་གནས་པས་ནི་བདེ་འགྲོ་འདོད་ཁམས་ལ་སོགས་པར་ཡང་མི་ལྟུང་སྟེ་འཁོར་བ་ལས་ཐག་བསྲིངས། ས་དྲུག་པ་ལ་གནས་པས་ནི་ཟག་པ་དང་བྲལ་བས། ཁམས་ཀྱི་འཇིགས་པ་མེ་ཆུ་ལ་སོགས་པས་མི་ཚུགས། ས་བདུན་པ་ལ་གནས་པས་ནི། ཐེག་པ་འོག་མ་པར་མི་ཟློག །ཞི་བདེ་ལ་མི་གནས་ཤིང་། གཞན་དོན་ལ་ཕྱིར་འོང་། ས་བརྒྱད་པ་ལ་གནས་པས་ནི། མི་ཤེས་པའི་སྐྱོན་དང་བྲལ་ཞིང་ཤེས་བྱ་ཁོང་དུ་ཆུད། ས་དགུ་པ་ལ་གནས་པས་དུས་སུ། ལམ་མཐར་རྫོགས་སུ་ཉེ་ཞིང་འབྲས་བུ་མྱུར་དུ་སྦྱོར། ས་བཅུ་པའི་དུས་སུ། ས་སྒྲོད་དགོས་པར་མི་ཟློག་ཅིང་སངས་རྒྱས་ཀྱི་ས་ལ་ཐོགས་པ་མེད་པ་མངོན་དུ་འགྱུར་ཞིང་། ལྷུན་གྱིས་གྲུབ་པའི་ཡོན་ཏན་དང་ལྡན་ནོ། །གསུམ་པ་ལམ་གྱི་རྐྱེན་ཡན་ལག་ནི། དོན་བསྡུས་ལས། དེ་རྐྱེན་ཡན་ལག་རྣམ་པ་གཉིས། །སྒྲུབ་བྱེད་རྐྱེན་དང་ཤེས་བྱེད་པའི། །ཞེས་པས། ལམ་བསྒྲུབ་བྱེད་ཀྱི་རྐྱེན་ཡན་ལག་དང་། ལམ་ཤེས་བྱེད་ཀྱི་རྐྱེན་ཡན་ལག་གོ། །སྒྲུབ་བྱེད་ནི། ལམ་གྱི་ཡན་ལག་སུམ་ཅུ་གཉིས། །མདོ་དང་གཞི་དང་བསླབ་པའི་མཐའ། །ཞེས་པས་སྤྱི་དོན་གསུམ་སྟེ། སྔགས་ཀྱི་སྐོལ་མདོ་བཅུ་གཉིས། གསང་སྔགས་ཀྱི་གཞི་བཅུ། བསླབ་པའི་མཐའ་བཅུའོ། །བསྐོལ་མདོ་བཅུ་གཉིས་ནི། ཐེག་པ་རིམ་པ་དགུ་ཀ་ལ་སྦྱར་དུ་རུང་ཡང་། སྐབས་འདིར་ཨ་ནུ་ལ་སྦྱོར་ཏེ། །མདོ་ནི་བཅུ་གཉིས་འཇུག་སྒོ་དང་། །ཞེས་དང་། འཇུག་པའི་སྒོ་དབྱིངས་དང་ཡེ་ཤེས་ཀྱི་སྒོ་ནས་འཇུག །དམ་ཚིག་ཏིང་འཛིན་ལྟ་བ་དང་། ཞེས་པས་དམ་ཚིག་ནི་སྙིང་རྗེའི་དམ་ཚིག་དང་། ཆོས་ཉིད་ཀྱི་དམ་ཚིག་སྲུང་། ལྟ་བ་ནི་དབྱིངས་ཡེ་ཤེས་གཉིས་སུ་མེད་པར་ལྟ། ཏིང་ངེ་འཛིན་ནི། དོན་དང་ཡི་གེའི་རྗེས་སུ་ཞུགས་ནས། མཚན་བཅས་དང་མཚན་མེད་སྒོམ་མོ། །དམིགས་པ་ཟླས་པ་ཕྲིན་ལས་ནི་དང་། ཞེས་པས། དམིགས་པ་ཐམས་ཅད་རང་གི་སེམས་ཀྱི་བདག་ཉིད་ཆེན་པོར་དམིགས། ཟླས་པ་ནི་བྲག་ཆ་ལྟར་གྲགས་སྟོང་དབྱེར་མེད་དུ་ཟློས་ཕྲིན་ལས་ནི་ཞི་རྒྱས་དབང་དྲག་བཞིས་དོན་མཛད། སྤྱོད་ལམ་དང་ནི་ཐོབ་བྱའི་དབང་། ཞེས་པས་སྤྱོད་པ་ནི་ཐབས་ཀྱི་སྤྱོད་པ། དབང་བསྒྱུར་གྱི་སྤྱོད་པ་བྱེད། ཐོབ་བྱའི་དབང་ནི་ཁྲོ་བོའི་དབང་མཆོག་སུམ་ཅུ་རྩ་དྲུག་བསྐུར་རིག་འཛིན་དང་སངས་རྒྱས་པ། ཞེས་པས་རིག་འཛིན་གྱི་ས་ནི། སྒྲ་ལ་གནས་པའི་ལམ་ལ་གནས་པའི་ཚེ་ལ་དབང་བའི། ཕྱག་རྒྱ་ཆེན་པོའི་ལྷུན་གྱིས་གྲུབ་པའི་རིག་འཛིན་ནོ། །སངས་རྒྱས་ཀྱི་ས་ནི། བརྡལ་བ་ཆོས་ཉིད་དང་། ཡི་གེ་འཁོར་ལོ་ཚོགས་ཆེན་ཐོབ། །ངེས་འབྱེད་ཡན་ལག་དག་ཏུ་བཤད། །ཅེས་པས། ལྟ་བ་ངེས་པར་བྱེད་པའི་ཡན་ལག །ཆོས་རྟགས་ཀྱི་ཕྱག་རྒྱ་བཞིས་ལྟ་བའི་དོན་ངེས་པར་བྱེད་དོ། །གསང་སྔགས་ཀྱི་གཞི་བཅུ་ནི། གཞི་ནི་རྣམ་བཅུ་སྒྲུབ་པ་དང་། །ཞེས་པས་སྒྲུབ་པ་སྒྱུ་མ་ལྟ་བུ། གསང་སྔགས་མི་དང་སྤྱོད་པ་དང་། །ཞེས་པས། གསང་སྔགས་ཀྱི་མི་སྨིག་སྒྱུ་ལྟ་བུ། སྤྱོད་པ་རྨི་ལམ་ལྟ་བུ། དངོས་གྲུབ་གནས་དང་ཟླས་པའི་སྒྲ། །ཞེས་པས་དངོས་གྲུབ་གཟུགས་བརྙན་ལྟ་བུ། གནས་དྲི་ཟའི་གྲོང་ཁྱེར་ལྟ་བུ། བཟླས་པས་བྲག་ཆ་ལྟ་བུ། ཕྱག་རྒྱ་ཏིང་འཛིན་ལྟ་བ་དང་། །ཞེས་པས། ཕྱག་རྒྱ་ཆུ་ཟླ་ལྟ་བུ། ཏིང་ངེ་འཛིན་ཆུའི་ཆུ་བུར་ལྟ་བུ། ལྟ་བ་མིག་ཡོར་ལྟ་བུ། ཆོ་འཕྲུལ་དག་སྟེ་དེ་དག་དོན། །ཞེས་པས་ཆོ་འཕྲུལ་འགལ་མེ་སྐོར་བ་ལྟ་བུའོ། །དེ་ལྟར་དཔེ་བཅུས་མཚོན་ནས་དོན་ལ་གནས་ཤིང་ཡང་དག་པའི་དོན་སྒྲུབ་པར་བྱེད་པའོ། །བསླབ་པའི་མཐའ་བཅུ་ནི། བསླབ་པའི་མཐའ་ནི་རྣམ་བཅུ་སྟེ། །དམ་ཚིག་གཞི་དང་རྒྱུད་འགྲོལ་དང་། །སྒོ་མོར་སྐུར་དང་ཡུལ་དབྱུང་དང་། །དབང་རིམ་ལ་དོར་སྤྱོད་པ་དང་། །ཐག་བཅད་པ་དང་ཉམས་སླང་དང་། །མན་ངག་དོན་དང་མདོར་བསྡུས་རྣམས། །རྣལ་འབྱོར་བསླབ་པའི་མཐའ་བཅུར་བཤད། །ཅེས་པའི་དོན་གྱིས་གཞི་དམ་ཚིག་གིས་བཟུང་བ་བསྡུས་པར་ཆད་ནས་མིང་ཙམ་འཆད། འབྲིང་གཞི་འཛིན་པ་ནི་དམ་ཚིག་སྟེ། སྒོ་གསུམ་སྒོམ་པར་གནས་པའི་དོན། །རྩ་བ་ཡན་ལག་ལ་སོགས་པའི། །སྲུང་དང་སྒྲུབ་པ་དེ་ཉིད་དོ། །ཞེས་པ་ལ་སོགས་པའི་དོན་དང་སྦྱར་ནས་བཤད། རྒྱས་པར་འཆད་ནས་སྤྱི་དོན་བཞི་བཞི་བཤད་དོ། །ལ་བསླབ་པ་ཞིང་ས་གཤིན་པོ་སོ་ནམ་བྱེད་པ་ལྟ་བུ། རྒྱུད་ཐོས་པས་གྲོལ་བ་གྱི་ལིང་སྒྲོག་གྲོལ་བ་ལྟ་བུ། སྒོ་ཀུན་ནས་བསྡུ་བ་ལ་བསླབ་པ་བུང་བ་ཚང་འཚོལ་བ་ལྟ་བུ། ཕུལ་དུ་མཁས་པས་དབྱུང་བ་ལ་བསླབ་པ་རི་རྒྱལ་ལྷུན་པོའི་རྩེར་ཕྱིན་པ་ལྟ་བུ། རིམ་པ་དབང་གིས་སྒྲོལ་བ་རྒྱལ་བུ་རྒྱལ་ས་འཛིན་པ་ལྟ་བུ། ལ་སྤྱོད་པས་དོར་བ་ལ་བསླབ་པ་གླང་པོ་ཆེས་ཆུ་བརྒལ་བ་ལྟ་བུ། ཐག་ལྟ་བས་བཅད་པ་ལ་བསླབ་པ་ཁྱུང་དར་མ་ནམ་མཁའ་ལ་ལྡིང་བ་ལྟ་བུས་བསྟན། ཉམས་སུ་ཏིང་ངེ་འཛིན་གྱིས་བླང་བ་ལ་བསླབ་པ་ནོར་བུ་རིན་པོ་ཆེ་སྟོན་པའི་དེད་དཔོན་ལྟ་བུ། དོན་མན་ངག་གིས་སྒྲུབ་པ་ལ་བསླབ་པ་གསེར་འགྱུར་གྱི་རྩི་ལྟ་བུ་མདོ་དོན་གཅིག་ཏུ་འདུ་བར་བསླབ་པ་སོ་ནམ་གྱིས་ཁེ་སྒྲུབ་པ་ལྟ་བུའམ་དགོངས་མལ་ལྟ་བུའོ། །ཤེས་བྱེད་ཀྱི་རྐྱེན་ཡན་ལག་ལ་གསུམ། དབྱེ་བ་བསྟན་པ། རྒྱུ་མཚན་བསྟན་པ། གཏན་ལ་དབབ་པའོ། །དང་པོ་དབྱེ་བ་ནི། རྒྱུད་ནི་བྱིན་རླབས་འབྱུང་བ་དང་། ལུང་བསྟན་རྒྱུད་པ་རྣམ་གཉིས་སོ། །ཞེས་པས་གཉིས་ཏེ། བྱིན་རླབས་འབྱུང་བའི་རྒྱུད་བསྟན་པ་དང་། ལུང་བསྟན་རྒྱུད་པའི་རྒྱུད་བསྟན་པའོ། །གཉིས་པ་རྒྱུ་མཚན་ནི། བྱིན་རླབས་སྐུ་བཞིའི་བསྟན་པ་དག །ཅེས་པས། སྟོན་པ་སྐུ་བཞི། གདུལ་བྱ་སྣོད་བཞི་ལ། བསྟན་པ་བཞིས་གསུངས་པའི་ངོས་ནས་བྱིན་རླབས་འབྱུང་བའི་རྒྱུད་ལ། ཐུབ་པའི་དབང་པོས་ལུང་བསྟན་པ་ལྟར། ཕྱག་ན་རྡོ་རྗེས་མི་ཡུལ་དུ་གསང་སྔགས་ཀྱི་རྒྱུད་རྣམས་རིག་འཛིན་མི་དང་མི་མ་ཡིན་པ་ལ། བཤད་པའི་ངོས་ནས་ལུང་བསྟན་རྒྱུད་པའི་རྒྱུད་དོ། །གསུམ་པ་གཏན་ལ་དབབ་པ་ལ་གཉིས་ལས། བྱིན་རླབས་འབྱུང་བའི་རྒྱུད་ལ་ཡང་གསུམ་སྟེ། དབྱེ་བ་དང་། ཁྱད་པར་དང་། ལྡེ་མིག་གིས་སྒོ་ནས་རྒྱས་པར་བཤད་པའོ། །དང་པོ་དབྱེ་ན། བཤད་ཐབས་ལྡེ་མིག་རྣམ་གཉིས་ཏེ། ཞེས་པས་སྤྱིའི་ཞོར་ལ་སྤྱོད་པའི་འདྲེན་སྒོ་ནས་གཏན་ལ་དབབ་པ་དང་། རྒྱུད་སྒོ་དྲུག་ཕྱི་ནང་གཉིས་སུ་བསྡུས་ཏེ་སྒོ་གཉིས་གཏན་ལ་འབེབས་པའི་ལྡེ་མིག་གོ། །གཉིས་པ་ཁྱད་པར་ལ་སྔགས་མཚན་ཉིད་ཀྱི་ཁྱར་པར་དང་། སྔགས་ནང་གི་ཁྱད་པར་དང་། བསྐྱེད་རྫོགས་གསུམ་ནང་གི་ཁྱད་པར་ལ་སོགས་པ་ཤེས་པར་བྱའོ། །གསུམ་པ་སྒོ་དང་ལྡེ་མིག་རྒྱས་པར་བཤད་པ་ལ་གཉིས་ལས། དང་པོ་སྤྱོད་པའི་འདྲེན་སྒོ་གཏན་ལ་དབབ་པ་ནི། སྤྱོད་པའི་འདྲེན་སྒོ་རྣམ་འབྲེལ་གསུམ། །འབྱེད་པ་དྲུག་དང་འགྲོལ་བ་བཞི། །ངེས་པར་འབྱིན་པ་རྣམ་གསུམ་མོ། །ཞེས་པ་ཡན་ལག་རྒྱུའི་ཡན་ལག །སྦྱོར་བའི་ཡན་ལག །འབྲས་བུའི། དངོས་གཞིའི། བཟུང་བའི། མཚན་ཉིད་ཀྱི། དགོངས་པ། གཞན་པའི། ལྡེམ་པོ་གི། མཐུན་མཇུག་སྦྱོར་བའི། དོན་དམ་ངེས་པའི་བླ་མ་ཐབས་གིས་འབྱེད། མདོ་བཞིས་འགྲོལ་རྩ་བ་གསུམ་གྱིས་འབྱིན་པས་སྡེ་བཀོད་པ་རྣམ་འགྲེལ་གྱིས་སྟོན། སྒོ་གཉིས་ཀྱི་ལྡེ་མིག་ནི། སྒོ་གཉིས་སྤྱི་དང་ཁྱད་པར་ལས། །ཞེས་པས་གཉིས་ལས་སྒོ་གཉིས་སྤྱིར་བསྟན་པ་ནི། སྤྱི་ཡང་རྣམ་གསུམ་ཡན་ལག་མདོ་རྩ་བ་དག་གིས་འགྲེལ་བར་བྱེད། ཅེས་པས། ཡན་ལག་དྲུག་གི་རྒྱུའི་རྩ་བ། འབྲེལ་བའི། འདྲེན་པའི། ངེས་པའི། སྦྱོར་བའི། སྐྱེ་བ་མེད་པའི། མཉམ་པ་ཉིད་ཀྱི། ཇི་བཞིན་པའི། རྩལ་བ་མེད་པའི། དེ་ཁོ་ན་ཉིད། དམ་པར་ངེས་པ་ཡོངས་སུ་ཟིན་པ་འབྱེད། མདོ་བཞིས་འགྲེལ་རྩ་བ་གསུམ་གྱིས་འབྱིན་པ་སྟེ་བསྡུ་བ་རྣམ་གསུམ་གྱིས་སྟོན་ནོ། །ཁྱད་པར་གསང་སྒོ་ནི། ཁྱད་པར་གསང་སྒོའི་རྣམ་འགྲེལ་པར། ཡན་ལག་མདོ་དང་རྩ་བ་ཡིས་འབྱེད་འགྲོལ་ངེས་པར་འབྱིན་པར་བྱེད། ཅེས་སོ། །འབྱེད་པའི་ཡན་ལག་དྲུག །འགྲོལ་བའི་མདོ་བཞི། འབྱེད་པའི་རྩ་བ་གསུམ་མོ། །དང་པོ་ནི། འབྱེད་པ་རྒྱུ་དང་རྩ་བ་དང་། །འབྲེལ་པ་ཚིག་དང་ངེས་པ་སྦྱོར། །ཞེས་པས་དྲུག་གོ། །དེ་ཡང་སྤྱི་དོན་ཆེན་པོ་དྲུག་གིས་བཤད་དེ། ང་གཉིས་པ་ལས། གང་དུ་དགོས་པ་གང་ངེས་དང་། །ངོ་བོ་དམིགས་དང་བཅས་པའོ། །ཞེས་པས། དང་པོ་རྒྱུའི་ཡན་ལག་སྨོས་པའི་དགོས་པ་ནི། ཁུངས་སྨོས་པས་ཡིད་ཆེས་པར་བྱ་བའི་ཕྱིར་རོ། །ངོ་བོ་ནི། རྒྱུ་ནི་གླེང་གཞི་དྲུག་ཡིན་ཏེ། །བསྟན་པ་དོན་གང་དུས་གང་ཚེ་སྟོན་པ་གང་ཉིད་ཀྱིས། །གནས་གང་དུ་འཁོར་གང་ལ་གང་བརྗོད་བསྡུད་པ་པོའོ། །ཞེས་སོ། །ངེས་ཚིག་ནི། གཏན་པ་འབྱུང་བའི་རྒྱུར་འགྱུར་བའི་ཕྱིར་རོ། །རྣམ་གྲངས་རྣམ་པར་ཕྱེ་སྟེ་དོན་གྱི་དམིགས་བཟུང་བ་ཤིན་ཏུ་རྒྱས་པར་བསམ་གྱིས་མི་ཁྱབ་པའི་གླེང་གཞི་རབ་ཏུ་རྒྱས་པར་སྐུ་ལྔའི། འབྲིང་སྣོད་ཀྱི་དབང་དུ་བཞི། བསྡུས་པར་སྤྱི་དང་མཐུན་པར་སྐུ་བཞི་ལས་ནི། སྐུ་བཞིའི་རྡོ་རྗེར་འཛིན་པ་ཆེན་པོའི་གླེང་གཞིའོ། །དེ་ཡང་དང་པོ་ཆོས་སྐུའི་གླེང་གཞི་ནི། འདི་སྐད་བདག་གིས་ཐོས་པའི་དེ་ཁོ་ན་ཉིད་སྣང་བའི་དུས་གཅིག་ན། ཞེས་པས། གནས་ནི་ཀུན་གཞི་ཆོས་ཀྱི་དབྱིངས་ཀྱི་ཕོ་བྲང་དུ། སྟོན་པ་ཆོས་ཀྱི་སྐུས་བློ་གྲོས་ཅན་གྱིས་འཁོར་ལ། གཏན་པ་དོན་དམ་ངེས་པའི་ཚིག་ཏུ། དུས་ནི་དུས་བཞི་བརྗོད་དུ་མེད་པར་གསུངས་ལ། སྡུད་པ་པོ་ཕྱག་ན་རྡོ་རྗེར་མཛད་དོ། །ལོངས་སྐུའི་གླེང་གཞི་ནི། གསང་བའི་སྙིང་པོ་དེ་ཁོ་ན་ཉིད་ཀྱིས་ཚིག་འདི་སྐད་དུ་མཐུན་འཇུག་ཐབས་སུ་ཐོས་པའི་དུས་གཅིག་ཅིག་ན། ཞེས་པས། གནས་འོག་མིན་ཆེན་པོའི་ཕོ་བྲང་དུ་སྟོན་པ་ལོངས་སྐུའི། འཁོར་རིགས་རྒྱུད་ཅན་ལ། བསྟན་པ་ལྡེམས་དགོངས་སྦྱོར་བའི་ཚིག་ཏུ། དུས་དུས་བཞི་མཉམ་པ་ཉིད་དུ་གསུངས་པ་ལས། ཕྱག་རྡོར་གྱིས་བསྡུས་པའོ། །སྤྲུལ་སྐུའི་གླེང་གཞི་ནི། རྒྱ་ཆེར་བརྗོད་པ་ལྡེམས་དགོངས་ཀྱི་ཚིག་འདི་སྐད་དུ་བཀྲི་ཐབས་སུ་ཐོས་པའི་དོན་ཅིག་ན་ཞེས་པས། གནས་མོས་པ་ཅན་གྱི་འཇིག་རྟེན་དུ། སྟོན་པ་སྤྲུལ་པའི་སྐུས། འཁོར་ལྷ་མི་སྐལ་བ་ཅན་ལ། བསྟན་པ་ཀྲི་ཏྲ་རྒྱུད་པའི་ཚིག་ཏུ། དུས་སྒྲོན་མ་ཡོངས་སུ་བཀོད་པའི་དུས་སུ་གསུངས་པ་ཡང་། སྡུད་པ་པོ་ཕྱག་ན་རྡོ་རྗེ་གྱིས་མཛད་དོ། །གསང་བ་སྐུའི་གླེང་གཞི་ནི། འདོད་པ་རང་རྐྱེན་གྱི་ཚིག་འདི་སྐད་དུ། མ་བཀག་ཆོས་ཉིད་དུ་དགོངས་པ་རང་སྣང་བར་ཐོས་པའི་དུས་གཅིག་ན། ཞེས་པས། གནས་ནི་གཙུག་ཏོར་འཁོར་ལོ་བསྒྱུར་བ་ཡུམ་གྱི་མཁར། སྟོན་པ་གསང་བའི་སྐུས་ཞེན་ཆགས་ཅན་གྱི་འཁོར་ལ། བསྟན་པ་འདོད་པ་རང་རྐྱེན་གྱི་ཚིག་ཏུ། དུས་གསང་དབང་བསྐུར་ཞིང་འོག་སྒོ་ཉམས་སུ་ལེན་པའི་དུས་སུ་གསུངས་པ་ཡང་། སྡུད་པ་པོ་ཕྱག་ན་རྡོ་རྗེར་མཛད་པའོ། །རྒྱས་པ་ཞེས་བདུན་པས་བསྟན་ནོ། །རྩ་བའི་ཡན་ལག་ནི། རྩ་བ་གླེང་སློང་རྐྱེན་ཉིད་དེ། །ཇི་ལྟར་སློང་ནས་ཞུས་བཤད་ཚུལ། །ཞེས་པ་དང་། ཡང་། མདུན་བསུས་གུས་དང་དྲི་བ་དྲིས། །སྐབས་ལས་གླེང་དུ་སློང་བའོ། །ཞེས་པས་དོན་གསུམ་སྟེ། སྟོན་པས་མདུན་བསུ་ནས་གླེང་བསླང་བ་དང་། འཁོར་གྱིས་གུས་པས་དྲི་བ་དྲིས་ཏེ་གླེང་བསླང་བའོ། །ཞེ་བརྒྱད་པ་ནས་སྟོན་ནོ། །འབྲེལ་བ་ནི། འབྲེལ་བ་གང་བརྗོད་གང་གིས་བརྗོད། །གང་ཕྱིར་གང་གིས་སྟོབས་ཀྱིས་བཤད། །ཅེས་པ་དང་། འབྲེལ་བའི་ཡན་ལག་རྣམ་པ་བཞིར། བརྗོད་དང་། བརྗོད་བྱ་འབྲེལ་དགོངས་ཐ་མ་གཉིས་བཞི་འདྲེན་པའོ། །ཞེས་པས། དགོས་དོན་འབྲེལ་ལ་བཞི་ལས། དང་པོ་འབྲེལ་པ་ལ་གཉིས་ཏེ། ཐབས་དང་ཐབས་བྱུང་གི་འབྲེལ་པ་ནི། ཞེ་དགུ་པ་ལས། བཛྲ་ཀར་མ་ཙག་ཀྲ་སྭཱ་ཏ་ཧ་ཧ་ཧཾ་ཞེས་སྐྱེས་བུ་དབང་བསྐུར་བ་ནི་ཐབས། ལས་ཀྱི་རྡོ་རྗེར་དབང་ཐོབ་སྟེ། །ཞེས་པས། འཆད་པའི་སྐྱེ་བུར་གྱུར་པ་ནི་ཐབས་ལས་བྱུང་བའོ། །དེ་དང་དེ་ལས་བྱུང་བའི་འབྲེལ་བ་ནི། ཨེ་མ་ཧོ་བཅོམ་ལྡན་འདས་རྡོ་རྗེ་སེམས་དཔའི་འདི་ནི། འདི་ལྟར་མཐུ་ཆེ་བ། འདི་ལྟར་རྒྱ་ཆེ་བ། འདི་ལྟར་མཁས་པ་འདི་ལྟར་གསལ་ཞིང་ཟབ་པ་ནི། བཅོམ་ལྡན་འདས་ཀྱི་ཐུགས་དང་འབྲེལ་ཞིང་། ཐུགས་ལས་སྐྱེས་པ་ལགས། དེ་ཁོ་ན་ཉིད་དང་འབྲེལ་ཞིང་དེ་ཁོ་ན་ཉིད་ལས་སྐྱེས་པ་ལགས་སོ་ཞེས་བཤད་དོ། །བརྗོད་བྱ་ནི་རང་བཞིན་གྱིས་སྦས་པའི་ཆོས་ཉིད་དོ། །བརྗོད་བྱེད་བརྡའ་དཔེ་ལྡེ་མིག་དང་བཅས་པའོ། །དགོས་པ་ལ་གཉིས་ལས། དགོས་པ་ནི་དོན་རྟོགས་པའོ། །དགོས་པའི་དགོས་པ་ནི་བདེ་གཤེགས་ཀྱི་ཐུགས་མཉམ་ཉིད་རང་ཉིད་རང་རིག་པས་མངོན་དུ་གྱུར་པའོ། །ཞེ་དགུ་པ་ནས་སྟོན་ནོ། །འདྲེན་པའི་ཡན་ལག་ནི། རང་བཞིན་ལྟ་བ་ངེས་དོན་དང་། །སྤྱི་སྡུད་པ་དང་རྣམ་པར་དབྱེ། །ཚིག་དོན་འབྲེལ་དང་འབྲེལ་ཤུགས་སྦྱོར། །རང་ལུགས་ཉིད་དང་བརྒལ་ལན་དང་། །ལྡེམ་དགོངས་བརྡའ་དང་དཔེ་མཚོན་དང་། །མན་ངག་གབ་སྦས་འབྱིན་སྡེབས་རྣམས། །དཔེ་བཅུ་ལྟ་བུར་མཚོན་པའོ། །ཞེས་པས་བཅུ་སྟེ། རང་བཞིན་ལྟ་བའི་ཚིག་ཁྱུང་དར་མ་ནམ་མཁའ་ལ་ལྡིང་བ་ལྟ་བུ་དང་། སྤྱི་དོན་སྡུད་པའི་ཚིག་སེང་གེ་མཆོང་བ་ལྟ་བུ་དང་། རྣམ་པར་དབྱེ་བའི་ཚིག་སྟག་གི་མཆོང་པན་ལྟ་བུ་དང་། རང་སྐྱེས་གཉེར་གྱི་ཚིག་རུ་སྦལ་གྱི་ནུར་འགྲོས་ལྟ་བུ་དང་། འབྲེལ་པ་སྦྱོར་བའི་ཚིག་བྱ་ངང་མོའི་འཇོལ་འགྲོས་ལྟ་བུ་དང་། ཚད་མ་བཀའ་གཞུང་གི་ཚིག་དུས་ཀྱི་འབྲུག་ཆར་ལྟ་བུ་དང་། གཏར་ཀ་གགས་སེལ་གྱི་ཚིག་གླག་ཁྲ་མོ་གཟན་ལ་བཅུམ་པ་ལྟ་བུ་དང་། ལྡེམ་དགོངས་མན་ངག་གི་ཚིག་རྣ་ཕྲུག་བྲག་ལ་འཛེག་པ་ལྟ་བུ་དང་། མཚོན་པ་དཔེའི་ཚིག་མེ་ལོང་གཡའ་དག་པ་ལྟ་བུ་དང་། སྣོལ་མཚམས་འཕེན་སྡུད་ཀྱི་ཚིག་སེང་ཕྲུག་རྩལ་སྦྱོང་བ་ལྟ་བུའི་དང་བཅུའི་སྒོ་ནས་འཆད་དོ། །དེ་ནི་ལྔ་བཅུ་པས་སྟོན་དོན་ངེས་པར་འབྱེད་པའི་ཡན་ལག་ནི། ངེས་པ་གཏན་ཚིག་རྣམ་བཅུ་གཉིས། ཞེས་པའི་བཞི་ཚོ་གསུམ་སྟེ། སྣོད་བཞི་ལ་བསྟན་པ་བཞིར། ངེས་པ་ནི། གང་ལ་སྤྱན་རས་གཟིགས་དབང་གིས། །མཐའ་ཐུག་མེད་པའི་འ གྲོ་གང་དག །འདི་ན་སྣོད་བཞི་ཁོ་ནར་གཟིགས། །ཞེས་པ། གདུལ་བྱ་བཞི་ལ་བརྟན་པ་བཞིར་ངེས་པར་བྱེད་པའོ། །གཏན་ཚིགས་ཀྱི་ཡན་ལག་གམ་སྤྱི་དོན་ཆེན་པོའི་བཞིས་ངེས་པ་ནི། གང་དུ་དགོས་པ་གང་ངེས་པ། །ངོ་བོ་དམིགས་དང་བཅས་པའོ། །ཞེས་པས། གླེང་བཞི་ལ་སོགས་པ་གང་ལ་ཡང་། དགོས་ཆེད། ངེས་ཚིག །ངོ་བོ། རྣམ་གྲངས་རྣམ་པར་ཕྱེ་སྟེ་དོན་གྱི་དམིགས་བཟུངས་བ་དང་བཅས་པས་སྟོན་པའོ། །ཆོས་རྟགས་ཀྱི་ཕྱག་རྒྱ་བཞིས་ངེས་པ་ནི། བཀའ་དོན་གཏན་ཚིག་རིགས་པ་བཞིས། །སྣང་དང་མི་འགལ་རྒྱས་འཐད་སྦྱར། །ཞེས་པས་ལྟ་བའི་དོན་ལྟ་བུ་གཅིག་ལ་ཡང་། བཀའ་ལུང་ལས་སྣང་བ། དོན་དང་མི་འགལ་བ་གཏན་ཚིགས་ཀྱིས་རྒྱས་པ། རིགས་པས་འཐད་པ་དང་བཞིས་ངེས་པར་བྱའོ། །ང་གཅིག་པས་སྟོན་ནོ། །སྦྱོང་བའི་ཡན་ལག་ལ་གཉིས་ལས། བདག་དོན་དུ་སྦྱོར་བ་ལ་སོ་གཉིས་ཏེ། རྟོག་པ་བཞི་དང་མཚན་ཉིད་བཞི། །དགོས་འབྲེལ་བཞི་དང་ཡན་ལག་བཞི། །དེར་འཇུག་དཔེ་བཞི་འཚོལ་དཔེ་བཞི། །བསྙེན་སྒྲུབ་ཡན་ལག་བཞི་དག་དང་། །མཚན་ཉིད་ཚུལ་དང་སྦྱར་བ་བཞི། །རྣམ་པ་སུམ་ཅུ་རྩ་གཉིས་རྣམས། །གཞི་ཉིད་འབྲེལ་དང་ཟག་བཅས་དང་། །མཐོང་དང་སྒོམ་དང་མཐར་ཕྱིན་དང་། །སངས་རྒྱས་པ་དང་རྣམ་དྲུག་དང་། །བསྡུས་ཏེ་དེ་ཡི་ཡན་ལག་ཡིན་ཞེས་པའི་ཚུལ་གྱིས་བདག་དོན་འབྲས་བུ་ལ་སྦྱོར་བའོ། །གཞན་དོན་ཐུགས་རྗེས་སྦྱོར་བ་ཉེར་བརྒྱད་ནི། ཆོ་འཕྲུལ་བཞི་དང་མངོན་ཤེས་ལྔ། །ཐབས་དང་ཐབས་སྦྱར་ལྔ་ལྔ་དང་། །རང་བཞིན་ལྔ་དང་ཕྲིན་ལས་བཞི། །གཞན་དོན་སྤྱོད་པའི་ཡན་ལག་སྟེ། །ཞེས་པས། གཞན་དོན་འགྲོ་དོན་ལ་སྦྱོར་བའོ། །ང་གཉིས་པས་སྟོན་ནོ། །མདོ་བཞིས་འགྲོལ་བ་ནི། མདོ་བཞི་མཐོང་ཐོས་མངོན་སུམ་དང་། །བྱ་བ་བྱེད་དང་རྣམ་བཞིས་འགྲེལ། །ཞེས་པས། ཐོས་པས་ངེས་པར་འབྱུང་བའི་མདོ། །མཐོང་བས་ངེས་པར་འབྱུང་བའི་མདོ། །མངོན་སུམ་ངེས་པར་འབྱུང་བའི་མདོ། །ཐམས་ཅད་ནས་ཐམས་ཅད་དུ་འབྱུང་བ་མེད་པའི་མདོ་དང་བཞིས་འགྲེལ་ལོ། །ང་གསུམ་པས་བསྟན་ནོ། །འབྱིན་པའི་རྩ་བ་ལ་གསུམ་སྟེ། །ངེས་པའི་རྩ་བ་མན་ངག་གསུམ། །མི་མཐུན་ཕྱོགས་རྣམས་བཅད་པ་དང་། །དོན་མཐུན་འདྲ་བའི་དཔེ་མཚོན་དང་། །ངེས་པའི་དོན་ལ་གནས་པ་ཡི། །དོན་གསུམ་ཚུལ་གྱིས་རྣམ་འགྲེལ་འབྱིན། །ཞེས་པས། མི་མཐུན་པ་སྐྱོན་གྱི་རྩ་བ། མཚོན་པ་དཔེའི་རྩ་བ། དོན་ངེས་པའི་རྩ་བའོ། །ང་བཞི་ང་ལྔ་ང་དྲུག་པས་སྟོན་ནོ། །ལུང་བསྟན་རྒྱུད་པའི་བསྟན་པ་གཏན་ལ་དབབ་པ་གསུམ་སྟེ། དབྱེ་བ་དང་། བརྒལ་ལན་བསྟན་པ་དང་། གཏན་ལ་དབབ་པ་དངོས་སོ། །དབྱེ་ན་གླེང་གཞི་གླེང་སླང་ལ་སོགས་པའི་གནས་འཆད་ལ། བརྒལ་ལན་བསྟན་པ་ནི། ལུང་བསྟན་རྒྱུད་པའི་བསྟན་པ་ཡང་། །དེ་བཞིན་ཚུལ་དུ་འགྲེལ་བས་ཏེ། །ཞེས་པས། འོ་ན་ལུང་བསྟན་རྒྱུད་པའི་བསྟན་པ་ལ་གླེང་གཞི་གླེང་སླང་ཡོད་ཀྱིས། དགོས་འགྲེལ་ལ་སོགས་ཇི་ལྟར་འགྲེལ། མི་འགྲེལ་ན་དོན་བསྡུས་དང་འགལ། འགྲེལ་ན་གཞུང་གང་ལ་ངོས་འཛིན་ཏེ་མ་དམིགས་སོ། །ཞེ་ན། དེའི་སྐྱོན་མི་འོང་སྟེ། གླེང་གཞི་གླེང་སློང་ནི་མི་མཐུན་པས་སྨོས་ཀྱིས། དགོས་འགྲེལ་ལ་སོགས་གཞན་ནི། ཐུན་མོང་པ་ཡིན་པས་མ་སྨོས་ཏེ་ལྡབས་པར་འགྱུར་ཕྱིན་རོ། །དེ་ཡང་དོན་བསྡུས་ལས། གླེང་བསླང་ལ་སོགས་དྲུག་རྣམས་དང་། །མདོ་བཞི་རྩ་བ་གསུམ་ལ་སོགས། །ཚུལ་བཞིན་རྗེས་སུ་སྦྱར་བ་བྱ། །ཞེས་པས་མངོན་ནོ། །གཏན་ལ་དབབ་པ་དངོས་ལ་དོན་བཞིས་ཏེ། རྒྱུད་འདི་ལྷ་དང་མི་ཡི་ཡུལ་དུ་ཇི་ལྟར་དུ་གྲགས་ཤིང་རྒྱུད་པ་ལོ་རྒྱུས་ཀྱི་དོན་སྟོན་པ་དང་གཅིག །རྒྱུད་གཞན་ལས་དཔག་པ་ཆེ་བའི་ཚུལ་བསྟན་པ་དང་གཉིས་གང་ཟག་གང་གིས་སྤྱོད་ཡུལ་ཡིན་པ་སྣོད་ཀྱི་ཚུལ་བསྟན་པ་དང་གསུམ། རྒྱུད་ཇི་ལྟར་བཤད་པའི་ཚུལ་བསྟན་པ་དང་བཞིའོ། །དང་པོ་ནི་ལེའུ་སོ་དྲུག་པ་ལས། གང་གིས་གང་ལ་གང་རྒྱུད་པ། །དེ་བཞིན་ཉིད་ནི་དེ་འོ་ཞེས། །ཆོས་ཀྱི་རྒྱལ་པོས་རྒྱལ་ཚབ་ལ། །དགོངས་པ་རིགས་པ་རྣམས་པས་རྒྱུད། །ཅེས་པས། རྒྱུད་ལུགས་གསུམ་སྟེ། རྒྱལ་བ་དགོངས་པས་རྒྱུད་པ། རིག་འཛིན་གཉེན་གྱིས་གསང་སྒོ་རྒྱུད་པ། །གང་ཟག་རྣ་བའི་དབང་པོས་རྒྱུད་པའོ། །དང་པོ་ནི། ཀུན་གཞི་ཆོས་ཀྱི་དབྱིངས་ཀྱི་ཕོ་བྲང་ནས། ཆོས་སྐུ་ཀུན་ཏུ་བཟང་པོས། འཁོར་རྒྱལ་ཚབ་རིགས་ལྔ་ལ། ནམ་ཟླ་དྲོད་པའི་རྩི་ཐོག་ལྟར་བྱིན་གྱིས་རླབས་ཀྱིས་བཤད། རིགས་ལྔས་འོག་མིན་ཆེན་པོའི་གནས་སུ་འཁོར་རིགས་གསུམ་མགོན་པོ་ལ་སོགས་པའི་བྱང་ཆུབ་སེམས་དཔའ་ཆེན་པོ་རྣམས་ལ། ནམ་མཁའ་ལ་ཉི་མ་ཤར་བ་ལྟར་ངང་གིས་བཤད། དེ་དག་གིས་ཚིག་ཏུ་བརྗོད་པ་རྣ་བས་ཐོས་པ་ལྟ་བུ་ནི་མ་ཡིན་ཏེ། དགོངས་པས་རྒྱུད་པའོ། །རིག་འཛིན་རིགས་པས་རྒྱུད་པ་ལ་གསུམ་ལས། རིག་པ་འཛིན་པ་མི་མ་ཡིན་པ་ལ་རྒྱུད་པ་ནི། ཀུན་ཏུ་བཟང་པོ་ཉིད་ཀྱི་སྤྲུལ་པ་རིགས་གསུམ་དུ་སྣང་བར་མཛད་དོ། །དེ་ཡང་འཇམ་དཔལ་ནི་མཁྱེན་རབ་ཀྱི་བདག་པོར་གྱུར་པས་གཙོ་བོར་ཟབ་དོན་ལྟ་བའི་ཆོས་སྟོན། ཕྱག་རྡོར་ནི་མཐུ་སྟོབས་ཀྱི་བདག་པོར་གྱུར་པས། དྲག་ཤུལ་གྱི་འགྲོ་བའི་དོན་མཛད་པས་སྤྱོད་པའི་ཕྱོགས་བསྟན་སྤྱན་རས་གཟིགས་ནི་ཐུགས་རྗེའི་བདག་ཉིད་དུ་གྱུར་ཏེ། སྙིང་རྗེས་འགྲོ་བའི་དོན་བྱེད་པས་སྒྲུབ་པའི་ཕྱོགས་བསྟན། ཟེར་ཡང་། ལྟ་སྤྱོད་སྒྲུབ་པ་གསུམ་ཀ་ལྷའི་གནས་སུ་འཕགས་པ་འཇམ་དཔལ་གྱིས། གཞོན་ནུ་མཛེས་པའི་སྐུས་ལྷ་ལོངས་སྤྱོད་ཅན་རྣམས་ཀྱི་ལུས་སེམས་དང་ཚུལ་མཐུན་པས། ལྷ་གྲགས་ལྡན་ཕྱོགས་སྐྱོངས་ལ་བཤད། དེས་རིན་ཆེན་འོད་འབར་ལ་བཤད། དེས་སྐྱེ་རྒུའི་བདག་པོ་ལ་བཤད། དེས་ཚངས་པ་ཀུན་གྲོལ་ལ་བཤད། དེས་ཚངས་པ་གཙུག་ཕུད་ལ། དེས་ལྷའི་དབང་པོ་བརྒྱ་བྱིན་ལ། དེས་ལྷའི་ཚོམ་བུ་འབུམ་སྡེ་ལ་བཤད་དེ། ལྷ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཅིང་། སངས་རྒྱས་ཀྱི་གདུང་སོབ་པ་ཅན་དུ་གྱུར་ཏོ། །ཀླུའི་གནས་སུ་འཕགས་པ་སྤྱན་རས་གཟིགས་དབང་ཕྱུག་གིས། བདུད་རྩི་སྨན་གྱི་སྐུས་གདུག་པ་ཀླུ་ནད་ཅན་རྣམས་ཀྱིས་ལུས་སེམས་དང་མཐུན་པའི། ཀླུ་རྒྱལ་མགྲིན་པ་ནག་པོ་ལ་བཤད། དེས་ཀླུ་མོ་མ་མ་ཁ་འདུལ་ལ་བཤད། དེས་ཀླུ་མོ་འདུལ་ཚངས་མ་ལ་བཤད། དེས་ཀླུ་ཡི་འོད་དགའ་བོ་ལ། དེས་འཇོག་པོ་ལ། དེས་ཀླུ་ཡི་ཚོམ་བུ་འབུམ་ལ་བཤད་དེ། ཀླུ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཅིང་། སངས་རྒྱས་ཀྱི་གདུང་སོབ་པ་ཅན་དུ་གྱུར་ཏོ། །གནོད་སྦྱིན་གྱི་གནས་སུ་ཕྱག་ན་རྡོ་རྗེ་འཇིགས་བྱེད་འཇིགས་པའི་སྐུས་གཏུམ་པོ་གནོད་སྦྱིན་རྣམས་ཀྱི་ལུས་དང་བསམ་པ་དང་ཚུལ་མཐུན་པས། གནོད་སྦྱིན་ཀུན་ཏུ་བཟང་པོ་ལ་བཤད། དེས་གནོད་སྦྱིན་ལག་ལ་རྡོ་རྗེ་ལ། དེས་གནོད་སྦྱིན་གྲགས་ལྡན་ཕྱོགས་སྐྱོང་ལ། །དེས་གནོད་སྦྱིན་ཚོམ་བུ་འབུམ་སྡེ་ལ་བཤད་དེ། གནོད་སྦྱིན་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཅིང་སངས་རྒྱས་ཀྱི་གདུང་སོབ་པ་ཅན་དུ་གྱུར་ཏོ། །རིག་པ་འཛིན་པ་མི་དང་མི་མ་ཡིན་པ་གཉིས་ཀ་ལ་རྒྱུད་པ་ནི། རྡོ་རྗེ་གདན་གྱི་བྱང་ཤར་ན། དྲག་ཤུལ་ཅན་གྱི་རི་བོ་མ་ལ་ཡ་ཞེས་བྱ་བ་ཡོན་དེ། དེའི་མཚན་ཉིད་དམ་ཚུལ་ནི། རི་དེའི་རྩེ་མོ་ལ་གཅན་གཟན་གྱི་རྒྱལ་པོ་སེང་གེའི་ཁྲས་ས་ཡོད་པ། འདབ་གཤོག་ན་གཅན་གཟན་སྟག་གི་ཁྲས་ལ་ཡོད་པ། རྩ་བ་དང་སྡོང་པོ་དང་ཡལ་ག་དང་ལོ་མ་མེ་ཏོག་དང་འབྲས་བུ་སྨན་སྣ་ཚོགས་འབྱུང་བའི་ཤིང་དུ་མ་སྐྱེས་པ་ངོས་ལ་བྲག་དཀར་པོ་ཁྱི་ཚུགས་པ་གྲངས་དང་གྲངས་ཀྱིས་ཡོད་པ། དེའི་ཤར་ངོས་ན་ཀྲི་པ་ཨ་སུ་རའི་བྲག་ཕུག་ཅེས་བྱ་བ། སྒོ་ཟླ་གམ་ལ་ངོ་མཚར་གྱི་རི་མོ་རང་བྱུང་བ་ཕུག་རིན་པོ་ཆེ་སུ་ལ་བརྒྱད་ལ་ཉི་ཟླའི་རི་མོ་རང་སྣང་བ། པང་ཐོག་སུམ་རིམ་དང་ལྡན་ཞིང་། སྤྱི་བོར་ཆོས་ཉིད་གཅིག་ཏུ་སྒྲོགས་པའི་བྱ་ཀ་ལན་ཏ་ཀའི་ཚང་ཆས་པ། ལས་དང་སྐལ་བར་ལྡན་པ་རྣམས་ཀྱིས་ཕྱིན་པར་སླ་ལ། སྐལ་བར་མི་ལྡན་པ་རྣམས་ཀྱིས་བསྒྲོད་པར་མི་ནུས་ལ། དེའི་རྩེར་ཐུབ་པ་འདས་ནས་ལོ་ཉེར་བརྒྱད་ན། འཁོར་དམ་པའི་རིགས་ཅན་ལྷ་གྲགས་ལྡན་ཆོས་སྐྱོང་ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མི་ལས་སྐལ་བ་དང་ལྡན་པ་ལི་ཙ་བི་དྲི་མ་མེད་པར་གྲགས་པ་དང་ལྔས། རང་རང་གི་རྫུ་འཕྲུལ་གྱིས་རིའི་རྩེར་འདུས་ཏེ་གདུང་བ་ཉེར་གསུམ་བཏོན་པས། ཕྱོགས་བཅུའི་སངས་རྒྱས་ཀྱིས་གསན་ནས། གསང་བདག་ལ་བསྐུལ་བ་མཛད། གསང་བདག་གིས་ཞལ་གྱིས་བཞེས་ཏེ། མ་ལ་ཡའི་རྩེར་བྱོན། གསང་སྔགས་ཀྱི་ཆོས་ཀྱི་འཁོར་ལོ་བསྐོར། དེའི་སྡུད་པ་པོ་བློ་གྲོས་ཐབས་ལྡན་གྱིས་མཛད་དེ། རིན་པོ་ཆེ་གསེར་ཤོག་ལ་བཻ་ཌཱུརྱ་ཡ་ཞུན་མས་རྩ་བ་རང་ནན་དུ་བྲིས་ཏེ། གླེགས་བམ་དུ་བྱས་ནས་དགོངས་པའི་རྩལ་གྱིས་མདུན་གྱི་ནམ་མཁའ་ལ་སྦས་སོ། །རིག་པ་འཛིན་པ་མི་ལ་རྒྱུད་པ་ནི། དེ་ལྟར་བསྐོར་བའི་བྱིན་རླབས་རྒྱལ་པོ་ཛཿལ་རྨི་ལྟས་སུ་སྣང་ཞིང་། བསྟན་པ་གསལ་བར་མཛད་པ་ནི། ཟ་ཧོར་གྱི་རྒྱལ་པོ་ཨ་པར་ར་མུ་ཉ་བྱ་བའི་སྲས་རྒྱལ་པོ་ཛ་ཞེས་བྱ་བའི་རྨི་ལྟས་སུ་ཤར་ཏེ། དང་པོ་རིའི་རྩེར་ཕྱག་རྡོར་བྱོན་ཏེ་སྐུའི་ཁྲུན་ལས་འོད་ཟེར་སྔོན་པོ་འཕྲོས་འཛིན་རྟེན་གྱི་ཁམས་བསྲེགས་ཏེ་མི་སྣང་བར་བྱས། གསུང་འབྲུག་སྟོང་ལྡིང་བའི་སྒྲ་ཐོས། ཐུགས་ཀ་ནས་རྡོ་རྗེ་འོད་འབར་བ་གཅིག་བྱུང་ནས་སྙིང་ཁར་ཐིམ། ཉི་མ་འོད་འབར་བ་གཅིག་བྱུང་ནས་རྒྱལ་པོའི་སྤྱི་བོར་ཐིམ། ཟླ་བ་འོད་འབར་བ་གཅིག་བྱུང་ནས་རྐང་མཐིལ་དུ་ཐིམ། སྣང་སྲིད་ཀྱི་ལྟོས་ཐམས་ཅད་རྒྱལ་པོའི་ལྟོ་བར་འཕྱོ་བ་གཅིག་རྨིས་སོ། །གཉིས་པ་ནི་དེ་བཞིན་གཤེགས་པ་ཐམས་ཅད་ཆོས་ཀྱི་བགྲོ་བ་མཛད་ཅིང་། ཉི་ཟླ་ཞོན་ནས་གསེར་གྱི་འཁོར་ལོ་བསྐོར་ཞིང་སྲིད་པ་གསུམ་གྱི་ཁ་ལོ་གྱེན་ལ་བསྒྱུར་བ་གཅིག་རྨིས་སོ། །ཡང་གསུམ་པ་ལ། ནམ་མཁའི་འོད་ལས་སྤྲིན་གསེར་གྱི་ཁ་དོག་ཅན་ནི་འཐིབས། ཆོ་འཕྲུལ་གྱི་སྒྲ་གོ་སླ་ཞིང་སྙན་པས་ཚིམ་པ་ནི་གྲགས། རིན་པོ་ཆེ་སྣ་ཚོགས་ཀྱི་སྨུག་པ་ནི་འཐིབས། བཻ་ཌཱུརྱའི་འོད་ནི་ལྷུང་། སྣང་སྲིང་གསལ་བའི་གློག་ནི་འཁྱུག །རིན་པོ་ཆེའི་ཆར་བབས་པ་གཅིག་རྨིས་སོ། །བཞི་པ་ལ། འཇིག་རྟེན་གྱི་ལྟོས་ནི་འགྱུར། རིན་པོ་ཆེ་འབར་བའི་སྒྲོན་མས་སྣང་སྲིད་ཀྱི་མུན་པ་གསལ། བདུད་རྩི་སྨན་གྱི་ཆུ་རྒྱུན་བྱུང་བས་འགྲོ་བ་རྣམས་ཀྱི་གཅོང་སྙིང་སྦྱངས། འགྲོ་བ་མཐའ་དག་རྡོ་རྗེ་རྣལ་འབྱོར་ཞེས་སྒྲ་དི་རི་རི་སྒྲོགས་པ་གཅིག་རྨིས་སོ། །ལྔ་པ་སྤྲིན་གྱི་གསེབ་ནས་ཉི་མའི་དཀྱིལ་འཁོར་ལ། རིན་པོ་ཆེ་སྣ་ཚོགས་ཀྱི་འོད་ཟེར་ཤར་བའི་དཀྱིལ་ནས། རད་ན་སྨུག་པོ་དཔལ་བེའུ་སྒྲོམ་དང་བཅས་པ་ཕྱི་ནང་གསང་བའི་ནང་ན། གསེར་གྱི་གླེགས་བམ་ལ་བཻ་ཌཱུརྱ་ཞུན་མས་རྩ་བ་རང་གནས་སུ་བྲིས་པའི་གླེགས་བམ་མང་པོ་སྐར་མདའ་ས་ལ་ལྟུང་བ་བཞིན་དུ་བབས་པ་གཅིག་རྨིས་སོ། །དྲུག་པ་ལ་གླེགས་བམ་དེ་རྣམས་ལ་བྱང་ཆུབ་སེམས་དཔའ་དང་རིག་འཛིན་དང་ལྷ་མོ་ཚད་མེད་པ་རྣམས། ཡོན་ཏན་གྱི་སྒྲ་སྒྲོགས་ཤིང་། མཆོད་བསྟོད་དང་བསྐོར་བ་བྱེད་པ་གཅིག་རྨིས་སོ། །བདུན་པ་ལ་ནམ་མཁའི་སྤྲིན་གསེབ་ནས་ལུང་བསྟན་པའི་སྒྲ་བྱུང་སྟེ། ལས་དང་སྐལ་བར་རབ་ལྡན་ཞིང་། །རྒྱལ་བ་འབྱུང་བར་ལུང་བསྟན་པའི། །བསོད་ནམས་ཅན་གྱི་དྲ་མ་ཁྱོད། །སྤྲུལ་པས་ཇི་ལྟར་ལུང་བསྟན་དུས། །ད་ལྟ་དུས་དེར་སྔོན་ཤར་གྱིས། །འཁོར་བའི་སྙིང་པོར་བྱ་བའི་ཕྱིར། །ང་ཡི་ཆོ་འཕྲུལ་བྱིན་རླབས་ཀྱིས། །བསྟན་པའི་སྙིང་པོ་དམ་པ་ཞིག །སྐལ་ལྡན་ཁྱོད་ལ་བསྟན་པར་བྱའོ། །ཞེས་ལུང་བསྟན་པ་ཞིག་རྨིས་སོ། །དེ་ནས་མནལ་སད་དེ་འཁོར་སོགས་ལ་རྨི་ལམ་རྣམས་བརྗོད་པས། སྐལ་བར་ལྡན་ངེས་པས་སྒྲུབ་པ་མཛོད་ཅིག་ཟེར་ནས། སྒྲུབ་པ་མཛད་དེ་རི་དེའི་རྩེར་བྱོན་པས། རིན་པོ་ཆེ་ལས་བྱས་པའི་ཕྱག་ན་རྡོ་རྗེའི་སྐུ་བཞུགས་པ་ཕྱག་རྡོར་དངོས་སུ་བཞུགས་སམ་སྙམ་ནས་མཐོང་ནས། དགྱེས་ཏེ་སྐོར་བ་དང་ཕྱག་བྱས་ནས། སྔོན་ཚེ་གོང་ནས་སྒྲུབ་པའི་ལྷ། །ལས་ཀྱིས་མཇལ་བའི་ལྷ་མཆོག་འདི། །སྐལ་པ་བརྒྱར་ཡང་མི་གཏོང་ངོ་། །ཨེ་མ་ངོ་མཚར་མཆོག་གི་སྐུ། །འདྲེན་པ་བདག་གི་དཔལ་ལེགས་འདྲ། །མོས་པས་གཟུགས་ཀྱི་ལྷ་མཆོག་འཛིན། །ཞེས་ཟླ་བ་བདུན་དུ་ཡི་དམ་བྱ་སྟེ་སྒྲུབས་པས་རྨི་ལྟས་དང་མཐུན་པའི་གླེགས་བམ་རྣམས་སྣང་ངོ་། །ལས་དང་ཐུགས་རྗེས་འབྲེལ་པས་མཐོང་བའི་གླེགས་བམ་ལ། རབ་ཏུ་དགའ་བའི་ཚུལ་གྱིས་བཀླག་པས་ཡིག་འབྲུ་གཅིག་ཀྱང་བརྡའ་མ་འཇལ་ལོ། །ཨེ་མ་ཧོ་སྔར་གྱི་རྨི་ལྟས་དང་སྦྱར་ན་ངོ་མཚར་དུ་གྱུར་པའི་དོན་གཅིག་ཡོད་ངེས་པ་ལ། བདག་གིས་མི་རྟོགས་པ་ཅི་ཉེས་སྙམ་དུ་བཤུམས་སོ། །དེ་ནས་ཐེ་ཚོམ་ཞུགས་ནས། འཇིག་རྟེན་གྱི་ཁམས་ན་བརྡའ་མཇལ་བྱ་སུ་ཡོད་ཅེས་བསྒྲགས་པས། ཟ་ཧོར་གྱི་རྒྱལ་པོ་ཨུ་པ་ར་ཛ་ཤེས་ཉེན་ཆེ་ཟེར་ནས་སྤྱན་དྲངས་པས་བྱོན་དུ་མ་བཞེད། གླང་པོ་ཆེ་ལ་བཀལ་ནས་སྐྱལ་བས་ཀྱང་བརྡའ་མ་འཇལ་ཏེ། རྒྱལ་པོ་ཉིད་ཀྱིས་དཔག་འཚལ་གསུང་ནས་སླར་བཀུར་ཏེ་བྱུང་ངོ་། །དེ་ནས་ཡང་ཡབ་རྒྱལ་པོ་ལ་ཁ་ཐུང་ཡུམ་ཀྲ་ལེ་བ་ཅན་བྱ་བ་ལ་བུ་དགེ་སློང་ཀུ་རུ་ར་ཛ་ཞེས་བྱ་ཚེ་ལོ་སྟོང་ཐུབ། བྱང་ཆུབ་སེམས་དཔའ་རིན་ཆེན་མང་གི་སྤྲུལ་པ་དེ་ལ་བསྟན་པས། དེས་བརྟགས་པས་ཐུགས་ཀྱི་སྒྲུབ་པ། རྡོ་རྗེ་སེམས་དཔའ་ཞལ་མཐོང་གི་ལེའུ་དང་། བསྒྲུབས་ལུགས་ཀྱི་ལེའུ་གཉིས་རྟོགས་ལམ་རིམ་ལྟར་བྱས་ནས་སོ་ཡང་སྐད། རྒྱལ་པོ་ཉིད་ཀྱིས་མཆོད་པ་ཆེན་པོ་བྱས་ཏེ་གསོལ་བ་བཏབ་པས་མདོ་འདིའི་དབང་དུ་བྱས་ནས་རྟོགས་སོ་ཡང་སྐད་ནས། གང་ཡིན་ཡང་དེ་ལས་བྱུང་བ་བཞིན་དུ་བསྒྲུབ་པ་མཛད་པས། རྡོ་རྗེ་སེམས་དཔའ་ཞལ་མཐོང་མངོན་སུམ་དུ་གཟིགས། རིགས་ཀྱི་བུ་དངོས་གྲུབ་ཅི་འདོད་གསུངས་པ་ལ། གླེགས་བམ་འདི་རྣམས་ཀྱི་དོན་རྟོགས་པར་འཚལ་གསུངས་པས། རིགས་ཀྱི་བུ་རང་གི་ཕུང་པོ་སྦྱོངས་དང་། ལག་ན་རྡོ་རྗེས་ལུང་སྟོན་པར་འགྱུར་གྱིས་གསུངས་ནས་མི་སྣང་བར་གྱུར་ཏོ། །དེ་ནས་སྤྲོ་བ་སྐྱེས་ཏེ་སྒྲུབ་སྒྲུབ་ལུགས་པས་པ་མཛད་པས། ཕྱག་ན་རྡོ་རྗེའི་ཞལ་མངོན་སུམ་དུ་མཐོང་། བརྟུལ་ཞུགས་ཀྱིས་རྡོ་རྗེ་ལན་གསུམ་ནམ་མཁའ་ལ་སྤར་ཏེ་སླར་སླངས་ཏེ། རྒྱལ་པོའི་གཙུག་ཏུ་བཞག་སྟེ་དབང་བསྐུར། སྣོད་དུ་རུང་བར་བྱས་ཏེ་སྒྲིབ་པ་དག་ནས། གླེགས་བམ་གྱི་དོན་རྣམས་ནམ་ལང་པ་ན་ཉི་མ་ཤར་བ་བཞིན་དུ་མཁྱེན་ནས། ཏན་ཏྲ་སྡེ་བཅོ་བརྒྱད་དུ་ཕྱེ་སྟེ། སྐུའི་ཏན་ཏྲ་གསུམ་ནི། གླང་པོ་ཆེ་རབ་འབོག །གླང་པོ་ཆུར་འཇུག །སྔགས་རྒྱས་མཉམ་སྦྱོར་རོ། །གསུང་གི་ཏན་ཏྲ་གསུམ་ནི། དབང་ཆེན་འདུས་པ། གཅིག་ལས་འཕྲོས་པ། ཟླ་གསང་ཐིག་ལེའོ། །ཐུགས་ཀྱི་གསུམ་ནི། རི་བོ་བརྩེགས་པ། རྩེ་གཅིག་བསྐུལ་བའི། གསང་བ་འདུས་པའི་འོ། །ཡོན་ཏན་གྱི་གསུམ་ནི། བདུད་རྩི་མཆོག །ནམ་མཁའ་མཛོད། དཔལ་མཆོག་དང་པོའོ། །ཕྲིན་ལས་ཀྱི་གསུམ་ནི། སྒྲོན་མ་འབར་བ། ཀི་ལ་ཡ་བཅུ་གཉིས། ཀརྨ་མ་ལེའོ། །སྤྱི་རྒྱུད་གསུམ་ནི། དོན་ཐམས་ཅད་ཀྱི་འཇུག་སྡུད་ཐབས་ཀྱི་ཞགས་པ་བམ་པོ་བཅོ་བརྒྱད་པ། དམ་ཚིག་ས་མ་ཡ་འབུམ་སྟེ་བཀོད་པའི་རྒྱུད། སྒྱུ་འཕྲུལ་དྲ་བའི་ལེའུ་སྟོང་ཕྲག་བརྒྱ་པ། དེ་ལྟར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་བཅོ་ལྔ། སྤྱིའི་རྒྱུད་གསུམ་སྟེ་བཅོ་བརྒྱད་དུ་ཕྱེ་ནས། འདི་མན་ཆད་གང་ཟག་རྣ་བའི་དབང་པོའི་བརྒྱུད་པ་ཡིན་གསུངས་ཨིན་ཏྲ་བྷུ་ཏི་ལ་བཤད། དེས་ན་ག་སུ་ཏྲི་ལ་བཤད། དེས་གུ་ཡ་སུ་ཏྲི་ལ་བཤད། དེས་ཀུ་ཀུ་ར་ཛ་ལ། དེས་རོ་ལངས་བདེ་བ་ལ། དེས་བཞད་པ་རྡོ་རྗེ་ལ། དེས་ཟ་ཧོར་གྱི་རྒྱལ་པོ་བྲ་ཧ་ཏི་ཛ་ལ། དེས་ཤཱཀྱ་སེང་གེ་ལ། དེས་ཏི་ར་མ་ཏི་ལ། དེས་བདེ་བ་གསལ་མཛད་ལ། དེས་དར་མ་བོ་དྷི་ལ། དེས་བལ་པོ་བ་སུ་དྷ་ར་ལ། བརྒྱུད་པའམ། ཡང་ན་དར་མ་བོ་དྷིས་སྣུབ་ལ་གནང་སྟེ། དེའི་ལོ་རྒྱུས་ཡང་སྣུབས་སངས་རྒྱས་ཡེ་ཤེས་རིན་པོ་ཆེས་ལོ་ལྔ་བཅུ་རྩ་བཞི་ལ། བལ་པོ་བ་སུ་དྷ་ར་ལ་ཆོས་ཞུས་པའི་ཡོན་ཡུལ་མཉེས་པར་བྱས་པས། གུ་རུའི་ཞལ་ནས་ངའི་ཆོས་རྣམས་ཚར་བས། ངའི་སློབ་དཔོན་བྲམ་ཟེ་གསལ་བ་རྒྱལ་མཚན་བྱ་བ་ལོ་དྲུག་བརྒྱ་ཐུབ་གཅིག་བཞུགས་ཀྱིས་དེ་ལ་ཆོས་ཞུས་ཤིག་གསུངས། སྣུབས་ཀྱིས་དེའི་སྤྱན་སྔར་བྱོན་ཏེ་ཆོས་མང་དུ་ཞུས། དགོངས་འདུས་ཀྱི་གདམ་ངག་ཀྱང་མང་དུ་གནང་། དབང་བསྐུར་ཡང་མང་དུ་གནང་ངོ་། །དེ་ནས་དགོངས་འདུས་ཀྱི་གཞུང་ཞུས་པས། གུ་རུའི་ཞལ་ནས། མདོ་མཁན་དར་མ་བོ་དྷི་དང་། ད་ན་ར་ཤི་ཏ་བྱ་བ་གཉིས། བྲུ་ཞའི་མཁན་པོ་སོ་ཀྱ་ཨེ་ལམ་ཀ་ར། ཏེ་བདེ་བ་གསལ་བའི་རྒྱན་ནམ་བདེ་བ་བསལ་མཛད་དོ། །ཆེ་བཙན་སྐྱེས་བྱས་ལ། འབྲུ་ཤའི་ཡུལ་དུ་སྤྱན་དྲངས་ནས་བཞུད་ཀྱིས་དེར་ཞུས་ཤིག་གསུངས། སྣུབས་ཀྱིས་དེར་ཕྱིན་པས་ཆོས་སྲིད་དང་ཆོས་དམག་བྱེད་པ་དང་འདོམ་སྟེ། དམག་གསེབ་ཏུ་དར་མ་བོ་དྷི་དང་། དྷ་ན་རཀྵི་དང་། ཆེ་བཙན་སྐྱེས་གསུམ་བཞུགས་པའི་ཞལ་མཐོང་སྟེ་ཆོས་ཞུས་པས། ལོ་པཎ་གསུམ་གྱིས་བྲུ་ཤའི་ཡི་གེ་ལས་བྲུ་ཤའི་ཡུལ་དུ་ཁྲོམ་བསྒྱུར་དུ་གཏན་ལ་ཕབ་ནས་སྣང་ངོ་། །སངས་རྒྱས་ཡེ་ཤེས་རིན་པོ་ཆེས་བོད་དུ་བྱོན་ནས། ཐུགས་ཀྱི་སྲས་སོ་ཡེ་ཤེས་དབང་ཕྱུག་སྲུ་ལེགས་པའི་སྒྲོན་མེ་དཔའ་གོར་འཕགས་པ་བློན་ཆེན་ཁུ་ལུང་ཡོན་ཏན་རྒྱ་མཚོ་བཞིའི་ནང་ནས་སྣུབས་ཁུ་ལུང་ཡོན་ཏན་རྒྱ་མཚོ་ལ་གནང་། དེས་རྒྱལ་བློ་གྲོས་བྱང་ཆུབ་དང་། སྣ་ནམ་ཚུལ་ཁྲིམས་བྱང་ཆུབ་ལ་གནང་། རྒྱ་ཡིས་ཐོ་ཀར་གནམ་སྡེ་ལ་བཤད། དེས་སྣ་ནམ་ཞལ་ཡོན་ལ་སོགས་པ་བཞི་ལ། བར་དུ་གཞུ་གསོད་ཤག་ལ། ཐ་མ་ལྷ་རྗེ་འུག་པ་ལུང་པ་ལ་བཤད། ལྷ་རྗེའི་སློབ་མ་རྩེ་མོ་བཞི་བཙུན་པ་དང་ལྔ་ལས། དེའི་ནང་ནས་བདེ་གཤེགས་གྲུ་ཕུག་པ་ཟུར་ཆུང་ཤེས་རབ་གྲགས་ལ། དེས་ཀ་བཞི་གདུང་བརྒྱད་ལ་སོགས་ཕོ་སོ་དང་མཐུན་འཇུག་གི་རྩེ་མོར་གྱུར་པ་ཙ་ག་བླ་མར་བཤད་པའི་རྩེ་མོར་གྱུར་པ་མེ་ཉག་འབྱུང་གྲགས་ལྟ་དགོངས་ཀྱི་རྩེ་མོར་གྱུར་པ་ཟུར་ཆུང་དགོན་པ། མགོན་རྒྱའི་རྩེ་མོར་གྱུར་པ་བཙུན་པ་པེ་ཙ་མེ་རུའོ། །ར་ཛི་འགོ་ཆུང་པའོ། །གོང་གདུང་བརྒྱད་ཅེས་པའི་མཆན་སྐྱོན་སྟོན་ཉག་ཡས་ཡང་གེང་བླ་མ་འདྲ་ཏིག་ཇོ་ཤག་སླན་ཤཀྱ་བཟང་། ཆུ་འགོའི་མ་ཐོག་བྱང་འབར་ནེ་སང་ཀྱི་ཀྱ། ཆོས་སེང་བྱང་གི་ཤུད་ཀྱི་ཟླ་གྲགས་སྣ་ནམ་གྱི་ནུབ་སྟོན་བག་མ། གྲམ་བུའི་གཙང་། ཤག་བཟང་། ལྷ་རྗེ་ཚལ་པ། ལྷ་རྗེ་རཀ་ཤིང་། དབུས་པས་ཐོབ་པའོ། །པ་ལ་བཤད་དེ་ཉི་ཟླ་ལྟར་གྲགས་སོ། །ཐུགས་ཀྱི་སྲས་བཞི་ཀས་ལྷ་རྗེ་ཉ་རི་བ་ལ་བཤད། ལྷ་རྗེའི་བུ་སློབ་གྲངས་ལས་འདས་ཀྱང་ཉེ་སྟོན་དལ་དང་། ཁྱབ་སྟོན།༣ སྙོན་སྟོན་དང་། ནུབ་སྟོབས་གཉིས་སོ། །ཡོངས་སུ་གྲགས་པ་ཐོབ་པ་སྟོན་བཞི་དང་། ནག་བཞི་ཟུར་ནག་འཁོར་ལོ། ཉ་ནག་འོད་པོ། རྩེ་རྒྱ་ནག །ལྷ་རྗེ་འདར་ནག་བྱ་བ་བདོག་པ་ལས། སྟོན་བཞིའི་ནང་ནས་ཕུབས་སྟོན་ཁ་རག་སྙིང་པོ་ལ་བཤད། དེས་སྲས་པདྨ་འབར་བ་ལ་བཤད། དེས་རོག་ལ་བཤད། དེས་བདག་ལའོ། །གཉིས་པ་གཞན་ལས་དཔགས་པ་ཆེ་བའི་ཚུལ་བསྟན་པ་ནི། ཐེག་པ་ཐམས་ཅད་ཀྱི་ཡང་རྩེ་ཡིན་པའི་ཆེ་བ། རི་རྒྱལ་ལྷུན་པོའི་རྩེར་ཕྱིན་པ་ལྟ་བུ། བསྟན་པ་ཐམས་ཅད་ཀྱི་འབྱུང་གནས་ཡིན་པར་ངེས་པའི་ཆེ་བ། ནམ་མཁའ་ལ་འབྱུང་བ་བཞི་ཤར་བ་ལྟ་བུ། རྒྱུད་ཐམས་ཅད་ཀྱི་རྒྱལ་པོ་ཡིན་པར་ངེས་པའི་ཆེ་བ། གཟི་མདངས་འབར་བའི་ཉི་མ་ལྟ་བུ། ལུང་ཐམས་ཅད་ཀྱི་སྤྱི་འགྲེལ་ཡིན་པར་ངེས་པའི་ཆེ་བ། རྒྱ་མཚོ་ཆེན་པོ་ལ་ཆུ་དང་ཆུ་བྲན་འབབ་པ་ལྟ་བུ། མན་ངག་ཐམས་ཅད་ཀྱི་ཉིང་ཁུ་ཡིན་པར་ངེས་པའི་ཆེ་བ། མར་གྱི་ཡང་ཞུན་ལྟ་བུ། དོན་ཐམས་ཅད་ཀྱི་འཇུག་ཡིན་པར་ངེས་པའི་ཆེ་བ། སོ་ནམ་གྱི་ཁེ་སྒྲུབ་པ་ལྟ་བུ། ཆོས་ཐམས་ཅད་ཀྱི་མེ་ལོང་ཡིན་པར་ངེས་པའི་ཆེ་བ། འཕྲུལ་གྱི་མེ་ལོང་གཡའ་དག་པ་ལྟ་བུ། དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཞེ་ཕུག་ཡིན་པར་ངེས་པའི་ཆེ་བ། རྒྱལ་པོའི་སྲས་གཅིག་པ་ལྟ་བུ། འབྲས་བུ་ཐམས་ཅད་ཀྱི་ཞུགས་ས་ཡིན་པས་ངེས་པར་ཆེ་བ་རྒྱལ་པོའི་བཀའ་རྟགས་ཐོབ་པ་ལྟ་བུ། འདས་པའི་དེ་བཞིན་གཤེགས་པ་ཐམས་ཅད་གཤེགས་ཤུལ་ཡིན་པས་ངེས་པར་ཆེ་བ། རྒྱལ་ལམ་དང་ཁྲིའུ་པ་ལྟ་བུ། ད་ལྟར་བཞུགས་པ་དང་། མ་འོངས་པའི་རྣལ་འབྱོར་གྱི་ལམ་ཡིན་པས་ངེས་པར་ཆེ་བ། ཁྲི་ལམ་མམ་སྟོང་ཤུལ་ལྟ་བུ། གསུམ་པ་གང་ཟག་གང་གི་སྤྱོད་ཡུལ་ཡིན་པ་སྣོད་ཀྱི་ཚུལ་བསྟན་པ་ནི། བློ་ཞིབ་པ་བས་ཀྱང་ཆེས་ཞིབ་པ། ཟབ་པ་བས་ཀྱང་ཆེས་ཟབ་པའི་སྤྱོད་ཡུལ་ཡིན་གྱིས་ཀུན་གྱི་ཐུན་མོང་མ་ཡིན་ནོ། །བཞི་པ་རྒྱུད་ཇི་ལྟར་བཤད་པའི་ཚུལ་ནི། དབང་པོ་རབ་ལ་མཚན་བསྟན་པས་གོ་བས་དཔེར་ན་སྨན་པ་འཚོ་བྱེད་གཞོན་ནུས་ལག་གི་རྩ་ལ་བརྟགས་པས་ལུས་ཀྱི་ནད་ངོས་ཟིན་པ་ལྟ་བུ། འབྲིང་ལ་དོན་རྣམ་པར་ཕྱེ་བས་རྟོགས་པ་སྨན་གྱི་ཁ་བྱང་ལྟ་བུ། ཐ་མ་འབྲུ་རེ་གཉིས་རེས་རྟོགས་པ་སྨན་གཅིག་ཀྱང་དྲི་དང་ཁ་དོག་ལ་སོགས་པ་དུ་མས་གཏན་ལ་འབེབ་པ་ལྟ་བུའོ། །དང་པོ་རབ་ལ་མཚན་བསྟན་པ་ནི། སྒྲ་སྐད་ངོས་བཟུང་བ་དང་། མཚན་བསྒྱུར་བ་དང་། མཚན་སྦྱར་བ་དང་། མཚན་བཤད་པ་རྣམས་ཏིག་པར་ཤེས་པར་བྱའོ། །འབྲིང་ལ་དོན་རྣམ་པར་ཕྱེ་ན་བཞི་སྟེ། ལུང་གཞན་ལས། གདུལ་བྱའི་དོན་དང་སྦྱར་ཏེ་བཤད་པ་དང་། གསང་བ་སྤྱི་གཞུང་དང་སྦྱར་ཏེ་བཤད་པ་དང་། གཞི་ལམ་འབྲས་བུ་དང་སྦྱར་ཏེ་བཤད་པ་དང་། ཁྱད་པར་རང་གཞུང་དང་སྦྱར་ཏེ་བཤད་པའོ། །དེ་ལ་དོན་བཞི་སྟེ། རྒྱུད་འབྱུང་བའི་རྒྱུ་གླེང་གཞི་དང་། རྐྱེན་གླེང་བསླང་བ་དང་། ཡོངས་སུ་ཤེས་པར་བྱ་བ་རྒྱུད་ཀྱི་དངོས་པོ་བྱུང་ཚུལ་བསྟན་པ་དང་། དྲི་ལན་དུ་རྒྱུད་དང་སྟོན་པ་ལ་བསྟོད་པའོ། །དང་པོ་གླེང་གཞི་ནི། དོན་བསྡུས་ལས། རྒྱུད་དོན་རྣམ་པར་གསུམ་ཁུངས་དང་རྒྱུད། ངོ་བོ་ཉིད་དེ། ཞེས་པས་གསུམ་སྟེ། དང་པོ་ནི། ཐུན་མོང་བཅའ་གཞི་སྤྱིའི་རྒྱུད་དེ། ཞེས་པས། ལེའུ་དང་པོ་ཐུན་མོང་བཅའ་གཞིའི་གླེང་གཞིའོ། །ལེའུ་གཉིས་པ་ནི། གདམ་པ་ལུང་བསྟན་རྩ་བའི་རྒྱུད། གླེང་གཞི་སྤྱི་ཡི་རྒྱུད་ཅེས་བྱ། ཞེས་པས། གླེང་གཞི་སྤྱིའི་རྒྱུའམ་རྒྱུའི་རྒྱུའོ་གདམ་ངག་ངེས་པར་བཞག་པ་ཞེས་བྱ་བའི་ལེའུའོ། །འཁོར་འདུས་སྨེ་དང་ཞེས་པས་ལེའུ་གསུམ་པའི་གདུང་བ་ཉེར་གསུམ་ཐོག་མ་དམ་པས་གདུང་བ་སྟོན་པའི་ལེའུ་ནི། རྒྱུ་དངོས་པོ། བསྐུལ་བཞེས་པ་ཞེས་པས། ལེའུ་གང་གིས་གདུང་བ་སེལ་བར་སྒྲོས་པའི་བཞི་པར་དུས་གསུམ་གྱི་དེ་བཞིན་གཤེགས་པས་ཕྱག་རྡོར་ལ་གདུང་བ་སོལ་ཅིག་པར་བསྐུལ། ཕྱག་རྡོར་གྱིས་བསལ་བར་ཞལ་གྱིས་བཞེས་པ་ནི་གླེང་གཞིའི་རྐྱེན་ནོ། །ལེའུ་ལྔ་པའི་སྟོད་ནི་གླེང་གཞི་རང་གི་ངོ་བོ་ཕུན་སུམ་ཚོགས་པ་ཡིན་ཏེ། སྟོན་པ་གསང་བདག །བསྟན་པ་དགོངས་པ་འདུས་པ་ལ་སོགས་པའི་གསང་སྔགས་ཀྱི་རྒྱུད། འཁོར་དམ་པའི་རིགས་ཅན་ལྔ། གནས་མ་ལ་ཡའི་རྩེ། དུས་ཐུབ་པ་འདས་ལོ་ཉི་ཤུ་རྩ་བརྒྱད་ཀྱི་དུས། སྡུད་པ་པོ་བློ་གྲོས་ཐབས་ལྡན་ནོ། །ལུང་དམ་པར་འགྲོ་བར་གསོལ་བ་བཏབ་པའི། ལེའུ་ལྔ་པའི་སྨད་རྐྱེན་གླེང་སླང་པ་ལ་གཉིས་ཏེ། སྟོན་པས་མདུན་བསུས་ཏེ་གླེང་སླང་བ་དང་འཁོར་གྱིས་གུས་པར་དྲིས་ཏེ་གླེང་སླང་བའོ། །གསུམ་པ་རྒྱུད་ཀྱི་དངོས་པོ་བྱུང་ཚུལ་བསྟན་པ་ནི། སྙིང་པོ་བྱང་ཆུབ་ཀྱི་བྱུང་ཚུལ་བཅུ་གཉིས། དབང་བསྐུར་ཐབས་ཀྱི་བྱུང་ཚུལ་བཅུ་གཉིས། གདམ་ངག་དབོག་ཐབས་ཀྱི། ཁྱད་པར་རྩལ་འཕགས་ཀྱིི། རྒྱུད་གནས་ཚུལ་ལུགས་ཀྱི་བྱུང་ཚུལ་བཅུ་གཉིས་སོ། །རྒྱུད་གནས་ལུགས་ཀྱི་བྱུང་ཚུལ་བཅུ་གཉིས་ལ། མིང་བཅུ་གཉིས། ལྟ་བ་བཅུ་གཉིས། དཔེ་བཅུ་གཉིས་སོ། །དེ་ཡང་། དེ་རྣམས་སྦྱར་ནས་བཤད་ནས། དང་པོ་རྨོངས་པ་གདུང་བ་སེལ་བའི་བྱུང་ཚུལ། མ་རིག་མུན་སེལ་གྱི་ལྟ་བ། དཔེར་ན་མ་དང་བུ་ཕྲད་པ་ལྟར་དུ་བསྟན་པ་ལ་ལེའུ་གཅིག་སྟེ་དྲུག་པས་རྨོངས་པ་གདུང་བ་སེལ་བ་ཞེས་བྱའི་སྟོན་ནོ། །གཉིས་པ་སྒྲོན་མ་ཡོངས་སུ་བཀོད་པའི་བྱུང་ཚུལ། ཡེ་ཤེས་རང་གནས་ལྟ་བ། ཉི་མའི་སྙིང་པོ་ལྟར་བསྟན་པ་ལ་ལེའུ་གཉིས་ཏེ། རྡོ་རྗེ་སེམས་དཔའི་ཆོ་འཕྲུལ་བཀོད་པའི་བདུན་པ་དང་བརྒྱད་པས་གསང་སྔགས་གཉིས་ཀྱི་ངོ་བོ་བསྟན་པའི་བསྟན་ནོ། །གསུམ་པ་གང་གིས་ངེས་པ་རྙེད་པའི་བྱུང་ཚུལ། མངོན་པར་དོན་སྙེད་ཀྱི་ལྟ་བ། དབུལ་མོས་གཏེར་རྙེད་པར་ལྟར་བསྟན་པ་ལ་ལེའུ་དྲུག་སྟེ། དགུ་པ་རྡོ་རྗེ་སེམས་དཔའི་དེ་ཁོ་ན་ཉིད་བསྟན་པའི་ལེའུ། བཅུ་ཁྱད་པར་དམ་པའི་པ། བཅུ་གཅིག་རྒྱུད་དག་པའི་སྐྱེས་རྒྱུད་ཏན་པའི་པ། དབུགས་འབྱིན་པའི་བཅུ་གཉིས་པ། བཅུ་གསུམ་པ་སྐྱེས་བུ་དང་དབང་ཐོབ་པའི། བཅུ་བཞི་པ་སྐྱེས་དམ་པ་དབང་ཐོབ་པའི་རྣམས་ཀྱིས་སྟོན་ནོ། །བཞི་པ་སྙིང་པོ་བྱང་ཆུབ་ཉིད་དུ་ངེས་པའི་བྱུང་ཚུལ་དེ་ཁོ་ན་ཉིད་ཀྱི་ལྟ་བ། ནམ་མཁའ་ལྟར་བསྟན་པ་ནི། ལེའུ་བཅོ་ལྔ་པས་སྟོན་དོན་ཁོ་ན་ཉིད་དུ་ངེས་པའོ། །ལྔ་པ་དགོངས་པར་ངེས་པར་འབྲེལ་བའི་བྱུང་ཚུལ་མ་འདྲེས་ཡོངས་རྫོགས་ཀྱི་ལྟ་བ། རྒྱ་མཚོའི་ནང་དུ་ཉི་ཟླ་སྐར་གྱི་གཟུགས་བརྙན་ཤར་བ་ལྟར་བསྟན་པ་ལ་ལེའུ་བཞི། བཅུ་དྲུག་རྫུ་འཕྲུལ་གྱི་ཆོ་འཕྲུལ་པ། བཅུ་བདུན་ཆོས་སྣང་བའི་པ། བཅོ་ཀུན་བརྗོད་པའི་བརྒྱད་པ། བཅུ་དགུ་ཡོངས་སུ་རྫོགས་པའི་ཆོ་འཕྲུལ་པའོ། །དྲུག་པ་གདུལ་བྱ་སྐབས་ལ་བབས་པས་བྱུང་ཚུལ། མཚན་མ་རང་ཞིའི་ལྟ་བ། དཔའ་བོས་དགྲ་ཐུལ་བ་ལྟར་བསྟན་པ་ལེའུ་བཅུ་གཉིས་ཏེ་ཉི་ཤུ་པ་ནས་སོ་གཅིག་པ་མན་ཆད་ཀྱིས་སྟོན་ནོ། །བདུན་པ་བྱིན་རླབས་འབྱུང་བའི་ལྟ་བ། བྱིན་གྱིས་རླབས་ཀྱི་སྣང་བའི་ཚུལ་རྒྱ་མཚོ ། ཉི་ཤུ་པ་མ་དག་པའི་རྒྱུད་བསྟན་པའི། ཉེར་གཅིག་པ་འདས་པ་སྔོན་བྱུང་གི། ཉེར་གཉིས་པ་ཏ་རུ་ཏྲ་འཁོར་བཅས་ཀྱི་སྤྱོད་ཡུལ་བསྟན་པ། ཉེར་གསུམ་པ་ཆོ་འཕྲུལ་སྐུལ་བ། ཉེར་བཞི་པ་བཀའ་སྒྲོས་པ། ཉེར་ལྔ་པ་བཀའ་སྒྲོས་བཅད་པས། ཉེར་དྲུག་ལས་རྡོར་བསྐོས་བཏབ་པ། ཉེར་བདུན་པ་བདུད་ཡོངས་སུ་བཏུལ་བ། ཉེར་བརྒྱད་པ་སྨན་པ་གདུང་བ་སྟོན་པ། ཉེར་དགུ་པ་རྒུད་པ་སྦྱངས་བ། སུམ་ཅུ་དགོངས་པ་བསྐུལ་བ། སོ་གཅིག་པ་ལུང་བསྟན་པའི་ལེའུ། ཆེན་པོ་རླབས་ལྟར་བསྟན་པ་ལ་ལེའུ་བཞི། སོ་ཐུགས་ཡེ་ཤེས་སྣང་བ་རྒྱན་བཀོད་པ་གཉིས་པ། སྐུ་ཡོངས་སུ་སྣང་བ་དམ་པ་སོ་གསུམ་པ། སོ་བཞི་གསུང་མི་ཟད་པ་རྒྱན་གྱི་འཁོར་ལོ་བསྐོར་བ་པ། སོ་སྤྱོད་པ་མི་ཟད་པ་རྒྱན་གྱི་ཙཀྲ་བཀོད་པའི་ལྔའོ། །བརྒྱད་པ་རྒྱུད་པ་ཐམས་ཅད་ཐབས་ཀྱིས་གྲགས་པའི་བྱུང་ཚུལ། མི་མཐུན་སྐྱོན་སེལ་གྱི་ལྟ་བ་སྟག་ཚང་སེལ་བའམ་ལྟ་བུ་རང་གཞན་གྱི་དུག་སྡོང་སེལ་བ་ལྟར་དུ་བསྟན་པ་ལ་ལེའུ་གསུམ། རྨོངས་པ་སེལ་བའི་དཔྱོད་ཐུན་གྲོལ་བ་སོ་དྲུག་པ། སོ་གང་གི་དྲི་བ་ཐེ་ཚོམ་བཅད་པ་བདུན་པ། སོ་བརྒྱད་སྔོན་འབྱུང་གི་གཏམ་བརྒྱུད་བརྗོད་པ་པའོ། །དགུ་པ་གང་གི་ཆེད་དུ་མཛད་པའི་བྱུང་ཚུལ་གྲོལ་དོན་ཐུན་གྱི་ལྟ་བ། སྨན་པ་མཁས་པ་ནད་གསོ་བ་ལྟར་བསྟན་པ་ལ་ལེའུ་བཞི། སོ་ཐུགས་ཀྱི་མཛད་པ་ཡོངས་སུ་རྫོགས་པ་དགུ་པ། བཞི་གསུང་གི་མཛད་པ་ཡོངས་སུ་རྫོགས་པ་བཅུ་པ། ཞེ་ཐབས་ཀྱི་མཛད་པ་ཡོངས་སུ་རྫོགས་པ་གཅིག་པ། ཞེ་གཉིས་སྐུའི་མཛད་པ་ཡོངས་སུ་རྫོགས་པ་པའོ། །བཅུ་པ་ལུང་ཆེན་ངེས་པར་བསྟན་པའི་བྱུང་ཚུལ། ངེས་པ་ཕྱིས་འབྱུང་གི་ལྟ་བ། བློན་པོ་རིག་པ་ཅན་གྱི་ཞལ་ཆེམ་ལྟར་བསྟན་པ་ལ། ལེའུ་ཞེ་གསུམ་པས་སྟོན་ནོ། །བཅུ་གཅིག་པ་ལས་རྒྱུན་ཡོངས་སུ་གཅོད་པའི་བྱུང་ཚུལ། མཚན་མ་རང་དག་གི་ལྟ་བ། ཁྲུས་མཁན་མཁས་པས་ཁྲུས་བྱས་པ་ལྟར་བསྟན་པ་ལ་ལེའུ་གཅིག་སྟེ་ཞེ་གཅིག་པས་ཆོ་འཕྲུལ་སྔོན་བྱུང་གི་སྟོན་ནོ། །བཅུ་གཉིས་པ་དགོངས་པ་རྣམ་པར་སྒྲོལ་བའི་བྱུང་ཚུལ། དགོངས་པ་རྣམ་པར་བགྲོ་བའི་ལྟ་བ། སློབ་དཔོན་ཚོགས་ནས་རྒྱལ་པོ་ཡི་ཆབ་སྲིད་འཛིན་པ་ལྟར་བསྟན་པ་ལ་ལེའུ་སུམ་ཅུ་སོ་གཅིག་གིས་སྟོན་པ་ལས། དེ་ཡང་ས་བཅད་རྣམ་པ་གཉིས། ཆོས་ཀྱི་རྣམ་གྲངས་རྣམ་པ་བཅུར་དགོངས་བསྒྲོ་བ་དང་། མཚན་བསླབ་པའི་མཐའ་བཅུ་དང་སྦྱར་ཏེ་དགོངས་པ་བགྲོ་བའོ། །ཆོས་ཀྱི་རྣམ་གྲངས་བཅུར་དགོངས་པ་འགྲོ་བ་ནི། ལེའུ་ཞེ་ལྔ་པའི་ནང་ནས་མར། དམ་པ་རྣམས་ཀྱི་དགོངས་པ་ལ་འཇུག་པ་མདོ་རྒྱུད་ན། མཛོད་དུ་འཇུག་པར་བྱའོ། །རང་བཞིན་མ་བཅོས་པར་བའོ། །ལྗོན་ཤིང་སྐྱེད་པར་བྱའོ། །སྒྲོན་མེ་སྦར་བར་བྱའོ། །རྗེས་སུ་འཇུག་པར་བྱའོ། །ཁྱད་པར་དུ་འགྲོ་བར་བྱའོ། །ཡུལ་ལ་འཇུག་པར་བྱའོ། །མེ་ལོང་བཏགས་པར་བྱའོ། །མཐུན་པར་འཇུག་པར་བྱའོ། །ནད་གསོ་བར་བྱའོ། །ཞེས་པས། དང་པོ་མཛད་དུ་འཇུག་པ་ལ་ལེའུ་བཅུ་གཉིས་ཡོད་པ་ལས་དོན་རྣམ་པར་གསུམ་སྟེ། སྤྱོད་པའི་འདྲེན་སྒོ་ལ་འཇུག་པ་ལ། ཡན་ལག་དྲུག་གིས་འབྱེད། མདོ་བཞིས་འགྲོལ། རྩ་བ་གསུམ་གྱིས་འབྱིན་པར་བྱེད་དོ། །ཞེ་ལྔ་བཀོད་པ་རྣམ་པར་འགྲེལ་ཞེས་བྱ་བས་སྟོན། ཐ་མལ་གྱི་སྦྱོར་སྒོ་ལ་ཡང་། ཡན་ལག་དྲུག་གིས་འབྱེད། མདོ་བཞི་འགྲོལ། རྩ་བ་གསུམ་གྱིས་འབྱིན་པར་བྱེད་དོ། །ཞེ་དྲུག་པས་རྒྱུ་བ་རྣམ་པར་འགྲེལ་ཞེས་བྱ་བའི་སྟོན། ངེས་པའི་གསང་སྒོ་འཇུག་པ་ལ་ཡང་། ཡན་ལག་དྲུག་གིས་འབྱེད་པ་ལ་ལེའུ་དྲུག་སྟེ། ཞེ་བདུན་པ་རྒྱུའི་གླེང་གཞི་ཕུན་སུམ་ཚོགས་པ་ཞེས་བྱ་བའི་ཡན་ལག་གླེང་གཞི་ཞེ་བརྒྱད་པ་རྩ་བའི་ཡན་ལག་རྩ་བ་སྦྱོར་བའི་ཡན་ལག་བསྟན་པའི་གླེང་སླང་། འབྲེལ་པའི་ཡན་ལག་གི་དགོངས་ཆེད་བསྟན་པའི་ཞེ་དགུ་པ་འབྲེལ་པ། དགོས་ཆད་ཀྱི་ཡན་ལག །ལྔ་བཅུ། ཡོངས་སུ་འདྲེན་པའི་ཡན་ལག་རྣམ་པར་གྲོལ་བའི་འདྲེན་པ་ཚིག་གི་ཡན་ལག །ང་གཅིག་པ་ངེས་པའི་ཡན་དམ་པ་ཡན་ལག་སྦྲེད་པའི་ལག །ང་ཐབས་རྣམ་པར་འགྲེལ་བ་ཞེས་བྱ་བའི་གཉིས་པ་སྦྱོར་བ་བྱང་ཆུབ་ཀྱི་ཡན་ལག་གོ། །མདོ་བཞིས་འགྲོལ་བ་ལ་ལེའུ་གཅིག་སྟེ། ང་གསུམ་པས་མདོ་རྒྱ་ཆེར་འདྲེས་པའི་སྟོན། རྩ་བ་གསུམ་གྱིས་འབྱིན་པ་ལ་ལེའུ་གསུམ། ཆོས་ཉིད་ཀྱི་མེ་ལོང་བསྟན་པའི་ང་བཞི་པ་མཚོན་པ་དཔེའི་རྩ་བ། ང་ལྔ་པ་མི་མཐུན་ཆོས་ཐམས་ཅད་ཀྱི་རྩ་བ་མུན་པའི་སྤྱོད་ཡུལ་བསྟན་པའི་པ་སྐྱོན་གྱི་རྩ་བ། ང་དྲུག་པ་དོན་ངེས་པའི་ཆོས་ཐམས་ཅད་ཀྱི་རྩ་རྣམ་པར་དག་པའི་སྤྱོད་ཡུལ་བསྟན་པའི་རྩ་བའོ། །ང་བདུན་པ་རང་བཞིན་སྦྱོར་རང་བཞིན་གྱི་མ་བཅོས་པར་བྱ་བ། ང་དེ་ཁོ་ན་ཉིད་གསང་བ་དམ་པ་ལྗོན་ཤིང་སྐྱེད་པའི་བརྒྱད་པ་ལྗོན་ཤིང་སྐྱེད་པར་བྱ་བ། སྦྱོར་རྗེས་འཇུག་གི་ང་དགུ་པ་རྗེས་སུ་འཇུག་པར་བྱ་བ། དྲུག་ཅུ་པ་སྒྲོན་མ་སྦྱོར་མིག་གི་སྒྲོན་མ་བསྟན་པའི་ལེའུ་བསྲེ་བར་བྱ་བ་རེ་གཅིག་པ་ཁྱད་པར་དུ་སྦྱོར་བའི་སྒྲོན་