cover

སྔ་འགྱུར་བཀའ་མའི་ཆོས་སྡེའི་གླེགས་བམ་གོ་དགུ་པ།

གླེགས་བམ། ཏེ༽

དགའ་རབ་རྡོ་རྗེ། ཀཿདམ་པ། གཙང་སྟོན་རྡོ་རྗེ་རྒྱལ་མཚན། དབུས་པ་རྟ། རྟ་ཇོ་ཡེ། རྟའི་ཇོ་སྲས། རྟ་ཛྙཱ་ན་ཤྲཱི།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

རྫོགས་པ་ཆེན་པོ་བསམ་གཏན་ཉམས་ཀྱི་སྒྲོན་མེ། རིག་འཛིན་དགའ་རབ་རྡོ་རྗེ།

རིག་འཛིན་དགའ་རབ་རྡོ་རྗེས་མཛད་པ་ཡིན། རྫོགས་པ་ཆེན་པོ་བསམ་གཏན་ཉམས་ཀྱི་སྒྲོན་མེ། རྒྱ་གར་སྐད་དུ། བྷྱ་ནན་ཡུ་པ་པྲ་ཧི་ན་མ། བོད་སྐད་དུ། བསམ་གཏན་ཉམས་ཀྱི་སྒྲོན་མ་ཞེས་བྱ། རང་སྣང་རྡོ་རྗེ་སེམས་དཔའ་ལ་ཕྱག་འཚལ་ལོ། །རང་བཞིན་གནས་དང་རྒྱལ་བ་ལྔ། །སྟོན་པའི་མཆོག་གྱུར་ཐུགས་རྗེའི་བདག །འགྲོ་བའི་མགོན་གྱུར་བླ་མ་ལ། །རང་སྣང་ངང་དུ་དབྱེར་མེད་འདུད། །ཆོས་ཀུན་སྐྱེ་མེད་རང་སྣང་དུ ། །རྟོགས་པས་ཕྱོགས་བྲལ་ངེས་པའི་སོར། །མ་ཡེང་སྐྱེ་འགག་མེད་གནས་པའི། །ཉམས་རྟགས་རིམ་པ་ཟུར་མཚོན་དགོས། །དེ་ཡང་ཅིག་ཆར་ཐོད་རྒལ་དང་། །རིམ་གྱིས་པ་དང་གསུམ་དུ་བསྟན། །ཅིག་ཆར་སྐྱེ་མེད་རང་སྣང་དུ། །རྟོགས་པས་ཡུལ་མེད་རང་ལས་གྲོལ། །གཉིས་མེད་རང་བྱུང་ཡེ་ཤེས་ལ། །སྣང་གྲགས་མ་བཅོས་ཆོས་སྐུར་ཤར། །ཐིག་ལེ་རང་གསལ་ཉག་གཅིག་ལ། །བཏང་བཞག་གཉིས་མེད་བསྒོམ་དང་བྲལ། །བྱུང་ཚོར་གཡོ་འགོག་ཆོས་སྐུར་ཤར། །གཟུང་འཛིན་བག་ཆགས་སྲིད་མཐའ་ཟད། །རང་བྱུང་ཡེ་ཤེས་མངོན་བྱས་པའི། །འོད་གསལ་མཐའ་བྲལ་ཆེན་པོ་ལ། །མ་འདྲེས་ཡོངས་རྫོགས་ཐིག་ལེ་གཅིག །ཐུགས་རྗེའི་བྱིན་རླབས་ཅིར་ཡང་འཆར། །ཐོད་རྒལ་ལམ་ལ་ངེས་མེད་དེ། །འགའ་ཞིག་གནས་ནས་མཐར་ཕྱིན་ཡོད། །ལ་ལ་མི་གཡོ་མཉམ་ཉིད་ནས། །མཐར་ཕྱིན་ཡོན་ཏན་རྫོགས་པ་ཡོད། །ལ་ལ་དང་པོ་གནས་མ་ཐག །ཉམས་དང་དྲོད་རྟགས་མཐོན་དམན་སྐྱེ། །གོ་རིམ་ངེས་མེད་མཐར་ཕྱིན་ཡོད། །ལ་ལ་གནས་པ་བསྟན་པ་དང་། །མི་གཡོ་བ་དང་མཉམ་ཉིད་ནས། །གོང་དུ་འཕར་ཞིང་མཐར་ཕྱིན་ཡོད། །ལ་ལ་གོ་རིམ་ཅན་སྐྱེ་ལ། །སྐབས་སུ་ཐོད་རྒལ་སྐྱེ་བ་ཡོད། །དེ་དག་གང་ཡིན་རང་རང་གི། །ཉམས་དང་མཐུན་པར་སྐྱེ་བ་ནི། །ཉམས་རིམ་བཞི་ཡི་རིམ་པ་བཞིན། །རང་རང་སྐབས་དང་ཉམས་རྟགས་སྦྱར། །ཁྱད་པར་མྱུར་ཞིང་ངེས་མེད་སྐྱེ། །ཐོད་རྒལ་དག་ཏུ་སྐྱེ་བ་ཡིན། །རིམ་གྱིས་པ་ནི་གནས་པ་དང་། །མི་གཡོ་མཉམ་ཉིད་ལྷུན་གྱིས་གྲུབ། །གནས་པའི་ངོ་བོ་མཚོན་པའི་དཔེ། །རྟགས་མཚོན་རང་གི་འབྲས་བུ་འོ། །ངོ་བོ་མཉམ་བཞག་རྗེས་ཤེས་དང་། །ཇི་ལྟར་བསྐྱང་ཚུལ་བོགས་འདོན་ནོ། །མཉམ་ཉིད་སྐྱོན་གྱིས་མ་བསླད་པར། །མ་གཏད་ངང་དུ་མ་ཡེད་གསལ། །གནས་པ་རྩེ་གཅིག་ཡོད་མེད་ལ། །སྟོང་གསལ་བདེ་ལ་མི་རྟོག་གནས། །དེ་ལ་དང་པོ་ཆུ་དྲག་བཞིན། །རྣམ་རྟོག་མང་ཞིང་ཅུང་ཟད་གནས། །དེ་ནས་དལ་དྲག་ཆུ་བོ་བཞིན། །རེས་གནས་རེས་རྟོག་ཐུན་ཕྱེད་གནས། །དེ་ནས་དལ་བབ་ཆུ་བོ་བཞིན། །ཤེས་ས ལ་དལ་ཞིང་ཐུན་དུ་གནས། །ཐུན་དུ་མ་བཅད་བསྒོམ་པ་ཡང་། །ཉམས་དང་རྟོགས་པ་གོང་བཞིན་ཤེས། །མཉམ་བཞག་དང་པོའི་རྟོགས་པ་ནི། །ལོང་བཏགས་འཆོར་ཐུག་འཕྲད་ཆོས་མ། །དེ་ནས་ལོང་བཏགས་ཙག་ཙིག་དང་། །ཕལ་ཆེར་ཐུག་ཕྲད་རང་ལོག་འབྱུང་། །དེ་ནས་ཐུག་ཕྲད་ཙག་ཙིག་དང་། །ཕལ་ཆེར་རང་ལོག་གནས་པ་ཡིན། །རྗེས་ཤེས་དྲན་པས་མ་ཟིན་ན། །ཐ་མ ལ་འཆོར་དང་བཏང་སྙོམས་གནས། །དྲན་ཟིན་ཐ་མལ་ཨ་འཐས་ལྡོག །གཟུང་འཛིན་ལོང་བརྟགས་འཁྲུལ་པར་ཤེས ། །ཐུག་ཕྲད་ཤར་དང་རང་ལྡོག་འབྱུང་། །ཅི་ལྟར་བསྐྱངས་ཚུལ་མཉམ་བཞག་ནི། །ངེས་ཀྱང་རེས་གནས་རེས་བྲལ་བས། །མ་ཡེངས་དོན་དང་མ་བྲལ་བའི། །རྩོལ་བ་དང་བཅས་བཏང་སྙོམས་བསྟེན། །དོན་ནི་སྤྲོས་བྲལ་མངོན་སུམ་ལ། །བཙལ་བའི་ཆ་གཞན་ཡུལ་མེད་པས། །མི་བཙལ་རང་ལུགས་ཀྱི་ནར་བཞག །ཞེ་འདོད་མི་བྱ་ལྷུག་པར་བཞག །ཅིར་སྲིད་ཅིར་སྣང་ཅི་འགྱུར་ཡང་། །དེ་བཞིན་ཉིད་ལས་མ་གཡོས་པས། །འདའ་མེད་གསུམ་གྱིས་གཟེར་བཏབ་ལ། །སྤྲོ་བསྡུ་མེད་པའི་དགོངས་པར་གནས། །རྗེས་ཤེས་དྲན་པའི་ཐག་པ་ཡིན། །རྟ་རྒོད་བཞིན་དུ་བསྒྲིམ་ལ་བཙའ། །བོགས་འདོན་ཐུན་འཚམས་ཁམས་ཚོད་དང་། །སྐྱོན་དང་བཅོས་ཐབས་ལ་སོགས་ཀུན། །ཉམས་དང་ཁམས་ཀྱི་ཚོད་བཟུང་ཞིང་། །སྐྱོན་བཅོས་བསྒོམ་ཀློད་ཞལ་ལས་ཤེས། །ལུང་ཟབ་བླ་མ་ཉམས་ཅན་ཡུན། །བལྟ་དང་ལྟང་འབུལ་ཉམས་བཤུར་བས། །ངེས་འཆར་འཕྲང་སེལ་བོགས་འབྱིན་བྱེད། །མི་རྟག་འཆི་བསམ་བརྩོན་འགྲུས་བསྐྱེད ། །གནས་ལུགས་དྲན་པའི་རྩིས་ཟིན་པའི། །གསང་སྤྱོད་ཐབས་ལ་བརྟེན་པ་དང་། །འཁྲུལ་འཁོར་ལྟ་སྟང་སྣ་ཚོགས་དང་། །རླུང་དང་བདེ་བའི་མན་ངག་དང་། །དམིགས་མེད་སྙིང་རྗེ་བསྒོམས་པ་དང་། །གདམ་པའི་གནད་དང་ཤེས་རབ་ཀྱིས། །རིག་པའི་རྩལ་སྦྱང་ཉམས་བོགས་འདོན། །དེས་ནི་ཆུ་དྲག་དལ་འབབ་དང་། །སྤྲིན་པར་ཉི་མ་གསལ་ཡིད་ཆེས། །ཚོགས་དྲུག་རང་ལྡོག་ལྷུག་པ་ནི། །སྐྱེས་བུ་ནད་གདུངས་ཁྲེལ་ཤོར་འདྲ། །ཆོས་སྐུ་མིད་ཀྱི་མིང་སྤྲོས་བྲལ། །སྐྱེས་བུ་མིག་ཕྱུང་སྙིང་བཏོན་འདྲ། །ལོངས་སྐུ་རང་འཛིན་གཞན་རྟོག་བསྒྲལ། །རང་གསལ་མཁའ་ལ་ཉི་ཤར་འདྲ། །གཉིས་མེད་ཉམས་གསལ་ཡིད་བདེ་བ། །འཇིགས་བཅས་སྐྱེས་བུ་ལམ་བསྒྲོད་གཅིག །རང་ཡུལ་མཐོང་བས་འཇིགས་མེད་འདྲ། །རང་དབྱོར་ཉམས་ཀྱི་རྟགས་མཚན་ནི། །དྲོད་རྟགས་རྨི་ལམ་འཕྲང་བསལ་ལོ། །དྲོད་ནི་བཟོད་པ་འཕྲ་ཐོབ་དང་། །ལུས་ཡང་བདེ་བ་འབྱུང་བ་དང་། །དབུགས་ཀྱི་རྒྱུ་མ་མི་ཚོར་དང་། །སེམས་ཉིད་རྣལ་དུ་ཕེབས་པ་ཡིན། །གསལ་ལ་ཡུལ་མེད་མི་རྟོག་པའོ། །བར་མ་རྟོག་དང་མངོན་ཤེས་ནི། །འཁོར་བའི་ཆོས་ལ་སྐྱོ་བ་དང་། །རང་གི་གནས་ལ་མི་ཆགས་ཞིང་། །ཐག་རིང་གཞན་དུ་འགྲོ་བར་འདོད། །ངར་འཛིན་ཕྱོགས་ཆ་དྲེགས་སྤྱོད་དང་། །ཉོན་མོངས་ཆགས་སྡང་ཞེན་པ་ཆུང་། །ཐ་སྙད་བརྗེད་ཆུང་ཀུན་བརྟགས་ཆུང་། །དོན་ལྡན་འཁྲུལ་ལ་ཡ་མཚན་ཞིང་། །བྱམས་དང་སྙིང་རྗེ་ཕན་སེམས་ལྡན། །ཆོས་བརྒྱད་ཆུང་ཞིང་དོན་ལ་བརྩོན། །ཟད་པར་སྐྱེ་མཆེད་མཐོང་བ་དང་། །རླུང་གི་མཚན་མ་ལྔ་མཐོང་དང་། ཤུག་སྣང་བརྒྱད་སོགས་ཉམས་སྣང་དང་། །གཡོ་ཐོབས་ཙམ་དུ་མཐོང་སྲིད་དོ། །བཅོ་བརྒྱད་སྤྱོད་ཡུལ་ཆ་ཡང་དེའོ། །འགྲོ་དྲུག་རྩ་གནས་རླུང་ཚུད་དེང་། །ཐོག་མེད་བག་ཆགས་སྣ་ཚོགས་དང་། །སེམས་ཉིད་ཅིར་ཡང་འཆར་བའི་ཕྱིར། །འགྲོ་དྲུག་སྣང་ཚུལ་སྣ་ཚོགས་དང་། །ལྷ་དང་ལྷ་མོ་ལ་སོགས་དང་། །སྐྱེད་མོས་ཚལ་དང་ཞིང་ཁམས་སོགས། །ཉམས་ཀྱི་བྱེ་བྲག་ཅིར་ཡང་འཆར། །དེ་ཀུན་སེམས་ཉིད་རང་སྣང་ལས། །མ་གཡོས་དེ་བཞིན་མ་བཅོས་བཞག །འདོད་མིན་སྒྲ་ཐོས་ཁ་དོག་མཐོང་། །སྔངས་འདར་དབུགས་རྒོད་ཤུགས་རིང་འབྱུང་། །རྟོག་མེད་གཉིད་མེད་རྨི་ལམ་མང་། །ཟས་མཁྲེན་ལུས་སེམས་གྱོང་ཞིང་རྩུབ། །བསྒོམ་འཚེ་མི་ཕེབས་ཡུན་ཐུང་སྲབ། །ལུས་གཟེར་རྐྱེན་མེད་བློ་སྦྲིད་འོང་། །རྩ་དང་ལུང་རྒུད་ཁམས་ཟེད་བསྐུང་། །ཁམས་གོས་ཁམས་དང་ཉམས་སྦྱར་བསྒོམ། །དུས་མིན་ཞལ་མཐོང་ལུང་བསྟན་སོགས། །བདུད་ཀྱི་ཆོ་འཕྲུལ་ཤེས་བྱས་ལ། །རྐྱེན་བསལ་ཐབས་བཞིན་གཞོམ་པ་དང་། །རང་སྣང་རང་བྱུང་རང་དགར་གཞག །ལྷ་གཅིག་དྲུང་གནས་མངོན་ཤེས་དང་། །དམིགས་པ་འགའ་ཡི་མངོན་ཤེས་དང་། །གཡོ་ཐོབ་ཙམ་དུ་འབྱུང་བ་སྲིད། །རྣལ་འབྱོར་ཉམས་ཀྱི་རྨི་ལམ་ཡང་། །རང་སྣང་སྒྱུ་མར་གསལ་བ་ཡིས། །ཁྱི་དང་གཅན་གཟན་གདུག་པ་དང་། །བདུད་དང་སྲིན་པོ་དམུ་སོགས་ཀྱིས། །རྨུག་ཅིང་ལུས་གཏུབ་ཟ་ལ་སོགས། །རེས་འགའ་བཟོད་ཅིང་སེམས་སུ་ཤེས། །རྨི་ལམ་ཟིན་ཅིང་དེ་བཞིན་ཤེས། །ཡུལ་མེད་རྟོག་པ་ཙག་ཙིག་དང་། །ཆ་ཙམ་རྟོགས་དང་ཉམས་གསལ་འབྱུང་། །གཞན་ཡང་རྣལ་འབྱོར་རྨི་ལམ་ནི། །སྒྲེན་མོར་བྱུང་དང་ཁྲུས་བྱེད་དང་། །རྣམ་དག་ཆུ་བོར་འབོག་སྐྱལ་འཁྲུད། །ཆར་རྒྱུན་བུམ་ཆུའི་འཁྲུ་བ་དང་། །ནང་གྲོལ་རྣག་ཁྲག་ཕྱིར་ཐོན་དང་། །མེས་བསྲེག་རླུང་གཡེང་མཁའ་ལ་འཕུར། །དེ་ཀུན་དྲི་མ་དག་པའི་ལྟས། །གཡུལ་འགྱེད་ཞི་དང་ནད་བྱང་། །དང་ཐོན་བཅིངས་གྲོལ་ནད་ལས་ཐར། །མུན་ཁུང་འདམ་ནས་ཐོན་པ་དང་། །འཇིགས་སྔངས་གཙན་གདུག་པའི་ཚོགས། །ཞི་དང་གྲུ་རྒལ་ཆུ་ཆེན་ཐར། །དེ་སོགས་ངན་སོང་འཇིགས་བྲལ་ལྟས། །ཁྲི་རྐང་ཉིད་དང་རིན་ཆེན་སྐས། །རི་རྩེ་མཆོད་ཆེན་ནམ་མཁའི་སྐས། །འཛེགས་དང་གྱེན་ལ་འགྲོ་བ་དང་། །གླང་ཆེན་ཞོན་དང་ནམ་མཁའ་ལ། །དཀྱིལ་དཀྲུང་ཉམས་མྱོང་གོང་དུ་འཕེལ་ལྟས། །གླེགས་བམ་རྙེད་དང་གླེག་བམ་འདྲི། །བལྟས་པས་ངོ་མཚར་དོན་བྱུང་དང་། །གཏན་ལ་འབེབས་གཞན་ལ་སྟེན། །ཡི་གེའི་སྒྲ་ཐོས་ཡི་གེར་མཐོང་། །དེ་སོགས་ཆོས་ལ་དབང་བྱེད་ལྟས། །སྔོན་མ་མཐོང་བའི་ཡུལ་མཐོང་དང་། །བྱང་ཆུབ་ཆེན་པོའི་མཆོད་རྟེན་མཐོང་། །རི་བོ་རྩེ་ནས་ཀུན་ལྟ་བ། །དེ་སོགས་ཆོས་ཉིད་དོན་མཐོང་ལྟས། །ཁྱེའུ་དང་བུ་མོ་ཡིད་འོང་དང་། །སྣ་ཚོགས་རྒྱན་བཏགས་མཛེས་མཐོང་དང་། །ཡིད་འོང་ངོ་མཚར་རྫས་རྙེད་པ། །དེ་ཀུན་འདོད་པའི་དོན་གྲུབ་ལྟས། །རྔ་དང་དུང་གི་སྒྲ་ཆེན་གྲགས། །ཀུན་དགའ་ཀུན་གྱི་ཡིན་འོང་དང་། །ཀུན་འདུས་ཀུན་གྱི་མཆོད་རྨི་བ། །གྲགས་ཐེབས་འདུ་བ་མང་བའི་ལྟས། །སངས་རྒྱས་བྱང་སེམས་བླ་མ་ཡིས། །བྱིན་རླབས་དབང་བསྐུར་ལུང་སྟོན་སོགས། །དེ་ཀུན་བདུད་དང་ཆ་དབྱེ་བ། །ཤིན་ཏུ་གཅེས་པས་བླ་མ་དང་། །རང་གི་ཉམས་ཀྱིས་བརྟགས་བྱས་ལ། །བདུད་ཡིན་རྐྱེན་བསལ་ཐབས་གཞན་ཤེས། །བདུད་མི ན་གསོལ་བཏབ་དེ་བཞིན་གནས། །མི་སྐྲག་མི་བྲེད་རང་ལུགས་བཞག །གཞན་ཡང་འགྲོ་བ་རིགས་དྲུག་གི། །སྣང་ཚུལ་བདེ་སྡུག་སྣ་ཚོགས་དང་། །མེ་ཏོག་ཚལ་དང་གཞལ་ཡས་ཁང་། །ཞིང་ཁམས་སྐྱེད་མོས་ཚལ་ལ་སོགས། །བཅོ་བརྒྱད་སྤྱོད་ཡུལ་རྩ་ཡང་རྨི། །བདུད་བེར་ཀར་ལ་སོགས་པའི། །ཆོ་འཕྲུལ་རྣམ་པ་སྣ་ཚོགས་འབྱུང་། །དེ་སོགས་ཐོག་མེད་བག་ཆགས་དང་། །རྩ་གནས་རླུང་པོ་ཉམས་སྣང་དག །མ་སྐྱེས་སེམས་ཉིད་རང་སྣང་ཕྱིར། །བཟང་ངན་རྟོག་དཔྱོད་མི་བྱ་ཞིང་། །རང་བྱུང་རང་སྣང་རང་སོར་བཞག །འཕྲང་བསལ་རྟགས་མཚན་ཅིར་སྣང་ཡང་། །ངན་རྟོག་དགའ་བྲོད་རློམ་སེམས་བདུད། །རང་བྱུང་རང་ཞི་རང་དགར་བཞག །རང་བཞིན་རྟོག་ན་ཕྲ་མོ་ཡང་། །དམ་པ་ཉིད་ཡིན་དམ་པའི་ལྟས། །ཆོས་ཀུན་སེམས་ཉིད་རང་སྣང་ལ། །བཟང་ངན་སྐྱོན་ཡོན་གཉིས་མེད་པས། །རང་ཤར་རང་གྲོལ་སེམས་ཉིད་རང་། །དེ་བཞིན་མ་བཅོས་ངང་ལ་བཞག །ཟང་ཟིང་གྲགས་པ་ཐོབ་པ་ཡིས། །ང་ཆེ་འཇིག་རྟེན་གཡེང་བ་ནི། །རྣལ་འབྱོར་ཐར་པའི་སྲོག་གཅོད་ཡིན། །བདུད་ཤེས་སྤངས་ལ་ཉམས་རྟོགས་སྤེལ། །ཅི་ནས་གདུལ་བྱའི་ཡུལ་མཐོང་ན། །རང་འདོད་ཞེན་པ་མེད་པ་ཡིས། །བྱམས་དང་སྙིང་རྗེ་མི་བཏང་བཟུང་། །འབྲས་བུ་སྦྱོར་ཚུལ་རང་འབྲས་བུ། །རྟོགས་པའི་ངང་གནས་རྣལ་འབྱོར་གྱིས། །གསལ་ལ་ཡུལ་མེད་སྒོམས་པ་ཡིས། །ཉོན་མོངས་ཀུན་བརྟགས་འབྲོང་བཅོམ་ནས། །བརྟན་པའི་ཆ་ལ་མི་གཡོ་ཐོབ། །རང་འབྲས་རྣལ་འབྱོར་འཕོ་བའི་ཚེ། །གདམས་པའི་གནད་གོམས་ཤེས་རབ་ཀྱིས། །འགའ་ཞིག་ཡེ་ཤེས་ཆོས་སྐུར་སྦྱོར། །འགའ་ཞིག་སྒྱུ་ལུས་བར་དོ་ནས། །ལྷ་མི་རིག་འཛིན་དེ་ནས་གྲོལ། །ཕལ་ཆེར་བག་ཆགས་རྟོགས་མཐུ་ཡིས། །ངེས་པར་མི་ལུས་ཐོབ་ནས་ནི། །ཆོས་སྤྱོད་པ་དང་ལྡན་གྱུར་ནས། །དེ་ཚེ་ཆོས་ཉིད་བདེན་པ་མཐོང་། །མི་གཡོའི་ངོ་བོ་མཚོན་པའི་དཔེ། །རྟགས་མཚན་རང་གི་འབྲས་བུའོ། །ངོ་བོ་མཉམ་རྗེས་བསྐྱངས་ཚུལ་སོགས། །མཉམ་བཞག་མི་མཐུན་གཉེན་པོ་བྲལ། །མ་གཏད་ཡེངས་བྲལ་མི་གཡེར་གནས། །བདེ་གསལ་མི་རྟོག་སྤྲོས་བྲལ་བའི། །རང་བྱུང་ཡེ་ཤེས་དྲོད་དང་ལྡན། །རྒྱ་མཚོའི་གཏིང་ལྟར་མི་གཡོ་ལ། །ཉིན་ཕྱེད་ཉིན་དང་ཉིན་ཞག་གནས། །མཉམ་བཞག་རྟོག་པ་རང་གྲོལ་དང་། །འབྱུང་འཇུག་མེད་པར་གནས་པ་ཡིན། །རྗེས་ཤེས་དྲན་པས་མ་ཟིན་ན། །ཐ་མལ་ཞེན་ཆུང་བཏང་སྙོམས་དང་། །སྐབས་སུ་རང་ལོག་ཐུག་ཕྲད་དང་། །དྲན་ཟིན་གཉིས་མེད་གསལ་འདེབས་ཤིང་། །རང་སྣང་སྒྱུ་མར་གསལ་དང་། །ཐུག་ཕྲད་རང་ཤར་རང་ལོག་འབྱུང་། །བསྐྱངས་པ་དང་གོམས་མི་གཡོར་གནས། །གཞི་བཞག་རང་ལུགས་ཆེན་པོ་ཡི། །མ་ཡེངས་ཡལ་འཇོག་དགོངས་པ་ལ། །རྩོལ་མེད་བཏང་སྙོམས་ཆེན་པོར་གནས། །ཆོས་ཀུན་སྤྲོས་བྲལ་རང་རིག་གསལ། །ཆོས་སྐུ་རང་ཆས་རྩོལ་མེད་ལ། །བྱར་མེད་སྐྱེས་བུ་ཇི་བཞིན་དུ། །ལུས་སེམས་ཁོང་ཀློད་གར་དགར་བཞག །མ་སྐྱེས་རང་བྱུང་སྐྱེ་བ་མེད། །བཅིངས་གྲོལ་མེད་པའི་ཆོས་ཉིད་ལ། །མ་བཅོས་རང་ལུགས་གཉུག་མར་བཞག །ཞེ་འདོད་མི་ཕྱལ་བར་བཞག །རྗེས་ཤེས་དྲན་པའི་ཐག་པ་ཡིས། །ལུས་སྐྱོངས་ཇི་ལྟར་མ་ཡེངས་བཅའ། །བོགས་འདོན་རང་གནས་རྣལ་འབྱོར་པས། །ཁམས་དང་ཐུན་ཚད་སྐྱོན་བཅོས་དང་། །ལྟ་འབུལ་ཉམས་བསྡུར་གོང་མ་བཞིན། །བྱར་མེད་བརྩོན་འགྲུས་ཆེན་པོ་དང་། །དམིགས་མེད་བྱམས་དང་སྙིང་རྗེ་ཡིས། །འགྲོ་བ་ཀུན་ལ་ཕྱོགས་མེད་བསྒོམ། །དགོངས་པ་སྐྱེད་ཆུང་འཐས་པ་ན། །རྟོགས་པའི་ངང་ལས་མ་ཡེངས་པའི། །གསང་སྤྱོད་སྤྱོད་པ་སྣ་ཚོགས་བྱ། །དྲན་བཏང་ཡེངས་ཞི་མི་གསལ་ན། །རང་སྣང་མངོན་རྟོགས་མི་གཡོ་བའི། །ངང་ལ་དྲན་པས་རྒྱུན་དུ་བསྐྱངས། །དྲན་བཏང་ངང་ལ་མ་ཡེངས་ན། །གྲོང་ཡུལ་ཚོང་དུས་ལ་སོགས་པར། །གཞན་དག་མི་མོས་དོན་མི་འགྱུར། །སྤང་ལ་སྤྱོད་པ་སྣ་ཚོགས་དང་། །རི་ཁྲོད་དགོན་པར་ལུས་ངག་ཡིད། །མཆོང་རྒྱུག་སྨྲ་བརྗོད་སྣ་ཚོགས་དང་། །དྲན་རྟོག་བསམ་པ་སྣ་ཚོགས་བྱ། །དེ་ཡིས་ཉོན་མོངས་ཀུན་བརྟགས་ཀྱིས། །བག་ལ་ཉལ་སླད་དེ་རྗེས་ལ། །གཉིས་མེད་མི་གཡོ་ངང་ལ་བཞག །དེ་ལྟར་ལྟ་སྤྱོད་སྤེལ་བ་ཡིས། །མི་གཡོ་རྒྱུན་གོམ་བརྟན་པར་བྱ། །དཔེ་ནི་སྐུ་གསུམ་མི་འཇིག་དེས། །དེ་བཞིན་གསལ་ལ་མི་གཡོ་དཔགས། །མི་རྟོག་ཐིག་ལེའི་ངང་གནས་ནི། །མ་བསྐྱོད་དང་བའི་རྒྱ་མཚོ་དང་། མི་གཡོ་རང་ལ་ཏིལ་མེ་དང་། །མ་གོས་རྣམ་དག་པདྨ་འདྲ། །རྟགས་མཚན་དྲོད་རྟགས་མངོན་ཤེས་དང་། །རྨི་ལམ་ཉམས་རྟགས་འཕྲང་བས་ལོ། །དྲོད་ནི་ཤིང་བལ་ལྟར་ཡང་དང་། །ལུས་ཀྱི་བཟོད་པ་ཆེར་ཐོབ་དང་། །ཁམས་སྙོམས་རང་ལུས་བདེ་བ་རྒྱས། །འགྱུ་བ་ཆད་དང་ཐུན་འཚམས་བྲལ། །དོན་ལ་རྣལ་དུ་ཕེབས་པ་ཡིས། །གསལ་ལ་ཡུལ་མེད་མི་གཡེར་གནས། །རྟགས་ནི་དུས་གསུམ་གཅིག་རྟོགས་པས། །འཕོ་འགྱུར་མཐོང་ལ་ཉམས་མེད་དང་། །འཁྲུལ་པའི་ཁམས་ལ་སྐྱེ་བ་མེད། །མ་བཅོས་དེ་བཞིན་ཉིད་དུ་གསལ། །ཏིང་འཛིན་རླུང་ཟིན་དྲོད་ལྡན་པའི། །ཟས་དང་གོས་ཀྱི་འདུ་ཤེས་ཆུང་། །ཉོན་མོངས་ངར་འཛིན་ཕྱོགས་ཆ་དང་། །ཆོས་བརྒྱད་ཆགས་སྡང་ཀུན་བརྟགས་སོགས། །ཤིན་ཏུ་ཆུང་ཞིང་ཕྲ་བས་གནས། །འཁྲུལ་ལ་ཡ་མཚན་ཐུགས་བརྩེ་བའི། །ཚད་མེད་ཐུགས་རྗེ་ཆེན་པོ་འབྱུང་། །ས་ལ་མི་འདུག་མཁའ་ལ་འགྲོ། །སྣང་བ་ཆུར་ཤར་ཆུར་མི་བྱིང་། །ཐམས་ཅད་མེར་སྣང་མེས་མི་ཚིག །ལུས་ཡང་བདེ་ཞིང་རླུང་མི་སྤྱོད། །འབྱུང་བཞི་སྣང་མེད་ནམ་མཁར་དེངས། །ཟད་པར་སྐྱེ་མཆེད་སྣང་བ་ཡིན། །རླུང་གི་མཚན་མ་རྣམ་ལྔ་ཡང་། །དུ་བ་ལྟ་བུར་ལང་ལོང་དང་། །སྨིག་རྒྱུ་ལྟ་བུར་གྱ་གྱུ་དང་། །སྲིན་མེ་ལྟ་བུར་དམར་འཕྲོ་སྣང་། །མར་མེ་ལྟ་བུར་དམར་ཀེམ་གསལ། །མཁའ་ལ་ཉི་ཤར་ལྟ་བུར་སྣང་། །ཤུགས་སྣང་བརྒྱད་པོ་སྣང་བ་ཡང་། །གྲུར་ཞུགས་འགྲོ་བ་སྙམ་བྱེད་དང་། །མཁའ་ལ་འཕུར་བ་སྙམ་བྱེད་དང་། །སྣང་བ་མུན་པར་གྱུར་པ་དང་། །ནམ་མཁའ་རྡུལ་གྱིས་གང་བ་དང་། །ནམ་མཁའ་འོད་དུ་འགྲོ་བ་དང་། །ལུས་དང་འབྱུང་བའི་སྣང་མེད་པར། །སེམས་ཉིད་སྣང་སྟོང་དང་པ་དང་། །མེ་ལོང་སྐར་མདས་བརྒྱན་པ་དང་། །སངས་རྒྱས་ཞིང་ཁམས་མཐོང་བ་འབྱུང་། །བདུད་ཀྱི་སྤྱོད་ཡུལ་སྣང་བ་ཡང་། །སྤྲུལ་པ་གྲངས་མེད་འབྱེད་མཐོང་དང་། །དམ་པར་འདུག་མཐོང་དམ་པར་རྒྱུ། །རྒྱལ་བས་གསུངས་ཀུན་གསལ་མཐོང་དང་། །དུས་གསུམ་གསལ་ཤེས་མཐོང་བ་དང་། །རྒྱུ་དྲུག་ལམ་གནས་ཀུན་མཐོང་དང་། །དེ་ལ་སྙིང་རྗེའི་སེམས་འབྱུང་དང་། །ཀུན་སྣང་གསལ་བར་མཐོང་བ་དང་། །ཅི་ལ་ཐོག་མེད་འགྲོ་བ་དང་། །མཁའ་ལ་ས་བཞིན་འགྲོ་བ་དང་། །རྒྱལ་བས་ཕྱག་བརྐྱང་ལུང་སྟོན་དང་། །ཀུན་གྱི་སྐད་དུ་ཆོས་སྨྲ་དང་། །སྣོད་བཅུད་བསྟི་གནས་མཐོང་བ་དང་། །སྟོང་གསུམ་མཉམ་པར་མཐོང་བ་དང་། །དེ་ཉིད་སེམས་ཉིད་གསལ་ཤེས་དང་། །ལས་སུ་རུང་བས་ཐོག་མེད་དང་། །དམ་པའི་དོན་ལ་བགོ་པ་དང་། །འཇིག་རྟེན་གཙོ་བོས་མཆོད་པ་དང་། །རང་བཞིན་ཤེས་ན་དམ་པའི་རྟགས། །མི་ཤེས་དགའ་བྲོད་ཕྱོགས་འཛིན་བདུད། །གཞན་ཡང་རླུང་ཟིན་བག་ཆགས་དང་། །སེམས་ཉིད་ཕྱོགས་མེད་རང་སྣང་ཕྱིར། །ངན་སོང་གསུམ་གནས་སྡུག་བསྔལ་དང་། །འདོད་ཁམས་ལྷ་མིའི་སྣང་ཚུལ་དང་། །གཟུགས་ཁམས་གཟུགས་མེད་བསམ་གཏན་དང་། །པདྨའི་ཚལ་གནས་སངས་རྒྱས་ཞིང་། །ཉམས་ཀྱིས་སྣང་བ་ཅིར་ཡང་ཤར། །དེ་ཀུན་དབྱིངས་ལས་མ་གཡོས་པས། །འཇིག་སྐྲག་དགའ་བྲོད་རློམ་སེམས་སོགས། །མི་བྱ་གཉིས་མེད་ངང་དུ་བཞག །བདུད་དང་ཁྱབ་འཇུག་བེ་གར་དང་། །ཆོས་སྐྱོང་ཕྲག་དོག་ལྷ་ཡི་བདུད། །རྫུ་འཕྲུལ་སྣ་ཚོགས་སྟོན་བྱེད་ཅིང་། །འཇིག་རྟེན་གྲགས་པ་སྒྲོགས་པ་དང་། །ལོངས་སྤྱོད་གཡེང་བས་འདྲིད་པ་དང་། །དྲོད་རྟགས་བྱིན་རླབས་སྟོབས་བསྐྱེད་ནས། །དགའ་བྲོད་རློམ་སེམས་ང་རྒྱལ་བསྐྱེད། །གཉུག་མའི་ངང་གནས་དགོངས་པ་དང་། །བདག་མེད་ཐར་པའི་བར་དུ་གཅོད། །དེ་ཀུན་སེམས་ཉིད་རང་སྣང་ལས། །མ་གཡོས་གཉིས་མེད་ངང་དུ་གཞོམ། །མངོན་པར་ཤེས་པ་དྲུག་སྣང་པ། །སྤྱན་གྱིས་གླིང་གྲངས་མཐོང་བ་དང་། །རྣ་བས་དེ་ཡི་སྒྲ་ཐོས་དང་། །སྔོན་གནས་རྗེས་སུ་དྲན་པ་དང་། །འཆི་འཕོ་སྐྱེ་བ་ཤེས་པ་དང་། །ཕ་རོལ་གཞན་གྱི་སེམས་ཤེས་དང་། །ཐུགས་རྗེས་གདུལ་དང་མི་འདུལ་དང་། །དུས་ལ་བབ་དང་མ་བབ་ཤེས། །རྫུ་འཕྲུལ་ཆོས་སྟོན་ཀུན་བརྗོད་དང་། །རྗེས་བསྟན་ལ་སོགས་གཡོ་ཐོབ་འབྱུང་། །རྨི་ལམ་གོང་བཞིན་སྟོབས་སུ་འཕེལ། །ཁྱད་པར་རྨི་ལམ་རྟོག་པ་ནི། །ཆ་ཙམ་ཕྱེད་དང་ཕལ་ཆེར་གསལ། །རང་སྣང་སྒྱུ་མར་གསལ་བ་དང་། །སེམས་ཅན་ཀུན་ལ་ཐུགས་བརྩེ་བའི། །བྱམས་དང་སྙིང་རྗེ་ཆེར་སྐྱེ་བའོ། །ཁྱུང་དང་གླང་ཆེན་སེང་གེ་ལ། །ཞོན་དང་ཁྲི་ཆེན་ལ་འདུག་དང་། །མཆེད་རྩེ་རྩེ་དང་རི་བོ་སྤོ། །ཉི་ཟླའི་རྩེ་དང་ནམ་མཁའི་དབྱིངས། །འདུག་པ་དམ་པའི་ས་ཐོབ་རྟགས། །ཀུན་ལ་དབང་བསྒྱུར་སྤྱོད་པ་དང་། །འཇིག་རྟེན་སྐོས་ལ་འདེབས་པ་དང་། །གཡུལ་འགྱེད་ཞི་དང་གཡུལ་ལས་རྒྱལ། །བསྲེག་པའི་སྐལ་པ་གཞི་ལ་སོགས། །དམ་པའི་རིགས་ངེས་དག་བདེན་རྟགས། །རིན་ཆེན་གླིང་དུ་ཕྱིན་པ་དང་། །མེ་ཏོག་བདུད་རྩིའི་ཆར་འབབ་དང་། །གླེགས་བམ་འཁོར་ལོ་ལག་འབབ་དང་། །རི་རབ་ཀླད་སྐོར་འཇིག་རྟེན་གཡོ། །ཉི་ཟླ་ལག་ཐོག་མུན་པ་སེལ། །རྔ་སོགས་དུང་སྒྲས་སྟོང་གསུམ་གང་། །དངོས་ཀུན་ཡི་གེའི་སྒྲ་ཐོས་མཐོང་། །དེ་ཀུན་དམ་པ་མཆོག་ཐོབ་ཅིང་། །ཆོས་ལ་དབང་སྒྱུར་འགྲོ་སྨིན་ལྟས། །སྟོང་གསུམ་མཐོང་དང་གླིང་གྲངས་བསྒྲོད། །རི་རབ་རྩེར་ཕྱིན་ཐམས་ཅད་མཐོང་། །ནམ་མཁའི་ཁམས་ཀུན་མཐོང་བ་དང་། །རྒྱ་མཚོའི་གཏིང་དུ་ཕྱིན་པ་དང་། །རང་ལ་འོད་བྱུང་སྣང་སྲིད་གསལ། །ཆོས་ཉིད་བདེན་པ་མཐོང་བའི་ལྟས། །དམ་པའི་གསུང་ཐོས་སྐུ་མི་མཐོང་། །འབྲུག་སྒྲ་ལ་སོགས་སྒྲ་ཆེན་དང་། །ལྷ་མོ་ལ་སོགས་ཀླུ་དབྱངས་ཀྱིས། །སྙན་པའི་སྒྲ་སྒྲོགས་ཐོས་པ་ནི། །ངེས་པར་ལུང་བསྟན་འབྱུང་བའི་ལྟས། །བདུད་དང་སྲིན་པོ་མི་ནག་པོ། །ཁྱབ་འཇུག་ཚངས་པ་ལ་སོགས་པ། །བརྟུལ་ཅིང་སྐེད་བཅད་གྱུར་མིག་ཟོས། །འཇིག་རྟེན་བདུད་ལས་ཐར་བའི་ལྟས། །གཞན་ཡང་འགྲོ་བ་རིགས་དྲུག་གི། །བདེ་སྡུག་སྣང་ཚུལ་སྣ་ཚོགས་དང་། །དག་པའི་སྣང་བ་སྣ་ཚོགས་པ། །སྔར་བས་སྟོབས་འཕེལ་གསལ་བ་དང་། །བཅོ་བརྒྱད་སྤྱོད་ཡུལ་སྣ་ཚོགས་འབྱུང་། །བདུད་དང་ཆོས་སྐྱོང་ལ་སོགས་པ། །དབང་བསྐུར་ལུང་བསྟན་བྱིན་རློབ་པའི། །ཆོ་འཕྲུལ་སྣ་ཚོགས་སྟོན་བྱེད་ཀྱང་། །རྒྱུར་ཤེས་རེ་དོགས་མི་བྱ་ཞིང་། །གཉིས་མེད་བྱམས་པ་ཆེན་པོ་བསྒོམ། །འཕྲང་བསལ་རྟགས་མཚན་ལ་སོགས་པའི། །སྒོ་དྲུག་མཚན་མ་ཅིར་སྣང་ཡང་། །མ་སྐྱེས་རིག་པ་རང་སྣང་བའི། །རང་བྱུང་རང་ཞི་རང་དགར་བཞག །སྐྱེ་མེད་དབྱིངས་ལས་མ་གཡོས་ཤིང་། །དུས་གསུམ་འཕེལ་འགྲིབ་མེད་པའི་ཕྱིར། །ཡེ་ཤེས་རང་གནས་བྱ་རྩོལ་མེད། །རེ་དོགས་རྩོལ་སྒྲུབ་ཀུན་ལས་རྒྱལ། །དཔེར་ན་ནམ་མཁའི་ངང་ཉིད་ལས། །ཉི་ཟླ་གཟའ་སྐར་གློག་འགྱུ་དང་། །འཇའ་ཚོན་སྤྲིན་འཁྲིག་འཕེལ་འགྲིབ་ཀྱང་། །ནམ་མཁའི་དབྱིངས་ལ་འཕེལ་འགྲིབ་མེད། །ཐིག་ལེ་ཀློང་དབྱིངས་ཆོས་དབྱིངས་པ། །ཚོགས་དྲུག་རྟགས་དང་རྨིས་ལྟས་ཀྱི། །མཚན་མ་འཕེལ་འགྲིབ་ཅིར་ཡང་སྣང་། །དེ་བཞིན་ཉིད་ལ་འཕེལ་འགྲིབ་མེད། །མི་ཤེས་དགའ་བྲོད་རློམ་སེམས་དང་། །ང་རྒྱལ་ཡུལ་བརྟགས་མཚན་མ་བདུང་། །གང་ལའང་དམ་པར་མི་བལྟའ་ཞིང་། །སྟོང་ཉིད་མ་སྐྱེས་རྣམ་དག་དབྱིངས། །བདག་མེད་ཕྱོགས་བྲལ་ངང་དུ་གཞོམ། །ཡུལ་མདོ་རིག་པ་རང་སོར་བཞག །འཇིག་རྟེན་སྣང་གྲགས་ཟང་ཟིང་དང་། །འཁོར་སློབ་གཡེང་རྒྱུ་བར་ཆོད་བདུད། །དམན་པའི་ཚུལ་བཟུང་རྒྱུར་ཤེས་པས། །སྒྱུ་མ་ལྟ་བུར་འཕང་མེད་བྱ། །བདུད་ཤེས་གཅིག་པུར་ཉམས་མྱོང་སྤེལ། །འོན་ཀྱང་རྟོག་པའི་ཀློང་གནས་པས། །སྟོང་གསལ་ཀློང་ལ་ཕུར་པ་འདེབས། །སྙན་གྲགས་ཟང་ཟིང་ཆགས་མེད་ན། །ཚད་མེད་སྙིང་རྗེ་ཆེན་པོ་དང་། །ཐུགས་བརྩེ་ཕན་སེམས་ལྡན་པ་ཡི། །དཀར་སྤྱོད་ཐུན་འཇུག་ལྷག་སྤྱོད་དང་། །ཐབས་མཁས་མཛད་པ་སྣ་ཚོགས་ཀྱིས། །འགྲོ་བའི་དོན་དུ་ལུས་ངག་ཡིད། །སྐྱེ་བ་མེད་པར་རྒྱུན་དུ་འབད། །འབྲས་བུ་སྦྱོར་ཚུལ་རང་འབྲས་བུ། །མི་གཡེ་ངང་གནས་རྣལ་འབྱོར་པ། །ཐུགས་རྗེས་སྤྱོད་པ་སྣ་ཚོགས་དང་། །མི་རྟོག་ཐིག་ལེའི་ཀློང་གནས་པའི། །དགོངས་པས་ཉོན་མོངས་ཀུན་བརྟགས་བསྒྲིབ། །ཕྲ་བ་བཅོམས་ནས་མཉམ་ཉིད་ཐོབ། །རྣལ་འབྱོར་པ་དེ་འཕོས་པའི་ཚེ། །འབྱུང་བ་ལྔ་པོ་ཞིག་པ་དང་། །རབ་ནི་ཡེ་ཤེས་ཆོས་སྐུར་སྦྱོར། །འབྲིང་ནི་ཡེ་ཤེས་བར་དོ་ནས། །རྟོགས་གསལ་སེམས་ལ་དབང་ཐོབ་ནས། །ལྷ་ཡི་རིག་འཛིན་ཆེན་པོ་ཐོབ། །དེ་ཚེ་ཉིད་ལ་མངོན་སངས་རྒྱས། །མཉམ་ཉིད་ངོ་བོ་མཚོན་པའི་དཔེ། །རྟགས་མཚན་རང་གི་འབྲས་བུའོ། །ངོ་བོ་དགོངས་སྤྱོད་གནས་པའི་ཚུལ། །འཁོར་དང་མྱ་ངན་འདས་པའི་ཆོས། །མ་སྐྱེས་རང་སྣང་དམིགས་མེད་ཕྱིར། །ཡུལ་མེད་རང་གསལ་ཅིར་མི་གཟིགས། །ཐམས་ཅད་མཉམ་པ་ཉིད་དུ་གསལ། །རང་བྱུང་ཡེ་ཤེས་སྤྲོས་བྲལ་བའི། །ཟག་པ་ཀུན་བྲལ་བདེ་ཆེན་ཐོབ། །མཉམ་ཉིད་མི་གཡོ་ཆོས་སྐུའི་དང་། །ལོ་ཟླ་འདས་ཀྱང་དེ་བཞིན་གནས། །མཉམ་ཉིད་ངང་ལས་མ་གཡོས་ཤིང་། །ཞིང་ཁམས་སྟོང་གསུམ་བརྒྱ་སྟོང་ཕྲག །ཐུགས་རྗེ་རང་བྱུང་སྤྲུལ་པ་ཡིས། །རྔོན་དང་སྨད་འཚོང་ཤན་པ་དང་། །ལྷ་མི་བསོད་ནམས་ལྡན་ལུས་སོགས། །གང་ལ་གང་ལྟར་འདུལ་བ་བཞིན། །མངོན་ཤེས་རྫུ་འཕྲུལ་སྣ་ཚོགས་དང་། །སྤྲུལ་པའི་ལུས་ཀྱིས་འདུལ་བར་བྱེད། །མཉམ་ཉིད་ངང་ལས་མཉམ་རྗེས་ཐོབ། །ཅུང་མངའ་ཚུལ་བཟང་རྩོལ་བ་ཅན། །གཉིས་མེད་ཡུལ་བྲལ་དེ་བཞིན་ཉིད། །མཉམ་ཉིད་མི་གཡོ་ཆོས་ཀྱི་སྐུ། །འདུ་འབྲལ་མེད་པའི་དགོངས་པ་ལ། །དུས་མེད་བཏང་སྙོམས་ཆེན་པོར་གནས། །དཔེ་ནི་མཉམ་ཉིད་ཆོས་སྐུའི་ངང་། །ངོས་བཟུང་མེད་པ་ཆུ་ཟླ་འདྲ། །ཡེ་ཤེས་རང་ལ་ཉི་མ་འདྲ། །རྒྱུན་ཆད་མེད་པ་ཆུ་བོ་འདྲ། །མཉམ་ཉིད་རེ་དོགས་ཉམས་ང་མེད། །ཁྱུང་ཆེན་མཁའ་ལ་ལྡིང་བ་འདྲ། །རྟགས་ནི་རྟགས་མཚན་རྫུ་འཕྲུལ་མངོན། །མཉམ་ཉིད་ཀུན་དངོས་ཀུན་བྲལ་ཕྱིར། །ཟག་མེད་ཟས་གོས་ཞན་པ་གྲོལ། །ཀུན་བརྟགས་ཉོན་མོངས་ཆགས་སྡང་དང་། །ངར་འཛིན་ཕྱོགས་ཆ་རེ་དོགས་དང་། །ཆོས་བརྒྱད་ལ་སོགས་རྩད་ནས་ཆོད། །འཇིགས་པ་ལྔ་བྲལ་བདུད་བཞི་བཅོམས། །རྒྱལ་བས་ལུང་བསྟན་དབང་བསྐུར་ཕྱིར། །བརྟག་པའི་བྱེ་བྲག་འདི་ལ་མེད། །མཚན་མ་རང་རིག་རང་ཤར་ཕྱིར། །སྤྲུལ་པ་སྣ་ཚོགས་འགྱེད་མཐོང་དང་། །དབང་བསྐུར་ལུང་བསྟན་ལ་སོགས་པ། །ཁྱད་པར་མཚན་མ་སྣ་ཚོགས་པ། །གཉིད་ལོགས་མ་ལོགས་མེད་པར་གསལ། །རང་བྱུང་ཆོ་འཕྲུལ་བཞིར་སྣང་བ། །ཉི་ཟླ་ཞོན་ནས་མཁའ་ལ་འགྲོ། །རི་བྲག་ལ་སོགས་ཐོགས་མེད་དང་། །ཆུ་ལ་མི་བྱིང་མེས་མི་ཚིག །དུག་དང་མཚོན་དང་ནད་མི་ཚུགས། །ཆུ་རྒྱུན་བཟློགས་དང་རླུང་མི་རྒུལ། །བསྲེག་པའི་སྐལ་བ་གཞིལ་བ་དང་། །ཉི་མའི་དཀྱིལ་འཁོར་འབུམ་འགྱེད་དང་། །སྐམ་སར་ཆུ་ཕྱུང་བྱེ་མ་གསེར། །སོལ་བ་ལྗོན་ཤིང་དུག་ལ་སྨན། །མི་སྣང་བ་དང་མང་པོར་སྤྲུལ། །རི་རབ་བསྐྱོད་ནས་བསོར་བ་དང་། །འཇིག་རྟེན་རྒྱང་མར་འཕེན་པ་དང་། །སྟོང་གསུམ་ཉུང་འབྲུར་ཤོང་བ་དང་། །ཉུང་འབྲུས་སྟོང་གསུམ་ཁེངས་པ་དང་། །གཞན་ཡང་ཇི་ལྟར་འདོད་པ་བཞིན། །ལྷ་སྲིན་རྣམས་ལ་དབང་བྱེད་དང་། །ཚེ་དང་དུས་ལ་བསྲིང་བསྟུངས་དང་། །དགུག་དང་བཏང་དང་བཅིངས་དང་དགྲོལ། །གསོ་གསད་ཕམ་རྒྱལ་ཐོག་མེད་འགྲུབ། །རང་བྱུང་ཐུགས་རྗེའི་བྱིན་རླབས་ཀྱིས། །འགྲོ་བ་རིགས་དྲུག་མུ་སྟེགས་དང་། །ལམ་དང་ས་ལ་གནས་པ་ལ། །སོ་སོའི་སྐད་དང་ཆ་མཐུན་པར། །གང་ལ་འཚམ་པར་ཆོས་དང་སྟོན། །རྣལ་འབྱོར་ཏིང་འཛིན་རྩལ་སྟོབས་ཀྱིས། །འཇིག་རྟེན་བརྒྱ་སྟོང་གཡོས་ནས་ཀྱང་། །ངོ་མཚར་ཆེར་བསྐྱེད་དགའ་ཞིང་མགུ། །ནང་གཡོས་སའི་རིམ་པོར་བྱེད། །གསང་བ་སྔགས་ཀྱི་སྒྲ་བསྒྲགས་པས། །ཀུན་ཀྱང་རྨད་བྱུང་སྔགས་ཀྱི་སྒྲར། །གྲག་པས་བདུད་འདུལ་ངན་སོང་སྦྱོང་། །ཐེག་ཆེན་ལམ་གཟུང་འགྲོ་དོན་མཛད། །མ་བསྒྲིབས་རང་གནས་མཉམ་ཉིད་ཀྱི། །ཟག་མེད་ཤེས་རབ་སྤྱན་མངའ་བས། །མངོན་པར་ཤེས་པ་རྣམ་པ་དྲུག །གསལ་དང་རྒྱལ་གྱིས་ཁྱད་པར་འཕགས། །འབྲས་བུ་རང་ངོ་སྦྱོར་བའི་ཚུལ། །མཉམ་པ་ཉིད་ཀྱི་ངོ་བོ་ལ། །ཟག་པ་ཀུན་བྲལ་རིགས་ཆེན་འཛིན། །སྐྱེ་ཤི་འཕོ་འགྱུར་མེད་པའི་ཕྱིར། །དེ་ཚེ་ཉིད་ལ་མངོན་སངས་རྒྱས། །མཉམ་ཉིད་རྣལ་འབྱོར་སྤྱོད་པ་དང་། །དགོངས་པའི་ངང་གནས་ཤེས་རབ་ཀྱིས། །ཤེས་བསྒྲིབ་རགས་དང་འབྲིང་བཅོམ་ནས། །རྩོལ་བ་མེད་པར་ལྷུན་གྲུབ་ཐོབ། །ལྷུན་གྲུབ་ངོ་བོ་མཚོན་པའི་དཔེ། །རྟགས་དང་རང་གི་འབྲས་བུ་འོ། །སྐྱེ་མེད་རང་བྱུང་མངོན་བྱས་པའི། །རྩོལ་མེད་བདེ་ཆེན་ལྷུན་གྲུབ་ལ། །མཐའ་དབུས་སྐྱེ་མེད་རྣམ་དག་དབྱིངས། །སྐུ་ལྔ་མ་འདྲེས་ཀུན་ཏུ་བཟང་། །ལྷུན་རྫོགས་ངང་ལ་མ་གཡོས་ཤིང་། །ཞིང་ཁམས་མཐར་ཐུག་མེད་པ་རུ། །ཐུགས་རྗེའི་སྤྲུལ་པ་སྣ་ཚོགས་ཀྱིས། །གང་ལ་གང་འདུལ་དོན་རྫོགས་བྱེད། །མཐའ་དབུས་གཉིས་མེད་དེ་བཞིན་ཉིད། །ནམ་མཁའི་དཔེ་ལྟར་མཚོན་དུ་མེད། །ཆ་ཙམ་དཔག་བསམ་རིན་ཆེན་དང་། །མེ་ལོང་ཉི་མའི་སྙིང་པོ་འདྲ། །རྟགས་ནི་སངས་རྒྱས་རྫུ་འཕྲུལ་དང་། །ཡོན་ཏན་སྣ་ཚོགས་རང་བཞིན་རྫོགས། །མ་བསྒྲིབས་ཀུན་གསལ་མངོན་ཤེས་དྲུག །ཀུན་མཁྱེན་མེ་ལོང་ཚུལ་གཟིགས་པ། །ཡུལ་དང་མཁྱེན་ཚད་རྒྱལ་བ་དང་། །འདྲ་ལ་བག་ལ་ཉལ་བས་ཕྱེ། །རང་འབྲས་ལྷུན་གྲུབ་ཆོས་ཀྱི་སྐུ། །རང་གི་རྒྱལ་ཚབ་སྟེན་པ་བྱེད། ལྷུན་གྲུབ་རྣམ་པར་དགོངས་སྤྱོད་དང་། །མཐའ་བྲལ་འོད་གསལ་འདུས་མ་བྱས། །དམིགས་མེད་རང་རིག་ཤེས་རབ་ཀྱིས། །སྐད་ཅིག་གཅིག་ལ་ཐ་མ་ཡི། །བག་ལ་ཉལ་བཅོམ་དེ་བཞིན་གཤེགས། །ཀུན་སངས་ཀུན་དངོས་རྫོགས་སངས་རྒྱས། །རང་བྱུང་ཡེ་ཤེས་མངོན་བྱས་པའི། །སྤང་ཐོབ་གཉིས་མེད་འགྲོ་འོང་མེད། །སྐུ་དང་གསུང་ཐུགས་ཡོན་ཏན་ལས། །བསམ་གྱིས་མི་ཁྱབ་མ་འདྲེས་རྫོགས། །འབྲས་བུའི་ཀློང་དུ་ཤེས་པར་གྱིས། །ཉམས་རྟགས་སྣ་ཚོགས་སྣང་བ་དང་། མཐར་ཕྱིན་ཡོན་ཏན་ཀུན་རྫོགས་ཀྱང་། །ཆོས་དབྱིངས་འཕེལ་འགྲིབ་མེད་པའི་ཕྱིར། །གཞི་ལས་གཡོས་པ་རྡུལ་ཙམ་མེད། །རྟོགས་པ་ཡིན་བཞིན་ནོར་བུ་ལས། །ཆེ་བའི་ཆེན་པོར་རྩལ་འབྱིན་པའི། །རྟོགས་པའི་ངང་གནས་དགོངས་པ་ཡི། །ཉམས་རྟགས་མཚོན་པའི་མེ་ལོང་འདི། །ངོ་མཚར་རྨད་བྱུང་རིན་ཆེན་གཏེར། །དུས་གསུམ་བདེ་གཤེགས་རྒྱལ་བ་ཡི། །ཐུགས་དགོངས་མཁྱེན་པ་ཡེ་ཤེས་མཆོག །འདི་ལ་བརྟེན་ལ་ཚད་ལ་ཕོབ། །རྒྱལ་བའི་དགོངས་པ་ཐུགས་ཀྱི་བཅུད། །བསྟན་པའི་ཡང་སྙིང་ངོ་མཚར་འཕྲུལ། །རྣ་བརྒྱུད་ཉམས་ཀྱི་སྒྲོན་མ་འདི། །རྣལ་འབྱོར་དགོངས་པ་མཐར་ཕྱིན་ཤོག །དགེ་བས་འགྲོ་ཀུན་བྱང་ཆུབ་སྨོན། །བསམ་གཏན་ཉམས་ཀྱི་སྒྲོན་མ་ཞེས་བྱ་བ་བསྒྲུབ་པའི་གྲོགས་མཆོག་རྫོགས་སོ། །རྒྱ་གར་གྱི་མཁན་ཤྲཱི་སིདྷས། བོད་ཀྱི་ལོ་ཙཱ་དགེ་སློང་བཻ་རོ་ཙ་ནས་ཞུས་ཞིང་བསྒྱུར་ཏེ། གཏན་ལ་ཕབས་པའོ།། །།དགེའོ། །དགེའོ།། །།

རྫོགས་པ་ཆེན་པོ་བསམ་གཏན་སྤྱི་འགྲེལ། ཀཿདམ་པ།

རྫོགས་པ་ཆེན་པོ་བསམ་གཏན་སྤྱི་འགྲེལ་བཞུགས་སོ། །ཀཿདམ་པའི་གསུང་། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཀུན་མཁྱེན་ཉིད་ལ་ཕྱག་འཚལ་ནས། །རྫོགས་སངས་རྒྱས་དང་དམ་པ་ཡི། །ལུང་དང་དགོངས་པའི་མན་ངག་ལས། །རྣལ་འབྱོར་བསམ་གཏན་སྤྱི་འགྲེལ་བཤད། །སེམས་ཉིད་ནོར་བུ་རིན་པོ་ཆེ། །ཕྱོགས་དང་རིས་སུ་མ་ཆད་པས། །འཁོར་དང་མྱ་ངན་འདས་པའི་ཆོས། །ཅི་ལྟར་དམིགས་ཤིང་བསམ་པར་སྣང་། །དེ་དག་རང་བཞིན་ཅི་ལྟ་བར། མཁའ་དང་འཇའ་སྣང་ཇི་བཞིན་ཏེ། །འཁྲུལ་པའི་སེམས་རྒྱུད་ཐ་དད་ཀྱང་། །རིགས་རྒྱུད་མེད་ཕྱིར་དབྱེ་བར་དཀའ། །མོས་པའི་སྐལ་ལྡན་གཞུག་བྱའི་ཕྱིར། །བསམ་གཏན་འཇུག་རིམ་མདོ་ཙམ་ཞིག །ལུང་དང་དགོངས་པའི་མན་ངག་ལས། །བརྟེན་ནས་རྟོགས་ལྡན་བདག་གིས་བཤད། །འཇུག་དང་བརྟག་དང་སྣང་དང་བཅོས། །མི་མཐུན་ལམ་དུ་བསླང་བ་དང་། །སེམས་ཀྱི་སྒྲོ་འདོགས་བཅད་པ་དང་། །ལྷུན་གྲུབ་རྒྱ་ཡན་བདལ་ཁྱབ་ལ། །དབང་བསྒྱུར་ངོ་བོ་ཉིད་སྐུ་འཐོབ། །གཡོ་ཐོབ་གོམས་པའི་འཕེལ་རིམ་གྱིས། །ལྷུན་གྲུབ་རིན་ཆེན་གཏན་དབབ་པས། །སྐལ་ལྡན་རྣལ་འབྱོར་དོན་ཆེན་རྫོགས། །དང་པོའི་ཐབས་ཀྱང་འདི་ལྟ་སྟེ། །བླ་མ་ལུང་དང་བྱིན་རླབས་ལྡན། །དགའ་རབ་རྡོ་རྗེ་མན་ཅད་ནས། །པདྨའི་རྒྱལ་པོ་ལ་སོགས་ཀྱི། །དགོངས་པའི་དོན་ལ་འདྲིས་པ་དེ། །སྟོན་པ་ཀུན་གྱི་ངོ་བོ་ལས། །དཀའ་བས་དང་དུ་བླང་བར་བྱ། །ལྷུན་གྲུབ་བྱང་ཆུབ་རིན་པོ་ཆེ། །མཐའ་རྣམས་ཀུན་དང་ཡོངས་བྲལ་བས། །མཚན་མའི་ཚུལ་གྱིས་མི་གོས་ཀྱང་། །ཐམས་ཅད་མ་འདྲེས་ཡོངས་རྫོགས་ཤིང་། །བསྟན་སྲུང་དམ་ཅན་མཉེས་པ་དང་། །ལས་ཀྱི་སྒྲིབ་པ་སྦྱང་བའི་ཕྱིར། །གཞུང་བཞིན་ཚོགས་དང་གཏོར་མས་མཆོད། །ཀུན་གྱིས་བྱིན་གྱིས་རློབ་པར་གྱུར། །གཉིས་པའི་དོན་ཡང་འདི་ལྟ་སྟེ། །ལུང་ལྡན་བླ་མའི་སྤྱན་སྔ་རུ། །རིགས་ངེས་དད་ལྡན་ཤེས་རབ་སྤྱན། །ལས་དང་ཐུགས་རྗེས་འཕྲད་རུང་བས། །ལུས་བསྲང་དཀྱིལ་ཀྲུང་དྲང་འདུག་སྟེ། །ལྷུན་གྲུབ་རིན་ཆེན་སེམས་འདི་ལ། །རློམ་བཅས་ང་རྒྱལ་ཡོངས་སྤངས་ཏེ། །དམ་པའི་ལུང་བཞིན་འདི་ལྟར་བལྟའ། །ཡུལ་དང་གནས་དང་མཚན་ཉིད་ལ། །ཤེས་རབ་སྤྱན་གྱིས་ལེགས་པར་བལྟ། །ས་དང་ཆུ་དང་མེ་དང་རླུང་། །སྲ་དང་གཤེར་དང་ཚ་དང་གཡོ། །རིན་ཆེན་སེམས་ལ་ལེགས་བལྟས་ན། །མཚན་ཉིད་དེ་ལྟར་མི་འདུག་པས། །སེམས་ལ་འབྱུང་བའི་དངོས་པོ་མེད། །འབྱུང་བ་ཉིད་ལས་དེ་བཙལ་ན། །དེའང་སེམས་ཀྱི་རྟེན་མེད་འགྱུར། །དེ་ལྟར་ཡང་ཡང་བལྟས་པའི་ཚེ། །འབྱུང་སེམས་འབྲེལ་མེད་རྟོགས་པ་འཆར། །འདོད་དང་གཟུགས་དང་གཟུགས་མེད་ཁམས། །མཚན་ཉིད་གསུམ་དུ་སྣང་བ་ལ། །གོང་བཞིན་ཡང་དང་ཡང་བལྟས་ན། །སེམས་ལའང་ཁམས་གསུམ་མཚན་ཉིད་མེད། །ཁམས་གསུམ་ལ་ཡང་སེམས་མི་གནས། །དེ་ལྟར་ཡང་དང་ཡང་བལྟས་ན། །སེམས་ཉིད་ཁམས་ལ་མི་གནས་པའི། །རྟོགས་པ་མངོན་དུ་འཆར་བར་འགྱུར། །གཟུགས་དང་སྒྲ་དང་དྲི་དང་རོ། །དེ་བཞིན་རེག་པའི་བྱེ་བྲག་ལྔ། །མཚན་ཉིད་ལྔ་རུ་སྣང་བ་དེ། །སེམས་ལ་དེ་དག་བཙལ་གྱུར་ན། །མཚན་ཉིད་དེ་དག་རྙེད་མི་འགྱུར། །ཡུལ་ལ་སེམས་དེ་མི་རྙེད་པས། །ཡུལ་སེམས་འབྲེལ་མེད་རྟོགས་པ་འཆར། །རྟོག་པ་གཡོ་བའི་ཉམས་ཞེས་བྱ། །དེ་ནས་གནས་ལ་བལྟ་བྱ་སྟེ། །སྤྱི་བོ་ནས་ནི་རྐང་མཐིལ་བར། །ཤ་དང་ཁྲག་དང་རུས་པ་དང་། །ཆུ་རྒྱུས་དབང་པོའི་ཚོགས་རྣམས་དང་། །ཕྲ་རགས་བ་སྤུ་ཡན་ཆད་དུ། །སེམས་འདི་ཡང་དང་ཡང་བཙལ་ན། །མ་བརྟག་རིམ་པོར་གནས་པའི་ཚེ། །གནས་པ་ལྟ་བུར་སྣང་བ་ལ། །ངེས་པར་ཞིབ་ཏུ་དབྱེ་བའི་ཚེ། །ཤེས་རབ་སྤྱན་གྱིས་མངོན་སུམ་ལ། །གང་ནའང་མི་གནས་རྟོགས་པ་འབྱུང་། །ཡང་ཡང་རྟོགས་པ་བརྟན་པའི་ཚེ། །ལྷན་ཅིག་གཅེས་པའི་ཕུང་པོ་འདི། །དུར་ཁྲོད་ལྟར་སྣང་ཞེན་པ་ལྡོག །དཔྱོད་པ་ཐོབ་པའི་ཉམས་ཞེས་བྱ། །སེམས་ཉིད་རང་གི་མཚན་ཉིད་ལ། །དཔྱོད་པའི་ཐབས་ཀྱང་འདི་ལྟ་སྟེ། །དཀར་པོ་ལ་སོགས་ཁ་དོག་དྲུག །སེམས་ལ་ཡང་ཡང་བལྟ་བྱས་ནས། །དྲུག་པོ་གང་དུ་མི་སྣང་བས། །སེམས་ལ་ཁ་དོག་མེད་པར་རྟོགས། །ཁ་དོག་ལ་ཡང་སེམས་མི་གནས། །རིང་ཐུང་ལ་སོགས་ལྟོས་པ་བཞི། །གྲུ་བཞི་ལ་སོགས་རང་བཞིན་བཞི། །དེ་དག་སེམས་ལ་བཙལ་གྱུར་ན། །སེམས་ལ་དབྱིབས་ཀྱི་དངོས་པོ་མེད། །སེམས་ཉིད་དབྱིངས་སུ་མི་སྣང་ཞིང་། །དབྱིབས་བརྒྱད་ལ་ཡང་སེམས་མི་གནས། །དབྱིབས་སུ་མི་སྣང་རྟོགས་པ་འབྱུང་། །ཕོ་མོ་མ་ནིང་ལ་སོགས་པའི། །རིགས་ཀྱི་མཚན་མར་བཏགས་པ་རྣམས། །སེམས་ལ་བལྟས་ན་གང་ཡང་མེད། །དེ་ལྟར་ཡང་ཡང་བལྟ་བྱས་ན། །རིགས་དང་བྲལ་བའི་རྟོགས་པ་འཆར། །ལུང་ལས་ཀྱང་ནི་འདི་སྐད་དུ། །སེམས་ཀྱིས་སེམས་བཙལ་སེམས་མ་རྙེད། །དེ་ལས་སེམས་དོན་གཅིག་རྙེད་པ། །དོན་གྱིས་དོན་རྙེད་སེམས་ལ་གཏུགས། །སེམས་དག་གར་རྙེད་གཏེར་གྱི་མཆོག །ཡང་། སེམས་ཀྱི་མཚན་ཉིད་བཙལ་ཀྱིས་མ་རྙེད་དེ། །གཞན་ལ་འདི་འདྲ་ཞེས་ནི་བསྟན་དུ་མེད། །ཡང་། ཚིག་གིས་མི་ཕོབས་དབྱིབས་དང་ཁ་དོག་དབང་པོའི་སྤྱོད་ཡུལ་མིན། །བསྟན་ཅིང་བརྟག་པར་དཀའ་ལ་བརྗོད་པའི་ཐ་སྙད་རྣམས་དང་བྲལ། །ཞེས་གསུངས་སོ། །སེམས་ཀྱི་རང་བཞིན་སྤྲོས་བྲལ་བ། །ཡུལ་ལ་མི་གནས་རྟེན་དང་བྲལ། །དེ་བཞིན་རང་གི་མཚན་ཉིད་མེད། །དེ་ལྟར་རྟོགས་པའི་ཉམས་བྱུང་ན། །དཔྱོད་པ་བརྟན་པའི་ཉམས་ཞེན་བྱ། །བསམ་གཏན་གསུམ་པ་བསྟན་པ་ནི། །སེམས་ཀྱི་རང་བཞིན་འོད་གསལ་བ། །མཉམ་བཞག་ཚེ་ན་འབྱུང་བ་སྟེ། །མཉམ་ཉིད་ཡུལ་བྲལ་ཏིང་འཛིན་ལ། །མ་ཡེངས་ངང་གིས་གནས་པར་བྱ། །སྐྱེས་བུ་རབ་ཀྱི་སྤྱོད་ཡུལ་ཡིན། །འབྲིང་གིས་སེམས་ཉིད་འོད་གསལ་ལ། །ཡུལ་དང་ཤེས་པའི་ཚུལ་དུ་མཐོང་། །དེ་ལ་དེ་བཞིན་གནས་པར་བྱ། །ཐ་མས་རྟོག་པའི་ལྷད་བྲལ་བའི། །མི་གཡོ་ཙམ་དུ་གནས་པ་རྙེད། །རང་གསལ་གནད་དུ་མ་ཕེབས་ཀྱང་། །དེ་ལྟ་ཉིད་ལ་གནས་པར་བྱ། །ཕྱི་ནང་གཡེང་བས་མ་གོས་པའི། །གནས་སུ་ཡང་ཡང་བསྒོམ་པར་བྱ། །བཞི་པའི་དོན་ཡང་འདི་ལྟ་སྟེ། །བསམ་གཏན་སྐྱོན་གྱི་བྱེ་བྲག་གི། །བྱིང་བ་དང་ནི་རྒོད་པའོ། །དེའང་བྱེ་བྲག་གཉིས་གཉིས་ཏེ། །བྱིང་བ་དང་ནི་རྨུགས་པ་དང་། །དེ་བཞིན་རྒོད་དང་འཕྲོ་བའོ། །མཉམ་བཞག་ངང་ལ་གནས་པའི་ཚེ། །འདུ་ཤེས་མེད་པར་མ་གྱུར་ལ། །འདུ་ཤེས་རྗེས་སུ་མ་འབྲངས་ཀྱང་། །འོད་གསལ་ཏིང་འཛིན་མི་གསལ་བ། །བྱིང་བ་ཞེས་སུ་ཐ་སྙད་འདོགས། །ཇི་སྲིད་མཉམ་པར་བཞག་པའི་ཚེ། །གསལ་བའི་འདུ་ཤེས་འགགས་ནས་ནི། །ཐིམ་པ་བཞིན་དུ་ཟབ་པ་དེ། །རྨུགས་ཞེས་བྱ་བར་ཐ་སྙད་འདོགས། །དེ་ཉིད་ཏིང་དུ་གྱུར་པ་ལ། །སྐལ་བ་དམན་པའི་གང་ཟག་གིས། །འབྲས་བུའི་དོན་དུ་མཐོང་བ་ན ། །འདུ་ཤེས་མེད་པའི་ཁམས་སུ་ལྟུང་། །ཤེས་རབ་སྤྱན་དང་བྲལ་བ་ཡིན། །སེམས་ཉིད་འོད་གསལ་ཆེན་པོ་ལ། །རང་གསལ་མཉམ་པར་བཞག་པའི་ཚེ། །རྟོག་པ་རགས་པའི་རི་བོས་ནི། །རླུང་གིས་མར་མེ་བསད་པ་བཞིན། །རང་གསལ་ཡེ་ཤེས་རྒྱུན་བཅད་ནས། །རྒོད་ཞེས་བྱ་བར་ཐ་སྙད་འདོགས། །ཅུང་ཟད་ཏིང་འཛིན་མ་བྲལ་བར། །རླུང་གིས་མར་མེ་གཡོས་པ་བཞིན། །འཕྲ་བའི་རྟོག་པ་བྱུང་བ་ན། དེ་ལ་འཕྲ་བ་འཕྲོ་ཞེས་བྱ། །དེའི་བྱེ་བྲག་འདི་ལྟ་སྟེ། །འདུ་བྱེད་མང་པོའི་ཁྱད་པར་གྱིས། །རྩོལ་བ་ཆེད་དུ་བསམས་པ་དང་། །སྔོན་གྱི་བག་ཆགས་གོམས་པ་ཡིས། །མ་བསམས་འདྲིས་པའི་དྲན་པ་འབྱུང་། །མ་བསམས་བག་ཆགས་མ་འདྲིས་ཀྱང་། །གློ་བུར་སེམས་ཀྱི་རྟོག་པ་འབྱུང་། །ཆེད་འགའ་རྟོག་པ་འཕྲ་རགས་ཞིག །བྱུང་བའི་དུས་སུ་མ་ཚོར་ཡང་། །ཡང་དག་ཡིད་འཕྲོག་གཟོད་ན་ཚོར། །རྟོག་པ་འཕྲ་རགས་དེ་དག་གིས། །དགོངས་པ་ཆོས་དབྱིངས་མཛོད་དཀྱིལ་ནས། །རང་བྱུང་ཡེ་ཤེས་ནོར་འཕྲོག་པས། །འཕྲ་རགས་རྐུན་བུ་ཞེས་སུ་གྲགས། །འདི་དག་རྗེས་སུ་འབྲངས་པ་ན། །སྐྱེ་ཤི་གནས་སུ་ཡུན་རིང་བས། །མཁས་ལ་སྒྲིན་བས་ནན་ཏན་བྱ། །སྐྱོན་གྱི་ཚོགས་རྣམས་བཅོས་པ་ཡང་། །བྱིང་དང་རྨུགས་པ་བསལ་བ་ནི། །རྟག་ཏུ་བླ་མ་བསྟེན་བྱས་ལ། །བྱིན་རླབས་ཚོགས་ཆེན་བསག་བྱས་ཏེ། །གཟུ་ལུམ་མངོན་པའི་ང་རྒྱལ་དང་། །རས་ཆོད་ཆེར་འགེབས་ཁོང་རྟིང་ཡང་། །རབ་ཏུ་གུས་པའི་ཚུལ་གྱིས་སུ། །བླ་མའི་གདམས་ངག་བསྟེན་པར་བྱ། །ཟབ་མོའི་བཀའ་ལ་ཐོས་བསམ་བྱ། །ཉམས་པ་བསྐང་བཤགས་དད་པས་བསང་། །ཤེས་རབ་སྐས་ཁུང་གསིང་བསྟོད་ཅིང་། །རྒྱལ་བ་སྲས་དང་བཅས་པ་ཡི། །ཆེ་བའི་ཡོན་ཏན་རྒྱུན་དུ་བསམ། །དེས་ནི་སྐྱོན་ཚོགས་ཞི་བར་འགྱུར། །རིན་ཆེན་རིག་པ་མ་ཡེངས་ན། །སྐྱོན་ཚོགས་དེ་དག་འབྱུང་མི་འགྱུར། །རྟོག་ཚོགས་བཅོས་ཐབས་འདི་ལྟ་སྟེ། །ཤེས་རབ་ལྡན་པའི་སྐྱེས་བུ་ཡིས། །མཁས་ལྡན་ཆེན་པོའི་སྤྱན་སྔ་རུ། །རིག་པ་གནད་ཆོད་ཡུལ་བྲལ་ན། །ཕྲ་རགས་རྟོགས་པ་རྩ་བྲལ་ནས། །བྱང་ཆུབ་སེམས་སུ་གནད་ཆུད་ནས། །རང་བྱུང་ཡེ་ཤེས་ཉིད་དུ་ཐིམ། །རེ་དོགས་བྲལ་བས་མཁའ་བཞིན་འགྱུར། །དཔེར་ན་ཁང་པ་སྟོང་པ་ལ། །བདག་པོ་རེ་དོགས་བྲལ་བ་ལྟར། །སེམས་ཉིད་སྟོང་པའི་གཞལ་ཡས་ན། །རང་བྱུང་རིག་པ་རེ་དོགས་བྲལ། །ཡང་ན་མཁའ་སྤྲིན་ཅི་བཞིན་ཏེ། །ཀུན་གཞི་སྟོང་པའི་ནམ་མཁའ་ལ། །ཕྲ་རགས་རྟོག་པ་སྤྲིན་སྣང་ཡང་། །སྟོང་ཉིད་ལས་བྱུང་སྟོང་པར་སྣང་། །ཐ་མར་སྟོང་པའི་ངང་དུ་ཞི། །འབྱུང་འཇུག་བྲལ་བའི་རྟོགས་པ་འཆར། །ཡང་ན་ཆུ་ལ་ཉ་འཕྱོ་བ། །ཅི་ལྟར་འཕྱོས་ཀྱང་གཤོར་མི་འདའ། །ཀུན་གཞི་སྟོང་པའི་རྒྱ་མཚོ་ན། །ཕྲ་རགས་དྲན་པ་ཉ་ལྟར་འཕྱོ། །གང་ལྟར་གྱུར་ཀྱང་སྟོང་མི་འདའ། །རང་བྱུང་འོད་གསལ་ཉིད་དུ་ཤར། །ཡང་ན་མཛོད་ཀུན་སྐྱེས་བུ་དེ། །ངོས་ཟིན་ཙམ་གྱིས་གནོད་པ་མེད། །དེ་བཞིན་རྐུན་བུ་འཕྲ་རགས་ཀྱང་། །སྟོང་པར་ཤེས་ན་ཉེས་པ་མེད། །ལུང་ལས་ཀྱང་ནི་འདི་སྐད་དུ། །རྣམ་པར་རྟོག་པའི་མཚན་མ་ཅི་བྱུང་ཡང་། །རྟོག་པ་དེ་ཉིད་ཆོས་དབྱིངས་ཡིན་ཤེས་ན། །ཆོས་ཀྱི་དབྱིངས་ནི་གཞན་དུ་བསྒོམ་མི་དགོས། །ཡང་༴ མ་བསམས་མ་སྦྱངས་ཆོས་བཞིན་དུ། །རྣམ་རྟོག་ཉིད་ལ་ཡེ་ཤེས་སྐྱེ། །ཞེས་པ་ལ་སོགས་རྒྱུད་ལས་གསུངས། །སེམས་ཉིད་འོད་གསལ་ཆེན་པོ་ལ། །ཅི་སྲིད་མཉམ་པར་བཞག་པའི་ཚེ། །ཕྲ་རགས་སྐྱོན་སོགས་བྱུང་བ་ན། །དང་པོར་ཡང་དག་མི་འཕྲོགས་ཀྱང་། །དེ་ནས་ཡེ་ཤེས་གཉེན་པོས་ཟིན། །སྐད་ཅིག་སྔ་ཕྱི་བྱེ་བྲག་ལ། །རྣམ་པར་རྟོག་པ་སྔོན་དུ་བྱུང་། །ཡེ་ཤེས་ཆེན་པོ་ཕྱི་ནས་ཤར། །འཕྲ་རགས་སྐྱོན་ཚོགས་ཡེ་ཤེས་ཤར། །སྐྱོན་བཅོས་གཡོ་བའི་ཉམས་ཞེས་བྱ། །འོད་གསལ་ཆེན་པོར་ལྷན་ནེ་བར། །གསལ་བའི་ངང་ལ་རྟོག་པ་འབྱུང་། །བྱུང་བ་ཙམ་གྱིས་དབྱིངས་སུ་རིག །ཡེ་ཤེས་ཆེན་པོ་མདུན་དུ་ཤར། །རྣམ་པར་རྟོག་པ་ཕྱི་ནས་བྱུང་། །དེ་ཡང་ཡེ་ཤེས་ཉིད་དུ་ཤར། །སྐྱོན་བཅོས་ཐོབ་པའི་ཉམ་ཞེས་བྱ། །རང་བྱུང་ཡེ་ཤེས་སེམས་དཀྱིལ་ནས། །ཕྲ་རགས་རྟོག་པ་ཅི་བྱུང་ཡང་། །རང་བྱུང་རང་སྣང་ཉིད་དུ་གསལ། །དཔེར་ན་མཁའ་ལ་ཉི་ཤར་བ། །སྟོང་གསལ་དག་ཅིང་དྲོ་བ་རྣམས། །དུས་གཅིག་མཉམ་པར་རྫོགས་པ་བཞིན། །སྣང་གསལ་དྲན་རིག་ཡེ་ཤེས་ཀློང་། །ཅིར་སྣང་འགག་མེད་འཛིན་ཆགས་མེད། །གཉིས་མེད་རིག་པས་ལྷུན་གྱིས་གྲུབ། །རྟག་ཏུ་དེ་ལྟར་གནས་པ་ནི། །སྐྱོན་བཅོས་བརྟན་པའི་ཉམས་ཡིན་པར། །ཤེས་རབ་ལྡན་པ་བདག་གིས་བཤད། །སྐྱེས་བུ་དེ་ལ་གནས་པའི་ཚེ། །མངོན་གསུམ་དག་དང་རྨི་ལམ་དུ། །སྒྲིབ་པ་དག་དང་ས་ཐོབ་པའི། །རྟགས་དང་ཅུང་ཟད་འབྱུང་བར་འགྱུར། །ལྔ་པའི་བསམ་གཏན་ཁྱད་པར་ནི། །འཇིག་རྟེན་པ་དང་གཞན་རྣམས་ཀྱིས། །འཛིན་སྤོང་འགོག་ཅིང་སྦྱོང་བ་དང་། །མཚན་མས་ལམ་དུ་བྱེད་པའི་ཆོས། །འདོད་པ་ལྔ་དང་དུག་གསུམ་དང་། །ཡུལ་དུ་གྱུར་པའི་ཆོས་ཐམས་ཅད། །ལྷུན་གྲུབ་ཡེ་ཤེས་ཉིད་ཡིན་ཕྱིར། །ལམ་ལ་གནས་པའི་རྣལ་འབྱོར་པས། །རྟོགས་པའི་ཀློང་དུ་བསླང་བར་བྱ། །གཟུགས་སོགས་འདོད་ཡོན་ལྔ་པོ་ལ། །སློབ་པའི་ཐབས་ཀྱང་འདི་ལྟ་སྟེ། །སྐྱེ་བོ་ཕལ་དང་ཐེག་དམན་པས། །ཅུང་ཟད་དབེན་པའི་ས་ཕྱོགས་སུ། །བླ་མ་རྒྱལ་མཆོག་ཚོགས་ཀྱིས་མཆོད། །མཁའ་འགྲོའི་ཚོགས་ལ་གཏོར་མ་སྦྱིན། །བདལ་ཁྱབ་མཁའ་ལ་རིག་པ་གསེང་། །མཚན་ལྡན་ཆགས་པའི་ཡུལ་བཞག་ལ། །དབང་པོའི་མིག་གིས་བལྟས་བྱས་ལ། །རྣམ་ཤེས་དྲན་པ་གསལ་བར་འཛུད། །གསལ་བ་བརྟན་པར་གྱུར་པ་དང་། །མིག་སྦྱར་ཡིད་ཡུལ་ཆོས་སུ་བྱ། །ཅུང་ཟད་གསལ་བ་བརྟན་པ་དང་། །རྣམ་རྟོག་ཡེ་ཤེས་གསལ་བ་དང་། །གཏན་ཚིགས་གོང་མ་དྲན་བྱས་ཏེ། །གསལ་ཉིད་སེམས་ཀྱི་རང་བཞིན་ལ། །སེམས་ཀྱང་དེ་རུ་གསལ་བར་ཤེས། །སེམས་དང་གསལ་བ་དབྱེར་མེད་པས། །དྲན་པའི་གཟུགས་ཉིད་ཡེ་ཤེས་ཀློང་། །ཅི་སྲིད་དྲན་པ་མ་གསལ་ན། །ཞེན་ཡུལ་གཟུགས་ལ་ཡང་ཡང་བལྟ། །སེམས་ཀྱིས་གསལ་བ་ཐོབ་པ་ན། །ཆོས་ཀྱི་གཟུགས་ཁམས་དག་པ་ཡིན། །གཟུགས་ཀྱི་གཡོ་བའི་ཉམས་ཞེས་བྱ། །དེ་ལྟར་བརྟན་པར་གྱུར་པ་དང་། །ཡུལ་གྱི་ཞེན་པའི་ཉམས་ལ་བརྟག །ཤེས་མེད་གདོས་པས་མི་མཐོང་ཕྱིར། །གཟུགས་ཉིད་ཡིད་ཀྱི་ཤེས་པ་ལ། །ཤེས་པ་ཉིད་ཀྱང་གཟུགས་ཡིན་ཏེ། །གཟུགས་དང་ཤེས་པ་དབྱེར་མེད་པས། །དྲན་པའི་རྒྱལ་པོ་ཆོས་ཀྱི་སྐུ། །འབྱེད་པ་མེད་པའི་རྟོགས་པ་འཆར། །དེ་ལྟར་ཡང་དང་ཡང་བལྟས་ན། །ཞེན་པའི་གཟུགས་དང་ཆོས་ཀྱི་གཟུགས། །དབྱེར་མེད་རང་བྱུང་ཉིད་དུ་གསལ། །གཟུགས་ཁམས་ཐོབ་པའི་ཉམས་ཞེས་བྱ། །དེ་ནས་གཟུགས་ཀྱི་ཁམས་རྣམས་ནི། །སྡུག་དང་མི་སྡུག་བར་པ་མ། །ཕྱོགས་བཅུ་ཀུན་ཏུ་བལྟ་བར་བྱ། །དྲན་པའི་ཡིད་ལ་གསལ་བ་དང་། །ནང་དུ་བལྟས་ཏེ་ཆོས་ཁམས་ཀྱི། །གཟུགས་ལ་ཡང་ཡང་བལྟ་བྱས་ཏེ། །ཆོས་ཁམས་རང་བྱུང་ཡེ་ཤེས་སུ། །སྔར་བཞིན་གསལ་བར་གྱུར་པ་དང་། །ཡུལ་གཟུགས་ཀུན་ལ་བལྟ་བར་བྱ། །ཡུལ་ཉིད་རིག་པའི་ཡེ་ཤེས་ལ། །རིག་པ་ཉིད་ཀྱང་ཡུལ་དུ་སྣང་། །ཡུལ་དང་རིག་པ་གཉིས་མེད་པས། །ཀུན་ཀྱང་རང་བྱུང་ཡེ་ཤེས་སྣང་། །དེ་ནས་ཀྱང་ནི་འདི་ལྟར་གཞལ། །སྟོང་གསུམ་ནམ་མཁའ་མུ་མེད་ཁམས། །མཐོང་དང་མ་མཐོང་ཐམས་ཅད་ཀུན། །ཡིད་ཀྱི་རིག་པས་མདུན་དུ་བྱས། །སྔར་བཞིན་རང་འབྱུང་ཡེ་ཤེས་སུ། །ཐམས་ཅད་གསལ་བར་གྱུར་པ་དང་། །མུ་མཐའ་ཡས་པའི་གཟུགས་རྣམས་ཀུན། །ཡིད་ཀྱི་རིག་པར་དབྱེར་མེད་པར། །ཀུན་ཀྱང་རང་བྱུང་ཉིད་དུ་གསལ། །འདས་པའི་ཡིད་ཀྱང་དེ་བཞིན་ལ། །མ་འོངས་པའང་དེ་བཞིན་པས། །དུས་གསུམ་སེམས་ཀྱི་རིག་པར་གསལ། །རིག་པ་དབྱིངས་དང་དབྱེར་མེད་པས། །ཆོས་རྣམས་མཉམ་པ་ཉིད་དུ་གསལ། །གཟུགས་ཁམས་བརྟན་པའི་ཉམས་ཞེས་བྱ། །འདི་ནི་རྣམ་པར་ཐར་པ་ཡིན། །དེ་ནས་སྒྲ་ཡི་ཁམས་ལ་བརྟག །ཡིད་འོང་འདོད་པའི་ཡུལ་ལས་བྱུང་། །ཟིན་དང་ཟིན་པས་བསྐྱོད་པའི་སྒྲ། །ཤིན་ཏུ་སྙན་ལ་ངོས་བཟུང་མེད། །མདུན་དུ་བྱས་ཏེ་ལེགས་པར་མཉན། །གསལ་ནས་ཡིད་ཀྱི་རིག་པས་བལྟ། །ཡིད་ཀྱི་ཡུལ་ལ་སྒྲ་སྙན་ཅིང་། །སྙན་ཉིད་ཡིད་ཀྱི་རིག་པར་ཤར། །ཡིད་དང་ཡིད་ཡུལ་དབྱེར་མེད་པས། །རང་བྱུང་རང་སྣང་ཉིད་དུ་གསལ། །དེ་ནས་བརྟན་ནས་གཡོ་བའི་ཉམས། །དེ་ནས་ཡུལ་གྱི་སྒྲ་ལ་མཉན། །དེ་ཉིད་ཡིད་ཀྱི་རིག་པ་ལ། །རིག་པ་ཉིད་ཀྱང་དེ་ཉིད་པས། །རིག་སྒྲ་དབྱེར་མེད་ཉམས་སུ་མྱོངས། །རང་གསལ་ཆོས་ཀྱི་དབྱིངས་སུ་གོ། །དེ་ཉིད་ཐོབ་པའི་ཉམས་ཞེས་བྱ། །སྒྲ་རྣམས་ཀུན་ལའང་དེ་ལྟར་བརྟག །ཟིན་དང་མ་ཟིན་སྒྲ་རྣམས་དང་། །ཟག་མེད་སྟོན་དང་ཟག་བཅས་སྟོན། །དེ་བཞིན་ཉོན་མོངས་གདུང་བ་བསྐྱེད། །སྒྲ་རུ་གྱུར་པ་ཐམས་ཅད་ཀུན། །རང་བྱུང་རིག་པས་ཉམས་སུ་བླང་། །ཐབས་ནི་གོང་བཞིན་ཤེས་པར་བྱ། །སྒྲ་ཡི་མངོན་ཞེས་ལྡོག་ནས་ནི། །རྣ་བའི་ཡུལ་རྣམས་རོ་གཅིག་འགྱུར། །རྟག་ཏུ་གསལ་ན་བརྟན་པའི་ཉམས། །དེ་ནས་དྲི་ལ་བསླབ་བྱ་སྟེ། །ཤིན་ཏུ་དགོན་པའི་ས་ཕྱོགས་སུ། །ག་པུར་ལ་སོགས་དྲི་བསྣམས་ཏེ། །དེ་ནས་ཡིད་ཀྱི་རིག་པས་བསྣམས། །གསལ་ནས་སེམས་སུ་དབྱེར་མེད་ལ། སེམས་ཉིད་ཡེ་ཤེས་རང་བཞིན་པས། །རང་བྱུང་རང་གསལ་ཡོང་གིས་མཉམ། །དེ་ནི་གཡོ་བའི་ཉམས་ཞེས་བྱ། །དེ་ནས་ཡུལ་གྱི་དྲི་ལ་བསྣམས། །དྲི་ཉིད་སེམས་ཀྱི་རིག་པ་ལ། །རིག་པ་ཉིད་ཀྱང་དྲིར་གསལ་བས། །དབྱེར་མེད་རང་སྣང་ཉིད་དུ་གསལ། །དེ་ལྟར་བརྟགས་ལ་ཐོབ་པའི་ཉམས། །དྲི་རྣམས་ཀུན་ལའང་དེ་ལྟར་བསླབ། །དྲི་རྣམས་ཐམས་ཅད་ཡེ་ཤེས་སུ། །རྟག་ཏུ་གསལ་བ་བརྟན་པའི་ཉམས། །དེ་ནས་རོ་ལ་འདི་ལྟར་བསླབ། །ཤིན་ཏུ་ཞིམ་པའི་རོ་མྱངས་ལ། །དེ་ནས་སེམས་ཀྱིས་མྱང་བར་བྱ། །གསལ་ཉིད་རིག་པའི་རང་བཞིན་ལ། །རིག་པ་ཉིད་ཀྱང་དེར་གསལ་བས། །རང་གསལ་ཡེ་ཤེས་ཉིད་དུ་གནས། །དེ་ཉིད་གཡོ་བའི་ཉམས་སུ་བཤད། །དེ་ནས་ཡུལ་གྱི་རོ་ལ་མྱང་། །ཡིད་ཀྱིས་མྱོང་དང་ལྗགས་ཀྱིས་མྱོང་། །རིག་པའི་ངང་དུ་དབྱེར་མེད་པ། །ཀུན་ཏུ་གསལ་ན་ཐོབ་པའི་ཉམས། །དེ་ནས་རོ་ཡི་བྱེ་བྲག་ནི། །ཐམས་ཅད་ཀུན་ལ་དེ་ལྟར་བསླབ། །རོ་རྣམས་རིག་པའི་ཁྱད་པར་ལས། །རིག་པ་ཉིད་ཀྱང་རོ་རྣམས་སོ། །ཀུན་ཀྱང་དབྱེར་མེད་ཡེ་ཤེས་དང་། །གསལ་བ་བར་ཆད་མེད་པ་ནི། །བརྟན་པའི་ཉམས་སུ་བཤད་པ་ཡིན། །རེག་བྱའི་ཁམས་ཀྱང་འདི་ལྟ་སྟེ། །ཕྱི་དང་ནང་གི་བྱེ་བྲག་ལས། །མཐུ་ཆེན་ནང་གི་ཁམས་ལ་བསླབ། །མཚན་ལྡན་ལང་ཚོ་དར་ལ་བབ། །འཁྲིག་པའི་བསྟན་ཆོས་མཁས་པ་ལ། །ཤིན་ཏུ་དབེན་པའི་ས་ཕྱོགས་སུ། །ཁྲུས་དང་རྒྱན་དང་དྲིས་བྱུགས་ཏེ། །གསང་བའི་མཁའ་ལ་གཞུག་པར་བྱ། །རང་བྱུང་ཡེ་ཤེས་གསལ་བ་དང་། །གཙུག་ཏོར་བདེ་མྱོང་བདེ་བ་གཉིས། །ཅུང་ཟད་འདྲེས་པ་གཡོ་བའི་ཉམས། །དེ་ནས་ཡང་ཡང་ཉམས་སུ་བླང་། །སེམས་ཉིད་འོད་གསལ་བདེ་ཆེན་དང་། །གཙུག་ཏོར་ལས་བྱུང་བདེ་བ་གཉིས། །བར་ཆད་མེད་པར་རོ་གཅིག་པ། །ཤིན་ཏུ་གསལ་བ་ཐོབ་པའི་ཉམས། །དེ་ལྟར་ཡང་ཡང་གོམས་བྱས་ན། །ཆུ་སྐྱེས་ཟེའུ་འབྲུ་དབུ་མ་ལ། །རྒྱལ་མཚན་རྩེ་མོ་རེག་པའི་ཚེ། །ཡིད་ཀྱི་ནམ་མཁའ་གསལ་འགྱུར་དང་། །བདེ་ཆེན་རང་བྱུང་ཡེ་ཤེས་ལ། །རོ་གཅིག་ནམ་མཁའ་ལྟ་བུར་གསལ། །འོན་ཀྱང་རྒྱ་མཚོ་ཆེན་པོ་ལ། །ཆུ་བྲན་ཐིམ་ཡང་མི་བསྐྲུན་ལྟར། །སེམས་ཉིད་འོད་གསལ་རྒྱ་མཚོ་ལ། །ཆུ་བྲན་ལྟ་བུའི་བདེ་བ་ཡིན། །བསྐྲུན་དུ་མེད་ཅིང་རོ་གཅིག་འགྱུར། །ཤིན་ཏུ་གོམས་པ་བརྟན་པའི་ཉམས། །དེ་ལྟར་འདོད་ཡོན་ལྔ་པོ་ནི། །རང་བྱུང་ཡེ་ཤེས་རྒྱན་དུ་རྫོགས། །སྣང་སྟོང་དབྱེར་མེད་མཐོང་བའི་གཟུགས། །བདེ་ཆེན་རིག་པ་ཐོས་པའི་སྒྲ། །དང་བས་ཚིམ་བྱེད་ཆོས་ཉིད་དྲི། །ཐམས་ཅད་དབྱེར་མེད་མྱོང་བའི་རོ། །མཁའ་དབྱིངས་རིག་པ་ཤར་བའི་རེག །རྣམ་འབྱོར་ཆེ་ལ་དེ་ལྟར་རྫོགས། །ལུང་ལས་ཀྱང་ནི་འདི་སྐད་དུ། །འདོད་སྤྱོད་སྙིང་རྗེས་བླན་བས་ན། །གང་དུ་དགའ་བར་བྱང་ཆུབ་སྤྱོད། །ཡང་། ཀུན་སྤྱོད་ཡོན་ཏན་རྣམ་ལྔ་ཡང། །ཆོས་ཉིད་དབྱིངས་ཀྱི་རྒྱན་ཅེས་གསུངས། །ཞེས་པ་ལ་སོགས་ཀུན་ནས་གསུངས། །མངོན་པར་ཤེས་པ་ལྔ་པོ་ཡང་། །འདོད་ལྔ་དག་པས་འབྱུང་བར་བཤད། །འདོད་སྤྱོད་རྣམ་པ་ལྔ་པོ་འདིར། །མུ་མཐའ་ཡས་པའི་ཆོས་རྣམས་ཀུན། །གང་ཡང་མ་འདུས་གཅིག་མེད་པས། །འདོད་ལྔ་ལམ་དུ་གྱུར་པ་ལ། །རང་བྱུང་ཡེ་ཤེས་འོད་གསལ་པའི། །ཀློང་དུ་མ་གྱུར་གང་ཡང་མེད། །མཁས་ལྡན་ཆེན་པོས་དེ་སྐད་བཤད། །དུག་གསུམ་ལམ་དུ་བྱ་བ་ནི། །ཞེ་སྡང་ཁོང་ཁྲོ་སྐྱེས་པའི་ཡུལ། །དེ་ལ་གཉིས་ཏེ་མ་ཧཱ་ཡོ་ག་བས་དེ་ཉིད་གཟུགས་བརྙན་དུ་བསྒོམ་པ་འོས་པའི་མཚན་མ་ཅན་དུ་ཁྱེར། འདིར་ནི་དེའི་རང་བཞིན་རང་རིག་པའི་ཡེ་ཤེས་སུ་རྟོགས་ཏེ་མདོར་ན་དུག་གསུམ་ཡང་བདག་འཛིན་ལས་བྱུང་བས་བདག་འཛིན་རྩད་ནས་དག་པས་ཡོངས་སུ་དུག་གསུམ་ལམ་དུ་བྱེད་པའོ། །ཐབས་ཀྱིས་མདུན་དུ་བྱས་ནས་ཀྱང་། །ཅུང་ཟད་བལྟས་ན་ཁོང་ཁྲོ་འབྱུང་། །ཡང་ན་ཉེས་པའི་རྒྱུ་ལ་བསམ། །ཅུང་ཟད་ཁོང་ཁྲོ་སྐྱེས་པ་ན། །ནན་གྱིས་མི་དགག་དེ་ལ་དཔྱད། །བཀག་ན་དམན་པའི་ལམ་དུ་འགྱུར། །རྟོགས་པས་མི་ཟིན་རང་རྒྱུད་ནའང་། །ཤིན་ཏུ་ཡ་ངའི་གནས་སུ་སྐྱེ། །ཤེས་རབ་ཐབས་ཀྱིས་བྱིན་རློབས་ནས། །རང་བྱུང་ཡེ་ཤེས་ལྷུན་གྱིས་གྲུབ། །ཅུང་ཟད་ཁོང་ཁྲོའི་ཞེ་སྡང་དེ། །དཔྱད་ན་རང་རིག་ཡེ་ཤེས་ཉིད། །ཆོས་ཀྱི་དབྱིངས་ལས་མི་གཞན་པས། །དེ་ཉིད་ཡེ་ཤེས་ངང་དུ་ཤར། །དེ་ལྟར་གོམས་ན་གཡོ་བའི་ཉམས། །ཡང་ནི་ཁོ་ཁྲོའི་ཡུལ་ལ་བལྟ། །ཡུལ་ཉིད་རང་རིག་ཡེ་ཤེས་ལ། །ཡེ་ཤེས་ཉིད་ཀྱང་ཡུལ་ལྟར་སྣང་། །དེ་ལྟར་གཉིས་མེད་རྟོགས་པའི་ཚེ། །ཁྲོ་བའི་ཡུལ་དང་ཁྲོ་མཁན་སེམས། །མ་བཀག་རང་བྱུང་ཡེ་ཤེས་དང་། །དེ་ཉིད་ཐོབ་པའི་ཉམས་ཞེས་བྱ། །དེ་ནས་མི་མཐུན་ཡུལ་རྣམས་ལ། །སྔོན་ལྟར་རྣམ་པར་དཔྱད་པའི་ཚེ། །ཀུན་ཀྱང་རང་བྱུང་ཉིད་དུ་གསལ། །དབྱེར་མེད་ལྷུན་གྲུབ་སྤྲུལ་པའི་སྐུ། །དགྲའ་སྡང་བྱམས་གཉེན་ཐམས་ཅད་ཀུན། །དབྱེ་བསལ་མེད་པར་ངང་དུ་ཤར། །རིག་པ་ཆོས་དབྱིངས་ངང་དུ་གསལ། །བྱམས་པས་དོན་ཉིད་རྣམ་སྦྱངས་ཕྱིར། །སྙིང་རྗེ་ཆེན་པོ་ཅིར་མི་མཛད། །དབྱེ་བསལ་མེད་པའི་བྱམས་པ་དང་། །བྱམས་པས་ཅེས་པ་ནི་ཕྱི་ནང་གི་ཆོས་ཐམས་ཅད་རང་རིག་པའི་སྙིང་པོ་བྱང་ཆུབ་སེམས་འཆོར་བའི་རྡུལ་ཙམ་ཡང་མི་དམིགས་ཏེ། དམིགས་པ་མེད་པའི་ཐུགས་རྗེའི་བདག་ཉིད་མཁྱེན་པ་རྣམ་གསུམ་དང་ལྡན་པའི་བདེ་བར་གཤེགས་པ་ཡི་ངོ་བོ་དེ་ལྟ་བུའོ། །དོན་ཉིད་ཅེས་པ་བདག་ལས་མི་གཞན་པའི་གདུལ་བྱ་རྣམས་རང་སྣང་བ་སྟེ། རྣམ་སྦྱང་ཅེས་པ་དེ་ཉིད་མི་དམིགས་པའི་ཐུགས་རྗེས་འཛིན་པའོ། །སྙིང་རྗེ་ཆེན་པོ་ཅིར་མི་མཛད་ཅེས་པ་ནི་བསད་པ་མེད་པ་རྡོ་རྗེའི་མཚོན་གྱིས་བསད་པ་ལ་བྱའོ། །མཛད་པ་མེད་པའི་སྙིང་རྗེ་ཡིན། །ཆགས་པ་གཉིས་ཀྱི་ཡུལ་བྱུང་ན། །མཐའ་རུ་མི་བཀག་ལམ་དུ་བསླང་། །ཞེན་ཡུལ་མདུན་བཞག་ཡིད་ལ་བྱ། །གསལ་ནས་སེམས་སུ་བྱུང་གདབ་ལ། །སེམས་ཉིད་རང་བྱུང་ཡེ་ཤེས་སུ། །ཤིན་ཏུ་གསལ་བ་གཡོ་བའི་ཉམས། །དེ་ནས་ཞེན་པའི་ཡུལ་ལ་བལྟ། །ཡུལ་ཉིད་ཡིད་ཀྱི་རིག་པ་ལ། །རིག་པ་ཉིད་ཀྱང་ཡུལ་སྣང་བས། །ཡུལ་རིག་དབྱེར་མེད་ཆོས་ཀྱི་དབྱིངས། །དེ་ལྟར་གསལ་བ་ཐོབ་པའི་ཉམས། །དེ་ནས་ཞེན་ཡུལ་ཀུན་ལའང་བལྟ། །ཡུལ་ཉིད་ཡིད་ཀྱི་རིག་པ་ལ། །སྔར་བཞིན་ཉམས་སུ་བླངས་པའི་ཚེ། །ཀུན་ཀྱང་རང་བྱུང་ཡེ་ཤེས་ངང་། །མུ་མཐའ་མེད་པའི་ཆོས་རྣམས་ཀུན། །དེ་རུ་མ་འདུས་གང་ཡང་མེད། །ཤིན་ཏུ་གསལ་བ་བརྟན་པའི་ཉམས། །དགེ་སྡིག་བཟང་ངན་གཙང་སྨེ་ཀུན། །དབྱེར་མེད་རྟོག་པ་མི་འཇུག་པ། གཏི་མུག་ཆེན་པོ་ཆོས་ཀྱི་སྐུ། །ཡང་ན་སྐྱེ་བུས་འདི་ལྟར་དགོངས། །རྒྱལ་བ་རྫོགས་པ་མན་ཆོད་ནས། །ན་རག་དམྱལ་བ་ཡན་ཅད་ཀྱི། །ཕྲ་རགས་བཟང་ངན་གཙང་སྨེ་དང་། །མཐོན་དམན་བྱམས་སྡང་བཟང་ངན་སོགས། །གཉིས་པར་སྣང་བའི་ཆོས་ཐམས་ཅད། །གཉིས་ཅན་ཡིད་ཀྱིས་བལྟ་བྱས་ན། །ཐམས་ཅད་རིག་གསལ་མཁའ་ལྟར་སྤངས། །རིག་བ་སྤྲོས་བྲལ་དབྱིངས་སུ་གསལ། །ཤིན་ཏུ་དག་པ་གཡོ་བའི་ཉམས། །གཉིས་ཅན་ཆོས་ཀྱང་རིག་པ་ལ། །རིག་པ་ཡང་གཉིས་ཅན་ཆོས་ལྟར་སྣང་། །དེ་བས་ཐམས་ཅད་རིག་པའི་ངང་། །རིག་པ་དབྱེར་མེད་དབྱིངས་སུ་གསལ། །ཤིན་ཏུ་བརྟན་ན་ཐོབ་པའི་ཉམས། །གཉིས་པར་སྣང་བའི་ཆོས་ཐམས་ཅད། །རྒྱ་མཚོ་འཇིངས་ཀྱི་གཟུགས་བརྙན་ལྟར། །རྟག་ཏུ་དབྱེར་མེད་རང་གསལ་ཅིང་། །མཚན་མའི་འདུ་ཤེས་མི་འཇུག་ན། །གཏི་མུག་ཆེན་པོ་བརྟན་པའི་ཉམས། །ལུང་ལས་ཀྱང་ནི་འདི་སྐད་གསུངས། །འདོད་ཆགས་ཞེ་སྡང་གཏི་མུག་ཀྱང་། །བྱང་ཆུབ་ཆེན་པོ་ལམ་ལས་བྱུང་། །ཡང་༴ འདོད་ཆགས་རང་བྱུང་གི་ཡེ་ཤེས་ཆེན་པོ་དང་། ཞེ་སྡང་རང་བྱུང་གི་ཡེ་ཤེས་ཆེན་པོ་དང་། གཏི་མུག་རང་བྱུང་གི་ཡེ་ཤེས་ཆེན་པོ་དང་། ང་རྒྱལ་རང་བྱུང་གི་ཡེ་ཤེས་ཆེན་པོ་དང་། འཕྲག་དོག་རང་བྱུང་གི་ཡེ་ཤེས་ཆེན་པོ་དང་། ཡང་༴ ཉོན་མོངས་ལྔ་དང་འཚམས་མེད་ལྔ་པོ་ཡི། །ལམ་དེར་ཞུགས་པས་མཉམ་སམ་རྒྱལ་པོ་འཐོབ། །ཡང་། ཤན་པ་སྨད་འཚོང་འཚམས་མེད་ལྔ། །ཁ་ན་མ་ཐོ་འཇིག་རྟེན་སྤོང་། །ཡོངས་སུ་རྫོགས་པ་ཆོས་ཀྱི་རྩི། །བདེ་བ་ཆེ་ལ་གཞན་མེད་དོ། །ཞེས་གསུངས་སོ། །མུ་མཐའ་མེད་པའི་འཇིག་རྟེན་ན། །མུ་མཐའ་མེད་པའི་ཆོས་རྣམས་ཀུན། །འདི་རུ་མ་འདུས་གང་ཡང་མེད། །གཏི་མུག་དབྱེར་མེད་ཆོས་ཀྱི་སྐུ། །ལྷུན་གྱིས་རྫོགས་པ་ཐུགས་ཀྱི་རྒྱན། །འདོད་ཆགས་བདེ་ཆེན་ལོངས་སྤྱོད་སྐུ། །བདེ་བ་ཆེན་པོ་སྐུ་ཡི་རྒྱན། །ཞེ་སྡང་འགག་མེད་སྤྲུལ་པའི་སྐུ། །ཐུགས་རྗེ་ཆེན་པོ་རོལ་པའི་རྒྱན། །ང་རྒྱལ་འགྱུར་མེད་མཉམ་པའི་རྒྱན། །ཅིར་ཡང་མི་གཡོ་ཏིང་འཛིན་རྒྱན། །འཕྲག་དོག་མ་གོས་རྡོ་རྗེའི་སྐུ། །མཐའ་བཞི་བྲལ་བས་འཕྲིན་ལས་རྒྱན། །དེ་བས་རྒྱན་གྱི་སྐུ་ལྔར་གྲགས། །དུག་ལྔ་རང་རྒྱུད་འཁྲུལ་པའི་ཁམས། །དག་པ་ཆེན་པོ་ཡེ་ཤེས་དང་། །དབྱེར་མེད་བདེ་ཆེན་ངོ་བོའི་སྐུ། །ཐམས་ཅད་ཆོས་ནི་གཅིག་པུ་ཉིད། །མཁས་ལྡན་ཆེན་པོས་དེ་སྐད་བཤད། །སྣང་སྲིད་ལམ་དུ་བསླང་བ་ཡང་། །ཡུལ་ཁམས་ཀུན་ལ་བལྟ་བྱས་ན། །དེ་ནས་ཡིད་ཀྱི་ཁམས་ལ་བལྟ། །ཆོས་ཁམས་ཐམས་ཅད་གསལ་བ་དང་། །ཆོས་ཉིད་མཁའ་རུ་བྱིན་བརླབས་ནས། །གསལ་ལ་མི་འགོག་ལྷན་ནེ་འབྱུང་། །རོ་གཅིག་བདེ་ཆེན་དབྱིངས་སུ་རྫོགས། །སྣང་སྲིད་ལམ་གྱུར་གཡོ་བའི་ཉམས། །དེ་ནས་ཆོས་ཀྱི་ཁམས་ལ་བལྟ། །དབང་ལྔའི་ཡུལ་དུ་གྱུར་པ་ཡི། །ནམ་མཁས་བསྡུས་པའི་ཆོས་ཐམས་ཅད། །རང་རིག་ཤེས་པ་ཉིད་དུ་གསལ། །རིག་པ་ཉིད་ཀྱང་ཆོས་སུ་སྣང་། །ཆོས་དང་རིག་པ་དབྱེར་མེད་པས། །ཐམས་ཅད་མཉམ་པའི་ངང་དུ་གསལ། དཔེར་ན་རྒྱ་མཚོ་དངས་པ་ལ། །སྐར་ཚོགས་གཟུགས་བརྙན་མང་སྣང་ཡང་། །ཉིད་ལས་མི་གཞན་ས་ལེར་སྣང་། །དེ་བཞིན་སྣང་བའི་ཆོས་རྣམས་ཀུན། །ཆོས་དབྱིངས་དང་བའི་དཀྱིལ་འཁོར་ན། །མ་འདྲེས་ཡོངས་སུ་རྫོགས་པར་གསལ། །ཀུན་ཏུ་ལྷམ་མེར་གྱུར་པ་ནི། །སྣང་བ་ཐོབ་པའི་ཉམས་ཞེས་བྱ། །དེ་ནས་སྲིད་པའི་ཆོས་ཐམས་ཅད། །རྣ་བའི་དབང་ལ་གྲགས་སོ་ཆོག །སེམས་ཀྱི་རིག་པས་མངོན་དུ་བྱ། །རིག་པ་དབྱིངས་དང་དབྱེར་མེད་པས། །དངོས་པོ་ཀུན་ཀྱང་དེ་ལྟར་རོ། །སྣང་བ་རྒྱ་མཚོ་ཆེན་པོ་བཞིན། །མི་རྟོག་རྣམ་མཁའི་མཁའ་ལྟར་ཡངས། །རྟག་ཏུ་ལྷམ་མེར་གསལ་བ་ན། །སྣང་བ་བརྟན་པའི་ཉམས་ཞེས་བྱ། །འདི་ཉམས་ཐོབ་བ་ཕྱིན་ཅད་དུ། །ཕལ་ཆེར་འབྱུང་འཇུག་མེད་པ་ཡིན། །འོན་ཀྱང་བསྙེམས་པ་མི་འཆང་བར། །དམ་པའི་བླ་མ་བསྟེན་བྱས་ལ། །དཀའ་བའི་ཚོགས་ཀྱིས་མཉེས་བྱས་ལ། །ཤིན་ཏུ་རྣལ་འབྱོར་ཐེག་ཆེན་ལ། །ཐོས་བསམ་སེམས་ཀྱི་མདུད་པ་བཀྲོལ། །སྐྱེ་བོས་དབེན་པའི་དགོན་པ་བསྟེན། །བླ་མ་བསྙེན་དང་དགོངས་བརྩོན་དང་། །དགོན་པ་བསྟེན་པ་མ་གཏོགས་པ། །བརྩོན་དང་དམ་བཅས་ཐམས་ཅད་འདོར། །དམ་བཅས་འཆིང་བའི་མདུད་པ་ལ། །བརྩོན་བཅས་ཕལ་ཆེར་བདུད་ཀྱི་ལས། །འབྱུང་འཇུག་མེད་པའི་ཏིང་འཛིན་ནི། །བརྩོན་བྱ་བརྩོན་བྱེད་ཡུལ་དང་བྲལ། །ནམ་མཁའ་མཐའ་མེད་དག་པ་བཞིན། །རང་བྱུང་འོད་གསལ་ནམ་མཁའ་ཆེ། །དམ་བཅའ་ཞེན་པའི་མདུད་པ་བྲལ། །འདི་ལས་གོམས་པར་མ་གྱུར་ན། །འདི་ཉིད་ཟག་བཅས་བསམ་གཏན་པས། །འབྱུང་བ་ལྔ་པོ་ཞིག་གྱུར་ཚེ། །གཟུགས་མེད་ལྷ་ཡི་རིག་འཛིན་འཐོབ། །དེ་ཚེ་ཉིད་ཀྱིས་མངོན་སངས་རྒྱས། །གལ་ཏེ་རྣལ་འབྱོར་དམན་པ་ཞིག །བླ་མེད་ཐེག་པའི་སྒོ་འདི་རུ། །ཐོས་བསམ་སྦྱངས་པ་རྒྱ་ཆུང་ན། །བླ་མའི་སྟོབས་ཀྱིས་ཏིང་འཛིན་ནི། །ཤིན་ཏུ་བརྟན་པར་གྱུར་ན་ཡང་། །མཁས་ལྡན་བླ་མ་དང་བྲལ་ན། །བློན་པོ་རྒྱལ་པོས་བོར་བ་བཞིན། །ཞེར་འཛིན་བདུད་པ་མི་གྲོལ་བས། །སེམས་ཅན་གོང་མའི་ཁམས་སུ་ལྷུང་། །དེ་བས་བསྙེམས་པ་མི་འཆང་བར། །འདི་ཚོད་ཙམ་ནས་ཤིན་ཏུ་བརྩོན། །གོལ་སྒྲིབ་སྐྱོན་རྣམས་ངོས་བཟུང་མཛོད། །འཇིག་རྟེན་ངོ་དགའི་ཁར་མ་གཡེང་། །དགོན་པ་བསྟེན་པ་རྟག་ཏུ་བརྩོན། །སློང་མོ་ངལ་བའི་འཚོ་བ་དེར། །མཚན་མ་འཛིན་པའི་ཆོས་སྤྱོད་ཀྱང་། །སྙིང་རྗེས་གཞན་བཟུང་མ་གཏོགས་པ། །ལུས་ངག་ངལ་བ་ཕལ་ཆེར་སྤོངས། །རྒྱལ་བ་ངོ་དགའ་མི་མངའ་ཞིང་། །དམ་པས་འཚོགས་པ་མི་བསྟེན་པས། །རྒྱལ་མཆོད་བླ་མ་མཉེས་བྱ་བ། །མི་ནུས་ཡེངས་ལ་ཅི་ནུས་མཛོད། །དམ་པའི་ཞལ་གྱི་བདུད་རྩི་ཡིན། །འདི་ཚོད་ཙམ་གྱི་ཏིང་འཛིན་ལ། །ཕྱི་ནང་དྲོད་ཀྱང་ཅུང་ཟད་འབྱུང་། །འཁོར་བའི་ཆོས་ལ་ཞེན་པ་ལྡོག །རང་གནས་ཡུལ་འཁོར་མི་ཆགས་ཤིང་། །ཟས་སྐོམ་འཚོ་བ་སྤང་བར་འགྱུར། །འདོད་དང་གཡེང་བ་ཆུང་འགྱུར་ཞིང་། །མཚན་མའི་ཆོས་ལ་མི་མོས་ཤིང་། །བླ་མེད་ཐེག་པའི་དོན་ལ་མོས། །འཇིག་རྟེན་གཡེང་བ་མི་དགའ་ཞིང་། །སེམས་ཅན་ཀུན་ལ་སྙིང་རྗེ་འབྱུང་། །གཏི་མུག་འཐིབས་པའི་གཉིད་རྟོག་ཚོམས། །ཁམས་ཀྱི་ནད་རྣམས་སྲབ་པར་འགྱུར། །བགེགས་ཀྱིས་བར་དུ་གཅོད་པ་མེད། །ལྷ་སྲིན་ཀུན་གྱིས་བསྐུར་བར་འགྱུར། །གཞན་གྱི་བར་ཆོད་གྱུར་པ་ཀུན། །དེས་བསལ་ཙམ་གྱིས་མྱུར་དུ་ཞི། །རྨི་ལམ་ཆོས་རྣམས་ཐམས་ཅད་ཀུན། །སྒྱུ་མའམ་ཆུ་ཟླ་ལྟ་བུར་རྨི། །བདེར་གཤེགས་རྒྱལ་བ་རྨི་བ་དང་། །ཞིང་ཁམས་གཞན་དུ་འགྲོ་བ་དང་། །ནམ་མཁའ་རི་རབ་སྐས་ལ་འཛེག །དེ་ལ་སོགས་པ་མཚན་མའི་རྟགས། །ས་ཐོབ་སྒྲིབ་སྦྱང་ཡེ་ཤེས་སྐྱེ། །ལྟས་རྣམས་མདོ་རྒྱུད་གཞན་དུ་གཟིགས། །དྲུག་པའི་དོན་ཡང་འདི་ལྟ་སྟེ། །རྣལ་འབྱོར་མངོན་དུ་མ་གྱུར་ཀྱང་། །བག་ལ་ཉལ་བའི་མདུད་པ་ཡིས། །ལྷུན་གྲུབ་མངོན་དུ་མི་འགྱུར་བས། །རྣམ་པར་ཐར་པའི་བྱེ་བྲག་གིས། །བསམ་གཏན་སྒྲོ་འདོགས་བཅད་པ་གཅེས། །རྣམ་གྲངས་བརྒྱ་སྟོང་ཕྲག་ཡངས་པ། །གང་ལྟར་བསྐྱེད་ཀྱང་མེ་ཏོག་སྐྱེ། །སྐྱེ་བོས་དབེན་པའི་ས་ཕྱོགས་སུ། །གཅིག་པུ་ཉམས་ཀྱི་དོན་ལ་དཔྱད། །བག་མེད་ཅ་ཅོ་ཡོངས་སྤངས་ནས། །ཤེས་རབ་ཅན་གྱིས་འདི་ལྟར་བལྟ། །དུས་བཞི་མཉམ་པའི་ཐར་པ་ནི། །འཇིག་རྟེན་འདི་དང་ཕྱི་མ་དང་། །རྨི་ལམ་དང་ནི་དཀྱིལ་འཁོར་མོས། །དེ་བཞིན་དག་པ་འཕགས་པའི་ཞིང་། །གང་སྣང་གཞན་གྱིས་དབེན་པའི་ཕྱིར། །ཡིད་ཤེས་རིག་པའི་ཁྱད་པར་སྣང་། །རྨོངས་ལ་ཅིག་ཆར་འཚོགས་པ་མེད། །དེ་ཕྱིར་དེ་དག་རང་གི་སེམས། །སེམས་ཉིད་རང་བྱུང་ཡེ་ཤེས་པས། །ཐམས་ཅད་མཉམ་པ་ཉིད་དུ་གསལ། །ལུང་ལས། རང་སེམས་རྒྱུན་ལས་འཕགས་པའམ། སྐྱེ་བོའི་ཆོས་ནི་གཞན་ན་ཡོད་མ་ཡིན། །རྒྱུ་དྲུག་རིགས་ལས་དེའང་སྣ་ཚོགས། །དེ་དག་རང་གི་ཏིང་འཛིན་ནོ། །སེམས་རྒྱུན་དེ་ནི་ཕྱོགས་དང་ཅུང་ཟད་མེད་པས་ཅིག་ལ་རྟེན་མེད་དེ། དེ་ལ་ཕྱོགས་མེད་ཕྱིར་ན་མཐའ་ཡས་ཞིང་རྣམས་བདག་གི་ལུས། བདག་གི་ལུས་ནི་མཐའ་ཡས་ཞིང་དང་སྐྱེ་བོའི་ལུས་སུ་རབ་སྣང་ཡང་། ཞེས་གསུངས་སོ། །དུས་བཞི་མཉམ་པའི་རྣམ་པར་ཐར་བའོ། །རྩལ་དྲུག་རྫོགས་པའི་རྣམ་ཐར་ནི། །རིག་པ་ཕྱོགས་དང་བྲལ་བའི་ཕྱིར། །མདུན་དུ་བལྟ་སྟེ་རྒྱབ་ཏུ་བལྟ། །དེ་ནས་གཡས་དང་གཡོན་དུ་བལྟ། །དེ་ནས་སྟེང་དང་འོག་ཏུ་བལྟ། །ཕྱོགས་དྲུག་རིག་པས་དུས་གཅིག་བལྟ། །ཡང་ཡང་བྱས་ཏེ་གོམས་པ་ན། །ཉི་མ་མཁའ་ལ་ཤར་བ་བཞིན། །ཕྱོགས་བཅུ་འཇིག་རྟེན་ཐམས་ཅད་ཀུན། །རིག་པ་ཕྱོགས་བྲལ་དུས་ཅིག་གསལ། །མཐའ་དབུས་བྲལ་བའི་བསམ་གཏན་ནི། །ཤར་སོགས་ཕྱོགས་ཅིག་ཡིད་ལ་བྱ། །ནམ་མཁའི་མཐའ་འདི་ཡོད་མེད་བརྟག ། ཡོད་པ་ཉིད་ཀྱང་མི་རིགས་ལ། །དེ་བཞིན་མེད་པའང་རིགས་མ་ཡིན། །ཤེས་རབ་སྤྱན་གྱིས་བལྟས་པའི་ཚེ། །འཁྲུལ་པའི་ཞེན་པ་ལྡོག་ནས་ནི། །ཡེ་ཤེས་ལྷམ་མེར་གནས་པར་འགྱུར། །དེ་ནས་ཕྱོགས་བརྒྱད་ཀུན་ཏུ་བལྟ། །ཡང་ཡང་དཔྱད་ན་གོང་བཞིན་འགྱུར། །དེ་ནས་སྟེང་འོག་ཕྱོགས་བཅུར་བལྟ། །མཐའ་འདི་ཡོད་དམ་མེད་ཞེས་བརྟག །ལེགས་པར་དཔྱད་པར་གྱུར་པའི་ཚེ། །ཡོད་མེད་གང་ཡང་མ་ཡིན་པའི། །རྟོགས་པ་མངོན་དུ་ཤར་བར་འགྱུར། །དེ་ལྟར་ཡོད་མེད་མཐའ་བྲལ་ན། །དབུས་འདི་ཅི་ལྟར་ཡིན་སྙམ་ན། །དབུས་ཀྱང་ཡིན་མིན་ཐ་སྙད་བྲལ། །ཡང་ན་རྟོགས་པ་འདི་ལྟ་བུ། །མཐའ་དབུས་བྲལ་དང་མ་བྲལ་བའི། །རྟོག་པ་དེ་ཉིད་ཆོས་ཀྱི་དབྱིངས། །རང་བྱུང་རང་གསལ་ཡེ་ཤེས་དང་། །ཆོས་ཀྱི་དབྱིངས་སུ་དབྱེར་མེད་པས། །ལྷུན་གྲུབ་ཡེ་ཤེས་མངོན་དུ་འཆར། །དེ་ལ་ཕྱོགས་ཀྱི་འོད་འདུས་པས། །ཕྱོགས་བཞི་མཚམས་དང་བླ་འོག་གྲུབ། །ཡང་ན་ཡིད་ཀྱི་ཤེས་པ་ལ། །ཕོ་བྲང་དཀྱིལ་འཁོར་ལྷུན་གྲུབ་ལྟར། །མཐར་ཐུག་མེད་པའི་འཇིག་རྟེན་ཁམས། །རིག་པའི་ངང་དུ་ལྷུན་གྱིས་གྲུབ། །རིག་པ་ཉིད་ཀྱང་ཆོས་ཀྱི་དབྱིངས། །དེ་ལ་མཐའ་དབུས་ཞེན་པ་བྲལ། །དུས་གསུམ་མཉམ་པའི་ཐར་པ་ནི། །ཐོག་མའི་དུས་དང་ཐ་མའི་དུས། །ད་ལྟར་སྣང་བའི་དུས་དང་གསུམ། །རིག་པའི་ངང་ལ་ཅིག་ཏུ་རྫོགས། །འདས་པ་འགགས་ཀྱང་མངོན་གསལ་ཞིང་། །མ་འོངས་མ་སྐྱེས་མངོན་དུ་གསལ། །དངོས་པོར་ཡོད་མེད་དེ་གསལ་བས། །ད་ལྟར་སྣང་བའི་ཆོས་ཐམས་ཅད། །དངོས་མེད་རིག་པའི་དཀྱིལ་འཁོར་ཏེ། །རིག་ཉིད་དབྱིངས་དང་དབྱེར་མེད་པས། །ཐམས་ཅད་ཆོས་སྐུ་ཆེན་པོའི་ངང་། །དུས་གསུམ་གཅིག་སྟེ་ཁྱད་པར་མེད། །སྔོན་མེད་ཕྱིས་མེད་གདོད་ནས་བྱུང་། །ཆོས་སྐུས་ཁྱབ་པས་ཅིག་པའི་ཕྱིར། །ཆེ་བས་ཆེན་པོའི་རང་བཞིན་གནས། །ཡང་། དུས་གསུམ་དུས་མེད་རྟོགས་པ་པོ། །ཞེས་གསུངས་སོ། །ཐོག་མཐའ་དབྱེར་མེད་རྣམ་ཐར་ནི། །ཐོག་མ་མེད་པ་དུས་ཀྱི་ཚེ། །མ་རིག་ཡེ་ཤེས་དབྱེར་མེད་ལས། །བརྟགས་པ་འཁྲུལ་པའི་ཤེས་པ་འབྱུང་། །སྐད་ཅིག་རྨི་ལམ་ཡུན་རིངས་ཀྱི། །ལོ་འམ་སྐལ་པར་སྣང་བ་བཞིན། །རིག་པ་འཁྲུལ་པའི་ཤེས་པ་ཡིས། །ཐོག་མ་ནས་བཟུང་ཐ་མའི་བར། །འཁྲུལ་པའི་རྒྱུ་ལ་གནས་པར་འགྱུར། །ཐོག་མཐའ་རྒྱུན་འཛིན་ཤེས་པ་དེ། །རིག་པ་ཉིད་ཡིན་དེ་ཡང་དབྱིངས། །དབྱེར་མེད་མཉམ་པ་ཆོས་ཀྱི་སྐུ། །འདས་དང་མ་བྱོན་ད་ལྟར་གྱི། །ཐ་སྙད་མིང་ལ་མི་གནས་ཏེ། །སྐྱེ་འགག་མེད་པར་རྣམ་བརྟགས་ཤིང་། །འདི་ཉིད་དུས་གསུམ་ཆེན་པོར་སྦྱོར། །ཞེས་གསུངས་དེ་ཉིད་རྟེན་དུ་གྱུར་པའི་ཚེ། །སྔོན་གྱི་གནས་དང་ཕྱི་མའི་གནས། །འཆི་འཕོ་སྐྱེ་བ་ཐམས་ཅད་ཀུན། །སྐད་ཅིག་སྔ་ཕྱི་དྲན་པ་ལྟར། །ལྷམ་མེར་གསལ་སྐལ་པ་དཔག་ཏུ་མེད་པའི་སྔོན་དུ་ཅི་ལྟར་ཡིན་པ་དེ་བཞིན་དུ་འདས་པ་དང་ད་ལྟར་ཐམས་ཅད། ད་ལྟ་ཡུན་ཐུང་ངུན་གྱི་བར་སྐད་ཅིག་ལས་ཀྱི་བསམ་རྣལ་འབྱོར་པས་དྲན་པ་བཞིན་དུ་དུས་གསུམ་གྱི་ཆོས་རྣམས་ཀྱང་འགྲིབ་པ་མེད་པར་མཁྱེན་ཏེ། བའི་མངོན་ཤེས་འབྱུང་། །ཐོག་མཐའ་རྟོགས་པའི་རྣམ་ཐར་ནི། །འཇིག་རྟེན་ཐོག་མའི་ཐོག་མ་དེ། །ཡོད་པར་མི་གཤའ་མེད་མི་རིགས། །ཕྱོགས་ཅིག་ཤེས་པས་བདེ་མི་འགྱུར། །དེ་ལྟར་ཡང་ཡང་བསམས་པའི་ཚེ། །འཁྲུལ་པ་རང་ལོག་ཤེས་པ་འབྱུང་། །ཐ་མ་དེ་བཞིན་དཔྱད་པའི་ཚེ། ཡོད་མེད་མི་རིགས་སྔོན་བཞིན་འགྱུར། །ཐོག་མཐར་གྲུབ་པ་མེད་པའི་ཕྱིར། །ད་ལྟར་ཡང་མི་ངེས་སྔོན་དང་མཚུངས། །དེ་ལྟར་ཡང་དང་ཡང་དཔྱད་ན། །འཁྲུལ་པ་ཡིད་ཀྱི་ཤེས་པར་འདུས། །དེ་ཉིད་རིག་པའི་བག་ལ་ཞ། །རིག་པ་དབྱིངས་དང་དབྱེར་མེད་པས། །ཆོས་ཀུན་མཉམ་ཉིད་ལྷུན་གྱིས་གྲུབ། །ཐོག་མ་གང་ནས་བྱུང་བ་དང་། །ཐ་མ་གར་འགྲོ་ད་ལྟར་ནི། །གར་གནས་རིག་པའི་འཕྲེང་བ་སྟེ། །རིག་པ་སེམས་ཀྱི་རང་བཞིན་ལ། །སེམས་ཉིད་དབྱིངས་དང་དབྱེར་མེད་དོ། །ཡང་ན་ཐར་པ་འདི་ལྟ་བུ། །རིང་དང་ཐུང་པའི་བྱེ་བྲག་ནི། །ལྟོས་པ་ཉིད་ཀྱིས་གྲུབ་འགྱུར་ཏེ། །ལྟོས་པ་འཁྲུལ་པའི་རིག་པ་ལ། །རིག་པ་དབྱིངས་དང་དབྱེར་མེད་དོ། །གལ་ཏེ་རིང་ཐུང་མ་གྲུབ་སྙམ། །མ་གྲུབ་ཞེན་པ་མདུན་གནས་ན། །མི་རྟོག་འཛིན་པའི་མདུད་པ་ཡིན། །རྣལ་འབྱོར་རྣལ་འབྱོར་མཆོག་ཆེན་གྱིས། །དེ་ལ་གནས་པར་མ་བྱེད་ཅིག །སྐལ་པ་སྐད་ཅིག་ཚད་བསྟུང་དང་། །སྐད་ཅིག་སྐལ་པར་བསྲིང་བ་གཉིས། །དུས་ཀྱི་རྣམ་ཐར་གོམས་ལས་འབྱུང་། །ཡང་ན་ཐར་པ་འདི་ལྟ་བུ། །སྣང་སྲིད་འདི་ལྟར་སྣང་བའི་ཆོས། །བེམ་རིག་གཉིས་སུ་འཁྲུལ་པས་བརྟགས། །མཁས་ལྡན་ཆེན་པོས་དཔྱད་པའི་ཚེ། །བེམ་པོ་རིག་པའི་རང་བཞིན་ལ། །རིག་པ་དབྱིངས་དང་དབྱེར་མེད་པས། །ཐ་དད་མེད་པའི་རྟོགས་པ་འཆར། །ཡང་ན་ཐར་པ་འདི་ལྟ་བུ། །བེམས་པོ་དང་ནི་རིག་པ་ཡི། །ཁྱད་པར་གཉིས་སུ་སྣང་བའི་ཆོས། །བེམས་པོར་བརྟགས་དང་རིག་པར་བརྟགས། །གཉིས་ཀ་འཁྲུལ་པའི་སེམས་ལས་བྱུང་། །སེམས་ཉིད་ཡེ་ཤེས་རང་བཞིན་བས། །ཡང་ཡང་དཔྱད་པས་རྟོགས་གྱུར་ཚེ། །སྐམ་པ་ཆུ་དང་བྱེ་མ་གསེར། །སྣང་བ་བསྒྱུར་ནུས་ཡེ་ཤེས་འབྱུང་། །ཡང་ན་ཐར་པ་འདི་ལྟ་བུ། །བདག་གཞན་གཉིས་ཀྱི་སྣང་བ་རྣམས། །འཁྲུལ་པ་བརྟགས་པའི་རིག་པ་ལ། །རིག་པ་དབྱིངས་དང་དབྱེར་མེད་པས། །དེ་ཉིད་ཆོས་སྐུ་ཆེན་པོར་གསལ། །ཡང་ན་ཐར་པ་འདི་ལྟ་བུ། །གཞན་ཡང་བདག་གི་རིག་པ་ལ། །བདག་ཀྱང་བདག་གི་རིག་པར་གསལ། །རང་ཤེས་མཉམ་པའི་རིག་པ་དེ། །འགྲོ་དྲུག་སེམས་ཅན་ཉིད་དུ་གསལ། །འགྲོ་དྲུག་རིག་པའི་བྱེ་བྲག་རྣམས། །ཆུ་ཡི་གཉེར་མ་ཐ་དད་ཀྱང་། །རྒྱ་མཚོ་ཆེན་པོར་གཅིག་པ་བཞིན། །རིག་པ་དབྱིངས་དང་དབྱེར་མེད་ཕྱིར། །ཐམས་ཅད་ཆོས་སྐུ་ཆེན་པོར་གསལ། །ཡང་ན་ཐར་པ་འདི་ལྟ་བུ། །བདག་ཅེས་བྱ་དང་གཞན་ཅེས་བྱ། །གཉིས་ཀ་བདག་གི་ཤེས་པ་ལས། །དེ་ཉིད་དབྱིངས་ཀྱི་རང་བཞིན་བས། །བདག་གཞན་དབྱེར་མེད་མཉམ་པར་གསལ། །དེ་དག་གདེང་དུ་གྱུར་པའི་ཚེ། །བདག་གི་ཤེས་པའི་དྲན་པ་བཞིན། །གཞན་སེམས་ཤེས་པའི་མངོན་ཤེས་འབྱུང་། །ཡང་ན་ཐར་པ་འདི་ལྟ་བུ། །ཡུལ་དང་སེམས་སུ་སྣང་བ་རྣམས། །སེམས་ཉིད་ཡུལ་སྣང་ཡུལ་ཉིད་སེམས། །མ་སྐྱེས་དབྱིངས་དང་དབྱེར་མེད་པས། །རང་བཞིན་ཆོས་སྐུ་ཆེན་པོར་གསལ། །ཡང་ན་ཐར་པ་འདི་ལྟ་བུ། །ལུས་ཉིད་རིག་པའི་ཁྱད་པར་ལས། །ལུས་ཀྱང་རིག་པའི་ཁྱད་པར་སྣང་། །གཉིས་ག་རིག་པར་དབྱེར་མེད་པས། །དེ་ཉིད་རང་གསལ་ཆོས་སྐུར་ཐིམ། །དེ་ལྟར་བསྟན་པར་གྱུར་པའི་ཚེ། །ལུས་ལ་བྱེ་བྲག་སྣ་ཚོགས་སྟོན། །མི་སྣང་བ་དང་འབྱུང་ཆེན་རྣམས། །ལུས་ལྟར་བརྡའ་སྤྲོད་གཡོ་བར་འགྱུར། །ལུས་མེད་ལུས་ཏེ་ལུས་ཀྱི་མཆོག །ལུས་ཀྱི་མཐའ་ནི་རྟོགས་པ་པོ། །ཞེས་གསུངས་སོ། །ཡང་ན་ཐར་པ་འདི་ལྟ་བུ། །འཁོར་ཚུལ་སྐྱེ་རྒས་ན་འཆི་དང་། །དམིགས་པས་བརྟགས་པའི་ཆོས་ཐམས་ཅད། །སེམས་ཉིད་འཁྲུལ་པའི་ངོ་བོ་བས། །འཁྲུལ་པ་རིག་པའི་རང་བཞིན་ལ། །རིག་པ་དབྱིངས་དང་དབྱེར་མེད་དོ། །མྱ་ངན་འདས་པའི་རང་བཞིན་ཡང་། །འཁྲུལ་ཉིད་འཁྲུལ་པར་ཤེས་པ་ལས། །འཁྲུལ་པ་རིག་ཤེས་རིག་དབྱིངས་ཤེས། །དེ་ཉིད་བརྟན་པས་མྱ་ངན་འདས། །དེ་ལྟར་འཁོར་དང་མྱ་ངན་འདས། །རྣལ་འབྱོར་རིག་པར་དབྱེར་མེད་ལ། །རིག་པ་དབྱིངས་དང་དབྱེར་མེད་པས། །མཁས་ལྡན་ཤེས་རབ་མངོན་གསུམ་དུ། འཁོར་འདས་གཉིས་བཏགས་ཐ་སྙད་བྲལ། །ཐམས་ཅད་དབྱེར་མེད་མཉམ་པའི་སྐུ། །དེ་ལྟར་གདེངས་དང་ལྡན་པའི་ཚེ། །མཐའ་ཐུག་མེད་པའི་ཞིང་ཁམས་ཀུན། །ཕྱག་མཐིལ་ལྟ་བུར་མངོན་དུ་འགྱུར། །ཡེ་ཤེས་སྤྱན་ཞེས་དེ་ལ་བྱ། །འཁོར་བ་དང་ནི་མྱ་ངན་འདས། །སོ་སོར་ཡོད་པ་མ་ཡིན་ཏེ། །འཁོར་བའི་རང་བཞིན་ཤེས་གྱུར་ལ། །མྱ་ངན་འདས་ཞེས་དེ་ལ་བྱ། །ཞེས་གསུངས་སོ། །ཡང་ན་ཐར་པ་འདི་ལྟ་བུ། །སེམས་ཅན་ཞེས་དང་སངས་རྒྱས་ཞེས། །གཉིས་སུ་བརྟག་པའི་ཆོས་འདི་ལ། །ངོ་བོ་ཉིད་ཀྱིས་དབྱེར་མེད་དེ། །དབྱིངས་དང་རིག་པ་དབྱེར་མེད་པ། །མངོན་དུ་གྱུར་པ་ཆོས་ཀྱི་སྐུ། །དེ་ལ་སངས་རྒྱས་ཞེས་སུ་བརྗོད། །ངོ་བོ་དབྱིངས་དང་དབྱེར་མེད་ཀྱང་། །མ་རིག་འཁྲུལ་པའི་རིག་པ་དེ། །དངོས་མེད་པ་ལ་དངོས་བརྟགས་པས། །ལས་གསུམ་ཉོན་མོངས་ལྔ་ལ་སོགས། །རིག་ལ་ཞེན་པས་བདག་ཏུ་བཟུངས། །སེམས་ཅན་ཞེས་སུ་ཐ་སྙད་འདོག །གང་ཡང་དབྱིངས་ལས་མི་གཞན་ཏེ། །དབྱིངས་དང་རིག་པ་དབྱེར་མེད་པས། །ཐམས་ཅད་ཆོས་སྐུ་ཆེན་པོར་འདུས། །ཡང་ན་ཐར་པ་འདི་ལྟ་བུ། །བདེ་བར་གཤེགས་ཞེས་བྱ་གདུལ་བྱའི། །སྟོན་པར་སྣང་བ་གཟུགས་ཀྱི་སྐུ། །འགྲོ་བ་བདེ་གཤེགས་གདུལ་བྱར་སྣང་། །ཐུགས་རྗེའི་ཡུལ་དང་ཐུགས་རྗེ་བདག །གང་ཡང་དག་དང་མ་དག་པའི། །རིག་པ་ཉིད་དུ་དབྱེར་མེད་ཕྱིར། །རིག་པ་དབྱིངས་དང་དབྱེར་མེད་ཡིན། །དེ་ལྟར་བརྟན་པར་གྱུར་པའི་ཚེ། །ཕྱོགས་བཅུ་དུས་བཞིའི་ཞིང་ཁམས་ཀྱི། །རྒྱལ་བ་བདག་གི་སྤྲུལ་པ་ལ། །བདག་ཀྱང་རྒྱལ་བས་སྤྲུལ་པ་ལྟར། །འབྱེད་པ་མེད་པའི་རྟོགས་པ་འཆར། །སངས་རྒྱས་སེམས་ཅན་དབྱེར་མེད་དེ། །ལམ་གྱིས་བཅོས་སུ་ག་ལ་ཡོད། །ཡང་། སངས་རྒྱས་སངས་རྒྱས་མ་ཡིན་པའི། །སེམས་ཅན་སེམས་ཀྱི་རྒྱུད་ནི་གང་ཞེས་གསུངས་སོ། །ཡང་ན་ཐར་པ་འདི་ལྟ་བུ། །གང་དུ་ལེགས་པར་དཔྱད་པའི་ཆོས། །འབྱུང་བ་བཞི་དང་ཁམས་གསུམ་དང་། །འདོད་ཡོན་ལྔ་དང་ཉོན་མོངས་ལྔ། །དཀར་པོ་ལ་སོགས་རྣམ་དྲུག་དང་། །དེ་བཞིན་རིང་ཐུང་ལ་སོགས་བརྒྱད། །རིགས་ཀྱི་བྱེ་བྲག་གསུམ་པོ་དང་། །དེ་བཞིན་འགྲོ་བ་དྲུག་རྣམས་དང་། །རྣམ་ཤེས་བརྒྱད་དང་ཚོར་བ་གསུམ། །ཡུལ་དྲུག་དུས་གསུམ་ཕྱེ་བ་ཡིས། །དྲུག་དང་དྲུག་ཕྲག་གསུམ་དུ་འགྱུར། །འདུ་ཤེས་བྱེ་བྲག་ལྔ་པོ་དང་། །དེ་བཞིན་འདུ་བྱེད་ལྔ་བཅུ་གཅིག །གཟུགས་ཀྱི་ཕུང་པོ་རྣམ་ལྔ་དང་། །འཁོར་འདས་ཆོས་སུ་གྲགས་པ་རྣམས། །གོང་བཞིན་ཡང་དང་ཡང་དཔྱད་ན། །ཀུན་ཀྱང་སེམས་ཀྱི་རིག་པ་ལ། །རིག་པ་དབྱིངས་ཀྱི་རང་བཞིན་ལས། །མ་འདྲེས་ཡོངས་རྫོགས་དགོངས་པ་འཆར། །ཐམས་ཅད་ཕྱོགས་བྲལ་ལྷུན་གྲུབ་པ། །རྣམ་པར་ཐར་པའི་བྱེ་བྲག་རྫོགས། །མཚན་མ་བཅོ་བརྒྱད་ལ་སོགས་པ། །བར་ཆད་རྣམས་ཀྱང་དེ་ལས་འབྱུང་། །དག་དང་མ་དག་བརྟགས་པ་རྣམས། །ཐམས་ཅད་དབྱིངས་སུ་རྫོགས་པའི་ཚེ། །ལྷུན་གྱིས་གྲུབ་པའི་རིག་པ་འཆར། །ལུང་ལས་ཀྱང་ནི་འདི་སྐད་དུ། །རྣལ་འབྱོར་ནམ་མཁའི་བྱ་ལམ་གནས། །མ་བྱུང་མ་སྐྱེས་སྙིང་པོ་ལ། །སྒྲོས་བཏགས་ཆོས་ཀུན་ག་ལ་ཡོད། །ཅེས་གསུངས་སོ། །ཡང་། སྤྲོ་བ་མེད་ཅིང་བསྡུ་བ་མེད། །སྟོང་པར་མི་དགོངས་གཟའ་བ་མེད། །ཅེས་པ་དང་། ཡང་། དེ་ལྟར་དུས་དང་རྣམ་པ་ཐམས་ཅད་དུ། ཉིད་ལས་མ་ཡེངས་པ་ནི་ཆོས་ཀྱི་སྐུ། །སྟོབས་སུ་གྱུར་ན་འཇིག་རྟེན་རང་བཞིན་མེད། །ཅེས་པ་ལ་སོགས་པ་གསུངས་སོ། །རྣལ་འབྱོར་བདུན་པ་འདི་ལྟ་སྟེ། །ལམ་མཐར་སོན་པའི་སྐྱེས་བུ་ལ། །དབང་པོ་ལྔ་དང་ཡུལ་ལྔ་དང་། །སྡུག་དང་མི་སྡུག་བར་པ་དང་། །ཉོན་མོངས་ལྔ་དང་བརྟགས་པའི་ཆོས། །དགེ་བ་དང་ནི་སྡིག་པའི་ཆོས། །ཕུང་པོ་གཉིས་སུ་སྣང་བ་དང་། །རྒྱུ་རྐྱེན་འཚོགས་དང་མ་འཚོགས་དང་། །འབྲས་བུ་འབྱུང་དང་འགག་པ་དང་། །ཡུལ་དང་ཞེན་པས་བཏགས་པའི་ཆོས། །ཐ་དད་གཉིས་སུ་སྣང་བ་རྣམས། །ཐམས་ཅད་རིག་པའི་ཁྱད་པར་ལས། །རིག་པའང་ཐབས་སུ་ཀུན་སྣང་བས། །མཁའ་ལྟར་ཡངས་དོག་ཀུན་དང་བྲལ། །རྒྱུ་འབྲས་སྤྲོས་པ་ངང་གིས་མེད། །གང་ལའང་བཀག་འཛིན་ཞེ་འདོད་བྲལ། །བྱ་བྲལ་རྫོགས་པའི་རྣལ་འབྱོར་ཡིན། །ཐམས་ཅད་རྫོགས་པ་སྤྱིར་ཆིབས་པ། །བརྒྱད་པའི་དོན་ཡང་འདི་ལྟ་སྟེ། །འཁོར་དང་མྱ་ངན་འདས་པའི་ཆོས། །ཀུན་གྱི་ངོ་བོ་དབྱེར་མེད་པས། །དངོས་མེད་ངོ་བོ་ཉིད་སྐུར་བརྗོད། །རང་བཞིན་མ་སྐྱེས་དོནདམ་པ། །དབྱིངས་དང་རིག་པ་དབྱེར་མེད་པས། །དེ་ཉིད་མ་བཅོས་ཆོས་ཀྱི་སྐུ། །མ་འདྲེས་འགག་མེད་ཀུན་ཏུ་སྣང་། །འགྲོ་དྲུག་འཁྲུལ་པ་སྣ་ཚོགས་ཀྱང་། །ཐམས་ཅད་མཁྱེན་པ་ཡེ་ཤེས་སྤྱན། །ཅི་ཡང་འགག་མེད་སྤྲུལ་པའི་སྐུ། །མ་བཀག་མ་སྐྱེས་དབྱེར་མེད་པས། །ལོངས་སྤྱོད་རྫོགས་པའི་སྐུ་རུ་བརྗོད། །ཐམས་ཅད་མཐའ་གཉིས་ཡོངས་བྲལ་བས། །མངོན་པར་བྱང་ཆུབ་སྐུ་རུ་བརྗོད། །འགྱུར་བ་མེད་ཅིང་འགག་པ་མེད། །དེ་ཉིད་རྡོ་རྗེ་ཡི་སྐུ་བརྗོད། །དེས་ན་སྐུ་རྣམས་ལྷུན་གྱིས་གྲུབ། །རང་སྣང་ཐུགས་རྗེའི་མཛད་པ་ཡིས། །གདུལ་བྱ་ཀུན་གྱི་རྒྱུད་རྣམས་ལ། །སྐུ་དང་གསུང་ཐུགས་ཡོན་ཏན་ལས། །ཉི་ཤུ་ལྔས་བསྡུས་མཐའ་ཡས་རྣམས། །ལྷུན་རྫོགས་རྣམ་ཀུན་མཁྱེན་པའོ། །རང་བཞིན་ལས་རྟོགས་པ། དེ་ལས་ཐུགས་རྗེ་དེ་ལས་མཛད་པ། དེ་ལས་མཐར་ཕྱིན། མཐར་ཕྱིན་པའང་རང་བཞིན་དེས་ན་མ་འདྲེས་པ་དང་། ཡོངས་སུ་རྫོགས་པ། དབྱེར་མེད་པའོ། །སྤྱིར་རྟོགས་པ་འཇུག་པའི་དུས་ན། གདེང་ངོ་བོ་ལྷུན་གྱིས་མ་གྲུབ་བར་དུ། ཉམས་གཡོ་ཐོབ་བརྟན་གསུམ། དྲོད་ཕྱི་ནང་གསང་གསུམ་གྱིས། ངོ་བོ་ཆོས་ཀྱི་དབྱིངས་ལ་འཕེལ་འགྲིབ་མེད་ཀྱང་། རྟོགས་པ་གོམས་པའི་ཉམས་ཚོད་བཟུང་ངོ་། །དགའ་རབ་རྡོ་རྗེ་མན་ཆད་ནས། །གྲུབ་པའི་སྐྱེས་བུ་ཐམས་ཅད་ཀྱི། །ཐུགས་ལ་དགོངས་པའི་མན་ངག་བཅུད། །སྐལ་ལྡན་ཐུགས་ཀྱི་གཏེར་དུ་མཛོད། །ཁོང་ན་གནས་པའི་ཡང་ཁོང་དུ། །ལྕགས་ཀྱི་སྒྲོམ་བུ་ཁ་བསྡམ་མོ། །རྒྱ་མཚོ་གཏིང་གི་ཕ་བོང་དང་། །ཆུ་སྲིན་གྲེ་བའི་རིན་ཆེན་བཞིན། །སྐལ་པར་དཀྲུགས་ཀྱང་ཁར་མི་དབྱུང་། །བཀའ་རྟགས་གསུམ་གྱིས་རྒྱས་གདབ་བོ། །བྱང་ཆུབ་སེམས་ཀྱི་འཇུག་རིམ་རྫོགས་སོ།། །། རྡོ་རྗེ་དོན་སྟོན་ལུང་གི་ལབ་དགོད་འདི། །མཁས་རྟོགས་ཉམས་ལྡན་རྩལ་ཆེན་རབ་རྫོགས་པའི། །ས་བཅུའི་སེམས་དཔའ་གཅིག་པུ་མ་གཏོགས་པའི། །ཕལ་གྱི་ཡུལ་མིན་བློས་རེག་དཀའ་བར་གསུངས། །འོན་ཀྱང་སྙིགས་མའི་གདུལ་བྱ་དཔག་མེད་རྣམས། །ས་བཅུའི་དབང་ཕྱུག་ཆེ་མཆོག་དམ་པ་ལ། །ཅིས་ཀྱང་མི་འཕྲོགས་འགྲན་པའི་སེམས་མེད་ཀྱང་། །མེས་པའི་པ་པ་བན་རྡེ་བདག་གིས་ནི། །རྗེ་བཙུན་ཞལ་གྱི་བདུད་རྩི་དམ་པ་རྣམས། །ངེས་པའི་དོན་སྟོན་ཚིག་གི་འབྲུ་མཆན་དུ། །གསུང་གི་སྒྲོས་ལྡན་བཀོད་པར་མི་ནུས་ཏེ། །དོན་གྱི་ཕྱོགས་མཐུན་ཆ་ཙམ་ཡི་གེར་བཏག ། རང་བཟོ་ལ་སོགས་གཉིས་པའི་རྩ་བར་མིན། །འོན་ཀྱང་གྲོས་སྲིད་བླ་མ་ཉིད་ལ་བཤགས། །དགེ་བའི་ཚོགས་སྣང་འདི་ཉིད་དོན་རྟོག་ཤོག །།རྣ་བར་ཐར་པའི་གྲངས་ནི། དབྱེར་མེད་པ་བཅོ་བརྒྱད། ཡུལ་འདོད་ཡོན་ལྔ། ཉོན་མོངས་པ་ལྔ། འབྱུང་བ་བཞི། ཁམས་གསུམ། ཁ་དོག་དྲུག །དབྱིབས་བརྒྱད། རིགས་གསུམ། འགྲོ་བ་དྲུག །ཕུང་པོ་ལྔ། རྣམ་ཤེས་ཚོགས་བརྒྱད་དྲུག་ཏུ་བསྡུ། །ཚོར་བ་བདེ་སྡུག་བཏང་སྙོམས་གསུམ། །འདུ་ཤེས་རྒྱ་ཆུང་ངུ་དང་། ཆེན་པོ་དང་། འབྲིང་པོ་དང་། ཚད་མེད་པ་དང་། བསམ་གྱིས་མི་ཁྱབ་པའི་འདུ་ཤེས་ཏེ་ལྔ། འདུ་བྱེད་ཀྱི་ཁམས་ལྔ་བཅུ་རྩ་གཅིག །གཟུགས་ཀྱི་ཕུང་པོའི་ཁམས་ལ་བཅོ་ལྔ་སྟེ། སྤྱིར་བརྒྱ་སུམ་ཅུ་སོ་བརྒྱད། དེ་ལ་བསམ་གྱིས་མི་ཁྱབ་པའི་འདུ་ཤེས་བྱ་བ་ཏིང་ངེ་འཛིན་རང་གི་ངོ་བོ་དེ་བཞིན་གཤེགས་པ་ལ་མངའ་བ་ཡིན། ཚད་མེད་པ་བྱ་བ་ཉན་ཐོས་ལ་ཡོད་པ་ཡིན། དེ་རྣམས་ལ་སྒྲོས་འདོགས་གཅོད་པའི་ཚུལ་ནི། གོང་ལྟར་འདོད་ཡོན་ལམ་ཁྱེར་གྱི་སློབ་པ་ལྟ་བུ་སྟེ། ཐམས་ཅད་ཀྱང་རིག་པར་བྱུང་ཐེབས་ལ། རིག་པ་ཉིད་ཀྱང་བརྟག་པའི་ཆོས་སྣ་ཚོགས་སུ་སྣང་ཡང་། རིག་པ་ཉིད་དང་དབྱིངས་ཡིན་ལ། དབྱིངས་ཉིད་རིག་པར་སྣང་བས། དབྱིངས་དང་རིག་པ་དབྱེར་མེད་པ་ནི་ཆོས་ཀྱི་སྐུའོ། །ཆེད་བྱས་དང་། ཆེད་འཛིན་དང་། ཆེད་ལྟོས་ཀྱི་མཐའ་མངོན་སུམ་དུ་མི་གསལ་ཞིང་། གབས་སུ་ཡོད་པ་ཡིན་པས། དེ་ཉིད་ཉོན་མོངས་པ་དང་། ཤེས་བྱའི་སྒྲིབ་པ་ཀུན་དུ་འགྲོ་བས། ཐར་པ་མི་འཐོབ་ཅིང་། གལ་ཏེ་ཐོབ་ནའང་། མཐས་འཆིང་བ་དང་། གལ་ཏེ་མཐས་མི་འཆིང་ནའང་། ལྷུན་གྲུབ་ཆོས་སྐུ་ལས་ཡུན་རིང་བར་གྱུར་པ་དང་། ཏིང་ངེ་འཛིན་ཡོད་སྙམ་གྱི་ང་རྒྱལ་གྱིས། ལྷག་ལུས་ཀྱིས་འབྲས་བུ་མངོན་དུ་མི་འགྱུར་བའི་སྐྱོན་དང་། འཆི་ཀ་མོ་ལ་འཇིགས་པ་དང་བཅས་པའི་སྐྱོན་རྣམས་སྒྲོ་འདོགས་པ་ལས་འབྱུང་བས། མདོ་རྒྱུད་ལ་སོགས་གཞུང་མང་པོའི་ནང་དུ། སྒྲོ་འདོགས་ཀྱི་རྣམ་གྲངས་བསམ་གྱིས་མི་ཁྱབ་པ་གསུངས་པ་དེ་རྣམས། གཅོད་པ་ཤིན་ཏུ་གལ་ཆེའོ། །སྔོན་རྒྱ་གར་དང་བོད་ཀྱི་རྒྱལ་ཁམས་སུ་གྲུབ་པ་ཐོབ་པ་གྲངས་མང་པོ་བྱུང་བ་དེ་རྣམས། རིས་མཁས་པ་ཞི་འཚོ་ལགས། དེ་བས་ད་ལྟ་ཡང་སྒྲོ་འདོགས་གཅད་པ་ལ་མཁས་པ་གཙོ་ཆེ། གོང་གི་འདོད་ཡོན་ལམ་དུ་བསླང་བ་མན་ཆད་ཀུན། སྒྲོས་འདོགས་གཅད་པའི་ཐབས་ལགས། མངོན་དུ་རྒྱུ་བ་དང་བག་ལ་ཉལ་ཡོད་པའི་ཕྱོགས་ཞེན་ཐམས་ཅད་མཚན་མའི་རྣམ་པ་ཡིན་པས་དེའི་སྒྲོ་འདོགས་བཅད་པས་དེའི་སྐྱོན་ལས། ཐར་པའི་ཕྱིར་ན། རྣམ་པར་ཐར་པ་ཞེས་བྱའོ། །སྒྲོས་འདོགས་དེ་རྣམས་མ་ལུས་པར་བཅད་ན། རྒྱ་ཡན་བྱ་བ་རང་ཤུགས་ཀྱིས་འབྱུང་བ་ཡིན། ལོགས་སུ་སློབ་པ་མ་མཆིས། ཕྱོགས་ལྟོས་ཙམ་དུ་གྲངས་བགྲང་ན། འདུ་ཤེས་ཀྱི་ལྷག་མ་ཟད་པའི་ཚེ། ལྷག་ལུས་ལ་བརྟེན་པའི་དབང་གིས། དབང་པོ་ལྔ་དང་། ཡུལ་ལྔ་དང་། རྣམ་ཤེས་ལྔ་དང་བཅོ་ལྔ་ལ། བྱེ་བྲག་ཏུ་བརྩིས་པས། སྡུག་པ་དང་མི་སྡུག་པ་དང་བར་པ་དང་གསུམ་དང་། ཉོན་མོངས་པ་ལྔ་དང་། ལས་དགེ་སྡིག་གཉིས་དང་། རྒྱུ་རྐྱེན་གྱི་ཁྱད་པར་དང་། ཞེས་པ་འགགས་པའི་ཁྱད་པར་ཏེ། བཅུ་གསུམ་པོ་དེ་དག་ནམ་མཁའ་ཉིད་དམ་ནམ་མཁའ་ལ་འབྱུང་འཇུག་དང་བྲལ་བ་བཞིན། ཐམས་ཅད་མ་འདྲེས་ལ་ཡོངས་སུ་རྫོགས་པ་དབྱེར་མེད་པས། ཆེད་བྱས་ཀྱི་རེ་འདོད་ཐམས་ཅད་དང་བྲལ་ཏེ། རང་གསལ་ཕྱོགས་དང་བྲལ་བའི་ཤེས་པ། བྱ་བྲལ་རྫོགས་པའི་སྤྱོད་པ། སྣང་གསལ་ཡེ་འཕྱོའི་ཏིང་འཛིན་དང་། རྣམ་དག་དབྱིངས་ཀྱི་ཏིང་ངེ་འཛིན་ལྷུན་གྱིས་གྲུབ་པས། འདི་དང་འདི་འོ་སྙམ་པ་འམ། སྤངས་ཐོབ་ཀྱི་རེ་འདོད་ལ་སོགས་པ། ཀུན་དང་བྲལ་བས་རྒྱ་ཡན་ཞེས་བྱ་སྟེ། རྒྱ་ལུས་ཀྱི་རྒྱ་མདུན་ཡིན། ཡན་པ་ནི་ཤེས་པ་དང་རིག་པ་ཙམ་དུ་ཡང་ཆེད་འཛིན་བྲལ་ཏེ་མཐའ་དང་བྲལ་བ་ལ་ཡན་ཞེས་བྱའོ། །ལྷུན་གྱིས་གྲུབ་པའི་འབྲས་བུ། འཁོར་བ་འདི་སྤངས་ནས་འབྲས་བུ་དག་པ་ལོགས་སུ་ཚོལ་བ་མ་ཡིན་ཏེ། འཁོར་བ་ཉིད་རང་བྱུང་ཡེ་ཤེས་ངོ་བོ་ཉིད་ཀྱི་སྐུར་ལྷུན་གྱིས་གྲུབ་པས་ལྷུན་གྱིས་གྲུབ་པའི་འབྲས་བུ་ཞེས་བྱའོ། །སྔར་སེམས་ཅན་གྱི་དུས་སུ་ནི། སེམས་ཡུལ་དང་ཡུལ་ཅན་གཉིས་སུ་བརྟགས་ཏེ། དེས་གཟུང་འཛིན་རྒྱས་ནས། ལས་གསུམ་བསགས་ཏེ་ཁམས་གསུམ་དུ་སྨིན་ཏེ། འདོད་ཁམས་པ་ཞི་གནས་ལ་རྟོག་པ་དང་། གཟུགས་ཁམས་པ་ཞི་གནས་ལ་རྟོག་པ་དང་། གཟུགས་མེད་པ་ལྷག་མཐོང་ལ་ཡུལ་དུ་འཛིན་པ་རང་ཡང་གཟུང་འཛིན་ཡིན། ཉན་ཐོས་དང་རྒྱལ་བ་བདག་འཛིན་མཁན་མེད་ཀྱང་། ཀུན་གཞི་མེད་ལ་མི་ཟད་པའི་དོན་མ་རིག་པ་དང་། ཡུལ་སེམས་ཐ་དད་དུ་འཛིན་ཏེ། གཟུང་ཡུལ་གྱི་བདག་མེད་མ་རྟོགས་པས། སྲིད་པ་ལས་ཐར་ཀྱང་དམན་པར་མཆིའོ། །བྱང་ཆུབ་སེམས་དཔའི་ཐེག་པ་ཀུན་གཞིའི་དོན་རིག་ཀྱང་། ལྟ་བསྒོམ་གྱི་ཆེད་འཛིན་དང་བཅས་པས། ཆེད་འཛིན་མ་སྤོངས་བར་སངས་རྒྱས་པ་ལ་ཡུན་རིང་ངོ་། །དེ་བས་བླ་ན་མེད་པའི་ཐེག་པ་ལ་དེ་དག་གི་སྐྱོན་མེད། འོན་ཀྱང་རྣལ་འབྱོར་པ་རང་གིས་ཕྱོགས་ཆ་ཅན་དུ་སོང་ན་སྐྱོན་ཆེན་པོ་ཡིན་ཏེ། འོག་མ་གང་གི་མུར་འགྲོ་ཡང་ཕྱོགས་ཞེན་གྱི་ཁྱད་པར་ལ་བརྩི། དེ་ནས་ལྷུན་གྱིས་གྲུབ་པའི་འབྲས་བུ་ལ། སྐུ་ལྔར་ལྡོག་ཕྱོགས་ཀྱི་བྱེ་བྲག་གིས་རྩི་ན། རིལ་གྱི་ཆོས་ལྷུན་གྱིས་གྲུབ་པས། བྱས་ཆོས་ཐམས་ཅད་དད་བྲལ་བ་ངོ་བོ་ཉིད་ཀྱི་སྐུ། རང་བཞིན་སྟོང་པ་དང་། རྩལ་མི་སྟོང་གཉིས་མཐའི་ཞེན་པ་བྲལ་བས་ཆོས་ཀྱི་སྐུ་སྟོང་ལ་སྣང་བདལ་ཁྱབ། རང་གསལ་ཐམས་ཅད་འགག་པ་མེད་པ་ལོངས་སྤྱོད་རྫོགས་པའི་སྐུ། ལམ་པ་དང་འགྲོ་དྲུག་གི་འདོད་ཕྱོགས་ལྟར་སྣང་བས་ནོར་བུ་རིན་པོ་ཆེ་རི་དབང་གི་རྒྱལ་པོ་ལྟ་བུ་སྟེ་སྤྲུལ་པའི་སྐུ། ཐམས་ཅད་དུ་དགེ་སྡིག་བདེ་སྡུག་ཞེན་ཕྱོགས་མཐོ་རིས་ངན་སོང་ཐམས་ཅད་རང་བཞིན་ལ་བྱེད་པ་པོ་མེད། རྐྱེན་ལ་བསྒྱུར་བ་པོ་མེད། དངོས་གཞི་ལ་རྫས་ཅན་མ་གྲུབ། །ཐར་པའི་དུས་ན་འགགས་མཁན་མེད། །འཁོར་བའི་དུས་ན་བསྒྱུར་བྱེད་མེད། །མྱ་ངན་ལས་འདས་པའི་ཆོས་སྐུ་ལྔ་ལྡན་གྱི་འཁོར་ལོ་ཡང་། འདས་པའི་དུས་ན་བསྒྲུབ་བྱེད་མེད། འཁོར་བའི་དུས་ན་འགོགས་མཁན་མེད་ཀྱང་། རིག་པ་རང་དང་མ་རིག་པའི་ཁྱད་པར་གྱི། ལྷུན་གྱིས་གྲུབ་པ་ནི་མངོན་པར་བྱང་ཆུབ་པའི་སྐུའོ། །འཁོར་བའི་དུས་ན་ཡང་མ་རིག་པ་གཞན་ནས་འོངས་ཏེ་མ་བཀབས། རིག་པ་གཞན་དུ་སོང་བས་བསྒྲིབས་པ་མེད། མྱ་ངན་ལས་འདས་པའི་དུས་ན་ཡང་མ་རིག་པ་སོང་ཞིང་དེངས་པ་མེད། རིག་པ་འོངས་ཤིང་རྒྱས་པ་ཡང་མེད་པས། དེ་བས་ཐམས་ཅད་ངོ་བོ་རྟོག་དཔྱོད་དང་བྲལ་བས་ངོ་བོ་ཉིད་ཀྱི་སྐུའམ་རྫོགས་པ་སྤྱིར་ཆི བས་ཀྱི་སའམ། སྣང་གསལ་ཡེ་འཕྱོའི་ཏིང་ངེ་འཛིན་ནམ་རང་རིག་ཕྱོགས་བྲལ་གྱི་རང་བྱུང་ཡེ་ཤེས་སམ། ལྷུན་གྱིས་གྲུབ་པའི་འབྲས་བུ་ཞེས་བྱའོ། །མན་ངག་གི་ཡི་གེ་འདི། འདི་ལྟར་ཉམས་བླངས་སུ་བསྡེབས་པ་དེ། དགའ་རབ་རྡོ་རྗེ་མས་ཅད་ནས། ད་ལྟ་འོ་སྐོལ་ཡས་ཆད་ལ་ཡོད་རེ་སྐན། འོན་ཀྱང་ཁྱེད་སྐྱེས་བུ་དམ་པ་ཆོས་མཛད་ཀྱི་མཆོག །འབྲས་བུ་ཆེད་དུ་གཉེར་བ། ཁོ་བོའི་སྲས་དམ་པ་ལགས་པས། ཁྱོད་ཤིན་ཏུ་གཅེས་པར་བྱས་ནས་བྲིས་པ་ལགས། ཁོ་བོ་ཤིན་ཏུ་ཐུགས་ངན་པ་ནི་མ་ལགས་ཏེ། ཐུགས་ལ་བརྣག་པའི་བཅུད་མཛད་ནས། ཤིན་ཏུ་གསང་བར་ཞུ། སྔོན་གྱི་བཀའ་བརྒྱུད་ལ་འདི་ལྟར་བསྡེབས་པ་མེད་པས། འདའ་ཀར་བབ་ཀྱང་གཏེར་དུ་སྦ་བར་རིགས། །ཉམས་ཀྱི་གདམ་ངག་བཀོལ་བའི་ལག་ལེན། གྲུབ་པ་དགོངས་པའི་བརྒྱུད་པ་ཡི་གེར་བྲིས་པ། རྫོགས་སོ།། །།

