རྫོགས་པ་ཆེན་པོའི་སྤྱི་ཆིངས། ཀཿདམ་པ།

རྫོགས་པ་ཆེན་པོའི་སྤྱི་ཆིངས་བཞུགས་སོ། །རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་འབྲེལ། མན་ངག་ཐམས་ཅད་ཀྱི་ཉིང་ཁུ་བསྟན་པ་ཐམས་ཅད་ཀྱི་མཛོད་ཆེན་པོ། ཐེག་པ་ཐམས་ཅད་ཀྱི་ཡང་རྩེ། དཀྱིལ་འཁོར་ཐམས་ཅད་ཀྱི་མེ་ལོང་། དགོངས་པ་ཐམས་ཅད་ཀྱི་མཐར་ཐུག །ལྟ་སྒོམ་ཐམས་ཅད་ཀྱི་སྒྲོན་མེ། སངས་རྒྱས་ཐམས་ཅད་ཀྱི་དགོངས་པའི་སྙིང་པོ། དེ་ལྟར་ཆེ་བ་དགུ་དང་ལྡན་པའི་རྫོགས་པ་ཆེན་པོ་འདི་གཏན་ལ་འབེབ་པ་ལ། སྤྱི་དོན་རྣམ་པ་བརྒྱད་ཀྱི་སྟོན་ཏེ། རྫོགས་པ་ཆེན་པོའི་ངོ་བོ་བསྟན་པ་དང་། ངེས་ཚིག་དང་། དབྱེ་བ་དང་། རྣམ་གྲངས་དང་། ཁྱད་པར་དུ་འཕགས་ལུགས་དང་། མཚན་ཉིད་དང་། རྫོགས་ཚུལ་དང་། རྫོགས་ཆེན་རྟོགས་པའི་དགོངས་པ་དང་། འབྲས་བུ་བསྟན་པའོ། །དེ་ལ་རྫོགས་པ་ཆེན་པོའི་ངོ་བོ་ནི། ཆོས་ཐམས་ཅད་ཀྱི་དབྱིངས་སྐྱེ་བ་མེད་པ། འཁྲུལ་རྟོག་གིས་མ་བསླད་པའི་སྟོང་གསལ། རྒྱ་མ་ཆད་པ་དེ་ཉིད་ཡིན་ནོ། །ངེས་ཚིག་ནི། རྫོགས་ཞེས་པས་མ་རྫོགས་པའི་ཆོས་གང་ཡང་མེད་དེ། ཕྱི་རོལ་པ་ནས་བཟུང་སྟེ་ཐེག་པའི་རིམ་པ་ཐམས་ཅད་དང་། འཁོར་འདས་ཀྱི་ཆོས་ཐམས་ཅད་སྟོང་གསལ་ཆེན་པོར་རྫོགས་སོ་ཞེས་པ་ནི། ཆོས་ཉིད་འགྱུར་བ་མེད་པ། ཆེན་པོ་ནི་ཐེག་པ་གཞན་པས་ཆེ་བས་དགོངས་པ་ཁྱད་པར་དུ་འཕགས་སོ། །རྫོགས་པ་ཆེན་པོའི་དབྱེ་བ་ནི་གཉིས་ཏེ། གོལ་ས་མཐར་ཐུག་གི་རྫོགས་ཆེན་དང་། ཉམས་ལེན་འབྲས་བུའི་རྫོགས་ཆེན་ནོ། །གོལ་ས་ལ་གསུམ་སྟེ། ཁ་འབྱམས་བློའི་རྫོགས་ཆེན་དང་། བར་དོ་ཡོངས་གྲོལ་གྱི་རྫོགས་ཆེན་དང་། མཚན་མ་ཚིག་བྲལ་གྱི་རྫོགས་ཆེན་ནོ། །དང་པོ་ནི་རྫོགས་ཆེན་སངས་རྒྱས་ཀྱི་དགོངས་པའི་མཐར་ཐུག་ཡིན་པ་ལ། གནས་ལུགས་ཀྱི་དོན་མ་ནོར་བ་ནི་མ་རྟོགས་ཤིང་ཉམས་སུ་མ་ལོན་པས་ཁ་ཆག་ཙམ་དུ་དོན་གྱི་ཚིག་བཟང་པོ་རྣམས་ཁ་ཚིག་ཏུ་སོང་བ་ཡིན་ནོ། །གཉིས་པ་བར་དོ་རང་གྲོལ་ནི། རྫོགས་པ་ཆེན་པོའི་ལྟ་སྒོམ་བཟང་པོ་དང་། ཟབ་མོ་ཐམས་ཅད་ཉམས་སུ་ལེན་པ་ཐང་ཆད་ནས། ཆོས་ཐམས་ཅད་ཡེ་གྲོལ་དང་། རང་གྲོལ་ཡིན་པའི་གཏན་ཚིགས་དང་། ཁུངས་མང་པོ་ཁྱེར་ནས་ཉམས་སུ་མ་བླངས་པས་བྲོད་རྟགས་དང་ཉམས་མ་ཤར་བར། སངས་རྒྱས་ཡིན་ཞེས་ཟེར་ཅིང་དགེ་བ་མི་སྤྱོད། སྡིག་པ་མི་སྤང་བ་རྣམས་སོ། །དེ་ནི་ཆད་པར་ལྟ་བ་རྣམས་ཡིན་ཏེ། ལས་དགེ་སྡིག་གང་ཡང་མེད་པར་ལྟ་བ་ནི། ཚ་བའི་དམྱལ་བར་སྐྱེ་བ་ལུང་ནས་བཤད་དོ། །གསུམ་པ་མཚན་མ་ཚིག་གི་རྫོགས་ཆེན་ནི། ཚིག་ཙམ་དུ་ཆོས་ཐམས་ཅད་སྐྱེ་བ་མེད་པ་ཡིན་ཟེར་ནས། ལུང་ཁུང་མང་པོ་འདྲེན་ཅིང་ཐ་མལ་གྱི་རྣམ་རྟོག །མ་སྤངས་པར། ཆོས་ཐམས་ཅད་དངོས་པོ་དང་མཚན་མར་བཟུང་ནས་རྟོགས་ལྡན་དུ་ཁས་ལེན་པ་རྣམས་ནི་རྟག་པར་ལྟ་བ་ཡིན་ནོ། །གོལ་ན་སེམས་ཅན་དམྱལ་བ་མནར་མེད་པར་སྐྱེའོ། །གཉིས་པ་ཉམས་ལེན་འབྲས་བུའི་རྫོགས་ཆེན་ནི། སྤྲོས་བཅས་ཐབས་ཀྱི་རྫོགས་ཆེན་དང་། སྤྲོས་མེད་ཤེས་རབ་ཀྱི་རྫོགས་ཆེན་ནོ། །སྤྲོས་བཅས་ནི། ཉན་ཐོས་ཀྱི་ཐེག་པ་ནས་བཟུང་ནས། ཨ་ཏིའི་ཐེག་པའི་བར་དུ་སྤང་བླང་དགག་སྒྲུབ་ཆེ་ཆུང་མཐོ་དམན་ཕྱོགས་རིས་ལ་སོགས་པ་མེད་པར་ཐབས་སྣ་ཚོགས་ཀྱིས་ལམ་དུ་འཁྱེར་ཏེ། དེ་རྣམས་ཀྱང་མཐའ་བྲལ་སྟོང་གསལ་ཆེན་པོར་ཡོངས་སུ་རྫོགས་པར་བྱེད་པའོ། །སྤྲོས་མེད་ཤེས་རབ་ཀྱི་རྫོགས་ཆེན་ལ་གསུམ་སྟེ། གནས་ལུགས་གཞིའི་རྫོགས་ཆེན། རིམ་འཇུག་ལམ་གྱི་རྫོགས་ཆེན་དང་། །མཐར་ཐུག་འབྲས་བུའི་རྫོགས་ཆེན་ནོ། །དང་པོ་ནི། གཞི་དངོས་པོ་གཤིས་ཀྱི་དོན་དེ་ངོ་བོ་ཀ་དག །རང་བཞིན་ལྷུན་གྲུབ་ཀྱི་ངོ་བོར་གཞུགས་ཏེ། དེ་ལ་ཀ་ནས་དག་པས་འཁྲུལ་མ་མྱོང་། ཡེ་ནས་མ་བཅོས་མ་བསླད་པར་བཞུགས་ཏེ་ལྷུན་གྲུབ་ཏུ་གནས་སོ། །ངོ་བོ་རང་བཞིན་ཐུགས་རྗེ་གསུམ་དང་སྐུ་ལྔ་ཡེ་ཤེས་ལྔ་དང་། མ་སྤངས་མ་འདྲེས་པར་ཡོངས་སུ་རྫོགས་པར་གནས་སོ། །དེ་རྟོགས་པ་ནི་ལམ་མ་བསྒྲོད་པར་དབང་པོ་རྣོན་པོས་རྟོགས་པ་ཙམ་གྱིས་སངས་རྒྱས་སོ། །རིམ་འཇུག་པ་ནི་ལམ་རིམ་གྱིས་པ་དང་། ཅིག་ཆར་དུ་འཇུག་པ་གཉིས་ལས། དང་པོ་ནི་དབང་དང་དམ་ཚིག་ཐོབ་པར་བྱས་ཏེ། སེམས་འཛིན་དང་། བསམ་གཏན་དང་། སྒོམ་པ་ཏིང་ངེ་འཛིན་ལ་རིམ་གྱིས་བསླབས་ཏེ། དེ་ནས་སངས་རྒྱས་ཀྱི་ད གོངས་པ་མཐར་ཐུག་པའི་དོན་རྣམས་རྫོགས་པར་བྱེད་པའོ། །ཅིག་ཅར་བ་ནི་གསུམ་སྟེ། སྐྱོན་བྲལ་ཡོན་ཏན་གྱི་རྫོགས་ཆེན་དང་། མཚན་མ་ཚིག་བྲལ་གྱི་རྫོགས་ཆེན་དང་། སྟོང་གསལ་དོན་གྱི་རྫོགས་ཆེན་དང་གསུམ། དང་པོ་ནི་ཐོས་བསམ་སྒོམ་གསུམ་གྱིས་བློའི་སྒྲོ་འདོགས་བཅད་དེ། དེ་ནས་ལྟ་བ་ཕྱིན་ཅི་མ་ལོག་པར་རྟོགས། སྒོམ་པས་ཉམས་སུ་བླངས། སྤྱོད་པས་བོགས་འདོན་ཏེ་ལ་ཟླའོ། །རྟག །ཆད། བྱིང་། རྒོད། བླང་། དོར། རེ་དོགས་གོལ་སྒྲིབ་ཐམས་ཅད་ཀྱི་མཐའ་དང་བྲལ་ཏེ། སངས་རྒྱས་ཀྱི་དགོངས་པ་མཐར་ཐུག་པ་ཕྱིན་ཅི་མ་ལོག་པ་མཐའ་བྲལ་ཡོངས་སུ་རྫོགས་པའི་ངང་ལ་གནས་པ་ནི། སྐྱོན་ཐམས་ཅད་དང་བྲལ་ཏེ་ཡོན་ཏན་རྫོགས་པའོ། །མཚན་མ་ཚིག་བྲལ་ནི། ཕྱི་ནང་གི་ཆོས་ཐམས་ཅད་ཆོས་ཀྱི་དབྱིངས་སྐྱེ་འགག་མེད་པ་ཐིག་ལེ་ཉག་གཅིག་ཏུ་རྟོགས་པ་ནི་ཚིག་དང་ཡི་གེ་ལས་འདས་ཏེ། མཚན་མའི་དངོས་པོ་གང་ཡང་མ་གྲུབ་པའོ། །སྟོང་གསལ་དོན་གྱི་རྫོགས་ཆེན་ནི། སྣང་ཞིང་སྲིད་པའི་ཆོས་ཐམས་ཅད་བྱང་ཆུབ་སེམས་ལས་བྱུང་ཞིང་སེམས་སུ་འདུས་ཏེ། བྱང་ཆུབ་སེམས་ནི་རིག་པའི་ཡེ་ཤེས་ཡིན། རིག་པའི་ཡེ་ཤེས་དེ་ནི་རྒྱུད་ལུང་མན་ངག་གིས་གཏན་ལ་ཕབ་པའི་དུས་ན་ངོ་བོ་དང་དབྱིངས་དང་ཁ་དོག་འཁོར་འདས་ལ་སོགས་པ་གང་ཡང་མ་གྲུབ་པར་སྣང་བ་རང་སྣང་། ཤར་བ་རང་ཤར། རང་བྱུང་རང་གྲོལ་ཏུ་གནས་ཏེ། དེ་ཉིད་སྐྱོན་ཡོན་ཐམས་ཅད་ཀ་ནས་དག་སྟེ། རེ་དོགས་ཀྱི་མཐའ་ཐམས་ཅད་ལས་འདས་ཤིང་གང་གི་ངོ་བོར་ཡང་མ་གྲུབ། སྟོང་ཞིང་གསལ་ལ་གང་གིས་ཡང་མི་དམིགས་པས། བདེ་ཞིང་རྟོག་མེད་དུ་གནས་པ་དེ་ཉིད་དུ་མ་འདུས་པའི་ཆོས་གང་ཡང་མེད་དོ། །སྟོང་ཞིང་གསལ་བ་བྱང་ཆུབ་སེམས། །སངས་རྒྱས་ཀུན་གྱི་སྙིང་པོ་ཡིན། །ཞེས་སོགས་རྫོགས་པ་ཆེན་པོའི་རྣམ་གྲངས་ནི། སྤྱིར་རྫོགས་ཆེན་ལ་སྡེ་ཆེན་པོ་གསུམ། ཀློང་ཆེན་པོ་དགུ། བམ་པོ་ཁྲི་ཆིག་སྟོང་། རྒྱུད་སྡེ་ཁྲི་ཕྲག་གཅིག །མཆོང་ཆེན་པོ་བརྒྱད་ཅུ། གཟེར་ཆེན་པོ་ལྔ་བརྒྱ་དང་བརྒྱད་ཅུ། གནད་ཀྱི་གདམས་ངག་ཁྲི་དྲུག་སྟོང་། ངོ་སྤྲོད་སྟོང་དང་དགུ་བརྒྱ། ལ་བཟླ་བའི་གདམས་ངག་ཁྲི་ཕྲག་གསུམ། ཤན་འབྱེད་ཀྱི་གདམས་ངག་སྟོང་ཕྲག་དགུ །ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི་བཞུགས་སོ།། །།ཀཿདམ་པས་གསུངས་སོ།། །།