མ་བསྟན་པའི་འགྲོ་བ། རེ་གཉིས་པ་ཡུལ་དམ་པ་ལ་འཇུག་པ་ཡུལ་ལ་འཇུག་པ། རེ་གསུམ་པ་མེ་ལོང་མཚོན་པ་ཞེས་བྱ་བའི་བཏག་པ། རེ་བཞི་པ་མཐུན་སྒྱུ་མ་རོལ་པ་རྣམ་པར་གྲོལ་བའི་པར་འཇུག་པ། རེ་ལྔ་པ་རང་བྱུང་བདུད་རྩི་ནད་གསོ་བར་བྱའོ། །སྤྱི་དོན་གཉིས་པ་མཚན་བསླབ་པའི་མཐའ་བཅུ་ནི། རེ་དྲུག་པ་གཞི་དམ་དམ་ཚིག་པའི་མཆོག་ཚིག་གིས་བཟུང་བ་ལ་བསླབ་པ། རེ་བདུན་པ་རྒྱུད་ཐོས་སྙན་རྒྱུར་དམ་པ་མཆོག་གི་པས་སྒྲོལ་བ་ལ་བསླབ་པ། རེ་བརྒྱད་པ་ཆོས་ཐམས་ཅད་ཀྱི་སྒོ་རྣམ་པར་དབྱེ་བའི་སྒོ་ཀུན་ནས་བསྡུར་བ། རེ་དགུ་པ་བསམ་གྱིས་མི་ཁྱབ་བསྟན་པའི་ཕུལ་དུ་མཁས་པ་འབྱུང་བ། བདུན་ཅུ་པ་རིམ་སྦྱོར་ལུང་བསྟན་པའི་པ་དབང་གིས་སྒྲོད་པ། དོན་སྦྱོར་སྤྱོད་འཇུག་གི་གཅིག་པ་སྤྱོད་པས་དོར་བ། དོན་གཉིས་པ་ཐེ་ཚོམ་ཡོངས་སུ་གཅོད་པའི་ཐག་ལྟ་བས་བཅད་པ། དོན་སྦྱོར་དབང་རྒྱུར་གྱི་གསུམ་པ་ཉམས་སུ་ཏིང་ངེ་འཛིན་གྱིས་བླངས་བ། དོན་བཞི་པ་དོན་པར་སྒྲུབ་པའི་དོན་མན་ངག་གིས་སྒྲུབ་པས། དོན་ལྔ་པ་འབུ་ཏ་ཀུན་གྱི་དགོངས་པ་འདུས་པའི་ལེའུ་མདོ་དོན་གཅིག་ཏུ་བསྡུས་པ་ལ་བསླབ་པ། དགོངས་མ་ལམ་སོ་ནམ་གྱི་ཁེ་སྒྲུབ་པ་ལྟར་དུ་བསྟན་པའོ། །བཞི་པ་དྲི་ལན་དུ་རྒྱུད་དང་སྟོན་པ་ལ་བསྟོད་པར་བསྟན་པ་ནི། ཨེ་མའོ་སྐྱེས་ཆེན་གསང་བའི་བདག །རྩལ་ཆེན་སྨྲ་བ་སེང་གེ་སྒྲ། །དེ་བཞིན་གཤེགས་པ་ཀུན་གྱི་ཐུགས། །སངས་རྒྱས་ཀུན་མངོན་ཡེ་ནས་བྱུང་། །ཁྱོད་ནི་སངས་རྒྱས་ཀུན་གྱི་མེས། །ཆེ་མཆོག་ཆེ་བཙན་དམ་པའི་སྐུ། །བདེ་གཤེགས་ཀུན་གྱི་བཤེས་གཉེན་མཆོག །སེམས་པ་སངས་རྒྱས་ཀུན་གྱི་དངོས། ། ཞེས་པས་སྟོན་པ་ལ་བསྟོད། ཀུན་གྱི་འབྱུང་གནས་མེ་ལོང་གསལ། །ཕྱོགས་ཀུན་གང་ལ་ངེས་པ་ཡི། །ཐེག་ཆེན་རྨད་གྲགས་ངོ་མཚར་ཆེ། །གསང་ཆེན་བྱུང་ཚུལ་ངོ་མཚར་ཆེ། །ཨ་ཧོ་ཞེས་ངེས་པ་དམ་པར་མངོན་པར་བསྟོད་དོ། །ཐ་མ་འབྲུ་རེ་གཉེར་བསྟན་པ་ནི། བཤད་པའི་ཡན་ལག་འདྲེན་པ་ཚིག་བཅུའི་སྐྱེ་བར་སྟོན་ནས་གཞུང་འཆད་པར་བྱེད་པའོ། །སྤྱི་དོན་གསུམ་པ་འབྲས་བུའི་དོན་ལྔ་སྟེ་ངོ་བོ། ངེས་ཚིག་དབྱེ་བ། ཐོབ་ཚུལ་དང་། མཚན་ཉིད། ངོ་བོ་ལ་གཉིས། མ་འདྲེས་རྣམ་གྲངས་སུ་སྣང་བའི་ངོ་བོ་དང་། དབྱེར་མེད་ལྷུན་གྲུབ་ཏུ་སྣང་བའི་ངོ་བོའོ། །མ་འདྲེས་རྣམ་གྲངས་སུ་སྣང་བ་ནི། བསྡུ་ན་རྟེན་བྱེད་པའི་སྐུ་གསུང་གོ་རྟ་སྤྲོད་པའི་ཐུགས་རིག་ཅིང་མཁྱེན་པའི་ཡོན་དགོས་འདོད་འབྱུང་བ་ཏན་ཕྲིན་བྱ་བ་བྱེད་པའི་རྣམ་པ་ལྔ། འབྲིང་དུ་སྐུ་གསུང་ཐུགས་ཡོན་ཏན་ཕྲིན་ལས་ཉི་ཤུ་རྩ་ལྔ་སྟེ། སྐུ་ལྔ་ནི། ཆོས་སྐུ། ལོངས་སྐུ། སྤྲུལ་སྐུ། ངོ་བོ་ཉིད་ཀྱི་སྐུ། གསང་བའི་སྐུའོ། །གསུང་ལྔ་ནི། སོ་བཞི་པ་ནས། ངོ་བོ་ཉིད་མེད་པའི་གསུང་ནི་ནམ་མཁའ་ལྟ་བུའོ། །ཆོས་ཀྱི་སྐུའི་གསུང་ཉི་མའི་སྙིང་པོ་ལྟ་བུའོ། །ལོངས་སྐུའི་གསུང་མེ་ལོང་ལྟ་བུའོ། །གསང་བ་སྐུའི་གསུང་སེང་གེ་ལྟ་བུའོ། །སྤྲུལ་པ་སྐུའི་གསུང་ནི་གསུང་གཅིག་ཡན་ལག་བསམ་གྱིས་མི་ཁྱབ་པའོ། །ཞེས་སོ། །ཐུགས་ལྔ་ནི། ཆོས་ཀྱི་དབྱིངས་ཀྱི་ཡེ་ཤེས། མེ་ལོང་ལྟ་བུའི་ཡེ་ཤེས། མཉམ་པ་ཉིད་ཀྱི་ཡེ་ཤེས། སོ་སོར་རྟོགས་པའི་ཡེ་ཤེས། བྱ་བ་གྲུབ་པའི་ཡེ་ཤེས་སོ། །ཡོན་ཏན་ལྔ་ནི། ཞིང་ཁམས། གཞལ་ཡས་ཁང་། གདན་ཁྲི། འོད་ཟེར། རྒྱན་ནོ། །ཕྲིན་ལས་ལྔ་ནི། ཞི་རྒྱས་དབང་དྲག་བཞི། ལྷུན་གྱིས་གྲུབ་པའི་ཕྲིན་ལས་ལྔ་ནི། རྒྱས་པར། སྐུ་གསུང་ཐུགས་བསམ་གྱིས་མི་ཁྱབ་པར་སྣང་ངོ་། །དེ་ཡང་དོན་བསྡུས་ལས། འབྲས་བུ་ཉིད་ནི་རྫོགས་སངས་རྒྱས། སྐུ་དང་ཡོན་ཏན་ལས་ཉི་ཤུ་ལྔ་བསྡུས་མཐའ་ཡས་རྣམས། ཞེས་པས་མངོན། དབྱེར་མེད་ལྷུན་གྲུབ་ཏུ་སྣང་བའི་ངོ་བོ་ནི། སྐུ་གསུང་ཐུགས་ཡོན་ཏན་ཕྲིན་ལས་དབྱེར་མེད་དུ་ལྷུན་གྱིས་གྲུབ་པའོ། །དེ་ཡང་དོན་བསྡུས་ལས་ལྷུན་རྫོགས་རྣམ་ཀུན་མཁྱེན་པའོ། །ཞེས་པས་མངོན་ནོ། །ངེས་ཚིག་ནི། སྨིན་ཅིང་མཐར་ཕྱིན་པས། ན་འབྲས་བུའོ། །དབྱེ་ན་གཉིས། བདག་དོན་གྲུབ་པ་པོ་དང་གཞན་དོན་མཛད་པའོ། །དང་པོ་ནི་གཞིའི་ཆོས་ཉིད་ཇི་ལྟ་བ་བཞིན་དུ་མངོན་དུ་གྱུར་ཏེ། ལམ་གྱི་རྩོལ་བ་དང་བྲལ་བའོ། །གཞན་དོན་མཛད་པ་པོ་ལ་གསུམ། ཐུགས་རྗེས་གཟིགས་པའི་ཚུལ་ཡུལ་དུ་བྱས་ན་གཟུང་འཛིན་ཅན་དུ་འགྱུར། མ་བྱས་ནས་འཁྲུལ་པར་འགྱུར། ཞེ་ན་དབྱེར་མེད་དུ་གཟིགས་སོ། །དབྱེར་མེད་ལ་གཟིགས་བྱ་གཟིགས་བྱེད་མི་འཐད་དོ་ཞེ་ན་ཐ་དད་མེད་ཀྱང་དེ་ཡིས་ཆར་འདོགས་སོ། །གཟིགས་ནས་ཐུགས་རྗེ་སྐྱེས་པའི་ཚུལ། །སྐྱེས་ནས་དོན་མཛད་པའི་ཚུལ་ལོ། །དེ་ལ་ལྔ། ཐབས་མཁས་པའི་མཛད་པ་བྱུང་ཚུལ་བརྒྱད་པ། ཡུལ་དང་མཐུན་པའི་མཛད་པ་བྱུང་ཚུལ། དགུ་པ། རྨད་བྱུང་ཆེ་བའི་མཛད་པ་བྱུང་ཚུལ། བཅུ་པ། ལས་རྒྱུན་གཅོད་པའི་མཛད་པ་བྱུང་ཚུལ་བཅུ་གཅིག་པ། བསྟན་པ་འཆད་པའི་མཛད་པ་བྱུང་ཚུལ་བཅུ་གཉིས་པའོ། །ཐོབ་ཚུལ་ནི། སྤངས་ཐོབ་མེད་པར་རིག་པ་རང་སྣང་མངོན་དུ་བྱས་པའོ། །དེ་ཡང་ལེའུ་ལྔ་པ་ལས། གཞན་ནས་མ་བྱུང་རང་བྱུང་བར། །ཤེས་ལ་སྙད་བརྟགས་མ་ཤེས་ལ། །གཏོར་ཞེས་ཐ་སྙད་རྟག་པར་ཟད། །ཅེས་པ་དང་། ལེའུ་དགུ་པ་ལས། སེམས་ཉིད་རྟོགས་ན་སངས་རྒྱས་ཏེ། ཞེས་པས་མངོན་ནོ། །འབྲས་བུའི་མཚན་ཉིད་ནི། ལེའུ་སོ་གསུམ་པ་ལས། སྐུ་དེ་དག་ནི་རྟག་པར་ཡང་ཟུང་གཅིག །མི་རྟག་པར་ཡང་ཟུང་ཅིག །ཡོད་པར་ཡང་ཟུང་ཅིག །མེད་པར་ཡང་ཟུང་ཅིག །གཅིག་པར་ཡང་ཟུང་ཅིག །ཐ་དད་པར་ཡང་ཟུང་ཅིག །གཅིག་ཐ་དད་ཀྱི་ངོ་བོ་ལས་གྲོལ་བར་ཡང་ཟུང་ཅིག །ཅེས་པ་དང་། མདོ་བསྲེས་ལས། སྐུ་ཇི་ལྟ་བ་བཞིན་དུ། གསུང་དང་ཐུགས་དང་ཡོན་ཏན་དང་ཕྲིན་ལས་ཀྱང་ཤེས་པར་བྱའོ། །ཞེས་པས། སྐུ་གསུང་ཐུགས་ཡོན་ཏན་ཕྲིན་ལས་ལྔ་ཀ་མཐའ་དྲུག་ལས་གྲོལ་བའོ། །རྗེ་ཡིས་གསུང་པས་ཞལ་གྱི་གདམས་པ་ཐོབ། །གདམས་པའི་གནད་ཀྱིས་རྒྱལ་བའི་དགོངས་པ་རྟོགས། །ཆོས་ཀྱི་སྤྱན་གྱིས་ཚིག་གིས་འབྲེལ་དོན་རིག །ཐོབ་པ་རིགས་རྟོགས་ལྡན་པའི་བརྩོན་སེང་ལ། །རྗེ་ཡིས་བཀའ་བསྒོས་བུ་ཡིས་བསྐུལ་བའི་ཕྱིར། །མདོ་ཁོག་རིན་ཆེན་སྒྲོན་མ་འདི་བཀོད་པས། །བླ་མ་མཉེས་ཤིང་ཀུན་དོན་འགྲུབ་པར་ཤོག །ཁོག་དོན་རིན་པོ་ཆེའི་སྒྲོན་མ་ཞེས་བྱ་བ། གསང་སྔགས་འཛིན་པ་བརྩོན་སེང་གིས་བཀོད་པའོ། །དགེའོ། །དགེའོ། །དགེའོ།། །།