རྫོགས་པ་ཆེན་པོའི་སྤྱི་ཆིངས། ཀཿདམ་པ།

རྫོགས་པ་ཆེན་པོའི་སྤྱི་ཆིངས་བཞུགས་སོ། །རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་འབྲེལ། མན་ངག་ཐམས་ཅད་ཀྱི་ཉིང་ཁུ་བསྟན་པ་ཐམས་ཅད་ཀྱི་མཛོད་ཆེན་པོ། ཐེག་པ་ཐམས་ཅད་ཀྱི་ཡང་རྩེ། དཀྱིལ་འཁོར་ཐམས་ཅད་ཀྱི་མེ་ལོང་། དགོངས་པ་ཐམས་ཅད་ཀྱི་མཐར་ཐུག །ལྟ་སྒོམ་ཐམས་ཅད་ཀྱི་སྒྲོན་མེ། སངས་རྒྱས་ཐམས་ཅད་ཀྱི་དགོངས་པའི་སྙིང་པོ། དེ་ལྟར་ཆེ་བ་དགུ་དང་ལྡན་པའི་རྫོགས་པ་ཆེན་པོ་འདི་གཏན་ལ་འབེབ་པ་ལ། སྤྱི་དོན་རྣམ་པ་བརྒྱད་ཀྱི་སྟོན་ཏེ། རྫོགས་པ་ཆེན་པོའི་ངོ་བོ་བསྟན་པ་དང་། ངེས་ཚིག་དང་། དབྱེ་བ་དང་། རྣམ་གྲངས་དང་། ཁྱད་པར་དུ་འཕགས་ལུགས་དང་། མཚན་ཉིད་དང་། རྫོགས་ཚུལ་དང་། རྫོགས་ཆེན་རྟོགས་པའི་དགོངས་པ་དང་། འབྲས་བུ་བསྟན་པའོ། །དེ་ལ་རྫོགས་པ་ཆེན་པོའི་ངོ་བོ་ནི། ཆོས་ཐམས་ཅད་ཀྱི་དབྱིངས་སྐྱེ་བ་མེད་པ། འཁྲུལ་རྟོག་གིས་མ་བསླད་པའི་སྟོང་གསལ། རྒྱ་མ་ཆད་པ་དེ་ཉིད་ཡིན་ནོ། །ངེས་ཚིག་ནི། རྫོགས་ཞེས་པས་མ་རྫོགས་པའི་ཆོས་གང་ཡང་མེད་དེ། ཕྱི་རོལ་པ་ནས་བཟུང་སྟེ་ཐེག་པའི་རིམ་པ་ཐམས་ཅད་དང་། འཁོར་འདས་ཀྱི་ཆོས་ཐམས་ཅད་སྟོང་གསལ་ཆེན་པོར་རྫོགས་སོ་ཞེས་པ་ནི། ཆོས་ཉིད་འགྱུར་བ་མེད་པ། ཆེན་པོ་ནི་ཐེག་པ་གཞན་པས་ཆེ་བས་དགོངས་པ་ཁྱད་པར་དུ་འཕགས་སོ། །རྫོགས་པ་ཆེན་པོའི་དབྱེ་བ་ནི་གཉིས་ཏེ། གོལ་ས་མཐར་ཐུག་གི་རྫོགས་ཆེན་དང་། ཉམས་ལེན་འབྲས་བུའི་རྫོགས་ཆེན་ནོ། །གོལ་ས་ལ་གསུམ་སྟེ། ཁ་འབྱམས་བློའི་རྫོགས་ཆེན་དང་། བར་དོ་ཡོངས་གྲོལ་གྱི་རྫོགས་ཆེན་དང་། མཚན་མ་ཚིག་བྲལ་གྱི་རྫོགས་ཆེན་ནོ། །དང་པོ་ནི་རྫོགས་ཆེན་སངས་རྒྱས་ཀྱི་དགོངས་པའི་མཐར་ཐུག་ཡིན་པ་ལ། གནས་ལུགས་ཀྱི་དོན་མ་ནོར་བ་ནི་མ་རྟོགས་ཤིང་ཉམས་སུ་མ་ལོན་པས་ཁ་ཆག་ཙམ་དུ་དོན་གྱི་ཚིག་བཟང་པོ་རྣམས་ཁ་ཚིག་ཏུ་སོང་བ་ཡིན་ནོ། །གཉིས་པ་བར་དོ་རང་གྲོལ་ནི། རྫོགས་པ་ཆེན་པོའི་ལྟ་སྒོམ་བཟང་པོ་དང་། ཟབ་མོ་ཐམས་ཅད་ཉམས་སུ་ལེན་པ་ཐང་ཆད་ནས། ཆོས་ཐམས་ཅད་ཡེ་གྲོལ་དང་། རང་གྲོལ་ཡིན་པའི་གཏན་ཚིགས་དང་། ཁུངས་མང་པོ་ཁྱེར་ནས་ཉམས་སུ་མ་བླངས་པས་བྲོད་རྟགས་དང་ཉམས་མ་ཤར་བར། སངས་རྒྱས་ཡིན་ཞེས་ཟེར་ཅིང་དགེ་བ་མི་སྤྱོད། སྡིག་པ་མི་སྤང་བ་རྣམས་སོ། །དེ་ནི་ཆད་པར་ལྟ་བ་རྣམས་ཡིན་ཏེ། ལས་དགེ་སྡིག་གང་ཡང་མེད་པར་ལྟ་བ་ནི། ཚ་བའི་དམྱལ་བར་སྐྱེ་བ་ལུང་ནས་བཤད་དོ། །གསུམ་པ་མཚན་མ་ཚིག་གི་རྫོགས་ཆེན་ནི། ཚིག་ཙམ་དུ་ཆོས་ཐམས་ཅད་སྐྱེ་བ་མེད་པ་ཡིན་ཟེར་ནས། ལུང་ཁུང་མང་པོ་འདྲེན་ཅིང་ཐ་མལ་གྱི་རྣམ་རྟོག །མ་སྤངས་པར། ཆོས་ཐམས་ཅད་དངོས་པོ་དང་མཚན་མར་བཟུང་ནས་རྟོགས་ལྡན་དུ་ཁས་ལེན་པ་རྣམས་ནི་རྟག་པར་ལྟ་བ་ཡིན་ནོ། །གོལ་ན་སེམས་ཅན་དམྱལ་བ་མནར་མེད་པར་སྐྱེའོ། །གཉིས་པ་ཉམས་ལེན་འབྲས་བུའི་རྫོགས་ཆེན་ནི། སྤྲོས་བཅས་ཐབས་ཀྱི་རྫོགས་ཆེན་དང་། སྤྲོས་མེད་ཤེས་རབ་ཀྱི་རྫོགས་ཆེན་ནོ། །སྤྲོས་བཅས་ནི། ཉན་ཐོས་ཀྱི་ཐེག་པ་ནས་བཟུང་ནས། ཨ་ཏིའི་ཐེག་པའི་བར་དུ་སྤང་བླང་དགག་སྒྲུབ་ཆེ་ཆུང་མཐོ་དམན་ཕྱོགས་རིས་ལ་སོགས་པ་མེད་པར་ཐབས་སྣ་ཚོགས་ཀྱིས་ལམ་དུ་འཁྱེར་ཏེ། དེ་རྣམས་ཀྱང་མཐའ་བྲལ་སྟོང་གསལ་ཆེན་པོར་ཡོངས་སུ་རྫོགས་པར་བྱེད་པའོ། །སྤྲོས་མེད་ཤེས་རབ་ཀྱི་རྫོགས་ཆེན་ལ་གསུམ་སྟེ། གནས་ལུགས་གཞིའི་རྫོགས་ཆེན། རིམ་འཇུག་ལམ་གྱི་རྫོགས་ཆེན་དང་། །མཐར་ཐུག་འབྲས་བུའི་རྫོགས་ཆེན་ནོ། །དང་པོ་ནི། གཞི་དངོས་པོ་གཤིས་ཀྱི་དོན་དེ་ངོ་བོ་ཀ་དག །རང་བཞིན་ལྷུན་གྲུབ་ཀྱི་ངོ་བོར་གཞུགས་ཏེ། དེ་ལ་ཀ་ནས་དག་པས་འཁྲུལ་མ་མྱོང་། ཡེ་ནས་མ་བཅོས་མ་བསླད་པར་བཞུགས་ཏེ་ལྷུན་གྲུབ་ཏུ་གནས་སོ། །ངོ་བོ་རང་བཞིན་ཐུགས་རྗེ་གསུམ་དང་སྐུ་ལྔ་ཡེ་ཤེས་ལྔ་དང་། མ་སྤངས་མ་འདྲེས་པར་ཡོངས་སུ་རྫོགས་པར་གནས་སོ། །དེ་རྟོགས་པ་ནི་ལམ་མ་བསྒྲོད་པར་དབང་པོ་རྣོན་པོས་རྟོགས་པ་ཙམ་གྱིས་སངས་རྒྱས་སོ། །རིམ་འཇུག་པ་ནི་ལམ་རིམ་གྱིས་པ་དང་། ཅིག་ཆར་དུ་འཇུག་པ་གཉིས་ལས། དང་པོ་ནི་དབང་དང་དམ་ཚིག་ཐོབ་པར་བྱས་ཏེ། སེམས་འཛིན་དང་། བསམ་གཏན་དང་། སྒོམ་པ་ཏིང་ངེ་འཛིན་ལ་རིམ་གྱིས་བསླབས་ཏེ། དེ་ནས་སངས་རྒྱས་ཀྱི་ད གོངས་པ་མཐར་ཐུག་པའི་དོན་རྣམས་རྫོགས་པར་བྱེད་པའོ། །ཅིག་ཅར་བ་ནི་གསུམ་སྟེ། སྐྱོན་བྲལ་ཡོན་ཏན་གྱི་རྫོགས་ཆེན་དང་། མཚན་མ་ཚིག་བྲལ་གྱི་རྫོགས་ཆེན་དང་། སྟོང་གསལ་དོན་གྱི་རྫོགས་ཆེན་དང་གསུམ། དང་པོ་ནི་ཐོས་བསམ་སྒོམ་གསུམ་གྱིས་བློའི་སྒྲོ་འདོགས་བཅད་དེ། དེ་ནས་ལྟ་བ་ཕྱིན་ཅི་མ་ལོག་པར་རྟོགས། སྒོམ་པས་ཉམས་སུ་བླངས། སྤྱོད་པས་བོགས་འདོན་ཏེ་ལ་ཟླའོ། །རྟག །ཆད། བྱིང་། རྒོད། བླང་། དོར། རེ་དོགས་གོལ་སྒྲིབ་ཐམས་ཅད་ཀྱི་མཐའ་དང་བྲལ་ཏེ། སངས་རྒྱས་ཀྱི་དགོངས་པ་མཐར་ཐུག་པ་ཕྱིན་ཅི་མ་ལོག་པ་མཐའ་བྲལ་ཡོངས་སུ་རྫོགས་པའི་ངང་ལ་གནས་པ་ནི། སྐྱོན་ཐམས་ཅད་དང་བྲལ་ཏེ་ཡོན་ཏན་རྫོགས་པའོ། །མཚན་མ་ཚིག་བྲལ་ནི། ཕྱི་ནང་གི་ཆོས་ཐམས་ཅད་ཆོས་ཀྱི་དབྱིངས་སྐྱེ་འགག་མེད་པ་ཐིག་ལེ་ཉག་གཅིག་ཏུ་རྟོགས་པ་ནི་ཚིག་དང་ཡི་གེ་ལས་འདས་ཏེ། མཚན་མའི་དངོས་པོ་གང་ཡང་མ་གྲུབ་པའོ། །སྟོང་གསལ་དོན་གྱི་རྫོགས་ཆེན་ནི། སྣང་ཞིང་སྲིད་པའི་ཆོས་ཐམས་ཅད་བྱང་ཆུབ་སེམས་ལས་བྱུང་ཞིང་སེམས་སུ་འདུས་ཏེ། བྱང་ཆུབ་སེམས་ནི་རིག་པའི་ཡེ་ཤེས་ཡིན། རིག་པའི་ཡེ་ཤེས་དེ་ནི་རྒྱུད་ལུང་མན་ངག་གིས་གཏན་ལ་ཕབ་པའི་དུས་ན་ངོ་བོ་དང་དབྱིངས་དང་ཁ་དོག་འཁོར་འདས་ལ་སོགས་པ་གང་ཡང་མ་གྲུབ་པར་སྣང་བ་རང་སྣང་། ཤར་བ་རང་ཤར། རང་བྱུང་རང་གྲོལ་ཏུ་གནས་ཏེ། དེ་ཉིད་སྐྱོན་ཡོན་ཐམས་ཅད་ཀ་ནས་དག་སྟེ། རེ་དོགས་ཀྱི་མཐའ་ཐམས་ཅད་ལས་འདས་ཤིང་གང་གི་ངོ་བོར་ཡང་མ་གྲུབ། སྟོང་ཞིང་གསལ་ལ་གང་གིས་ཡང་མི་དམིགས་པས། བདེ་ཞིང་རྟོག་མེད་དུ་གནས་པ་དེ་ཉིད་དུ་མ་འདུས་པའི་ཆོས་གང་ཡང་མེད་དོ། །སྟོང་ཞིང་གསལ་བ་བྱང་ཆུབ་སེམས། །སངས་རྒྱས་ཀུན་གྱི་སྙིང་པོ་ཡིན། །ཞེས་སོགས་རྫོགས་པ་ཆེན་པོའི་རྣམ་གྲངས་ནི། སྤྱིར་རྫོགས་ཆེན་ལ་སྡེ་ཆེན་པོ་གསུམ། ཀློང་ཆེན་པོ་དགུ། བམ་པོ་ཁྲི་ཆིག་སྟོང་། རྒྱུད་སྡེ་ཁྲི་ཕྲག་གཅིག །མཆོང་ཆེན་པོ་བརྒྱད་ཅུ། གཟེར་ཆེན་པོ་ལྔ་བརྒྱ་དང་བརྒྱད་ཅུ། གནད་ཀྱི་གདམས་ངག་ཁྲི་དྲུག་སྟོང་། ངོ་སྤྲོད་སྟོང་དང་དགུ་བརྒྱ། ལ་བཟླ་བའི་གདམས་ངག་ཁྲི་ཕྲག་གསུམ། ཤན་འབྱེད་ཀྱི་གདམས་ངག་སྟོང་ཕྲག་དགུ །ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི་བཞུགས་སོ།། །།ཀཿདམ་པས་གསུངས་སོ།། །།

རྫོགས་ཆེན་ལྟ་སྤྱོད་སྒོམ་པ་དམ་ཚིག་འབྲས་བུ་དང་བཅས་པ། ཀཿདམ་པ།

རྫོགས་ཆེན་ལྟ་སྤྱོད་སྒོམ་པ་དམ་ཚིག་འབྲས་བུ་དང་བཅས་པ་བཞུགས་སོ། །ཀཿདམ་པ་རིན་པོ་ཆེའི་གསུངས་ཡིན། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ལྷུན་གྱིས་གྲུབ་པའི་འབྲས་བུ། ཐོབ་བྱ་དག་གི་རང་བཞིན། དབང་ཕྱུག་ཆེན་པོ་ཡི་དགོངས་སྤྱོད། །མཐའ་བྲལ་ལྷུན་རྫོགས་ཀྱི་ལྟ་བ། །ཤེས་རབ་དཔྱོད་བྲལ་གྱི་ཏིང་ངེ་འཛིན། བྱ་བྲལ་ལྷུན་རྫོགས་ཀྱི་སྤྱོད་པ། ཐེག་པ་ཀུན་གྱི་ཡང་རྩེ། རྫོགས་པ་ཆེན་པོའི་དོན་འདི་ལ་རྣམ་པ་བཞི་སྟེ། དང་པོ་ལྟ་བས་མཐའི་ཐག་གཅད་པ་དང་། སྒོམ་པས་ཉམས་སུ་བླང་བ་དང་། གོལ་སྒྲིབ་གདལ་ཤ་གཅད་པའི་ངོས་ནས། དགོངས་སྤྱོད་ལྷུན་རྫོགས་པ་དང་། སྤང་ཐོབ་དང་བྲལ་བའི་འབྲས་བུ་ལྷུན་གྱིས་གྲུབ་ལུགས་སོ། །དེ་ཡང་དང་པོ་ལྟ་བས་མཐའི་ཐག་གཅད་པ་ནི། ལུང་ལས། སྒྱུ་མ་རྣམ་གཉིས་སྤྱོད་ཡུལ་ནི། །སེམས་ཉིད་ཆོས་དབྱིངས་ངང་དུ་གཅིག །ཅེས་པ། སྤྱིར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སེམས་ཀྱི་རང་བཞིན་དུ་གཅིག་པར་ལ་བཟླ་སྟེ། དེ་ཡང་གཅིག་པའི་ཚུལ་ནི། སེམས་ཀྱི་རང་བཞིན་དུས་གསུམ་འདུས་མ་བྱས་པ། བདལ་བ་ཆེན་པོ་ཡེ་ནས་ལྷུན་གྱིས་གྲུབ་པ་སྟེ། ངོ་བོ་ཆོས་ཀྱི་སྐུ་ཡིན་པས། །དེ་རྟོགས་པ་ལ་ནི་ཆོས་ཀྱི་སྐུ་ཞེས་བྱ་སྟེ། ཆོས་ཀྱི་དབྱིངས་ཅི་ལྟ་བ་མངོན་དུ་གྱུར་པ་ནི་ཅི་ལྟ་བ་མཁྱེན་པའི་ཡེ་ཤེས་ཞེས་བྱའོ། །དེ་ཉིད་ཀྱང་མི་འགག་པའི་རྩལ་རང་སྣང་བ་ལ་ནི། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་ལ་སོགས་པ་བསམ་གྱིས་མི་ཁྱབ་པར་ཡང་སྣང་ཞིང་། གདུལ་བྱ་སོ་སོའི་བྱེ་བྲག་གིས་ནི། མེ་ལོང་ལྟ་བུའི་ཡེ་ཤེས་དང་། །སོ་སོར་རྟོགས་པའི་ཡེ་ཤེས་ལ་སོགས་པ། གདུལ་བྱ་གཟིགས་ཚུལ་བསམ་གྱིས་མི་ཁྱབ་པར་ཡང་སྣང་ངོ་། །དེ་དག་ལ་ནི་ཡེ་ཤེས་སྒྱུ་མའི་སངས་རྒྱས་ཞེས་ཀྱང་བྱའོ། །ཆོས་ཀྱི་དབྱིངས་ཀྱི་ལྟ་བ་དེ་མེད་ལ་མི་ཟད་པའི་རང་བཞིན་ཡིན་པ་ལས། བདག་མེད་པའི་ཕྱོགས་གཅིག་རྟོགས་པས་ཀྱང་སྲིད་པ་ཡོངས་སུ་ཟད་ནས། ཉན་ཐོས་དང་རང་རྒྱལ་བའི་བྱང་ཆུབ་ཐོབ་པར་བྱེད་དོ། །དེའི་ཕྱིར་ན་མྱ་ངན་ལས་འདས་པའི་ཆོས་ཐམས་ཅད་ཀྱང་། སེམས་ཆོས་ཀྱི་དབྱིངས་རྟོགས་པ་ལས་འབྱུང་ཞིང་། ཆོས་ཀྱི་དབྱིངས་ཀྱི་རང་བཞིན་དུ་གནས་པས། ཡེ་ཤེས་སྒྱུ་མའི་སངས་རྒྱས་སེམས་སུ་གཅིག་ཅེས་བྱའོ། །འོ་ན་འཁོར་བའི་ཆོས་ཐམས་ཅད་ཚུལ་ཅི་ལྟར་དབྱིངས་སུ་གཅིག་ཅེ་ན། འཁོར་བའི་ཆོས་ཐམས་ཅད་ནི་སེམས་ཀྱི་དབྱིངས་མ་རྟོགས་པའི་སྣང་བ་ཡིན་ཏེ། དེ་ཅི་ལྟར་མ་རྟོགས་ཤེ་ན། སེམས་ཀྱི་རང་བཞིན་ངོས་བཟུང་ཐམས་ཅད་དང་བྲལ་བ་ཡེ་ཅི་བཞིན་པ་དེ་ནི། བློ་ཡི་རྟོགས་པའི་ཡུལ་མ་ཡིན་པའི་ཕྱིར་ན། ལས་ཀྱིས་བསྐྱངས་པས་ཡང་དག་པའི་བཤེས་གཉེན་དང་། ཕྲད་པའི་སྐལ་བ་མེད་དེ། དེའི་ཕྱིར་ཤེས་བྱ་ཅི་ལྟ་བ་ལ་ཁ་མ་བལྟས་པས་མ་རྟོགས། ཡིད་ཀྱི་ཤེས་པ་སྐད་ཅིག་མ་ལས་བྱུང་བའི་ཆོས་ཡུལ་དང་ཡུལ་ཅན་དབང་པོར་བཅས་པའི་རྗེས་སུ་འབྲང་ཞིང་། དགེ་སྡིག་གི་བག་ཆགས་སྣ་ཚོགས་པ་བསགས་ཏེ། དབྱིངས་ལས་མི་གཞན་བཞིན་དུ་རྟགས་དང་མཐུ་བརྟས་པས། འདོད་ཁམས་གནས་རིས་ཉི་ཤུར་སྐྱེ་བར་བྱེད་དོ། །སེམས་ཀྱི་རང་བཞིན་མ་རྟོགས་ན། ཡུལ་དབང་པོ་རྗེས་སུ་མ་འབྲང་ཡང་། ཡིད་ཀྱི་ཤེས་པ་སྐད་ཅིག་མའི་མཚམས་ལ། རྟོག་པ་འགོག་ཅིང་དཔྱོད་པ་དང་བཅས་པ་མཐུ་བརྟས་པའི་ཁྱད་པར་ལས་གཟུགས་ཁམས་སུ་སྐྱེའོ། །སེམས་ཀྱི་རང་བཞིན་མ་རྟོགས་པས། །སེམས་ལ་དཔྱོད་དེ་ཡོད་པའི་འདུ་བྱེད་དང་། མེད་པའི་འདུ་བྱེད་དང་། གཉིས་ག་མ་ཡིན་པའི་འདུ་བྱེད་དང་། སྟོང་པའི་འདུ་བྱེད་བཞི་མཐུ་བརྟས་པའི་དུས་ན་སེམས་ཀྱི་རང་བཞིན་ནི་མ་རྟོགས། དཔྱོད་པའི་འདུ་བྱེད་མཐུ་བརྟས་པས་སྐྱེ་མཆེད་མུ་བཞིར་འབྱུང་ངོ་། །དེ་ཐམས་ཅད་ལ་ནི་ལོག་རྟོགས་སྒྱུ་མའི་སེམས་ཅན་ཞེས་བྱ་སྟེ། སེམས་ཆོས་ཀྱི་དབྱིངས་མ་རྟོགས་པའི་རྟོག་པ་དང་། དཔྱོད་པ་དང་། དམིགས་པའི་ཁྱད་པར་ལས་བྱུང་བའི་ཕྱིར། འཁོར་བའི་ཆོས་ཀྱང་སེམས་ལས་བྱུང་ཞིང་སེམས་སུ་འདུས་ཞེས་བྱའོ། །དེ་ལྟར་འཁོར་འདས་གཉིས་སུ་སྣང་བའི་དུས་ན་ཡང་། སེམས་ཉིད་ཆོས་ཀྱི་དབྱིངས་ལས་གཉིས་སུ་འགྱུར་བ་མེད་དོ། །འོ་ན་ད་ལྟར་གཉིས་སུ་སྣང་བ་འདི་ཅི་བཞིན་ཡིན་ཞེ་ན། རྟོགས་པ་དང་མ་རྟོགས་པའི་ཁྱད་པར་ཙམ་སྟེ། གཏན་ནས་གཉིས་སུ་འགྱུར་བ་མེད་དོ། །གཉིས་སུ་སྣང་བ་འདི་ངོ་བོ་ཆོས་ཀྱི་སྐུ་ལས་ཐ་དད་པར་འགྱུར་བ་མེད་པ་སྟེ། དེ་བཞིན་གཤེགས་པའི་ཅི་ལྟ་བ་མཁྱེན་པའི་ཡེ་ཤེས་ཀྱི་དགོངས་པ་ལ་ནི། འཁོར་བའི་ཆོས་རྡུལ་ཕྲ་བ་གཅིག་གམ། འཇག་མིག་གི་སྲིན་བུ་གཅིག་ལོགས་སུ་བསལ་བ་མེད་པར་ཆོས་ཀྱི་སྐུ་ཡིན། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ཡིན། བདལ་ཁྱབ་ཆེན་པོ་ལྷུན་གྱིས་གྲུབ་པ་ཡིན་ནོ། །སེམས་ཅན་གྱི་ལོགས་རྟོག་གི་བསམ་པ་ལ་ནི། ཐམས་ཅད་ཀྱང་ཕུང་པོ་ལྔ་ཡིན། འབྱུང་བ་ལྔ་ཡིན། བརྟགས་པའི་ཤེས་པ་ཉོན་མོངས་པ་ལྔ་ཡིན། ཁམས་གསུམ་ཡིན། སྐྱེ་འགག་གི་ཆོས་ཅན་སྣ་ཚོགས་པ་ཡིན། བེམས་པོ་ཡིན། རིག་པ་ཅན་ཡིན། ཕན་དང་གནོད་པ་ཅན་ཡིན། ཡུལ་དང་ཡུམ་ཅན་ཡིན་བདེ་བ་དང་སྡུག་བསྔལ་བ་ལ་སོགས་པ་མཚན་མར་བརྟགས་པའི་ཆོས་ཐམས་ཅད་ཡིན་ནོ། །ལུང་ལས་ཀྱང་། ཆོས་ཉིད་དེ་ལ་དེ་འཁྲུལ་ཡུལ་དང་དབང་པོ་མཚན་མ་སྣ་ཚོགས་འཛིན། ཅེས་འབྱུང་ངོ་། །དེ་བས་ན་སེམས་ཅན་གྱི་འཁྲུལ་པ་སྣ་ཚོགས་པར་སྣང་བ་དང་། མྱ་ངན་ལས་འདས་པའི་ཆོས་ཀྱི་སྐུ་གཉིས། དངོས་པོ་གཅིག་ལ་ལྷུན་རྫོགས་ཏེ། གཉིས་སུ་གྱུར་པ་གང་ཡང་མེད་དོ། །ལུང་ལས་ཀྱང་། ཕྱི་དང་ནང་ཀུན་ཆོས་ཀྱི་དབྱིངས། །རྣམ་པར་དག་པའི་སྤྱོད་ཡུལ་ལ། །སངས་རྒྱས་སེམས་ཅན་གཉིས་མེད་དོ། །ཞེས་གསུངས་སོ། །འོ་ན་གཉིས་སུ་མེད་ན། ཐུགས་རྗེའི་བདག་པོ་སངས་རྒྱས་ཀྱི་ཐུགས་རྗེའི་ཡུལ་སེམས་ཅན་ནི་གང་ནས་བྱུང་། བདེར་གཤེགས་ཀྱི་ཡེ་ཤེས་ཀྱི་སྤྱན་ནི་ཅི་མཁྱེན་ཞེ་ན། ཐུགས་རྗེའི་བདག་པོ་སངས་རྒྱས་ཞེས་བྱ་བ་གཅིག་ལོགས་སུ་མི་བཞག་སྟེ། དངོས་ཆོས་ཀྱི་སྐུ་ཡིན། དེ་རང་གི་རང་བཞིན་ཡིན། ཐུགས་རྗེའི་ཡུལ་སེམས་ཅན་ཞེས་བྱ་བ་གཅིག་ལོགས་སུ་མི་བཞག་སྟེ། དངོས་འཁྲུལ་པའི་ཤེས་པ་ཕྱི་ནང་དུ་སྣང་བ་འདི་ཉིད་ཡིན། དེ་ཆོས་ཀྱི་དབྱིངས་ཡིན། དེ་ཆོས་ཀྱི་སྐུ་ཡིན། དེ་ལྟར་དབྱེར་མེད་ཕན་ཆད་ཡུལ་དུ་བྱས་པ་མེད་པའི་ཕྱིར། ཡེ་ཤེས་ཀྱི་སྤྱན་གྱིས་གཟིགས་པ་མི་འཐད་སྙམས་ན། ངོ་བོ་ཡུལ་དུ་བྱས་ནས་གཟིགས་པ་ནི་མེད་དེ། སེམས་ཅན་གྱི་འཁྲུལ་པ་ཤེས་པ་ཆོས་སྐུ་ལས་མི་གཞན་བཞིན་དུ་ཡུལ་དུ་བྱས་པ་ནི་ཡོད་དོ། །འོ་ན་གཟུང་འཛིན་དུ་མ་ཐལ་ལམ་ཞེ་ན། འཁྲུལ་པའི་རང་བཞིན་ལ་ཡུལ་དུ་བྱས་པ་མེད་པའི་ཕྱིར་མ་ཐལ། དེ་ལྟར་འཁྲུལ་པ་གཟིགས་པ་ལ་ནི། ཅི་སྙེད་མཁྱེན་པའི་ཡེ་ཤེས་ཞེས་བྱའོ། །འཁྲུལ་པ་དེ་ནི་སེམས་ཅན་གྱི་ལོག་རྟོག་ཡིན་ཏེ་དེ་གྲངས་མཐའ་ཡས་པའི་ཕྱིར། ཅི་སྙེད་མཁྱེན་པའི་ཡེ་ཤེས་ཀྱང་མཐའ་ཡས་སོ། །འཁྲུལ་པ་བཟློག་པར་བྱེད་པའི་ཕྱིར། །གཟུགས་སྐུ་མཐའ་ཡས་པ་དང་། ཐེག་པ་མཐའ་ཡས་པ་ཡང་འབྱུང་ངོ་། །དེ་ལྟར་ན་བདེ་གཤེགས་སྐུ་གཟུགས་སྐུ་ཡང་ཆོས་སྐུ་ལས་བྱུང་ལ། འཁྲུལ་པ་ཡང་ཆོས་སྐུ་ལས་འབྱུང་བའི་ཕྱིར། དེ་གཉིས་ཁྱད་མེད་པར་ཐལ་ལོ་ཞེ་ན། ཁྱད་མེད་དེ། རང་བཞིན་ལ་དབྱེ་བ་མེད་པའི་ཕྱིར་རོ། །འཁྲུལ་པས་དོན་བྱེད་ནུས་སམ། བདེར་གཤེགས་སྐུས་ནི་དོན་མཛད་ནུས་པའི་ཕྱིར་མི་འདྲའོ་སྙམ་ན། འཁྲུལ་པ་ཡང་དོན་བྱེད་ནུས་པའི་རང་བཞིན་ཅན་དུ་གནས་ཏེ། ཕྱི་ནང་གི་རྟེན་ཅིང་འབྲེལ་བར་འབྱུང་བའི་ནུས་པ་ལ་ལྟོས། ལུང་ལས་ཀྱང་། སྐྱེ་འགྲོ་ཕྱི་ནང་གཟུགས་རྣམས་ཐམས་ཅད་ནི། །སྐུ་མཆོག་མི་ཟད་རྒྱན་གྱི་འཁོར་ལོར་འདུས། །སྐྱེ་འགྲོ་ཕྱི་ནང་སྒྲ་རྣམས་ཐམས་ཅད་ཀུན། །གསུང་མཆོག་མི་ཟད་རྒྱན་གྱི་འཁོར་ལོར་འདུས། །ཐམས་ཅད་ཆོས་ཀྱི་དབྱིངས་སུ་རོ་གཅིག་པས། །ཐུགས་མཆོག་མི་ཟད་རྒྱན་གྱི་འཁོར་ལོར་འདུས། །ཞེས་པ་དང་། སྐུ་དང་ཕྱག་རྒྱ་ཞིང་ཁམས་དང་། །ལུང་ཅན་ཟབ་མོའི་དབྱིངས་ན་གསལ། །ལྔ་བཞི་ནང་དུ་འཁོར་བ་ཡང་། །ཡེ་ཤེས་སངས་རྒྱས་དེ་ལས་མེད། །ཞེས་པས་སོ། །དེ་ལྟར་ན་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སེམས་ཉིད་ཆོས་ཀྱི་དབྱིངས་སུ་འདུས་པར་ཤེས་རབ་ཀྱིས་ཐག་ཆོད་པར་བྱའོ། །འོ་ན་འཁོར་འདས་ཆོས་སེམས་སུ་འདུས་ན། སེམས་ལ་དུ་ཡོད་ཅེ་ན། བརྒྱད་དེ། རང་བཞིན་དང་། ངོ་བོ་དང་། རྣམ་གྲངས་དང་། རྩལ་དང་ཡོན་ཏན་དང་། ཡུལ་དང་། འཕགས་པ་དང་། སེམས་ལ་སྣང་ཚུལ་དང་། འབྲས་བུའོ། །སེམས་ཀྱི་རང་བཞིན་ནི། དོན་དམ་པའི་བདེན་པ་སྟེ། སྟོང་ཞིང་བདག་མེད་པའོ། །ངོ་བོ་ནི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བསགས་པའི་ལས་ཀྱིས་ཐ་དད་ཀྱང་ངོ་བོ་དབྱེར་མེད་པའོ། །རྣམ་གྲངས་ནི་སེམས་དང་སེམས་ལས་བྱུང་བའོ། །སེམས་ནི་རྣལ་མ་དོན་གྱི་ཀུན་གཞིའོ། །སེམས་ལས་བྱུང་བ་ནི་གསུམ་སྟེ། སྣང་བ་དང་། བརྟགས་པ་དང་། བག་ཆགས་སོ། །སྣང་བ་ནི། འབྱུང་བ་ཆེན་པོ་བཞི་ལ་སོགས་པའི་སྣོད་དང་བཅུད་དུ་སྣང་བ་ཐམས་ཅད་དོ། །བརྟགས་པ་ནི་རྣམ་པར་ཤེས་པའི་ཚོགས་བདུན་ནོ། །རྩོགས་པ་ནི་སྦྱོར་བ་དོན་གྱི་ཀུན་གཞི་སྟེ། དགེ་དང་མི་དགེ་བག་ཆགས་ལ་སོགས་པའོ། །སེམས་ཀྱི་རྩལ་ནི། རིག་པ་དང་། བློ་དང་། ཤེས་རབ་དང་། མངོན་ཤེས་ལ་སོགས་པ་མངོན་དུ་བྱེད་པ་དང་། དཔྱད་པས་ཤེས་པའི་ཆོས་ཐམས་ཅད་དོ། །སེམས་ཀྱི་ཡོན་ཏན་ནི་བསྒྱུར་ཞིང་སྒྲུབ་ཏུ་བཏུབ་པའོ། །སེམས་ཀྱི་ཡུལ་ནི་གཉིས་ཏེ། འདུས་མ་བྱས་པ་དོན་གྱི་ཡུལ་དང་། འདུས་བྱས་པ་རྟགས་ཀྱི་ཡུལ་ལོ། །འདུས་མ་བྱས་པ་དོན་གྱི་ཡུལ་ནི། ནམ་མཁའ་སྟེ་སེམས་རང་གི་རང་བཞིན་ནོ། །འདུས་བྱས་ཀྱི་ཡུལ་ནི། ཁ་དོག་དང་དབྱིབས་ལ་སོགས་པ་འདུས་བྱས་བློས་བརྟགས་པ་ཐམས་ཅད་དོ། །སེམས་འཕགས་པ་ལ་སྣང་བའི་ཚུལ་ནི། སེམས་ཀྱི་རང་བཞིན་འདུས་མ་བྱས་པ་ནི། འཕགས་པ་ཉིད་ཀྱི་རང་བཞིན་དུ་སྣང་སྟེ། ཅི་ལྟ་བ་མཁྱེན་པའམ་ཆོས་ཀྱི་སྐུ་ཞེས་བྱའོ། །སེམས་ཀྱི་རྩལ་ཡེ་ཤེས་སུ་སྣང་སྟེ། སེམས་ཀྱི་རྣམ་གྲངས་སེམས་ལས་བྱུང་བ་ཐམས་ཅད་རང་སྣང་དུ་སྣང་སྟེ། དཔེར་ན་མེ་ལོང་གི་རང་བཞིན་གྱིས་མེ་ལོང་གི་གཟུགས་བརྙན་མཐོང་བ་ལྟ་བུའོ། །སེམས་ཅན་ལ་སྣང་ཚུལ་ནི། རང་བཞིན་འདུས་མ་བྱས་པ་ནི་མ་རྟོགས། །སེམས་ལས་བྱུང་བ་གསུམ་ལ་སྣང་བ་ལ་བཅད། བརྟགས་པས་འཛིན། གཟུགས་མེད་པའི་ཚུལ་གྱིས་བག་ཆགས་བསགས་ཏེ། དེ་ཡང་ཡིད་ཀྱི་ཤེས་པ་སྐད་ཅིག་མ་དྲན་པ་སྣ་ཚོགས་སྔ་ཕྱི་ལུང་འདོགས་ཤིང་བག་ཆགས་ཀྱི་དངོས་གཞིར་གྱུར་ཏོ། །དེའི་དབང་གིས་དམིགས་པའི་བློས་ཁམས་གསུམ་ཆོས་སྣ་ཚོགས་སུ་སྨིན་ཏོ། །མདོར་ན་སེམས་ཅན་ལ་ནི་སེམས་ཀྱི་རང་བཞིན་མི་སྣང་ལ། རྣམ་གྲངས་འབའ་ཞིག་བློའི་དམིགས་པ་ལ་སྣང་ཞེས་བྱ། འཕགས་པ་ལ་ནི། རང་བཞིན་སྣང་བའི་དབང་གིས་རྣམ་གྲངས་ཀྱི་ཆོས་ཐམས་ཅད་རང་སྣང་ཉིད་དུ་གཟིགས་ཞེས་བྱའོ། །དེ་ནི་སྣང་ཚུལ་ལོ། །སེམས་ཀྱི་འབྲས་བུ་ནི་རྣམ་པ་གཉིས་ཏེ། བཏགས་པ་ཐུན་མོང་གི་འབྲས་བུ་དང་། བརྟགས་མེད་མཐའ་བྲལ་མཐར་ཐུག་གི་འབྲས་བུའོ། །དེ་ལ་བརྟགས་པ་ཐུན་མོང་གི་འབྲས་བུ་ནི། རྒྱུ་རང་བཞིན་མེད་པ་ལས། གང་བློ་ཡིས་བཏགས་པ་ལྟར་ཆགས། བསྒྲུབས་པ་ལྟར་གྲུབ། བལྟས་པ་ལྟར་སྣང་སྟེ། ལུང་ལས་ཀྱང་། རང་བཞིན་གཅིག་ཏུ་མ་ངེས་པས། །ཅི་ལྟར་བཏགས་པ་དེ་ལྟར་སྣང་། །ཞེས་པ་དང་། དགོངས་པ་འདུས་པ་ལས་ཀྱང་། མེད་རྒྱུ་བརྟགས་ཆགས་བསྒྲུབས་འགྲུབ་བལྟས་པར་སྣང་། ཞེས་པས་སོ། །བརྟགས་མེད་མཐའ་བྲལ་གྱི་འབྲས་བུ་ནི། སེམས་ཀྱི་རང་བཞིན་མངོན་དུ་གྱུར་པ། སྐུ་གསུམ་ལྷུན་གྱིས་གྲུབ་པ། མི་ཟད་རྒྱུན་གྱི་འཁོར་ལོ་བསམ། སེམས་ཅན་ཐམས་ཅད་ཀྱི་རང་བཞིན་དེ་ལ་ནི། རྟོགས་དང་མ་རྟོགས་ཁྱད་པར་མེད། །རྒྱུས་མ་བསྐྱེད་རྐྱེན་གྱིས་མི་འཇིག །རྒྱུ་རྐྱེན་གཞན་ལ་རག་མ་ལས། གཞན་ངོར་མི་སྣང་། བདག་དོར་མི་དམིགས་པ་དེ་ལ་ནི་ཆོས་ཀྱི་ངོ་བོ་ཞེས་བྱ་སྟེ། རྟོགས་པས་གསལ་དུ་མེད། མ་རྟོགས་པས་སྒྲིབ་ཏུ་མེད། བསྒོམ་པས་སྒྲུབ་ཏུ་མེད། མ་བསྒོམ་པས་འཆོར་བའང་མེད། སེམས་ཅན་གྱི་དུས་སུ་མ་འགགས། སངས་རྒྱས་ཀྱི་དུས་སུ་མ་སྐྱེས་ཏེ། དེ་ནི་རང་བཞིན་གྱིས་རྣམ་པར་དག་ཅིང་འགྱུར་བ་མེད་པས་ན། ལུང་ལས་ཀྱང་། གློ་བུར་ལས་ཀྱིས་ཅིར་སྣང་ཡང་། །དངས་མ་དུས་གསུམ་འགྱུར་བ་མེད། །ཅེས་གསུངས་སོ། །དེ་ནི་རྟོགས་དང་མ་རྟོགས་ཁྱད་པར་མེད་པར་ལ་གཅད་དོ། །དེའི་སྒོར་འཇུག་པའི་རྣལ་འབྱོར་པའི་དགོངས་པ་ནི། མིན་པ་ལས་ཡིན་པར་བསྒྱུར་དུ་ནི་མེད་དེ། མ་རྟོགས་པ་རྟོགས་སུ་ཡོད་པའི་ཕྱིར། ཏིང་ངེ་འཛིན་དང་གདམས་ངག་གི་བྱེ་བྲག་རྣམས། དེ་བཞིན་གཤེགས་པས་གསུངས་སོ། །དེ་ཡང་འདི་ལྟར་སེམས་ཅན་རྣམས་ནི་ཆོས་ཀྱི་དབྱིངས་ཀྱི་རང་བཞིན་དུ། དུས་དང་རྣམ་པ་མེད་པར་གནས་ཀྱང་། གང་ལས་ཀྱི་སྦྱངས་པས་སེམས་ཀྱི་རང་བཞིན་ཆོས་ཀྱི་དབྱིངས་དུས་གསུམ་དུ་འགྱུར་བ་མེད་པ་ནི་མ་རྟོགས་སོ། །སེམས་ལས་བྱུང་བའི་ཆོས་ཡུལ་དང་དབང་བོར་བཅས་པའི་རྗེས་སུ་འབྲངས་ཏེ། གཟུང་བ་དང་འཛིན་པས་ཕྱི་ནང་གི་དངོས་པོ་སྣ་ཚོགས་སུ་བལྟས་ནས་དུག་ལྔ་དང་དུག་གསུམ་ལ་སྤྱོད་དེ། དེའི་འབྲས་བུ་ཁམས་གསུམ་དུ་སྨིན་པར་བྱས་ཀྱང་། ཆོས་ཀྱི་དབྱིངས་ལས་གཞན་དུ་འགྱུར་བ་ནི་མེད་དོ། །དེ་ལྟར་མ་རྟོགས་པའི་སྐྱོན་ནི། ཁམས་གསུམ་གྱི་སེམས་ཅན་དུ་སྣང་བའི་ཕྱིར། རྟོགས་པར་བྱ་དགོས་ཏེ། དེའི་ཐབས་ནི་སོ་སོར་རྟོག་པའི་ཤེས་རབ་ཀྱི་ཆོས་ཐམས་ཅད་ཀྱི། རྩ་བ་སེམས་ཡིན་པས། སེམས་ཀྱི་རང་བཞིན་ལ་དཔྱད་ཅིང་གཞིག་ན་དོན་དམ་པའི་བདེན་པ་མཐོང་བར་འགྱུར་རོ། །སེམས་ལས་བྱུང་བའི་ཆོས་ཕྱི་ནང་གི་དངོས་པོ་ཐམས་ཅད་ཡིན་པའི་ཕྱིར། ཕྱི་ནང་གི་དངོས་པོ་ཐམས་ཅད་ལ་སོ་སོར་གྱིས་མི་ཁྱབ་པའོ། །མདོར་ན་སེམས་ཀྱི་འབྲས་བུ་ནི། སེམས་ཀྱི་རང་བཞིན་ཆོས་ཀྱི་དབྱིངས་རིག་པ་ལ་རང་དབང་དུ་གྱུར་པའི་དུས་ན། དབྱིངས་ལས་མ་བྱུང་བའི་ཆོས་མེད་པས། དབྱིངས་ལས་བྱུང་བའི་ཆོས་ཐམས་ཅད་རང་སྣང་ཐབས་ཀྱི་རིག་པར་ཤར་ཏེ། དབང་སྒྱུར། རང་སྣང་དུ་ཤར། མཁྱེན་གཟིགས། དོན་མཛད་ན་ཡང་། ངོ་བོ་ཡུལ་དང་བྲལ་ཅིང་རྣམ་པ་རང་སྣང་དུ་གཟིགས་པའོ། །སེམས་ཐུན་མོང་གི་འབྲས་བུ་ནི། རང་བཞིན་ཅི་ལྟ་བ་མ་རྟོགས་ཀྱང་། རྣམ་པ་བློ་ཡི་དམིགས་པ་ལྟར་གྲུབ། ཅེས་བྱ་སྟེ། དེ་ནི་རྒྱུ་ལས་ཀྱང་བྱུང་བའི་འབྲས་བུ་སྟེ། མདོར་ན་ཟག་བཅས་ཀྱི་འབྲས་བུ་མཐའ་དག་གམ། རྣམ་པ་གཅིག་ཏུ་ན། མཐོང་སྣང་བཅུ་དྲུག་འབའ་ཞིག་པ་ཐམས་ཅད་ལ་བྱའོ། །དེ་དག་ལ་ནི་ལྟ་བས་ཐག་གཅད་པ་མདོ་ཙམ་དུ་བསྡུས་པའོ། །འགྲོ་བ་རིགས་དྲུག་མུ་སྟེགས་རྟག་ཆད་གཉིས། ཐེག་པ་འོག་མ་བརྒྱད་དང་བཅུ་དྲུག་གོ། །དེ་དག་མ་འདྲེས་ཡོངས་སུ་རྫོགས་པ་ནི། མཐོང་སྣང་ལྷུན་གྲུབ་རྫོགས་པ་ཆེན་པོའོ། །ལྷུན་གྱིས་གྲུབ་པའི་འབྲས་བུ། རྫོགས་པ་ཆེན་པོ་བསྒོམ་པའི་མན་ངག །ཉམས་སུ་བླང་བ་ལ་བཞི་སྟེ། སེམས་འདི་རྟོགས་སམ། བསྒོམ་པའི་ངོ་བོ་ཡིན་ནམ་མ་ཡིན་ཐག་གཅད་པ་དང་། རྟོགས་སུ་ཡོད་མེད་ཐག་གཅད་པ་དང་། བསྒོམ་དུ་ཡོད་མེད་ཐག་གཅད་པ་དང་། སྒོམ་པའི་སྐྱོན་བཅོས་སུ་ཡོད་མེད་ཐག་གཅད་པའོ། །དེ་ལ་དང་པོ་ནི། སེམས་འདི་རྟོགས་བྱའི་ངོ་བོ་གཏན་ལ་ཕེབས་ཏེ། ལ་གཅད་པ་ནི། ལྟ་བས་ཐག་གཅད་པ་གང་དུ་བསྟན་པའོ། །ལུང་ལས་ཀྱང་། ནམ་མཁའ་འདི་ནི་འབྱུང་བ་ཀུན་གྱི་བདག །སེམས་ཉིད་འདི་ནི་སངས་རྒྱས་ཀུན་གྱི་མཛོད། །ཆོས་ཉིད་འདི་ནི་ཆོས་ཅན་ཀུན་གྱི་གནས། །འདི་དག་བདལ་ཁྱབ་ཆེན་པོའི་དབྱིངས་སུ་རྫོགས། །ཞེས་པས། སེམས་རྟོགས་བྱའི་ངོ་བོ་ཡིན་པར་དམ་བཅའ། གཉིས་པ་ལ་སེམས་འདི་རྟོགས་སུ་ཡོད་དམ་མེད་སྙམས་ན། རྟོགས་སུ་ཡོད་དེ། སེམས་ནི་སངས་རྒྱས་ཀྱི་ངོ་བོ་དུས་གསུམ་དུ་འདུས་མ་བྱས་པ། གདགས་གཞི་དང་བཏགས་པ་ཐམས་ཅད་དང་བྲལ་བ། སངས་རྒྱས་ཀྱི་ངོ་བོ་ཉིད་རྟོགས་པའི་ཤེས་རབ་ཀྱིས། དཔྱད་ཅིང་གཞིག་ན་ཡང་། སེམས་ཀྱི་རང་བཞིན་མཐོང་བར་འགྱུར་རོ། །གལ་ཏེ་རྟོགས་སུ་མེད་དམ་སྙམ་ན། དེ་ལྟ་ན་ནི་རྒྱལ་བས་གསུངས་པའི་བསྟན་པ་ལ་དགོས་ཆེད་མེད་པ་དང་། སེམས་ཅན་གྱིས་སངས་རྒྱས་མངོན་དུ་བྱེད་མི་གཏུབ་པར་འགྱུར་རོ། །གལ་ཏེ་ཆོས་དབྱིངས་ཀྱི་རང་བཞིན་སེམས་ཅན་ཐམས་ཅད་ལ་ཁྱབ་པར་གནས་ཏེ། གང་གིས་ཀྱང་མ་བསྒྲིབས་པའི་ཕྱིར་མ་རྟོགས་པ་རྟོགས་སུ་མེད། ཡེ་ནས་སངས་རྒྱས་ཟིན་ཞེ་ན། དེ་ལྟ་ན་ནི་ཁམས་གསུམ་གྱི་སེམས་ཅན་གྱི་འཁྲུལ་པའི་སྣང་བ་མི་འབྱུང་བ་དང་། བདེ་གཤེགས་ཀྱི་ཐུགས་རྗེའི་ཡུལ་མེད་པ་དང་། བསྟན་པ་གསུང་བ་ལ་དགོས་ཆེད་མེད་པ་དང་། སེམས་ལས་བྱུང་བའི་བག་ཆགས་སྣང་མི་བཏུབ་པས། ཐམས་ཅད་ཀྱང་མྱ་ངན་ལས་འདས་པའི་མཐའ་ཅན་དུ་འགྱུར་རོ། །དེའི་ཕྱིར་ན། མི་གནས་པ་གནས་པར་བྱར་མེད་ཀྱང་། ཆོས་ཀྱི་དབྱིངས་དང་རང་བཞིན་གྱིས་གནས་པ་དེ་ཤེས་པ་དང་། མ་ཤེས་པའི་ཁྱད་པར་ལས། སངས་རྒྱས་དང་སེམས་ཅན་དུ་སྣང་བས་ངོ་ཤེས་པར་བྱ་བའི་ཕྱིར། རྟོགས་སུ་ཡོད་པའོ། །དེ་ནི་བྱང་ཆུབ་ཀྱི་སེམས་རྟོགས་སུ་མེད་པའི་གཏན་ཚིགས་སོ། །གསུམ་པ་ནི། བསྒོམ་དུ་ཡོད་དམ་མེད་ཅེ་ན། ཁ་ཅིག་གིས་བསྒོམ་དུ་མེད་ཅེས། ཆོས་ཉིད་དམིགས་སུ་མེད་པ་ལ་འཁྲུལ་ནས། མ་བཅོས་པའི་ངང་དུ་མ་ཡེངས་པ་ལས་འཁྲུལ་ནས་གནས་པར་གནས་པ་ཙམ་ཡང་མི་བྱེད་པར། ལྟ་བ་སྟོང་པའི་ཕྱོགས་སུ་གཏོད་ཅིང་། སེམས་རིག་པ་རང་གསལ་གྱི་རང་བཞིན་མ་རྟོགས་པར་དམུ་རྒོད་དུ་ཤོར་ནས། སེམས་འགྲེད་དེ་བློ་ཕྱང་ཆད་པར་འོང་བ་ཡང་ཡོད་དེ། དེ་ནི་མུ་སྟེགས་ཆད་པའི་ཕྱོགས་སོ། །ཁ་ཅིག་གིས་བསྒོམ་དུ་ཡོད་པར་ཁས་བླངས་ནས། བསམ་གྱིས་མི་ཁྱབ་པའི་འདུ་ཤེས་ལས་འཁྲུལ་ཏེ། ཤེས་བློ་ལ་རྟག་པར་འཛིན་པས། །ཆོས་ཀྱི་བདག་མེད་ནི་མ་རྟོགས། །གང་ཟག་གི་ཤེས་པ་ལ་བདག་ཏུ་བཟུངས་བ་ནི། མུ་སྟེགས་རྟག་པའི་ཕྱོགས་ཏེ། གཟུགས་ཁམས་ཀྱི་མུར་ལྟུང་ངོ་། །འདིར་རིས་ཅིག་སློབ་དཔོན་པད་མའི་རྒྱལ་པོའི་དགོངས་པའི་ཏིང་ངེ་འཛིན་ལྷུན་གྱིས་གྲུབ་པ་ནི། བདག་གིས་འདི་ལྟར་འདོད་དེ། དང་པོ་ཆོས་ཀྱི་དབྱིངས་རྟོགས་བྱའི་དོན་དམ་པའི་བདེན་པ་མཐའ་དག་དང་བྲལ་བ་དེ་ནི། བློ་རྟོག་པའི་སྤྱོད་ཡུལ་མ་ཡིན་ཅིང་། རྒྱུ་རྐྱེན་ཐམས་ཅད་དང་བྲལ་བའི་ཕྱིར། བསྒོམ་ཞིང་བསྒྲུབ་ཏུ་མེད་དོ། །དེའི་སྒོར་འཇུག་པའི་རྣལ་འབྱོར་པས་ཆོས་ཀྱི་དབྱིངས་དེ་ངོ་མ་ཤེས་པ་ལས། ཤེས་པར་བྱ་བའི་ཕྱིར་སོ་སོར་རྟོགས་པའི་ཤེས་རབ་ཀྱིས་དཔྱད་ཅིང་། གཞལ་དགོས་པའི་ངོས་ནས་བསྒོམ་དུ་ཡོད་དོ། །མཐོང་བའི་དོན་དམ་པའི་དབྱིངས་ནི་ཐ་སྙད་ཐམས་ཅད་དང་བྲལ་ཏེ། དམིགས་སུ་མེད་པའི་ངོས་ནས་བསྒོམ་དུ་མེད་དོ། །དམིགས་སུ་མེད་པའི་དོན་དེ་ལ་ཡང་། མ་འདྲིས་པར་འདྲིས་པར་བྱ་བའི་ཕྱིར་དང་། འདུ་ཤེས་ཀྱི་ལྷག་མ་ཟད་པར་བྱ་བའི་ཕྱིར་དང་། མ་ཡེངས་པར་འདུ་འཛི་དང་གཡེང་བ་ཐག་བཅད་དེ། ཡུན་དུ་གནས་དགོས་པས་སྒོམ་དུ་ཡོད་དོ། །བསྒོམ་པའི་དོན་ལ་ཤེས་པ་ཡུལ་དང་ཡུལ་ཅན་ཙམ་དུའང་མེད་དེ། རིག་པ་ཡུལ་དང་བྲལ་བས་སེམས་ཀྱི་རང་བཞིན་དུ་སོང་བས་ན་བསྒོམ་དུ་མེད་དོ། །སེམས་ཀྱི་རང་བཞིན་འོད་གསལ་བ་དེ་ནི། དེ་བཞིན་གཤེགས་པ་ལ་ལྷུན་གྲུབ་ཀྱང་། རྣལ་འབྱོར་པའི་ལས་ཀྱིས་བསྐྱེད་པའི། བག་ཆགས་ཀྱི་ལྷག་མ་དང་བཅས་པས་མཉམ་པར་བཞག་པ་དང་། མ་བཞག་པ་ཡོད་པའི་སྒོ་ནས་སྒོམ་དུ་ཡོད་དོ། །མཉམ་པར་བཞག་ཀྱང་རིག་པ་ཡུལ་བྲལ་ཆོས་ཀྱི་དབྱིངས་སུ་གསལ་བའི་ངོས་ནས་བསྒོམ་དུ་མེད་དོ། །དེ་ལྟར་རིག་པ་ཡུལ་བྲལ་ཆོས་ཀྱི་དབྱིངས་སུ་གསལ། གཏིང་ཆེན་པོ་བཅུའི་དོན་རྙེད་ཀྱང་། ལྷག་པའི་ཡུལ་བདལ་ཁྱབ་ཆོས་ཀྱི་དབྱིངས་སུ་འདུ་ཤེས་ཀྱི། ལྷག་མ་མ་ཟད་ཀྱི་བར་དུ། གཡེང་བ་དང་བཅས་པའི་ཕྱིར། བསམ་གཏན་གྱི་བར་ཆད་ཡོད་དེ། དགྲ་ལྔ་ལས་མི་ཚུགས་པར་བྱ་བའི་ཕྱིར། འདུ་འཛིན་དང་གཡེང་བ་ཐག་གཅད་དེ། སྤྲོས་པ་ལས་རྣམ་པར་འདས་པར་བྱ་བའི་ཕྱིར། སྒོམ་དུ་ཡོད་དོ། །གདེང་ཆེན་བཅུའི་དོན་ཀློང་དུ་གྱུར། ལུས་ཀྱི་ལྷག་མ་ཡལ། སྣང་སྲིད་དབྱིངས་སུ་ཐིམ། འདུ་ཤེས་ཀྱི་ལྷག་མ་ཟད། འཁོར་འདས་རོ་གཅིག་ཏུ་གྱུར་པའི་དུས་ན། ཐམས་ཅད་ལྷུན་གྱིས་གྲུབ་པས་བསྒོམ་དུ་མེད་དོ། །ཡེ་ཤེས་ལྔ་རྫོགས་མཁྱེན་པ་གཉིས་ཤར། གཟུགས་སྐུ་མངོན་དུ་བསྟན། མཛད་པ་ལྷུན་གྲུབ། རིག་པ་ལ་དབང་ཐོབ་པའི་དུས་ན། ཡོད་མེད་ཐམས་ཅད་ལྷུན་གྱིས་གྲུབ་ཅེས་བྱའོ། །བཞི་པ་གོལ་སྒྲིབ་ཡོད་མེད་ཀྱི་གདར་ཤ་བཅད་པ་ནི། དེ་ཡང་རྣམ་པ་གཉིས་ཡིན་ཏེ། ལ་བཟླ་བ་དང་། ཤན་དབྱེ་བའོ། །དེ་ལ་ལ་བཟླ་བའི་ངོས་ནས་གོལ་སྒྲིབ་ཐམས་ཅད་ཀྱང་ཆོས་ཀྱི་དབྱིངས་ཡིན་པས། གོལ་ས་དང་སྒྲིབ་པ་མེད་དེ། ཐམས་ཅད་གདལ་པ་ཆེན་པོ་ཆོས་ཀྱི་དབྱིངས་སུ་འདུས་པས། གནས་ཀྱིས་དམན་པ་ངན་སོང་གསུམ་དང་། ལྟ་བས་དམན་པ་མུ་སྟེགས་རྟག་ཆད་དང་། སྤྱོད་པས་དམན་པ་ཤན་པ་དང་སྨད་འཚོང་དང་། ལྟ་བས་མཐོ་བའི་རྫོགས་པའི་སངས་རྒྱས་དད། །གནས་ཀྱིས་མཐོ་བའི་ཚངས་པའི་འཇིག་རྟེན་དང་། །སྤྱོད་པས་མཐོ་བའི་ཉན་ཐོས་དང་དགྲ་བཅོམ་རྣམས། འབྱེད་པ་མེད་པར་ཆོས་ཀྱི་དབྱིངས་སུ་གཅིག་པ་ལ་དེ་ལ་གོལ་ས་ག་ལ་ཡོད་དེ། གོལ་ས་ཡང་ཆོས་ཀྱི་དབྱིངས་སུ་གོལ། སྒྲིབ་པ་ཡང་ཆོས་ཀྱི་དབྱིངས་རང་བཞིན་གྱིས་འོད་གསལ་བ་ལ། སྒྲིབ་བྱེད་དང་བྲལ་བས་སྒྲིབ་བྱ་ག་ལ་ཡོད། སྒྲིབ་པ་ཉིད་ཀྱང་ཆོས་ཀྱི་དབྱིངས་ཡིན། ལུང་ལས་ཀྱང་། གོལ་སྒྲིབ་བྱ་བ་ག་ལ་ཡོད། གོལ་ས་ཉིད་ཀྱང་བྱང་ཆུབ་སེམས། །ཞེས་གསུངས་སོ། །ཤན་དབྱེ་བའི་དབང་དུ་ནི། ཆོས་ཀྱི་དབྱིངས་ལ་དབྱེ་བ་མེད་ཀྱང་། སྙམ་ཞུགས་པའི་རྟོགས་དཔྱོད་ཐམས་ཅད་གོལ་སྒྲིབ་སྟེ། དེ་ཡང་ཆོས་ཉིད་ལས་མི་གཞན་བཞིན་དུ། ཟིན་ཆགས་ཀྱི་རྟོག་དཔྱོད་བྱུང་བ་ནི། ཆོས་ཉིད་ལས་གོལ་ཞེས་བྱ། རྟོག་དཔྱོད་ཀྱིས་དབང་གིས་ཆོས་ཀྱི་དབྱིངས་ཀྱི་རང་བཞིན། འོད་གསལ་བ་དེ་མདོན་སུམ་དུ་མ་གྱུར་པ་ལ་ནི་བསྒྲིབ་ཞེས་བྱའོ། །གོལ་སྒྲིབ་ཀྱི་རྟོག་དཔྱོད་ནི་མཐའ་ཅན་གྱི་ཆོས་བཅུ་དྲུག །ཉོན་མོངས་པ་ལྔ་དང་སུམ་ཅུ་རྩ་བདུན་ནོ། །དེ་ནི་རང་བཞིན་གྱི་གོལ་སྒྲིབ་བོ། །བར་དུ་གཅོད་པའི་གོལ་སྒྲིབ་ནི། ཆོས་ཀྱི་དབྱིངས་ཀྱི་རང་བཞིན་རྟོགས་ཀྱང་། ཏིང་ངེ་འཛིན་གསལ་བ་དང་། འདྲིས་པ་དང་། གོམས་པ་དང་། མཐར་ཕྱིན་པ་ལ་སྒྲིབ་པ་སྟེ། གོལ་སྒྲིབ་འདི་དག་གིས་བར་ཆོད་ན། ཆོས་ཀྱི་དབྱིངས་རྟོགས་པ་ལྟ་བའི་གདེང་དང་ལྡན་ཡང་། ཏིང་ངེ་འཛིན་མ་གོམས་པའི་དབང་གིས། ཆོས་ཀྱི་དབྱིངས་གདེང་དུ་གྱུར་མི་སྟེར་ཅིང་། སྲིད་པ་ཡོངས་སུ་ཟད་པར་ཡང་མི་ནུས་ཏེ། འཁོར་བ་བརྒྱུད་པར་བྱེད་དོ། །མངོན་པར་ཤེས་པ་ལ་སོགས་པའི་ཡོན་ཏན་རྣམས་ཀྱང་། ཟུར་ཡང་འབྱུང་བར་མི་ནུས་སོ། །དེ་དག་གི་གོལ་སྒྲིབ་ནི། བར་དུ་གཅོད་པའི་ཆོས་བཅུ་དྲུག །བསམ་གཏན་གྱི་སྒྲིབ་པ་བཅུ། གློ་བུར་གྱི་སྐྱོན་དྲུག །དོགས་པའི་འདུ་ཤེས་ཆེན་པོ་ལྔ་སྟེ། སུམ་ཅུ་རྩབདུན་ནོ། །དེ་དག་ནི་བསམ་བསྟན་གྱི་སྐྱོན་གོལ་སྒྲིབ་ངོས་བཟུང་བའོ། ༈ །སྤྱི་དོན་གསུམ་པོ་གོལ་སྒྲིབ་ཀྱི་གདར་ཤ་གཅད་པ་ལ་གསུམ་སྟེ། གོལ་ས་དང་། སྒྲིབ་པ་དང་། གོལ་སྒྲིབ་དང་བྲལ་བའི་འབྲས་བུའོ། །དེ་ལ་གོལ་ས་བཅུ་དྲུག་སྟེ། འགྲོ་བ་རིགས་དྲུག་གི་གོལ་ས་དྲུག །མུ་སྟེགས་རྟག་ཆད་གཉིས། བསམ་གཏན་བཞི། སྐྱེ་མཆེད་བཞི་དང་བཅུ་དྲུག་གོ། །སྒྲིབ་པ་བཅུ་དྲུག་ནི། བདག་མེད་པ་ཕྱོགས་གཅིག་རྟོགས་ཤིང་། གདེང་དུ་གྱུར་པའི་གནས་སྐབས་ལ་བཏགས་ཏེ། ཉན་ཐོས་མདོ་སྡེ་པ་དང་བྱེ་བྲག་པ་གཉིས། རང་རྒྱལ་བ་དང་གསུམ། སེམས་ཙམ་རྣམ་བདེན་རྣམ་རྫུན་གཉིས། དབུ་མ་ལ་རྣམ་རྟོག་ཡེ་ཤེས་སུ་སྨྲ་བ་དང་། ཡེ་ཤེས་སྒྱུ་མ་ལྟ་བུར་སྨྲ་བ་དང་། རབ་ཏུ་མི་གནས་པ་དང་། རྣལ་འབྱོར་དཔྱོད་པའི་དབུ་མ་དང་། ཏོན་མུན་པ་སྟེ་ལྔ་དང་བཅུའོ། །ཕྱི་རྒྱུད་སྡེ་གསུམ། ནང་པ་རྣམ་གཉིས་དང་བཅོ་ལྔ། རྫོགས་པ་ཆེན་པོའི་ཉིད་ཀྱང་ཆེད་དུ་འཛིན་པ་ཡིན་ཏེ། དེ་དང་བཅུ་དྲུག་གོ། །མདོར་ན་གོལ་ས་དང་གཡང་ས་གཉིས་དོན་གཅིག་སྟེ། ཆོས་ཉིད་དོན་དམ་པའི་བདེན་པ་མ་རྟོགས་ནས། བརྟགས་པའི་བྱེ་བྲག་གིས་ཉེས་དམིགས་ཐམས་ཅད་གར་སོང་བ་གོལ་སར་བརྩིའོ། །ཆོས་ཉིད་མ་རྟོགས་པའི་ཆ་ཐམས་ཅད་ནི་སྒྲིབ་པར་བརྩིའོ། །གོལ་སྒྲིབ་སྤངས་པའི་འབྲས་བུ་ནི། ཏིང་ངེ་འཛིན་ལྷུན་གྱིས་གྲུབ་པ་ནི། ཆོས་ཀྱི་དབྱིངས་མཐའ་ཐམས་ཅད་དང་བྲལ་བ་རང་བཞིན་དུ་རྟོགས་ནས། སྒྲིབ་བྱ་སྒྲིབ་བྱེད་མེད་པའི་ཆོས་ཀྱི་དབྱིངས་སུ་ཤར་བ་ནི་སྒྲིབ་པ་མེད་ཅེས་བྱ་ལ། གོལ་ས་ཐམས་ཅད་ཀྱང་ཆོས་ཀྱི་དབྱིངས་ཀྱི་རང་བཞིན་ལས། མི་གཞན་བར་ཤེས་ནས། ཐམས་ཅད་སྙིང་པོ་བྱང་ཆུབ་ལས་གཞན་མེད་པར་ཤེས་པས་ཏིང་ངེ་འཛིན་གྱི་རྒྱལ་པོ་ཆེན་པོར་འགྱུར་ཏེ། ལུང་ལས་ཀྱང་། བྱང་ཆུབ་སྙིང་པོར་དེ་མ་ཐག ། ཏིང་འཛིན་རྒྱལ་པོ་ཆེན་པོ་འབྱུང་། ཞེས་པས་སོ། །དེ་ནི་གོལ་སྒྲིབ་གདར་ཤ་བཅད་པའོ། ༈ །ལྷུན་གྱིས་གྲུབ་པའི་འབྲས་བུ་ལ་གསུམ་སྟེ། འབྲས་བུ་རང་གི་ངོ་བོ་དང་། །ཐོབ་ཚུལ་དང་། མི་ཐོབ་པའི་སྐྱོན་བསྟན་པའོ། །དེ་ལ་འབྲས་བུ་རང་གི་ངོ་བོ་ལ་གསུམ་སྟེ། ཆོས་ཀྱི་སྐུ་དང་། གཟུགས་ཀྱི་སྐུ་དང་། ཐུགས་རྗེའི་མཛད་པའོ། །དེ་ལ་ཆོས་ཀྱི་སྐུ་ནི། རིག་པས་ལྷུན་རྫོགས། རང་སར་གྲོལ་བའི་དུས་ན། འཁོར་འདས་ཐམས་ཅད་གདལ་པ་ཆེན་པོ་ཆོས་ཀྱི་སྐུ་མཐའ་དབུས་མེད་པར་རྫོགས་པ་སྟེ། འཁོར་འདས་ཀྱི་ཆོས་ཐམས་ཅད་ངོ་བོ་དབྱེར་མེད་པའི་ངོས་ནས། ཆོས་ཀྱི་སྐུ་ཞེས་གྲགས་ཏེ། ལུང་ལས་ཀྱང་། ལྷུན་གྱིས་གནས་པ་བཞག་པ་ཡིན། །ཞེས་པ་དང་། ཡང་། སྐུ་གཅིག་ཀུན་ཏུ་ཁྱབ་པས་བདལ་བའི་སྐུ། །ཞེས་པ་དང་། ཡང་། བྱ་བྲལ་ལྷུན་རྫོགས་བདལ་པ་ཆོས་ཀྱི་སྐུ། །ཞེས་པ་དང་། ཡང་། མི་གཡོ་བ་ནི་སྐུའི་རྒྱ། །དེ་ལ་ཕྱོགས་ཀྱི་འོད་འདུས་པས། །ཕྱོགས་བཞི་མཚམས་དང་བླ་འོག་གྲུབ། །ཅེས་པ་དང་། གསང་བའི་སྙིང་པོ་ལས་ཀྱང་། དུས་བཞི་མཉམ་པ་ཉིད་ཀྱི་དབྱིངས། །སྐུ་གསུང་ཐུགས་ཀྱི་ལྷུན་སྟུག་པོ། །བཀོད་པའི་རྒྱན་ཉིད་དུ་བཞུགས་སོ། །ཞེས་གསུངས་སོ། །དེ་དག་ནི་ཆོས་སྐུའོ། །གཟུགས་ཀྱི་སྐུ་ནི། གདུལ་བྱའི་བྱེ་བྲག་གིས་ཐ་དད་པར་སྣང་སྟེ། དེ་ཡང་འགགས་པ་མེད་པའི་ཡེ་ཤེས་ཀྱིས། ཤེས་བྱའི་ཏིང་ངེ་འཛིན་གོམས་མ་གོམས་ཀྱི་བྱེ་བྲག་ལ་གཟིགས་ཏེ། ལོངས་སྤྱོད་རྫོགས་པའི་སྐུ་ཐ་དད་པར་སྣང་ངོ་། །ལས་དང་ཉོན་མོངས་པའི་བྱེ་བྲག་ལ་གཟིགས་ཏེ། སྤྲུལ་པའི་སྐུ་ཐ་དད་པར་སྣང་། དེ་ལྟར་གདུལ་བྱ་དང་གདུལ་བྱེད་དུ་སྣང་ཡང་། གང་ཡང་ཆོས་ཀྱི་སྐུ་ལས་མ་གཡོས་པ་ནི། གཟུགས་བརྙན་སྣ་ཚོགས་སུ་སྣང་ཡང་མེ་ལོང་ལས་མ་གཡོས་པ་བཞིན་ནོ། །ཐུགས་རྗེའི་མཛད་པ་ནི་སྐུ་ཐ་དད་པར་སྣང་བ་དང་། གསུངས་ཐ་དད་པའི་སྒོ་བསམ་གྱིས་མི་ཁྱབ་པར་སྒྲོགས་པ་དང་། ཐུགས་ཅི་སྙེད་མཁྱེན་པའི་ཡེ་ཤེས་བསམ་གྱིས་མི་ཁྱབ་པའི་མཁྱེན་པ་དང་། ཡོན་ཏན་དང་ཞིང་ཁམས་དང་ཕོ་བྲང་། སྟོབས་དང་མི་འཇིགས་པ་ལ་སོགས་པ་ཆེ་བའི་ཡོན་ཏན་སྣ་ཚོགས་པ་རྔོམ་པ་དང་། འཕྲིན་ལས་རྒྱ་མཚོས་འགྲོ་བའི་དོན་ལ་རོལ་པའོ། །འབྲས་བུ་ཐོབ་པའི་དུས་ནི་གསུམ་སྟེ། ཚེ་འདི་ལ་ཐོབ་པ་དང་། བར་དོར་ཐོབ་པ་དང་། སྐྱེས་ནས་ཐོབ་པའོ། །དེ་ཡང་འདི་ལ་ཐོབ་པ་ནི། རྟེན་གྱི་གང་ཟག་ལས་སྐལ་བར་ལྡན་ཞིང་ལང་ཚོ་གཞོན་པ་དང་། ཤེས་རབ་མཆོག་ཏུ་གྱུར་ཅིང་། དད་པ་རབ་དང་ལྡན་པ། བརྩོན་འགྲུས་ཕུལ་དུ་བྱུང་ཞིང་། བརྟུལ་ཞུགས་ཀྱི་སྟོབས་དང་ལྡན་པ། རྩ་བ་དང་ཡན་ལག་གི་དམ་ཚིག་མ་ཉམས་ཅིང་། ལས་དང་ཆོས་ཀྱི་རོ་ཚོར་བ་ཁ་གསག་དང་གྱ་གྱུ་སྤངས་ཤིང་། ཡོན་ཏན་གྱི་གདེང་ཐུབ་པ། འཁོར་བའི་འདུ་འཛི་དང་། ཁེ་གྲགས་ཀྱི་ཆབ་སྤྱོམ་དང་། དགོས་པའི་རྣམ་བཞག་ནི། རྨི་ལམ་དུ་ཡང་མི་བྱེད་ལ། དགོངས་པའི་དོན་དང་ལྡན་ཞིང་། དབང་ཚུལ་བཞིན་དུ་ཐོབ་པ། བླ་མ་སྲོག་གི་ཕྱིར་ཡང་མི་གཏོང་བ་དེས། འདུ་འཛི་རྣམ་པར་བཅད་དེ། རི་ཁྲོད་ཀྱི་དགོན་པ་ཆེན་པོ་བསྟེན་ནས་རྒྱུན་མི་གཅོད་པ་དེས། དང་པོ་སེམས་ལ་དབང་ཐོབ་པར་བྱེད་དེ། དེ་ནས་ཆོས་ལ་དབང་ཐོབ་པར་བྱེད་དོ། །དེ་ནས་ཆོས་བསྒྱུར་བ་ལ་དབང་ཐོབ་པར་བྱེད་དོ། །དེ་ནས་ལུས་ལ་དབང་ཐོབ་པར་བྱེད་དོ། །དེ་ནས་ལུས་བསྒྱུར་བ་ལ་དབང་ཐོབ་པར་བྱེད་དོ། །དེ་ནས་ཡུལ་དེ་བཞིན་གཤེགས་པའི་སྤྲུལ་པ་བཞིན་དུ། ཆོས་ཀྱི་དབྱིངས་སུ་ཡལ་ནས། སྐུ་ལྔ་ལྷུན་རྫོགས་པ་ནི་འདི་ལ་ཐོབ་པའོ། །སྐྱེས་བུའི་ཡོན་ཏན་གོང་མ་རྣམས་དང་ལྡན་ཡང་། བརྩོན་འགྲུས་ཆུང་བའི་དབང་གིས། སེམས་ཀྱི་རང་བཞིན་རྟོགས་ཀྱང་། དབང་ཐོབ་མི་ནུས་ཏེ། ཏིང་ངེ་འཛིན་ལྷུན་གྱིས་མ་གྲུབ་པས། འཆི་ནས་བར་དོ་འབྱུང་བར་བྱེད་དོ། །བར་དོས་སྔོན་གྱི་དགེ་བའི་བཤེས་གཉེན་རྗེས་སུ་དྲན་ནས། དེའི་དགོངས་པའི་གདམས་ངག་རྗེས་སུ་དྲན་ཏེ། དེས་བར་དོ་ལ་དབང་བྱེད་དོ། །དེའི་དབང་གིས་གནས་ངན་ལེན་ཡོངས་སུ་ཟད་དེ། བསགས་པའི་ལུས་ཀྱིས་ཚེ་ཕྱི་མ་ལ་འཇུག་གོ། །ཕྱི་མའི་ལུས་དེས། ལས་ཀྱིས་མ་སྦྱངས་པའི་དབང་གིས། དགེ་བའི་བཤེས་གཉེན་དང་འཕྲད་དེ། དེས་དོན་ལ་འཇུག་པར་བྱེད་དོ། །སྔར་མོས་པའི་དབང་གིས། ཚེ་དེ་ཉིད་ལ་མངོན་དུ་བྱེད་པར་འགྱུར་རོ། །དེ་ལ་ནི་སྐྱེས་ནས་ཐོབ་པ་ཞེས་བྱའོ། །གཞན་ལས་ཀྱིས་སྦྱངས་པ་རྣམས་ཀྱིས་མོས་པ་ཙམ་མམ། རྟོགས་པ་ཙམ་བྱ་སྟེ། གྲུབ་པའི་མཐའ་ནོར་བ་མེད་པ་ལས། སྐྱེས་བུའི་ཡོན་ཏན་ཀུན་རྫོགས་ཀྱང་། བརྩོན་འགྲུས་དང་དགོན་པ་བསྟེན་པ་མ་གཏོགས་པ། དེ་རྣམས་སྐྱེ་བ་གསུམ་ཕྱིན་ཆད་ལ་འཕྲད་ཅིང་ཐོབ་པའི་སྐལ་བ་ཡོད་ཀྱང་། འབྲས་བུ་ཐོབ་པའི་དུས་ཀྱི་ཁོངས་སུ་མི་བརྩིའོ། གཞན་རྟོགས་པ་ཤས་ཆེ་ཆུང་གི་ཁྱད་པར་དང་། གོམས་ཤས་ཆེ་ཆུང་གི་ཁྱད་པར་གྱིས། འབྲས་བུའི་ཡན་ལག་གཞན་ཡང་ཡོད་དེ། འདིར་མི་བརྩིའོ། །མི་ཐོབ་པའི་སྐྱོན་ནི། སྐྱེས་བུ་ཡོན་ཏན་མི་ཚང་བ་སྟེ། རྟེན་ཅིང་འབྲེལ་པར་འབྱུང་བའི་ནུས་པ་དང་། ལས་ཀྱི་རྒྱུ་འབྲས་དང་། མ་འདྲེས་པའི་རྒྱན་ཡོངས་སུ་འགོགས་པ་དེ་ནི། མཐའ་ཆད་པར་འགྱུར་ཏེ། ངན་སོང་ཁ་བརྒྱུད་ཅིང་། གལ་ཏེ་མིའི་འཇིག་རྟེན་དུ་སྐྱེས་ཀྱང་། སྒོ་ལྔའི་དབང་པོ་མེད་པར་སྐྱེས་ནས། སངས་རྒྱས་ཀྱི་བསྟན་པ་ལ་འཇུག་པ་ལྟ་སྨོས་ཀྱང་ཅི་དགོས། སྐལ་བ་གཏན་མེད་པ་སྟེ། སྐལ་མེད་རྣམས་ལ་གཏན་དུ་སྦས། །ཞེས་གསུངས་སོ། །སྐྱེས་བུ་ཡོན་ཏན་གཞན་ཀུན་རྫོགས་ཀྱང་། དམ་ཚིག་ཉམས་པ་དེ་ནི། ངན་སོང་ཁ་བརྒྱུད་པར་འགྱུར་ཏེ། གལ་ཏེ་ཡུན་རིང་མོ་ཞིག་ན་གདུལ་བྱར་གྱུར་ཀྱང་། རུ་ཏྲར་འགྱུར་རོ། །སྐྱེས་བུའི་ཡོན་ཏན་ཀུན་རྫོགས་དང་། རྟོགས་པ་ཆུང་བ་དེ་ནི། སྲིད་པ་ཁ་བརྒྱུད་པར་འགྱུར་རོ། །སྐྱེས་བུ་ཡོན་ཏན་ཀུན་རྫོགས་ཀྱང་། བརྩོན་འགྲུས་དམན་པ་དེ་ནི། སྐྱེ་བ་མང་པོ་ལ་འགྱང་བར་བྱེད་དོ། །དེ་དག་ཐམས་ཅད་ནི་འབྲས་བུ་ཐོབ་པའི་སྐྱོན་ནོ། །བདེར་གཤེགས་རྒྱལ་བའི་མན་ངག་གསང་ཆེན་ལས། གཉིས་སུ་མེད་པའི་ཆོས་དབྱིངས་དོན་རྟོགས་པའི། །རང་རིག་དབང་ཕྱུག་རྡོ་རྗེ་ཡེ་ཤེས་ཀྱིས། །རྒྱལ་བའི་དགོངས་བརྒྱུད་རིམ་བཞིན་མདོ་ཙམ་ཞིག །བསྡུས་པའི་དགེ་བའི་རྩ་བ་གང་ཐོབ་དེས། །བཛྲ་ཀེ་དྷུ་ལ་སོགས་རྣལ་འབྱོར་རྣམས། །ཀུན་ཀྱང་ལྟ་སྒོམ་དམ་ཚིག་ལྡན་ནས་ནི། །བདལ་ཁྱབ་ཆོས་སྐུ་མངོན་དུ་གྱུར་པར་ཤོག །རྫོགས་སོ། །ཀཿཐོག་པ་པྲ་ཛྙཱ་སེངྷས་མཛད་པའོ།། །།

