བླ་མ་དྲུག་གི་གདམས་ངག དབུས་པ་རྟ།

བླ་མ་དྲུག་གི་གདམས་ངག །ཀུན་ཏུ་བཟང་པོ་རྡོ་རྗེ་སེམས་དཔའ་དགའ་རབ་རྡོ་རྗེའི་ཐུགས། །བཀའ་བབས་གདུང་རབས་གོང་མ་རྣམས་ལ་གུས་པས་འདུད། །ཡ་རབས་སྐལ་ལྡན་རྣམས་ཀྱི་དོན་ཆེད་དུ། །ངོ་སྤྲོད་གདམས་ངག་བླ་མའི་གསུང་བཞིན་བྲི། །སྤྱིར་མཚོན་བྱ་དོན་གྱི་རྫོགས་པ་ཆེན་པོ་དང་། མཚོན་བྱེད་ཚིག་གི་རྫོགས་པ་ཆེན་པོ་གཉིས་སུ་གོ་བ་ལོང་མཛོད་ལ། དེ་ཡང་མཚོན་བྱའི་དོན་ནི་གཞན་ལ་མི་བདོག་སྟེ། རང་གི་སེམས་ཉིད་སྟོང་གསལ་འཛིན་མེད་དུ་རང་ལ་རང་ཆས་སུ་གནས་པ་དེའོ། །དེ་ཡང་རྫོགས་པ་རང་ཇི་ལྟར་རྫོགས། ཆེ་བ་རང་ཅིས་ཆེ་ན་འཁོར་འདས་ལམ་པས་བསྡུས་པའི་ཆོས་ཐམས་ཅད་རང་གི་སེམས་སྟོང་གསལ་གཉིས་མེད་ཀྱི་ཆོས་སྐུར་ཡེ་ནས་རྫོགས་པས་རྫོགས་པ། དེ་ལས་ལྷག་པའི་བསྒྲུབ་བྱ་གཞན་མེད་པས་ཆེན་པོའོ། །དེ་ཡང་སེམས་ཕྱོགས་རྩ་བ་ལས། ལྷག་མ་མེད་པར་ཡོངས་སུ་རྫོགས། །ཆེ་བའི་ཆེན་པོར་རང་བཞིན་གནས། །ཞེས་སོ། །འོ་ན་རང་ཆས་སུ་གནས་པས་ཆོག་མོད། གཏན་ལ་དབབ་ཅི་དགོས་ཞེ་ན། དགོས་ཏེ་དེ་ལྟར་གནས་ཀྱང་དང་པོར་རང་ངོ་མ་ཤེས། བར་དུ་རང་ས་མ་ཟིན། ཐ་མ་རང་དབང་མ་ཐོབ་སྟེ། མངལ་སྒོ་རང་དབང་མེད་པར་འགྲིབས་པས། ཁམས་གསུམ་དུ་འཁོར་རྒྱུད་དྲུག་ཏུ་འཁྱམས་ཤིང་སྡུག་བསྔལ་སྣ་ཚོགས་ཉམས་སུ་མྱོང་ངོ་། །འཁྲུལ་པ་དེ་བཟློག་པར་བྱེད་པ་ལ། དང་པོ་རང་ངོ་ཤེས་པར་བྱ། བར་དུ་རང་ས་ཟིན་པར་བྱ། ཐ་མ་རང་དབང་ཐོབ་པར་བྱ་སྟེ། དེ་ཡང་དང་པོ་སྐྱེ་འགག་གཉིས་མེད་དེ་རང་ངོ་ཤེས་པར་བྱ་སྟེ། དེ་ཡང་། ཆོས་རྣམས་དཔེ་ཡིས་མཚོན་ཏེ་བསྟན། །ཆོས་རྣམས་དེ་ཡིས་མ་མཚོན་ན། །རྨོངས་པས་གོ་བར་ག་ལ་འགྱུར། །ཞེས་པས། འདུས་མ་བྱས་ཀྱི་ནམ་མཁའ་དཔེར་བླངས་ལ། དེ་ཡང་ནམ་མཁའ་ལ་བལྟས་པས་ཁ་དོག་ཏུ་མ་གྲུབ། དབྱིབས་སུ་མ་གྲུབ། མཚན་ཕོ་མོ་མ་ནིང་དུ་མ་གྲུབ། འདི་ཕྱིར་ན་འདི་ཡིན་བྱ་བའི་ངོས་བཟུང་ཐམས་ཅད་དང་བྲལ་ཏེ། ཕྱོགས་སུ་ཞེན་པ་དང་འཛིན་པ་མཐའ་དག་གིས་སྟོང་པ་བཞིན་དུ། བྱང་ཆུབ་སེམས་ཀྱི་རང་བཞིན་ལ་ཡང་། ཁ་དོག་ཏུ་མ་གྲུབ། དབྱིབས་སུ་མ་གྲུབ། མཚན་ཕོ་མོ་མ་ནིང་དུ་མ་གྲུབ། འདི་ཕྱིར་ན་འདི་ཡིན་བྱ་བའི་ངོས་བཟུང་ཐམས་ཅད་དང་བྲལ་ཏེ། ཕྱོགས་སུ་ཞེན་པ་དང་འཛིན་པ་ཐམས་ཅད་ཀྱིས་སྟོང་། དེ་ཡང་། ནམ་མཁའི་རྟོག་པ་སྐྱེ་མེད་ཅིང་། །ཞེས་པས། སྐྱེ་བ་མེད་པར་རང་ངོ་ཤེས་པར་བྱའོ། །དཔེར་ན་ནམ་མཁའ་ལས་སྤྲིན་ན་བུན་དང་ཁུ་གླངས་དང་། ཉི་ཟླ་གཟའ་སྐར་ལ་སོགས་པ་མ་འགགས་པར་ཤར་བ་བཞིན་དུ། སེམས་ཉིད་ངོས་བཟུང་དང་བྲལ་བ་དེ་ཉིད་འཛིན་མེད་ཀྱི་རིག་པ་ཕྱོགས་མེད་དུ་རང་སྣང་སྟེ། འཁོར་འདས་ལམ་གསུམ་དུ་མ་འགགས་པར་ཤར་རོ། །དེ་ཡང་། རྟོག་པ་དེ་ཉིད་ནམ་མཁའ་འདྲ། །ཞེས་པས། འགག་པ་མེད་པར་རང་ངོ་ཤེས་པར་བྱའོ། །དཔེར་ན་སྤྲིན་ཉིད་ནམ་མཁའི་ངང་ལས་བྱུང་ནམ་མཁའ་ཉིད་དུ་ཞི། ནམ་མཁའ་དང་སྤྲིན་དབྱེར་མི་ཕྱེད་པ་བཞིན། སེམས་སྐྱེད་ངོས་བཟུང་དང་བྲལ་བའི་དུས་ཉིད་ན། འཛིན་མེད་ཀྱི་རིག་པ་རང་སྣང་། རང་སྣང་བསྔོ་བའི་དུས་ཉིད་ན་ངོས་བཟུང་དང་བྲལ་ཏེ། སྟོང་བསྔོ་བའི་དུས་ན་སྣང་། སྣང་བསྔོ་བའི་དུས་ན་སྟོང་སྟེ་དབྱེར་མི་ཕྱེད་དོ། །དེ་ཡང་། མི་ཆགས་ནམ་མཁའི་བསྔོ་བ་ལས། ཞེས་པས། གཉིས་སུ་མེད་པར་རང་ངོ་ཤེས་པར་བྱའོ། །དཔེར་ན་ཤར་གྱི་ནམ་མཁའ། ལྷོའི་ནམ་མཁའ་ལ་ཡུལ་དུ་བྱས་ནས་ལྟར་མེད། ལྷོའི་ནམ་མཁའ་ཤར་གྱི་ནམ་མཁའ་ལ་ཡུལ་དུ་བྱས་ནས་བསྒོམ་དུ་མེད་པ་བཞིན་དུ། གཉིས་མེད་ལ་ཡུལ་དུ་བྱས་ནས་ལྟ་ཞིང་བསྒོམ་དུ་མེད་དེ། བློ་ངོ་བོ་ཉིད་དུ་གྲོལ་ཆེན་པོར་རང་ངོ་ཤེས་པར་བྱའོ། །དེ་ལྟར་རང་ངོ་ཤེས་པ་དེ་ལྟ་བའོ། །དེ་ལྟར་ལྟ་བས་ཕྱོགས་མེད་རྟོགས་པས་ཡོན་ཏན་ཕྱོགས་ཞེན་འཛིན་པ་གྲོལ་དགོས། སེམས་ཉིད་སྐྱེ་བ་མེད་ངོས་བཟུང་དང་བྲལ་བར་རྟོགས་པས་སྣང་བའི་ཕྱོགས་ཞེན་དང་འཛིན་པ་ལས་གྲོལ་འཛིན་མེད་ཀྱི་རིག་པ་རང་སྣང་དུ་རྟོགས། སྟོང་པ་ཕྱོགས་ཞེན་དང་འཛིན་པ་ལས་གྲོལ་ལོ། །དེ་གཉིས་སུ་མེད་པར་རྟོགས་གཉིས་འཛིན་གྱི་ཞེན་པ་དང་འཛིན་པ་ལས་གྲོལ། གཉིས་མེད་རང་གྲོལ་ཆེན་པོར་རྟོགས་པས་ཡུལ་ཡུལ་ཅན་གྱིས་ཞེན་པ་དང་འཛིན་པ་ལས་གྲོལ་ལོ། །དེ་ལྟར་ཡིན་ལུགས་ཤེས་ཀྱང་ཞེན་པ་དང་འཛིན་པ་གྲོལ་དུ་མ་བཏུབ་ན་བསྒོམ་དགོས་པ་ཡིན། དེ་ལ་བར་དུ་རང་ས་ཟིན་པར་བྱ་སྟེ། སེམས་དུག་གསུམ་རྟོག་པའི་རྗེས་སུ་མི་འབྲངས་ཏེ། ལུས་ངག་ཡིད་གསུམ་ཁོང་གློད་ལ། །སྔར་འདས་པའི་རྗེས་མི་གཅོད། ཕྱིས་མ་འོངས་པ་སྡུན་མི་བསུ། ད་ལྟའི་ཤེས་པ་རྩི་གདབ་མེད་པའི་མདོ་འདི་ཀར་སློད་ལ་གཞན་པས། གསལ་ལ་རྟོག་པ་མེད། གསལ་ལ་འཛིན་པ་མེད་པའི་ཤེས་པ་ས་ལེ་སངས་ངེ་བ་གཅིག་རྒྱུད་ལ་སྐྱེའོ། །དེ་དུས་གསུམ་སངས་རྒྱས་ཀྱི་དགོངས་པ་ཡིན་པས་རྣལ་འབྱོར་པས་ཉམས་ལེན་བྱའོ། །རང་དབང་ཐོབ་པ་ནི། དེ་ལྟར་ལྟ་བ་སྐྱེ་འགག་གཉིས་མེད་དུ་རང་ངོ་ཤེས། སྟོང་གསལ་འཛིན་མེད་ཏུ་རང་ས་ཟིན་པས་དེའི་ངང་ལ་འཁྲུལ་རྒྱུ་མེད་དེ། བར་དོའི་དུས་སུ་མ་ལ་སྒོ་སོག་མའི་སྦུ་གུ་བཞིན་དུ་འདུག་ཀྱང་རང་དབང་མེད་པར་མི་འགྲིམ་མོ། །མངལ་སྒོ་མ་འགྲིམས་རང་ངོ་རང་གིས་ཤེས་པ་རང་ས་ཟིན། སྡུག་བསྔལ་མ་སྤངས་ཆོས་ཉིད་ཏུ་རང་གྲོལ་བ་ལ་སངས་རྒྱས་ཟེར་ཏེ། དེ་ལས་སེམས་ཅན་གྱི་དོན་ཇི་ལྟར་འབྱུང་ན། ཉི་མ་ལས་འོད་རང་བཞིན་གྱིས་འབྱུང་བའམ། རིན་པོ་ཆེ་ལས་དགོས་འདོད་འབྱུང་པ་བཞིན་དུ་སེམས་ཅན་གྱི་དོན་འབད་མེད་དུ་འབྱུང་ངོ་། །དེ་ཡང་། རང་དོན་ཆེན་པོ་ནམ་མཁའ་འབྱུང་། །ཞེས་སོ།། ཨིྀཊ྅྅྅། སྟོང་གསལ་ཆོས་སྐུའི་གནས་ལུགས་དེ། །ལྟ་བསྒོམ་ངོ་ཤེས་རང་ས་འཛིན། །ཞིག་པོ་སྤྲུལ་སྐུའི་ཞལ་གདམས་འདི། །དབུས་པ་རྟ་ཡིས་ཡི་གེར་བཀོད། །བཏགས་པས་ཉམས། བཅོས་པས་སླད། བསྒོམ་པས་འཁྲུལ། ཨ་ཡུ་རང་རང་གིས་རང་སྟོང་པ་ལྟ་བུའོ། །ཞེས་འཁྲུལ་ལུགས་ཀྱི་སྐབས་སུ་ཨ་ཡུ་རའི་གཏམ་རྒྱུད་གསུང་ངོ་།། །།