རབ་འབྲིང་ཐ་གསུམ་མམ་དགུའི་སྒོ་ནས་སེམས་གནས་པའི་ཚད་བསྟན་པ།
རབ་འབྲིང་ཐ་གསུམ་མམ་དགུའི་སྒོ་ནས་སེམས་གནས་པའི་ཚད་བསྟན་པ་བཞུགས། རབ་འབྲིང་ཐ་གསུམ་མམ་དགུའི་སྒོ་ནས་སེམས་གནས་པའི་ཚད་བསྟན་པ་ནི། དབུགས་ལ་གསུམ་སྟེ། རབ་དབུགས་འགྱུ་བ་མི་ཚོར། འབྲིང་བརྟགས་ན་ཚོར། ཐ་མ་མ་བརྟགས་ཀྱང་ཚོར་བའོ། །རབ་ཀྱི་རབ་དབུགས་རྒྱུ་བ་མི་ཚོར། རབ་ཀྱི་འབྲིང་དབུགས་ལྟེ་བ་ན་ཡོད་པ་སྙམ་སེམས ། རབ་ཀྱི་ཐ་མ་ཕྲ་བ་ཞིག་ཡར་རྒྱུ་བ་སྙམ་སེམས་སོ། །འབྲིང་གི་རབ་རྒྱུ་བ་བརྟགས་ན་རེས་ཚོར་རེས་མི་ཚོར། འབྲིང་གི་འབྲིང་བརྟགས་ན་གཏན་དུ་ཚོར། འབྲིང་གི་ཐ་མ་མ་བརྟགས་པར་ཚོར་རོ། །ཐ་མའི་དབུགས་མ་བརྟགས་པར་ཚོར་ཡང་མི་གནོད། ཐ་མའི་འབྲིང་ཚོར་ཡང་རེས་གནོད་རེས་མི་གནོད། ཐ་མའི་ཐ་མ་ཚོར་ཡང་ཚོར་ལ་གནོད་ཀྱང་གནོད་དོ། །ལུས་ལ་གསུམ་སྟེ། རབ་ལུས་མི་འཆར། འབྲིང་ལུས་བརྟགས་ན་འཆར། ཐ་མ་ལུས་མ་བརྟགས་ཀྱང་འཆར་རོ། །རབ་ཀྱི་རབ་ལུས་བརྟགས་ན་མི་འཆར་བར་བསྒོམ་བཟུང་དུ་འགྲོ། རབ་ཀྱི་འབྲིང་ལུས་མི་འཆར་ལ་བསྒོམ་བཟང་རྒྱུ་མེད། རབ་ཀྱི་ཐ་མ་ལུས་མ་རྟགས་པར་བུན་ནེ་འཆར་བའོ། །འབྲིང་གི་རབ་ལུས་བརྟགས་ན་རེས་འཆར་རེས་མི་འཆར། འབྲིང་གི་འབྲིང་བརྟགས་ན་འཆར། འབྲིང་གི་ཐ་མ་ལུས་བུན་ནེ་བ་ཞིག་རྟག་ཏུ་འཆར་རོ། །ཐ་མའི་རབ་ལུས་རྟག་པར་འཆར་ལ་མི་གནོད། ཐ་མའི་འབྲིང་འཆར་ལ་རེས་གནོད་རེས་མི་གནོད། ཐ་མའི་ཐ་མ་འཆར་ལ་གནོད་པའོ། །སྒྲ་ལ་གསུམ་སྟེ། རབ་སྒྲ་མི་ཐོས། འབྲིང་ཞེན་པ་མི་འཇིག །ཐ་མ་མི་གནོད་པའོ། །རབ་ཀྱི་རབ་སྒྲ་ཆེ་འབྲིང་ཆུང་ངུ་གསུམ་ཀ་མི་ཐོས། རབ་ཀྱི་འབྲིང་ཆུང་འབྲིང་གཉིས་མི་ཐོས་སོ། །རབ་ཀྱི་ཐ་མས་ཆུང་ངུ་མི་ཐོས་སོ། །འབྲིང་གི་རབ་སྒྲ་གསུམ་ཀ་ལ་ཞེན་པ་མི་འཇུག །འབྲིང་གི་འབྲིང་ཆུང་འབྲིང་གཉིས་ལ་ཞེན་པ་མི་འཇུག །འབྲིང་གི་ཐ་མ་ཆུང་ངུ་ལ་ཞེན་པ་མི་འཇུག་གོ། །ཐ་མའི་རབ་སྒྲ་གསུམ་ཀ་ལ་མི་གནོད། །ཐ་མའི་འབྲིང་ཆུང་འབྲིང་གཉིས་མི་གནོད། ཐ་མའི་ཐ་མ་ཆུང་ངུ་མི་གནོད་དོ། །ཁམས་ལ་གསུམ་སྟེ། ཁམས་རབ་ཟངས་སུ་འགྲོ། འབྲིང་པོ་ཐུབ། ཐ་མ་དུབ་ཅིང་གནོད་དོ། །ཁམས་རབ་ཀྱི་རབ་ཤིན་ཏུ་བཟང་དུ་འགྲོ། རབ་ཀྱི་འབྲིང་འཕལ་དུ་བཟང་དུ་འགྲོ། རབ་ཀྱི་ཐ་མ་རེས་བཟང་རེས་ངན་ནོ། །ཁམས་འབྲིང་གི་རབ་སོ་ཐུབ། འབྲིང་གི་འབྲིང་ཕལ་ཆེར་སོ་ཐུབ་ཀྱང་རེས་མི་ཐུབ། འབྲིང་གི་ཐ་མ་ཕལ་དུ་སོ་མི་ཐུབ་རེས་འགའ་ཐུབ། ཁམས་ཐ་མའི་རབ་ཕལ་ཆེར་མི་གནོད། ཐ་མའི་འབྲིང་རེས་གནོད་རེས་མི་གནོད། ཐ་མའི་ཐ་མ་ཕལ་ཆེར་གནོད་རེས་འགའ་མི་གནོད་དོ། །ཤིན་ཏུ་སྦྱངས་པ་ལ་གསུམ་སྟེ། ཤིན་ཏུ་སྦྱངས་པ་རབ་ལུས་སེམས་ལ་ཆེར་ཕེབས། འབྲིང་འབྲིང་དུ་ཕེབས། ཐ་མ་ཆུང་ངུར་ཕེབས་སོ། །ཤིན་ཏུ་སྦྱངས་པ་རབ་ཀྱི་རབ་ཆེར་ཕེབས་རྣམ་གྲངས་ཀྱང་མང་། རབ་ཀྱི་འབྲིང་ཆེར་ཕེབས་ལ་རྣམས་གྲངས་ཀྱང་འགའ་ཡོད་པ། རབ་ཀྱི་ཐ་མ་ཆེར་ཕེབས་རྣམ་གྲངས་མེད་པའོ། །འབྲིང་གི་རབ་ཤིན་ཏུ་སྦྱངས་པ་འབྲིང་ལ་རྣམ་གྲངས་མང་བ། འབྲིང་གི་འབྲིང་ཤིན་ཏུ་སྦྱངས་པ་འབྲིང་ལ་རྣམ་གྲངས་འགའ་ཡོད་པ། འབྲིང་གི་ཐ་མ་ཤིན་ཏུ་སྦྱངས་པ་འབྲིང་ལ་རྣམ་གྲངས་མེད་པའོ། །ཐ་མའི་རབ་ཤིན་ཏུ་སྦྱངས་པ་ཐ་མ་ལ་རྣམ་གྲངས་མང་བ། ཐ་མའི་འབྲིང་ཤིན་ཏུ་སྦྱངས་པ་ཐ་མ་རྣམ་གྲངས་འགའ་ཡོད་པ། ཐ་མའི་ཐ་མ་ཤིན་ཏུ་སྦྱངས་པ་ཐ་མ་ལ་རྣམ་གྲངས་མེད་པའོ། །ཡུན་ལ་གསུམ་སྟེ། རབ་ཀྱིས་ཐུན་ཚོད་སྐྱོལ། འབྲིང་གིས་ཆུ་ཚོད་སྐྱོལ། ཐ་མས་དབུགས་ཚོད་སྐྱོལ་ལོ། །རབ་ཀྱི་རབ་ཐུན་ཚོད་གཏན་དུ་སྐྱོལ། རབ་ཀྱི་འབྲིང་གིས་ཐུན་གསུམ་སྐྱོལ། གཅིག་མི་སྐྱོལ་རབ་ཀྱི་ཐ་མ་ཡིས་བལ་སྐྱོལ་རེས་ཚོད་མི་སྐྱེལ་ལོ། །འབྲིང་གི་རབ་ཀྱིས་ཆུ་ཚོད་སྐྱོལ། འབྲིང་གི་འབྲིང་གིས་ཕལ་དུ་སྐྱོལ་རེས་ཚོད་གསུམ་ལས་མི་སྐྱོལ། འབྲིང་གི་ཐ་མས་ཕལ་དུ་ཚད་སྐྱོལ་རེས་ཆུ་ཚོད་ཕྱེད་ལས་མི་སྐྱོལ་ལོ། །ཐ་མའི་རབ་ཀྱི་གཏན་དུ་དབུགས་ཚོད་སྐྱོལ། ཐ་མའི་འབྲིང་གིས་ཕལ་དུ་སྐྱོལ་རེས་དབུགས་ཚོད་ལས་མི་སྐྱོལ། ཐ་མའི་ཐ་མས་ཕལ་དུ་དབུགས་ཚོད་སྐྱོལ་རེས་ཕྱེད་ལས་མི་སྐྱོལ་ལོ། །རྗེས་ཀྱི་ཤེས་པ་ལ་གསུམ་སྟེ། རབ་བསྒོམ་པ་གཏང་ཙ་ན་ཡང་བསྒོམ་པ་ཀ་ལྟར་འོང་ལ། འབྲིང་དེ་བས་ཞན་དུ་འོང་བ། ཐ་མ་སང་བའོ། །རབ་ཀྱི་རབ་ཡུན་རིང་བ། རབ་ཀྱི་འབྲིང་ཅུང་ཞིག་འོང་བ། རབ་ཀྱི་ཐ་མ་ཡུན་ཐུང་བའོ། །འབྲིང་གི་རབ་ཞན་པ་དེ་ཡུན་རིང་། འབྲིང་གི་འབྲིང་ཞན་པ་ཅུང་ཞིག་འོང་། འབྲིང་གི་ཐ་མ་ཡུན་ཐུང་བའོ། །ཐ་མའི་རབ་སངས་གུལ། ཐ་མའི་འབྲིང་ཅུང་ཞིག་ན་སངས། ཐ་མའི་ཐ་མ་མདོ་ལ་སངས་པའོ། །སྤྱོད་ལམ་ལ་གསུམ་སྟེ། རབ་ཆེར་ཁྱབ། འབྲིང་འབྲིང་དུ་ཁྱབ། ཐ་མ་ཆུང་ངུ་ཁྱབ་བོ། །སྤྱོད་ལམ་རབ་ཀྱི་རབ་ཀྱིས་གཏན་དུ་བཞི་ཀ་ལ་ཁྱབ། རབ་ཀྱི་འབྲིང་གིས་གསུམ་ལ་ཁྱབ། རབ་ཀྱི་ཐ་མས་གཉིས་ལ་ཁྱབ་པའོ། །སྤྱོད་ལམ་འབྲིང་གི་རབ་ཀྱིས་འབྲིང་དུ་བཞི་ལ་ཁྱབ། འབྲིང་གི་འབྲིང་གིས་གསུམ་ལ་འབྲིང་དུ་ཁྱབ། འབྲིང་གི་ཐ་མ་གཉིས་ལས་མི་ཁྱབ་པའོ། སྤྱོད་ལམ་ཐ་མའི་རབ་ཀྱིས་བཞི་ལ་ཆུང་ངུ་ཁྱབ། ཐ་མའི་འབྲིང་གིས་གསུམ་ལ་ཆུང་ངུ་ཁྱབ། ཐ་མའི་ཐ་མས་གཉིས་ལ་ཆུང་ངུ་ཁྱབ་པའོ། །ཉོན་མོངས་པ་ལ་གསུམ། རབ་ཉོན་མོངས་པ་ཆེར་འབྲི། འབྲིང་འབྲིང་དུ་འབྲི། ཐ་མ་ཆུང་ངུར་འབྲི། རབ་ཀྱི་ཉོན་མོངས་པ་ཡོ་འབྲི། རབ་ཀྱི་འབྲིང་ལ་ཉོན་མོངས་པ་དྲུག་ལ་ལྔ་འབྲི། རབ་ཀྱི་ཐ་ཉོན་མོངས་པ་བཞི་འབྲི། འབྲིང་གི་རབ་ཀྱིས་ཉོན་མོངས་པ་དྲུག་འབྲིང་དུ་འབྲི། འབྲིང་གི་འབྲིང་གིས་ཉོན་མོངས་པ་ལྔ་འབྲིང་དུ་འབྲི། འབྲིང་གི་ཐ་མས་ཉོན་མོངས་པ་བཞི་འབྲིང་དུ་འབྲིའོ། །ཐ་མའི་རབ་ཀྱིས་ཉོན་མོངས་པ་དྲུག་ཐ་མར་འབྲི། ཐ་མའི་འབྲིང་གིས་ཉོན་མོངས་པ་ལྔ་ཐ་མར་འབྲི། ཐ་མའི་ཐ་མས་ཉོན་མོངས་པ་བཞི་ཐ་མར་འབྲི། གཉིས་ཙམ་མི་འབྲིའོ།། །།