རྫོགས་པ་ཆེན་པོ་ས་གཅིག་པའི་འགྲེལ་པ་དོན་གསལ་ཉི་མ། གཙང་སྟོན་རྡོ་རྗེ་རྒྱལ་མཚན།

རྫོགས་པ་ཆེན་པོ་ས་གཅིག་པའི་འགྲེལ་པ་དོན་གསལ་ཉི་མ་བཞུགས་སོ། །ༀ་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །མཉམ་ཉིད་ནམ་མཁའི་ངང་ལས་མ་གཡོས་ཀྱང་། །ཡུལ་བྲལ་ཐུགས་རྗེ་རང་རིག་བྱང་ཆུབ་སེམས། །སྐལ་ལྡན་དགོས་པ་སྐོང་པའི་ནོར་བུ་མཆོག །བླ་མ་དམ་པའི་ཞབས་ལ་གུས་པས་འདུད། །སྣོད་བཅུད་ཆོས་ཀུན་རང་རིག་ངོ་བོ་ཉིད། །རང་སྣང་གསལ་བ་ཀུན་ཏུ་བཟང་པོ་ཡི། །རྩོལ་བ་རབ་ཟད་ཡེ་ནས་འབྲས་བུའི་དབྱིངས། །རྣམ་དག་བྱང་ཆུབ་སེམས་ལ་ཕྱག་འཚལ་ལོ། །འདིར་རྫོགས་པ་ཆེན་པོ་ས་གཅིག་པ་ཚིག་དོན་འབྲུ་གཉེར་ན། གསུམ་སྟེ། མཚན་བསྟན་པ་དང་། ཕྱག་འཚལ་བ་དང་། གཞུང་བཤད་པའོ། །དང་པོ་ནི་རྒྱ་གར་སྐད་དུ། སན་ཏི་དར་བ། བོད་སྐད་དུ། རྫོགས་པ་ཆེན་པོ་ས་གཅིག་པ་ཞེས་བྱ་སྟེ། རྒྱ་གར་སྐད་ཀླད་དུ་སྨོས་པའི་དགོས་པ་ཡང་། ཁུངས་ཀྱི་ཡིད་ཆེས་པར་བྱ་བ་ཡིན་ཏེ། འདིར་ཤིན་ཏུ་རྣལ་འབྱོར་གྱི་སྐབས་སུ་མེའི་རྟགས་དུ་བ་འདྲ་བར། མཐར་ཐུག་པའི་ཐེག་པ་ཕལ་གྱི་བློ་རིག་དཀའ་ཞིང་། སྐལ་ལྡན་གྱི་སྤྱོད་ཡུལ་དུ་གྱུར་པ་ཀུན་ཏུ་བཟང་པོའི་ངོ་བོ་ཉིད་བརྗོད་བྱེད་ཀྱི་ཚིག་ནི་ཤིན་ཏུ་རྣལ་འབྱོར་གྱི་སྡེར་སྣང་ནས་འཛམ་བུ་གླིང་གི་དཔལ་དུ་སྣང་བར་བྱ་བའི་ཕྱིར། དེའི་སྣོད་དམ་གཞི་ལྟ་བུ་དག་པར་བྱ་བའི་ཆེད་དུ། འགྲོ་དྲུག་ཐུན་མོང་གི་སྟོན་པ་སྤྲུལ་པའི་སྐུ་ཤཱཀྱ་ཐུབ་པ། ཀུན་ཏུ་བཟང་པོའི་སྐུ་གསུང་ཐུགས་དབྱེར་མེད་པའི་ངང་ལ་སྣང་སྟེ། འཛམ་བུ་གླིང་གི་དབུས་རྡོ་རྗེ་གདན་ལ་མངོན་པར་རྫོགས་པའི་ཚུལ་བསྟན་ནས། བཀའ་སྡེ་སྣོད་གསུམ་གྱིས་གདུལ་བྱ་རྣམས་ཚིམ་པར་ཏེ། མཛད་པ་རྫོགས་པའི་ཚུལ་བསྟན་པ་ཡང་གདུལ་བྱའི་སྣང་བ་སྟེ། ཤིན་ཏུ་རྣལ་འབྱོར་པ་ཡི་རྟེན་ནམ་སྣོད་དམ་བརྒྱུད་ནས་འཇུག་པའི་ཐབས་ཏེ། དེ་ཉིད་སྣང་བའི་གྲོལ་ཕུག་རྒྱ་གར་ཡིན་པའི་ཁུངས་དང་། འདི་ཉིད་ཀྱི་སྣང་ཚུལ་ཡང་བརྒྱུད་ཚུལ་གསུམ་སྟེ། སངས་རྒྱས་ཐམས་ཅད་ཀྱི་ངོ་བོ་ཉིད། རྒྱལ་བ་ཀུན་ཏུ་བཟང་པོ་ནས་རྡོ་རྗེ་སེམས་དཔའ་སོགས་དེ་དུས་གསུམ་གྱི་རྒྱལ་བ་རྣམས་དགོངས་པ་བྱང་ཆུབ་སེམས་དབྱེར་མེད་པ་རྒྱལ་བ་དགོངས་པས་བརྒྱུད་པའི་ཚུལ་དང་། རྡོ་རྗེ་སེམས་དཔའི་དགོངས་པ་གནས་རྒྱ་མཚོ་ནོར་བུ་རིན་པོ་ཆེའི་གླིང་དུ་བརྫུས་སྐྱེས་སུ་ཡང་བཞེད་ལ་རྒྱལ་རིགས་སུ་སྐུ་འཁྲུངས་པ་སྤྲུལ་པའི་སྐུ་དགའ་རབ་རྡོ་རྗེ་བཀྲ་ཤིས་པའི་རྒྱུད་དུ་ཡོན་ཏན་ཆེན་པོ་བདུན་དང་ལྡན་པར་ལུང་བསྟན་ཐོབ་པ་ལ་རིག་པས་བརྒྱུད་དེ། རིག་པ་ཉིད་བྱང་ཆུབ་སེམས་ཀུན་ཏུ་བཟང་པོའི་ངོ་བོར་ལྷུན་གྱིས་གྲུབ་པའོ། །ཀུན་ཏུ་བཟང་པོའི་དགོངས་པ་ཉིད་གོ་ཕྱེ་བའི་འཁོར་ལ་དར་བར་བྱ་བའི་ཕྱིར། དུས་དེར་གསེར་གྱི་གླེགས་བམ་ལ་བཻ་ཌཱུརྱའི་ཞུན་མས་རང་ནན་བགྱིས་པ་རང་སྣང་བར་གྱུར་ཏེ། ཚིག་མདོར་བསྡུས་པ་ཚིག་དྲུག་ལྟ་བུས་དོན་ཏེ་ལ་སོགས་པ་འཁོར་འདས་ཀྱི་ཆོས་ཐམས་ཅད་པ་ལམ་རིམ་བགྲོད་ཀྱི་རྩོལ་བ་དང་བྲལ་བས་ཀུན་ཏུ་བཟང་པོའི་སྐུ་གསུང་ཐུགས་སུ་གསལ་བར་བསྟན་པ་ལྟ་བུའི་བུངས་ཆུང་ལ་དོན་ཆེ་བའི་ཚིག་སྡེབ་སྦྱོར་ལེགས་པར་བཤད་པར་སྣང་ངོ་། །དེ་ནས་འཇམ་དཔལ་བཤེས་གཉེན་ནས་རིམ་པར་བརྒྱུད་ཐ་མ། སློབ་དཔོན་ཆེན་པོ་ཤྲཱི་སིང་ཧའི་དག་ཀྱང་ཡུལ་དང་རུས་རྒྱ་གར་དུ་སྣང་བའོ། །ས་བརྒྱད་པའི་ལུང་བསྟན་ཐོབ་པ་སློབ་དཔོན་ཆེན་པོ་བཻ་རོ་ཙ་ནས་ཀྱང་དཀའ་བ་མང་པོའི་སྐུ་ཉམས་སུ་བཞེས་ནས་རྒྱ་གར་ཡུལ་དུ་དཔལ་ཤི་ལེན་ན་ལེན་ཏྲའི་གཙུག་ལག་ཁང་དུ་སློབ་དཔོན་ཆེན་པོ་ཤྲཱི་སིང་ཧ་ལ་ཞུས་པ་སྟེ་དེས་རྒྱ་གར་སྐད་དུ་སྨོས་པའོ། །དེས་ན་ཀུན་ཏུ་བཟང་པོ་ནས་བརྒྱུད་ཚུལ་གསུམ་བར་མ་ཆད་པར་བརྒྱུད་དེ་ཁུངས་བཙུན་པོའི་དོན་གྱིས་ཡིད་ཆེས་པ་དང་། དེའི་དབང་གིས་ཞུགས་ནས་དོན་མཐར་ཕྱིན་པར་འགྱུར་བའོ། །སན་ཏི་དར་བ། ཞེས་པ་སྤྱིར་ན་སྐད་རིགས་མང་ན་ཡང་འབྱུང་བ་ལྔ་ལས་དཔེ་བླངས་པ་ལྔ་སྟེ། སང་སྐྲི་ཏའི་སྐད། བྱ་ཀ་ར་ནའི་སྐད་དང་། ཨ་བ་བྲང་ཤ་ནའི་སྐད་དང་། བྷི་ཤ་ཏི་ནའི་སྐད་དང་། བྱིངས་དང་ལྔའོ། །སང་སྐྲི་ཏའི་སྐད་ནི་ས་དང་འདྲ་སྟེ་བྱིངས་ཆེ་ཁ་གསལ་བརྟག་ཐུབ་ཀུན་ལ་འཇུག་པ་ལྷའི་སྐད་དེ། ཕ་རོལ་ཏུ་ཕྱིན་པ་དང་རྡོ་རྗེ་སེམས་དཔའི་སྒྱུ་འཕྲུལ་དྲ་བའི་རྒྱུད་ལ་སོགས་པའོ། །བྱ་ཀ་རའི་སྐད་ཆུ་དང་འདྲ་སྟེ། ཀུན་ལ་འཇུག་བརྟག་སླ་ཁ་གསལ་ཕུགས་མཐར་ཐུག་ཡོད་དེ་མདོ་སྡེ་རྣམས་སོ། །བྷི་ཤ་ཏི་ནའི་སྐད་མེ་དང་འདྲ་སྟེ་རྐྱེན་ལ་ལྟོས་ཏེ་ཕུགས་ཐུང་གཏན་ཚིགས་མི་ཆེ་བའི་མིང་གིས་མཚོན་མཁའ་འགྲོ་མའི་སྐད་དེ་སངས་རྒྱས་མཉམ་སྦྱོར་མ་གཏོགས་པའི་མ་རྒྱུད་ཐམས་ཅད་དོ། །ཨ་བ་བྲང་ཤ་ནའི་སྐད་རླུང་དང་འདྲ་སྟེ། ཁ་མི་གསལ་བརྟགས་དཀའ། རིག་པ་མི་གཅིག་མན་ངག་གཙོ་ཆེ་ཡི་དྭགས་ཀྱི་སྐད་དེ་གཤིན་རྗེའི་ཆོས་སྐོར་དང་ལྷ་མ་ཡིན་གྱི་ཡུལ་ནས་བྱུང་བའི་བསྟན་པ་རྣམས་སོ། །སྐད་ཀྱི་བྱིངས་ནི་ནམ་མཁའ་དང་འདྲ་སྟེ་བྱིངས་ཆེ་ཕུགས་རིང་བརྟག་དཀའ་ཟུར་གཅིག་གོ་བས་མང་པོ་གོ། ཚིག་ཉུང་ངུ་ཡིས་དོན་རྒྱས་པོ་ཆེ་སྟོན་ཏེ་རྫོགས་པ་ཆེན་པོ་འདི་ཉིད་དོ། །དེས་ན་སན་ཏི་དར་བ་ཞེས་པས་སོ་སོར་བསྒྱུར་དུ་མེད་དེ་བྱིངས་ཀྱིས་བསྒྱུར་བའོ། །སང་སྐྲི་ཏ་ལ་འོས་པ་སོ་སོར་ན་རྫོགས་པ་ནི་ཨ་ཏི་ཆེན་པོ་ནི་མ་ཧཱ་ལྟ་བུ་སྟེ་འདི་དེ་མིན་པས་སོ། །དེས་ན་སློབ་དཔོན་ཆེན་པོ་བཻ་རོ་ཙ་ན་ནི་མུ་བཞིའི་སྐད་ཀྱི་བྱེ་བྲག་ཐམས་ཅད་ལ་མཁས་པ་ཕུལ་དུ་ཕྱིན་པ་སྟེ། ཕྱོགས་འགའ་ཙམ་ཤེས་པ་ལྟ་བུ་མ་ཡིན་ཏེ། རྫོགས་པ་ཆེན་པོ་ཚིག་ཉུང་ངུས་དོན་རྒྱ་ཆེན་པོ་སྟོན་པས་སྐད་ཀྱི་བྱིངས་ཀྱིས་བསྒྱུར་བའོ། །འདིར་ཆེ་བ་ལྔ་སོ་སོ་ལ་རྒྱ་གར་སྐད་མེད་པ་ནི་ལྔ་ཀ་དཀྱུས་གཅིག་ཏུ་བསྒྱུར་བ་སྟེ། དེའི་དང་པོ་ལ་གཅིག་པ་ལ་རྒྱ་གར་བཏགས་ནས་ནམ་མཁའ་ཆེའི་ཞབས་སུ་འགྱུར་བྱང་བརྟགས་པ་སྟེ་ཆེ་བ་ལྔ་ལྔས་ལྟ་སྒོམ་སོགས་གཅིག་ཏུ་སྟོན་པས་དཀྱུས་གཅིག་ཏུ་བྱས་པའོ། །སེམས་བསྒོམ་ནི་གསུམ་ལས་སྔ་འགྱུར་ནི་དོན་བཅུ་གཉིས་མ་སྟེ། ཐིག་ལེ་དྲུག་པ་ནི་རྒྱུད་ཀྱི་ཁུངས་ཐམས་ཅད་ནས་དེ་ཉིད་ཡོད་པས་ཕྱི་འགྱུར་ཡིན་ཀྱང་འདི་ཉིད་བཅུག་པའོ། །ཐིག་ལེ་དྲུག་པ་ལ་ཕྱི་འགྱུར་གྱི་དབུ་ཡིན་པའི་དབང་གིས་རྒྱ་གར་སྐད་ཀྱང་ཡོད་དེ། གཞུང་ལྔའི་གོ་རིམ་ངེས་པར་བཞག་པའི་རྒྱུ་མཚན་ནི་སློབ་དཔོན་ཉིད་ཀྱིས་སློབ་དཔོན་ཤྲཱི་སིང་ཧ་ལ་གསན་པའི་དུས་ཀྱི་ལོ་རྒྱུས་ལ་གསལ་ལོ། །བོད་སྐད་དུ། ཞེས་པ་བོད་རྣམས་སྐད་མཐུན་པར་བྱ་བའི་ཕྱིར་ཀླད་དུ་སྨོས་པའོ། །མཚན་ཀླད་དུ་བསྟན་པའི་དགོས་པ་ནི། ཤིན་ཏུ་རྣལ་འབྱོར་གྱི་རྟེན་སྐལ་པ་མཆོག་དང་ལྡན་པ་དག་ཚིག་མདོར་བསྡུས་པ་ཉིད་ཀྱི་དོན་མ་ནོར་བ་མཐའ་གྲུ་རྒྱས་པར་རིག་པ་ལ་ལྷུན་གྱིས་གྲུབ་སྟེ། རྟོགས་པའི་རིག་པ་སྐད་ཅིག་ལ་ཀུན་ཏུ་བཟང་པོའི་དགོངས་སྤྱོད་ལྷུན་གྱིས་གྲུབ་ནས། བྱ་བརྩོལ་ནི་ཆོས་རྣམས་ལ་སྤངས་པ་མེད་པར་རང་དག་པ་ནི་སྐལ་པ་ཡང་རབ་ཀྱི་ཆེད་དོ། །དེ་ལས་གཞན་པ་ཡང་རྫོགས་པ་ཆེན་པོ་ས་གཅིག་པ་ཞེས་པས། དེའི་དོན་བཤད་པས་དཔེར་རྟ་དཀྱུས་ཀྱི་བྱང་འདྲེག་ན་དཀྱུས་མཇུག་རྗེས་སུ་མི་འདའ་བར་འོང་བ་ལྟར། གཞུང་བརྗོད་བྱེད་ཀྱི་ཚིག་གིས་བརྗོད་པའི་དོན་ཐམས་ཅད་མཚན་དོན་ལས་མི་འདའ་ཞིང་སླར་དེ་ཉིད་དུ་གཏན་ལ་འབེབས་པར་ཤེས་པས། གཞུང་ཉིད་ཟབ་མོ་ཡིན་པར་ཡིད་ཆེས་ཏེ། འཇུག་ནས་རྟོགས་བསྒོམ་མཐར་ཕྱིན་ཏེ་འབྲས་བུ་ལྷུན་གྱིས་གྲུབ་པ་དང་། གཉིས་ཀྱི་ཕྱིར་རོ། །མཚན་རང་གི་ངོ་བོ་ནི་དོན་དང་མཐུན་པའི་དགོངས་པ་སྟེ་འདིར་དོན་རང་གི་ངོ་བོ་ལས་བརྟགས་པ་ནི། རྫོགས་པ་ཆེན་པོས་གཅིག་པ། ཞེས་ཆོས་སྐད་བཟང་པོའི་སྐད་ཀྱིས་དབྱིངས་ཀྱིས་བསྒྱུར་ཏེ་ཚིག་ཉུང་ལ་དོན་ཟབ་ལ་མང་བའི་ཕྱིར་སྐད་ཀྱི་མཆོག་གོ། །དེ་ཡང་རྫོགས་ཞེས་པ་འཁོར་བ་དང་། མྱ་ངན་ལས་འདས་པའི་ཆོས་བརྟགས་གཞིར་གྱུར་པ་ཐམས་ཅད་མ་འགགས་པར་རང་སྣང་ཡང་ཆུ་དང་རླབས་བཞིན་རང་རིག་སྙིང་པོ་བྱང་ཆུབ་སེམས་སུ་རྫོགས་ཏེ། ཐམས་ཅད་དེར་གཅིག་ཅིང་ལྷུན་གྱིས་གྲུབ་ཀྱང་སྣང་སྟོང་གང་གིས་མཐས་མ་རེག་པས་ཆེན་པོའོ། །བརྟག་གཞི་དེ་ཉིད་གཞལ་པའི་ཐབས་ཀྱི་བརྗོད་བྱེད་ཀྱི་ཚིག་ཐེག་པ་རིམ་པ་དགུ་དང་རྣམ་པར་ཐར་པའི་སྒོ་བསམ་གྱིས་མི་ཁྱབ་པ་སྣང་ཡང་བརྗོད་བྱ་བྱང་སེམས་ཀྱི་རང་བཞིན་ལ་སྣང་ལ། སླར་ཡང་བྱང་སེམས་ཀྱི་རང་བཞིན་ལས་མི་གཉིས་པར་རྫོགས་པ་དང་། ཐེག་པ་མ་འགགས་པ་དེ་དག་འདི་མཐོང་བའི་ཐབས་ཀྱི་ལམ་ཡིན་པ་དང་། ལམ་མཐར་ཕྱིན་པའི་འབྲས་བུའང་བྱང་སེམས་ཉིད་ཡིན་པས་དེ་ཉིད་ལ་རྫོགས་ཀྱང་། བྱང་སེམས་ལ་སྣང་བ་དང་། རང་བཞིན་གང་གིས་ཀྱང་མ་རིག་ཅིང་དེ་ཉིད་དུ་དབྱེར་མེད་པས་ཚོ་ཆེན་པོའོ། །ཐོག་བྱའི་ཡུལ་དུ་བརྟག་པའི་གུ་ནའི་ཚོགས་སྐུ་རིགས་རྒྱན་གྱི་འཁོར་ལོ་དང་མ་འདྲེས་པ་ལ་མོང་བ་ཐམས་ཅད་བྱང་སེམས་ཀྱི་རང་བཞིན་ལ་རྫོགས་ཀྱང་རྒྱུ་འབྲས་སམ་རྩ་ལོའི་མཚན་ཉིད་བྲལ་ཞིང་གང་དུའང་མ་དམིགས་པས་ཆེན་པོའོ། །ཐེག་པ་བརྒྱད་པོའི་ལམ་གྱི་གུ་ན་ཡོན་ཏན་མ་ལུས་པ་ཐམས་ཅད་ཤིན་ཏུ་རྣལ་འབྱོར་ལ་སྣང་ཞིང་སླར་རང་རིག་བྱང་ཆུབ་སེམས་སུ་རྫོགས་ཀྱང་འོག་མའི་ལྟ་བསྒོམ་གྱི་ཆེད་འཛིན་གྱི་དྲི་མས་མ་གོས་པས་ཆེན་པོའོ། །དེས་ན་སྙིང་པོ་བྱང་ཆུབ་རང་རིག་ཡེ་ཤེས་ལ་སྣང་གྲགས་ཀྱི་ཆོས་ཐམས་ཅད་འབྲས་བུའི་ངོ་བོར་ལྷུན་གྱིས་རྫོགས་པ་ལ་རང་བྱུང་གི་ཡེ་ཤེས་ཡེ་ཤེས་ལྔ་དབྱེར་མེད་པའི་རང་བཞིན་ཉིད་ལ་རྫོགས་པ་རྫོགས་པར་བྱར་མེད་རིན་པོ་ཆེ་དབང་གི་རྭ་ཙེ་ལྟར་འབྲས་བུའི་གུ་ན་ཡོན་ཏན་ཐམས་ཅད་ལྷུན་གྱིས་རྫོགས་པ་ལ་རྫོགས་པ་ནི་ཞེས་བྱའོ། །ཆེན་པོ་འཁོར་འདས་ཀྱི་ཆོས་ཐམས་ཅད་བྱང་ཆུབ་སེམས་སུ་ལྷུན་རྫོགས་པས་བདག་ཉིད་ཆེན་པོར་ལྷུན་གྱིས་གྲུབ་སྟེ། གཞན་ཐ་སྙད་ཙམ་ཡང་མ་དམིགས་པ་ལ་ཆེན་པོ་ཞེས་བྱའོ། །ས་གཅིག་པ་ཞེས་པ་ས་ནི་གནས་པ་དང་རྟེན་པ་སྟེ། རང་རིག་སྙིང་པོ་བྱང་ཆུབ་པས་བསམ་བརྗོད་ཀྱི་ཡུལ་ལས་འདས་ཏེ་གང་དུའང་མ་གྲུབ་པ་ཉིད་གཞི་དང་གཞི་ཅན་མེད་ཀྱང་ཆོས་ཐམས་ཅད་ཀྱི་གནས་སུ་གྱུར་ཏེ། འཁོར་འདས་ཀྱི་ཆོས་ཐམས་ཅད་ཅི་ལྟར་སྣང་ཡང་བྱང་སེམས་ལས་མི་གཡོ་བས་གཞིའི་བདག་ཉིད་དང་། རང་རིག་པ་ཆེན་པོ་ཉིད་མེད་ལ་ཟད་མི་ཤེས། སྟོང་པ་ལ་ཐམས་ཅད་འབྱུང་བས་འཁོར་འདས་ལམ་གྱིས་བསྡུས་པའི་ཆོས་ཐམས་ཅད་བྱང་སེམས་ལ་བརྟེན་ཏེ་སྣང་། དེའི་ངང་ལས་མི་གཡོ་སླར་དེ་ཉིད་ལ་ཐིམ་པ་དང་། ལམ་ཐེག་པ་བརྒྱད་ཀྱི་བྱ་བ་ཐམས་ཅད་ཀྱང་ཀུན་གཞི་ས་ཆེན་པོ་ལ་བརྟེན་ཏེ་སོ་སོའི་དགོས་པ་གྲུབ་པར་བྱེད་པ་དང་། འགྲོ་དྲུག་གི་མཐུན་སྣང་ཐམས་ཅད་ཀྱང་དེ་ཉིད་ལ་སྟོན་ཏེ་གྲུབ་པར་བྱེད་པས་རྟེན་པའི་ཕྱིར་ཡང་ས་ཞེས་བྱའོ། །དེས་ན་བྱང་སེམས་ཀུན་གཞི་ནི་ཀུན་ནས་ཉོན་མོངས་པའི་གཞི་རྣམ་པར་བྱང་བའི་རྟེན་ཞེས་རྣམ་པ་འབྱེད་པ་དང་། ཐ་ཤེའི་ལམ་པས་སྨོས་སོ། །གཅིག་པ་ཞེས་པ་ཐ་སྙད་དེ་ཡང་། བལྟོས་པ་སྟེ་གང་ཡིན་ན་རྣམ་གྲངས་སུ་བརྗོད་པའོ། །དེ་ཡང་ལོ་ཀ་གཟུང་འཛིན་གྱི་ས་དང་། མུ་སྟེགས་པ་རྟག་ཆད་ལ་དམིགས་པའི་ས་དང་། ཉན་ཐོས་དགྲ་བཅོམ་པའི་འབྲས་བུ་ལས་སྦྱོར་བའི་ལམ་དཀར་པོ་རྣམ་པར་མཐོང་བའི་ས་པ་བྱང་ཆུབ་སེམས་དཔའ་རབ་ཏུ་དགའ་བ་འོས་པ་བཅུ་དང་། གསང་སྔགས་ཕྱི་ནང་དག་ཤེས་རབ་ཀྱི་ལམ་དང་། ཐབས་ལམ་སོ་སོའི་ས་བཅུ་དང་། ཟག་བཅས་ཟག་མེད་ཀྱི་སོ་སོའི་རིག་འཛིན་གྱི་ས་རྣམས་ཅི་ལྟར་སྣང་ཡང་། བྱང་སེམས་ཀྱི་ས་རང་བྱུང་ཡེ་ཤེས་སུ་གཅིག་སྟེ། གསེར་ལས་བྱས་པའི་རྫས་རྣམས་གསེར་དུ་གཅིག་པ་དང་འདྲ་བར། ཐམས་ཅད་རང་བྱུང་ཡེ་ཤེས་ཀྱི་ངང་དུ་གཅིག་ཅེས་བྱ་སྟེ། ཤིན་ཏུ་རྣལ་འབྱོར་གྱི་སྐབས་འདི་ཉིད་ཀྱང་རང་བྱུང་ཡེ་ཤེས་རིམ་པར་བགྲོད་དུ་མེད་པ་ཉིད་རྒྱུའི་དུས་ན་འབྲས་བུའི་ཆོས་ཐམས་ཅད་རྩལ་སྤྲུལ་པར་བསྟན་པས་ས་གཅིག་ཅེས་བྱའོ། །འོ་ན་ས་ཡི་རྣམ་གྲངས་དེ་རྣམས་བརྗོད་པས་བྱང་སེམས་དུ་མར་མ་གྱུར་རམ་ཞེ་ན། མི་འགྱུར་ཏེ་ས་དེ་དག་ཐམས་ཅད་ནི་བྱང་སེམས་མ་རྟོགས་པ་དང་། རྟོགས་པ་ཤས་ཆུང་བ་དང་། ཤས་ཤིན་ཏུ་ཆེ་བའི་ཁྱད་པར་ལ་བརྩིས་ཀྱི་རང་གི་ངོ་བོ་ལ་དུ་མར་འགྱུར་བ་མེད་དོ། །དེ་བས་ན་བྱང་སེམས་ཀྱི་དོན་ཐོག་ཏུ་བབ་པའི་ས་དེ་དག་བགྲོད་པ་མེད་པར་འདིར་རྫོགས་ཏེ་འདིར་ཆུབ་པས་རྫོགས་པ་སྤྱིར་ཆིབས་ཀྱི་ས་ཞེས་བྱའོ། །ཞར་ལ་བཤད་པ། གང་ཟག་གཅིག་གིས་ས་ཚད་མཐོ་དམན་གང་ནས་ཞུགས་ཀྱང་། དོན་མངོན་དུ་འགྱུར་བའི་སྤྱིར་ཆིབས་ཀྱི་ས་ནོན་པས་གཅིག་པ་དང་། ཐེག་པའི་བྱེ་བྲག་གིས་ས་ལམ་ཅི་ལྟར་བགྲོད་ཅིང་། དོན་ཆོས་དབྱིངས་ལ་དུ་མ་མེད་པ་གཅིག་གསུངས་སོ། །དེ་བས་ན་ས་ཡི་རྣམ་གྲངས་འདིར་གཅིག་པ་དང་། འདི་རྟོགས་ན་འོག་མ་རིམ་བཞིན་བགྲོད་དུ་མེད་པ་དང་། རིམ་བཞིན་དུ་བགྲོད་པའི་གུ་ན་ཡོན་ཏན་ཐམས་ཅད་ཀྱང་འདི་ཉིད་རྫོགས་ཤིང་འདི་ཉིད་ལ་ལྷུན་གྱིས་གྲུབ་པའི་ཕྱིར་གཅིག་ཅེས་བརྗོད་དོ། །དེ་ངོ་བོ་དགོངས་པའི་མཚན་དང་པོ་བསྟན་ནས། གཉིས་པ་ནི་བྱང་ཆུབ་ཀྱི་སེམས་རིག་པའི་ཁུ་བྱུག་ཅེས་བྱ་བ། ཞེས་པ་དཔེ་དོན་གཉིས་ག་ལ་བཏགས་པ་སྟེ། དོན་ནི་བྱེད་ཅེས་པ་དེ་ཁོ་ན་ཉིད་སྙིང་པོ་བྱང་ཆུབ་སེམས་ལ། ཉོན་མོངས་པ་དང་འཁྲུལ་པ་རང་བཞིན་གྱི་ཆོས་ཐམས་ཅད་ཡེ་ནས་མ་གྲུབ་སྟེ་གཉེན་པོའི་སྦྱང་དུ་ཡང་མེད་ལ་རང་གི་ངོ་བོ་ཉིད་ཤེས་བརྗོད་ལས་འདས་པ་ནི་བྱང་བའོ། །འཁོར་འདས་སམ་སྣོད་བཅུད་ཀྱི་ཆོས་ཐམས་ཅད་ཅི་ལྟར་སྣང་ཡང་འོང་བསྡུས་དང་བྲལ་བའི་ཚུལ་གྱིས་བྱང་སེམས་སུ་གཅིག་ཅིང་དབྱེར་མེད་དེ་རྣམ་གྲངས་ཀྱི་ཆ་ཤས་དང་བྲལ་བས་བྱང་ཆུབ་བོ། །ཀྱེ་སེམས་ཞེས་པ་དེ་མ་འདྲེས་པ་ཡོངས་སུ་རྫོགས་པའི་ངོ་བོ་ཚོགས་བརྒྱད་ཀྱི་རང་བཞིན་ཡེ་ནས་ངང་གིས་མཐའ་གང་དུ་ཡང་མི་གཡོ་ལ་ཡོང་གི་འོད་གསལ་བའི་བདག་ཉིད་ཅན་མཐའ་ཐམས་ཅད་མ་སྤངས་ངང་གིས་དག་ལ་དུས་གསུམ་མི་གཡོ་བའོ། །འོ་ན་དེ་ལྟ་བུའི་དོན་རང་བཞིན་རྣམ་པར་དག་པ་དེ། སྐྱེས་བུའི་བློ་ལ་སྣང་དུ་མི་བཏུབ་བམ་ཞེ་ན་བཏུབ་པ་ནི། རིག་པ་ཞེས་པ། འགྲོ་བ་རྣམས་ཀྱི་རིག་པ་གཟུང་འཛིན་དུ་ཡིད་ཀྱི་ཤེས་པར་སྣང་བ་ཉིད་རིག་པ་རང་གི་རང་བཞིན་མངོན་དུ་གྱུར་པའི་དུས། ཡིད་ཀྱི་ཤེས་པ་རང་བྱུང་གི་ཡེ་ཤེས་སུ་གསལ་ནས། ཡིད་ཀྱི་ཤེས་པ་གཞི་དག་གཟུང་འཛིན་རྩ་བ་བྲལ་འཁོར་བ་དཔྱིས་ཕྱིན། རང་རིག་ཡེ་ཤེས་རྩ་བ་དང་ལོ་མ་མེད་ཐམས་ཅད་དུ་ཁྱབ་བདལ་འུབ་ཆུབ་ཏུ་ལྷུན་གྱིས་གྲུབ་པ་ནི་དེ་ཁོ་ན་ཉིད་དོ། །ཁུ་བྱུག་ཞེས་པ་དཔེར་ན། སོས་ཀའི་དུས་ན་ཁུ་བྱུག་གྲགས་ན་ཀུན་ཡིད་འཇུག་དགའ་བ་བསྐྱེད་པ་དང་འདྲ་བར། སྐྱེས་བུ་ཡང་རབ་ཀྱི་བློ་ལ། དེ་ཁོ་ན་ཉིད་ཀྱི་དོན་གསལ་བར་སྣང་བའི་ཚེ། བྱ་རྩོལ་དང་བྲལ་བའི་ངང་ལ་གཟུང་འཛིན་ཕྲ་རག་དང་བྱ་རྩོལ་ངང་གིས་མ་དམིགས་ཏེ་ཐ་སྙད་ལས་འདས་པ་ཉིད་ལྷུན་གྱིས་གྲུབ་པ་ནི། རྩོལ་བས་མ་གདུང་བའི་དགའ་བ་བསྐྱེད་པ་སྟེ། ཅི་བཞིན་པ་ཉིད་དུ་སེན་ཤེས་འཇུག་པའི་དོན་ནོ། །དེ་ཡང་ཞི་བར་བཤད་ན། ཕུན་སུམ་འཚོགས་པའི་དཔེ་ནི། ཁུ་བྱུག་བྱ་བྲན་ཐམས་ཅད་ཀྱི་རྗེ་ཡིན་པ་དང་། རིགས་བཟང་ལ་སྐད་སྙན་ཏེ་སྐྱོན་མེད་པ་དང་། གློ་བུར་དུ་བསྐོས་པའི་བྱ་རྗེ་མ་ཡིན་ཏེ་ཡེ་ནས་ཡིན་པ་དང་། དུས་སུ་འབྱུང་ཞིང་དུས་སུ་སྲུན་པ་ལས་མི་འདའ་བ་དང་། ལུག་རིད་ཀྱི་སྲོག་འཛིན་པ་དང་། བྱ་རྗེ་ལ་གུ་ན་ཐམས་ཅད་ལྷུན་གྱིས་གྲུབ་པ་དང་དྲུག་སྟེ། དོན་རང་རིག་སྙིང་པོ་བྱང་སེམས་ཆོས་ཐམས་ཅད་ཅི་ལྟར་སྣང་ཡང་གཟུང་འཛིན་ཀ་ནས་དག་སྟེ་ཀུན་ཏུ་བཟང་པོའི་ངང་ཉིད་ལྷུན་གྱིས་གྲུབ་པས་ཆོས་ཐམས་ཅད་ལ་དབང་བསྒྱུར་བ་དཔེ་དང་པོ་ལྟ་བུ་དང་། རིགས་བཟང་ལ་སྐད་སྙན་སྐྱོན་མེད་པ་བཞིན་རང་རིག་སྙིང་པོ་བྱང་སེམས་རང་བཞིན་དུས་གསུམ་མི་འགྱུར་ཞིང་གདུལ་བྱ་ཤེས་རབ་མཆོག་གི་བློ་ཚིམ་པ་དང་། མཚན་མ་ཆ་ཤས་ཀྱི་སྐྱོན་གྱིས་མ་གོས་པ་དང་། བསྐོས་པའི་བྱ་རྗེ་མ་ཡིན་པ་བཞིན་བྱང་སེམས་རྒྱུ་ལས་མ་བྱུང་རྐྱ ེན་གྱིས་མ་བསྐྱེད་གཞན་གྱི་བྱས་བཅོས་བྲལ་བར་བསྟན་པ་དང་། དུས་སུ་འབྱུང་ཞིང་དུས་སུ་སྲུན་པ་ལས་མི་འདའ་བ་བཞིན་རང་རིག་བྱང་སེམས་ཅིར་ཡང་མི་འགག་པར་འཆར་ཡང་ངོ་བོ་ཆོས་དབྱིངས་སུ་ཚོགས་ཏེ་དེ་ཉིད་ལས་མ་གཏོགས་སྣང་བའི་མཐའ་དང་སྟོང་པའི་མཐའ་ལ་དམིགས་པས་ན་མི་འདའ་བ་དང་། ཁུ་བྱུག་གྲགས་ན་ལུག་རིད་ཀྱི་སྲོག་འཛིན་ཏེ་མི་འཆི་བར་ཤེས་པ་ལྟར། གཟུང་འཛིན་འཁྲུལ་པ་དང་ལམ་གྱི་རྩོལ་བ་ཐམས་ཅད་རང་རིག་བྱ་བྲལ་རྫོགས་པའི་ངང་དུ། དབུགས་འབྱིན་ནས་འཁྲུལ་རྩོལ་ངང་གིས་དག་པ་དང་། ཁུ་བྱུག་ལ་བྱ་རྗེའི་གུ་ན་ཐམས་ཅད་ལྷུན་གྱིས་གྲུབ་པ་ལྟར། རྟོགས་པའི་རང་རིག་ཉིད་འབད་པ་མེད་པའི་འབྲས་བུའི་གུ་ན་ཐམས་ཅད་ལྷུན་གྲུབ་ཏུ་བ ཞུགས་པའོ། །དེས་ན་གཏན་རྒྱ་ལས། རྡོ་རྗེ་ཚིག་དྲུག་བྱ་རྗེ་བཞིན། །རྩོལ་བས་དུབ་པ་དབུགས་འབྱིན་ཏེ། ཞེས་པ་རང་རིག་སྙིང་པོ་བྱང་ཆུབ་སེམས་དེ་ཁོ་ན་ཉིད། ཁུ་བྱུག་གྲགས་པ་ལྟར། བློ་ལ་གསལ་བར་ཤར་བའི་ཚེ་སྐབས་ན། ལུག་རིད་ཀྱི་དབུགས་འབྱིན་པ་དང་འདྲ་བའི། ཁམས་གསུམ་གཟུང་འཛིན་འཁྲུལ་པས་དུབ་པ་དང་། ལམ་པ་རྣམས་སོ་སོའི་ཆེད་བྱས་ཀྱི་རྩོལ་བས་དུབ་པ་རྣམས། སྙིང་པོ་བྱང་སེམས་རྟོགས་པའི་རིགས་པ་སྐད་ཅིག་གཅིག་ལ་རྩོལ་བ་སྤངས་པ་མེད་པས་རང་དག་པས་དབུགས་འབྱིན་ཏེ་ངལ་སོས་ཞེས་བྱ་བའོ། །དེས་ན་མཚན་གཉིས་པ་སྟེ་བརྗོད་བྱ་དོན་གྱི་ངོས་ནས་གདག་པའོ། །གསུམ་པ་བརྗོད་བྱ་ཚིག་གི་ངོས་ནས་གདག་པ་ནི། རྡོ་རྗེ་ཚིག་དྲུག་པ་ཞེས་པ་འབྲས་བུ་ཕྱེད་དཀའ་བའི་སྟེ། རྡོ་རྗེ་ཕ་ལམ་ནི། ཅིས་ཀྱང་བཤིག་ཅིང་གཞོམ་དུ་མེད་པ་བཞིན། དོན་སྙིང་པོ་བྱང་སེམས་སྤྱོད་ཡུལ་དུ་མ་གྱུར་པས། ཤེས་བརྗོད་ལས་འདས་ཏེ། སྐྱེ་འཇིག་དང་བྲལ་བའི་རྡོ་རྗེ་ལྟ་བུ་ཉིད། བརྗོད་པར་བྱེད་པའི་ཚིག་ཀྱང་བློ་ཡང་རབ་ཀྱི་ཡུལ་ཏེ་ཕལ་གྱིས་རིག་ཀྱང་རྟོགས་པར་དཀའ་ལ་འབྲས་བུ་མི་ཚོམ་པ་རྡོ་རྗེ་ལྟ་བུའོ། །ངང་རང་བཞིན་བདག་ཉིད་ཆེན་པོ་གསུམ་ཀུན་ཏུ་བཟང་པོ་དང་། བཟང་མོ་དང་། དབྱེར་མེད་པ་གསུམ་གྱིས། སྣང་གྲགས་ཀྱི་ཆོས་ཐམས་ཅད། མཐོང་སྣང་ཉིད་ན་ཕྱག་འཚལ་བའི་སྐབས་སུ། འཆད་པ་ལྟར་ཀུན་ཏུ་བཟང་པོ་ཡི་ངང་དུ་རྫོགས་པ་ལ། རྟོག་བརྟུལ་གྱི་འཕན་སེལ་མི་འདའ་བ་ཉིད་འབྲས་བུའི་ངོ་བོར་ལྷུན་གྱིས་གྲུབ་པ་སྟེ། དེ་བས་ན་གཞུང་འདིས་འབྲས་བུ་གཙོ་ཆེ་བར་མངོན་པ་དང་། རྫོགས་པ་ཆེན་པོ་རང་གཞུང་གི་འབྲས་བུ་སར་གཏན་ལ་ཕབ་པས། ལམ་གྱི་རྩོལ་བ་དང་བྲལ་བ་དང་། མཚན་དོན་རྫོགས་པ་ཆེན་པོ་ས་གཅིག་པ་དང་། རིག་པའི་ཁུ་བྱུག་ཅེས་བྱ་བ་དང་། རྩོལ་བས་དུབ་པ་དབུགས་འབྱིན་ཏེ་བྱ་བ་སོ་སོ། །དོན་དེ་ཉིད་ཚིག་རྐང་དྲུག་གིས་སྟོན་པས་རྡོ་རྗེ་ཚིག་དྲུག་པ་ཞེས་ཏེ། མཚོན་དོན་གྱི་ངོ་བོ་བརྗོད་བྱ་བརྗོད་བྱེད་གཉིས་སོ། །མཚན་དོན་གྱི་ཆེ་བ་ནི། སྭ་སྟི་དཔལ་གྱི་དཔལ་ཞེས་པ་དེ་ཡང་། སྭ་སྟི་ནི་བཀྲ་ཤིས་པའི་སྒྲ་སྟེ། བཀྲ་མི་ཤིས་པ་ལ་ལྟོས་ནས་འདོགས་ཏེ། ཁམས་གསུམ་གྱི་སྡུག་བསྔལ་རྒྱུ་དང་འབྲས་བུ་བཅས་པ་ཐམས་ཅད་ནི། ཀུན་བརྟགས་སུ་ལུས་སེམས་གདུང་བས་བཀྲ་མི་ཤིས་པ་སྟེ། སྣང་ཙམ་ཉིད་ན། རང་རིག་བྱང་སེམས་ས་གཅིག་པར་ལྷུན་གྱིས་ཚོགས་པས་རྩོལ་བ་མ་སྤང་ངང་གིས་དག་པས་བཀྲ་ཤིས་པ་ཆེན་པོའོ། །དོན་གཏིང་ནས་ལོགས་པའི་ལྟ་བ་སུམ་བརྒྱ་དྲུག་ཅུ་ལོགས་པ་ཐམས་ཅད་ལོག་པའི་རྒྱུ་འབྲས་བུ་རྩུབ་མོ་འབྱིན་པ་བཀྲ་མི་ཤིས་ཀྱང་སྤངས་པ་མེད་པར་མ་ནོར་བའི་དབྱིངས་སུ་གཅིག་པར་ཆུབ་པས་མ་སྤངས་ངང་གིས་བྲལ་ཏེ་བཀྲ་ཤིས་པའོ། །འབྲས་བུ་ཐོབ་བྱའི་ཡུལ་དུ་རེ་ཞིང་དུས་ལ་བཟའ་བ་ཐམས་ཅད་ཐོབ་པ་མེད་པའི་དབྱིངས་ས་གཅིག་པའི་ངང་དུ་སྐུ་དང་ཡེ་ཤེས་ཡེ་ཤེས་ལྷུན་གྱིས་གྲུབ་པའི་བཀྲ་ཤིས་ཞེས་འདོགས་པའོ། །ཡང་ན་སྭ་ནི་ཞི་བ་ལ། སྟི་ནི་ངལ་སོས་པ་སྟེ། བྱང་སེམས་རིམ་གྱིས་བསྒྲོད་པ་དང་བྲལ་བས་གཅིག་པའི་ངང་དུ་ཁམས་གསུམ་རང་རྒྱུད་ཀྱི་སྡུག་བསྔལ་རྒྱུ་དང་འབྲས་བུ་བཅས་པའི་རྩོལ་བ་དང་། མུ་སྟེགས་ལོགས་ལྟ་ལ་ཆེད་འཛིན་རྩོལ་བ་དང་། ཐེག་པ་བརྒྱད་པོ་སོ་སོའི་ལྟ་སྤྱོད་ཆེད་བྱས་ཀྱི་རྩོལ་བ་རྣམས་དང་། འབྲས་བུ་ཐོབ་བྱ་ཡུལ་དུ་བཟའ་བའི་རྩོལ་བ་རྣམས་རང་རིག་བྱང་སེམས་ས་ཆེན་པོའི་ངང་དུ། དཔེར་ན་ནམ་མཁའི་ཆོ་འཕྲུལ་ཐམས་ཅད་ནམ་མཁའི་ངང་དུ་དག་པ་བཞིན། འདིར་མ་སྤངས་ངང་གིས་དག་ཐ་སྙད་ཙམ་དུ་མ་དམིགས་ལ་ནི་ཞི་བ་ཞེས་བྱའོ། །དུས་དེ་ཉིད་ན། ཤིན་ཏུ་རྣལ་འབྱོར་གྱི་དོན་མངོན་དུ་གྱུར། །ཆོས་ཉིད་མངོན་དུ་མཐོང་ཇི་བཞིན་པར་སོན། །སྤྱིར་ཆིབས་ཀྱི་ས་ལྷུན་གྱིས་གྲུབ་པ་ནི། །རྩོལ་བ་ལ་རག་མ་ལས་ཏེ། བྱང་སེམས་ངང་དུ་ངལ་སོས་པའོ། །དཔལ་གྱི་དཔལ་ཞེས་པ་དང་པོ་ནི། རང་བཞིན་གྱི་ཆོས་ཀྱི་དབྱིངས་སྤྲོས་པ་མེད་པ་ས་གཅིག་པ་ཉིད་འཁོར་འདས་ཐམས་ཅད་བཞི་བཞག་ཏུ་བཞུགས་ཏེ། དེ་ལས་སྣང་བ་དང་མ་གཡོས་པ་དང་བསྣུམ་པའི་ཕྱིར་སྤྱི་དཔལ་ཆེན་མོའོ། །གཉིས་པ་ནི་དེ་ཉིད་ཀྱི་རྩལ་མ་འགགས་པ་འགྲོ་བའི་དོན་ལ་དགའ་བཞིན་མར་ཤར་ཏེ་ལམ་གྱིས་དེའི་དོན་རྟོགས་ནས་ནར་སོན་པའི་དུས་ན་སྡུག་བསྔལ་དང་བྱ་རྩོལ་དང་མཚན་མ་དང་རེ་བ་ཐམས་ཅད་ལས་འདས་ཏེ་བདེ་བ་ཆེན་པོ་ལྷུན་གྱིས་གྲུབ་པས་དཔལ་གཉིས་པ་སྟེ་རྟོགས་པ་མཐར་ཆིབས་པའོ། །ཡང་ན་དཔལ་དང་པོ་ནི་སྲིད་པ་ཟད་པའི་ཐབས་ཐེག་པ་ལུང་མན་ཆད་བརྒྱད་པོ་ཀུན་ལ་བྱ་སྟེ། གོང་མ་འོག་དཔལ་ཡིན་ཡང་རྩོལ་བ་དང་བཅས་པས་སོ། །གཉིས་པ་ནི་བྱ་བྲལ་རྫོགས་པའི་ལུང་། ཤིན་ཏུ་རྣལ་འབྱོར་གྱི་ཐེག་པ་འདི་ཉིད། དེ་འོག་མ་རྣམས་གང་ཡང་འདི་ཉིད་དུ་ཆུད་པའི་དུས་ན་རྩོལ་བ་མ་སྤངས་ངང་གིས་དག་སྟེ་ལྷག་པའི་ཆོས་སྐུ་ཆེན་པོར་སྨིན་པའོ། །དེས་ན་དཔལ་གྱི་དཔལ་ཞེས་བྱའོ། །དམ་པ་བདེ་བར་གཤེགས་པས་སྭ་སྟི་ཕྱིན་ཆད་འདི་ཕྱག་གི་འོག་ན་ཡང་འདོགས་ཏེ། མཚན་དོན་གྱི་ངོ་བོ་དེ་ཕྱག་གི་ཡུལ་ཉིད། རང་རིག་སྙིང་པོ་བྱང་སེམས་མ་འདྲེས་ཡོངས་རྫོགས་སུ་མཐུན་པས། གང་ལྟར་ཡང་བདེ་སྟེ་ཚིག་ལ་དཔལ་གསུམ་དུ་གྱུར་པ་དང་། མཚན་གྱི་ངོ་བོ་དང་ཆེ་བ་གཉིས་ཀྱིས་དེ་ལྟར་ལེགས་པོའང་གསུངས། ༈ །ཕྱག་འཚལ་བ་ནི། བཅོས་ལྡན་འདས་དཔལ་ཀུན་ཏུ་བཟང་པོ་སྐུ་གསུང་ཐུགས་རྡོ་རྗེ་བདེ་བ་ཆེན་པོ་ལྷུན་གྱིས་རྫོགས་པ་ལ་ཕྱག་འཚལ་ལོ། །ཞེས་པ་དགོས་པ་ནི་འདིར་ཤིན་ཏུ་རྣལ་འབྱོར་གྱི་སྟེ་ས་ལམ་རིམ་གྱིས་བགྲོད་པ་དང་བྲལ་བས། ཕྱི་ནང་གི་ཆོས་མཐོང་སྣང་ཉིད་ན་ཀུན་ཏུ་བཟང་པོའི་ཀ་བཙར་ལྷུན་གྱིས་གྲུབ་པ། རང་སྣང་བ་འབྲས་བུའི་ངོ་བོར་གསལ་བས། དེ་ལྟ་བུ་སྟོན་པའི་ཆོས་ཀྱི་ཁ་བྱང་དང་། ཕྱག་འཚལ་བའི་ཡུལ་དང་གཞུང་གི་དོན་གཅིག་སྟེ། ཕྱག་གི་དོན་བཤད་པས་གཞུང་གི་དོན་རྟོགས་པར་འགྱུར་བ་དང་། གོང་མ་དག་གི་མཉམ་པ་ཉིད་ལ་ཁུངས་མི་འབྱུང་ཞིང་བརྩམས་པ་མཐར་ཕྱིན་པར་བྱ་བའི་ཕྱིར་བསྟན་པ་དང་། འོག་མ་དག་གིས་མོས་གུས་ཀྱིས་ཚོགས་རྫོགས་པས་དེ་ལས་གདམས་ངག་སྣང་ནས་དོན་ཉིད་ཀྱིས་འགྱུར་ཡང་འགྱུར་བས་ཀླད་དུ་བསྟན་པའི་དགོས་པའོ། །བཞིའོ། །ཡུལ་ནི་མཚན་དོན་ཉིད་དོ། །ཐབས་ནི་ལྟ་བས་རྟོགས་ཏེ་ངེས་གོམས་ཏེ་མཐར་ཕྱིན་པའོ། །དེ་དག་ནི་བསྡུས་པའི་དོན་ནོ། །འབྲས་བུའི་དོན་ནི། བཅོམ་ལྡན་འདས་ཞེས་པ་ཤིན་ཏུ་རྣལ་འབྱོར་གྱི་སྐབས་འདིར་ཡུལ་དུ་བྱས་པའི་གཟུགས་ཀྱི་སྐུ་དག་པ་ཕྱོགས་གཅིག་པ་ལ་ལུས་ངག་གིས་གུས་འདུད་བྱེད་པ་ལྟ་བུ་མ་ཡིན་ཏེ་དེས་ན་འབྲས་བུའི་གཞོམ་པའི་སྐབས་སུ་ཡང་འོག་མ་ལྟར་གཉེན་པོ་སྟོབས་ཀྱི་སྤངས་བྱའི་ཚོགས་སྤངས་པ་དང་། ཆེ་བའི་གུ་ན་ཕུན་སུམ་ཚོགས་པ་ཉིད་འདིར་མི་སྒྲུབ་སྟེ་མ་སྤངས་ལྷུན་གྱིས་གྲུབ་སྟེ། དེ་ལས་ཀྱང་ཁྱད་པར་མི་མཐུན་པ་དང་གཉེན་པོ་དབྱེར་མེད་པར་ལྷུན་གྱིས་རྫོགས་པ་ཉིད་གཉེན་པོའི་སྟོབས་སུ་ཤར་བའི་ཕྱིར་འོག་མ་ལྟར་མི་སྦྱོར་ཏེ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དབྱེ་གསལ་མེད་པར་བྱང་སེམས་ཀྱི་ངང་དུ་འུབ་ཆུབ་སྟེ་མི་མཐུན་པ་མ་དམིགས་པས་བཅོམ། དེ་ཉིད་ན་མི་འགགས་པའི་རྩལ་ཆེ་བའི་གུ་ན་ཐམས་ཅད་ལྷུན་གྱིས་རྫོགས་པས་ལྡན། རང་རིག་བྱང་སེམས་བདག་ཉིད་ཆེན་པོར་ཡོངས་སུ་རྫོགས་པའི་གཏན་ཚིགས་ཀྱི་སྣང་སྟོང་གང་དུ་ཡང་མ་གྲུབ་སྟེ་འཛིན་པའི་མཚན་མ་དམིགས་སུ་མེད་པས་འདས་སོ། །དོན་དེས་བཅོམ་པས་ཀུན་ཏུ་བཟང་པོའི་རང་བཞིན་བསྟན། ལྡན་པས་ངོ་བོ་བསྟན། འདས་པས་མཚན་ཉིད་བསྟན་ཏོ། །ཡང་ན་འདིར་བཅོམ་པ་ནི་བདུད་བཞི་སྟེ། གཅིག་ཏུ་འདུས་པ་ཕུང་པོའི་བདུད། །ཡུལ་ལ་ཞེན་པ་ཉོན་མོངས་བདུད། །སོ་སོར་གྱེས་པ་འཆི་བདག་བདུད། །རང་དབང་མེད་པ་ལྷ་ཡི་བདུད། །བཞི་པོ་ཉིད་དུ་འོག་མའི་བཞི། །བཅོམ་པ་འདིར་མ་སྤངས་ངང་གིས་ལྡན་ཀྱང་འདི་ཉིད་དུ་སྙིང་པོ་བྱང་སེམས་ཀུན་མ་བྱས་པའི་ངང་ལ་རྟག་པ་རང་སྣང་གི་ཕུང་པོ་ཡང་། རང་བྱུང་ཡེ་ཤེས་ལས་མི་གཞན་པས་ཕུང་པོའི་བདུད་ཡུལ་དུ་མ་སྤངས་ངང་གིས་བྲལ་བའོ། །གཟུང་འཛིན་ཡུལ་ཡུལ་ཅན་ལྟར་སྣང་ཡང་བྱང་སེམས་ལ་ཆ་ཤས་མེད་པས་ཡུལ་མ་གྲུབ་པས་ཡུལ་ཅན་ངང་གིས་མི་གནས་ཏེ། བདག་ཉིད་ཆེན་པོར་རྫོགས་པ་ལ་ཆགས་སྡང་ངང་གིས་མི་གནས་པས་ཉོན་མོངས་པའི་ཚོགས་ཡེ་ཤེས་སུ་ལྷུན་གྱིས་གྲུབ་བོ། །དེར་ཉོན་མོངས་པའི་བར་ཆོད་མ་སྤངས་ངང་གིས་དག་གོ། །བྱང་སེམས་རང་སྣང་གི་ཡེ་ཤེས་ལ་སྐྱེ་བའི་ཕུང་པོ་མ་གྲུབ་པས་འགག་པའི་ཆོས་མི་གནས་ཏེ་ངོ་བོ་ཉིད་ཀྱི་རྟག་པ་ནི་ནམ་མཁའ་ལྟ་བུ་བས་འཆི་འཕོ་བའི་འགྱུར་བ་དང་བྲལ་ཏེ། འཆི་བདག་མ་སྤངས་ངང་གིས་དག་པའོ། །བྱང་སེམས་ངོ་བོ་འདུས་མ་བྱས་པས། ལས་དབང་ལ་མི་བརྟེན་ཏེ་དེ་ནས་གཞན་དག་མ་ཡིན་པས་མི་མཐུན་པ་ཀ་ནས་དག་སྟེ་གཉེན་པོ་ངང་གིས་མ་གྲུབ་པས་ལྷའི་བུའི་བདུད་ཐ་སྙད་ཙམ་དུ་ཡང་མ་གྲུབ་བོ། །དེས་ན་བྱང་སེམས་ལ་བདུད་བཞི་ངང་གིས་མི་གནས་པས་བཅོམ་ཞེས་བྱའོ། །ལྡན་ཞེས་པ་རང་རིག་བྱང་སེམས་རིམ་གྱིས་བགྲོད་པ་དང་བྲལ་བའི་དོན་ལ་དཀར་པོ་བདུན་ལ་སོགས་པ་འབྲས་བུའི་ཆེ་བའི་ཡོན་ཏན་གུ་ན་རྩལ་ལས་འདས་པ་རྣམས་རྒྱུ་རྐྱེན་ལས་མ་བྱུང་བྱེད་པ་པོས་མ་བྱས་ཏེ་ཡེ་ལྷུན་གྱིས་གྲུབ་པར་བཞུགས་པ་ལ་ལྡན་ཅེས་བྱ་བའམ། ཡང་ན་སྙིང་པོ་བྱང་སེམས་གསལ་ལ་མི་འགག་པས་མ་འདྲེས་པའི་ཆོས་ཐམས་ཅད་དང་ལྡན་ལ་ངོ་བོ་མ་དམིགས་པས་རང་བཞིན་གྱི་ཆོས་ཐམས་ཅད་དང་ལྡན་ཏེ་ཐ་སྙད་པའི་ངོ་ལ་སྣང་བའི་སྣང་སྟོངའམ་རྟོག་པ་ཐམས་ཅད་འཁོར་འདས་ཀྱི་བརྗོད་པ་ཐམས་ཅད་མ་འདྲེས་ཡོངས་སུ་རྫོགས་པ་ལྷུན་གྱིས་གྲུབ་པས་ལྡན་ཞེས་བྱའོ། །འདས་ཞེས་པ་མཚན་ཉིད་དམིགས་སུ་མེད་པས་སྤྲོས་པ་ལས་འདས་པའམ། ཡང་ན་རང་བྱུང་ཡེ་ཤེས་ཁུ་བྱུག་གི་དོན་རང་སྣང་གི་ཡེ་ཤེས་ཆེན་པོར་ལྷུན་གྱིས་གྲུབ་ཀྱང་ཆོས་ཀྱི་དབྱིངས་ལས་མ་གཡོས་པས་དངོས་པོའི་མཐའ་ལས་འདས། དེ་ཉིད་ཅིར་ཡང་མི་འགག་པར་འཆར་བས་སྟོང་པའི་མཐའ་ལས་འདས་ཏེ། དེ་ཉིད་དུའང་ཞེན་པས་བཟུང་བ་དང་བྲལ་བ་ལ་ནི་འདས་པ་ཞེས་བྱའོ། །དཔལ་ཞེས་པའི་གུ་ན་བསྟན་ཏེ། དཔལ་ནི་གསུམ་སྟེ། རང་བཞིན་མཚན་ཉིད་ཐམས་ཅད་ལས་འདས་ཀྱང་སྟོང་པའི་ཕྱོགས་གཅིག་པ་མ་ཡིན་ཏེ། བྱང་སེམས་རང་བྱུང་གི་ཡེ་ཤེས་ལྷུན་གྱིས་གྲུབ་པ་ལ། རྒྱན་གྱིས་ཙ་ཀྲ་ཉེར་ལྔ་ལ་སོགས་པ་འབྲས་བུའི་ཆོས་ཐམས་ཅད་མ་རྟོགས་པའི་དུས་ན་རྫོགས་བཞིན་པའི་རང་བཞིན་ལྷུན་གྲུབ་ཀྱི་དཔལ་ལོ། །དེ་ནི་ཡིད་བཞིན་གྱི་ནོར་བུ་རིན་པོ་ཆེ་ཡོན་ཏན་འབྱུང་བའི་བདག་ཉིད་དུ་བཞུགས་པ་གཞན་གྱིས་མ་བརྩལ་བར་ལྷུན་གྱིས་གྲུབ་པ་ལྟ་བུའོ། །དོན་དེ་ཉིད་ཐབས་ཁྱད་པར་འཕགས་པ་ཤིན་ཏུ་རྣལ་འབྱོར་གྱི་ལུང་དང་དེ་ཉམས་སུ་ལོན་པའི་ཉམས་ཀྱི་མན་ངག་གཉིས་ཀྱི་རང་རིག་པའི་མངོན་སུམ་དུ་ཕྱི་ནང་སྣོད་བཅུད་ཀྱི་ཆོས་ཐམས་ཅད་གཞི་ཅི་ལྟ་བ་མངོན་དུ་བྱས་ཏེ། རིམ་གྱིས་བགྲོད་པ་དང་བྲལ་ནས་དོན་མཐར་ཐུག་བསྐྱེད་དུ་བྱ་བ་མེད་དེ་ཉིད་དུ འང་འཛིན་པ་མེད་པ་ནི་གསལ་ལ་འགག་པ་མེད་པས་རིག་པ་རང་སྣང་གི་དཔལ་ཞེས་བྱའོ། །བྱིན་རླབས་རང་སྣང་ཀ་བ་རྩ་གསུམ་དང་མཛད་པ་བསམ་གྱིས་མི་ཁྱབ་པ་ནི། ནམ་མཁའ་དག་གི་ཟླ་བ་རྒྱས་པ་ཆུ་ཐམས་ཅད་ཀྱི་ནང་ན་སྣང་བཞིན་ཏེ། འབྱུང་འཇུག་མེད་པའི་རང་བྱུང་ཡེ་ཤེས་ཉིད་ཆོས་ཐམས་ཅད་ལ་ཁྱབ་པའི་དོན་གྱིས་ཐུགས་རྗེ་ཞེས་སྨོས་ཏེ། ཡུལ་དུ་མ་བྱས་པའི་མཛད་པའི་རླབས་རང་སྣང་བ་ནི་རྟོགས་པའི་ཞར་ལ་འགག་པ་མེད་པར་རང་སྣང་སྟེ་གདུལ་བྱའི་སྣང་བའོ། །དེ་ཡང་རྟོགས་པ་མཐར་ཐུག་པ་ནི་རིན་པོ་ཆེ་མངོན་དུ་བྱས་པ་དང་འདྲ་ལ་གསོལ་བ་བཏབས་པ་བཞིན་དུ་དགོས་འདོད་འབྱུང་བ་ནི་གཞན་སྣང་སྟེ། སྐད་ཅིག་ལ་དུས་གཅིག་ཏུ་མཐར་ཐུག་པ་མེད་པར་སྣང་སྟེ་རེས་མོ་དང་འབྱུང་འཇུག་ལ་དམིགས་སོ། །ཞར་ལ་འབྱུང་བའི་དཔལ་ཞེས་བརྗོད་དོ། །དཔལ་གསུམ་ལྷུན་གྱིས་གྲུབ་པའི་བསྟན་པའི་བསྟན་པ་འབྱུང་བའི་གཞི་སྟོན་པའི་ངོ་བོ་ཅི་ལྟ་བུ་ཞེ་ན། ཀུན་ཏུ་བཟང་པོ་ཞེས་པས་རླབས་རང་སྣང་བའི་མི་འགག་པའི་ཆོས་ཐམས་ཅད་ནི་ཀུན་ཏུ་བཟང་པོ་ཞེས་བྱ་སྟེ་སྣོད་བཅུད་འཁོར་འདས་ཀྱི་ཆོས་ཅི་ལྟར་སྣང་ཡང་བྱང་སེམས་རང་སྣང་གི་ཡེ་ཤེས་ཆེན་པོ་སྟེ། ཡུལ་ཡུལ་ཅན་མ་གྲུབ་པ་གཟུང་འཛིན་ངང་གིས་མི་གནས་ཏེ་འཁོར་བ་མ་གྲུབ་པས་འདས་པ་ཞེས་བྱ་བའི་གདགས་གཞི་བྲལ་ཡང་གཟུང་འཛིན་དང་ཆ་ཤས་མ་མེད་དེ་ཉེས་པའི་སྐྱོན་གྱི་མ་གོས་པས་ཐ་སྙད་ཙམ་དུ་ཀུན་ཏུ་བཟང་པོ་ཞེས་སྨོས་སོ། །དེ་ཡང་རང་བཞིན་ལ་དབྱེ་བ་མེད་ཀྱང་ལམ་པའི་ངོས་ནས་ལྔ་སྟེ། ཆོས་ཐམས་ཅད་ཡོངས་སུ་རྫོགས་པ་ལ་མ་འདྲེས་ལ། བདག་ཉིད་ཆེན་པོར་ལྷུན་གྱིས་གྲུབ་པའི་ངང་ལ་གཞན་མ་དམིགས་པའི་དབང་གིས་སྣོད་བཅུད་དང་གཟུང་འཛིན་དང་ཕྱི་ནང་འོས་པའི་ཆ་ཤས་གཞི་ནས་དག་པ་ནི་རང་བཞིན་ཀུན་ཏུ་གཟང་པོའོ། །དེ་ལྟ་བུའི་དོན་མངོན་དུ་གྱུར་པའི་རིག་པ་ལ་རང་བཞིན་ཅི་ལྟ་བ་མངོན་དུ་བྱ་སྟེ། རིག་པ་ལ་ལྷུན་གྱིས་གྲུབ་པའི་དུས་སུ་སྣང་བར་འཛིན་པ་དང་སྟོང་པར་འཛིན་པ་འོས་པ་སྟེ་ཆེད་བྱས་ཀྱི་གཟུང་འཛིན་གྱི་སྐྱོན་གྱིས་མ་གོས་ཏེ། རིག་པ་རང་གསལ་ཆེད་འཛིན་དང་བྲལ་བ་ནི་ལྟ་བ་ཀུན་ཏུ་བཟང་པོའོ། །དོན་དེ་ཉིད་རིགས་པ་ལ་མཉམ་པར་བཞག་པའི་དུས་སུ་རང་ཉིད་ཀྱི་དོན་དེ་ཉིད་དུ་གསལ་བས་ཡུལ་དང་ཡུལ་ཅན་ཡང་མ་གྲུབ་ཕྱི་ནང་དུ་ལྟ་བའི་དངོས་པོ་ཡང་མ་དམིགས། སེམས་ཉིད་རང་ལ་ཡེ་ཤེས་ཆེན་པོར་སྣང་བས་བྱིངས་རྨུག་རྒོད་འཐོར་འོས་པའི་རྐྱེན་རང་དག་གསལ་ལ་མི་གཡོ་བའི་ངང་ལ་ཆེད་འཛིན་དང་བྲལ་བ་ནི་ཏིང་ངེ་འཛིན་ཀུན་ཏུ་བཟང་པོའོ། །དེ་ཉིད་སྲོག་ཏུ་གྱུར་པའི་དབང་གིས་ཡུལ་དྲུག་འོས་པ་འགགས་མེད་ཀྱི་ཆོས་ཐམས་ཅད་དུ་སྣང་ཡང་ཡུལ་དུ་མ་གྲུབ་པས་མ་དམིགས་མ་བཀག་པས་རོལ། བདག་ཉིད་ལ་བདག་ཉིད་རོལ། བདག་ཉིད་ལ་བདག་ཉིད་སྤྱོད་པ་ནི། བདག་ཉིད་ཆེན་པོའི་སྤྱོད་པ་ཞེས་བྱ་སྟེ། ཅི་བྱས་འཛིན་མེད་ནམ་མཁའི་བྱ་ལམ་བཞིན་བྱས་ཀྱང་། མི་སོགས་ཚིག་པའི་གཟུགས་བརྙན་བཞིན་པས། འཆི་བྱ་འཆི་བྱེད་གཏན་མ་གྲུབ་པ་ནི་འགགས་མེད་རང་སྣང་གི་སྤྱོད་པ་ཀུན་ཏུ་བཟང་པོའོ། །སྤྱོད་པའི་དོན་དེ་ཉིད་ཀྱིས་བདག་གཞན་དབྱེར་མེད་པས་འགྲོ་དྲུག་ཡུལ་དུ་མ་གྲུབ་རང་སྣང་རྡོ་རྗེ་དབྱིངས་ཀྱི་དཀྱིལ་འཁོར་དུ་དེ་དག་ཐམས་ཅད་བསད་པ་མེད་པར་རྡོ་རྗེའི་མཚོན་གྱིས་བསྒྲལ་ཏེ། རང་རིག་སྙིང་པོ་བྱང་ཆུབ་སེམས་སུ་རྟོགས་པས་བསྒྲལ་བས་འགྲོ་དྲུག་རང་སར་དག །འཁོར་བ་འཕྱིས་བྱུང་ཐམས་ཅད་ཀུན་ཏུ་བཟང་པོའི་ངང་དུ་རྫོགས་པ་ནི་འཕྲིན་ལས་ཀྱི་འབྲས་བུའང་ཡིན་ཏེ་ཆེད་འཛིན་ཕྲ་བའང་མི་མངའ་བ་ནི་འཕྲིན་ལས་ཀུན་ཏུ་བཟང་པོའོ། །ལྔ་པས་ཚིག་གི་ཐ་སྙད་དུ་ཕྱེས་ཀྱང་ངོ་བོ་དབྱེར་མེད་པ་ཉིད་སྟོན་པའི་ངོ་བོའོ། །དོན་བསྡུས་ན་གཉིས་སྣང་གི་ཆོས་ཐམས་ཅད་གཉིས་མེད་བྱང་སེམས་ངང་དུ་འུབ་ཆུབ་པས་ཆེད་འཛིན་གྱི་སྐྱོན་མི་མངའ་བ་ལ་ངན་པ་བཙལ་གྱིས་མི་རྙེད་པ་ལ་ཐ་སྙད་དུ་ཀུན་ཏུ་བཟང་པོ་ཞེས་སྨོས་སོ། །འོ་ན་སྟོན་པ་དེའི་ཆ་ལུགས་ཅི་ལྟ་བུ་དང་ལྡན་ཞེ་ན། གོང་དུ་དཔལ་གྱི་སྐབས་སུ་བཤད་པ་བཞིན། འཁོར་འདས་ཀྱི་ཆོས་ཐམས་ཅད་རང་སྣང་ཀུན་ཏུ་བཟང་པོའི་ཆ་ལུགས་སུ་ཤར་བའི་ཕྱིར། སྐུ་གསུང་ཐུགས་ཞེས་སྨོས་ཏེ་བུ་ཏའི་སྐུ་མཚན་དང་དཔེ་བྱད་ཀྱིས་འབར་བ་དུས་གསུམ་གྱིས་དབྱེ་བ་ཐམས་ཅད་དང་། ཁམས་གསུམ་གྱི་ཡུལ་དང་དབང་པོར་བཅས་པའི་སྣང་ངོ་ཅོག་ཐམས་ཅད་ངོ་བོ་དབྱིངས་ལས་མ་གཡོས་རྣམ་པ་སྒྱུ་མའི་མཚན་ཉིད་ཙམ་མི་འགག་དེ་ཡང་དབྱེར་མེད་པའི་སྐུའི་ཆ་ལུགས་སོ། །དེ་བཞིན་གཤེགས་པའི་གསུང་ཡང་བསམ་གྱིས་མི་ཁྱབ་པ་དང་སེམས་ཅན་གྱི་ཟིན་པ་དང་མ་ཟིན་པ་དང་། གཉི་ག་ལས་བྱུང་བའི་སྒྲ་ཐམས་ཅད་ངོ་བོ་དབྱིངས་ལས་མ་གཡོས་རྣམ་པ་མི་འགག་དབྱེར་མེད་པ་ནི་གསུང་གི་ཆ་ལུགས་སོ། །དེ་བཞིན་གཤེགས་པའི་ཐུགས་ཅི་ལྟ་བ་དང་ཅི་སྙེད་པ་དང་དབྱེར་མེད་པར་བསྡུས་པའི་ཡེ་ཤེས་གསུམ་དང་ལྔ་དང་དགུ་དང་ཏིང་ངེ་འཛིན་གྱི་སྒོ་འབུམ་ཕྲག་རྣམས་དང་། སེམས་ཅན་གྱི་དུས་གསུམ་དུ་བསྡུས་པའི་དྲན་རྟོག་བསམ་གྱིས་མི་ཁྱབ་པ་རྣམས་ངོ་བོ་དབྱིངས་ལས་མ་གཡོས་རྣམ་མཁྱེན་རང་གི་མཚན་ཉིད་ཙམ་དུ་མི་འགག་དེ་ཡང་དུས་གསུམ་དུ་དབྱེར་མེད་པ་ནི་ཀུན་ཏུ་བཟང་པོའི་ཐུགས་ཀྱི་ཆ་ལུགས་སོ། །འོ་ན་བྱེ་བྲག་བསམ་གྱིས་མི་ཁྱབ་པས་དུ་མར་འགྱུར་རོ་ཞེ་ན། མི་ཕྱེད་པའི་དོན་དམ་པ་རྡོ་རྗེ་ཞེས་སྨོས་ཏེ། དོན་རང་བྱུང་ཡེ་ཤེས་སྐྱེ་འཇིག་མེད་པ་དེས་རྡོ་རྗེ་མཚོན་ཏེ། ངོ་བོ་ཆོས་དབྱིངས་དུས་གསུམ་དུ་མི་འགྱུར་བས་རྡོ་རྗེ་རྣམ་པ་རང་བྱུང་གི་ཡེ་ཤེས་གསལ་ལ་འགག་པ་མེད་པས་ཐ་སྙད་ཀྱི་ཆོས་ཐམས་ཅད་དེ་ཉིད་དུ་འཇོམས་པས་ཀྱང་རྡོ་རྗེ། དེ་གསུམ་ཀྱང་མི་ཕྱེད་ཆུ་དང་གཤེར་བའམ། མར་དང་སྣུམ་པ་ལྟར་དབྱེར་མེད་པའི་དོན་གྱི་རྡོ་རྗེའོ། །བདེ་བ་ཞེས་པ་འདོད་ཁམས་འདོད་དོན་གྱི་བདེ་བ་དང་། གཟུགས་ཁམས་བསམ་གཏན་གྱི་བདེ་བ་དང་། བྱིས་པ་གསུམ་འགོགས་པའི་བདེ་བ་དང་། བྱང་ཆུབ་སེམས་དཔའ་དག་མཉམ་བཞག་པའི་བདེ་བ་དང་། མ་ཧཱ་ཁ་སྦྱར་གྱི་བདེ་བ་དང་དེ་དག་ལ་སོགས་པ་ཐམས་ཅད་ཀྱི་དེངས་གཞིར་སྙིང་པོ་བྱང་སེམས་ལྷུན་གྱིས་གྲུབ་ཀྱང་རྩོལ་བས་མ་གོས་པའི་ཕྱིར་ད ང་། ཐམས་ཅད་ཀྱིས་བསྐྲུན་དུ་མེད་པའི་ཕྱིར་དང་། ཐམས་ཅད་ལ་ཁྱབ་པའི་ཕྱིར་ན་ཆེན་པོའོ། །ལྷུན་གྱིས་རྫོགས་པ་ཞེས་པ། རང་བྱུང་གི་ཡེ་ཤེས་གང་དུའང་མ་གྲུབ་བཞིན་གུ་ན་ཐམས་ཅད་རྩོལ་བ་མེད་པར་ལྷུན་གྱིས་རྫོགས་ཏེ་གོང་གི་ཡོན་ཏན་དང་ཆ་ལུགས་དང་། བདེ་བ་ཐམས་ཅད་དེ་ལྷུན་གྱིས་གྲུབ་ཀྱང་། རྩོལ་བའི་བྱ་བ་དང་བྲལ་ཏེ་ཐོག་མར་མ་བྱས་ད་ལྟར་བྱར་མེད་མཐར་མི་འགྱུར་ཡེ་ནས་བྱ་རྩོལ་དང་བྲལ་བའི་ངང་དུ་ལྷུན་གྱིས་གྲུབ་ཀྱང་། ཐམས་ཅད་ཀྱང་དེར་ཚོགས་ཏེ་ནོར་བུ་རིན་པོ་ཆེ་ལྟ་བུར་གྱུར་པ་ནི། ལ་ཞེས་པས་ཐ་སྙད་དུ་འདུད་པའི་ཡུལ་ཏེ། ཕྱག་འཚལ་ལོ་ཞེས་པ། ཐེག་པ་འོག་མ་རྣམས་ཀྱི་ཕྱག་ཀྱང་འདིར་བཀག་པ་མ་ཡིན་ཏེ་ཚུལ་གཉིས་ཀྱིས་རང་བཞིན་ཡེ་ནས་དབྱེར་མེད་པ་མི་ཕྱེད་འདྲེས་པའི་ཕྱག་དང་། རིག་པ་རང་གསལ་བར་ལ་སོགས་པའི་ཕྱག་དང་། བསམ་གཏན་ཡུལ་དང་བྲལ་བར་ཏེ་དེའི་ཕྱག་དང་། མཐར་ཕྱིན་འབྲས་བུའི་ཕྱག་འཚལ་བའོ། །དེ་ལྟར་ཕྱག་འཚལ་བ་ཡང་ཡུལ་དང་ཡུལ་ཅན་དུ་དམིགས་ནས་མོས་འདུད་ཀྱི་མཚན་མ་མེད་པར་བསྟན་ཏོ། །གཞུང་བཤད་པ་ལ་རྡོ་རྗེའི་ཚིག་དྲུག་པ་གཅོད་དོན་དྲུག་གིས་ཕྱག་འཚལ་བ་ནི། དོན་ལྟར་སྟོན་པ་ཀུན་ཏུ་བཟང་པོའི་ཆ་ལུགས་ཅི་ལྟར་གནས་པའི་གཏན་ཚིགས་རྣལ་འབྱོར་པའི་བགྲོད་པ་མེད་པའི་ལམ་དུ་བསྟན་ཏེ། དེ་ཡང་དང་པོ་རང་བཞིན་གྱི་གཏན་ཚིགས་ནི། སྣ་ཚོགས་རང་བཞིན་མི་གཉིས་ཀྱང་། ཞེས་པ་དེ་ཡང་སྣ་ཚོགས་ཞེས་པས། མི་འདྲ་བའི་བྱེ་བྲག་མང་པོར་བརྗོད་པ་ནི་འཁོར་བ་དང་མྱ་ངན་ལས་འདས་པའི་ཆོས་ཏེ། འཁོར་བའི་ཆོས་མ་རིག་པ་དང་རྐྱེན་ལས་དང་ཉོན་མོངས་པ་ལས་བྱུང་བའི་གཉིས་ཅན་གྱི་བྱེ་བྲག་སྟེ། ཁམས་གསུམ་གྱི་སྣོད་བཅུད་དང་གཟུང་འཛིན་དང་བརྟན་གཡོའི་བྱེ་བྲག་ཕྲ་རག་ཐམས་ཅད་དང་། མྱ་ངན་ལས་འདས་པའི་ཆོས་སྐུ་དང་ཡེ་ཤེས་དང་རྒྱན་དང་འཁོར་ལོ་དང་སྟོབས་དང་མི་འཇིགས་པ་འོས་པའི་གུ་ནའི་བྱེ་བྲག་བསམ་གྱིས་མི་ཁྱབ་པ་ཐམས་ཅད་དང་། དེ་གཉིས་སུ་འཛིན་པ་ཡང་ཞེན་པ་གཉིས་ཀྱི་སྣང་བ་སྟེ་འཁོར་འདས་གཉིས་ཀྱི་ལྟོས་པའི་དབང་གིས་སོ། །རང་བཞིན་ཞེས་པ་འཁོར་འདས་ཀྱི་ཆོས་མ་འགག་པ་ཅི་ལྟར་སྤྱོད་ཀྱང་། རང་གི་དུས་གསུམ་དུ་མི་འགྱུར་ཞིང་ཐམས་ཅད་ལ་ཁྱབ་ཀྱང་མི་ཕྱེད། དངོས་པོའི་ཆོས་གང་གིས་ཀྱང་མ་གོས་ཆ་ཤས་སུ་མི་རྙེད་དེ་ཐ་སྙད་དུ་རྣམ་པར་དག་པ་ཞེས་བྱའོ། །མི་གཉིས་ཞེས་པ་ལྟོས་པ་དེ་དག་ནི་མིང་ཙམ་སྣང་གི་རང་བཞིན་ལས་དུས་གསུམ་མ་གཡོས་ཏེ། སྣང་བའི་དུས་ཉིད་ན་སྒྱུ་མ་ལྟར་རང་གི་ངོ་བོ་མ་ངེས་པ་དེ་གཅིག་ཏུ་ས་མི་ཟིན་པས་ཅིར་ཡང་སྣང་བ་དང་། ངང་གིས་རང་རྒྱུད་པ་མེད་དེ་ཅི་ལྟར་སྣང་ཡང་། རང་བཞིན་ལ་སྐད་ཅིག་གིས་ཀྱང་མ་གཡོས་པས་སོ་སོའི་བཏགས་པ་ལྟར་མི་བདེན་ཏེ་མ་འདྲེས་ལ་ཡོངས་སུ་རྫོགས་པ་བྱང་སེམས་སུ་ལྷུན་གྱིས་གྲུབ་པའོ། །ཀྱང་ཞེས་པ་ཚིག་གིས་སྣང་སྟོང་གི་མཐའ་གསལ་ཏེ། མི་གཉིས་ཞེས་བརྗོད་ཀྱང་དོན་ལ་ཞེར་འཛིན་གྱི་གཞི་བྲལ་བས་ཚིག་གི་ཐོག་ཏུ་མི་ཕེབས་པ་དང་། བསམ་པའི་ཡུལ་ལས་འདས་ཏེ་དམིགས་པས་མི་རེག་པས་མི་གཉིས་ཙམ་དུ་ཞེན་བས་འཛིན་པ་དང་ཡང་བྲལ་བའོ། །དེས་ནི་རྟོགས་པའི་ལྟ་བ་བསྟན་ཏོ། །འདི་ཉིད་དཔེ་དོན་རྟགས་གསུམ་དུའང་སྦྱར་ཏེ། དཔེ་སྣ་ཚོགས་ཏེ་འབྱུང་བ་སྣ་ཚོགས་སུ་སྣང་བའི་འཇིག་རྟེན་མཐའ་ཐུག་པ་མེད་པའི་ཆོས་སྐྱེ་འཇིག་དུ་མར་སྣང་ཡང་འབྱུང་བའི་རང་བཞིན་ནམ་མཁའི་ངང་དུ་འདུས་ཤིང་ནམ་མཁའི་ངང་དུ་མི་གཉིས་ཞེས་བྱའོ། །དོན་སྣ་ཚོགས་ཏེ་ཆོས་ཅན་མཚན་མའི་རྣམ་པ་འཁོར་འདས་མི་འདྲ་བ་སྣ་ཚོགས་སུ་སྣང་བ་ཐམས་ཅད་རང་བཞིན་ཆོས་ཉིད་དུ་འདུས་ཤིང་ཆོས་ཉིད་ཀྱི་ངང་དུ་དབྱེར་མེད་པ་ནི་མི་གཉིས་ཞེས་བྱ་བ་སྟེ་དོན་ནོ། །རྟགས་སྣ་ཚོགས་ནི་སེམས་ཅན་གྱི་སེམས་བྱུང་གི་བློའི་བྱེ་བྲག་སྣོད་བཅུད་ཕྱི་ནང་རྣམ་པ་སྣ་ཚོགས་པ་ཀུན་སེམས་བྱུང་གི་རང་བཞིན་སེམས་ཉིད་འོད་གསལ་བའི་ངང་དུ་འདུས་ཤིང་སེམས་ཉིད་དང་དབྱེར་མེད་ནི་མི་གཉིས་པའི་རྟགས་ཏེ་བསྒོམ་པའོ། །དེ་བས་ན་ནམ་མཁའ་ལ་ཡང་སྲིད་པའི་ནམ་མཁའ་དཔེ་དང་། ཆོས་ཉིད་ཀྱི་ནམ་མཁའ་དོན་དང་། སེམས་ཉིད་ཀྱི་ནམ་མཁའ་རྟགས་ཏེ། འདི་གསུམ་ཀྱང་མཚོན་སྒོ་སོ་སོར་བསྟན་ཀྱང་ངོ་བོ་དབྱེར་མེད་པ་ནི་རང་བཞིན། འབྱུང་བ་དང་བཏགས་པའི་ངོས་ནས་ཆོས་ཅན་བློའི་ངོས་བརྟགས་པ་སྟེ། འདི་གསུམ་མཚོན་ཚུལ་སོ་སོར་བསྟན་ཀྱང་། མཚོན་བྱའི་གཞི་གཅིག་པ་ནི་སྣ་ཚོགས་ཞེས་བྱའོ། །སྣ་ཚོགས་དང་རང་བཞིན་དེ་གཉིས་ཀྱང་མེད་ལ་མི་ཟད་པ་ཙམ་གྱི་ཕྱིར་ཚིག་སྒོ་སོ་སོར་བསྟན་ཀྱང་དུས་ལ་སྔ་ཕྱི་དང་། ཕྱོགས་ལ་རེས་འཇོག་དང་། འཕྲོ་འདུ་མེད་པར་ཆུ་དང་གཉེར་མ་བཞིན་དབྱེར་མེད་པ་ནི་བདག་ཉིད་ཆེན་པོའི་གཏན་ཚིགས་ལ་སྙོག་གོ། །ཀྱང་ཞེས་པ་འོ་མ་འདྲེས་པ་དང་། རང་བཞིན་གཉིས་མི་གཉིས་ཞེས་སྨོས་ན། མ་འདྲེས་པ་ལ་ཆ་ཤས་ཡོད་པ་བཞིན་ཡོངས་སུ་རྫོགས་པ་ལ་ཡང་ཆ་ཤས་ཡོད་པར་མི་འགྱུར་རམ་ཞེ་ན། མི་འགྱུར་བར་བསྟན་པ་ནི་ངང་གི་གཏན་ཚིགས་ཏེ། ཆ་ཤས་ཉིད་དུ་སྤྲོས་དང་བྲལ། ཞེས་པ་ངང་གི་གཏན་ཚིགས་སྟོན་ཏེ། ཆ་ཤས་ཞེས་པས་བལྟོས་པའི་ཆོས་ཏེ། སྣོད་བཅུད་དམ་གཟུང་འཛིན་ནམ། འཁོར་འདས་སམ་ལམ་གཉིས་སུ་འཛིན་དབང་གིས་ཆོས་ཅན་གྱི་དངོས་པོ་ཐམས་ཅད་དོ། །ཉིད་དུ་ཞེས་པ་དཔེར་ན། གསེར་དུ་བྱས་པའི་རྫས་རྣམས་གསེར་དུ་གཅིག་པ་བཞིན། ཆ་ཤས་ཀྱི་དངོས་པོ་ཐམས་ཅད་མ་འགགས་པར་སྣང་ཙམ་ཉིད་ནས། སོ་སོའི་ཆ་ཤས་མཚན་མ་དང་བྲལ་ཏེ། ཆོས་ཉིད་དང་གཉིས་སུ་མེད་ཀྱང་། དེ་ཉིད་ཀྱང་གཉིས་ཅན་ལ་བལྟོས་པའི་དབང་གིས་མཐའ་ཡིན་ཏེ། དེ་ཉིད་དུ་དེ་ལ་གཟུང་བ་དང་ཡང་བྲལ་བས་བསམ་བརྗོད་ཀྱི་ཡུལ་ལས་འདས་ཏེ། དོན་དེས་ན་སྤྲོས་དང་བྲལ་ཞེས་པས། ཆ་ཤས་ཉིད་དུ་མ་འགགས་པར་སྣང་བས་སྟོང་པའི་སྤྲོས་པ་དང་བྲལ་བ་ལ་ངོ་བོ་ཆོས་ཉིད་ལས་མ་གཡོས་པས། སྣང་བའི་སྤྲོས་པ་དང་བྲལ་ཏེ། དོན་དེ་ཉིད་ལ་དེ་ཉིད་དུ་འཛིན་པ་དང་བྲལ་བས། ངོ་བོའི་སྤྲོས་པ་ངང་གིས་ཞི་ལ། ལྟ་བའི་ངོ་བོ་འདི་ལྟ་བུའི་ཞེས་འཛིན་པ་ངང་གིས་མ་དམིགས་པས་ཡུལ་གྱི་སྤྲོས་པ་དང་བྲལ་བས། སྤྲོས་བྲལ་ཉིད་དུ་སྨོས་པ་ཡང་ཐ་སྙད་ཙམ་ལས་ངོ་བོ་འདི་ལྟ་བུའོ་ཞེས་བརྗོད་པར་མི་ནུས་ཏེ། དམིགས་པར་བྱ་བའི་ཡུལ་དང་བྲལ་ཞིང་ཐོབ་བྱ་ངང་གིས་མ་གྲུབ་བོ། །དོན་དེ་ཉིད་ནི་དཔེ་དོན་རྟགས་གསུམ་དབྱེར་མེད་པ་སྟེ། དཔེ་ནི་ནམ་མཁའི་ཆ་ལས་བྱུང་བའི་ཤས་སྣ་ཚོགས་ཅི་ལྟར་སྣང་ཡང་སྣང་ཙམ་ཉིད་ན་ནམ་མཁའ་ཉིད་དུ་འོང་བསྡུས་མེད་པར་རྫོགས་པས་སྤྲོས་དང་བྲལ་ལོ། །དོན་ཆོས་ཉིད་ཀྱི་ཆ་ལས་ཆོས་ཅན་མཚན་མའི་ཆ་ཤས་སྣ་ཚོགས་སུ་སྣང་ཡང་ཆོས་ཉིད་འོང་བསྡུ་མེད་པས་ཆོས་ཅན་སོ་སོ་ཉིད་ནས་སྤྲོས་པ་དང་བྲལ་ཏེ་རང་བཞིན་ཆོས་ཉིད་དང་མི་ཕྱེད་པས་སོ། །རྟགས་སེམས་ཉིད་ཀྱི་ཆ་ལས་སེམས་བྱུང་ལོག་རྟོག་གི་ཆོས་ཐམས་ཅད་སེམས་ཉིད་ཀུན་གཞིའི་ངང་དུ་འོངས་དུས་མེད་པར་སེམས་བྱུང་གི་རྟོག་ཉིད་རིག་པ་རང་སར་སྤྲོས་པ་དང་བྲལ་བ་ནི་རྟོགས་པའི་ཉམས་སོ། །དེ་བས་དཔེ་དོན་རྟགས་གསུམ་དབྱེར་མེད་པ་ནི་ཐེག་པ་འོག་མའི་མཐའ་བྲལ་གྱི་ཆོས་ཉིད་ལྟ་བུ་མ་ཡིན་ཏེ། འདིར་རིག་པ་བྱང་སེམས་ཆོས་ཀྱི་དངོས་པོ་ཡུལ་དུ་མ་སྤངས་ཀྱང་ཆོས་ཉིད་ལ་དུས་གསུམ་དུ་མི་འགྱུར་ཞིང་ཆོད་བྱས་དང་། མཐར་འཛིན་དང་ཞེ་འདོད་ཕྲ་མོའང་མི་དམིགས་པ་སྟེ་ངང་ཞེས་བརྗོད་དེ། ལྟ་བ་དེ་ཁོ་ན་ཉིད་ཀྱི་མན་ངག་གོ། །འོ་ན་གོང་གི་གཏན་ཚིགས་ཀྱི་དོན་དེ་ཉིད་བསྒོམ་པའི་དུས་སུ་བློ་དང་ཆ་ཤས་སུ་མི་འགྱུར་རམ་ཞེ་ན། ཅི་བཞིན་པ་ནི་མི་རྟོག་ཀྱང་། ཞེས་པས་བདག་ཉིད་ཆེན་པོའི་གཏན་ཚིགས་བསྟན་ཏེ། དེ་ཡང་བདག་ཉིད་ཆེན་པོ་ནི། སྣོད་བཅུད་ཀྱི་ཆོས་བྱང་སེམས་ལ་སྣང་ཞིང་བྱང་སེམས་རྫོགས་ཏེ། ནམ་མཁའ་ལ་མཐའ་དབུས་མེད་པར་སྣོད་བཅུད་མཐའ་མེད། དེའི་རང་བཞིན་རིག་བྱང་ཆུབ་སེམས་ལའང་མཐའ་འདི་ཁྱབ་འདིར་མ་ཁྱབ་མེད་དེ། ཐམས་ཅད་སྣུམ་པའི་ངོ་བོ་ཉིད་ཀྱང་། སྣང་སྟོང་གང་གིའང་མཐའ་ལ་མི་དམིགས་ཤིང་། བདག་ཉིད་དུ་རྫོགས་ཀྱང་ཞེར་འཛིན་ཕྲ་མོའང་མི་གནས་པ་ནི་གཞན་དུ་རྡུལ་ཕྲ་རབ་ཀྱང་མ་ལུས་པས། བདག་ཉིད་ཆེན་པོ་ཞེས་བྱ་སྟེ་བུ་ཏ་མེད་པའི་ཆེ་ཁོ་ནའོ། །དོན་དེ་ཉིད་ལ་ལམ་པའི་ངོར་ཡིན་པ་དང་། རྟོགས་པ་དང་མཐར་ཐུག་པ་གསུམ་གྱི་ཚུལ་དུ་སྣང་བས་འདིར་རྟོགས་པའི་ངོས་ཉེ་བར་བཟུང་སྟེ་གོང་དུ་ལྟ་བ་དེ་ཁོ་ན་ཉིད་ཀྱི་མན་ངག་བཞིའི་དོན་ལ་འཇུག་པ་པོའི་བློའི་བྱེ་བྲག་གི་གདམ་ངག་གི་སྟོབས་ཀྱིས་མངོན་སུམ་དུ་སྣང་བ་དང་། ལུང་དང་མན་ངག་གིས་ཐོས་པའི་ཤེས་རབ་ལ་བརྟེན་ཏེ་རང་བཞིན་ངང་དུ་ཕེབས་པ་ནི་གཟའ་གཏད་བྲལ་བ་ལྟ་བའི་ངོ་བོ་སྟེ། བྱང་སེམས་ཆོས་ཐམས་ཅད་དང་དབྱེར་མེད་པའི་ངོ་བོ་ཚིག་ཙམ་མ་ཡིན་པར། སེམས་ཀྱི་དཀྱིལ་དུ་ཐག་ཆོད་དེ་གསལ་ལ་འགགས་པ་མེད་པ་ཉིད་ཆེད་འཛིན་ཐམས་ཅད་དང་བྲལ་བའོ། །ལྟ་བའི་རྩལ་གྱིས་ཐམས་ཅད་བདག་ཏུ་སྣང་། །བདག་ཐམས་ཅད་དུ་སྣང་ཡང་རྩ་ལོ་དང་སྤྲོ་བསྡུ་དང་། དམིགས་གཏད་གཏན་ནས་མ་གྲུབ་པའོ། །དེ་ལྟ་བུ་ནི་ལམ་སྒོམ་པའི་གཞིའོ། །རྟོགས་པས་ཆོག་ཅེས་དེ་ཙམ་དུ་བཞག་ཀྱང་ཟག་བཅས་ཀྱི་མཐོང་ལམ་མོ། །དེ་དག་ནི་གོང་གི་ངང་གིས་རྟོགས་པའི་སྣོད་ཡིན་ཏེ་འདིར་ལྟ་བསྒོམ་གྱི་མཚམས་སོ། །དོན་དེ་ཉིད་མ་བསྒོམ་པའི་ངོ་བོ་ནི་ཅི་བཞིན་པ་ཞེས་པ་བསྒོམ་པ་དམིགས་གཏད་དང་བྲལ་བར་བསྟན་ཏེ། ལྟ་བའི་ངོ་བོ་ངང་གི་རྒྱུ་ལས་མ་བྱུང་རྐྱེན་གྱིས་མ་བསྐྱེད་བྱེད་པ་པོས་མ་བྱས་ཡེ་ནས་ཅི་ལྟར་གནས་པ་དེ་བཞིན་བྱ་བ་ལྟ་བུ་སྟེ་འདིར་ཅི་བཞིན་ལ་ཙམ་བློའི་ཡུལ་དུ་བྱེད་ན་ཡང་དེ་ཉིད་ལ། རྟོག་པ་ཉིད་མེད་དེ། ཅི་བཞིན་པ་ཞེས་རྣམ་རྟོག་དེ་ཕྱིར་རྟོག་བསྒོམ་པ། བདེ་བ་ཆེན་པོ་འདོད་པ་ཆགས་པའི་ནད་ཡིན་ཏེ། ཞེས་སོ། །དེ་བས་ན་འདིར་དེ་ལྟ་བུ་ནི་ངོ་བོའི་སྤྲོས་པ་ཡིན་ཏེ། རྫོགས་ཆེན་རང་གི་གོལ་ས་ཡང་ཡིན་ནོ། །དེས་ན་ཏིང་ངེ་ནད་དང་བྲལ་བའི་ངོ་བོ་ནི་ལྟ་བའི་སྲོག་སྔོན་དུ་སོང་བས་གྱུར་པ་བདག་ཉིད་ཆེན་པོའི་དོན་རྒྱུ་རྐྱེན་ལས་མ་བྱུང་། བྱེད་པ་པོས་མ་བྱས། གཟུང་འཛིན་ཕྲ་མོའང་མ་དམིགས། ཅི་བཞིན་པ་ཞེས་དོན་ཡིད་ལ་འཛིན་པར་ཡང་མི་རྟོག་སྟེ། བསྒོམ་བྱ་དང་བསྒོམ་བྱེད་ཀྱི་རྣམ་པ་མེད་པས། ཡིད་ལ་བྱེད་པ་དང་། ཞེ་ལ་འཛིན་པ་མེད་པར་གང་དུའང་མི་དམིགས་མི་དམིགས་པ་ཉིད་དུའང་མི་དམིགས་ཏེ། རང་གསལ་གྱི་ཡེ་ཤེས་ཆེན་པོའི་བསྒོམ་པའོ། །འདིར་ཡང་དཔེ་དོན་རྟགས་གསུམ་སྦྱར་ཏེ། དཔེ་ཅི་བཞིན་པ་ནམ་མཁའ་སྟེ། ནམ་མཁའ་ཡེ་ནས་མ་བཅོས་ཅི་བཞིན་ཉིད་དུ་གནས་པས་མི་རྟོག་སྟེ་ད་གདོད་ནམ་མཁའ་ནམ་མཁའ་སྒྲུབ་པ་མ་ཡིན་མི་རྟོག་མི་དམིགས་ཡུལ་དུ་མི་བྱེད་མི་བརྩལ་ཏེ། ཡོད་པ་ལས་མེད་པ་ལ་ཡོད་པར་མི་འགྱུར་ཕྱོགས་རིས་མེད་པས། ངང་ཅི་བཞིན་པ་སྟེ་མ་བཅོས་ཤིང་དམིགས་པ་དང་བྲལ་ལོ། །དེ་བཞིན་དུ། དོན་ཆོས་ཉིད་ནི་ཡེ་ཅི་བཞིན་པ་སྟེ་མ་བཅོས་པར་གནས་པས་ཞེས་མི་རྟོག་ཅེས་པ། གདོད་ཆོས་ཉིད་ཀྱི་ཆོས་ཉིད་མི་བསྒྲུབ། དེས་འགྲེ་བས་མི་རྩོལ་མི་སེམས་ཡུལ་དུ་མི་བྱེད། མི་དམིགས་མི་བསྐྱེད་ཡོད་པ་ལས་མདོར་མི་འགྱུར་མེད་པ་ལ་ཡོད་པར་མི་འགྱུར། དུས་གསུམ་གྱི་བྱ་བ་དང་བྲལ་ཏེ། གཉིས་སུ་མེད་པའི་ཕྱིར་མི་རྟོག་པའོ། །རྟོགས་ནི་རང་གི་བྱང་སེམས་རྒྱུ་རྐྱེན་གྱི་བྱ་བ་ཐམས་ཅད་དང་བྲལ་བ་ཅི་བཞིན་པ་སྟེ། མི་རྟོག་ཞེས་པ་དང་དགོད་སེམས་ཀྱིས། སེམས་ཉིད་མི་བསྒྲུབ་མི་རྩོལ་མི་སེམས་ཡུལ་དུ་མི་བྱེད་མི་དམིགས་མི་རྟོགས་སྔར་མེད་པ་ལས་ཡོད་པར་མི་སྒྲུབ། མེད་པ་ལས་ཡོད་པར་མི་སྒྲུབ། རྒྱུ་འབྲས་སུ་མི་རྟོག །བག་ཆགས་དང་སྒྲིབ་བྱེད་དུ་མ་དམིགས་དུས་གསུམ་གྱི་བྱ་བ་དང་བྲལ། འཁོར་བ་ལས་འདས་པ་དང་། སེམས་ཅན་ལ་བུ་ཏ་དང་། མ་དག་པ་དག་པར་བསྒྱུར་མེད། གཉིས་པའི་ཐ་སྙད་ཐམས་ཅད་དང་། ངང་གིས་བྲལ་བས་མི་རྟོག་ཅེས་བྱའོ། །དེས་ན་དེས་བཅོས་སུ་མེད་ཀྱང་མི་རྟོག་པ་ནམ་མཁའི་དོན་ཅི་བཞིན་མི་རྟོག་པ་ཆོས་ཉིད། རྟགས་ཅི་བཞིན་མི་རྟོག་པ་ནི་སེམས་ཉིད་དང་འདི་གསུམ་སོ་སོར་མཚོན་ཀྱང་དབྱེར་མེད་པ་ནི་བདག་ཉིད་ཆེན་པོ་སྟེ། ཅི་བཞིན་པ་ཉིད་ཡུལ་དུ་བྱས་པ་མེད་ལ། དེ་ཉིད་དུ་འཛིན་པའང་མེད་པས་མི་རྟོག་ཅེས་བྱ་སྟེ་བསྒོམ་པའི་ངོ་བོ་མ་ནོར་བའོ། །ཀྱང་ཞེས་པ་ནི། མི་རྟོག་པ་དེ་ཉིད་འགོག་པའི་མཐའ་ཅན་ནམ་དབུ་མའི་སྤྲོས་བྲལ་ཟང་མ་ལྟ་བུ་མ་ཡིན་པར་སྟོན་པས་ཐམས་ཅད་མཁྱེན་པའི་བསྒོམ་པ་ནི། རྣམ་པར་སྣང་མཛད་ཀུན་ཏུ་བཟང་། །ཞེས་པ་ཤིན་ཏུ་རྣལ་འབྱོར་གྱི་བསྒོམ་པ་ནི་རྒྱུ་མི་འདྲ་བའི་ཏིང་ངེ་འབྲས་བུ་རེ་ལ་ལྟ་མ་ཡིན་ཏེ། གདོད་མ་ཉིད་ནས་ཐམས་ཅད་མཁྱེན་པའི་ངོ་བོ་མ་འདྲེས་ཡོངས་རྫོགས་ཏིང་ངེའི་ངོ་བོ་སྟེ་བསྒོམ་པའི་ངོ་བོ་རེ་རིག་ཅིང་བཞིན་པ་ཉིད། དམིགས་འཛིན་ཐམས་ཅད་དང་བྲལ་ཡང་། །མྱ་ངན་ལས་འདས་པའི་ཆོས་རང་བཞིན་ཆེ་ཡོན་དང་བཅས་པའི་རྣམ་པ་ཐམས་ཅད་དང་། ལམ་གྱི་ཆོས་མ་ལུས་པའི་རྣམ་པ་དང་སྲིད་པའི་ཆོས་རྒྱུ་དང་འབྲས་བུ་ཡུལ་དབང་པོར་བཅས་པ་ཐམས་ཅད་ཀྱི། རྣམ་པར་རང་གསལ་བར་སྣང་ཡང་གོས་པའམ་འཛིན་པ་མེད་པ་ནི། མཛད་ཅེས་པས་ངོ་བོ་ཉིད་ཀྱི་མཛད་པ་ཐམས་ཅད་ཀྱི་བྱེད་པ་པོ་སྟེ་དོན་དེ་ཉིད་ལ་དུས་གསུམ་མི་གཡོ་བ་ནི་ཐམས་ཅད་མཁྱེན་པའི་སྒོམ་པ་ཞེས་སོ། །དེས་ན་ཐམས་ཅད་མཁྱེན་པ་བསྒོམ་པའི་མཆོག་ངོ་བོ་ཉིད་ནི་དམིགས་སུ་མེད། ཅེས་པ་དང་། མི་སྐྱེ་མི་འགག་ཅིར་མི་དགོངས། །ཞེས་པའོ། །དེས་ན་ལྟ་བའི་ངང་ལ་དུས་གསུམ་མི་གཡོ་བའི་ཞེན་འཛིན་དང་བྲལ་ཡང་། རང་གསལ་རྒྱ་མཚོའི་འཇིངས་ལྟར། རེ་དོགས་ཀྱི་ཐ་སྙད་མི་གནས་པ་ཏིང་ངེ་འཛིན་གྱི་ངོ་བོའོ། །ལམ་པའི་ངོར་གལ་ཏེ་ནམ་མཁའ་དང་ལྟ་བའི་སྲོག་གིས་རྟོགས་པ་ཉིད་སྤང་དུ་མེད་པར་ཐག་ཆོད་པར་གསལ་བ་ཉིད་ཀྱིས་སྐྱོན་ཐམས་ཅད་རང་དག་གོ། །དེའི་ངང་ལས་ཀུན་ཏུ་བཟང་ཞེས་བྱ་སྟེ། རང་བཞིན་གྱིས་མ་སྐྱེས་པའི་ཕྱིར། །སེམས་ཀྱི་ཆོས་ཉིད་ལ་རྟོགས་རྟུལ་གྱི་སྐྱོན་མི་མངའ་བས་རང་བཞིན་ཀུན་ཏུ་བཟང་པོ་དང་། དེའི་དོན་སྣང་ནས་རང་བྱུང་ཡེ་ཤེས་ཀུན་ཏུ་རང་གསལ་བ་ལ་ཡོང་གིས་འོད་གསལ་བས་གཟུང་འཛིན་གྱི་འཕན་སེལ་མི་གནས་པས། ལྟ་བ་ཀུན་ཏུ་བཟང་པོ་དང་། ཕྱི་ནང་མེད་པར་རང་རིག་བྱང་སེམས་སུ་ལྷུན་གྱིས་གྲུབ་པ་ལ་མཚན་མའི་གཡོ་འགུལ་ངང་གིས་མི་གནས་ཤིང་། གལ་ཏེ་ན་ཡང་ཡེ་ཤེས་སུ་སྣང་བས་ཞེར་འཛིན་ཕྲ་མོའང་མ་དམིགས་ཏེ་ཏིང་ངེ་འཛིན་ཀུན་ཏུ་བཟང་པོ་དང་། སྒོམ་པའི་ངོ་བོ་ཉིད་ལ་ཕྱོགས་རིས་མེད་པས་སྤྱོད་པ་ཀུན་གྱི་དགོངས་གཞིར་གྱུར་ཀྱང་། མི་གོས་པ་ནམ་མཁའ་བཞིན་པས་བླང་དོར་བྲལ་ཏེ་སྤྱོད་པ་ཀུན་ཏུ་བཟང་པོ་དང་། བདག་ཉིད་ཆེན་པོའི་ངང་ལ་བདག་གཞན་འབྱེད་པ་མེད་དོ། །མི་གཉིས་པར་རྟོགས་པས་ཐམས་ཅད་བྱང་སེམས་སུ་བསྒྲལ་ཟིན་པའི་ཕྲིན་ལས་རྒྱུན་མི་འཆད་པས་ཕྲིན་ལས་ཀུན་ཏུ་བཟང་དང་། སྐུ་ལྔ་ལྷུན་གྱིས་གྲུབ་པས་ཀུན་ཀུན་ཏུ་སྐྱོན་མེད་པར་ཁས་བླངས་སོ། །སྣ་གཅིག་ཏུ་ནམ་མཁའི་ངང་ལས་བྱུང་བའི་རྣམ་པ་སྣ་ཚོགས་སུ་སྣང་བ་ཉིད་ནམ་མཁའི་ངོ་བོ་ཉིད་ཀྱི་མཛད་པར་ཤར་བས་ནམ་མཁའ་ཉིད་ཟིན་ཆགས་མེད་དེ་ཀུན་ཏུ་བཟང་པོ་དང་། ཆོས་ཉིད་ཀྱི་ངང་ལས་ཆོས་ཅན་གྱི་མཚན་མ་སྣ་ཚོགས་རྣམ་པར་སྣང་ཡང་། ཆོས་ཉིད་རང་བཞིན་གྱི་མཛད་པ་མི་འགག་པར་ཤར་བས་ཆོས་ཉིད་ལ་ཟིན་ཆགས་མེད་པ་དང་། སེམས་ཀྱི་ངང་ལས་སེམས་བྱུང་གི་བློའི་རྣམ་པར་རྟོག་པ་མཐའ་ཡས་སྣང་ཡང་། སེམས་ཉིད་དུ་སྣང་བ་མི་འགགས་པར་ཤར་བས་སེམས་ཉིད་ལ་ཟིན་ཆགས་མེད་དེ་ཀུན་ཏུ་བཟང་པོའོ། །དེས་ན་དཔེ་དོན་རྟགས་གསུམ་ཡང་། དབྱེར་མེད་དེ་བཞིན་བདག་ཉིད་ཆེན་པོའི་གཏན་ཚིགས་ཀྱིས་ཐམས་ཅད་མཁྱེན་པའི་ལྟ་བ་ལ་ཞེ་འདོད་དང་བྲལ་བ་དང་། སྣང་བ་ཉིད་དངོས་པོའམ་མཚན་མར་མ་གྲུབ་པའི་ཕྱིར། ཀུན་ཏུ་བཟང་པོའི་དགོངས་པ་དང་རོལ་པའོ། །དེས་ན་ཀུན་ནས་ཀུན་ཏུ་བཟང་པོ་ཞེས་བྱའོ། །ཐེག་པ་གཞན་ལས་དཔག་ལུགས་བསྟན་པ་ནི། ཟིན་པས་རྩོལ་བའི་ནད་སྤངས་ཏེ། ཞེས་པ། ཟིན་པས་ནི་རང་རིག་སྙིང་པོ་བྱང་སེམས་འབྲས་བུ་ཆོས་ཐམས་ཅད་ཡེ་ནས་ལྷུན་གྱིས་མ་གྲུབ་ཟིན་པ་དེ་ཉིད། རང་རིག་པའི་མངོན་སུམ་དུ་བྱས་པ་ལ་ཡུལ་དུ་མ་གྲུབ། རང་གི་རང་བཞིན་མངོན་དུ་སྣང་བའི་གཏན་ཚིགས་ཀྱིས་རྩོལ་བ་ཞེས་པ། རྒྱུ་འབྲས་སུ་སྒྲུབ་པའི་རྩོལ་བ་དང་། ལམ་ལྟ་སྤྱོད་བསྒོམ་པ་ལ་སོགས་པའི་ཆེད་དུ་འཛིན་པའི་རྩོལ་བ་ཕྲ་རགས་རྣམས་ནི། ལུས་ངག་དུབ་ཅིང་འཛིན་པ་ཉིད་ཀྱིས། སླར་རང་བྱུང་ཡེ་ཤེས་མཐོང་དུ་མི་སྟེར་བའི་ནད་ལྟ་བུར་གྱུར་པའི་ཕྱིར་ཤིན་ཏུ་རྣལ་འབྱོར་ལ་འོག་མའི་བྱ་རྩོལ་མི་དགོས་པས་སྤངས་ཞེས་བསྟན་ཏོ། །འོན་ཀྱང་བླང་དོར་གྱིས་སྤངས་པ་ལས་འདས་ཏེ། བླང་དོར་མ་དམིགས་མཐས་མ་གོས་པའོ། །དེ་ནས་ཐེག་པ་འདིར་ཆུད་པའི་སྐྱེས་བུ་ནི་སྙིང་རྗེ་བྱང་ཆུབ་རྩོལ་བའི་བྱ་བ་ཐམས་ཅད་དང་། ཡེ་བྲལ་བའི་ངང་དུ་གནས་པས། གདོད་ཐོབ་པར་འདོད་པའི་རྩོལ་བ་ལ་མི་རྟེན་ཏེ། ངོ་བོ་གྲུབ་ཟིན་པའི་ཆོས་ལ་གདོད་ངང་གིས་མི་གནས་པའི་རྩོལ་བའི་ནད་སྤངས་ཞེས་བྱ་སྟེ། ནད་སོས་པས་བདེ་བར་གནས་པ་དང་འདྲའོ། །ཡང་ན་ཟིན་པས་ཞེས་པ་ལུང་གིས་ཟིན་པའི་དོན་བཅུ་དང་ལྡན་ཏེ། ངོ་བོ་ཐམས་ཅད་མཁྱེན་པའི་བསྒོམ་པ་བདག་ཉིད་ཆེན་པོ་ཉིད་ཀུན་ཏུ་བཟང་པོ་ལྔ་ལྷུན་གྱིས་མ་གྲུབ་པའི་དུས་སུ། གཞི་ཅི་ལྟ་བ་མངོན་དུ་སོན་པའི་ལྟ་སྒོམ་གྱི་ངང་ལ་རང་རིག་གདོད་ནས་ཐམས་ཅད་མཁྱེན་པའི་ཡེ་ཤེས་སུ་གསལ་བས་ལྟ་བའི་ངོ་བོ་ཡུལ་དང་ཡུལ་ཅན་མེད་པར་སྤྱན་གྱི་དམ་པར་གྲུབ་ཟིན། སྙིང་པོ་བྱང་ཆུབ་ལ་དགོངས་འགྲེལ་དུ་གཞུགས་པས་བསྒོམ་པའི་ངོ་བོ་བསམ་གཏན་ཆེན་པོར་ཡེ་ནས་གྲུབ་ཟིན། ལྷུན་གྱིས་མ་གྲུབ་པའི་ཡེ་ཤེས་ལ་ཐོབ་བྱ་ཐོབ་བྱེད་མེད་པར་བདག་ཉིད་ཆེན་པོར་མངའ་བརྙེས་ཟིན། ཐིག་ལེ་ཆེན་པོ་བསྲུང་མཚམས་ཀྱི་འཛིན་པ་དང་བྲལ་བས་ཉམས་པ་བཞི་ལས་མ་གྲུབ་པས་སྐོལ་ཟིན། མ་གྲུབ་པ་གྲུབ་པར་བྱེད་དེ། ངོ་བོ་ཉིད་བྱང་ཆུབ་ཀྱི་ཀློང་ལས་མ་གཡོས་པས་འབྲས་བུ་བྱང་ཆུབ་མངོན་དུ་སྣང་ཟིན། རང་རིག་སྤྱོད་ཡུལ་དང་བྲལ་བ་ཉིད་དུ་ཆོས་ཐམས་ཅད་བྱུངས་ཐིབས་པས། པུ་ཙ་ཕུལ་ཏེ་འབྲས་བུ་ཡང་སྣང་ཟིན། མ་འདྲེས་ཡོངས་རྫོགས་ཀྱི་ཡེ་ཤེས་རང་གསལ་བས་མ་དམིགས་པ་ལ་མ་འགག་པའི་འཁོར་བཀོད་ཟིན། འཁོར་བའི་སྤྱོད་པ་འོས་པ་དེ་ཆེད་འཛིན་གྱི་ངང་ལ་འགྲེ་ལྡོག་སྤྱིར་ཚུགས་གར་འགྲེས་ཀྱང་ངོ་བོ་ཉིད་ལས་མ་གཡོས་པས་ངང་གིས་འཁོར་བར་མི་ལྡོག་སྟེ་དངོས་གྲུབ་ཐོབ་ཟིན། ཁམས་གསུམ་ལ་སོགས་པའི་མཛད་པ་ཐམས་ཅད་དུ་རང་ཤར་ཅིང་བྱང་སེམས་ལས་མ་གཡོས་ཏེ། མ་སྨིན་པ་མེད་པས་འགྲོ་དོན་མཛད་ཟིན། འབུ་ཏ་སེམས་ཅན་ཐམས་ཅད་ཀྱི་བྱེད་སྤྱོད་ཐམས་ཅད་དུ་རང་ཤར་བ་ལ་ཆེད་དུ་བྱ་བ་མེད་པས་སྤྱོད་པ་སྤྱད་ཟིན་པའི་ཕྱིར། རྩོལ་བ་པོ་ངང་གིས་མི་གནས་ཏེ། ལུང་ཨ་ནུ་མན་ཆད་ཀྱི་རང་ལ་མཐའ་དབུས་མེད་པའི་རྩོལ་བ་དང་། དོན་རྟགས་འབྱེད་པའི་རྩོལ་བ་ལ་སོགས་པ་བཅོ་ལྔ་ནི་འདིར་གཟུང་འཛིན་བྱ་རྩོལ་དུ་སྣང་བ་ཉིད། རྩོལ་བའི་ཆུ་བོ་རབ་མེད་ལ་འབོག་པ་སྟེ། ཐར་བར་དཀའ་བའི་ནད་ཆེན་པོའོ། སྤངས་ཏེ་ཞེས་པ་མ་གོས་པ་སྟེ། ཏིང་ངེ་འཛིན་ཆེན་པོའི་སྐབས་འདིར། རྩོལ་བ་དེ་དག་མ་སྤངས་ངོ་བོས་བྲལ་བས་ལམ་པ་ཡང་ངོ་བོ་ཉིད་མངོན་དུ་གྱུར་པ་ཁོ་ནའི་ཕྱིར་ཡ་བྲལ་བའི་སྨན་ཆེན་པོའི་ངོ་བོ་ཉིད་དུ་བཞུགས་པ་ལ ། སྤང་ཞེས་བྱའོ། །དེས་ན་རྩོལ་བ་རྣམས་དང་བྲལ་བས་ཐེག་པ་འོག་མ་ལས་དཔགས་པར་བསྟན་ཏེ། རྩོལ་བའི་ཆོས་དེ་དག་དངོས་གྲུབ་ཐབས་སུ། རེ་ནས་མི་སྤྱོད་པ་ནི་ཡེངས་པའོ། །ཏིང་ངེ་འཛིན་འབྲས་བུ་ལྷུན་གྱིས་མ་གྲུབ་ཏུ་བསྟན་པ་ནི། ལྷུན་གྱིས་གནས་པས་བཞག་པ་ཡིན། ཞེས་པ་གོང་དུ་རྩོལ་བའི་ནད་ཡིན་པའི་ཕྱིར་དེ་ལ་མི་གནས་ནས། ཆོས་ཉིད་ལྷུན་གྱིས་གྲུབ་པ་ལ་མི་གནས་པའི་ཚུལ་གྱིས་གནས་ན་ཡེ་ཤེས་ལྷུན་གྱིས་གྲུབ་པ་ཞེས་བྱ་སྟེ། རང་བཞིན་ཆོས་ཉིད་ཡེ་ནས་བྱ་རྩོལ་ལས་འདས་ཏེ། འབྲས་བུ་ངོ་བོ་ལྷུན་གྱིས་གྲུབ་པར་རྟོགས་པའི་རྣལ་འབྱོར་སྒོམས། བྱ་ཡུལ་དུ་མ་གྲུབ་པའི་ཕྱིར་སྒོམ་བྱེད་ཀྱི་བློ་ཡང་ལྷུན་གྱིས་གྲུབ་སྟེ། བསྒོམ་བྱ་བསྒོམ་བྱེད་དབྱེར་མེད་པར་གནས་པ་ནི་སེམས་རིགས་པ་རང་སར་བཞག་པས་ཐབས་ཐམས་ཅད་དང་བྲལ་བའི་ཐབས་དམ་པ། དམིགས་གཏད་ཐམས་ཅད་དང་བྲལ་བའི་བསམ་གཏན་དམ་པ་ཡུལ་དང་བྲལ་བའི་ལྟ་བ་དམ་པ། སྒྲིབ་པ་མ་དམིགས་སྤང་པ་དམ་པ། ཐོབ་པ་དང་བྲལ་བའི་འབྲས་བུ་དམ་པ་ཡིན་པས་ཡོན་ཏན་ཐམས་ཅད་ལྷུན་གྱིས་གྲུབ་བོ། །དེ་ནི་བྱང་སེམས་ཀྱི་ཏིང་ངེ་འཛིན་ཡིན་པའི་དོན་ཅི་ལྟ་བ་མ་བཅོས་པ་ནི་མ་འདྲེས་པ་ཡོངས་རྫོགས་བྱང་སེམས་ཆོས་ཐམས་ཅད་ཀྱི་བདག་ཉིད། ཡེ་ནས་ལྷུན་གྲུབ་ཏུ་བཞུགས་ཏེ། དེ་ལྟ་བུའི་ངང་ལས་ཡུལ་དང་ཡུལ་ཅན་མེད་པར་དུས་གསུམ་དུ་མི་འགྱུར་པ་ལ་ནི་བཞག་པ་ཡིན་ཞེས་བྱ་སྟེ། བསྒོམ་པའི་ངོ་བོ་མཐར་ཕྱིན་པ་དེ་ཉི་མ་སྟོང་དུས་གཅིག་ལ་ཤར་ན་མུན་པའི་དཔགས་ཕྲ་མོ་ཡང་མི་རྙེད་པ་བཞིན་བསྒོམ་པའི་འགལ་རྐྱེན་ཀ་ནས་དག་པས། མཐའི་མུན་པ་ཡེ་ནས་མེད། ཅེས་གསུངས་པ་ལྟ་བུའོ། །འབྲས་བུ་ནི་སྒོམ་པའི་ངོ་བོ་མཐར་ཕྱིན་པ་ཉིད་ལ་འབྲས་བུ་ཞེས་བྱ་སྟེ། ལྷུན་གྱིས་གནས་པས་བཞག་པ་ཡིན། ཞེས་པ་ཡེ་ནས་འབྲས་བུའི་ངོ་བོར་ལྷུན་གྱིས་གྲུབ་ཟིན་པར་བསྟན་ཏེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ནི། རྒྱུ་རྐྱེན་གྱིས་མ་གྲུབ་པར་དགོས་འདོད་སྐོང་བའི་རང་བཞིན་དུ་བཞུགས་ཏེ། འབྱུང་བ་ཉིད་ཕྱོགས་དང་རིས་སུ་མི་རྙེད་ཀྱང་ཟད་འཕེལ་བྲལ་བ་རང་སྣང་བའོ། །དཔེ་དེ་བཞིན་དུ། རང་རིག་སྙིང་པོ་བྱང་ཆུབ་མཐའ་གང་དུ་ཡང་མ་ལྷུང་། ཕྱོགས་ཀྱི་འཛིན་པ་མ་སྤངས་ངང་གིས་དག །ངོ་བོ་གང་དུའང་མ་གྲུབ་བཞིན་རྐྱེན་ཅེས་ཀྱང་གཞོམ་དུ་མེད་པ་ཉིད། མ་རྟོགས་པའི་དུས་སུ་འཁོར་བའི་ཆོས་ཐམས་ཅད། དངོས་གཞིར་ལྷུན་གྱིས་གྲུབ་ལ། ཐབས་ལམ་ཐེག་པ་རིམ་པ་དགུ་ཡང་བྱང་སེམས་ལ་ལྷུན་གྱིས་གྲུབ་ཅིང་རང་སྣང་ལ་དག་པའི་སྣང་བ་མ་འགགས་པ་དཀོར་བདུན་དང་སྐུ་རིག་རྒྱན་གྱི་ཙ་ཀྲ་ཉེར་ལྔ་དང་བདེ་བར་གཤེགས་པའི་གུ་ན་བརྒྱ་བཞི་བཅུ་འོས་པའི་གུ་ན་ཐམས་ཅད་ཡེ་ཤེས་ལྷུན་གྱིས་གྲུབ་སྟེ། དེས་ན་འོག་མ་བཞིན་སྐུ་གསུམ་གྱི་རྒྱུ། ཚོགས་གཉིས་བསགས་པའང་འདི་ལ་ཆེད་དུ་མ་གྲུབ་སྟེ། བྱང་སེམས་ཡེ་ནས་སྐུ་གསུམ་གྱི་ངོ་བོ་ཉིད་དུ་བཞུགས་སོ། །དེ་ལྟ་བུའི་བྱང་སེམས་བསམ་བརྗོད་ཀྱི་ཡུལ་ལས་འདས་པ་ཉིད། ལྟ་བ་པོའི་དབང་གིས་ཅིར་ཡང་སྣང་བས་མེ་ལོང་གཡའ་དག་པ་ལ་གཟུགས་བརྙན་གྱི་ངོ་བོ་ཉིད་དུ་བཞུགས་པ་བཞིན། ཡེ་ནས་ལྷུན་གྲུབ་ཏུ་བཞུགས་པ་ཉིད་ལ་ལྷུན་གྱིས་གནས་སོ་ཞེས་བྱའོ། །གཞག་པ་ཡིན་ཞེས་པས། དེ་ཉིད་རྒྱུ་རྐྱེན་གྱི་རྣམ་པ་གང་ལ་ཡང་རག་མ་ལས་པར་སྣང་བ་སྤོངས་པའང་མེད། རང་བཞིན་ལེན་པའང་མེད། སྒྲིབ་པ་སྤོངས་བ་མེད་དེ་ཡེ་ཤེས་སུ་དག་ཡེ་ཤེས་ལན་པ་མེད་དེ་རང་གི་ངོ་བོར་ལྷུན་གྱིས་མ་གྲུབ། ལམ་སྒྲུབ་པའི་རྩོལ་བ་དང་བྲལ་ཏེ། འབྲས་བུ་རྒྱུ་ལ་རག་མ་ལས། མི་རྩོལ་བ་ཆེད་དུ་བསྟན་པའང་མེད་དེ། བྱང་སེམས་ཆོས་ཐམས་ཅད་ཀྱི་ངོ་བོ་ཉིད་དུ་ཤར། འབྲས་བུ་ཐོབ་པའི་རེ་བ་དང་ཡང་བྲལ་ཏེ། ཡུལ་དུ་མ་དམིགས་ལྟུང་གི་དོགས་པའང་མེད་དེ། གཞི་རྩ་དང་བྲལ་རིག་པ་ཉིད་ཡེ་ནས་བདག་ཉིད་དུ་གསལ། དེ་ལྟ་བུའི་རང་རིག་བྱང་སེམས་འཁོར་འདས་ཐམས་ཅད་ཀྱི་ངོ་བོ་ཉིད་ལྷག་པའི་ཆོས་སྐུ་ཆེན་པོ། ལམ་གྱི་རྩོལ་བ་ཟད་པ་ཉིད་འབྲས་བུའི་མཐར་ཐུག་པ་འབྲས་བུའི་ངོ་བོ་དང་གུ་ན་ཐམས་ཅད་དུས་ལ་རེས་མོས་མེད་པས་ལྷུན་གྲུབ་ཏུ་འཆར་རོ། །འོ་ན་འོག་མ་དག་གིས། འབྲས་བུ་མཐར་ཐུག་སྐུ་གསུམ་སྟེ། ཡེ་ཤེས་ཀྱི་ཚོགས་མཐར་ཕྱིན་པ་ཆོས་སྐུར་སྣང་ལ་བསོད་ནམས་ཀྱི་སྟོབས་ལས་ལོངས་སྐུ་སྨོན་ལམ་གྱིས་སྤྲུལ་སྐུའོ་ཞེས་བརྗོད་ན། འདིར་རྒྱུ་དེ་དག་ལ་མ་སྨོས་པས་ཅི་ལྟར་སྣང་ཞེ་ན། དཔེར་ན་ཆུ་བསྒུལ་ན་རྙོག་མ་སྤངས་ཏེ། གཟུགས་བརྙན་གྱི་བྱེ་བྲག་ཐམས་ཅད། སྣང་ཡང་ཆུ་ཉིད་སྣང་བས་ཡུལ་དུ་མ་གྲུབ་པ་ལྟར། འདིར་རང་རིག་སྙིང་པོ་བྱང་ཆུབ་སེམས་འབྲས་བུ་ལྷུན་ཏུ་བཞུགས་པ་ཉིད། མ་བཅོས་རང་སར་བཞག་པས་ཏིང་ངེ་འཛིན་མཐར་ཕྱིན་ཏེ། ཆེད་འཛིན་ཕྲ་བའང་མ་དམིགས་པས་ཆུ་ཡི་རྙོག་མ་སངས་པ་སྟར་གནས་པ་ལ། ཐམས་ཅད་མཁྱེན་པའི་སྐུ་ལ་སོགས་པའི། ཆེ་ཡོན་རྣམས་ལྟ་བ་པོ་དང་མཐུན་པར་རང་རིག་ཉིད་དེ་དག་ཏུ་ཤར་ཡང་ཡུལ་དུ་མ་གྲུབ་པས་མི་ཕྱེད་དམིགས་སུ་མེད་པའི་ཐུགས་རྗེ་ཆེན་པོ་ཞེས་ཀྱང་བྱའོ། །དབང་གི་ར་ཙ་ལྟར་ཟད་འཕེལ་མེད་པར་ལྷུན་གྲུབ་ཏུ་བཞུགས་པ་ནི། དེར་འཛིན་དང་བྲལ་བའི་རོལ་པ་མ་འགགས་པས། འདུ་ཤེས་མེད་པའི་ཐབས་ཀྱི་རོལ་པ་ཞེས་བྱའོ། །ཤིན་ཏུ་རྣལ་འབྱོར་གྱི་སྐབས་འདིར་བདེ་བར་གཤེགས་པ་ཐམས་ཅད་རང་རིག་བྱང་སེམས་སུ་དབྱེར་མེད་པའི་ངང་གིས་ཞིང་ཁམས་ཆེ་ཆུང་རིས་སུ་བཅད་པ་མ་དམིགས་ཀྱང་། ལྟ་བ་པོའི་ངོ་ལ་ལྟར་སྣང་འགོགས་པ་ཡང་མ་ཡིན་ནོ། །འོན་ཀྱང་མཐར་ཐུག་པ་མེད་པའི་དབྱིངས་ན། ཞིང་ཁམས་གཉིས་པོ་མཐར་ཐུག་པ་མེད་པ་ན། དག་པ་དང་མ་དག་པའི་གདུལ་བྱ་མཐའ་ཐུག་པ་མེད་པ་ལ། སྐུ་གཉིས་དེ་ལྟར་སྣང་བ་ནི་གྲངས་དང་དབྱིངས་ཆུའི་སྣོད་ལྟར་གདུལ་བྱ་དང་མཐུན་པར་རང་སྣང་བ་ནི། བཀྲ་ཤིས་པའི་རྒྱུད་དུ་བསྟན་པ་ཡིན་ནོ། །དེ་དག་ཀྱང་རིམ་གྱི་བརྒྱུད་པ་དང་བྲལ། རྩ་བ་དང་ལོ་མ་དང་བྲལ་སྐད་ཅིག་གཅིག་ལ་ཕྱོགས་ཐམས་ཅད་རང་སྣང་ཡང་། ཡེ་ཤེས་ཀྱི་རྗེས་སུ་འབྲང་བའང་མ་དམིགས་ཐུགས་རྗེས་རྗེས་སུ་འབྲང་བའང་མ་དམིགས་ཏེ། མེ་ལོང་གཡའ་དག་པའམ་དབང་གི་ར་ཙ་ལྟར་རྩོལ་བ་དང་བྲལ་རང་སྣང་བའོ། །འོན་ཀྱང་འོག་མ་དག་གིས་རིག་པ་བཞིན་དུ་ཚོགས་བསགས་པ་དང་སྒྲིབ་པ་དག་སྟེ། དོན་ཆེན་པོ་མཐོང་བའི་ཐབས་སོ། །དེས་ན་བརྒྱུད་པའི་རྒྱུར་འགྱུར་རོ། །འབྲས་བུ་ངོ་བོ་དེ་དག་གི་གཞི་ཡང་ཆོས་ཐམས་ཅད་ཀྱི་ངོ་བོ་མཐོང་བ་མེད་པའི་ཚུལ་གྱིས། རང་རིག་བྱང་སེམས་འབྲས་བུའི་ངོ་བོར་ལྷུན་གྱིས་མ་གྲུབ་པས། གསེར་ལ་གསེར་དུ་ཤེས་པ་བཞིན། འཁོར་བ་ཉིད་འདས་པ་ཞེས་བརྗོད་དོ། །དོན་དེས་ན་གདུལ་བྱ་མ་འགགས་ཡུལ་དུ་མ་གྲུབ་རང་རིག་བྱང་ཆུབ་སེམས་སུ་རྫོགས། རང་བྱུང་ཡེ་ཤེས་ཀྱི་ངང་ལ་མི་གཉིས་པས། ཁྱབ་པ་ཆེན་པོའི་ཐུགས་རྗེ་ཞེས་ཀྱང་དེ་ལ་བྱའོ། །དེ་ལྟ་བུའི་རྒྱུ་འབྲས་དང་ཕྱོགས་འཛིན་གྱི་རྣམ་པ་ཅན་གྱི། འབྲས་བུ་ལས་འདས་ཏེ་ཡེ་ནས་རྫོགས་པའི་དོན་ཉིད་མངོན་དུ་སྣང་བ་ལ། སྣོན་མ་གདབས་མི་གསལ་བ་གསལ་བར་བྱས་པ་མེད། ཆུང་བ་ཆེ་བར་བྱས་པ་མེད། རྒྱུ་རྐྱེན་རྣམ་པ་དང་བྲལ་ཏེ། བདག་ཉིད་ཆེན་པོར་ལྷུན་གྱིས་མ་གྲུབ་ནས་ཞེར་འཛིན་ཕྲ་མའང་མ་དམིགས་ཏེ། མཐའ་ཐམས་ཅད་དང་བྲལ་བའི་རང་རིག་བྱང་སེམས་གསལ་བ་དང་མཐའ་དང་བྲལ་བ་ནམ་མཁའ་ལྟ་བུ་ལྷུན་གྱིས་གྲུབ་པས་ན་ལྷུན་གྱིས་གནས་པས་བཞག་པ་ཡིན་ཞེས་བྱའོ། །དེས་འབྲས་བུ་ལྷུན་གྱིས་གྲུབ་པའོ། །མན་ངག་ཞེས་པ། བུངས་ཆུང་ལ་དོན་ཆེ་བའི་གཏན་ཚིགས་ཏེ། བརྗོད་བྱེད་ཀྱི་ཚིགས་བུངས་ཆུང་བ་རྡོ་རྗེའི་ཚིགས་དྲུག་གིས། དོན་ཆེ་བ་སྟེ་རྣམ་པར་ཐར་པའི་ཐེག་པ་བསམ་གྱིས་མི་ཁྱབ་པའང་། ཐེག་པ་རིམ་པ་དགུར་འདུས་པ་དེ་ཡང་ཐེག་པ་ཡར་ལྡན་གླང་པོ་ཆེའི་དཔེས་རྫོགས་པ་ཆེན་པོར་འདུས་ཏེ། ཐེག་པ་མ་ལུས་པའི་དོན་སྟོན་པས་དོན་ཆེ་བ་སྟེ། བརྗོད་བྱེད་ཚིག་གོ། །བརྗོད་བྱ་དོན་བུངས་ཆུང་སྟེ། རང་རིག་བྱང་སེམས་ཅི་བཞིན་ཉིད་དམ་རྩོལ་བ་མེད་པའམ་རང་བྱུང་ཡེ་ཤེས་སམ་རྫོགས་པ་ཆེན་པོའམ། ས་གཅིག་པ་ཞེས་བྱ་སྟེ། དོན་གྱི་དངོས་པོ་ཚིག་གི་ཐ་སྙད་དུ་བརྗོད་ཀྱང་དེ་ཉིད་ཀྱིས་ཀྱང་། དོན་ལ་རེག་པར་མི་ནུས་པའི་ངོ་བོ་འདི་ལྟ་བུ་ཞེས་ཞེན་པས་བཟུང་བ་རྡུལ་ཕྲ་རབ་ཀྱང་མ་དམིགས་གང་ཡང་མ་སྤངས་ངང་གི་བྲལ་བའི་ངོ་བོའོ། །དོན་ཆེ་བ་ནི་དེ་ཉིད་རང་རིག་སྙིང་པོ་བྱང་སེམས་ཏེ། འཁོར་འདས་ལམ་པ་ཐམས་ཅད་མ་བརྩལ་བར་ལྷུན་གྱི་རྫོགས་པ་གཟུང་འཛིན་གཞི་བྲལ་འཁོར་བ་རང་དག་ཉི་མའི་སྙིང་པོ་ལྟར་མུན་པ་གཞི་བྲལ། མྱ་ངན་ལས་འདས་པ་ཞེས་པའང་མ་དམིགས་པས་བུ་ཏ་ཞེས་པའི་ཐ་སྙད་དང་ཡ་བྲལ་ཏེ་དོན་ཆེ་བ་དང་། ཐེག་པ་འོག་མའི་རྩོལ་བ་རྣམས་མ་སྤངས་ངང་གིས་དག་པ་དང་། འབྲས་བུའི་བདག་ཉིད་ལྷུན་གྱིས་གྲུབ་པས་ཡོན་ཏན་གྱི་རྩོལ་བ་ཐམས་ཅད་འབད་པ་མེད་པར་རང་འཆར་བ་དང་། འདི་ཉིད་དུ་རིམ་གྱིས་བགྲོད་པ་དང་བྲལ་ཞིང་རང་ཉིད་འབྲས་བུ་ལྷུན་གྱིས་གྲུབ་སྟེ་རང་གཞན་དུ་མ་ལས་པས་དོན་ཆེ་བའོ། །བྱ་སླ་དཔགས་དཀའ་བས་མན་ངག་དང་ཞེས་བྱ་སྟེ། བྱ་སླ་བ་ནི་རང་རིག་བྱང་ཆུབ་སེམས་བྱ་རྩོལ་ཐམས་ཅད་ཀྱི་བདག་ཉིད་དུ་བཞུགས་ཀྱང་། ངོ་བོ་ཉིད་ལ་བྱ་རྩོལ་གྱི་ཆོས་ཀྱི་གོས་པ་ཕྲ་བའང་མི་དམིགས་ཏེ། ཅི་བཞིན་པ་ལ་དེ་ཉིད་དུ་རིག་པ་སོན་པ་ཉིད་ཀྱི་མཐར་ཕྱིན་པས་སླ་བའོ། །དོན་དེས་དཔགས་དཀའ་སྟེ། བསམ་བརྗོད་ཀྱི་ཡུལ་ལས་འདས་པ་དང་། ཡུལ་དུ་མ་གྱུར་བདག་ཉིད་ཆེན་པོར་ལྷུན་གྱིས་གྲུབ་པ་ཉིད་ཀྱིས། ཉིད་ལ་རེག་པར་མི་ནུས་པ་དང་། འོག་མ་དག་གིས་གྲངས་མེད་གསུམ་ལ་སོགས་པར་བརྩལ་ཀྱང་། དེ་ཉིད་ཀྱི་སྒྲིབས་པས་མ་རིག་པའི་ཕྱིར། དཔགས་དཀའ་བའོ། །རྒྱལ་བའི་དགོངས་པ་བཀྲིད་དྲང་དང་བྲལ་བར་ངེས་པར་ཐོག་ཏུ་ཕེབས་པའི་ཕྱིར་ཡང་མན་ངག་སྟེ། རིག་པ་རང་བྱུང་ཡེ་ཤེས་མཐའ་ཐམས་ཅད་དང་བྲལ་བ་ཉིད། གདགས་གཞི་དང་བྲལ་ཡང་ཐ་སྙད་དུ་རྒྱལ་བ་རྣམས་ཀྱི་དགོངས་པ་མ་ནོར་བའོ། །ཐེག་པ་བརྒྱད་པོ་ནི་ཐབས་ཀྱིས་བྱ་རྩོལ་གྱིས་དེ་ཉིད་བཀྲིད་ཅིང་དྲང་བའི་ཐབས་སོ། །འདིར་ཤིན་ཏུ་རྣལ་འབྱོར་པ་ལམ་རིམ་བགྲོད་དང་བྲལ་བ་ཉིད། ཡུལ་ཕྱི་ནང་ལ་གཏན་ཚིགས་དང་གྲུབ་མཐའ་དབྱེར་མེད་པའི་གཏན་ཚིགས་དང་། ས་གསུམ་དང་ཆེ་བ་ལྔ་དང་། ཐེག་པ་དྲུག་གི་སྤུ་མ་བརྗེས་མདོག་མ་བསྒྱུར་བར། སྣང་སྲིད་རང་གྲོལ་ཏེ། ཀུན་ཏུ་བཟང་པོར་ལྷུན་གྱིས་རྫོགས་པ་ནི། གཅིག་ཆོད་དུ་སྟོན་པ་ཐེག་པའི་དམ་པའོ། །དེས་ན་མན་ངག་ཞེས་བྱའོ། །རྫོགས་ཆེན་པོ་དང་། བྱང་ཆུབ་ཀྱི་སེམས་དང་། རིག་པའི་ཁུ་བྱུག་རྣམས་བཤད་ཟིན་ཏེ། ཞེས་བྱ་བ་ནི་བརྗོད་བྱེད་ཀྱིས་བརྗོད་བྱའི་འོག་འདྲེན་པའི་ཚིགས་ཏེ། དོན་སྟོན་པར་བྱེད་པའི་ཚིག་གིས་འཕྲད་དོ། །རྡོ་རྗེའི་ཚིག་དྲུག་པའང་མཚན་གྱི་སྐབས་སུ་བཤད་ཟིན་ཏོ། །རྫོགས་སོ། །ཞེས་བརྗོད་བྱེད་ཀྱིས་བརྗོད་བྱ་མཐར་ཕྱིན་ནས། བརྗོད་བྱེད་ཀྱང་མ་ལུས་པའི་ཐ་ཚིག་གོ། །དུས་གསུམ་མ་བྲལ་སྐད་གཅིག་མ་མཐོང་དོན། །སྣང་གྲགས་ཆོས་རྣམས་ཀུན་ཏུ་བཟང་པོའི་དབྱིངས། །རང་སྣང་ཡེ་ནས་འབྲས་བུའི་ངོ་བོ་ཉིད། །སྐད་གཅིག་ཉིད་ལ་སྣང་བས་ཁུ་བྱུག་སྟེ། །ཚིག་དྲུག་དོན་ཉིད་དམ་པ་བརྟེན་སྟོབས་ཀྱིས། །ཅུང་ཟད་སྣང་ཡང་གཏི་ནས་འོས་མིན་ཀྱང་། །ལོང་བ་ལ་ཡང་ལམ་རྒྱུས་ལྟོས་པ་བཞིན། །ཕན་པའི་སེམས་ཀྱི་ཕྱོགས་ཙམ་བཀྲོལ་བ་ཡང་། །མཐུ་ཆུང་ནན་ལ་བཏབ་པ་བཞིན་དུ་སྣང་། །རང་སེམས་དབང་བརྩུགས་དགའ་བའི་ཤུགས་ཀྱིས་བཀོད། །བཞེད་པ་ཅི་མཆིས་གོང་མ་རྣམས་ལ་བཤགས། །བརྩེ་བའི་སེམས་ལས་བྱུང་བའི་བསོད་ནམས་གང་། །མྱུར་དུ་འགྲོ་ཀུན་མཉམ་ཉིད་སྣོད་གྱུར་ནས། །ཐེག་མཆོག་ཉི་མ་བཞིན་དུ་དར་པར་ཤོག །དོན་གསལ་ཉི་མ་རྫོགས་སོ། །འདིའི་འཇིག་ཙམ་གྱིས་ཚིག་རིས་དང་གཞུང་ན་དམ་པ་བདེ་གཤེགས་ཀྱི་གསུང་བཀོད་པ་སོགས་ཀྱིས་གཙང་སྟོན་རིན་ཆེན་པས་མཛད་པར་ཐེ་ཚོམ་མེད་པར་འདུག་གོ། །ཞེས་སི་ཏུ་རིན་པོ་ཆེའི་ཕྱག་བྲིས་སུ་འདུག་གོ། །དགེའོ།། །།

