གསང་བ་ཐུགས་ཀྱི་སྒྲོན་མ་གནོད་སྦྱིན་མོ་བྱང་ཆུབ་ཀྱིས་མཛད་པ།

གསང་བ་ཐུགས་ཀྱི་སྒྲོན་མ་བཞུགས། །རྒྱ་གར་སྐད་དུ། བོ་དྷི་ཙིཏྟ་རཏྣ་གུ་ཧྱ་ཙིཏྟ་པྲ་དྷཱི་སཾ་ནཱ་མ། བོད་སྐད་དུ། བྱང་ཆུབ་ཀྱི་སེམས་རིན་པོ་ཆེ་གསང་བ་ཐུགས་ཀྱི་སྒྲོན་མ་ཞེས་བྱ་བ། བཅོམ་ལྡན་འདས་དཔལ་རང་གསལ་མ་བཅོས་ལྷུན་གྱིས་གནས་པའི་ངང་དུ་ཕྱག་འཚལ་ལོ། །རྒྱལ་བས་མཁྱེན་སྣང་དུས་དྲུག་བསྐུལ་སྤྲུལ་བརྡར། །འཇིག་རྟེན་མུན་སེལ་ཡང་སྤྲུལ་ཉི་མ་ཤར། །དེ་ཡི་གསུང་བཞིན་བློར་བཞག་གསལ་བར་བསྟན། །ཀུན་སྣང་དེར་རྟོགས་མཚོན་མེད་འབྱུང་གཞིར་གནས། །དེ་རྟོགས་འཁྲུལ་པས་མྱང་འདས་འཁོར་བར་འགྱུར། །ཀུན་གྱི་རྒྱུར་གྱུར་འབྱུང་བ་བཞི་ལས་ལྟར། །མ་རྟོགས་གཟུང་འཛིན་རྣམ་རྟོག་གྲངས་མཐའ་ཡས། །རྗེས་རྟོགས་བརྟགས་སྣང་རང་ཀར་སྤྱོད་པས་འཁོར། །བདག་འཛིན་ཉོན་མོངས་དབང་གིས་རྟོགས་དོན་བཅོམ། །ལས་དབང་རྒྱལ་བའི་ཐུགས་རྗེས་དོན་མཐར་སོན། །སྦྲུལ་མདུད་གནས་སྐབས་གཅིག་གིས་དེ་རིག་འགྱུར། །དེ་སྲིད་སྟོང་སྣང་བདག་མེད་གཤིས་སུ་གྲོལ། །ཐེག་ཆུང་ཐ་དད་འབྲས་བུར་བྲོད་བསྐུར་ཙམ། །ཕྱི་ནང་མཐོན་དམན་དོན་ལ་མེད་པར་རྫོགས། །སྙིང་པོ་རྣལ་མའི་གསང་དུ་འུབ་ཆུབ་སྟེ། །གསལ་སྣང་རྟོག་མེད་སྤྲོས་བྲལ་ལྷུན་གྲུབ་ངང་། །ཉི་བཞིན་གསལ་སྣང་ཀུན་གྱིས་མཚོན་དུ་མེད། །བདེ་བ་ཆེན་པོ་སྟོང་ཉིད་སྤྲོས་དང་བྲལ། །སྣང་བཞིན་སྟོང་པས་དངོས་པོར་བསྟན་དུ་མེད། །དབྱེར་མེད་གཅིག་གི་ངང་དུ་རྟོགས་པར་མཛོད། །ཡིད་སྦྱིན་ནོར་བུ་མཆོད་བསྐུར་རྟེན་བཀུར་འདྲ། །ཕྱོགས་སུ་མ་ལྷུངས་རྒྱར་མ་ཆད་པའི་ངང་། །གསལ་བའི་ངང་དུ་སྟོང་དབང་བསྐུར་རྫོགས་འདྲེས། །དབྱེར་མེད་རྫོགས་པའི་ངང་དུ་རྒྱས་བཏབ་འཕགས། །རྩེ་གཅིག་མ་ཡེངས་དོན་རྟོགས་གོམས་པར་གཞག །རྒྱ་མཚོའི་དབྱིངས་བཞིན་དུ་མ་གཅིག་ཏུ་རྫོགས། །གཞི་ཉིད་ལམ་ལ་ལམ་ཉིད་འབྲས་བུར་སྣང་། །འགྲོད་དུ་མེད་པས་བགྲོད་པའི་མཆོག་ཉིད་དེ། །སྣང་བ་དངོས་པོར་འཛིན་པ་འཁྲུལ་པའི་བློ། །མཉམ་ཉིད་མི་གཡོ་ཆོས་ཀྱི་སྐུར་མཚོན་པས། །ཅིར་ཡང་སྣང་བ་བདེ་ཆེན་རང་གསལ་རྒྱས། །འགྲོ་བའི་དོན་དུ་རྣམ་སྤྲུལ་ཅིར་ཡང་སྟོན། །འབྲས་བུ་ལྷུན་རྫོགས་བདེ་ཆེན་ཀུན་ཏུ་བཟང་། །རོལ་པའི་ངང་དུ་རོལ་པ་མ་བཅོས་བདེ། །གནས་གྱུར་རང་དག་ཡེ་ཤེས་ལྔར་སངས་རྒྱས། །ཀྱེ་དགེ་སློང་རང་གསལ་དབྱེར་མེད་ཡོན་ཏན་བསམ་ལས་འདས། །མི་རྟོག་མ་རྟོག་དེ་བཞིན་ནམ་མཁའི་ངང་། །རྩོལ་བའི་རྣམ་པ་ཀུན་སྤངས་ལྷུག་པར་གནས། །གཅིག་པུར་ཡུལ་རྐྱེན་བྲལ་བའི་ས་ལེ་བ། །ཚད་མ་གསུམ་གྱིས་ངེས་པར་དང་དུ་ལོང་། །ཆུ་བོ་བཞི་རྫོགས་བླ་མ་བཀུར་བར་བྱ། །གཡོས་པ་མེད་པའི་བསམ་སྟན་ངེས་ལུང་བསྟན། །ཀུན་ཀྱང་ཏིང་འཛིན་གསལ་རྟོག་མེད་རྟོགས་བྱེད། །རྒྱལ་བ་ཉིད་དང་དགོངས་སྤྱོད་གཅིག་པར་ཟུང་། །ཐར་པ་བགྲོད་ཕྱིར་འདིས་དོན་གསལ་བར་སྟོན། །གནོད་སྦྱིན་མོ་བྱང་ཆུབ་མས་མཛད་པ། །བྱང་ཆུབ་ཀྱི་སེམས་རིན་པོ་ཆེ་གསང་བ་ཐུགས་ཀྱི་སྒྲོན་མ་ཞེས་བྱ་བ། །རྫོགས་སོ།། །།རྒྱ་གར་གྱི་མཁན་པོ་ཤྲཱི་སིངྷ་པྲ་བ་ཏ་དང་། བོད་ཀྱི་ལོ་ཙཱ་བ་སློབ་དཔོན་ཆེན་པོ་བཻ་རོ་ཙ་ནས་ཡུལ་དྷ་ཧེ་ནའི་འདུ་ཁང་དུ་ཞུས་ཤིང་བསྒྱུར་ཏེ་གཏན་ལ་བབས་པ།། །།