 སྔ་འགྱུར་བཀའ་མའི་ཆོས་སྡེའི་གླེགས་བམ་བརྒྱ་བཅུ་པ།གླེགས་བམ། ཝེ༽བྱེ་མ་ལ་མུ་ཏྲ།སི་ཁྲོན་མི་རིགས་དཔེ་བསྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། མགོ་བརྗོད།རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར། ཐུགས་རྗེ་ཆེ་ཞུ།ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས། སྒྲོན་མ་འབར་བའི་དོན་བསྡུས།སྒྲོན་མ་འབར་བའི་དོན་བསྡུས་བཞུགས་སོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྒྲོན་མ་འབར་བ་ཞེས་བྱ་བ་རང་རིག་མངོན་སུམ་དུ་གཏན་ལ་འབེབས་པར་བྱེད་པའི་རྒྱུད་འདི་ལ། བསྡུས་པའི་དོན་གཉིས་ཀྱིས་བསྟན་ཏེ། མཚན་གྱིས་གཞུང་དོན་གསལ་བར་བསྟན་པ་དང་། གཞུང་གིས་རྒྱུད་ཀྱི་མཚན་དོན་གསལ་བར་བསྟན་པ་གཉིས་ལས། མཚན་དོན་གོང་དུ་བསྟན་ཟིན་ནས། འདིར་གཞུང་བསྟན་ཏེ། གཞུང་དངོས་ལ་ཡན་ལག་གི་དོན་གསུམ་སྟེ། རྒྱུད་ཟབ་མོ་འབྱུང་བར་བསྟན་པས་རྒྱུད་ཀྱི་གླེང་གཞི་བསྟན་པ་དང་། ལེའུ་བཞིའི་དོན་མདོར་བསྟན་པ་དང་། རྒྱང་ཞགས་ཆུའི་སྒྲོན་མེའི་ཚིག་དོན་རྒྱས་པར་བཤད་པའོ། །དང་པོ་གླེང་གཞི་ལའང་དོན་གསུམ་སྟེ། ཟབ་མོ་དོན་འདི་སྐད་བདག་གི་བསྟན་པའི་དུས་གཅིག་ན། གསུམ་གྱི་རྒྱུད་དཀའ་བས་ཐུན་མོང་མ་ཡིན་པའི་གླེང་གཞི་སྟོན་པ་ཉིད་ཀྱིས་རང་ལ་རང་སྟོན་གྱི་ཚུལ་དུ་གསུངས་པ་ལ། སྡུད་པ་པོས་ཚིག་གིས་མ་བཅོས་པར་བསྟན་པ་དང་། གླེང་གཞི་གཉིས་ཀྱི་མཚམས་སྦྱར་བ་སྒྲ་དོན་སརྦ་ཨ་པ་ལ་དྷ་ཐིམ། ཚིག་གིས་ཆོས་ཐམས་ཅད་ལ་ཟླ་བར་བསྟན་པ་དང་། ཐུན་མོང་གི་གླེང་གཞི་ཐེག་པ་ཐུན་མོང་བ་དང་སྒོ་བསྟུན་གྱི་ཚུལ་དུ་སྡུད་པ་པོས་ཚིག་ཏུ་བཀོད་པའོ། །ལན་ལག་གི་དོན་གཉིས་པ་ལེའུ་བཞིའི་དོན་མདོར་བསྟན་པ་ལ་ནང་དོན་གཉིས་ཀྱིས་བསྟན་ཏེ། རྒྱུད་ཀྱི་གཞུང་དོན་ངེས་པར་རང་བཞིན་རྒྱུད་དག་རྡོ་རྗེ་འཆང་། འབྱུང་བར་བྱེད་པའམ་ཆེ་བ་བསྟན་པ་དང་། རྒྱུད་ཀྱི་ཚིག་དོན་ལེའུ་བཞིའི་དོན་མདོར་བསྟན་པའོ། །ཡན་ལག་གི་དོན་གསུམ་པ། རྒྱང་ཞགས་ཆུའི་སྒྲོན་མའི་ཚིག་དོན་རྒྱས་པར་བཤད་པ་ལ་ནང་དོན་བཞི་སྟེ། འདི་ཀུན་སྒྲོན་མ་རྣམ་བཞིའོ། །དྲི་བ་མདོར་བསྟན་པ་དང་། དེ་ནས་རྒྱུད་དག་རྡོ་རྗེ་འཆང་། ལམ་མདོར་བསྟན་པ་དང་། དེ་ནས་རྡོ་རྗེ་འཆང་ཆེན་གྱིས། དྲི་བ་རྒྱས་པར་བསྟན་པ་དང་། རྒྱུའི་རྡོ་རྗེ་ཡང་འཆང་བ། ལན་རྒྱས་པར་བསྟན་པའོ། །ནང་དོན་བཞི་པའི་ཐ་མ་རྒྱས་པར་བཤད་པ་ལ་དྲི་ལན་དགུས་སྟེ། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། གནས་དང་། ལམ་དང་། འཆར་སྒོ་དང་། མཐུན་དཔེ་དང་། ཚད་དོ། །དང་པོ་རྒྱང་ཞགས་ཆུའི་སྒྲོན་མའི་དེ་བཞིན་འཁོར་བའི། དེ་ནས་སྟོན་པས་ཡང་། ངོ་བོའི་ལན་བསྟན་པ་དང་། གཉིས་པ་ངེས་ཚིག་བསྟན་པ་ལ་ནང་ཚན་གྱི་དོན་ལྔ་སྟེ། འཁོར་འདས་རྒྱང་འཕེན་པའི་ངེས་ཚིག་དང་། ངེས་པའི་ཚིག་ནི་ལྟ་བུ། འཁོར་འདས་ཀྱི་སྣང་བ་འཛིན་ལུགས་བསྟན་པ་དང་། སྣང་བ་དེ་གཉིས་ཆུ་ནི་སྣང་བ། ཞེན་པའི་དངོས་པོ་བཅད་པའི་ངེས་ཚིག་དང་། དེ་ཉིད་ཀྱིས་གསལ་བར་སྒྲོན་ནི་རང་གི་སྣང་བ་ཀུན། བྱེད་པའི་ངེས་ཚིག་བསྟན་པ་དང་། ཁྱབ་པར་རིག་པ་ཕྱིའི་དབྱིངས། བྱེད་པའི་ཚིག་བསྟན་པའོ། །དྲིས་ལན་གསུམ་པ་དབྱེ་བ་བསྟན་པ་དང་། དབྱེ་བ་རྣམ་པ་གསུམ་ཡིན་ནོ། །དྲིས་ལན་འདིའི་ཕྱེད་འདི་ལྟ་བུ། བཞི་པ་མཚན་ཉིད་བསྟན་པ་དང་། དྲིས་ལན་ལྔ་པ་གནས་ས་གང་ན་གནས་བསྟན་པ་དང་། དྲིས་ལན་ཐོག་མ་རང་གི་ལུས་བསྐྱེད་པའི། དྲུག་པ་མིག་དེ་རང་གིས་ཤེས་ཤིང་གང་དང་འབྲེལ་བསྟན་པ་དང་། དྲིས་ལན་བདུན་པ་སྒོ་གང་ལས་འཆར་བའི་སྒོ་ནི་མིག་ཉིད་དང་། འཆར་བར་བསྟན་པ་དང་། དྲིས་ལན་བརྒྱད་པ་མཐུན་པའི་དཔེ་བསྟན་པ་དང་། དཔེར་ན་འཛིན་བྱེད་ལྕགས་ཀྱུ་ཡིས། དྲིས་ལན་དགུ་པ་རྒྱང་ཞགས་སྒྲོན་མ་སྣང་བར་བྱེད་དོན་གྱིས། ཆུའི་ཚད་ཚིག་གསུམ་གྱིས་བསྟན་པའོ། །ལེའུ་གཉིས་པ་ཤེས་རབ་རང་བྱུང་གི་སྒྲོན་མ་བསྟན་པ་འདི་ལ་བསྡུས་པའི་དོན་གཉིས་སྟེ། ཞུ་བ་མདོར་བསྟན་པ་དང་། ལན་རྒྱས་པར་བཤད་པའོ། །ལན་རྒྱས་པར་བཤད་པ་ལ་དྲིས་ལན་བརྒྱད་ཀྱིས་བསྟན་ཏེ། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། སྒོ་དང་། གནས་དང་། ཚད་དང་། མཐུན་དཔེའོ། །དང་པོ་ཤེས་རབ་དེ་ནས་སྟོན་པས་ཡང་གསུངས་པ། རང་བྱུང་གི་སྒྲོན་མའི་ངོ་བོའི་ལན་རྒྱས་པར་བསྟན་པ་དང་། དྲིས་ལན་གཉིས་པོ་ངེས་ཚིག་བསྟན་པ་ལ་ནང་ཚན་གྱི་དོན་ལྔ་སྟེ། ཤེས་པའི་ངེས་ཚིག་ཤེས་པ་དངོས་དང་དང་པོ་ཁྱོད་པའི། བསྟན་པ་དང་། རབ་ཀྱི་ངེས་ཚིག་རང་བཞིན་དག་པའི་ཆོས་སྐུ་ནི། བསྟན་པ་དང་། ཤེས་པའི་རབ་དེ་གཞན་གྱིས་སྤྱོད་པའོ། །གཞན་མ་ཡིན་པར་བསྟན་པ་དང་། དེ་ལྟར་གཞན་མ་ཡིན་པར་བྱས་པས་འདི་དོན་རྒྱུ་རྐྱེན་དང་རྩོལ་བསྒྲུབ་དང་བྲལ་བར་བསྟན་པ་དང་། དེ་ལྟར་སྒྲོན་མས། བྱས་པ་ལས་མ་ཡུང་པའི་ཤེས་རབ་དེ་གཉིས་སུ་མེད་ཅིང་ཀུན་ལ་ཁྱབ་པའི་ངེས་ཚིག་བསྟན་པའོ། །དྲིས་ལན་གསུམ་པ་དབྱེ་བ་དབྱེ་ན་རྣམ་པ་ལྔ་ཡིན་ཏེ། བསྟན་པ་དང་། དྲིས་ལན་བཞི་པ་མཚན་ཉིད་བསྟན་པ་དང་། དྲིས་ལན་འཁོར་བའི་སྒོ་དེ་དབང་པོ་ལྔ། ལྔ་པ་འཆར་སྒོ་བསྟན་པ་དང་། དྲིས་ལན་དྲུག་པ་ཤེས་རབ། སྐྱེད་པར་བྱེད་པའི་རྩ་བཞི་ནས། ཀྱི་གནས་ས་བསྟན་པ་དང་། དྲིས་ལན་བདུན་པ་དེ་ཉིད་ཀྱི་ཚད་བསྟན་པ་ལ་ནང་ཚན་གྱི་དོན་ལྔ་སྟེ། གཞི་གནས་གཞི་གནས་རང་བྱུང་རང་བྱུང་གི་ཤེས་རབ་ཀྱི་ཚད་བསྟན་པ་དང་། སྣང་བ་སྣང་བ་ཅེར་ཟིན་ཤེས་རབ་ཚད། ཅེར་ཟིན་གྱི་ཤེས་རབ་ཀྱི་ཚད་བསྟན་པ་དང་། དྲན་པ་འགག་པ་མེད་པའི་ཤེས་རབ་དྲན་པ་འགག་མེད། མ་བརྗེད་པའི་གཟུངས་སྐྱེས་པའི་ཚད་བསྟན་པ་དང་། སོ་སོར་རྟོགས་པའི་བློ་སོ་སོར་རྟོག་པའི་ཤེས་རབ། རིམ་གྱི་ཤེས་པ་བསྐྱེས་པའི་རྟགས་དང་ཚད་བསྟན་པ་དང་། འཇུག་བྱེད་རྣམ་གསུམ་གྱི་ཤེས་རབ་ཀྱི་ཚད་བསྟན་པའོ། །དྲིས་ལན་བརྒྱད་པ་དཔེ་བསྟན་པའོ། །ད་ནི་ལེའུ་གསུམ་པའི་ཐིག་ལེ་འཇུག་རྣམ་བྱེད་གསུམ་ཤེས་རབ་ནི། སྟོང་པའི་སྒྲོན་མ་འདི་ལ་བསྡུས་པའོ་དཔེར་ན་སྤྲ་བརླན་མེད་པ། དོན་གཉིས་ཀྱིས་བསྟན་ཏེ། ཞུ་བ་མདོར་བསྟན་པ་དང་། དེ་ནས་རྒྱུ་དག་རྡོ་རྗེ་འཆང་ལན་རྒྱས་པར་བཤད་པའོ། །ལན་རྒྱས་པར་བཤད་པ་ལ་ནང་ཚན་གྱི་དོན་བཅུ་གཉིས་སྟེ། ཐིག་ལེ་སྟོང་པའི་དེ་ནས་རྡོ་རྗེ་འཆང་བ་ཡིས། ངོ་བོ་བསྟན་པ་དང་། གཉིས་པ་ངེས་ཚིག་ཐིག་ལེ་མི་འགྱུར་དྲང་པོ་ལ། གི་ལན་རྒྱས་པར་བཤད་པ་དང་། གསུམ་པ་དབྱེ་བ་བསྟན་པ་དང་། དབྱེ་བ་ཉིད་ནི་རྣམ་པ་ལྔ། བཞི་པ་ཐིག་ལེ་རང་གནས་དགོངས་པ་གཅིག་ཡིན་པས། སྟོང་པའི་སྒྲོན་མའི་མཚན་ཉིད་དམ་དགོངས་པ་བསྟན་དང་། ལྔ་པ་སྒྲོན་མ་དེ་ཉིད་སེམས་ཅན་ཀུན་གྱི་ལུས་ཀྱི་དཀྱིལ། གནས་གང་ན་གནས་བསྟན་པ་དང་། དྲུག་པ་འཆར་བ་སྣང་བ་ཡིས་ནི་འཆར་བྱེད་པ། བྱེད་པའི་སྒོ་བསྟན་པ་དང་། བདུན་པ་སྒྲོན་མ་དེ་ཉིད་ཀྱི་རང་བཞིན་སྟོང་པ་ཉིད་ལས་རང་ལོག་པའི། ནམ་དངོས་གང་ཡིན་པ་དང་། བརྒྱད་པ་བར་སྣང་མིན་ན་སྟོང་པ་ལ། སྒྲོན་མ་དེ་ཉིད་ཡུལ་ལ་སྣང་བ་བསྟན་པ་དང་། དགུ་པ་ཚད་བསྟན་པ་དང་། ཐིག་ལེ་སྤྲོས་དང་བསྡུ་མེད་པར། བཅུ་པ་སྒྲོན་མ་དེ་ཉིད་འོད་ལ་འདུས་པའི་ཐིག་ལེ་ནི། འགྲོ་བ་དྲུག་ལ་ཇི་ལྟར་གནས་པ་བསྟན་པ་དང་། བཅུ་གཅིག་པ་རྟོག་པའི་རང་གི་འཐེབ་དང་འཛུབ་མོ་ཡིས། མཐོང་བར་བྱས་སྟེ། དེ་ལ་གོམས་པར་བྱ་བའི་མན་ངག་བསྟན་པ་དང་། བཅུ་གཉིས་པ་དཔེར་ན་རྨ་བྱའི་མདོངས་དང་མཚུངས། མཐུན་པའི་དཔེ་བསྟན་པའོ། །ལེའུ་བཞི་པ་དབྱིངས་རྣམ་པར་དག་པའི་སྒྲོན་མ་བསྟན་པའི་ལེའུ་འདི་ལ་དོན་ལྔ་སྟེ། ཞུ་བ་མདོར་དེ་ནས་རྒྱུ་དག་རྡོ་རྗེ་འཆང་། བསྟན་པ་དང་། ལན་རྒྱས་པར་བཤད་པ་དང་། རྒྱུད་བཟུང་བའི་ཕན་ཡོན་བསྟན་པ་དང་། རྒྱུད་འདི་འཛིན་པར་སུ་འདོད་པ། ལེའུའི་མཚན་དང་། ཅེས་སྒྲོན་མ། རྒྱུད་གསུངས་པ་ལ། དེ་སྐད་སྟོན་པས། རྗེས་སུ་ཡི་རང་བའོ། །ལན་རྒྱས་པར་བཤད་པ་ལ་དོན་བཅུ་གཅིག་པ་སྟེ། དང་པོ་ངོ་བོ། དེ་ནས་རྡོ་རྗེ་འཆང་ཆེན་གྱིས། བསྟན་པ་དང་། གཉིས་པ་ངེས་རྣམ་པ་ཡུལ་དུས་སྣང་ལ། ཚིག་བསྟན་པ་དང་། གསུམ་པ་དབྱེ་བ་བསྟན་པ་དང་། དབྱེ་བ་རྣམ་པ་གསུམ་ཡིན་ཏེ། བཞི་པ་རང་བཞིན་རང་བཞིན་སྣང་བ་མ་འགགས་པས། བསྟན་པ་དང་། ལྔ་པ་དབྱིངས་རྣམ་པ་དག་པའི་སྒྲོན་མའི་ཕྱི་ནང་མེད་པར་ཟང་ཐལ་བས། དགོངས་པའམ་མཚན་བསྟན་པ་དང་། དྲུག་པ་འཁོར་འདས་རུ་ཤན་ཕྱེད་ནས་ནི། གོམས་པར་བྱེད་པའི་མན་ངག་བསྟན་པ་དང་། བདུན་པ་དེ་ཉིད་ཀྱི་མཚན་བསྟན་པ་དང་། མཐིང་ག་མི་འགྱུར་སྣང་བ་ལ། བརྒྱད་པ་དེ་ཉིད་ཀྱི་གནས་པ་མིག་ནི་འབྱུང་བ་སྐྱེ་མེད་པ། བསྟན་པ་དང་། དགུ་པ་དེ་ལྟར་མིག་གི་རྣམ་ཤེས་དག་པ་ལ། གནས་པའི་དབྱིངས་རིག་དེ་སྒོ་གང་ལས་འབྱུང་བར་བསྟན་པ་དང་། བཅུ་པ་དེ་ཉིད་རང་སོ་བསྟན་པ་དང་། འདི་ལྟར་གནད་གསུམ་མན་ངག་དང་། བཅུ་གཅིག་པ་དཔེར་ན་ཡི་གེ་ན་རོ་བཞིན། དེ་ཉིད་ཀྱི་མཐུན་པའི་དཔེ་བསྟན་པའོ། །སྒྲོན་མ་འབར་བའི་དོན་བསྡུས་པ། ཞེས་བྱ་བ། དཔེ་ཡི་སྒོ་ནས་མཚན་བཏགས་པ། ཨཐྎཿ དགེའོ། །དགེའོ། །དགེའོ།། །། གསེར་གྱི་མེ་ཏོག་མཛེས་པ་རིན་པོ་ཆེ་སྒྲོན་མ་འབར་བའི་རྒྱུད་དོན་གསལ་བར་བྱེད་པ་མུ་ཏིག་ཕྲེང་བ་བརྒྱུས་པ། བྱེ་མ་ལ་མུ་ཏྲ།གསེར་གྱི་མེ་ཏོག་མཛེས་པ་རིན་པོ་ཆེ་སྒྲོན་མ་འབར་བའི་རྒྱུད་དོན་གསལ་བར་བྱེད་པ་མུ་ཏིག་ཕྲེང་བ་བརྒྱུས་པ་ཞེས་བྱ་བ་བཞུགས་སོ། །རྒྱ་གར་སྐད་དུ། ཤ་ས་ལི་མ་ལཱ་པཱ་ཏ་ན་མ། བོད་སྐད་དུ། མུ་ཏིག་ཕྲེང་བ་བརྒྱུས་པ་ཞེས་བྱ་བ། བཅོམ་ལྡན་འདས་དཔལ་སྣང་བ་རང་ཤར་བ་ཉིད་ལ་ཕྱག་འཚལ་ལོ། །གང་ལ་དུག་གསུམ་ནད་ཞུགས་སེལ་བའི་རང་གསལ་སྒྲོན་མ་ཉིད། །ལུང་རིགས་གཏན་ཚིགས་གསལ་བའི་སྒོ་འབྱེད་ཡིད་དཔྱོད་རྣམས་སྤངས་ཏེ། །དམ་པ་དྲིན་ཅན་གོང་མ་རྣམས་ལ་གསོལ་བཏབ་རྒྱུད་ཀྱི་ཐེ་ཚོམ་རྣམས། །བདག་པས་དམན་པའི་བློ་ཅན་སྐལ་ཡོད་པ། །རང་བཞིན་རྫོགས་ཆེན་དོན་ལ་མོས་པས་འཇུག་དོན་དུ། །རིན་ཆེན་ཕྲེང་རྒྱུད་མུ་ཏིག་ལྟ་བུ་ཉིད། །སྒྲོན་མའི་ཡང་སྒྲོན་འདི་ཉིད་རབ་ཏུ་སྤྲོ་ཞིང་ཡང་། །ཚིག་ཏུ་བསྡུས་ཏེ་དོན་དུ་གསལ་བར་བྱའོ། །དེ་ལ་དཔལ་རྡོ་རྗེ་འཆང་ཆེན་པོ་དེས་འགྲོ་བ་སྐལ་བ་དང་ལྡན་པ་རྣམས་ཀྱི་དོན་དུ་རང་བཞིན་རྫོགས་པ་ཆེན་པོའི་རྒྱུད་ཤྭ་ལོ་ཀ་འབུམ་ཚོ་དྲུག་ཅུ་རྩ་ལྔ་གསུངས་པ་ལས། ཁྱད་པར་འབུམ་ཕྲག་ཉི་ཤུ་རྩ་གཅིག་པ། མན་ངག་གི་སྡེ། དེ་ཉིད་ལ་གསུམ་ལས་རྒྱུད་རང་གཞུང་ཉིད། དེ་ཉིད་ལ་གཞིར་ཕྱེ་བ་ལས་བཤད་པ་རང་གསལ་བ་ཉིད། དེ་ལ་གསུམ་ལས་ཐིག་ལེ་རང་གནད་ལ་ཕབ་པའི་མན་ངག་གོ། །དེ་ལ་བསྐོར་བཞི་བཞུགས་པ་ལས་གསང་བ་བླ་ན་མེད་པ་རྫོགས་པ་ཆེན་པོའི་བསྐོར་རོ། །དེ་ཉིད་ལ་རྒྱུད་བཅུ་བདུན་བཞུགས་པ་ལས། སྒྲོན་མ་འབར་བ་ཞེས་པ་རང་རིག་མངོན་སུམ་དུ་གཏན་ལ་འབེབས་པར་བྱེད་པའོ། །རྒྱུད་འདི་ལ་གཉིས་ཀྱིས་བསྟན་ཏེ། མཚན་གྱིས་རྒྱུད་ཀྱི་གཞུང་དོན་གསལ་བར་བསྟན་པ་དང་། གཞུང་གིས་རྒྱུད་ཀྱི་མཚན་དོན་གསལ་བ་གཉིས་ལས། འདིར་མཚན་དོན་བསྟན་ཏེ། མཚན་ལ་ལྔ་སྟེ། མཚན་གྱི་བཞུགས་ཚུལ་བསྟན་པ་དང་། དབྱེ་བ་དང་། སྒྲ་འཇུག་པའི་རྒྱུ་མཚན་དང་། ངོས་བཟུང་བ་དང་། མཚན་གྱི་དགོས་པ་བསྟན་པའོ། །བཞུགས་ཚུལ་ནི་སྤྲོས་བཅས་རྟོག་པས་མ་སྤྲོས། སྤྲོས་མེད་ཉག་གཅིག་ཏུ་མ་བསྡུས། བྱས་བཅོས་རོལ་པར་མ་ཤར་བའི་དགོངས་པ། རྒྱུད་དང་ལུང་དང་མན་ངག་གི་ཚིག་ཙམ་དུ་ཡང་མ་གྲུབ། མིང་དུ་འཛིན་པའི་འདུ་ཤེས་དང་རང་བྲལ། གཡོས་མེད་ཟང་ཐལ་དུ་བཞུགས་པས། སྤྲོ་ཞིང་མིང་དུ་མེད་ལ། སྤྲོ་རྒྱུ་ཚིག་ཏུ་མ་གྲུབ་པས། ངོས་བཟུང་མཚན་མ་དང་བྲལ་བ་ཉིད་དོ། །དབྱེ་ན་བཞི་སྟེ། ཕྱི་སྤྲོས་པ་སྒྲ་འགྱུར་དུ་བཤད། ནང་མིང་བསྟན་བརྡ་འགྱུར་དུ་བཤད། གསང་བ་བསྡུས་པ་དོན་འགྱུར་དུ་བཤད། གསང་བ་བླ་ན་མེད་པ་ཚིག་བྲལ་མན་ངག་ཏུ་བཤད་པའོ། །གོང་མའི་བཞུགས་ཚུལ་ཚིག་ཏུ་གྲུབ་པ་དང་ག་ལ་སྲིད་དེ། མིང་གི་ཆ་ཡང་མ་ཡིན་འདི་ལྟར་ཡིན་པ་ཡང་། ལེན་པ་སྐྱོན་ལས་འདས་པ་སྟོང་པར་བཞུགས་པས། ས་ཞེས་སྟོང་པ་མཚོན་པའི་ཡི་གེ་བྱུང་ལ། དེ་ལས་འགགས་པ་མེད་པའི་ཐུགས་རྗེ་རང་ཤར་ནས་སྤྲོ་བྱེད་དུ་མའི་ཚིག་གི་རྒྱུ་སྟོན་པར་བྱེད་པའི་སྤྲུལ་པས་འགྲོ་བ་རྣམས་བཞུགས་ཚུལ་ལ་དགོད་པར་བྱེད་པས། དེ་ལ་ཞབས་ཀྱུད་དུ་བྱུང་བའོ། །དེ་ལྟར་སྟོང་པ་ཆོས་སྐུ་ལས། མཁྱེན་པ་སྤྲུལ་སྐུར་ཤར་བས། དེ་གཉིས་ཀྱི་མཚམས་སྦྱོར་བ་ལོངས་སྤྱོད་རྫོགས་པའི་སྐུ་གསལ་བར་བྱུང་བས་ན་ཙའོ། །དེ་ལྟར་མཚོན་པ་སྐུ་གསུམ་དུ་བྱུང་ལ། བཞུགས་ཚུལ་ངོ་བོ་རང་བཞིན་ཐུགས་རྗེ་གསུམ་ལས་མི་འགྱུར་བ་ནི་སའོ། །དེ་ལྟར་དངོས་པོའི་བཞུགས་ཚུལ་འགྱུར་བ་མེད་ཀྱང་། འགྲོ་བ་རྣམས་ལ་སྒྲོན་མ་བཞིན་རང་འོད་དང་བཅས་པར་མཚོན་དུ་ཡོད་པས། དེ་ལ་གུ་གུའོ། །འོད་དང་བཅས་པའི་སྒྲོན་མ་དེ་ཉིད་འགྲོ་བ་ཐམས་ཅད་ཀྱི་ལུས་ལ་གནས་པས་ནའོ། །དེ་གནས་པར་སུས་བསྟན་ན་སྔོན་འབྱུང་དུ་སྤྲུལ་པའི་ལོངས་སྐུའི་སྤྲུལ་པ་བསྟན་པས་ག་སྤྲུལ་སྐུ་དེ་ཇི་ལྟར་བྱོན་ན་འོད་ཟེར་དཔག་ཏུ་མེད་པ་དང་བཅས་ནས་བྱོན་པས་དེ་ལ་གུ་གུའོ། །དེ་ཡང་རྗེས་འཇུག་ཏུ་བླ་མ་བྷུ་ཏིའི་སྤྲུལ་པ་དང་འདྲ་བར་བསྟན་པས་ཡང་གའོ། །དེ་ལྟར་ན་བཞུགས་ཚུལ་རང་གི་ངོ་བོ་གསལ་བྱེད་དང་བཅས་པ་དེ་ལུས་གཅིག་མ་བླངས་ན་མ་བླངས་བླངས་ཕན་ཆད་རྟག་པར་ཁྱབ་པས་ན་ཏའོ། །དེ་ལྟར་གནས་པའི་བཞུགས་ཚུལ་དེ་སྒོ་གང་ནས་འཆར་ན་མིག་ནས་འཆར་བས་ར་འཆར་བྱེད་ཀྱི་ཡི་གེའོ། །དེ་ཉིད་རྫས་སུ་གྲུབ་པ་མེད་པས་ད་ཆད་པ་སྟོང་པའི་ཡི་གེར་བྱུང་། དེ་ཉིད་ཐོག་མ་ལུས་གྲུབ་པའམ་ཆགས་པ་དང་དུས་མཉམ་པས་ན་གོང་མ། ད་ལྟ་ལུས་གནས་ཀྱི་བར་ལ་ཡང་འབྲལ་བ་མེད་པར་གནས་པས་ཡང་ནའོ། །འོ་ན་ཡི་གེ་རང་གི་བཞུགས་ཚུལ་ལུས་ལ་སྐྱེ་འཆི་ཡོད་པ་ལྟར་དེ་ལ་ཡང་སྐྱེ་འཆི་ཡོད་དོ་ཞེ་ན་མེད་དེ་སྐྱེ་མེད་མཚོན་པའི་ཨ་བྱུང་བའོ། །བཞུགས་ཚུལ་རང་གི་ངོ་བོ་སྐྱེ་མེད་ལ་བལྟ་སྟེ་སྐྱེ་ཤི་མེད་པའི་དབྱིངས་གཅིག་ཏུ་དྲིལ་བའི་ཕྱིར། ལམ་ཞེས་བྱའོ། །འོ་ན་དབྱིངས་ནི་ཡུལ་ཏེ་ངོ་བོ་མ་ཡིན་ཞེ་ན་དེ་ལྟར་མ་ཡིན་ཏེ་སྐུ་གསུམ་འདུ་འབྲལ་མེད་པ་རང་འོད་ཡེ་གསལ་ཆེན་པོའི་དག་པ་ལ་བཞུགས་པས་ཀེ་ཞེས་འབྱུང་བའོ། །སྐུ་གསུམ་པོ་དེས་འཁོར་འདས་གཉིས་ཀ་འཛིན་པར་བྱེད་པས་ཛ་ཞེས་འཛིན་པ་མཚོན་པར་བྱེད་པའི་ཡི་གེའོ། །འོ་ན་འཛིན་པ་ཡོད་ཕན་ཆད་ཆོས་སྐུ་མ་ཡིན་ནོ་ཞེ་ན། མི་སྟོ་སྟེ་འགགས་པ་མེད་པའི་རོལ་པ་རང་ཤར་བས་ཉི་མ་ལས་འོད་རང་ཆས་པ་ལྟར་གཟུགས་སྐུ་གཉིས་སེམས་ཅན་གྱི་དོན་ལ་འགགས་མེད་དུ་རང་ཤར་བས་དེ་ལ་འབྱུང་བའོ། །དེ་ལྟར་ཐུགས་རྗེས་གཟུགས་གཉིས་ཀྱིས་སེམས་ཅན་རྣམས་རང་བཞིན་རྫོགས་པ་ཆེན་པོའི་ལྟ་བའི་དོན་གཉིས་མེད་དུ་ལ་བཟླ་བར་བྱེད་པས་ལ་ཞེས་ལྟ་བའམ་ལ་བཟླ་མཚོན་པའི་ཡི་གེ་བྱུང་བའོ། །དེ་རྣམས་ཀྱང་སོ་སོར་མ་ཡིན་པར་ངོ་བོ་རྟག་པར་བཞུགས་པའི་ཡི་གེ་ཡིན་པས་ཏ། དེ་ལྟར་ན་སྐུ་གསུམ་པོ་འདི་ཡང་དོན་ཉམས་སུ་ལེན་པའི་སྐལ་ལྡན་རྣམས་ཀྱི་ལམ་གྱི་སྣང་བ་ཡིན་པས། སྐུ་ཞེས་ལུས་ཀྱི་ཐ་སྙད་ལས་མ་འདས་པས་ནའོ། །དེ་ལྟར་དུས་གསུམ་རྟག་པར་བཞུགས་པའི་ཡེ་ཤེས་དེ་ཉིད་སྐལ་ལྡན་གྱིས་ཉམས་སུ་བླངས་པས། སྐུ་གསུམ་པོ་ཉིད་ལམ་དུ་འཆར་བས་ཏྲ། སྐུ་ཞེས་ཀྱི་ཐ་སྙད་ལས་མ་འདས་པར་ཅེས་ཤེས་ན་ན་སྟེ་ལུས་མཚོན་པར་བྱེད་པའི་ཡི་གེའོ། །དེ་ལྟར་སྒྲ་འགྱུར་མེད་འབྲེལ་བ་དེ་དག་རྣམས་གང་ལས་བྱུང་ན་ཐོག་མ་མཚན་གྱི་བཞུགས་ཚུལ་གཞི་མ་ཉིད་ལས་སུས་ཀྱང་བྱས་པ་མེད་པར་འགགས་མེད་དུ་རང་ཤར་ཏེ། བར་དུ་ཡང་རང་སྣང་། ཐ་མར་ཡང་རང་གྲོལ་བའི་ཕྱིར་ནམ་ཞེས་བསྟན་པའོ། ༈ །མཚན་མིང་བརྡ་འགྱུར་དུ་བཤད་པ་ནི། གསང་སྔགས་གསང་བའི་གནད་ནི་བརྡ་ལ་བརྟེན་ནས་རྟོགས་པར་བྱེད་པར་སྟེ། འདི་ལྟར་མིང་དང་ཡི་གེ་ལ་སོགས་པ་ཐམས་ཅད་བརྡར་བཏགས་པས། བརྡ་ལས་མ་འདས། སྣང་བ་ཐམས་ཅད་ཀྱང་བརྡར་ཤར་བས་ཐམས་ཅད་བརྡ་དོན་གྱི་མན་ངག་དུ་ཤར་བས་ན། འཁོར་འདས་ཀུན་བརྡ་ཙམ་དུ་རྟོགས་པའོ། །སྒྲོན་མ་ནི་དཔེར་ན་གསེར་ལ་བཙོ་བསྲེག་གི་ལས་ཅི་བྱས་ཀྱང་ངོ་བོ་ལ་འགྱུར་བ་མེད་པ་དང་འདྲ་བར། རིག་པ་རང་བྱུང་གི་སྒྲོན་མ་འཁོར་བའི་རྣམ་རྟོག་གིས་གོས་པ་མེད་ངོ་བོ་འགྱུར་བ་མེད་དོ། །འགྱུར་བ་མེད་པའི་སྒྲོན་མ་ལ་སྐལ་ལྡན་གྱིས་ཉམས་སུ་བླངས་པས། ལོ་འདབ་ལས་མེ་ཏོག་འབྱུང་བ་དང་འདྲ་བར་མངོན་སུམ་དུ་སྣང་བའོ། །དེ་ཡང་ཇི་ལྟར་སྣང་ན་མི་འགྱུར་མཐིང་ཁའི་རང་མདངས་དང་། དྲི་མེད་དཀར་པོའི་རང་མདངས། ཁྱབ་པ་སེར་པོའི་དང་། རང་བྱུང་དམར་པོའི་དང་། རྩོལ་བྲལ་ལྗང་གུའི་རང་གདངས་དང་ལྔར་སྣང་བས་མཛེས་པ་ཅེས་བྱ་སྟེ། ལྷའི་ཁང་བཟངས་ན་གསེར་གྱི་མེ་ཏོག་རབ་ཏུ་མཛེས་པ་ཡུ་བ་དང་ཟེའུ་འབྲུར་བཅས་པ་ཡོད་དེ། འགྲོ་བ་གཞན་གྱིས་མཐོང་ན་ངོ་མཚར་བ་དང་འདྲ་བར། རང་ལ་གནས་པའི་སྒྲོན་མ་དེ་གསལ་བྱེད་ཁ་དོག་ལྔར་མཐོང་བས། དེ་ལས་སྣང་བའི་འཕེལ་འབྱུང་བ་ནི། རིན་པོ་ཆེ་གུར་རྣམས་ཀྱི་རྣམ་པ་ལྟ་བུ་དང་། ཡེ་ཤེས་མཁར་ཐབས། དམིགས་མདངས་དང་། དམིགས་ཚགས་དང་། མེ་ཏོག་དང་། མཆོད་རྟེན་དང་། པདྨ་ད ང་། མདུང་རྩེའི་རྣམ་པ་དང་། དྲྭ་བ་དང་། དྲྭ་བ་ཕྱེད་པའི་རྣམ་པར་འཕེལ་བས་ན། རིན་པོ་ཆེ་དང་དྲྭ་བས་ནའོ། །མཚན་དངོས་ནི་སྒྲོན་མའི་ངོ་བོ་དང་། ངེས་ཚིག་དང་། དཔེ་དང་། དབྱེ་བ་དང་། འཆར་བ་དང་། གནས་པ་དང་། ལམ་དང་། འབྲེལ་བ་དང་། དེ་ཉིད་ཀྱི་རང་བཞིན་ཇི་ལྟར་ཡིན་པ་དང་དགུས་བསྟན་ཏེ། ངོ་བོ་རང་གསལ་སྒྲིབ་པའི་སྐྱོན་དང་བྲལ་ལོ། །ངེས་ཚིག་འཁོར་བའི་མུན་པ་བསལ་ནས་མྱ་ངན་ལས་འདས་པའི་སྣང་བ་སྟོན་པར་བྱེད་པས་ན་སྒྲོན་མའོ། །དེས་ནི་ཁང་སྟོང་མུན་ནག་གཅིག་ན་གསེར་གྱི་བུམ་པ་ཡོད་པ་དེ་སུས་ཀྱང་མཐོང་བའི་སྐལ་བ་མེད་པ་ལས། སྒྲོན་མའམ་མར་མེ་བཏེགས་པས་རང་བཞིན་གྱིས་གསལ་བ་དང་འདྲ་བ་སྒྲོན་མ་འདི་རྣམས་ཀྱང་རང་རིག་པའི་ཡེ་ཤེས་དངོས་འཁོར་བ་ལ་ཁྱབ་པ་ཉིད་གཏན་ལ་དབབ་མི་དགོས་པར་མངོན་སུམ་དུ་སྟོན་པར་བྱེད་པའོ། །དབྱེ་བ་ནི་བཞི་སྟེ་འོག་ནས་སོ་སོའི་ལེའུ་ནས་ཞིབ་པར་སྟོན་ནོ། །འཆར་ས་ནི་སྟོང་པ་བདག་ཏུ་མེད་པ། འཆར་སྒོ་མིག་གི་དབང་པོ་མ་འཁྲུལ་པ། གནས་པ་ནི་སེམས་ཅན་ཐམས་ཅན་ཀྱི་ཙིཏྟ་རིན་པོ་ཆེ་ན་རིག་པ་རང་གི་ངོ་བོར་བཞུགས་སོ། །ལམ་རྩ་བཞི་ནས་སྒྲོན་མ་རང་གི་ངོ་བོ་བཞི་འབྱུང་བར་བྱེད་པའོ། །འབྲེལ་བ་ནི་ཐོག་མར་ལུས་ཀྱི་ཆགས་པའི་དུས་ན་འབྱུང་བ་བཞི་ཡི་དྭངས་མ་ལས་ལྟེ་བ་རྩ་མདུད་ཀྱི་དཀྱིལ་དུ་མིག་ཆུའི་རྣམ་པ་ལ་བ རྟེན་ནས་རྩ་བཞིར་འབྲེལ། དེ་ནས་དྲན་པ་འདུས་པ་དང་འབྲེལ་ཏེ་འཇག་མའི་སྦུབ་མ་ཙམ། དེ་ལས་རོ་རྣམས་འདུས་པར་འབྲེལ་ཏེ་རྟ་རྔ་ཙམ། དེ་ནས་རྩེ་མོ་རྣམ་བཀེད་དུ་འབྲེལ་ཏེ་མོ་ཁབ་ཙམ་དེ་ནས་དམིགས་སུ་འབྲེལ་བ་ནི་དར་སྐུད་ཙམ་དུ་འབྲེལ་བའོ། །རང་བཞིན་ནི་འཁོར་འདས་གཉིས་སྣང་བར་བྱེད་ཅིང་རང་གསལ་སྙིང་པོའི་ངང་བཞིན་དུ་ཡོད་པའོ། །དེ་ཉིད་ལ་བརྟེན་ནས་ཉམས་སུ་བླངས་པས་ཉམས་སུ་མྱོང་བ་གཅིག་ནས་གཅིག་ཏུ་འབར་བས་འབར་བའི་ཞེས་བྱ་སྟེ་བསྐལ་པའི་མེ་འབར་བ་ལ་སྲོག་ཆགས་མི་གནས་པ་དང་འདྲ་བར། སྒྲོན་མ་ལ་བརྟེན་པའི་ཉམས་སུ་མྱོང་བ་འབར་བ་ལ་རྣམ་པར་རྟོག་པ་གནས་མི་སྲིད་དོ། ༈ །གསང་བ་བསྡུས་པ་དོན་འགྱུར་དུ་བཤད་པ་ནི། དེ་དག་ཀུན་ཀྱང་མཚན་གྱི་ཡོན་ཏན་ཡིན་ཏེ་རབ་ཏུ་རྒྱུད་ཅེས་བྱ་བར་འདུས་པ་ཡིན་ཏེ། རྒྱུད་ནི་གསུམ་སྟེ། སྤྲོ་བྱེད་ཚིག་གི་རྒྱུད་དང་། རང་བཞིན་དོན་གྱི་རྒྱུད་དང་། རང་རིག་རྒྱུན་ཆགས་ཀྱི་རྒྱུད་དོ། །སྤྲོས་བྱེད་ཚིག་གི་རྒྱུད་ནི་གཞན་ན་བསྟན་ནས་ཡོད་དོ། །རང་བཞིན་དོན་གྱི་རྒྱུད་ནི། གཞི་དངོས་པོའི་འདུག་ཚུལ། ངོ་བོ་སྐུ་ལས་འདས་པ་དང་། རང་བཞིན་རྩལ་ལས་འདས་པ། ཐུགས་རྗེ་རིས་ལས་འདས་པ་ཉིད་དེ། རྒྱ་མ་ཆད་པས་ཕྱོགས་ལྷུང་དང་བྲལ་བ། རིས་སུ་མེད་པས་བདག་ཏུ་གྲུབ་པ་མེད་པས། གཏད་མེད་པས་གཟུང་འཛིན་ལས་གྲོལ་བའོ། །དེ་ལྟར་ཆོས་ཉིད་ཀྱི་བཞུགས་ཚུལ་དེ། ཤར་རོལ་པར་རང་ཤར་བས་འབད་ཅིང་རྩོལ་དུ་མེད། དེ་ལྟར་ཤར་ཀྱང་ངོ་བོ་རང་དག་པས། དྲི་མའི་མཐའ་ལས་འདས། དེ་ལྟར་དག་པ་དེ་གྲོལ་བ་གནས་ལུགས་སུ་རང་གྲོལ་བས་བྱས་བཅོས་ཐམས་ཅད་རང་བཞག་ཏུ་སངས་རྒྱས་པའོ། །རང་རིག་རྒྱུན་ཆགས་ཀྱི་རྒྱུད་ནི་གཞན་རྒྱུད་ཤེས་པས་བསྡུས་པ་དང་རང་ཤེས་བྱས་བསྡུས་པའོ། །རང་རྒྱུད་ནི་རང་རིག་པའི་ཡེ་ཤེས་དྲན་པ་ལས་འདས་པས་འཛིན་རྟོག་དུ་མ་སོང་། བློ་ལས་འདས་པས་ཡིད་དཔྱོད་ཀྱིས་གཏན་ལ་མི་ཕེབས་ཤིང་དེ་ཉིད་དུ་མ་སོང་། དྲན་མེད་ལས་འདས་པས་བེམ་པོར་མ་སོང་། སྐྱེ་མེད་དུ་གྲུབ་པ་མེད་པས་ད་སྐྱེ་མི་སྲིད་དེ་འཁོར་བ་ལས་འདས་པས་ཏེ། མཚན་མ་དང་ཀ་མར་འཛིན་པའི་སངས་རྒྱས་སུ་མ་སོང་བའོ། །དེ་ལྟ་བུའི་དོན་དེ་རང་གིས་རང་ཤེས་པས་ཤེས་བྱེད་གཞན་ལས་རག་མ་ལུས་པའོ། །དེ་ལྟར་ན་ཤེས་པ་རང་ཤེས་སུ་ཡོ ད་པས་བཅོས་སུ་མེད། དེ་ལྟ་བུའི་རྒྱུད་དེ་ཡིད་མ་ཡིན་པས་འགྱུ་བ་རང་དག །སེམས་མ་ཡིན་པས་དྲན་བསམ་གྱི་འཁོར་ལོ་ལས་འདས། མ་རིག་པ་ལ་སོགས་པའི་ཉོན་མོངས་པ་ཐ་དད་པ་མ་ཡིན་པས། མངོན་པར་ཞེན་པའི་ཡུལ་ཐ་དད་པ་ལས་ལོག །དེ་ཚིག་གིས་གཏན་ལ་མི་ཕེབས་པས་གྲུབ་མཐའ་ལས་ལོག །ལ་ཤེས་རབ་ཀྱི་སྤྱོད་ཡུལ་མ་ཡིན་པས་ཡིད་དཔྱོད་ལས་འདས། དེ་ཉིད་ལྟ་སྒོམ་སྤྱོད་གསུམ་གྱིས་བསྟན་དུ་མེད་པ་སྙམ་བྱེད་དུ་མའི་ཕྱོགས་སུ་མ་ལྷུང་བའོ། །འོ་ན་དེ་གང་ཡིན་ན། དེ་ཉིད་རང་དངོས་པོའི་གཤིས་ཡིན་པས་དོགས་པའི་འཁྲིས་མེད་ལ། དེ་ཉིད་དབང་པོའི་མངོན་གསུམ་དང་འབྲེལ་བས་རེ་བའི་དྲིན་གཞན་དུ་མི་འཆའ་བའོ། །དེ་ལྟར་རང་གི་རྒྱུད་དེ་གོང་མ་རྣམས་སྤངས་བ་མ་ཡིན་ཏེ། སྤངས་ན་རྫོགས་པ་ཆེན་པོ་མ་ཡིན་པས། དེ་རྣམས་རང་དུ་ཡང་གཏན་ལ་དབབ་ཏུ་བཏུབ་པ་དེ། དེ་ཉིད་དྲན་པ་ལྟར་སྣང་བས་མ་འོངས་པའི་ཡུལ་སྣ་ཚོགས་ལ་འཇུག་པར་བྱེད་ལ། དྲན་པ་མེད་པ་ལྟར་སྣང་བས་བེམ་པོ་རྣམས་ལ་འཇུག་པ་ཡིན་ལ། བློ་ལྟར་སྣང་བས་ཡིད་དཔྱོད་དུ་མ་འཇུག་པའི་ས་ཡིན་ལ། སྐྱེ་མེད་ལྟར་སྣང་བས་བྱུང་བ་གནས་ས་འགྲོགས་མི་ཤེས་ལ། དེ་ཉིད་ཚིག་དུ་བྱུང་བས་སྒྲ་ཚད་སྣ་ཚོགས་པའི་གཏུགས་པར་སྣང་། དེ་ཉིད་ཤེས་རབ་དུ་བྱུང་བས་སྙམ་བྱེད་ཐ་དད་པའི་རྩ་བར་བྱུང་བའོ། །དེ་ཉིད་རེ་བ་ཡིན་པས་སངས་རྒྱས་གཞན་དུ་བཙལ་དུ་མེད་ལ། དགོས་པ་ཉིད་ལྟར་སྣང་སྟེ། ད་ལྟ་འཁོར་བ་ཉིད་ན་གནས་པས་སོ། །དེ་ལྟར་ན་རང་གི་རྒྱུད་ཤེས་པས་བསྡུས་ཏེ་གང་ལྟར་ཡང་གཏན་ལ་དབབ་ཏུ་བཏུབ་པའོ། །གཞན་རྒྱུད་ཤེས་བྱ་བསྡུད་པ་ནི། འཇིག་རྟེན་པའི་རྒྱུད་དང་། དག་པ་ཕྱོགས་མཐོང་དང་། ཡང་དག་པའི་རྒྱུད་དོ། །འཇིག་རྟེན་པ་ནི་རྒྱུད་རང་སོ་དྲི་མ་དང་བཅས་པས་སོ་སོའི་སྐྱེ་བོ་དང་རིགས་དྲུག་སོ་སོའི་རྒྱུད་དོ། །ཕྱིན་ཅི་ལོག་གི་རྒྱུད་མུ་སྟེགས་གྲུབ་མཐའ་བ སྒྱུར་བའོ། །དག་པ་ཕྱོགས་མཐོང་བ། ཉན་ཐོས་དང་། རང་བྷུ་ཏ་དང་། བྱང་ཆུབ་སེམས་དཔའི་རྒྱུད་དོ། །ཡང་དག་པ་སངས་རྒྱས་ཀྱི་རྒྱུད་ཀྱིས་བསྡུས་པའོ། །དེ་དག་རྣམས་རྣལ་འབྱོར་པས་ཤེས་པས་བྱ་དགོས་པའི་ཕྱིར་ན་ཤེས་བྱ་ཞེས་བྱའོ། །དེ་ལྟར་ན་ངོ་མཚར་བ་རང་རིག་ཡེ་ཤེས་སུ་བཞུགས། ངེས་ཚིག་གཅིག་ནས་གཅིག་ཏུ་བརྒྱུད་པས་ན་རྒྱུད་ལ། ཡང་བྲེང་ཆགས་པའམ་ཐང་ཆོད་པས་ན་རྒྱུད་ཡིན་ལ། དབྱེ་ན་སྤྲོ་བྱེད་ཚིག་གི་རྒྱུད་བཅུ་བདུན། རང་བཞིན་དོན་གྱི་རྒྱུད་གནས་ལུགས། རང་བཞིན་རྒྱུན་ཆགས་ཀྱི་རྒྱུན་རང་རྒྱུད་དང་གཞན་རྒྱུད་དོ། །ཞེས་བྱ་བ་ནི་གོང་མའི་དེ་དག་བསྟན་པར་བྱ་བཤད་པར་བྱ་ཞེས་བྱ་བའི་ཐ་ཚིག་གོ། །གསང་བ་བླ་ན་མེད་པའི་ཚིག་བྲལ་མན་ངག་དང་སྦྱོར་སྟེ་བཤད་པ་ནི། རྟེན་གྱི་གང་ཟག་རང་བཞིན་རྫོགས་པ་ཆེན་པོའི་དོན་ལ་མོས་ཤིང་ཡིད་ཆེས་པས་སྒྲོན་མའི་དོན་ཉམས་སུ་བླངས་པས་ཆོས་ཉིད་དོན་གཏན་ལ་ཕེབས་པ་ནི། མཚན་ལ་བརྟེན་ནས་རྟོགས་པས་ཏེ། སྐལ་ལྡན་ཡིད་ཆེས་ཤིང་མོས་པ་མ་ལོག་པ་གསེར་གྱི་སྒྲམ་དང་འདྲ་བས་གསེར་གྱི་ཞེས་བྱ། དེ་ཉིད་དབང་པོ་རྣོན་པོ་ལ་དྲི་མ་དང་སྐྱོན་མེད་པས་ན་མེ་ཏོག་ཞེས་བྱ། དེ་ལྟར་ཤེས་རབ་ཀྱི་སྒྲོན་མ་བཞིའི་དོན་མངོན་སུམ་དུ་གཏན་ལ་ཕེབས་ན་མཛེས་པའོ། །དེ་ལྟར་གཏན་ལ་ཕེབས་པ་དེ་རྐྱེན་མ་ཡིན་པའི་ཡུལ་དགོན་པར་བྱ་བ་སྤངས་ནས་ཉམས་ལེན་དང་མ་བྲལ་བར་གནས་པ་ལས་ཉམས་གོང་འཕེལ་གྱི་སྣང་བ་ཤར་བ་ན་རིན་པོ་ཆེའོ། །ཉམས་གོང་འཕེལ་གྱི་སྣང་བ་ཡིད་དཔྱོད་དམ་ཚིག་མ་ཡིན་པར་དབང་པོ་དང་འབྲེལ་བར་མངོན་སུམ་དུ། དཔེར་ན་མུན་ཁང་དུ་སྒྲོན་མ་བཏེགས་པས་རྫས་ལག་པ་གསལ་བ་དང་འདྲ་བར་སྣང་བས་ན་སྒྲོན་མའོ། །དེ་ཉིད་ལ་ཡུན་རིང་དུ་ཉམས་སུ་བླངས་པས་འཁྲུལ་པའི་སྣང་བ་འདི་འགགས་ནས་རིག་པ་ཚད་ལ་ཕེབས་པའི་སྣང་བ་དང་། ཆོས་ཉིད་ཟད་པའི་སྣང་བ་ལ་སྤྱོད་པས་ན་འབར་བའི་ཞེས་བྱ་སྟེ་དཔེར་ན་མེ་ཆེན་པོ་འབར་བ་ལ་ཤིང་བསྣན་པ་དང་འདྲ་བར། ཉམས་གོང་འཕེལ་བས་ཀྱང་སྣང་བ་གཏན་ལ་དབབ་པའོ། །དེ་ལྟར་ཀྱང་ཚིག་གི་རྒྱུད་འདི་ལ་རྟེན་ནས་ཉམས་སུ་ལོངས་པས་ན་ཞེས་བྱའོ། །སྒྲ་འཇུག་པའི་རྒྱུ་མཚན་ནི་ཨཱ་ལོ་ཀེ་ཞེས་བྱ་སྟེ། སྣང་བ་ཞེས་བྱ། སྒྲོན་མ་ཞེས་བྱ། སྣང་བ་ཡང་མངོན་སུམ་དུ་སྣང་བས་ན་སྣང་བ། སྒྲོན་མ་ནི་གསལ་བ་ལ་རང་གསལ་བས་གཞན་གྱི་མུན་པ་སེལ་བར་བྱེད་པས་ན་སྒྲོན་མའོ། །དེ་ལྟར་ན་སྒྲོན་མ་བཞི་བོ་འདི་ནི་དཔེར་ན་སྐྱེས་བུ་གཅིག་གསེར་འདོད་པ་ལ། སྔོན་དུ་གསེར་མ་ཡིན་པའི་སྒྲོ་འདོགས་བཅད་ནས་གསེར་དུ་གཏན་ལ་འབེབས་པ་འདྲ་བར། ཐེག་པ་ཐུན་མོང་པ་རྣམས་ཀྱིས་གཞན་སྤྲོས་བཅད་པས། རང་དོན་སྒྲོན་མར་གཏན་ལ་མ་ཕེབས་སྟེ། བརྩོན་འགྲུས་ཚི་ཆད་པ་དང་འདྲ། འདི་རང་སྤྲོས་བཅད་དེ་སྔོན་དུ་ནས་གསེར་རང་དུ་གཏན་ལ་ཕབ་པ་དང་འདྲ་བ་སྒྲོན་མ་བཞི་རང་ཐོག་དུ་མངོན་སུམ་དུ་བསྟན་པས་གཞན་གྱི་སྤྲོས་པ་རང་ཆོད་དེ་བརྩོན་འགྲུས་བྱ་མི་དགོས་པར་ཡིད་དཔྱོད་སྙམ་བྱེད་མེད་པར་སངས་རྒྱ་བའོ། །དེའི་ཕྱིར་ན་ཐེག་པ་ཐུན་མོང་པ་རྣམས་སྒྲོན་མ་མེད་པའི་མུན་པའམ། མིག་མེད་པ་དང་འདྲ་བའོ། ༈ །མཚན་དཀྱུས་ལ་ངོས་བཟུང་བ་ནི། སྒྲོན་མ་བཞི་བོ་དེ་སྔོན་དུ་རྒྱང་ཞགས་ཆུའི་སྒྲོན་མ་བསྟན་ཏེ། དེ་ལ་དོན་དགུས་ལེའུ་དང་པོའི་ཁོག་དོན་རྫོགས་པར་བསྟན་པ་ལས། ངོ་བོ་ནི་སྒྲོན་མ་ཉིད་ཡིན་ལ། ངེས་ཚིག་ནི་རྒྱང་ནི་རིང་བའི་རྒྱུད་འཛིན་པས། གཟུགས་སུ་སྣང་བ་རྣམས་འཛིན་པས་ཏེ། འབར་བས་ནི་དཔེར་ན་མེ་འབར་བས་རྫས་འཛིན་ཅིང་སྲེག་པས་ནའོ། །དབྱེ་བ་ནི་འབྱུང་བ་ལྔའི་དྭངས་མ་འདུས་པ་དང་། ཡེ་ཤེས་ཀྱི་དྭངས་མ་འདུས་པ་དང་། དབང་པོའི་དྭངས་མ་འདུས་པ་དང་། གསུམ་གྱིས་ཤིན་ཏུ་ལེགས་པར་རྫོགས་པས་ན་མཛེས་པའི་སྟེ་རབ་ཏུ་གསལ་བར་གནས་པའོ། །མཚན་ཉིད་ནི་དབང་པོ་རྣམས་འདུས་པའི་དྭངས་མ་མིག་དུ་དོན་དམ་པའི་འབྱུང་བ་བཞི་ལས་གྲུབ་པས་ན་མེ་ཏོག་ཞེས་བྱའོ། །གནས་ནི་དབང་པོ་ལྔའི་ནང་ནས་དྭངས་མ་འདུས་པ་མིག་ཡིན་ལ། དེའི་ལམ་རྩ་བཞི། དེ་ལས་ཀྱང་ཁྱད་པར་དུ་ཀ་ཏི་གསེར་གྱི་རྩ་ཆེན་པོ་ནས་རྒྱུ་ཞིང་གནས་དང་། རིན་པོ་ཆེ་ལྔ་ལས་ཁྱད་པར་འཕགས་པ་གསེར་ཡིན་པས་ན་གསེར་གྱི་ཞེས་པའོ། །བསྐྱེད་པ་དང་འདྲེན་པ་ནི་མིག་དེ་ཡང་ཐོག་མ་ལྟེ་བར་ཆགས། དེ་ནས་དྲན་པར་བརྒྱུད་དེ་ནས་རོ་རྣམས་སུ་བརྒྱུད། དེ་ལས་རྩེ་མོ་རྣམས་བཀོད་དུ་བརྒྱུད། དེ་ལས་མིག་དུ་བརྒྱུད་པས་ན་བརྒྱུད་དོ། །དེ་ཡང་ཐོག་མ་མ་ལུས་ཀུན་རྫོབ་ཀྱི་འབྱུང་བ་བཞི་ལས་བསྐྱེད་པས་ན་དྭངས་མ་དོན་དམ་པའི་འབྱུང་བ་བཞིར་སྨིན་པའོ། །འཆར་སྒོ་ནི་མིག་རྒྱ་མཚོ་ལས་མེ་ཏོག་གི་རྣམ་པ་དང་མཚུངས་པས། མཐུན་དཔེ་ནི་འདི་ཉིད་ལ་གོམས་པས་ཡོན་ཏན་ཟད་པ་རྣ་བར་འཛིན་པར་བྱེད་པས་ན་རིན་པོ་ཆེ་ཞེས་བྱའོ། །དེ་ལྟར་ན་མེ་ཏོག་མཛེས་པ་སུས་མཐོང་བ་ཅེས་པས་སྟེ། རྒྱང་ཞགས་ཆུའི་སྒྲོན་མའི་མཚན་ཉིད་སུས་མཐོང་བ་སངས་རྒྱ་བ་ཡིན་ནོ། །དེ་ལྟར་ལེའུ་དང་པོའི་དོན་ཚིག་རྒྱུད་ཀྱི་མཚན་ལ་བསྡུས་ཏེ་བསྟན་པའོ། ༈ །ལེའུ་གཉིས་པ་ཤེས་རབ་རང་བྱུང་གི་སྒྲོན་མའི་ཚིག་རྣམས་རྒྱུད་ཀྱི་མཚན་ལ་བསྡུ་ན་ནི། དོན་བརྒྱད་ཀྱིས་བསྟན་པའི་ངོ་བོ་ནི་སྒྲོན་མ་ལྷག་མ་རྣམས་ཀྱི་ཤེས་བྱེད་དུ་ཡོད་པས་ན་ངོ་བོས་སྟེ། སྒྲོན་མ་ཞེས་བྱའོ། །ངེས་ཚིག་ནི་ཤེས་པ་ཐམས་ཅད་ཀྱི་རབ་གང་ཡིན་ན་འཁྲུལ་པ་རྣམ་རྟོག་འགགས་པའི་དོན་ཤེས་པ་ན། དེ་ཉིད་ཤེས་པའི་བྱེ་བྲག་རྣམས་ལས་རབ་ཏུ་གྱུར་པ་ནི་དཔེར་ན་རིན་པོ་ཆེ་གསེར་གླིང་དུ་ཕྱིན་པའི་ཚེ་ས་རྡོའི་བག་མེད་པ་དང་འདྲ་བར། ཤེས་རབ་ཀྱིས་ཚིག་གི་སྤྲོས་པ་ཆོད་པའི་ངོ་བོ་ལ་ཚིག་དུ་གྲུབ་པ་མེད་པར་རྟོགས་པ་ནི་གསེར་གྱི་ཞེས་བྱའོ། །དེ་ཡང་གཞན་ལས་བྱུང་བ་མ་ཡིན་ཞིང་གཞན་གྱི་སྒྲོ་འདོགས་གཅོད་དེ་ཞེས་པ་སྟེ། ལུས་ཀྱི་གཞི་ལ་གནས་པའི་ཤེས་རབ་དང་། སྣང་བ་ཅེ་ཟིན་འཕྲལ་བྱུང་གི་ཤེས་རབ་དང་། དྲན་པ་འགགས་པ་མེད་པའི་ཚིག་གི་ཤེས་རབ་དང་། སོ་སོར་རྟོག་པ་སྙམ་བྱེད་བློ་ཡི་ཤེས་རབ་དང་། ཉོན་མོངས་པ་རྩད་ནས་གཅོད་པ་ཐོས་བསམ་བསྒོམ་བྱུང་གི་ཤེས་རབ་དང་ལྔ་ལས་སྣང་བ་མཆེད་པ་དང་། ཚིག་ལ་མཆེད་པ་དང་། བསྡུད་ཅིང་སྲེག་པར་བྱེད་པས་ན་འབར་བའི་ཞེས་པའོ། །ཤེས་རབ་ཀྱི་མཚན་ཉིད་ནི་སྣང་བ་དང་མི་སྣང་བའི་ཆོས་ཀྱི་རྣམ་པ་རྣམས་རང་བཞིན་མེད་པར་ཤེས་པས་ན་དཔའ་བ་ཞེས་བྱ་སྟེ། མཛེས་པ་ཞེས་བྱའོ། །འཆར་བར་བྱེད་པའི་སྒོ་ནི་དབང་པོའི་ལས་ཁྱད་པར་ནང་ནས་མེ་ཏོག་གི་རྣམ་པ་ལྟ་བུ་འཆར་བས་ན་མེ་ཏོག་གོ། །དེ་ཉིད་ལུས་ལ་གང་ན་གནས་ན་བསྐྱེད་པར་བྱེད་པའི་རྩ་ནས་འགྱུ་ཞིང་གནས་པས་ན་རྒྱུད་ཅེས་བྱ། ཚད་ནི་ཤེས་རབ་ལྔའི་སོ་སོ་ཉམས་གོང་ནས་གོང་དུ་འཕེལ་བ་སྟེ་རིན་པོ་ཆེ་ཞེས་པའོ། །མཐུན་དཔེ་ནི་སྤྲ་བ་རླན་དང་བྲལ་བའི་ནང་དུ་མེ་སྟག་ཕྲ་མོ་ཚུད་པས་འབར་ཞིང་ཆེར་མཆེད་པས་བྱེད་པས་ན་ཡང་འབར་བ་ཞེས་བྱའོ། །དེ་ལྟར་ལེའུ་གཉིས་པའི་ཚིག་དོན་མཚན་ལ་བསྡུས་པའོ། ༈ །ད་ནི་ལེའུ་གསུམ་པ་ཐིག་ལེ་སྟོང་པའི་སྒྲོན་མའི་དོན་བཅུ་གཉིས་སུ་གཏན་ལ་ཕབ་པའི་ལེའུ་གསུམ་པའི་ཚིག་རྣམས་མཚན་ལ་ངོས་གཟུང་བ་ནི། ངོ་བོ་ཉག་གཅིག་ལ་འཕྲ་བ་སྤྲོས་པ་དང་བྲལ་བས་ན་མཛེས་པའི་ཅེས་བྱ་ལ། ངེས་ཚིག་ནི་ཐིག་མི་འགྱུར་བ་དང་ལེ་བརྡལ་བ་དང་། སྟོང་པ་དངོས་པོའི་འཛིན་པ་དང་བྲལ་བས་ན་འབར་བའི་ཅེས་བྱ་ལ། དབྱེ་བ་རྣམ་པ་ལྔ་སྟེ། གཞི་གནས་རང་བཞིན་གྱི་ཐིག་ལེ་དང་། ལུས་གནས་རྩའི་དང་། ཀུན་རྫོབ་རྒྱུའི་དང་། དོན་དམ་སྤྲོས་མེད་ཀྱི་ཐིག་ལེ་དང་། རང་བྱུང་འབྲས་བུའི་ཐིག་ལེ་དང་ལྔ་གསེར་དང་སེར་པོ་ལྟར་གཉིས་མེད་དུ་གནས་པས་གསེར་གྱི་ཞེས་བྱའོ། །དེའི་རང་བཞིན་ནམ་དགོས་པ་ནི་རང་གནས་དགོངས་པ་གཅིག་ཏུ་གནས་པའི་ཚེ། ཐ་སྙད་དུ་འཛིན་པའི་གྲངས་ལ་སོགས་པ་ཟད་པས་ན་ཏོག་ཅེས་བྱ་སྟེ་རྩེ་མོའམ་གཅིག་ཏུ་གནས་པའི་དོན་ནོ། །དེའི་གནས་ནི་རྩ་སྟོང་ཕྲག་གྲངས་མང་པོར་གནས། མཚན་ཉིད་རྣམས་ཀྱང་རྩ་བཞི། དེ་ལས་ཀྱང་ཁྱད་པར་དུ་ཀ་ཏི་གསེར་གྱི་རྩ་ཆེན་པོ་ལས་རྒྱུ་བའོ། །སྒོ་ནི་མིག་ནས་འཆར་བས་ན་མིག་གིས་ཀྱང་གཟུགས་ལ་སོགས་པ་ལ་མཆེད་པར་བྱེད། མེད་ཀྱང་མཆེད་པར་བྱེད་པའོ། །དེའི་རང་བཞིན་ནི་གསལ་བ་དངོས་པོའི་ཕྱོགས་སུ་མ་ལྷུང་སྟོང་པས་མཚན་མའི་རིས་སུ་མ་སོང་བ་ཡིན་པས་རིན་པོ་ཞེས་བྱ་སྟེ་གཞན་ལས་རིན་ཐང་གི་ཁྱད་པར་འཕགས་པས་ཏེ་ཡིད་བཞིན་གྱི་ནོར་བུ་ལྟ་བུའོ། །དེ་ཉིད་སྣང་བ་གང་ལ་སྣང་ན་ནམ་མཁའ་རྒྱ་ཆེ་བ་ལ་སྣང་བས་ན་ཆེ་ཞེས་པའོ། །དེའི་ཚད་ནི་རྩོལ་བཅས་རྩའི་གནད་དང་རྩོལ་མེད་རིག་པའི་གནད་ཀྱིས་དེ་ཉིད་ཚད་ལ་འབེབས་པས་ན་རྒྱུད། ཞེས་པས་ཏེ་བླ་མ་བརྒྱུད་པ་ལ་བརྟེན་ནས་ཉམས་སུ་མྱོང་བའོ། །དེ་ཉིད་དངོས་ནི་འགྲོ་བ་རིགས་དྲུག་སོ་སོ་ལ་རང་འོད་དང་བཅས་པར་གནས་པ་སྒྲོན་མ་ཞེས་རིགས་དྲུག་གི་མུན་པ་སེལ་བར་བྱེད་པའོ། །མཐུན་དཔེ་ནི་དཔེར་ན་རྨ་བྱའི་མདོངས་དང་འདྲ་སྟེ། འོད་ལྔས་ཁྱབ་པས་ན་ཞེས་བྱ་བའི་ཞེས་པ་གཏན་ལ་འབེབས་པ་ཚིག་ཡིན་པས་ན་དཔེས་གཏན་ལ་ཕབ་པའོ། །དེ་ལྟར་ན་ངོ་བོ་དང་གཅིག །ངེས་ཚིག་དང་གཉིས། དབྱེ་བ་དང་གསུམ། མཚན་ཉིད་དམ་དགོངས་པ་དང་བཞི། གནས་པ་དང་ལྔ། སྒོ་གང་ལས་འཆར་བ་དང་དྲུག་དེའི་རང་བཞིན་དང་བདུན། ཡུལ་ལ་ཇི་ལྟར་སྣང་ལུགས་དང་བརྒྱད། དེའི་ཚད་དང་དགུ། དངོས་དང་བཅུ། དེ་རྟོགས་པར་བྱེད་པའི་མན་ངག་དང་བཅུ་གཅིག །མཐུན་དཔེ་དང་བཅུ་གཉིས་སུ་ལེའུ་གསུམ་པའི་ཚིག་མཚན་ལ་བསྡུས་ནས་བསྟན་པའོ། ༈ །ད་ནི་ལེའུ་བཞི་པའི་ཚིག་དབྱིངས་རྣམ་པར་དག་པའི་དོན་མཚན་ལ་བསྡུས་ན། བཅུ་གཅིག་ཏུ་བསྟན་པའི་ངོ་བོ་ནི་སྒྲོན་མའོ། །དོན་ལ་རིག་པའི་ངོ་བོ་བསྡུས་པར་བྱེད་པའོ། །ངེས་ཚིག་ནི་རྣམ་པར་དང་། དག་པ་དང་། དབྱིངས་དང་གསུམ་དུ་སྤེལ་ལེགས་པས་ན། མཛེས་པའོ། །དབྱེ་བ་ནི་གཞི་ལ་གནས་པའི་དབྱིངས་དང་། ལམ་དང་། ཡུལ་ལ་སྣང་བ་གསུམ་གྱིས་ངོ་བོ་ལ་འགྱུར་བ་མེད་པར་གསེར་རོ། །རང་བཞིན་ནི་རྣམ་རྟོག་ཟབ་ཅིང་རང་ཐལ་དུ་གནས་པས་གོང་ནས་འབྲེལ་བས་ན་ཀྱི་ཞེས་འདྲེན་པ་མཚོན་པའི་ཚིག་གོ། །དགོས་པའམ་མཚན་ཉིད་ནི། དྲི་མའི་རྣམ་རྟོག་ལས་འདས་སྒྲིབ་བྲལ་ཉག་གཅིག་ཏུ་ཡོད་པས་ན་ཏོག་ཅེས་སྒྲས་ཏེ་ཆོས་ཉིད་ཀྱི་རང་སྒྲ་ཉེས་སྐྱོན་ལས་འདས་པའོ། །དེ་ཉིད་གོམས་པར་བྱེད་པའི་མན་ངག་ནི་སྔོན་འགྲོ་དང་དངོས་གཞི་ལ་བརྟེན་ནས་རྟོགས་པ་ཉམས་སུ་མྱོང་བ་རང་གི་རྒྱུད་ལ་བརྟེན་ནས་འབྱུང་བའོ། །དེ་རང་གནས་པ་ནི་མིག་ལ་འབྱུང་བའི་ཉེས་སྐྱོན་མེད་པ་སྟེ་མཆོད་པས་ན་མེའོ། །དེའི་ཚད་ནི་མཐིང་ཀ་ལས་ཁ་དོག་ལྔར་གསལ་ཙམ་ན་བསྟན་པ་ཐོབ་པ་སྟེ། སྣང་བའི་འཕེལ་རྫོགས་པས་ན་རིན་པོ་ཆེ་ཞེས་པའོ། །སྒོ་ཡང་མིག་ནས་འཆར་བས་གོང་འདྲ། དེ་ཉིད་དངོས་ནི་རང་གི་སྨིན་མཚམས་ནས་སྣང་བས་ན་ཡང་སྒྲོན་ཞེས་པའོ། །མཐུན་དཔེ་ནི་ཡི་གེ་ན་རོ་ལྟ་བུར་གཉིས་སུ་གཅིག་གི་རང་བཞིན་དུ་བཞུགས་པས་ན་ཞེས་བྱའི་ཞེས་བསྟན་པའོ། །དེ་ལྟར་ན་ངོ་བོ་དང་གཅིག །ངེས་ཚིག་དང་གཉིས། དབྱེ་བ་དང་གསུམ། དེའི་རང་བཞིན་དང་བཞི། མཚན་ཉིད་དམ་དགོས་པ་དང་ལྔ། དེ་ཇི་ལྟར་གཡོས་པར་བྱ་བའི་ཐབས་དང་དྲུག །དེའི་ཚད་དང་བདུན། གནས་དང་བརྒྱད། སྒོ་གང་ནས་འཆར་བ་དང་དགུ། དེ་ཉིད་དངོས་གང་ཡིན་པ་དང་བཅུ། མཐུན་དཔེ་དང་བཅུ་གཅིག་གིས་ལེའུ་བཞི་པའི་དོན་མཚན་ལ་བསྡུས་ཏེ་བསྟན་པའོ། །མཚན་རྒྱུད་ལ་ངོས་བཟུང་བ་བསྟན་ནོ། །མཚན་གྱི་དགོས་པ་ནི། བཏགས་པ་མིང་གི་དགོས་པ་དང་། བརྗོད་པ་ཚིག་གི་དགོས་པ་དང་། བསྡུས་པ་དོན་གྱི་དགོས་པ་གསུམ་ལས་བཏགས་པ་མིང་ནི། ལ་ལ་ལེའུ་མཚན་དུ་སོང་བ་ཡོད། ལ་ལ་ཤྭ་ལོ་ཀ་ལས་སོང་བ་ཡོད། ལ་ལ་བསྡུས་དོན་ལས་སོང་བ་ཡོད། ལ་ལས་གཙོ་བོའི་ལྷ་ལས་སོང་བ་ཡོད། ལ་ལ་ཚིག་དང་མ་འབྲེལ་ལ་དོན་གོ་ལས་མིང་དུ་བཏགས་པ་ཡོད་དེ། ལ་ལ་ཚིག་འགའ་ཙམ་ལ་བརྟེན་ནས་མིང་བཏགས་པ་ཡོད་དེ། དེ་དག་རྣམས་ནི་དོན་ཡིན་ཀྱང་ཚིག་དང་མ་འབྲེལ་བ་དང་། གྲངས་ཡིན་ཀྱང་དོན་དུ་མ་འདུས་པ་དང་། ཚིག་ཡིན་ཀྱང་དོན་དུ་མ་འདུས་པས་ན་དགོས་པ་ཡོད་ཀྱང་འབྲེལ་བ་མེད་པའོ། །འདི་ནི་དེ་ལྟར་མ་ཡིན་ཏེ་ཚིག་དང་དོན་དུ་འབྲེལ་བ་སྟེ། གསེར་ལ་སོགས་པ་མཚན་གྱི་ཆེ་བར་བསྟན་ནས། སྒྲོན་མ་བཞིའི་ཚིག་གིས་ཀུན་ལ་འབྲེལ། ལེའུ་བཞིས་སྒྲོན་མ་བཞིའི་ཆོས་བསྟན་པས་གཞུང་ཚིག་དང་ཡི་གེར་བྱུང་བ་དང་། མ་འབྲེལ་བ་མེད་པས་མིང་སྨོས་པ་ཙམ་གྱིས་གཞུང་གོ་བའི་དགོས་པ་ཡོད་པས་ན་དབང་པོ་ལ་རྣོ་རྟུལ་མེད་པའི་གནད་བསྟན། དོན་སྒྲོན་མ་ཞེས་མ་རིག་པའི་མུན་པ་སེལ་བའི་དགོས་པ་ཡོད་པས་རང་རིག་མངོན་སུམ་དུ་རྟོགས་པའོ། །བརྗོད་པ་ཚིག་གི་དགོས་པ་ནི་ལ་ལ་ནས་མཚན་བསྡུས་པར་བཏགས་ནས་ཚིག་རྒྱས་པར་བསྟན་པ་ཡོད་ལ། ལ་ལ་མཚན་རྒྱས་པས་བསྟན་ལ་ཚིག་དོན་བསྡུས་པར་གསུངས་པ་ཡོད་དེ། འདི་ནི་དེ་ལྟར་མ་ཡིན་པར་མཚན་ཀྱང་སྒྲོན་མ་བཞིའི་ཚིག་ལས་མ་འདས་པས་ན་མངོན་གསུམ་རང་གནད་དུ་བསྟན་པའི་དགོས་པ་ཡོད་པས། ཚིག་གིས་སངས་མི་རྒྱ་བའི་གནད་བསྟན་པའོ། །བསྡུས་པ་དོན་གྱི་དགོས་པ་ནི་སྒྲོན་མ་བཞི་ལ་བརྟེན་ནས། གང་ཟག་གཅིག་སངས་རྒྱ་བའི་དགོས་པ་ཡོད་པས། རྒྱུད་གཞན་ལ་རག་མ་ལུས་པའི་གནད་དང་། གཞུང་ལེའུ་བཞི་ཡི་བདག་ཉིད་དུ་གནས་པ་དེ་དོན་སྒྲོན་མ་བཞིའི་མཚན་དུ་བསྟུས་པས་བརྗོད་བྱ་ལ་ཡིད་ཆེས་པའི་དགོས་པ་ཡོད་པས། མན་ངག་ཚིག་གསུམ་དུ་འདུས་པའི་གནད་བསྟན་པའོ། །དེ་ལྟར་དགོས་པ་གསུམ་གྱིས་དབང་པོ་རྣོ་རྟུལ་མེད་ཀྱང་བརྩོན་འགྲུས་ལ་ཆེ་ཆུང་ཡོད་པས། བརྩོན་འགྲུས་རབ་ཟག་པ་དང་བཅས་པའི་ཕུང་པོ་མི་སྣང་བར་འདི་ཉིད་དུ་སངས་རྒྱས་པའི་དགོས་པ་དང་། འབྲིང་བར་དོན་རང་གི་དེ་ཉིད་སྒྲོན་མ་བཞིའི་སྣང་བ་ལ་བརྟེན་ནས་སངས་རྒྱ་བའི་དགོས་པ་དང་། ཐ་མ་ཟབ་མོའི་ཆོས་ཀྱི་སྒོ་མཐོང་བའི་ཡོན་ཏན་གྱིས་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་ཕྱུང་ནས་སངས་རྒྱ་བའི་དགོས་པའོ། ༈ །དེ་ལྟར་མཚན་བསྟན་ནས་ད་ནི་རྒྱུད་ཀྱི་གཞུང་དོན་ངེས་པར་བསྟན་ལ་གཉིས་ལས། ཐོག་མར་རྒྱུད་འབྱུང་བའི་ཡན་ལག་དུ་ཕྱག་བཙལ་བ་བསྟན་པ་དང་། གཞུང་དངོས་ལས་ཕྱག་བཙལ་བ་བསྟན་པ་ནི། སྔོན་འབྱུང་དུ་རྒྱུད་ཀྱི་སྡུད་པ་པོས་རྒྱུད་ཀྱི་སྟོན་པ་ལ་རྗེས་སུ་ཡིད་རང་ཞིང་དྲིས་ལན་གྱི་སྒོ་ནས་ཕྱག་བཙལ་བ་དང་། རྗེས་འཇུག་ཏུ་མ་འོངས་པའི་དུས་ཀྱི་སྐལ་ལྡན་རྒྱུད་འདི་ཉིད་ལ་མོས་པ་རྣམས་ཀྱི་ཚོགས་རྫོགས་པའི་དོན་དུ་ཕྱག་བཙལ་བ་དང་། དེ་ལྟར་ཕྱག་བཙལ་བའི་དགོས་པ་བསྟན་པ་དང་གསུམ་མོ། །དེ་ལྟར་སྔོན་འབྱུང་དུ་རྒྱུའི་རྡོ་རྗེ་འཆང་ཞེས་བྱ་བ་འདུས་པ་གཉིས་པའི་སྡུད་པ་པོ་དེས་ཡོན་ཏན་གྱི་མཐོང་བ་དག་པས། འབྲས་བུ་ཡི་རྡོ་རྗེ་འཆང་ཆེན་པོ་འབྲས་བུ་རང་ཚོགས་ཆེན་པོར་བཞུགས་པ་དེ་ལ་འཁྲུལ་པ་ལྟར་སྣང་གི་གཟུང་འཛིན་མི་མངའ་བས་མ་རིག་པ་རྣམ་པ་གསུམ་ལས་ཀུན་ཏུ་བཏགས་པའི་མ་རིག་པ་བཅོམ་པས་བདག་འཛིན་མེད་པའི་ཡེ་ཤེས་མཉམ་པ་རེས་མེད་དང་ལྡན་ཏེ། རྐྱེན་དུ་མངོན་པར་སྣང་བའི་ཉོན་མོངས་པ་ལས་འདས་པའོ། །དེ་ལྟར་ཡུལ་ཅན་དུ་མའི་རྣམ་པར་རྟོག་པ་ཡོད་མི་སྲིད་པས། གཉིས་འཛིན་གྱི་ཤེས་པའི་མཐའ་ལས་གྲོལ་ཏེ་ལྷན་ཅིག་སྐྱེས་པའི་མ་རིག་པ་བཅོམ་པས་དུས་གསུམ་མཉམ་པ་ཉིད་དུ་གནས་ཏེ། སྐྱེ་བ་དང་འཇུག་པ་ལ་རང་དབང་ཐོབ་པས་སྐྱེ་མེད་རང་གྲོལ་ལ། དེ་ལྟར་སྐྱེ་བ་མེད་པ་འཆི་བདག་གི་བདུད་ལས་རྒྱལ་སྐྱེ་མེད་ཡེ་ནས་དག་པའི་ཡེ་ཤེས་དང་ལྡན་ཏེ། འཁོར་འདས་གཉིས་འཛིན་གྱི་མཐའ་ལས་འདས་པའོ། །ཡང་དེ་ཉིད་འཁྲུལ་བ་ཞེས་བྱ་བར་གྲུབ་པ་མེད་པས་རྒྱུ་བདག་ཉིད་གཅིག་པའི་མ་རིག་པ་བཅོམ་པས། འབྱུང་བ་འདུས་པ་ཟག་བཅས་ཀྱི་ཕུང་པོ་མ་གྲུབ་སྟེ། ཕུང་པོའི་བདུད་ལས་རྒྱལ་བས། རང་འབྱུང་སྟོང་པ་ཉིད་ཀྱི་ཡེ་ཤེས་དང་ལྡན་ཏེ། མཚན་མ་བདག་འཛིན་གྱི་ཤེས་པ་ལས་འདས་པའོ། །དེ་ལྟར་མ་རིག་པ་གསུམ་མིང་མེད་པས་ད་འཁྲུལ་མི་སྲིད་པས་སྟོང་པ་ཉིད་རིག་པ་སྣང་བའི་དབང་དུ་མ་གྱུར་པས་ཕྲ་རགས་ཀྱི་དྲི་མ་རྣམས་བཅོམ་པས། སྣང་བ་འཁྲུལ་འཁོར་གྱི་ཆོ་འཕྲུལ་རྣམས་ཀྱིས་བྲིད་ཅིང་བསླུ་བར་མི་ཚུགས་པས། རང་བཞིན་རྣམ་དག་གི་ཡེ་ཤེས་དང་ལྡན་ཏེ། འབྱུང་རྐྱེན་དུ་མའི་གནོད་པ་ལས་འདས་པའོ། །དེ་ལྟ་བུའི་རྒྱུད་ཀྱི་སྟོན་པ་དེ་ལ་འཛིན་པ་ནང་གི་སྒྲོ་འདོགས་ཆོད་པས་བདག་ཉིད་ཀྱི་དོན་རང་འབྱུང་དུ་སུས་ཀྱང་བྱས་པ་མེད་པར་གྲུབ་པས་རང་དོན་རྫོགས་ལ། གཟུང་བ་ཕྱིའི་སྒྲོ་འདོགས་བཅད་དེ་གདུལ་བྱ་འགྲོ་བ་རིས་སོ་སོའི་བསམ་པ་དང་པོའི་བྱེ་བྲག་མཁྱེན་པས་གཞན་དོན་ལ་ཐོགས་པ་མེད་པར་མཛད་པས་ན་དཔལ་ལོ། །སྣང་བ་ནི་བཞི་སྟེ། གདུལ་བྱ་ཡུལ་དུ་ཐ་དད་པའི་སྣང་བ་དང་། བདེ་གཤེགས་འཁྲུལ་པ་དག་པའི་སྣང་བ་དང་། འགྲོ་དྲུག་འཁྲུལ་བ་དམིགས་པ་སོ་སོའི་སྣང་བ་དང་། རང་བཞིན་རྣམ་པར་དག་པའི་སྣང་བའོ། །དེ་ལྟར་སྣང་བ་བཞི་འབད་ཅིང་རྩོལ་མི་དགོས་པར། རྒྱུད་ཀྱི་སྟོན་པ་དེའི་ཐུགས་ལ་ཤར་བ་ཉིད་ལ། སྔོན་འབྱུང་དུ་སྡུད་པ་པོས་དྲིན་ལ་ལན་ལྡོན་པའི་ཚུལ་དུ་ཕྱག་འཚལ་ལོ། །རྗེས་འཇུག་དུ་མ་འོངས་པའི་སྐལ་ལྡན་རྫོགས་པའི་དོན་དུ་ཕྱག་བཙལ་བ་ནི། རྒྱུད་ཀྱི་སྟོན་པ་དྲུག་པ་རྡོ་རྗེ་འཆང་དེ་ཉིད་ཀྱིས་སྔོན་བྱུང་དུ་བདུད་བཞི་ངང་གིས་བཅོམ་པས་རྗེས་འཇུག་མོས་པ་དང་ལྡན་པ་དེ་ཉིད་ཀྱི། ལུས་ངག་ཡིད་ཀྱི་མི་དགེ་བ་རྣམས་རང་བཞིན་ཤུགས་ཀྱིས་ཐུགས་རྗེས་བཅོམ་སྟེ། རྒྱུ་བསོད་ནམས་ཀྱི་ཚོགས་དང་ལྡན་ཏེ། ལས་ཀྱི་རྣམ་པར་སྨིན་པ་ལས་འདས་པས་རང་བྱུང་གི་ཡེ་ཤེས་ལས་ཀྱི་དབང་དུ་མི་འགྱུར་ཏེ། དགེ་བས་བསྐྱབ་ཏུ་མེད་ལ། སྔོན་བྱུང་དུ་སྟོན་པ་ཉིད་ཡེ་ཤེས་བཞི་ལྡན་པས་རྗེས་འཇུག་མོས་པ་དང་ལྡན་པ་དེས་བསྐུལ་ཞིང་གསོལ་བཏབ་ཀྱི་ཐུགས་རྗེས་ལྟ་བ་ཕྱིན་ཅི་ལོག་དུ་འཛིན་པའི་རྣམ་པ་རྣམས་བཅོམ་པས། འབྲས་བུ་ཡེ་ཤེས་ཀྱི་ཚོགས་དང་ལྡན་ཏེ། བག་ཆགས་སྔ་ཕྱིའི་ཞེན་པ་ལས་འདས་པས། རང་བྱུང་རིག་པའི་སྒྲོན་མ་བཞི་ལ་བརྩོན་འགྲུས་ཀྱི་མཐའ་དང་བྲལ་ནས། སྡིག་པས་གོས་པ་མེད་པ་ནམ་མཁའ་ལ་མདུང་བསྐོར་བའམ། ཆུ་ལ་རལ་གྲི་བཏབ་པ་ལྟ་བུའོ། །དེ་ལྟར་ན་སྐལ་ལྡན་དེ་སྟོན་པས་བྱིན་བརླབས་གཉིས་བཞུགས་པས་དྲི་མ་གཉིས་བཅོམ། ཚོགས་གཉིས་དང་ལྡན། ལས་དང་བག་ཆགས་ལས་འདའ། མཐའ་རྣམ་པ་གཉིས་ལ་མི་གནས་པའི་སྐལ་ལྡན་དེ་ལ། ཆོས་ཉིད་མངོན་སུམ་གྱི་སྣང་བ་མངོན་དུ་སྣང་བ་རང་དོན་ཁོང་དུ་ཆུད་ལ། འཕོ་བ་ཆེན་པོའི་རླུང་སྦྱང་བ་ལ་བརྟེན་ནས་གཞན་དོན་སྟོན་པས་དཔལ་ལོ། །དེ་ལྟར་རང་གཞན་གྱི་དོན་རྫོགས་པ་དེ་ཉིད་སྐལ་ལྡན་དེས། ཆོས་ཉིད་མངོན་སུམ་སྒྲོན་མ་བཞིའི་སྣང་བ་དང་། ཉམས་གོང་འཕེལ་གྱི་སྣང་བ་དང་། རིག་པ་ཚད་ལ་ཕེབས་པའི་སྣང་བ་དང་། ཆོས་ཉིད་ཟད་པའི་སྣང་བ་དང་བཞི་མཐར་ཕྱིན་པ་ལས་བྱུང་བས་ཏེ། སྔོན་དུ་སྟོན་པས་སྣང་བ་བཞིའི་དོན་མཁྱེན་པ་ལས་བྱུང་བས་ན། རྗེས་འཇུག་ལ་སྣང་བ་བཞི་པོ་དེ་ཚིག་ཙམ་དུ་མ་ཡིན་པར། མངོན་སུམ་དུ་རང་ལ་རང་ཤར་བས་ན། དེ་སྟོན་པའི་ཐུགས་རྗེ་གཉིས་བྱིན་བརླབས་ནས་བྱུང་བས་ན་མོས་པའི་སྒོ་ནས་དང་། དེ་ལྟར་རང་གིས་རྟོགས་པ་རང་ལ་རང་ངོ་མཚར་བ་ཉིད་ཀྱིས་ཉིད་ལ་ཕྱག་འཚལ་ལོ། །ཞེས་བྱའོ། །དེ་ལྟར་ན་སྔོན་དུ་སྡུད་པ་པོས་ཕྱག་བཙལ་བས་རང་གི་དྲིན་ལན་ཐོབ་པའི་དགོས་པ་དང་། རྒྱུད་ཟབ་མོའི་ཚིག་རས་ཆོད་དང་གཟུ་ལུམ་དུ་མི་འགྲོ་བའི་དགོས་པ་དང་། མ་འོངས་པའི་སེམས་ཅན་ཡི་རང་སྐྱེས་ཏེ་འཇུག་པར་འགྱུར་བའི་དགོས་ལ་ཡོད་དོ། །རྗེས་འཇུག་དུ་རྒྱུན་ཟབ་མོ་འདི་ལ་མོས་པ་སྤྱོད་པ་རྣམས་ཀྱི་ཚོགས་རྫོགས་པའི་དགོས་པ་དང་། དེ་ལྟར་ཚོགས་རྫོགས་པས་རྟོགས་པ་ཁྱད་པར་ཅན་སྐྱེ་རྒྱུད་ལ་སྐྱེ་བའི་དགོས་པ་དང་། ཆོས་ཉིད་མངོན་གསུམ་སྒྲོན་མ་བཞི་ཉིད་ཀྱི་སྣང་བ་རྟེན་ནས་མོས་འཇུག་གང་ཟག་བརྩོན་འགྲུས་རབ་དོན་འདི་ཉིད་ལ་སྟོབས་སུ་གྱུར་ནས་ཟག་བཅས་མི་སྣང་བར་སྣང་བ་བཞིའི་ཚད་རྫོགས་པས་འདི་ཉིད་ལ་ལྷག་མེད་དུ་སངས་རྒྱ་བའི་དགོས་པ་དང་། བརྩོན་འགྲུས་འབྲིང་པོ་གཅིག་སྣང་བ་བཞི་ཡི་ཡོན་ཏན་ལ་བརྟེན་ནས་བར་མ་དོ་ལ་སངས་རྒྱ་བའི་དགོས་པ་དང་། བརྩོན་འགྲུས་ཐ་མ་གཅིག་ཟབ་མོའི་ཆོས་ཀྱི་སྒོ་མཐོང་བའི་ཡོན་ཏན་རང་རྒྱུད་ཀྱི་སྟོན་པའི་གསུང་ཚིག་དང་ཡི་གེར་བཀོད་པ་རྣ་བའི་དབང་པོས་ཐོས་པའི་ཡོན་ཏན་དང་། དེ་ཉིད་ཕྱག་བཙལ་པ་ཙམ་གྱིས་རང་བཞིན་སྤྲུལ་པའི་སྐུ་ཡི་ཞིང་ཁམས་སུ་དབུགས་དབྱུང་ནས་མངོན་པར་སངས་རྒྱ་བའི་དགོས་པ་ཡོད་པས་ཕྱག་འཚལ་བའོ། ༈ །ད་ནི་རྒྱུད་ཀྱི་གཞུང་སྟོན་ཏེ། གོང་དུ་མཚན་གྱི་སྐབས་སུ་གཞུང་མདོར་བསྟན། འདི་དང་པོ་གླེང་གཞིའི་འོག་ནས་དེ་རྒྱས་པར་བཤད། གཞུང་རྫོགས་པ་ལེའུ་དང་པོའི་ཕྱེད་མན་ཆད་དང་། ལེའུ་གསུམ་པོ་ཤིན་ཏུ་རྒྱས་པར་བཤད་པའོ། །དེ་ལ་འདིར་ལེའུ་དང་པོའི་དོན་སྟོན་ཏེ། འདི་ལ་སྤྱི་དོན་གསུམ་སྟེ། རྒྱུད་ཟབ་མོ་འབྱུང་བར་བསྟན་པས་རྒྱུད་ཀྱི་གླེང་གཞི་བསྟན་པ་དང་། ལེའུ་བཞིའི་དོན་མདོར་བསྟན་པ་དང་། རྒྱང་ཞགས་ཆུའི་སྒྲོན་མའི་ཚིག་དོན་རྒྱས་པར་བཤད་པའོ། །དེ་ལ་དང་པོའི་གླེང་གཞི་ལ་གསུམ་སྟེ། ཟབ་མོ་མངོན་སུམ་གྱི་རྒྱུད་འདི་འབྱུང་དཀའ་བས་ཐུན་མོང་མ་ཡིན་པའི་གླེང་གཞི། སྟོན་པ་ཉིད་ཀྱི་རང་ལ་རང་སྟོན་གྱི་ཚུལ་དུ་གསུངས་པ་ལ་སྡུད་པ་པོས་ཚིག་གིས་མ་བཅོས་པར་བསྟན་པ་དང་། གླེང་གཞི་གཉིས་ཀྱི་མཚམས་སྦྱར་བ་སྒྲ་དོན་ཚིག་གིས་ཆོས་ཐམས་ཅད་ལ་བཟླ་བར་བསྟན་པ་དང་། ཐུན་མོང་གི་གླེང་གཞི་ཐེག་པ་ཐུན་མོང་པ་དང་སྒོ་བསྟུན་གྱི་ཚུལ་དུ་སྡུད་པ་པོས་ཚིག་ཏུ་བཀོད་པ་བསྟན་པ་གསུམ་ལས། ཐུན་མོང་མ་ཡིན་པའི་གླེང་གཞི་བསྟན་པ་ནི། རྒྱུད་འདི་སྟོན་པ་རྡོ་རྗེ་འཆང་ཆེན་པོས། ཐུགས་ཀྱི་དཀྱིལ་ནས་ཕྱུང་། མགུལ་གྱི་བུམ་པར་དྲིལ། ལྗགས་ཀྱི་དབང་པོར་བཀྲལ། ཚེམས་བཞི་བཅུ་རྩ་གཉིས་ཀྱི་བར་ནས་ཚངས་པའི་སྐད་ཀྱི་ཉེ་རིང་མེད་པར་གོ་བར་བྱ་བའི་ཕྱིར་བདག་གིས་ནི། གཞན་གྱིས་མ་ཡིན་པར་སྔོན་བྱུང་དུ་བདག་ཉིད་ལ་བདག་ཉིད་ཀྱིས་བསྟན་ལ། རྗེས་འཇུག་དུ་སྡུད་པ་པོ་རྒྱུའི་རྡོ་རྗེ་འཆང་ལ་གཞན་གྱི་མ་ཡིན་པར་བདག་ཉིད་རང་གི་བསྟན་པའོ། །དེ་ཡང་དུས་ཅི་ཙམ་པ་བསྟན་པ་ཡིན་ལ། སྔོན་བྱུང་དུ་བསྟན་པ་སྔ་མའི་ཞིང་ཁམས་སུ། སྡུད་པ་པོ་གཞན་ལ་བསྟན་པ་འདི་མ་ཡིན་པའི་དུས་ན་བསྟན་ལ། རྗེས་འཇུག་དུ་སྡུད་པ་པོ་ཁྱོད་ཉིད་ལ་ད་ལྟའི་དུས་འདི་ན་བསྟན་པ་ཡིན་ནོ། །དེ་ལྟར་སྟོན་པས་ཐུན་མོང་མ་ཡིན་པར་སྡུད་པ་པོ་རྒྱུ་དག་པའི་རྡོ་རྗེ་འཆང་ལ་གནང་བས། རྒྱུ་ཡི་རྡོ་རྗེ་འཆང་དེ་ལ་ཐེ་ཚོམ་སྐྱེས་ཏེ། འོ་ན་ཞིང་ཁམས་འདི་མིན་པ་ཇི་སྐད་བྱ་བར་སྟོན་པས་གནས་ཇི་སྐད་བྱ་བར་གསུངས་སྙམ་པ་དང་། འཁོར་རམ་སྡུད་པ་པོ་གང་ལ་གསུངས་སྙམ་དང་། འཁོར་རམ། དུས་རང་ནམ་གསུངས་སྙམ་པ་དང་། སངས་རྒྱས་གཞན་གྱིས་མ་གསུངས་པར། སྟོན་པ་གཅིག་པུས་གསུངས་པ་ལ ས་གཞན་གྱིས་མ་གསུངས་སམ་སྙམ་པའི་ཐེ་ཚོམ་ཡིད་ལ་སྐྱེས་པས། སྟོན་པའི་ཐུགས་ཀྱིས་མཁྱེན་ཏེ་སྡུད་པ་པོའི་ཐེ་ཚོམ་བཅད་པའི་ཕྱིར། སྡུད་པ་པོ་རྒྱུ་དག་པའི་རྡོ་རྗེ་འཆང་ཁྱོད་ཀྱི་རྣམ་པར་རྟོག་པ་ལ་སྔོན་བྱུང་ན་གནས་གར་ཆོས་འདི་བསྟན་སྙམ་པ་ན་གནས་ནི། སྟོང་པ་ཉིད་ཀྱི་གཞི་ཚད་མེད་པར་གསལ་བའི་དཀྱིལ་འཁོར་ཞེས་བྱ་བ་ཡིན་ནོ་ཞེས་ཐེ་ཚོམ་བསལ་ལོ། །དེ་སྡུད་པ་པོའི་གནས་ཀྱི་ཐེ་ཚོམ་ཆོད་དེ་འཁོར་ཇི་སྐད་བྱ་བ་ལ་བཤད་སྙམ་པ་ལ། གནས་དེ་ཉིད་ནས། འཁོར་ནི་མི་འབྱེད་པ་ཆེན་པོའི་འདུལ་སྟངས་སོ་སོ་མ་ཡིན་ཐ་དད་པ་མ་ཡིན་པའི་ཞེས་གསུངས་པས་འཁོར་གང་ལ་བཤད་སྙམ་པའི་ཐེ་ཚོམ་ཆོད་དོ། །སྡུད་པ་པོ་ཉིད་ལ་གནས་འཁོར་གྱི་ཐེ་ཚོམ་ཆོད་པས་སྔོན་བྱུང་དུ་ཞིང་ཁམས་ཇི་སྐད་བྱ་བ་གཅིག་ཏུ་གསུངས་སྙམ་པ་ལ། སྟོན་པས་གསུངས་པའི་ཞིང་ཁམས་ཀྱི་མིང་ནི་ཡེ་ནས་རང་གསལ་ཆེན་པོའི་གཞི་ཞེས་གསུངས་སོ། །དུས་ནམ་གསུངས་སྙམ་པ་ནི། རང་སྣང་བ་ཆེན་པོ་འགགས་མེད་དུ་ཤར་བའི་ཀློང་ནས་ཅེས་གསུངས་སོ། །སྟོན་པ་གཅིག་པུ་ལས་སངས་རྒྱས་གཞན་གྱིས་མ་གསུངས་སམ་སྙམ་པ་ལ་སྔོན་བྱུང་འགགས་པ་མེད་པའི་རིག་པ་རང་ལ་རང་ཤར་ནས་བརྗོད་དུ་མེད་པའི་དོན་འདི་འདས་པའི་སངས་རྒྱས་རྣམས་ཀྱིས་ཀྱང་གསུངས་སོ། །དེ་ནས་ང་ལ་སོགས་པའི་སངས་རྒྱས་རྣམས་ཀྱིས་ཀྱང་གསུང་ངོ་། །ཕྱིས་ཀྱང་མ་འོངས་པའི་དུས་ན། སངས་རྒྱས་རྣམས་ཀྱིས་ཀྱང་གསུང་བར་འགྱུར་རོ། །ཅེས་ཐུན་མོང་མ་ཡིན་པའི་གླེང་གཞི་རང་གཞུང་དུ་བཀའ་སྩལ་པས། རྒྱུད་དག་པའི་རྡོ་རྗེ་འཆང་གི་རྒྱུད་ཀྱི་ཐེ་ཚོམ་ཆོད་དེ་ཡིད་ཆེས་སོ། །དེ་དག་གི་འབྲས་བུ་བཤད་ན་སྟོང་པ་ནི་དངོས་པོ་རང་རྒྱུད་དུ་འཛིན་པའི་གནས་ས་རྡོ་དང་རི་བྲག་གི་གནས་མ་ཡིན་པ། རང་བཞིན་གྱིས་གསལ་ལ། ངོ་བོས་སྟོང་ལ། ཐུགས་རྗེ་ཤར་བ་ཉིད་ཀྱི་གཞི། ཀ་ནས་དག་པས་དྲི་མའི་མཐའ་ལས་འདས། མཐའ་དང་དབུས་མེད་པས་ཚད་འདི་ཡིན་བྱ་བར་གཟུང་དུ་མེད་པར་ཁྱབ་ལ། རང་བཞིན་གསལ་བའི་འོད་ལྔར་སུས་ཀྱང་བྱས་པ་མེད་པར་རང་ཤར་བའི་དཀྱིལ་ནས་སྟོན་པ་རྡོ་རྗེ་འཆང་ཆེན་པོས་འཁོར་ནི་འདི་དང་འདིའི་རྣམ་རྟོག་མེད་དེ་རིས་སུ་མེད་པས་མི་འབྱེད་པ་ཆེན་པོའི་ཐུགས་རྗེ་འགྲོ་བ་ཐམས་ཅད་ལ་གཟིགས་ཀྱང་། འགྲོ་བ་རྣམས་ཀྱི་མོས་པའི་བྱེ་བྲག་གིས་ཐེག་པའི་འདུལ་སྟངས་སོ་སོར་བསྟན་པ་ལས། རང་བཞིན་རྫོགས་པ་ཆེན་པོའི་རྒྱུད་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་ལས་ཁྱད་པར་དུ་སྒྲོན་མ་འབར་བ་འདི་ཟབ་པར་ཀུན་གྱི་ཐུན་མོང་མ་ཡིན་པར། སྔོན་འབྱུང་རིས་སུ་མེད་པའི་འཁོར་ལ་བསྟན་ལ། རྗེས་འཇུག་ད་ལྟ་རྒྱུ་ཡི་རྡོ་རྗེ་འཆང་ལ་སོགས་པ་མོས་པ་ཐ་དད་པ་རྣམས་ཀྱི་དོན་དུ་ཐུན་མོང་མ་ཡིན་པའི་གླེང་གཞི་འདི་བསྟན་པས། སྒྲོན་མ་རྣམ་པ་བཞིའི་སྣང་བ་མངོན་སུམ་ལམ་རྫོགས་པ་ཆེན་པོ། རང་སྣང་གཞི་རྫོགས་སུ་རྫོགས་པས་འཁྲུལ་པའི་དྲི་མ་རྣམ་པར་དག་པས། ཆོས་ཉིད་རྣམ་པར་དག་སྣང་བ་ཆེན་པོར་རང་བཞིན་སུས་ཀྱང་བྱས་པ་མེད་པའི་འཁོར་དུ་ཡེ་ནས་བཀོད་ཅིང་གནས་པ་ཡིན་ནོ། །དེ་དག་རྣམས་ཀྱང་ངོ་བོ་ཀ་ནས་དག་པའི་ཡེ་ཤེས་ལ་བྱེད་པའི་མཁན་པོ་མེད་པས་ཡེ་ནས་ངོ་བོ་སྟོང་པར་གནས་པས་རྟག་པ་མཐར་འཛིན་པའི་ཞེན་པ་ལས་རང་ལོག །རང་བཞིན་གསལ་བ་ཆེན་པོའི་གཞི་ལ་ཆད་པ་མཐར་འཛིན་པ་ལས་རང་ལོག་ཐུགས་རྗེ་འགགས་པ་མེད་པའི་སྟོན་པ་གདུལ་བྱ་ཡི་ཡུལ་མིང་འདྲ་བ་ཐ་དད་པ་ལ། འདུལ་བྱེད་ཀྱི་སྐུ་མི་འདྲ་བར་སྤྲུལ་ནས་དོན་བྱེད་པའི་རིག་པ་རང་ཤར་ནས། དེ་ལྟ་བུའི་གཞི་དེ་ལ་ཚིག་དང་ཡི་གེ་བརྗོད་པ་གང་གིས་ཀྱང་གཏན་ལ་མི་ཕེབས་པས། དངོས་པོ་གཤིས་ཀྱི་གནས་ལུགས་ལ་བརྗོད་དུ་མེད་དོ་ཞེས་བླ་དྭགས་སུ་གདུལ་བྱའི་སེམས་རྣམས་ལ་དོན་སྒྲོན་མ་བཞི་པོ་འདི་ཡིན་ནོ་ཞེས་སྔར་ལྟར་འདས་པའི་སངས་རྒྱས་རྣམས་ཀྱིས་གསུངས་སོ། །དེ་ལྟར་སྒྲོན་མ་འབར་བའི་རྒྱུད་འདི་ད་ལྟ་སངས་རྒྱས་རྣམས་ཀྱང་འདི་ཉིད། དོན་ལ་བཞུགས་ཤིང་རང་རང་གི་འཁོར་ལ་གསུངས་སོ། །ཕྱིས་ཀྱང་རྒྱུད་འདི་མ་འོངས་པའི་དུས་ན་སངས་རྒྱས་རྣམས་རང་རང་གི་འཁོར་གྱི་ནང་དུ་གསུངས་པར་འགྱུར་རོ། །འོ་ན་དེ་ལྟར་སྟོན་པ་དང་འཁོར་དང་། གནས་ལ་སོགས་པ་རྣམས་ཐ་དད་པ་ཡིན་ནོ་ཞེ་ན་མ་ཡིན་ཏེ། སྟོན་པ་ལོགས་གཅིག་གནས་དང་འཁོར་ལ་སོགས་པ་ཐམས་ཅད་ལོག་གཅིག་མ་ཡིན་ཏེ། ཐམས་ཅད་ངོ་བོ་གཅིག་ཏུ་བཞུགས་པས་ན། རང་སྣང་སྟེང་རང་འབྱུང་གི་ཡེ་ཤེས་ལ་མ་རིག་པ་ལ་སོགས་པ་གཅིག་ཀྱང་མེད་པས་གཞི་ཀ་དག་ཆེན་པོའི་མཛད་སྤྱོད་འགགས་པ་མེད་པར་ཟང་ཐལ་དུ་རང་གི་རང་བཞིན་དུ་ཤར་བ་ཡིན་པས། ཐམས་ཅད་དེ་ཉིད་ཀྱི་ཀློང་ནས་བྱུང་ཞིང་དེ་ཉིད་དུ་བཞུགས་ཤིང་། དེ་ཉིད་དུ་གཅིག་པའིི་ཕྱིར་ན། སྟོན་པ་ཡང་ང་། གནས་ཀྱང་ང་། འཁོར་ཡང་ང་། བསྟན་པ་དང་འཁོར་ཡང་ང་ཞེས་པས་སོ། །དེ་ལྟར་སྡུད་པ་པོའི་ཐེ་ཚོམ་ཐུན་མོང་མ་ཡིན་པའི་གླེང་གཞི་རང་གཞུང་དུ་བཅད་པ་བསྟན་ནས། ད་ནི་གླེང་གཞི་གཉིས་ཀྱི་མཚམས་སྦྱར་བ་སྒྲ་དོན་ཚིག་གིས་ཆོས་ཐམས་ཅད་ལ་ཟླ་བར་བསྟན་པ་ནི། སརྦ་ཨ་བ་མ་འ་བརྡ་ཐིམ་ཞེས་དུས་དེའི་དུས་ན་སུས་ཀྱང་བྱས་པ་མེད་པར་རང་བྱུང་དུ་ནམ་མཁའ་ལ་སྒྲ་བྱུང་བ་སྟེ། སྒྲ་དེ་འགྱུར་བྱེད་སྲས་བསྒྱུར་ན། ཆོས་ཐམས་ཅད་སྐྱེ་བ་མེད་པའི་ངང་དུ་གཉིས་མེད་དུ་ཐིམ་པ་ཞེས་བྱ་སྟེ། ཚིག་གིས་སངས་མི་རྒྱ་བའི་གནད་དུ་བྱུང་བའོ། །སྒྲ་དེ་ཡི་གེ་འབྲུ་སྦྱོར་གྱིས་བསལ་ན། ཆོས་ཐམས་ཅད་ཀྱི་ངོ་བོ་དེ་ལ་བྱས་སྤྱོད་དང་བརྩོན་འགྲུས་ཀྱི་རྣམ་པ་ཇི་ལྟར་བྱས་ཀྱང་དེ་ཉིད་ལ་རང་བཞིན་གྱིས་འགྱུར་བའམ། བྱས་བཅོས་ཀྱིས་འགྱུར་བའམ། དུས་ཀྱིས་འགྱུར་བ། སྦྱངས་པའི་ཡོན་ཏན་གྱིས་འགྱུར་བ་ཡོད་མི་སྲིད་པས་ས་ཞེས་བྱུང་བའོ། །མི་རྟགས་སོ་སོའི་སྒྲ་དེ་སྦྱར་ནས་ས་ཞེས་པ་སྟེ། འདི་ནི་སྦྱངས་བྱ་བློ་རིགས་ཀྱིས་ཞེས་མིང་དུ་བཏགས་པ་དེས་དང་པོ་རབ་ཏུ་དགའ་བ་ལ་སོགས་པའི་བགྲང་བྱ་མ་ཡིན། འགྲོ་འཛིན་རང་སྣང་གི་ས་ཞེས་བྱ་བ་འགྲོ་བ་རྣམས་ཀྱིས་མིང་དུ་བཏགས་པའི་ས་དེ་ཡང་མ་ཡིན། ལུས་བསྐྱེད་སྨིན་པའི་ས་ཞེས་བྱ་བ་འབྱུང་བའི་ནང་ནས་འགྲོ་བའི་ས་དེ་ཡང་མ་ཡིན། ཡི་གེ་བརྡ་སྦྱོར་གྱི་ས་ཞེས་བྱ་བ་ཡི་གེ་རིས་སུ་བྲིས་པའི་ས་དེ་ཡང་མ་ཡིན། རང་བཞིན་གྲུབ་ཚུལ་གྱི་ས་ཞེས་བྱ་སྟེ་འགྲོ་བ་རྣམས་ཀྱི་རྩའི་ནང་ན་རང་བཞིན་གནས་ཀྱི་ཡི་གེ་ས་ཞེས་བྱ་བ་སུས་ཀྱང་བྱས་པ་མེད་པ་ཡོད་དེ་ཡང་མ་ཡིན། འོ་ན་ས་ལྔ་པོ་ལ་གང་ཡང་མ་ཡིན་ནས་འདི་གང་ཡིན་ན། ཆོས་ཉིད་འགྱུར་བ་མེད་པའི་ས་ཡིན་ནོ། །དེ་ཡིན་པས་ན་འགྱུར་བ་མེད་པའོ། །ས་ལྔ་པོ་ནི་བགྲང་བྱ་བློ་རིགས་ཀྱིས་ཡང་གཅིག་ནས་གཅིག་ཏུ་འཕོ་བར་འགྱུར་བ་ཡིན། འཇིག་རྟེན་རག་པའི་ས་ཡང་བསྐལ་པའི་ཆགས་འཇིག་གིས་འཇིག་པར་འགྱུར་རོ། །ལུས་བསྐྱེད་སྨིན་པའི་ས་ཡང་ལུས་བསྐྱེད་པས་ལུས་འཇིག་པའི་དུས་ན་རྩ་ལུས་དེ་ལ་མི་གནས་པ་འཇིག་པ་ཡིན་ལ། རང་བཞིན་གྲུབ་ཚུལ་ཀྱང་བརྟེན་པའི་རྩ་མི་རྟག་པས་འགྱུར་བ་ཡིན་ནོ། །ཆོས་ཉིད་ལ་འགྱུར་བ་མེད་པ་ཡིན་པས་སྒྲས་གྲུབ་ན་བརྡས་བཏགས་པའི་ཡི་གེར་མཚོན་དུ་བྱུང་བའོ། །དེ་ལྟར་འགྱུར་བ་མེད་པའི་ཆོས་ཉིད་སྒྲིབ་བྱེད་ཡོད་དམ་མེད་ཞེ་ན། འཁྲུལ་གཞི་གནས་ལུགས་ཀྱི་སྒོ་ནས་མ་རིག་པ་གསུམ་གྱི་སྒྲིབ་བྱེད་དུ་བྱུང་བས་བ་ཡིན་ཏེ། རྒྱུ་མེད་ཟང་ཐལ་དུ་གཏན་ལ་མ་ཕེབས་པ་ལས་རྒྱུ་བདག་ཉིད་གཅིག་པའི་མ་རིག་པ་བྱུང་ལ། གཉིས་མེད་རང་སྣང་དུ་གཏན་ལ་མ་ཕེབས་པ་ལས་ལྷན་ཅིག་སྐྱེས་པའི་མ་རིག་པ་བྱུང་ལ། ཡུལ་རྐྱེན་རང་དག་དུ་གཏན་ལ་མ་ཕེབས་པ་ལས་ཀུན་ཏུ་བཏགས་པའི་མ་རིག་པར་བྱུང་བས་ན་བ་ཞེས་བྱུང་ཏེ། དེ་ཡང་མི་རྟགས་སོ་སོའི་སྒྲ་དང་སྦྱར་ན། འཇིག་རྟེན་བཏགས་པའི་བ་ནི་བྱོལ་སོང་གི་བ་ལ་སོགས་པ་ཡིན་ཏེ། སྒྲིབ་པ་མ་ཡིན་ཡིག་བརྡའ་གོང་དང་འདྲ། རང་བཞིན་གྲུབ་པ་ཡང་འདྲའོ། །དེ་ལྟར་ན་མ་རིག་པ་གསུམ་གྱིས་གོང་གི་ཆོས་ཉིད་འགྱུར་བ་མེད་པའི་ས་དེ་འགྲོ་བ་ཐམས་ཅད་ལ་ཡོད་ཀྱང་སྒྲིབ་པས་ན་བ་ཞེས་སུ་བྱུང་བའོ། །འོ་ན་དེ་ལྟར་མ་རིག་པ་གསུམ་གྱིས་སྒྲིབ་ན་འཁོར་བ་ལས་ཐར་པའི་ཐབས་མེད་དོ་ཞེ་ན། དེ་ལྟར་མ་ཡིན་ཏེ། ཞེས་བྱ་སྟེ་གོང་གི་ར་དེ་རྒྱན་གྱི་ཡི་གེར་བྱུང་བས། །འཆར་བྱེད་དུ་བྱུང་བས་སྟེ། དེ་ལྟར་མ་རིག་པ་གསུམ་པོ་དེ་ཤར་འཁྲུལ་གཞི་གནས་ཚུལ་གྱི་གོ་ནས་ཤར། འཁོར་བ་རང་དག་གི་ངོས་ནས་དག་སྟེ། ཤར་བ་རང་ཤར་དག་པ་རང་དག་དེ་དག་པ་རང་དག་པས། གྲོལ་བ་རང་གྲོལ། དཔེར་ན་སྤྲིན་པ་དང་ཉི་མ་བཞིན་དུ། སྤྲིན་པ་རང་བྱུང་བས་ཉི་མ་འགྲིབ་པ་ལྟར་སྣང་སྟེ། ཉི་མ་ལ་སྤྲིན་པས་གོས་པ་མེད་ལ་སྤྲིན་པ་ལ་ཡང་ཉི་མས་མ་གོས་པ་བཞིན་ནོ། །དེ་མིང་བཏགས་སོ་སོའི་སྒྲ་དང་སྦྱར་ན། མཚོན་བྱ་མིང་གི་ར་ནི་དངོས་པོ། བརྡ་སྦྱོར་ཡི་གེའི་ར་དང་། རང་བཞིན་གྲུབ་ཚུལ་དང་། བཏགས་པའི་མིང་གི་ར་ལ་སོགས་པ་རྣམས་ནི་ར་ཡིན་ལ་འཆར་བྱེད་མ་ཡིན་ནོ། །འདི་ནི་རོལ་པ་འཆར་ཚུལ་གྱི་ར་ས་སྟེ་འཆར་བྱེད་དུ་བྱུང་བའོ། །དེ་ལྟར་མ་རིག་པ་གསུམ་གྱིས་གོས་པ་མེད་པའི་ཆོས་ཉིད་མི་འགྱུར་བ་དེ་ཉིད་ལ། ཐོག་མ་སྐྱེ་མ་མྱོང་། ད་ལྟ་སྐྱེ་བ་ལ་མི་གནས། ཐ་མ་སྐྱེ་མི་སྲིད་པས་ཨ་ཞེས་པ་སྟེ། དེ་ལྟར་སྐྱེ་བ་མེད་པར་ཅེས་ཤེས་ན་རྒྱུ་མ་རིག་པ་གསུམ་རང་དག་པས་ཐོག་མ་སྐྱེ་མ་མྱོང་སྟེ། འཁྲུལ་ན་ཞེན་པའི་བློ་ལས་འདས། རྐྱེན་སྣང་བ་སྐུ་གསུམ་དུ་ཤར་བས་ལུས་བདག་ཏུ་འཛིན་པའི་བློ་ལས་གྲོལ་བས། ད་ལྟ་འདི་ནི་སྐྱེ་བ་ཡིན། ཞེས་པའམ། འདི་ནི་མི་སྐྱེ་བ་ཡིན་ནོ་ཞེས་ཐ་སྙད། མིང་དུ་མེད་པས་སྐྱེ་བ་ལ་མི་གནས། རྒྱུ་རྐྱེན་གཉིས་སུ་འདོགས་པའི་མཁན་པོ་ཙམ་དུ་ཡང་སྒྲུབ་པ་མེད་པས་ལས་དང་རྣམ་སྨིན་མཚམས་སྦྱོར་བའི་བློ་ལས་གྲོལ་བས། མཐའ་གྲོལ་ཅི་ཡང་ངོ་བོར་ཀྱང་གདགས་སུ་མེད་པས་ད་སྐྱེ་མི་སྲིད་དོ། །དེ་ཡང་བརྗོད་པའི་ཚིག་གི་སྐྱེ་མེད་དང་། བཏགས་པ་མིང་གི་སྐྱེ་མེད་དང་། སྙམ་བྱེད་ཡིན་ཚུལ་གྱི་སྐྱེ་མེད་དང་། གྲུབ་མཐའ་རང་བྱུང་གི་སྐྱེ་མེད་མ་ཡིན་ཏེ། ལྟ་བསྒོམ་གདར་ཤ་གཅོད་པའི་སྐྱེ་མེད་དུ་ལ་བཟླ་བའོ། །དེ་ཡང་མིང་བཏགས་སོ་སོའི་སྒྲ་དང་སྦྱར་ན། མཚོན་བྱ་རྟགས་ཀྱི་ཨ་ནི་རྟགས་སུ་བཀོད་པ་རྟགས་སྟེ་འདི་ལ་མཚོན་ཚུལ་སྣ་ཚོགས་སུ་སྟོན་པས་སྐྱེ་མེད་གཅིག་པུར་འགྲོ་བའི་ངེས་པ་མེད། བརྡ་སྦྱོར་ཡི་གེའི་ཨ་བྲིས་པ་དེ་ཡང་ལ་ལས་སྐྱེ་མེད་མཚོན་སྟེ་ལ་ལས་འགགས་མེད་མཚོན་པ་ལ་སོགས་པར་ངེས་མེད་རང་བཞིན་གྲུབ་ཚུལ་དང་། བཏགས་པ་མིང་འདྲ། རྟག་པ་སྒྲ་ཡི་ཨ་ནི་ཨ་ཞེས་རྟག་པ་སྟེ། དེ་ཡང་སྐྱེ་མེད་དུ་འགྲོ་བའི་པོ་དེ་མེད་དོ། །འོ་ན་འདི་དག་གང་ཡང་མ་ཡིན་པས། ཆོས་ཉིད་སྤྲོས་བྲལ་གྱི་ཨ་སྐྱེ་མེད་ངོས་གཟུང་དང་བྲལ་བའོ། །དེ་ལྟར་སྐྱེ་མེད་པ་དེ་ཉིད་རང་བེམ་པོ་ལྟ་བུ་ཡིན་པས་སྙམ་པ་ལ་མཁྱེན་ཏེ་དངོས་པོའི་རིགས་སྣང་ལས་ལོག་པས་པ་ཞེས་བྱ་སྟེ། སྟོང་པ་དེ་ཡང་ཉི་ཚེ་བའི་ཅི་ཡང་མེད་པའི་སྐྱེ་མཆེད་ཀྱི་ལྷའི། སྟོང་པ་ལྟ་བུ་མ་ཡིན་ཏེ། བདེ་བ་ཉམས་མྱོང་དུ་ཡོད་ལ། རིག་མེད་སྟོང་པ་ནམ་མཁའ་ལྟ་བུ་མ་ཡིན་ཏེ། ཤེས་ཤིང་མཁྱེན་པ་མ་འགགས་པར་གསལ་ལ། སྒྲོ་བཏགས་སྟོང་པ་གྲུབ་པའི་མཐའི་སྟོང་པ་ཞེ་འདོད་དང་མ་བྲལ་བ་མ་ཡིན་ཏེ། འདོད་པ་ཚིག་ཙམ་དུ་གྲུབ་པ་མེད་ཅིང་། རང་གསལ་སྙིང་པོའི་བདག་ཉིད་དུ་ཡོད་ལ། རྒྱུན་ཆད་སྟོང་པ་སྣང་ངོ་གང་དུ་མེད་པ་མ་ཡིན་ཏེ། ཐུགས་རྗེ་འཆར་བྱེད་འགགས་པ་མེད་པའོ། །དེ་ཡང་མིང་བཏགས་སོ་སོའི་སྒྲ་དང་སྦྱར་ན། མཚོན་པ་རྟགས་བཀོད་པའི་པ་ནི་མིང་དུ་མ་རྣམས་ཏེ་སྟོང་པ་མ་ཡིན་ནོ། །བརྡ་སྦྱོར་ཡི་གེ་བྲིས་པ་རྣམས་ཏེ་སྟོང་པ་འབའ་ཞིག་ཏུ་འགྲོ་བའི་ངེས་བྱེད། གྲུབ་ཚུལ་གྱི་པ་གོང་དང་འདྲ། གདགས་པ་རྒྱན་གྱི་པ་རྒྱན་གྱི་བྱེ་བྲག་པ་རྣམས་དང་། མིང་པ་ལ་སོགས་ཏེ། སྟོང་པ་མ་ཡིན། འདི་ནི་ཆོས་ཉིད་རང་སྣང་གི་པའོ། །དེ་ལྟར་སྟོང་པ་དེ་ཡང་གཞི་དངོས་པོའི་འདུག་ཚུལ་གང་གིས་ཀྱང་། མ་བཅོས་མ་བསླད་པར་གནས་པས་ན་མ་ཞེས་པས་སྟེ། བཏགས་པ་ལྟར་སྣང་གི་གཞི་མ་བཅོས་པ་གནས་པའི་ཡུལ་དེ་དེ་མ་ཡིན་ཏེ། མ་བསླད་གཉུག་མའི་དོན་དུ་གནས་པ་ལ། གནས་སྐབས་བྱེ་བྲག་གི་གཞི་གང་ན་གནས་པའི་འདུག་ས་སྟེ། དེ་མ་ཡིན་པར་མ་བཅོས་རང་བཞག་ཏུ་གནས་པའོ། །དངོས་པོ་གཤིས་ཀྱི་གཞི་མ་བཅོས་པ་ཉིད་ལ་དྲི་མའི་སྐྱོན་གྱིས་མ་གོས་པ་ཡིན་ལ། དེ་རྟོགས་པར་བྱེད་པའི་ཡན་ལག་ཏུ་ལུས་ངག་མ་བཅོས་རང་སོར་བཞག་པས། འཁྲུལ་པ་མ་སྙོག་པ་རང་དྭངས་ཏེ། བཞུགས་ཚུལ་མ་བསླད་པར་གཞི་ལ་གནས་པའོ། །དེ་ཡང་མིང་བཏགས་སོ་སོའི་སྒྲ་དང་སྦྱར་ན། ལྷག་མ་རྣམས་གོང་དང་འདྲ་ལ། ལུས་བསྐྱེད་མངལ་ཞུགས་ཀྱི་མ་ཡང་གནས་སྐབས་ཀྱི་གཞི་ཡིན་ཏེ་དངོས་པོའི་བཞུགས་ཚུལ་མེ་ཡིན་པས་ན་འདི་ནི་གཞི་མ་ཆོས་པའི་མའོ། །དེ་ལྟར་གཞི་མ་བཅོས་པ་དེ་ཡང་མཐའ་གྲོལ་ཚིག་ལས་འདས་པར་རང་ལ་ལྟ་བས་ན་ལ་ཞེས་པས་སྟེ། མཐའ་ཞེས་ནི་བགྲོད་པ་ལམ་གྱི་མཐའ་གྲོང་ཁྱེར་ལྟ་བུ་ཡང་མ་ཡིན་སྣང་བ་ཡུལ་གྱི་མཐའ་ཕྱིའི་རྒྱ་མཚོ་ལ་ཐུག་པ་ལྟ་བུ་ཡང་མ་ཡིན། ལས་དང་བག་ཆགས་ཀྱི་མཐའ་རྣམ་པར་སྨིན་པ་དང་། ཡུལ་སེམས་གཉིས་ཀྱི་མཐའ་གཅིག་ཏུ་མི་གནས་པ་དང་། ཡོད་མེད་གཉིས་ཀྱི་མཐའ་འདྲེར་མི་བཏུབ་པ་དང་། རྟག་ཆད་གཉིས་ཀྱི་མཐའ་འབྲས་བུ་མེད་པ་རྣམས་ལས་གྲོལ་བས་སྟེ། གྲོལ་བ་དེ་ཡང་འདུས་བྱས་པའི་རྣམ་པ་མདུད་པ་གྲོལ་བ་ལྟ་བུ་དང་། བཙོན་ལྕགས་ལས་གྲོལ་བ་དང་རྒྱལ་པོའི་གཉན་ལས་གྲོལ་བ་ལྟ་བུ་མ་ཡིན་ཏེ། ཡེ་ནས་གྲོལ་བའི་དོན་ཉིད་རང་གྲོལ་རང་གིས་གྲོལ་བ་ངོ་ཤེས་པ་ལ་བྱའོ། །དེ་ཡང་དམིགས་པ་རྫས་ཀྱི་མཐའ་གྲོལ་དང་། མ་འབྱམས་ཚིག་གི་མཐའ་གྲོལ་དང་། མུ་བཞི་ཡིན་ཚུལ་གྱི་མཐའ་གྲོལ་གསུམ་མ་ཡིན་པར། འདི་ནི་བློ་ཡི་མཐའ་ལས་གྲོལ་བས་ཚིག་གི་རྗེས་མི་གཅོད། ཉོན་མོངས་པའི་མཐའ་ལས་གྲོལ་བས་གཉེན་པོ་གཞན་ལ་རག་མ་ལུས། ལས་དང་བག་ཆག་ལས་གྲོལ་བས་རྒྱུད་རྣམ་སྨིན་ལ་ལྟོས་མི་འཆའ། གཅོད་པའི་ཤེས་པ་ལས་གྲོལ་བས་ཡིད་དཔྱོད་དང་མཉམ་བྱེད་ཀྱི་ཕྱོགས་སུ་མ་ལྷུང་། སྐུ་དང་ཡེ་ཤེས་ལས་གྲོལ་བས་བཟང་ངན་རེ་དོགས་ཀྱི་ཁོང་ཐག་ཆོད། ལྟ་བསྒོམ་སྤྱོད་པའི་མཐའ་ལས་གྲོལ་བས་བརྩོན་འགྲུས་དང་བྱ་བྱེད་ལས་འདས་པའོ། །མིང་བཏགས་སོ་སོའི་སྒྲ་དང་སྦྱར་ན་གཞན་གོང་དང་འདྲ་བསྒྲོད་བྱ་ཡུལ་གྱི་ལ་ལ་ཞེས་རྒལ་བྱེད་ལྟ་བུ་མ་ཡིན་ནོ། །དེ་ལྟར་མཐའ་གྲོལ་ཆེན་པོའི་ལྟ་བ་དེ་ཉིད་ཡེ་ནས་འདི་འདྲ་ཞེས་བསྟན་དུ་ཡོད་མ་མྱོང་བས་དྷ་ཞེས་པས་སྟེ། ད་ནི་མེད་པ་ཆད་པ་མཚོན་པའི་སྟེ། མཐའ་གྲོལ་དེ་ལ་དངོས་པོ་མེད་པས་རགས་པ་མཐར་འཛིན་པ་ལས་རང་ལོག་ཏེ། དེ་ཡང་རྒྱུ་རྐྱེན་བར་ཆད་ཀྱིས་ཆད་པ་ཤེས་པ་གློ་བུར་བ་འགགས་ཕྱི་ནས་སྐྱེ་མི་སྲིད་པ་ལྟ་བུ་མ་ཡིན་ཏེ། ཡེ་ནས་ཆད་པས་སྐྱེ་བྱ་སྐྱེ་བྱེད་ལས་འདས། མེད་པ་གཉིས་འགྱུར་གྱི་ཆད་པ་སྔར་མེད་ཕྱིས་མེད་ད་ལྟ་གློ་བུར་འདོད་པ་ལྟ་བུ་མ་ཡིན་བྱས་པ་འབད་རྩོལ་གྱིས་དག་པའི་ཆད་པ་དངོས་པོ་འབད་པས་དག་ནས་མེད་པར་འདོད་པ་ཡང་མ་ཡིན་ཏེ། འདི་ནི་ཡེ་ནས་ཡོང་མ་མྱོང་པས་གློ་བུར་གྱི་ཤེས་པ་འབྱུང་མི་སྲིད་ལ། ད་ལྟ་ཡོད་པ་ལ་མི་གནས་པས། འཁྲུལ་པའི་རང་རྐྱེན་གྱིས་གནོད་མི་སྲིད། ཕྱིས་ཀྱང་ཡོད་པར་མི་འགྱུར་མི་སྲིད་པས་རྣམ་སྨིན་བསགས་པའི་ལུས་ལེན་མི་སྲིད་དོ། །འོ་ན་ད་ལྟར་གྱི་ལུས་དང་དབང་པོའི་སྣང་བ་འདི་ཅི་ཡིན་ཞེ་ན། ཡོད་པས་དངོས་པོ་མཐར་འཛིན་དུ་མ་གྲུབ་པས་ཡོད་པར་གནས་པ་མིན་པའི་གནད་ཀྱིས། ཞེས་པས་བདག་ཏུ་བདག་ཏུ་འཆིང་མི་སྲིད། མེད་པ་རང་བཞིན་མེད་པས་མཐར་སྣང་རགས་པ་ལ་ལྟོས་མི་སྲིད་པས་དངོས་མེད་རང་སྣང་དུ་ཟང་ཐལ་བའི་གནད་ཀྱི། འདི་ལ་གྲུབ་པ་ཅི་ཡང་མེད། ལུས་ལ་ལུས་སུ་གྲུབ་པ་མེད་པ་མིང་ཐ་དད་པ་མེད་པས་རྩལ་བས་གྲུབ་པ་ཅི་ཡང་མེད། སེམས་ལ་སེམས་སུ་གྲུབ་པ་མེད་པས་སྔར་བྱུང་ཁུངས་མེད་ལ། ད་ལྟ་རྟེན་ས་མེད་ལ་ཕྱིས་འགྲོ་ས་མེད་པས་བཙལ་བས་མེད་ཅིང་ཡོད་པ་ལ་མི་གནས་པས་གཏན་ལ་ཕེབས་སོ། །མིང་བཏགས་སོ་སོའི་སྒྲ་དང་སྦྱར་ན་གོང་མ་དང་འདྲ། དེ་ལྟར་མེད་པའི་མཐའ་གྲོལ་ལ་ཕྱང་ཆད་པའམ། ཆད་པ་མཐར་འཛིན་པའི་དྲི་མའི་སྐྱོན་མེད་དམ་ཞེ་ན། དེ་མེད་པས་དེ་ལ་དག་བྱེད་ཀྱི་ཡི་གེ་ཧ་བཏགས་པ་ནང་འབྲེལ་གྱི་ཡི་གེ་འགྱུར་ཞེས་བྱ་སྟེ། འབད་རྩོལ་གྱིས་དག་པ་དང་། རང་བཞིན་གྱིས་དག་པ་དང་། བཏགས་པའི་དག་པ་རྣམས་མ་ཡིན་པར་ཡེ་ནས་དག་པས་ད་དེ་ཉིད་ལ་དག་བྱ་བ་མ་དག་བྱ་བའི་ཐ་སྙད་ལས་འདས་པས། མ་དག་པའི་ཕྱོགས་ཡེ་ནས་མ་དག་པ་མ་རིག་པ་དང་། གློ་བུར་དུ་མ་དག་པ་སེམས་དང་། བྱས་པས་མ་དག་པ་རྣམ་པར་སྨིན་པ་དང་། རང་བཞིན་གྱིས་མ་དག་པ་ཕྱི་ནང་སྣོད་བཅུད་ལ་སོགས་པ་རྣམས་ལས་ལོག་པའི་རང་དག་མཐའ་གྲོལ་ཕྱོགས་སུ་མ་ལྷུང་བའི་ལྟ་བ་ཞེས་བྱ་བར་བཞུགས་པའོ། །མིང་བཏགས་གོང་མ་ལྟར་སྤྱད་དོ། །འོ་ན་མཐའ་གྲོལ་ཆེན་པོའི་ལྟ་བ་དེ་ཡི་གེ་རྣམ་པ་ཐ་དད་པར་བྱུང་བས་དེ་ཡང་ཐ་དད་ཡིན་ནོ་ཞེ་ན། མ་ཡིན་ཏེ། ཤེས་བྱ་དང་ཤེས་པའི་རྣམ་པ་ཐམས་ཅད་ཡེ་ཤེས་མཐའ་གྲོལ་ཆེན་པོ་གཅིག་ཏུ་འདུས་པའི་ན་ནི་ཞེས་པས་ཏེ། རང་བཞིན་གྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་དང་། བཏགས་པ་མིང་གི་དཀྱིལ་འཁོར་དང་། བརྗོད་པ་ཚིག་གི་དཀྱིལ་འཁོར་རྣམས་མ་ཡིན་པར། དངོས་པོ་རང་གི་འདུག་ཚུལ་ཤེས་བྱ་ཕྱིན་ཅི་མ་ལོག་པའི་ཡོངས་རྫོགས་མཐའ་གྲོལ་གྱི་དཀྱིལ་འཁོར་དུ་མ་འདུས་པ་མེད་པར་འདུས་པའོ། །མིང་བཏགས་གོང་དང་འདྲའོ། །འོ་ན་དཀྱིལ་འཁོར་དེའི་མཚན་ཉིད་ཅི་ཡིན་ཞེ་ན། འདྲེན་པའི་ཡི་གེ་ཞེས་བྱ་སྟེ་གུ་གུ་དེ་རང་གསལ་གོས་པ་མེད་པའི་འོད་ལྔས་ཁྱབ་ཅིང་རང་གྲོལ་བས་ན་མཐའ་གྲོལ་ཞེས་བྱའོ། །འོ་ན་མཐའ་གྲོལ་ཞེས་བྱ་བ་དེ་ཉིད་རང་གང་ཡིན་ན་གོང་མའི་གཞི་མ་བཅོས་པ་དེ་ཉིད་རང་ཡིན་པས་ལཱ་ཞེས་གོང་དུ་བསྟན་པ་དང་མཚུངས་སོ། །འོ་ན་དེ་དག་ཀྱང་སྒྲ་དོན་འབྲེལ་སྦྱར་ན་ཆོས་ཐམས་ཅད་སྐྱེ་བ་མེད་པའི་ངང་དུ་གཉིས་མེད་དུ་ཐིམ་པ་ཞེས་བྱ་བ་གང་ཟག་གཅིག་ཚིག་གཅིག་པོ་དེ་ལ་བརྟེན་ནས་སངས་རྒྱ་བའི་མན་ངག་ཏུ་བསྟན་པའོ། །ད་འོ་ན་དེ་ཀ་ཡེ་ནས་སངས་རྒྱ་བའི་ལྟ་བར་འདུག་ན་ད་ལྟར་གྱི་འཁྲུལ་པའི་སེམས་ཅན་འདི་དག་ལ་སངས་རྒྱ་བའི་སྐལ་པ་ཡོད་དམ་མེད་སྙམ་ན། ཅི་སྟེ་མེད་དེ། བཻ་ཏ་ཨ་ལོ་ཀ །ཞེས་བསྟན་པས་ན། དེ་ཡང་སྒྲ་བརྡ་དོན་བསྒྱུར་ན། འཇིགས་པ་མེད་པའི་སྣང་བ་རྣམ་པར་དག་པ་ཞེས་ཡིན་པས། དེའི་སྣང་བ་འདི་ལ་བྱས་བཅོས་ཅི་ཡང་། བྱར་མེད་པས་སངས་རྒྱ་བའི་གནད་དུ་བྱུང་བའོ། །སྒྲ་ཡི་གེ་འབྲུ་སྦྱོར་གྱིས་བསིལ་ན། འཁྲུལ་བ་སོར་བཞག་གི་མ་རིག་པས་སྟེ། ཡོད་ཐོས་སྣང་གྲགས་ཐམས་ཅད་ལ་ཁྱབ་པས་ན་བཏགས་པ་མིང་གི་མ་རིག་པ་བྷེ་ཞེས། ཡོད་པར་འདོགས་མཁན་ཀྱང་མ་རིག་པ། དེ་བཞིན་དུ་མེད་པ་དང་། ཡིན་པ་དང་། མིན་པ་དང་། འཁོར་བ་དང་མྱ་ངན་ལས་འདས་པ་དང་། སངས་རྒྱས་སེམས་ཅན་ཐམས་ཅད་དུ་འདོགས་པ་མ་རིག་པ་ཡིན་པས་ན། བཏགས་པ་མིང་ལ་ཡང་དག་པར་བརྟགས་པས་གྲུབ་པ་མེད་པ་དང་། ཡིན་པ་མེད་པ་དང་། མཚན་ཉིད་མེད་པ་དང་སྙིང་པོ་མེད་པར་ཤེས་པས། དེ་ལྟར་འདོགས་མཁན་གྱི་མ་རིག་པ་མ་གྲུབ་པ་ཡོད་མི་སྲིད་པས་འཁྲུལ་པ་རང་དག་པས་དེ་ལ་ཧ་བྱུང་བའོ། །དེ་གཉིས་ཀ་གོང་དང་འདྲའོ། །ཧ་དེ་ཡང་བཏགས་པ་མིང་རྣམ་པར་དག་པ་བྱུང་བའོ། །དེ་ལྟར་མ་རིག་པ་རང་དག་པས་ལམ་གཉིས་སུ་ཤར་ཏེ་མ་རིག་པ་གཞི་ལ་ཁྱབ་བྱེད་དུ་གནས་པས་ལམ་མ་དག་པར་བྱུང་། དེ་ཉིད་མ་འཁྲུལ་པ་ཡེ་ནས་དག་པའི་ཆ་ན་ལམ་དག་པར་བྱུང་བས་ན་འགྲེང་བུ་གཉིས་བྱུང་བའོ། །ལམ་མ་དག་པ་ནི་ལམ་མེད་པས་མ་དག་སོ་སོའི་སྐྱེ་བོ། ལམ་ལོག་ནས་མ་དག་པ་མུ་སྟེགས་ཆད། ལམ་གོལ་ནས་མ་དག་པ་ཉན་ཐོས་དང་། རང་རྒྱལ། བྱང་སེམས་སོ། །དག་པའི་ལམ་ལ་གཉིས་སྟེ། ལམ་རྒྱལ་ཐོབ་དང་། ལམ་མངོན་གསུམ་པའོ། །དེ་ལ་འདི་དེ་དག་ཀུན་མ་ཡིན་ཏེ། སྒྲོན་མ་བཞི་ལ་བརྟེན་ཏེ་ཁྱད་པར་དུ་དབྱིངས་རྣམ་པར་དག་པའི་སྒྲོན་མ་ལ་བརྟེན་ནས་མངོན་གསུམ་ལམ་དུ་བྱེད་པའོ། །འོ་ན་ལམ་མངོན་སུམ་པ་དེ་དུས་ཐམས་ཅད་མེད་དམ་སྙམ་སྟེ། གནས་སྐབས་ཙམ་མམ། ཡུད་ཙམ་མམ་སྐད་ཅིག་དུམ་བུ་ལས་རྒྱུན་ཡོད་མི་སྲིད་སྙམ་ན། དེ་ལྟར་མ་ཡིན་ཏེ་དུས་ཐམས་ཅད་དུ་བརྟན་པར་བཞུགས་པས་ན། ཏ་ཞེས་བྱུང་བས་དེ་ཡང་གདོད་མ་ནས་མི་རྟག་པ་སྤྲིན་དང་ན་བུན་དང་། གློ་བུར་དུ་མི་རྟག་གློག་དང་འཇའ་ཚོན་དང་། སྐྱེས་པས་མི་རྟག་པ་འགྲོ་བ་རྣམས་དང་། བྱས་པས་མི་རྟག་པ་འདུས་བྱས་ཀྱི་ལམ་རྣམས་དང་། མ་སྐྱེས་ཀྱང་མི་རྟག་པ་ཆུའི་སྦུ་བ་དང་། མ་བྱས་ཀྱང་མི་རྟག་པ་དབྱར་གྱི་རྩི་ཐོག་དང་། སྐད་ཅིག་ཏུ་མི་རྟག་པ་བྲག་ཆ་དང་། ཡུད་ཙམ་དུ་མི་རྟག་པ་དྲི་ཟའི་གྲོང་ཁྱེར་དང་། ཐང་གཅིག་ལ་མི་རྟག་པ་སྒྱུ་མ་དང་མིག་འཕྲུལ་དང་། ཐུན་གཅིག་ཏུ་མི་རྟག་པ་རྨི་ལམ་དང་། ངེས་པའི་དུས་མེད་པར་མི་རྟག་པ་རང་གི་ཚེ་ལ་སོགས་པའི་མི་རྟག་པ་དེ་དག་ལས་ལོག་ནས་རྟག་པར་བཞུགས་པའི་ཆོས་ཉིད་དོ། །དེ་རྟག་པ་ཙམ་མ་ཡིན་ཏེ། ཐེར་ཟུག་ཏུ་རྟག་པར་འདོད་པ་མུ་སྟེགས་དང་། གནས་སྐབས་ཀྱིས་རྟག་པ་ནམ་མཁའ་དང་། འདུས་པས་དུམ་བུར་རྟག་པ་གླིང་བཞི་དང་རི་རབ་དང་། མིང་དུ་བཏགས་པའི་རྟག་པ་རྣམས་མ་ཡིན་ཏེ་དངོས་པོ་གཤིས་ཀྱི་འདུག་ཚུལ། སུས་ཀྱང་བྱས་པ་མེད་པས་མི་འཛིན་ཏེ། དུས་གསུམ་མཉམ་པ་ཉིད་དུ་རྟག་པར་བཞུགས། འགུལ་ལྡེག་དང་འགྱུར་དུ་མི་བཏུབ་པས་འཕོ་འགྱུར་མེད་པའི་རྟག་པ་ཆེན་པོར་བཞུགས། ཞེ་འདོད་དང་ཚིག་ཙམ་ལས་འདས་པས་མ་བཅོས་པའི་རྟག་པ་ཆེན་པོར་བཞུགས། ཡེ་ནས་གནས་པས་བསྒྱུར་དུ་མི་བཏུབ་པའི་རྟག་པ་ཆེན་པོར་བཞུགས་པའོ། ༈ །དེ་ཡང་མིང་བཏགས་སོ་སོའི་སྒྲ་དང་སྦྱར་ན། མཚོན་པ་རྟགས་བཀོད་ཀྱི་ཏ་དང་། ཡི་གེ་བརྡ་སྦྱོར་གྱི་ཏ་དང་། རང་བཞིན་གྲུབ་ཚུལ་གྱི་ཏ་དང་། མིང་བཏགས་ལ་སོགས་པའི་ཏ་ལས། འདི་མཚོན་པ་རྟགས་བཀོད་ཀྱི་ཏ་སྟེ། འདི་ལ་བརྟེན་ནས་ཆོས་ཉིད་རྟག་པ་ཆེན་པོ་མཚོན་པའོ། །དེ་ལྟར་རྟག་པར་བཞུགས་པའི་ཆོས་ཉིད་དེ་ལ་དུས་གསུམ་དུ་སྐྱེ་བ་ཡོད་མ་མྱོང་བས་ཨ་ཞེས་བྱ་སྟེ། བྱས་པས་སྐྱེ་བ་དང་། རང་བཞིན་གྱིས་སྐྱེ་བ་དང་། བསྐྱེད་པས་སྐྱེ་བ་དང་། རྒྱུ་རྐྱེན་གྱིས་སྐྱེ་བ་ལ་སོགས་པ་ལས་ལོག་ནས་སྐྱེ་བར་བཞུགས་པ་གོང་དུ་བསྟན་པ་དང་མཚུངས་སོ། །དེ་ཡང་སྐྱེ་མེད་དེ་ཡང་མཐའ་གྲོལ་ཕྱོགས་ལྷུང་མེད་པར་སོང་བས་ལོ་ཞེས་བྱ་སྟེ་གོང་དུ་བསྟན་པ་དང་མཚུངས་སོ། །དེ་ཡང་དབྱིངས་རྣམ་པར་དག་པའི་སྒྲོན་མ་ལ་བརྟེན་ནས་མཐའ་ཐམས་ཅད་ལས་གྲོལ་བས་ན་ན་རོར་བྱུང་བའོ། །མཐའ་གྲོལ་ཆེན་པོའི་ལྟ་བ་དེ་ཉིད་དབྱིངས་ཀྱི་སྒྲོན་མ་ལ་བརྟེན་ནས་སྐུ་གསུམ་ལམ་དུ་བྱས་པས་རྟོགས་པས་ན་ཀ་ཞེས་བྱུང་བ་སྟེ། མཚོན་བྱེད་རྟགས་བཀོད་ཀྱི་ཀ་ལ་བརྟེན་ནས་རྟོགས་པས་དེ་སྐུ་ཞེས་ལུས་ལ་ཞེས་བཅུག་པས་ཏེ། སྐུ་གང་ནས་ཡོད་ཕན་ཆད་ལུས་ཡིན་པས། ལམ་ནི་ལུས་ལ་རྟེན་ནས་སྦྱངས་དགོས་ཀྱི། འབྲས་བུ་ལ་ནི་ལུས་སུ་གྲུབ་པ་མེད་དོ། །དེ་ལྟར་ཡིན་ཀྱང་གལ་ཏེ་ལམ་མི་འདོད་པར་འབྲས་བུ་གཅིག་ཆར་དུ་འདོད་པ་ཡང་ཡོད་དེ། འདི་ནི་ཆུང་མ་མེད་པའི་བུ་འདོད་པ་དང་མཚུངས་པས་འོང་མི་སྲིད། དེ་ལྟར་མ་ཡིན་པར་གསང་སྔགས་པ་རྣམས་ནི་འབྲས་བུ་ལ་ལམ་དུ་བྱེད་ཞེས་པ་ནི་སྐུ་གསུམ་པོ་ལམ་དུ་བྱེད་པ་རྣམས་ལ་དགོངས་པ་ཡིན་ནོ། །གལ་ཏེ་སྐུ་གསུམ་མ་ཡིན་པའི་ལམ་དུ་བྱ་རྒྱུད་གཅིག་བྱུང་ན་འདི་ཡང་འགལ་ཏེ། དངོས་བཞག་དང་དངོས་མ་ཡིན་འཚོལ་བའི་གོལ་སར་འགྱུར་རོ། །དེའི་ཕྱིར་ན་མན་ཏྲའི་རྒྱུད་དང་མན་ངག་ཐམས་ཅད་ནས་སྐུ་གསུམ་དང་ཡེ་ཤེས་ལྔ་འབྲས་བུ་ཡིན་པར་ཀུན་ནས་གསུངས་པ་ནི། འདི་ནི་ལམ་དུ་བྱེད་པ་སྟེ། དེ་ཡང་ལུས་ཡིན་ཀྱང་སྐུར་མི་འགྲོ་བའི་རིགས་དྲུག་ཐ་དད་ཀྱི་ལུས་ལས་ལས་ལོག་པས་སྐུ་ཞེས་བྱ་སྟེ། དེ་ལྟར་ན་ལུས་ཀྱི་བྱེ་བྲག་ནི་རང་ག་མ་ཤ་ཁྲག་འབྱུང་བ་སྨིན་པའི་ལུས་དང་། རིགས་བྱེད་འོད་ཀྱི་ལུས་དང་། དྲན་གཅོད་ཡིད་ཀྱི་ལུས་དང་། འདུ་ཤེས་སྙམ་བྱེད་ཀྱི་ལུས་དང་། འཁྲུལ་འཁོར་བསགས་པའི་ལུས་ལས་ལོག་སྟེ། སྤྲུལ་སྐུ་ངེས་པ་མེད་པའི་སྐུ་དང་། རྣམ་སྨིན་བག་ཆགས་ཀྱི་སྐུ་དང་། འཇུག་པ་གཅིག་ཆར་བའི་སྐུ་ལྟ་བུ་མ་ཡིན་ཏེ། སྤྲུལ་སྐུ་ལ་འགྲོ་བ་རིགས་དྲུག་དང་མཐུན་པའི་ཕྱིར་རྣམ་རྟོག་བག་ཆགས་ཀྱི་ལུས་ཡོད། ལོངས་སྐུ་ལ་ཡེ་ཤེས་སྒྱུ་མའི་ལུས་སྣང་ངོ་ལ་གྲུབ་པ་ཡོད། ཆོས་སྐུ་ལས་གཟུགས་སྐུ་གཉིས་ཀྱིས་དོན་བྱེད་པའི་ཕྱིར་རིན་པོ་ཆེ་གསང་བའི་ལུས་ཡོད་དོ། །དེ་ལྟར་ན་སྐུ་གསུམ་གྱི་མིང་དང་། སྐུ་གསུམ་གྱི་ངོ་བོ་དང་། ངེས་ཚིག་དང་། སྐུ་གསུམ་གྱི་དབྱེ་བ་དང་། སྐུ་གསུམ་རང་གི་མཚན་ཉིད་དང་། སྐུ་གསུམ་དུ་འཇོགས་པའི་མཐར་པ་དང་། སྐུ་གསུམ་པོ་དེ་གང་ཟག་གི་རྒྱུད་ལ་ཇི་ལྟར་གནས་པ་དང་། རྣལ་འབྱོར་ལམ་པ་རྣམས་ལ་ཇི་ལྟར་སྣང་བ་དང་། མཐར་ཐུག་འབྲས་བུའི་དུས་ན་སྐུ་གསུམ་པོ་དེ་ཇི་ལྟར་འགྱུར་བ་དགུས་བསྟན་ཏོ། །སྐུ་གསུམ་གྱི་མིང་ནི། ཆོས་སྐུ་དང་། ལོངས་སྐུ་དང་། སྤྲུལ་པའི་སྐུའོ། །ངོ་བོ་ནི་ཆོས་སྐུའི་ངོ་བོ་ཡོན་ཏན་ཐམས་ཅད་ཀྱི་འབྱུང་ཁུངས་སུ་བཞུགས་ལ། ལོངས་སྐུ་ཡེ་ཤེས་ཐམས་ཅད་ཀྱི་རྒྱན་དུ་བཞུགས། སྤྲུལ་པའི་སྐུ་འགྲོ་བ་ཐམས་ཅད་ཀྱི་གཙོ་བོར་བཞུགས་སོ། །ངེས་ཚིག་ནི་ཆོས་སྤྱི་དང་རང་གི་མཚན་དུ་བྱེད་པ། ཀྱི་འབྲེལ་པས་སྟེ་དེ་དང་འབྲེལ་བའི་ཡོ་གིས་སྐུ་རིན་པོ་ཆེ་གསང་བའི་སྦུབས་ཞེས་བྱ་བ། ལུས་ཞེས་བྱ་སྐུ་ཞེས་བྱའོ། །དེ་ལ་བདག་གིས་ལ་ལ་ན་མཐར་ཐུག་ཏུ་བཤད་པ་ཡང་ཡོད་དེ། དེ་ལྟར་ནི་མ་ཡིན་ནོ། །ལོངས་སྐུ་ཡི་ངེས་ཚིག་ནི་ལོངས་ཡེ་ཤེས་ལྔ་ལ་སྤྱོད་ལ། རྫོགས་པ་མཚན་དང་དཔེ་བྱད་དུ་རྫོགས། སྐུ་ཡེ་ཤེས་རྒྱུ་ལས་སྟེ་གོང་དང་མཚུངས་སོ། །སྤྲུལ་པ་ནི་གཟུགས་མི་འདྲ་བ་ཐ་དད་པས་ཏེ། བརྫུས་སྐྱེས་དང་། སྒོང་སྐྱེས་དང་། དྲོད་རླན་ལས་སྐྱེས་པ་དང་། མངལ་སྐྱེས་སུ་སྤྲུལ་ནས་ལྷའི་གཟུགས་ལ་སོགས་ཏེ་རིགས་དྲུག་གང་འདུལ་དུ་སྤྲུལ་ལ། སྐུ་རྣམ་རྟོག་བག་ཆགས་སོ། །དབྱེ་བ་ནི་ཆོས་སྐུའི་ཆོས་སྐུ་དཔལ་ཀུན་ཏུ་བཟང་པོ། ཆོས་སྐུའི་ལོངས་སྐུ་མགོན་པོ་དཔག་ཏུ་མེད་པ། དེའི་སྤྲུལ་སྐུ་དྲུག་པ་རྡོ་རྗེ་འཆང་། ལོངས་སྐུའི་ཆོས་སྐུ་རྣམ་པར་སྣང་མཛད་གངས་ཆེན་མཚོའོ། །ལོངས་སྐུའི་ལོངས་སྐུ་རིགས་ལྔའི་སངས་རྒྱས། ལོངས་སྐུའི་སྤྲུལ་སྐུ་ཕྱག་ན་རྡོ་རྗེ། སྤྲུལ་སྐུའི་ཆོས་སྐུ་རྡོ་རྗེ་སེམས་དཔའ། དེའི་ལོངས་སྐུ་རིགས་གསུམ་མགོན་པོ། སྤྲུལ་སྐུའི་སྤྲུལ་སྐུ་ཐུབ་པ་དྲུག་གོ། །སྐུ་གསུམ་རང་གི་མཚན་ཉིད་ནི། ཆོས་སྐུའི་མཚན་ཉིད་རང་གི་གྲུབ་པའི་མཐའ་བཞི་པ། ལོངས་སྐུའི་མཚན་ཉིད་ཆོས་ཐམས་ཅད་ལ་བཟོད་པ་ཐོབ་པ། སྤྲུལ་པའི་སྐུའི་མཚན་ཉིད་ཚིག་གི་སྒྲོ་འདོགས་ཆོད་པའོ། །དེ་ནི་ཡོ་གི་ལམ་དང་སྦྱར་བའི་མཚན་ཉིད་ནི་ཆོས་སྐུའི་མཚན་ཉིད་ལ་འཁྲུལ་རྟོག་མི་མངའ་བ། ལོངས་སྐུ་གསལ་སྟོང་དབྱེར་མེད་པ། སྤྲུལ་སྐུ་ཤེས་བྱ་དང་ཤེས་བྱ་ཕྱིན་ཅི་མ་ལོག་ཅིང་དེ་ཉིད་མཁྱེན་པ་མ་འགགས་པར་སྤྲུལ་པའོ། །སྐུ་གསུམ་དུ་འཇོག་པའི་མཐར་པ་ནི། ཆོས་ཀྱི་སྐུ་མེད་ན་ཆོས་དང་ཆོས་མ་ཡིན་པའི་མཐའ་མི་ཕྱེད། ལོངས་སྐུ་མེད་ན་ཡེ་ཤེས་ལྔ་རང་གི་མཚན་ཉིད་མི་ཤེས། སྤྲུལ་སྐུ་མེད་ན་གཞན་དོན་མཐར་མི་ཕྱིན། དེ་ནི་ཆོས་ལས་གྲུབ་པས་ཆོས་སྐུར་མཐར་དེ། དཔེར་ན་རྒྱལ་རིགས་བཞི་ལ་སོགས་པའི་མི་རིགས་སོ་སོའི་ལུས་རིགས་སོ་སོ་ལ་གྲུབ་པ་དང་འདྲའོ། །དེ་ལྟར་ཡེ་ཤེས་ལྔ་ལ་ལོངས་སྤྱོད་པས་ན་ལོངས་སྤྱོད་པའི་སྐུར་མཐར་ལ། དཔེར་ན་འཁོར་ལོས་བསྒྱུར་བའི་རྒྱལ་པོ་གླིང་བཞི་ལ་ལོངས་སྤྱོད་པ་དང་འདྲའོ། །དེ་ལྟར་ན་ཆོས་ལས། སྤྲུལ་པས་ཆོས་སྐུ། དེའི་མཁྱེན་པའི་ཡེ་ཤེས་ཀྱི་ཆ་མ་འགགས་པ་ལ་ལོངས་སྐུར་སྤྲུལ། དེའི་མཛད་པ་འཕྲིན་ལས་ཀྱི་སྤྱོད་པ་མ་འགགས་པ་ལས་སྤྲུལ་པའི་སྤྲུལ་སྐུར་སྤྲུལ་ནས་གཞན་དོན་རྫོགས་པར་བྱེད་པས་ན། སྐུ་གསུམ་གྱི་ཐ་མ་སྤྲུལ་པའི་སྐུར་སྤྲུལ་ནས་དོན་བྱེད་པས་སྤྲུལ་སྐུར་འཐད་དོ། །སྐུ་གསུམ་པོ་དེ་གང་ཟག་གི་རྒྱུད་ལ་ཇི་ལྟར་གནས་པ་ནི། སྐྱེ་བའི་རིམ་པ་དང་གནས་པའི་རིམ་པས་སྟེ། གནས་པ་ནི་ཡོ་གིས་མཉམ་པར་བཞག་པའི་དུས་ན་དྲན་བསམ་གྱི་རྣམ་པར་རྟོག་པ་རྒྱུན་འགགས་ནས་གནས་པ་དེ་ཆོས་སྐུ། དེ་ལ་འཛིན་པའི་རྣམ་རྟོག་མ་ཞུགས་པར་གསལ་བ་འཛིན་མེད་དུ་གནས་པ་ལོངས་སྐུ། དེ་ནས་མཉམ་བཞག་ལས་ལངས་ནས་རྗེས་ལ་ཐམས་ཅད་གོང་ལྟར་རོལ་བ་སྣ་ཚོགས་པར་མཁྱེན་ཏེ། དེའི་ངང་ལ་གནས་པ་སྤྲུལ་སྐུའོ། །སྐྱེ་བའི་གོ་རིམ་ལྟར་ན་ཡོ་གིས་ཐོག་མ་ཐོས་བསམ་སྒོམ་གསུམ་གྱི་ཤེས་རབ་ཀྱི་ཕྱི་ནང་གསང་བ་གསུམ་གྱི་སྒྲོ་འདོགས་བཅད་ནས་སྤྲོས་པ་གཅོད་པའི་ཚེ་སྤྲུལ་སྐུ། དེ་ནས་གང་ཟག་ཆོས་ལ་གནས་པའི་ཚེ་ཚིག་དོན་གཉིས་མེད་ལ་ལོངས་སྤྱོད་པས་ལོངས་སྐུ། དེ་ནས་ཆོས་པོར་ཏེ་རང་སྣང་ཆོས་ཉིད་ལས་མ་འདས་པས་ཆོས་སྐུའོ། །ཡོ་གི་ལམ་པའི་དུས་ན་ཇི་ལྟར་སྣང་བའི་ནི་ཕྱི་སྤྲུལ་པ་འཛིན་མེད་ཀྱི་ཤེས་པ་རྟོག་མེད་དུ་ཤར་བ་ནི་སྤྲུལ་སྐུའི་སྣང་བ། ནང་ལུས་ངག་ལ་བདེ་ཆེན་རང་ལུགས་སུ་ཤར་བ་ལོངས་སྐུའི་སྣང་བ། གསང་བ་སེམས་དང་ཆོས་སུ་འདྲེས་ནས་རྣམ་རྟོག་རྒྱུན་ཆད་པས་ནི་ཆོས་སྐུའི་སྣང་བ། མཐར་ཐུག་འབྲས་བུའི་དུས་ན་སྐུ་གསུམ་པོ་དེ་ཇི་ལྟར་འགྱུར་བ་ནི། སྣང་བ་རང་སར་དག་ཏེ། ཆོས་ཉིད་ཟད་པའི་སྣང་བ་རང་ཤར་བས་ཆོས་སྐུ་ཞེས་ཐ་སྙད་དུ་གྲུབ་པ་མེད། ཉམས་སུ་མྱོང་བའི་མཐར་ཐུག་པས་རིག་པ་ཚད་ལ་ཕེབས་པས་ཉམས་གོང་འཕེལ་དུ་མེད་པས་ལོངས་སྐུ་ཞེས་ཐ་སྙད་མིང་དུ་གྲུབ་པ་མེད། ལུས་ངག་གི་བྱས་བཅོས་མི་དགོས་པར་རིག་པ་མངོན་སུམ་ལ་གནས་པས་མན་ངག་གི་ཞེན་པ་ལས་འདས་པས་སྤྲུལ་པའི་སྐུ་ཞེས་ངོ་བོ་ལ་གྲུབ་པ་མེད་དོ། །དེ་ལྟར་ན་སྐུ་གསུམ་པོ་དེ་ནི་ལམ་གྱི་སྣང་བ་ཡིན་པས་སྐུ་གསུམ་ཞེས་མཐར་ཐུག་འབྲས་བུའི་སྐབས་ན་མི་སྲིད་དོ། །འོ་ན་དེ་ལྟར་སྐུ་གསུམ་མེད་ན་ཡེ་ཤེས་རྒྱུན་ཆད་ལྟ་བུ་ཡིན་ནམ་ཞེ་ན། དེ་ལྟར་མ་ཡིན་ཏེ། མཛད་བྱ་ཡུལ་དང་ཡུལ་ཅན་དུ་གྲུབ་པ་མེད་ཀྱང་། རང་ཤུགས་འགགས་མེད་ཀྱི་ཐུགས་རྗེ་ཉི་མ་ལས་འོད་འབྱུང་བ་ལྟར་སེམས་ཅན་རྣམས་ཐམས་ཅད་མཁྱེན་པའི་སྤྱན་འགགས་པ་མེད་པར། རང་ཤར་བས་སེམས་ཅན་གྱི་དོན་བྱེད་མ་འགགས་པར་རང་བྱུང་བས། འབྱུང་བ་ནམ་སླའི་དྲོད་ཕེབས་པས་ཆབ་རོམ་ལ་སོགས་པ་རང་བཞིན་ལྷན་གྱིས་ཞུ་བ་ལྟར། སེམས་ཅན་རྣམས་ལ་རང་བཞིན་གྱི་བྱིན་རླབས་རང་ཤར་བའོ། །མིང་བཏགས་ཀྱི་སྒྲ་དང་སྦྱར་བ་གོང་མ་རྣམས་དང་འདྲའོ། །དེ་ལྟར་ཡང་གང་ཟག་གཅིག་སངས་རྒྱ་བར་བྱེད་པའི་ཚིག་གཅིག་གིས་བསྟན་པ་ནི། འཇིགས་པ་མེད་པའི་སྣང་བ་རྣམ་པར་དག་པ་ཞེས་བྱ་བའི་ཤད་པར་བྱུང་བའོ། །དེ་ལྟར་ན་སྐུ་གསུམ་རང་གི་རང་ས་ལ་ཇི་ལྟར་ཞུགས་ཤིང་འཆར་ཞེ་ན། ཨ་ནམ་པ་ལམ་ཀེ་གསུངས་པ་ན། གོང་མའི་སྐུ་གསུམ་པོ་དེ་ལ་ལུས་ཡོད་པས་སྐྱེ་བ་ཡང་ཡོད་དམ་སྙམ་ན། དེ་ལྟར་མ་ཡིན་ཏེ། བྲིས་པ་གཟུགས་ཀྱི་སྐུ་དང་། བཀོད་པ་ཡི་གེའི་སྐུ་དང་། བྱས་པ་རྫས་ཀྱི་སྐུ་དང་། བཏགས་པ་མིང་གི་སྐུ་དང་། རྟག་པ་སྒྲའི་སྐུ་དང་། སྣང་བ་གཟུགས་བརྙན་གྱི་སྐུ་ལ་སོགས་པ་མ་ཡིན་པར། སྐུ་གསུམ་རང་གི་ངོ་བོ་ལ་སྐྱེ་བ་ཡོད་མ་མྱོང་སྟེ། ཨ་ཞེས་བསྟན། གནས་སྐབས་དུམ་བུར་གྱི་སྐྱེ་བ་མེད་དོ། །མཐར་ཐུག་གི་དོན་ལ་སྐྱེ་བ་མེད་པས་ད་རྟོག་པ་མེད་པའོ། །དེའི་ཕྱིར་ནས་ཨ་ཞེས་སོ་དང་མཆུ་དང་། དེ་ཉིད་སྦུབས་ཀྱི་འགྱུ་བྱེད་མེད། ལྕེའི་འགྱུར་ལ་མ་བརྟེན་པར་ལུས་ཀྱི་དབུས་ལྟེ་བའི་དཀྱིལ་ནས་རྩའི་རྒྱལ་པོ་ཨ་བ་དྷུ་ཏིའི་ནང་ནས་ཟང་ཐལ་དུ་རྒྱུ་བས་ན། ལུས་ལ་གནས་པའི་སྐུ་གསུམ་པོ་དེ་ཡི་གེའི་བདག་ཉིད་དུ་བཞུགས་པས། རང་བཞིན་གྲུབ་ཚུལ་གྱི་ཨ་ཞེས་བྱ་བ་ཡིན་ཏེ། ཁོང་ནས་བྱུང་བ་སྐྱེ་བ་མེད་ཅེས་བྱའོ། །དེ་ལུས་ལ་གནས་པར་ཅིས་ཤེས་ན། ལུས་མཚོན་པར་བྱེད་པ་ཡི་གེ་ནམ་ཞེས་བསྟན་པས་ཏེ། དེ་ཡང་གོང་དུ་བསྟན་པའི་རིགས་བྱེད་འོད་ཀྱི་ལུས། འོད་གསལ་གྱི་ལྷ་རྣམས་ལ་ཡོད། འདུ་ཤེེས་རང་གསལ་གྱི་ལུས་སྐྱེ་མཆེད་ཀྱི་ལྷ་ལ་ཡོད། བསགས་པ་རྣམ་སྨིན་གྱི་ལུས་དམྱལ་བ་ལ་ཡོད། འགྱུ་བའམ་དྲན་པ་ཡིད་ཀྱི་ལུས་སྲིད་པའི་བར་དོ་དང་མཁའ་ལ་རྒྱུ་བའི་ཡི་དྭགས་རྣམས་ལ་ཡོད། རང་ག་མ་འབྱུང་བ་སྨིན་པོའི་ལུས་ནི། འདོད་པ་ཁམས་ཀྱི་སེམས་ཅན་རྣམས་ལ་ཡོད་པས། ལུས་དེ་དག་གི་ནང་ནས་དབྱེར་མེད་པར་མཉམ་པར་གནས་པ། ཀླད་ཀོར་མཉམ་པའི་ཡི་གེ་སྟེ་ཀུན་ལ་གནས་པའོ། །དེ་ཡང་མཉམ་ལུགས་ཇི་ལྟར་མཉམ་ན། དངོས་པོ་གཤིས་ཀྱི་འདུག་ཚུལ་མཉམ་ལུགས་ནི་མ་བཅོས་རང་ལུགས་སུ་མཉམ་ལ། འགྲོ་བ་རིགས་དྲུག་སྤྱི་ལ་མཉམ་ལུགས་ནི་ཆ་མེད་ནང་རྫོགས་སུ་མཉམ། རྣལ་འབྱོར་བ་ཡིས་ལམ་མངོན་སུམ་དུ་མཐོང་། པ་རྣམས་རིས་མེད་རྒྱ་མ་ཆད་པར་མཉམ་མོ། །དེ་ཡང་མི་མཉམ་པ་རྣམས་ལས་ལོག་པ་སྟེ། མི་མཉམ་པ་ནི་བཟང་ངན་མི་མཉམ་པ་དང་། མཐོང་སྣང་དང་། ལེགས་ཉེས་དང་། བྱས་པ་དང་མ་བྱས་པ་མི་མཉམ་པ་དང་། ཆེ་ཆུང་མི་མཉམ་པ་དང་། ཡོད་མེད་མི་མཉམ་པ་དང་། རིང་ཐུང་དང་། སྦོམ་ཕྲ་དང་། ཡིན་མིན་དང་། ཡངས་དོག་དང་། གསལ་བ་དང་མི་གསལ་བ་ལ་སོགས་པ་ལས་ལོག་སྟེ་མཉམ་པ་ཉིད་དུ་གནས་པའོ། །མཉམ་པ་དེ་ཡང་ཁྱབ་པས་མཉམ་པ་བཟང་ངན་མེད་པར་སངས་རྒྱས་སེམས་ཅན་ཐམས་ཅད་ལ་བཟང་ངན་མེད་པར་མཉམ། དེ་ལྟ་བུ་དེ་རིས་མེད་ཆེ་ཆུང་མེད་པས་རིས་མེད་དེ་རིས་མེད་ཆེ་ཆུང་མེད་པར་མཉམ་པས་མཉམ་པ་རིས་མེད། སྣང་སྲིད་འཁོར་འདས་ཀུན་ལ་ཕྱོགས་མེད་པར་གནས་པས། ཆེ་བ་དབུས་ཀྱི་རི་རབ་དང་། ཆུང་བ་འཇག་མའི་སྲིན་བུ་ཡན་ཆད་ལ་གནས་པ་ཆེ་ཆུང་མཉམ་པས་མཉམ་པ་ཕྱོགས་མེད། དེ་ཡང་འདི་ལ་ཡོད་འདི་ལ་མེད་ཞེས་གུད་བཅད་མེད་པས་ཡོད་མེད་ངོ་མཉམ། རིང་བ་བསྐལ་བ་དང་ཐུང་བ་སྣང་བ་འདི་ཀ་ལ་ཁྱད་མེད་དུ་མཉམ་པར་གནས་པ་ཉིད་རིང་ཐུང་ངོ་མཉམ། སྦོམ་པ་གླང་པོ་དང་། འཕྲ་བ་འབུ་སྲིན་གཉིས་དབྱེར་མེད་མཉམ་པ་ཉིད་སྦོམ་ཕྲ་ངོ་མཉམ། ཡིན་པ་སྣང་བའི་ཆོས་དང་མིན་པ་སྟོང་པའི་ཆོས་གཉིས་རང་ངོར་མཉམ་པས་སྣང་སྟོང་ངོ་མཉམ། ཡངས་པ་ནམ་མཁའ་དང་གཅོང་རོང་མ་བཅོས་རང་སོའམ་མཉམ་པ་ཉིད་ཡིན་པས་ཡངས་དོག་མཉམ། མཐོ་བ་སངས་རྒྱས་དང་དམའ་བ་དམྱལ་བ་རང་རིག་ངོ་ལ་ཁྱད་མེད་མཉམ་པ་ཉིད་ཡིན་པས་སངས་རྒྱས་དང་དམྱལ་བ་ངོ་མཉམ། ལེགས་པ་སྟེར་བ་གཉེན་དང་ཉེས་པ་བྱེད་པ་དགྲ་གཉིས་ངོ་མཉམ་སྣང་ངོ་ལ་མཉམ་པ་ཉིད་དུ་གནས་པས་དགྲ་གཉེན་ངོ་མཉམ། བྱས་པའི་ལས་དགེ་སྡིག་དང་མ་བྱས་པའི་རྣམ་སྨིན་དངོས་པོ་ལ་མཉམ་པ་ཉིད་ཡིན་པས་བྱས་མ་བྱས་ངོ་མཉམ། གསལ་བའི་རྣམ་པ་ལྟ་བསྒོམ་དང་མི་གསལ་བའི་རྣམ་པ་གཏི་མུག་གཉིས་ཆོས་ཀྱི་དབྱིངས་སུ་མཉམ་པས་གསལ་མི་གསལ་ངོ་མཉམ། ཉེ་བ་སྤུན་ཚན་དང་རིང་བ་འགྲོ་བ་གཞན་གཉིས་བདེ་གཤེགས་སྙིང་པོས་བསྡུས་པར་མཉམ་པས་ན་ཉེ་རིང་ངོ་མཉམ། དེ་བཞིན་དུ་བཟང་བ་ཟས་ནོར་བཟང་པོ་དང་ངན་པ་རྡོ་དང་ཁྱི་ལུད་དང་ངར་བསྣབ་རྣམས་ལ་སོགས་པ་ཡིན་ཚུལ་ཡོད་ངོས་ལ་མཉམ་པས་བཟང་ངན་ངོ་མཉམ་པ། དེ་ལྟར་ན་ཤེས་མ་ཤེས་དང་། བསྒོམ་མ་བསྒོམ་དང་། རྟོགས་མ་རྟོགས་ད