རྫོགས་པ་ཆེན་པོའི་གལ་གནད། གཙང་སྟོན་རྡོ་རྗེ་རྒྱལ་མཚན།

བླ་མ་རིན་པོ་ཆེ་ཀཿཐོག་རྡོ་རྗེ་རྒྱལ་མཚན་གྱི་མཛད་པའོ། །རྫོགས་པ་ཆེན་པོའི་གལ་གནད། ཨཱོཾ་སྭཱ་སྟི། ན་མོ་གུ་རུ། བཀྲ་ཤིས་པར་གྱུར་ཅིག །སེམས་ཉིད་རང་རིག་ཡེ་ཤེས་ཉི་མ་སྟོང་ལྡན་འོད་ཟེར་གྱིས། ལྷན་ཅིག་གནས་པའི་མི་མཐུན་རྩ་བ་ཡན་ལག་བཅས་པ་རྣམས། སྐད་ཅིག་ཉིད་ལ་དངས་མཛད་སྟོན་ཀའི་ནམ་མཁའ་དག་པ་དང་། སེམས་ཉིད་གསལ་དབྱེར་མ་བྱེད་གསལ་སྟོང་སྨྲ་བསམ་ལས་འདས་པ། རང་སྣང་ཅིར་ཡང་འཆར་བ་དགོས་འདོད་དབང་གི་རྒྱལ་པོའི་ཚུལ། གདུལ་བྱའི་འཁོར་སློབ་དགོས་སྐོང་མཐུན་སྣང་མེ་ལོང་བཞིན། རྩ་ལོང་བྱུང་འཇུག་བྲལ་བ་ཆུ་ཡི་ཟླ་བ་ལྟ་བུའི་ཚུལ། ཡོན་ཏན་མཆོག་ལྡན་རྗེ་བཙུན་བླ་མ་རྣམས་ཀྱི་ཞབས་ལ་འདུད། །ཐམས་ཅད་མཁྱེན་པའི་ཐུགས་རྗེ་ཡིས། །ཐེག་པ་བསམ་གྱིས་མི་ཁྱབ་པ། །གདུལ་བྱའི་དོན་དུ་གསུངས་པ་ཡང་། །བློ་ཡི་རིམ་པ་བཞིན་སྣང་བ། །གདུལ་བྱའི་རྐྱེན་གྱིས་སྣང་བ་རྩམ། །ལྟ་སྤྱོད་སྒོམ་པ་འབྲས་བུ་རྣམས། །ཐེག་པ་སོ་སོའི་གཞུང་བཞིན་དུ། །བློ་དང་མཐུན་པར་སྣང་ན་ཡང་། །འདིར་ནི་བླ་མེད་ཐེག་པ་མཆོག །བགྲོད་པ་གཅིག་པས་ཚེ་གཅིག་གིས། །འབྲས་བུ་མངོན་དུ་བྱ་བའི་ལམ། །དབང་པོ་ཡང་རབ་སྦྱངས་པ་ཅན། །བསགས་པ་མཆོག་ཏུ་གྱུར་པ་ཡིས། །སྐྱེས་ཆེན་ཅིག་གི་བཅུད་ཡིན་ཏེ། །དཔེར་ན་སེང་གེའི་འོ་མ་བཞིན། །སྤྱིར་ཐུབ་པ་ཆེན་པོ་འདི་ཉིད་ཀྱིས། །བསྟན་པ་སྣང་བའི་ཐེག་པ་མཆོག །སྒོས་སུ་སྙིགས་མའི་ཐ་མ་ལ། །བསྟན་པ་དར་བར་ལུང་བསྟན་ཏེ། །སྐྱེས་མཆོག་ལམ་ལ་གནས་པ་རྣམས། །གྲངས་མང་བསམ་གྱིས་མི་ཁྱབ་པས། །རྗེ་བཙུན་བླ་མ་ཡན་དུ་བསྟན། །དད་བརྩོན་ཆེན་པོའི་དང་དུ་བླངས། །གྲུབ་ཐོབ་བླ་མ་ནམ་མཁའི་སྐར་མ་བཞིན། །གསང་སྔགས་བྱིན་རླབས་བསམ་མི་ཁྱབ། །སྤྱིར་གསང་སྔགས་ཀྱི་ལྟ་སྒོམ་སྤྱོད་གསུམ་འབྲས་བུ་བཞི་ཞེས་བརྗོད་ཀྱང་། ལྟ་བ་ནི་ལམ་གྱི་སྔོན་འགྲོ་ལམ་གྱི་གཞི་གང་གི་ཡང་རྒྱབ་རྟེན་ལྟ་བུ་ཡིན་ཏེ། དེ་ཐ་སྙད་ཡིད་ཀྱི་ཡུལ་དུ་བྱས་པའི་སྟོང་པ། སྤྱི་ཁྱབ་ཀྱི་ཞེར་འཛིན་ཅིག་ལ་ལྟ་བ་ཞེས་བརྗོད་དེ། འདིར་གདར་ཤ་ཆོད་པར་བྱེད་ན། གསང་སྔགས་ཀྱི་སྐབས་སུ་ལྟ་བ་གཉིས་ཏེ། སོ་སོར་རྟོགས་པ་ཡུལ་གྱི་ལྟ་བ་དང་། །མི་དམིགས་པའི་ཤེར་གྱི་ཡུལ་གྱི་ལྟ་བའོ། །སོ་སོར་རྟོག་པ་ཤེས་རབ་ཀྱི་ལྟ་བའོ། །ལུང་ཟབ་མོ་དང་བླ་མ་དམ་པའི་མན་ངག་གཉིས་སེམས་ཐོག་ཏུ་མ་ཕེབས་པར་ཐ་སྙད་ལ་དོན་དུ་འཛིན་ཏེ། སྣང་བ་སེམས་ཡིན། སེམས་ལས་བྱུང་ཞིང་སེམས་སུ་འདུས་ཞེས་པ་དང་། སྣང་བ་སྒྱུ་མ་ལྟ་བུ་ཞེས་པ་དང་། སྣང་བ་རང་བཞིན་མེད་པ་ཡིན་ཞེས་པ་དང་། ཕུང་པོ་ལྔ་རིག་ལྔ། འབྱུང་བ་ལྔ། ཡུམ་ལྔ། ཡིན་ཞེས་པ་ལ་སོང་པའི། སྙམ་བློ་ཡིད་ཀྱི་འདུ་ཤེས་ནི་སོ་སོར་རྟོག་པའི་ཤེས་རབ་ཀྱི་ལྟ་བ་སྟེ། དཔེར་ན་མུན་ནག་ནང་ན་རིན་པོ་ཆེ་ཚོལ་བའི། གསལ་བྱེད་སྒྲོན་མ་བཟུང་བ་ཡིས། རིན་པོ་ཆེ་མ་མཐོང་ནས་སྒྲོན་མ་དོན་དུ་འཛིན་པ་ལྟ་བུའོ། །མི་དམིགས་པ་ཤེས་རབ་ཡུལ་གྱི་ལྟ་བ་ནི། ཉམས་ཅན་གྱི་བླ་མ་ལུང་ཟབ་མོའི་དོན་ལ་བརྟེན་ཏེ། ཕྱི་ནང་གི་ཆོས་ཐམས་ཅད་ལ་གཞལ་བ་ནི། ཆོས་ཐམས་ཅད་སེམས་སྣང་སྟེ། སེམས་ཉིད་རྟོགས་པའི་གཞི་མེད་བསྐྱེད་པའི་རྩ་བ་མེད་པར། རང་སྣང་མི་འགག་པ་ཡུལ་སེམས་ཐམས་ཅད་ཀྱི་ངོ་བོ་ཉིད་ཡིན་པ་ལ་བརྡའ་སྤྲད་པས། ཡུལ་ཐམས་ཅད་སེམས་སུ་དབྱེར་མེད་པས་ཡུལ་མ་གྲུབ། སེམས་རྩ་བ་དག་སྟེ་ནམ་མཁའ་དང་དབྱེར་མེད། ཡུལ་དང་ཡུལ་ཅན་དབྱེར་མེད་པའི་དགོངས་པ། ལྷུན་གྱིས་གྲུབ་པས་རྣལ་འབྱོར་པའི་རིག་པ་དེ་ཉིད་དུ་གྱུར་པ་ལ་བལྟ་བྱ་བལྟ་བྱེད་མེད་རྟོགས་སྙམ་གྱི་ཞེ་རློམ་མེད་པ། དོན་དམ་ཉིད་ནི་ལྟ་བ་རྟོགས་པ་མཐར་ཕྱིན་པའོ། །ཐ་མལ་པའི་ཤེས་པ་ཡུལ་ལ་གསལ་བར་གཅོད་པའི་བདག་ཉིད་སྐད་ཅིག་མ་ནི། ཡིད་ཀྱི་ཤེས་རབ་ཅེས་བྱ་སྟེ་ཡུལ་དང་ཁྱད་མེད་པས། བསྒོམ་པའི་གནས་སྐབས་སུ་དག་བྱའོ། །དེ་ལྟ་བུའི་ལྟ་བ་མངོན་དུ་གྱུར་ཡང་། བསྒོམ་པས་འདྲིས་པར་མ་བྱས་པར་ཟག་བཅས་ཀྱི་སའོ། །ཟག་པ་མེད་པ་མངོན་དུ་སྣང་བ་ནི་སྒོམ་པའི་ཏིང་ངེ་འཛིན་ཁོ་ནའི་སྟོབས་སོ། །དེ་ལྟ་བུའི་ལྟ་བ་དེ་རྣལ་འབྱོར་པ་ལ་མངོན་དུ་གྱུར་པ་མི་སླ་ན་ཡང་། སོ་སོར་རྟོགས་པའི་ཤེས་རབ་ཙམ་ལ་བརྟེན་ནས། གདམ་ངག་རིམ་པ་བཞིན་ཉམས་སུ་བླང་པ་ན། ཏིང་ངེ་འཛིན་གོང་མའི་ཚེ་ལྟ་བ་དེ་དག་རང་བཞིན་གྱིས་རྟོགས་པར་འགྱུར་ཏེ། སྒོམ་པའི་སྟོབས་ཀྱིས་ལྟ་བ་སྐྱེ་བ་ཞེས་བྱའོ། །ལྟ་བྱ་ལྟ་བྱེད་མེད་པ་ལྟ་བ་མཆོག །རྟོགས་པའི་གདེངས་དང་ལྡན་པའི་སྐྱེས་བུ་ལ། །མི་འཇིགས་རྫོང་ལ་ཞེན་པའི་དཔའ་བོ་ནི། །གོ་མཚོན་ཕུན་སུམ་འཚོགས་པ་ལྡན་པ་འདྲ། །བྱས་འཛིན་བྲལ་བའི་འདུ་ཤེས་ལྷུན་གྲུབ་པས། །བསྔོ་བ་མི་དགོས་བྱང་ཆུབ་ཆེན་པོར་ཕྱིན། །ཡུལ་དྲུག་ཆོས་རྣམས་གང་དང་གང་མཐོང་བ། །གསལ་ལ་མི་འཛིན་ལྟ་བའི་ངོ་བོ་རྫོགས། །བྱས་འཛིན་བྲལ་བ་ནམ་མཁའི་བྱ་ལམ་བཞིན། །དུག་ལྔ་རང་རྒྱུད་དག་སྟེ་ཆ་ཕྲ་བ། །སྒོམ་པའི་ཏིང་ངེ་འཛིན་གྱིས་དག་པར་བྱེད། །འགྲོ་བ་རྣམས་ལ་ཐུགས་རྗེ་ཆེན་པོ་ཉིད། །ངང་ངམ་རྒྱུན་གྱིས་གཏིང་ནས་དྲག་པོར་འཆར། །ཕ་ལ་མོས་གུས་བར་མཚམས་མེད་པ་སྟེ། །གནག་ལས་འཕྲ་བའི་ཕྲ་བ་མིག་བཞིན་འཛེམ། །དཀར་པོ་ལས་རྣམས་རྒྱུན་འཆད་མེད་པར་འཕེལ། །འཇིག་རྟེན་བྱ་བ་སྦྲུལ་ཤུན་བཞིན་དུ་འདོར། །རང་གནས་མི་ཆགས་གཞན་དུ་འགྲོ་བར་འདོད། །རྨི་ལམ་རྟགས་ཀྱང་མང་འབྱུང་སྟེ། །ཐ་སྙད་བརྗོད་ཀྱིས་མི་ལང་མདོར་བསྡུ་ཙམ། །བླ་ན་མེད་པའི་བྱང་ཆུབ་མྱུར་དུ་ཐོབ་པར་འདོད་པའི་རྣལ་འབྱོར་པས། ཟག་མེད་ནས་སངས་རྒྱས་ཀྱི་ས་མངོན་པའི་ལམ་གྱི་ངོ་བོ་ནི་ཏིང་ངེ་འཛིན་ཡིན་ཏེ། ཆོས་སྤྱོད་དགུ་པོ་གཞན་ཐམས་ཅད་ནི་དེའི་གདོང་གྲོགས་སུ་གྱུར་པའོ། །དེ་ཡང་རྒྱུ་ཅན་དྲུག་གིས་ལམ་གོང་ནས་གོང་དུ་འཕར་བ་བཙའ་མྱེ་བཞིན་ཏེ། བཙའ་མྱེ་ཆུང་ངུ་དུ་བ་ལ་མེ་སྟག །དེ་ལས་གོང་ནས་གོང་དུ་འཕེལ་ནས་མཐར་ཕྱིན་པ་འབྲས་བུ་ཆོས་སྐུ་ལྷུན་གྱིས་གྲུབ་པའོ། །རྒྱུ་ཅན་དྲུག་ནི། མཚུངས་པའི་རྒྱུ་ནི་རང་གི་རྟོགས་པའི་ཤེས་རབ། བསགས་པ་དང་སྦྱངས་པ་གཉིས་ཀྱི་བརྒྱན་པ། རྣོ་བ་རལ་གྲི་གན་མ་ལྟ་བུའོ། །གདམ་ངག་གི་སྟོབས་ཀྱིས་རིག་པ་མཐའ་བྲལ་གྱི་ཡེ་ཤེས་ཆེན་པོ། སེམས་ཉིད་མ་བཅོས་པ་གཉུག་མའི་ངོ་བོ་ཉིད་ངོ་སྤྲད་ནས་ཉམས་སུ་བྱུང་སྟེ། རང་ངོ་རང་གིས་ཤེས་པ་དང་། མཐའ་ཐམས་ཅད་དང་བྲལ་ནས་གོང་དུ་སྟོབས་སུ་གྱུར་ནས། འབྲས་བུ་སྦྱོར་བ་སྟེ། རྒྱུ་གཉིས་སོ་རྐྱེན་བཞི་ལ། བདག་པོའི་རྐྱེན་བླ་མ་སྟེ། དཔེར་ན་དབྱར་གྱི་ལོ་ཏོག་རླན་གྱིས་བསྐྱོད་ནས་སྟོན་འབྲས་བུ་ལྷག་པ་ལ། བདག་པོས་བདག་བྱས་ནས་རྐྱེན་ཆུ་ལུད་འཛོམས་པར་བྱས་ཏེ། ཐན་པའི་དུས་སུ་ཆུ་བཀྱེ། གཞན་གྱི་གནོད་པ་ལས་སྲུང་བར་བྱ་བ་དང་འདྲ་བར། རྡོ་རྗེ་སློབ་དཔོན་གྱིས་བདག་བྱས་ནས། ཏིང་ངེ་འཛིན་གྱི་འགལ་རྐྱེན་སྤང་། མཐུན་རྐྱེན་བསྒྲུབ་བོགས་འདོན་གྱི་གདམ་ངག་དབོག །ཉོན་མོངས་པ་དང་ཡུལ་གྱི་ཆོས་ཐམས་ཅད་སེམས་སུ་རྟོགས་པར་བྱེད། ལྟས་ངན་གཡང་དུ་བླན་མི་མཐུན་པ་གཉེན་པོར་བསྟེན་པ་ནི། ལམ་མཐོ་པོའི་ཡན་ལག་རྐྱེན་ཏེ། ལམ་དམའ་བའི་གྲོགས་རྣམས་ཀྱང་ཉམས་སུ་མྱོང་བར་བྱེད། འབྲས་བུ་ལ་སྦྱོར་བ་ནི་རྐྱེན་ནོ། །དཔེར་ན་རྡོ་རྗེ་སློབ་དཔོན་ནི་རྒྱུ་དང་རྐྱེན་གཉིས་ཀར་འགྲོའོ། །དབང་པོ་རྐྱེན་ནི། དབང་པོ་ལྔ་དང་སྟེ། མིག་ལ་བརྟེན་ཏེ་གཟུགས་ཐམས་ཅད་ཏིང་ངེ་འཛིན་གྱི་གྲོགས་སུ་འགྱུར་བ་དང་། རྣ་བ་ལ་བརྟེན་ཏེ་སྒྲ་ཐམས་ཅད་དེས་འགྲེས་པས། ཡུལ་དྲུག་གི་ཆོས་སེམས་ཉིད་ཀྱི་ངང་དུ་རྟོགས་པར་བྱེད་ལ། སེམས་མ་ཡེངས་པའི་བཏང་སྙོམས་ཆེན་པོའི་ངང་དུ་ལྷུན་གྱིས་གྲུབ་པ་ནི། དབང་པོའི་རྐྱེན་ནོ། །དམིགས་པའི་རྐྱེན་ནི། རྣལ་འབྱོར་པའི་དོན་དུ་གཉེར་བྱ་འཁོར་འདས་དབྱེར་མེད་པའི་ངོ་བོ་འོད་གསལ་གྱི་ཡེ་ཤེས་ཏེ། སེམས་ཉིད་ཅི་ལྟར་ཡིན་པའི་དོན་ལ། བྱས་བཅོས་ཐམས་ཅད་དང་བྲལ་བ་ཞེས་འདོད་ཕྲ་བའི་ཕྲ་བའང་མི་མངའ་བ་ནི་མ་བཅོས་པའི། དེ་ཉིད་ཆུའི་རང་བཞིན་གཤེར་བ་དང་འདྲ་བར། ཆོས་ཐམས་ཅད་ལ་ལྷུན་གྱིས་གྲུབ་ཅིང་། མི་མཐུན་པ་དང་གཉེན་པོ་མ་དམིགས་པའི་ངོ་བོ་ཉིད་ནི་གཉུག་མའི་བྱང་ཆུབ་སེམས་སོ། །གསང་སྔགས་ཀྱི་ངོ་བོ་འོད་གསལ་བ་ལ་སོགས་པ་མཚོན་པའི་ཐ་སྙད་ཚིག་གི་ཐ་སྙད་ཀྱིས་དོན་ཅིག་ཏུ་སྟོན་ལ། དཔེར་ན་ཡིད་བཞིན་གྱི་ནོར་བུ་རི་དབང་གི་རྒྱལ་པོ། ཉི་མ་ཕྱེད་ནགས་ཚལ་གྱི་དབུས་སུ་བཞུགས་པ་ལྟ་བུ་སྟེ། དེ་ལ་དམིགས་པས་ཏིང་ངེ་འཛིན་སྟོབས་སུ་གྱུར། འབྲས་བུ་སངས་རྒྱས་པའོ། །དེ་མ་ཐག་པའི་རྐྱེན་ནི། གོང་མ་འགགས་པས་གོ་ཕྱེ་ནས། ཏིང་ངེ་འཛིན་སྟོབས་སུ་གྱུར་ཏེ། ལམ་པའི་ངོ་བོས་ཏིང་ངེ་འཛིན་པ་གཡོ་བ་དང་། དེ་ལས་སྐྱེད་དུ་བྱ་བ་རིམ་པ་བཞིན། ཐོབ་པ་དང་། བརྟེན་པ་དང་། མཐར་ཕྱིན་པའི་གཞི་ཀུན་ལ་སྦྱར་ཏེ། སྔ་མ་བརྟེན་པ་དང་། ཕྱི་མ་གཡོ་བ་དང་ཐོབ་པ་ཀུན་བསྣོལ་མ་ལྟ་བུ་སྟེ་རྒྱུད་འབྲེལ་པའོ། །ཁྲིགས་གདུམ་དུ་མེད་དོ། །དོན་གྱི་རྣམ་གྲངས་རྣམ་དབྱེར་མེད་དེ་ཁྲིགས་བུར་མེད་དོ། །ཉམས་སུ་ལེན་པའི་ཐབས་མདོར་བསྡུས་པར་གྱུར་ན། དགོངས་ཉམས་སུ་དང་ལྡན་པའི་བླ་མ་ལ། དད་བརྩོན་ཤེས་རབ་དང་ལྡན་པའི་སློབ་མས་ཞུས་ཏེ། བཅུད་འཛོམས་ནས། བླ་མས་གདམ་ངག་ཕོག་པའི་དོན། སློབ་མས་ཉམས་སུ་བླངས་པའི་དང་པོ་ལ། རིག་པ་མ་བཅོས་པའི་ཤེས་རབ་རང་སོར་བཞག་པའི་དུས་སུ། བྱིང་རྨུག་དང་རྒོད་འཐོར་གྱི་སྐྱོན་དང་བྲལ་ཉི་མ་ཕྱེད་སྐད་ཅིག་མ་ལ་རྒྱུད་དུ་གནས་པའི་ཚུན་ཆད་ནི་གནས་པའི་ཏིང་ངེ་འཛིན་ཞེས་བྱ་སྟེ། ཏིང་ངེ་འཛིན་དང་པོའོ། །འདི་ཡི་དུས་སུ་རྟོགས་པས་མ་ཁྱབ་ཆེད་དུ་བསྒྲུབ་པའི་མ་བཅོས་པའོ། །སེམས་མཐོང་བའི་ལམ་མམ་སྣ་ག་ལྟ་བུ་ཡིན། ཞི་གནས་ཡིན་པས་རྣལ་འབྱོར་པ་བརྩོན་འགྲུས་སྟོབས་ཆེ་ན་ཉམས་སྣང་འཇམ་རྩུབ་རྣམས་སོ། །ནམ་མཁའི་སྤྲིན་ལྟར་རང་བྱུང་རང་ཞིར་གཞག །རེ་དོགས་གང་ཡང་མི་བྱ། འདིའི་དུས་སུ་ཉམས་ཅན་གྱི་བླ་མ་ཁོ་ན་གལ་ཆེ། འཁོར་དང་ཡུལ་ཞིང་དང་ཉེ་དུ་ལ་མི་ཆགས་ནས། ཐག་རིངས་གཏོད་པར་འགྲོ་བའི་འདུ་ཤེས་འབྱུང་། ཏིང་ངེ་འཛིན་དེའི་ཉམས་ཀྱི་རྨི་ལམ་ཡང་ཐད་སོར་འབྱུང་བར་བཤད། དེ་དག་ཀྱང་བསྒོམ་པའི་ཏིང་ངེ་འཛིན་བརྩོན་འགྲུས་ཆེ་བ་ལ་སྣང་གི། བརྩོན་འགྲུས་ཆུང་ན་སྣང་བ་མ་ཡིན་ཏེ། རྒྱུ་འབྲས་ཡིན་པས་སོ། །འདིའི་དུས་སུ་ཆུད་སོ་སོ་ཆོས་གང་དང་གང་ལ་བརྟེན་ཏེ། སྣང་བ་སེམས་སུ་ཆོད་པ་སྣང་བ་ཙམ་འབྱུང་། དེ་ནས་བརྩོན་འགྲུས་བསྐྱེས་པས་ཉིན་གཅིག་འམ། ཉིན་ཞག་གཅིག་ལ་ཐུན་ཅིག་ཙམ་ནུས་ནས་གོང་གི་སྐྱོན་དེ་དག་ཕྲ་བ་མི་འབྱུང་ན། ཏིང་ངེ་འཛིན་གཉིས་པའི་ཚད་དེ། འདིའི་དུས་སུ་ཆུ་རྙོག་མ་དང་འདྲ་བས་རྟོགས་པ་ཕྲ་བ་དག་ནས། ཏིང་ངེ་འཛིན་ལ་དེ་ཉིད་དུ་འཛིན་པའི་འདུ་ཤེས་ཀྱང་ཆུང་སྟེ། སེམས་ཀྱི་དོན་ཟུར་གསལ་བའོ། །འདིའི་དུས་སུས་དོན་མཐར་ཐུག་པ་འདི་ཡིན། ཆོས་སྐུ་འདི་ཁོ་ན་ཡིན་སྙམ་པ་འབྱུང་སྟེ། ཆུ་དྭངས་མས་གཉེར་མ་དང་འདྲ་བས་སེམས་ཉིད་ཀྱི་སྒྲིབ་བྱེད་གཙོ་བོའི་རྟོག་པ་བྲལ་བའི་ཕྱོགས་སོ། །འདིའི་དུས་སུ་སྣང་སེམས་དབྱེར་མེད་ཀྱི་རྟོགས་པ་འགོ་ཟུག་པ་བརྟན་པ་ཡིན་ཏེ། ཏིང་ངེ་འཛིན་ལ་འཛིན་པ་ཆུང་བ་ཉིད་སེམས་ཉིད་ཀྱི་དོན་མཐོང་བས་སེམས་ཉིད་རང་གི་རང་བཞིན་ཅི་ལྟར་ཡིན་པ་རྟོགས་པ་ལ་འཕྲིག་ཁུར་བའོ། །རྟོགས་པའི་བྱེ་བྲག་གི་སྣང་བ་རྨ་མས་འདི་ནས་འཆར་ཏེ། ཧ་ཅང་ཞི་བ་ན་ཡུན་པར་འགྱུར། འདིའི་དུས་སུ་ཁམས་གསུམ་གྱི་སེམས་ཅན་ལ་སྙིང་རྗེ་ཆེན་པོ་ཤུགས་ཀྱིས་འཆར། བླ་མ་སྐད་ཅིག་ཀྱང་མི་བརྗེད། དཀར་པོའི་ཆོས་སྤྱོད་རྒྱུན་མི་འཆད། གནག་ལས་འཕྲ་བའི་འཕྲ་བ་ཡང་ཡང་། ལུས་མ་བོར་བར་སྤྲུལ་པ་འགྲོ་བ་སྣ་ཚོགས་ཀྱི་དོན་བྱ་སྙམ་བློའང་འབྱུང་། གོས་དང་ཟས་ཀྱི་འདུ་ཤེས་ཆུང་། འདོད་ཆགས་ལ་སོགས་པ་ཆ་འཕྲ། བསྟོད་སྨད་དགའ་མི་དགའ་འདྲ། དོན་རྣམས་ཀྱང་དཔེར་ན་གཙུབ་ཤིང་གི་སྦྱོར་བ་བཞིན་བརྩོན་འགྲུས་དྲག་པོ་ལས་སྣང་གི། སོ་བདེ་ཙམ་གྱི་སྒོམ་སྒྲུབ་ལས་ནི་གང་ཡང་མི་སྣང་ངོ་། །སྐྱེས་བུ་སྐལ་ལྡན་གྱིས་དེ་ནས་བསྒོམ་པ་ལ་འབད་པས་སེམས་ཀྱི་གནས་ལུགས་ཅི་ལྟ་བ་ནི་སྣང་སེམས་དབྱེར་མེད་ཡིན་པས། དེའི་རྟོགས་པ་འཆར་བས། ཡུལ་སེམས་དབྱེར་མེད་ཅེས་བྱའོ། །ཡུལ་སེམས་སྣང་སེམས་དངོས་པོ་ཐམས་ཅད་བྲལ་བས་རྣལ་འབྱོར་པའི་ལུས་ལ་སེམས་གནས་པར་བཅས་པའི་འདུ་ཤེས་ཟད་པས་ནམ་མཁའ་ཡི་དབྱིངས་སུ་ཡལ་ཏེ། ནམ་མཁའ་རིག་པ་ཅན་དུ་གྱུར་པས་ཡུལ་གྱི་ཆོས་ཐམས་ཅད་སྣང་མི་སྣང་གི་ཐ་དད་ལས་འདས་པས། བློའི་ཡུལ་དུ་བཟུང་བའི་ཆོས་འཕྲ་བ་མ་དམིགས་པ་ནི། དེ་ལྟ་བུའི་དོན་རྣལ་འབྱོར་པའི་དོན་མངོན་དུ་བྱས་པའི་རྟོགས་པ་ཡིན་གྱི། དོན་མངོན་དུ་མ་བྱས་པ་རྣམས་ལ་ནི་ཚིག་གི་ཐ་སྙད་དེ་གཏམ་མོ། །དེ་ལྟ་བུའི་དགོངས་པ་ལ། འཁོར་དང་མྱ་ངན་ལས་འདས་པའི་ཆོས། ཅི་ལྟར་ཡང་མ་གཟིགས་ཏེ། ཞེས་པས། འཁོར་བའི་འཛིན་པ་དག་པས་མྱ་ངན་ལས་འདས་པ་མ་དམིགས། ཡུལ་གྱི་འཛིན་པ་དག་པས། ཡུལ་ཅན་མ་དམིགས་པས། ཐ་སྙད་དམ་དོན་དམ་ཞེས་པས་བྱུང་བའི་འདུ་ཤེས་ཐམས་ཅད་དང་བྲལ་བ་ནི་མཉམ་ཉིད་ཅེས་བྱ། རོ་ཅིག་ཅེས་བྱ། འཁོར་འདས་དབྱེར་མེད་ཅེས་བྱ་སྟེ། ཟག་མེད་རང་གི་མཚན་ཉིད་མངོན་དུ་སྣང་བས། ཁམས་གསུམ་གྱི་འཇིགས་པ་དང་བྲལ་ལོ། །ཟླ་བའམ་ལོའམ་དེ་བས་ཀྱང་བར་རིང་བར་ཏིང་ངེ་འཛིན་ལ་གནས་ཀྱང་སེམས་རང་ཐོག་ཏུ་ཕེབས། རང་གིས་རང་རིག་བསྒོམ་བྱ་བསྒོམ་བྱེད་མེད། །བསྒོམ་པའི་ངོ་བོ་ལ་དམིགས་ཏེ། །བསྒོམ་མཁན་ལ་དམིགས་པའི་ཕྱིར། །ནམ་མཁའ་ནམ་མཁའ་ལས་མི་འདའ་བ་དང་འདྲ་བར། ཏིང་ངེ་འཛིན་ལ་གནས་མི་ནུས་པ་མེད། གནས་བྱ་གནས་བྱེད་མེད། མ་རྟོགས་པའི་འཁྲུལ་པ་ཐམས་ཅད་མི་མཁྱེན་པའམ་མི་གཟིགས་པ་མེད་ཀྱང་། མཁྱེན་བྱ་མཁྱེན་བྱེད་དང་། གཟིགས་བྱ་གཟིགས་བྱེད་མེད་པ་ནི་རོ་གཅིག་གི་ཏིང་ངེ་འཛིན་མཐར་ཕྱིན་པའོ། །དེའི་རྟགས་ཕྱི་རུ་ཤར་བའི་མཚན་མ་ནི། ལྷའི་བུ་མོ་མཐོང་ཡང་ཆགས་པའི་སེམས་མི་སྐྱེ་སྟེ་སེམས་སྣང་བས་སོ། །སྲིན་པོ་འབར་བ་མཐོང་ཡང་སྐྲག་པའི་སེམས་མི་སྐྱེ་སྟེ། གཅིག་པའི་འདུ་ཤེས་ཟད་པས་སོ། །ཡུལ་དྲུག་གི་ཆོས་ཅི་སྣང་ཡང་གཟུང་འཛིན་དུ་སོང་བ་མེད་དེ། སེམས་ཉིད་རང་སྣང་བའོ། །ཉོན་མོངས་པ་ལྔ་གཏན་དག །མངོན་པར་ཤེས་པ་འདིའི་སྐབས་སུ་འབྱུང་། དེའི་རྟེན་གྱི་གང་ཟག་དེ། འདས་ན་དེའི་བར་དོ་ལ་ཆོས་སྐུ་ལ་སྦྱོར་ནས་སྐུ་གསུམ་ལྷུན་གྱིས་གྲུབ་པའོ། །ཏིང་ངེ་འཛིན་དེ་དག་ཉམས་སུ་ལེན་པའི་རྣལ་འབྱོར་པའི་སྤྱོད་པ་ནི། ཏིང་ངེ་འཛིན་དང་པོའི་དུས་སུ་རྣམ་པར་དཀར་བའི་སྤྱོད་པ་ཐ་དག་ཉམས་སུ་བླང་སྟེ། ཐུན་མོང་གི་ཐེག་པའི་གཞུང་བཞིན་ནོ། །ཏིང་ངེ་འཛིན་དང་པོ་དང་། གཉིས་པ་དང་། གསུམ་པའི་དུས་སུ། ཉམས་ཅན་གྱི་བླ་མ་དང་མི་འབྲལ་བ་གལ་ཆེ། མུན་ནག་གི་ནང་ན་འགྲོ་བའི་ལམ་མཚོན་པའི་སྒྲོན་མེ་ཡིན། ཆུ་ཆེན་པོ་ལས་སྒྲོལ་བའི་སྐྱ་བ་འཛིན་མཁན་ཡིན། བླ་མའི་མོས་གུས་དང་ཏིང་ངེ་འཛིན་ལ་མི་ཞེན་ནས། མ་ཡེངས་པའི་བཏང་སྙོམས་ལ་གནས་པ་དང་། བརྩོན་འགྲུས་ལ་བར་མཚམས་མེད་པ་གསུམ་བོགས་འདོན་གྱི་གཙོ་བོ་ཡིན་ཏེ། གཞན་མ་ལ་ཤས་ཤིག་ཞེ་འདོད་ཀྱི་ལྗང་བུ་འཐོན་པའོ། །འདིའི་གཞུང་དུ་སྨོས་པའི་བརྩོན་འགྲུས་དང་མི་ལྡན་ཡང་། བསྒོམ་པའི་སྲོག་ནི་མ་ཡེངས་པ་ཞེས་པས་སྤྱོད་ལམ་རྣམ་བཞིར་མ་ཡེངས་པར་བྱ་བ་དང་། དེ་རྟོགས་ནས་རྨི་ལམ་དང་གཉིད་འཐུག་པོ་འབྱུང་པ་གལ་ཆེ། སྤྱོད་ལམ་མ་ཡེངས་ཏིང་འཛིན་མི་གཡོ་བ། །རྣམ་རྟོག་ཕྲ་དང་ཕྲ་བའི་ཕྲ་བ་རྣམས། །རྩད་མི་ཆོད་པས་སྐྱོན་སྲིན་ཤས་ཙམ་འདུག །ཏིང་འཛིན་གཉིས་པའང་རྣམ་པར་དཀར་བའི་དཀར་པོའི་སྤྱོད་པ་སྟེ། ཆོས་ཐམས་ཅད་སྒྱུ་མའི་དཔེ་བརྒྱད་ལྟ་བུར་སྦྱོར་བའོ། །གཞན་དོན་ནི་ཆེད་དུ་གཉེར་མི་དགོས། ཏིང་ངེ་འཛིན་གྱི་ཤུགས་ཀྱིས་རང་ཤར་དུ་འོང་། ཁས་བླངས་པའི་འདུལ་སྡོམ་རྣམས་ནི། སྔར་གྱི་གོ་ཆ་ཆེན་པོའི་སྟོབས་ཀྱིས་བསྲུངས་པས། ཕྱིས་ནི་ཉེས་པའི་རྩ་བ་བདག་འཛིན་དག་པས། ཉམས་པ་རྒྱུ་ནས་དག་པའི་སྟོབས་ཀྱིས་ཉི་མའི་དཀྱིལ་ན་མུན་པ་མི་གནས་པ་དང་འདྲའོ། །དེ་ལྟ་བའི་སྐྱེས་བུས་ཀྱང་། གཞན་དོན་དུ། གནས་ཆོས་ཀྱི་དབྱིངས་ལ་གནས་ཀྱང་། འདུས་བྱས་ཀྱི་དགེ་རྩ་རྒྱུན་མི་འཆད། སློབ་མ་གོ་འཕང་མཆོག་བརྙེས་ཀྱང་། །སེམས་ཅན་གནས་པའི་བླ་མ་བཀུར། །སེམས་ཅན་ཡུལ་དུ་མ་དམིགས་ཀྱང་། །སྙིང་རྗེའི་ཆུ་བོ་རྒྱུན་མི་གཅད། །སྒྲ་རྣམས་རང་རིགས་རང་ཤེས་ཀྱང་། །འཆལ་རྒོད་ལོ་རྒྱུས་བླང་མི་བྱ། །ཅི་བྱས་རྒྱལ་བའི་མཛད་སྤྱོད་ཀྱང་། །འཕྱོ་གཡེང་བརྐམ་པའི་ལས་མི་བྱ། །སྟོང་གསུམ་སངས་རྒྱས་པར་ཤེས་ཀྱང་། །གྲོང་པའི་དགོན་པར་གནས་མི་བྱ། །ཡེ་སངས་རྒྱས་པར་མངོན་རྟོགས་ཀྱང་། །སེང་གེའི་ཡུལ་ལྟར་ཅིག་ཏུ་གནས། །རི་ཁྲོད་དགོན་པར་གནས་བཅས་ཀྱང་། །དེ་རུ་བཅས་བཅོས་མི་བྱ་འདུག །དམ་པ་རྣམས་ཀྱི་སྤྱོད་པའོ། །རྣལ་འབྱོར་བཞི་པ་ལྷུན་གྱིས་གྲུབ་པའི་རྣལ་འབྱོར་ནི་སངས་རྒྱས་པ་སྟེ། མཉམ་པ་ཉིད་ཀྱི་ཏིང་ངེ་འཛིན་མཐར་ཕྱིན། ལམ་གྱི་བྱ་བ་ཟད་པའི་ངོ་བོ་ནི་འབྲས་བུ་སྟེ། གཞན་དག་ལས་ཆོས་ཀྱི་སྐུ་ནམ་མཁའ་ལྟ་བུ། ལོངས་སྤྱོད་རྫོགས་པའི་སྐུ་སྤྲིན་ལྟ་བུ། དེ་ལས་སྤྲུལ་པའི་སྐུ་ཆར་ལྟ་བུས་འགྲོ་དོན་རྒྱུན་དུ་བྱེད་པ་ནི། ཤིན་ཏུ་ཡང་བདེ་མོད་ཀྱང་། ཆོས་ཀྱི་སྐུ་ནི་ནམ་མཁའ་ལྟ་བུ་མཐའ་ཐུག་པ་མེད་པ། ཆོས་ཀྱི་དབྱིངས་དང་མཉམ་པའི་ངང་ལས་འཁོར་བའི་ཉོན་མོངས་པ་རྒྱུ་འབྲས་ཕྲ་བའི་ཕྲ་བའང་། མ་གྲུབ་པ་ནི་ལྷག་པའི་ཆོས་སྐུ་ཆེན་པོའོ། །དེའི་ངང་ལས་ཁམས་གསུམ་གྱི་སེམས་ཅན་ཐམས་ཅད་ཀྱི། མེ་ལོང་ལས་གཟུགས་བརྙན་གྱི་ཚུལ་དུ་སྣང་བ་ནི། ཅི་སྙེད་མཁྱེན་པའོ། །ཁམས་གསུམ་གྱི་སེམས་ཅན་ཐམས་ཅད་ཀྱི་རྒྱུད་ལས། སེམས་ཅན་གཅིག་གི་ཐོག་མ་མེད་པ་ནས་ཐ་མ་མེད་པའི་རྣམ་པ ར་རྟོགས་པའི་གྲངས་ཐམས་ཅད་མཁྱེན་ཏེ། གདུལ་བྱ་ཉིད་ལས་མི་གཞན་པ་དང་། བསམ་གྱིས་མི་ཁྱབ་པའི་ཡེ་ཤེས་ལ་མངའ་བརྙེས་པའོ། །དེས་ན་ཐམས་ཅད་མ་འགགས་པ་ནི་ཅི་སྙེད་མཁྱེན་པའོ། །མཁྱེན་བྱ་མཁྱེན་བྱེད་ཀྱི་རྟོགས་པ་ལས་གྲོལ་བ་ནི། ཅི་ལྟ་བ་མཁྱེན་པའོ། །འདིར་ཟག་བཅས་ཀྱི་ཤེས་པས། ཟག་མེད་སངས་རྒྱས་ཀྱི་ས་གཞལ་བ་ནི། ལུང་ཟབ་མོ་རྣམས་ཀྱིས་བསྒྲུབ་དགོས་པའོ། །བྲི་ཡིས་མི་མངའ་བས་འགོ་ཕྱོགས་ཙམ་མོ། །ཆོས་ཀྱི་སྐུ་གང་དུ་ཡང་མ་གྲུབ་པ་ཅིར་ཡང་འཆར་བ་ལྷུན་གྱིས་གྲུབ་པའི་ཐུགས་རྗེ་དང་། སྔོན་གྱི་སྨོན་ལམ་རྒྱ་ཆེན་པོའི་རྒྱུ་ལས། གདུལ་བྱའི་རྐྱེན་གྱིས་མེ་ལོང་གི་གཟུགས་བརྙན་བཞིན་དུ་སྣང་བ་ནི། ཟག་མེད་ལ་ལོངས་སྐུ། ཟག་བཅས་ལ་སྤྲུལ་སྐུའི་གདུལ་བྱའི་བློ་བཞིན་དུ་དོན་མཛད་དོ། །གདུལ་བྱ་རྣམས་ཀྱིས་སེམས་ཉིད་ཆོས་སྐུ་ཡིན་པའི་ཕྱིར། རྒྱུད་ནས་ཤར་བ་མེད་དེ། གདུལ་བྱའི་མདུན་དེ་ཉིད་ན་གདུལ་བྱེད་སྣང་བས། འགྲོ་འོང་དང་བྲལ་ལ་ཆུ་ཟླ་ལྟ་བུའོ། །མཐུན་པར་སྣང་བ་མེ་ལོང་ལྟ་བུའོ། །མཐུ་ཆུང་ནན་ལ་བཏབས་པ་བཞིན། བན་ལྡོམ་ཡིས་ཚིག་སྡོམ་བརྗོད་པ་འདི། ལྷ་ཡུལ་བདུད་རྩི་བརྗོད་ནས་མཚུངས། །སློབ་མས་བསྐུལ་བའི་ངོར་བྱས་པ། །དམ་པའི་དྲིན་ཙམ་བྲོ་བ་ཡིས། །ཐ་སྙད་ཡི་གེར་བཀོད་པ་འདི། །འགལ་འཁྲུལ་གོང་མ་རྣམས་ལ་བཤགས། །ངལ་བའི་དགེ་བ་ཅི་མཆིས་པ། །སྒྲུབ་པ་ཉམས་ལེན་རྣལ་འབྱོར་རྣམས། །ལམ་གྱི་འཚེ་བ་ཀུན་བྲལ་ནས། །མྱུར་དུ་འགྲོ་བ་འདྲེན་པར་ཤོག །བཀའ་བརྒྱུད་ཟབ་མོ་འོ་མའི་རྒྱ་མཚོ་ལ། །འཆི་མེད་འོད་གསལ་སེམས་ཉིད་མངོན་དུ་བཞུགས། །རྗེ་བཙུན་གསུང་གི་བསྒྲུབ་ཅིང་བསྒྲུབ་བྱས་ནས། །ཐོས་བསམ་བསྒོམ་གསུམ་བརྩོན་འགྲུས་གྲོགས་ཀྱིས་བསྙམ། །སྙིང་པོ་མར་ཉིད་ཆོས་སྐུ་མངོན་དུ་སྣང་། །སངས་རྒྱས་གཉིས་པ་རྗེ་བཙུན་ཐུགས་དགོངས་ནས། །འཆི་མེད་སྨན་ཆེན་གཉུག་མ་ལྷུན་གྱིས་གྲུབ། །མོས་གུས་རྡོ་རྗེ་མཆུ་ཡིས་རབ་བླངས་ན། །རང་སེམས་པད་མར་རོ་བཅུད་ཉམས་སུ་མྱོང་། །ཡུལ་དྲུག་གཡོ་མེད་སྨིགས་རྒྱུའི་ཕུང་པོ་ལ། །གསང་སྔགས་རིག་པའི་རྒྱལ་པོ་ལྷུན་གྱིས་གྲུབ། །སྟོན་བྱེད་བླ་མའི་གསུང་བཞིན་ཉམས་བླངས་ནས། །ཐེ་ཚོམ་གཅོད་ཅིང་ངེས་ཤེས་སྐྱེ་བར་སྣང་། །གཉིས་འཛིན་རྡོ་རྗེ་བྲག་གི་སྙིང་པོ་ན། །མ་བཅོས་གཉུག་མའི་བདུད་རྩི་ཆེན་པོ་གནས། །གདམ་ངག་རྡོ་རྗེ་གཟོང་གིས་རབ་བརྐོས་ནས། །ཡུལ་བྲལ་བདུད་རྩི་ཆེན་པོ་མངོན་དུ་སྣང་། །དུག་ལྔ་གཟུང་འཛིན་རག་པའི་རི་བོ་ལ། །ཕྱོགས་འཛིན་བྲལ་བའི་བདུད་རྩི་ཆེན་པོ་གནས། །མཉམ་པ་ཉིད་ཀྱི་གཡོས་ཀྱིས་རབ་སྦྱར་ནས། །དུག་ལྔ་རང་དག་བདུད་རྩི་ཆེན་པོ་ཉིད། །ཧེ་ཧེ་ཧེ། དགེའོ། །གལ་གནད་རྫོགས་སོ། །ཤེས་ཚད་ཀྱི་ཡི་གེ་གཟབས་ནས་འདུག །དཔོན་སྒོམ་རིང་བྱང་ཐུགས་དགྱེས་པར་མཛོད་ཅིག །བཀྲ་ཤིས་དགེའོ།། །།

ཨ་རོའི་རྫོགས་ཆེན་སྐོར་ལས་བསྔོ་བའི་ཆོ་ག་དོན་བཞི་པ། དབུས་པ་རྟ།

ཨ་རོའི་རྫོགས་ཆེན་སྐོར་ལས་བསྔོ་བའི་ཆོ་ག་དོན་བཞི་པ་བཞུགས་སོ། །དགོས་འདོད་འབྱུང་བའི་རིན་ཆེན་སྐུ། །མ་རིག་མུན་སེལ་ཉི་མའི་གསུང་། །ཀུན་ཁྱབ་མཉམ་ཉིད་ནམ་མཁའི་ཐུགས། །བླ་མ་ལྷ་དང་བཅས་ལ་འདུད། ༈ །དགེ་བ་གང་བྱས་དོན་ཡོད་པའི། །མི་ཟད་འཕེལ་དང་བཅས་པའི་ཕྱིར། །སྤྲུལ་སྐུ་ཉིད་ཀྱི་གསུང་བཞིན་དུ། །ཐེག་ཆེན་བསྔོ་བའི་རིམ་པ་བཤད། ༈ །འདི་ལ་དོན་བཞི་སྟེ། ཡོན་སྤྱད་པ་དང་། ཡོན་སྦྱང་པ་དང་། ཡོན་བཤད་པ་དང་། ཡོན་བསྔོ་བའོ། །དང་པོ་ཡོན་གྱི་སྤྱད་ཐབས་ནི། སྤྱད་ཐབས་ལེགས་དགོས་ཏེ། དེ་ཡང་མ་ལེགས་ན་མདོ་ལས། གཞན་ཡང་དད་པ་ཅན་གྱི་ནོར་བླངས་ནས། །དགེ་བ་མ་སྤྱད་མི་ཆོས་ནོར་དུ་སྤྱད། །འཁོར་བའི་བུ་ཚ་ཁྱིམ་ཐབ་བྱེད། །འབྲས་བུ་བདག་ནི་རྔ་མོའི་ལུས་སུ་སྐྱེ། །དེའི་ནོར་ལ་བདག་ལོངས་བྱེད། །ཅེས་པས། དད་པ་ཅན་ལ་ནོར་བླངས་ནས་དགེ་ཕྱོགས་སུ་མ་བཏང་པར་བུའི་ཕོག་དང་བུ་མོའི་རྫོང་དང་། རང་གི་དཔག་ནོར་དང་། དམག་ཟན་དམག་ཆུ་དང་། མདའ་རིན་མེད་རིན་དང་། བྱ་ཟས་བྱི་ཟས་ལ་སོགས་སུ་མི་གཏང་སྟེ་དགེ་བ་གང་འཕེལ་དུ་གཏོང་ངོ་། །རང་གིས་ཟ་བ་དེ་ཡང་ཇོ་བོ་རྗེའི་ཞལ་ནས་ཟས་ལ་ཆ་བཞིར་བསྒོ་བྱས་ཏེ། དང་པོ་ལྷ་ལ་བཤོས་གཙང་དབུལ། །དེ་རྗེས་ཆོས་སྐྱོང་བསྲུངས་མ་ལ། །གཏོར་མ་ཤིན་ཏུ་རྒྱ་ཆེན་བཏང་། །རང་གིས་ཟོས་ཤིང་མཐུངས་པ་ཡི། །ལྷག་མ་འབྱུང་པོ་ཀུན་ལ་སྦྱིན། །ཞེས་པས། དང་པོ་ལྷ་ལ་བཤོས་གཙང་དབུལ་ལོ། །དེའི་རྗེས་ལ་ཆོས་སྐྱོང་ལ་གཏོར་མ་གཏོང་། ལྷག་མ་ཨུ་ཙི་ཏའི་སྔགས་ཀྱིས་འབྱུང་པོ་ལ་སྦྱིན་ནོ། །ཡང་དག་སྔགས་ནང་པ་རྣམས་ཟན་རྡོག་གཅིག་ལ་ཡང་། ལྟ་བ་བྱིན་བརླབས་བསྐྱེད་པ་དང་། སྤྱན་དྲང་མཆོད་དང་རོལ་བ་དང་། །ལྷག་མའི་ལས་དང་བསྔོ་བ་བརྒྱད། །ཅེས་པས་དོན་བརྒྱད་དང་ལྡན་པར་སྤྱད་དོ། །དེ་ནི་ཡོན་གྱི་སྤྱད་ཐབས་སོ། །གཉིས་པ་ཡོན་སྦྱང་བ་ནི། དད་པ་ཅན་གྱི་རྫས་དེ་འཇུ་དཀའ་སྟེ། མདོ་ལས། ལྕགས་རྡོ་དངུལ་རྡོ་བཞུ་རུ་བཏུབ་པ་སྟེ། །དད་པ་ཅན་གྱི་ནོར་ནི་བཞུར་མི་བཏུབ། །ཅེས་པས། ལྕགས་ཀྱི་རྡོ་དང་དངུལ་གྱི་རྡོ་ཡང་སོལ་བའི་མེ་ལ་བཞུ་ན་འཇུ་སྟེ། དད་པ་ཅན་གྱི་ནོར་རྫས་འཇུར་མི་བཏུབ་བོ། །འོ་ན་སུས་འཇུ་ཞེ་ན། དེ་ཉིད་ལས། རྟོགས་ནས་ཀློང་དུ་གྱུར་པའི་དྲོད་ལྡན་དང་། །ཞེས་པས། ལྟ་བ་རྟོགས་པའི་དྲོད། ཞེན་པ་གྲོལ་བ་གཅིག་གིས་འཇུའོ། །འོ་ན་དེ་ཉུང་པས་དེ་བས་ཀྱང་དཀའ་བར་སོང་སྙམ་ན། ཡང་དེ་ཉིད་ལས། ཆགས་མེད་དགེ་བ་སྤྱོད་པའི་གང་ཟག་གིས། །མ་སྦྱིན་བླངས་ནས་སྤྱད་མི་སྒྲིབ་བོ། །ཞེས་པས། རང་གི་ཟས་ནོར་ལ་ཆགས་པ་མེད་ཅིང་གཞན་དུ་དགེ་བ་གང་འཕེལ་དུ་སྤྱད་ན། རྐུ་འཕྲོག་ལས་སོགས་པ་མ་བྱིན་པར་བླངས་ནས་སྤྱད་ཀྱང་མི་བསྒྲིབ། སྟེ་འཇུའོ། །ད་ལྟ་ཡང་དད་རྫས་དེ་འཇུ་བར་བྱེད་ལ། དད་རྫས་དེ་ཟོས་པའི་རྗེས་ལ་དགེ་སྦྱར་རེ་བྱེད་པ་ཡིན་ཏེ། ཇ་སུན་རེ་མཐུ་པ་པའི་རྗེས་ལ་ཡང་མདོ་ཚར་རེ་འདོན་པའམ་དགེ་སྦྱོར་རེ་བྱེད་པའོ། །ཡང་ཡོན་ཡོངས་སུ་དག་པའི་གཟུངས་བྱ་བ་བཞུགས་པ་དེས་རི་རབ་ཙམ་གྱི་བསོད་ནམས་ཀྱང་འདག་པར་གསུངས་པས་ད་གདོན་ནོ། །དེ་ནི་ཡོན་གྱི་སྦྱངས་ཐབས་སོ། །གསུམ་པ་ཡོན་བཤད་ཐབས་ལ་གཉིས་ཏེ། དགེ་བ་ཡར་འཕེལ། མར་འཕེལ་ལོ། །དང་པོ་ལ་གསུམ་སྟེ། ཡར་འཕེལ་གྱི་ལུས་དང་། རིགས་པ་དང་། དཔེའ་འོ། །ལུང་ནི་ཚོགས་གཉིས་ཁྱད་པར་ཅན་གྱི་མདོ་ལས། དུད་འགྲོ་ཕལ་པ་སྟོང་ཕྲག་བརྒྱ། །སོ་སོར་སྐྱེ་བོ་གཅིག་ལ་སྦྱར། །སོ་སོར་སྐྱེ་བོ་སྟོང་ཕྲག་བརྒྱ། །ལམ་དུ་བཞུགས་པ་གཅིག་ལ་སྦྱར། །ལམ་དུ་ཞུགས་པ་སྟོང་ཕྲག་བརྒྱ། །དགེ་སློང་ཁྲིམས་ལྡན་གཅིག་ལ་སྦྱར། །དགེ་སློང་ཁྲིམས་ལྡན་སྟོང་ཕྲག་བརྒྱ། །བྱང་ཆུབ་སེམས་དཔའ་གཅིག་ལ་སྦྱར། །བྱང་ཆུབ་སེམས་དཔའ་སྟོང་ཕྲག་བརྒྱད། །བླ་མ་དམ་པ་གཅིག་ལ་སྦྱར། །ཞེས་པ་དང་། ཡང་། དུད་འགྲོ་རྣམས་ལ་བརྒྱ་འགྱུར་ཏེ། །སྐྱེ་བོ་རྣམས་ལ་སྟོང་དུ་འགྱུར། །དགེ་སློང་རྣམས་ལ་འབུམ་འགྱུར་ཏེ། །རྡོ་རྗེ་འཛིན་པ་གྲངས་ལས་འདས། །ཞེས་གསུངས་སོ། །མངོན་པ་འོག་མ་ལས་ཀྱང་། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ཕུལ་གཞལ་དུ་མེད་པའོ། །ཞེས་གསུངས་སོ། །རིགས་པ་ནི། དུད་འགྲོ་ཕལ་པ་སྟོང་ཕྲག་བརྒྱ་ལ་སྦྱིན་པ་གཏང་བ་བས། སྐྱེ་བོ་གཅིག་ལ་སྦྱིན་པ་གཏང་བ་བསོད་ནམས་ཆེ། ཅིའི་ཕྱིར་ན་དངོས་པོ་ཆེ་ཆུང་དང་། གཙང་མི་གཙང་དང་། ལྡོག་མི་ལྡོག་གི་ཁྱད་པར་རོ། །དང་པོ་དངོས་པོ་ཆེ་ཆུང་ནི། དུད་འགྲོ་ལ་སྟེ་རབ་དངོས་པོ་ཆེའོ། །གཉིས་པ་གཙང་མི་གཙང་ནི། དུད་འགྲོ་ལ་སྟེར་དངོས་པོ་ཆུང་། སྐྱེ་བོ་ལ་སྟེར་བ་དངོས་པོ་ཆེའོ། །གཉིས་པ་གཙང་མི་གཙང་ནི་དུད་འགྲོ་ལ་སྟེར་བ་དེ་མི་གཙང་པ་དྲི་མ་ཅན་རྡུལ་མ་ཅན་རུལ་པ་དེ་སྟེར་བའོ། །སྐྱེ་བ་མ་སྟེར་བ་ནི་གཙང་བ་དྲི་མེད་པ་སྟེར་བའོ། །གསུམ་པ་ལྡོག་མི་ལྡོག་ནི། དུད་འགྲོ་ལ་བྱིན་ནས་བརྡེག་འཕུལ་བྱེད་པས་ལྡོག་པའོ། །སྐྱེ་བོ་ལ་མི་ལྡོག་སྟེ་བྱིན་པའི་རྗེས་ལ་གནོད་པ་མི་སྐྱེལ་བའོ། །སོ་སོ་སྐྱེ་བོ་སྟོང་ཕྲག་བརྒྱ་ལ་སྦྱིན་པ་གཏང་པ་བས་ལམ་དུ་ཞུགས་པ་གཅིག་བསོད་ནམས་ལྡན་གཅིག་བསོད་ནམས་ཆེ་སྟེ། ཁྲིམས་ཀྱི་ཁྱད་པར་དུ་བྱས་པའོ། །དགེ་སློང་ཁྲིམས་ལྡན་སྟོང་ཕྲག་བརྒྱ་ལ་སྦྱིན་པ་བཏང་བ་བས་ཀྱང་། བྱང་ཆུབ་སེམས་དཔའ་གཅིག་བསོད་ནམས་ཆེ་སྟེ། བདེན་པ་མཐོང་བས་ཁྱད་དུ་བྱའོ། །བྱང་ཆུབ་སེམས་དཔའ་སྟོང་ཕྲག་བརྒྱ་ལ་སྦྱིན་པ་སྦྱིན་པ་བས་ཀྱང་། སེམས་ངོ་སྤྲོད་པའི་བླ་མ་དམ་པ་གཅིག་བསོད་ནམས་ཆེ་སྟེ། དགོངས་འདུས་ལས། ཆོས་ཀུན་མི་ཤིག་མ་རྟོགས་ཀྱང་། །དམ་པར་གྱུར་པའི་བླ་མ་ལ། །བཀུར་གནས་རིམ་གྲོ་ཆེར་བྱས་ནས། །འཁོར་བའི་རྒྱ་མཚོ་ལས་རྒལ་འགྱུར། །ཅིའི་ཕྱིར་ཞིང་རབ་གཤིན་པ་ལ། །ས་བོན་བཏབ་ན་རྒྱས་འཕེལ་བཞིན། །བསོད་ནམས་དམ་པའི་ཞིང་རབ་ལ། །ཏིལ་འབྲུ་མི་སྟོར་འཕེལ་སྨིན་འགྱུར། །ཞེས་པས། མཆོག་ཐུན་མོང་གཉིས་ཀྱི་དངོས་གྲུབ་བླ་མ་ལས་འབྱུང་ཞིང་འཁོར་བའི་རྒྱ་མཚོ་ལས་སྒྲོལ་བའི་ཕྱིར་རོ། །དཔེ་ནི་དཔེར་ན་ཞིང་ས་གཤིན་པ་གཅིག་ལ་ས་བོན་བཏབ་ན་རྒྱས་ཤིང་འཕེལ་བ་དང་བཅས་ནས་སྨིན་པ་བཞིན་ནོ། །དེ་ནི་ཡར་འཕེལ་གྱིས་དཔེའོ། །བློ་ཆུང་བ་རྣམས་ནོར་ཡོད་རྣམས་ཡོད་པ་རྒྱུ་མཚན་དུ་ཞོག་ལ་ཡར་འཕེལ་དུ་ཚོགས་སོགས་ཤིག །ཕོ་སྒོ་མོ་སྒོ་ལས་མ་བྱུང་ཚོགས་བསགས་པ་ལས་བྱུང་བའོ། །ནོར་མེད་པ་ཚོ་མེད་པ་རྒྱུ་མཚན་དུ་ཞོག་ལ་ཚོགས་སོགས། ཕོ་སྒོ་མོ་སྒོ་ཞན་ནས་རྟོགས་པ་མན་ཚོགས་མ་བསགས་པས་ལན་པ་ཡི། གཉིས་པ་མར་འཕེལ་ལ་གསུམ་སྟེ། མར་འཕེལ་གྱི་ལུང་དང་། རིགས་པ་དང་། དཔེའོ། །ལུང་ནི་སེམས་ཅན་མགུ་བྱས་མ་གཏོགས་པ། །རྒྱལ་བ་མཉེས་པའི་ཐབས་གཞན་མེད། །ཅེས་པ་དང་། སེམས་ཅན་རྣམས་ལ་ཕན་མཆོག་དེ་ནི་ང་ལ་ཕན་མཆོག་ཡིན། སེམས་ཅན་རྣམས་ལ་གནོད་མཆོག་དེ་ནི་ང་ལ་གནོད་མཆོག་ཡིན། ཅི་ཕྱིར་ཞེ་ན་ང་དང་སེམས་ཅན་བདེ་དང་སྡུག་བསྔལ་མཚུངས་འདོད་པ། ཞེས་པ་དང་། ཡང་། འདམ་དང་ལྗན་ལྗིན་ཁྲོད་ན་པད་མ་འདབ་མ་རྒྱས། མི་རྣམས་དགའ་བའི་ཚལ་ནས་རྒྱས་པའི་མཆོད་པ་མཉེས། ཞེས་པ་དང་། ཡང་མེའུ་ཞུས་པའི་མདོ་ལས། གང་ཞིག་བཀྲེས་པ་རྣམས་ལ་སྦྱིན་བཏང་པ། །སྤྱིན་པ་ཀུན་གྱི་ནང་ནས་མཆོག་ཏུ་གསུངས། །རྒྱལ་བ་བསོད་ནམས་རྒྱ་ཆེན་ཐོབ་པར་འགྱུར། ༈ །རིགས་པ་ནི། དཀོན་མཆོག་ལ་མཆོད་པ་ཕུལ་བས་སེམས་ཅན་ལ་སྦྱིན་པ་གཏང་པ་བསོད་ནམས་ཆེ། ཅིའི་ཕྱིར་ན་ཁོངས་སུ་ཚུད་མ་ཚུད་དང་། །དངོས་སུ་ལོངས་སྤྱོད་མི་སྤྱོད་དང་། །འདོད་པའི་སེལ་མི་སེལ་གྱི་ཁྱད་པར་རོ། །དང་པོ་ཁོངས་སུ་ཚུད་མ་ཚུད་ནི། སེམས་ཅན་ལ་སྦྱིན་པ་བཏང་བས་སངས་རྒྱས་ཁོངས་སུ་ཆུད་དེ། དེ་ལ་སངས་རྒྱས་མཉེས་སོ། །དཀོན་མཆོག་ལ་མཆོད་པ་ཕུལ་བས་སེམས་ཅན་ལ་ཁོངས་སུ་མཆོད་དོ། །ལྷ་ས་རུ་མར་ཁལ་སྟོང་གི་མར་མེ་བཏང་ཡང་། སེམས་ཅན་གཅིག་གི་མགོ་བ་སྣུམ་པ་ལ་ཡང་མི་ཕན་ནོ། །གཉིས་པ་དངོས་སུ་ལོངས་སྤྱོད་མི་སྤྱོད་ནི། སེམས་ཅན་དངོས་སུ་ལོངས་སྤྱོད་དེ། ཟས་ལ་དངོས་སུ་ཟ་ཞིང་སྐོམ་དུས་དངོས་སུ་མཐུང་པ་ལ་སོགས་པའོ། །དཀོན་མཆོག་དངོས་སུ་ལོངས་མི་སྤྱོད་དེ། ལྷ་བཤོས་ཕུལ་ཡང་སེར་ཀ་ཤིག་གེ། ཡོན་ཆབ་ཕུལ་ཡང་རྡུལ་ཁད་དེ་འཇོག་པའོ། །གསུམ་པ་འདོད་པའི་སེལ་མི་སེལ་ནི། སེམས་ཅན་ལ་འདོད་པ་བསལ་དུ་ཡོད་དོ། །སྐོམ་པ་ལ་འཐུངས་པས་ངོམས་པ་དང་། ལྟོགས་པ་ལ་ཟོས་པས་འགྲངས་པ་ལ་སོགས་པའོ། །དཀོན་མཆོག་ལ་ཕུལ་བས་བསོད་ནམས་ཐོབ་ཀྱང་འདོད་པ་བསམ་རྒྱུ་མེད་དེ། སྦྲིབས་སྐྱེམས་མི་མངའ་དུས་གསུམ་རྒྱལ་བའི་སྐུ། །ཐུགས་རྗེ་དང་བཙན་འཛམ་གླིང་ནམ་མཁའ་འདྲ། །ཞེས་སོ། །སེམས་ཅན་རང་ཡང་མི་ཆེན་པོ་བས་སྐྱེ་བོ་རང་བསོད་ནམས་ཆེ། ཅིའི་ཕྱིར་ན། མི་ཆེན་པོ་རྣམས་སྡེར་མེད་ཀྱང་མི་མགུ། བྱ་ན་ཆུང་ཡང་མི་མགུ། སྐྱེ་བོ་ལ་གདན་དང་སྡེར་ལས་སོགས་པ་མི་དགོས་ཏེ་མགུ་སླའོ། །དེ་བས་ཀྱང་རྒན་པ་རྣམས་པས་ཀྱང་། བྱིས་པ་རྣམས་བསོད་ནམས་ཆེ་སྟེ། ཅིའི་ཕྱིར་ན་རྒན་པ་རྣམས་ལ་དངོས་པོ་ཆེ་དགོས་ལ། བྱིས་པ་རྣམས་ལ་བཅོས་ཡོས་སྤར་བ་རེ་བྱིན་ཡང་དགའ་ནས་འོང་བས་སོ། །ཕྱུག་པོ་རྣམས་པས་མི་ལྟོགས་རྣམས་བསོད་ནམས་ཆེ་སྟེ། ཅིའི་ཕྱིར་ན་རྒན་ཕྱུག་པོ་རྣམས་དེས་སྔ་འགྲངས་ཏེ་སྒོ་ནས་ལྟོགས་ནས་འོངས་ཀྱང་ཁྱིམ་དུ་ཟ་སྙིང་མི་འདོད། །ཟས་བྱིན་ཀྱང་དགའ་རྒྱུ་ཙམ་མེད་དོ། །ལྟོགས་པོ་རྣམས་པ་དེ་སྒོ་ནས་ལྟོགས་ནས་འོངས་པས་ཁྱིམ་དུ་ཇེ་ལྟོགས་ལ་སོང་། །ཟས་བྱིན་པས་དགའ་བཞིན་མ གུ་བས་སོ། །མི་ལྟོགས་པས་སྤྲང་པོ་བསོད་ནམས་ཆེ་སྟེ། ཅིའི་ཕྱིར་ན། མི་ལྟོགས་ལ་གཉེན་འདུན་ལ་སོགས་པ་ལ་གཉའ་བསྐྱི་བྱར་ཡོད་དེ། སྤྲང་པོ་རྣམས་ལས་འདྲིས་མེད་པས་མ་བླངས་ན་སྟེར་མཁན་མི་འོངས། བསླངས་ན་སྙིང་དུ་མི་སྡུག་གོ། །སྟེང་ན་གོས་མེད། ཞུགས་པའི་ཁྱིམ་མེད། བཟང་བའི་ཟས་མེད་པས་སོ། །སྤྲང་པོ་བས་ཀྱང་ཡི་དྭགས་བསོད་ནམས་ཆེ་སྟེ། ཅིའི་ཕྱིར་ན་སྤྲང་པོ་རྣམས་པོ་དེ་ལ་སྒོ་བརྡུངས་ནས་བླངས་དུ་ཡོད། ཕམ་ཕབས་བསྡུ་རུ་ཡང་ཡོད་དེ། ཡི་དྭགས་ལ་ལུས་དང་ཡན་ལག་མི་འཚམས་པ། གསུས་པ་ཡུལ་ལྗོངས་ཙམ། མགོ་རྫ་མ་ཙམ་པ། ཁ་ཁབ་མིག་ཙམ་པ། གྲེ་བ་བྱིས་རྒྱུས་ཙམ་པ། ཡན་ལག་བྱི་ཐུར་ཙམ་པ། ཁ་ཅིག་གིས་བཟའ་རྒྱུ་མི་རྙེད། རྙེད་པ་དེ་ཁ་ཁབ་མིག་ཙམ་དང་གྲེ་བ་བྱིས་ཙམ་དུ་མི་ཚུད། དེར་ཚུད་ཀྱང་གསུས་པ་ཡུལ་ལྗོངས་ཙམ་པ་དེ་མི་ཁེབས་པ་དང་། ཁ་ཅིག་གིས་ཟོས་པ་དང་རྡོ་གོར་དང་ཁྲོ་ཆུ་ཁོལ་མ་དང་མེ་མར་མོ་དང་གྲ་ཕུབ་འགྲོ་བ་ལ་སོགས་པ་དང་། ཁ་ཅིག་ལ་གཞན་གྱིས་བསྲུངས་ནས་ཟ་རུ་མི་སྟེར་བ་ལ་སོགས་པའོ། །དེ་ལ་གཏོར་མའི་ལས་འབའ་ལ་ཚོགས་བསགས་པར་བྱའོ། །དེ་རྣམས་ཀྱི་ནང་ནས་ཀྱང་འཇུང་འགེགས་ཅན་བསོད་ནམས་ཆེ་སྟེ། མཆུ་ཆེ་ལ་གཡས་སུ་ཡོ་བ་དང་། མིག་དམར་ལ་གཡོན་དུ་ཡོ་བ་དང་། ཁ་ནས་མེ་རབ་ཏུ་འབར་བ་དང་། ཁ་ནས་བག་ཆགས་ངན་པའི་ཚིག་སྨྲ་བ་ང་ལ་མེད་ན། ང་ལ་དགོས་ན། འཕངས་ན། མ་སྦྱིན་ཅིག །སྟེར་ན་ཡང་ཆེ་སྟེ་འགྲོའོ། །ཕྲི་ལ་བྱིན་ཅིག་ཟེར་བའོ། །དེ་ལ་ཆུ་སྦྱིན་གྱི་ལས་ལ་འབད་པར་བྱའོ། ༈ །དཔེ་ནི་དཔེར་ན་བྱིས་པ་གཅིག་ལ་གཞན་གྱིས་འགྲོན་བྱས་པས། ངོམས་འགྲངས་བུ་དེ་ལ་བྱུང་ཡང་ཕ་མ་མགུ་སྟེ་དགའ་བ་སྐྱེས་པ་བཞིན་ནོ། །དེ་ནི་མར་འཕེལ་ལོ། །བློ་ཆེ་བ་རྣམས་ལ་ནོར་ཡོད་པ་རྣམས་ལ་ཡོད་པ་རྒྱུ་མཚན་དུ་ཞོག་ལ་ཚོགས་སོགས་ཤིག །ཕོ་སྒོ་མོ་སྒོ་ཞན་ནས་དབང་ལས་བྱུང་ངོ་། །ཚོགས་བསགས་པ་ལས་བྱུང་བ་ཡིན་ནོ། །ནོར་མེད་པ་ཚོ་མེད་པ་རྒྱུ་མཚན་དུ་ཞོག་ལ་ཚོགས་སོགས་ཤིག །ཕོ་སྒོ་མོ་སྒོ་ཞན་ནས་དག་པ་མེད་དོ། །ཚོགས་མ་བསགས་པ་ལེན་པ་ཡིན་ནོ། །བཞི་པ་ཡོན་ཡོངས་སུ་བསྔོ་བ་ལ་བསྔོ་བ་མ་འགྲུབ་པའི་རྒྱུ་གསུམ་བསྟན། སྦྱིན་པ་འཛད་པའི་རྒྱུ་བཞི་སྤང་པའོ། །དང་པོ་ནི་རྡོ་རྗེ་འཕྲ་མོའི་ཏིང་ངེ་འཛིན་ཡི་དམ་གྱི་ལྷ་བསྒོམ་བྱེད་པར་གཅིག་གིས་བསྔོས་ན་འགྲུབ། ཆོས་ཐམས་ཅད་རྨྱི་ལམ་སྒྱུ་མ་ལྟ་བུར་ཤེས་པར་སྟོང་པ་ཉིད་རྒྱུད་ལ་སྐྱེས་པ་གཅིག་གིས་བསྔོས་ན་འགྲུབ། རྟེན་དཀོན་མཆོག་གི་སྤྱན་སྔ་ཐ་ན་ཚྭ་ཚྭ་སྡོག་པོ་གཅིག་བཞུགས་པའི་རྩར་བསྔོས་ན་འགྲུབ་བོ། །གཉིས་པ་ནི། འགྱོད་པ་སྐྱེས་ན་སྦྱིན་པ་འཛད། །ལོག་ལྟ་སྐྱེས་ན་སྤྱིན་པ་འཛད། །ཡུལ་བྱང་ཆུབ་སེམས་དཔའ་ལ་ཁོང་ཁྲོ་སྐྱེ་ན། སྦྱིན་པ་འཛད། བསྔོ་བ་མ་བྱས་ན་འཛད་དོ། །ད་ནི་གང་བསྔོ་ན་དུས་གསུམ་དགེ་བ་བསྔོ་སྟེ། སྔར་འདས་པའི་དགེ་བ་བྱས་པ་དང་། ཕྱིས་མ་འོངས་པའི་དགེ་བ་བྱེད་པོ་དང་། ད་ལྟར་གྱི་དགེ་བ་གང་ཡིན་པ་ཐམས་ཅད་བསྔོ་སྟེ། གང་དུ་བསྔོ་ན་འཇིག་རྟེན་གྱི་བདེ་ལེགས་སུ་བསྔོ། འཁོར་བའི་ཆོས་ཡིན་པས་དོན་མེད་པས་སོ། །ཉན་ཐོས་དང་རང་སངས་རྒྱས་སུ་མི་བསྔོ་སྟེ། ཐེག་པ་དམན་པས་གཞན་གྱི་དོན་བྱེད་མི་ནུས་སོ། །དེ་ཡང་སངས་རྒྱས་སུ་གྲུབ་པའི་མདོ་ལས། དམྱལ་བར་ལྷུང་བས་བྱང་ཆུབ་ལ། །གཏན་གྱི་གེགས་བྱེད་མ་ཡིན་ཏེ། །ཉན་ཐོས་རང་སངས་རྒྱས་ཀྱི་ས། །ཐེག་པ་དམན་པ་གཏན་གྱི་གེགས། །ཞེས་སོ། །དེས་ན་དུས་གསུམ་གྱི་དགེ་བ་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཏུ་བསྔོ་སྙམ་དུ་འདུན་པ་ཆེར་གཏང་ལ། ཐལ་མོ་སྦྱར་ཏེ་རྗེས་ཟློས་བྱ་བ་ནི། སངས་རྒྱས་བྱང་ཆུབ་སེམས་དཔའ་དང་། །སློབ་དཔོན་བདག་ལ་དགོངས་སུ་གསོལ། །བདག་གི་དགེ་བའི་རྩ་བ་འདིས། བླ་མེད་བྱང་ཆུབ་ཐོབ་གྱུར་ཅིག །བླ་མེད་བྱང་ཆུབ་ཐོབ་ཀྱི་བར། །ཅི་བསམ་ཐམས་ཅད་འགྲུབ་པར་ཤོག །ཅེས་ལན་གསུམ་བརྗོད་དོ། །ཚིག་དང་པོས་ལུས་བྱིན། གཉིས་པས་གསལ་བཏབ། གསུམ་པས་བསྔོ་བ་འགྲུབ་པའོ། །དེའི་རྗེས་ལ་དགེ་བའི་རྩ་བ་བརྟན་པ་མཐར་ཕྱིན་པར་གྱུར་ཅིག །ཅེས་ལན་གསུམ་བརྗོད་དོ། །དེའི་རྗེས་ལ་བསྔོ་བྱ་དང་བསྔོ་བྱེད་ཐམས་ཅད་མི་དམིགས་པའི་རྒྱས་གདབ་ཟེར་ཏེ། རྫོགས་པ་ཆེན་པོ་ནམ་མཁའ་ཆེ་ལས། བླ་མ་མཆོད་དང་གཏོང་བ་དང་། །དེ་བཞིན་བསོད་ནམས་ཐམས་ཅད་ཀྱང་། །མ་ཆགས་མི་གཡོའི་སྟོབས་མྱེད་ན། །བྱས་ཀྱང་འཆིང་བ་ཆེན་པོར་འགྱུར། །ཞེས་དང་། །བླ་མ་ལ་མཆོད་པ་དང་། སེམས་ཅན་ལ་སྦྱིན་པ་གཏོང་པ་དང་། དེ་བཞིན་དུ་བསོད་ནམས་ཀྱི་ལས་གང་བྱེད་ཀྱང་། ལྟ་བས་མ་ཆགས་ཤིང་། ཏིང་ངེ་འཛིན་མི་གཡོ་བའི་སྟོབས་མེད་ན། དགེ་བ་གང་བྱས་ཀྱང་སླར་འཆིང་པར་འགྱུར་བས། གནས་ལུགས་ལྟ་བ་སེམས་ཉིད་མ་སྐྱེས་པའི་ངོས་ནས་སྦྱིན་པ་གཏང་བྱའི་ཡུལ་དང་། གཏོང་བའི་མཁན་པོ་དང་། སྦྱིན་པའི་དངོས་པོ་གསུམ་དུ་མ་སྐྱེས་ཏེ། །ངོས་བཟུང་དང་བྲལ་ཏེ་མ་དམིགས་སོ། །མ་འགགས་པའི་ངོས་ནས་གསུམ་རང་སྣང་། གཉིས་སུ་མེད་པའི་ངོས་ནས་སྐྱེ་འགག་གཉིས་མེད་ཀྱི་དོན་ལ་བསྐྱལ་ལོ། ༈ །དགེ་བ་ཡོངས་སུ་འཕེལ་བྱེད། །བསྔོ་བའི་ཆོ་ག་མདོར་བསྡུས། །བླ་མའི་གསུང་ལ་བརྟེན་ནས། །ཇོ་ཡེས་བདག་གིས་བསྒྲིགས་པས། །ཁམས་གསུམ་སེམས་ཅན་ཀུན་ཀྱང་། །སྡུག་བསྔལ་ཡོངས་ལས་གྲོལ་ཤོག །བསྔོ་བའི་ཆོ་ག་དོན་བཞི་པ་ཞེས་བྱ་བ། དབུས་པ་རྟ་ཡིས་སྦྱར་བའོ། །རྫོགས་སོ།། །།

དམ་པ་ཆོས་ཀྱི་ཡང་སྙིང་དོན་གསལ་ལྔ་པ། དབུས་པ་རྟ།

དམ་པ་ཆོས་ཀྱི་ཡང་སྙིང་དོན་གསལ་ལྔ་པ་བཞུགས་སོ། ། བླ་མ་རིན་པོ་ཆེ་སྤྲུལ་པའི་སྐུ། འགྲོ་བའི་མགོན་པོ། རྣལ་འབྱོར་གྱི་དབང་ཕྱུག་ཆེན་པོ། མཚན་ཡོངས་སུ་གྲགས་པའི་ཞིག་པོ་ཞེས་བྱ་བ། དུས་གསུམ་གྱི་སངས་རྒྱས་ཀུན་དང་མི་གཉིས་པ་ཁྱེད་ལ་ཕྱག་འཚལ་ལོ། །རྗེ་རིན་པོ་ཆེ་དེའི་ཞལ་ནས། གདམས་ངག་ལ་བཤད་པ་ཇི་ཙམ་བྱས་ཀྱང་། ཉམས་སུ་ལེན་ན་གསུམ་པོ་འདིར་འདུ་བར་འདུག་གསུང་། དེ་ལ་ངན་སོང་གསུམ་དུ་མི་སྐྱེ་བའི་གདམས་ངག་དང་གཅིག །མཐོ་རིས་ལྷ་དང་མིའི་བདེ་སྐྱིད་ཐོབ་པའི་གདམས་ངག་དང་གཉིས། སངས་རྒྱས་རང་འོང་བའི་གདམས་ངག་གཅིག་དང་གསུམ་བདོག །ངས་གསུམ་ཀ་བཤད་པས་མཆི། ཞལ་རྣམ་པ་རང་གང་འདམས་པ་ལ་འདོམས་མཛོད། གང་རུང་གཅིག་ལ་འདམ་རང་འཚལ། །གང་ལ་ཡང་མི་འདེམ་པར་ང་རང་ངན་སོང་དུ་འགྲོ་ཟེར་ན་ཡང་དབང་མེད་བདག་པོ་ཆེ་སྟེ། མི་སྐྱིད་པ་ཡིན་པས་གང་རུང་གཅིག་ལ་འདམ་རང་འཚལ་ལོ། །དེ་ལ་དང་པོ་ངན་སོང་གསུམ་དུ་མི་སྐྱེ་བའི་གདམས་ངག་ནི། ངན་སོང་གསུམ་བྱ་བ། དམྱལ་བ་ལ་ཚ་གྲང་གི་སྡུག་བསྔལ་ཡོད། ཡི་དྭགས་བཀྲེས་སྐོམ་གྱི་སྡུག་བསྔལ་ཡོད། བྱོལ་སོང་ལ་གླེན་ལྐུགས་སམ་བཀོལ་སྤྱོད་ཀྱི་སྡུག་བསྔལ་ཡོད་པས། སྡུག་བསྔལ་ཅན་གྱི་གནས་དེར་ཤོག་དང་བྱས་ནས་བོས་པས་འོང་མཁན་མི་མཆི། སོང་དང་བྱས་ནས་གཏང་བས་འགྲོ་མཁན་མི་མཆི་སྟེ། རང་གིས་སྡིག་པ་མི་དགེ་བའི་ལས་བྱས་པས། ངན་སོང་གསུམ་གྱི་གནས་སུ་སྐྱེས་ནས། སྡུག་བསྔལ་རང་གིས་ཉམས་སུ་མྱོང་བ་ཡིན་ཏེ། སྡིག་པའི་ལས་ལ་སྤྱོད་པ་ལ་བཙན་དུག་ལ་ལྟ་བུའི་ཉེས་དམིགས་བྱ་བ་ལགས། དེ་ཡང་མི་གཅིག་གིས་བཙན་དུག་ལ་རོ་མྱོངས་པས་མངར་བར་བྱུང་བས། འོ་བཙན་དུག་འདི་མངར་བར་འདུག་གོ་སྙམ་སྟེ་འཇིབས་པས་མངར་བ་དང་དགའ་སྟེ། དུག་གི་ནུས་པ་རྒྱས་ཙམ་ན་ལུས་ན་ཚས་གང་སྟེ་ཐ་མ་སྲོག་དང་བྲལ་སྐད། དཔེ་དེ་དང་འདྲ་བར་སྡིག་པ་མི་དགེ་བའི་ལས་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་སྨྲ་བ་ལ་སོགས་པ་སྡིག་པ་འདི་ཚོ་ཡང་འཕྲལ་ལ་ཕན་པ་སྙམ་བྱེད་དེ། དེ་ཀུན་བཙན་དུག་མངའ་བ་དང་འདྲ་བ་ལགས། དུག་གི་ནུས་པ་རྒྱས་པ་དང་འདྲ་བར་སྡིག་པའི་རྣམ་པར་སྨིན་པའི་དུས་ལ་བབ་ཙམ་ན། ངན་སོང་གསུམ་གྱི་སྡུག་བསྔལ་དེ་རང་གི་ཐོག་ཏུ་བབས་པ་ཡིན་པས། སྔར་གྱི་ལ་བཤགས་པ། ཕྱིས་ཀྱི་ལ་སྡོམ་པ་ལེན་འཚལ། དེ་ལ་དང་པོ་བཤགས་པ་ལ་གཉིས་ཏེ། དོན་དམ་ལྟ་བའི་བཤགས་པ་དང་། དང་པོ་ནི། འཕགས་པ་ཀོའུ་ཤི་ཀའི་མདོ་ལས། ཤེས་རབ་མཆོག་དང་ལྡན་པ་ཡིས། །འགྱོད་པའི་ཕུལ་དུ་ཐོན་བྱས་ནས། །ལས་དང་ལས་ཀྱི་རྣམ་སྨིན་རྣམས། །དམ་པའི་དོན་དུ་མེད་པར་རྟོགས། །གོས་པ་མེད་པ་སྙིང་པོའི་དོན། །རྟོགས་ན་དོན་དམ་བཤགས་པ་སྟེ། །དྲི་མེད་འོད་གསལ་ཞི་བྱས་ནས། །ལས་ཀྱི་སྒྲིབ་པ་རྣམ་དག་ལྟོས། །ཞེས་གསུངས་པས། དཔེར་ན་མདང་ཕན་ཆད་མུན་པ་མུན་ནག་གི་དཀྱིལ་འཁོར་དུ་ཡོད་པ་ལས། ད་ནངས་ནམ་ལངས་ཉི་མ་ཤར་བས་མུན་པ་ཐམས་ཅད་རང་སངས་ལ་སོང་བ་བཞིན་དུ། སེམས་ཉིད་དངོས་པོ་གཤིས་ཀྱི་དོན་མ་ནོར་བར་རྟོགས་ཙམ་ན། སྔར་བྱས་ཀྱི་སྡིག་པ་ཐམས་ཅད་ཀྱིས་མ་གོས་ཏེ། རང་སངས་ལ་འགྲོའོ། །དེ་ཡང་། བསྐལ་བར་བསགས་པའི་མུན་ནག་འཐིབས་པོས་ཡང་། །རིག་པའི་རྒྱལ་པོ་ཡེ་ཤེས་ཉི་གཟེར་གྱིས། །སྐད་གཅིག་ཡུད་ཙམ་གཅིག་ལ་དངས་པར་བྱེད། །ཅེས་སོ། །དེ་ནི་དོན་དམ་ལྟ་བའི་བཤགས་པའོ། །དེ་ལྟར་མ་རྟོགས་པ་རྣམས་ཀྱིས་སྟོབས་བཞིའི་སྒོ་ནས་བཤགས་དགོས་ཏེ། དེ་ལ་བཞི། རྟེན་གྱི་སྟོབས་དང་གཅིག །རྣམ་པར་སུན་འབྱིན་པའི་སྟོབས་དང་གཉིས། ཉེས་པ་ལས་སླར་ལྡོག་པའི་སྟོབས་དང་གསུམ། གཉེན་པོ་ཀུན་དུ་སྤྱོད་པའི་སྟོབས་དང་བཞིའོ། །དང་པོ་ནི་བླ་མ་དང་དཀོན་མཆོག་ཐམས་ཅད་ནམ་མཁའ་ལ་སྤྲིན་བཞིན་དུ་ཐིབ་པོ་བཞུགས་པར་སོམས་ལ་དེ་ལ་མོས་གུས་ཀྱི་གདུང་པ་མཛོད་ཅིག །གཉིས་པ་ནི་སྔར་བྱས་ཀྱི་ལས་ལ་འགྱོད་པ་དྲག་པོ་བསྐྱེད་མཛོད་ཅིག །གསུམ་པ་ནི་ད་ཕྱིན་ཆད་ལུས་དང་སྲོག་ལ་བབ་ཀྱང་སྡིག་པ་མི་བྱ་དགོས་སྙམ་དུ་དམ་ཆོས་མཛོད་ཅིག །དེ་ལྟར་སྟོབས་གསུམ་པོ་དེ་སྔོན་དུ་སོང་བའི་སྒོ་ནས། ཐལ་མོ་སྦྱར་ཏེ་རྗེས་ཟློས་བྱ་བ་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་སློབ་དཔོན་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བས། ཚེ་རབས་ཐོག་མ་མེད་པ་ནས། ཐ་མ་ད་ལྟའི་བར་དུ་ལུས་ངག་ཡིད་གསུམ་གྱི་སྒོ་ནས། སྡིག་པ་མི་དགེ་བའི་ལས་ཅི་བགྱིས་པ་ཐམས་ཅད། བླ་མ་དང་དཀོན་མཆོག་གི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །སླན་ཆད་ཀྱང་གང་ཐུབ་ཐུབ་ཀྱི་སྒོ་ནས་བསྡོམ་པར་བགྱིད་ལགས་སོ། །ཞེས་ལན་གསུམ་བརྗོད། ཐབས་ཡིན་ནོ་ལེགས་སོ་ཞེས་ཀྱང་བརྗོད་དོ། །དེ་ལ་ཚིག་དང་པོས་ལུས་བྱིན། བར་པས་གསལ་བཏབ། ཐ་མས་སྡིག་པ་དག་པ་དང་སྡོམ་པ་ཐོབ་དུས་མཉམ་ཡིན་གསུམ། དེ་ལ་དང་པོ་མི་འཆབ་པོ་མི་སྦེད་དོ་ཡན་ཆད་ནི་སྔར་སྡིག་པ་བྱས་པའི་བཤགས་པ་ཡིན་ཏེ། བཤགས་པས་འདག་གམ་ཞེ་ན། འདག་སྟེ་སྔར་བྱས་ཀྱི་སྡིག་པ་ཐམས་ཅད་སངས་ཀྱི་དག་པ་ལགས་སོ། །སླན་ཆད་ཀྱང་སྡོམ་པར་བགྱིད་ལགས་སོ་ཞེས་པ་ནི་ཕྱིས་མི་བྱེད་པར་སྡོམ་པ་ཡིན་ཏེ། ཕྱིན་ཆད་གང་ཐུབ་ཐུབ་ཀྱི་སྒོ་ནས་སྡོམས་མཛོད་ཅིག །སྡིག་པ་སྤངས་ནས་ངན་སོང་དུ་བཀྱིགས་གྲགས་ནས་བསྐྱུར་ཀྱང་མི་འགྲོ་བ་ཡིན་ནོ། །དེས་ངན་སོང་རྣམ་པ་གསུམ་དུ་མི་སྐྱེ་བའི་གདམ་ངག་ཐལ་ལོ། ༈ །གཉིས་པ་ནི། ངན་སོང་གསུམ་དུ་མ་སྐྱེས་པས་ཀྱང་མི་ཕན་པར་འདུག །མཐོ་རིས་ལྷ་མའི་གོ་འཕང་ཐོབ་ཀྱང་། ལ་ལ་ནི་ཚེ་ཐུང་། ལ་ལ་ནི་ལྟོགས་པ་ཚེ་རིང་པ་ཡི་དྭགས་འདྲ། ལ་ལ་ནི་བཞིན་ལུས་ཡིད་དུ་མི་འོང་བར་འདུག །མི་ལུས་རང་ཡང་བདེ་སྐྱིད་དང་ལྡན་པ་དགོས་པར་འདུག་སྙམ་ན་བྱས་པས་མཆི་གསུངས། ཇུ་ག་བྱས་ན་འོང་སྙམ་ན་སྲོག་གཅོད་པ་སྤོངས་ལ་སྲོག་སྐྱབས་མཛོད། ཆ་མཐུན་དུ་ཚེ་རིང་པོ་འོང་བ་ལགས། རྡུངས་བརྡེགས་སྤངས་ནས་ནད་གཡོག་བྱ། ཆ་མཐུན་དུ་ན་ཚ་དཀོན་པོ་འོང་པ་ལགས། སེར་སྣ་སྤངས་ལ་བྱིན་པ་གང་གྲུབ་གྲུབ་ཀྱི་སྒོ་ནས་བཏང་། ཆ་མཐུན་དུ་ལོངས་སྤྱོད་ཆེན་པོ་འོང་བ་ལགས། དེ་ཡང་། བྱང་ཆུབ་སེམས་དཔའི་སྤྱིན་པས་ཡི་དྭགས་འགྲོ་བ་གཅོད། དབུལ་བ་དང་ནི་དེ་བཞིན་ཉོན་མོངས་ཐམས་ཅད་གཅོད། སྤྱོད་ཚེ་ལོངས་སྤྱོད་མཐའ་ཡས་རྒྱས་པ་ཐོབ་པར་འགྱུར། སྦྱིན་པས་སྡུག་བསྔལ་གྱུར་པའི་སེམས་ཅན་ཡོངས་སྨིན་བྱེད་ཅེས་སོ། །ཁོང་ཁྲོ་སྤངས་ལ་བཟོད་པ་བསྒོམ། ཆ་མཐུན་དུ་གཟུགས་བྱད་བཟང་པོ་འོང་བ་ལགས། དེ་ཡང་། བཟོད་པས་གཟུགས་བཟང་དམ་པ་རྒྱ་ཆེན་ཐོབ་འགྱུར་ཏེ། གསེར་མདོག་སྡུག་ཅིང་འགྲོ་བས་ལྟ་བའི་འོས་སུ་འགྱུར། ཞེས་སོ། །རང་དོན་སྤངས་ལ་གཞན་དོན་ཅིར་གྱུར་དུ་བྱའོ། །སེམས་ཅན་ཐམས་ཅད་ཅི་སྨྲས་ཉན་པ་འོང་བ་ལགས། དེ་ཡང་ཡང་དག་པར་རྫོགས་པའི་སངས་རྒྱས་ཀྱིས་གཞན་གཅེས་པར་བྱས་ནས་གཞན་དོན་བྱས་པས་སྔོན་ལ་སངས་རྒྱས་པ་ལགས། འོ་སྐོལ་གྱིས་གཞན་པས་རང་གཅེས་པར་བྱས་པས་ད་རུང་དུ་འཁོར་བར་ལུས་པ་ལགས་པས་ད་ནས་ཕར་ལ་ཅི་བྱེད་ཐམས་ཅད་སེམས་ཅན་གྱི་དོན་དུ་ཅི་འགྱུར་བྱའོ། །དེ་ཡང་རྫོགས་པའི་སངས་རྒྱས་གཞན་དོན་བྱེད་པ་དང་། ཁམས་གསུམ་སེམས་ཅན་རང་དོན་བྱེད་པ་གཉིས། །འབྲས་བུ་ཆེ་ཆུང་ཁྱད་པར་དེ་འདྲའོ། །ཞེས་གསུངས་སོ། །འོ་སྐོལ་ལ་ད་ལྟ་བདེ་སྐྱིད་དགོས་པ་བཞིན་དུ། ཚེ་ཕྱི་མ་ལ་ཡང་དགོས་པ་ཡིན་པས། གདམ་ངག་དེ་རྣམས་ལག་ལེན་བྱེད་པ་གལ་ཆེའོ། །དེས་མཐོ་རིས་ལྷ་དང་མིའི་བདེ་སྐྱིད་ཐོབ་པའི་གདམས་ངག་ཐལ་ལོ། ༈ །གསུམ་པ་ནི་མཐོ་རིས་ལྷ་དང་མིའི་བདེ་སྐྱིད་རང་ཐོབ་ཀྱང་བདེ་ཡང་བདེ་ཡུན་རིང་པོ་མི་འདུག །སྐྱིད་ཀྱང་སྐྱིད་ཡུན་རིང་པོ་མི་འདུག་པས། སངས་རྒྱས་རང་ཐོབ་དགོས་པར་འདུག་སྙམ་ན་བྱས་པས་མཆི། དེ་ལ་གདམ་ངག་གཉིས་བདོག་གསུང་། བརྒྱུད་ནས་སངས་རྒྱས་དང་། མྱུར་བར་སངས་རྒྱ་བའོ། །དང་པོ་ནི། ལུས་ཀྱི་སྒོ་ནས་ལྷ་ཕྱག་དང་བསྐོར་བ་བྱ། དེས་ལུས་ཀྱི་སྒྲིབ་པ་འབྱང་། ལུས་ཀྱི་ཚོགས་རྫོགས་པ་ཡིན། ངག་གི་སྒོ་ནས་མདོ་དང་སྙིང་པོ་དང་སྐྱབས་འགྲོ་བྱ། དེས་ངག་གི་སྒྲིབ་པ་བྱང་ངག་གི་ཚོགས་རྫོགས་པ་ཡིན། ཡིད་ཀྱི་སྒོ་ནས་བླ་མ་དང་དཀོན་མཆོག་ལ་མོས་པ་དང་གུས་པ་ཞེ་ཐག་པ་ནས་བྱས། དེས་ཡིད་ཀྱི་སྒྲིབ་པ་འབྱང་ཡིད་ཀྱི་ཚོགས་རྫོགས་པ་ཡིན། དེ་ལྟར་ལུས་་ངག་ཡིན་གསུམ་གྱི་སྒྲིབ་པ་བྱང་། ལུས་ངག་ཡིད་གསུམ་གྱི་ཚོགས་རྫོགས་ཙམ་ན་སངས་རྒྱས་ཞེས་བྱ་བ་དེ་མི་འདོད་ཀྱང་འབྱུང་བ་ཡིན་པས། དེ་བཞིན་དུ་ཉམས་སུ་ལོངས་མཛོད་ཅིག ༈ །གཉིས་པ་མྱུར་བར་སངས་རྒྱ་བའི་ཐབས་ནི། གང་ཟག་འགའ་ཞིག་འཁོར་བའི་གནས་ལས་ངེས་པར་ཡིད་བྱུང་ཞིང་སྐྱོ་ན། གོལ་ལེའི་ལོང་མེད་མྱུར་བ་རང་དུ་སངས་རྒྱས་པ་དགའ་སྙམ་ན་བྱས་པས་མཆི་གསུང་། དེ་ཡང་ཇི་ལྟར་བྱེད་ན་གཉིས་ཏེ། ལྟ་བ་དང་། བསྒོམ་པའོ། །དང་པོ་ལྟ་བ་ལ་གསུམ་སྟེ། ལྟ་བའི་མི་འདོགས་དང་། ལྟ་ཐབས་དང་། ལག་ལེན་ནོ། །དང་པོ་ནི། སྐྱེ་བ་མེད་པ། འགག་པ་མེད་པ། གཉིས་སུ་མེད་པའོ། །གཉིས་པ་ལྟ་ཐབས་ནི། མིག་གིས་ལྟ་རྒྱུ་མི་འབོག་སྟེ། སེམས་ཀྱིས་སེམས་ལ་ལྟོས་མཛོད་དང་། བལྟས་པའི་དུས་ན་ཡང་ལྟ་རྒྱུ་ཡང་མི་འདུག །མཐོང་རྒྱུ་ཡང་མ་རྙེད། དབྱིབས་དང་ཁ་དོག་ལ་སོགས་པ་འདིའི་ཕྱིར་ན་འདི་ཡིན་བྱ་བའི་ངོས་གང་ཡང་མ་རྙེད་པ་དེ་ལ། མིང་དུ་སྐྱེ་བ་མེད་པའི་དོན་ཟེར་བ་ལགས། དེ་སྐད་དུ་ཡང་ཀུན་བྱེད་ལས། མཐོང་དུ་དམིགས་པའི་ཡུལ་དང་བྲལ། །ཤེས་སུ་ཚིག་གིས་མཚོན་དུ་མེད། །ཅེས་པ་དང་། ཡང་སེམས་སྒོམ་ལས། སེམས་ཀྱི་རང་བཞིན་བཙལ་ཡང་མི་རྙེད་ན། །གཞན་ལ་འདི་འདྲ་ཞེས་ནི་བསྟན་དུ་མེད། །ཅེས་པ་དང་། ཡང་རབ་འབྱམས་ལས། མཐོང་བ་མེད་པར་མཐོང་བ་ནི། །ཆོས་སྐུ་སྐྱེ་མེད་མཐོང་བ་ཡིན། །ཞེས་པས་ལགས་སོ། །གཉིས་པ་འགག་པ་མེད་པ་ནི། འོ་ན་སྐྱེ་མེད་ཡིན་ན་རྣམ་པ་སྣ་ཚོགས་འདི་ཙམ་འཆར་བ་ཅི་ལྟར་ཡིན་སྙམ་ན། དཔེར་ན་ནམ་མཁའ་ཉིད་སྤྲིན་དུ་ཤར་བའམ། རྒྱ་མཚོ་ཉིད་རླབས་སུ་ཤར་བ་བཞིན་དུ། སེམས་སྐྱེ་མེད་སྐྱིད་སྡུག་བཟང་ངན་དགག་བསྒྲུབ་སྤངས་བླང་ལེགས་ཉེས་ལ་སོགས་པ་ཐམས་ཅད་དུ་རང་ཤར་བ་ཡིན་ཏེ། སྣང་བ་སྣ་ཚོགས་ཕྱོགས་མེད་ཅི་ཤར་ཡང་། སེམས་རང་སྣང་བ་ལས་མ་གཏོགས་གཞན་མེད་དོ། །དེའང་ཀུན་བྱེད་ལས། སྣང་བ་ཐམས་ཅད་ང་ཡི་རང་བཞིན་ཡིན། །ཞེས་པ་དང་། ཡང་གཞན་ལས། སྣང་ཞིང་སྲིད་པའི་ཆོས་རྣམས་ཀུན། །བྱང་ཆུབ་སེམས་དང་དབྱིངས་སུ་འདུས། །ཞེས་པས་གསལ་ལོ། །དེ་ལྟར་རྟོགས་ཙམ་ན། འགགས་པ་མེད་པའི་དོན་བྱ་བ་རྟོགས་པ་ལགས་སོ། །གསུམ་པ་གཉིས་སུ་མེད་པ་ནི། འོ་ན་སྣ ང་བ་སྣ་ཚོགས་སུ་འཆར་བ་དང་། རང་བཞིན་མེད་པ་དེ་གཉིས་ཐ་དད་དམ་སྙམ་ན། མི་དད་དེ་དཔེར་ན་ཆུ་ནང་གི་ཟླ་བ་དང་འདྲ་སྟེ། ཆུ་ནང་གི་ཟླ་བ་དེ་མེད་དམ་བྱས་པས་སྐྱ་ཁྱིལ་ལེ་སྣང་གི་འདུག །ཡོད་དམ་བྱས་པས་ཆུ་དར་ཚགས་ལ་བཙགས་ཀྱང་དེ་ནས་ཟླ་བ་མི་རྙེད་པར་གདའ། དེས་ན་སྣང་བ་རང་བཞིན་མེད་པ་དུས་མཉམ་ལྡན་གཅིག་ཏུ་འོང་བ་བཞིན་དུ། སེམས་ཀྱི་རང་བཞིན་དེ་ཡང་མེད་དམ་བྱས་པས་དགའ་མི་དགའ་ཆགས་སྡང་ལ་སོགས་པ་སྣ་ཚོགས་སུ་སྣང་གི་འདུག །ཡོད་དམ་བྱས་པས་ཅིའི་ངོ་བོར་ཡང་མ་གྲུབ་པར་འདུག་སྟེ། དེ་ཡང་སྣང་གདོང་ཙམ་ན་རང་བཞིན་མེད། རང་བཞིན་མེད་བསྡོ་ཙམ་ན་ཅིར་ཡང་སྣང་སྟེ། དེ་གཉིས་ཚིག་ལ་སྔ་ཕྱི་བྱུང་ཡང་དོན་ལ་གཉིས་སུ་མེད་པའོ། །དེ་ལྟར་རྟོགས་ཙམ་ན་གཉིས་སུ་མེད་པའི་དོན་བྱ་བ་རྟོགས་པ་ལགས་སོ། །དེ་ཡང་ཁུ་བྱུག་ལས། སྣ་ཚོགས་རང་བཞིན་མི་གཉིས་ཀྱང་། །ཞེས་པ་དང་། ཡང་ནམ་མཁའ་ཆེ་ལས། གཅིག་སྟེ་རྣམ་པ་ཡོངས་ཀྱིས་མེད། །ཅེས་པ་དང་། ཕར་ཕྱིན་ལས་ཀྱང་། གཟུགས་སྟོང་པའོ། །སྟོང་པ་ཉིད་གཟུགས་སོ་གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་པས་གསལ་ལོ། །དེ་ལྟར་ལྟ་བས་སེམས་སྐྱེ་འགག་གཉིས་སུ་མེད་པའི་ངོ་བོར་རྟོགས་ཀྱང་། ཉོན་མོངས་ཆགས་སྡང་འདི་ཚོ་སྐྱེ་འགག་གཉིས་མེད་དུ་མ་གྲོལ་ན། ལག་ལེན་ལ་མ་ཐེབས་ཏེ་ཅི་ཡང་མི་ཕན་པས། གསུམ་པ་ལྟ་བའི་ལག་ལེན་ནི། ད་ན་ཡར་ལ་ཉོན་མོངས་རྣམ་རྟོག་ཅི་ཤར་ཡང་ཁ་ཡན་ལ་མི་གཏོང་བར་དེ་ཉིད་ལ་བལྟས་པས་རང་བཞིན་མི་འདུག་སྟེ་སྐྱེ་མེད་དུ་རང་གྲོལ། དེ་ཉིད་སེམས་ལས་མ་གཏོགས་པ་གཞན་མེད་དེ། རང་སྣང་བས་འགག་མེད་དུ་རང་གྲོལ། ཤར་བ་དང་རང་བཞིན་མེད་པ་དུས་མཉམ་པས་གཉིས་མེད་དུ་རང་གྲོལ་ལོ། །མདོར་ན་ཉོན་མོངས་རྣམ་རྟོག་གང་སྐྱེས་ཀྱང་ཁ་ཡན་དུ་མི་གཏང་བར་དེ་ཉིད་ལ་བལྟས་པས་སྐྱེ་འགག་དབྱེར་མེད་རང་གྲོལ་དུ་བུན་བུན་འགྲོ་བ་ལགས་སོ། །དེ་སྐད་དུ་ཡང་སེམས་བསྒོམ་ལས། རྣམ་པར་རྟོགས་པའི་མཚན་མ་ཅི་བྱུང་ཡང་། །རྟོག་པ་དེ་ཉིད་ཆོས་ཉིད་ཡིན་ཤེས་ན། །ཆོས་ཀྱི་དབྱིངས་ཉིད་གཞན་ནས་སྒོམ་མི་དགོས། །དེ་ལ་གཉེན་པོས་བཅོས་ཤིང་དགག་ཏུ་མེད། །ཅེས་སོ། །དེ་ནི་ལྟ་བའི་ལག་ལེན་ཡིན་པས་ཤིན་དུ་གལ་ཆེའོ། །དེ་ལྟར་ལྟ་བ་རྟོགས་པས་ཡོན་ཏན་ཕྱོགས་ཞེན་དང་འཛིན་པ་གྲོལ་ནས་འགྲོ་བ་ཡིན་ཏེ། གྲོལ་ན་བསྒོམ་མི་དགོས་པས། གྲོལ་ལམ་མ་གྲོལ་རང་ལ་ལྟ་རྟོག་ཐོང་གསུང་། མ་གྲོལ་བར་འདུག་ན་ངང་བསྟེན་དགོས་པས། གཉིས་པ་བསྒོམ་པ་ལ་གཉིས་ཏེ། གཞག་ཐབས་དང་། ངོ་བོའོ། །དང་པོ་ནི། ལུས་ས་ལ་བོར་ཐབས་སུ་གཞག །ངག་སྨྲ་བརྗོད་དང་བྲལ་ཐབས་སུ་གཞག །སེམས་ནམ་མཁའ་ལ་ཡས་ཐབས་སུ་གཞག་གོ། །མདོར་ན། ལུས་ངག་ཡིད་གསུམ་ལ་རྟོག་པ་གང་ཡང་མི་བཞུགས་པར་རང་ལུགས་སུ་གཞག་གོ། །གཉིས་པ་ངོ་བོ་ནི། དེ་ལྟར་གཞག་པས་སེམས་གསལ་ལ་རྟོག་པ་མེད་པ། གསལ་ལ་འཛིན་པ་མེད་པའི་ཤེས་པ་གསལ་ལ་སེང་ངེ་བ་གཅིག་ནང་ནས་འཆར་བས་དེ་ལ་སྒོམ་ཟེར་བ་ཡིན། དུས་གསུམ་སངས་རྒྱས་ཀྱི་དགོངས་པ་ཡིན། གཞི་དངོས་པོ་གཤིས་ཀྱི་གནས་ལུགས་ཡིན། རྣལ་འབྱོར་བའི་ཉམས་ལེན་ཡིན་པས་དེ་ལ་གོམས་འདྲིས་རྟག་ཏུ་བྱའོ། །དེ་ཡང་སེམས་བསྒོམ་ལས། སྒོམ་དང་བསྒོམ་པར་བྱ་བ་གཉིས་མེད་དེ། །དོན་དམ་ངང་ལ་བདེ་བར་གནས་པ་ཡིན། །བྱང་ཆུབ་སེམས་སྒོམ་ཞེས་ཀྱང་དེ་ལ་བྱ། །རྟོགས་པའི་ཀློང་ཆེན་མ་ཡེངས་དོན་རྟོགས་ནས། །རྣམ་དག་བྱང་ཆུབ་སེམས་ཀྱི་བསྒོམ་པ་ཡིན། །ཞེས་པས་གསལ་ལོ། །དེ་ལྟར་ལྟ་བསྒོམ་ཉམས་སུ་བླངས་པའི་ངང་ཤུགས་ལས་བྱུང་བ་ན་སྤྱོད་པའོ། །དེ་བཞིན་དུ་ཉམས་སུ་བླངས་ན་འབྲས་བུ་སངས་རྒྱས་ལོང་མེད་པར་འབྱུང་ངོ་། །དེས་མྱུར་བར་སངས་རྒྱ་བ། དེའི་གོང་མས་བརྒྱུད་ནས་སངས་རྒྱ་བ། གཉིས་ཀ་དྲིལ་ནས་སངས་རྒྱས་རང་འོང་བའི་གདམ་ངག་ཐལ་བར་ལགས་སོ། ༈ །མན་ངག་ནོར་བུ་འཇུག་སྒོ་གསུམ་པ་འདི། བླ་མའི་གསུང་ལ་བདེར་གཤེགས་ལུང་གིས་བརྒྱན། །ཕྱི་རབས་དོན་དུ་དབུས་པ་རྟ་ཡིས་བཀོད། །འདི་དོན་རྟོགས་ནས་འགྲོ་བའི་དོན་མཛད་ཤོག །རྫོགས་སོ།། ༈ །། །། །སྤྲུལ་སྐུ་རིན་པོ་ཆེའི་གསུང་འགྲོས། །དབུས་པ་རྟ་ཡིས་ཡི་གེ་བཀོད་པའོ། །རྟ་རིན་ཆེན་དཔལ་གྱི་ཕྱག་དཔེ་ལགས་སོ། །

