བསམ་གཏན་མན་ངག

བསམ་གཏན་མན་ངག། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བསམ་གཏན་བདུད་ལས་རྣམ་པར་རྒྱལ་བའི་མན་ངག་ལ་སྤྱི་དོན་གཉིས་ལས། སློབ་བུ་ངེས་ཤེས་བསྐྱེད་པ་བརྒྱུད་པའི་ལོ་རྒྱུས་དང་། ཉམས་སུ་བླངས་པ་གདམས་ངག་གི་རིམ་པའོ། །དང་པོ་ནི་སློབ་དཔོན་ཨ་རོ་ཡེ་ཤེས་འབྱུང་གནས་སྤྲུལ་པའི་སྐུ་དངོས་དེ་ལ། སྤྱིར་སློབ་མ་མང་ཡང་ཐུགས་ཟིན་བཞི། དེའི་ནང་ནས་ཡ་ཟི་བོན་སྟོན་པ་གནང་། དེས་གྲུ་གུ་ཀློག་འབྱུང་ལ་གནང་སྟེ། ཨ་རོ་ཉིད་ལ་ཡང་བཀའ་ཐོབ་ཙམ་བྱས་ནས། ཐིལ་དུ་ཡ་ཟི་ལ་ཞུས་སོ། །དེས་སྤ་བསྒོམ་བསོད་ནམས་རྒྱལ་མཚན་ལ་གནང་། དེ་ལ་ཐུགས་ཀྱི་སྲས་བཞི་ཐུགས་ཀྱི་དམ་པ་གཅིག་དང་ལྔ་ལས། སྲས་བཞི་ནི། བྲབ་ཤི་སྒོམ་ཆེན། འ་ཞ་བསྒོམ་ཆེན། བ་རང་བསྒོམ་ཆེན། ཁ་རག་བསྒོམ་ཆུང་བཞིའོ། །སྲས་ཀྱི་དམ་པ་འཛི་བསྒོམ་དང་ལྔ་ལས། བྲབ་ཤི་བསྒོམ་ཆེན་དེ་བློ་ཤིན་དུ་བརྟུལ་བས། དེའི་དོན་དུ་དེ་གོང་ཡན་ཆད་སྙན་རྒྱུད་དུ་ཡོད་པ་སྟེ། སྤ་བསྒོམ་གྱིས་ཡི་གེ་རིས་སུ་བཀོད་ནས་བྲབ་ཤི་དང་། འཛི་བསྒོམ་ལ་གནང་། དེས་བ་རང་བསྒོམ་ཆེན་ལ་གནང་། དེས་ཇོ་མོ་ཉང་མོ་ལ། དེས་དམ་པ་ཤག་རྒྱལ་ལ། དེས་ལྕེ་ཇོ་གཟུངས་ལ། དེས་སྤྲུལ་སྐུ་རིན་པོ་ཆེ་ཞིག་པོ་ལ། དེས་རྟ་ཇོ་ཡེ་ལ། དེས་སྲས་རྟ་གཟི་བརྗིད་ལ། དེས་རྟ་བན་བདག་ལ་གནང་ངོ་། །གདམས་ངག་འདིའི་སྐོར་ལ་བཞི། ལམ་དུ་སློང་པ་ལ་ཐུན་མོང་མ་ཡིན་པའི་མན་ངག །ཚོགས་ལ་བཤད་པ་ལ་ཐུན་མོང་། བར་དོ་ངོས་འཛིན་པ་ལ་བར་དོ་བཞི་པ། ལམ་ཉམས་སུ་ལེན་པ་ལ་ཉམས་དྲོད་རྟགས་དང་། དེ་ལས་བར་ཆད་བདུད་འབྱུང་བས། དྲོད་རྟགས་ངོས་འཛིན་པ་དང་། བདུད་དབང་དུ་མི་གཏོང་པ་ལ་བསམ་གཏན་བདུད་ལས་རྣམ་པར་རྒྱལ་བའི་མན་ངག་གོ། །དེ་ལྟར་བཞི་ལས་འདི་བདུད་ལས་རྣམ་རྒྱལ་ལོ། །དེ་ལ་སྤྱི་དོན་བཞི་ལས། ཕྱག་བཙལ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་པ་དོན་གནས་ལུགས་མཇལ་པ་ཡིན་ཏེ། སེམས་ཉིད་བདེ་ལེགས་ཀྱི་གཞིར་གྱུར་པས་དཔལ། ངོ་བོ་མི་འགྱུར་བའམ་གཉིས་སུ་མེད་པས་རྡོ་རྗེ། གསལ་ལ་རྟོག་པ་མེད་པས་སེམས་དཔའ་ལ་ཕྱག་བཙལ་བའི་ཡུལ་ལོ། །ཕྱག་འཚལ་ལོ། །ཞེས་པས་ངོ་བོ་སྟེ། རྟོག་པ་མཇལ་པའོ། །དཔལ་རྡོ་རྗེ་སེམས་དཔའི་དོན་གནས་ལུགས་དེ་རྟོགས་པ་ལྟ་བའི་ཕྱག །དེ་ལ་གོམས་པ་བསྒོམ་པའི་ཕྱག །དེ་མངོན་གྱུར་པ་འབྲས་བུའི་ཕྱག་གོ། །གདའི་ཐུགས་དམ་གྱི་ལྷ་དཔལ་རྡོ་རྗེ་སེམས་དཔའ་ལ་ལུས་ངག་ཡིད་གསུམ་གུས་པའོ། །བཤད་པར་དམ་བཅའ་བ་ཚིག་བཞི་བསྟན་པ་ལས། ཟབ་མོའི་བཀའ་དང་། ཞེས་པ་ནམ་མཁའ་ཆེ་ལ་སོགས་པའོ། །བླ་མའི་གདམས་ངག་དང་ཞེས་པ་སེམས་བསྒོམ་པ་ལ་སོགས་པའོ། །རྣལ་འབྱོར་རིག་པ་བརྒྱུད་པའི་མན་ངག་ཅེས་པ། བདུད་ལེ་འདི་རང་ཟེར་ཀྱང་། སྤུགས་པ་སྙན་རྒྱུད་ལ་སོགས་པའོ། །བརྟེན་ནས་བདུད་ཀྱི་མན་ངག་ཅུང་ཙམ་བྲི་ཞེས་པ། གོང་མ་དེ་རྣམས་ལ་བརྟེན་ནས། ཕྱི་རབས་པ་རྣམས་བདུད་ལས་གྲོལ་བའི་དོན་དུ་ཡི་གེ་བྲི་བར་སྤ་བསྒོམ་གྱིས་དམ་བཅས་པའོ། །བཅུ་གཉིས་ཀྱི་རྟགས་ཀྱི་སྐབས་སུ། སྤྱིར་ལམ་བསྒོམ་རྟགས་འདི་རྣམས་འབྱུང་བ་ཡིན་ཏེ། དེ་ལ་ཕལ་ཆེར་བའི་དབང་དུ་བྱས་པ་ནི། ཚོགས་ལམ་ལ་བདུད་ཀྱིས་ཕལ་ཆེར་དེར་རྩོལ་ཅེས་པས། རྩ་བ་བསྡོམ་ཡིན་ཏེ། རྒྱས་པར་འོག་དུ་སྟོན། ངག་དོན་དྲིལ་ན་ཚོགས་ལམ་བཞི་གསུམ་བཅུ་གཉིས་ལ། བསོད་ནམས་ཆ་མཐུན་གྱི་དགེ་བའི་རྩ་བས་རྒྱུད་སྨིན་པར་བྱེད། གནས་སྐབས་དེར་བདུད་ཀྱིས་ཕལ་ཆེར་རྩོལ་བ་འབྱུང་ངོ་། །སྦྱོར་ལམ་བཞི་ནི། དྲོད༴ རྩེ་མོ༴ བཟོད་པ༴ འཇིག་རྟེན་ཆོས་མཆོག་གོ། །སྤྱིར་ན་དྲོད་དང་རྩེ་མོ་གཉིས་ཀྱི་ཡེ་ཤེས་ཀྱིས། བཟུང་ཡུལ་རང་བཞིན་མེད་པ་སྤྱིའི་ཚུལ་དུ་རྟོགས། བཟོད་པ་དང་ཆོས་མཆོག་གཉིས་ཀྱིས་བཟུང་ཡུལ་དང་འཛིན་སེམས་གཉིས་ཀ་རང་བཞིན་མེད་པར་སྤྱིའི་ཚུལ་དུ་རྟོགས་སོ། །དེ་ལ་དྲོད་ལ་རྟགས་གཡོ་ཞེས་པ། དྲོད་ཀྱིས་བཟུང་ཡུལ་རང་བཞིན་མེད་པ་སྤྱིའི་ཚུལ་དུ་རྟོགས་ནས། མཐོང་ལམ་གྱི་ཡེ་ཤེས་ཀྱི་མེ་སྐྱེ་བའི་སྔ་ལྟས་ལ་དྲོད་ཅེས་བྱ་སྟེ། དཔེར་ན་རྩུབ་བསྟན་དང་པོ་དྲོ་བ་དང་འདྲའོ། །རྟགས་ནི་ལུས་ལ་སྲིན་བུ་མི་འབྱུང་པ་ལ་སོགས་པའོ། །རྩེ་མོ་ལ་རྣལ་འབྱོར་འཕེལ་སྐྱེད་ཆེ་ནི་གོང་གི་ཡེ་ཤེས་དེ་ཉིད་གནས་སྐབས་ཀྱི་ཆོས་ལ་འབད་པ་ཆུང་བ་སྟེ། བསོད་ནམས་གོང་ནས་གོང་དུ་འཕེལ་བའོ། །བཟོད་པ་ལ་སྙམ་པའི་རྣལ་འབྱོར་བརྟེན། ཞེས་པས་གཟུང་འཛིན་གཉིས་ཀ་རང་བཞིན་མེད་པ་སྤྱིའི་ཚུལ་དུ་རྟོགས་ནས། གོང་གི་དེ་ཉིད་ཆེས་བརྟན་པར་འགྱུར་བའོ། །ཆོས་མཆོག་ལ་ཤིན་ཏུ་མཉམ་པར་གནས་ཞེས་པ། གོང་གི་དེ་ཉིད་ཤིན་ཏུ་བརྟན་ཏེ། རྒྱུན་དུ་གནས་པའོ། །མངོན་རྟོགས་རྒྱན་ལས། དེའི་རྟགས་དང་རྣམ་འཕེལ་དང་། བརྟན་དང་སེམས་ཀུན་གནས་པའོ། །ཞེས་སོ། །དེ་ཡང་རྫོགས་ཆེན་གྱི་རྣལ་འབྱོར་པ་ལ་ཆ་མཐུན་བརྩིའོ། །ས་བཞི་ནི། ས་དང་པོ་ལ་སྒོ་གར་ཞུགས་ཀྱང་གཉིས་སུ་མེད་པའི་རྟོགས་པ་དེར་འདྲི་ཞེས་པ། ས་དང་པོ་རབ་ཏུ་དགའ་བ་ཐོབ་པའི་དུས་སུ། དང་པོ་ཐེག་པའི་སྒོ་གར་ཞུགས་ཀྱང་ཆོས་ཀྱིས་བདག་མེད་མངོན་སུམ་དུ་རྟོགས་པས། གཟུང་འཛིན་དང་གཉིས་འཛིན་ཐམས་ཅད་ནུབ་པའོ། །ས་གཉིས་པ། བདུན་པ་མན་ཆད་ལ་ཆོས་ཀྱི་ལུང་བསྟན་པའི་སྣོད་དུ་རུང་། ཞེས་པ། ས་དང་པོ་མན་ཆད་ལ་དངོས་སུ་ལུང་བསྟན་ན། རློམ་སེམས་སྐྱེས་ནས་བདུད་འཇུག་པས་གསུངས་ཏེའམ་བརྒྱུད་དེ་ལུང་སྟོན་ལ། ས་གཉིས་པ་དྲི་མ་མེད་པ་ཡན་ཆད་དུ་བདུད་ཟིལ་གྱིས་གནོན་པས་ཆོས་ཀྱི་ལུང་སྟོན་པའི་སྣོད་དུ་རུང་ངོ་། །ས་བརྒྱད་པ་ནས་ཐབས་ཀྱི་ཐེག་པ་ཐམས་ཅད་ནས་ཐམས་ཅད་དུ་དེར་འདྲེ་ཞེས་པས། དཔེར་ན་བུ་ཆུང་ལ་འདི་བཟའ་བ་ཡིན་ལ་འདི་བཟའ་བ་མིན་མེད་པ་བཞིན་དུ། ས་བརྒྱད་པ་མི་གཡོ་བ་ཐོབ་པའི་དུས་སུ། ལྟ་བ་དང་གྲུབ་མཐའ་ཐམས་ཅད་གཅིག་ཏུ་འདྲེས་ཏེ་ཐ་དད་མེད་པའོ། །དེ་ལ་གཞོན་ནུའི་ས་ཞེས་བྱའོ། །ས་བཅུ་པ་ལ་སྐྱེས་བུ་རྒྱལ་ཚབ་ཆེན་པོར་དབང་བསྐུར་ཞེས་པས། རྒྱུད་བླ་མ་ལས། འོད་ཟེར་ཆེན་པོ་དབང་བསྐུར་ཕྱིར། །ཆོས་ལ་དབང་བ་ཀུན་ལ་ཡང་དག་སྦྱིན། །ཞེས་པས། བྱམས་པ་ཤག་ཐུབ་ཀྱིས་རྒྱལ་ཚབ་ཏུ་དབང་བསྐུར་བ་བཞིན་ནོ། །ཚོགས་ལམ་བཞི་ནི། སྐབས་སུ་རྟོགས་པ་དང་། ཞེས་པས་ལུས་དྲན་པ་ཉེ་བར་གཞག་པ་སྟེ། ལུས་མི་གཙང་པ་དང་སྡུག་བསྔལ་དུ་མའི་གནས་ཙམ་དུ་སྐབས་སུ་རྟོགས་པའོ། །མོས་ལ་ལས་གྱུར་པ་དང་ཞེས་པ་ཚོར་བ་དྲན་པ་ཉེ་བར་གཞག་པ་སྟེ། ལུས་སྡུག་བསྔལ་དུ་མའི་གནས་སྤངས་ལ། ཚོར་བ་དྲན་པ་ཉེ་བར་བཞག་པ་བསྒོམས་ཏེ་མོས་པའོ། །ལྷག་པར་མོས་པ་དང་ཞེས་པས། སེམས་དྲན་པ་ཉེ་བར་གཞག་པ་སྟེ། ལུས་སྡུག་བསྔལ་དུ་མའི་གནས་སྤངས་ནས། ཚོར་བ་དྲན་པ་ཉེ་བར་གཞག་པ་བསྒོམས་པ་དེ་ལ་ལྷག་པར་མོས་པའོ། །ཐོས་པ་ལས་གྱུར་པའོ་ཞེས་པ་ནི། ཆོས་དྲན་པ་ཉེ་བར་གཞག་པ་སྟེ། གོང་ལྟར་གཞག་པས་ཐོབ་བྱའི་ཡོན་ཏན་ཐོབ་པའོ། །འདོད་པའི་ལྷ་ཆུང་མ་དང་བཅས་པའི་བསྟན་པ་ལ། དེ་དག་གི་ལས་ནི་འདོད་པའི་ལྷ་ཆུང་མ་དང་བཅས་པ་དེའི་སྤྱི་བོ་ན། ཞེས་པ་ལ་སོགས་ལ་ངག་དོན་འདི་ལྟར་ཤེས་པར་བྱ་སྟེ། དེ་ཡང་འདོད་པའི་ཁམས་ཀྱི་ཡ་ཐ། གཟུགས་ཀྱི་ཁམས་ཀྱི་མ་ཐ། གཞན་འཕྲུལ་དབང་བྱེད་ཀྱི་གནས་ན། བདུད་ཀྱི་བུ་ག་ར་དབང་ཕྱུག་ཅེས་བྱ་བ་དང་། དེའི་ཆུང་མ་པད་མའི་ཕྲེང་བ་ཞེས་བྱ་བ་འཁོར་དང་བཅས་པ་ཡོད་དང་། དེ་དག་གི་བསམ་པ་ལ་འདོད་ཁམས་ཀྱི་སེམས་ཅན་འདི་དག །ཁོའི་ཞོར་རམ་གཡོག་གི་ཚུལ་དུ་ཡོད་པ་ལ། ཆོས་སུ་བྱས་པ་དེ་ཁོའི་མངའ་རིས་ནས་ཤོར་ཏེ། ཁོའི་གཉེན་པོ་ལྟ་བུར་འགྱུར་བས། ཆོས་བྱེད་དང་བཤེས་པ་གཅིག་ཡོད་པ་དང་ཁོའི་སྙིང་ལ་ཚ་ཀར་གྱིས་འོང་སྟེ། དེར་བདུད་དེས་མཉམ་པ་ལ་གཞག་སྟེ་ལས་ཀྱི་མངོན་ཤེས་ཀྱིས་བལྟས་པས། མི་འདི་ཡིན་ངོ་ཤེས་ཏེ། དེ་ལ་གནོད་པ་སྐྱལ་བའི་ཕྱིར་དུག་ལྔ་གང་ཤས་ཆེ་བལྟས་པས། ཆུང་མའི་སྤྱི་བོ་ནས་དུག་ལྔའི་མདའ་ལྔ་ཡོད་དེ། དེ་ཡང་དྲེགས་པར་བྱེད་པ་ཞེ་སྡང་། རྨོངས་པར་བྱེད་པ་འདོད་ཆགས། ཀུན་ཏུ་རྨོངས་པ་གཏི་མུག་རྒྱལ་བར་བྱེད་པ་ང་རྒྱལ། སེམས་མེད་པར་བྱེད་པ་ཕྲག་དོག་ལྔ་ཡོད་པ་དེ། གང་ཤས་ཆེ་བ་ལ། དེའི་མདའ་དེ་རྒྱབ་པས་ཆེར་འབར་བར་གྱུར་ཏེ། དེ་ཡང་ཞེ་སྡང་ལྟ་བུ་དེ་ཆེ་ན་དྲེགས་པར་བྱེད་པའི་མདའ་དེ་རྒྱབ་པས། ཞེ་སྡང་སྐྱེ་བའི་རྐྱེན་ཡང་འབྱུང་། ཞེ་སྡང་རབ་ཏུ་འབར་འགྱུར་ཏེ། ཞེ་སྡང་གི་དབང་དུ་འགྱུར་བར་བྱེད་དོ། །དེས་དུག་ལྔ་གཞན་འདྲེའོ། །རླུང་བྱང་ཆུབ་སེམས་དཔའ་ཁྲོས་པའི་བདུད་ནི། སྤྱིར་དོན་གོ་འདི་ལྟར་ཤེས་པར་བྱ་སྟེ། སེམས་ཀྱི་རང་བཞིན་ནམ་མཁའ་ལྟ་བུ་ལ་ཅིར་ཡང་དམིགས་སུ་མེད་ཀྱང་། དེ་ལྟར་རྟོགས་པར་བྱེད་པ་ལ་ཐབས་ཤེས་རབ་ཟུང་དུ་འབྲེལ་དགོས། ལྟ་བ་ཐབས་ཀྱིས་མ་ཟིན་ན་ཡང་བལྟ་བ་སྐྱང་པ་ཡིན་པས་རླུང་བྱང་ཆུབ་སེམས་དཔའ་འཁྲོས་པས་བདུད། ཐབས་ལྟ་བས་མ་ཟིན་ན་ཡང་འཁྲོས་པས་བདུད་དེ། དེ་ཡང་ལྟ་བ་ཐབས་ཀྱིས་ཟིན། ཐབས་ལྟ་བས་ཟིན་པར་བྱ་དགོས་སོ། །ལྟ་བ་ཐབས་ཀྱིས་ཟིན་པར་བྱ་བ་ལ་བཞི་ལས། མཉམ་པའི་ངང་ལ་གནས་པའི་རྒྱུ་རྟེན་པ་དང་། ཞེས་པས། མི་རྟེན་ན་ཐབས་ཀྱི་གོལ་ས་ཡིན་པས། རྒྱུ་བདུན་ཚོགས་པར་བྱ་བ་ནི་དཔུངས་པ་ན་གསལ་ལོ། །ངང་ལ་གནས་སུ་མི་སྟེར་པའི་གགས་བསལ་བ་དང་། ཞེས་པས་མི་སེལ་ན་ཐབས་ཀྱི་གོལ་ས་ཡིན་པས། ངང་ལ་གནས་སུ་མི་སྟེར་བའི་ཉེས་པ་བརྒྱད་སྤང་པ་དཔུངས་པ་ན་གསལ་ལོ། །ཐབས་ཁྱད་པར་ཅན་གྱིས་ཟིན་པར་བྱ་བ་དང་། ཞེས་པས་མ་ཟིན་ན་གོལ་ས་ཡིན་པས། མཐུན་པའི་ཆོས་བརྒྱད་ཉམས་སུ་ལེན་པ་དཔུངས་པ་གསལ་ལོ། །དྲོད་ཚད་ནི་རྟེན་གྱི་དྲོད་ཚད་དང་། འཇུག་པའི་དྲོད་ཚད་གཉིས་ལས། རྟེན་གྱི་སྐབས་སུ་སྤྱི་རྟགས་ཉི་ཤུ་རྩ་བཞི་ལ། གོང་མ་གཉིས་པོ་ཞེས་པ། འདོད་པའི་རྟགས་དང་མི་འདོད་རྟགས་གཉིས་པོ་ལ་ནི་མན་ངག་མེད་པས་ནི་འདོད་པའམ་མི་འདོད་པའི་རྟགས་སུ་འཛིན་ཏེ། དེ་ནི་མི་མཉམ་པའི་རླུང་སྐྱེས་པའི་རྟགས་དང་། འདོད་པའི་རྟགས་དང་མི་འདོད་པའི་རྟགས་དང་གསུམ་པོ་དེ་བླ་མའི་ཞལ་ལ་རག་གོ། ། ཞེས་པ་དེ་ཡང་བསྒོམ་པ་བཟང་དུས་སུ་བྱུང་ན། འདོད་པའི་རྟགས་ཡིན། ངན་དུས་སུ་བྱུང་ན་མི་འདོད་པའི་རྟགས་ཡིན། སྤེལ་མ་བྱུང་ན་མི་མཉམ་པའི་རླུང་སྐྱེས་པའི་རྟགས་ཡིན། གུ་རུ་རིན་པོ་ཆེ་གསུང་ངོ་། །ཡང་ན་གོང་མ་གཉིས་པོ་ཞེས་པས། མགོ་ལུས་བགགས་ཀྱིས་ལྕི་བ་ནས་ལུས་སེམས་གཉིས་ཀ་རྩུབ་པ་ཡན་ཆད་བཅུ་བདུན་པ་གཅིག་འོག་ནས་མཐོང་པ་འཁྲུལ་པ་གསུམ་པོ་དེ་གཅིག་སྟེ། དེ་ལྟར་གཉིས་པོ་དེ་ལས་ནི་མན་ངག་མེད་པས་ནི་འདོད་པའམ་མི་འདོད་པའི་རྟགས་སུ་འཛིན་ཏེ། ཞེས་པ་མན་ངག་མེད་པའི་རུ་ཡིས་ནི། འདོད་པ་དང་མི་འདོད་པའི་རྟགས་སུ་འཛིན་ཏེ། དེ་ནི་མི་མཉམ་པའི་རླུང་སྐྱེས་པའི་རྟགས་འབའ་ཞིག་གོ། །མི་མཉམ་པའི་རླུང་སྐྱེས་པའི་རྟགས་དང་། འདོད་པའི་རྟགས་དང་མི་འདོད་པའི་རྟགས་དང་གསུམ་མོ། །དེ་བླ་མའི་ཞལ་ལ་རག་གོ། །ཞེས་པ། གོང་གི་རྟགས་ཉིུ་ཤུ་རྩ་བཞི་པོ་དེ་མི་མཉམ་པའི་རླུང་སྐྱེས་པའི་རྟགས་སོ། །དབུས་ན་ཁམས་ཀྱང་སྲབ། བསྒོམ་པ་ཡང་ངན་དུས་སུ། ཤུགས་རིངས་འབྱུང་བ་དང་། སྡང་བ་དང་། འདར་བ་དང་། དབུགས་མི་བདེ་ཞིང་རྔམ་པ་འབྱུང་བ་དང་། ཞེས་པས་ཁམས་ཀྱང་སྲབ་བསྒོམ་པ་ཡང་ངན་དུས་སུ་བཞི་པོ་དེ་བྱུང་ན། མི་འདོད་པའི་རྟགས་ཡིན་ནོ། །ཁམས་མི་བདེ་བ་མེད་ཅིང་བསྒོམ་པ་བདེ་དུས་སུ་བྱུང་ན་ཤིན་ཏུ་སྦྱངས་པ་རྩུབ་པའི་ཕྱོགས་ཡིན་ཏེ་འདོད་པའི་རྟགས་སོ། །ཞེས་པས། བཞི་པོ་དེ། ཁམས་བདེ་བ་དང་། བསྒོམ་པ་བཟང་དུས་སུ་བྱུང་ན། ཤིན་དུ་སྦྱངས་པ་རྩུབ་པའི་ཕྱོགས་ཡིན་ཏེ་འདོད་པའི་རྟགས་སོ། །རྒྱུ་རྣམ་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། ཞེས་པ་ལ། སྟོང་པར་གནས་པ་དང་གཅིག །སེམས་ཅན་ཡོངས་སུ་མི་གཏོང་བ་དང་གཉིས། ཇི་སྐད་སྨྲས་བཞིན་བྱེད་པ་ཞེས་པ། ཆོས་བཞིན་དུ་བྱེད་པ་དང་གསུམ། བདེར་གཤེགས་ཀྱི་བྱིན་བརླབས་ཅན་དང་བཞི་དང་ལྡན་ན་བདུད་ཞི་ཞེས་རིན་པོ་ཆེ་གསུང་། ཡང་ན་གཞན་གྱི་རྙེད་པ་ལ་ཕྲག་དོག་མེད་པ་དང་གཅིག །ཕྲ་མའི་ཚིག་ཡོངས་སུ་སྤོང་པ་དང་གཉིས། སྐྱེ་བོ་མང་པོ་དགེ་བའི་རྩ་བ་འཛིན་དུ་འཇུག་པ་དང་གསུམ། སྒྲིབ་པ་མེད་པའི་བྱམས་པ་བསྒོམ་པ་བཞི་དང་ལྡན་ནའོ། །དེ་ཉིད་བཅུ་ནི་ཡོངས་སུ་ཤེས། ཞེས་པ་ལ། བསྟན་པ་དང་གཅིག །དུབ་པ་དང་གཉིས། བློ་གྲོས་ལྡན་པ་དང་གསུམ། བཟོད་པ་ལྡན་པ་དང་བཞི། དྲངས་པ་དང་ལྔ། གཡོ་སྒྱུ་མེད་པ་དང་དྲུག །སྔགས་ཀྱི་སྦྱོར་བ་ཤེས་པ་དང་བདུན། རྒྱུད་ཀྱི་སྦྱོར་བ་ཤེས་པ་དང་བརྒྱད། སྙིང་རྗེ་ལྡན་པ་དང་དགུ། བསྟན་ཆོས་མཁས་པ་དང་བཅུའོ། །ཡང་ན་དེ་ཁོ་ན་ཉིད་ལྟ་བ་ལ་མཁས་པ་དང་གཅིག་མཛད་པ་སྤྱོད་པ། བཀོད་པ་དཀྱིལ་འཁོར། རིམ་པ་བསྒྲོད་པ་དབང་། མི་འདའ་བ་དམ་ཚིག །རོལ་པ་ཕྲིན་ལས། དོན་དུ་གཉེར་བ་བསྒྲུབ་པ། མི་གཡོ་བ་ཏིང་ངེ་འཛིན། གནས་སུ་སྟོབས་པ་མཆོད་པ་འཆིང་བཟླས་སྔགས་དང་ཕྱག་རྒྱ་ལ་མཁས་པ་དང་བཅུའོ། །ཞུས་སོ་དག་གོ། །རྟ་རིན་ཆེན་དཔལ་གྱི་ཕྱག་དཔེ་ལགས་སོ།། །།