དམ་པ་ཆོས་ཀྱི་ཡང་སྙིང་སྤྲུལ་སྐུ་ཞིག་པོའི་གསུང་སྒྲོས་དོན་གསལ་ལྔ་པ། དབུས་པ་རྟ།

དམ་པ་ཆོས་ཀྱི་ཡང་སྙིང་སྤྲུལ་སྐུ་ཞིག་པོའི་གསུང་སྒྲོས་དོན་གསལ་ལྔ་པ་བཞུགས། དགོས་འདོད་ཀུན་འབྱུང་རྟོགས་ལྡན་རིན་པོ་ཆེ། འཁྲུལ་པ་རང་གྲོལ་ཞིག་པོ་སྤྲུལ་པའི་སྐུ། །ཐུགས་རྗེས་ཀུན་སྐྱོབ་འགྲོ་བའི་མགོན་པོ་ཉིད། །དྲིན་ཅན་བླ་མ་ཁྱེད་ལ་གུས་པས་ཕྱག་འཚལ་ལོ། །ངོ་བོ་བདག་མེད་གནས་ལུགས་ལ། །བདག་ཏུ་བཟུང་བས་འཁྲུལ་པའི་ལམ། །བདག་མེད་རྟོགས་ནས་བདེ་བ་ཆེ། །ཞེས་པས། གནས་ལུགས། འཁྲུལ་ལུགས། འཁྲུལ་པ་བཟློག་པའི་ཐབས་གསུམ་དུ་གསུང་པ་ལ། དང་པོ་གནས་ལུགས་ནི། ངོ་བོ་བདག་མེད་གནས་ལུགས་ལ། །ཞེས་པས་སྟོན་ཏེ། དེ་ལ་གཞི་སྙིང་པོ་བྱང་ཆུབ་སེམས་ཀྱི་ངོ་བོའམ་གནས་ལུགས་ནི། མཉམ་པ་ཉིད་ཕྱོགས་རིས་མེད་པ། སྟོང་གསལ་ནམ་མཁའ་ལྟ་བུ་ཞེས་བྱ་སྟེ། སེམས་ཀྱི་ངོ་བོ་ཉམས་པ་ཉིད་བཟང་ངན་དང་ཆེ་ཆུང་མེད་པ། དེ་ཡང་ཕྱོགས་དང་རིས་མེད་པ། ངེས་བཟུང་ཐམས་ཅད་དང་བྲལ་ཏེ་སྟོང་། འཛིན་མེད་ཀྱི་རིག་པ་རང་སྣང་སྟེ་གསལ། དེ་ཡང་གཉིས་སུ་མེད་པ་ཆོས་སྐུ་གནས་ཏེ། དཔེ་ནམ་མཁའ་ལྟ་བུའོ། །དཔེར་ན་འདུས་མ་བྱས་ཀྱི་ནམ་མཁའ་ལ་ངོས་བཟུང་གང་ཡང་མེད། ཐོགས་པར་བྱེད་པའི་རེག་བྱ་ཐམས་ཅད་དང་བྲལ་ཏེ་སྟོང་། སྤྲིན་དང་ན་བུན་ལས་སོགས་པ་མ་འགགས་པར་རང་སྣང་སྟེ་གསལ། ནམ་མཁའ་ཉིད་སྤྲིན་དུ་ཤར། སྤྲིན་ཉིད་ནམ་མཁའི་ངང་ལས་མ་འདས། ནམ་མཁའ་དང་སྤྲིན་དབྱེར་མི་ཕྱེད་པ་བཞིན་ནོ། །ལ་ཞེས་པ་དེ་ལྟ་ཡིན་པ་ལ། མ་རྟོགས་ཞེས་པའི་ཐ་ཚིག་གོ། །གཉིས་པ་འཁྲུལ་ལུགས་ནི། བདག་ཏུ་བཟུང་བས་འཁྲུལ་པའི་ལམ། ཞེས་པས་བསྟན་ཏེ། དེ་ལ་གསུམ། རྒྱུ་དང་། རྐྱེན་དང་། འབྲས་བུའམ་ཉེས་པའོ། །དེ་ལ་རྒྱུ་ནི་མ་རིག་པ་གཉིས་ཏེ། ལྷན་ཅིག་སྐྱེས་པའི་མ་རིག་པ་དང་། ཀུན་དུ་བཏགས་པའི་མ་རིག་པའོ། །དང་པོ་ནི་གསེར་སེར་པོར་ཡེ་ནས་གནས་པ་དང་། གཡའ་ཡིས་བསྒྲིབས་ཏེ་སོར་སོར་མ་མངོན་པ་དུས་མཉམ་ལྷན་ཅིག་ཏུ་བྱུང་བ་བཞིན་དུ། གནས་ལུགས་ངོ་བོ་བདག་མེད་དུ་གནས་པ་དང་། དེ་ལྟར་ངོ་མ་ཤེས་པ་གཉིས་དུས་མཉམ་ལྷན་ཅིག་ཏུ་སྐྱེས་པས་དེ་སྐད་ཅེས་བྱའོ། །དེ་ཡང་སྤར་ཁབ་ལས། སེམས་རང་བཞིན་གྱིས་འོད་གསལ་བ་ཡིན་ཡང་། ངེས་པའི་ཤེས་པས་ངེས་པར་མ་བྱས་པས་ནི་ལྷན་ཅིག་སྐྱེས་པའི་མ་རིག་པའོ། །ཞེས་སོ། ༈ །གཉིས་པ་ཀུན་བཏགས་ནི། ངོ་མ་ཤེས་ཀྱི་མི་ཟློ་སྟེ། །ང་མེད་པ་ལ་ང་རུ་བཟུང་། །བདག་མེད་པ་ལ་བདག་ཏུ་བཟུང་། །བདག་ལ་གཞན་འདྲ་གཅིག་ལ་གཉིས་འཛིན་གྱི་རྟོག་པ་དུ་མས་ལོག་པར་བཏགས་པའོ། །དེ་ཡང་སྙིང་པོ་ལས། སྲིད་རྩེའི་ཉེས་དམིགས་བདག་ཏུ་རྟོག་ལས་འཕྲོས་ཞེས་པ་དང་། ཁྱུང་ཆེན་ལས ། ཡེ་ནས་རྒྱས་པའི་བདག་ཉིད་མངོན་སུམ་གནས་པ་ལ། །གྲིབ་མ་གཟུགས་ཀྱི་དཔེ་བཞིན་དེ་ལ་རྟོག་པ་བྱུང་། །ཞེས་གསུངས་སོ། ༈ །རྐྱེན་ནི། ལས་གསུམ་དང་འདོད་ཡོན་ལྔ་དང་ཉོན་མོངས་པ་ལྔ། ལས་གསུམ་ནི། དགེ་བ་དང་། མི་དགེ་བ་དང་། མི་གཡོ་བའོ། །དེ་ཡང་དགེ་བའི་ལས་ནི། དགེ་བ་བཅུ་ལས་སོགས་པ་ཡིན་ཏེ། བཅུ་ནི། ལུས་ཀྱི་གསུམ་དང་། ངག་གི་བཞི་དང་། ཡིད་ཀྱི་གསུམ་མོ། །ལུས་ཀྱི་གསུམ་ནི། སྲོག་སྐྱབས་བྱེད་པ་དང་། སྦྱིན་པ་གཏོང་བ་དང་། ཚངས་སྤྱོད་བསྲུངས་པའོ། །ངག་གི་བཞི་ནི། བདེན་པར་སྨྲ་བ་དང་། གཞན་མི་མཐུན་པ་བསྡུས་པ་དང་། ངག་འཇམ་ཞིང་ངེས་པར་སྨྲ་བ་དང་། གཏམ་ལྷད་མེད་དམ་བདག་གཞན་དོན་དུ་འགྲོ་བ་སྨྲ་བའོ། །ཡིད་ཀྱི་གསུམ་ནི། ཆོག་པར་འཛིན་པ་དང་། ཕན་པར་སེམས་པ་དང་། དཀོན་མཆོག་གསུམ་ལ་དད་གུས་བྱ་ཞིང་ཡང་དག་པའི་དོན་ལ་སེམས་པའོ། ༈ །གཉིས་པ་མི་དགེ་བ་ནི། མི་དགེ་བ་བཅུ་དང་། མཚམས་མེད་ལྔ་དང་། དེ་དང་ཉེ་བ་ལྔ་དང་། ལྕི་བ་བཞི་དང་། ལོག་པ་བརྒྱད་དང་། ཁ་ན་མ་ཐོ་བ་གསུམ། དེ་ལ་མི་དགེ་བ་བཅུ་ནི། ལུས་ཀྱི་གསུམ་དང་། ངག་གི་བཞི་དང་། ཡིད་ཀྱི་གསུམ་མོ། །དང་པོ་ལུས་ཀྱི་གསུམ་ནི། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པའོ། །ངག་གི་བཞི་ནི། རྫུན་དང་། ཕྲ་མ་དང་། ཚིག་རྩུབ་དང་། ངག་འཁྱལ་བའོ། །ཡིད་ཀྱི་གསུམ་ནི། བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །དེ་རེ་རེ་ལ་རྒྱས་པར་ཕྱེ་སྟེ་བསྟན་པ་ནི། སྲོག་གཅོད་པ་ལ་གསུམ། འདོད་ཆགས་ཀྱི་སྒོ་ནས་གཅོད་པ་དང་། ཞེ་སྡང་གི་སྒོ་ནས་གཅོད་པ་དང་། གཏི་མུག་གི་སྒོ་ནས་གཅོད་པའོ། །མ་བྱིན་པར་ལེན་པ་ལ་གསུམ། མཐུས་མ་བྱིན་པར་ལེན་པ་དང་། སྒྱུས་མ་བྱིན་པར་ལེན་པ་དང་། འཇབ་བུས་མ་བྱིན་པར་ལེན་པའོ། །འདོད་པ་ལོག་པར་གཡེམ་པ་ལ་གསུམ། ཆོས་ཀྱི་བསྲུངས་པ་དང་། ཁྲིམས་ཀྱིས་བསྲུངས་པ་དང་། བདག་པོས་བསྲུངས་པའོ། །རྫུན་ལ་གསུམ་སྟེ། མི་ཆོས་བླ་མའི་རྫུན་དང་། ཕན་པའི་རྫུན་དང་། ཕན་གནོད་མེད་པའི་རྫུན་ནོ། །ཕྲ་མ་ལ་གསུམ་སྟེ། བཙན་འཕྲ་དང་། ལྐོག་ཕྲ་དང་། གཞགས་ཕྲའོ། །ཚིག་རྩུབ་ལ་གསུམ་སྟེ། རྒྱུད་ཀྱིས་རྩུབ་པ་དང་། ལན་དུ་རྩུབ་པ་དང་། ཡོན་ཏན་དུ་ལྟ་སྟེ་རྩུབ་པའོ། །ངག་འཁྱལ་བ་ལ་གསུམ་སྟེ། གནོད་པར་སེམས་པའི་ངག་འཁྱལ། ཡ་མ་བླའི་ངག་འཁྱལ། ཡང་དག་པའི་ངག་འཁྱལ་ལོ། །བརྣབ་སེམས་ལ་གསུམ་སྟེ། བདག་ལ་བརྣབ་པ་དང་། གཞན་ལ་བརྣབ་པ་དང་། གཉིས་ཀ་ལ་བརྣབ་པའོ། །གནོད་སེམས་ལ་གསུམ་སྟེ། བདག་ལ་གནོད་པ་དང་། གཞན་ལ་གནོད་པ་དང་། གཉིས་ཀ་ལ་གནོད་པའོ། །ལོག་པར་ལྟ་བ་ལ་གསུམ་སྟེ། རྟག་པར་ལྟ་བ་དང་། ཆད་པར་ལྟ་བ་དང་། བདེན་པར་ལྟ་བ་ལ། བསྐུར་པ་འདེབས་པའོ། །མཚམས་མེད་པ་ལྔ་ནི། ཕ་གསོད་པ་དང་། མ་གསོད་པ་དང་། དགྲ་བཅོམ་པ་གསོད་པ་དང་། དགེ་འདུན་འདུ་བའི་དབྱེན་བྱེད་པ་དང་། དེ་བཞིན་གཤེགས་པའི་སྐུ་ལ་ངན་སེམས་ཀྱི་ཁྲག་འབྱིན་པའོ། །དེ་དང་ཉེ་བ་ལྔ་ནི། གྲོགས་ཀྱིས་བློ་གཏད་པ་ལ་འཁྲུལ་བ་དང་། སྙིང་རྗེ་རྗེ་སྐད་ཟེར་གྱི་གསོད་པ། དགེ་སློང་མ་སུན་འབྱིན་པ། དགེ་འདུན་འདུ་བའི་སྒོ་འཕྲོག་པ། རབ་གནས་དང་ལྡན་པའི་མཆོད་རྟེན་འཇིག་པའོ། །ཉམས་པའི་ལྕི་བ་བཞི་དང་། ལོག་པའི་ལྕི་བ་བཞི་དང་། སྨད་པའི་ལྕི་བ་བཞི་དང་། བསྐུར་བའི་ལྕི་བ་བཞིའོ། །དེ་ལ་ཉམས་པའི་ལྕི་བ་བཞི་ནི། མི་ཆོས་ཀྱི་མནའ་ཉམས་ན་ལྕི། །སྨད་ཉན་ཐོས་ཀྱི་འདུལ་ཁྲིམས། བྱང་ཆུབ་སེམས་དཔའི་སྡོམ་པ། གསང་སྔགས་ཀྱི་དམ་ཚིག་ཉམས་ན་ལྕི་བའོ། །ལོག་པའི་ལྕི་བ་བཞི་ནི། མཁས་པའི་གོང་ལྕི། བསྒོམ་ཆེན་གྱི་ཕྱག་ལྕི། བསྒོམ་བསྒྲུབ་མཁན་གྱི་ཟས་ལྕི། སྔགས་པའི་ནོར་ལྕི་བའོ། །སྨད་པའི་ལྕི་བ་བཞི་ནི། གཏི་མུག་དབང་གིས་འཕགས་པའི་སྐུ་ལ་མི་ལེགས་བྱས་ཏེ་ལྕི། ང་རྒྱལ་གྱི་དབང་གིས་བདེན་པའི་ཚིག་ཁྱལ་དུ་བསད་དེ་ལྕི། ཕྲག་དོག་གི་དབང་གིས་གྲོགས་ཀྱི་ཡོན་ཏན་ལ་སྨད་པ་ལྕི། འདོད་ཆགས་ཀྱི་དབང་གིས་ཆོས་དང་ནོར་དུ་བརྗེ་བ་ལྕི་བའོ། །བསྐུར་པའི་ལྕི་བ་བཞི་ནི། རང་བཞིན་དངོས་མེད་ངང་ལ་གལ་འཛུགས་ལྕི། གཉམ་ཉིད་ཆོས་ལ་ཁྱད་འདོན་ལྕི། མི་དགེ་བཅུ་ལ་ལོག་ལྟ་ལྕི། མཚམས་མེད་ལྔ་ལ་ཁྲག་འབྱིན་ལྕི་བའོ། །ལོག་པ་བརྒྱད་ནི། ཕྱིའི་ལོག་པ་བཞི་དང་། ནང་གི་བཞིའོ། །དེ་ལ་ཕྱིའི་བཞི་ནི། དཀར་པོའི་ཕྱོགས་ལ་སྨོད་པ་དང་། ནག་པོའི་ཕྱོགས་ལ་བསྟོད་པ་དང་། དད་པ་ཅན་གྱི་ཚོགས་བཅག་པ་དང་། དགེ་བ་ཅན་གྱི་ཐུགས་དཀྲུགས་པའོ། །གཉིས་པ་ནང་གི་བཞི་ནི། མི་སྤང་བ་སྤངས་ཏེ་ཡི་དམ་གྱི་ལྷ་སྤངས་པ་དང་། མི་སྨད་པ་སྨད་དེ་རྡོ་རྗེ་སློབ་དཔོན་གྱི་སྐུ་ལ་སྨད་པ་དང་། མི་དྲལ་བ་བྲལ་ཏེ་དམ་ཚིག་གཉན་པོ་དྲལ་བ་དང་། མི་བསྐྱུང་པ་སྐྱུངས་ཏེ་མཆེད་ལྕམ་ལ་བརྩེ་གདུངས་སྐྱུངས་པའོ། །ཁ་ནས་མ་ཐོ་བ་གསུམ་ནི། ལུས་ཀྱི་ཁ་ནས་མ་ཐོ་བ་དང་། ངག་གི་ཁ་ནས་མ་ཐོ་བ་དང་། ཡིད་ཀྱི་ཁ་ནས་མ་ཐོ་བའོ། །གསུམ་པ་མི་གཡོ་བའི་ལས་ནི། རགས་སོགས་ཞེས་བྱ་སྟེ། ཚད་མེད་བཞི་དམིགས་པ་དང་བཅས་ཏེ་རང་རྒྱུད་བསྒོམ་པ་དང་། ཞི་སོགས་ཞེས་བྱ་སྟེ། ལྟ་བས་མ་ཟིན་པའི་སྒོམ་ཞི་གནས་བློ་ཡུལ་དུ་བསྒོམ་པའོ། །འདོད་ཡོན་ལྔ་ནི། མིག་གི་ཡུལ་དུ་གཟུགས་སྣང་བ་དང་། རྣ་བའི་ཡུལ་དུ་སྒྲ་རུ་སྣང་བ་དང་། སྣའི་ཡུལ་དུ་དྲིའི་སྣང་བ་དང་། ལྕེའི་ཡུལ་རོའི་སྣང་བ་དང་། །ལུས་ཀྱི་ཡུལ་རེག་བྱའི་སྣང་བའོ། །དེ་ཡང་རེ་རེ་ལ་བསྟེན་ནས་དུག་ལྔ་སོགས་པ་ཡིན་ཏེ། མིག་གི་ཡུལ་གཟུགས་སྣང་བ་ལ། །ལེགས་པ་ལ་འདོད་ཆགས། མ་ལེགས་པ་ལ་ཞེ་སྡང་། གཉིས་མེད་དུ་མ་ཤེས་པས་གཏི་མུག །རང་ལེགས་པ་ལ་ང་རྒྱལ། གཞན་ལེགས་པ་ལ་ཕྲག་དོག་སྟེ། དུག་ལྔ་འཆར་བའི་རྒྱུ་ཡིན་ནོ། །དེས་འགྲོ་སྟེ་ལྔ་ཀ་ལ་སྦྱར་རོ། །ཉོན་མོངས་པ་ལྔ་ནི། དུག་ལྔའི་རྐང་གྲངས་དང་། དཔེ་དོན་བསྡེབ་པ་དང་། མཚན་ཉིད་བསྟན་པའོ། །རྐང་གྲངས་ནི། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་གོ། །དཔེ་དོན་སྡེབ་པ་ནི། འདོད་ཆགས་ཚ་ལ་དང་གར་བཅིན་བཞིན་དུ་འཐས། ཞེ་སྡང་། མེ་ལྟར་འབར། གཏི་མུག་མུན་འཐིབས། ང་རྒྱལ་རི་ལྟར་སྡོས། ཕྲག་དོག་རླུང་ལྟར་འཚུབས་པའོ། །མཚན་ཉིད་ནི། ཞེ་སྡང་རྣམས་པ་གསལ་རྒྱུན་ཐུང་། འདོད་ཆགས་རྣམ་པ་མི་གསལ་རྒྱུན་རིང་། ང་རྒྱལ་སྤངས་མཐོ། ཕྲག་དོག་ཡུལ་བཟང་། ཤེས་བཞིན་དུ་མི་སྤྱོད་པ་གཏི་མུག་གོ། །དེ་རྣམས་ནི་རྐྱེན་ནོ། ༈ །རྒྱུ་རྐྱེན་དེས་བསྐྱེད་པའི་འབྲས་བུའམ་ཉེས་པ་ནི། མ་རིག་པ་གཉིས་པོ་རྒྱུར་གཞག་ནས། ཞེ་སྡང་གིས་ཀུན་ནས་བསླང་པའི་ལས་མི་དགེ་བའི་རྐྱེན་གྱིས་འབྲས་བུ་དམྱལ་བར་སྐྱེས་ནས། ཉེས་པ་ཚ་གྲང་གི་སྡུག་བསྔལ་ཉམས་སུ་མྱོང་སྟེ། མདོ་བཅུ་ལས། ཞེ་སྡང་ལམ་གྱི་སྒོར་ཞུགས་ནས། །དམྱལ་བའི་གནས་ན་ཚ་གྲང་སྤྱོད། །སྔ་ཕྱི་དྲན་པའི་ཆོས་སྤྱོད་ཀྱང་། །སྔ་མ་ལས་ཀྱི་རྣམ་སྨིན་གྱིས། །ཚ་དང་གྲང་པ་ཉམས་སུ་མྱོང་། །ཞེས་པས་གསལ་ལོ། །འདོད་ཆགས་ཀྱིས་ཀུན་ནས་བསླང་པའི་ལས་མི་དགེ་བའི་རྐྱེན་གྱི་འབྲས་བུ་ཡི་དྭགས་སུ་སྐྱེས་ནས། ཉེས་པ་བཀྲེས་སྐོམ་གྱི་སྡུག་བསྔལ་ཉམས་སུ་མྱོང་སྟེ། ཡང་དེ་ཉིད་ལས། འདོད་ཆགས་ལམ་གྱི་སྒོར་ཞུགས་ནས། །ཡི་དྭགས་གནས་ན་བཀྲེས་སྐོམ་སྤྱོད། །བསྔོས་ནས་ཚིམ་པའི་ཆོས་ཡོད་ཀྱང་། །སྔ་མའི་ལས་ཀྱི་རྣམ་སྨིན་གྱིས། །བཀྲེས་དང་སྐོམ་པ་ཉམས་སུ་མྱོང་། །ཞེས་པས་གསལ་ལོ། །གཏི་མུག་གིས་ཀུན་ནས་བསླང་བའི་ལས་མི་དགེ་བའི་རྐྱེན་གྱིས་འབྲས་བུ་དུད་འགྲོར་སྐྱེས་ནས། ཉེས་པ་གླེན་ལྐུགས་ཀྱི་སྡུག་བསྔལ་ཉམས་སུ་མྱོང་སྟེ། ཡང་དེ་ཉིད་ལས། འདོད་ཆགས་ལས་ཀྱི་སྒོར་ཞུགས་ནས། །ཡི་དྭགས་གནས་ན་བཀྲེས་སྐོམ་སྤྱོད། །བསྔོས་ནས་ཚིམ་པའི་ཆོས་ཡོད་ཀྱང་། །སྔ་མའི་ལས་ཀྱི་རྣམ་སྨིན་གྱིས། །བཀྲེས་དང་སྐོམ་པ་ཉམས་སུ་མྱོང་། །ཞེས་པས་གསལ་ལོ། །གཏི་མུག་གིས་ཀུན་ནས་བསླང་བའི་ལས་མི་དགེ་བའི་རྐྱེན་གྱིས་འབྲས་བུ་དུད་འགྲོར་སྐྱེས་ནས། ཉེས་པ་གླེན་ལྐུགས་ཀྱི་སྡུག་བསྔལ་ཉམས་སུ་མྱོང་སྟེ། ཡང་དེ་ཉིད་ལས། གཏི་མུག་ལས་ཀྱི་སྒོར་ཞུགས་དུད་འགྲོའི་གནས་ན་གླེན་ལྐུགས་སྤྱོད། །རིགས་པ་འཕྲ་མོའི་ཆོས་ཡོད་ཀྱང་། སྔ་མ་ལས་ཀྱི་རྣམ་སྨིན་གྱིས། གླེན་ཞིང་ལྐུགས་པར་ཉམས་སུ་མྱོངས། །ཞེས་པས་གསལ་ལོ། །དེ་ཡང་མཚམས་མེད་ལྔ་དང་དེ་དང་ཉེ་བ་ལྔ། ལྕི་བཞི་ལོག་བརྒྱད་ཁ་ན་མ་ཐོ་གསུམ། །འདི་སྤྱོད་ངན་སོང་གསུམ་དུ་གདོན་མི་ཟ། །ཞེས་པས་གསལ་ལོ། །ཡང་འདོད་ཆགས་ཀྱི་ཀུན་ནས་བསླང་བའི་དགེ་བ་བཅུའི་རྐྱེན་གྱིས་འབྲས་བུ་མིར་སྐྱེས་ནས། ཉེས་པ་འགྱུར་བའི་སྡུག་བསྔལ་ཉམས་སུ་མྱོང་ངོ་། །ཡང་ང་རྒྱལ་གྱིས་ཀུན་ནས་བསླང་པའི་ལས་དགེ་བ་བཅུ་སྤྱད་པའི་རྐྱེན་གྱིས་འབྲས་བུ་ལྷར་སྐྱེས་ནས། ཉེས་པ་ལྟུང་བའི་སྡུག་བསྔལ་ཉམས་སུ་མྱོང་ངོ་། །ཡང་ཕྲག་དོག་གིས་ཀུན་ནས་བསླང་པའི་ལས་དགེ་བ་བཅུ་སྤྱད་པའི་རྐྱེན་གྱིས་འབྲས་བུ་ལྷ་མ་ཡིན་དུ་སྐྱེས་ནས། ཉེས་པ་འཐབ་རྩོད་ཀྱི་སྡུག་བསྔལ་ཉམས་སུ་མྱོང་ངོ་། །རྒྱས་པ་ལས། དགེ་བ་བཅུ་སྤྱོད་མི་དགེ་སྤོང་བྱེད་པ། །འདོད་ཁམས་ལྷ་དང་མི་རུ་སྐྱེས་པའི་རྒྱུ། །ཞེས་པས་གསལ་ལོ། །ཡང་མ་རིག་པས་རྒྱུ་བྱས། ཉོན་མོངས་པ་བག་ལ་ཉལ་དུ་གནས་པ་ལ། རགས་སོགས་ཞེས་བྱ་བ་ཚད་མེད་བཞི་དམིགས་པ་དང་བཅས་ཏེ་རང་རྒྱུད་དུ་བསྒོམས་པའི་རྐྱེན་གྱིས་འབྲས་བུ་གཟུགས་ཁམས་གནས་རིས་བཅུ་བདུན་དུ་སྐྱེས་ནས། ཉེས་པ་ལྟུང་བའི་སྡུག་བསྔལ་ཉམས་སུ་མྱོང་བའོ། །ཡང་རྒྱུ་མ་རིགས་པས་བྱས། ཉོན་མོངས་པ་བག་ལ་ཉལ་དུ་གནས་པ་ལས། ཞི་སོགས་ཞེས་བྱ་བ་ལྟ་བས་མ་ཟིན་པའི་སྒོམ་ཞི་གནས་བློ་ཡུལ་བྱས་ཏེ་བསྒོམས་པའི་རྐྱེན་གྱིས་འབྲས་བུ་སྐྱེ་མཆེད་མུ་བཞིར་སྐྱེས་ནས། ཉེས་པ་ལྟུང་པའི་སྡུག་བསྔལ་ཉམས་སུ་མྱོང་བའོ། །རྒྱས་པ་ལས། ཚད་མེད་བཞི་སོགས་མི་གཡོ་སྒོམ་བྱེད་པ། །ཚངས་གནས་ལ་སོགས་སྐྱེ་བའི་རྒྱུ་ཡིན་ནོ། །ཞེས་པས་གསལ་ལོ། །གསུམ་པ་འཁྲུལ་པ་བཟློག་པའི་ཐབས་ནི། བདག་མེད་རྟོགས་ན་བདེ་བ་ཆེ། །ཞེས་པས་བསྟན་ཏེ། དེ་ཡང་སྤྱིར་འགྲོ་དྲུག་གམ་ངན་སོང་གི་སེམས་ཅན་རྒྱ་ཆེ་ཞིང་གྲངས་མང་བའི་ནང་ནས། དཔལ་འབྱོར་ཕུན་སུམ་ཚོགས་པ་མི་ལུས་རིན་པོ་ཆེ་ཐོབ། ཆོས་མེད་གླིང་མང་པ་ལས་འཛམ་བུ་གླིང་དུ་སྐྱེས། ཆོས་ཀྱི་མིང་ཡང་མི་གྲགས་པའི་གནས་མང་བ་ལས། ཆོས་དར་བའི་ས་ཕྱོགས་སུ་སྐྱེས། །དད་པ་མེད་པའི་རྟེན་གྱིས་གང་ཟག་མི་ལུས་རིན་པོ་ཆེ་ཐོབ་ནས་ཀྱང་། རྣམ་པར་སྨིན་པའི་ཁུར་ཁུར་ནས་ངན་སོང་དུ་སྟོང་ལོག་བྱེད་པ་ལ། དད་པ་ཡོད་པའི་དུས་འདིར་འཁྲུལ་པ་མི་བཟློག་པའི་ཐབས་མེད་དོ། །དེ་ལ་གཉིས་ཏེ། བརྒྱུད་ནས་བཟློག་པ་དང་། དངོས་སུ་བཟློག་པའོ། །དང་པོ་ནི་ངན་སོང་དུ་སྐྱེ་བར་བྱེད་པའི་རྐྱེན་སྡིག་པ་མི་དགེ་བ་ཡིན་པས་རྒྱུ་འབྲས་ཤེས་པར་བྱ་སྟེ། དགེ་སྡིག་ཤན་ཐང་ཕྱེ་ལ་འཁྲུལ་པ་བཟློག་གོ། །གཉིས་པ་དངོས་སུ་བཟློག་པ་ལ་བཞི། འཁོར་བའི་རྒྱུ་མ་རིག་པ་ཡིན་པས། བདག་འཛིན་བདག་མེད་དུ་ངོ་སྤྲད་དོ། །མ་རིག་པ་རང་སངས་རྒྱས་སུ་བཟློག་པ་དང་། འཁོར་བ་སྤྱིའི་རྐྱེན་འདོད་ཡོན་དང་དུག་ལྔ་ཡིན་པས། འདོད་ཡོན་རང་གྲོལ་དུག་ལྔ་ཆོས་ཉིད་དུ་ངོ་སྤྲོད་དེ་རང་གྲོལ་དུ་བཟློག་པ་དང་། མཐོ་རིས་ཀྱི་རྐྱེན་དགེ་བ་དང་། ཞི་རགས་ཡིན་པས། ཀུན་དུ་བཟང་པོར་ངོ་སྤྲད་དེ་བླང་དོར་མེད་པར་བཟློག་པ་དང་། འབྲས་བུ་འམ་ཉེས་པ་སྡུག་བསྔལ་ཡིན། །སྡུག་བསྔལ་བྱང་ཆུབ་སེམས་སུ་ངོ་སྤྲད་དེ། སྡུག་བསྔལ་ཆོས་སྐུར་ཤེས་པས་བཟློག་པའོ། ༈ །དེ་ལ་བརྒྱུད་དེ་བཟློག་པ་ལས་རྒྱུ་འབྲས་ཤེས་པར་བྱ་སྟེ། དགེ་སྡིག་ཤན་ཐང་དབྱེ་བ་ནི། །ལས་འབྲས་ལུང་གིས་བསྒྲུབ་པ་དང་། །རིགས་པས་བསྒྲུབ་པ་དང་། །རྣམ་གྲངས་དང་། ལས་འབྲས་ཀྱི་དཔེ་བསྟན་པ་དང་བཞིའོ། །དང་པོ་ལ་ལྔ་ལས། ལས་ཡོད་ངེས་པའི་ལུང་ནི། ལས་བརྒྱ་པ་ལས། ཞིང་དང་ས་བོན་ཇི་བཞིན་དུ། །དགེ་སྡིག་ལས་ཀྱང་དེ་བཞིན་ནོ། །ཞེས་སོ། །ལས་ཆུད་མི་ཟ་བའི་ལུང་ནི། ཡང་དེ་ཉིད་ལས། ལུས་ཅན་དག་ནི་ལས་རྣམས་ནི། ། བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་བྱེད། །ཅེས་སོ། །ལས་ཐ་དད་པའི་ལུང་ནི། དབུལ་པོ་དེས་པས་ཞུས་པའི་མདོ་ལས། ས་བོན་མངར་བ་རྣམས་ལས་ནི། །འབྲས་བུ་མངར་བར་སྐྱེ་བར་འགྱུར། །ས་བོན་ཚ་བ་རྣམས་ལས་ནི། །འབྲས་བུ་ཚ་བར་སྐྱེ་བར་འགྱུར། །ཕན་པའི་འབྲས་བུ་བདེ་བ་སྟེ། །གནོད་པའི་འབྲས་བུ་སྡུག་བསྔལ་རང་འབྱུང་། ཞེས་སོ། །མས་བསྒོམ་མི་བཏུབ་པའི་ལུང་ནི། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་བཙུན་མོ་དང་འཁོར་རྣམས་ཀྱི་སླད་དུ། སྡིག་པ་མི་དགེ་བའི་ལས་ཆུང་ངུ་ཙམ་ཡང་མ་མཛད་ཅིག །དེ་ཅིའི་ཕྱིར་ན། སྡུག་བསྔལ་གྱི་སྐལ་ལེན་འགའ་ཡང་མ་མཆིས་པའི་ཕྱིར་རོ། །ཞེས་པས། དཀར་ཕྱུག་པོའི་ལོ་རྒྱུས་ལྟ་བུའོ། །རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་བའི་ལུང་ནི། མྱ་ངན་ལས་འདས་པ་ལས། སྡིག་པ་ཆུང་ངུ་འཕྲ་མོ་ཡང་། །མི་གནོད་ཙམ་དུ་བརྙས་མི་བྱ། །ཆུ་ཡི་ཐིག་པ་ཆུང་ངུ་ཡིས། །སྣོད་ཆེན་ཁད་ཀྱིས་འགང་པར་འགྱུར། །ཞེས་གསུངས་སོ། །ལས་འབྲས་རིགས་པས་བསྒྲུབ་པ་ནི། རྒྱུ་སྡིག་པ་མི་དགེ་བ་སྤྱོད་པ་ལས་འབྲས་བུ་ངན་སོང་དང་སྡུག་བསྔལ་འབྱུང་བ་འདི། རིགས་འོས་གཤའ་ཤིན་ཏུ་འཐད་དོ། །རྒྱུ་དགེ་ལས་འབྲས་བུ་མཐོ་རིས་དང་བདེ་བ་ཐོབ་པ་འདི། རིགས་འོས་གཤའ་ཤིན་ཏུ་འཐད་དོ། །དེ་ཡང་འདི་ལྟར། བསོད་པའི་ལན་པ་གསོད་དུ་འོང་ལ། བཟུང་པའི་ལན་འཛིན་དུ་འོང་། ཕྲོགས་པའི་ལན་འཕྲོག་ཏུ་འོང་། བརྡུངས་པའི་ལན་བརྡུང་དུ་འོང་བཞིན་ནོ། །ལས་འབྲས་ཀྱི་རྣམ་གྲངས་ནི། བཞི་ཚན་གསུམ་ལས་དང་པོ་ནི། འདི་དང་ཕྱི་མ་གཉིས་ཀར་བདེ་བའི་ལས། འདིར་སྡུག་ཕྱི་མར་བདེ་བའི་ལས། འདིར་བདེ་ཕྱི་མར་སྡུག་པའི་ལས། འདི་དང་ཕྱི་མ་གཉིས་ཀར་སྡུག་པའི་ལས་སོ། །བཞི་ཚན་གཉིས་པ་ནི། བསམ་པ་སྦྱོར་བ་གཉིས་ཀ་དཀར་བའི་ལས། བསམ་པ་གནག་ལ་སྦྱོར་བ་དཀར་བའི་ལས། བསམ་པ་དཀར་བའི་སྦྱོར་བ་གནག་པའི་ལས། བསམ་པ་དང་སྦྱོར་བ་གཉིས་ཀ་གནག་པའི་ལས་སོ། །བཞི་ཚན་གསུམ་པ་ནི། རྣམ་པ་ནས་རྣམ་པར་དཀར་བའི་ལས། རྣམ་པ་ནས་རྣམ་པར་གནག་པའི་ལས། དཀར་ནག་འདྲེས་པའི་ལས། དཀར་ཀྱང་མི་དཀར་གནག་ཀྱང་མི་གནག་པའི་ལས་སོ། ༈ །ལས་འབྲས་ཀྱི་དཔེ་ནི། གྱང་ལ་སྲིད་པའི་འཁོར་ལོ་རྒྱུ་རྐྱེན་འདུས་ནས་བྲིས་པས། དོན་ལ་གྲུབ་པ་མེད་ཀྱང་གནས་སྐབས་རིགས་དྲུག་གི་གནས་བདེན་བདེན་ལྟར་སྣང་བ་བཞིན་དུ། དོན་ལ་གྲུབ་པ་མེད་ཀྱང་གནས་སྐབས་བདེ་སྡུག་གི་བྱེ་བྲག་ཡོད་པ་ལྟར་སྣང་ངོ་། །དེས་ན་མི་དགེ་བ་བཅུ་ལ་སོགས་པ་འདི་འཕྲ་ཞིང་འཕྲ་བ་ནས་འཛེམས་དགོས་གལ་ཏེ་བག་མེད་པའི་དབང་གིས་སྡིག་པས་འགོས་སྲིད་པས། དེ་ཡང་དུས་ལས་མ་འདས་པའི་སྒོ་ནས་བཤགས་ཏེ་དག་པར་བྱའོ། །གནས་སྐབས་རང་ལ་ཕན་པས་དགེ་བའི་ལས་ལ་འབད་པར་བྱའོ། །དེས་ནི་ངན་སོང་དུ་བསྐྱུར་ཀྱང་མི་འགྲོ་སྟེ། དེ་ལྟར་དགེ་སྡིག་ཤན་ཐང་ཕྱེ་བས་ངན་སོང་དུ་མི་ལྟུང་། མཐོ་རིས་ལྷ་དང་མིའི་རྟེན་ཁྱད་པར་ཅན་ཐོབ་ནས་འཁྲུལ་པ་བརྒྱུད་དེ་བཟློགས་སོ། ༈ །འཁོར་བ་སྤྱིའི་རྒྱུ་མ་རིགས་པ་ཡིན་པས་བདག་འཛིན་བདག་མེད་དུ་ངོ་སྤྲད་དོ། །མ་རིགས་པ་རང་སངས་སུ་བཟློག་པ་ནི། དེ་ལ་བདག་ཏུ་འཛིན་པ་འདི་བསམ་གྱིས་མི་ཁྱབ་ཀྱང་། བསྡུ་ན་མ་བརྟགས་མ་དཔྱད་པའི་བདག་འདི་གསུམ་དུ་འདུ་སྟེ། ཕྱི་ཡུལ་གྱི་བདག་འཛིན། བར་ཕུང་པོའི་བདག་འཛིན། ནང་སེམས་ཀྱི་བདག་འཛིན་ནོ། །དེ་ལ་དང་པོ་ནི། ཕྱི་རོལ་རི་ལུང་དང་། ཞིང་ཡུལ་ཁང་ཁྱིམ། དགྲ་གཉེན་སྣ་ཚོགས་སུ་འཛིན་པའོ། །བར་ཕུང་པོའི་བདག་འཛིན་ནི། གཟུགས་ཀྱི་ཕུང་པོ་ལ་བརྟེན་ནས་མགོ་དང་རྐང་པ་ལ་སོགས་པར་ང་བདག་སྣ་ཚོགས་སུ་འཛིན་པ་དང་། དེ་ལ་བརྟེན་པའི་མིང་རུས་ལ་སོགས་པ་སྣ་ཚོགས་སུ་འཛིན་པའོ། །ནང་སེམས་ཀྱི་བདག་འཛིན་ནི། སེམས་དུས་གསུམ་རྟོག་པའི་རྗེས་སུ་འབྲངས་ཏེ་དེ་རེ་རེ་ལ་བརྟེན་ནས་ཀྱང་བདག་ཏུ་བཟུང་ནས་དུག་ལྔའམ་དུག་གསུམ་རང་ག་མར་སོགས་པའོ། །དེ་ལྟར་བདག་ཏུ་བཟུང་པས་སྡུག་བསྔལ་ཐམས་ཅད་བྱུང་སྟེ། གསང་སྙིང་ལས། སྲིད་རྩེའི་ཉེས་དམིགས་བདག་ཏུ་རྟོགས་ལས་འཕྲོས། ཞེས་པས་གསལ་ལོ། །དེ་ཡང་བདག་ཏུ་འཛིན་པ་འདི་སྤངས་པས་མི་སྤོངས། བཀག་པས་མི་ཁེགས། བསྒྱུར་བས་མི་འགྱུར་བས་བདག་མེད་དུ་ངོ་སྤྲད་དེ། དེ་ཡང་ཕུང་པོ་དང་སེམས་གཉིས་བདག་མེད་དུ་ངོ་སྤྲད་པས། ཕྱི་ཡུལ་ཤུགས་ལ་ཆོད་པ་ཡིན་ཏེ། བདག་བྱ་བ་འདི་ལུས་ལ་ཟེར་རམ། སེམས་ལ་ཟེར་རམ། གང་ན་འདུག་བརྟག་པ་ཐོང་དང་། ལུས་ལ་ཟེར་ན། ཡ་གི་སྤྱི་བོའི་གཙུག་ནས་མ་གི་རྐང་པའི་མཐིལ་ཡན་ཆད་དུ་ཚོལ་དང་། མགོ་བོས་བདག་བཏུབ་བམ། ཡན་ལག་དང་རོ་སྟོད་རོ་སྨད་དང་། ནང་ཁྲོལ་དང་གཡས་གཡོན་ཐམས་ཅད་ལ་བརྟགས་པས་གང་ལ་ཡང་མ་རྙེད་དེ། ཐ་མལ་པའི་ཞེན་པ་ལ་སྙིང་ལ་ཡོད་པ་སྙམ་བྱེད་དེ། དེ་ལ་ཡོད་ན་རོ་ལ་ཡང་སྙིང་ཡོད་པས་བདག་ཡོད་དགོས་ཏེ། རོ་དེ་མེ་ལ་བསྲེགས་ཀྱང་། ས་ལ་སྦས་ཀྱང་། རྦབ་ཏུ་བོར་ཀྱང་། ཡན་ལག་བཅད་ཀྱང་། ཁྱིས་ཟོས་ཀྱང་མི་དགའ་འམ། རྟོག་པ་མི་འདུག་སྟེ། དེས་ན་སྙིང་ལའང་བདག་གྲུབ་པ་མི་འདུག་གོ། །དེས་ན་ལུས་འདི་དང་པོ་རྒྱུ་ངན ། ཤ་དང་རུས་པ་ཕ་མའི་རྒྱུ་དེ་འདྲ། བར་དུ་རྐྱེན་ངན། རྒྱུ་རྐྱེན་འདུ་བའི་སོ་ནམས་དེ་འདྲ་ལུས་སུ་གྲུབ་ནས་ཀྱང་ཕྱི་ལྤགས་པ་ལབ་ལེབ། ནང་རུས་པ་གང་གོང་། བར་ན་རྩ་དང་རྒྱུས་པ་བྲང་བྲེང་། ནང་མི་གཙང་བའི་རྫས་སུམ་ཅུ་རྩ་དྲུག་གིས་གང་བ། ཁྲག་དང་ཆུ་སེར་ཆུ་ལ་གཡར། དྲོད་མེ་ལ་གཡར། ཤ་དང་རུས་པ་ས་ལ་གཡར། དབུགས་རླུང་ལ་གཡར་བས། ཐ་མ་འཇིག་སླ་སྟེ། ནད་རྐྱེན་འཆི་བའི་རྐྱེན་བསམ་གྱིས་མི་ཁྱབ་བོ། །སྐྱེ་རྒ་ན་འཆི་དང་བཅས་པ་འདི་ལ། བདག་བཏུབ་པ་མི་འདུག་སྟེ། ཐེག་ཆེན་ལས། ལུས་ཀྱང་བདག་མ་ཡིན་ཏེ་ཤ་ཁྲག་རུས་པ་རྣམས། །འབྱུང་ཆེན་འདུལ་ཕྱིར་ཕྱི་རོལ་བརྩིག་པ་འདྲ། །ཞེས་པས། དེས་ན་ལུས་འདི་ཕྱི་རོལ་གྱི་རྩིག་པ་དང་འདྲ་སྟེ། བརྟགས་ཤིང་དཔྱད་པས་ལུས་ལ་བདག་མ་གྲུབ་པ་གཅིག་ཉམས་སུ་མྱོང་ན། ལུས་ཀྱི་བདག་འཛིན་འདི་སྔར་བས་ཆུང་དུ་འགྲོ་དགོས་པ་ཡིན་ནོ། །དེ་ལ་རྟེན་པའི་མིང་དང་། རུས་ལ་སོགས་པ་ལ་ཡང་བརྟག་སྟེ། དེ་ལ་མིང་འདི་མའི་ཁོང་པ་ནས་སྟབས་ཅིག་ཏུ་འོངས་པར་ཡང་མི་འདུག །ཕ་མ་གཉིས་འདུས་ཀྱི་བཏགས། བཏགས་པ་ལ་མངོན་པར་ཞེན་པ་ཡིན་ཏེ། མིང་འདི་སྤོར་ཡང་བཏུབ་པར་འདུག །གླ་བཏགས་ལ་སོགས་པ་འགྱུར་ནས་ཡང་འགྲོ་བར་འདུག་པས། ཐེག་ཆེན་ལས། མིང་ཡང་བདག་མ་ཡིན་ཏེ་བཏགས་པ་ཙམ། ཞེས་པས། མིང་འདི་བཏགས་པར་འདུག་པས་བརྟགས་ཤིང་དཔྱད་པས་མིང་ལ་བདག་མ་གྲུབ་པ་གཅིག་ཉམས་སུ་མྱོང་ན། མིང་ནས་བོས་ནས་སྟོད་སྒྲ་དང་སྨད་སྒྲ་ལ་སོགས་པའི་འཛིན་པ་སྔར་བས་ཆུང་དུ་འགྲོ་དགོས་སོ། །དེ་བཞིན་དུ་རུས་པ་ལ་སོགས་པ་ལ་ཡང་བརྟག་སྟེ། དང་པོ་རུས་ཀྱི་བྱུང་ཁུངས་དེད་ཙམ་ན། གཏན་མེད་ར་ལ་བཏགས་པ་ཡིན་ཏེ། འབྲོམ་རྟེན་ཙོམ་ཕ་ལྔ་ལ་སོགས་པ་ལྟ་བུ་ཡིན་པས། དེས་ན་རུས་ཀྱང་གནས་སྐབས་ཀྱི་བཏགས་པར་འདུག་པས། བཏགས་པས་རུས་ལ་ཡང་བདག་མ་གྲུབ་པ་གཅིག་ཉམས་སུ་མྱོང་ན། རུས་ཀྱི་ཞེན་པ་ཡང་ཆུང་དུ་འགྲོ་དགོས་སོ། །འོ་ན་བདག་བྱ་བ་སེམས་ལ་ཟེར་རམ་སྙམ་ན། སེམས་ཀྱིས་སེམས་ལ་ལྟོས་དང་། ལྟས་པའི་དུས་ན་ཅིའི་ངོ་བོར་ཡང་མ་གྲུབ་ངོས་བཟུང་ཐམས་ཅད་དང་བྲལ་ནས་འདུག་སྟེ། ཤེས་པ་སྐད་གཅིག་མ་སྔ་མ་ནི་འདས་པར་འདུག །འདས་པ་མེད་པ་ཡིན་པས་བདག་མི་བཏུབ ། །ཤེས་པ་སྐད་ཅིག་མ་ཕྱི་མ་ནི་མ་འོངས་པར་འདུག །མ་འོངས་པ་མེད་པར་ཡིན་པས་བདག་མ་བཏུབ། ད་ལྟར་གྱི་རིག་པ་འདི་ངོ་བོས་སྟོང་གི་འདུག་སྟེ། རིག་པའི་དུས་ནི་རིག་མཁན་དེ་ཉིད་སྟོང་པར་འདུག །འགྱུ་བའི་དུས་ན་འགྱུ་མཁན་དེ་ཉིད་སྟོང་པར་འདུག །སྣ་ཚོགས་སུ་གསལ་བའི་དུས་ན། གསལ་མཁན་དེ་ཉིད་སྟོང་པར་འདུག་པས། དེས་ན་སེམས་ཀྱིས་ཀྱང་བདག་མ་བཏུབ། ཤེས་པ་སྐད་གཅིག་མ་སྔོན་འདས་པ། ཕྱིས་མ་འོངས་པ། ད་ལྟར་བ་ངོ་བོས་སྟོང་པས། ད་རིག་པ་འཆར་ཚད་ངོ་བོས་སྟོང་པར་འདུག་པས་སྟོང་པ་རྒྱུན་མི་འཆད་དུ་འདུག་པའོ། །རིག་པ་སྟོང་པ་དེ་ལ་བདག་གྲུབ་པ་མི་འདུག་པས། བདག་མེད་རྒྱུན་མི་འཆད་དུ་འདུག་པའོ། །དེ་མ་གྲུབ་ཙམ་ན་བདག་འཛིན་རང་སར་གྲོལ་བའི་རང་གསལ་རྟོག་མེད་ཀྱི་ཆོས་ཉིད་རྒྱུན་མི་ཆད་དུ་འདུག་པའོ། །ཆོས་ཉིད་དེ་སངས་རྒྱས་སྒམ་སྟེ་མ་མཛད། སེམས་ཅན་སྒྲིན་ཏེ་མ་བཅོས། ཆོས་ཉིད་དེ་ཡར་སངས་རྒྱས་ལ་བཟང་དུ་མ་བཀོད། མར་སེམས་ཅན་ལ་ངན་དུ་མ་བཀོད། བར་ལམ་པ་ལ་འབྲིང་པོར་མ་བཀོད་པས། རིག་པས་ཁྱབ་ཚད་ལ་མཉམ་པོར་གནས་པས། མཉམ་པ་ཉིད་ལས་མི་འཆད་དུ་འདུག་པའོ། །ཆོས་ཉིད་མཉམ་པ་ཉིད་དེའི་ངང་དུ་ཆོས་ཐམས་ཅད་རང་གྲོལ་རྒྱུན་མི་འཆད་དུ་འདུག་པའོ། །དེས་ན་ང་བདག་ཏུ་གྲུབ་པ་མི་འདུག་སྟེ། དོན་དྲུག་པ་ལས། སེམས་ཀྱི་རང་བཞིན་བཙལ་ཡང་མི་རྙེད་ན། །གཞན་ལ་འདི་འདྲ་ཞེས་ནི་བསྟན་དུ་མེད། །ཅེས་པས། ཧྲིལ་དྲིལ་བས་ལུས་ངག་ཡིད་གསུམ་ལ་བདག་མ་གྲུབ་པར་ཡིད་ཆེས་ཐག་ཆོད་ནས། བདག་འཛིན་དང་བྲལ་བའི་ངང་ལ་རིག་པ་རང་ལུགས་སུ་འདུག་པ་དེ་མངོན་དུ་གྱུར་པ་ནི་ཆོས་སྐུའོ། །དེ་ལྟར་རང་སེམས་རང་གིས་ཀྱང་མ་མཐོང་། གཞན་གྱིས་ཀྱང་མ་མཐོང་བ་དེ་ཀ་ལ་བདག་མེད་ཅེས་བྱ་སྟེ། དེ་ལྟར་ཕུང་པོ་དང་སེམས་ལ་བདག་མེད་ཙམ། ཕྱི་རོལ་ཡུལ་གྱི་སྣང་བ་རི་ལུང་ཁང་ཁྱིམ་དགྲ་གཉེན་ལ་སོགས་པའི་སྣང་བ་ཐམས་ཅད་གྲུབ་མི་སྲིད་དོ། །བདག་མེད་ཤུགས་ཀྱིས་ཤེས་སོ། །ཡང་ཕྱི་རོལ་གྱི་དངོས་པོ་འདི་ཡང་མི་རྟག་སྟེ། སྣོད་ཀྱི་འཇིག་རྟེན་འདི་ཆགས་འཇིག་གནས་སྟོངས་དང་བཅས་པས་མཐའ་མི་རྟག །གནས་སྐབས་དུས་བཞི་འགྱུར་ལྡོག་དང་བཅས་པས་ཀྱང་བདག་མེད་དོ། །བཅུད་ཀྱི་སེམས་ཅན་སྐྱེ་རྒས་ན་འཆི་དང་བཅས་པས་མཐའ་མི་རྟག །གནས་སྐབས་འགྱུར་བ་དང་བཅས་པས་བདག་མེད་དོ། །དེ་ལྟར་ངོ་བོ་བདག་མེད། གནས་ལུགས་དེ། ངོ་ཕྲོད་ཅིང་རྟོག་པས་མ་རིག་པ་རང་སངས་ཏེ། འཁོར་བའི་རྒྱུ་ཟད་དེ་འཁྲུལ་པ་བཟློག་གོ། །གཉིས་པ་འཁོར་བ་སྤྱིའི་རྐྱེན་འདོད་ཡོན་དང་དུག་ལྔ་ཡིན་པས། འདོད་ཡོན་རང་གྲོལ་དུག་ལྔ་ཆོས་ཉིད་དུ་ངོས་སྤྲད་དེ་རང་གྲོལ་དུ་བཟློག་པ་ཡིན། དེ་ཡང་འདོད་པའི་ཡོན་ཏན་ལྔ་ནི་ངོས་བཟུང་བ་ནི། མིག་ཡུལ་གཟུགས་ལ་སོགས་པ་ཡིན་པ། དེ་ཡང་སྐྱེ་བོ་ནི་འདོད་ཡོན་གང་ཤར་ལ། དུག་ལྔ་འམ་དུག་གསུམ་སོགས་པས་འཁོར་བའི་རྐྱེན་ཡིན་ལ། འཁྲུལ་པ་བཟློག་པའི་གང་ཟག་གིས་མིག་ཡུལ་དུ་གཟུགས་སྣང་བ་ལ། ལེགས་ཉེས་སུ་བཀྲའ་ས་ལེ་འདུག་ཀྱང་དེ་ཀ་ལ་བལྟས་པས་དེ་ཡང་སེམས་ཀྱི་སྣང་བར་འདུག་ལ། སེམས་ལ་རང་བཞིན་གྲུབ་པ་མི་འདུག་པས། གཟུགས་སྣང་སྟོང་དབྱེར་མེད་དུ་རང་གྲོལ་ཏེ། རིག་པ་རང་སྣང་གི་སྐུ་སྣང་སྟོང་དབྱེར་མེད་དུ་ཤེས་སོ། །དེས་བཞི་ཀ་འགྲེ་སྟེ། རྣ་བའི་ཡུལ་སྒྲ་དང་། སྣའི་ཡུལ་དྲི་དང་། ལྕེའི་ཡུལ་རོ་དང་། ལུས་ཀྱི་ཡུལ་རེག་བྱ་ཡང་ཤེས་པར་བྱའོ། །དེས་འདོད་པའི་ཡོན་ཏན་ལྔ་རང་སར་གྲོལ་ཏེ་རྐྱེན་བཟློག་གོ། །དུག་ལྔ་ཆོས་ཉིད་དུ་ངོ་སྤྲོད་པ་ནི། དུག་ལྔ་ངོས་བཟུང་པ་དང་། ཆོས་ཉིད་དུ་ངོ་སྤྲོད་པ་གཉིས་ལས། ངོས་བཟུང་པ་ནི། རྐྱེན་གྱི་སྐབས་ཀྱིས་ཤེས་པར་བྱ་སྟེ། དེ་ཡང་རང་རྒྱུད་པ་ནི། དང་པོ་ཁྲེལ་འཛེམ་ངོ་ཚ་ཤོར། བར་དུ་དུག་ལྔ་རྒྱུན་དང་བཅས། ཐ་མ་བསྔགས་པར་བལྟ་བའོ། །དེ་ནི་རང་རྒྱུད་པའོ། །འོ་ན་དེ་སྤངས་ངམ། སྦྱང་ངམ། བསྒྱུར་རམ། དབང་དུ་བྱ་བའམ་ཞེ་ན། སྤངས་པས་མི་སྤོངས། སྦྱངས་པས་མི་འབྱོངས། བསྒྱུར་བས་མི་འགྱུར། དབང་དུ་བྱས་པས་མི་འདུས་ཏེ། ཆོས་ཉིད་དུ་ངོ་སྤྲོད་དོ། །དེ་ཡང་ཇི་ལྟ་བུ་ཞེས་ན་ཁྱིམ་བདག་གཅིག་གི་བཟའ་ཤིང་གི་ར་བར་དུག་གི་མྱུ་གུ་གཅིག་སྐྱེས་ཏེ་བདག་པོ་ན་རེ་ལྡུམ་རར་དུག་སྐྱེས་པས། ས་ཚུན་ཆད་གླང་པོ་དང་མ་ཧེ་ལ་བཀལ་ཏེ་ཕྱིའི་རྒྱ་མཚོ་ལ་སྐྱེལ་ཟེར་ནས་སྤོང་ངོ་། །སྨན་པ་ཞིག་བྱུང་སྟེ་ལྡུམ་རའི་དུག་འདོན་པ་ལས་ཚུན་ཆད་རྒྱ་མཚོ་ལ་སྐྱེལ་བ་ཡང་མི་འོང་། གླང་པོ་དང་མ་ཧེའང་སྙིང་རྗེ་བས། ལྡུམ་ར་འདི་ཆུས་སྦངས་ནས་དུག་ནས་ཐེན་པས་རྩ་བ་ཁབ་རྩེ་ཙམ་ཡང་མ་ལུས་པར་འོང་། དེ་བཙོས་པས་དུག་གི་ནུས་པ་མི་འབྱུང་ཟེར་སྦྱོང་། སྔགས་མཁན་གཅིག་ན་རེ། བདག་པོ་ལྟར་ཡང་མ་ཡིན། སྨན་པ་ལྟར་ཤིང་བུ་ཟད་ཟད་དུ་བཙོ་ཡང་མི་དགོས། ངས་སྔགས་བཏབ་བས་སྙིང་རླུང་དང་གྲང་པ་ལ་ཡང་ཟེར་ནས་དུག་སྨན་དུ་བསྒྱུར་རོ། །རྨ་བྱ་ང་ན་རེ་བདག་པོ་དང་སྨན་པ་ལྟར་ཡང་མ་ཡིན། སྔགས་མཁན་ལྟར་མགོ་རུལ་རུལ་དུ་སྔགས་འདེབས་པ་ཡང་དཀའ་བས། ང་དུག་ལ་དབ་པ་ཡིན་པས་ཟོས་པས་ཆོག་ཟེར་ནས་དུག་ལ་དབང་དུ་བྱེད་དོ། །ལྡུམ་ར་ན་རེ་ང་ལ་སྨན་སྐྱེ་ནའང་སྐྱེས་དགའ་རྒྱུ་ཡང་མེད། དུག་སྐྱེ་ནའང་སྐྱེས་ང་རང་གི་ནང་ཡིད་མི་དགའ་རྒྱུ་ཡང་མེད་ཟེར་ནས། གཉིས་ཀ་ཁོ་རང་གི་ནང་དུ་འདུག་པས་སྤང་བླང་མེད་དོ། །དཔེ་དེ་བཞིན་དུ་ལྡུམ་ར་དང་འདྲ་བའི་གནས་ལུགས་ལ། ཉོན་མོངས་དུག་ལྔ་ཤར་བས། བདག་པོ་ལྟ་བུའི་ཉན་རང་གི་བློར་མ་ཤོང་སྟེ། དགྲ་དང་ཚེར་མའི་ཚུལ་དུ་ལྟས་ནས་ཞེ་སྡང་གི་གཉེན་པོར་བྱམས་པ། འདོད་ཆགས་ཀྱི་གཉེན་པོར་མི་སྡུག །གཏི་མུག་གི་གཉེན་པོར་རྟེན་འབྲེལ་བསྒོམས་ནས་སྤོང་སྟེ། དེས་ཀྱང་དུག་ལྔ་འདུག་ས་བསྒྱུར་བ་ལས་མ་བྱུང་ངོ་། །སྨན་པ་ལྟ་བུའི་བྱང་ཆུབ་སེམས་དཔའ་ན་རེ། སྤངས་པས་མི་སྤོངས་པས། དོན་དམ་པའི་ངོ་བོ་ལ་དུག་ལྔ་མ་གྲུབ། ཀུན་རྫོབ་སྒྱུ་མ་ལ་དུག་ལྔར་སྣང་བ་ཡིན་ཏེ། དོན་དམ་སྤྲོས་བྲལ་དུ་སྦྱོར་ཏེ། དེས་ཀྱང་དོན་དམ་བཟང་པོས་ཀུན་རྫོབ་ངན་པ་ལྟས་པས། གཉིས་འཛིན་ལས་མ་གྲོལ་ལོ། །སྔགས་མཁན་ལྟ་བུའི་སྔགས་ཕྱི་པ་ན་རེ། སྦྱངས་པས་མི་འབྱོངས་པས། ཞེ་སྡང་རྡོ་རྗེ་སེམས་དཔའ། འདོད་ཆགས་སྣང་བ་མཐའ་ཡས། གཏི་མུག་རྣམ་པར་སྣང་མཛད། ང་རྒྱལ་རིན་ཆེན་འབྱུང་ལྡན། ཕྲག་དོག་དོན་ཡོད་གྲུབ་པར་བསྒྱུར་ཏེ། དེས་ཀྱང་ལྷ་བཟང་པ། དུག་ལྔ་ངན་པར་བལྟས་པས་གཉིས་འཛིན་ལས་མ་གྲོལ་ལོ། །རྨ་བྱ་ལྟ་བུའི་གསང་སྔགས་ནང་པ་ན་རེ། བསྒྱུར་བས་མི་འགྱུར་བས། ཉོན་མོངས་རང་དང་སྤྱི་བསྟན་པ། མཚན་ཉིད་མ་ནོར་དོན་རྟོགས་ནས། རྣམ་པར་བྱང་པའི་ལམ་དུ་འགྱུར། ཞེས་པས། དུག་ལྔའི་མཚན་ཉིད་མ་ནོར་བ་རྟོགས་ན་རྣམ་པར་བྱང་བའི་ལམ་ཡིན་ཟེར་ནས་དབང་དུ་བྱེད་དེ། དེས་ཀྱང་གཉིས་འཛིན་ལས་མ་གྲོལ་ལོ། །ལྡུམ་ར་ལྟ་བུའི་རྫོགས་ཆེན་པ་ན་རེ། དུག་ལྔ་སྐྱེས་ན་ཡང་སྐྱེས་ཡེ་ཤེས་སྐྱེ་ན་ཡང་སྐྱེས། དུག་ལྔ་ཉིད་ཡེ་ཤེས་ཡིན་ཏེ། དུག་ལྔ་ཆོས་ཉིད་ཏུ་ངོ་སྤྲོད་དོ། །དེ་ཡང་ཇི་ལྟར་ངོ་སྤྲོད་ན། ཞེ་སྡང་སྐབས་རྩེར་སྐྱེས་པའི་དུས་དེར་དེ་རང་ལ་ཞེས་ལྟས་པས། སེམས་ཉིད་རང་སྣང་དུ་འདུག་པས་སྣང་བའི་ཆོས་ཉིད། དེ་ཡང་ངོས་བཟུང་དང་བྲལ་ནས་འདུག པས་སྟོང་པའི་ཆོས་ཉིད། ཞེ་སྡང་དུ་སྣང་བ་དང་སྐྱེ་བ་མེད་པ་དུས་མཉམ་དུ་འདུག་པས་གཉིས་སུ་མེད་པའི་ཆོས་ཉིད་དོ། །དེ་ལྟར་ཞེ་སྡང་སྐྱེས་པ་དང་། ཁ་ནང་དུ་ལོག་ནས་ལྟས་པས་ཞེ་སྡང་ཆོས་ཉིད་ཏུ་གྲོལ་ལོ། །དེས་མཚོན་ནས་ཉོན་མོངས་གང་ཤར་ཆོས་ཉིད་དུ་གྲོལ་བས། ཉོན་མོངས་གང་ཤར་ཆོས་ཉིད་དུ་འདུག་པའོ། །ཡང་ན་ཞེ་སྡང་མདའ་ལྟར་འཕང་། གཞུ་ལྟར་དགུག །སོར་གཞག་ཅེས་བྱ་སྟེ། མདའ་ལྟར་འཕང་པ་ནི། ཞེ་སྡང་སྐྱེས་པའི་དུས་སུ་སེམས་ཀྱི་རྗེས་སུ་སེམས་བཅུག་ནས་གཏང་བས་འགྲོ་ས་མ་རྙེད་དོ། །གཞུ་ལྟར་དགུག་པ་ནི། དེར་འགྲོ་ས་མ་རྙེད་སེམས་སུ་གོ་བ་དང་། དེ་རང་ལ་ལྟས་པས་ངོས་བཟུང་མི་རྙེད་དོ། །སོར་གཞག་པ་ནི། དེ་ལྟར་སྣང་ལ་ངོས་བཟུང་མེད་པའི་ངང་དུ་རང་ལུགས་སུ་གཞག་པས། ཉོན་མོངས་པ་ཞེ་སྡང་གི་ཐོག་ནས་གསལ་སྟོང་གཉིས་མེད་ཀྱི་ལྟ་སྒོམ་ཐུན་གཅིག་འོང་ངོ་། །དེས་དུག་ལྔ་ཀུན་ལ་འགྲེ་སྟེ། སྣང་སྟོང་གཉིས་མེད་ཀྱི་ལྟ་བསྒོམ་ཐུན་རེ་རེ་འབྱུང་སྟེ། །ཉོན་མོངས་གང་སྐྱེས་ཆོས་ཉིད་དུ་གྲོལ་ལོ། །དེ་ལྟར་ཉོན་མོངས་པ་དང་རྣམ་པར་རྟོག་པ་གང་སྐྱེས་ལ་མ་ཡེངས་པར་དྲན་པས་རྩིས་བཟུང་པས། རབ་ཉོན་མོངས་ཟིལ་གྱིས་ནོན་ཏེ་མི་སྐྱེའོ། །འབྲིང་འབུར་འཇོམས་ནི། དཔེར་ན་རྡོ་ཚན་མོ་ལ་ཁ་བ་ཁྲོ་ས་བྱུང་ཡང་མོད་ལ་ལྡེམ་ཞུ་བ་བཞིན་དུ། ཉོན་མོངས་པ་སྐྱེས་པ་དང་ཆོས་ཉིད་དྲན་པ་མཚུངས་པའོ། །ཐ་མ་རྗེས་སྙོག་ཡིན་ཏེ་དུག་ལྔ་སྐྱེས་པའི་དུས་སུ་རང་ཀར་བཏང་ནས། དེའི་དོད་པོ་དགེ་སྦྱོར་རེ་བྱེད་དེ་ཕན་ཆུང་ངོ་། །དེ་ལྟར་དུག་ལྔ་ཆོས་ཉིད་དུ་གྲོལ་བས། །འཁོར་བ་སྤྱིའི་རྐྱེན་དུག་ལྔ་ཆོས་ཉིད་གྲོལ་ལོ། །གསུམ་པ་མཐོ་རིས་སུ་སྐྱེ་བར་བྱེད་པའི་རྐྱེན་དགེ་བ་དང་། ཞི་རགས་ཡིན་པས་ཀུན་ཏུ་བཟང་པོར་ངོ་སྤྲོད་དེ་བླང་དོར་མེད་པར་བཟློག་པ་ནི། སེམས་རིས་སུ་སྐྱེ་བར་བྱེད་པའི་རྐྱེན་དགེ་བ་དང་། ཞི་རགས་ཡིན་པས་ཀུན་ཏུ་བཟང་པོར་སྤྲོད་དེ་བླང་དོར་མེད་པར་བཟློག་པ་ནི། སེམས་ཉིད་ཀུན་དུ་བཟང་པོ་འདི། །ཅིར་ཡང་མ་འགགས་རང་སྣང་ལ། །གཞན་སྣང་རྟོགས་པ་ལྟས་པས་འཁྲུལ། །རང་སྣང་རྟོགས་ན་འཁོར་མཐའ་བཟློག་ཅེས་པས། གནས་ལུགས་རྩལ་དང་འཁྲུལ་ལུགས་དང་། འཁྲུལ་པ་བཟློག་པའི་ཐབས་སུ་ངོ་སྤྲོད་དོ། །གནས་ལུགས་ནི། སེམས་ཉིད་ཀུན་དུ་བཟང་པོའི་འདི། ཞེས་པས་བསྟན་ཏེ། དེ་ཡང་རང་གི་སེམས་ཉིད་བཟང་ངན་དང་དགག་བསྒྲུབ་ཀྱི་མཐའ་ལས་གྲོལ་བའི་མཉམ་པ་རིས་མེད་ཆེན་པོར་གནས་ཏེ། དཔེར་ན་ས་གཞི་འདི་ལ་ཡོངས་ཀྱི་དགེ་བའི་བཤེས་གཉེན་དང་། བཙད་པ་དང་གནས་བརྟན་དང་ཡུལ་གྱི་མི་ཆེན་རྣམས་ཀྱིས་འོངས་པས། དེ་ལ་བཟང་པོར་བྱས་ངའི་སྟེང་ན་ཡར་བྱོན་པ་འོར་རེ་ཆེ་མི་ཟེར་བར་གདའ་བ། ཁྱི་དང་ཕག་དང་མཛེ་སྤྲང་ལ་སོགས་པས་ཕྱིར། ངའི་སྟེང་ན་ཡར་འོང་འོང་ངེས་མི་ཟེར་བར་གདའ་བ། དེ་ལྟར་ས་འདི་ལ་གསེར་གཡུ་དང་དར་ཟབ་ཀྱིས་བཀང་ཡང་དགའ་རྒྱུ་མི་འདུག །ཁྱི་ལུད་དང་མི་གཙང་བ་སྣ་ཚོགས་ཀྱིས་བཀང་མི་དགའ་བ་མི་གདའ་བ། ས་འདི་ལ་བཀོས་ཀྱང་གལ་མེད། ཆུ་ལ་བསྐུར་ཡང་གལ་མེད། རླུང་ལ་བསྐུར་ཡང་གལ་མེད། འདིའི་སྟེང་དུ་འཁར་ལན་ཆེན་པོ་བྱས་ཀྱང་གལ་མེད་དེ། མཉམ་པ་རིས་མེད་ཆེན་པོར་འདུག་པའོ། །དེ་བཞིན་དུ་སེམས་ཉིད་ཀུན་ཏུ་བཟང་པོ་འདི་ལ་མྱ་ངན་ལས་འདས་པ་སྐུ་དང་ཡེ་ཤེས་ཀྱི་སྣང་བ་ཤར་ཡང་། དང་དུ་བླང་ཞིང་བསྒྲུབ་པའི་རིས་སུ་ཆད་པ་ཡང་མེད། འཁོར་བའི་ཆོས་ལུས་དང་སྡུག་བསྔལ་ཕྱི་ནང་སྣོད་བཅུད་དུ་སྣང་བ་ཡང་། ངན་པར་བྱས་ནས་སྤང་ཞིང་དགག་པའི་རིས་སུ་ཆད་པ་ཡང་མེད་དོ། །དེ་བཞིན་དུ་དགེ་སྡིག་དང་མ་རིག་ཡེ་ཤེས་ལ་སོགས་པ་གང་ཡང་བླང་དོར་དང་དགག་སྒྲུབ་མེད་པས་མཉམ་པ་རིས་མེད་ཆེན་པོར་གནས་སོ། །གཉིས་པ་རྩལ་ངོ་སྤྲོད་པ་ནི། ཅིར་ཡང་མ་འགགས་རོལ་སྣང་ལ་ཞེས་པས་བསྟན་ཏེ། མཉམ་པ་ཉིད་འདི་ཉིད་ཀྱི་རྩལ་ཅིར་ཡང་མ་འགགས་པར་སྣང་བ་ཡིན་ཏེ། ཀུན་ནས་ཉོན་མོངས་པའི་ཆོས་ཕྱི་ནང་སྣོད་བཅུད་དུ་ཡང་སེམས་ཉིད་རང་སྣང་། རྣམ་པར་བྱས་པས་མྱ་ངན་ལས་འདས་པའི་ཆོས་སྐུ་དང་ཡེ་ཤེས་སུ་ཡང་སེམས་ཉིད་རང་སྣང་། དེ་ཡང་བྱེ་བྲག་ཏུ་ཡང་སྣང་ལུགས་རྒྱས་པར་བསེད་དོ། །མདོར་ན་སྣང་ཚད་ཤར་ཚད་སེམས་ཉིད་མ་འགགས་པར་ཤར་བ་ཡིན་ཏེ། དཔེར་ན་ནམ་མཁའ་ལས་ཉི་མ་ཤར་བའི་དུས་ན། དེའི་ཟེར་ཕྱོགས་བཅུར་བརྡལ། ཉི་མ་ནུབ་པའི་དུས་སུ་འོད་ཟེར་ཁོ་རང་ལ་འདུས་པ་བཞིན་ནམ། རྒྱ་མཚོ་རང་རླབས་སུ་ཤར་བ་བཞིན་ནོ། །ལ་ཞེན་པ་ནི་དེ་ལྟར་མ་ཤེས་ཤིང་མ་རྟོགས་པའི་ཐ་ཚིག་གོ། །གསུམ་པ་འཁྲུལ་ལུགས་ངོ་སྤྲོད་པ་ནི། གཞན་སྣང་རྟོག་པ་ལྟས་པས་འཁྲུལ། ཞེས་པས་བསྟན་ཏེ། དེ་ཡང་ལྷན་ཅིག་སྐྱེས་པའི་མ་རིག་པས་རང་སྣང་ལ་གཞན་འདྲ། གཅིག་ལ་གཉིས་འཛིན་གྱི་རྟོག་པ་ལྟས་པས། རིགས་དྲུག་སྡུག་བསྔལ་གྱི་སྣང་བ་འདི་འབྲས་བུ་བྱུང་བ་ཡིན་ཏེ། མདོར་ན་བདག་གཞན་གཉིས་སུ་འཁྲུལ། འཁོར་འདས་གཉིས་ཡུལ་སེམས་གཉིས། ཡོད་མེད། རྟག་ཆད། བཟང་ངན་ལ་སོགས་ཏེ་གཉིས་མེད་ལ་གཉིས་སུ་འཁྲུལ་ལོ། །བཞི་པ་འཁྲུལ་པ་བཟློག་པའི་ཐབས་ནི། རང་སྣང་རྟོགས་ན་འཁོར་མཐའ་བཟློག །ཅེས་པས་བསྟན་ཏེ། དེ་ལ་ཡང་དག་པར་རྫོགས་པའི་སངས་རྒྱས་ཀྱིས་བྱིན་གྱིས་བརླབས་སམ། རང་གི་ངོ་བོ་འམ། ཚིག་སྡེབ་སྦྱོར་ལེགས་མོས་བཤད་པ་ཐམས་ཅད་ཀྱང་། སེམས་ཅན་གྱི་འཁྲུལ་པ་བཟློག་པའི་ཐབས་སམ། །སེམས་ཉིད་གཏན་ལ་དབབ་པའི་ཐབས་སུ་གསུངས་པ་ལགས། བླ་མ་དགེ་བའི་བཤེས་གཉེན་རྣམས་ཀྱིས་རང་འདོད་གཏིང་ནས་སྤངས་པ་ཐུགས་བྱང་ཆུབ་མཆོག་ཏུ་སེམས་བསྐྱེད་ནས་གསུངས་པ་ཡང་འཁྲུལ་བ་བཟློག་པའི་ཐམས་ཅད་སེམས་ཉིད་གཏན་ལ་དབབ་པའི་ཐབས་སུ་གསུངས་པ་ལགས། ད་ལྟར་རང་རེ་ཡང་ཆོས་དགའ་རྩེད་དང་ཞོར་འཕྱོ་དང་རྐྱེན་གདམ་མ་ལགས་པའི་ཐུགས་དད་པས་ཀུན་ནས་བླང་ནས་ཐོས་བསམ་མཛད་པ་དང་། འཁྲུལ་པ་བཟློག་ཅིང་སེམས་ཉིད་གཏན་ལ་དབབ་པའི་ཐབས་ལགས། ལྷོ་བླན་བྱང་བསྡབས་ཀྱང་འགྲོ་ས་རང་ཐག་དམིགས་ལས་མེད། དང་ཞ་འདོམ་གང་ལ་གཏད་པ་མེད་རྩེ་གང་ལས་མེད། ཆོས་བརྒྱ་བཤད་སྟོང་བཤད་ཀྱང་རྩ་བ་རང་གི་སེམས་གཏན་ལ་འབེབས་པ་ལས་མི་བདོག་པས། རང་གི་སེམས་ཉིད་གཏན་ལ་དབབ་པའོ། །དེ་ཡང་ཇི་ལྟར་གཏན་ལ་འབེབས་ན། སྣང་སྲིད་འཁོར་འདས་ལམ་པས་བསྡུས་པའི་ཆོས་ཐམས་ཅད་སེམས་རང་སྣང་བ་ཡིན་ཏེ། དེ་ཡང་སེམས་ཉིད་རང་སྣང་། རང་སྣང་རིས་མེད། སེམས་ཉིད་རང་སྣང་། རང་སྣང་ཡུལ་མེད། སེམས་ཉིད་རང་སྣང་། རང་སྣང་ཕྱོགས་མེད། དེ་ལྟར་རྟོགས་ན་ཕྱོགས་ཆ་ལས་བཟློག་སྟེ། འཁོར་མཐའ་བཟློག་གོ། །དེ་ཡང་དབང་པོ་རབ་ཀྱི་གདམ་ངག་ཡིན་ཏེ། གོ་ན་ཚིག་གཅིག་གདའ་ན་གཡབ་ཅིག །རོལ་བརྒྱ་ཤལ་བ་གཅིག །བྱ་བརྒྱ་འུར་རྡོ་གཅིག །ངག་དོན་དྲིལ་བས་དེ་ལྟར་ངོ་སྤྲད་པས། ལྟ་བ་ཕྱོགས་མེད་རྟོགས་ནས་ཡོན་ཏན་ཕྱོགས་ཞེན་དང་འཛིན་པ་གྲོལ་དགོས་སོ། །དེ་ལྟར་ངོ་སྤྲད་པ་ཙམ་ལས་ངང་བསྟེན་རྒྱུ་མེད་དེ། ངོ་སྤྲད་པ་རང་གིས་འཁྲུལ་པ་རང་གྲོལ་ལོ། །འབྲས་བུའམ་ཉེས་པ་སྡུག་བསྔལ་ཡིན་པས། སྡུག་བསྔལ་བྱང་ཆུབ་སེམས་སུ་ངོ་སྤྲད་དེ། སྡུག་བསྔལ་ཆོས་སྐུར་ཤེས་པས་འཁྲུལ་པ་བཟློག་པ་ནི། དེ་ལ་སྤྱིར་སྡུག་བསྔལ་ནི་བསམ་གྱིས་མི་ཁྱབ་བརྗོད་ཀྱིས་མ་རྫོགས་ཏེ། དེ་ལ་སྡུག་ལུ་གུ་རྒྱུད་གཅིག་གི་ཞབས་ལ་གཅིག་སྤེལ། སྡུག་བསྔལ་ཆུའི་གཉེར་མ་དང་འདྲ་སྟེ་བུད་པ་དང་སངས་པ་མེད། སྡུག་བསྔལ་ལ་བསྡུག་བསྔལ་བཞི་དང་། བྱེ་བྲག་གི་སྡུག་བསྔལ་དྲུག་གོ། །དེ་ལ་སྤྱི་ཁྱབ་ཀྱི་སྡུག་བསྔལ་བཞི་ནི། སྐྱེ་བ་དང་། རྒས་པ་དང་། ན་བ་དང་། འཆི་བའོ། །དེ་ལ་སྐྱེ་བ་ནི་མའི་ཁོང་པའི་ནང་ན་སྡུག་བསྔལ་ཆུང་ངམ་སྙམ་ན། མ་འགྲངས་པའི་ཚེ་ན་བྲག་བར་དུ་བཙིར་བ་ལྟ་བུ། མ་རྟོགས་པའི་ཚེ་ན་གཡང་ལ་གཏང་བ་ལྟ་བུ། ཚ་བ་མཐུབ་ན་མེ་མར་མོས་གཡོགས་པ་ལྟ་བུ། གྲང་བ་མཐུབ་པའི་ཚེ་ན་དགུན་ཆུ་གྲང་མོར་བསྐྱུར་བ་ལྟ་བུ། སྐྱེ་བའི་ཚེ་ན་ལྤགས་པ་བཤུས་ནས་བྲག་བར་དུ་བྲུད་པ་ལྟ་བུ། གདན་ཁར་ལྷུང་བའི་ཚེར་མའི་དོང་དུ་བསྐྱུར་བ་ལྟ་བུ། ཕ་མས་བླངས་པའི་ཚེ་ན་བྱི་ཕྲུག་ཁྲས་ཁྱེར་བ་ལྟ་བུ་ལ་སོགས་པའི་སྡུག་བསྔལ་བསམ་གྱིས་མི་ཁྱབ་བོ། །རྒས་པའི་སྡུག་བསྔལ་ནི། རྒས་པའི་ཚེ་ན་མགོ་དཀར། གཉེར་མ་འདུས། ཁ་སྣ་ནས་ཆུ་འཛག །ཡན་ལག་ཐམས་ཅད་འདར། རང་ལུས་རང་གིས་དབང་མ་ཐོབ་སྟེ། ལངས་ན་ཡོག་མོ་རྩ་བ་ནས་འདོན་པ་དང་འདྲ། སྡོད་ན་ཚ་སྒྲོ་ལུང་ཐག་ཆད་པ་ལྟ་བུ། བསོད་ནམས་ཀྱི་ཆ་བབས་ཉམས་ནས། ཅི་སྨྲས་རྣ་བར་མི་སྙན། ཅི་བྱས་སྙིང་དུ་མི་སྡུག་གོ། །ན་བའི་སྡུག་བསྔལ་ནི། ན་བའི་ཚེ་ན་འོག་ཏུ་ཅི་བཏིང་ཚེར་མས་རྩུབ། བསྔས་སུ་ཅི་བཅུག་རྡོ་བས་འཁྲང་། སྟེང་དུ་ཅི་གོན་རི་བས་ལྕི། ཟས་དགྲ་ལྟར་སྤངས། གཉིད་བྱ་ལྟར་ཡང་། རང་ལུས་སྡུག་བསྔལ་གྱི་འབྱུང་གནས་སུ་འདུག་པའོ། །འཆི་བའི་སྡུག་བསྔལ་ནི། འཆི་ནད་ཀྱི་བཏབ་པའི་དུས་སུ། རིམ་གྲོ་བྱས་པས་ཐམས་ཅད་བྲུབས་པ་བས་ཀྱང་ཐུ། སྨན་གཏང་བ་ནི་དུག་གཏང་བ་བས་ཀྱང་ཐུ། ནད་པ་འདང་བས་ཀྱང་དོ་མོད་ན་ཟེར་བའི་དུས་སུ། དཔལ་ཕྱག་ན་རྡོ་རྗེའི་པང་དུ་མགོ་གཞག །འཚོ་བྱེད་གཞོན་ནུས་དཔྱད་བྱས་ཀྱང་མི་ཕན་ཏེ། ས་ཕྱོགས་མི་འདྲ་བ་གཅིག་ཏུ་འགྲོ་དགོས། ནོར་རྫས་ལ་སེར་སྣ་དང་གསོག་འཇོག་ཇི་ཙམ་བྱས་ཀྱང་། ཟན་རྟོགས་གཅིག་གམ་ཁབ་ལོངས་གཅིག་ཀྱང་སྒྱེར་དུ་མ་བྱུང་། འབྲེལ་པའི་གཉེན་གྱི་སེམས་བཟུང་ངོ་བསྲུངས་ཀྱང་། གྲོགས་སུ་གཅིག་ཀྱང་མེད། བརྩིགས་པའི་འཁར་ལན་ཇི་ཙམ་ཡོད་ཀྱང་དར་ཅིང་། བསྡད་པའི་གནས་ཀྱང་མེད། རང་གཅིག་པུ་རྣམ་པར་སྨིན་པ་དང་བཅས་ཏེ་འཁྱམས་པས་ཡ་ང་ཞིང་སྐྱི་བུང་པའི་ལས་ཡིན་ནོ། །དེས་ཚར་ན་ཡང་དྲག་སྟེ། ཡང་སྐྱེས་ནས་གོང་མ་ལྟར་འཁོར་ཏེ་སངས་མ་རྒྱས་ཀྱི་བར་དུ་རང་ཐག་གི་རི་མོའམ། ཟོ་ཆུན་ཁྱུད་མོ་བཞིན་ནོ། །སྐྱེ་རྒས་ན་འཆི་རང་ཐག་རི་མོ་འདྲ། །ཞེས་གསུངས་སོ། །བྱེ་བྲག་གི་སྡུག་བསྔལ་དྲུག་ནི། དམྱལ་བ་ཚ་གྲང་། ཡི་དྭགས་ལ་བཀྲེས་སྐོམ། དུད་གྲོ་ལ་གླེན་ལྐུགས་སམ་བཀོལ་སྤྱད། མི་ལ་འགྱུར་བ། ལྷ་ལ་ལྟུང་བ། ལྷ་མ་ཡིན་ལ་འཐབ་རྩོད་དོ། །དེ་ལ་རྒྱས་པར་བཤད་ན། གནས་གཞན་དང་། ཚེ་ཚད་དང་། དབྱེ་བ་དང་། སྡུག་བསྔལ་གྱི་བྱེ་བྲག་ལ་སོགས་ཀྱི་ཤེས་པར་བྱའོ། །བྱང་ཆུབ་སེམས་སུ་ངོ་སྤྲད་པ་ནི། བྱང་ཆུབ་སེམས་ཀྱི་རང་བཞིན་ནི། །དམན་པའི་སེམས་ཀྱིས་མི་རྟོགས་ཏེ། །གཏན་ཚིགས་གསུམ་གྱིས་ཤེས་པར་བྱ། །ངང་ནི་རིགས་པ་གསལ་བ་ལས། །རང་བཞིན་རིག་པ་ཅིར་ཡང་སྣང་། །བདག་ཉིད་སྣང་སྟོང་ཐ་དད་མེད། །བསྒྲུབ་བྱ་དག་གི་རང་བཞིན་ནི། །འཁྲུལ་པ་བྱང་ཆུབ་སེམས་སུ་ཤེས། །ཞེས་པས། བྱང་ཆུབ་ཀྱི་སེམས་ཞེས་བྱ་བ་ནི། གཏན་ཚིགས་གསུམ་གྱིས་གཏན་ལ་དབབ་སྟེ། ངང་སྐྱེ་བ་མེད་པའི་གཏན་ཚིགས་ཀྱི་མཚོན་ཏེ། ཆོས་ཐམས་ཅད་སྐྱེ་བ་མེད་པར་གཏན་ལ་དབབ་པ་ནི། སེམས་ཀྱིས་སེམས་ལ་བལྟས་པས། དཀར་དམར་ལ་སོགས་པའི་ཁ་དོག་ཏུ་མ་གྲུབ། གྲུ་བཞི་ནར་མོ་ཟླུམ་པོ་ལ་སོགས་པའི་དབྱིབས་སུ་མ་གྲུབ། བྱུང་པ་དང་། གནས་ས་དང་། འགྲོ་ས་ལ་སོགས་བརྟགས་པས་ཀྱང་མ་རྙེད་པ་ནི། བྱང་པ་སྐྱེས་པ་མེད་པ་ཞེས་བྱ་སྟེ། སེམས་ཉིད་ངོས་བཟུང་ཐམས་ཅད་དང་བྲལ་བ་དེའོ། །རང་བཞིན་འགགས་པ་མེད་པའི་གཏན་ཚིགས་ཀྱིས་མཚོན་ཏེ། ཆོས་ཐམས་ཅད་འགག་པ་མེད་པར་གཏན་ལ་དབབ་པ་ནི། སེམས་ཉིད་ངོས་བཟུང་མ་གྲུབ་ན། །སྣ་ཚོགས་སུ་སྣང་བ་འདི་གང་ཡིན་ཞེ་ན། སེམས་ཉིད་རང་མ་འགགས་པར་ཤར་ཏེ། འཁོར་བའི་ཆོས་ལུས་དང་སྡུག་བསྔལ་དུ་ཡང་སེམས་རང་སྣང་། རྣམ་པར་བྱང་པ་མྱ་ངན་ལས་འདས་པའི་ཆོས་སྐུ་དང་ཡེ་ཤེས་སུ་ཡང་སེམས་ཉིད་རང་སྣང་། བར་ལམ་པའི་ཆོས་ལྟ་བསྒོམ་སྤྱོད་པར་ཀྱང་སེམས་ཉིད་རང་སྣང་། རང་གི་རྒྱུད་ལ་སྐྱེས་པའི་དུག་ལྔ་དུག་གསུམ་རྟོགས་པར་ཀྱང་རང་སྣང་བ་ནི། ཆུབ་པ་འགག་མེད་ཅེས་བྱ་སྟེ། སྣང་ཚད་དུ་སེམས་ཉིད་མ་འགགས་པར་ཤར་བ་དེའོ། །བདག་ཉིད་གཉིས་སུ་མེད་པའི་གཏན་ཚིགས་ཀྱིས་མཚོན་ཏེ། ཆོས་ཐམས་ཅད་སྣང་སྟོང་དབྱེར་མེད་དུ་གཏན་ཚིགས་ལ་དབབ་པ་ནི། རང་བཞིན་ངོས་བཟུང་དང་བྲལ་བའི་རྐྱེན་མེད་དེ་དང་། སྣ་ཚོགས་སུ་རང་སྣང་བའི་འགག་མེད་དེ་གཉིས་གཅིག་ཏུ་འདུག་གམ་ཐ་དད་དུ་འདུག་བརྟགས་པས་ཐ་མི་དད་དེ་སེམས་ཉིད་ངོས་བཟུང་དང་བྲལ་བ་དེ་རང་སྣང་། རང་བསྡོ་བའི་དུས་ན་ངོས་བཟུང་དང་བྲལ་ཏེ། ཚིག་ཏུ་རེ་མོས་བརྗོད་ཀྱང་དོན་ལ་གཅིག་ཏུ་གོ་བའོ། །དེ་ཡང་ངག་དོན་དྲིལ་ན། སྣ་ཚོགས་སུ་ཤར་བ་འདིས་སེམས་རང་སྣང་། སྣང་བསྡོ་བའི་དུས་ན་ངོས་བཟུང་དང་བྲལ་བ་དེའོ། །དེ་ལྟར་བསམ་པས་དྲས་ཐག་ཆོད་པར་བྱས་ལ། སྡུག་བསྔལ་ལམ་རྟོག་གང་བྱུང་ལ་ལྟས་པས་བྱང་ཆུབ་སེམས་སྐྱེ་འགག་གཉིས་མེད་ཀྱི་ཆོས་སྐུར་གྲོལ་ལོ། །ཡང་ན་བྱང་ཆུབ་སེམས་ཀྱི་རང་བཞིན་ལ། །གཉུག་མར་གནས་པ་ཆོས་ཀྱི་སྐུ། །སྔ་ཕྱི་རྗེས་འབྲེངས་འཁྲུལ་པའི་ལམ། །དེ་རྗེས་མི་གཅོད་བྱང་ཆུབ་སེམས། །ཞེས་དང་། འཁོར་བའི་སྡུག་བསྔལ་འདི་གང་ལས་བྱུང་ཞེ་ན། ནམ་མཁའ་ནས་མ་བབས། ས་ནས་མ་སྐྱེས། ཤར་ལྷོ་ནུབ་བྱང་ནས་མ་བྱུང་། གཞན་གྱིས་བསྐྱལ་བ་མིན་ཏེ། རང་སེམས་སྡོད་མ་ཤེས་པས་སྡུག་བསྔལ་དུ་ཤར་བ་ཡིན་ནོ། །དེ་ཡང་ཉམས་སུ་ལེན་པའི་དུས་སུ། ལུས་རང་ལུགས་སུ་བློད། ངག་རང་ལུགས་སུ་བློད། སེམས་འདིས་དུས་གསུམ་རྟོག་པའི་རྗེས་སུ་མ་འབྲངས་པར། སྔར་འདས་པའི་རྗེས་མི་གཅོད། ཕྱིས་མ་འོངས་པའི་སྔུན་མི་བསུ། ད་ལྟ་ཡུལ་ལྔའི་རྗེས་སུ་མ་འབྲངས་པར་ཤེས་པ་རང་ལུགས་སུ་བློད་དེ། ཤེས་པ་ལ་སྤང་དང་སྤྲོ་བསྡུ་དང་། འགྲོ་འོངས་མེད་པར་གཞག་པས། ཤེས་པ་གསལ་ལ་རྟོག་པ་མེད། གསལ་ལ་འཛིན་པ་མེད་པའི་ཤེས་ས་ལེ་སང་ངེ་བ་ཅིག་ནང་ནས་སྐྱེ་སྟེ། དེ་ལ་དུས་གསུམ་སངས་རྒྱས་ཀྱི་དགོངས་པ་ཞེས་ཀྱང་བྱ། གཞི་དངོས་པོ་གཤིས་ཀྱི་གནས་ལུགས་ཞེས་ཀྱང་བྱ་སྟེ། སྔར་འདས་ཀྱི་སངས་རྒྱས་རྣམས་ཀྱི་གཤེགས་ཤུལ། །མ་འོངས་པའི་རྣལ་འབྱོར་པ་རྣམས་ཀྱི་ལམ། །ད་ལྟར་གྱི་རྣལ་འབྱོར་པ་རྣམས་ཀྱི་ཉམས་ལེན་ཡིན་ཏེ། སངས་རྒྱས་རང་སེམས་རྟོག་པ་བྲལ་བ་ཡིན། །ཞེས་པ་དང་། རྟོག་མེད་མཉམ་ཉིད་ཆོས་ཀྱི་སྐུ། །ཞེས་པ་དང་། དྲན་རིག་ཤེས་པ་མ་འགགས་ལ། །འཛིན་རིག་ཡུལ་ལས་རྣམས་པར་གྲོལ། །ཞེས་པས་གསལ་ལོ། །ད་ལྟར་མཉམ་གཞག་ལ་ཐུན་དུ་བཅད་ལ་བསྒོམས་པས། སྡུག་བསྔལ་གྱི་རྟོག་པ་ཆུ་རྙོག་མ་དང་བྲལ་བའམ། ནམ་མཁའ་སྤྲིན་དང་བྲལ་བ་བཞིན་དུ་རངས་དྭངས་ཏེ། བྱང་ཆུབ་སེམས་གཉུག་མ་ཆོས་སྐུའི་ངང་དུ་རང་ས་ཟིན། གནས་ལུགས་ཆོས་ཀྱི་སྐུ་ལས་འགྲོ་དོན་གཟུགས་སྐུ་གཉིས་བྱུང་སྟེ། དེ་ཡང་དོན་གྱི་གནས་ལུགས་སྣང་ལ་རང་བཞིན་མེད་པ། སྣང་བའི་ངོས་ནས་བྱང་ཆུབ་སེམས་དཔའ་ལ་སོགས་དག་པའི་སྣང་བ་ལ་ལོངས་སྐུ། མ་དག་པ་སེམས་ཅན་ལ་སྤྲུལ་སྐུ། གང་ལ་གང་འདུལ་དུ་སྣང་ནས་དོན་མཛད་དོ། །དེ་ཡང་དོན་གྱི་གོ་བ་ནི་གང་ཡང་ངོས་བཟུང་མེད་པའི་དོན་མངོན་དུ་གྱུར་པས་སངས་ལ། ཕྱོགས་མེད་རང་སྣང་མངོན་གྱུར་པས་རྒྱས་ཏེ། མཁྱེན་པའི་ཡེ་ཤེས་ཤར་ནས་དོན་མཛད་དོ། །ཀུན་བྱེད་ལས། སྤྲོས་མེད་དབྱིབས་དང་དབང་པོའི་སྤྱོད་ཡུལ་སངས། །ནམ་མཁའ་བཞིན་དུ་ཀུན་ལ་ཁྱབ་ཅིང་རྒྱས། །ཞེས་གསལ་ལོ། །ནམ་མཁའ་ལྟ་བུ་ཕྱོགས་བྲལ་བདག་མེད་ལ། །མ་རིག་ཀུན་བཏགས་དུག་ལྔའི་རྒྱུ་རྐྱེན་གྱིས། །རྒྱལ་བུ་རྐང་འཁྱམས་བཞིན་དུ་འཁྲུལ་བ་འདི། །གྲུབ་པ་མེད་ཀྱང་ངོ་མ་ཤེས་པས་འཁོར། །དེ་བཟློག་ཀུན་བཟང་ཐུགས་རྗེ་བསམ་མི་ཁྱབ། །སྙིགས་མའི་དུས་འདིར་ཞིག་པོ་ཉིད་འདྲ་ལས། །ཟེར་ཙམ་ཤར་བས་མུན་སེལ་ཉི་མ་འདི། །བདག་གཞན་དོན་ཕྱིར་དབུས་པ་རྟ་ཡིས་སྦྱར། །དགེ་བས་སེམས་ཅན་ཇི་བཞིན་དོན་རྟོགས་ཏེ། །འཁྲུལ་པའི་སེམས་ཅན་རང་ངོ་ཤེས་པར་ཤོག །དམ་པ་ཆོས་ཀྱི་ཡང་སྙིང་སྤྲུལ་སྐུ་ཞིག་པོའི་གསུང་སྒྲོས་སྒྲོས། །དོན་གསལ་ལྔ་པ་ཞེས་བྱ་བ། །རྟ་ཇོ་ཡེ་ཤེས་ཀྱིས་སྦྱར་བ། །རྫོགས་སོ། །ཡང་ན་ཁ་ན་མ་ཐོ་བ་གསུམ་ནི། རང་བཞིན་གྱིས་ཁ་ན་མ་ཐོ་བ་ནི། མི་དགེ་བཅུ་ལ་སོགས་པའི་སྡིག་པའོ། །བཅས་པའི་ནི་སྦྱིན་ལེན་དང་སྐྱེ་བ་གཅོད་པ་ལ་སོགས་པའོ། །འཇིག་རྟེན་གྱི་ནི་རབ་བྱུང་གི་སྒོག་པ་ཟོས་པ་ལ་སོགས་པ་ལྟ་བུའོ།། །།

རྫོགས་པ་ཆེན་པོའི་གཞི་ལམ་འབྲས་གསུམ་གྱི་སྙན་ཁུང་བརྒྱུད་པའི་མན་ངག

རྫོགས་པ་ཆེན་པོའི་གཞི་ལམ་འབྲས་གསུམ་གྱི་སྙན་ཁུང་བརྒྱུད་པའི་མན་ངག་བཞུགས་སོ། །བླ་མ་དམ་པའི་མན་ངག་སྨ་མི་དབབ། དྲི་མ་ལ་མི་བསྐུར། ཐལ་ཁུང་དུ་མི་བསུར། མི་བཅིང་། མི་བསླད། ཡར་དུ་མི་གཞུག །ཟགས་སུ་མི་གཞུག །སྐམས་སུ་མི་གཞུག །ལྟ་བར་མི་དགྲོལ། ཟོང་དུ་མི་བཙོང་། མི་སྤྱུག །གཡང་དུ་མི་བསྐྱུར། དུག་ཏུ་མི་གཏང་། རབས་མི་བཅད། དབང་པོ་མི་གཞར། དེ་ལྟར་ཡིན་པས་མིག་བས་ཕངས་པར་སྦ། སྲོག་ལྟར་ཕངས་པར་བཙའོ། །ལྟ་བ་བྱེད་སྤྱོད་ལ་གདབ་པ། བསྒོམ་པ་སྤྱོད་ལམ་ལ་གདབ་པ། སྙིང་རྗེ་ཕྱོགས་བྲལ་ལ་གདབ་པ། སྡུག་བསྔལ་ལམ་དུ། ཉོན་མོངས་པ་འབྲས་བུར། དགའ་མི་དགའ་ཀུན་དུ་བཟང་པོར། བདག་གཞན་གཉིས་སུ་མེད་པར། འཁོར་བ་མྱ་ངན་ལས་འདས་པར། སེམས་ཅན་སངས་རྒྱས་སུ་གདབ་པ། སྣང་སྲིད་སེམས་སུ། སེམས་ཆོས་ཉིད་དུ་གདབ་པ། སྐྱོན་དང་ཡོན་ཏན་བླང་དོར་མེད་པ་གདབ་པའོ། ༈ །བཀག་པའི། བཀག་པ། བཀག་པའི་མ་བཀག་པ། མ་བཀག་པའི། བཀག་པ། མ་བཀག་པའི། མ་བཀག་པའོ། །བརྩལ་བའི། བརྩལ་བ། བརྩལ་བའི། མ་བརྩལ་བ། མ་བརྩལ་བའི། བརྩལ་བ། མ་བརྩལ་བའི། མ་བརྩལ་བའོ། ༈ །ཨ་ཨ་ནུད་བ་བཱ་སྭ་བ་བཱ་དྷརྨ་ཏེ། ཞེས་བྱ་བའི་སྒྲ་ལས་དྲངས། ཨ་མ་སྐྱེས་ཤིང་སྐྱེ་བ་མེད་པའི་རང་བཞིན་ཡིན། ཏི་ཏིན་ཏི་ན་ཞེས་བྱ་བའི་སྒྲ་ལས་དྲངས་ན། མཉམ་པ་ཉིད་ཀྱི་ཐུགས་རྗེ་ཆེན་པོས་སེམས་ཅན་ཐམས་ཅད་གཟུང་བའི་དོན་ཡིན། ཨས་མཚོན་པའི་སྐྱེ་བ་མེད་པའི་དོན་རྟོགས་པ་ནི་ཤེས་རབ་ལ། ཏིས་མཚོན་པའི་སྙིང་རྗེ་ནི་ཐབས། ཐབས་དང་ཤེས་རབ་གཉིས་སུ་དབྱེར་མེད་པའི་རྟོགས་པ་ལ་ཡོ་ག་ཞེས་བྱ་སྟེ། རྣལ་འབྱོར་གྱི་དོན་ནོ། །རྣལ་འབྱོར་ཞེས་བྱ་བ་ནི་ཆོས་ཉིད་དོན་གྱི་རྣལ་མ་ལ་རང་རིགས་པའི་བློ་འབྱོར་པ་ལ་བྱའོ། ༈ །གང་དུ་རྫོགས། གང་རྫོགས། ཚུལ་ལམ་ཐབས་ཇི་ལྟར་རྫོགས། དེ་ལྔའི་སྒོ་ནས་རྫོགས་ཏེ། དེ་ཉིད་ཀྱི་ཚུལ་གྱིས་རྫོགས། དེ་ཉིད་ལས་བྱུང་བའི་ཚུལ་གྱིས་རྫོགས། དེ་ཉིད་ཀྱི་ངང་དུ་ཞ་ཞིང་རླག་པའི་ཚུལ་གྱིས་རྫོགས། ལས་དང་མཚན་ཉིད་ཀྱི་སྒོ་ནས་རྫོགས། རྟོགས་ཤིང་གཞག་པའི་སྒོ་ནས་རྫོགས་སོ། །གང་ཆེ། གང་ལས་ཆེ། ཚུལ་ལམ་ཐབས་དུའི་སྒོ་ནས་ཆེ། དེ་རྣམ་པ་བཅུའི་སྒོ་ནས་ཆེ་སྟེ། ཟིལ་གནོན་ཆེ་བ་རྣམ་པ་ལྔའི་སྒོ་ནས་ཆེ། ཡེ་ནས་ཡིན་པ་གསུམ་གྱིས་ཆེ། མཚུངས་པ་དཔེ་བརྒྱད་ཀྱི་སྒོ་ནས་ཆེ། མེད་པ་བཅུ་གཉིས་ཀྱིས་ཆེ། མ་གྲུབ་པ་ལ་བཟླ་བ་དྲུག་གིས་ཆེ། གཉེན་པོ་མེད་པས་ཆེ། འགྲན་ཟླ་མེད་པས་ཆེ། སྣ་ཚོགས་མེད་པས་ཆེ། སྣ་ཚོགས་མེད་ཀྱང་སྤྲུལ་པ་བསམ་གྱིས་མི་ཁྱབ་པས་ཆེ། རྒྱུ་རྐྱེན་ལ་རགས་མ་ལས་པས་ཆེའོ། ༈ །མངོན་པར་རྫོགས་པར་སངས་རྒྱས་པའི་ཆེ་བ་དང་། བདག་ཉིད་ཆེན་པོར་སངས་རྒྱས་ཡིན་པའི་ཆེ་བ་དང་། ཆོས་ཀྱི་དབྱིངས་སུ་སངས་རྒྱས་པའི་ཆེ་བ་དང་། དེ་ཡིན་པར་སངས་རྒྱས་པའི་ཆེ་བ་དང་། ཐམས་ཅད་ནས་ཐམས་ཅད་དུ་སངས་རྒྱས་མེད་པའི་ཆེ་བའོ། ༈ །ཀུན་ཏུ་བཟང་པོ་ཡེ་ནས་ཡིན་པ་དང་། དེ་ཀུན་ཏུ་བཟང་མོ་ཡེ་ནས་ཡིན་པ་དང་། དེ་གཉིས་སུ་མེད་པ་ཡེ་ནས་ཡིན་པའོ། ༈ །ཆོས་ཉིད་བྱང་ཆུབ་ཀྱི་སེམས་དེ། རྒྱ་མཚོ་དང་མཚུངས་པས་ཆེ། འབྱུང་བ་ཆེན་པོ་བཞི་དང་མཚུངས་པས་ཆེ། དེ་རྒྱལ་པོ་དང་མཚུངས་པས་ཆེ། དེ་ནམ་མཁའ་དང་མཚུངས་པས་ཆེ། དེ་ཉི་མ་དང་མཚུངས་པས་ཆེ། དེ་བདུད་རྩི་དང་མཚུངས་པས་ཆེ། དེ་ཡིད་བཞིན་གྱི་ནོར་བུ་རིན་པོ་ཆེ་དང་མཚུངས་པས་ཆེ། དེ་རིན་པོ་ཆེ་གསེར་གླིང་དང་མཚུངས་པས་ཆེའོ། ༈ །བཟང་ངན་མེད་པས་ཆེ། བདག་གཞན་མེད་པས་ཆེ། བསྒོམ་ཞིང་བཅོས་སུ་མེད་པས་ཆེ། བསྒྲུབ་ཅིང་བྱ་རུ་མེད་པས་ཆེ། །བཀག་ཅིང་དོར་བ་མེད་པས་ཆེ། སྤང་ཞིང་བླང་བ་མེད་པས་ཆེ། རྒྱུ་དང་འབྲས་བུ་མེད་པས་ཆེ། ཡངས་ཤིང་དོག་པ་མེད་པས་ཆེ། ཐེག་པ་གོང་འོག་མེད་པས་ཆེ། ནོར་ཞིང་འཁྲུལ་པ་མེད་པས་ཆེ། སེམས་ཅན་སངས་རྒྱས་མེད་པས་ཆེ། རེ་ཞིང་དོག་པ་མེད་པས་ཆེའོ། ༈ །ལྟ་བས་ལྟ་རུ་མེད་པར་ལ་བཟླ་བ་དང་། ལྟ་བས་རྟོགས་སུ་མེད་པར་ལ་བཟླ་བ་དང་། ལྟ་བས་དམིགས་སུ་མེད་པར་ལ་བཟླ་བའོ། །བསྒོམ་པས་བསྒོམ་དུ་མེད་པར་ལ་བཟླ། བསྒོམ་པས་བཅོས་སུ་མེད་པར་ལ་བཟླ་བ། བསྒོམ་པ་ཡིད་ལ་བྱར་མེད་པ་ལ་བཟླ་བའོ། །སྤྱོད་པ་སྤྱད་དུ་མེད་པར་ལ་བཟླ་བ། སྤྱོད་པས་སྤྱད་རྒྱུ་མེད་པར་ལ་བཟླ་བ། སྤྱོད་པས་སྤྱད་པ་མེད་པར་ལ་བཟླ་བའོ། །བསྒྲུབ་པ་བསྒྲུབ་ཏུ་མེད་པར་ལ་བཟླ་བ། བསྒྲུབ་པས་རྩོལ་དུ་མེད་པར་ལ་བཟླ་བ། བསྒྲུབ་པས་ཐོབ་ཏུ་མེད་པར་ལ་བཟླ་བ། འཕྲིན་ལས་ཀྱིས་བྱར་མེད་པར་ལ་བཟླ་བ། འཕྲིན་ལས་ཀྱིས་བྱེད་མཁན་མེད་པར་ལ་བཟླ་བ། འཕྲིན་ལས་ཀྱིས་བྱས་པ་མེད་པར་ལ་བཟླ་བའོ། །དམ་ཚིག་བསྲུང་དུ་མེད་པར་ལ་བཟླ་བ། བསྲུང་ས་མེད་པར་ལ་བཟླ་བ། ཐོབ་ཏུ་མེད་པར་ལ་བཟླ་བའོ། ༈ །བླ་མ་དགེ་བའི་བཤེས་གཉེན་སངས་རྒྱས་དངོས་ཀྱི་ཚུལ་དུ་བཙལ་བར་བྱ། དེ་ནད་པའི་ཚོགས་ཀྱིས་སྨན་པ་བརྟེན་པའི་ཚུལ་དུ་བཙལ་བར་བྱ། དེ་ལན་ཚ་མྱང་པའི་ཚུལ་གྱིས་བཙལ་བར་བྱ། དད་པ་ཆུ་བོའི་གཞུང་བཞིན་སྐྱེ་འབྲི་མེད་པར་བཙལ་བར་བྱ། བརྩོན་འགྲུས་གཞུ་མོའི་རྒྱུད་བཞིན་ངལ་དུབ་མེད་པར་བཙལ་བར་བྱ། གནས་དང་ཡུལ་ལ་ཆགས་པ་མེད་པར་བཙལ་བར་བྱ། །ནོར་དང་རྫས་ལ་ཕངས་པ་མེད་པར་བཙལ་བར་བྱ། །སྡུག་བསྔལ་ཆུ་ལྟར་འཐུང་བའི་ཚུལ་གྱིས་བཙལ་བར་བྱ། །བྱང་སེམས་རི་ལྟར་བརྟན་པའི་ཚུལ་གྱིས་བཙལ་བར་བྱའོ། ༈ །བརྡལ་པ་ནམ་མཁའ་ལྟ་བུར་གཞག་པ། བཏང་པ་སྤྲེའུ་ལྟ་བུར་གཞག་པ། བརྩལ་བ་མེད་པར་ཟིན་པ་ཕྱི་ལྟ་བུར་གཞག་པ། མ་བརྙོག་པར་དྭངས་པ་ཆུ་ལྟ་བུར་གཞག་པ། དྲན་པ་ལྟར་གཞག་པ། བོར་བ་ལྟ་བུར་གཞག་པ། རྟོགས་ཤིང་ཡིད་ཆེས་པ་ལྟ་བུར་གཞག་པ། མཐའི་ཞེན་པ་བཅོ་བརྒྱད་བཅད་པ་ལྟ་བུར་གཞག་པའོ། ༈ །དེའི་ཞེན་པ་བཅོ་བརྒྱ་ནི། བཙལ་ན་སྟོར། བཀག་ན། ཉམས། བཅོས་ན་བསླད། བསྒོམས་ན། གཅལ། བཙལ་ན། བྲལ། བསྒུགས་ན་བྲོས། བལྟས་ན། ཡལ། དྲན་ན། སངས། མྱོང་ན། ཤོར། གཟོབ་ན། འདྲེས། བགྲོད་ན། འཁྱམས། ངའོ། སྙམ་ན། ལྟུང་། རྟོགས་སོ་སྙམ་ན། སྟོངས། སེམས་ལ་རྣམ་རྟོག་བླང་ན། ཕུང་། གཏད་འཛིན་བྱེད་ན། གནད་ཅིང་། བརླག །བྱུང་ཚོར་གྱི་རྗེས་སུ་འབྲེངས་ན་འཁོར། བྱིང་སྨུགས་ཀྱི་དབང་དུ་སོང་ན་འཐིབས། སྤང་བླང་བྱེད་ན། འཇོལ་ལོ། ༈ །བསྒོམས་པ་སྐྱེ་བའི་རིམ་པ་སེམས་ཀྱི་དྲོད་ཚད་བསྟན་པ་ལ། བསྒོམ་པ་དང་འཕྲོད་པ་ལ་ནི་གཞག་ལ། མི་འཕྲོད་པ་ལ་མི་གཞག་པའི་ཕྱིར་མན་ངག་གཞག་པའི་གནས་གང་ཟག་གི་རིགས་རྣམ་པར་དབྱེ་བའི་མན་ངག་དང་། དེ་ལྟར་རིགས་སོ་སོར་ཕྱེ་ཡང་བག་ཆགས་ངོས་མ་ཟིན་ན་ཕན་མེད་པས། མཐུན་པའི་རྐྱེན་བག་ཆགས་ངག་ལ་ཡོད་པ་ངོས་གཟུང་པའི་མན་ངག་དང་། དེ་ལྟར་བག་ཆགས་ངོས་ཟིན་ཀྱང་རྣལ་འབྱོར་པ་དེ་སེམས་མ་གནས་ན་ཕན་མེད་པས། དེ་མྱུར་དུ་སེམས་ལས་སུ་རུང་བར་བྱ་བའི་ཕྱིར་སེམས་གནས་པའི་ཐམས་ཀྱི་རིམ་པའི་མན་ངག་དང་། དེ་ལྟར་སེམས་གནས་ཀྱང་རྣལ་འབྱོར་པ་དེ་དྲོད་ཚད་ཀྱིས་མ་ཟིན་ན་ཕན་མེད་པས། དེ་དྲོད་ཚད་ཀྱིས་གཟུང་བར་བྱ་བའི་ཐབས་ཀྱི་རིམ་པའི་མན་ངག་དང་། དེ་ལྟར་རྣལ་འབྱོར་པ་དེ་དྲོད་ཀྱིས་ཟིན་ཀྱང་བོགས་མ་བྱུང་ན་ཕན་མེད་པས། དེ་གོང་ནས་གོང་དུ་ཁྱད་པར་དུ་འགྲོ་བ་བོགས་དབྱུང་བའི་ཐབས་ཀྱི་རིམ་པའི་མན་ངག་དང་། དེ་ལྟར་རྣལ་འབྱོར་པ་དེ་བོགས་བྱུང་ཡང་ལམ་ལོག་པར་འགྲོ་བ་གོལ་ས་ཡིན་པས། གོལ་ས་བཅད་པའི་ཐབས་ཀྱི་རིམ་པའི་མན་ངག་དང་། དེ་ལྟར་གོལ་ས་ཆོད་ཀྱང་བསྒྲིབ་པ་ངོས་མ་ཟིན་ན་ཕན་མེད་པས། དེ་བསྒྲིབ་པ་ངོས་གཟུང་བའི་ཐབས་ཀྱི་རིམ་པ་མན་ངག་དང་། དེ་ལྟར་བསྒྲིབ་པ་ངོས་ཟིན་ཀྱང་འདོད་པའི་རྟགས་དང་མི་འདོད་པའི་རྟགས་འབྱུང་བས། རྟགས་ཀྱི་མན་ངག་མདོར་བསྡུས་ཏེ་བསྟན་པའོ། ༈ །སྤྱིའི་རིགས་དང་། རྒྱུའི་རིགས་དང་། དབང་པོའི་རིགས་དང་། སྤྱོད་པའི་རིགས་སོ། །དང་པོ་ནི། དད་ལྡན་གཡོ་རྒྱུ་ཆུང་བ་དང་། བློ་མི་རྒོད་པ་དང་། རྒྱུད་འཇམ་ཞེ་སྡང་ཆུང་བ་དང་། དྲང་ལ་སྡུག་བསྔལ་བཟོད་པ་དང་། བརྟན་ལ་གོ་ཆ་མཐུག་པ་དང་། །ཤེས་གཡུང་རིགས་དང་ལྡན་པ་དང་། །གཞན་གྱིས་མ་རྫབས་བསྒོ་བ་ཉན། །བཅུ་བཞི་ལྡན་པའི་གང་ཟག་ནི། །རང་དུ་ཐོགས་ནས་བཞི་བཅུས་འགྲུབ། ༈ །དབྱིབས་ཀྱི་སྒོ་ན་བཟུང་བ་དང་། །ཁ་དོག་དང་། བསྐྱེད་རྫོགས་ཀྱི་སྒོ་ནས་བཟུང་བ་དང་། བསྟུས་རྒྱས་དང་། བག་ཆགས་དང་། བཏང་སྙོམས་དང་། མན་ངག་གི་སྒོ་ནས་བཟུང་བའོ། ༈ །ཆོས་ཉིད་བྱང་ཆུབ་ཀྱི་སེམས། གནས་པར་བྱ་བའི་རྒྱུ་འཚོག་པར་བྱ་བ་དང་། གནས་སུ་མི་སྟེར་བའི་ཉེས་པ་བརྒྱད་སྤངས་པ་དང་། །དེ་དང་མཐུན་པའི་ཆོས་བརྒྱད་རིམ་པ་བཞིན་དུ་མ་ནོར་བར་ཉམས་སུ་བླང་བར་བྱའོ། ༈ །རྒྱུ་འཚོགས་པ་ནི། ཤེས་པ་འཁྱོག་བསྲང་བ་དང་། རྒྱུད་ཞུན་དང་ཐར་སེམས་བཟང་བྱ་བ་དང་། བག་ཆགས་གང་ལ་ཡོད་ངོས་གཟུང་པ་དང་། མ་སྨིན་པ་སྨིན་པར་བྱ་དང་། བློ་མལ་དུ་གནས་པ་དང་། ལོང་དང་ལྡན་པ་དང་། ལྟ་བས་ཐག་ཆོད་པའོ། །ཉེས་པ་བརྒྱད་སྤངས་པ་ནི། འཕྲོ་མེད་པའི་ཉེས་པ་དང་། སྐལ་བ་མེད་པའི་ཉེས་པ་དང་། རྒྱུ་རྐྱེན་གཞན་ལ་རག་ལས་པའི་དང་། རྟེན་གནད་པའི་ཉེས་པ་དང་། ཐབས་ཆུངས་པའི་ཉེས་པ་དང་། རྒྱུད་ཞུན་པའི་ཉེས་པ་དང་། འཁོར་མ་ཤེས་པའི་ཉེས་པ་དང་། བཀོལ་གྲགས་པའི་ཉེས་པ་དང་བརྒྱད་དོ། །དེ་དང་མཐུན་པའི་ཆོས་བརྒྱད་ནི། རྟེན་དང་སྦྱར་ཏེ་རྒྱུ་ཚོགས་ལ་གནས་པར་བྱ་བ་དང་། རིགས་དང་སྦྱར་ཏེ་རྣལ་འབྱོར་གྱི་ཟས་བདུན་གྱིས། འཁམས་བརྟས་པར་བྱ་བ་དང་། དམིགས་པའི་ཡུལ་སེམས་གནས་པའི་མཚན་ཉིད་བསྟན་པ་དང་། སྤྱི་རྟགས་ཉི་ཤུ་རྩ་བཞིས་འཁམས་ཀྱི་ཚོད་བཟུང་པ་དང་། མདོ་གཅོད་བཞིའི་མན་ངག་གིས་མཐུན་ཚད་བཟུང་པ་དང་། ཉམས་དད་སྦྱར་ཏེ་ཕྱིར་བཅོས་པའི་ཐབས་བསྟན་པ། བསྒོམ་པ་རབ་འབྲིང་གསུམ་མམ་དགུའི་སྒོ་ནས་སེམས་གནས་པའི་ཚད་བསྟན་པ་དང་། ཉེས་པ་དྲུག་གམ་བརྒྱད་སྤང་ཞིང་བརྟན་པའི་ཆོ་ག་གཞུང་བཞིན་དུ་བྱ་བ་དང་བརྒྱད་དོ། ༈ །དབུག་དང་། ལུས་དང་། སྒྲ་དང་ནི། ཁམས་དང་ཤིང་དུ་སྦྱངས་པ་དང་། ཡུན་དང་རྗེས་ཀྱི་ཤེས་པ་དང་། སྤྱོད་ལམ་ཉོན་མོངས་འགྲིམ་མི་འགྲིབ། མཚན་ཉིད་བཞིའམ་བཅུ་ཡིས་ནི། རབ་འབྲིང་དགུའམ་གསུམ་དུ་བསྟན། ༈ །དངོས་པོ་མ་ཤེས་པའི་ཉེས་པ་དང་། མཚན་ཉིད་མ་ཤེས་པའི་དང་། དུས་ཚོད་མ་ཤེས་པའི་དང་། འཁམས་ཀྱི་ནུས་པ་དང་སྦྱོར་ཤེས་པའི་དང་། ཆོག་མ་ཤེས་པའི་དང་། གཟིང་བསྟོད་གྲགས་པའི་དང་། གཞུང་ལྟར་བྱས་པའི་དང་། གཞུང་ལྟར་མ་བྱས་པའི་ཉེས་པའོ། ༈ །གང་ཟག་འཇུག་པའི་ཉམས་དང་། རྣལ་འབྱོར་སྐྱེ་ཉམས་སོ། །དེ་ལ་བདེ་བ་གསལ་བ། མི་རྟོག་པ། མི་གཡོ་བའོ། །ཤིན་ཏུ་སྦྱངས་པའི་བདེ་བ། ཐོབ་པའི་བདེ་བ། བྲལ་བའི་བདེ་བ། འཇུག་པ་འཐབས་ཀྱི་བདེ་བ། ཉེ་བར་ཞི་བའི་བདེ་བ། བདུད་རྩི་འདྲེས་པའི་བདེ་བ། རང་བཞིན་གྱི་བདེ་བ། ཡེ་ཤེས་ཆེན་པོའི་བདེ་བ། ལྟ་བས་ཐག་ཆོད་པས་ཉམས་བ་དང་བག་ཚ་བ་ལ་སོགས་ཏེ་འཇིགས་པ་ཐམས་ཅད་དང་བྲལ་བས་བདེ། རྒྱུའི་དུས་ན་འབྲས་བུ་ཉིད་རྒྱུད་ལ་བསྐྱེད་མི་དགོས་པས་བདེ། སྣང་སྲིད་ཆོས་སྐུར་གསལ་བས་འབད་རྩོལ་གྱི་དཀའ་བ་དང་བྲལ་བས་བདེའོ། ༈ །དངོས་པོའི་གསལ་བ། ཡུལ་གྱི་གསལ་བ། རྣམ་པར་ཤེས་པའི་གསལ་བ། བདུད་རྩིའི་གསལ་བ། སྒྲོན་མའི་གསལ་བ། རང་བཞིན་གྱི་གསལ་བ། ཡེ་ཤེས་ཀྱི་གསལ་བའོ། །དབང་པོའི་སྒོ་མ་བཀག་པས་གསལ། །བྱིང་རྨུགས་ཀྱི་འཐིབས་པ་དང་བྲལ་བས་གསལ། བག་ཆགས་ཀྱི་ཁུ་རླངས་ཀྱིས་མ་རྟོགས་པས་གསལ། རྟོག་པའི་རྡུལ་གྱིས་མ་དཀྲུགས་པས་གསལ་ལོ། །ངོ་བོ་ཉིད་ཀྱིས་མི་རྟོག་པ། ཕྱིན་ཅི་མ་ལོག་པའི་མི་རྟོག་པ། སྤྲོས་པ་མེད་པའི་མི་རྟོག་པ། དྲན་བྱེད་ཀྱི་རྒྱ་དང་བྲལ་བས་མི་རྟོག །ཐ་སྙད་མེད་པའི་མི་རྟོག་པ། ཉེ་བར་ཞི་བའི་མི་རྟོག་པ། རང་བཞིན་གྱི་མི་རྟོག་པ། ཡེ་ཤེས་ཀྱི་མི་རྟོག་པའོ། །ད་ལྟ་ཞིང་སྤྱོད་པ་མེད་པས་མི་རྟོག །ཐ་སྙད་ཀྱི་སྒྲ་དང་བྲལ་བས་མི་རྟོག །གཟུང་འཛིན་གྱི་ཆར་མ་ལྷུང་པས་མི་རྟོག །བྱུང་ཚོར་གྱི་རྗེས་སུ་མ་འབྲེངས་པས་མི་རྟོག་གོ ༈ །ལྟ་བ་མི་གཡོ། བསྒོམ་པ་མི་གཡོ། སྤྱོད་པ་མི་གཡོ་བའོ། ༈ །ཐུན་མོང་མ་ཡིན་པའི་ཉམས་ནི། ཤིན་ཏུ་སྦྱངས་པས་ལུས་སེམས་ཁྱབ། །བྱས་དང་མ་བྱས་གཉིས་ཀ་འོང་། །དུས་ནི་ཕལ་ཆེར་ཀུན་ཏུ་འོང་། །སྤྱོད་ལམ་བཞི་དང་མཚུངས་པར་ལྡན། །མིག་ནི་དང་རྩུམ་གཉིས་ཀར་བདེ། །ལེགས་ཉེས་སྐྱོན་གྱིས་ཆེར་མི་གཡོ། །ཉོན་མོངས་སྐྱོན་གྱིས་ཆེར་མི་གནོད། །ཐ་མལ་རྟོག་པ་ཐམས་ཅད་ནུབ། །ཐ་མལ་སྒྱུ་ཆེན་གནོད་མི་འགྱུར། །ཚིག་གི་ཐ་སྙད་ཀུན་དང་བྲལ། །དམ་ཆོས་གང་ཐོས་བདུད་རྩིར་བལྟ། །འགྲོ་བ་གང་མཐོང་སྙིང་རྗེ་སྐྱེ། །ལམ་ལ་གང་གནོད་བདུད་དུ་ལྟ། །དངོས་པོ་གང་མཐོང་ཞེན་པ་ལོག །མཚན་མའི་སྤྱོད་ཞེན་དང་བྲལ་བ། །བག་ཆགས་ངན་པའི་རྨིས་ལྟས་ནུབ། །གློ་བུར་ནད་ཀྱིས་གནོད་མི་ནུས། །འབྲས་བུ་མངོན་ཤེས་རེ་སྒུགས་བྲལ། །བཅྭ་བརྒྱད་ལྡན་པའི་གང་ཟག་ནི། །རྒྱལ་སྲས་དང་པོའི་མཚོན་ཡིན་ནོ། ༈ །ཚོགས་ལ་གནས་པས་བོགས་དབྱུང་པ་དང་། མཚན་མ་རྟེན་ཅན་སྔོན་དུ་སོང་པས་བོགས་དབྱུང་པ་དང་། བསམ་གཏན་སྤེལ་བས་དང་། སོ་སོར་རྟོགས་པའི་ཤེས་རབ་ཀྱིས་དང་། བསྟི་ཞིང་ངལ་བསོ་བས་དང་། བསམ་མནོ་དྲག་པོ་དང་། ལྟ་རྟོག་དྲག་པོས་དང་། བསྒྲོ་གླེང་དྲག་པོས་དང་། ཁ་ཟས་དང་། སྒྲ་གཅོད་དྲག་པོས་དང་། སྤྱོད་ལམ་དང་། བརྟུལ་ཤུགས་དང་། མན་ངག་གིས་བོགས་དབྱུང་བའོ། ༈ །ཡིན་པའི་དོན་ལ་ནོར་བའི་རིག་པ་འཇོག་ན་ལྟ་བའི་གོལ་ས། དམ་ཚིགས་ཕྱོགས་ཅན་དུ་བསྲུང་ན་དམ་ཚིག་གི་གོལ་ས། འཕྲིན་ལས་གཟའ་གཏད་ཀྱིས་རྩོལ་ན་དེའི་གོལ་ས། རྟོགས་པའི་རིག་པ་གྲངས་སུ་བགྲང་ན་ཡེ་ཤེས་ཀྱི་གོལ་ས། རྟོགས་པ་རྒྱབ་ཀྱིས་ཕྱོགས་ལ་མི་རྟོག་པ་ལ་མངོན་དུ་བྱེད་ན་འཕྲ་བའི་གོལ་ས། འོག་ནས་གོང་དུ་རྒྱུ་ལས་འབྲས་བུར་རྩོལ་ན་ཕ་རོལ་དུ་ཕྱིན་པའི་གོལ་ས། ལྷ་དང་དཀྱིལ་འཁོར་ལ་ཆགས་ན་རྒྱུད་གོལ་ས། དབྱིངས་དང་ཡེ་ཤེས་ལ་རྟེན་འཆའ་ན་ལུང་དུ་གོལ། ལྟ་བ་སྤྱོད་པ་དབྱིངས་ལས་ཐལ་གྲགས་ན་མན་ངག་གི་གོལ་པའོ། ༈ །ཡོད་པར་ལྟ་བ། ཡིན་པར་ལྟ་བ། བཟང་པོར་ལྟ་བ། ཡོན་ཏན་དུ་ལྟ་བ། གཙང་པར་ལྟ་བ། དག་པར་ལྟ་བ། བདག་ཏུ་ལྟ་བ། འབྲས་བུར་ལྟ་བ། འདུས་བྱས་སུ་ལྟ་བ། ཉོན་མོངས་པར་ལྟ་བ། ཀུན་རྫོབ་ཏུ་ལྟ་བའོ། ༈ །འགེགས་ཤིང་སྤོང་པ་དང་། རྩོལ་ཞིང་བསྒྲུབ་པ་དང་། བསྒྲོད་ཅིང་སྦྱོང་བ་དང་། དབྱེ་གསལ་བླང་དོར་བྱེད་པ་དང་། གཉེན་པོ་རྒྱུད་ལ་བརྟེན་པ་དང་། དམིགས་པ་ནང་དུ་བསྡུད་པའོ། ༈ །མཉམ་པ་ཉིད་ཀྱི་གོལ་བསྒྲིབ་སུམ་ཅུ་དག་རྒྱུད་ལས་བྱུང་པ་གང་ཞེ་ན། ལེ་ལོ་བྱ་བ་མང་པོ་དང་། རྒོད་པ་དང་ནི་སེམས་གཡེང་དང་། རྨུགས་དང་། འདོད་ཆེན་ཆེ་བ་དང་། བརྩོན་འགྲུས་ཆུང་དང་གཉིས་ལ་དགའ། །རེ་བ་མང་དང་དོགས་པ་མང་། །ཁ་ཐོན་དང་ནི་གློག་དང་འདྲི། །ཅ་ཅོ་མང་པོ་སྨྲ་བ་དག །བར་དུ་གཅོད་པ་བཅུ་བཞི་ཡིན། །མི་གཡོ་བ་དང་གསལ་བ་དང་། །བདེ་བ་དང་། སེམས་ལ་རྣམ་རྟོག་མང་པོ་སྐྱེས། །མངོན་པར་ཤེས་པ་དག་དང་ནི། །མཚན་མའི་རྫུ་འཕྲུལ་འབྱིན་པ་དང་། །འདི་ལས་ལྷག་པ་མེད་དོ་ཞེས། །ཆོག་པ་རུ་ནི་འཛིན་པ་དང་། །བདག་གི་ལྟ་བ་ངོམ་པ་དང་། །གཞན་གྱི་ལྟ་བ་ཁྱད་དུ་གསོད། །ཏིང་ངེ་འཛིན་གྱི་བསྒྲིབ་བཅུ་ཡིན། །བློ་བུར་ཞེ་སྡང་ཆེན་པོ་འབྱུང་བ་དང་། །བློ་བུར་འདོད་ཆགས་ཆེན་པོ་ལྡང་བ་དང་། །ཕྲག་དོག་ང་རྒྱལ་འཁྲུག་པ་དང་། །གཟུ་རྔུ་མུན་པས་འཐིབས་པ་དང་། །ལྟ་བ་སྙེམས་དང་འདི་དྲུག་ནི། །ཏིང་ངེ་འཛིན་གྱི་སྐྱོན་དྲུག་ཡིན། ༈ །ཉན་ཐོས་ཀྱིས་གང་ཟག་གི་བདག་མེད་པ་ཙམ་རྟོགས་པ་དེ་བསྒྲིབ་པའོ། །དབུ་མས་གཉིས་ཀ་མེད་པར་རྟོགས། སྒྱུ་མ་ཙམ་དུ་སྤང་བླང་བྱེད་པ་བསྒྲིབ་པའོ། །ནང་པས་ཆོས་ཐམས་ཅད་མ་སྐྱེས་པ་ཡིན་ལ་དབྱིངས་ཡུལ་དུ་བྱས་ནས་ཏིང་ངེ་འཛིན་གྱིས་རྩོལ་བས་བསྒྲིབ་པའོ། །ཨ་ཏི་ནི་རྒྱུ་རྐྱེན་མེད་པར་རང་བྱུང་ལ། བསྒྲིབ་བྱེད་མེད་པར་རང་གསལ་བ་ཡིན་ནོ། ༈ །ཉམས་ནི། ཏིང་ངེ་འཛིན་ཤས་ཆེ་བའི་ཉམས་རྣམ་པ་ལྔ་ནི། ཤིན་ཏུ་སྦྱངས་པ་འཇམ་རྩུབ་ཀྱིས་ལུས་སེམས་ལ་ཆེར་ཁྱབ་པ་དང་། འཛིན་ཆེ་ཞིང་མཐུག་ལ་བརྟེན་པ་དང་། གཏང་དཀའ་བ། བཀོལ་དུ་མི་འདོད་པ། བྱུང་ཚོར་སྣ་ཚོགས་ཀྱི་རྗེས་སུ་མི་འབྲང་པའོ། །ཤེས་རབ་ཤས་ཆེ་བ་ནི། རྣམ་པ་མེད་ལ་གཡོ་བག་ཅན་དུ་འདུག་པ། རྟོག་སྤྱོད་གཉིས་ཀྱི་ཤས་ཆེ་བ། ཏིང་ངེ་འཛིན་དུ་མི་འཇུག་པ། ཆོས་ཀྱི་སྣང་བ་འཆར་བ། སྣང་སྤྱོད་ཐམས་ཅད་དེ་ཁོ་ན་ཉིད་དུ་རྟོགས་ཤིང་ཡིད་ཆེས་པའོ། །གཉིས་ཀ་ཤས་ཆེ་བ་ནི། ཇི་ལྟར་འདོད་པ་བཞིན་དུ་འཇུག་པ་དང་། དང་པོར་བབས་སླ་བ། བར་དུ་རྐྱེན་གྱིས་གནོད་པ་ཆུང་བ། ཐ་མར་བརྟན་ལ་ཡུན་རིང་དུ་གནས་པ། ཤིན་ཏུ་སྦྱངས་པ་ཤས་ཆེ་བ་དང་། བྱིང་རྒོད་གཉིས་ཀྱིས་དབེན་པ། ཁམས་ཀྱི་གནོད་པ་ཆུང་ལ་ཉོན་མོངས་པ་འགྲིབ་སྐྱེན་པའོ། །གཉིས་ཀ་ཤས་ཆུང་བ་ནི། གཞག་ཐབས་སྣ་ཚོགས་ཀྱི་སྒོ་ནས་གཞག་ན་གཞག་ཏུ་བཏུབ་ལ། དང་པོར་བབས་དཀའ། བར་དུ་རྐྱེན་གྱིས་གནོད་པ་ཆེ། ཐ་མར་སངས་སྐྱེན་པ། རྟོག་དཔྱོད་གཉིས་ཀ་ཤས་ཆེར་འབྱུང་བ་དང་། ཤིན་ཏུ་སྦྱངས་པ་ཞན་ཅིང་འཛིན་ཆུང་བ་དང་། ཁམས་ཀྱི་གནོད་པ་ཆེ་ཞིང་ཉོན་མོངས་པ་འགྲིབ་བུལ་བའོ། །ཏིང་ངེ་འཛིན་འཕེལ་པའི་རྒྱུ་ལྔ་ནི། རྒྱུ་ཚོགས་ལ་གནས་པས་རབ་ཏུ་འཕེལ། ལེ་ལོ་དང་གཡེང་བ་སྤངས་ཤིང་རྩོལ་བའི་ལམ་ལ་གནས་པས་འཕེལ། ཚངས་པར་སྤྱོད་པ་ལ་གནས་ཤིང་ཚུལ་ཁྲིམས་དང་དམ་ཚིག་རྣམ་པར་དག་པར་འཕེལ། རྟེན་རྒྱས་པའི་རྒྱུ་བསྟེན་ཅིང་སོ་སོར་རྟོག་པའི་ཤེས་རབ་ཀྱི་མེ་སྦར་བས་འཕེལ། དྲོད་ཚད་སྙོམས་ཤིང་རྟེན་མ་ཉམས་པས་འཕེལ་ལོ། །ཤེས་རབ་འཕེལ་བའི་རྒྱུ་ལྔ་ལ། རྒྱུ་ཚོགས་ལ་གནས་པར་པས་རབ་ཏུ་འཕེལ། བླ་མ་དང་གསལ་བྱེད་ཀྱི་སྒྲོན་མ་དང་མ་བྲལ་བས་འཕེལ། རྟག་ཏུ་བད་ཀན་རྒྱས་པའི་རྒྱུ་སྤངས་པས་འཕེལ། རྟེན་རྒྱས་པའི་རྒྱུ་རྟེན་ཅིང་ཟབ་མོའི་དོན་ལ་མ་སྨོས་པས་འཕེལ། དྲོད་ཆད་སྙོམས་ཤིང་རྟེན་མ་མཉམ་པས་འཕེལ་ལོ། ༈ །དགོན་དྲུག་བསྟེན་པའི་ཚུལ་གྱིས་སྤྱོད་པར་བྱ། མཐའ་དྲུག་སྤང་བའི་ཚུལ་གྱིས་སྤྱད་པར་བྱ། མཐུན་བཞི་བསྟེན་པའི་ཚུལ་གྱིས་སྤྱད་པར་བྱ། མཐའ་གཉིས་སྦྱངས་པའི་ཚུལ་གྱིས་སྤྱད་པར་བྱ། གྲོགས་བཟང་བསྟེན་ཅིང་གྲོགས་ངན་སྤང་བའི་ཚུལ་གྱིས། མཐུན་པ་བླ་མར་ཤེས་པའི་ཚུལ་གྱིས། མི་མཐུན་པ་བདུད་དུ་ཤེས་པའི་ཚུལ་གྱིས། ཐམས་ཅད་ནམ་མཁའི་ངང་ཚུལ་ལ་བཏང་སྙོམས་ཆེན་པོའི་ཚུལ་གྱིས། སྦྱང་པ་རྣམ་གསུམ་གང་མཐུན་བསྟེན་པའི་ཚུལ་གྱིས་སྤྱད་པར་བྱ། ཀུན་ཏུ་བཟང་པོ་འཕེལ་འགྲིབ་པའི་ཚུལ་གྱིས། ཀུན་ཏུ་བཟང་མོ་འཕེལ་དང་འགྲིབ་པའི་ཚུལ་གྱིས་སྤྱད་པར་བྱའོ། །རྣལ་འབྱོར་ཕུག་ཏུ་མི་འདུག་དབང་པོ་ཡན་དུ་ཁྱེ། །ཅོག་གེ་མི་འདུག་ངལ་བའི་ལས་མི་བྱ། འགྲངས་ལ་ཚོད་ཟིན་པ། འཕྲོད་ལ་སྣ་མང་པའོ། །མན་ངག་རིན་པོ་ཆེ་སྤུངས་པ། རྫོགས་སོ། ༈ །ཨ་ཏི་ཡོ་ག་རྫོགས་པ་ཆེན་པོ་ནི། རྩོལ་བསྒྲུབ་བྱ་བརྩལ་ལས་འདས་པའི་ཆོས་ཡིན་ཏེ། སངས་རྒྱས་ནི་ཆོས་ཀྱི་སྐུ་ཐིག་ལེ་ཉག་གཅིག་ཡིན་ལ། ཆོས་ཀྱི་སྐུ་ནི་རང་གི་བྱང་ཆུབ་ཀྱི་སེམས་ཇི་བཞིན་རྟོགས་པ་ལ་བྱ། རང་བྱང་ཆུབ་ཀྱི་རང་བཞིན་ཚིག་ཙམ་མ་ཡིན་པའི་མན་ངག་ཡིན་པས་ངང་ལ་གནས་སྐྱེན། གནད་ཀྱི་མན་ངག་ཡིན་པས་ཞེན་གྱི་མདུད་པ་གྲོལ་སྐྱེན། ཁོང་ནས་ཁོང་དུ་གྲོལ་བའི་མན་ངག་ཡིན་པས་ཡེ་ཤེས་འཆར་སྐྱེན་ནོ། ༈ །ཨ་རོ་ཡེ་ཤེས་དེས་ཡ་ཟི་བོན་བཙུན་ལ་བཤད། དེས་གྲུ་གུ་གློག་འབྱུང་ལ། དེས་སྦས་བསྒོམ་བསོད་ནམས་སྙིང་པོ་ལ། དེས་འཛི་བསྒོམ་ལ། དེས་བ་རང་བསྒོམ་ཆེན་ལ། དེས་ཇོ་མོ་ཉང་མོ་ལ། དེས་དམ་པ་ཤག་རྒྱལ་ལ། དེས་དམ་པ་རིན་པོ་ཆེ་ལ། དེས་སྤྲུལ་སྐུ་རིན་པོ་ཆེ་ལ། དེས་བླ་མ་རྟ་ཆེན་པོ་ལ། དེས་བླ་མ་མཁས་པ་གཟི་བརྗིད་ལ། དེས་རྟ་བན་བདག་ལ་གནང་ངོ་།། །།རྟ་བན་རིན་ཆེན་དཔལ་གྱི་ཕྱག་དཔེའོ།།

བླ་མ་དྲུག་གི་གདམས་ངག དབུས་པ་རྟ།

བླ་མ་དྲུག་གི་གདམས་ངག །ཀུན་ཏུ་བཟང་པོ་རྡོ་རྗེ་སེམས་དཔའ་དགའ་རབ་རྡོ་རྗེའི་ཐུགས། །བཀའ་བབས་གདུང་རབས་གོང་མ་རྣམས་ལ་གུས་པས་འདུད། །ཡ་རབས་སྐལ་ལྡན་རྣམས་ཀྱི་དོན་ཆེད་དུ། །ངོ་སྤྲོད་གདམས་ངག་བླ་མའི་གསུང་བཞིན་བྲི། །སྤྱིར་མཚོན་བྱ་དོན་གྱི་རྫོགས་པ་ཆེན་པོ་དང་། མཚོན་བྱེད་ཚིག་གི་རྫོགས་པ་ཆེན་པོ་གཉིས་སུ་གོ་བ་ལོང་མཛོད་ལ། དེ་ཡང་མཚོན་བྱའི་དོན་ནི་གཞན་ལ་མི་བདོག་སྟེ། རང་གི་སེམས་ཉིད་སྟོང་གསལ་འཛིན་མེད་དུ་རང་ལ་རང་ཆས་སུ་གནས་པ་དེའོ། །དེ་ཡང་རྫོགས་པ་རང་ཇི་ལྟར་རྫོགས། ཆེ་བ་རང་ཅིས་ཆེ་ན་འཁོར་འདས་ལམ་པས་བསྡུས་པའི་ཆོས་ཐམས་ཅད་རང་གི་སེམས་སྟོང་གསལ་གཉིས་མེད་ཀྱི་ཆོས་སྐུར་ཡེ་ནས་རྫོགས་པས་རྫོགས་པ། དེ་ལས་ལྷག་པའི་བསྒྲུབ་བྱ་གཞན་མེད་པས་ཆེན་པོའོ། །དེ་ཡང་སེམས་ཕྱོགས་རྩ་བ་ལས། ལྷག་མ་མེད་པར་ཡོངས་སུ་རྫོགས། །ཆེ་བའི་ཆེན་པོར་རང་བཞིན་གནས། །ཞེས་སོ། །འོ་ན་རང་ཆས་སུ་གནས་པས་ཆོག་མོད། གཏན་ལ་དབབ་ཅི་དགོས་ཞེ་ན། དགོས་ཏེ་དེ་ལྟར་གནས་ཀྱང་དང་པོར་རང་ངོ་མ་ཤེས། བར་དུ་རང་ས་མ་ཟིན། ཐ་མ་རང་དབང་མ་ཐོབ་སྟེ། མངལ་སྒོ་རང་དབང་མེད་པར་འགྲིབས་པས། ཁམས་གསུམ་དུ་འཁོར་རྒྱུད་དྲུག་ཏུ་འཁྱམས་ཤིང་སྡུག་བསྔལ་སྣ་ཚོགས་ཉམས་སུ་མྱོང་ངོ་། །འཁྲུལ་པ་དེ་བཟློག་པར་བྱེད་པ་ལ། དང་པོ་རང་ངོ་ཤེས་པར་བྱ། བར་དུ་རང་ས་ཟིན་པར་བྱ། ཐ་མ་རང་དབང་ཐོབ་པར་བྱ་སྟེ། དེ་ཡང་དང་པོ་སྐྱེ་འགག་གཉིས་མེད་དེ་རང་ངོ་ཤེས་པར་བྱ་སྟེ། དེ་ཡང་། ཆོས་རྣམས་དཔེ་ཡིས་མཚོན་ཏེ་བསྟན། །ཆོས་རྣམས་དེ་ཡིས་མ་མཚོན་ན། །རྨོངས་པས་གོ་བར་ག་ལ་འགྱུར། །ཞེས་པས། འདུས་མ་བྱས་ཀྱི་ནམ་མཁའ་དཔེར་བླངས་ལ། དེ་ཡང་ནམ་མཁའ་ལ་བལྟས་པས་ཁ་དོག་ཏུ་མ་གྲུབ། དབྱིབས་སུ་མ་གྲུབ། མཚན་ཕོ་མོ་མ་ནིང་དུ་མ་གྲུབ། འདི་ཕྱིར་ན་འདི་ཡིན་བྱ་བའི་ངོས་བཟུང་ཐམས་ཅད་དང་བྲལ་ཏེ། ཕྱོགས་སུ་ཞེན་པ་དང་འཛིན་པ་མཐའ་དག་གིས་སྟོང་པ་བཞིན་དུ། བྱང་ཆུབ་སེམས་ཀྱི་རང་བཞིན་ལ་ཡང་། ཁ་དོག་ཏུ་མ་གྲུབ། དབྱིབས་སུ་མ་གྲུབ། མཚན་ཕོ་མོ་མ་ནིང་དུ་མ་གྲུབ། འདི་ཕྱིར་ན་འདི་ཡིན་བྱ་བའི་ངོས་བཟུང་ཐམས་ཅད་དང་བྲལ་ཏེ། ཕྱོགས་སུ་ཞེན་པ་དང་འཛིན་པ་ཐམས་ཅད་ཀྱིས་སྟོང་། དེ་ཡང་། ནམ་མཁའི་རྟོག་པ་སྐྱེ་མེད་ཅིང་། །ཞེས་པས། སྐྱེ་བ་མེད་པར་རང་ངོ་ཤེས་པར་བྱའོ། །དཔེར་ན་ནམ་མཁའ་ལས་སྤྲིན་ན་བུན་དང་ཁུ་གླངས་དང་། ཉི་ཟླ་གཟའ་སྐར་ལ་སོགས་པ་མ་འགགས་པར་ཤར་བ་བཞིན་དུ། སེམས་ཉིད་ངོས་བཟུང་དང་བྲལ་བ་དེ་ཉིད་འཛིན་མེད་ཀྱི་རིག་པ་ཕྱོགས་མེད་དུ་རང་སྣང་སྟེ། འཁོར་འདས་ལམ་གསུམ་དུ་མ་འགགས་པར་ཤར་རོ། །དེ་ཡང་། རྟོག་པ་དེ་ཉིད་ནམ་མཁའ་འདྲ། །ཞེས་པས། འགག་པ་མེད་པར་རང་ངོ་ཤེས་པར་བྱའོ། །དཔེར་ན་སྤྲིན་ཉིད་ནམ་མཁའི་ངང་ལས་བྱུང་ནམ་མཁའ་ཉིད་དུ་ཞི། ནམ་མཁའ་དང་སྤྲིན་དབྱེར་མི་ཕྱེད་པ་བཞིན། སེམས་སྐྱེད་ངོས་བཟུང་དང་བྲལ་བའི་དུས་ཉིད་ན། འཛིན་མེད་ཀྱི་རིག་པ་རང་སྣང་། རང་སྣང་བསྔོ་བའི་དུས་ཉིད་ན་ངོས་བཟུང་དང་བྲལ་ཏེ། སྟོང་བསྔོ་བའི་དུས་ན་སྣང་། སྣང་བསྔོ་བའི་དུས་ན་སྟོང་སྟེ་དབྱེར་མི་ཕྱེད་དོ། །དེ་ཡང་། མི་ཆགས་ནམ་མཁའི་བསྔོ་བ་ལས། ཞེས་པས། གཉིས་སུ་མེད་པར་རང་ངོ་ཤེས་པར་བྱའོ། །དཔེར་ན་ཤར་གྱི་ནམ་མཁའ། ལྷོའི་ནམ་མཁའ་ལ་ཡུལ་དུ་བྱས་ནས་ལྟར་མེད། ལྷོའི་ནམ་མཁའ་ཤར་གྱི་ནམ་མཁའ་ལ་ཡུལ་དུ་བྱས་ནས་བསྒོམ་དུ་མེད་པ་བཞིན་དུ། གཉིས་མེད་ལ་ཡུལ་དུ་བྱས་ནས་ལྟ་ཞིང་བསྒོམ་དུ་མེད་དེ། བློ་ངོ་བོ་ཉིད་དུ་གྲོལ་ཆེན་པོར་རང་ངོ་ཤེས་པར་བྱའོ། །དེ་ལྟར་རང་ངོ་ཤེས་པ་དེ་ལྟ་བའོ། །དེ་ལྟར་ལྟ་བས་ཕྱོགས་མེད་རྟོགས་པས་ཡོན་ཏན་ཕྱོགས་ཞེན་འཛིན་པ་གྲོལ་དགོས། སེམས་ཉིད་སྐྱེ་བ་མེད་ངོས་བཟུང་དང་བྲལ་བར་རྟོགས་པས་སྣང་བའི་ཕྱོགས་ཞེན་དང་འཛིན་པ་ལས་གྲོལ་འཛིན་མེད་ཀྱི་རིག་པ་རང་སྣང་དུ་རྟོགས། སྟོང་པ་ཕྱོགས་ཞེན་དང་འཛིན་པ་ལས་གྲོལ་ལོ། །དེ་གཉིས་སུ་མེད་པར་རྟོགས་གཉིས་འཛིན་གྱི་ཞེན་པ་དང་འཛིན་པ་ལས་གྲོལ། གཉིས་མེད་རང་གྲོལ་ཆེན་པོར་རྟོགས་པས་ཡུལ་ཡུལ་ཅན་གྱིས་ཞེན་པ་དང་འཛིན་པ་ལས་གྲོལ་ལོ། །དེ་ལྟར་ཡིན་ལུགས་ཤེས་ཀྱང་ཞེན་པ་དང་འཛིན་པ་གྲོལ་དུ་མ་བཏུབ་ན་བསྒོམ་དགོས་པ་ཡིན། དེ་ལ་བར་དུ་རང་ས་ཟིན་པར་བྱ་སྟེ། སེམས་དུག་གསུམ་རྟོག་པའི་རྗེས་སུ་མི་འབྲངས་ཏེ། ལུས་ངག་ཡིད་གསུམ་ཁོང་གློད་ལ། །སྔར་འདས་པའི་རྗེས་མི་གཅོད། ཕྱིས་མ་འོངས་པ་སྡུན་མི་བསུ། ད་ལྟའི་ཤེས་པ་རྩི་གདབ་མེད་པའི་མདོ་འདི་ཀར་སློད་ལ་གཞན་པས། གསལ་ལ་རྟོག་པ་མེད། གསལ་ལ་འཛིན་པ་མེད་པའི་ཤེས་པ་ས་ལེ་སངས་ངེ་བ་གཅིག་རྒྱུད་ལ་སྐྱེའོ། །དེ་དུས་གསུམ་སངས་རྒྱས་ཀྱི་དགོངས་པ་ཡིན་པས་རྣལ་འབྱོར་པས་ཉམས་ལེན་བྱའོ། །རང་དབང་ཐོབ་པ་ནི། དེ་ལྟར་ལྟ་བ་སྐྱེ་འགག་གཉིས་མེད་དུ་རང་ངོ་ཤེས། སྟོང་གསལ་འཛིན་མེད་ཏུ་རང་ས་ཟིན་པས་དེའི་ངང་ལ་འཁྲུལ་རྒྱུ་མེད་དེ། བར་དོའི་དུས་སུ་མ་ལ་སྒོ་སོག་མའི་སྦུ་གུ་བཞིན་དུ་འདུག་ཀྱང་རང་དབང་མེད་པར་མི་འགྲིམ་མོ། །མངལ་སྒོ་མ་འགྲིམས་རང་ངོ་རང་གིས་ཤེས་པ་རང་ས་ཟིན། སྡུག་བསྔལ་མ་སྤངས་ཆོས་ཉིད་ཏུ་རང་གྲོལ་བ་ལ་སངས་རྒྱས་ཟེར་ཏེ། དེ་ལས་སེམས་ཅན་གྱི་དོན་ཇི་ལྟར་འབྱུང་ན། ཉི་མ་ལས་འོད་རང་བཞིན་གྱིས་འབྱུང་བའམ། རིན་པོ་ཆེ་ལས་དགོས་འདོད་འབྱུང་པ་བཞིན་དུ་སེམས་ཅན་གྱི་དོན་འབད་མེད་དུ་འབྱུང་ངོ་། །དེ་ཡང་། རང་དོན་ཆེན་པོ་ནམ་མཁའ་འབྱུང་། །ཞེས་སོ།། ཨིྀཊ྅྅྅། སྟོང་གསལ་ཆོས་སྐུའི་གནས་ལུགས་དེ། །ལྟ་བསྒོམ་ངོ་ཤེས་རང་ས་འཛིན། །ཞིག་པོ་སྤྲུལ་སྐུའི་ཞལ་གདམས་འདི། །དབུས་པ་རྟ་ཡིས་ཡི་གེར་བཀོད། །བཏགས་པས་ཉམས། བཅོས་པས་སླད། བསྒོམ་པས་འཁྲུལ། ཨ་ཡུ་རང་རང་གིས་རང་སྟོང་པ་ལྟ་བུའོ། །ཞེས་འཁྲུལ་ལུགས་ཀྱི་སྐབས་སུ་ཨ་ཡུ་རའི་གཏམ་རྒྱུད་གསུང་ངོ་།། །།

རྫོགས་པ་ཆེན་པོའི་མན་ངག རྟ་ཇོ་ཡེ།

རྫོགས་པ་ཆེན་པོའི་མན་ངག་བཞུགས། སྤྲུལ་སྐུའི་རིན་ཆེན་ཀུན་བཟང་ཞལ། །མཉམ་པ་རིན་ཆེན་འགྲོ་བའི་མགོན། །སྤྲུལ་སྐུ་རིན་ཆེན་ཞིག་པོ་འདི། །ཞབས་ལ་གུས་པའི་མགོ་བོས་འདུད། །བླ་མ་རིན་པོ་ཆེའི་ཞལ་གྱི་གདམས་པ་རྫོགས་པ་ཆེན་པོའི་མན་ངག་འདི་ལ་གསུམ་སྟེ། སྟོང་པ་བརྩོན་དུ་བཟུང་བ་དང་། །རིག་པ་གནད་ལ་དབབ་པ་དང་། །རྣམ་རྟོག་འཕྲང་ནས་གདོན་པའོ། །དེ་ལས་དང་པོ་སྟོང་པ་བརྩོན་དུ་བཟུང་པ་ནི། ད་ལྟར་གྱི་རྣམ་པ་འདི་སྒྱུ་མ་མཁན་གྱི་རྟ་གླང་ངམ་གཉིད་ལོག་པའི་རྨི་ལམ་དང་འདྲ་སྟེ། སྣང་བ་བདེན་མེད་གཅིག་ཏུ་གོ་དགོས་པའོ། །དེ་ཡང་དཔེར་ན་སྒྱུ་མ་མཁན་གྱིས་ཤིང་བུ་དང་རྡེའུ་ལ་སྔགས་དང་སྦྱོར་རྩི་བཏབ་པས། རྟ་དང་གླང་པོ་མེད་བཞིན་དུ་སྣང་སྟེ། སྣང་ཡང་དོན་ལ་རང་གྲུབ་པ་མེད་དོ། །གཉིད་ལོག་པའི་རྨི་ལམ་ན་ཡང་བདེ་སྡུག་ཅི་རྨྱིས་ཀྱང་དོན་ལ་གྲུབ་པ་མེད་པ་བཞིན་དུ། འདི་ལྟར་འདི་ལྟར་སྣང་བ་འདི་ཡང་དོན་ལ་གྲུབ་པ་མེད་དེ་ཤེས་པ་འཁྲུལ་བའི་བག་ཆགས་ཀྱི་མཐུས་རྒྱུན་བརྟས་པའོ། །དོན་ལ་གྲུབ་པ་མེད་པར་ཤེས་པ་ནི་སྟོང་པ་བཙོན་དུ་བཟུང་བ་ཡིན་ནོ། །རིགས་པས་ཀྱང་གཏན་ལ་དབབ་སྟེ། །དེ་ལ་བཞི་ལས། ལྟོས་པའི་རིགས་པ་དང་། ཆོས་ཉིད་ཀྱི་རིགས་པ་དང་། བྱ་བ་བྱེད་པའི་རིགས་པ་དང་། འཐད་པ་བསྒྲུབ་པའི་རིགས་པའོ། །དེ་ལ་ཆོས་ཉིད་ཀྱི་རིགས་པ་ནི། བརྩིགས་པའི་མཐའ་འཇིག་པ་ཁོ་རང་གི་གཤིས་སམ་ཆོས་ཉིད་ཡིན་ཏེ། དེ་གོ་ན་ཡུལ་དང་ཁྱིམ་གྱིས་ཞེན་པ་གྲོལ་དགོས། བསགས་པའི་མཐའ་འཛད་པ། ཁོ་རང་གི་གཤིས་སམ་ཆོས་ཉིད་ཡིན་ཏེ། དེ་གོ་ན་ནོར་རྫས་ཀྱི་ཞེན་པ་གྲོལ་དགོས། འདུས་པའི་མཐའ་འབྲལ་བ་ཁོ་རང་གི་གཤིས་སམ་ཆོས་ཉིད་ཡིན་ཏེ། དེ་གོ་ན་ཉེ་འབྲེལ་གྱི་ཞེན་པ་གྲོལ་དགོས། སྐྱེས་པའི་མཐའ་འཆི་བ་ཁོ་རང་གི་གཤིས་སམ་ཆོས་ཉིད་ཡིན་ཏེ། དེ་གོ་ན་རང་ལུས་ཀྱི་ཞེན་པ་གྲོལ་དགོས་སོ། །སྤྱིར་ན་འདུས་བྱས་ཐམས་ཅད་མི་རྟགས་པ། སྒྱུ་མ་མཁན་གྱི་རྟ་གླང་ངམ་གཉིད་ལོག་པའི་རྨི་ལམ་དང་འདྲ་སྟེ། བདེན་མེད་དུ་ཤེས་པ་ནི་སྟོང་པ་བཙོན་དུ་བཟུང་པའོ། །དེ་ལྟར་ཤེས་ཙམ་ན་གཙང་སྦྲ་ཅན་སྐྱུགས་པ་མཐོང་པའམ། ཁྱིམ་མི་འདོད་ཀྱི་བུ་མོའམ་སྐྱུག་ནད་ཅན་ལ་ཟས་སྟབས་པ་བཞིན་དུ་སྐྱུག་ལོག་གིས་འགྲོ་དགོས་སོ། །གཉིས་པ་རིགས་པ་གནད་ལ་དབབ་པ་ལ་གཉིས་ཏེ། བྱ་བ་མ་འགག་པ་ཐབས་ཀྱི་ཆ་དང་། བྱེད་པ་མི་དམིགས་པ་ཤེས་རབ་བོ། །དེ་ལ་ཐབས་ནི། ཕྱག་འཚལ་བ་དང་བསྐོར་བ་བྱེད་པ་དང་། ཆོས་སྤྱོད་བཅུ་དགེ་བ་བཅུ་བསླབ་པའི་མཐའ་བཅུ་ཕ་རོལ་དུ་ཕྱིན་པ་བཅུ་ལས་སོགས་པའོ། །ཤེས་རབ་ནི། ལུས་ངག་ཡིད་གསུམ་ཁོང་གློད་ལ། སྔར་འདས་པའི་རྗེ་མི་གཅོད། མ་འོངས་པའི་སྔུན་མི་བསུ། ད་ལྟ་ཡུལ་ལྔའི་རྗེས་སུ་མི་འབྲེངས་། ཤེས་པ་རྩི་གདབ་མེད་པར་གཞག་གོ། །ཨ་རོའི་ཞལ་ནས། སྔར་རྗེས་མི་གཅོད་འདས་པའི་འ དུ་ཤེས་དོར། ཕྱིས་མདུན་མི་བསུ་ཡིད་ཀྱི་འབྲེལ་ཐག་གཅད། བར་པ་འཛིན་མེད་ནམ་མཁའི་ངང་ལ་ལྟ། དུས་གསུམ་གཅིག་ཏུ་གཞག་པའི་མན་ངག་ཡིན། །ཞེས་པ་དང་། ནམ་མཁའ་ཆེ་ལས། དུས་གསུམ་གཅིག་སྟེ་ཁྱད་པར་མེད། །སྔོན་མེད་ཕྱིས་མེད་གདོད་ནས་འབྱུང་། །ཆོས་སྐུས་ཁྱབ་པས་གཅིག་པའི་ཕྱིར། །ཆེ་བ་ཆེན་པོ་རང་བཞིན་གནས། །ཞེས་པས་སོ། །དེ་ལྟར་གཞག་པས་གསལ་ལ་རྟོག་པ་མེད་པ། གསལ་ལ་འཛིན་པ་མེད་པའི་ཤེས་པ་སེ་ལེ་སང་ངེ་བ་དེ་ཡིན་ནོ། །དེ་དུས་གསུམ་སངས་རྒྱས་ཀྱི་དགོངས་པ་ཡིན་པས། རྣལ་འབྱོར་པས་ཀྱང་ཉམས་ལེན་བྱའོ། །དེ་ཡང་དཔེར་ན་བྱ་ནམ་མཁའ་ལ་འཕུར་བ་ལ་གཤོག་པ་གཉིས་དགོས་པ་བཞིན་དུ་སངས་རྒྱ་བར་བྱེད་པ་ལ་ཐབས་ཤེས་རབ་ཟུང་དུ་འབྲེལ་དགོས་ཏེ། ནམ་མཁའ་ཆེ་ལས། ཤེས་རབ་ཐབས་ལ་བསྟེན་པས་འགྲུབ། །ཞེས་ཐབས་ཤེས་རབ་ཟུང་འབྲེལ་དུ་ཉམས་སུ་བླང་ངོ་། །གསུམ་པ་རྣམ་རྟོག་འཕྲང་ནས་གདོན་པ་ནི། སྤྱིར་རྣམ་རྟོག་ནི་ད་ལྟའི་སེམས་ས་མ་ཟིན། མི་འཆར་དགུ་འཆར་མི་འགྱུ་དགུ་འགྱུ་འདི་ལ་ཟེར་བ་ཡིན་ཏེ། དེ་ཉན་ཐོས་སྤོང་། རང་རྒྱལ་འགེགས་དབུ་མ་སེམས་ཙམ་སྦྱོང་། གསང་སྔགས་ལྷ་དང་ལྷ་མོར་བསྒྱུར་བ་ལས། དེ་རྣམས་དྲེད་མོའི་སྔོས་དང་འདྲ་བའོ། །རྫོགས་པ་ཆེན་པོ་ནི་དེ་ལྟར་མི་བྱེད་དེ། རྣམ་རྟོག་བྱུང་བའི་དུས་ཉིད་ན། དེ་ཉིད་རང་ལ་བལྟས་པས་རང་བཞིན་མེད་པར་བུན་གྱིས་འགྲོ་སྟེ། རྣམ་རྟོག་རང་བཞིན་མེད་པ་དེ་ཀ་ཆོས་ཉིད་ཡིན་ཏེ། ཆོས་ཉིད་གཞན་མེད་དོ། །ཆོས་ཉིད་མེད་ཀྱིས་མ་ལྟ་རྣམ་པར་རྟོག་པ་ལྟོས། རྣམ་རྟོག་མཐོང་བ་མེད་ན་ཆོས་ཉིད་དེ་ཀ་ཡིན། ཞེས་གསུངས་སོ། །རྣམ་རྟོག་སྤང་བ་དང་དགག་མི་དགོས་སོ། །དེ་ནི་རྣམ་རྟོག་འཕྲང་ནས་གདོན་པའོ། །གནས་ལུགས་རང་གནས་མཉམ་པ་ཉིད། །ངོ་མ་ཤེས་པས་རྟོག་འཁྲུལ་བཟུང་། །དེ་དོན་མཚོན་བྱེད་བླ་མའི་གསུང་། །ཕྱི་རབས་བརྗེད་ཐོར་བདག་གིས་བཀོད། །སྤྲུལ་སྐུ་ཞིག་པོའི་གསུངས་སྒྲོས། རྟ་ཇོ་ཡེས་ཀྱིས་བཀོད་པའོ། །རྫོགས་སོ།། །།

བླ་མ་དྲུག་གི་གདམས་ངག དབུས་པ་རྟ།

བླ་མ་དྲུག་གི་གདམས་ངག་བཞུགས། འཁོར་བའི་སྡུག་བསྔལ་སྐྱོབ་པའི། བཤེས་གཉེན་རྣམས་ལ་གུས་པས་འདུད། བླ་མ་དྲུག་གི་གདམ་ངག་བསྟན་པར་བྱ། ༈ དེ་ལ་དྲུག །འཕགས་པ་བླ་མ་དགེ་བའི་བཤེས་གཉེན། གང་ཟག་བླ་མ་དགེ་བའི། རང་རིག་པའི་བླ་མ། ཐབས་ལ་མཁས་པའི་བླ་མ། དགྲ་བླ་མ། ནད་བླ་མ་དགེ་བའི་བཤེས་གཉེན་ནོ། ༈ །དེ་ལ་འཕགས་པ་བླ་མ་དགེ་བའི་བཤེས་གཉེན་ནི། སྐུ་གསུམ་ཡེ་ཤེས་བཞིའི་བདག་ཉིད་ཅན་དེ། ད་ལྟར་དངོས་སུ་མི་སྣང་བ་ལ། ཆོས་སྐུ་དེའི་ངང་ལས་ཐུགས་རྗེ་གཟུགས་སྐུ་གཉིས། དེ་ལས་འདིར་སྤྲུལ་སྐུ་ཚིག་དང་ཡི་གེར་བྱུང་ནས། ཆོས་སྐུ་ནམ་མཁའ་ལྟ་བུ་ལས། གཟུགས་སྐུ་འགྲོ་བའི་དོན་དུ་བྱོན། །གཟུགས་སྐུར་མི་སྣང་ཡིག་འབྲུར་སྣང་། །ཡིག་འབྲུ་རྣམས་སུ་བྱུང་ནས་ནི། །སེམས་ཅན་ཀུན་གྱི་མདུན་ན་གནས། །སེམས་ཅན་དེ་དག་ཐམས་ཅད་ཀྱིས། །ང་ཡིན་སྙམ་དུ་མི་སེམས་སོ། །ཞེས་པས། བཀའ་མདོ་རྒྱུད་འདི་རྣམས་སོ། །དེ་ལ་བྲིས་པས་བཀྲ་ཤིས། གླགས་པས་བར་ཆད་སེལ། མཉན་ན་རྟོགས་པ་འཆར། ལྟས་ན་ངེས་ཤེས་སྐྱེ། མཆོད་ན་བྱིན་རླབས་འབྱུང་། ཀུན་ཆུབ་པར་བྱས་ནས་འབྲས་བུ་ཐོབ་པའོ། །གང་གྲུབ་ཀྱི་སྒོ་ནས་ཉམས་སུ་བླང་ངོ་། །དེ་སྟོན་པར་བྱེད་པ་ལ་གང་ཟག་བླ་མ་དགེ་བའི་བཤེས་གཉེན་དགོས་པས། དེ་ལ་ལོ ག་པའི་བླ་མ་དང་། ཡང་དག་པའི་བླ་མའོ། །དང་པོ་ལ་གསུམ། ཆད་པ་དང་ཆ་མཐུན་པ་ལོག་པའི་བཤེས་གཉེན། རྟག་པ་དང་ཆ་མཐུན་པ་དགེ་བའི་བཤེས་གཉེན། འཇིག་རྟེན་པ་དང་ཆ་མཐུན་པ་རང་རྒྱུད་པའི་བཤེས་གཉེན་ནོ། །དང་པོ་ནི་རྣལ་འབྱོར་པ་ལ་ཉེ་སྟེ། དེ་ཇི་སྐད་ཟེར་ན། ལས་རྒྱུ་འབྲས་ཁྱད་དུ་བསད་དེ། ལས་དགེ་བས་ཕན་མ་བཏགས། སྡིག་པས་གནོད་པ་མ་བསྐྱལ་པ། ནམ་ཤི་སངས་རྒྱས། ཐོད་པ་བོར་ཆོག་ཡིན། ཤི་ཙམ་ན་རྒྱུ་ཟད་རྐྱེན་ཟད་ལ་འགྲོ། རྒྱུ་ཟད་པས་ལུས་འབྱུང་བ་ལ་ཞ། རྐྱེན་ཟད་པས་སེམས་ནམ་མཁའ་ལ་ཡས་ཏེ་ལུས་འདོད་ཀྱང་མི་མྱོང་ཟེར་རོ། །དེ་ལ་བརྟེན་ན་ལམ་ལོག་པར་འགྲོ་བས་མི་བསྟེན་ནོ། །གཉིས་པ་ནི། བཀའ་གདམས་པ་ལ་ཉེ་སྟེ། ཇི་སྐད་ཟེར་ན། སྟོང་པ་ཉིད་འཕངས་སྨད། རྒྱང་རིང་པོར་བཞག །བསྐུར་པ་བཏབ་སྟེ། འཕངས་སྨད་དེ་ཡིན་དང་ཡིན་ཏེ་མི་རྟོག་ཟེར། རྒྱང་རིང་སྟེ་བསྐལ་པ་གྲངས་མེད་གསུམ་ལས་མི་རྟོགས་ཟེར། བསྐུར་པ་བཏབ་སྟེ། སེམས་ཕྱོགས་ༀ་ནས་འཕུར་ཚོ་གསུམ་ཆོས་ལོག་དྲི་མ་ཅན་ཞེས་ཟེར་བའོ། །དེ་ལ་ཡང་བརྟེན་པར་མི་བྱའོ། །གསུམ་པ་ནི་སྟོན་པ་ཚིག་རྒྱགས་ཁྱེར་བ་རྣམས་ལ་ཉེ་བ་ཡིན་ཏེ། ཆོས་བརྗོད་པ་ལེགས་མོ་ཤེས་ཀྱང་། རང་དེ་དང་མི་མཐུན་ཏེ། འཇིག་རྟེན་གྱི་བྱ་བ་ལས་དང་སོ་ནམ་དང་ཚོང་རྩེག་ལས་སོགས་པ་དང་ཆ་བསྟུན་ནས་བྱེད་པའོ། །དེ་ལ་ཡང་སློབ་མ་ཤེས་པ་ཁ་བཟློག་ཏུ་མི་བཏུབ་པས་བསྟེན་པར་མི་བྱའོ། །འོ་ན་གང་ལ་བརྟེན་ན་ཡང་དག་པའི་བླ་མ་མཚན་ཉིད་བཅུ་གཉིས་པ་སོགས་དང་ལྡན་པ་ལ་བསྟེན་ནོ། །དེ་ལ་གུས་པ་དང་བསྙེན་བཀུར་རྒྱུན་མི་བཅད་དོ། །རང་རིག་པ་བླ་མ་དགེ་བའི་བཤེས་གཉེན་ནི། གོང་གི་བླ་མ་གཉིས་པོ་ལ་བསྟེན་པས། རང་སེམས་རང་གིས་རིག་གོ། །རྟོག་པ་ནང་ནས་སྐྱེ་སྟེ། རང་སེམས་ཆོས་སྐུར་ཤར་བར་བྱའོ། །ཐབས་ལ་མཁས་པ་བླ་མ་དགེ་བའི་བཤེས་གཉེན་ནི། རང་སེམས་ཆོས་སྐུར་རྟོགས་པས། ཉོན་མོངས་པ་དང་སྡུག་བསྔལ་ཆོས་ཉིད་ཏུ་འཆར་ཏེ། ཉོན་མོངས་ཆེ་ས་ན་ཡེ་ཤེས་ཆེ་བའོ། །དགྲ་བླ་མ་དགེ་བའི་བཤེས་གཉེན་ནི། དགྲ་ལ་བརྟེན་ནས་སྦྱིན་བཟོད་དུས་གཅིག་ལ་ཐེངས་པར་འདུག་སྟེ། གཞན་ལ་བྱིན་པས་སྦྱིན་པ་གཅིག་པུ་ལས་མེད་པ་ལ། དགྲས་འཕྲོག་པས་དངོས་པོ་དེ་སྦྱིན་པ། དེ་ལ་ལན་མ་བྱས་པར་དངོས་པོ་དེ་བློས་གཏང་བས་བཟོད་པ། སྦྱིན་པས་ལོངས་སྤྱོད་འཕེལ། བཟོད་པས་གཟུགས་བཟང་། དེ་དམིགས་མེད་དུ་ཤེས་ན་སངས་རྒྱའོ། །དེ་ནས་བླ་མ་ཡིན་ནོ། །ལག་ལེན་དུ་སྦྱིན་བཟོད་དུས་གཅིག་ཏུ་ཐོངས་པར་བྱའོ། །ནད་བླ་མ་དགེ་བའི་བཤེས་གཉེན་ནི། སྤྱིར་གདོན་སངས་རྒྱས་ཀྱི་སྤྲུལ་པ། ནད་དགེ་བའི་བཤེས་གཉེན་ཡིན། དེ་ཅིའི་ཕྱིར་ན། དེ་ལ་དྲུག །ནད་སྡིག་སྒྲིབ་ཀྱི་ཕྱགས་ཤིང་ཡིན་ཏེ། ནད་དེས་སྔར་གྱི་ལས་སྒྲིབ་འབྱང་བའོ། །དད་པའི་གསོལ་འདེབས་ཏེ། ན་ཚས་གདུངས་པའམ་ཆོས་དྲན་པའམ་དད་པ་ཆེར་འགྲོ་བས་སོ། །བརྩོན་འགྲུས་ཀྱི་རྟ་ཕོ་ཡིན་ཏེ། ན་ཚས་བསྐུལ་མ་བྱེད་པས་སོ། །ནད་སེར་སྣའི་མདུད་འགྲོལ་ཏེ། ན་ཚས་ཞེན་ཆགས་དང་བྲལ་བས་སམ། དེ་སོས་པའི་ཕྱིར་ཡོ་བྱད་གཏོང་པས་སོ། །ངན་སོང་གི་སྒོ་འགེགས་ནི། གོང་གི་དེ་རྣམས་ཀྱིས་ངན་སོང་དུ་བཀྱིགས་གྲགས་ནས། བསྐུར་ཀྱང་མི་ལྟུང་བས་སོ། །མཐོ་རིས་དང་ཐར་པའི་ལམ་སྟོན་ནི། ངན་སོང་གི་སྒོ་བཀག་པས་གཞན་བསྡད་པ་མེད་དེ། ཡང་ན་མཐོ་རིས་ཐོབ་ལ། ཡང་ན་ཐར་པ་ཐོབ་པས་སོ།། །།ཨཐྎ། ༈ །དོན་འདི་གནས་ལུགས་རང་བྱུང་ཆོས་ཀྱི་སྐུ། །ངོ་མ་ཤེས་ཏེ་བདག་ཏུ་འཛིན་པས་བསྒྲིབས། །དོན་དེ་མཚོན་བྱེད་བཤེས་གཉེན་བླ་མ་དྲུག །འགྲོ་བའི་མགོན་པོ་སྤྲུལ་སྐུ་ཞིག་པོའི་གསུང་། །གཞན་ལ་ཕན་ཕྱིར་དབུ་པ་རྟ་ཡིས་བཀོད། །མ་རིག་མུན་པ་སེལ་བའི་སྒྲོན་མེ་ཤོག །དགེའོ།། །།

སློབ་དཔོན་བཞིའི་གདམ་ངག རྟའི་ཇོ་སྲས།

སློབ་དཔོན་བཞིའི་གདམ་ངག་བཞུགས། གྷུ་རུ་རྣམས་ལ་ན་མོ། སློབ་དཔོན་བཞིའི་གདམ་ངག་ལ། སློབ་དཔོན་དགའ་རབ་རྡོ་རྗེའི་བཅོས་བསླད་མེད་པ་དང་། རྒྱལ་པོ་ཨིན་ཏྲ་བོ་དྷིའི་ཡི་གེ་ཕྱེད་པ་དང་། པད་མ་འབྱུང་གནས་ཀྱི་རྒན་མོ་མཛུབ་ཚུགས་དང་། ཏེ་ལོ་པའི་བསམ་དུ་མེད་པའོ། །དང་པོ་དགའ་རབ་རྡོ་རྗེའི་བཅོས་བསླད་མེད་པ་ནི། ཆུ་མ་རྙོགས་ན་དྭངས། སེམས་མ་བཅོས་ན་བདེ། མ་བཅོས་པར་ཞོག་ཅིག །ཅེས་གསུངས་སོ། །རྒྱལ་པོ་ཨིན་ཏྲ་བོ་དྷིའི་ཡི་གེ་ཕྱེད་པ་ནི། བྱ་བ་གཏང་པའི་སེམས་བཞིན་དུ། །ཇི་ལྟར་གནས་པ་དེ་ལྟར་གཞག །ཅེས་གསུངས་སོ། །པད་མ་འབྱུང་གནས་ཀྱི་རྒན་མོ་མཛུབ་ཚུགས་ནི། སློབ་དཔོན་པད་མ་བོད་དུ་བྱོན་དུས་སུ། མང་ཡུལ་གང་ཐང་དུ་རྒན་མོ་གསུམ་གྱིས་བསྙེན་བཀུར་བྱས་ནས། གདམས་ངག་ཞུས་པས། སློབ་དཔོན་གྱི་ཞལ་ནས། རྒན་མོ་གསུམ་པོ་སེམས་ཚོལ་ལ་ཤོག་ཅིག །དེ་ནས་གདམས་ངག་བྱའོ་གསུང་ནས། རྒན་མོ་གསུམ་གྱིས་སེམས་བཙལ་བས། གཅིག་གིས་བཙལ་བས་ཡ་གི་སྤྱི་བོའི་གཙུག་ནས་རྐང་མཐིལ་ཡན་ཆད་དུ་བཙལ་བས། སེམས་འདི་རིག་རིག་པོ་གྱུ་གྱུའོ་ལུས་མགོ་མཇུག་མྱེད་པར་ཁྱབ་པ་ཅིག་འདུག་སྙམ་མོ། །གཅིག་གིས་ཇི་ལྟར་བལྟས་ནས་བཙལ་ཀྱང་མ་རྙེད་མ་བཙལ་ན་གྱུ་གྱུ་འདུག་ནས་གཤའ་མ་གཅིག་དང་མི་འདུག་སྟེ་སྒྱུ་མ་ཙམ་ཞིག་ཡིན་ནམ་སྙམ་སྟེ་ཐེ་ཚོམ་པར་གྱུར་ཏོ། །གཅིག་གིས་བཙལ་བས་ཕྱི་ཡུལ་ལ་བཙལ་བས་ཀྱང་མ་རྙེད། ནང་ལུས་ལ་བཙལ་བས་ཀྱང་མ་རྙེད །ཁ་དོག་ཏུ་བཙལ་བས་ཀྱང་མ་རྙེད། དབྱིབས་སུ་བཙལ་བས་ཀྱང་མ་རྙེད། །མཚན་ཕོ་མོ་མ་ནིང་ལས་སོགས་པར་བཙལ་བས་ཀྱང་མ་རྙེད་དོ། །དེར་རྒན་མོ་རྣམས་ཀྱིས་སློབ་དཔོན་ལ། རྙེད་པ་དང་ཐེ་ཚོམ་པ་དང་། མ་རྙེད་པ་ལས་སོགས་པ་རིམ་པ་བཞིན་དུ་རྒྱས་པར་སྨྲས་པ་དང་། སློབ་དཔོན་གྱི་ཞལ་ནས། དང་པོ་དེ་ལ་ཁྱེད་སེམས་འཚོལ་བ་ལ་མ་མཁས་གསུང་། གཅིག་ལ་ཁྱོད་སེམས་འཚོལ་བ་ལ་འབྲིང་པོར་འདུག་གསུང་། གཅིག་ལ་ཁྱོད་སེམས་འཚོལ་བ་ལ་མཁས་པར་འདུག །མ་རྙེད་པ་དེ་ཀ་རྙེད་པའི་མཆོག་ཡིན་པས། དེ་ཀའི་ངང་ལ་ཧད་སད་ཧད་དུ་ཆུག །ཚོམ་པར་ཚོམ་དུ་ཆུག །དེ་ཀའི་ངང་ལ་ཧད་དེ་ཚོམ་མེ་ཞོག་ཅིག །རྒན་མོ་ཁྱེད་མཚན་མ་རང་སར་གྲོལ་བ་བྱ་བ་ཡིན། སྨོན་པ་རང་སར་དག་པ་ཡིན། བྱ་ངོ་ཤེས་པའི་བདེ་བ་ཁོང་དུ་ཆུད་པ་ཡིན། ལུས་མི་རུ་འདུག་ཀྱང་དགོངས་པ་སངས་རྒྱས་དང་མཉམ་པ་བྱ་བ་ཡིན། ལུས་ཚོང་འདུས་ན་འདུག་ཀྱང་སེམས་དགོན་པར་གནས་པ་བྱ་བ་ཡིན་གསུང་ནས། མགུར་འདི་བཞེངས་སོ། །རྒན་མོ་ཕྱིན་པས་ས་མཐའ་མི་འཁོར་གྱིས། །དགོན་པའི་གནས་སུ་ཅོག་གེ་བསྡོད། །སྨྲས་པས་རྟོག་མཐའ་མི་ཆོད་ཀྱིས། །ཁ་རོག་ཁ་ཚུམ་དིག་ལ་བསྒོམས། །བསྒོམས་པས་དོན་ཐོག་མི་ཕེབས་ཀྱིས། །བསམ་དུ་མེད་པའི་ངང་ལ་ཞོག །ཅེས་གསུངས་སོ། །ཏེ་ལོ་པའི་བསམ་དུ་མེད་པ་ནི། མི་བསམ། མི་མནོ། མི་སེམས། མི་བསྒོམ། མི་སྤྱད། མ་ཡེངས་པར་ཞོག་ཅིག །ཅེས་གསུངས་སོ། །ཨྀིཊ྅྅྅། འགྲོ་བའི་སྡུག་བསྔལ་སྐྱོབ་མཛད་པ། །མཚན་ལྡན་ཞིག་པོ་རིན་པོ་ཆེའི། །ཞབས་ཀྱིས་རྡུལ་ལ་གུས་བཏུད་ནས། །གསུང་སྒྲོས་ཞལ་གྱི་ཐིགས་པ་བྲི། །རྗེ་རིན་པོ་ཆེ་འགྲོ་བའི་མགོན་པོ་དེའི་ཞལ་ནས། ཁམས་གསུམ་ནད་པ་འཚོ་དཀའ། འཚོ་མཛད་སྨན་པ་བདན་དཀོན། སྨན་གྱི་དམ་ཆོས་ཐུན་ཆུང་། ཐོབ་པའི་ཚེ་ན་ནན་ཏན་བསྐྱེད། ཅེས་གསུང་ངོ་། །དཀོན་མཆོག་ཐུགས་རྗེ་སྨན་པའི་རྒྱལ་པོ་ཡིས། །དམ་ཆོས་བདུད་རྩི་ཕན་པའི་སྨན་བསྩལ་ཀྱང་། །འདི་ལྟར་བདག་གཞན་རྒྱུད་ལ་ཕར་ལྟས་པས། །ཁ་ཅིག་ཚུལ་ཁྲིམས་ཆོས་སྤྱོད་བརྩོམ་པར་མཐོང་། །ཁ་ཅིག་ཐོས་བསམ་ཤེས་རབ་འཕེལ་བར་མཐོང་། །ཁ་ཅིག་དགོན་བརྟེན་ཏིང་འཛིན་བརྩོམ་མཐོང་ཡང་། །དངོས་པོར་སྣང་ཕྱིར་ཞེན་པ་འགའ་བྲལ་བ། །འདོད་པ་མཐོང་ན་སྡེར་མོ་ཅན་བཞིན་འབྲད ། །མི་མཐུན་མཐོང་ན་རྭ་ཅན་བཞིན་དུ་སིག །ཡོན་ཏན་མཐོང་ན་རྨ་བྱ་གར་བྱེད་འདྲ། །བསླབས་པའི་ཡོན་ཏན་ཚོགས་ནི་གུད་ཏུ་གཞག །བསླབ་བྱ་ཉོན་མོངས་ཚོགས་ཀྱང་གུད་ཏུ་བཞག །ཉོན་མོངས་ཅུང་ཟད་ཞི་བ་མ་མཐོང་ན། །ཐར་པའི་རྒྱུ་མ་མཆིས་སམ་རྟེན་ངན་ནམ། །ལས་ཀྱིས་མནར་རམ་ཐུགས་རྗེའི་ཤུགས་ཆུས་སམ། །བསླབ་ཚུལ་ཉེས་སམ་སྤོང་ངེ་ཅིས་ལན་གྱུར ། །གཡའ་ལྡན་གསེར་ནི་མེ་ངན་ནང་གཞག་ཀྱང་། །གཡའི་དངོས་པོ་མི་འདོར་གསེར་མི་སྣང་། །མེ་བཟང་རླུང་དང་ལྡན་པ་མྱུར་སྦར་ན། །གཡའི་རང་བཞིན་དོར་ནས་གསེར་དུ་སྣང་། །ད་ལྟའི་བསླབ་ཚུལ་འདི་འདྲ་བསླབས་པས་ནི། །བསྐལ་པ་ཞིང་གི་རྡུལ་སྙེད་གྲངས་མེད་དུ། །ཇི་སྲིད་བར་མ་ཆད་པར་བསླབས་ཀྱང་ནི། །ཉོན་མོངས་འགའ་ཡང་འཇིལ་བ་མི་འདྲ་ན། །དེ་སྲིད་སྦྱོར་བའི་ལས་ཀྱང་ག་ལ་རེ། །ན་མོ་འོན་ནོ། །བསླབས་དང་ཉོན་མོངས་སོ་སོར་མ་བྱེད་པར། །བསླབ་བྱ་ཐམས་ཅད་ཉོན་མོངས་སྟེང་དུ་ཕོབ། །ཅེས་གསུང་ངོ་། །རྫོགས་སོ།། །།འདི་ནི་རོང་པ་ཆོས་བཟང་ནས་རིམ་པར་བརྒྱུད་ནས། འགྲོ་མགོན་རིན་པོ་ཆེའི་ཕྱག་ཏུ་བྱུང་། རིན་པོ་ཆེས་ཐུགས་སྲས་རྟ་ལ་གདམས་སོ། །ཁོང་གིས་རྟའི་ཇོ་སྲས་བདག་ལ་གནང་། །འགྲོ་མགོན་ཞིག་པོའི་གསུང་སྒྲོས་ཁ་འཐོར་བ། །མ་བཅོས་པར་ཇི་སྐད་གསུང་པ་བཞིན་དུ་བྲིས་པ་ལགས་པས། འདི་བཞིན་དུ་མཛད་པར་ཞུའོ། །ལེགས་སོ། །དགེའོ།། །།

དཔེ་དགུས་སྐྱོན་དགུ་ངོས་བཟུང་བཅོས་ཐབས། དབུས་པ་རྟ།

དཔེ་དགུས་སྐྱོན་དགུ་ངོས་བཟུང་བཅོས་ཐབས་བསྟན་པ་བཞུགས། སྤྱན་རས་གཟིགས་སྤྲུལ་རིན་ཆེན་འགྲོ་བའི་མགོན། །བདུད་དཔུང་འཇོམས་མཛད་དམ་པ་དེ་ལ་འདུད། །དེ་ལ་དཔེ་དགུས་སྐྱོན་དགུ་ངོས་བཟུང་སྟེ། །སྐྱོན་བཟློག་པ་ནི་ཡོན་ཏན་དུ་འགྱུར་བའོ། །དེ་ལ་སྐྱོན་དགུ་གང་ཞེ་ན། སྤྲེའུ་ཤིང་ཐོག་གྲུབ་པ་སྣ། །ཤ་འུ་རྭ་ཆོར་སྒེག་མོའི་རྒྱན། །བྱའི་ཆོས་དང་ནད་པའི་བསྔས། །ཁྱི་དང་ཤིག་བཞིན་མི་བྱའོ། །ཞེས་གསུངས་པས། བརྩོན་འགྲུས་ཕྱི་ཤོལ་དུས་ལས་པའི་སྐྱོན་སྤྲེའུ་ཤིང་ཐོག །རང་གི་གདམ་ངག་ལ་ངེས་ཤེས་ཆུང་བའི་སྐྱོན་གྲུབ་པའི་སྣ། རང་གི་རྒྱུད་ལ་གཟོད་མ་ཐོབ་པའི་སྐྱོན་ཤའུ། ལྟ་བ་གཏིང་ཐུངས་པའི་སྐྱོན་རྭ་ཆོར། སྤྱོད་པ་ཚུལ་ཆོས་སུ་ཤོར་བའི་སྐྱོན་སྒེག་མོའི་རྒྱན། ཆོས་ཁ་ཆོས་སུ་ཤོར་བའི་སྐྱོན་བྱའི་ཆོས། རྩ་བ་བདག་འཛིན་མ་སྤོངས་པའི་སྐྱོན་ནད་པའི་བསྔས། ཆོས་པ་ནང་འཐབས་པའི་སྐྱོན་ཁྱི་དང་། སྦྱིན་པར་མ་མཐོང་པར་ཁ་ཕྱིར་བལྟས་པའི་སྐྱོན་ཤིག་ལྟ་བུའོ། །དེ་ལ་དང་པོ་སྤྲེའུ་ཤིང་ཐོག་ཅེས་པ་དེ་དཔེར་ན་སྤྲེའུ་ནི་སྤྲེའུ་གཞོན་པ་རྣམས་ཀྱིས་ཤིང་གི་རྩེ་མོར་འཛེགས་ཏེ། ཤིང་ཐོག་མང་པོ་བསྐྱུར་ནས་བསགས་ལ་བཟའ་སྙམ་ཙམ་ན། སྤྲེལ་རྒན་ཚོས་སྡོང་པོའི་རྨང་དུ་བསྡད་ནས་ཟོས་པས། གཞོན་པ་ཚོ་ལ་བཟའ་རྒྱུ་མ་བྱུང་སྟེ་ལྟོགས་སོ། །དཔེ་དེ་བཞིན་དུ་བརྩོན་འགྲུས་ཕྱིར་ཤོལ་དུ་ལས་ཏེ། བུ་ཕོག་ལ་ཆོས་བྱ། བུ་ཕོག་ལ་ཆོས་བྱས། བུ་མོ་བརྫངས་ལ་ཆོས་བྱ། ཡུལ་ཞིང་སྤེལ་ལ་ཆོས་བྱ། ཆོས་རྒྱགས་བསགས་ལ་ཆོས་བྱ་སྙམ་པ་ལ་སོགས་པ་དེ་སྐྱོན་ཡིན་ཏེ། དེ་ངོས་བཟུང་ལ་བཅོས་པ་ནི། དཔེར་ན་སྤྲེའུ་རྒན་ཤོས་རྣམས་སྔར་ཕྱིར་ཤོལ་དེས་སུན་པས། ད་ཤིང་ཐོག་གང་རྙེད་ཟ་བ་བཞིན་དུ། ཆོས་ཕྱི་ཤོལ་དུ་མི་གཞག་པར་ཇི་ལྟར་གོ་གོ་ཉམས་སུ་བླང་ངོ་། ༈ །གྲུབ་པའི་སྣ་ཞེས་པ། དཔེར་ན་གྲུབ་པ་ནི་རང་གི་སྣ་ལ་བསེ་ཏྲི་ཡོད་པ་ལ། གྲུབ་པ་གཞོན་པ་རྣམས་རྒྱུས་མེད་པར་རྩྭ་གང་རེག་ལ་བསེ་དྲི་འདུག་སྙམ་ནས་བཞག་པས་རྩྭ་བསེ་དྲི་མེད་པ་མ་རྙེད་པར་ལྟོགས་སོ། །དཔེ་དེ་བཞིན་དུ་རང་གི་གདམ་ངག་ལ་ངེས་ཤེས་མ་སྐྱེས་རང་སྣང་མ་དག་པར་བྱས་ནས། བླ་མ་དང་མཆེད་གྲོགས་ལ་འཁང་ཞིང་། གནས་དགོན་དང་གྲངས་གང་དུ་ཕྱིན་ཀྱང་གཤའ་མ་མི་འདུག་སྙམ་སྟེ་སྐྱོན་འབའ་ཞིག་ཏུ་མཐོང་པའོ། །དེ་ངོས་བཟུང་ལ་བཅོས་པ་ནི། གྲུམ་པ་རྒན་པོ་ཀུན་སྙམ་ན་རྩ་ལ་བསེ་དྲི་སྣམ་པ་མིན་ཏེ་རང་གི་སྣ་ལ་བསེ་དྲི་ཡོད་པ་ཡིན་སྙམ་བསེ་དྲི་བསྣམས་སྣམ་དུ་ཟོས་པས་འགྲངས་པར་བྱུང་བ་བཞིན་དུ། བླ་མ་དང་ཆེད་གྲོགས་དང་དགོན་དང་གྲངས་དེ་དག་ན་སྐྱོན་ཡོད་པ་མ་ཡིན་ཏེ། རང་གི་གདམ་ངག་ལ་ངེས་ཤེས་མ་སྐྱེས་ཤིང་རང་སྣང་མ་དག་པ་ཡིན་སྙམ་པ་བྱས་ནས་ཉམས་སུ་བླངས་པས་རྟོགས་པ་འཆར་རོ། ༈ །ཤ་འུར་ཞེས་པ། དཔེར་ན་ཤ་འུར་ནི་དེ་ལ་རེག་པའི་ཐབས་མེད་པ་བཞིན་དུ། ཆོས་པ་ཁ་ཅིག་རང་གི་རྒྱུད་ལ་བཟོད་པ་མ་ཐོབ་པར་བྱས་ནས་ཅི་བྱུང་ཀྱང་མི་བཟོད་པར་གཞན་འབའ་ཞིག་ལ་ཁ་ཆོས་འཇུག་པའོ། །དེ་ངོས་བཟུང་ལ་བཅོས་པ་ནི། །ཉོན་མོངས་དང་རང་རྒྱུད་བཏུལ་ལ་རང་གིས་བཟོད་པར་བྱའོ། །རྭ་ཆོར་ཞེས་པ། དཔེར་ན་རྭ་ཆོར་ནི་ཁ་ནས་རྒྱ་ཆེ་བར་འདུག་ཀྱང་གཏིང་ན་མཛུབ་མོ་རང་མི་ཤོང་། དཔེ་དེ་བཞིན་དུ་ལྟ་བ་ཁ་ལ་ཁྱེར་ཏེ། ཁ་ལ་མཉམ་པ་ཉིད་ཡིན་ཕྱོགས་མེད་འཛིན་མེད་ཡིན་པ་སྐད་ཟེར་ནས་སྐྱེན་བྱུང་ཙམ་ན་རྐྱེན་མི་ཐུབ་པར་བརྡུགས་པའོ། །དེ་ངོས་བཟུང་ལ་བཅོས་པ་ནི། །ལྟ་བ་ཁ་ལ་ཁྱེར་དུ་མ་སོང་བར་གཏིང་ནས་དོན་གོ་ཞིང་རྟོགས་པར་བྱས་ལ། རྐྱེན་ཐུབ་པ་ཅིག་དགོས་སོ། ༈ །སྒེག་མོའི་རྒྱན་ཞེས་པ། དཔེར་ན་སྒེག་མོ་རྒྱན་ནི་མི་ཚོགས་པ་དང་ཁྲོམ་གྱི་གསེབ་ཏུ་བྱི་དོར་བྱེད་རྒྱན་འདོགས་སོ། །མི་མེད་ཙམ་ན་འབོགས་སོ། །དཔེ་དེ་བཞིན་དུ་མི་ཡོད་ཙམ་ན་ཚུལ་གྱི་དགེ་སྦྱོར་ལ་སོགས་པ་བྱེད། མི་མེད་ཙམ་ན་མི་བྱེད་དོ། །དེ་ངོས་བཟུང་ལ་བཅོམ་པ་ནི། སྤྱོད་པ་ཚུལ་ཆོས་སུ་མ་ཤོར་བར་བྱ་སྟེ། དགེ་སྦྱོར་རང་དོན། ཡིན་པས་ངོ་ལྐོག་མེད་པར་བྱའོ། ༈ །བྱའི་ཆོས་དང་ཞེས་པ། དཔེར་ན་བྱའི་ཆོས་ནི་ནེ་ཚོ་ནེ་རེ་སྲོག་གཅོད་པ་མཐོལ་ལོ་བཤགས་སོ། །མ་བྱིན་པར་བླངས་པ་མཐོལ་ལོ་བཤགས་སོ། །བརྫུན་དུ་སྨྲས་པ་མཐོལ་ལོ་བཤགས་སོ་ཟེར་ནས་འབུ་བྱར་བྱེད་ལོ། །དེར་འབུ་མཐོང་པ་དང་ཁྱུར་རྩེར་མེད་ནས་སྡིག་ཆེ་ཟེར་སྐད། །དེ་གོང་གི་མཐོལ་བཤགས་ཚོ་དང་སྡིག་ཆེ་བ་མི་བདེན་ཏེ། དཔེ་དེ་བཞིན་དུ་ཁ་ལ་ཆོས་བྱེད་པ་སྐད་དམ། སྡིག་འོང་བ་སྐད་དམ་དགེ་བ་དང་ལེན་པ་སྐད་ཟེར་ནས་གདིང་རྣམ་པར་སྨིན་པ་ལ་མི་འཛེམ་པ་རྣམས་སོ། །དེ་ངོས་བཟུང་ལ་བཅོས་པ་ནི་ཁ་སུ་མ་ཤོར་བར་བྱས་ལ་ཆོས་ཇི་ལྟར་ཤེས་པ་དེ་རང་གིས་ཞེ་ཐག་པ་ནས་ཉམས་སུ་བླངས་ལ་ལ་ཆོས་དང་ལྡན་པར་བྱའོ། །ནད་པའི་སྔས་ཞེས་པ་དཔེར་ནད་པའི་སྔས་ནི་གང་དུ་བསྟན་ཀྱང་ཇི་ལྟར་བྱས་ཀྱང་མི་བདེ་སྟེ། དཔེ་དེ་བཞིན་དུ་རང་གི་བདག་འཛིན་མ་སྤོངས་ན། ཇི་ལྟར་བྱས་ཀྱང་མི་བདེ་སྟེ་སྡུག་བསྔལ་ལོ། །དེ་ངོས་བཟུང་ལ་བཅོས་པ་ནི། །སྡུག་བསྔལ་ཐམས་ཅད་ཀྱི་རྩ་བ་བདག་འཛིན་དུ་འདུག་པས། བདག་འཛིན་སྤངས་ནས་སྡུག་བསྔལ་ཐམས་ཅད་རང་ཞི་བར་འགྱུར་རོ། །ཁྱི་དང་། ཞེས་པ། དཔེར་ན་ཁྱི་ནི་གང་དུ་ཕྲད་ཀྱང་འཐབ་སྟེ། དཔེ་དེ་བཞིན་དུ་ཆོས་པ་གར་ཚོགས་ཀྱང་གཞོགས་སྨོད་དང་ཟུར་ཟ་དང་། དུག་གཏོང་རེས་ལ་སོགས་ཕྲག་དོག་འབའ་ཞིག་བྱེད་པ་རྣམས་སོ། །དེ་ངོས་བཟུང་ལ་བཅོས་པ་ནི། ཆོས་པ་ཐམས་ཅད་སེམས་ཅན་གྱི་དོན་བྱེད་པར་ནི་བསམ་པ་གཅིག །ཕུགས་སངས་རྒྱ་བར་ཀྱང་གཅིག་པས་མཐུན་པར་བྱའོ། ༈ །ཤིག་བཞིན་མི་བྱའོ། །ཞེས་པ། དཔེར་ན་ཤིག་ནི་ཕར་ལ་སྦྱིན་པར་མ་མཐོང་པར་བཟའ་འོ་སྙམ་པའི་བསམ་པ་ལས་མེད་བཞིན་དུ། ཕར་ལ་སྦྱིན་པ་བཏང་རྩིས་མ་བཅུག་པར་གཞན་ལ་བཟའ་རྩིས་བཅུག་པའོ། །དེ་ངོས་བཟུང་ལ་བཅོས་པ་ནི། ཚོགས་རང་གི་ཡང་རྫོགས་དགོས་པས། ཕར་ལ་སྦྱིན་པ་བཏང་ཞིང་གཞན་དོན་དུ་ཚོགས་སོགས་གྲུབ་ཚད་བྱའོ། །དེ་ཚོ་ངོས་བཟུང་ལ་སྤྱོད་བཅོས་པས་ཡོན་ཏན་དུ་འགྱུར་བའོ། །དཔེ་དགུས་སྐྱོན་དགུ་ངོས་བཟུང་བའོ། །ཨྀིཊ྅྅྅ ༅། དཔེ་དགུའི་སྒོ་ནས་བསྐྱོན་དགུ་པོ། ངོས་བཟུང་བཅོས་ཐབས་བསྟན་པ་འདི། སྤྲུལ་སྐུ་ཞིག་པོའི་གསུང་བཞིན་དུ། །དབུས་པ་རྟ་ཡིས་ཡི་གེར་བཀོད། །བདག་གཞན་སྐྱོན་ལས་གྲོལ་བར་ཤོག། །།

ཤིག་གི་བསྟན་བཅོས། དབུས་པ་རྟ།

ཤིག་གི་བསྟན་བཅོས་བཞུགས། ཐུགས་རྗེ་ཆེ་ལྡན་སྡུག་བསྔལ་ཀུན་སྐྱོབ་པའི། །སྐྱབས་ཆེན་མཆོད་འོས་རྣམས་ལ་འདུད་བྱས་ཏེ། །བདག་གཞན་ཤིག་ལས་གྲོལ་བའི་ཕྱིར། །ཤིག་གི་བསྟན་བཅོས་དགོད་པར་བྱ། །དེ་ལ་བཞི་སྟེ། ཤིག་གི་རྒྱུ་མ་བསྟན་པ་དང་། སྐྱོན་བསྟན་པ་དང་། འཇིག་རྟེན་པའི་སྤང་ཚུལ་གྱིས་མི་སྤངས་པ་དང་། འདས་པ་དང་སྦྱར་ཏེ་སྤང་ཚུལ་བསྟན་པའོ། །དང་པོ་རྒྱུ་ནི། སྔོན་གྱི་ལས་ཀྱི་རྣམ་པར་སྨིན་པ་ལས་གྱུར་པ་དང་། འབྱུང་པོ་གདོན་བགེགས་ལས་གྱུར་པ་དང་། མི་གཙང་པ་ལས་གྱུར་པ་དང་། སྤྲུལ་པའི་ཤིག་གོ། །གཉིས་པ་སྐྱོན་ནི་བཞི་སྟེ། ངོ་ཚ་བ་དང་། སྐྱུག་བྲོ་བ་དང་། སྡིག་ཆེ་བ་དང་། ཟ་བ་འདོར་བཞི། གསུམ་པ་འཇིག་རྟེན་པའི་སྤོང་ཚུལ་གྱིས་མི་སྤོངས་པ་ནི། ས་ལ་བསྐྱུར་ན་ས་བོན་བཏབ་ཅེས་བྱ་སྟེ་སླར་ལ་མང་འགྲོའོ། །སེམས་ཅན་གཞན་ལ་བཏང་ན་ཤིག་གི་ཐོག་བཅོལ་བས་བྱ་སྟེ་སླར་ལ་མང་དུ་འགྲོ་བའོ། །བསོད་ན་རོ་དམག་འདྲེན་པ་ཞེས་བྱ་སྟེ་སླར་ལ་མང་དུ་འགྲོ་བའོ། །བཞི་པ་འདས་པ་སྦྱར་ཏེ་སྤང་ཚུལ་ནི། སྔོན་གྱི་ལས་ཀྱི་རྣམ་པར་སྨིན་པ་ལས་གྱུར་པའི་ཤིག་དེ་བྱུང་ན། ཚོགས་གཉིས་ལས་སོགས་བྱས། སྒྲིབ་པ་དང་བག་ཆགས་སྦྱངས་པས་སངས་པར་འགྱུར་རོ། །གདོན་བགེགས་ལས་གྱུར་པ་དེ་ནི། བྱིན་བརླབས་དང་རིམ་འགྲོས་སངས་པར་འགྱུར་རོ། །མི་གཙང་པ་ལས་གྱུར་པ་དེ་ནི། ཁྲུས་ཆོག་གིས་སངས་པར་འགྱུར་རོ། །སྤྲུལ་པའི་ཤིག་དེ་ནི། བདེ་བར་གཤེགས་པས་བཟོད་པ་སྒོམ་མམ་མི་བསྒོམ་ལྟ་བས་ཏེ། དེ་ལ་བཟོད་པ་བསྒོམས་པས། བདེ་བར་གཤེགས་པ་མཉེས་ཤིང་རང་སངས་པར་འགྱུར་རོ། །བྱང་ཆུབ་སེམས་དཔའ་ཤིག་ཅན་གྱིས་ཞུས་པའི་མདོ་ལས་གསུངས་པ། གོ་སླ་བར་བསྡེབས་པའོ། །རྫོགས་སོ། ༈ །ཤིག་གི་བསྟན་བཅོས་སྟོང་ཐུན་འདི། །སྤྲུལ་སྐུ་ཞིག་པོའི་གསུང་སྒྲོས་སམ། །མདོ་ལས་བྱུང་བ་ཇི་བཞིན་དུ། །དབུས་པ་རྟ་ཡིས་ཡི་གེར་བཀོད། །རྟ་ཡི་ཇོ་སྲས་བདག་ལ་གནང་། །བདག་གཞན་ཤིག་ལས་ཐར་གྱུར་ཅི ག། །།

མཚུར་ཞིག་པོ་བདུད་རྩིའི་ཞལ་གདམས་སྔོན་འགྲོའི་ཆོས་སྤྱོད་ཀྱི་རིམ་པ་རྨད་དུ་བྱུང་བ། དབུས་པ་རྟ།

མཚུར་ཞིག་པོ་བདུད་རྩིའི་ཞལ་གདམས་སྔོན་འགྲོའི་ཆོས་སྤྱོད་ཀྱི་རིམ་པ་རྨད་དུ་བྱུང་བ་བཞུགས་སོ། །ཆོས་རྗེ་མཚུངས་མེད་རྣལ་འབྱོར་དབང་ཕྱུག་གཙོ། །ཡིད་བཞིན་ནོར་ལྟར་ཀུན་གྱི་རེ་བསྐོང་པའི། །སངས་རྒྱས་གཉིས་པ་འགྲོ་བའི་གཉེན་གཅིག་པོ། །དྲིན་ཅན་སྤྲུལ་སྐུ་ཁྱེད་ལ་ཕྱག་འཚལ་ལོ། ༈ །དེ་ལ་སྤྱིར་ཆོས་ཀྱི་སྔོན་འགྲོ་དངོས་གཞི་མཇུག་གསུམ་དུ་གསུངས་པ་ལས། འདི་སྔོན་འགྲོ་བསྟན་པའོ། །དེ་ལ་ལྔ་སྟེ། ཆོས་ཉན་པ་པོའི་སྤྱོད་ལམ་དང་། ལྷ་ཕྱག་གི་བཙལ་ཐབས་དང་། གཏོར་མའི་གཏང་ཐབས་དང་། མཎྜལ་གྱི་དབུལ་ཐབས་དང་། རྗེས་ལ་དགེ་སྦྱོར་གྱི་བྱ་ཐབས་སོ། །དང་པོ་ཉན་པ་པོའི་སྤྱོད་ལམ་ནི། དམའ་བའི་ས་ལ་འདུག་ནས་ནི། གཉིད་དང་རྨུགས་པ་རབ་བསལ་ཏེ། བློ་ཡི་པད་མ་ཁ་ཕྱེ་ལ། ཚིག་གི་བདུད་རྩི་བཏུང་པར་བྱའོ། །ཞེས་པས་བསྟན་ཏེ། དེ་ལ་དམའ་བའི་ས་ལ་འདུག་ནས་ནི་ཞེས་པས། འཆད་པ་པོའི་སློབ་དཔོན་དེས་མཐོའི་སར་བཞུགས་ནས། ཉན་པ་པོ་རྣམས་དམའ་སར་འདུག་པ་ཡིན་ཏེ། དོན་ལ་མཐོའི་ང་རྒྱལ་གཅོག་པ་ཡིན། གཉིད་དང་རྨུགས་པ་རབ་བསལ་ཅེས་པ། ལུས་གཉིད་དུ་མི་གཏང་། སེམས་རྨུགས་སུ་མི་འཇུག་པ་ཡིན་ཏེ། དེ་ལ་གཉིད་འདི་སྲི་ལ་ཤིན་ཏུ་ནན་པས། དེ་རིང་ལྟ་བུ་ཞིག་གཉིད་དུ་སོང་ན། སང་ཡང་འགྲོ་བ་ཡིན་པས། གཉིད་དུ་མ་སོང་ཞིང་འཛེམས་པ་ཤིན་ཏུ་གལ་ཆེའོ། །རིག་པ་རྨུགས་སུ་མི་གཞུག་སྟེ། བས་ས་ལ་གཡེར་བག་བཏོན་ལ་བྱའོ། །དེ་ལྟར་བྱས་ནས་ཅི་བྱེད་ན། བློའི་པད་མ་ཁ་ཕྱེས་ལ། ཚིག་གི་བདུད་རྩི་བཏུང་པར་བྱའོ། །ཞེས་པས་བློ་སོ་སོར་རྟོག་པའི་ཤེས་རབ་ཀྱི་པད་མ་ཁ་ཕྱེ་ལ། ཚིག་བདུད་རྩི་དང་འདྲ་བ་དེ་བློའི་གཏིང་དུ་གོ་ཞིང་ཡིད་ཆེས་པར་བྱའོ། །དེ་ཡང་འོ་སྐོལ་ལྟ་བུ་ཅི་སྨོས་ཏེ། ས་ལ་གནས་པའི་བྱང་ཆུབ་སེམས་དཔའ་ཡང་ཆོས་ཉན་གྱི་བཞུགས་པ་ལགས། དེ་ཡང་སྟོན་པ་ཤཀྱཱ་ཐུབ་ཀྱིས་ཀྱང་ཕྱག་ན་རྡོ་རྗེ་ལ་བསྐུལ་ཏེ། གསང་བའི་བདག་པོ་དེ་ཕྱིར་ངས། ཁྱོད་ལ་ལེགས་པར་བསྟན་པར་བྱ། །ཁྱོད་ནི་རྩེ་གཅིག་ཡིད་ཀྱིས་ཉོན། །ཞེས་མཚན་བརྗོད་ནས་གསུངས་པ་དང་། ཡང་སྟོན་འཁོར་དགོངས་པ་ཐ་མི་དད་ཡིན་ཡང་། རྗེས་འཇུག་ཡེངས་ཀྱིས་དོགས་པ་ལ་དགོངས་ནས། སྟོན་པ་ཀུན་བྱེད་ཀྱིས་སེམས་དཔའ་རྡོ་རྗེ་ལ་བསྐུལ་ཏེ། ཀྱེ་སེམས་དཔའ་ཆེན་པོ། ཡིད་རྣ་དབང་ལ་ཆུག་ཅིག །རྣ་དབང་སྒྲ་ལ་རྟོགས་ཤིག །ངས་དོན་སྒྲར་བཤད་ཀྱིས། ཞེས་གསུངས་པས། རྗེས་འཇུག་ཀྱང་དེ་ལྟར་མ་ཡེངས་པར་བྱའོ། ༈ །གཞན་ཡང་མ་དག་པ་གསུམ་ཡང་ཞིང་། དག་པ་གསུམ་དང་ལྡན་པར་བྱ་སྟེ། དང་པོ་མ་དག་པ་གསུམ་གང་ཞེ་ན། ལུས་ཀྱི་སྤྱོད་ལམ་མ་དག་པ་དང་། ངག་གི་སྨྲ་བ་མ་དག་པ་དང་། སེམས་ཀྱི་བསམ་པ་མ་དག་པའོ། །དེ་རྣམས་ངོས་བཟུང་ལ་སྤང་ཞིང་། ཞོར་ལ་དག་པ་གསུམ་དང་ལྡན་པར་བྱ་སྟེ། དེ་ལ་ལུས་ཀྱི་སྤྱོད་ལམ་མ་དག་པ་ནི། རྐང་པ་དཀྱིལ་ཀྲུང་བཅས་ནས་ཉན་པ་དང་། རྐང་པ་བརྐྱང་ནས་ཉན་པ་དང་། མགོ་ལ་ཞྭ་གོན་ཐོད་བཅིངས་ནས་ཉན་པ་དང་། གཅིག་ལ་གཅིག་བསྙེས་ནས་ཉན་པ་དང་། ས་དྲིས་འབྲི་བ་དང་རྩིག་ཆུ་རྩིག་པ་དང་། ཉལ་བ་ལ་སོགས་པ་མ་གུས་པའི་ཆ་ཐམས་ཅད་དོ། །དེ་དག་ཐམས་ཅད་སྤངས་ལ་དག་པར་བྱ་བ་ནི། ལུས་བླ་མའི་ཕྱོགས་སུ་བཏུད་དེ། དྲི་དགས་སྨན་པའི་ཚུལ་དུ་བཅས་ལ། གུས་པས་མཉན། ལགས་པའི་ཐལ་མོ་ཡང་གཉིས་པོ་བསྣོལ་ཞིང་བསྐུམ་སྟེ་སྦྱར་ལ་མཉན་ནོ། ༈ །ངག་གི་སྨྲ་བ་མ་དག་པ་ནི། ཤབ་ཤུབ་མང་པོ་ཟེར་བ་དང་། གླེང་བསླང་གཏོང་བ་ལ་སོགས་པ་སྟེ། དེ་དག་རང་དང་ཟླ་བོ་གཉིས་ཀ་ལ་ཤིན་ཏུ་གནོད་པའོ། །དེ་སྤངས་ལ་དག་པར་བྱ་བ་ནི། ཁ་རོག་པར་སྡོད་པའོ། ༈ །སེམས་ཀྱི་བསམ་པ་མ་དག་པ་ནི། ལུས་ཆོས་གྲར་བསྡད་ནས། སེམས་ཁྱིམ་གྱི་ལས་དང་བྱ་བ་དང་། བུ་ལོན་འབྲེལ་ཆགས་དང་། ཁ་སྨྲས་གླེང་གཞི་ལ་སོགས་པའི་བསམ་མནོ་གཏོང་པ་སྟེ། དེ་དག་གིས་ཆོས་ཡིད་ལ་མི་དྲན་པས་སྤོང་དགོས་ཏེ། དེ་ཡང་། འགྲོ་ལ་སེམས་རྒྱུད་གཉིས་མི་འཆང་། ཞེས་པས། འཇིག་རྟེན་གྱི་བསམ་མནོ་གཏོང་པའི་སེམས་གཅིག་དང་། ཆོས་ཉན་པའི་སེམས་གཅིག་གཉིས་མེད་པས། གཅིག་ལ་རིགས་པ་སོང་ན་གཅིག་མི་དྲན་ནོ། །དེ་ལ་བསམ་པ་མ་དག་པ་དེ་དག་སྤངས་ལ། དག་པར་བྱ་བ་ནི་ཆོས་ཉན་གྱི་བར་དུ་གང་ལ་ཡང་སེམས་མ་ཡེངས་པར་བྱ་སྟེ། དེ་ཡང་དེ་རིང་སེམས་འཕྲོས་ན་སང་ཡང་སེམས་འཕྲོར་འོང་བས་མ་ཡེངས་པར་བྱ་བ་གལ་ཆེའོ། །གཞན་ཡང་འབའ་ལ་རྒྱུགས་མ་ཡིན། ཚོད་ལྟ་མ་ཡིན་རྐྱེན་པས་མ་ཡིན། ངོ་བསྲུངས་མ་ཡིན་པར་ཐུགས་དད་པས་ཀུན་ནས་བླང་མཉན་ཞེས་གསུངས་སོ། །དེ་རྣམས་ནི་ཆོས་ཉན་པ་པོའི་སྤྱོད་ལམ་མོ། ༈ །གཉིས་པ་ལྷ་ཕྱག་གི་བཙལ་ཐབས་ནི་གཉིས་ཏེ། མ་གུས་པའི་ཕྱག་ཉེས་དམིགས་དང་བཅས་པ་དེ་གོལ་ས་ངོས་བཟུང་བ་སྤངས་པ་དང་། གུས་པ་དང་བཅས་པའི་ཕྱག་གི་སྒོ་ནས་ཚོགས་ཀྱི་བསག་ཐབས་སོ། །དང་པོ་ནི་མཁས་པ་རྩ་ནག་པའི་ཞལ་ནས། ཡར་ལ་སྐེད་པ་མི་སྲོང་ལ། །མར་ལ་མགོ་བོ་མི་འགུགས་ཤིང་། །གུས་པ་གཏིང་ནས་མ་སྐྱེས་པ། །ང་ལ་མི་ཕན་ཁྱེད་པ་གནོད། །དམྱལ་བ་མགོ་འཕྱོངས་སྐྱེ་བའི་རྒྱུ། །དེ་བས་ཁྱེད་ཀྱི་ཁྲ་ཕྱག་ཤོལ། །ཞེས་གསུངས་པས། ཡར་ལ་སྐེད་པ་ཡང་མི་སྲོང་། མར་ལ་མགོ་བོ་ས་ལ་ཡང་མི་རེག །གུས་པ་གཏིང་ནས་མ་སྐྱེས་པའི་ཟོལ་ཕྱག་རྒུར་ཙམ་དེས་སློབ་དཔོན་ལ་ཕན་པ་མེད་པར་རང་དམྱལ་བབ་མགོ་འཕྱོངས་སུ་སྐྱེ་བས་དེ་ནི་སྤང་ངོ་། །དེ་སྐད་དུ་ཡང་མདོ་ལས་ཀྱང་། མ་གུས་པའི་ཕྱག་གིས་ནི། སྤྱི་གཙུག་གི་དམྱལ་བར་སྐྱེ་བོ། །ཞེས་གསུངས་སོ། །གཉིས་པ་ནི། ཐལ་མོ་རྣལ་མར་སྦྱར། སྐེད་པ་དྲང་པོར་བསྲང་། གུས་པ་དང་བཅས་པས་ཡན་ལག་སྨད་ལྔ་ས་ལ་ཐུགས་པའི་ཕྱག་གཅིག་བཙལ་ན། ཡོན་ཏན་ནི་གནས་སྐབས་ཀྱི་འབྲས་བུ་ཡན་ལག་པདྨ་ལྔའི་འོག་ན་རྡུལ་ཕྲ་རབ་ཇི་སྙེད་ཅིག་ཡོད་པའི་འཁོར་ལོ་བསྒྱུར་བའི་རྒྱལ་པོ་ཐོབ་ལ། མཐར་ཐུག་རྒྱལ་བ་རིགས་ལྔའི་ངོ་བོར་སངས་རྒྱ་བར་གསུངས་སོ། །དེ་ནས་གུས་པ་དང་བཅས་གལ་ཆེའོ། །གྲངས་ནི་ཆོས་མ་གསུངས་གོང་དུ་བླ་མ་ལ་གསུམ། ཆོས་ལ་གསུམ་སྟེ་དྲུག་བྱ། ཐོན་ནས་ཀྱང་དྲུག་སྟེ་བཅུ་གཉིས་བྱའོ། །ཡོན་ཏན་གོང་དུ་བཤད་པ་དེ་ལྟར་ཡོད་པས་རང་རང་གི་ཁྱིམ་དུ་ཡང་ཟ་ཕྱག་ལ་སོགས་པ་མ་ཆག་པར་འབད་ལ་བྱའོ། །དེ་ནི་ཕྱག་གི་སྒོ་ནས་ཚོགས་ཀྱི་བསག་ཐབས་སོ། ༈ །གསུམ་པ་གཏོར་མའི་གཏང་ཐབས་ནི། གཏོར་ཟན་རྡོག་པོར་ཀུན་གྱིས་ཁྱེར་ལ་སྤྱོན་སྤྱོན། ཁྱིམ་དུ་གང་ཟག་རེ་རེ་ཙམ་གདན་དྲངས་ནས་ཀྱང་གཏོར་མ་ཞུ་ཟེར་ན། ཆོས་གྲར་ཚོགས་པ་འདི་རྣམས་ཀྱི་ནང་ན། ལ་ལ་མཁྱེན་པ་དང་ལྡན་པ་ཡོད། ལ་ལ་རྟོགས་པ་དང་ལྡན་པ་ཡོད། ལ་ལ་གསལ་སྟོང་ཏིང་ངེ་འཛིན་སྒོམ་པ་ཡོད། ལ་ལ་བསྐྱེད་རིམས་ལྷ་བསྒོམ་པ་ཡོད་དེ། ནུས་མཐུ་བྱིན་བརླབས་དང་ལྡན་པ་མང་པོ་ཡོད་པས་འདི་དག་ཐམས་ཅད་སྨོན་ལམ་སྟབས་གཅིག་ཏུ་བཏབ་ནས་ཐུགས་དམ་དུས་གཅིག་ཏུ་སད་པ་ཡིན་པས། འདི་རྣམས་ཀྱི་བྱིན་བརླབས་བྱས་པས། བརྒྱ་འགྱུར་སྟོང་འགྱུར་དུ་འགྱུར་ཏེ། །དེ་ཡང་ཚེ་འདིའི་བར་ཆད་སེལ། །ཕྱི་མ་ཡི་ལམ་སྣ་འདྲེན་པའོ། །འདི་ལ་གཉིས་ཏེ། ལྡན་པ་གསུམ་དང་། ཚིམ་པ་བཞིའོ། །དང་པོ་ལྡན་པ་གསུམ་ནི། སྟེགས་དང་ལྡན་པ། རྒྱན་དང་ལྡན་པ། རླན་དང་ལྡན་པའོ། །དང་པོ་སྟེགས་དང་ལྡན་པ་ནི། མ་འཛི་ལ་སོགས་པ་སྟེགས་གང་ཡོད་པ་རེའི་ཁ་གཏོར་མ་རྣམས་བཀོད་པའོ། །གཉིས་པ་རྒྱན་དང་ལྡན་པ་ནི། རྒྱན་གང་ཡོད་ཀྱིས་བྱ་སྟེ། ཐ་མ་ལ་ཕུག་གམ་སྒོག་པ་ཚུན་ཆོད་ཅི་འབྱོར་གྱི་རྒྱན་རེ་ཡོད་ན་ལེགས་པ་ཡིན། དེ་ཡང་ཇོ་བོ་སྔགས་ཀུན་ན་རེ། ཞི་བ་ལ་དཀར་གཏོར་ཁྲོ་བོ་ལ་དམར་གཏོར་དུ་བྱ་གསུངས་ཏེ། དཀོན་མཆོག་ལ་དེ་ཀ་འདྲ་བའི་ཁྱད་མེད། དེ་ཡང་ཅི་ཤེས་ན། དུས་གསུམ་སངས་རྒྱས་ཐམས་ཅད་ལ། །རང་བཞིན་དགོངས་པ་གཅིག་ལས་མེད་ཅེས་པས་མངོན་ནོ། །ད་འོ་ན་སྐུ་མདོག་དང་ཕྱག་མཚན་མ་འདྲ་བ་སོ་སོར་ཐ་དད་འདི་ཙམ་འདུག་པ་སྙམ་ན། དེ་ཡང་། སེམས་ཅན་མོས་བློ་ཐ་དད་ལ། །སངས་རྒྱས་མཚན་ཡང་སོ་སོར་བཏགས། །ཞེས་པས། སེམས་ཅན་གྱི་བློ་ཐ་དད་པ་འདུལ་བའི་དོན་དུ་དགོངས་པ་མ་གཏོགས་པ་སངས་རྒྱས་ལ་སོ་སོར་ཐ་དད་མེད་དོ། །དེའི་ནད་ཀས་དཀོན་མཆོག་ལ་རྒྱན་གང་བཏབ་ཀྱང་འདྲའོ། །གསུམ་པ་རླན་དང་ལྡན་པ་ནི། གང་འབྱོར་གྱི་རླན་རེས་འབྲན་པ་ཡིན་ཏེ། དེ་ཡང་འོ་ཅག་གི་འདིར་གཏེར་གཉེན་བས་གཉེན་མཛད་ལ། གཏོར་མ་མང་ཤོས་འདི་རྣམས་སྤྲང་པོ་ལ་ཕན་པས་སྐམ་གཏོར་དུ་མཛོད། མཐོང་གཏོར་དེར་ཆུ་མང་དུ་ལུགས། །དེ་ནས་ཐམས་ཅད་ལ་ཏིང་ངེ་འཛིན་གྱི་ཆུ་རྒྱུན་ཕབ་ནས་བྱེད་པ་ཡིན་གསུངས་ངོ་། །དེ་ནི་ལྡན་པ་གསུམ་མོ། ༈ །གཉིས་པ་ཚིམ་པ་བཞི་ནི། བཤམས་པ་ཚིམ་པ་རེག་པས་ཚིམ་པ། བསྔོས་པས་ཚིམ་པ། རྗེས་ཀྱིས་ཚིམ་པའོ། །དང་པོ་བཤམས་པས་ཚིམ་པ་ནི། གཏོར་མ་བཤམས་པ་རང་གིས་ཀྱང་ཡི་དྭགས་སམ་ཤས་གཅིག་ཚིམ་པ་ཡོད་དོ། །གཉིས་པ་རེག་པས་ཚིམ་པ་ནི། སྣོད་ལ་ལག་པ་རེག་པས་ཀྱང་ཤས་ཅིག་ཚིམ་པ་ཡོད་དོ། །གསུམ་པ་བསྔོས་པས་ཚིམ་པ་ནི། བསྔོ་ལུགས་ཇི་ལྟར་ཤེས་པ་རེ་ཡལ་བར་མ་བཞག་པར་མཛོད་ཅིག །མི་ཤེས་པ་རྣམས་ལ་ད་ལྟ་བསླབ་པས་ཆོག་པ་ཡིན། དེ་ཡང་ཇི་ལྟར་བྱེད་པ། དང་པོ་བླ་མ་དང་དཀོན་མཆོག་ལ་སྐྱབས་འགྲོ་བྱ། དེའི་རྗེས་ལ་བྱང་ཆུབ་མཆོག་ཏུ་སེམས་སྐྱེད། དེ་ནས་གཏོར་མ་ལ་དམིགས་ལ། ངག་ཏུ་ཨཱོཾ་ཨ་ཧཱུྃ་ཞེས་པ། ཉེར་གཅིག་གམ་བདུན་ནམ་གསུམ་བརྗོད་པས། འབྲུ་གསུམ་པོ་གཏོར་མ་ལ་ཕོག་ལྟེ་ཞུ་བས། ཡིད་ཀྱིས་སྣོད་རིན་པོ་ཆེ་ལས་གྲུབ་པ་སྟོང་གསུམ་ཁྱབ་པ་ཙམ། བཅུད་བདུད་རྩིའི་རྒྱ་མཚོ་ཆེན་པོར་དམིགས་ལ། བླ་མ་དཀོན་མཆོག་མཆོད་པ། ཆོས་སྐྱོང་ལ་གང་འདོད་ཀྱི་དམ་རྫས། མཐའ་ཡས་ཀྱི་སེམས་ཅན་ལ་རང་རེ་ཇི་ལྟར་འདོད་པ་བཞིན་དུ་གང་ལ་གང་དགོས་སུ། ནམ་མཁའ་ནས་ཆར་བབ་པ་བཞིན་དུ་གང་ལ་གང་དགོས་སུ་འབྱུང་པར་བསམ་མོ། །དེ་ཡང་གཏོར་མ་ལ་བཙན་དུག་ཏུ་བྱིན་གྱིས་མི་རློབ་སྟེ། གང་ལ་གང་འདོད་དུ་བྱིན་གྱིས་བརླབས་པས། རྨ་བྱ་ལ་བཙན་དུག་ཏུ་ཡང་འཆར་གསུང་། འབུལ་ཚིག་ནི། བདག་གི་བསོད་ནམས་སྟོབས་དང་ནི་༴ ཞེས་པ་ལ་སོགས་བརྗོད་དོ། །དེ་ཡང་མི་ཤེས་ན། བླ་མ་དཀོན་མཆོག་ཡི་དམ་ལྷ་ཚོགས་ཆོས་སྐྱོང་བསྲུངས་མ་འཁོར་དང་བཅས་པ་ལ་འབུལ་ལོ། །འགྲོ་དྲུག་གི་སེམས་ཅན་ལུས་པ་མེད་པ་ཐམས་ཅད་ལ་འབུལ་ལོ། །གང་ལ་གང་དགོས་ཅི་ལ་ཅི་འདོད། འདོད་པའི་ཡོན་ཏན་ལྔ་དང་ལྡན་པར་གྱུར་ཅི ག་ཅེས་བརྗོད་དོ། །གཞི་པ་རྗེས་ཀྱིས་ཚིམ་པ་ནི། ཆུ་བོ་བད་ཟན་འབྲུལ་བ་ལ་སོགས་པའི་རྗེས་ཀྱིས་ཀྱང་ཡི་དྭགས་ཚན་ཅིག་ཚིམ་པ་ཡིན་ནོ། །དེ་ལྟར་གཏོར་མ་འདི་བསོད་ནམས་ཤིན་ཏུ་ཆེ། འཕྲལ་གྱི་རྐྱེན་བཟློག །བར་ཆད་སེལ། ཕུགས་ཀྱི་ལམ་སྣ་འདྲེན། ཚེ་ཕྱི་མ་དབུལ་འཕོངས་ཀྱི་སྡུག་བསྔལ་དང་བྲལ། འཕྲལ་དུ་སྲིས་ཚུན་ཆོད་ཀྱང་རྨེ་བ་ཡིན། ཕན་ཡོན་དཔག་ཏུ་མེད་པས་ན་པར་ནས། གཏོར་ཟན་ཆུང་ངུ་ན་རེ་ཅིས་ཀྱང་བསྣོམས་ལ་ཡོན་ཏན་ཅིག་གཏོར་མ་བགྱིའོ། །དེ་ལྟར་འདིར་མ་ཟད་དེ་རང་རང་གི་ཁྱིམ་དུ་ཡང་གཏོར་མ་རེམ་ལ་ཐོང་མཛོད། གོང་གི་ཕན་ཡོན་དེ་རྣམས་འབྱུང་བས་གཏོར་མའི་ལས་ལ་འབད་པར་བྱའོ། །དེ་ནི་གཏོར་མའི་སྒོ་ནས་ཚོགས་ཀྱི་བསག་ཐབས་སོ། ༈ །བཞི་པ་མཎྜལ་གྱི་དབུལ་ཐབས་ནི། མ་དྷ་ལ་གཉེར་པས་མཎྜལ་ཞེང་དུ་ཆེ་ལ་དཀྱུས་སུ་རིང་བ་ཞིག་ཤོམས་མཛོད། དེ་ནས་ཆོས་ལ་བྱོན་པ་རྣམས་ཀྱིས་ཀྱང་མཎྜལ་གྱི་འབྲུ་ཚོམས་པ་རེ་ཀུན་གྱིས་སྣོམས་ལ་བསྡུས། དེ་ལ་མདྷལ་གྱི་གཉེར་པས་གཞུང་བཞིན་དུ་བཀོད་ནས་འབུལ་བ་ཡིན། དེ་ཡང་རྒྱས་པར་བྱེད་ན་དབུས་སུ་ཚོམ་བུ་གཅིག་དགོད་དེ་རི་རབ་ཏུ་བསམ། དེ་ནས་དེའི་ཐ་མར་གླིང་ཆེན་པོ་བཞི་དང་། གླིང་ཕྲན་བརྒྱད་དང་རིམ་བཞིན་དུ་དགོད་དོ། །དེའི་ནང་དུ་རྒྱལ་སྲིད་རིན་པོ་ཆེ་སྣ་བདུན་གཏེར་དང་བརྒྱད། ཉི་ཟླ་གཉིས་དང་བཅས་ཏེ་ཚོམ་བུ་ཉི་ཤུ་རྩ་གསུམ་དུ་བཀོད་ལ། དེ་ལྟར་དམིགས་ལ་དབུལ་ལོ། །དེ་བས་བསྡུས་པ་ཉི་ཤུ་རྩ་གཅིག་པ་དང་། བཅོ་ལྔ་པ་དང་། བདུན་པ་ལ་སོགས་པ་རྒྱས་བསྡུས་རིམ་པ་བཞིན་དུ་སྐབས་དང་སྦྱར་ལ་དབུལ་ལོ། །གཡོན་ན་སིལ་མའི་ལུགས་བྱ་བ། འབྲུ་སིལ་བུ་གཏོར་ཏེ། རིན་པོ་ཆེ་སིལ་མར་བསམས་ནས་འབུལ་བ་ཡིན་གསུང་། དེ་ནས་འབུལ་མཁན་གྱིས་མ་དྷལ་བཞེས་པར་ཞུ་བྱ། སློབ་དཔོན་གྱིས་ཚོགས་རྫོགས་པར་གྱུར་ཅིག །ཅེས་བརྗོད་དོ། །དེ་ལྟར་མཎྜལ་ཕུལ་བས་བསོད་ནམས་དཔག་ཏུ་མེད་དེ་གླིང་བཞི་རི་རབ་དང་བཅས་པ་ལག་ཏུ་བླངས་ནས་ཕུལ་བ་དང་ཁྱད་མེད། དེ་ཡང་མང་པོ་འདུས་པའི་དགེ་བའི་རྩ་བ་ཡིན་པས། མེ་ཏོག་ཁྱེར་འོང་ཚད་ཀྱིས་བསོད་ནམས་དེ་ཙམ་རེ་ཐོབ་པ་ཡིན་པས། ནང་པར་ནས་ནས་འབྲུ་བདུན་བརྒྱད་ཙམ་རེ་ཐམས་ཅད་ཀྱིས་བསྣོམས་ལ་གཡོན་ཅིག །དེར་མ་ཟད་དེ་རང་གི་ཁྱིམ་དུ་ཡང་བླ་མ་དཀོན་མཆོག་ལ་མཎྜལ་འབུལ་བ་ལ་འབད་པར་བྱའོ། །དེ་ནི་མཎྜལ་གྱི་སྒོ་ནས་ཚོགས་བསག་ཐབས་སོ། །ལྔ་པ་རྗེས་ལ་དགེ་སྦྱོར་གྱི་བྱ་ཐབས་ནི། ལྟོའམ་ཆོས་ཐོན་པའི་རྗེས་ལ་དགེ་སྦྱོར་རེ་བྱེད་པ་ཡིན་ཏེ། སྤྱིར་གང་བྱས་ཀྱང་འདྲ་བ་ཡིན། དེ་ཡང་དང་པོ་འབུམ་འདོན་པ་ཡིན་སྐད། དེ་ནས་དེ་འོ་རྒྱལ་བར་བྱུང་ནས་ཤེས་རབ་སྙིང་པོ་འདོན་པ་ལ། རྗེ་རིན་པོ་ཆེའི་ཞལ་ནས་ཤེས་རབ་སྙིང་པོ་འདི་ཡང་། དག་པར་བྱུང་ན་ཐེག་པ་ཆེན་པོའི་མདོ་ཡིན་པས་ངོ་མཚར་ཆེ་སྟེ། འདི་ཡང་ཤེས་པ་ཉུང་བས་དག་པ་མི་འོང་བར་འདུག །དེ་བས་མ་ཎི་པད་མེ་འདི་རང་བཀའ་བརྩོད་པ་དང་བྲལ། ཀུན་གྱིས་མི་ཤེས་པ་མེད་པས་འདི་རང་བསྒྲངས་པ་ངོ་མཚར་ཆེ་བར་འདུག་གསུང་ནས་མ་ཎི་རུ་བསྒྱུར་ནས་མཛད་དོ། །དེ་ཡང་སྤྱིར་ལྷ་གང་བསྒོམས་ཀྱང་འདྲ། སྙིང་པོ་གང་བཟླས་ཀྱང་འདྲ་བ་ལ། འོན་ཀྱང་ཇོ་བོ་ཐུགས་རྗེ་ཆེན་པོ་འདི་བོད་ཀྱི་ལྷ་སྐལ་ཡིན་ཏེ། དེ་ཡང་རྒྱ་གར་རི་མ་ལ་ཡ་གནམ་ལྕགས་ཐོག་འབབ་པའི་རྩེ་མོ་ན། མཐུ་སྟོབས་ཀྱི་བདག་པོ་དཔལ་ཕྱག་ན་རྡོ་རྗེ་བཞུགས་ནས་རྒྱ་དཀར་པོའི་དོན་མཛད་པ་ལགས་སྐད། རྒྱ་ནག་པོ་རི་བོ་རྩེ་ལྔ་ལ་མཁྱེན་རབས་ཀྱི་བདག་པོ་འཕགས་པ་འཇམ་དཔལ་བཞུགས་ནས་རྒྱ་ནག་པོ་རྣམས་ཀྱི་དོན་མཛད་པ་ལགས་སྐད། ཕོ་བྲང་རི་བོ་ཏ་ལའི་རྩེ་མོ་ན་ཐུགས་རྗེའི་བདག་པོ་འཕགས་པ་སྤྱན་རས་གཟིགས་བཞུགས་ན། འོ་སྐོལ་བོད་རྣམས་ཀྱི་དོན་མཛད་པ་ལགས་སྐད། དེ་ལྟར་ཡིན་པས་ལྷ་ཐུགས་རྗེ་ཆེན་པོ་འདི་སྒོམ་པར་བདེ། གྲུབ་ཐག་ཉེ་བྱིན་བརླབས་ཆེ་བ་ཡིན་སྐད། དེའི་ཕྱིར་ལྷ་ཐུགས་རྗེ་ཆེན་པོ་སྒོམ། སྙིང་པོ་ཡང་ཐམས་ཅད་སངས་རྒྱས་ཀྱི་གསུང་ཡིན་པར་འདྲ་བ་ལ། གོང་གི་གནད་ཀས། གསུང་ཡི་གེ་དྲུག་པ་འདི་བཀའ་སྩོལ་པ་ཐམས་ཅད་དང་བྲལ། བྱིས་པ་ཀུན་གྱིས་ཀྱང་བསླབ་མ་དགོས་པར་ཤེས། བྲག་ལོགས་ལ་རང་བྱུང་དུ་བྱོན། ཕན་ཡོན་ལ་དཔག་ཏུ་མེད་པས་འདི་བཟླས་སོ། །དེ་ཡང་ཇི་ལྟར་བཟླས་ན་མངོན་རྟོགས་དང་བཤད་ཚོད་མང་ཀྱང་ཧྲིལ་དྲིལ་ན་ལྷ་ཐུགས་རྗེ་ཆེན་པོ་བསྒོམས་ནས་སྙིང་པོ་ཡི་གེ་དྲུག་པ་རེ་བཟླས་པས་ཆོག་གོ། །བཟླས་ལུགས་ནི་གསུམ་སྟེ། ཕྱི་མདོ་སྡེ་ལྟར་བཟླས་པ། ནང་གསང་སྔགས་ལྟར་བཟླས་པ། གསང་བ་མཁའ་འགྲོ་མ་བརྡའ་ལྟར་བཟླས་སོ། །དང་པོ་ནི་ཇི་སྲིད་སྐད་ཆེ་བར་བཟླས་པ་ཡིན་ཏེ། དེ་ཐོས་པའི་སེམས་ཅན་ཀྱང་གྲོལ་ནུས་པས་སོ། །གཉིས་པ་ནི་གོང་རྩ་གཡས་གཡོན་གྱི་ཐོས་ཙམ་བཟླས་སོ། །གསུམ་པ་ནི་ཡིད་ལ་ལམ་ལམ་བཟླས་ཆོག་གོ། །དེ་ལྟར་བཟླས་ལུགས་གསུམ་གང་མོས་སམ་ཁམས་དང་སྦྱར་ལ་བཟླས་སོ། །བཟླས་པའི་ཕན་ཡོན་ནི་དཔག་ཏུ་མེད་དེ་རྒྱས་པར་བཤད་དོ། །ལུང་ནོད་བྱ་བ་ཡིན་པས་འདིར་ངའི་ལད་མོ་ལན་གསུམ་མཛོད་ཅིག་ཅེས་ཐལ་མོ་སྦྱར་ལ་ཨཱོཾ་མ་ཎི་པད་མེ་ཧཱུྃ་ཞེས་ལན་གསུམ་གྱིས་ལུང་དབོག་གོ །དེས་ལུང་ཐོབ་པ་ཡིན་པས་ཐུགས་དམ་དུ་བཟུང་ནས་བསྒྲང་པར་ཞུ ། ཆོས་ཐོན་པའི་རྗེས་འདི་ལ་བརྒྱ་ཚོ་རེ་བསྒྲངས་པར་ཞུའོ། །སུ་མ་ཎི་འདྲེན་པ་རེམ་པ་ཚོ་སྔོན་ལ་སངས་རྒྱས། མི་རེམ་པ་ཚོ་ཕྱི་ལ་སངས་རྒྱ། ཡེ་མ་བསྒྲངས་ན་སངས་མི་རྒྱ་བ་ཡིན་པས་རེམ་ལ་བཟླས་སོ། །དེ་ནི་རྗེས་ལ་དགེ་སྦྱོར་གྱི་བྱ་ཐབས་སོ། ༈ །འགྲོ་བའི་མགོན་པོ་སྤྲུལ་སྐུ་ཞིག་པོའི་གསུང་། །སྔོན་འགྲོའི་བརྗེད་ཐོ་ཡི་གེར་བྲིས་པ་འདི། །གཞན་ལ་ཕན་ཕྱིར་དབུས་པ་རྟ་ཡིས་བསྡེབས། །དེ་ཡི་དྲིན་གྱིས་ཁམས་གསུམ་སེམས་ཅན་ཀུན། །ཚོགས་གཉིས་རྫོགས་ཏེ་ཐར་པའི་ས་ཐོབ་ཤོག །འགྲོ་མགོན་ཞིག་པོའི་གསུང་བསྒྲོས་བཅོས་སླད་མེད་པར་དབུས་པ་རྟ་ཡིས་སྦྱར་བ། རྫོགས་སོ།། །།ཁོ་བོ་རྟ་བན་གཟི་བརྗིད་ང་། །འཇིག་རྟེན་ཆོས་ལུགས་མི་བཟོ་ཡང་། །བླ་མའི་གསུང་ལ་ངེས་པ་ཐོབ། །མ་ལེ་ཡིད་སྨོན་མི་གཏོང་ངོ་། །ཀྱག་ལ་ངས།།

སྤུངས་པའི་ཁྲིད་ལུགས་གསལ་བའི་སྒྲོན་མེ། རྟ་ཛྙཱ་ན་ཤྲཱི།

སྤུངས་པའི་ཁྲིད་ལུགས་གསལ་བའི་སྒྲོན་མེ་བཞུགས། སྤྲུལ་པའི་བདག་ཉིད་ཨ་རོ་ཡེ་ཤེས་དང་། །ཡ་ཟི་བོན་སྟོན་དྲུ་གུ་གློགས་འབྱུང་དང་། །སྦ་བསྒོམ་བསོད་སྙིང་དམ་པས་འཛི་བསྒོམ་དང་། །བ་རང་བསྒོམ་ཆེན་ཇོ་མོ་ཉང་མོ་དང་། །དམ་པ་ཤཱཀ་རྒྱལ་ཤཱཀྱ་བླ་མ་དང་། །ལྕེ་སྟོན་ཇོ་གཟུངས་སྤྲུལ་སྐུ་ཞིག་པོ་ཉིད། །དྲིན་ཅན་བླ་མ་རྣམས་ལ་འདུད་བྱས་ཏེ། །མན་ངག་རིན་ཆེན་སྤུངས་པ་ཡི། །ཁྲིད་ལུགས་གསལ་བའི་སྒྲོན་མ་བྲི། །སློབ་དཔོན་ཨ་རོ་ཡེ་ཤེས་འབྱུང་གནས་ཀྱིས། །ཁམས་ཀྱི་ཡ་ཟི་བོན་སྟོན་ལ། །སྙན་རྒྱུད་རིན་པོ་ཆེ་སྤུངས་པའི་གདམ་ངག་བསྟན་པ་བཞིན་དུ། འོ་སྐོལ་འདིར་ཡང་སྟོན་པར་བགྱིད་ལགས་སོ། །མན་ངག་འདི་ལ་དོན་གཉིས་ཏེ། །སློབ་བུ་ངེས་ཤེས་བསྐྱེད་པ་བརྒྱུད་པའི་ལོ་རྒྱུས་དང་། ཉམས་སུ་བླངས་པ་གདམ་ངག་གི་རིམ་པའོ། །དང་པོ་ནི་སློབ་དཔོན་ཨ་རོ་སྤྲུལ་པའི་སྐུ་དངོས་དེས། ཐུགས་ཟིན་བཞིའི་ནང་ནས་ཁམས་ཀྱི་ཡ་ཟི་བོན་སྟོན་ལ་གདམ་ངག་ཐམས་ཅད་རྫོགས་པར་གནང་། དེས་གྲུབ་པ་ཐོབ་ཡོན་ཏན་དུ་མ་དང་ལྡན་ནོ། །དེ་ལ་རྒྱན་གྷོང་གི་དྲུ་གུ་གློག་འབྱུང་གིས། ཨ་རོ་ཉིད་ལ་ཡང་བཀའ་ཐོབ་ཙམ་བྱས། མཐིལ་དུ་ཡ་ཟི་ལ་ཞུས་སོ། །དེས་རོང་གི་བྲག་རྒྱབ་པ་སྦ་སྒོམ་བསོད་ནམས་སྙིང་པོ་ལ་གནང་དེས་རོང་སྟོད་པ་འཛི་བསྒོམ་ལ་གནང་། དེས་དོ་རིའི་བ་རང་བསྒོམ་ཆེན་ལ་གནང་། དེས་ཇོ་མོ་ཉང་མོ་བྱ་བ་ཁ་རག་ཉང་ཁོལ་བ་ཡིན་ཏེ། དད་པ་ཤིན་ཏུ་ཆེ་ཆོས་བྱ་སྙམ་པ་ལ། མིང་པོས་ཁྱོ་ལ་བཏང་པས་མཛེ་རྫུ་བཏབ་ནས་བྲལ། རེས་སྨྱོ་རྫུས་ཀྱང་བཏབ་ནས་ཆོས་ལ་ཕྱིན་པས། བ་རང་བསྒོམ་ཆེན་དང་མཇལ་ནས་སྤུངས་པའི་གདམ་ངག་གནང་ནས་ཉམས་སུ་བླངས་པས། ཉམས་མྱོང་དང་ལྡན་མི་ཆེན་པོ་འདུས་སོ། །དེ་ལ་རྩང་སྟོན་རྡོ་རྗེ་འབར་གྱིས་སྣ་མཚོན་མཛོད་ནས་ལྕེ་ཤག་རྒྱལ་གྱིས་ཞུས། དེས་ལྕེ་སྟོན་གཟུང་ངེ་ལ། དེས་སྤྲུལ་སྐུ་རིན་པོ་ཆེ་ལ། ཡང་ཇོ་མོས་སེ་བྲག་པ་ལ། དེས་སྤྲུལ་སྐུ་རིན་པོ་ཆེ་ལ། དེས་དངོས་ལའོ། །དེ་ལྟར་བརྒྱུད་པ་གྲུབ་ཐོབ་རྟོགས་ལྡན་ཟམ་མ་ཆད་པས་ཡིན་ཆེས་ཤིང་ངེས་ཤེས་སྐྱེ་དགོས་སོ། །ཉམས་སུ་བླང་པ་གདམ་ངག་གི་རིམ་པ་ལ་གཉིས་ལས། ཐུན་མོང་གི་སྤུངས་པ་གུད་ན་བཞུགས། ཐུན་མོང་མ་ཡིན་པ་འདི་ལ་གཉིས་ཏེ། མན་ངག་གི་མཚན་ཆེ་བ་དང་བཅས་པ་དང་། མན་ངག་དངོས་པོ། མཚན་ནི་མན་ངག་རིན་པོ་ཆེ་སྤུངས་པ་ལ་འདི་ཞེས་པས། རྩོལ་བ་ལ་རག་མ་ལུས་པས་ཚེགས་ཆུང་། མཐར་ཐུག་གི་འབྲས་བུ་ཐོབ་པས་དོན་ཆེ་བས་མན་ངག །བྱང་ཆུབ་བསྒྲུབ་པའི་ལམ་གྱི་དགོས་འདོད་ཐམས་ཅད་འབྱུང་བས་རིན་པོ་ཆེ་སྤུངས་པ་བཞིན་ནོ། །དེ་ཀ་རྣལ་འབྱོར་པ་གོང་མ་རྣམས་ཀྱིས་ཉམས་མྱོང་གི་རིག་པ་བརྒྱུད་པའི་མན་ངག་ཡིན་པས། ཚིག་ཏུ་གོ་སླ་དོན་དུ་ཤེས་སྐྱོན་ནོ། །བརྒྱུད་པ་ཐབས་སུ་ཁྱེར་བ་མིན་ཏེ། གནས་ལུགས་ཐབས་སུ་འཁྱེར་བའི་ཐབས་ཁྱད་པར་ཅན་གྱིས་ཟིན་པའི་མན་ངག་ཡིན་པས། ལྟ་སྤྱོད་བག་ཡངས་ལ་འབྲས་བུ་མཉམ་ཉིད་གདུ་བ། ལྟ་བ་ཨ་ཏི་ཡོ་ག །སྤྱོད་པ་གདབ་པ་བཅུ། མ་འཆོལ་བའི་མན་ངག་ཡིན་པས་རྟོགས་པ་རྒྱུད་ལ་འཆར་རྐྱེན། ལྟ་བསྒོམ་སྤྱོད་པའི་དྲོད་ཚད་ཀྱིས་ཟིན་པའི་མན་ངག་ཡིན་པས། ཆོས་ཉིད་ཀྱི་ངང་ལ་རིག་པ་གནས་རྐྱེན། ལྟ་བ་ཨ་ཏི་ཡོ་གའི་གནད། བསྒོམ་པ་སྐྱེ་བའི་རིམ་པ་སེམས་ཀྱི་དྲོད་ཚད་བསྟན་པ། སྤྱོད་པ་གདབ་པ་བཅུའི་གནད་ཀྱི་མན་ངག་ཡིན་པས། ཞེན་འཛིན་གྱི་མདུད་པ་རང་སར་གྲོལ་རྐྱེན། རྟོགས་པའི་བླ་མ་གོང་མའི་ཁོང་ནས་སློབ་བུ་འོག་མའི་ཁོང་དུ་འོལ་བའི་མན་ངག་ཡིན་པས། གཉིས་མེད་ཀྱི་ཡེ་ཤེས་རྒྱུད་ལས་འཆར་རྐྱེན་ནོ། །དེ་ལྟར་མན་ངག་གི་མཚན་ཆེ་བ་དྲུག་པོ་དེ་བཤད་པས། གཞན་པས་ལྷག་པའི་ཡེ་ཤེས་གཅིག་སྐྱེ་དགོས་སོ། །མན་ངག་དངོས་ལ་གསུམ་སྟེ། བཙལ་ཐབས་དགུས་བླ་མ་བཙལ་བ་དང་། བཅང་ཐབས་བཅུ་བདུན་དམ་ཚིག་ཏུ་བསྟན་པ་དང་། མན་ངག་གདབ་པ་དངོས་སོ། །དང་པོ་ནི་བླ་མ་དགེ་བའི་བཤེས་གཉེན་སངས་རྒྱས་དངོས་ཀྱི་ཚུལ་དུ་བཙལ་བར་བྱ་ཞེས་པ་ལ་རྩོགས་པ་དགུས་བསྟན་ཏེ་བགྲང་། དེ་ལ་སྤྱིར་བླ་མ་ལ་བཞི་སྟེ། ཕྱིའི་བླ་མ་ཚིག་གི་དོན་མཚོན་པར་བྱེད་པ། ནང་གི་བླ་མ་དེས་མཚོན་པའི་ལྟ་བ་རྟོགས་པ། གསང་བའི་བླ་མ་རྟོགས་པ་དེ་བསྒོམས་པས་ཉམས་སུ་མྱོང་བ། མཐར་ཐུག་གི་བླ་མ་ནི་ཇི་ལྟ་བ་བཞིན་ལས་སུ་རུང་བའོ། །དེ་ལས་འདི་ཕྱིའི་བླ་མ་བཙལ་ཐབས་གཙོ་ཆེ་སྟེ། དེ་ལ་བླ་ཡང་དག་པར་རྫོགས་པའི་སངས་རྒྱས་ཀྱི་དགོངས་པ། དེ་ཚིག་གིས་མཚོན་ནས་རྒྱུད་ལ་བསྐྱེད་པར་བྱེད་པས་ན། སྡུག་བསྔལ་ལས་སྐྱོབ་པའི་དགེ་བའི་བཤེས་གཉེན་དེ། སངས་རྒྱས་བས་ཀྱང་ལྷག་སྟེ། དེས་ཀྱང་ལག་པ་ནས་ཁྲིད་ནས་གཞག་ཏུ་མེད་ལ། རང་ལ་གནས་པ་བླ་མས་ངོ་སྤྲོད་པས། སངས་རྒྱས་དངོས་བས་ཀྱང་ལྷག་པའི་ཚུལ་གྱིས་བཙལ་བར་བྱའོ། །དེ་ནད་པའི་ཚོགས་ཀྱིས་སྨན་པ་བསྟེན་པ་དེ་སྨན་པ་ཅི་དགའ་བ་བྱས་ཏེ་བསྟེན་པ་བཞིན་དུ། མན་ངག་འདོད་པའི་སློབ་བུས་བླ་མ་ཅི་མཉེས་པ་བྱས་ལ་བཙལ་བར་བྱའོ། །དེ་ལན་ཚ་མྱང་བ་དེ་ཁས་ན་ཆུ་བླུགས། ཞན་ན་ཚ་འདེབས། རན་ན་འཐུང་བ་བཞིན་དུ། རུ་དེའི་སྤྱོད་པའམ་དགོངས་ཉམས་ཟབ་བམ་མི་ཟབ་བལྟས་ལ་ཟབ་པ་ལ་ཞུ། དང་པོའི་དད་པ། མོས་པའི་དད་པ། ཡིད་ཆེས་པའི་དད་པ་གསུམ་པོ་དེ་རེས་ཆེ་རེས་ཆུང་བ་མིན་ཏེ་ཆུ་བོའི་གཞུང་བཞིན་སྐྱེ་འབྲི་མེད་པར་བཙལ་བར་བྱ། བླ་མའི་ཆགས་ཕྱིར་བརྩོན་ཞིང་མན་ངག་ཞུ་བ་ལ་འགྲུས་པས་ཐང་ལྷོད་མེད་དེ། གཞུ་མོའི་རྒྱུད་བཞིན་ཐང་ངེ་བཙལ་བར་བྱའོ། །གནས་སྐྱིད་པ་དང་ཡུལ་བཟང་བ་ལ་ཆགས་པ་མེད་པར་བཙལ་བར་བྱའོ། །ནོར་དང་རྫས་དང་ཕངས་པ་མེད་པར་བློས་བཏང་ལ་བཙལ་བར་བྱའོ། །ལུས་ངག་གི་དཀའ་བས་བླ་མ་ཚོལ་ཞིང་བརྟེན་པ་ལ་སྡུག་བསྔལ་གྱི་དཀའ་བ་བཟོད་ཡིད་གདུངས་པ་སྐོམ་པ་ཆུ་ཚོལ་བ་ལྟ་བུའི་ཚུལ་གྱིས་བཙལ་བར་བྱ། བྱང་སེམས་རི་ལྟར་བརྟན་པ་ནི་ལྟ་བ་ཉམས་སུ་མྱོང་བ་ལ་འ ཕོ་འགྱུར་མེད་ཟེར་ཀྱང་། བློ་བརྟན་པོ་རི་དང་འདྲ་བས་མི་འགྱུར་བར་བཙལ་བར་བྱ་རིན་པོ་ཆེ་གསུང་ངོ་། །བཅང་ཐབས་བཅུ་བདུན་ཚིག་ཏུ་བསྟན་པ་ནི། བླ་མ་དམ་པའི་གདམ་ངག་སྨ་ཅི་དབབ། ཅེས་པ་ལ་སོགས་པ་བཅུ་བདུན་ཏེ་བསྒྲང་། བླ་ནི་ཡང་དག་རྫོགས་སངས་རྒྱས། །མ་ནི་དེ་བསྐྱེད་བྱེད་པའོ། །ཞེས་པས། བླ་ནི་སངས་རྒྱས་ཀྱི་དགོངས་པ་ལ་བྱ། མ་ནི་ཚིག་གིས་མཚོན་ནས་རྒྱུད་མ་ངེས་ཤེས་བསྐྱེད་པ་ལ་བྱ། དམ་པ་ནི་གཞན་ལས་ཁྱད་པར་དུ་གྱུར་པ་སྟེ། བླ་མ་དེས་ཨ་ཏི་ཡོ་གའི་གདམ་ངག་བསྟན་པ་ལ། ཐེ་ཚོམ་སྐྱེས་ན་སྨ་ཕབ་པ་ཡིན་ཏེ་བྱིན་བརླབས་མི་འབྱུང་བས་ཡིད་ཆེས་བར་བྱའོ། །རང་གི་རིགས་པས་འདི་ལྟར་འཐད་བྱས་ན་དྲི་མ་ལ་བསྐུལ་བས་གསུང་བཞིན་བྱའོ། །ཁྲིད་ཀྱི་དུས་སུ་རླུང་ལ་ཐུན་རྐུན་མི་བྱ་བ་དང་ཐུན་ལ་འབྱམས་སུ་མི་གཞུག་པ་ལ་སོགས་པ་ཡིན་གསུང་། ཤོག་གུ་ལ་བྲིས་ན་ཐལ་ཁུང་དུ་གསུར་བ་ཡིན་ཏེ། འོ་ན་ད་ལྟ་བྲིས་ནས་འདུག་པ་སྙམ་པ་ལ། དཔེ་དེ་ལྟར་འདུག་ཀྱང་བློ་གནས་སུ་ཧྲུག་གེམ་བརྗེད་པར་བྱའོ། །དེ་ལྟར་མ་བྱས་ན་ཐལ་ཁུང་དུ་གསུར་བའོ། །ང་ལ་གདམ་ངག་ལ་འཐོར་དུ་སྤུངས་པ་ན་འདི་འདྲ་ཡོད་སྨྲས་ནས་ཡར་བ་སྟེ། ལ་འཐོར་དུ་མི་སྨྲའོ། །ཕག་ཏུ་མཆེད་གྲོགས་ལ་སོགས་པ་ལ་སྤུངས་པའི་ལུགས་ཀྱིས་འདི་འདུ་ཡོད་བྱས་ན་ཟགས་པ་སྟེ། ཉམས་སུ་ལེན་ལུགས་འདི་ལྟར་བྱེད་བྱ་བ་ལ་སོགས་པ་མི་བཟླས་སོ། །རང་གི་ཉམས་སུ་མ་བླངས་ཏེ་བརྗེད་ན་སྐམས་པ་སྟེ། མ་བརྗེད་པར་ཉམས་སུ་བླང་ངོ་། །སྤུངས་པའི་ལུགས་ཀྱི་ལྟ་བ་ཨ་ཏི་ཡོ་ག་ལ་སོགས་འདི་ལྟར་འདོད་བྱས་ན་ལྟ་བར་བཀྲོལ་བ་སྟེ། དེ་གཞན་ལ་མི་བཤད་དོ། །གདམ་ངག་འདི་ལྟ་བུ་ཡོད་དེ་ཁྱོད་རང་འབུལ་བ་བྱེད་དམ་བྱས་ན་ཆོས་དང་ནོར་དུ་བརྗེས་ནས་བཙོངས་པ་སྟེ་མན་ངག་དང་ནོར་མི་རྗེའོ། །ཁྲིད་མ་བྱས་པར་ཕར་ཕར་བཤད་ན་སྤྱུགས་པ་སྟེ། ཁྲིད་མ་བྱས་པར་མི་བཤད་དོ། །གོང་མའི་དམ་ཚིག་མ་ཐུབ་ན་ངན་སོང་དུ་ལྷུང་པས་གཡང་དུ་སྐྱུར་བ་ཡིན་ཏེ། དེ་ཐུབ་པར་བྱའོ། །གོང་མ་ཚོ་མ་ཐུབ་ན་རང་ལ་གནོད་པས་དུག་ཏུ་སོང་བ་སྟེ། དེ་ཐུབ་པར་བྱའོ། །གཞན་ལ་ཡེ་མ་བསྟན་ན་རབས་བཅད་པ་ཡིན་པས། སྣོད་ལྡན་འགའ་ལ་བསྟན་ནོ། །སྤུངས་པའི་སྐོར་འདི་ཚང་བར་མ་བྱིན་ན་དབང་པོ་བཅར་བ་ཡིན་པས་ཚང་བར་སྦྱིན་ནོ། །དམ་ཚིག་དེ་ལྟར་ཡིན་པས་རང་གི་མིག་པས་ཀྱང་ཕངས་པར་སྦའོ། །མན་ངག་འདི་རང་གི་སྲོག་པས་ཀྱང་ཕངས་པར་བཙའོ། །དམ་ཚིག་འདི་རྣམས་ཐུབ་པར་བྱ་དགོས་སོ། །གདམས་ངག་གདབ་པ་ལ་གསུམ་སྟེ། ལྟ་བ་དང་། བསྒོམ་པ་དང་། སྤྱོད་པའོ། །དེ་ལྟར་གསུམ་ཉམས་སུ་བླངས་པས་འབྲས་མཁར་མ་ལོ་ལེགས་ན་ཕུལ་སོག་ཞོར་ལ་འབྱུང་བ་དང་འདྲ་སྟེ་འབྲས་བུ་ཞོར་ལ་འབྱུང་ངོ་། །ལྟ་བ་ལ་གསུམ་སྟེ། ཤན་འབྱེད་ཁོང་འཁྲོལ་བཞི་ཐེག་པའི་འགྲལ་ལམ་ཤན་འབྱེད་དུ་བསྟན་པ་དང་། མཚན་ཁོང་ཐོན་ལྟ་བ་དངོས་སུ་བསྟན་པ་དང་། ཡོན་ཏན་རྫོགས་པ་ཆེན་པོའོ། །དང་པོ་ནི་བཀག་པ་ལ་སོགས་པ་བཞིས་དགག་བྱ་གཙོ་བོར་སྟོན། བཙལ་བ་ལ་སོགས་པ་བཞིས་བསྒྲུབ་བྱ་གཙོ་བོར་སྟོན། དེ་གཉིས་ཁོང་ཁྲོལ་བས་ཁོང་འཁྲོལ་ཞེས་བྱའོ། །དེ་ལ་དང་པོ་བཀག་པའི་ཅེས་པ་ཉན་ཐོས་ཀྱི་ལུས་སེམས་གཉིས་ཀ་སྡིག་པ་བཀག་ནས་དགེ་བ་བསྒྲུབ་པའོ། །བཀག་པ་ནི་དགེ་སྡིག་མཉམ་པ་ཉིད་རང་ལ་གནས་པ་མ་རྟོགས་པའོ། །ཡང་བཀག་པ་ནི་སྔགས་ཀྱི་རྣལ་འབྱོར་པས་ལུས་ངག་གིས་སྡིག་པ་བཀག་ཀྱང་སེམས་ཀྱིས་སྒྱུ་མར་ཤེས་པས་མ་བཀག་པའོ། །མ་བཀག་པ་ནི་རྫོགས་ཆེན་ཁ་འབྱམས་པས་དོན་མ་གོ་བར་ལུས་ངག་གིས་སྡིག་པ་དགག་མི་དགོས་ཟེར། སེམས་ཀྱིས་མཉམ་པ་ཉིད་དུ་མ་ཤེས་པས། མཉམ་པ་ཉིད་ཀྱི་དོན་བཀག་པའོ། །མ་བཀག་པའི་ནི་སེམས་ཀྱིས་མཉམ་པ་ཉིད་དུ་ཤེས་པས་ལུས་ངག་གིས་སྡིག་པ་མ་བཀག་པའོ། །མ་བཀག་པ་ནི་སེམས་ཀྱིས་དགེ་སྡིག་མཉམ་པ་ཉིད་དུ་ཤེས་ནས་ལུས་ངག་གི་སྡིག་པ་མ་བཀག་ལ་མི་འཇུག་པ་གཅིག་དགོས་སོ། ༈ །བཙལ་བའི་ནི་ཉན་ཐོས་པ་སྟེ། ལུས་སེམས་གཉིས་ཀ་སྡིག་པ་བཙན་ཐབས་སུ་སྤོང་དགེ་བ་བསྒྲུབ་པའོ། །བཙལ་བ་ནི་སྤང་བླང་མེད་པར་མ་ཤེས་པའོ། །བཙལ་བའི་ནི་ལུས་ངག་གིས་ལྷ་བསྒོམ་སྙིང་པོ་བཟླས་ནས་བཙལ་བའོ། །མ་བཙལ་བ་ནི་སེམས་ཀྱིས་འབྲས་བུ་རང་ལ་ཡོད་པར་ཤེས་ནས་མ་བཙལ་བའོ། །མ་བཙལ་བའི་རྫོགས་ཆེན་ལ་འབྱམ་པ་ལུས་ངག་གི་རྩོལ་བས་བཙལ་དུ་མེད། ལུས་ཀྱིས་ལྷ་མི་བསྒོམ་ངག་གིས་སྙིང་པོ་མི་བཟློས། བཙལ་བ་ནི་སེམས་ཀྱི་འབྲས་བུ་རང་ལ་ཡོད་པར་མ་ཤེས་པས་སོ། །མ་བཙལ་བ་ནི་རྫོགས་ཆེན་རྟོགས་པས་ལུས་སེམས་གཉིས་ཀས་མཉམ་པ་ཉིད་དུ་ཤེས་པས་དགེ་སྡིག་གིས་མ་བཙལ་བའོ། །མ་བཙལ་བ་རྩོལ་བ་ཐམས་ཅད་དང་བྲལ་བའོ། །འདི་རྣམས་རྒྱ་ཆུང་བར་ཉན་ཐོས། རྣལ་འབྱོར་ཆེན་པོ། སོ་སོ་སྐྱེ་བོ། རྫོགས་ཆེན་པ་བཞི་དང་སྦྱར། རྒྱ་ཆེ་བར་མཚན་ཉིད་པ། གསང་སྔགས་པ། འཇིག་རྟེན་པ། རྫོགས་ཆེན་པ་བཞི་དང་སྦྱར་ནས་རང་གང་ན་འདུག་པ་ཤན་དབྱེའོ། །སྐྱེ་བོ་བ་རྫོགས་ཆེན་ཁ་འབྱམས་པ་བྱ་བར་རིན་པོ་ཆེ་གསུང་ངོ་། །མཚན་ཁོང་ཐོན་ལྟ་བ་དངོས་སུ་བསྟན་པ་ནི། དེ་ཡང་ཨས་མཚོན་ནས་སྐྱེ་མེད། ཏིས་འགག་མེད། ཡོ་གས་མཚོན་ནས་གཉིས་མེད་སྟོན་ནོ། །ཨ་ཨ་ནུད་བ་བཱ་སྭ་བ་བཱ་དྷར་མ་ཏེ་ཞེས་བྱ་བའི་སྒྲ་ལས་དྲངས་ན། ཨ་མ་སྐྱེས་ཅིང་སྐྱེ་བ་མེད་པའི་རང་བཞིན་ཡིན་ཞེས་པ་ནི། ཀུན་ནས་ཉོན་མོངས་པ་འཁོར་བའི་ཆོས་ལུས་དང་སྡུག་བསྔལ་དུ་སྣང་བ་ཡང་རྒྱུ་ལས་མ་བྱུང་། རྐྱེན་ནམ་ངོ་བོས་མ་སྐྱེ། ལམ་པའི་ཆོས་ལྟ་བསྒོམ་སྤྱོད་པར་སྣང་བ་ཡང་རྒྱུ་ལས་མ་བྱུང་། ཁམས་མ་སྐྱེས་པ་མཚན་ལས་འདས་པའི་ཆོས་སྐུ་དང་ཡེ་ཤེས་སུ་སྣང་བ་ཡང་རྒྱུ་ལས་མ་བྱུང་། རྐྱེན་ནམ་ངོ་མ་སྐྱེས་ཏེ། དོན་ནི་སེམས་ཀྱིས་སེམས་ལ་བལྟས་པས་ངོས་བཟུང་ཐམས་ཅད་དང་བྲལ་བ་དེའོ། ཏི་ཏིན་ཏི་ན་ཞེས་བྱའི་སྒྲ་ལས་དྲངས་ན། མཉམ་པ་ཉིད་ཀྱི་ཐུགས་རྗེ་ཆེན་པོས་སེམས་ཅན་ཐམས་ཅད་བཟུང་བའི་དོན་ཡིན་ནོ། །དེ་ཡང་སྒྲ་དེ་ལས་དྲངས་ནས་མཉམ་པ་ཉིད་ནི་ཆོས་ཐམས་ཅད་འགག་མེད་སྣང་མཉམ་གྱི་ཐུགས་རྗེ་ཆེན་པོའི་ནི་རྟོགས་པ་མངོན་འགྱུར་གྱི་ཐུགས་རྗེ་ཆེན་པོ་ཤར་བ་ལྟ་བུ་མ་ཡིན་ཏེ། གནས་ལུགས་འགག་མེད་སྣང་མཉམ་དུ་རྒྱུན་མི་འཆད་པ་ལ་ཐུགས་རྗེ་ཞེས་བྱ་སྟེ། རྟག་པ་རྒྱུན་དུ་ཐུགས་རྗེ་སྐྱེ་བའི་དོན་ཡིན་གསུང་། བཟུང་བ་ནི་ཆོས་ཉིད་རང་སྣང་རིས་མེད་དུ་བཟུང་བའོ། །དེ་ཡང་འཁོར་བའི་ཆོས་སུ་ཡང་རང་སྣང་། ལམ་བར་ཀྱང་རང་སྣང་། མྱ་ངན་ལས་འདས་པར་ཀྱང་རང་སྣང་བ་སྟེ། དོན་ནི་སེམས་ཉིད་རང་སྣང་དུ་སལ་ལེ་བ་འདིའོ། །ཨས་མཚོན་པའི་སྐྱེ་བ་མེད་པའི་དོན་རྟོགས་པ་ནི་ཤེས་རབ་ལ། ཏིས་མཚོན་པའི་སྙིང་རྗེ་ནི་ཐབས། ཐབས་དང་ཤེས་རབ་གཉིས་སུ་དབྱེར་མེད་པའི་དོན་རྟོགས་པ་ལ་ཡོ་ག་ཞེས་བྱ་སྟེ་རྣལ་འབྱོར་གྱི་དོན་ནོ། །རྣལ་འབྱོར་ཞེས་བྱ་བ་ནི་ཆོས་ཉིད་དོན་གྱི་རྣལ་མ་ལ་རང་རིག་པའི་བློ་འབྱོར་པ་ལ་བྱའོ། །ཞེས་པ་ནི། ཐབས་ཤེས་རབ་གཉིས་སུ་དུས་ལ་ལྔ་ཕྱི་མེད། ངོ་བོ་ལ་བཟང་ངན་མེད། འདུག་ས་ལ་ཐ་དད་མེད་དེ། དོན་ལ་ཨ་མ་སྐྱེས་པ་སེམས་ཉིད་ངོས་བཟུང་ཐམས་ཅད་དང་བྲལ་བའི་དུས་ན་རང་སྣང་། ཏི་འགག་མེད་སེམས་ཉིད་སྣང་བདོས་པའི་དུས་ན་དེ་ཉིད་ངོས་བཟུང་དང་བྲལ་ཏེ་ཨ། དེ་གཉིས་དུས་མཉམ་ཆིག་ཆོད་དུ་དཀྲུག་གིས་རྟོགས་པ་དེའོ། །དེ་ལ་མཚན་ཁོང་ཐོན་གྱིས་ངེས་པ་ནི་རུའི་ཐུགས་ནས་རང་འབྱུང་དུ་ཐོན་པས་སོ། །རིན་པོ་ཆེ་ནི་མཚན་ཨ་ཏི་ཡོ་གའི་ཁོངས་ནས་ལྟ་བ་སྐྱེ་འགག་གཉིས་མེད་ཐོན་པར་འཐད་གསུང་ངོ་། །ཡོན་ཏན་རྫོགས་པ་ཆེན་པོ་ནི་གཉིས་ཏེ། རྫོགས་པའི་རྫོགས་ཚུལ་དང་། ཆེ་བའི་དཔགས་ཚུལ་ལོ། །དང་པོ་ནི་གང་དུ་རྫོགས་སེམས་ཉིད་ཨ་ཏི་ཡོ་ག་སྐྱེ་འགག་གཉིས་མེད་ཀྱི་ངང་དུ་རྫོགས། གང་རྫོགས་ཨ་ནུ་མན་ཆད་འཁོར་འདས་ལམ་པས་བསྡུས་པ་ཐམས་ཅད་རྫོགས། ཚུལ་ཇི་ལྟར་རྫོགས་ན། དེ་རྣམ་པ་ལྔའི་སྒོ་ནས་རྫོགས་ཏེ་ཞེས་པས་བགྲང་ངོ་། །དེ་ཡང་ཆིངས་བཞིར་འདུས་སོ། །དེ་ཉིད་ཀྱི་ཚུལ་གྱིས་རྫོགས་ནི་རང་སེམས་སྐྱེ་འགག་གཉིས་མེད་དུ་རྟོགས་པ་དེ་ཉིད་ཆོས་སྐུ་ཡིན་པས་ཆོས་སྐུ་དེ་ཉིད་ཀྱི་ཚུལ་གྱིས་རྫོགས། འོ་ན་དེ་རིགས་པའི་ཤེས་པ་ལ་གྲུབ་པ་མ་ཡིན་དབང་པོའི་མངོན་སུམ་གྱི་སྤྱོད་ཡུལ་དུ་སྣང་བ་མ་ཡིན་ནོ་ཞེས་ན་དང་པོར་ཡང་དེ་ཉིད་ལས་བྱང་བའི་ཚུལ་གྱིས་རྫོགས། ཐ་མ་ཡང་དེ་ཉིད་ཀྱི་ངང་དུ་ཞ་ཞིང་བརླག་པའི་ཚུལ་གྱིས་རྫོགས་པའི་གསུམ་པ་ལས་དང་མཚན་མའི་སྒོ་ནས་རྫོགས་པ་ནི། དགེ་བའི་ལས་དང་སྡིག་པའི་ལས་སེམས་ཀྱི་སེམས་ཉིད་དུ་གཅིག་ཅིང་རྫོགས་པའོ། །རྟོགས་ཤིང་བཞག་པའི་སྒོ་ནས་རྫོགས་ཤིང་། ལྟ་བ་ཨ་ཏི་ཡོ་ག་སྐྱེ་འགག་གཉིས་མེད་དུ་རྟོགས་ཤིང་། བསྒོམ་པ་དེའི་ངང་ལ་མ་ཡེངས་པར་གཞག་པས། དེ་ལྟར་རྟོགས་གོམས་ཀྱི་ངང་དུ་ཐམས་ཅད་མཉམ་པར་རྫོགས་སོ། །ཆེ་བའི་དཔགས་ལུགས་ནི། གང་ཆེ་ན་སེམས་ཉིད་ཨ་ཏི་ཡོ་ག་སྐྱེ་འགག་གཉིས་མེད་ཆེ། གང་ལ་ཆེ་ན་ཨ་ནུ་མན་ཆད་ཕྱོགས་འཛིན་ཅན་ལས་དཔགས་ཏེ་ཆེ། ཚུལ་ལམ་ཐབས་དུའི་སྒོ་ནས་ཆེ་ན། དེ་རྣམ་པ་བཅུའི་སྒོ་ནས་ཆེ་སྟེ་བགྲང་། ཟིལ་གནོན་ཆེ་བ་ལྔ་བའི་སྒོ་ནས་ཆེ་བ་ནི། དང་པོ་མངོན་པར་རྫོགས་པར་སངས་རྒྱས་པའི་ཆེ་བ་དང་ཞེས་པ། རང་གི་སེམས་རྟོགས་པའི་དེ་བཞིན་ཉིད་དུ་ཕྱི་ནང་གི་ཆོས་ཐམས་ཅད་སེམས་ལས་རིས་སུ་ཆད་པ་རྡུལ་ཙམ་ཡང་མེད། དེ་ཡང་སྐྱེ་འགག་གཉིས་མེད་ཆོས་སྐུར་ཡེ་ནས་མངོན་སུམ་དང་ངོ་མཐོན་དུ་སངས་རྒྱས་པས་ཆེ་བའོ། །དེས་གང་ཟིལ་གྱིས་མནན་མ་རྟོགས་སོ་སོ་སྐྱེ་བོ་དང་། ལོག་རྟོག་མུ་སྟེགས་ཟིལ་གྱིས་མནན་ཏེ་ཆེ་བ་དང་ལྡན་པར་བཞུགས། གང་ལས་དཔགས་ཏེ་ཆེ་བ་དང་ལྡན་པར་བཞུགས་ན་མ་རྟོགས་ལོག་རྟོགས་ལས་དང་གལ་ཆེ་བ་དང་ལྡན་པར་བཞུགས་སོ། །འོ་ན་ཐམས་ཅད་མངོན་སུམ་དང་ངོ་མཐོན་དུ་སངས་རྒྱས་ན། འཁོར་བ་རྒྱུན་ཆད་ནས་ཆད་པར་འགྱུར་རམ་ཞེ་ན། འདི་དག་ཐམས་ཅད་མེད་དོ་མི་ཟེར་བས་མ་ཆད་དོ། །བདག་ཉིད་ཆེན་པོར། སངས་རྒྱས་པའི་ཆེ་བ་དང་། ཞེས་པས། རང་སེམས་སྐྱེ་འགག་གཉིས་མེད་དུ་རྟོགས་པ་དེ་ཀ་ཆོས་སྐུ་བདག་ཉིད་ཆེན་པོའི་ངོ་བོར་སངས་རྒྱས་པའོ། །གང་མནན་ན་ཆད་ལྟ། གང་ལས་ན་ཆད་ལྟ་ལས་སོ། །འོ་ན་ཐམས་ཅད་ཆོས་སྐུའི་བདག་ཉིད་དུ་འདུག་པས་རྟག་པར་འགྱུར་རོ་ཞེ་ན། དེ་མ་ཡིན་ཏེ། ཆོས་ཀྱི་དབྱིངས་སུ་སངས་རྒྱས་པའི་ཆེ་བ་དང་ཞེས་པས་སངས་རྒྱས་ཙམ་རང་དུ་ཡང་བློའི་ཡུལ་དུ་བྱར་མེད་དེ། རིག་པ་མུ་མཐའ་དང་བྲལ་བའི་ཆོས་ཀྱི་དབྱིངས་སུ་སངས་རྒྱས་པའི་ཆེ་བའོ། །གང་ཟིལ་གྱིས་མནན་ན་རྟག་ལྟ། གང་ལས་དཔགས་ན་རྟག་ལྟ་ལས་སོ། །དེ་ཡིན་པར་སངས་རྒྱས་པའི་ཆེ་བ་དང་ཞེས་པ་ད་རུང་ཐེ་ཚོམ་ཟ་ན་ནན་ཏན་གྱི་ཆོས་ཡིན་པས། ཆོས་ཐམས་ཅད་མངོན་སུམ་དང་ངོ་མཐུན་དུ་སངས་རྒྱས་པ་ཐེ་ཚོམ་མེད་པར་ཡིན། ཆོས་སྐུ་བདག་ཉིད་ཆེན་པོར་སངས་རྒྱས་པ་ཐེ་ཚོམ་མེད་པར་ཡིན། དེ་ཡང་བློ་ཡུལ་དུ་བྱར་མེད་པ་ཆོས་ཀྱི་དབྱིངས་ཐེ་ཚོམ་མེད་པ་ཡིན་པའོ། །གང་ཟིལ་གྱིས་མནན་ན་ཐེ་ཚོམ། གང་ལས་དཔགས་ན་ཐེ་ཚོམ་ལས་སོ། །འོ་ན་སངས་རྒྱས་དེ་དངོས་པོ་དང་མཚན་ཅན་དུ་འགྱུར་ཞེ་ན། ཐམས་ཅད་ནས་ཐམས་ཅད་དུ་སངས་རྒྱས་མེད་པའི་ཆེ་བའོ། །ཞེས་པས་སངས་རྒྱས་མ་རྒྱས་གཉིས་ཀྱི་ཐ་སྙད་ལས་ཀྱང་འདས་ཏེ། ཡེ་གདོད་མ་ནས་ཆེ་བ་བཞིའི་ངོ་བོར་སངས་རྒྱས་པ་ལས་མ་གཏོགས་པ། གཞན་ནས་འོང་བ་མེད་པས་ཆེ་བའོ། །གང་ཟིལ་གྱིས་མནན་ན་ཨ་ནུ་མན་ཆད་ཟིལ་གྱིས་མནན་ཏེ་ཆེ་བ་དང་ལྡན་པར་བཞུགས། གང་ལས་དཔགས་ན་ཨ་ནུ་མན་ཆད་ལས་དཔགས་ཏེ་ཆེ་བ་དང་ལྡན་པར་བཞུགས་སོ། །ཡེ་ནས་ཡིན་པ་གསུམ་གྱི་ཆེ་བ་ནི། འོ་ན་ཆོས་ཐམས་ཅད་དང་ཆེ་བའི་ངོ་བོར་ཡེ་ནས་སངས་རྒྱས་ན། དེ་རང་ཡེ་ནས་གྲུབ་བམ་ཞེ་ན། སྣང་བ་འདི་དག་ཀུན་ཏུ་བཟང་པོ་ཡེ་ནས་ཡིན་པ་དང་ཞེས་པས། བཟང་ངན་བླང་དོར་མེད་པར་ཀུན་ཏུ་བཟང་པོ་ཆེ་བ་ལྔའི་ཡེ་ནས་མ་འགགས་པ་ཡིན་པ་དང་། དེ་ཀུན་ཏུ་བཟང་མོ་ཡེ་ནས་ཡིན་པ་དང་ཞེས་པས། དེ་ཉིད་ཀྱང་མ་སྐྱེས་ཏེ་ངོ་བོ་ངོས་བཟུང་དང་བྲལ་བ་ཡེ་ནས་ཡིན་པ་དང་། དེ་གཉིས་སུ་མེད་པ་ཡེ་ནས་ཡིན་པའོ་ཞེས་པས། དེ་ཡང་གཉིས་སུ་མེད་དེ་ཀུན་ཏུ་བཟང་པོ་ཆེ་བ་ལྔའི་ངོ་བོར་མ་འགགས་པར་ཡེ་ནས་སྣང་བ། ཀུན་ཏུ་བཟང་མོ་ངོས་གཟུང་དང་བྲལ་བ་གཉིས་དུས་ལ་སྔ་ཕྱི་མེད། ངོ་བོ་ལ་བཟང་ངན་མེད། འདུག་ས་ལ་ཐ་དད་མེད། དེ་གཉིས་སུ་མེད་པའི་དོན་ཡེ་ནས་ཡིན་པའོ། །དེ་ཡང་ཚིག་དེའི་སྒོ་ནས་ངེས་ཤེས་སྐྱེ་དགོས་སོ། །མཚུངས་པ་དཔེ་བརྒྱད་ཀྱི་ཆེ་བ་ནི་འོ་ན་སེམས་ཉིད་ཨ་ཏི་ཡོ་ག་ཆེ་བའི་ཡོན་ཏན་དང་བཅས་པ་དེ། སྐྱེ་བོའི་ལྐོག་ཏུ་གྱུར་པས་མི་རྟོགས་སོ་ཞེ་ན། ཆོས་རྣམས་དཔེ་ཡིས་མཚོན་ཏེ་བསྟན། །ཆོས་རྣམས་དཔེ་ཡིས་མ་མཚོན་ན། །རྨོངས་པས་གོ་བར་མི་འགྱུར་ཏེ། །ཞེས་པས། མཚུངས་དཔེ་བརྒྱད་ཀྱིས་མཚོན་ཏེ་བསྟན་པ་ནི། ཆོས་ཉིད་བྱང་ཆུབ་སེམས་དེ་རྒྱ་མཚོ་དང་མཚུངས་པས་ཆེ་ཞེས་པས། རྒྱ་མཚོ་ལ་ཆོས་བཞི། གཏིང་ཟབ་འདི་ཙམ་ཡོད་ཀྱི་ཚད་མ་ཟིན་པ་དང་། ཁ་འདོམ་བདུན་ཡན་ཆད་ལས་གཏིང་མི་གཡོ་བ་དང་། རྒྱ་མཚོའི་རླངས་དཔག་བསམ་གྱི་ཤིང་ལ་ཕོག་དེ་ལས་ཆུ་བྲན་ཐམས་ཅད་འབྱུང་བ་དང་། དེ་ཐམས་ཅད་རྒྱ་མཚོ་ཉིད་དུ་རོ་གཅིག་པའོ། །འབྱུང་བ་ཆེན་པོ་བཞི་དང་མཚུངས་པས་ཆེ་ཞེས་པ། དེ་ལ་བཞི་ལས། སས་འདེགས་ཤིང་ཐམས་ཅད་ཀྱི་རྟེན་བྱེད་པ་དང་། ཆུས་དྲི་མ་ཐམས་ཅད་འཁྲུ་བ་དང་། མེས་རྩིར་སྦུར་ལ་སོགས་བསྲེགས་པར་བྱེད་པ་དང་། རླུང་གིས་ཐམས་ཅད་འཐོར་བར་བྱེད་པའོ། །དེ་རྒྱལ་པོ་དང་མཚུངས་པས་ཆེ་ཞེས་པས། དེ་ལ་ཆོས་བཞི་ལས། རྒྱལ་པོ་བྲམ་ཟེ་ལ་སོགས་གཞན་པས་རིགས་བཙུན་པ་དང་། དེ་འབངས་རྣམས་ཀྱི་བཀུར་གནས་ཡིན་པ་དང་། དེ་འབངས་རྣམས་ཀྱི་རེ་གནས་ཡིན་པས་དང་། དེ་བཏང་སྙོམས་སུ་འདུག་ལ་བྱ་བ་ཐམས་ཅད་འགྲུབ་པའོ། །དེ་ནམ་མཁའ་དང་མཚུངས་པས་ཆེ་ཞེས་པས། དེ་ལ་ཆོས་བཞི་ལས། འདུས་མ་བྱས་ཀྱི་ནམ་མཁའ། དགོས་པ་མེད་པར་ཀུན་ལ་བྱས་པ་དང་། དེ་ལ་ཁ་གཏིང་མེད་པ་དང་། འདི་ཤོང་འདི་མི་ཤོང་གི་ཡངས་དོག་མེད་པར་དང་། དེ་ལས་སྣོད་བཅུད་ཐམས་ཅད་འབྱུང་བའོ། །དེ་ཉི་མ་དང་མཚུངས་པས་ཆེ་ཞེས་པས། དེ་ལ་ཆོས་བཞི་ལས། མུན་པའི་སྐྱོན་གྱིས་མ་གོས་པ་དང་། འདམ་རྫབ་ལ་སོགས་སྐེམས་པ་དང་། དེ་སྐམས་སོ། །བའི་འདུ་ཤེས་མེད་པ་དང་། ཉི་མ་ཤར་བ་དང་རང་བཞིན་ཀུན་ལ་བག་དྲོ་བའོ། །བདུད་རྩི་དང་མཚུངས་པས་ཆེ་ཞེས་པས། དེ་ལ་ཆོས་བཞི་ལས། དེ་དུས་གསུམ་རྒྱལ་བའི་མཆོད་པའི་རྫས་ཡིན་པ་དང་། རོ་ཕྱོགས་སུ་མ་ལྷུང་སྟེ་ཞིམ་པ་དང་། སྨན་ཐམས་ཅད་ཀྱི་རྒྱལ་པོ་ཡིན་པ་དང་། དུག་གི་གཉེན་པོ་ཡིན་པའོ། །དེ་ཡི་བཞིན་གྱི་ནོར་བུ་རིན་པོ་ཆེ་དང་མཚུངས་པས་ཆེ་ཞེས་པས། དེ་ལ་ཆོས་བཞི་ལས། དེ་ཕྱིའི་རྒྱ་མཚོའི་འདམ་ན་གནས་པ་དང་། འདམ་ནས་བཏོན་ནས་ཕྱི་བས་ཕྱིས་བསྐུ་བསྐུས་པ་དང་། དེ་རྒྱལ་མཚན་གྱི་རྩེ་མོ་ལ་བཏགས་པ་དང་། མཆོད་པ་ཕུལ་ཞིང་གསོལ་བ་བཏབ་པས་དགོས་འདོད་འབྱུང་བའོ། །རིན་པོ་ཆེ་གསེར་གླིང་དང་མཚུངས་པས་ཆེའོ། །ཞེས་པས། དེ་ལ་ཆོས་བཞི་ལས། དེ་རྒྱལ་མཚོའི་གླིང་ལ་ཡོད་པས་ཕལ་གྱིས་ཕྱིན་པར་དཀའ་བ་དང་། ས་རྡོ་ལ་སོགས་པ་བཟང་ངན་གྱི་སེལ་མེད་པ་དང་། གཞན་པས་རིན་ཐང་ཆེ་བ་དང་། དཔེ་དབུལ་བ་སེལ་བའི་དགོས་པ་ཡོད་པའོ། །དེ་ལྟར་རྒྱ་མཚོ་ལ་སོགས་པ་བརྒྱད་པོས་དཔེ་བྱས། སེམས་ཉིད་ཀྱི་དོན་བྱས་ལ་གང་ཟག་གི་བརྒྱུད་ལ་ངེས་ཤེས་སྐྱེ་དགོས་པ་ཡིན་ནོ། །དེ་ཡང་རྒྱས་པར་བྱེད་ན། མཚུངས་པ་དཔེ་བརྒྱད་པོ་རེ་རེས་ཉི་མ་རེ་རེ་ལྟ་བ་ངོ་སྤྲད་ཀྱི་ངེས་ཤེས་བསྐྱེད། བསྒོམ་པ་སེམས་ཀྱི་འཇོག་སོ་བརྒྱད་ཀྱིས་མཉམ་པ་ལ་བཞག་སྟེ། དེ་གཉིས་སྤེལ་གྱི་ལམ་དུ་བླང་ངོ་། །མེད་པ་བཅུ་གཉིས་ཀྱིས་ཆེ་བ་ལ་གཉིས་ཏེ། ཨ་ཏི་རང་པའི་ཆེ་བ་བཞི་དང་། ཐེག་པ་འོག་མ་ལས་དཔགས་པའི་ཆེ་བ་བརྒྱད་དོ། །དང་པོ་ནི་བཟང་ངན་མེད་པས་ཆེ་ཞེས་པས། ཨ་སྐྱེ་མེད་ལ་བཟང་ངན་དུ་མ་སྐྱེས་ཏེ་སྟོང་མཉམ། ཏི་འགག་མེད་བཟང་ངན་མ་འགགས་ཏེ་སྣང་མཉམ། ཡོ་ག་གཉིས་སུ་མེད་པ་ལ་བཟང་ངན་གྱི་སྣང་བ་མ་བཀག་ལ་དེའི་མཐར་མ་རེག་སྟེ་མཚན་མ་རང་སར་གྲོལ་བས་ཆེའོ། །བདག་གཞན་གཉིས་སུ་མེད་པས་ཆེ། ཨ་ཏི་ཡི་གེ་སྐྱེ་འགག་གཉིས་མེད་ལ་བདག་གཞན་སྣང་བ་མ་བཀག་མཚན་མ་རང་སར་གྲོལ་བས་ཆེའོ། །རྒྱལ་སར་གོང་བཞིན་སྦྱར་ཐམས་ཅད་འགྲེ། །བསྒོམ་ཞིང་བཅོས་སུ་མེད་པས་ཆེ་བ་ནི། ཨ་ཏི་ཡོ་ག་ལ་མ་སྤངས་རང་སར་གྲོལ་བས། བློ་ཡུལ་དུ་བྱས་ནས་ཡུལ་ཡུལ་ཅན་དུ་བསྒོམ་ཞིང་སྐྱོན་ངན་པར་བལྟས་ལ་ཆེད་དུ་བཅོས་སུ་མེད་པས་ཆེའོ། །བསྒྲུབ་ཅིང་བྱ་རུ་མེད་པས་ཆེ་བ་ནི། ཨ་སྐྱེ་མེད་ལ་བསྒྲུབ་བྱ་བསྒྲུབ་བྱེད་དུ་མ་སྐྱེས། ཏི་འགག་མེད་ལ་བསྒྲུབ་བྱ་བསྒྲུབ་བྱེད་དུ་མ་འགགས། ཡོ་ག་གཉིས་མེད་ལ་བསྒྲུབ་བྱ་བསྒྲུབ་བྱེད་ཀྱི་སྣང་བ་ལ་མ་བཀག་ལ་དེའི་མཐས་མ་རེག་སྟེ་མཚན་མ་རང་སར་གྲོལ་ཏེ། ལུས་ངག་གི་རྩོལ་བས་འབྲས་བུ་ཆེད་དུ་བསྒྲུབ་ཅིང་། སེམས་ལས་ལོགས་པའི་འབྲས་བུ་ཐོབ་པར་བྱ་རུ་མེད་པས་ཆེའོ། །ཐེག་པ་འོག་མ་ལས་དཔགས་པའི་ཆེ་བ་བརྒྱད་ནི། བཀག་ཅིང་དོར་བ་མེད་པས་ཆེ་ནི། རང་རྒྱལ་ལུགས་འབྱུང་རྟེན་འབྲེལ་བཅུ་གཉིས་བཀག་ཅིང་དོར་དུ་ཡོད་པས་ཆེ་བ་མིན་ལ། ཨ་ཏི་ཨ་སྐྱེ་མེད་ལ་འགེགས་བྱ་འགེགས་བྱེད་དུ་མ་སྐྱེས་ཏེ་སྟོང་མཉམ། ཏི་འགག་མེད་ལ་འགེགས་བྱ་འགེགས་བྱེད་དུ་མ་འགགས་ཏེ་སྣང་མཉམ། ཡོ་ག་རྟེན་འབྲེལ་བཅུ་གཉིས་ཀྱི་སྣང་བ་མ་བཀག་ལ་མཐས་མ་རེག་སྟེ་མཚན་མར་རང་སར་གྲོལ་བས་ཆེའོ། །མན་ཆད་ལ་ཡང་དེ་བཞིན་རྒྱས་པར་སྦྱར་རོ། །སྤང་ཞིང་བླང་པ་མེད་པས་ཆེ་ནི་ཉན་ཐོས་ལ་སྡུག་བསྔལ་ཀུན་འབྱུང་འཁོར་བའི་རྒྱུ་འབྲས་སྤང་བྱ། འགོག་པ་དང་ལམ་མྱ་ངན་ལས་འདས་པའི་རྒྱུ་འབྲས་བླང་བྱར་འདོད་པས་ཆེ་བ་མིན་ལ། ཨ་ཏི་སྤང་བླང་མ་སྐྱེ་འགྲེ། རྒྱུ་དང་འབྲས་བུ་མེད་པས་ཆེ་ནི། བྱང་ཆུབ་སེམས་དཔའ་ནི་རྒྱུ་སེམས་ཅན་ལ་འབྲས་བུ་སངས་རྒྱས་འདོད་པས་ཆེ་བ་མིན་ལ། ཨ་ཏི་ལ་ཨ་སྐྱེ་མེད་རྒྱུ་འབྲས་སུ་མ་སྐྱེས་འགྲེ། འབྲེ་ཏ་ཤའི་དཔེ་ཡང་གསུང་ངོ་། །ཡངས་ཤིང་དོག་པ་མེད་པས་ཆེ་ནི། ཀྲི་ཡ་བ་ལྟ་བ་དག་པ་མཐའ་བཞི་དང་བྲལ་བས་ཡངས་ལ། སྤྱོད་པས་ཁྲུས་དང་གཙང་སྦྲ་བྱེད་པས་དོག་པས་ཆེ་བ་མེན་ལ། ཨ་ཏི་ཨ་སྐྱེས་མེད་ལ་ཡངས་དོག་ཏུ་མ་སྐྱེས་འགྲེ། ཐེག་པ་གོང་འོག་མེད་པས་ཆེ་ནི། ཨུ་པ་ལ་དེ་ལྟ་བ་ཡོ་ག་དང་མཐུན་པས་གོང་། སྤྱོད་པ་ཀྲི་ཡ་ལྟར་སྤྱོད་པས་འོག་ཡོད་པས་ཆེ་བ་མེན་ཏེ། ཨ་ཏི་ཨ་སྐྱེ་མེད་ལ་གོང་འོག་ཏུ་མ་སྐྱེས་འགྲེ། ནོར་ཅིང་འཁྲུལ་པ་མེད་པའི་ཆེ་ནི། ཡོ་ག་ན་རེ་སྐྱེ་བོ་སྣང་བ་རང་རྒྱུད་རིགས་དྲུག་ཏུ་འདོད་པ་འདི་ནོར་ཅིང་འཁྲུལ་ལ། ང་ལ་ནོར་ཞིང་འཁྲུལ་པ་མེད་ཟེར་བས་འཁྲུལ་མ་འཁྲུལ་གཉིས་སུ་འདོད་པས་ཆེ་བ་མེན་ལ། ཨ་ཏི་ཨ་སྐྱེ་མེད་ལ་ནོར་ཞིང་འཁྲུལ་བར་མ་སྐྱེས་འགྲེ། སེམས་ཅན་སངས་རྒྱས་མེད་པས་ཆེ་ནི། མ་ཧཱ་བ་སེམས་ཅན་དང་རྟོག་ཚོགས་ངན་པ། དེ་གནས་བསྒྱུར་བའི་སངས་རྒྱས་སམ་ལྷ་བཟང་བར་འདོད་པས་ཆེ་བ་མེད་ལ། ཨ་ཏི་ཨ་སྐྱེ་མེད་ལ་སངས་རྒྱས་སེམས་ཅན་དུ་མ་སྐྱེས་འགྲེ། རེ་ཞིག་དགོས་པ་མེད་པས་ཆེ་ནི་ཨ་ནུ་སྟེ། དབྱིངས་དང་ཡེ་ཤེས་ཀྱི་སྒོ་ནས་འབྲས་བུ་ཐོབ་ལ་རེ་ཞིག་མ་ཐོབ་ཀྱིས་དོགས་པ་ཡོད་པས་ཆེ་བ་མེན། ཨ་ཏི་ཨ་སྐྱེ་བ་མེད་ལ་རེ་དོགས་སུ་མ་སྐྱེས་ཏེ་སྟོང་མཉམ། ཏི་འགག་མེད་ལ་རེ་དོགས་སུ་མ་འགགས་ཏེ་སྣང་མཉམ། ཡོ་ག་གཉིས་སུ་མེད་པ་ལ་རེ་དོགས་ཀྱི་སྣང་བ་མ་བཀག་ལ་མཐས་མ་རེག་ཏེ་མཚན་མ་རང་སར་གྲོལ་བས་རེ་དོགས་གཉིས་མེད་པས་ཆེའོ། །དེ་ཡང་སྐྱེ་འགག་གཉིས་མེད་ཀྱི་དོན་ཚིག་དུ་མ་ཤོར་བར་ངེས་ཤེས་ལྷངས་པ་སྐྱེ་དགོས་སོ། །མ་གྲུབ་པ་ལ་བཟླ་བ་དྲུག་གི་ཆེ་བ་ནི། མ་ཇོ་ནི་བལྟ་བྱའི་ཡུལ་ཆོས་ཉིད། ལྟ་མཁན་གྱི་ཤེས་པ། ལྟ་བ་རང་གི་དངོས་པོ་གསུམ། ཨ་སྐྱེ་མེད་དུ་སྟོང་མཉམ། །ཏི་འགག་མེད་དུ་སྣང་མཉམ། ཡོ་ག་གཉིས་སུ་མེད་པ་ལ་སྣང་སྟོང་ངོས་མཉམ་གྱི་དབྱེར་མེད་དུ་རྟོགས་པས་ལྟ་བ་ལྟ་རུ་མེད་པར་བཟླ་བ་དང་། ལྟ་བ་རྟོགས་སུ་མེད་པར་ལ་བཟླ་བ་དང་། ལྟ་བ་དམིགས་སུ་མེད་པར་ལ་བཟླ་བའོ་གསུང་། ལྷ་རྗེ་སྐུ་འདས་ཀྱིས་མ་ཇོ་ལ་རང་གྲོལ་འདི་འཐད་དམ་གསུངས་པས་འཐད་གསུང་ནས། རང་བཞིན་སྐྱེ་མེད་ལ་ལྟ་བྱ་ལྟ་བྱེད་མ་གྲུབ། རོལ་པས་འགག་མེད་ལ་ལྟ་བྱ་ལྟ་བྱེད་མ་འགགས་ལྟ་བ་ལྟ་རུ་མེད་པར་ལ་བཟླ་བ་དང་། མཚན་ཉིད་ལ་སྣང་སྟོང་དབྱེར་མེད་དེ། ལྟ་བ་རྟོགས་སུ་མེད་པར་ལ་བཟླ་བ་དང་། དེ་བློ་ཡུལ་དུ་མི་གནས་ཏེ་འབྲས་བུའམ་ཆོས་སྐུ་གཞན་ན་མེད་དེ་རང་གྲོལ་བས་ལྟ་བས་བློ་ཡུལ་དུ་དམིགས་སུ་མེད་པར་ལ་བཟླའོ། །ཆོས་ཉིད་བློ་ཡུལ་དུ་བསྒོམ་ཞིང་སྐྱོན་ཆེད་དུ་བཅོས་སུ་མེད་པ་དང་། སྤྱོད་པ་སྤྱད་དུ་མེད་པ་དང་། བསྒྲུབ་པ་བསྒྲུབ་ཏུ་མེད་པ་དང་། འཕྲིན་ལས་བྱར་མེད་པ་དང་། དམ་ཚིག་རིས་ཅན་དུ་བསྲུང་དུ་མེད་པ་ལ་ཡང་གོང་མ་ལྟར་འདྲེས་ཏེ་ཤེས་པར་བྱའོ། །དེ་ལྟར་ལྔ་པོ་ལ་ནི་མདོར་བསྟན་རྒྱས་བཤད་དུ་ཕྱེ་སྟེ་བསྟན་པའོ། །ད་འདི་ལྔ་ནི་དབྱེ་བ་མེད་པར་ཐད་དྲང་དུ་བཤད། གཉེན་པོ་མེད་པས་ཆེ་ཞེས་པས་རང་གི་བྱང་ཆུབ་ཀྱི་སེམས་རང་གསལ་སྟོང་གཉིས་མེད་དུ་རྟོགས་པ་ལས་གཉེན་པོ་གཞན་མེད་པས་ཆེའོ། །འགྲན་ཟླ་མེད་པས་ཆེ་ཞེས་པ་ཐམས་ཅད་དུ་སེམས་རང་སྣང་བ་ལས་མ་གཏོགས་པ་ཟློག་པ་ཟད་དེ་འགྲན་ཟླ་གཞན་མེད་པས་ཆེའོ། །སྣ་ཚོགས་མེད་པས་ཆེ་ཞེས་པ། ཡུལ་སྣ་ཚོགས་སུ་སྣང་ཡང་སེམས་ལོགས་སུ་གྲུབ་པ་མེད་པས་ཆེའོ། །སྣ་ཚོགས་མེད་ཀྱང་སྤྲུལ་པ་བསམ་གྱིས་མི་ཁྱབ་པས་ཆེ་ཞེས་པས། སེམས་ལས་ལོག་པའི་སྣ་ཚོགས་མེད་ཀྱང་སེམས་ཉིད་ཀྱིས་སྤྲུལ་པ་འདི་འཆར་འདི་མི་འཆར་མེད་དེ་བསམ་གྱིས་མི་ཁྱབ་པས་ཆེའོ། །རྒྱུ་རྐྱེན་ལ་རག་མ་ལས་པས་ཆེ་ཞེས་པས་སེམས་ཉིད་རང་བྱུང་གི་ཡེ་ཤེས་རྒྱུ་རྐྱེན་རག་མ་ལུས་པས་ཆེ་བའོ། །གསུང་སྒྲོས་ནི་རྒྱུའི་དུས་ན་ཡང་རང་བྱུང་གི་ཡེ་ཤེས། འབྲས་བུའམ་རྐྱེན་གྱི་དུས་ན་ཡང་རང་འབྱུང་གི་ཡེ་ཤེས་ཡིན་ཏེ་སྨན་འབྲེ་ཏ་ཤ་ལྟ་བུའོ། །དེ་ཡན་ཆད་ནི་རྟོགས་པར་བྱ་བའི་ལྟ་བ་སྟེ། སེམས་ཉིད་རང་འབྱུང་ཡེ་ཤེས་སྐྱེ་འགག་གཉིས་མེད་དུ་རྟོགས་པར་བྱའོ། །ནམ་མཁའ་ལ་མཐའ་མེད་པ་ཁྱུང་གིས་ཤེས། རྒྱ་མཚོ་ལ་གཏིང་མེད་པ་གསེར་གྱི་ཉ་མོས་ཤེས། ཆོས་ཉིད་རིས་མེད་ཇི་ལྟ་བ་བསྒོམས་ན་ཤེས་པས་བསྒོམ་པ་སྟོན་ཏེ། དེ་ལ་གཉིས་ལས། རུ་ཆེན་པོ་བློ་ཆེ་བའི་འཇོག་པོ་བརྒྱད་དང་། བློ་ཆུང་པའི་འཇོག་པོ་བརྒྱད་དུ་གསུངས་སོ། །རིན་པོ་ཆེ་ནི་བསྒོམ་པར་བྱ་བ་སེམས་ཀྱི་འཇོག་སོ་བརྒྱད་དང་། བསྒོམ་པ་སྐྱེ་བའི་རིམ་པ་སེམས་ཀྱི་དྲོད་ཚད་བསྟན་པ་གཉིས་སུ་གསུང་། དེ་ལ་བསྒོམ་པར་བྱས་པ་སེམས་ཀྱི་འཇོག་སོ་བརྒྱད་ནི་བགྲང་། བརྡལ་བ་ནམ་མཁའ་ལྟ་བུར་གཞག་པ་ཞེས་པས། རིག་པ་ཕྱི་ནང་མེད་པར་བརྡལ་པ། དཔེར་ན་བུམ་པའི་ནང་གི་ནམ་མཁའ་དང་། ཕྱིའི་ནམ་མཁའ་གཉིས་བུམ་པ་ཆག་པས་འདྲེས་ཤིང་ཐ་དད་མེད་པ་ལྟར། སངས་རྒྱས་ཀྱི་དགོངས་པ་དང་སེམས་ཅན་གྱི་སེམས་འཕྲུལ་ཤེས་ལ་ཐ་དད་ཀྱང་གཉིས་མེད་དུ་ཤེས་པའི་ངང་ལ་གཞག་གོ། །བཏང་བ་སྤྲེའུ་ལྟ་བུར་གཞག་པ་ཞེས་པ་རིག་པ་བཙོན་དུ་མི་གཟུང་བར་གཏང་བ། དཔེར་ན་སྤྲེའུ་ཁྱིམ་དུ་བཅུག་ན་བུག་པ་ན་ཕར་འབྲོས་པ་ལ་ཆེད་དུ་བཏང་ན་རང་ལོག་ཏུ་འོང་བ་བཞིན་དུ། ལྷུག་པར་བཞག་ན་རང་ལོག་ཏུ་འོང་བས་ལྷུག་པར་གཞག་གོ། །བརྩོལ་མེད་པར་ཟིན་པ་ཕྱི་ལྟ་བུར་གཞག་པ་ཞེས་པ། བརྩོལ་བས་བརྩལ་བ་མེད་པར་ཟིན་པ། དཔེར་ན་ཕྱེ་ལ་བརྔོ་རྟག་ལ་སོགས་པའི་བརྩོལ་བ་མི་དགོས་པ་བཞིན་དུ། སེམས་ཉིད་ཨ་ཏི་རྟོག་པ་ལས་སོགས་ན་བརྩོལ་བས་མི་བསྒྲུབ་པར་ལྷོད་དེ་གཞག་གོ། །མ་རྙོགས་པར་དྭངས་པ་ཆུ་ལྟ་བུར་གཞག་པ་ཞེས་པས་ཉོན་མོངས་རྣམ་རྟོག་གིས་མ་རྙོགས་པ། དཔེར་ན་ཆུ་མ་རྙོགས་ན་རང་དངས་པ་བཞིན་དུ། སེམས་ལ་རྣམ་རྟོག་བྱུང་ན་སྒོ་གསུམ་གློད་ལ་རང་དྭངས་སུ་གཞག་གོ། །དྲན་པ་ལྟ་བུར་གཞག་པ་ཞེས་པ། ལྟ་བ་དྲན་པས་ཟིན་པ། དཔེར་སྔར་རྗེད་པ་ཕྱིས་དྲན་པ་བཞིན་དུ། བསྒོམ་བརྗེད་པ་ལྟ་བས་བསོས་བཏབ་ལ་མ་ཡེངས་པའི་རྩིས་བཟུང་ལ་བཞག་གོ། །བོར་བ་ལྟ་བུར་གཞག་པ་ཞེས་པ། རྟོགས་པའི་དོན་ལ་འཛིན་པ་བོར་བ། དཔེར་ན་མཆིལ་མ་ཐང་ལ་བོར་བ་ཕྱིས་དགོས་པ་མེད་པས་ལེན་པའི་བློ་མི་སྐྱེ་བ་བཞིན་དུ། སེམས་ཉིད་ཨ་ཏིར་རྟོགས་པའི་དོན་ལ་འཛིན་རྟོག་བོར་བ་གཞག་གོ། །རྟོགས་ཤིང་ཡིད་ཆེས་པ་ལྟ་བུར་གཞག་པ་ཞེས་པ། གནས་ལུགས་རྟོགས་ཤིང་ཡིད་ཆེས་པ། དཔེར་ན་ཡིན་པ་ལ་ཡིན་པར་ངོ་ཤེས་ཤིང་ཡིད་ཆེས་ཐེ་ཚོམ་མི་ཟ་བ་བཞིན་དུ། སེམས་ཉིད་ཨ་ཏི་རྟོགས་ཤིང་ཡིད་ཆེས་ཐེ་ཚོམ་མི་ཟ་བའི་ངང་ལ་མ་བཅོས་པར་གཞག་པའོ། །མཐའི་ཞེན་པ་བཅྭ་བརྒྱད་བཅད་པ་ལྟ་བུར་གཞག་ཅེས་པ་ནི་བཅྭ་བརྒྱད་དེ། དེ་ལ་སྤྱི་སྡོམ་ནི་ལྟ་བ་ཨ་ཏི་ཡོ་གའི་ངོས་ནས། ཨ་སྐྱེ་མེད་ལ་མཐའི་ཞེན་པ་བཅྭ་བརྒྱད་མ་སྐྱེས་ཤིང་ངོ་བཟུང་བ་དང་བྲལ། ཏི་འགག་མེད་དེ་ལ་མཐའི་ཞེན་པ་བཅྭ་བརྒྱད་དུ་མ་འགགས་ཏི་རང་སྣང་། ཡོ་ག་གཉིས་མེད་ལ་མཐའི་ཞེན་པ་བཅྭ་བརྒྱད་ཀྱི་སྣང་བ་མ་འགག་ལ་དེའི་རེག་སྟེ་མཚན་མ་རང་སར་གྲོལ་བས། བཙལ་ན་སྟོར། ཅེས་པ་དེ་ལས་ལོགས་པ་བཙལ་དུ་མེད་པ་ལ་བཙལ་ན། བཙལ་དུ་མེད་པའི་དོན་སྟོར་བས་མཐའ་ཡིན་ལ། དེ་སྤངས་པ་ནི་བཙལ་མེད་ལ་བཙལ་མེད་རང་དུ་ངོ་ཤེས་པར་བྱས་ལ་གཞག་གོ། །བཀག་ན་ཉམས། ཞེས་པ་སེམས་ཉིད་ཨ་ཏི་ལ་རྟོག་པ་བཀག་ནས་བསྒོམས་ན་བཀག་ཏུ་མེད་པའི་དོན་ལས་ཉམས་པས་མཐའ་ཡིན་ལ། དེ་སྤང་པ་ནི་དགག་ཏུ་མེད་པ་ལ་མེད་པ་རང་དུ་ཤེས་པར་བྱས་ལ་གཞག་གོ། །བཅོས་ན་སླད། ཅེས་པ་སེམས་ཉིད་ཨ་ཏིའི་གནས་ལུགས་བཅོས་སུ་མེད་པ་ལ་བཅོས་ན། བཅོས་སུ་མེད་པའི་དོན་སླར་ལ་བསླད་པས་མཐའ་ཡིན། དེ་སྤང་པ་བཅོས་མེད་རང་དུ་གཞག་གོ། །བསྒོམས་ན་བཅས་ཞེས་པ་སེམས་ཉིད་ཨ་ཏི་བློ་ཡུལ་དུ་བསྒོམ་དུ་མེད་པ་ལ། ཡུལ་དུ་བྱས་ནས་བསྒོམས་ན་བཅལ་བས་མཐའ་ཡིན། སྤང་བ་འགྲེ། བསྒོམ་མེད་ལ་བསྒོམ་མེད་དུ་ཤེས་པར་བྱས་ལ་གཞག་གོ། །བཙལ་ན་བྲལ་ཅེས་པ་ཆོས་ཉིད་རྩོལ་བ་དང་བྲལ་བ་ལ། ལུས་ངག་གི་རྩོལ་བས་བཙལ་ན་རྩོལ་མེད་ཀྱི་དོན་དང་བྲལ་བས་མཐའ། རྩོལ་མེད་ལ་རྩོལ་མེད་རང་དུ་བཞག་གོ། །བསྒུགས་འབྲེལ་ཅེས་པ། བསྒོ་འོང་དུ་རེ་ནས་བསྒུགས་ན་སླར་ལ་འབྲོས་པས་མཐར། རེ་དོགས་མེད་པར་གློད་ལ་གཞག་གོ། །བལྟས་ན་ཡལ་ཅེས་པ་སེམས་ཉིད་ཨ་ཏི་བློ་ཡུལ་བྱས་ནས་བལྟས་ན་བལྟར་མེད་ཀྱི་དོན་ཡ་བས་མཐའ། ཡུལ་མེད་དུ་གློད་ལ་གཞག་གོ། །དྲན་ན་སངས་ཞེས་པ་བསྒོམ་བྱུང་མནོ་ནས་དྲན་ན་ཆོས་ཉིད་དྲན་མེད་ཀྱི་དོན་སངས་པས་མཐའ་དྲན་མེད་རང་བྱུང་ཤེས་པར་བྱས་ལ་བཞག་གོ། །མྱོང་ན་ཤོར་ཅེས་པ་ཆོས་ཉིད་ཡུལ་དུ་ཉམས་སུ་མྱོང་དུ་མེད་པ་ལ་ཉམས་སུ་མྱོང་ན། མྱོང་མེད་ཀྱི་དོན་ཤོར་བས་མཐའ། མྱོང་དུ་མེད་པ་ལ་མེད་པ་རང་དུ་ཤེས་པར་བྱས་ལ་གཞག་གོ། །གཟོབ་ན་འདྲེས་ཞེས་པ་ལེགས་ཉེས་ཀྱི་སྤྱོད་པ་གཙོར་བྱས་ནས་གཟོབ་ན་རྟོག་པ་འདྲེས་པས་མཐའ་ཡིན། ལེགས་ཉེས་ཀྱི་འཛིན་རྟོག་མེད་པར་གཞག་གོ། །བགྲོད་ན་ཁྱམས་ཞེས་པ་ཨ་ཏི་བགྲོད་དུ་མེད་པ་ལ་གོང་འོག་ཏུ་བགྲོད་ནས་སླར་ལ་འཁོར་བར་འཁྱམས་པས་མཐའ་ཡིན། སེམས་ཉིད་བགྲོད་མེད་རང་དུ་ཤེས་པར་བྱས་ལ་གཞག་གོ། །ངའོ་སྙམ་ན་ལྷུང་ཞེས་པ་སེམས་ཉིད་ང་བདག་མེད་པར་ལ་ངའོ་སྙམ་ན་སླར་འཁོར་བ་ལྷུང་པས་མཐའ་ཡིན། ང་མེད་བདག་མེད་དུ་བཞག་གོ། །རྟོགས་སོ་སྙམ་ན་སྟོང་ཞེས་པ་ངས་སེམས་ཉིད་རྟོགས་སོ་སྙམ་ན་རྟོགས་སུ་མེད་པའི་དོན་དང་བྲལ་བས་མཐའ་ཡིན། བློ་ཡུལ་དུ་རྟོགས་སུ་མེད་པར་གཞག་གོ། །སེམས་ལ་རྣམ་རྟོག་བསླང་ན་ཕུང་ཞེས་པ་སྙུག་མའི་སེམས་ཆོས་ཉིད་ལ་མཚན་མའི་རྣམ་རྟོག་འཕྲ་རགས་རང་རྒྱུད་ལ་བསླང་ན་སླར་ལ་ཕུང་པས་མཐའོ། །མཚན་མའི་རྟོག་པས་མ་བསླང་བར་གཞག་གོ། །གཏད་འཛིན་བྱེད་ན་གནད་ཅིང་བརླག་ཅེས་པ་ཏིང་ངེ་འཛིན་ལ་གཏད་འཛིན་བྱེད་ན་དམིགས་གཏད་མེད་པའི་ཏིང་ངེ་བརླག་པས་མཐའ། དམིགས་གཏད་མེད་པར་གཞག་གོ། །བྱུང་ཚོར་གྱི་རྗེས་སུ་འབྲེངས་ན་འཁོར་ཅེས་པ་རྣམ་པར་རྟོག་པ་བྱུང་ཡང་བྱུང་ཚོར་ཡང་བ་ལ་དེའི་རྗེས་སུ་རིགས་པ་འབྲངས་ནས་ཁམས་གསུམ་དུ་འཁོར་བས་མཐའ། བྱུང་ཚོར་གྱི་རྗེས་སུ་མ་འབྲེངས་པར་གཞག་གོ། །བྱིང་རྨུགས་ཀྱི་དབང་དུ་སོང་ནས་འཐིབས་ཞེས་པ་བྱིང་པ་ཆུང་འཇམ་དུ་ལག་པ་བཅུག་པ་ལྟ་བུ་དང་། རྨུགས་པ་དོན་མི་གསལ་བ་གཉིས་ཀྱི་དབང་དུ་བསྒོམ་པ་སོང་ན་འཐིབས་པས་མཐའ། ཤེས་རབ་འཕང་སྟོད་ལ་སང་ངེ་གཞག་གོ། །སྤང་བླང་བྱེད་ན་འཛོལ་ལོ་ཞེས་པ་སེམས་ཉིད་ཨ་ཏི་ཡོ་ག་ལ་ཨ་སྐྱེ་མེད་ལ་སྐྱོན་ཡོན་མ་སྐྱེས། ཏི་ལ་མ་འགགས་ཡོ་ག་དེའི་སྣང་བ་མ་བཀག་ལ་མཐས་མ་རེག་མཚན་མ་རང་སར་གྲོལ་བ་ལ་སྐྱོན་སྤངས་ཡོན་ཏན་བླངས་ན། ཨ་ཏི་གཉིས་མེད་དང་འཛོལ་བས་མཐའ་ཡིན་ལ། ཨ་ཏི་དེ་སྤངས་པ་ནི་ཨ་ཏི་སྤང་བླང་མེད་པའི་ངང་ལ་ལྷོད་ཀྱིས་གློད་ལ་གཞག་གོ། །གཞག་ཟེར་ནས་གཞག་པ་གཞན་མེད་པ་བཅྭ་བརྒྱད་བཅད་དེ་མཐའ་མ་སྤངས་རང་གྲོལ་དེའི་ངང་ལ་ལུས་ས་ལ་བོར་ཐབས། ངག་སྨྲ་བརྗོད་དང་བྲལ་ཐབས་སེམས་ནམ་མཁའ་ལ་ཡས་ཐབས་སུ་གློད་ལ་གཞག་གོ། །ད་ནི་སྒོམས་པ་སྐྱེ་བའི་རིམ་པ་སེམས་ཀྱི་དྲོད་ཚད་བསྟན་པ་ལ་བརྒྱད་དེ་བགྲང་། དང་པོ་བསྒོམ་པ་དང་འཕྲོད་པ་ལ་ནི་མན་ངག་གཞག་ལ། བསྒོམ་པ་དང་མི་འཕྲོད་པ་ལ་ནི་མི་བཞག་པའི་ཕྱིར། མན་ངག་བཞག་པའི་གནས་གང་ཟག་གི་རིགས་རྣམ་པར་དབྱེ་བའི་མན་ངག་ནི། དེ་ལ་བཞི་རུ་བཤད་ཀྱང་གཉིས་སུ་བསྡུའོ། །སྤྱི་རིགས་དང་། བྱེ་བྲག་གི་རིགས་སོ། །དང་པོ་ནི་སྤྱིའི་རིགས་དང་ཞེས་པས་མདོར་བསྟན། རྒྱས་པར་བཤད་པ་ཆོས་བཅུ་བཞི་དང་ལྡན་དགོས་ཏེ། དད་ལྡན་གཡོ་སྒྱུ་ཆུང་པ་དང་ཞེས་པས་དད་པ་ནི་དཀར་པོའི་ཆོས་ཐམས་ཅད་བསྐྱེད་པར་བྱེད་པའི་ས་བོན་ཡིན་པས། བླ་མ་དང་གདམ་ངག་ལ་མོས་པ་དུངས་པའི་དད་པ་དང་། མོས་ཀྱིས་མི་མདོ་སྟེ་རེ་ཡིན་སྙམ་པ་དང་བའི་དད་པ་དང་། དང་གིས་མི་མདོ་སྟེ་ཐེ་ཚོམ་མེད་པར་ཡིད་ཆེས་པ་གསུམ་དང་ལྡན་ན་འཕྲོད་པས་གདམ་ངག་གདབ་པ་ལ། མི་ལྡན་ན་མི་གདབ་དང་། འཕྲོད་མི་འཕྲོད་ཀུན་ལ་དེས་འགྲེའོ། །གཡོ་ནི་སེམས་གྱ་གྱུ་བ། སྒྱུ་ནི་འཆབ་པའམ་ཟོལ་སོགས་དེ་ཆུང་བ་དང་གཉིས། སེམས་བཟང་བློ་མི་རྒོད་པ་དང་། །ཞེས་པས་སེམས་རྒྱུད་བཟང་བ་དང་གསུམ། བློ་མི་རྒོད་པ་བློ་སྣ་ཉུང་བ་དང་བཞི། རྒྱུད་འཇམ་ཞེ་སྡང་ཆུང་བ་དང་ཞེས་པས་རྒྱུད་འཇམ་པ་ཞི་ཞིང་དེས་པ་དང་ལྔ། ཞེ་སྡང་ཆུང་བ་དང་དྲུག །དྲང་ལ་སྡུག་བསྔལ་བཟོད་པ་དང་ཞེས་པས་བཀའ་དྲང་རྫུན་མེད་པ་དང་བདུན། ཆོས་ཀྱི་ཕྱིར་སྡུག་བསྔལ་བཟོད་པ་དང་བརྒྱད། བསྟན་ལ་གོ་ཆ་མཐུག་པ་དང་ཞེས་པས་ཡིད་གཞན་གྱིས་མི་འགྱུར་བའི་བློ་བརྟན་པ་དང་དགུ། ཐོས་བསམ་བསྒོམ་པ་བྱེད་པ་ལ་དད་བརྩོན་གྱི་གོ་ཆ་མཐུག་པ་དང་བཅུ། ཤེས་གཡུང་རིགས་དང་ལྡན་པ་དང་ཞེས་བློ་སྣ་ཉུང་སྟེ་ཤེས་པ་གཡུང་བ་དང་བཅུ་གཅིག །རིགས་དང་ལྡན་དེ་ཤེས་རབ་ཆེ་བ་དང་བཅུ་གཉིས། གཞན་གྱིས་མ་རྫབས་སྒོ་བ་ཉན་ཅེས་པས་རྩ་རླུང་དང་སེམས་འཛིན་ལ་སོགས་པ་བྱས་ལ་མཐར་ཕྱིན་པ་མེད་པ་དང་བཅུ་གསུམ། རུ་ཡིས་སྤྱོད་ལམ་ལ་སོགས་པ་གང་བསྒོ་བ་ཉན་པ་དང་བཅུ་བཞི་དང་ལྡན་ན། བཅུ་བཞིར་ལྡན་པའི་གང་ཟག་ནི། རིང་དུ་ཐོགས་ན་བཞི་བཅུས་འགྲུབ། ཅེས་པས་ཐོགས་ཀྱང་ཞག་བཞི་བཅུས་སེམས་གནས་པ་འགྲུབ་པས་མན་ངག་གདབ། འགའ་དང་ལྡན་ཡང་གདབ་ཏུ་རུང་། ཡེ་མི་ལྡན་ན་མན་ངག་མི་འཕྲོད་གདབ་ཏུ་མི་བཏུབ་པས། སྔར་མི་ལྡན་པ་ཡང་གཉེན་པོས་བསྒྱུར་ལ་ལྡན་པར་བྱ་དགོས་སོ། །རྒྱུའི་རིགས་དང་ཞེས་པས་ནད་འདུ་བ་བཞི་ཤས་ཆེ་ཆུང་དང་བསྟུན། དབང་པོ་རིགས་དང་། ཞེས་པས་དབང་པོ་བརྟུལ་དང་སྦྱར། སྤྱོད་ལམ་རིགས་དང་ཞེས་པསཉོན་མོངས་པ་དུག་ལྔ་ཤས་ཆེ་ཆུང་དང་སྦྱར་རོ། །དེ་ལ་རྒྱུའི་རིགས་བད་ཀན། དབང་པོའི་རིགས་རྟུལ་པོ། སྤྱོད་པའི་རིགས་གཏི་མུག །གཉེན་པོ་བསྐྱེད་རིམས་དང་མཚན་བཅས་ལ་འཕྲོད་པའི་རིགས་དང་གཅིག །རྒྱུའི་རིགས་རླུང་། དབང་པོའི་རིགས་རྣོན་པོ། སྤྱོད་པའི་རིགས་འདོད་ཆགས། གཉེན་པོ་མཚན་མ་མེད་དང་རྫོགས་རིམས་ལ་འཕྲོད་པའི་རིགས་དང་གཉིས། རྒྱལ་རིགས་མཁྲིས་པ། དབང་པོའི་རིགས་འབྲིང་པོ། སྤྱོད་པའི་རིགས་ཞེ་སྡང་། གཉེན་པོ་གཉིས་ཀ་ལ་འཕྲོད་པའི་རིགས་དང་གསུམ། རྒྱུའི་རིགས་འདུས་པ། དབང་པོའི་རིགས་ཤིན་ཏུ་གཏུལ་བ། སྤྱོད་པའི་རིགས་ང་རྒྱལ་དང་ཕྲག་དོག་ཤས་ཆེ་བ་ནི། གཉེན་པོ་སྐུ་ལ་འཕྲོད་པའི་རིགས་ཏེ། སྐུ་འདི་ནི་གཞུང་ནས་མ་ཟིན་ལུགས་མ འམ་རས་བྲིས་ལ་དམིགས་པ་གཏད་ཀྱིན་སེམས་འཛིན་པ་ཡིན་གསུང་ངོ་། །དེ་ལྟར་བཞི་བྱེ་བྲག་གི་རིགས་སོ། །དེ་ལྟར་རིགས་སོ་སོར་ཡང་བག་ཆགས་ངོས་མ་ཟིན་ན་ཕན་མེད་པས་མཐུན་པའི་རྐྱེན་བག་ཆགས་གང་ལ་ཡོད་ངོས་གཟུང་བའི་མན་ངག་ནི་བདུན་ཡོད་ཀྱང་ཆིངས་བཞི་རུ་བསྡུ་སྟེ། དབྱིབས་ཀྱི་སྒོ་ནས་བཟུང་བ་དང་། ཁ་དོག་དང་ཞེས་པ་མཚན་བཅས་དང་གཅིག །བཏང་སྙོམས་དང་ཞེས་པ་མཚན་མེད་དང་གཉིས། བསྐྱེད་ཅེས་པ་དང་། བསྡུས་རྒྱས་དང་ཞེས་པ་གཉིས་སྦྲེལ་ལ་བསྐྱེད་རིམ་དང་གསུམ། རྫོགས་རིམས་ཀྱི་སྒོ་ནས་གཟུང་བ་དང་ཞེས་པ། མན་ངག་གི་སྒོ་ནས་བཟུང་བའོ། །གཉིས་སྦྲེལ་ལ་རྫོགས་རིམས་དང་བཞིའོ། །བག་ཆགས་དང་ཞེས་པ་སྤྱིར་བཏང་སྟེ་གོང་གི་བྱེ་བྲག་གི་རིགས་བཞི་གང་ཡོད་ངོས་འཛིན་པའོ། །དེ་ལ་དང་པོ་མཚན་བཅས་ལ་འཕྲོད་པའི་རིགས་དབྱིབས་ཁ་དོག་ནི། དབྱིབས་ཟླུམ་པོ་ཁ་དོག་དཀར་པོ་ལ་སེམས་གཟུང་བ་དང་། དབྱིབས་གྲུ་བཞི་ཁ་དོག་སེར་པོ། དབྱིབས་ཟླ་ཁམ་ཁ་དོག་དམར་པོ། དབྱིབས་གྲུ་གསུམ་ཁ་དོག་མཐིང་ཁ་ལ་སེམས་བཟུང་བའོ། །ཡང་ན་དབྱིབས་ཡི་གེ་ཨཱོཾ་ཁ་དོག་དཀར་པོ། སྭ་སེར་པོ། ༀ་དམར་པོ། ཧཱུྃ་མཐིང་ཁ། ཧ་ལྗང་ཁུ་ལ་སེམས་བཟུང་བའོ། །གཉིས་པ་མཚན་མེད་ལ་འཕྲོད་པའི་རིགས་ལ་བཏང་སྙོམས་ཏེ། དེ་ཡང་ལུས་ཙོག་པུར་བཅས། མིག་བར་སྣང་ལ་བལྟས། སེམས་དབྱིབས་ཁ་དོག་ཏུ་མི་རྟོག་སྟེ། སྒོ་གསུམ་གློད་བཅས་བཅོས་མེད་པར་བཏང་སྙོམས་སུ་གནས་པའོ། །གསུམ་པ་བསྐྱེད་རིམས་ལ་འཕྲོད་པའི་རིགས་ལ་བསྡུས་རྒྱས་ཞེས་པས་དཀྱིལ་འཁོར་བསྡུས་པའམ་གང་མོས་ལ་སེམས་བཟུང་ངོ་། །བཞི་པ་རྫོགས་རིམས་ལ་འཕྲོད་པའི་རིགས་ལ་མན་ངག་གི་སྒོ་ནས་ཞེས་པས་ལྟ་བ་རྟོགས་པ་ལ་ཡིད་ཆེས་པ་བསྐྱེད་ལ་མཉམ་པར་གཞག་ཟེར་ཀྱང་། བླ་མ་མན་ངག་རྩ་དང་རླུང་དང་ཐིག་ལེ་དང་སྣ་ཚོགས་ཀྱིས་སེམས་འདུལ་ཞིང་གཟུང་ངོ་། །དེ་ཡང་ཁྲིད་ཀྱི་དུས་སུ་གང་ཟག་གི་རིགས་འདི་ཚོ་སློབ་དཔོན་གྱིས་ངོས་འཛིན་པ་ཡིན་ཏེ་ངོས་ཚིར་བ་མ་ཟིན་པས། དམིགས་པ་སྤོས་ཤིང་སྤོས་ལ་སེམས་འཛིན་དུ་བཅུག་པས། སེམས་གང་ལ་གནས་པ་དེ་ལ་བག་ཆགས་ཡོད་པས་བཟུང་གསུང་ངོ་། །དེ་ལྟར་བག་ཆགས་ངོས་ཟིན་ཀྱང་རྣལ་འབྱོར་པ་དེ་སེམས་མ་གནས་ན་ཕན་མེད་པས་དེ་མྱུར་དུ་སེམས་ལས་སུ་རུང་བར་བྱ་བའི་ཕྱིར་སེམས་གནགས་ཐབས་ཀྱི་རིམ་པའི་མན་ངག་ནི་གསུམ་སྟེ། དང་པོ་ཆོས་ཉིད་བྱང་ཆུབ་ཀྱི་སེམས་གནས་པར་བྱའི་རྒྱུ་འཚོགས་པར་བྱ་བ་ནི་བདུན་ཏེ། ཤེས་པ་འཁྱོག་བསྲང་བ་དང་ཞེས་པ། ཤེས་པ་འཁྱོག་པ་གང་ཞེ་ན། བསྒོམ་སྙིང་མི་འདོད་པ་དང་། བསྒོམ་པ་སྐྱོ་བ་དང་། བྱིང་རྨུགས་སུ་སོང་པའོ། །དེ་དད་པ་ཆུང་བས་ཉེས་ཏོ་དད་པ་བསྐྱེད་ལ་བསྲང་ང་། དེ་ལ་བཞི་ལས། དང་པོའི་དད་པ་གྱེང་ལ་རི་མོ་བྲིས་པ་ལྟ་བུ་ནི། ལྷ་བཟོ་མཁས་པས་གྱེང་ལ་རི་མོ་བྲིས་པས་རེ་ལེགས་སྙམ་པ་བཞིན་དུ། རུ་དང་གདམ་ངག་ལ་རེ་ཡིན་རེ་ལེགས་སྙམ་པའི་དད་པ་བསྐྱེད་པའོ། །མོས་པའི་དད་པ་བུ་ཕྱིར་འབྲང་བ་ལྟ་བུ་ནི། དཔེར་ན་བུ་མ་ཕྱིར་འབྲངས་པ་དེ་ལ་མོས་ཤིང་སྐྱོ་ངས་མེད་པ་བཞིན་དུ། རུའི་རྗེས་སུ་འབྲང་ཞིང་གདམ་ངག་ཞུ་བ་ལ་མོས་ཤིང་སྐྱོངས་མེད་པའོ། །ཡིད་ཆེས་པའི་དད་པ་ནོར་བུ་ཆུ་དྭངས་པ་ལྟ་བུ་ནི། དཔེར་ན་ནོར་བུ་ཆུ་དྭངས་ཆུ་ནང་དུ་བཅུག་པས་རྙོག་མ་དངས་པ་བཞིན་དུ། རུ་དང་གདམ་ངག་ལ་ཡིད་ཆེས་ཤིང་ངེས་ཤེས་སྐྱེས་པས་མཉམ་པར་ཡིད་ཆེས་ཐེ་ཚོམ་སེལ་བའོ། །འདྲེས་ཤིང་དབྱེར་མི་ཕྱེད་པའི་དད་པ་ཆུ་དང་འོ་མ་འདྲེས་པ་ལྟ་བུ་ནི། དཔེར་ན་ཆུ་དང་འོ་མ་འདྲེས་པ་དབྱེར་མི་ཕྱེད་པ་བཞིན་དུ། སྣང་སྟོང་ངོས་མཉམ་དབྱེར་མེད་དུ་ཤེས་པས་གཉིས་འཛིན་མེད་པའོ། །རྒྱུད་ཞུན་དང་ཐར་བྱ་བ་དང་། །ཞེས་པ་རུའི་གདམས་ངག་ལེགས་པར་ཐོབ་པ། དེའི་ཚིག་ཟིན་པ། དོན་གོ་བ། ཉམས་སུ་ལེན་ཤེས་པ། ཉམས་སུ་བླངས་པའི་ངེས་ཤེས་སྐྱེས་པའོ། །བག་ཆགས་གང་ལ་ཡོད་པའི་བཟུང་དང་ཞེས་པས། ཁ་དོག་དབྱིབས་ལ་སོགས་པའི་སྒོ་ནས་བག་ཆགས་ངོས་བཟུང་བས་སེམས་ཟིན་མཉམ་པ་ཉིད་དུ་རྟོགས་པས་དེའི་སྟོབས་ཀྱིས་ཆགས་སྡང་མཉམ་པ་ཉིད་དུ་ལ་བཟླ་བའོ། །མ་སྨིན་པ་སྨིན་པར་བྱ་བ་དང་ཞེས་པ་རྣལ་འབྱོར་གྱི་ཟས་བདུན་གྱིས་ཁམས་སྨིན་པར་བྱས་ཏེ་སེམས་གཟུང་བའོ། །བློ་མལ་དུ་གནས་པ་དང་ཞེས་པ། བྱ་བ་བཏང་ལ་རུས་གནང་བའི་མན་ངག་དེ་དད་པ་བརྟན་པོས་མི་སྤོངས་པའོ། །ལོང་དང་ལྡན་པར་དང་ཞེས་པ་ཉམས་སུ་ལེན་ཁོམ་པའོ། །ཐག་ལྟ་བས་བཅད་པའོ་ཞེས་པ་ཨ་ཏི་ཡོ་ག་རྟོགས་ཤིང་ཐག་ཆོད་པ་ལ་བྱ་ཟེར་ཀྱང་། གདམ་ངག་ཞུས་ལ་བསྒོམ་དགོས་སྙམ་པར་ཐག་ཆོད་དགོས་ཏེ། ལྭེབ་པ་སླ་སྟེ་བསྒོམ་པ་དཀའ་ཞེས་རིན་པོ་ཆེ་གསུང་ངོ་། །སེམས་གནས་པར་བྱ་བའི་ཉེས་པ་བརྒྱད་སྤང་བར་བྱ་བ་ནི་བརྒྱད་དེ། འཕྲོ་མེད་པའི་ཉེས་པ་དང་ཞེས་པ། རུ་ལ་གདམས་ངག་ཞུས་པས་ལ་ཕྱིས་དུས་བཏབ་པར་མ་ཕྱིན་པའོ། །དེ་སྤང་བ་ནི་དུས་སུ་ཕྱིན་ལ་གདམས་ངག་ཞུའོ། །སྐབས་པ་མེད་པའི་ཉེས་པ་དང་ཞེས་པ་གདམ་ངག་ཞུས་པས་མ་གནང་བའོ། །དེ་སྤང་བ་ནི་དེའི་རྒྱུད་འཛིན་སློབ་བུ་ལ་ཞུའོ། །རྒྱུ་རྐྱེན་གཞན་ལ་རག་ལས་པའི་ཉེས་པ་དང་ཞེས། ཡོ་བྱད་ཆུང་བས་གདམས་ངག་ཕོག་ཀྱང་ཉམས་སུ་ལེན་མི་ཁོམས་པའོ། །དེ་སྤངས་པ་ནི་ཁྲིད་ཀྱི་བར་ཟླ་བ་གཅིག་གི་ཆ་རྐྱེན་འཚོགས་པར་བྱ། དེ་ནས་གང་ལྟར་བྱས་ཀྱང་ཆོག་གོ། །རྟེན་གནད་པའི་ཉིས་པ་དང་ཞེས་པ་ལུས་ན་ཚ་དང་བཅས་པའོ། །དེ་སྤང་བ་ནི་ནད་དེ་བཅོས་ལ་སངས་ཀྱིས་དྲག་པ་དང་ཞུའོ། །ཐབས་ཆུང་བའི་ཉེས་པ་དང་ཞེས་པ་རུ་སེམས་བཟུང་པའི་དྲོད་ཚད་ལ་སོགས་པ་མེད་པ་སྟེ། དེ་སྤང་བ་ནི་བླ་མ་ཐབས་མཁས་པ་ལ་ཞུ། རྒྱུད་ཞན་པའི་ཉེས་པ་དང་ཞེས་པ་ཤེས་རབ་ཆུང་སྟེ་གདམ་ངག་བཏབ་ཀྱང་མི་གོ་བའོ། །དེ་སྤང་བ་ནི་ཐོས་བསམ་ལ་སྦྱང་། ཚོགས་སོག་བྱའོ། །འཁོལ་མ་ཤེས་པའི་ཉེས་པ་དང་ཞེས་པ་རེས་བསྒོམས་པས་བྱང་སེམས་ཀྱི་རུ་མ་སྟོར། དེ་སྤང་བ་ནི་ཐང་ངེ་བསྒོམ། བཀོལ་དྲག་པའི་ཉེས་པའི་ཞེས་པ། བསྒོམས་དྲགས་པས་ཁམས་ལོགས་ནས་བསྒོམ་པ་རྐང་ཆད་པའོ། །དེ་སྤང་བ་ནི་སྐབས་སུ་ངལ་བསོ་ཞིང་བསྒོམ་མོ། །དེ་དང་མཐུན་ཆོས་བརྒྱད་རིམས་པ་བཞིན་དུ་མ་ནོར་བར་ཉམས་སུ་བླང་བ་ནི་བརྒྱད་དེ། དང་པོ་རྟེན་དང་སྦྱར་ཏེ་ཚོགས་ལ་གནས་པ་དང་ཞེས་པ། རྟེན་བཟང་ངན་གཉིས་ཏེ། རྟེན་ངན་པ་ནི་ཤེད་མེད་སྟོབས་དང་བྲལ་བའི་རྒས་པ་དང་། ལང་ཚོ་དྲི་མས་ཕོག་པའི་ནད་པ་དང་། བསླབ་ཉེས་དོན་ལ་དྲེད་པའི་ཚིག་ལ་འབྱམས་པ་གསུམ་མོ། །རྟེན་བཟང་པ་ནི་དེ་ལས་བཟློག་པ་སྟེ་ན་སོ་ཞོན་པ། ལུས་བདེ་བ། ཚིག་ལ་མ་དྲེད་པ་དེ་ལ་རྒྱུ་ཚོགས་ལ་གནས་པར་བྱ་སྟེ། དེ་ཡང་ལུས་ཚོགས་ལ་གནས་པ་གལ་ཆེ་བའི་ལྷ་ཕྱག་དང་བསྐོར་བ་ཡང་བཤོལ་ལ་བྱ་བ་བཏང་ལ་དལ་བར་སྡད ། མགོ་ཆག་འདྲམས་ཀྱིས་དགོས་པ་བཞིན་དུ་བྱ། ངག་ཚོགས་ལ་གནས་ཏེ་སྨྲ་བ་བཅད་ཡིད་ཚོགས་ལ་གནས་ཏེ་མནོ་བསམ་ཅི་ཡང་མི་གཏང་། མནོ་བསམ་བྱུང་ན་འཕྲོ་པད་བཅད་དོ། །ཚོགས་གནས་ལ་ཞག་གྲངས་མི་རྩི་རྟགས་ལ་བལྟ་སྟེ། དེ་ལ་ལུས་ཀྱི་རྟགས་ནི་ཤ་ཆང་མང་པོ་ཟོས་ནས་ད་བར་བསྡད་ཀྱང་ངལ་ཞིང་དུབ་པ་དང་ཁ་ཤུས་འདེབས་པ་ལ་སོགས་པའོ། །གདོང་ལ་བརྟག་པ་ནི་བལྟས་པས་ཧད་དེ་ཐོམ་མེད་བ་འོང་། དྲིས་ཏེ་བརྟག་པ་ནི་ཤེས་པ་གནས་སམ་རྟོག་པ་འཕྲོད་ཆོད་དམ་དྲིས་པས། ཧད་དེ་ཐོམ་མེ་འདུག་ཟེར་བ་ལ་སོགས་པའོ། ༈ །གཉིས་པ་རིགས་དང་སྦྱར་ཏེ་རྣལ་འབྱོར་གྱི་ཟས་བདུན་གྱིས་ཁམས་རྟས་པར་བྱ་བ་དང་ཞེས་པ། རིགས་ནི་སྤྱིའི་རིགས་ཆོས་བཅུ་བཞི་དང་ལྡན་ལ། བྱེ་བྲག་ཏུ་ནད་འདུ་བ་བཞིའམ། དབང་པོ་རྣོ་བརྟུལ་ལམ། དུག་ལྔ་ཤས་གང་ཆེ་དང་སྦྱར་ཏེ་ཟས་བདུན་བརྟེན་ནོ། །ཟས་བདུན་ནི་རྣམ་པར་ཤེས་པའི་ཟས་སྒོ་ལྔ་བཏང་སྙོམས་སུ་གཞག །རིག་པའི་ཟས་གོས་ཚ་གྲང་སྙོམས་པ་འཇམ་པ་མལ་བདེ་བ་རྔས་འབོལ་བར་བྱ། སེམས་པ་ཡིད་ཀྱི་ཟས་ང་ལ་བསྒོམ་འོང་ངམ་མི་འོང་སྙམ་པ་བྱ་མི་དགོས་འོང་བ་ཇི་ལྟར་འདུས་འོང་སྙམ་པ་བྱ་མི་དགོས་ད་གདོད་འདི་ཡིན་བྱ་བ་ངོ་སྤྲོད་དོ། །ཁམས་ཀྱི་ཟས་འཕྲོད་ལ་སྣ་མང་འགྲངས་ལ་ཚོད་ཟིན་པའོ། །གཉིས་ཀྱི་ཟས་ཉིན་མོ་དུག་ཡིན་པས་མི་ལོག་མཚན་མོ་ཚིམ་པར་ལོག་གོ། །ཚངས་པར་སྤྱོད་པའི་ཟས་ཁྲིད་འདི་མ་ཐོན་གྱི་བར་དུ་ལུས་ཚངས་པར་སྤྱོད་པ་ལ་གནས་པར་བྱའོ། །ཏིང་ངེ་འཛིན་གྱིས་ཟས་ནི་ཁད་དང་མུ་ཡིས་སྐྱེ་སྟེ་ཁམས་ཀྱི་ཟས་དང་བྲལ་ཡང་མདངས་དབང་པོ་གསལ་བ་ལ་སོགས་པའོ། །དེ་ལྟར་བདུན་པོ་རྟེན་ལ་ཁམས་ལེགས་པར་རྟས་པར་བྱའོ། ༈ །གསུམ་ལ་དམིགས་ཡུལ་སེམས་གནས་པའི་མཚན་ཉིད་བསྟན་པ་ཞེས་པས་དམིགས་པའི་ཡུལ་ནི། མཚན་བཅས་མཚན་མེད་བསྐྱེད་རིམ་རྫོགས་རིམ་ལ་སོགས་པ་ལ་དམིགས་བཟུང་བས། སེམས་གནས་པའི་མཚན་ཉིད་ལ་གཉིས་ཏེ། སངས་རྒྱས་གསུམ་གྱི་དགོངས་པ་ཟུང་དུ་འཇུག་པ་ཉམས་བཞི་འཕེལ་འགྲིབ་རྒྱུ་དང་བཅས་པ་དང་། དེ་ལྟར་འཕེལ་འགྲིབ་འདུག་པས་ལམ་དྲུག་བརྟེན་པའོ། །དང་པོ་ལ་དྲུག་སྟེ། ཏིང་ངེ་འཛིན་ཤས་ཆེ་བའི་ཉམས་རྣམས་པ་ལྔ། ཤེས་རབ་ཤས་ཆེ་བས་ཉམས་སྣང་བ་ལྔ། གཉིས་ཀ་ཤས་ཆེ་བའི་ཉམས་བདུན། ཆུང་པ་ཆེ་བར་བྱེད་པ་ལ་ཏིང་ངེ་འཕེལ་བའི་རྒྱུ་ལྔ་བརྟེན། འགྲིབ་པའི་སྐྱོན་ལྔ་ཞོར་ལ་སྤང་། །ཤེས་རབ་འཕེལ་བའི་རྒྱུ་ལྔ་བསྟེན། །འགྲིབ་པའི་སྐྱོན་ལྔ་ཞོར་ལ་སྤང་ངོ་། །དེ་ལ་དང་པོ་ཤིན་ཏུ་སྦྱངས་པ་འཇམ་རྩུབ་གཉིས་ཀྱིས་ལུས་སེམསས་ཆེར་ཁྱབ་པ་དང་ཞེས་པ། ལུས་སྦྱངས་པ་འཇམ་པ་ནི་འོ་མའི་ཁ་ཕྲུ་བཏབ་པ་ལྟར་འཇམ་པ། སྦྲའི་ཕྱི་ལོགས་ནས་ཉི་མ་ཤར་བ་དང་ལྟར་དྲོ་ཐིབ་པའོ། །སེམས་ཉོན་མོངས་ཟུག་རྔུ་མེད་པར་འཇམ་འབོལ་ལེ་བའོ། །རྩུབ་པ་ནི་ལུས་འདར་བ་དང་སྤྲུག་པ་དང་། སེམས་སྐབས་སུ་མི་རྟོག་པ་ལྷངས་ལྷངས་སྐྱེ་བ་འབྱུང་ངོ་། །འཛིན་ཆེ་ཞིང་མཐུག་ལ་བརྟན་པ་དང་ཞེས་པ། ལྟ་བ་ཉམས་སུ་མྱོང་བ་དེ་འཛིན་ཆེ་ཞིང་། མི་རྟོག་པ་མཐུག་ལ་རྐྱེན་གྱིས་མི་འགྱུར་བ་བསྟན་པའོ། །གཏང་དཀའ་བ་དང་ཞེས་པ་ཉམས་མྱོང་དེ་བསྡམས་པའམ་སྦྲིད་པ་སྙམ་བྱེད་པ་མི་ཐོངས་པའོ། །བཀོལ་དུ་མི་འདོད་པ་དང་ཞེས་ལུས་འཇིག་རྟེན་བྱ་བའི་ཕྱོགས་སུ་བཀོལ་དུ་མི་དོད་པ་དང་། སེམས་མཚན་མའི་རྣམ་རྟོག་ལ་ཡིད་མི་འཇུག་པའོ། །བྱུང་ཚོར་སྣ་ཚོགས་ཀྱི་རྗེས་སུ་མི་འབྲང་པའོ་ཞེས་པ་རྟོགས་པ་བྱུང་ཚོར་གྱི་རྗེས་སུ་རིག་པ་མི་འབྲང་བའོ། །ཤེས་རབ་ཤས་ཆེ་བ་ནི་རྣམ་པ་མེད་ལ་གཡོ་བག་ཅན་དུ་འདུག་པ་ཞེས་པས་རྟོག་པ་འདི་ཡིན་བྱ་བའི་གཟུང་གི་རྣམ་པ་མེད་ལ་ཡིད་གཡོ་བག་ཅན་དུ་མི་སྡོད་པར་ཀློང་ཀློང་པའོ། །རྟོག་སྤྱོད་གཉིས་ཀྱི་ཤས་ཆེ་བ་ཞེས་པ་དོན་ལ་རྟོག་སྤྱོད་དོ། །ཏིང་ངེ་འཛིན་དུ་མི་འཇུག་པ་ཞེས་པ་ནི་ཐམས་ཅད་སེམས་སུ་འདུག་པ་ལ་བསྒོམས་མ་བསྒོམས་མེད་སྙམ་ན་བབས་དཀའ་བའོ། །ཆོས་ཀྱི་སྣང་བ་འཆར་བ་ཞེས་པ་ནི་ལུང་ཟབ་མོ་སྔར་ཐོས་པ་ནི་ལུང་ཟབ་མོ་སྔར་ཐོས་པ་དང་ཨ་ཅང་ཆེས་ཏེ་མ་ཐོས་པ་ཡང་ཐོལ་ཐོལ་སྐྱེ་སྟེ། དོན་ཟབ་མོའི་སྣང་བ་རྒྱུད་ལ་འཆར་རོ། །སྣང་སྤྱོད་ཐམས་ཅད་དེ་ཁོ་ན་ཉིད་དུ་རྟོགས་ཤིང་ཡིད་ཆེས་པའོ་ཞེས་པ་ནི་སྣང་ཞིང་སྤྱོད་པ་འདི་ཐམས་ཅད་སེམས་ཀྱི་དེ་ཁོ་ན་ཉིད་དུ་ཤེས་ཤིང་རྟོགས་པས་ཐེ་ཚོམ་མེད་དེ་ཡིད་ཆེས་པའོ། །ཏིང་ངེ་འཛིན་དད་ཤེས་རབ་གཉིས་ཀ་ཤས་ཆེ་བའི་ཉམས་བདུན་ནི། ཇི་ལྟར་འདོད་པ་བཞིན་དུ་འཇུག་པ་དང་ཞེས་པས་དམིགས་པ་གང་ལ་བཟུང་བ་དེ་ལ་སེམས་ཟིན་ནས་ཇི་ལྟར་འདོད་པ་བཞིན་དུ་འཇུག་པའོ། །དང་པོ་བབས་སླ་བ་ཞེས་པ་ཏིང་ངེ་འཛིན་བབས་སླ་བའོ། །བར་དུ་རྐྱེན་གྱིས་གནོད་པ་ཆུང་བ་ཞེས་པས་གཟུགས་སྒྲ་ལ་སོགས་པའི་རྐྱེན་གྱིས་ཏིང་ངེ་ལ་མི་གནོད་པའོ། །ཐ་མར་བསྟན་ལ་ཡུན་རིང་དུ་གནས་པ་ཞེས་པ་ཏིང་ངེ་དེ་བརྟན་པ་མི་འགྱུར་བ། དུས་ཡུན་རིང་དུ་གནས་པའོ། །ཤིན་ཏུ་སྦྱངས་པ་ཤས་ཆེ་བ་དང་ཞེས་པ་འཇམ་རྩུབ་གཉིས་ཤས་ཆེ་སྟེ་གོང་དུ་བཤད་ཟིན་ནོ། །བྱིང་རྒོད་གཉིས་ཀྱིས་དབེན་པ་ཞེས་པ་བྱིང་རྒོད་ཀྱི་སྐྱོན་ཉུང་བའོ། །ཁམས་ཀྱི་གནོད་པ་ཆུང་ལ་ཉོན་མོངས་པ་འགྲིབ་རྐྱེན་པའོ་ཞེས་པ་ཁམས་ལོག་པ་ལ་སོགས་པ་ཏིང་ངེ་འཛིན་ལ་གནོད་པ་ཆུང་ལ། དུག་ལྔས་འགྲིབ་རྐྱེན་པའོ། །ཏིང་ངེ་དང་ཤེས་རབ་གཉིས་ཀ་ཤས་ཆུང་བའི་ཉམས་བདུན་ནི་གཞན་ཐབས་སྣ་ཚོགས་ཀྱི་སྒོ་ནས་གཞན་ན་གཞག་ཏུ་བཏུབ་པ་ཞེས་པ་དམིགས་པ་སྤོས་ཤིང་གཞག་ཐབས་སྣ་ཚོགས་ཀྱིས་གཞག་ན་གླེང་ངེ་བ་གཅིག་གཞག་ཏུ་སྟུབ་ཙམ་པ་དང་། དང་པོར་བབས་དཀའ་བ་ཞེས་པ་ཏིང་ངེ་བབས་དཀའ་བ་དང་། བར་དུ་རྐྱེན་གྱིས་གནོད་ཆེ་ཞེས་པ་གཟུགས་ལ་སོགས་པའི་རྐྱེན་བག་ཙམ་གྱིས་ཏིང་ངེ་ལ་གནོད་ནས་འཇིག་པའོ། །ཐ་མ་སངས་རྐྱེན་པ་ཞེས་པ་ཐུན་ཚོད་མ་སྐྱོལ་བར་བསྒོམ་པ་སངས་པའོ། །རྟོག་སྤྱོད་གཉིས་ཤས་ཆེར་འབྱུང་བ་དང་ཞེས་པ་འཇིག་རྟེན་སྣང་ཡུལ་ལ་རྟོག་སྤྱོད་གཉིས་ཀྱི་ཤས་ཆེར་འབྱུང་བའོ། །ཤིན་ཏུ་སྦྱངས་པ་ཞན་ཅིང་འཛིན་ཆུང་བ་ཞེས་པ་ཤིན་ཏུ་སྦྱངས་པ་འཇམ་རྩུབ་གཉིས་ཞན་པ་དང་། ཏིང་ངེ་འཛིན་ལ་འཛིན་ཆུང་བའོ། །ཁམས་ཀྱི་གནོད་པ་ཆེ་ཞིང་ཉོན་མོངས་པ་འགྲིབ་བུལ་བའོ། །ཞེས་པ་ཁམས་ལོག་པས་ཏིང་ངེ་འཛིན་ལ་གནོད་ཆེ་ཞིང་། དུག་ལྔ་འགྲིབ་བུལ་བའོ། །དེ་ལྟར་ཏིང་ངེ་འཛིན་དང་ཤེས་རབ་ཤས་ཆེ་བ་ལ་ནི་ཉམས་བཟང་ལ། དེ་གཉིས་ཤས་ཆུང་བ་ལ་ཉམས་ངན་པར་འདུག་པས། ད་དེ་ཆུང་བ་ཆེ་བར་བྱེད་པ་ལ། ཏིང་ངེ་འཕེལ་བའི་རྒྱུ་ལྔ་བསྟེན། འགྲིབ་པའི་རྐྱེན་ལྔ་སྤང་། ཤེས་རབ་འཕེལ་བའི་རྒྱུ་ལྔ་བསྟེན། འགྲིབ་པའི་རྐྱེན་ལྔ་སྤང་བའོ། །དེ་ལ་ཏིང་ངེ་འཛིན་འཕེལ་བའི་རྒྱུ་ལྔ་ནི། རྒྱུ་ཚོགས་ལ་གནས་པར་རབ་ཏུ་འཕེལ་ཅེས་པ་ལུས་ཚོགས་ལ་གནས་ཏེ་བྱ་བ་སྤང་བ་དང་། ངག་སྨྲ་བ་བཅད་པ་དང་། ཡིད་འགྱུ་བ་བཅད་ན་ཏིང་ངེ་འཕེལ། ལེ་ལོ་དང་གཡེང་བ་སྤངས་ཤིང་རྩོལ་བའི་ལམ་ལ་གནས་པས་འཕེལ་ཅེས་པ། ལེ་ལོ་ལ་གཉིས་སྙོམ་ལས་ཀྱི་ལེ་ལོ་དགེ་སྦྱོར་སང་བྱ་ལ་ལུས་པ་དང་། སྦྱོར་བ་དམན་པའི་ལེ་ལོ་སྡིག་པ་སྤངས་ནས། ཉམས་སུ་ལེན་པ་བརྩོན་པའི་ལམ་ལ་གནས་ན་འཕེལ། ཚངས་པར་སྤྱོད་ལ་གནས་ཤིང་ཚུལ་ཁྲིམས་དང་དམ་ཚིག་རྣམ་པར་དག་པས་འཕེལ་ཅེས་པ། ལུས་ཚངས་པར་སྤྱོད་པ་ལ་གནས་ཤིང་ཉན་ཐོས་ཀྱི་འདུལ་ཁྲིམས་དང་སྔགས་ཀྱི་དམ་ཚིག་རྣམ་པར་དག་པས་འཕེལ་ལོ། །རྟེན་རྒྱས་པའི་རྒྱུ་བརྟེན་ཅིང་སོ་སོར་རྟོག་པའི་ཤེས་རབ་ཀྱི་མེ་སྦར་བས་འཕེལ་ལོ། །རྟེན་རྒྱས་པའི་རྒྱུ་ཁ་ཟས་བཟང་པོ་བརྟེན་ཅིང་ཐོས་བསམ་བསྒོམ་གསུམ་གྱིས་ཆོས་ཉིད་ཀྱི་དོན་སོ་སོར་རྟོགས་པའི་ཤེས་རབ་ཀྱི་མེ་སྦར་བས་འཕེལ། དྲོད་ཚད་སྙོམས་ཤིང་རྟེན་མ་ཉམས་པས་འཕེལ་ཅེས་པ་སྤྱོད་ལམ་གྱི་དྲོད་ཚད་དང་། ཁམས་ཀྱི་མཐུན་གྱི་དྲོད་ཚད་དང་། རྟེན་ལུས་ཀྱི་ཐིག་ལེ་མ་ཉམས་པས་འཕེལ་ལོ། །དེ་ལ་བཟློག་པ་འགྲིབ་པའི་རྐྱེན་ལྔ་ནི། ཚོགས་ལ་མ་གནས་ཏེ་ལུས་ངག་ཡིད་གསུམ་འཇིག་རྟེན་གྱི་བྱ་བས་ཁྱེར་ནས་འགྲིབ། ལེ་ལོ་དང་གཡེང་བ་ཆེ་ཞིང་རྩོལ་བ་ཆུང་ནས་འགྲིབ། ཚངས་པར་སྤྱོད་པ་ལ་མ་གནས་ཤིང་ཚུལ་ཁྲིམས་དང་དམ་ཚིག་ཉམས་ན་འགྲིབ། ཁ་ཟས་ཞན་ཞིང་ཐོས་བསམ་བསྒོམ་པ་མ་བྱས་ན་འགྲིབ། དྲོད་ཚད་མ་སྙོམས་ཤིང་རྟེན་ཐིག་ལེ་ཉམས་ན་འགྲིབ་བོ། །ཐ་མ་ཤེས་རབ་འཕེལ་བའི་རྒྱུ་ལྔ་ཞེས་པས། རྒྱུ་ཚོགས་ལ་གནས་པས་རབ་ཏུ་འཕེལ་ཅེས་པ་བཞིན་ནོ། །བླ་མ་དང་གསལ་བྱེད་ཀྱི་སྒྲོན་མ་དང་མ་བྲལ་བས་འཕེལ་ཅེས་པ། བླ་མ་དང་མ་བྲལ་གདམ་ངག་ཞུས། ཤེས་རབ་གསལ་བར་བྱེད་པའི་སྒྲོན་མ་མདོ་རྒྱུད་ཟབ་མོ་དང་། བསྒོམ་ཡིག་དང་། མན་ངག་དང་། སྙན་རྒྱུད་དང་མ་བྲལ་བས་ལྟ་རྟོག་བྱས་ན་འཕེལ་ལོ། །རྟག་ཏུ་བད་ཀན་རྒྱས་པའི་རྒྱུ་སྤངས་པས་འཕེལ་ཅེས་པ། སུངས་དང་རྗེན་ལ་སོགས་པའི་ཟས་བད་ཀན་སྐྱེ་བ་རྣམས་སྤངས་ནས་འཕེལ་ལོ། །རྟེན་རྒྱས་པའི་རྒྱུ་རྟེན་ཅིང་ཟབ་མོའི་དོན་ལ་མ་རྨོངས་པས་འཕེལ་ཅེས་པས། རྟེན་རྒྱས་པའི་རྒྱུ་ཁ་ཟས་བཟང་པོ་དང་ཏི་ངེ་འཛིན་ཆོས་ཉིད་ཟབ་མོའི་དོན་ལ་མ་རྨོངས་པས་བསྒོམ་བྱུང་གི་ཤེས་རབ་འཕེལ་ལོ། །དྲོད་ཚད་སྙོམས་ཤིང་རྟེན་མ་ཉམས་པས་འཕེལ་ལོ། །ཞེས་པས་གོང་བཞིན་ནོ། །དེ་ལས་བཟློག་པ་འགྲིབ་པའི་སྐྱེན་ལྔ་ནི། ཚོགས་ལ་མ་གནས་པ་དང་། བླ་མ་དང་དཔེ་ཆ་དང་བྲལ་བ་དང་། བད་ཀན་སྐྱེ་བའི་ཟས་བསྟེན་དང་། ཁ་ཟས་ཞན་ཅིང་ཉོན་མོངས་པ་འདོད་ཆགས་དང་ཉིན་མོའི་གཉིད་ཀྱིས་འགྲིབ། དྲོད་ཚད་མ་སྙོམས་ཤིང་ཐིག་ལེ་ཉམས་པས་འགྲིབ་བོ། །དེ་ལྟར་འཕེལ་འགྲིབ་འདུག་པས་ལམ་དྲུག་བརྟེན་པ་ནི། དགོན་དྲུག་བསྟེན་པ་དང་གཅིག །མཐའ་དྲུག་སྤངས་པ་དང་གཉིས། མཐུན་བཞི་བསྟེན་པ་དང་གསུམ། མཐའ་གཉིས་སྤང་བ་དང་བཞི། ཀུན་ཏུ་བཟང་པོ་འཕེལ་འགྲིབ་དང་ལྔ། ཀུན་ཏུ་བཟང་མོའི་འཕེལ་འགྲིབ་དང་དྲུག་གོ། །དགོན་དྲུག་བསྟེན་པའི་ཚུལ་གྱིས་སྤྱོད་པར་ཞེས་པ། གནས་དགོན་པ་གྲོང་ལས་སྤགས་པ་འདུ་འཛིན་གཡེང་བ་མེད་པའོ། །ལུས་དགོན་པ་བྱ་བྱེད་སྤང་བའོ། །མལ་དགོན་པ་གཅིག་པུ་ཉལ་བའོ། །སེམས་དགོན་པ་ཐ་མལ་བསམ་མནོ་སྤངས་པའོ། །ཀུན་ཏུ་བཟང་པོའི་དགོན་པ་བཟང་ངན་དང་ཆེ་ཆུང་དང་མཉམ་པ་ཉིད་དུ་སྤྱོད་པའོ། །རྡོ་རྗེ་སེམས་པའི་དགོན་པ་སེམས་ཉིད་ངོ་བོ་མི་འགྱུར་བར་སྤྱོད་པའོ། །དེ་ལྟར་དྲུག་པོ་བསྟན་ལ་སྤྱོད་དོ། །མཐའ་དྲུག་སྤང་བའི་ཚུལ་གྱིས་སྤྱོད་པ་ཞེས་པ། ཏིང་ངེ་ཉམས་སུ་ལེན་པའི་དུས་སུ། ལུས་ཀྱི་ཡ་མཐའ་ལྷ་ཕྱག་དང་བསྐོར་བ་ལ་སོགས་ཏེ་ལུས་ཀྱི་དགེ་བ་དང་། མ་མཐའ་མལ་དུ་འདུག་པའམ་ལུས་ཀྱི་སྡིག་པ་དང་། ངག་གི་ཡ་མཐའ་བཟླས་བརྗོད་ལ་སོགས་ཏེ་ངག་གི་དགེ་བ་དང་། མ་མཐའ་ལོང་གཏམ་མ་མངག་གི་མི་དགེ་བ་དང་། སེམས་ཀྱི་ཡ་མཐའ་ལྷ་བསྒོམ་པ་ལ་སོགས་ཡིད་ཀྱི་དགེ་བ་དང་། མ་མཐའ་ཐ་མལ་རྟོགས་པའི་ཡིད་ཀྱི་མི་དགེ་བ་དང་། གནས་ཀྱི་ཡ་མཐའ་གནས་བཟང་བ་གཞན་པས་ལྷག་པ་ཆགས་སེམས་སྐྱེ་བ་དང་། མ་མཐའ་འཁོབ་ལ་སོགས་བཙལ་ཞུངས་དཀའ་བ་དང་། གོས་ཀྱི་ཡ་མཐའ་སྐེ་བོར་དང་སྤུ་ཐུལ་ལ་སོགས་ཆགས་སྐྱེ་བ་དང་། མ་མཐའ་རེ་དུག་ལ་སོགས་ཕུང་པོ་ལ་གནོད་པ་དང་། ཟས་ཀྱི་ཡ་མཐའ་ཤ་ཆང་བུ་རམ་ལ་སོགས་ཆེད་ཀས་བསྒྲུབ་པ་དང་། མ་མཐའ་སྦང་ཟན་ལོ་ཐུག་ལ་སོགས་པའི་རྟེན་རྒུད་པ་རྣམས་སོ། །དེ་ཡང་ལུས་ངག་ཡིད་གསུམ་གྱི་མཐའ་དང་སྨོས་ཅི་དགོས། ཏིང་ངེ་ལ་གནོད་ན་ཡ་མཐའ་ཡང་སྤང་ངོ་། །གནས་གོས་ཟས་གསུམ་པོ་དེ། བཟང་གྲངས་པ་ལྷག་པ་དང་ཡང་སྩོལ་བ་དང་གཡེང་བའི་རྒྱུ་ཡིན་ལ། ངན་གྲགས་པ་ཡང་རྟེན་གུད་དེ་འགྲོ་བས་སྤང་ངོ་། །ཆོས་པའི་གོས་ལ་སོགས་པ་མི་མ་ཚོར་བ་ཡིན་གསུང་ངོ་། །མཐུན་བཞི་བསྟེན་པའི་ཚུལ་གྱིས་སྤྱོད་པར་བྱ་ཞེས་པས། གནས་དང་། གྲོགས་དང་། ཟས་དང་། སྤྱོད་ལམ་མོ། དང་པོ་ནི་མཐོ་ལ་དྲོ་བ་། ཡངས་ལ་བསིལ་བ། ལྷ་སྲིན་སྐྱེ་བོ་མ་རུང་བ་མེད་པའོ། །མཐོ་སྟེ་གྲོང་ལས་དཔགས་པ། རྒུན་དྲོ་བ། ས་ཤུལ་ཡངས་པ། དབྱར་ཚད་ཁུང་མེན་ཏེ་བསིལ་བ། ཡུལ་ན་ལྷ་སྲིན་དང་། བཙན་བདུད་དང་། སྐྱེ་བོ་མ་རུངས་པ་མེད་པ། མི་རྒོད་ཀྱི་འགྲུལ་སྲང་མ་ཟུག་པའོ། །གྲོགས་མན་ངག་དང་མཐུན་པ་དང་། གྲོགས་བཟང་བརྟེན་ཅིང་ཞེས་པས་བསྟན་པའི་གྲོགས་བཟངས་ནང་པ་སངས་རྒྱས་པ་དཀོན་མཆོག་གསུམ་ལ་གུས་པ། ཐེག་པའི་གྲོགས་བཟང་ཤེས་རབ་དང་སྙིང་རྗེ་ཆེ་བ། བསྒྲུབ་པའི་གྲོགས་བཟང་བརྩོན་འགྲུས་ཆེ་བ། བྱང་ཆུབ་ཀྱི་གྲོགས་བཟང་བྱང་ཆུབ་དོན་དུ་གཉེར་བའོ། །དེ་ནི་བླ་མ་དང་འདྲ་སྟེ་མཐུན་པ་བླ་མར་ཤེས་པའི་ཚུལ་གྱིས་སྤྱད་པར་བྱ་ཞེས་སོ། །གྲོགས་ངན་སྤང་བའི་ཚུལ་གྱིས་སྤྱད་པར་ཞེས་པ་གྲོགས་ངན་མན་ངག་དང་མི་མཐུན་པ་སྤང་སྟེ། བསྟན་པའི་གྲོགས་ངན་མུ་སྟེགས་སམ་དཀོན་མཆོག་ལ་མི་གུས་པ། ཐེག་པའི་གྲོགས་ངན་ཤེས་རབ་དང་སྙིང་རྗེ་ཆུང་བ། བསྒྲུབ་པའི་གྲོགས་ངན་ལེ་ལོ་ཆེ་བ། བྱང་ཆུབ་ཀྱི་གྲོགས་ངན་ཏིང་ངེ་བཞག་ནས་འཚོ་བ་དོན་དུ་གཉེར་བའོ། །དེ་ནི་ཉམས་སུ་ལེན་པའི་བདུད་དང་འདྲ་སྟེ། མི་མཐུན་བདུད་དུ་ཤེས་པའི་ཚུལ་གྱིས་སྤང་བར་བྱ་ཞེས་སོ། །ཟས་མན་ངག་དང་མཐུན་པ་ནི། འགྲངས་གལ་ཚོད་ཟིན་པ་ཞེས་པས་སྤྱིར་འགྲངས་ལ་འགྲངས་གྲགས་པ་མེན་ཏེ་ཚོད་ཟིན་པ། འཕྲོད་ལ་སྣ་མང་པ་ཞེས་པ། ནད་གཞི འམ་ཁམས་རིགས་དང་འཕྲོད་པ་ལ་ཕྱོགས་གཅིག་པ་མེན་ཏེ་སྣ་མང་བའོ། །སྤྱོད་ལམ་མན་ངག་དང་མཐུན་པ་ནི། རྣལ་འབྱོར་ཕུག་ཏུ་མི་འདུག་དབང་པོ་ཡན་དུ་ཕྱེ་ཞེས་པས་ཕུག་ཏུ་འདུག་ལ་སེམས་མི་བཏུམ། དབང་པོ་སྒོ་ལྔ་པོ་དང་ཡུལ་ལ་གཟུགས་སྣང་སྟོང་དབྱེར་མེད། སྒྲ་གྲག་སྟོང་། དྲི་ཚོར་སྟོང་། རོ་བྲོ་སྟོང་། རེག་རེག་སྟོང་དབྱེར་མེད་དུ་ཡན་པར་ཁྱེ། ཅོག་གེ་མི་འདུག་ངལ་བའི་ལས་མི་བྱེ་ཞེས་པ། ཤེས་པ་ཐ་མལ་དུ་ཅོག་གེ་མི་འདུག་ལྟ་བ་ཨ་ཏི་ཡོ་གའམ་བསྒོམ་པ་སྟོང་གསལ་དང་མ་བྲལ་བར་བྱ། ལུས་ངག་ངལ་བའི་ལས་བྱས་ན་ཏིང་ངེ་འགྲིབ་པས་མི་བྱའོ། །མཐའ་གཉིས་སྤང་པའི་ཚུལ་གྱི་སྤྱད་པར་བྱ་ཞེས་པ། འདོད་པ་བསོད་ནམས་ཀྱི་མཐའ་དང་། ངལ་ཞིང་དུབ་པའི་མཐའོ། །དང་པོ་ནི་འཇིག་རྟེན་ཆོས་བརྒྱད་ལ་ལ་གྲགས་པ་དང་། བདེ་བ་དང་། རྙེད་པ་དང་། བསྟོད་པ་ནི་འདོད། མ་གྲགས་པ་དང་། སྡུག་བསྔལ་བ་དང་། སྟོར་བ་དང་སྨད་པ་བཞི་མི་འདོད་པའོ། །དེ་ཡང་པ་ནི་ཐམས་ཅད་ནམ་མཁའི་ཚུལ་ལ་བཏང་སྙོམས་ཆེན་པོའི་ཚུལ་གྱིས་སྤྱད་པར་བྱ་ཞེས་པས། ཆོས་ཐམས་ཅད་ནམ་མཁའ་དང་འདྲ་བའི་ངང་ཚུལ་ལ། ཆོས་བརྒྱད་ཨའི་ངོས་ནས་སྟོང་མཉམ། ཏིའི་ངོས་ནས་སྣང་མཉམ། ཡོ་གའི་ངོས་ནས་ཆོས་བརྒྱད་ཀྱི་སྣང་བ་མ་བཀག །དེའི་མཐས་མ་རེག་རང་སར་གྲོལ་བའོ། །སྤོངས་ལེན་མེད་པ་བཏང་སྙོམས་ཆེན་པོར་སྤྱོད་པར་བྱའོ། །ངལ་ཞིང་དུབ་པའི་མཐའ་ནི། ལྟོ་རྒྱབ་ཀྱི་ཆེད་དུ་ལུས་ངག་ཡིད་གསུམ་ངལ་ཞིང་དུབ་པའོ། །དེ་སྤང་པ་ནི་སྦྱང་པ་རྣམ་གསུམ་གང་མཐུན་བསྟེན་པའི་ཚུལ་གྱིས་སྤྱད་པར་བྱ་ཞེས་པས། ཏིང་ངེ་འཛིན་གྱི་སྦྱང་བ་དང་། མན་ངག་གིས་སྦྱང་བ་དང་། སྤྱོད་ལམ་གྱི་སྦྱང་བའོ། །ཏིང་ངེས་སྦྱང་བ་ན་ཏིང་ངེ་ཉམས་སུ་ལེན་པ་རང་ཡིན་ཏེ། དེས་ཏིང་ངེའི་ཟས་དང་ཕྲད་ནས་འབྱོངས་སོ། །མན་ངག་གིས་སྦྱང་བ་ལ། ངེས་པ་གཅིག་གིས་སྦྱང་བ་དང་། ངེས་པ་གྲོལ་བུས་སྦྱང་བའོ། །དང་པོ་ནི་ལྟ་བ་ཨ་ཏི་ཡོ་གས་མཚན་མའི་ཆོས་ཐམས་ཅད་རང་གྲོལ་དུ་ཤེས་པའོ། །དེས་ལྟ་བའི་ཟས་དང་ཕྲད་ནས་འབྱོངས་སོ། །ངེས་པ་གྲོལ་བུལ་སྦྱང་བ་ནི་བོགས་དབྱུང་བཅུ་གསུམ་ལ་སོགས་པ་བྱའོ། །དེས་ཀྱང་ཏིང་ངེའི་ཟས་དང་ཕྲད་ནས་འབྱོངས་སོ། །སྤྱོད་ལམ་གྱིས་སྤྱོད་པ་ནི། དཀར་པོས་ལྡོམ་བུ་བྱ་སྟེ། རབ་ཀྱིས་ཡུལ་ཞིང་གར་དགར་འཛིན་མེད་དུ་བོར་ལ་བྱ། འབྲིང་གིས་བླ་མ་དང་དགེ་ཕྱོགས་སུ་བཏང་ལ་བྱ། ཐ་མས་སྐྱེད་འཕེལ་བཏང་ལ་རྒྱགས་ལྡང་ཙམ་ན་ལོག་ལ་དགེ་སྦྱོར་བྱའོ། །དེས་ཀྱང་འབྱོངས་སོ། །ནག་པོ་རང་གསོག་འཇོག་དང་སེམས་ལྟོ་ཕྱིར་ཤོར་བས་མི་བྱའོ། །ཀུན་ཏུ་བཟང་པོ་འཕེལ་དང་འགྲིབ་པའི་ཚུལ་གྱིས་ཞེས་པ་ཀུན་ཏུ་བཟང་པོ་ནི་ཏིང་ངེས་ཏེ། དེ་འཕེལ་བའི་རྒྱུ་ལྔ་སྟེ། འགྲིབ་པའི་རྐྱེན་ལྔ་སྤངས་ཏེ་སྤྱོད། །ཀུན་ཏུ་བཟང་མོ་འཕེལ་དང་འགྲིབ་པའི་ཚུལ་གྱིས་ཞེས་པ་ཀུན་ཏུ་བཟང་པོ་ནི་རིང་ངེས་ཏེ་དེ་འཕེལ་བའི་རྒྱུ་ལྔ་སྟེ། འགྲིབ་པའི་རྐྱེན་ལྔ་སྤངས་ཏེ་སྤྱོད་ཀུན་ཏུ་བཟང་མོ་འཕེལ་དང་། འགྲིབ་པའི་ཚུལ་གྱི་སྤྱོད་པར་བྱ་ཞེས་པ་ནི་ཤེས་རབ་སྟེ། དེ་འཕེལ་བའི་རྒྱུ་ལྔ་བསྟེན། འགྲིབ་པའི་རྐྱེན་ལྔ་སྤངས་ཏེ་སྤྱད་དོ། །བཞི་པ་སྤྱི་རྟགས་ཉི་ཤུ་རྩ་བཞིས་ཁམས་ཀྱིས་དྲོད་ཚད་བཟུང་བ་དང་ཞེས་པ་ནི། འོག་གི་འདི་རྣམས་ཁམས་བད་དུ་སུ་བྱུང་ན་སྦྱངས་པ་རྩུབ་པའི་ཉམས། མི་བདེ་བའི་དུས་སུ་བྱུང་ན་ཁམས་ལོག་པའི་རྟགས་སུ་འགྲོ་བ་སྤྱི་རྟགས་སོ། །ཡང་རིན་པོ་ཆེ་ནི་བསྒོམ་པ་སྤྱིའི་རྟགས་དང་མཐུན་པས་སྤྱི་རྟགས་སུ་འགྲོ་གསུང་། ཉི་ཤུ་རྩ་བཞི་ནི་གྲངས་ཏེ། དེ་ལ་རླུང་འཁྲུགས་པའི་རྟགས་བཞི་ནི། མིག་འཁྲུལ་བ་དང་། སྒྲ་འཁྲུལ་བ་དང་། ངག་འཁྲུལ་བ་དང་། སེམས་འཁྲུལ་བའོ། །ནམ་མཁའི་རླུང་འཁྲུགས་པའི་རྟགས་ནི། རྣམ་རྟོག་རྒྱས་པ་དང་། གཉིས་མི་ཕེབས་པ་དང་། གཉིད་སྲབ་པ་དང་། རྨི་ལམ་མང་པའོ། །སའི་རླུང་འཁྲུགས་པའི་རྟགས་ནི། མགོ་བོ་བགས་ཀྱིས་ལྕི་བ་དང་། ཟས་ཡི་གར་མི་འོང་བ་དང་། ལུས་སེམས་གྱོང་བ་དང་། ལུས་སེམས་རྩུབ་པའོ། །ཆུའི་རླུང་འཁྲུགས་པའི་རྟགས་ནི། བསྒོམ་སྙིང་མི་འདོད་པ་དང་། བསྒོམ་འཆེར་བ་དང་། བསྒོམ་མི་ཕེབས་པ་དང་། བསྒོམ་སྲབ་པའམ་ཡུན་དུ་ཐུང་བའོ། །མེའི་རླུང་འཁྲུགས་པའི་རྟགས་ནི། རྐྱེན་མེད་པར་གློ་ཆུང་འབྱུང་བ་དང་། རྐྱེན་མེད་པར་སྦྲིད་པ་འབྱུང་བ་དང་། ལུས་ལ་གཟེར་ཟུག་འབྱུང་བ་དང་། སྤྱོད་ལམ་མི་བདེ་བའོ། །རླུང་གི་རླུང་འཁྲུགས་པའི་རྟགས་ནི། རྔམ་པ་འབྱུང་བ་དང་། ལུས་འདར་བ་དང་། ཤུགས་རིངས་འབྱུང་བ་དང་། དབུགས་རྒོད་པ་འབྱུང་ངོ་། །ཁམས་ཀྱི་ཚོད་བཟུང་བ་ནི་འཇིག་རྟེན་ཉམས་པའི་རྟགས་དེ་ཀུན་འབྱུང་བཞིན་དུ་བསྒོམ་པ་ལ་བརྩོན་འགྲུས་ངང་ལ་གནས་སུ་མི་སྟུབ་ལ། བསྒོམ་ཡོད་པ་ཡང་ངན་དུ་འགྲོ་ཞིང་བོགས་མི་འོང་བས། རྟེན་གྱི་རྟགས་དེ་ཀུན་བྱུང་ན་ངལ་བསོ་ཞིང་ཚོགས་ལ་གནས་པར་བྱས་ལ། ཁམས་རྟས་སུ་གཞུག་ཅིང་། བསྒོམ་པ་བདེ་ཙ་ན་ཚོད་བཟུང་ཞིང་། ནུབ་ཀྱང་འཕྲོ་བཅད་ཅིང་བསྒོམས་ན་བསྒོམས་པ་ཇི་བཟང་ཇེ་བཟང་འགྲོ་ཞིང་བོགས་འོང་ངོ་། །ལྔ་པ་མདོ་གཅོད་བཞིའི་མན་ངག་གིས་བསྒོམ་པ་ཐུན་ཚོད་གཟུང་བ་དང་ཞེས་པ། མདོ་གཅོད་བཞི་ནི། ཐུན་སྟོད་དང་། ཐུན་སྨད་གཉིས། སྔར་ཐུན་དང་ཕྱི་ཐུན་གཉིས་ཏེ་བཞིའོ། །མན་ངག་གིས་ཐུན་ཚོད་གཟུང་བ་ནི། ཐུན་སྟོད་པས་ཐུན་སྨད་བདེ་བ་དང་། བསྒོམ་པ་སྔ་མ་བས་ཕྱི་མ་བདེ་ན། རྟེན་ཁམས་ཀྱི་ནུས་པ་ཆེ་བས་ཚོད་བཟུང་ཞིང་ཐུན་ཆེར་བསྒོམ་མོ། །དེ་ལས་བཟློག་པ་ནི་རྟེན་ཁམས་ཀྱི་ནུས་ཆུང་བས་ཁོང་ངལ་པོ་ཞིང་ཐུན་ཆུང་དུ་བསྒོམ་མོ། །སྔ་དྲོ་ཐུན་སྟོད་ལ་མ་བདེ་ན་ཚོགས་ལ་མ་གནས་པ་ཡིན་པས་ཚོགས་གནས་ལ་ནན་ཏན་བྱས། ཕྱི་དྲོ་དང་ཐུན་སྨད་མི་བདེ་ན་རྟེན་ཉམས་པ་ཡིན་པས་ཟས་བསྟར་རོ། །དེ་ལྟར་མ་བྱས་ན་དྲོད་ཚད་ཀྱི་མན་ངག་མེད་པས་ངང་ལ་གནས་སུ་མི་བཏུབ་ཅིང་བསྒོམ་པ་ངན་དུ་འགྲོ་ཞིང་བོགས་མི་འོང་ངོ་། །དྲུག་པ་ཉམས་དང་སྦྱར་ཏེ་ཕྱིར་བཅོས་པའི་ཐབས་བསྟན་པ་དེང་ཞེས་པ་ཉམས་དང་སྦྱར་བ་དང་། ཕྱིར་བཅོས་པ་གཉིས་ལས། དང་པོ་ལ་གཉིས་ཏེ། གང་ཟག་འཇུག་པའི་ཉམས་དང་། རྣལ་འབྱོར་སྐྱེ་བའི་ཉམས་སོ། །དང་པོ་ནི་གང་ཟག་འཇུག་པའི་ཉམས་ནི་ཞེས་པས་བདུན་ཏེ། ཁུགས་པའི་ཉམས་དང་། ཆགས་པའི་དང་། ཟིན་པའི་དང་། ལོག་པའི་དང་། བྲི་བ་དང་། ངང་ལ་གནས་པ་དང་། གེད་དུ་གྱུར་པའོ། །ཁུགས་པ་ནི་དཔེར་ན་བྱ་རྒོད་ནམ་མཁའ་ལ་འཕྱོ་བ་ལ་གཟན་མཐོང་ནས་གཟན་ཐོག་ཏུ་ཁུགས་པ་བཞིན་དུ། ལྟ་བ་རྟོགས་ཏེ་སེམས་མ་གནས་པ་དམིགས་པ་ལ་གཏད་པས་ཙེན་ཙེར་ཁུགས་པའོ། །ཆགས་པ་ནི་དེར་བྱ་རྒོད་གཟན་ལ་ཆགས་པ་བཞིན་དུ་དམིགས་པ་ནམ་བྱས་རེས་ཆགས་པའོ། །ཟིན་པ་ནི་དེར་བྱ་རྒོད་དེ་སྙི་ལ་ཟིན་པ་བཞིན་དུ་ལྟ་བ་ཉམས་སུ་མྱོང་བའོ། །ལོག་པ་ནི་བྱ་རྒོད་སྙི་ལས་ཤོར་ཏེ་བྲེད་པ་བཞིན་དུ། ལྟ་བ་ཉམས་སུ་མྱོང་བས་འཇིག་རྟེན་སྡུག་བསྔལ་སྐྱུག་ལོག་སྟེ་བྲེད་པའོ། །བྲིས་པ་ནི་ཡུན་རིང་ནས་སྙི་ལ་ཟིན་པའི་འཇིགས་པ་དེ་བྲི་བ་བཞིན་དུ། བསྒོམས་པས་འཁོར་བའི་འཇིགས་པ་དེ་བྲི་བའོ། །ངང་ལ་གནས་པ་ནི་དེར་བྱ་རྒོད་དེ་ཚང་དུ་གནས་པ་བཞིན་དུ་ལྟ་བའི་ངང་ལ་གནས་པའོ། །གེད་དུ་གྱུར་པ་ནི་བྱ་རྒོད་དེ་ཕྱིས་གཟན་མཐོང་ཡང་དེ་འཇུག་པའི་སེམས་མི་སྐྱེ་བ་བཞིན་དུ། འཁོར་བ་ལ་འཇུག་པའི་བློ་མི་སྐྱེ་བ་ནི་གེད་དུ་གྱུར་པའོ། ༈ །གཉིས་པ་རྣལ་འབྱོར་སྐྱེ་བའི་ཉམས་པ་ཞེས་པ་གཉིས་ཏེ། ཐུན་མོང་དང་ཐུན་མོང་མ་ཡིན་པའོ། །དང་པོ་ལ་བཞི་སྟེ། བདེ་བ་དང་། གསལ་བ་དང་། མི་རྟོག་པ་དང་། མི་གཡོ་བའོ། །དང་པོ་ལ་གཉིས་ཏེ། ཐུན་མོང་དང་། ཁྱད་པར་རོ། །ཐུན་མོང་ལ་དྲུག་སྟེ། ཤིན་ཏུ་སྦྱང་བའི་བདེ་བ་དང་། སེམས་འཛིན་གྱི་དུས་སུ་བྱུང་བ་སྦྱངས་པས་འཇམ་རྩུབ་བོ། །ཐོབ་པའི་བདེ་བ་དང་ཞེས་པ་ནོར་ཐོབ་པས་སེམས་བདེ་བ། བྲལ་བའི་བདེ་བ་དང་ཞེས་པ་ནད་དང་བྲལ་བའི་བདེ་བ། འཇུག་པ་ཐམས་ཀྱི་བདེ་བ་དང་རྩ་རླུང་གི་ཐབས་ཀྱི་བདེ་བ་དང་། ཉེ་བར་ཞི་བའི་བདེ་བ་དང་ཞེས་པའི་གཉིད་ལོག་པས་ཚོགས་དྲུག་གི་རྟོག་པ་ཞི་བའི་བདེ་བ། བདུད་རྩི་འདྲེས་པའི་བདེ་བ་ཞེས་པ་ཕོ་མོ་སྤྲད་པའི་དཀར་དམར་བདེ་བའོ། །དེ་རྣམས་ཐུན་མོང་གི་བདེ་བ་ཡིན་ཏེ། བསྒོམ་པའི་ཉམས་རྟགས་ཀྱི་བདེ་བ་མེན་ཅེས་སྦྱར་རོ། །ཁྱད་པར་གྱི་བདེ་བ་ནི། རང་བཞིན་གྱི་བདེ་བ་ཞེས་པ་རང་བཞིན་ལྷུན་གྱིས་གྲུབ་པ་བྱས་པར་མེད་པར་བདེ་བའོ། །ཡེ་ཤེས་ཆེན་པོའི་བདེ་བའོ། །ཞེས་པས་དེ་ལྟར་ཡེ་ནས་གནས་པ་དེ་ངོ་སྤྲད་ཉམས་སུ་བླངས་པས་ངོ་ཤེས་ཉམས་སུ་མྱོང་བའོ། །དེ་བདེ་བར་འགྲོ་བའི་རྒྱུ་མཚན་ནམ་ངེས་ཚིག་ནི། ལྟ་བས་ཐག་ཆོད་པས་ཉམས་ང་བ་དང་བག་ཚ་བ་ལ་སོགས་ཏེ་འཇིགས་པ་ཐམས་ཅད་དང་བྲལ་བས་བདེ་ཞེས་པས། ལྟ་བས་ཆོས་ཐམས་ཅད་ཨ་སྐྱེ་མེད་དངོས་བཟུང་དང་བྲལ་བར་ཐག་ཆོད། ཏི་འགག་མེད་རང་སྣང་དུ་ཐག་ཆོད། ཡོ་གས་གཉིས་མེད་ལ་འཁོར་བ་ལ་སོགས་པའི་སྣང་བ་བཀག་ལ་མཐས་མ་རེག་པས་འཁོར་བ་ལ་ཉམས་ང་བ་དང་བག་ཚ་བ་ལ་སོགས་ཏེ་འཇིགས་པ་ཐམས་ཅད་དང་བྲལ་བས་བདེ་བའོ། །རྒྱུའི་དུས་ན་འབྲས་བུ་ཉིད་དུ་ལྷུན་གྱིས་གྲུབ་པས། འབྲས་བུ་ལ་རེ་བ་དང་སྒུགས་པ་མེད་པས་བདེ་ཞེས་པས་རྒྱུ་སེམས་ཅན་གྱི་དུས་ན་འབྲས་བུ་སྟོང་གསལ་གྱི་ཆོས་སྐུ་ཉིད་དུ་ལྷུན་གྱིས་གྲུབ་པས་རང་ངོ་ཤེས་པས་ད་སྡོད་འབྲས་བུ་ཐོབ་པ་ལ་རེ་བ་དང་། དྲོད་རྟག་པ་ལ་སོགས་པ་སྒུགས་པ་མེད་པས་བདེའོ། །མཉམ་པ་ཉིད་ཡེ་ནས་ལྷུན་གྱིས་གྲུབ་པས། ད་སྡོད་མཉམ་ཉིད་རྒྱུད་ལ་བསྐྱེད་མི་དགོས་པས་བདེ་ཞེས་པ། ཆོས་ཐམས་ཅད་ངོ་བོ་སྣང་སྟོང་ངོས་མཉམ་པ་ཉིད་ཡེ་ནས་ངོ་བོ་རིས་མེད་དུ་ལྷུན་གྲུབ་ཏུ་གནས་པས། ད་སྡོད་མཉམ་པ་ཉིད་རྒྱུད་ལ་བསྐྱེད་པའི་རྩོལ་བ་མི་དགོས་པས་བདེའོ། །སྣང་སྲིད་ཐམས་ཅད་ཆོས་སྐུར་གསལ་བས་འབད་རྩོལ་གྱིས་དཀའ་བ་དང་བྲལ་བས་བདེའོ་ཞེས་པས་སྣང་ཞིང་སྲིད་པའི་ཆོས་ཐམས་ཅད་སྟོང་གསལ་གཉིས་མེད་ཀྱི་ཆོས་སྐུར་གསལ་བར་རྟོགས་པས་ལུས་ངག་ཡིད་གསུམ་འབད་རྩོལ་གྱི་དཀའ་བ་དང་བྲལ་བས་བདེའོ། །གསལ་བ་ལ་ཐུན་མོང་དང་ཁྱདཔར་གཉིས་ལས། དང་པོ་ལ་ལྔ་སྟེ། དངོས་པོའི་གསལ་བ་ཞེས་པ་ཤེལ་ཕྱི་ནས་བལྟས་ན་ནང་གསལ་ནང་ནས་བལྟས་ན་ཕྱི་གསལ་བའོ། །ཡུལ་གྱི་གསལ་བ་ཞེས་པ། མིག་གི་ཡུལ་དུ་གཟུགས་གསལ་བ་ལ་སོགས་པའོ། །རྣམ་པར་ཤེས་པའི་གསལ་བ་ཞེས་པ་རྣམ་པར་ཤེས་པ་སྒོ་ལྔའི་གསལ་བ་ལྟ་བུའོ། །བདུད་རྩིའི་གསལ་བ་ཞེས་པ་ཚིག་གི་བདུད་རྩིས་དེའི་དོན་གསལ་བའོ། །སྒྲོན་མེའི་གསལ་བ་ཞེས་པ་སྒྲོན་མེ་བཏེག་པས་མུན་པ་གསལ་བའོ། །དེ་རྣམས་ཐུན་མོང་གི་གསལ་བ་ཡིན་ཏེ་བསྒོམ་པའི་ཉམས་རྟགས་ཀྱི་གསལ་བ་མ་ཡིན་ནོ། །ཁྱད་པར་ནི་གཉིས་ཏེ། རང་བཞིན་གྱི་གསལ་བ་ཞེས་པ་རང་བཞིན་གཉིས་མེད་ཀྱི་ཡེ་ཤེས་སྒྲིབ་བྱེད་མེད་པའམ་ཡུལ་མེད་དུ་རང་གསལ་ལོ། །ཡེ་ཤེས་ཀྱི་གསལ་བ་ཞེས་པ་ད་ལྟར་ཡེ་ནས་གནས་པ་ངོ་སྤྲད་ཉམས་སུ་བླངས་ངོ་ཤེས་ཤིང་ཉམས་སུ་མྱོང་བའོ། །དེའི་རྒྱུ་མཚན་ནི་དབང་པོའི་སྒོ་མ་བཀག་པས་གསལ་ཅེས་པ་ཡུལ་ལྔ་བྱང་ཆུབ་སེམས་སུ་འདུས་པས་དབང་པོའི་སྒོ་མ་བཀག་སྟེ་གཟུགས་སྣང་སྟོང་དབྱེར་མེད་དུ་གསལ་བ་ལ་སོགས་པའོ། །བྱིང་རྨུགས་ཀྱི་འཐིབས་པ་དང་བྲལ་བས་གསལ་ཅེས་པ། རྟོགས་པའི་དོན་ལ་བྱིང་རྨུགས་འཐིབས་པའི་སྐྱོན་དང་བྲལ་བས་གསལ་ལོ། །བག་ཆགས་ཀྱི་ཁུ་རླུང་གིས་མ་རྙོགས་པས་གསལ་ཅེས་པ་ལས་དགེ་མི་དགེའི་བག་ཆགས་ཀྱི་ཁུ་རླུང་གིས་རྟོགས་པའི་ཡེ་ཤེས་མ་རྙོགས་པས་གསལ་ལོ། །རྟོག་པའི་རྡུལ་གྱིས་མ་དཀྲུགས་པས་གསལ་ལོ་ཞེས་པ། རྟོག་པ་འཕྲ་རགས་ཀྱི་རྡུལ་གྱི་རྟོགས་པའི་ཡེ་ཤེས་མ་དཀྲུགས་པས་གསལ་ལོ། །མི་རྟོག་པ་ལ་གཉིས་ཏེ། ཐུན་མོང་དང་། ཁྱད་པར་རོ། །ཐུན་མོང་ལ་དྲུག་སྟེ། ངོ་བོ་ཉིད་ཀྱིས་མི་རྟོག་པ་ཞེས་པ་རྡོ་ཤིང་ལ་སོགས་པ་ལྟ་བུའོ། །ཕྱིན་ཅི་མ་ལོག་པའི་མི་རྟོག་པ་ཞེས་པ་ཉན་ཐོས་ཀྱི་བདག་མེད་བསྒོམ་པ་སྟེ། སྐྱེ་བོ་དང་མུ་སྟེགས་ལས་ལྟོས་ནས་ཕྱིན་ཅི་མ་ལོག་པའོ། །སྤྲོས་པ་མེད་པའི་མི་རྟོག་པ་ཞེས་པ་དབུ་མ་སེམས་ཉིད་སྤྲོས་བྲལ་ལོ། །དྲན་བྱེད་ཀྱི་རྒྱ་དང་བྲལ་བའི་མི་རྟོག་པ་ཞེས་པ་ནི་ར་རོ་བའམ་བརྒྱལ་བ་ལྟ་བུའོ། །ཐ་སྙད་མེད་པའི་མི་རྟོག་པ་ཞེས་པ་བུ་ཆུང་ལྟ་བུའོ། །ཉེ་བར་ཞི་བའི་མི་རྟོག་པ་ཞེས་པ་གཉིད་ལོག་པས་ཚོགས་དྲུག་འགགས་པའོ། །དེ་རྣམས་ནི་ཐུན་མོང་གི་མི་རྟོག་པ་ཡིན་ཏེ་ལྟ་བསྒོམ་ཉམས་སུ་མྱོང་བའི་རྟགས་མ་ཡིན་ནོ། །ཁྱད་པར་ནི་རང་བཞིན་གྱི་མི་རྟོག་པ་ཞེས་པ་སེམས་ཉིད་རང་བཞིན་གྱིས་སྤྲོས་པ་ཐམས་ཅད་དང་བྲལ་བའི་མི་རྟོག་པའོ། །ཡེ་ཤེས་ཀྱི་མི་རྟོག་པ་ཞེས་ཡེ་ནས་གནས་པའི་དོན་ངོ་སྤྲོད་ཉམས་སུ་བླངས་པས་ངོ་ཤེས་ཤིང་ཉམས་སུ་མྱོང་བའོ། །དེའི་རྒྱུ་མཚན་ནི་ལྟ་ཞིང་སྤྱོད་པ་མེད་པས་མི་རྟོག་ཅེས་པ་བློ་ཡུལ་དུ་བྱས་ནས་པ་མེད་པས་མི་རྟོག ། ཐ་སྙད་ཀྱི་སྒྲ་དང་བྲལ་བས་མི་རྟོག་ཅེས་པ་ཐ་སྙད་ཀྱི་སེམས་ཉིད་བརྗོད་དུ་མེད་པའི་དོན་རྟོགས་ནས་སྒྲ་དང་བྲལ་བ་མི་རྟོག །གཟུང་འཛིན་གྱི་ཆར་མ་ལྷུང་བས་མི་རྟོག །ཅེས་པ་གཟུང་བའི་ཡུལ་རང་རྒྱུད་པ་དང་འཛིན་པའི་སེམས་རང་རྒྱུད་པའི་ཆར་མ་ལྷུང་བས་མི་རྟོག །བྱུང་ཚོར་གྱི་རྗེས་སུ་མ་འབྲེངས་པས་མི་རྟོག་ཅེས་པ་རྣམ་རྟོག་བྱུང་ཚོར་གྱི་རྗེས་སུ་ལམ་པའི་ཤེས་པས་མ་འབྲངས་པས་མི་རྟོག་གོ། །མི་གཡོ་བ་ལ་གསུམ་ལས། ལྟ་བའི་མི་གཡོ་ཞེས་པ་ལྟ་བ་གཟའ་གཏད་ཀྱི་ཕྱོགས་སུ་མི་གཡོ་སྟེ། ཨ་སྐྱེ་མེད་དུ་རྟོགས་པས་སྣང་བ་ཕྱོགས་གཅིག་ལ་གཟའ་ཞིང་གཏད་དུ་མེད། ཏི་འགགས་མེད་དུ་རྟོགས་པས་སྟོང་པ་ཕྱོགས་གཅིག་ལ་གཟའ་ཞིང་གཏད་དུ་མེད། ཡོ་ག་གཉིས་མེད་དུ་རྟོགས་པས་གཉིས་སྣང་ལ་གཟའ་ཞིང་གཏད་དུ་མེད། རང་གྲོལ་དུ་རྟོགས་པས་ཡུལ་ཡུལ་ཅན་ལ་གཟའ་ཞིང་གཏད་དུ་མེད་དོ། །བསྒོམ་པ་མི་གཡོ་ཞེས་པ་དམིགས་གཏད་ཀྱི་ཕྱོགས་སུ་མི་གཡོ་སྟེ། དེ་ཡང་ཨ་ཏི་ཡུལ་མེད་རྩེ་ཅིག་ཏུ་གནས་པ་ལ། སེམས་ཙམ་པ་ལྟར་སྣང་བའམ་གསལ་བ་ཕྱོགས་གཅིག་ཏུའང་མི་གཡོ། དབུ་མ་པ་ལྟར་སྟོང་པའམ་སྐྱེ་མེད་ཕྱོགས་གཅིག་ཏུ་ཡང་མི་གཡོ་སྟེ་དམིགས་གཏད་ཐམས་ཅད་དང་བྲལ་བའོ། །སྤྱོད་པ་མི་གཡོ་ཞེས་པ་སྤྱོད་པ་བླང་དོར་གྱི་ཕྱོགས་སུ་མི་གཡོ་སྟེ། ལྟ་བསྒོམ་དང་མ་བྲལ་བའི་ཤུགས་ལས་བྱུང་བ་སྤྱོད་པ་བཟང་ངན་བླང་དོར་དང་བྲལ་བའོ། །ད་ནི་ཐུན་མོང་མ་ཡིན་པའི་ཉམས་ཞེས་པ་བཅྭ་བརྒྱད་དེ། ཤིན་ཏུ་སྦྱངས་པས་ལུས་སེམས་ཁྱབ་ཅེས་པ། ལུས་ཤིང་བལ་གྱི་འདབ་མ་ལྟར་ཡང་བ་དང་། སེམས་ཤིན་ཏུ་བདེ་བའོ། །བྱས་དང་མ་བྱས་གཉིས་ཀ་འོང་ཞེས་པས་བསྒོམ་པ་བྱས་ཙ་ན་དང་མ་བྱས་པ་གཉིས་ཀ་ལ་འོང་བའོ། །དུས་ནི་ཕལ་ཆེར་ཀུན་ཏུ་འོང་ཞེས་པ་སྔ་དྲོ་བད་ཀན་གྱི་དུས་དང་། ཕྱི་དྲོ་རླུང་གི་དུས་དང་། ཉིན་ཕྱེད་ཁྲག་དང་མཁྲིས་པའི་དུས་ཐད་དུ་འོང་བའོ། །སྤྱོད་ལམ་བཞི་དང་མཚུངས་པར་ལྡན། ཅེས་པ། འགྲོ་བ། འདུག་པ། ཉལ་བ། ཟ་བའི་དུས་སུ་ཡང་བསྒོམ་དང་མཚུངས་པར་ལྡན་ནོ། །མིག་ནི་དང་བཙུམས་གཉིས་ཀར་བདེ་ཞེས་པ་བསྒོམ་པ་ཀློང་དུ་གྱུར་པས་མིག་ཕྱེ་ཡང་བདེ། བཙུམས་ཀྱང་བདེའོ། །ལེགས་ཉེན་སྐྱོན་གྱིས་ཆེར་མི་གཡོ་ཞེས་པ་ཉོན་མོངས་ཆགས་སྡང་གི་སྐྱོན་གྱིས་བསྒོམ་པ་ལ་མི་གནོད་པའོ། །ཐ་མལ་རྟོགས་པ་ཐམས་ཅད་ནུབ་ཅེས་པ་གཟུགས་ལ་སོགས་པ་ཅི་མཐོང་ཡང་ཉེས་ལེགས་ཀྱི་རྟོག་པ་ཐམས་ཅད་ནུབ། དེ་ལ་སོགས་ཏེ་ཐ་མལ་གྱི་སྤྱོད་པ་ཐམས་ཅད་ནུབ། ཐ་མལ་སྒྲ་ཆེན་གནོད་མི་འགྱུར། ཞེས་པ་སྒྲ་ཅི་གྲགས་ཀྱང་བསྒོམ་པ་ལ་མི་གནོད། ཚིག་གི་ཐ་སྙད་ཀུན་དང་བྲལ་ཅེས་པ་ཅི་སྨྲ་ཡང་ལེགས་ཉེས་དང་བྲལ་བའོ། །དམ་ཆོས་གང་མཐོང་བདུད་རྩིར་ལྟ་ཞེས་པ། གང་བལྟས་བལྟས་ཀྱི་དོན་གོ་སྟེ་ཆོས་ཚུལ་ལ་སྨྲ་བའོ། །འགྲོ་བ་གང་མཐོང་སྙིང་རྗེ་སྐྱེ་ཞེས་པ་མ་རྟོགས་པའི་སེམས་ཅན་འཁྲུལ་པ་སྤྱོད་པ་ཐམས་ཅད་ལ་སྙིང་རྗེ་སྐྱེ། ལམ་ལ་གང་གནོད་བདུད་དུ་བལྟ་ཞེས་པ་ལམ་ཉམས་སུ་ལེན་པ་ལ་གནོད་ན་ཆོས་དང་རུ་ཡང་བདུད་དུ་བལྟ། དངོས་པོ་གང་མཐོང་ཞེན་ལ་ལོག་ཅེས་པ་འདོད་ཡོན་གྱི་དངོས་པོ་གང་མཐོང་ཡང་ཐ་མལ་གྱི་ཞེན་པ་རང་ཁ་མ་ལོག །མཚན་མའི་ཆོས་སྤྱོད་ཞེན་དང་བྲལ་ཅེས་པ་མདོ་དང་སྙིང་པོ་དང་བསྐོར་བ་ལ་སོགས་པ་མེད་ཐབས་མེད་སྙམ་པའི་ཞེན་པ་དང་བྲལ། བག་ཆགས་ངན་པའི་རྨིས་ལྟས་ནུབ་ཅེས་པ་འཇིག་རྟེན་འཁྲུལ་རྟོག་བག་ཆགས་ངན་པའི་རྨིས་ལྟས་ནུབ། གློ་བུར་ནད་ཀྱིས་གནོད་མི་ནུས་ཞེས་འགྲེ་རྟོག་ཞི་བས་ན་ཚ་གློ་བུར་བའི་གནོད་པ་མི་འབྱུང་འབྲས་བུ་མངོན་ཤེས་རེ་སྒུགས་བྲལ་ཅེས་པས་རང་སེམས་སངས་རྒྱས་སུ་རྟོགས་པས་འབྲས་བུ་ཐོབ་ལ་ལ་རེ་བ་དང་། ལམ་གྱི་དྲོད་རྟགས་དང་མངོན་ཤེས་ལ་སོགས་པ་འོང་དུ་རེ་ནས་སྒུགས་པ་དང་བྲལ་ལོ། །བཅྭ་བརྒྱད་ལྡན་པའི་གང་ཟག་ནི་ཞེས་པ་ལས་འཕྲོ་དང་སྐལ་བར་ལྡན་པ། མན་ངག་ཟབ་མོ་ཡོད་པ། རྣལ་འབྱོར་ཚད་དུ་ཕྱིན་པའི་ཉམས་རྟགས་ཀྱི་བྱེ་བྲག་བསམ་གྱིས་མི་ཁྱབ་པ་ཡོད་ཀྱང་མདོར་བསྡུ་ན་བཅྭ་བརྒྱད་པོ་དེ་དང་ལྡན་པ་ནི། རྒྱལ་སྲས་དང་པོའི་མཆོག་ཡིན་ནོ་ཞེས་པ་རྒྱལ་བ་ནི་སངས་རྒྱས། དེའི་སྲས་བྱང་ཆུབ་སེམས་དཔའ། དང་པོ་ནི་ས་དང་པོ་ཡིན་ཏེ། མཆོག་ཅེས་པ་ས་དང་པོ་བས་ཀྱང་ཉམས་བཅྭ་བརྒྱད་པོ་འདི་སྐྱེས་པ་མཆོག་ཡིན་ནོ། །ཉམས་དང་སྦྱར་ཏེ་ཞེས་པས། ཐུན་མོང་གི་ཉམས་ལས་ཁྱད་པར་གྱི་ཉམས་མ་བྱུང་ན་ཕྱིར་བཅོས་པར་འཐད་དམ་སྙམ་སྟེ་བླ་མ་མི་གསུང་། ཉམས་དེ་རྣམས་མ་བྱུང་ན་ཕྱིར་བཅོས་ཏེ། ཚོགས་གནས་བསྐྱར། ཟས་བདུན་བསྟེན། ཉེས་པ་སྤང་། ཤེས་པ་ཐང་གཅད་དོ། །ཡང་བྱིང་ན་གསེང་རྒོད་ན་འཐོར་བ་བསྡུ། ཡང་སྐྱོན་ཅི་འབྱུང་ཡང་། ཨ་སྐྱེ་མེད། ཏི་འགགས་མེད། ཡོ་ག་གཉིས་མེད་དུ་ཤེས་པར་བྱ་སྟེ་བློ་རབ་ཀྱི་བཅོས་ཐབས་སོ། །དམ་པའི་ཕྱག་ཆ་ན། གང་ཟག་ལ་བསྒོམ་མ་འཕྲོད་པའི་སྐྱོན་འཕྲོད་པའི་ཡོན་ཏན་གྱིས་བཅོས། བག་ཆགས་མ་ཟིན་པའི་སྐྱོན་དེའི་ཡོན་ཏན་གྱིས་བཅོས། སེམས་མ་གནས་པའི་སྐྱོན་གནས་པའི་ཡོན་ཏན་གྱིས་བཅོས་སོ། །བྱིང་རྒོད་བཅོས་པ། ངོ་བོ་དང་། རྒྱུ་དང་། རྐྱེན་ལ་སོགས་བཅོས་ཐབས་མང་དུ་གདའ་སྟེ་བླ་མ་མི་གསུང་ངོ་། །བདུན་པ་བསྒོམ་པ་རབ་འབྲིང་གསུམ་མམ་དགུའི་སྒོ་ནས་སེམས་གནས་པའི་ཚེ་ད་བསྟན་པ་ནི། དབུགས་དང་ཞེས་པ་གསུམ་སྟེ། སེམས་གནས་པ་རབ་ལ་རྒྱུ་བ་མི་ཚོར། འབྲིང་ལ་བརྟགས་ན་ཚོར། ཐ་མ་ཚོར་བའོ། །ལུས་དང་ཞེས་པ་གསུམ་སྟེ། གནས་པ་རབ་ལ་ལུས་ཀྱི་སྣང་བ་མི་འཆར། འབྲིང་བརྟགས་ན་འཆར། ཐ་མ་ལ་མ་བརྟགས་ཀྱང་འཆར་རོ། །སྒྲ་དང་ནི་ཞེས་པ་གསུམ་སྟེ། གནས་པ་རབ་སྒྲ་ཅི་གྲགས་ཀྱང་མི་གནོད། འབྲིང་ཐོས་ཀྱང་ཞེན་པ་མི་འཇུག །ཐ་མ་གྲག་ཀྱང་མི་གནོད་དོ། །ཁམས་དང་ཞེས་པ་གསུམ་སྟེ། རབ་བཟང་དུ་འགྲོ། འབྲིང་པོ་ཐུབ། ཐ་མ་ངན་དུ་འགྲོ། ཤིན་ཏུ་སྦྱང་པ་དང་ཞེས་པ་འཇམ་རྩུབ་གཉིས་ཏེ། འཇམ་པ་ནི་ལུས་འོ་མ་བཏབ་པ་ལྟ་བུ་དང་། སྦྲའི་ཕྱི་ལོགས་ནས་ཉི་མ་ཤར་བ་ལྟ་བུའོ། །ཤེས་པ་དགའ་ཞིང་བདེ་འབོལ་ལེ་གནས་པའོ། །རྩུབ་པ་ནི་སེམས་གནས་པས་ལུས་འདར་བ་དང་། སྤྲུག་པ་དང་། ཤེས་པ་མི་རྟོག་པ་ལྷངས་ལྷངས་པ་སྐྱེའོ། །གནས་པ་རབ་ལ་ལུས་སེམས་ལ་ཆེར་ཕེབས་པ་དང་། འབྲིང་ལ་འབྲིང་དུ་ཕེབས། ཐ་མ་ལ་ཆུང་ངུ་ཕེབས་པའོ། །ཡུན་དང་ཞེས་པ་གསུམ་སྟེ། གནས་པ་རབ་ཀྱིས་ཐུན་ཚད་སྐྱོལ། འབྲིང་གིས་ཆུ་ཚད་སྐྱོལ། ཐ་མས་དབྱུག་ཚོད་སྐྱོལ་ལོ། །ཡང་ན་རབ་གོམ་པ་དྲུག་ཅུ། འབྲིང་བཞི་བཅུ། ཐ་མ་ཉི་ཤུའོ། །རྗེས་ཀྱི་ཤེས་པ་དང་ཞེས་པ་མཉམ་གཞག་བཏངབའི་རྗེས་ཐོབ་ཡིན་ཏེ་གསུམ། རབ་བཟང་དུ་འགྲོ། འབྲིང་ཁྱད་མེད། ཐ་མ་ངན་དུ་འགྲོ། སྤྱོད་ལམ་ཞེས་པ་གསུམ་སྟེ། གནས་པ་རབ་ཀྱིས་སྤྱོད་ལམ་བཞི་ཀ་ལ་ཆེར་ཁྱབ། འབྲིང་འབྲིང་དུ་ཁྱབ། ཐ་མ་ཆུང་ངུ་ཁྱབ་པའོ། །ཡང་ན་རབ་ཀྱི་བཞི་ཀ་ལ་ཁྱབ། འབྲིང་གིས་གཉིས་གསུམ་ཁྱབ། ཐ་མས་གཅིག་ལ་ཁྱབ་པའོ། །ཉོན་མོངས་འགྲིབ་མི་འགྲིབ་ཅེས་པ་གསུམ་སྟེ། རབ་ཉོན་མོངས་པ་ཟིལ་གྱིས་གནོན། འབྲིང་འབུར་འཇོམས། ཐ་མ་རྗེས་སྙེག་གོ། །ཡང་ན་རབ་ཉོན་མོངས་པ་ལྔ་ཀ་འགྲིབ། འབྲིང་འགའ་འགྲིབ། ཐ་མ་རྒྱུན་ཐུང་བའོ། །མཚན་ཉིད་བཞིའམ་བཅུ་ཡིས་ནི་ཞེས་པ་ལ། བཞི་ནི་བདེ་བ། གསལ་བ། མི་རྟོག་པ། མི་གཡོ་བའོ། །བཅུ་ནི་སྦྱངས་པ་འཇམ་རྩུབ་གཉིས་རེ་རེར་ཕྱེ་བའོ། །ཡང་ན་བཞི་ནི། དབུགས་དང་ལུས་དང་སྒྲ་གཅིག །ཁམས་དང་ཤིན་ཏུ་སྦྱངས་པ་དང་གཉིས། ཡུན་དང་རྗེས་ཀྱི་ཤེས་དང་པ་གསུམ། སྤྱོད་ལམ་ཉོན་མོངས་འགྲིབ་མི་འགྲིབ་མི་འགྲིབ་དང་བཞིའོ། །བཅུ་འགྲེ། རབ་འབྲིང་དགུའམ་གསུམ་དུ་བསྟན་ཅེས་པ་དབུགས་ལ་སོགས་པ་རེ་རེ་ལ་རབ་འབྲིང་དགུ་དགུར་དབྱེ་སྟེ། རབ་ཀྱི་རབ། རབ་ཀྱི་འབྲིང་། རབ་ཀྱི་ཐ་མའོ། །འབྲིང་གི་རབ། འབྲིང་གི་འབྲིང་། འབྲིང་གི་ཐ་མའོ། །ཐ་མའི་རབ། ཐ་མའི་འབྲིང་། ཐ་མའི་ཐ་མའོ། །ལུས་ལ་སོགས་པ་གཞན་ལ་དེ་ལྟར་སྦྱར། ཡང་དམ་པ་སེ་བྲག་པ་ནི། དགུ་པོ་རབ་འབྲིང་གསུམ་དུ་གཏན་དུ་བཞེད་དོ། །དེས་ནི་སེམས་གནས་པ་ཆེ་ཆུང་གི་ཚད་བསྟན་ནོ། །བརྒྱད་པ་ཉེས་པ་དྲུག་གམ་བརྒྱད་སྤང་ཞིང་བསྟན་པའི་ཆོ་ག་གཞུང་བཞིན་དུ་བྱ་བའོ་ཞེས་པ་ལ་གཉིས་ཏེ། ཉེས་པ་སྤང་བ་དང་། བསྟན་པའི་ཆོ་ག་བྱ་བའོ། །དང་པོ་ལ་བརྒྱད་དམ་དྲུག་སྟེ། དངོས་པོ་མ་ཤེས་པའི་ཉེས་པ་དང་ཞེས་པ་ལྟ་བ་མ་རྟོགས་ཏེ། ཨའི་ངོས་ནས་སྐྱེ་མེད་དུ་མ་ཤེས། ཏིའི་ངོས་ནས་འགག་མེད་དུ་མ་ཤེས། ཡོ་གའི་ངོས་ནས་གཉིས་མེད་དུ་མ་ཤེས་པ་ནི་བསྒོམ་པའི་ཉེས་པའོ། །མཚན་ཉིད་མ་ཤེས་པའི་དང་ཞེས་ཆོས་སྤྱད་དེ་ད་རང་གི་མཚན་ཉིད་མཉམ་ཉིད་དུ་མ་ཤེས་པའོ། །དེ་ཡང་སྤྱིའི་མཚན་ཉིད་ཨ་སྐྱེ་མེད་སྟོང་མཉམ། རང་གི་མཚན་ཉིད་ཏི་འགག་མེད་སྣང་མཉམ། ཡོ་ག་སྣང་སྟོང་ངོས་མཉམ་གྱི་དབྱེར་མེད་དོ། །རྟུག་ཏུ་བྱེད་ན་དེ་གཉིས་བ ལྡོག་པ་གཅིག་པས་གཅིག་ཏུ་བགྲང་ངོ་། །དུས་ཚོད་མི་ཤེས་པའི་དང་ཞེས་པ་བསྒོམ་པ་འོང་དུས་སུ་མ་བསྒོམས་མི་འོང་བའི་དུས་བསྒོམ་པའོ། །ཁམས་ཀྱིས་ནུས་པ་དང་སྦྱོར་མ་ཤེས་པའི་དང་ཞེས་པ་ནི་ཁམས་བཟང་དུས་སྒོམ་ན་དུས་སུ་མི་བསྒོམ་པ་ཡིན་པ་ལ། དེ་ལྟར་མ་ཤེས་ཁམས་ངན་དུས་སུ་བསྒོམ་པས་ཁམས་ལོག་ནས་བསྒོམ་པ་རྐང་ཆད་པའོ། །ཆོག་མ་ཤེས་པའི་དང་ཞེས་བསྒོམ་པ་བཟང་པོར་ཡོད་པ་ལ། དེ་བས་ཀྱང་བཟང་པོ་འདོད་ནས་བསྒོམ་པས་ཁམས་ལོག་པའམ། ཉམས་བཟང་པོ་ཡོད་པ་ལ་དེ་བས་ཀྱང་བཟང་བ་འདོད་ནས་བསྒོམས་པས་ཁམས་ལོག་པའམ། གདམ་ངག་ཟབ་མོ་སྔ་ནས་ཡོད་པ་གཞག་ནས་ཕྱི་མ་ཚོལ་བའོ། །གཟེངས་སྟོད་གྲགས་པའི་དང་ཞེས་པ་སྤྱིར་སློབ་དཔོན་དགེ་བས་བསྒོམ་གདབ་བྱ་བ་ཡིན་པ་ལ། དེ་མ་བྱས་པར་ཁྱོད་ལ་བསྒོམ་འོང་བར་འདུག་བྱས་པས། ང་ལ་བསྒོམ་འོང་བར་འདུག་སྙམ་ནས་གནས་པ་བཞག་ནས་སེམས་གཟེངས་བསྟོད་པའོ། །གཞུང་ལྟར་བྱས་པའི་ཁྲིད་ཀྱི་དུས་སུ་སྔར་གྱི་ལུས་ངག་གི་དགེ་སྦྱོར་གཞུང་ལྟར་བྱས་ནས་བསམ་གཏན་མ་བྱས་པའོ། །གཞུང་ལྟར་མ་བྱས་པའི་ཉེས་པའོ་ཞེས་པ་ནི། རུས་གསུངས་པ་ལྟར་མ་བྱས་པས་སེམས་གནས་སུ་མ་གཏུབ་པའོ། །དྲུག་ཏུ་བྱེད་ན་དེ་གཉིས་བཟློག་པ་གཅིག་པས་གཅིག་ཏུ་བསྒང་ངོ་། །དེ་ལྟར་བསྒོམ་བྱེད་པའི་ཉེས་པ་དྲུག་གམ་བརྒྱད་པོ་དེ་སྤང་དགོས་སོ། །བསྟན་པའི་ཆོ་ག་གཞུང་བཞིན་དུ་བྱ་བའོ་ཞེས་པ་ནི། ཚོགས་གནས་དང་ཟས་བདུན་བསྟེན་པས་སྨིན་པའི་རྟགས་བྱུང་ནས་ཐུན་ལ་འཇུག་སྟེ། དང་པོ་ལ་ཐུན་གཅིག །གཉིས་པ་ལ་གཉིས། གསུམ་པ་ལ་གསུམ། བཞི་པ་ལ་བཞི། ལྔ་པ་ལ་ལྔ། དྲུག་པ་ལ་དྲུག །བདུན་པ་ལ་བདུན། བརྒྱད་པ་ལ་བརྒྱད། དགུ་པ་ལ་དགུ། ཉི་མ་བཅུ་པ་ལ་ཐུན་བཅུ་བྱས་ལ། ཉི་མ་གཅིག་ངལ་བསོ། ཡང་ཉི་མ་དང་པོ་ལ་ཐུན་བཅུ། གཉིས་པ་ལ་དགུ། གསུམ་པ་ལ་བརྒྱད། བཞི་པ་ལ་བདུན། ལྔ་པ་ལ་དྲུག །དྲུག་པ་ལ་ལྔ། བདུན་པ་བཞི། བརྒྱད་པ་ལ་གསུམ། དགུ་པ་ལ་གཉིས། བཅུ་པ་ལ་གཅིག །ཐུན་གྲངས་མང་ཉུངས་ཀྱི་ཉུང་བའི་དོད་པ་ཆེར་བཏང་ལ། ཕྱི་མ་ཐུན་གཅིག་དུ་ཕྱམ་ཚེར་བཏང་ལ་སྤྱོད་ལམ་ལ་བརྒལ་ལོ། །མ་ཁེལ་ན་བརྟན་པ་ལ་ནན་ཏན་བསྐྱེད་དོ། །རྒྱས་པར་ཁྲིད་དུ་ཤེས་སོ། །ད་ནི་དེ་ལྟར་སེམས་གནས་ཀྱང་རྣལ་འབྱོར་པ་དེ་དྲོད་ཚད་ཀྱིས་མ་ཟིན་ན་ཕན་མེད་པས་དེ་དྲོད་ཚད་ཀྱིས་བཟུང་བར་བྱ་བའི་ཐབས་ཀྱི་རིམ་པའི་མན་ངག་དང་ཞེས་པས་བདུན་ཏེ། རྟེན་གྱི་དྲོད་ཚད་དང་། ཐུན་གྱི་དང་། བཟང་ངན་གྱི་དང་། བཅོས་ཐབས་ཀྱི་དང་། ཉམས་ཀྱི་དང་། བོགས་དབྱུང་བའི་དང་། རྟགས་ཀྱི་དྲོད་ཚད་དོ། །དང་པོ་རྟེན་གྱི་དྲོད་ཚད་ནི། རྟེན་རྒྱས་པ་དང་། རྒུད་པ་དང་། སོ་ཐུབ་པ་དང་། ཤིན་ཏུ་རྒུད་པའོ། །རྟེན་རྒྱས་པ་ནི་ཁ་ཟས་དང་སྤྱོད་ལམ་གྱི་ཆ་སྙོམས་པས་རྩ་དར། རྩ་དར་བས་རླུང་དར། རླུང་དར་བས་ལུས་ཀྱི་རྟེན་ཐིག་ལེ་རྒྱས་ཏེ་བསྒོམ་པ་བཟང་དུ་འོང་། རྟེན་སོ་ཐུབ་པའི་དུས་སུ་ཁམས་སོ་ཐུབ་པར་འོང་པས་བསྒོམ་པ་ཡང་སོ་ཐུབ་ཏུ་འོང་ངོ་། །རྟེན་རྒུད་པ་ནི་ཁ་ཟས་དང་སྤྱོད་ལམ་མ་སྙོམས་པས་འབྱུང་བ་ཆ་འཁྲུགས་ཏེ་རྟེན་རྒུད། རྟེན་རྒྱུད་པས་རླུང་རྒུད། ལུང་རྒུད་པས་རྟེན་ཐིག་ལེ་ཉམས་ཏེ་བསྒོམས་ཀྱང་ངན་དུ་འགྲོའོ། །རྟེན་ཤིན་ཏུ་རྒུད་པའི་དུས་སུ་མགོ་ལུས་བགས་ཀྱིས་ལྕི་བ་ལ་སོགས་པ་མི་འདོད་པའི་རྟགས་འབྱུང་ངོ་། །ཐུན་གྱི་དྲོད་ཚད་ནི། དབུགས་ཁུག་པ་བཅྭ་བརྒྱད་ཀྱིས་གཞི་གཟུང་ལ་ཡར་གྱིས་འཕེལ་བཅུ་དང་མར་གྱི་འགྲིབ་བཅུ་་བྱ་སྟེ། རྟེན་རྒྱས་པའི་དབང་དུ་བྱས་པའོ། །རྟེན་ཐ་མལ་པ་ལ་བསྒོམ་སྐྱེ་འབྲི་མི་བྱ་བར་ཐང་གཅིག་ཏུ་གཞག་གོ། །རྟེན་རྒུད་པའི་དུས་སུ་བསྒོམ་པའི་ཐུན་ཆུང་དུ་བཏང་ངོ་། །ཐུན་གྲངས་ཀྱང་ཉུང་དུ་བྱའོ། །རྟེན་ཤིན་ཏུ་རྒུད་པའི་དུས་སུ་ཐུན་ཚད་བཟུང་དུ་མེད་དོ། །བསྒོམ་ཤོལ་ལ་ཟས་བདུན་བརྟེན་ཏེ་ཁམས་གསོ་བ་བྱའོ། །བཟང་ངན་གྱི་དྲོད་ཚད་ནི། ལྟ་བ་དང་མཐུན་ཤས་ཆེ་ཞིང་དེའི་ངང་ལ་གནས་པ་ནི་བསྒོམ་པ་བཟང་བའོ། །ལྟ་བ་དང་མཐུན་ཤས་ཆུང་ན་ཞི་གནས་མཐུག་པོ་འདུག་ཀྱང་བསྒོམ་པ་ངན་ཏེ། ཧད་པོ་བོགས་མེད་བསྒོམ་པའི་བདུད་ཅེས་སོ། །ཡང་ན་བསྒོམ་པ་རབ་འབྲིང་དགུའམ་གསུམ་དང་ཡང་བསྟུན་ནོ། །བཅོས་ཐབས་ཀྱི་དྲོད་ཚད་ནི། ལྟ་བས་བཅོས་པ་དང་། སྤྱོད་པས་བཅོས་པའོ། །དང་པོ་ལ་གཉིས་ཏེ། སྤྱིར་བཅོས་པ་དང་། བྱེ་བྲག་ཏུ་བཅོས་པའོ། །སྤྱིར་བཅོས་པ་ནི་བསྒོམ་པའི་སྐྱོན་བྱིང་རྒོད་ཡིན་པས། ཨ་སྐྱེ་མེད་ལ་བྱིང་རྒོད་མ་སྐྱེས་ཏེ་ངོས་བཟུང་དང་བྲལ། ཏི་འགག་མེད་ལ་བྱིང་རྒོད་དུ་མ་འགགས་ཏེ་སེམས་ཉིད་རང་སྣང་། ཡོ་ག་ལ་བྱིང་རྒོད་ཀྱི་སྣང་པ་མ་བཀག་ལ་མཐས་མེ་རག་གཉིས་མེད་རང་སར་གྲོལ་ལོ། །བྱེ་བྲག་ཏུ་བཅོས་པ་ནི། བྱིང་པ་ཨ་སྐྱེ་མེད་དུ་བཅོས་ཏེ། བྱིང་པ་དེ་ཉིད་ངོས་ཆོས་ཉིད་སྐྱེ་མེད་ཀྱི་ངང་དུ་འདུག་པས་དེ་ལྟར་ཤེས་དགོས། རྒོད་པ་ཏི་འགག་མེད་དུ་བཅོས་ཏེ་རྒོད་པ་སེམས་ཉིད་འཛིན་མེད་ཀྱི་རིགས་པ་རང་སྣང་དུ་འདུག་གོ། །དེ་གཉིས་སུ་མེད་པ་རང་གྲོལ་དུ་བཅོས་སོ། །སྤྱོད་པས་བཅོས་པ་ནི། བྱིང་ན་གཅེར་བུ་དང་ཁྲུས་བྱ། ས་མཐོ་སར་སྡད། རིག་པ་གཡེར་གདོད། ཟས་རྩུབ་པ་བསྟེན་ཅིང་མུན་པ་དཀར་སར་བསྒོམ་མོ། །རྒོད་ན་གོས་དྲོད་བགོན། བསྐུ་མཉེ་བྱ། ཤེས་པ་འཕང་སྨད། ཟས་བཅུད་ཅན་བསྟེན་ལ་མུན་ཁུང་དུ་བསྒོམ། ཉམས་ཀྱི་དྲོད་ཚད་ནི། དང་པོ་གཡོ་བའི་ཉམས་ནི་རི་གཟར་གྱི་ཁ་ནས་ཆུ་འབབ་པ་དང་འདྲ་སྟེ། ཤེས་དམིགས་པ་ལ་གཏད་ཀྱང་དར་ཅིག་ཀྱང་སྡོད་དུ་མི་བཏུབ་སྟེ། རེས་བསྒྲིམས་ཀྱང་མི་སྡོད་པ་ལ། མ་གཞག་ཀྱང་རེ་འགག་སྡོད་པའོ། །ཐོབ་པའི་ཉམས་ནི་རང་གི་ཤེས་པ་ཐང་ན་བཅད་བྱིང་རྒོད་ཀྱི་དབང་དུ་མི་འགྲོའོ། །དེ་ལ་གཏོང་མི་བྲ་བ་དང་ཆོས་ཉིད་ཀྱི་རོ་ཆགས་འབྱུང་ངོ་། །གོམས་པའི་ཉམས་ནི། རང་གི་ཤེས་པ་བཏང་སྙོམས་སུ་གཞག་པས་རྐྱེན་མེད་ན་མི་འཕྲོའོ། །བརྟེན་པའི་ཉམས་ནི་རྐྱེན་དབང་དུ་མི་འགྲོ་སྟེ། རྐྱེན་གྱིས་མི་གནོད་པའོ། །མཐར་ཕྱིན་པའི་ཉམས་ནི་ར་རོ་བ་དང་བརྒྱལ་བ་དང་། གཉིད་མཐུག་པོར་སོང་བའི་དུས་སུ་ཡང་བསྒོམ་འབྱུང་བའོ། །གཞུང་ནས་བཤད་པའི་ཉམས། ཏིང་ངེ་ཆེ་བའི་ཉམས་ལྔ་དང་། ཤེས་རབ་ཤས་ཆེ་བའི་ཉམས་ལྔ་དང་། གཉིས་ཀ་ཤས་ཆེ་བའི་ཉམས་བདུན་དང་། གཉིས་ཀ་ཤས་ཆུང་བའི་ཉམས་བདུན་ནི། སེམས་འཛིན་གྱི་སྐབས་སུ་འབྱུང་བའོ། །གང་ཟག་འཇུག་པའི་ཉམས་ནི་མགོ་ཞབས་སུ་འབྱུང་བའོ། །རྣལ་འབྱོར་སྐྱེ་བའི་ཉམས་ནི་ཐུན་མོང་གི་ཉམས་ཚོ་བསྒོམ་བསྡོ་བའི་དུས་སུ་འབྱུང་ངོ་། །ཐུན་མོང་མ་ཡིན་པའི་ཉམས་ནི། མཐར་ཕྱིན་པའི་དུས་སུ་འབྱུང་ངོ་། །བོགས་དབྱུང་བའི་དྲོད་ཚད་ནི། ལྟ་བས་བོགས་དབྱུང་སྟེ། ལྟ་བས་ལྟ་རུ་མེད་པར་ལ་བཟླ། བསྒོམ་པས་བསྒོམ་དུ་མེད་པར་ལ་བཟླ། སྤྱོད་པས་སྤྱོད་དུ་མེད་པར་ལ་བཟླ་སྟེ། ལྟ་བསྒོམ་གྱི་ཞེན་པ་དགྲོལ་ལོ། །རྒྱས་པར་མ་གྲུབ་པ་ལ་བཟླ་བ་དྲུག་གི་སྐབས་སུ་ཤིས་སོ། །ཡང་ན་བོགས་དབྱུང་བཅུ་གསུམ་དང་བསྟུན་ནོ། །རྟགས་ཀྱི་དྲོད་ཚད་ནི་འདོད་པའི་རྟགས་དང་མི་འདོད་པའི་རྟགས་ཅི་བྱུང་ཡང་དགའ་བྲོད་མི་བྱའོ། །རྒྱས་པར་བདུད་ལེ་ལས་ཤེས་སོ། །དེ་ལྟར་རྣལ་འབྱོར་པ་དེ་དྲོད་ཚོད་ཀྱིས་ཟིན་ཀྱང་བོགས་མ་བྱུང་ན་ཕན་མེད་པས། དེ་གོང་ནས་གོང་དུ་ཁྱད་པར་དུ་འགྲོ་བ་བོགས་དབྱུང་བ་ཐབས་ཀྱི་རིམ་པའི་མན་ངག་དང་ཞེས་པ་བཅུ་གསུམ་སྟེ། ཚོགས་ལ་གནས་པས་བོགས་དབྱུང་བ་ཞེས་པ་ལུས་ཚོགས་ལ་གནས་ཏེ་བྱ་བ་སྤང་། ངན་སྲ་བ་བཅད། ཡིད་མནོ་བསམ་ཅི་ཡང་མི་བཏང་བས་བསྒོམ་པ་བོགས་དབྱུང་བའོ། །མཚན་མ་རྟེན་ཅན་སྔོན་དུ་སོང་པས་ཞེས་པ་མཚན་མ་དབྱིབས་ཁ་དོག་དང་། རྟེན་ཅན་རྟེན་པ་ལྟ། དེ་བསྒོམས་ནས་མི་རྟོག་པ་བསྒོམས་ཏེ་བོགས་དབྱུང་བའོ། །བསམ་གཏན་སྤེལ་ཁ་དང་ཞེས་པ་བསམ་གཏན་མཚན་མར་མི་རྟོག་པ་རྒྱུད་ལ་སྤེལ་བས་བོགས་དབྱུང་བའོ། །ཡང་ན་རེས་མཚན་བཅས་རེས་མི་རྟོག་པ་སྤེལ་བས་སོ། །སོ་སོར་རྟོག་པའི་ཤེས་རབ་ཀྱིས་ཞེས་པ་སྤྱི་དང་རང་གི་མཚན་ཉིད་ཤེས་པར་བྱ་སྟེ། སྤྱི་དང་བསྟུན་ན་མི་རྟག་པ། སྡུག་བསྔལ་བ། སྟོང་པ། བདག་མེད་པའོ། །རང་གི་མཚན་ཉིད་ས་སྲ་ཞིང་མཁྲེགས་པ། ཆུ་རླན་ཞིང་གཤེར་བ་ལ་སོགས་པའོ། །ཨ་ཏི་ནི་ཆོས་ཉིད་སྐྱེ་བ་མེད་པ་སྤྱིའི་མཚན་ཉིད། འགག་པ་མེད་པ་རང་མཚན་ཉིད། དེ་ལ་རྟོག་སྤྱོད་བཏང་ལ་ཤེས་རབ་ཀྱི་མེ་སྦར་བ་བོགས་དབྱུང་། ཡང་ན་ཟབ་མོའི་དོན་ལ་ཐོས་པར་བྱས་ལའོ། །བསྟི་ཞིང་ངལ་བསོ་བས་དང་ཞེས་པ་འགྲོ་ལས་ལ་སོགས་པས་ལུས་ངག་དུབ་པ་དེ་སྐབས་སུ་ངལ་བསོ་བའོ། །ཡང་ན་སྒོམ་པ་ངལ་བག་རེ་གསོ་ཞིང་བསྒོམས་ན་བོགས་འོང་བསམ་མནོ་དྲག་པོས་དང་ཞེས་པ་ཆོས་ཉིད་ལ་ཐེ་ཚོམ་མེད་ཅིང་བྱིང་རྒོད་སེལ་བའི་བསམ་མནོ་དྲག་པོས་སོ། །ལྟ་རྟོག་དྲག་པོས་དང་ཞེས་པ་མདོ་ལུང་ཟབ་མོའམ་བསྒོམ་ཡིག་ལ་སོགས་པ་བྱའོ། །བསྒྲོལ་གླིང་དྲག་པོས་དང་ཞེས་པ་ཐལ་ཕྱིར་བརྩོད་པ་མིན་པའི་ཉམས་བསྡུར་གྱི་བསྒྲོ་གླིང་ངོ་། །དེ་རྣམས་ཞག་བདུན་བདུན་ཙམ་བྱས་ལ་བོགས་དབྱུང་ངོ་། །ཁ་ཟས་དང་ཞེས་པས་བྱིང་ན་བད་ཀན་ཡོད་པས་རྩུབ་པ་དང་ཡང་པ་བཟའ། སྣུམ་པ་དང་ལྕི་བ་སྤང་། རྒོད་ན་རླུང་ཡོད་པས་ཟས་བཅུད་ཅན་དང་ལྕི་བ་བཟའ། རྩུབ་པ་སྤང་ངོ་། །འཁམས་དང་གང་འཕྲོད་ཟོས་ན་བོགས་འོང་། སྨྲ་བཅད་དྲག་པོ་དང་ཞེས་པས་ངག་མི་སྨྲ་བར་ལྐུགས་པའི་ཚུལ་དུ་བྱས་ན་བོགས་འོང་། ལུས་སྨྲ་བ་བཅད་པ་དང་ཡང་བསྟུན་ལ་བོགས་དབྱུང་ངོ་། །སྤྱོད་ལམ་དང་ཞེས་པ་འགྲོ་བ་ལ་སོགས་པའི་སྤྱོད་ལམ་གང་བྱེད་ཀྱང་ལྟ་བསྒོམ་གྱི་ངང་ལས་མ་ཡེངས་ཏེ་རོ་སྙམས་པས་བོགས་དབྱུང་ངོ་། །བརྟུལ་ཞུགས་དང་ཞེས་པ་གཙང་སྨེ་དང་བཟང་ངན་དང་ངོ་ཚ་བའི་རྟོག་པ་ལ་སོགས་པ་ཐམས་ཅད་སྤངས་ཏེ་ཉམས་ང་བ་མེད་པས་སོ། །མན་ངག་གི་བོགས་དབྱུང་པའོ་ཞེས་པ་ལྟ་བ་ཉམས་སུ་མྱོང་བའི་དོན་དེ་ཡངས་དོག་མེད་པ་ཆེ་ཆུང་མེད་པའི་དོན་རྒྱུན་དུ་དྲན་པས་སམ། ཡང་ན་མན་ངག་སྣ་ཚོགས་ཏེ། རྩ་དང་རླུང་ཐིག་ལེ་དང་ལྟ་བསྒོམ་ལ་སོགས་པ་རྣམ་པ་སྣ་ཚོགས་པས་བོགས་དབྱུང་བའོ། ༈ །ད་ནི་དེ་ལྟར་རྣལ་འབྱོར་པ་དེ་བོགས་བྱུང་ཡང་ལས་ལོག་པར་འགྲོ་བས་གོལ་ས་ཡིན་པས། གོལ་ས་བཅད་པ་ཐབས་ཀྱི་རིམ་པའི་མན་ངག་དང་ཞེས་པས་དེ་ལ་བཞི། རྣམ་གྲངས་ཀྱི་གོལ་ས་དགུ། ལྟ་བའི་གོལ་ས་ཉི་ཤུ་རྩ་བཞི། ཐབས་ཀྱི་གོལ་ས་དྲུག །མཉམ་པ་ཉིད་ཀྱི་གོལ་བསྒྲིབ་སུམ་ཅུའོ། །དང་པོ་རྣམ་གྲངས་ཀྱི་གོལ་ས་དགུ་ནི། ཡིན་པའི་དོན་ལ་མ་ཤོར་བའི་རིག་པ་འཇོག་ན་ལྟ་བའི་གོལ་ས་ཞེས་པ་ཨ་ནུ་སྤྱིའི་གོལ་ས་ཡིན་ཏེ། ཐེག་པའི་ཡང་རྩེར་ཨ་ཏིའི་སྒོར་ཞུགས་ནས་རང་རང་གི་ཆོས་ཉིད་ཇི་ལྟར་ཡིན་པ་མ་ནོར་བའི་དོན་ལ། བློས་མ་ནོར་བར་ཡུལ་དུ་བྱས་ནས་འཇོག་ན་ལྟ་བའི་གོལ་སའོ། །དམ་ཚིག་ཕྱོགས་ཅན་དུ་བསྲུང་ན་དམ་ཚིག་གི་གོལ་ས་ཞེས་པ། ཨ་ཏི་རིས་མེད་ཆེན་པོའི་དམ་ཚིག་འདའ་ཉམས་མེད་པ་ལ། མི་སྤང་བ་དང་དུ་བླང་བ་ལ་སོགས་རིས་ཅན་དུ་བསྲུང་ན་དེའི་གོལ་སའོ། །འཕྲིན་ལས་གཟའ་གཏད་ཅན་དུ་བཙོལ་ན་དེའི་གོ་ས་ཞེས་པ་ཨ་ཏི་འཕྲིན་ལས་བྱ་བརྩལ་དང་བྲལ་བ་ལ་ཞི་རྒྱས་དབང་དྲག་ལ་སོགས་པས། ཞི་བས་གནོད་སྡིག་ཞི་བར་བྱེད་པ་དང་། རྒྱས་པས་བསོད་ནམས་དང་ལོངས་སྤྱོད་རྒྱས་པར་བྱེད་པ་ལ་སོགས་པ་གཟའ་གཏད་ཅན་དུ་རྩོལ་ན་དེའི་གོལ་སའོ། །རྟོགས་པའི་རིག་པ་གྲངས་སུ་བགྲང་བ་ཡེ་ཤེས་ཀྱི་གོལ་ས་ཞེས་པ་ཨ་ཏི་རང་བྱུང་གི་ཡེ་ཤེས་ཐིག་ལེ་ཉག་གཅིག་རྟོགས་པ་ལ། མངོན་སུམ་པའི་ཡེ་ཤེས་ལ་སོགས་པ་གྲངས་སུ་ཕྱེ་སྟེ་བགྲང་། མངོན་སུམ་པའི་ཡེ་ཤེས་ནི། དུས་གསུམ་དུ་མི་རྟོག་པ་བསྒོམ་པས་མཉམ་གཞག་ལ་ཆོས་ཐམས་ཅད་ནམ་མཁའི་དཀྱིལ་ལྟར་རྟོགས། རྗེས་ཐོབ་སྒྱུ་མ་ལྟ་བུར་མཁྱེན་པའོ། །རྗེས་ལ་ཐོབ་པའི་ཡེ་ཤེས་ནི། མཉམ་གཞག་བཏང་ན ས་རྗེས་ཀྱི་ཤེས་པ་ལ་ད་ཅིའི་བསྒོམས་པའི་ངོ་བོ་ལ་རྟོག་དཔྱོད་བྱས་པས་ངང་གིས་གསལ་བའམ་ཤུགས་ཀྱིས་བདེ་བ་འབྱུང་ངོ་། །དག་པ་འཇིག་རྟེན་པའི་ཡེ་ཤེས་ནི་འཇིག་རྟེན་པའི་སྣང་བ་དག་ནས་སྒྱུ་མའི་དཔེ་བརྒྱད་ལྟར་གཟིགས་པའོ། །རྒྱབ་ལས་སྐྱེས་པའི་ཡེ་ཤེས་ནི་བསྒོམ་པའི་ཐུན་བར་དུ་ཁམས་གསང་བ་སྟེ། དེ་ནས་མི་རྟོག་པ་སྔ་མའི་སེར་བཟང་པོ་དེ་ལ་བསྒོམས་པས་བསྒོམ་པ་བཟང་པོ་ཡེར་གྱིས་འབྱུང་བའོ། །དེ་ལྟར་བཞིར་ཕྱེ་ནས་གྲངས་སུ་བགྲང་ན་དབུ་མའི་ཡེ་ཤེས་སུ་གོལ་ལོ། །རྟོག་པ་ལ་རྒྱབ་ཀྱིས་ཕྱོགས་ལ་མི་རྟོག་པ་མངོན་སུམ་དུ་བྱེད་ན་འཕྲ་བའི་གོལ་ས་ཞེས་པ་ནི་ཉན་ཐོས་སྤྱིའི་གོལ་ས་ཡིན་ཏེ། ཨ་ཏི་རྟོག་པ་མ་སྤངས་པ་རང་སར་གྲོལ་བ་ལ། རྟོག་པ་ལ་ངན་པར་བྱས་ནས་སྤངས་ཆོས་ཉིད་མི་རྟོག་པ་ལ་བཟང་པོར་བྱས་ནས་མངོན་སུམ་དུ་བྱེད་ན་ཆོས་ཉིད་འཕྲ་བའི་གོལ་སའོ། །འོག་ནས་གོང་དུ་རྒྱུ་ལས་འབྲས་བུ་རྩོལ་ན་ཕ་རོལ་དུ་ཕྱིན་པའི་གོལ་ས་ཅེས་པ་ནི། ཨ་ཏི་ས་ལམ་བསྒྲོད་དུ་མེད་དེ་ས་ལམ་ཆིག་ཆོད་རང་སེམས་མཚོན་པ་ལ། ས་དང་ལམ་འོག་ནས་གོང་དུ་རྒྱུ་སྔ་མ་ལས་འབྲས་བུ་ཕྱི་མར་རྩོལ་ཞིང་བསྒྲུབ་ན་ས་དང་ཕ་རོལ་ཏུ་ཕྱིན་པའི་གོལ་སའོ། །ལྷ་དང་དཀྱིལ་འཁོར་ལ་ཆགས་ན་རྒྱུད་དུ་གོལ་ས་ཞེས་པ་ནི་མ་ཧཱ་སྟེ། ཨ་ཏི་རང་སེམས་ལྷ་དང་དཀྱིལ་འཁོར་དུ་རྟོགས་པ་ལ། རྟེན་པ་ལྷ་དང་། རྟེན་དཀྱིལ་འཁོར་ལ་ཆགས་ནས་རྩོལ་ན་རྒྱུད་མ་ཧཱ་རུ་གོལ་ལོ། །དབྱིངས་དང་ཡེ་ཤེས་ལ་རྟེན་འཆའ་ན་ལུང་དུ་གོལ་ས་ཞེས་པ་ཨ་ཏི་ཡུལ་ཡུལ་མེད་རང་སར་གྲོལ་བ་ལ། དབྱིངས་སྣང་བ་རྩལ་རྫོགས་སུ་ལྷུན་གྱིས་གྲུབ་པ་ཀུན་ཏུ་བཟང་མོའི་རང་བཞིན། ཡེ་ཤེས་འགག་པ་མེད་པ་ཀུན་ཏུ་བཟང་པོའི་རོལ་པ་བློ་ཡུལ་དུ་བྱས་ནས་བློ་རྟེན་འཆའ་ན་ལུང་ཨ་ནུ་རུ་གོལ་ལོ། །ལྟ་བ་གཅད་པའི་དབྱིངས་ལས་ཐལ་དྲགས་ན་མན་ངག་གི་གོལ་སའོ། །ཞེས་པ་ཨ་ཏི་རང་སེམས་ཡེ་ནས་སངས་རྒྱས་པ་དེ་ངོ་ཤེས་པར་བྱེད་པ་ལས། གཞི་ལས་འབྲས་བུ་བཟང་བར་མི་འདོད་པ་ལ། གཞིའི་ངོ་བོ་ལས་འབྲས་བུ་བསྐྱེད་བཏོན་ནས་བཟང་བར་འདོད་ན་མན་ངག་ཨ་ཏིའི་གོལ་སའོ། །ལྟ་བའི་གོལ་ས་ཉི་ཤུ་རྩ་བཞི་ནི། ཡོད་པར་ལྟ་བ་ལ་སོགས་པ་བཅུ་གཉིས་པོ་རེ་རེ་ལ་དེ་ལས་བཟློག་པ་རེ་རེ་དང་གཉིས་གཉིས་སུ་ཕྱེ་བས་ཉེར་བཞི་སྟེ། དེ་ཡང་ཨ་ཏི་ཡོ་གའི་ལྟ་བ་ནི། ཨ་སྐྱེ་མེད་ལ་ཆོས་ཐམས་ཅད་སྟོང་མཉམ། ཏི་འགག་མེད་ལ་ཆོས་ཐམས་ཅད་སྣང་མཉམ། ཡོ་ག་སྣང་སྟོང་ངོས་མཉམ་གྱི་དབྱེར་མེད་ལ། ཡོད་པར་ལྟ་ཞེས་ཡོད་པ་ཕྱོགས་གཅིག་ཏུ་ལྟར་ན་ཡང་ཨ་ཏི་ཕྱོགས་མེད་ལས་གོལ། དེ་ལས་ལོགས་ཏེ་མེད་པ་ཕྱོགས་གཅིག་ཏུ་ལྟ་ན་ཡང་ཨ་ཏི་ཕྱོགས་མེད་ལས་གོལ་ལོ། །དེས་འདྲེ་སྟེ། ཡིན་པར་ལྟ་བ་ཞེས་ཡིན་པར་ལྟ་བ་དང་། མེད་པར་ལྟ་བ། བཟང་བར་ལྟ་བ་ཞེས་པས་བཟང་བར་ལྟ་བ་དང་། ངན་པར་ལྟ་བ། ཡོན་ཏན་དུ་ལྟ་ཞེས་པས་ཡོན་ཏན་དུ་ལྟ་བ་དང་། སྐྱོན་དུ་ལྟ་བ་དང་། གཙང་བར་ལྟ་བ་ཞེས་པས། གཙང་བ་ཕྱོགས་གཅིག་ཏུ་ལྟ་བ་དང་། མི་གཙང་བར་ལྟ་བ། དག་པ་ལྟ་བ་ཞེས་པ་དག་པར་ལྟ་བ་དང་། མ་དག་པར་ལྟ་བ། བདག་ཏུ་ལྟ་བ་ཞེས་པས་བདག་ཏུ་ལྟ་བ་དང་། གཞན་དུ་ལྟ་བ། སངས་རྒྱས་སུ་ལྟ་བ་ཞེས་པས་སངས་རྒྱས་སུ་ལྟ་བ་དང་། སེམས་ཅན་དུ་ལྟ་བ། འབྲས་བུ་ལྟ་བ་ཞེས་པས་འབྲས་བུ་ལྟ་བ་དང་། རྒྱུར་ལྟ་བ། འདུས་བྱས་སུ་ལྟ་བ་ཞེས་པས་འདུས་བྱས་སུ་ལྟ་བ་དང་། འདུས་མ་བྱས་སུ་ལྟ་བ། ཉོན་མོངས་པར་ལྟ་བ་ཞེས་པས་ཉོན་མོངས་པར་ལྟ་བ་དང་། རྣམ་པར་བྱང་བར་ལྟ་བ། ཀུན་རྫོབ་ཏུ་ལྟ་བའོ་ཞེས་པས་ཀུན་རྫོབ་ཏུ་ལྟ་བ་དང་། དོན་དམ་པ་ཕྱོགས་གཅིག་ཏུ་ལྟ་བའོ། །དེ་ལྟར་ཨ་ཏི་ཡོ་ག་སྐྱེ་འགག་གཉིས་མེད་ཕྱོགས་མེད་མཉམ་པ་ཉིད་དུ་གནས་པ་ལ། ཕྱོགས་འཛིན་གྱི་བློས་ཕྱོགས་རེར་ལྟ་བ་རྣམས་གོལ་སའོ། །ཐབས་ཀྱི་གོལ་ས་དྲུག་ནི་སྤྱིར་ཐབས་ལ་གཉིས་ལ། ཨ་ཏི་གནས་ལུགས་ཐབས་སུ་ཁྱེར་བ་ཡིན་ཏེ། དེ་ལ་འགེགས་ཤིང་སྤོང་བ་དང་ཞེས་པ་ཉོན་མོངས་དུག་ལྔ་ལ་སོགས་མི་མཐུན་ཕྱོགས་འགེགས་ཤིང་སྤོང་ན་ཡང་ཨ་ཏི་གནས་ལུགས་ཐབས་སུ་འཁྱེར་བ་ལས་གོལ་ལོ། །རྩོལ་ཞིང་བསྒྲུབ་པ་དང་ཞེས་པས་རྒྱུ་ལམ་གྱི་སྒོ་ནས་འབྲས་བུ་ཆེད་བྱས་ལུས་ངག་ཡིད་གསུམ་རྩོལ་ཞིང་བསྒྲུབ་ན་ཡང་གོལ་ལོ། །བསྒྲོད་ཅིང་སྤྱོད་པ་དང་ཞེས་པ་ལམ་ལྔ་ལ་རིམ་པར་བསྒྲོད་ཅིང་ས་བཅུ་སྒྲིབ་པ་སྦྱོང་ན་ཡང་གོལ་ལོ། །དབྱེ་གསལ་བླང་དོར་བྱེད་དང་ཞེས་པ། ཨ་ཏི་བཟང་ངན་བླང་དོར་མེད་པ་ལ། སྐྱོན་དང་ཡོན་ཏན་དུ་ཕྱེ་ནས་ཡོན་ཏན་བཟང་པོ་བླང་བྱ། སྐྱོན་དོར་བྱར་བྱེད་པས་གོལ་ལོ། །གཉེན་པོ་རྒྱུ་ལ་བསྟེན་པ་དང་ཞེས་ཨ་ཏི་གཉེན་པོ་མེད་པས་ཆེ་བ་རྟོག་པ་རང་ཡེ་ཤེས་ལ། རྟོག་པ་ལ་གཉེན་པོ་ཆེད་དུ་རྒྱུད་ལ་བསྟེན་ན་ཡང་གོལ་ལོ། །དམིགས་པ་ནང་དུ་བསྡུད་པའོ་ཞེས་པ་ཨ་ཏི་རང་སྣང་རིས་མེད་ལ། བློ་ཡིས་དམིགས་པ་ནང་དུ་བསྡུས་ནས་ཆེད་དུ་འཇོག་ན་ཡང་གནས་ལུགས་ཐབས་སུ་འཁྱེར་བ་ལས་གོལ་བས་ཐབས་ཀྱི་གོལ་པའོ། །མཉམ་པ་ཉིད་ཀྱི་གོལ་བསྒྲིལ་སུམ་ཅུ་ནི། མཉམ་པ་ཉིད་ཀྱི་གོལ་བསྒྲིབ་སུམ་ཅུ་དང་རྒྱུད་ལས་འབྱུང་པ་གང་རྒྱུད་ལས་འབྱུང་བ་གང་ཞེན་ཅེས་པས། ཨ་ཏི་ཡོ་ག་ཆོས་ཐམས་ཅད་མཉམ་པ་ཉིད་ལ། མཉམ་པ་ཉིད་མ་རྟོགས་པས་འོག་མར་གོལ། དེ་མ་མཐོང་བས་བསྒྲིབས། སུམ་ཅུ་ནི་གྲངས་ཏེ། དེ་ལ་ཏིང་ངེའི་བར་དུ་གཅོད་པ་བཅུ་བཞི། ཏིང་ངེ་ལ་སྒྲིབ་པ་བཅུ། ཏིང་ངེའི་སྐྱོན་དྲུག་གོ། །དེ་རྣམས་བཀའ་རྒྱུད་ལས་གསུངས་པའམ། ལམ་གྱི་རྒྱུད་ལ་གསལ་བར་བསྟན་པ་གང་ཞེ་ན་ཞེས་མདོར་བསྟན་ནོ། །རྒྱས་པ་ལ་བར་དུ་གཅོད་པ་བཅུ་བཞི་ནི། ལེ་ལོ་བྱ་བ་མང་པོ་དང་ཞེས་པ་ལེ་ལོ་སྙོམ་ལས་དང་སྦྱོར་བ་སྨོན་པའོ་གཅིག །ལུས་ངག་འཇིག་རྟེན་གྱི་བྱ་བ་མང་བ་དང་གཉིས། རྒོད་པ་དང་ནི་སེམས་གཡེང་དང་བཅས་པས་སྔོན་བརྒོད་བརྒོད་རྩེ་རྩེ་བས་སེམས་ལང་དུ་རེད་ནས་འཕྲོ་བ་དང་གསུམ། །དེ་ལྟར་གྱི་ཡུལ་ཐད་ཀ་མས་སེམས་གཡེངས་པ་དང་བཞི། རྨུགས་དང་འདོད་ཆེན་ཆེ་བ་དང་ཞེས་པ། །སེམས་ཤིན་ཏུ་རྨུགས་ནས་དོན་མི་གསལ་བ་དང་ལྔ། ཟས་ནོར་ལ་འདོད་པ་ཆེ་བ་དང་དྲུག །བརྩོན་འགྲུས་ཆུང་དང་གཉིད་ལ་དགའ་ཞེས་པས་སྒོམ་པ་ལ་བརྩོན་འགྲུས་ཆུང་བ་དང་བདུན། རྟག་ཏུ་གཉིད་ལ་དགའ་བ་དང་བརྒྱད། རེ་བ་མང་དང་དོགས་པ་མང་ཞེས་པས། དྲོད་རྟགས་དང་། མངོན་ཤེས་དང་། རྫུ་འཕྲུལ་ལ་སོགས་ཐོབ་ལ་རེ་བ་དང་དགུ། དྲོད་རྟགས་ལ་སོགས་མ་ཐོབ་ཀྱིས་དོགས་པ་དང་། འཁོར་བར་ལྷུང་གིས་དོགས་པ་དང་བཅུ། ཁ་དོག་དང་ནི་གློག་དང་འདྲི་ཞེས་པས་བསྒོམ་པ་ཡལ་བར་བཞག་ནས་དག་གི་ཁ་ཏོན་བྱེད་པ་དང་བཅུ་གཅིག་ཏིང་ངེ་ཡལ་བར་བཞག་ནས་གློག་པ་དང་བཅུ་གཉིས། ཏིང་ངེ་ཡལ་བར་བཞག་ནས་ཡི་གེ་འདྲི་བ་དང་བཅུ་གསུམ། ཅ་ཅོ་མང་པོ་སྨྲ་བ་དང་ཅེས་པས་ཏིང་ངེ་ཉམས་སུ་མི་ལེན་པར་འཇིག་རྟེན་གྱི་ཅ་ཅོ་མང་པོ་སྨྲ་བ་དང་བཅུ་བཞིའོ། །བར་དུ་གཅོད་པ་བཅུ་བཞི་ཡིན་ཞེས་པ་མཉམ་པ་ཉིད་ཀྱི་ཏིང་ངེ་མཉམ་སུ་ལེན་པ་ལ་བར་དུ་གཅོད་པའི་གྲངས་མདོར་བསྡུས་ན་བཅུ་བཞིའོ། །ཏིང་ངེའི་སྒྲིབ་བཅུ་ནི། མི་གཡོ་བ་དང་གསལ་བ་དང་ཞེས་པས། འཇིག་རྟེན་བློ་ཡུལ་དུ་བྱས་པའི་ཞི་གནས་ཕྱོགས་གཅིག་པ་བསམ་གཏན་མི་གཡོ་བ་དང་གཅིག །དེའི་ཉམས་གསལ་བ་དང་གཉིས། བདེ་བ་དང་ནི་སེམས་ལ་རྣམ་ཤེས་མང་པོ་སྐྱེ་ཞེས་པས། དེའི་འཇིག་རྟེན་པའི་ཉམས་ལུས་བདེ་བ་དང་གསུམ། སེམས་ལ་འདི་ལྟར་བྱའོ་སྙམ་པའི་རྟོག་པ་མང་པོ་སྐྱེ་བ་དང་བཞི། མངོན་པར་ཤེས་པ་དག་དང་ནི་ཞེས་པས་མངོན་པར་ཤེས་པ་ལྔ་འབྱུང་དུ་རེ་བ་དང་ལྔ། མཚན་མའི་རྫུ་འཕྲུལ་འབྱིན་པ་དང་ཞེས་པ། སྟོད་ནས་མེ་འབར་བ་དང་། སྨད་ནས་ཆུ་འབྲུག་པ་ལ་སོགས་པ་མཚན་མའི་རྫུ་འཕྲུལ་འབྱིན་པར་འདོད་པ་དང་དྲུག །འདི་ལས་ལྷག་པ་མེད་དོ་ཞེས་ཞེས་པས་ཉམས་བག་རེ་ཙམ་སྐྱེས་པ་ལ་འདི་ལ་ལྷག་པ་མེད་དོ་ཞེས་ང་རྒྱལ་སྐྱེ་བ་དང་བདུན། ཆོག་པ་རུ་ནི་འཛིན་པ་དང་ཞེས་པ་གོང་གི་ཉམས་དེས་ཆོག་པར་འཛིན་པ་དང་བརྒྱད། བདག་གི་ལྟ་བ་ངོམ་པ་དང་ཞེས་པ་རང་གི་ལྟ་བ་ལ་ང་རྒྱལ་སྐྱེས་ནས་གཞན་ལ་ངོམ་པ་དང་དགུ། གཞན་གྱི་ལྟ་བ་ཁྱད་དུ་གསོད་ཅེས་པ་གཞན་གྱི་ལྟ་བ་ལ་མི་བདེན་ཟེར་ནས་ཁྱད་དུ་གསོད་ཅིང་སྨྲ་བ་དང་བཅུའོ། །ཏིང་ངེ་འཛིན་གྱི་སྒྲིབ་བཅུ་ཡིན་ཞེས་པས་དེ་རྣམས་ནི་མཉམ་པ་ཉིད་ཀྱི་ཏིང་ངེ་ལ་སྒྲིབ་པའི་གྲངས་མདོར་བསྡུས་ན་བཅུའོ། །ཏིང་ངེའི་སྐྱོན་དྲུག་ནི། གློ་བུར་ཞེ་སྡང་ཆེན་པོ་ལྡན་པ་དང་ཞེས་པས་དུས་གློ་བུར་དུ་རང་གི་རྒྱུད་ལ་སེམས་ཀུན་ནས་འཁྲུགས་པའི་ཞེ་སྡང་ཆེན་པོ་འབྱུང་བ་དང་གཅིག །གློ་བུར་འདོད་ཆགས་ཆེན་པོ་ལྡང་བ་དང་ཞེས་པ་དུས་གློ་བུར་དུ་ཕྱིའི་རྫས་དང་ཡོ་བྱད་དང་། ནང་སེམས་ཅན་འཁྲིག་པ་ལ་འདོད་ཆགས་ཆེན་པོ་ལྡང་བ་གཉིས། ཕྲག་དོག་ང་རྒྱལ་འཁྲུགས་པ་དང་ཞེས་པས། གཞན་གྱི་ཡོན་ཏན་ཕྲག་ཏུ་མི་ཤོང་བའི་ཕྲག་དོག་ཆེན་པོ་འབྱུང་བ་དང་གསུམ། རང་གི་ཡོན་ཏན་ལ་ང་རྒྱལ་ཆེན་པོ་སྐྱེས་ནས་སེམས་ཁེངས་ཤིང་འཁྲུག་པ་དང་བཞི། ཟུག་རྔུ་མུན་པ་འཐིམས་པ་དང་ཞེས་པ་རྣམ་པར་རྟོག་པའི་ཟུག་རྔུ་དང་བཅས་པའི་གཏི་མུག་གི་མུན་པ་ལྟ་བུས་དོན་མི་གསལ་བར་འཐིབས་པ་དང་ལྔ། ལྟ་བ་སྙེམས་དང་འདི་དྲུག་ནི་ཞེས་པས་ང་ལྟ་བ་མཐོ་བས་ཅི་བྱས་ཀྱང་མི་གནོད་སྙམ་ནས་སྡིག་པ་ལ་མི་འཛེམ་པ་དང་དྲུག་པོ་ནི། མཉམ་པ་ཉིད་ཀྱི་ཏིང་ངེ་འཛིན་གྱི་སྐྱོན་ཡིན་ནོ། །གོལ་ས་བཅད་པ་ནི། གོལ་ས་དེ་རྣམས་ངོས་ཟིན་པས་ཀྱང་ཆོད་དེ་གོལ་སར་མི་འཆོར། ཡང་ན་ལྟ་བ་རང་གིས་བཅད་དེ། གོལ་ས་དེ་རྣམས་ཨ་སྐྱེ་མེད་ལ་གོལ་ས་ངོས་བཟུང་དང་བྲལ་སྟོང་། ཏི་འགག་མེད་ལ་གོལ་ས་རང་སྣང་ལ་རིས་མེད། ཡོ་ག་གཉིས་མེད་ལ་སྣང་སྟོང་ངོས་མཉམ་གྱི་དབྱེར་མེད་དུ་ཤེས་པར་བྱས་ལ་བཅད་ལ། དེའི་ངང་ལ་བཞག་གོ། །ད་ནི་དེ་ལྟར་གོལ་ས་ཆོད་ཀྱང་སྒྲིབ་པ་ངོས་མ་ཟིན་ན་ཕན་མེད་པས། སྒྲིབ་པ་ངོས་བཟུང་བར་བྱ་བའི་ཐབས་ཀྱི་རིམ་པའི་མན་ངག་དང་ཞེས་པས་གསུམ། དང་པོ་ཉན་ཐོས་ཀྱི་གང་ཟག་གིས་བདག་མེད་ཙམ་རྟོགས་པ་དེ་སྒྲིབ་པའོ། །ཞེས་པ་ཉན་ཐོས་ཀྱིས་ཉེར་ལེན་ཕུང་པོ་ལྔ་ལ་ངར་འཛིན་གྱི་རྒྱུན་དང་བྲལ་བའི་གང་ཟག་གི་བདག་མེད་རྟོགས་ཀྱང་དེ་ལ་ཞེན་པས། ཨ་ཏིའི་དོན་མཐོང་དུ་མི་སྟེར་བས་བསྒྲིབ་པའོ། །དབུ་མས་གཉིས་ཀ་མེད་པར་རྟོགས་ཀྱང་སྒྱུ་མ་ཙམ་དུ་ཡང་སྤང་བླང་བྱེད་པ་བསྒྲིབ་པའོ། །ཞེས་པ་དབུ་མ་སེམས་ཙམ་བྱང་ཆུབ་སེམས་དཔའི་ཐེག་པས་གང་ཟག་གི་བདག་ཉེར་ལེན་གྱིས་ཕུང་པོ་ལ་ངར་འཛིན་དང་། ཆོས་ཀྱི་བདག་གཟུང་འཛིན་གཉིས་ཀ་མེད་པར་རྟོགས་ཀྱང་། སྒྱུ་མ་ཙམ་དུ་ཀུན་རྫོབ་འཁྲུལ་པ་སྤང་བྱ། དོན་དམ་བླང་བྱར་བྱས་ནས་ཞེན་པས། ཨ་ཏིའི་དོན་མཐོང་དུ་མི་སྟེར་བས་བསྒྲིབ་པའོ། །ནང་པས་ཆོས་ཐམས་ཅད་མ་སྐྱེས་པ་ཡིན་པ་ལ། དབྱིངས་ཡུལ་དུ་བྱས་ནས་ཏིང་ངེ་འཛིན་གྱིས་རྩོལ་བ་བསྒྲིབ་པའོ་ཞེས་པ་གསང་སྔགས་ནང་པས་ཆོས་ཐམས་ཅད་མ་སྐྱེས་ཡིན་པ་ལ་དབྱིངས་ཆོས་ཉིད་སྟོང་པ་ཉིད་ཡུལ་དུ་བྱས་ནས་ཏིང་ངེའི་རྩོལ་བ་བྱེད་པས། དེས་ཨ་ཏིའི་དོན་མཐོང་དུ་མི་སྟེར་བསྒྲིབ་པའོ། །དེ་ལ་སོགས་ཏེ་བཟང་རྟོག་ངན་རྟོག་གང་ལ་ཞེན་ཅིང་འཛིན་པ་གཅིག་འདུག་ཀྱང་། ཨ་ཏི་ཕྱོགས་མེད་རང་འབྱུང་ཡེ་ཤེས་ལ་བསྒྲིབ་པ་ཡིན་པས་དེ་ངོས་བཟུང་ལ། འོ་ན་ཨ་ཏི་རང་ཇི་ལྟར་ཡིན་ཞེ་ན། ཨ་ཏི་རྒྱུ་རྐྱེན་མེད་པས་རང་འབྱུང་ལ། བསྒྲིབ་བྱེད་མེད་པར་རང་རང་གསལ་བ་ཡིན་ནོ། །ཞེས་པས་སེམས་ཉིད་ཨ་ཏི་རྒྱུ་ལས་མ་བྱུང་། རྐྱེན་གྱིས་མ་བསྐྱེད་པར་རང་འབྱུང་། དེ་ཀ་བསྒྲིབ་བྱེད་མེད་པས་རང་གསལ་ཏེ། །འདིར་གསལ་འདིར་མི་གསལ་མེད་པར་ཕྱོགས་ཀུན་ཏུ་རང་གསལ་བས་སྤང་བླང་དང་དགག་སྒྲུབ་གང་ཡང་མེད་དོ། །ད་ནི་དེ་ལྟར་བསྒྲིབ་པ་ངོས་ཟིན་ཀྱང་འདོད་པའི་རྟགས་དང་མི་འདོད་པའི་རྟགས་འབྱུང་པས་རྟགས་ཀྱི་མན་ངག་མདོར་བསྡུས་ཏེ་བསྟན་པའོ་ཞེས་པས། རྟགས་ནི་བཅྭ་ལྔ་སྟེ། ཡི་དམ་ལྷ་དང་སྐུ་གཞན་དང་། །ལུང་བསྟན་པ་དང་སྙིང་རྗེ་དང་། །སྤོབས་པ་ཐོགས་པ་མེད་པ་དང་། །ནམ་མཁའི་གསེར་ཡིག་འོད་དང་ནི། །རྨིས་ལྟས་དང་མི་མངོན་ཤེས་དང་། །ཆོ་འཕྲུལ་དང་ནི་སྣ་ཚོགས་དང་། །ཉམས་དང་བྱིན་བརླབས་སླུ་བྱེད་དང་། །མཆོད་སོགས་འདྲིས་པའི་ཆ་བྱད་ཅན། །དྲུག་དང་མི་ལྡན་བཅྭ་ལྔ་ནི། །བདུད་ཀྱིས་བྱིན་གྱིས་བརླབས་པའི་རྟགས་ཞེས་པས། དྲུག་ནི། ཉམས་དགའ་མདངས་དང་ལྡན་པ་དང་། །བསྒོམ་པ་བཟང་པོའི་དུས་དག་དང་། །ང་རྒྱལ་རློམ་སེམས་ཆེར་མི་གཡོ། །རྒྱུད་དངས་སྡིག་སེམས་ཞི་བ་དང་། །རྔམས་པ་ཚུལ་གྱིས་བཟླས་སེམས་མེད། །གཞུང་དང་མཐུན་པའི་ལམ་རྟགས་རྣམས། །ཞེས་པས་གོང་གི་བཅྭ་ལྔ་པོ་དེ་འོག་གི་དྲུག་པོ་དང་ལྡན་པར་བྱུང་ན་འདོད་པའི་ཉམས་རྟགས་ཡིན་ནོ། །དེ་ལས་བཟློག་པ་ནི། རང་ཉམས་མི་དགའ་ཞིང་རྟགས་ལ་མདངས་མེད་པ་དང་། བསྒོམ་ངན་པའི་དུས་དང་། དེ་ལས་ང་རྒྱལ་དང་རློམ་སེམས་སྐྱེས་པ་དང་། རང་རྒྱུད་མ་དྭངས་སྡིག་སེམས་མ་ཞི་བའི་དུས་དང་། ངམ་པ་སྐྱེས་ཏེ་གཞན་ལ་བཤད་སྙམ་པ་དང་། རང་རང་གི་ཆོས་གཞུང་དག་མི་མཐུན་པར་འདུག་པའི་དུས་སུ་བཅྭ་ལྔ་པོ་བྱུང་ན་བདུད་ཀྱིས་བྱིན་གྱིས་བརླབས་ཏེ་བར་དུ་གཅོད་པའི་རྟགས་ཡིན་པས་མི་འདོད་པའི་རྟགས་སོ། །མདོར་ན་རྟགས་ངོ་མཚར་ཅན་གང་བྱུང་ཡང་། རང་ལ་དགའ་བྲོད་དང་ང་རྒྱལ་འདུག་ན་ད་རུང་རྟགས་འབྱུང་བའི་དུས་ལ་མ་བབ་པ་ཡིན་པས་བདུད་ཡིན་ནོ། །རྟགས་གང་བྱུང་ཡང་དགའ་བྲོད་དང་ང་རྒྱལ་མི་འདུག་ན་ལམ་རྟགས་སུ་ཤེས་པར་བྱའོ། ༈ །ད་ནི་སྤྱི་དོན་ཐ་མ་གདབ་བཅུ་སྤྱོད་པ་སྟོན་ཏེ། བཅུ་ལས། ལྟ་བ་བྱེད་སྤྱོད་ལ་གདབ་པ་ཞེས་པ་ལྟ་བ་ནི་ཨས་མཚོན་ནས་ཆོས་ཐམས་ཅད་སྐྱེ་མེད་ངོས་གཟུང་དང་བྲལ་བར་རྟོགས། ཏིས་མཚོན་ནས་འགག་མེད་རང་སྣང་དུ་རྟོགས། ཡོ་གས་མཚོན་ནས་ཆོས་ཐམས་ཅད་སྣང་སྟོང་ངོས་མཉམ་གྱི་དབྱེར་མེད་དུ་རྟོགས་པ་ལ་ལྟ་བ་ཞེས་བྱའོ། །དེ་བྱེད་སྤྱོད་ཐམས་ཅད་ལ་གདབ་སྟེ། དེ་ལ་དགེ་སྦྱོར་ཕྱག་ལྟ་བུ་གཅིག་བྱེད་ན། ཨ་སྐྱེ་མེད་ལ་ཕྱག་བཙལ་བྱའི་ཡུལ། འཚལ་མཁན། འཚལ་བའི་དངོས་པོ་གསུམ་ཀར་མ་སྐྱེས་ཏི་འགག་མེད་ལ་གསུམ་ཀར་མ་འགགས་ཏེ་རང་སྣང་། ཡོ་ག་གཉིས་མེད་ལ་ཕྱག་བཙལ་བའི་སྣང་བ་མ་བཀག་ལ་དེ་ཉིད་དུས་ན་ངོས་བཟུང་དང་བྲལ་བར་བཙལ་ལོ། །དེས་ལུས་ངག་ཡིད་གསུམ་གྱི་དགེ་སྦྱོར་དང་བྱེད་སྤྱོད་གང་བྱེད་ཀྱང་འགྲེ། བསྒོམ་པ་སྤྱོད་ལམ་ལ་གདབ་པ་ཞེས་པ་བསྒོམ་པ་ནི་ལྟ་བ་ཨ་ཏི་ཡོ་གའི་དོན་རྟོགས་ནས་དེའི་ངང་ལ་རིག་པ་ཡུལ་མེད་དུ་གནས་པ་སྟེ་སྟོང་གསལ་ནམ་མཁའ་ལྟ་བུའོ། །དེ་སྤྱོད་ལམ་ལ་གདབ་སྟེ། འགྲོ་བའི་དུས་སུ་ཡང་གསལ་སྟོང་འཛིན་མེད་ནམ་མཁའ་ལྟ་བུ། འདུག་པ་དང་། ཉལ་བ་དང་། ཟ་བ་དང་ལོངས་སྤྱོད་པའི་དུས་སུ་ཡང་གསལ་སྟོང་འཛིན་མེད་ནམ་མཁའ་ལྟ་བུ་དང་མ་བྲལ་བར་གདབ་བོ། །སྙིང་རྗེ་ཕྱོགས་བྲལ་ལ་གདབ་པ་ཞེས་པ་སྤྱིར་སྙིང་རྗེ་ལ་གསུམ། སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པ་གསུམ། ཕྱོགས་དང་བྲལ་ཏེ། སེམས་ཅན་ཐམས་ཅད་སྐྱེ་འགག་གཉིས་མེད་ཟབ་མོ་བྱང་ཆུབ་ཀྱི་ཞིང་དུ་རྟོགས་པས། སྙིང་རྗེ་སྐྱེ་བྱའི་ཡུལ་སེམས་ཅན། ཐུགས་རྗེ་སྐྱེ་བའི་མཁན་པོ། སྐྱེ་བ་དངོས་པོའི་ཕྱོགས་དང་བྲལ་བས་ཡུལ་ཡུལ་ཅན་མེད་པར་གཉིས་མེད་དུ་གདབ་པའོ། །མཚན་ཁོང་ཐོན་གྱི་སྐབས་སུ་མཉམ་པ་ཉིད་ཀྱི་ཐུགས་རྗེ་ཆེན་པོས་སེམས་ཅན་ཐམས་ཅད་གཟུང་ཅེས་པའི་དོན་ནོ། །ཡང་ན་སྙིང་རྗེ་ཨ་སྐྱེ་མེད་ལ་སྙིང་རྗེ་བྱ་རྗེས་བྱེད་དུ་མ་སྐྱེས་ཏི་ལ་མ་འགགས། ཡོ་ག་ལ་གཉིས་སུ་མེད་པས་ཕྱོགས་བྲལ་ལ་གདབ་པ་གསུང་། སྡུག་བསྔལ་ལམ་དུ་ཞེས་པས་ནི། ཨ་སྐྱེ་མེད་ལ་སྡུག་བསྔལ་དུ་མ་སྐྱེས་ཏེ་ངོས་བཟུང་དང་བྲལ། ཏི་འགག་མེད་པ་ལ་སྡུག་བསྔལ་དུ་མ་འགགས་ཏེ་རང་སྣང་། ཡོ་ག་གཉིས་སུ་མེད་པ་ལ་སྡུག་བསྔལ་གྱི་སྣང་བ་མ་བཀག་ལ་དེའི་མཐས་མ་རེག་པས། སྡུག་བསྔལ་ཆོས་ཉིད་རིས་མེད་དུ་ཤེས་པས་ལམ་དུ་གདབ་བོ། །ཉོན་མོངས་པ་འབྲས་བུར་ཅེས་པས་ཨ་སྐྱེ་མེད་ལ་དུག་ལྔ་སྐྱེས་ཏེ་ངོས་གཟུང་དང་བྲལ། ཏི་འགག་མེད་ལ་དུག་ལྔར་མ་འགགས་ཏེ་རང་སྣང་། ཡོ་ག་གཉིས་སུ་མེད་པ་ལ་དུག་ལྔའི་སྣང་བ་མ་བཀག་ལ་དེའི་མཐས་མ་རེག་པས། དེ་ཉིད་གསལ་སྟོང་གཉིས་མེད་ཀྱི་ཆོས་སྐུ་ཡིན་པས་འབྲས་བུ་གདབ་བོ། །དགའ་མི་དགར་ཀུན་ཏུ་བཟང་པོར་ཅེས་པ། ཨ་སྐྱེ་མེད་ལ་དགའ་མི་དགར་མ་སྐྱེས་ཏེ་ངོས་གཟུང་དང་བྲལ། ཏི་འགག་མེད་ལ་དགའ་མི་དགར་འགགས་ཏེ་རང་སྣང་། ཡོ་ག་གཉིས་སུ་མེད་པ་ལ་དགའ་མི་དགའི་སྣང་བ་མ་བཀག་ལ་དེའི་མཐས་མ་རེག་པས། དགའ་མི་དགའ་ལ་བཟང་ངན་དང་བླང་དོར་མེད་དེ་ཀུན་ཏུ་བཟང་པོར་གདབ་བོ། །བདག་གཞན་གཉིས་སུ་མེད་པའི་ཞེས་པ་ཨ་སྐྱེ་མེད་ལ་བདག་གཞན་དུ་མ་སྐྱེས། ཏི་འགག་མེད་ལ་བདག་གཞན་དུ་མ་འགགས། ཡོ་ག་གཉིས་སུ་མེད་པ་ལ་བདག་གཞན་གྱི་སྣང་བ་མ་བཀག་ལ་དེའི་མཐའ་མ་རེག་སྟེ། བདག་གཞན་གཉིས་མེད་མཉམ་པ་ཉིད་དུ་གདབ་བོ། །འཁོར་བ་དང་མྱ་ངན་ལས་འདས་པ་ཞེས་པ་སེམས་ཅན་སངས་རྒྱས་སུ་གདབ་པ་ཞེས་པ། གནས་ལུགས་སྐྱེ་རྒ་ན་འཆི་དང་བྲལ་བའི་གཉིས་མེད་ལ། འཁོར་བའམ་སེམས་ཅན་ནི་དེ་མ་རྟོགས་ཏེ་སྐྱེ་རྒ་ན་འཆི་དང་བཅས་པའོ། །དེ་ལ་གནས་ལུགས་ཇི་ལྟར་ཡིན་པར་རྟོགས་པ་དེ་ལྟ་བ། དེའི་ངང་དང་མ་བྲལ་བར་སྤྱོད་པ་སྤྱོད་པ། དེ་མངོན་དུ་གྱུར་པ་མྱ་ངན་ལས་འདས་པའམ་སངས་རྒྱས་ཡིན་པས། འཁོར་བ་དང་སེམས་ཅན་ཉིད་མ་སྤངས། དེ་གཉིས་མེད་དུ་ཤེས་པས་མྱ་ངན་པས་འདས་པའམ་སངས་རྒྱས་སུ་གདབ་པའོ། །སྣང་སྲིད་སེམས་སུ། སེམས་ཆོས་ཉིད་དུ་གདབ་པ་ཞེས་པ་ནི། སྣང་བ་ཕྱི་སྣོད། སྲིད་པ་ནང་བཅུད་ཐམས་ཅད་རང་གི་སེམས་ཡིན། སེམས་ཉིད་ཨ་སྐྱེ་མེད་ངོས་བཟུང་དང་བྲལ་བ་སྟོང་པའི་ཆོས་ཉིད། ཏི་འགག་མེད་སྣང་སྲིད་དུ་མ་འགག་པར་རང་སྣང་བ་སྣང་བའི་ཆོས་ཉིད། ཡོ་ག་ལ་སྣང་སྲིད་ཀྱི་སྣང་བ་མ་བཀག་ལ་དེའི་མཐས་མ་རེག་པས་གཉིས་མེད་མཉམ་པ་ཉིད་ཀྱི་ཆོས་ཉིད་དུ་གདབ་པའོ། །སྐྱོན་དང་ཡོན་ཏན་བླང་དོར་མེད་པར་གདབ་པའོ་ཞེས་ཨ་སྐྱེ་མེད་ལ་སྐྱོན་ཡོན་དུ་མ་སྐྱེས་ཏེ་ངོས་བཟུང་ཐམས་ཅད་དང་བྲལ་བའི་སྟོང་མཉམ། ཏི་འགག་མེད་ལ་སྐྱོན་ཡོན་དུ་མ་འགག་པར་རང་སྣང་སྟེ་སྣང་མཉམ། ཡོ་ག་གཉིས་སུ་མེད་པ་ལ་སྐྱོན་ཡོན་གྱི་སྣང་བ་མ་བཀག་ལ་མཐས་མ་རེག་སྣང་སྟོང་ངོས་མཉམ་མོ། །མཉམ་པ་ཉིད་ལ་སྐྱོན་དོར་ཞིང་ཡོན་ཏན་བླང་དུ་མེད་པར་གདབ་པའོ། །དེའང་ཉན་ཤད་བྱས་ནས་ཕྱིས་བཤོལ་བ་མིན་ཏེ། ད་ལྟ་ཉིད་ནས་སྤྱོད་ཐོག་བསྐལ་ཏེ་གདབ་བོ། །འབྲས་བུ་ནི་གཞུང་ནས་བཤད་པ་མེད་ཀྱང་། དེ་ལྟར་ལྟ་བསྒོམ་སྤྱོད་པ་གསུམ་འཛོམས་པས་དཔེར་ན་འབྲས་སོ་བ་ལོ་ལེགས་ན་ཕུབ་སོགས་བྱུང་ལས་བྱུང་བ་བཞིན་དུ། འབྲས་བུ་འདོད་པ་མེད་ཀྱང་ཤུགས་ལས་འབྱུང་སྟེ། དེ་ཡང་རིག་པ་གཟུང་འཛིན་ལས་གྲོལ་ཏེ་ལྷག་པ་ཆོས་ཀྱི་སྐུའི་ངང་དུ་གནས། དེ་ཡང་སྐུ་གསུམ་དུ་མིང་འདོགས་ན་ཨ་སེམས་ཉིད་སྐྱེ་མེད་ངོས་བཟུང་དང་བྲལ་བར་མངོན་དུ་གྱུར་པ་ཆོས་སྐུ། ཏི་འགག་མེད་རང་སྣང་དུ་མངོན་དུ་གྱུར་པ་སྤྲུལ་སྐུ། ཡོ་ག་གཉིས་སུ་མེད་པ་མངོན་དུ་གྱུར་པ་ལོངས་སྐུའོ། །དེ་ཡང་རེ་ཤིག་ཐ་སྙད་ཙམ་མོ། །སེམས་ཅན་གྱི་དོན་ནི། ཡིད་བཞིན་གྱི་ནོར་བུ་རིན་པོ་ཆེ་ལས་དགོས་འདོད་འབྱུང་བའམ། ཉི་མ་ལས། འོད་རང་བཞིན་གྱིས་འབྱུང་བ་བཞིན་དུ། སྐྱེ་མེད་ལས་མ་འགགས་པར་སྣང་སྟེ་དོན་མཛད་དོ། །དེའི་དོན་རྟོགས་ཆོས་ཀྱི་སྐུ། གཞན་དོན་གཟུགས་སྐུས་བྱེད་པའོ། །ཞེས་སོ། །ཆོས་སྐུ་མཉམ་ཉིད་ཐུགས་རྗེས་བྱིན་གྱིས་བརླབས། །སྤྲུལ་སྐུ་ཡེ་ཤེས་འབྱུང་གནས་ལས་བརྒྱུད་པའི། །མན་ངག་ཉིང་ཁུ་རིན་ཆེན་སྤུངས་པ་ལ། །ལམ་ཁྱེར་ཁྲིད་ལུགས་རིན་ཆེན་གསུང་སྒྲོས་འདི། །བདག་གཞན་རྗེད་རྡོར་དབུས་པ་རྟ་ཡིས་བཀོད། །བདག་གྲོལ་འགྲོ་བ་འདྲེན་པའི་དཔལ་དུ་ཤོག །ལས་ཅན་རྣམས་དང་དེས་འདི་འཕྲད་པར་ཤོག །ཀུན་ལ་བསྟན་ཀྱང་དོན་དུ་མི་འགྱུར་གསང་། །སྐལ་ལྡན་ལས་འཕྲོ་ཅན་གྱིས་ཉམས་སུ་ལོང་། །དོ་ཕྲུག་མ་དང་ཕྲག་པ་ཇི་བཞིན་དུ། །ཆོས་ཉིད་མ་དང་འཕྲད་པར་ཐེ་ཚོམ་མེད། །མན་ངག་རིན་ཆེན་སྤུངས་པ་ལ། གོང་མའི་ཕྱག་ཆ་དང་བླ་མའི་གསུང་སྒྲོས་ལ་བསྟེན་ནས། རྟ་ཛྙཱ་ན་ཤྲཱིས་བདག་གཞན་གྱི་དོན་དུ་སྦྱར་བ། ཁྲིད་ལུགས་གསལ་བའི་སྒྲོན་མ་ཞེས་བྱ་བ། རྫོགས་སོ།། །།རྟ་རིན་ཆེན་དཔལ་གྱི་ཕྱག་དཔེ་ལགས་སོ། །ཞུས་སོ། །དག་གོ། །དགེའོ།། །།

ཨ་རོ་ཡེ་ཤེས་འབྱུང་གནས་ཀྱི་ལོ་རྒྱུས།

ཨ་རོ་ཡེ་ཤེས་འབྱུང་གནས་ཀྱི་ལོ་རྒྱུས་བཞུགས། བླ་མ་དམ་པ་རྣམས་ལ་ཕྱག་འཚལ་ལོ། །སློབ་དཔོན་ཨ་རོ་ཡེ་ཤེས་འབྱུང་གནས་ཀྱི་ལོ་རྒྱུས་འདི་ལ་གསུམ་སྟེ། དང་པོ་སྐྱེ་རྒྱུད་བསྟན་པ་དང་། བར་དུ་མཛད་པ་བསྟན་པ་དང་། ཐ་མར་མཐར་འགྱུར་གྱི་ལོ་རྒྱུས་བསྟན་པའོ། །དེ་ལ་དང་པོ་སྐྱེ་རྒྱུད་བསྟན་པ་ནི། ཅོག་རོ་ཟངས་དཀར་མཛོད་ཁུལ་གྱིས། སློབ་དཔོན་ཨ་རོ་ཡེ་ཤེས་འབྱུང་གནས་ལ་མངོན་པར་ཤེས་པ་མངའ་བ་རྣམས་ལ་སྔོན་གྱི་གནས་རྗེས་སུ་དྲན་པ་བགྱི་བ་བདོག་མཆི་བས། སློབ་དཔོན་ཉིད་ཀྱིས་སྔོན་གྱི་སྐྱེ་གནས་ཇི་ཙམ་ཞིག་དྲན་པ་ལགས་གསུང་བར་ཞུ་དང་ཞེས་ཞུས་པས། སློབ་དཔོན་གྱི་ཞལ་ནས། འཁོར་བ་ལ་ཐོག་མཐའ་མེད་པར་ངའི་སྐྱེ་རྒྱུད་ལ་ཐོག་མཐའ་ཅང་ཡོད་དམ་གསུང་། འོན་ཀྱང་ངས་ལམ་སྣ་ཟིན་ནས་སྐྱེ་བ་ལྔ་ཙམ་རྒྱུད་པ་ཡིན་གསུང་། དེ་རྣམས་གསུང་བར་ཞུ་དང་བྱས་པས། དེ་ཡང་དང་པོ་རྒྱ་གར་ཤར་ཕྱོགས་སུ་བྲམ་ཟེ་མགྱོགས་བྱེད་ཅེས་བྱ་བའི་བུར་སྐྱེས་ཏེ། དེའི་དུས་སུ་ས་ཐེག་པ་ཆེན་པོའི་ཆོས་ལ་ནན་ཏན་བྱས་པས་ཆོས་ལ་ངེས་པར་སེམས་པའི་བཟོད་པ་བྱ་བ་ཐོབ་སྟེ། དེའི་དུས་སུ་ལམ་སྣ་ཟིན་པ་ཡིན་གསུང་། དེ་ནས་ཚེ་འཕོས་ནས་སུམ་ཅུ་རྩ་གསུམ་གྱི་གནས་སུ་ལྷའི་བུ་ཀུན་དགའ་སྙིང་པོ་བྱ་བར་སྐྱེས་ཏེ། དེའི་དུས་སུ་ང་ལྷའི་ལོངས་སྤྱོད་ལ་མ་ཆགས་པར་ལྷའི་དབང་པོ་ལ་ཆོས་ཉན་ཅིང་ལྷའི་བསམ་གཏན་ལ་མཉམ་པར་འཇོག་པ་བྱས་པ་ཡིན་གསུང་། དེ་ནས་ཤི་འཕོས་ནས་རྒྱ་གར་དུ་བྲམ་ཟེ་སྣོན་པོ་བྱ་བའི་བུ་དགེ་སློང་མཐའ་གྲོལ་གཞོན་ནུ་བྱ་བར་སྐྱེས་ཏེ། རྒྱ་གར་གྱི་མཁས་པ་རྣམས་ལ་སྡེ་སྣོད་ཀྱི་ཆོས་མ་ལུས་པ་མཉན་ཞིང་ཤེས་རབ་ཀྱིས་དེ་དག་གི་དོན་རྟོགས་ཤིང་ཁོང་དུ་ཆུད་པ་ཡིན་གསུང་། དེ་ནས་ཤི་འཕོས་ནས་འགར་དགེ་ལོད་ཅེས་བྱ་བའི་བུ་དགེ་སློང་སྲིན་བུ་ཉ་ཞེས་བྱ་བར་སྐྱེས་ཏེ། དེའི་དུས་སུ་སློབ་དཔོན་པད་མ་སམ་བྷ་བ་བསམ་ཡས་སུ་བྱོན་ནས་བཞུགས་པ་དང་མཇལ་ཏེ་གསང་སྔགས་ཟབ་མོའི་ཆོས་ཉན་ཞིང་དེའི་དོན་རང་གཅིག་པུར་བསྡད་ནས་བསམ་གཏན་ཉམས་སུ་ལེན་པ་འབའ་ཞིག་ལ་བརྩོན་པར་བྱས་པ་ཡིན་གསུང་། དེ་ནས་ཤི་འཕོས་ནས་མདོ་ཁམས་སུ་ཕ་ཨ་རོ་ཉག་པོ་དང་། མ་སོག་མོ་དཔལ་སྒྲོན་བྱ་བའི་བུ་ཨ་རོ་ཡེ་ཤེས་འབྱུང་གནས་ཞེས་བྱ་བར་སྐྱེས་པ་འདི་ཉིད་ཡིན་གསུང་ངོ་། །དེ་ལྟ་བུའི་དམ་པ་དེ་ལ་ངོ་མཚར་ཅན་གྱི་རྟགས་རྣམ་པ་ལྔ་བྱུང་སྟེ། ཚེ་སྔ་མ་ལ་ཆོས་ཉིད་ཀྱི་ཉམས་རྒྱུད་ཆགས་དང་ལྡན་པའི་རྟགས་སུ་མའི་ཁོང་པ་ན་གནས་པའི་དུས་སུ་ཨའི་སྒྲ་ལན་གསུམ་བྱུང་། སྐྱེ་བ་འདི་ཉིད་ལའང་ཆོས་ཉིད་ཀྱི་ཉམས་རྒྱུན་ཆགས་སུ་གནས་པའི་རྟགས་སུ་མ་ལས་བཙས་པའི་ཚེ་ན་ཡང་ཤེས་པ་ཏིང་ངེ་འཛིན་གྱི་ངང་དུ་མྱོས་པ་བྱུང་། འདོད་པའི་ཡོན་ཏན་ལ་ཞེན་པ་མེད་པའི་རྟགས་སུ་ཟས་དང་གོས་ཀྱི་འདུ་ཤེས་མེད་པ་གཅིག་བྱུང་། མའི་བཀའ་ལ་དྲིན་དུ་བཟོ་བའི་རྟགས་སུ་མས་གཏམ་དྲིས་པ་ལ་ལན་གཏེར་ཤེས་པ་གཅིག་བྱུང་། སྤྲུལ་པའི་སྐུ་ཡིན་པའི་རྟགས་སུ་ལང་ཚོ་གཞན་དང་མཚུངས་པ་མེད་པར་ཤིན་ཏུ་བསྐྱེད་རྫོགས་སྐྱེན་པ་གཅིག་བྱུང་ངོ་། །དེ་ཡན་ཆད་ནི་དང་པོ་སྐྱེ་རྒྱུད་བསྟན་པའོ། །བར་དུ་མཛད་པ་བསྟན་པ་ནི། སྤྱི་དོན་དགུ་ཡོད་པ་ལས། དང་པོ་དགེ་བའི་བཤེས་གཉེན་ཆེན་པོ་སེང་གེ་རྒྱལ་བའི་སྲས་དང་། ཡང་གོང་ཡེ་ཤེས་གཡུང་དྲུང་གི་སྤྱན་སྔ་ལས་དང་བག་ཆགས་ཇི་ལྟར་སད་པ་ནི། དེ་ཡང་ཕ་མ་གཉིས་པོ་དེས་བུའི་སྤྱོད་ལམ་ངོ་མཚར་བ་མང་པོ་ནི་མཐོང་། ཇི་ལྟ་ཡིན་ངོ་མ་ཤེས་པར་གྱུར་པ་ལ་དགེ་བཤེས་གཉིས་པོའི་སྤྱན་སྔར་ཁྱེར་ནས་ཕྱིན་ཏེ། བདག་ཅག་གི་བུ་འདི་ལ་ངོ་མཚར་བའི་རྟགས་འདི་ལྟ་བུ་བྱུང་བས་འདི་ཇི་ལྟར་བུ་གཅིག་ལགས་ཞེས་ཞུས་པས། འདིའི་སྤྱོད་པ་ལ་ངེད་ཀྱིས་བརྟག་པར་བྱས་ཡིས་བུ་འདིར་ཞོག་ལ་ཁྱེད་རང་སོང་གཅིག་གསུངས་ནས་ཕ་མས་ལོག་སྟེ་བུ་དེར་བཞག་པས། བུ་དེ་དགེ་བཤེས་གཉིས་པོ་ལ་སྤྱན་འབྲུ་ཚུགས་སུ་ཅེ་རེ་གཟིགས་ཀྱི་འདུག་པས། ཁོང་གི་བྱིན་བརླབས་དགེ་བཤེས་གཉིས་པོ་ལ་ཞུགས་ནས་ཏིང་ངེ་འཛིན་གྱི་ཉམས་ཁྱད་པར་ཅན་སྐྱེས་སོ། །བུ་དེས་ཀྱང་ཁོང་ཇི་ལྟར་མཛད་པའི་མཛད་སྤྱོད་ལྟར་བྱས་ཤིང་བསྒོམས་པས་སྐྱེ་བ་སྔ་མ་རྣམས་ཀྱི་ཐོས་བསམ་དང་བསྒོམས་བསྒྲུབ་ཀྱི་བག་ཆགས་ཐམས་ཅད་དུས་དེ་རུ་སད་པ་ལགས་སྐད། དེ་ནས་ཨན་ཆུང་ཡང་རྫོང་གི་དགོན་པར་གཤེགས་ནས་དགོངས་པ་མཛད་པས་ལོ་བདུན་དང་ཟླ་བདུན་ན་ཆོས་ཉིད་མངོན་སུམ་དུ་མཐོང་བའི་ལམ་མངོན་དུ་བྱས་ཏེ་སྣང་བ་རང་བཞིན་མེད་པར་མཐོང་བའི་ཉམས་ཐོབ་ནས་ཕྱག་རྡོ་ལ་རེག་པས་རྗེས་ལམ་ལམ་བྱུང་། ཞབས་བྲག་ལ་གཞག་པས་འདག་པའི་སྟེང་དུ་གཞག་པ་ལྟ་བུ་བྱུང་ངོ་། །འོད་ཀྱི་ལུས་ཐོབ་སྟེ་ཉིན་མཚན་ཁྱད་པར་མེད་པར་སྣང་བ་འབའ་ཞིག་ཏུ་གྱུར་པ་བྱུང་། རྟེན་འབྲེལ་གྱི་སྣང་བ་ཐམས་ཅད་བདེན་མེད་དུ་ཤེས་པས་བན་བུན་དང་ལང་ལོང་གི་ཉམས་ཤར་བ་ལགས་སྐད་དོ། །དེར་ཡང་བཞུགས་སུ་མ་བཞེད་པར་ཁམས་ཀྱི་ཡང་རྩེར་ལུང་གི་དགོན་པར་གཤེགས་ཏེ་དེར་ལོ་གཅིག་དང་ཟླ་བ་གཅིག་བཞུགས་པས། རྫུ་འཕྲུལ་དང་ཏིང་ངེ་འཛིན་ལ་དབང་ཐོབ་པ་བྱུང་སྟེ། ཆེན་པོ་ཆུང་ངུར་འགྱུར་བ་དང་། ཆུང་ངུ་ཆེན་པོར་འགྱུར་བ་དང་། ཡོད་པ་མི་སྣང་བར་འགྱུར་བ་དང་། མེད་པ་སྣང་བར་བྱེད་པ་དང་། འགྲོ་ན་འདུག་པར་མཐོང་བ་དང་། འདུག་ན་འགྲོ་བར་མཐོང་བ་ལ་སོགས་པའི་རྫུ་འཕྲུལ་གྱི་བྱེ་བྲག་ཐམས་ཅད་ལ་དབང་བསྒྱུར་ནུས་པ་བྱུང་ངོ་། །དེ་ནས་ཆོས་སྐོར་གློང་ཐང་སྒྲོན་མའི་གནས་སུ་གཤེགས་ནས་ལམ་ཉེས་དེ་ལྟ་བུ་སྤྱོད་པ་མཛད་དེ། མཆོད་རྟེན་གཅིག་གི་རྩར་བཞུགས་ནས་ཉིན་བཞིན་ཁྲུས་ཀྱི་དོད་པོར་ཁ་ནས་མར་ཆུ་མཐུངས་ཀྱི་བཤོས། མཚན་བཞིན་གནས་ཀྱི་སྒོ་འཕྲེད་བཅད་ཀྱི་ཉལ། དེ་དག་ཀྱང་བརྡར་བསྟན་པ་ཡིན་ཏེ་མཆོད་རྟེན་གྱི་རྩར་སྡོད་པ་ནི་རྒྱབ་དཀོན་མཆོག་མ་གཏད་ན་བདེ་བྱ་བ་ཡིན། ཁྲུས་ཁོང་དུ་བྱེད་པ་ནི་ནང་གི་ཉོན་མོངས་པ་དག་དགོས་བྱ་བ་ཡིན། ནུབ་མོ་སྒོ་འཕྲེད་བཅད་ནས་ཉལ་བ་ནི་གནས་ན་བཞུགས་པའི་ལམ་ལ་གནས་པའི་དགེ་འདུན་གྱི་བར་ཆད་བསྲུང་བ་ཡིན་ནོ། །དེ་ཡང་ནུབ་གཅིག་སྒོ་འཕྲེད་བཅད་ནས་ཉལ་བའི་ཚེ་གནས་བརྟན་གྱིས་ཨ་རོ་འདི་ཕར་ལོངས་དང་བྱས་ནས་རྡེག་པ་གཅིག་རྒྱབ་པས་ཨ་རོ་དང་ཨ་རོ་སྟེ་ཡེ་ཤེས་ཀྱི་འབྱུང་གནས་གཅིག་གདའ་གསུང་། དེ་ནས་བཙུན་པ་རྣམས་ལ་རྫུ་འཕྲུལ་བསྟན་པར་བཞེད་ནས། ཁོང་གིས་ཤིང་འཐུར་གཏང་བའི་ལག་ཆ་ཐམས་ཅད་བོར་ནས་བྱུང་བས། ཁོང་གིས་རྒྱ་གད་དང་ཆོས་ཏེ་གཡང་ལ་བསྐྱུར་སྙམ་པ་ལ། འདི་སྐད་དུ་འགུར་བཞེངས་པ། འཁོར་འདས་སེམས་ཀྱི་རོལ་སྣང་ལ། །བདེན་པར་བཟུང་དུ་དངོས་པོ་མེད། །རང་ངོ་རང་གི་ཤེས་ཙམ་ན། །འགྲོ་དྲུག་གཡང་ལ་ཉམ་མི་ང་། །འཁོར་བའི་ངམ་གྲོག་གཡང་ས་ནས། །མྱ་ངན་འདས་པའི་ཐང་ཆེན་རྙེད། །ཅེས་གསུངས་པ་དང་ངམ་གྲོག་དང་གཡང་ས་ཀུན་ཐང་མཉམ་པར་སོང་སྐད། དེར་བཙུན་པ་ཀུན་ཡ་མཚན་སྐྱེས་སོ། །ཡང་ཉིད་གཅིག་ཆུ་འཆུར་གཏང་བས་ཆུ་འཆུ་བའི་ལག་ཆ་ཐམས་ཅད་བཅག་ནས་བྱུང་སྟེ། ཡང་ཁོང་གི་ཆུ་བསྐྱུར་དགོས་སྙམ་པ་ན། འཁོར་བའི་རྒྱ་མཚོ་གཏིང་རིང་པས། །དུག་ལྔའི་འདམ་ལས་ཐར་དུས་མེད། །སྐྱེ་རྒས་ན་འཆིའི་ཆུ་རྒྱུན་དེ། །ཤེས་རབ་མེ་ཡིས་སྐམས་ན་སྐོམས། །ཞེས་གསུངས་པས་ཆུའི་ཚོགས་ཐམས་ཅད་ཡེ་མེད་པར་གྱུར་ཏེ་ལུང་པ་ཐམས་ཅད་སྐམ་པར་གྱུར་སྐད། དེར་ཡང་བཙུན་པ་རྣམས་ངོ་མཚར་ཆེན་པོ་སྐྱེས་སོ། །དེ་ལ་སོགས་པ་རྫུ་འཕྲུལ་གྱི་སྤྱོད་པ་ཡ་མཚན་དུ་གྱུར་པ་མང་པོ་མཛད་དེ། དེ་ནས་དེར་ཡང་མ་བཞུགས་པར་གཤེགས་པ་དང་མཁན་པོ་བླ་ཆེན་དགོངས་པ་རབ་གསལ་དང་མཇལ་བས། བླ་ཆེན་གྱི་ཞལ་ནས་སྨྱོན་ཐབས་ཀྱི་སྤྱོད་པ་དེ་ལྟ་བུ་མ་མཛད་པར་ཆོས་ལ་ཐོས་བསམ་ཡང་མཛོད། རབ་ཏུ་བྱུང་ལ་སྡོམ་པ་ཡང་བསྲུངས་གསུངས་པས། གངས་ཀྱི་སེང་གེ་དཀར་མོ་དང་། །གྲོང་གི་ཀུ་ཀུ་ར་ཙ་གཉིས། །རང་སྐད་འདོན་པར་འདྲ་ལགས་ཏེ། །ཟིལ་གྱི་གནོན་པར་ཁྱད་པར་ཆེ། །རི་རྩིབས་འགྲིམ་པའི་བྱིའུ་ཆུང་དང་། །ནམ་ཕངས་གཅོད་པའི་ཁྱུང་ཆེན་གཉིས། །འདབ་གཤོག་རློབ་པར་འདྲ་ལགས་ཏེ། །ནམ་འཕངས་གཅོད་པར་ཁྱད་པར་ཆེ། །ང་སྣང་ལ་རང་བཞིན་མེད་པ་དང་། །ཁྱོད་བློ་དམན་ཚིག་ལ་ཞེན་པ་གཉིས། །དོན་མཆོག་བསྒྲུབ་པར་འདྲ་ལགས་ཏེ། །འབྲས་བུ་ཐོབ་པར་ཁྱད་པར་ཆེ། །ཞེས་གསུངས་པས། བླ་ཆེན་པོ་ངོ་མཚར་སྐྱེས་ཏེ། ཁྱོད་སྐྱེས་བུ་ཁྱད་པར་ཅན་དུ་འདུག་པས་འགྲོ་བའི་དོན་བྱེད་དགོས་པ་ཡིན། དེའི་ཕྱིར་ན་འགྲོ་བ་དད་པར་བྱ་ཞིང་ཉེས་སྤྱོད་མི་དགེ་བའི་ཚོགས་སྤོང་བ་ལ་འཇུག་པར་བྱ་བའི་ཆེད་དུ་རབ་ཏུ་བྱུང་བ་བྱེད་དགོས་པ་ཡིན་པས་ཁྱེད་རབ་ཏུ་བྱུང་ཞིག །འབྲས་བུ་གསང་སྔགས་ཀྱི་ཐེག་པའི་སྒོ་ནས་དོན་བྱེད་པ་ལ་སློབ་མ་དཀྱིལ་འཁོར་གྱི་ལམ་དུ་འཇུག་པར་བྱ་བའི་ཕྱིར་དབང་དགོས་པ་ཡིན་པས་དབང་བསྐུར་ཞུས་ཤིག །གཞན་དག་ཡིད་ཆེས་པར་བྱ་བའི་ཕྱིར་ཆོས་ཉན་དགོས་པ་ཡིན་པས་མཁན་པོ་རྣམས་ཀྱིས་སྤྱན་སྔར་ཆོས་ཉོན་ལ་ཐུགས་དགོངས་བསྡུར་ཅིག་གསུང་པས། སྔར་གྱི་ཚིགས་བཅད་རྣམས་ཀྱང་གསུངས་པ་དང་བླ་ཆེན་པོ་སྔངས་པ་ན། སློབ་དཔོན་ཉིད་ཐབས་ཁྱད་པར་ཅན་གྱིས་འགྲོ་བའི་དོན་དུ་བསྟན་པའི་བྱ་བ་མཛད་པ་ལ་དགོངས་ནས། བླ་ཆེན་དགོངས་པ་གསལ་ཉིད་ཀྱི་སྤྱན་སྔར་རབ་ཏུ་བྱུང་སྟེ་བསྙེན་པ་རྫོགས་པ་མཛད་ནས་མིང་ཡང་དགེ་སློང་ཡེ་ཤེས་འབྱུང་གནས་ཞེས་བཏགས་སོ། །དེ་ནས་སློབ་དཔོན་ཆེན་པོ་སྙགས་ཛྙཱ་ན་ཀུ་མ་ར་ལ་དབང་རྣམས་རྫོགས་པར་ཞུས་ཏེ་གསང་མཚན་རྡོ་རྗེ་སྣོན་པོ་ཞེས་བྱ་བར་བཏགས་སོ། །དེ་ནས་སློབ་དཔོན་ཆེན་པོ་པ་ཀོར་བཻ་རོ་ཙ་ན་དང་། ཁ་ཆེ་ཡེ་ཤེས་རྡོ་རྗེ་དང་། སྙན་ཆེན་དཔལ་དབྱངས་ལ་སོགས་པ་མཁས་པ་མང་པོ་ལ་མཉན་ནས་ཐུགས་དགོངས་བསྡུར་བས། ཚིག་གི་སྒྲོས་དང་མཚོན་ཚུལ་གྱི་བྱེད་པ་ལ་ཅུང་ཟད་མ་མཐུན་ཡང་ཡང་དག་པའི་དོན་ལ་མཐུན་པར་ལ་བཅད་དེ་དགོངས་པ་གཅིག་ཏུ་རྟོགས་ནས་མཚན་ཡང་ཤེས་རབ་ཅན་རང་འབྱུང་གི་ཡེ་ཤེས་བྱ་བར་བཏགས་སོ། །སློབ་དཔོན་བཻ་རོ་ཙ་ནའི་ཞལ་ནས་འདི་སྤྲུལ་པའི་སྐུ་ཡིན་གསུང་། གཉགས་ཛྙཱ་ནའི་ཞལ་ནས་ས་བརྒྱད་ནོན་པའི་བྱང་ཆུབ་སེམས་དཔའ་ཡིན་གསུང་། གཉན་ཆེན་དཔའ་དབྱངས་ཀྱི་ཞལ་ནས་ས་དང་པོ་བདེན་པ་གཟིགས་པའི་བྱང་ཆུབ་སེམས་དཔའ་ཡིན་གསུང་། བླ་ཆེན་དགོངས་པ་གསལ་གྱི་ཞལ་ནས་འཕགས་ཀླུ་སྒྲུབ་ཀྱི་སྤྲུལ་པ་ཡིན་གསུང་། ཁ་ཆེ་ཡེ་ཤེས་རྡོ་རྗེའི་ཞལ་ནས་རྡོ་རྗེ་སེམས་དཔའི་སྤྲུལ་པ་ཡིན་གསུང་། ཁ་གཅིག་ནི་འཕགས་པ་འཇམ་དཔལ་གྱི་སྤྲུལ་པ་ཡིན་པར་བཞེད་དོ། །དེ་ནས་དྲང་སྲོང་གཏུམ་པ་ལྟ་བུའི་རི་ལ་བྱོན་ནས་དེར་དཔལ་རྡོ་རྗེ་སེམས་དཔའི་ཞལ་མངོན་སུམ་དུ་གཟིགས་ཏེ་ལུང་ཡང་མངོན་སུམ་དུ་བསྟན། རྡོ་རྗེ་སེམས་དཔའ་ཐུགས་ལེགས་པར་ལྟ་བའི་གདམ་ངག་ལ་སོགས་པ་ཡང་གནང་། དེ་ནས་ཁྱོད་འདི་རུ་མ་སྡོད་པར་འཐེབས་སྐུ་སྟག་མོའི་དགོན་པར་རྒྱུག་ལ་མདོ་རྒྱུད་ཐམས་ཅད་ཀྱི་དོན་བསྡུས་ལ་འགྲོ་བ་སེམས་ཅན་གྱི་དོན་བྱས་ཤིག་པར་ལུང་བསྟན་ནོ། །དེ་ནས་ལུང་བསྟན་པ་བཞིན་འཐེབས་སྐྱུ་སྟག་མོའི་དགོན་པར་བྱོན་ནས་བཞུགས་པས་མདོ་རྒྱུད་ཐམས་ཅད་ཀྱི་དོན་ཐུགས་ལ་ཤར་རོ། །དེ་ནས་སློབ་དཔོན་གྱིས་དབང་པོ་རབ་འབྲིང་ཐ་མ་གསུམ་དང་སྦྱར་ཏེ། ཕྱི་མདོ་སྡེ་ལ་རྟེན་ནས་དབང་པོ་ཐ་མའི་དོན་དུ་ཕྱི་སྐོར་གྱི་ཆོས་རྣམས་མཛད་དོ། །ནང་གསང་སྔགས་ལ་རྟེན་ནས་དབང་པོ་འབྲིང་གི་དོན་དུ་ནང་སྐོར་གྱི་ཆོས་རྣམས་མཛད། གསང་བ་ཐུགས་ཀྱི་ཉམས་མྱོང་ལ་རྟེན་ནས་དབང་པོ་རབ་ཀྱི་དོན་དུ་གསང་སྐོར་གྱི་ཆོས་རྣམས་མཛད་དོ། །དེ་ནས་སློབ་བུ་གང་དང་གང་ལ་གདམ་ངག་གང་དང་གང་གནང་བ་དང་རྒྱུད་པའི་ཐེམ་ཡིག་གི་ལོ་རྒྱུས་ནི། སློབ་དཔོན་ཆེན་པོ་ཨ་རོ་ཡེ་ཤེས་འབྱུང་གནས་ཀྱིས་དང་པོ་ཡ་ཟི་བོན་སྟོན་ལ་རྒྱལ་ཐབས་སྤྱི་བླུགས་ཀྱི་དབང་ལ་སོགས་པ་དང་པོ་རིག་པ་རྩལ་གྱི་དབང་བསྐུར་ནས། དེའི་ངང་ལ་རིག་པ་རྩེན་གྱིས་གཞག་པའི་མན་ངག་གནང་། དེ་ནས་རྣམ་རྟོག་རྩད་ནས་གཅོད་པ་སྤུ་གྲི་ལྟ་བུའི་མན་ངག་གནང་། དེ་ནས་རང་བྱུང་གི་ཡེ་ཤེས་མ་ཤར་བ་ཤར་བར་བྱེད་པའི་མན་ངག་གནང་། དེ་ནས་རྟོགས་པར་བྱེད་པ་ལྟ་བའི་གདམས་ངག་གནང་། དེ་ནས་ཡེ་ཤེས་ངོས་བཟུང་གནང་། དེ་ནས་བྱང་ཆུབ་སེམས་གཅོག་གཞག་མ་གནང་། དེ་ནས་རིན་པོ་ཆེ་ཉམས་ཀྱི་མན་ངག་གནང་ངོ་། །དེ་ནས་དེ་དག་གི་དཀའ་བ་གཅོད་པར་བྱེད་པ་ལ་དྲིས་ལན་བརྒྱད་ཀྱི་གདམ་ངག་དང་། ཚུལ་བདུན་གྱི་སྒོ་ནས་རྟོགས་པར་བྱེད་པ་དང་། རིན་པོ་ཆེ་དཀའ་གཅོད་ཀྱི་གདམས་པ་དང་། རིན་པོ་ཆེ་གཞུང་སྲོང་གི་གདམས་པ་དང་། རིན་པོ་ཆེ་ཡང་ཞུན་གྱི་གདམས་པ་དང་། བར་དོའི་གདམས་པ་རྣམས་གནང་བ་ལགས་སོ། །ཡང་གདམས་པ་སྐོར་ཆུང་གཅིག་ལ། ཡེ་ཤེས་འཁོར་ལོས་འཇུག་པའི་སྒོ་བསྟན། སངས་རྒྱས་བཞིའི་མན་ངག་གིས་ཆོས་ཉིད་ལམ་དུ་བཀྱེར་བའི་རིམ་པ་བསྟན། ཡེ་ཤེས་བཞིའི་མན་ངག་གིས་ལྟ་བ་བསྟན། ཡེ་ཤེས་སེམས་ལས་བྱུང་བའི་མན་ངག་གིས་སེམས་ཀྱི་ཡོན་ཏན་བསྟན། ངེས་པའི་ཞུས་ལན་རིག་པའི་བསམ་གཏན་གྱིས་ཐེ་ཚོམ་གྱི་གེགས་བསལ། བྱང་སེམས་རྐྱེན་དབང་དུ་མི་གཏང་བའི་མན་ངག་གིས་སྡུག་བསྔལ་ཆོས་ཉིད་དུ་བསྟན། རིན་པོ་ཐོག་བབས་ཀྱི་མན་ངག་གི་ཚེ་འདི་ལ་སངས་རྒྱས་ཀྱི་དགོངས་པ་བསྟན། དེ་རྣམས་སྐར་ཕྲན་བཞིན་དུ་མ་འདྲེས། ཆུ་བོ་བཞིན་དུ་རྒྱུན་མ་ཆད་པར་གནས་པ་ལགས་སོ། །དེ་ནས་རྔོག་ལེགས་པའི་ཤེས་རབ་ལ་གདམས་པ་ཇི་ལྟར་གནང་བ་ནི། རྔོག་ལེགས་པའི་སྒྲོན་མ་ལ་གདམ་ངག་དང་སྦྱར་ནས་ཐོག་ཏུ་སྤུངས་པ་ཕྱི་ཚུལ་ལོ། །ནང་ཚུལ་དུ་འཁོར་བ་འཇུག་ལྡོག་གིས་སྣང་སྲིད་འཁོར་འདས་ཀྱི་ཆོས་གཏན་ལ་ཕབ། རིན་པོ་ཆེ་གནད་ཀྱི་སྒྲོན་མས་གང་ཟག་གཅིག་སངས་རྒྱ་བའི་ཆོས་སུ་བསྟན། རིན་པོ་ཆེ་རང་དབང་གི་ཐུགས་ཀྱི་མན་ངག་གིས་མན་ངག་དཀའ་ཚོམས་ཀྱི་འཕྲང་བསྟན། ས་ཟིན་པ་གསུམ་གྱིས་སྐུ་གསུམ་ངོ་སྤྲད། མན་ངག་ལྕེ་རྡོར་གྱིས་ལ་བཟླ། ཡིག་ཕྲན་སུམ་ཅུ་རྩ་གཉིས་ཀྱིས་རྟོགས་པའི་གདེང་བསྐྱེད་པ འོ། །དྲུམ་ཤིང་ཤེས་རབ་སྨོན་ལམ་ལ་ཇི་ལྟར་གདམས་པའི་ལོ་རྒྱུས་ནི། དང་པོ་སྟོང་ཐུན་བཅྭོ་བརྒྱད་ཀྱི་གདམ་ངག་གནང་། སྣང་སྲིད་ཇི་ལྟར་བྱུང་བ་ལ་སྣང་སྲིད་བྱུང་ལུགས་ཀྱི་སྡེ་སྐོར་གནང་། གྲུབ་མཐའ་གཏན་ལ་འབེབས་པ་ལ་སྣང་བ་བཅུ་བདུན་གྱི་སྡེ་སྐོར་གནང་། འཁྲུལ་པ་གཏན་ལ་འབེབས་པ་ལ་ཚད་མ་བརྒྱད་ཀྱི་སྡེ་སྐོར་གནང་། སེམས་དང་འབྱུང་བ་ཐ་མི་དད་པ་བསྒྲུབ་པ་ལ་འབྱུང་བ་དྲུག་རྩིས་ཀྱི་སྡེ་སྐོར་གནང་། ལྟ་བསྒོམ་སྤྱོད་པ་གསུམ་གཏན་ལ་འབེབས་པ་ལ་དཔེ་དགོངས་དྲུག་གི་སྡེ་སྐོར་གནང་བའོ། །ལྔ་བསྡུས་ཀྱི་སྡེ་སྐོར་ལྔ་ལ། སྦུབས་ལྔ་དང་། ཀུན་གཞིའི་ལྔའི་སྡེ་ལུས་ལྔ་དང་། བར་དོ་ལྔའི་སྡེ་སྐོར་དང་། སེམས་ཉམས་ལྔ་དང་། རྒྱས་གདབ་ལྔའི་སྡེ་སྐོར་གནང་། བཞི་བསྡུས་ཀྱི་སྡེ་སྐོར་ལ། སྒྲོན་མ་བཞི་དང་། བསོད་བཞིའི་སྡེ་སྐོར་གནང་། གསུམ་བསྡུས་ཀྱི་སྡེ་སྐོར་ལ། སྒོ་གསུམ་གཏན་ལ་དབབ་པ་དང་། བཅའ་ཐབས་རྣམ་པ་གསུམ་དང་། སྐུ་གསུམ་གྱི་སྡེ་སྐོར་བསྟན། གཉིས་བསྡུས་ཀྱི་སྡེ་སྐོར་ལ། སྐད་གཅིག་མ་གཉིས་དང་། སེམས་དང་སྙིང་པོ་དབྱེ་བ་དང་། སྙིང་པོ་སྣང་ཚུལ་གྱི་སྡེ་སྐོར་དང་། དངོས་སྣང་དབྱེ་བའི་སྡེ་སྐོར་དང་། ཕྲ་མོའི་གདམས་པ་ཉི་ཤུ་རྩ་གཅིག་གནས་པ་ལགས་སོ ། །ཅོག་རོ་ཟངས་ཀ་མཛོད་ཁུར་ལ་ཇི་ལྟར་གདམས་པའི་ལོ་རྒྱུས་ནི། གཞི་ལམ་འབྲས་བུ་གཏན་ལ་འབེབས་པ་ལ་གཞིའི་དཔེ་ཆུང་བདུན། ལམ་གྱི་དཔེ་ཆུང་བདུན། འབྲས་བུའི་དཔེ་ཆུང་བདུན་གནང་། འཁྲུལ་བ་གཏན་ལ་འབེབས་པ་ལ་འཁྲུལ་བ་རྩད་གཅོད་གདམས་པ་གནང་། དགོངས་པ་འཕྲང་གི་གནད་སྟོན་པ་ལ་དཀའ་ཚོམས་བཅུ་བཞིའི་དགོངས་པ་བསྟན། ལྟ་བ་འཇུག་སྒོ་ཉམས་གསུམ་དུ་སྟོན་པ་ལ་ཚིག་དོན་གསལ་བའི་དགོངས་པ་བསྟན། ལྟ་བ་མཉམ་གཞག་སྤྱོད་པ་གསུམ་གྱིས་གཏན་ལ་འབེབས་པ་ལ་གཟེར་ཀ་གནད་བྱུང་གི་གདམས་པ་བསྟན། ལྟ་བསྒོམ་སྤྱོད་པ་འབྲས་བུ་བཞི་གཏན་ལ་འབེབས་པ་ལ་ཡི་གེ་མེད་པའི་སྙན་རྒྱུད་བསྟན། བསྒོམ་དུ་ཡོད་པར་འདོད་པ་ལ་གཟེར་དམིགས་དྲུག་པ་བསྟན། བསྒོམ་དུ་མེད་པར་འདོད་པ་ལ་འཕྲུལ་ཡི་གེ་བཞི་སྐོར་བསྟན། ལམ་བར་དོ་གཅོད་པ་ལ་བར་རྡོ་བཞིའི་གདམས་པ་བསྟན། ཆོས་ཉིད་བརྡའ་ཡིས་མཚོན་པ་ལ་གྱད་ཁམས་འཕྲུལ་གྱི་ལྡེ་མིག་བསྟན། འཁོར་བ་འཇུག་ཟློག་གི་གནད་སྟོན་པ་ལ་གསང་ཚུལ་ཉི་མའི་སྒྲོན་མ་བསྟན། ཉོན་མོངས་པའི་སྒྲིབ་པ་གཅོད་པ་ལ་རིག་པ་རྐྱང་འདེད་ཀྱི་གདམས་ངག་བསྟན། ཤེས་བྱའི་སྒྲིབ་པ་གཅོད་པ་ལ་ལྟ་བའི་ལྡེ་མིག་ལ་སོགས་པ་བསྟན་པ་ལགས་སོ། །དེ་ཡན་ཆད་ཀྱིས་སོ་སོའི་བྱེ་བྲག་ལ་ཇི་ལྟར་གདམས་པ་བསྟན་པའོ། །ཐུན་མོང་སྤྱི་ལ་ཇི་ལྟར་གདམས་པའི་གདམ་ལུགས་བསྟན་པ་ནི། སྤྱིར་ཡི་གེ་རིགས་ཀྱི་གདམས་པ་སྡེ་ཚན་རྣམ་པ་བཞིར་འདུས་ཏེ། རྒྱ་ཆེ་བ་སེམས་སྡེའི་སྐོར་དང་། སྐབས་སུ་ལེན་པ་བསམ་གཏན་གྱི་སྡེ་དང་། ཟབ་པ་སྡེ་མིག་སྐོར་དང་། དཀའ་བ་གཅོད་པ་སྒྲོན་མའི་སྐོར་རོ། །སེམས་སྡེའི་སྐོར་ནི་སེམས་སྨད་བཅོ་བརྒྱད་ལས་འགྲེལ་པ་བཅྭ་བརྒྱད་ཀྱིས་གཏན་ལ་ཕབ་པ་དང་། གཉན་ཆེན་གྱི་སྒྲོན་མ་དྲུག་ལ་འགྲེལ་པ་དྲུག་གིས་གཏན་ལ་ཕབ་པའོ། །ཉམས་སུ་ལེན་པ་བསམ་གཏན་གྱི་སྡེ་ལ། ཐེག་ཆེན་རྣལ་འབྱོར་དང་། སེམས་ཉམས་རྣམ་གསུམ་དང་། ལུང་མན་ངག་མདོར་བསྡུས་དང་། ཨ་ཏི་ཡོ་གའི་མན་ངག་བསྡུས་པའི་བསམ་གཏན་དང་། ཡུལ་ཀུན་ལ་འཇུག་པའི་བསམ་གཏན་དང་། རིན་པོ་ཆེ་སྤུངས་པའི་བསམ་གཏན་དང་། བསྒོམ་ལུང་གསུམ་པའི་བསམ་གཏན་དང་། ཞུས་ལེན་ཁུངས་ཀྱི་བསམ་གཏན་ལ་སོགས་པ་རྣམས་སོ། །ཟབ་པ་ལྡེ་མིག་གི་སྐོར་ནི། འཁྲུལ་འཁོར་ལྡེ་མིག་གི་རྩ་འགྲེལ་དང་། ལྟ་བསྒོམ་སྤྱོད་པ་གསུམ་གྱི་ལྟེ་མིག་དང་། གལ་གེགས་གསེར་གྱི་ལྡེ་མིག་དང་། ཐེག་དགུ་ལ་ཤན་འབྱེད་པའི་ལྡེ་མིག་དང་། གྱད་ཁམས་འཕྲུལ་གྱི་ལྡེ་མིག་ལ་སོགས་པའོ། །དཀར་བ་གཅོད་པ་སྒྲོན་མའི་སྐོར་ལ། དཔེ་དོན་གསུམ་གྱི་སྒྲོན་མ་དང་། ལྟ་བ་རིན་པོ་ཆེའི་སྒྲོན་མ་དང་། སེམས་ཀྱི་མུན་སེལ་སྒྲོན་མ་དང་། སྒྲོལ་སྐུར་སེལ་བའི་སྒྲོན་མ་དང་། བདུད་རྣམས་སེལ་བའི་སྒྲོན་མ་དང་། གསང་ཚུལ་ཉི་མའི་སྒྲོན་མ་ལ་སོགས་པའོ། །དེ་དག་གི་བར་དུ་སྐུ་ཚེའི་ཚད་ཇི་ཙམ་ཞིག་བཞུགས་ཞེ་ན། མི་ཚེ་འབྲིང་པོ་གསུམ་ཙམ་གྱི་ཚད་དུ་བཞུགས་པ་ཡིན་སྐད། སྤྱིར་སྐུ་ཚེ་ལ་དབང་ཐོབ་པ་ཡིན་པས་ཇི་སྲིད་ཀྱི་བར་དུ་བཞུགས་ཀྱང་བཞུགས་སུ་ཡོད་པ་ཡིན་ལ། སྐུ་དུས་ནམ་གྱི་ཚེ་གནས་གར་གཤེགས་པར་བཞེད་ཀྱང་རང་དབང་ཡོད་པ་ལགས་སྐད་དོ། །དེ་ཡང་སློབ་དཔོན་གྱི་ཞལ་ནས་ངའི་ཆོས་ལ་མོས་པ་གཏིང་ནས་སྐྱེད་ཅིག །དེ་ལྟར་མོས་པའི་སྒོ་ནས་བརྒྱུད་པ་འཛིན་པའི་བུ་དེ་དག་ཀྱང་ཚེ་ལ་མངའ་གཉེས་པར་གྱུར་ཅིག །རྒས་ཁར་སེའུ་སྐྱེ་བར་གྱུར་ཅིག །ཅེས་གསུང་ནས་སྨོན་ལམ་གདབ་པ་ཡིན་ཏེ། ཕྱིས་ཀྱི་བུ་སློབ་མ་ཡང་སློབ་ཀུན་ལའང་ཇི་ལྟར་གསུངས་ཤིང་སྨོན་ལམ་གདབ་པ་ལྟར་བྱུང་བ་ལགས་སོ། །དེ་དག་གི་བར་དུ་མཛད་ཚུལ་ལོ། །ཐ་མ་མཐར་འགྱུར་གྱི་ལོ་རྒྱུས་ལ་སྐུ་གང་དུ་གཤེགས་ཤིང་ཇི་ལྟར་གཤེགས་པའི་ཚུལ་ནི། ཡ་ཟི་བོན་སྟོན་ལ་སོགས་པ་ཁམས་ཀྱི་སློབ་མ་རྣམས་ན་རེ་ཁམས་ཀྱི་ལེང་ཏ་ཕུག་ཏུ་ཕུང་པོ་ལྷག་མ་མེད་པར་ཀུན་ཏུ་བཟང་པོའི་དབྱེ་བ་མེད་པའི་ངང་དུ་སངས་རྒྱས་པ་ཡིན་གསུང་སྐད། ཟངས་ཀ་མཛོད་ཁུར་ན་རེ་ངའི་འཕྲེན་གྱི་བྲག་ཕུག་ཏུ་ཕུང་པོ་ལྷག་ཎ་རུ་རྡོ་རྗེ་སེམས་དཔའ་དང་གཉིས་སུ་ཎ་པར་སངས་རྒྱས་ནས་ད་ལྟ་ཡང་སྤྲུལ་པས་སེམས་ཅན་གྱི་དོན་སྣ་ཚོགས་མཛད་ཀྱི་བཞུགས་གསུང་ངོ་། །སློབ་དཔོན་ཉིད་ཀྱི་ཞལ་ནས། དྲུམ་ཤིང་དང་རྔོག་ལེགས་པའི་ཤེས་རབ་ལ་ང་འདི་ནས་ཤི་འཕོས་ནས་རབ་དགའི་འཇིག་རྟེན་གྱི་ཁམས་སུ་ད་ལྟའི་ཀུན་རྫོབ་ཀྱི་མིང་འདི་ཉིད་ཉེ་བའི་གཟུང་སྟེ་ཡེ་ཤེས་འབྱུང་གནས་འོད་ཅེས་བྱ་བར་སངས་རྒྱ་བར་འགྱུར་ཞེས་གསུང་བ་ལགས་སྐད། དེ་ལྟར་སློབ་མ་རྣམས་ཀྱིས་སོ་སོར་རང་རང་གིས་མཐོང་ཚུལ་མི་འདྲ་བས་ཐ་དད་དུ་གཟིགས་ཀྱང་རྒྱུད་ཐ་དད་མེད་པ་ལ་སྤྲུལ་པ་སོ་སོར་སྣང་བ་ཡིན་པས་གང་དུ་མཐོང་ཡང་འགལ་བ་མེད་དེ་དོན་ལ་ཆོས་ཉིད་མཉམ་པ་ཉིད་ཀྱི་ངང་དུ་སངས་རྒྱས་པ་ལགས་སོ། །རུ་སྙན་ཆེན་བཞིན་དུ་རིག་འཛིན་གྱི་ས་ལ་དངོས་སུ་སྣང་བ་ཡང་མ་ལགས། རུ་པད་མ་བཞིན་དུ་ཕུང་པོ་ལྷག་མ་དང་བཅས་པ་ཡང་མ་ཡིན་ནོ། །འདི་སློབ་དཔོན་ཨ་རོ་ཡེ་ཤེས་འབྱུང་གནས་ཀྱི་ལོ་རྒྱུས་ཆེན་པོ་ཞེས་སུ་གྲགས་སོ། །རྫོགས་སོ། །སྤྱིར་སློབ་དཔོན་ཨ་རོའི་ལོ་རྒྱུས་འདི་ལ་མི་མཐུན་པ་མང་དུ་འདུག །ཁམས་ཀྱི་རྒྱ་སྒོ་ཆེན་མོ་ན་ཚོང་པ་མང་པོ་ཡོད་པའི་ཤུལ་ནས་བུ་ཆུང་གཅིག་ཏུ་བྱོན་པའི་ལུགས་ཀྱང་འདུག །ཡང་གནས་དེ་ཉིད་ཀྱི་དགེ་སློང་མ་གསལ་སྦྱིན་མ་ཞེས་བྱ་བས་ཆུ་ལེན་དུ་ཕྱིན་པས་ནགས་ཀྱི་གསེབ་ཤིང་ལོའི་ཁུད་ན་ཕ་མ་མེད་པའི་བུ་ཆུང་གཅིག་འདུག་པ་བླངས་ནས་གསོས་པས་དེ་ལ་བྱུང་བའི་ལུགས་ཀྱང་འདུག །ཁོལ་མོ་ལ་ནས་ཕུག་ཏུ་བྱོན་པར་འདོད་པའི་ལུགས་ཀྱང་འདུག །རྒྱ་བོད་ཧོར་གསུམ་འཐབ་པའི་དབུས་ནས་བུ་ཆུང་གཅིག་རྙེད་པ་བོད་ཀྱིས་བླངས་ནས་གསོས་པས་དེ་ལ་བྱོན་བའི་ལུགས་ཀྱང་འདུག །འབྲོ་དྲེད་པོ་དང་དྲོད་ནག་གིས་ཇག་ལ་ཕྱིན་པས་ལ་ཁ་ནས་རྙེད་པའི་ལུགས་ཀྱང་འདུག །ཡར་ལུང་གི་དགེ་འདུན་སོལ་ནག་ཐང་པའི་གཉེར་པས་བུ་ཆུང་གཅིག་རྙེད་པའི་ལུགས་ཀྱང་འདུག །རྩང་གི་སྟག་ལ་ལ་འོག་པའི་གནས་བརྟན་སྐྱོ་བ་སྐྱེས་ནས་ཐོས་བསམ་མཛད་ཅིང་བསྒོམ་བསྒྲུབ་ལ་གཤེགས་ནས་ཁམས་སུ་བྱོན་པས་དེ་ལ་བྱུང་བའི་ལུགས་ཀྱང་འདུག །ཕ་ཨ་རོ་ཤག་སྙིང་དང་མ་སོག་མ་དཔལ་སྒྲོན་གཉིས་ཀྱི་བུར་འདོད་པ་ཡང་འདུག །སློབ་དཔོན་ཤན་ཏ་དེ་བ་ཤི་འཕོས་ནས་རྒྱལ་པོ་མ་སྐྱེས་དགྲའི་སྲས་སུ་སྐྱེས་པ་སྐྱེ་བ་བརྒྱུད་པའི་ལུགས་ཀྱང་འདུག །སྤྱིར་ཕ་མ་གཉིས་ཀ་མེད་པའི་འདོད་པ་དང་། གཉིས་ཀ་ཡོད་པར་འདོད་པ་དང་། ཕ་མེད་མ་ཡོད་པར་འདོད་པ་ལ་སོགས་པ་མི་མཐུན་པ་མང་དུ་གདའོ། །དེས་ན་སྤྲུལ་པའི་སྐུ་ཡིན་པར་ངེས་གསུང་ངོ་། །ལུང་བསྟན་ཐོབ་པ་ཡིན་ཏེ། ལུང་བསྟན་དམ་པའི་མདོ་ལས། ང་ནི་མྱ་ངན་འདས་འོག་ཏུ། །བསྟན་པ་ལྔ་བརྒྱ་ཕྲག་བཅུ་གནས། །ལྔ་བརྒྱ་ཕྲག་ལྔ་ལོན་པའི་ཚེ། །རྣལ་འབྱོར་ཨ་རོ་ཞེས་བྱ་བ། །ཁྱག་པ་ཁྱག་ཡུལ་ཐང་ཁོབ་ཏུ། །བདག་མེད་སྟོང་པའི་དོན་བསྒོམས་ནས། །མངོན་པར་དགའ་བའི་ཞིང་ཁམས་སུ། །དྲི་མ་མེད་པ་ཞེས་བྱ་བའི། །བྱང་ཆུབ་སེམས་དཔར་སྐྱེས་ནས་ནི། །ཐེག་པ་ཆེན་པོའི་ཆོས་འཆད་དོ། །ཞེས་གསུངས་པ་ཡིན་ནོ། །རྫོགས་སོ།། །།དག་གོ། །

སྒོམ་ཁྲིད་དམ་རྫོགས་པ་ཆེན་པོའི་མན་ངག་ཇི་ལྟ་བ་བཞིན་དུ་རྟོགས་ཤིང་ཐོབ་པར་འདོད་པ་རྣམས་ཀྱི་སྔོན་དུ་འགྲོ་བའི་ཆོས།

སྒོམ་ཁྲིད་དམ་རྫོགས་པ་ཆེན་པོའི་མན་ངག་ཇི་ལྟ་བ་བཞིན་དུ་རྟོགས་ཤིང་ཐོབ་པར་འདོད་པ་རྣམས་ཀྱི་སྔོན་དུ་འགྲོ་བའི་ཆོས་བཞུགས། རྒྱ་མཚོ་ནང་གི་རིན་ཆེན་བཅུད། །དགོས་འདོད་འབྱུང་གནས་དེད་དཔོན་གྱིས། །བླངས་ཏེ་ཕུན་སུམ་ཚོགས་པ་བྱིན། །དྲིན་ཅན་ཁྱེད་ལ་སྐྱབས་སུ་འཆིའོ། །བསྒོམ་ཁྲིད་དམ་རྫོགས་པ་ཆེན་པོའི་མན་ངག་ཇི་ལྟ་བ་བཞིན་དུ་རྟོགས་ཤིང་ཐོབ་པར་འདོད་པ་རྣམས་ཀྱིས་སྔོན་དུ་སེམས་བསྐྱེད་པ་བྱ་སྟེ། དེ་ཡང་སྔོན་དུ་འགྲོ་བ་ནི། རྟེན་བླ་མ་དང་དཀོན་མཆོག་གི་སྤྱན་སྔར། མཆོད་པ་དང་། གཏོར་མ་དང་། ཚོགས་ལ་སོགས་པས་ཕུན་སུམ་ཚོགས་པར་བཤམས་ཏེ། སེམས་བསྐྱེད་དང་ལྡན་པའི་བླ་མ་ཁྲི་མཐོན་པོའི་ཁར་གདན་བཟང་པོ་ལ་བཞུགས། སློབ་བུས་འཁོར་བའི་གནས་འདི་ཐམས་ཅད་མེ་མ་མུར་གྱི་འོབས་བཞིན་སྡུག་བསྔལ་ཐམས་ཅད་ཀྱི་འབྱུང་གནས་འདི་ལས་གྲོལ་བར་བྱེད་པ་ལ། དེའི་དོན་དྲན་པར་བྱ་སྟེ། ནགས་མེས་ཚིག་པའི་རི་དྭགས་སམ་མཚོ་འཁྱགས་པའི་ཆུ་བྱ་བཞིན་དུ། ཆོས་མེན་ལྟོས་པ་དང་བྲལ་བར་གོ་སྟེ། བླ་མ་དཀོན་མཆོག་ལ་དད་གུས་སྔོན་དུ་སོང་བས། རྒྱུན་བཤགས་སམ། བདུན་རྣམ་དག་ལ་རྩོགས་པ་དགེ་སྦྱོར་གྱི་གཞུང་རེ་སྔོན་དུ་བྱ་ལ། གཏོར་མ་བྱིན་གྱིས་བརླབ་པ་དང་། ཟ་ཚོགས་ལ་སོགས་པས་ཚོགས་བྱིན་གྱིས་བརླབ་པ་དང་མཆོད་པ་བྱས་ལ། སྐལ་ལྡན་རྣམས་ཀྱིས་མ་རོལ་བའི་གོང་དུ་བར་འདིར་ཆོ་ག་བྱ་སྟེ། སློབ་མས་ཕྱག་བཙལ་ལ། ཡོན་དབུལ་ལོ། །མེ་ཏོག་གཏོར་ལ་ཞུ་བ་དབུལ་ལོ། །ཐལ་མོ་སྦྱར་བའི་སྙིམ་པར་མེ་ཏོག་བླུགས་ལ་ལུས་ཙོག་པུར་བསྡད་ལ། གུས་པ་དང་ལྡན་པར་བྱའོ། །བླ་མས་བྱམས་སྙིང་རྗེ་བྱང་ཆུབ་སེམས་དང་ལྡན་པས། འདི་སྐད་བཤད་པར་བྱའོ། །དང་པོ་གནས་ལུགས་རིག་པ་རྒྱུ་རྐྱེན་གྱིས་མ་བསྐྱེད་པ། སྟོང་གསལ་ནམ་མཁའ་ལྟ་བུ་འདི། ངོ་མ་ཤེས་པའི་རྟོག་པས་བསྒྲིབས་པའི་འཁྲུལ་པའི་བདག་ཏུ་བཟུང་བས། འགྲོ་དྲུག་སྡུག་བསྔལ་གྱི་སྣང་བ་འདི་དངོས་པོ་ལ་གྲུབ་པ་མེད་ཀྱང་། ཤེས་པ་འཁྲུལ་བའི་བག་ཆགས་ཀྱི་མཐུས་རྒྱུན་བརྟས་པས་རྨྱི་ལམ་གྱི་ཚུལ་དུ་མེད་བཞིན་དུ་སྣང་བའོ། །དེ་བཟློག་པར་བྱེད་པ་ལ་དགེ་སྡིག་ཤན་ཐང་མ་ཕྱེད་ན་ཆོས་བྱར་མི་བཏུབ་པས། དགེ་སྡིག་ཤན་ཐང་དབྱེ་བ་ལ། དང་པོ་སྡིག་བཤགས་བྱ་སྟེ། དོན་དམ་གྱི་བཤགས་པ་ནི། ཀོའུ་ཤི་ཀ་ལས། གོས་པ་མེད་པ་སྙིང་པོའི་དོན། །རྟོགས་ན་དོན་དམ་བཤགས་པ་སྟེ། །དྲི་མེད་འོད་གསལ་ཞི་བྱས་པས། །ལས་ཀྱི་སྒྲིབ་པ་རྣམ་དག་ལྟོས། །ཞེས་པས། དཔེར་ན་མདང་ཕན་ཆད་མུན་པ་མུན་ནག་གི་དཀྱིལ་འཁོར་དུ་ཡོད་པ་ལ་ད་ནང་ནམ་ལངས་ནས་ཉི་མ་ཤར་བས་མུན་པ་རང་སངས་ལ་སོང་བ་བཞིན་དུ་སེམས་ཀྱི་གནས་ལུགས་རྟོགས་ན། སྡིག་ཐམས་ཅད་རང་སངས་ལ་འགྲོ་བ་ཡིན་ཏེ། དེ་ཁྱེད་རང་ལ་ད་སྡོད་ངོ་སྤྲོད་དོ། །ད་ལྟ་ཀུན་རྫོབ་སྟོབས་བཞི་བའི་སྒོ་ནས་བཤགས་པ་བྱ་སྟེ། དེ་ལ་རྟེན་གྱི་སྟོབས་ནི། བླ་མ་དང་དཀོན་མཆོག་ནམ་མཁའ་ལ་སྤྲིན་བཞིན་དུ་གཏིབས་པར་བསམ་ལ་མོས་པ་བྱའོ། །རྣམ་པར་སུན་འབྱིན་པའི་སྟོབས་ནི། སྔར་བྱས་ཀྱི་སྡིག་པ་ལ་བ་སྤུ་གཟིངས་མཆི་མ་ཀློངས་པའི་སྒོ་ནས་འགྱོད་པ་བསྐྱེད་ལ། ཉེས་པ་ལས་སླར་ལྡོག་པའི་སྟོབས་ནི། ད་ཕྱིན་ཆད་ལུས་དང་སྲོག་ལ་བབ་ཀྱང་མི་བྱེད་པར་དམ་བཅས་ལ། སྟོབས་གསུམ་སྔོན་དུ་སོང་བས་བཤགས་པ་བྱ་སྟེ་རྗེས་ཟློས་བྱ་བ་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། ཚེ་རབས་ཐོག་མ་མེད་པ་ནས། ཐ་མ་ད་ལྟའི་བར་དུ། ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བའི་ལས་ཅི་བགྱིས་པ་ཐམས་ཅད་བླ་མ་དང་དཀོན་མཆོག་གི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །སླན་ཆད་ཀྱང་སྡོམ་པར་བགྱིད་ལགས་སོ། །ཞེས་ལན་གསུམ་བརྗོད་ལའོ། །དང་པོས་ལུང་སྦྱིན། བར་པས་གསལ་གདབ། ཐ་མས་སྡིག་པ་འདག་པར་དང་སྡོམ་པ་ཐོབ་པ་དུས་མཉམ་ཡིན་ཏེ། མི་འཆབ་བོ། །མི་སྦེད་དེ་ཡན་ཆད་སྔར་བྱས་པའི་སྡིག་པ་བཤགས་པ་ཡིན་ཏེ། དེས་སངས་ཀྱིས་དག་པ་ཡིན་ནོ། །སླན་ཆད་ད་ན་ཕར་ཡིན་ཏེ། སྡིག་པའི་བྱེ་བྲག་རྣམས་ལུས་དང་སྲོག་ལ་བབ་ཀྱང་སྡོམ་པ་ཡིན་ཏེ། རྒྱས་པར་བཤད་དོ། །དེ་ནི་གཉེན་པོ་ཀུན་ཏུ་སྤྱོད་པའི་སྟོབས་སམ། སོར་ཆུད་པའི་སྟོབས་སོ། །དེ་ནས་སྐྱབས་འགྲོ་ཁྱད་པར་ཅན་བྱ་བ་དང་། ཐུན་མོང་གི་སེམས་བསྐྱེད་ནི། ཕྱག་ལ་སོགས་པ་གོང་བཞིན་བྱས་ལ། རྗེས་ཟློས་བྱ་བ་ནི། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་གྲུབ་པར་ཤོག །ཅེས་ལན་གསུམ་བརྗོད་ལ། ཚིག་དང་པོས་ལུང་བྱིན། བར་པས་གསལ་གདབ། ཐ་མས་སྐྱབས་འགྲོ་སེམས་བསྐྱེད་ཐོབ་པའོ། །དང་པོ་གཉིས་ཀྱིས་སྐྱབས་འགྲོ་ཁྱད་པར་བ་ཡིན་ལ། གཞུག་མ་གཉིས་ཀྱིས་སེམས་བསྐྱེསད་ཐུན་མོང་བ་ཡིན་ཏེ། སླབ་བྱ་ལ་སོགས་པ་བསྡུས་པ་གཅིག་བཤད་དོ། །ཁྱད་པར་གྱི་སེམས་བསྐྱེད་ནི། ཕྱག་ལ་སོགས་པ་གོང་བཞིན་བྱས་ལ། བདག་སེམས་ཅན་གྱི་དོན་དུ་རྫོགས་ཆེན་གཉིས་ཎ་ཀྱི་དོན་ལ་འཇུག་པར་བྱའོ་སྙམ་དུ་བསམས་ལ་གསོལ་བ་གདབ་ཅིང་ཞུ་བ་བྱའོ། །དེ་ནས་བླ་མས་ཉན་ཐོས་ཀྱི་འཇུག་སྒོ་བསླབ་སྟེ། ཉན་ཐོས་ཀྱི་འཇུག་སྒོ་ཐོབ་ཀྱང་ཐོབ་ལ། ཐོབ་པར་ཡང་བསམ་མོ། །དེ་ནས་བློ་ཡར་བཏེག་སྟེ་ཕྱག་གོང་བཞིན་བྱའོ། །གཉིས་ཎ་ཀྱི་འཇུག་སྒོ་ཞུའོ། །ཡང་བླ་མས་བྱང་ཆུབ་སེམས་དཔའི་འཇུག་སྒོ་བསླབ་བོ། །དེས་འདྲེས་ཏེ་གསང་སྔགས་ནང་པ་མན་ཆད་ཤེས་པར་བྱའོ། །དེ་ལྟར་སློབ་མས་གཉིས་ཎ་ཀྱི་འཇུག་སྒོ་རེ་ཞུས། བླ་མས་ཐེག་པ་རིམ་པར་འཇུག་སྒོ་བསླབས་པས། ཐེག་པའི་རིམ་པ་བཞིན་འཇུག་སྒོ་ཐོབ་ཅིང་བློ་ཡར་འཕར་བས་ཡིན་ནོ། །དེ་ནས་ཐུན་མོང་གང་གིས་ཀྱང་བློ་མ་ཁེངས་པའི་སྒོ་ནས། གཉིས་ཎ་རྫོགས་པ་ཆེན་པོའི་རིག་པ་རྩལ་གྱི་དབང་རྣམ་པ་གསུམ་ཞུ་ཞིང་གསོལ་གདབ་བོ། །དེ་ནས་བླ་མས་དམ་ཚིག་དྲིའོ། །སློབ་བུས་ཁས་བླང་ངོ་། །བླ་མས་དམ་ཚིག་དབོག་གོ། །སློབ་བུས་དམ་ཚིག་ཇི་ལྟ་བ་བཞིན་དུ་བསྲུང་བར་དམ་བཅའོ། །དེ་ནས་བླ་མས་དབང་གསུམ་པ་འཇུག་སྒོ་བདུན་ངོ་སྤྲད་པར་བྱའོ། །ཁྲིད་དང་ངོ་སྤྲོད་ལ་སོགས་པ་ཡིན་ནོ། །དཔེར་ན་མཚན་མ་རྫས་ཀྱི་དབང་གི་དུས་སུ་གདོང་གཡོགས་བཀྲོལ་བ་བཞིན་དུ་དོན་རིག་པ་རྩལ་དབང་གི་དུས་སུ། ངོ་སྤྲོད་ཀྱི་མན་ངག་ཐོབ་པའོ། །གདོང་གཡོགས་བཀྲོལ་མིག་ཕྱེ་དེ་ནས་དལ་མཐོང་བ་བཞིན་དུ། ཐོས་པས་དོན་རྟོགས་པས་དཀྱིལ་འཁོར་མཐོང་བའོ། །རྟོགས་པའི་དོན་ལ་ཏིང་ངེས་གོམས་པ་ནི། ད་ལར་ཞུགས་པའི་ཞེས་འཇུག་སྒོ་ཞིབ་ཏུ་བཤད་དོ། །དེ་ནས་སློབ་བུས་གཏང་རག་གཏོང་ངོ་། །ཨཐྎ། རྫོགས་སོ།། །།དཔེ་གཟུགས་བརྙན་གྱི་དོན་གཉིས་ཎ་ཀྱི། ཞུས་དག་གོ། །

རབ་འབྲིང་ཐ་གསུམ་མམ་དགུའི་སྒོ་ནས་སེམས་གནས་པའི་ཚད་བསྟན་པ།

རབ་འབྲིང་ཐ་གསུམ་མམ་དགུའི་སྒོ་ནས་སེམས་གནས་པའི་ཚད་བསྟན་པ་བཞུགས། རབ་འབྲིང་ཐ་གསུམ་མམ་དགུའི་སྒོ་ནས་སེམས་གནས་པའི་ཚད་བསྟན་པ་ནི། དབུགས་ལ་གསུམ་སྟེ། རབ་དབུགས་འགྱུ་བ་མི་ཚོར། འབྲིང་བརྟགས་ན་ཚོར། ཐ་མ་མ་བརྟགས་ཀྱང་ཚོར་བའོ། །རབ་ཀྱི་རབ་དབུགས་རྒྱུ་བ་མི་ཚོར། རབ་ཀྱི་འབྲིང་དབུགས་ལྟེ་བ་ན་ཡོད་པ་སྙམ་སེམས ། རབ་ཀྱི་ཐ་མ་ཕྲ་བ་ཞིག་ཡར་རྒྱུ་བ་སྙམ་སེམས་སོ། །འབྲིང་གི་རབ་རྒྱུ་བ་བརྟགས་ན་རེས་ཚོར་རེས་མི་ཚོར། འབྲིང་གི་འབྲིང་བརྟགས་ན་གཏན་དུ་ཚོར། འབྲིང་གི་ཐ་མ་མ་བརྟགས་པར་ཚོར་རོ། །ཐ་མའི་དབུགས་མ་བརྟགས་པར་ཚོར་ཡང་མི་གནོད། ཐ་མའི་འབྲིང་ཚོར་ཡང་རེས་གནོད་རེས་མི་གནོད། ཐ་མའི་ཐ་མ་ཚོར་ཡང་ཚོར་ལ་གནོད་ཀྱང་གནོད་དོ། །ལུས་ལ་གསུམ་སྟེ། རབ་ལུས་མི་འཆར། འབྲིང་ལུས་བརྟགས་ན་འཆར། ཐ་མ་ལུས་མ་བརྟགས་ཀྱང་འཆར་རོ། །རབ་ཀྱི་རབ་ལུས་བརྟགས་ན་མི་འཆར་བར་བསྒོམ་བཟུང་དུ་འགྲོ། རབ་ཀྱི་འབྲིང་ལུས་མི་འཆར་ལ་བསྒོམ་བཟང་རྒྱུ་མེད། རབ་ཀྱི་ཐ་མ་ལུས་མ་རྟགས་པར་བུན་ནེ་འཆར་བའོ། །འབྲིང་གི་རབ་ལུས་བརྟགས་ན་རེས་འཆར་རེས་མི་འཆར། འབྲིང་གི་འབྲིང་བརྟགས་ན་འཆར། འབྲིང་གི་ཐ་མ་ལུས་བུན་ནེ་བ་ཞིག་རྟག་ཏུ་འཆར་རོ། །ཐ་མའི་རབ་ལུས་རྟག་པར་འཆར་ལ་མི་གནོད། ཐ་མའི་འབྲིང་འཆར་ལ་རེས་གནོད་རེས་མི་གནོད། ཐ་མའི་ཐ་མ་འཆར་ལ་གནོད་པའོ། །སྒྲ་ལ་གསུམ་སྟེ། རབ་སྒྲ་མི་ཐོས། འབྲིང་ཞེན་པ་མི་འཇིག །ཐ་མ་མི་གནོད་པའོ། །རབ་ཀྱི་རབ་སྒྲ་ཆེ་འབྲིང་ཆུང་ངུ་གསུམ་ཀ་མི་ཐོས། རབ་ཀྱི་འབྲིང་ཆུང་འབྲིང་གཉིས་མི་ཐོས་སོ། །རབ་ཀྱི་ཐ་མས་ཆུང་ངུ་མི་ཐོས་སོ། །འབྲིང་གི་རབ་སྒྲ་གསུམ་ཀ་ལ་ཞེན་པ་མི་འཇུག །འབྲིང་གི་འབྲིང་ཆུང་འབྲིང་གཉིས་ལ་ཞེན་པ་མི་འཇུག །འབྲིང་གི་ཐ་མ་ཆུང་ངུ་ལ་ཞེན་པ་མི་འཇུག་གོ། །ཐ་མའི་རབ་སྒྲ་གསུམ་ཀ་ལ་མི་གནོད། །ཐ་མའི་འབྲིང་ཆུང་འབྲིང་གཉིས་མི་གནོད། ཐ་མའི་ཐ་མ་ཆུང་ངུ་མི་གནོད་དོ། །ཁམས་ལ་གསུམ་སྟེ། ཁམས་རབ་ཟངས་སུ་འགྲོ། འབྲིང་པོ་ཐུབ། ཐ་མ་དུབ་ཅིང་གནོད་དོ། །ཁམས་རབ་ཀྱི་རབ་ཤིན་ཏུ་བཟང་དུ་འགྲོ། རབ་ཀྱི་འབྲིང་འཕལ་དུ་བཟང་དུ་འགྲོ། རབ་ཀྱི་ཐ་མ་རེས་བཟང་རེས་ངན་ནོ། །ཁམས་འབྲིང་གི་རབ་སོ་ཐུབ། འབྲིང་གི་འབྲིང་ཕལ་ཆེར་སོ་ཐུབ་ཀྱང་རེས་མི་ཐུབ། འབྲིང་གི་ཐ་མ་ཕལ་དུ་སོ་མི་ཐུབ་རེས་འགའ་ཐུབ། ཁམས་ཐ་མའི་རབ་ཕལ་ཆེར་མི་གནོད། ཐ་མའི་འབྲིང་རེས་གནོད་རེས་མི་གནོད། ཐ་མའི་ཐ་མ་ཕལ་ཆེར་གནོད་རེས་འགའ་མི་གནོད་དོ། །ཤིན་ཏུ་སྦྱངས་པ་ལ་གསུམ་སྟེ། ཤིན་ཏུ་སྦྱངས་པ་རབ་ལུས་སེམས་ལ་ཆེར་ཕེབས། འབྲིང་འབྲིང་དུ་ཕེབས། ཐ་མ་ཆུང་ངུར་ཕེབས་སོ། །ཤིན་ཏུ་སྦྱངས་པ་རབ་ཀྱི་རབ་ཆེར་ཕེབས་རྣམ་གྲངས་ཀྱང་མང་། རབ་ཀྱི་འབྲིང་ཆེར་ཕེབས་ལ་རྣམས་གྲངས་ཀྱང་འགའ་ཡོད་པ། རབ་ཀྱི་ཐ་མ་ཆེར་ཕེབས་རྣམ་གྲངས་མེད་པའོ། །འབྲིང་གི་རབ་ཤིན་ཏུ་སྦྱངས་པ་འབྲིང་ལ་རྣམ་གྲངས་མང་བ། འབྲིང་གི་འབྲིང་ཤིན་ཏུ་སྦྱངས་པ་འབྲིང་ལ་རྣམ་གྲངས་འགའ་ཡོད་པ། འབྲིང་གི་ཐ་མ་ཤིན་ཏུ་སྦྱངས་པ་འབྲིང་ལ་རྣམ་གྲངས་མེད་པའོ། །ཐ་མའི་རབ་ཤིན་ཏུ་སྦྱངས་པ་ཐ་མ་ལ་རྣམ་གྲངས་མང་བ། ཐ་མའི་འབྲིང་ཤིན་ཏུ་སྦྱངས་པ་ཐ་མ་རྣམ་གྲངས་འགའ་ཡོད་པ། ཐ་མའི་ཐ་མ་ཤིན་ཏུ་སྦྱངས་པ་ཐ་མ་ལ་རྣམ་གྲངས་མེད་པའོ། །ཡུན་ལ་གསུམ་སྟེ། རབ་ཀྱིས་ཐུན་ཚོད་སྐྱོལ། འབྲིང་གིས་ཆུ་ཚོད་སྐྱོལ། ཐ་མས་དབུགས་ཚོད་སྐྱོལ་ལོ། །རབ་ཀྱི་རབ་ཐུན་ཚོད་གཏན་དུ་སྐྱོལ། རབ་ཀྱི་འབྲིང་གིས་ཐུན་གསུམ་སྐྱོལ། གཅིག་མི་སྐྱོལ་རབ་ཀྱི་ཐ་མ་ཡིས་བལ་སྐྱོལ་རེས་ཚོད་མི་སྐྱེལ་ལོ། །འབྲིང་གི་རབ་ཀྱིས་ཆུ་ཚོད་སྐྱོལ། འབྲིང་གི་འབྲིང་གིས་ཕལ་དུ་སྐྱོལ་རེས་ཚོད་གསུམ་ལས་མི་སྐྱོལ། འབྲིང་གི་ཐ་མས་ཕལ་དུ་ཚད་སྐྱོལ་རེས་ཆུ་ཚོད་ཕྱེད་ལས་མི་སྐྱོལ་ལོ། །ཐ་མའི་རབ་ཀྱི་གཏན་དུ་དབུགས་ཚོད་སྐྱོལ། ཐ་མའི་འབྲིང་གིས་ཕལ་དུ་སྐྱོལ་རེས་དབུགས་ཚོད་ལས་མི་སྐྱོལ། ཐ་མའི་ཐ་མས་ཕལ་དུ་དབུགས་ཚོད་སྐྱོལ་རེས་ཕྱེད་ལས་མི་སྐྱོལ་ལོ། །རྗེས་ཀྱི་ཤེས་པ་ལ་གསུམ་སྟེ། རབ་བསྒོམ་པ་གཏང་ཙ་ན་ཡང་བསྒོམ་པ་ཀ་ལྟར་འོང་ལ། འབྲིང་དེ་བས་ཞན་དུ་འོང་བ། ཐ་མ་སང་བའོ། །རབ་ཀྱི་རབ་ཡུན་རིང་བ། རབ་ཀྱི་འབྲིང་ཅུང་ཞིག་འོང་བ། རབ་ཀྱི་ཐ་མ་ཡུན་ཐུང་བའོ། །འབྲིང་གི་རབ་ཞན་པ་དེ་ཡུན་རིང་། འབྲིང་གི་འབྲིང་ཞན་པ་ཅུང་ཞིག་འོང་། འབྲིང་གི་ཐ་མ་ཡུན་ཐུང་བའོ། །ཐ་མའི་རབ་སངས་གུལ། ཐ་མའི་འབྲིང་ཅུང་ཞིག་ན་སངས། ཐ་མའི་ཐ་མ་མདོ་ལ་སངས་པའོ། །སྤྱོད་ལམ་ལ་གསུམ་སྟེ། རབ་ཆེར་ཁྱབ། འབྲིང་འབྲིང་དུ་ཁྱབ། ཐ་མ་ཆུང་ངུ་ཁྱབ་བོ། །སྤྱོད་ལམ་རབ་ཀྱི་རབ་ཀྱིས་གཏན་དུ་བཞི་ཀ་ལ་ཁྱབ། རབ་ཀྱི་འབྲིང་གིས་གསུམ་ལ་ཁྱབ། རབ་ཀྱི་ཐ་མས་གཉིས་ལ་ཁྱབ་པའོ། །སྤྱོད་ལམ་འབྲིང་གི་རབ་ཀྱིས་འབྲིང་དུ་བཞི་ལ་ཁྱབ། འབྲིང་གི་འབྲིང་གིས་གསུམ་ལ་འབྲིང་དུ་ཁྱབ། འབྲིང་གི་ཐ་མ་གཉིས་ལས་མི་ཁྱབ་པའོ། སྤྱོད་ལམ་ཐ་མའི་རབ་ཀྱིས་བཞི་ལ་ཆུང་ངུ་ཁྱབ། ཐ་མའི་འབྲིང་གིས་གསུམ་ལ་ཆུང་ངུ་ཁྱབ། ཐ་མའི་ཐ་མས་གཉིས་ལ་ཆུང་ངུ་ཁྱབ་པའོ། །ཉོན་མོངས་པ་ལ་གསུམ། རབ་ཉོན་མོངས་པ་ཆེར་འབྲི། འབྲིང་འབྲིང་དུ་འབྲི། ཐ་མ་ཆུང་ངུར་འབྲི། རབ་ཀྱི་ཉོན་མོངས་པ་ཡོ་འབྲི། རབ་ཀྱི་འབྲིང་ལ་ཉོན་མོངས་པ་དྲུག་ལ་ལྔ་འབྲི། རབ་ཀྱི་ཐ་ཉོན་མོངས་པ་བཞི་འབྲི། འབྲིང་གི་རབ་ཀྱིས་ཉོན་མོངས་པ་དྲུག་འབྲིང་དུ་འབྲི། འབྲིང་གི་འབྲིང་གིས་ཉོན་མོངས་པ་ལྔ་འབྲིང་དུ་འབྲི། འབྲིང་གི་ཐ་མས་ཉོན་མོངས་པ་བཞི་འབྲིང་དུ་འབྲིའོ། །ཐ་མའི་རབ་ཀྱིས་ཉོན་མོངས་པ་དྲུག་ཐ་མར་འབྲི། ཐ་མའི་འབྲིང་གིས་ཉོན་མོངས་པ་ལྔ་ཐ་མར་འབྲི། ཐ་མའི་ཐ་མས་ཉོན་མོངས་པ་བཞི་ཐ་མར་འབྲི། གཉིས་ཙམ་མི་འབྲིའོ།། །།

ངག་དོན་བཞིར་དྲིལ

ངག་དོན་བཞིར་དྲིལ་བཞུགས། བླ་མ་སྤྲུལ་སྐུ་རིན་པོ་ཆེ། མཉམ་མེད་རྗེའི་ཞབས་ལ་འདུད། རྗེ་རིན་པོ་ཆེའི་ཁྲིད་ཀྱི་ཕྱག་བཞེས། ངག་དོན་བཞིར་དྲིལ་ཏེ་གསུངས་པ་ལ། ལྟ་བ་ཐབས་ཀྱིས་བཟུང་བ་ནི། ཚོགས་གནས་ཟས་བདུན་བརྟེན་པ་ནས་བསྒོམ་པ་སྤྱོད་ལམ་གདབ་པ་ཡན་ཆད་ཡིན་པ་ལ། དེ་ལ་ཚོགས་གནས་ལ་ཞག་གྲངས་མི་བརྩི་སྟེ། རྟགས་ལ་ལྟ་བ་ཡིན་ནོ། །དེ་ལ་ཕྱི་ལུས་ལ་བརྟག་པ་དང་། ནང་ཤེས་པ་ལ་བརྟག་པ་གཉིས་ལས། ཕྱི་ལུས་ལ་བརྟག་པ་ནི་ངལ་ཞིང་དུབ་པ་དང་། ཁ་ཤུས་འདེབས་པ་དང་། གཞན་གྱིས་བལྟས་པས་ཀྱང་ཧད་དེ་ཐོམ་མེ་བའོ། །ནང་ཤེས་པ་ལ་བརྟག་པ་ནི། ཤེས་པ་རྟོག་མེད་དུ་ཧད་དེ་ཚོམ་མེད་སྡོད་པ་ཡིན་ཏེ། བླ་མས་དྲིས་པས་ཤེས་པ་ཧད་དེ་ཅི་ཡང་མི་དྲན་པར་སྡོད་ཀྱི་འདུག་ཟེར་བ་ལ་སོགས་པའོ། །འོ་ན་ཚོགས་གནས་ཀྱི་ཤེས་པ་ཧད་དེ་ཚོམ་མེ་བ་རྟོག་མེད་དོ། །སྒོམ་ཡིན་ནམ་ཞེ་ན་ཡིན་ཀྱང་ཡིན་ལ་མེད་ཀྱང་མིན་ནོ། །སེམས་གནས་པ་དེ་བསྒོམ་གྱི་གཞིར་རུ་འགྲོ་ས་ཡིན་ལ་ད་རུང་ངོ་མ་སྤྲད་པས་མིན་ནོ། །དེ་ལྟར་ཚོགས་གནས་ཀྱི་རྟགས་བྱུང་ནས་ཐུན་ལ་འཇུག་སྟེ། ཡར་གྱི་འཕེལ་བཅུ་དང་། མར་གྱི་འགྲིབ་བཅུ་བྱའོ། །དེ་ལ་ཚོགས་གནས་ནས་བཟུང་ནས། སྤྱིར་རྟགས་ཉི་ཤུ་རྩ་བཞིས་ཁམས་ཀྱི་ཚོད་བཟུང་སྟེ། དེ་ཡང་རླུང་རྟགས་འདི་རྣམས་ཐུན་གྱི་སྐབས་སུ་དུག་དབྱུང་བྱས་པས་ཕལ་ཆེར་མི་འབྱུང་། ཚོགས་གནས་ཀྱི་སྐབས་སུ་སེམས་ཟིན་པས། རླུང་ཟིན་ནས་དེའི་སྐབས་སུ་ཕལ་ཆེར་འོང་སྟེ། དེ་ལ་རྟགས་ནི། རླུང་འཁྲུགས་པའི་རྟགས་བཞི་དང་། ནམ་མཁའི་བཞི་དང་། སའི་བཞི་དང་། ཆུའི་བཞི་དང་། མེའི་རླུང་འཁྲུགས་པའི་རྟགས་བཞིའོ། །དེ་ལ་དང་པོ་ནི། མིག་འཁྲུལ་བ་དང་། སྒྲ་འཁྲུལ་བ་དང་། ངག་འཁྲུལ་བ་དང་། སེམས་འཁྲུལ་བའོ། །ནམ་མཁའི་རླུང་འཁྲུགས་པའི་རྟགས་བཞི་ནི། རྣམ་རྟོག་རྒྱས་པ་དང་། གཉིད་མི་ཕེབས་པ་དང་། གཉིད་སྲབ་པ་དང་། རྨི་ལམ་མང་བའོ། །སའི་རླུང་འཁྲུགས་པའི་རྟགས་བཞི་ནི། མགོ་བོ་བགས་ཀྱིས་ལྕི་བ་དང་། ཟས་ཡིད་གར་མི་འོང་བ་དང་། ལུས་སེམས་གྱོང་བ་དང་། ལུས་སེམས་རྩུབ་པའོ། །ཆུའི་རླུང་འཁྲུགས་པའི་རྟགས་བཞི་ནི། བསྒོམ་འཚེར་བ་དང་། བསྒོམ་སྙིང་མི་འདོད་པ་དང་། བསྒོམ་མི་ཕེབས་པ་དང་། བསྒོམ་སྲབ་པའམ་ཡང་ན་ཡུན་ཐུང་བའོ། །མེའི་རླུང་འཁྲུགས་པའི་རྟགས་བཞི་ནི། རྐྱེན་མེད་པར་གློ་ཆུང་འབྱུང་བ་དང་། རྐྱེན་མེད་པར་སྦྲིད་པ་འབྱུང་བ་དང་། ལུས་ལ་གཟེར་ཟུག་འབྱུང་བ་དང་། སྤྱོད་ལམ་མི་བདེ་བའོ། །རླུང་གི་རླུང་འཁྲུགས་པའི་རྟགས་བཞི་ནི། རྔམས་པ་འབྱུང་བ་དང་། ལུས་འདར་བ་དང་། ཤུགས་རིངས་འབྱུང་བ་དང་། ཁམས་དབུགས་རྒོད་པའོ། །དེ་ལ་བཅོས་པ་ནི། གོང་འོག་གི་རླུང་རྟགས་བརྒྱད་པོ་དེ་བྱུང་ན། ལུས་སྦང་མཁར་གྱིས་བཀྲུས་ལ། མར་རྙིང་གི་བྱུག་པ་བྱ། ཕྱེས་དབྱིའོ། །ཁ་ཟས་སྟར་ཟས་བཅུད་ཅན་བཟའ། ཚོགས་གནས་བཤོལ་ལ་མི་གསེབ་ཏུ་གསེང་ངོ་། །དེ་ལྟར་མ་བྱས་ན་བསྙོ་བའམ་སྙིང་རླུང་དུ་སོང་བའི་ཉེན་ཡོད་དོ། །ནམ་མཁའི་རླུང་འཁྲུགས་པའི་རྟགས་དེ་རྣམས་བྱུང་ན། བཅོས་པ་ནི་ཁ་ཟས་སྟར་བྱུག་པ་བྱས་པས་ཞིའོ། །ས་རླུང་འཁྲུགས་པའི་རྟགས། མགོ་བོ་བགས་ཀྱིས་ལྕི་བ་ལ་སོགས་པ་དེ་རྣམས་བྱུང་ན། བད་ཀན་ཡིན་པས་དབྱར་ཡིན་ན་ཆུ་བ་བཟའ། དགུན་ཡིན་ན་སྦང་ཟན་ཟ་བད་ཀན་ལ་ཕན་པའི་ཟས་རྟེན་བད་ཀན་གྱི་བཅོས་བྱའོ། །ཆུ་རླུང་འཁྲུགས་པའི་རྟགས། བསྒོམ་འཚེར་བ་དང་། བསྒོམ་སྙིང་མོ་འདོད་པ་དང་བྱུང་ན། དད་པ་བསྐྱེད། མི་རྟག་པ་བསྒོམ། ངན་སོང་གི་སྡུག་བསྔལ་དང་འཁོར་བའི་ཉེས་དམིགས་བསམ། ཟས་སྟར་བྱུག་པ་བྱ། མེ་རླུང་འཁྲུགས་པ་ལ། གློ་ཆུང་དང་། སྦྲིད་པ་དང་། ལུས་ལ་གཟེར་ཟུག་བྱུང་བ་ལ་ནི། མགོ་གཟེར་ན་གང་ན་བའི་སར། ཆང་གི་ཁ་རུ་བཏབ་ལ། ཁམ་ཕོར་བསྲེག་པ་བསླན། ཐལ་མོའི་ལྐོགས་རྡེག །དེས་སོལ་ལོ། །སྨིན་སྤྲག་ན་ན་ཤེས་པ་བསྡུས་པའི་སྐྱོན་ཡིན་པས་གློད་པས་སོལ་ལོ། །རོ་སྟོད་གཟེར་ན་རླུང་བཟུང་ལ། གཞུང་སྲ་མོ་འགེངས་པའི་ཚུལ་ལམ། ཡང་ན་གཞུ་སྲ་སྙི་རན་པ་དངོས་སུ་དགང་། དེས་སོལ་ལོ། །རོ་སྟོད་རྒྱངས་སེ་འདུག་ན། རྡོ་ཁལ་གཅིག་ཙམ་གྱི་ལྗིད་ཡོད་པ་ཅིག་ཁུར་ལ། འབེན་ཚད་གང་ཙམ་དུ་བསྐྱལ་བས་ཞི་བར་འགྱུར་རོ། །ཚིགས་བཞི་ན་ན་དེ་རང་ལ་བྱུག་པ་བྱས་པས་སོལ་ལོ། །རྐང་པ་ན་ན་མེ་ལོང་གི་རྒྱབ་ཏུ་གཡེར་མ་བསྒྱུར་ལ། གཡེར་ཆུ་དང་མེ་ལོང་གི་གཡའ་འདྲེས་པ་དེ་གང་ན་བ་ལ་བྱུགས་ལ། ས་སྟེགས་ཁ་ཅིག་ཏུ་འཕོངས་བཞགས་ལ་ཤུགས་དང་བཅས་ནས་སྤྲུགས་པས་ཞི་བར་འགྱུར་རོ། །ལག་པ་ན་ན་གང་ན་བ་དེ་ལྗིད་ལ་རང་ཕབ་ལ་སྤྲུག་གོ། །མིག་ནས་ཆུ་མ་བྱུང་ན་རླུང་ཡིན་པས་ལྟག་ཁུང་དུ་མར་ཁུ་བྱུག་གོ། །ཚད་པ་ཡིན་ན་མིག་དམར་དཀྲུག་གིས་འགྲོ་བས་བསིལ་སྨན་བཏང་ངོ་། །སྤྱིར་རླུང་སྐྱོན་ཐམས་ཅད་གགས་སེལ་དང་བསྟུན་ལ་བསལ་ལོ། །ཤས་ཅིག་སྨན་སྤྱད་དང་ཡང་བསྟན་ནོ། །ཕལ་ཆེར་གློད་པ་རང་གིས་ཀྱང་རང་ཞིའོ། །སྤྱི་བོར་བླ་མ་བསྒོམས་ཤིང་མོས་གུས་བྱས་པས་ཀྱང་སོལ་ལོ། །སྤྱིར་ཚོགས་གནས་ལ་མ་ཞུགས་པའི་གོང་ནས་ལུས་ཀྱི་སྤྱོད་ལམ་དལ་བ་དང་། བསྐུ་མཉེ་བྱ་བ་དང་ཆང་ལ་སོགས་པ་ཟས་བསྐོམ་བཟང་པོ་ཟོས་ན་བསྒོམ་པ་བཟང་། རླུང་སྐྱོན་ཆུང་གསུང་ངོ་། །བྱིང་རྒོད་བཅོས་པའི་གདམ་ངག་དང་སྙན་རྒྱུད་ལས་ཤེས་སོ། །བཅོས་ཐབས་བླ་མས་ཐུགས་ལ་བཏགས་པ། དངོས་ཀྱིས་མི་བརྗོད་ཀྱི་གཟུངས་མ་ཐོབ་བས་ཡི་གེར་བཀོད་པའོ། །ཨིྀཊ྅྅྅།། གསང་ངོ་ས་མ་ཡ། །རྒྱ་རྒྱ་རྒྱ། །ཞུས་སོ། །དག་གོ། །

མན་ངག་བསྟན་པ།

མན་ངག་བསྟན་པ་བཞུགས། དེ་སྐྱོན་གྲངས་མང་རེ་ཤིག་ལྔ། །རླུང་དུག་རླུང་སྨྱོ་ཁྱབ་བྱེད་ལོག །ཤ་མདངས་བར་ཤོར་འཁྱིམས་པའོ། །འཕར་འཕྱོངས་སྤྲུག་འདར་རླུང་དུག་སྟེ། །སྣ་རྩེར་ཁྲག་དབྱུང་སྣ་ལ་བཀུ། །ལུས་པོ་མཉེ་ཞིང་ཏིལ་མར་བྱུག །རྩོལ་བ་གློད་ལ་དོན་ལ་གདགས། །ཁ་སྨྲ་མཚོ་རྒྱུག་རླུང་སྨྱོ་སྟེ། །བདུད་རྩི་རློན་སྦྱོངས་རྣམ་ལྔ་དང་། །གཡེར་མ་ཚིལ་ཆེན་བསྲེས་པ་ཡིས། །སྤྱི་བོ་སྙིང་ཁར་བསྐུ་མཉེ་བྱ། །ལྕེ་སོག་དཀར་ནག་རྒྱ་ཚལ་སོགས། །རྫས་དགོད་དུད་པས་སྣ་ནས་བདུག །གནད་དུ་མེས་བསྲེག་ཐུར་མས་བསྣུན། །དྲག་པོའི་ཧོམ་ནས་གདོན་པར་བྱ། །བཀྲག་ཤོར་མདོག་ངན་བ་མོ་ཁ། །ཐལ་བའི་མདོག་ལ་ལུས་འཁྲུག་གཟེར། །མགོ་འཁོར་སྙིང་མི་དགའ་ཞིང་འཁྱམ། །ཆུ་ཕུལ་དོ་གདུས་སུམ་ཆ་ལ། །ཏང་ཁུང་ཁྱོར་ཕྱེད་ལྕེ་ཐོག་གཞག །ལྟོ་སྟོང་ཆུས་ཕུལ་ཡང་ཡང་བཏང་། །ཕྱི་ནས་སྣུམ་མཉེ་རིག་པ་གློད། །གཟེར་སར་རིག་པའི་གྲིས་གཏུབས་ལ། །སྟང་པར་ཧར་གྱིས་གཏོང་ལ་གཏང་། །རིག་པ་གསངས་ལ་དབུགས་སྒོར་གདོན། །ཟུག་པར་རིག་པའི་མེས་བསྲེགས་གཏོར། །ཤ་མཐངས་བར་ཤོར་ལུང་ཟ་འཕྲུག །སྐྲང་ཞིང་ཆུ་སེར་འབྲུམ་པ་འབྱུང་། །མཛེའམ་སྐྱ་སྒངས་འདྲར་འགྱུར་ཡིན། །ལོ་མར་གཡེར་མ་བསྲེས་ལ་བསྐུ། །ཡུང་པ་ཙན་དན་དཀར་པོ་དང་། །མར་སར་སྦྱར་ལ་ཡང་ཡང་བསྐུ། །ན་ནས་བཟང་སྡུག་སྨན་མར་དང ། །ཙན་དུག་སྔགས་སམ་སྨན་གྱིས་བརྡུལ། །སྨན་མར་སྦྱར་ལ་བཏང་བའོ། །སྐྲངས་དམིགས་བྱུང་ན་ལེགས་པར་བསྐུ། །བྱང་པ་དུར་བྱེད་བརྡུངས་པ་དང་། །དྲི་ཆེན་དྲི་ཆུ་དྲོན་པོ་སྦྱར། །ལུག་ཞོ་ཙམ་གྱིས་ནང་རེ་བསྐུ། །ཤུལ་དེ་བཀྲུ་ཞིང་ཡང་ཡང་སྐུ། །ཞག་བདུན་བརྒྱད་དུ་བསྐུས་ནས་བཀྲུ། །ཐུར་མས་གསེངས་ན་ཆུ་སེར་འབྱུང་། །རྨ་བཅོས་མི་བྱ་ཀློག་རྒན་གཡོག །གྲོ་ཆང་སྦྲང་གཡུང་བཏང་ལ་གཏང་། །དཀར་སྔོན་ནས་ཟན་རྒོད་ཤས་གསོ། ༈ །རླུང་འཁྱིམས་ཤེས་པ་མི་གསལ་བྱིང་། །གློ་སྙིང་མི་བདེ་མགོ་ན་ལྕི། །ངོ་འཛུམ་སྣུམ་གནག་རྔུལ་ཞད་ཅན། །དང་ཀ་མི་བདེ་དབུགས་ཐུང་རྩེགས། །སྐབས་སུ་དབུགས་འཐུམས་རྒྱལ་བར་འགྱུར། །སྐབས་སུ་བུམ་ནང་ཆུ་བསྒུལ་པའམ། །ཆུ་ནང་འདམ་བུ་མགོ་ཡུར་བཞིན། །རིག་པ་གཡོ་ལ་བརྟན་བག་ཅན། །བདེ་ལ་མི་བདེ་ཆ་མ་ཕྱེད། །སྐབས་སུ་ངུ་རྒོད་བརླ་བག་ཅན། །ཚབས་ཆེ་ངོ་གདོང་སྙིང་ཁ་དང་། །སོགས་སྤྲག་རྐང་ལག་ཐིལ་མགོ་ལ། །ཆུ་ལྕག་དྲག་བརྡེག་སྦྲང་བུ་རམ། །ཀ་ར་ཆུ་དྲང་སྦྱར་བ་ཡིན། །ཁ་ནས་ཏིག་ཅིང་ཟས་གསར་པ། །བཅུད་དང་ལྡན་པས་ཁད་ཀྱི་གསོ། །རིག་མ་བརྟེན་ལ་རོ་སྙོམས་བྱ། །རིག་པ་རྒྱ་བསྐྱེད་དཔངས་སྟོད་ལ། །མདའ་ལྟར་འཕང་ཞིང་དོན་ལ་བལྟ། །བླ་མ་བརྟེན་ཞིང་ཚོགས་འཁོར་བསྐོར། །དབང་མནན་ཉམས་ལ་བསྐང་བཤགས་བྱ། །འཇམ་ཁྲུས་ལེགས་བྱ་ལུས་བཅག་བསང་། །ནད་གཞི་གཉེན་པོས་ཞི་བྱ་སྦྱང་། །བར་ཆད་བསྲུང་མཚམས་དམ་པར་བྱ། །རྒྱས་པར་དམ་པའི་དྲུང་དུ་བཅད། །གཞན་ན་མི་གསལ་འདིར་བསྡུས་ཙམ། །མན་ངག་ཉི་མའི་སྙིང་པོ་འོད་ལྡན་ལས། ཀྱེ་ཧོ་དཔལ་ལྡན་རིགས་ཀྱི་བུ། །མཁས་པས་དོན་ལས་མི་འཁྱར་བའི། །ཐ་སྙད་རྗེས་འབྲང་མ་བྱེད་ཅིག །དོན་མེད་ཚིག་སྙན་འབྲེད་མེད་གྱིས། །དོན་མཚན་ཚིག་ལམ་མ་དགག་ཅིག །རྟོགས་དོན་གནས་སམ་གནས་རྟོགས་བྱའི། །ཞི་གནས་ཉམས་ལེན་མ་ཞེན་ཅིག །མ་རྟོགས་ཉམས་ལེན་གཏད་སྤང་གསང་། །དངོས་གྲུབ་ཆུ་རྒྱུན་མ་བཅད་ཅིག །དོན་འགྱུར་ལྷག་སྤྱོད་བཙུན་པར་བྱའི། །བཙུན་དྲེགས་གཞན་བརྙས་མ་བྱེད་ཅིག །རང་དོན་འཇུར་བུར་གདམ་སྤང་གིས། །དཀར་ནག་རྒྱུ་འབྲས་མ་བཟློག་ཅིག །མཐའ་བཞི་ཕྱོགས་ལྷུང་དགྲོལ་བྱ་ཡིས། །རྟགས་ཐབས་མུ་བཞི་མ་དགག་ཅིག །མུ་བཞི་ལྡེ་མིག་རང་གྲོལ་བྱའི། །འབྲོས་བདེ་ཁ་འབྱམས་མ་སྨྲ་ཅིག །ངེས་པར་གདེང་དུ་ཕེབས་པར་བྱའི། །ཤེས་ཚུལ་རང་བསླུས་མ་བྱེད་ཅིག །ཅེས་གསུངས་སོ། །ཡེ་ཤེས་གསང་བའི་རྒྱུད་ལས། གསང་བའི་ཐེག་པ་དམ་པ་འདི། །གཞན་གྱིས་ནུབ་པར་མི་འགྱུར་ཏེ། །དྲི་མེད་བདུན་རྩི་རྟོགས་དཀའ་ལ། །རྣམ་རྒྱུད་འཕྲུལ་ཚིག་མི་ལྡན་པར། །སྒྲ་བཞིན་སྤྱད་ནས་སྨྲ་བ་དང་། །ལྟ་སྤྱོད་ལོག་པའི་ང་རྒྱལ་ཅན། །མ་བཅོས་རང་སྣང་རོལ་པ་དང་། །རྣམ་རྟོག་ཞེན་པའི་བཏགས་པ་དག །བྱེ་བྲག་མ་ཕྱེད་རྨོངས་པའི་བློ་། །རྡོ་ལ་གསེར་དུ་འཛིན་པ་བཞིན། །འོད་གསལ་ལྷུན་གྲུབ་རང་སྣང་དང་། །བཏགས་པའི་ཞེན་པ་བསྲེས་ནས་སྨྲ། །མ་བཅོས་རིག་པའི་གདེང་མེད་པར། །རང་ལྟས་ཡ་རབས་མཐོང་འདོད་པ། །བབ་བཅོལ་འདོད་ལྔ་སྤྱོད་པས་ལོག །དེའི་དུས་ཀྱི་གང་ཟག་རྣམས། །སྦྲེལ་མ་གཡང་ལ་ལྷུང་བ་བཞིན། །རྡོ་རྗེའི་ཁབ་ཏུ་ལྷུང་གྱུར་ནས། །བྱང་ཆུབ་སེམས་ཀྱི་རིགས་དང་བྲལ། །མགྱོགས་འགྲོ་ས་མཚམས་འདས་དང་འདྲ། །ཞེས་གསུངས་ནས་གདའོ།། །།ཞུས་སོ། །དག་གོ། །དགེའོ།། །།