ང་ཆོས་བྱས་མ་བྱས་དང་། འཁོར་བ་མྱ ང་འདས་ལ་སོགས་པ་ཀུན་ལ་སྦྱར་རོ། ༈ །དེ་ཡང་མཉམ་པ་ཉིད་དེ་ཡང་དངོས་པོ་རགས་པའམ། མཐར་འཛིན་དུ་མེད་པས་སྟོང་པར་ཡོད་པས་པ་ཞེས་བསྟན་པས་ན། འདི་ནི་མི་སྟོང་པ་ནས་སྟོང་པར་གནས་པ་སྟེ་གོང་དུ་བསྟན་པ་དང་མཐུན་ནོ། །དེ་ཡང་སྟོང་ངོ་ཙམ་ལ་མི་གནས་པར་ཡོངས་རྫོགས་མཐའ་གྲོལ་ཆེན་པོར་བཞུགས་པས་ལམ་ཞེས་པས་སྟེ་ལམ་གོང་དུ་བསྟན་པ་དང་མཚུངས། ཀླད་བསྐོར་མཉམ་ཉིད་དུ་བྱུང་སྟེ། འདི་ནི་མཐའ་གྲོལ་དུ་ཡོད་པས་དག་པ་རང་ངོ་ལ་མཉམ་པ་ཞེས་བྱ་བ་ཡིན་ནོ། །དེ་ལྟར་མཐའ་ཐམས་ཅད་ལས་གྲོལ་བས་སྐུ་གསུམ་གྱི་མཐའ་ལས་གྲོལ། གསལ་འོད་ལྔ་ལས་གྲོལ་བས་ནི་ཀེ་ཞེས་བསྟན་པ་ནི་གོ་སླའོ། །དེ་ཡང་བརྡ་སྦྱོར་མིང་བསྒྱུར་ན། སྐྱེ་མེད་སྟོང་པའི་ས་སྐུ་གསུམ་འོད་དུ་ཤར་བ་ཞེས་བྱ་བའི་ཚིག་གཅིག་ཏུ་བསྡུས་ནས་བསྟན་པའོ། །དེ་ལྟར་ཀྱང་ཐམས་ཅད་མཉམ་པ་ཉིད་ཀྱི་ཤེས་རབ་ཀྱིས་འགྲོ་བ་རྣམས་ཀྱིས་ལུས་འཛིན་པར་བསྟན་པ་ནི། སརྦ་མ་ནི་ཤ་ཅེས་གསུངས་པས་ན། དེ་ཡང་ངོ་བོ་ལས་འགྱུར་བ་མེད་པས་ས། རང་བཞིན་ལ་མ་རིག་པ་གསུམ་འགགས་པ་མེད་པར་ཁྱུད་པས་ན་འཆར་བྱེད་ཀྱི་རྩལ་ཕྱིར་ཤར་བས་རྦ། དེ་ལྟར་འགྱུར་བ་མེད་པ་དེ་ལ་མ་རིག་པ་གསུམ་རྩལ་ཤར་ཀྱང་ཆོས་ཉིད་ངོ་བོའམ་གཞི་དེ་ལ་མཉམ་ཞིང་གཉིས་མེད་དུ་གནས་པས་མ། དེ་ཡང་འགྲོ་བ་ལུས་ཅན་རྣམས་ཀྱི་ལུས་ལ་གནས་པས་ན། དེའི་ངོ་བོའམ་བཞུགས་ལུགས་ཇི་ལྟར་གནས་ན་འོད་དུ་ཡོད་པས་གུ་གུ། དེ་འཁོར་བའི་ཆོས་ཅན་ཀུན་ལ་ཁྱབ་པས་ང་ཞེས་བྱ་སྟེ། འཁོར་བ་ནི་མི་འཁོར་བ་ལས་ལོག་ནས་འཁོར་བ་ཁོ་ནར་བྱེད་པས་འཁོར་བས་ཏེ། གཅིག་ནས་གཅིག་ཏུ་འཁོར་བ་ཟོ་ཆུའི་རྣམ་པ་ལྟ་བུ་དང་། རྒྱུན་ཆད་མེད་པར་འཁོར་བ་འཁྲུལ་འཁོར་གྱི་རྒྱུན་ལྟ་བུ་དང་། གནས་སྐབས་སུ་འཁོར་བ་སྤྲིན་དང་ཆར་ལྟ་བུ་དང་། ཐང་ཆོད་དུ་འཁོར་བ་གཞོན་མའི་སྡུག་གུ་ལྟར་འཁོར་བ་དང་། དེ་དག་གི་འཁོར་བ་ཞེས་བྱ། བརྗེ་བ་ཞེས་བྱ། སྤོ་བ་ཞེས་བྱ་གནས་གཅིག་ཏུ་མི་རྟག་པ་ཞེས་བྱ། མི་སྡོད་པ་ཞེས་བྱ་སྟེ་ངེས་པ་མེད་པའི་ཆོས་ཅན་ནོ། །སྡུག་བསྔལ་དང་། ཀུན་འབྱུང་གི་ལས་དང་རྒྱུ་འབྲས་ལས་མ་འདས་པས་ན་འཁོར་བའོ། །དེ་ལྟར་ང་ཞེས་བདག་ཉིད་དུ་འཛིན་པ་དང་། བདག་གིར་འཛིན་པ་དང་། རང་རྒྱུད་དུ་འཛིན་པ་ཉིད་དེ། ཡི་གེ་མེད་པའི་རྒྱུད་དུ་བདུན་དུ་ག ཏན་ལ་ཕབ་ནས་བསྟན་ཏོ། །མིང་བཏགས་སོ་སོ་གོང་མ་དང་འདྲ་བའོ། །འོ་ན་འཁོར་བ་དེ་ཉིད་རྒལ་དཀའ་བ་ཆུ་བོ་ལྟ་བུ་དང་། ཐར་བར་དཀའ་བ་བཙོན་དོང་དུ་བཙུད་པ་ལྟ་བུ་དང་། སྤོངས་བར་དཀའ་བ་ཟས་སྐོམ་ལྟ་བུ་ཡིན་པས་ན། གཏན་དེ་ལས་མི་ཐར་རམ་ཞེ་ན། གཏན་མི་ཐར་བ་མ་ཡིན་ཏེ། ཤེས་རབ་ཕྱིན་ཅི་མ་ལོག་པ་ཤེས་རབ་རང་བྱུང་གི་སྒྲོན་མ་ལ་བརྟེན་ནས་ཐར་བར་འགྱུར་བས་ན་ཤ །ཞེས་བསྟན་ཏེ། འདིས་ནི་ཤེས་རབ་མཚོན་པར་བྱེད་པས་སྟེ། ཤེས་རབ་ཀྱི་དབྱེ་བ་ལ་སོགས་པ་ནི་ཁོ་རང་གི་སྐབས་ནས་སྟོན་ལ། ཤེས་རབ་ཞེས་པ། མ་དག་པའི་ཤེས་རབ་དང་། ཕྱིན་ཅི་ལོག་གི་ཤེས་རབ་དང་། སྒྲོས་བཏགས་ཡིད་དཔྱོད་ཀྱི་ཤེས་རབ་དང་། མིང་བསྒྱུར་གྱི་ཤེས་རབ་དེ་ཡང་དག་པའི་ཤེས་རབ་མ་ཡིན་ནོ། །མ་དག་པའི་ཤེས་རབ་ནི། ཐོས་པ་རྒྱ་ཆུང་བ་ནས་མ་དག་པས་ཐེ་ཚོམ་དུ་གྱུར་ལ་བསྒོམ་པ་ཡུན་ཐུང་ནས་མ་དག་པས་ཡིད་གཉིས་སུ་གྱུར་ལ། མན་ངག་རྩད་མ་ཆོད་པས་ཆལ་ཆོལ་དུ་གྱུར་ལ། གྲུབ་མཐའ་ཕུགས་མ་རྟོགས་པས་མ་དག་ཏེ་ལྷ་བསྒོམ་ལ་ས་ཟིན་མེད་པར་འགྱུར་བའོ། །ཕྱིན་ཅི་ལོག་ནི་ཐེག་པ་སྤྱི་གཞུང་དང་འགལ་ན་སངས་རྒྱས་ཀྱི་བརྒྱུད་པ་ཕྱིན་ཅི་ལོག །ལས་དང་རྣམ་སྨིན་ལས་འགལ་ན་བྱ་བའི་སྤྱོད་པ་ཕྱིན་ཅི་ལོག །ལྷ་བསྒོམ་ཁྱད་དུ་གསོད་ན་འབྲས་བུ་ཕྱིན་ཅི་ལོག །གནས་ལུགས་ལ་རྗེས་འཇུག་དུ་མེད་ན་ཕུགས་ཀྱི་ལྟ་བ་ཕྱིན་ཅི་ལོག་ཏུ་རྟོགས་པའི་ཤེས་རབ་ཡིན་པས་མིང་ཙམ་ལས་མིན་ནོ། །སྒྲོས་བཏགས་ཡིད་དཔྱོད་ཀྱི་ཤེས་རབ་ནི་ཚིག་རྣམས་ལ་རྟོགས་དཔྱོད་ཀྱི་ཤེས་པ་བློ་དང་བཅས་པ་སྟེ། མིན་པ་ལ་ཡིན་པར་སྒྲོས་བཏགས། དེ་བཞིན་དུ་ཡོད་པ་ལ་མེད་པ། སྣང་བ་ལ་སྟོང་པར། སྟོང་པ་ལ་སྣང་བར་སྒྲོས་བཏགས་པས་ན། འདི་ནི་བླ་མའི་མན་ངག་ཚད་མ་མེད་པའི་སྐྱོན་ལས་བྱུང་བ་ཡང་ཡོད་དེ། དེ་ལས་བྱུང་བས་བཀའ་ལ་རས་ཆོད་དང་གཟུ་ལུམ་བྱེད་པར་འགྱུར་བ་ཡིན་ཏེ། སེམས་ཀྱི་སྣང་བ་རྡོ་རྗེ་དམྱལ་བ་ལས་འགྲོ་ས་མེད་དོ། །ཐོག་མ་ཐོས་པ་ཆུང་བས་ཚིག་གི་ལེགས་སྒྲིགས་པ་ཡང་ཡོད་དེ། འདི་ནི་ཐེ་ཚོམ་མ་ཆོད་པ་ཡིན་སྙམ་བྱེད་ཀྱི་བློ་ཡིན་པས། མིང་ཤེས་རབ་ཏུ་བསྒྱུར་ཀྱང་ཤེས་རབ་མ་ཡིན་ཏེ་འཁོར་བའི་ས་བོན་འདེབས་པར་བྱེད་པ་ལས་ཐར་པ་ལ་ཕན་པ་རྡུལ་གྱི་ཆ་མེད་པའི་སྟེང་དུ་ངན་སོང་དུ་འཕེན་པར་བྱེད་པའི་གྲོགས་ཡིན་ནོ། །འོ་ན་ཡང་དག་པའི་ཤེས་རབ་གང་ཡིན་ན། སྒྲོ་འདོགས་གཅོད་པ་དང་། འཁྲུལ་པ་རྟོགས་པར་བྱེད་པ་དང་། ཉོན་མོངས་པའི་རྩད་གཅོད་པར་བྱེད་པས་ན་ཤེས་རབ་ཀྱི་ལས་སོ། །སྒྲོ་འདོགས་ནི་ཚིག་ཡིན་ཏེ། ཚིག་གཅིག་མ་བྱུང་ན་མ་བྱུང་བྱུང་ཕན་ཆད་སྒྲོ་བཏགས་པ་གཅིག་རྙེད་ནས་འོང་བས་ཤེས་རབ་ཀྱིས་ཚིག་གི་ཞེན་པའི་སྤྲོས་པ་ཆོད་པའི་དུས་ན་སྒྲོ་འདོགས་ཆོད་པ་དེ་ཤེས་རབ་ཡང་དག་པའོ། །འཁྲུལ་པ་རྟོག་པའི་ལས་ཏེ། འདི་སྣང་བའི་འཁྲུལ་མངོན་ཞེན་ནམ་ཆོད་ཙམ་ན་ཡང་དག་པའི་ཤེས་རབ་བོ། །ཉོན་མོངས་པ་གཅོད་པར་བྱེད་པས་ཏེ། རང་གི་རྒྱུད་ལ་ཉོན་མོངས་པ་སྐྱེ་བའམ་སྐྱེད་པར་བྱེད་པ་ཙམ་ཡང་མེད་ཙམ་ན་ཡང་དག་པའི་ཤེས་རབ་བོ། །དེ་ཡང་ཤེས་རབ་མ་ཡིན་པ་ལོག་པས་ཏེ། མ་ཡིན་པ་ནི། ཡིད་དཔྱོད་ཡིད་ཀྱིས་དཔྱད་པ་མ་ཡིན་ཏེ། དེ་ལྟར་མ་ཡིན་པ་ཅིས་ཤེས་ན་ཤེས་རབ་ལ་བརྟགས་ཤིང་དཔྱད་མི་དགོས་ཏེ། ཤེས་རབ་ཆེན་པོས་སྐད་ཅིག་ལ། ཆོས་ཀུན་ཁོང་དུ་ཆུད་པས་ཏེ། དེ་ལྟར་ཆུད་པས་མངོན་པར་རྟོག་པ་ཤར་བས་ཚིག་གི་མཐའ་ཆོད་པའོ། །ཐེ་ཚོམ་དང་། ཡིད་གཉིས་དང་། སྙམ་བྱེད་དང་སྒྲོ་འདོགས་པ་རྣམས་ལས་ལོག་པས་ན་ཤེས་རབ་བོ། །དེ་ཡང་མིང་བཏགས་སོ་སོའི་སྒྲ་དང་སྦྱར་ན་མཚོན་བྱེད་རྟགས་བཀོད་ཀྱི་ཤ་དང་། བཏགས་པ་མིང་གི་དང་། ཡི་གེ་བརྡ་སྦྱོར་གྱི་དང་། རང་བཞིན་འགྲུབ་ཚུལ་གྱི་དང་། ཐོགས་པ་མེད་པ་ཤེས་རབ་ཀྱིའོ། །དེ་ཡང་བསྒྱུར་ན་ཐམས་ཅད་མཉམ་པ་ཉིད་ཀྱི་ཤེས་རབ་ཀྱིས་འགྲོ་བའི་ལུས་འཛིན་པ་ཞེས་བྱ་བ་ཚིག་དུ་བསྡུས་པའོ། ༈ །ད་ནི་རྒྱུད་ཀྱི་ཚིག་དོན་མཚོན་བྱེད་རྟགས་ཀྱི་ཡི་གེ་ལ་བརྟེན་ནས་སྒྲོན་མ་བཞིས་བསྟན་པ་འབེབས་པར་བྱེད་པའི་སྒྲ་འབྱུང་བའི་གནད་བསྟན་པ་ནི་སྐྱེ་བ་མེད་པའི་ཆོས་བཅུ་ལ་བརྟེན་ནས་སྣང་བ་འདི་དང་གཅིག །འཁོར་འདས་གཉིས་ཏེ་གསུམ། དབུགས་གསུམ་སྐུ་གསུམ་གྱི་སྣང་བ་དང་། བར་དོ་བཞི་སྟེ་བཅུས་གཏན་ལ་འབེབས་པར་བསྟན་པ་ནི། རགས་པ་སྐྱེ་མེད་མིག་གི་རྣམ་ཤེས་ལ་བརྟེན་ནས་ཤེས་པས་འདི་ལྟར་རགས་པའི་སྣང་བ་སྐྱེ་མེད་དུ་གྲོལ་བས་རྫོགས་པ་ཆེན་པོ་ཉིད་ཕྱོགས་གང་དུ་ཡང་མ་ལྷུང་བ་མེད་དེ། རྒྱང་ཞགས་ཆུའི་སྒྲོན་མར་ཟང་ཐལ་བ་ནི་ཨ་ཞེས་མ་སྤངས་རང་བཞག་པའི་སྐྱོན་མེད་དོ། །འཁོར་བ་གདར་ཤ་བཅད་པའི་སྐྱེ་མེད་མིག་གི་དབང་པོ་ལ་བརྟེན་ནས་འཁོར་བ་ཉིད་ཡེ་སངས་རྒྱས་པར་མཐོང་བས་རྫོགས་པ་ཆེན་པོ་ཉིད་རེ་ལྟོས་གང་ཡང་མི་འཆའ་བས་ཤེས་རབ་རང་བྱུང་གི་སྒྲོན་མར་རང་ཤར་བ་ནི་ཨ་ཐོག་མ་སྟེ། རོལ་པ་སྐྱེ་བ་མེད་པ་ཞེས་བྱའོ། །མྱོང་འདས་མངོན་སུམ་དུ་ཁྱེར་བའི་སྐྱེ་མེད་མིག་གི་འདུ་སྟེ་རེག་པ་ལ་བརྟེན་ནས་མྱ་ངན་ལས་འདས་པ་ཅེར་མཐོང་དུ་བསྟན་ལ་ཕབས་པས་རིག་པ་ཉིད་ཡེ་སངས་རྒྱས་པར་གྲོལ་བས་རྫོགས་ཆེན་སྨོན་ལམ་དང་བྲལ་བས་རང་བྱུང་གི་སྒྲོན་མས་ཆོས་ཉིད་ལས་འདའ་བས་སྟེ། ཨ་འོག་མས་སྟེ། མཚན་ཉིད་ལ་སྐྱེ་མེད་ཞེས་བྱའོ། །རྣམ་རྟོག་རང་ཆོད་ཀྱི་སྐྱེ་མེད་མིག་གི་འདུ་སྟེ་རེག་པ་རྐྱེན་གྱིས་ཚོར་བ་ལ་རྟེན་ནས་རྣམ་རྟོག་བག་ཆགས་སྦུབས་ཀྱི་ཞེན་པ་རང་ལོག་པས་ཆུ་བུར་གྱི་མིག་དུ་ལྟ་བའི་ཡུལ་འཁྲུལ་སྣང་རང་འགགས་པས། སྤྲུལ་སྐུ་ཚིག་གི་ཐེ་ཚོམ་རང་ཆོད་པས། ཐིག་ལེ་སྟོང་པའི་སྒྲོན་མ་ལྡོག་འགྱུར་མེད་ཟང་ཐལ་བས་ཨ་སྟེང་མས་སྟེང་། གཞན་ངོ་ཡུལ་དག་པའི་སྐྱེ་མེད་ཞེས་བྱའོ། །ཡེ་ཤེས་རང་གྲོལ་བའི་སྐྱེ་མེད་མིག་གི་དེ་བཞིན་ཉིད་ལ་བརྟེན་ནས་ཡེ་ཤེས་ལྔའི་བདག་ཉིད་དུ་འཛིན་པ་རང་ལོག་པས། ཤེས་རབ་ཀྱི་མིག་གི་ཡུལ་ཆོས་ཟད་པས་ཐིག་ལེ་སྟོང་པའི་སྒྲོན་མ་ལུས་ཟང་ཐལ་བས་ལོངས་སྐུ་ལམ་གྱི་ཕུག་རྡུགས་པ་ནི་ཨ་དབུས་ནས་སྟེ། རང་བྱུང་གི་ཡེ་ཤེས་གཞན་དབང་དུ་མ་གྱུར་པའི་སྐྱེ་མེད་ཞེས་བྱའོ། །ཡོན་ཏན་ལྷུན་གྲུབ་ཀྱི་སྐྱེ་མེད་མིག་གི་རང་ངོ་ལ་བརྟེན་ནས། སྐྱོན་རང་གྲོལ་དུ་མཐོང་བས་རིན་པོ་ཆེ་གསང་བ་ཞེས་ལམ་གྱིས་མཚམས་ཕྱེ་བས་ཡེ་ཤེས་ཀྱི་མིག་གིས་ལྟ་བའི་ཡུལ་འདུག་ཚུལ་རང་དག་པས་ཐིག་ལེ་སྟོང་པའི་སྒྲོན་མས་འགགས་མེད་ཟང་ཐལ་བས། ཆོས་སྐུ་ལམ་གྱིས་མཚམས་ཕྱེད་པས་ཨ་འོག་མས་སྟེ། དངོས་པོ་རང་དག་པའི་སྐྱེ་མེད་ཞེས་བྱའོ། །ཤེས་བྱ་གྲས་གཅོད་ཀྱི་སྐྱེ་མེད་མིག་གི་རང་སྣང་ལ་བརྟེན་ནས་རིག་པ་མངོན་སུམ་དུ་མཐོང་བས། ཡིད་དཔྱོད་ཀྱི་ལྟ་བ་རང་འགགས་ཏེ་རང་བཞིན་གནས་པའི་བར་དོ་མི་སྣང་བར་དབྱིངས་རྣམ་པར་དག་པའི་སྒྲོན་མར་རང་འདུས་པས་ཨ་ཀུན་གྱི་ཐོག་མ་སྟེ། ཆོས་ཅན་རང་དག་པའི་སྐྱེ་མེད་ཞེས་བྱའོ། །སྐྱེ་འཆི་ལ་བཟླའི་སྐྱེ་མེད་མིག་གི་ཟད་ལུགས་ལ་བ རྟེན་ནས་སྐྱེ་མེད་རང་གྲོལ་དུ་མཐོང་བས། དབྱིངས་ཀྱི་སྒྲོན་མ་རྟེན་བྲལ་བ་ནི་ཨ་དང་འོག་སྟེ་རིག་པ་འཆི་མེད་དུ་རྟོགས་པའི་སྐྱེ་མེད་ཞེས་བྱའོ། །ཆོས་ཉིད་རང་དག་པའི་སྐྱེ་མེད་མིག་གི་དེ་ཁོ་ན་ཉིད་ལ་བརྟེན་ནས་འཁྲུལ་སྣང་འགགས་པར་མཐོང་བས། ཆོས་ཉིད་ཀྱི་བར་མ་དོ་ལ་ལྟོས་མི་འཆའ་བར་དབྱིངས་རྣམ་པར་དག་པའི་སྒྲོན་མ་འཕེལ་རྫོགས་པ་ནི་ཨ་གསུམ་པས་ཏེ། འཁྲུལ་པ་རང་ལོག་པས་ཆོས་ཉིད་མ་དང་ཕྲད་པའི་སྐྱེ་མེད་ཞེས་བྱའོ། །སྲིད་པ་རྒྱུན་གཅོད་ཀྱི་སྐྱེ་མེད་མིག་གི་མ་ནོར་བ་དེ་བཞིན་ཉིད་ལ་བརྟེན་ནས་གདོས་བཅས་རང་དག་པས་སྲིད་པ་བར་མ་དོ་ལ་འཇུག་མི་སྲིད་དེ། འཁོར་འདས་འབྲེལ་ཆད་པས་དབྱིངས་རྣམ་པར་དག་པའི་སྒྲོན་མ་མིང་དང་བྲལ་བ་ནི་ཨ་ཀུན་གྱི་འོག་མས་ཏེ། འཁོར་འདས་དཔྱིས་འབྱིན་པའི་སྐྱེ་མེད་ཞེས་བྱའོ། །དེ་ལྟར་སྐྱེ་བ་མེད་པ་བཅུ་ལ་བརྟེན་ནས་སྒྲོན་མ་བཞིའི་ཆོས་ཉིད་ཕྱིན་ཅི་མ་ལོག་པར་མཐོང་བས། དྲན་བསམ་གྱི་བློ་ལས་འདས་སྟེ། མཐའ་གྲོལ་གང་གི་ངོ་བོར་ཀྱང་མ་གྲུབ་པས་རང་བཞིན་རྫོགས་པ་ཆེན་པོའི་དོན་མཐའ་ལ་སྐྱོལ་བའོ། །དེ་ཉིད་ལ་བརྟགས་ན་སྐྱེ་མེད་ལུགས་ཉི་ཤུར་འགྲོ་བ་ཡིན་ནོ། །དེ་ལྟར་རྒྱུད་ཀྱི་ཚིག་དོན་སྒྲ་ལ་བསྡུས་ནས་བསྟན་ཏེ། རང་གི་ངོ་བོ་ལ་གནས་པའི་དུས་ན་སྒྲོན་མ་བཞི་པོ་དེ་ཐ་དད་པ་ཡིན་ནམ་སྙམ་ན་མ་ཡིན་ཏེ། མཉམ་པ་ཉིད་གཉིས་སུ་མེད་པ་སྐུ་གསུམ་འགྱུར་མེད་དུ་མ་མ་ཨེ་ཀ་པ་རཱ་ཞེས་བསྟན་པས་ན། དེ་བསྒྱུར་བས་གོང་དང་འདྲའོ། སྒྲ་དེ་བསིལ་ན། དེ་ལྟར་སྒྲོན་མ་བཞི་སྔར་བཞིན་གནས་ལུགས་ལ་མཉམ་པས་མ་གོང་མས་སྟེ་གོང་དུ་བསྟན་པ་དེ་རྣམས་དང་འདྲའོ། །དེ་ལྟར་མཉམ་པ་ལས་ཆོས་ཐམས་ཅད་གཉིས་སུ་མེད་པ་ཡིན་པར་བསྟན་པས་མ་ཞེས་གདགས་པ་རང་འབྲེལ་གྱི་ཡི་གེར་བྱུང་བས་ན། འདི་ལྟར་གཉིས་སྣང་གི་མཐའ་ལས་ལོག་ནས་གཉིས་མེད་དུ་གནས་པ་ནི། སྣང་སྟོང་གཉིས་སུ་མེད་དེ། དེ་ཇི་ལྟར་མེད་ཞེ་ན། སྣང་བ་སྣང་བས་སྟོང་པར་མ་གྲུབ་ལ། སྟོང་པ་སྟོང་པས་སྣང་བར་མ་གྲུབ་པའི་ཕྱིར་གཉིས་སུ་མེད་དོ། །དེ་ལྟར་ཡང་ཅིས་ཤེས་ན་སྣང་བ་སོ་ཙམ་ན་ངོ་བོ་སྟོང་ངོ་། །དེ་ལྟར་སྟོང་སོ་ཙམ་ན་རོལ་པ་སྣང་བ་སོ་བའི་གནད་ཀྱིས་སོ། །དེ་ལྟར་ཡོད་མེད་གཉིས་སུ་མེད་པ་དང་། བསྒོམས་མ་བསྒོམས་རྟོགས་མ་རྟོགས། ཤེས་མ་ཤེས་གཉིས་སུ་མེད་པ་དང་། གྲོལ་མ་གྲོལ་དང་། སངས་རྒྱས་སེམས་ཅན་ལ་སོགས་པ་གཉིས་སྣང་ཐམས་ཅད་ལ་ཁྱབ་པ་ལྟོས་མེད་པའི་རིགས་པས་བསྒྲེས་པས། ཆོས་ཐམས་ཅད་གཉིས་མེད་ཀྱི་ར་བ་ལས་མ་འདས་པའོ། །དེ་ལྟར་གཉིས་སུ་མེད་པ་དེ་ལ་སྐྱེ་མེད་བཅུའི་རང་བཞིན་དུ་སྦྱོར་བའི་ལམ་ལ་སྣང་བས་ཨེ་ཞེས་བསྟན་པས། ཆོས་ཉིད་མཉམ་པ་དེ་སྒྲོན་མ་བཞི་ཅེར་མཐོང་དུ་གཏན་ལ་ཕབ་པས་ཉམས་སུ་མྱོང་བ་དྲག་པོ་སྐྱེས་པས་ན། ཨེས་ཆོས་འབྱུང་མཚོན་པའོ། །དེ་སྐུ་གསུམ་ལམ་དུ་སྣང་བས་ཀ་ཞེས་བྱ། སྐུ་གསུམ་གཅིག་པའི་ལམ་ལ་འགྱུར་བ་མེད་པས་པ། འགྱུར་བ་མེད་པའི་ལམ་ལས་ཉམས་སྣ་ཚོགས་སུ་ཤར་བས་རཱ། དེ་ལ་ཐབས་འགགས་པ་མེད་པའི་མན་ངག་ལ་བརྟེན་ནས་རྟོགས་པས་ད་ལ་འ་རིང་བོ་འགྱུར་བྱེད་ཀྱི་ཡི་གེ་བྱུང་བའོ། །དེ་བརྡ་སྦྱོར་ཚིག་དུ་བསྒྱུར་ན་མཉམ་པ་ཉིད་གཉིས་སུ་མེད་པ་སྐུ་གསུམ་འགྱུར་མེད་གཅིག་ཏུ་ཤར་བ་ཞེས་ཚིག་གཅིག་ཏུ་བསྡུས་ནས་གང་ཟག་གཅིག་སངས་རྒྱ་བར་བྱེད་པའི་དོན་དུ་བསྟན་པའོ། །འོ་ན་དེ་ལྟར་སྒྲོ་བཏགས་པ་ཆོས་ཐམས་ཅད་གཉིས་མེད་སྐྱེ་མེད་དང་། ཐམས་ཅད་གཅིག་པར་འདུག་པས། འདི་ལྟར་སྣང་བ་སྤྲོས་པའི་ཆོས་རྣམས་གར་སོང་ཞེ་ན་རྟག་པ་དང་བརྟགས་པ་འགྱུར་བ་མེད་པའི་ཀློང་དུ་གཉིས་མེད་དུ་འདས་པས་ན་འཁོར་འདས་སྤྱིའི་ཁྱབ་བྱེད་དུ་བྱུང་བ་ནི་ཏྱ་ཉ྄ཡ྅྅྅་ཏ་ཡྃ་ཞེས་བསྟན་པས། དེ་ཡང་ཐམས་ཅད་ཀྱི་མཐའ་ལས་གྲོལ་བ་ཆེན་པོར་ཁྱབ་ཅིང་རྟེན་པར་བཞུགས་པས་ཏྱ། དེ་ལ་ཡ་སྟ་ནི་ཁྱབ་བྱེད་དུ་བྱུང་བ་སྟེ། དེ་བོད་སྐད་དུ་ཀླགས་ན་ཏྻེ་ཞེས་བྱའོ། །མཐའ་གྲོལ་ཆེན་པོ་དེ་ལ་ཉོན་མོངས་པ་རྣམས་ཀྱི་མཐའ་ལས་གྲོལ་བ་ཉ྄ཡ་྅྅྅ཞེས་པས་ཏེ། མ་རིག་པ་གསུམ་ལས་ལོག་པས་ཤེས་ཤིང་རིག་པ་ཉིད་དུ་རང་གྲོལ། ཡིད་ཀྱི་དྲན་བསམ་གྱི་མཐའ་ལས་ལོག་པས་འབྱེད་པ་མེད་པའི་ཤེས་རབ་ཏུ་གྲོལ། སེམས་ཀྱི་བྱུང་ཚོར་གྱི་མཐའ་ལས་ལོག་པས་ཡེ་ཤེས་གཉིས་ཀྱི་བདག་ཉིད་དུ་གྲོལ། བློ་ཡི་འཕྲོ་འདུ་མཐའ་ལས་ལོག་པས་མཐའ་གྲོལ་ཆེན་པོའི་བདག་ཉིད་དུ་བཞུགས་ཏེ། དེ་ལ་འདོད་ཆགས་མ་བྱུང་མ་སྐྱེས་ཏེ་རང་གྲོལ། དེ་ལྟར་གཏི་མུག་དང་། ཞེ་སྡང་དང་། ང་རྒྱལ་དང་། ཕྲག་དོག་དང་། བག་ཆགས་དང་། ལས་ལ་སོགས་པ་མ་བྱུང་མ་སྐྱེས་ཏེ་རང་གྲོལ་བའོ། །དེ་ལྟར་མཐའ་གྲོལ་ཡོངས་རྫོགས་སུ་ཁྱབ་པས་དེ་ལ་ཡ་ས་སྟ་བྱུང་བའོ། །དེ་ཡང་འདུས་མ་བྱས་པས་རྟག་སྟེ་ཏའོ། །སངས་རྒྱས་སེམས་ཅན་ཐམས་ཅད་ལ་ཁྱབ་པར་གནས་པས་མ། མཉམ་པ་དེ་ཕྱོགས་དང་རིགས་སུ་མེད་དེ་གཉིས་སྣང་དང་ཀླད་བ སྐོར་རོ། །དེ་ཡང་བསྒྱུར་ན་རྟག་པར་འགྱུར་བ་མེད་པའི་ཀློང་གཉིས་མེད་དུ་འདས་པ་ཞེས་བྱའོ། །དེ་ལྟར་གླེང་གཞིའི་མཚན་སྦྱར་བ་སྒྲ་དོན་གྱི་མན་ངག་བསྟན་ནས། ༈ །ད་ནི་ཐུན་མོང་གི་གླེང་གཞི་བསྟན་པར་བྱའོ། །གོང་དུ་སྡུད་པ་པོ་རང་བཞིན་རྒྱུ་དག་པའི་རྡོ་རྗེ་འཆང་དེ་ལ་ཐུན་མོང་མ་ཡིན་པའི་གླེང་གཞིའི་སྐབས་སུ་ཡིད་ལ་ཐེ་ཚོམ་ལྔ་སྐྱེས་པ། དེ་ཆོད་ན་རྒྱུད་ཀྱི་གཞུང་དོན་ཐུགས་སུ་ཆུད་ནས། སྡུད་པ་པོ་རང་གི་འཁོར་གྱི་ནང་དུ་མཆོག་ཐུན་མོང་དུ་ཚིག་དོན་ངེས་པར་ཕྱེ་སྟེ་བསྟན་པའམ། རང་གི་འཁོར་གྱིས་ངེས་པར་ཐོབ་པར་བྱ་བའི་ཕྱིར་ན་འདི་སྐད་བདག་གིས་ཐོས་པའི་དུས་གཅིག་ན། ཞེས་ཐུན་མོང་དུ་གླེངས་པས་ཐུན་མོང་གི་གླེང་གཞི་ཞེས་བྱ་ལ། དེ་ཡང་ཁྱད་པར་དང་ཐུན་མོང་གཉིས་ཀྱི་གོ་བ་ནི། ཁྱད་པར་ནི་ཐེག་པ་སྤྱི་ཐུན་མོང་པ་རྣམས་དང་མ ི་འདྲ་བས་ཁྱད་པར་ཡིན། འདི་ནི་ཐེག་པ་ཐུན་མོང་པ་རྣམས་དང་སྒོ་བསྟུན་པས་ཐུན་མོང་ཞེས་ཡོངས་གྲགས་སུ་ཡོད་པ་ལ་བྱའོ། །ཡང་ཁྱད་པར་ཟབ་མོའི་དོན་ལ་འཇུག་པར་བྱེད་པ་ལ་དགོངས་པ། ཐུན་མོང་འགལ་བ་སྤང་པ་ལ་དགོངས་པའོ། །སྡུད་པ་པོས་དེ་སྐད་གསུངས་པས་རང་གི་འཁོར་ཁ་གཅིག་དེ་ལ་གོ་བ་སྐྱེས། ཁ་ཅིག་གིས་ཕྱིན་ཅི་ལོག་དུ་རྟོགས་ཁ་ཅིག་གིས་བྱེ་བྲག་ཏུ་འདི་ནི་གང་ཡིན་ལ་སོགས་པའི་རྣམ་རྟོག་སྐྱེ་བ། ཁ་ཅིག་གིས་གླེང་གཞི་རང་གཞུང་དུ་གོ་སྟེ། འདི་བསྟན་པ་རྒྱུད་ཟབ་མོ། དེ་སུ་ལ་ཐོས་ན་སྟོན་པ་དྲུག་པ་རྡོ་རྗེ་འཆང་ལ་ཐོས། ཚུལ་ལམ་ཐབས་ཇི་ལྟར་ཐོས་ན་ལྷ་ཚངས་པའི་སྐད་ཉེ་རིང་མེད་པར་ཐོས། དེ་སུས་ཐོས་ན་བདག་གིས་ཐོས་ཏེ། གཞན་གྱིས་བརྒྱུད་པ་མེད་པར་སྒྲོ་འདོགས་གཅད། གང་གིས་ཐོས་ན་སྡུད་པ་པོ་རྣ་བའི་དབང་པོ་ཕྱིན་ཅི་མ་ལོག་པར་ཐོས་ཏེ་འཁྲུལ་པ་མེད་པར་སྒྲོ་འདོགས་བཅད། ཐོས་པ་ལ་དགོས་པ་ཅི་ཡོད་ན། སྡུད་པ་པོས་སྔོན་འབྱུང་དུ་རང་གི་མངོན་སུམ་དུ་རྟོགས་ལ། དེ་ལྟར་རྟོགས་པས་རང་གི་འཁོར་གྱིས་ཀྱང་འདི་ཐོས་པས་རྟོགས་པར་འགྱུར་བའི་དགོས་པ་ཡོད་ལ། དེ་དུས་ཇི་ཙམ་ན་ཐོས་ན་དུས་གཅིག་ན་ཐོས་ཀྱི་ཡང་ནས་ཡང་དུ་མ་ཐོས་པས། སྡུད་པ་པོ་དེ་མཆོག་ཏུ་དབང་བོ་རྣོ་བར་ཀྱང་སྟོན་ལ། ཡང་ན་རྒྱུད་འདི་དང་རྒྱུད་གཞན་དུས་གཅིག་ཏུ་ཐོས་ཀྱི། དུས་ཐ་དད་པས་སྟོན་པ་ཐ་དད་པ་ལ་ཐོས་པ་མ་ཡིན་ཏེ་དུས་དང་གནས་གཅིག་ཏུ་ཀུན་ཐོས་པས་སྡུད་པ་པོ་ཐོས་པ་རྫོགས་པར་སྟོན་ཏོ། །དེ་སྐད་གསུངས་པ་ལ་ཁོ་རང་གི་འཁོར་ལྷའི་བུ་རང་སྣང་སྟོན་པ་ཞེས་བྱ་བ་ཐེ་ཚོམ་ལྔ་སྐྱེས་ཏེ། འདི་ལྟ་བུའི་ཆོས་འདི། གནས་ནི་ཇི་སྐད་བྱ་བར་ཐོས་ལ། གྲོགས་ནི་གང་དང་ལྷན་ཅིག་ཏུ་ཐོས་ལ། ཆོས་ནི་ཇི་སྐད་བྱ་བ་ཐོས་ལ། མཚན་ཇི་ལྟ་བུས་གསུངས་སྙམ་པ་སྐྱེས་པ་ལ། གནས་ནི་ཕྱོགས་བཅུ་གང་ནས་བལྟས་ཀྱང་ཀུན་ཏུ་ཟང་ཐལ་ཆེ་བའི་ཆོས་ཉིད་ཀྱི་ཕོ་བྲང་ན་བཞུགས་པའི་སྟོན་པ་ལ་བདག་གིས་ཐོས་པའོ། །འཁོར་གྱི་རྣམ་རྟོག་ལ་གནས་ཀྱི་མེད་དང་དེ་ཡིན་ན། སྟོན་པ་ཇི་ལྟར་བྱ་བ་ལ་ཐོས་སྙམ་པ་ལ། སྟོན་པའི་མིང་ནི་རྣམ་པར་དག་པའི་རྡོ་རྗེ་འཆང་ཆེན་པོས་བདག་ལ་གསུངས་པའོ། །འོ་ན་རྒྱུད་དམ་བསྟན་པའི་མིང་ཇི་སྐད་བྱ་བ་གསུངས་སྙམ་པ་ལ། ཆོས་ནི་སྒྲོན་མ་སྣང་བར་བྱེད་པ་འདི་གསུངས་སོ། །འོ་ན་སྟོན་པ་རང་གནས་དང་སྟོན་པའི་མིང་དེ་ཇི་ལྟར་ཡིན་ན་གྲོགས་ཇི་སྐད་བྱ་བ་དང་ལྷན་ཅིག་ཐོས་སྙམ་ན། གྲོགས་འཇིག་རྟེན་གྱི་གཟུགས་འཛིན་པའི་ལྷ་དང་ཀླུ་དང་། མི་དང་དྲི་ཟ་དང་། འཇིག་རྟེན་ལས་འདས་པའི་གཟུགས་འཛིན་པའི་སངས་རྒྱས་དང་། བྱང་ཆུབ་སེམས་དཔའ་དང་། ཡེ་ཤེས་ཀྱི་མཁའ་འགྲོ་མ་དཔག་ཏུ་མེད་པའི་སྣང་བའི་གཟུགས་འཛིན་པ་རྣམས་དང་ལྷན་ཅིག་ཏུ་ཐོས་སོ་ཞེས་པའོ། །འོ་ན་གནས་ཀྱི་མིང་དང་། སྟོན་པའི་མཚན་དང་། ཆོས་ཀྱི་མཚན་དང་། གྲོགས་རྣམས་དེ་ལྟར་ཡིན་ན། སྟོན་པ་དེས་ཚུལ་ལམ་ཐབས་ཇི་ལྟ་བུས་གསུངས་སྙམ་པ་ལ། སྣང་བ་ནི་འཁྲུལ་པའི་ཡུལ་དང་སེམས་ཀྱི་ནུས་པ་རྣམས་རང་བཞིན་མེད་པར་མཁྱེན་པས་རྣམ་པར་དག་པའི་སྟེ་རྡོ་རྗེ་འདུས་མ་བྱས་པ་འཆང་བ་རྒྱུན་དུ་ཡེ་ཤེས་མི་ག ཡོ་བའི་དགོངས་པ་དང་འདུ་བ་མེད་པ་ཆེན་པོ་དོན་ཆེ་བས་འབྲས་བུ་སངས་རྒྱས་ཚིག་ཆེ་བས་རང་བཞིན་རྫོགས་པ་ཆེན་པོའི་དོན་སྟོན་པའི་སྟོན་པ། རྒྱུ་མ་རིག་པ་གསུམ་དག་པའི་རྡོ་རྗེ་མི་བྱེད་པར་སེམས་ཅན་གྱི་དོན་ལ་སེམས་རྩེ་གཅིག་འཆང་བ་དུས་གསུམ་དུ་སེམས་ཅན་གྱི་དོན་ལ་སེམས་རྩེ་གཅིག་ཏུ་སེམས་དཔའ་བདག་ལ། རང་བཞིན་མ་བཅོས་པའི་དོན་དངོས་སུ་སྣང་བར་མཛད་ནས། རྫོགས་པ་ཆེན་པོའི་རྒྱུད་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་ཐུགས་ཀྱི་དགོངས་པ་ལས་རྗེས་སུ་བཀྲམ་ནས་བདག་ལ་སོགས་པའི་འཁོར་རྣམས་ལ་གཟིགས་ནས། དེ་དག་ལས་ཁྱད་པར་དུ་ཕྱུང་བའི་སྒྲོན་མ་ནི་བཞིའི་དོན་སྣང་བར་བྱེད་པ། སངས་རྒྱས་ཐམས་ཅད་ཀྱི་སྙིང་པོའི་དོན་བསྡུས་པ། གསང་བ་བླ་མ་འདི་ཡི་གོང་ན་གཞན་མེད་པས་ན་ཆེན་པོ། ཉན་ཐོས་དང་ཐེག་པ་དམན་པ་རྣམས་ལ་གསང་བ་ཡིན་ལ། རང་བཞིན་རྫོགས་པ་ཆེན་པོའི་དོན་ལ་མོས་པའི་སྐལ་ལྡན་རྣམས་ལ་ཐུན་མོང་དུ་བསྟན་པས། འདི་ཉིད་དོན་རྒྱུད་ལ་སྐྱེས་ཏེ་འཁོར་བ་ལས་གྲོལ་ཏེ། མྱ་ངན་ལས་འདས་པའི་འབྲས་བུ་བདེ་བླག་ཏུ་རྟོགས་པར་བྱེད་པ་ནི། སྣང་བ་རྣམ་པར་དག་པའི་རྡོ་རྗེ་འཆང་ཆེན་པོ་དེས་ཆོས་ཐམས་ཅད་གཉིས་སུ་མེད་པའི་གཞི་གནས་ཀྱི་ཡེ་ཤེས་ལས་མཁྱེན་རིག་གསལ་བའི་ཀློང་དུས་གཅིག་ཏུ་རོལ་བས་ཚིག་གི་རྒྱལ་པོ་འདི་དག་དོན་གྱི་ངོ་བོར་དྲིལ་བའི་དགོངས་པ་ཐུགས་ལ་ཤར་ནས། སྟོན་པ་ཉིད་ཀྱི་མགུར་ཡངས་པ་སེང་གེའི་མགྲིན་ལྟ་བུའི་མགུར་གྱི་བུམ་པར་ཚིག་རྣམས་དྲིལ་ཏེ། གསང་སྔགས་ཀྱི་ཐབས་ཐུན་མོང་དུ་བསྟན་པ་མ་ཡིན་པའི་དོན་འདི་ཐུགས་མཁྱེན་པའི་ཤེས་རབ་ཀྱིས་ལྗགས་ཀྱི་དབང་བོ་པདྨ་རྒྱས་པ་ལྟ་བུ་ལ་བཀྲམ་ནས། རྡོ་རྗེ་ནི་སྐྱེ་འཇིགས་མི་མངའ་བ་སྒྲོན་མ་བཞི་སྣང་བར་དབང་པོའི་སྤྱོད་ཡུལ་དུ་བྱེད་པའི་ཚིག་ཏུ་བདག་ལ་འདི་དག་བསྡུས་པའི་དོན་དུ་དགོངས་ཏེ་བཀའ་ཕྱིན་ཅི་མ་ལོག་པར་བསྩལ་ཏོ། །དེ་ལྟར་སྡུད་པ་པོས་བསྟན་པས་འོ་ན་གནས་ཀྱི་མིང་བསྟན་པ་ལ་གནས་དེའི་མཚན་ཉིད་རང་ཇི་ལྟ་བུ་གཅིག་ཡོད་སྙམ་པ་ལ། གནས་ཀྱི་མཚན་ཉིད་ནི། ཤར་དང་། ནུབ་དང་། ལྷོ་དང་། བྱང་དང་། མཚམས་བཞི་དང་། སྟེང་དང་། འོག་དང་། ཕྱོགས་བཅུའི་འཇིག་རྟེན་གང་ནས་སུ་ཡིས་བལྟས་ཀྱང་ཕྱི་ནང་མེད་པར་ཀུན་ཏུ་ཟང་ཐལ་བར་མཐོང་བས་དེའི་མིང་ནི་ཆོས་ཉིད་རྣམ་པར་དག་པའི་ཕོ་བྲང་ན་གནས་དེ་ལ་སྣ་ཚོགས་པའི་རྒྱན་གྱིས་སྤྲས་པས་ཕུན་སུམ་ཚོགས་པས་ཏེ། དེ་ཡི་ཕྱིར་ན་སྣ་ཚོགས་ནི་རིན་པོ་ཆེའི་རྒྱན་དྲྭ་བ་དང་དྲྭ་བ་ཕྱེད་པ་དང་རྟ་བབས་དང་། རིན་པོ་ཆེའི་མཆུ་འཕྱང་བ་ལ་སོགས་པས་ས་གཞི་ལ་སྣང་བར་བྱས་པས་ན། ཡེ་ཤེས་ནི་མཚན་ཉིད་འཛིན་པའི་ཡེ་ཤེས་ཏེ། མེ་ལོང་ལྟ་བུ་དང་། ཆོས་ཀྱི་དབྱིངས་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་དང་། རྣམ་པ་ལྔའི་རིན་པོ་ཆེའི་མིག་ཚགས་དང་། མིག་མང་དང་། འཁར་ཐབས་དང་། བེར་ཁྱིམ་དང་། པདྨ་བརྩེགས་པ་དག་གིས་སྤྲས་པ་ནི་འཆར་བྱེད་དུ་བྱུང་བའོ། །ཁ་དོག་ནི་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། མཐིང་ཁ་དང་ལྔ་གསལ་བ་ཆེན་པོའི་ས་གཞི། མཐའ་དང་དབུས་མི་དམིགས་པས་རྒྱ་ཆེ་ལ། དབྱིབས་ལ་ཚད་མེད་པས་དཀྱིལ་ཡངས་པའོ། །དེ་ལ་དྲི་མའི་ཉེས་པ་མེད་པས་མཐའ་སྐུ་དང་ཡེ་ཤེས་སུ་རྣམ་པར་གསལ་བ་ཞེས་བྱའོ། །དེ་ཡང་སྐུ་རྣམས་ཀྱི་རང་བཞིན་ལས་ཐམས་ཅད་ཀྱི་གཙོ་བོ་ནི་ཆོས་སྐུ་དེ་ལས་ལོངས་སྐུ། དེ་ལས་སྤྲུལ་པའི་སྐུས་སེམས་ཅན་ཀུན་གྱི་དོན་གང་དུ་ཡང་ཐོགས་པ་མེད་པར་མཛད་པས་ཟང་ཐལ་བ་ཞེས་བྱའོ། །དེ་ལྟ་བུའི་གནས་དེ་ནས་སྤྲུལ་པའི་སྐུས་ཕྱོགས་བཅུའི་འཇིག་རྟེན་གྱི་ཁམས་ཀུན་ཏུ་གང་ལ་གང་འདུལ་བའོ། །དེ་དང་དེའི་གཟུགས་དང་མཐུན་པར་འཆར་བྱེད་མ་འགགས་པར་སྤྲུལ་པ་འབྱུང་བས་ན་སྤྲུལ་སྐུའི་གནས་སོ། །དེ་ལྟར་ཤར་བའི་སྤྲུལ་པའི་སྐུ་དེས་གང་འདུལ་ན་འགྲོ་བ་རྣམས་ལ་ཉེ་རིང་མེད་པར་སྤྱི་ཁྱབ་ཏུ་འདུལ་བས་ཕྱི་ནང་མེད་པའི་ཞེས་བྱ། དེ་ལྟ་བུའི་གནས་དེ་ཡང་གང་ལས་བྱུང་ན་ངོ་བོ་ཀ་དག་པའི་རྩལ་དུ་ཤར་བས། དེ་ཉིད་འགྱུར་བ་མེད་པས་པ་ལ། བཀོད་པ་ནི་འཁོར་གྱི་ཁྱད་པར་དུ་བྱུང་སྟེ་ཕུན་སུམ་ཚོགས་པའོ། །ཡོངས་རྫོགས་པ་ནི་སྟོན་པའི་ཁྱད་པར་གྱི་ཡོན་ཏན་ཏེ། སྟོན་པ་དེ་ལ་ཡེ་ཤེས་དང་འོད་དང་ཐིག་ལེ་ལ་སོགས་པ་རྣམས་ཀྱི་བརྒྱན་པས་སྟོན་པར་ཀྱང་བྱུང་། ཕུན་སུམ་ཚོགས་པའོ། །དེ་ལྟར་ཐམས་ཅད་ཀྱིས་མཛེས་པར་བྱས་པས། གནས་ཀྱང་ཡིན་ལ་ཕུན་སུམ་ཚོགས་པ་ཡང་ཡིན། དེ་བཞིན་འཁོར་ཀྱང་ཡིན་ལ་ཕུན་སུམ་ཚོགས་པ་ཡང་ཡིན། བསྟན་པ་དང་། སྟོན་པ་དང་། དུས་ལ་སོགས་པའོ། །སྡུད་པ་པོས། དེ་ལྟར་རང་གི་འཁོར་གྱི་ནང་དུ་བསྟན་པས་ལྷའི་བུ་ལ་སོགས་པ་ཡིད་ཆེས་པ་སྐྱེས་ནས་བསྟན་པ་ལ་རབ་ཏུ་དད་ཅིང་འདུན་ནོ། །དེ་ནི་རྒྱུད་འབྱུང་བར་བྱ་བའི་ཕྱིར་རྒྱུད་ཀྱི་གླེང་གཞི་བསྟན་ནས། ༈ །ད་ནི་རྒྱུད་ཀྱི་གཞུང་དོན་ལེའུ་བཞིའི་དོན་མདོར་བསྟན་པ་འཆད་དེ། འདི་ལ་གཉིས་ཀྱིས་བསྟན་པའི་དང་པོ་རྒྱུད་ཀྱི་གཞུང་དོན་ངེས་པར་འབྱུང་བར་བྱེད་པའམ་ཆེ་བ་བསྟན་པ་ནི། རང་བཞིན་རྒྱུད་དག་རྡོ་རྗེ་འཆང་། །ཞེས་པ་ལ་སོགས་པས་བསྟན་ཏེ། དེ་ནི་སྟོན་པས་སྡུད་པ་པོ་ལ་བོས་ནས་བཀའ་སྩལ་པའི་དོན་ནོ། །ངས་ནི་ཞེས་པ་སྟོན་པས། ཆོས་ཉིད་ཀ་ནས་དག་པ་ཉིད་ལས། ལྷུན་གྲུབ་འགགས་པ་མེད་པའི་ཡིད་རང་བྱུང་དུ་གཡོས་པས་དྲན་པའི་ལས། སྣ་ཚོགས་སུ་བྱུང་སྟེ་དེ་ཡང་དྲན་པའི་རྒྱུན་འགྱུ་བ། རྐྱེན་སྣང་བ། དྲན་པའི་ལས་ཀྱིས་རྟོག་པ་དུ་མ་སྡུད་པར་བྱེད་པས་སྟེ། དེ་ཡང་འགྱུ་བ་མེད་ན་རྐྱེན་སྣང་བ་ལ་རྟོག་དཔྱོད་མི་འཇུག །རྐྱེན་སྣང་བ་ལ་རྟོག་དཔྱོད་མ་བཙུད་ན་ལས་ཀྱི་རྣམ་པར་རྟོག་པ་དུ་མ་སྡུད་མི་སྲིད་དོ། །དེ་ལྟར་ལས་ཀྱིས་རྣམ་པར་རྟོག་པ་དུ་མ་བསྡུས་པས། ཡུལ་དྲུག་ལ་གཅོད་པའི་འགྱུ་བྱེད་འཛིན་པ་དང་། ཀུན་ཏུ་འཚོལ་བྱེད་དང་། གཏན་ལ་འབེབས་པ་དང་། ངེས་པར་འཇོག་པ་དང་། ཉོན་མོངས་པ་ཅན་གྱི་དང་། ཡིད་ཀྱི་རྣམ་པར་ཤེས་པའི་ཡིད་དང་དྲུག་ནི་ཡུལ་ཐེ་ཚོམ་དང་། ཡིད་གཉིས་དང་། རྟོག་པ་དང་། དྲན་པ་དང་། སྙམ་བྱེད་དང་། ཕྱིན་ཅི་ལོག་དང་དྲུག་ལ་ཀུན་ཏུ་གཅེས་པ་ནི་འཁོར་བའི་ཆོས་ཀྱི་རྩ་བ་དང་ཡན་ལག་ཏུ་བཅས་པར་ཤར་རོ་ཞེས་བསྡུད་པ་ལ་གདམས་པའོ། །དེ་ཡང་ཐོག་མ་གང་ནས་བྱུང་ན་འགྱུ་བ་དྲན་པའི་རྒྱུ་ཙམ་དུ་བརྟེན་པའི། འདི་ཡི་དུས་ན་རགས་པའི་སྣང་བ་ཙམ་དུ་གྲུབ་པ་མེད་པས་སྣང་བ་མེད་པའི་སྟེ། གཟུགས་སུ་གྲུབ་པ་མེད་ལ། དེའི་ཕྱིར་ན་འགྱུ་བ་མེད་པའི་སྔོན་རོལ་ན་རྣམ་རྟོག་གི་མིང་མེད་ལ། ཡེ་ཤེས་རང་གི་ངོ་བོར་བཞུགས་པས། ཕྱོགས་ནས་ནི་དེ་ལྟ་བུ་ལ་གྲུབ་པ་མེད་པའི་ཆ་ནས། ད་ལྟར་གྱི་ཡིད་དྲུག་དང་། དེ་ལས་བྱུང་བའི་བསམ་པའི་འཛིན་པ་སྟེ་སེམས་ཞེས་བཟུང་བའི་ཡུལ་སླང་བར་བྱེད་པ་དང་། དྲན་པ་ཡུལ་དུ་མ་ལ་རྟོག་ཅིང་འཕྲོ་བར་བྱེད་པ། འདི་དག་རྣམས་ད་རེས་གཅད་པར་བྱ་བའི་ཕྱིར། ཐེག་པ་ཐུན་མོང་པ་རྣམས་ཀྱིས་ཡིད་དཔྱོད་ཀྱི་ལྟ་བ་ལས་མེད་པ་འདི་ལ་ཐེ་ཚོམ་སྐྱེ་བའི་ས་རིག་པའི་ཡེ་ཤེས་དེ་ཤེས་རབ་ཀྱིས་མ་ཡིན་པར་དབང་པོའི་ཡུལ་དུ་མངོན་སུམ་ལ་གཏན་ལ་འབེབས་པའི་སྒྲོན་མ་འབར་བའི་རྒྱུད་ཞེས་བྱ་བ་གཞུང་ཚིག་དང་ཡི་གེར་ང་ཡིས་སྤྲོ་ཡིས། རང་བཞིན་རྒྱུད་དག་པའི་རྡོ་རྗེ་འཆང་ཁྱོད་ཀྱིས། གཅོད་པའི་ཤེས་རབ་ཕྱིན་ཅི་མ་ལོག་དང་། ལུས་ངག་ཡིད་ཀྱི་སྤྱོད་ལམ་ཕྱིན་ཅི་མ་ལོག་པ་དང་། རྣ་བའི་དབང་པོ་ཕྱིན་ཅི་མ་ལོག་ཅིང་སྒྲ་གཞན་ལ་མ་ཡེངས་པར་ཉོན་ཅིག་ཅེས་སྔོན་འབྱུང་དུ་སྡུད་པ་པོས་ཉན་པའི་སྐྱོན་སྤངས་ཤིག་པར་གདམས་ཤིང་བསྐུལ། རྗེས་འཇུག་ཏུ་ད་ལྟ་ཉན་པ་རྣམས་ལ་གདམས་པའོ། །གསང་བ་མཆོག་གི་རྒྱུད་ཟབ་མོ་འདི་ནི་སྒྲོན་མ་བཞི་མངོན་སུམ་དུ་སྟོན་པས་རབ་ཏུ་ཟབ་བོ། །དེ་ཡང་སྒྲོན་མ་རིག་པའི་སྣང་བས་འཇིག་པ་ཕྱི་སྣོད་ཀྱི་འབྱུང་བ་ས་ཆུ་མེ་དང་གསུམ་འབྱུང་བ་རླུང་གི་དལ་ལ་བརྟེན། དེ་ལ་འགྲོ་བ་རིགས་དྲུག་གི་སེམས་ཅན་བརྟེན་པས་ན། དེ་གཉིས་ཀ་རྟག་པ་མ་ཡིན་པས་འཇིག་རྟེན་ཞེས་བྱ་སྟེ། འབྱུང་བ་ནམ་མཁའ་ལ་བརྟེན་པའོ། །དེ་འཇིག་པ་ནི་འདོད་པ་དང་། གཟུགས་དང་། གཟུགས་མེད་པའི་ཁམས་ནི་སྒྲོན་མ་བཞི་ལ་བརྟེན་ནས། འགྲོ་བ་ཐམས་ཅད་ལ་བརྟེན་པ་སྒྲོན་མ་བ ཞི་ཡིན་པས་དེ་ལ་བརྟེན་ནས་སངས་རྒྱ་བར་བྱེད་པའི་ཕྱིར། སྐྱེ་འགྲོ་བརྟན་གཡོ་ཐམས་ཅད་ལ་རིག་པའི་ཡེ་ཤེས་འགགས་མེད་དུ་སོ་སོར་རང་ལ་སྣང་ཡང་། ཐེག་པ་ཐུན་མོང་པ་ཡིད་དཔྱོད་འཛིན་པ་འདི་དག་རྣམས་ཀྱིས་མི་མཐོང་བས། རིམ་པ་བརྒྱད་པོ་འདི་ཀུན་ཆོས་ཉིད་མངོན་གསུམ་ལས་གོལ་ཏེ་ངོ་བོ་སུས་ཀྱང་མཐོང་བ་མེད་པའི་ཕྱིར་རོ། །འོ་ན་དེ་རྣམས་ཀྱིས་མི་མཐོང་བ་བཞིན་ཀུན་གྱིས་མཐོང་བ་མེད་དམ་ཞེ་ན། ཡེ་ཤེས་རང་བྱུང་སྒྲོན་མ་ཆེན་པོ་བཞི་ནི། རྒྱུད་འདི་འཆང་བའི་སྐལ་ལྡན་གང་ཞིག་གིས་དབྱིངས་དང་རིག་པ་འདུ་འབྲལ་མེད་པ་སྒྲོན་མའི་ངོ་བོ་ལྷག་མཐོང་དུ། དཔེར་ན་རྒྱ་མཚོའི་སྟེང་གི་མེ་ཏོག་ལྟར་རང་འོད་རང་རྫོགས་སུ་མཛེས་པའི་རྒྱན་གྱིས་བརྒྱན་པར་མཐོང་བས་ན་སྙིང་པོའི་དོན་ལ་འདྲིས་པ་ཞེས་བྱའོ། །དེ་ལྟར་སྔར་མ་མཐོང་བས་འཁོར་བའི་ཆོས་ལ། ད་མཐོང་བའི་ཕྱིར། གཞི་གནས་ཀྱི་ཡེ་ཤེས་ཆེན་པོ་གསུམ་དུ་ཡོངས་སུ་མྱ་ངན་ལས་འདའ་བར་འགྱུར་བས་མྱང་འདས་ཀྱི་ཆོས་སོ། །དེ་ལྟར་ཡང་གང་ལ་བརྟེན་ནས་མཐོང་ན་སྒྲོན་མ་བཞི་ཉིད་ཀྱི་སྣང་བ་ལ་བརྟེན་ནས་ལྷག་མཐོང་གི་ཡེ་ཤེས་དངོས་སུ་རྟོགས་ཤིང་མཐོང་བའོ། །འོ་ན་དེ་གློ་བུར་དུ་བྱུང་ངམ་ཞེ་ན། མ་ཡིན་ཏེ་ཐོག་མ་ཉིད་ནས་བར་མཚམས་མེད་པར་རྒྱུན་དུ་རང་སྣང་ཆེན་པོའི་ཡེ་གདངས་སུ་བརྡལ་བ་ཀུན་ཏུ་ཁྱབ་པར་ཤར་བའོ། །དེ་ཡང་ཤར་ལུགས་ཇི་ལྟར་ཤར་ན་རྡོ་རིག་པ་རྗེ་ཡེ་ཤེས། རིག་པ་དང་ཡེ་ཤེས་ཀྱི་རང་གདངས་གཉིས་སུ་མེད་པ་དེ་སྙིང་པོ་རིག་པའི་ཡེ་ཤེས་ཡེ་ནས་འཛིན་རྟོག་དང་བྲལ་བ་ཉིད་དུ་ཤར་བའོ། །དེ་ད་ལྟ་སྐལ་ལྡན་ལ་ཉན་པའི་དུས་བྱུང་ཙམ་ན་ཆོས་ཉིད་མངོན་སུམ་དང་པོ་འཕྲད་པས་ན་ནུབ་པ་མེད་དོ། །དེ་ལྟར་ནུབ་པ་མེད་པའི་ཡེ་ཤེས་ཀྱི་སྒྲོན་མའི་ཉམས་གོང་དུ་འཕེལ་བས་ན་རིན་པོ་ཆེའི་གཏེར་གྱི་མཛོད་ཆེན་པོ་དང་འཕྲད་པ་ལྟར་ལོངས་སྤྱོད་པས་འདི་ནི་མྱ་ངན་ལས་འདས་པའི་ཡོན་ཏན་སྣ་ཚོགས་འཕེལ་བའོ། །དེའི་ཕྱིར་ན་སྒྲོན་མ་འབར་བའི་རྒྱུད་འདི་སུ་ཡིས་སྤྱོད་པ་བསྐལ་པ་བཟང་བོ་ཞེས་བྱའོ། །དེའི་མིང་ནི་རང་བཞིན་རྫོགས་པའི་སྐལ་པ་ཡོད་པས་དེ་དང་འཕྲད་པ་དོན་བཟང་པོ་ཚིག་འབྲུ་བཟང་པོ་ཞེས་བྱའོ། །ཐོག་མ་དང་། བར་དང་། ཐ་མར་དགེ་བས། ཆོས་ཉིད་མ་བཅོས་པའི་ངང་དངོས་པོའི་འདུག་ཚུལ་རང་རིག་དོན་གྱི་སྙིང་པོ་ཅན་དུ་མངོན་པར་རྫོགས་པར་སངས་རྒྱའོ། །དེའི་ཕྱིར་ན་སྐལ་ལྡན་འདི་ལ་མི་དགེ་བ་རྡུལ་ཕྲ་རབ་ཀྱི་ཆ་ཙམ་ཡང་མེད་དོ། །དེ་ཅི་ཡི་ཕྱིར་ན་བརྩོན་འགྲུས་རབ་ལ་ཟག་པ་མི་སྣང་། ཐ་མ་ལ་སྒྲོན་མ་མངོན་གསུམ་དུ་མཐོང་བའི་ཡོན་ཏན་ལ་སྤྱོད་པས། འབྱུང་བ་རགས་པའི་དང་ཉོན་མོངས་པའི་རྡུལ་གཉིས་བཞི་དང་བྲལ་བའི་རང་རིག་པ་ཉིད་མངོན་སུམ་དུ་རྟོགས་ཤིང་མཐོང་བའི་ཕྱིར། དེ་ལ་ཚིག་གིས་གཏན་ལ་མི་ཕེབས་པས་ན་རིག་པ་མངོན་གསུམ་འདི་ལ་ཐ་སྙད་ཀྱི་ཚིག་གིས་སྒྲོ་གདགས་སུ་མེད་པས་དུ་མ་དང་བྲལ་བ་ཉིད་དོ། །དེ་ལྟར་རྒྱུད་འབྱུང་བའི་ཆེ་བའམ་དགོངས་པ་བསྟན་ནས། ད་ནི་རྒྱུད་ཀྱི་ཚིག་དོན་ལེའུ་བཞིའི་དོན་མདོར་བསྟན་པ་ནི། འདི་ཀུན་སྒྲོན་མ་རྣམ་བཞི་ཡིས། །ཞེས་པ་ལ་སོགས་པས་བསྟན་ཏེ། ཚིག་འདི་ཀུན་ཐམས་ཅད་སྒྲོན་མ་རྣམ་པ་བཞིའི་ཚིག་ལས་གཞན་གང་ཡང་མེད་དོ་ཅེས་པའོ། །ཚིག་དེ་བསྟན་པ་ལ་དགོས་པ་ཅི་ཡོད་ན། སེམས་ཅན་ཀུན་གྱི་ལུས་ལ་གནས་ཤིང་སྣང་བ་འཇིག་པར་འགྱུར་བའི་དགོས་པ་ཡོད་དོ། །དེ་ཡང་རྒྱང་ཞགས་ཆུའི་སྒྲོན་མ་བསྟན་པའི་དགོས་པ། གཟུགས་ལ་སོགས་པ་འདོད་པའི་ཡོན་ཏན་ལྔ་ངོ་བོ་ཉིད་དུ་གྲོལ་བར་བྱེད་ལ། ཤེས་རབ་རང་བྱུང་སྒྲོན་མ་རང་རྒྱུད་ལ་ཤར་བས། ཐེག་པ་ཐུན་མོང་པ་རྣམས་ཀྱི་ཐེ་ཚོམ་གཅོད་པར་བྱེད་དོ། །ཐིག་ལེ་སྟོང་པའི་སྒྲོན་མ་ཡོད་རྟགས་ཀྱིས། འཁོར་བ་དང་མྱ་ངན་ལས་འདས་པ་གཉིས་བསྲེ་བའི་མཚམས་སྦྱོར་བར་བྱེད་པའོ། །དག་པ་དབྱིངས་ཀྱི་སྒྲོན་མ་ཡིས་ནི། རྣལ་འབྱོར་པ་རྣམས་ཀྱི་ཉམས་གོང་ནས་གོང་དུ་འཕེལ་བའི་ས་བོན་འདེབས་པའོ། །དེའི་ཕྱིར་ན་འདི་ཀུན་གྱིས་ཁྱད་པར་གྱིས་སྣང་བ་ཞེས་བྱའོ། །དེ་ལྟར་རྒྱུད་ཀྱི་ཚིག་དོན་མདོར་བསྟན་ནས། ད་ནི་རྒྱས་པར་འཆད། དེ་ལས་ཀྱང་རྒྱང་ཞགས་ཆུའི་སྒྲོན་མའི་དོན་རྒྱས་པར་སྟོན་ཏོ། །འདི་ལ་དོན་གསུམ་གྱི་བསྟན་པའི་དང་པོ་སྒྲོན་མ་དེ་ཉིད་ཀྱི་དྲིས་ལན་མདོར་བསྟན་དུ་བསྟན་པ་ལ་གཉིས་ལས་དྲིས་པ་ནི་དེ་ནས་རྒྱུད་དག་རྡོ་རྗེ་འཆང་། ཞེས་པ་ལ་སོགས་པ་བསྟན་ཏེ། དེ་ནས་ནི་མདོར་བསྟན་པའི་དེ་ནས་སོ། །རྒྱུད་དག་རྡོ་རྗེ་འཆང་ནི་སྡུད་པ་པོའི་མིང་། སྒྲོན་མ་བཞིའི་དོན་བསྟན་པས་དགའ། དེ་ལྟར་མངོན་སུམ་དུ་མཐོང་བའི་དོན་ལ་ཡིད་ཆེས་པས་མགུ། དང་བའི་དང་། མོས་པའི་དང་། ཡིད་ཆེས་པའི་དད་པ་དང་གསུམ་རབ་ཏུ་སྐྱེས་ནས། སྟོན་པ་ལ་ཞུ་བའི་གསོལ་བ་ནི། སྣང་བ་དག་པའི་སྟོན་པ་རྡོ་རྗེ་འཆང་བ་ལ། སྔར་གྱི་དེ་མ་གོ་བས་ད་དེའི་དོན་ཞུ་བའི་ཚིག་ནི་འདི་སྐད་ཅེས་གསོལ་ཏོ། །ཀྱེ་བདག་དོན་ཀྱེ་གཞན་དོན་དུ་སྟོན་པ་འདུན་པའི་སྒོ་ནས་བོད་པ་རྡོ་རྗེ་མི་ཕྱེད་པའི་སྒོ་ནས་གཅོད་པ། འཆང་ཞེས་ཏིང་ངེ་འཛིན་མངའ་བའི་སྒོ་ནས་བོས་ནས། འདས་ནི་རང་བཞིན་གྱིས་སངས་པ་མཁའ་ལ་སྤྲིན་དེངས་པ་ལྟར་སངས་པ་དང་། རྐྱེན་གྱིས་སངས་པ་ནི་ནོར་བུ་ཆབ་རྙོག་མ་ཅན་དུ་རྩལ་པ་ཙམ་གྱིས་སངས་པ་ལྟར་སངས་ལ། བྱས་པ་སངས་པ་དྲི་མ་བཀྲུས་པས་དག་པ་ལྟར་སངས་པ་དང་། གཉན་པོས་སངས་པ་ནད་ལ་སྨན་གྱིས་སངས་པ་ལྟར་སངས་པའོ། །དེ་ཡང་སངས་པར་བྱ་བའི་ཡུལ་ཡིད་དྲུག་སངས་པས་གཟུང་བའི་རྣམ་པར་རྟོག་པ་མེད་ལ། སངས་རྒྱུ་ཉོན་མོངས་པ་ལྔ་སངས་པས་སླར་འཁོར་བར་ལྡོག་མི་སྲིད། སངས་པར་བྱ་བའི་རྐྱེན་རགས་པ་རྫས་གྲུབ་ཀྱི་སྣང་བ་མི་སྣང་བས་འཁྲུལ་པ་ཐམས་ཅད་རང་སངས་པ་དང་། སངས་པའི་དགོས་པ་འཁོར་བའི་འཁོར་ལོ་ལ་འཇུག་མི་སྲིད་པའོ། །རྒྱས་པ་ནི་གར་རྒྱས་པ་དང་། གང་གིས་རྒྱས་པ་དང་། གང་ལྟར། གང་གི་ཕྱིར་རྒྱས་པའོ། །གང་རྒྱས་ན་སྐུར་རྒྱས་ཏེ་ཆོས་སྐུ་སྐྱེ་བ་མེད་པ་ལས། གཟུགས་སྐུ་གཉིས་འགགས་པ་མེད་པར་ཤར་ནས་སེམས་ཅན་རྣམས་ཀྱི་དོན་ཐོགས་པ་མེད་པར་མཛད་པའོ། །མཁྱེན་པ་ཡེ་ཤེས་སུ་རྒྱས་ཏེ། སྤྲུལ་པའི་སྐུའི་དུས་ན་ཡེ་ཤེས་དེ་ཤེས་རབ་ཀྱི་མིག་ལ་བརྟེན་ནས་གདུལ་བྱའི་ཡུལ་རྣམས་ལ་གཟིགས་ཤིང་དེ་ཕྱིན་ཅི་མ་ལོག་པར་མཁྱེན་པས་རྒྱས་ལ། ལོངས་སྐུའི་དུས་ན་ཡེ་ཤེས་ཀྱི་སྤྱན་ལ་བརྟེན་ནས་རང་གི་ངོ་བོ་ལ་གཟིགས་ཏེ་ཡེ་ཤེས་ལྔ་ཡི་མཚན་ཉིད་ཕྱིན་ཅི་མ་ལོག་པར་མཁྱེན་ལ། ཆོས་སྐུའི་དུས་ན་ཆོས་ཉིད་དྲི་མ་མེད་པའི་སྤྱན་ལ་བརྟེན་ནས་ཆོས་ཀྱི་དབྱིངས་བསམ་གྱིས་མི་ཁྱབ་པ་ལ་གཟིགས་པས། ཆོས་ཐམས་ཅད་ལ་རྡུལ་དང་བྲལ་ཞིང་དྲི་མ་རྣམ་པར་དག་པར་མཁྱེན་པས་རྒྱས་ཏེ། དེ་ཡང་རང་ངོ་ལ་གཞི་གནས་ཀྱི་ཡེ་ཤེས་གསུམ་དུ་རྒྱས་པས་ཏེ། སྤྲུལ་པ་སྐུ་ཡི་མཁྱེན་པ་རྫོགས་པས་ཐུགས་རྗེ་ཀུན་ཁྱབ་ཀྱི་ཡེ་ཤེས་སུ་རྒྱས། ལོངས་སྐུའི་མཁྱེན་པ་རྫོགས་པས་རང་བཞིན་ལྷུན་གྲུབ་ཀྱི་ཡེ་ཤེས་སུ་རྒྱས། ཆོས་ཀྱི་སྐུའི་མཁྱེན་པ་རང་དག་དུ་རྫོགས་པས་ངོ་བོས་ཀ་དག་གི་ཡེ་ཤེས་རྒྱས་པའོ། །མཛད་པའི་ཕྲིན་ལས་སུ་རྒྱས་པ་ནི་སྤྲུལ་པའི་སྐུས་ཞི་ཁྲོ་རྣམ་འཕྲུལ་གྱི་ཆ་ནས་གང་ལ་གང་འདུལ་དུ་རྒྱས། ལོངས་སྐུས་ཡབ་ཡུམ་རྣམས་འཇུག་རང་བྱུང་གི་ཡི་གེ་དྲུག་ལྗགས་སམ་གསང་བའི་མཁའ་ལས་སྤྲོས་ནས་གསུང་ཆོས་ཀྱི་འཁོར་ལོར་རྒྱས། ཆོས་སྐུ་འགགས་མེད་རང་ཤུགས་ཀྱི་ཆ་ནས་ཆོས་ཉིད་རང་སྒྲ་ལས་འོད་འཕྲོས་ནས་ཞིང་ཁམས་རྣམ་པར་དག་པར་མཛད་དེ། མ་བཅོས་རང་བཞག་ཏུ་རྒྱས་པའོ། །གནས་པ་ཏིང་ངེ་འཛིན་དུ་རྒྱས་པ་ནི། ཆོས་སྐུ་ལ་མཚན་མ་སྤྲོས་པའི་ཚིག་མེད་པས་གཅོད་བྱེད་རང་དག་གི་དགོངས་པ་ལ་གནས། ལོངས་སྐུ་ལ་རགས་པ་རྫས་གྲུབ་ཀྱི་གཟུགས་མེད་པས་རང་གསལ་རྣམ་དག་གི་དགོངས་པ་ལ་གནས། སྤྲུལ་སྐུ་ལ་ཞེན་པ་རང་རྒྱུད་དུ་འཛིན་པ་མེད་པས་ཆགས་མེད་འོད་གསལ་གྱི་དགོངས་པར་རྒྱས་པའོ། །དེ་ལྟར་ན་ངོ་བོ་སྐུར་རྒྱས། མཁྱེན་པ་ཡེ་ཤེས་སུ་རྒྱས། མཛད་པ་ཕྲིན་ལས་སུ་རྒྱས། གནས་པ་ཏིང་ངེ་འཛིན་དུ་རྒྱས་པའོ། །གང་གིས་རྒྱས་ན་གོང་དུ་འབད་རྩོལ་མེད་པར་སངས་བས་རྒྱས་པའོ། །གང་ལྟར་རྒྱས་ན། སྐུ་མཚན་དང་དཔེ་བྱེད་དུ་རྒྱས་པ་སྒེག་མོ་ལ་རྒྱན་གྱིས་བརྒྱན་པ་ལྟར་རྒྱས་པ་དང་། སྐུ་སྣང་ལ་རང་བཞིན་མེད་པ་ཆུ་ནང་གི་ཟླ་བའམ་བར་སྣང་གི་འཇའ་ཚོན་ལྟར་རྒྱས་པ་དང་། སྐུ་རང་བཞིན་དམིགས་སུ་མེད་པ་ནམ་མཁའི་དཀྱིལ་ལྟར་རྒྱས་པའོ། །གང་གི་ཕྱིར་རྒྱས་ན། ཉོན་མོངས་པའི་དྲི་མ་སངས་པས་བདག་འཛིན་གྱི་ཤེས་པའི་རྒྱུན་ཟད་པས་རྒྱས། ལས་ཀྱི་སྒྲིབ་པ་སངས་པས་ལས་དང་ལས་ཀྱི་རྣམ་སྨིན་གྱི་མཐའ་སྟོང་པའི་ཕྱིར་རྒྱས། ཤེས་བྱའི་སྒྲིབ་པ་སངས་པས་དངོས་པོའི་གནས་ལུགས་ཀྱི་འཛིན་པར་དག་པ་དང་། ཇི་སྙེད་པ་གདུལ་བྱ་རང་ས་ནས་དག་པའི་ཕྱིར་རྒྱས་པའོ། །དེ་ཡང་རང་བཞིན་རྫོགས་ཆེན་གྱི་ཆ་ནས་འབད་མེད་རང་གྲོལ་དུ་སངས་ཞིང་རྒྱས་ལ། ཐེག་པ་ཐུན་མོང་པ་རྣམས་ཀྱི་གཉེན་པོ་རྐྱེན་གྱིས་སངས་ཞིང་རྒྱས་སོ། །དེ་དག་ཀུན་གྱིས་རང་གི་སྣང་བ་ཐམས་ཅད་བསྡུས་ནས། གོང་དུ་སྟོན་པས་སྒྲོན་མ་བཞི་འདུས་པར་གསུངས་པའི་ཚིག་རྣམས་ལས། ཁྱད་པར་དུ་རྒྱང་ཞགས་ཆུའི་སྒྲོན་མ་ཞེས་དང་པོར། སྟོན་པས་ཚིག་ཏུ་བསྡུས་པའི་སྐབས་སུ་སྔར་གསུངས་ལ། འདི་ཉིད་བདག་གིས་སྔར་ལ་འཚལ་བ་དང་བདག་ལ་གསུངས་དང་ཞེས་བསྡུད་པ་ལ་དྲིས་པའོ། །ད་ནི་སྟོན་པས་ལན་མདོར་བསྟན་པ་ནི། དེ་ནས་རྡོ་རྗེ་འཆང་ཆེན་གྱིས། །ཅེས་པ་ལ་སོགས་པས་བསྟན་ཏེ། དེ་ནས་ནི་ཞུས་མ་ཐག་པའི་དེ་ནས། རྡོ་རྗེ་འཆང་ཆེན་གྱིས་ནི་སྟོན་པས་ལན་བསྟན་པར་བྱའོ་ཞེས་པའོ། །ལན་དེ་ཡང་བྱེ་བྲག་བཀའ་སྒྲོ་བའི་ཚུལ་གྱིས་གསུངས་པ་དང་། འཆད་པའི་ཚུལ་གྱིས་གསུངས་པ་དང་། ཞལ་གདམས་ཀྱི་ཚུལ་གྱིས་གསུངས་པ་དང་། ཕྱི་ཅན་གྱི་ཚུལ་གྱིས་གསུངས་པ་དང་། རང་ཐད་ཀྱི་ཚུལ་གྱིས་གསུངས་པ་དང་། གླེང་བསླངས་ཀྱི་ཚུལ་གྱིས་གསུངས་པ་དང་དྲུག་ལས་འདི་ནི་གླེང་བསླངས་ཀྱི་ཚུལ་དུ་གསུངས་པའོ། །དེའི་ཕྱིར་ན་ཚིག་ནི་འདི་སྐད་རབ་ཏུ་གླེངས་ཞེས་པས་སོ། །ཨེ་མའོ་ངོ་མཚར་ཏེ་ཁྱོད་ཀྱིས་འགྲོ་བ་སེམས་ཅན་གྱི་དོན་དུ་འདི་ལྟར་ནན་ཆགས་དང་བཅས་ནས་འདྲི་བ་ཁོ་རང་གིས་ནི་ཤེས་ཟིན་རྟོགས་ཟིན་པ་ལ་ངོ་མཚར་ནས་སྡུད་པ་ལ་སྟོན་པས་བོས་ནས། རྒྱུད་དག་རྡོ་རྗེ་འཆང་ཞེས་བོས་ནས། སྔོན་དུ་ངས་ནི་རྒྱང་ཞགས་ཆུའི་སྒྲོན་མ་ལ་སོགས་པ་རྣམ་པ་བཞིའི་སྣང་བ་ཡུལ་ལ་ཤར་བའི་རང་སྣང་ཉིད་ལ། རང་ངོ་རྣམ་པར་དག་པ་དེ་ལ་སྔོན་བྱུང་དུ་ཕར་ཡུལ་ལ་མིག་གི་དེ་ཁོ་ན་ཉིད་ཀྱིས་བལྟས་པས། ཡེ་ཤེས་དག་པའི་སྣང་བ་གཅིག་ཆར་མ་ཡིན་པར་མིག་གི་དབང་པོའི་དབང་དུ་འདི་ཀུན་རིམ་གྱིས་ངའི་བློའི་ཡུལ་དུ་སྣང་བ་ནི། དེ་ལས་ཀྱང་ཐོག་མ་རྒྱང་ཞགས་ཆུའི་སྒྲོན་མས་མིག་གི་དྭངས་མ་ལ་བརྟེན་ནས་ནི། འདི་ལྟར་འཁྲུལ་པའི་སྣང་བ་དང་། ལྟ་བ་དངོས་བྱུང་གི་ཡེ་ཤེས་དང་། ཆོས་ཉིད་ཀྱི་བར་མ་དོའི་དང་གསུམ་གྱི་སྣང་བ། རྒྱང་ཞགས་ཆུའི་སྒྲོན་མས་འཛིན་པར་བྱེད་དོ། །སྣང་བ་གསུམ་པོ་དེ་བཟུང་བ་ལ་དགོས་པ་ཅི་ཡོད་ན་སྒྲོན་མ་དེས་ནི་འཁྲུལ་པའི་སྣང་བ་དེ་མ་ཡིན་ལ་དེར་འཛིན་དང་ལྟ་བའི་སྣང་བ་རིག་པ་མངོན་གསུམ་རྡོ་རྗེ་ལུ་གུ་རྒྱུད་དང་། ཆོས་ཉིད་ཀྱི་བར་མ་དོའི་སྣང་བ་སྐུ་དང་ཡེ་ཤེས་འོད་དང་ཟེར་གྱི་རང་མདངས་དང་གསུམ་གྱིས་སྣང་བ་སྒྲོན་མ་དེས་བཟུང་བས། འཁྲུལ་པའི་སྣང་བ་རྣམས་ཉམས་གོང་འཕེལ་ལ་བརྟེན་ནས་འབད་མེད་རང་གྲོལ་དུ་འགྱུར་བའི་དགོས་པ་དང་། དེ་ནི་བརྩོན་འགྲུས་རབ་ཀྱིས་སོ། །གང་ཟག་བརྩོན་འགྲུས་འབྲིང་པོས་ཆོས་ཉིད་ཀྱི་བར་མ་དོ་ལ་རིག་པ་བུའི་སྣང་བ་དང་། ཆོས་ཉིད་མའི་སྣང་བ་གཉིས་མེད་དུ་རང་རིག་པས་དེ་ཉིད་རང་སར་གྲོལ་བའི་དགོས་པ་དང་། གང་ཟག་སྐལ་ལྡན་བརྩོན་འགྲུས་མཆོག་རབ་ཏུ་གྱུར་པས་ལྟ་བ་མངོན་སུམ་དུ་མཐོང་བ་ལས་ཡིད་དཔྱོད་ཀྱི་ཚིག་ལས་རང་གྲོལ་ནས། ལྟ་བ་ཀུན་གྱི་སྙིང་པོ་དབྱིངས་རིག་འདུ་འབྲལ་མེད་པས་འདི་ཉིད་ལ་ཟག་བཅས་མི་སྣང་བར་ཡང་དག་པར་རྫོགས་པར་སངས་རྒྱ་བའི་དགོས་པ་དང་། དེའི་ཁོངས་སུ་གང་ཟག་བརྩོན་འགྲུས་ཆུང་བ་གཅིག་ཟབ་མོ་མངོན་གསུམ་གྱི་སྒོ་མཐོང་བའི་སྒོར་ཞུགས་ན་ཉམས་སུ་བླང་བའི་ལོང་མེད་པས་བག་ཆགས་ཀྱིས་སྲིད་པའི་བར་དོ་ལ་མཚམས་སྦྱར་ནས། ཟབ་མོ་མཐོང་བའི་ཡོན་ཏན་གྱིས་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་ཕྱུང་ནས་སངས་རྒྱ་བའི་དགོས་པ་དེ་ཀུན་སྣང་བ་འདི་ཉིད་ལ་མིག་གི་དབང་པོ་མིས་ལྟས་པས་མཐོང་བ་ནི། གོ་རིམ་གྱི་དབང་དུ་བྱས་ན་རྒྱང་ཞགས་ཆུའི་སྒྲོན་མ་འདི་ནི་ལྟ་བ་ཐམས་ཅད་ཀྱི་གཞི་མ་འཛིན་པ་བསྟན་ཏེ། དཔེར་ན་འབྲས་བུ་བསྐྱེད་པར་བྱེད་པའི་ས་བོན་བཞིན་དུ། རིམ་གྱིས་རང་འཕེལ་དང་བཅས་ནས་གནས་པའོ། །དེ་ལྟར་དྲིས་པ་དང་ལན་བསྟན་ནས། ད་ནི་གཉིས་པ་དྲི་བ་རྒྱས་པར་སྟོན་ཏེ། རྒྱུའི་རྡོ་རྗེ་ཡང་འཆང་བས་ཅེས་པ་ལ་སོགས་པས་བསྟན་ཏེ། རྒྱུ་མ་དག་པ་དག་པའི་རྡོ་རྗེ་ཡང་འདྲིས་པ་སེམས་ཅན་སྙིང་ལ་བཅུག་ཅིང་སེམས་ཅན་ལ་བརྩེ་བས་འཚང་པས། རྒྱུད་ཀྱི་སྟོན་པ་དྲུག་པ་རྡོ་རྗེ་འཆང་ཆེན་པོ་སྣང་བ་རྣམ་པར་དག་པ་དེ་ལ། ཚིག་ནི་འདི་སྐད་ཅེས་རྒྱུ་དག་པའི་རྡོ་རྗེ་འཆང་གིས་གསོལ་ཏོ། །རང་གཞན་གཉིས་ཀྱི་དོན་དུ་གསང་སྔགས་ཀྱི་ཞུ་བ་ཁྱད་པར་ཅན་གྱིས་ཀྱེ་ཀྱེ་རྒྱུད་ཀྱི་སྟོན་པ་འགྲོ་དྲུག་གི་སེམས་མཁྱེན་པའི་རྡོ་རྗེ་འཆང་ལགས། རྒྱང་ཞགས་ཆུའི་སྒྲོན་མ་ཞེས་གསུངས་པ་དེ། འདི་ཡི་ངོ་བོ་ནི་ཇི་ལྟ་བུ་ལགས། འདི་བདག་གིས་མ་འཚལ་བདག་ལ་གསུངས། དེ་བཞིན་དུ་འདི་ངེས་ཚིག་ཇི་སྐད་དུ་གསུངས་པ་ལགས་བདག་གིས་མ་འཚལ་བདག་ལ་གསུང་ཞེས་ཀུན་ལ་སྦྱར། དབྱེ་ན་རྣམ་པ་དུ་ཞིག་ཡོད་པ་ལགས། འདི་ཡི་མཚན་ཉིད་དང་བཞུགས་ཚུལ་ཇི་ལྟ་བུ་ལགས། སྒྲོན་མ་དེ་གནས་ནི་གང་དུ་གནས་པ་ལགས། ཐོག་མ་ནི་རྒྱུ་གང་གིས་བསྐྱེད་པ་ལགས། དེའི་འཁོར་བའི་སྒོའམ་སྣང་བ་ཇི་ལྟ་བུ་ལགས། སྒྲོན་མ་འདིིའི་མཐུན་པའི་དཔེ་གང་ཞིག་ལགས། འདི་ཀུན་གྱི་སོ་སོའི་ཚད་རྣམས་གང་གིས་བཟུང་བར་བགྱི། འདི་དག་བདག་གིས་སྔར་མ་འཚལ་བས་ད་སྟོན་པས་འདི་ཀུན་ལེགས་པར་བདག་ལ་གསུངས་ཤིག་དྲི་བ་རྒྱས་པར་དྲིས་པ་བསྟན་ནས། ༈ །ད་ནི་སྤྱི་དོན་གསུམ་ལ་ལན་རྒྱས་པར་སྟོན་ཏེ། འདི་ལ་དགུ་ཡོད་པ་ལས་དང་པོ་རྒྱང་ཞགས་ཆུའི་སྒྲོན་མའི་ངོ་བོ་ལས་བསྟན་པ་ནི། དེ་ནས་སྟོན་པས་ཡང་གསུངས་པ། །ཞེས་པ་ལ་སོགས་པས་བསྟན་ཏེ། དེ་ནས་ནི་དྲིས་མ་ཐག་པའི་དེ་ནས་རྒྱུད་ཀྱི་སྟོན་པ་དྲུག་པ་རྡོ་རྗེ་འཆང་གིས་རྒྱང་ཞགས་ཆུའི་སྒྲོན་མའི་དོན་ཡང་སྡུད་པ་པོ་རྒྱུ་དག་པའི་རྡོ་རྗེ་འཆང་ལ་གསུངས་པ། གསུངས་ལུགས་ཇི་ལྟར་གསུངས་ན་སྒྲོ་སྐུར་དང་བྲལ་བར་གསུངས་སོ། །སྡུད་པ་པོ་ལ་ངེས་པའི་དོན་གྱིས་ཀྱེ་མ་རྒྱུའི་རྡོ་རྗེ་འཆང་ཉན་པའི་སྐྱོན་རྣམས་སྤངས་ལ་ཉོན་ཅིག་ངས་ཀྱང་རྒྱང་ཞགས་ཆུའི་སྒྲོན་མའི་ངོ་བོ་བསྟན་གྱིས་ཁྱོད་ཀྱིས་ཤེས་རབ་དང་། རྣ་བའི་དབང་པོ་དང་། ལུས་ངག་ཡིད་ཀྱིས་མོས་གུས་རྣམས་མ་འཁྲུལ་བར། ཤེས་རབ་ལ་སྙམ་བྱེད་ཀྱི་སྐྱོན་མེད་པ་དང་། རྣ་བ་སྒྲ་ལ་ཡེངས་པའི་སྐྱོན་མེད་པ་དང་། འདུ་ཤེས་ཕྱིན་ཅི་ལོག་ཏུ་འགྱུར་བའི་སྐྱོན་རྣམས་སྤང་ལ་ཚིག་འདི་ཀུན་གོང་འོག་དང་ཟུར་དང་སྒྲོས་མ་ཆགས་པར་ཟུངས་ཤིག་རྒྱུ་དག་པའི་རྡོ་རྗེ་འཆང་ཞེས་ཉན་པ་པོའི་སྐྱོན་སྤངས་ལ་ཉོན་ཅིག་བར་བསྐུལ་ལོ། །ཆོ་ག་ལ་བརྟེན་པའི་དོན་གྱི་ངོ་བོ་གང་བཟུང་ཞེ་ན། རྒྱང་ཞགས་ཆུའི་སྒྲོན་མའི་ངོ་བོ་གང་ཡིན་ཞེས་ཁྱོད་ཀྱིས་ང་ལ་གང་དྲིས་པ་དེའི་ལན། དེ་ཁྱོད་ཀྱིས་ཤེས་བཞིན་དུ་མ་འོངས་པའི་དུས་ཀྱི་སེམས་ཅན་གྱི་དོན་ལ་དམིགས་ནས་དྲི་བ་ནི་འོས་ཆེ་བས། དེའི་ངོ་བོའི་ལས་ཀྱིས་ནི་མ་དག་འཁྲུལ་པའི་སྣང་པ་རང་དག་པ་དག་པ་ཡེ་ཤེས་ཀྱི་སྣང་བ་གཉིས་ཀ་བསྡུད་པར་བྱེད་པའོ། །དེའི་ངོ་བོ་རང་ནི་མཐོང་བར་བྱེད་པ་ཡིན་ཏེ། དེས་མཐོང་ལུགས་ཇི་ལྟར་མཐོང་ན། མིག་གི་རྣམ་ཤེས་ཀྱི་འཛིན་པའི་ཆ་ལས་རགས་སྣང་གི་གཟུགས་སྡུག་པ་དང་མི་སྡུག་པ་རྣམས་མཐོང་བས། དེ་ལས་མཐོང་བའི་ལས་འཁོར་བའི་ཆོས་དུ་མ་རྣམས་ལ་ཆགས་ཤིང་འཛིན་པས། འཁྲུལ་པའི་ལྟ་བ་སྟེ། འདི་ཡི་དོན་ནི་འགགས་པར་བྱེད་པ་ཡིན་པས། རྣམ་ཤེས་དོན་ནི་འགགས་པར་བྱེད་ཞེས་པའོ། །ཡང་ཆ་ཞེས་བྱ་ཟུང་ཞེས་ཟླ་ཞེས་བྱ་སྟེ། མིག་གི་དེ་ཁོ་ན་ཉིད་མ་འཁྲུལ་པ་ལས་ཡུལ་སྟོང་པ་ལ་རིག་པ་སྟོང་པ་འདུས་མ་བྱས་པ་དེ་འཛིན་པས། ཆོས་ཐམས་ཅད་ཀྱི་དེ་ཁོ་ན་ཞེས་བྱ། གཞན་མ་ཡིན་པའི་ཆོས་ཉིད་ཅེས་བྱ། མ་ནོར་བའི་ཆོས་ཉིད་ཅེས་བྱ། མ་བཅོས་པ་ཞེས་བྱ། འདི་ལ་སྐྱེ་འཇིག་མེད་པས། སྐྱེ་མེད་ནམ་མཁའི་རང་བཞིན་ལ་ཞེས་པ་དང་། ནམ་མཁའི་མཐའ་ལས་ལོངས་སྤྱོད་པ་ཞེས་པས་སོ། །དེ་ལྟར་མྱང་འདས་འཁྲུལ་པ་མེད་ཅིང་དོན་ལ་ལྟ་བས་ན་ལྟ་བས་ཏེ། འདི་ལ་མིང་དུ་བརྟགས་ན་བསྒོམ་པའི་ངོས་ནས་མིང་བརྟགས་ན། ནམ་མཁའ་རྣམ་དག་གི་ཏིང་ངེ་འཛིན་ཞེས་བྱ། སྤྱོད་པའི་སྒོ་ནས་མིང་བཏགས་ན་བྱ་བྲལ་ནམ་མཁའི་ངང་ལ་གནས་པའི་སྤྱོད་པ་ཞེས་བྱ། ལྟ་བའི་སྒོ་ནས་མིང་དུ་བཏགས་ན་ནམ་མཁའ་མཐའ་མཉམ་གྱི་ལྟ་བ་ཞེས་བྱ། འབྲས་བུའི་སྒོ་ནས་མིང་དུ་བཏགས་ན་རིས་མེད་ནམ་མཁའ་ཡོངས་རྫོགས་ཀྱི་འབྲས་བུ་ཞེས་བྱ། གཞིའི་སྒོ་ནས་མིང་དུ་བཏགས་ན་མཐར་ཐུག་ནམ་མཁའི་གནས་ལུགས་ཞེས་བྱ། ལམ་གྱི་སྒོ་ནས་མིང་དུ་བཏགས་ན་ནམ་མཁའ་ལམ་ཁྱེར་གྱི་ལམ་ཞེས་བྱ། མན་ངག་གི་སྒོ་ནས་མིང་དུ་བཏགས་ན་ཡོངས་ཀྱི་མན་ངག་ཞེས་བྱའོ། །དེ་ཡང་གཞན་གྱི་ལུང་གི་ཡིད་ཆེས་བསྐྱེད་པ་ནི། རྣམ་དག་ནམ་མཁའི་རང་བཞིན་གནས་པ་དང་། བྱ་བྲལ་ནམ་མཁའི་ངང་ལ་གནས་ཞེས་པ་དང་། ནམ་མཁའ་ཕྱོགས་མེད་རིགས་དང་བྲལ་ཅེས་པ་དང་། མཐར་ཐུག་ནམ་མཁའི་དགོངས་པའོ་ཞེས་པ་དང་། རྣལ་འབྱོར་ནམ་མཁའི་བྱ་ལམ་གནས་ཞེས་པ་དང་། རྣམ་གྲོལ་ནམ་མཁའི་རང་བཞིན་ལས་ཞེས་པས་སོ། །དེ་ལྟར་ཆ་གཉིས་ལས་གནས་པའི་ཕྱིར། འཁོར་བ་དང་མྱ་ངན་ལས་འདས་པ་གཉིས་ཀའི་ཆ་འཛིན་པས་ན་ལྟ་བས་ཏེ། འཁོར་བའི་ལྟ་བ་ནོར་དང་ལྡན་པར་བྱ་བ་དང་། འདས་པའི་ལྟ་བ་ཆོས་བྱེད་པ་རྣམས་ཕྱིས་བླ་ན་མེད་པའི་བྱང་ཆུབ་ཐོབ་པར་བྱའོ་བར་འཁོར་འདས་གཉིས་ཀ་མཐུན་པའི་ལྟ་བའོ། །དེ་ལྟར་མཐུན་པའི་འདོད་པ་ཡོད་ཀྱང་། འཇིག་རྟེན་སོ་སོའི་ནོར་སོག་པ་ལ་སོ་ནམ་རིགས་མི་འདྲ་བ་དང་། ཐར་བ་འདོད་པ་ལ་ཆོས་ཀྱི་སྒོ་མི་འདྲ་བ་སྣ་ཚོགས་པ་ནས་བྱེད་པའོ། །དེ་དང་འདྲ་བར་འདི་ཡི་ངོ་བོ་མིག་ལ་བརྟེན་ནས་འཁོར་འདས་གཉིས་ཀ་རྟོགས་པར་མཐུན་པའོ། །དེ་ལྟར་ངོ་བོ་བསྟན་ནས། ད་ནི་ངེས་ཚིག་སྟེ་འདི་ལ་ནང་གསེས་ཀྱི་དོན་ལྔ་ཡོད་པ་ལས། འཁོར་འདས་རྒྱང་དུ་འཕེན་པའི་ངེས་ཚིག་བསྟན་པ་ནི། ངེས་པའི་ཚིག་ནི་འདི་ལྟ་བུ་ཅེས་པ་ལ་སོགས་པས་བསྟན་ཏེ། འདི་ནི་དྲང་པའི་ཚིག་མ་ཡིན་པར་ངེས་པའི་དོན་གྱི་ཚིག་འདི་ལྟ་བུ་ངོ་མཚར་བར་བསྟན་པའོ། །རྒྱང་ནི་འཁོར་བ་ལས་མངོན་པར་ཞེན་པའི་མིག་གི་རྣམ་ཤེས་ཀྱིས་མྱ་ངན་ལས་འདས་པ་རྒྱང་རིང་པོར་འཕེན་པར་བྱེད་ལ། ཆོས་ཉིད་ཀྱི་དོན་ལ་མངོན་སུམ་དུ་ལྟ་བར་བྱེད་ལ་མིག་དེ་ཁོ་ན་ཉིད་ཀྱིས། འཁོར་བའི་ཆོས་ཀྱི་རྒྱུད་འཆིངས་པ་རྣམས་རྒྱང་རིང་བོར་འཕེན་པར་བྱེད་ཅིང་དབྱིངས་དང་རིག་པ་ཕྱི་རོལ་གྱི་ནམ་མཁར་འཛིན་པས་ན་རྒྱང་ཞེས་བྱ་བ་དང་། དེ་ཡང་ཀུན་རྫོབ་ཀྱི་འབྱུང་བ་བཞི་ལས་བསྐྱེད་ནས་དོན་དམ་རྟོགས་པར་བསྐྱེད་པས། མིག་འབྱུང་བས་ཡིན་ཏེ་ས་ནི་གཟུགས་སུ་སྣང་བས་དེ། འབྱུང་བས་དེས་འགྲོ་བ་རྣམས་འཛིན་པར་བྱེད་ན། མིག་གི་ཡུལ་འཁོར་བ་རགས་པའི་གཟུགས་འཛིན་པ་དང་། མིག་གི་དེ་ཁོ་ན་ཉིད་ཀྱི་ཆ་ནས་སྟོང་པའི་གཟུགས་སྟེ་དབྱིངས་རིག་འཛིན་པ་འབྱུང་བ་སས་བསྐྱེད་པའི་ཕྱིར་རོ། །དེ་ཡང་འཁོར་བའི་གཟུགས་ནི་དབྱིབས་ཐ་དད་པ་དང་། ཆོས་ཉིད་ཀྱི་གཟུགས་དེ་ཡང་དྲྭ་བ་དང་དྲྭ་བ་ཕྱེད་པ་ལ་སོགས་པ་ཐ་དད་པ་དང་། དེ་གཉིས་ཀྱི་ཁ་དོག་དཀར་བ་དང་། དམར་བ་དང་། སེར་བ་དང་། ལྗང་གུ་དང་། མཐིང་ཀ་དང་། དེ་བཞིན་དུ་ཤེལ་དང་། རྡུལ་གྱི་ཁ་དོག་ལ་སོགས་པ་དང་། འཁོར་བའིི་ཕྱོགས་ཀྱི་ཁ་དོག་ཐ་དད་པ་དང་། ཆོས་ཉིད་ཀྱི་རྩལ་ལམ་ཡོན་ཏན་གྱི་ཁ་དོག་ཐ་དད་པ་དང་ལ་སོགས་ནི་འཁོར་བ་མིག་གི་རྣམ་ཤེས་ཀྱི་ཆས་ཡོད་པའི་རྣམ་པ་དང་རགས་པ་རྣམས་སྡུད་ལ་མིག་གི་དེ་ཁོ་ན་ཉིད་ཀྱི་ཆ་ནས་སྟོང་པ་ཉིད་དང་། རང་བཞིན་མེད་པ་དང་། དབྱིངས་དང་། རིག་པ་དང་། ཡེ་ཤེས་རྣམས་སྡུད་པ་ནི། འབྱུང་བ་ཆུས་བསྐྱེད་པས་དེའི་ལས་ཡིན་ལ། ཀུན་རྫོབ་ཀྱི་ཆུས་གཟུགས་བསྡུད་པར་བྱེད་ལ། དོན་དམ་པའི་ཆུས་ཆོས་ཉིད་སྡུད་པར་བྱེད་པས་ན་མིག་སྟེ་ཆུའི་རང་བཞིན་དུ་གནས་པའོ། །རྟེན་གྱི་གང་ཟག་རིག་པ་མངོན་སུམ་གྱི་མན་ངག་ཡོད་པས་ཉམས་སུ་བླངས་པས་རིག་པ་རྡོ་རྗེ་ལུ་གུ་རྒྱུད་འདབས་འབྱོར་དུ་སྐྱེ་བའི་སྐུ་ཡང་ནམ་མཁར་རྒྱང་རིང་ནས། བསྐྱེད་པ་འཛིན་པས་འབྱུང་བ་རླུང་ཡིན་ཏེ། ཀུན་རྫོབ་ཀྱི་འབྱུང་བ་ལས་བསྐྱེད་དོན་དམ་དུ་གྲུབ་པའོ། །དེ་ལྟར་མིག་གི་དེ་ཁོ་ན་ཉིད་འཁྲུལ་པ་མེད་པས་མཐོང་བར་བྱེད་པ་ནི་ཀུན་རྫོབ་ཏུ་འབྱུང་བ་སེམས་བསྐྱེད་ལ་དོན་དམ་གྱི་ཚེ་ཚ་བ་མེད་པའི་སྲེག་པས་སྒྲོན་མ་ཉིད་འཛིན་པར་བྱེད་པ་དང་། དེ་ལྟར་ཀུན་རྫོབ་ཀྱིས་བསྐྱེད་པར་བྱེད་པ་དེ་དོན་དམ་གྱི་འབྱུང་བ་བཞི་རྟོགས་པའི་ཕྱོགས་ནས་ནི། ཀུན་རྫོབ་ཀྱི་འབྱུང་བ་བཞི་འཁོར་བའི་ཆོས་མ་རིག་པ་ཡིན་པས་དེ་དག །ཆོས་ཉིད་ཉམས་སུ་ལེན་པའི་སྐལ་ལྡན་དེ་རྒྱང་དུ་འཕེན་པ་རྒྱང་ཞེས་དེ་ལ་བྱའོ། །དེ་བཞིན་དུ་དོན་དམ་གྱི་འབྱུང་བ་བཞི་ལ་རྟོགས་པའི་ཕྱོགས་ནས་ཀུན་རྫོབ་ཀྱིི་འབྱུང་བ་བཞི་ལ་དོན་དམ་དུ་བཟུང་བས་ཡང་། མྱ་ངན་ལས་འདས་པ་ཡང་འཕེན་པར་བྱེད་པས་རྒྱང་ཞེས་བྱ་བ་ཡིན་ནོ། །དེ་འཁོར་འདས་རྒྱང་དུ་འཕེན་པའི་ངེས་ཚིག་བསྟན་ནས། ད་ནི་འཁོར་འདས་ཀྱི་སྣང་བ་འཛིན་ལུགས་བསྟན་པ་ནི། དེ་བཞིན་འཁོར་བའི་སྣང་ཆ་ནས། །ཞེས་པ་ལ་སོགས་པས་བསྟན་ཏེ། གཉིས་ལས་འདི་ནི་མིག་རྣམ་ཤེས་ཀྱི་ཆ་དེ་བཞིན་ཉིད་མ་རྟོགས་པའི་འཁོར་བའི་སྣང་བའི་ཆ་མ་རིག་པས་བསྡུས་པའི་ཉོན་མོངས་པ་རྣམས་དང་། ཡིད་ཀྱིས་བསྡུས་པ་རྣམ་པར་རྟོག་པའི་ཚོགས་དང་། འགྱུ་བྱེད་ཀྱིས་བསྡུས་པ་དྲན་པ་དང་སེམས་ཀྱིས་བསྡུས་པ་བསམ་པ་དང་། ཀུན་གཞིའི་བསྡུས་པ་འཕྲ་རགས་ཏུ་མ་རྣམས་དང་ཉེར་ལེན་ཀུན་གཞི་བསགས་པའི་ཆ་ནས། གཟུགས་ཏེ། ཁ་དོག་དང་། དབྱིབས་དང་། དེ་ཡང་རགས་པའི་གཟུགས་རི་བོ་དང་། འཕྲ་བ་རྡུལ་ཕྲ་རབ་དང་། སྣང་བ་དང་། མི་སྣང་བ་ཡིད་ཀྱི་གཟུགས་དང་། སྒྲ་ནི་འབྱུང་བ། བེམ་པོའི་སྒྲ་དང་། རིགས་བཅས་རིགས་དྲུག་ཀྱི་སྒྲ་དང་། ཡི་གེ་འདི་འབྲེལ། བརྡ་སྦྱོར་གྱི་སྒྲ་དང་། རང་བཞིན་གྱི་མ་བྱས་པ། སྒྲ་དང་། དྲི་ནི་འབྱུང་བཞི་འབྱུང་བསླབ་བྱ་རིག་མེད་ཀྱི་དང་། རྣམ་ཤེས་རིག་རི་ཅ་བཅས་ཀྱི་དང་། རྟགས་འཛིན་རྣམ་པ་ལ། པ་ཡུལ་གྱི་དྲི་བོ། རོ་ནི་འབྱུང་བཞི་དམིགས་རྟེན་གྱི་དང་། བྱང་བྱ་ཡུལ་གྱི་དང་། ཁ་བ་རང་དང་ར་བ་མིང་བརྟགས་དངོས་པོའི་རོ་འོ། །རེག་ནི་རང་ལ་ཉམས་མྱོང་དང་བཅས་པ་དང་། གཉེན་རིག་ཚོར་བ་དང་བཅས་པ་ནི་རྒྱབ་པ་ལ་སོགས་པས། སྟེ་འདོད་པའི་ཡོན་ཏན་ལྔར་མིག་གི་དབང་པོའི་དྭངས་མ་ཡིན་པའི་གནད་ཀྱིས་ཀུན་གྱི་དོན་རྣམས་ནི་མིག་གིས་རིག་པས་ན་འཁོར་བའི་ཆོས་ཏེ། འདི་ཡིས་བདག་ཏུ་འཆིང་བས་དཔེར་ན་ཞགས་པ་དང་འདྲ་བ་ཡིན་ནོ། །དེ་ལྟར་མིག་དང་། སྣ་དང་། རྣ་བ་དང་། ལྕེ་དང་། ལུས་ཀྱི་དབང་པོའི་ཡུལ་ལྔ་ལ་ཕྱི་རོལ་སྣང་བའི་བྱེ་བྲག་ཏུ་ཤར་བ་ནི། མིག་གི་རྣམ་ཤེས་ཡུལ་དུ་མ་ལ་བཅད་པས་དྲན་པའི་རྟེན་དུ་སོང་སྟེ། དེ་ལ་དྲན་པ་དེས་བསམ་པས་རྣམ་པར་རྟོག་པ་དུ་མར་ཤར་བ་ནི་རྣམ་ཤེས་ཀྱི་གཟུགས་བཅད་པས་བྱུང་བས། དེ་དག་ཀུན་ལ་བདག་ཏུ་ཡིད་ཀྱི་རྣམ་ཤེས་དང་བཅས་པས་ཀུན་གཞི་ཞེས་བྱ་སྟེ། འཚོགས་པ་དུ་མ་ལས་གྲུབ་པ་ནི་མིག་གི་རྣམ་ཤེས་འདིས་དངོས་པོ་རགས་པ་ལ་བདག་ཏུ་འཛིན་པའི་བློ་སྐྱེས་པས་བདག་འཛིན་དུ་མས་རང་བཅིངས་པས། འཁོར་བའི་བཙོན་རར་བཅིངས་པ་ནི་ཞགས་པ་ཞེས་ཐོག་མ་ནས་འཁོར་ཞིང་གནས་པ་ནི། ཕྱིར་གསལ་ཆ་ལས་འཁྲུལ་པ་རྒྱང་ནས་འཛིན་ཞེས་བྱའོ། །འོ་ན་དེ་ལྟར་བཅིངས་པ་དེ་ལས་ཐར་བའམ་གྲོལ་བའི་ཐབས་མེད་དམ་ཞེ་ན་ཡོད་དེ། ལས་དང་སྐལ་བར་ལྡན་པའི་གང་ཟག་རང་བཞིན་རྫོགས་པ་ཆེན་པོའི་དོན་ལ་མོས་ཤིང་ཡིད་ཆེས་པ་གཅིག་གིས། སྔོན་དུ་བླ་མ་དག་པ་གཅིག་ལ་མན་ངག་ཕྱིན་ཅི་མ་ལོག་པ་གཅིག་ཞུས། དེས་འཁོར་བའི་ཞེན་པ་བཏང་ནས། རྐྱེན་མ་ཡིན་པའི་ཡུལ་དགོན་པ་གཅིག་ཏུ་ཕྱིན་ནས། སྒྲོན་མའི་དེ་ཁོ་ན་ཉིད་ཀྱི་གནད་གཅུན་ནས། ཡུལ་འཁྲུལ་པ་མེད་པ་ནི་ཕྱི་ཡི་དབྱིབས་ཀྱི་དེ་བཞིན་ཉིད་ནི་ནམ་མཁའ་སྤྲིན་དང་བྲལ་བ་ལ། རིག་པ་འཁྲུལ་པ་མེད་པ་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་ལ་བདག་ཏུ་རྟོག་པའི་འཛིན་པ་སྐུར་སྣང་བ་ནི། མིག་གི་དེ་ཁོ་ན་ཉིད་ཀྱིས་དེའི་སྣང་བ་ཡུལ་ལ་ཡས་སུ་མི་འཇུག་པར་གཅིག་ཏུ་བསྡུད་པར་བྱེད་པ་ནི། སྒྲོན་མ་འདི་ཡིས་འཛིན་པས་ན་ཞགས་པ་ཞེས་བྱ་སྟེ་མྱ་ངན་ལས་འདས་པ་འཛིན་པར་བྱེད་པའོ། །དེས་ནི་འཁོར་འདས་ཀྱི་སྣང་བ་འཛིན་པའི་ངེས་ཚིག་བསྟན་ནས། ད་ནི་སྣང་བ་དེ་གཉིས་ལ་ཞེན་པའི་དངོས་པོ་གཅད་པའི་ངེས་ཚིག་བསྟན་པ་ནི། ཆུའི་སྣང་བ་དེ་དག་ལས་ཞེས་པ་ལ་སོགས་པས་བསྟན་ཏེ། ཆུ་ནི་མིག་ཆུའི་རང་བཞིན་དུ་འདུག་པས་སོ། །སྣང་བ་ནི་འཆོར་བ་དང་འདས་པའོ། །དེ་དག་ལས་ནི་འཁོར་བའི་སྣང་བ་ཞེན་པ་སྤུ་ཙམ་ཡང་མི་བྱའོ། །དེ་བཞིན་དུ་རིག་པའི་ཉམས་གོང་འཕེལ་གྱི་སྣང་བ་ལ་ཡང་ཞེན་པ་མ་བྱས་པས་དངོས་པོ་འདུག་ཚུལ་གྱི་རང་ས་ལ་རང་སྣང་དུ་ལོག་ནས་ཟག་བཅས་མི་སྣང་བར་སངས་རྒྱ་བ་ནི། སྔོན་དུ་སྐལ་ལྡན་གྱི་བྱ་བ་གསུམ་བཏང་ནས་རྫས་དང་ལོག་སྤྱོད་དང་། འཁོར་དང་བདེ་སྡུག་གང་ལ་ཡང་མ་ཞེན། ཀུན་ལ་ཆགས་པའི་སེམས་མ་བསྐྱེད་པར་དོར་ནས་གྲོགས་མེད་པར་གཅིག་པུར་བསླབས་པ་ལས་བྱུང་བའོ། །དེ་ལྟར་འཁོར་བའི་ངང་དག་པའི་སྣང་བ་གཉིས་ཀ་བཅས་བཅོས་མ་བྱས་པར་རང་སར་བཞག་ནས་ནི། དེ་ལ་བདག་ཏུ་བཅད་དེ་ཤེས་པ་ཆེན་པོ་ལ་གཅོད་བྱེད་མེད་པར་བཞག་པ་ནི་དཔེར་ན་གཟུ་བོའི་བློ་ཅན་ལྷ་ཁང་དུ་ཕྱིན་པ་ལྟར་འཛིན་པ་དང་། ས་གང་ལ་ཡང་ཆགས་པ་མེད་པས་ཆུ་ཞེས་བྱའོ། །སྣང་བ་གཉིས་ལ་ཞེན་པའི་དངོས་པོ་གཅད་པ་བསྟན་ནས། ད་ནི་དེ་ཉིད་ཀྱི་གསལ་བར་བྱེད་པའི་ངེས་ཚིག་བསྟན་པ་ནི། སྒྲོན་ནི་རང་གི་སྣང་བ་ཀུན་ཞེས་ལ་སོགས་པ་བསྟན་ཏེ། སྒྲོན་ནི་དཔེར་ན་མེའི་རྒྱུ་སྒྲོན་ཤིང་དང་འདྲ་སྟེ་དཔེར་དེ་བཞིན་དུ་རིག་པའི་ཡེ་ཤེས་རྟོག་པའི་སྒྲོན། ཤིང་མེད་ན་མེའི་རྒྱུ་མེད་པས་མེ་མི་འབྱུང་ལ། སྒྲོན་མ་མེད་ན་སངས་རྒྱས་མི་འབྱུང་ངོ་། །དེ་ལྟར་སྒྲོན་མས་རང་རིག་པའི་སྣང་ཚད་འཁོར་བའི་སྣང་བ་གཉིས་ཀ་སྤེལ་བར་བྱེད་པས་ན་ཀུན་ཞེས་བྱའོ། །དེ་ཡང་རྟེན་གྱི་གང་ཟག་སྐལ་ལྡན་གཅིག་ལ། ཐོག་མ་རིག་པ་མངོན་གསུམ་གྱི་སྣང་བ་བསྟན་ཅིང་ངོ་སྤྲད་ནས། དེ་ནས་དེ་ཉིད་གོམས་ཤིང་གནས་ལུགས་དང་འདྲིས་པས་ཉམས་གོང་ནས་གོང་དུ་འཕེལ་བའི་སྣང་བ་ནི། སྔོན་དུ་དབྱིངས་ཀྱི་སྣང་བ་འཁོར་བ་ལས་འབྲེལ་བ་དང་། དེ་ནས་ཐིག་ལེའི་སྣང་བ་རྩོལ་བ་མེད་པ་དང་། དེ་ནས་འོད་ཀྱི་སྣང་བ་གྱེན་འགྲེང་རྩིབས་ཤར་དང་། སྣམ་བུ་དང་། མུ་ཁྱུད་དང་། གྲུ་ཆད་ལ་སོགས་པར་སྣང་བ་དང་། དབྱིབས་ནི་མེ་ཏོག་དང་། པདྨ་བརྩེགས་དང་མདུང་རྩེ་དང་། མཆོད་རྟེན་རྩེགས་པའི་དབྱིབས་ལྟ་བུ་དང་། དེ་ནས་ཡེ་ཤེས་ལྔའི་སྣང་བ་ནི་ཆོས་ཀྱི་དབྱིངས་ཡེ་ཤེས་ཀྱི་སྣང་བ་མཁར་ཐབས་དང་། མེ་ལོང་ལྟ་བུའི་ཡེ་ཤེས་གུར་ཁྱིམ་དང་། མཉམ་པ་ཉིད་ཀྱི་ཡེ་ཤེས་དྲྭ་བ་དང་དྲྭ་བ་ཕྱེད་པ་དང་། སོ་སོར་རྟོག་པའི་མིག་མང་རིས་དང་། བྱ་བ་གྲུབ་པའི་རིན་པོ་ཆེ་མིགས་ཚགས་ཀྱི་རྣམ་པ་ལྟ་བུ་སྣང་བ་ཡིན་ནོ། །དེ་ནས་ཐིག་ལེའི་སྣང་བ་ནི། འཕྲ་བ་དང་། ཤིན་ཏུ་འཕྲ་བ་དང་། རབ་ཏུ་འཕྲ་བ་དང་། ཟླུམ་པ་དང་། ཤིན་ཏུ་ཟླུམ་པ་དང་། རབ་ཏུ་ཟླུམ་པ་དང་། ལྔ་ལྔའི་ཆས་སྤྲས་པ་དང་། ཕྱེད་སྐུའི་རྣམ་པ་ཅན་དག་ཏུ་སྣང་བ་ཡིན་ནོ། །དེ་ནས་སྐུའི་སྣང་བ། ཡེ་ཤེས་སེམས་དཔའ་རང་ཅང་དང་། ཡབ་ཡུམ་གྱི་རྣམ་པ་ཅན་དང་། རིགས་ལྔའི་བདག་ཉིད་དུ་སྣང་བ་དང་། དཀྱིིལ་འཁོར་གྱི་རྣམ་པ་དག་ཏུ་སྣང་བ་རྣམས་ནི་ཉམས་གོང་འཕེལ་གྱི་སྣང་བས་དེ། འདི་དག་གི་དུས་ན་རིས་ཅན་གྱི་སྣང་བ་ཕྱོགས་སམ་གཡུད་ལ་གཏད་པ་ནི་མ་ཡིན་ཏེ། ཕྱོགས་མེད་རིས་དང་བྲལ་བས་ཟང་ཐལ་གཅིག་རྫོགས་ཀྱི་རྣམ་པར་གནས་ལ། མཚན་མ་རྫས་གྲུབ་ཏུ་ནི་མེད་དེ། དཔེར་ན་ཆུ་ནང་གི་ཟླ་བའམ་མེ་ལོང་གི་གཟུགས་བརྙན་ལྟར་སྣང་ཡུལ་དུ་ཡོད་ལ་ཞེན་ཡུལ་དུ་གྲུབ་པ་མེད་དོ། །དེ་དག་ཀུན་ཀྱང་ཤེས་བྱ་རང་གི་མཚན་ཉིད་ཀྱི་སྣང་བ་ནི་མ་ཡིན་ཏེ། རྣལ་འབྱོར་པ་ལམ་པ་རྣམས་ལ་རིག་པའི་རྩལ་ཡོན་ཏན་དུ་སྣང་བ་ཡིན་ནོ། །འདི་དག་རྣམས་ནམ་མཁའི་ཆོ་འཕྲུལ་དང་འདྲ་སྟེ། བྱུང་ཡང་དེ་ཉིད་ལས་བྱུང་ལ་གྲོལ་ཀྱང་དེ་ཉིད་ལས་གྲོལ་བའོ། །དེ་ཡང་གཞི་འཛིན་པའི་རིག་པ་རྣམ་པར་རྟོག་པ་ཡེ་དག་ཏུ་བཞུགས་པ་དང་། མཚན་ཉིད་འཛིན་པའི་རིག་པ་ཤེས་ཤིང་རིག་པར་ཡོད་པ་དང་། ལྷག་མཐོང་གི་རིག་པ་ལུ་གུ་རྒྱུད་དུ་ཡོད་པ་དང་། རང་གྲོལ་གྱི་རིག་པ་ཕྱོགས་དང་རིས་ལས་འདས་པའི་ཡོན་ཏན་གྱི་སྣང་ཚུལ་དུ་གོང་གི་སྣང་བ་དེ་དག་བྱུང་ལ། དེ་ཡང་གཞི་གནས་ཀྱི་ཡེ་ཤེས་གསུམ་ལ་ངོ་བོ་ཀ་དག་གིས་ཡེ་ཤེས་སྒྲིབ་བྱེད་ལྷན་ཅིག་སྐྱེས་པ་རྣམས་ཡེ་ནས་རང་དག་པ་དང་། རང་བཞིན་ལྷུན་གྲུབ་ཀྱི་ཡེ་ཤེས་སྤང་བྱ་དང་སྤོང་བྱེད་དུ་གྲུབ་པ་མེད་པ་སྐྱོན་ཡོན་ཏན་ལྷུན་རྫོགས་སུ་གནས་པ་དང་། ཐུགས་རྗེ་ཀུན་ཁྱབ་ཀྱི་ཡེ་ཤེས་ལ་འགགས་པ་མེད་པས་འབྱེད་པ་མེད་པའི་ཤེས་རབ་གང་ལ་ཐོགས་མེད་དུ་ཤར་བས་མཚན་ཉིད་འཛིན་པའི་ཡེ་ཤེས་ལྔར་སྣང་སྟེ། གཞི་གཅིག་ལས་མ་གཡོས་པས་ཆོས་ཀྱི་དབྱིངས་ཀྱི་ཡེ་ཤེས་སུ་ཁྱབ་བརྡལ་བ་དང་། སྣང་ཕྱི་རོལ་གྱི་ཡུལ་ལ་སྣང་ཡང་ཞེས་པ་བློ་ཡི་ཡུལ་དུ་གྲུབ་པ་མེད་པ་མེ་ལོང་ལྟ་བུའི་ཡེ་ཤེས་དང་། བཟང་ངན་བདེན་རྫུན་གཉིས་མེད་དུ་གནས་པ་མཉམ་པ་ཉིད་ཀྱི་ཡེ་ཤེས་དང་། ཡུལ་དང་ཡུལ་ཅན་སོ་སོའི་རྣམ་རྟོག་གི་ཞེན་པ་ལ་མི་གནས་པ་སོ་སོར་རྟོག་པའི་ཡེ་ཤེས་དང་། བྱ་རྩལ་རྩོལ་སྒྲུབ་དང་བཅོས་མ་ལས་འདས་པ་བྱ་བ་གྲུབ་པའི་ཡེ་ཤེས་རྣམས་ཀྱི་བྱུང་ཚུལ་གྱི་སྣང་བར་བྱུང་བའོ། །སྣང་བ་དེ་དག་གི་མཚན་ཉིད་རང་གང་ཡིན་ན། གསལ་བས་ཏེ། འདི་ལ་བྱེ་བྲག་ཏུ་ཕྱེ་ན་བྱས་པའི་གསལ་བ་སྣང་གསལ་དང་། མེ་ལོང་དང་། ཁེ་ཏ་པ་དང་། མཚོན་གྱི་རྣམ་པ་རྣམས་ལ་བྱ། རྒྱུ་རྐྱེན་གྱིིས་གསལ་བ་མན་ཤེལ་གྱི་འོད་དང་། ཡིད་བཞིན་ནོར་བུའི་འོད་ལ་སོགས་པ་རྣམས་སོ། །རང་བཞིན་གྱི་གསལ་བ་ཉི་མ་དང་ཟླ་བ་དང་། སྐར་མའི་འོད་ལ་སོགས་པ་རྣམས་སོ། །བཏགས་པའི་གསལ་བ་མིང་གི་བྱེ་བྲག་རྣམས་ལ་བྱ། ཉམས་སུ་མྱོང་བའི་གསལ་བ་ནི་ཤེས་པས་གསལ་བ་དང་། ཤེས་པ་གསལ་བའོ། །ཤེས་པས་གསལ་བ་ནི་ཚིག་གི་འབྲེལ་དང་དོན་ཤེས་པས་ཏེ། ཚིག་གཅོད་ཀྱི་ཤེས་རབ་ལ་བྱ། མཚན་ཉིད་ཤེས་པས་གསལ་བ་ནི་དངོས་པོའི་མཚན་ཉིད་ངོ་ཤེས་པས་སྒྲོ་འདོགས་ཆོད་པས་དེ་རྟོགས་པའི་ཤེས་རབ་ལ་བྱའོ། །ཤེས་པ་གསལ་བ་ནི་རང་བཞིན་གྱིས་གསལ་བ་ནི་གྲུབ་མཐས་བློ་མ་བསྒྱུར་བའི་གང་ཟག་ཤེས་པ་རང་བཞིན་གྱིས་གསལ་བ་ལ་བྱ། དེ་བསྒྱུར་བས་གསལ་བ་ནི་ཉམས་སུ་མྱོང་བས་གསལ་བ་རང་བཞིན་གྱིས་ཉམས་སུ་མྱོང་བ་འཇིག་རྟེན་པའི་དང་། ཆོས་ཉིད་ཉམས་སུ་མྱོང་བ་གཉིས་ལས་འདི་ཆོས་ཉིད་ཉམས་སུ་མྱོང་བའི་གསལ་བའོ། །དེ་ལ་ཆོས་ཀྱི་འདྲ་གཞི་ཉམས་སུ་མྱོང་བ་ནི་གསལ་བ་སྙམ་པ་ལས་སྒྲོ་འདོགས་གཏིང་ནས་མ་ཆོད་པས་ཏེ་འདི་གོལ་སར་གྱུར་པ་ཡིན་ཏེ། གསལ་ལོ་སྙམ་པས་བསམ་གཏན་དང་པོའི་ལྷར་གོལ། གསལ་བ་ཡིན་སྙམ་པས་གཉིས་པ། གསལ་བར་འདུག་སྙམ་པས་གསུམ་པ། གསལ་སྙམ་བྱེད་པ་བཞི་པ། ཡང་གསལ་བར་འདོད་པ་ཞེས་པའི་བློ་འགྱུར་བྱེད་དང་བཅས་པ་ནི་སྟོང་གསལ་དུ་འདོད་པའི་བློ་ཡོད་ན་འདི་ཡང་གོལ་ཏེ་འོད་གསལ་གྱི་ལྷར་གོལ། རང་རིག་ལ་ཞེན་པ་བློས་བཏགས་པའི་འཁོར་ཡོད་པར་འདོད་པ་རྣམས་ཀྱང་དེ་ཉིད་དུ་གོལ་ལ། གསལ་བ་རྟོག་པ་མེད་པར་འདོད་པ་རྣམས་ནི་རིས་ཅན་ལམ་དུ་བྱེད་པ་ཡིན་པས་སྐྱེ་མཆེད་དང་པོར་གོལ། གསལ་བ་ལ་འཛིན་པ་མེད་པར་འདོད་ན་ཡང་སྔ་མ་ལྟར་གོལ་ལ། གསལ་བ་བདེ་བར་འདོད་ན་ཡང་སྐྱེ་མཆེད་གཉིས་པར་གོལ་ལ། གསལ་བ་ལ་རང་བཞིན་མེད་པར་འདོད་ན་ཡང་སྐྱེ་མཆེད་གསུམ་པར་གོལ་ལ། དེ་དག་ནི་གོལ་སར་གྱུར་པའི་གསལ་བ། ཕྱིན་ཅི་ལོག་གི་གསལ་བ་ནི་གསལ་བ་ཡུལ་དུ་ཤོར་ན་ཕྱིན་ལོག་གོ། །གསལ་བ་སེམས་ལ་ཤོར་ན་ཡང་ལོག་གསལ་བ་བློ་དང་ཤེས་པ་ལ་ཤོར་ན་ཡང་ལོག །གསལ་བ་ཚིག་ལ་ཤོར་ན་ཡང་ལོག །གསལ་ཙམ་གཅིག་བློ་ཡི་ཡུལ་དུ་བསྒོམ་པ་དང་ལྟ་བ་ལ་སྤྱོད་པ་རྣམས་ཕྱིན་ཅི་ལོག་པའོ། །འདི་དག་རྟག་ཆད་དུ་གོལ་ལ། གོང་མ་རྣམས་ཁམས་གསུམ་དུ་གོལ་བའོ། །ཆོས་ཉིད་རང་གི་ཉམས་སུ་མྱོང་བའི་གསལ་བ་ནི། གསལ་ཕྱི་རོལ་གྱི་ཡུལ་ལ་གསལ་བ་དྲན་པ་བདག་ཏུ་བཟུང་ན་གསལ་བ་གཤའ་མ་ཡིན། གསལ་བ་བློ་ཡི་ཡུལ་དུ་གསལ་བ་ལ་འཛིན་མེད་རང་ས་ལ་གྲོལ་བ་ནི་ཁམས་གསུམ་ལས་འདའ། གསལ་བ་དབང་པོ་ལ་གསལ་བ་རང་ངོ་རང་བཞག་པ་ནི་ཁམས་གསུམ་ལས་འདས་པའི་གསལ་བའོ། །འོ་ན་གསལ་བ་དེ་རང་ལྟ་བའི་ངོ་བོ་མ་ཡིན་ཏེ་གསལ་བ་ཟང་ཐལ་བ་ཞེས་བྱ་སྟེ། གསལ་བ་གོམ་པ་དང་། ཕྱིན་ཅི་ལོག་དང་། འཇིག་རྟེན་པའི་གསལ་བ་མ་ཡིན་པ། ཁམས་གསུམ་ལས་འདས་པའི་གསལ་བ་དེ་དག་ཀྱང་རྣལ་འབྱོར་པའི་ལམ་ཡིན་པ་ལས་འབྲས་བུ་ལ་རིག་པ་མེད་དོ། །དེ་ལྟར་དེ་དག་ལས་འདས་པའི་ཚེ་རིག་པ་ཚད་ལ་ཕེབས་པའི་སྣང་བའི་དུས་ན་ཆོས་ཐམས་ཅད་རང་རིག་ཏུ་འོད་གསལ་བ་ཞེས་བྱ་བ་དང་། ཡུལ་སྣང་གཉིས་མེད་ཀྱི་གསལ་བ་བྱ་བའང་སྟེ་འདི་ཡང་འབྲས་བུ་ལ་རིག་པ་མེད་དོ། །དེ་ཕྱིར་ན་ཟང་ཐལ་ཞེས་པ་དེ་དག་ལས་འདས་ནས་ཆོས་ཉིད་ཟད་པའི་སྣང་བ་ཞེས་བྱ་སྟེ། ཆོས་དང་། ཡེ་ཤེས་དང་། སངས་རྒྱས་ཞེས་པ་ཙམ་དུ་ཡང་གྲུབ་པ་མེད་ལ། འདི་ལ་གསལ་བ་ཞེས་བྱ་སྲིད་པས་འབྲས་བུ་རེ་ཞིག་ཚིག་གིས་གཏན་ལ་དབབ་བོ། །དེ་ཡང་གྲུབ་མཐའ་ངེས་ཅན་གྱི་གོལ་ས་ནི། རིག་པ་གསལ་བ་དོན་དམ་དུ་འདོད་ན་སེམས་ཙམ་དུ་གོལ་བ་ཡིན། སྣང་བ་གསལ་བ་དང་ཤེས་པ་གསལ་བ་དོན་དམ་དུ་འདོད་ན་མདོ་སྡེར་གོལ། དབང་པོ་དང་ཀུན་བརྟགས་རྣམས་གསལ་བ་དོན་དམ་དུ་འདོད་པ་རྣམས་སྔགས་ཕྱི་ནང་དུ་གོལ་བས། རང་བཞིན་རྫོགས་པ་ཆེན་པོ་མ་ཡིན་ནོ། །དེ་ལྟར་གསལ་བའི་སྤྲོས་པའི་མཐའ་དེ་དག་གཅོད་པས་སྒྲོན་མའི་གསལ་བ་དངོས་ཉམས་སུ་མྱོང་བའོ། །སྒྲོན་མའི་གསལ་བ་དེ་ནི་ཁམས་གསུམ་པའི་གོལ་བའི་གསལ་བ་དང་། གྲུབ་པའི་མཐའི་གོལ་བའི་གསལ་བ་དང་། ཕྱི་ལོག་མུ་སྟེགས་རྟག་ཆད་དུ་ལོག་པ་དེ་དང་། འབྱུང་བ་ས་དང་ཆུ་དང་མེ་དང་རླུང་གི་སྣང་བ་རྟགས་པའི་རྫས་ལ་གསལ་བར་འཛིན་པའི་སྣང་བ་ཀུན་མ་ཡིན་ཏེ། ལམ་གྱི་གསལ་བའི་སྣང་བ་རང་གི་ཉེས་པས་གཅོད་པའི་གསལ་ཆ་འགགས་པ་མེད་པར་གསལ་ཞིང་། གོང་མ་རྣམས་ལས་ལོག་པ་ནི་ལམ་གྱི་སྣང་བ། གསལ་བའི་ཆ་ཡིན་ལ་འབྲས་བུ་ནི་མ་ཡིན་ནོ། །དེ་ཅི་ཡི་ཕྱིར་ཞེ་ན་མ་ཡིན་ཏེ། དབང་པོའི་དྭངས་མ་ཉིད་ཀྱི་རང་གི་སྒོ་ལ་གསལ་བས་ན་སྒྲོན་མའི་སྣང་ཆ་ཉིད་ལམ་སྟེ་ལོངས་སྐུའི་ཉམས་གོང་འཕེལ་དང་། ཆོས་སྐུའི་རིག་པ་ཚད་ལ་ཕེབ་པས་ཏེ། སྐུ་གསུམ་ལམ་སྣང་དུ་བསྟན་པའོ། །དེས་དེ་ཉིད་ཀྱི་གསལ་བར་བྱེད་པའི་ངེས་ཚིག་བསྟན་ནས། ད་ནི་ཁྱབ་པར་བྱེད་པའི་ངེས་ཚིག་བསྟན་པ་ནི། རིག་པ་ཕྱི་ཡི་དབྱིངས་བཞག་པ་ཞེས་པ་ལ་སོགས་པས་བསྟན་ཏེ། རིག་པ་ནི་ལྷག་མཐོང་གི་རིག་པ་ལུ་གུ་རྒྱུད་ཕྱིའི་དབྱིབས་ནི་ནམ་མཁའ་འཁྲུལ་བ་མེད་པ། བཞག་པས་ནི་འཁྲུལ་མེད་གསུམ་དུ་བཞག་སྟེ་བྱ་བྱེད་དང་བྲལ་བ་ཉིད། ནང་དབྱིབས་ནི་དབྱིངས་རྣམ་པར་དག་པའི་སྒྲོན་མ། དེ་ལ་རིག་པ་བཞག་པ་ལ་དགོས་པ་ཅི་ཡོད་ན་ཉོན་མོངས་པའི་དྲི་མ་ཐམས་ཅད་རང་སར་དག་སྟེ། རྣམ་རྟོག་སྐྱེ་མི་སྲིད་པས་ཡེ་ཤེས་རང་གི་ངོ་བོའི་སྣང་བ་ལས་མ་རྟོག་པ་གང་ཡང་མེད་དོ། །དེ་ལྟར་བཞག་པ་ལ་རྣལ་འབྱོར་པ་ལ་ཉམས་གོང་ནས་གོང་དུ་འཕེལ་བའི་སྣང་བ་འོད་དང་ཡེ་ཤེས་དང་ཐིག་ལེ་དང་སྐུའི་རྣམ་པ་འདི་དག་སྐྱེས་པས་འཁོར་བ་ལ་མི་གནས་ཏེ་མྱ་ངན་ལས་འདས་པའོ། །དེ་ལས་གང་བྱུང་ན་དབྱིངས་རྣམ་པར་དག་པའི་སྒྲོན་མ་དང་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་གཉིས་གཉིས་མེད་དུ་འདྲེས་པས་ཆོས་ཉིད་མའི་སྣང་བ་རང་རིག་པ་བུའི་སྣང་བ་གཉིས་ཡང་དག་པར་འདྲེས་པ་ཡིན་ནོ། །འདྲེས་པ་དེའི་རྒྱུ་གང་ཡིན་ན་དབང་པོ་ལྔའི་རྣམ་པ་ཀུན་གྱིས་འདུས་པའི་དྭངས་མ་ཡང་དག་པ། འཆར་བྱ་གང་བྱེད་དབྱིངས་རིག་གཉིས་ཀྱི་སྒོ་ནི་མིག་ཡིན་པས། འཁོར་འདས་ཀུན་གྱི་གཞི་མིག་གིས་འཛིན་པས་མ་ཞེས་བྱའོ། །དེ་རྣམས་ཀྱིས་ནི་དྲི་བ་གཉིས་པའི་ལན་ངེས་ཚིག་བསྟན་ནས། ༈ །ད་ནི་དྲི་བ་གསུམ་པ་དབྱེ་བ་བསྟན་པ་ནི། དབྱེ་བ་རྣམ་པ་གསུམ་ཡིན་ནོ། །ཞེས་པ་ལ་སོགས་པས་བསྟན་ཏེ། དབྱེ་བ་ནི་བྱེ་བྲག་ལ་དགོངས་པའོ། །རྣམ་པ་ནི་ཡུལ་གསུམ་ནི་གྲངས་ཡིན་ནོ། །འབྱུང་བ་ནི་ལྔས་ཏེ་ཀུན་རྫོབ་སའི་དྭངས་མ་ཤ །ཆུའི་ཁྲག །མེ་དྲོད། རླུང་གི་དྭངས་མ་དབུགས་དང་ལྔ་འདུས་པའི་རྩལ་ཤེས་པ་དུ་མ་མིག་གིས་འཛིན་ཏེ། དེ་ལས་དོན་དམ་པའི་འབྱུང་བ་ལྔ་ས་སྲ་བ་མེད་པའི་བརྟན་པས་སྒྲོན་མ་གཡོ་བ་རང་འགུལ་བའི་སྣང་བ་འཛིན་ཅིང་བརྟེན་པའི་ལས་བྱེད། ཆུ་གཤེར་བ་མེད་པའི་སྡུད་པས་སྣང་བ་གཅིག་ཏུ་བསྡུས་པས་དོན་འདྲིལ་བར་བྱེད། མེ་ཚ་བ་མེད་པའི་སྲེག་པས་རྣམ་པར་རྟོག་པ་སྐྱེ་མི་སྲིད་དེ་དག་པའི་ལས་བྱེད། རླུང་ཡང་བ་མེད་པའི་བསྐྱོད་པས་དབྱིངས་རིག་མཁའ་ལ་བསྐྱོད་དེ་མངོན་གསུམ་དུ་སྣང་བའི་ལས་བྱེད། ནམ་མཁའ་ཁྱབ་པ་མེད་པའི་ཡེ་དྭངས་ཀྱིས་རིག་པའི་སྣང་བ་སྟོན་པར་བྱས་པས་དོན་དམ་གྱི་འབྱུང་བ་ལྔ་རང་གི་སྣང་བ་ཀུན་འདུས་པའི་ཕྱིར་ན། རྒྱང་ཞགས་ཆུའི་སྒྲོན་མ་ཞེས་བྱ་བ་འབྱུང་བ་ལྔའི་བདག་ཉིད་དུ་གནས་པའོ། །དེ་ལྟར་འབྱུང་བ་ལྔའི་རྩལ་ཕྱི་དང་ནང་དུ་གནས་པ་ལས་འཁོར་བ་འཛིན་པར་བྱེད་པ་མིག་གི་རྣམ་པར་ཤེས་པ་གཟུང་ཆ་མ་འགགས་པ་དང་། ཡེ་ཤེས་འཛིན་པར་བྱེད་པ་མིག་གི་དེ་བཞིན་ཉིད་སྣང་ཆ་མ་འགགས་པས་ན་ཡེ་ཤེས་རང་གི་ངོ་བོ་འདུས་པའི་རྒྱང་ཞགས་ཆུའི་སྒྲོན་མ་ཞེས་བྱ་སྟེ་དོན་དམ་ཡེ་ཤེས་ལྔ་འདུས་ཤིང་དེ་ཉིད་ཀྱི་མཚན་ཉིད་འཛིན་པས་སོ། །དབང་པོ་ནི་ལྔ་སྟེ་མིག་དང་རྣ་བ་དང་སྣ་དང་ལྕེ་དང་། ལུས་ཀྱི་དབང་པོའོ། །དེ་དག་ལྔའི་དྭངས་མ་འདུས་པའི་ངོ་བོ་མིག་ཡིན་ཏེ། དེ་ཡང་དེ་དག་ཐམས་ཅད་ཀྱི་དྭངས་མ་འདུས་པས་ན་དབང་པོ་ཡུལ་འཆར་བར་བྱེད་པའི་རྩ་ཞེས་བྱ་བ་ཐོག་མ་ལུས་ཀྱི་གཞི་འཛིན་པའི་དུས་ན་ལྟེ་བར་ཀུན་རྫོབ་ཀྱི་འབྱུང་བ་བཞིའི་དྭངས་མ་འདུས་པ་ལས་གྲུབ་པ། དེ་ལས་དྲན་པར་བསྐྱེད། དེ་ལས་རོ་རྣམས་སུ་བསྐྱེད་དེ་ལས་རྩེ་མོ་རྣམས་བཀོད་དུ་གཡས་སུ་འཁྱིལ་པའི་རྩ་ཁུག་པ་གསུམ་ཡོད་ལ་ཁ་ཆེ་ལ་རྩ་བ་འཕྲ་བ་མེན་གྱི་རྭ་ལྟ་བུའི་ནང་དུ་མིག་གི་ཨ་འབྲས་དཀར་ནག་ཕྱེད་པར་ཡོད་པས་འཁོར་འདས་གཉིས་ཀའི་རྒྱུར་བྱུང་བས། དབང་པོའི་བདག་ཉིད་དུ་འགྲོ་བ་ཀུན་ལ་གནས་པས་དབང་པོ་འདུས་པའི་རྒྱང་ཞགས་ཆུའི་སྒྲོན་མ་དང་དབྱེ་བ་གསུམ་དུ་བསྟན་པའོ། ༈ །ད་ནི་དྲིས་ལན་བཞི་པ་མཚན་ཉིད་བསྟན་པ་ནི། འདི་ཡི་མཚན་ཉིད་འདི་ལྟ་བུ་ཅེས་ལ་སོགས་པས་བསྟན་ཏེ། འདི་ལ་ནི་འོག་ནས་སྟོན་པའི་ཚིག །མཚན་ཉིད་འདི་ལྟ་བུ་ནི་གསལ་བྱེད་གསལ་ལ་མ་ལྟོས་པས་ན་མིག་ཡིན་ལ། ཕྱི་ཡུལ་ལ་འཆར་བར་བྱེད་པའི་གོ་འགགས་པ་མེད་པ་ཡིས། དབང་པོ་ཐམས་ཅད་ཀྱི་དྭངས་མ་འདུས་པ་མིག་གི་སྒོར་ཨ་འབྲས་སུ་སྨིན་པས་འཁོར་འདས་གཉིས་ཀ་འཛིན་པའོ། །དེ་གང་ལས་བསྐྱེད་ན་ཐོག་མ་ལྟེ་བ་ནས་སྐྱེས་པས་རྩ་བ་བ་མེན་གྱི་རྭ་ལྟ་བུའི་སྒོ་ལ་མིག་གི་རྣམ་པར་ཤེས་པ་ཆགས་པས་འཁོར་བ་བསྡུ་ལ། དེ་ཉིད་མ་འཁྲུལ་པ་ལས་དེ་ཁོ་ན་ཉིད་ཅེས་བྱ་སྟེ་རྣམ་ཤེས་ལ་བརྟེན་ཀྱང་། དེས་གོས་པ་མེད་པའི་པདྨའི་ནི་དེ་ཉིད་འདམ་ལ་བརྟེན་ཀྱང་འདམ་གྱི་ཉེས་པས་གོས་པ་མེད་པའོ། །སྤྱན་ནི་ཆགས་པ་མེད་པའོ། །གནས་ནི་རྒྱང་ཞགས་ཉིད་དོ། །འོ་ན་རྒྱང་ཞགས་དེ་ཉིད་རང་གི་མཚན་ཉིད་ནི་དབང་པོ་ལྔ་ཡི་ཡུལ་གཟུགས་དང་། སྒྲ་དང་། དྲི་དང་། རོ་དང་། རེག་འཛིན་པར་བྱེད་པའོ། །དེ་ཡང་ཐོག་མ་ཀུན་རྫོབ་ཀྱི་འབྱུང་བ་ལྔ་ལས་བསྐྱེད་པས། ད་ལྟ་ཡང་འབྱུང་བའི་ལས་ནི་བཞི་སྟེ། དེ་ཡང་འབྱུང་བ་རླུང་གིས་བསྐྱེད་པས་དེའི་ལས་ནི། རླུང་གི་དྭངས་མ་ལས་གཟུགས་ལ་འཇུག་པའི་ཆ་ནི་རྣམ་ཤེས་གཟུགས་ལ་འཕེན་པར་བྱས་པས་གཟུགས་རྒྱང་རིང་པོ་ནས་མཐོང་བའོ། །ཆུའི་དྭངས་མའི་ལས་ཤེས་པས་མཚན་ཉིད་གཅིག་ཏུ་བསྡུད་པར་བྱས་པས། སྣང་བ་གང་ཡིན་ངོ་ཤེས་ཤིང་མཚན་ཉིད་གཟུགས་ལ་བརྟེན་ནས་ཁོང་དུ་ཆུད་པའོ། །དེ་ཡང་སའི་དྭངས་མས་གཟུགས་ལ་སོགས་པ་མཐོང་བྱེད་མ་འགགས་པར་ཅེར་གྱིས་མཐོང་བྱེད་དུ་འབྱུང་བ་འཛིན་པས་ཏེ། གང་ཡིན་གཏན་ལ་འབེབས་ཤིང་མིག་ཆུང་ཡང་རི་རབ་ལ་སོགས་པ་གཟུགས་ཆེན་པོ་དང་། ཏིལ་འབྲུ་ལ་སོགས་པ་ཆུང་བ་རྣམས་འཛིན་པར་བྱེད་པ་སའི་ལས་སོ། །མཆེད་པར་སྣང་ནི་མེའི་དྭངས་མས་སྣང་བ་གཅིག་ནས་གཅིག་ཏུ་མཆེད་པས་གཟུགས་སྣ་ཚོགས་པ་གཏན་ལ་འབེབས་པ་དང་། གཅིག་ལ་མི་གནས་པར་ཐ་དད་པར་ལྟ་ཞིང་གཅིག་ལ་གཅིག་མི་ཆགས་པ་མེའི་ལས་ཀྱིས་བྱུང་བའོ། །དོན་དམ་པའི་འབྱུང་བ་བཞི་ལས་ཡེ་ཤེས་ཀྱི་ལས་བྱེད་པར་བྱུང་བས་ནི། དོན་དམ་གྱི་འབྱུང་བ་སས་དབྱིངས་དང་རིག་པ་བཟུང་། ཆུས་གཅིག་ཏུ་གནས་པར་བསྡུས། མེས་སྣང་བ་གོང་ནས་གོང་དུ་སྤེལ། རླུང་གིས་འཁོར་བ་ལ་མི་གནས་པར་བསྐྱོད་ལས་བྱས་པ་ནི་མིག་གིས་ལྟ་བས་ན་ལྟ་བ་དང་ངོ་། །གནས་དང་ནི་རིག་པའི་གནས་ཙི་ཏ་ནས་མིག་ཏུ་བསྐྱོད་དེས་ནམ་མཁའ་ལ་བསྐྱོད་པས་རླུང་ངོ་། །གོང་མ་ནི་མིག་གིས་ནམ་མཁའ་ལ་རིག་པ་འཛིན་པས་སའི་ལས་གྲུབ་པའོ། །དབང་པོས་ནི་མིག་ཏེ་ཆུའི་རང་བཞིན་དུ་འདུས་པས་གཟུགས་སྡུག་པ་ནི་སེམས་ཀྱི་ཉམས་རྣམས་སུ་འབྱུང་བའོ། །ཡུལ་དང་ནི་མེའི་ཡེ་ཤེས་དབྱིངས་དང་རིག་པ་ནམ་མཁའ་ལ་མཆེད་པར་བྱས་པའོ། །ཡུལ་ཅན་དང་ནི་གཟུགས་དང་། དེ་ལས་བྱུང་བའི་གཟུགས་ཀྱི་མཚན་ཉིད་དང་། མིང་དང་དབྱེ་བ་དང་། དབྱིབས་དང་ཁ་དོག་ལ་སོགས་པ་དང་། བྱེ་བྲག་ཐ་དད་པ་དེ་འཛིན་པས་བཟུང་བས་ན་ཡུལ་ཅན་ཞེས་པའོ། །ཡུལ་མེད་ནི་ཆོས་སྟོང་པ་དང་། རང་བཞིན་མེད་པས་ཏེ། སྟོང་པ་ཕྱི་སྟོང་པ་ཉིད་དུ་བལྟས་པས་ཕྱིའི་སྣང་བ་རང་བཞིན་མེད་པར་རྟོགས་ཤིང་མཐོང་ལ། དེ་བཞིན་དུ་ནང་སྟོང་པ་ཉིད་མཐོང་བས་ནང་གི་དང་། ཕྱི་ནང་སྟོང་པ་ཉིད་ཀྱིས་ཕྱི་ནང་གཉིས་ཀ་རང་བཞིན་མེད་པར་མཐོང་ལ། སྟོང་པ་ཉིད་སྟོང་པ་ཉིད་ཀྱིས་སྟོང་ངོ་ཙམ་ལ་ཡང་མི་གནས་པར་རང་བཞིན་མེད་པ་དང་། ཆེན་པོ་སྟོང་པ་ཉིད་ཀྱི་ཚུལ་ལ། དོན་དམ་པ་སྟོང་པ་ཉིད་བྱུང་། འདུས་བྱས་སྟོང་པ་ཉིད་བཏགས་པ་རྣམས་དང་། འདུས་མ་བྱས་སྟོང་པ་ནམ་མཁའ་དང་། རང་བཞིན་སྟོང་པ་ཉིད་མ་བཅོས་པའི་སེམས། ཆོས་ཐམས་ཅད་སྟོང་པ་ཉིད་ཟག་པ་མེད་པ། མི་དམིགས་པ་སྟོང་པ་ཉིད་ངོ་བོ་མེད་པ། རང་གི་མཚན་ཉིད་སྟོང་པ་ཉིད་གནས་ལུགས། དོར་བ་མེད་པ་སྟོང་པ་ཉིད་རྟོགས་པ། ཐོག་མ་དང་ཐ་མ་མེད་པ་སྟོང་པ་ཉིད་རིག་པ། མཐའ་ལས་འདས་པ་སྟོང་པ་ཉིད་ལྟ་བ། དངོས་པོ་མེད་པའི་སྟོང་ཉིད་སྤྲུལ་སྐུ། ངོ་བོ་ཉིད་སྟོང་པ་ཉིད་ལོངས་སྐུ། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཆོས་སྐུའོ། །དེ་ལྟར་དེ་དག་མཐོང་བས་རང་བཞིན་མེད་པར་མཐོང་བ་ནི་འདི་ལ་བརྟེན་པའི་ཤེས་རབ་ཀྱི་མིག་རྣམ་པར་དག་པས་མཐོང་བའོ། །རྣམས་ནི་ཆོས་ཀྱི་གནས་ལུགས་ཀྱི་མཚན་ཉིད་དང་། ཆོས་ཀྱི་དབྱིངས་སྤྲོས་པ་དང་བྲལ་བ་དང་། མ་ནོར་བ་དེ་བཞིན་ལྟ་བ་ཕྱིན་ཅི་མ་ལོག་པ་དང་། གཞན་མ་ཡིན་པ་དེ་བཞིན་ཉིད་རང་བྱུང་གི་ཡེ་ཤེས་འཛིན་མེད་དུ་ཤར་བའོ། །དེས་ནི་མཚན་ཉིད་བསྟན་ནས། ༈ །ད་ནི་དྲིས་ལན་ལྔ་པ་གནས་གང་ན་བསྟན་པ་ནི། འདིའི་གནས་ནི་མིག་ཡིན་ཏེ་ཅེས་པ་ལ་སོགས་པས་བསྟན་ཏེ། འདི་ནི་རྒྱང་ཞགས་ཆུའི་སྒྲོན་མ། གནས་ནི་རྟེན་པའི་འདུག་ས་ཡིན་ལ་མིག་ནི་བཞི་སྟེ། འཇིག་རྟེན་པས་མིང་ཙམ་དུ་བཏགས་པའི་མིག་དང་། འབྱུང་བའི་དྭངས་མ་འདུས་པའི་ཆུ་བུར་གྱི་མིག་དང་ཤེས་རབ་ཀྱི་དང་། ཡེ་ཤེས་ཀྱི་མིག་གོ། །འཇིག་རྟེན་པའི་མིང་ཙམ་དུ་བཏགས་པ་ཁབ་མིག་དང་ཁྱིམ་དམིགས་ལ་སོགས་པའོ། །དེ་ལ་འདིའི་གནས་ས་ཆུ་བུར་གྱི་མིག་འབྱུང་བ་བཞིའི་དྭངས་མ་འདུས་པ་དཀར་ནག་ཕྱེད་པ་འཁོར་འདས་ཕྱེད་མའི་གྲོང་ཁྱེར་ཞེས་བྱ་བ་ན་གནས་སོ། །ཤེས་རབ་ཀྱི་མིག་ནི་ལྔ་སྟེ། ཤའི་མིག་དང་། ལྷའི་དང་། ཏིང་ངེ་འཛིན་གྱི་དང་། ཐམས་ཅད་མཁྱེན་པའི་དང་། རྣམ་པ་ཐམས་ཅད་མཁྱེན་པའི་མིག་གོ། །ཤའི་མིག་གི་ལས་དང་ཉོན་མོངས་པའི་སྒྲིབ་པ་དང་། རང་གི་ཐོས་བསམ་བསྒོམ་པ་རྣམས་མཐོང་ལ། ལྷ་མིག་གིས་སེམས་ཅན་གཞན་གྱི་ལུས་བོང་དང་ཚེ་ཚད་ལོངས་སྤྱོད་དང་། རྐྱེན་ཡོན་དང་ལས་དང་ཉོན་མོངས་པའི་དྲི་མ་རྣམས་མཐོང་། ཏིང་ངེ་འཛིན་གྱིས་ནི་སེམས་ཅན་རྣམས་ཀྱི་བསམ་པ་དང་། འཆི་འཕོ་བ་དང་། སྐྱེ་བ་དང་། ཡིད་ལ་བྱེད་པ་སྣ་ཚོགས་པ་དང་། དུས་དང་དབང་པོ་རྣམས་མཐོང་ལ། ཐམས་ཅད་མཁྱེན་པའི་མིག་གིས་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་སའི་རིམ་པ་དང་། ཡོན་ཏན་དང་། རྫུ་འཕྲུལ་གྱི་མཁྱེན་པ་དང་། ཆོས་ཀྱི་དབྱིངས་དང་ཞིང་ཁམས་ཀྱི་ཚད་རྣམས་མཐོང་། རྣམ་པ་ཐམས་ཅད་མཁྱེན་པའི་མིག་གིས་ནི་ཤེས་བྱ་ཇི་ལྟ་བ་དངོས་པོའི་གནས་ལུགས་མཐོང་བ་དང་། ཇི་སྙེད་པ་གདུལ་བྱའི་བསམ་པ་རྣམས་མཐོང་བ་དང་། ཡེ་ཤེས་ཀྱི་མིག་ལ་གཉིས་ལས་ནང་གསལ་དུ་མཐོང་བས་ནི་མིང་བྱེད་པའི་ཡེ་ཤེས་ཀྱི་ཡེ་ཇི་སྙེད་པའི་ཡེ་ཤེས་རང་གིས་རང་གཟིགས་པའི་ཡིན། ཕྱི་གསལ་ནི་མཚན་ཉིད་འཛིན་པའི་ཡེ་ཤེས་ལྔ་དུས་གཅིག་མི་བྱེད་པར་མཐོང་། འབྱེད་པ་མེད་པའི་ཐུགས་རྗེ་རྒྱུན་ཆད་མེད་པར་ཕྱོགས་མེད་དུ་གཟིགས་པས་སོ། །འོ་ན་མིག་བཞི་པོ་དེ་ལས་ནི་ཆུ་བུར་གྱི་མིག་གིས་འཁོར་འདས་གཉིས་མཐོང་བར་བྱེད་པའི་ལས་བྱེད། ཤེས་རབ་ཀྱི་མིག་གིས་སྤྱི་དང་རང་གི་མཚན་ཉིད་ཤེས་ནས་འཁོར་འདས་ཐམས་ཅད་དུས་གཅིག་ལ་མཐོང་བའི་ལས་བྱེད་དེ། དམིགས་པ་རྣམ་པར་དག་པས་ཚིག་གི་སྤྲོས་པ་ཆོད་ལ། མ་དག་པས་ཚིག་ལ་འགྲོ་ལྡོག་རྟོག་པའོ། །ཡེ་ཤེས་ཀྱི་མིག་གིས་ཆོས་ཉིད་ཕྱིན་ཅི་མ་ལོག་པར་བྱེད་ཅིང་། སེམས་ཅན་སེམས་ལས་བྱུང་བའི་དྲི་མ་དེ་དག་གིས་ཡུལ་ནི་ཆུ་བུར་གྱི་ཡུལ་གཉིས་ལས། བླ་མའི་ལུང་གིས་ཟིན་པ་རྣམས་ཀྱིས་རིག་པའི་རང་ངོ་ལྟ་བར་བྱེད་ལ། ལུང་མེད་པ་ལ་ཕྱིན་ཅི་ལོག་གི་དང་། འཇིག་རྟེན་སོར་བཞག་པའི་ཡུལ་ལོ། །ཕྱིན་ཅི་ལོག་ནི་འབྱུང་བ་ཚ་གྲང་གི་ནད་ཀྱིས་གདུང་བ་རྣམས་ཀྱི་རྣམ་ཤེས་ཀྱི་ལྟ་བ་དང་། གྲུར་ཞུགས་པས་རི་འགྲོ་བར་སྣང་བ་དང་། མིག་རབ་རིབ་ཅན་གྱིས་དེ་མ་ཡིན་པ་ལ་དེར་འཛིན་པ་ལ་སོགས་པ་རྣམས་སོ། །སོར་བཞག་ནི་གཟུགས་སྡུག་པ་དང་མི་སྡུག་པར་མཐོང་བའི་ཡུལ་ལོ། །ཤེས་རབ་ཀྱི་མིག་ཡུལ་ནི་ཆོས་དང་ཆོས་མ་ཡིན་པ་རྣམ་པར་གཅོད་ཅིང་དེ་ཉིད་ལ་བཟླ་བའོ། །ཡེ་ཤེས་ཀྱི་ནི་ཆོས་ཀྱི་དབྱིངས་ལ་ལྟ་བས་ཡུལ་ལོ། །དེ་དག་གི་རྟེན་ནི་གཉིས་ལས་དབང་པོ་རང་གི་ངོ་བོ་དང་། དེའི་རྟེན་ནོ། །དབང་པོ་མིག་གི་རང་གི་ངོ་བོས་དམིགས་པ་ཐམས་ཅད་མཐོང་བར་བྱེད། རྟེན་ནི་གཉིས་ཏེ། དབང་པོ་རང་གི་རྟེན་པ་དང་། དབང་པོ་ལ་བརྟེན་པའི་ཆོས་སོ། །རང་གི་རྟེན་པ་ནི་འོག་ནས་བསྐྱེད་པའི་སྐབས་སུ་བསྟན། དེ་ཡང་ཨ་འབྲས་དྭངས་མ་ཆུ་བུར་གྱི་མིག་གི་རྟེན་པ། དེ་ལ་གང་བརྟེན་ན་རིག་པ་དང་མ་རིག་པ་གཉིས་ཀ་བརྟེན་པའོ། །ལུས་ཀྱི་དཀྱིལ་ནི་གནད་ཀྱི་འབྱུང་བ་ཙིཏྟ་ཡིན་ལ། དེའི་ནང་ན་ཤེས་པ་འདུས་པའི་དྭངས་མ་མེ་སྟག་ལྟ་བུ་གནས་པ་ནི་ཤེས་རབ་ཀྱི་མིག་རང་གི་རྟེན་པ་ཡིན། དེ་ལ་གང་བ རྟེན་ན་རྟོག་པ་དང་ཉམས་སུ་མྱོང་བ་དང་ཏིང་ངེ་འཛིན་རྣམས་བརྟེན་པའོ། །རང་གི་ཙི་ཏའི་དཀྱིལ་ན་ཡེ་ཤེས་ཐམས་ཅད་འདུས་པའི་དྭངས་མ་འོད་ལྔའི་ཐིག་ལེ་ཚོན་སྣ་ལྔའི་གྲུ་གུ་བསྔོགས་པ་ལྟ་བུ་གནས་པ་ནི་ཡེ་ཤེས་ཀྱི་རྟེན་པའི་ས་ཡིན་ལ། དེ་ཉིད་ལ་སངས་རྒྱས་ཀྱི་ཐུགས་རྣམ་པར་དག་པའི་ཡེ་ཤེས་གནས་པས་ན། ལྟ་སྒོམ་སྤྱོད་གསུམ་གྱི་གནད་ཐམས་ཅད་དེ་ཉིད་ལ་བརྟེན་པ་ཡིན། དེ་དག་གི་ཡུལ་ལ་སྣང་ལུགས་ནི་ཆུ་བུར་ལ་གཟུགས་ཀྱི་རྣམ་པ་ཁ་དོག་དང་དབྱིབས་དང་དག་པ་དང་མ་དག་པའི་གཟུགས་རྣམས་སུ་སྣང་བ་དང་། རིག་པའི་ཡེ་ཤེས་མངོན་སུམ་དུ་སྣང་བའོ། །ཤེས་རབ་ལ་དབང་པོ་རབ་དང་འབྲིང་དང་ཐ་མ་རྣམས་སུ་སྣང་། ཡེ་ཤེས་ལ་རྣམ་རྟོག་གང་གིས་ཀྱང་མ་གོས་པའོ། །དེ་དག་ལས་འགྱུ་བྱེད་ཀྱི་ངོ་བོ་གང་རྒྱུ་བ་ནི། ཆུ་བུར་ལ་གཟུང་བའི་ཆ་སྟེ་ཤེས་བྱའི་སྒྲིབ་པ་རྒྱུ་བ་དང་། རིག་པ་ཡེ་ཤེས་ཀྱི་སྒོ་ཡིན་པས། རིག་པ་རང་གི་ངོ་བོ་རྒྱུ་བ་ཡིན། དེའི་ཕྱིར་རྟོག་པ་ཐམས་ཅད་དེ་ལ་བརྟེན་ནས་འཆར་བའོ། །དེ་ལྟར་ཆུ་བུར་གྱི་མིག་ཡིན་པའི་རྟགས་སུ་རང་བཞིན་གྱིས་ཆུ་འཛག་པའོ། །ཤེས་རབ་ལ་ཡེ་ཤེས་ཐ་དད་པ་རྣམས་རྒྱུ་བ་ཡིན་ཏེ། ཕྱིན་ཅི་ལོག་པ་དང་མ་ལོག་པ་རྣམས་རྒྱུ་བ་ཡིན་ལ། དེ་ཡང་སྐྱེས་བུས་གློ་དང་སྦྲིད་པ་དྲག་པོ་ལུས་པའི་ཚེ། རང་གི་ཁ་དང་སྣ་ནས་མེ་སྟག་གི་རྣམ་པ་ལྟ་བུ་ཕྲ་མོ་དག་འཕྲོ་བ་ཡིན་ནོ། །ཡེ་ཤེས་ལས་མི་རྟོག་པ་དང་དགོངས་པ་དང་། ཁྱད་པར་གྱི་སྣང་བ་རྣམས་རྒྱུ་བས། དེའི་རྟགས་སུ་སྐྱེས་བུའི་མཐེབ་འཛུབ་ཀྱིས་མིག་གི་ཐ་མ་བཙིར་ན་འོད་ཀྱི་ཐིག་ལེ་རྨ་བྱའི་མདོངས་ལྟ་བུ་སྣང་བ་ཡིན་ནོ། །དེ་དག་རང་གི་ངོ་བོའི་ཆུ་བུར་གོང་དུ་བསྟན་ནོ། །ཤེས་རབ་ནི་ཕྱིན་ཅི་ལོག་དང་རང་ལ་ལོག་པ་མཁྱེན་པའི་ངོ་བོར་བཞུགས་སོ། །ཡེ་ཤེས་ནི་དང་རང་བཞིན་བདག་ཉིད་ཆེན་པོར་བཞུགས་སོ། །མིག་དེ་དག་ཕྱི་ནང་གི་འབྱུང་བ་དང་སྦྱར་ན་ཆུ་བུར་གྱི་མིག་མཆེད་པར་བྱེད་པས་མེ་ཡིན། ནང་ལྟར་ཡེ་ཤེས་རང་གི་ངོ་བོ་འཛིན་པས་དྲོད། རང་བཞིན་དུ་འབྱུང་བ་བཞིའི་ཆར་ཡོད་དོ། །ཤེས་རབ་ནི་ཡང་དག་པའི་ཤེས་པ་སྣ་ཚོགས་སུ་མཆེད་པས་མེ་ཡིན་ལ། རྣམ་པར་དག་པའི་ཤེས་པ་རྣམས་སྲེགས་པས་དྲོད་ཡིན། ཡེ་ཤེས་ནི་རྣམ་པར་རྟོག་པ་སྲེག་ཅིང་དགོངས་པ་རྣམས་སུ་མཆེད་པས་མེ་ཡིན། ཐ་མལ་པའི་གཟུང་འཛིན་བསྲེགས་ནས་ལམ་རྟགས་སུ་མཆེད་པས་དྲོད། རང་བཞིན་དུ་དོན་དམ་གྱི་འབྱུང་བ་བཞིར་ཡོད་ལ། འོ་ན་དེ་དག་འབྱུང་བས་མི་རྟོག་པས་མི་བསྐྱེད་པ་ཡིན་པས། དེ་བཅད་པའི་མན་ངག་ནི་ཆུ་བུར་དལ་བར་གཟིགས་སྟངས་གསུམ་ལ་གནས་པས། གཟུང་བའི་རྣམ་པར་རྟོག་པ་རྒྱུན་ཆད་པས་རིག་པ་རང་ས་ན་གསལ་བ་ཡིན། ཤེས་རབ་ཀྱིས་ཚིག་ཐམས་ཅད་ཀྱི་ཞེན་པ་རྒྱུན་བཅད་ནས། བརྗོད་དུ་མེད་པའི་ངང་ལ་གནས་པས། འཇིགས་པའི་རྣམ་པར་རྟོག་པ་རང་འགགས་ཏེ། སྨྲ་བསམ་གྱི་ཡུལ་ལས་འདས་ནས་སྐུ་གསུམ་དང་། འདུ་འབྲལ་མེད་པར་གསལ་བའོ། །ཡེ་ཤེས་ཀྱི་བྱུང་ཚོར་གྱི་རྣམ་པར་རྟོག་པ་ཐམས་ཅད་རྒྱུན་བཅད་ནས་ཡེ་ཤེས་རང་གི་ངོ་བོ་ལ་བཞུགས་པས་དྲན་པ་རྣམས་རང་འགགས་ཏེ། བསམ་པ་རྣམ་པར་དག་ནས་ཡིད་ལ་བྱེད་པའི་འགྱུ་བ་རྒྱུན་ཆད་པས། ལྟ་སྒོམ་སྤྱོད་པ་ལས་འདས་པའི་སྐུ་གསུམ་ཚད་ལྡན་དུ་གསལ་བའོ། །དེ་རྣམས་ཀྱི་འགྱུ་བྱེད་བཅད་པས་འབྲས་བུ་གང་ཡིན་ན། ཆུ་བུར་གྱི་མིག་ལ་བརྟེན་ནས་རིག་པ་མངོན་གསུམ་དུ་མཐོང་བས་སྣང་བ་འདི་ལ་སངས་རྒྱ་བ་དང་། བླ་མའི་ལུང་མེད་པ་ལས་འཁོར་བ་ཉིད་ཡིན། ཤེས་རབ་ཀྱིས་ནི་ཐོས་བསམ་སྒོམ་པ་ལ་བརྟེན་ནས་འབྲས་བུ་ཚེ་གཅིག་ལ་སངས་རྒྱ་བ་དང་། དེ་ཉིད་གོམས་རྟགས་མེད་ན་རིགས་དྲུག་ལས་མངོན་མཐོ་བ་རྣམ་པ་གཉིས་ཐོབ་པའོ། །ཡེ་ཤེས་ཀྱི་འབྲས་བུ་ནི་ཡེ་ཇི་བཞིན་པ་དང་མཚན་ཉིད་འཛིན་པའི་ཡེ་ཤེས་ཉིད་ལ་བ རྟེན་ནས་བར་མ་དོ་ལ་སངས་རྒྱ་བ་དང་། དེ་ཉིད་ལ་རང་སྣང་དུ་ཤེས་ན་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་ཕྱུང་ནས་བར་དོ་མེད་པར་སངས་རྒྱའོ། །དེ་ལྟར་ན་རྒྱང་ཞགས་ཆུའི་སྒྲོན་མ་ནི་མིག་གི་ཨ་འབྲས་ལ་གནས་པ་ཡིན་ཏེ་འདིའི་ཕྱིའི་ཡུལ་ལ་མཐོང་བྱེད་འགགས་པ་རྣ་བར་ཤར་བས་སྣང་བ་རྣམས་སྐྱེ་བས་ཏེ། གོང་དུ་བསྟན་པའི་གཟུགས་ལ་སོགས་པའི་ཡུལ་རྣམས་འཛིན་པར་བྱེད་པ་ཡིན་ནོ། །དེ་ལྟར་གནས་པ་བསྟན་ནས། ༈ །ད་ནི་དྲིས་ལན་དྲུག་པ་དེ་རང་གང་གིས་གྲུབ་ཅིང་གང་དང་འབྲེལ་བ་བསྟན་པ་ནི། ཐོག་མ་རང་གི་ལུས་བསྐྱེད་པའི་ཞེས་པ་ལ་སོགས་པ་བསྟན་ཏེ། དེ་ཡང་སྔོན་དུ་ལུས་ཀྱི་མཚན་ཉིད་ཤེས་དགོས། དེ་ཤེས་པས་རྩ་ཡི་མཚན་ཉིད་ཤེས། དེ་ཤེས་པས་ཡེ་ཤེས་ཀྱི་གནས་ས་ཤེས། དེ་ཤེས་པས་ལྟ་བ་རྟོགས་པའི་དགོས་པ་ཡོད་པ་གལ་ཆེའོ། ། ལུས་ནི་ལུས་ཆགས་པའི་མཚན་ཉིད་དང་། བསྐྱེད་པའི་དང་། ལུས་གྲུབ་ཅིང་གནས་པའི་འོ། །ལུས་ཆགས་པའི་ནི། ཚེ་གོང་མའི་ལུས་སེམས་བྱེ་ནས། སྔར་གྱི་ཞེན་པའི་ཡུལ་དང་བྲལ་ནས། ཆོས་ཉིད་བར་མ་དོ་ལ་རང་གི་སྣང་བ་རང་སྣང་དུ་མ་ཤེས་ཏེ། སྲིད་པའི་བར་དོ་ཞེས་བྱ་བ་དབང་པོ་ཀུན་ཚང་ཐོགས་མེད་ལྡན་པའི་ལུས་བླངས་ནས། རིག་བྱེད་འོད་ཀྱི་ལུས་སུ་གྲུབ་ནས་ཤེས་པ་ནི་དཔེར་ན་བྱ་སྒྲོ་རླུང་གིས་མཁའ་ལ་བཏེག་པ་ལྟ་བུར་འགྱུར་ཏེ། ཕར་ཕྱ་ཚུར་ཕྱ་གནས། ལུས་ནི་མེད་ཀྱང་ཡོད་པ་སྙམ་པ་དཔེར་ན་རྨི་ལམ་གྱི་ལུས་ལྟ་བུ་ཡོད་པའི་དུས་ན། ལས་ཀྱི་ལེན་པོ་བག་ཆགས་ཉིང་མཚམས་སྦྱོར་བ་ནི་ཐོག་མ་བསོད་ནམས་བསགས་ཤིང་ལས་བཟང་བ་རྣམས་རིགས་དང་ལྡན། འཁོར་དང་ལོངས་སྤྱོད་དུ་ལྡན་པའི་མངལ་དུ་འཇུག་གོ། །ལས་ངན་པ་རྣམས་ནི་ནོར་མེད་པ་དང་མ་དག་པའི་མངལ་དུ་འཇུག་གོ། །དེ་ཡང་ཕ་མ་རྒྱུ་རྐྱེན་དག་པའི་སྦྱོར་བའི་གསང་ལམ་ནས་ཞུགས་ཏེ། མངལ་དུ་ཚུད་པའི་ཚེ་སྤྱིལ་པོའི་ནང་དུ་ཚུད་སྙམ་པ་སྐྱེས་ཏེ། འདིའི་དུས་ན་མངལ་གྱི་རྒྱས་འཐུམས་ཏེ། འགྲོར་མེད་པའོ། །དེ་ནས་ཕའི་རྒྱུ་བྱང་སེམས་དང་། མའི་རྐྱེན་ཁྲག་གཉིས་མངལ་གནས་སུ་ཁྲག་དང་འོ་མ་འདྲེས་པ་ལྟར་མེར་མེར་བོར་ཞག་བདུན་དུ་འགྱུར་ཏེ། འདི་དུས་ཕ་མའི་བྱང་སེམས་གཉིས། བདག་ལུས་ལེན་པ་པོ་དེའི་རླུང་སེམས་གཉིས་ཏེ་བཞི་འདྲེས་པ་ལས། བདག་མེའི་དུས་སུ་སྨིན་ནོ་ཐོག་མའི་དུས་ལ་མངལ་དུ་ཞུགས་ནས། དེའི་ཚེ་ཡང་མའི་ལུས་ལ་ཡང་དྲོད་ཤིན་ཏུ་ཆེ་བ་གཅིག་འོང་བ་ནུར་བོའི་དུས་ན་རླངས་པའམ་དུ་བ་ལྟ་བུ་གཅིག་འོང་ངོ་། །དེ་ཡང་མེའི་སར་སྨིན་ན་སེར་པོ། ཆུའི་བར་ནག་པོར། རླུང་ལ་སྔོ་ཞིང་དམར་བར། མེ་རང་ལ་སེར་ཞིང་གསལ་བ་འོང་། དེ་བཞིན་དུ་ས་ལས་ཐིག་ལེ། ཆུ་ལས་ཆུ་བུར། རླུང་ལས་འབྱུང་བ་རྩའི་ཆ་དེ་དག་ཀྱང་ཁ་དོག་གོང་མ་རྣམས་རང་འདྲའོ། །དེ་དག་རྣམས་གཅིག་ཏུ་འདུས་པ་ལས་ལུས་ཀྱི་དབུས་སུ་ལྟེ་བ་ཞེས་བྱ་སྟེ། རྩ་ཤིན་ཏུ་ཕྲ་བ་རྟ་རྔ་ལ་སྟོང་དུ་བསིལ་བ་ཙམ་རབ་ཏུ་ཕྲ་བ་མང་པོ་འདུས་པ་དབྱིབས་གྲུ་གསུམ་པ་གཅིག་ཏུ་གྱུར་པའི་ཚེ། ཀུན་རྗོབ་ཀྱི་རྒྱུའི་རྣམ་པ་དེ་དག་ཀྱང་ནུར་ནུར་བོར་ཞག་བདུན་དུ་གནས་སོ། །འདི་ཡི་དུས་ན་ལྟེ་བའི་དབུས་སུ་ཀུན་རྫོབ་ཀྱི་འབྱུང་བ་བཞི་འདུས་པ། མིག་ཤིན་ཏུ་ཆུང་བ་ཏིལ་འབྲུ་ལ་སྟོང་དུ་བསྒོས་པ་ཙམ། རབ་ཏུ་གསལ་བ། འབྱུང་བ་སྨིན་པའི་རྩ་ཕྲ་མོ་བཞིས་ཕྱོགས་བཞི་ནས་སྦྲའི་ཐག་པ་ལྟར་བརྐྱང་བ་གཅིག་གི་ནང་ན། ཡེ་ཤེས་ཀྱི་ངོ་བོ་ཤིན་ཏུ་ཕྲ་ཞིང་རྟགས་དཀའ་བ་གཅིག་གནས་སོ། །དེ་ནས་འབྱུང་བ་སོ་སོ་ལས་ཀྱི་རླུང་གིས་བསྐྱོད་པས། དྲོད་ཀྱི་དྭངས་མ་ཤིན་ཏུ་སྲབ་པ་སྦྲང་བུའི་གཤོག་པ་ལ་བརྒྱར་གཤགས་པ་ཙམ། ཁ་དོག་དམར་བ་ནུབ་ཕྱོགས་ཀྱི་རྩའི་ནང་དུ་བསྐྱོད་ཅིང་ཆགས་པ་ནི་ཤེས་པའི་རྟེན་ཏེ། ཤེས་པའི་དྭངས་མ་ཤིན་ཏུ་འཕྲ་ལ་གསལ་བར་ཆགས་སོ། །འདིའི་དུས་ན་ལས་ཀྱི་རླུང་གིས་ཀུན་རྫོབ་ཀྱི་རྒྱུ་རྣམས་དཀྲུགས་པས། ཡང་ལན་ཅིག་དཀྲུག་གིས་འདྲེས་པས་ལྟར་ལྟར་བོར་ཞག་བདུན་གནས་ཏེ། འདི་དུས་སུ་ཤར་གྱི་རྩ་ནང་དུ་ལུས་ཀྱི་དྭངས་མ་ཁ་དོག་ནག་པ་སྔར་དང་འདྲ་བ་འདུས་པའི་ནང་དུ་ཐིག་ལེ་རབ་ཏུ་ཕྲ་བ་གཅིག་གནས་པ་ལ། བརྟེན་ནས་རྟོག་མེད་ཀྱི་ཤེས་པ་གནས་པའོ། །དེ་ནས་ལས་ཀྱི་རླུང་གིས་ཡང་ལན་ཅིག་དཀྲུགས་པས་འདྲེས་ཏེ་དེའི་དུས་ན་ལྷོའི་རྩ་ནང་དུ་ཤའི་དྭངས་མ་ཁ་དོག་དཀར་བའི་ནང་དུ་ཡིད་དང་སེམས་ཀྱི་རྟེན་ཐིག་ལེར་གནས་སོ། །ཡང་ལས་ཀྱི་རླུང་གིས་བསྐྱོད་པས་འདྲེས་པ་ལས་བྱང་གི་རྩ་ནང་དུ་དབུགས་ཀྱི་དྭངས་མ་གསེར་ས་འོག་ཏུ་བཅུག་པའི་རླངས་པ་ཙམ་ཁ་དོག་སྔོ་ཞིང་དམར་བ་ཆགས་པ་ལས། ཡེ་ཤེས་དང་རིག་པའི་རྩལ་གསལ་བ་རང་ཤེས་དང་བཅས་པ་བརྟེན་ནས་གནས་སོ། །དེ་ཡང་རྟེན་དེ་དག་རེ་རེའི་ནང་ན་ནུབ་ཙ་ན་ཤེས་པ་དང་བློ་དང་དྲན་པའི་རྟེན། ཤར་ན་མ་རིག་པ་དང་ཉོན་མོངས་པའི་རྟེན། ལྷོ་ན་འགྱུ་བ་རང་ཡིད་ཀྱི་རྟེན། བྱང་ན་སེམས་དང་རྣམ་པར་རྟོག་པའི་རྟེན་དུ་ཡོད་པ་ནི། ཀུན་རྫོབ་ཀྱི་འབྱུང་བ་བཞི་ལ་སྒྲོན་མ་བཞི་བརྟེན་པའི་དུས་ནའོ། །དོན་དམ་གྱི་དུས་ན་སྒྲོན་མ་རང་གི་ངོ་བོར་བཞུགས་སོ། །དེ་ནས་ཡང་ལས་ཀྱི་རླུང་གིས་བསྐྱོད་པ་ལས་ཐམས་ཅད་སོ་སོར་ལན་གཅིག་བྱེ། དེ་ནས་འབྱུང་བ་ཆུའི་ལས་ཀྱིས་རང་བཞིན་དུ་བསྡུས་པ་ལས་འབྱུང་བ་སའི་བྱེད་པའི་ལས་ཀྱི་བཟུང་བས་ཡང་གོར་གོར་བུར་གྱུར་ཏེ། མེའི་ལས་ཀྱི་ཞག་བདུན་དུ་སྨིན་པར་བྱས་པའི་དུས་ན་འཁོར་ལོ་བཞིའི་རྩ་འདབ་རྣམས་དང་། དབང་པོ་རྣམ་ལྔའི་རྟེན་གྱི་རྩ་དང་བཅས་པ། བསྐྱེད་བྱེད་དང་པོའི་འཁོར་ལོར་རྩ་འདབ་དྲུག་ཅུ་རྩ་བཞི། འབྱུང་བའི་སྤྱན་དང་སྒྲོན་མའི་སྤྱན་གཉིས་གསལ་བ། དྲན་པ་འདུས་པར་སུམ་ཅུ་རྩ་གཉིས་སྤྱན་དང་བཅས་པ། དེ་ལས་འབྱུང་བ་མེས་སྨིན་པའི་འཕེལ་རོ་རྣམས་འདུས་པར་རྩ་བཅུ་དྲུག་སྤྱན་གཉིས་དང་བཅས་པར་བསྐྱེད། དེ་ལས་རྩེ་མོ་རྣམ་པར་བཀོད་པ་རྩ་འདབས་སུམ་བརྒྱ་དང་དྲུག་ཅུར་བཅས་པ་སྤྱན་གཉིས་དུས་སུ་སྨིན་པར་བྱས་སོ། །དེ་ནས་ཡང་ལས་ཀྱི་རླུང་གིས་བསྐྱོད་པ་ལས་ཡང་ཀུན་རྫོབ་ཀྱི་རྒྱུད་དེ་དག་སོ་སོར་ཕྱེ། ཆུས་གཅིག་ཏུ་བསྡུས། སས་འདྲེས་ཤིང་བཟུང་བས་འཁྲང་འགྱུར་ཞེས་བྱ་སྟེ་རབ་ཏུ་སྲ་བ་གཅིག་ཏུ་འགྱུར། དེ་ལ་མེས་སྨིན་པའི་ལས་བྱས་པས་དེ་དག་གི་དབུས་དྲང་པོར་རྩ་གསུམ་ཀ་བའི་ཚུལ་དུ་བསྐྱེད་ཅིང་སྨིན་པར་བྱས་སོ། །དེ་ནས་ཡང་སྔར་ལྟར་འབྱུང་བ་སོ་སོའི་ལས་ཀྱིས་འཁྲང་འགྱུར་ཀྱང་བཤིག་ནས་ཉའི་རྣམ་པ་ལྟ་བུ་ཆགས་གང་བ་གཅིག་ཏུ་རྒྱས་ཏེ། དེ་ལྟར་བདུན་གྱི་བར་ལ་འབྱུང་བ་ཆུས་གཅིག་ཏུ་བསྡུས་པས་གཟུགས་སུ་གྲུབ་ལ། སས་བཟུང་པས་ཐ་དད་དུ་མ་སོང་། དེ་ནས་མེས་སྨིན་པར་བྱས་ཏེ་དབང་པོ་ལྔའི་སྒོ་དོད་ནས་དབང་པོའི་རྟེན་དུ་བྱུང་། རླུང་གིས་སོ་སོར་ཕྱེ་བས་མིག་ལ་སོགས་པ་སོ་སོ་ནས་གསལ་བར་བྱས་སོ། །དེ་ནས་འབྱུང་བ་བཞིའི་ལས་དངོས་སུ་མེད་ཤུགས་སུ་བྱས་ནས། ཆུས་རླན་པའི་ལས་བྱས་པས་བསྐྱེད་ཅིང་འཕེལ་ཏེ་ཆེར་བྱས། སས་སྲ་ཞིང་བརྟན་པ་གཟུགས་སུ་གྲུབ་པའི་ལས་བྱས་དབྱིབས་རུས་སྦལ་ལྟ་བུར་བྱས། སོ་སོའི་མའི་ཁྱིད་གང་དུ་བྱས་སོ། །མེས་ཚ་ཞིང་སྲེག་པའི་ལས་བྱས་པས་ཡན་ལག་རྣམས་བསྐྱེད། རླུང་གིས་ཡང་ཞིང་བསྐྱོད་པའི་ལས་བྱས་པས་ཨ་བ་དྷུ་ཏིར་བཙུད་དོ། །འདི་ཡི་དུས་ན་ལུས་ཀྱིས་འཚོགས་པའི་ཆོས་རྟེན་འབྲེལ་དང་། འབྱུང་བ་དང་། ཉོན་མོངས་པ་དང་། ཡེ་ཤེས་ལ་སོགས་པ་ཀུན་བསྐྱེད་ཅིང་སྨིན་པའོ། །དེ་ནས་ཡང་འབྱུང་བ་ཆུས་དྲང་བའི་ལས་སུ་བྱས་པས་ནང་དུ་སྨིན་པའི་རྒྱུ་བྱས། སས་ལྕི་ཞིང་ཐེན་པའི་ལས་བྱས་པས་ཤ་ཁྲག་དངོས་སུ་གྲུབ་ནས་སྦལ་བའི་རྣམ་པ་ལྟ་བུ་མཐོ་གང་དུ་བསྐྱེད། མེས་ཚ་བའི་ལས་བྱས་པས་ཤེས་པ་གསལ་བ་དང་མི་གསལ་བ་དང་། ཡན་ལག་རྣམས་སུ་བྱས། རླུང་གིས་ཕྱེ་བས་ཡན་ལག་ལྔ་དང་དབང་པོ་ལྔ་དང་། དོན་སྣོད་ལྔ་དང་། རྣམ་ཤེས་བརྒྱད་དང་། ཕུང་པོ་དང་། ཁམས་དང་། སྐྱེ་མཆེད་རྣམས་སོ་སོ་ནས་གསལ་བ་དང་། བྱེ་བྲག་ཏུ་བྱས་པ་ནི་འབྱུང་བ་སོ་སོའི་བྱེད་ལས་དག་པ་དང་མ་དག་པའི་ཁྱད་ཡིན་པས། འགྲོ་བ་རྣམས་ལ་ཤེས་པ་ཆེ་ཆུང་དང་། དབང་པོ་དང་གཟུགས་དང་། ཡན་ལག་དང་། ཁ་དོག་དང་། དབྱིབས་དང་། བཀྲག་དང་གཟི་མདངས་དང་། འཁོར་དང་ལོངས་སྤྱོད་ལ་སོགས་པ་ཆེ་ཆུང་དང་། ལེགས་ཉེས་རྣམས་འབྱུང་བ་དག་པ་དང་མ་དག་པའི་ཁྱད་ལས་བྱུང་བའོ། །དེ་ཡང་རྒྱུ་གང་ལས་བྱུང་ན་སྔོན་དུ་མས་འབྱུང་བ་ལ་གནོད་པའི་བྱེ་བྲག་བྱས་པ་ལས་བྱུང་བའོ། །དག་པ་ནི་མས་འབྱུང་བ་བསྐྱེད་པའི་གྲོགས་སུ་འགྲོ་བའི་ལས་བྱས་པ་ལས་བྱུང་བའོ། །དེ་ནི་ལུས་སུ་ཆགས་པའི་མཚན་ཉིད་དེ། དེ་ལྟར་ཞག་བདུན་ཚན་བརྒྱད་དུ་ལུས་དང་དབང་པོ་རྣམས་རྫོགས་པར་བསྐྱེད་པ་ནི་དེ་ལྟར་ཟླ་བ་གཅིག་དང་ཞག་ཉི་ཤུ་རྩ་དྲུག་གིས་ལུས་སུ་ཆགས་པའི་ལས་བྱས། དེ་ནས་མས་ཟས་ཟོས་སྐོམ་འཐུང་བས་བསྐྱེད་ནས་ཡང་དེ་ཙམ་ཞིག་ན་ལུས་ཀྱི་ལྤགས་པ་དང་། བ་སྤུ་རྣམས་བསྐྱེད་ལ། ཉོན་མོངས་པ་བག་ལ་ཉལ་ལངས་པས་འགུལ་བའི་ལས་རླུང་གིས་བྱས། འཕྲིག་པའི་ལས་སས་བྱས། འགྱུ་བའི་ལས་ཆུས་བྱས། ཤེས་པ་མཆེད་པའི་ལས་མེས་བྱས། ཟླ་བ་གསུམ་དང་ཞག་ཉེར་གཉིས་ན་མའི་རུམ་དུ་ཤེས་པ་འགུལ་ཞིང་འཕྲིག་པ་བྱུང་། དེ་ནས་དེ་ཙམ་ཞིག་ན་ཟས་ཀྱི་རྣམ་པ་མྱོང་བ་ལ་སོགས་པ་བྱས་པས་དེ་བས་བཟུང་། ཡེ་ཤེས་བཅུད་དུ་སྨིན་པའི་ལས་བྱས། རླུང་གིས་དྭངས་སྙིགས་བྱེ་བས། ལུས་རྫོགས་ཏེ་ཡན་ལག་བསྐྱོད་ལུས་འགུལ་པའི་ལས་བྱས་སོ། །དེ་ནས་ཟླ་བ་གཉིས་དང་ཞག་དྲུག་ན་མངལ་ནས་ཐོན་པ་ཕན་ཆད་ནི་ལུས་སུ་གྲུབ་པའོ། །དེ་ནས་ཇི་སྲིད་གནས་པའི་བར་དོ་ལ་ལུས་བླངས་པ་སྟེ། དེ་ལྟར་ལུས་རྫོགས་པའི་ལྟེ་བ་ལ་དྲན་པ་བསྐྱེད། དེ་ནས་རོ་རྣམས་བསྐྱེད། དེ་ནས་རྩེ་མོ་རྣམ་པར་བཀོད་པ་བསྐྱེད་པའི་འཁོར་ལོ་ལས་དབང་པོ་ཡུལ་ལ་འཆར་བའི་རྩ་བཞི་དབང་པོ་སོ་སོའི་སྒོ་ལ་ཟུག་ནས་ཡོད་ལ། དེ་ལས་ཀྱང་འདི་དག་ལས་གཡས་སུ་གལ་ཏེ་སྐྱོན་ཡོན་དབང་པོ་དྭངས་འབྱེད་ཞེས་པའི་རྩ་ཁུག་པ་གསུམ་ཡོད་པ་དབྱིབས་བ་མེན་གྱི་རྭ་དང་འདྲ་བ་རྩ་བ་འཕྲ་བ་ཁ་ཆེ་བའི་དཀྱིལ་དུ་མིག་གི་ཨ་འབྲས་ཞེས་བྱ་བ། དཀར་ནག་ཕྱེད་མ་ཆུའི་རང་བཞིན་དུ་བསྐྱེད་པ་ལས་སྨིན་པའོ། །དེ་ལ་བརྟེན་ནས་དོན་དམ་གྱི་འབྱུང་བ་བཞི་ལས་སྐྱེས་པའི་སྒྲོན་མ་བཞིར་སྣང་བའོ། །དེ་དག་ཀྱང་དཀྱུས་དང་སྦྱར་ན་ཐོག་མ་སྲིད་པའི་བར་དོ་ལས། རང་གི་ལུས་བསྐྱེད་པ་ནི། ལས་ཀྱི་མཚམས་སྦྱར་བ་གོང་དུ་བཤད་ལ། དེ་ནས་ལས་དག་པ་ཕ་མ་ལོངས་སྤྱོད་དང་ལྡན་པའི་མའི་མངལ་དུ་ཞུགས་པའི་ཚེ་སྤྱིལ་པོར་ཚུད་པ་དང་འདྲ། ལུས་སུ་ཆགས་པ་ནི་ལུས་ཀུན་གྱི་ཐོག་མ་རུ་གང་ཆགས་ན་ལྟེ་བའི་རྩ་མདུད་ཆེན་པོ་ལས་འབྱུང་བ་བཞི་པོ་སོ་སོའི་སྨིན་པའི་མཚན་ཉིད་རྩ་བཞི་འདུས་པའི་དབུས་ཀྱི་རྩ་མདུད་གྲུ་གསུམ་ཉིད་དུ་ཡང་། བདག་གི་རླུང་སེམས་དང་ཕ་མའི་རྒྱུ་རྐྱེན་དྭངས་མ་དང་བཞི་འདྲེས་པ་ལས། མེར་མེར་པོ་ལ་སོགས་པར་བསྐྱེད་པའི་དབུས་སུ་ལྟེ་བར་ཀྱང་མིག་གི་འབྲས་བུ་ཉིད་དུ་ཆགས་པས། དེ་ལྟར་ཞག་དང་ཟླ་བས་ལུས་རྫོགས་པར་གྱུར་པའི་ཀླད་པ་དུང་ཁང་དཀར་པོ་ནས། སྐྱོན་ཡོན་དབང་པོ་དྭངས་བྱེད་གཡས་སུ་འཁྱིལ་བ་གསུམ་ཡོད་པས། རྩ་ནི་བ་མེན་གྱི་རྭའི་དབྱིབས་དང་འདྲ་བ། དབང་པོའི་དྭངས་མ་ཀུན་འདུས་ནས། དོན་དམ་གྱི་འབྱུང་བའི་ལས་བྱེད་པ་ནི་དབང་པོའི་ཡུལ་ལ་འཆར་བར་བྱེད་པའི། རྩའི་ནང་ན་འདི་ཉིད་གནས་པ་ནི། དེ་ཡང་ཕའི་རྒྱུ་དང་མའི་རྐྱེན་གྱི་ཆ་གཉིས་ལས། བསྐྱེད་པས་མིག་དཀར་ནག་འདྲེས་པ་ཉིད་དུ་འཁོར་འདས་གཉིས་དོན་དམ་ཀུན་རྫོབ་ཀྱི་འབྱུང་བའི་ཆ་ནས་བྱུང་བའི། དེས་བསྐྱེད་པ་དང་འབྲེལ་བ་བསྟན་ནས། ༈ །ད་ནི་དྲིས་ལན་བདུན་པ་སྒོ་གང་ནས་འཆར་བ་བསྟན་པ་ནི། འཆར་བའི་སྒོ་ནི་མིག་ཉིད་རང་ཞེས་པ་གོང་དུ་བཤད་ཟིན་ཏོ། །དེ་ལྟར་གསུམ་གྱིས་འཆར་སྒོ་བཤད་ནས། ད་ནི་དྲིས་ལན་བརྒྱད་པ་མཐུན་པའི་དཔེ་བསྟན་པ་ནི། དཔེར་ན་འཛིན་བྱེད་ལྕགས་ཀྱུ་ཡི་ཞེས་པའི་ཚིག་བཅད་དྲུག་གིས་བསྟན་ཏེ། དཔེར་ན་གླང་པོ་ཆེ་གཟུགས་ཆེ་ལ་སྟོབས་ཆེ་ཡང་འཛིན་པར་བྱེད་པ་ལ་ལྕགས་ཀྱུ། གང་འདུལ་བར་སྣང་བ་དེའི་སྣ་ནས་བཟུང་བས་སྟོབས་ཆེ་ཡང་འགྲོ་མི་ནུས་པར་འཛིན་པ་བཞིན་དུ། འཁོར་བ་སྤངས་དཀའ་བ་དང་མྱ་ངན་ལས་འདས་པ་སྒྲུབ་དཀའ་བའི་ཆོས་གཉིས་ཀ་རྒྱང་ཞགས་ཆུའི་སྒྲོན་མས་སྣང་བ་གཉིས་བཟུང་ནས། འཁོར་བ་རང་བཞིན་མེད་པར་ཤེས། མྱ་ངན་ལས་འདས་པ་ལ་རེ་བ་མེད་པར་ཤེས་པ་ནི་སྒྲོན་མ་འདི་ཡིས་འཛིན་པར་བྱེད་པ་ཡིན་ནོ། །དེ་ནི་མཐུན་པའི་དཔེ་བསྟན་ནས། ད་ནི་དྲིས་ལན་དགུ་པ་རྒྱང་ཞགས་ཆུའི་སྒྲོན་མའི་ཚད་ཚིག་གིས་བསྟན་པ་ནི། སྒྲོན་མས་སྣང་བར་བྱེད་དོན་བྱེད་ཀྱིས་ཞེས་པ་ལ་སོགས་པས་བསྟན་ཏེ། སྒྲོན་མས་ནི་འཁོར་བ་དང་མྱ་ངན་ལས་འདས་པ་གཉིས་ཀའི་སྣང་བ་སྟོན་པར་བྱེད་ལ། དེ་ཡང་འཁོར་བའི་ཆ་ནས་ཡུལ་གཟུགས་སུ་སྣང་བ་དང་། དེའི་དོན་རིག་པ་ནི་ལྷག་མཐོང་གི་རིག་པ་ཡང་དག་པ། རྡོ་རྗེ་ལུ་གུ་རྒྱུད་དུ་སྣང་བའི་ཚད་འཛིན་པ་ནི་རྒྱང་ཞགས་ཆུའི་སྒྲོན་མ་ཉིད་ཡིན་པར་བསྟན་པའོ། །དེ་དག་གིས་ལེའུའི་གཞུང་བསྟན་ནས། ད་ནི་ལེའུའི་མཚན་བསྟན་ཏེ། ཞེས་ཚིག་དང་ཡི་གེ་འོ། །སྒྲོན་མ་འབར་བའི་རྒྱུད་ནི་མཚན་གྱི་སྐབས་སུ་བསྟན། ལས་ནི་ཁྱད་པར་དུ་རྒྱང་ཞགས་ཆུའི་སྒྲོན་མ་བསྟན་པ་ནི་གོང་དུ་རྒྱས་པར་བཤད་ཟིན། ལེའུ་ནི་གཞུང་གི་སྡེའི་ཚིག་དུམ་བུར་གཅོད་པར་བྱེད་པའོ། །དང་པོ་ནི་སྔོན་མ་དང་། ཐོག་མ་དང་། དོན་གྱི་གྲངས་ཀྱི་གཞི་འཛིན་པ་ཞིག་ཞེས་པའོ། ༈ །ད་ནི་ལེའུ་གཉིས་པའི་ཚིག་དོན་མུ་ཏིག་གི་ཕྲེང་བ་བརྒྱུས་པ་ལྟར་སྟོན་ཏེ། ལེའུ་འདི་ལ་བསྡུས་པའི་དོན་དགུས་བསྟན་པའི་དང་པོ་ཞུ་བ་མདོར་བསྟན་པ་ནི། དེ་ནས་རྒྱུ་དག་རྡོ་རྗེ་འཆང་ཞེས་པ་ལ་སོགས་པས་བསྟན་ཏེ། དེ་ནས་ནི་ལེའུ་དང་པོ་བཤད་པའི་དེ་ནས་རྒྱུ་དག་རྡོ་རྗེ་འཆང་ནི་སྡུད་པ་པོའི་མིང་། སྔར་སྟོན་པ་ཉིད་ཀྱིས་གསུངས་པའི་དོན་སྡུད་པ་པོའི་བློར་ཚུད་ནས། ད་ཡང་ནི་ཚིག་གིས་འདི་སྐད་ཅེས་སྟོན་པས་གསོལ་ཏོ། །བདག་དང་གཞན་གྱི་དོན་དུ་ཀྱེ་ཀྱེ་ཞེས་བོས་ནས། བཅོས་པ་ནི་རྒྱུ་བདག་ཏུ་འཛིན་པ་མེད་པས་རྒྱུའི་མ་རིག་པ་བཅོམ། ཐིག་ལེ་ཉག་གཅིག་ཟླ་དང་བྲལ་བས་ལྷན་ཅིག་སྐྱེས་པའི་མ་རིག་པ་བཅོམ། ཚིག་ཏུ་འཛིན་པའི་ཞེན་པ་ལ་མི་གནས་པས་ཀུན་ཏུ་བཏགས་པའི་མ་རིག་པ་བཅོམ། ལ་དེ་ལྟར་བཅོམ་པ་རྒྱུ་མེད་ཀ་དག་པའི་ཡེ་ཤེས་དང་ལྡན་ཏེ་རང་མ་བཅོས་པར་གནས། སྐྱེ་མེད་གྲོགས་སུ་ཤེས་པས་རང་བཞིན་ལྷུན་གྲུབ་ཀྱི་ཡེ་ཤེས་དང་ལྡན་ཏེ། རང་བཞིན་འགག་མེད་དུ་གནས། གདག་བྱ་མིང་དུ་མ་གྲུབ་པས་ཐུགས་རྗེ་ཀུན་ཁྱབ་ཀྱི་ཡེ་ཤེས་དང་ལྡན་ཏེ་བདག་ཉིད་ཆེན་པོར་མིང་འགྱུར་བར་གནས་པས་ལྡན་ཞེས་བྱའོ། །རྡོ་རྗེ་རིག་པ་དང་ཡེ་ཤེས་འཆང་བ་དེ་གཉིས་དང་རྒྱུན་དུ་མི་འབྲལ་བར་གནས་པའོ། །དེ་སྐད་བོས་ནས་སྔར་སྟོན་པ་ཉིད་ཀྱིས་གསུངས་པ་ལས། བདག་ནི་དོན་དམ་པའི་ངེས་པ་རྙེད་ལགས་པས། ད་མ་འོངས་པའི་སེམས་ཅན་རྣམས་ཀྱི་དོན་དུ་བདག་ཞུ་བ་བྱེད་པས། རྒྱང་ཞགས་ཆུའི་སྒྲོན་མ་དེ་ལྟར་ལགས་ན་སྟོན་པ་ཉིད་ཀྱིས་གོང་དུ་ལེའུ་དང་པོའི་མདོར་བསྟན་གྱི་སྐབས་སུ་གསུངས་པའི། ཤེས་རབ་རང་བྱུང་གི་སྒྲོན་མ་ཞེས་བགྱི་བ་གཅིག་གསུངས་པའི་དོན་དེ། གོང་དུ་མདོར་བསྟན་པའི་སྐབས་སུ་གོ་དགོས་ཏེ། མ་འོངས་པའི་སེམས་ཅན་གྱི་དོན་དུ་བདག་ཉན་པར་འཚལ་བས། དེའི་ངོ་བོ་ཇི་ལྟ་བུ་ལགས། དེ་བཞིན་དུ་ངེས་པའི་ཚིག་གི་རྣམ་པ་གང་ལགས། དེ་ལ་དབྱེ་བ་དུ་ཡིས་བསྟན་པ་ལགས། སྒྲོན་མ་འདི་ཡི་མཚན་ཉིད་ཇི་ལྟ་བུ་ལགས། སྒོ་ནི་གང་ལས་འཆར་བར་བྱེད་ཅིང་སྣང་བ་ལགས། དེ་བཞིན་དུ་དེ་གནས་པ་གང་ཞིག་ན་གནས་པ་ལགས། དེ་དགོངས་པའི་ཚད་རྣམས་ཇི་ལྟ་བུ་ལགས། སྒྲོན་མ་འདི་ལ་མཐུན་པའི་དཔེ་གང་གིས་མཛད་པ་ལགས། སྟོན་པ་ནི་བོད་པ་ཐུགས་རྗེ་ནི་རང་བཞིན་ཤུགས་ཀྱི་ཐུགས་རྗེ་ཕྱོགས་མེད་རང་ཤུགས་སུ་འཆར་བ་དང་། རྐྱེན་ཡུལ་དང་ཕྲད་པའི་ཐུགས་རྗེ་རྒྱུ་རྐྱེན་དག་པ་ལས་འཆར་བ་དང་། བསྐུལ་ཞིང་གསོལ་བ་བཏབ་པའི་ཐུགས་རྗེ་མོས་གུས་དང་ལྡན་པ་འཆར་བ་ཆེན་པོ་ལ། འདི་ཀུན་སེམས་ཅན་གྱི་དོན་དུ་གཉན་པར་འཚལ་བས་དེ་དག་རྣམས་གསུང་བར་ཞུས་པའོ། །དེས་ནི་དྲི་བ་མདོར་བསྟན་ནས། ད་ནི་ལན་རྒྱས་པར་འཆད་དེ་དེ་དག་ལས་ཀྱང་དྲིས་པ་དང་པོའི་ཤེས་རབ་རང་བྱུང་གི་སྒྲོན་མའི་ངོ་བོའི་ལན་རྒྱས་པར་བསྟན་པ་ནི། དེ་ནས་སྟོན་པས་ཡང་གསུངས་པ་ཞེས་པ་ལ་སོགས་པས་བསྟན་ཏེ། དེ་ནས་ནི་ཞུས་པའི་དེ་ནས་སྟོན་པ་རྡོ་རྗེ་འཆང་གིས་རྒྱུ་དག་པའི་རྡོ་རྗེ་འཆང་ལ་ཡང་ཤེས་རབ་རང་བྱུང་གི་སྒྲོན་མ་གསུངས་པ། ཀྱེ་མ་རྒྱུ་དག་པའི་རྡོ་རྗེ་འཆང་ཞེས་སྡུད་པ་པོ་ལ་བོས་ནས། ང་ཡིས་སྤྱིར་ཤེས་རབ་རང་བྱུང་གི་སྒྲོན་མ་བསྟན་གྱིས། བྱེ་བྲག་དེའི་ངོ་བོ་བསྟན་གྱིས། ཁྱོད་ཀྱིས་ཡང་དག་པའི་ཤེས་རབ་ཀྱིས། ཚིག་འདི་ཀུན་འཁྲུལ་པ་མེད་པར་ཟུང་ཞིག་ཅེས་ཉན་པར་བསྐུལ་ཤེས་རབ་རང་བྱུང་གི་སྒྲོན་མ་ཞེས་བྱ་བ་ནི་ཤེས་པའི་དྭངས་མས་ཏེ། འདི་ནི་སྒྲོན་མ་བཞི་པོ་ཐམས་ཅད་ཀྱི། ཤེས་བྱེད་ཉིད་དུ་གནས་པས་ན། འདི་མེད་ན་དོན་གྱི་རྟོགས་པ་མི་སྐྱེའོ། །དེའི་ཕྱིར་ན་འདི་སྒྲོན་མ་ཀུན་གྱི་ཆ་ལ་འདི་ཉིད་གནས་པས། རྩའི་ནང་ཤེས་རབ་བཞིར་གནས་པ་ནི་འབྱེད་པར་བྱེད་པའི་ཤེས་རབ་ལ་སོགས་པའོ། །དེ་ལྟར་བཞི་པོའི་ལས་ཀྱིས་ཅི་བྱེད་ན། ཚིག་གི་མཐའ་ཐམས་ཅད་འབྱེད་པ་མེད་པའི་ངང་དངོས་པོ་འདུག་ཚུལ་དུ་གནས་པར་བྱེད་པའོ། །ཆ་ཕྲ་ནི་ཤེས་རབ་ཀྱི་ཐོག་མ་ཚིག་གི་སྒྲོ་འདོགས་ཆ་ཕྲ་མོ་ཐམས་ཅད་བཅད་ནས་སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསྐྱེད་དེ། ཐ་མ་འཁྲུལ་པའི་རྣམ་རྟོག་ཆ་ཙམ་ཡང་མེད་པར་བྱས་ནས། ཚིག་གི་ཞེན་པ་དང་བྲལ་བ་ནི་ཤེས་རབ་ཀྱི་ངོ་བོར་ནི། ཡེ་ཐོག་མ་ནས་དེ་ལྟར་གནས་པ་ཡིན་པས། ད་བློས་སྒྲོ་གདགས་སུ་མེད་པར་ཤེས་ཙམ་ན་ཤེས་རབ་སྐྱེས་པའོ། །དེས་ནི་དྲི་བ་དང་པོའི་ལན་ཤེས་རབ་ཀྱི་ངོ་བོ་བསྟན་ནས། ད་ནི་དྲིས་ལན་གཉིས་པ་དེས་ཚིག་བསྟན་པ་ལ་ནང་གསེས་ཀྱི་དོན་ལྔ་ཡོད་པ་ལ་དང་པོ་ཤེས་པའི་ངེས་ཚིག་བསྟན་པ་ནི། ཤེས་པ་དངོས་དང་དངོས་མེད་པའི་ཞེས་པ་ལ་སོགས་པས་བསྟན་པ་ཡིན་ཏེ། ཞེས་པ་ནི། དག་པའི་ཤེས་པ་དང་། མ་དག་པའི་ཤེས་པའོ། །མ་དག་པའི་ཤེས་པ་ནི། འཁྲུལ་པའི་ཤེས་པ་དང་། ཐེ་ཚོམ་གྱི་ཤེས་པ་དང་། ཡིད་གཉིས་དང་། ཡིད་དཔྱོད་ཀྱི་ཤེས་པ་དང་། ལོག་པའི་ཤེས་པའོ། །འཁྲུལ་པ་ནི་དེ་མ་ཡིན་ལ་དེར་འཛིན་པ་རྣམས། ཐེ་ཚོམ་ནི་མཚན་ཉིད་གཏན་ལ་མ་ཕེབས་པའོ། །ཡིད་གཉིས་ནི་བློ་རྩེ་གཉིས་པ་རྣམས། ཡིད་དཔྱོད་ནི་ཚིག་གི་མཐའ་ལ་སྒྲོ་འདོགས་པ་སྟེ། མིན་པ་ལ་ཡིན་པར་སྒྲོ་འདོགས་དང་། ཡིན་པ་ལ་མིན་པར་སྒྲོ་འདོགས་པ་རྣམས་དང་། སྙམ་བྱེད་དུ་མ་རྣམས་ཡིན་ནོ། །ལོག་པ་ནི་ཤེས་བྱ་ཕྱིན་ཅི་ལོག་ཏུ་རྟོགས་པ་རྣམས་ཏེ། གྲུབ་པའི་མཐའ་དང་། དངོས་པོ་ལ་ཕྱིན་ཅི་ལོག་ཏུ་རྟོགས་པ་རྣམས་སོ། །དེ་དག་ནི་མ་དག་པའི་ཤེས་རབ་འཇིག་རྟེན་ལས་མི་འདའ་འོ། །ཡང་དག་པའི་ཤེས་པ་ནི་ཤེས་པར་བྱ་བའི་ཡུལ་མངོན་གསུམ་དུ་རྟོགས་པ་དང་། རྒྱབ་ཐོབ་ཏུ་རྟོགས་པ་གཉིས་ཡིན་ནོ། །དེས་ན་འཁོར་བ་ལ་བརྟེན་ནས་དངོས་དང་འདི་ཉིད་སྤང་དུ་མེད་པར་འདི་རང་མངོན་སུམ་དུ་རྟོགས་པའོ། །དངོས་མེད་ནི་མྱ་ངན་ལས་འདས་པའི་ལམ་རྣམས་ཀྱི་མཚན་ཉིད་ཤེས་པས་རྒྱབ་ཐོབ་བོ། །དེ་ཡང་མ་དག་པའི་ཤེས་པ་འདི་ལྟར་སྣང་བ་ཀུན་ལ་རབ་ཏུ་ཞུགས་ནས་རྣམ་པར་མ་དག་པའི་གཞི་དང་ལམ་དང་འབྲས་བུ་དག་ཏུ་འགྱུར་ལ། ཡང་དག་པའི་ཤེས་པ་ནི་སྣང་བ་ལ་ཞུགས་ནས་དེའི་དོན་ཡང་དག་པར་ཤེས་པས། ཆོས་སྤྱི་ཡི་དོན་རྣམས་མ་འཁྲུལ་བར་ཡང་དག་པར་ཤེས་པ་གྲུབ་པའི་མཐའ་གཞན་གྱི་ཚིག་སྤྲོས་པ་ཆོད་དེ། ཚིག་ལ་ཞེན་པའི་རྣམ་པར་རྟོག་པ་མེད་པ་དང་། དེ་བཞིན་དུ་ཆོས་རང་གི་མཚན་ཉིད་ཕྱིན་ཅི་མ་ལོག་པར་རྟོགས་པས། རང་གི་ཞེ་འདོད་དང་གྲུབ་པའི་མཐའ་རྣམས་ཞི་གནས་འཁྲུལ་པ་དང་ག་ལ་སྲིད་དེ། ཆོས་ཙམ་དུ་འཛིན་པའི་ཞེན་པ་ལས་གྲོལ་ཏེ། ཆ་ཙམ་ཡེ་ནས་བཞག་པའི་རྡོ་རྗེ་བརྟེན་པ་ནི། ཡང་དག་པའི་ཤེས་པས་ཏེ། འདིས་རང་གི་གཞི་གནས། གསུམ་དང་མཚན་ཉིད་འཛིན་པའི་ཡེ་ཤེས་ལྔ་སྟེ། དེ་ལྟར་ཡེ་ཤེས་དགུ་ལ་མངོན་གསུམ་དུ་སྤྱད་པས་དབྱིངས་དང་རིག་པ་ཚད་རྣམས་ཤེས་པ་ཡིན་ནོ། །དེས་ནི་ཤེས་པའི་ཚིག་བསྟན་ནས། ད་ནི་རབ་ཡིན་པར་བསྟན་པ་ནི། རང་བཞིན་དག་པའི་ཆོས་སྐུ་ནི་ཞེས་པ་ལ་སོགས་པས་བསྟན་ཏེ། རང་ནི་དངོས་ལ་བཞིན་ནི་དེའི་སྣང་ཆའམ་ཡོན་ཏན་ཏེ། དག་པའི་ནི་དྲི་མའི་མཐའ་ལས་འདས་པ། ཆོས་ནི་སྤྱི་དང་རང་གི་མཚན་ཉིད་སྐུ་ནི་དེ་གཉིས་ལས་གྲུབ་པའོ། །སུས་ནི་སྔར་ལམ་གསུམ་གྱི་སེམས་སུས་ཀྱང་མ་རྙེད་པ་དེ། ཤེས་པ་ཡང་དག་པ་དེས་རང་རིག་པས། མ་དག་པའི་ཤེས་པ་དང་། འཁོར་བའི་ཤེས་རྟེན་ཀུན་ལས་ཁྱད་པར་དུ་འཕགས་པས་ཤེས་རབ་རྣམས་ཀྱི་ནང་ནས་རབ་ཅེས་བྱ་སྟེ་འབྲས་བུ་སངས་རྒྱས་ཀྱི་དོན་ཤེས་པས་ཕུལ་ཞེས་བྱ། གོང་ན་མེད་པ་ཞེས་བྱ་སྟེ། ཚིག་གི་མཐའ་དང་སྣང་བའི་མཐའ་ལས་འདས་པའོ། །དེ་ནི་རབ་ཀྱི་ངེས་ཚིག་བསྟན་ནས། ད་ནི་དེ་ལྟར་ཤེས་པའི་རབ་དེ་གཞན་མ་ཡིན་པར་བསྟན་པ་ནི། གཞན་གྱིས་ནི་དེ་ལྟར་ཤེས་ན་རྟོགས་པའི་རབ་དེ་བདག་ཉིད་ཀྱིས་ཤེས་པ་ལས་གཞན་གྱིས་ཤེས་པ་མ་ཡིན་པས་དེ་ལྟ་བུའི་རབ་ལ་སེམས་ཅན་སྤྱིས་དཔྱད་པའི་གནས་མེད་པས་ན། དེ་གཞན་རྒྱུད་ལུང་གི་ཚིག་དང་བླ་མའི་མན་ངག་ལས་ཀྱང་མ་བྱུང་སྟེ་རང་ལས་ཤར་བས་དེ་ལྟར་ཤར་བ་དེ་དགོང་མའི་གཞན་རྐྱེན་ལ་ཡང་མི་བརྟེན་ཏེ། ཡང་དག་པའི་ཤེས་པས་ཆོས་རང་གི་མཚན་ཉིད་ཙམ་ཀྱང་མི་སྣང་བར་ཤེས་པའི་ཕྱིར་དང་། དེ་ཡང་བདག་རྒྱུད་རྩོལ་བཅས་མ་བརྟེན་ནས་གློ་བུར་དུ་སྐྱེས་པ་མ་ཡིན་ཏེ། ཡེ་ནས་ཡང་དག་པའི་ཤེས་རབ་ཀྱི་ཡུལ་ཡིན་པས། དེ་བློ་དང་མ་དག་པའི་ཤེས་པ་ལ་སོགས་པ་གཞན་གྱི་ཡུལ་མིན་པས་རང་ཞེས་བྱ་ཡིན་ཏེ། གཉེན་པོ་གཞན་ལ་རག་མ་ལུས་ཏེ་ཚིག་གི་མཐའ་ལས་གྲོལ་བའི་ཕྱིར་རོ། །དེ་ཡང་གཉེན་པོ་ཚིག་དང་མ་བྲལ་གྱི་བར་ཇི་སྲིད་དུ་བློ་ལས་ཤེས་རབ་མ་ཡིན་ནོ། །དེས་ནི་ཤེས་རབ་གཞན་མ་ཡིན་པར་བསྟན་ནས། ད་ནི་དེ་ལྟར་གཞན་ལ་ཡིན་པར་རྒྱུ་རྐྱེན་དང་རྩོལ་གྲུབ་དང་བྲལ་བར་བསྟན་པ་ནི། བྱས་པས་ནི་སྣང་བ་ལ་བརྟགས་དཔྱད་བྱས་པ་དང་། ལུས་ངག་གི་རྩོལ་བ་བྱས་པ་དང་། འདུས་བྱས་ཀྱི་དགེ་བའི་རྩ་བ་བྱས་པས་ཡང་དག་པའི་ཤེས་རབ་གཞན་མ་ཡིན་པ་འདི་ཡི་དོན་སུས་ཀྱང་རྙེད་པ་མེད་དོ། །དེ་ཅིའི་ཕྱིར་བྱས་པས་མི་རྙེད་ན་ཡེ་ནས་གནས་པའི་དོན་ཀྱང་དེ་ཉིད་ནས་སུ་ལ་ཡང་རེ་བ་མེད་པས་དེ་ལ་ལྟོས་པའི་དགོས་པ་ཡོད་མི་སྲིད་པའི་ཕྱིར་རོ། །དེའི་ཕྱིར་ན་ཤེས་རབ་སྟོང་པ་གཞན་མེད་འབྱེད་པར་མེད་པ་དེ། ཡེ་ནས་རང་སྣང་དུ་ཡོད་པས། ཤར་བ་ཐམས་ཅད་རང་ཤར་ཡིན། དེ་ལྟར་ཤར་བས་གྲོལ་བ་ཐམས་ཅད་རང་གྲོལ་ལ། དེ་ལྟར་གྲོལ་བ་དེ་སུས་ཀྱང་བྱས་པ་མེད་པས་ན་རང་བྱུང་བས་ཏེ། དེ་གང་ལས་བྱུང་ན་དངོས་པོ་གཤིས་ཀྱི་འདུག་ཚུལ་ལས་བྱུང་ཤེས་པ་ཐམས་ཅད་ཀྱི་ནང་ནས་རབ་ཅེས་བྱའོ། །དེས་ནི་རྒྱུ་རྐྱེན་དང་བརྩོན་འགྲུས་དང་བྲལ་བར་བསྟན་ནས། ད་ནི་དེ་ལྟར་བྱས་པ་ལས་མ་བྱུང་བའི་ཤེས་པ་དེ་གཉིས་སུ་མེད་ཅིང་ཀུན་ལ་ཁྱབ་པའི་ངེས་ཚིག་བསྟན་པ་སྒྲོན་མས་ནི་འཁོར་བའི་རྣམ་རྟོག་གི་མུན་པ་བསལ་ནས་ཆོས་ཉིད་རྣམ་པར་དག་པའི་སྣང་བ་ཐམས་ཅད་སྟོན་པར་བྱེད་ཅིང་། སྣང་བ་དང་། སྟོང་པ་དང་། ཡོད་པ་དང་། མེད་པ་དང་། ཡིན་པ་དང་། མིན་པ་དང་། རྟོགས་པ་དང་མ་རྟོགས་པ་ལ་སོགས་པ་ཀུན། གཉིས་སུ་མེད་པར་ཤེས་པ་རང་གི་ངོ་བོ་ལ་སྣང་ལ་གཞན་ལ་མ་ཁྱབ་བམ་ཞེ་ན། ཁྱབ་ཏེ་མཐོ་རིས་ངན་སོང་ཡོད་ཐོས་སྣང་གྲགས་ཐམས་ཅད་ལ་ཤེས་རབ་རང་བྱུང་རང་ཤར་དུ་ཁྱབ་པས་ལས་ནི་སོ་སོ་རང་རང་གི་ངོ་ལ་ཁྱབ་པས་སོ། །དེ་ཡང་ཤེས་རབ་ཀྱི་ཁྱབ་བྱེད་ནི་རིག་པའི་རང་ངོ་ལ་ཁྱབ་པ་ཡིན་ནོ། །དེ་དག་རྣམས་ཀྱིས་ནི་དྲིས་ལན་གཉིས་པ་ཤེས་རབ་རང་བྱུང་གི་སྒྲོན་མའི་ངེས་ཚིག་བསྟན་ནས། ༈ །ད་ནི་དྲིས་ལན་གསུམ་པ་དབྱེ་བ་བསྟན་པ་ནི། དབྱེ་བ་རྣམ་པ་ལྔ་ཡིན་ཏེ། །ཞེས་པ་ལ་སོགས་པས་བསྟན་ཏེ། དེས་མདོར་བསྟན། རྒྱས་པར་དབྱེ་ན་རང་གི་ལུས་ཀྱི་གཞི་ལ་གནས་པའི་ཤེས་རབ་ནི་སུས་ཀྱང་བྱས་པ་མེད་པར་ཡེ་ནས་རང་བྱུང་ཤེས་རབ་ལྔར་སེམས་ཅན་ཀུན་གྱི་ཙིཏྟ་ན་གནས་པ་ཡིན་ནོ། །འདི་ཡང་ལུས་ལ་གནས་པའི་དུས་ན། རྩ་བཞི་དབུ་མ་དང་ལྔ་ན་གནས་ཏེ། འབྱེད་པར་བྱེད་པའི་ཤེས་རབ་ཞེས་བྱ་བ་ཚིག་གི་མཐའ་ཕྱེད་པར་བྱེད་པ་གཅིག་ཏུ་གནས་པས་ཚིག་གི་ཚད་ཟིན་པའོ། །སྡུད་པར་བྱེད་པའི་ཤེས་རབ་གནས་པ་ནི་ཚིག་གི་སྤྲོས་པ་བཅད་ནས་དོན་གཅིག་ཏུ་སྡུད་པར་བྱེད་ལ། གནས་པར་བྱེད་པའི་ཤེས་རབ་ཀྱིས་དོན་ལ་གནས་པ་ལས་མི་འདའ་བ་བྱེད། བསྐྱོད་པར་བྱེད་པའི་ཤེས་རབ་ཀྱིས་ནམ་མཁའ་རྣམ་པར་དག་པ་ལ་རིག་པ་འཛིན། སྒྲོལ་བར་བྱེད་པའི་ཤེས་རབ་ཀྱིས་ཆོས་ཐམས་ཅད་ཀྱི་སྲོག་གཅོད་པར་བྱེད་པས་ཏེ། ཐབས་དང་བསྟུན་ནས་གནད་གང་ལ་ཡང་ཞེན་པའི་རྒྱུན་ཆད་དེ། མི་གནས་པས་ཆོས་ཀྱི་སྲོག་ཆོད་པ་ཡིན་ནོ། །དེ་ལྟར་ལྔ་གང་ལ་བརྟེན་ཅིང་ལས་གང་བྱེད་ན་ཆུས་ནི་འབྱུང་བ་རྡོས་བཅས་ཀྱི་དང་། རིག་བྱེད་ཡིད་ཀྱི་དང་། སྣང་བ་འོད་ཀྱི་དང་། ཤེས་བྱ་སྟོང་པ་ལ་སོགས་པ་དང་ཆོས་སྤྱི་དང་རང་གི་མཚན་ཉིད་ཀྱི་རྟེན་རྣམས་བྱེད་པའོ། །དེའི་ཡུལ་ནི་ཚིག་གི་སྤྲོས་པ་གཅོད་དོ། །སྣང་བ་ནི་ཆོས་ཉིད་སྣང་བ་ཅེར་གྱིས་མངོན་སུམ་དུ་འཛིན་པ་ནི། མིག་གི་སྒོ་དབང་པོའི་ཆ་ལ་སྣང་བའི་ཤེས་རབ་ཀྱིས། ཡིད་དཔྱོད་ཀྱིས་བརྟག་ཏུ་མེད་པར། མངོན་སུམ་དུ་དབྱིངས་རྣམ་པར་དག་པ་རང་རིག་པ་རྡོ་རྗེ་ལུ་གུ་རྒྱུད་གཉིས་མེད་དུ་གནས་པར་བྱེད་པས། མདུན་པ་ནམ་མཁའ་འཛིན་པ་ཤེས་རབ་དེའི་ཡུལ་རིག་པ་མངོན་སུམ། དྲན་པ་ནི་ཡེ་ནས་ཡོད་པ་མ་ཡིན་ཏེ། ཤེས་པ་གློ་བུར་བ་ཡིན་ཏེ། གློ་བུར་དུ་དྲན་ཚད་རང་བཞིན་མེད་པར་ཤེས་ན་ཤེས་རབ། དེ་ཆོས་སུ་ཁྱེར་ན་དྲན་པ། དེ་འགགས་པ་མེད་པའི་ཤེས་པ་ཐ་དད་དུ་ཤར་བ་དེ་ལ་ཆོས་སུ་བྱས་ན་ཆོས་ལ་ཐུག་པ་མེད་པར་འགྲོ་ལ། དེ་ཤེས་རབ་ཏུ་འགྲོ་བ་ནི་བླ་མའི་མན་ངག་བརྗེད་པ་མེད་པར་རྒྱུད་ལ་བརྟེན་པས་ཤེས་རབ་ཏུ་འགྲོ་བ་ནི་དྲན་པ་གློ་བུར་བ་ཡིན་པར་ཤེས་པས། གློ་བུར་གྱི་ཤེས་པ་ཐ་དད་པ་ལ་སེམས་མི་འཇུག་པས། ཤེས་པ་གློ་བུར་བ་ལ་མི་གནས་རྩེ་གཅིག་ལས་ཡུལ་རྐྱེན་གློ་བུར་དུ་སྣང་བའི་ཕྱོགས་ཀྱི་ཡུལ་ལ་བརྟེན་ནས་བྱུང་བ་རྣམས་ལ་མི་གནས་པར་ངོ་བོ་ཉིད་མེད་ཐིག་ལེ་ཉག་གཅིག་ཏུ་བསྡུས་པས། ཤེས་རབ་སྟེ། འདི་ཡི་ཡུལ་དྲན་པ་གློ་བུར་བ་ལ་རྟོག་པར་བྱེད་པའོ། །སོ་སོར་ནི་ཚིག་གི་མཐའ་དང་། ཡང་དག་པ་དང་མ་དག་པ་ལ་སོགས་པ་རྣམས་མ་འདྲེས་པར་རྟོགས་པའི་ཤེས་རབ་ཀྱིས་རྟོགས་ནས་སྣང་བའི་དོན་ཇི་ལྟར་ཤར་བ་རྣམས་ཉམས་སུ་མྱོང་བས། ཆོས་སྤྱི་གྲུབ་མཐའ་འཛིན་པ་རྣམས་ཀྱི་ཚིག་གི་སྤྲོས་པའི་སྲོག་གཅད། རང་གི་མཚན་ཉིད་ཀྱི་ཆོས་ནི་རང་གི་ཞེ་འདོད་ཀྱི་གྲུབ་མཐའ་ཞིག་པ་ན་ཆོས་ཙམ་དུ་འབྱེད་པ་ཡང་སྣང་མི་སྲིད་པའོ། །ལས་དང་པོ་ནས་འཇུག་པར་བྱེད་པ་ལ། སྔོན་དུ་ཐོས་པའི་ཤེས་རབ་ཀྱིས་ཚིག་གི་མཐའ་གཅད་ནས་རྒྱུད་གྲོལ་བར་བྱེད་ལ། དེ་ནས་བསམ་པའི་ཤེས་རབ་ཀྱིས་ཉམས་སུ་བླངས་པས་རྣམ་རྟོག་གི་སྲོག་བཅད་ལ། དེ་ནས་བསྒོམས་པའི་ཤེས་རབ་ཀྱིས་ཐག་བཅད་ནས་བསྒོམ་མི་བསྒོམ་ལ་སོགས་པའི་བློ་ཙམ་ཡང་མི་གནས་པར་བྱེད་པ་དང་རྣམ་པ་གསུམ་གཏན་ལ་ཕེབས་པར་ཤེས་རབ་ཀྱིས་ནི། ད་ལྟར་གནས་པའི་བར་གྱི་རང་བཞིན་གནས་པའི་བར་དོན་གཏན་ལ་ཕེབས་པར་བྱས་ནས། ཡུལ་ཚིག་དང་ཞེས་པ་དང་། རྟོགས་པ་གསུམ་གྱི་སྲོག་གཅོད་པར་བྱེད་པའོ། །དེས་ནི་དབྱེ་བ་བསྟན་ནས། ད་ནི་དྲིས་ལན་བཞི་ལ་མཚན་ཉིད་བསྟན་པ་ནི། སྣང་དང་མི་སྣང་ཆོས་རྣམས་ཀུན་ཞེས་པ་ལ་སོགས་པས་བསྟན་ཏེ། སྣང་དང་ནི་འཁོར་བའི་ཆོས། མི་སྣང་དང་ནི་མྱ་ངན་ལས་འདས་པའི་ཆོས་རྣམས་ཀུན། འཁོར་བའི་ཆོས་ཀྱི་མཚན་ཉིད་སྒྱུ་མའི་རྨི་ལམ། སྤྲུལ་པའམ། དྲི་ཟའི་གྲོང་ཁྱེར་ལྟར་སྣང་ལ་རང་བཞིན་མེད་པར་སུས་ཤེས་པ། དེ་མྱ་ངན་ལས་འདས་པའི་ཆོས་ཉིད་ཀྱང་སྒྱུ་མ་ལྟ་བུར་ཤེས་པར་འགྱུར་བ་ཡིན་པས་འདི་དུས་ན་སྒོམ་དུ་མེད་པའི་ཆོས་ཉིད་རྟོགས་སུ་མེད་པའི་ལྟ་བ། ཆོས་ལས་འདས་པའི་ཤེས་རབ་ཞེས་བྱ་བ་ཡིན་པས་ན་འདི་ནི་ཤེས་རབ་དེའི་མཚན་ཉིད་དོ། །དེས་ནི་མཚན་ཉིད་བསྟན་ནས། ༈ །ད་ནི་དྲིས་ལན་ལྔ་པ་འཆར་སྒོ་བསྟན་པ་ནི། འཆར་ཕྱེད་སྒོའི་དབང་པོ་ཡོད་ཅེས་པ་ལ་སོགས་པས་བསྟན་ཏེ། འཆར་བྱེད་ནི་རྩོལ་བ་མེད་པར་རང་ཤར་དུའོ། །སྒོ་ནི་དབང་པོ་ལྔའི་མིག་དང་རྣ་བ་དང་སྣ་དང་ལྕེ་དང་ལུས་དང་ལྔའོ། །དེ་ལས་ཀྱང་ཤེས་རབ་ནི་ཁྱད་པར་སྣའི་དབང་པོའི་སྒོ་ནས་འཆར་བར་བྱེད་ལ། དེ་འཆར་བར་ཅིས་ཤེས་ན། དེའི་རྟགས་སུ་མཚན་མོའི་དུས་ཉིད་སྐྱེས་བུས་གླལ་དྲག་པོ་དང་སྦྲིད་པ་དྲག་པོ་དང་། ཤིན་ཏུ་གློ་དྲག་པོ་འདུ་བའི་ཚེ་ན། ཤེས་རབ་ཀྱི་རང་བཞིན་དེ་མེ་སྟག་ལྟ་བུ་དམར་ལ་དྭངས་པའི་འོད་ཟེར་ཕྲ་མོ་དཔེར་ན་ཙན་དན་གྱི་མེ་སྟག་བཞིན་དུ་སྣ་ནས་སྐྱེས་བུ་རྣམས་ལ་འཕྲོ་བས། ཤེས་རབ་དེའི་ཚད་ཀྱང་དེ་ཡིན་རྟགས་ཀྱང་དེ་ཡིས་ཟིན་པས། སྣ་ནས་དེ་ལྟར་སྣང་བས་འཆར་བར་བྱེད་པའི་སྒོ་ངོས་ཟིན་པའོ། །དེས་ནི་འཆར་སྒོ་བསྟན་ནས། ད་ནི་དྲིས་ལན་དྲུག་པ་ཤེས་རབ་ཀྱི་གནས་པ་བསྟན་པ་ནི། བསྐྱེད་པར་བྱེད་པའི་རྩ་བཞི་ནས། །ཞེས་པ་ལ་སོགས་པས་བསྟན་ཏེ། བསྐྱེད་པར་ནི་ལུས་དང་། དྲན་པ་དང་། ཤེས་པ་དང་། དབང་པོ་རྣམས་བསྐྱེད་པར་བྱེད་པས་རྩ་རོ་མ་དང་། རྐྱང་མ་དང་། ཀུན་རྡར་མ་དང་། ཤེལ་སྦུབ་ཅན་དང་། བཞི་ཡིན་ནང་ནས་ཤེས་པ་རྣམས་ཀྱི་རང་བཞིན་ནི། རླུང་གིས་འཕེན་པས་འགྱུ་བ་དང་། རིག་པའི་རང་རྩལ་གྱིས་འགུལ་བ་དང་འབྱུང་བའི་བྱེད་པས་འཕྲིག་པ་དང་། ཤེས་རབ་ཀྱི་རང་རྩལ་གྱིས་ཡང་བ་དང་། ཤེས་པའི་འཕྲོ་འདུ་ཡིས་བསྐྱོད་པའི་རྣམ་པ་དང་། ཡེ་ཤེས་ཀྱི་ངོ་བོས་བདག་ཉིད་ཆེན་པོ་ཉིད་དུ་གནས་པའོ། །དེ་ཡང་དེའི་གནས་རྩ་བཞི་པོ་དེ། རང་གང་ལས་བསྐྱེད་ཅིང་བརྟེན་ན་ཙིཏྟའི་དཀྱིལ་ནས་ཀུན་རྡར་མ་ཡོད་ལ། དེའི་གཡས་ན་རོ་མ། ཙིཏྟའི་གཡོན་ན་རྐྱང་མ་ཡོད་པས་འགྱུ་བར་བྱེད། དེ་མཐའ་མ་ལ་ཤེལ་གྱི་བུ་གུ་ཅན་གྱིས་འཁོར་བ་སྟེ་ཁུག་པར་ཡོད་དོ། །དེ་ལྟར་ཙིཏྟ་ཉིད་ལ་རྩ་དེ་རྣམས་ཀྱིས་འཁོར་བར་གནས་ཤིང་བརྟེན་པའོ། །དེ་ལྟར་རྩ་དེ་དག་གི་ནང་ན་ཤེས་པ་ཐམས་ཅད་འདུས་པའི་དྭངས་མ་གསེར་ས་འོག་ཏུ་བཅུག་པའི་རླངས་པ་ཙམ་དུ་ཤེས་པའི་རྒྱུད་ཡིན་ཏེ་འདི་རྣམས་ཀྱི་ནང་ན་གནས་སྟེ། དཔེར་ན་མེ་སྟག་ཡར་བའི་མཚན་ཉིད་ལྟ་བུ་ཉིད་གནས་པ་དེ་གང་ཡིན་ན། འབྱེད་བྱེད་ཀྱི་ཤེས་རབ་དང་། བསྡུད་བྱེད་ཀྱི་ཤེས་རབ་དང་། གནས་བྱེད་ཀྱི་ཤེས་རབ་དང་། བསྐྱོད་བྱེད་ཀྱི་ཤེས་རབ་དང་། སྒྲོལ་བྱེད་ཀྱི་ཤེས་རབ་ལྔ་ཡིན་ཏེ། གནས་ནི་རྩ་བཞིའི་ནང་ན་གནས་པ་སྟེ་རྩའི་མིང་འོག་ནས་སྟོན། དེ་ཡང་ཤེས་རབ་དེ་དག་གི་འཕེལ་དང་ལས་ནི་ལས་ཀྱི་རླུང་ལྔ་སྟེ། མེ་དང་མཉམ་དུ་གནས་པའི་རླུང་དང་། དྭངས་སྙིགས་འབྱེད་པའི་དང་། ཀུན་ཏུ་ཁྱབ་བྱེད་ཀྱི་དང་། སྲོག་འཛིན་པའི་རླུང་དང་བཅས་ནས་རྒྱུ་བ་ཡིན་ཏེ། འདི་ལ་བརྟེན་པའི་ལས་བྱེད་པས་དེའི་ཕྱིར་ན་རླུང་ལ་བརྟེན་པའི་བསམ་གཏན་འདི་དག་ཟབ་སྟེ། རང་གི་ངོ་བོ་དང་། ངེས་ཚིག་དང་། དབྱེ་བ་དང་། བཅོས་ཐབས་དང་གནས་པར་བྱ་བའི་མན་ངག་འོག་ནས་སྟོན་པས་སོ། །དེ་ལྟར་ཤེས་རབ་ཀྱི་རྩལ་རླུང་གིས་བྱས་པས་ཤེས་པ་གསལ་གསལ་བ་བོ་ཤེས་རབ་ཀྱི་ངོ་བོ་རིག་རིག་པོ་རླུང་གི་ལས་ཡིན་ནོ། །དེ་ལྟར་རླུང་ལྔ་ཡང་ཤེས་པའི་རྩལ་དུ་སྣང་བས་ཤེས་རབ་རྣམས་ཀྱི་རང་བཞིན་དུ། རྩ་བཞི་ན་གནས་ནི། རྩའི་མིང་དང་། དེ་དང་པོ་གང་ནས་བསྐྱེད་པ་དང་། རྩའི་གནས་པ་དང་། རྩ་དེ་ཀུན་གྱི་སོ་སོའི་བྱེད་པའི་ལས་དང་། རྩའི་རང་བཞིན་དང་། རང་གི་མཚན་ཉིད་ཇི་ལྟ་བུ་ཡིན་པ་དང་། སྒྲ་འཇུག་པའི་རྒྱུ་མཚན་དང་། རྩ་ལ་བརྟེན་པའི་ཤེས་རབ་དང་ཡེ་ཤེས་དེ་བློའི་ཡུལ་དུ་བསྒོམ་ན་ཇི་ལྟ་བུ་བསྒོམ་པ་དང་། རྩ་དེ་དག་མཐའ་གྲོལ་ཡོངས་རྫོགས་ཀྱི་ལྟ་བ་ཡིན་པ་དང་དགུས་རྩ་རང་གི་ཆོས་རྒྱས་པར་བསྟན་ཏེ། རྩའི་མིང་ནི་རོ་མ་དང་རྐྱང་མ་དང་ཀུན་རྡར་མ་དང་། ཤེལ་གྱི་སྦུབ་མ་ཁོག་པ་སྟོང་པ་དང་བཞི་འོ། །དེ་ལྟར་རྩ་བཞི་པོ་དེ་དག་ལས་བསྐྱེད་པ་ནི་རོ་མ་ནི་ཀུན་རྫོབ་ཀྱི་དུས་ན་འབྱུང་བ་ཆུས་བསྐྱེད་དེ། དེ་ཡང་དང་པོ་ལུས་ཆགས་པའི་དུས་ན་འབྱུང་བ་ཆུའི་དྭངས་མ་ལས་ཆུ་སེར་དུ་སོང་། ཆུ་སེར་གྱི་དྭངས་མ་འདུས་པ་ལས་ཁྲག་གི་རྟ། ཤིན་ཏུ་ཕྲ་བ་རྟ་རྔ། རྒྱའི་ཆ་ཙམ་རི་ལི་བསྒྲིལ་མ་ལྟ་བུ་ལས་ལུས་ཀྱི་ཁྲག་དང་ཆུའི་ལས་རྣམས་བྱེད་པ་གཅིག་ཏུ་བསྐྱེད་པས། ལུས་ཀྱི་བསྡུད་བྱེད་དུ་གནས་པའོ། །རྐྱང་མ་ནི་ཐོག་མ་འབྱུང་བ་སའི་དྭངས་མ་ཐིག་ལེ་ཉུང་འབྲུ་སྟོང་གི་ཆ་ཙམ། དེ་ལས་ཤའི་དྭངས་མ་རྨུགས་པ་ན་བུན་ལྟ་བུ་ལས་ཤིན་ཏུ་ཕྲ་བའི་རྩ་གསེར་གྱི་མོ་ཁབ་ལྟ་བུར་བསྐྱེད། དེས་རུས་པའི་རང་བཞིན་བསྐྱེད། གོང་མས་ཆུ་རྒྱུས་རྣམས་བསྐྱེད་པའོ། །ཀུན་རྡར་མ་ནི་འབྱུང་བ་རླུང་ལས་བསྐྱེད་པས་སྟེ། ཐོག་མ་རླུང་གི་དྭངས་མ་ལས་དབུགས་ཀྱི་དྭངས་མ་བྱི་བ་ཕྲ་མའི་ཁ་རླངས་ཙམ། དེ་ལས་རྩ་ཕྱི་ཕྲ་ནང་ཡངས་པ་བདེ་བ་བསྐྱེད་བྱེད། རླུང་གི་རང་བཞིན་དུ་བསྐྱེད། དེས་དབང་པོ་རྣམས་བསྐྱེད་དོ། །ཤེལ་གྱི་སྦུ་གུ་ཅན་གྱི་ཀུན་རྫོབ་ཀྱི་དུས་ན་འབྱུང་བ་མེ་བསྐྱེད་དོ། །ཐོག་མ་ལུས་ཆགས་པའི་དུས་ན་མེ་ལས་མིག་གི་དྭངས་མ། ཏིལ་འབྲུ་བརྒྱ་ཡི་ཆ་ཙམ། དེ་ལས་དྲོད་ཀྱི་དྭངས་མ་ཉུང་འབྲུ་སྟོང་གི་ཆ་ཙམ་ལས་རྩ་སྦོམ་ཞིང་སྦུབ་མ་ཡངས་ཕྱི་དཀར་ལ་ནང་དམར་བ་བསྐྱེད། དེས་སྐྲ་དང་སོ་དང་སེན་མོ་དང་པགས་པ་རྣམས་བསྐྱེད་དོ། །རྩ་དེ་དག་གི་གནས་ནི་ཙི་ཏ་རིན་པོ་ཆེ་ལས་འཁོར་ཏེ། རོ་མ་གཡས་ན་གནས། རྐྱང་མ་གཡོན་ན་གནས། ཀུན་རྡར་མ་ནི་དབུས་ན་གནས། ཤེལ་གྱི་སྦུ་གུ་ཅན་སྟེང་ནས་འཁོར་བའི་ཚུལ་དུ་རྒྱུ་བ་ཡིན་ལ། དེ་ཡང་ལུས་ཀྱི་འཁོར་ལོ་བཞི་ལས། བསྐྱེད་བྱེད་དང་པོའི་འཁོར་ལོ་ན་རོ་མས་རྩ་རྣམས་ཀྱི་གཙོ་བོ་བྱས་ནས་གནས། དྲན་ཙ་ན་རྐྱང་མས་གཙོ་བྱས་ནས་གནས། རོ་རྣམས་ན་ཤེལ་སྦུབ་ཅན་གྱིས་གཙོ་བོ་བྱས་ནས་གནས། རྩེ་མོ་རྣམ་པར་བཀོད་པ་ན་ཀུན་རྡར་མས་གཙོ་བོ་བྱས་ནས་གནས་སོ། །དེ་ལྟར་འཁོར་ལོ་བཞིས་རྩ་བཞིས་གཙོ་བོ་བྱས་པ་ཅི་ཡིན་ན། བསྐྱེད་འབྱུང་བ་ས་ཡིན་ཀྱང་སྐྱེད་བསྡུད་པའི་ལས་ནི། ཀུན་རྫོབ་ཀྱི་དུས་ན། འགྲོ་བའི་ལུས་མགོ་མཇུག་གི་འབྱུང་བ་ཆུའི་ཚ་གྲང་གི་ནད་ཀྱི་བྱེ་བྲག་ཏུ་བྱེད་པ་ཡིན་ལ། འབྱུང་བ་ཆུའི་བྱེད་པའི་ལས་ཀྱིས་ཚེའི་འདུ་བྱེད་པ་མིན་ཏེ་ཆུ་རང་གི་དུས་ལ་འཕོ་བར་བྱེད་པའོ། །རྐྱང་མས་ནི་འབྱུང་བ་སའི་ལས་བྱེད་དེ་ཤའི་མདོག་དང་། གནས་པ་དང་བརྟེན་པར་བྱེད་པ་ཡིན་ནོ། །དེའི་གནས་འགྱུར་བ་ལས་ཤའི་ནད་རྣམས་སུ་ལུས་ཀྱི་འབྱུང་བའི་ཐུག་པར་བྱེད་པ་ཡིན་ནོ། །དེ་ལྟར་སའི་བྱེད་པའི་ལས་ལོག་ཅིང་འཁྲུག་པ་ལས་སས་ཚེའི་འདུ་བྱེད་རང་དུས་ལ་བྱེད་པ་ཡིན་ནོ། །ཀུན་རྡར་མ་ཡིས་ནི་འབྱུང་བ་རླུང་གིས་བྱེད་དེ། སྟེང་རླུང་དང་འོག་རླུང་དང་། རྩ་འཕར་བ་དང་། ལུས་ཀྱི་སྟོབས་དང་། འགྲོ་བ་དང་ཡན་ལག་བསྐྱོད་པ་རྣམས་བྱེད་ལ། དེ་གནས་འགྱུར་བ་ལས་འབྱུང་བ་ལོག་སྟེ། དབུགས་མི་བདེ་བ་དང་། བར་ཆད་པ་དང་། རྩའི་དྲག་ཞན་དང་། སྡོད་པ་ལ་སོགས་པ་བྱས་ནས་ལུས་ལ་ནད་འཁྲུགས་ལ། འབྱུང་བ་རླུང་གི་བྱེད་པའི་ལས་གསུམ་ནང་ལོག་པ་ལས་རླུང་གིས་ཚེའི་དུས་བྱེད་པ་སྟེ། དེས་བྱས་པ་རྣམས་རླུང་རང་གི་དུས་ལའོ། །ཤེལ་གྱི་སྦུ་གུ་ཅན་གྱི་བྱེད་པའི་ལས་ནི་འབྱུང་བ་མེའི་ལས་བྱེད་དེ། དྲོད་དང་། དབང་པོ་གསལ་དང་། མི་གསལ་བ་དང་། སྨྲ་བ་དང་། ཤེས་པ་རྣམས་རྡུལ་ལ་སོགས་པ་བྱེད་རྩ་དེའི་གནས་འགྱུར་བ་ལས་འབྱུང་བ་མེའི་ལས་ཀྱི་ཤེས་པ་རྣམ་པར་གཡེང་བའི་ནད་དང་། དབང་པོའི་ནད་རྣམས་སུ་འགྱུར་ལ། འབྱུང་བ་མེའི་བྱེད་པའི་ལས་གསུམ་པོ་གནས་འགྱུར་བ་ལས་མེ་ཡིས་དུས་བྱེད་པ་ནི་མེ་རང་གི་དུས་ལ་སྐྱེས་བུ་དེ་འཆི་བར་བྱེད་དོ། །དོན་དམ་པའི་དུས་ན་རོ་མ་ཡིས་ནི་བྱང་ཆུབ་ཀྱི་སེམས་ཏེ་རྒྱུའི་དུས་ན་ཁུ་བ་དང་ཁྲག །འབྲས་བུའི་དུས་ན་ཟག་པ་མེད་པའི་ཡེ་ཤེས་བསྐྱེད་པའི་ལས་བྱེད། རྐྱང་མས་ནི་རྒྱུ་ཡི་དུས་ན་དྲན་པའི་ཡིད། འབྲས་བུའི་དུས་ན་ཤེས་རབ་ཕྱིན་ཅི་མ་ལོག་པར་བསྐྱེད་པའི་ལས་བྱེད་ལ། ཀུན་རྡར་མས་ནི་རྒྱུ་ཡི་དུས་ན་འཇིག་རྟེན་པའི་བདེ་བ། འབྲས་བུའི་དུས་ན་ཟག་པ་མེད་པའི་བདེ་བ་ཆེན་པོ་དང་། མི་རྟོག་པ་བསྐྱེད་ཅིང་རིག་པའི་འབྲས་བུ་སྨིན་པར་བྱེད་དོ། །ཤེལ་སྦུབ་ཀྱིས་ནི་རྒྱུའི་དུས་ན་གཟུང་འཛིན་དང་། འབྲས་བུའི་དུས་ན་སེམས་གནས་པའི་ལས་བྱེད་དོ། །རྩའི་རང་བཞིན་ནི། རོ་མའི་རང་བཞིན་ནི་ཁྲག་གི་རང་བཞིན་ལས་བློ་དུ་མ་སྡུད་པའི་རང་བཞིན། རྐྱང་མ་ཆུ་སེར་གྱི་རང་བཞིན་ལ་ཤེས་པ་དུ་མ་སྡུད། ཀུན་རྡར་མ་རླུང་གི་རང་བཞིན་ལ་དྲན་པ་དུ་མ་སྡུད། ཤེལ་སྦུག་ཅན་དྲོད་ཀྱི་རང་བཞིན་ལ་རྟོག་པ་དུ་མ་སྡུད་པའོ། །རྩ་དེ་དག་རང་གི་མཚན་ཉིད་ནི་རོ་མའི་མཚན་ཉིད་ཀུན་རྫོབ་ཀྱི་དུས་ན་རྡོ་རྗེས་སུ་འཛིན་ལ། རྐྱང་མའི་སྒྲའི་མཚན་ཉིད། ཀུན་རྡར་མ་གཟུགས་ཀྱི་མཚན་ཉིད། ཤེལ་སྦུག་ཅན་དྲི་ཡི་མཚན་ཉིད་དོ། །དོན་དམ་པའི་འབྲས་བུའི་དུས་ན། རོ་མས་རྒྱང་ཞགས་ཆུའི་སྒྲོན་མའི་མཚན་ཉིད་འཛིན། རྐྱང་མས་ཤེས་རབ་རང་བྱུང་གི་མཚན་ཉིད་འཛིན། ཀུན་རྡར་མས་དབྱིངས་རྣམ་པར་དག་པའི་མཚན་ཉིད་འཛིན། ཤེལ་སྦུབ་ཅན་གྱིས་ཐིག་ལེ་སྟོང་པའི་སྒྲོན་མའི་མཚན་ཉིད་འཛིན་པའོ། །སྒྲ་འཇུག་པའི་རྒྱུ་མཚན་ནི་རོ་མ་ཞེས་པ་ས་ལས་གྲུབ་པས་རོ་དང་འདྲ་བ་སྟེ། དོན་བྱེད་ཉུང་ལ། བྱ་བྱེད་ཉུང་ཞིང་གཅིག་ཏུ་གནས་པས་ན་ལྕི་ཞིང་འགྱུར་ལྡོག་མེད་པས་ན་རོ་དང་མཚུངས་ལ། ཡང་མྱོང་བའི་རོ་དང་འདྲ་བས་ན་ཉམས་སུ་མྱོང་ན་བདེ་བ་བསྐྱེད་པར་བྱེད་པའོ། །མ་ནི་ལུས་ཐོག་མ་ལྟེ་བ་ལ་བརྟེན་ནས་ཆགས་པས་གཞི་མ་སྟེ། ལྟེ་བའི་རྩ་ཡི་གཙོ་བོ་བྱེད་པས་སོ། །རྐྱང་མ་ནི་རྩ་འདི་ལ་ཡལ་ག་དང་གཞུག་མེད་ལ་གང་ལ་ཡང་མ་བརྟེན་པར་ཡོད་ལ་མས་དྲན་པའི་གཞི་མ་བྱེད་པས་སོ། །ཀུན་རྡར་མ་ནི་གཅིག་ཏུ་མི་གནས་ལ་རྒྱུ་བར་བྱེད་པ་སྟེ། འདི་ནས་རླུང་གི་ལས་ཐམས་ཅད་བྱེད་པས། དེ་ལ་ཁུག་པ་ལྔ་ཡོད་པས་དེ་ཀུན་གཡོ་རླུང་གིས་འདར་ཞིང་འཕྲིག་པར་བྱེད་པས་ན་དང་། གལ་ཏེ་རྩ་འདིའི་གནས་འབྱུང་བས་བསྒྱུར་བའི་ཚེ་ན་རྣལ་འབྱོར་པའི་ལུས་དང་ཡན་ལག་ཀུན་འདར་ཞིང་འཕྲིག་པའི་ནང་དུ་འགྱུར་བའི་ཕྱིར་རོ། །ཤེལ་སྦུག་ཅན་ནི་ཕྱི་དཀར་ལ་ནང་དམར། སྦུག་མ་ཡངས་ལ་ཟང་ཐལ་དུ་ཡོད་སེམས་ཅན་གྱི་སྲོག་གནས་པར་བྱེད་པའོ། །དེ་ཡང་རྩ་གསུམ་པོ་དེ་རྣམས་ལ་མར་འདོགས་པ་ནི། དཔེར་ན་འཇིག་རྟེན་གྱི་མས་ཀྱང་ལུས་བསྐྱེད་པས་མ། དེ་ལྟར་རྩ་གསུམ་པོ་དེས་ནི་རོ་མས་ལུས་བསྐྱེད་རྐྱང་མས་ངག །ཀུན་རྡར་མས་སེམས་བསྐྱེད་པས་མ་ཞེས་བྱའོ། །ཤེལ་སྦུག་ཅན་གྱིས་ནི་དེ་དག་འདུས་པས་ལུས་ངག་ཅན་ཞེས་བྱའོ། །དེ་ཡང་ལུས་ལ་བརྟེན་པའི་དུས་ན་མངལ་ན་གནས་པའི་སེམས་ཅན་དེའི་མངལ་གཡས་ན་རོ་མས་བུ་ཕོ་སྨིན་པར་བྱེད། གཡོན་རྐྱང་མས་བུ་མོར་སྨིན་པར་བྱེད། དབུས་ཀྱིས་དེ་གཉིས་ཀའི་སེམས་སྨིན་པར་བྱེད། ཤེལ་སྦུག་ཅན་གྱིས་ལུས་སྨིན་པར་བྱེད་པས་ཅན་ཞེས་བྱའོ། །རྩ་ལ་བརྟེན་པའི་ཤེས་རབ་དང་ཡེ་ཤེས་དེ་བློ་ཡི་ཡུལ་དུ་ཇི་ལྟར་བསྒོམ་པ་ནི། བཙན་ཐབས་སུ་བསྒོམ་པ་དང་རིམ་གྱིས་བསྒོམ་པའོ། །བཙན་ཐབས་སུ་བསྒོམ་པ་ནི། རྩ་དེ་དག་བསྟེམས་པས་རྩ་དེ་ཀུན་གྱི་ནང་ན་རང་བཞིན་རྩ་གནས་ཀྱི་ཡི་གེ་འོད་ཀྱི་གོང་བུ་དང་བཅས་པ་གནས། དེ་བརྟེན་པའི་རང་བཞིན་ཀུན་ཏུ་བཟང་པོ་ཡབ་ཡུམ་གཉིས་གནས་པས། བསྟེམས་པས་རྩ་གནས་ཀྱི་ཡི་གེ་འཁྲོགས་དེས་རླུང་སྦར། རླུང་སྦར་བས་ཀུན་བཟང་ཡབ་ཡུམ་སྦྱོར་བའི་བརྡས་བསྐུལ། དེ་གཉིས་སུ་མེད་པར་སྙོམས་པར་ཞུགས་པ་ལས་གཉིས་མེད་ཀྱི་བདེ་བ་རང་ལུགས་སུ་མི་སྐྱེ་མི་སྲིད་དོ། །རིམ་གྱིས་པ་ནི་འཁོར་ལོ་དང་པོ་རོ་མ་ལ་ཤེས་པ་གཏད་རླུང་སེམས་རྩའི་ནང་ནས་དྲངས་ཏེ་རྩ་ནང་གི་ཡི་གེ་ཨ་དམར་པོ་རེག་བྱ་ཚ་བ་རང་བཞིན་སྐྱེ་མེད་དུ་འདུག་པ་ལ་བློ་གནས་པར་བྱའོ། །དེ་ལ་ཤེས་པ་མ་ཚུད་ན་འཁོར་ལོ་གཉིས་པའི་རྐྱང་མ་ལ་ཤེས་པ་གཏད་རྩ་ནང་གི་ཡི་གེ་ༀ་རེག་བྱ་གྲང་ལ་ཁ་དོག་དཀར་བ་ཟླ་བའི་དཀྱིལ་འཁོར་ལྟ་བུ་ལ་ཤེས་པ་གཏད། བློ་རྩ་ནང་ནས་དྲང་། དེ་ལ་མ་ཚུད་ན་འཁོར་ལོ་གསུམ་པའི་ཤེལ་སྦུབ་ཅན་ལ་ཤེས་པ་གཏད། བློ་རྩ་ནས་དྲངས། ཡི་གེ་ཧ་དམར་པོ་རེག་བྱ་ཚ་གྲང་སྙོམས་པ་ལ་ཤེས་པ་གཏད། དེ་ལ་ཡང་མ་ཚུད་ན་འཁོར་ལོ་བཞི་པའི་ཀུན་རྡར་མ་ལ་ཤེས་པ་གཏད། བློ་རྩ་ནང་དུ་གཟུང་། ཡི་གེ་ཧཱུྃ་མགོ་ཐུར་ལ་བསྟན་པ་ཁ་དོག་ལྗང་གུ་རེག་བྱ་བདེ་བ། རང་བཞིན་སྟོང་པ། ངོ་བོ་གསལ་བ་ལ་བློ་གནས་པར་བྱའོ། །འདི་དག་གི་དུས་ན། དང་པོ་ལ་འོག་རླུང་དྲངས་པ་གནད་ཡིན། གཉིས་པ་བར་རླུང་བསྐྱིལ་བ་གནད་ཡིན། གསུམ་པ་ལ་སྟེང་རླུང་དགུག །བཞི་པའི་དུས་ན་སྟེང་རླུང་མནན་འོག་རླུང་འཐེན། བར་དཀྲུག་པ་གནད་ཡིན་ནོ། །ལུས་ནི་སྐྱིལ་ཀྲུང་དུ་བྱའོ། །དེ་ལྟར་བློ་གནས་པར་བྱས་པས་བློ་ལས་བྱུང་བའི་རྣམ་རྟོག་ཐམས་ཅད་རང་འགགས་ཏེ། དང་པོ་ལུས་སེམས་ལ་བདེ་བ་སྐྱེ། གཉིས་པ་གསལ་བ་ཉམས་སུ་མྱོང་། གསུམ་པ་སྟོང་པ་ཉིད་བློ་དང་བྲལ་བའི་ངང་ལ་གནས། བཞི་པ་རང་བཞིན་རྫོགས་པ་ཆེན་པོའི་བློ་དངོས་གང་དུ་ཡང་འཛིན་པའི་མཐའ་དང་བྲལ་བར་འགྱུར་བ་ཡིན་ནོ། །དེ་ལྟར་བསྒོམ་པས་རོ་མས་ཐབས་ལ་གནས་པས་དེ་ཉིད་བདེ་གསལ་དུ་ཉམས་སུ་མྱོང་། རྐྱང་མས་ཤེས་རབ་ལ་གནས་པས་དེ་ཉིད་སྟོང་གསལ་དུ་ཉམས་སུ་མྱོང་། ཀུན་རྡར་མས་ཐབས་ཤེས་རབ་གཉིས་མེད་དུ་གནས་པས། བདེ་སྟོང་གང་དུ་མི་འཛིན་མཐར་འཛིན་ལས་གྲོལ། ཤེལ་སྦུག་ཅན་གྱིས་ཡིན་པ་ཐབས་ཀྱི་ཞེན་པ་དང་བྲལ། མིན་པ་ཤེས་རབ་ཀྱི་ཞེན་པ་དང་བྲལ། ཡིན་མིན་རང་དག་པའི་ཐབས་ཤེས་རབ་གཉིས་མེད་དུ་ལྟ་བའི་ཞེན་པ་དང་བྲལ་བས། རང་ངོ་ལ་རང་རྫོགས་སུ་གནས་པ་ཉིད་འགྱུར་བ་ནི་རྩ་བསྒོམ་པའི་མན་ངག་གོ། །རྩ་དེ་དག་མཐའ་གྲོལ་ཡོངས་རྫོགས་ཀྱི་ལྟ་བ་དང་སྦྱར་བ་ནི། རོ་མས་འདུ་ཤེས་ཙམ་དུ་མི་གནས་པར་དྲན་པ་དང་བློ་མཐའ་ལས་གྲོལ་བས་སྐྱེ་མེད་དུ་གནས་པས། ལས་དང་བག་ཆགས་ཀྱིས་མི་འགྲིབ་པར་ཡིད་ཆེས་ཏེ། འབྲས་བུ་དགེ་བ་བཅུ་ལ་མི་རེ། དེ་ལ་རེ་བ་མེད་པས་འཁོར་བ་དང་ངན་སོང་སོགས་ཡོད་མ་མྱོང་བར་ངོ་ཤེས། དེ་ཤེས་པས་སྣང་སྲིད་ཐམས་ཅད་རང་གྲོལ་ཡིན་པར་ཐག་ཆོད་པས་མངལ་གྱི་གྲོང་ཁྱེར་དུ་མི་འཇུག་པས་བློ་བདེ་བའོ། །རྐྱང་མ་ལ་ཟླ་མེད་པས་མ་རིག་པ་དང་ཉོན་མོངས་པའི་མཐའ་ལས་གྲོལ་ཏེ་ཐིག་ལེ་ཉག་གཅིག་ཏུ་གནས་པས། གཟུང་འཛིན་གྱི་རྣམ་རྟོག་གིས་མི་འགྲིབ་པར་ངོ་ཤེས། དེ་ཤེས་པས་ཡེ་ཤེས་ལྔ་ལ་མི་རེ། དེ་ལ་རེ་བ་མེད་པས་རྒྱུ་དུག་ལྔ་དུག་གསུམ་མེད་པར་ཡིད་ཆེས། དེ་ལྟར་ཡིད་ཆེས་པས་འཁོར་འདས་ཡེ་སངས་རྒྱས་པར་ཐག་ཆོད། དེ་ཆོད་པས་གཟུང་འཛིན་རང་སར་གྲོལ་བས་བློ་བདེ་བའོ། །ཡང་ཀུན་རྡར་མས་ཀུན་གྲོལ་བས་རྟོགས་མ་རྟོགས་ཀྱི་མཐའ་ལས་གྲོལ་ཏེ་ཐམས་ཅད་རང་གྲོལ་ཆེན་པོའི་དགོངས་པ་ལ་གནས་པས། ལས་དང་རྣམ་སྨིན་གྱིས་མི་འགྲིབ་པར་ངོ་ཤེས། དེ་ཤེས་པས་ཚོགས་དང་བསོད་ནམས་ལ་མི་རེ། དེ་ལ་རེ་བ་མེད་པས་སྐྱེ་བ་སྔ་ཕྱི་མེད་པར་ཡིད་ཆེས། དེ་ལྟར་ཡིད་ཆེས་པས་འཁོར་བ་ཉིད་གློ་བུར་བ་ཡིན་པར་ཐག་ཆོད། དེ་ཆོད་པས་རྒྱུ་རྐྱེན་རང་སར་གྲོལ་བས་བློ་བདེ་བའོ། །ཡང་ཤེལ་སྦུབ་སྟོང་པར་གནས་པས་མཚན་མ་བློ་བཏགས་པའི་ཆོས་ཀྱི་མཐའ་ལས་གྲོལ་ཏེ། བརྗོད་དུ་མེད་པའི་དོན་ལ་གནས་པས་ཚིག་གིས་སངས་མི་རྒྱ་བར་ངོ་ཤེས། དེ་ཤེས་པས་རྒྱུད་ལུང་མན་ངག་ལ་མི་རེ། དེ་ལ་རེ་བ་མེད་པས་རིག་པ་ཉིད་ཤེས་རབ་ཀྱིས་གཏན་ལ་མི་ཕེབས་པར་ཡིད་ཆེས། དེ་ཆེས་པས་དབང་པོའི་མངོན་སུམ་ལ་སྣང་བར་ཐག་ཆོད། དེ་ཆོད་པས་ཡིད་དཔྱོད་དང་སྙམ་བྱེད་ལས་གྲོལ་བས་བློ་བདེ་བའོ། །དེ་ལྟར་ན་རྩ་ཡི་ནང་སྟོང་པས་ཆོས་ཉིད་སྟོང་པ་མཐའ་གང་ལ་ཡང་མི་གནས་པར་རང་གྲོལ་བ་མཚོན་ལ། ཕྱི་གསལ་བར་འདུག་པས་འཁོར་འདས་མ་རྫོགས་པ་མེད་པར་ཡོངས་སུ་རྫོགས་པས་ན། མཐའ་གྲོལ་ཡོངས་རྫོགས་ཆེན་པོའི་ལྟ་བ་ནི་རྩ་ལ་བརྟེན་ནས་ཐོབ་པའོ། །དེ་ལྟར་ན་རྩའི་མིང་དང་གཅིག །གང་ལས་སྐྱེས་པ་དང་གཉིས། རྩའི་གནས་པ་དང་གསུམ། སོ་སོའི་བྱེད་པའི་ལས་དང་བཞི། རང་བཞིན་དང་ལྔ། རྩའི་མཚན་ཉིད་ཇི་ལྟ་བུ་ཡིན་པ་དང་དྲུག །སྒྲ་འཇུག་པའི་རྒྱུ་མཚན་དང་བདུན། རྩ་ལ་བརྟེན་པའི་ཡེ་ཤེས་དེ་བློའི་ཡུལ་དུ་ཇི་ལྟར་བསྒོམ་པ་དང་བརྒྱད། རྩ་དེ་དག་མཐའ་གྲོལ་ཡོངས་རྫོགས་ཀྱི་ལྟ་བ་ཇི་ལྟར་ཡིན་པ་བསྟན་པ་དང་དགུས་རྩའི་ཆོས་ཉིད་རྒྱས་པར་བསྟན་ཏོ། །དེ་ལྟ་བུའི་མཚན་ཉིད་དང་ལྡན་པའི་རྩ་བཞི་ཡི་ནང་ན། ཤེས་རབ་དེ་དག་རྣམས་མི་གསལ་བ་ལས་ལོག་ནས་གསལ་བ་རང་ཤེས་ཆེན་པོར་བཞུགས་པའོ། ༈ །དེ་ཡང་འབྱུང་བའི་དྭངས་མ་འདུས་པ་ལས་ལུས་ཀྱི་མིང་དང་། ཡེ་ཤེས་ཀྱི་དྭངས་མ་ལས་སྒྲོན་མའི་མིང་དུ་བྱུང་ལ། ཤེས་པའི་དྭངས་མ་ལས་ཤེས་རབ་ཀྱི་མིང་དང་། རིག་པའི་དྭངས་མ་ལས་སྐུ་གསུམ་གྱི་མིང་དང་བཞི་འདུས་པའི་ཡེ་གདངས་སུ་ཐོག་མ་བཞི་ལས་བབས་ཀྱིས་གྲུབ་པས། ཐ་མ་ལ་ལུས་ལ་ཡང་གནས་པས། དེའི་ལས་ཀྱི་ཡིན་མིན་དང་། ཡོད་མེད་དང་། ཤེས་མ་ཤེས་དང་། གྲོལ་མ་གྲོལ་དང་། རྟོགས་མ་རྟོགས་དང་། འཁོར་འདས་ལ་སོགས་པ་ཐམས་ཅད་འབྱེད་པའི་ངོ་བོར་ཤེས་རབ་ཏུ་ཡོད་པ་ནི། ཡེ་ནས་གཞི་ལ་གྲུབ་ཅིང་གློ་བུར་མ་ཡིན། ད་ལྟ་ལུས་ཀྱི་ཆ་རྩའི་ནང་ལས་རྒྱུ་ཞིང་གནས་པའོ། །དེ་དག་རྣམས་ཀྱང་རླུང་གི་ལས་བྱེད་པས། བར་སྐབས་སུ་རླུང་གི་ཤེས་རབ་དེ་ཉིད་རང་བཟུང་བས་ཤེས་རབ་ནང་གསལ་དུ་གནས་པས་ཁ་ཕྱིར་མ་བལྟས་པ་ལས། ཤེས་རབ་ཀྱི་རྩལ་ཤེས་པ་ལ་དྲན་པའི་མཐའ་རང་འགག་པས་དྲན་མེད་དུ་འདས་པས། རྣམ་པར་རྟོག་པའི་ཡུལ་བདག་འཛིན་རྣམས་ཀྱི་དབང་གིས་རྨུགས་པར་ཡང་གནས་ཏེ། འདི་ཡི་དུས་ན་འབྱུང་བའི་རླུང་གིས་ཤེས་རབ་ཀྱི་རྩལ་རང་རིག་པ་དང་། རང་རྟོགས་པ་དང་། རང་གྲོལ་བ་དང་། རང་འདས་པ་ལ་སོགས་པ་རྣམས་ལུས་ཀྱི་འབྱུང་བ་བཞིའི་རྒྱས་ཤེས་རབ་འཐུམ་པས། ཕྱིར་གསལ་བའི་ཆ་སྣང་བའི་དོན་དམ་བཅད་པས་ཤེས་པ་དང་། རིག་པ་དང་རྟོག་པ་མེད་དེ། ནང་དུ་རྨུགས་པར་འགྱུར་བ་ནི། རླུང་གི་བྱེད་པས་ན། དེ་ལྟར་རླུང་ནི་ལས་མྱུར་བ་དང་ལྡོག་སྐྱེན་པ་དང་། བསླབ་སླ་བ་དང་། འབྲས་བུ་འབྱིན་པར་བྱེད་པའོ། །དེའི་ཕྱིར་ན་རྟེན་གྱི་གང་ཟག་གཅིག་ལ་མི་རྟོག་པ་གཅིག་མི་སྐྱེ་ན་མི་སྐྱེ། སྐྱེ་ཕན་ཆད་རླུང་མ་བསྟེན་པར་སྐྱེ་མི་སྲིད་དོ། །དེས་ན་རླུང་འདི་ཤིན་ཏུ་ཡོན་ཏན་ཆེའོ། །དེས་ན་འདིར་ནི་རླུང་གི་མཚན་ཉིད་དམ་རང་བཞིན་རྒྱས་པར་བཤད་ན། རླུང་གིས་ནི་རླུང་གི་ངོ་བོ་དང་། དབྱེ་བ་དང་། ལས་དང་། དེའི་བློ་ཡི་ཡུལ་དུ་ཇི་ལྟར་བཞག་པ་དང་། རླུང་དེ་རྣམས་མཐའ་གྲོལ་ཡོངས་རྫོགས་ཀྱི་ལྟ་བ་ལ་བཟླ་བའོ། །རླུང་གི་ངོ་བོ་ནི། རླུང་སྤྱི་ཡི་ཁྱད་པར་གྱི་ངོ་བོ་དང་། སོ་སོ་རང་རང་གི་ངོ་བོ། རླུང་སྤྱིའི་ངོ་བོ་ནི་བསྐྱོད་པ་ཉིད་རླུང་སྤྱིའི་ངོ་བོར་བྱུང་ལ། དེ་ཡང་བསྐྱོད་པ་མེད་ན་ཉམས་གོང་དུ་མི་འཕེལ་བས། ཡང་པ་ཉིད་རླུང་གི་མཚན་ཉིད་དམ་ངོ་བོར་བྱུང་སྟེ། དེ་ཡང་པ་ཉིད་མེད་ན་བག་ཆགས་ཀྱི་ཉིང་མཚམས་སྦྱོར་བ་ཉིད་དང་དབྱེར་མི་ཕྱེད། གཡོ་བ་རླུང་གི་ངོ་བོ། དེ་མེད་ན་རླུང་གི་རྩལ་མི་རྫོགས། དེ་ལྟར་སྤྱི་ཡི་ངོ་བོ་གསུམ་དུ་གཏན་ལ་ཕབ་པའོ། །རླུང་གི་དབྱེ་བ་ནི་བསྡུ་ན་གཉིས་ཏེ། རང་གི་རྣམ་པར་རྟོག་པའི་རླུང་དང་། མི་རྟོག་པའི་ཡེ་ཤེས་ཆེན་པོའི་རླུང་དང་གཉིས་སོ། །རྣམ་པར་རྟོག་པའི་རླུང་ནི་བརྒྱད་དོ། །རྣམ་པར་གཡེང་བ་དང་། རྣམ་པར་འཕྲོ་བ་དང་། སྦུད་པ་དང་འཛིན་པ་དང་། ཡུལ་བདག་དང་བཅས་པ་ལ་རྣམ་པར་རྟོག་པ་དང་། མེད་པ་ལ་རྣམ་པར་རྟོག་པ་དང་། སྙམ་བྱེད་དང་། ཡིད་དཔྱོད་རྣམས་ཏེ་བརྒྱད་དོ། །དེ་ལས་སྤྲོས་པས་རྣམ་པར་རྟོག་པ་བརྒྱ་སྟོང་དུ་མ་བརྗོད་ཀྱིས་མི་ལང་བར་སྣང་བའོ། །དོན་ཡེ་ཤེས་རང་གི་ངོ་བོ་ནི་རྣམ་པར་རྟོག་པའི་རླུང་བརྒྱད་ཀྱི་གཡོ་བ་དང་བྲལ་བ་ཡིན། རླུང་བྱེ་བྲག་སོ་སོ་ཡི་ངོ་བོ་ནི། སྲོག་འཛིན་པའི་རླུང་གི་ངོ་བོ་རྣམ་པ་གཉིས་ཏེ། ལུས་ཀྱི་སྲོག་འཛིན་པར་བྱེད་པ་ནི་ལུས་ཅན་ཐམས་ཅད་ལ་ཇི་སྲིད་གནས་ཤིང་འཚོ་བར་བྱེད་པའི་རླུང་སྟེ། ལུས་ཀྱི་སྲོག་དུ་བྱེད་པས་ན། དེ་ཉིད་འཁྲུགས་ཤིང་། བསྒྲལ་བ་དང་། སྲོག་འཆད་པས་སྲོག་གི་དབང་པོ་འགག་པས་དབང་པོ་གཞན་དག་ཀྱང་འགག་པ་ཡིན་ཏེ། འདི་ནི་ལུས་ཅན་ཀུན་གྱི་ཕོ་རྣམས་ལ་རྒལ་འདབས་གཡས་ནས་དར་ལྕེ་རླུང་གིས་བསྐྱོད་པའི་ངོ་བོར་ཡོད། མོ་རྣམས་ལ་གཡོན་ན་ཡོད། དེ་ཉིད་བརྟན་ཞིང་ཚེ་འཕེལ་བར་འདོད་པའི་རྣལ་འབྱོར་པས་རང་གི་ལུས་ལ་མེ་རྩ་དང་གཏར་ཀའི་རྗེས་མེད་ན། ཙནྡ་སྨུག་པོ་དང་། གླ་རྩི་དང་། ག་བུར་དང་། ལི་ཁྲི་བཙིར་བའི་ཁུ་བ་ཆུ་དང་སྦྱར་བས་སྐྱེས་པ་རྣམས་ལ་རྒལ་འདབས་གཡས་སུ་བྱུགས་ཅིང་ཉི་མ་ལ་བསྲེག །བུད་མེད་ཀྱི་གཡོན་དུའོ། །དེ་ནས་འབྲུ་མར་བསྡུས་པའི་ཁུ་བས་བྱུགས་ཅིང་མཉེ་བར་བྱ། ཟླ་བ་ཉ་གང་བའི་ཉིན་པར་མ་ཆགས་པར་བྱས་པས། ཚེ་འཕེལ་བར་ངེས་སོ། །ཡེ་ཤེས་འཛིན་པའི་རླུང་གི་ངོ་བོ་ནི། སྒྲོན་མ་ཡིན། དེ་ཡང་དེ་ཉིད་ཨར་ལ་གཏད་ཅིང་ཉམས་ལེན་དང་མ་བྲལ་ན། ཡེ་ཤེས་དག་པའི་སྣང་བ་འདི་ཉིད་ལ་རྫོགས་པར་འཆར་རོ། །དེའི་ངེས་ཚིག་ནི་སྲོག་ཅེས་དོན་ཉིད་དུ་གནས་ལ། དེ་འཛིན་པར་བྱེད་པ་རླུང་ངོ་། །སྙིང་རྗེ་མེད་པ་བསྐལ་པ་ལས་ཀྱི་ངོ་བོ་ནི། འགྱུ་བྱེད་མེད་པའི་རང་གནས་ཆེན་པོའོ། །ངེས་ཚིག་ནི་དེས་རྒྱུས་ཤིང་འགུལ་བས་སྲོག་འཆད་པ་ཡིན་པས་ན། སྲོག་གཅོད་པའི་ཕྱིར་སྙིང་རྗེ་མེད་པའོ། །བསྐལ་པ་ནི་ཐང་གཅིག་ཏུ་བརྟན་པར་གནས་པའོ། །དེའི་ལས་ཀྱིས་དོན་དམ་པའི་ལས་དང་ཀུན་རྫོབ་གཉིས་ཀྱི་ལས་བྱེད་ལ། ཀུན་ཏུ་ཁྱབ་བྱེད་ཀྱི་ངོ་བོ་ནི་འདེགས་ཤིང་སྤེལ་བར་བྱེད་པའོ། །ངེས་ཚིག་ཀུན་ཏུ་ཁྱབ་བྱེད་ཅེས་པས་ལུས་མགོ་མཇུག་ཀུན་ཏུ་ཁྱབ་པའོ། །མེ་དང་མཉམ་དུ་གནས་པའི་ངོ་བོ་ནི་དྲོད་བསྐྱེད་པར་བྱེད་པའོ། །ངེས་ཚིག་ནི་མེ་ནི་ཡེ་ཤེས་ལ་བྱ། མཉམ་པ་ནི་དེ་ཉིད་དང་ལྷན་ཅིག་ཏུ་གནས་པ་ལ་བྱའོ། །དྭངས་སྙིགས་འབྱེད་པའི་རླུང་གི་ངོ་བོ་ནི། སྤྲིས་མ་སྟེ་གསེར་སྦྱང་པའི་སྦྲིས་ཀྱི་རྣམ་པ་ལྟ་བུ་ཡིན་ནོ། །ངེས་ཚིག་ནི་དྭངས་སྙིགས་འབྱེད་པར་ཞེས་པ་ནི། གསུམ་ལས། ཡེ་ཤེས་ཀྱི་དྭངས་སྙིགས་དང་། འབྱུང་བའི་དང་། ལས་དང་ལས་ཀྱི་མཐའི་དྭངས་སྙིགས་འབྱེད་པར་བྱེད་པའོ། །ཡེ་ཤེས་ཀྱི་དྭངས་མ་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་ཆེན་པོ་དང་། དེའི་ཆ་ཤས་ཀྱི་སྐུ་རྣམས་དང་། དེ་ཉིད་ཐིག་ལེ་ཡོངས་སུ་སྨིན་པའི་སྐུ་རྣམས་ཡིན་ལ། སྙིགས་མ་ནི། སྒྲོན་མ་བཞི་དང་དབྱིངས་ཀྱི་རང་བཞིན་འོད་ལྔའི་རྣམ་པ་རྣམས་ཡིན་ནོ། །དེ་ཡང་དྭངས་མ་འཁོར་འདས་གཉིས་སུ་མེད་པར་བསྲེ་བའི་ལམ་ཡང་དག་པ་ཡིན་ལ། རང་གནས་རྫོགས་པའི་གཞི་ཡང་ཡིན་ལ། མ་སྨིན་རྫོགས་པའི་འབྲས་བུ་ཡང་ཡིན་ནོ། །དྭངས་མ་ཆེན་པོ་ནི་རིག་པ་ཚད་ལ་ཕེབས་པའི་སྣང་བ་ཉིད་དེ། སྐུ་གསུམ་རང་རྒྱུད་དུ་འཛིན་པའི་ཞེན་པ་ལས་འདས་ནས། མདོར་ན་ལམ་གྱི་སྣང་བ་རྫོགས་པ་ཉིད་དོ། །སྙིགས་མ་ནི་རང་བཞིན་གྱི་སྙིགས་མ་སྒྲོན་མ་བཞི། རང་བཞིན་རྣམ་པར་དག་པའི་རླུང་གིས་ངོ་བོ་ཉིད་དུ་བྱུང་བ་སྟེ། སྣང་བ་དང་། སྟོང་པ་དང་གསལ་བ་དང་། ཁྱབ་པར་བྱེད་པའི་ངོ་བོ་ཉིད་ཆེན་པོར་རང་འབྱུང་བ་ཡིན་ལ། ངོ་བོ་ཉིད་རྣམ་པར་དག་པ་ནི་མ་སྨིན་པའི་ལམ་གྱི་སྣང་བའི་འཕེལ་རྣམས་ཡིན་ཏེ། རྣམ་པར་དག་པའི་རླུང་གི་སྣང་བ་འོད་དང་འོད་ཀྱི་འཇའ་དང་། འོད་དང་འོད་ཀྱི་དུམ་བུ། འོད་དང་འོད་ཀྱི་གྲུ་ཆད་ལ་སོགས་པ་ཡིན། སྣང་བ་དེ་དག་ཀྱང་རླུང་གི་སྣང་བ་ལས་བྱུང་བ་ཡིན་གྱི། བྱས་པའམ། བཅོས་པ་ལྟ་བུ་ནི་མ་ཡིན་ནོ། །དེ་ཡང་དྭངས་སྙིགས་འབྱེད་པའི་རླུང་ཟེར་ཡང་དོན་རླུང་ལྔ་རྣམ་པར་དག་པའི་ངོ་བོ་རྣམས་ཀྱི་སྣང་བ་སོ་སོར་མ་ཕྱེ་བར་རྣམ་པར་དག་པ་ཉིད་དུ་སྣང་བ་ཡིན་ལ། དེ་ཡང་མཐིང་ཀ་འགྱུར་བ་མེད་པའི་སྙིང་རྗེ་མེད་པའི་རླུང་གི་ངོ་བོའི་སྣང་བར་ཤར་བ་ཡིན་ནོ། །དཀར་པོ་དྲི་མ་མེད་པ་རྣམ་པར་དག་པ་སྲོག་འཛིན་པའི། སེར་པོ་ཡོན་ཏན་རྫོགས་པ་ཀུན་ཏུ་ཁྱབ་བྱེད་ཀྱི། དམར་པོ་དབང་བཞི་རྫོགས་པ་མེད་པ་མཉམ་དུ་གནས་པའི་ལྗང་གུ་བྱ་རྩོལ་དང་བྲལ་བ་དྭངས་སྙིགས་འབྱེད་པའི་རླུང་གི་ངོ་བོ་ཉིད་ཀྱི་སྣང་བ་རྣམ་པར་དག་པའོ། །འབྱུང་བ་དྭངས་སྙིགས་ན། ཕྱི་ཡི་འབྱུང་བ་རྣམས་ཀྱི་དྭངས་སྙིགས་ནི་རྣམ་པར་སྲུབས་བྱེད་ཀྱི་རླུང་གིས་ཕྱེ་ནས། སྙིགས་མ་ས་རྡོ་དང་རི་བྲག །ལུ་མ་དང་ལྡེང་ཀ་དང་། མཚོ་དང་རྒྱ་མཚོ། འབར་བ་དང་། མཆེད་པ་དང་། རབ་ཏུ་མཆེད་པ་དང་། དུས་མཐའི་མེ་དང་། རྣམ་པར་འཕྱོས་པ་དང་། འཐོར་བ་དང་། འབྱེད་པ་དང་། བསྐྱོད་པ་ལ་སོགས་པའི་རྣམ་པར་ཕྱེ་ལ། དྭངས་མས་ནི་བཅུད་རྣམས་སུ་སྨིན་པར་བྱས་ཏེ། ཤ་དང་ཁྲག་དང་དྲོད་དང་དབུགས་རྣམས་སུ་ཕྱེ་བའོ། །ནང་གི་འབྱུང་བའི་སྙིགས་མ་ཤ་ལ་སོགས་པ་ཡིན་ལ། དྭངས་མ་ནི་དོན་དམ་སྟེ། ས་སྲ་བ་མེད་པའི་བརྟན་པས་ཀུན་གཞི་བསྐྱེད་པའི་རྩལ་བྱས་པ་དང་། ཆུ་གཤེར་བ་མེད་པའི་སྡུད་པས་ཀུན་གཞིའི་འཚོགས་པ་བསྡུད་པ་དང་། མེ་ཚ་བ་མེད་པའི་སྲེག་པས་ཀུན་གཞི་ཡུལ་སོ་སོར་ཤར་བ་དང་། རླུང་ཡང་བ་མེད་པའི་བསྐྱོད་པས་ཀུན་གཞིའི་སྐྱོན་དང་ཡོན་ཏན་གྱི་རྩལ་འབྱོངས་པའོ། །དྭངས་མ་ནི། ཕོ་དང་མོ་དང་། མ་ནིང་གསུམ། དེའི་ལས་ནི་ཕོའི་འབྱུང་བས་སྲེག་སྨིན་པའི་ལས་དང་འབྱེད་པ་རླུང་གཉིས་བྱེད། མོས་བསྐྱེད་པ་སའི་དང་། བསྡུད་པ་ཆུའི་ལས་བྱེད། མ་ནིང་གི་སྟོང་པ་ནམ་མཁའི་ལས་བྱེད་པའོ། གསང་བ་བླ་ན་མེད་པ་ཡོངས་སུ་རྫོགས་པའི་འབྱུང་བའི་སྙིགས་མ་ནི། དྲོད་དང་བཀྲག་དང་། མདངས་དང་དབུགས་ཡིན། དྭངས་མ་ནི་རྩ་ལས་འགྱུ་བས། ཕོ་མོ་མ་ནིང་བྱང་ཆུབ་སེམས་དཔའ་བཞིའོ། །དེ་ཡང་འབྱུང་བ་ཕོའི་རླུང་དྲག་ཅིང་ཆེ་བ་དང་། སྦོམ་པ་མཁྲིས་པ་མེའི་ཁམས་ལ་དབང་། འབྱུང་བ་མོ་ཕྲ་བ་དང་འཕར་སྐྱེན་པ་དང་། རྒྱུན་ཞེན་པ་ནི་བད་ཀན་ཆུའི་ལས་ལ་དབང་། མ་ནིང་སྟོངས་པ་དང་ཞར་བ་དང་འབྱར་བ་ནི་རླུང་སྟེ་སྟོང་པ་རླུང་གི་ཁམས་ལ་དབང་ངོ་། །དེ་ཡང་བྱང་ཆུབ་སེམས་དཔའ་དལ་འཇམ་རྒྱུད་རིང་ལ་སྐབས་སུ་འཁྲུགས་པ་འདུས་པ་སའི་ཁམས་ལ་དབང་བའོ། །དེ་ལྟར་རྩ་ནས་འགྱུ་བའི་རླུང་གིས་རྣལ་འབྱོར་བའི་ཕུང་པོ་ལ་ནད་ཀྱི་བྱེ་བྲག་བརྟགས་པའོ། །ལས་དང་ལས་ཀྱི་མཐའི་དྭངས་སྙིགས་ནི། ལས་ཀྱི་སྙིགས་མ་ནི་མི་དགེ་བ་བཅུའི་རྒྱུ་རྐྱེན་དང་བྱེད་པའི་ལས་སོ་སོ་ཡིན་ནོ། །དྭངས་མ་ནི་དགེ་བ་བཅུའི་ལས་དང་རྒྱུ་རྐྱེན་སོ་སོའི་ལས་བྱེད་པ་ཉིད་དོ། །ལས་ཀྱི་མཐའི་སྙིགས་མ་ནི། སྔོན་གྱི་ལས་ཀྱི་རྣམ་པར་སྨིན་པས་ཏེ། དབང་པོ་མ་ཚང་བ་དང་། དབུལ་བ་དང་། ལུས་ལ་འབྱུང་བའི་ནད་དམ་པོས་ཟིན་པ་དང་། གཟུགས་ངན་ཞིང་ཡན་ལག་མ་ཚང་བ་དང་། ཀླ་ཀློའི་ཡུལ་དུ་སྐྱེས་པ་དང་། ངན་སོང་གསུམ་དུ་སྐྱེས་པ་རྣམས་སོ། །དྭངས་མ་ནི་གཟུགས་བཟང་བ་ལ་སོགས་པ་རྣམས་སོ། །ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་འབྲས་བུ་དང་། ཡང་དག་པར་རྫོགས་པའི་སངས་རྒྱས་ཐོབ་པ་རྣམས་ཡིན་ནོ། །དེ་ལྟར་འབྱེད་པ་ནི་དྭངས་སྙིགས་འབྱེད་པའི་ལས་ཀྱི་འགྱུ་བ་དག་ལས་བྱུང་བའོ། །དེ་ལྟར་ན་རླུང་སྤྱི་དང་། བྱེ་བྲག་དང་། དྭངས་སྙིགས་དང་གསུམ་གྱི་ངོ་བོ་བསྟན། དེ་ཡང་བསྡུ་ན་རླུང་གི་ངོ་བོ་སྟོང་པ་དང་། རང་བཞིན་སྣང་བ། ཐུགས་རྗེ་འགྱུ་བའོ། །ངོ་བོ་སྟོང་པ་ཡིན་པས་འཁོར་བའི་རྣམ་རྟོག་གང་དུའང་མེད། རླུང་ཟད་པའི་དུས་ན་འཁོར་འདས་ཀྱི་སྣང་བ་གཉིས་ཀ་འཛད་པ་ཡིན་ནོ། །ཐུགས་རྗེ་འགྱུ་བ་ཡིན་པས་འདི་ཉིད་ལ་བརྟེན་ནས་ཉམས་སུ་བླངས་པས་རང་གཞན་གྱི་དོན་གཉིས་ལ་ཐོགས་པ་མེད་པར་སྤྱོད་པའོ། །དེས་ནི་ངོ་བོ་བསྟན་པའོ། །དབྱེ་བ་དང་བྱེད་པའི་ལས་དང་ཚད་ནི་རླུང་གི་སྡོམ་བྱང་གི་ཡི་གེ་དང་སྦྱར་རོ། །རླུང་དེ་དག་རང་གི་བློ་ཡི་ཡུལ་དུ་ཇི་ལྟར་བཞག་པ་ནི། བཞག་ལུགས་གསུམ་སྟེ། ཕྱི་ཡུལ་ལ་བཞག་པ་དང་། ནང་ལུས་ལ་བཞག་པ་དང་། གསང་བ་སེམས་ལ་རླུང་བཞག་པའོ། །ཕྱི་ཡུལ་ལ་བཞག་པ་ལ་གསུམ། རང་བཞིན་གྱི་ཡུལ་ལ་བཞག་པ་དང་། དམིགས་རྟེན་གྱི་ཡུལ་ལ་བཞག་པ་དང་། འདོད་ཡོན་སོ་སོའི་ཡུལ་ལ་བཞག་པའོ། །དེ་ལྟར་བཞག་པའི་མན་ངག་རྣམས་དང་སྦྱར་རོ། །དེ་དག་མཐའ་གྲོལ་ཡོངས་རྫོགས་ཆེན་པོའི་ལྟ་བ་ལས་ལ་བཟླ་བ་ནི། རླུང་གི་གཟུང་ཡུལ་རྫས་སུ་མེད་ལ་ཞེན་ཡུལ་རྟགས་པ་མ་ཡིན་པས་གཟུང་འཛིན་གྱི་མཐའ་ལས་གྲོལ་བས། ཡུལ་གང་ཡང་རེ་མེད། དེ་ལྟར་མེད་པས་འདི་ལྟར་སྣང་བ་ཐམས་ཅད་རླུང་ཡིན་པར་ངོ་ཤེས། དེ་ཤེས་པས་རླུང་གི་སྣང་བ་ནམ་ཟད་པ་ན། འཁོར་འདས་གཉིས་ཀ་ཟད་པར་ཡིད་ཆེས། དེ་ལྟར་ཡིད་ཆེས་པས། འབྲས་བུ་རླུང་རང་ཡིན་པས་ཐག་ཆོད་དེ། དེ་ཆོད་པས་རླུང་རིག་གཉིས་སུ་མེད་པས་བློ་བདེ་བའོ། །དེ་ལྟར་ན་རླུང་དེ་དག་ལ་བརྟེན་པས་རྟོགས་པ་ཤར་བ་ནི་ཤེས་རབ་ཀྱི་རྩལ་རླུང་གི་བསྐྱོད་པའི་ཚེ། ཚིག་ལ་དཔྱོད་པའི་ཤེས་རབ་སྐྱེས་ཏེ། རྣལ་འབྱོར་པ་བདག་ཉིད་ཀྱིས་སྔོན་མ་མཐོང་བའི་བསྟན་ཆོས་རྣམས་ཀྱང་། དེའི་མིང་ཡིད་ལ་དྲན་པ་ཙམ་གྱིས་ཤེས་ཤིང་ཚིག་དང་དོན་གསལ་བར་འཆད་ཤེས་པ་དང་། དེ་བཞིན་དུ་ཤེས་རབ་དེ་གསལ་བ་དང་མི་གསལ་བའི་རྩལ་རྣམས་ནི། རླུང་གིས་གཡོ་བ་དང་འགུལ་བ་སྟེ་གནས་པ་དང་འགྱུ་བ་དང་རང་བཞིན་ཉིད་ལས་བྱུང་བས་ན། རླུང་ནི་ལས་མྱུར་ལ་འབྲས་བུ་མྱུར་དུ་འབྱིན་པར་བྱེད་པའོ། །དེ་ལྟར་རླུང་དང་ཤེས་རབ་ལུས་ཀྱི་དཀྱིལ་ཙིཏྟ་རིན་པོ་ཆེ་ལ་རྩ་བཞི ས་འཁོར་བའི་ནང་ན་གནས་པའོ། །དེས་ན་གནས་པ་བསྟན་ནས། ༈ །ད་ནི་དྲིས་ལན་བདུན་པ་དེ་ཉིད་ཀྱི་ཚད་བསྟན་པ་ལ་ནང་གསེས་ཀྱི་དོན་ལྔས་བསྟན་པའི་དང་པོ་གཞི་གནས་རང་བྱུང་གི་ཤེས་རབ་ཀྱི་ཚད་བསྟན་པ་ནི། གཞི་གནས་ཤེས་རབ་རང་བྱུང་ཚད་ཅེས་པ་ལ་སོགས་པས་བསྟན་ཏེ། གཞི་ནི་ལུས་ལ་འབྱེད་པར་བྱེད་པའི་ཤེས་རབ་དང་། སྡུད་པ་དང་། གནས་པ་དང་། བསྐྱོད་པ་དང་། སྒྲོལ་བར་བྱེད་པ་གནས་ཏེ་དེ་ལས་ཀྱང་དང་པོ་འབྱེད་པར་བྱེད་པའི་ཤེས་རབ་རང་བྱུང་གི་ཚད། སྐྱེས་བུ་གཅིག་གི་རྒྱུད་ལ་སྐྱེད་པ་ནི་ཡིད་དཔྱོད་འཛིན་པའི་ལྟ་བའི་ཚིག་རྣམས། འབྱེད་པ་ལ་མཁས་པ་ཡིན་ཅིང་། ཚིག་ཐམས་ཅད་ལ་རྟོག་དཔྱོད་ཚུད་ཅིང་ཚིག་འབྱེད་པ་ལ་མཁས་པ་སྟེ། འདི་ནི་ཡིད་དཔྱོད་ཀྱི་ཤེས་རབ་ཅེས་བྱའོ། །སྡུད་པའི་ཤེས་རབ་སྐྱེས་པ་ནི། ཚིག་གི་དོན་རྣམས་གཅིག་ཏུ་བསྡུས་པ་ལ་མཁས་པར་འགྱུར་ཏེ། ཚིག་ཉུང་བ་ལ་དད་ཅིང་དེ་ཉིད་རྟོག་ཤེས་པ་སྟེ། འདི་ནི་བློ་དང་འདྲེས་པའི་ཤེས་རབ་བོ། །གནས་པའི་ཤེས་རབ་སྐྱེས་པ་ནི། ཚིག་གང་བྱུང་ཡང་དེ་རང་གི་རྒྱུད་ལ་སྦྱོར་ཤེས་ཅིང་དེ་གནས་པར་ཤེས་པའོ། །འདི་ནི་འཁོར་བའི་ཤེས་རབ་བོ། །བསྐྱོད་པའི་ཤེས་རབ་སྐྱེས་པ་ནི། སྔོན་མ་ཐོས་པའི་བསྟན་བཅོས་དང་ཚིག་རྣམས་ལ་རྟོགས་ཤིང་དེའི་དོན་འཆད་ཤེས་པ་དང་། ཆོས་སྤྱིའི་རྣམ་པ་ལ་མཁས་པ་ཡིན་ཏེ། འདི་ནི་སེམས་ཀྱི་ཤེས་རབ་སྟེ་འཁྲུལ་པའི་དག་པ་ཕྱོགས་གཅིག་པའི་ཤེས་རབ་བོ། །དེ་ལྟར་བཞི་ཡང་རྒྱུད་མ་དག་པའི་ཤེས་རབ་བོ། །ཡང་དག་པའི་ཤེས་རབ་ནི། སྒྲོལ་བར་བྱེད་པའི་ཤེས་རབ་ཕྱིན་ཅི་མ་ལོག་པར་རྒྱུད་ལ་སྐྱེས་པའི་གང་ཟག་གཅིག་ལ། ཆོས་ནི་སྤྱིར་གྲུབ་པའི་མཐའ་འཛིན་པའི་ཚིག་སྤྲོས་པ་ཆོད་པ་ཡིན་པས་ཚིག་ལ་མི་བརྟག །རབ་ནི་མཚན་ཉིད་རང་བཞིན་མེད་པར་ཡིད་ཆེས་ཀུན། དུས་གཅིག་ལ་མཉམ་པའི་ཉམས་སུ་མྱོང་བ་རང་གི་རྒྱུད་ལ་སྐྱེས་པས། ཚིག་གང་མཐོང་ཡང་ཡིད་ཆེས་བསྐྱེད་དེ། མཉམ་པ་ཉིད་དུ་རྟོགས་པ་ཡིན་པས་འདི་ནི་ཤེས་པའི་ཤེས་རབ་ཅེས་བྱ་བའི་བརྟན་པའི་གདེང་རྙེད་པ་ཡིན་ན། དེ་ཉིད་ལ་ཕྱི་འགྱུ་བ་དང་ལྡོག་པ་མ་ཡིན་པར། དུས་རྟག་ཏུ་རང་གི་རྒྱུད་ལ་གནས་པས་ན། སྐྱེས་བུ་འདི་ནི་ལུས་ཀྱི་གཞི་ལ་གནས་པའི་ཤེས་རབ་ལྔ་ལས་ཁྱད་པར་དུ་སྒྲོལ་བར་བྱེད་པའི་ཤེས་རབ་ཀྱིས་ཆོས་ཉིད་ཕྱོགས་གཅིག་ཟིན་པ་ཡིན་ནོ། །དེ་ལྟར་ཟིན་པའི་རྟགས་སུ་སྐྱེས་བུ་འདི་ཡི་ལུས་ཀྱང་ཤིང་བལ་གྱི་འདབ་མ་ལྟར་ཡངས་པ་དང་། ཤེས་པ་རང་བཞིན་གྱི་ཤེས་པ་དང་། འཁྲུལ་པ་ལས་ལོག་པའི་ཤེས་པ། རབ་ཏུ་གསལ་བའོ། །དེ་དེས་ནི་གཞི་གནས་ཀྱི་ཤེས་རབ་ལྔའི་ཚད་བསྟན་ནས། ༈ །ད་ནི་སྣང་བ་ཅེར་ཟིན་གྱི་ཤེས་རབ་ཀྱི་ཚད་བསྟན་པ་ནི། སྣང་བ་འཁྲུལ་སྣང་འདི་གཅེར་གྱིས་མཐོང་བ་ཙམ་གྱིས་དེ་ལ་ཤེས་པ་འདོན་པ་སྟེ་འདི་ནི་གཉེན་པོ་རྒྱུད་སྦྱོར་གྱི་ཤེས་རབ་ཞེས་པ་ཡིན་ཏེ། དེའི་ཚད་ནི། སྣང་བ་གང་ཤར་བ་དེ་ཆོས་ཉིད་ཀྱི་རྐྱེན་དུ་གྱུར་རྟོག་པའི་གཉེན་པོར་སོང་བས། གང་སྣང་དེ་ཇི་ལྟར་གྱུར་ཀྱང་དེ་ཉིད་ལ། ཅོག་གི་འཇོག་ཤེས། དེ་ལ་བཞག་པས་དགོངས་པའི་གཞིའི་ཉམས་སུ་མྱོང་བ་སྐྱེ་བའི་རྟགས་ནི། རང་གི་ལུས་ཀྱི་དཀྱིལ་ཙིཏྟ་ན་གནས་པའི་ཁ་དོག་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། མཐིང་ག་ལྔའི་འོད་ཐིག་ལེ་སྟོང་པའི་སྒྲོན་མ་ཉིད། སྐྱེས་བུའི་མཐེབ་མཛུབ་ཀྱི་རྩོལ་བ་མེད་པར་རང་གི་མིག་ནས་ཕྱིར་ཤར་ནས་ནམ་མཁའ་ལ་རང་སྣང་བ་དེ་ལ་འདི་ལ་ཤེས་པ་རང་ས་ཟིན་པ་ནི་གཉེན་པོའི་ཤེས་རབ་སྟེ། ལམ་སྣ་ཟིན་པའི་ཤེས་རབ་སྐྱེས་པ་ཡིན་པས། དེ་སྐྱེས་པའི་རྟགས་སུ། སྐལ་ལྡན་དེའི་ལུས་ཀྱང་རྐང་པ་ཁྲུ་གང་གིས་མཚན་མོ་འགྲོ་བ་ལ་ལྟས་ན་ས་ལ་རེག་པ་མེད་པར། བར་སྣང་ལ་འགྲོ་བ་ངེས་སོ། །རྣལ་འབྱོར་པ་འདི་ཁོ་རང་གི་ནང་རྟགས་འཁྲུལ་པ། བེམ་པོའི་རྣམ་པ་འདི་དག་གིས་ཤེས་པ་གང་ལ་གཏད་པར། དང་པོ་གང་ལ་གཏད་པའི་བེམ་པོ་དེ་རྣམས་ས་རྡོ་རི་བྲག་གང་ཡིན་ཀྱང་ཉལ་ཉལ་དངོས་མེད་དུ་ཞུ་བར་ནུས་པ་ནི། གཉེན་པོའི་ཤེས་རབ་ཀྱི་རང་རྩལ་འཕྲུལ་པ་ལ་འབྱོངས་པའི་ཚད་ཡིན་ནོ། །དེས་ནི་སྣང་བ་ཅིར་ཟིན་ལམ་ལས་ལྡོག་པ་མེད་པའི་ཤེས་རབ་ཀྱི་ཚད་བསྟན་ནས། ད་ནི་དྲན་པ་འགག་པ་མེད་པའི་ཤེས་རབ་མི་བརྗེད་པའི་གཟུངས་སྐྱེས་པའི་ཚད་བསྟན་པ་ནི། དྲན་པ་ནི་གློ་བུར་གྱི་ཤེས་པ་ནམ་མཁའ་ལ་སྤྲིན་བྱུང་བ་དང་འདྲ་སྟེ། སྤྲིན་གྱིས་ནམ་མཁའ་ལ་གོས་པ་མེད་པ་ལྟར་དྲན་པ་གློ་བུར་བས་ཤེས་རབ་ལ་གོས་པ་མེད་ལ། བྱུང་བ་ཡང་འགག་མེད་དུ་བྱུང་ལ། གྲོལ་བ་ཡང་འགག་པ་མེད་པར་གྲོལ་བས་ན་ཤེས་རབ་སྟེ། དེའི་ཚད་ནི། རྣལ་འབྱོར་པ་དེའི་ཤེས་པ་འཇིག་རྟེན་འཁྲུལ་པའི་རྣམ་པ་བཟང་བ་དང་ངན་པ་དང་། གཞན་གང་ལ་ཡང་མི་འཇུག་པར་རང་གི་དེ་ཉིད་འཁྲུལ་པ་མེད་པར་གནས་པའོ། །དེ་ལྟར་མི་བརྗེད་པའི་གཟུངས་སྐྱེས་སྟེ་ཚེ་སྔར་གྱི་ཆོས་རྣམས་རྒྱུད་ལ་སྐྱེས་པས་ཏེ། དེའི་རྟགས་སུ་ནང་དུ་གཅིག་པུར་འདུག་པར་དགའ་བ་ནི་སྣང་བ་ལ་ཤེས་རབ་ཀྱི་བྱན་ཚུད་པ་དང་། ཡེ་ཤེས་ཟླ་དང་བྲལ་བའི་རྟགས་ཡིན། རྣལ་འབྱོར་པ་འདི་ནི་མི་མེད་ཅིང་རབ་ཏུ་དབེན་པའི་ས་ཕྱོགས་ལ་རྟག་ཏུ་དད་ཅིང་མོས་པ་ནི་འཁྲུལ་སྣང་གྲོགས་སུ་ཤར་བའི་རྟགས་ཡིན། མི་གཞན་དང་འགྲོགས་སྙིང་མི་འདོ ད་པར་རི་དྭགས་ལྟར་རྟག་ཏུ་ནགས་ཁྲོད་དུ་འགྲིམ་པ་ནི། འཁྲུལ་པའི་སྣང་བ་ཟད་དུ་ཉེ་བའི་རྟགས་ཡིན། ཤེས་པ་རྩེ་གཅིག་འགྱུར་བ་མེད་པ་ནི་ཐེ་ཚོམ་དང་སྒྲོ་འདོགས་ཆོད་པའི་རྟགས་ཡིན་ནོ། །འགྲོ་བ་གཞན་གྱིས་བརྗོད་པའི་གཏམ་ལ་ཡང་དག་པར་བྲག་ཆ་ལྟར་ཤེས་པས། གཟུངས་སུ་འཛིན་པ་ཉིད་དང་བྲལ་བ་ནི་ཚིག་གི་སྤྲོས་པ་ཆོད་པས་ཚིག་ཏུ་སྣང་བ་གང་ལ་ཡང་བློ་མི་འཇུག་པའི་རྟགས་ཡིན། ལྟ་བ་མི་འགྱུར་བའི་གདེང་རྙེད་པས་ཐམས་ཅད་ཆོས་ཉིད་ཀྱི་ཀློང་དུ་མཐོང་བས། ནམ་མཁའ་དག་ལ་འགྲོ་བ་སྙམ་བྱེད་པ་ནི། ལུས་ཀྱི་རྡོས་བཅས་ཟད་དུ་ཉེ་བའི་རྟགས་ཡིན། སེམས་དེ་གར་གཏད་པའི་སར་ས་དེར་འཆགས་པ་ནི། སེམས་ཀྱི་འཁྲུལ་པ་འགགས་པའི་རྟགས་ཡིན། ཕ་རོལ་པོའི་ཚིག་དང་གྲུབ་མཐའ་དང་ཡིན་མིན་གྱི་རྣམ་པ་རྣམས་ཀྱི་རྐྱེན་གྱིས་ཀྱང་། སྐལ་བ་དང་ལྡན་པ་འདི་ལ་བསྒྱུར་དུ་སུས་ཀྱང་མི་རྙེད་ག་ལ་སྲིད་དེ། མི་ནུས་པ་ནི་ཆོས་ཉིད་འགྱུར་བ་མེད་པའི་དོན་ཁོང་དུ་ཆུད་པའི་རྟགས་ཡིན། རྣམ་པར་རྟོག་པ་དང་། ཡ་ང་བ་དང་ངོ་ཚ་བ་དང་བག་ཚ་བ་མེད་པར་ཤེས་པ་བདེ་ཡངས་སུ་སྤྱོད་པ་ནི། འཁྲུལ་པ་ཞིག་ཏུ་ཉེ་བའི་རྟགས་ཡིན། ཚད་དང་རྟགས་འདི་ལྟར་སྐྱེས་པའི་མི་དེ་ནི། དྲན་པ་འགག་པ་མེད་པ་མི་བརྗེད་པའི་གཟུངས་ཀྱི་ཤེས་རབ་སྐྱེས་པས། ཟག་བཅས་སྣང་བ་འདི་ཉིད་ལ་བྱ་བ་ཟིན་པའི་སྐྱེས་བུ་ཞེས་བྱ་བར་འགྱུར་བ་ཡིན་ནོ། །དེས་ནི་མི་བརྗེད་པའི་གཟུངས་ཀྱི་ཤེས་རབ་དྲན་པ་འགག་པ་མེད་པར་སྐྱེས་པའི་རྟགས་ཚད་བསྟན་ནས། ༈ །ད་ནི་སོ་སོར་རྟོགས་པའི་བློའི་རིམ་པའི་ཤེས་རབ་སྐྱེས་པའི་རྟགས་དང་ཚད་བསྟན་པ་ནི། སོ་སོར་ནི་ཀུན་གཞི་དང་ཆོས་སྐུ་བྱེད་པར་རྟོགས་པ་དང་། སེམས་དང་ཡེ་ཤེས་དང་། འབྱུང་བ་དྭངས་སྙིགས་དང་། འཁོར་བ་དང་མྱང་འདས་ཕྱེད་མར་རྟོགས་པའི་ཤེས་རབ་སྟེ། དེ་ཡང་ཀུན་གཞི་དང་ཆོས་སྐུ་དབྱེ་བའི་དུས་དང་། སོ་སོའི་མཚན་ཉིད་དང་། དེ་དབྱེ་བའི་མན་ངག་དང་། ཕྱེད་པའི་རྟགས་དང་། ཕྱེད་པའི་ཚད་ལྔས་བསྟན་ཏེ། དེ་ཡང་སོ་སོའི་མཚན་ཉིད་ནི། ཀུན་གཞི་དང་ནི་ཀུན་ཞེས་པ་འཚོགས་པས་ན་ཀུན་གཞི་ཡིན་ལ། ལས་དང་ཉོན་མོངས་པ་དང་། བག་ཆགས་སྔ་ཕྱི་དང་། ཕུང་པོ་དང་ཁམས་ལ་སོགས་པ་འཚོགས་པས་ཏེ། དེ་ཡང་ཡེ་དོན་གྱི་ཀུན་གཞི་ལྷུན་གྲུབ་རིན་པོ་ཆེའི་གཞི་ལ་མི་སྣང་དགུ་སྣང་། མི་གནས་དགུ་གནས། མི་ཤར་དགུ་ཤར། མི་འབྱུང་དགུ་འགྱུར། མི་སྲིད་དགུ་སྲིད་པའོ། །སྦྱོར་བ་དོན་གྱི་ཀུན་གཞི་ནི། དེ་ལྟར་ལྷུན་གྲུབ་ལ་མི་སྣང་དགུ་སྣང་བས། འགྱུ་བ་ཡིད་ཀྱི་སྦྱོར་བ་ལས་དྲན་པའི་རྒྱུ་བྱས། སྣང་བ་སེམས་ཀྱི་སྦྱོར་བ་ལས་བསམ་པའི་རྒྱུ་བྱས། འགྱུ་བ་ཤེས་པའི་སྦྱོར་བས་གཟུང་འཛིན་གྱི་རྒྱུ་བྱས། དམིགས་པ་རྐྱེན་གྱི་སྦྱོར་བ་བཞིས་བདག་གི་རྐྱེན་བྱས་པ་ནི་སྦྱོར་བ་དོན་གྱི་ཀུན་གཞི་སྟེ། འཁྲུལ་པ་གཡོ་བྱེད་ཀྱི་ལས་བསྡུས་པའོ། །དེ་ལྟར་སྦྱོར་བ་ལས་མ་རིག་འཁྲུལ་གཞིའི་རྐྱེན་རང་རང་གིས་རང་གཡོས་པས། བག་ཆགས་འཁྲུལ་པའི་རྐྱེན་བྱས་པས་ཉོན་མོངས་པ་ལྔའི་རྒྱུ་རྐྱེན་དུ་བྱུང་བས། བག་ཆགས་སྔ་ཕྱི་འདྲེས་པ་ལས། ཀུན་རྫོབ་ཀྱི་འབྱུང་བ་བཞི་ཡི་རྐྱེན་གྱི་སྒོ་ནས་བག་ཆགས་ལུས་ཀྱི་ཀུན་གཞི་རྟེན་འབྲེལ་འཁོར་བའི་འཁྲུལ་འཁོར་དུ་བྱུང་སྟེ། འབྱུང་བ་སོ་སོའི་ཆོས་དང་། རྟེན་འབྲེལ་འཁྲུལ་པའི་ཆོས་དང་། ཉོན་མོངས་རྐྱེན་གྱི་ཆོས་དང་། རྡོས་བཅས་རྡུལ་ཕྲ་རགས་ལ་སོགས་པའི་གཞི་ལུས་ལ་བཅས་པས་ནི་ཀུན་གཞི་ཞེས་བྱའོ། །དེ་ལྟར་ཀུན་གཞི་རྣམ་ཤེས་ཡིད་ཀྱི་བྱུང་ཚོར་སྣ་ཚོགས་པས་ན་བསགས་པའི་ཀུན་གཞི་སྟེ་ཀུན་འདྲེས་ཤིང་མཚུངས་པར་གནས་པས་ན་ལྷན་གཅིག་སྐྱེས་པའི་མ་རིག་པ་ཞེས་བྱའོ། །དེས་ནི་ཀུན་གཞི་རང་གི་མཚན་ཉིད་དོ། །ཆོས་སྐུ་ཡང་ཞེས་པ་ནི་ཆོས་སྐུ་རང་གི་མཚན་ཉིད་དེ། ཆོས་ནི་སྤྱི་ཡི་ཆོས་ཤེས་པར་བྱ་བ་དང་། རང་གི་མཚན་ཉིད་ཉམས་སུ་བླང་བྱ་གཉིས་ཏེ། སྤྱི་ཡི་ཆོས་ཚིག་དང་ཡི་གེ་ཐེག་པའི་རིམ་པ་ལ་སོགས་འདི་དག་ཤེས་པར་བྱས་ལ། ཚིག་གི་སྤྲོས་པ་ཆོད་པའི་དགོས་པ་དང་། ཆོས་སྤྱིའི་རྣམ་པ་ལ་བློ་མི་འཇུག་པའི་ཕྱིར་ཤེས་བྱའི་དགོས་པ་སྟེ་ཕྱི་ཡི་སྤྲོས་པའི་སྒྲོ་འདོགས་ཆོད་པས་སྣང་བ་ཆོས་ཀྱི་སྐུ་ཡིན་ལ། ཆོས་རང་གི་མཚན་ཉིད་རིག་པ་མངོན་སུམ་ལ་བརྟེན་ནས་ཉམས་སུ་བླང་པས། ཡིད་ཆེས་པའི་རྟགས་སྔོན་དུ་ཤར་བས་གདེང་གཞན་དུ་མི་འཆའ་བས་ནང་གི་སྒྲོ་འདོགས་ཆོད་པས་རིག་པའི་ཆོས་ཉིད་དོ། །དེ་ལྟར་ཆོས་ཉིད་ལས་གྲུབ་པས་སྐུ་སྟེ། རྡོས་བཅས་རགས་པའི་ལུས་སུ་ནི་མེད་དེ། འགྱུར་མེད་ཟང་ཐལ་བའི་ངོས་ནས་སྐུ་རུ་བཞག་ལ། མཚན་མ་གསལ་བྱེད་དུ་མེད་དོ་སྟོང་པ་གཞི་རྫོགས་ཀྱི་ངོས་ནས་སྐུ་རུ་བཞག་ལ་གྲུབ་པ་ཚོགས་ཀྱི་སྐུ་ནི་མ་ཡིན་ཏེ་མཁྱེན་པ་འགགས་པ་མེད་པའི་སྐུ་རུ་བཞག་པ་ཡིན་ནོ། །སྣང་བ་གཟུགས་བརྙན་གྱི་སྐུ་ནི་མེད་ལ་གྲུབ་མཐའི་མཐར་ཐུག་པའི་ངོས་ནས་སྐུ་རུ་བཞག །རིག་བྱེད་འོད་ཀྱི་སྐུར་ནི་མ་ཡིན་ལ་ཡོན་ཏན་འཆར་ཚུལ་གྱི་སྒོ་ནས་སྐུར་བཞག་པ་ཡིན་ནོ། །དེ་ལྟར་མཚན་རྫོགས་རིགས་ཀྱི་སྐུར་ནི་མེད་ལ། ཐུགས་རྗེ་འཆར་བྱེད་ལ་འགག་པ་མེད་པའི་སྒོ་ནས་སྐུར་བཞག་པའོ། །དེ་ལྟར་ཕྱི་སྣང་བའི་ཆོས་ཉིད་སྐུར་གྱུར་པས་འཁྲུལ་པའི་མིང་མེད། ནང་རིག་པའི་ཆོས་ཉིད་སྐུར་གྱུར་པས་ད་འཁྲུལ་པ་མི་སྲིད་པས་ན། མ་འཁྲུལ་བའི་འ དུས་མ་བྱས་པའི་ངོས་དང་། མི་འགྱུར་བ་དང་། ལྡོག་པ་མེད་པའི་ངོས་ནས་སྐུར་བཞག་པའོ། །དེ་ལྟར་ཆོས་སྐུ་ཡིན་པར་ཅིས་ཤེས་ན་སྲིད་པ་ཁམས་གསུམ་གྱི་ཆོས་ཉིད་ཀྱི་མཐའ་ལས་འདས་ཏེ། རང་རྒྱུད་ཞེན་པའི་སྐུ་ལས་གྲོལ་བས་ཕྱི་ནང་གཉིས་ཀ་ཆོས་ཀྱི་སྐུ་ལས་མ་གཏོགས་པ་གང་ཡང་མེད་པས། འབྲས་བུ་གཞན་དུ་རེ་མི་འཆའ། དེ་རེ་འཆའ་ས་མེད་པས་ཆོས་ཀྱི་སྐུ་ལ་ལུས་མེད་པར་ངོ་ཤེས། དེ་ཤེས་པས་རྒྱུ་ཉོན་མོངས་པ་ལ་གྲུབ་རྒྱུ་མེད་པར་ཡིད་ཆེས། དེ་ལྟར་ཡིད་ཆེས་པས། འབྲས་བུ་རང་ལས་འབྱུང་བར་ཐག་ཆོད། དེ་ཆོད་པས་རང་ལུས་ཆོས་སྐུ་ཡིན་པར་བློ་བདེ་བའོ། །དེ་ནི་ཆོས་ཀྱི་སྐུ་རང་གི་མཚན་ཉིད་དེ། དེ་ཡང་ཆོས་ཀྱི་སྐུ་དེའི་ངོ་བོ་འདུས་མ་བྱས། རང་བཞིན་ལ་སྐྱེ་འཇིག་མེད་ཐུགས་རྗེ་ལ་དབྲི་བསྐོལ་མེད། མཚན་ཉིད་མཐའ་ཐམས་ཅད་ལས་གྲོལ་བའོ། །དེ་ལྟར་ཀུན་གཞི་དང་ཆོས་སྐུ་གཉིས། ཆུ་དང་འོ་མ་འདྲེས་པ་ལྟར་མ་རྟོགས་པའི་དུས་ན་གནས་པའོ། །དེ་ཡང་དུས་ནམ་ནས་འདྲེས་ན་འཁྲུལ་པའི་བློ་ནི་མ་སྐྱེས་པ་ན་འདྲེས། ད་ཇི་ཙམ་དུ་གནས་ན་བློ་མ་ཟད་ཀྱི་བར་ལ་གནས་པའོ། །འོ་ན་དེ་གཉིས་ལ་དབྱེ་བའི་ཐབས་མེད་དམ་ཞེ་ན་ཡོད་དེ། དཔེར་ན་ཆུ་དང་འོ་མ་འདྲེས་པ་དེ་བྱ་ངང་མོའི་མཆུས་སོ་སོར་ཕྱེས་པ་དང་འདྲ་བར། འབྱེད་པའི་དུས་རང་བཞིན་གནས་པའི་བར་དོ་ལ་དབྱེ་བ་སྟེ། དེ་སུས་འབྱེད་ན་རྟེན་གྱི་གང་ཟག་འཁོར་བ་ལ་བློ་ལོག་པ། ཚེ་འདི་རྒྱབ་ཏུ་བོར་ནས་ཕྱི་མ་དང་དུ་ལེན་པ་དད་པ་ལ་འགྱུར་བ་མེད་པ། ཤེས་རབ་ལ་འགྱུར་བ་མེད་པ། བརྩོན་འགྲུས་ལ་ཐང་ལྷོད་མེད་པ། རང་བཞིན་རྫོགས་པ་ཆེན་པོའི་དོན་ལ་མོས་པ་གཅིག་གིས་འབྱེད་ལ། དེ་འབྱེད་པའི་མན་ངག་གི་བཤད་རྒྱུད་ཚིག་གི་རིམ་པ་ལ་བརྟེན་པས་ཕྱི་ཡི་སྒྲོ་འདོགས་བཅད་པས། ཤེས་བྱའི་ཆོས་ཉིད་མཐར་ཐུག་པས་སྣང་བ་ཐམས་ཅད་ཆོས་སྐུར་གཏན་ལ་ཕབས་པས་ཡེ་དོན་གྱི་ཀུན་གཞིའི་མིང་མེད་དེ། རང་བྱུང་གི་ཡེ་ཤེས་གཞན་ལ་མ་ལྟོས་པའི་གནད་ཀྱིས་སོ། །དེ་ལྟར་ཅིས་ཤེས་ན་འདི་ལྟར་སྣང་བ་ཐམས་ཅད་ཆོས་སྐུ་ལས་མ་རྟོགས་པ་གང་ཡང་མི་འ དུག་པས། ཡུལ་རྐྱེན་བདག་ཏུ་རྟོག་པའི་མཐའ་ལས་གྲོལ་བས། གཉེན་པོ་གཞན་ལ་ལྟོས་མི་འཆའ། དེ་མ་བཅོས་པས་དུག་ལྔ་ཉིད་དུག་ལྔས་གྲོལ་བར་ངོ་ཤེས། དེ་ཤེས་པས་རང་ཀ་མ་རང་གྲོལ་བར་ཡིད་ཆེས། དེ་ཆེས་པས་ལས་དགེ་སྡིག་མེད་པར་ཐག་ཆོད། དེ་ཆོད་པས་སྣང་སྲིད་ཡེ་སངས་རྒྱས་ཏེ་བློ་བདེ་བའོ། །སྙན་བརྒྱུད་གནད་ཀྱི་མན་ངག་རིག་པ་མངོན་སུམ་ལ་བརྟེན་ནས་ནང་གི་སྒྲོ་འདོགས་བཅད་པས། ཉམས་སུ་བླང་བྱའི་ཆོས་ཉིད་ཀྱི་མཐར་ཐུག་པ་རང་ལུས་སྐུར་གྲོལ་བས། སྦྱོར་བའི་ཀུན་གཞི་དང་བག་ཆགས་ལུས་ཀྱི་ཀུན་གཞི་མིང་མེད། དེ་མེད་པས་ཟག་བཅས་སྡུག་བསྔལ་གྱི་མཐར་མ་ལྷུང་། དེ་མ་ལྷུང་པས་རང་བྱུང་གི་ཡེ་ཤེས་ལས་ལ་རེ་བ་མེད། དེ་མེད་པས་འདི་ཉིད་ལ་ཟག་མེད་དུ་སངས་རྒྱ་བར་ངོ་ཤེས། དེ་ཤེས་པས་ལས་དགེ་བས་ཕན་མ་བཏགས་པར་ཡིད་ཆེས། དེ་ཆེས་པས་རིག་པའི་ཡེ་ཤེས་ཉིད་བར་མ་དོ་ལ་མི་ལྟོས་པར་ཐག་ཆོད། དེ་ཆོད་པས་འདི་ཉིད་ལ་ཆོས་ཉིད་རང་ཟད་པས་བློ་བདེ་བའོ། །དེ་ལྟར་མན་ངག་གཉིས་ལ་བརྟེན་ནས་མཐའ་གྲོལ་ཡོངས་རྫོགས་ཀྱི་ལྟ་བ་རྟོགས་པ་ནི་དེའི་མན་ངག་གོ། །དེ་ལྟར་ཕྱེ་བས་ཕྱེད་པའི་ངོ་བོ་གོང་ལྟར་རྟོགས་པས་ཀུན་གཞི་དང་ཆོས་སྐུ་འདི་ལྟར་ཕྱེད་པའི་རྟགས་ནི་འདི་ལྟ་བུ་ཤར་ཏེ། རྣལ་འབྱོར་པ་རང་གི་ལུས་ལ་ཞེན་པའི་བློ་དང་བྲལ་ནས་གཏད་མེད་ཐོམ་གྱིས་སོང་བ་སྟེ། ལུས་ལ་བརྡེག་པ་དང་། མཚོན་བཏབ་ཀྱང་ཡ་ང་བ་དང་བྲལ་བ་ནི་ནང་གི་སྒྲོ་འདོགས་ཆོད་དེ། ལུས་ཀྱི་ཀུན་གཞི་དང་ཕྱེད་པའི་རྟགས་ཡིན། རིག་པ་གར་གཏད་པའི་སར་གནས་པ་ནི། རང་ལུས་ཏེ་རིག་པ་ལ་དབང་ཐོབ་པས་སྦྱོར་བ་དོན་གྱི་ཀུན་གཞི་ཆོས་སྐུ་ཕྱེད་པའི་རྟགས་ཡིན། རྣལ་འབྱོར་བ་དེའི་ལུས་ནི་བེམ་པོ་བཞིན་དུ་འགྱུར་བ་ནི་འདི་ཡི་དུས་ན་འཕོ་བའི་ལས་གྲུབ་པ་སྟེ། རྣམ་ཤེས་གཞན་གྱི་ལུས་ལ་འཇུག་ནུས་པ་དག་འབྱུང་ཞིང་། རང་གི་ལུས་བེམ་པོར་འགྱུར་ཞིང་། རིག་པ་སྦུག་ནས་ཐོན་པར་ནུས་པ་སྟེ། འདིས་ནི་འཁོར་བ་དང་གཉིས་ཀ་ལ་དབང་ཐོབ་པས་ཡེ་དོན་གྱི་ཀུན་གཞི་འཁྲུལ་འཁོར་གྱི་གཞི་མ་དང་ཆོས་སྐུ་ཕྱེད་པའི་རྟགས་སོ། །འདི་ནི་དོན་གྱིས་ཕྱེད་པའི་ཚད་དུ་ཡང་འགྲོའོ། །ཕྱེད་པའི་ཚད་དངོས་ནི་རང་གི་སྒྱུ་ལུས་སྒྱུ་མའི་རང་བཞིན་དུ་གྱུར་ནས་ཟག་བཅས་སུ་མི་སྣང་བའོ། །དེ་ཕྱེ་བའི་ཆོས་པ་ནི་དབང་པོ་རབ་ཀྱི་ཟག་པ་རང་ཟད་ནས་ཕུང་པོ་ལྷག་མེད་དུ་འདི་ལ་སངས་རྒྱ་བར་འགྱུར་བའི་དགོས་པ་ཡོད་དོ། །སེམས་དང་ཡེ་ཤེས་དབྱེ་བ་ལ་ཡང་། རང་གི་མཚན་ཉིད་དང་། དུས་དང་། འབྱེད་པའི་མན་ངག་དང་། རྟགས་དང་། ཚད་དང་། ཕྱེ་བའི་དགོས་པ་དང་དྲུག་གིས་བསྟན་པ་ལ། སོ་སོ་རང་གི་མཚན་ཉིད་ནི། སེམས་དང་ནི་སེམས་ཀྱི་མཚན་ཉིད། སེམས་ཀྱི་ངོ་བོ་སྣང་བ་ལ་མ་ངེས། རང་བཞིན་ཡུལ་ཀུན་ལ་འཇུག་པ། དབྱེ་བ་འཁྲུལ་པའི་སེམས་དང་། ཕྱིན་ཅི་ལོག་གི་སེམས་སོ། །མཚན་ཉིད་དྲན་བསམ་རྣམས་ཀྱི་གཞི་འཛིན་པ། ལས་ཀྱི་བག་ཆགས་སྔ་ཕྱི་འབྲེལ་བྱེད་པ། སེམས་ཀྱི་འབྲས་བུ་ཁམས་གསུམ་དུ་འཁོར་བ། སེམས་ཀྱི་སྣང་བ་ཡིད་དཔྱོད་སྣ་ཚོགས་པའོ། །ཡེ་ཤེས་ཀྱི་མཚན་ཉིད་ནི་གོང་མ་ལས་ལོག་པ་སྟེ། ངོ་བོ་རང་སྣང་རང་གྲོལ་པ། རང་བཞིན་འོད་གསལ་བ། མཚན་ཉིད་གང་དུ་ཡང་གྲུབ་པ་མེད་པ། དབྱེ་བ་གཞི་གནས་ཀྱི་ཡེ་ཤེས་དང་མཚན་ཉིད་འཛིན་པའི་ཡེ་ཤེས་སོ། །ལས་ཀྱི་རྣམ་པར་རྟོག་པ་ཐམས་ཅད་གཅོད་པར་བྱེད། འབྲས་བུ་སངས་རྒྱ་བར་བྱེད་པའོ། །དེ་ཡང་ཡེ་ནས་གནས་པའི་དོན་དེ་ཕྱིན་ཅི་མ་ལོག་པར་ཤེས་པས་ན་ཡེ་ཤེས་ཏེ། ཤེས་རབ་ཀྱིས་རྟོགས་པའོ། །དེའི་བཞུགས་ཚུལ་ནི་མཐའ་གྲོལ་ཡོངས་རྫོགས་ཀྱི་ལྟ་བར་བཞུགས་སོ། །དེ་ཡང་སེམས་ཀྱི་མཐའ་ལས་རང་གྲོལ་བས། འཁོར་བའི་དོགས་མེད། དེ་མེད་པས་འགྲོ་བ་རྣམས་ཡེ་ནས་གྲོལ་བར་ངོ་ཤེས། དེ་ཤེས་པས་རང་བྱུང་གི་ཡེ་ཤེས་ཉིད་འབད་པ་དང་རྩོལ་སྒྲུབ་ཀྱི་ནད་དང་བྲལ་བས་ཡིད་ཆེས། དེ་ཆེས་པས་རྣལ་འབྱོར་པའི་ལུས་ངག་ལ་བཅོས་སུ་མེད་པར་ཐག་ཆོད། དེ་ཆོད་པས་བྱ་བྱེད་རྣམས་རང་གྲོལ་བས་ཏེ་བློ་བདེ་བའོ། །དེ་ལྟ་བུ་ནི་ཡེ་ཤེས་རང་གི་མཚན་ཉིད་དམ་བཞུགས་ཚུལ་ལོ། །དེ་ལྟར་སེམས་དང་ཡེ་ཤེས་གཉིས་པོ་དེ་གསེར་དང་གཡའི་ཚུལ་དུ་རང་གིས་རང་ཆས་སུ་འདྲེས་ནས་གནས་སོ། ། དེ་དུས་ནམ་འདྲེས་ན་འབྱུང་བ་ཉེར་ལེན་གྱི་ལུས་ནམ་ཆགས་པ་ན་འདྲེས་སོ། །དེ་འབྱེད་པར་འགྱུར་བའི་དུས་ནི་ལུས་ཀྱི་ཉེར་ལེན་ནམ་ཟད་ཙམ་ན་ལྷན་གཅིག་ཏུ་མི་གནས་སོ། །དེ་ཕྱེད་པའི་ཐབས་མེད་དམ་སྟེ་ཡོད། གསེར་ལ་བཟོ་བོ་མཁས་པས་སྦྱོང་བྱེད་ཀྱི་ལས་བྱས་པས་ཕྱེད་པ་ལྟར། བླ་མའི་མན་ངག་ཕྱིན་ཅི་མ་ལོག་པ་ལ་བརྟེན་ནས་ཕྱེད་པའོ། །དེ་གཉིས་འབྱེད་པའི་དུས་ནི་རང་བཞིན་གནས་པའི་བར་དོ། དེ་འབྱེད་པར་བྱེད་པའི་མན་ངག་ནི་སྒྲོན་མ་བཞི་ལམ་དུ་ཁྱེར་བའི་མན་ངག་ལ་བརྟེན་ནས། སྐལ་ལྡན་གྱིས་འབྱེད་པའོ། །དེ་ལྟར་ཕྱེ་བས་སྒྲོན་མ་དངོས་སུ་སྣང་བས་ཡིད་དཔྱོད་ཀྱི་མཐའ་ལས་གྲོལ་ཏེ། ལྟ་བ་ལ་སྙེམ་མ་ཞུགས་པས། ངོ་རང་ཐོག་ཏུ་ཤེས། དེ་ཤེས་པས་ཡིད་སྣང་བ་ལ་ཆེས། དེ་ཆེས་པས་ཐག་ཡུལ་ཐོག་ཏུ་ཆོད། དེ་ཆོད་པས་བློ་ཡེ་གྲོལ་དུ་བདེ་བའོ། །དེ་ལྟར་ཕྱེད་པའི་རྟགས་ནི། རྣལ་འབྱོར་པ་དེའི་དབུགས་ཕྱི་ནང་དུ་འགྱུ་བར་བྱེད་པ་དང་རྩལ་འགྱུ་བ་དང་། སྤྱི་བོ་ནས་རྒྱུ་བ་རྣམས་ཀྱི་སྒོ་ནས་ཡང་དག་པར་བརྟགས་ཀྱང་དེ་མི་སྣང་བ་ལ་ནི་སེམས་ཡེ་ཤེས་ཀྱི་དབང་དུ་གྱུར་པས་བྱུང་ཚོར་གྱི་གཞི་སྟོང་པའི་རྟགས་སོ། །ཚད་ནི་བག་ཆགས་ཀྱི་རྨི་ལམ་ནུབ་པའོ། །དེ་ནམ་ཕྱེད་ན་རྡོས་པ་དང་བྲལ་བའི་དུས་ནའོ། །དེ་ཕྱེ་བས་ན་དགོས་པ་ཅི་ཡོད་ན་དབང་པོ་རབ་གཅིག་འདི་ལ་རྣམ་པར་རྟོག་པ་ལས་ཀྱི་རླུང་ཟད་ནས། བར་དོ་དང་པོ་སྐད་ཅིག་གི་ཡུལ་དུ་བྱས་སྟེ་སྐད་ཅིག་མ་གསུམ་ལ་སངས་རྒྱ་བའོ། །འབྱུང་བ་དྭངས་སྙིགས་འབྱེད་པ་ལ་ཡང་། རང་གི་མཚན་ཉིད་དང་། འབྱེད་པའི་དུས་དང་། དེ་འབྱེད་པའི་མན་ངག་དང་། རྟགས་དང་། ཚད་དང་། དགོས་པ་དང་དྲུག་གིས་བསྟན་ཏེ། འབྱུང་བ་ནི་དོན་དམ་པའི་འབྱུང་བ་བཞི་ནི་ཆུ་གཤེར་བ་མེད་པའི་སྡུད་པས་དཀར་པོའི་སྣང་བ་རང་ལོག །ས་སྲ་བ་མེད་པའི་བརྟན་པས་སེར་པོའི་སྣང་བ་རང་ལོག །མེ་ཚ་བ་མེད་པའི་སྲེག་པས་དམར་པོའི་སྣང་བ་རང་ལོག །རླུང་ཡངས་པ་མེད་པའི་བསྐྱོད་པས་ལྗང་གུའི་སྣང་བ་རང་ལོག །ནམ་མཁའ་ཁྱབ་པ་མེད་པའི་ཡེ་གདངས་ཀྱི་མཐིང་ཀའི་སྣང་བ་རང་ལོག་པ་ནི། མའི་འབྱུང་བའི་མཚན་ཉིད། ཀུན་རྫོབ་ཀྱི་འབྱུང་བ་བཞི་ནི། ཆུས་བསྡུད་པའི་ལས་བྱེད། སས་བསྐྱེད་ཅིང་འཛིན། མེས་སྨིན་རླུང་གིས་འབྱེད་པའི་ལས་བྱེད་པ་ནི། མའི་འབྱུང་བའི་མཚན་ཉིད་དོ། །དེ་ཡང་སྙིགས་མའི་འབྱུང་བའི་མཚན་ཉིད་དོ། །དེ་ཡང་སྙིགས་མའི་འབྱུང་བའི་ངོ་བོ་མི་བརྟན་པ། རང་བཞིན་འགྱུར་བ། མཚན་ཉིད་ཀུན་རྫོགས་ལས་ཀྱི་འགྲོ་བ་བརྟེན་པར་བྱེད། འབྲས་བུ་ཆགས་འཇིག་གོ། །དྭངས་མའི་ངོ་བོ་ལམ་དུ་སྣང་བ། རང་བཞིན་བཟུང་ཡུལ་དུ་མེད་པ། འོད་དུ་གསལ་བ་དོན་དམ་པ། ལས་ཀྱིས་ལམ་ཕྱིན་ཅི་མ་ལོག་པར་བྱེད་པ། འབྲས་བུ་ལོངས་སྐུའི་ཞིང་ཁམས་ནས་སངས་རྒྱ་བའོ། །དེ་ལྟར་འབྱུང་བ་དྭངས་སྙིགས་གཉིས་ཁྲག་དང་ཞོ་འདྲེས་པ་ལྟར་རིས་འཛིན་དུ་ཡོད་དོ། །དེ་ཡང་ནམ་འདྲེས་ན་ལུས་ནམ་གྲུབ་པའི་དུས་ན་འདྲེས་ལ། དེ་ནམ་ཕྱེད་ན་ཆོས་ཉིད་ཀྱི་བར་མ་དོར་ཕྱེད་ལ། དེ་དུས་ནམ་འབྱེད་ན་འཆི་ཀ་མའི་བར་དོ་ལ་འབྱེད་དེ། མི་གསལ་བ་གསལ་གདབ་པ་ནི། རང་གིས་གསལ་ཐེབས་ན་ལེགས་མ་ཐེབས་ན་བླ་མ་བཞུགས་ན་བླ་མས་རྣ་བར་སྨྱུག་མའི་ཨུ་འབིའམ། ཤོག་གུའི་སྦུགས་ནས་ལན་གསུམ་དུ་གདབ་བོ། །བླ་མ་མེད་ན་དམ་ཚིག་གཅིག་པའི་གྲོགས་ཀྱིས་གསལ་གདབ་བོ། །དེ་འབྱེད་པའི་མན་ངག་ནི། ཁྲག་དང་ཞོ་འདྲེས་པ་དེ་གཞན་གྱིས་མི་ཕྱེད་དེ། ནོར་བུ་ཀེ་ཀེ་རུས་ལན་གསུམ་དཀྲུགས་པས་བྱེད་དོ། །དེ་ལྟར་འབྱུང་བ་དྭངས་སྙིགས་འབྱེད་པའི་མན་ངག་ཆོས་ཉིད་ཀྱི་བར་མ་དོའི་མན་ངག་ལ་བརྟེན་ནས་ཕྱེ་སྟེ། རགས་པའི་སྣང་བ་རྣམས་རང་བཞིན་མེད་པར་ཤེས་པས། རྟག་པར་འཛིན་པའི་མཐའ་ལས་གྲོལ། དེ་གྲོལ་བས་འཁོར་བའི་ཆོས་ལ་ལྟོས་མི་འཆའ། དེ་མ་བཅོས་པས་རིག་པ་ལ་ཞེ་འདོད་མེད་པར་ངོ་ཤེས། དེ་ཤེས་པས་ཐེག་པ་ཐུན་མོང་བའི་གྲུབ་མཐའ་ཞེ་འདོད་དང་བཅས་པས་སངས་མི་རྒྱ་བར་ཡིད་ཆེས། དེ་ཆེས་པས་ལམ་སྔོན་དུ་སྦྱོང་དགོས་པར་ཐག་ཆོད། དེ་ཆོད་པས་འགྱུར་བ་མེད་པའི་ལམ་འཕྲང་དགུག་གི་དགྲ་དང་འདྲ་བར་སྡོད་པས་བློ་བདེ་བའོ། །དེའི་རྟགས་ནི་འབྱུང་བ་དྭངས་སྙིགས་རྣལ་འབྱོར་པ་སུས་ཕྱེད་པའི་རྟགས་སུ། སྣང་བ་འདི་ལ་རགས་པའི་སྣང་བས་ས་རྡོ་དང་རི་བྲག་འདི་དག་སྐབས་སུ་རང་འགགས་ལ་འགྲོ་བས་ཏེ། འདི་ནི་འབྱུང་བ་དྭངས་སྙིགས་ཕྱེད་པའི་རྟགས་ཡིན་པས། འདི་ལ་རིག་པ་རྡོ་རྗེ་ལུ་གུ་རྒྱུད་ཀྱི་ཆ་ཤས་ཀྱི་སྐུ་ལ་བདེ་བར་སྦྱོང་པའི་རྟགས་སོ། །དེའི་ཚད་ནི་འོད་ཀྱི་སྣམ་བུ་ལ་སྤྱོད་པ་ཉིད་ཡིན་ནོ། །ཕྱེད་པ་དངོས་ནི་ཆོས་ཉིད་ཀྱི་བར་མ་དོའོ། །དེ་ལྟར་ཕྱེ་བ་ལ་དགོས་པ་ཅི་ཡོད་ན་དབང་པོ་འབྲིང་པོ་གཅིག་ཆོས་ཉིད་ཀྱི་བར་དོ་ལ་རང་གི་དེ་ཉིད་བརྟན་པ་ཐོབ་ནས་མངོན་པར་རྫོགས་པར་སངས་རྒྱ་བའི་དགོས་པ་ཡོད་དོ། །གོང་དུ་བསྟན་པ་དེ་བཞིན་དུ་འདི་ལ་ཡང་དྲུག་གིས་བསྟན་ཏེ། འཁོར་བའི་མཚན་ཉིད་ནི། ངོ་བོ་གཅིག་ཏུ་མི་གནས་པས་འཁོར་བས་ན་འཁོར་བ། རང་བཞིན་མ་བརྟགས་ན་ཉམས་དགའ་བ། མཚན་ཉིད་གཅིག་ཏུ་མ་ངེས་པ། ལས་ཀྱི་སྡུག་བསྔལ་དུ་མ་བསྐྱེད་པར་བྱེད་པ། འབྲས་བུ་འགྲོ་བ་རིགས་དྲུག་གོ། །མྱ་ངན་ལས་འདས་པའི་མཚན་ཉིད་ནི། ངོ་བོ་མཐའ་གང་དུ་ཡང་མ་ལྷུང་། རང་བཞིན་ཆོས་ཉིད་འདུས་མ་བྱས་པ། མཚན་ཉིད་སྐྱེ་བ་མེད་པ། ལས་ཀྱི་འཁྲུལ་པའི་ཞེན་པ་ལས་གྲོལ་བར་བྱེད་པ། འབྲས་བུ་ཆོས་ཟད་པའོ། །དེ་ལྟར་མྱ་ངན་ལས་འདས་པ་དེ་ནི། ཡོད་མེད་སྟོང་པའི་མཐའ་ལས་འཛིན་མེད་ཕྱོགས་རིས་མེད་པར་རང་གྲོལ། དེ་གྲོལ་བས་འགྲོ་དྲུག་མངལ་གྱི་གྲོང་ཁྱེར་དུ་མེད། དེ་མེད་པས་འབྲས་བུ་ལ་ལྡོག་མེད་པར་ངོ་ཤེས། དེ་ཤེས་པས་ངན་སོང་གསུམ་ངོ་བོ་ལ་གྲུབ་པ་མེད་པར་ཡིད་ཆེས། དེ་ཆེས་པས་རིག་པ་ལ་དྲི་མ་མེད་པར་ཐག་ཆོད། དེ་ཆོད་པས་བདེ་སྡུག་ངོ་སྙམ་སྟེ་བློ་བདེ་བའོ། །དེ་ལྟར་གནས་པའི་འདས་པ་དང་འཁོར་བ་གཉིས། སྣོད་བཅུད་དབྱེ་བ་ཆུ་དང་སྙིགས་མའི་ཚུལ་དུ་འདྲེས་ཏེ། དེ་ཡང་ནམ་འདྲེས་ན་དྲན་པ་ཡིད་ཀྱི་འགྱུ་བ་ནམ་བྱུང་བ་ན་འདྲེས། དེ་ཡང་དེ་གནས་ཀྱི་བར་ལ་གནས། ཐ་མ་དེ་ནམ་ཟད་པ་ན་ཕྱེད་དོ། །དེ་འབྱེད་པའི་དུས་ནི་ད་ལྟ། དེ་འབྱེད་པར་བྱེད་པའི་མན་ངག་ནི་རང་བཞིན་རྫོགས་པ་ཆེན་པོ་ཆོས་ཉིད་སྔོན་དུ་བསྟན་པ་སྟེ། ཆུའི་རྙོག་མ་དེ་ནོར་བུ་ཆུ་དྭངས་བཅུག་པ་ཙམ་གྱིས་སེལ་བ་དང་འདྲ་བར། རིག་པའི་ཡེ་ཤེས་མངོན་གསུམ་དུ་བསྟན་པས་འདི་ཉིད་འབྲས་བུ་རང་རྫོགས་རང་བཞིན་གཉིས་མེད་དུ་རྟོགས་ཤིང་ཤེས་ཏེ། འཁྲུལ་པའི་ཞེན་པ་རང་རྒྱུད་དུ་འཛིན་པའི་མཐའ་ལས་འཛིན་མེད་རང་སྣང་དུ་གྲོལ་བའོ། །དེ་གྲོལ་བས་འཁོར་བ་མི་རྟག་པར་ངོ་ཤེས་ཏེ། དེ་ཤེས་པས་བྱས་པའི་ཆོས་ཀྱིས་སངས་མི་རྒྱ་བར་ཡིད་ཆེས། དེ་ཆེས་པས་ཆོས་ཐམས་ཅད་མ་བཅོས་རང་སར་བཞག་པ་ཡིན་པར་ཐག་ཆོད། དེ་ཆོད་པས་ཚེ་འདི་བྱ་བྱེད་དང་བྲལ་ཏེ་བློ་བདེ་བའོ། །དེ་ལྟར་སུས་ཕྱེད་པའི་སྐལ་ལྡན་ལ། འཁྲུལ་པའི་བློའི་སྣང་བ་རྣམས་སྐྱེ་མི་སྲིད་པ་ནི་འཁོར་བའི་ཐག་ཆོད་པའི་རྟགས་ཡིན། དེ་ལྟར་ཐག་ཆོད་པ་ལ་གལ་ཏེ་འཁྲུལ་པའི་བསམ་པ་སྐབས་སུ་སྐྱེས་ཀྱང་ཕན་གནོད་དང་བྲལ་བའོ། །དེའི་ཚད་ནི་འཁྲུལ་པའི་བྱ་བ་ལ་བློ་འཇུག་མི་སྲིད་པའོ། །དེ་ལྟར་ཕྱེ་བ་ལ་དགོས་པ་ནི་ཟབ་མོ་འཇུག་སྒོ་མཐོང་བའི་ཡོན་ཏན་གྱིས་དབང་པོ་ཐ་མ་གཅིག་རང་བཞིན་སྤྲུལ་པའི་སྐུར་དབུགས་ཕྱུང་ནས་སངས་རྒྱ་བའི་དགོས་པ་ཡོད་དོ། །དེ་ལ་སོགས་པའི་ནི་དབང་པོ་ཐ་མའི་ཐ་མ་གཅིག་གིས་འཁོར་བ་ལས། བློ་ངང་གིས་ལོག །རང་བཞིན་རྫོགས་པ་ཆེན་པོའི་དོན་འདི་ཐོས་པ་དང་། མོས་པ་བྱས་པའི་སྟོབས་ཀྱིས་རང་གི་ཤེས་རབ་ཀྱིས་འཁོར་བའི་མཚན་ཉིད་རྟག་པ་ཡིན་སྙམ་པ་དང་། མྱ་ངན་ལས་འདས་པ་འདུས་མ་བྱས་ཤིང་སྐྱེ་བ་མེད་པ་ཡིན་སྙམ་པ་ཙམ་དུ་གཏན་ལ་ཕེབས་པ་སྙམ་བྱེད་ཙམ་ལ་བརྟེན་ནས་སྐྱེ་བར་བརྒྱུད་ནས་སངས་རྒྱ་བ་ཡིན་ནོ། །དེ་ལྟར་ན་བློ་ཡི་རིམ་པས་སོ་སོར་རྟོགས་པའི་ཤེས་རབ་བོ། །ད་ནི་འཇུག་བྱེད་རྣམ་གསུམ་གྱི་རྟགས་བསྟན་པ་ནི། འཇུག་བྱེད་ནི་དང་པོའི་དུས་ན་ཐོས་པས་རྒྱུད་གྲོལ། བསམ་པས་ཐག་བཅད། བསྒོམ་པས་ལ་བཟླ་བ་རྣམ་པ་གསུམ་གྱི་ཤེས་རབ་ནི། ཐོས་པ་ལས་བྱུང་བའི་ཤེས་རབ་ཀྱིས་ཚིག་གི་སྒྲོ་འདོགས་ཆོད་པ་སྟེ། དེའི་ཚད་ནི། ཆོས་རྒྱུད་དང་ལུང་དང་མན་ངག་ཀུན་གྱི་ཚིག་གཅིག་མགོ་སྨོས་པ་ཙམ་གྱིས་ནི། ཆོས་དེའི་གཞུང་ཀུན་ཤེས་པ་ནི། སྔོན་ཆད་ཐོས་མ་མྱོང་ཀྱང་ཤེས་པ་ནི་ཐོས་པ་ལས་བྱུང་བའི་ཤེས་རབ་ཀྱི་ཚད་དུ་ཕྱིན་པའི་རྟགས་སོ། །དོན་གྱི་རྟགས་ནི་ཚིག་གི་འབྲེལ་པ་དང་བྲལ་བའོ། །བསམ་པ་ལས་བྱུང་བའི་ཤེས་རབ་ནི། རང་ཤེས་པ་ཅི་ལ་བསམ་པའི་ཟུངས་ནི་རྟེན་གང་ལ་གཏད་པ་ལ་བརྟེན་ནས་ཉམས་སུ་མྱོང་བར་ཤར། རང་གི་རྒྱུད་ལ་བདེ་བར་ཤར་ན་བསམ་པས་ཡང་ནི་དེ་བཞིན་དུ་ཤེས་རབ་འབྱུང་བའི་རྟགས་སོ། །དོན་གྱི་རྟགས་ནི་དྲན་པའི་འགྱུ་བ་རྒྱུན་ཆད་པའོ། །བསྒོམས་པ་ལས་བྱུང་བའི་ཤེས་རབ་ནི། འདི་ལྟར་སྣང་བའི། འཁྲུལ་པའི་རྣམ་པར་རྟོག་པའི་ཞེན་པ་མཐའ་དག་རང་བཞིན་གྱིས་འགགས་ནས་ཕྱིས་སྐྱེ་མི་སྲིད་པ་ནི། སྐྱེ་མེད་རྟོགས་ཞེས་བློ་ལས་འདས་པའི་རྟགས་ཡིན། དེ་ལྟར་རྟོགས་པའི་རྣལ་འབྱོར་པ་འདི་ནི་བསྒོམ་པའི་ཤེས་རབ་རང་གིས་རང་རྙེད་པའི་རྟགས་ཡིན་ནོ། །དེའི་དོན་གྱི་ཚད་ནི། འཁྲུལ་སྣང་ཞིག་ནས་མི་ལས་འདས་པའོ། །དེས་ནི་ཤེས་རབ་རང་བྱུང་གི་སྒྲོན་མའི་རྟགས་བསྟན་ནས། ༈ །ད་ནི་དྲིས་ལན་བརྒྱད་པ་དཔེ་བསྟན་པ་ནི། ཤེས་རབ་ཀྱིས་རྣམ་རྟོག་གི་མཚན་མ་སྲེག་པ་ནི། དཔེར་ན་སྤྲ་བ་རླན་མེད་པ་ལ། མེ་སྟག་ཕྲ་བ་ཉིད་དང་ཕྲད་ཀྱང་། སྤྲ་བ་ཀུན་མཆེད་དེ་མེས་སྲེག་པ་བཞིན་དུ། ཤེས་རབ་ཀྱི་སྤྲ་བ་རླན་མེད་པ་དང་འདྲ་བའི་རྣམ་པར་རྟོག་པའི་བག་ཆགས་སྔ་ཕྱི་མེད་པར་སྲེགས་ཏེ། སྤྲ་བ་ཀུན་མེས་མཆེད་ནས་ཐལ་བ་ཡང་གྲུབ་པ་མེད་པ་དང་འདྲ་བར་བག་ཆགས་དེ་སྔར་ཆོད་པ་ཡང་མེད། ད་ལྟ་གནས་པ་ཙམ་དུ་ཡང་མི་སྲིད། ཕྱིས་ཐལ་བའི་ཤུལ་ཙམ་ཡང་མེད་པ་དང་འདྲ་བར་ག་ལ་སྲིད་དེ། དེ་ལྟར་མེད་པས་ད་འདི་ལྟར་སྣང་བ་ཀུན་ཤེས་རབ་རང་བྱུང་གི་སྒྲོན་མའི་སྣང་བ་ལས་མ་གཏོགས་པ་གཞན་མེད་པའོ། །དེ་ལྟར་ཆོས་ཀྱི་རྣམ་གྲངས་བཅུས་ལེའུའི་གཞུང་བསྟན་པའོ། །ཞེས་ཚིག་དང་ཡི་གེར་སྒྲོན་མ་འབར་བའི་རྒྱུད་ཀྱི་སྡེ་ལས་ཤེས་རབ་རང་བྱུང་གི་སྒྲོན་མ་ཆོས་ཀྱིིི་རྣམ་གྲངས་རང་ངོ་ལ་བརྒྱད་དུ་བྱས་ནས་བསྟན་པའོ། །ལེའུ་སྡེ་ཚན་ངོ་ཤེས་པར་བཅད་པའོ། །གཉིས་པ་གཅིག་བསྟན་པའི་གོ་འོག་མས་ཏེ་གྲངས་སོ། ༈ །ད་ནི་ལེའུ་གསུམ་པ་བསྟན་ཏེ་ལེའུ་འདིས་ཐིག་ལེ་སྟོང་པའི་སྒྲོན་མ་བསྟན་ཏེ། འདི་ལ་བསྡུས་པའི་དོན་གཉིས་ཀྱིས་བསྟན་པའི་དང་པོ་ཞུ་བ་མདོར་བསྟན་པ་ནི། དེ་ནས་རྒྱུ་ཡི་རྡོ་རྗེ་འཆང་ཞེས་པ་ལ་སོགས་པས་བསྟན་ཏེ། འདི་ནི་སྡུད་པ་པོའི་མིང་ངོ་། །དེ་ལྟར་ཤེས་རབ་རྒྱས་པར་བསྟན་པས་རང་གི་དོན་ལ་ཡིད་ཆེས་པའི་ཚིག་ཤར་ནས། སེམས་མི་རྟོག་པ་མཉམ་པ་ཉིད་མ་བཅོས་པ་ཆེན་པོར་གྱུར་ཏེ། རང་གི་རྒྱུད་ལ་ཤེས་རབ་ཆེན་པོ་རང་ཤར་ནས། ཆོས་སྤྱི་དང་རང་གི་མཚན་ཉིད་ཀུན་དུ་མ་རོ་ཅིག་ཏུ་རྩད་ནས་ཆོད་དེ། མཐའ་གྲོལ་ཡོངས་རྫོགས་དངོས་བྲལ་སྟོང་པའི་ཡུལ་རྙེད་ནས། མ་འོངས་པའི་སེམས་ཅན་ཀུན་གྱི་དོན་དུ། རང་བཞིན་དག་པའི་རྡོ་རྗེ་འཆང་ལ་འདི་སྐད་ཅེས་གསོལ་ལོ། །ཀྱེ་ཀྱེ་སངས་རྒྱས་རྡོ་རྗེ་འཆང་། ཞེས་པ་སྟོན་པ་ལ་བོས་ནས། རྒྱུད་དག་པའི་རྡོ་རྗེ་འཆང་། བདག་གིས་ཆོས་ཀུན་རང་བཞིན་གྱིས་འོད་གསལ་བའི་ངོ་བོ། ལས་དང་ཉོན་མོངས་པ་དང་ཤེས་བྱའི་དྲི་མ་གསུམ་མེད་པའི་ཆོས་ཀྱི་མིག་ཡིད་དཔྱོད་དང་བྲལ་བ་རྙེད་ནས། ཚིག་གི་སྤྲོས་པ་དང་བྲལ་བའི་དོན་མ་རིག་པ་ཀ་ནས་དག་པ་ཆེན་པོའི་གནས་ལུགས། ཆོས་ཀུན་གྱི་ཐུགས་རྩད་ནས་འདིར་ཆོད་པ་ལགས་ཏེ། བདག་ལ་ཚིག་གིས་དགོས་པ་མ་མཆིས་ཀྱང་མ་འོངས་པའི་སེམས་ཅན་ཐམས་ཅད་ལ་བདག་གི་སྙིང་རྗེ་ཆེན་པོས་ཀུན་ནས་བསླང་སྟེ་གཞན་དོན་རྫོགས་པར་བགྱི་བར་འཚལ་བས། དེ་ཀུན་གྱི་སྙིང་ནས་བཟུང་བའི་ཕྱིར། ཤེས་རབ་རང་བྱུང་གི་སྒྲོན་མ་གོང་དུ་གསུངས་པ་དེ་ལྟར་ན ། འདིའི་ལེའུ་དང་པོའི་མདོར་བསྟན་གྱི་སྐབས་སུ་ཐིག་ལེ་སྟོང་པའི་སྒྲོན་མ་ཉིད་ཅེས་སྟོན་པས་གོང་དུ་མདོར་བསྡུས་པའི་ཚིག་གསུངས་པའི་དོན་ཏེ། བདག་ཞུ་བས་འདི་ཡི་ངོ་བོ་ནི་ཅི་ལྟ་བུ་ལགས། འདི་དག་འོག་ནས་སྟོན་པས་ལགས་ཀུན་ལ་སྦྱར་རོ། །འདི་ཀུན་སེམས་ཅན་ཀུན་གྱི་དོན་དུ། རྡོ་རྗེ་འཆང་ལ་བདག་ཉན་པར་འཚལ་བས་གསུང་པར་ཞུ་ཞེས་དྲི་བ་མདོར་བསྟན་པའོ། །ད་ནི་ལན་རྒྱས་པར་བསྟན་པ་ལ་བཅུ་གཉིས་ཡོད་པ་ལས་དང་པོ་ཐིག་ལེ་སྟོང་པའི་སྒྲོན་མའི་ངོ་བོ་བསྟན་ཏེ། དེ་ནས་ནི་ཞུས་མ་ཐག་པའི་དེ་ནས་རྡོ་རྗེ་འཆང་ནི་སྟོན་པའི་མཚན། དེ་ཡང་སྟོན་པ་དེ་སྔོན་དུ་སངས་རྒྱ་བའི་ཚེ་རང་བཞིན་རྫོགས་པ་ཆེན་པོའི་དོན་བྱ་བྱེད་དང་འབད་རྩོལ་མེད་པར། ཉོན་མོངས་པ་ཐམས་ཅད་རང་བཞིན་དུ་དྲི་མ་མེད་པ་དག་ནས་སངས་རྒྱས་པ་ཆ ེན་པོ་དེས། ཡང་བསྡུས་པ་ལ་འདི་སྐད་ཅེས་ཐིག་ལེ་སྟོང་པའི་སྒྲོན་མ་གཞུང་ཡི་གེ་དང་ཚིག་ཏུ་གསུངས་སོ། །ཀྱེ་མ་རྒྱུད་དག་རྡོ་རྗེ་འཆང་ཞེས་སྡུད་པ་པོ་ལ་བོས་ནས། ཁྱེད་ཀྱི་ཁྱོད་རང་གིས་ནི་སྔར་ཆོས་ཐམས་ཅད་དུ་མ་རོ་གཅིག་ཏུ་རྩད་ནས་ཆོད་པ་ཀ་དག་ཆེན་པོའི་གཞི་སྟེ། ཆོས་ཐམས་ཅད་ཀྱི་མིག་དྲི་མ་མེད་ཅིང་རྡུལ་དང་བྲལ་བ་རྙེད་བཞིན་དུ། མ་འོངས་པའི་སེམས་ཅན་གྱི་དོན་དུ་ང་ལ་ཞུས་པ་དེ་ལེགས་སོ། །ཞེས་གསུངས་ནས་ང་ཡིས་ཐིག་ལེ་སྟོང་པའི་སྒྲོན་མ་ལ་ཁྱོད་ཀྱིས་འདྲི་བ་བཅུ་གཉིས་དྲིས་པའི་ལན་ཁྱོད་ལ་རྒྱས་པར་བསྟན་པར་བྱ་ཡིས། ཁྱོད་ཀྱི་ཤེས་རབ་ཀྱི་དབང་པོ་ཕྱིན་ཅི་མ་ལོག་པས་འདི་ལྟར་མ་འོངས་པའི་སེམས་ཅན་རང་བཞིན་རྫོགས་པ་ཆེན་པོའི་ལམ་ལ་མོས་ཤིང་ཡིད་ཆེས་པ་རྣམས་ཀྱི་དོན་དུ་ཡང་དག་པར། ངས་བསྟན་པའི་ཚིག་འདི་ཀུན་གོང་འོག་མ་ནོར་བར་ཁྱོད་ཀྱིས་ཡིད་ལ་ཟུངས་ཤིག་ཅེས་སྡུད་པ་པོ་ལ་གདམས་པའོ། །ཐིག་ནི་ལམ་མི་འགྱུར་བ་དྲང་པོ་ལ། ལེ་བརྡལ་བ་ཀུན་ཁྱབ་ཀྱི་རིག་པ་ཡུལ་ཀུན་ལ་ཤར་བའོ། །སྟོང་པ་ནི་དེ་ལྟར་ཤར་ཀྱང་དངོས་པོ་རྫས་སུ་གྲུབ་པ་མེད་པའོ། །སྒྲོན་མས་ནི་འཁོར་བའི་མུན་པ་བསལ་ནས་འདས་པའི་སྣང་བ་སྟོན་པར་བྱེད་པའོ། །དེ་ཡང་ཡིད་དཔྱོད་མ་ཡིན་པས། ཆོས་སྤྱི་ཡི་མཚན་ཉིད་ཀྱིས་གཞན་གྱི་སྤྲོས་པ་གཅོད་པ་དང་། རང་གི་མཚན་ཉིད་ཀྱིས་ནང་གི་སྤྲོས་པ་བཅད་ནས་རང་དུ་ངོ་ཤེས་པ་རྣམས་དང་། འདི་ཉིད་ལ་མོས་པ་ཀུན་གྱི་ཡིད་ཆེས་བསྐྱེད་པ་ཡིན་པས། སྒྲོན་མ་འདི་ཉིད་ཀྱི་མན་ངག་ཟབ་ཅིང་ཕྱིན་ཅི་མ་ལོག་པར་སྐལ་པ་དང་ལྡན་པ་སུ་ཡིས་ཤེས་པ་དེས། སྟོང་པ་ཐིག་ལེ་ཉག་གཅིག་གི་སྐུ་ལ་ནམ་མཁའི་ངང་དུ་ལོངས་སྤྱོད་པས། ཉིད་ལྟ་བ་ལ་གོམས་པ་སྟེ་རིག་པ་མངོན་སུམ་གྱི་སྣང་བ་དང་། ཉམས་གོང་འཕེལ་གྱི་སྣང་བ་དང་། རིག་པ་ཚད་ཕེབས་ཀྱི་སྣང་བ་རྣམས་ཀྱིས་རང་བཞིན་དབང་པོའི་སྤྱོད་ཡུལ་དུ་གཏན་ལ་ཕེབས་པས། འབྲས་བུ་འདི་ཉིད་ལ་ཐོབ་པའོ། །དེ་ལྟར་ཐོབ་པའི་ཕྱིར་ན་ཐིག་ལེ་སྟོང་པའོ། །འདིའི་ངོ་བོ་ནི། དུ་མའི་ཐ་སྙད་ལས་འདས་ཤིང་རྒྱུན་རིང་ལ་ཟབ་པས་ཉག །གྲངས་ཀྱི་མཐའ་རྣམ་པར་བཅད་ནས་གཅིག་ཏུ་གནས་པ། འདི་ལ་མ་རིག་པའི་ཆ་དང་། ཡུལ་དུ་མ་ལ་རྐྱེན་པའི་ཉོན་མོངས་པའི་ཆ་ཡོད་མི་སྲིད། ཡིད་དཔྱོད་འཛིན་པའི་ཐེག་པ་རྣམས་ཀྱིས་མཐོང་བ་མེད་པས་ངོ་བོ་ཕྲ་བ་ཡིན་ལ། འདི་ཉིད་ཚིག་གིས་གཏན་ལ་མི་ཕེབས་པས་གྲུབ་མཐའི་སྤྲོས་པ་དང་། རྒྱུད་ལུང་གི་ཚིག་གི་སྤྲོས་པ་ཐམས་ཅད་དང་བྲལ་བ་ནི་ངོ་བོ། འོ་ན་སྤྲོས་བྲལ་སྟོང་པ་ཡིན་ནམ་ཞེ་ན་མ་ཡིན་ཏེ། ལམ་གྱི་དུས་ན་ཆད་པ་སྟོང་པའི་མུ་དང་། སྤྲོས་བྲལ་དང་། ཉི་ཚེ་བ་དང་། རབ་ཏུ་མི་གནས་པ་དང་། ཅི་ཡང་མ་ཡིན་པ་དང་། མེད་པ་སྟོང་པའི་མུ་དང་བྲལ་ཏེ། རང་རིག་གིས་གསལ་ལ། ཀུན་གྱི་སྤྱོད་ཡུལ་མ་ཡིན་པས་ཆེན་པོར་གནས་ཏེ། དེའི་རང་བཞིན་ནི་རང་གི་རང་འོད་ལྔར་གསལ། གསལ་བ་དེ་ཡང་རིས་ཅན་མ་ཡིན་པས་ཐམས་ཅད་མཉམ་པ་ཉིད་དུ་གནས་པས། དེ་ལ་རྣམ་རྟོག་གནས་མི་སྲིད་པས། བྱུང་ཚོར་གང་ལ་ཡང་མི་རྟོག །ཡིད་སྤྱོད་ཀྱི་ཚིག་གི་སྤྲོས་པ་དང་བྲལ་བས། དབྱིངས་གཅིག་ཏུ་རྫོགས་པས་ཏེ། དེའི་ངོ་བོ་ཐིག་ལེ་ཟླུམ་པོར་གནས་ཏེ། དབྱིབས་མཚོན་ལ། དེའི་ཁ་དོག་ཅི་ཞེ་ན། བྱ་རྩལ་དང་རྩོལ་བསྒྲུབ་ཀྱིས་མ་བསྐུར་བར། སྤྲོས་བཅས་བསྐུར་རྒྱུ་དང་བཅས་པ་དང་། སྤྲོས་མེད་མཚོན་པའི་རྫས་ཙམ་ལ་བརྟེན་པ་དང་། ཤིན་ཏུ་སྤྲོས་མེད་བརྡ་ལ་བརྟེན་པ་དང་། རབ་ཏུ་སྤྲོས་པ་མེད་པའི་དབང་རང་ངོ་ལ་བརྟེན་པའི་འདི་ཉིད་རང་གི་དབང་བཞི་གཞི་ལ་རྫོགས་པའི་ཕྱིར་ན། ཁ་དོག་དམར་པོ་ཤས་ཆེ་བ་གཞན་ལས་ལོག་ནས་རང་ལ་གསལ་བར་སྣང་བ་ནི། གློ་བུར་དུ་སྐྱེས་པ་མ་ཡིན་ཏེ། ཡེ་ནས་ཆོས་ཉིད་ཀྱི་རང་མདངས་སུ་གནས་པའོ། །དེ་ཉིད་ལ་སྒྲིབ་པ་གསུམ་གྱི་དྲི་མ་མེད་དེ། ལས་ཀྱི་སྒྲིབ་པས་སྒྲིབ་མ་མྱོང་པས་ལས་ཀྱི་རྣམ་སྨིན་གྱིས་ཕྱིས་སྒྲིབ་མི་སྲིད། ཉོན་མོངས་པའི་སྒྲིབ་པ་མེད་པས་ཡུལ་རྐྱེན་གང་ལ་ཡང་མི་འཇུག་ཅིང་། དེ་ཉིད་རང་རྒྱུ་རྐྱེན་གྱིས་མ་བསྐྱེད་པས། ཤེས་བྱའི་སྒྲིབ་པ་ཡོད་མི་སྲིད་དེ། རང་གི་གྲུབ་པའི་མཐའ་ཙམ་ལ་ཡང་མི་གནས། དེ་བཞིན་དུ་འབྱུང་བ་ཕྲ་རགས་ཕྲ་བ་རྡུལ་ཕྲ་རབ་དང་། རགས་པ་ས་རྡོ་དང་རི་བྲག་དང་། མེ་རླུང་ཆུའི་དྲི་མ་མེད་ཅིང་གནས་པ་ནི། གློ་བུར་མ་ཡིན་པར་ངོ་བོ་ཀ་དག་པའི་ཡེ་ཤེས་སུ་ཡེ་ནས་བཞུགས་པའོ། །དེ་ཉིད་ལ་ཐེག་པ་ཐུན་མོང་པའི་ཆོས་ཉིད་ལྟར། བདག་ཉིད་ཀྱིས་བདག་ཉིད་འཆིང་བའི་ཉོན་མོངས་པའི་འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་རྣམས་དང་ཡེ་ནས་བྲལ་བའོ། །དེ་ལྟར་ནས་སུས་ཀྱང་བྱས་པ་མེད་པས་རང་གིས་རང་གསལ་ཏེ། རྣམ་རྟོག་གི་བག་ཆགས་སྔ་ཕྱི་དང་ཉོན་མོངས་པའི་དྲི་མ་ལས་འདས་པས་གསལ་བ་ཡང་ན་ལམ་གྱི་སྣང་བ་མ་རྫོགས་ཀྱི་བར་ལ་ཡེ་ཤེས་ལྔའི་རང་མདངས་འོད་ལྔར་གསལ་བ་ལ་བྱ། གསལ་བ་དེ་མཚན་མ་རིས་ཅན་དུ་མ་སོང་སྟེ། རང་གི་ངོ་བོ་ཉིད་ཀྱིས་སྟོང་པ་ཕྱོགས་གང་དུ་ཡང་མ་ལྷུང་བས་རིས་མེད་ལ། རྒྱ་གར་ཡང་མ་ཆད་པས་མཉམ་པ་ཆེན་པོའི་རང་བཞིན་དུ་གནས་པ་ནི། འདི་ནི་སྒྲོན་མ་དེའི་ངོ་བོར་རེས་ཤིག་ཙམ་དུ་འདོད་པའོ། །ཞེས་ངོ་བོ་བསྟན་ནས། ༈ ད་ནི་དྲི་བ་གཉིས་པའི་ལན་གྱིས་རྒྱས་པར་བཤད་པ་ནི། ཐིག་ནི་མི་འགྱུར་དྲང་པོ་ལ་ཞེས་པ་ལ་སོགས་པས་བསྟན་ཏེ། ཐིག་ནི་རྩ་བ། མི་འགྱུར་བ་ནི་འགྱུར་བ་རྣམ་པར་བཅད་པའི་ངོས་ནས་མི་འགྱུར་བར་གནས་པ་དང་། མི་འགྱུར་བའི་ཆོས་ཉིད་རང་གི་ངོ་བོ། འགྱུར་བ་ནི་རང་བཞིན་གྱིས་འགྱུར་བ་ནི་ནམ་མཁའི་ཆོ་འཕྲུལ། དུས་ཀྱིས་འགྱུར་བ་ནི་ལོ་ཐོག་དང་རྩི་ཐོག་ལ་སོགས་པ། བསྒྱུར་བས་འགྱུ་བ་བྱས་པའི་ཆོས་མི་རྟག་ཅིང་འགྱུར་བ་རྣམས། བློས་བསྒྱུར་བ་ནི་ཡིད་དཔྱོད་ཀྱི་ལྟ་སྒོམ་སྟེ་ཐེག་པ་ཐུན་མོང་བའི་འདོད་པ་རྣམས། རང་གི་རང་ངོས་བསྒྱུར་བ་ནི་འཁོར་བ་ཉིད་ཡང་དག་ཏུ་འགྱུར་བའོ། །དེ་ལས་ནི་འདི་འགྱུར་བ་བཞི་ལས་ལོག་ནས། མི་འགྱུར་བར་གནས་ཏེ། འདི་ལ་རང་བཞིན་གྱི་འགྱུར་བ་ནམ་མཁའི་ཆོ་འཕྲུལ་ལྟ་བུ་མ་ཡིན་ཞིང་མེད་པས། ཤེས་པ་དྲན་པ་བློ། འཛིན་པ་གློ་བུར་བ་མེད་པས་འགྱུར་མི་སྲིད་དོ། །དུས་གསུམ་མཉམ་པ་ཉིད་དུ་གནས་པར་དུས་ཀྱིས་ཀྱང་འགྱུར་མི་སྲིད། བྱ་བའི་རྒྱུ་མེད་པས་བྱ་བའི་རྐྱེན་བྱས་པ་འགྱུར་མི་སྲིད། འདི་ཉིད་མངོན་གསུམ་དུ་སྣང་བ་བློ་བསྒྱུར་དུ་བཏུབ་སྲིད་པས་མི་འགྱུར་རོ། །འདི་ནི་འགྱུར་བའི་ཕྱོགས་ནས་བལྟས་ན་རང་གི་ངོས་འགྱུར་བ་ཙམ་དུ་བཏུབ་ལ། དེའི་ཕྱིར་ན་བློས་མ་བསྒྱུར་སྣང་བས་མ་བཅད་པ་ཞེས་སོ། །དེ་ཡང་ངོ་བོས་མི་འགྱུར་ཏེ། རིག་སྟོང་དབྱེར་མེད་ལ་རང་བཞིན་གྱིས་མི་འགྱུར་ཏེ་སྣང་གསལ་དབྱེར་མེད། དེ་ཆོས་ཉིད་ཀྱིས་མི་འགྱུར་ཏེ། ཡིད་དཔྱོད་དང་ཐེ་ཚོམ་དང་བྲལ་བའོ། །དྲང་པོ་ནི་ལམ་སྟེ། གནས་ལུགས་ཚིག་གིས་མ་བསྒྱུར་བས། རང་ངོ་དྲང་པོར་གནས་པས་བཅོས་མ་ལས་གྲོལ། ལམ་དྲན་རྟོག་གིས་མ་བསྒྱུར་བས། ཐད་ཀ་དྲང་པོར་ཉེ་རིང་མེད་པར་གནས་པས་གོལ་ས་ལས་གྲོལ་ལ། རྟོགས་པ་ཡིད་ཀྱིས་མ་བསྒྱུར་བར་གནས་སུ་རང་གྲོལ་བས། ལམ་ལ་ཉེ་རིང་མེད་པས་སྣང་བས་རང་རྫོགས་ལམ་ཞེས་བྱའོ། །དེའི་ཕྱིར་ན་མི་འགྱུར་བས་གཞི། དྲང་པོར་གནས་ཤིང་འཁྱོགས་མེད་པས་ལམ་སྟེ། འདི་ལྟར་གཞི་ལམ་གཉིས་རྫོགས་ཆེན་བྱ་བྲལ་ཀློང་ཆེན་གྱི་ངང་ལས་བྱུང་བའོ། །དེ་ལྟ་བུ་དེ་གློ་བུར་བ་ཡིན་ནམ་བྱས་པ་ལ་མ་ཡིན་ཏེ། གདོད་མ་ནས་འདུས་མ་བྱས་པས་གཞི་ཡིན་པས་ད་སྐྱེ་འཇིག་དང་བྲལ། འཕྲལ་དུ་བཅོས་པ་མེད་པས་ལམ་ཡིན་པ་དང་ཉེ་རིང་མེད་པའི་ཕྱིར། ཡེ་ནས་གང་གིས་ཀྱང་མ་བསྒྱུར་བ་གཞི་ཡིན་ལ། ཡེ་ནས་སུས་ཀྱང་མ་བཅོས་པ་ཉིད་ལམ་ཡིན་པས། དེ་ལྟར་འགྱུར་བ་དང་བཅོས་མ་མེད་ཅིང་དེ་གཉིས་དང་བྲལ་བ་ནི་གཞི་ལམ་འདུ་འབྲལ་མེད་པའོ། །ལེ་ནི་རྩལ་བརྡལ་བ་ནི། རང་བཞིན་གྱིས་བརྡལ་བས་བཅོས་མ་ལས་གྲོལ་ལ། རང་ལུགས་སུ་བརྡལ་བས་འཛིན་པ་ལས་གྲོལ་ལ། རང་སྣང་དུ་བརྡལ་བས་ལྟར་སྣང་ལས་གྲོལ་ལ། རང་གྲོལ་དུ་བརྡལ་བས་ལྟོས་པ་ལས་གྲོལ་ལ། རང་དག་ཏུ་བརྡལ་བས་དྲི་མ་ལས་གྲོལ་ལོ། །དེ་ལྟར་སྒྲོན་མའི་སྣང་བས་ཁྱབ་བརྡལ་བས་ན་རང་བཞིན་རྫོགས་པ་ཆེན་པོའི་འབྲས་བུ་ཉིད་གཞན་ལྟོས་དང་བྲལ་བས། རེ་དོགས་དང་སྨོན་ལམ་ལས་འདས་པས་ན། འགྲོ་དྲུག་འཁྲུལ་པའི་སྣང་བ་དང་། བདེ་བར་གཤེགས་པའི་དང་། རང་བཞིན་གྱི་དང་། མན་ངག་གནས་ཀྱི་སྣང་བ་རྣམས་ནི་ཇི་ལྟར་སྣང་། ཅིར་ཤར་ཡང་སོ་སོ་གོ་གོ་གནས་གནས་སུ་རང་སར་མ་རྫོགས་པ་མེད་པས་འབྲས་བུ་ཡིན། དེ་ལྟར་ཡིན་པར་ཅིས་ཤེས་ན་དྲན་པར་མེད་པས་བསྒྱུར་དུ་མི་གཏུབ། དྲན་མེད་དུ་མེད་པས་རང་གསལ། སྐྱེ་མེད་དུ་མེད་པས་རང་རྫོགས་མཐའ་གྲོལ་དུ་གནས་པས་ཀ་དག་པའོ། །སྟོང་པས་ནི་རྩ་བ། དངོས་པོ་ནི་སྣང་བའི་དངོས་པོ་དང་། སྟོང་པའི་གཉིས་སོ། །སྣང་བ་ནི་རགས་པ་རྫས་གྲུབ་ཀྱི་དངོས་པོ་དང་། གཅོད་བྱེད་འགྱུ་བའི་དངོས་པོའོ། །རགས་པ་རྫས་གྲུབ་ནི། འགྲོ་དྲུག་གི་སྣང་བ་སྟེ། ས་དང་ཆུ་དང་མེ་དང་རླུང་གི་སྣང་བས་ཏེ་འགྲོ་བ་དྲུག་སོ་སོ་ལ་སྣང་ལུགས་རེ་རེས་སྣང་བའོ། །གཅོད་བྱེད་འགྱུར་བའི་སྣང་བ་ནི། མིག་གི་འགྱུ་བ་ལས་གཟུགས་ལ་དངོས་པོར་འཛིན་པ་དང་། དེ་བཞིན་རྣ་བའི་འགྱུ་བས་སྒྲ་ལ་དངོས་པོར་འཛིན་པ་ལ་སོགས་པའོ། །སྟོང་པའི་སྣང་བ་ནི་ལྟ་བའི་འདོད་པ་རྣམས་ཏེ། གལ་ཏེ་ལྟ་བ་ཉིད་གསལ་བར་འདོད་ན་ཡང་འདི་ནི་སེམས་ཙམ་པ་སེམས་ཀྱི་དངོས་པོ་དོན་དམ་པར་འདོད་པ་དང་ཁྱད་པར་མེད་པས་ཁམས་གསུམ་རང་རྒྱུད་དུ་འཛིན་པའི་དངོས་པོ་ཡིན་ཏེ་འདིས་ནི་ཁམས་གསུམ་ལས་འདའ་མི་སྲིད། གལ་ཏེ་སྟོང་པར་འདོད་ན་ཡང་དབུ་མ་ཁས་ལེན་དང་བྲལ་བར་འདོད་ཅིང་རིག་པའི་ཤེས་པའི་དངོས་པོ་གཙོ་བོ་ལས་རྟོགས་པ་ཁྱད་པར་མེད་དེ་དེ་ཡང་སྟོང་པར་ཡོད་དོ། །སྙམ་ན་ཡོད་མིན་མེད་མིན་གྱི་སྐྱེ་མཆེད་ཀྱི་དངོས་པོ་ལས་འགྲོ་ས་མེད་དེ། དེ་ཡང་སྟོང་པར་ཁས་བླངས་ཀྱང་ཡོད་པ་མཐར་འཛིན་གྱི་དངོས་པོ་ཡིན་ལ་གལ་ཏེ་ཅི་ཡང་མེད་ཅིའི་ངོ་བོར་ཡང་གྲུབ་པ་མེད་སྙམ་ན་ནི་ཅི་ཡང་མེད་པའི་སྐྱེ་མཆེད་ཀྱི་དངོས་པོ་ལ་འགྲོ་ས་མེད་དེ། མེད་པ་འདབ་འབྱོར་གྱི་དངོས་པོ་ཞེས་བྱ་བ་ཡིན་ནོ། །མེད་པ་ཙམ་ཡིན་ནོ་སྙམ་ན་ཡང་གོང་མར་གོལ་ལོ། །གལ་ཏེ་ཀུན་རྫོབ་རང་སྣང་གི་དངོས་པོའི་རྣམ་པ་འདི་ཉིད་རྣམ་པར་ཤེས་པ་ཙམ་མམ། ལྟར་སྣང་ཡིན་ཏེ་དོན་དམ་ལ་གྲུབ་པ་གང་ཡང་མེད་དོ་སྙམ་ན་ཡང་རྣམ་ཤེས་མཐའ་ཡས་པའི་དངོས་པོས་ཏེ་འདི་ཡང་དེ་ཉིད་ལས་འགྲོ་ས་མེད་དོ། །གལ་ཏེ་ཆོས་ཐམས་ཅད་སྟོང་པ་ངོས་བཟུང་དང་བྲལ་བ་ནམ་མཁའི་དཀྱིལ་ལྟ་བུ་ཡིན་ནོ་སྙམ་ན་ཡང་འདི་ནི་སེམས་ཉིད་མཐའ་ཡས་པའི་དངོས་པོ་སྟེ་ནམ་མཁའ་མཐའ་ཡས་སྐྱེ་མཆེད་ལས་འགྲོ་ས་མེད་དོ། །དེ་བཞིན་དུ་སྒོམ་པའི་ཚེ་ན་བདེ་བ་དང་སྟོང་པར་འདོད་ན་ཡང་། མཐར་འཛིན་གྱི་དངོས་པོ། གསལ་བ་སྟོང་པར་འདོད་ན་ཡང་མཚན་མའི་དངོས་པོ། རིག་པ་སྟོང་པར་འདོད་ན་ཡང་ཤེས་བྱེད་ཀྱི་དངོས་པོ། མཉམ་པ་ཉིད་སྟོང་པར་འདོད་ན་ཡང་མཐའ་བཀག་དངོས་པོ། གཉིས་མེད་སྟོང་པར་འདོད་ན་ཡང་སྙམ་བྱེད་ཀྱི་དངོས་པོ། དེ་ཀུན་དངོས་པོའི་ཆོས་ཏེ་སངས་རྒྱ་བའི་གེགས་བྱེད་པ་ཡིན་ནོ། །དེ་ལྟར་དེ་དག་རྣམས་དངོས་པོའི་རྣམ་པ་དེ་ཀུན་ལ་འཛིན་པའི་ཤེས་པའི་ཆ་རྟ་རྔ་ལ་བརྒྱའི་ཆ་ཙམ་ལས་མེད་ཀྱང་ཁམས་གསུམ་དུ་འཁྲིད་པར་བྱེད་པའི་ཆོས་སོ། །དངོས་པོ་དེ་དག་ལས་ལོག་པའི་སྟོང་པ་ཡིན་ཏེ། སྟོང་པའི་ཡང་གྲངས་འཛིན་རིག་པའི་སྟོང་པ་མ་ཡིན། རྒྱུན་ཆད་སྟོང་པ་མ་ཡིན། མི་གནས་པའི་སྟོང་པ་མ་ཡིན། དེ་གསུམ་ཡིན་ན་ཕྱི་སྟོང་པ་ལ་སོགས་པའི་སྟོང་པ་ཉིད་གྲངས་ངེས་པར་འདོད་ན་གཅིག་དང་དུ་མ་དང་བཅས་པར་འགྱུར་ལ། རྒྱུན་ཆད་ཡིན་ན་དོན་བྱེད་མི་ནུས་ལ། ཐ་མ་ལྟར་ན་སྤངས་པའི་སྟོང་པས་ཏེ་འདི་དག་གི་སྤངས་པས་སྤོངས་མི་སྲིད་དོ། །འོ་ན་འདི་ནི་ཚིག་ཏུ་བཏགས་པ་ཡེ་དག་སྟོང་པ་ཉིད་ཡིན་པས་གྲུབ་མཐའི་ཚིག་གིས་གསལ་མི་དགོས་པས། ཉོན་མོངས་པ་གནས་མི་སྲིད་པས་སྤང་རྒྱུ་གང་ཡང་མེད་ལ། བླང་རྒྱུ་ཅི་ཡང་མེད་དོ། །རང་རྫོགས་སྟོང་པ་ཡིན་པས་ལྟ་སྒོམ་སྤྱོད་པའི་བཅོས་མ་ལ་མི་གནས་པའོ། །རང་གྲོལ་སྟོང་པ་ཡིན་པས་བློས་བཏགས་པའི་གྲུབ་པའི་མཐའ་ཐམས་ཅད་ལས་གྲོལ་བའོ། །དེ་ལྟར་ན་ཡུལ་ལ་ནི་གོང་མའི་སྟོང་པའི་ཡུལ་གསུམ་དང་། དངོས་པོའི་ཡུལ་དེ་དག་ལ་ཞེན་པ་ནི་རང་གི་འདོད་པ་བློ་ནི་ཚིག་དང་ཡི་གེ་དང་སྤྲོས་པ་དང་། མཚན་མ་དང་། ཡིན་པ་མིན་པ་དང་། ཐེ་ཚོམ་དང་། ཡིད་དཔྱོད་དང་། མདོར་ན་འཁོར་འདས་ཀྱི་འདོད་པ་ཡོད་ཀྱི་བར་ཏེ། དེ་དག་ནམ་འགགས་པ་ན་མཐར་གྲོལ་ཡོངས་རྫོགས་ཆེན་པོ་ཡིན་པས་ན་གོང་མ་རྣམས་བཀག་པས། རང་བཞིན་ནི་མ་བཅོས་པ་སྟེ། འདི་ལ་གྲུབ་མཐས་བཅོས་པ་དང་། ལྟ་སྒོམ་གྱིས་བཅོས་སུ་མེད་པའི་ཕྱིར་ན། ཡེ་དག་དང་། རང་རྫོགས་དང་། རང་གྲོལ་སྟོང་པ་ཆེན་པོར་གནས་པས། ཞེན་པ་རང་རྒྱུད་དུ་འཛིན་པའི་གསལ་བར་འདོད་པས་ན་ཁམས་གསུམ་དུ་འཁྲིད་པར་བྱེད་པས་ན། སྟོང་པ་ཉིད་རང་གི་ངོ་བོ་ལ་ཞེན་པས་རང་རྒྱུད་པའི་བློ་རང་གི་གྲུབ་པའི་མཐའི་འདོད་པ་ཙམ་ཡང་མི་སྣང་ངོ་། །དངོས་པོའི་གཤིས་ལ་དེ་ལྟར་གནས་ཀྱང་གང་ཟག་ལམ་པའི་སྣང་བ་ལ་སྒྲོན་མས་ནི་རྩ་བ། འོད་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། མཐིང་ག་ལྔས་ཆོས་ཉིད་ཀྱི་ལམ་ལ་ཡོན་ཏན་གྱི་རྩལ་མ་འགགས་པར་ལམ་གྱི་སྣང་བར་ཤར་བ་ནི། བྱས་ཏེ་ཞེས་པས་འདི་ལམ་སྣང་དུ་གསལ་བར་བསྟན་ཏེ། བླ་མའི་མན་ངག་ལ་བརྟེན་པའི་ལྟ་སྒོམ་གྱི་ལམ་སྣང་དུ་གསལ་བར་བྱ་སྟེ། དེ་ཡང་གཞན་ལས་བྱུང་བ་ནི་མ་ཡིན་ཏེ། རང་གི་ངོ་བོ་འོད་ལྔར་གསལ་བ་ཡིན་པས། འདི་ཡང་སྣང་བ་རིས་མེད་པར་སྣང་གི་འཇའ་ཚོན་ལྟ་བུ་མ་ཡིན་ཏེ། རང་གི་རིག་པ་ཉིད་དང་བཅས་ནས་གནས་པའོ། །དེ་ལྟར་གཞི་དང་ལམ་རྣམ་པ་གཉིས་སུ་བསྟན་པ་འདི་རྣམས་ཀྱང་ཐིག་ལེ་སྟོང་པའི་སྒྲོན་མའི་ངེས་པའི་ཚིག་བསྟན་པ་ཡིན་ནོ། ༈ །ད་ནི་དྲིས་ལན་གསུམ་པ་དེའི་དབྱེ་བ་བསྟན་པ་ནི། དབྱེ་བ་ཉིད་ནི་རྣམ་པ་ལྔ་ཞེས་པ་ལ་སོགས་པས་བསྟན་ཏེ། སྒྲོན་མ་འདི་ཕྱེ་ན་གཞི་གནས་རང་གི་ཐིག་ལེ་དང་། ལུས་གནས་རྩའི་ཐིག་ལེ་དང་། ཀུན་རྫོབ་རྒྱུའི་ཐིག་ལེ་དང་། དོན་དམ་སྤྲོས་པ་མེད་པའི་ཐིག་ལེ་དང་། རང་བྱུང་འབྲས་བུའི་ཐིག་ལེ་དང་རྣམ་པ་ལྔའོ། །དེ་ལ་གཞི་ནི་དངོས་པོ་གཤིས་ཀྱི་འདུག་ཚུལ། སྤྲོས་པ་གང་གིས་ཀྱང་མ་སྤྲོས་པས་འཛིན་པ་མེད་ལ། ཞེ་འདོད་ཅི་ཡང་མེད་པས་ཕྱོགས་གང་དུ་ཡང་མ་ལྷུང་། ཡོན་ཏན་རང་སྣང་དུ་རྫོགས་པས་ལྷུན་གྲུབ་ཏུ་སྣང་སྟེ། སྐྱོན་གྱིས་གོས་པ་མེད་པས་ཀ་དག་གང་ལ་ཡང་རེ་ཞིང་ལྟོས་པ་མེད་པས་ཟང་ཐལ་བའོ། །དེ་ལྟ་བུའི་གཞི་ལས་ལྷུན་གྲུབ་ཀྱི་གཅོད་བྱེད་ཕྱིར་ཤོར་བ་ལས་སྣང་ཆ་སྣ་ཚོགས་པར་འགྱུར་ཏེ། དེ་ལས་རྒྱུ་བདག་ཉིད་གཅིག་པའི་མ་རིག་པས་འཁྲུལ་པའི་རྒྱུ་བྱས་ལྷན་ཅིག་བྱེད་པའི་མ་རིག་པས་འཁྲུལ་པའི་ཐ་དད་པར་བྱས། ཀུན་ཏུ་བརྟགས་པའི་མ་རིག་པས་ཡུལ་དང་དམིགས་པ་དུ་མ་བཅད། དེ་ལྟར་གསུམ་འདུས་པ་ལས་ཡིད་དྲུག་ཏུ་བྱུང་། ཡིད་དྲུག་གིས་བྱུང་ཚོར་མ་འགགས་པ་ལ་རྐྱེན་བཞིར་བྱུང་། དེ་ལྟར་རྒྱུ་མ་རིག་པ་ལ་གསུམ། མཚམས་ཡིད་དྲུག་གིས་སྐྱར་ལས་རྐྱེན་བཞིས་བྱས་པས་འཁྲུལ་པའི་ལས་ཀྱི་ལེན་ནོ། །སྐྱེ་བ་བཞིའི་ལུས་ཐ་དད་པར་བྱུང་བའོ། །དེ་ལྟར་འཁྲུལ་པ་བག་ཆགས་ཀྱི་ལུས་སུ་བྱུང་བའོ། །དེ་ལ་གང་གནས་ན་སེམས་ཅན་རྣམས་ཀྱི་རང་རང་གི་ལུས་སྤྱི་ལ་ཁྱབ་པར་ཀུན་ཏུ་བཟང་པོའི་ཐིག་ལེ་བཟང་ངན་ཆེ་ཆུང་མེད་པར་ཁྱབ་པ་དང་། ཆོས་ཉིད་ཀྱི་ཐིག་ལེ་རང་བཞིན་མ་བཅོས་པ་དང་། དབྱིངས་ཀྱི་ཐིག་ལེ་ཡངས་དོག་མེད་པ་དང་། དབྱིངས་རྣམ་པར་དག་པའི་ཐིག་ལེ་དྲི་མ་མེད་པ་དང་། ཡེ་ཤེས་ཀྱི་ཐིག་ལེ་གསལ་འགྲིབ་མེད་པ་དང་། ཡེ་ཤེས་ཆེན་པོའི་ཐིག་ལེ་ཤར་ནུབ་མེད་པ་ཡིས་ལུས་ཀུན་ལ་ཁྱད་པར་གནས་པས་ན་རང་བཞིན་གྱི་གཞི་ཞེས་བྱའོ། །དེ་ལྟར་ཐིག་ལེ་དྲུག་གིས་འདི་ལྟར་སྣང་བའི་ཆོས་དང་། སྲིད་པ་ནི་མི་སྲིད་པའི་ནམ་མཁའ་དང་། མེད་པའི་སྲིད་པ་ནམ་མཁའི་མེ་ཏོག་ལ་སོགས་པ། འགྱུར་བའི་སྲིད་པ་ལྷ། ལས་ཀྱི་སྲིད་པ་འགྲོ་བ་དྲུག་དང་། ཡེ་ནས་སྲིད་པ་ཆོས་ཉིད་དོ། །སྲིད་པ་འཁོར་བ། སྣང་བ་འདས་པའི་ཆོས་རྣམས་གཉིས་མེད་གཅིག་ཏུ་ཡེ་ནས་བཟླུམས་ཏེ་བསྡོམས་ནས་གནས་པ་ལ་ད་སུས་ཀྱང་ཅི་ཡང་བཅོས་སུ་མེད་པའོ། །དེ་ལྟར་ཐིག་ལེ་དྲུག་ནི་ལུས་སྤྱི་ལ་ཁྱབ་ཅིང་ཆོས་ཉིད་དུ་གནས་ལ། ཁྱད་པར་དུ་ལུས་ཀྱི་རྩ་རྣམས་ཀྱི་ནང་ནས་འགྱུས་པའི་ཚེ་ན་ལུས་ལ་གནས་པའི་ཐིག་ལེ་དྲུག་པོ་དེ། རྩའི་ནང་ནས་ལམ་དུ་འཐིགས་པའི་ཚེ་ན་གཞིའི་ཐིག་ལེ་ཐིག་ལེ་བཟང་པོ་དངོས་པོ་གཞན་མ་ཡིན་པ་དང་། ལམ་གྱི་ཐིག་ལེ་བཟང་པོ་འཆར་བྱེད་སྣ་ཚོགས་པ་དང་། བཟང་པོའི་བཟང་པོ་རྟོགས་པ་གཉེན་པོ་ལ་རག་མ་ལུས་པ་དང་། བཟང་པོ་རྒྱན་དང་ལྡན་པའི་ཐིག་ལེ་སྣང་བ་རང་ཐོག་ཏུ་ཡིད་ཆེས་པ་དང་། བཟང་པོའི་རྩེ་མོའི་ཐིག་ལེ་འཁོར་འདས་གང་དུ་ཡང་མ་གྲུབ་པ་ཡིས། དེ་ལྟར་ཐིག་ལེ་ལྔས་རྩའི་ནང་རྣམས་ནས་ཁྱབ་པར་རྒྱུ་བས་ཐབས་ཤེས་རབ་ཀྱི་རྩལ་སྤྱོད་པར་བྱེད་པའོ། །དེ་ཡང་ཐབས་ཀྱི་བདེ་བ་བསྐྱེད་པ་དང་། ཤེས་རབ་ཀྱིས་སྡུག་བསྔལ་གཅོད་པར་བྱེད་པ་གཉིས་གཉིས་མེད་གཅིག་ཏུ་ཡེ་ནས་བཟླུམས་ཞིང་བསྡོམས་ནས་གནས་པའོ། །དེ་ལྟར་ཐིག་ལེ་ལྔས་རྩ་རྣམས་ཀྱི་ནང་ནས་འགྱུ་ཞིང་ཆོས་ཉིད་དུ་རྒྱུ་བའོ། །འོ་ན་ལུས་གྲུབ་པ་དེ་ལས་རྩར་གནས་པར་བྱུང་བའི་ལུས་དེ་རང་རྒྱུ་རྐྱེན་གང་ལས་གྲུབ་ཞེ་ན། ཀུན་འབྱུང་བ་བཞིའི་རང་བཞིན་ཅན་དེ། དང་པོ་བཟའ་བ་དང་། བཏུང་བས་བྱང་སེམས་བསྐྱེད་པས་ས། དེ་ནས་ཐིག་ལེར་བསྡུས་པས་ཆུ། དེ་ནས་གཉིས་འདུས་ཤིང་སྐྱེས་པས་རླུང་། དེ་ནས་དྲོད་འབེབས་པས་མེའོ། །རྫོབ་ནི་བག་ཆགས་རྣམས་ཀྱིས་བརྫབས་ཤིང་སྤམས་པས་ན་ལུས་ལེན་པའི་རྒྱུ་ཕའི་ཐིག་ལེ་ཐབས་ཀྱི་ཆ་བདེ་བར་ཤར། མའི་རྐྱེན་བྱང་སེམས་དམར་བོའི་ཐིག་ལེ་ཡིས་ལུས་ཀྱི་ཉེར་ལེན་གྱི་རྐྱེན་བྱས་པས་ཐིག་ལེ་དངོས་ལ་འབྱུང་བ་བཞིའི་རྣམ་པས་ཀུན་རྫོབ་ཀྱི་འབྱུང་བའི་ལུས་ཀྱི་གཞི་བྱས་པ་ནི། རྒྱུ་རྐྱེན་དེ་གཉིས་ལ་རྫས་སུ་གྲུབ་པས་ས་དངོས་པོར་གྲུབ། གཤེར་བས་ཆུ་དངོས་སུ་གྲུབ། འདི་ཡི་དུས་ན་དྲོད་དུ་གནས་པས་མེ་དངོས་སུ་གྲུབ། རང་ཤུགས་ཀྱིས་འཕེལ་བའི་སྟོབས་བྱུང་བས་རླུང་དུ་གྲུབ་པས། དེ་ལྟར་རྒྱུ་རྐྱེན་གཉིས། ལུས་ལེན་པའི་རླུང་དང་སེམས་གཉིས་ཏེ་བཞི་འདྲེས་པ་ལས་འབྱུང་བ་བཞི་ཡི་ཆོས་ཉིད་ལུས་ཀྱི་གཞི་ཆགས་པ་ལ་སོགས་པ་གོང་དུ་བསྟན་ནོ། །དེ་ལྟར་བཞིས་འབྱུང་བ་བཞིའི་ལས་སོ་སོར་ལུས་སུ་བསྐྱེད་པས། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་ལྔ་དང་། བག་ཆགས་འདྲེས་པ་དང་། ཉོན་མོངས་པ་དུ་མ་ལས་གྲུབ་པའི་སེམས་གཉིས་བསྐྱེད་པའི་རྒྱུ་འབྱུང་བ་བཞི་རྐྱེན་ལས་དང་ཉོན་མོངས་པ་དང་། བག་ཆགས་སྔ་ཕྱི་རྣམས་ཀྱིས་བྱས་པས། རྟེན་འབྲེལ་འཁྲུལ་སོ་དུ་མའི་ཆོས་འཚོགས་པས་ཕུང་པོ་ཞེས་བྱའོ། །དེ་ལྟར་དུ་མ་འཚོགས་པས་ཕུང་པོ་ལྔ་དང་། ཁམས་བཅོ་བརྒྱད་པ་སོགས་ཉོན་མོངས་པ་ལྔ་དང་། མ་རིག་པ་གསུམ་དང་། ཡིད་དྲུག་དང་། རྐྱེན་བཞི་དང་། རྣམ་ཤེས་བརྒྱད་དང་། སྐྱེ་མཆེད་བཅུ་གཉིས་དང་། བག་ཆགས་གསུམ་དང་། དབང་པོ་ལྔ་དང་། འབྱུང་བ་བཞི་དང་། ཤ་ཁྲག་འཚོགས་པ་དུ་མ་རྣམས། ཡེ་ནས་གཉིས་མེད་གཅིག་ཏུ་བཟླུམས་ཤིང་བསྡོམས་ཏེ་གནས་པའོ། །འདི་ནི་དེ་དག་མ་ཡིན་པར། དངོས་པོ་གཤིས་ཀྱི་འདུག་ཚུལ། ངོ་བོ་ཀ་དག་པ། དམ་པ་མི་བསླུ་ཞིང་བདེན་པར་ངེས་པ། དེ་ལ་སྤྲོས་པའི་ཚིག་དང་ཡི་གེ་དང་ཐེག་པའི་འདོད་པ་གང་ཡང་མེད་པའི་ཐིག་ལེ་སྟོང་པའི་སྒྲོན་མ་ཡིས། དབྱིངས་རྣམ་པར་དག་པའི་སྒྲོན་མ་དང་། རིག་པ་རྡོ་རྗེ་ལུ་གུ་རྒྱུད་ཀྱི་སྐུ་གཉིས་གཉིས་མེད་གཅིག་ཏུ་ཡེ་ནས་བཟླུམས་ཤིང་གནས་པའོ། །དེ་ཉིད་དངོས་གང་ཡིན་ཞེ་ན། གཞན་ལ་རག་མ་ལུས་པར་རང་ལས་འབྱུང་ཞིང་རང་ལ་ཤར། དེ་ལྟར་ཤར་བས་རང་སྣང་བའོ། །དེ་ཁོ་ན་གསང་སྔགས་རྣམས་ཀྱི་འབྲས་བུ་ལ་ལམ་དུ་བྱེད་པའི་ཕྱིར་ན་ཐིག་ལེ་སྟོང་པའི་སྒྲོན་མ་ཡིས། འདས་པ་དང་མ་འོངས་པ་དང་ད་ལྟའི་སངས་རྒྱས་ཀྱི་དགོངས་པ་རང་གནས་མཉམ་གཞག་ཆེན་པོའི་དོན་རྣམས། ལུས་ཀྱི་རྩོལ་བ་དང་། ངག་གི་སྒྲུབ་པ་བྱ་མི་དགོས་པར་ཡེ་ནས་རྣམ་པར་རྟོག་པ་དང་བྲལ་བའི་དབྱིངས་རྣམ་པར་དག་པའི་སྒྲོན་མ་དང་གཉིས་སུ་མེད་པར་ཡེ་ནས་གཅིག་ཏུ་བཟླུམས་ཤིང་གནས་སོ། །དེའི་ཕྱིར་ན་འདི་ཀུན་དེའི་དབྱེ་བས་ན། དེ་ཉིད་ལྔ་དབྱེར་མེད་པར་གནས་པས་མི་འགྱུར་བས་འདུས་མ་བྱས། གཞི་ལམ་གཉིས་མེད་དུ་བསྟན་པས་ཐིག་ལེ། དངོས་པོའི་མཐའ་ལ་ཞེན་པ་ཡོད་མི་སྲིད་པས་སྟོང་པ་ཉིད་དུ་གནས་པ་ལས། སྣང་ཆའི་ཡུལ་ལ་དབྱེ་བ་རྣམ་པ་ལྔར་བསྟན་ཀྱང་། དེ་ཉིད་དངོས་པོ་ཐ་དད་པ་མ་ཡིན་ཅིང་རིམ་གྱིས་མི་གནས་པས་ཅིག་ཆར་དུ་ཡེ་ནས་གཉིས་མེད་གཅིག་ཏུ་བཟླུམས་པའི་གནས་ཐིག་ལེ་རང་གི་ངོ་བོའི་བཞུགས་ཚུལ་ནི་ལམ་སྣང་གི་འོད་ལྔར་གསལ། དེ་ལྟར་གསལ་བས་ཐིག་ལེའི་སྒྲོན་མ་འདི་ལ་ནུབ་པ་མེད་པ་ནི། ཡེ་ནས་རང་བྱུང་ཆེན་པོར་བཞུགས་པས། ཚིག་གི་མཐའ་ལས་འདས་པས། སྒྲོན་མའི་དབྱེ་བ་ལ་སོགས་པ་འདི་ཀུན་ཚིག་གི་སྤྲོས་པའི་རྒྱུ་མེད་དེ་ཐིག་ལེ་ཉག་གཅིག་ཏུ་གནས་པའོ། །དེ་ལྟར་ན་སྤྲོས་མེད་ཐིག་ལེ་ཉག་གཅིག་གི་དོན་དེ་ཉིད་དབང་པོའི་སྤྱོད་ཡུལ་དུ་མཐོང་ན་དེ་རང་ཉིད་ལས། གཞན་ཕྱི་དང་ནང་དང་བླ་མ་དང་རྒྱུད་ལུང་མན་ངག །ཚིག་ལ་སོགས་པ་གང་དུ་ཡང་མི་རྙེད་དེ། དེ་ཉིད་དེ་རྣམས་སུ་བརྩལ་བ་ཡིས་གནས་ལུགས་ཀྱི་དགོངས་པ་རྙེད་པ་མེད་དོ། །ཞེས་དབྱེ་བ་བསྟན་པའོ། །ད་ནི་དྲིས་ལན་བཞི་པ་ཐིག་ལེ་སྟོང་པའི་སྒྲོན་མའི་མཚན་ཉིད་དམ་དགོས་པ་བསྟན་པ་ནི། རང་གནས་དགོངས་པ་གཅིག་ཡིན་པས་ཞེས་པ་ལ་སོགས་པས་བསྟན་ཏེ། དེ་ཡང་གཞན་རྩོལ་ལས་མ་བྱུང་བས་རང་ལ་གནས་པའི་དོན། དགོངས་པ་ནི་ཐུན་དང་མཚམས་མེད་པ། བྱ་རྩལ་དང་རྩོལ་སྒྲུབ་ལས་འདས་པ། ཡེ་ནས་ཡོད་པའི་དོན་དེ་སྐལ་ལྡན་གྱི་རྒྱུད་ལ་སྐྱེས་པས་ཏེ། དེ་ཉིད་ལས་འགྲོ་ཉལ་འདུག་སྡོད་སྤྱོད་ལམ་ཇི་ལྟར་འདུག་ཀྱང་མི་འབྲལ་བས་ན་དགོངས་པས་ཏེ། དུ་མ་ལས་འདས་པས་ཆོས་སྐུ་ཐིག་ལེ་ཉག་གཅིག་ཡིན་པས། ཐ་སྙད་ནི་སྒྲོ་བཏགས་པའི་ཚིག་རྣམས་ཏེ། མེད་པ་ལ་ཡོད་པར་སྒྲོས་བཏགས་པ་དང་། ཡོད་པ་ལ་མེད་པ་དང་། ཡིན་པ་ལ་མིན་པ་དང་། མིན་པ་ལ་ཡིན་པར་ཚིག་གིས་སྒྲོ་བཏགས་པས་ཏེ། དོན་གྱིས་མིང་འགྱུར་བ་རྣམས་སོ། །དེ་ཡང་ཚིག་གི་ཐ་སྙད་དང་། བརྡའི་དང་། གྲངས་ཀྱི་དང་། མིང་གི་ཐ་སྙད་རྣམས་ཀྱི་གྲངས་གཅིག་གཉིས་ལ་སོགས་པ་རྣམ་གྲངས་ཀྱི་ཆོས་འདི་ཡི་མཚན་ཉིད་ལ། ཡེ་ནས་སྒྲོ་གདགས་སུ་མེད་པའི་དོན་དེ་སྐལ་ལྡན་གྱིས་གཏན་ལ་ཕེབས་པས་ད་ཟད་དེ་སྐྱེ་མི་སྲིད་པའོ། །དེ་ཡང་སྒྲ་འཇུག་པའི་རྒྱུ་མཚན་དག་བྱས་པས་རྩོལ་བས་བཀྲུས་པས་དག་པ་ལྟ་བུ་ཡིན་ལ། མེད་པ་ནི་ཡེ་ནས་མེད་པ་དང་། འཕྲལ་མེད་པས་གཞི་འཇུག་པ་མང་པོ་ལ་འགྲོ། ཟད་པ་ནི་སླར་ལྡོག་མི་སྲིད་པའི་སྒོ་ནས་བཞག་པའོ། །དེ་ལྟར་ཟད་པས་དེ་ཉིད་ལ་གཅིག་ཞེས་མི་འགྲུབ་པས། གཉིས་སུ་འཛིན་པའི་ཞེན་པ་སྐྱེ་མི་སྲིད། དེ་ལྟར་གཉིས་མེད་པས་གཅིག་ཞེས་མི་གྲུབ་པས། གཉིས་སུ་འཛིན་པའི་ཞེན་པ་སྐྱེ་མི་སྲིད། དེ་ལྟར་གཉིས་མེད་པས་གཅིག་དུ་འཛིན་པའི་ཤེས་པ་སྐྱེ་མི་སྲིད། དེ་ལྟར་གཅིག་གཉིས་མེད་པས་བཅུའམ་བརྒྱ་སྟོང་ལ་སོགས་པ་ཡོད་མི་སྲིད་པའོ། །དེ་ལྟར་དེ་ཀུན་དང་བྲལ་བས་ཐིག་ལེ་སྟོང་པ་རང་གི་མཚན་ཉིད། འདི་ལ་ཐབས་མེད་པས་བདེ་བའམ་གསལ་བ་ཞེས་གྲུབ་རྒྱུ་ཅི་ཡང་མེད་པས་ཤེས་རབ་ཞེས་གྲུབ་པ་མེད་པས་སྟོང་པའམ་གཉིས་མེད་དུ་སྣང་བས་ཅི་ཡང་ཡོད་པ་མིན་ནོ། །དེ་ལྟར་ཐབས་ཤེས་རབ་གཉིས་སུ་ག་ལ་སྲིད་པས་ན། འདི་ལ་གྲུབ་པ་ཅི་ཡང་མེད་པས་ཐིག་ལེ་སྟོང་པའི་སྒྲོན་མ་རང་གི་མཚན་ཉིད་ལ་གཅིག་དང་དུ་མ་ལ་སོགས་པ་དང་བྲལ་བས། དེའི་ངོ་བོ་སྟོང་པ་ཉིད་མཐའ་གྲོལ་ཡོངས་རྫོགས་སུ་བཞུགས་པས། འདི་ལྟར་ཀུན་རྫོབ་ཀྱི་སྣང་བ་འདི་དག་གང་དང་གང་གིས་ཡུལ་དང་ཡུལ་ལ་མངོན་པར་ཞེན་པ་ཐམས་ཅད་རང་བཞིན་གྱིས་བྱས་པ་མེད་པར་འགགས་པའི་དུས་ན། འདི་ཡི་རང་བཞིན་ལ་ལྡོག་མེད་པས་མི་འགྱུར་གནས་པ་ལས་འཕྲོ་མི་སྲིད། དེ་མ་འཕྲོས་པས་ཆོས་ཉིད་རྟོག་པ་མེད་པ་ཡེ་ནས་དག་པའི་དགོངས་པ་ལ་གནས་ཏེ། འདི་ལ་མ་བསྒོམས་ཀྱང་རང་གི་རང་ལ་རང་བཞིན་གནས་པས་རྫོགས་པ་ཆེན་པོའི་བསྒོམས་པས་ཏེ། བར་དང་ཐུན་མཚམས་མེད་པའི་དགོངས་པ་ཨ་ཏི་ཡོ་ག །ཐིག་ལེ་ཉག་གཅིག །དུ་མ་དང་། ཐ་སྙད་སྤྲོད་པ་དང་། མ་རིག་པ་ཡུལ་དང་བདག་ཏུ་བཅོས་པའི་ཉོན་མོངས་པའི་ཟླ་དང་བྲལ་བའི་དགོངས་པ་རང་གཅིག་ཆར་དུ་ཟང་ཐལ་བའི་ཏིང་ངེ་འཛིན་ཞེས་བྱ་བ་ཡིན་ཏེ། འདི་ནི་འབད་རྩོལ་ལས་བྱུང་བ་མེད་པས་རང་བཞག་རང་གྲོལ་བས་ན་མཐའ་གང་ལ་ཡང་མི་གནས་པའོ། །དེ་ཡང་གཞན་གྱི་བྱས་ཤིང་བརྩལ་བ་ལས་མ་བྱུང་སྟེ་རང་གི་གནས་ལུགས་རང་བཞིན་མ་བཅོས་པ་ཆེན་པོའི་དགོངས་པར་ཡེ་ནས་ཡོད་པ་ལ། ལུས་མ་འགུལ་བས་མིག་མི་འགུལ། དེ་ཉིད་མ་འགུལ་བས་རིག་པ་མི་འགུལ་ཏེ། མི་འགུལ་བ་གསུམ་ལ་གཞི་བཅས་པས་བྱ་བ་ལུས་ལ་བྲལ། བྱེད་པ་ཡིད་ལ་མེད་པས་བྲལ་བར་འདུག་པས་སྡོད་པ་རྣམ་པ་གསུམ་ལ་དུས་རྒྱུན་དུ་གནས་པ་ནི་དགོངས་པའོ། །དགོངས་པ་དེ་ཉིད་ཀྱི་མཚན་ཉིད་དངོས་པོ་རྫས་མེད་པས་སྟོང་པ་ཉིད་ཡིན་ལ། ཆད་པ་མུ་མེད་པའི་མཐར་མ་ལྷུང་བས་གསལ་བས་ཁྱབ་པར་གནས་པ་ཡིན་ལ། དེ་ཉིད་རང་གི་ངོ་བོ་ལམ་ལ་མི་གནས་པས་ལུས་ཀྱི་མཐའ་མ་སྤྲུལ་པའི་སྐུ་འདི་འདྲ་གཅིག་ཏུ་ངེས་པ་མེད་པའི་ལུས་དང་། ལོངས་སྐུ་མཚན་དཔེ་རྫོགས་པའི་འོད་ཀྱི་སྐུ་དང་། ཆོས་སྐུ་ཆོས་ཉིད་ལས་གྲུབ་པ་སྟོང་པའི་ལུས་རྣམས་ཆོས་ཉིད་ཟད་པའི་སྣང་བར་ཡོད་པས་འདི་ལ་གྲུབ་པ་མེད་དོ། །དེ་ཡང་ལུས་སུ་གནས་ཕན་ཆད་ཉམས་ཀྱི་སྣང་བ་ཡོད་པས། དེ་ལ་འཛིན་ཅིང་རྟོག་པ་ཡོད་པས་སྐུ་གསུམ་དུ་སྣང་ལ། འདི་ཡི་མཚན་ཉིད་མདོར་བསྡུས་ན་ལྟ་སྒོམ་མན་ངག་གི་བདག་དང་། གཞན་ལྟ་ཅི་སྨོས་ཏེ། རང་གི་གྲུབ་པའི་མཐའི་བདེན་འཛིན་གྱི་ཡུལ་ཉམས་དང་མྱོང་པ་དང་འབྲས་བུ་དང་ཡིན་མིན་དུ་འཛིན་པ་ལས་གྲོལ་བ་ནི་མེད་པ་མ་ཡིན་ཏེ། དེ་ཉིད་གང་དུ་སོང་ཞེ་ན་སྟོང་པ་ནི་བདག་ཏུ་འཛིན་པའི་འབྲས་བུ་དངོས་པོ་མེད་པ་དང་ཡིན་མིན་གྱི་རྩིས་མེད་པས་ནའོ། །འདི་ཉིད་རང་མཐའ་གྲོལ་ཡོངས་རྫོགས་ཆེན་པོའི་ལྟ་བར་ཡེ་ནས་སུས་ཀྱང་བྱས་པ་མེད་པར་རང་བྱུང་། རང་སྣང་རང་གྲོལ་བས་ན། གདངས་མི་འགྱུར་བ་ཉིད་དུ་བཞུགས་པ་ལས་དེ་ལྟར་བཞུགས་པ་དེ་གཞན་ནས་བྱུང་བ་མེད་པས་རང་ལ་གནས་པའི་དོན་ཡིན་ལ། དེ་ལ་སྔོན་ཐོག་ཀྱང་བྱེད་པའི་མཁན་པོ་མེད། དེ་ཡང་སུས་ཀྱང་བྱས་པ་དང་བྱེད་པ་མེད་པར། ཡེ་ནས་ཆོས་ཉིད་མཉམ་པ་ཆེན་པོར་སངས་རྒྱས་དང་སེམས་ཅན་ཐམས་ཅད་ལ་དབྱེར་མེད་དུ་གནས་པའོ། །ཞེས་མཚན་ཉིད་དང་དགོངས་པ་བསྟན་ནས། ༈ ད་ནི་དྲིས་ལན་ལྔ་པ་སྒྲོན་མ་དེ་ཉིད་གནས་གང་ན་གནས་བསྟན་པ་ནི། སེམས་ཅན་ཀུན་གྱི་ལུས་ཀྱི་དཀྱིལ་ཞེས་པ་ལ་སོགས་པས་བསྟན་ཏེ། སེམས་རྣམ་པར་རྟོག་པའི་བག་ཆགས་དུ་མས་བསླད་པ་ཡང་ཅན་འབྱུང་བ་ཤ་ཁྲག་གིས་བཟུང་བས། གདུགས་ཅན་ཞེས་པ་དང་རྟ་ཅན་ནམ་ཁྲབ་ཅན་འཁར་བ་ཅན་ཞེས་པ་ལ་སོགས་པ་ལྟ་བུ་གཉིས་འདུས་ཅན་དང་ལྡན་པའོ། །དེ་ཡང་དེ་ལྟར་སེམས་དང་འབྱུང་བ་གཉིས་འདུས་པ་ལས་ལུས་ཀྱི་བྱེ་བྲག་ཐ་དད་པ་ཀུན་གྱི་དཀྱིལ་ཚད། ཙིཏྟ་རིན་ཆེན་ཟུར་བརྒྱད་པའི་གཞལ་ཡས་ཁང་། ཕྱོགས་ཐམས་ཅད་དུ་རྩའི་རྣམ་པ་ནི་སྟོང་ཕྲག་གྲངས་མང་པོར་ཡོད་ཀྱང་། དེ་དག་ཁྱད་པར་དུ་འབྱུང་བ་ཆེན་པོ་བཞིའི་རྩ་བཞི་ལ་སྒྲོན་མ་འདི་ཉིད་གནས་པ་ནི། འབྱུང་བ་སའི་བདག་ཉིད་ཀྱི་སྙིང་པོ་གསེར་ཡིན་པས་ཙིཏྟའི་གཡས་ནས་འགྱུ་བར་བྱེད་པ་སྟེ། འབྱུང་བ་ས་ལས་མིང་དུ་བཏགས་པ་ཀ་ཏི་གསེར་གྱི་རྩ་ཆེན་ཞེས་བྱ། རང་ངོ་ལས་མིང་དུ་བཏགས་པ་རོ་མ་ཞེས་བྱའོ། །འབྱུང་བ་ཆུ་ལས་མིང་དུ་བཏགས་པ་དར་དཀར་སྣལ་མ་ལྟ་བུ་ནི་ཕྲ་བ་ཡིན་ལ། རང་ངོ་ལས་མིང་དུ་བཏགས་པ་རྐྱང་མ་སྟེ་གཡོན་ནས་རྒྱུ་བའོ། །འབྱུང་བ་རླུང་གི་བྱེད་པ་ལས་མིང་དུ་བཏགས་པ་འཁྲིལ་པ་དང་། ཞེས་བྱ། རང་ངོ་ལས་མིང་དུ་བཏགས་པ་ཀུན་འདར་མ་ཞེས་བྱ་སྟེ། དབུགས་ནས་རྒྱུ་བའོ། །ཡང་འབྱུང་བ་མེའི་བྱེད་པ་ལས་མིང་དུ་བཏགས་པ་ཤེལ་སྦུག་ཅན་ཞེས་བྱ། རང་ངོ་ལས་མིང་དུ་བཏགས་པ་སིད་དྷརྨ་ཞེས་བྱ་སྟེ། སྟེང་ནས་འཁོར་བའི་ཚུལ་དུ་རང་རྒྱུ་བ་འདི་བཞིའི་ནང་དུ་ཁྱད་པར་དུ་རྩ་བཞག་ནས་མི་འགྱུ་ཞིང་མི་གནས་ལ། འདི་བཞིའི་ནང་ན་གནས་ཤིང་ལས་དང་ཡེ་ཤེས་ཀྱི་རླུང་གཉིས་ཀྱི་རྟ་ལ་ཞོན་ནས། སྒོ་ལྔ་ལ་འབྱུང་བ་དང་ཙིཏྟའི་ནང་དུ་འཇུག་པ་དང་ཕྱི་ཡི་སྣང་བ་རྣམས་ལ་རང་ཤར་དུ་ཁྱབ་པ་དང་། འདི་ལྟར་སྣང་བའི་བདག་ཉིད་དུ་སྣང་བ་རང་སྣང་ཤར་བར་རང་ཤར། ཁྱབ་པ་རང་ཁྱབ། གྲོལ་བ་རང་གྲོལ་དུ་ཡེ་ནས་ཚིག་དང་ཡི་གེའི་སྤྲོས་པ་མེད་པར་ཡང་དག་པའི་རང་བཞིན་དུ་རྩ་རྣམས་ཀྱི་ནང་ན་གནས་སོ། །རྩའི་ནང་ན་དེའི་ངོ་བོ་རང་ཇི་ལྟར་གནས་ཤེ་ན། གཞི་ནི་དངོས་པོ་འདུག་ཚུལ་དང་། གནས་སྐབས་ལུས་ཀྱི་གཞི་དང་། སྣང་བ་ཡུལ་གྱི་གཞིའོ། །ཐིག་ནི་ས་མཚམས་ངེས་པར་འབྱེད་པ་སྟེ། འཁོར་འདས། ཆོས་དང་ཆོས་མ་ཡིན་པ་དང་། ཡིན་མིན་ལ་སོགས་པའོ། །ལེ་ནི་གཅོད་པར་བྱེད་པས་ཏེ། ཡུལ་དང་ཉོན་མོངས་པ་དང་། ལས་དང་བག་ཆགས་ལ་སོགས་པ་གཅོད་པར་བྱེད་པའོ། །དེ་ཡང་ཐིག་འབྱེད་པས་ཐབས་ཡིན་ལ། ལེ་གཅོད་པའི་ཤེས་རབ་ཡིན་ནོ། །བཟང་པོ་ནི་དེ་ལྟར་ཐབས་དང་ཤེས་རབ་གཉིས་མེད་ཀྱི་དོན་ལ་གནས་པས་ངན་པའི་རྣམ་པར་རྟོག་པ་མེད་པའོ། །ལམ་གྱི་ནི་བགྲོད་པ་བགྲང་བྱའི་ལམ་ཚོགས་ལམ་དང་། མཐོང་བའི་ལམ་དང་། སྦྱོར་བའི་ལམ་དང་། སྒོམ་པའི་ལམ་དང་། མཐར་ཕྱིན་པའི་ལམ་སྟེ། འདི་དག་ནི་གང་ཟག་གི་བློ་འབྲིད་པ་ཡིན་པས་རང་བཞིན་རྫོགས་པ་ཆེན་པོ་ལ་མེད་དེ། སེམས་ཀྱི་སྣང་བའི་བྱེ་བྲག་གོ། །འཇུག་པ་གྲུབ་མཐའི་ལམ་ཐེག་པ་རིམ་པ་དགུའི་ཞེ་འདོད་རྣམས་ཏེ། འདི་ནི་བློ་ལས་འདས་པས་བསྒྲུབ་ཏུ་མེད་པས། དེ་དག་ནི་ཚིག་ལ་རྗེས་སུ་འཛིན་པ་རྣམས་ཀྱི་ལམ་ཡིན་ནོ། །རྒྱབ་ཐོབ་ཡོན་ཏན་གྱི་ལམ་ནི་བར་དོར་སངས་རྒྱ་བར་འདོད་པ་རྣམས་ཏེ། འདི་ནི་གང་ཟག་ལེ་ལོ་ཅན་གྱི་ཡིད་གསོ་བ་ཡིན་པས་འདི་ཉིད་སྣང་བ་འདི་ལ་ཟག་པ་རང་ཟད་དེ་སངས་རྒྱ་བའོ། །ལམ་འདི་ནི་ཆོས་ཉིད་མངོན་སུམ་གྱི་ལམ་ཡིན་ཏེ་ཚིག་དང་ཡི་གེས་གཏན་ལ་དབབ་མི་དགོས། ཕྱི་དུས་དང་སྔ་དུས་ལ་མི་ལྟོས་པར་འདི་ཉིད་ལ་སྤྱད་དུ་ཡོད་པའོ། །ཐིག་ནི་ལམ་དྲང་པོ་ཡིན་པས་བགྲོད་སླ། གསེབ་ལམ་འགྱུར་བ་མེད་པ་ཡིན་པས་གོལ་ས་མེད་དོ། །ལེ་ནི་བཀལ་བའི་དོན་ཏེ། སྣང་བའི་ཟག་པ་བཀལ་བས་ཡེ་ཤེས་ལྔའི་རང་མདངས་སུ་སྣང་། འབྱུང་བ་གདོས་བཅས་ཀྱི་ལུས་བཀལ་བས་སྐུ་གསུམ་ལམ་དུ་སྣང་བའི་ལུས་སུ་སྣང་། འཁོར་བའི་ཆོས་ལ་བཀལ་བས་ཉམས་གོང་འཕེལ་དུ་སྣང་། ཆོས་སུ་འཛིན་པའི་རྟོག་པ་ལས་བཀལ་བས་ཆོས་རྣམས་རང་ཟད་པའི་སྣང་བ་ལ་སྤྱོད་པའོ། །དེའི་ཕྱིར་ན་དེ་བཞིན་ཉིད་མ་བཅོས་པས་ངན་པའི་ཉོན་མོངས་ཀྱི་མིང་མེད་པས་བཟང་པོར་གནས་ཏེ། དཔེར་ན་རིན་པོ་ཆེ་གསེར་གླིང་དུ་ཕྱིན་པ་ལྟ་བུའོ། །དེ་ལྟར་རྣམ་རྟོག་གི་མིང་མེད་པས་བཟང་པོ་བཞི་གཞི་དང་ལམ་རྣམས་ཀྱི་རྩེ་མོ་ཐིག་ལེ་སྟོང་པའི་སྒྲོན་མ་ཉིད་དོ། །དེ་ཉིད་ཀྱི་དོན་རྟོགས་པ་ལས་ཉམས་གོང་ནས་གོང་དུ་འཕེལ་བ་ནི། དེ་ལྟར་རྣམ་རྟོག་ཡོད་མི་སྲིད་པས་བཟང་པོའི་རྒྱན་འོད་དང་། ཐིག་ལེ་དང་། སྐུ་ལ་སོགས་པ་དང་ལྡན་པར་སྣང་བ་ནི་ཡང་དག་པའི་ཡེ་ཤེས་ཀྱི་ལམ་སྟེ། ལུས་ཀྱི་རྩ་བཞི་པོ་རྣམས་ཀྱི་ནང་ན་གནས་པ་ལས་བྱུང་བ་སྟེ། ཕྱི་རོལ་ནི་མ་ཡིན་ནོ། །དེའི་ཕྱིར་ན་རྩ་ནང་གི་ཐིག་ལེ་འདི་ཀུན་ལ་བརྟེན་ནས་གསང་སྔགས་ཀྱི་ལམ་རྟགས་ཀྱི་རང་བཞིན་སྟོན་པར་བྱེད་པ་ཉིད་དུ་བྱེད་པའོ། །དེ་ཡང་སྔོན་དུ་ལུས་ཀྱི་གནད་འདུག་སྟངས་གསུམ་བྱས་པས་རྩའི་ནང་ན་ཡང་དག་པའི་ཡེ་ཤེས་གནས་པ་སྔོན་དུ་བྱུང་ནས། མངོན་དུ་གནས་པ་ལས་བྱུང་བའོ། །དེ་ཡང་གང་ཟག་གཅིག་ལ་ཡོད་པ་མ་ཡིན་ཏེ་སེམས་ཅན་ཐམས་ཅད་ཀྱི་ལུས་བསྐྱེད་པའི་རྟེན་དུ། གློ་བུར་དུ་བྱུང་བ་མིན་པར་ཡེ་ཐོག་མ་ནས་འདི་ནི་གནས་པའོ། །ཞེས་གནས་པ་བསྟན་ནས། ༈ ད་ནི་དྲིས་ལན་དྲུག་པ་འཆར་བར་བྱེད་པའི་སྒོ་བསྟན་པ་ནི། སྣང་བའི་ལམ་ནི་འཆར་བྱེད་ལས་ཞེས་པ་ལ་སོགས་པས་བསྟན་ཏེ། སྣང་བའི་ནི་ཡེ་ཤེས་རང་རྩལ་གྱི་རང་གདངས་ཀྱི་འཆར་བའི་སྒོ་བྱ་བྱེད་དང་བྲལ་བའི་མིག་ལས་འཆར་བར་ཡིན་ཏེ། རྐྱེན་ནི་རབ་རིབ་དང་ལིང་ཏོག་དང་། ཞར་ལོང་མེད་པ་དེ་དག་གིས་མ་སྒྲིབ་པའི་སེམས་ཅན་ཐམས་ཅད་ཀྱི་མི་གནས་འཆར་བའི་སྒོ་ཡིན་ནོ། །དེའི་མཚན་ཉིད་གོང་དུ་རྒྱས་པར་བཤད་ཟིན་ཏོ། །འདི་ལ་རྒྱ་གར་གྱི་སྐད་དུ་ཙཀྵུ་ཞེས་པའི་མིང་གི་བཏགས་པའི་སྒོ་ནས་ན། དཔེར་ན་ཉི་མའི་དཀྱིལ་འཁོར་བཞིན་དུ་འོད་དང་ཟེར་དུ་འཆར་བའོ། །དེ་ཡང་གཞན་ལས་བྱུང་བ་མིན་ཏེ། གདོད་མ་ནས་རང་གིས་རང་ཆས་སུ་འོད་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། མཐིང་ག་དང་། ལྔའི་རང་བཞིན་ཡེ་ཤེས་ལྔའི་ཟེར་རབ་ཏུ་འཕྲོ་བ་དང་། མཆེད་པ་དང་། ཤིན་ཏུ་མཆེད་པ་ཉིད་དུ། སངས་རྒྱས་སེམས་ཅན་ཀུན་ལ་རང་ཆས་སུ་འགྲོ་བ་རྣམས་ཀྱི་མིག་ལས་གཞན་སུ་ལ་ཡང་མ་བརྟེན་པར་འོད་ཀྱི་རྣམ་པར་སྣང་བ་ཡིན་ནོ། །དེ་ལྟར་འཆར་བར་བྱེད་པ་ནི་ཡེ་ནས་རང་བྱུང་གི་ཡེ་ཤེས་དངོས་པོའི་གཤིས་ཀྱི་འདུག་ཚུལ་མ་འགགས་པས་འཆར་བར་བྱེད་པའི་སྒོ་དབང་པོ་རྣམས་ཀྱི་དྭངས་མ་མིག་ཡིན་པས་འདི་དང་འབྲེལ་པའི་ཚུལ་ཡིན་པས། ད་ལྟ་ལྟར་ཡོད་པས་སྣང་བའི་ཡུལ་ནམ་མཁའ་སྤྲིན་དང་བྲལ་བ་ཉིད་ལ་འོད་དུ་གསལ་བར་སྣང་བ་ནི་ཡང་དག་པའི་སྣང་བ་ཡིན་ཏེ། སེམས་ཅན་ཀུན་གྱི་མིག་ནས་འཆར་བའོ་ཞེས་འཆར་བའི་སྒོ་བསྟན་ནས། ༈ ད་ནི་དྲིས་ལན་བདུན་པ་སྒྲོན་མ་དེ་ཉིད་ཀྱི་རང་བཞིན་ནམ་དངོས་པོ་གང་ཡིན་བསྟན་པ་ནི། སྟོང་པ་ཉིད་ལས་རང་ལོག་པའི་ཞེས་པ་ལ་སོགས་པས་བསྟན་ཏེ། སྟོང་པ་ཉིད་ནི་རྒྱུན་ཆད་སྟོང་པ་དང་། རབ་ཏུ་མི་གནས་པ་སྟོང་པ་དང་། བགྲང་བྱའི་སྟོང་པ་རྣམས་ལས་རང་བཞིན་གྱིས་ལོག་པའོ། །ཆོས་ཉིད་མངོན་སུམ་དུ་ཉམས་སུ་མྱོང་བར་བྱེད་པ་ནི། ཡིད་དཔྱོད་དུ་མེད་པར་དབང་པོའི་ཡུལ་དུ་གསལ་བའི་རིག་པ་ཡེ་ཤེས་ཀྱི་སྣང་བ་ནི། ད་ལྟ་བསྟན་པས་ཡིད་ཆེས་དང་བྲལ་བར་སྐྱེ་སྟེ། འདི་ཡང་ཡེ་ནས་ཡོད་པ་ཡིན་པ་ལས་ད་ལྟ་ཐབས་ཀྱི་གློ་བུར་དུ་བྱུང་བ་མ་ཡིན་པར། ཡེ་ཤེས་ལྔའི་རང་གདངས་ལྔ་དང་བཅས་པར་ཡང་དག་པར་རྫོགས་པའི་སངས་རྒྱས་ཀྱི་རང་བཞིན་ཉིད་ལ་ཡེ་ནས་བབས་ཀྱིས་གྲུབ་ནས་གནས་པ་ལ། གློ་བུར་པ་ནི་མ་ཡིན་ནོ། །དེ་ལྟར་དབང་པོའི་ཡུལ་ལ་གསལ་བར་བྱེད་པའི་རིག་པ་དང་འོད་དང་ཡེ་ཤེས་རྣམས་ཀྱི་ངོ་བོར་ཡང་། སྣང་བ་དང་སྟོང་པ་མཐར་འཛིན་པའི་དངོས་པོ་ལས་ནི་ཡེ་ནས་ལོག་སྟེ་རང་རིག་འོད་གསལ་བར་བཞུགས་སོ། །དེ་ཡང་ཉི་ཚེ་བའི་སྟོང་པ་དང་། བར་ཆད་པ་དང་། རྒྱུན་ཆད་པ་དང་། ཚིག་གི་སྟོང་པ་ཉིད་དུ་ཡོད་པ་མ་ཡིན་ཏེ། རང་གིས་རང་གསལ་བས་ཕྱི་རོལ་སྟོང་པ་ཡིད་བཏགས་སུ་འདོད་པ་རྣམས་ལས་ལོག་པ་ལ། དེ་ཤེས་ཤིང་རིག་པར་ཡོད་པས་རྟག་ཆད་མཐར་འཛིན་པའི་བདག་པས་ལོག །དེ་ཐོག་མ་ནས་བབས་ཀྱིས་གྲུབ་པས་བློ་བཏགས་ཚིག་གི་ལྟ་བ་རྣམས་ལས་ལོག་པ་ནི། ཡེ་ནས་གནས་པ་ཡིན་པས་སྒྲོན་མ་རང་གི་མཚན་ཉིད་དུ་བཞུགས་པ་ནི། ཚིག་གིས་བཏགས་པའམ། བློས་བཅོས་པ་མ་ཡིན་ཏེ། རྟོག་པའི་སངས་རྒྱས་མིང་མེད། མ་རྟོག་སེམས་ཅན་མིང་མེད་པའི་ཚེ་ན་ཐོག་མའི་ངོ་བོ་ཀ་དག་ཆེན་པོ་ལས། རང་བཞིན་ལྷུན་གྲུབ་ཀྱི་ཡེ་ཤེས་སོ་སོའི་མཚན་འཛིན་པ། རྩལ་སྣ་ཚོགས་སུ་ཤར་ཏེ་ཡིད་ཀྱི་མཛད་པ་མ་འགགས་པ་ལས་ནི་འདི་ལྟ་བུར་ཡེ་ནས་རང་ཤར་དེ། དེ་ལས་ཐུགས་རྗེ་ཀུན་ཁྱབ་ཀྱི་ཡེ་ཤེས་སུས་ཀྱང་མ་བྱས་པར་མཁྱེན་པ་རང་གསལ་བར། ཡེ་ཉིད་ནས་སྒྲོན་མ་འདི་ནི་རང་བཞིན་འོད་གསལ་ངོ་བོ་སྐུར་བཞུགས་ཀྱང་འདུས་མ་བྱས། རང་བཞིན་འོད་དུ་བཞུགས་ཀྱང་རྫས་སུ་གྲུབ་པ་མེད། ཐུགས་རྗེ་ཐིག་ལེར་བཞུགས་ཀྱང་འཁོར་བའི་རྣམ་རྟོག་ལས་གྲོལ་བ་ཉིད་དུ་གནས་པ་ནི་འདི་ཡི་རང་བཞིན་ནམ་དངོས་ཡིན་ནོ། །ཞེས་རང་བཞིན་ནས་མཚན་ཉིད་བསྟན་ནས། ༈ ད་ནི་དྲིས་ལེན་བརྒྱད་པ་སྒྲོན་མ་དེ་ཉིད་ཡུལ་ལ་སྣང་བ་བསྟན་པ་ནི། བར་སྣང་ཉིད་ནི་སྟོང་པ་ལ། །ཞེས་པ་ལ་སོགས་པས་བསྟན་ཏེ། བར་ནི་མར་གྱི་འབྱུང་བ་འཕྲ་རགས་ཀྱི་མ་སྒྲིབས་ཡར་གྱི་སྤྲིན་དང་ན་བུན་གྱིས་མ་སྒྲིབས་པའི་བར་དུ་སྒྲོན་མ་བཞག་པ་ལ་བྱའོ། །བར་དེར་སྒྲོན་མའི་སྣང་བ་ཉིད་ན་དངོས་པོ་རྫས་སུ་མེད་ཅིང་སྣང་ཡུལ་དུ་ཡོད་ལ་བཟུང་ཡུལ་དུ་མེད་པས་སྟོང་པ་དེ་ལ་དབང་པོ་དང་འབྲེལ་བའི། སྣང་བ་ནི་རང་གི་ངོ་བོ་མ་འགགས་པར་ཤར་བ་ཡིན་པས། དེ་ཉིད་ནི་རང་བྱུང་གི་ཡེ་ཤེས་ཐིག་ལེ་ཉག་གཅིག་རང་བཞིན་རྫོགས་པ་ཆེན་པོར་ཡེ་ནས་གནས་པའོ། །འདི་ལ་ཚིག་གིས་བརྗོད་པས་གཏན་ལ་མི་ཕེབས་སྟེ་རིག་པ་མངོན་སུམ་དུ་གསལ་བས་ཤེས་རབ་ཀྱི་སྤྱོད་ཡུལ་དུ་མེད་པ་ནི་ཡིད་དཔྱོད་ཀྱི་ལྟ་བསྒོམ་སྤྱོད་པ་ལས་འདས་སྟེ། རང་ལ་གནས་པའི་ངོ་བོར་ཡང་དག་པའི་ཡེ་ཤེས་འདུས་མ་བྱས་པ་ཉིད་ཡུལ་འདུས་མ་བྱས་པ་ཡེ་ནས་སྟོང་པ་ཉིད་སྐྱེ་འཇིགས་དང་བྲལ་བའི་ནམ་མཁའི་ཁམས་སུ་སྒྲོན་མའི་སྣང་བ་ཉིད་འདུས་མ་བྱས་པ་དང་གཉིས་གཉིས་མེད་དུ་གནས་པའོ། །ཞེས་ཡུལ་གང་ལ་སྣང་བ་བསྟན་ནས། ༈ ད་ནི་དྲིས་ལན་དགུ་པ་ཚད་བསྟན་པ་ནི། ཐིག་ལེ་སྤྲོ་དང་བསྡུ་མེད་པར་ཞེས་པ་ལ་སོགས་པས་བསྟན་ཏེ་དེ་ལྟར་ཉམས་སུ་བླངས་པ་ཐིག་ལེ་སྟོང་པའི་སྒྲོན་མ་ལ་ལས་ཀྱི་རླུང་ཟད་ཕའི་ཚེ་འགྲོ་འོང་མི་སྣང་བས་སྤྲོ་བ་འགྲོ་བ། བསྡུ་བ་འོང་བ་མེད་པར་འདུག་པ་གཅིག་ཏུ་གནས་པར། ཡུལ་བར་སྣང་ཉིད་དུ་སྐལ་བ་དང་ལྡན་པ་སྒྲོན་མ་སུས་ཟིན་པ་ནི་རྩོལ་བ་ལས་འདས་པའི་ཉམས་ལེན་དེའི་ཚད་དུ་དེ་འགྱུར་ཏེ། དེ་ནི་རྩོལ་བ་མེད་པར་རང་གྲོལ་བའི་རྟགས་སུ་དེ་ལྟར་སྣང་བ་ཡིན་ནོ། །དེ་ཉིད་བཙན་ཐབས་ལ་བརྟེན་ནས་རྩོལ་བ་དང་བཅས་པའི་ཉམས་སུ་ལེན་ལུགས་ལ་ནི་རྩ་གཏེམ་པ་དང་ལུས་ཀྱི་གནད་གཟིར་བས་འབད་པ་ཆེར་བྱས་པ་ལས། ཡང་ཚད་གོང་མ་དང་འདྲ་བར་འབྱུང་བ་ཡིན་ནོ། །ཞེས་ཚད་བསྟན་ནས། ༈ ད་ནི་དྲེས་ལེན་བཅུ་པ་སྒྲོན་མ་དེ་ཉིད་དངོས་འགྲོ་བ་དྲུག་ལ་ཇི་ལྟར་གནས་བསྟན་པ་ནི། འོད་ལྔ་འདུས་པའི་ཐིག་ལེ་ནི་ཞེས་པ་ལ་སོགས་པས་བསྟན་ཏེ། འོད་ནི་དཀར་པོ་མེ་ལོང་ལྟ་བུའི་ཡེ་ཤེས་ཀྱི་གདངས། སེར་པོ་མཉམ་པ་ཉིད་ཀྱི་ཡེ་ཤེས་ཀྱི་གདངས། དམར་པོ་སོ་སོར་རྟོག་པའི་ཡེ་ཤེས་ཀྱི་གདངས། ལྗང་གུ་བྱ་བ་གྲུབ་པའི་ཡེ་ཤེས་ཀྱི་གདངས། མཐིང་ག་ཆོས་ཀྱི་དབྱིངས་ཀྱི་རང་མདངས་དང་ལྔ་འདུས་པའི་ཐིག་ལེ་ནི་འགྲོ་བ་དྲུག་ལ་ཆེ་ཆུང་ཁ་དོག་གི་གསལ་མི་གསལ་གྱི་ལྷ་རྣམས་ལ་ནི་ལྷ་རང་གི་མཐོ་གང་། དབྱིབས་ཟླུམ་པོ་རང་ལ་རང་གསལ་ཆེན་པོར་ཡོད་དོ། །ལྷ་མིན་རྣམས་ལ་ཆེ་ཆུང་རང་གི་ཆག་པ་གང་དབྱིབས་ཟླུམ་པོ། མི་རྣམས་ལ་རང་གི་མཐེ་བོང་གང་བར་ཡོད། དབྱིབས་ཟླུམ་པོ་འབྱུང་བ་བཞི་ཡི་ཟག་པ་མེད་པར་ཡོད། བྱོལ་སོང་རྣམས་ལ་ནི་གཏི་མུག་གི་རྒྱས་འཐུམས་ནས་ནི་ཕྱིར་མི་སྣང་སྟེ། ནང་དུ་རང་གསལ་ཙམ་དུ་ཡོད། ཡི་དྭགས་རྣམས་ལ་སྣང་ངོ་ཕྲ་བ་དེ་ཉུང་འབྲུ་ཙམ་དུ་ཡོད་དོ། །དམྱལ་བ་རྣམས་ལ་རང་ངོ་ལ་གསལ་བ་ཙམ་ལས་མེད་དོ། །འོ་ན་ཁ་དོག་གི་དངོས་པོ་འགྲོ་བ་རིགས་དྲུག་ལ་ཇི་ལྟར་གནས་ན། ལྷ་ལ་དཀར་པོ་ཤས་ཆེར་སྣང་། ལྷ་མིན་རྣམས་ལ་དེ་བཞིན་དུ་ལྗང་གུ་ཤས་ཆེར་སྣང་། མི་ལ་དམར་གསལ་ཤས་ཆེ་བར་སྣང་བ་ནི། རང་ངོ་ལ་ཆགས་པ་དང་བྲལ་བར་ཡོད་དོ། །བྱོལ་སོང་ཉིད་ལ་མཐིང་ག་ཤས་ཆེར་ཡོད། ཡི་དྭགས་ལ་སེར་པོ་ཤས་ཆེ་བར་དེ་བཞིན་ནོ། །དམྱལ་བ་རྣམས་ལ་ཁ་དོག་ལྔར་ཡོད་པ་ནི་ཤས་ཆེ་ཆུང་མེད་པར་གནས་ཏེ། འདི་ནི་ཉོན་མོངས་པའི་འབྲས་བུ་རྫོགས་པས་དེའི་ཆ་ལ་གསལ་བར་གནས་པ་ཡིན་ནོ། །དེ་ལྟར་སྒྲོན་མ་དངོས་ཏེ་མང་དུ་ཡོད་པས་རྟག་པ་མཐར་འཛིན་པ་མ་ཡིན། རིག་གཉིས་མེད་དུ་ཡོད་པས་རྟག་ཆད་མཐར་འཛིན་པའི་གང་གི་ཕྱོགས་སུ་མ་ལྷུང་བའི་ཆར་ཡེ་ནས་གནས་པ་ནི། སྒྲོན་མ་དངོས་ནི་དེ་བཞིན་དུ་ཡིན་ནོ་ཞེས་དངོས་བསྟན་ནས། ༈ ད་ནི་དྲིས་ལན་བཅུ་གཅིག་པ་དེ་རྟོགས་པའམ་མཐོང་བར་བྱ་སྟེ། དེ་ལ་གོམས་པར་བྱས་པའི་མན་ངག་བསྟན་པ་ནི། རང་གི་མཐེབ་དང་འཛུབ་མོ་ཡིས་ཞེས་པ་ལ་སོགས་པས་བསྟན་ཏེ། རྣལ་འབྱོར་པ་རང་གི་མཐེ་བོང་དང་འཛུབ་མོ་ཡིས་ཙཀྵུའི་ཕུགས་དང་འགྲམ་བཙིར་ན་ཐིག་ལེ་སྟོང་པའི་སྒྲོན་མ་དེ་མངོན་གསུམ་དུ་སྣང་སྟེ་སྐལ་ལྡན་གྱིས་འདི་ལ་ཡིད་ཆེས་པར་གྱིས་ཤིག་ཅེས་རྡོ་རྗེ་འཆང་གིས་གདམས་པའོ། །རྩོལ་བ་བྱེད་པས་གོང་ལྟར་གཏེམས་པས་གོམས་པར་གྱུར་པ་དེའི་གནད་ཀྱིས། དམར་པོའི་ཤས་མེད་པར་ཁ་དོག་ལྔ་དང་ལྡན་པར་གྱུར་ཏེ་ནམ་མཁར་མངོན་སུམ་དུ་སྣང་བ་ནི། ཡང་དག་པའི་ས་ལ་འགྲོ་བར་ངེས་ཏེ། ཐིག་ལེ་སྟོང་པའི་སྒྲོན་མ་རྩོལ་བ་མེད་པར་ཤར་ནས་འཁོར་བ་མངལ་གྱི་གྲོང་ཁྱེར་དུ་འཇུག་མི་སྲིད་པས། དེ་ལྟར་ཤར་བའི་སྐལ་ལྡན་འདིས་ནི་རིག་པའི་རང་དབང་ཐོབ་ཞེས་བྱ་སྟེ། དེ་ནི་རྩོལ་བ་མེད་པར་རང་གྲོལ་ལོ། །གལ་ཏེ་བཙན་ཐབས་སུ་གྲོལ་བར་འདོད་ན་རྩོལ་བ་དང་བཅས་པས་འབད་པ་ཅན་དེ་ཡང་འདི་ལྟར། རྣལ་འབྱོར་བ་རང་གི་མཇིང་པའི་ཟུར་གྱི་ཕྱི་རོལ་ན་རྩ་གསེར་གྱི་དོང་རྩེ་བརྩེགས་པ་ལྟ་བུ་ཡོད་དེ། འདི་ལས་ཡེ་ཤེས་ཀྱི་རླུང་གིས་བསྐྱོད་པས་གྱེན་ལ་འཕྲིག་ཅིང་ཐུར་ལ་འཕར་བ་རབ་ཏུ་དྲག་པ་གཉིས་ཡོད་པ་ལ། རང་གི་སོར་བཞི་འོག་ཏུ་གཅལ་བའི་འོག་ཏུ་ལག་པ་གཡས་གཡོན་གྱི་འཛུབ་མོ་དང་འཐེབ་མོས་དལ་གྱིས་ཡང་ཡང་བཙིར་ནས། མིག་གི་གཡས་སུ་འབྲུ་ཚུགས་སུ་བལྟ། དེ་ནས་གྱེན་ལ་དྲག་པར་བལྟ། ལུས་འདུག་སྟངས་ལྕགས་སྡོང་གི་དྲིལ་ལུགས་སུ་བྱ། འདི་ཡི་དུས་ན་རླུང་མཁས་པས་རབ་ཏུ་གཏེམས་པར་བྱའོ། །དེ་ལྟར་བྱས་ན་འོད་ནི་སྒྲོན་མ་མདའ་གང་ཚུན་ཆོད་དུ་གསལ་བར་གནས་པ་ཡིན་ནོ། །དེ་ལྟར་ཡང་སྣང་བ་དེ་ལ་གོམས་ཤིང་འདྲེས་པར་བྱས་ན། དེ་ལས་སྣང་བ་མཆེད་པའི་དུས་ན་ཐིག་ལེའི་འཕེལ་རྣམས་ཀྱི་བར་དུ་ཐིག་ལེ་དང་སྐུ་ལ་སོགས་པ་བཟུང་བ་ནི། དེའི་ཐབས་ཀྱི་མན་ངག་ཏུ་བསླབ་ཐབས་སུ་འདི་ཀུན་དེའི་ནི་གོམས་ཐབས་དེར་ནི་རྩོལ་བ་མེད་པའི་སྣ་ཀར་འགྱུར་རོ་ཞེས་དེ་ཉིད་ཀྱི་ཐབས་ཀྱི་མན་ངག་བསྟན་ནས། ༈ ད་ནི་དྲིས་ལན་བཅུ་གཉིས་པ་མཐུན་པའི་དཔེ་བསྟན་པ་ནི། སྒྲོན་མ་དེ་ཉིད་དཔེར་ན་ཅི་འདྲ་ན་རྨ་བྱའི་མདོངས་དང་མཚུངས་པ་དང་། དེ་བཞིན་དུ་ཁྲ་ཚང་ན་ཉལ་བའི་མིག་གམ་ནི། ཡང་ན་དེ་བཞིན་དུ་ཉ་རྩ་མོའི་མིག་ལྟ་བུ། ཡང་ན་དེ་བཞིན་སྲོག་ཆགས་ཀུན་མོའི་མིག་ནི་བྱི་ལའི་མིག་དང་འདྲ་བར་ཐིག་ལེ་འོད་ཀྱི་མུ་ཁྱུད་དུ་གནས་པའོ། །དཔེ་ནི་འདི་རྣམས་བཞིན་དུ་སྒྲོན་མ་དེ་ཡང་གནས་པའོ། །ཞེས་དངོས་བསྟན་ཀྱང་དཔེས་ཡིད་ཆེས་པར་བསྟན་པའོ། །ཞེས་སྒྲོན་མ་འབར་བའི་རྒྱུད་ལས། དེ་ལྟར་ལན་རྒྱས་པར་བཤད་པ་ལ་བཅུ་གཉིས་དྲི་བ་མདོར་བསྟན་པ་བཅུ་གསུམ་གྱི་ལེའུ་ཡི་གཞུང་བསྟན་ནས། ལེའུའི་མཚན་སྔར་བསྟན་པའི་དོན་ཐིག་ལེ་སྟོང་པའི་སྒྲོན་མ་བསྟན་པའི་བཏུས་པའི་དོན་གསུམ་དུ་བྱས་ནས་བསྟན་པའི་ལེའུ་སྟེ། ཞེས་གཞུང་གི་དུམ་བུ་ངེས་པའི་དོན་བསྟན་པ་སྟེ་གོང་དུའོ། །གསུམ་པའོ། །གཉིས་ལས་གཞན་དུ་གྱུར་པའི་གྲངས་ཀྱི་རྣམ་པའོ། ༈ །ད་ནི་ལེའུ་བཞི་པའི་ཚིག་དོན་ཕྲེང་བ་བརྒྱུས་པ་ལྟར་བསྟན་པ་ནི། ལེའུ་འདི་ལ་བསྡུས་པའི་དོན་བཞི་སྟེ། དྲི་བ་མདོར་བསྟན་པ་དང་། ལན་རྒྱས་པར་བཤད་པའོ། །རྒྱུད་བཟུང་བའི་ཕན་ཡོན་དང་། རྗེས་སུ་ཡི་རང་བ་དང་བཞི་ལས། དྲི་བ་མདོར་བསྟན་པ་ནི། དེ་ནས་རྒྱུད་དག་རྡོ་རྗེ་འཆང་ཞེས་པ་ནི་སྡུད་པ་པོའི་མིང་ངོ་། །སྡུད་པ་པོ་དེས། ལེའུ་གསུམ་པར་མི་གནས་པའི་ཡེ་ཤེས་ཆེན་པོར་གོ་ཕྱེ་ནས་རང་བཞིན་དག་པའི་སྟོན་པ་རྡོ་རྗེ་འཆང་ལ་ཡང་ནི་ཞུས་པའི་ཚིག་འདི་སྐད་ཅེས་བྱ་བར་གསོལ་ཏོ། །ཀྱེ་ཀྱེ་བཅོམ་ལྡན་རྡོ་རྗེ་འཆང་ཞེས་སྟོན་པ་ལ་བོས་ནས། ཐིག་ལེ་སྟོང་པའི་སྒྲོན་མ་ཉིད། སྟོན་པས་ལེའུ་གསུམ་པར་གསུངས་པ་དེ་ལྟར་ལགས་ན། ཉིད་ཀྱི་གོང་དུ་དང་པོར་གསུངས་པའི། དག་པ་དབྱིངས་ཀྱི་སྒྲོན་མ་ཉིད། སྔར་མདོར་བསྟན་པའི་ལེའུ་དང་པོར་གསུངས་པའི་ཚིག་འདིའི་དོན་ནམ་བྱེ་བྲག་བདག་གིས་ལེགས་པར་མ་འཚལ་བས། འདིའི་ངོ་བོ་ཇི་ལྟ་བུ་ཞིག་ལགས། འདིའི་ངེས་ཚིག་གི་རྣམ་པ་ཅི་ལགས་ཞེས་ཀུན་ལ་སྦྱར་རོ། །འདི་ཀུན་བདག་གིས་སྔར་སྟོན་པས་སྒྲོན་མ་གསུམ་པའི་སྐབས་སུ་གསུངས་པ་དེའི་ཤུགས་ཀྱིས་འཚལ་ཀྱང་། འདི་ཉིད་རང་གི་བྱེ་བྲག་ལེགས་པར་མ་འཚལ་བས། ཕྱིས་བདག་སེམས་ཅན་གྱི་དོན་བྱེད་པའི་ཚེ་མ་འོངས་པའི་དུས་ཀྱི་སེམས་ཅན་གྱི་དོན་དུ་ཡང་། རང་བཞིན་དག་པའི་རྡོ་རྗེ་འཆང་ལ་བདག་ཉན་པར་མཚལ་བས་འདི་དག་ལེགས་པར་ཕྱེ་ལ་གསུངས་ཞེས་དྲི་བ་མདོར་བསྟན་ནས། ༈ ད་ནི་ལན་རྒྱས་པར་བསྟན་པ་ལ་ནང་དོན་བཅུ་གཅིག་གི་བསྟན་པའི་དང་པོ་ངོ་བོ་བསྟན་པ་ནི། དེ་ནས་རྡོ་རྗེ་འཆང་ཆེན་གྱིས། །ཞེས་པ་ལ་སོགས་པས་བསྟན་ཏེ། དེ་ནས་ནི་ཞུས་མ་ཐག་པའི་དེ་ནས་སོ། །རྡོ་རྗེ་འཆང་ཆེན་གྱིས་ནི་སྟོན་པའི་མཚན། འདི་དབྱིངས་རྣམ་པར་དག་པའི་སྒྲོན་མ། སྐད་ནི་གསུངས། ཚིག་ཏུ་ནི་བྱེ་བྲག་ཏུ་སྤྲོས་པ། བཀའ་ནི་བྱིན་གྱིས་བརླབས་པའི་བཀའ་དང་། རྗེས་སུ་གནང་བ་དང་། དངོས་གསུམ་ལས་འདི་བཀའ་དངོས་སོ། །རྩལ་ཏོ་ནི་འོ་མ་ལས་མར་ལྟར་བསྡུས་པའི་དོན་དུ་བཀའ་སྩལ་པ་དང་། ཚ་བའི་ནད་ལས་ག་བུར་ལྟར་གཉེན་པོའི་དོན་དུ་བཀའ་སྩལ་པ་དང་། ཇི་ལྟར་སྐས་ཀྱི་སྡོང་བུའི་རིམ་པ་ལྟར་དབང་པོ་བྱེ་བྲག་ཏུ་རྩལ་བ་གསུམ་ལས་འདི་ནི་བསྡུས་པའི་དོན་དུ་གསུངས་པས་སྟེ། ཐེག་པ་མཐའ་དག་གི་ཡང་སྙིང་འོ་མ་ལ་སྐྲོགས་ནས་མར་དུ་ཕྱུང་བ་ལྟར། སྤྱིར་ཐེག་པ་རྣམས་ལས་ཆེན་པོ། དེ་ལ་ཕ་རོལ་དུ་ཕྱིན་པ་དང་། སྔགས་གཉིས་ལས་སྔགས་སུ་འདུས། དེ་ལ་ཕྱི་ནང་གཉིས་ལས་ནང་པར་བསྡུས། དེ་ལ་བསྐྱེད་པ་དང་རྫོགས་པ་རྫོགས་པ་ཆེན་པོ། གསུམ་ལས་རྫོགས་པ་ཆེན་པོར་བསྡུས། རྫོགས་ཆེན་ལ་སེམས་སྡེ། ཀློང་སྡེ། མན་ངག་གི་སྡེ་གསུམ་ལས། མན་ངག་གི་སྡེར་བསྡུས། མན་ངག་གི་སྡེ་ལ་མང་པོར་བཞུགས་པ་ལས་ཀྱང་ཐིག་ལེ་རང་གནད་ལ་བབ་པ་ཟབ་པར་བསྡུས། དེ་ལས་ཀྱང་གསང་བ་བླ་ན་མེད་པ་ཟབ་པར་བསྡུས། དེ་ལ་རྒྱུད་བཅུ་བདུན་དུ་བཞུགས་པ་ལས་ཀྱང་བརྗོད་བྱའི་དོན་མཐར་ཐུག་པ་འོ་མ་ལ་མར་བསྡུས་པ་ལྟར་སྙིང་པོ་ཡང་ཞུན་སྒྲོན་མ་བཞིར་བསྡུས་ནས་རྒྱུད་འདིར་བཀོད་པའོ། །དེ་ཡང་སྡུད་པ་པོ་ལ་ལུས་ཉལ་བ་དང་། བརྐྱང་པ་དང་། ཟུར་ལ་འདུག་པ་དང་། ཞྭ་དང་། སྟན་དང་། མཚོན་ཐོག་པ་དང་། སྒེག་པའི་རྒྱན་སྤོང་ལ་ཉོན་ཅིག །ངག་གཏམ་དང་། བསྟན་པ་གཞན་གྱི་ཚིག་བརྗོད་པ་དང་། སྔགས་དང་ཁ་ཐོན་ལ་སོགས་པ་སྤོངས་ལ་ཉོན་ཅིག །སེམས་རྣམ་པར་གཡེངས་པ་དང་། སྔར་ཞེན་པའི་བག་ཆགས་ལ་ཞེན་པ་དང་། མ་འོངས་པ་སློང་པ་དང་། ད་ལྟ་འཁྲུལ་པ་དང་། ཕྱིན་ཅི་ལོག་གི་སེམས་དང་། མི་དད་པའི་བསམ་པ་དང་། ཡིད་དཔྱོད་ཀྱི་བསམ་པ་དང་རྣ་བའི་དབང་པོ་ལ་སོགས་པའི་སྒོ་སོ་སོའི་ཡུལ་ལ་མ་ཡེངས་པར་ཉོན་ཅིག་རྒྱུད་དག་རྡོ་རྗེ་འཆང་ཞེས་སྔོན་དུ་སྟོན་པས་སྡུད་པ་ལ་ཉན་པའི་སྐྱོན་སྤོངས་ལ་ཉོན་ཅིག་ཞེས་གདམས། རྗེས་འཇུག་ཏུ་བླ་མ་སློབ་མ་ལ་གདམས་པའོ། །སྡུད་པ་པོ་ཁྱོད་ཀྱིས་སེམས་ཀྱི་རྣམ་པར་རྟོག་པ་ནོར་རམ་འཁྲུལ་ལམ་སྙམ་པའི་ཤེས་པ་ཕྱིན་ཅི་ལོག་བྱུང་ཡང་། ངས་ཇི་ལྟར་བསྟན་པ་ལ་ནོར་བ་མེད་ཀྱིས། ཁྱོད་རང་གི་ཤེས་པ་ལ་ཕྱིན་ཅི་ལོག་གི་རྣམ་པ་སྐྱེས་པའམ་ཡིད་དཔྱོད་ཀྱི་རྟོག་པ་སྐྱེ་བ་སྲིད་པས། ངས་ཇི་ལྟར་བསྟན་པ་ལྟར་གོང་འོག་དང་། ཚིག་ལ་ལྷག་ཆད་དང་། དོན་ལ་ཡིད་ཀྱིས་མ་དཔྱད་པར། ནོར་བ་མེད་པའི་སེམས་རབ་ཏུ་དད་པར་གྱིས་ལ་ཟུངས་ཤིག་ཅེས་གདམས་པའོ། །ཁྱོད་ཀྱིས་ངེས་པའི་དབྱིངས་རྣམ་པར་དག་པའི་ངོ་བོ་ནི། དབྱིངས་ནི་ཕྱི་དབྱིངས་ནམ་མཁའ། ནང་དབྱིངས་སྒྲོན་མ། གསང་བའི་ཆོས་ཀྱི་དབྱིངས་སྟོང་པ་མཐའ་འདི་ཞེས་བརྗོད་པར་མི་ནུས་ལ། དེ་བཞིན་དུ་དབུས་དང་ཕྱོགས་མིག་ཏུ་མ་ཚུད་པའི་སྒྲོན་མས་ནི། དབྱིངས་ལ་བྱ། རིག་པ་གཞི་འཛིན་པའི་རིག་པ་ལ་ཉོན་མོངས་པ་ཀ་ནས་དག་པ་དང་། ཁྱབ་བྱེད་རྒྱུའི་རིག་པ་ལྷུན་གྲུབ་ཀུན་ལ་ཁྱབ་པ་དང་། ལམ་སྣང་གི་རིག་པ་འཕེལ་སྟོན་པ་དང་། ལྷག་མཐོང་གི་རིག་པ་ངོ་བོ་སྡུད་ཅིང་། ལུ་གུ་རྒྱུད་ཀྱི་ར་བར་དབྱིངས་ཀྱི་སྒྲོན་མ་འདིས་བྱེད་དེ། མདོར་ན་རིག་པའི་ཁྱིམ་ལྟ་བུར་སྣང་བ་ཡིན་ནོ། །འདི་ལ་དུས་རྒྱུན་དུ་སུས་གོམས་པར་བྱས་པའི་སྣང་བ་ལ་འདྲིས་པ་དེས་དོན་དེ་ཉིད་རྟོགས་པ་ཡིན་ནོ། །དེ་རང་གི་ངོ་བོ་ནི་ཁ་དོག་མཐིང་ག་ཆོས་ཉིད་མི་འགྱུར་བར་རང་གསལ་བ་ནི། རིག་པའི་མུ་ཁྱུད་ཀྱི་འོད་ནི་ར་བར་གནས་པ་ཡིན་ཏེ། དེ་གཞན་གྱིས་བྱས་པ་མ་ཡིན་པས་རང་གིས་རང་གསལ་མར་མེའི་འོད་ལྟར་ཕྱི་ཡི་ཡུལ་དུ་སྣང་བ་དེ་ཁོ་ན་རང་། དེ་ཉིད་ཀྱི་ངོ་བོ་ཉིད་ཡིན་པར་འདི་ནི་མ་བཅོས་པར་རང་སར་བཞག་པས་སངས་རྒྱས་ཀྱི་དགོངས་པ་བྱ་བྱེད་ལས་འདས། ཞེས་ངོ་བོ་བསྟན་ནས། ༈ ད་ནི་དྲིས་ལན་གཉིས་པ་ངེས་ཚིག་བསྟན་པ་ནི། རྣམ་པ་ཡུལ་དུ་སྣང་བ་ལ་ཞེས་པ་ལ་སོགས་པས་བསྟན་ཏེ། དེ་ནི་རགས་པའི་རྣམ་པ་འབྱུང་བ་བཞིའི་རྣམ་པ་དང་། ཡུལ་གྱི་རྣམ་པ་གཉིས་ལ་སྒོ་ལྔ་སོ་སོའི་ཡུལ་ལ་ཞེན་པའི་རྣམ་པ་དང་། བཟུང་བ་ཡུལ་གྱི་རྣམ་པ་ཁ་དོག་དང་དབྱིབས་ཀྱི་བྱེ་བྲག་དང་། ཤེས་པའི་རྣམ་པ་ཡིན་སྙམ་པ་དང་། མིན་སྙམ་པ་ལ་སོགས་པ་དང་། འཁྲུལ་པའི་རྣམ་པ་དེ་མ་ཡིན་པ་ལ་དེར་འཛིན་པ་དང་། ཡང་དག་པའི་རྣམ་པ་རང་སྣང་མངོན་སུམ་དུ་མཐོང་བ་ལྔ་ལས་འདི་ནི་ཡང་དག་པའི་རྣམ་པ་ཡུལ་ནི་དབང་པོའི་རྣམ་ཤེས་མ་ཡིན་པར་དེ་ཁོ་ན་ཉིད་དུ་སྣང་བ་ལ། གོང་གི་རྣམ་པ་བཞི་དག་པས་དྲི་མའི་གྲངས་མ་རིག་པ་གསུམ་དང་། ཡིད་དང་དྲུག །རྐྱེན་བཞི་དང་། སྒྲིབ་པ་གསུམ་དང་། ཉོན་མོངས་པ་ལྔ་དང་། བག་ཆགས་སྔ་ཕྱི་ལ་སོགས་པའི་མཐའ་ཡེ་ནས་ཟད་པས་དེ་ཉིད་ལས་དང་རྣམ་སྨིན་ལ་མི་ལྟོས་ཏེ། རང་བྱུང་གི་ཡེ་ཤེས་རང་དབང་དུ་གྱུར་པས། རེ་དོགས་ལས་འདས་པའོ། །དབྱིངས་ཀྱིས་ཕྱི་ནང་སྣོད་བཅུད་ལ་མ་ཁྱབ་པ་མེད་པས། དོན་ལྷག་མཐོང་གི་རིག་པའི་རང་ཡུལ་བྱེད་པས། རིག་པ་རྡོ་རྗེ་ཉིད་ནི་མི་འགྱུར་ཞིང་འདུས་མ་བྱས་པ། ལུ་གུ་རྒྱུད་བར་མཚམས་མེད་པར་རྒྱུན་འདབ་སྦྱོར་དུ་གནས་པའོ། །རིག་པ་འདི་ཉིད་དབྱིངས་ཀྱི་ནང་དུ་འཇུག་པས་དེ་ལ་གཏད་པར་བྱས་ན། རིག་པ་རང་གི་ངོ་བོ་མཐོང་བའི་བྱིན་གྱིས་བརླབས་ཀྱིས་རྟོག་མེད་དུ་མི་འགྲོ་མི་སྲིད་དོ། །དེའི་ཕྱིར་ན་ནང་གི་དབྱིངས་རྣམ་པར་དག་པའི་སྒྲོན་མའི་གོ་རར་ཡང་ནས་ཡང་དུ་ཡུན་རིང་པོར་གཏད་ཅིང་ཉམས་སུ་བླངས་ཏེ། དེ་ཉིད་རླུང་གིས་མ་བཟུང་ཞེན་པས་དེ་ལ་མི་གནས་པའི་འདུག་ཚུལ་གྱིས་འདི་ནི་ཉིན་མཚན་དུ་འབྲལ་བ་མེད་པར་ཉམས་སུ་བླངས་པས། དེ་ཉིད་གོམས་ཏེ། དབྱིངས་རིག་ངོ་བོ་དེ་དཔེར་ན་ལྕེ་སྤྱང་གི་མིག་ལྟར་ཉིན་མཚན་མེད་པར་དུས་རྒྱུན་དུ་སྣང་བའི་ཚེ་ན་རིག་པ་ཚད་ལ་ཕེབས་སུ་ཉེ་བ་ཡིན་ནོ། །དེ་ཡང་གང་ལས་བྱུང་ན་དབྱིངས་རྣམ་པར་དག་པའི་སྒྲོན་མས་རིག་པ་རྡོ་རྗེ་ལུ་གུ་རྒྱུད་ཀྱི་སྐུ། ཕྱི་ཡི་དབྱིངས་ནམ་མཁའ་སྤྲིན་མེད་པ་ཉིད་ལ་ཅེར་གྱིས་བཏོན་ཏེ་སྣང་བ་བྱུང་བས་ཏེ། དེ་ཡང་རང་བཞིན་མེད་པར་སྣང་བ་ཡིན་ལ། རྫས་སུ་གྲུབ་པའི་མཚན་མར་ཡོད་པ་ནི་མིན་ཏེ། ཡང་དག་པར་བརྟགས་ན་ཆོས་ཉིད་རང་ཟད་པར་བྱེད་པ་ཡིན་པས། མས་ཆོས་ཉིད་ཟད་པའི་སྣང་བ་དེའི་དོན་འཛིན་པས་ན། འདི་དག་ནི་བློས་བཏགས་པ་མིན་པར་ཡེ་ནས་འདིའི་རང་བཞིན་ཉིད་ཀྱི་ངེས་ཚིག་ཏུ། ཡེ་ནས་སངས་རྒྱས་རྣམས་དང་འདུ་འབྲལ་མེད་པར་གནས་པའོ། །ངེས་ཚིག་བསྟན་ནས། ༈ ད་ནི་དྲིས་ལན་གསུམ་པ་དབྱེ་བ་བསྟན་པ་ནི། དབྱེ་བ་རྣམ་པ་གསུམ་ཡིན་ཏེ། །ཞེས་པ་ལ་སོགས་པས་བསྟན་ཏེ། གསུམ་ནི་གཞི་ལ་གནས་པའི་དབྱིངས་དང་། ལམ་ལ་གནས་པའི་དང་། ཡུལ་ལ་སྣང་བའི་དབྱིངས་སོ། །གཞི་ནི་གནས་སྐབས་ལུས་ལ་བཞི་སྟེ། ལུས་ཀྱི་རྩ་བཞི་ཡི་ནང་ན་གནས་པའི་དག་པའི་དབྱིངས་ཀྱིས་ལས་གང་བྱེད་ན། ལྷག་མཐོང་གི་རིག་པའི་སྐུ་ལུ་གུ་རྒྱུད་དེ་གཞི་གནས་ཀྱི་ཡེ་ཤེས་གསུམ་དུ་ཤར་བས། དེ་སྐུ་རུ་ཕྱི་ཡི་དབྱིབས་ལ་འཛིན་པར་བྱེད་པ་ཡིན་ལ། དེ་བཟུང་བས་འཁྲུལ་སྣང་འགགས་པའི་དགོས་པ་ཡོད་དོ། །ལམ་ལ་ནི་ལུས་ཀྱི་འཁོར་ལོ་བཞིའི་ཁྱད་པར་གྱི་རྩ་བཞི་ནས་བྱུང་ཞིང་། དེ་ཉིད་ལ་གནས་པའི་དབྱིངས་རྣམ་པར་དག་པའི་སྒྲོན་མ་ཉིད་ཀྱིས་ནི་བྱེད་པའི་ལས་གང་བྱེད་ན། གཞི་གནས་ཀྱི་རིག་པའི་ཡེ་ཤེས་ཐིག་ལེ་བཞིའི་ཐིག་ལེ་བཟང་པོ་ལ་སོགས་པའི་དྭངས་མ་སྡུད་པར་བྱེད་པ་ལ། དེ་བྱས་པས་ཟག་བཅས་ལུས་འཁྲུལ་པ་འཇིག་པའི་དགོས་པ་ཡོད་དོ། །ཡུལ་ལ་ནི་སྒོ་མིག་ནས་ཐོན་ནས་ནམ་མཁའ་འཁྲུལ་པ་མེད་པ་ལ་སྣང་བའི་དབྱིངས་རྣམ་པར་དག་པའི་སྒྲོན་མའི་ལས་ཀྱི་ནི་རིག་པ་རྡོ་རྗེ་ལུ་གུ་རྒྱུད་དེ་ཡེ་ཤེས་ཀྱི་རླུང་གིས་བསྐྱོད་ནས་འགྲོ་བ་སྣང་བ་ཉིད། ནམ་མཁའ་ལ་ཡས་སུ་མི་འཇུག་པར་དབྱིངས་ཀྱི་ནང་དུ་བརྩོན་བུ་ལྟ་བུར་འཛིན་པར་བྱེད་པའོ། །དེ་བྱས་པས་རིག་པ་ཉིད་ཚད་ལ་ཕེབས་པའི་དགོས་པ་ཡོད་དོ། །དེའི་ཕྱིར་ན་དགོས་པ་གསུམ་དང་བཅས་པ་འདི་ཀུན་དེ་ཡི་དབྱེ་བའོ། །ཞེས་དབྱེ་བ་བསྟན་ནས། ༈ ད་ནི་དྲིས་ལན་བཞི་པ་རང་བཞིན་བསྟན་པ་ནི། རང་བཞིན་སྣང་བ་མ་འགགས་པ་ཞེས་པ་ལ་སོགས་པས་བསྟན་ཏེ། འདི་ནི་སྣང་བ་བཞི་ལས་རང་བཞིན་གྱི་སྣང་བས་ཏེ། ལྷུན་གྲུབ་ཀྱི་ཡོན་ཏན་སྐྱོན་དུ་ཤར་བ་ལས་རོལ་པ་མ་འགགས་ཏེ། སྣ་ཚོགས་སུ་ཤར་བས་སེམས་ཅན་གྱི་རྟོག་ཚོགས་སུ་བྱུང་བས་འདི་ལྟར་སྣང་བའི་ཚོགས་བྱུང་བ་ནི། འདི་ཡི་སྒྲའི་གནས་བསྒྱུར་བ་ལས་དྲན་པ་གློ་བུར་ཀུན་ཟད་དེ་ཞེས་བསྒྱུར་བས་སེམས་ཅན་སྣང་བའི་དུས་ན་དྲན་པ་ལྟར་བྱུང་བས་ན། དྲན་པའི་རྒྱུ་དང་། རྐྱེན་དང་། རང་བཞིན་དང་། བྱེད་པའི་ལས་དང་། འབྲས་བུ་དྲན་པ་ལ་བཟླ་བའི་མན་ངག་གོ། །དྲན་པའི་རྒྱུ་ནི་བག་ཆགས་སྔ་ཕྱི་ལས་ཡིད་ཀྱི་འགྱུ་བ་ལས་བྱུང་ལ། རྐྱེན་ཞེན་པའི་ཡུལ་སྔ་མ་ལ་བརྟེན་ནས་དྲན་པ་སྐྱེ་བ་དང་། བཟུང་བའི་ཡུལ་ཐུག་ཕྲད་ལས་སྐྱེ་བ་ནི་དགྲ་དང་གཉེན་གྱི་རྣམ་པ་རྣམས་ལས་སྐྱེ་བའོ། །དྲན་པའི་རང་བཞིན་ནི་གློ་བུར་བས་ཏེ། དཔེར་ན་ནམ་མཁའ་ལ་སྤྲིན་བྱུང་བ་དང་འདྲའོ། །བྱེད་པའི་ལས་ཀྱི་བདེ་སྡུག་གི་སྣ་ཁྲིད་པར་བྱེད་པས་ཏེ་བདེ་བར་དྲན་པ་དང་སྡུག་བསྔལ་དུ་དྲན་པ་རྣམས་སོ། །དྲན་པའི་འབྲས་བུ་བདག་གཞན་དུ་འཛིན་པའོ། །དེ་ཉིད་ལ་བཟླ་བའི་མན་ངག་ནི། དྲན་པ་ནི་གློ་བུར་གྱི་ཤེས་པས་ཏེ། དཔེར་ན་ནམ་མཁའ་ལས་སྤྲིན་པ་གློ་བུར་དུ་བྱུང་ཡང་ནམ་མཁའ་ཉིད་ལ་གོས་པ་མེད་དོ། །དེ་ལྟར་དྲན་པ་གློ་བུར་བ་དེ་སྣང་སྣང་ཡང་ཆོས་ཉིད་ལ་གོས་པ་མེད་པ་དེ་ནམ་མཁའ་འདྲ་བའོ། །དེའི་ཕྱིར་ན་དྲན་པ་གཞི་ཆེ་བ་ཞེས་བྱ་སྟེ། དྲན་པ་སྔ་མ་འགགས་པ་ཕྱི་མ་དེ་ལ་གནས་མི་སྲིད། ད་ལྟ་འགྱུ་བ་རང་སར་དག་པས་སོ། །བློ་ནི་ཡང་རྒྱུ་དང་། རྐྱེན་དང་། རང་བཞིན་དང་། འབྲས་བུ་དང་། བྱེད་པའི་ལས་དང་། ལ་བཟླ་བའོ། །བློ་ཡི་རྒྱུ་ནི་ཤེས་པ་མ་དག་པ། རྐྱེན་ཚིག་དང་ཡི་གེ་ལ་བརྟེན་ནས་སྐྱེ་བ་ཡིན་ལ། རང་བཞིན་ཡིད་དཔྱོད་རྟག་པ་དང་བཅས་ཤིང་ཚིག་ལ་སྒྲོས་འདོགས་པ་རྣམས་སོ། །བྱེད་པའི་ལས་ནི་ཐེ་ཚོམ་དང་སྙམ་བྱེད་དང་རྟོག་དཔྱོད་དུ་འཛིན་པར་བྱེད་ཅིང་ཚིག་དང་ཡུལ་ལ་སྙམ་འཇུག་པའོ། །འབྲས་བུ་མ་དག་པའི་ཤེས་པ་དང་ཕྱིན་ཅི་ལོག་གོ། །དེ་ཉིད་ལ་བཟླ་བ་ནི་ཤེས་པ་སྟོང་པ་འགྱུ་བ་རང་སངས་པས་བློ་སྐྱེ་བ་གོ་འགགས་པས་རང་བཞིན་བློ་བྲལ་གྱི་དགོངས་པ་ལ་གནས་པས། ཚིག་གི་ཞེན་པ་རང་བྲལ་ཏེ། རྫོགས་ཆེན་བྱ་རྩོལ་ལས་འདས་པའོ། །དངོས་པོ་ནི་གཉིས་ཏེ། རང་གི་འདུག་ཚུལ་གྱི་དངོས་པོ་དང་། ལྟར་སྣང་གི་དངོས་པོའོ། །རང་གི་འདུག་ཚུལ་ནི་བློ་ལས་འདས་པས་བསྒྲུབ་ཏུ་མེད་དེ་ལྟ་སྒོམ་གྱི་འབད་རྩོལ་མེད་པའོ། །དྲན་པ་ལས་འདས་པས་སྐྱེ་བའི་རྒྱུན་ཆོད་དེ་རེ་དོགས་དང་བྲལ་བ་ཉིད་དོ། །ལྟར་སྣང་གི་དངོས་པོ་ལས་འདས་པས་བཏགས་པ་ཐམས་ཅད་རང་བཞིན་གྱིས་སྟོང་པས་ཚིག་དང་ཡི་གེ་ལ་མི་ལྟོས་པའོ། །ལྟར་སྣང་གི་དངོས་པོའི་རྒྱུ་འཁྲུལ་པ། རྐྱེན་ལས་དང་རྣམ་སྨིན། རང་བཞིན་མི་རྟག་པ་དང་། བྱེད་པའི་ལས་ཀྱི་འཁོར་བའི་རྒྱུ་འབྲས་བསྐྱེད་པར་བྱེད་པའོ། །འབྲས་བུ་འགྲོ་བ་རིགས་དྲུག་གི་སྐྱེ་གནས་སོ། །དེ་ཉིད་ལ་བཟླ་བ་ནི་སྐལ་ལྡན་གྱིས་ཉམས་སུ་བླངས་པས་དེ་དག་ཀུན་ཟད་དེ། རིག་པའི་ངོ་བོ་ལ་མི་སྣང་བས་འཁྲུལ་པ་རྣམས་རང་དག་སྟེ། ཆོས་ཀྱི་དབྱིངས་སུ་རྒྱ་ཆེ་ལ་དཀྱིལ་ཡངས་པར་གྱུར་པ་ནི། མཐའ་གྲོལ་ཡོངས་རྫོགས་ཀྱི་དགོངས་པར་གནས་པས་དེ་ལ་རྣམ་པར་རྟོག་པ་མེད་པའི་ཕྱིར་རིག་པ་ཡང་དག་ཏེ་ངོ་བོ་ལ་གསལ་འགྲིབ་མེད་པར་གནས་པ་ནི། གོང་མའི་དྲན་པ་དང་བློ་དང་དངོས་པོ་རྣམས་ཀྱི་རྐྱེན་གྱིས་མི་འགྲིབ་པས་མི་གཡོ་བ་ནི་རྣམ་རྟོག་གི་རླུང་དང་བྲལ་བའོ། །མཉམ་པ་ཉིད་ནི་རྒྱ་ཆད་དང་ཕྱོགས་ལྷུང་མེད་པའི་དགོངས་པ་བཅོས་མ་ལས་གྲོལ་བའོ། །དེ་གང་ལས་བྱུང་ན་གོང་མའི་དྲན་པ་དང་བློ་དང་དངོས་པོ་གསུམ་གྱི་མཚན་ཉིད་ཤེས་པ་ལས་བྱུང་བའོ། །དེ་ལྟར་གསུམ་གྱི་རྣམ་པར་རྟོག་པའི་མཐའ་ཟད་ཙམ་ན། ཆོས་ཐམས་ཅད་མཉམ་པ་ཉིད་གཉིས་སུ་མེད་པའི་སྟོང་པ་ཉིད་དབྱིངས་སུ་ཡང་དག་པའི་རིག་པ་རྡོ་རྗེ་ལུ་གུ་རྒྱུད་ཚུད་པ་ཡིན་པས། དེ་ལ་ཡེ་ནས་རྣམ་རྟོག་རྣམ་པ་གསུམ་ཟད་པར་ནི། དབྱིངས་རྣམ་པར་དག་པའི་སྒྲོན་མའི་རང་བཞིན་ལ་རྣམ་པའི་ཡུལ་དག་སྟེ། གཉིས་མེད་ཀྱི་དབྱིངས་སུ་ཆོས་ཐམས་ཅད་རང་གནས་པ་ལ། རྒྱུད་ལུང་མན་ངག་གི་བརྗོད་ཅིང་འདི་ལྟར་སྣང་བའི་ཆོས་རྣམས་ལ་དྲན་པ་དང་བློས་བཏགས་པའི་ཚིག་གཉིས་སུ་མེད་པས། ཕྱི་ཡི་ཆོས་ཤེས་བྱ་གྲུབ་པའི་མཐའ་རྣམས་དང་། ནང་གི་ཆོས་རྣམས་ཉམས་སུ་བླང་བྱ་ཟབ་མོ་དོན་གྱི་དགོངས་པ་འདི་ཡིན་ཞེས་གཉིས་སུ་མེད་པའི་ཕྱིར། དབྱིངས་རྣམ་པར་དག་པའི་སྒྲོན་མ་ལ་ཡུལ་དངོས་པོ་གཉིས་སུ་མེད་པས། ཡང་དག་པ་ཆོས་ཉིད་མཉམ་པ་ཆེན་པོའི་ངང་དུ་བྱ་བྱེད་དང་བྲལ་བར་གནས་པས་རང་གི་རིག་པའི་ཡེ་ཤེས་བསྐྱོད་བྱེད་ཀྱི་རླུང་དང་བྲལ་བས་རང་བཞིན་གྱིས། བརྡལ་བ་ཆེན་པོའི་ངང་དུ་གནས་པའོ་ཞེས་རང་བཞིན་བསྟན་ནས། ༈ ད་ནི་དྲིས་ལན་ལྔ་པ་དབྱིངས་རྣམ་པར་དག་པའི་སྒྲོན་མའི་དགོངས་པའམ་མཚན་ཉིད་བསྟན་པ་ནི། ཕྱི་ནང་མེད་པར་ཟང་ཐལ་བས་ཞེས་པ་ལ་སོགས་པས་བསྟན་ཏེ། ཕྱི་ཡུལ་དང་ནང་སེམས་གཉིས་སུ་མེད་པར་ཟང་ཐལ་དུ་གནས་པས་སྐྱོན་གང་གིས་ཀྱང་མ་བསྒྲིབས་ཏེ། དབྱིངས་རིག་འདུ་འབྲལ་མེད་པ་ལ། དྲི་མ་ནི་མིག་ལ་ཕྱེ་བཙུམ་དང་། ནམ་མཁའ་ལ་སྤྲིན་དང་། ལུས་ལ་བསྒུལ་བསྐྱོད་དང་། རིག་པ་ལ་རླུང་གི་དྲི་མ་མེད་པར་ཉམས་སུ་ལེན་པའི་དུས་ན་བྱ་བ་ཡིན་ལ། དེ་ཡང་བྱས་པས་བྱུང་བ་ནི་མ་ཡིན་ཏེ། ཡེ་ནས་ཆོས་ཉིད་ཀ་དག་ཆེན་པོར་ཡང་དག་པའི་ས་ལ་བཞུགས་པ་ཡིན་ཏེ། ད་ལྟ་ནི་དེའི་གནས་ལུགས་ཀྱི་སྟེང་དུ་ཕབ་པ་ཡིན་པས། འདི་ཡི་དུས་ན་ཡུལ་དང་ཡུལ་ཅན་གྱི་རྣམ་པ་རང་དག་པས་དམིགས་པ་རྣམ་པར་གཅོད་པའི་ཤེས་པ་མེད་དེ། དབྱིངས་ཀྱི་རང་བཞིན་འདི་ནི་ངོ་བོས་སྟོང་ལ། མཚན་ཉིད་གསལ་བ་དག་ཏུ་འདི་ནི་ཡེ་ནས་བཞུགས་པ་ལ་ད་སུས་ཀྱང་བཅོས་སུ་མེད་པའོ། །འོ་ན་འདི་མེད་ན་རིག་པའི་ཡུལ་མེད་པས། འོད་ལྔའི་སྣང་བ་འགགས་པ་མེད་པའི་ཆར་ནི་དབྱིངས་རྣམ་པར་དག་པའི་སྒྲོན་མ་འདི་བསྟན་པའོ་ཞེས་མཚན་ཉིད་དང་དགོངས་པ་བསྟན་ནས། ༈ ད་ནི་དེ་ཉིད་གོམས་པར་བྱེད་པའི་མན་ངག་དྲིས་ལན་དྲུག་པ་བསྟན་པ་ནི། འཁོར་འདས་རུ་ཤན་ཕྱེད་ནས་ནི། །ཞེས་པ་ལ་སོགས་པས་བསྟན་ཏེ། ཐོག་མར་རྟེན་གྱི་གང་ཟག་སྐལ་བ་དང་ལྡན་པ་རང་བཞིན་རྫོགས་པ་ཆེན་པོའི་དོན་ལ་ཡིད་ཆེས་ཤིང་མོས་པ་གཅིག་གིས། བླ་མ་མཚན་ཉིད་དང་ལྡན་པ་གཅིག་ལ། དབང་བཞི་རྫོགས་པར་བྱས་ལ། དེ་ནས་གདམས་པ་འདི་ཡང་དང་ཡང་དུ་ཞུས་སྟེ། ཕུ་ཐག་ཆོད་པར་བྱས་ལ། དེ་ནས་འཇིག་རྟེན་འདི་བློས་བཏང་ལ་རང་གི་རྫས་དང་ཡོ་བྱད་ཅི་ཡོད་པ་རྣམས་བླ་མ་ལ་ཕུལ་ལ། མན་ངག་འདི་བསྒྲུབ་པར་བྱས་ཏེ། སྒྲུབ་ལུགས་གཉིས་ལ་སྤྲང་པོའི་ཚུལ་གྱིས་སྒྲུབ་པ་དང་། རི་དྭགས་ལྟར་བསྒྲུབ་པའོ། །སྤྲང་པོ་ལྟ་བུར་བསྒྲུབ་པ་ནི་མིས་ངོ་མི་ཤེས་པའི་ཡུལ་དུ་ཐ་མ ལ་པར་བརྫུས་ནས་ཡོན་ཏན་རྣམས་གསང་ནས་ལྡོམ་བུས་གང་ཤེས་པ་བདེ་བདེ་འགྲོ་ཞིང་ཉམས་སུ་ལེན་པར་བྱའོ། །རི་དྭགས་ལྟར་བསྒྲུབ་པ་ནི་རྐྱེན་མ་ཡིན་པའི་ཡུལ་དུར་ཁྲོད་དང་། རབ་ཏུ་དབེན་པའི་ས་ཕྱོགས་མི་མི་རྒྱུ་བར་སོང་སྟེ་ཉམས་སུ་ལེན་པའོ། །དེ་ཡང་སྐལ་བ་དང་ལྡན་པ་དེས་ངག་བཅད་ནས་སུ་དང་ཡང་བརྡ་ཙམ་ཡང་མི་འཕྲད་པར་ཉམས་སུ་བླང་སྟེ། དེ་ཉམས་སུ་ལེན་ལུགས་ཇི་ལྟར་ལེན་ན། མན་ངག་སྔོན་དུ་འགྲོ་བ་དང་། དངོས་གཞི་ལས། སྔོན་དུ་འགྲོ་བའི་དོན་ཉམས་སུ་བླང་སྟེ། སྤྲོས་པ་ལ་དགའ་ན་འབྱུང་བཞིའི་རྣལ་འབྱོར་བྱ། མི་དགའ་ན་སྔོན་དུ་འཁོར་འདས་རུ་ཤན་འབྱེད་པའི་སྤྱོད་པ་བྱ་བ་ནི། ལུས་རུ་ཤན་འབྱེད་པའི་སྤྱོད་པ་བྱའོ། །དེ་རྟགས་ཚད་ལ་ཕེབས་པ་དང་། ལུས་རྣལ་དུ་འབེབས་ཤིང་སོར་གཞུག་པའི་ཆོ་ག་བྱ། དེ་ནས་ངག་རུ་ཤན་འབྱེད་པའི་སྤྱོད་པ་བྱ། དེ་རྟགས་ཚད་ལ་ཕེབས་པ་དང་། ཡང་ངག་རྣལ་དུ་འབེབས་པའི་ཆོ་ག་བྱ། དེ་ནས་སེམས་རུ་ཤན་འབྱེད་པའི་སྤྱོད་པ་བྱའོ། །དེ་རྟགས་ཚད་ལ་ཕེབས་པ་དང་། ཡང་སེམས་རྣལ་དུ་ཕེབས་པའི་ཆོ་ག་བྱ་བ་ནི། སྔོན་དུ་འགྲོ་བའི་མན་ངག་གོ། །དེ་ལྟར་བྱས་པ་ལ་དགོས་པ་ཅི་ཡོད་ན། སྔོན་དུ་ལུས་རུ་ཤན་ཕྱེད་པས་སྔོན་ཆད་བདག་གི་ལུས་ཀྱི་བྱེ་བྲག་བསམ་གྱིས་མི་ཁྱབ་པ་བླངས་ཀྱང་། འཁོར་བ་དང་རུ་ཤན་མ་ཕྱེད་པས་ལུས་འདི་ཡང་ཡང་བླང་པ་ཡིན་པས། ད་རེས་འཁོར་བ་དང་རུ་ཤན་ཕྱེ་བ་བྱེད་དེ། ཕྱིས་ལུས་ལེན་མི་སྲིད་མངལ་གྱི་གྲོང་ཁྱེར་དུ་འགྲིམ་མི་སྲིད་པའི་དགོས་པ་ཡོད་དེ། དེ་ཡང་གང་ཟག་དེ་བརྩོན་འགྲུས་ཅན་ཡིན་ན་འདི་ཉིད་ལ་འཁྲུལ་པ་རང་དག་ནས། ཟག་བཅས་མི་སྣང་བར་སངས་རྒྱ་བ་དང་། འབྲིང་ཡིན་ན་བར་དོར་སངས་རྒྱ་སྟེ་མངལ་སྒོར་མི་འཇུག་པ་དང་། བརྩོན་འགྲུས་ཐ་མ་ཡིན་ན་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་ཕྱུང་ནས་བརྫུས་ཏེ་སྐྱེས་ནས་ལོ་ལྔ་བརྒྱ་ན་སངས་རྒྱ་བས་མངལ་གྱི་སྒོར་འཇུག་མི་སྲིད་དོ། །དེ་ཡང་ཐུན་མོང་དུ་ལུས་ཀྱི་མངོན་ཞེན་ལྡོག་པའི་དགོས་པ་དང་། ལུས་ཀྱི་བར་ཆད་ཉེ་བར་ཞི་བའི་དགོས་པའོ། །ལུས་ཀྱི་མངོན་ཞེན་ལོག་པས་ལུས་སྒྱུ་མར་མཐོང་། དེ་མཐོང་བས་སྣང་བ་སྒྱུ་མའམ་རྨི་ལམ་དུ་མཐོང་། དེ་མཐོང་བ་ལས་ཚེ་འདི་ཆེད་དུ་བྱེད་པ་ལས་ལྡོག་པའི་དགོས་པ་ཡོད་པས། ད་འཁོར་བའི་བྱ་བ་ལ་འཇུག་མི་སྲིད་དོ། །ལུས་ཀྱི་བར་ཆོད་ཉེ་བར་ཞི་བས་སྒྲུབ་པ་ཡུན་རིང་བར་འགྱུར་བའི་དགོས་པ་ཡོད། དེ་ལྟར་ཡུན་རིང་བས་འབྲས་བུ་སྨིན་པར་འགྱུར་བས་སངས་མི་རྒྱ་མི་སྲིད་དོ། །མཆོག་གི་དགོས་པ་ནི་ལུས་སྤྲུལ་པའི་སྐུ་རུ་གྲོལ་བའི་དགོས་པ་དང་། ཕྱིས་འཁོར་བའི་ལུས་ལེན་མི་སྲིད་པའོ། །ལུས་སྤྲུལ་པའི་སྐུར་འགྲོ་བ་སེམས་ཅན་གྱི་དོན་རང་བཞིན་ཤུགས་ལས་བྱུང་བ་ཡིན་ལ། དེ་བྱུང་བས་ཐེག་པ་ཆེན་པོའི་གཞི་མ་སྟོངས་པའོ། །དེ་མ་སྟོངས་པ་ནི་མན་ངག་ཕྱིན་ཅི་ལོག་ཏུ་མི་འགྱུར་ལ། དེ་མ་གྱུར་པས་དངོས་གྲུབ་མྱུར་དུ་ཐོབ་པའི་དགོས་པ་ཡོད་དོ། །ལུས་ཕྱིས་འཁོར་བར་འཇུག་མི་སྲིད་པས་སྐྱེ་བ་ལ་དབང་ཐོབ་པའི་དགོས་པ་ཡོད་ལ། དེ་ཐོབ་པས་འཕོ་བ་ཆེན་མོའི་ལུས་འགྲུབ་པའི་དགོས་པ་ཡོད། དེ་གྲུབ་པས་སེམས་ཅན་གྱི་དོན་སྔོན་དུ་བྱེད་པར་འགྱུར་བའི་དགོས་པ་ཡོད་དོ། །དེ་ནས་ལུས་རྣལ་དུ་ཕབ་ཅིང་སོར་བཅུག་པ་ལ་དགོས་པ་ཅི་ཡོད་ན། ལུས་ཀྱི་འཁྲུལ་པ་རང་དག་ནས་ལུས་བདེ་ལུགས་སུ་གནས་པའི་དགོས་པ་དང་། ཉམས་སུ་ལེན་པ་ལ་བརྩོན་འགྲུས་བསྐྱེད་པར་འགྱུར་བའི་དགོས་པ་དང་། ལུས་དང་དབང་པོ་རང་བཞིན་གྱིས་དུལ་བར་འགྱུར་བའི་དགོས་པ་ཡོད་དོ། ༈ །ངག་རུ་ཤན་འབྱེད་པའི་དགོས་པ་ནི་སྔར་ངག་འདིས་ལུས་བླངས་རེས་ཀྱིས་ངག་ཀྱང་དེ་སྙེད་བླངས་པས་ཅི་ཙམ་གཅིག་སྨྲས། ད་ཡང་ད་རེས་འཁོར་བའི་ངག་དང་རུ་ཤན་མ་ཕྱེད་ན་ཅི་སྙེད་སྨྲ་བའི་ལུས་ལ་ཐུག་པ་མེད་པས་ད་རེས་མི་སྨྲ་བས་འདི་རུ་ཤན་ཕྱེད་པས་ཕྱིས་འཁོར་བའི་ངག་གི་སྨྲ་བྱེད་རྒྱུན་ཆད་པའི་དགོས་པ་ཡོད་དེ། དེ་རིང་ནས་འདས་པའི་ངག་ཏུ་གྱུར་པ་དགོས་པ་ཡོད་དོ། །དེ་ཡང་ཐུན་མོང་དུ་ངག་གི་ཞེན་པ་ལྡོག་པ་དང་། ངག་གི་བར་ཆད་ཞི་བའི་དགོས་པ་ཡོད་དོ། །ངག་གི་ཞེན་པ་ལོག་པས་ད་འཁོར་བ་འཁྲུལ་པའི་གཏམ་སྨྲ་མི་སྲིད་པ་དང་། དེ་མ་སྨྲས་པས་བརྗོད་དུ་མེད་པའི་དོན་ཁོང་དུ་ཆུད་པར་འགྱུར་བའི་དགོས་པ་ཡོད་དོ། །དེ་ཆུད་པས་ཡང་གོང་ལྟར་འགྲོ་བའི་ངག་ཏུ་ལྡོག་མི་སྲིད་དེ་སངས་རྒྱ་བའོ། །ངག་གི་བར་ཆོད་ཞི་བས་ངག་ཚིག་གི་རྗེས་སུ་འབྲེང་མི་སྲིད། དེ་མ་འབྲེང་པས་ལྟ་བ་སྙམ་བྱེད་དང་ཡིད་དཔྱོད་དང་ཡིད་དཔྱོད་དུ་འགྲོ་མི་སྲིད། དེ་མ་སོང་བས་ཆོས་ཉིད་མངོན་གསུམ་དུ་གཏན་ལ་ཕེབས། དེ་ཕེབས་པས་ཟག་བཅས་མི་སྣང་བར་སངས་རྒྱས་ངེས་པའི་དགོས་པ་ཡོད་དོ། །མཆོག་ཏུ་ངག་ལོངས་སྐུར་གྲོལ་བ་དང་། ད་སངས་རྒྱས་ཀྱི་ངག་ཏུ་གྱུར་ཏེ་འཁོར་བར་ལྡོག་མི་སྲིད་པའི་དགོས་པ་ཡོད་དོ། །ངག་ལོངས་སྐུར་གྲོལ་བས་བར་དོ་འདི་ཉིད་ལ་ཆོད། དེ་ཆོད་པས་ཤ་ཁྲག་གི་ལུས་ལ་བརྟེན་པའི་སྨྲ་བ་རྒྱུན་ཆད་དེ་ཆད་པས་སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན་ཏེ་ཆོས་ཟད། དེ་ཟད་པས་ཕྱིས་ཆོས་ཞེས་མིང་དུ་བཏགས་པ་ལ་ད་དགོས་པ་མེད་པས་སྣང་མི་སྲིད། དེ་མི་སྣང་བས་འབྲས་བུ་སངས་རྒྱ་བའི་དགོས་པ་ཡོད་དོ། །ངག་འཁོར་བར་མི་ལྡོག་པས་ཁམས་གསུམ་འཁོར་བ་རྒྱུན་ཆད། དེ་ཆད་པས་འཁོར་བ་ཉིད་ཡོད་མི་སྲིད། དེ་མེད་པས་འབྲས་བུ་སངས་རྒྱས་ལས་འགྲོ་ས་མེད་པའིི་དགོས་པ་ཡོད་དོ། །ངག་རྣལ་དུ་ཕབ་པའི་དགོས་པ་ནི་ཕྱིས་ངག་གི་ཅལ་ཅོལ་མི་འབྱུང་བ་དང་། ཉམས་སུ་ལེན་པ་བརྟན་པ་དང་། ངག་རང་བཞིན་གྱིས་རྣལ་བ་དང་། བརྫུན་ལ་སོགས་པའི་ཚིག་བརླབ་པོ་ཆེ་སྨྲ་མི་སྲིད་པའི་དགོས་པ་ཡོད་དོ། ༈ །སེམས་རུ་ཤན་འབྱེད་པའི་དགོས་པ་ནི། སྔར་བསྐལ་པ་དཔག་ཏུ་མེད་པ་ནས་སེམས་ཀྱི་བྱུང་ཚོར་གྱི་རྣམ་རྟོག་གི་ལས་བསགས་ན་བསམ་གྱིས་མི་ཁྱབ་པ་འདི་ཅིས་ལེན་ན། སྔར་སེམས་རུ་ཤན་མ་ཕྱེད་པས་ལན། ད་ད་རེས་ལས་བསམ་པའི་ལས་མི་བྱེད་པས་སེམས་ཀྱི་རུ་ཤན་དང་ཕྱེ་བས་ཕྱེད། ཕྱིས་འཁོར་བའི་སེམས་ཀྱི་རྣམ་རྟོག་གི་ལས་བྱེད་མི་སྲིད་དེ། མྱ་ངན་ལས་འདས་པའི་སེམས་སུ་དུས་གཅིག་ནས་སོང་བའོ། །དེ་ཡང་ཐུན་མོང་གི་དགོས་པ་ནི་སེམས་ཀྱི་ཞེན་པ་ལོག་པའི་དགོས་པ་དང་། སེམས་ཀྱི་བར་ཆད་ཞི་བའི་དགོས་པའོ། །སེམས་ཀྱི་ཞེན་པ་ནི་སེམས་ཀྱི་བྱུང་ཚོར་གྱི་རྣམ་པར་རྟོག་པ་སྔ་མ་རྣམས་ལ་སྐྱུག་ལོག་པས་ཕྱིས་སེམས་བྱུང་ཚོར་ལ་མི་འཇུག །དེ་མ་ཞུགས་པས་ད་ལྟ་བསམ་པའི་རྒྱུན་འགགས། དེ་འགགས་པས་ཉོན་མོངས་པའི་སྔོན་དུ་རྒྱུ་ལྡང་མི་སྲིད། དེ་མ་ལངས་པས་རྣམ་པར་མི་རྟོག་པའི་ཡེ་ཤེས་ཀྱི་ངང་ལ་རང་བཞིན་གྱིས་གནས། དེ་གནས་པས་འཁོར་བའི་བག་ཆགས་སྔ་ཕྱི་མཚམས་སྦྱོར་མི་སྲིད། དེ་མ་སྦྱར་བས་ཕྱིས་སེམས་སུ་འགྲུབ་མི་སྲིད། དེ་མ་གྲུབ་པས་འབྲས་བུ་སངས་རྒྱ་བའི་དགོས་པ་ཡོད་དོ། །སེམས་ཀྱི་བར་ཆོད་ཞི་བས་སེམས་ཀྱི་གཡོ་བ་དང་བྲལ་བ་དང་། དེ་བྲལ་བས་ཡུལ་གཞན་ལ་བསམ་པ་མི་འཕྲོ་ཞིང་ཉམས་ལེན་བརྟན་པའི་དགོས་པ་ཡོད། དེ་མ་འཕྲོས་ཤིང་བརྟན་པས་འགྱུ་བ་རྣམས་རྒྱུན་ཆད་པ་དང་། དེ་ཆད་པས་རང་སྣང་འགྲོ་འོང་མེད་། དེ་མེད་པས་རིག་པ་གཅིག་ཏུ་གནས་པའི་དགོས་པ་དང་། དེ་གཅིག་ཏུ་གནས་པས་རིག་པ་ཚད་ལ་ཕེབས། དེ་ཕེབས་པས་འབྲས་བུ་ཟག་པ་མི་སྣང་བར་སངས་རྒྱ་བའི་དགོས་པ་ཡོད་དོ། །མཆོག་ཏུ་སེམས་ཆོས་ཀྱི་སྐུར་གྲོལ་བ་དང་། ཕྱིས་འཁོར་བའི་སེམས་སུ་ཟློག་མི་སྲིད་པའི་དགོས་པའོ། །སེམས་ཆོས་ཀྱི་སྐུར་གྲོལ་བས་ད་ཆོས་ལས་འདས་པས་བསྒྲུབ་ཏུ་མེད། དེ་མེད་པས་ལྟ་སྒོམ་སྤྱོད་པའི་ཞེན་པ་རང་འགགས། དེ་འགགས་པས་གང་ལ་འདོད་པའི་དངོས་པོ་དང་བྲལ། དེ་བྲལ་བས་དངོས་པོ་འདུག་ཚུལ་གྱི་ཐོག་ལས་མི་འདའོ། །དེ་མ་འདས་པས་ཆོས་ཉིད་རང་ཟད། དེ་ཟད་པས་མྱ་ངན་ལས་འདས་པ་གྲུབ་མ་མྱོང་། དེ་མ་མྱོང་བས་ཁམས་གསུམ་འཁོར་བ་གཏན་སྤྲུགས། དེ་སྤྲུགས་པས་དེ་ཉིད་རང་ངོ་བོར་སངས་རྒྱས་པའི་དགོས་པ་ཡོད་དོ། །ད་སེམས་འཁོར་བར་མ་ལོག་པས་རྒྱུ་སེམས་ཅན་གྱི་མིང་མེད། དེ་མེད་པས་ཐམས་ཅད་སངས་རྒྱ་བ་ལས་འགྲོ་ས་མེད། དེ་མེད་པས་སྤྱོད་ལམ་ཇི་ལྟར་བྱས་ཀྱང་འབྲས་བུ་སངས་རྒྱ་ངེས་པའི་དགོས་པ་ཡོད་དོ། །སེམས་རྣལ་དུ་བབ་པའི་དགོས་པ་ནི། ཕྱིས་ཀྱི་བསམ་པ་འགགས་པ་དང་། ད་ལྟའི་དྲན་བསམ་རྒྱུད་ལ་མི་གནས་པ་དང་། སེམས་རྣལ་མར་གྱུར་ཏེ་ཡུལ་ལ་མི་འཇུག་པའི་དགོས་པ་ཡོད་དོ། །དེ་ལྟར་ན་འཁོར་འདས་རུ་ཤན་ཕྱེ་ནས་ནི། ལུས་ངག་རྣམས་ནི་རྣལ་དུ་ཕབ་ཅེས་བྱའོ། །དེ་ནས་ལུས་ངག་གི་གནད་གཟིར་བས་འདུག་སྟངས་གསུམ་ལས་ལུས་མི་འདའ་བར་བྱ་སྟེ། དེ་བྱས་པས་ལུས་ལ་གནས་པའི་རིག་པ་དེ་མངོན་སུམ་དུ་མཐོང་བའི་དགོས་པ་ཡོད། དེ་ཡང་དཔེར་ན་སྦྲུལ་གྱི་རྐང་ལག་མ་གཅུས་པར་མི་མངོན། གཅུས་པས་མངོན་པ་དང་འདྲའོ། །ངག་བཅད་ནས་སུ་དང་ཡང་བརྡ་ཙམ་ཡང་མི་འཕྲད་པར་གནས་པས་ཆོས་ཉིད་བརྗོད་དུ་མེད་པའི་ངང་ལ་གནས་པའི་དགོས་པ་ཡོད་དོ། །དོན་གྱིས་ཚིག་གི་ཕྱིར་མི་འབྲེང་བའི་དགོས་པ་ཡིན་ནོ། །སེམས་དབྱིངས་རིག་མི་འབྲལ་བར་བྱ། དེ་བྱས་པས་མངོན་སུམ་གནད་ཀྱི་སྣང་བ་མཐོང་བའི་དགོས་པ་ཡོད་དོ། །དེ་མཐོང་ཞིང་རྒྱུན་དུ་གནས་པས་ཉམས་གོང་འཕེལ་གྱི་སྣང་བ་མཐོང་བའི་དགོས་པ་ཡོད་དེ་མཐོང་བས་ཡིད་ཆེས་རང་ཐོག་ཏུ་ཆོད། དེ་ཆོད་པས་རིག་པ་ཚད་ལ་ཕེབས་པའི་སྣང་བ་མཐོང་བའི་དགོས་པ་ཡོད། དེ་མཐོང་བས་འཁྲུལ་པའི་སྣང་བ་འགགས་པའི་དགོས་པ་ཡོད། དེ་འགགས་པས་ཆོས་ཉིད་ཟད་པའི་སྣང་བ་དང་གཉིས་སུ་མེད་པར་སྤྱོད་པའི་དགོས་པ་ཡོད། དེ་སྤྱད་པས་འཁོར་བའི་མིང་མེད། མྱང་འདས་བཙལ་དུ་མ་རྙེད། སངས་རྒྱས་ལ་རེ་མེད། སེམས་ཅན་ལ་དོགས་མེད། ཆོས་ཆུ་བོ་ལ་ཕོ། ཐུགས་རྗེ་ནམ་མཁའ་ལ་ཡལ་བ། སྐུ་གསུམ་གྱི་བཅིངས་པ་ལས་གྲོལ་བའོ། །དེ་ལྟར་སྔོན་དུ་འགྲོ་བའི་མན་ངག་རྣམས་དྲོད་རྟགས་ཚད་ལ་ཕབས་ནས། དེ་ནས་མངོན་སུམ་གནད་ཀྱི་སྣང་བ་དབྱིངས་དང་རིག་པའི་སྣང་བ་དང་འབྲལ་བ་མེད་པར་སྐལ་ལྡན་གྱིས་བརྟག་གོ། །དེ་ནས་དེ་ཉིད་དང་ཉིན་མཚན་དུ་གནས་པ་ལས། ལུས་ཀྱིས་ནད་དང་བྲལ་བ་དང་སེམས་ལ་གཏད་པའི་འབེན་མི་དགོས་པའི་ཚེ། འདི་ལ་གོམས་པའི་ཚད་ཉིན་མཚན་མི་སྣང་སྟེ། འདི་ཡི་དུས་ན་འཁོར་འདས་འདྲེས་པས་རྣལ་འབྱོར་གྱི་སྡེ་རྙེད་པ་ཡིན་པས་ན། དེ་ནས་ཉམས་གོང་འཕེལ་གྱི་སྣང་བ་འཆར་ཏེ། ཕྱི་རོལ་གྱི་ནམ་མཁའ་ལ་འོད་ཀྱི་འཇའ་གུར་དང་། ཐིག་ལེ་ལ་སོགས་པ་ཉིད་ཀྱི་སྣང་བ་ནི། ཡང་གཅིག་འབྱུང་སྟེ་འདས་ནས་ཡང་གཅིག་འཆར་བ་རྣལ་འབྱོར་པའི་ཉམས་ཀྱི་སྣང་བ་ལམ་སྣང་ཡིན་ཏེ། ཐོག་མ་འོད་ཀྱི་སྣམ་བུ་ལ་སོགས་པ་གང་ནས་གོང་དུ་ཡང་འཕེལ་བར། རིམ་གྱིས་འཆར་བ་ནི་སྔོན་དུ་རང་གི་གོམས་པ་ལས་རང་བཞིན་རྫོགས་པ་ཆེན་པོའི་ལམ་ཐོབ་པ་ཡིན་ཏེ། འདི་ལ་བརྟན་པའི་ཚད་རང་གི་ལུས་མི་སྣང་བ་རྙེད་ནས། རིག་པ་ཚད་ལ་ཕེབས་པའི་སྣང་བ་ཡིན་ཏེ། འདི་ནས་ཉམས་ཀྱི་འཕེལ་ཟད། བློའི་ཆོས་ཟད། ནང་འབྱུང་གི་འབྱུང་བ་ཟད། སྐུ་གསུམ་གྱི་གྲངས་ཟད། རྟེན་པའི་ཆོས་རྣམས་ཟད་པའི་སྣང་བ་ཤར་སྟེ། འདི་ལ་འདི་ལྟ་བུ་ཞེས་སུས་ཀྱང་བརྗོད་པར་ནུས་པ་མིན་ནོ། །དེ་ལྟར་གྱུར་པ་ནི། དབྱིངས་རྣམ་པར་དག་པའི་སྒྲོན་མ་ལ་རྣལ་འབྱོར་པ་དེ་ཉིད་ཀྱིས་གཅེས་པར་བྱས་པའི། སྟོབས་ཀྱིས་འབྱུང་བ་ཡིན་པས། སྒྲོན་མ་འདི་ལ་གོམས་པར་བྱེད་པའི་ཡན་ལག་ཏུ་སྔོན་འགྲོ་དངོས་གཞི་གཉིས་ལས། སྔོན་འགྲོ་ལ་ལུས་ཀྱི་སྔོན་དུ་འགྲོ་བ་ལུས་རུ་ཤན་མ་ཕྱེད་ན་ལུས་ཀྱི་ཞེན་པ་མི་ལྡོག །དེ་མ་ལོག་ན། ངག་རུ་ཤན་ཕྱེ་ཡང་ལུས་ལ་ངག་བརྟེན་པས་ངག་གི་ཞེན་པ་མི་ལྡོག །དེ་མ་ལོག་ན་སེམས་རུ་ཤན་ཕྱེ་ཡང་སེམས་ཀྱི་ཞེན་པ་མི་ལྡོག །དེ་མ་ལོག་ན་མན་ངག་ལ་ཡིད་ཆེས་མི་སྐྱེ། དེ་མ་སྐྱེས་ན་ལུས་ངག་རྣལ་དུ་ཕབ་ཀྱང་སོར་མི་ཆུད། དེ་མ་ཆུད་ན་ལུས་ངག་སེམས་ཀྱི་གནད་གཟིར་ཀྱང་ཡེ་ཤེས་སྔོན་དུ་མི་སྣང་། དེ་མ་སྣང་ན་མངོན་སུམ་གནད་ཀྱི་སྣང་བ་མི་མཐོང་། དེ་མ་མཐོང་ན་ཉམས་གོང་འཕེལ་གྱི་སྣང་བ་མི་འཆར། དེ་མ་ཤར་ན་རིག་པ་ཚད་ལ་ཕེབས་མི་སྲིད། དེ་མ་ཕེབས་ན་ཆོས་ལ་ཟད་པ་འོང་མི་སྲིད། དེ་མ་བྱུང་ན་ཉམས་སུ་བླངས་པ་ལ་དགོས་པ་ཅི་ཡང་མེད་དེ་འབྲས་བུ་མེད་པའོ། །དེ་ལྟར་སྤྱོད་པ་གསུམ་རྣལ་ཕེབ་གསུམ་སྟེ་དྲུག །གནད་གཟིར་གསུམ་སྟེ་དགུ། སྣང་བ་བཞི་སྟེ་བཅུ་གསུམ་གྱིས་གང་ཟག་གཅིག་སངས་རྒྱ་བའི་ཆ་རྐྱེན་དུ་ནི་ངས་བཤད་དོ། །ཞེས་སྔོན་བྱུང་དུ་སྡུད་པ་པོ་ལ་སྟོན་པས་གདམས་ལ་རྗེས་འཇུག་ཏུ་བླ་མས་སློབ་མ་ལ་གདམས་པའོ། །ཞེས་དེ་ཉིད་ལ་གོམས་པར་བྱ་བའི་མན་ངག་བསྟན་ནས། ༈ ད་ནི་དྲིས་ལན་བདུན་པ་དེ་ཉིད་ཀྱི་ཚད་བསྟན་པ་ནི། མཐིང་ག་མི་འགྱུར་སྣང་བ་ལས་ཞེས་པ་ལ་སོགས་པས་བསྟན་ཏེ། དབྱིངས་རྣམ་པར་དག་པའི་སྒྲོན་མ་ལ་གོམས་པའི་དུས་ན་ཁ་དོག་མཐིང་ག་ཤས་ཆེ་བ་ནི་ཆོས་ཉིད་མི་འགྱུར་བའི་སྣང་བ་ཡིན་ཏེ། དེ་ལས་སྐལ་ལྡན་གྱིས་ཉམས་སུ་བླངས་པས་ཁ་དོག་སོ་སོར་མ་འདྲེས་པར་སོ་སོ་ནས་གསལ་བའི་འོད་མཐིང་ག་གཞི་ཆེ། དཀར་པོ་ལམ་གསལ། སེར་པོ་འཕེལ་སྟོན། དམར་པོ་སྣ་སེལ། ལྗང་གུ་རང་གྲོལ་བ་དང་། ལྔར་ལམ་སྣང་ལ་གྱུར་པའི་ཚེ། རྣལ་འབྱོར་པ་དེས་ལམ་གྱི་སྣ་ཟིན་པ་ཡིན་པས་འདི་ཡི་དུས་ན་སྔར་ཞེན་པའི་རྣམ་རྟོག་འགག་པ་ཡིན་ནོ། །དེའི་རྟགས་སུ་སྔར་འདྲིས་པའི་ཡུལ་གྱི་རྨི་ལམ་འགག་པར་འགྱུར་བ་ཡིན་ལ། ལུས་ལ་ཡང་དྲོད་རྟ་རྔ་ཙམ་གཅིག་འབྱུང་ངོ་། །དེ་ནས་སྣང་བ་འདི་ཉིད་རབ་ཏུ་གསལ་བར་གྱུར་པ་ལ་བརྩོན་འགྲུས་ཀྱི་བྱེ་བྲག་གིས་ཟླ་བ་བདུན་དང་དགུ་དང་བཅུ་གཅིག་དུ་གནས་ཤིང་། དེ་ནས་ཡང་རྣལ་འབྱོར་པ་རང་གི་མདུན་གྱི་སྐྲ་དང་སྨིན་མའི་མཚམས་སུ། དབྱིངས་ཀྱི་སྒྲོན་མ་དེ་རྣལ་འབྱོར་པ་རང་གི་སོར་བཞིའམ་ནི་ཡང་ན་མཐོ་གང་ལས། ནམ་མཁའ་ལ་འཕགས་སྟེ་རང་གི་ལུས་དང་བྲལ་བའི་ཚེ་ན་འཁོར་འདས་ཀྱིས་མཚམས་ཕྱེད་པ་ཞེས་བྱ་སྟེ། མངལ་གྱི་གྲོང་ཁྱེར་དུ་འཇུག་མི་སྲིད་པའི་ཚད་དེ། འདིའི་དུས་ན་ཕྱི་འབྱུང་བའི་གཟུང་འཛིན་འགག་སྟེ། དེའི་རྟགས་སུ་རྣལ་འབྱོར་པ་དེ་ལ་ཕྱིས་མ་འོངས་པའི་ཡུལ་གཞན་གྱི་རྨི་ལམ་སྐྱེ་མི་སྲིད་དོ། །དེ་ནས་འོད་ཀྱི་སྣམ་བུ་མདུན་དུ་སྣང་བའི་ཚེ་ན་འཁྲུལ་པ་ཡེ་ཤེས་སུ་གྱུར་བའི་ཚད་དེ། འདིའི་དུས་ན་ད་ལྟའི་གཟུང་འཛིན། རེས་འགག་རེས་ལ་གནས་པས། རྨི་ལམ་ཀྱང་དེ་དང་འདྲའོ། །ལྷག་མ་ནི་ཚད་ཡིག་དང་སྦྱར་རོ། །དེ་ལྟར་རྣལ་འབྱོར་པས་ཉམས་སུ་ལོངས་པ་དེའི་ཚད་དུ་དེ་འགྱུར་རོ་ཞེས་ཚད་བསྟན་ནས། ༈ ད་ནི་དྲིས་ལན་བརྒྱད་པ་དེ་ཉིད་ཀྱི་གནས་པ་བསྟན་པ་ནི། མིག་ནི་འབྱུང་བའི་རྐྱེན་མེད་ལ་ཞེས་པ་ལ་སོགས་པས་བསྟན་ཏེ། འདི་ཡི་གནས་པའི་ས་མིག་གི་དེ་ཁོ་ན་ཉིད་ཡིན་ཏེ། གོང་དུ་རྒྱས་པར་བཤད་དོ། །དེ་ཉིད་ལ་དབྱིངས་ཀྱི་སྒྲོན་མ་གནས་ཤིང་རང་གི་རིག་པ་ཡང་དག་པ་ཉིད་རྡོ་རྗེ་ལུ་གུ་རྒྱུད་དུ་སྣང་བ་སྟེ། ཕྱི་ཡི་དབྱིངས་འཁྲུལ་པ་མེད་པ་སྤྲིན་དང་བྲལ་བའི་ནམ་མཁའ་ལ་ཤེས་རབ་ཀྱིས་མ་ཡིན་པར་དབང་པོའི་དྭངས་མས་འཛིན་པར་བྱེད་པ་ནི་ཡུལ་ལ་སྣང་བའི་དུས་ནའོ། །དེ་ཡང་ཉིན་མོ་འདས་པའི་ཆ་ཡིན་པས་སྣང་བའོ། །མཚན་མོ་འཁོར་བའི་ཆ་ཡིན་པས་རང་གི་ཤེས་བྱ་མཚན་མོ་ནང་དུ་གསལ་བའི་ཚེ། རིག་པ་ཕྱིར་མི་སྣང་སྟེ་གཉིད་ཀྱི་དུས་ན་རྨི་ལམ་ལ་སོགས་པའི་རྟོག་པ་ནི་ཡིད་ཡིན་ཏེ། རིག་པའི་སྣང་བ་མ་ཡིན་ནོ། །འདི་ཡི་དུས་ན་རང་རང་གི་ཙིཏྟའི་དཀྱིལ་དུ་རིག་པ་གནས་པ་ཡིན་པས་རྨི་ལམ་གྱི་ཞེན་པ་བཅད་པ་བསམ་གཏན་གྱི་ཐུན་གྱི་མན་ངག་དང་སྦྱར་རོ། །འདི་ཡི་དུས་ན་རིག་པ་ཙིཏྟར་གཞུག་པའི་གནད་དང་། སེམས་གཉིད་ཀྱི་ཐིབས་སུ་བསད་པའི་གནད་དང་། ཡིད་ལ་རྨི་ལམ་གྱིས་རྒྱས་གདབ་པའི་གནད་གསུམ་བྱའོ། །དེ་ནས་ནམ་ལངས་ནས་རིག་པ་མྱ་ངན་ལས་འདས་པའི་ཡུན་རྐྱེན་ལ་ཕྱིར་འཕྲོས་པའི་ཚེ་རྣལ་འབྱོར་པས་རིག་པ་སྤྲིན་དང་བྲལ་བའི་ནམ་མཁའ་ལ་གཏད་པ་ཡིན་ནོ། །ཞེས་གནས་པ་བསྟན་ནས། ༈ ད་ནི་དྲིས་ལན་དགུ་པ་དེ་ལྟར་གནས་པའི་དབྱིངས་རིག་དེ་སྒོ་གང་ལས་འབྱུང་བསྟན་པ་ནི། མིག་གི་རྣམ་ཤེས་དག་པ་ལ་ཞེས་པ་ལ་སོགས་པས་བསྟན་ཏེ། འདི་ཡི་འཆར་བའི་སྒོ་མིག་གི་རྣམ་པ་ཡུལ་ཤེས་པ་མཐོང་བ་དག་པ་ནི་འགག་པའི་རྣམ་ཤེས་མ་ཡིན་པར། སྐྱེ་འགག་མེད་པའི་དབང་པོ་དེ་ཁོ་ན་ཉིད་ཡིན་ལ། དེ་ནས་ཇི་ལྟར་འཆར་ཞེ་ན། ལམ་གྱི་སྣང་བ་སྟོང་པ་ཕྱང་ཆད་པ་ལས་ལོག་པས་གལ་བྱེད་ནི་རང་སྣང་སྟོང་པ་ཡིན་ལ། འབར་བའི་ནི་སྣང་བ་ལ་མཆེད་ཡོད་པའོ། །འོད་ཟེར་ལྔར་ཤར་བས་ཡོ་གའི་ཡིད་ཆེས་པའི་གདིང་རྙེད་དེ། དེ་ཡང་ངོ་བོ་ལ་མི་འགྱུར་ཡང་ཁྱབ་པ་སེམས་ཅན་ཐམས་ཅད་ལ་དབྱེར་མེད་པའི་ཚུལ་དུ་ཡང་། མཐིང་གའི་རང་མདངས་ཆེན་པོར་གནས་སོ། །དེ་ལྟར་ཡང་ཡེ་ནས་འཆར་བར་བྱེད་པའི་སྣང་བ་མ་འགགས་པས། ཕྱི་ཡུལ་ནམ་མཁའ་རྣམ་པར་དག་པ་ལ་ཐམས་ཅད་དབྱེར་མེད་དུ་སྣང་ངོ་། །འགྲོ་བ་ཡོངས་ལ་སྒྲོན་མ་འདི་ཡི་འཆར་སྒོ་ཡང་གཅིག་སྟེ་མིག་ནས་ཡང་འཆར་བར་ཡང་གཅིག །དེ་ལྟར་ངོ་བོ་ཉིད་ལ་འགྱུར་བ་མེད་ཀྱང་ཀུན་ལ་ཁྱབ་པའི་ཚུལ་དུ་སྣང་ངོ་། །དེ་ལྟར་སྒྲོན་མ་འདི་ཡི་རྣམ་པར་རང་དག་པས། དབྱིངས་རྣམ་པར་དག་པའི་སྒྲོན་མ་དང་རིག་པ་རྡོ་རྗེ་ལུ་གུ་རྒྱུད་གཉིས་ཀྱི་ཟུང་འཇུག་གི་བདེ་བ་ལ་སྙོམས་པར་འཇུག་པའི་ས་ཡིན་ནོ། །དེ་ལྟར་མཉམ་པར་བཞག་པ་དེ་ཡང་འཕྲལ་བཅོས་མ་ཡིན་ཏེ་ཡེ་ནས་གནས་ཏེ། དེ་ཡང་ཅོག་གིས་རང་བཞག་གོ། །དེ་ཡང་བཅས་བཅོས་མི་བྱ་བར་ཤར་བ་ཐམས་ཅད་རང་ཤར་དུ་བཞག །སྣང་བ་ཐམས་ཅད་རང་སྣང་དུ་བཞག །བྱུང་བ་ཐམས་ཅད་རང་བྱུང་གི་ཡེ་ཤེས་ཀྱི་སྤྱོད་ཡུལ་ལོ། །དེ་ལྟར་བཞག་པས། དེ་ལྟར་སྒྲོན་མའི་སྣང་བ་དེ་ཉིད་སེམས་ཅན་ཀུན་གྱི་མིག་དང་རང་འབྲེལ་བས། དེ་ཉིད་ཡུལ་རྐྱེན་སྤྲིན་དང་བྲལ་བའི་ནམ་མཁར་ཤར་བས་མངོན་སུམ་དུ་སྣང་བའོ། །དེ་ལྟར་འཆར་སྒོ་མ་འགགས་པ་མིག་ཡིན་ནོ་ཞེས་འཆར་བར་བྱེད་པའི་སྒོ་བསྟན་ནས། ༈ །ད་ནི་དྲིས་ལན་བཅུ་པ་འདི་ཉིད་དངོས་བསྟན་པ་ནི། འདི་ལྟར་གནད་གསུམ་མན་ངག་དང་ཞེས་པ་ལ་སོགས་པས་བསྟན་ཏེ། འདི་ལྟར་གནད་ནི་སྒོ་ཡི་གནད་མིག །ཡུལ་གྱི་གནད་ནམ་མཁའ། རིག་པའི་གནད་རྡོ་རྗེ་ལུ་གུ་རྒྱུད་དང་གསུམ་གྱིས་མན་ངག་དང་། གང་ཟག་སྐལ་ལྡན་སུ་ལ་འཛོམ་པའི་སྐྱེས་བུ་ནི། དབྱིངས་རྣམ་པར་དག་པ་ལ་གོམས་པར་བྱེད་པར་འདོད་ན། བླ་མས་བསྟན་པའི་མན་ངག་གི་སྔོན་དུ་འདི་ནི། སྲིད་པ་ཡིས་ནི་འབྱུང་བའི་སྲིད་པས་གྲུབ་པའི་ལུས་ཡ་མཚམས་ནས་ནི་སྨིན་མཚམས་སོ། །སྒྲོན་མ་འདི་ནི་གཉིས་ནི་མིག་འཇུག་ཡུལ་ཟུང་ལ་ས་ནི་གཡས་གཡོན་དེ་ཉིད་རང་ཐབས་དང་ཤེས་རབ་ཏུ་འཆར་བ་སྟེ། ཐབས་དང་ནི་ངོ་བོ་དང་། ངེས་ཚིག་དང་། དབྱེ་བ་དང་། ཡུལ་དང་། བྱེད་པའི་ལས་དང་། རང་བཞིན་དང་། གོ ལ་ས་དང་། འབྲས་བུ་དང་བརྒྱད་དོ། །དེ་ཡང་ཐབས་ཀྱི་ངོ་བོ་ཚེགས་ཆུང་ལ་གནད་དུ་འགྲོ་བ་ཡིན། ངེས་ཚིག་ནི་འདོད་པ་གང་ཡིན་པ་དམིགས་པ་གཞན་གཅིག་ལ་བརྟེན་ནས་མངོན་སུམ་དུ་འབྱིན་པར་བྱེད་པའོ། །དབྱེ་ན་སླ་བའི་ཐབས་དཔེར་ན་བར་སྣང་གི་གློག་ལྟ་བུར་སྐད་ཅིག་ཙམ་ལ་བར་སྣང་སྟོང་པ་དང་འདྲ་བར་འདིས་ཀྱང་སྔོན་དུ་ཡང་བསྟན་མ་ཐག་ཏུ་ཉམས་སུ་མྱོང་བ་བསྐྱེད་ཅིང་ཡལ་བ་སྐྱེན་པའོ། །ཆེ་བའི་ཐབས་དཔེར་ན་དབུས་ཀྱི་རི་བོའི་རྩེར་ཕྱིན་པས་གླིང་བཞི་དུས་གཅིག་ལ་མཐོང་བ་དང་འདྲ་བར། འདིས་ཀྱང་ཐབས་ལ་བརྟེན་པ་ཆོས་ཐམས་ཅད་ཀྱི་མཚན་ཉིད་ཤེས་ཤིང་རང་གི་རིག་པ་མངོན་སུམ་དུ་མཐོང་བར་བྱེད་པའོ། །དེའི་ནང་ནས་འབྲས་བུ་གསང་སྔགས་ནི་ཐབས་ཀྱི་ལམ་པ་ཡིིན་པས། ཐབས་མེད་ན་ཤེས་རབ་རྐྱང་པ་ཡ་བྲལ་བས་ཉན་ཐོས་ཉིད་དུ་ལྷུང་ཞེས་པའོ། །ཐབས་ཀྱི་ཡུལ་ནི་སླ་བའི་ཡུལ་དམིགས་པའི་མཚན་མ་ལ་བརྟེན་ནས་རྟོགས་པར་བྱེད་ལ། མྱུར་བའི་ཡུལ་ལུས་ངག་གི་རྩོལ་གནད་ལ་བརྟེན་ནས་རྟོགས་པར་བྱེད་ལ། ཆེ་བའི་ཐབས་ཀྱི་ཡུལ་ནི་གོམས་པའི་གནད་ལ་བརྟེན་ནས་རྟོགས་པར་བྱེད་པའོ། །ཐབས་ཀྱི་བྱེད་པའི་ལས་ཀྱི་ལུས་ངག་གི་སྡུག་བསྔལ་བཅད་ནས། ལུས་ངག་གི་བདེ་བ་བསྐྱེད་པར་བྱེད། དེ་བྱས་པས་གསལ་བ་ཉམས་སུ་མྱོང་། དེ་མྱོང་བས་ཆོས་ཉིད་ཀྱི་དོན་མངོན་སུམ་དུ་གཏན་ལ་ཕེབས་པའོ། །ཤེས་རབ་ཀྱིས་ནི་དེ་ལྟར་ནུས་པ་མ་ཡིན་ནོ། །དེ་ཡང་ལུས་ངག་ལ་བདེ་བ་མ་སྐྱེས་ན་སེམས་འཁོར་བ་ལས་ཕྲལ་མི་སྲིད། དེ་མ་ཕྲལ་བས་རིག་པ་ཉམས་ཐོག་ཏུ་གསལ་མི་སྲིད། དེ་མ་གསལ་ན་ཅི་ཙམ་བསྒོམས་ཀྱང་ཆོས་ཉིད་ཀྱི་དོན་མངོན་སུམ་དུ་རྟོགས་མི་སྲིད། དེ་མ་རྟོགས་ན་ཡིད་དཔྱོད་ཀྱི་ལྟ་སྒོམ་གྱིས་འཁོར་བར་འཕེན་པའི་སྣ་ཁྲིད་བྱེད་པའོ། །ཐབས་ཀྱི་རང་བཞིན་ནི་དང་པོ་རང་ཐོག་ཏུ་མི་འཇོག་པར་གཞན་གཅིག་ནས་མཚོན་ནས། ཐ་མ་རང་ཐོག་ཏུ་འབེབས་པའོ། །གོལ་ས་ནི་དེ་ཉིད་ལ་རང་རྒྱུད་དུ་བཟུང་ན་གཟུགས་ཁམས་སུ་འཆིང་བར་འགྱུར། དེ་ཉིད་བློ་བྲལ་དུ་བཞག་སྟེ་ཤེས་པ་ཙམ་ལ་ལྟོས་ནས་གོམས་ཤིང་སྦྱོང་བ་མ་བྱས་ན། འདི་ནི་དམ་ཚིག་ཉམས་པས་དམྱལ་བར་འཁྲིད་པར་བྱེད། གོམས་པ་སྟོབས་སུ་གྱུར་པས་ཀྱང་ཐབས་ལ་རེ་ན་འབྲས་བུ་མཐའ་ཡས་པ་སྟེ། སྐྱེ་མཆེད་ཀྱི་ལྷར་གོལ། དེ་ཉིད་རྟག་པར་བཟུང་ན་ཕྱི་རོལ། རྟག་པར་དེ་ཉིད་བར་དུ་མེད་དང་པོ་དང་ཐ་མ་ཡོད་པར་བཟུང་ན་ཆད་པར་གོལ་ལོ། །ཐབས་ཀྱི་འབྲས་བུ་ནི་ཡེ་ཤེས་དངོས་སུ་སྐྱེས་ནས་བཙན་ཐབས་སུ་སངས་རྒྱ་བའོ། །ཤེས་རབ་ནི། ངོ་བོ་དང་། ངེས་ཚིག་དང་། དབྱེ་བ་དང་། ཡུལ་དང་། བྱེད་པའི་ལས་དང་། རང་བཞིན་དང་། གོལ་ས་དང་། འབྲས་བུ་དང་བརྒྱད་དོ། །ཤེས་རབ་ཀྱི་སྤྱི་ཡི་རྣམ་པ་གོང་གི་ལེའུ་གཉིས་པར་རྒྱས་པར་བཤད་དོ། །འདི་ནི་བྱེ་བྲག་ཏུ་ཤེས་རབ་གཏན་ལ་འབེབས་པར་བྱེད་པའི་ཆ་ནས་བཞག་པའོ། །ངོ་བོ་ནི་ཤེས་རིག་གཞན་དུ་མ་གྱུར་པ་ཡིན་ལ། ངེས་ཚིག་ནི་ཤེས་པ་ཐམས་ཅད་ཀྱི་རབ་བམ་ཕུལ་དུ་གྱུར་པ་ཆོས་ཉིད་ཕྱིན་ཅི་མ་ལོག་པར་ཤེས་པའོ། །དབྱེ་བ་རྒྱས་པར་གོང་དུ་བཤད་ཟིན་ལ། འདིར་ནི་གང་ཟག་འཇུག་པར་བྱེད་པ་ལ་སྔོན་དུ་ཐོས་པས་རྒྱུད་མ་བཀྲོལ་ན་ཐ་མ་ཡིད་དཔྱོད་དུ་འགྲོ་བའི་སྐྱོན། དེ་ནས་བསམ་པའི་ཤེས་རབ་ཀྱིས་ཐག་མ་བཅད་ན་ཐ་མ་དྲན་པའི་རྒྱུད་ལངས་པས་ཚིག་གི་རྗེས་སུ་འབྲང་བའི་སྐྱོན་ཡོད། དེ་ནས་བསྒོམས་པའི་ཤེས་རབ་ཀྱིས་སྤྲོས་པ་བདག་ཏུ་འཛིན་པའི་གྲུབ་མཐའ་ལས་ལོག་པར་མ་བྱས་ན། རང་གི་གྲུབ་པའི་མཐའ་ལ་མངོན་པར་ཞེན་པས་ཐ་མ་ངན་སོང་དུ་ཁྲིད་པའི་སྐྱོན་ཡོད་དོ། །དེ་ཡང་དབྱེ་ན་ཐོས་པ་ལ་ཚིག་གི་སྒྲོས་འཚོལ་བའི་ཐོས་པ་དང་། དོན་གྱི་སྒྲོས་དོན་ཚོལ་བའི་ཐོས་པའོ། །ཚིག་གི་ཤེས་རབ་ནི་མ་དག་པའི་ཐོས་པའི་ཤེས་རབ་ཡིན་ཏེ། ཚིག་ལ་བླ་མའི་མན་ངག་སོར་མ་བཞག་པར་སྒྲོས་བཏགས་ནས་ཡིད་ཀྱིས་དཔྱད་ཅིང་མིན་པ་ལ་ཡིན་པར་འཁྲིགས། ཡིན་པ་ལ་མིན་སྙམ་པར་འཁྲིགས་པར་བྱེད་པ་སྟེ། འདི་ནི་བཀའ་ལ་རས་ཆོད་དང་། གཟུ་ལུམ་བྱེད་པས་སྟེ། གསུང་གི་དམ་ཚིག་རྩ་བ་ནས་ཉམས་པས་རྡོ་རྗེ་དམྱལ་བ་ལས་འགྲོ་ས་མེད་དོ། །དོན་ལ་སྒྲོས་ཚོལ་བ་ནི་ཡིན་སྙམ་མིན་སྙམ་པར་སྒྲོས་བརྩལ་ཀྱང་སྙམ་བྱེད་ཀྱི་ཐོག་ཏུ་གནས་ཡིད་དཔྱོད་ལས་མིན་པས་ངན་སོང་དུ་ཁྲིད་པར་བྱེད་དོ། །དེ་ནི་ཡིད་ཀྱི་ལས་ཡིན་པའི་ཕྱིར་རོ། །ཡང་དག་པའི་ཐོས་པ་ལས་བྱུང་བའི་ཤེས་རབ་ནི། སྔོན་དུ་ཚིག་གི་མཐའ་བཅད་པས་ད་ཚིག་ལ་སྒྲོ་གདགས་སུ་མེད་དོན་གྱི་མཐའ་བཅད་པས་ད་རེ་དོགས་དང་ཕྱོགས་ལྷུང་མེད་པའོ། །བསམ་པའི་ཤེས་རབ་ལ། མ་དག་པ་ནི་གཉིས་ཏེ་ཚིག་གི་འགྲོ་ལྡོག་ལ་བསམ་པས་ཆོས་ཉིད་ལ་རང་བཟོར་སོང་བས་ཤེས་རབ་མ་དག །ལྟ་སྒོམ་ཞེ་འདོད་ལ་བསམ་པས་ཆོས་ཉིད་ལ་བདག་ཏུ་བཟུང་བས་མ་དག་པའོ། །དག་པའི་ཤེས་རབ་བམ་སྒོམ་པ་ལས་བྱུང་བའི་ཤེས་རབ་སྤང་བྱ་ཉོན་མོངས་པའི་མཐའ་ཆོད་པས་རྐྱེན་གང་གིས་ཀྱང་མི་གནོད། ཐོབ་བྱ་ཡེ་ཤེས་ཀྱི་མཐའ་ཆོད་པས་ཡིད་གང་ལ་ཡང་མི་འཇུག་པས་རྐྱེན་ངན་པ་རྣམས་ཉམས་མྱོང་གི་གྲོགས་སུ་ཤར་བའོ། །སྒོམ་པའི་ཤེས་རབ་མ་དག་པ་ནི། རྟེན་པ་ཚིག་གི་ཆོས་ལ་རྗེས་སུ་བཟུང་བས་ཐ་མ་ཚིག་ལ་ལོངས་སྤྱོད་པས་དོན་མཐའ་སྤང་སྟེ་རང་གི་རྒྱུད་མ་དག་པས་འབྲས་བུ་ངན་སོང་དུ་ཁྲིད་ལ། ཞེ་འདོད་དངོས་པོ་ཉམས་ལ་བདེན་པར་བཟུང་བས་རང་གི་ཆོས་མ་ཞིག་པས་ཐ་མ་རང་རྒྱུད་པར་གོལ་བས་མ་དག་གོ། །དག་པའི་བསྒོམ་པ་ལས་བྱུང་བའི་ཤེས་རབ་ནི། ཆོས་སྤྱི་ཡི་མཚན་ཉིད་ཤེས་བྱ་སྤྱི་མཚན་གྱི་མཐའ་ཆོད་པས་གྲུབ་མཐའ་འདོད་རྒྱལ་གྱི་རྗེས་སུ་མི་འབྲེང་པས། སྤྲོས་པ་རང་ཐོག་ཏུ་ཆོད་དེ་སྣང་བའི་ཞེན་པ་འགགས། ཆོས་རང་གི་མཚན་ཉིད་ཉམས་སུ་བླང་བྱ་རང་མཚན་ནང་དུ་ཆོད་པས་རང་གི་ཆོས་དང་གྲུབ་མཐའ་ཞིག་པས་འཁྲུལ་པ་རང་འགགས་པའོ། །ཤེས་རབ་ཀྱི་ཡུལ་ནི་ཆོས་ཉིད་ཕྱིན་ཅི་མ་ལོག་པ་ཚིག་གི་སྤྲོས་པ་དང་བྲལ་བའོ། །དེ་ཡང་ཇི་སྲིད་ཚིག་ལ་སྤྱོད་ཀྱི་བར་ལ་བློ་ལས་ཤེས་རབ་མ་ཡིན་ནོ། །བྱེད་པའི་ལས་ནི་ཐོས་པའི་ཤེས་རབ་ཀྱིས་ཆོས་དང་ཆོས་མ་ཡིན་པ་ངོ་ཤེས་པར་བྱས་ཏེ། ལྟ་སྒོམ་ཕྱིན་ཅི་ལོག་རྣམ་པར་བཅད་ནས་ཉོན་མོངས་པ་མགོ་གནོན་པར་བྱེད། བསམ་པའི་ཤེས་རབ་ཀྱིས་རང་གི་གྲུབ་པའི་མཐའ་ལ་ཡིད་ཆེས་པར་བྱ་སྟེ། ཆོས་སུ་མི་འགྲོ་བའི་སྤྱོད་པ་ལས་ལོག་ནས། ཉོན་མོངས་པ་གནས་བསྒྱུར་ནས་བདག་ཏུ་འཛིན་པའི་ཞེན་པ་གཅོད་པར་བྱེད། བསྒོམ་པའི་ཤེས་རབ་ཀྱིས་རང་རིག་པའི་ཡེ་ཤེས་མངོན་སུམ་དུ་ཉམས་སུ་མྱོང་ནས་རང་བཞིན་གྱི་གྲུབ་མཐའི་ཚིག་ལ་མི་ལྟོས་པར་ཐག་བཅད་ནས་ཉོན་མོངས་པ་རྩ་བ་ནས་ཆོད་པས་རང་གི་རྒྱུད་ལ་འཁྲུལ་པ་སྐད་ཅིག་ཀྱང་མི་གནས་པར་བྱེད་པའོ། །དོན་གྱི་ཉོན་མོངས་པ་གཅོད་པར་བྱེད་ཅིང་ཆོས་ཉིད་མངོན་སུམ་དུ་རྟོགས་པར་བྱེད་པའོ། །ཤེས་རབ་ཀྱི་རང་བཞིན་ནི་འདི་ཉིད་རང་གི་བློའམ་དྲན་པའམ་ཡིད་གནས་མི་སྲིད་དེ། དཔེར་ན་མར་ཁུ་ཁོལ་བ་ལ་ཆུའི་ཐིགས་པ་མི་གནས་པ་བཞིན་ནོ། །གོལ་བ་ཤེས་རབ་ཚིག་གི་ཕྱིར་འབྲེང་པས་ཡིད་དཔྱོད་སྒྲོ་བཏགས་སུ་གོལ། ཤེས་རབ་ཡིན་སྙམ་དུ་སོང་བས་དོན་སྙམ་བྱེད་བློ་ཡི་ཐོག་ཏུ་གོལ། ཤེས་རབ་ཀྱི་འབྲས་བུ་ནི་གཉིས་མེད་མཉམ་པར་ཤེས་ན་རྒྱུད་ནས་སངས་རྒྱ་ཞིང་ཡེ་ཤེས་རྒྱུད་ནས་སྐྱེ་བའི་གནད་ཀྱིས་སོ། །དེ་ལྟར་ཐབས་ཤེས་རབ་ཀྱི་རང་བཞིན་ནམ་ལས་འབྲེལ་ནི། གཉིས་མེད་གཅིག་གི་ཚུལ་ཡིན་ཏེ། ཐབས་མེད་ཤེས་རབ་རྐྱང་བར་སོང་ན་གྲུབ་མེད་པར་རྒྱ་མཚོའི་གླིང་ལ་ཚུད་པ་དང་འདྲ། ཤེས་རབ་མེད་ཐབས་རྐྱང་པར་སོང་ན་སྐྱེས་བུ་མིག་དང་བྲལ་བ་དང་འདྲ་སྟེ་མཐོང་བྱེད་ཀྱི་གཅོད་མེད་དོ། །དེའི་ཕྱིར་འདུ་འབྲལ་མེད་ན་གང་ཟག་གཅིག་སངས་རྒྱ་བ་ལ་ཐབས་ཀྱི་བདེ་བ་བསྐྱེད་པར་བྱེད་པས། ཤེས་རབ་ཀྱི་སྡུག་བསྔལ་གཅོད་པར་མ་བྱས་ན་བདེ་བ་མི་སྐྱེ་བས་སོ། །ཐབས་ཀྱི་གསལ་བ་ཉམས་མྱོང་སྐྱེས་པའི་ཤེས་རབ་ཀྱིས་མཐའ་མ་བཅད་ན་ཉམས་མྱོང་མི་འཆར་བས་འདུ་འབྲལ་མེད་པའོ། །དེ་ཡང་ཐབས་ཀྱི་ལུས་ངག་ལ་བདེ་བ་འབྱིན་པས་ཤེས་རབ་ཀྱིས་སྟོང་པ་ཉིད་དུ་རྟོགས་པར་བྱེད་པ་དང་གཉིས་སུ་མེད་པའོ། །དོན་ལ་ཐབས་ཀྱིས་ཉམས་མྱོང་འཕེལ་ཅིང་འཛིན། ཤེས་རབ་ཀྱིས་འཁྲུལ་པ་དང་ཉོན་མོངས་པ་གཅོད་པའོ། །དེ་ལྟར་ཐབས་ཤེས་རབ་གཉིས་ནི་འཁྲིལ་ཏེ་གཉིས་མེད་གཅིག་པར་ཡང་དག་པའི་ངོ་བོ་ལ་གནས་པའི་རྟགས་སུ་དབྱིངས་ཀྱི་སྒྲོན་མ་ཉིད་ལུས་ལས་རང་གིས་སོར་གཅིག་གིས་མ་རེག་པར། ཉིན་མོ་མྱ་ངན་ལས་འདས་པའི་དུས་ཡིན་པས་འབྱུང་བ་བཞིའི་རང་རྐྱེན་ནང་འཕྲད་པས་སྒྲོན་མའི་རང་མདངས་དང་ལྡན་པས། ཡེ་ཤེས་ཀྱི་སྣང་བར་འགྱུར་སྟེ་མངོན་སུམ་དུ་སྣང་བ་ཡིན་ལ། མཚན་མོ་འཁོར་བའི་ཆ་ཡིན་པས་འབྱུང་བའི་རང་རྐྱེན་མ་དག་པས་ཀྱང་། སྒྲོན་མའི་སྣང་བ་མཐིང་གར་གནས་པ་ནི་འཁོར་བའི་ཉེས་སྐྱོན་གྱིས་སྒྲིབས་པའོ། །དེའི་དུས་ན་སྣང་བ་དེ་རང་གི་ངོ་བོ་ཉིད་ལ་འབྱར་ནས་ཕྱིར་འཕེན་པའི་རླུང་གི་སྟོབས་ཞན་པའོ། །དབྱིངས་ཀྱི་རང་བཞིན་འོད་ཀྱིས་ཁྱིམ་ན་གནས་པ་སྟེ། འདིའི་དུས་ན་ཡང་ངོ་བོ་ལ་འགྱུར་བ་མེད་པའི་ཡེ་གདངས་ཆེན་པོར་འདི་ནི། སངས་རྒྱས་སེམས་ཅན་ཐམས་ཅད་ལ། སུས་ཀྱང་བྱས་པ་མེད་པར་འདི་ནི། ཡེ་ནས་གཉིས་མེད་མཉམ་པ་ཉིད་མ་བཅོས་པ་ཆེན་པོར་གནས་པའི་ཕྱིར། འདི་ནི་ཁྱབ་ཆེ་ཡང་ཡིད་དཔྱོད་ཀྱིས་མི་རྙེད་པས། འཕྲ་བས་སྟེ་ལས་ཀྱི་སྒྲིབ་པས་བསྒྲིབས་ནས་བླ་མའི་མན་ངག་མེད་པ་ལ་མི་སྣང་བའོ། །འོ་ན་ཀུན་ལ་མི་སྣང་ངམ་ཞེ་ན་བླ་མའི་མན་ངག་ཡོད་པ་ལ་མངོན་སུམ་དུ་སྣང་བ་ནི། རང་གིས་མན་ངག་ཤེས་པའི་གནད་ཀྱིས་ཡེ་ཤེས་རྟོགས་པའི་ཆར་ཤར་ནས་ཤེས་རབ་ཀྱིས་མ་ཡིན་པར་དབང་པོའི་མངོན་སུམ་ཉིད་དེ་ཡིད་ཀྱི་མངོན་སུམ་ཉིད་དེ་ཡིད་ཀྱི་མངོན་སུམ་ཡུལ་འདྲེས་པ་མེད་པས་བདེན་པ་རྣལ་འབྱོར་གྱི་མངོན་སུམ་དང་པོ་མངོན་སུམ་དུ་བསྟན་པ་མེད་པས་སྐྱེ་མི་སྲིད་རང་རིག་གི་མངོན་སུམ་ཉམས་སུ་མྱོང་བ་ལ་མ་བརྟེན་པར་འཆར་མི་སྲིད་པས་མངོན་སུམ་དེ་དག་ལས་འདི་རབ་ཏུ་གསང་ངོ་། །དེ་ལྟར་གསང་བའི་གསང་བ་དབང་པོ་དང་འབྲེལ་པ་རྫོགས་པ་ཆེན་པོ་འདི་ཉིད་ལ་སྐལ་པ་དང་ལྡན་པ་གང་སུ་ཡང་རུང་བ་སྤྱོད་པར་འདོད་པ་དེ། ཡེ་ནས་སངས་རྒྱས་པ་ཉིད་ཡིན་ཀྱང་དེ་ལས་ཀྱང་ཡང་སངས་རྒྱས་སོ། །འདི་ཉིད་རང་གི་བཞུགས་ཚུལ་ནི། དངོས་པོའི་གསལ་བའི་ཕྱོགས་ནས་སྒྲོན་མ་དེ་ལ་བལྟས་ན་ནི། རང་གི་གསལ་བྱེད་དུ་ཡོད་པས་མཚན་མའི་ཆ་བག་ཙམ་ཡོད་པ་ལྟར་སྣང་སྟེ། འདི་ནི་ལམ་གྱི་སྣང་བ་ཡིན་གྱི་ཆོས་ཉིད་རང་གི་ངོ་བོ་ཟད་པས་སྟོང་པར་ཡང་མཚོན་དུ་མི་བཏུབ། ཟད་པ་ཉིད་གསལ་བར་ཡང་མཚོན་པར་མི་ནུས་ཏེ། དེ་ཡང་གསལ་བར་རོལ་པར་རང་ཤར། དེ་ལྟར་ཤར་བ་ཉིད་གནས་ལུགས་སུ་རང་གྲོལ། དེ་གྲོལ་བས་ངོ་བོ་རང་དག་གོ། །དེ་ལྟར་མཚན་མ་མེད་པའི་སྟོང་པ་ཉིད་ལ་བལྟས་པ་ཡིས། རང་གསལ་དུ་སྣང་བ་འདི་ལ་བཟུང་བའི་ཡུལ་དུ་མེད་པས་ན། འདི་ལྟར་རོལ་པ་དང་གནས་ལུགས་དང་ངོ་བོ་གསུམ་གྱི་བདག་ཉིད་དུ་གནས་པ་ཉིད། ཡེ་ནས་ཡོད་པ་ཡིན་ལ་འདི་ཉིད་བླ་མའི་མན་ངག་དང་མི་ལྡན་ན་སུས་ཀྱང་མི་ཟིན་ཏེ་སྟོང་པ་ཉིད་ངོས་བཟུང་དང་བྲལ་བའི་ཕྱིར། དེས་ན་དབྱིངས་ཀྱི་རང་བཞིན་དངོས་པོའི་འདུག་ཚུལ་འདི་ནི་ཆད་པའི་ལྟ་བ་ལས་ལོག་པས་གསལ་བར་གནས་པ་དང་རྟག་པའི་ལྟ་བ་ལས་ལོག་པས་སྟོང་པ་འདི་ནི། ཡེ་གདོད་མ་ནས་ཁྱབ་ཅིང་རང་གི་ལུས་ལ་གནས་པའོ། །དེ་ཡང་གཞན་ལས་མ་བྱུང་སྟེ་རང་གི་སྣང་བའོ། །སྣང་བ་དེ་ཡང་དངོས་པོར་མེད་པས་སྟོང་ཉིད་ཡིན་ལ། དེ་ཉིད་ཆད་པར་མ་སོང་བས་གསལ་བའི་ཡུལ་དུ་ཡོད་པའོ། །དེ་ལྟ་བུའི་སྟོང་གསལ་གཉིས་སུ་མེད་པ་འདིར་ནི་སྐལ་ལྡན་གྱིས་གོམས་པའི་ཚད་རྙེད་ནས་དེ་ཡང་གློ་བུར་ཡོད་པ་མ་ཡིན་ཏེ། ཡེ་ནས་རང་གི་རང་བཞིན་གྱིས་དག་པ་ཆེན་པོ་ཉིད་དུ་གནས་པའོ། །དེ་ལྟ་བུའི་གནས་ལུགས་དེ་དུས་མེད་པར་རང་མདངས་སུ་སྣང་བའི་ཡེ་ཤེས་སྟེ། དེའི་ཡུལ་ནམ་མཁའ་ལ་ནི་དུས་རྒྱུན་དུ་སྣང་བའོ། །འཁོར་འདས་ཡོད་མེད་ཀུན་འགྱུར་བ་མེད་པའི་དབྱིངས་སུ་ཆོས་ཉིད་ཐམས་ཅད་འདུས་པས། འདི་ཉིད་རང་གི་གནས་ལུགས་རྟག་ཆད་མཐར་འཛིན་ལས་ལོག་པས་སྟོང་པ་གསལ་བར་བཞུགས། གཉིས་ག་དང་གཉིས་ཀ་མ་ཡིན་པར་འཛིན་པའི་ཞེན་པ་ལས་ལོག་པས་སྟོང་གསལ་རིག་པའི་སྙིང་པོ་ཅན་ཡིན་པས། དེའི་དོན་ལ་གནས་པའི་སྐལ་ལྡན་གྱིས་སྙིང་པོ། གནས་པའི་གང་ཟག་བརྩོན་འགྲུས་རབ་སྣང་བ་འདི་ཉིད་ལ་ཕྱི་ཡི་འབྱུང་བ་བཞིར་འཛིན་པའི་རྐྱེན། རགས་པ་སའི་གནོད་པ་དང་། ཆུ་དང་མེ་དང་རླུང་གི་སྣང་བ་རང་འགགས་ནས་འགྲོ་བ་གཞན་གྱིས་བལྟས་པས་འབྱུང་བ་ལ་ཟང་ཐལ་བར་སྣང་བའོ། །ནང་ལུས་ཀྱི་འབྱུང་བའི་རྐྱེན་ཤ་ཁྲག་རང་ཀ་མར་འཛིན་པ་རང་གྲོལ་ནས་སངས་རྒྱའོ། །བརྩོན་འགྲུས་འབྲིང་པོ་གཅིག་ལུས་ཀྱི་འབྱུང་བ་བཞིའི་རྐྱེན་ལུས་དང་བྲལ་བའི་ཚེ་ཆོས་ཉིད་བར་མ་དོར་ཆོས་ཉིད་ཀྱི་བདེན་པ་མཐོང་ནས་དེ་ཉིད་དུ་དགོངས་པའི་སྟོབས་རྙེད་ནས་སངས་རྒྱའོ། །བརྩོན་འགྲུས་ཐ་མ་གཅིག་བླ་མ་དམ་པའི་གདག་ངག །རིག་པ་མངོན་སུམ་མཐོང་ནི་མཐོང་། འཇིག་རྟེན་འདི་ཡི་གཡེང་བས་གཡེངས་ནས་ཉམས་སུ་བླང་ལོང་མ་བྱུང་བས་བག་ཆགས་ཀྱི་ལུས་འདི་ནི་བོར་བ་ན། ཟབ་མོའི་ཆོས་ཉིད་ཀྱི་སྒོ་མཐོང་བའི་བྱིན་རླབས་ཀྱིས་རང་བཞིན་སྤྲུལ་པའི་སྐུར་དབུགས་ཕྱུང་ནས་སངས་རྒྱ་བའི་ཕྱིར། བསྟན་པ་དམ་པ་འདི་ལ་ཞུགས་སོ་ཅོག་སངས་མ་རྒྱས་པ་གཅིག་ཀྱང་མེད་པས་ན། འདི་དག་ལ་ད་འཁོར་བའི་སྣང་བ་མི་སྲིད་དོ་ཞེས་དབྱིངས་རྣམ་པར་དག་པའི་སྒྲོན་མ་དངོས་བསྟན་ནས། ༈ ད་ནི་དྲིས་ལན་བཅུ་གཅིག་པ་དེ་ཉིད་ཀྱི་མཐུན་པའི་དཔེ་བསྟན་པ་ནི། དཔེར་ན་ཡི་གེ་ན་རོ་བཞིན་ཞེས་པ་ལ་སོགས་པས་བསྟན་ཏེ། འདི་ཉིད་ཀྱི་ངོ་བོ་ནི། དཔེར་ན་ཡི་གེ་ན་རོ་བཞིན་དུ་ཐབས་དང་ཤེས་རབ་ཀྱི་རང་བཞིན་ལས་གཅིག་ལས་གཉིས་སུ་སྣང་བའོ། །དེ་ལྟར་ཐབས་དང་ཤེས་རབ་གཉིས་ཀྱིས་བཟུང་སྟེ་དེ་ཐ་དད་པ་མ་ཡིན་པས་གཉིས་སྡོམ་པས་གཅིག་ཏུ་གནས་པའོ། །དེའི་ཁ་དོག་ནག་པོ་ནི་གང་གིས་ཀྱང་བསྒྱུར་དུ་བཏུབ་པ་མིན་པས་ལྟ་བ། རྣལ་འབྱོར་པས་དེ་ལ་གོམས་པར་བྱས་པས་གདེང་རྙེད་ནས། དེ་ཉིད་སྣང་བ་འཕེལ་བས་དཔེན་ན་བར་སྣང་འཇའ་མཚོན་བཞིན་དུ། ཁ་དོག་ལྔ་མ་འདྲེས་ལ་ཡོངས་སུ་རྫོགས་པའི་སྣང་བ་གྱུར་པ་ཡིན། དེ་ལས་ཀྱང་བརྟན་པའི་གདེང་ནི་དེ་ནས་ཡང་འདི་ནི་གོམས་པའི་སྟོབས་ཀྱིས། རྣལ་འབྱོར་པ་སྒྲོན་མ་དེ་ཡི་རྟགས་དང་ལྡན་པ་ལ། སྣང་བ་དེ་བས་རྒྱ་ཆེར་གྱུར་ཏེ་བར་སྣང་གི་ཁམས་རྣམས་ཀྱང་དེ་བཞིན་དུ་ཁ་དོག་ལྔའི་འོད་ཀྱི་སྣང་བར་གྱུར་པ་ཡིན། ཞེས་དཔེ་བསྟན་ནས་དེ་དག་གིས་ལན་རྒྱས་པར་བཤད་ནས། ༈ ད་ནི་དོན་ཐ་མ་རྒྱུད་འདི་བཟུང་བའི་ཡོན་ཏན་ནམ་དགོས་ཆེད་བསྟན་པ་ནི། རྒྱུད་འདི་འཛིན་པར་སུ་འདོད་པ་ཞེས་པ་ལ་སོགས་པས་བསྟན་ཏེ། རྒྱུད་འདི་ཞེས་པ་ནི་རིགས་མཚོན་པར་བྱེད་པས་ན་རྒྱུད་ཡིན་ལ་འདིས་ནི་སངས་རྒྱ་བའི་རིགས་སུ་བྱེད་པའོ། །འཕེན་པར་བྱེད་པས་ན་རྒྱུད་དེ། དཔེར་ན་གཞུ་ལ་སོགས་པའི་རྒྱུད་ལ་ཡང་འཕེན་པའི་སྟོབས་ཡོད་པ་དང་འདྲ་བར། རྒྱུད་འདིས་ནི་འཁོར་བའི་ས་ནས་མྱ་ངན་ལས་འདས་པའི་སར་འཕེན་པར་བྱེད་པའི་སྟོབས་འདིས་བྱེད་པའོ། །དེ་ལྟར་ན་འདི་འཛིན་པའི་རིགས་ཀྱི་བུའམ། རིགས་ཀྱི་བུ་མོ་གང་ཡང་རུང་བས་འཇིག་རྟེན་འདི་དང་ཕ་རོལ་གཉིས་ཀའི་འདོད་པའི་དོན་ལྷག་མ་མེད་པར་འགྲུབ་ཅིང་། མ་འོངས་པའི་དུས་ན་ཡང་རྒྱུད་འདི་ནི་དམ་པ་ནི་ལྷ་དང་མི་རྣམས་ཕྱག་བྱེད་པའི། སྐྱེས་བུ་རང་བཞིན་རྫོགས་པ་ཆེན་པོའི་སྐལ་བ་དང་ལྡན་པ་དེས་འཛིན་པར་འགྱུར་ལ། དེ་ཉིད་ཀྱི་ངང་ཚུལ་བཞིན་དུ་ཕྱིན་ཅི་མ་ལོག་པས་འཆད་པ་དང་ཉན་པ་དང་། ཡིད་ལ་བྱེད་པར་འགྱུར་རོ། །དེའི་ཕྱིར་ན་རྒྱུད་འདིའི་ཚིག་དང་ཡི་གེ་རྣམས་མ་ཉམས་པ་དང་། མ་ནོར་བ་དང་། མ་འདྲེས་པ་དང་། ལྷག་པ་དང་ཆད་པ་མེད་པར་ཚིག་གི་ཟུར་ཆག་པ་མེད་པར་སོ་སོར་སྐལ་ལྡན་གྱིས་བཟུང་བ་ཡིན། རིགས་ཀྱི་བུ་དེ་ལ་ཡོན་ཏན་གྱི་ཚོགས་འདི་ལྟ་བུ་དང་ལྡན་པར་འགྱུར་ཏེ། འཇིག་རྟེན་འདི་ལ་བཀྲ་ཤིས་ཕུན་སུམ་འཚོགས་པ་དང་། འདོད་པའི་དོན་ཇི་ལྟ་བར་འགྲུབ་པ་དང་། ཚེ་རིང་ཞིང་ནད་མེད་པ་དང་། སངས་རྒྱས་ཀྱི་བསྟན་པ་ལ་དགའ་བའི་ལྷ་དང་ཀླུ་དང་གནོད་སྦྱིན་དང་། ནམ་གྲུ་ལ་སོགས་པས་རབ་ཏུ་སྲུང་བ་དང་། སྐྱོབ་པ་དང་། སྦེད་པ་དང་སྐྱོང་བ་ལ་སོགས་པ་བྱེད་པ་དང་། དབང་ཕྱུག་ཕུན་སུམ་འཚོས་པ་ལ་སོགས་པ་འཕེལ་པར་བྱེད་པ་དང་། སྡིག་པ་མི་དགེ་བའི་ལས་ལ་མི་འཇུག་ཅིང་དེ་དག་རྣམས་འཇོམས་པར་འགྱུར་བ་དང་། ལྟ་བ་ངན་པའི་གྲོང་ཁྱེར་རྣམས་དང་བདུད་ཀྱི་ལས་སྤོང་བར་བྱེད་པ་དང་། ལྟ་བ་ཕྱིན་ཅི་ལོག་པ་རྣམས་ལ་འཇུག་པར་མི་འགྱུར་བ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་རློབས་པ་དང་། མཁའ་འགྲོ་མ་རྣམས་ཀྱི་གཟུགས་སྟོན་ཅིང་ལུང་སྟོན་པར་བྱེད་པ་དང་། འཇིག་རྟེན་གྱི་འཇིགས་པ་བརྒྱད་ལས་ཐར་བར་བྱེད་པའོ། །མ་འོངས་པའི་དུས་ན་ཡང་གོང་མ་རྣམས་དང་ལྡན་པ་དང་། གཟུགས་བཟང་ཞིང་འགྲོ་བ་བྱམས་པ་དང་། ཁ་དོག་དང་། གཟི་བརྗིད་དང་། མདངས་དང་སྟོབས་དང་ལྡན་པ་དང་། འཕོང་དང་སྒྱུ་རྩལ་དང་ལྡན་པ་དང་། འཁོར་འདུ་ཞིང་ལོངས་སྤྱོད་དང་ལྡན་པ་དང་། འདིའི་རྒྱུད་རང་བཞིན་གྱིས་དག་པས་མི་བརྗེད་པའི་གཟུངས་དང་། མངོན་པར་ཤེས་པ་དྲུག་ཤར་སྟེ་སྐྱེ་བ་སྔ་ཕྱི་ལ་སོགས་པ་ཐམས་ཅད་དྲན་ཅིང་ཕྱིན་ཅི་མ་ལོག་པ་ཤེས་པ་དང་། རང་བཞིན་གྱིས་བསམ་གཏན་ལ་གནས་པ་དང་། ཚེ་དེ་འཕོས་ནས་བླ་ན་མེད་པའི་བྱང་ཆུབ་ཐོབ་པར་ངེས་པ་ནི། རྒྱུད་འདི་ལ་མཉན་པ་དང་། བལྟས་པ་དང་། ཤེས་པ་མེད་ཀྱང་། མོས་པ་དང་གུས་པ་བྱེད་པའི་སྐྱེས་བུས་བཅངས་པ་ཙམ་གྱིས་འགྲུབ་པ་ཡིན་ཏེ། དཔེར་ན་ཀླུ་འདུལ་བའི་ནོར་བུ་བཅངས་པའི་སྐྱེས་བུ་ལ། ཀླུའི་གནོད་པ་འབྱུང་མི་སྲིད་པ་དང་འདྲའོ། །དེ་མ་ཡིན་པའི་མཉན་པ་དང་། ཤེས་པ་དང་ཡིད་ལ་བྱེད་པ་རྣམས་ལ་ཡོན་ཏན་སངས་རྒྱས་ཀྱི་ཐུགས་ཀྱི་མཁྱེན་པ་ཡེ་ཤེས་བསམ་གྱིས་མི་ཁྱབ་ཅིང་བརྗོད་དུ་མེད་པ་ཆེན་པོ་གཞན་དག་ཀྱང་ཐོབ་པར་འགྱུར་བ་ལ་ཐེ་ཚོམ་བྱར་མེད་དོ། །དེའི་ཕྱིར་ན་བཀོད་པ་ཆེན་པོ་ལས་སངས་རྒྱས་ཀུན་གྱིས་ཕྱག་མཛད་པའོ། །གང་གིས་སྙིང་པོ་གསང་བའི་རྒྱུད། །ཚིག་ནི་གཅིག་དང་གཉིས་ཀྱང་རུང་། །གལ་ཏེ་ཚིག་ཤད་ཕྱེད་པའམ། །འདི་ཡི་མིང་ཙམ་བཟུང་བས་ཀྱང་། །སངས་རྒྱས་ཞིང་ཁམས་དཔག་མེད་ལ། །སྤྱོད་པར་ནུས་སྟེ་རང་དབང་འགྱུར། །ཞེས་གསུངས་པས་ན་རྒྱུད་འདི་རིན་པོ་ཆེའི་ཡི་གེ་ལ་བྲིས་ཏེ། མོས་པ་དང་མཆོད་པ་བསྙེན་བསྐུར་བྱས་ནས་དོན་མ་ཤེས་ཀྱང་བླ་ན་མེད་པའི་བྱང་ཆུབ་ཐོབ་བོ། །དེ་ལྟར་ཡང་གསང་བ་གསང་མཆོག་བླ་མེད་རྒྱུད། །ངེས་པའི་སྙིང་པོ་བསྟན་པ་འདི། །བསྙེན་བསྐུར་ཆེན་པོ་རབ་བྱས་ཏེ། །བྲིས་དང་བླང་དང་བཅངས་པ་དང་། །གང་གིས་སྤྱི་བོར་འཛིན་པའི་མི། །འདི་ནི་སྤྲུལ་སྐུའི་ཞིང་ཁམས་སུ། །ངལ་གསོ་བྱས་སྟེ་སངས་རྒྱའོ། །ཞེས་གསུངས་པའོ། །དེ་ལྟ་བུའི་ཡོན་ཏན་དང་ལྡན་པའི་རྒྱུད་ཀྱི་སྔོན་དུ་མཚན་བསྟན་པའི་དུས་ན། སྒྲ་འགྱུར་དུ་བསྟན་པས་དབང་པོ་ཐ་མས་སྒྲ་ཇི་བཞིན་པའི་དོན་དྲང་ཐད་དུ་རྫོགས་ནས་རྒྱུད་ཀྱི་ཚིག་དོན་ཁོང་དུ་ཆུད་པ་དང་། བརྡ་འགྱུར་དུ་བསྟན་པས་དབང་པོ་འབྲིང་པོས་བརྡ་དོན་གྱི་མན་ངག་ལ་བརྟེན་ནས་རྒྱུད་ཀྱི་ཚིག་དོན་ལྷག་ཆད་མེད་པར་ཁོང་དུ་ཆུད་པ་དང་། དོན་འགྱུར་དུ་བསྟན་པས་དབང་པོ་རབ་ཀྱིས་འདུས་པ་གནད་ཀྱི་མན་ངག་ལ་བརྟེན་ནས་རྒྱུད་ཀྱི་ཚིག་དོན་ཕྱིན་ཅི་མ་ལོག་པར་ཁོང་དུ་ཆུད་པ་དང་། རྣམ་པ་གསུམ་སྟེ། དེ་གསུམ་དུ་རྒྱུད་འདི་མ་ཡིན་པའི་རྒྱུད་གཞན་ལ་ཡང་གསུམ་པོ་དེའི་ངོ་བོ་སྦྱར་བར་ཞེས་པར་བྱས་ན། ཇི་ལྟར་རྒྱུད་སོ་སོའི་མཚན་བསྟན་པ་ཙམ་གྱིས། རྒྱུད་དེ་ཉིད་རང་གི་གཞུང་གི་ཚིག་དང་ཡི་གེ་རྣམས་ཀྱི་ངོ་བོ་མངོན་པར་རྟོགས་པར་འགྱུར་བའོ། །ཞེས་དོན་ཐ་མ་རྒྱུད་བཟུང་བའི་ཕན་ཡོན་རྒྱུད་ཀྱི་མཚན་དང་སྦྱར་བ་བསྟན་ནས། ད་ནི་ལེའུའི་མཚན་བསྟན་པ་ཞེས་གཞུང་ཚིག་དང་ཡི་གེར་བཀོད་པ་སྒྲོན་མ་འབར་བ་ལས་ཁྱད་པར་དུ་དབྱིངས་རྣམ་པར་དག་པའི་སྒྲོན་མ་ལ་ཞུ་བ་མདོར་བསྟན་པ་དང་། ལན་རྒྱས་པར་བཤད་པ་དང་། རྒྱུད་བཟུང་བའི་ཕན་ཡོན་དང་གསུམ་དུ་བསྡུས་ནས་བསྟན་པའི་ལེའུ་གཞུང་གི་སྡེ་ཚན་ངེས་པར་བཅད་པ་སྟེ། བཞི་པའོ། །གསུམ་པ་གཞན་དུ་གྱུར་པའི་གྲངས་ཀྱི་བྱེ་བྲག་ཏུ་བསྟན་པའོ། །ཡང་ན་སྒྲོན་མ་ནི་བཞི་ཁོ་ནར་ངེས་པས་ལེའུ་ཡང་བཞི་ཁོ་ནར་ངེས་པས་བསྟན་ལ། དེ་ལས་མང་ན་སྒྲོན་མ་ཐ་དད་པར་འགྱུར་ལ་ཉུང་ན་སྒྲོན་མ་བཞི་ཡི་གྲངས་མ་ཚང་པས་བཞི་ཁོ་ནར་ངེས་པའོ། །གོང་དུ་ལེའུ་དང་པོ་ལ་གླེང་གཞི་གཉིས་དང་དེ་གཉིས་ཀྱི་མཚམས་སྦྱར་བསྔགས་ཀྱི་སྒྲ་དང་བཅས་པ་དང་གསུམ། སྒྲོན་མ་བཞིའི་རྒྱུད་དོན་མདོར་བསྟན་པ་དང་བཞི། རྒྱས་པར་བཤད་པ་ལ་ལེའུ་བཞི། དེ་ལས་ལེའུ་དང་པོར་རྒྱང་ཞགས་ཆུའི་སྒྲོན་མ་སྤྱི་ཡི་རྣམ་པའི་རྣམ་པ་ཞུས་ལན་གསུམ་སྟེ་དྲུག །ལེའུ་དེ་ལ་ཞུ་བ་མདོར་བསྟན་པ་དང་། ལན་རྒྱས་པར་བཤད་པས་ཏེ་བརྒྱད། ལེའུའི་མཚན་དང་དགུ། ལེའུ་གཉིས་པ་ཤེས་རབ་རང་བྱུང་གི་སྒྲོན་མ་ལ་ཞུ་བ་མདོར་བསྟན་པ་དང་། ལན་རྒྱས་པར་བཤད་པ་གཉིས། ལེའུའི་མཚན་དང་གསུམ་སྟེ་བཅུ་གཉིས། ལེའུ་གསུམ་པ་ཐིག་ལེ་སྟོང་པའི་སྒྲོན་མའི་ལེའུ་མདོར་བསྟན་དང་ལན་རྒྱས་པར་བཤད་པ་གཉིས། ལེའུའི་མཚན་དང་གསུམ་སྟེ་བཅོ་ལྔ། ལེའུ་བཞི་པ་ཞུ་བ་མདོར་བསྟན། ལན་རྒྱས་པར་བཤད་པ་དང་། རྒྱུད་བཟུང་བ། ཕན་ཡོན་དང་། ལེ་ཚན་དང་། རྒྱུད་གསུངས་པ་ལ་རྗེས་སུ་ཡི་རང་བར་བསྟན་པ་དང་ལྔ་སྟེ། བསྡུས་ན་ཉི་ཤུ་ཐམ་པའོ། །དེ་སྐད་སྟོན་པས་གསུངས་པ་ཡིས། རྒྱུད་དག་པའི་རྡོ་རྗེ་འཆང་དང་གཞན་ཡང་ཉིད་ལས་མི་གཞན་པའི་འཁོར་ཐུབ་པ་དྲུག་དང་། དགའ་རབ་རྡོ་རྗེ་དང་། མཁའ་འགྲོ་མ་དཔག་ཏུ་མེད་པ་དང་། འཇིག་རྟེན་གྱི་གཟུགས་འཛིན་པའི་ལྷ་དང་ཀླུ་དང་ལྷ་མ་ཡིན་དང་དྲི་ཟ་ལ་སོགས་པ་རྣམས། དགའ་ཞིང་མགུ་བའི་སེམས་སྐྱེས་ནས། སྟོན་པས་འདི་ཉིད་གསུངས་པ་ལ་མགྲིན་གཅིག་ཏུ་ཐལ་མོ་སྦྱར་ནས་མངོན་པར་བསྟོད་དོ། །གསེར་གྱི་མེ་ཏོག་མཛེས་པ་རིན་པོ་ཆེ་སྒྲོན་མ་འབར་བའི་རྒྱུད་ཞེས་བྱ་བ། ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་ལས་ཁྱད་པར་དུ་གྱུར་པའི་བཅུད་བྱུང་བའི་དོན་གསལ་བར་བྱེད་པ་མུ་ཏིག་ཕྲེང་བ་བརྒྱུས་པ་ཞེས་བྱ་བ་མཁས་པ་བྱེ་མ་ལས་མཛད་པ་རྫོགས་སོ།། །།ཨིཐི། རྒྱ་རྒྱ། སྲུངས་ཤིག །ས་མ་ཡ། ཏིསྨཱ། དགེའོ།། །། སྐུ་གདུང་འབར་བའི་རྒྱུད་ཀྱི་འགྲེལ་པ་སྒྲོན་མ་ཕྲེང་བ་བཀོད་པ། སློབ་དཔོན་ཆེན་པོ་བི་མ་ལ་མི་ཏྲ།སྐུ་གདུང་འབར་བའི་རྒྱུད་ཀྱི་འགྲེལ་པ་སྒྲོན་མ་ཕྲེང་བ་བཀོད་པ་ཞེས་བྱ་བ་བཞུགས་སོ། །རྒྱ་གར་སྐད་དུ། ཨཱ་ལོ་ཀེ་མ་ལཱ་པུ་ཏི་མཱ། བོད་སྐད་དུ། སྒྲོན་མ་ཕྲེང་བ་བཀོད་པ་ཞེས་བྱ་བ། བཅོམ་ལྡན་འདས་འབྱུང་བ་རྣམས་རང་སར་དག་པ་ཆེན་པོ་ལ་ཕྱག་འཚལ་ལོ། །མ་འོངས་དུས་ཀྱི་སྐལ་ལྡན་ངེས་ལུང་ཅན། །སྙིང་པོ་གསང་བ་བླ་མེད་རྒྱུད་རྒྱལ་ཉིད། །ཐེ་ཚོམ་མེད་པར་བདེ་བླག་ཉིད་དུ་ཡང་། །རྨོངས་ཤིང་འཁྲུལ་པ་མེད་པར་རྟོགས་བྱའི་ཕྱིར། །སྒྲོན་མ་སྣང་བྱེད་ཕྲེང་བ་བཀོད་འདྲ་བའི། །རབ་རྣོའི་མིག་དང་འདྲ་བའི་གསང་ཏིག་ཉིད། །རྗེ་བཙུན་དཔལ་ལྡན་ཉིད་ལ་གསོལ་བཏབ་ནས། །རང་སྣང་གོམས་པའི་རྟགས་ཚད་གཏན་འབེབས་པའི། །སྐུ་གདུང་ངེས་པའི་སྒྲོན་མ་བཤད་པར་བྱའོ། །དེ་ལ་ཡང་དག་པར་རྫོགས་པའི་སངས་རྒྱས་འགྲོ་བ་རྣམས་ཀྱི་བླ་མ་དཔལ་རྡོ་རྗེ་འཆང་གིས་སྤྱིར་སྤྲོས་པའི་ཚིག་ལ་བརྟེན་པའི་ཆོས་བསམ་གྱིས་ཁྱབ་པ་ཞིག་གསུངས་པ་ལས། དེ་དག་གི་ནང་ནས་ཐེག་པ་ཀུན་ལས་ཁྱད་པར་དུ་བསྡུས་པ་མར་གྱི་ཉིང་ཁུ་ལྟ་བུ། རང་བཞིན་རྫོགས་པ་ཆེན་པོའི་རྒྱུད་ཤྭ་ལོ་ཀ་འབུམ་ཕྲག་དྲུག་བཅུ་རྩ་བཞི་མིང་ཐ་དད་པར་གསུངས་པ་ལས། དཀྱུས་ཚིག་མན་ངག་ཏུ་བསྟན་པས་ན་མན་ངག་གི་སྡེ་ཞེས་བྱ་བ་རབ་ཏུ་ཟབ་པར་བསྟན་ཏོ། །དེ་ལྟར་མན་ངག་གི་སྡེ་རྣམས་ལས་ཀྱང་ཐིག་ལེ་རང་གནད་ལ་དབབ་པ་རྣམས་ཟབ་པར་བསྟན་པས། རྫོགས་པ་ཆེན་པོ་ཐིག་ལེའི་སྐོར་ཞེས་བྱའོ། །དེ་ལ་སྡེ་ཚན་བཞིར་གནས་པ་ལས། གསང་བ་བླ་ན་མེད་པ་ཡོངས་སུ་རྫོགས་པ་ཆེན་པོ་འདི་ཟབ་པར་བསྟན་པའོ། །འདི་ལ་རྒྱུད་ངེས་པ་བཅུ་བདུན་ཡོད་པ་ལས་གང་ཟག་གི་རྟགས་རྣམ་པ་གསུམ་བསྟན་པའི་སྐུ་གདུང་འབར་བའི་རྒྱུད་དོ། །རྒྱུད་འདི་ལེའུ་གསུམ་དུ་གསུངས་པ་སྟེ། ལེའུ་དང་པོས་སྔོན་སྦྱངས་ཀྱི་ལུས་ལ་རྟགས་ཇི་ལྟར་འབྱུང་བ་བསྟན་པ། གཉིས་པས་ད་ལྟ་གོམས་པའི་གང་ཟག་རྣམས་ལ་རྟགས་ཇི་ལྟར་འབྱུང་བ་བསྟན་པ། གསུམ་པས་གང་ཟག་དེ་འབྱུང་བའི་ཕུང་པོ་བོར་བའི་ཕྱི་ནས་ཇི་ལྟར་འབྱུང་བ་བསྟན་པའོ། །དེ་ལ་ལེའུ་དང་པོ་སྔོན་སྦྱངས་ཀྱི་རྟགས་བསྟན་པའི་ལེའུའི་དོན་འཆད་དོ། །འདི་ལ་རྒྱུད་ཀྱི་མཚན་བསྟན་པ་དང་། རྒྱུད་ཀྱི་གཞུང་དོན་མངོན་པར་རྟོགས་པ་བསྟན་པ་དང་། ལེའུའི་གཞུང་བསྟན་པའོ། །རྒྱུད་སྤྱིའི་གཞུང་ལ་ལེའུ་གསུམ་དུ་གནས་པའི། དེ་ལ་དང་པོའི་ལེའུའི་གཞུང་དང་། མཚན་དོན་གཉིས་ལས། མཚན་བསྟན་པ་སྟེ། དེ་ལ་མཚན་གྱི་བཞུགས་ཚུལ་བསྟན་པ་དང་། མཚན་གྱི་འགྱུར་བྱེད་བསྟན་པའོ། །དེ་ལ་མཚན་གྱི་བཞུགས་ཚུལ་ནི། དངོས་པོའི་འདུག་ཚུལ་གང་གིས་ཀྱང་སྒྲོས་མ་བཏགས་ཅིང་། མི་ཚིག་གིས་བར་དུ་མ་བསླད་པ་ཉིད། མཚན་གྱི་བཞུགས་ཚུལ་ཡིན་ཏེ། དེ་ཉིད་ཀྱི་མཚོན་བྱ་རྒྱུད་ཀྱི་སྟོན་པས་གསུངས་ལ། དེ་ཚིག་དང་ཡི་གེར་སློབ་དཔོན་དགའ་རབ་རྡོ་རྗེ་དང་། རྡོ་རྗེ་དབྱིངས་ཀྱི་མཁའ་འགྲོ་མ་གཉིས་ཀྱིས། རི་བོ་མ་ལ་ཡའི་རྩེ་མོ་ལ་ཚིག་དང་ཡི་གེར་དཀར་ཆག་ལ་བཏབ་ནས་རྒྱུད་སོ་སོའི་མཚན་དུ་གསལ་བར་བཀོད་པ་ལས། འདི་ནི་ཚིག་དོན་མཚན་དུ་གསལ་བར་བསྟན་པས། ངེས་པའི་རྟགས་སྐུ་དང་གདུང་ལ་སོགས་པ་སྟོན་པར་མཚན་གྱིས་གསལ་བས་ན། བཞུགས་ཚུལ་ཡིན་ལ། རྒྱུད་ལ་ནི་མཚན་དོན་ལ་བཏགས་པ་ཙམ་ལས། གཞུང་ན་མཚན་དང་མཐུན་པར་སྟོན་པ་ཡང་ཡོད། ལ་ལ་བསྐྱེད་རིམ་གྱི་ལྷ་གཙོ་བོའི་མིང་གིས་བཏགས་པ་ཡང་ཡོད། ལ་ལ་བམ་པོ་དང་ཤྭ་ལོ་ཀས་བཏགས་པ་ཡང་ཡོད། ལ་ལ་སྡེ་དང་རྣམ་གྲངས་ཀྱི་སྒོ་ནས་བཏགས་པ་ཡོད་པ་ལས། འདི་ནི་དེ་ལྟར་མ་ཡིན་ཏེ། རྒྱུད་ཀྱི་མཚན་བསྟན་པ་ཙམ་གྱིས་གཞུང་གི་དོན་བདེ་བླག་ཏུ་རྟོགས་པའི་ཕྱིར་མཚན་བསྟན་པས་གཞུང་མངོན་པར་རྟོགས་པར་འགྱུར་བ་ཡིན་ནོ། །དེ་ཡང་མཚན་གྱི་བཞུགས་ཚུལ་རང་གི་ངོ་བོ་ནི་དཔལ་ནམ་མཁའ་མེད་པ་སྟེ། རྟེན་གྱི་གང་ཟག་གཅིག་སངས་རྒྱས་པ་ལ་རྟགས་མེད་པར་སངས་མི་རྒྱ། རྟགས་དང་ལྡན་པར་སངས་རྒྱ་བར་སྟོང་པ་རང་གསལ་བ་ཙམ་ལ་ཡང་མི་གནས་པས། སངས་རྒྱ་བས་ནམ་མཁའ་ཡུལ་དུ་གཅད་པ་མེད་པའི་ཕྱིར་མཚན་རང་གི་བཞུགས་ཚུལ་ལོ། །མཚན་གྱི་འགྱུར་བྱེད་བསྟན་པ་ལ་གསུམ་སྟེ། མཚན་སྒྲ་འགྱུར་དུ་བསྟན་པ་དང་། བརྡའ་འགྱུར་དུ་བསྟན་པ་དང་། དོན་འགྱུར་དུ་བསྟན་པའོ། །དེ་དག་ལ་གཉིས་གཉིས་ཏེ། མཚན་གྱིས་ལེའུའི་གཞུང་རྫོགས་པའི་གནས་ལུགས་དང་། གང་ཟག་གི་བྱེ་བྲག་སྟོན་པའི་དགོས་ཆེད་དོ། །ལེའུ་གཞུང་གི་མཚན་སྒྲ་འགྱུར་དུ་བསྟན་པས་ལེའུ་དང་པོའི་གཞུང་མངོན་པར་རྟོགས་པ་དང་། བརྡའ་འགྱུར་དུ་བསྟན་པས་གཉིས་པའི་ལེའུའི་གཞུང་མངོན་པར་རྟོགས་པར་འགྱུར་བ་དང་། དོན་འགྱུར་གྱིས་ལེའུའི་གཞུང་གསུམ་པ་མངོན་པར་རྟོགས་པའོ། །དེ་ལ་མཚན་སྒྲ་འགྱུར་དུ་བཤད་ན། འདི་ལྟར་རྒྱུད་ཀྱི་འདོད་པ་ཤེས་རབ་ཕྱིན་ཅི་མ་ལོག་པར་རྟོགས་ཏེ། དེ་ཉིད་རྟོགས་པས་རྟགས་བསྟན་པ་དང་། གལ་ཏེ་མ་རྟོགས་ཀྱང་སྔོན་དུ་སྦྱངས་པ་དེ་ཉིད་ཤེས་རབ་ལ་བརྟེན་ནས་ད་ལྟའི་གཟུགས་ཀྱི་ཕུང་པོ་ལ་སྐུ་གསུང་ཐུགས་ཀྱི་རྟགས་ཤར་ཏེ། འོད་དང་རིས་སུ་སྣང་བའི་ཕྱིར་ན་ཤྲི། དེ་ད་ལྟ་སྐྱེས་བུ་རྣམས་ལ་གང་ནས་བྱུང་ན་ལུས་ལས་བྱུང་བས་ན། དེ་རྒྱུ་གང་ལས་བྱུང་ན་སྔོན་དུ་ཆོས་ཉིད་ལ་སྐྱེ་བ་མེད་པར་འདོད་པའི་དོན་དུ་བསྒྲུབས་པ་ལས་བྱུང་བས་ཨ། དེ་ཉིད་སྔོན་དུ་སྐྱེ་བ་མེད་པའི་དོན་མ་རྟོགས་ཏེ་སྐུ་གསུམ་གྱི་ཞེ་འདོད་བྲལ་བས། ད་ལྟའི་ལུས་དང་གནས་སྐབས་ཀྱི་གཞི་ལས་ལོག་པས། ཀ་མ་ནིའོ། །དེ་ཉིད་སྐུ་གསུམ་བདག་དུ་འཛིན་པའི་བློ་ལས་ལོག་ནས་ད་ལྟ་ཡང་གནས་སྐབས་ཀྱི་གཞི་དག་ནས་སྐུ་གསུམ་རང་རྒྱུད་དུ་འཛིན་པ་ལས་གྲོལ་བར་གྱུར་པ་ནི། མ་དྷ་ཀ་ཡ་ཞེས་བྱའོ། །དེ་ཉིད་ད་ལྟ་དེ་ལྟར་རྟོགས་ནས་འབྲས་བུ་སངས་རྒྱས་ནས་སྤྲུལ་པའི་སྐུ་རང་དག་ཆེན་པོའི་དོན་བྱེད་པ་ནི་གྷ་ཞེས་པའོ། །དེའི་ཕྱིར་ན་སྔོན་དུ་སངས་རྒྱས་ཐམས་ཅད་ཀྱི་སྐུ་ལ་སྦྱངས་པའི་གདུང་ལ་སོགས་པ་རྟགས་ལུས་ལ་འབྱུང་ལ། དེ་ཡང་མགོ་ལས་འབྱུང་། སངས་རྒྱས་ཀྱི་གསུང་ལ་འབྱོངས་པས་འགྲིན་པར་པདྨ་ལ་སོགས་པ་ལྔ་འབྱུང་བ་དང་། ཐུགས་ལ་སྦྱངས་པས་ལུས་ཀྱི་སྙིང་ཁར་རྩེ་གསུམ་ལ་སོགས་པའི་རྟགས་ལྔ་འབྱུང་བའི་ཕྱིར་ཛ་ཞེས་སྐུ་གསུང་ཐུགས་མཚོན་པའམ་འཛིན་པའི་ཡི་གེའོ། །དེ་ཡང་ལུས་ལ་སྐུ་གསུང་ཐུགས་ཀྱི་རྟགས་བྱུང་བ་དེ། སྔོན་དུ་ལུས་ཀྱ ི་ལས་གཙོ་བའི་སྦྱངས་པ་ལས་བྱུང་བ་སྟེ། འོག་མའི་ནའོ། །ཡང་སྔོན་ངག་གཙོ་བའི་སྒོ་ནས་བསྒྲུབས་པ་ལ། ད་ལྟ་ངག་ལ་སྐུ་གསུང་ཐུགས་ཀྱི་རྟགས་འབྱུང་བ་ནི། སྐུ་ལ་སྦྱངས་པའི་ཚིག་བཙན་པ་ལ་སོགས་པའི་རྟགས་བཞི་དང་། གསུང་ལ་སྦྱངས་པས་ཚངས་པའི་སྐད་ལ་སོགས་པའི་རྟགས་གསུམ་དང་། ཐུགས་ལ་སྦྱངས་པས་ཕ་རོལ་གྱི་ཚིག་ཅི་སྨྲས་པ་ལ་སོགས་པའི་རྟགས་གཉིས་འབྱུང་བས་ན་ལའོ། །ཡང་སྔོན་དུ་སེམས་གཙོ་བའི་སྒོ་ནས་བསྒྲུབས་པས་ད་ལྟ་ཡིད་ལ་སྨིན་པ་ནི། སྔོན་དུ་སྐུ་ལ་སྦྱངས་པས་མ་བསླབས་བསྒོམ་པ་རང་བབས་ལ་སོགས་པའི་རྟགས་གཉིས་དང་། གསུང་ལ་སྦྱངས་པས་བསམས་པའི་ཆོས་རྣམས་བློར་སྣང་བ་ལ་སོགས་པ་གསུམ་དང་། ཐུགས་ལ་སྦྱངས་པས་རྟག་ཏུ་གཅིག་པུར་འདུག་པ་ལ་སོགས་པའི་རྟགས་གསུམ་སྟེ་བརྒྱད་དང་ལྡན་པས། དེ་ཡང་རྟགས་ཡོད་པས་ཏའོ། །དེ་ཡང་དེ་ལྟ་བུའི་ལུས་འདི་ཡོད་པ་ལ་བརྩོན་འགྲུས་དང་ལྡན་པས་མ་བསྒྲུབས་ན། ལས་ཀྱི་མཐའ་ལོག་པས་ཡིད་འཁྲུག་པ་ལ་སོགས་པ་སྐྱེ་བའི་ལུས་སུ་གྱུར་པས་ནའོ། །དེ་ལྟར་རྟགས་དེ་དག་ཀྱང་རྟགས་ཀྱིས་འཆར་བར་བྱེད་པས་ཏྲ་ཞེས་བྱའོ། །རྟགས་འདི་དག་རྣམས་དང་ལྡན་པའི་སྐྱེས་བུ་འདི་ཉིད་ལ་འབད་པ་གཙོ་ཆེ་བས་བསྒྲུབས་ན་གནས་སྐབས་ཀྱི་གཞི་ལས་ལོག་ནས། ཐོག་མའི་གཞི་ལ་སངས་རྒྱ་བའི་ཕྱིར་ན་མཱ་ཞེས་བྱའོ། །དེས་ཐུགས་རྗེ་འགག་པ་མེད་པས་སེམས་ཅན་གྱི་དོན་བྱེད་པས་མ་རིང་པོར་བྱུང་བའོ། །མཚན་བརྡ་འགྱུར་དུ་བཤད་པ་ནི་རིག་པ་འཛིན་པའི་གང་ཟག་བརྡ་དུ་མ་ལ་བརྟེན་ནས་རྟོགས་པར་བསྟན་པས་ཏེ། བརྡའ་ནི་རང་བཞིན་གྱི་བརྡའ་གྱུར་པ་འདི་ལྟར་གྲགས་པ་སྣང་བས་བསྡུས་པ་ཐམས་ཅད་ཡིན་ཏེ། འདི་ཉིད་ལ་བཏགས་པས་རང་བཞིན་མེད་པའི་དོན་རྟོགས་པ་བརྡའ་རྣམས་བསྡུས་པར་བརྟགས་སོ། །བསྟན་པའི་བརྡའ་ནི་བླ་མའི་མན་ངག་འབོགས་པའི་དུས་ན་ཡིན་ནོ། །འབྱུང་བའི་བརྡའ་ནི་གསང་སྔགས་ཀྱི་དོན་ཟབ་མོ་ཉམས་སུ་བླངས་པས་སྐལ་ལྡན་གྱི་ལུས་ངག་ལ་འབྱུང་བས་ཏེ། དེ་ཡང་སྐལ་ལྡན་འདི་ཉིད་ལ་སྔོན་དུ་ཟག་པ་མི་སྣང་བར་སངས་རྒྱ་བ་རྣམས་ལ། ལུས་བོར་བའི་ཚེ་སྐུ་ནི་ཞི་བའི་སྐུ་དང་ཁྲོ་བོའི་སྐུ་གཉིས་ལས། སྐྱེས་བུ་གཅིག་ལ་ཞི་ཁྲོ་གཉིས་ཀ་བྱུང་ན། བར་མ་དོ་མེད་པར་སངས་རྒྱ་བའི་རྟགས་ཡིན། ཞི་བ་གཅིག་པུར་བྱུང་ན་བར་དོར་ཞག་ལྔ་གནས་པའི་བརྡའ་ཡིན། ཁྲོ་བོ་བྱུང་ན་བར་དོ་ལ་སྐད་ཅིག་མ་ལྔ་ལ་སངས་རྒྱ་བའི་རྟགས་དང་བརྡའ་ཡིན་ནོ། །གདུང་ནི་ལྔ་ལ་ཤ་རི་རམ་ནི་དེ་བཞིན་གཤེགས་པའི་རིགས་ཀྱི་སངས་རྒྱས་སུ་འགྱུར། བ་རི་རམ་རྡོ་རྗེའི་རིགས་སུ་འགྱུར། ཆུ་རི་རམ་རིན་པོ་ཆེའི་རིགས་སུ་འགྱུར། བསེ་རི་རམ་པདྨའི་རིགས་སུ་འགྱུར། ཉ་རི་རམ་ལས་ཀྱི་རིགས་ཀྱི་སངས་རྒྱས་སུ་འགྱུར་ཏེ། འདི་དག་ནི་ལོངས་སྤྱོད་རྫོགས་པའི་རིགས་ཀྱི་སངས་རྒྱས་སུ་འགྱུར་བའི་བརྡའོ། །འབར་བའི་ནི་རིང་བསྲེལ་དང་། འོད་དང་། སྒྲ་དང་། ས་གཡོ་བ་དང་། ནམ་མཁའི་ཆོ་འཕྲུལ་ལ་སོགས་པ་སྟེ། དེ་ཡང་རིང་བསྲེལ་དང་འོད་དང་སྒྲ་ལ་སོགས་པས་ནི་སྐུ་གསུམ་རིགས་ཀྱིས་སོ་སོར་འགྲོ་བའི་བརྡའ་སྟེ། གཞུང་དུ་བརྟག་གོ། །ས་གཡོ་བ་ནི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། རིག་པ་འཛིན་པའི་སར་འགྲོ་བས་ཏེ་གཞུང་ན་ཞིབ་བོ། །ནམ་མཁའི་ཆོ་འཕྲུལ་འདི་དག་རིགས་དྲུག་སྤྱི་མཐུན་གྱི་ལས་ཀྱི་ལེན་ལུགས་ཀྱི་བརྡའ་ཡིན་ནོ། །དོན་འགྱུར་ནི་དཔལ་ཞེས་བརྗོད་པས་ཏེ། སྔོན་དུ་འགྲོ་བའི་དོན་སྤྲོས་པ་ལ་དགའ་ན་འབྱུང་བཞིའི་རྣལ་འབྱོར་ལ་བྱས་པས། དེའི་དོན་རྒྱུད་ལ་སྐྱེས་པ་ལས་འབྱུང་བཞིས་མི་གནོད་པ་ལ་སོགས་པའི་རྟགས་དྲུག་དང་། དེས་རིགས་དྲུག་གི་སྐད་ཤེས་པའི་དོན་ཉིད་ལ་གནས་པའི་རྟགས་སུ་སྐད་ལ་སོགས་པའི་ཡོན་ཏན་དཔག་ཏུ་མེད་པ་ཤེས་པ་དང་། སྤྲོས་པ་ལ་མི་དགའ་བ་རྣམས་ཀྱིས་འཁོར་འདས་རུ་ཤན་འབྱེད་པའི་སྤྱོད་པ་བྱས་པའི་དོན་རང་གི་རྒྱུད་ལ་སྐྱེས་པའི་རྟགས་རྣམས་དང་། ལྟ་སྒོམ་སྤྱོད་པ་རྟོགས་པའི་རྟགས་རྣམས་དང་། འོད་དང་། ཐིག་ལེ་དང་། སྐུ་དང་། དབྱིངས་ལ་གོམས་པའི་རྟགས་རྣམས་དང་། བྱེ་བྲག་ཏུ་སྐུ་གསུམ་ལ་གོམས་པའི་རྟགས་རྣམས་དང་། ཁྱད་པར་དུ་རིག་པའི་དོན་ལ་གོམས་པའི་རྟགས་རྣམས་ནི་མཆོག་ཏུ་རང་བཞིན་གྱི་རྫོགས་པའི་དཔལ་ལོ། །ནམ་མཁའ་མེད་པ་ནི་ཆོས་ཉིད་སྐྱེ་བ་མེད་པ་རྟོགས་པའི་རྟགས་ཉིད་ལས་ཁྱད་པར་དུ་ལུས་ངག་ཡིད་དོན་རྟགས་གཉིས་ལྡན་དང་། གསུམ་ལྡན་ལ་སོགས་པའི་བྱེ་བྲག་གིས་བསྟན་པའོ། །དབང་པོའི་བྱེ་བྲག་དང་རྒྱུད་ཀྱི་མཚན་སྦྱར་བ་ནི། གསུམ་སྟེ། སྒྲ་འགྱུར་དུ་བསྟན་པས་སྒྲ་ཇི་བཞིན་པའི་མན་ངག་ལ་བརྟེན་ནས། དབང་པོ་ཐ་མས་རྒྱུད་ཀྱི་དོན་མཚན་དུ་གོ་བ་དང་། བརྡའ་འགྱུར་དུ་བསྟན་པས་དབང་པོ་འབྲིང་པོས་བརྡའི་དོན་གྱི་མན་ངག་ལ་བརྟེན་ནས་རྒྱུད་ཀྱི་དོན་རྣམས་མཚན་བསྟན་པས་གོ་བ་དང་། དོན་འགྱུར་དུ་བསྟན་པས་དབང་པོ་རབ་ཀྱིས་དོན་མངོན་སུམ་གྱི་མན་ངག་ལ་བརྟེན་ནས་རྒྱུད་ཀྱི་དོན་རྣམས་མཚན་བསྟན་པས་གོ་བའོ། །དེ་ལ་མཚན་སྒྲ་འགྱུར་དུ་བསྟན་པ་ནི། སྒྲའི་སྒྲུབ་བྱེད་དང་དབྱིངས་གཉིས་ལ་བརྟེན་ནས་རང་གི་རྒྱུད་གཅོད་པའི་ཤེས་རབ་ཀྱིས་རང་དོན་མངོན་པར་རྟོགས་པ་དང་། སྒྲའི་གཞན་སེལ་དང་ཕན་པའི་རྐྱེན་ཅན་གཉིས་ལ་བརྟེན་ནས་གཞན་རྒྱུད་གཅོད་པའི་ཤེས་རབ་ཀྱིས་གཞན་དོན་ཕྱིན་ཅི་མ་ལོག་པར་མཁྱེན་པས་ན་ཤྲིའོ། །དེ་ཡང་སྒྱུ་མའི་ལུས་ལ་བརྟེན་ནས་བྱེད་པས་ན། དེ་ལྟར་དོན་གཉིས་བྱེད་ཀྱང་རང་གི་ངོ་བོ་ལ་སྐྱེ་མེད་དུ་གནས་པས་ཨ། སྐྱེ་བ་མེད་པ་ཉིད་སྐུ་མི་འགྱུར་བའི་དོན་དུ་རྟོགས་པས་ཀ །དེ་ལྟར་ཀྱང་གློ་བུར་དུ་བྱས་ཤིང་བཅོས་པ་ལས་བྱུང་བ་མ་ཡིན་ཏེ། ཡེ་ཐོག་མ་ཀ་དག་མ་བཅོས་པའི་གཞི་ལ་བབས་ཀྱིས་གྲུབ་པས་མ། དེ་ལྟ་བུའི་དོན་དེ་ད་ལྟ་རང་གི་ལུས་ལ་རང་བཞིན་ནམ་མཚན་ཉིད་ཇི་ལྟར་གནས་ན་འོད་དུ་ཡོད་པས་ན། འོད་དེ་གནས་སྐབས་ཀྱི་གཞི་ལ་ད་ལྟའི་སྣང་བ་ཡིས་མ་བསླད་པར་གནས་པས་ཡང་མཱ། དེ་ལྟར་གནས་པའི་རིག་པའི་ཡེ་ཤེས་དང་ཟེར་དུ་གནས་པ་དེ་ལ་ཉོན་མོངས་པའི་དྲི་མ་ཡེ་དག་ཏུ་བཞུགས་པས། དག་བྱེད་ཡི་གེའོ། །གོང་དུ་རྟོགས་པའི་སྐུ་གསུམ་གྱི་རང་བཞིན་དུ་ད་ལྟ་ཡང་གནས་པས་སྐུ་གསུམ་མཚོན་པར་བྱེད་པའི་ཡི་གེ་ཀའོ། །དེ་ལྟར་གནས་པའི་གནད་ཀྱིས་སྣང་བ་གསུམ་དུ་གཏན་ལ་ཕེབས་པས་འཁྲུལ་པ་རང་ལོག་པས་སྐུ་གསུམ་རང་སར་ལྡོག་པ་མཚོན་པའི་ཡི་གེ་ཡའོ། །དེ་ལྟར་སྣང་བ་གསུམ་རང་སར་ལོག་པ་དེ་གང་ལས་བྱུང་ན་ད་ལྟའི་སྣང་བ་འདི་ལོངས་སྐུར་གཏན་ལ་ཕེབས་པ་ལས་བྱུང་བས། ལོངས་སྐུ་མཚོན་པའི་ཡི་གེ་གྷ་ཞེས་འཐུག་པོས་སྣང་བ་ལ་དྲི་མ་རང་སར་དག་པ་མཚོན་པའོ། །དེ་ལྟར་ལོངས་སྐུའི་སྣང་བ་རང་དག་པས་སྐུ་གསུམ་དག་པའི་སྣང་བ་གསུམ་མི་གཏོང་བར་འཛིན་ཅིང་དེ་དང་མི་འབྲལ་བར་གནས་པས་འཛིན་པ་མཚོན་པའི་ཡི་གེ་ཛའོ། །དེ་ལྟར་གཟུང་བ་དེ་ལ་སྟོང་པ་ལ་བཟླ་ལྟ་བས་ཐག་གཅད་པའི་ཕྱིར་ན་ལ། དེ་ལྟ་བུའི་དོན་དེ་དུས་གསུམ་མཉམ་པ་ཉིད་དུ་བཞུགས་ཤིང་བརྟགས་པས་ཏ། དེ་ཡང་ཆོས་ཉིད་ཀྱི་བར་དོར་སྣང་བྱེད་འོད་ཀྱི་ལུས་སུ་སྣང་བས་ཀྱང་ན། དེ་ལྟར་དབང་པོ་ཐ་མ་དེས་འདི་ཉིད་ལ་མ་རྟོགས་ན་ཆོས་ཉིད་རྟག་པའི་དོན་སྲིད་པའི་བར་དོ་ཞེས་བྱ་བ་འཆར་བས་ཏྲའོ། །དེ་ལྟར་སྲིད་པའི་བར་དོ་ལ་རིག་བྱེད་འོད་ཀྱི་ལུས་ལ་འཇུག་པས་ཀྱང་ནའོ། །དེ་ལྟར་སྲིད་པའི་བར་དོ་ལས་མར་མངལ་གྱི་གྲོང་ཁྱེར་དུ་མི་འཇུག་པས་ཆོས་ཉིད་ཟབ་མོ་མཐོང་ཞིང་སྤྱད་པའི་ཡོན་ཏན་ལ་བརྟེན་ནས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་ཕྱུང་སྟེ། རྫུས་ནས་སྐྱེས་ནས་དེ་ནས་ཐོག་མའི་གཞི་ཀ་དག་གི་གནས་སུ་བར་དོ་མེད་པར་སངས་རྒྱ་བས་ནའོ། །དེས་སྤྲུལ་པའི་སྐུས་སེམས་ཅན་གཞན་གྱི་དོན་བྱེད་པས་ན་མཱ་རིང་པོར་བྱུང་བའོ། །འདིའི་དུས་ན་གཞན་དོན་རྫོགས་པར་བྱེད་པ་ནི་ཐོག་མའི་དུས་ན་སྒྲ་ཡིས་གཞན་སེལ་དང་ཕན་པའི་རྐྱེན་ཅན་ལ་བརྟེན་ནས་གཞན་གཅོད་ཀྱི་ཤེས་རབ་རྒྱུད་ལ་སྐྱེས་པ་ལས་བྱུང་བའོ། །དེ་ནི་དབང་པོ་ཐ་མས་རྒྱུད་ཀྱི་མཚན་དོན་མངོན་པར་རྟོགས་པའི་མན་ངག་གོ། །ད་ནི་དབང་པོ་འབྲིང་པོ་བརྡའ་འགྱུར་ལ་བརྟེན་ནས་རྟོགས་པ་ནི། དེ་ལྟར་རྒྱ་གར་གྱི་སྐད་རང་སོར་གནས་པ་རང་བཞིན་གྱི་སྒྲའི་བཞུགས་ཚུལ་ལས། ལོ་ཙཱ་བས་བརྡའ་སྐད་ཆོ་འཕྲུལ་གྱི་ཡི་གེར་བསྒྱུར་བས། བོད་སྐད་དུ། ཞེས་བརྡའ་བཏགས་པས་འདི་ནི་འགྱུར་བྱེད་སྣང་བའི་བརྡའ་ཡིན་པས། ཕྱི་རོལ་གྱི་སྣང་བ་ལ་རྟགས་བརྡའ་དོན་གྱི་མན་ངག་དུ་མ་གྱུར་པ་ཡེ་ནས་མེད་པས། སྣང་སྲིད་བརྡར་ཤར་བས་འཁྲུལ་པ་རང་དག་འཁྲུལ་རྐྱེན་རང་དག་པས་མ་རིག་པ་གདར་ཤ་ཆོད། དེ་ཆོད་པས་ཆོས་ལ་བྱན་ཚུད། དེ་ཚུད་པས་དབང་པོ་འབྲིང་པོས་ཆོས་ཉིད་མའི་སྣང་བ་ཆོས་ཉིད་ཀྱི་བར་དོ་ལ་རིག་པ་བུ་དང་འཛོམ་ནས་སངས་རྒྱའོ། །ད་ནི་དོན་འགྱུར་དབང་པོ་རབ་སྣང་བ་འདི་ལ་ཟག་པ་དང་བཅས་པའི་ཕུང་པོ་མི་སྣང་བར་སངས་རྒྱ་བ་ནི། དཔལ་ནི་གཉིས་ཏེ། བདག་ཉིད་ཀྱིས་ཆོས་ཉིད་མངོན་སུམ་གྱི་སྣང་བ་མན་ངག་ལ་བརྟེན་ནས་འདི་ཉིད་བརྩོན་འགྲུས་བཏོན་པས། འཁྲུལ་སྣང་རང་དག་ནས། འདི་ཡི་དུས་ན་རྟོགས་པས་བདག་གྲོལ་བས་བདག་དོན་མཐར་ཕྱིན་པས་བདག་གི་དཔལ་ཡིན་ལ། དེས་འཕོ་བ་ཆེན་པོའི་ལུས་སུ་སླར་བཞེངས་ནས་འགྲོ་བ་སུམ་སྟོང་དུས་གཅིག་ལ་སངས་རྒྱས་ཀྱི་ས་ལ་བཀོད་པས་ཐུགས་རྗེས་གཞན་བསྒྲལ་བས་གཞན་དོན་མཐར་ཕྱིན་པས་ཐུགས་རྗེ་གཞན་གྱི་དཔལ་ལོ། །ནམ་མཁའ་ནི་གཉིས་ཏེ། བཏགས་པ་མིང་གི་ནམ་མཁའ་ནི། ཆོས་ཉིད་ཀྱི་ནམ་མཁའོ། །བཏགས་པ་ནི་ཕྱི་རོལ་གྱི་ནམ་མཁའ་འདི་ཡང་བཏགས་པ་ཡིན་ལ། ཡང་དག་པར་ནི་ནམ་མཁའ་ཡིན་པའི་ངོ་ཏི་མེད་པ་དང་། དེ་བཞིན་དུ་མིང་དུ་བཏགས་པའི་ནམ་མཁའ་རྣམས་ཀྱང་ནམ་མཁའ་ངོ་ཏི་མེད་པ་དང་། དང་པོ་འདོགས་པའི་མཁན་པོ་ངོས་མི་ཟིན་པ་དང་། བར་དུ་ཡོད་པར་ཡིད་མི་ཆེས་པ་དང་། ཐ་མ་ནམ་མཁའ་འགྲོ་བའི་ཐག་མ་ཆོད་པས་མིང་དུ་བཏགས་པའི་ནམ་མཁའ་སྔར་ཡོད་མ་མྱོང་། ད་ཡང་ཡོད་མི་སྲིད། ཕྱིས་ཡོད་པར་མི་འགྱུར་བས་མེད་དོ། །ཆོས་ཉིད་ཀྱི་ནམ་མཁའ་ནི་ཤེས་བྱའི་ཆོས་ཉིད་གྲུབ་མཐའ་དང་ཚིག་གི་སྤྲོས་པ་དང་སོ་སོའི་གནས་ལུགས་ལ། སྔ་མ་ཡོད་མ་མྱོང་། ད་ཡོད་མི་སྲིད་དོ། །ཕྱིས་ཡོད་པར་མི་འགྱུར་བས་མེད་དོ། །རང་ཉམས་སུ་བླངས་བྱའི་ཆོས་ཉིད་འཁྲུལ་པ་རང་འགགས་ཤིང་ཆོས་ཉིད་རང་ཟད་པས། སྔ་མ་འདས་ནས་མེད། ཕྱི་མ་ཟད་ནས་མེད། ད་འཁྲུལ་པ་ལ་མི་གནས་པས་མེད་དོ། །དེ་ལྟར་སྤྱིར་ཤེས་བྱའི་ཆོས་དང་བྱེ་བྲག་ཏུ་ཉམས་སུ་བླང་བྱའི་ཆོས་གཉིས་མེད་པས་ན། གཞན་འདི་ལྟར་སྣང་བའི་ཆོས་ཡོད་ཅེས་ཐོས་ཙམ་གྱི་སྣང་གྲགས་ཀྱི་ཆོས་རྣམས་ཡོད་པར་ག་ལ་སྲིད་པས། སྟོང་པ་ནམ་མཁའ་ཡང་མེད་པས་ན། གཞན་དངོས་པོ་སྣང་བ་རགས་པ་འདི་ཡང་དག་པ་ལ་ཡོད་མི་སྲིད་པས་འཁྲུལ་པ་རང་དག་པའོ། །སྐུ་ནི་སྐུའི་ངོ་བོ་ལུས་ཀྱི་བྱེ་བྲག་ཏུ་བཞུགས་པས། ངེས་ཚིག་ལས་ཀྱི་མཐའ་རྫོགས་པའོ། །དབྱེ་ན་སྣང་བ་གཟུགས་ཀྱི་སྐུ་དང་། བཏགས་པ་མིང་གི་སྐུ་དང་། ལུས་མེད་ལུས་ཀྱི་སྐུའོ། །སྣང་བ་གཟུགས་ཀྱི་སྐུ་ནི་རིས་སུ་བྲིས་པ་དང་། ལུགས་སུ་བླུགས་པ་དང་། འབུར་དུ་བཏོད་པ་རྣམས་དང་། མདོར་ན་འདི་ལྟར་སྣང་བ་ཐམས་ཅད་སྣང་བ་གཟུགས་ཀྱིས་བསྡུས་སོ་ཅོག་གོ། །བཏགས་པ་མིང་ནི་མིང་དུ་བཏགས་པ་ཙམ་ཡིན་ནོ། །ལུས་མེད་ལུས་ཀྱི་སྐུ་ནི། སྐུ་གསུམ་སྟེ། ལུས་མེད་ཅེས་འབྱུང་བ་རྒྱུ་རྐྱེན་གྱི་ལུས་དང་། རིག་བྱེད་འོད་ཀྱི་ལུས་དང་། སྲོག་མེད་སྒྱུ་མའི་ལུས་དང་། སྣང་བ་འོད་ཀྱི་ལུས་དང་། སྡུག་བསྔལ་འདུས་པའི་ལུས་མེད་པ་ནི་ཆོས་ཀྱི་སྐུ་སྟེ། ཆོས་ཡོད་པའི་འདོད་པ་ཙམ་མ་ཟད་པས་སྐུ་ཡིན་ལ། རིག་སྣང་འོད་ཀྱི་ལུས་ཡོད་པ་ནི་ལུས་ཏེ་ཞེས་པ་ལོངས་སྐུ་ལ་འོད་ཀྱི་ལུས་ཡོད་པས་སྐུ་ཡིན་ལ། ལུས་ཀྱི་མཆོག་ནི་འབྱུང་བ་རྒྱུ་རྐྱེན་འདུས་པའི་ལུས་རྣམས་ཀྱི་ནང་ནས་མཆོག་སྤྲུལ་པ་ངེས་མེད་ཀྱི་ལུས་སྤྲུལ་པའི་སྐུ་ཡིན་པས་སྐུ་ཞེས་བྱའོ། །དེའི་ཕྱིར་ན་གསང་སྔགས་འདིའི་ལུགས་ཀྱི་སྐུ་ཞེས་ལུས་ལ་ཞེས་བཅུག་པ་ཡིན་ཏེ། ལུས་ཡོད་ཕན་ཆད་འབྲས་བུ་མི་བཏུབ་པས་སྐུ་གསུམ་པོ་འདི་ནི་གང་ཟག་ལམ་གྱི་སྣང་བ་ཡིན་ནོ། །སྐུར་འཇོག་པའི་འཐད་པ་ནི་ཇི་སྲིད་རང་གི་གྲུབ་མཐའ་ལ་གནས་ཀྱི་རིང་ལ་ཆོས་ཡོད་པས་ཆོས་ཀྱི་སྐུ་སྟེ། ཆོས་ཀྱི་རྣམ་གྲངས་འདུས་པའི་ལུས་ཡིན་པས་སྐུ་ཞེས་བྱའོ། །ཇི་སྲིད་དུ་སྣང་བའི་གཟིགས་སྣང་དུ་མ་ལ་ལོངས་སྤྱོད་ཀྱི་བར་དུ་ལོངས་སྐུ་སྟེ། གདུལ་བྱ་ལ་སོགས་པའི་གཟིགས་སྣང་ཟང་ཐལ་དུ་འདུས་ཤིང་དེ་ལ་སྤྱོད་པས་རིག་བྱེད་འོད་ཀྱི་ལུས་སྟེ། དེ་ལ་ལོངས་སྤྱོད་པས་ལོངས་སྐུ་སྟེ་དེ་ལ་མདུན་དང་རྒྱབ་ཏུ་མེད་པར་ཞལ་ཐལ་ལེ་གཟིགས་པས་ན་སྐུའོ། །སྤྲུལ་པའི་ལུས་ཐ་དད་པར་མི་འདྲ་བར་སྤྲུལ་ནས་སེམས་ཅན་གྱི་དོན་བྱེད་པས་ན་སྤྲུལ་པའི་སྐུ་སྟེ། ངེས་མེད་སོ་སོ་དང་མཐུན་པ་གང་ལ་གང་འདུལ་དུ་སྟོན་པས་ན་སྐུའོ། །སྐུ་གསུམ་གྱིས་མཚམས་ནི། ལམ་པ་ལ་སྦྱར་ན་བློའི་རྣམ་པར་སྤྲུལ་པ་མ་ཟད་ཀྱི་བར་དུ་སྤྲུལ་སྐུ་ལ། སྣང་བའི་བྱེ་བྲག་ཡོད་ཀྱི་བར་རྣམས་ལ་ལོངས་སྤྱོད་རྫོགས་པའི་སྐུ་སྟེ། དོན་གྱིས་འདོད་ཡོན་ལ་སྤྱོད་ཀྱི་བར་རྣམས་སོ། །རྣལ་འབྱོར་པ་རང་གི་གྲུབ་པའི་མཐའ་མ་ཞིག་གི་བར་ལ་ཆོས་ཀྱི་སྐུ་སྟེ། དེ་ཞིག་པའི་དུས་ན་འབྲས་བུ་ཞེས་ཐ་སྙད་དུ་བྱའོ། །དེའི་ཕྱིར་ན་སྐུ་གསུམ་པོ་འདི་ལམ་ཡིན་ནོ། །རྟགས་སྟོན་ཚད་ཕྱིན་གྱི་སྐུ་ནི་ལམ་པ་དེ་འདས་པའི་འོག་ཏུ་རུས་པ་ལས་ཞི་བའི་སྐུ་དང་ཁྲོ་བོའི་སྐུ་རྣམ་པར་རྟགས་བསྟན་པའི་སྐུ་ལ་བྱའོ། །དེ་ཡང་ལུས་ཡིན་ལ་སྐུ་ཡིན་པ་ནི་འབྱུང་བ་རྒྱུ་རྐྱེན་དང་། རིག་བྱེད་ཡིད་དང་། གདོས་པ་སྲོག་མེད་པའོ། །སྐུ་ཡིན་ལ་ལུས་མ་ཡིན་པ་ནི་ཆོས་ཀྱི་ཕུང་པོ་འདུས་པ་སྟེ། ཞལ་ཕྱག་ཏུ་གྲུབ་པ་མེད་པ་ནི་ཆོས་སྐུའོ། །ལྷག་མ་གཉིས་པོ་ནི་སྐུར་མིང་བཏགས་ཀྱང་སྐུ་ཡང་མ་ཡིན་ལ་ཞལ་ཕྱག་ཏུ་ཡོད་ལ། ལུས་མ་ཡིན་ཏེ་བདག་འཛིན་གྱི་ཞེན་པ་དང་རགས་པ་རྫས་སུ་མེད། སྐུ་ཡང་ཡིན་ལ་ལུས་ཀྱང་ཡིན་པ་ནི་སྐྱེ་མཆེད་ཀྱི་ལྷའི་ལུས་ཏེ། ལུས་ཡིན་པས་འཕྲ་བ་འགྱུར་བའི་ཁ་མིག་རྣ་བ་ཡོད། སྐུ་ཡིན་པས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་སྤྱོད་པའོ། །དེ་ནི་འགྱུར་བའི་སྐུ་དང་ལུས་ཡིན་ནོ། །མི་འགྱུར་བ་ཆོས་ཀྱི་སྐུའོ། །འཕྲལ་མི་འགྱུར་ལ་ཕུགས་སུ་འགྱུར་བ་ལོངས་སྐུ། འཕྲལ་འགྱུར་ལ་ཕུགས་མི་འགྱུར་བ་སྤྲུལ་སྐུའོ། །དེ་ནི་སྐུ་གཉིས་ཀྱིས་ལྷུན་གྱིས་གྲུབ་པ་ལས་འབྲས་བུ་ཚུལ་འབྱུང་བའི་གནད་ཀྱིས་སོ། །རྣམ་པར་སྨིན་པ་ལས་བྱུང་བའི་རིག་འཛིན་གྱི་ལུས་དང་། བསོད་ནམས་བསགས་པ་བྱང་ཆུབ་སེམས་དཔའི་ལུས་གཉིས་ནི་ངོ་བོ་མ་བརྗེས་པར་ལུས་འབྱུང་བ་དཔེར་ན་གྲོག་མའི་ལུས་བཞིན་ནམ་སྲོག་ཆགས་ལྕང་མོ་སྦྲང་བུ་ལ་སོགས་པར་ལུས་གཅིག་མ་བོར་བར་གཅིག་ཏུ་བརྗེ་བ་དང་འདྲའོ། །དེ་ལྟར་ལུས་ལས་འདས་པས་སྐུ་ཞེས་བྱའོ། །གདུང་ནི་དེའི་རིགས་སམ་རྒྱུད་དུ་མཚོན་པས་ཏེ། གདུང་གི་ངོ་བོར་འགྱུར་བ་མེད་པར་རིགས་མཚོན་པར་བྱེད་ལ། ངེས་ཚིག་ནི་སངས་རྒྱས་ཀྱི་རིགས་བཞིའི་རིགས་སུ་མཚོན་པར་བྱེད་ལ། དབྱེ་ན་ངེས་པར་ལྟར་སྣང་གི་གདུང་རྒྱལ་རིགས་དང་། བྲམ་ཟེ་དང་། རྗེ་རིགས་དང་། རྨོངས་རིགས་ཞེས་པ་སོ་སོའི་རིགས་ངེས་པ་དང་། མིང་དུ་བཏགས་པའི་གདུང་གང་ལ་མིང་ཡོད་པ་དང་། བྱ་བ་འདེགས་པའི་གདུང་ཕྱམ་འདེགས་པར་བྱེད་པའི་ཤིང་ལ་སོགས་པ་ཡིན་ལ། ཚད་ཕྱིན་རྟགས་ཀྱི་གདུང་ནི། ཤ་རི་རམ་ལ་སོགས་པ་ལྔ་ཡིན་ནོ། །དེ་དག་གིས་གོང་གི་སྐུའམ་ལུས་དེ་དག་གི་རིགས་སམ་རྒྱུད་དུ་འགྱུར་བས་སོ། །འབར་བ་ནི་འཇིག་རྟེན་པའི་འབར་བ་དང་། སངས་རྒྱས་ཀྱི་འབར་བའོ། །འཇིག་རྟེན་པའི་བརྗོད་པའི་ངག་འབར་བ་སྨྲ་བར་བྱེད་པ་དང་། བསྐྱེད་པའི་ཤེས་རབ་འབར་བ་དགའ་བ་དང་མི་དགའ་བའི་ཤེས་པ་རྣམས་ཡིན་ནོ། །ལུས་ཀྱི་རྒྱུ་རྐྱེན་འབར་བ་ཚ་བ་དང་གྲང་བའི་ནད་གྱི་རིགས་རྣམས་དང་། ཕྱི་རོལ་གྱི་ཡུལ་ལ་འབར་བ་ནི། མེ་འབར་བ་ལ་སོགས་ཏེ་མིང་དུ་གྲགས་པ་རྣམས་སོ། །སངས་རྒྱས་ཀྱི་འབར་བ་ནི་སྐུ་འབར་ཏེ་ཁ་དོག་དང་གཟི་བརྗིད་དུ་འབར། གསུང་ཆོས་དང་ཆོས་ཉིད་དུ་འབར། ཐུགས་མཁྱེན་པ་དང་ཡེ་ཤེས་སུ་འབར་བའོ། །དེ་ལྟར་འབར་བས་ལེའུ་གསུམ་གྱི་རྟགས་སྣ་ཚོགས་པར་བྱུང་བའོ། །ཆེན་པོའི་ནི་དབང་པོ་རབ་ཀྱིས་ཟག་པ་དང་བཅས་པ་མི་སྣང་བར་འདི་ཉིད་དུ་སངས་རྒྱ་བས། རྫོགས་པ་ཆེན་པོ་མཐའ་བྲལ་ཡོངས་རྫོགས་ཀྱི་ལྟ་བའི་དོན་ཐུགས་སུ་ཆུད་པ་ལས་བྱུང་བ་སྟེ། དེ་ཡང་འགྱུར་བ་དུས་འཛིན་གྱི་སྣང་བ་དང་སྦྱར་ཏེ་བཤད་ན། དྲན་པའི་མཐའ་ལས་གྲོལ་བས་དྲན་མེད་དུ་གནས། དེ་ཡང་དྲན་པ་བློ་ལ་མེད་དེ་ཡེ་ནས་རང་བྱུང་འོད་གསལ་དུ་ཡོད། དྲན་མེད་རྨུགས་པའམ་གང་དུ་ཡང་མ་ཤེས་པའམ་མ་བཅད་པ་མ་ཡིན་ཏེ། ཤེས་ཤིང་རིག་པར་གནས། དྲན་མེད་ཀྱི་མཐའ་ལས་གྲོལ་ཏེ་སྐྱེ་མེད་དུ་གནས་ཏེ། སྐྱེ་མེད་བློ་ཡིན་པས་སྐྱེ་མེད་ཀྱང་མཐའ་ལས་གྲོལ་ཏེ་བློ་འདས་སུ་གནས། འདས་པ་རྗེས་འགགས་པ་ཡིན་པས་འདས་ཞེས་བྱ་བ་ཙམ་དུ་ཡང་མི་འཛིན་པས་དེ་ལྟར་གློ་བུར་དྲན་པའི་མཐའ་དང་། མ་ཕྱེད་པ་དྲན་མེད་ཀྱི་མཐའ་དང་། སྐྱེ་མེད་བེམ་པོའི་མཐའ་དང་། བློ་འདས་ཚིག་གི་མཐའ་བཞི་ལས་གྲོལ་བས་མཐའ་བྲལ་ཡོངས་རྫོགས་ཆེན་པོའོ། ཆོས་ལམ་སྣང་གི་རྣམ་པ་དང་སྦྱར་ཏེ་བཤད་ན། ལུས་འཛིན་སྐུའི་མཐའ་དང་། མཁྱེན་པ་ཡེ་ཤེས་ཀྱི་མཐའ་དང་། གསལ་བ་འོད་ཀྱི་མཐའ་དང་། མྱོང་བ་རིག་པའི་མཐའ་བཞི་ལས་གྲོལ་ཏེ་ཡོངས་སུ་རྫོགས་པའོ། །ཤེས་བྱ་སྤྱིའི་མཚན་ཉིད་དང་སྦྱར་ཏེ་བཤད་ན། ཡོད་པ་དངོས་པོའི་མཐའ་དང་། མེད་པ་སྟོང་པའི་མཐའ་དང་། སྣང་བ་གཟུགས་ཀྱི་མཐའ་དང་། གྲོལ་བ་ཤེས་པའི་མཐའ་དང་བཞི་ལས་གྲོལ་བས་མ ཐའ་གྲོལ་དེ་ཉིད་དུ་ཡང་མེད་པས་ཡོངས་སུ་རྫོགས་པ་ཆེན་པོའོ། །ཤེས་བྱ་རང་གི་མཚན་ཉིད་དང་སྦྱར་ཏེ་བཤད་ན། འཇུག་པ་ཤེས་རབ་ཀྱི་མཐའ་དང་། ལྟ་སྒོམ་ཡིད་སྤྱོད་ཀྱི་མཐའ་དང་། གོམས་ཚད་ཉམས་མྱོང་གི་མཐའ་དང་། ཐོབ་བྱ་འབྲས་བུའི་མཐའ་བཞི་ལས་གྲོལ་བ་སྟེ་དེ་ཉིད་མ་སྤངས་དེ་ཡོངས་སུ་རྫོགས་པ་ཆེན་པོའོ། ། མཐའ་བཅུ་དྲུག་ལས་གྲོལ་བས་ཆེན་པོ་ཞེས་བྱ་སྟེ། རང་བཞིན་རྫོགས་པ་ཆེན་པོ་ལྟ་བ་མཐར་ཐུག་པས་ན། འདི་ཉིད་ལ་སངས་རྒྱ་བ་ཡིན་པས་ཆེན་པོ་ཞེས་བྱའོ། །རྒྱུད་ནི་ངོ་བོ་དང་། ངེས་ཚིག་དང་། དབྱེ་བ་དང་། དཔེ་དང་། རྒྱུད་ཀྱི་ལྡང་ཚད་དོ། །རྒྱུད་ཀྱི་ངོ་བོ་ནི་ཐབས་དང་ཤེས་རབ་དབྱེར་མི་ཕྱེད་པའོ། །ངེས་ཚིག་ནི་ཚིག་ཏུ་བརྒྱུད་པའི་དོན་ལ་འཛོལ་བ་མེད་ཅིང་མི་འགྱུར་བ་ཡིན་པས་ན་རྒྱུད། ཡང་ན་རྒྱུད་ཀྱི་སྟོན་པ་རྡོ་རྗེ་འཆང་ནས་ད་ལྟའི་རྣལ་འབྱོར་པ་ཡན་ཆད་དུ་རྒྱུད་ཀྱང་མི་ཚིག་གིས་མ་བསླད་པས་རྒྱུད་དོ། །དབྱེ་ན་རང་བཞིན་གྱི་རྒྱུད་དང་། ཐབས་ཀྱི་རྒྱུད་གཉིས། རང་བཞིན་གྱི་རྒྱུད་དངོས་པོའི་བཞུགས་ཚུལ་ཡིན་ཏེ། དེ་ཡང་སྙིང་པོ་རང་བཞིན་གྱི་རྒྱུད་སངས་རྒྱས་སེམས་ཅན་ཐམས་ཅད་ལ་རིག་པའི་ཡེ་ཤེས་ཀྱིས་ཁྱབ་པ་ཉིད་ཡིན་ལ། བཅུད་རང་བཞིན་གྱི་རྒྱུད་ནི་ཚིག་ལ་མ་བརྟེན་པའི་རྒྱུད་ཀྱི་དགོངས་པ་རྒྱུད་ལ་སྐྱེས་པ་ཡིན་ནོ། །ཐབས་ནི་གོང་མའི་དོན་མཚོན་པར་བྱེད་པ་སྟེ། མཚོན་བྱ་ཐབས་ཀྱི་རྒྱུད་སྐལ་ལྡན་གྱི་རིག་པ། མཚོན་བྱེད་ཐབས་ཀྱི་རྒྱུད་གོང་མའི་དོན་མཚོན་པར་བྱེད་པ་སྐུ་གདུང་འབར་བའི་རྒྱུད་ཚིག་དང་ཡི་གེར་བཀོད་པ་འདིས་མཚོན་ནས། ཡིད་ཆེས་པའི་རྟགས་ལ་བརྟེན་ནས། གང་ཟག་བརྩོན་འགྲུས་རབ་དོན་འགྱུར་ལ་བརྟེན་ནས་འདི་ཉིད་ལ་ཟག་བཅས་མི་སྣང་བར་སངས་རྒྱ་བ་དང་། འབྲིང་མཚན་བརྡའ་འགྱུར་ལ་བརྟེན་ནས་བར་དོར་སངས་རྒྱ་བ་དང་། ཐ་མ་མཚན་སྒྲ་འགྱུར་དུ་བཤད་པ་ལ་བརྟེན་ནས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་ཕྱུང་ནས་སངས་རྒྱ་བའོ། །རྒྱུད་ཀྱི་དཔེ་ནི་ཐགས་དང་འདྲ་སྟེ། རྒྱུ་དང་། སྤུན་དང་། སྐད་དང་སྐྱེས་བུའི་རྩོལ་བ་དང་བཞི་རྫོགས་པ་ལས་རས་ཡུག་ཏུ་ལོངས་པ་དང་འདྲ་བར། རྒྱུད་རང་གི་ཚིག་དང་། དེའི་དགོངས་པ་ཕྱིན་ཅི་མ་ལོག་པ་དང་། དེ་ཉིད་བླ་མའི་མན་ངག་གིས་ཟིན་པ་དང་། རང་གི་བརྩོན་འགྲུས་དང་བཞི་འཛོམས་པས་སངས་རྒྱའོ། །རྒྱུད་ཀྱི་ལྡང་ཚད་ནི། གོང་གི་མཚོན་བྱེད་ཐབས་ཀྱི་རྒྱུད་ལ་གཉིས་ཡིན་ཏེ། བསྐྱེད་པའི་རིམ་པ་གཙོ་བོར་བསྟན་པའི་རྒྱུད་དང་། རྫོགས་པའི་རིམ་པ་གཙོ་བོར་བསྟན་པ་གཉིས་ལས། བསྐྱེད་པའི་རིམ་པ་གཙོ་བོར་སྟོན་པ་ལ། དང་པོ་དབང་བཞི་ཡིན། དམ་ཚིག་གྲོགས་ཡིན་ཏེ་གཉིས། སྔགས་བསྒྲུབ་བྱ་ཡིན། ལྷ་འབྲས་བུ་ཡིན་ཏེ་གཉིས། དཀྱིལ་འཁོར་ཡུལ་ཡིན། བསྙེན་སྒྲུབ་ལམ་ཡིན་ཏེ་གཉིས། སྤྱོད་པ་འཇུག་སྒོ་ཡིན། ལྟ་བ་དགོངས་པའི་ཕུགས་ཡིན་ཏེ་ག ཉིས། ཕྲིན་ལས་ཡོན་ཏན་ཡིན། དངོས་གྲུབ་ཐོབ་བྱ་ཡིན་ཏེ་གཉིས། དེ་ལྟར་བཅུ་གཉིས་འཛོམས་པའི་བ སྐྱེད་པའི་རིམ་པ་གཙོར་བསྟན་པའི་རྒྱུད་ཀྱི་ལྡང་ཚད་དེ་ཚོ་དང་མི་ལྡན་ན་རྒྱུད་མ་ཡིན་ནོ། །རྫོགས་པའི་རིམ་པ་གཙོར་བསྟན་པའི་རྒྱུད་ཀྱི་ལྡང་ཚད་ནི། མན་ངག་གཞི་ཡིན། སྤྱོད་པ་ཐབས་ཡིན་ཏེ་གཉིས། བསྒོམ་པ་ལམ་ཡིན། ལྟ་བ་ཁོག་ཕུབ་ཡིན་ཏེ་གཉིས། ཉམས་ལེན་རྟེན་ཡིན། ཤེས་རབ་རྟགས་ཡིན་ཏེ་གཉིས། བར་དོ་བརྟེན་ཡིན། འབྲས་བུ་ཐོབ་བྱ་ཡིན་ཏེ་བརྒྱད་དང་ལྡན་པ་རྣམས་ནི་རྫོགས་པའི་རྒྱུད་དོ། །འདི་རྣམས་དང་མི་ལྡན་ན་རྒྱུད་མ་ཡིན་ནོ། །དེ་གཉིས་ལ་ཐུན་མོང་དུ་ཚིག་ལ་འདབ་བྱུང་ན་རྒྱུད་མ་ཡིན་ནོ། །ཚིག་བཅད་ལ་འདྲེས་བྱུང་བ་དང་། གཞན་གྱི་ཁུངས་ཕྱུངས་པ་དང་། གཞན་དུ་ཁ་འཕངས་པ་བྱུང་ན་མི་ཚིག་གིས་བསླད་པ་ཡིན་ནོ། །གལ་ཏེ་དེ་དག་དང་མི་ལྡན་པའི་རྒྱུད་ཅིག་བྱུང་ན། དེ་ལ་རྒྱུད་ཕྱི་མ་མ་ཚང་བ་ཁ་སྐོང་བའི་རྒྱུད་དམ། བཤད་པའི་རྒྱུད་ཅིག་ངེས་པར་དགོས་སོ། །དེ་མ་བྱུང་ན་ཡིད་ཆེས་མེད་དོ། །ཞེས་བྱ་བ་ནི་དེ་ལྟ་བུའི་རྒྱུད་ཅིག་བཤད་པར་བྱའོ་ཞེས་རྒྱུད་ཀྱི་མཚན་བསྟན་པའོ། །ད་ནི་རྒྱུད་ཀྱི་གཞུང་སྟོན་ཏེ། གཞུང་ལ་༡སྤྱིར་ལེའུ་གསུམ་དུ་བསྟན་པ་ལས་བྱེ་བྲག་ཏུ་ལེའུ་དང་པོའི་ཚིག་དོན་བཤད་པ། ལེའུ་༢དང་པོ་ལ་རྒྱུད་ཀྱི་གཞུང་རྫོགས་པར་བསྟན་པའི་ཕྱིར། སྔོན་དུ་ཕྱག་བཙལ་པ་བསྟན་པ་དང་། ལེའུའི་གཞུང་དངོས་བསྟན་པ་གཉིས་ལས། ཕྱག་འཚལ་བ་བསྟན་པ་ནི། རང་དོན་རྟོགས་པའི་སྒོ་ནས་ཕྱག་འཚལ་བ་དང་། གཞན་དོན་འཇུག་པའི་སྒོ་ནས་ཕྱག་འཚལ་བ་གཉིས། རང་དོན་ལ་གསུམ། རྟེན་གྱི་གང་ཟག་རབ་གཅིག་འདི་ལ་ཟག་བཅས་མི་སྣང་བར་སངས་རྒྱ་བ་ནི། སྔོན་དུ་འཁོར་འདས་རུ་ཤན་འབྱེད་པའི་སྤྱོད་པ་བྱས་པས་ལུས་ངག་ཡིད་ཀྱི་མངོན་ཞེན་གྱི་རྣམ་རྟོག་བཅོམ་པས་ན་བཅོམ། དེ་ལྟར་བྱས་ནས་དེ་ནས་ལུས་ངག་རྣལ་དུ་འབེབས་པའི་ཆོ་ག་བྱས་པས། ལུས་ངག་ཡིད་སྐུ་གསུམ་དང་ལྡན་པས་ན་ལྡན། དེ་ལྟར་བྱས་པའི་རྟེན་གྱི་གང་ཟག་དེ་འཁོར་བའི་ཞེན་པ་ལས་འདས་པས་འདས་ཞེས་བྱའོ། །དེ་ནས་མངོན་གསུམ་གནད་ཀྱི་སྣང་བ་གཟིར་ནས་རིག་པ་ཚད་ལ་ཕེབས་པས་ཕྱི་ནང་གི་འབྱུང་བ། ས་དང་ཆུ་དང་མེ་དང་རླུང་རྣམས་མི་སྣང་པར་འཁྲུལ་པ་འགགས་ནས་རང་སར་དག་པས་མཐའ་གྲོལ་ཡོངས་རྫོགས་ཆེན་པོའི་ལྟ་བ་མཐར་ཕྱིན་པ་ཉིད་ལ་ཕྱག་འཚལ་ལོ་ཞེས་བྱའོ། །བརྩོན་འགྲུས་འབྲིང་པོ་གཅིག་གིས་རིག་པ་མངོན་སུམ་གྱི་མན་ངག་ཞུས་ནས། སྔོན་འགྲོ་དངོས་གཞི་ཐང་གཅད་ནས་ནི་ཉམས་སུ་བླང་དུ་མ་བྱུང་། སྐབས་སུ་ཉམས་སུ་བླངས་པས་ཐ་མལ་པའི་ལུས་ངག་བཅོམ་པས་བཅོམ་ཞེས་བྱ། མངོན་གསུམ་རང་སྣང་མཐོང་བའི་བྱིན་རླབས་དང་ལྡན། ཡིད་དཔྱོད་བློ་ལས་འདས་ཏེ། འདི་ཉིད་ལ་སྣང་བ་རང་ཟད་དུ་མ་སོང་བས། དེ་ཚེའི་དུས་བྱེད་པའི་ཚེ་རང་གི་ལུས་ཀྱི་འབྱུང་བ་རྣམས་ས་ས་ལ་ཐིམ་པས་ལུས་ལྕི་བར་འགྱུར། ཆུ་ཆུ་ལ་ཐིམ་པས་ཁ་སྣ་ནས་ཆུ་འོར་གཅིག་འབྱུང་དེ་ནས་སྐམས། མེ་མེ་ལ་ཐིམ་པས་རྐང་མཐིལ་དང་ལག་མཐིལ་ནས་དྲོད་འཆོར། རླུང་རྣམ་པར་ཤེས་པ་ལ་ཐིམ་པས་དབུགས་མི་བདེ། རྣམ་ཤེས་ནམ་མཁའ་ལ་ཐིམ་པས་ཤེས་པ་མི་གསལ་བར་ཐིབ་ཐིབ་ཉོག་ཉོག་ཏུ་འགྱུར་རོ། །ནམ་མཁའ་འོད་གསལ་ལ་ཐིམ་པའི་ཚེ་ལུས་སེམས་བྲལ་ནས་ལུས་འབྱུང་བ་དེ་རྣམས་ཀྱི་ངང་དུ་རིམ་གྱིས་ཐིམ་ནས། ལུས་ལ་གནས་པའི་རིག་པའི་ཡེ་ཤེས་དེ་ཆོས་ཉིད་མའི་སྣང་བ་ལ་ཐིམ་པའི་ཚེ། འོད་གསལ་ཟུང་འཇུག་ལ་ཐིམ་པ་ཞེས་བྱ་སྟེ། རིག་པ་བུའི་སྣང་བ་ལ་ཉོན་མོངས་པའི་དྲི་མ་རང་དག་ནས་མ་བུ་འཕྲད་པའི་དུས་དེར། འདིའི་དུས་ན་དྲི་མ་རྣམས་ནི་འགྱུར་བ་ཕྲ་རགས་ལུས་ཀྱིས་སྒྲིབ་པའི་དྲི་མ་ཡང་དག །ཉོན་མོངས་པ་བག་ལ་ཉལ་དང་མངོན་དུ་རྒྱུ་བའི་དྲི་མ་ཡང་དག །སྒོ་ལྔ་རང་རྒྱུད་དུ་འཛིན་པའི་ཞེན་པ་མེད་པས་གློ་བུར་ཡུལ་རྐྱེན་གྱི་དྲི་མ་ཡང་དག་ནས། མི་བརྗེད་པའི་གཟུངས་དང་། མངོན་པར་ཤེས་པ་དྲུག་ཐོབ་ནས་ལོངས་སྐུའི་ཞིང་ཁམས་ལ་ལོངས་སྤྱོད་ནས། དེ་དག་ཀྱང་རང་སར་དག་ནས། ཟུང་འཇུག་གཉིས་མེད་ལ་ཐིམ་པ་ཞེས་བྱ་སྟེ་ལྷུན་གྲུབ་རིན་པོ་ཆེའི་གཞི་ལ་ངེས་པ་རྙེད་ནས་ཆོས་ཉིད་ཀ་དག་ཆེན་པོ་ལས་རང་གིས་རང་གྲོལ་བ་ཉིད་ལ་ཉིད་ཕྱག་འཚལ་ལོ་ཞེས་བྱའོ། །ཡང་བརྩོན་འགྲུས་ཐ་མ་རང་བཞིན་རྫོགས་པ་ཆེན་པོ་འདིས་མངོན་སུམ་གྱི་ལམ་གྱི་སྒོ་ནི་མཐོང་། འཇིག་རྟེན་རྒྱབ་ཏུ་བོར་ནས་བསྒྲུབ་པར་མ་ནུས་ཏེ། ཟབ་མོའི་དོན་འདི་མཐོང་བ་དང་བཅས་པ་ཙམ་གྱིས། ཉོན་མོངས་པ་རང་རྒྱུད་དུ་འཛིན་པ་བཅོམ་སྟེ། རང་བཞིན་མེད་པ་ཙམ་དུ་ཤེས། ཐུན་མོང་གི་ཡོན་ཏན་དང་ལྡན། དེ་ནས་ལུས་ཀྱི་འབྱུང་བའི་དྲ་བ་ཟད་ནས་ལུས་བོར་བས་སྣང་བ་འདི་ལས་འདས། དེ་ནས་ཆོས་ཉིད་ཀྱི་བར་མ་དོ་ལ་འབྱུང་བ་ཕྲ་རགས་ཀྱི་དྲི་མ་རྣམས་རང་སར་དག་པས། རང་བཞིན་འོད་གསལ་གྱི་ལུས་ལ་གནས། ལོངས་སྤྱོད་རྫོགས་པའི་སྐུའི་ཞལ་མཐོང་ཡང་། འདི་ཉིད་རང་སྣང་དུ་མ་ཤེས་པས། ལྷུན་གྲུབ་ཆེན་པོའི་སྣང་བ་ལ་ལམ་དོན་ནས། སྲིད་པའི་བར་དོ་ལ་ཚུད་པའི་ཚེ། རང་གི་ཤེས་རབ་ཀྱི་དྲན་པ་རྙེད་ནས་རང་བཞིན་སྤྲུལ་པ་སྐུའི་ཞིང་ཁམས་སུ་བརྫུས་ཏེ་སྐྱེས་ཤིང་དེར་དབུགས་ཕྱུང་ནས་བར་དོ་མེད་པར་སངས་རྒྱས་པ་དེ་ཉིད་ལ་ཕྱག་འཚལ་ལོ་ཞེས་པའོ། །གཞན་དོན་དུ་འཇུག་པའི་སྒོ་ནས་ཕྱག་བཙལ་བ་བསྟན་པ་ནི། སྔོན་འབྱུང་དུ་རྒྱུད་ཀྱི་སྟོན་པ་རྡོ་རྗེ་འཆང་ཆེན་པོ་དེ་ལ་གཟུགས་ཀྱི་ཕུང་པོ་གདོས་པ་རང་རྒྱུད་པ་མེད་པ་དང་། ཚོར་བ་བདེ་སྡུག་ལ་ཞེན་འཛིན་མེད་པ་དང་། རྣམ་ཤེས་ཡུལ་དུ་མ་གཅོད་པ་མེད་པ་དང་། འདུ་ཤེས་སེམས་དཔའ་དང་བཅས་ཤིང་ཡུལ་གཞན་ལ་རྟོག་པ་མེད་པ་དང་། འདུ་བྱེད་ཉོན་མོངས་པའི་གློ་བུར་བ་མེད་པས་ཕུང་པོ་ལྔ་བདག་ཏུ་འཛིན་པའི་བདུད་བཅོམ་སྟེ། ཟག་མེད་ཟང་ཐལ་དུ་བཞུགས་པས། གཏི་མུག་དྲན་མེད་དུ་གནས་པ་མེད་པ་དང་། ཞེ་སྡང་རགས་པ་མངོན་དུ་རྒྱུ་བ་མེད་པ་དང་། འདོད་ཆགས་ཀྱི་ཡུལ་བདག་དང་བདག་ཏུ་ཞེན་པ་མེད་པ་དང་། ཕྲག་དོག་ཡུལ་ལ་སློང་བ་མེད་པ་དང་། ང་རྒྱལ་ཁེངས་པའི་སྣོམ་པ་མེད་པས། ཉོན་མོངས་པའི་བདུད་བཅོམ་སྟེ། ཡེ་ནས་གཉེན་པོ་གཞན་ལ་རག་མ་ལུས་པར་བཞུགས་པའོ། །དེ་ཉིད་སྔར་སྐྱེ་མ་མྱོང་པས་ད་འཆི་མི་སྲིད་པས་འཆི་བདག་གི་བདུད་བཅོམ་སྟེ། སྐྱེ་མེད་རང་གི་ངོ་བོར་བཞུགས་སོ། །དེ་ཉིད་ལ་སྣང་བས་བསླུ་ཞིང་འབྲིད་དུ་མི་ཚུགས་ཏེ། རང་སྣང་རང་གྲོལ་དུ་མཁྱེན། ཉོན་མོངས་པས་བསླུ་ཞིང་འབྲིད་དུ་མི་ཚུགས་ཏེ་རང་དག་རང་གྲོལ་དུ་མཁྱེན་པས་ལྷའི་བུའི་བདུད་བཅོམ་སྟེ། ཞེན་པའི་མཐའ་ཐམས་ཅད་ལས་གྲོལ་བར་བཞུགས་པས་ན་བདུད་བཞི་རང་གིས་རང་བཞིན་གྱིས་བཅོམ་པའོ། །དེ་ལྟར་སྟོན་པའི་སྐུའི་གཟི་བྱིན་གྱིས་བདུད་བཞི་བཅོམ་པས། ཉིད་ཀྱི་སྐུ་ལས་འབྱུང་བ་ཕྲ་རགས་ཀྱི་དྲི་མ་རྣམས་འབྱུང་བ་སོ་སོ་ཉིད་ཀྱི་རང་སར་དག་པས། བདུད་བཞི་ལས་རྒྱལ་བ། ཆེན་པོ་ཉིད་ཀྱི་སྐུ་ལ་རྗེས་འཇུག་རྒྱུད་འདི་ལ་མོས་པ་རྣམས་ཀྱིས་ལུས་ངག་གུས་པ་དང་བཅས་པས་ཕྱག་འཚལ་ལོ་ཞེས་འཚལ་བས། མོས་པས་སྤྱོད་པའི་སྐལ་ལྡན་གྱི་ལུས་ཀྱི་སྒྲིབ་པ་རྣམས་དག་ནས་ལུས་ལ་རྟགས་རྫོགས་པའི་དགོས་པ་ཡོད་དོ། །ཡང་མངོན་འབྱུང་དུ་རྒྱུད་ཀྱི་སྟོན་པའི་ལྗགས་ཀྱི་དབང་པོ་ལ་རང་བྱུང་རྩ་གནས་ཀྱི་ཡི་གེ་དྲུག་རང་གིས་རང་འཕྲོས་པའི་ཕྱིར། དབང་ཕྱུག་དང་ལྡན་པས་བདུད་ཀྱི་སྟོབས་ཕམ་པར་མཛད་པ་དང་། གྲགས་པ་དང་ལྡན་པས་འཇིག་རྟེན་གྱི་སྒྲོ་བསྐུར་མེད་པ་དང་། དཔལ་དང་ལྡན་པས་རང་གཞན་གྱི་དོན་ཕུན་སུམ་ཚོགས་པ་དང་། གཟུགས་དང་ལྡན་པས་འགྲོ་བ་གཞན་རྣམས་ཀྱིས་བསྐུར་བའི་གནས་སུ་བྱེད་པ་དང་། བརྩོན་འགྲུས་དང་ལྡན་པས་གཞན་དོན་མཐར་ཕྱིན་པར་བྱེད་པ་དང་། ཡེ་ཤེས་དང་ལྡན་པས་མཁྱེན་པ་གང་ལ་ཡང་འགགས་པ་མེད་པ་ནི་ཕྱི་རོལ་གྱི་ལྡན་པ་དྲུག་ཡིན་ལ། ནང་དུ་ངོ་བོ་ཀ་ནས་དག་པའི་ཡེ་ཤེས་དང་ལྡན་པས་ཉེས་སྐྱོན་གང་གིས་ཀྱང་འགྲིབ་པ་མེད་པ་དང་། རང་བྱུང་ལྷུན་གྲུབ་ཀྱི་ཡེ་ཤེས་དང་ལྡན་པས་གདུལ་བྱའི་རིགས་མི་འདྲ་བ་ཐ་དད་པ་ལ་འདུལ་བྱེད་ཀྱི་སྐུ་ཐ་དད་པར་སྤྲུལ་ནས་གཞན་དོན་ཐོགས་པ་མེད་པར་མཛད་པ་དང་། ཐུགས་རྗེ་ཀུན་ཁྱབ་ཀྱི་ཡེ་ཤེས་དང་ལྡན་པས་ཉིད་གསུང་མདོ་སྡེ་འདུལ་བ་མངོན་པར་སྤྲུལ་ནས། འགྲོ་བ་རིགས་དྲུག་ལ་ཐུབ་པ་དྲུག་གི་གཟུགས་སུ་སྣང་བས་རིགས་དྲུག་གི་འཁོར་བ་རྒྱུན་ཆད་པར་མཛད་པ་དང་། མཚན་ཉིད་འཛིན་པའི་ཡེ་ཤེས་ལྔ་དང་ལྡན་པས། གདུལ་བྱ་རྣམས་ཀྱི་བསམ་པ་ཕྱིན་ཅི་མ་ལོག་པར་མཁྱེན་པ་དང་། རང་བཞིན་རྒྱུན་ཆད་མེད་པའི་དགོངས་པ་དང་ལྡན་པས། རྣམ་པར་རྟོག་པ་གང་གིས་ཀྱང་བསྐྱོད་པར་མི་ནུས་པ་དང་། གསང་སྔགས་ཀྱི་ཆོས་ཉིད་ཟབ་མོ་རྒྱུན་དུ་སྒྲོགས་པས་མཐའ་གྲོལ་ཡོངས་རྫོགས་དང་ལྡན་པས་མཐའ་བཅུ་དྲུག་ལས་གྲོལ་བ་ཉིད། ཡེ་ཉིད་ནས་བཞུགས་ཤིང་གཞན་ལ་སྒྲོགས་པ་དང་ལྡན་པ་ནི་ཉིད་ཀྱི་གསུང་གི་རང་བཞིན་གྱི་ཡོན་ཏན་ཏེ། གསུང་འགག་མེད་ཕྱོགས་བཅུར་གསལ་བ་ཉིད་ལ་འབྱུང་བའི་སྣང་རྐྱེན་ཤ་ཁྲག་བདག་ཏུ་འཛིན་པའི་དྲི་མ་རྣམས་རང་གི་ལུས་ཀྱི་རང་སར་དག་པས། གསུང་རང་བྱུང་གི་ཡི་གེ་དྲུག་གིས་ཆོས་ཀྱི་འཁོར་ལོ་ཆེན་པོ་བར་མཚམས་མེད་པར་བསྐོར་བ་ཉིད་ཀྱིས་གསུང་མོས་པ་སྤྱོད་པའི་ངག་གུས་པ་དང་བཅས་པས་ཕྱག་འཚལ་ལོ། །ཞེས་བཙལ་བས། ངག་གི་སྒྲིབ་པ་རྣམ་པར་དག་ནས་ངག་ལ་རྟགས་འཆར་བའི་དགོས་པ་ཡོད་དོ། །ཡང་སྟོན་པ་ཉིད་ཀྱི་ཐུགས་ལ་བདག་འཛིན་ཞེན་པ་མི་གནས་པས་འཁོར་བའི་སྐྱོན་ཡོན་གྱི་མཐའ་ཐམས་ཅད་ལས་འདས་ཏེ། ཐུགས་རྣམ་པར་མི་རྟོག་པའི་ཡེ་ཤེས་ཆེན་པོ་ཉིད་དུ་བཞུགས་པས། རྟོག་པ་ལས་བྱུང་བའི་དྲན་པ་དང་བསམ་པ་དང་། སེམས་དང་། ཡིད་དང་། འགྱུ་བ་རྣམས་རང་གི་ངོ་བོ་ལ་མི་གནས་ཤིང་། ཆོས་ཉིད་ཀ་ནས་དག་པའི་སར་རང་གྲོལ་བས་གཞི་གནས་ཆེན་པོའི་དགོངས་པ་ལ་གནས་པའི་སྟོན་པའི་ཐུགས་ལ། མོས་པ་སྤྱོད་པའི་སྐལ་ལྡན་གྱིས་ཡིད་གདུང་བས་ཕྱག་འཚལ་ལོ་ཞེས་བཙལ་བས། ཡིད་ཀྱི་སྒྲིབ་པ་རྣམ་པར་དག་ནས་ཡིད་ལ་རྟགས་འཆར་བའི་དགོས་པ་ཡོད་པའི་དོན་དུ་ཕྱག་འཚལ་བའོ། །འདི་ལ་བཤད་ཡམས་གསུམ་ཡོད་དོ། །ལེའུ་འདི་དང་མ་འབྲེལ་བ་ནི་མེད་དོ། །དེ་ཕྱག་བཙལ་བ་བསྟན་ནས། ད་ནི་རྒྱུད་ཀྱི་གཞུང་ངེས་པར་སྟན་ཏེ། དེ་ལ་རྒྱུད་འབྱུང་བའི་ཡན་ལག་རྒྱུ་གླེང་གཞི་སྤྱིར་བསྟན་པ་དང་། བྱེ་བྲག་ཏུ་ལེའུའི་གཞུང་བསྟན་པ་ལ། ལེའུ་ནི་དང་པོའི་གཞུང་ངོ་། །དེ་ལ་གླེང་གཞི་ནི་རྒྱུད་སྤྱིའི་ལེའུ་གསུམ་ཀའི་ཆ་རྐྱེན་དང་ཡན་ལག་ཡིན་གྱིས་འདི་གཅིག་པུའི་གླེང་གཞི་ནི་མ་ཡིན་ཏེ། གླེང་གཞི་ལ་གཉིས་ལས། དང་པོ་ཐུན་མོང་མ་ཡིན་པའི་གླེང་གཞི་རྒྱུད་འདི་གཞན་ལས་ཟབ་པའི་མཚན་ཉིད་བསྟན་པ་ནི། སྔོན་བྱུང་དུ་སྟོན་པ་ཉིད་ཀྱིས་རང་གི་རྣམ་སྤྲུལ་གྱིས་གསུངས་པའམ། རྗེས་འཇུག་ཏུ་རང་གི་འཁོར་གྱི་རྟོག་པ་གཅད་པའི་དོན་དུ་འདི་སྐད་བདག་གིས་བསྟན་པའི་དུས་ཅིག་ན། ཞེས་སྟོན་པ་ཉིད་ཀྱིས་འཁོར་གྱི་ནང་དུ་བཀའ་སྩལ་པ་ནི། རྒྱུད་འདི་སྔོན་བྱུང་དུ་ཡང་སངས་རྒྱས་གཞན་གྱིས་བསྟན་པ་མེད། བདག་གིས་བསྟན་པ་ལས། ད་ལྟ་ཡང་བདག་མ་ཡིན་པ་གཞན་མི་གསུང་། ཕྱིས་ཀྱང་བདག་མ་ཡིན་གཞན་མི་གསུང་། ཞེས་པའི་ཐའ་ཚིག་སྟེ། རྒྱུད་འདི་རབ་ཏུ་ཟབ་ཅིང་སྟོན་པ་ཉིད་ཀྱིས་ཆེ་བ་བསྟན་པའི་ཕྱིར་བྱུང་ལ། རྣམ་པར་གཅིག་ཏུ་རྒྱུད་འདིར་བདག་གིས་བསྟན་པ་ལས་གཞན་དུ་བསྟན་པ་མེད་པས་འབྱུང་དཀའ་བར་སྟོན་པའོ། །དེ་ཡང་གནས་འདིར་ངས་བསྟན་པ་ལས་གཞན་དུ་བསྟན་པ་མེད་པ་དང་། དེ་ཡང་གནས་འདི་ཉིད་དུ་ངས་འཁོར་འདུས་པ་རྣམས་ལ་ལྷ་ཚངས་པའི་སྐད་ཀྱིས་བསྟན་པར་བྱའོ་ཞེས་གསུངས་པ་ཡིན། དེ་ཡང་ལྷ་ཚངས་པས་སྟོན་པ་མ་ཡིན་ཏེ། སྟོན་པ་བདག་རང་གིས་བཤད་པར་བྱའོ་ཞེས་པའོ། །གང་བཤད་ན་བསྟན་པ་ཐུན་མོང་མ་ཡིན་པ་སྐུ་གདུང་འབར་བའི་རྒྱུད་འདི་བཤད་པར་བྱའོ་ཞེས་གསུངས་སོ། །རྒྱུད་འདི་སྔ་མའམ་ཕྱིས་བསྟན་པ་མེད་པར་དུས་ད་ལྟ་ཉིད་དུ་འཁོར་མཁའ་འགྲོ་མ་ལ་སོགས་པ་ལ་བསྟན་པར་བྱའོ་ཞེས་གསུངས། དེ་ཡང་དང་པོ་མགོ་སྨོས་ནས་བར་ཆད་པ་མེད་པར་སྟན་གཅིག་གི་སྟེང་ནས་རྒྱུད་འདི་རྫོགས་པར་ཁྱེད་རྣམས་ལ་བསྟན་པར་བྱའོ་ཞེས་གསུངས་སོ། །འཁོར་དེ་དག་གི་ནང་ནས་རྡོ་རྗེའི་རིགས་ཀྱི་མཁའ་འགྲོ་མ་གསལ་བའི་ཡིད་ཅན་མ་ཞེས་བྱ་བ་ལངས་ཏེ་ཐལ་མོ་སྦྱར་ནས་སྟོན་པ་ལ་ཞུས་པས། སྟོན་པ་ཉིད་དེ་ལྟར་གནས་དང་སྟོན་པ་དང་། སྟོན་པ་འཁོར་དང་དུས་དེ་ཀུན་ད་ལྟའི་འདི་ཉིད་ལགས་སམ་འོན་ཏེ་སྟོན་པས་སྔོན་འབྱུང་དུ་གསུངས་པ་གཞན་ཞིག་ལགས་ཞེས། ཡིད་ཀྱི་རྟོག་པ་སྐྱེས་པས། སྟོན་པས་མཁྱེན་ཏེ་སྡུད་པ་པོའི་རྟོག་པ་གཅད་པའི་དོན་དུ། གནས་ནི་སྔོན་འབྱུང་དུ་ངས་བསྟན་པའི་གནས་ཀྱང་ཡོད་དེ། ད་རེས་ཁྱེད་རྣམས་འདུལ་བར་བྱེད་པའི་གནས་འདི་ཉིད་རང་ཡིན་ནོ། །ཞེས་ཐུགས་ཀྱིས་མཁྱེན་པ་ལ་སྟོན་པས། སྡུད་པ་པོས་སེམས་ཀྱི་རྟོག་པ་ཆོད་ནས། འོ་ན་སྔོན་འབྱུང་དུ་མ་ཡིན་པར་ད་ལྟ་རྣམ་རྟོག་ཆོད་དེ། ད་ལྟའི་གནས་པ་འདིའི་མིང་གང་ཡིན། རྒྱུད་ཇི་སྐད་བྱ་བ་ཅིག་གསུང་། སྟོན་པའི་མཚན་ཇི་སྐད་དུ་གདགས། །དུས་ཀྱི་མིང་ཇི་སྐད་བྱ། འཁོར་གྱི་མིང་ཇི་སྐད་བྱ་བར་བདག་གིས་བདག་རང་གི་འཁོར་གྱི་ནང་དུ་སྨྲ་བར་བྱས་ན་སྙམ་པའི་ཡིད་ལ་རྟོག་པ་སྐྱེས་ཏེ། སྟོན་པས་སྡུད་པ་པོའི་བསམ་པ་མཁྱེན་པས་ཁྱོད་ཀྱིས་ང་འདས་པའི་འོག་ཏུ་གནས་འདིའི་མིང་ནི། མི་གནས་སྟོང་པ་ཆེན་པོའོ། །གནས་ནི་བསམ་པ་ཉིད་མེད་པ། །ཞེས་བྱ་བར་ཐོགས་ཞེས་བཀའ་སྩལ་པས། མཁའ་འགྲོ་མའི་ཡིད་ལ་མིང་དེ་ཡིན་ན་དེ་རང་ལ་ཡང་ཤེས་པའི་རྒྱུ་མ་བྱུང་སྙམ་པ་ལ། མི་གནས་ནི་འདི་ལྟར་བདག་རྟོག་གི་འཛིན་པ་མི་གནས། བཟུང་བའི་ཞེན་པ་མེད་པ་ཡིན་པས། སྟོང་པ་ཉིད་དངོས་པོ་རྐྱེན་གང་གིས་ཀྱང་སྐྱེད་པར་མི་ནུས་པས། ཤིན་ཏུ་རྒྱ་ཆེན་པོའི་གཞལ་ཡས་ཁང་གི། གནས་ནི་རང་བཞིན་གྱི་ཏིང་ངེ་འཛིན་ལ་གནས་པས་འདི་ལ་ངན་པའི་རྣམ་པར་རྟོག་པའི་བསམ་པ་ཉིད་ཡེ་ནས་མེད་པ་ཡིན་ཏེ། ད་ལྟ་ཡང་ཁྱོད་ལ་རྣམ་པར་རྟོག་པ་ངན་པའི་རྟོག་པ་ཅང་ཡོད་དམ་ཞེས་བསྟན་པས། དེ་ནས་ཡིད་ཀྱི་རྟོག་པ་ཆོད་དེ། འོ་ན་གནས་ཀྱི་མིང་དང་གོ་བ་ནི་དེ་ལྟར་ཡིན་ན། སྟོན་པ་ཉིད་ཀྱི་མཚན་ཇི་སྐད་དུ་བྱ་སྙམ་པ་ལ། སྟོན་པས་སྡུད་པ་པོའི་རྟོག་པ་གཅད་པར་བྱ་བའི་ཕྱིར། བཅོམ་ལྡན་འདས་དེ་བཞིན་གཤེགས་པའི་གདུང་། ཞེས་པའི་མཚན་མ་ཤེས་ན་དེ་ཡིན་ནོ། །ཞེས་གསུངས་པས། མཁའ་འགྲོ་མའི་ཡིད་ལ་དེ་རང་གང་ལ་ཟེར་སྙམ་པ་ལ། སྟོན་པའི་ཐུགས་ཀྱི་བྱིན་རླབས་རྒྱུད་ལ་སྣང་བར་བྱས་ཏེ། འཁོར་བའི་རྣམ་པར་རྟོག་པ་ཐམས་ཅད་བཅོམ་ཡེ་ཤེས་ལྔའི་བདག་ཉིད་དང་ལྡན། དེ་བཞིན་ཉིད་མ་བཅོས་རང་གནས་ཀྱི་དགོངས་པ་ལ་གནས་པ་ཡིན་ནོ། །གཤེགས་པ་འདི་སླར་འཁོར་བ་ལས་ལྡོག་པ་མ་ཡིན་ཏེ། ཆོས་ཉིད་ཡང་དག་གི་སར་གཤེགས་པའོ། །གདུང་ནི་མི་འགྱུར་བའོ། །ཞེས་མིང་དེ་ཡིན་ཞེས་སྡུད་པ་པོའི་ཐུགས་སུ་ཆུད་པའོ། །དེ་ལྟར་གནས་ཡིན་ལ། རྣམ་རྟོག་གི་བསམ་པ་མེད་པས་ཕུན་སུམ་འཚོགས་པ་ཡིན་ནོ། །སྟོན་པ་ཡིན་ལ་ཆོས་ཉིད་ཀ་ནས་དག་པའི་ས་ལ་གཤེགས་པས་ཕུན་སུམ་འཚོགས་པ་ཡིན་ནོ། །དེ་ནས་སྡུད་པ་པོའི་ཡིད་ལ་གནས་དང་སྟོན་པ་དེ་ལྟར་ཡིན་ན་སྟོན་པས་གསུངས་པའི་བསྟན་པའི་ཆོས་འདི་ལ་ཇི་སྐད་ཟེར་སྙམ་པ་དང་། སྟོན་པས་མཁྱེན་ནས་གསུངས་པ། མི་འབྱེད་སྣང་བའི་ཆོས་གདུང་ལ། མིང་ཐོགས་ཤིག་ཅེས་གསུངས་པས། ཡང་དེ་རང་གང་ཡིན་སྙམ་པ་དང་། ཐུགས་ཀྱི་བྱིན་རླབས་སྡུད་པ་པོའི་སེམས་ལ་ཤར་བ་ནི། ཆོས་ཉིད་མཉམ་པ་ཉིད་མཐའ་གང་དུ་ཡང་མི་འབྱེད་པས་འདི་ལྟར་སྣང་བའི་ཆོས་ཐམས་ཅད་ངོ་བོ་ལ་འགྱུར་བ་མེད་པ། རང་བཞིན་ལ་འགག་མེད་དུ་ཤར་བ་ཉིད་བསྟན་པ་ཡིན་ལ། དེ་ཉིད་ལ་འགྱུར་བ་མེད་པས་གདུང་ཞེས་ཆོས་ཀྱི་མིང་ཡིན་ནོ། །ཞེས་སྡུད་པ་པོའི་ཐུགས་སུ་ཆུད་དོ། །ཡང་སྡུད་པོ་དེས་མཐའ་གང་དུ་ཡང་མི་འབྱེད་པའི་ཆོས་ཡིན་ལ། སྣང་བའི་ཆོས་ཀྱི་ངོ་བོ་ལ་འགྱུར་བ་མེད་པས་ཕུན་སུམ་ཚོགས་པ་ཡིན་པར་མཁྱེན་ནོ། །དེ་ལྟར་སྡུད་པ་པོས་མཁྱེན་པ་ལས། གནས་དང་། སྟོན་པ་དང་། བསྟན་པ་གསུམ་དེ་ལྟར་ཡིན་ན། འཁོར་གྱི་མིང་དང་དུས་གང་ལ་བྱ་སྙམ་པ་ལ། སྟོན་པས་མཁྱེན་ཏེ་བཀའ་སྩལ་པ། རང་གི་རིག་པའི་ཡེ་ཤེས་གདུང་། ཞེས་འཁོར་གྱི་མིང་མ་ཤེས་ན་དེ་ཡིན་ནོ་ཞེས་གསུངས་པས། དེ་རང་གང་ཡིན་སྙམ་པ་ལ། བྱིན་རླབས་རྒྱུད་ལ་སྐྱེས་པས། སྟོན་པ་ཉིད་རང་གི་རིག་པ་ལས་སྤྲུལ་པའི་ཡེ་ཤེས་ཉིད་ལས་མི་གཞན་པའི་འཁོར་སྟོན་པའི་གདུང་འཛིན་པ་ནི། སྟོན་པ་ཉིད་ཀྱིས་རིག་པ་ལས་སྤྲུལ་པའི་འཁོར་ཡིན་ལ། ཡེ་ཤེས་ཉིད་ལས་མི་གཞན་པས་སྟོན་པའི་གདུང་འཛིན་པས་ཕུན་སུམ་ཚོགས་པའོ་ཞེས་སྡུད་པ་པོས་མཁྱེན་ནོ། །དུས་ཀྱི་མིང་མ་ཤེས་ན། ངས་ནི་ཐོག་མའི་དུས་སུ་ཡང་། །འདི་ཉིད་དུ་ནི་འོངས་པ་ཡིན། །ཆོས་ཀུན་གདུང་གི་རང་བཞིན་ལ། །ཞེས་བྱ་བར་ཐོགས་ཤིག་ཅེས་གསུངས་པས། དེ་གང་ཡིན་སྙམ་པ་ལ་སྟོན་པའི་བྱིན་རླབས་ཤར་བ་ནི། ངས་ནི་སྔོན་འབྱུང་དུ་དུས་དང་ཐོག་མའི་དུས་ཀྱང་འདི་རང་། ད་ལྟའི་དུས་སུ་ཡང་འདི་ཉིད་དུ་འོངས་པ་ཡིན་པས། འདིའི་མིང་ནི་ཆོས་ཀུན་མཉམ་པ་ཉིད་དུ་རྟོགས་པའི་དོན་ལ་འགྱུར་བ་མེད་པས་གདུང་གི་རང་བཞིན་དུ་ཤར་བའི་དུས་ཡིན་པ་ལས། འདི་ལྟར་གནས་དང་སྟོན་པ་དང་ཆོས་དང་འཁོར་དང་ལྔར་གཏན་ལ་ཕབ་པའོ། །ཞེས་དུས་འགྱུར་བ་མེད་པའི་དུས་ཡིན་ལ། ཐམས་ཅད་དུ་ཤར་བས་ཕུན་སུམ་ཚོགས་པའོ་ཞེས་སྡུད་པ་པོས་མཁྱེན་པས་ཏེ། དེ་ལྟར་སྟོན་པའི་མཁན་པོ་གང་ཡིན་སྙམ་པ་ལ། ཕུན་སུམ་ཚོགས་པ་ལྔ་ཐུན་མོང་མ་ཡིན་པའི་གླེང་གཞི་འདི་ནི་ངས་སྔོན་དུ་ཡང་བསྟན་ལ་ད་ལྟ་ཡང་ང་ཡིས་ཁྱེད་ལ་བསྟན་པ་ཡིན་ལ་ཕྱིས་ནི་འཁོར་ཁྱེད་མ་ཡིན་པ་གཞན་ལའང་སྟོན་པའོ། །ཞེས་ཐུན་མོང་མ་ཡིན་པའི་གླེང་གཞི་བསྟན་ནས། ད་ནི་ཐུན་མོང་གི་གླེང་གཞི་སྔགས་སྤྱི་དང་སྒོ་བསྟུན་པ་སྟོན་ཏེ། དེ་ནས་སྡུད་པ་པོའི་རྟོག་པ་རྣམས་ཆོད་རྒྱུད་ཀྱི་ཚིག་དོན་གསལ་བར་ཐུགས་སུ་ཆུད་ནས། སྡུད་པ་པོས་རང་གི་འཁོར་གྱི་ནང་དུ་གླེང་གཞི་རང་གཞུང་གི་ཚིག་འདི་དག་བརྗོད་དོ། །འདི་སྐད་བདག་གིས་ཐོས་པའི་དུས་གཅིག་ན། ཞེས་འདི་ནི་ཆོས་ཕུན་སུམ་ཚོགས་པ་སྐུ་གདུང་འབར་པའི་རྒྱུད་འདི། སྐད་ནི་སྟོན་པའི་གསུང་དངོས་སུ་གང་གིས་ཐོས་ན་རྣ་བའི་དབང་པོས་ཕྱིན་ཅི་མ་ལོག་པ་ཐོས། སུ་ལ་ཐོས་ན་སྟོན་པ་ཉིད་ལ། བདག་རང་གིས་ཐོས་པ་ལས་གཞན་ནས་རྒྱུད་པ་མ་ཡིན་པར་དངོས་ཀྱིས་ཐོས། དུས་ཇི་ཙམ་ན་ཐོས་ན་འདི་ཉིད་གོང་བཞིན་ཤེས་ནས་རྟོགས་པའི་དུས་ན་ཐོས། དེ་ཡང་ལན་མང་པོ་མ་ཐོས་ཏེ་ལན་གཅིག་ལ་གང་བཞིན་རྟོགས་པས་སྡུད་པ་པོ་དེ་ཉིད་ཤེས་རབ་ཆེ་བས་སྟོན་པའོ། །དེ་ལྟར་བརྗོད་པས་མཁའ་འགྲོ་མའི་འཁོར་བྱང་ཆུབ་སེམས་དཔའ་གློག་གི་འོད་ཟེར་ཞེས་བྱ་བ་ལ། ཡིད་ལ་རྣམ་རྟོག་དྲུག་སྐྱེས་ཏེ། ཁྱོད་ཀྱི་ཚིག་འདི་དག་བརྫུན་ཡིན་བདེན་པ་མིན་སྙམ་སྟེ། འོ་ན་ཁྱོད་ཀྱིས་ཐོས་དང་ཐོས་ཏེ་གནས་ཇི་སྐད་བྱ་བར་སྟོན་པ་སུ་ལ་ཐོས། གྲོགས་གང་དང་ལྷན་ཅིག་ཏུ་ཐོས། ཆོས་ཇི་སྐད་བྱ་བ་ཐོས། དུས་ཇི་ཙམ་ན་ཐོས་སྙམ་པ་ལ། མཁའ་འགྲོ་མས་དེའི་ཐུགས་ཀྱིས་རྒྱུད་མཁྱེན་ཏེ། བྱང་ཆུབ་སེམས་དཔའ་ཁྱེད་རྟོག་པ་སྐྱེར་མི་རུང་བའི་འདི་དག་རྫུན་པའི་ཚིག་མ་ཡིན་པས། གནས་ནི་རྣམ་པར་རྟོག་པའི་བསམ་པ་ཐམས་ཅད་ཀྱིས་མ་བསླད་པ་མི་རྟོག་པའི་ཡེ་ཤེས་རང་སྣང་བའི་ཆོས་ཐམས་ཅད་ཀྱི་འབྱུང་བའི་གནས། གཞལ་ཡས་ཁང་དབྱིབས་གྲུ་གསུམ་པ། མི་རྟོག་ཅིང་བསམ་པ་དང་བྲལ་བས་ན། སྟོན་པ་མི་འགྱུར་བའི་དེ་བཞིན་གཤེགས་པའི་གདུང་། རང་བཞིན་ཤུགས་ཀྱི་ཐུགས་རྗེ་དང་། རྐྱེན་ཡུལ་དང་འཕྲད་པའི་དང་། བསྐུལ་ཞིང་གསོལ་བ་བཏབ་པའི་ཐུགས་རྗེ། དེ་གསུམ་དབྱེར་མེད་དུ་ཕྱོགས་མེད་ཆེན་པོའི་སྐུར་ཤར་བའི་སྟོན་པ་རྡོ་རིག་པ་རྗེ་ཡེ་ཤེས་གཉིས་གཉིས་མེད་དུ་འཆང་བ་ཆེན་པོའི་བཅོམ་ལྡན་འདས་ཀྱིས་བདག་ལ་གསུངས་པ་ཡིན་ལ། དེའི་ཚེ་གྲོགས་ནི་སྟོན་པ་དེས་གདུལ་བྱ་ཉོན་མོངས་པ་རིགས་དྲུག་གི་རྒྱུད་ལ་གནས་ནས་དེ་བརྟུལ་ཏེ། འགྲོ་བ་རིགས་དྲུག་གི་སྐྱེ་གནས་དག་པར་བྱ་བའི་ཕྱིར་ན། སྤྲུལ་པ་སྐུའི་སངས་རྒྱས་ཤཱཀྱ་ཐུབ་པ་དང་། དབང་པོ་བརྒྱ་བྱིན་དང་། ཐགས་བཟང་རིས་དང་། སེང་གེར་སྤྲུལ་པ་དང་། ཁ་འབར་མ་དང་། ཆོས་ཀྱི་རྒྱལ་པོ་རྣམས་དང་། བྱང་ཆུབ་སེམས་དཔའ་གླང་པོའི་ཟེར་ལ་སོགས་ཏེ་བརྗོད་ཀྱིས་མི་ལང་བ་དང་། གཞན་ཡང་འདོད་པའི་ལྷ་དང་། གཟུགས་དང་། གཟུགས་མེད་པའི་ལྷ་དཔག་དུ་མེད་པ་དང་། དགའ་རབ་རྡོ་རྗེ་འགྲོ་བ་མིའི་གཟུགས་སུ་འཛིན་པ་ལ་སོགས་ཏེ་མིའི་ཚོགས་དཔག་ཏུ་མེད་པ་སྐལ་བ་དང་ལྡན་པ་དང་། གཞན་ཡང་སྟོན་པའི་གདུལ་བྱའི་འཁོར་ནི། མཁའ་འགྲོ་མ་དང་། ཤ་ཟ་དང་། གནོད་སྦྱིན་དང་། སྲིན་པོ་དང་། གྲུལ་བུམ་དང་། ཀླུ་དང་། འཇིག་རྟེན་གྱི་ཁམས་སྐྱོང་བ་ལ་སོགས་པ་བསམ་གྱིས་མི་ཁྱབ་པ་དང་། ལྷན་ཅིག་ཏུ་ཐོས་པ་ཡིན་ནོ། །དེའི་ཚེ་དུས་ནི་མི་གནས་པའི་ཡེ་ཤེས་ཆེན་པོ་རང་གི་བསམ་གཏན་ལ་གནས་པའི་དུས་སུ་ཐོས་ནས། ང་དང་འཁོར་དེ་ཐམས་ཅད་ངོ་བོ་ལ་ཐ་མི་དད་པར་འབྱེད་པ་མེད་པའི་ཚུལ་གྱིས་ཆོས་ཐམས་ཅད་མཉམ་པ་ཉིད་དུ་གཉིས་སུ་མེད་པའི་དགོངས་པ་ལ་ཐབས་གཅིག་ཏུ་སྟོན་པ་ཉིད་དང་དབྱེར་མི་ཕྱེད་པར་བཞུགས་པ་ཡིན་ནོ། །ཞེས་བསྟན་པས་བྱང་ཆུབ་སེམས་དཔའ་དེའི་རྣམ་པར་རྟོག་པའི་ཐེ་ཚོམ་རྣམས་ཆོད། དེ་ཡང་གནས་ཡིན་ཡང་ཕུན་སུམ་ཚོགས་པ་མ་ཡིན་པ་དང་། སྟོན་པ་ཡིན་ཡང་ཕུན་སུམ་ཚོགས་པ་མ་ཡིན་པ་དང་། བསྟན་པ་ཡིན་ཡང་ཕུན་སུམ་ཚོགས་པ་མ་ཡིན་པ་དང་། འཁོར་ཡིན་ཡང་ཕུན་སུམ་ཚོགས་པ་མ་ཡིན་པ་དང་། དུས་ཡིན་ཡང་ཕུན་སུམ་ཚོགས་པ་མ་ཡིན་པ་ནི། སྟོན་པ་མེད་ན་གནས་ཕུན་སུམ་ཚོགས་པ་མ་ཡིན་ལ། བསྟན་པ་མེད་ན་སྟོན་པ་མ་ཡིན། བཤད་པར་བྱ་བའི་ཆོས་ལ་འཁོར་མེད་ན་སྟོན་པ་ཉིད་ཡིན་ཡང་ཕུན་སུམ་ཚོགས་པ་མ་ཡིན། སྟོན་པ་མེད་ན་འཁོར་ཡིན་ཡང་ཕུན་སུམ་ཚོགས་པ་མ་ཡིན། དེ་ལྟར་གནས་དང་གཅིག །སྟོན་པ་དང་གཉིས། བསྟན་པ་དང་གསུམ། འཁོར་དང་བཞི་མ་འཛོམ་ན་དུས་ཡིན་ཡང་ཕུན་སུམ་ཚོགས་པ་མ་ཡིན་ནོ། །དེ་ལྟར་བཞི་དུས་འཛོམས་ལ་ཕུན་སུམ་ཚོགས་པ་ཞེས་བྱའོ། །དེ་ལྟར་སྟོན་པ་དང་། གནས་དང་། བསྟན་པ་དང་། འཁོར་དང་། དུས་གཅིག་ལ་ཐབས་གཅིག་དུ་འཁོད་པའི་ཚེ། སྟོན་པ་ལ་ངས་འཁོར་དེ་དག་གི་ནང་ནས་ལངས་ཏེ་འདི་སྐད་ཅེས་ཞུས་སོ། །སྡུད་པ་པོ་རང་གི་འཁོར་གྱི་ཐེ་ཚོམ་བསལ་ལ། རྗེས་འཇུག་ཐུན་མོང་གི་གླེང་གཞི་རང་གཞུང་དུ་བསྟན་ནས། ད་ནི་ལེའུའི་གཞུང་སྟོན་ཏེ། དེ་ལ་བྱེ་བྲག་ཏུ་ལེའུ་དང་པོའི་གཞུང་ལ། དོན་གཉིས་ལས། ཞུ་བ་མདོར་བསྟན་པ་དང་། ལན་རྒྱས་པར་བཤད་པ་གཉིས་ལས། ཞུ་བ་མདོར་བསྟན་པ་ནི། དེ་ནས་འཁོར་དུ་འདུས་པ་དེ་ནས་ནི། །ཞེས་པ་ལ་སོགས་པས་བསྟན་ཏེ། དེ་ནས་ནི་རྗེས་སུ་འཇུག་པ་རྣམས་ལ་ཡིད་ཆེས་པར་བྱ་བའི་ཕྱིར། སྟོན་པ་དང་། གནས་དང་། བསྟན་པ་དང་། འཁོར་དང་བཞི་དུས་འཛོམས་པའི་དེ་ནས། འཁོར་དུ་འདུས་པའི་ཚོགས་བསམ་གྱིས་མི་ཁྱབ་པ་ཡོད་ཀྱང་དེ་དག་གི་ནང་ན་དེ་ནས་ནི་ཁྱད་པར་དུ་རྡོ་རིག་པ་རྗེ་ཡེ་ཤེས་གཉིས་གཉིས་མེད་རིགས་ཀྱི་རིག་པ་དང་། ཡེ་ཤེས་ཀྱི་སྡེ་ཚན་མཁའ་དབྱིངས་ཀྱི་འགྲོ་བ་རིག་པ་གསལ་བ་དྲི་མ་མེད་པ་ཡིད་ཀྱིས་ནི་དྲན་པ་རྣམ་པར་དག་པའི་ཤེས་རབ་ཀྱི་ཡིད་ཀྱིས། རྒྱུད་ཀྱི་སྟོན་པ་དྲུག་པ་རྡོ་རྗེ་འཆང་གི་སྟོན་པ་ཉིད་མདུན་དུ་ཡང་དག་པར་མི་འགྱུར་བ་ཡིད་ཀྱི་རྣམ་པར་རྟོག་པ་མེད་པའི་འགྱུ་བ་མེད་པའི་དབུགས་རླུང་གི་བྱེ་བྲག་གི་ལས་ཕྱུང་ནས། ཚིག་འདི་སྐད་ཅེས་ནི་སྟོན་པ་ལ་ཞུ་བ་རབ་ཏུ་ཞུས་སོ། །ཀྱེ་སྟོན་པ་ཉིད་རྡོ་རྗེ་འཆང་ཞེས་སྟོན་པའི་མཚན་ནས་བོས་ནས་འཇིག་པ་ཕྱི་སྣོད་ཀྱི་འཇིག་རྟེན་ས་ཆུ་མེ་རླུང་ལ། བརྟེན་པ་འགྲོ་བ་རིགས་དྲུག་གི་སེམས་ཅན། དེ་ལ་བརྟེན་པའི་སེམས་ཅན་བསྡུས་ན་ཁམས་གསུམ་དུ་འདུས་ཏེ། དེ་ཡང་འདོད་པ་ཁམས་ཀྱི་སེམས་ཅན་ནི། དམྱལ་བ་རྣམ་པར་སྨིན་པ་རབ་ཏུ་ཚན་ཆེ་བ་ལས་བྱུང་ལ། དེ་ཡང་དབྱེ་ན་རྒྱུ་ལས་ཀྱི་བྱེ་བྲག་ཚ་གྲང་གཉིས་ལས་བྱུང་བས་བརྒྱད་བརྒྱད་བཅུ་དྲུག །དེ་ཡང་བརྒྱད་དུ་བསྡུ་ན། ཉི་ཚེ་བ་དང་ཉེ་འཁོར་བ་གཉིས་ཏེ་བཅུ། ཡི་དྭགས་ཕྱིའི་སྒྲིབ་པ་ཅན་དང་ནང་གི་སྒྲིབ་པ་ཅན་གཉིས་དང་བཅུ་གཅིག །བྱོལ་སོང་བྱིངས་ན་གནས་པ་དང་ཁ་འཐོར་བ་གཉིས་ཏེ་བཅུ་གསུམ། མི་དང་བཅུ་བཞི། རྒྱལ་ཆེན་རིགས་བཞི་དང་། སུམ་ཅུ་རྩ་གསུམ་དང་། མཚེ་མ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་དང་དྲུག་སྟེ། དེ་ལྟར་ཉི་ཤུ་ནི་འདོད་པ་ཁམས་ཀྱི་སེམས་ཅན་ནོ། །འོད་གསལ་དང་། འོད་ཆུང་དང་། ཚད་མེད་འོད་སྤྲིན་མེད་ལ་སོགས་ཏེ། གཟུགས་ཁམས་ཀྱི་ལྷའི་རིས་བཅུ་བདུན། གཟུགས་མེད་པའི་ཁམས་ཀྱི་སྐྱེ་མཆེད་མུ་བཞི་སྟེ། སེམས་ཅན་གྱི་སྡེ་རིགས་བཞི་བཅུ་རྩ་གཅིག་གིས་ཁམས་གསུམ་གྱི་ནང་དུ་འཁོར་བར་འཁོར་ཞིང་། སེམས་ཅན་གྱི་ལུས་ཐ་དད་པ་ཐམས་ཅད་དུ་འཁོར་ཞིང་འཁྲུལ་བས། འདི་དག་གིས་སྔར་བླ་ན་མེད་པའི་འབྲས་བུ་དེ་བཙལ་བས་མ་རྙེད་པར་འཁྲུལ་ཏེ་སངས་རྒྱས་དོན། སྔ་མ་སེམས་ཅན་དེ་དག་ཙམ་སུས་ཀྱང་རིག་པ་མངོན་སུམ་གྱི་དོན་དེ་རྙེད་པ་མེད་དོ། །ད་ལས་དང་སྐལ་བར་ལྡན་པའི་གང་ཟག་སུས་ཆོས་ཉིད་མངོན་སུམ་གྱི་དོན་མཐོང་བ། དེ་ལ་ལུས་ངག་ཡིད་ལ་རྟགས་ནི་ཇི་ལྟ་བུ་ཞིག་འབྱུང་བ་ལགས། སྤྱིར་སྡོམས་པ་བྱེ་བྲག་ཏུ་སོ་སོར་ཕྱེ་ན། དེའི་རྟགས་ཀུན་བདག་ལ་སྟོན་པས་བསྟན་དུ་གསོལ་ཞེས་ཞུ་བ་མདོར་བསྟན་ནས། ད་ནི་ལན་སྟོན་པ་ལ་གཉིས་ཀྱིས། བསྟན་པ་ལས་སྤྱིར་བསྟན་པ་དང་བྱེ་བྲག་གཉིས་ལས། སྤྱི་ལ་གཉིས་ཀྱིས་བསྟན་པའི་དང་པོ་ལན་མདོར་བསྟན་པ་ནི། དེ་ནས་སྟོན་པ་རྡོ་རྗེ་འཆང་། །ཞེས་པ་ལ་སོགས་པས་སྟོན་ཏེ། ཞུས་མ་ཐག་པའི་དེ་ནས་སྟོན་པ་རྡོ་རྗེ་འཆང་ནི་མཚན། རང་ནི་གཞན་ལ་སོགས་པ་རང་ངོ་། །རིག་པ་ནི་ཤེས་བྱ་རང་གི་ངོ་བོའོ། །གསལ་བ་ནི་རང་བཞིན་གྱིས་གསལ་བ་ཉི་ཟླ་དང་། བྱས་ཤིང་རྒྱུ་རྐྱེན་གྱིས་གསལ་བ་མར་མེ་དང་། སྒྲོན་མེ་དང་མེ་ལོང་ལ་སོགས་པ། དག་པས་གསལ་བ་ངོ་བོ་ལྟར་སྣང་དང་། མ་བསྒྲིབས་པར་གསལ་བ་མན་ཤེལ་དང་། རྩོལ་བསྒྲུབ་ཀྱིས་གསལ་བ་མཉམ་གཞག་གི་དུས་དང་། ཡེ་ནས་གསལ་བ་རང་གི་རིག་པའི་ཡེ་ཤེས་ཉིད་ཡིན་ནོ། །སྟོབས་ཀྱིས་གསལ་བ་ཤེས་རབ་སྟེ། འདི་ནི་རིག་པ་ལས་བྱུང་བའི་ཤེས་རབ་ཀྱི་སྒོ་ཕྱེ་ནས། གཞི་ལ་གནས་པའི་ཤེས་རབ་རྣམ་བཞི་ཡིས་རྟོགས་པའི་རྟོགས་ལུགས་ནི། ཆོས་འབྱུང་ཆེན་པོའི་མཛོད་ནི་ཐུགས་ཀྱི་དགོངས་པ་ཇི་ལྟར་ཡོད་པའི་ལུགས་བསྟན་པ། ཀྱེ་མ་ཞེས་ངེས་པའི་སྙིང་པོ་སུ་ལ་ཡང་མ་བསྟན་པ་མཁའ་འགྲོ་མ་གསལ་བའི་ཡིད་ཅན་མ་ཁྱོད་ལ། ང་ཡིས་ངེས་པ་ཁོ་ནར་བསྟན་གྱིས་ཁྱོད་ཀྱིས་བློའི་སྐྱོན་རྣམ་པ་བཞི་པོ་འདི་སོལ་ལ། བློ་ཞབས་རྡོལ་ལྟ་བུ་དང་། དུག་ཅན་དང་། གཞོགས་རལ་དང་། ཁ་སྦུབ་དང་། ཕྱིན་ཅི་ལོག་གི་སྐྱོན་རྣམས་སྤོང་ལ་ཟུང་ཞིག་ཅེས་པ་ཉན་པ་པོ་ལ་གདམ་པ། དེ་ལྟར་གདམས་པས་སྡུད་པ་པོ་ཉིད་ཤིན་ཏུ་ཤེས་རབ་ཆེ་ལ་ངམ་པས་ཡིད་ལ། ང་ལ་སྐྱོན་དེ་དག་མེད་དེ་སྟོན་པ་ཉིད་ལ་ཚིག་གི་འཁྲུལ་པ་མ་བྱུང་ངམ་སྙམ་པ་ལ། སྟོན་པའི་ཐུགས་ལ་ཤར་ནས་གསུངས་པ་ངས་ཁྱོད་ལ་བསྟན་པའི་ཚིག་འདི་དག་ལ། འཁྲུལ་པ་རྡུལ་ཕྲ་རབ་སྟོང་དུ་བགོས་པའི་ཆ་ཙམ་ཡང་མེད་པས། ཁྱོད་ཀྱིས་ངས་བསྟན་པའི་ཚིག་ལ་མ་ལྷག་མ་ཆད་འཁྲུལ་པ་མེད་པའི་ཚིག་འདི་དག་ཁྱོད་རང་གི་འཁོར་རྣམས་ལ་མ་ནོར་བར་སྟོན་ཅིག་གསུངས་པས། སྡུད་པ་པའི་རྟོག་པ་ལ་གལ་ཏེ་འཁྲུལ་ལ་མ་ནོར་ན་ཉེས་པ་ཅི་ཡོད་སྙམ་པ་ལ། འདི་ནི་འདི་རང་ལྟར་ངེས་པའི་དོན་ཡིན་པས། དང་པོ་ཚིག་ཏུ་ངེས་པས། བར་དུ་ཉམས་སུ་བླང་དུ་ངེས། ཐ་མ་འབྲས་བུའི་དོན་དུ་ངེས་པའི་ཕྱིར་ནོར་རམ་འཁྲུལ་ན་ངེས་མེད་དུ་འགྲོ་བས། དེ་ལྟར་སོང་ན་དོན་ལ་ཡིད་ཆེས་མེད་པས་མ་ནོར་བར་ཟུངས་ཤིག །སྙིང་པོ་ནི་ཚིག་ཐམས་ཅད་ཀྱི་སྙིང་པོ་བསྡུས་པ་རྒྱུད་འདི་ཡིན། དོན་ཐམས་ཅད་ཀྱི་སྙིང་པོ་བསྡུས་པ་འདི་ནས་བསྟན་པའི་རྟགས་འདི་དག་ཡིན་པས། སྙིང་པོ་ལ་འཁྲུལ་པ་ཡོད་ན་ས་བོན་མེས་ཚིག་པ་དང་འདྲའོ། །དེའི་ཕྱིར་ན་གལ་ཏེ་འཁྲུལ་ན་གསང་སྔགས་ཀྱི་དམ་ཚིག་ཉམས་ན་རྡོ་རྗེ་དམྱལ་བ་ཆེན་པོར་སེམས་ཀྱི་སྣང་བ་འཁྲུལ་བར་འགྱུར་བས། དེའི་ཕྱིར་ན་ཁྱོད་ཀྱིས་མ་འཁྲུལ་བར་གྱིས་ཞེས་གསུངས་པའོ། །དེ་སྐད་གསུངས་པས་མཁའ་འགྲོ་མའི་རྟོག་པ་ལ་ཅིའི་ཕྱིར་ན་དེ་དག་ངེས་པར་འགྱུར་སྙམ་པ་ལ། དོན་ཀུན་གྱི་ནི་རྟགས་མེད་ན་ཡིད་མི་ཆེས་པས། དོན་ཐམས་ཅད་འདི་ལ་འདུས་པའི་ཕྱིར་འདི་དོན་ཡིན། དོན་ལ་ཐེ་ཚོམ་མམ་སོམ་ཉི་ཟའམ་འཁྲུལ་ན་འདི་དག་དང་ལས་ཀྱི་སྐལ་བས་བསྟན་པ་ལ། འདི་དང་འཕྲད་མི་སྲིད་པ་ཡིན་ཏེ། དེ་ཡང་ཇི་ལྟར་འགྱུར་ཡང་རྫོགས་པའི་སངས་རྒྱས་གཅིག་མི་འབྱུང་ན་མི་འབྱུང་འབྱུང་ཕན་ཆད་ལ་རྟགས་འདི་རྣམས་ཀྱིས་མ་ཁྱབ་པ་མེད་པའི་ཕྱིར་རོ། །དེ་ལྟར་སྡུད་པ་པོའི་ཐེ་ཚོམ་གཅད་ནས་རྟགས་མདོར་བསྡུས་ན་སངས་རྒྱས་ཐམས་ཅད་ཀྱི། སྐུའི་རྟགས་དང་། གསུང་གི་དང་། ཐུགས་ཀྱི་རྟགས་དང་གསུམ་དུ་འདུས་སོ། །སྐུ་ནི་གསུམ་སྟེ། ཆོས་ཀྱི་སྐུ་དང་། ལོངས་སྐུ་དང་། སྤྲུལ་པ་སྐུ་དང་གསུམ་མོ། །རྟགས་ནི་འོག་ནས་སྟོན་ཏོ། །གསུང་གི་ནི་གསུམ་སྟེ། བརྗོད་དུ་མེད་པ་རྒྱ་ཆེ་བའི་གསུང་དང་། གྲགས་ལ་གཟུང་དུ་མེད་པ་སྒྲ་བརྙན་ལྟ་བུའི་གསུང་དང་། ཚིག་གི་གསུང་དང་གསུམ་མོ། །དེ་ཡང་སྐུ་གསུམ་ལ་རིམ་གྱིས་སྦྱར་རོ། །རྟགས་ནི་འོག་ནས་སྟོན། དེ་བཞིན་དུ་རྡོ་རྗེའི་ཐུགས་ཀྱི་ནི་གསུམ་སྟེ། གཡོ་བའི་ཐུགས་དང་། མཁྱེན་རིག་གསལ་བའི་ཐུགས་དང་། འཇིག་རྟེན་མཁྱེན་པའི་ཐུགས་དང་གསུམ་སྐུ་གསུམ་གྱི་ཐུགས་ཡིན་ནོ། །རྟགས་ནི་འོག་ནས་སྟོན་པའོ། །ཇི་ལྟར་སྔོན་འབྱུང་དུ་སངས་རྒྱས་རྣམས་ལ་རྟགས་ཤར་བ་ལྟར་འདིར་ཡང་སངས་རྒྱ་བའི་སེམས་ཅན་ཀུན་གྱི་ལུས་ངག་ཡིད་ལ། རྟགས་འདི་དག་རྣམས་ནི་མངོན་སུམ་དུ་སྣང་བར་འགྱུར་བ་ཡིན་པས། འདི་ཉིད་ནས་བསྟན་པའི་རྟགས་རྣམས་སུ་ལ་སྣང་བ་དེ་ཚེ་འདིའི་སྔོན་མ་ནས་སྐུ་གསུང་ཐུགས་སོ་སོ་ལ་སྦྱངས་པའི་སྐལ་བ་ཅན་ཡིན་ནོ། །ཚེ་སྔ་མ་ལ་བར་ཆོད་དུ་སོང་བ་ལས་བསྒྲུབ་པའི་འབྲས་བུ་མ་སྨིན་པ་ལ་ནི། གོང་དུ་མ་སྨིན་པས། ཚེ་ད་ལྟའི་དུས་སུ་ངེས་པར་བསྒྲུབས་ན་འབྲས་བུ་ནི་ཚེ་འདི་ལ་སུ་ཡིས་གྲུབ་པའི་མི་དེ་ཉིད་ལ། འོག་ནས་སྟོན་པའི་ལུས་ཀྱི་རྟགས་དང་། དེ་བཞིན་དུ་ངག་གི་རྟགས་དང་། ཡིད་ལ་སོགས་པའི་རྟགས་འདི་རྣམས་འབྱུང་བ་ཡིན་ནོ། །ཞེས་སྟོན་པས་གསུངས་པ་ལ་སྡུད་པ་པོའི་རྟོག་པ་ལ་རྟགས་མེད་པར་སངས་རྒྱ་བ་ཡོད་དམ་མེད་སྙམ་པ་ལ། གལ་ཏེ་འདི་ནས་བཤད་པའི་རྟགས་འདི་ཀུན་མ་བྱུང་ན། ཕྱི་རོལ་འཇིག་རྟེན་པའི་ཡིད་དཔྱོད་འཛིན་པའི་ལྟ་བར་འགྱུར་བ་ཡིན་པས་རྟགས་མེད་པར་སངས་རྒྱ་མི་སྲིད་དོ། །ཞེས་ལན་མདོར་བསྟན་ནས། ད་ནི་སྤྱིའི་འཇུག་པར་བྱེད་པའི་ཡོན་ཏན་བསྟན་པ་ནི། དེ་ཕྱིར་རྟགས་དང་སུ་ལྡན་པ་ཞེས་པ་ལ་སོགས་པས་བསྟན་ཏེ། དེའི་ཕྱིར་ན་རྟགས་འདི་དག་རྣམས་སྐྱེས་བུ་སུ་ལྡན་པ་དེ་ལ་ཉམས་སུ་བླངས་པའི་ཡོན་ཏན་ཡོད་ལ། སྐལ་ལྡན་འདི་ཡིས་གསང་བའི་རྒྱུད་འདི་རྣམས་ཀྱི་ངེས་པའི་ལུང་ཐོབ་པ་ལས་བྱུང་བས། ངེས་པའི་ལུང་གི་ཉམས་སུ་བླངས་པའི་རིག་པའི་ཚད་ཟིན་པས་ནི་ཆོས་ཉིད་ཟད་པའི་སྣང་བ་ལ་སྤྱོད་བས་ན། ཕྱི་རོལ་དུ་འཁྲུལ་བའི་སྣང་བ་འགགས་པ་དང་། ནང་དུ་ལུས་རྡོས་པ་འགགས་པ་དང་། དེ་ལ་སོགས་པ་འཁྲུལ་པ་དང་ཡེ་ཤེས་དང་། ཀུན་གཞི་དང་ཆོས་སྐུའི་ཚད་ཀུན་ཟིན་པ་འདི་ནི་རྣལ་མ་ཆོས་ཉིད་མ་བཅོས་པ། འབྱོར་པ་དེ་དང་གཉིས་སུ་མེད་པ། དེ་ལ་ཉོན་མོངས་པའི་དྲི་མ་མེད་པས་དག་པའི་ལམ་ལ་གོས་པ་མེད་པའོ། །ལམ་འདི་ཉིད་ལ་ནི་བགྲང་བྱའི་ལམ་ཚོགས་ལམ་དང་། མཐོང་ལམ་དང་། སྒོམ་ལམ་དང་། སྦྱོར་ལམ་དང་། མཐར་ཕྱིན་པ་ཡང་འདི་མ་ཡིན། འདི་དག་བགྲོད་དཀའ་ཚི་ཆད་པའི་ལམ་ཞེས་བྱའོ། །རྣལ་འབྱོར་རིག་འཛིན་གྱི་ལམ་ཀྱང་མ་ཡིན་ཏེ། འདི་དག་ནི་རྩོལ་བཅས་དོན་ཆུང་བའི་ལམ་ཡིན། འཇུག་སྒོ་གྲུབ་མཐའི་ལམ་ཉན་ཐོས་ལ་སོགས་པའི་ལམ་སྟེ། འདི་དག་ནི་ལམ་རིང་ལ་འབྲས་བུ་ལྡོག་པ་ཡིན་པས། འདི་ནི་མངོན་སུམ་རང་གནད་ཀྱི་ལམ་མོ། །ལམ་འདི་ལ་སྐལ་བ་དང་ལྡན་པ་གང་གནས་པ་དེ། ཡང་དག་པར་རྫོགས་པའི་སངས་རྒྱས་རྣམས་ཀྱི་བདེན་པ་ནི་གསུམ་སྟེ། ཀུན་རྫོབ་ལས་འབྲས་ཀྱི་བདེན་པ་དང་། དོན་དམ་རང་བཞིན་གྱི་བདེན་པ་དང་གཉིས་ནི་མ་ཡིན། ཟག་མེད་མཚན་ཉིད་དང་བྲལ་བའི་བདེན་པས་ཏེ། ཀུན་རྫོབ་ནི་ལས་དང་རྣམ་སྨིན་བདེན་པ་གཙོ་ཆེ་བ་ཡིན་ཏེ། འདི་ལ་ལས་དང་རྣམ་སྨིན་གྲུབ་མ་མྱོང་། དོན་དམ་པ་ཆོས་ཐམས་ཅད་རང་བཞིན་གནས་ལུགས་ཙམ་དུ་བདེན་པ་ཡིན་ཏེ། འདི་ལ་ཟག་པ་མེད་པས་གནས་ལུགས་སུ་གྲུབ་པ་མེད་ལ། མཚན་ཉིད་དང་བྲལ་བས་རང་བཞིན་ནམ་ཀུན་རྫོབ་ཀྱི་སྣང་ཆ་གྲུབ་པ་མེད་དོ། །དེ་ཡང་འདི་ཉིད་ཤེས་རབ་ཀྱིས་མ་ཡིན་པར་དབང་པོས་མཐོང་དུ་ཡོད་པའོ། །ཞེས་སྤྱིའི་འཇུག་པར་བྱེད་པའི་ལམ་གྱི་ཡོན་ཏན་བསྟན་ཏེ། དེ་གཉིས་ཀྱིས་ནི་སྤྱིའི་ལན་བསྟན་ནས། ད་ནི་བྱེ་བྲག་ཏུ་སྐུ་གསུང་ཐུགས་ལ་སྔོན་དུ་སྦྱངས་པའི་རྟགས་ད་ལྟ་འཆར་བའམ་གང་ཟག་གི་ལུས་ངག་ལ་ཇི་ལྟར་འབྱུང་བ་ལ་ནང་དོན་གསུམ་སྟེ། གང་གི་ལུས་ལ་སྐུ་གསུང་ཐུགས་ཀྱི་རྟགས་ཇི་ལྟར་འབྱུང་བ་དང་། དེ་བཞིན་དུ་ངག་དང་ཡིད་ལ་ཇི་ལྟར་འབྱུང་བ་བསྟན་པ་གསུམ་ལས། ལུས་ཀྱི་རྟགས་བསྟན་པས་ཏེ། འདི་ལ་ནང་གསེས་ཀྱི་དོན་གསུམ་ཡོད་པ་ལས། དང་པོ་སྔོན་དུ་སངས་རྒྱས་རྣམས་ཀྱིས་སྐུ་ལ་སྦྱངས་པའི་རྟགས་བསྟན་པ་ནི། བདེན་མཐོང་ལུས་ལ་རྟགས་འདིའི། །ཞེས་པ་ལ་སོགས་པས་བསྟན་ཏེ། དེ་ལྟར་གང་གི་བདེན་པ་གསུམ་གྱི་མཚན་ཉིད་མཐོང་བའོ། །ལུས་ལ་ནི་ལུས་ཀྱི་ངོ་བོ་བསགས་པ་འདུས་པ། ངེས་ཚིག་འཇོག་པའམ་ལུས་དེ་བོར་བའམ་བཞག་ནས་སེམས་འགྲོ་བའི་ཕྱིར་ན་ལུས་སོ། །དབྱེ་བ་ནི་འཇིག་རྟེན་མིང་ཙམ་དུ་གྲགས་པའི་ལུས་དང་། རྣམ་པར་རྟོག་པ་བག་ཆགས་ཀྱི་ལུས་དང་། ཡེ་ཤེས་སྒྱུ་མའི་ལུས་དང་། རིན་པོ་ཆེ་གསང་བའི་ལུས་དང་བཞིའོ། །མིང་ནི་འཇིག་རྟེན་པའི་མིང་དུ་གྲགས་པའི་ལུས་ཀྱི་བརྡའ་རྟགས་པ་རྣམས་སོ། །རྣམ་རྟོག་བག་ཆགས་ཀྱི་ལུས་ལ་དབྱེ་ན་དྲུག་སྟེ། རིགས་དྲུག་ཐ་དད་པའི་ལུས་དང་། བག་ཆགས་རང་ཀ་མའི་ལུས་དང་། ཕྱེད་སྣང་ཉམས་མྱོང་གི་ལུས་དང་། སྤྲུལ་པ་སྒྱུ་མའི་ལུས་དང་། དྲན་པ་རྨི་ལམ་གྱི་ལུས་དང་། ཚད་ཕྱིན་འོད་གསལ་གྱི་ལུས་སོ། །རིགས་དྲུག་ཐ་དད་པའི་ལུས་ནི་བཞི་སྟེ། གདོས་བཅས་འབྱུང་བ་འདུས་པ་ཤ་ཁྲག་གི་ལུས་དང་། གཟུགས་མཛེས་འོད་ཀྱི་ལུས་དང་། སྣང་བཅས་སྟོང་པའི་ལུས་དང་། རིག་བྱེད་ཡིད་ཀྱི་ལུས་སོ། གདོས་བཅས་ནི་འབྱུང་བ་བཞི་ལས་དང་པོ་འཁྲུལ་བས་ཁ་དོག་དང་། བརྡའ་དང་སྐད་མི་མཐུན་པ་སྣ་ཚོགས་པ་དང་། འདོད་པ་ཁམས་ཀྱི་སེམས་ཅན་གྱི་ལུས་འགའ་སྟེ། ཐོག་མ་ཡང་འབྱུང་བ་བཞི་ལས་གྲུབ་ཅིང་སྐྱེ་ལ། ཐ་མ་ཡང་འབྱུང་བས་འཇིག་ཅིང་ཡལ་བ་ཡིན་ཏེ། མི་དང་ལྷ་རིགས་དྲུག་དང་ལྷ་མིན་རྣམས་ཀྱི་ལུས་ཡིན་ཏེ། ངན་སོང་གསུམ་མ་གཏོགས་པའི་འདོད་ཁམས་ཀྱི་སེམས་ཅན་གྱི་ལུས་ཡིན་ནོ། །གཟུགས་མཛེས་འོད་ཀྱི་ལུས་ནི། གཟུགས་ཁམས་ཀྱི་ལྷ་རྣམས་ལ་འོད་ཀྱི་ལུས་ཡོད་པའོ། །དེ་ཡང་ཐོག་མ་འོད་ལས་གྲུབ་པས་བར་དུ་འོད་ལྔ་ལ་བརྟེན། ཐ་མ་ཡང་འོད་ཀྱིས་འཇིག་ཅིང་འོད་ཉིད་ཡལ་བའོ། །སྣང་བཅས་སྟོང་པའི་ལུས་ནི། ཐོག་མ་བསམ་གཏན་ལ་ཆགས་ཤིང་འཛིན་པས་འཁྲུལ་ཏེ། འདུ་ཤེས་ཙམ་པོ་སྟོང་པ་ལྟར་སྣང་གི་ལུས་དང་། སྐྱེ་མཆེད་ཅེས་བྱ་བ་དེ་དབང་པོ་མཐའ་ཡས་པ་དང་བཅས་པ། བསམ་གཏན་གྱི་ལྷའི་ལུས་ཏེ། བར་དུ་སྟོང་པ་ལ་གནས་ཐ་མར་སྟོང་པར་ཡལ་བའོ། །རིག་བྱེད་ཡིད་ཀྱི་ལུས་ནི་ཐོག་མ་འགྱུ་བྱེད་སྣ་ཚོགས་པ་ལས་འཁྲུལ་ཏེ། སྲིད་པ་བར་མ་དོ་དང་། ཡི་དྭགས་ཕལ་མོ་ཆེའི་ལུས་ཏེ། དེ་ཡང་དང་པོ་ཡང་ཡིད་ཀྱིས་བསྐྱེད་ཅིང་། བར་དུ་ཡང་ཡིད་ལ་གནས། ཐ་མ་ཡང་ཡིད་ཀྱིས་འཇིག་ཅིང་དེ་གཉིས་ལས་ཡལ་བའོ། །སེམས་ཅན་དམྱལ་བ་འགའ་ལ་ནི་ཚོར་བའི་ལུས་སུ་ཡོད་པས་སྡུག་བསྔལ་ཉམས་སུ་མྱོང་ལ། རེག་པའི་ལུས་སུ་མེད་པ་ཤ་ཁྲག་རང་ག་མ་མེད་པ་ཡང་ཡོད་དོ། །བག་ཆགས་རང་ཀ་མའི་ལུས་ནི་ཕུང་པོ་ལྔ་གཅིག་ལ་འདུས་པའོ། །ཕྱེད་སྣང་ཉམས་མྱོང་གི་ལུས་ནི་སྐལ་ལྡན་གྱིས་ཉམས་སུ་བླངས་པས་བག་ཆགས་བརྟན་པ་ལས་བྱུང་ཏེ། རང་གི་རྣམ་པ་སྐབས་སུ་ན་བུན་ལྟར་སྣང་བ་དང་། རེས་རླངས་པ་ལྟར་དང་། རེས་ཟང་ཐལ་དུ་སྣང་བའི་དུས་ན་ཡིན་ནོ། །སྤྲུལ་པའི་ལུས་ནི་བེམ་པོ་ལས་ལུས་སུ་གྱུར་པ་དང་། རང་བཞིན་མེད་པ་ལས་ལུས་སུ་གྱུར་པའོ། །བེམ་པོ་རིས་སུ་བྲིས་པ་ལ་སོགས་པ་ལག་གི་འདུ་བྱེད་ཀྱིས་བྱས་པའོ། །རང་བཞིན་མེད་པ་ནི་སངས་རྒྱས་ཀྱིས་སྤྲུལ་པའི་ལུས་ཀྱིས་སེམས་ཅན་གྱི་དོན་བྱེད་སེམས་དཔའ་དང་བཅས་པ་དང་། སྤྲུལ་པ་སྒྱུ་མའི་སྦྱོར་སྔགས་ལ་སོགས་པས་བྱས་པའི་སེམས་པ་མེད་པ་ཉིད། དྲན་པ་རྨི་ལམ་གྱི་ལུས་ནི། རྨི་ལམ་ན་ལུས་ཐ་དད་པར་མཐོང་བ་དང་། རང་གིས་ཐ་དད་པར་སྤྲུལ་པ་ལ་སོགས་པའོ། །ཚད་ཕྱིན་འོད་གསལ་གྱི་ལུས་ནི། རྒྱུའི་ལུས་དང་འབྲས་བུའི་ལུས་སོ། །རྒྱུ་ནི་རིག་པ་ཚད་ལ་ཕེབས་པའི་ཚེ་རྡོས་བཅས་ཀྱི་སྣང་བ་འགགས་ཏེ། འོད་གསལ་ཟང་ཐལ་དུ་མཐོང་བའོ། །འབྲས་བུ་ནི་སྤྲུལ་སྐུ་དང་། ལོངས་སྐུ་དང་། ཆོས་སྐུ་དང་ལུས་ཀྱི་མཐའོ། །དེ་ལྟར་བྱེ་བྲག་ཐ་དད་པར་ཕྱེ་བས་བག་ཆགས་ཀྱི་ལུས་ལ་བཅུ་གཉིས་ཀྱིས་བསྟན་པའོ། །ཡེ་ཤེས་སྒྱུ་མའི་ལུས་ནི་ཆོས་ཉིད་ཀྱི་བར་དོ་སྟེ། འོད་ཀྱི་ལུས་དང་། ཐིག་ལེའི་དང་། སྐུ་སྣ་ཚོགས་པའི་དང་། སྣང་བ་ལ་རང་བཞིན་མེད་པའི་དང་། གསལ་བ་ལ་བདག་མེད་པ་དང་། འོད་གསལ་བ་ལ་ཡེ་ཤེས་ཀྱི་ཞལ་ཕྱག་དང་བཅས་པའོ། །དེ་ཡང་སྣང་བའི་ཆ་ནས་ལུས་ཡིན་ལ། གསལ་བའི་ངོས་ནས་ཡེ་ཤེས་ཡིན། རང་བཞིན་མེད་པའི་ཆ་ནས་སྒྱུ་མ་ཞེས་བྱ་བ་ཡིན་ནོ། །རིན་པོ་ཆེ་གསང་བའི་ལུས་ནི་རྩལ་སྣ་ཚོགས་སུ་སྣང་ལ། ཡོན་ཏན་ལྷུན་གྲུབ་དུ་རྫོགས་པའོ། །ངོ་བོ་འགགས་པ་མེད་པའི་བྱུང་ཚུལ་དུ་གནས་པ་སྟེ། འཆར་ལུགས་བརྒྱད་དང་ཐིམ་ལུགས་བརྒྱད་ལ་སོགས་པའི་བདག་ཉིད་ཆེན་པོར་བཞུགས་པས་ཏེ། དེ་ལ་རོལ་པ་འགག་མེད་དུ་ཤར་བ་དང་། གཏན་ཚིག་སྟོང་གསལ་དུ་ཁྱབ་པ་དང་། ཡོན་ཏན་ལྷུན་གྲུབ་ཏུ་རྫོགས་པས་ན་རིན་པོ་ཆེ་ཡིན་ལ། ཐེག་པ་ཐུན་མོང་པ་རྣམས་ཀྱིས་སངས་རྒྱས་ཀྱི་སར་འཇོག་པས་ན་སྐུ་ཡིན། མདོར་ན་བསོད་ནམས་རྫོགས་པའི་ཆོས་ཀྱི་སྐུ་ཡིན་པས་ལུས་ཞེས་བྱའོ། །ལུས་དེ་དག་གི་བྱེད་པའི་ལས་ནི། རྣམ་རྟོག་བག་ཆགས་ཀྱིས་ཤ་ཁྲག་གི་འདུ་བྱེད་དུ་བྱེད། དུ་མར་བྱེད། བག་ཆགས་རང་ཀ་མས་ཉེ་བར་ལེན་པ་བྱེད། སྤྲུལ་པས་སྣང་བ་འགྲིབ་པར་བྱེད། དྲན་པ་རྨི་ལམ་གྱི་བག་ཆགས་སྡུད་པར་བྱེད། ཚད་ཕྱིན་འོད་གསལ་གྱིས་འབྱུང་བ་རྣམས་དག་པར་བྱེད་དོ། །ཡེ་ཤེས་སྒྱུ་མས་ནི་བག་ཆགས་ཀྱི་མཚམས་སྦྱོར་བ་དང་། དེ་ཉིད་བརྟན་པ་དང་མི་སྟོན་པ་དང་། མཚམས་ལེན་པ་དང་། བག་ཆགས་ཀྱི་མཚམས་ཉེ་བར་ཡོད་པར་བྱེད་པའོ། །རིན་པོ་ཆེ་གསང་བའི་ལུས་ཀྱིས་མངོན་པར་ཤེས་པ་དྲུག་དང་། རྒྱུན་གྱི་ཏིང་ངེ་འཛིན་དང་། མི་བརྗེད་པའི་གཟུངས། རང་བཞིན་གྱི་བསམ་གཏན་རྣམས་སུ་བྱེད་པའོ། །དེ་དག་གི་ཡུལ་ནི་རྣམ་རྟོག་བག་ཆགས་ཀྱི་ཡུལ་འཁྲུལ་སྣང་སྣ་ཚོགས་པ་ཡིན། ཡེ་ཤེས་སྒྱུ་མའི་ཡུལ་རྣམ་པར་དག་པའི་སྣང་བ་ཡིན། རིན་པོ་ཆེའི་བདེ་བར་གཤེགས་པའི་སྣང་བ་རྣམས་ཡིན། དེ་དག་གི་རྟེན་ནི་རྣམ་རྟོག་བག་ཆགས་ཀྱི་རྟེན་ལུས་ཀྱི་ལྟེ་བར་རྩ་ཐམས་ཅད་རོ་གཅིག་ཏུ་འདུས་པས་མདུད་པའི་དཀྱིལ་ན་འབྱུང་བ་འདུས་པའི་སྙིང་པོ་མིག་དཀར་ནག་ཕྱེད་པར་གནས་པ་ལ་བརྟེན་པའོ། །ཡེ་ཤེས་སྒྱུ་མ་ནི་མིག་གི་ཕུག་ན། འོད་ཐམས་ཅད་ཀྱི་སྙིང་པོ་འདུས་པ་སྐུ་ལྔ་ཉུངས་འབྲུ་ཙམ་ལས་སྤྱན་ཕུལ་ཐག་ཙམ་དུ་གནས་པ་ལ་བརྟེན་པའོ། །ལུས་དེ་དག་གི་སྣང་ལུགས་ནི། རྣམ་རྟོག་བག་ཆགས་ནི་དབང་པོ་དང་ཡན་ལག་དང་ཉིང་ལག་དང་བཅས་པ་དང་། ཕུང་པོ་ལྔའི་རང་བཞིན་དུ་སྣང་། ཡེ་ཤེས་སྒྱུ་མ་ནི་འོད་དང་ཐིག་ལེ་དང་དབྱིངས་དང་རིག་པ་དང་སྐུ་སྣ་ཚོགས་པར་སྣང་བའོ། །རིན་པོ་ཆེ་ནི་ཡོན་ཏན་གྱི་བྱུང་ཚུལ་དུ་མ་དང་། སྐུའི་འཆར་སྒོ་དུ་མ་དང་། རང་སྣང་ཁ་དོག་དུ་མ་དང་། མཛད་པའི་ཕྲིན་ལས་དུ་མར་སྣང་བའོ། །དེ་དག་ལས་འགྱུ་བྱེད་ཀྱི་ངོ་བོ་གང་འགྱུ་བ་ནི། རྣམ་རྟོག་ལས་བྱུང་ཚོར་སྣ་ཚོགས་པ་གཟུང་བ་དང་འཛིན་པ་དང་། ལས་སྣ་ཚོགས་པ་དང་ཡེ་ཤེས་ཀྱི་ངོ་བོ་དག་འགྱུ་བ་ཡིན་ནོ། །ཡེ་ཤེས་སྒྱུ་མ་ལས་རླུང་དང་ཡེ་ཤེས་དང་སྐུ་དང་མཚན་དང་དཔེ་བྱད་དུ་བཅས་པ་རྒྱུ་བས་ཏེ། དབུགས་མེད་པའི་འགྱུ་བ་དང་། སྲོག་མེད་པའི་སྐུ་ཞེས་བྱའོ། །རིན་པོ་ཆེའི་རྩལ་སྣ་ཚོགས་དང་། རོལ་པ་སྣ་ཚོགས་དང་། འབྱུང་ཚུལ་མ་འགགས་པ་དག་ཏུ་འགྱུ་བའོ། །དེ་ཀུན་གྱི་རྟགས་ནི་རྣམ་རྟོག་གི་རྨི་ལམ་ཡིན། ཡེ་ཤེས་ཀྱི་རྟགས་སྒྲོན་མ་ཡིན། རིན་པོ་ཆེའི་དབྱིངས་རྣམ་པར་དག་པའི་སྒྲོན་མའོ། །དེ་དག་སོ་སོའི་ངོ་བོ་ནི་རྣམ་རྟོག་བག་ཆགས་ཀྱིས་འབྱུང་བ་བཞིའི་བདག་ཉིད། ལྷུམས་སུ་ཞུགས་པ་དང་། ལྷུམས་ན་གནས་པ་དང་། བཙས་པ་དང་། འབྱུང་བ་དེ་དག་གཟུག་པ་དང་བྱེར་བ་དང་། སྙོམས་པ་དང་། འཁྲུག་པར་གནས་པ་དང་། རྒས་པ་དང་། ན་བ་དང་། འཆི་བའི་བདག་ཉིད་དུ་གནས་པའོ། །ཡེ་ཤེས་སྒྱུ་མ་ནི་རིག་ལྔ་དང་། ཡབ་དང་། ཡུམ་ལྔ་དང་། སྐུ་ལྔ་ཡེ་ཤེས་ལྔ་དང་། འོད་ད ང་ཐིག་ལེ་དང་ཚོམ་བུའི་བདག་ཉིད་ཆེན་པོར། མཚན་དང་དཔེ་བྱད་དང་བཅས་པར་བཞུགས་སོ། །རིན་པོ་ཆེ་གསང་བའི་ནི་འཆར་སྒོ་བརྒྱད་དང་། ཐིམ་ལུགས་བརྒྱད་དང་། ཡོན་ཏན་ལྷུན་གྲུབ། རྩལ་ལྷུན་གྲུབ། རོལ་པ་ལྷུན་གྲུབ། སྣ་ཚོགས་ལྷུན་གྱིས་གྲུབ་པའི་བདག་ཉིད་ཆེན་པོར་བཞུགས་སོ། །ལུས་དེ་དག་ཕྱི་ནང་གི་འབྱུང་བ་དང་སྦྱར་ན། རྣམ་རྟོག་བག་ཆགས་ནི་སེམས་ཀྱི་བརྟེན་པའི་གནས་ཡངས་པ་ཡིན་པས་ནམ་མཁའ་ལ། ཁྱབ་བྱེད་ཀྱི་གོ་སྐབས་འབྱེད་ཅིང་ངོ་བོ་སྟོང་པར་གནས་པས་སེམས་ཡིན་ལ། ཡེ་ཤེས་སྒྱུ་མ་སྣང་ལ་རང་བཞིན་མེད་པར་གནས་པས་ན་ནམ་མཁའ་ཡིན་ལ། སྟོང་པ་བདག་ཏུ་མ་གྲུབ་པས་སེམས་སོ། །རིན་པོ་ཆེ་གསང་བ་ནི་སྣ་ཚོགས་འབྱུང་བཞིར་པས་གྱུར་པས་ནམ་མཁའ་ཡིན་ལ། ཡུལ་དངོས་པོ་ལས་འདས་པས་སེམས་ཡིན་ནོ། །ལུས་དེ་དག་གི་འགྱུ་བྱེད་གཅད་པའི་མན་ངག་ནི། རྣམ་རྟོག་བག་ཆགས་ཀྱི་ལུས་ལ་སྒོ་ལྔའི་ཞེས་པ་རང་ལོག་སྟེ། དུས་གསུམ་གྱི་ཞེན་པ་རང་ལོག་པས་བག་ཆགས་ཀྱི་འགྱུ་བ་རང་ཆོད་དོ། །ཤིང་གི་རྣམ་པ་ལ་བརྟེན་ནས་བསླབས་པས། དུས་བཞི་མཉམ་པར་སྦྱོར་བའི་བསམ་གཏན་ལ་རྒྱུན་དུ་གནས། འཁྲུལ་རྐྱེན་དུ་མར་འཛིན་པ་རྣམས་འགགས། ཡེ་ཤེས་རང་ངོ་ལ་གནས་པ་ཡིན། སྔོན་དུ་ལུས་གནད་ལ་ཕབ་པ་ལས་བྱུང་བའོ། །དེ་ལྟར་བསླབ་ཐབས་དུ་མ་ལ་བརྟེན་ནས་གོམས་པས་རྣམ་པར་རྟོག་པའི་འགྱུ་བ་རང་ཆོད་དེ། སྐུ་ལྔའི་སྣང་ལུགས་རྣམས་དུས་ཐམས་ཅད་དུ་འདུ་འབྲལ་མེད་པར་གནས་པའོ། །དེ་ཡང་སྔོན་དུ་མིག་གཅུན་པ་ལས་བྱུང་བའོ། །འདི་ལྟར་སྣང་བ་ཐམས་ཅད་གཅེར་སྣང་གཅེར་བཞག་གཅེར་གྲོལ་དུ་བཞག་པས། སྐྱོན་དུ་སྣང་བའི་འགྱུ་བ་རང་འགགས་ཏེ། ཐམས་ཅད་ཡོན་ཏན་དུ་ཤར་བས། རྣམ་པར་རྟོག་པ་བཙལ་དུ་མི་རྙེད་པ། ཡེ་ཤེས་རང་གི་ངོ་བོ་ལ་རྒྱུན་དུ་གནས་པ། རིན་པོ་ཆེའི་ལུས་སུ་བྱུང་བའོ། །ལུས་དེ་དག་ལ་གོམས་པའི་འབྲས་བུ་ལ། དེ་ཡང་ལུས་རང་གི་གནས་ལུགས་སུ་ཤེས་ཤིང་དེ་ཉིད་ལ་གོམས་པས། འབྲས་བུ་སྤྲུལ་པའི་སྐུའི་བདག་ཉིད་ཆེན་པོར་རང་གིས་རང་ཤེས་པས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་ཕྱུང་ནས། སྐྱེ་བ་གཅིག་གིས་ཐོགས་ཏེ་སངས་རྒྱའོ། །ཡེ་ཤེས་སྒྱུ་མའི་ལུས་ཀྱི་གནས་ལུགས་ཤེས་ཤིང་དེ་ཉིད་ལ་གོམས་པས། འབྲས་བུ་ལོངས་སྐུའི་བདག་ཉིད་ཆེན་པོར་རང་གིས་རང་ཤེས་ཏེ་བར་མ་དོ་ལ་སངས་རྒྱ་བ་ཡིན་ནོ། །རིན་པོ་ཆེ་གསང་བའི་ལུས་ཀྱི་གནས་ལུགས་ཤེས་ཤིང་དེ་ཉིད་ལ་གོམས་པས། འབྲས་བུར་ཆོས་སྐུ་རང་གིས་རང་ཤེས་ནས་སྣང་བ་འདི་ཉིད་ལ་ཟག་བཅས་རང་ཡལ་དུ་འཚང་རྒྱའོ། །ལུས་དེ་དག་ཀྱང་ཀུན་གཞི་རྣམ་པར་རྟོག་པ་ཉིད་ལས་སྤྲུལ་པས་ན་ཀུན་གཞིའི་རྣམ་པར་རྟོག་པའི་ཞེན་པ་རང་འགག་པས། ཕྱིས་ཉེ་བར་ལེན་པའི་ལུས་རིན་པོ་ཆེ་གསང་བའི་སྦུབས་སུ་ནུབ་ནས། མཚན་མར་འཛིན་པ་རྣམས་ལས་རང་གྲོལ་ནས། ཆོས་ཉིད་ཟད་པའི་སྣང་བ་མཐོང་ནས་སླར་མི་ལྡོག་པའོ། །དེ་ལྟར་ལུས་ཀྱི་བྱེ་བྲག་དེ་དག་ལ་ཆོས་ཀྱི་རྣམ་གྲངས་ནི། ལུས་སྤྱིའི་ངོ་བོ་དང་གཅིག །ངེས་ཚིག་དང་གཉིས། དབྱེ་བ་སོ་སོ་རང་གི་མཚན་ཉིད་དང་གསུམ། བྱེད་པའི་ལས་དང་བཞི། ཡུལ་དང་ལྔ། རྟེན་པ་དང་དྲུག །སྣང་ལུགས་དང་བདུན། དེ་དག་ལས་འགྱུ་བྱེད་ཀྱི་ངོ་བོ་གང་འགྱུ་བ་དང་བརྒྱད། ལུས་དེ་དག་ལ་སོ་སོའི་ངོ་བོ་དང་དགུ། ཕྱི་ནང་གི་འབྱུང་བ་དང་སྦྱར་ལུགས་དང་བཅུ་ཐམ་པ། འགྱུ་བྱེད་ཇི་ལྟར་གཅད་པའི་མན་ངག་དང་བཅུ་གཅིག །འབྲས་བུ་དང་བཅུ་གཉིས་ཀྱིས་བསྟན་པའོ། །དེ་ལྟར་ལུས་ཀྱི་བྱེ་བྲག་དུ་མ་བསྟན་ཀྱང་། ལུས་འདི་ནི་ད་ལྟའི་འབྱུང་བ་ལས་གྲུབ་པའི་ལུས་འདི་ལ་རྟགས་འདི་ཀུན་འབྱུང་བའོ། །དེ་ལ་ཡང་ཚེ་སྔ་མ་ལ་སྔོན་དུ་འབྱོངས་པའི་ཚད། ད་ལྟའི་ལུས་འདི་ལ་བཟུང་སྟེ། སྔོན་དུ་འགྱུ་བ་གཅད་པའི་མན་ངག་གོམས་པས་ནི། འདིར་ནི་ཐབས་ལས་བྱུང་བའི་བདེ་བས་ལུས་ངག་ཡིད་ཀྱི་འཁྲུལ་པ་རྒྱུན་གཅད་ནས། ཤེས་རབ་ལས་བྱུང་བའི་བདེ་བས་སེམས་ཀྱི་འཁྲུལ་བ་རྒྱུན་གཅད་ནས། ཆོས་ཀྱི་དབྱིངས་སྟོང་པ་ཉིད་འདུས་མ་བྱས་པར་གཤེགས་པའོ། །དེ་ཡང་གཤེགས་ལུགས་ཇི་ལྟར་གཤེགས་ན། མཛད་པའི་ཕྲིན་ལས་མ་ལུས་པ་མཛད་ནས་གཤེགས་པ་དང་། མཛད་པའི་ཕྲིན་ལས་ཕྱིས་འབྱུང་དུ་གཤེགས་པའོ། །དེ་ལྟར་ལུས་ཀྱི་མཚན་ཉིད་ཤེས་ཤིང་ལུས་ལ་གོམས་པས། སྐུ་གསུམ་གྱི་འབྲས་བུར་གྱུར་བ་ཡིན་པས། སྔོན་དུ་སྐལ་བ་དང་ལྡན་པ་དེ་སུས་འབྱོངས་པ་དེའི་དཔྲལ་བའི་དབྱིངས་སུ་ཡང་དག་པའི་རྟགས། དུང་ནི་གཡས་སུ་འཁྱིལ་པ་དང་འདྲ་བའི་རི་མོའམ་འབུར་དུ་དོད་པ་དག་བྱུང་བ་ནི་སྤྲུལ་སྐུ་ལ་འབྱོངས་པའི་རྟགས་ད་ལྟའི་ལུས་ལ་ཤར་བ་ཡིན་ནོ། །དེ་ཡང་སྔར་སྦྱངས་པའི་འཕྲོ་ལ་བར་ཆད་པ་ད་ལྟའི་ལུས་ལ་སྨིན་པའོ། །ཡང་ལོངས་སྐུ་ལ་འབྱོངས་པར་བྱས་པས། ཚེ་སྔ་མ་བར་ཆད་པ་ད་ལྟའི་ལུས་ཀྱི་ཡང་དཔྲལ་བའི་སྨིན་མའི་བར་ནས་ཡར་མདུང་རྩེ་མོ་གསུམ་པ་དང་འདྲ་བའི་གཉེར་མ་གྱེན་ལ་འགྲེང་བ་གསུམ་རི་མོའམ་འབུར་དུ་གང་རུང་བ་འབྱུང་ན་ལོངས་སྐུ་ལ་འབྱོངས་ཏེ། འདི་ལ་བར་མ་ཆད་པར་ཉམས་སུ་བླངས་ན་ལོ་གསུམ་གྱིས་གྲོལ་བ་ཡིན་ནོ། །གལ་ཏེ་གཅིག་བྱུང་ན་སྐྱེ་བ་གཅིག་གིས་ཐོགས། གཉིས་བྱུང་ན་སྐྱེ་བ་གཉིས་ན་གྲོལ་བ་ཡིན་ནོ། །འདི་ལ་འབད་པ་མ་བྱས་ན་གོལ་སའི་གནས་སུ་འགྱུར་བ་ཡིན་ནོ། །གལ་ཏེ་འདི་ལ་རྟགས་འདི་དག་ཡོད་ཀྱང་ཆོས་མི་སྤྱོད་ན། སྔ་མ་སྦྱངས་པའི་ཡོན་ཏན་འདི་ལ་རྫོགས་ཏེ། དེའི་མན་ངག་ལ་སྐྱོན་ནམ་སྔགས་ཀྱི་དམ་ཚིག་ལ་སྐྱོན་བྱུང་བ་ཡིན་པས། རྟགས་འདི་དག་དང་ལྡན་ཡང་སེམས་ཅན་དམྱལ་བར་འགྲོ་བ་ཡིན་ནོ། །རྟགས་དང་ལྡན་པའི་སྐྱེས་བུའི་ད་ལྟའི་ཆོས་ལ་གནས་པ་ནི། སྔོན་དུ་བརྩོན་འགྲུས་ཀྱི་བར་ཆད་པ་ལས་ད་ལྟ་སྨིན་པ་སྟེ། འདི་ནི་ཆོས་སྤྱོད་ན་གྲོལ་བར་ངེས་སོ། །དེ་བཞིན་དུ་ཡང་ཆོས་ཀྱི་སྐུ་ལ་ཚེ་སྔ་མ་སྦྱངས་པའི་སྐྱེས་བུའི་དཔྲལ་བ་ལ་ཡི་གེ་ཨཱོཾ། རི་མོར་བྱུང་ན་དམ་ཚིག་གི་ཉེས་པ་ཡོད་པས་བཤགས་པའི་ལས་བྱས་པས་འགྲུབ། དེ་ལྟར་མ་བྱས་པའམ་ཆོས་དང་སྒོ་འཛོལ་ནས་མ་སྤྱད་ན་ནི་དམྱལ་བར་ལྷུང་བར་ངེས་སོ། །ཡང་ན་ཤ་ལས་རང་འབུར་དུ་བྱུང་ན། བརྩོན་འགྲུས་ཀྱི་བར་ཆད་པ་ཡིན་པས་ཆོས་དང་འཕྲད་པ་ཙམ་གྱིས་སངས་རྒྱའོ། །དེ་ལྟར་རང་བཞིན་གྱིས་སུ་ལ་ཡང་རུང་སྟེ། བྱ་དང་རི་དྭགས་ལ་སོགས་པ་ལ་འོང་བ་ཡང་ཡོད་དེ། འདི་ཀུན་ནི་སྔོན་དུ་བླ་མ་ལ་མ་གུས་པས་བར་ཆད་པ་ཡིན་ཏེ། ཡུལ་མཐའ་འཁོབ་ཏུ་སྐྱེས་ནས། དེ་ནས་དམྱལ་བར་འགྲོ་བ་ཡིན་ནོ། །རྟགས་འདི་གསུམ་སུ་ལ་འབྱུང་བའི་མི་དེས་ནི། ཚེ་སྔོན་དུ་སངས་པ་ཉོན་མོངས་པའི་རང་བཞིན་སངས། སྐུ་དང་ཡེ་ཤེས་སུ་རྒྱས་པའོ། །སྐུ་གསུམ་ལ་སྦྱངས་པ་ཡིན་པས། ད་ཡང་ཚེ་འདི་ཉིད་ལ་ལུས་ཀྱི་འགྱུ་བ་གཅད་པའི་མན་ངག་ལ་སྦྱངས་པའི་རྣལ་འབྱོར་པ་དེ་ནི། སངས་རྒྱས་ཐམས་ཅད་ཀྱི་སྐུ་གསུམ་དང་དབྱེར་མི་ཕྱེད་པར། ད་ལྟའི་ལུས་འདི་ལ་གདེང་དང་ལྡན་པའི། དྲོད་ཚད་ཕེབས་པས་སངས་རྒྱའོ། །རང་དུས་ནི། ཚེ་འདི་ལ་རྟོགས་པའི་ཚེ་ནི་གཉིས་ན་སངས་རྒྱས་ཀྱི་འབྲས་བུ་ཐོབ་པར་འགྱུར་བ་ཡིན་ནོ། །གལ་ཏེ་ཚེ་འདི་ལ་ཆོས་མ་སྤྱད་ཅིང་བར་ཆད་ན་གོང་གི་སྐྱོན་གཉིས་པོ་ཡིན་པས། དམ་པའི་དོན་ལ་མ་ཞུགས་པར་ལེ་ལོས་གཡེངས་ན་གོལ་སར་ལྷུང་ངོ་། །འདི་ཉིད་ལས་བསྒོམ་པ་ཉིད་ལས་རབ་ཏུ་བརྩོན་པ་ནི་རྟགས་དེ་ལྟར་བྱུང་བའི་མི་དེས། ཚེ་འདི་ཉིད་ལ་རབ་ཏུ་འབད་པ་ཞེས་སོ། །ཞེས་དེ་དག་གིས་གང་ཟག་གི་ལུས་ལ་སངས་རྒྱ་བའི་སྐུ་གསུམ་གྱི་རྟགས་གསུམ་བསྟན་ནས། ད་ནི་ལུས་ལ་སངས་རྒྱས་ཀྱི་གསུང་ལ་སྔ་མ་སྦྱངས་པའི་རྟགས་དྲུག་བསྟན་པ་ནི། སངས་རྒྱས་ཀུན་གྱི་གསུངས་ལ་ནི། །ཞེས་པ་ལ་སོགས་པས་བསྟན་ཏེ། སངས་རྒྱས་ཀྱིས་ནི་འདས་པ་དང་། ད་ལྟར་དང་། མ་འོངས་པ་ཀུན་གྱི་གསུངས་ལ་ནི། ཚེ་སྔ་མ་ལ་སྦྱངས་པའི་རྟགས་ནི། སྔོན་དུ་སྦྱངས་པ་བྱས་ནས་འབྱོངས་པའི་ཚད་དང་མ་རྙེད་པའི་མི་དེ་ཉིད་སྔ་མ་ལ་སྐལ་བ་དང་ལྡན་པ་ལ། ལུས་ལ་རྟགས་འདི་ལྟ་བུ་མི་དེའི་མགྲིན་པའི་གཡས་སུ་སྐྱེས་པ་རྣམས་ལ་འོང་པ་ཡིན་ལ། བུད་མེད་རྣམས་ལ་གཡོན་དུ་པདྨ་འདབ་མ་བརྒྱད་པའམ་རི་མོ་འབུར་དུ་བྱུང་ན། འདིས་ནི་སྔོན་དུ་ལུས་ཀྱི་འགྱུ་བ་བཅད་པའི་མན་ངག་ལ་བརྟེན་པའི་བསམ་གཏན་ལས་བྱུང་བ་ཡིན་ཏེ། ཚེ་འདི་ལ་ལུས་ཀྱི་བསམ་གཏན་དང་ངག་ལ་བརྟེན་པ་ལ་སྦྱངས་ན། སྣང་བ་མཐའ་ཡས་ཀྱི་སངས་རྒྱས་སུ་འགྱུར་བ་ཡིན་ནོ། །གལ་ཏེ་པདྨ་དེའི་འདབ་མ་ལ་ཆེ་ཆུང་འདུག་ན་ཚེ་སྔ་མ་ལ་རྡོ་རྗེའི་སྤུན་ལ་དམ་ཚིག་ཉམས་པ་ཡིན་པས་གསང་སྔགས་ཀྱི་རྒྱུད་བཀླག །འདབ་མ་བཞི་པར་བྱུང་ན་བླ་མའི་ངག་བཅག་པས་བར་ཆད་པ་ཡིན་ནོ། །འདི་ལ་བླ་མ་ལ་གསོལ་བ་གདབ། རི་མོ་པད་འདབ་ཡོ་ན་ཐུགས་ཀྱི་དམ་ཚིག་ཉམས་པ་ཡིན་པས། རྣལ་འབྱོར་བ་ཉམས་སྐྱོང་པ་རྣམས་ལ་བཤགས། དེའི་ལྟེ་བ་མ་གསལ་ན་སྔོན་གྱི་མན་ངག་ལ་སྐྱོན་དང་ལྷག་ཆད་བྱུང་བ་ཡིན་པས་བསྐང་བའི་ཆོ་ག་བྱའོ། །འདི་ལ་དེ་དག་མ་བྱས་ན་གོལ་སར་འགྱུར་རོ། །འདི་ལ་དེ་དག་བྱས་ཤིང་དགོངས་པ་ལ་གནས་ན་སྣང་བ་མཐའ་ཡས་ཀྱི་སངས་རྒྱས་སུ་འགྱུར་བ་ཡིན་ནོ། །ཡང་ན་མགྲིན་པར་དུང་གཡས་སུ་འཁྱིལ་པའམ་འབུར་དུ་བྱུང་ན་དེ་སྐྱེས་པ་བུད་མེད་ལ་ལོག་པའམ། བུད་མེད་ཆོས་ཀྱི་སྒོ་ལས་ལོག་ན་དམ་ཚིག་གི་འཁྲུགས་ཀྱིས་བར་ཆད་པས་འདི་ལ་བཤགས་པ་རྒྱ་ཆེན་པོ་བྱ། དེ་མཆུ་འཐུར་དུ་བྱུང་ན་བཀའ་ལ་རས་ཆོད་བྱས་པས་བར་ཆད་པ་ཡིན་པས་ཉེས་པ་བཤགས། གཡས་སུ་བྱུང་ན་བརྩོན་འགྲུས་ཆུང་བས་བར་ཆད་པ་ཡིན་པས་འདི་ལ་འབད་པ་ཆེར་བྱ། གཡོན་དུ་བྱུང་ན་བླ་མ་སྤོང་ལེན་བྱས་པ་ལས་བར་ཆད་པ་ཡིན་པས་འདི་ལ་ལུས་ཀྱི་བཤགས་པ་བྱའོ། །རྟགས་དེ་ཡོ་བར་མངོན་ན་སྔ་མར་སློབ་མ་ལ་ཆོས་ཀྱི་ཆ་ལག་རྫོགས་པར་མ་བྱས་པ་ལས་བར་ཆད་པས་ཚོགས་འཁོར་བྱའོ། །དེ་ལྟར་བྱས་ཤིང་ཆོས་ཀྱི་སྒོ་མ་ལོག་པར་སྤྱད་ན། རྡོ་རྗེ་མི་བསྐྱོད་པའི་སངས་རྒྱས་སུ་འགྱུར་རོ། །དེ་ལྟར་དུ་ཡང་མགྲིན་པ་དར་ལྕེ་འཕྱར་བ་ལྟ་བུའི་རི་མོའམ། འབུར་དུ་བྱུང་བ་ནི། སྔོན་དུ་གསུང་ལ་སྦྱངས་པའི་རྟགས་ཡིན་ཏེ། དར་གྱི་དབྱིབས་དེ་ལྕེ་གསུམ་པར་བྱུང་ན། གཞན་ལ་དབང་བསྐུར་པས་བར་ཆད་པ་ཡིན་ཏེ། དགེ་སློང་ལ་སྟོན་མོ་བྱས་ལ་བསྒྲུབས། ལྕེ་ལྔ་པའམ་དྲུག་པ་བྱུང་ན། བླ་མའི་ངག་ལན་དྲུག་བཅག་པ་ལས་བྱུང་བ་ཡིན་ནོ། །ཡི་གེ་བརྒྱ་པ་འབུམ་ཕྲག་ལྔས་བཤགས་པ་བསྒྲུབས། དེ་འཕྲེད་ཉལ་དུ་བྱུང་ན་སྔ་མ་ལ་ཆོས་ལ་རང་བཟོ་བྱས་པས་བར་ཆད་པ་ཡིན་པས། བྲི་བའི་ལས་ནུས་ཚད་བྱས་ལ་བསྒྲུབ་བོ། །དེ་ལྟར་བྱས་ནས་ཆོས་སྤྱད་ན་གོལ་སར་མི་འགྱུར་བར་རིན་ཆེན་འབྱུང་ལྡན་གྱི་སངས་རྒྱས་སུ་འགྱུར་རོ། །དེ་ལྟར་མ་བྱས་ཤིང་ཆོས་མ་སྤྱོད་ན་གོལ་སར་འགྱུར་རོ། །ཡང་སྐྱེས་པའམ་བུད་མེད་གང་རུང་ལ་མགྲིན་པ་ལ་ལྕགས་ཀྱུའི་རི་མོའམ་འབུར་དུ་བྱུང་བ་དེ་ནི་སངས་རྒྱས་ཀྱི་གསུང་ལ་སྔོན་དུ་སྦྱངས་པ་ལས་བྱུང་བ་སྟེ། མགོ་ཐུར་ལ་ལྟ་ན་བླ་མའི་ཡུམ་དང་དམ་ཚིག་གི་སེལ་ལས་བར་ཆད་པས་ཏེ། བཤགས་པའི་ལས་ཅི་རིགས་པར་བྱ། མགོ་གཡས་སུ་བྱུང་ན་ཚུལ་ཁྲིམས་འཆལ་བ་ལས་བར་ཆད་པས་དགེ་སློང་རང་ལོ་དང་མཉམ་པ་ལ་བཤགས། གཡོན་དུ་བྱུང་ན་སྔ་མ་དམ་བཅའ་ཉམས་པས་བར་ཆད་པ་ཡིན་པས་རང་གི་བླ་མའི་མདུན་དུ་བཤགས། གྱེན་དྲང་པོ་ལ་བྱུང་ན་བླ་མའི་མན་ངག་ལ་ཐེ་ཚོམ་སྐྱེས་པ་ལས་བར་ཆད་པ་ཡིན་ཏེ། རང་གི་བླ་མའི་སྤྱན་སྔར་བཤགས་སོ། །དེ་ལྟར་བྱས་ཤིང་ཆོས་སྤྱོད་ན་རྣམ་པར་སྣང་མཛད་རིགས་ཀྱི་སངས་རྒྱས་སུ་འགྱུར། ཡང་སྐྱེས་པའམ་བུད་མེད་གང་ཡང་རུང་བའི་མགྲིན་པར་རལ་གྲིའི་རི་མོའམ་འབུར་དུ་གྱུར་བ་དེས་ནི་སྔོན་དུ་སངས་རྒྱས་ཀྱི་གསུང་ལ་སྦྱངས་པའི་བར་དུ་ཉེས་པ་ཙམ་གྱིས་བར་ཆད་ནས་ལུས་བླངས་པ་ལས་བྱུང་བ་སྟེ། དེ་ཡང་རྩེ་མོ་ཐུར་ལ་བྱུང་ན་གཞན་གྱི་ཉམས་གྲིབ་ཀྱིས་གནོད་པས་བར་ཆད་པ་ཡིན་པས་བསྐང་བ་བྱ། གཡས་སུ་བྱུང་ན་ཉམས་པ་གཞན་དང་ལྷན་ཅིག་ཏུ་གནས་པས་བར་ཆད་པ་ཡིན་པས། གཅིག་པུར་གནས་པས་བསྒྲུབ། གཡོན་དུ་བྱུང་ན་གཞན་གྱིས་མ་དམིགས་པའི་རྫས་ལ་ལོངས་སྤྱད་པས་བར་ཆད་པ་ཡིན་པས་སྙིང་རྗེའི་ཡུལ་ལ་སྦྱིན་པ་གཏོང་། དབུས་སུ་བྱུང་ན་བླ་མའི་ཁས་བླངས་བཅག་པ་ལས་བར་ཆད་པ་ཡིན་པས། ད་ལྟའི་བླ་མ་ལ་བསྙེན་བསྐུར་བྱའོ། །དེ་ལྟར་བྱས་ཤིང་ཆོས་ཚུལ་དང་མཐུན་པ་སྤྱད་ན། འབད་པ་ཆེར་བྱ་མི་དགོས་པར་དོན་འགྲུབ་པའི་སངས་རྒྱས་ཀྱི་རིགས་སུ་འགྱུར་བ་ཡིན་ནོ། །ཡང་སྐྱེས་པའམ་བུད་མེད་གང་རུང་གི་མགྲིན་པར། ཡི་གེ་ཨའི་མཚན་མ་ནི། རི་མོ་ཉིད་དང་འབུར་དུ་ཡང་། སུ་ལ་ཡོད་པའི་སྐྱེས་བུའམ་བུད་མེད་དེས། སྔོན་དུ་སངས་རྒྱས་འདས་པ་དང་མ་འོངས་པ་དང་ད་ལྟར་བྱུང་བ་དང་ཀུན་གྱི་གསུང་ལ་ཡང་། འདི་ཡིས་སྔོན་དུ་སྦྱངས་པས། ཉེས་པའི་སྐྱོན་གྱིས་བར་ཆད་པ་ཡིན་པས་ན། ཡང་མགོ་ཐུར་ལ་བྱུང་ན། སྔོན་དུ་གཞན་གྱི་ནོར་མི་འདོད་པར་དམ་བཅས་ནས། སྐབས་སུ་འདོད་པས་ནོར་ལ་ཞུགས་ནས་བར་ཆད་པས། ད་འཁོར་གསུམ་ཡོངས་སུ་དག་པར་བྱས་ནས་བསྒྲུབ་བོ། །གཡས་སུ་ལྟ་ན་མཚམས་གཅད་པའི་བར་ཆད་པ་ལས་བྱུང་སྟེ་བསྐང་བའི་ལས་བྱའོ། །གཡོན་དུ་བྱུང་ན་ངག་བཅད་པ་ལས་བར་ཆད་པའི་སྐྱོན་ཏེ། ད་རྩ་གནས་ཀྱི་ཡི་གེའི་འཁོར་ལོ་བསྐོར་རོ། །སྟེང་དྲང་པོར་བྱུང་ན་དད་པ་ཅན་གཞན་ཞིག་གི་ཚོགས་བཅག་པ་ལས་བར་ཆད་པའི་ཉེས་པ། བླ་མ་ལ་ཡོན་དབུལ། དེ་ལྟར་བྱས་ཤིང་ཆོས་སྤྱད་ན་རྡོ་རྗེ་འཆང་གི་སངས་རྒྱས་སུ་ཚེ་འདི་མ་རྟོགས་པ་ཚེ་གཉིས་ཀྱིས་ནི་སངས་རྒྱས་ཐམས་ཅད་ཀྱི་གསུང་གཅིག་པུར་གྱུར་པ་དཔལ་རྡོ་རྗེ་འཆང་གི་ངེས་པའི་འབྲས་བུ་ཐོབ་པར་འགྱུར་རོ། །དེའི་ཕྱིར་ན་ལུས་ལ་གསུང་གི་རྟགས་ཡོད་ཀྱང་། ཚེ་འདི་ལ་ཡང་ཆོས་སྤྱོད་ཅིང་བར་ཆོད་མེད་པ་ཞེས་པ་ཡིན་པས། འདི་ལ་བར་མ་ཆོད་པའི་གསུང་། རྩ་གནས་ཀྱི་ཡིག་འབྲུ་བསྒོམས་པ་ནི་ཚེ་གཉིས་ན་གདོན་མི་ཟ་བར་འབྲས་བུ་ཐོབ་པར་ངེས་སོ། །ཞེས་གང་ཟག་ལུས་ལ་སངས་རྒྱས་ཀྱི་གསུང་ལ་སྔོན་དུ་སྦྱངས་པའི་རྟགས་བསྟན་ནས། ད་ནི་སངས་རྒྱས་ཀྱི་ཐུགས་ལ་སྦྱངས་པའི་རྟགས་ད་ལྟའི་ལུས་ལ་འབྱུང་བར་བསྟན་པ་ནི། སངས་རྒྱས་རྣམས་ཀྱི་ཐུགས་ལ་ཡང་། །ཞེས་པ་ལ་སོགས་པས་བསྟན་ཏེ། སངས་པ་ནི་རྣམ་རྟོག་ཐ་དད་དུ་འཛིན་པའི་དྲི་མ་དང་། དངོས་པོའི་ཞེན་པ་ཐ་དད་དུ་འཛིན་པ་དང་། འཁྲུལ་པའི་འདུ་བྱེད་རྣམས་རང་བཞིན་གནས་ལུགས་ཀྱིས་སངས་ལ། རྒྱས་པ་མི་རྟོག་པ་རང་གནས་ཀྱི་ཏིང་ངེ་འཛིན་གྱི་དགོངས་པ་བཞུགས་ཚུལ་ལ་རྒྱས་སོ། །དེ་ལྟར་རྒྱས་པ་ནི། རང་བཞིན་ལྷུན་གྲུབ་ཀྱི་སངས་རྒྱས་ཏིལ་འབྲུ་ལ་མར་གྱིས་ཁྱབ་པ་ལྟ་བུ་དང་། རྟོགས་པ་མངོན་དུ་གྱུར་པའི་སངས་རྒྱས་མེ་ལོང་གི་གཡའ་དག་པ་ལྟ་བུ་དང་། ཇི་བཞིན་པའི་སངས་རྒྱས་མན་ཤེལ་ལ་དྲི་མས་མ་གོས་པ་ལྟ་བུ་དང་། དེ་རྣམས་ཀྱི་ཐུགས་ཀྱི་མཁྱེན་རིག་གསལ་བའི་དང་། འཇིག་རྟེན་མཁྱེན་པའི་དང་། དྲན་རྟོག་ཟད་པའི་ཐུགས་གསུམ་ལ་ཡང་། སྐྱེས་པ་དང་བུད་མེད་གང་གིས། ཚེ་སྔོན་དུ་གོམས་པར་བྱས་པའི་སྐྱེས་པ་དང་བུད་མེད་སུས་སྦྱངས་པ་བྱས་པ་འདིའི་ལུས་ལ་རྟགས་ལྔ་པོ་འདི་དག་རྣམས། སྐལ་ལྡན་གང་ཞིག་གི་སྙིང་ཀའི་གནས་སུ་ནི། རྩེ་གསུམ་པའི་རྡོ་རྗེ་གྱེན་ལ་འགྲེང་པའི་རི་མོའམ། འབུར་དུ་བྱུང་བའི་མི་དེ་ནི་སངས་རྒྱས་ཀྱི་ཐུགས་ལ་གོམས་པས་ཏེ། དེ་ཡང་བརྩེ་མོ་ཐུར་ལ་བྱུང་ན་སྔགས་ཀྱི་བཟླས་པ་ལ་བར་ཆད་པ་ལས་བར་དུ་ཆད་པ་ཡིན་པས། ངག་བཅད་ཅིང་བསྐང་བའི་ལས་བྱའོ། །རྩེ་མོ་གཡས་སུ་བྱུང་ན་གཞན་མི་དད་པའི་དམ་ཚིག་བསྐང་བས་བར་ཆད་པ་ཡིན་པས། ད་ལྟ་ཨའི་འཁོར་ལོ་བསྐོར་རོ། །གཡོན་དུ་བྱུང་ན་འདོད་པས་ལོག་པ་ལ་བར་ཆད་པས་སྡོམ་པ་བླང་བའི་ལས་བྱས་ལ་བསྒྲུབ་བོ། །དྲང་པོར་གྱེན་ལ་བྱུང་ན་ལྟ་བའི་ཆོས་ཉིད་ལ་ཡིད་གཉིས་ཞུགས་པ་ལས་བར་ཆད་པ་སྟེ། གྲུབ་པའི་མཐའ་ལ་སྦྱངས་ལ་བསྒྲུབ་བོ། །གྱེན་ཞེས་པ་ནུ་མའི་སྟེང་དུ་བརྟག་གོ། །འདི་ནི་ཆོས་ཀྱི་སྐུའི་སངས་རྒྱས་སུ་འགྱུར་བ་ཡིན་ནོ། །ཡང་དེ་བཞིན་དུ་འཁོར་ལོ་རྩིབས་བཞི་པའི་རི་མོའམ་འབུར་དུ་སྙིང་གའི་གནས་སུ་བྱུང་བ་ལ་ནི། ཚེ་སྔ་མ་ལ་སངས་རྒྱས་ཀྱི་ཐུགས་ལ་སྦྱངས་པ་སྟེ། ཙཀྲ་དེ་གཡས་སུ་ཡོ་ན་ཐབས་ཀྱི་མན་ངག་ལ་མངོན་པར་ཞེན་པའི་སྐྱོན་ཡིན་བས། བརྡའ་ལ་གནས་པར་བྱའོ། །གཡོན་དུ་ཡོ་ན་ཤེས་རབ་ཡིད་དཔྱོད་དུ་གྱུར་པ་ལས་བར་ཆད་པ་ལས་བྱུང་བ་ཡིན་པས། ད་ལྟ་སྟོང་ཉིད་ལ་སྦྱང་ངོ་། །དེ་ལྟར་བྱས་ཤིང་འདི་ལ་ཆོས་ཚུལ་བཞིན་དུ་བསྒྲུབ་པ་ཙམ་གྱིས་ལོངས་སྐུའི་ཐུགས་ཀྱི་རིགས་ཀྱི་སངས་རྒྱས་སུ་འགྱུར་རོ། །ཡང་སྐྱེས་པའམ་བུད་མེད་གང་ཡང་རུང་བའི་སྙིང་གའི་གནས་སུ་རིམ་པ་དཀར་བ་དང་། དམར་བ་དང་སེར་བ་གསུམ་པའི་ཤའི་མདོངས་སུམ་བརྩེག་གི་རི་མོའམ། གཏིང་གི་བཀྲག་ཏུ་བྱུང་བ་ནི། དེ་ཡང་དཀར་བ་ཤས་ཆེ་ན་བརྩོན་འགྲུས་ཆུང་བས་བར་ཆད་དེ། དེ་ལ་རྒྱུད་བཀླག་པའི་ལས་བྱས་ལ་བསྒྲུབ་བོ། །དམར་བ་ཤས་ཆེ་ན་དབང་མ་རྫོགས་པར་སྒྲུབ་པ་བྱས་པའི་ཉེས་པས་དབང་བསྐུར་རྫོགས་པར་བྱའོ། །སེར་བ་ཤས་ཆེ་ན་རང་གི་ཡོན་ཏན་ལ་རློམ་པ་ཆེས་བས་ཉེས་པས། གཞན་ལ་བསྟོད་པའི་ལས་བྱས་ནས་བསྒྲུབས་པས། སྤྲུལ་པ་སྐུའི་ཐུགས་ཀྱི་རིགས་སུ་སངས་རྒྱ་བར་འགྱུར་རོ། །སྐྱེས་པའམ་བུད་མེད་གང་ཡང་རུང་བའི་སྙིང་ཀའི་གནས་སུ་རིན་པོ་ཆེའི་རྩེ་མོ་ཐུར་ལ་ལྟས་པ་བྱུང་ན། ཏིང་ངེ་འཛིན་ལ་གཡེང་བའི་བར་ཆད་ཞུགས་པས་བྱུང་སྟེ། ནགས་ཁྲོད་དུ་བརྟེན་པ་བྱ་བ་ཉིད་དམ། ངག་བཅད་ལ་བསྒྲུབ་བོ། །གཡས་སུ་ཡོ་ན་ལུས་ཀྱི་ལེ་ལོས་བར་ཆད་པས་ཆོས་སྤྱོད་པ་ཙམ། གཡོན་དུ་ཡོ་ན་ངག་གིས་བར་ཆད་པས་ཡི་གེ་བརྒྱ་པ་བརྗོད། སྟེང་དྲང་པོར་བྱུང་ན་ལྟ་སྒོམ་གྱི་མན་ངག་ཆུང་བའི་སྐྱོན་ཡིན་པས། ད་ལྟ་སྒོམ་ལ་གནས་པར་བྱའོ། །དེ་ལྟར་བྱས་ནས་ལས་མ་ལོག་ན་ངོ་བོ་ཉིད་ཀྱི་སངས་རྒྱས་རྣམས་ཀྱི་ཐུགས་ཀྱི་རིགས་སུ་སངས་རྒྱ་བར་འགྱུར་རོ། །ཡང་སྐྱེས་པའམ་བུད་མེད་གང་ཡང་རུང་བའི་སྙིང་ཀ་སྟེ་ནུ་མ་གཡོན་པའི་སྟེང་དུ། ཡི་གེ་ཧཱུྃ་གི་མཚན་མ་ནི། རི་མོའམ་འབུར་དུ་སུ་ལ་བྱུང་བའི་སྐྱེས་པའམ་བུད་མེད་ནི། ཚེ་སྔ་མ་ལ་ཡང་དག་པའི་སངས་རྒྱས་རྣམས་ཀྱི་ཐུགས་ལ་ནི། སྐལ་བ་དང་ལྡན་པ་འདི་ཡིས་གོམས་པར་བྱས་སོ་སྐལ་བ་དང་ལྡན་པའི་མཁའ་འགྲོ་མ་ཞེས་བོས་ཏེ་སྡུད་པ་པོའི་ཉན་པ་བསྐུལ་བའོ། །དེ་ལྟར་ན་ཧཱུྃ་དེ་མགོ་ཐུར་ལ་བྱུང་ན་བསྒོམ་པ་ལ་བར་ཆད་པ་ཡིན་པས། ད་སྐལ་ལྡན་འདིས་ནི་བསྒོམ་པ་ལ་བརྩོན་པར་བྱས་ནས་བསྒྲུབ་པར་བྱའོ། །གཡས་སུ་ཡོ་ན་ཐུགས་ཀྱི་དམ་ཚིག་ལ་སེལ་ཞུགས་པའི་རྟགས་ཡིན་པས། ད་ལྟ་ཉམས་པ་གསོ་བའི་ཆོ་ག་བྱའོ། །གཡོན་དུ་ཡོ་ན་རྡོ་རྗེའི་སྤུན་ལ་ངན་སེམས་ཀྱིས་ཁྲག་ཕྱུང་བ་ལས་བར་ཆད་པ་ལ་བྱུང་བས་བཤགས་པའི་ལས་བྱའོ། །དྲང་པོར་འདུག་ན་གཞན་གྱིས་བཅས་པའི་སྡིག་པས་བར་ཆད་པ་ལས་བྱུང་བས་ཏེ། སེམས་གཙོ་བའི་དགེ་བ་བྱའོ། །དེ་ལྟར་བྱས་ཤིང་ལས་ཀྱི་མཐའ་མ་ལོག་ན། ཚེ་འདི་ཉིད་ལ་བར་མ་ཆད་པར་ཆོས་སྤྱད་ན་མི་དེ་ཚེ་འདི་དང་གསུམ་ན། རྡོ་རྗེ་འཛིན་པའི་སངས་རྒྱས་རྣམས་ཀྱི་ཐུགས་ཀྱི་དཀྱིལ་འཁོར་དུ་འཚང་རྒྱ་བ་ལ་ཐེ་ཚོམ་མེད་དོ། །དེའི་ཕྱིར་ན་འདི་ལྟར་སྐུ་གསུང་ཐུགས་ལ་ནི། ཚེ་སྔ་མའམ་སྔོན་དུ་སྦྱངས་པའམ་གོམས་པའི་ཡོན་ཏན་གྱིས་ཚེ་འདི་ཉིད་ལ་བྱུང་བ་ད་ལྟ་གོམས་པའི་ལས་ཀྱི་བྱེ་བྲག་བྱས་ཆོས་སོ་ཅོག་གང་ཡང་རུང་བ་ཕྱིན་ཅི་ལོག་མ་ཡིན་པ་ལ་མི་འདི་ནི། ཞུགས་པ་ཙམ་ལ་གོང་གི་རྟགས་འདི་རྣམས་འབྱུང་བར་ངེས་པ་ཡིན་ནོ། །དེ་ལྟར་རྟགས་དང་ལྡན་པའི་མི་ལ། ཚེ་འདི་ལ་བར་མཚམས་མེད་པར་ཆོས་སྤྱད་ན་བསྒོམས་པའི་རྟགས་གདོན་མི་ཟ་བར་འབྲས་བུ་ཐོབ་པར་ངེས་སོ། །དེ་ལྟར་སྐུ་གསུང་ཐུགས་ཀྱི་རྟགས་དང་ལྡན་པའི་མིས་ཚེ་འདི་ལ་ཆོས་མ་སྤྱད་ཅིང་གོང་གི་ཆོ་ག་རྫོགས་པར་མ་སྤྱད་ན། གོལ་སར་ལྟུང་བ་ནི། ཚེ་འདི་ཉིད་ལ་ལས་དང་བྱ་བ་ལ་གཡེངས་ནས་བསྒྲུབ་པ་མ་བྱས་པ་ནི་སྔ་མའི་བར་ཆོད་ཞུགས་པའི་སྐྱོན་གྱིས། འབྲས་བུ་ད་ལྟ་ཉིད་ལ་མི་ཐོབ་སྟེ་གལ་ཏེ་སྐྱེས་པའམ་བུད་མེད་ལ་གོང་གི་ཐུགས་ཀྱི་རྟགས་ཡོད་པ་ལ། འདི་ལ་བར་ཆད་ནས་ལས་ཀྱི་མཐའ་ལོག་པར་འགྱུར་བས་གོལ་སའི་གནས་ནི་དྲུག་སྟེ། ཀུན་ཏུ་འཚོལ་བའི་ཡིད་དང་། གཏན་ལ་འབེབས་པ་དང་། ངེས་པར་འཇོག་པ་དང་། ཡིད་ཀྱི་རྣམ་པར་ཤེས་པ་དང་། ཉོན་མོངས་པ་ཅན་གྱི་ཡིད་དང་། འགྱུ་བྱེད་འཛིན་པའི་ཡིད་དང་དྲུག་གིས། རང་གི་ལུས་ངག་འཁྲུགས་པར་བྱེད་པའི་གནས་ལྷ་མིན་གྱི་གནས་སུ་ཚེ་གསུམ་ན་སྐྱེ་བར་འགྱུར་རོ། །དེ་འདས་པའི་འོག་ཏུ་བྱོལ་སོང་གི་ལུས་འབུམ་ཕྲག་དྲུག་ལེན། དེ་དག་འདས་པའི་འོག་ཏུ་ཡི་དྭགས་ཀྱི་སྐྱེ་གནས་དེ་ཉིད་ཚེ་སྟོང་ཕྲག་བཅུ་གཉིས་འཕོ་བར་བྱེད་པའོ། །དེ་དག་འདས་པའི་འོག་ཏུ་དམྱལ་བའི་ལུས་གྲངས་མེད་པར་འགྱུར་བ་ཡིན་ནོ། །དེ་ནི་སྔོན་དུ་དམ་པའི་འབྲས་བུ་དང་ཕྲད་ནས་དེ་ཉིད་སྤངས་པར་འགྱུར་བའི་ཉེས་པ་ཡིན་ནོ། །འདི་རྣམ་པར་སྨིན་པ་ལྷག་པར་ཆེ་བ་ཡིན་པའི་ཕྱིར་ཏེ། འདིས་མཚམས་མེད་པ་ལྔ་བྱས་པ་དང་ཁྱད་པར་ཅི་ཡང་མེད་དོ། །ཡང་སྐྱེས་པ འམ་བུད་མེད་གང་ཡང་རུང་བ་ལ་གོང་གི་སངས་རྒྱས་ཀྱི་སྐུའི་རྟགས་རྣམས་བྱུང་བ་ལས། འདི་ཉིད་དུ་རྣམ་པར་གཡེངས་ནས་བར་ཆད་པས། དེ་བཞིན་དུ་གོལ་སར་གྱུར་ནས་གཟུགས་ཀྱི་ཁམས་ཀྱི་ལྷ་རྣམས་ཀྱི་གནས་སུ་སྐྱེ་བ་ཡིན་ནོ། །དེར་ཚེ་བརྒྱར་གནས་པ་འགྱུར་བ་ཡིན་ནོ། །དེ་འདས་པའི་འོག་ཏུ་འདོད་པ་ཁམས་ཀྱི་ལྷ་རྣམས་ཀྱི་ལུས་རིམ་གྱིས་བརྒྱ་ཕྲག་དུ་མ་བླངས་ནས་དེ་འདས་པའི་འོག་ཏུ་ལྷ་མིན་སྟོང་ཕྲག་ལྔ། དེ་འདས་ནས་མིའི་སྐྱེ་བ་ལྔ་བརྒྱ། དེ་འདས་ནས་བྱོལ་སོང་འབུམ་ཕྲག་ལྔ། དེ་འདས་ནས་ཡི་དྭགས་ཁྲི་ཕྲག་བདུན། དེ་འདས་དམྱལ་བ་གྲངས་མེད་པ་ལ་སྤྱད་ནས། ལས་ཀྱི་མཐའ་འཁོར་བའོ། །ཡང་སྐྱེས་པའམ་བུད་མེད་གང་ཡང་རུང་བ་ལ་གོང་གི་གསུང་གི་རྟགས་བྱུང་བ་ལས། འཇིག་རྟེན་འདི་ཡི་རྣམ་པས་གཡེངས་ནས་བར་ཆད་ན་ཆོས་ཉིད་མ་དང་འཛོལ་ནས་གོལ་སར་འགྱུར་བ་ནི། ལྷ་ཚངས་པའི་གནས་སུ་སྐྱེའོ། །དེ་ཡང་དང་པོ་དང་གཉིས་པ་དང་། གསུམ་པ་དང་བཞི་པ་རིམ་གྱིས་གནས་ནས་འདས་པའི་འོག་ཏུ་མནར་མེད་པའི་ཚེ་སྟོང་ཕྲག་བདུན། དེ་ནས་ཡང་ལས་ཀྱི་མཐའ་འཁོར་བ་ཉིད་དེ། གོང་དུ་མ་སྤྱད་པའི་གོལ་སའོ། །སྐུ་གསུང་ཐུགས་ཀྱི་རྟགས་གཞི་ལ་ཁྱབ་པས་ཀུན་ལ་འོང་བ་ནི། དེ་ཡང་འདི་དག་རྣམས་ཀྱི་གཞིའི་ཡོན་ཏན་དུ་སེམས་ཅན་རྣམས་ལ་ཁྱབ་ནས་ཡོད་པས། གལ་ཏེ་དམ་པའི་དོན་གྱི་སྐལ་བ་མེད་ཅིང་དེ་ཉིད་ཚེ་འདི་ལ་མ་མཐོང་བའི། རྣམ་སྨིན་ལས་ཀྱི་མཐའ་རྫོགས་པའི་ཤན་པའི་སྲོག་གཅོད་པ་དོན་དུ་གཉེར་བ་དང་། སྨད་ཚོང་མ་མངལ་གྱི་སྒོར་ཡིད་ཀྱི་ལུས་ཅན་གྱི་སྲོག་གཅོད་པར་བྱེད་པ་དང་། ཡུལ་དང་གནས་ཀྱི་བསྐལ་པའི་མཐའ་འཁོབ་དང་། སངས་རྒྱས་མི་བཞུགས་པའི་ས་དང་། ཆོས་མི་དར་བའི་ས་དང་། མོན་དང་། ཀློ་དང་། རྡོ་སོགས་ཆོས་ཀྱི་སྒྲ་ཙམ་ཡང་མེད་པ་རྣམས་ལ་ཡང་། ཐོག་མའི་གཞི་ནས་སངས་རྒྱས་ཀྱི་སྐུ་དང་གསུང་དང་ཐུགས་རང་ཆས་སུ་ཡོད་པས་ས་བོན་གྱི་ཚུལ་དུ་ཁྱབ་ནས་ཡོད་དེ། དང་པོ་ཚེ་སྔོན་དུ་སྐུ་གསུང་ཐུགས་གང་རུང་ལ་གོམས་པས་ནི། རྟགས་ད་ལྟའི་ཚེ་འདི་ལ་འོང་བ་ཡོད་དོ། །དེ་ཚེ་གོང་མ་ལ་ཆོས་སྤོང་པ་དང་། བླ་མ་ལ་ལོག་ལྟ་སྐྱེས་པ་དང་། གཞན་གྱི་དམ་ཚིག་གི་སེལ་གྱིས་གནོད་པ་དང་། རང་གི་ངག་བར་ཆད་པ་དང་། ལུས་ཀྱི་བསམ་གཏན་ལ་གནོད་པའི་ལས་དང་། དམ་པའི་བཀའ་ལ་རས་ཆོད་དང་གཟུ་ལུམས་བྱས་པ་དང་། བཀའ་བསླད་པ་དང་། བརྐུས་པ་དང་། བསླུས་པ་དང་། བརློམས་པ་དང་། རྡོ་རྗེ་སློབ་དཔོན་དང་། རྡོ་རྗེ་སྤུན་ལ་ངན་སེམས་ཀྱིས་ཁྲག་ཕྱུང་བ་ལ་སོགས་པའི། གོང་དུ་བར་ཆོད་སྤྱོད་པའི་དུས་ན་ཞུགས་པ་ལས། དེ་ཉིད་ལ་ཚད་དུ་མ་ཕྱིན། བར་ཆད་ཀྱི་དབང་དུ་གྱུར་པས་ཚེ་འདི་ལ་ཤན་པ་ལ་སོགས་པའི་ལུས་སུ་ཚེ་འདི་ལ་བྱུང་ན། གོང་དུ་སྦྱངས་པའི་སྟོབས་ཀྱིས་གོང་དུ་བསྟན་པའི་སྐུ་གསུང་ཐུགས་ཀྱི་རྟགས་ངན་པ་ལ་སོགས་པ། འདི་ཀུན་ཀྱང་ཚེ་འདི་ལ་འབྱུང་བ་ཡོད་དོ། །རིགས་བཟང་ངན་སྔོན་སྦྱངས་པའི་སྟོབས་ཀྱིས་བྱུང་ལ། དེའི་དུས་ན་གོང་ལྟར་བར་ཆད་པས་ལུས་ཀྱི་ལེན་ལུགས་དེ་ལྟར་བྱུང་བའོ། །དེ་ཡང་ཤན་པ་ལ་སོགས་པའི་ལས་ཀྱི་བསྐལ་པའི་ལུས་ལ་རྟགས་ཡོད་ཅིང་མཚན་མ་འདི་ལྟར་བྱུང་བའི་རིགས་ངན་པ་གནས་ཀྱི་བསྐལ་པའི་མི་དེ་ཡིས། གལ་ཏེ་དམ་པའི་ཆོས་དང་འཕྲད་ནས་གདམས་པ་འདི་ལ་དོན་མ་ནོར་བ་ལ་ངེས་པ་སྐྱེས་ཏེ་ཞུགས་ན་ནི་རིགས་དང་མི་ལྡན་པའི་མི་དེ་ཡང་སྐལ་བ་དང་ལྡན་པར་འགྱུར་རོ། །ཚེ་འདི་ལ་ཆོས་ལ་མ་ཞུགས་ན་རེ་ཞིག་ལྷའི་གནས་རྣམས་སུ་གོང་དུ་བསྟན་པ་བཞིན་དུ་སྐྱེས་ནས། ཐ་མ་དམྱལ་བའི་ཚེ་སྤྱོད་པ་དང་འཁོར་བ་ལས་ཀྱི་མཐའ་འཁོར་བ་ཡིན་ནོ། །ཞེས་ཐུགས་ཀྱི་རྟགས་གོལ་ས་དང་བཅས་པ་བསྟན། དེ་དག་དྲིལ་བས་ནི། དོན་དང་པོ་ལུས་ལ་སྐུ་གསུང་ཐུགས་ཀྱི་རྟགས་འབྱུང་བར་བསྟན་ནས། ད་ནི་སྔོན་དུ་སྦྱངས་པའི་སྐྱེས་བུའི་ངག་ལ་སྐུ་གསུང་ཐུགས་ཀྱི་རྟགས་ཇི་ལྟར་འབྱུང་བ་བསྟན་པ་ལ། ནང་དོན་གསུམ་ཡོད་པ་ལས། དང་པོ་སངས་རྒྱས་རྣམས་ཀྱི་སྐུ་ལ་གོམས་པའི་རྟགས་ངག་ལ་ཇི་ལྟར་འབྱུང་བ་བསྟན་པ་ནི། འདི་ལྟར་སེམས་ཅན་ངག་ལ་ཡང་། །ཞེས་པ་ལ་སོགས་པས་བསྟན་ཏེ། འདི་ལྟར་ནི་འོག་ནས་སྟོན་པ་འདི་ལྟར། སེམས་ཅན་སྨྲ་བའི་ངག་ཡོད་དོ་ཅོག་ལ་སངས་རྒྱས་ཀྱི་སྐུ་གསུང་ཐུགས་ཀྱི་རྟགས་འབྱུང་བ་ཡིན་ནོ། །ངག་ལ་ཡང་ནི་ངག་གི་ངོ་བོ་དང་། ངེས་ཚིག་དང་། དབྱེ་བ་དང་། ལས་དང་། འབྲས་བུ་དང་། ངག་སྦྱང་བར་བྱའི་རིམ་པ་དང་། གནས་ཤིང་དུས་ཀྱི་ཆོ་ག་རྒྱས་པར་བྱ་བ་དང་། ངག་ཉིད་འཁོར་བ་ལས་མི་འཇུག་པར་བྱ་བ་དང་། ཕྱི་ནང་གི་འབྱུང་བ་དང་ཇི་ལྟར་སྦྱར་བ་དང་། འབྲས་བུ་སྐུ་གསུང་ཐུགས་སུ་ལ་བཟླ་བ་དང་བཅུས་ངག་གི་ཆོ་ག་རྒྱས་པར་བསྟན་པའོ། །ངག་གི་ངོ་བོ་ནི་ལུས་སེམས་གཉིས་ཀྱི་འཚམས་སྦྱོར་བར་བྱེད་ཅིང་། རང་གི་ལུས་ལ་གྲགས་པར་བྱེད་པ་ཡིན་ལ། མདོར་ན་བརྗོད་པའི་གཞི་ཡིན་ནོ། །ངག་གི་ངེས་ཚིག་ནི་རང་གཞན་གྱི་ཡུལ་ལ་བསྔགས་ཤིང་རྗེས་སུ་འཛིན་པ་དང་། མི་འཛིན་པའི་རྣམ་པ་རྣམས་ཡིན་ནོ། །མདོར་ན་བརྗོད་བྱ་གསལ་བར་བྱེད་པའོ། །དབྱེ་བ་ནི་བཏགས་པ་ལྟར་སྣང་གི་ངག་དང་། མཚན་ཉིད་དངོས་གཞིའི་ངག་གོ། །བཏགས་པ་མིང་དུ་གྲགས་པ་རྣམས་སོ། །མཚན་ཉིད་ནི་འཁྲུལ་པ་ཡུལ་འཛིན་གྱི་ངག་དང་། རང་བཞིན་ཡང་དག་གི་ངག་གོ། །འཁྲུལ་པ་ཡུལ་འཛིན་གྱི་ངག་ནི། འགྲོ་དྲུག་རང་སོའི་ངག་དང་། རང་བཞིན་སྣང་ཚུལ་གྱི་ངག་གོ། །འགྲོ་དྲུག་རང་སོའི་ངག་ནི་སོ་སོའི་སྐད་དང་། བརྡའ་དང་། ཚིག་དང་བརྗོད་པ་རྣམས་ཡིན་ལ། དེ་ཡང་ལྷ་དང་མི་ལ་སོགས་པ་འགྲོ་དྲུག་སོ་སོའི་ངག་ཡིན་ནོ། །རང་བཞིན་སྣང་ཚུལ་གྱི་ངག་ནི་འབྱུང་བ་ཚ་གྲང་འདུས་པའི་རང་སྒྲ་དང་། ས་དང་ཆུ་དང་མེ་དང་རླུང་གི་སྒྲ་རྣམས་ཏེ། མདོར་ན་བྱས་པ་མེད་པའི་རྒྱུ་དང་རྐྱེན་འདུས་པ་ལས་བྱུང་བ་རྣམས་སོ། །དེ་ལྟར་གཉིས་ནི་འཁྲུལ་པ་ཡུལ་འཛིན་གྱི་ངག་གོ། །རང་བཞིན་ཡང་དག་གི་ངག་ནི། འཁྲུལ་པ་རྒྱུ་དག་པའི་ངག་དང་། རྐྱེན་དག་པའི་ངག་དང་། རྒྱུ་རྐྱེན་གཉིས་ཀ་དག་པའི་ངག་གོ། །རྒྱུ་དག་པ་ནི་ཉན་ཐོས་དང་། རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ངག་གོ། །རྐྱེན་དག་པ་ནི་ངག་གི་ནུས་པ་རྫོགས་པས་ཏེ། བྲམ་ཟེ་དང་སྔགས་ཀྱི་ནུས་པ་ཐོབ་པའི་གང་ཟག་རྣམས་སོ། །རྒྱུ་རྐྱེན་གཉིས་ཀ་དག་པ་ནི། སྤྲུལ་པ་སྐུའི་གསུང་དབྱངས་གཅིག་གིས་འགྲོ་བ་སོ་སོའི་གོ་བའི་ཡུལ་དག་པར་བྱེད་པ་ཡིན་ལ། དེ་དག་གི་བྱེད་པའི་ལས་ནི། བཏགས་པ་ལྟར་སྣང་གིས་སོ་སོའི་མིང་འཛིན་པའི་ལས་བྱེད་ཅིང་། དེ་ཉིད་མཚོན་པར་བྱེད་པའོ། །འཁྲུལ་བ་ཡུལ་འཛིན་གྱི་ངག་གིས་རང་རང་གི་བརྡའ་འཕྲད་ཅིང་བརྗོད་བྱ་ལེན་པར་བྱེད་ལ། རང་བཞིན་ཡང་དག་གིས་ནི་རང་དོན་དུ་བརྗོད་བྱའི་དོན་ཁོང་དུ་ཆུད་པར་བྱེད་ལ། གཞན་དོན་དུ་ནུས་པ་བསྐྱེད་ཅིང་གཞན་གྱི་ནུས་པ་རྫོགས་པའི་ལས་བྱེད་དོ། །ངག་གི་འབྲས་བུ་ནི་བཏགས་པ་ལྟར་སྣང་གི་འབྲས་བུ་ནི་གཟུགས་རྫོགས་པ་ཡིན་ནོ། །འཁྲུལ་པ་ཡུལ་འཛིན་གྱི་འབྲས་བུ་ནི་འཁོར་བའི་ལས་ཐ་དད་པ་སྨིན་པ་ཡིན་ནོ། །རང་བཞིན་ཡང་དག་གིས་ནི་སངས་རྒྱས་ཀྱི་ཡེ་ཤེས་སུ་སྨིན་པ་དང་། འགྲོ་བ་གཞན་ལ་སྐུ་གསུང་ཐུགས་སུ་སྨིན་པ་དང་། རང་གི་སྟོབས་དང་རྫུ་འཕྲུལ་སྨིན་པ་དང་། གཞན་གྱི་སྡུག་བསྔལ་ཉིད་བདེ་བར་སྨིན་པ་དང་། ངག་སྦྱང་བར་བྱ་བའི་རིམ་པ་ནི། འདི་ལ་དབྱེ་བའི་ལས་བྱེད་མི་དགོས་ཏེ། ད་ལྟའི་རྟེན་གྱི་གང་ཟག་ལས་དང་སྐལ་བར་ལྡན་པ། རང་བཞིན་རྫོགས་པ་ཆེན་པོའི་དོན་ལ་མོས་ཤིང་དད་པ་དང་ལྡན་པ་ཞིག་གིས། སྔོན་དུ་འཁོར་བ་མི་རྟག་པའི་མཚན་ཉིད་རྒྱུད་ལ་སྐྱེས་པས། འཇིག་རྟེན་གྱི་རྣམ་པ་ལས་བློ་ལོག །དེ་ལས་ལོག་པས་ཚེ་འདི་རྒྱབ་ཏུ་བོར། དེ་བོར་བས་དང་དུ་བླང་རྒྱུ་དམ་པའི་ཆོས་ལས་མེད། དེ་ལྟར་མེད་པ་སྔོན་དུ་སོང་བས་ད་བླ་མ་མཚན་ཉིད་བཞི་དང་ལྡན་པ་གཅིག་ལ་མན་ངག་ཞུས་ཏེ། དེ་ལྟར་བླ་མ་མཚན་ཉིད་བཞི་དང་ལྡན་པ་དེ་ལ། མན་ངག་ཀྱང་སངས་རྒྱས་ནས་སྙན་རྒྱུད་བར་མ་ཆད་པ་དང་། ཡིད་ཆེས་བཀའི་དཔང་པོ་དང་བྲལ་བ་གལ་ཆེ། དེ་ཡང་སྙན་རྒྱུད་ལ་མི་ཚིག་གི་འཕྲ་མ་མ་ཚུད་པ་དང་། བཀའ་རྒྱུད་ཀྱི་བཤད་པ་ལ་ཡིད་དཔྱོད་ཀྱི་སྒྲོས་མ་བཏགས་པ་གཉིས་ཕྱིན་ཅི་མ་ལོག་པ་དང་། བླ་མ་མཚན་ཉིད་དང་ལྡན་པ་དང་། བདག་ཉིད་མོས་པ་དང་དད་པ་ཡིད་ཆེས་ཤེས་རབ་དང་གསུམ་འཛོམ་པ་ནི། སངས་རྒྱས་ལག་བཅངས་སུ་འཆང་བའི་སྐལ་བ་ཅན་ཡིན་ཏེ། དེ་ལྟར་འཛོམ་ན་རིགས་ཀྱི་བུ་དེས་བླ་མའི་མན་ངག་ཐབས་དུ་མས་ཡང་ནས་ཡང་དུ་ཞུ་ཐག་བཅད་དེ། དེ་ནས་ཆོད་པ་དང་། རྐྱེན་གྱིས་མི་གནོད་པའི་དགོན་པར་རི་དྭགས་ཀྱི་ཚུལ་གྱིས་བསྒྲུབ་པ་དང་། ཆ་མེད་རྒྱུས་མེད་པའི་ཡུལ་དུ་སྤྲང་པོའི་ཚུལ་གྱིས་བསྒྲུབ་པ་གཉིས་གང་མོས་པ་བྱའོ། །འདི་གཉིས་གང་བྱེད་ཀྱང་ངག་བཅད་པ་རབ་ཏུ་གལ་ཆེའོ། །ངག་སྦྱང་བའི་མན་ངག་ནི། སྔོན་དུ་ཉི་མ་ལྔ་དྲུག་ཏུ་བརྗོད་པའི་གཏམ་སྣ་ཚོགས་པ་སྨྲ་བར་བྱའོ། །དེ་ལྟར་བྱས་པས་ངག་གི་ཞེན་པ་ལོག་པའི་དགོས་པ་ཡོད་དེའི་ཞེན་པ་ལོག་པས་ཕྱིས་འཁོར་བའི་ངག་ལ་འཇུག་མི་སྲིད་དོ། །དེ་མ་ཞུགས་ན་འབྲས་བུ་སངས་རྒྱས་ངེས་པའོ། །དེ་ནས་ཉི་མ་བདུན་ནམ་དྲུག་ཙམ་དུ་ངག་མ་འདྲེས་པར་བྱས་ཏེ། གཞན་དང་ཚིག་མི་འདྲེ་བ་དང་། རང་གི་བརྗོད་པ་ཙམ་མི་སྨྲ་བར་བྱས་པས། ངག་འཇིག་རྟེན་པ་མ་ཡིན་པའི་དགོས་པས་ཏེ། གཞན་དང་མ་འདྲེས་པས་རང་གི་དོན་རྫོགས་པར་འགྱུར་བ་ཡིན་ནོ། །དེ་ནི་ངག་མི་འདྲེ་བའི་སྦྱང་བའོ། །དེ་ནས་ཟླ་བ་ཙམ་དུ་ངག་གནས་པའི་རིམ་པ་ཏེ། གཞན་ལ་ཡི་གེའམ་བརྡའ་ཙམ་བྱ་ཞིང་རང་སྐབས་སུ་རྩ་གནས་ཀྱི་ཡི་གེ་དང་། ཆོས་མ་ཡིན་པའི་འཁྲུལ་ཚིག་མི་སྨྲ་བར་གནས་པ་ནི། ངག་དམ་པའི་ལམ་སྲོལ་དུ་བཞུགས་པས་ཏེ། འདི་ལ་འཁྲུལ་བས་གོས་མི་སྲིད་དོ། །དེ་ལྟར་བྱས་པས་ངག་གི་འཁྲུལ་པའི་ཉོན་མོངས་པ་རང་དང་གཞན་ལ་སྐྱེ་མི་སྲིད་པས་གལ་ཆེའོ། །དེ་ནས་ངག་བཅད་པ་ཞེས་བྱ་སྟེ་རང་གིས་ཀྱང་ཚིག་གི་ཟུར་ཙམ་ཡང་མི་སྨྲ། གཞན་དང་འདྲེ་བ་ནི་ལྟ་ག་ལ་སྲིད་དེ། ལྐུག་པའི་འདུ་ཤེས་བརྟེན་པས། ཆོས་ཐམས་ཅད་ཀྱི་གཞུང་ནས་བརྗོད་དུ་མེད་དོ། །སྨྲར་མེད་དོ་ཞེས་བསྟན་པའི་དོན་ལ་ལག་ལེན་བྱས་པ་སྟེ། འདི་ལྟར་བྱས་པའི་སྐྱེས་བུ་དེའི་རྒྱུད་ལ་བརྗོད་དུ་མེད་པའི་ཆོས་ཉིད་ཀྱི་དོན་མི་སྐྱེ་མི་སྲིད་དོ། །འདི་དག་གི་དུས་ན་ཡི་གེ་བརྡའ་ལ་སོགས་པ་ཡང་སྤང་བར་བྱའོ། །དེ་ལྟར་ཡུན་རིང་དུ་གནས་པས། ཐ་མ་ངག་རང་བརྡོལ་ནས། ཆོས་དང་ཆོས་ཙམ་ཡིན་པ་ལ་སོགས་པ་སྨྱོན་པའི་ཚིག་ལྟ་བུར་འགྱུར་ཏེ། འདིའི་དུས་ན་འཁྲུལ་པ་རང་ཐོག་ཏུ་གྲོལ་བ་ཡིན་ནོ། །སྐྱེས་བུ་ལ་ལ་ངག་རང་རྡོལ་བ་མི་འབྱུང་པར་ལྐུག་པ་ལྟར་རྒྱུན་དུ་འགྱུར་བ་ཡང་ཡོད་དོ། །འདི་ནི་བརྗོད་མེད་ཀྱི་ངང་དུ་སངས་རྒྱ་བ་ཡིན་ཏེ། སྤྲུལ་པའི་སྐུ་འབྱུང་བ་མ་ཡིན་ནོ། །དེ་ཡང་མ་འདྲེས་པའི་འཁོར་བའི་ཞེན་པ་འཇིག་རྟེན་ལས་བློ་ལྡོག་ངག་བསྡམས་པ་དེ་གནས་པར་བྱས་པས་རང་གི་རྒྱུད་ལས་འཁྲུལ་པ་འཆར་མི་སྲིད་དོ། །ངག་བཅད་པས་ཆོས་ཐམས་ཅད་བརྗོད་དུ་མེད་པར་མི་རྟོགས་མི་སྲིད་དོ། །དེ་ལྟར་སྦྱངས་པས་སངས་རྒྱས་ཀྱི་སྐུ་གསུང་ཐུགས་ཀྱི་རྟགས་འབྱུང་བ་ངེས་པ་ཡིན་ནོ། །ངག་ཉིད་གནས་ཤིང་དུས་ཀྱི་ཆོ་ག་རྒྱས་པར་བྱ་བ་ནི། རྣལ་འབྱོར་པ་དེ་སའི་ལུས་ཡིན་ན། རླུང་གི་དུས་དང་། ཉི་མ་དང་། ཟླ་བ་དང་། ལོ་དང་འཛོམ་པ་ལ་ངག་གི་ལས་ཅི་བྱས་ཀྱང་། འཁོར་བ་དང་། ལྡོག་པ་དང་། གཡེལ་བ་དང་འབྱམ་པར་འགྱུར་བ་ཡིན་ནོ། །རང་གི་ལོ་དང་། ཟླ་བ་དང་། ཉི་མ་དང་། དུས་ལ་ངག་གི་ལས་ཅི་བྱས་ཀྱང་རྒྱས་པ་ཡིན་ནོ། །སས་ཆུའི་དུས་ལ་བྱས་ན་འཕེལ། མེའི་དུས་ལ་བྱས་ན་འཇིག་པ་ཡིན་ནོ། །དེ་བཞིན་དུ་རྣལ་འབྱོར་པ་དེ་ཆུའི་ལུས་ཡིན་ན་མེའི་དུས་ལ་ནུས་པ་མི་འབྱིན། སའི་དུས་ལ་འཕེལ། རླུང་གི་དུས་ལ་འཇིག །མེས་ཆུའི་དུས་ལ་མི་བྱ་ནུས་པ་གཏན་བརླག །རླུང་གི་དུས་ན་འཕེལ། སའི་དུས་ལ་འཇིག་པའོ། །རླུང་གིས་སའི་དུས་ལ་བྱས་ན་ནུས་པ་གཏན་བརླག །མེའི་དུས་ལ་འཕེལ། ཆུ་ལ་འཇིག་པའོ། །དེ་ཡང་སས་རླུང་གི་ལོ་ལ་འབྱུང་བས་རང་ཤས་ཆེའི་ངག་གི་ལས་སྔགས་ལ་སོགས་པ་བརྗོད་ན་སེམས་ཅན་སྤྱི་ལ་འབྱམས། མེ་ཤས་ཆེ་བའི་ལས་བྱས་ན་རང་གི་འཁོར་དང་ལོངས་སྤྱོད་ལ་འབྱམ་པར་འགྱུར་རོ། །རླུང་གི་ཉི་མ་ལ་སྔགས་པས་ཡི་གེ་སམ་དང་ཀྲམ་དང་བཅས་པ་ཤས་ཆེ་བས། སའི་རང་ཡིག་མང་པོ་བརྗོད་ནས་སེམས་ཅན་སྤྱི་ལ་ལྡོག །རི་དང་། མ་དང་། ས་དང་། སོད་ཤས་ཆེ་བར་བཟླས་ན། རང་དང་། རང་གི་འཁོར་དང་ལོངས་སྤྱོད་ལ་ལྡོག་གོ། །རླུང་གི་ཟླ་བ་ལ་ཡང་འབྱུང་བ་ཆུའི་ཡི་གེ་ཁཾ་དང་ཧཱུྃ་མང་པོ་བརྗོད་ན་སེམས་ཅན་སྤྱི་ལ་འཁོར་རླུང་གི་ཡི་གེ་ཡཾ་དང་། ཡ་དང་། ཕཊ་ཤས་ཆེ་བར་བརྗོད་ན་རང་དང་འཁོར་དང་ལོངས་སྤྱོད་ལ་འཁོར་བར་འགྱུར་རོ། །དུས་ལ་བཟླས་ཤིང་བརྗོད་ན། འབྱུང་བ་བཞིའི་ས་རང་ཤས་ཆེ་ན་སེམས་ཅན་སྤྱིའི་ལོངས་སྤྱོད་ཉམས། མེ་ཤས་ཆེ་ན་རང་གི་ལོངས་སྤྱོད་ཉམས། ཆུ་ཤས་ཆེ་ན་སེམས་ཅན་སྤྱིའི་སྲོག་ལ་གཟན། རླུང་ཤས་ཆེ་ན་རང་གི་སྲོག་ལ་གཟན། ཀུན་འཛོམ་པ་ལ་བྱས་ན་གོང་ལྟར་ནུས་པ་གཏན་བརླག་ཅིང་ངན་སོང་དུ་འཕེན་པར་བྱེད་པས། ངག་རྒྱས་པར་བྱེད་པའི་ཆོ་ག་འདི་རབ་ཏུ་གལ་ཆེའོ། །དེ་ཡང་ས་རང་གི་ལོ་ལ་ས་དང་མཐུན་པའི་ལས་གཙོ་ཆེ་བར་བྱས་ན་རྒྱས། མེ་དང་མཐུན་པར་བྱས་ན་འཕེལ། ཆུ་དང་མཐུན་པར་བྱས་ན་རྫོགས། རླུང་དང་མཐུན་པར་བྱས་ན་དོན་ཐོབ་པའོ། །རང་གི་དུས་སུ་མ་འཁྲུལ་བས་ནུས་པ་འབྱིན། ཟླ་བ་ལ་གཞན་གྱི་གཤེད་འགྲུབ་ཉི་མ་ལ་རང་གི་གཤེད་ལྡོག་པའོ། །དེའི་འགྲེས་ཀྱིས་འབྱུང་བ་བཞིའི་གྲལ་གྱིས་རྣལ་འབྱོར་གསུམ་པོ་ལ་ཡང་རྩིའོ། །ངག་ཉིད་འཁོར་བ་ལས་མི་འཇུག་པར་བྱ་བའི་མན་ངག་ནི། དེ་ལྟར་བྱས་པས་ངག་གི་ཞེན་པ་རང་ལོག་ནས་ལོངས་སྐུར་གྲོལ་བས། ད་འཁོར་བ་ལ་འཇུག་མི་སྲིད་དོ། །དེ་མི་འཇུག་པ་དེ་རང་གང་ཡིན་ན། ད་ལྟ་ཡང་ཉོན་མོངས་པ་སྐྱེ་བའི་རྒྱུ་སེམས་ཀྱིས་བྱེད། རྐྱེན་ངག་གིས་བྱེད་དེ། ངག་ལ་བརྟེན་ནས་ཉོན་མོངས་པ་སྣ་ཚོགས་བསྐྱེད་པར་བྱེད་པས། ངག་གཅད་པས་ཡུལ་དང་ཡུལ་ཅན་གྱི་ཉོན་མོངས་པ་སྐྱེ་མི་སྲིད་དོ། ། ཕྱི་ནང་གི་འབྱུང་བ་དང་སྦྱར་བ་ནི། ངག་འབྱུང་བ་མེ་ཡིན་ཏེ། འཕྲ་བ་ལས་མཆེད་ནས་ཆེན་པོར་འགྱུར་བའི་ལས་བྱེད་པ་དང་འདྲ་བར། ངག་ལ་བརྟེན་པའི་ཚིག་ཕྲ་མོ་ལ་བརྟེན་ནས་འཁོར་བའི་ཉེས་དམིགས་ཆེན་པོར་འགྱུར་བ་ནི། ཚིག་རྩུབ་གཅིག་ཙམ་ལ་བརྟེན་ནས་འཁྲུགས་པ་ལ་སོགས་པའི་ལས་ཀྱིས་འགྲོ་བ་རྣམས་སྲོག་བཅད་པས་འབྲས་བུ་ངན་སོང་དུ་ཁྲིད་པར་བྱེད་པ་ཡང་ངག་གིས་བྱེད། སྐྱེད་ཅིང་སྨིན་པར་བྱེད་པ་དྲོད་ཡིན་ལ། དེ་ཡང་ལུས་དྲོད་ཕྲ་མོ་ལ་བརྟེན་ནས་ལུས་སུ་སྨིན་པར་བྱས་པ་དང་འདྲ་བར། ངག་གི་གནས་ལུགས་ཀྱི་ཚིག་ཕྲ་མོ་ལ་བརྟེན་ནས། ཆོས་ཉིད་བརྗོད་དུ་མེད་པའི་དོན་རྟོགས་ནས་འབྲས་བུ་སངས་རྒྱས་ཐོབ་པར་བྱེད་པས་ན་དྲོད་དོ། །འབྲས་བུ་སྐུ་གསུང་ཐུགས་སུ་ལ་བཟླ་བ་ནི། གཞུང་གི་རྟགས་འདི་དག་ཀྱང་སྔོན་དུ་ངག་ལ་སྦྱངས་པས་འབྱུང་གིས། གཞན་གྱིས་ནི་མ་ཡིན་ནོ། །དེ་ཡང་ངག་ཉིད་སྐུ་གསུམ་དུ་ཡོད་པས་ངག་གི་འབྲས་བུ་རང་རྫོགས་མཐའ་གྲོལ་ཡེ་གནས་ལ། གསུང་གསུམ་དུ་ཡེ་ནས་ཤར་བས་བརྗོད་བྱའི་རོལ་པ་སྣ་ཚོགས་སུ་སྣང་ལ། ཐུགས་གསུམ་རང་དུ་བྱུང་བས་ངོ་བོ་ཅི་ཡང་མི་གནས་པས་རང་གནས་སུ་རང་གྲོལ་བའོ། །དེ་ལྟར་བཅུས་ངག་ལ་ཡང་དག་པའི་འབྲས་བུ་མཐར་ཐུག་འབྱུང་བར་བསྟན་པའོ། །དེ་ཡང་ངག་གི་ལས་དེ་ལྟར་ཚེ་སྔོན་དུ་རང་བཞིན་ལྷུན་གྲུབ་ཀྱི་དང་། ཡེ་ཇི་བཞིན་པ་དང་། རྟོགས་པ་མངོན་དུ་གྱུར་པའི་སངས་རྒྱས་རྣམས་ཀྱི་སྐུ་གསུང་ཐུགས་ལ། ངག་ལ་བརྟེན་ནས་གང་ཟག་གིས་གོམས་ཤིང་སྦྱངས་པའི་རྟགས་སུ་ལ་ཡང་གཞུང་འདི་ནས་བཤད་པ་འདི་ལྟར་འབྱུང་ངོ་། །མཁའ་འགྲོ་མ་ཞེས་སྟོན་པས་སྡུད་པ་པོ་ལ་བོས་ནས་ལན་བཀའ་སྩལ་པ་ནི། དེ་ཡང་བྱེ་བྲག་ཏུ་ཚེ་སྔ་མ་ལ་སངས་རྒྱས་ཀུན་གྱི་སྐུ་ཉིད་ལ་སྔོན་དུ་གང་ཟག་སུ་ཡིས་གོམས་པར་བྱས་པའི་མི་དེ་ཡིས། ཇི་སྐད་སྨྲས་པའི་ངག་གི་ལས་ཚིག་བརྗོད་པའི་བརྟེན་ནམ་གཟུངས་ནི་བཙན་པ་ཡི་བརྗེད་པ་མེད་ཅིང་མི་འགྱུར་བ་དང་། སུ་དང་དམ་བཅས་པའི་ཆད་པ་ནི་ཚིག་གི་ཆད་པ་བྱ་བའི་ལས་དང་། སྒྲ་འཇུག་པའི་རྒྱུ་མཚན་གྱི་ཆད་པ་སྔར་ཡོད་པའི་ཕྱིས་མེད་པ་ནི་འདི་མ་ཡིན། གང་གིས་དམ་བཅས་པ་ལས་མི་གཡེལ་བའི་ཕྱིར་ན་ཆད་པ་རྣམས་འགྱུར་བ་མེད་པར་བྱུང་བ་ནི། ངག་གི་ལས་ཀྱིས་ཚེ་སྔ་མ་ལ་སངས་རྒྱས་ཀྱི་སྐུ་ལ་གོམས་པར་བྱས་པ་ཡིན་ཏེ། འདི་ནི་འཇིག་རྟེན་གྱི་ལས་ཀ་ཐ་དད་པ་ལས་བར་ཆད་ནས་འབྲས་བུ་མ་སྨིན་ཏེ། ད་ལྟ་ངག་གི་ལས་རྒྱུད་བཀླག་པ་ལ་སོགས་པའི་ལས་བྱས་ནས། ཆོས་སྤྱོད་ལ་ཞུགས་པས་འབྲས་བུ་ངེས་པ་ཐོབ་སྟེ། ཚེ་འདི་ཉིད་ལ་སངས་རྒྱ་བར་འགྱུར་ཏེ་བར་མ་ཆད་པའི་ཚེ་གཅིག་གིས་སྐལ་བ་དང་ལྡན་པ་ཡིན་ནོ། །ཡང་སྐལ་བ་དང་ལྡན་པའི་སྐྱེས་པའམ་བུད་མེད་གང་ཡང་རུང་བ་དག་གིས་ཉི་མ་གཅིག་ལ་དབང་པོའི་བྱེ་བྲག་གིས་མི་བརྗེད་པའི་གཟུངས་ཐོབ་པ་ནི། དབང་པོ་འབྲིང་གི་སྦྱངས་པ་ཡིན་ལ། སྐད་ཅིག་གམ་དུས་གཅིག་ལ། ཚིགས་སུ་གཅད་པ་སྟོང་ངམ་ནི་སྟོང་ཟིན་པར་འགྱུར་ལ། ཡང་ན་བཞི་བརྒྱའི་ཚིགས་བཅད་ཀྱི་དོན་དང་ཡི་གེ་འཁྲུལ་པ་མེད་པར་ཐུགས་སུ་ཆུད་པ་ནི་ཚེ་སྔ་མ་ལ་འདོད་ཆགས་ཀྱི་གཡེང་བས་བར་ཆད་པ་ཡིན་ཏེ། ད་ལྟ་སྡོམ་པ་ལ་གནས་པར་བྱས་ནས་བསྒྲུབས་པས་འབྲས་བུ་ཚེ་འདི་མ་གཏོགས་པ་གཉིས་ནས་སངས་རྒྱ་བ་ཡིན་ནོ། །ཡང་གོང་མའི་བློ་འབྲིང་པོ་ལས་ཉི་མ་གཅིག་ལ་གྲུབ་པ་ནི་ཚིགས་སུ་བཅད་པ་སྟོང་ཉི་མ་གཅིག་གི་ཁོངས་སུ་བློ་ལ་ཚུད་པའམ། ཡང་ན་ཁྲིའམ་ཉིས་སྟོང་ངམ་སྟོང་ཕྲག་ལ་མི་དེས་ཚིག་དེ་དག་གི་དོན་བློ་ལ་སྟེ། བློ་ནི། བློའི་རྒྱུ་དང་། རྐྱེན་དང་། རང་བཞིན་དང་། ངོ་བོ་དང་། ངེས་ཚིག་དང་། དབྱེ་བའོ། །བློའི་རྒྱུ་ནི་དད་པ་དང་གུས་པ་ལས་བྱུང་བ། རྐྱེན་བླ་མ་མཚན་ཉིད་དང་ལྡན་པ་ལ་བརྟེན་ནས་སྐྱེ་བ་ཡིན། རང་བཞིན་འགྱུར་བ་ཡིན་ལ། ངོ་བོ་ཚིག་ལ་རྟོག་དཔྱོད་ཀྱི་ཤེས་པ་བློ་དང་བཅས་པ་ཉིད། ངེས་ཚིག་ནི་བློ་ཞེས་འགྱུ་ཞིང་མཆེད་པ་དང་བཅས་པར་བྱེད་ལ། རྟོག་ཅིང་སྤྱོད་པར་བྱེད་པའོ། །དབྱེ་ན་འཇིག་རྟེན་ལྟར་སྣང་གི་འཇིག་རྟེན་ལ་གྲགས་པའི་བློའི་བྱེ་བྲག་ཡིན་ལ། ཕྱིན་ཅི་ལོག་གི་བློ་ལོག་ཤེས་རྣམས་ལ་བྱ། མཐུན་སྣང་གི་བློ་ཀུན་རྫོབ་ཀྱི་མཚན་ཉིད་རྟོགས་པར་བྱེད་ཅིང་། དེ་དག་ལ་འཇུག་ཅིང་སྤྱོད་པའོ། །དག་པའི་བློ་རྟོག་པ་དང་མི་རྟོག་པའི་མཚན་ཉིད་ཤེས་པ་སྟེ་བཞིའོ། །བློ་དེ་དག་གི་བྱེད་པའི་ལས་ནི། ཀུན་རྫོབ་ཀྱི་ཡུལ་དང་ཡུལ་ཅན་ལ་འཛིན་ཅིང་རྟོག་པ་དང་། དཔྱོད་པའི་ཡིད་དང་ལྡན་པའོ། །དེ་ཡང་འཇིག་རྟེན་པའི་རྟོག་པ་རྣམས་འཛིན་པར་བྱེད་པའོ། །དེ་དག་རྣམས་སུ་ལ་སྣང་བར་འགྱུར་བ་ནི། ཚེ་སྔ་མ་ལ་སངས་རྒྱས་ཀྱི་སྐུ་ལ་འབྱོངས་པའི་འཕྲོ་ལ་ཉན་པ་རྒྱུན་ཆད་པ་ལས་བར་ཆད་ནས་འབྲས་བུ་མ་སྨིན་པ་སྟེ། འདི་ལ་ཡེ་ཤེས་ཀྱི་སྣང་བ་ལ་འདྲིས་པར་བྱས་ནས་བསྒྲུབ་ན་ཚེ་གཉིས་ན་སངས་རྒྱ་བ་ལ་ཐེ་ཚོམ་མེད་དོ། །ཡང་སྐྱེས་པའམ་བུད་མེད་གང་ཡང་རུང་བས་ཅི་སྨྲས་པ་གཞན་ལ་ཕན་ཐོགས་པའི་མི་དེས་ནི། སྔོན་དུ་སངས་རྒྱས་རྣམས་ཀྱི་སྐུ་ལ་ངག་གིས་ཡང་དག་པར་སྦྱངས་པ་ཡིན་པས། འདི་ནི་ཚེ་སྔ་མ་ལ་སེམས་ཅན་གྱི་དོན་བྱེད་པའི་འཕྲོ་ལ་རང་ལ་རློམ་པ་སྐྱེས་ནས་བར་ཆད་ན་འབྲས་བུ་མ་རྫོགས་པས། ད་བཤད་ཉན་གྱི་ལས་གཙོ་བས་སངས་རྒྱས་ཐོབ་པར་འགྱུར་བ་ཡིན་པས་ན། འདི་ལ་གོམས་པར་བྱ་བར་རབ་ཏུ་གཅེས་པ་ཡིན་ནོ། །མཁའ་འགྲོ་མ་ཞེས་སྡུད་པ་པོ་ལ་བོས་ནས། དེ་ལྟར་རྟགས་བཞི་པོ་གཅིག་གི་ངག་ལ་གཅིག་དང་ལྡན་ན་སོ་སོའི་འབྲས་བུ་ཚེ་གཉིས་ན། གཉིས་དང་ལྡན་ན་ཚེ་གཅིག །གསུམ་དང་ལྡན་ན་འབྲས་བུ་འདི་ཉིད་ལ། བཞི་ཀ་རྫོགས་པ་ནི་འབད་པ་བྱ་མི་དགོས་པར་སངས་རྒྱའོ། །ཞེས་གང་ཟག་གི་ལུས་ངག་ལ་སངས་རྒྱས་ཀྱི་སྐུའི་རྟགས་བཞི་བསྟན་ནས། ད་ནི་ལྔ་པ་སངས་རྒྱས་ཀྱི་གསུང་ལ་སྦྱངས་པའི་རྟགས་འདི་དག་ལ་འབྱུང་བ་བསྟན་པ་ནི། སྔོན་དུ་སངས་རྒྱས་ཀུན་གྱི་ཡང་ཞེས་པ་ལ་སོགས་པས་བསྟན་ཏེ། ཚེ་སྔོན་དུ་རང་བཞིན་ལྷུན་གྲུབ་ཀྱི་སངས་རྒྱས་ནི་སེམས་ཅན་ཐམས་ཅད་ལ་བདེ་བར་གཤེགས་པའི་སྙིང་པོས་ཁྱབ་པ་དང་། ཡེ་ཇི་བཞིན་པའི་སངས་རྒྱས་སོ་སོའི་གནས་ལུགས་དང་། རྟོགས་པ་མངོན་དུ་གྱུར་པ་འཁྲུལ་སྣང་རང་དག་པ་ཀུན་གྱི་ཡང་གསུང་ལ་སྐྱེས་པ་དང་བུད་མེད་སུ་ཡིས་གོམས་པར་བྱས་པའི་ངག་ལ་རྟགས་འདི་དག་འབྱུང་བ་ཡིན་ནོ། །དེ་ཡང་སྔོན་དུ་སྐྱེས་པའམ་བུད་མེད་གང་ཡང་རུང་བའི་སྐད་ལྷ་ཚངས་པའི་དབྱངས་བཞིན་དུ་ཕྱི་ནང་ཉེ་རིང་མེད་པར་གསལ་ཞིང་། སེམས་ཅན་ཀུན་གྱི་རྣ་བར་སྙན་པ་དང་ལྡན་པ་ནི། ཚེ་སྔ་མ་ལ་གོམས་པའི་བར་ལ་གཞན་གྱི་ཆོས་ལ་ཉན་པའི་བློ་སྐྱེས་ནས་ཉན་པས་བར་ཆད་ནས་འབྲས་བུ་མ་སྨིན་པ་ལས་གྱུར་པས་ཏེ། ད་རྫོགས་པར་རྒྱུད་ལ་བརྟེན་ཅིང་བསྒྲུབ་པས་འབྲས་བུ་ཐོབ་པ་ཡིན་ནོ། །ཡང་སྐྱེས་པའམ་བུད་མེད་གང་ཡང་རུང་བ་གཅིག་གིས་ཚིགས་སུ་བཅད་པ་སྟོང་ལ་ཡང་དག་པར་སེམས་གཞུང་ནས་བཟུང་ན། ཉིན་གཅིག་ལ་སྐལ་ལྡན་དེས་བློར་ཟིན་པའི་མི་དེ་ནི། ཚེ་སྔ་མ་ལ་གཞན་ལ་སྒྲོ་བསྐུར་བའི་ལས་དང་། ཚིག་བརླང་པོས་གཞན་གྱི་ཞེ་གཅད་པས་བར་ཆད་པ་འབྲས་བུ་མ་སྨིན་པ་ཡིན་པས། དེ་ཉིད་དང་ལྡན་པའི་སྐྱེས་བུ་དེས། ད་ལྟ་ཚོགས་ཀྱི་འཁོར་ལོ་ལན་ལྔ་བྱས་ནས་འབྲས་བུའི་དོན་ལ་གནས་ན། ཡང་འབྲས་བུ་ངེས་པར་ཐོབ་པ་ཡིན་ནོ། །ཡང་སྐྱེས་པའམ་བུད་མེད་གང་ཡང་རུང་བའི། སེམས་ཅན་མི་དང་མི་མ་ཡིན་པ་དང་། བྱོལ་སོང་དང་ཐ་ན་བྱ་དང་རི་དྭགས་ལ་སོགས་པ་ཐམས་ཅད་བྲན་བཞིན་དུ་འདུ་ཞིང་དབང་སྒྱུར་བ་དང་། བཀའ་ཉན་པ་དང་། བྱ་བའི་ལས་ཅི་འགྲུབ་པ་དང་། གང་ཟག་འདི་ཡིས་ལས་ལ་འཁོར་བར་གྱུར་པ་དེ་ནི། ཚེ་སྔ་མ་ལ་ངག་གི་ལས་གཙོ་བའི་སྒོ་ནས་སངས་རྒྱས་ཐམས་ཅད་ཀྱི་གསུང་ལ་བསྒྲུབ་པ་བྱེད་པའི་ཚེ་ན་གཞན་གྱི་གཏམ་རྒྱུད་ཀྱི་བར་གཅད་པས་འབྲས་བུ་མ་རྫོགས་ཏེ། ད་ལྟའི་ལུས་སུ་སྨིན་པས་ན། ཚེ་འདི་ལ་ངག་གཅད་པ་གཙོ་ཆེ་བའི་སྒོ་ནས་བསྒྲུབས་པས་འབྲས་བུ་ངེས་པ་ཐོབ་པར་འགྱུར་བ་དག་ཡིན་ནོ། །དེ་ལྟར་རྟགས་དེ་དག་རེ་རེ་བྱུང་བ་ནི། ཚེ་འདི་མ་གཏོགས་པ་གཉིས་ན་འབྲས་བུ་ཐོབ་པ་ཡིན་ལ། གཉིས་དང་ལྡན་ན་བར་མ་དོ་ལ་སངས་རྒྱ་བ་ཡིན། གསུམ་ཀ་གང་ཟག་གཅིག་གི་ལུས་ལ་རྫོགས་ན་ཆོས་མ་ལོག་པར་བར་ཆད་མེད་པར་སྤྱད་ན་ཚེ་འདི་ལ་སངས་རྒྱ་བ་ཡིན་པས་ན། དེ་ལྟ་བུའི་རྟགས་དང་ལྡན་པའི་སྐྱེས་བུ་དེ་ནི། སྔོན་དུ་སངས་རྒྱས་ཀྱི་གསུང་པ་ངག་གཙོ་བོར་བསྒྲུབས་པས་ན། མི་འདི་ཡིས་སྔ་མ་ལ་གོམས་པར་བྱས་སོ་མཁའ་འགྲོ་མ་ཞེས་སྡུད་པ་པོ་ལ་གདམས་པ་དང་བཅས་པས་ཏེ། སྔོན་དུ་སངས་རྒྱས་ཀྱི་གསུང་མ་གོམས་པའི་རྣལ་འབྱོར་པའི་ད་ལྟའི་ལུས་ལ་སྨིན་པ་བསྟན་ནས། ད་ནི་སྔོན་དུ་ངག་གི་ལས་གཙོ་བའི་སྒོ་ནས་སངས་རྒྱས་ཀྱི་ཐུགས་ལ་སྦྱངས་པ་ད་ལྟའི་རྣལ་འབྱོར་པའི་ངག་ལ་སྨིན་པ་བསྟན་པའི་རྟགས་ནི། སངས་རྒྱས་ཀུན་གྱི་ཐུགས་ལ་ཡང་། །ཞེས་པ་ལ་སོགས་པས་བསྟན་ཏེ། སངས་ནི་ཤེས་བྱ་རང་གི་མཚན་ཉིད་ལ་བདག་ཏུ་འཛིན་པའི་དྲི་མ་མེད་པས། རྟོགས་པ་འཕྲ་རགས་ཀྱི་དྲི་མ་རང་དག་པས་སངས་ཞེས་བྱ་ལ། དེ་ལྟར་སངས་པས་རང་གི་ངོ་བོ་ཀ་ནས་དག་པའི་ཡེ་ཤེས་སུ་དྲི་མ་དང་། བྱས་བཅོས་བརྩོལ་སྒྲུབ་དང་བྲལ་བས་རྒྱས་པའོ། །དེ་ལྟ་བུའི་འདས་པའི་སངས་རྒྱས་ལ་མ་འོངས་པ་གྲུབ་པར་མི་འཛིན། མ་འོངས་པ་འདས་པའི་སྔོན་དུ་མི་སློང་། དེ་ལྟ་བུ་ལ་འགག་པ་དང་སྐྱེ་བ་གྲུབ་པ་མེད་པས། ཡོད་པའི་མཐར་འཛིན་པ་རྣམས་ཡེ་གྲོལ་བས། དེ་ཉིད་ཡོད་མ་མྱོང་བས་རྟགས་པ་ཡེ་ནས་གྲུབ་པ་མེད། མེད་མ་མྱོང་བས་ཆད་པའི་མཐར་འཛིན་གྱི་རྟོག་པ་མེད་པས། མཐའ་གཉིས་ལས་འདས་པའོ། །ངོ་བོ་ཅིར་ཡང་ཤར་རྒྱུ་མེད། རང་བཞིན་གང་དུ་ཡང་སྣང་བ་མེད། ཐུགས་རྗེ་ལ་རོལ་པ་སྣ་ཚོགས་ཤར་བས། ཡོད་པ་རོལ་པ་རང་ཤར། མེད་པ་གནས་ལུགས་སུ་རང་གྲོལ། ཡོད་མེད་གཉིས་སུ་མ་གྲུབ་པས་ངོ་བོ་རང་གྲོལ་རང་དག་པའོ། །ཡང་དག་པའི་ཐུགས་དེ་ལྟ་བུ་ལ་སྔོན་དུ་གོམས་པར་བྱས་པའི་སྐྱེས་པའམ་བུད་མེད་ཡང་རུང་བའི་ངག་ལ་རྟགས་གཉིས་པོ་བྱུང་བ་དེ་ཡིས། འདི་ཉིད་སྦྱངས་པའི་རྟགས་འགྲོ་བ་ཕ་རོལ་ཡོན་ཏན་དང་ལྡན་པ་གཅིག་གིས་ཚིག་གཅིག་སྨྲས་པ་ཙམ་གྱིས་ནི། ཚིག་དེའི་དོན་ཁོའི་འདོད་པ་གང་ཡིན་པ་ནི་ཕྱིན་ཅི་མ་ལོག་པར་དེའི་འདོད་པ་བདེ་ལུགས་སུ་ཕ་རོལ་པོ་དེ་ཇི་ལྟར་འདོད་པ་བཞིན་དུ་གོ་བ་མ་ནོར་བར་སྐྱེས་བ་ནི། ཚེ་སྔ་མ་ལ་ངག་གཙོ་བའི་སྒོ་ནས་སངས་རྒྱས་ཀྱི་ཐུགས་ལ་སྦྱོང་བའི་འཕྲོ་ལ། སེམས་ཅན་ཕ་རོལ་པོ་གཅིག་ལ་ངག་གི་ནུས་པ་ཕྱུང་བས་བར་ཆད་ནས་ནུས་པ་མ་རྫོགས་པ་སྟེ། འདིས་ནི་ད་ལྟའི་ཚེ་ལ་གང་ཟག་གི་ངག་གི་ནུས་པ་དང་ལྡན་པ་ལ། ཚོགས་རྫོགས་པར་བྱས་ནས་ཆོས་མ་ལོག་པར་སྒྲུབ་ན། ཚེགས་མེད་པར་འབྲས་བུ་ཐོབ་པ་ཡིན་ནོ། །ཡང་སྐྱེས་པའམ་བུད་མེད་གང་ཡང་རུང་བ་དེ། རང་གིས་ཁ་ནས་སྨྲས་པའི་ཚིག །འཇིག་རྟེན་པའི་གཏམ་དང་། གྲུབ་པའི་མཐའི་ཚིག་དང་། ཉམས་སུ་མྱོང་བ་དག་གི་ཚིག་དང་། མདོར་ན་བརྗོད་པ་ཐ་དད་པའི་ཚིག་དང་། རང་གི་གནད་ཐོག་ཏུ་འབེབས་པའི་ཚིག་རྣམས་ལ། ཇི་སྐད་སྨྲས་པ་བཞིན་དུ་འགྱུར་བ་མེད་པར་གང་ཟག་གཞན་རྗེས་སུ་འཛིན་པ་དེས་བསླབ་ཏུ་བཏུབ་པ་དང་། དེ་ཉིད་ལོངས་པ་དང་རྗེས་མི་འགྱུར་བར་སྨྲ་བ་དེ་ནི། ཚེ་སྔ་མ་ལ་ངག་གཙོ་བའི་སྒོ་ནས་སངས་རྒྱས་ཀྱི་ཐུགས་ལ་སྦྱོང་བའི་དུས་སུ་བག་ཙམ་མ་འབྱོངས་པ་ལ། ཡིད་དཔྱོད་ཀྱི་ཚིག་བཏགས་པས་བར་ཆོད་དེ་འབྲས་བུ་མ་རྫོགས་པ་སྟེ། དེ་ཉིད་ལ་ད་ལྟ་བླ་མ་མཆོད་པ་དང་། རྡོ་རྗེ་སྤུན་ལ་ཚོགས་བསགས་པའི་ལས་བྱས་ནས་བསྒྲུབས་ན་འབྲས་བུ་ཚེགས་མེད་པར་འབྱིན་པའོ། །འདི་ལྟ་བུ་དང་ལྡན་པ་དེས་ནི་སངས་རྒྱས་རྣམས་ཀྱི་རྟགས་སྔོན་དུ་གོམས་པ་ལས། ད་ལྟའི་ངག་ལ་ཡང་དག་པར་སྨིན་པས་ཏེ་འདི་ནི་སྔོན་དུ་གོམས་པ་ལས་བྱུང་བ་ཡིན་ནོ། །མཁའ་འགྲོ་མ་ཞེས་བོས་ནས། གོང་དུ་ངས་བསྟན་པ་དེ་ལྟར་ངག་གཙོ་བའི་སྒོ་ནས་སྐུ་གསུང་ཐུགས་ལ་ཡང་ནས་ཡང་དུ་སུས་གོམས་པའི་སྐྱེས་པའམ་བུད་མེད་དེ་ནི་རྟགས་སོ་སོ་དང་ལྡན་པ་རྣམས་ཚེ་འདི་ལ་བར་མ་ཆད་པར་ཆོས་སྤྱོད་ན། ཚེ་འདི་མ་གཏོགས་པ་གཉིས་ལ་ནི་རྟོགས་པ་མངོན་དུ་གྱུར་པའི་སངས་རྒྱས་ཐོབ་པར་ངེས་སོ། །གོང་མའི་རྟགས་གཉིས་ཀ་རྫོགས་པས་ནི་ཚེ་འདི་ལ་སངས་རྒྱས་ཀྱི་འབྲས་བུ་ཐོབ་པ་ལ་ཐེ་ཚོམ་བྱར་མེད་དོ། །གལ་ཏེ་དེ་ལྟ་བུའི་རྟགས་ཡོད་ཀྱང་ཚེ་འདི་ལ་ཆོས་ལ་ཞུགས་ཙམ་ལས་བར་ཆད་ནི། ལུས་ཀྱི་སྐབས་སུ་བཤད་པའི་གོལ་སར་ལྟུང་བ་ཡིན་ནོ། །ཞེས་སངས་རྒྱས་ཀྱི་ཐུགས་ཀྱི་རྟགས་བསྟན་ཏེ། དེ་དག་རྣམས་ནི་རྣལ་འབྱོར་པས་སྔོན་དུ་སྦྱངས་པས་ད་ལྟའི་གང་ཟག་ཏུ་སྐྱེས་པ་ཆོས་ལ་ཞུགས་ཙམ་གྱི་ངག་ལ། སངས་རྒྱས་ཀྱི་སྐུ་གསུང་ཐུགས་ཀྱི་རྟགས་འབྱུང་བ་བརྟན་པའོ། །ད་ནི་དོན་ཐ་མ་རྣལ་འབྱོར་པས་སྔོན་དུ་སྦྱངས་པའི་སེམས་ལ། སངས་རྒྱས་ཀྱི་སྐུ་གསུང་ཐུགས་ཀྱི་རྟགས་བསྟན་པ་ལ་བཞི་ཡོད་པའི་དང་པོ། སྔོན་སྦྱངས་ཀྱི་སྐྱེས་བུ་རྣམས་ཀྱི་སེམས་ལ་སངས་རྒྱས་ཀྱི་སྐུའི་རྟགས་བསྟན་པ་ནི། ཡང་ན་མཁའ་འགྲོ་གསལ་ཡིད་ཉོན། །ཞེས་པ་ལ་སོགས་པས་བསྟན་ཏེ། ཡང་ནི་ལན་གདབ་པའི་ཚིག་དེ། འདི་ཉིད་ལ་ཡང་ནས་ཡང་དུ་བསྟན་པར་བྱ་ཞེས་པའོ། །མཁའ་རིག་པ། འགྲོ་ཡེ་ཤེས་མ་ཆོས་ཉིད་དང་གསུམ་དབྱེར་མི་ཕྱེད་པའི་དོན་རང་གསལ་སྙིང་པོའི་དོན་ལ། ཀུན་ཏུ་འཚོལ་བའི་ཡིད་ཀྱིས་ཡུལ་བདག་ཏུ་གཅད། གཏན་ལ་འབེབས་པའི་ཡིད་ཀྱིས་ཡུལ་བདག་དང་བདག་གིར་བྱས། ངེས་པར་འཇོག་པའི་ཡིད་ཀྱིས་ཡུལ་སོ་སོའི་མཚན་ཉིད་ངེས་པར་གཟུང་། འགྱུ་བྱེད་འ ཛིན་པའི་ཡིད་ཀྱིས་གང་ལ་འགྱུས་པ་ཙམ་ལས་འཛིན་པའི་བློ་ཞེ་ན། ཡིད་ཀྱི་རྣམ་པར་ཤེས་པས་ཚོགས་དུ་མ་བསྡུས། ཉོན་མོངས་པ་ཅན་གྱི་ཡིད་ཀྱི་ཕྲ་རྒྱས་འཚོགས་པའི་ལས་བསྡུས་པ་སྟེ། དེ་ལྟར་ཡིད་དྲུག་གི་བྱུང་ཚོར་གྱི་རྟོག་པ་སྤོངས་ལ། རིག་པའི་ཡེ་ཤེས་ཆོས་ཉིད་གསལ་བ་ཆེན་པོའི་ཀློང་ནས་ཉོན་ཅིག་ཅེས་སྡུད་པ་པོའི་ཡིད་ཀྱི་སྐྱོན་དྲུག་བསལ་ནས། སྔར་སྦྱངས་པའི་རྟགས་སྐུ་གསུང་ཐུགས་ཀྱི་རྟགས། ད་ལྟའི་ཡིད་ལ་ཇི་ལྟར་བྱུང་བ་བསྟན་གྱིས་ཁྱོད་ཀྱིས་མ་ཡེངས་པར་ཉོན་ཅིག་ཅེས་གདམས་པའོ། །སེམས་རྣམ་པར་རྟོག་པའི་བག་ཆགས་དུ་མ་འདུས་པའི་ལས་ཅན་ཀུན་གཞི་ཉེར་ལེན་གྱི་ལུས་ཀྱིས་བསླད་པས་སེམས་ཅན་ཞེས་བྱའོ། །དེ་ལྟ་བུའི་འགྲོ་བ་སྐྱེས་པའམ་བུད་མེད་གང་གི་ཡིད་ལ་ཡིད་ནི། ཡིད་ཀྱི་ངོ་བོ་དང་། ངེས་ཚིག་དང་། དབྱེ་བ་དང་། བྱེད་པའི་ལས་དང་། རྒྱུ་དང་། རྐྱེན་དང་། རང་བཞིན་དང་། འབྲས་བུ་དང་། སོ་སོའི་མཚན་ཉིད་དང་། ཡིད་དེ་བཟུང་ཞིང་བསྟན་པར་བྱ་བའི་མན་ངག་དང་། ཕྱི་ནང་གི་འབྱུང་བ་དང་སྦྱར་བ་དང་། སྐུ་གསུམ་དུ་ལ་བཟླ་བ་དང་བཅུ་གཉིས་ཀྱིས་ཡིད་ཀྱི་ཆོས་རྒྱས་པར་བསྟན་ཏེ། ངོ་བོ་དྲན་པ་དང་། བསམ་པ་དང་། འགྱུ་བའི་རྒྱུ་རྣམས་སོ། །ངེས་ཚིག་ནི་ཡུལ་སྣ་ཚོགས་པ་ལ་འཇུག་པ་བྱེད་པའོ། །དབྱེ་ན་དྲུག་ཏེ། ཀུན་ཏུ་འཚོལ་བའི་ཡུལ་གསུམ་སྟེ། དུས་གསུམ་ལ་འཇུག་ཅིང་འཚོལ་བར་བྱེད་པ་དང་། གཏན་ལ་འབེབས་པའི་ཡིད། དེ་ལྟར་དུས་གསུམ་གྱི་ཡུལ་ལ་འགྱུས་པས་དེའི་རྗེས་སུ་ལུས་དང་བཅས་ཏེ་གཏན་ལ་འབེབས་པའོ། །ངེས་པར་འཇོག་པའི་ཡིད་ནི་དེ་ལྟར་ལུས་དང་བཅས་པས་ཚོང་དུས་ལ་སོགས་པའི་རྣམ་པ་དུ་མ་གཏན་ལ་ཕབ་པ་དེ་ལ་ངེས་ཤེས་མཐར་ཐུག་དང་བཅས་པས་ཡུལ་ལ་ཞེན་པ་མཐར་ཐུག་དང་བཅས་པས་འཛིན་པའོ། །དེ་ལྟར་རྣམ་པ་དུ་མ་ལ། ངེས་པ་གཞག་པའི་ཡུལ་གསུམ་ལ་འགྱུ་བར་བྱེད་པའི་དྲན་པ་སྣ་ཚོགས་པ་འགྱུ་བས་ཡུལ་དུ་མ་ལ་འཛིན་པས་དུ་མར་བཟུང་བས་འགྱུ་བྱེད་འཛིན་པའི་ཡིད་དོ། །ཡིད་ཀྱི་རྣམ་པར་ཤེས་པ་ནི་དེ་ལྟར་ཡུལ་གསུམ་ལ་འགྱུས་ཤིང་བཟུང་བ་སྒོ་ལྔ་ལ་སོགས་པའི་ཤེས་པ་མང་པོ་སོ་སོར་སྣང་བར་འགྱུར་བས། དེ་དག་གིས་ཡུལ་མི་འདྲ་བ་ཐ་དད་པ་ལ་ཤེས་པ་འཛིན་པའི་ཆ་ཐ་དད་པར་བཟུང་བས། ཕྱི་ནང་གི་བཟུང་བའི་ཡུལ་སྣ་ཚོགས་པར་ཤར་བའོ། །ཉོན་མོངས་པ་ཅན་གྱི་ཡིད་ནི། དེ་ལྟར་སྒོ་ལྔའི་ཤེས་པ་ཐ་དད་པ་ཡུལ་ཐ་དད་པ་རྣམ་འཁྲུལ་པའི་ཤེས་པ་ཡིན་པར་མ་ཤེས་པས་གཏི་མུག་བག་ལ་ཉལ་དང་སྔོན་དུ་རྒྱུ་གཉིས་བྱུང་། དེ་མ་ཤེས་པས་ཡུལ་བཟང་ངན་གྱི་བྱེ་བྲག་ལ་འདོད་ཅིང་ཆགས་པས་འདོད་ཆགས་བྱུང་། དེ་ལ་ཆགས་པས་ང་དང་བདག་གིར་གཟུང་འཛིན་རགས་པ་ལས། ཞེན་ཅིང་ཆགས་པའི་དབང་གིས། གཞན་ལ་ཞེ་སྡང་པའི་ཉོན་མོངས་པ་བྱུང་། དེ་ལྟར་ཞེ་སྡང་ནས་སྡང་བའི་དབང་གིས། མཉམ་པ་ལ་ང་རྒྱལ་བར་བྱས། དེ་བྱས་པས་འཕྲ་བ་ཉིད་ལའང་དོག་ཅིང་གཞན་ལ་སྤོངས་ཤིང་བདག་ཏུ་འདོད་པ་བསྒྲུབ་པ་དང་། དེ་དག་ལ་སོགས་པ་ཉོན་མོངས་པ་བསམ་གྱིས་མི་ཁྱབ་པ་རྣམས་སུ་བྱུང་བའོ། །བྱེད་པའི་ལས་ནི། ཀུན་ཏུ་འཚོལ་བྱེད་ཀྱིས་འདས་པ་དང་། མ་འོངས་པ་དང་། ད་ལྟའི་ཡུལ་རྣམས་འཚོལ་ཞིང་སློང་བར་བྱེད། དེ་བྱས་པས་དྲན་པའི་གཞི་འཛིན་པའོ། །གཏན་ལ་འབེབས་པའི་ཡིད་ཀྱིས་མིང་ཐ་དད་པར་འདོགས་གཞིར་བྱེད་པའོ། །དེ་བྱས་པས་ཚིག་དང་བརྗོད་པ་རྣམས་ལ་ཡིད་ཀྱིས་བརྗོད་པའོ། །ངེས་པར་འཇོག་པའི་ཡིད་ཀྱིས་སྙམ་བྱེད་དུ་མ་ལ་གནས་ཤིང་འཇོག་པའོ། །དེ་བྱས་པས་ཡིད་དཔྱོད་འཛིན་པའི་ལྟ་བ་དང་། བསྒོམ་པ་དང་། སྤྱོད་པར་གྱུར་པའོ། །འགྱུ་བྱེད་འཛིན་པའི་ཡིད་ཀྱིས་ནི་ཡུལ་མིང་དང་བཅས་པ་དུ་མ་ལ་གཅོད་ཅིང་འ ཛིན་པའི་ཤེས་པ་བློ་དང་བཅས་པར་བྱེད་ལ། དེ་བྱས་པས་དོན་ལ་ཡིད་ཆེས་མེད་པར་འགྱུར་བའོ། །ཡིད་ཀྱི་རྣམ་ཤེས་ཀྱིས་ནི་སྒོ་ལྔའི་ཞེན་པ་ཐ་དད་དུ་འཛིན་པའི་ལས་བྱེད་ལ། དེ་བྱས་པས་འཁྲུལ་པའི་ཤེས་པ་སྣ་ཚོགས་པ་སྡུད་པར་འགྱུར་བའོ། །ཉོན་མོངས་པ་ཅན་གྱི་ཡིད་ཀྱིས་ནི། རྟོག་པ་ཐ་དད་པ་སློང་བར་བྱེད་ལ། དེ་བྱས་པས་མི་རྟོག་པའི་ཡེ་ཤེས་ཀྱི་གེགས་སུ་གྱུར་པའོ། །རྒྱུ་ནི་ཀུན་དུ་འཚོལ་བྱེད་ཀྱི་རྒྱུ་དྲན་པ། གཏན་ལ་འབེབས་པ་ཀུན་གཞི། ངེས་པར་འཇོག་པ་བློ། འགྱུ་བྱེད་འཛིན་པ་མིང་། ཡིད་རྣམ་ཤེས་ཀྱི་རྒྱུ་དབང་པོ་སོ་སོའི་བྱེད་རྒྱུ། ཉོན་མོངས་པ་ཅན་གྱི་ཡིད་ཀྱི་རྒྱུ་འཁྲུལ་པའོ། །རྐྱེན་ནི་ཀུན་དུ་འཚོལ་བྱེད་ཀྱི་ཡིད་ཡུལ་གསུམ་ལ་བརྟེན་ནས་སྐྱེ། གཏན་ལ་འབེབས་པ་བཟུང་བའི་ཡུལ་ཙམ་ལ་བརྟེན་ནས་སྐྱེ། ངེས་པར་འཇོག་པ་ཞེན་པའི་ཡུལ་དུ་གྱུར་པ་ལ་བརྟེན་ནས་སྐྱེ། འགྱུ་བྱེད་འཛིན་པ་རང་བཞིན་མ་བཅོས་པ་ལ་བརྟེན་ནས་སྐྱེ། ཡིད་ཀྱི་རྣམ་ཤེས་འདོད་པའི་ཡོན་ཏན་ལ་བརྟེན་ནས་སྐྱེ། ཉོན་མོངས་པ་ཅན་གྱི་ཡིད་བག་ཆགས་སྔ་ཕྱིའི་ཉིང་འཚམས་སྦྱོར་བ་རྨི་ལམ་གྱི་རྣམ་པ་ལ་བརྟེན་ནས་སྐྱེའོ། །དེ་དག་གི་རང་བཞིན་ནི། ཀུན་དུ་འཚོལ་བའི་ཡིད་ཀྱི་རང་བཞིན་འདོད་པས་ཆོ་ག་ཤེས་རྒྱུ་མེད་པ་དང་། གཏན་ལ་འབེབས་པ་ནི་ང་དང་བདག་གིར་འཛིན་པ་དང་། ངེས་པར་འཇོག་པ་ནི་གཅད་པའི་ཡུལ་ལ་ཞེན་པ། འགྱུ་བྱེད་འཛིན་པའི་རང་བཞིན་རྟེན་གཅིག་ལ་མི་གནས་པ། ཡིད་ཀྱི་རྣམ་པར་ཤེས་པའི་རང་བཞིན་གཅིག་ལ་ཐ་དད་དུ་འཛིན་པ། ཉོན་མོངས་པ་ཅན་གྱི་ཡིད་ཀྱི་རྣམ་པའམ་རང་བཞིན་ཕྱིན་ཅི་ལོག་གི་རྣམ་པ་རྣམས་ཡིད་ལ་བྱེད་ཅིང་འཁྲུལ་པའི་རང་བཞིན་ནོ། །འབྲས་བུ་ནི་ཀུན་དུ་འཚོལ་བའི་འབྲས་བུ་བག་ཆགས། གཏན་ལ་འབེབས་པའི་རྟོགས་པ། ངེས་པར་འཇོག་པ་ཡིད་དཔྱོད། འགྱུ་བྱེད་འཛིན་པའི་ཐེ་ཚོམ། ཡིད་ཀྱི་རྣམ་ཤེས་ཀྱི་འབྲས་བུ་ལོག་ཤེས། ཉོན་མོངས་པ་ཅན་གྱི་ཡིད་ཀྱི་གོང་མ་རྣམས་འདུས་པའི་ཕྱིར་ན་འགྲོ་བ་རིགས་དྲུག་ཏུ་འཁོར་བའོ། །སོ་སོའི་མཚན་ཉིད་ནི། ཀུན་དུ་འཚོལ་བའི་ཡིད་ཀྱི་མཚན་ཉིད་ཟླར་སྡུད་ཅིང་གནས་པ་མ་ཡིན་པའོ། །གཏན་ལ་འབེབས་པའི་རྟོག་པ་བྱེད་ཅིང་ཡུལ་ཡོངས་སུ་གཅོད་པའོ། །ངེས་པར་འཇོག་པ་ནི་འཁྲུལ་པ་ལ་ཡང་དག་ཏུ་འཛིན་པའོ། །འགྱུ་བྱེད་འཛིན་པའི་མཚན་ཉིད་སྣང་རུང་རྣམས་འཛིན་པར་བྱེད་པའོ། །ཡིད་ཀྱི་རྣམ་ཤེས་ཀྱིས་ནི་སྒོ་ལྔའི་རྗེས་སུ་འགྲོ་ལྡོག་གོ། །ཉོན་མོངས་པ་ཅན་གྱི་ཡིད་ཀྱི་མཚན་ཉིད་ནི་སྡུག་བསྔལ་ཞིང་རྒྱུན་མི་རྟག་པའོ། །ཡིད་དེ་དག་བཟུང་སྟེ་བསྟན་པར་བྱ་བའི་མན་ངག་ནི། ཡིད་དྲུག་པོ་དེ་དག་ནི་ཡེ་ནས་ཡོད་པ་མ་ཡིན་ཏེ། གློ་བུར་བ་དཔེར་ན་ནམ་མཁའི་སྤྲིན་དང་འདྲ་སྟེ། གློ་བུར་དུ་བྱུང་ཞིང་གློ་བུར་དུ་དེངས་པ་དང་འདྲ་བར། ཆོས་ཉིད་ཡེ་ནས་གནས་པ་དེ་ལ། ཡིད་དྲུག་གློ་བུར་དུ་བྱུང་ཞིང་གློ་བུར་དུ་ཡལ་བས་ཏེ། དེ་ལྟར་སྣང་བ་སྣ་ཚོགས་སུ་སྣང་ཡང་གཅིག་ཡིན་པས། གཅིག་ལ་ཐ་དད་དུ་འཛིན་པའི་འགྱུ་བ་རང་གཅད་པས། ཡུལ་གསུམ་ལ་བདག་ཏུ་རྟོག་པའི་བློ་ལས་འདས་པས། དྲན་པ་གློ་བུར་བའི་རྟོག་པ་རྒྱུན་ཆད། དེ་ཆད་པས་དྲན་པ་མེད་པ་བེམས་པོའི་ཤེས་པ་རང་འགགས། དེ་འགགས་པས་སྐྱེ་མེད་རང་གི་ངོ་བོ་ལ་གནས་ཏེ། འགག་མེད་དུ་ཟང་ཐལ། དེ་ལས་འདས་ཏེ་མཐའ་གྲོལ་ཡོངས་རྫོགས་ཆེན་པོའི་ལྟ་བར་བཞུགས་ཏེ། ཡིད་ཀྱི་འགྱུ་བ་རང་ཆོད། དེ་ཆོད་པས་ཡུལ་ལ་འཛིན་པའི་ཤེས་པ་རང་གཏན་སྟོང་པའོ། །དེ་སྟོང་པས་བག་ཆགས་སྔ་ཕྱིའི་ཞེན་པ་སྐྱེ་མི་སྲིད་པས། འཁྲུལ་པ་རྒྱུན་ཆད་པའོ། །དེ་ཡང་དེ་ཉིད་བཟུང་བའི་མན་ངག་དངོས་ནི་ཐབས་ལ་བརྟེན་ནས་བཟུང་བ་དང་། ཤེས་རབ་ལ་བརྟེན་ནས་བཟུང་བའོ། །ཐབས་ལ་བརྟེན་ནས་བཟུང་བ་ནི། སྒྲའི་དམིགས་རྟེན་ལ་སོགས་པ་སྒོ་ལྔའི་རང་རྒྱུད་ཀྱི་ཞེན་པ་ཟློག་པའི་ཐབས་ལྔའམ་དྲུག་ལ་བརྟེན་ནས་སྦྱངས་པས། སྣང་ལ་རང་བཞིན་མེད་པའི་ཡིད་ཀྱི་བྱུང་ཚོར་གྲོལ་བ་འབྱུང་བ་ཡིན་ནོ། །ཡང་རྣམ་པར་རྟོག་པ་ཧཱུྃ་གིས་དེད་པ་ལ་སོགས་པ་སྙིང་གཟེར་ཉེར་གཅིག་ལ་བསླབས་པས་ཡིད་ཀྱི་འགྱུ་བ་རང་འགགས་ནས། བདེ་ཆེན་རང་ལུགས་སུ་འཆར་བ་དག་ཡིན་ནོ། །ཤེས་རབ་ལ་བརྟེན་ནས་བཟུང་བ་ནི། དངོས་པོ་གཤིས་ཀྱི་འདུག་ཚུལ་ལ་འཁོར་འདས་གྲུབ་མ་མྱོང་བས། འགྱུ་བའི་ཤེས་པ་ཡོད་མི་སྲིད། དེ་མེད་པས་ཡིད་དྲུག་གི་ཡུལ་ལ་སྣང་མ་མྱོང་། དེ་མ་མྱོང་བས་གཅོད་པར་བྱེད་པའི་ཤེས་པ་རྒྱུན་ཆད་པའོ། །གང་ལྟར་ཤར་བ་ཐམས་ཅད་ཆོས་ཉིད། ཇི་ལྟར་སྣང་བ་ཐམས་ཅད་རོལ་པ། ཡོད་མེད་སྣང་གྲགས་ཐམས་ཅད་གནས་ལུགས་སུ་གྲོལ་བ་ཞེས་བྱ་སྟེ། ཡིད་དྲུག་བཙལ་དུ་མ་རྙེད་པས་འཁྲུལ་པ་ཀ་ནས་དག་པའོ། །དེ་ལྟར་ཀ་དག་པས་སྣང་བ་རང་ས་ན་བརྟན། ཤེས་པ་རང་ས་ནས་གྲོལ་ཏེ། སྣང་བའི་དུས་ན་རང་སྣང་དུ་ཤེས་པའི་གནད་དང་། འགྱུ་བའི་དུས་ན་རང་ཡུལ་དུ་ཤེས་པའི་གནད་དང་། གྲོལ་བའི་དུས་ན་ཡེ་གྲོལ་དུ་རྟོགས་པའོ། །ཡིད་དེ་དག་ཕྱི་ནང་གི་འབྱུང་བ་དང་སྦྱར་བ་ནི། གང་ལ་ཡང་ཐོགས་པ་མེད་པས་འགྱུ་བ་རླུང་ཡིན་ལ། འབྱུང་འཇུག་གང་སྟོང་དུ་བྱེད་པས་དབུགས་ཡིན་ནོ། །སྐུ་གསུམ་དུ་ལ་བཟླ་བ་ནི། དེ་ལྟར་ཆོས་ཀྱི་རྣམ་གྲངས་བཅུ་གཉིས་ཀྱིས་ཡིད་གཏན་ལ་ཕབ་པས། ཡིད་ལ་ཡིད་དུ་ཤེས་པས་ཕྱི་ཡུལ་ལ་འཛིན་པ་རང་དག །ནང་སེམས་ཀྱི་འཆིང་བ་རང་གྲོལ། བདག་འཛིན་ཉོན་མོངས་པའི་རྟོག་པ་རང་འགགས་པས། དྲན་པ་མི་གནས་དེ་འདྲ་བསམ་ཡུལ་དང་བྲལ། དྲན་མེད་ལ་མི་གནས་ཡེ་ནས་སྐྱེ་བ་མེད། སྐྱེ་མེད་ལ་མི་གནས་པས་འགྱུ་བ་བློ་ལས་འདས། འདས་ཐོག་ན་མི་གནས་ཏེ་མཐའ་གྲོལ་ཅི་ཡི་ངོ་བོར་ཡང་མ་གྲུབ་པས། སྐུ་གསུམ་དུ་ཡོངས་སུ་རྫོགས་པ་ནི། སྣ་ཚོགས་ཡིད་ཀྱི་ཆོ་འཕྲུལ་ཡིན་པས་སྤྲུལ་སྐུ་རང་ཤར། བྱས་སྤྱོད་ལོངས་སྤྱོད་ཀྱི་རྒྱུན་དུ་ཤར་བས་ལོངས་སྐུ་རང་ཤར། ཡོད་མེད་སྣང་སྟོང་གཤིས་ལས་གྲོལ་བས་ཆོས་སྐུར་རང་ཟང་ཐལ་བ་ནི། དེ་དག་ངོས་བཟུང་བ་ཡིད་དཔྱོད་འགྱུ་བ་སྣ་ཚོགས་སུ་སྣང་བ་སྤྲུལ་སྐུ་ཐུག་ཕྲད་དུ་ངོ་སྤྲད། ཡིད་ཀྱི་དྲན་པ་ཡུལ་དུ་མ་སྤྱད་པ་ལོངས་སྐུ་ཐུག་ཕྲད་དུ་ངོ་སྤྲད། ཡིད་ཀྱི་འཛིན་པ་གློ་བུར་རང་སར་དག་པ་ཆོས་སྐུ་ཐུག་ཕྲད་དུ་ངོ་སྤྲད་པས། སྣང་བ་རང་རྒྱུད་དུ་འཛིན་པའི་ཞེན་པ་རང་ལོག་པས་སྤྲུལ་པའི་སྐུ་ལ་ཞེན་པའི་འགྱུ་བ་རང་ཆོད་པས་ཡིད་ཀྱི་དྲན་པ་ལ་བཟླ། ཆོས་ཉིད་བཅོས་མ་ལས་གྲོལ་བའི་ཡིད་རང་བྱུང་གི་ཡེ་ཤེས། གསལ་བ་རང་རྒྱུད་དུ་འཛིན་པའི་ཞེན་པ་རང་ལོག་པས། ལོངས་སྤྱོད་རྫོགས་པའི་སྐུ་ཡིས་བཅིངས་པའི་མདུད་པ་རང་ས་ནས་གྲོལ་བས། ཡིད་ཀྱི་བྱུང་ཚོར་ལ་བཟླ་སྟེ། ཆོས་ཉིད་གཉུག་མ་གཉིས་སུ་མེད་པར་གནས་པས་ཡིད་རང་བྱུང་གི་ཡེ་ཤེས། སྟོང་པ་རང་རྒྱུད་དུ་འཛིན་པ་རང་ལོག་པས། ཆོས་ཀྱི་སྐུར་འཛིན་པའི་ཞེ་འདོད་རང་འགགས་པས། ཡིད་ཀྱི་འགྱུ་བ་གཏན་མེད་པར་ཡོད་མེད་ལ་བཟླས་ཏེ། རྣལ་མ་དོན་གྱི་ཆོས་ཉིད་དུ་ཡིད་རང་བྱུང་གི་ཡེ་ཤེས་སུ་རང་ཤར་བའོ། །དེ་ལྟར་ཡིད་ཀྱི་རང་གི་མཚན་ཉིད་ཀྱི་ཆོས་བཅུ་གཉིས་ཕྱིན་ཅི་མ་ལོག་པར་ཁོང་དུ་ཆུད་ཅིང་རྩ་བ་ཆོད་པ་ལས་སྐྱེས་བུའི་ཡིད་ཡང་དག་པའོ། །ཆོས་ཉིད་ཁོང་དུ་ཆུད་པ་འདི་ལྟ་བུའི་རྟགས་རྣམས་དང་ཡིད་ལ་ལྡན་པར་གྱུར་པ་དེ་ནི། ཚེ་སྔ་མ་ལ་སངས་རྒྱས་རྣམས་ཀྱི་སྐུ་གསུང་ཐུགས་ལ་ཡང་དག་པར། ད་ལྟའི་ཡིད་ལ་རྟགས་བྱུང་བ་འདི་ཡིས་ཚེ་སྔ་མ་ལ་གོམས་པར་བྱས་པ་སྟོན་པ་རྡོ་རྗེ་འཆང་ང་ཡིས་བསྟན་ལ། འདི་མ་ཡིན་པ་གཞན་དུ་སངས་རྒྱས་གཞན་དག་གིས་ཀྱང་བསྟན་པའོ། །རྟགས་གཉིས་པོ་འདི་ལྟར་བྱུང་བའི་སྐྱེས་བུ་ནི་སྐུ་ལ་གོམས་པ་ནི། སུས་ཀྱང་མ་བསླབས་པར་བསྒོམ་པ་རང་བབས་སུ་གང་ལ་བྱུང་བའི་སྐྱེས་པའམ་བུད་མེད་ནི། སྔ་མ་ལ་བསྒོམ་པའི་དུས་ན་བྱིང་བའི་སྐྱོན་ལས་བར་ཆད་ནས་འབྲས་བུ་མ་རྫོགས་པ་སྟེ། འདི་ལ་སྣང་གསལ་གྱིས་བསྐང་བར་བྱས་ནས། སྒྲུབ་པས་འབྲས་བུ་ཚེ་གཉིས་ན་ཐོབ་པར་ངེས་སོ། །ཡང་སྐྱེས་པའམ་བུད་མེད་གང་ཡང་རུང་བའི་རང་བཞིན་གྱིས་རྣམ་རྟོག་ཆུང་ཞིང་སེམས་ནི་སུས་ཀྱང་བཅོས་པ་མེད་པར་ངང་གིས་རང་གཞག་ཏུ་དལ་བ་རྙེད་པའི་སྐྱེས་པའམ་བུད་མེད་འདིས་ནི་སྔོན་དུ་སངས་རྒྱས་ཀྱི་སྐུ་ལ་ཡིད་གཙོ་བའི་སྒོ་ནས་གོམས་པར་བྱེད་པའི་དུས་ན། བླ་མ་ལ་སེམས་པས་བག་མེད་པར་གྱུར་པ་ལས་བར་ཆད་ནས་འབྲས་བུ་དེ་ཉིད་ལ་མ་རྫོགས་ཏེ། ད་ལྟའི་བླ་མ་ལ་སེམས་ཀྱི་གདུང་བ་རབ་ཏུ་བསླང་བ་ཡང་དང་ཡང་དུ་བྱས་པས། བསྒྲུབ་ན་ཚེ་འདི་དང་གཉིས་ཏེ་སངས་རྒྱས་ཐམས་ཅད་ཀྱི་སྐུའི་དེ་བཞིན་ཉིད་ཀྱི་སངས་རྒྱས་སུ་འགྱུར་རོ། །ཞེས་སྔོན་དུ་སྦྱངས་པའི་ཡིད་ལ་སངས་རྒྱས་རྣམས་ཀྱི་སྐུའི་རྟགས་བསྟན་ནས། ད་ནི་སྔོན་དུ་སངས་རྒྱས་ཀྱི་གསུང་ལ་གོམས་པར་བྱས་པའི་རྟགས་ད་ལྟའི་ཡིད་ལ་འབྱུང་བར་བསྟན་པ་ནི། བསམ་པས་ཆོས་རྣམས་བློར་སྣང་དང་། །ཞེས་པ་ལ་སོགས་པས་བསྟན་ཏེ། སྐྱེས་པའམ་བུད་མེད་གང་གིས་སྔོན་ཆད་མ་མཐོང་བའི་ཆོས་རྣམས་ཀྱང་། བསམས་པ་ཙམ་གྱིས་ཤེས་བྱ་སྤྱིའི་རྣམ་པ་ཆོས་གྲུབ་པའི་མཐར་འཛིན་པ་དང་། ཤེས་བྱ་རང་གི་ཆོས་རང་གི་འདུག་ཚུལ་ཕྱིན་ཅི་མ་ལོག་པར་ཤེས་པ་རྣམས་སྐྱེས་བུ་དེའི་བློར་སྣང་ཞིང་འཁྲུལ་པ་མེད་པར་ཤེས་པའི་གང་ཟག་ནི། སྔོན་དུ་སངས་རྒྱས་ཀྱི་གསུངས་ལ་ཡིད་གཙོ་བོའི་སྒོ་ནས་སྦྱོང་པའི་ཚེ་རང་གི་བླ་མ་ལ་མི་དད་པ་སྐད་ཅིག་མ་གཉིས་ཀྱི་ཆ་ཙམ་སྐྱེས་པ་ལས། བར་ཆད་ནས་འབྲས་བུ་དེ་ཉིད་ལ་མ་རྫོགས་པར་འདི་ལ་ལས་ཀྱི་འཕྲོ་འཐུད་པ་སྟེ། ད་ལྟ་ཡིད་ཀྱིས་བླ་མ་ལ་རབ་ཏུ་མོས་པ་དཔག་ཏུ་མེད་པ་བསགས་པ་ལས་བསྒྲུབ་སྟེ། ཆོས་མ་ལོག་ན་ཚེ་འདི་དང་གསུམ་ན་སངས་རྒྱས་ཀྱི་གསུང་གི་སངས་རྒྱས་བཞིན་དུ་འགྱུར་རོ། །དེ་བཞིན་དུ་སྐྱེས་པའམ་བུད་མེད་གང་ཡང་རུང་བས་སྔར་མཐོང་མ་མྱོང་བའི་གླིང་དང་རབ་ཏུ་བཅས་པ་དང་། གླིང་དུམ་བུ་དང་། ལྷ་དང་ལྷ་མིན་གྱི་ཡུལ་དང་། ངན་སོང་གསུམ་གྱི་ཡུལ་ཡིད་ཀྱིས་མཐོང་བ་ནི། སྔོན་དུ་ཡིད་གཙོ་བའི་སྒོ་ནས་སངས་རྒྱས་ཀྱི་གསུང་ལ་བསྒྲུབས་པའི་ཚེ། རང་གི་ཡུལ་ལ་ཞེན་པའི་འགྱུ་བ་བྱུང་ནས་བར་ཆད་པས་འབྲས་བུ་དེ་ཉིད་ལ་མ་རྫོགས་པས། ད་ལྟ་འདི་ལ་ལས་ཀྱི་འཕྲོ་འཐུད་པས་བྱུང་བ་ཡིན་ཏེ། རང་གི་ཡུལ་སྤངས་ནས་ཡིད་ཀྱི་བསམ་གཏན་ལ་བསླབས་པས་འབྲས་བུ་ཚེ་འདི་དང་གསུམ་ན་འབྱིན་པ་ཡིན་ནོ། །ཡང་སྐྱེས་བུས་སྔར་རྣ་བའི་དབང་པོས་མ་ཐོས་པའི་ཆོས་ཀྱི་ཚིག །རང་བཞིན་དུ་བྱས་པ་མེད་པར་ནི་སྐྱེས་པའམ་བུད་མེད་སུས་ཤེས་པ་ནི། སྐལ་ལྡན་འདིས་ནི་སྔོན་དུ་སངས་རྒྱས་ཐམས་ཅད་ཀྱི་གསུང་ལ་གོམས་པར་བྱེད་པའི་ཚེ། ཚིག་ལ་ཐེ་ཚོམ་སྐྱེས་པ་ལས་བར་ཆད་ནས་འབྲས་བུ་དེ་ཉིད་མ་རྫོགས་ཏེ། ད་ལྟ་ཡིད་ལ་སྨིན་པས་ཏེ། འདི་ཉིད་ལ་ཆོས་མ་ལོག་པ་གཞན་ལ་བསྟན་ན། ཚེ་འདི་དང་གསུམ་ན་འབྲས་བུ་རྫོགས་པར་འགྱུར་རོ། །མཁའ་འགྲོ་མ་ཞེས་སྡུད་པ་པོ་ལ་གདམས་པའོ། །ཞེས་སངས་རྒྱས་ཀྱི་གསུང་ལ་སྦྱངས་པའི་རྟགས་བསྟན་ནས། ད་ནི་ཐུགས་ལ་སྔོན་དུ་སྦྱངས་པའི་རྟགས་ཡིད་ལ་འབྱུང་བར་བསྟན་པ་ནི། རྟག་ཏུ་གཅིག་པུར་འདུག་པ་དང་། །ཞེས་པ་ལ་སོགས་པས་བསྟན་ཏེ། སྐྱེས་བུ་འདི་ནི་དུས་རྟག་ཏུ་རང་གཅིག་པུར་འདུག་ཅིང་མི་དང་མི་འགྲོགས་པར། གཞན་གྱི་ཟླ་ལ་མི་བརྩི་བར་འདུག་ཚུགས་དང་ལྡན་པའི་སྐྱེས་པའམ་བུད་མེད་ནི། ཚེ་སྔ་མ་ལ་ཡིད་གཙོ་བའི་སྒོ་ནས་སངས་རྒྱས་ཀྱི་ཐུགས་ལ་སྦྱོང་བ་ལ་བར་ཆད་ནས། མི་གཞན་གྱིས་མ་མཐོང་བར་ལུས་ཀྱི་སྡིག་པ་ཆ་འཕྲ་མོ་སྐྱེས་པས་འབྲས་བུ་དེ་ཉིད་མ་རྫོགས་པས། ད་ལྟའི་ཡིད་ལ་སྨིན་པས། སཱཙྪ་དང་མཆོད་རྟེན་གྱི་ལས་བྱས་ནས་བསྒྲུབ་པས། འབྲས་བུ་ཚེ་གསུམ་ན་རྫོགས་པའོ། །ཡང་སྐྱེས་པའམ་བུད་མེད་གང་ཡང་རུང་བས་གང་ལ་ཡང་འཇིགས་ཤིང་ཡ་ང་བའི་སེམས་མེད་པ་དང་ལྡན་པ་ནི། སྔོན་དུ་ལྷག་པའི་ང་རྒྱལ་སྐྱེས་པ་ལས་བར་ཆད་ནས་འབྲས་བུ་དེ་ཉིད་ལ་མ་རྫོགས་པ་ཡིན་ནོ། །ད་ལྟའི་ཡིད་ལ་སྨིན་པའོ། །དེ་ལྟ་རང་གི་བླ་མ་ལ་འཁོར་གསུམ་ཡོངས་སུ་དག་པར་བྱས་ནས་སྒྲུབ་པས་ཚེ་གསུམ་ན་འབྲས་བུ་རྫོགས་པར་འགྱུར་རོ། །ཡང་སྐྱེས་བུ་རང་བཞིན་གྱིས་རི་མཐོན་པོ་རྣམས་དང་རི་སུལ་དང་ནགས་འཐུག་པོའི་ཚལ་དུ་འགྲིམ་པའི་མི་འདིས་ནི་སྔོན་དུ་སངས་རྒྱས་རྣམས་ཀྱི་ཐུགས་ལ་ཡང་དག་པར་གོམས་པར་བྱེད་པའི་ཚེ་ན། རྡོ་རྗེའི་སྤུན་ལ་ཡིད་ཀྱིས་ཕྲག་དོག་ཞུགས་པས་བར་ཆད་ནས། ད་ལྟའི་ཡིད་ལ་སྨིན་པས། ད་རྡོ་རྗེའི་སྤུན་ལ་ཚོགས་ཀྱི་སྟོན་མོ་བྱས་ནས། ཆོས་མ་ལོག་པར་བསྒྲུབས་ན། འབྲས་བུ་འབྱིན་པ་ཡིན་ནོ་མཁའ་འགྲོ་མ་ཞེས་སྡུད་པ་པོ་ལ་གདམས་པའོ། །དེ་ཡང་འབྲས་བུ་ཇི་ཙམ་ན་ཐོབ་ཞེ་ན། རྟགས་འདི་ལྟར་ཡིད་ལ་ལྡན་པའི་སྐྱེས་བུའམ་བུད་མེད་ལ། ཚེ་འདི་ལ་འཇིག་རྟེན་གྱི་འཁྲུལ་པ་བར་མ་ཆད་བར་ཆོས་ཉིད་ཀྱི་བདེན་པ་ལ་སྤྱད་ན། ཚེ་འདི་དང་གསུམ་གྱིས་ནི་གདོན་མི་ཟ་བར་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་སངས་རྒྱས་ཉིད་ལ་ཐེ་ཚོམ་མེད་པར་ཐོབ་ངེས་སོ། །གལ་ཏེ་བར་ཆད་ནས་གོལ་སར་གྱུར་པ་ནི་ལུས་ཀྱི་སྐབས་སུ་བསྟན་པ་དང་འདྲའོ། །ཞེས་ཐུགས་ཀྱི་རྟགས་བསྟན་ནས། ད་ནི་དེ་དག་ཀྱང་གཞི་རང་བཞིན་གྱིས་གནས་པ་རིག་པ་བཟང་ངན་མེད་པར་མཇུག་བསྡུ་བ་ཕན་ཡོན་དང་བཅས་པ་བསྟན་པ་ནི། འདི་ལྟར་རིགས་དང་རིགས་དམན་ལ་ཞེས་པ་ལ་སོགས་པས་བསྟན་ཏེ། རྟགས་ཀྱི་རྣམ་པ་འདི་ལྟར་ཆོས་སྤྱོད་པའི་རིགས་དང་། མ་རབས་ངན་པའི་རིགས་ཆོས་མི་སྤྱོད་པ་དང་འགྲོ་བ་དམན་པ། མཁའ་ལྡིང་གི་རྒྱལ་པོ་བྱ་ཁྱུང་དང་། རི་དྭགས་ཀྱི་རྒྱལ་པོ་ཨེ་ནྱ་དང་། ཁྱིའི་རྒྱལ་པོ་རྣ་བ་བཞི་ཡོད་པ་ལ་སོགས་པ་ནི་བྱོལ་སོང་གཞན་རྟ་དང་མ་ཧེ་ལ་སོགས་པའི་གཟུགས་སུ་འཛིན་པ་ཐ་དད་པ་རྣམས་ལ་ཡང་། སྔོན་དུ་གོམས་པ་བྱས་པའི་རང་ཤུགས་ཀྱིས་ནི་གོང་དུ་བསྟན་པའི་རྟགས་འདི་ནི་སྐུའི་སྐུ་སྤྲུལ་པའི་སྐུ་དང་། སྐུའི་གསུང་ལོངས་སྐུ་དང་། སྐུའི་ཐུགས་ཆོས་སྐུ་གསུང་ལས། ལུས་ཀྱི་ལུས་དང་དབང་པོའི་ཡན་ལག་གསལ་བར་རྫོགས་པ་སྟེ། རགས་པ་སྔོན་དུ་སྣང་བའི་ལུས་འདི་དང་། ལུས་ཀྱི་ངག་ཡན་ལག་སྤྱོད་པ་དང་སེ་གོལ་གཏོགས་པ་ལ་སོགས་པ་ལུས་ཀྱི་རྩོལ་བའི་སྒྲ་སྟེ་མ་བརྗོད་པར་རང་ཤུགས་ལས་བྱུང་བ་དང་། ལུས་ཀྱི་ཡིད་རླུང་གི་སྟོབས་ལ་བརྟེན་ནས་འགྲོ་བ་དང་བསྐྱོད་པར་ནུས་པ་རྣམས་ཏེ། དེ་ལྟར་ལུས་གསུམ་ལ་འབྱུང་བ་ཡོད་དོ་ཞེས་བསྟན་པ་དང་། དེ་བཞིན་དུ་འདིའི་རྟགས་གསུང་གི་གསུང་མཚོན་དུ་མེད་པའི་གསུང་དང་། གསུང་གི་སྐུ་ཚིག་གི་གསུང་དང་། གསུང་གི་ཐུགས་བརྗོད་དུ་མེད་པ་གསུང་གི་རྟགས་དང་གསུམ་ལས། ངག་གི་ལུས་བརྗོད་གཞི་སྣ་ཚོགས་སུ་བྱུང་བ་དང་། ངག་གི་ངག་སྒྲ་སྣ་ཚོགས་པ་དང་། ངག་གི་ཡིད་ཚིག་སྣ་ཚོགས་བརྗོད་པ་དང་། བསམ་པ་དང་སྐྱེ་བ་ལ་བརྟགས་ཏེ་འབྱུང་བ་ཡིན་ནོ། །དེ་ལྟར་ཐུགས་ཀྱི་སྐུ་ཡིད་མེད་པ་དང་། ཐུགས་ཀྱི་གསུང་སེམས་པ་དང་། ཐུགས་ཀྱི་ཐུགས་མ་རིག་པ་མེད་པའི་རྟགས་དང་གསུམ་ལས། ཡིད་ཀྱི་ལུས་འགྱུ་བར་བྱེད་པ་དང་། ཡིད་ཀྱི་ངག་ཡུལ་གཅོད་པ་དང་། ཡིད་ཀྱི་ཡིད་བག་ཆགས་སྔ་ཕྱི་རྣམས་ལ་རྟགས་འདི་རྣམས་ནི་འབྱུང་བ་ཡོད་དོ། །འདི་ཀུན་ནི་སྔོན་དུ་སྦྱངས་ཏེ། དེ་ལས་གོང་དུ་བསྟན་པའི་ཉེས་པས་བར་ཆད་པས་མཐར་མ་ཕྱིན་པ་སྟེ། ད་ལྟའི་ལུས་ངག་ཡིད་ལ་སྨིན་པ་ཡིན་ནོ། །འདི་ལྟར་བྱུང་བའི་སྐྱེས་བུ་རྣམས་ཀྱིས་ཚེ་འདི་ལ་བར་ཆད་བསྐང་བའི་ལས་བྱས་ནས། ཆོས་སྤྱད་ན་རྟགས་དང་ལྡན་པ་དེ་ཀུན་ཀྱང་ནི་སྐད་དང་བརྡའ་གཅིག་པར་འབྲས་བུ་གོང་ལྟར་ཐོབ་པ་ཡིན་ནོ། །གལ་ཏེ་ལེ་ལོས་གཡེངས་ནས་ཚེ་འདི་ལ་བར་ཆད་ནས་ཆོས་མ་སྤྱད་ན། སྐུའི་རྟགས་དང་ལྡན་པ་ལ་འདི་ལ་ཆོས་མེད་ན་གོལ་ཏེ་གཟུགས་ཁམས་ཀྱི་ལྷར་སྐྱེ་བ་དང་། གསུང་གི་རྟགས་དང་ལྡན་ནས་འདི་ལ་ཆོས་མ་སྤྱད་ན་ཚངས་པའི་གནས་བཞིར་སྐྱེའོ། །ཐུགས་ཀྱི་རྟགས་དང་ལྡན་ནས་འདི་ལ་ཆོས་མ་སྤྱད་ན་སྐྱེ་གནས་ལྷ་མིན་དག་ཏུ་སྐྱེས་ཏེ། དེ་ནས་འཁོར་བ་ལས་ཀྱི་ཁ་བརྒྱུད་ནས་གོང་དུ་ལུས་ཀྱི་སྐབས་སུ་བསྟན་པ་བཞིན་དུ་ཐ་མ་སེམས་ཅན་དམྱལ་བའི་གནས་སུ་འགྱུར་བ་ཡིན་ནོ། །དེའི་ཕྱིར་ན་འདི་ལྟར་བྱུང་བའི་སྐྱེས་བུ་ལ་སྔ་མ་སྦྱངས་པའི་རྟགས་ཀྱིས་ནི། ད་ལྟ་མ་ཆ ད་པར་བསྒྲུབས་ན་བདེ་བའི་ལས་རྫོགས་ནས་ཡང་རྒྱུ་སེམས་ཅན་ལ་འབྲས་བུ་སངས་རྒྱས་སུ་འགྱུར་རོ་ཞེས་ཡིད་ལ་སྐུ་གསུང་ཐུགས་ཀྱི་རྟགས་འབྱུང་བ་འཇུག་བསྡུ་བ་ཕན་ཡོན་དང་བཅས་པ་བསྟན་ཏེ་ལེའུ་གཞུང་བསྟན་ཏོ། །ལེའུའི་མཚན་ནི་སྐུའི་སྔ་མའི་རྟགས་བསྟན། གདུང་གིས་ཕྱི་མིའི་རྟགས་བསྟན། འབར་བས་ད་ལྟའི་རྟགས་བསྟན། རིན་པོ་ཆེས་ཡོན་ཏན་འཕེལ་སྣོད་བསྟན། རྒྱུད་ནི་སྐུའི་རྒྱུད་འགྲོ་བའི་ལུས། གསུང་གི་རྒྱུད་ངག་དང་། ཐུགས་ཀྱི་རྒྱུད་སེམས་སོ། །དེ་ལྟར་རྒྱུད་གསུམ་གཅིག་ཏུ་འདུས་པ་རང་རྒྱུད་རྫོགས་པ་ཆེན་པོ་ལས། སྐྱེས་བུ་གང་ཟག་ལུས་ཀྱི་ལུས་དང་། ལུས་ཀྱི་ངག་དང་། ལུས་ཀྱི་ཡིད་དང་། ངག་གི་ལུས་དང་། ངག་གི་ངག་དང་། ངག་གི་ཡིད་དང་། ཡིད་ཀྱི་ལུས་དང་། ཡིད་ཀྱི་ངག་དང་། ཡིད་ཀྱི་ཡིད་རྣམས་ལ་སྔོན་དུ་སྦྱངས་པའི་རྟགས་ད་ལྟའི་ལུས་ངག་ཡིད་དགུ་ལ་ཇི་ལྟར་འབྱུང་བ་ཚིག་དང་ཡི་གེར་བསྟན་པའོ། །ལེའུའི་གཞུང་གི་དུམ་བུའམ་སྐབས་སམ། སྡེ་ཚན་ངེས་པར་གཅད་པ། དང་པོའོ། །སྟེ་ཐོག་མའོ། ། ༅། །ད་ནི་ལེའུ་གཉིས་པ་ད་ལྟའི་ལུས་ངག་སེམས་ལ་ཉམས་སུ་བླངས་པའི་རྟགས་བསྟན་པ་འདི་ལ་སྤྱི་དོན་བཞིས་བསྟན་ཏེ། སྔོན་འགྲོ་ལ་སྦྱང་པར་བྱ་བའི་རིམ་པའི་རྟགས་དང་། དངོས་གཞི་ཟག་པ་མེད་པའི་དོན་ལ་ཉམས་སུ་བླངས་པ་ལས་འབྱུང་བ་བྱེ་བྲག་སོ་སོའི་རྟགས་བསྟན་པ་དང་། རྟགས་དང་ལྡན་པའི་སྐྱེས་བུའི་ཡོན་ཏན་གྱི་རྣམ་པར་གཞག་པ་བསྟན་པ་དང་། གལ་ཏེ་རྟགས་དང་མི་ལྡན་ན་མན་ངག་ཕྱིན་ཅི་ལོག་ཏུ་བསྟན་པའི་སྐྱོན་དང་བཞི་ལས། དང་པོ་སྔོན་དུ་འགྲོ་བ་སྦྱོང་བར་བྱ་བའི་དོན། སྦྱངས་པ་ལས་བྱུང་བའི་རྟགས་བསྟན་པ་ལ་ནང་གསེས་ཀྱི་དོན་བཞིས་བསྟན་པའི་དང་པོ། སྟོན་པས་གདུལ་བྱ་ཁྱད་པར་ཅན་གྱི་ཡུལ་ལ་གཟིགས་ནས་རྒྱུད་ཀྱི་རྒྱལ་པོ་ལེགས་པར་ཉོན་ཅིག་པར་བསྟན་པ་ནི། དེ་ནས་སྟོན་པ་རྡོ་རྗེ་འཆང་ཞེས་པ་ལ་སོགས་པས་བསྟན་ཏེ། དེ་ནས་ནི་ལེའུ་དང་པོ་བཤད་མ་ཐག་པའི་དེ་ནས། སྟོན་པ་ནི་བསྟན་པ་ཁྱད་པར་ཅན་ཐུགས་ལས་ཕྱུང་ནས་འགྲོ་བ་སྨིན་པར་བྱེད་པའོ། །རྡོ་རྗེ་གཟུང་འཛིན་གྱི་རྣམ་པར་རྟོག་པ་མི་མངའ་བའོ། །འཆང་བ་ནི་ཆོས་ཉིད་མཉམ་པའི་དགོངས་པ་ལ་མི་འབྲལ་བར་གནས་པའོ། །དེ་ལྟར་ན་སྟོན་པ་ཉིད་ཀྱིས་མཚོན་བྱ་དོན་གྱི་ཆོས་དང་། མཚོན་བྱེད་ཚིག་གི་ཆོས་གཉིས་མཚོན་བྱེད་ལ་རིག་པ་ཡིད་དཔྱོད་ཀྱི་ཆོས་དང་། རྟག་པ་རྗེས་ཀྱི་ཆོས་དང་། རང་རིག་མངོན་གསུམ་གྱི་ཆོས་ཀུན་ཐམས་ཅད་ལ། ཟག་པ་ནི་འབྱུང་བ་རྡོས་པའི་ཟག་པ་དང་། ཉོན་མོངས་པ་ཐ་དད་པའི་ཟག་པ་དང་། གློ་བུར་རྐྱེན་གྱི་ཟག་པ་དང་གསུམ་མོ། །འབྱུང་བའི་ཟག་པ་ནི་ཕྱི་འབྱུང་བ་རགས་པའི་ཟག་པ་གཟུང་བའི་ཡུལ་དང་ཞེན་པའི་ཡུལ་རགས་པ་རྫས་དང་བཅས་པ། ཆོས་ཀྱི་དབྱིངས་སྟོང་པ་ཉིད་དུ་མ་ཡིན་པ་འཛག་པར་བྱེད་ལ། ནང་འབྱུང་བ་ལུས་ཀྱི་ཟག་པ་ཞེན་པ་ཐ་དད་པར་བཟུང་བས་ཆོས་ཉིད་གཉིས་སུ་མེད་པའི་དོན་འཛག་པར་བྱེད་པས་ཏེ། ཤ་ཁྲག་རྡོས་པ་དང་བཅས་པའོ། །ཉོན་མོངས་པའི་ཟག་པ་ནི། རྒྱུ་མ་རིག་པའི་ཟག་པ་དང་། རྐྱེན་དུག་ལྔ་ཐ་དད་པའི་ཟག་པ་དང་། འབྲས་བུ་བག་ཆགས་སྔ་ཕྱིའི་མཚམས་སྦྱོར་བ་དང་བཅས་པའི་ཟག་པ་དང་གསུམ་མོ། །རྒྱུ་མ་རིག་པའི་ཟག་པ་ནི་ལྷན་ཅིག་སྐྱེས་པའི་མ་རིག་པས་འཁྲུལ་པ་དོན་དམ་པར་འཛིན་པའི་ཟག་པའི་རྒྱུ་བྱས། ཀུན་ཏུ་བཏགས་པའི་མ་རིག་པས་ནི་ཡུལ་གཉིས་པོ་ལ་དེ་མ་ཡིན་ལ་དེར་འཛིན་གྱི་ཟག་པའི་རྒྱུ་བྱས། རྒྱུ་བདག་ཉིད་གཅིག་པའི་མ་རིག་པས་ནི་ལྟ་བ་དང་བསྒོམ་པ་ལ་ཡིད་དཔྱོད་ཀྱིས་འཛིན་པའི་ཟག་པའི་རྒྱུ་བྱས་པའོ། །རྐྱེན་དུག་ལྔ་ཐ་དད་པར་འཛིན་པའི་ཟག་པ་ནི། དེ་ལྟར་རྒྱུ་གསུམ་འདུས་པས་དངོས་པོའི་གཤིས་ཤེས་བྱ་རང་གི་མཚན་ཉིད་མ་ཤེས་མ་གསལ་བས་གཏི་མུག་པས་རང་གསལ་སྙིང་པོའི་དོན་ཟག་པར་བྱས། རྒྱུ་དེ་ཞེན་པའི་བློའི་ཡུལ་དུ་བྱས་གཅད་པས་འདོད་ཅིང་ཆགས་པས་ཆགས་མེད་ལ་ཟླ་དང་བྲལ་བའི་དོན་ཡེ་ཤེས་ཟག་པར་བྱས། རྒྱུ་དེ་དག་རང་རྒྱུད་པའི་ཡིད་ཀྱིས་གཅད་པས་ཞེ་སྡང་བ་སྟེ་མཉམ་ཉིད་གཉུག་མ་ལྷུན་གྲུབ་ཀྱི་དོན་ཟག་པར་བྱས་སོ། །དེ་ལྟར་གསུམ་ལས་འདོད་པའི་ཁམས་འདོད་ཆགས་ཀྱི་ལས་གཙོ་བས་ན་འདོད་ཁམས་བདག་དང་བཅས་པར་གྲུབ་ལ། གཟུགས་ཀྱི་ཁམས་རགས་པ་ཞེ་སྡང་གི་ལས་གཙོ་བས་མཛེས་པ་འོད་ཀྱི་ཁམས་སུ་གྲུབ་པའོ། །གཟུགས་མེད་པའི་ཁམས་གནས་པ་གཏི་མུག་ལས་འབྱེད་མེད་རྨུགས་པ་ཁམས་སུ་གྲུབ། དེ་དག་གི་རྐྱེན་ཡུལ་དང་ཤེས་པ་ཐ་དད་པ་ལས་ཕྲ་བ་དང་རགས་པའི་ཟག་པ་དང་། ཤིན་ཏུ་ཕྲ་བའི་ཟག་པ་དང་། རབ་ཏུ་ཕྲ་བའི་ཟག་པས་ཏེ། འགྱུ་བ་དང་དྲན་པ་དང་ཡིད་རྣམས་སོ། །དེ་ཡང་ཡིད་གང་ལས་བྱུང་ན་དྲན་པ་ལས་བྱུང་། དྲན་པ་གང་ལས་བྱུང་ན་འགྱུ་བ་ལས་བྱུང་། འགྱུ་བ་དུག་གསུམ་ལས་བྱུང་། དུག་གསུམ་པོ་མ་རིག་པ་གསུམ་པོ་ལས་བྱུང་། དེ་དག་རྣམས་འདུས་པ་ལས་འཁྲུལ་པ་ཞེས་བྱ་བའི་མཚན་ཉིད་དོ། །འབྲས་བུ་བག་ཆགས་སྔ་ཕྱིའི་ཟག་པ་ནི། ཡིད་ལ་སོགས་པ་གསུམ་འདུས་པ་ལས་སྔ་མའི་བག་སྟེ་ཤེས་བཞིན་པའི་ཆ་སྟེ་དེ་ཉིད་ལ་ཆགས་པས་འཁྲུལ་པའི་རྟེན་བྱས། ད་ལྟའི་བག་ཆགས་ཡུལ་སྣ་ཚོགས་པའི་བག་ལ། འབྲས་བུ་ང་དང་བདག་ཏུ་འཛིན་པས་ཆགས། དེ་གཉིས་ཀྱི་མཚམས་གཉིད་དང་རྨི་ལམ་གྱིས་སྦྱར་བས་འབྲས་བུ་ཡུལ་སེམས་གཉིས་སུ་བྱུང་། ད་ལྟའི་བག་དགའ་བ་དང་། མི་དགའ་དང་། བདེ་བ་དང་སྡུག་པ་ལ། ཡུལ་སྣོད་དང་འདྲ་བ་ལ་ཆགས་པ་ལས་བཟུང་པ་དང་འཛིན་པ་བྱུང་། ཕྱིས་འབྱུང་གི་བག་ཆགས་ཤིང་ཞེན་པའི་བློ་འཕེན་པས་ཆགས་ཏེ། མཚམས་ཉེ་བར་ལེན་པའི་ལུས་ཀྱིས་སྦྱོར་བས། འབྲས་བུ་འཁོར་བ་ནས་འཁོར་བར་འཁོར་ཏེ། སྔར་གྱི་བག་ཆགས་ཞེན་པའི་མཐའ་དང་ད་ལྟའི་ལུས་འཚོགས་པ་དང་བཅས་པའི་འབྲས་བུར་སྨིན་པས། བདག་འཛིན་གྱི་ཞེན་པ་དུ་མའི་ཟག་པ་བསགས་པས། སྔར་གྱི་ཟག་པ་དང་ད་ལྟའི་འཚོགས་པ་གཉིས་འདབ་འབྱོར་པས། ཕྱིས་འབྱུང་བའི་ཟག་པ་ཀུན་གཞི་འཕེན་པའི་ལས་སྡུད་པས། ཕྱིས་ལུས་ལེན་པའི་རྒྱུ་ད་ལྟར་བསྐྱེད་པས། སྐྱེ་རྒས་ན་འཆི་བཞི་ལ་བརྟེན་ནས་འབྲས་བུ་མ་འོངས་པའི་དུས་སུ་ལུས་ཏེ། དེ་ཡང་ད་ལྟའི་གཟིགས་པའི་ཆོས་ཉིད་ལས་གྲུབ་པས། དེ་གསུམ་གྱི་མཚམས་གཉིད་དང་རྨི་ལམ་ལུས་དང་གསུམ་གྱིས་སྦྱར་བས། ཕྱི་མ་ཕྱི་མའི་ལུས་ཀྱི་འབྲས་བུ་དང་། དེའི་ཕྱི་མ་ལ་སོགས་པ་ཐུག་པ་མེད་པར་འགྱུར་བ་ནི་ཟག་པའི་འབྲས་བུ་དང་འཁོར་བའི་མཐའ་སྟེ་འཁོར་བ་ཉིད་མ་ཟད་ཀྱི་བར་ལ་ལུས་ཀྱང་དེ་སྙེད་དུ་ལེན་པའོ། །དེ་ལྟར་ཤེས་པ་གཟུ་བོ་ལུང་དུ་མ་བསྟན་པས། བག་ལ་ཉལ་སྤྱད་པ་མེད་པའི་ཡུལ་དུ་ཆགས་པས་ཟག་པ་ཉིད་དུ་བྱུང་བའོ། །གློ་བུར་རྐྱེན་གྱི་ཟག་པ་ནི། ཆོས་ཉིད་ཟབ་མོའི་དོན་ལ་ཕྱིན་ཅི་ལོག་དུ་རྟོགས་པའི་ཟག་པ་དང་། གྲུབ་པའི་མཐའ་ལོག་པ་ལས་བྱུང་བའི་ཟག་པ་དང་། རང་གི་གྲུབ་པའི་མཐའ་ལ་ཞེན་ཡུལ་བློ་དང་བཅས་པས་བཟུང་བའོ། །ཆོས་ཉིད་ཟབ་མོའི་དོན་ཕྱིན་ཅི་ལོག་ཏུ་རྟོགས་པ་ནི། རང་རིག་མངོན་གསུམ་དུ་མ་རྟོགས་པར་ཡིད་དཔྱོད་ཚིག་གི་མཐའ་ལ་སྤྱོད་པའི་ཐ་སྙད་ཀྱི་མངོན་གསུམ་དང་རྗེས་དཔག་ལ་སོགས་པའི་ཟག་པ། ཆོས་ཉིད་མངོན་གསུམ་ལ་བསྒྲིབ་པ་དང་། ཚིག་གི་ཡིན་ཚུལ་བློས་གཞག་པས་ཆོས་ཉིད་རང་སྣང་གི་འགྲོས་དང་བྲལ་ནས་ཕྱིན་ཅི་ལོག་གི་ཟག་པ་ཡིན་ལ། དེ་བཞིན་སྟོང་པ་ཡིད་ཀྱིས་གཅད་པ་དང་། གསལ་བ་དང་རང་བཞིན་མེད་པ་ཡིད་ཀྱིས་གཅད་པ་དང་། མཐའ་ལོག་ནས་རྒྱུ་འབྲས་ལས་ཀྱི་རྒྱུན་གཅད་པ་རྣམས་ཡིན་ནོ། །གྲུབ་པའི་མཐའ་ལོག་པའི་ཟག་པ་ནི། ལྟ་བ་ཕྱིན་ཅི་ལོག་ཏུ་ཞུགས་པ་རྣམས་ཟག་པ་རང་ཀ་མར་སྤྱོད་པ་ཡིན་ལ། རང་གི་གྲུབ་པའི་མཐའ་ལ་ཞེན་ཡུལ་བློ་དང་བཅས་པའི་ཟག་པ་ནི། ངའི་བླ་མ་ལས་ལྷག་པ་མེད་པར་ཞེན་པ་དང་། དེ་བཞིན་དུ་ངའི་མན་ངག་ལས་ཟབ་པ་མེད་དོ་བར་ཞེན་པ་དང་། ངའི་ལྟ་བ་དང་། བསྒོམ་པ་དང་། ཆོས་པ་ང་ལས་བ ཟང་བ་མེད་སྙམ་པའི་བློ་དང་ལྡན་པའི་ཟག་པ་རྣམས་ཡིན་ནོ། །ཟད་ཅིང་ནི་གང་ཟད་པ་དང་། གང་ལ་ཟད་པ་དང་། གང་གིས་ཟད་པ་དང་། གཏན་ཚིགས་གང་གི་ཕྱིར་ཟད་པ་དང་། དཔེ་གང་ལྟར་ཟད་པ་དང་། ཟད་པའི་དགོས་པ་དང་དྲུག་གིས་བསྟན་ཏོ། །གང་ལ་ཟད་ན་གོང་མའི་ཟག་པ་རྣམས་ཟད། གང་ལ་ཟད་ན་ཆོས་ཉིད་མངོན་གསུམ་གྱི་དོན་ཉམས་སུ་མྱོང་བའི་སྐལ་ལྡན་ལ་ཟད། གང་གིས་ཟད་ན་བླ་མའི་མན་ངག་ཕྱིན་ཅི་མ་ལོག་པ་དང་རང་གི་བརྩོན་འགྲུས་མྱུར་བར་བསྟན་པས་ཟད། གཏན་ཚིགས་གང་གི་ཕྱིར་ཟད་ན། གཅིག་ཤེས་ཀུན་གྲོལ་གྱི་གཏན་ཚིགས་ཀྱིས་ཤེས། གཅིག་མ་ཤེས་པས་ཀུན་མ་ཤེས་པ་ནི། རང་གི་གནས་ལུགས་མ་ཤེས་པས་འཁོར་འདས་ཀུན་མི་ཤེས་ལ། རང་གི་རིག་པའི་གནས་ལུགས་ཕྱིན་ཅི་མ་ལོག་པར་ཤེས་པས་འཁོར་འདས་ཐམས་ཅད་ཀྱི་མཚན་ཉིད་ཤེས་པའོ། །དེའི་ཕྱིར་ན་བསད་པ་ཀུན་བསད་པས་སོད་པ་གཅིག་ཀྱང་མ་སོད་པ་དང་། བསད་པ་གཅིག་བསད་པས་སོད་པ་ཀུན་སོད་པའོ། །ཆོས་ཉིད་བྱ་བ་ཙམ་དུ་ཡང་བློ་ལ་གྲུབ་པ་མེད་པས། དངོས་པོའི་འདུག་ཚུལ་རང་གིས་རང་ཟད་པ་སྟེ། རྒྱབ་གཅིག་ལ་རྒྱབ་པས་ཕོག་པ་ཀུན་ལ་ཕོག་པ་དང་། འཁོར་བ་ཉིད་རང་ཟད་པས་མྱ་ངན་ལས་འདས་པ་བཙལ་དུ་མེད་པས། རང་གནས་སྟོང་པ་ཉིད་དུ་ཟད་པས་རྐྱེན་གྱི་བློ་ཡོད་མ་མྱོང་། དེ་མེད་པས་བཏགས་པ་མིང་གི་མཐའ་ཟད་པས། ཐ་སྙད་ཚིག་ལ་ལྟོས་མི་འཆའོ། །དེའི་ཕྱིར་ན་ཚིག་མེད་ཡི་གེ་ལས་འདས་པས་བརྗོད་པའི་མཐའ་ཟད་པས། ཆོས་ལས་འདས་པའི་ཟད་པ་ཞེས་བྱའོ། །དཔེ་ཇི་ལྟར་ཟད་ན་ཤེས་བྱ་རང་རྒྱུད་དག་པ་མཁའ་ལ་སྤྲིན་དེངས་པ་ལྟར་ཟད་པ་དང་། ངོ་བོ་ཉིད་རང་དེངས་པ་ཆུའི་སྙོག་མ་རང་སར་དེངས་པ་ལྟར་ཟད་པ་དང་། འཁྲུལ་འཁོར་གྱི་རྒྱུན་དག་པ་ཤིང་ཟད་མེ་ཤི་བ་ལྟར་ཟད་པ་དང་། ཆོས་ཉིད་ཀྱི་ལམ་ལ་ཟད་པ་ལམ་གྱི་མཐར་རང་གི་ཐེམ་སྒོར་ཟད་པའོ། །དེ་ལྟར་ཟད་པའི་དགོས་པ་ནི། རྒྱུ་ཟད་པས་འཁོར་བའི་འཕྲེང་ཐག་གཅད་པའི་དགོས་པ་ཡོད། རྐྱེན་ཟད་པས་མངལ་གྱི་གྲོང་ཁྱེར་དུ་མི་འཇུག་པའི་དགོས་པ་ཡོད། རྒྱུ་རྐྱེན་གཉིས་ཀ་ཟད་པས་འཁོར་འདས་ལྟེ་ཆད་པའི་དགོས་པ་ཡོད། ཉམས་མྱོང་ལྟ་བསྒོམ་ཟད་པས་ཆོས་ཀྱི་བདག་ལ་མི་གནས་པའི་དགོས་པ་ཡོད། ཆོས་ཟད་པས་དགྲོལ་རྒྱུ་མེད་དེ་ཡེ་ནས་གྲོལ་བར་ཤེས་པའི་དགོས་པ་ཡོད། འཁྲུལ་པ་ཟད་པས་འཁོར་བ་རྒྱུན་ཆད་པའི་དགོས་པ་ཡོད་དོ། །དེ་ལྟར་ཟག་པ་རང་ཟད་པའི་ཆོས་ཉིད་དེ་ལ། ཕྲ་རགས་དྲི་མའི་རྡུལ་མེད་པ་ནི། ཕྲ་བའི་རྡུལ་དང་རགས་པའི་རྡུལ་ལོ། །ཕྲ་བ་ལ་གཉིས་ཏེ་འབྱུང་བ་ཕྲ་བའི་རྡུལ་ཕྲ་རབ་ཀྱི་ཟག་པ་དང་ཟད་པས་ཕུང་པོའི་བདག་མ་གྲུབ་ལ། ཉོན་མོངས་པའི་ཕྲ་བའི་རྡུལ་ཤེས་བྱའི་སྒྲིབ་པའི་ཟག་པ་མེད་པས། སྦྱང་བྱའི་ལམ་མ་གྲུབ། རགས་པ་ནི་འབྱུང་བའི་རགས་པ་ཤིང་དང་རྡེའུ་དང་རྩིག་པ་དང་སྣམ་བུ་དང་བུམ་པ་དང་། རི་དང་ཁང་ཁྱིམ་དང་རི་རབ་དང་གླིང་བཞིའི་ཟག་པ་ཟད་པས་ཆོས་ཀྱི་བདག་མ་གྲུབ། ཉོན་མོངས་པ་རགས་པ་འདོད་ཆགས་ཞེ་སྡང་གཏི་མུག་གི་ཟག་པ་ཟད་པས་ཐོབ་བྱ་དོན་གྱི་འབྲས་བུ་མ་གྲུབ་པས། རེ་དོགས་གཉིས་ཀྱི་མཐའ་ལས་འདས་ཏེ། རེ་གང་ལ་ཡང་མི་ཆེ། ལྟོས་གང་ལ་ཡང་མི་འཆའ། འདོད་པ་གང་དང་ཡང་བྲལ་བའི། དེ་ལྟར་ཟག་པ་དེ་ཟད་པས་ནི། རྡུལ་མེད་པ་དེ་ལ། མཉམ་པ་ཉིད་ཅེས་གདགས་སུ་བཏུབ་པ་ཡིན་ནོ། །དེ་མ་ཡིན་ན་མཉམ་པ་ཉིད་ཀྱི་མིང་གིས་གདགས་སུ་མི་བཏུབ་བོ། །འོ་ན་དེ་གང་ཡིན་ན་དེ་ལྟ་བུའི་མཚན་ཉིད་དང་ལྡན་པ་ལ་ཆོས་ཀྱི་ཆོས་ཉིད་ཅེས་པ་སྟེ། ཐ་སྙད་སྒྲོས་གདགས་སུ་མེད་པ་ནི་ཟག་པ་ཟག་པའི་ཕྱིར་རོ། །དེ་ལྟར་ཟག་པ་ཟད་པ་དང་རྡུལ་མེད་པ་དང་ཆོས་ཉིད་གསུམ་དབྱེར་མེད་པས་མཉམ་པ་ཆེན་པོར་ཐམས་ཅད་ཤར་ཞིང་གནས་པ་ཞེས་བྱའོ། །དེ་ལྟ་བུའི་ཆོས་ཉིད་མཉམ་པ་ཆེན་པོ་གཉིས་སུ་མེད་པའི་དོན་དེ་སྔོན་འབྱུང་གི་དུས་སུ་རྒྱུད་ཀྱི་སྟོན་པས་གཟིགས་ནས་གདུལ་བྱའི་ཡུལ་ལ་གཟིགས་པ་དང་། ཆོས་ཉིད་རང་གི་ངོ་བོ་ལ་གཟིགས་པའོ། །གདུལ་བྱ་ནི་འགྲོ་བ་རང་རྒྱུད་དག་པ་གུ་རུ་དགའ་རབ་རྡོ་རྗེ་ལ་སོགས་པ་ལ་གཟིགས་ནས་གཞན་དོན་ཕྱིན་ཅི་མ་ལོག་པར་མཐར་ཕྱིན་པར་མཛད་པ་དང་། ཆོས་ཉིད་རང་གི་ངོ་བོ་ལ་གཟིགས་སྟངས་གསུམ་གྱིས་གཟིགས་ནས་ནི་རང་དོན་རྫོགས་པའི་འབྲས་བུ་ཕྱིན་ཅི་མ་ལོག་པ་མཐར་ཕྱིན་པར་མཛད་དོ། །རྗེས་འཇུག་ལམ་ལ་གནས་པའི་སྐལ་ལྡན་གྱིས་ཆོས་རང་གི་ངོ་བོ་ལ་གཟིགས་སྟངས་གསུམ་གྱིས་གཟིགས་ཏེ། སྤྲུལ་སྐུའི་གཟིགས་སྟངས་ཀྱིས་བལྟས་པས་འཁྲུལ་སྣང་སྤྲུལ་པ་ལྟ་བུར་མཐོང་ལ། ལོངས་སྐུའི་གཟིགས་སྟངས་ཀྱིས་བལྟས་པས་ཡེ་ཤེས་སྒྱུ་མ་ལྟ་བུར་མཐོང་ལ། ཆོས་སྐུའི་གཟིགས་སྟངས་ཀྱིས་བལྟས་པས་ཆོས་ཉིད་མཚན་ཉིད་བྲལ་བར་མཐོང་བས་རང་དོན་ཕྱིན་ཅི་མ་ལོག་པར་རྫོགས། དེ་ལྟར་ཟད་པའི་ཆོས་ཉིད་མཐོང་བས་འཕོ་བ་ཆེན་མོའི་ལུས་སུ་སླར་ལོག་པས། གཞན་དོན་ཕྱིན་ཅི་མ་ལོག་པར་མཐར་ཕྱིན་པ་ནི་གཟིགས་སྟངས་གསུམ་ལས་བྱུང་བའོ། །དེ་ལྟ་བུའི་ཆོས་ཉིད་ལ་གནས་ཤིང་ཕྱིན་ཅི་མ་ལོག་པར་མཁྱེན་པའི་སྟོན་པ་དེས། འཁོར་གདུལ་བྱ་རྣམ་པར་དག་པའི་རིགས་རྣམས་ལས་རྡོ་རྗེའི་ནི་རིགས་ཀྱི་ནང་ནས་ཡང་དག་པའི་མཁའ་འགྲོ་མ་ནི་གསལ་བའི་ཡིད་ཅན་མ་ལ། སྟོན་པས་འདི་སྐད་ཅེས་ཚངས་པའི་དབྱངས་དང་ལྡན་པས། ཚིག་འདི་ནི་སྟོན་པས་སྡུད་པ་པོ་མཁའ་འགྲོ་མ་ལ་གསུངས་སོ། །ཀྱེ་མ་ངེས་པ་ཁོ་ནར་ཁྱོད་ཀྱིས་རྣ་བའི་དབང་པོ་སྒྲ་གཞན་ལ་མ་ཡེངས་པར་ཉོན་ཅིག་མཁའ་འགྲོ་མ། ང་ཡིས་གསང་བའི་རྒྱུད་གཞུང་ཚིག་དང་ཡི་གེར་བསྟན་གྱིས། ཁྱོད་ཀྱིས་ང་ལ་དང་བའི་དད་པ་དང་། མོས་པའི་དད་པ་དང་། ཡིད་ཆེས་པའི་དད་པ་དང་གསུམ་གྱིས་ཉོན་ཅིག །དེ་ལྟར་ཁྱོད་ཀྱིས་ལུས་མི་འགྱུར་བར་མདུན་དུ་དྲང་པོར་འདུག་སྟེ། ཐལ་མོ་སྦྱར་བ་དང་། ངག་མི་འགྱུར་ཏེ་བརྗོད་པ་སྒྲ་ལ་མ་ཤོར་བས་དང་། ཡིད་མི་འགྱུར་ཏེ་དགའ་བ་དང་སྤྲོ་བའི་དད་པ་དང་གསུམ་མི་འགྱུར་བའི་ཡིད་ཀྱིས་ཡང་དག་པའི་ཤེས་རབ་ཕྱིན་ཅི་མ་ལོག་པས་ངའི་ཚིག་འདི་དག་ཤེས་རབ་གསལ་བ་དང་། དག་པ་དང་། མ་འདྲེས་པ་དང་། ཕྱིན་ཅི་མ་ལོག་པས་ཉོན་ལ། མ་འོངས་པའི་དུས་ཀྱི་སེམས་ཅན་རྣམས་ལ་ཁྱོད་ཀྱིས་རབ་ཏུ་དང་པའི་ཡིད་ཀྱིས་གཞན་དོན་ལེགས་པར་རྫོགས་པར་བྱ་བའི་ཕྱིར། འཁྲུལ་པ་མེད་པའི་ཚིག་འདི་དག་ཟུངས་ཤིག་ཅེས་སྟོན་པས་གདུལ་བྱ་ཁྱད་པར་ཅན་ལ་གཟིགས་ནས་རྒྱུད་ཀྱི་རྒྱལ་པོ་འདི་ལེགས་པར་ཉོན་ཅིག་ཅེས་པར་གདམས་པ་བསྟན་ནས། ད་ནི་སྤྲོས་བཅས་འབྱུང་བ་བཞིའི་སྒྲ་ལ་སྔོན་དུ་འགྲོ་བ་སྦྱང་པ་སྐུ་གསུམ་གྱི་སྣ་ཁྲིད་པའི་རྟགས་བསྟན་པ་ནི། འདི་ལྟར་སྐྱེས་བུ་སྐལ་བ་ཅན། །ཞེས་པ་ལ་སོགས་པས་བསྟན་ཏེ། ཚེ་འདི་ལ་ཉམས་སུ་བླངས་ཤིང་བསྒྲུབས་པས་འདི་ལྟར་རྟགས་དང་ལྡན་པའི་སྐྱེས་བུ་ནི་སྐལ་པ་ཅན་ཞེས་བྱ་བ་ཡིན་ནོ། །ཚེ་འདི་ལ་ཆོས་དང་ཆོས་ཉིད་གཉིས་མེད་དུ་རྟོགས་པ་དེ་ལ་འདྲིས་པར་བྱས་པས། དེ་ཉིད་མངོན་སུམ་དུ་མཐོང་བ་དོན་ཡིན། དེ་ལ་གོམས་པར་བྱས་ནས་ནི། ད་ཁམས་གསུམ་འཁོར་བ་ལས། ཕྱིར་མི་ལྡོག་པས་སྔོན་དུ་ཉམས་ལེན་ཐུན་མོང་མ་ཡིན་པ་ལས་བྱུང་བའི། བཀའ་དག་པའི་གཞིའི་ངོ་བོ་མི་འགྱུར་བ། རང་བཞིན་གྱིས་གསལ་བ། ཐུགས་རྗེ་ཁྱབ་པའི་ས་ལ་ཡང་དག་པར་གནས་པ་ཉིད་ཡིན་ཏེ། དེ་ལྟ་བུའི་དོན་ལ་སྐལ་བ་དང་ལྡན་པ་སུ་ཡིས་སྤྱད་པར་ནུས་པ་ལ། ལུས་དང་ངག་དང་སེམས་ཀྱི་རྟགས་སུ་ཡང་། རྒྱུད་འདི་ནས་བཤད་པ་འདི་རྣམས་འབྱུང་ངོ་མཁའ་འགྲོ་མ། ཞེས་བོས་ནས། རྟེན་གྱི་གང་ཟག་སྤྲོས་པ་ལ་དགའ་བ་གང་ཞིག་གིས་སྔོན་དུ་འབྱུང་བ་བཞིའི་སའི་སྒྲ་དོན་ལ་བསླབ་པ་དང་། མེ་དང་ཆུ་དང་རླུང་གི་སྒྲ་དོན་ལ་གོམས་ཤིང་སྦྱངས་པའི་རྟགས་ནི་གོམས་པའི་ཚད་དེར་ཕྱིན་པ་དང་། འགྲོ་བ་རིགས་དྲུག་གི་སྒྲ་ལ་སྐལ་བ་དང་ལྡན་པ་སུས་གོམས་པ་ལ། ཚེ་འདི་ལ་འབྱུང་བ་སས་མི་སུབ། ཆུས་མི་ཁྱེར། མེས་མི་ཚིག །རླུང་གིས་མི་ཁྱེར་བས་དེ་དག་གིས་མི་གནོད་ཅིང་། ལྷག་པར་ལུས་ཀྱི་ཡན་ལག་དེ་བཞིན་དུ་མེ་ཡིས་ཚིག་པ་མེད་པ་ནི། ཤེས་རབ་ཀྱིས་ཕྱིའི་སྒྲོ་འདོགས་ཆོད་པའི་རྟགས་ཡིན་ནོ། །ལུས་ནི་ཆུ་ཡིས་བྱིང་བར་མི་ནུས་ཤིང་ཟང་ཐལ་པ་ནི། ཆོས་ཉིད་ཀྱིས་རང་ཁྱབ་ཅིང་སྤྲུལ་པས་གཞན་དོན་ལ་འཇུག་པའི་རྟགས་ཡིན། སྐྱེས་བུ་འདི་ཡི་སྐྲ་དང་གོས་ཆུ་ལ་བོར་ཀྱང་ཆུས་འཁྱེར་བ་མེད་པས་གཅིག་ཏུ་སྡོད་པ་ནི། འཁོར་བར་སླར་མི་ལྡོག་པའི་རྟགས་ཡིན། སྐལ་བ་དང་ལྡན་པ་དེ་ཡིས་རྐང་པས་ས་ལ་ཁྲུ་གང་གིས་མ་རེག་པར་བར་སྣང་ལ་འགྲོ་བར་ནུས་པ་ནི་སའི་སྒྲ་ལ་འབྱོངས་པས་རྫུ་འཕྲུལ་གྱི་རྐང་པ་བཞིས་སེམས་ཅན་གྱིས་དོན་རྫོགས་པར་བྱེད་པའི་རྟགས་ཡིན། ཡང་སྐལ་ལྡན་དེ་འབྱུང་བ་རླུང་གིས་དྲང་ཞིང་གཡོ་བ་མེད་པར། འདི་ལྟར་སུ་ལ་བྱུང་བ་ནི། སྔོན་དུ་རླུང་ལ་འབྱོངས་པས་སྣང་བ་འདི་ཟད་པར་འགྱུར་བའི་རྟགས་ཡིན། དེ་ལྟར་འབྱུང་བའི་སྐལ་ལྡན་ནི། འབྱུང་བ་བཞིའི་སྒྲ་ལ་གོམས་པའི་རྟགས་ཡིན་ནོ་ཞེས་སྐུ་གསུམ་གྱི་སྣ་ཁྲིད་པའི་རྟགས་བསྟན་ནས། ད་ནི་ནང་དོན་གསུམ་པ་སེམས་ཀྱི་སྣ་འ ཁྲིད་པའི་སྔོན་དུ་འགྲོ་བ་འབྱོངས་པའི་རྟགས་བསྟན་པ་ནི། སེམས་ཅན་སྣང་དང་མི་སྣང་བའི། །ཞེས་པ་ལ་སོགས་པས་བསྟན་ཏེ། སེམས་དྲི་མ་ཐ་དད་པའི་སྣང་བ་ཅན་ལ་ཀུན་གྱིས་གཞི་འཚོགས་པ་དང་བཅས་པར་སྣང་དང་ནི། དབང་པོ་ལྔའི་ཡུལ་དུ་སྣང་བའི་ཆོས་ཅན་རྣམས་དང་། མི་སྣང་བའི་དབང་པོའི་མངོན་སུམ་དུ། མ་འདུས་པ་ཡིད་ཀྱིས་བསྡུས་པའི་སེམས་ཅན་རྣམས་ཏེ། དོན་འགྲོ་བ་རིགས་དྲུག་སོ་སོའི་སྐད་ནི་སྐལ་བ་དང་ལྡན་པ་གང་གིས་ཤེས་པ་དེས་སྔོན་དུ་སེམས་ཀྱི་སྔོན་དུ་འགྲོ་བ་ལ་འབྱོངས་པས། ད་འགྲོ་བ་རིགས་དྲུག་གང་གི་ཡང་གཟུགས་སུ་ལུས་མི་ལེན་པའི་ཕྱིར་ན། རྟགས་འདི་དག་རྣམས་ལྡན་པ་ནི། སྤྱིར་ལུས་ཀྱི་མངོན་ཞེན་དང་། བྲལ་བའི་རྟགས་ཡིན་ལ། བྱེ་བྲག་ཏུ་ནི་འགྲོ་བ་མི་བསོད་ནམས་ཀྱིས་བརྒྱན་པ་གཙོ་ཆེ་བ་ཡིན་ནོ། །དེ་ནས་ལྷ་གཙོ་བ་དང་། ལྷ་མིན་དང་། བྱོལ་སོང་དང་། ཡི་དྭགས་དང་། དམྱལ་བ་དང་དྲུག་གི་སྐད། མི་ལ་གླིང་བཞི་ལས་འཛམ་བུའི་གླིང་གི་མི་རང་ལ་སྐད་རིགས་མི་འདྲ་བ་སུམ་བརྒྱ་དང་དྲུག་བཅུ། ཤར་ལུས་འཕགས་ཀྱི་གླིང་ན་བརྒྱ་དང་བཅུ་གཅིག །ནུབ་བ་ལང་སྤྱོད་ན་སྐད་ཉིས་བརྒྱ་དང་ལྔ་བཅུ། བྱང་སྒྲ་མི་སྙན་ན་སྟོང་དང་ལྔ། ལྷག་མའི་གླིང་བཅུ་དྲུག་ན། སྐད་རིགས་མི་མཐུན་པ་སྟོང་བདུན་བརྒྱ་དང་། འདི་ལྟར་གླིང་ཉི་ཤུ་ན་སྐད་མི་འདྲ་བ་སུམ་སྟོང་དང་བཞི་བརྒྱ་དང་ཉི་ཤུ་རྩ་དྲུག །གླིང་གཞན་དང་གཞན་གྱི་སྐད་གྲངས་རྣམས་ཤེས་པ་ནི་བསམ་པའི་ཤེས་རབ་རང་རྡོལ་བའི་རྟགས་སྔོན་དུ་འགྲོ་བ་སེམས་ཀྱི་རྟགས་ཡིན་ནོ། །ལྷའི་སྐད་ན་འདོད་པ་ལ་སྤྱོད་པའི་ལྷ་ལ་སྐད་མི་འདྲ་བ་དྲུག །གཟུགས་ཀྱི་ཁམས་ལ་ཉི་ཤུ། གཟུགས་མེད་པ་ལ་བཞི་བཅུ་སྟེ། དྲུག་བཅུ་རྩ་དྲུག་ཤེས་པ་ནི། ངག་གི་སྔོན་དུ་འགྲོ་བ་འབྱོངས་པའི་ཚད་ལ་ཕེབས་པའི་རྟགས་ཡིན་ནོ། །ལྷ་མིན་ལ་སྐད་མི་འདྲ་བ་བཞི་ཡོད་དེ་འདི་དག་རྣམས་ཤེས་པ་ནི་ངག་གི་སྒྲིབ་པ་ཟད་པའི་རྟགས་ཡིན་ནོ། །ཡང་བྱོལ་སོང་གི་སྐད་རིགས་མི་འདྲ་བ་འབུམ་ཕྲག་གཉིས་དང་དྲུག་སྟོང་ལྔ་བརྒྱ་ཡོད། འདི་དག་ཤེས་པ་ནི་ལུས་ཀྱི་བཅིངས་པ་ལས་གྲོལ་བའི་རྟགས་ཡིན་ནོ། །ཡི་དྭགས་ཀྱི་སྐད་བརྒྱ་ཉི་ཤུ་ཤེས་པ་ནི་ཡིད་ཀྱི་ཐེ་ཚོམ་ཆོད་པའི་རྟགས་ཡིན་ནོ། །དམྱལ་བའི་སྡུག་བསྔལ་ཉེ་བར་ལེན་པའི་སྐད་མི་འདྲ་བ་འབུམ་དང་ཁྲི་ཕྲག་གཉིས་དང་ཉེར་ལྔ་དང་དེ་དག་རྣམས་ཤེས་པ་ནི་ངག་གི་ལས་མཐར་ཕྱིར་པའི་རྟགས་ཡིན་པས། དེ་དག་རྣམས་ཅིའི་ཕྱིར་ཤེས་ན་སྐལ་ལྡན་འདི་ཡིས་འགྲོ་བ་དྲུག་གི་སེམས་ཀྱི་རྣམ་པར་རྟོག་པ་རྒྱུན་རང་ཆོད་པའི་ཕྱིར་ཏེ། དེ་དག་རྣམས་སུ་འཇུག་མི་སྲིད་པའི་ཕྱིར་རོ། །ཡང་འགྲོ་བ་དྲུག་པོའི་སྐད་མི་འདྲ་བ་དེ་ཀུན་གྱི་སེམས་ཀྱི་བསམ་པ་སྔ་ཕྱི་ཇི་ལྟར་གྱུར་པ་རྣམས་རང་གི་མངོན་པར་ཤེས་པས་མཁྱེན་པ་ནི་སེམས་ལས་སུ་རུང་བའི་རྟགས་ཡིན་ཏེ། དེ་ཅིའི་ཕྱིར་ཤེས་ན་སེམས་ཀྱི་འཁྲུལ་པའི་རྣམ་རྟོག་གི་བསམ་པ་རྣམས་ཟད་པའི་ཕྱིར་རོ། །དེ་ལྟར་ལུས་ངག་ཡིད་ཀྱིས་སྔོན་དུ་འགྲོ་བ་ཚད་དུ་འབྱོངས་པ་ལས། མདོར་ན་རྣ་བའི་མངོན་ཤེས། མིག་གི་དང་། འཆི་འཕོ་དང་། སྐྱེ་བ་དང་། ཕ་རོལ་གྱི་སེམས་ཤེས་པ་དང་། དུས་གསུམ་གཅིག་དུ་ཤེས་པ་དང་། ཆོས་ཉིད་ཟབ་མོའི་དོན་ཤེས་པའི་མངོན་ཤེས་དང་དྲུག་སྐལ་ལྡན་དེ་ལ་དུས་རྒྱུན་དུ་འབྱུང་བ་སྟེ། འདིས་ནི་འགྲོ་བ་དྲུག་གི་སྣང་བ་མ་དག་པའི་འདི་ནི་སྔོན་དུ་འགྲོ་བའི་སྐབས་རང་དུ་གཅད་པ་ཏེ། དེ་ཡང་གཞན་གྱིས་མ་ཡིན་པར་རང་གིས་རང་བཞིན་གནས་ལུགས་སུ་ལོག་ནས་ཡང་དག་པའི་སྣ་འཁྲིད་པས། འདི་ལ་མངལ་གྱི་གྲོང་ཁྱེར་རྒྱུན་གཅོད་པས་ཕྱིས་ཀྱི་སྐྱེ་བའི་རྒྱུན་བཅད་པའི་དོན་གྱི་གནད་ནི། ད་ལྟའི་ཚེ་འདི་ལས་སྔོན་དུ་འགྲོ་བའི་ལས་སྦྱངས་པས་སྣང་བ་འདི་ལྟར་སྐྱེས་བུ་འདིས་ཁྲེགས་ཆོད་དུ་ཆོད་པས། ད་ལྟ་རང་རྟགས་འདི་ཀུན་འབྱུང་བའོ། །ཞེས་སེམས་ཀྱི་སྣ་འཁྲིད་པར་བྱེད་པའི་སྔོན་དུ་འགྲོ་བ་ལ་འབྱོངས་པའི་རྟགས་དངོས་གཞི་ཟག་པ་མེད་པའི་ཡེ་ཤེས་ཉམས་སུ་ལོངས་པའི་དུས་ན་འབྱུང་བ་བསྟན་ནས། ད་ནི་རིག་པའི་སྣ་འཁྲིད་པར་བྱེད་པ་འཁོར་འདས་རུ་ཤན་འབྱེད་པའི་སྔོན་དུ་འགྲོ་བ་ལ་ལུས་ངག་སྦྱངས་པའི་རྟགས་དངོས་གཞིའི་དོན་རྒྱུད་ལ་སྐྱེས་པའི་དུས་ན་འཆར་བར་བསྟན་པ་ནི། འཁོར་འདས་རུ་ཤན་འབྱེད་པའི། །ཞེས་པ་ལ་སོགས་པས་བསྟན་ཏེ། འཁོར་བ་ནི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུ་དང་ལྔས་བསྟན་ཏེ། ངོ་བོ་སྡུག་བསྔལ་བསྐྱེད་པར་བྱེད། ངེས་ཚིག་འཁོར་བས་ཏེ་གཅིག་ནས་གཅིག་ཏུ་འཁོར་བའི་ཕྱིར་འཁོར་རོ། །དབྱེ་བ་ནི་གསུམ་སྟེ། མ་དག་པའི་འཁོར་བ་ཕྱིན་ཅི་ལོག་གིས་ལྟ་བས་བསྡུས་པ་རྣམས་དང་། དག་པ་ཕྱོགས་གཅིག་པའི་འཁོར་བ། ཉན་ཐོས་དང་། རང་སངས་རྒྱས་རྣམས་དང་། ཡང་དག་པའི་འཁོར་བ་བྱང་ཆུབ་སེམས་དཔའི་རྒྱུད་ཀྱིས་བསྡུས་པ་རྣམས་ཡིན་ནོ། །འཁོར་བའི་མཚན་ཉིད་ནི་འདི་འདྲ་བ་གཅིག་ཏུ་མ་ངེས་སོ། །འབྲས་བུ་འགྲོ་བ་རིགས་དྲུག་དང་ལམ་རྒྱུད་ལྔས་བསྡུས་པའི་སེམས་ཅན་རྣམས་སོ། །འདས་པ་ནི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །མྱང་འདས་ཀྱི་ངོ་བོ་སྐྱེ་ཤི་གཉིས་ལས་འདས་པའོ། །ངེས་ཚིག་མྱ་ངན་འཆི་བའི་དུས་ན་སྡུག་བསྔལ་ལ་སྤྱོད་པ་མེད་དེ། དེ་ཉིད་ལ་འཆི་བ་མེད་པས་མྱ་ངན་སྨྲེ་སྔགས་ལས་འདས་པས་ན་འདས་པའོ། །དབྱེ་བ་གསུམ་སྟེ། རྒྱུའི་ཐེག་པ་གསུམ་གྱི་འདས་པའི་ས་དང་། འབྲས་བུ་གསང་སྔགས་རྣམས་ཀྱི་འདས་པའི་ས་དང་། རང་བཞིན་རྫོགས་པ་ཆེན་པོའི་འདས་པའི་སའོ། །རྒྱུའི་ཐེག་པ་ནི། ཉན་ཐོས་ཀྱི་འདས་པ་དགྲ་བཅོམ་པ། རང་རྒྱལ་བའི་རིང་དུ་སོང་བ་རྣམ་པ་བརྒྱད། བྱང་ཆུབ་སེམས་དཔའི་བཅུ་གཅིག་ཀུན་ཏུ་འོད་ཀྱི་སའོ། །འབྲས་བུ་གསང་སྔགས་ཀྱི་ཕྱི་ནང་གི་མཚན་རྫོགས་རྡོ་རྗེ་འཆང་གི་སའོ། །རང་བཞིན་རྫོགས་པ་ཆེན་པོས་ཆོས་ཉིད་ཀ་ནས་དག་པས་སྤྲོས་པའི་མཐའ་ཐམས་ཅད་དང་བྲལ་བ་ཉིད་དུ་འདས་པའོ། །མཚན་ཉིད་ནི་རྒྱུའི་ཐེག་པ་གསུམ་གྱི་འདས་པའི་མཚན་ཉིད་ནི། སྦྱང་བྱ་གཙོར་བླངས་ནས་རྩོལ་བཅས་སུ་འདས་པ་དང་། སྔགས་ཕྱི་ནང་གིས་བསྒྱུར་བྱ་གཙོར་བྱས་ནས་དབྱེར་མེད་དུ་འདས་པ་དང་། རྫོགས་པ་ཆེན་པོས་མངོན་གསུམ་གཙོར་བྱས་ནས་སྤང་བླང་རྩོལ་བསྒྲུབ་མེད་པར་འདས་པའོ། །འདས་པའི་འབྲས་བུ་ནི། ཉན་ཐོས་ཀྱིས་སྐལ་པ་གྲངས་མེད་པ་གསུམ་ན་འཐོབ་ལ། རང་རྒྱལ་གྱིས་སྐལ་པ་གྲངས་མེད་པ་གསུམ་ན་འཐོབ་ལ། ཕ་རོལ་དུ་ཕྱིན་པའི་ཐེག་པས་བསྐལ་པ་ཆེན་པོ་སུམ་ཅུ་རྩ་གཉིས་ནས་འབྲས་བུ་ཐོབ་པ་བརྒྱད་སྟོང་པའི་འགྲེལ་པ་ནས་བཤད་དོ། །སྔགས་ཕྱི་ནང་གིས་ནི་ཕྱི་པ་གསུམ་གྱིས་གོས་གསུམ་བརྗེ་བ་དང་། ཟས་གསུམ་བརྟེན་པའི་དབང་གིས་ཚེ་གསུམ་ནས་འབྲས་བུ་ཐོབ་པ་དང་། ནང་པ་གཉིས་ཀྱིས་ནི། དོན་དམ་པ་དང་ཀུན་རྫོབ་ལྷ་དང་ལྷ་མོའི་རང་བཞིན་ལ་བརྟེན་ནས་སྐྱེ་བ་གཅིག་གིས་འབྲས་བུ་ཐོབ་པ་དང་། རང་བཞིན་རྫོགས་པ་ཆེན་པོས་ནི། གང་ཟག་བརྩོན་འགྲུས་རབ་ཀྱིས་ནི་ཟག་པ་དང་བཅས་པའི་ཕུང་པོ་མི་སྣང་བར་ཚེ་འདི་ཉིད་ལ་འབྲས་བུ་ཐོབ་པ་དང་། འབྲིང་པོས་སྐྱེ་བ་བརྒྱུད་པ་མེད་པར་བར་མ་དོ་ལ་འབྲས་བུ་ཐོབ་པ་དང་། ཐ་མ་ཡིས་ཀྱང་མངལ་གྱི་སྒོར་མི་འགྲིམ་པར་རང་བཞིན་སྤྲུལ་པ་སྐུའི་ཞིང་ཁམས་སུ་བརྫུས་ནས་སྐྱེས་ཏེ། དེ་ཉིད་དུ་ད བུགས་བྱུང་སྟེ་བར་མ་དོ་མེད་པར་སངས་རྒྱས་ཐོབ་བོ། །དེ་ལྟར་འདས་པའི་གནས་ལུགས་དེ་ཡང་གོང་མའི་འཁོར་བའི་ཆོས་དེ་དག་ལས་སྔོན་དུ་འགྲོ་བའི་ལུས་ངག་གི་སྤྱོད་པས། རུ་ཤན་འབྱེད་པའི་སྤྱོད་པ་བྱས་པ་ལས་བྱུང་བ་ཡིན་པས། དེ་ལྟར་རུ་ཤན་ཕྱེད་པ་ལས། དངོས་གཞི་ཟག་པ་མེད་པའི་ཡེ་ཤེས་ཉམས་སུ་ལོངས་པའི་དུས་ན། སྐྱེས་བུ་དེ་ཡི་ལུས་ངག་ཡིད་ལ་རྟགས་འདི་རྣམས་འབྱུང་བ་ཡིན་ནོ། །དེ་ཡང་སྔོན་དུ་འགྲོ་བ་ལུས་ཀྱི་སྤྱོད་པ་བྱས་པས་ལུས་འཁོར་བ་ལས་འཇུག་མི་སྲིད་པ་ནི་ལུས་རྣལ་དུ་ཕེབས་པའི་སྟོབས་ལས་བྱུང་། ངག་གི་སྔོན་དུ་འགྲོ་བའི་སྤྱོད་པ་བྱས་པས་ངག་འཁོར་བ་ལས་འཇུག་མི་སྲིད་པ་ནི། ངག་རྣལ་དུ་ཕེབས་པའི་སྟོབས་ལ་བརྟེན་ནས་བྱུང་། དེ་བཞིན་དུ་ཡིད་ཀྱི་སྔོན་དུ་འགྲོ་བ་ལ་གོམས་པའི་རྟགས་འདི་དག་འབྱུང་བ་ནི། ཡིད་རྣལ་དུ་ཕེབས་པའི་སྟོབས་ལ་བརྟེན་ནས་འབྱུང་པའོ། །དེ་ལ་བྱེ་བྲག་ཏུ་འདི་ལྟར་ལུས་ཀྱི་སྔོན་འགྲོ་ལ་གོམས་པའི་རྟགས་འདི་རྣམས་འབྱུང་བ་ཡིན་ནོ། །རྣལ་འབྱོར་པ་དེའི་ལུས་ཀྱི་ཞེན་པ་རང་ལོག་པའི་རྟགས་སུ། གཏན་ཚིགས་འདི་ལྟར་སྣང་བའི་འཁྲུལ་པ་ནི་དངོས་པོ་ལས་འཁྲུལ་པ་དང་། ཡུལ་ལས་འཁྲུལ་པའོ། །དངོས་པོ་ལས་འཁྲུལ་པ་ནི་དངོས་པོ་གཤིས་ཀྱི་འདུག་ཚུལ་ལས་འཁྲུལ་པ་དང་། དེའི་རང་བཞིན་ལས་འཁྲུལ་པའོ། །འདུག་ཚུལ་ནི་རྟོགས་ཏེ་སངས་རྒྱས་པའི་སྔ་རོལ་ནའང་གྲུབ་པའམ་མིང་དུ་བཏགས་པ་མེད། མ་རྟོགས་སེམས་ཅན་དུ་གྲུབ་པ་དང་མིང་དུ་བཏགས་པ་མེད་པའི་སྔོན་རོལ་གྱི་གཞི་དེ་ལ། རྒྱུ་མ་རིག་པ་གསུམ། རྐྱེན་འཚོགས་པ་བཞི། གཞི་དང་གཞི་ཤེས་པའི་ཁྱད་པར་ལས་འཁྲུལ་པས། འཁོར་བ་ཞེས་བྱ་བར་གྲུབ་པ་དང་། དེའི་རང་བཞིན་ལས་འཁྲུལ་པ་ནི། ལྷུན་གྲུབ་ཅིར་ཡང་སྣང་བ་ལས་རོལ་པ་ཅིར་ཡང་ཤར་བས། སྣང་ཚུལ་ཐ་དད་པར་བྱུང་བས། ཅིར་ཡང་ངེས་པ་མེད་པར་འཁྲུལ་པའོ། །ཡུལ་ལས་འཁྲུལ་པ་ནི་ཆོས་ཉིད་ཀྱི་བར་མ་དོ་ལས་འཁྲུལ་པས་ཏེ། གཟུང་བའི་ཡུལ་ལས་འཁྲུལ་པ་དང་། ཞེན་པའི་ཡུལ་ལས་འཁྲུལ་པའོ། །གཟུང་བའི་ཡུལ་ནི་གཟུང་བའི་ཡུལ་ཙམ་ཕྱིན་ཅི་ལོག་ཏུ་རྟོགས་ནས་འཁྲུལ་པ་དང་། གཟུང་བའི་ཡུལ་བྱེ་བྲག་པ་ལ་ཕྱིན་ཅི་ལོག་ཏུ་རྟོགས་ནས་འཁྲུལ་པའོ། །གཟུང་བའི་ཡུལ་ཙམ་ལ་ཕྱིན་ཅི་ལོག་ཏུ་རྟོགས་པ་ནི། ཆོས་ཉིད་ཀྱི་བར་མ་དོ་ལ་སྣང་བ་ཐམས་ཅད་ཀྱང་འོད་དང་འོད་ཁྱིམ་གྱི་ཚུལ་དུ་ཤར་བ་དེ། རྣམ་པར་ཤེས་པ་མངོན་དུ་རྒྱུ་ནི་ལུས་མེད་པས་མེད་དོ། །བག་ལ་ཉལ་གྱིས་བཟུང་སྟེ། དེ་ལྟར་སྣང་བ་དེ་ལ་ཤེས་པ་ཕྱིན་ཅི་ལོག་ཏུ་གྱུར་པས། འདི་ལྟར་སྣང་བ་ཀུན་ལ་རྟོག་པ་བཙུད་པས་འདི་ལས་ང་བྱུང་ངམ་ང་ལས་འདི་བྱུང་སྙམ་པའི་སྙམ་བྱེད་ལས་འཁྲུལ་པས་སྲིད་པ་བར་མ་དོར་ལས་ཀྱི་ཁ་བརྒྱུད་ནས་འཁོར་བར་འཁྲུལ་པ་དང་། གཟུང་པའི་ཡུལ་གྱི་བྱེ་བྲག་ནི་འོད་དམ་ཐིག་ལེའམ་སྐུ་ལྟ་བུ་གཅིག་ལ་ཡིད་དཔྱོད་ཀྱི་ཤེས་པ་བག་ལ་ཉལ་སྐྱེས་ཏེ། ཕྱིན་ཅི་ལོག་ཏུ་རྟོགས་ཏེ་ལྷག་མ་རྣམས་ཀྱི་རྟོག་པ་ཆོད་ཀྱང་། བྱེ་བྲག་པ་གཅིག་གིས་ཐེ་ཚོམ་མ་ཆོད་པ་ལས་འཁོར་བར་འཁྲུལ་ཏེ། སྲིད་པའི་བར་མ་དོ་ལ་འཁྲུལ་པའོ། །ཞེན་པའི་ཡུལ་ལས་འཁྲུལ་པ་ནི། སྔར་ཞེན་པའི་བག་ཆག་གིས་མཚམས་སྦྱོར་གྱི་ཡུལ་ལས་འཁྲུལ་པ་དང་། དེ་ཉིད་གློ་བུར་བའི་ཡུལ་ལ་ཞེན་པ་མཐར་ཐུག་དང་བཅས་པས་འཁྲུལ་བའོ། །སྔར་ཞེན་པའི་ཡུལ་ལས་ཕྱིན་ཅི་ལོག་ཏུ་རྟོགས་ནས་འཁྲུལ་པ་ནི། འདིའི་དུས་ན་རྨི་ལམ་གྱི་རྣམ་པ་དང་འདྲ་སྟེ། ད་ལྟའི་དུས་ན་སྔར་གྱི་ཡུལ་གང་དང་གང་ལ་འདྲིས་པ་དེ་མཚན་མོའི་རྨི་ལམ་གྱི་དུས་ན་སྣང་བ་དང་འདྲ་བར། འདིའི་དུས་ན་སྔར་གྱི་བག་ཆགས་བཟང་ངན་གང་བསགས་པ་རྣམས་ཀྱིས་ཞེན་པ་སྣང་བ་ཡིན་པས། འདིའི་དུས་ཀྱི་ཡེ་ཤེས་ལྔ་ཡི་སྣང་བ་འདི་དག་ལ་ཡང་། སྔར་གྱི་བག་ཆགས་ཀྱི་སྟོབས་ཀྱིས་སྐབས་སུ་རང་གི་སྔར་ཞེན་པའི་བག་ཆགས་སུ་གྱུར་བས་ཏེ། སྣང་བ་ཡང་འཆར་བས། དེའི་དབང་གིས་བག་ཆགས་ཀྱི་སྟོབས་ཀྱིས་དེ་ཉིད་ལ་ཕྱིན་ཅི་ལོག་ཏུ་རྟོགས་པས་སྲིད་པའི་བར་མ་དོར་འཁྲུལ་ནས། དེ་ཉིད་ལས་བཟང་ངན་གྱི་དབང་གིས་འགྲོ་བ་དྲུག་ཏུ་འཁྲུལ་པའོ། །ཞེན་ཡུལ་གློ་བུར་བ་ལས་འཁྲུལ་པ་ནི། འདིའི་དུས་ཀྱི་ཡེ་ཤེས་ལྔའི་སྣང་བ་འདི་ལ་གཅེས་པའམ་སྡུག་པར་བཟུང་བས། དེ་ཉིད་ཞེན་པ་མཐར་ཐུག་པ་དང་བཅས་པའི་དབང་གིས་སྲིད་པའི་བར་མ་དོ་ལ་འཁོར་བའི་མཚན་ཉིད་དུ་འཁྲུལ་པའོ། །དེ་དག་གི་ཞེན་པའི་རྒྱུན་གཅད་པ་ནི། དངོས་པོ་ལས་འཁྲུལ་པ་ལ་འཁྲུལ་གཞི་རྩིས་ཀྱི་ཡི་གེས་གཅད། གཟུང་པ་ཡུལ་ལ་འཁྲུལ་པའི་རྒྱུན་རྟེན་འབྲེལ་ཐབས་ཀྱི་ངོ་སྤྲོད་ཀྱི་གཅད། ཞེན་པའི་ཡུལ་ལས་འཁྲུལ་པའི་རྒྱུན་གོམས་པའི་གནད་ཀྱི་ངོ་སྤྲོད་ཀྱིས་གཅད་པའི་ཕྱིར་རོ། །དེ་ལྟར་ཆོད་པའི་རྟགས་སུ་ཡོ་གི་ནི་རང་གི་ལུས་ལ་ཆགས་པ་མེད་པར་སེམས་ཅན་ལུས་སུ་འདོད་པ་ལ་གཏོང་བར་ནུས་པ་སྟེ། དཔེར་ན་རྒྱལ་པོ་ཟླ་བས། ལུས་ཀྱི་མགོ་བརྒྱ་རྩ་བརྒྱད་གཏོང་བར་དམ་བཅས་ནས་གཏོང་པ་དང་འདྲ། དེའི་ཕྱིར་ན་མགོ་དང་རྐང་ལག་གཏོང་ཞིང་ཞུམ་པའི་སེམས་ཀྱང་མེད་ཞེས་པའོ། །ཆོས་ཉིད་སྟོང་པ་ཉིད་ཀྱི་དོན་ཁོང་དུ་ཆུད་པའི་རྟགས་སུ། ཕྱི་རོལ་གྱི་རྒྱན་ནམ་མཁའ་ལ་ཡོ་གི་འདི་ནི་བསྐྱོད་པ་དང་། འཕུར་བར་ནུས་པ་དང་། ཐོགས་པ་མེད་པར་རྒྱུ་བའི་ཕྱིར། རྣལ་འབྱོར་ནམ་མཁའི་བྱ་ལམ་གནས་ཞེས་པ་དང་། དེ་བཞིན་དུ་རིག་པ་དངོས་མེད་ཟང་ཐལ་དུ་རྟོགས་པའི་རྟགས་སུ། ཡོ་གི་དེའི་རགས་པ་ཀུན་རྟེན་གྱིས་འདི་ལ་འཛུལ་བར་ནུས་པས་ཏེ། སྟོང་ཕྲག་བརྒྱ་པ་ལས་ཀྱང་། ས་ལ་ཡང་བྱ་བཞིན་ཞེས་པ་དང་། རྣལ་འབྱོར་པ་འདིས་སེམས་ཀྱི་རྣམ་པར་རྟོག་པ་རྒྱུན་ཆད་པའི་རྟགས་སུ། སེམས་ཅན་རྣམས་ཀྱི་བསམ་པ་ཡོ་གི་འདིས་ཤེས་པ་དང་། འདུ་ཤེས་ཀུན་གྱི་དོན་ཤེས་ཤིང་ཞེས་པའོ། །དེ་བཞིན་དུ་འཁོར་བའི་ཆོས་རྣམས་ཀྱི་མཚན་ཉིད་ཤེས་པའི་རྟགས་སུ། མི་བསམ་པ་ནི་བེམ་པོའི་སྣང་བ་རྣམས་ཀྱི་དོན་ཡོ་གི་འདིས་ཤེས་པ་སྟེ། འཁྲུལ་སྣང་ཆེན་པོའི་བེམ་རིག་འབྱེད་པའི་རྒྱུད་ལས། བེམ་པོ་རྣམས་ལ་ཅི་དགར་རོལ་ཞེས་པའོ། །བསྒོམ་པ་ལས་བྱུང་བའི་ཤེས་རབ་རང་རྡོལ་བའི་རྟགས་སུ། ཁ་ནས་ཚིག་རྒྱུད་རིམ་པར་སྤྲོས་པའི་ཆོས་སྔར་ཐོས་མ་མྱོང་པའི་གཞུང་ཚིག་དང་ཡི་གེར་བཀོད་པ་རྣམས། སྔོན་ཆད་ཡོངས་སུ་གྲགས་པའི་འདོད་པའི་སྲོལ་དང་མཐུན་པར་ཤེས་པ་དང་། མི་མཐུན་པའི་རིམ་པ་སྤང་ཤེས་ཤིང་། ཡོ་གི་དེའི་ཁ་ནས་ཀྱང་སྨྲ་བར་འབྱུང་བ་སྟེ། ཡུལ་མུ་སྟེགས་ཅན་རྣམས་ཚར་གཅོད་ནུས་པ་དང་། འདི་ལྟར་རྣལ་འབྱོར་པ་སུ་ལ་བྱུང་བའི་མི་དེ་ནི། སྔོན་དུ་འགྲོ་བ་ལ་གོམས་པའི་རྟགས་ཡིན་པའི་ཕྱིར་ན། སྨྲ་བའི་དམ་པ་མཆོག་གི་གནས་ཞེས་པའོ། །རྟགས་དེ་དག་རྣམས་དང་ལྡན་པའི་སྐལ་ལྡན་ནི། ལུས་དང་ངག་དང་སེམས་ཀྱིས་འདི་ནི་འཁོར་བའི་འཆིང་བའི་རྣམ་པར་རྟོག་པའི་ཞེན་པ་གང་གིས་ནི་གོང་མ་འཁྲུལ་པ་གཉིས་པོའི་བཅིངས་པ་ཀུན་ལས་ཡང་དག་པར་གྲོལ་བ་སྟེ། སྐྱེས་བུ་འདིས་ཕྱིས་འཁོར་བའི་ལུས་ངག་སེམས་ཀྱི་འབྲེལ་པ་ཆོད་པར་ངེས་པ་སྟེ། དེ་ནི་སྔོན་དུ་རུ་ཤན་ཕྱེད་པ་ལས་བྱུང་བའོ་ཞེས་རིག་པའི་སྣ་འཁྲིད་པའི་སྔོན་འགྲོ་ལས་བྱུང་བའི་རྟགས་བསྟན་ཏོ། །དེ་དག་དྲིལ་ནས་སྔོན་དུ་འགྲོ་བའི་རྟགས་བསྟན་ནས། ད་ནི་དངོས་གཞི་ཟག་པ་མེད་པའི་ཡེ་ཤེས་ཀྱི་དོན་ཉམས་སུ་བླངས་པ་ལས་བྱུང་བའི་རྟགས་སྟོན་ཏེ། འདི་ལ་བཅུས་བསྟན་པའི་དང་པོ་ལྟ་བའི་དོན་རྟོགས་ཤིང་ཁོང་དུ་ཆུད་པའི་རྟགས་བསྟན་པ་ནི། ལྟ་བ་ལ་ནི་གོམས་པའི་རྟགས། །ཞེས་པ་ལ་སོགས་པས་བསྟན། ལྟ་བ་ནི་ངོ་བོ་དང་། ངེས་ཚིག་དང་། དབྱེ་བ་དང་། རང་གི་མཚན་ཉིད་དང་། འབྲས་བུ་དང་ལྔའོ། །ལྟ་བའི་ངོ་བོ་ནི་མཐོང་བ་ཡིན་ལ། ངེས་ཚིག་ནི་གང་ལ་ལྟ་བའི་ཡུལ་དེ་ཕྱིན་ཅི་མ་ལོག་པ་མཐོང་བའི་དོན་མྱོང་བ་རྒྱུད་ལ་སྐྱེ་བར་བྱེད་པའོ། །དབྱེ་ན་འཇིག་རྟེན་པའི་ལྟ་བ་དང་། འཇིག་རྟེན་པ་མ་ཡིན་པའི་ལྟ་བའོ། །འཇིག་རྟེན་པ་ནི་བཏགས་པའི་ལྟ་བ་མིང་དུ་གྲགས་པ་རྣམས་ཡིན་ལ། ཕྱིན་ཅི་ལོག་གི་ལྟ་བ་མུ་སྟེགས་རྟག་ཆད། མ་དག་པའི་ལྟ་བ་ཉན་ཐོས་དང་རང་སངས་རྒྱས། དག་པ་ཕྱོགས་མ་མཐོང་བའི་ལྟ་བ་ཕ་རོལ་དུ་ཕྱིན་པ་དང་སྔགས་ཕྱི་ནང་ངོ་། །འཇིག་རྟེན་པའི་ལྟ་བར་འཇོག་པ་ནི་འདི་དག་རྣམས་ཀྱིས་ཆོས་ཉིད་མངོན་སུམ་གྱི་དོན་མཐོང་བ་མེད་པས་སོ་སོའི་སྐྱེ་བོ་དང་ཁྱད་པར་ཅུང་ཟད་མེད་པའི་ཕྱིར་ན། འཇིག་རྟེན་པར་བཞག་སྟེ་འཇིག་རྟེན་ལས་མི་གྲོལ་བའི་ཕྱིར་རོ། །འཇིག་རྟེན་པ་མ་ཡིན་པའི་ལྟ་བ་ལ་གསུམ་སྟེ། ཆོས་ཅན་ལྟ་བའི་ཁྱད་པར་དུ། ཨ་ནུ་མན་ཆོད་ཀྱི་ཡོ་ག་གསུམ་སྟེ། ཕྱི་ཆོས་ཅན་གྱི་སྣང་བ་ལ་ལྟས་པས་ན། ཆོས་ཅན་གྱི་དོན་མཐོང་མ་མྱོང་བས་འཇིག་རྟེན་པ་དང་མཐུན། ཆོས་ཉིད་ལྟ་བའི་ལྟ་བ་རྫོགས་པ་ཆེན་པོ་སེམས་ཀྱི་སྡེ་དང་ཀློང་གི་སྡེ་དང་མན་ངག་གི་སྡེ་ཁ་ཅིག་ཡིན་ཏེ། ཆོས་ཉིད་འབའ་ཞིག་ལ་བལྟས་པས། ཆོས་ཐམས་ཅད་གནས་ལུགས་ཡིན་ཐོག་ཏུ་ལུས་པས། རང་གི་རིག་པ་ལ་མངོན་གསུམ་དུ་ཉམས་སུ་མྱོང་བ་མ་སྐྱེས་པས། གཞན་རྒྱུད་ཤེས་བྱའི་ཆོས་ཉིད་གཏན་ལ་ཕེབས་ཀྱང་རང་རྒྱུད་རྣམ་པར་གྲོལ་བའི་ཡེ་ཤེས་རང་གི་ངོ་བོའི་མཚན་ཉིད་མ་མཐོང་བས། འདི་ཉིད་ལ་སངས་མི་རྒྱ་བས་ཡང་དག་པའི་ལྟ་བ་མ་ཡིན། རང་རིག་ལྟ་བའི་ལྟ་བ་ནི་རྫོགས་པ་ཆེན་པོ་འདིའི་ལུགས་ཡིན་ཏེ། རང་གི་རིག་པ་དབང་པོའི་མངོན་གསུམ་དུ་གཏན་ལ་ཕབ་ནས། དོན་ཉམས་སུ་མྱོང་བ་རང་རྒྱུད་ལ་ད་ལྟ་སྐྱེས་པས་ཕུང་པོའི་ཟག་པ་འདི་ཉིད་ལ་ཟད་ནས་རྡོས་བཅས་མི་སྣང་བའོ། །ལྟ་བ་རང་གི་མཚན་ཉིད་ནི། གང་ལ་ལྟ་ན་སོ་སོའི་ཡུལ་མཚན་ཉིད་མ་འཁྲུལ་བ་ལ་བལྟ། གང་གིས་ལྟ་ན་ཚིག་གི་ཡུལ་སྒྲོས་ཐ་སྙད་སྣ་ཚོགས་པའི་ཡུལ་ལ། ཤེས་རབ་ཕྱིན་ཅི་མ་ལོག་པས་བལྟ། རང་རིག་མངོན་གསུམ་གྱི་འཁྲུལ་པ་མེད་པ་ལ། མིག་གི་དབང་པོའི་དེ་ཉིད་མ་འཁྲུལ་བས་བལྟ། ཆོས་ཅན་སྣ་ཚོགས་པའི་མཚན་ཉིད་ཀྱི་ཡུལ་ལ། ཐབས་དང་འཇུག་སྒོ་ཁྱད་པར་ཅན་གྱིས་ཉམས་སུ་མྱོང་བས་བལྟ་བའོ། །ཇི་ལྟར་ལྟ་ན་ཕྱིན་ཅི་ལོག་གི་བློ་དང་བྲལ་བས་ལྟའོ། །དེ་ལྟར་བལྟས་པས་གང་མཐོང་ན་སོ་སོའི་མཚན་ཉིད་ཕྱིན་ཅི་མ་ལོག་པར་མཐོང་བའོ། །དེ་ལྟར་མཐོང་བའི་འབྲས་བུ་ནི་འཇིག་རྟེན་པའི་ལྟ་བའི་འབྲས་བུས་འཇིག་རྟེན་མཐུན་སྣང་དུ་གྲུབ་ལ། འཇིག་རྟེན་པ་མ་ཡིན་པའི་ལྟ་བའི་འབྲས་བུ་ནི་ཆོས་ཅན་ཆོས་ཉིད་དུ་འགྱུར་བ་དང་། ཆོས་ཉིད་གང་གི་ངོ་བོར་ཡང་མ་གྲུབ་པ་དང་། རང་རིག་ཚེགས་མེད་དུ་སངས་རྒྱ་བ་ཉིད་དུ་འགྱུར་རོ། །དེ་ཡང་འདིར་ནི་ལྟ་བ་དེ་དག་གི་ནང་ནས་རང་རིག་ལྟ་བའི་ལྟ་བ་ལ་རྣལ་འབྱོར་པས་གོམས་པའི་རྟགས། རང་བཞིན་རྫོགས་པ་ཆེན་པོ་འདི་ཉིད་ཀྱི་སྐལ་པ་དང་ལྡན་པའི་སྐྱེས་པའམ་བུད་མེད་ལ། རྟགས་འདི་བཞིན་དུ་ཡང་ད་ལྟའི་ལུས་ངག་སེམས་ལ་འབྱུང་བར་འགྱུར་བ་ཡིན་ཏེ། དེ་ཡང་ཆོས་ཉིད་སྟོང་པ་རྣལ་འབྱོར་པ་དེའི་ལུས་དང་སེམས་ལ་གང་ཞིང་རྒྱས་པའི་རྟགས་སུ་མཁའ་ལ་འགྲོ་བའི་བྱ་བཞིན་ཏེ་ནམ་མཁའ་འདི་ལ་ཐོགས་པ་མེད་པར་རྒྱུ་བ་ནི་ལྟ་བ་ཆོས་ཉིད་དུ་རྟོགས་པ་ལས་བྱུང་བ་སྟེ། དེའི་ཕྱིར་ན་ཕ་རོལ་དུ་ཕྱིན་པ་ནས། ནམ་མཁའ་གནས་ཏེ་ཅིག་ཆར་ཆོ་འཕྲུལ་རྣམ་པར་སྟོན། ཞེས་པའོ། །ཡང་སྐལ་པ་དང་ལྡན་པའི་སྐྱེས་བུ་དེས་རླུང་ལ་བརྟེན་པའི་ལྟ་བའི་དོན་ཕྱིན་ཅི་མ་ལོག་པར་རྟོགས་པས། ནང་ལུས་ཀྱི་རླུང་ལ་རྣལ་འབྱོར་པ་དེ་རང་གིས་སྔོན་དུ་སྤྲོས་བཅས་དང་སྤྲོས་མེད་དང་། ཤིན་ཏུ་སྤྲོས་པ་མེད་པ་དང་། རབ་ཏུ་སྤྲོས་པ་མེད་པའི་དབང་བཞི་རྫོགས་པར་བྱས་པས། ཐ་མ་དེ་ཉིད་ལ་དབང་ཐོབ་པས་ཕྱི་ནང་གི་སྣང་བ་རྣམས་ལ། གོམས་པའི་སྟོབས་ཀྱིས་གང་ལྟར་ཅི་ཡང་བསྒྱུར་བའི། རྫུ་འཕྲུལ་དང་སྟོབས་རྫོགས་པའི་ཕྱིར་ན། དཔེར་ན་བར་སྣང་ལ་རྒྱུ་བའི་ཕྱིའི་རླུང་བཞིན་དུ་སྐད་ཅིག་མ་དྲུག་བརྒྱའི་བར་དུ། རྣལ་འབྱོར་པ་འདི་ཡིས་ལུས་ཀྱི་རྫུ་འཕྲུལ་ལ་བརྟེན་ནས་འཛམ་བུའི་གླིང་དུ་རྒྱུ་ཞིང་དགེ་བ་དང་མི་དགེ་བའི་མཚན་ཉིད་ཤེས་ཤིང་། དེ་ཉིད་ཀྱི་བར་ལ་དོན་བྱ་བ་དང་མི་བྱ་བའི་ནུས་པ་དང་ལྡན་པར་འགྱུར་བ་ཡིན་ནོ། །དེའི་ཕྱིར་ན་སྐད་ཅིག་ཐམས་ཅད་བྱེ་བྲག་ཕྱེད་ཅེས་པའོ། །ཡང་ལྟ་བའི་དོན་རང་གི་སེམས་ཉིད་སྟོང་པར་རྟོགས་པའི་རྟགས་སུ། ཕྱི་རོལ་གྱི་བེམ་པོའི་རྣམ་པའི་རི་དང་མཁར་ཁྱིམ་ལ་སོགས་པ་དངོས་པོའི་རྣམ་པ་གང་ལ་མིག་གིས་བལྟས་པ་ཙམ་གྱིས་དངོས་པོ་མེད་པ་ལྷན་ལྷན་ཞུ་བར་ནུས་པ་འདིས་ནི། རང་གི་སེམས་ཀྱི་མཚན་ཉིད་སྟོང་པ་ཉིད་དུ་རྟོགས་པས་ཏེ། དངོས་པོའི་དམིགས་རྟེན་ཞུ་བར་འགྱུར་ཞེས་སྐལ་པ་གཅོད་པའི་འཁོར་ལོ་ལས་སོ། །དེ་ལྟ་བུའི་རྟགས་རྫོགས་པར་བྱུང་བའི་རྣལ་འབྱོར་པ་འདིས་ནི་ལྟ་བའི་གདེང་རྙེད་པ་ཡིན་ནོ། །ཞེས་ལྟ་བ་རྟོགས་པའི་རྟགས་བསྟན་ནས། ད་ནི་བསྒོམ་པ་གོམས་ཤིང་འདྲིས་པའི་རྟགས་རྣལ་འབྱོར་པའི་ལུས་ངག་ལ་ཇི་ལྟར་འབྱུང་བ་བསྟན་པ་ནི། གང་གིས་སྒོམ་ལ་འབྱོང་བའི་རྟགས། ཞེས་པ་ལ་སོགས་པས་བསྟན་ཏེ། གང་གིས་ནི་རྣལ་འབྱོར་པ་གང་ཞིག་གིས། སྒོམ་ལ་ནི་ངོ་བོ་དང་། ངེས་ཚིག་དང་། དབྱེ་བ་དང་། སྒོམ་པ་རང་གི་མཚན་ཉིད་དང་། འབྲས་བུའོ། །སྒོམ་པའི་ངོ་བོ་ནི་ཐོབ་བྱའི་དོན་དེ་དང་མི་འབྲལ་བ་ཡིན་ལ། ངེས་ཚིག་ནི་གང་ཐོབ་པར་བྱེད་པའི་དོན་དེ་མི་གཏོང་ཞིང་ཡུན་རིང་པོར་གནས་པར་བྱེད་པའོ། །དབྱེ་བ་ནི་མིང་གི་སྒོམ་པ་དང་། འཇིག་རྟེན་བློ་སྣང་འཁྲིད་པའི་སྒོམ་པ་དང་། མཚན་མ་དམིགས་གཏད་ཀྱི་སྒོམ་པ་དང་། རྩ་རླུང་ངལ་སོའི་སྒོམ་པ་དང་། ཆོས་ཉིད་རང་ཐོག་ཏུ་གནས་པའི་སྒོམ་པ་དང་། རང་བཞིན་མ་བཅོས་པའི་སྒོམ་པ་དང་ལྔའོ། །མིང་ནི་མིང་དུ་བཏགས་པ་རྣམས་སོ། །འཇིག་རྟེན་པའི་བློ་སྣ་ཁྲིད་པའི། བདེ་བའི་ཡོན་ཏན་དང་། མི་བདེ་བའི་སྐྱོན་འཆོས་པའི་སྒོམ་པ་རྣམས་ཡིན་ནོ། །མཚན་མ་དམིགས་གཏད་དང་བཅས་པའི་སྒོམ་པ་ནི། བསྐྱེད་པའི་རིམ་པ་གཙོར་བསྒོམ་པ་དང་ཐབས་མི་འདྲ་བ་གཙོར་སྒོམ་པའོ། །རྩ་རླུང་ངལ་གསོའི་སྒོམ་པ་ནི་སྒོམ་གྱི་ལམ་སྟེགས་སུ་འགྲོ་བ་ཡིན་ནོ། །ཆོས་ཉིད་རང་ཐོག་ན་གནས་པའི་སྒོམ་པ་ནི། གནས་དང་རྟེན་པའི་ལམ་དུ་བྱེད་པའོ། །རང་བཞིན་མ་བཅོས་པའི་སྒོམ་པ་ནི། བྱས་བཅོས་དང་འབད་རྩོལ་མེད་པར་ཐམས་ཅད་རང་སར་བཞག་སྟེ། འདི་ལ་རྩོལ་བ་མེད་པས་བྱས་པའི་ཕྱོགས་སུ་མ་ལྷུང་སྟེ་བློ་སྣ་ཁྲིད་པའི་སྒོམ་པའི་སྐྱོན་མེད། ཡིད་ཀྱི་ཡུལ་དུ་མི་སྒོམ་པས་མཚན་མ་དམིགས་གཏད་དང་བཅས་པའི་སྒོམ་པའི་སྐྱོན་མེད། ལུས་ངག་ཡིད་ཀྱི་གཅུན་པ་ལ་མི་ལྟོས་པས་རྩ་རླུང་སེམས་ཀྱི་ངལ་གསོའི་སྒོམ་པའི་སྐྱོན་མིན། གནས་པ་ཚན་ཆེ་བའི་ཞི་གནས་ཕྱོགས་གཅིག་ཏུ་མ་ལྷུང་བས། ཆོས་ཉིད་རང་ཐོག་ཏུ་གནས་པའི་བསྒོམ་པའི་སྐྱོན་མེད་པས། ཚོགས་དྲུག་རང་ཡན། སྒོ་ལྔ་སོར་བཞག །སྣང་བ་གཅེར་བཞག་ཏུ་གཞག་པས། རང་བཞིན་གནས་ལུགས་ཀྱི་བསྒོམ་པའོ། །མཚན་ཉིད་ནི་གང་སྒོམ་ན་ཆོས་ཉིད་དངོས་པོའི་འདུག་ཚུལ་གྱི་མཚན་ཉིད་ཕྱིན་ཅི་མ་ལོག་པར་སྒོམ། གང་གིས་སྒོམ་ན་རྣལ་འབྱོར་པ་མཚན་ཉིད་དང་ལྡན་པ་འཁོར་བ་ལས་ཡིད་དབྱུང་བ་གཅིག་གིས་སྒོམ། སྒོམ་ལུགས་ཇི་ལྟར་སྒོམ་ན། མ་བཅོས་རང་བཞག་ཆེན་པོར་སྒོམ་པའོ། །འབྲས་བུ་ནི་བློའི་བབས་སྤྱོད་པའི་འབྲས་བུ་དང་། མཐར་ཐུག་རང་གྲོལ་གྱི་འབྲས་བུའོ། །བློའི་བབས་སྐྱེས་པ་ནི། དང་པོ་སོ་མ་ཞེས་པ་རང་ངོ་ཡིན་སྙམ་པ་ཙམ་འབྲས་བུར་སྣང་བ་དང་། གཉིས་པ་ལུས་ངག་གི་བདེ་བ་སྐྱེས་པ་འབྲས་བུར་སྣང་བ་དང་། གསུམ་པ་གཉུག་མ་སྟོང་པའི་དོན་གོ་བ་ཙམ་འབྲས་བུར་གྱུར་པ་དང་། བཞི་པ་མ་བཅོས་པ་ལུས་ངག་གནད་ལ་མི་ལྟོས་པ་འབྲས་བུར་འདོད་པ་སྟེ། འདི་དག་ནི་ཤེས་པ་བློའི་ཡིད་ཀྱི་ཕྱོགས་མཚོན་པ་ཡིན་ནོ། །མཐར་ཕྱིན་རང་གྲོལ་གྱི་འབྲས་བུ་སྐུ་གསུམ་དུ་འཛིན་པའི་ཞེན་པ་དང་བྲལ་ནས། ཆོས་ཐམས་ཅད་ཟད་པ་ཉིད་ལ་གནས་པ་ཡིན་ནོ། །དེ་ལྟར་རང་བཞིན་མ་བཅོས་པའི་སྒོམ་པའི་དོན་ལ་འབྱོངས་པའི་རྟགས་བསྟན་པ་ནི། ཆོས་ཉིད་སྐྱེ་བ་མེད་པའི་དོན་ལ་སྒོམ་པས་གོམས་པ་སྔོན་དུ་གྱུར་པའི་རྟགས་སུ། རྣལ་འབྱོར་པ་དེའི་ལུས་ལ་འབུ་དང་སྲིན་བུ་དང་སྲོག་ཆགས་ཤིག་དང་སྲོ་མ་ལ་སོགས་པ་མེད་པ་ནི། སེམས་ཅན་ཐམས་ཅད་ཀྱང་སྐྱེ་བ་མེད་པར་འཁོར་བ་ལས་སྒྲོལ་བ་ཡིས། སེམས་ཅན་ལ་དམིགས་པའི་སྙིང་རྗེ་དང་། བདག་གིས་ཆོས་ཟབ་མོའི་དོན་རྟོགས་པར་བྱས་པས། གཞན་དོན་རྫོགས་པར་བྱའོ་སྙམ་པའི་བློ་འབྱོངས་པས་ཆོས་ཉིད་ལ་དམིགས་པའི་སྙིང་རྗེ་སེམས་ཅན་གྱི་གཞན་དོན་དང་། རང་གི་དོན་གཉིས་མཐར་ཕྱིན་པར་བྱ་བའི་ཕྱིར་ན། རང་གི་ལུས་ལ་སྲོག་ཆགས་འབྱུང་མི་སྲིད་པ་ནི། ཀུན་རྫོབ་བྱང་ཆུབ་ཀྱི་སེམས་འབྱོངས་པའི་རྟགས་ཡིན་ནོ། །ཡང་སྐལ་བ་དང་ལྡན་པ་དེས། རྣམ་པ་ཡུལ་ལ་བརྟེན་པར་རྟོགས་པ་དེ་ཉིད་བློ་དུ་མས་སྤྱད་པ་འཁྲུལ་པའི་སེམས་དང་ཕྱིན་ཅི་ལོག་གི་སེམས་དང་། མ་དག་པའི་སེམས་དང་། བྱང་ཆུབ་ཀྱི་སེམས་དོན་དམ་དང་། ཀུན་རྫོབ་དང་། ཀུན་རྫོབ་གྱི་རྣམ་པ་རྒྱུན་སྐྱེ་བར་བྱེད་པའི་སེམས་སྟོང་པས། ད་སེམས་ཀྱི་བྱུང་ཚོར་མི་འབྱུང་བའི་རྟགས་སུ། སྐལ་ལྡན་དེའི་ལུས་ནི་ཤིང་བལ་གྱི་འདབ་མ་གཡེངས་སུ་གནས་པའམ། བྱ་སྒྲོའི་རྣམ་པ་ལྟ་བུའམ། རས་བལ་བཞིན་རབ་ཏུ་ཡང་པར་འགྱུར་བ་ཡིན་ནོ། །ཡང་རྟེན་གྱི་གང་ཟག་གིས་རང་གི་རིག་པ་དེ་ཉིད་སྔར་མ་སྐྱེས་པའི་དོན་དང་། ད་འཆི་བ་མེད་པའི་དོན་ཁོང་དུ་ཆུད་ཅིང་རྟོགས་པ་དང་ལྡན་པའི་རང་གི་དོན་རྟོགས་པའི་རྟགས་སུ། དེའི་ལུས་ནི་ལོ་བཅུ་དྲུག་ལོན་པ་བཞིན་དུ་འགྱུར་བའོ། །ཡང་གང་ཟག་དེ་ཉིད་ལ་ཆོས་ཉིད་སྟོང་པ་ཉིད་ཀྱི་རླན་གྱིས་རང་གི་སེམས་ཉིད་ལ་ཁྱབ་པའི་ཕྱིར་ན། གང་ཟག་དེའི་ལུས་ཀྱི་བ་སྤུ་དང་། གདོང་ཡན་ལག་དང་། ལུས་སྤྱིའི་ཤ་མདོག་ལ་སོགས་པ་དང་། དེ་བཞིན་དུ་སོ་དང་སེན་མོ་དང་སྐྲ་རྣམས་ལ་རང་བཞིན་གྱིས་སྣུམ་མ་བྱུགས་པར་བག་ལ་སྣུམ་རང་ཞུགས་ལས། སྣུམ་ལྕུག་དང་ལྡན་པ་ནི། དེ་ནི་ཆོས་ཉིད་སྟོང་པ་ཉིད་ཀྱི་སྒོམ་པ་ཚད་འབྱོངས་པའི་རྟགས་སོ། །ཡང་སྐལ་བ་དང་ལྡན་པའི་གང་ཟག་གཅིག་ལ་སེམས་ཀྱི་སྒོམ་པ་མངོན་དུ་གྱུར་པའི་རྟགས་ནི། འདི་ལྟར་སྣང་བའི་ཆོས་ཐམས་ཅད་ལ། རྣལ་འབྱོར་པ་དེའི་སེམས་ནི་སྐད་ཅིག་ཀྱང་སྣང་བའི་རྐྱེན་ཇི་ལྟར་བྱུང་ཡང་། ས་གཅིག་ཏུ་གནས་པ་ལས་གང་ལ་ཡང་མི་འཕྲོ་བར། ཐོག་མ་གང་དུ་གཏད་པའམ་བར་སྣང་གི་སར་སྡོད་ཅིང་། འཁྲུལ་པའི་ཡུལ་གཉིས་མ་རིག་པ་ཉིད་འཇུག་པར་མི་ནུས་པར་རང་སར་གནས་ཤིང་། རྣམ་རྟོག་གི་དབང་དུ་མི་འགྲོ་བ་ནི་ནང་གི་རྟགས་ཏེ། རྟགས་འདིས་ནི་བསྒོམ་པ་གཞན་མ་ཡིན་པ་རང་གིས་རྙེད་པ་ཡིན་པས་ན། འདི་དག་ནི་སྒོམ་པ་འབྱོངས་པ་སྟེ། འདི་དག་རྣམས་དང་ལྡན་པའི་སྐལ་ལྡན་ནི། ཚེ་འདི་དང་གཉིས་ཀྱིས་ནི་རྟོགས་པ་མངོན་དུ་གྱུར་པའི་སངས་རྒྱས་ཐོབ་པར་ངེས་སོ། །ཞེས་སྒོམ་པ་ལས་བྱུང་བའི་རྟགས་བསྟན་ནས། ད་ནི་ཆོས་ཉིད་ཀྱི་ཡུལ་འོད་ལ་གོམས་པའི་རྟགས་བསྟན་པ་ནི། གང་གིས་འོད་ལ་སུས་གོམས་པ། །ཞེས་པ་ལ་སོགས་པས་བསྟན་ཏེ། རྣལ་འབྱོར་པ་གང་ཞིག་གིས། འོད་ལ་ནི། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུ་དང་ལྔའོ། །འོད་ཀྱི་ངོ་བོ་ནི་རང་གི་གདངས་སྟོན་པར་བྱེད་པ་ཉིད་ཡིན་ལ། ངེས་ཚིག་ནི་ཡུལ་རྣམ་པར་དག་པ་ལ་སྣང་བར་བྱེད་པའི་ཕྱིར་ན་འོད། རང་གི་རང་བཞིན་སྟོན་པར་བྱེད་པའི་ཕྱིར་ན་འོད། ཐུགས་རྗེ་རང་ཤུགས་ཀྱིས་སྟོན་པས་ན་འོད་དོ། །དབྱེ་ན་མིང་གི་འོད་དང་། འཇིག་རྟེན་ལྟར་སྣང་གི་འོད་དང་། ཡེ་ཤེས་ལྔའི་རང་གི་མཚན་ཉིད་ཀྱི་འོད་དང་། བསོད་ནམས་ལུས་སྟོབས་ཀྱི་འོད་དང་། ཉམས་བླངས་གོམས་ཚད་ཀྱི་འོད་དོ། །མིང་ནི་མིང་དུ་བཏགས་པ་རྣམས་ཡིན་ལ། འཇིག་རྟེན་ལྟར་སྣང་གི་འོད་ནི། ཉི་མ་དང་། ཟླ་བ་དང་། གཟའ་དང་། སྐར་མ་དང་། མར་མེའི་འོད་དང་། སྲིན་བུ་མེ་ཁྱེར་ཀྱི་འོད་དང་། ཡི་དྭགས་ཀྱི་འོད་ལ་སོགས་པ་སྟེ་འདི་དག་རྣམས་འོད་ཡིན་ཡང་མཚན་ཉིད་དང་མི་ལྡན་པའོ། །བསོད་ནམས་ལུས་སྟོབས་ཀྱི་འོད་ནི། འཇིག་རྟེན་པ་དང་། འདས་པའོ། །འཇིག་རྟེན་པ་ནི་གཟུགས་ཀྱི་ཁམས་ཀྱི་ལྷ་རྣམས་ལ་བསོད་ནམས་ལས་གྲུབ་པའི་འོད་ལ་རེ་བས་ལུས་རྒྱན་རྣམས་ཡིན་ལ། འདས་པ་ནི་ཉན་ཐོས་ཀྱི་འོད་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་ཀྱི་གཟུགས་སྐུ་གཉིས་ཀྱི་འོད་དོ། །ཡེ་ཤེས་ལྔའི་རང་གི་མཚན་ཉིད་ཀྱི་འོད་ནི། ཆོས་ཀྱི་དབྱིངས་ཀྱི་ཡེ་ཤེས་རང་གི་མཚན་ཉིད་ལ་འོད་མཐིང་ཀ་ཆོས་ཉིད་ལམ་གྱི་རང་གདངས་སུ་གནས་པས། ལྟ་བ་རང་གི་ངོ་བོ་ལས་མི་འགྱུར་བར་སྣང་བར་བྱེད་ལ། མེ་ལོང་ལྟ་བུའི་ཡེ་ཤེས་ཀྱི་འོད་དཀར་པོ་ཆོས་ཉིད་ལམ་གྱི་ཟེར་གདངས་སུ་སྣང་བས། སྒོམ་པ་རང་གནས་པའི་གཤིས་སྣང་བར་བྱེད། མཉམ་པ་ཉིད་ཀྱི་ཡེ་ཤེས་རང་གི་མཚན་ཉིད་འོད་སེར་པོ་ཆོས་ཉིད་ལམ་གྱི་གཏིང་གདངས་སུ་སྣང་བས། སྤྱོད་པ་རང་གི་ཡོན་ཏན་དུ་སྣང་བར་བྱེད། སོ་སོར་རྟོག་པའི་འོད་དམར་པོ་ཆོས་ཉིད་ལམ་གྱི་ཁྱབ་པའི་ཡེ་གདངས་སུ་གནས་པས། འབྲས་བུ་རང་དབང་བའི་རྩལ་སྣང་བར་བྱེད། བྱ་བ་གྲུབ་པའི་རང་གི་མཚན་ཉིད་འཛིན་པའི་འོད་ལྗང་གུ་ཆོས་ཉིད་རྩལ་གདངས་སུ་སྣང་བས། རིག་པ་རང་གི་ངོ་བོ་རྩོལ་སྒྲུབ་དང་བྲལ་བར་སྣང་བར་བྱེད་པའོ། །ཉམས་སུ་བླངས་པ་གོམས་ཚད་ཀྱི་འོད་ནི། རྟེན་གྱི་གང་ཟག་གཅིག་གིས་ཉམས་སུ་བླངས་པའི་ཚེ། ཉམས་གོང་ནས་གོང་དུ་འཕེལ་བའི་སྣང་བ་ཁ་དོག་དང་དབྱིབས་མི་འདྲ་བ་ཐ་དད་པར་སྣང་བ་སྟེ། འོད་ཀྱི་དུམ་བུ་དང་། གྲུ་ཆད་དང་། གྱེན་འགྲེང་དང་། རྩིབས་ཤར་དང་། མུ་ཁྱུད་དང་། རིན་པོ་ཆེའི་དྲྭ་བ་དང་། དྲྭ་བ་ཕྱེད་པ་དང་། མཁར་ཐབས་དང་། གུར་ཁྱིམ་དང་། མིག་ཚགས་དང་། མིག་མངས་རིས་ལ་སོགས་པ་ནང་གི་རྟགས་ཀྱི་སྐབས་ནས་སྟོན་པ་ཡིན་ནོ། །འོད་དེ་དག་ནི་དངོས་པོའི་གཤིས་ལ་ཆ་ཚང་བ་གྲུབ་པ་རང་གི་ཆ་ཙམ་དུ་ཡོད་པ་ལས། ཕྱི་རོལ་སྣང་བྱེད་དུ་ཡོད་པ་མ་ཡིན་ཏེ། དཔེར་ན་ཏིལ་འབྲུ་ལ་མར་གྱིས་ཁྱབ་པ་དང་མཚུངས་སོ། །འདི་དག་ནི་ལམ་གྱི་སྣང་ཆའོ། །ཡང་དག་པའི་ཆོས་ཉིད་ཟབ་མོའི་ངོ་གང་ལ་འོད་ཡོད་ཅེས་པའམ་མེད་བྱ་བ་གང་ཡང་གྲུབ་པ་མེད་དོ། །འདི་ནི་ཚིག་གིས་བརྗོད་པར་དཀའོ། །མཚན་ཉིད་ནི་གསལ་བྱེད་གཞན་ལ་མ་ལྟོས་པའོ། །དེ་ཡང་གསལ་བྱ་རང་གི་རང་བཞིན་དེ་གསལ་བྱེད་དུ་ཉམས་སུ་མྱོང་བ་ལས། མྱོང་གསལ་གཉིས་སུ་མེད་པར་གསལ་བའོ། །འབྲས་བུ་ནི་ཆོས་ཀྱི་དབྱིངས་བསམ་གྱིས་མི་ཁྱབ་པའི་ངང་དུ་སངས་རྒྱའོ། །དེ་ལྟ་བུའི་འོད་ཀྱི་ལམ་སྣང་ལ་སྐྱེས་བུ་སུས་གོམས་པ་ནི། ཆོས་ཀྱི་དབྱིངས་བསམ་གྱིས་མི་ཁྱབ་པའི་ངང་དུ་སངས་རྒྱ་བ་ཡིན་ཏེ། དེ་ཡང་རྣལ་འབྱོར་པ་རང་གི་མིག་གི་དབང་པོ་ཡིས་མཐོང་བའི་སྤྱོད་ཡུལ་དུ། ཕྱི་རོལ་གྱི་འབྱུང་བ་ས་དང་མེ་དང་ཆུ་དང་རླུང་གི་རྣམ་པ་རྣམས་མི་སྣང་བར་རང་འོད་ཀྱི་སྣང་བར་སྐབས་སུ་སྣང་ཞིང་། སྐབས་སུ་འབྱུང་བ་བཞིའི་སྣང་བ་སུས་ཀྱང་བྱས་པ་མེད་པར་རང་ནུབ་སྟེ། དེ་ནས་ཐོག་མའི་མཐིང་ཀ་དང་། དེ་ནས་དཀར་པོ། དེ་ནས་སེར་པོ་དང་གསུམ་དུ་འགྱུར། དེ་ནས་དམར་པོ། དེ་ནས་ལྗང་གུའི་སྣང་བ་རྣམས་རིམས་ཀྱིས་ཤར་ནས། དེ་ལྟར་གོང་ནས་གོང་དུ་འཕེལ་ནས། ཁ་དོག་ལྔ་ལ་སྤྱོད་པའི་ཚེ། འོད་ལ་གོམས་པས་ཏེ། འོད་ཀྱི་སྣང་བ་འདི་དང་ཡོ་གི་དེ་འབྲལ་བ་མེད་པའི་རྟགས་སུ། འགྲོ་བ་གཞན་གྱིས་མཐོང་བའི་མིག་གི་སྤྱོད་ཡུལ་དུ་འཁྲུལ་པ་ཞིག་པའི་སྐལ་ལྡན་དེ། སྨྱོན་པ་བཞིན་དུ་མཐོང་སྟེ། དེ་ཉིད་ཀྱང་སྣང་བ་གང་ལ་ཡང་ཐོགས་རྡུགས་མེད་པར་མདོར་ན་འབྱུང་བ་བཞིའི་གནོད་པ་དང་བྲལ་ནས། ཆུ་ལ་བྱིང་བ་མེད་པ་ལ་སོགས་པ་ཡང་འབྱུང་། དེ་དག་ལ་རང་གིས་སྤྱོད་ཅིང་གནོད་པ་དང་བྲལ་བའོ། །དེའི་དུས་ན་སྐྱེས་བུ་དེ་དངོས་པོའི་རྫས་གང་ལ་ཡང་ཆགས་པ་མེད་པ་དང་། འདི་ལྟར་བྱུང་བའི་དུས་ན་འབྱུང་བ་བཞིའི་བཅིངས་པའི་དྲི་མ་ལས་གྲོལ་བའི་རྟགས་སུ། རི་དང་བྲག་ལ་སོགས་པ་རྣམས་ལ་ལུས་ཟང་ཐལ་དུ་འགྲོ་བར་ནུས་པ་དང་། དེ་བཞིན་དུ་སའི་གཏིང་དུ་འཛུལ་བར་འགྲོ་བ་གཞན་གྱི་སྣང་བ་ལ་མཐོང་བ་དག་འབྱུང་ལ། དེ་ལྟར་ཆུ་རྣམས་ལ་ཡང་བྱིང་བ་མེད་པར་ཟང་ཐལ་བའོ། །འདིའི་དུས་ན་ལུས་ལ་གོས་དང་བྲལ་ནས་ཆོས་ཀྱི་རང་དྲོད་ཕེབས་པས་ཀྱང་གྲང་བ་མེད་པ་ནི། གཅེར་བུ་སྣང་བ་གང་ལ་ཡང་ཐོགས་པ་མེད་ཅིང་རྒྱུ་བར་བྱེད་ལ། འདིའི་དུས་ན་ཏིང་ངེ་འཛིན་རོ་མཉམ་གྱི་ཟས་རྙེད་པས་འཇིག་རྟེན་གྱི་ཁམས་ཀྱི་ཟས་དང་སྐོམ་དང་ན་ཚ་དང་སྐྱེ་ཤི་ལ་སོགས་པའི་འདོད་པ་རང་བཞིན་གྱིས་བྲལ་བས་འདིས་ནི་སྣང་བ་འདི་ཉིད་ལ། ཟག་པ་དང་བཅས་པ་ཕུང་པོའི་ཟག་པ་དང་ཉོན་མོངས་པའི་ཟག་པ་རང་ཟད་ནས་འབྱུང་བ་བཞི་རང་སར་དེངས་ནས་ནི། ཟག་བཅས་ཀྱི་ཕུང་པོ་མི་སྣང་བར་ཚེ་འདི་ལ་སངས་རྒྱས་ཀྱི་འབྲས་བུ་ཐོབ་པ་ལ་ཐེ་ཚོམ་མེད་དོ་ཞེས་འོད་ལ་གོམས་པའི་རྟགས་བསྟན་ནས། ད་ནི་དབྱིངས་ལ་གོམས་པའི་རྟགས་བསྟན་པ་ནི། གང་གིས་དབྱིངས་ལ་གོམས་པས་ནི། ཞེས་པ་ལ་སོགས་པས་བསྟན་ཏེ། རྣལ་འབྱོར་པ་གང་ཞིག་གིས་ཆོས་ཀྱི་དབྱིངས་པ་ནི། དབྱིངས་ཀྱི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུ་དང་ལྔའོ། །དབྱིངས་ཀྱི་ངོ་བོ་ནི་ཡངས་ཤིང་ཁྱབ་བརྡལ་ཆེན་པོའི་བདག་ཉིད་གསལ་བ་རང་གསལ་ཉིད་དོ། །ངེས་ཚིག་ནི་དཀྱིལ་ཞེས་བྱ། དབྱིངས་ཞེས་བྱ། ཆོས་ཉིད་དངོས་པོ་གཤིས་ཀྱི་རང་བཞིན་ཡངས་ཤིང་མཐའ་ལ་ཐུག་པ་མེད་པ་ཉིད་དོ། །དབྱེ་ན་བཞི་ཏེ། ཕྱིའི་དབྱིངས་ནམ་མཁའ་དང་། ནང་གི་དབྱིངས་ཀྱི་སྒྲོན་མ་དང་། གསང་བའི་དབྱིངས་འོད་དང་ཐིག་ལེ་དང་། གསང་བ་བླ་ན་མེད་པའི་དབྱིངས་འཁྲུལ་སྣང་རང་འགགས་པའོ། །དེ་ཡང་ཕྱིའི་དབྱིངས་རིག་པའི་ཡུལ་ཡིན། ནང་གི་དབྱིངས་ཡེ་ཤེས་ཀྱི་ཡུལ་ཡིན། གསང་བའི་དབྱིངས་སྐུ་གསུམ་གྱི་ཡུལ་ཡིན། གསང་བ་བླ་ན་མེད་པའི་དབྱིངས་མཐར་ཐུག་འབྲས་བུའི་ཡུལ་ཡིན་ནོ། །མཚན་ཉིད་ནི། སྤྱི་མཚན་དང་རང་མཚན་ལས། སྤྱི་མཚན་ནི་སྣང་བ་ནུས་པ་ལ་ཁྱབ་པ་ཕྱོགས་མེད་དུ་ཤར་ཤིང་། གསལ་བའི་ཡུལ་དེ་དཔེར་ན་མེ་ལོང་གི་ནང་དུ་བཞིན་སྣང་གསལ་བར་བྱེད་པ་དང་འདྲའོ། །མདོར་ན་ཆོས་ཉིད་རང་ནི་མ་ཡིན་ཆོས་ཉིད་སྣང་བར་བྱེད་པའི་ཡུལ་གསལ་བའི་ནུས་པ་འབྱིན་པར་བྱེད་པའོ། །རང་མཚན་ནི་ཕྱིའི་དབྱིངས་ཀྱི་མཚན་ཉིད་སྟོང་པ་ངོས་གཟུང་དང་བྲལ་བ་ཡིན་ལ། ནང་གི་གསལ་བ་ངོས་བཟུང་དང་བྲལ་བ་ཡིན། གསང་བའི་སྣང་བ་ངོས་བཟུང་དང་བྲལ་བ་ཡིན་ལ། གསང་བ་བླ་ན་མེད་པ་དབྱིངས་ཀྱི་མཚན་ཉིད་མྱོང་བ་ངོས་བཟུང་དང་བྲལ་བའོ། །འབྲས་བུ་ནི་ཆོས་ཉིད་ཀྱི་ཡུལ་ཕྱིན་ཅི་མ་ལོག་པར་ཁོང་དུ་ཆུད་ཅིང་ཤེས་པ་ལ་བརྟེན་ནས་ཆོས་ཉིད་རང་གི་ངོ་བོ་ཕྱིན་ཅི་མ་ལོག་པར་མཐོང་ནས། མངོན་སུམ་མི་འགྱུར་བ་ལ་ལམ་དུ་བྱས་ནས་འབྲས་བུ་ཕྱིན་ཅི་མ་ལོག་པར་སངས་རྒྱས་སོ། །དེ་ལྟ་བུའི་དབྱིངས་ལ་གོམས་པའི་སྐལ་ལྡན་དེ་ལ་ནི། རྣམ་པར་རྟོག་པའི་རླུང་བརྒྱད་དང་བྲལ་བའི་རྟགས་སུ། དབུགས་ནི་ཕྱིར་རྒྱུ་བ་མེད་པར་རྣམ་པར་སྣང་བའི་ཡུལ་གྱི་རྣམ་པར་རྟོག་པ་དང་བྲལ། ནང་དུ་རྒྱུ་བ་རང་ཟད་པ་ནི་ནང་སེམས་ཀྱི་རྣམ་པར་རྟོག་པ་མེད་པའི་རྟགས་ཡིན་ནོ། །དེ་ལྟར་ཕྱི་ནང་གཉིས་ཀྱི་རྣམ་རྟོག་མེད་པས་ལུས་ཀྱི་རྡོས་པ་མེད་ཅིང་སྟོང་པའི་རྟགས་སུ་ལུས་ཀྱི་ཕྲ་རགས་ནུབ་པ་ནི། སྔོན་དུ་ཕྱིིའི་དབྱིངས་ལ་གོམས་པར་བྱས་པས་དེ་ཉིད་ལ་ཚད་འབྱོངས་པས། ལུས་ཀྱི་སྟོབས་ཀྱིས་ཕྱིའི་ནམ་མཁའ་ལ་བྱ་བཞིན་དུ་འགྲོ་བ་དང་། དེ་བཞིན་དུ་ཆུ་ལ་ཡང་ཉ་བཞིན་དུ་རྐྱལ་བ་དང་ལྡན་པ་འདིས་འགྲོ་སྟེ། དེ་ནི་ཕྱིའི་དབྱིངས་ལ་གོམས་པའི་རྟགས་ཡིན་ནོ། །ཡང་སྐལ་ལྡན་དེས་ནང་དབྱིངས་ལ་གོམས་པའི་རྟགས་ནི། སྔར་མཐོང་མ་མྱོང་བའི་ཡུལ་རྒྱ་དཀར་པོའི་རྒྱལ་ཁམས་དང་། ནག་པོ་དང་། ལི་དང་། ཧོར་གྱི་ཡུལ་རྣམས་དང་། དེ་ལས་རྒྱ་ཆེ་བའི་གླིང་བཞི་རི་རབ་དང་བཅས་པ། ཡང་འདུག་ས་གཅིག་ཏུ་སྐྱིལ་ཀྲུང་ངམ། ཙོག་པུའམ། གན་རྐྱལ། ཁ་སྦུབས། ཇི་ལྟར་འཇུག་པ་དེའི་ལུས་མ་ཞིག་པའི་སྒོ་ནས་མཐོང་བ་དེ་ནི་ཡེ་ཤེས་ཀྱི་མིག་མངའ་བ་ཡིན་ནོ། །ཡང་སྐལ་ལྡན་དེས་དེ་དག་འདས་པའི་འོག་ཏུ་གསང་བའི་དབྱིངས་ལ་གོམས་པའི་རྟགས་སུ་ཆོས་ཀྱི་དབྱིངས་དེ་བཞིན་ཉིད་ཁོང་དུ་ཆུད་པའི་སངས་རྒྱས་ཀྱི་སྤྲུལ་པའི་སྐུའི་ཞིང་ཁམས། ཤར་ཕྱོགས་ན་མངོན་པར་དགའ་བ་དང་། ལྷོ་ཕྱོགས་ན་དཔལ་དང་ལྡན་པ་དང་། ནུབ་ཕྱོགས་ན་པདྨ་རྩེགས་པ་དང་། བྱང་ཕྱོགས་ན་ལས་རབ་རྫོགས་པ་ལ་སོགས་པ་དེ་དག་གི་ཡོན་ཏན་རྣམས་ཤེས་ཤིང་ཁོང་དུ་ཆུད་པ་དང་། དེ་བཞིན་དུ་ལོངས་སྤྱོད་རྫོགས་པའི་སྐུའི་ཞིང་ཁམས་དུམ་བུ་བ་སྟེ། རྣམ་པར་སྣང་མཛད་ཀྱི་ཞིང་ཁམས་འཁོར་དང་གཙོ་བོ་ལ་སོགས་པ་དང་། དེ་བཞིན་མི་བསྐྱོད་པ་ལ་སོགས་པ་རིགས་ལྔའི་གཙོ་འཁོར་གྱི་ཁྱད་པར་མཐོང་བ་དང་། ལོངས་སྐུའི་ཞིང་ཁམས་རྒྱ་ཆེན་པོ་ཕྱོགས་བཅུའི་ཞིང་ཁམས་དཔག་ཏུ་མེད་པ་མཐོང་བ་དང་། གཞན་ཡང་ཆོས་ཀྱི་སྐུའི་ཞིང་ཁམས་ནི་གྲངས་ཅན་དང་། ཚད་ཅན་དང་། གྲངས་མེད་པ་དང་། ཚད་མེད་པ་དང་། བསམ་གྱིས་མི་ཁྱབ་པ། སྔར་མཐོང་བ་དག་ག་ལ་སྲིད་དེ་ཐོས་པ་ཡང་མེད་པ་རྣམས། ད་ལྟའི་འདུག་ས་གཅིག་ནས་ཞིང་ཁམས་འདི་ཀུན་དུས་གཅིག་ལ་སྐད་ཅིག་མ་བཅུ་དྲུག་གི་ཁོངས་སུ་མཐོང་བར་འགྱུར་བ་ནི། ཡེ་ཤེས་ཆེན་པོའི་མིག་རྙེད་པས་ཏེ་འདི་ལྟར་རྟགས་དེ་དག་དང་འདས་པའི་འོག་ཏུ་སྐལ་བ་དང་ལྡན་པའི་སྐྱེས་བུ་ལ། གསང་བ་བླ་ན་མེད་པའི་དབྱིངས་ལ་གོམས་པའི་རྟགས་བསྟན་པ་ནི། རྟགས་འདི་དག་རྣམས་རྫོགས་ནས་ཟླ་བ་བཅུ་དྲུག་ན། ཆོས་ཀྱི་དབྱིངས་བསམ་གྱིས་མི་ཁྱབ་པ་ཉིད་ཀྱང་སྐལ་ལྡན་དེས་མཐོང་བར་འགྱུར་ཏེ། འདི་མཐོང་མ་ཐག་ཏུ་སྐལ་བ་དང་ལྡན་པ་དེ། སྐུ་གསུམ་གྱི་སངས་རྒྱས་ཀྱི་འབྲས་བུ་འདི་ཉིད་ལ་ཐོབ་པར་འགྱུར་བ་ལ་ཐེ་ཚོམ་བྱར་མེད་དོ། །དེ་ལྟར་རྟགས་དང་ལྡན་པ་འདིའི་དུས་ན་སྐལ་ལྡན་དེ་ལ་སྡིག་པ་མི་དགེ་བའི་སེམས་མི་འབྱུང་སྟེ། གལ་ཏེ་བྱུང་ཡང་སྐལ་ལྡན་དེ་ལ་ཕན་པ་ཉམས་ཀྱི་གྲོགས་དང་། གནོད་པ་བསད་གཅོད་ཀྱི་རྣམ་པ་ཅི་བྱས་ཀྱང་རྣམ་སྨིན་དང་བྲལ་ཏེ། ཡེ་ཤེས་རང་གི་ངོ་བོ་ལ་གནས་པའོ། །དེ་ལྟ་བུའི་རྟགས་དང་ལྡན་པའི་རྣལ་འབྱོར་པ་འདི་ཡང་སྣང་བ་འདི་ཉིད་ལ། འབྱུང་བའི་ཟག་པ་དང་ཉོན་མོངས་པའི་དང་། ཕུང་པོའི་ཟག་པ་ཕྲ་རགས་བདག་ཏུ་མེད་པས་གཟུགས་ཕྲ་རགས་ཀྱི་ཟག་པ་དང་། བྱུང་ཚོར་གང་དུ་ཡང་མ་གྲུབ། ཚོར་བ་བདེ་སྡུག་དུ་མ་གྲུབ་པས་ཚོར་བའི་ཟག་པ་མེད། འཚོགས་པ་དུ་མར་མེད་པས་འདུ་ཤེས་ཀྱི་ཟག་པ་མེད། ཡུལ་དང་ཤེས་པ་ཅིའི་ངོ་བོར་ཡང་མེད་པས་རྣམ་པར་ཤེས་པའི་ཟག་པ་མེད། མི་རྟག་པ་མ་ཡིན་ཏེ་རང་སྣང་རྟག་པ་ཆེན་པོར་ཡོད་པས་འདུ་བྱེད་ཀྱི་ཟག་པ་མེད། ཟག་པ་དང་བཅས་པའི་ཕུང་པོ་ནི་ལྔ་སྟེ། འབྱུང་བ་ཕྲ་རགས་ཀྱི་ཚོགས་པ་འདུས་པས་གཟུགས་ཀྱི་ཕུང་པོ་དང་། རྣམ་པར་ཤེས་པའི་ཚོགས་བརྒྱད་ཡུལ་དང་ཡུལ་ཅན་ཐ་དད་པར་སྣང་བས་རྣམ་པར་ཤེས་པའི་ཕུང་པོ་དང་། ཚོགས་པའི་ཆོས་རྟེན་འབྲེལ་དང་། འབྱུང་བ་སོ་སོའི་སྨིན་པའི་ལས་དང་། བྱེད་པའི་ལས་གསུམ་དང་། ལོ་དང་། དུས་དང་། གཟའ་དང་། རྒྱུ་སྐར་དང་། གདོན་ལ་སོགས་པ་སོ་སོའི་རྟེན་དུ་མ་བྱེད་པས་འདུ་བྱེད་ཀྱི་ཕུང་པོ་དང་། བདེ་བ་དང་། སྡུག་པ་དང་། བཏང་སྙོམས་གསུམ་འདུས་པ་ལས་ཚོར་བའི་ཕུང་པོ་དང་། ཕྲ་བའི་ཉོན་མོངས་པ་ལྔ་བཅུ་རྩ་ལྔའི་འཚོགས་པའི་རྟེན་དང་འབྲེལ་བ་འདུས་པས་འདུ་བྱེད་ཀྱི་ཕུང་པོའོ་ལ་སོགས་ཏེ། ཕུང་ལྔ་མི་སྣང་བར་རང་སར་དེངས་པ་ནི། འབྱུང་བ་བཞི་ས་དང་ཆུ་དང་མེ་དང་རླུང་རང་གི་སར་རང་སར་དེངས་ནས། ཕྱིའི་འབྱུང་བ་ལྔའི་སྣང་བ་མི་སྣང་། ནང་ཕུང་པོ་ལྔའི་སྣང་བ་མི་སྣང་། གསང་བ་ཡེ་ཤེས་ལྔའི་སྣང་བ་ཙམ་དུ་ཡང་མི་སྣང་བས། འབྲས་བུ་ངེས་པར་ཐོབ་པར་ཡིན་ནོ། །དེ་དག་ནི་ཕྱིའི་རྟགས་དེ་རང་གཞན་གྱིས་ཚོར་བར་སྐྱེ་བ་ཡིན་ནོ། །འདིར་མ་བསྟན་པའི་ཚིག་གི་ལྷག་མ་ནང་གི་ཉམས་དང་རྟགས་ནི། རྒྱུད་འདིར་ནི་ང་སྟོན་པ་རྡོ་རྗེ་འཆང་གིས་མ་བཤད་དེ། དོན་གྱི་སྐལ་ལྡན་རང་གི་ཉམས་ལས་མ་སྐྱེས་པས་ན། ཉམས་སྐྱེས་པའི་རྟགས་དེ་ཤེས་པར་འདོད་ན་འདི་ལྟར་མཁའ་འགྲོ་མའི་མཛོད་ནས་བཤད་པས་ཤེས་པར་བྱའོ། །ནང་གི་རྟགས་ནི་འདི་བཞིན་དུ་རིག་པར་བྱའོ། །འཁྲུལ་པ་རང་གིས་རང་གཟིངས་པ་འགྱུར་བའི་རྟགས་དང་། མན་ངག་གི་གནད་ཐོག་དུ་མ་ཕེབས་པས་ངེས་པ་མེད་པའི་རྟགས་དང་། རིག་པ་མངོན་གསུམ་གྱི་གནད་ཀྱིས་མ་ཟིན་པ་བར་ཆོད་བདུད་གྱི་རྟགས་དང་། མངོན་གསུམ་རང་ཐོག་ཏུ་ཕེབས་པས་འགྱུར་བ་མེད་ཅིང་མི་འགྱུར་བའི་རྟགས་དང་བཞིའོ། །འགྱུར་བའི་རྟགས་ནི་ཉམས་སུ་མ་བླངས་པ་རྣམས་ལ་ཡང་འབྱུང་བ་ཡོད་ཀྱང་དོན་མི་འབྱུང་། བྱ་དང་རི་དྭགས་ལ་སོགས་པ་རྣམས་ལ་ཡང་འབྱུང་བ་ཡོད་དེ་འདི་ནི་རྒྱུའི་རྟགས་ཞེས་བྱ་སྟེ་དོན་མི་འབྱུང་ངེས་པ་ཡིན་ནོ། །དེ་ཡང་ངེས་པ་མེད་པའི་རྟགས་ནི། ཡིད་དཔྱོད་ཚིག་ལ་མཁས་པ་རང་རྡོལ་བ་དང་། ཕ་རོལ་གྱི་ཤེས་པ་དུམ་བུ་པ་དང་། ལྷའི་སྐུ་མཐོང་བ་དང་། ལུས་ལ་སྐུ་གདུང་འབྲུལ་བ་དང་། ངག་ལ་ནུས་པ་འབྱུང་བ་དང་། གཞན་གྱིས་ལུང་སྟོན་པ་དང་། རྟོགས་པ་འགགས་པ་དང་། ཞི་གནས་རྒྱུན་རིང་བ་དང་། ལུས་ཀྱི་དྲོད་དུམ་བུ་བ་དང་། འཇིག་རྟེན་འདྲེའི་ཆ་བྱད་མཐོང་བ་དང་། ཆོས་རྩོམ་ཞིང་ཚིག་གི་སྒྲོ་འདོགས་པ་རྣམས་ལ་བཟོ་བ་དང་། ཤེས་པའི་སྣ་དཔག་ཏུ་མེད་པ་འཕྲོ་བ་དང་། སེམས་ཡངས་པ་དང་། དབང་པོ་གསལ་བ་དང་། སྔོན་བས་བདེ་བ་ལྷག་ཏུ་ཆེ་བ་དང་། གཉིད་མི་འབྱུང་བ་དང་། དགའ་བ་ཁྱད་པར་ཅན་དང་། ཤེས་པ་སེར་བ་དང་། རྟག་ཏུ་ཁ་གླུ་ལེན་སྙིང་འདོད་པ་དང་། འགྲོ་སྙིང་འདོད་པ་དང་། མིག་འགྲོ་བ་གཞན་ལ་མི་ཆགས་པ་དང་། རྐང་པ་འགྲོས་མགྱོགས་པ་དང་། སེམས་ཕྱམ་བརྡལ་དུ་སོང་བ་དང་། ཤེས་པ་རྟག་ཏུ་འགྱུར་བ་དང་། བློ་གཅིག་ཏུ་མི་ཕེབས་པ་དང་། ཚིག་རྣམས་ལ་རྟོག་པ་འཛུད་པར་བྱེད་པ་དང་། མཁའ་འགྲོ་མའི་སྐད་ཐོས་པ་དང་། ཡུལ་མཐའ་འཁོབ་ཀྱི་སྐྱེ་བོ་དང་ལྷན་ཅིག་གནས་པ་དང་། རྟག་ཏུ་སྙིང་འདར་བ་དང་། ལུས་ཀྱི་བ་སྤུ་རྣམས་གྱེན་ལ་ལངས་པ་དང་། སེན་མོའི་དཀྱིལ་ན་ཡི་གེ་རྣམས་རང་བྱུང་བ་དང་། རྒང་ནས་སོའུ་སྐྱེ་བ་དང་། གཞན་གྱི་ལུས་ལ་བྱིན་བརླབས་བསྟིམ་པ་དང་། སྐྱིལ་ཀྲུང་ནམ་མཁའ་ལ་འཕར་བ་དང་། ལག་པའི་མཐིལ་ན་ཙཀྲ་ཡོད་པ་དང་། རྐང་པའི་སོར་མོ་གཉིས་འབྲེལ་བ་དང་། ཁའི་ནང་ནས་འོད་འབྱུང་བ་དང་། འགྲོ་འདུག་མི་ཚོར་བ་དང་། ལུས་བྱོལ་སོང་དུ་སྤྲུལ་ཤེས་པ་དང་། ཡན་ལག་ལ་རིང་བསྲེལ་ཕྲ་མོ་དག་འབྲུལ་བ་དང་། ལྷ་དང་ལྷ་མིན་བརྩོད་པ་མཐོང་བ་དང་། ཡི་གེ་འབྲུ་སྦྱོར་ལ་མཁས་པ་དང་། མིག་ལས་སྒྲ་འབྱུང་བ་དང་། མི་མ་ཡིན་རྣམས་དང་གླེང་བར་ནུས་པ་དང་། རླུང་འཆིང་བར་ནུས་པ་དང་། ཉི་ཟླ་འཛིན་པར་ནུས་པ་དང་། གཞན་གྱི་འབྱུང་བ་འཁྲུགས་པའི་འདུ་ཤེས་པ་དང་། ལུས་ལ་མེ་སྟག་འཕྲོ་བ་དང་། ཐལ་མོ་བརྡབ་པ་ལ་སྒྲ་ངོ་མཚར་ཅན་འབྱུང་བ་དང་ལྔ་བཅུ་ཐམ་པ་ནི་ལུས་ངག་སེམས་ལ་མངོན་པར་འབྱུང་བའི་ངེས་པ་མེད་པའི་རྟགས་སོ། །འདི་ལྟར་རྨི་ལམ་གྱིས་འགྱུར་ཞིང་ངེས་པ་མེད་པའི་རྟགས་ནི། རྟག་ཏུ་ཆོས་སྨྲ་བ་དང་། ཉན་པ་དང་། ཀློག་པ་དང་། བྲི་བ་དང་། འཛིན་པ་དང་། སྒོམ་པ་དང་། ལྷའི་སྐུ་མཐོང་བ་དང་། མཆོད་རྟེན་དང་། གཞལ་ཡས་ཁང་དང་། ལུང་སྟོན་པ་དང་། སེང་གེའི་ཁྲི་ལ་འདུག་པ་དང་། ཡུལ་ངེས་པ་སྣ་ཚོགས་པ་མཐོང་བ་དང་། ཉན་ཐོས་མཐོང་བ་དང་། རང་རྒྱལ་དང་བྱང་ཆུབ་སེམས་དཔའ་མཐོང་བ་དང་། ཤེལ་གྱི་མཆོད་རྟེན་ལ་འཛེག་པ་དང་། གསེར་གྱི་སྐས་ལ་འཛེག་པ་དང་། གངས་ཀྱི་སྟངས་ན་བསྒོམ་པ་དང་། ནམ་མཁའ་ལ་འཕུར་ཞིང་སངས་རྒྱས་ཀྱི་ཞིང་ཁམས་མཐོང་བ་དང་། སེང་གེ་ལ་ཞོན་ནས་ཕྱོགས་བཅུར་འགྲོ་བ་དང་། ཤེས་ཀྱི་མདུང་རིང་གཞན་ལ་བརྡེག་པ་དང་། སེམས་ཅན་རྣམས་ངན་སོང་ནས་བཏོན་པ་དང་། འཁོར་བའི་ཆུ་བོ་ལས་བརྒལ་བ་རྨི་བ་དང་། ལུས་བརྗེས་པར་རྨི་བ་དང་། སྟོན་པའི་ཞལ་མཐོང་བ་དང་། རིན་པོ་ཆེའི་གཏེར་རྙེད་པ་དང་། འགྲོ་བ་དྲུག་སྐྱབས་གནས་སུ་བཙུད་པ་རྨི་བ་དང་། གླིང་བཞི་མཐོང་བ་དང་། བླ་མ་དང་མཁན་པོས་ལུང་བསྟན་པ་རྨི་བ་དང་། སྐུ་གསུམ་མཐོང་བ་དང་། ཆོས་ཐམས་ཅད་ཤེས་པར་རྨི་བ་དང་། དབུས་ཀྱི་རི་བོའི་རྩེར་ཕྱིན་པ་རྨི་བ་དང་། ངན་སོང་གསུམ་རྒྱུན་ཆད་པར་གྱུར་ཅིག་ཅེས་སྨོན་ལམ་འདེབས་པ་དང་། བདག་ཉིད་སངས་རྒྱས་པར་རྨི་བ་དང་། འགྲོ་བ་དྲུག་གི་ཁ་ལོ་གྱེན་ལ་བསྒྱུར་བ་རྨི་བ་དང་། ཡན་ལག་རྣམས་རིན་པོ་ཆེའི་མཆོད་རྟེན་དུ་སོང་བར་རྨི་བ་དང་། བདག་གི་ལུས་ལ་སངས་རྒྱས་ཀྱི་སྤྲུལ་པ་འགྱེད་ཅིང་རྨི་བ་དང་། ཁམས་གསུམ་དོང་ནས་བཏོན་པར་རྨི་བ་དང་། གསེར་གྱི་མདའ་གཞུ་འཛིན་པར་རྨི་བ་དང་། མགོ་བོའི་སྟེང་དུ་སངས་རྒྱས་བཞུགས་པ་རྨི་བ་དང་། བདག་ཉིད་ཀྱི་ལུས་ཟང་ཐལ་དུ་སོང་བ་རྨི་བ་དང་། འཁོར་བ་རྒྱུན་ཆད་པར་རྨི་བ་དང་། བདག་ཉིད་ལ་རྒྱལ་པོས་དབང་བསྐུར་བར་རྨི་བ་དང་། བདུད་རྣམས་ཕམ་པར་བྱས་པར་རྨི་བ་དང་། རང་གིས་ལུས་རང་གིས་སྦྱངས་པར་རྨི་བ་དང་། སྐྱེ་རྒ་ན་འཆིའི་ཆུ་བོ་བཞིའི་རྒྱུན་ཆད་དོ་ཞེས་སྒྲ་ཐོས་པ་རྨི་བ་དང་། བདག་ཉིད་བྱང་ཆུབ་སེམས་དཔའི་ལུས་སུ་སྤྲུལ་བར་རྨི་བ་དང་། ཆོས་ཉིད་བརྗོད་དུ་མེད་པའི་དོན་རྟོགས་པར་རྨི་བ་དང་། བདག་ཉིད་ལུས་མི་འདྲ་བ་དག་ཏུ་སྤྲུལ་བར་རྨི་བ་དང་། ངག་གིས་འགྲོ་བ་རྣམས་བསྡུས་པར་རྨི་བ་དང་། སེམས་ཀྱི་མཚན་ཉིད་མཐོང་བར་རྨི་བ་དང་། ལྷ་རྣམས་ཀྱི་ཡུལ་མཐོང་བར་རྨི་བ་དང་། གསེར་གྱི་ལྷ་ཁང་གི་ཡང་ཐོག་ན་འདུག་པར་རྨི་བ་དང་། སངས་རྒྱས་ཀྱི་གསུང་ཐོས་པ་དང་། སྐུ་མཐོང་བ་དང་། ཐུགས་ཀྱི་དགོངས་པ་རྟོགས་པར་ནུས་པ་དང་། ལག་པས་གསེར་གྱི་གདུགས་གཉིས་བཟུང་ནས་ནམ་མཁའ་ལ་འཕུར་བ་རྨིས་པ་དང་། ལྷ་དང་ལྷ་མིན་གྱིས་ཕྱག་བྱེད་པར་རྨི་བ་དང་། ཡིད་བཞིན་གྱི་ནོར་བུའི་ཕུང་པོ་ལ་སྤྱོད་པར་རྨི་བ་དང་། གསེར་གྱི་གླེགས་བམ་གྱི་ཆར་བབས་པ་རྨི་བ་དང་། ཆོས་ཀྱི་སྒྲ་སྣ་ཚོགས་པ་བདག་ཉིད་ཀྱི་རྣ་བར་གྲགས་པ་དང་། བདག་ཉིད་ལ་སིལ་སྙན་སྣ་ཚོགས་པས་མཆོད་པར་རྨི་བ་དང་། ལྷའི་དབང་པོས་རིན་པོ་ཆེའི་ཁྲི་རྐང་པ་བཞི་དང་ལྡན་པའི་སྟེང་དུ་བཞག་ནས་ནམ་མཁའ་ལ་བཏེག་ནས་འགྲོ་བ་རྨི་བ་དང་། ཀླུའི་རྒྱལ་པོ་རྣམས་ཀྱིས་བདག་ལ་ནོར་བུ་རིན་པོ་ཆེ་སྟེར་བ་རྨི་བ་དང་། བར་མ་དོའི་སྣང་བ་འཆར་བ་རྨི་བ་དང་། གླང་པོ་ཆེ་ཞོན་ནས་སྐྱེས་བུ་སྟོབས་དང་ལྡན་པ་བཞིས་རྐང་པ་བཞི་ནས་བཏེག་ནས་ནམ་མཁའི་མཐོང་ན་ཡར་འགྲོ་བ་རྨི་བ་དང་། གསེར་གྱི་འཁོར་ལོའི་སྟེང་ན་བདག་ཉིད་གནས་ནས་ནམ་མཁའ་ལ་ལན་གསུམ་འཕར་བར་རྨི་བ་དང་། དྲུག་བཅུ་རྩ་དྲུག་སྟེ་བརྒྱ་དང་བཅུ་དྲུག་ནི་ངེས་པ་མེད་པའི་རྟགས་སོ། །དེ་རྣམས་ནི་ལམ་གྱི་རྟགས་ཏེ། འགྱུར་རམ་མི་འགྱུར་ཆ་མེད་པའོ། །བར་ཆད་ཀྱི་རྟགས་ནི་ལུས་སྣ་ཚོགས་སུ་སྤྲུལ་ཤེས་པ་དང་། ལུས་ལ་འོད་འབྱུང་བ་དང་། གང་དུ་ཕྱིན་པའི་ས་ཕྱོགས་སུ་སྒྲ་འབྱུང་བ་དང་། གཞན་ལ་ནུས་པ་འཇུག་པ་དང་། ཚོགས་པ་འདུ་བ་དང་། ཚིག་གི་སྒྲོས་འདོགས་པ་ལ་བཟོ་བ་རྣམས་ནི་གང་ཟག་དེ་ལ་བར་ཆོད་བྱུང་བའི་རྟགས་སོ། །དེ་ལྟར་རྟགས་གསུམ་པོ་དེ་སུ་ལ་བྱུང་ཀྱང་གནད་ཀྱི་མན་ངག་འདི་ལྟར་བྱས་ཏེ། འགྱུར་བའི་རྟགས་བྱུང་བ་ལ་སྐབས་སུ་ཆུ་དཀྱིལ་དུ་སྡད་ཅིང་། འཇིང་པ་གཉིས་ཤིང་གི་བྱང་བུ་སོར་བཅུ་དྲུག་པའི་ནང་དུ་སྟེམས་ཏེ། ལུས་ལ་ཙན་དན་གྱི་མར་གྱིས་རྟག་ཏུ་བྱུགས་ནས། ཕྱི་ནང་ཐམས་ཅད་དངོས་པོ་རགས་པར་བསྒོམས་ནས་འབྲས་བུ་ཐམས་ཅད་ཆུད་མི་ཟོས་པ་ཡིན་ནོ། །ངེས་པ་མེད་པའི་རྟགས་བྱུང་བ་ལ་ནི། ལུས་ལ་བསིལ་བའི་གོས་གྱོན་ཅིང་ཁ་ཟས་ཀྱང་བསིལ་བ་བཟའ། ངག་ཏུ་ཨའི་རྣམ་པ་བཟླས་ཤིང་། སེམས་ཀྱིས་ནམ་མཁའ་ལ་སངས་རྒྱས་ཀྱི་སྐུ་མང་པོ་བསྒོམ་པས། ཕར་ཆེར་ངེས་པ་ཅན་གྱི་རྟགས་སུ་འགྲོ་བ་ཡིན་ནོ། །བར་ཆོད་ཀྱི་རྟགས་ནི། ལུས་སྣ་ཚོགས་སུ་སྤྲུལ་པ་འདི་ཡང་བདུད་ཀྱིས་བྱིན་གྱིས་བརླབས་པ་ཡིན་ཏེ། དེ་ཉིད་ལ་རབ་ཏུ་བརྟགས་ན་གཟུགས་བརྙན་གཉིས་པར་སྣང་བར་ཡིན་ནོ། །དེ་ལྟར་མ་མཐོང་ན་དེ་ཉིད་ལ་གུ་གུལ་ནག་པོ་དང་། ནིམ་པའི་ཆུས་ལུས་མགོ་འཇུག་ཏུ་བྱུག་ཅིང་། ཡན་ལག་ལྔ་ལ་སྡེར་སོ་རྙིང་པའི་ས་འདགས་གིས་བྱུགས་ན། དེའི་ལུས་ཁྲ་བོར་འོང་ངོ་། །དེ་ལྟར་བྱུང་ན་དེའི་ལུས་ལ་དེ་བཞིན་གཤེགས་པའི་སྐུ་གཟུགས་མི་ལོང་ལ་བསྟན་པ་དེའི་ཁྲུས་ཆབ་ཀྱིས་བཀྲུས་པའི་ཁྲུས་ཆབ་ཀྱིས་བཀྲུ། ངག་ཏུ་ཕཊ་ཀྱི་རྣམ་པ་བཟླས་ཤིང་། སེམས་ཀྱིས་ཕྱི་ནང་ཐམས་ཅད་སྟོང་པ་ཉིད་དུ་བསྒོམས་པས་བར་ཆོད་ཞི་བ་ཡིན་ནོ། །དེ་བཞིན་འོད་དང་། སྒྲ་དང་། ནུས་པ་དང་། ཚིག་ལ་སོགས་པ་རྣམས་ལ་ཡང་བྱའོ། །དེ་ལྟར་བར་ཆོད་ཀྱི་རྟགས་བྱུང་བ་ལ་མན་ངག་དེ་ལྟ་བུ་དང་མི་ལྡན་ན་ཡི་དྭགས་ཀྱི་སྐྱེ་གནས་སུ་སྐྱེ་བ་ཡིན་ནོ། །དེ་དག་ནི་ཐེག་པ་ཐུན་མོང་བ་རྣམས་ཀྱི་འགྱུར་བའི་རྟགས་ཡིན་ནོ། །རིག་པ་མངོན་གསུམ་གྱི་དོན་མཐོང་བ་རྣམས་ལ་ནི། འགྱུར་མི་སྲིད་དོ། །དེ་ཡང་དངོས་པོ་མཐོང་བའི་གནད་ཀྱིས་བྱས་པའོ། །འདི་ཉིད་ཀྱི་རྟགས་ནི་གསུམ་སྟེ། རང་གིས་མཐོང་ལ་གཞན་གྱིས་མི་མཐོང་བའི་རྟགས་དང་། གཞན་གྱིས་མཐོང་ལ་རང་གིས་མི་མཐོང་བའི་རྟགས་དང་། རང་གཞན་གཉིས་ཀའི་རྟགས་རྣམས་ཏེ། འདི་དག་ནི་རྟགས་ཀྱི་ཡི་གེ་དང་སྦྱར་འོག་ནས་ཀྱང་སྟོན་ཏོ། །དེ་ལྟ་བུའི་རྟགས་གསུམ་དང་ལྡན་པའི་རྣལ་འབྱོར་པ་དེས་ལུས་ངག་རྣལ་དུ་ཕེབས་པ་ཡིན་པས། རྟགས་འདི་ལྟར་བྱུང་བའི་གང་ཟག་གིས་རྟགས་འདི་ཀུན་སོ་སོའི་སྐྱེ་བོ་དང་། ཉན་ཐོས་དང་དམ་ཚིག་མི་གཅིག་པ་རྣམས་ལ་རབ་ཏུ་གསང་ངོ་། །དེ་ཉིད་གསང་བའི་རྟགས་འདི་ཉིད་ཀྱི་ཡོན་ཏན་རྣལ་འབྱོར་པ་དེའི་ལུས་ངག་སེམས་ལ་ལྡན་པ་སྟེ། དེ་ལྟར་ཡོན་ཏན་རྫོགས་པའི་དུས་ན། དག་པའི་སྣང་བ་རང་ཤར་བ་ནི་ཡེ་ཤེས་ལྔའི་རང་རྟགས་སོ། །ཞེས་དབྱིངས་ལ་གོམས་པའི་རྟགས་བསྟན་ནས། ད་ནི་ཐིག་ལེ་ལ་གོམས་པའི་སྐལ་ལྡན་ལ་རྟགས་ཇི་ལྟར་འབྱུང་བ་བསྟན་པ་ནི། ཐིག་ལེ་ཀློང་དུ་སུས་གྱུར་བ། །ཞེས་པ་སོགས་པས་བསྟན་ཏེ། ཐིག་ལེ་ནི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །ཐིག་ལེའི་ངོ་བོ་ཐ་དད་པ་མ་ཡིན་པར་གཅིག་ཏུ་གནས་པ་ཡིན་ཅིང་ཟླ་དང་བྲལ་བའོ། །ངེས་ཚིག་ནི་ཐིག་མི་འགྱུར་ཅིང་དྲང་པོར་གནས་པའམ་ཆ་མཚོན་པར་བྱེད་པ་ཡིན་ལ། ལེ་བརྡལ་བ་ཆེན་པོ་ཐམས་ཅད་ལ་མ་ཁྱབ་པ་མེད་པ་ལ་བྱའོ། །དབྱེ་ན་ལུས་གནས་གཞིའི་ཐིག་ལེ་དང་། རང་བཞིན་ལམ་གྱི་ཐིག་ལེ་དང་། མཐར་ཕྱིན་འབྲས་བུའི་ཐིག་ལེ་དང་གསུམ་མོ། །ལུས་གནས་པ་གཉིས་ཏེ། ཀུན་རྫོབ་རྒྱུའི་ཐིག་ལེ་དང་། དོན་དམ་ཡེ་ཤེས་ཀྱི་ཐིག་ལེའོ། །ཀུན་རྫོབ་ཀྱི་ཐིག་ལེ་ནི། འབྱུང་བ་བཞིའི་དངས་མ་འདུས་པ་ཕ་མའི་བྱང་ཆུབ་སེམས་ཀྱི་ཐིག་ལེ་དེ། ཀུན་རྫོབ་བསྐྱེད་པར་བྱེད་པའི་རྒྱུ་འབྱུང་བ་བཞིའི་བདག་ཉིད་ཅན་ནོ། །དེ་ལ་བརྟེན་ནས་ལུས་བསྐྱེད་པ་སྟེ། ཐིག་ལེ་དེ་ལ་འབྱུང་བ་མེའི་དྭངས་མ་ཡོད་པས་དྲོ་བས་དྲོད་དུ་བསྐྱེད་ལ། སའི་དྭངས་མ་ཡོད་པས་སྲ་བ་ས་དེས་ཤ་བསྐྱེད། ཆུའི་དངས་མ་ཡོད་པས་སྡུད་པ་ཆུས་ཏེ་ཁྲག་བསྐྱེད། རླུང་གི་དྭངས་མ་ཡོད་པས་ཡང་བ་རླུང་སྟེ་དབུགས་བསྐྱེད་པས་ལུས་ཞེས་བྱ་བ་གྲུབ་པས་ན་ཀུན་རྫོབ་བོ། །དོན་དམ་ཡེ་ཤེས་ཀྱི་ཐིག་ལེ་ལྔ་སྟེ། གཞིའི་ཐིག་ལེ་བཟང་པོ་འོད་ཀྱི་གོང་བུར་དེ་ལྟར་ལུས་སུ་གྲུབ་པ་རྩའི་ནང་ན་གནས་ཤིང་གཡོ་འགུལ་མེད། ལམ་གྱི་ཐིག་ལེ་བཟང་པོ་རྩའི་ནང་ནས་ཡེ་ཤེས་ཀྱི་རླུང་གིས་བསྐྱོད་ནས་འགྲོ་འོང་བྱེད། བཟང་པོའི་བཟང་པོ་སྒྲོན་མ་ཡུལ་ལ་འཆར་བར་བྱེད། བཟང་པོའི་རྩེ་མོ་ཤེས་རབ་ཀྱི་གཅོད་སྣ་ཚོགས་པར་རྩའི་ནང་ནས་བསྐྱོད་པར་བྱེད། བཟང་པོ་རྒྱན་དང་ལྡན་པའི་ཐིག་ལེ་ནི་སྒྲོན་མ་རྣམ་པ་བཞི་ལ་བརྟེན་ནས་ཉམས་གོང་ནས་གོང་དུ་འཕེལ་བར་བྱེད་པའི་སྣང་བ་སྟོན་པར་བྱེད་པའོ། །རང་བཞིན་ལམ་གྱི་ཐིག་ལེ་ནི། ཆོས་ཉིད་ཀྱི་ཐིག་ལེ་བཅོས་པ་མེད་ཅིང་ཀུན་ལ་ཁྱབ་པ་དང་། ཀུན་ཏུ་བཟང་པོ་བཟང་ངན་དང་ཆེ་ཆུང་མེད་པར་སྣང་བ་དང་། དབྱིངས་ཀྱི་ཐིག་ལེ་ཕྱི་ནང་མེད་པར་གསལ་བ་དང་། དབྱིངས་རྣམ་པར་དག་པའི་ཐིག་ལེ་གོལ་སྒྲིབ་དང་ཕྱོགས་ལྷུང་མེད་པར་རང་ཤར་བ་དང་། ཡེ་ཤེས་ཀྱི་ཐིག་ལེ་ཡེ་ནས་བྱས་པ་མེད་པར་རང་བཞུགས་པ་དང་། ཡེ་ཤེས་ཆེན་པོའི་ཐིག་ལེ་ཉོན་མོངས་པ་གང་གིས་ཀྱང་མ་སྒྲིབ་པར་མངོན་གསུམ་དུ་སྣང་བ་དང་དྲུག་གོ། །མཐར་ཕྱིན་པ་འབྲས་བུའི་ཐིག་ལེ་ནི་ཆོས་ཀྱི་སྐུའི་ཐིག་ལེ་ཉག་གཅིག་སྤྲོས་པ་གང་གིས་ཀྱང་མ་སྤྲོས། བསྡུས་པ་སུས་ཀྱང་མ་བསྡུས། འདི་འདྲ་ཞེས་མཚན་ཉིད་དང་བྲལ་ལ། ངོ་བོ་ངོས་བཟུང་དང་བྲལ་ལ། རྩལ་སྣ་ཚོགས་སུ་སྣང་ལ། གྲུབ་རྒྱུ་གང་དུ་ཡང་མེད་པའོ། །ཐིག་ལེའི་མཚན་ཉིད་ནི། གནོད་འཇུག་ཟུག་རྔུ་དང་བྲལ་བའོ། །ཟླུམ་པོ་སྤྲོས་པ་མེད་ལ། རིག་པ་མཚོན་པའི་རྣམ་པ་དུམ་བུར་བསྟན་པས་ཡེ་ཤེས་ཟང་ཐལ་དུ་ཡོད་ལ། མུ་འཁྱུད་ལྔ་གཅིག་ཏུ་ཟླུམས་པས་སྐུའི་གནས་ཡིན་ལ། སྟོང་ཉིད་རྫས་སུ་མ་གྲུབ་པས་ངོས་བཟུང་ལས་འདས་པའོ། །དེ་ལས་སྣང་བའི་འཕེལ་རྣམས་འབྱུང་བས་ཡོན་ཏན་ཕྱོགས་མེད་དུ་ཤར་སྐྱོན་གང་གིས་ཀྱང་མ་གོས་པས། མཚན་ཉིད་ལ་དྲི་མ་མེད། རྩལ་འགག་པ་མེད་པས་རོལ་པ་སྣ་ཚོགས་སུ་ཤར། མཚན་ཉིད་གཉིས་སུ་མེད་པས་ངོ་བོ་རང་དག་ལ། གཏན་ཚིགས་ཕྱོགས་མེད་དུ་ཤར་བས་གནས་ལུགས་སུ་རང་གྲོལ་བའོ། །འབྲས་བུ་ནི་ཐིག་ལེ་ལ་རང་བཞིན་ཕྱི་ནང་མེད་པས་སྣང་སྲིད་ཟང་ཐལ་དུ་གྲོལ། མཚན་ཉིད་ངོས་བཟུང་མེད་པས་སྣང་བ་ཕྱོགས་མེད་དུ་གྲོལ། གཏན་ཚིགས་ལ་འགྱུར་ལྡོག་མེད་པས། དམ་བཅའ་ལ་ཡིན་མིན་མེད་པར་གྲོལ་བའོ། །དེ་ལྟ་བུའི་ཐིག་ལེ་དེ་ཀློང་དུ་སྐལ་བ་ལྡན་པ་སུས་མངོན་དུ་གྱུར་པ་འདི་ནི། རང་བཞིན་རྫོགས་པ་ཆེན་པོའི་སྐལ་བ་ཡོད་པས་ཆོས་ཉིད་སྟོང་པ་ཉིད་ཀྱི་དོན་དང་ལྡན་པ་དེ་ཆོས་ཀྱི་སྐུའི་ཐིག་ལེ་ཉག་གཅིག་མཐོང་བའི་རྟགས་ནི། རང་གི་མིག་ནས་ཐིག་ལེ་སྟོང་པའི་སྒྲོན་མ་ནི། རང་གི་མཐེབ་མཛུབ་ཀྱིས་རྩོལ་བ་མེད་པར་ནམ་མཁའ་སྟོང་པ་ལ་རང་ཤར་བ་ནི་དེ་ཉིད་ཚེའི་དུས་བྱས་ཀྱང་མངལ་གྱི་སྒོར་མི་འཇུག་ངེས་པའི་རྟགས་ཡིན་ནོ། །ཡང་སྐལ་ལྡན་དེ་ལ་འདི་ཀུན་རང་གིས་ཉམས་སུ་བླངས་པའི་རྟགས་ནི། ཚིག་གི་སྤྲོས་པ་མེད་པ་ལ་ཡོད་པར་སྒྲོ་བཏགས་དང་། ཡོད་པ་ལ་མེད་པར་དང་། ཡིན་པ་ལ་མིན་པར་དང་། མིན་པ་ལ་ཡིན་པར་ཚིག་གིས་སྒྲོ་བཏགས་དང་། ཡིད་ཀྱིས་དཔྱད་ཅིང་གཅིག་ལས་ཐ་དད་དུ་སྤྲོས་པ་དང་། དོན་གཅིག་ལ་ཚིག་གིས་དོན་ཐ་དད་དུ་ངོས་བཟུང་བ་དང་། ངོ་བོ་གཏན་ལ་མ་ཕེབས་པར་མཚན་ཉིད་འཚོལ་བ་དང་། དོན་མཚོན་པའི་ཚིག་གཅིག་གིས་ཆོག་པ་ཡིན་པ་ལ། དེ་ལས་སྤྲོས་པས་དོན་མ་རྙེད་པ་རྣམས་ཀྱིས་སྤྲོས་པ་མ་ཆོད་དེ་ཚིག་གང་ཡང་བཏགས་ཤིང་དཔྱད་པ་མེད་པ་རྣམས་ནི་སྐྱོན་ཅན་དང་ཡང་དག་པ་ནི། གྲུབ་མཐའ་གཞན་གྱིས་ཚིག་ཟབ་མོ་ལ་བློ་སྐད་ཅིག་ཀྱང་འཇུག་པར་མི་འགྱུར་ཏེ། ཚིག་གི་སྤྲོས་པ་ལ་རྟོག་པའི་སྐབས་མེད་པར་གནས་པ་ནི། གནས་ལུགས་ཀྱི་དོན་འབའ་ཞིག་ལ་གནས་པའི་རྟགས་ཡིན་ཏེ། དེ་ཉིད་ཀྱི་ལུས་སུ་རྣལ་འབྱོར་པ་རང་གིས་སྨྲ་བར་བྱེད་པའི་གཏམ་རྒྱུན་ཆད་པ་ནི་ཚིག་གི་བརྗོད་པ་ཟད་པའི་ཕྱིར་རོ། །འདིའི་དུས་ན་རྣལ་འབྱོར་པ་འདི་ཡང་ལྐུག་པ་ལྟ་བུར་གྱུར་ཏེ་འགྲོ་བ་གཞན་ལ་སྨྲ་བར་བྱེད་པ་དག་ག་ལ་སྲིད་དེ་སྨྲའོ་སྙམ་པའི་བསམ་པ་ཡང་། སྐྱེས་བུ་འདི་ལ་འབྱུང་མི་སྲིད་པ་ནི་ཆོས་ཉིད་བརྗོད་དུ་མེད་པའི་དོན་ཁོང་དུ་ཆུད་པའི་རྟགས་ཡིན། དེ་ཉིད་གཞན་གྱི་སྒྲ་ཉན་པ་དང་ཚིག་ཉན་པའི་རྗེས་སུ་སེམས་པ་དག་ག་ལ་འགྱུར་ཏེ། འདི་ལྟར་གང་ཟག་སུ་ལ་སྣང་བ་ཤར་བ་དེ། དངོས་པོ་གཤིས་ཀྱི་འདུག་ཚུལ་སྤྲོས་པ་མེད་པའི་ཆོས་ཀྱི་སྐུའི་ཐིག་ལེ་ཉག་གཅིག་སྐྱེས་བུ་དེས་རྩད་ནས་ཆོད་པ་ཡིན་པས། དེའི་ཕྱིར་ན་འདི་ལྟར་རྟགས་དང་ལྡན་པ་དེ་ནི། སྐུ་གསུམ་གྱི་སྣང་བའི་རྟགས་ཏེ། དེ་ནས་ལོ་ནི་གཉིས་ན་ཡང་དག་པའི་ཡེ་ཤེས་རང་གི་རིག་པ་ཉིད་ཀྱིས་སྣང་བ་ཚད་ལ་ཕེབས་པར་ཤེས་ནས། དེ་ནས་དབྱིངས་ཕྱི་ནང་འདྲེས་པ་རང་རིག་པའི་རང་སྣང་གཉིས། གཉིས་མེད་དུ་འདྲེས་པ་དང་། དེ་ལྟར་རིག་པ་ཚད་ལ་ཕེབས་པའི་སྣང་བ་དང་། དུས་ཐམས་ཅད་དུ་འབྲལ་བ་མེད་པ་དེའི་ངང་ལ་སྐལ་ལྡན་དེ་འདུག་པའོ། །དེ་ནས་ཆོས་རྣམས་རང་ཟད་པས་གང་ཟག་དེ་ཡང་ལུས་ཀྱི་འབྱུང་བཞི་རང་དེངས་སུ་འགྱུར་བར་ཚེ་འདི་ལ་ཐེ་ཚོམ་མེད་དོ། །ཞེས་ཐིག་ལེ་ལ་གོམས་པའི་རྟགས་འབྲས་བུ་དང་བཅས་པ་བསྟན་ནས། ད་ནི་སྐུ་ལ་གོམས་པའི་རྟགས་ལ་བྱེ་བྲག་ཏུ་ཆོས་ཀྱི་སྐུ་ལ་གོམས་པའི་རྟགས་བསྟན་པ་ནི། གང་གིས་སྐུ་ལ་ཚད་འབྱོངས་པ། །ཞེས་པ་ལ་སོགས་པས་བསྟན་ཏེ། རྣལ་འབྱོར་པ་གང་ཞིག་གིས་སྤྱིར་སྐུ་ཐམས་ཅད་ལ་བྱེ་བྲག་ཏུ་སྐུ་གསུམ་ལ་ཚད་འབྱོངས་པ་ནི། རང་བཞིན་རྫོགས་པ་ཆེན་པོའི་སྐལ་པ་དང་ལྡན་པའི་སྐྱེས་བུ་ལ། ཕྱི་རོལ་མངོན་པའི་ཡུལ་དུ་རྟགས་ནི་འདི་ལྟ་བུ་འབྱུང་བ་ཡིན་ཏེ། དེ་ཡང་བྱེ་བྲག་ཏུ་ཆོས་ཀྱི་སྐུ་ལ་འབྱོངས་པའི་རྟགས་ནི། ཆོས་ཀྱི་སྐུ་ལ་ནི། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །ཆོས་ཀྱི་སྐུའི་ངོ་བོ་ནི་ཡུལ་དུ་མེད་ལ་སྟོང་པ་ཉིད་གཟུགས་ཅན་མ་ཡིན་ལ། འགྲོ་འོང་མེད་པ། དུས་ཐམས་ཅད་པའི་ཡེ་ཤེས་ཚད་དང་ལྡན་པའོ། །ངེས་ཚིག་ནི་ཆོས་ཉིད་ཕྱིན་ཅི་མ་ལོག་པ་ཐམས་ཅད་འདུས་པའི་སྐུ་གང་གིས་ཀྱང་མི་ཤིགས་པས་ན་ལམ་གྱི་མཐར་ཐུག་སྟེ། ཆོས་མྱ་ངན་ལས་འདས་པའི་ཆོས། སྐུ་སྐྱེ་འཇིག་མེད་པས་ཆོས་ཀྱི་སྐུ་ཞེས་བྱའོ། །དབྱེ་ན་འཁོར་བའི་ཆོས་སྐུ་དང་། མྱ་ངན་ལས་འདས་པའི་ཆོས་སྐུའོ། །འཁོར་བའི་ཆོས་སྐུ་ནི། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཆོས་སྐུ་སྟེ། ཉན་ཐོས་ཀྱི་ཆོས་སྐུ་དགྲ་བཅོམ་པ། རང་རྒྱལ་རང་སངས་རྒྱས་ཉིད། བྱང་ཆུབ་སེམས་དཔའི་ཆོས་སྐུ་བཅུ་གཅིག་ཀུན་ཏུ་འོད་ཀྱི་སའོ། །མྱ་ངན་ལས་འདས་པའི་ཆོས་སྐུ་ནི་གསུམ་སྟེ། ཆོས་ཀྱི་སྐུའི་སྤྲུལ་པའི་སྐུ། སྔགས་ཕྱིའི་མཐར་ཐུག་གི་འབྲས་བུ། ཆོས་ཀྱི་སྐུའི་ལོངས་སྐུ་སྔགས་ནང་པའི་མཐར་ཐུག་གི་འབྲས་བུའོ། །ཆོས་ཀྱི་སྐུའི་ཆོས་སྐུ་རྫོགས་པ་ཆེན་པོ་ཁ་ཅིག་གི་འབྲས་བུའོ། །མཚན་ཉིད་ནི་ཉན་ཐོས་ཀྱི་ཆོས་ཀྱི་མཚན་ཉིད། ཕྱི་གཟུང་བའི་ཡུལ་གྱི་དགྲ་བཅོམ་པས་ཆོས་ཀྱི་བདག་མེད་པ་ལ། ནང་འཛིན་པའི་སེམས་ཀྱི་དགྲ་བཅོམ་པས་ཕུང་པོ་དང་ཁམས་ལ་བདག་མེད་པས་ཆོས་ཀྱི་སྐུ་ཡིན་པར་འདོད་ལ། རང་རྒྱལ་བའི་ཆོས་ཀྱི་སྐུའི་མཚན་ཉིད་ནི་རང་གིས་རྟེན་ཅིང་འབྲེལ་པའི་ཆོས་ཉིད་ཟབ་མོ་བསྒོམས་པས། དེ་ཉིད་ལ་གནས་པའི་སྟོབས་ཀྱིས་ཆོས་ཉིད་ལ་བདག་གཏན་མེད་ལ། ནང་སེམས་ལས་བྱུང་བའི་རྟེན་ཅིང་འབྲེལ་བ་ལུགས་འབྱུང་དང་ལུགས་བཟློག་ཏུ་བསྒོམས་པས་གང་ཟག་གི་བདག་ལས་རང་རྒྱལ་བས། དེ་ཉིད་ཆོས་ཉིད་རང་གི་ངོ་བོ་ཆོས་སྐུར་འདོད་པའོ། །བྱང་སེམས་ཀྱི་ཆོས་ཀྱི་སྐུ་ནི། སེམས་ཙམ་པ་སེམས་ལས་སྣང་བ་སེམས་ལས་བྱུང་བས་ཆོས་ཀྱི་བདག་མེད་ལ། སེམས་ཉིད་ཕྱི་རོལ་དུ་སྣང་བས་གང་ཟག་གི་བདག་མེད། དེ་ལྟར་སེམས་དང་སེམས་ལས་བྱུང་བ་ཐམས་ཅད་རང་རིག་རང་གསལ་དོན་དམ་དུ་འདོད་པས། དེ་ཉིད་ཕུང་པོའི་ཡུལ་དང་། ཞེན་པའི་ཤེས་པ་དང་བྲལ་བ་ནི། ཆོས་ཀྱི་སྐུ་ཡིན་ཏེ་བཅུ་གཅིག་ཀུན་ཏུ་འོད་ཀྱི་ས་དེ་ཉིད་ཐོབ་པར་འདོད་པ་དང་། དབུ་མ་པས་སྟོང་པ་ཅིའི་ངོ་བོ་ཡང་མ་གྲུབ་པ་ཉིད། ཆོས་ཉིད་སྤྲོས་པ་དང་བྲལ་བ་ལ། ཀུན་རྫོབ་ཀྱི་སྣང་བ་འདི་ལ་སྣང་མི་སྲིད་པས། དཔེར་ན་བུད་ཤིང་ཟད་པས་མེ་རང་ཤི་ནས་རྒྱུ་རྐྱེན་སྐྱེ་རྒྱུ་མེད་པ་དང་འདྲ་བ་ཉིད་ཆོས་སྐུ་ཞེས་ཐ་སྙད་དུ་བྱས་ཏེ། དེ་ཉིད་ས་བཅུ་གཅིག་པ་ཡིན་པར་འདོད་ལ། ཕ་རོལ་དུ་ཕྱིན་པས་ས་བཅུ་རིམ་གྱིས་བགྲོད་པའི་ཐ་མ་བཅུ་གཅིག་པ་ལ་ཤེས་བྱའི་སྒྲིབ་པ་ཟད་ནས་སངས་རྒྱ་བར་འདོད་པ་ནི། དེ་ཉིད་ཆོས་ཀྱི་སྐུ་སྟེ་ཆོས་ཀྱི་མཆོག་ཞེས་བྱའོ། །སྔགས་ཕྱི་པའི་ཆོས་སྐུའི་སྤྲུལ་པ་སྐུ་ནི། དཔལ་རྡོ་རྗེ་འཆང་མཚན་ཉིད་མངོན་པར་བྱང་ཆུབ་པ་ལྔ་དང་ལྡན་པའོ། །སྔགས་ནང་པའི་ཆོས་ཀྱི་སྐུའི་ལོངས་སྐུ་དཔལ་ཀུན་ཏུ་བཟང་པོ་རང་བཞིན་གྱི་མཚན་ཉིད་གསུམ་དང་ལྡན་པ། རྫོགས་པ་ཆེན་པོ་ལ་ལ་དག་གི་ཆོས་ཀྱི་སྐུའི་ཆོས་ཀྱི་སྐུ་གཞི་དངོས་པོའི་གནས་ལུགས་མ་བཅོས་ལྷུན་གྱིས་གྲུབ་པའི་མཚན་ཉིད་དང་། མ་འགགས་རོལ་པར་ཤར་བའི་མཚན་ཉིད་དང་། མ་བསྒོམས་རང་སར་གྲོལ་བའི་མཚན་ཉིད་དང་རྣམ་པ་གསུམ་དང་ལྡན་པའོ། །རྫོགས་པ་ཆེན་པོ་དེའི་ལུགས་ཀྱིས་ནི། ཆོས་ཀྱི་སྐུ་ལམ་གྱི་སྣང་བ་ཡིན་པར་འདོད་པས་ཏེ། ཆོས་ཇི་སྲིད་ཡོད་པའི་བར་ལ་བློ་ཡོད་པས་ཀྱང་ལམ་ཡིན་ལ། སྐུ་ཇི་སྲིད་ཡོད་ཀྱི་བར་ལ་ཡང་ལུས་ཡོད་པའི་ཕྱིར་ན་འདི་དག་ནི་ལམ་གྱི་སྣང་བ་ཡིན་ཏེ། མཐར་ཐུག་ནི་མ་ཡིན་ནོ། །འདིའི་དངོས་གཞི་ཟག་པ་མེད་པའི་ཡེ་ཤེས་ཉམས་སུ་བླངས་པས་རིག་པ་ཚད་ལ་ཕེབས་པའི་སྣང་བའི་དུས་ན། ཆོས་ཉིད་ཀྱི་མཐའ་ཟད་དུ་ཉེ་བའི་དུས་ཡིན་པས། འདིའི་དུས་ན་ཆོས་ཀྱི་སྐུ་ཡིན་ནོ། །ཆོས་ཀྱི་སྐུའི་འབྲས་བུ་ནི། འདིའི་ལུགས་ཀྱིས་ལམ་གྱི་མཐར་ཐུག་ཡིན་ལ། གཞན་དག་ནི་སངས་རྒྱས་དངོས་ཀྱི་འབྲས་བུར་འདོད་པའོ། །དེ་ལྟ་བུ་ལ་སྐལ་ལྡན་སུས་གོམས་པ་ནི། འགྲོ་བ་གཞན་གྱིས་མཐོང་བའི་སྤྱོད་ཡུལ་དུ་རྣལ་འབྱོར་པ་དེའི་ལུས་ནི་སུས་ཀྱང་མི་མཐོང་བར། རྣལ་པ་ལུས་ངག་ཡིད་རྣལ་དུ་ཕབ་པས། དངོས་གཞི་ཟག་པ་མེད་པའི་ཡེ་ཤེས་ལ་འབྱོར་པ་དེ་ཉིད། རང་གི་སྣང་བ་ལ་འབྱུང་བས་མི་འགྲིབ་པར་གང་དགར་རོལ་པ་སྣ་ཚོགས་སུ་སྣང་བར་བྱེད་པའོ། །དེ་ནི་ཆོས་ཉིད་ཀྱི་དོན་ཁོང་དུ་ཆུད་པའི་རྟགས་ཡིན་ནོ། །ཡང་རྣལ་འབྱོར་པ་གང་ཞིག་བརྩོལ་བས་མ་བཙལ་བར་གཞག་པའི་བསམ་གཏན་ནི། རྣལ་འབྱོར་པ་རང་གི་རྒྱུད་ལ་ཕྱིན་ཅི་མ་ལོག་པ་སྐྱེས་པའི་རྟགས་སུ། རྣལ་འབྱོར་པ་དེའི་བློ་དང་བཅས་པའི་ཤེས་པ་ཇི་མི་སྙམ་པའི་ཉམས་ནི་ལྐུག་པའི་རྨི་ལམ་ལྟ་བུ་དང་། གཞོན་ནུ་མའི་བདེ་བ་ལྟ་བུར་འགྱུར་བ་ཡིན་ནོ། །དེ་ཉིད་རྟོགས་པའི་རྣལ་འབྱོར་པ་ཀུན་གྱི་སེམས་ལ་དེ་ལྟར་སྣང་བའོ། །འདི་ལྟར་གོང་གི་རྟགས་རྣམས་བྱུང་བའི་སྐྱེས་བུ་རྣམས་ཀྱིས་ནི། ཆོས་ཀྱི་སྐུའི་སྣང་བ་མཐོང་བ་ཡིན་ནོ། །ཆོས་ཀྱི་སྐུ་འདི་མཐོང་བས་སངས་རྒྱས་ཐམས་ཅད་ཀྱི་ཆོས་ཉིད་ཀྱི་སྐུའི་ཀློང་དུ་སེམས་ཉིད་འདུས་པས་ལམ་གྱི་མཐར་ཐུག་སྟེ་མངོན་པར་རྫོགས་པ་སངས་རྒྱ་བའོ་ཞེས། ཆོས་ཀྱི་སྐུ་ལ་གོམས་པའི་རྟགས་བསྟན་ནས། ད་ནི་ལོངས་སྤྱོད་རྫོགས་པའི་སྐུ་ལ་གོམས་པའི་རྟགས་བསྟན་པ་ནི། གང་གིས་ལོངས་སྤྱོད་རྫོགས་པ་ལ། །ཞེས་པ་ལ་སོགས་པས་བསྟན་ཏེ། རྣལ་འབྱོར་པ་གང་ཞིག་གིས་ནི་ལོངས་སྤྱོད་རྫོགས་པ་ལ་ནི། ལོངས་སྤྱོད་རྫོགས་པའི་སྐུའི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུ་དང་ལྔའོ། །ངོ་བོ་ནི་མདུན་དང་རྒྱབ་ཏུ་མེད་པར་ཞལ་ཀུན་ཏུ་ཐལ་ལེ་བའོ། །ངེས་ཚིག་ནི་ཆོས་ཉིད་ལ་ལོངས་སྤྱོད་པས། ཚོགས་གཉིས་ལས་ཡེ་ཤེས་ཀྱི་ཚོགས་རྫོགས་པས། སྐུ་མཚན་དང་དཔེ་བྱད་དུ་ལྡན་ཏེ། རང་བཞིན་གཅིག་ལ་ངོ་བོ་ཐ་དད་དུ་སྣང་བའོ། །དབྱེ་ན་འཇིག་རྟེན་པའི་ལོངས་སྤྱོད་རྫོགས་པའི་སྐུ་དང་། འཇིག་རྟེན་ལས་འདས་པའོ། །འཇིག་རྟེན་པ་ནི་སྟོང་འཁོར་ལོས་བསྒྱུར་བའི་རྒྱལ་པོ་དང་། ལྷའི་ལུས་འགའ་ཡིན་ཏེ། འདི་དག་ནི་རྒྱུ་བསོད་ནམས་ཀྱི་ཚོགས་རྫོགས་པ་ལས་བྱུང་བའོ། །འཇིག་རྟེན་ལས་འདས་པ་ནི། ལོངས་སྐུའི་སྤྲུལ་པའི་སྐུ་རིགས་གསུམ་མགོན་པོ་དང་། ལོངས་སྐུའི་ལོངས་སྐུ་རིགས་ལྔའི་སངས་རྒྱས་དང་། ལོངས་སྐུའི་ཆོས་སྐུ་དཔལ་རྣམ་པར་སྣང་མཛད་གངས་ཆེན་མཚོའོ། །མཚན་ཉིད་སྐུ་དང་ཡེ་ཤེས་འོད་དང་ཁ་དོག་ཐམས་ཅད་དང་ལྡན་ཞིང་། རྡོས་བཅས་སུ་མི་སྣང་ལ་རང་བཞིན་རང་གིས་གསལ་བ་ཉིད་དོ། །དེ་ཡང་རགས་པའི་གཟུགས་ཅན་མ་ཡིན། དབུགས་ཕྱི་ནང་དུ་རྒྱུ་བའི་འགྲོ་འོང་མ་ཡིན། རང་བཞིན་རང་སྣང་གི་དུས་ཐམས་ཅད་པའོ། །འབྲས་བུ་ནི་ཆོས་ཉིད་ཀྱི་བར་དོའོ། །དེ་ལྟ་བུའི་སྐུ་ལ་གོམས་ཤིང་གདེང་དུ་གྱུར་པའི་རྟགས་ནི། རྟེན་གྱི་གང་ཟག་ཞིག་འདི་ལྟར་ལོངས་སྤྱོད་རྫོགས་པའི་སྐུ་ལ་ཉམས་སུ་མྱོང་བ་སྐྱེས་པའི་མི་ནི། རྣམ་པར་སྣང་མཛད་ཀྱི་སྐུ་དང་། རྡོ་རྗེ་མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པའི་སྐུ་དང་ལྔ། ཆོས་ཀྱི་དབྱིངས་ཀྱི་ཡེ་ཤེས་དང་། མེ་ལོང་ལྟ་བུ་དང་། མཉམ་པ་ཉིད་ཀྱི་ཡེ་ཤེས་དང་། སོ་སོར་རྟོག་པའི་ཡེ་ཤེས་དང་། བྱ་བ་གྲུབ་པའི་ཡེ་ཤེས་དང་ལྔ་ལ་རོལ་པ་ཕྱོགས་མེད་དུ་སྣང་བས། དེ་ལྟར་སྣང་བའི་སྣང་བ་ཉིད་ལ་ཡོ་གིས་མིག་གི་རོལ་པ་ཆེན་པོའི་སྣང་བ་ལ། ལྟ་སྟངས་གསུམ་གྱིས་བལྟས་པས། ལོངས་སྤྱོད་རྫོགས་པའི་ཞིང་ཁམས་དུས་གཅིག་ལ་མཐོང་སྟེ། འདི་ལྟར་མཐོང་བའི་ཚེ་ལུས་དང་ངག་དང་སེམས་ལ་རྟགས་འདི་དག་རྣམས་མཐོང་བ་དང་མ་བྲལ་བར་ཉམས་སུ་བླངས་པ་དེ་ཉིད་དང་ལྡན་པ་ནི། རྣལ་འབྱོར་ལྡན་པའི་རིགས་ཏེ། དེ་ཉིད་ཀྱི་སྐལ་པ་འདི་ཉིད་ལ་ལྡན་ཏེ། དེ་ཅིའི་ཕྱིར་ཞེ་ན། ཐིག་ལེ་སྟོང་པའི་སྒྲོན་མ་ཉིད་ནི། སྐྱེས་བུ་རང་གི་ལག་གིས་རྩོལ་བ་མེད་པར་ཤར་བ་ལ་ཕྱིས་མངལ་གྱི་གྲོང་ཁྱེར་དུ་འཇུག་མི་སྲིད་པས། དེ་བྱུང་ན་རིང་པོར་མ་ལོན་པར་འདི་ལྟར་སྣང་བ་འདི་ཉིད་ཀྱང་སྐུ་ལྔ་རུ་ཡང་དག་པར། དང་པོ་རྡོ་རྗེ་མི་བསྐྱོད་པ་དང་། དེ་ནས་རིན་པོ་ཆེ་འབྱུང་ལྡན་དང་། དེ་ནས་སྣང་བ་མཐའ་ཡས་དང་། དེ་ནས་དོན་ཡོད་གྲུབ་པ་དང་། དེ་ནས་དཔལ་རྣམ་པར་སྣང་མཛད་ཀྱི་སྐུ་རྣམས་རིམ་གྱིས་མཐོང་བའི་སྐྱེས་བུ་ནི། ལོངས་སྤྱོད་རྫོགས་པའི་སྐུའི་རྩ་བ་རྣལ་འབྱོར་པ་འདིས་ཆོད་པས། ལོངས་སྐུ་རང་གི་ངོ་བོ་མཐོང་བ་ཡིན་ནོ། །དེ་ནི་ལོངས་སྐུ་ལ་གོམས་པའི་རྟགས་ལུས་ལ་སྣང་བ་སྟེ། རང་གི་སྣང་བའི་ཁོངས་སུ་འདུ་བ་ཡིན་ནོ། །ཡང་རྣལ་འབྱོར་པ་དེས་འདི་ལྟར་རང་གི་རྒྱུད་ལ་གོམས་པའི་རྟེན་གྱི་གང་ཟག་དེའི་ངག་ནི་གསལ་ཞིང་སྐད་སྙན་པ་དང་ལྡན་པ་ལ། དུས་ཐམས་ཅད་དུ་བརྫུན་དུ་བརྗོད་པའི་ཚིག་ནི་སྐལ་ལྡན་འདིའི་ཁ་ནས་ལོང་གཏམ་ཙམ་དུ་ཡང་མི་འབྱུང་བ་ནི་ཆོས་ཉིད་བདེན་པའི་དོན་ཁོང་དུ་ཆུད་པའི་རྟགས་ཡིན་ནོ། །དེ་བཞིན་དུ་མི་དགེ་བའི་ལས་ཀྱི་ཚིག་ཟུར་ཙམ་ཡང་མི་འབྱུང་བ་ནི་ལས་དང་རྣམ་པར་སྨིན་པ་ཟད་པའི་རྟགས་ཡིན། རྣལ་འབྱོར་པ་འདི་ནི་ལྐུག་པ་ལྟ་བུར་གཏམ་དུ་སྨྲ་བའི་བརྗོད་པའི་མཐའ་འགགས་པ་ནི། ཆོས་ཉིད་བརྗོད་དུ་མེད་པའི་དོན་ཁོང་དུ་ཆུད་པའི་རྟགས་ཡིན། དེ་ལྟར་ངག་གི་རྟགས་དང་ལྡན་པ་དེས་སེམས་རྟགས་ལུས་ལ་ཤར་བ་ནི། ལོངས་སྐུའི་སྣང་བ་འདིའི་དོན་ཚིག་གཅིག་གིས་དོན་གཅིག་གཏན་ལ་ཕེབས་པར་ཉམས་སུ་བླངས་ན་འདི་ནི་ནམ་མཁའ་ལ་འཕུར་བ་ནི་ཡེ་ཤེས་ཀྱི་རླུང་ལས་སུ་རུང་བའི་རྟགས་ཡིན། དེ་བཞིན་དུ་རི་བྲག་ལ་ཡང་ཟང་ཐལ་བ་ནི། འདི་ལྟར་སྣང་བ་རང་བཞིན་མེད་པར་མཐོང་བའི་རྟགས་ཡིན། དེ་བཞིན་དུ་སའི་འོག་ཏུ་འཛུལ་བ་ནི། དངོས་མེད་ཡེ་ཤེས་ཟང་ཐལ་དུ་རྟོགས་པའི་རྟགས་ཡིན། དེ་བཞིན་དུ་ཆུ་ལ་བྱིང་བ་མེད་པར་བྱུང་བ་ནི། འཁོར་བའི་ཉེས་པའི་སྐྱོན་གྱིས་མི་གནོད་པའི་རྟགས་ཡིན། དེ་ལྟར་སེམས་རྟགས་ལུས་ལ་ཤར་བའི་རང་གི་ཡེ་ཤེས་ལ་དབང་བསྒྱུར་བའི་སྐལ་ལྡན་གྱིས། རྟགས་གཅིག་ཙམ་བྱུང་བ་ལས་ཉམས་སུ་ལེན་འཕྲོ་ཆད་ནས་དབྱིངས་དང་རིག་པ་བྲལ་ནས་གདེང་དུ་མ་ཚུད་ན། ཚེ་འདི་ལ་འབྱུང་བ་ཉིད་ནི་རང་དེངས་སུ་འགྱུར་བ་ཉིད་ནི་མ་ཡིན་ཏེ། ད་ལྟའི་ལུས་འདི་ནས་སྐྱེ་བ་མེད་པར་རིག་པ་འཕོས་ནས་ནི། ཆོས་ཉིད་ཀྱི་བར་མ་དོ་ལ་སྐད་ཅིག་མ་ལྔ་ལ། ཆོས་ཉིད་ཀ་དག་གི་གཞི་ལ་གྲོལ་བར་འགྱུར་རོ། །ཞེས་ལོངས་སྐུ་ལ་གོམས་པའི་རྟགས་བསྟན་ནས། ད་ནི་སྤྲུལ་སྐུ་ལ་གོམས་པའི་རྟགས་བསྟན་པ་ནི། གང་དག་སྐྱེས་བུ་སྐལ་དང་ལྡན་ཞེས་པ་ལ་སོགས་པས་བསྟན་ཏེ། གང་གིས་སྣང་བ་དག་པའི་སྐྱེས་བུ་རང་བཞིན་རྫོགས་པ་ཆེན་པོའི་སྐལ་བ་དང་ལྡན་པ་དེས། སྤྲུལ་སྐུའི་ཆོས་ཉིད་ལ་གོམས་པའི་རྟགས་ནི། སྤྲུལ་པའི་སྐུ་ནི། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུ་དང་ལྔའོ། །སྤྲུལ་སྐུའི་ངོ་བོ་ནི་འདི་འདྲ་གཅིག་མ་ངེས་ལ། རང་བཞིན་ཐ་དད་པར་སྣང་བའོ། །ངེས་ཚིག་ནི་གདུལ་བྱའི་ཡུལ་མི་འདྲ་བ་ཐ་དད་པ་ལ་འདུལ་བྱེད་ཀྱི་སྐུ་ཡང་དེ་རྙེད་དུ་སྤྲུལ་པས་ན་སྤྲུལ་པའོ། །དབྱེ་ན་མ་དག་པའི་སྤྲུལ་སྐུ་དང་། འགྲོ་བ་འདུལ་བའི་སྤྲུལ་སྐུ་དང་། རང་བཞིན་སྤྲུལ་པའི་སྐུའོ། །མ་དག་པ་ནི་ཕ་མ་ལས་མ་དག་པའི་སྐྱེ་གནས་སུ་དགེ་བའི་བཤེས་གཉེན་དགོངས་བ རྒྱུད་རྣམ་པར་སྤྲུལ་ནས་སེམས་ཅན་གྱི་དོན་བྱེད་པའོ། །འགྲོ་བ་འདུལ་བའི་ཐུབ་པ་དྲུག་ལ་སོགས་པའོ། །རང་བཞིན་སྤྲུལ་པའི་སྐུ་ནི་གསུམ་སྟེ། སྤྲུལ་པ་སྐུའི་སྤྲུལ་སྐུ་ཕྱག་ན་རྡོ་རྗེ་དང་། སྤྲུལ་པ་སྐུའི་ལོངས་སྐུ་རིགས་བཞི་སྤྲུལ་སྐུ་སོ་སོའི་ཞིང་ཁམས་དང་བཅས་པའོ། །སྤྲུལ་པ་སྐུའི་ཆོས་སྐུ་ཧེ་རུ་ཀ་ལྔའོ། །མཚན་ཉིད་ནི་གཟུགས་ཀྱི་ཕུང་པོ་གདུལ་བྱ་གང་མོས་སུ་སྣང་བ་ཡིན་ལ། གནས་གཅིག་ཏུ་ཡུན་རིང་བར་མི་གནས་པ་དང་མཛད་པའི་ལས་མཐར་ཕྱིན་པར་མཛད་པའོ། །འབྲས་བུ་ནི། འདི་ཉིད་ལས་གོམས་པ་མཐར་ཕྱིན་པས་ཀྱང་དག་པའི་སངས་རྒྱས་ཉིད་ལས་སླར་མི་ལྡོག་ལ། གལ་ཏེ་གོམས་པའི་ཚད་ལས་མ་ཕེབས་ན་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་འབྱིན་པའོ། །དེ་ལྟ་བུའི་སྤྲུལ་པའི་སྐུ་ཉིད་ལ་གོམས་ནས་ནི། སྣང་བ་འདི་ཉིད་ལ་གདེང་དུ་གྱུར་པའི་མི་དེའི། ལུས་དང་ངག་དང་སེམས་ལ་རྟགས་འདི་དག་སུ་ལ་བྱུང་བའི་སྐྱེས་བུ་ནི། སྤྲུལ་པའི་སྐུ་ལ་གོམས་པས་ན། གང་ཟག་འདི་ཡང་དག་པའི་སྐལ་བ་དང་ལྡན་པར་གྱུར་བ་ཡིན་ཏེ། སྔོན་དུ་བླ་མ་དམ་པ་ལ་ཐོས་པའི་ཆོས་རྣམས་ཀྱིས། དོན་ནི་འཇིག་རྟེན་པའི་དོན་དང་། འདས་པའི་དོན་ནོ། །འཇིག་རྟེན་པ་ནི་ཚིག་ཐ་དད་པ་ལ་དོན་ཀྱང་དེ་སྙེད་དུ་ཐ་དད་པའོ། །འདས་པའི་དོན་ནི་གཅིག་ཡིན་པ་ལ་ཚིག་ཐ་དད་པས་མཚོན་དུ་བཏུབ་པའོ། །དེ་ལྟར་ཚིག་ཐ་དད་ཀྱང་དོན་གཅིག་ཏུ་རང་གི་རྒྱུད་ལ་ཡང་དག་པའི་དོན་དེ་རིམ་གྱིས་མ་ཡིན་པར་གཅིག་ཆར་དུ་ནི་རང་འཆར་བར། གང་ཟག་འདི་ནི་ཚེ་འདི་ལ་འགྱུར་རོ་མཁའ་འགྲོ་མ། ཞེས་སྡུད་པ་པོ་ལ་གདམས་པའོ། །གང་ཟག་དེས་དེ་བཞིན་དུ་སྔོན་ལ་མ་ཐོས་པའི་བཀའ་དང་བསྟན་བཅོས་ཀྱི་ཚིག་ནི་སྣ་ཚོགས་པ་ཐོགས་པ་མེད་པར་གང་ཟག་དེའི་རང་བཞིན་དུ་བྱས་པ་མེད་པར་ཁ་ནས་སྨྲ་བར་འབྱུང་བ་ནི། ཚིག་གི་མཐའ་ཆོད་པའི་རྟགས་ཡིན། དེ་བཞིན་དུ་སྔར་མ་ཐོས་པའི་གསང་སྔགས་གཞན་དག་གི། རྒྱུད་ཀྱི་ཚིག་རྣམས་ཇི་བཞིན་དུ་སོ་སོའི་འདོད་པ་མ་ཉམས་པར་སྟོན་ཤེས་པ་ནི། ཚིག་གི་དོན་ཁོང་དུ་ཆུད་པའི་རྟགས་ཡིན། རྒྱུན་དེའི་གཞུང་གི་བཤད་པ་གོ་རིམ་མ་ནོར་བར་རང་རང་གི་འདོད་པ་ཇི་ལྟར་གསལ་བར་བཤད་པར་ནུས་པའོ། །དེ་བཞིན་དུ་ཆོས་ཀྱི་རྣམ་པ་མཐའ་དག་ལ། ཚིག་དང་དེའི་དོན་གྱི་རྣམ་པ་ཀུན་དེ་ཉིད་ལ། སེམས་ཅན་ཇི་ལྟར་མོས་པ་ཡི། ཆོས་རྣམས་ཀྱང་ནི་དེ་དང་མཐུན་པར་ཡང་། ཕ་རོལ་གྱིས་ཇི་ལྟར་དྲིས་པའི་ལན་དེ་ནི། སྐལ་བ་དང་ལྡན་པ་འདིས་ཕ་རོལ་པོའི་འདོད་པ་དང་མཐུན་པར་ལེན་འདོད་པས་ན། གང་ཟག་འདི་ནི་སྨྲ་བའི་སེང་གེ་ཞེས་བྱའོ། །དེ་ལྟར་རྟགས་དང་ལྡན་པ་དེ་ནི་འཇིག་རྟེན་མཁྱེན་པའི་ཤེས་རབ་ཐོབ་པའི་རྟགས་ཡིན་ནོ། །ཡང་སྐལ་ལྡན་དེ་ལ་ལུས་ཀྱི་སྟོབས་སུ་སྔོན་བས་ཡང་བར་གྱུར་ཏེ། རྐང་བ་མགྱོགས་པའི་དངོས་གྲུབ་དང་སྟོབས་རྣམས་ཀྱང་རྙེད་པ་ནི། སྙིང་རྗེས་གཞན་དོན་རྫོགས་པར་འགྱུར་བའི་རྟགས་ཡིན། ཡང་གང་ཟག་དེའི་ལུས་ཀྱི་གཉེར་མ་མེད་པར་འགྱུར་ཏེ། འོ་མ་གྲོད་པར་བླུགས་པ་དང་འདྲ་བར་འགྱུར་ནས། ལུས་ཀྱི་བདག་འཛིན་ལས་གྲོལ་བར་འགྱུར་བའི་རྟགས་ཡིན། ཡང་སྐྲ་དཀར་པོ་དག་ཏུ་ཡོད་ཀྱང་དེ་ནག་པོར་འགྱུར་བ་ནི་རིག་པ་འཆི་མེད་དུ་རྟོགས་པའི་རྟགས་ཡིན། དེ་བཞིན་དུ་དེའི་ལུས་བྱིས་པ་ལོ་བཅུ་དྲུག་ལོན་པ་བཞིན་དུ་གྱུར་པས་ཏེ། གཞོན་པའི་ཤ་ཆགས་ཤིང་དཀར་ཞིང་སྔོ་སངས་ཀྱི་མདངས་དང་ཡང་ལྡན་པར་འགྱུར་ཏེ། དཔེར་ན་ནམ་ཟླ་སོས་ཀའི་རྩ་ནི་གཞོན་ནུ་ལ་ཆར་པ་དག་ནི་ཡང་ནས་ཡང་བབ་པས ། དེ་ལ་སྐྱེད་ཆེན་པོ་ནི་རང་སྐྱེད་དང་ལྡན་པར་འགྱུར་བ་བཞིན་དུ་གཞོན་ཤ་ཆགས་པ་ནི། འཕོ་བའི་ལུས་ཀྱིས་སེམས་ཅན་གྱི་དོན་བྱེད་པའི་རྟགས་ཡིན། ཡང་གང་ཟག་དེ་ལ་སྔོན་ནས་མེད་པ་སྙིང་རྗེ་ཡང་དག་པར་འདི་ལ་གཏིང་ནས་སྐྱེས་པ་དང་། དེ་སྐྱེས་པས་དེའི་རྗེས་ལ་སེམས་ཅན་གྱི་དོན་ལ་འཇུག་པ་ནི། ཐེག་པ་ཆེན་པོའི་དོན་རྒྱུད་ལ་གོ་བའི་རྟགས་ཡིན། ཡང་རང་གི་ལུས་ཀྱིས། སེམས་ཅན་གཞན་ལ་ཕན་པའི་སེམས་ཅན་དག་ནི་བྱུང་བ་ན། གང་ཟག་འདི་ལ་ཤ་དང་ཁྲག་དང་མགོ་དང་རྐང་ལག་དང་ལྤགས་པ་ལ་སོགས་པ་ཇི་ལྟར་འདོད་པའི་ལུས་སྤྱི་དང་ཡན་ལག་གཏོང་བར་ནུས་ཤིང་ཕྱི་རོལ་གྱི་རྫས་དང་ལོངས་སྤྱོད་དགོས་པ་ཐམས་ཅད་སྨོས་ཅི་དགོས། དེ་སེམས་ཅན་གཞན་དང་། དེ་བཞིན་དུ་ལུས་ལ་སོགས་པ་གཏོང་པར་ནུས་པའི་རྟགས། འདི་ལྟར་སུ་ལ་བྱུང་པའི་མི་དེས། སྤྲུལ་པའི་སྐུ་ལ་སྐལ་ལྡན་དེས་རེག་གོ། །དེ་ནི་ཕྱི་ནང་གི་སྣང་བས་མི་གནོད་པའི་རྟགས་ཡིན་ནོ། །རྟགས་དེ་ལྟར་ལྡན་པའི་སྐྱེས་བུ་ནི། ལུས་འདི་བོར་བའི་རྗེས་ནི་རང་བཞིན་སྤྲུལ་པ་སྐུའི་ཞིང་ཁམས་སུ་མངལ་གྱི་སྒོར་མི་འགྲིམ་པར་པདྨ་ལ་རྫུས་སྐྱེས་ཀྱི་ལུས་བླངས་ནས་ཞིང་ཁམས་དེར་ནི་ལོ་དྲུག་ཁྲི་དང་སྟོང་ཕྲག་བརྒྱད་དང་ཡང་སྟོང་ཕྲག་གཅིག་སྟེ་ཁྲི་ཕྲག་བདུན་ལ་སྟོང་ཕྲག་གཅིག་གིས་མ་ཚང་བར་ཞིང་ཁམས་དེར་གནས་ནས་སེམས་ཅན་གྱི་དོན་སྐྱེས་བུ་འདི་ཡིས་བྱེད་པའོ། །དེ་ལྟར་དོན་བྱས་ནས་དེ་ནས་ངོ་བོའི་རང་བཞིན་ལས་སངས་རྒྱས་ཏེ་སྤྲུལ་པའི་སྐུར་རང་བྱུང་སྟེ། འཛམ་བུའི་གླིང་རྣམས་སུ། སྤྲུལ་པའི་སྐུ་བྱེ་བ་གཅིག་དང་དྲུག་ཁྲི་ཡིས། སེམས་ཅན་དེ་དག་རང་རང་དང་མཐུན་པའི་ལུས་བླངས་ནས། སེམས་ཅན་གྱི་དོན་ནི་བྱེད་པར་གང་ཟག་འདིས་ནི་འགྱུར་རོ་མཁའ་འགྲོ་མ་ཞེས་སྡུད་པ་པོ་ལ་གདམས་སོ། །དེ་ནས་སྤྲུལ་པ་དེ་དག་ཆོས་ཉིད་ངོ་བོ་ཀ་དག་ལ། དཔེར་ན་ཉི་མ་རྒས་པའི་དུས་འོད་ཟེར་གྱིས་གླིང་བཞིའི་མུན་པ་སེལ་བའི་ལས་ནི་བྱས་ནས། གླིང་གཅིག་ན་མི་གནས་པའི་ཚེ་འོད་ཟེར་དེ་དག་ཉི་མ་ཉིད་ལ་འདུས་པ་ལྟར། རང་གི་སྤྲུལ་པར་བཅས་པ་ནི། རང་གི་ངོ་བོར་རང་ཐིམ་པ་དཔེར་ན་ཆུ་ལ་ཆུ་ཐིམ་པ་ལྟར་སོང་ནས། རང་གི་ངོ་བོ་དང་དབྱེར་མེད་དེ་གཅིག་པ་མ་ཡིན་དབྱེ་བ་མེད་དོ་ཐ་དད་པ་མ་ཡིན་ལ། དེའི་ཕྱིར་ན་གཅིག་དང་ཐ་མི་དད། རྒྱ་ཆད་དང་ཕྱོགས་ལྷུང་མེད་པར་གྱུར་ནས། ཇི་ལྟར་ཆུ་ལ་ཆུ་ཐིམ་པ་དང་འདྲ་བར། མེ་ཆུ་དང་ཁ་དོག་མི་ཕྱེད་ལ། དེ་བཞིན་དུ་མར་ལ་མར་ཐིམ་པ་དང་འདྲ་བར། དབྱེར་མེད་བསྟན་དུ་མེད་པ། དེ་བཞིན་དུ་ནམ་མཁའ་ལ་ནམ་མཁའ་ཐིམ་པ་བཞིན་དུ་ངོས་བཟུང་མེད་པ་ནི། གཉིས་མེད་ངོས་བཟུང་མེད་པར་ཤེས་པས་སྔ་མ་དང་ཕྱི་མའི་རྟོག་པ་རང་གྲོལ་དུ་འགྱུར་བའོ། །ཞེས་སྤྲུལ་པའི་སྐུ་ལ་གོམས་པའི་རྟགས་བསྟན་ནས། ད་ནི་རིག་པ་ལ་གོམས་པའི་རྟགས་བསྟན་ཏེ། རིག་པ་ལ་ནི་སུས་གོམས་པ། །ཞེས་པ་ལ་སོགས་པས་བསྟན་ཏེ། རིག་པ་ནི། རིག་པའི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུ་དང་ལྔའོ། །རིག་པའི་ངོ་བོ་རྡོ་རྗེ་ལུ་གུ་རྒྱུད་ཡིན་ལ། ངེས་ཚིག་ནི་སྔར་མ་རིག་པ་དེ། ད་བླ་མའི་མན་ངག་ལ་བརྟེན་ནས་རིག་པས་ན་རིག་པའོ། །དབྱེ་ན་འཇིག་རྟེན་པའི་རིག་པ་དང་། འཇིག་རྟེན་པ་མ་ཡིན་པའི་རིག་པའོ། །འཇིག་རྟེན་པ་ནི་མིང་དུ་བཏགས་པ་རྣམས་དང་གནས་རིག་པའོ། །རིག་པའི་གནས་ནི་ལྔ་སྟེ། བཟོ་རིག་པ་དང་། གསོ་བ་དང་། སྒྲ་རིག་པ་དང་། གཏན་ཚིགས་རིག་པ་དང་། ལུང་རིག་པའོ། །བཟོ་ནི་བཟོའི་རིགས་མི་འདྲ་བ་དཔག་ཏུ་མེད་པ་ཤེས་པ་ཡང་སྔོན་དུ་རིག་པ་ལ་སྦྱངས་པའི་རྟགས་ཡིན། འདིས་ཀྱང་དམ་པའི་དོན་ལ་ངེས་པར་ཞུགས་ན་འབྲས་བུ་ཐོབ་པའོ། །གསོ་བ་ནི་སྨན་དཔྱད་སྣ་ཚོགས་པ་དང་། བསྲུང་བའི་རིགས་དང་། བཅུད་ལེན་སྣ་ཚོགས་པ་དང་། བསད་པ་དེ་ཉིད་སླར་གསོ་བར་ཤེས་པ་ནི། སྔོན་དུ་རིག་པ་ལ་སྦྱངས་པའི་རྟགས་ཡིན་ནོ། །སྒྲ་ནི་སྒྲའི་བྱིངས་དང་། བསྒྲུབ་བྱེད་དང་། གཞན་སེལ་དང་། ཕན་པའི་རྐྱེན་ཅན་བཞི་གང་ལ་ཡང་ཐོགས་པ་མེད་པར་ཤེས་པ་ཡང་སྔོན་དུ་སྦྱངས་པའི་རྟགས་ཡིན། གཏན་ཚིགས་ནི། ཚད་མ་དང་། དབུ་མ་དང་། སེམས་ཙམ་པ་ལ་སོགས་པའི་རིགས་པ་མི་འདྲ་བ་སྣ་ཚོགས་པ་ཤེས་པ་ཡང་སྔོན་དུ་རིག་པ་ལ་སྦྱངས་པའི་རྟགས་ཡིན་ནོ། །མདོར་ན་བསྟན་བཅོས་སྣ་ཚོགས་པ་མ་མཁྱེན་པའོ། །ལུང་ནི་རྒྱལ་བའི་བཀའ་ཕྱིན་ཅི་མ་ལོག་པ་རྣམས་ཏེ། རྒྱལ་བ་ལས་ཀྱི་ལུང་དང་། ཡེ་ཤེས་ལྷའི་ལུང་དང་། ངེས་པར་ཟད་པའི་ལུང་དང་། བྱ་བྲལ་རྫོགས་པ་ཆེན་པོའི་ལུང་ལ་སོགས་པ་རྣམས་དང་། སྔ་ན་ཐོས་མ་མྱོང་བ་ཤེས་པ་ནི། སྔོན་དུ་རིག་པ་ལ་སྦྱངས་པའི་རྟགས་ཡིན། འཇིག་རྟེན་པ་མ་ཡིན་པའི་རིག་པ་ནི། གཞི་གནས་ཀྱི་རིག་པ་དང་། ལམ་སྣང་གི་རིག་པ་དང་། ལྷག་མཐོང་གི་རིག་པའོ། །གཞི་གནས་ཀྱི་རིག་པ་ནི། གཞི་དངོས་པོ་དོན་གྱི་གནས་ལུགས་བཅོས་བསླད་གང་གིས་ཀྱང་ཕན་མ་བཏགས། གནོད་པ་མ་བསྐྱལ། དགེ་བས་སྐྱབས་ཀྱིས་མི་སྐྱོབས་ཏེ། དཔེར་ན་ནམ་ཟླ་དུས་ཚོད་ཀྱི་ཆབ་རོམ་སུས་ཀྱང་དགག་གིས་མི་ཁེགས་པར་རང་འཁྱག་པ་དང་། དེ་ཉིད་དུས་ལ་བབ་པའི་ཚེ་རང་ཞུ་བ་དང་འདྲའོ། །སྡིག་པས་མི་གོས་པས་ཏེ་དཔེར་ན་ཉི་ཟླ་ལ་སྤྲིན་གྱིས་གོས་པ་མེད་པ་དང་ཉེས་པ་མེད་པ་དང་། མན་ཤེལ་ལ་སྣོད་ཀྱིས་མ་གོས་པ་དང་འདྲ་བར། རིག་པ་ཉིད་ཀྱིས་སངས་རྒྱས་སེམས་ཅན་ལ་ཁྱད་མེད་དུ་གནས་པའོ། །ལམ་སྣང་གི་རིག་པ་ནི། གྲུབ་པའི་མཐའ་སྣ་ཚོགས་པས་མིང་བསྒྱུར་ཏེ། ལ་ལས་སེམས་སུ་བཏགས། ལ་ལས་སྐྱེ་མེད་དུ་བཏགས། ལ་ལས་ལྷན་ཅིག་སྐྱེས་པར་བཏགས། ལ་ལས་བློ་འདས་སུ་བཏགས། ལ་ལས་དངོས་པོའི་གནས་ལུགས་སུ་བཏགས། ལ་ལས་ཀུན་གཞིར་བཏགས། ལ་ལས་བྱང་ཆུབ་སེམས་ལ་སོགས་པའི་མིང་གི་འདོགས་ལུགས་མི་འདྲ་བ་ཐ་དད་པར་བཏགས་ཀྱང་། དོན་ཉམས་སུ་མྱོང་བ་རྣམས་ལ་འདྲ་སྟེ། དཔེར་ན་ཚའི་རོ་མྱོང་བ་རྣམས། རྒྱ་གར་བས་ལོན་ནེར་བཏགས། བལ་པོས་ཇི། ཞང་ཞུང་གིས་ཀུ་པ། རྒྱ་ནག་པོས་ཁྱེན། ཟ་ཧོར་གྱིས་རྡ། ཚ་བ་དམར་ཐག་གིས་སིབ། ཁྱི་ཐན་གྱི་རས་སུ་བཏགས་པ་ལ་སོགས་པ་འཛམ་བུའི་གླིང་རང་ན་ཡང་། མི་འདྲ་བ་སུམ་བརྒྱ་དྲུག་ཅུ་ཐམ་པ་ཡོད་ཀྱང་། དོན་ཚའི་རོ་མཆོག་གཅིག་པ་དང་འདྲ། དེ་བཞིན་དུ་རིག་པ་ཉིད་ཀྱི་དོན་ཉམས་སུ་མྱོང་བས། དཔེར་ན་ཚའི་རོ་མ་མྱོང་བར་ཚ་ལ་ཡོན་ཏན་སྣ་ཚོགས་དང་། མིང་དུ་མ་བཏགས་ཀྱང་གཏན་ལ་མི་ཕེབས་པ་དང་འདྲ་བར། རིག་པ་ཉིད་བླ་མའི་མན་ངག་གིས་གཏན་ལ་ཕེབས་པས། ཚིག་གང་ལྟར་བཏགས་ཀྱང་དོན་ལ་འགྱུར་བ་མེད་དོ། །དོན་ཉམས་སུ་མ་མྱོང་བར་ཚིག་སྣ་ཚོགས་ལ་ཁྱད་ཕྱེ་ཞིང་བོགས་བཏོན་ཀྱང་གཏན་ལ་མི་ཕེབས་ཏེ། དཔེར་ན་སྐྱེས་པ་སྙིང་ངན་པ་བརྗེད་ངས་ཆེ་བ་གཅིག་འདོད་པ་བུམ་པ་འདོད་པ་ལ། རང་གི་ལག་ན་བུམ་པ་བཟུང་ནས། ཚིག་སྣ་ཚོགས་པས་མི་རྣམས་ལ་བུམ་པ་འདྲི་བ་དང་འདྲའོ། །དེ་ལྟ་བུའི་རིག་པ་དེ་སངས་རྒྱས་དང་སེམས་ཅན་ཐམས་ཅད་ལ་ཁྱད་མེད་དུ་ཁྱབ་པར་གནས་པའོ། །ལྷག་མཐོང་གི་རིག་པ་ནི། རྡོ་རྗེ་ལུ་གུ་རྒྱུད་ཀྱི་སྐུ་ཡིན་ཏེ། འདི་ཉིད་བླ་མའི་མན་ངག་དང་ལྡན་པས་མངོན་གསུམ་དུ་རྟོགས་པས། ཡིད་དཔྱོད་ཚིག་གིས་སྒྲོས་གཞུག་ཏུ་མི་རྙེད། འདི་ཉིད་ཤེས་རབ་ཀྱིས་དཔྱད་དུ་མེད་པས་སྙམ་བྱེད་ཀྱི་ཡིན་སྙམ་གྱི་ལྟ་སྒོམ་གྱིས་གཏན་ལ་མི་ཕེབས། གཞན་ལྟོས་ཡིད་ཆེས་རྒྱུད་ལུང་ལ་མི་ལྟོས་པས། དེ་ཉིད་བསྟན་པ་ཙམ་གྱིས་མི་ཤེས་པ་མེད་པས། དབང་པོ་རྣོན་པོས་གཏན་ལ་མི་ཕེབས། ཚིག་གསུམ་གྱིས་གཏན་ལ་ཕེབས་པས་དབང་པོ་རྟུལ་པོས་ཀྱང་ད་ལྟ་ཉིད་དུ་རྟོགས་པ་མངོན་དུ་གྱུར། དེ་ཉིད་དབང་པོས་ཡུལ་དུ་བསྟན་དུ་ཡོད་པས་བསྒོམས་ཤིང་བསྒྲུབས་པས་འདི་ཉིད་མི་རྟོགས་ལ། འདི་ཉིད་ལ་ཡུལ་རྐྱེན་གྱིས་གནོད་མ་མྱོང་བས། ལས་དང་རྣམ་སྨིན་གྱིས་འགྲིབ་མི་སྲིད་དོ། །དེ་ལྟར་ལྷག་མཐོང་དུ་གང་གིས་མཐོང་ན། མིག་གིས་མཐོང་། ཡུལ་གང་ལ་མཐོང་ན་ནམ་མཁའ་ལ། མཐོང་ལུགས་ཇི་ལྟར་མཐོང་ན་རྡོ་རྗེ་ལུ་གུ་རྒྱུད་དུ་མཐོང་། མཐོང་བ་ལ་དགོས་པ་ཅི་ཡོད་ན་འདི་ཉིད་ལ་ཟག་པ་དང་བཅས་པའི་ཕུང་པོ་མི་སྣང་བར་སངས་རྒྱའོ། །རིག་པའི་མཚན་ཉིད་ནི་སྣང་ཡུལ་དུ་ཡོད་པས་གསལ་ལ། གཟུང་ཡུལ་དུ་མེད་པས་སྟོང་ལ། ཞེན་ཡུལ་དུ་མ་སྤྱད་པས་གསལ་སྟོང་དབྱེར་མི་ཕྱེད། དེ་ཡང་བསྟན་དུ་ཡོད་པས་ཡོད་པ་ཡིན་ལ། རྫས་སུ་མེད་པས་མེད་པ་ཡིན་ཏེ། དེ་རང་སྣང་དུ་བཞག་པས་ཡོད་མེད་དབྱེར་མི་ཕྱེད་པའོ། །འདི་ཉིད་ལུས་ལ་གནས་པས་འཁོར་བ་ཡིན་ལ། དེ་རང་ཡུལ་ལས་འདས་པས་མྱ་ངན་ལས་འདས་པ་སྟེ། དེ་ཉིད་མ་འཁྲུལ་བར་རང་གཞག་དུ་བཞག་པས་འཁོར་འདས་དབྱེར་མི་ཕྱེད་པའོ། །དེ་ལྟ་བུའི་རིག་པ་དེ་གཉེན་པོ་མེད་པས་ཉོན་མོངས་པ་སྣ་ཚོགས་པ་ཡང་ཡིན་ལ། དེ་ཉིད་ལ་ཡང་བསླད་མེད་པས་ཡེ་ཤེས་ཀྱང་ཡིན། དེ་ཉིད་རང་སར་བཞག་པས་ཉོན་མོངས་པ་ཉིད་ཉོན་མོངས་པ་ཉིད་ཀྱིས་གྲོལ། ཡེ་ཤེས་ཉིད་ཡེ་ཤེས་ཀྱིས་གྲོལ་བས་གཉེན་པོ་གཞན་ལ་རག་མ་ལུས་པས། བག་ཆགས་སྔ་ཕྱིས་དེ་ཉིད་འགྲེ་བ་མི་སྲིད་དོ། །རིག་པ་དེ་ཉིད་ལ་འཁོར་བའི་རྣམ་རྟོག་བྱུང་ཚོར་ཇི་ལྟར་བྱུང་ཀྱང་དེ་ཉིད་གསལ་བས་ཟང་ཐལ་དུ་སྣང་བས། ལས་ཀྱི་རྣམ་པར་སྨིན་པས་གོས་མི་སྲིད་དོ། །དེའི་ཕྱིར་ན་རིག་པ་དེ་ངོ་བོ་སྟོང་ལ། མཚན་ཉིད་ནི་གསལ་བ། གཏན་ཚིགས་ནི་སྐྱོན་ཡོན་ལས་འདས་པའོ། །དེ་ཉིད་ལ་ཡང་དག་པར་བཏགས་ན་ཚིག་གིས་འདི་འདྲ་ཞེས་སྒྲོས་གདགས་སུ་མེད་དེ་ཚིག་ཙམ་དུ་གྲུབ་པ་མེད་པའི་ཕྱིར་རོ། །དེ་ལྟ་བུའི་མཚན་ཉིད་ལ་ཡི་གེ་མེད་པས། ད་ལྟ་ཡི་གེས་གཏན་ལ་མི་ཕེབས། ཚིག་མེད་པས་ད་ལྟ་ཚིག་གིས་གཏན་ལ་མི་ཕེབས། སེམས་མེད་པས་ད་ལྟ་སེམས་ཡིན་དུ་གཏན་ལ་མི་ཕེབས། ཆོས་མེད་པ་ཆོས་ཀྱི་གཏན་ལ་མི་ཕེབས། དེ་ལ་སྡིག་དང་རྣམ་སྨིན་མེད་པས། དེ་ལ་སྡིག་དང་རྣམ་སྨིན་གྱིས་མི་གོས། དེ་ལ་སངས་རྒྱས་མེད་པས་འབྲས་བུ་སངས་རྒྱ་བའི་ས་མེད། སེམས་ཅན་མེད་པས་རྒྱུ་དྲུག་སེམས་ཅན་གྱི་དོགས་མེད། དེ་ཉིད་ཡེ་ནས་གྲོལ་ཟིན་པས་ལྟ་སྒོམ་སྤྱོད་པའི་རྒྱུ་མེད་དོ། །དེ་རང་རིག་པས་དེ་ལ་སྒོམ་མི་དགོས། སྣ་ཚོགས་སུ་སྣང་བས་བལྟར་མེད། གཉིས་མེད་རང་རྫོགས་སུ་ཡོད་པས་སྤྱོད་དུ་མེད་དོ། །འབྲས་བུ་ནི་རིག་པ་ཉིད་མངོན་གསུམ་ལམ་དུ་བྱས་པས་བརྩོན་འགྲུས་རབ་ཚེ་འདི་ཉིད་ལ་ཟག་པ་དང་བཅས་པའི་ཕུང་པོ་མི་སྣང་བར་སངས་རྒྱ་བ་དང་། འདི་ཉིད་མངོན་གསུམ་ཡུལ་དུ་ཤེས་པ་ཙམ་གྱིས། བརྩོན་འགྲུས་འབྲིང་པོ་ཆོས་ཉིད་ཀྱི་བར་མ་དོ་ལ་སངས་རྒྱ་བ་དང་། འདི་ཉིད་བསྟན་པ་ཙམ་གྱི་ཡོན་ཏན་གྱིས་བརྩོན་འགྲུས་ཐ་མ་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་ཕྱུང་ནས། མངོན་པར་རྫོགས་པ་སངས་རྒྱའོ། །དེ་ལྟ་བུའི་རིག་པ་ལ་རྣལ་འབྱོར་པ་སུས་གོམས་པ་བྱས་པ་དེའི་ལུས་ལ་རྟགས་འདི་འབྱུང་བའོ། །དམིགས་པ་གང་དུ་གཏད་པའི་དངོས་པོ་རྡོའམ་ཤིང་བུ་ལ། དེང་རང་གི་ཤེས་པ་བཅུག་པར་ནུས་པའི་དུས་ན་གང་ལ་བཙུད་པ་དེ་འགུལ་བར་ནུས་པ་ནི། རིག་པ་ལ་དབང་ཐོབ་པའི་རྟགས་ཡིན། དེ་བཞིན་དུ་གང་དུ་ཤེས་པ་འདུག་པའི་ས་དེ་ཉིད་དུ། རྣལ་འབྱོར་པ་དེའི་ལུས་ཀྱང་དེའི་ལུས་སུ་འཕོ་བ་སྟེ། རྗེས་ནས་གཉིས་སུ་མེད་དེ། དཔེ་ཇི་ལྟར་ན་རིག་པའི་ཆོས་ཉིད་དང་མཚུངས་སོ། །འདི་ནི་ལུས་ཀྱི་སྒྲིབ་ཤིང་དང་བྲལ་བའི་རྟགས་སོ། །ཡང་བསམ་རྒྱུན་ཞེན་པ་རང་འགགས་པ་དང་། འདི་ཉིད་ལ་ནང་གི་ཉམས་གོང་དུ་འཕེལ་བའི་རྟགས་རྣམས་ཀྱང་གསལ་བར་འགྱུར་བའོ། །མངོན་གསུམ་ནི། ཐ་སྙད་དུ་བློ་བཏགས་ཀྱི་མངོན་གསུམ་དང་། རང་རིག་གཅེར་སྣང་གི་དང་། གོམས་པ་མཐར་ཕྱིན་གྱིའོ། །ཐ་སྙད་བློ་བརྟགས་ནི་དབང་པོའི་མངོན་གསུམ་དང་། ཡིད་ཀྱི་དང་རྣལ་འབྱོར་གྱི་དང་། རང་རིག་གི་མངོན་གསུམ་མོ། །རང་རིག་གཅེར་སྣང་ནི་རྡོ་རྗེ་ལུ་གུ་རྒྱུད། གོམས་པ་མཐར་ཕྱིན་གྱི་ནི་ཆོས་ཟད་པའི་མངོན་གསུམ་ཉིད་དུ་སུས་རིག་པ། འདི་ནི་ལུས་ཀྱི་འབྱུང་བ་རང་གིས་ན། སྐལ་བ་ལྡན་པ་འདི་ལུས་ཀྱི་འབྱུང་བ་དེངས་ནས་སྐྱེ་མེད་མཆོག་ལ་མངའ་བརྙེས་པའོ། །ཞེས་རིག་པ་ལ་གོམས་པའི་རྟགས་བསྟན་ནས། ད་ནི་སྐྱེ་བ་མེད་པའི་དོན་ཁོང་དུ་ཆུད་པའི་རྟགས་བསྟན་པ་ནི། གང་གིས་སྐྱེ་མེད་སུ་ཡིས་ནི། །ཞེས་པ་ལ་སོགས་པས་བསྟན་ཏེ། རྣལ་འབྱོར་པ་གང་ཞིག་གིས། སྐྱེ་མེད་ནི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །སྐྱེ་མེད་ཀྱི་ངོ་བོ་ནི་སླར་མི་ལྡོག་ཅིང་མཁྱེན་པ་འགགས་པ་མེད་པ་ཉིད་ཡིན་ལ། ངེས་ཚིག་ནི་སྔར་མ་སྐྱེས་པའི་ཆོས་ཉིད་དེ་ད་སྐྱེ་མི་སྲིད་པས་ན་སྐྱེ་མེད་དོ། །དབྱེ་ན་རིག་མེད་བེམ་སྣང་གི་སྐྱེ་མེད་དང་། སྟོང་པ་མཁྱེན་མེད་ཀྱི་དང་། རང་རིག་ལམ་སློངས་ཀྱི་སྐྱེ་མེད་དང་། མཐར་ཐུག་བློ་ཟད་ཀྱི་སྐྱེ་མེད་དོ། །རང་རིག་བེམ་སྣང་གི་སྐྱེ་མེད་ནི། འདི་ལྟར་ས་ཆུ་མེ་རླུང་གི་སྣང་བ་བེམ་པོ་འདི་དག་དང་པོ་གང་ནས་ཀྱང་མ་སྐྱེས། ད་ཡང་མི་སྐྱེའོ། །སྟོང་པ་མཁྱེན་མེད་ཀྱི་སྐྱེ་མེད་ནི། ནམ་མཁའ་འདི་ཉིད་སྟོང་པ་ཡིན་ཏེ། མཁྱེན་པ་ཡེ་ཤེས་ཀྱི་ཆ་མེད་པ་འདི། དང་པོ་ཡང་སྐྱེ་མ་མྱོང་། ད་ལྟ་ཡང་སྐྱེ་བ་མི་གནས། ཐ་མ་ཡང་མི་སྐྱེ་བའོ། །རང་གི་ལམ་སློངས་ཀྱི་སྐྱེ་མེད་ནི། རིག་པ་དེ་ཉིད་སྔར་སྐྱེ་བ་མེད་ཀྱང་ད་ལྟར་ལུས་སུ་གྲུབ། ད་ལྟར་གྲུབ་པ་འདི་ཉིད་སྐྱེ་མེད་དུ་ཤེས་པས། ད་སྐྱེ་མི་སྲིད་པས་སྐྱེ་མེད་དེ། མཐར་ཐུག་བློ་ཟད་ཀྱི་སྐྱེ་མེད་ནི། བློ་ཟད་པས་ཆོས་མེད། ཆོས་མེད་པས་ཚིག་ལས་འདས། དེ་ལས་འདས་པས་སྐྱེ་བ་མེད། དེ་ཡང་གང་མི་སྐྱེ་ན་བློ་དང་དྲན་པ་མི་སྐྱེ། གང་གི་ཕྱིར་མི་སྐྱེ་ན་བློ་ཟད་པས་མི་སྐྱེ། དཔེ་གང་ལྟར་མི་སྐྱེ་ན། བསེ་ཤིང་གི་འབྲས་བུ་ལྟར་མི་སྐྱེ། དེ་ལྟར་མ་སྐྱེས་པས་བློའི་ཡུལ་རང་ཟད་དེ་སྐུ་གསུམ་དུ་འཛིན་པའི་ཤེས་རབ་ཀྱང་སྐྱེ་མེད། དེ་མེད་པས་སྐྱེ་བ་མེད་དོ་ཞེས་ཚིག་ཙམ་དུ་ཡང་གྲུབ་པ་མེད་དོ། །དེའི་ཕྱིར་ན་བློ་ལས་འདས་པས་གྲུབ་ཏུ་མེད་ཞེས་པས། དེ་ཉིད་མཐའ་ཐམས་ཅད་ལས་གྲོལ་བས་མཐའ་གྲོལ་ཡོངས་རྫོགས་ཉམས་བླངས་དང་བྲལ་བའོ། །དེ་ལྟར་མ་སྐྱེས་པ་ཕུང་པོ་ལྔའི་མཚམས་སྦྱོར་ཅིང་སྐྱེ་བ་མེད་པའི་དྲན་པ་དང་། བློ་ལས་གྲོལ་བས་མཐའ་གྲོལ་ཞེས་བྱའོ། །མཚན་ཉིད་ནི་མ་སྐྱེས་པའི་ཆོས་ཉིད་ལ་སྐྱེ་བ་མེད་པར་ཤེས་པས། ད་ལྡོག་པ་མེད་དེ་དཔེར་ན། དཔག་ཆེན་གྱི་མདའ་འཕངས་པ་དང་། རྒྱ་མཚོའི་གཏིང་དུ་རྡོ་བོར་བ་དང་འདྲའོ། །དེ་ཡང་དྲན་པའི་མཚན་ཉིད་མ་སྐྱེས་པས་འགྱུ་བ་རང་འགགས། དེ་འགགས་པས་རྣམ་རྟོག་བདག་ཏུ་འཛིན་པའི་ཉོན་མོངས་སྐྱེ་མི་སྲིད། དེ་མ་སྐྱེས་པས་ཆོས་དང་ཆོས་མིན་གཅོད་པའི་བློ་ལས་འདས། དེ་འདས་པས་ཚིག་ཏུ་འཛིན་པའི་ཤེས་རབ་སྐྱེ་མི་སྲིད། དེ་མ་སྐྱེས་པས་ལྟ་སྒོམ་ཡིད་དཔྱོད་ཡིན་ཐོག་ཏུ་འཇོག་པའི་མཐའ་ལས་གྲོལ་བས་མཐའ་གྲོལ་ལོ། །འབྲས་བུ་ནི་སྣང་བ་སྐྱེ་མེད་དུ་རྟོགས་པས་ཡུལ་གྱིས་འཁྲུལ་པ་རྒྱུན་ཆད། སེམས་སྐྱེ་མེད་དུ་རྟོགས་པས་སེམས་ཀྱི་དྲན་པ་རྒྱུན་ཆད། དེ་ལྟར་ན་སྣང་སེམས་གཉིས་མེད་རང་གྲོལ་བས་ན་སྐྱེ་བ་མེད་པའོ། །དེ་ལྟ་བུའི་ཆོས་ཉིད་གང་ཟག་སྐྱེ་མེད་རྩད་ནས་ཆོད་པའི་མི་དེ་ལ། རྟགས་ནི་འདི་ལྟར་འབྱུང་བར་ཡང་འགྱུར་ཏེ། འདི་ལྟ་བུའི་རྟགས་དང་སུ་ལྡན་པས་ནི། ང་སྟོན་པ་རྡོ་རྗེ་འཆང་དང་སྐལ་བ་མཉམ་པ་ཡིན་དེ་ཅིའི་ཕྱིར་ཞེ་ན། རྟགས་འདི་ལྟ་བུ་སུ་ལ་བྱུང་བའི་སྐྱེས་བུ་དེ་དང་ང་མཉམ་སྟེ། རྟགས་གང་ཞེ་ན། རྣལ་འབྱོར་པ་གང་གི་ལུས་ལ་འབུ་དང་སྲིན་བུ་དང་ཤིག་དང་སྲོ་མ་དང་སྲོག་ཆགས་སྐྱེ་བ་མེད་པ་ལ་སོགས་ཏེ། སྲོག་ཆགས་འདི་ཀུན་སྐྱེ་བ་རྒྱུན་ཆད་ནས། སྲིད་པ་སྐྱེ་མེད་དུ་རྟོགས་པའི་རྟགས་ཡིན། ཡང་རྣལ་འབྱོར་པ་གང་གི་སྐྲ་དང་སེན་མོ་ལན་གཅིག་བྲེགས་པ་དང་། འདི་ཀུན་གྱི་སྐྱེ་བ་རྒྱུན་ཆད་ནས་འདིས་རང་བཞིན་སྐྱེ་མེད་དུ་རྟོགས་པའི་རྟགས་ཡིན་ཏེ་བེམ་སྣང་རྟོགས་པའོ། །རྣལ་འབྱོར་པ་འདི་ནི་སྐྱེ་བ་མེད་པས་ཏེ། འདི་ལྟར་རྟགས་དེ་དག་དང་ལྡན་ནས་ནི། ཟླ་བ་དག་ནི་གསུམ་ན་ཡང་། སྐལ་ལྡན་འདི་ནི་ལུས་ཀྱི་འབྱུང་བ་རང་དེངས་སུ། ཟག་བཅས་ཕུང་པོ་མི་སྣང་བར། གཞན་གྱིས་མཐོང་བའི་སྤྱོད་ཡུལ་དུ་རང་འོད་མདོངས་ཕྱིར་བྱུང་ནས། དེའི་དཀྱིལ་དུ་རིག་པ་འོད་དང་བཅས་ཏེ། སངས་རྒྱ་བར་འདི་འགྱུར་རོ། །སྐལ་ལྡན་འདི་ལ་བར་མ་དོ་མི་སྲིད་པར་འདི་ཉིད་ལ་སངས་རྒྱའོ། །སྔར་སྐྱེ་བའི་ཞེན་པའི་རྒྱུན་གཅད་པས་ན། སྐྱེ་བ་སྔ་ཕྱི་གཉིས་ཀྱི་མཚམས་འོད་ཀྱི་ལུས་སུ་ལེན་མི་སྲིད་པར་འདི་ཉིད་ལ་ཕུང་པོ་བཞག་རྒྱུ་མེད་པར་སངས་རྒྱ་བའོ། །ལུས་ཀུན་གྱི་ཐ་མ་ཆོས་ཀྱི་སྐུ་ལོངས་སྐུ་སྤྲུལ་པའི་སྐུ་གསུམ་ལམ་དུ་བྱས་པས་ཚེ་གཅིག་ལ་འདིས་ཟད་པས་བྱས་ནས། ལུས་མེད་ཤ་ཁྲག་རང་ཀ་མ་ཕུང་པོ་ལྔ་རང་རྒྱུད་དུ་འཛིན་པའི་ལུས་མེད་པས་ཆོས་སྐུ། ལུས་དེ་འོད་དང་ཡེ་ཤེས་སྒྱུ་མ་ཙམ་གྱི་ལུས་སུ་གསལ་བ་ཟང་ཐལ་དུ་ཡོད་པས་ལོངས་སྐུ་འོད་ལུས་སུ་བྱུང་། ལུས་ཀྱི་མཆོག་མཚན་དང་དཔེ་བྱད་དུ་ལྡན་པའི་ལུས། འགྲོ་བ་གཞན་གྱི་ལུས་ལས་མཆོག་ཏུ་གྱུར་པ། སྤྲུལ་པ་སྐུའི་ལུས་ཕུང་པོ་ཁམས་དང་ལྟར་སྣང་བ། འདི་གསུམ་ལས་ནི། ལམ་གྱི་སྣང་ཆ་ལས་རྣལ་འབྱོར་པ་འདིས་བརྒལ་ནས་ཆོས་ཐམས་ཅད་ཟད་པས་བསྒྲུབ་ཏུ་མེད། ངོ་བོ་འདི་ཡིན་ཐ་སྙད་ལས་འདས་པས་བལྟར་མེད། རང་སྣང་གོམས་ཚད་ལས་འདས་པས་བསྒོམ་དུ་མེད་པའི་ས་ལ་རང་གི་རིག་པ་ཉིད་བརྡལ་བ་ཆེན་པོའི་ཡེ་ཤེས་མཐའ་ཐམས་ཅད་ལས་གྲོལ་བས། གྲུབ་རྒྱུ་ཅི་ཡང་མེད་པའི་ལུས་མེད་པར་རང་གི། ངོ་བོ་ཡེ་ནས་སངས་རྒྱས་པ་ཡིན་པར་དེ་ཉིད་དུ་གྲོལ་བ་ནི། དེ་ཡང་གློ་བུར་བྱས་བཅས་ལས་བྱུང་བ་མ་ཡིན་ཏེ། ཡེ་ནས་གནས་པ་སྙིང་པོའི་དོན་དུ་ཐོག་མ་ནས་ཡོད་པས། དེ་ཉིད་དུ་རང་ཐིམ་པའོ། །དེ་ལྟར་ཡེ་ནས་གནས་པའི་དོན་ཡིན་པས། དེའི་ཕྱིར་ན་སྐལ་ལྡན་འདི་ནི་སྐྱེ་བ་མེད་པའི་ས་ཐོབ་པའོ། །དེ་ལྟར་སྐྱེ་བ་མེད་པའི་ས་ཐོབ་པའི་རྣལ་འབྱོར་པ་དེ་མཐའ་གང་ལ་ཡང་མི་གནས་པའི་སྟོང་པ་ཉིད་ལ་སྤྱོད་དེ་དེ་ལྟར་སྟོང་པ་ཉིད་ཀྱི་རང་བཞིན་ལས་ཀྱང་འདས་པའི་རྣལ་འབྱོར་པ་དེ་མི་རྟོག་པ་ཉིད་རང་ལ་གནས་པས་འདི་ལ་བསམ་པའི་ཞེན་པ་མི་སྣང་བའོ། །དེ་ཡང་གཞན་ནས་བྱུང་ཞིང་བཙལ་བས་རྙེད་པ་མ་ཡིན་ཏེ་རང་གི་རང་བཞིན་དུ་ཡེ་ནས་དེ་བཞིན་ཉིད་དུ་གནས་པ་ཡིན་ནོ། །ཞེས་སྐྱེ་བ་མེད་པའི་རྟགས་བསྟན་ཏེ། དེ་དག་ཧྲིལ་གྱིས་དྲིལ་ནས་དངོས་གཞི་ཟག་པ་མེད་པའི་ཡེ་ཤེས་ཀྱི་རྟགས་བསྟན་པ་ལ་ནང་དོན་བཅུར་བྱས་ནས་ནི་དོན་གཉིས་པ་བསྟན་ནོ། །ད་ནི་སྤྱི་དོན་གསུམ་པ་རྟགས་དང་ལྡན་པའི་སྐྱེས་བུའི་ཡོན་ཏན་གྱི་རྣམ་པར་བཞག་པ་བསྟན་པ་ལ། ནང་གསེས་ཀྱི་དོན་དྲུག་ཡོད་པ་ལས་དང་པོ་ཡོན་ཏན་སྤྱིའི་ཁྱབ་པ་རྣམ་བཞག་ཏུ་བསྟན་པ་ནི། འདི་ལྟར་རྟོགས་པའི་སྐྱེས་བུ་ཡིས། །ཞེས་པ་ལ་སོགས་པས་བསྟན་ཏེ། རྒྱུད་འདི་ལྟར་རྟོགས་པའི་སྐྱེས་བུ་དེ་ཡོད་པའི་ཕྱོགས་ནས་ཕུན་སུམ་ཚོགས་པ་ལྔ་ལྟར་ཡང་ཡོན་ཏན་གྱི་ཆ་ལ་སྣང་ལ། མེད་པའི་ཕྱོགས་ནས་སྟོང་པ་ཉིད་བཅོ་བརྒྱད་ལྟར་ཡང་གཏན་ལ་དབབ་ཏུ་གཏུབ་ལ། བསམ་གྱིས་མི་ཁྱབ་པའི་ཕྱོགས་ནས་ཚིག་ཐ་དད་པ་ལྟར་ཡང་སྣང་ཞིང་། རང་བཞིན་མ་ངེས་པར་ཤར་ལ། དེ་ཉིད་ཤར་བས་རོལ་པ་འགགས་མེད་དུ་ཁྱབ་པ་སྟེ། དེ་དག་ཐ་དད་དུ་བྱུང་ཡང་དོན་ཐ་དད་པ་མ་ཡིན་པ་ནི་གཅིག་པར་གནས་པའི་ཡེ་ཤེས་ཡིན་པ་ནི། དོན་གྱིས་ངོ་བོ་གཉིས་ལ་སོགས་པའི་གྲངས་ཀྱིས་ཐ་སྙད་ཀྱིས་གྲུབ་པ་མེད་པས་གཅིག་ཏུ་གནས་ལ། དུ་མའི་སྒྲོ་འདོགས་རྣམ་པར་ཆོད་པས། གཅིག་རང་གི་མཚན་ཉིད་དུ་གནས། གཅིག་ཙམ་མམ་གཅིག་ཞེས་གདགས་སུ་མེད་པས་དེ་ཉིད་རང་གིས་རང་བསྟན་པས་ན་སྟོན་པ་ཆེན་པོ་ཞེས་བྱའོ། །དེ་ལྟ་བུའི་དོན་དེ་སུས་ཀྱང་མ་བཀོད་པར་ཡེ་ནས་ཆོས་ཉིད་ཀྱི་གདངས་ལ་རང་གནས་པ་ལ། ཀུན་རྫོབ་དོན་དམ་གྱི་སྣང་བའི་ཆ་ལྷུན་གྱིས་གྲུབ་པས་ན། ཐབས་ཀྱིས་བདེ་བ་མཚོན་པ་དང་། ཤེས་རབ་ཀྱིས་སྟོང་པ་མཚོན་པའོ། །རང་བཞིན་ལས་གདུལ་བྱ་ཀུན་རྫོབ་ཀྱི་ངོ་བོ་གང་ལ་སངས་རྒྱས་པའི་རིགས་རྣམ་པར་སྣང་མཛད་དང་། མོའི་རིགས་ནམ་མཁའ་དབྱིངས་ཕྱུག་མ་ལ་སོགས་པར་ཀྱང་ཕོ་མོ་གཉིས་ཐབས་ཤེས་རབ་གཉིས་སུ་སྣང་བའོ། །དེའི་ཕྱིར་ན་རྟགས་རྫོགས་པའི་སྐལ་ལྡན་འདི་ཀུན་ཀྱང་ཀུན་རྫོབ་ཀྱི་སྣང་ཆ་ལ་དེའི་འཁོར་དུ་སྣང་བའོ། །དེ་སྣང་བ་ཅིའི་ཕྱིར་ན་ཆོས་ཉིད་གཞིའི་སྣང་བ་རང་བཞིན་མེད་པ་ལས་ཆོས་ཐམས་ཅད་སྨྲར་མེད་པའི་འཁོར་དུ་སྣང་ལ། དེ་བཞིན་དུ་བསམ་དུ་མེད་པ་དང་བརྗོད་དུ་མེད་པའི་ཆོས་སུ་སྣང་བས། འཁོར་དང་། སྟོན་པ་དང་། གནས་དང་། ཆོས་ཐམས་ཅད་དུས་ལས་དབྱེར་མི་ཕྱེད་པས་དུས་གསུམ་མཉམ་པ་ཉིད་དུ་ཡང་དག་པར་ཡེ་ནས་འདི་ཀུན་སུས་ཀྱང་བྱས་པ་མེད་པར་རང་ལ་གནས་པའོ། །ཞེས་སྤྱིའི་ཡོན་ཏན་རྣམ་པར་བཞག་པ་བསྟན་ནས། ད་ནི་ལུས་ངག་སེམས་ཀྱི་རྟགས་བྱེ་བྲག་ཏུ་ཡོན་ཏན་གྱི་ངེས་པའི་འབྲས་བུ་བསྟན་པ་ནི། གང་གིས་སྐྱེས་བུ་བློ་བརྩལ་ཅན་ཞེས་པ་ལ་སོགས་པས་བསྟན་ཏེ། གང་གིས་ཁྱབ་པ་སྤྱིར་གཏང་ནས་བྱེ་བྲག་ཏུ་སྐྱེས་བུ་ནི་རྟེན་གྱི་གང་ཟག་བློ་ནི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །བློའི་ངོ་བོ་མི་འགྱུར་བ་བསྟན་པ། ངེས་ཚིག་ཡུལ་འཕྲལ་སྤྱོད་པར་བྱེད་པ་སྟེ། བློ་ནས་སྐྱེ་བ་དང་། གནས་པ་དང་འབྲལ་བར་བྱེད་པའོ། །དབྱེ་ན་རྟོག་བཅས་ཀྱི་བློ་དང་། རྟོག་མེད་ཀྱི་བློ་དང་། རྟོག་བཅས་ནི། ཡུལ་ཐ་དད་པ་གཅོད་པར་བྱེད་པ་སྟེ། ཚིག་དང་། ཤེས་པ་དང་། དྲན་པ་དང་། བསམ་པ་དང་། དངོས་པོ་ཡུལ་ལ་སྤྱོད་པར་བྱེད་པའོ། །རྟོག་མེད་ནི་ཆོས་ཉིད་ཡུལ་གྱི་རྒྱུ་མཚན་འཚོལ་བར་བྱེད་པ་རྣམས་ཡིན་ཏེ། དོན་གྱིས་ཡིད་སྤྱོད་དོ། །མཚན་ཉིད་ནི་ངེས་པ་མེད་པ་ཡིན་ནོ། །འབྲས་བུ་བློ་ལྟར་སྣང་ཞིང་རྟག་མི་ཐུབ་པའོ། །རྩལ་ནི་བློ་དེ་ལས་འདས་པས་ཤེས་རབ་སྟེ། ཚིག་གི་མཐའ་གཅོད་ནས་ཉོན་མོངས་པ་ལས་གྲོལ་བར་བྱེད་པས་ན་ཅན་ནོ། །ཞེས་བྱའོ། །དེ་ལྟར་ཉོན་མོངས་པ་ལས་གྲོལ་བའི་སྐྱེས་བུ་དེའི་ལུས་ལ་གོང་དུ་བཤད་པའི་ལུས་ཀྱི་རྟགས་རྣམས་མ་ལུས་པ་རྫོགས་པར་བྱུང་བས་ན་ལུས་བོར་མ་ཐག་ཏུ། བར་མ་དོའི་ཆོས་ཉིད་ལས། ཆོས་ཉིད་རང་གི་ངོ་བོའི་བདེན་པ་མཐོང་སྟེ་སངས་རྒྱས་རྒྱའོ། །ཡང་སྐྱེས་བུ་གང་ཞིག་ལ་ངག་གི་རྟགས་གོང་དུ་བསྟན་པ་རྣམས་མ་ལུས་པ་རྫོགས་པར་ཡོད་པ། འདི་ན་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་ཕྱུང་ནས་སངས་རྒྱའོ། །བརྫུས་ནས་སྐྱེས་ནས་སྐྱེ་བ་གཅིག་གིས་ཐོག་སྟེ་སངས་རྒྱའོ། །ཡང་གོང་དུ་བསྟན་པའི་སེམས་ཀྱི་རྟགས་དང་གང་ལྡན་པ། འདི་ནི་ཚེའི་འདུ་བྱེད་ཀྱིས། སྐྱེ་བ་འདི་དང་གཉིས་ན་བར་མ་དོ་མེད་པར་དཔེར་ན་སྐར་མདའ་ནམ་མཁའ་ལ་རྒྱུག་པའི་ཚུལ་དུ་སྐད་ཅིག་མ་གཅིག་ལ་འཁྲུལ་སྣང་འདི་འགགས། གཅིག་ལ་ཆོས་ཉིད་ཀྱི་བར་མ་དོར་སྣང་། གཅིག་ལ་ཆོས་ཉིད་ཀྱི་ཀ་དག་གི་སར་གྲོལ་བ་དང་གསུམ་གྱིས་དེ་ཉིད་ལ་སྤྲུལ་པའི་སྐུ་དང་བཅས་པ་ཡང་དག་པའི་ཆོས་ཉིད་ངོ་བོ་ཉིད་དང་རང་ཐིམ་པའོ། །ཞེས་ལུས་ངག་སེམས་ཀྱི་བྱེ་བྲག་གི་རྟགས་བསྟན་ནས། ད་ནི་ལུས་ངག་གི་རྟགས་གཉིས་འཛོམ་པའི་འབྲས་བུའམ་ཡོན་ཏན་བསྟན་པ་ནི། ལུས་དང་ངག་གི་རྟགས་འཛོམ་ན། །ཞེས་པ་ལ་སོགས་པ་སྟེ། ལུས་ནི་དཔེའི་ལུས་སྒྱུ་མ་ལྟ་བུ་ལ་བཏགས་པས་དམིགས་པ་མེད་པའི་དོན་རྟོགས། རྟགས་ཀྱི་ལུས་རྨི་ལམ་སྟེ། དེ་ཉིད་ལ་བརྟགས་པས་སྐྱེ་བ་མེད་པར་རྟོགས། དོན་གྱིས་ལུས་སྐུ་གསུམ་དབྱེར་མེད་པས་ཏེ། དེ་ཉིད་ལ་བརྟགས་པས་ཅོག་གཞག་ཅེར་གྱིས་གྲོལ་བར་རྟོགས་པའོ། །ངག་གི་དཔེའི་ངག་བྲག་ཆ་ལྟ་བུས་ཏེ་གྲགས་པ་རང་སྟོང་དུ་རྟོགས། རྟགས་ཀྱི་ངག་ཨ་ལི་དང་ཀ་ལིའི་རྣམ་པར་སྣང་བས་ཏེ། དེ་ཉིད་ལ་བརྟགས་པས་བརྗོད་པ་ཐམས་ཅད་རང་བཞིན་མེད་པར་རྟོགས། དོན་གྱི་ངག་ཆོས་ཉིད་སྤྲོས་པ་དང་བྲལ་བའི་རང་སྒྲ་སྟེ། དེ་ཉིད་ལ་རྟགས་པས་སྤྲོས་མེད་ཐིག་ལེ་ཉག་གཅིག་ཏུ་རྟོགས་པའོ། །དེ་ལྟར་གོང་དུ་བསྟན་པའི་ལུས་དང་ངག་གི་རྟགས་གང་ཟག་གཅིག་ལ་འཛོམ་ན་སྐལ་ལྡན་འདི་ནི་བྱང་ཆུབ་སེམས་དཔའ་ཆེན་པོ་ཞེས་བྱའོ། །འདིས་སེམས་ཅན་ཐམས་ཅད་འཛིན་པའི་སྙིང་རྗེ་ཅན་འདིས་ནི་སེམས་ཅན་རྣམས་བླ་ན་མེད་པའི་བྱང་ཆུབ་ལ་འཛིན་པའི་ཕྱིར་ན། ལུས་གཅིག་གིས་ལོ་ནི་བྱེ་བ་གཅིག་དང་བརྒྱད་སྟོང་དུ། འགྲོ་བ་མིའི་ལུས་ནི་གཅིག་གིས་ཡང་དག་པར་རྒས་པ་མེད་པར། འདི་ལྟར་སེམས་ཅན་གྱི་དོན་རྫོགས་པར་བྱས་ནས་ནི། སྔར་གྱི་སྐྱེ་བ་དང་ཕྱིས་ཀྱི་སྐྱེ་བ་དང་གཉིས་ཀྱི་བར་འཚམས་བར་དོ་ཉིད་དུ་མི་འཇུག་པར་སྐུ་མངོན་པར་འོད་དང་། སྒྲ་དང་གདུང་དང་། སྐུ་ལ་སོགས་པ་རྫོགས་པས་སངས་ཡང་རྒྱའོ། །ཞེས་ལུས་དང་ངག་གི་རྟགས་རྫོགས་པའི་འབྲས་བུ་བསྟན་ནས། ད་ནི་ལུས་དང་སེམས་ཀྱི་རྟགས་དང་ལྡན་པའི་ཡོན་ཏན་བསྟན་པ་ནི། ཡང་ན་སྐལ་ལྡན་སུ་ཞིག་ལ། །ཞེས་པ་ལ་སོགས་པས་བསྟན་ཏེ། ཡང་ན་མནན་པའི་ཚིག་རྫོགས་པ་ཆེན་པོའི་སྐལ་པ་དང་ལྡན་པ་སུ་ཞིག་གི་ལུས་ངག་སེམས་ལ། ལུས་ནི་བསྟན་ཟིན། སེམས་ཀྱི་ནི་དཔེའི་སེམས་སྤྲིན་དང་ཆར་འདྲ་སྟེ། དེ་ཉིད་ལ་བརྟགས་པས་ཡོད་མེད་གཉིས་འཛིན་དང་བྲལ་བར་རྟོགས། རྟགས་ཀྱི་སེམས་དྲན་བསམ་འགྱུ་བ་སྣ་ཚོགས་པ་སྟེ། དེ་ཉིད་ལ་བརྟགས་པས་བསམ་དུ་མེད་པའི་ཆོས་ཉིད་ཡེ་ནས་གྲོལ་ས་ཟིན་པར་རྟོགས། དོན་གྱི་སེམས་སྣ་ཚོགས་རང་སར་གྲོལ་བས་ཏེ། དེ་ཉིད་ལ་བརྟགས་པས་ཁམས་གསུམ་ཡོངས་སུ་གྲོལ་བར་རྟོགས་པའོ། །དེ་ལྟར་གོང་དུ་བསྟན་པའི་རྟགས་མ་ལུས་པར་ལྡན་པའི་གང་ཟག་འདི་ནི་འཇིག་རྟེན་མི་ཡུལ་དུ། ཡུན་རིང་དག་ཏུ་མི་གནས་པར། ལོ་དགུ་ན་ཆོས་ཉིད། སྐྱེ་བ་མེད་པར་རྟོགས་ནས་བསྟན་འཛིན་ནོ། །ཞེས་ལུས་དང་སེམས་ཀྱི་རྟགས་བསྟན་ནས། ད་ནི་ངག་དང་སེམས་ཀྱི་རྟགས་བསྟན་པ་ནི། ངག་དང་སེམས་ཀྱི་རྟགས་དང་ལྡན་ན། སྐྱེས་བུ་དེ་ཡང་འདི་ལྟར་ལྡན་ནས་ལོ་བཅུ་ན། ལུས་ཀྱི་འབྱུང་བ་རང་སར་དེངས་ནས་ནི། ཕྱི་རོལ་གྱི་སྣང་བ་འདི་ཉིད་ནི་མི་སྣང་བར་ཆོས་ཉིད་ནི་མ་བཅོས་པ་ལ་བྱ། ཟད་པ་ནི་ཕུང་པོ་ལྔའི་རྡོས་པ་མི་སྣང་བས། ཕྲ་རགས་ཀྱི་དྲི་མ་ཟད་པ་དང་། འབྱུང་བའི་རྐྱེན་རང་སར་གྲོལ་བས། ལུས་ཀྱི་འཆིང་བྱེད་ཟད་པ་དང་། སྔོན་རྒྱུ་དང་བག་ལ་ཉལ་རང་སར་དག་པས། འཁྲུལ་པ་ཉོན་མོངས་པ་རང་སར་ཟད་པའི་སར་ནི་ངོ་བོ་འགྱུར་མེད་ཟང་ཐལ། རང་བཞིན་འགག་མེད་ཟང་ཐལ། ཐུགས་རྗེ་རང་ཤར་ཟང་ཐལ་དུ་སྐྱོལ་ལོ། །ཞེས་ངག་དང་སེམས་ཀྱི་རྟགས་རྫོགས་པའི་འབྲས་བུ་བསྟན་ནས། ད་ནི་ལུས་ངག་སེམས་ཀྱི་རྟགས་གསུམ་རྫོགས་པའི་འབྲས་བུ་བསྟན་པ་ནི། གང་ལ་ལུས་ངག་སེམས་ཀྱི་རྟགས། །ཞེས་པ་ལ་སོགས་པས་བསྟན་ཏེ། རྣལ་འབྱོར་པ་གང་ལ་ལུས་དང་ངག་དང་སེམས་ཀྱི་རྟགས་རྣམས་མ་ལུས་པར་རྫོགས་ན། འདི་ལྟར་སུ་ལ་འཛོམ་པའི་སྐལ་པ་དང་ལྡན་པ་ཞེས་བྱས་ཏེ་འདི་ལ ། དེ་ལྟར་རྟགས་རྫོགས་ནས་ནི་ལོ་གཉིས་ན་ཡང་སྐྱེས་བུ་དེ་འབྱུང་བ་རང་དེངས་སུ་འགྱུར་བ་ཡིན་པས་འདི་ལ་ནི་ཐེ་ཚོམ་བྱར་མེད་པར་འདི་ནི་སངས་རྒྱས་ཀུན་གྱི་ཡང་དག་པའི་ལམ་དུ་སྣང་བའོ། །ཞེས་སྐུ་གསུམ་ཚད་དུ་ཕྱིན་པའོ། །ས་མ་ཡཱ། ཞེས་དམ་ཚིག་ཆེན་པོའི་སྒྲ་ལས་དྲངས་པ་སྟེ། བསྲུང་མཚམས་དང་བཅས་པའི་དམ་ཚིག་དང་། བསྲུང་མཚམས་ལས་འདས་པའོ། །བསྲུང་མཚམས་ནི་རྣམ་གྲངས་དང་བཅས་པ་དང་། རྣམ་གྲངས་མ་ཡིན་པའོ། །རྣམ་གྲངས་དང་བཅས་པ་ནི་སྐུ་དང་གསུང་དང་ཐུགས་ཀྱི་དམ་ཚིག་ལས། སྐུའི་དམ་ཚིག་ལ་བསྲུང་རྒྱུ་ཁྲི་ཕྲག་བཞི། གསུང་ལ་ཁྲི་ཕྲག་གསུམ་སྟེ་བདུན། ཐུགས་ལ་གསུམ་སྟེ་འབུམ་ཡོད་དོ། །རྣམ་གྲངས་མ་ཡིན་པ་ནི། སྤྱོད་དང་བསྒོམ་པ་དང་ལྟ་བའི་གེགས་སུ་འགྱུར་རོ་ཅོག་བསྲུང་བ་ཡིན་ནོ། །བསྲུང་མཚམས་ལས་འདས་པ་ནི་སྐལ་ལྡན་ལུས་ངག་སེམས་ཀྱི་རྟགས་དང་ལྡན་ཞིང་ཚད་དུ་ཕྱིན་པའི་དུས་ཡིན་ཏེ། འདི་ཉིད་ལ་འབྲས་བུར་སྨིན་པའི་ཕྱིར་རོ། །དེ་ཡང་གང་བསྲུང་ན་རྩ་བ་སྐུ་གསུང་ཐུགས་ལས་འགལ་བ་རྣམས་བསྲུང་ངོ་། །གང་གིས་བསྲུང་ན་འབྲས་བུ་གསང་སྔགས་ཀྱི་སྒོར་ཞུགས་པ་རྣམས་ཀྱིས་བསྲུང་། ཚུལ་ལམ་ཐབས་ཇི་ལྟར་བསྲུང་ན་གསང་བར་འོས་པ་དམ་རྫས་དང་། དབང་བསྐུར་བའི་དུས་ཀྱི་ལས་ཀྱི་ཕྱག་རྒྱ་མ་གསང་བ་དང་། གསང་བར་གཉེར་གཏད་པ་བླ་མའི་མན་ངག་དང་། ཡི་དམ་ལྷ་དང་སྙིང་པོ་དང་། རང་གི་ཡི་དམ་བླ་མའི་གདམས་པ་རྣམས་གསང་ངོ་། །གསང་བར་ཞལ་གྱིས་བཞེས་པའི་ལམ་རྟགས་རྣམས་དང་། སྒྲུབ་པའི་དངོས་གྲུབ་དང་། རྒྱལ་བའི་བཀའ་ནོར་གྱི་མི་བཙོང་སྟེ་གསང་། དེ་གང་ལ་གསང་ན་གསང་སྔགས་ཀྱི་སྣོད་དུ་མི་རུང་བ་རྣམས་ལ་གསང་ངོ་། །དེ་ནི་གསང་བའི་དམ་ཚིག་གོ། །ནང་གི་དམ་ཚིག་དང་རྡོ་རྗེ་སློབ་དཔོན་དང་། རྡོ་རྗེའི་སྤུན་ལྕམ་སྲིང་གི་སྐུ་ལ་བརྙས་པའི་ལས་མི་བྱ་སྟེ་བསྲུང་། གསུང་བཅག་པ་དང་བདག་ཉིད་ཀྱི་ངག་ཏུ་བརྙས་པ་ཡང་། ཐུགས་དང་མི་མཐུན་པའི་ལས་དང་། རང་གི་ཡིད་ལ་ངན་སེམས་མི་བྱ་བར་བསྲུང་ངོ་། །ཕྱིའི་དམ་ཚིག་ཏུ་ལུས་ཀྱི་སྒོ་ནས་སྲོག་གཅོད་པ་ལ་སོགས་པ་སྤང་ཞིང་བསྲུང་། ངག་རྫུན་ལ་སོགས་པ་བསྲུང་། སེམས་ཀྱིས་ལོག་པར་ལྟ་བ་ལ་སོགས་པ་བསྲུང་བའོ། །ཅིའི་ཕྱིར་བསྲུང་ན་འབྲས་བུ་གསང་སྔགས་ལ་ལམ་དུ་བྱེད་པའི་ཕྱིར་བསྲུང་། མ་བསྲུངས་ན་སྐྱོན་ཅི་ཡོད་ན་ཕྱིའི་དམ་ཚིག་ཉམས་ན་ངན་སོང་གསུམ་དུ་སྐྱེ། ནང་གི་དམ་ཚིག་མ་བསྲུངས་ཤིང་ཉམས་ན་རྡོ་རྗེ་དམྱལ་བར་སྐྱེ། གསང་བའི་དམ་ཚིག་མ་བསྲུང་ཤིང་ཉམས་ན་མནར་མེད་པའི་སེམས་ཅན་དམྱལ་བར་ལྷུང་ངེས་པའོ། །དེ་བསྲུངས་པ་ལ་དགོས་པ་ཅི་ཡོད། བསྲུངས་ཤིང་མ་ཉམས་ན་ཚེ་གཅིག་ལ་ཟག་བཅས་མི་སྣང་བར་བརྩོན་འགྲུས་རབ་གཅིག་འདི་ལ་སངས་རྒྱ། འབྲིང་གཅིག་བར་མ་དོ་ལ་སངས་རྒྱ། ཐ་མ་གཅིག་ཡང་མངལ་གྱི་སྒོར་མ་འགྲིམ་པར་སྤྲུལ་པ་སྐུའི་ཞིང་ཁམས་སུ་བརྫུས་ནས་སྐྱེ་སྟེ། དེར་དབུགས་ཕྱུང་ནས་སངས་རྒྱའོ། །ཉན་ཐོས་ལ་སོགས་པ་སྐལ་པ་དཔག་ཏུ་མེད་པར་ཚོགས་བསགས་ནས་ཀྱང་ཇི་སྲིད་འདུལ་ཁྲིམས་ལན་གཅིག་ཉམས་ཀྱང་གསོར་མེད་དེ། སླར་ལྷུང་བ་ཡིན་ལ། གསང་སྔགས་པས་ནི་ཇི་སྲིད་ཉམས་ཀྱང་བསྐང་ཞིང་གསོར་ཡོད་དོ། །དེ་ལྟར་དམ་ཚིག་ལ་གནས་པར་བྱས་པས་འདི་ལྟར་རྟགས་རྣམས་རྫོགས་པའི་གྲོགས་སུ་འགྲོ་བས་སྐྱེས་བུ་ཡིས་དམ་ཚིག་མ་ཉམས་ཤིང་འགལ་འཁྲུལ་མེད་ན་འཇིག་རྟེན་འདི་རང་ལ་ཡང་ཇི་ལྟར་འདོད་པའི་བྱེ་བྲག་ཏུ་འབྱུང་བ་སྲིད་ན། འཇིག་རྟེན་འདི་དང་དེ་ལས་འདས་པའི་དངོས་གྲུབ་དེ་ཀུན་ལ་ནི། རྣལ་འབྱོར་པ་འདིས་དབང་བསྒྱུར་བ་ནི་སྤྲོས་པ་དང་བཅས་པའི་དབང་གིས་ལུས་ཀྱི་རྣམ་པ་བསྒྱུར། སྤྲོས་མེད་ཀྱི་ངག་བསྒྱུར། ཤིན་ཏུ་སྤྲོས་པ་མེད་པའི་དབང་གིས་སེམས་བསྒྱུར། རབ་ཏུ་སྤྲོས་པ་མེད་པའི་དབང་གིས་ལུས་ངག་སེམས་ཐ་དད་དུ་འཛིན་པ་བསྒྱུར་བའོ། །གང་བསྒྱུར་ན་ལུས་སངས་རྒྱས་ཐམས་ཅད་ཀྱི་སྐུར་བསྒྱུར། ངག་གསུང་དུ། ཡིད་ཐུགས་སུ་བསྒྱུར། གང་གིས་བསྒྱུར་ན་རྟེན་གྱི་གང་ཟག་དབང་བཞི་རྫོགས་པར་བྱས་པ་དེས་བསྒྱུར། གང་གི་ཕྱིར་བསྒྱུར་ན་འཁྲུལ་པ་རྟོག་པ་གཅད་པའི་ཕྱིར་བསྒྱུར། བསྒྱུར་བའི་དགོས་པ་ནི། སངས་རྒྱས་ཀྱི་འབྲས་བུ་ཆུད་མི་ཟ་བར་བྱེད་པའོ། །ཞེས་ལུས་ངག་སེམས་ཀྱི་རྟགས་རྫོགས་པ་དམ་ཚིག་དང་དབང་ལས་བྱུང་བ་བསྟན་པ་སྟེ། དེ་དག་གིས་ནི་རྟགས་དང་ལྡན་པའི་སྐྱེས་བུ་ལ་ཡོན་ཏན་གྱི་རྣམ་པར་བཞག་པ་སྤྱི་དོན་གསུམ་པ་བསྟན་ནོ། །ད་ནི་སྤྱི་དོན་བཞི་པ་གལ་ཏེ་རྟགས་དང་མི་ལྡན་ན་མན་ངག་ཕྱིན་ཅི་ལོག་ཏུ་འགྱུར་བའི་སྐྱོན་བསྟན་པ་ལ། གསུམ་གྱིས་བསྟན་པའི་དང་པོ་ཡིད་དཔྱོད་ཀྱི་སྐྱོན་དུ་གྱུར་པ་བསྟན་པ་ནི། འདི་ལྟར་རྟགས་དང་མི་ལྡན་པར་ཞེས་པ་ལ་སོགས་པས་བསྟན་ཏེ། གཞུང་འདི་ནས་བཤད་པ་འདི་ལྟར་གང་ཟག་རྟགས་དང་མི་ལྡན་པར་ངས་ལྟ་བ་རྟོགས་ཟེར་བའམ། བསྒོམ་པ་བཟང་པོ་ཡོད་ཟེར་བ་རྣམས་ནི། བརྫུན་དུ་སྨྲ་བ་ཡིན་ཏེ། རང་གི་སྣང་བ་གདེང་དུ་མ་ཚུད་པ་ནི། རྟགས་མེད་པར་ལྟ་བ་རྟོགས་པར་ཁས་ལེན་པའི་རྟེན་གྱི་གང་ཟག་གང་ཞིག་གིས་ངས་ནི་ལྟ་བ་རྟོགས་པས་ཅི་བྱས་ཀྱང་མི་སྟོ་ཟེར་ནས་ཁས་ལེན་པ་དེ་ནི། ཡིད་ཀྱིིས་ཕྱོགས་གཅིག་ཏུ་སྤྱོད་པ་ཡིན་པས་འདི་རྣམས་ནི་ཡིད་ལ་ཡིན་སྙམ་པ་ལས། དངོས་པོ་མངོན་སུམ་དུ་མ་མཐོང་བས་ཕྱལ་བ་ཡིད་དཔྱོད་ཀྱི་ལྟ་བ་ཡིན་པས། འདི་ནི་འཁོར་བའི་ས་བོན་འདེབས་པར་བྱེད་པ་ལ་འདི་ལས་ལྷག་པ་མེད་དོ། །དེ་བཞིན་དུ་རྟགས་མེད་པར་ང་ལ་བསྒོམ་པ་ཡོད་ཟེར་བ་ནི། ཡིད་དཔྱོད་ཀྱི་གླེན་བསྒོམ་བྱེད་པ་ཡིན་ཏེ། འདིས་ནི་མི་རྟོགས་པའི་ཡེ་ཤེས་རང་གི་རྒྱུད་ལ་སྐྱེ་བར་ནི་མི་འགྱུར་བར་སླར་འཁོར་བར་འཆིང་བར་བྱེད་པའོ། །འདི་ཀུན་ཡིད་དཔྱོད་ཀྱི་ལྟ་བསྒོམ་ཡིན་པས་སངས་རྒྱས་ཀྱི་ས་ལ་འགྲོ་བར་ཡང་། ཡིད་དཔྱོད་ཀྱི་ལྟ་བསྒོམ་པ་མན་ངག་ཕྱིན་ཅི་ལོག་པ་འདི་ཉིད་ཡིན་པས་གྲོལ་བར་ནུས་པ་མ་ཡིན་ཏེ། འཁོར་བ་ཉིད་ལ་ཡུན་རིང་པོར་གནས་ནས། ཐ་མ་སེམས་ཅན་དམྱལ་བའི་གནས་སུ་མི་འདི་ནི་གནས་པ་སྟེ། སྔོན་དུ་མན་ངག་ལོག་པའི་དབང་གིས་སོ། །ཞེས་ལྟ་བསྒོམ་ཡིད་དཔྱོད་དུ་གྱུར་པའི་སྐྱོན་བསྟན་ནས། ད་ནི་ཐུན་མོང་རྒྱུའི་སྐྱོན་དུ་གྱུར་པ་བསྟན་པ་ནི། ལུས་ངག་ཡིད་ཀྱི་རྟགས་ཀུན་ནི། །ཞེས་པ་ལ་སོགས་པས་བསྟན་ཏེ། ལུས་ཀྱི་རྟགས་འགའ་ཙམ་དང་། ངག་དང་ཡིད་ཀྱི་རྟགས་ཀུན་ནི་སྐྱེས་བུ་གཅིག་ལ་འགའ་ཙམ་བྱུང་བའི་སྐྱེས་བུ་ནི། ཡང་དག་པར་རྫོགས་པའི་སངས་རྒྱས་ཀྱི་ས་ལ་རྣམ་པར་གྲོལ་བའི་ཡེ་ཤེས་མཐོང་བ་མ་ཡིན་ཏེ་འདིས་ནི་འཇིག་རྟེན་འདིའི་ཐུན་མོང་གི་དངོས་གྲུབ་ཐོབ་པའི་རྟགས་ཡིན་པས་ན། ཐེག་པ་ཐུན་མོང་པ་རྣམས་ཀྱི་ས་དང་ལྷན་ཅིག་སྤྱོད་པའི་ཕྱིར་ན། སྐྱེས་བུ་དེ་ལ་ལུས་ཀྱི་རྟགས་འགའ་ཙམ་བྱུང་ན། འདིས་དང་པོ་མིའི་ལུས་ཕལ་པ་དེ་ནས་མི་ལུས་ཁྱད་པར་ཅན་རིམ་གྱིས་ཐོབ་ནས་ཉན་ཐོས་ཀྱི་ས་ལ་གནས་པའོ། །ཡང་དག་གི་རྟགས་འགའ་ཙམ་བྱུང་བ་ནི། རང་སངས་རྒྱས་ཀྱི་ས་ལ་གནས་པའོ། །དེ་བཞིན་དུ་ཡིད་ཀྱི་རྟགས་འགའ་ཙམ་བྱུང་ན་རིག་པ་འཛིན་པའི་རྣལ་འབྱོར་གྱི་དབང་ཕྱུག་ཏུ་འདི་ནས་གྱུར་ནས། རྒྱུ་དང་ལས་ཀྱི་རྩལ་སྦྱངས་པའི་དབང་གིས་ནི་རིམ་གྱིས་ཉན་ཐོས་དང་། རང་རྒྱལ་དང་རིག་འཛིན་གྱི་ས་ལ་ཡང་དག་པར་སྐྱེ་བུ་འདི་ཉིད་དེའི་ས་སྟེ་ཉན་ཐོས་ཀྱི་ས་དང་། དཀར་པོ་རྣམ་པར་མཐོང་བའི་ས་དང་། རིགས་ཀྱི་དང་། བརྒྱད་པའི་དང་། རྒྱུན་དུ་ཞུགས་པའི་ས་དང་། ཕྱིར་འོང་བའི་ས་དང་། ཕྱིར་མི་འོང་བའི་ས་ལ་རིམ་གྱིས་གནས་པས་དང་། རང་རྒྱལ་བའི་ས་ནི་ལམ་བརྟེན་པ་དང་མི་བརྟེན་པ་ལ་གནས་པ་དང་། རིག་འཛིན་པའི་ས་ནི་ཚེ་ལ་དབང་བའི་རིག་འཛིན་གྱི་ས་དང་། ལྷུན་གྱིས་གྲུབ་པའི་དང་། རྣམ་པར་སྨིན་པའི་དང་། ཕྱག་རྒྱ་ཆེན་པོའི་རིག་འཛིན་གྱི་ཚོགས་ཆེན་རྫོགས་པ་ལ་ཞུགས་ནས་གནས་པ་ཡིན་ཏེ། རྟེན་གྱི་གང་ཟག་འདི་ལ་ཆོས་ཉིད་རྣམ་པར་དག་པ་རང་བཞིན་རྫོགས་པ་ཆེན་པོའི་འབྲས་བུ་རྣམ་དག་ཡེ་གྲོལ་དུ་རྟོགས་པ་ནི་མེད་པས། དེའི་ཕྱིར་ན་རྣལ་འབྱོར་པ་འདིས་རང་གི་ཆོས་ཉིད་ཀྱི་སྣང་བ་བདེ་ལུགས་སུ། འདི་ཡིས་ཟིན་པ་མ་ཡིན་ནོ། །དེའི་ཕྱིར་ན་རྣམ་པ་དང་ནི་ཡུལ་དང་ཡུལ་ཅན་གྱི་རྟོག་པ་དུ་མ་དང་། མཚན་མ་བདག་ཏུ་འཛིན་པའི་ཆ་དང་། བཅས་པའི་འཁྲུལ་པ་སྣང་བ་ཡང་དག་ཏུ་འཛིན་པའི་ཆ་ནི་མེད་ལ། འཁྲུལ་པའི་ཞེན་པ་རྒྱུན་ནི་མ་སྤོངས་ཏེ། འཁྲུལ་བའི་འཁོར་ལོ་སྐྱེ་བ་ཐ་དད་དང་བཅས་པ་ལ་གང་ཟག་འདི་ཀུན་སྤྱོད་པའོ། །ཞེས་རྒྱུ་ཐུན་མོང་དུ་གྱུར་པའི་སྐྱོན་བསྟན་ནས། ད་ནི་རིག་པ་མངོན་གསུམ་གྱི་དོན་ཉམས་སུ་བླངས་པའི་ལུས་ངག་ཡིད་གསུམ་ལ་རྟགས་དེ་དག་འབྱུང་བར་ངེས་པའི་ཚིག་གིས་ལ་བཟླ་བར་བསྟན་པར་ནི། གང་གིས་ལུས་ངག་ལྡན་པ་ཡི། །ཞེས་པ་ལ་སོགས་པས་བསྟན་ཏེ། གང་གི་ནི་རྣལ་འབྱོར་བ་གང་ཞིག་གི་ལུས་དང་ངག་དང་ཡིད་ཀྱི་རྟགས་དང་ལྡན་པའི་སྐལ་ལྡན་དེ་ལ། ལུས་ངག་ཡིད་གསུམ་གྱི་རྟགས་ནི་གཅིག་ཀྱང་མ་ལུས་པར་རྫོགས་པའི་སྐྱེས་བུ་ནི། མཉམ་པ་ནི་རྒྱ་མ་ཆད་པར་སངས་རྒྱས་དང་སེམས་ཅན་དུ་མཉམ། ཕྱོགས་སུ་མ་ལྷུང་སྟེ་ཡོད་མེད་རྟག་ཆད་དུ་འཛིན་པ་མེད་པས་འཁོར་འདས་མཉམ་པ་དང་། བྱ་བྱེད་འབད་རྩོལ་མེད་པས་ཆོས་ཉིད་ཡེ་ནས་གྲོལ་བས་ཕྱོགས་ཐམས་ཅད་དུ་ཤར་བས་རྟོགས་མ་རྟོགས་མཉམ་པ་དང་། འདི་ཉིད་རིས་སུ་མ་ཆད་དེ་ངོ་བོ་ལ་བཟང་ངན་མེད་པས་མཐོ་རིས་དང་ངན་སོང་དུ་མཉམ་པ་དང་། གཞན་འབྱུང་དུ་མ་ཡིན་རང་བྱུང་གི་ཡེ་ཤེས་རང་ལ་ཤར་བས་བསྒོམས་མ་བསྒོམས་མཉམ་པ་སྟེ། དེའི་ཕྱིར་ན་རྟོགས་པ་རོལ་པ་རང་ཤར་ལ། མ་རྟོགས་གནས་སུ་རང་གྲོལ། རྟོགས་མ་རྟོགས་གཉིས་སུ་མེད་པ་དེ་ངོ་བོ་རང་དག་པའོ། །དེ་བཞིན་དུ་འཁོར་བར་སྣང་བ་རོལ་པ་རང་ཤར། ཤར་བ་མྱང་འདས་ཏེ་གནས་ལུགས་སུ་རང་གྲོལ། འཁོར་འདས་གཉིས་མེད་དེ་ངོ་བོ་རང་དག་པའོ། །དེ་ལྟར་ཀུན་ཤེས་པར་བྱའོ། །དེ་ལྟར་མི་མཉམ་པ་མེད་པས་མཉམ་པ་ཉིད་མཐའ་གྲོལ་ཡོངས་རྫོགས་ཆེན་པོའི་ས་ནི། ཉན་ཐོས་དང་རང་རྒྱལ། རིག་འཛིན་གྱི་ས་མ་ཡིན་པ། ཆོས་ཉིད་ལ་འཕོ་འགྱུར་མེད་པའི་ས་བྱས་བཅོས་དང་འབད་རྩོལ་དུ་མེད་པའི་ཡང་དག་པའི་ས་ལ་ཡང་དེ་ལྟར་རྟགས་རྫོགས་པའི་སྐལ་ལྡན་འདི་ཀུན་འགྲོའོ་མཁའ་འགྲོ་མ། ཞེས་སྡུད་པ་པོ་ལ་ངེས་པར་གདམས་པ་དང་བཅས་པའི་ཚིག་གིས་བོས་ནས། དེ་རྟགས་རྫོགས་པ་དེ་དང་པོ་རྒྱུ་གང་ལས་བྱུང་ན། བླ་མའི་མན་ངག་ཕྱིན་ཅི་མ་ལོག་པ་དེ་གོམས་པར་བྱས་པ་ལས་བྱུང་བས་ན། གཏན་ཚིགས་དེའི་ཕྱིར་ན་དབྱིངས་རྣམ་པར་དག་པའི་སྒྲོན་མ་དང་། རིག་པ་རྡོ་རྗེ་ལུ་གུ་རྒྱུད་ཀྱི་སྐུ་ལ་ཡང་ནས་ཡང་དུ་གོམས་པར་གཅེས་ཏེ། ཉམས་སུ་ལེན་པ་བར་མ་ཆད་པ་སྔོན་དུ་གལ་ཆེ་བས་ན། དབྱིངས་ཆོས་ཉིད་ཀྱི་ཡུལ་ཡིན་པ་དང་། རིག་པ་ཆོས་ཉིད་རང་གི་ངོ་བོ་ཡིན་པས་དེ་གཉིས་ལ་རྣལ་འབྱོར་བ་སུས་གོམས་པ་བྱས་པ་ལ། གོང་དུ་ནི་ལེའུའི་གཞུང་དུ་བཤད་པ་ནི་བཤད་པའི་ཆིངས་ཀྱིས་ཚིག་གཞན་དུ་མ་འབྱམས་པ་དང་། སྤྲོས་པ་དང་། འགྱངས་པ་དང་། འཐོར་བ་དང་། ཡས་པ་རྣམས་སུ་བསྡུས་ཏེ་བཅིངས། འགྲོལ་བར་བྱེད་པ་ཡིས་མི་ཤེས་པའི་ཚིག་བཀྲོལ། འདོམས་ཀྱིས་རྒྱུད་ཡན་མན་གྱི་ཚིག་གཅིག་གི་གཅིག་གཏེམས་ནས་བཤད་པའི་ལུས་ངག་ཡིད་ཀྱི་རྟགས་དེ་དག་རྣམས། འདོད་པ་མེད་ཀྱང་མི་འབྱུང་བ་ཉིད་ནི་སྐྱེས་བུ་དེ་ལ་མི་སྲིད་དོ། །དཔེར་ན་ནམ་ཟླ་དྲོད་བབས་པའི་དུས་ནས་རྣམས་རང་བཞིན་གྱིས་དྲོས་ནས་ཆབ་རམ་ལ་སོགས་པ་རང་བཞིན་གྱིས་ཞུ་བ་ནི། སྐྱེས་བུས་འདོད་ནས་བྱས་པ་མ་ཡིན་ཏེ། རང་བཞིན་སུས་ཀྱང་དགག་པར་མི་ནུས་པར་རང་འབྱུང་བ་དང་འདྲ་བར། བུད་མེད་སྦྲུམ་མ་ཟླ་བ་རྫོགས་ནས་སུས་ཀྱང་དགག་པར་མི་ནུས་པར་བུས་པ་སྐྱེ་བ་དང་འདྲ་བར་དང་། དཔེར་ན་ས་བོན་བཏབ་ནས་ཆུ་ལུད་ཀྱིས་སྟོན་གྱི་ལོ་ཐོག་ཏུ་ཚོད་རྫོགས་ནས་འབྲས་བུ་རང་སྨིན་པ་ནི་སུས་ཀྱང་དགག་པར་མི་ནུས་པར་འབྲུ་སྨིན་པ་དང་འདྲ་བར། རང་རིག་མངོན་གསུམ་གྱི་དོན་ལ་བརྟེན་ནས་ཉམས་སུ་བླངས་པའི་རྟགས་ཚད་ནི་འདོད་པ་མེད་ཀྱང་། རང་གི་རང་བཞིན་གྱིས་མི་འདོད་ཀྱང་འབྱུང་བར་ངེས་པ་ཡིན་ནོ། །ཞེས་རིག་པ་མངོན་གསུམ་གྱི་དོན་ཉམས་སུ་བླངས་པའི་རྣལ་འབྱོར་པ་ལ་རྟགས་དེ་དག་འབྱུང་བར་ངེས་པ་ལ་བཟླ་བ་དང་བཅས་པ་བསྟན་ཏེ། དེ་དག་ཧྲིལ་གྱིས་དྲིལ་བས་ནི། གལ་ཏེ་རྟགས་དང་མི་ལྡན་ན་མན་ངག་ཕྱིན་ཅི་ལོག་ཏུ་གྱུར་པའི་སྐྱོན་བསྟན་པའོ། །དེ་དག་གིས་ལེའུའི་གཞུང་བསྟན་ནས། ལེའུའི་མཚན་བསྟན་པ་ནི། ཞེས་གཞུང་ཚིག་དང་ཡི་གེར་བཅད་པ། སྐུ་སྔོན་དུ་འགྲོ་བ་རྣམ་པ་གསུམ་སྦྱངས་པའི་རྟགས་བསྟན་པ་དང་། གདུང་ནི་དངོས་གཞི་ཟག་པ་མེད་པའི་ཡེ་ཤེས་ཀྱི་དོན་ཉམས་སུ་བླངས་པ་ལས་བྱུང་བའི་རྟགས་བསྟན་པ་དང་། འབར་བ་དེ་ལྟར་རྟགས་མ་བྱུང་ན་ལྟ་སྒོམ་ཕྱིན་ཅི་ལོག་ཏུ་སོང་བའི་རྟགས་བསྟན་པ་དང་། ཆེན་པོ་དེ་དག་ལ་ལ་བཟླ་བའོ། །རྒྱུད་ལས་ནི། ལུས་དང་། ངག་དང་། ཡིད་ལས། སྐལ་ལྡན་གྱི་སྐྱེས་བུ། གོམས་པ་མཐར་ཕྱིན་པ་དང་། རྟོགས་པ་མཐར་ཕྱིན་པ་རྣམས་ལ་ལུས། སངས་རྒྱས་ཐམས་ཅད་ཀྱི་སྐུར་གྲོལ་བའི་རྟགས་དང་། ངག་གསུང་དང་། སེམས་ཀྱི་རྟགས་ཀྱིས་སངས་རྒྱས་ཐམས་ཅད་ཀྱི་ཐུགས་སུ་གྲོལ་བའི་རྟགས་དང་ད་ལྟའི་ལུས་ངག་སེམས་ལ་ཇི་ལྟར་བྱུང་བསྟན་པའོ། །ལེའུ་སྟེ། ཆོས་ཀྱི་སྡེ་རྣམ་པར་བཅད་པའོ། །གཉིས་པའོ་ནི་གཅིག་ལས་གཞན་དུ་གྱུར་པའི་གྲངས་ཀྱི་རྣམ་པའོ། །ད་ནི་ལེའུ་གསུམ་པའི་ཚིག་དོན་འཕྲེང་བ་རྣམས་པར་བཀོད་པའོ། །ལེའུ་འདི་ལ་བསྡུས་པའི་དོན་རྣམ་པ་གཉིས་ཏེ། དྲིས་ལན་མདོར་བསྟན་པ་དང་། ལན་རྒྱས་པར་བཤད་པའོ། །མདོར་བསྟན་པ་ལ་གཉིས་ལས། དྲི་བ་སྤྱིིའི་རྣམ་པར་འདོད་པ་གཞུང་དུ་དྲིས་པ་བསྟན་པ་ནི། དེ་ནས་རྡོ་རྗེ་རིགས་ཀྱི་ཡང་། །ཞེས་པ་ལ་སོགས་པས་བསྟན་ཏེ། དེ་ནས་ནི་ལེའུ་གཉིས་པ་སྟོན་པས་གསུངས་མ་ཐག་པའི་དེ་ནས། རྡོ་རྗེ་སྟོང་ཉིད་སྐྱེ་འཇིག་དང་བྲལ་བ། རིགས་དེ་ཉིད་ལས་བྱུང་ཞིང་དེ་ལྟར་སྟོང་པ་ཉིད་ཀྱི་སྡེའམ་མཚན་ནོ། །ཀྱེ་འབྲེལ་བ་མཚན་པ་སྟེ་དེ་ལྟར་སྟོང་པ་ཉིད་སྐྱེ་འཇིག་དང་བྲལ་བའི་སྡེ་ཚན་ནམ་རིགས་ལས་བྱུང་བའི་མཁའ་འགྲོ་མ་འདིའི་མིང་གསལ་བའི་ཡིད་ཅན་མ་ཞེས་བྱ་བ་འབྲས་བུ་གསང་སྔགས་ཀྱི་སྡུད་པོར་བྱུང་བ་དེ་ཉིད། གོང་དུ་ལེའུ་གསུམ་པའི་རྟགས་བསྟན་པས། དེའི་དོན་རྒྱུད་ལས་སྐྱེས་པས། འཁོར་བ་ལ་རབ་ཏུ་མི་འཇིགས་པ་བཞིའི་གདེང་རྙེད་དེ། སྣང་བ་ལ་ཕྲ་རགས་ཀྱི་དྲི་མ་མེད་པར་རྟོགས་པས་ཡོད་མེད་དངོས་པོའི་སྣང་བས་མི་འཇིགས་པ་དང་། རང་རྒྱུད་ལ་སྒྲིབ་པ་གསུམ་རང་དག་པར་རྟོགས་པས་ཉོན་མོངས་པ་མི་འཇིགས་པ་དང་། དེ་ལྟར་སྣང་བ་དང་ཉོན་མོངས་པས་མི་འཇིགས་པས་རང་རྒྱུད་ཡེ་ནས་སངས་རྒྱས་པར་རྟོགས་པས་འཁོར་བའི་འཇིག་པ་མེད་པ་དང་། དེ་ལྟར་འཁོར་བ་ཉིད་ཡེ་སངས་རྒྱས་པར་མཐའ་གྲོལ་ཡོངས་རྫོགས་ཀྱི་ལྟ་བ་རྟོགས་པས་ན། མཁའ་འགྲོ་མ་དེ་ལ་རང་བཞིན་རྫོགས་པ་ཆེན་པོའི་རྟགས་དང་ལྡན་པར་མཁའ་འགྲོ་མ་དེ་གྱུར་ནས་ནི་མཁའ་འགྲོ་མ་དེ་ཉིད་རང་གི་ཆོས་ཉིད་དྲི་མ་མེད་པའི་མིག་རྣམ་པར་དག་པའི་རྡུལ་དང་བྲལ་བ་ཉིད་ཀྱང་། སྔར་མ་རྟོགས་ཤིང་མ་རྙེད་པ་ལོང་བ་དང་འདྲ་བ་སྟེ། རང་སྣང་ངོ་མ་ཤེས་པ་ལས། སྨན་པས་ལོང་བའི་མིག་ཕྱེ་བས་ཕྱེད་པ་དང་འདྲ་བར་སྟོན་པས་གསུངས་པས་སྔོན་འབྱུང་དུ་མཁའ་འགྲོ་མའི་མིག་དུས་འདིར་ཕྱེད་པས་ཡེ་ཤེས་ཀྱི་མིག་གིས་ཆོས་ཉིད་རྣམ་པར་དག་པའི་སྣང་བ་མཐོང་ལ། རྗེས་འཇུག་ཏུ་སློབ་མས་སྔར་འཁོར་བར་ཡུན་རིང་དུ་གནས་ཀྱང་མ་རིག་པའི་མིག་མ་ཕྱེད་པ་སྟེ། དུས་འདི་ཉིད་དུ་བླ་མ་ཕྱིན་ཅི་མ་ལོག་པ་དང་། མན་ངག་ཕྱིན་ཅི་མ་ལོག་པ་དང་། བདག་ཉིད་ཀྱི་རང་རྒྱུད་ཕྱིན་ཅི་མ་ལོག་པ་གསུམ་དུས་འཛོམ་པས་ཡེ་ཤེས་ཀྱི་མིག་ཏུ་ཕྱེད་པས་ཆོས་ཉིད་མངོན་གསུམ་གྱི་སྣང་བ་མཐོང་བའོ། །དེ་ལྟར་ཡེ་ཤེས་ཀྱི་མིག་ཕྱེད་པས་སྔོན་འབྱུང་དུ་སྡུད་པ་པོ་དེ་དྭངས་པའི་དད་པ་དང་ལྡན་ཞིང་སྟོན་པ་ལ་མགུ་བའི་སེམས་སྐྱེས་ནས། རྒྱུད་ཀྱི་སྟོན་པ་རྡོ་རྗེ་འཆང་ལ་ཚིག་འདི་སྐད་ཅེས་གསོལ་ཏེ། རྗེས་འཇུག་དུ་སློབ་མ་ཡེ་ཤེས་ཀྱི་མིག་རྙེད་ནས། དྭངས་པའི་དད་པ་སྐྱེས་ནས་བླ་མ་ལ་མགུ་བའི་སེམས་སྐྱེས་ནས་བླ་མ་ལ་མོས་པ་ཐུན་མོང་མ་ཡིན་པ་སྐྱེས་པའོ། །ཀྱེ་ཀྱེ་སྟོན་པ་རྡོ་རྗེ་འཆང་ཞེས་རང་གཞན་གྱི་དོན་མཐར་དབྱུང་བའི་ཕྱིར་བོས་ནས། སྔར་གྱི་གོང་དུ་ལེའུ་གཉིས་པའི་རྟགས་དེ་དག་ད་ལྟ། བསྒོམས་ཤིང་བསྒྲུབས་པའི། རྣལ་འབྱོར་པ་སྐལ་པ་དང་ལྡན་པའི་ལུས་དང་ངག་དང་སེམས་ལ། རྟགས་ནི་དེ་ལྟར་ལེའུ་གཉིས་པར་གསུངས་པ་དེ་ལྟར་འབྱུང་བ་ལ་གནས། ཡང་རྣལ་འབྱོར་པ་སྐལ་པ་དང་ལྡན་པ་ཞིག་གིས། སྙིང་པོ་ངེས་པའི་དོན་འདི་རྙེད་ནས། འཇིག་རྟེན་འདིའི་ལེ་ལོས་གཡེངས་ནས་ཚེ་འདི་ཉིད་ལ་གོམས་པ་མཐར་ཕྱིན་པ་ནི་མ་ནུས། གོམས་པའི་གདེང་ཙམ་ཞིག་ཡོད་པ་ལ་ཡེ་ཤེས་དང་དབྱིངས་དང་རིག་པ་ལ་གོམས་པ་ཀློང་དུ་མ་གྱུར་པས་སྣང་བ་འདི་ཉིད་ལ་མ་དག་ན། རྣལ་འབྱོར་པ་གང་ཞིག་གིས་ད་ལྟ་རིག་པ་མངོན་གསུམ་ལ་འབྱོངས་པ་མཐར་ཕྱིན་པའི་རྟགས་མེད་པ་དང་། འོན་ཏེ་སྐལ་བ་དང་ལྡན་པ་དེ་ད་ལྟའི་སྣང་བ་འདི་ཉིད་ལ་གོམས་པར་བྱེད་པའི་དུས་སུ་ཉམས་སུ་མྱོང་བ་བག་ཙམ་ནི་ཡོད། མཐར་ནི་མ་ཕྱིན་པའི་དུས་ན་རྣལ་འབྱོར་པ་ལུས་ནི་འབྱུང་བ་བཞི་ལས་གྲུབ་པ་སྟེ། དེ་ཡང་འབྱུང་བ་ཆུས་བསྡུས་པས་ཕུང་པོ་ཚོགས་པའི་ཆོས་རྣམས་བསྡུས། དེ་ལྟར་ཆུས་བསྡུས་པ་དེས་ས་སྲ་ཞིང་གནས་པར་བྱས་ཏེ་རྡུལ་དང་རྡུལ་ཕྲན་གྱི་མཚན་ཉིད་དང་ལྡན་པར་བྱས། མེས་སྨིན་ཅིང་སོ་སོ་ནས་གསལ་བར་བྱས། དེ་ལྟར་སྨིན་ཅིང་གསལ་བ་དེ་རླུང་གིས་སོ་སོར་མ་འདྲེས་པར་ཕྱེས་ཏེ་དེ་ལས་སོ་སོར་བསྐྱེད་པས་ན། ད་ལྟ་ཡང་སྨིན་པའི་ལུས་མི་འདྲ་བ་ཐ་དད་པ་ནི། ཆུའི་འབྱུང་བ་ཤས་ཆེ་བས་ཉེ་བར་ལེན་པ་ཉེར་ལྔ། མེ་ཉེར་ལྔ། ས་ཉེར་ལྔ། རླུང་ཉེར་ལྔ་སྟེ་བརྒྱ་ཐམ་པ། ཆུའི་ཆུ་ལ་ཉེར་ལྔ། ཆུའི་མེ་ལ་ཉེར་ལྔ། ཆུའི་ས་ལ་ཉེར་ལྔ། ཆུའི་རླུང་ལ་ཉེར་ལྔ་སྟེ་བརྒྱ་ཐམ་པ། དེ་བཞིན་དུ་ཕྱེ་བས་ས་ལ་ཡང་བརྒྱ། མེ་ལ་བརྒྱ། རླུང་ལ་བརྒྱ་སྟེ་བཞི་བརྒྱར་སྨིན་པ། ཐོག་མར་ཡང་འབྱུང་བས་སྐྱེད། བར་དུ་ཡང་འབྱུང་བས་སྨིན་པ་ལ་གནས། ཐ་མ་ཡང་འབྱུང་བ་བྱེད་པའི་ལས་འགྱུར་བས་འཇིག་པ་ཡིན་པས། རྣལ་འབྱོར་པ་ཉམས་སུ་ལེན་པ་འདིའི་དུས་ན་འབྱུང་བའི་བྱེད་པའི་ལས་བྱེར་བ་དང་ཟུག་པ་སྙོམས་པ་དང་གསུམ་བྱེད་པའི་ལས་མི་མཐུན་པ་ལས། དེ་ཡང་ཆུ་དང་ས་དང་མེ་དང་རླུང་གང་གིས་བསྐྱེད་ཀྱང་འབྱུང་བའི་བྱེད་པའི་ལས་བཅུ་གཉིས་ཀྱིས། ཆུའི་ཟུག་པ་དང་བྱེར་བ་དང་སྙོམས་པ་དང་གསུམ། དེ་བཞིན་དུ་མེ་ལ་གསུམ། ས་ལ་གསུམ། རླུང་ལ་གསུམ་སྟེ་བཅུ་གཉིས། འབྱུང་བ་ནམ་མཁའ་ནི་མ་ནིང་གི་འབྱུང་བ་ཡིན་པས་བྱེད་པའི་ལས་ཕྱིར་མི་སྣང་སྟེ་སྟོང་པའི་ཕྱིར་རོ། །དེ་ཡང་ལུས་དེ་དག་གཙོ་ཆེ་བ་ལ་སྐྱེད་པ་གཅིག་ཡིན་ཀྱང་། ཆུའི་ལུས་གཅིག་པོ་ལ་ཉེ་བར་མཚོན་ཏེ། ཆུའི་ལུས་བཞི་ནི། ཆུ་རང་གི་ཟུག་པ་ཡི་ནི་འབྱུང་བའི་ཉི་མ་དང་། སོ་སོའི་ལོ་དང་། ཟླ་བ་དང་། དུས་ཚོད་དང་བཞི་མ་འཁྲུལ་པ་ལ་རྣལ་འབྱོར་པ་དེ་ལ་གནད་ཀྱིས་བཏབ་པར་གྱུར་ན་ནི། དེ་ནས་འབྱུང་བའི་བྱེད་ལས་རྫོགས་པའི་ཞག་བཅུ་གཉིས། འབྱུང་བ་རང་ནི་སོ་སོ་སྨིན་པའི་ཉི་མ་དང་བཅུ་གསུམ་གྱི་རང་གི་དུས་མ་འཁྲུགས་པ་ལ། སྐྱེས་བུ་དེ་ཚེའི་འདུ་བྱེད་དུ་གྱུར་ནས། རྡོས་བཅས་ཟག་པའི་ཕུང་པོ་ལྔའི་རྒྱུ་དང་། རྐྱེན་ལས་གྲུབ་པ་ནི། གཟུགས་ཀྱི་ཕུང་པོ་འབྱུང་བ་ཕྲ་རགས་འདུས་པ་དང་། ཚོར་བའི་ཕུང་པོ་སྡུག་བསྔལ་ཕྲ་རགས་འདུས་པ་དང་། འདུ་ཤེས་ཀྱི་ཕུང་པོ་འགྱུ་བ་ཕྲ་རགས་འདུས་པ་དང་། རྣམ་པར་ཤེས་པའི་ཕུང་པོ་འཚོགས་པ་ཕྲ་རགས་འདུས་པ་དང་། འདུ་བྱེད་ཀྱི་ཕུང་པོ་ཉོན་མོངས་པ་ཕྲ་རགས་འདུས་པ་རྣམས་ལས་ལུས་ཞེས་བྱ་བར་མིང་དུ་ཐོག་པ། དེ་ཡང་གང་ལུས་ན་འབྱུང་བ་ཕྲ་རགས་ལས་གྲུབ་པའི་ཕུང་པོ་ལུས། གང་ལ་ལུས་ན་ཕྱིའི་འབྱུང་བ་རགས་པ་ལ། ལུས་གང་དང་བྲལ་ན་ལུས་དང་སེམས་བྲལ་སྟེ། སེམས་ཆོས་ཉིད་ཀྱི་བར་མ་དོ་ལ་སོང་། ལུས་འབྱུང་བ་ལ་ཕྱིར་ལུས་པའོ། །ཅིའི་ཕྱིར་ལུས་ན་འབྱུང་བའི་བྱེར་ཟུག་ནམ་མཐུན་པས་ལུས་ཀྱི་འབྱུང་བ་འཁྲུགས་ཏེ་ལུས་ཀྱི་རྟེན་ཕུང་པོ་ལྔའི་རྟེན་འགྱེལ་ཏེ་ས་ས་ལ་ཐིམ། ཆུ་ཆུ་ལ་ཐིམ། མེ་མེ་ལ་ཐིམ། རླུང་རླུང་ལ་ཐིམ། རླུང་རྣམ་པར་ཤེས་པ་ལ་ཐིམ། རྣམ་པར་ཤེས་པ་ནམ་མཁའ་ལ་ཐིམ། ནམ་མཁའ་འོད་གསལ་ལ་ཐིམ། འོད་གསལ་ཟུང་འཇུག་ལ་ཐིམ། ཟུང་འཇུག་གཉིས་སུ་མེད་པ་ལ་ཐིམ་པར་འགྱུར་བས། སྐྱེས་བུ་དེ་བར་ཆོད་ཀྱི་དབང་དུ་གྱུར་པས་ཚེ་འདི་ཉིད་ལ་རིག་པའི་གདེང་མ་རྙེད་པས། ལུས་ཀྱི་འབྱུང་བ་བཞི་རང་སར་མ་དག་པར་གྱུར་ནས། ཚེ་འདི་ལ་གོང་མའི་རིག་པ་མངོན་གསུམ་གྱི་མན་ངག་དེ་གོམས་པའི་ལོང་མེད་པར་བར་ཆོད་ཀྱི་དབང་དུ་གྱུར་པའི་དུས་སྐལ་བ་དང་ལྡན་པ་ལ། རྟོགས་པ་བག་ཙམ་ནི་སྐྱེས་གོམས་གདེང་དུ་མ་གྱུར་པའི་མི་དེའི་ཕུང་པོ་ལྷག་མ་འབྱུང་བ་ཟག་པའི་ཕུང་པོ་ལ། རིག་པ་མི་གནས་པར་གྱུར་པའི་ན། ཕྱི་རྟགས་ཇི་ལྟར་འབྱུང་བ་ལགས། ཡང་ནང་རྟགས་ཀྱང་མེད་ལ་འདི་མི་གྲོལ་བར་འཁོར་བའི་ལམ་ལ་ཡུན་རིང་བར་གནས་པ་ལགས་སམ། འདི་ཀུན་བདག་གིས་མ་འཚལ་བས་ཇི་ལྟར་འགྱུར་བ་ལགས། འདི་དག་ཀུན་སྟོན་པས་བདག་ལ་ཡང་དག་པར་ཐུགས་ཀྱི་དཀྱིལ་ནས་སྙིང་པོ་གསང་བའི་བཅུད་ཕྱུང་ལ། བདག་ལ་འདིའི་ཆོས་ཀུན་ཡང་དག་པར། རྒྱུད་ཀྱི་སྟོན་པ་ཐུགས་རྗེ་གསུམ་མངའ་བ་ཆེན་པོ་ཡིས། བདག་ལ་རིག་པ་ཇི་ལྟ་བ་བཞིན་དུ་མ་ནོར་བར། བཀའ་སྩལ་ལ་ཕྱིན་ཅི་མ་ལོག་པར་ཞུའོ་བཅོམ་ལྡན་འདས། ཞེས་སྡུད་པ་པོས་དྲིས་པ་མདོར་བསྟན་ནས། ད་ནི་སྟོན་པས་ལན་མདོར་བ སྟན་པ་ནི། དེ་ནས་སྟོན་པ་རྡོ་རྗེ་འཆང་ཞེས་པ་ལ་སོགས་པས་བསྟན་ཏེ། དེ་ནས་ནི་ཞུས་མ་ཐག་པའི་དེ་ནས། སྟོན་པ་ལ་ཡོན་ཏན་ཁྱད་པར་ཅན་གྱི་སྒོ་ནས་བོས་པ། རྡོ་རྗེ་ནི་དོན་ཆོས་ཉིད་ཀྱི་རྟགས། འཆང་བ་ནི་དོན་རྟགས་གཉིས་མེད་དུ་འཛིན་པའོ། །འདི་སྐད་གསུང་ཚིག་དང་ཡི་གེ། སྙིང་པོ་ཡང་དག་པའི་དོན་རྒྱུད་འདི་ཉིད། སྟོན་པ་དེས་ཐུགས་ཆོས་ཀྱི་དབྱིངས་ཀྱི་རང་བཞིན་ལས་མ་གཡོས་ཀྱང་། སྟོན་པ་ཡིས་ནི་གསུང་ཚངས་པའི་དབྱངས་དང་ལྡན་པ། ཐུགས་ཀྱི་དགོངས་པ་ནི་སྔོན་དུ་གཏང་ནས་ནི། ཞུ་བ་པོ་མཁའ་འགྲོ་གསལ་བའི་ཡིད་འབར་མ་ལ། གསང་སྔགས་ཀྱི་ལམ་ཉེ་བར་མཚོན་པའི་སྒོ་ནས། བོས་ཏེ་འདི་སྐད་དབང་པོའི་དོན་དང་སྦྱར་བའི་རྟགས་བཀའ་བསྩལ་ཏོ། །བོས་པ་དེ་གང་བོས་ན། ང་ལ་འཁྲུལ་པ་ཡོད་མ་མྱོང་བས་ནོར་ས་མེད་པའི་སེམས་ལས་བྱུང་བའི་ཚིག །འདི་ཁྱོད་ཀྱིས་ཀྱང་འཁྲུལ་པ་མེད་པར་ཟུང་ཞིག་ཅེས་ཉན་པ་དང་སྣ་གཏད་པར་བསྟན་ནས། སྐྱེས་བུ་བློ་རྩལ་རབ་ཉིད་ནི། འདི་ལ་བརྩོན་འགྲུས་རབ་ཏུ་གྱུར་པས། འཁྲུལ་པའི་སྣང་བ་འདི་ཉིད་ལ་རང་དག་ནས། ལུས་ཀྱི་འབྱུང་བ་བཞི་རང་གི་ས ར་དེངས་ནས་ཆོས་ཉིད་ཀ་དག་གི་ང་ོབོ་ཉིད་ཀྱི་སྣང་བ་ལ་འབྲས་བུ་ཟང་ཐལ་དུ་ཐོས་པས། འདི་ལ་ཟག་བཅས་ཀྱི་ཕུང་པོ་མི་སྣང་བར། འབྲས་བུ་རང་སངས་ཉིད་དུ་དཔེར་ན་ནམ་མཁའ་ལ་སྤྲིན་དེངས་པ་ལྟར་འགྱུར་རོ། །དེ་མ་ཡིན་པའི་བརྩོན་འགྲུས་འབྲིང་པོ་རྣམས་ལ་ཡང་། འདི་ལྟར་ཕྱིའི་རྟགས་རྣམས་འབྱུང་སྟེ་མངོན་པར་རྫོགས་པར་སངས་རྒྱའོ། །སྐྱེས་བུ་བརྩོན་འགྲུས་འབྲིང་པོ་གང་དག་མྱ་ངན་ལས་འདས་ན། དེ་ལ་སྐུ་དང་གདུང་དང་ནི། དེ་བཞིན་འོད་དང་སྒྲ་ཉིད་དང་། ས་ནི་གཡོས་པར་གྱུར་པའོ། །ནམ་མཁར་ཆར་པ་འབབ་པ་དང་། དེ་བཞིན་ཁུ་རླངས་དང་། འདི་ལྟར་རྟགས་པ་བདུན་དང་ཕྱི་ནས་འབྱུང་བ་རྣམས་ནི་མངོན་པར་རྫོགས་པར་སངས་རྒྱས་པ་དང་། འགྲོ་བ་རིགས་དྲུག་གི་སྐྱེ་གནས་ཀྱི་ཁྱད་པར་དུ་འགྱུར་བའོ། །ཞེས་ལན་མདོར་བསྟན་ནས། ད་ནི་དྲི་བ་རྒྱས་པར་བཤད་པ་བསྟན་པ་ནི། དེ་ནས་མཁའ་འགྲོ་གསལ་ཡིད་ཀྱིས། །ཞེས་པ་ལ་སོགས་པས་བསྟན་ཏེ། དེ་ནས་ནི་ལན་མདོར་བསྟན་པའི་དེ་ནས། མཁའ་ནི་མཁའ་ལ་འགྲོ་བར་བྱེད་པའོ། །མ་ཆོས་ཉིད་ལ་གནས་པའོ། །གསལ་བ་ནི་ཤེས་རབ་རྣམ་པར་དག་པས་ཆོས་དང་ཆོས་མ་ཡིན་པའི་རྣམ་པ་ཕྱིན་ཅི་མ་ལོག་པར་ཡིད་ལ་གསལ་བའི་རང་བཞིན་གྱིས་འོད་གསལ་བའོ། །སྟོན་པ་ནི་གསང་སྔགས་ཀྱི་སྲིད་ཞུ་ཁྱད་པར་ཅན་གྱི་སྒོ་ནས་འབོད་པའོ། །དེ་ལ་ནི་ཚིག་འདི་སྐད་ཅེས་ཞུས་སོ། །ཀྱེ་ཀྱེ་བཅོམ་ལྡན་འདས་དཔལ་རྡོ་རྗེ་འཆང་ཞེས་བོས་ནས། རྟེན་གྱི་གང་ཟག་རང་བཞིན་རྫོགས་པ་ཆེན་པོའི་རིགས་དང་ལྡན་པ་གཅིག་མྱ་ངན་ལས་འདས་པའི་རྟགས་སྔར་བྱེ་བྲག་ཏུ་གསུང་པའི། སྐུ་ཞེས་བགྱི་བ་ནི་ཇི་ལྟ་བུ་ལགས། དེའི་དོན་བདག་གིས་སྔར་མ་འཚལ་བས་གསུང་པར་ཞུ་ཞེས་ཀུན་ལ་སྦྱར་རོ། །དེ་བཞིན་དུ་གདུང་གི་རྣམ་པ་ནི་ཅི་ལགས། འོད་ཞེས་བགྱི་བ་གང་ལ་གསུང་པ་ལགས། དེ་བཞིན་སྒྲ་ཞེས་བགྱི་བ་ཇི་ལྟ་བུ་ལགས། ས་ནི་ཇི་ལྟར་དུ་གཡོ་བར་འགྱུར་བ་ལགས། དེ་བཞིན་ཆར་དང་ཁུ་རླངས་ཀྱི་རྣམ་པ་ཅི་ལགས། འདི་ཀུན་སྔར་མ་འཚལ་བས་སྟོན་པས་བདག་ལ་གསུང་དུ་གསོལ། ཞེས་དྲི་བ་རྒྱས་པར་བསྟན་ནས། ད་ནི་ལན་ཤིན་ཏུ་རྒྱས་པར་བཤད་པ་ལ་དོན་གཉིས་ཏེ། མྱ་ངན་ལས་འདས་པའི་རྟགས་བསྟན་པ་དང་། རིག་དྲུག་གི་སྐྱེ་གནས་ངེས་པའི་རྟགས་བསྟན་པ་ལས། དེ་ལ་མྱ་ངན་ལས་འདས་པའི་རྟགས་དང་པོ་ལ་ལྔ་ཡོད་པ་ལས། དང་པོ་སྐུ་ལྟར་འབྱུང་བ་བསྟན་པ་ནི། འདི་ལ་གཉིས་ཏེ། དང་པོ་སྐུ་སྤྱིའི་རྣམ་པའི་ལན་ཤིན་ཏུ་རྒྱས་པར་བཤད་པ་ནི། དེ་ནས་སྟོན་པས་ཡང་གསུངས་པ། །ཞེས་པ་ལ་སོགས་པས་བསྟན་ཏེ། དེ་ནས་ནི་དྲིས་མ་ཐག་པའི་དེ་ནས། སྟོན་པས་རྒྱུད་ཀྱི་ཚིག་འདི་དག་ཡང་རྟགས་ཀྱི་རིགས་པ་སྦྱར་ནས་གསུངས་པ། མཁའ་འགྲོ་མ་གསལ་བའི་ཡིད་ཅན་འབར་མ་ཁྱོད་ཉོན་ཅིག །ཅེས་བོས་ནས། རྟེན་གྱི་གང་ཟག་རྫོགས་པ་ཆེན་པོའི་རིགས་དང་ལྡན་པ་མྱ་ངན་ལས་འདས་པ་ལ། དེའི་ལྷག་མའི་ཟག་བཅས་ཀྱི་ཕུང་པོའི་རྗེས་ཤུལ་སྲེགས་ཤིང་སྦྱངས་པས། དེ་ལ་སྐུ་བྱུང་ན་རྣམ་པ་གཉིས་ཏེ། ཞི་བའི་སྐུ་དང་ཁྲོ་བོའི་སྐུ་རྣམ་པ་གཉིས་ཀྱི་གཟུགས་སུ་ཡང་དག་པར་རྟེན་གྱི་གང་ཟག་སུ་ཞིག་རྣལ་འབྱོར་ལྡན་པ་ལ། སྐུ་འདི་གཉིས་གཟུགས་ཀྱི་རྣམ་པ་ཡང་དག་པར་རུས་པའི་གཟུགས་བརྙན་དུ་གལ་ཏེ་གཉིས་ཀ་བྱུང་བ་སྲིད་ན་སྐལ་བ་དང་ལྡན་པ་འདི་ནི་བར་མ་དོ་མེད་པར་ཡང་དག་པའི་ཆོས་ཉིད་ངོ་བོ་ཀ་དག་ཆེན་པོའི་གཞི་ཡེ་ནས་འཁྲུལ་པ་ཡོད་མ་མྱོང་བས། གློ་བུར་གྱི་དྲི་མས་འགྲིབ་པ་མི་སྲིད་དེ། དཔེར་ན་ཆུའི་རྙོག་མ་བཞག་ཅིང་བཅས་བཅོས་མ་བྱས་པར་རང་སར་བཞག་པས་རང་སར་དེངས་པ་ལྟར་རང་གི་ངོ་བོ་རང་ཐིམ་པས་ཏེ། ཀ་དག་པའི་ཡེ་ཤེས་སུ་རང་གྲོལ་བའོ། །དེ་ཡང་ངོ་བོ་ཀ་ནས་དག་པའི་ཆ་ནས་མ་རིག་པ་ཡོད་མ་མྱོང་བས་ན། འགྲོ་བ་དྲུག་གི་སེམས་ཅན་འདི་རྣམས་འབད་རྩོལ་མེད་པར་རང་གྲོལ་བའི་གནད་དང་། རང་བཞིན་ལྷུན་གྲུབ་ཀྱི་ཆ་ནས་ལམ་གང་ལ་ཡང་སྣ་བཟུང་ནས་མངོན་པར་རྫོགས་པ་སངས་རྒྱས་པར་འགྱུར་བ་ཡིན་པ་དང་། དེ་ལྟར་ཀ་དག་ལྷུན་གྲུབ་གཉིས་སུ་མེད་དེ། གནས་ལུགས་ཕྱོགས་མེད་དུ་ཤར་བའི་གནད་ཀྱིས་སོ། །དེ་ཀ་ནས་དག་པས་སྒྲུབ་ཏུ་མེད་ལ། ཟང་ཐལ་བས་བསྒྲུབ་ཏུ་མེད་པའི་གདེང་དང་ལྡན་པར་སྐལ་ལྡན་འདི་འགྱུར་རོ། །ཞེས་སྐུ་སྤྱིའི་རྣམ་པ་བསྟན་ནས། ད་ནི་བྱེ་བྲག་ཏུ་བསྟན་པ་ལ་གཉིས་ཡོད་པ་ལས། དང་པོ་ཞི་བའི་སྐུའི་རྟགས་བྱུང་ན་དེ་ཉིད་མྱ་ངན་ལས་འདས་པ་ཡིན་པར་བསྟན་པ་ནི། ཞི་བའི་སྐུའི་རྟགས་བྱུང་ན་ཞེས་པ་ལ་སོགས་པས་བསྟན་ཏེ། ཞི་བའི་ནི། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུ་དང་ལྔའོ། །ངོ་བོ་ནི་ཟུག་རྔུ་དང་བྲལ་ཅིང་མཐའ་གང་དུ་ཡང་མ་སྤྲོས་པའོ། །ངེས་ཚིག་ནི་གཟུང་འཛིན་གྱི་རྣམ་པར་རྟོག་པ་ཞི་བས་ན་ཞི་བའོ། །དབྱེ་ན་རང་བཞིན་གྱིས་ཞི་བ་དང་། གནས་པ་ཞི་བ་དང་། བཅོས་པས་ཞི་བ་དང་། འཕྲལ་འབྱུང་དུ་ཞི་བ་དང་། བསྒྲུབས་ནས་ཞི་བའོ། །རང་བཞིན་གྱིས་ཞི་བ་ནི། ཡེ་ནས་ཆོས་ཉིད་སྤྲོས་པ་དང་བྲལ་ནས། རྣམ་པར་རྟོག་པ་གང་གི་ཡང་ཕྱོགས་སུ་མ་ལྷུང་བའོ། །གནས་པ་ཞི་བ་ནི་རིག་པ་དེ་ལུས་ལ་གནས་པའི་ཚེ་རྣམ་པར་རྟོག་པ་རླུང་གིས་མ་བསྐྱོད་པས། དེ་ཉིད་ལ་གནས་པས་ཉོན་མོངས་པ་ཞི་བའོ། །བཅོས་པས་ཞི་བ་ནི་རླུང་བཟུང་བ་དང་། མི་རྟོག་པ་ལ་སེམས་བཟུང་བས་རྣམ་པར་རྟོག་པ་ཞི་བའོ། །འཕྲལ་བྱུང་དུ་ཞི་བ་ནི། ཆོས་ཉིད་ཐུག་ཕྲད་ཀྱི་དགོངས་པས་འཕྲལ་བྱུང་གི་རྣམ་པར་རྟོག་པ་ཞི་ནས་མ་བཅོས་རང་བཞག་གི་དགོངས་པ་ལ་གནས་པའོ། །བསྒྲུབས་པས་ཞི་བ་ནི་བསྐྱེད་པའི་རིག་པས་ཏིང་ངེ་འཛིན་བསྒོམས་པས་ལུས་ཀྱི་རྣམ་པར་རྟོག་པ་ཞི་བ་དང་། ངག་བསམ་གཏན་གྱི་འཁོར་ལ་བསྒོམས་པས་ངག་གི་རྣམ་པར་རྟོག་པ་ཞི་བ་དང་། སེམས་ཉིད་སྐྱེ་བ་མེད་པའི་དོན་རྟོགས་པས་སེམས་བྱུང་གི་རྣམ་པར་རྟོག་པ་ཞི་བའོ། །མཚན་ཉིད་ནི། མཉེན་པ་དང་། ལྕུགས་པ་དང་། འཁྲིལ་བ་དང་། གཞོན་པའི་ཚུལ་དང་ལྡན་པ་དེ། དེ་ལྟར་ཞི་བའི་སྐུ་བྱུང་བས་གང་ཞི་ན་འཁོར་བའི་ཆོས་རྣམས་ནི། གང་གི་ཞི་ན་ཆོས་ཉིད་མངོན་གསུམ་གྱི་དོན་ལ་གོམས་པར་བྱས་པས་ཞི་ལ། དེ་ལྟར་ཞི་བ་ལ་དགོངས་པ་ཅི་ཡོད་ན། འཁོར་བ་ལས་འདས་པ་ཉིད་དོ། །འབྲས་བུ་ནི་ཀུན་བཟང་ཡབ་ཡུམ་གྱི་ངང་དང་རང་བཞིན་བདག་ཉིད་ཆེན་པོར། ཆོས་ཉིད་ཀྱི་བར་མ་དོ་ལ་བདེན་པ་ཐོབ་ནས་སངས་རྒྱ་བའི་རྟགས་ཡིན་ནོ། །དེ་ཡི་ཕྱིར་ན་དེ་ལྟ་བུའི་ཞི་བའི་སྐུའི་རྟགས་བྱུང་ན། ཆོས་ཉིད་ཀྱི་བར་མ་དོ་ལ། ཞག་ནི་ལྔ་ཡི་ཆོས་ཉིད་ཀྱི་བདེན་པ་མཐོང་སྟེ། དེ་ལྟར་ཞི་བའི་སྐུ་བྱུང་བའི་གང་ཟག་དེ་ཡང་རྣམ་པར་རྟོག་པའི་དྲི་མ་སངས་ཡེ་ཤེས་རང་གི་ངོ་བོར་རྒྱས་ནས་ཆོས་ཉིད་མའི་སྣང་བ་ལ་ཐིམ་མོ། །ཞེས་ཞི་བའི་སྐུ་བྱུང་བས་སངས་རྒྱ་བའི་རྟགས་བསྟན་ནས། ད་ནི་ཁྲོ་བོའི་སྐུ་བྱུང་བའི་གང་ཟག་མྱ་ངན་ལས་འདས་པའི་རྟགས་བསྟན་པ་ནི། གལ་ཏེ་ཁྲོ་བོའི་སྐུ་བྱུང་ན། །ཞེས་པ་ལ་སོགས་པས་བསྟན་ཏེ། གལ་ཏེ་ནི། ཕུང་པོ་བོར་བའི་ཕྱིར་ནས་རུས་པའི་ཁྲོ་བོའི་སྐུ་བྱུང་ན་ནི། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །ཁྲོ་བོའི་སྐུའི་ངོ་བོ་ནི། འབར་བ་ཆེན་པོ་ཉིད་ཡིན་ལ། ངེས་ཚིག་ནི་གདུག་པ་ཅན་རྣམས་ཚར་གཅོད་པར་བྱེད་ཅིང་གང་འདུལ་བ་ལ་ཁྲོ་བོའི་ཚུལ་སྟོན་པས་ཁྲོ་བོ་ཞེས་བྱའོ། །དབྱེ་ན་གཉེན་པོ་རིགས་ལྡན་གྱི་ཁྲོ་བོ་དང་། རང་བཞིན་འདུལ་སྟངས་ཀྱི་ཁྲོ་བོའི་སྐུའོ། །གཉེན་པོ་ནི་ཀླུ་འདུལ་བར་བྱེད་པ་ལ་མཁའ་ལྡིང་གི་རྒྱལ་པོ་ཁྲོ་བོའི་སྐུར་བྱུང་ལ། དེ་བཞིན་དུ་མ་ཧེ་འདུལ་བར་བྱེད་པ་ལ་རྟ་མགྲིན་གྱི་ཚོགས་སུ་སྤྲུལ་པ་ལྟ་བ་ཡིན་ལ། རང་བཞིན་འདུལ་སྟངས་ཀྱི་ཁྲོ་བོའི་སྐུ་ནི། རིགས་ལྔའི་ཡེ་ཤེས་ཀྱི་ཧེ་རུ་ཀ་རྣམ་པ་ལྔའོ། །མཚན་ཉིད་དཔའ་བ་དང་། སྒེག་པའི་ཉམས་དང་། འཇིགས་པ་དང་། རྒོད་པ་དང་། གཤེ་བ་དང་། ཁྲོ་བོའི་ཉམས་དང་། སྙིང་རྗེའིི་ཉམས་དང་། རྔམ་པའི་ཉམས་དང་། ཞི་བའི་ཉམས་དང་དགུར་ལྡན་ན། ཁྲོ་བོའི་མཚན་ཉིད་རྫོགས་པ་སྟེ། དེ་ཡང་གང་ལ་ཁྲོ་ན་ཞི་བས་མ་ཐུལ་བའི་སེམས་ཅན་རྣམས་ལ་ཁྲོ་ལ། གང་གིས་ཁྲོ་ན་སངས་རྒྱས་ཐམས་ཅད་ཀྱི་ཐུགས་ཡེ་ཤེས་གཉིས་སུ་མེད་པའི་ཡེ་ཤེས་ཀྱི་བདག་ཉིད་སྤྲུལ་ནས་སྐུས་ཁྲོ་ལ། ཅིའི་ཕྱིར་ཁྲོ་ན་སེམས་ཅན་གདུག་པ་ཅན་དེ་དག་རང་བཞིན་རྫོགས་པ་ཆེན་པོའི་དོན་ལ་དགོད་པའི་ཕྱིར་ཁྲོ། ཁྲོས་པ་ལ་དགོས་པ་ཅི་ཡོད་ན། གཞན་དོན་མཐར་ཕྱིན་པའི་དགོས་པ་ཡོད་དོ། །འབྲས་བུ་ནི་དེ་ལྟར་རྟགས་སུ་ཁྲོ་བོའི་སྐུར་བྱུང་སྟེ། ཆོས་ཉིད་ཀྱི་བར་མ་དོ་ལ་སྐད་ཅིག་མ་ལྔས་སངས་རྒྱའོ། །དེ་ལྟར་ཁྲོ་བའི་སྐུ་བྱུང་བའི་སྐལ་ལྡན་དེ་ནི་འཁོར་བའི་ཆོས་དང་མྱ་ངན་ལས་འདས་པའི་ཆོས་མཚམས་སྦྱོར་བར་བྱེད་ལ། ཉིད་ནི་མ་བཅོས་རང་སར་གནས་པའི་སྣང་བའོ། །བར་ནི་འཁྲུལ་དང་ཡེ་ཤེས་གཉིས་ཀྱི་བར། དོ་ནི་གཉིས་ལ་དབང་སྟེ་དེ་ཉིད་རང་སྣང་དུ་ཤེས་ན་མྱ་ངན་ལས་འདས་པ་ཡིན་ལ། འདི་ཉིད་ལ་ཐེ་ཚོམ་སྐྱེས་ན་འཁོར་བ་ཡིན་པས་སོ། །དེ་ལྟ་བུ་ལ་སྐད་ཅིག་མ་ཉིད་ནི་ཆ་ལྔ་ལ། ཁྲོ་བོའི་སྐུ་བྱུང་བའི་སྐྱེས་བུ་དེ་ནི་གྲོལ་བར་འགྱུར་རོ་མཁའ་འགྲོ་མ་ཞེས་སྡུད་པ་པོ་ལ་གདམས་ནས། ཁྲོ་བོའི་སྐུ་བྱུང་བའི་སྐྱེས་བུ་མྱ་ངན་ལས་འདས་པར་བསྟན་པའོ། །དེ་དག་དྲིལ་ནས་སྐུའི་རྟགས་བྱུང་བའི་གྲོལ་ལུགས་བསྟན་ནས། ད་ནི་གདུང་འབྱུང་བར་བསྟན་པ་ལ་གསུམ་ཡོད་པས། སྤྱི་དོན་དང་པོ་གདུང་སྤྱིའི་དབྱེ་བ་བསྟན་པ་ལ། གཉིས་ཡོད་པའི་དང་པོ་རིགས་དང་གདུང་གི་མིང་མདོར་བསྟན་པ་ནི། སྐྱེས་མཆོག་མྱ་ངན་ལ་འདས་པ་ལ་ཞེས་པ་ལ་སོགས་པས་བསྟན་ཏེ། སྐྱེས་པ་མངལ་ལས་སྐྱེས་པ་སྟེ། མཆོག་ནི་མི་ཡི་ལུས་ཐོབ་པ་དེ་ལས་ཀྱང་རྫོགས་པ་ཆེན་པོའི་རིགས་སུ་གྱུར་པའོ། །མྱ་ངན་ལས་འདས་པ་ནི་སངས་རྒྱས་འདས་པ་དང་མ་འོངས་པ་དང་ད་ལྟར་ཀུན་གྱི་གདུང་ཡང་འབྱུང་བ་ནི། སངས་རྒྱས་ནི་རིགས་ལྔ་ཉིད་ཀྱི་ཁྱད་པར་ལས། གདུང་གི་རིགས་ཀྱང་ལྔར་འབྱུང་བ་ཡིན་ཏེ། ལྔ་ནི་ཤ་རི་རམ་ནི་བདེ་བར་གཤེགས་པའི་རིགས་ཀྱི་གདུང་ཡིན་ལ། དེ་བཞིན་དུ་བ་རི་རམ་ཞེས་བྱ་བ་ནི་རྡོ་རྗེའི་རིགས་ཀྱི་གདུང་ཡིན་ནོ། །ཆུ་རི་རམ་རིན་པོ་ཆེའི་རིགས་ཀྱི་གདུང་ཡིན་ནོ། །བསེ་རི་རམ་ནི་པདྨའི་རིགས་ཀྱི་གདུང་ཡིན། དེ་བཞིན་དུ་ཉ་རི་རམ་ཞེས་བྱ་བ་ནི་ལས་ཀྱི་གདུང་ཡིན་ནོ། །ཞེས་རིགས་དང་གདུང་གི་མིང་མདོར་བསྟན་ནས། ད་ནི་དེ་དག་གི་འབྲས་བུའི་བྱེ་བྲག་མདོར་བསྟན་པ་ནི། ཐབས་ལྡན་མྱ་ངན་འདས་པ་ཡི། །ཞེས་པ་ལ་སོགས་པས་བསྟན་ཏེ། ཐབས་ནི་སྤྱིར་ཐེག་པ་ཆེ་ཆུང་གཉིས་ལས་ཆེན་པོར་འདོད་པ་ཡོད་ལ། ཐེག་པ་ཆེ་ཆུང་གི་ཁྱད་པར་ནི་ཤེས་རབ་དང་སྙིང་རྗེས་བྱས་པས། ཐེག་པ་ཆེན་པོ་ཤེས་རབ་ཆེ་བས་ཆོས་ཐམས་ཅད་སྟོང་པ་ཉིད་དུ་རྟོགས་ལ། སྙིང་རྗེ་ཆེ་བས་བདག་སངས་རྒྱས་པ་དང་། སེམས་ཅན་རྣམས་ཀྱང་སངས་རྒྱས་ལམ་ལ་འདྲེན་པར་བྱེད་པའོ། །ཐེག་པ་ཆུང་ངུ་རྣམས་ཀྱི་དེ་ལྟར་མ་ཡིན་ནོ། །དེ་ལྟར་འདི་ནི་ཐེག་པ་ཆེན་པོའོ། །ཐེག་པ་ཆེན་པོ་ཕ་རོལ་དུ་ཕྱིན་པ་དང་སྔགས་གཉིས་ཏེ། དེ་ཡང་སྔགས་དང་ཕ་རོལ་དུ་ཕྱིན་པའི་ཁྱད་པར་ནི། ཤེས་རབ་ཆེ་བས་ཆོས་ཐམས་ཅད་སྟོང་པ་ཉིད་དུ་རྟོགས་པར་འདོད་ལ། སེམས་ཅན་བླ་ན་མེད་པའི་འབྲས་བུ་ལ་འགོད་པར་འདོད་པའི་སྙིང་རྗེས་གཞན་དོན་གཙོ་བར་བྱེད་པ་གཉིས་མཐུན། སྔགས་ཀྱང་གཞན་དོན་དུ་སྙིང་རྗེ་ཆེན་པོ་གཙོ་བ་དང་། རང་དོན་དུ་ཤེས་རབ་གཙོ་བས་ཆོས་ཐམས་ཅད་སྟོང་པ་ཉིད་དུ་རྟོགས་པ་མཐུན་པ་ལ། ཁྱད་པར་ཐབས་ཀྱིས་བྱས་པས་སོ། །དེ་ཡང་སྔགས་ལ་ཕྱི་ནང་གཉིས་ལས། སྔགས་ཕྱི་ནང་གི་ཁྱད་ནི་ཐབས་གཙོར་བྱེད་པར་མཐུན་པ་ལ། སྔགས་ཕྱི་པས་ཐབས་བསྒྱུར་བར་མ་ཤེས་པས་དམ་རྫས་དམ་པ་ལྔ་ལ་འཇོལ་ཉོག་དུ་སྤྱོད་མ་ནུས་པ་ལ། གོས་གསུམ་བརྗེ་བ་དང་། མངར་གསུམ་དང་དཀར་གསུམ་བརྟེན་པ་ལ་སོགས་པ་ལས་མ་ནུས། སྔགས་ནང་པས་དུག་ལྔ་སྨན་དུ་བསྒྱུར་བ་ལ་སོགས་པའི་གནད་ཀྱིས་དང་། མ་སྤངས་གནས་དག་པའི་གནད་ཀྱིས་དམ་རྫས་ལྔ་ལ་འཇོལ་ཉོག་ཏུ་སྤྱོད་པར་ནུས་པ་ཁྱད་པར་དུ་འཕགས་པའོ། །དེ་ལྟར་དམ་རྫས་བདུད་རྩི་ལྔ་ལ་སྤྱད་པས། དགོས་པའམ་ཡོན་ཏན་ཅི་ཡོད་ན། ཕྱི་རོལ་དུ་རྣམ་པར་རྟོག་པ་གཅོད་ཅིང་བར་ཆོད་སེལ་བའི་དགོས་པ་ཡོད་ལ། ནང་དུ་སྐུ་ལྔ་ཡེ་ཤེས་ལྔ་ལ་འཇོལ་ཉོག་དུ་སྤྱད་ནས། དེ་ཉིད་དུ་སངས་རྒྱ་བའི་དགོས་པ་ཡོད་པའོ། །སྐྱོན་ནི་དེ་མ་ཡིན་པ་རྣམས་སོ། །དེ་ལ་འདི་ནི་ནང་པ། ནང་པ་ལས་ཀྱང་རྫོགས་པ་ཆེན་པོ་སྟེ། འདི་ཉིད་ཐབས་སླ་བས་སྔགས་ཀྱི་ཐེག་པ་ལས་ཀྱང་ཁྱད་པར་དུ་འཕགས། དེ་བཞིན་དུ་ཐབས་ཆེ་བ་དང་མྱུར་བས་ཁྱད་པར་དུ་འཕགས་པ་སྟེ། འདི་ཉིད་ཐབས་ཏེ། འབད་པ་དང་རྩོལ་བ་ཅི་ཡང་བྱ་མི་དགོས་པར་སྤང་བླང་ལས་འདས་པའི་དོན་དང་ལྷ་ཉིད་དུ་མངོན་གསུམ་དུ་རྟོགས་ནས་སངས་རྒྱ་བས་སླ། ཐབས་མྱུར་བ་ཡིན་ཏེ་བརྩོན་འགྲུས་རབ་འདི་ཉིད་ལ་ཟག་བཅས་མི་སྣང་བར་སངས་རྒྱ་ལ། འབྲིང་བར་མ་དོ་ལ་ལུས་འདི་བོར་མ་ཐག་ཏུ་སངས་རྒྱ། ཐ་མ་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་དབྱུང་ནས་སངས་རྒྱ་བས་ན་མྱུར་བའོ། །ཐབས་ཆེ་བས་འཕགས་པ་ནི། འདིའི་གོང་ནས་ལྷག་པའི་ཆོས་ཅི་ཡང་མེད་པས་ཆེ་བ་ན་ཡིན་ནོ། །དེ་ལྟ་བུའི་ཐབས་དེ་ལ་བརྟེན་ནས་དེ་ཉིད་ཉམས་སུ་བླངས་པས་འདི་ཉིད་ལ་བརྟན་པ་མ་ཐོབ་ཀྱང་། དེའི་དོན་གྱིས་རྟགས་འདི་ལྟར་མངོན་པ་མེད་ཀྱང་ཕུང་པོ་བོར་མ་ཐག་ཏུ་རྟགས་འདི་ལྟར་འབྱུང་བ་ནི། མྱ་ངན་ལས་འདས་པའི་རྟགས་ནི། སྐྱེས་བུ་དེའི་ལུས་ལ་སྐུ་དང་། གདུང་དང་། འོད་དང་སྒྲ་དང་དེ་ལས་ཁྱད་པར་དུ་གདུང་འདི་ཀུན་འབྱུང་བ་དེ་ནི་སངས་རྒྱས་རིགས་ལྔ་སོ་སོའི་གདུང་རིགས་ཀྱི་གདུང་བྱུང་ན། ལུས་འདི་བོར་མ་ཐག་ཆོས་ཉིད་ཀྱི་བར་མ་དོ་ལ། ཡང་དག་པར་སོ་སོ་རང་རིགས་ཀྱི་སངས་རྒྱས་ཀྱི་གདུང་འབྱུང་བའོ། །སྐུ་ནི་རྣམ་པར་སྣང་མཛད་དང་། རྡོ་རྗེ་མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་ཀྱི་སྐུ་དང་། དོན་ཡོད་གྲུབ་པའི་སྐུ་དང་། ལྔའི་གདུང་འབྱུང་བ་དེའི་སངས་རྒྱས་ཀྱི་སྐུ་མཐོང་ནས་གྲོལ་བའོ། །ཞེས་འབྲས་བུའི་བྱེ་བྲག་བསྟན་ནས། ད་ནི་གཉིས་པ་དྲི་བ་རྒྱས་པར་དྲིས་པ་ནི། ཤེས་རབ་འཁོར་གྱིས་ཡང་གསལ་བ། །ཞེས་པ་ལ་སོགས་པས་བསྟན་ཏེ། ཤེས་རབ་ནི་འཇུག་བྱེད་རྣམ་གསུམ་གྱི་ཤེས་རབ་སྟེ། ཐོས་པའི་ཤེས་རབ་ཀྱིས་ཉོན་མོངས་པ་ངོ་ཤེས་པར་བྱེད་ལ། བསམ་པའི་ཤེས་རབ་ཀྱིས་ཉོན་མོངས་པ་མགོ་གནོན་པར་བྱེད་ལ། བསྒོམ་པའི་ཤེས་རབ་ཀྱིས་རྩ་བ་ནས་གཅོད་པར་བྱེད་ཅིང་འབྱིན་པར་བྱེད་པའོ། །འཁོར་གྱིས་ནི་ཤེས་རབ་གཙོ་བ་མཁའ་འགྲོ་མ་སྟེ། ཡང་གསོལ་བ་ནི་དྲི་བ་ལན་གྲངས་མང་པོར་དྲིས་པའོ། །ཀྱེ་ཀྱེ་ནི་དོན་གཉིས་དགོས་པ་སྟེ། རྒྱུད་ཀྱི་སྟོན་པ་རྡོ་རྗེ་འཆང་ཞེས་བོས་ནས། གདུང་གི་རྣམ་པ་ནི། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །གདུང་གི་ངོ་བོ་ནི་སངས་རྒྱས་དང་སོ་སོ་རིགས་ཀྱི་རྟེན་ཡིན་ལ། ངེས་ཚིག་ནི་རིགས་མཚོན་པའི་ཕྱིར་ན་གདུང་ཞེས་བྱ་རུང་ཞེས་བྱའོ། །དོན་སྡེ་མཚོན་པར་བྱེད་པའོ། །དབྱེ་བ་འཇིག་རྟེན་བཏགས་པའི་གདུང་དང་། འགྲོ་བ་བྱེ་བྲག་པའི་གདུང་དང་། སངས་རྒྱས་བརྟན་འགྱུར་གྱི་གདུང་ངོ་། །བཏགས་པ་ནི་མིང་དུ་བཏགས་པ་ཙམ་ཡིན་ལ། འགྲོ་བ་བྱེ་བྲག་པ་ནི་གདུང་ཞེས་རིགས་མཚོན་པ་སྟེ། རྒྱལ་རིགས་དང་། རྗེ་རིགས་དང་། བྲམ་ཟེ་དང་། དམངས་རིགས་སོ། །སངས་རྒྱས་བསྟན་འགྱུར་ནི་ཤ་རི་རམ་ལ་སོགས་པ་ལྔ་ཕྱིའི་དབྱེ་བའོ། །འདི་ལྔས་ནི་སངས་རྒྱས་ཀྱི་རིགས་མཚོན་པར་བྱེད་པའོ། །མཚན་ཉིད་ནི་ཁ་དོག་དང་དབྱིབས་ལ་སོགས་པ་འདི་ནས་ངེས་པར་མཚོན་ནས་བསྟན་པ་རྣམས་སོ། །དེ་དག་གི་གདུང་ཡིན་ན་སོ་སོ་རིགས་ཀྱི་གདུང་ཡིན་ལ། གང་ལས་བྱུང་ན་རྟེན་གྱི་གང་ཟག་ཁྱད་པར་ཅན་ལས་བྱུང་། ཅིའི་ཕྱིར་བྱུང་ན་ཆོས་ཉིད་ཟབ་མོ་ལ་བློ་གཏད་ཅིང་ཉམས་སུ་བླངས་པ་ལས་བྱུང་། དེ་ལྟར་བྱུང་བ་ལ་དགོས་པ་ཅི་ཡོད་ན། རྗེས་སུ་འཇུག་པའི་གང་ཟག་རྣམས་ཡིད་ཆེས་པའི་དགོས་པ་ཡོད་དོ། །འབྲས་བུ་ནི་གདུང་རིགས་ལྔ་གང་བྱུང་བ་དེའི་རིགས་ཀྱི་སངས་རྒྱས་ཀྱི་སྐུ་མཐོང་ནས་སངས་རྒྱའོ། །དེ་ལྟར་བསྟན་པའི་གདུང་དེ་ཀུན་ལ་ཁ་དོག་ཉིད་ནི་གང་དང་གང་ལགས། དེ་ཀུན་གྱི་དབྱིབས་ནི་ཇི་ལྟ་བུ་ཞིག་ལགས། དེ་བཞིན་དུ་ཆེ་ཆུང་གི་རིམ་པ་ཡིས་སངས་རྒྱས་ལྔའི་སོ་སོའི་རིགས་ཀྱི་གདུང་དུ་ཡང་དག་པར་འགྲོ་བ་ལགས། འདི་ཀུན་བདག་གིས་སྔར་མ་འཚལ་བས། ཇི་ལྟར་ན་སོ་སོའི་གདུང་དུ་འགྲོ་བ་ལགས། འདི་དག་རྣམས་ལ་ངེས་ཤེས་མ་སྐྱེས་པས་བདག་ལ་བསྟན་དུ་གསོལ་ཞེས་དྲི་བ་བྱེ་བྲག་ཏུ་བསྟན་ནས། ད་ནི་ཐ་མ་ལན་ཤིན་ཏུ་རྒྱས་པར་བསྟན་པ་ལ་དྲུག་གིས་བསྟན་པའི་དང་པོ་ཤ་རི་རམ་གྱི་ཁ་དོག་དང་ཆེ་ཆུང་དང་དབྱིབས་ལ་སོགས་པ་བསྟན་པ། དེ་ནས་ཡང་ནི་བཀའ་སྩལ་པ། ཞེས་པ་ལ་སོགས་པས་བསྟན་ཏེ། དེ་ནས་ནི་དྲིས་མ་ཐག་པའི་དེ་ནས། ཡང་ནི་མནན་པའི་ཚིག་གོ། །བཀའ་སྩལ་པ་ནི་གང་གིས་བཀའ་སྩལ་ན་རྒྱུད་ཀྱི་སྟོན་པས། གང་ལ་སྩལ་ན་རྒྱུད་འདི། ཚུལ་ལམ་ཐབས་ཇི་ལྟར་སྩལ་ན། རྟགས་ཐམས་ཅད་བསྡུས་པས་ན་བསྡུས་པའི་དོན་དུ་སྩལ་ལ། སུས་སྩལ་ན་སྔོན་འབྱུང་དུ་སྡུད་པ་པོ་ལ་སྩལ་བའོ། །སྩལ་བ་ལ་དགོས་པ་ཅི་ཡོད་ན། རྗེས་སུ་འཇུག་པ་རྣམས་མོས་ཤིང་ཡིད་ཆེས་པ་དང་། བྲོད་པ་བསྐུལ་བའི་དགོས་པ་ཡོད་དོ། །ཀྱེ་མ་ཉོན་གཅིག་མཁའ་འགྲོ་མ་ཞེས་སྡུད་པ་པོ་ལ་བོས་ནས། གདུང་ཤ་རི་རམ་ཞེས་བྱ་བའི་ཁ་དོག་གང་ཞེས་ན་དཀར་ལ་དྭངས་ཞིང་ཤིན་ཏུ་བསྣུམ་ལ་དབྱིབས་ཏེ་འདྲིལ་ཏེ་གཏིང་ནས་འོད་ལྔའི་ཁ་དོག་ཏུ་རང་གསལ་བའོ། །ཆེ་ཆུང་གི་ཚད་ནི་སྲན་མའི་རྡོག་འབྲུ་ཙམ་ཤིན་ཏུ་བཟླུམ་པ་འོང་ངོ་། །འདི་ནི་རྒྱུ་གང་ལས་བྱུང་ན་རུས་པའི་དྭངས་མའི་རྒྱུ་ལས་བྱུང་བས་ཁ་དོག་དཀར་པོ་སྟེ། ཆོས་ཉིད་དྲི་མས་མ་གོས་པ་སྟེ། ཀ་དག་ཏུ་རྟོགས་པའི་རྟགས་ཡིན། རུས་པའི་དྭངས་མ་རྐང་མར་རམ། ལྟ་བ་བསྡུས་པའི་རྒྱུ་ལས་བྱུང་བས་ན་ཤིན་ཏུ་བསྣུན་པ་སྟེ། གཞི་གཅིག་ཆར་དུ་རྟོགས་པའི་རྟགས་ཡིན། རུས་པའི་སྙིང་པོ་ལས་བྱུང་བ་སྨིན་པས་འདྲིལ་བར་བྱུང་བ་ཡིན་ཏེ། འདི་ནི་ཆོས་ཀྱི་སྐུ་ཐིག་ལེ་ཉག་གཅིག་ཏུ་རྟོགས་པའི་རྟགས་ཡིན། འདི་ཡི་གནས་གང་ཞེ་ན། ཐབས་དང་ལྡན་པ་དེའི་མགོ་ལས་འབྱུང་བ་ཡིན་ནོ། །ཞེས་ཤ་རི་རམ་གྱི་དབྱིབས་ལ་སོགས་པ་བསྟན་ནས། ད་ནི་བ་རི་རམ་གྱི་ཁ་དོག་དབྱིབས་ལ་སོགས་པ་བསྟན་པ་ནི། བ་རི་རམ་ཞེས་སྔོ་ལ་ནག །ཅེས་པ་ལ་སོགས་པས་བསྟན་ཏེ། བ་རི་རམ་ཞེས་བྱ་བའི་ཁ་དོག་གང་ཡིན་ན། སྔོ་ལ་གནག་པར་འགྱུར་རོ། །ཆེ་ཆུང་གི་ཚད་ནི་ཆུང་ཤོས་ལ་ཉུངས་དཀར་གྱི་ནི་འབྲུ་ཙམ་མོ། །ཆེ་ཤོས་ལ་ཡང་ན་སྲན་ཆུང་གི་འབྲུ་ཙམ་མོ། །འདི་ནི་རྒྱུ་གང་ལས་བྱུང་ཞེ་ན། དྲོད་ཐམས་ཅད་འདུས་པའི་འབྱུང་བ་དྭངས་མ་འབྱུང་བ་མེའི་ས་བོན་ལས་བྱུང་བས་ཉུངས་འབྲུ་ཙམ་དུ་འདྲིལ་བ་ནི་ཤེས་རབ་ཀྱི་དོན་ཕྱིན་ཅི་མ་ལོག་པ་རྟོགས་པའི་རྟགས་ཡིན་ནོ། །དེ་འབྱུང་བའི་དྭངས་མ་འདུས་པ་ལས་འབྱུང་བ་སྔོ་བ་ནམ་མཁའི་ཆ་དང་། གནག་པ་ཆུའི་ལས་རྒྱས་པའི་རྟགས་ཡིན་ནོ། །དེའི་གནས་གང་ནས་འབྱུང་ཞེས་ན་ཐབས་ལྡན་དེའི་རྩི བ་མའི་གོ་མཚམས་ནས། འབྱུང་བ་ཡིན་ནོ་མཁའ་འགྲོ་མ་ཞེས་བ་རི་རམ་གྱི་ཁ་དོག་ལ་སོགས་པ་བསྟན་ནས། ད་ནི་ཆུ་རི་རམ་གྱི་ཁ་དོག་དང་དབྱིབས་དང་ཆེ་ཆུང་དང་རྒྱུད་དང་གནས་ས་བསྟན་པ་ནི། ཆུ་རི་རམ་ནི་ཁ་དོག་སེར་ཞེས་པ་ལ་སོགས་པས་བསྟན་ཏེ། ཆུ་རི་རམ་ཞེས་བྱ་བ་ནི་ཁ་དོག་སེར་པོར་འོང་བ་ལ། ཆེ་ཆུང་གི་ཚད་ནི་ཉུངས་ནག་གི་འབྲུ་ཙམ་སྟེ། རྒྱུ་ནི་ཁྲག་གི་དྭངས་མ་ལས་བྱུང་བས་ཆུ་སེར་དུ་འདྲིལ་ལ་ཁ་དོག་སེར་བ་ནི། ཡོན་ཏན་ཕྱོགས་མེད་དུ་རྟོགས་པའི་རྟགས་ཡིན་ནོ། །དེ་ཉིད་ཆུ་སེར་གྱི་ཐིགས་པ་ལས་འདྲིལ་བས་ཉུངས་འབྲུ་ཙམ་དུ་བྱུང་བ་སྟེ། ཐིག་ལེ་ལམ་དུ་བསླངས་པའི་རྟགས་ཡིན་ནོ། །དེ་ནི་གནས་གང་ནས་བྱུང་ཞེས་ན་ཐབས་ལྡན་དེའི་མཆིན་པའི་སྟེང་ནས་བྱུང་བ་ཡིན་ཞེས་ཆུ་རི་རམ་གྱི་ཁ་དོག་ལ་སོགས་པ་བསྟན་ནས། ད་ནི་བསེ་རི་རམ་གྱི་ཁ་དོག་ལ་སོགས་པ་བསྟན་པ་ནི། བསེ་རི་རམ་ནི་དམར་ལ་དྭངས། ཞེས་པ་ལ་སོགས་པས་བསྟན་ཏེ། བསེ་རི་རམ་གྱི་ཁ་དོག་གང་ཞེ་ན་ནི་དམར་ལ་དྭངས་པར་འབྱུང་བའོ། །ཆེ་ཆུང་གི་ཚད་ཀྱང་ནི་ཉུངས་དཀར་གྱི་འབྲུ་ཙམ། རྒྱུ་གང་ཞེ་ན་འདི་ནི་ཀུན་རྫོབ་ཀྱི་འབྱུང་བ་བཞི་འདུས་པ་ལས་བྱུང་བ་སྟེ། འབྱུང་བ་མེ་ལས་སྨིན་པས་ཁ་དོག་དམར་པོར་བྱུང་པ་སྟེ། འདི་ནི་དབང་བཞི་རྫོགས་ཞིང་ཐོབ་པས་དམ་ཚིག་ལ་སྐྱོན་གྱིས་མ་གོས་པའི་རྟགས་ཡིན། འབྱུང་བ་མེ་ལས་སྨིན་པས་རབ་ཏུ་དྭངས་པས་ཏེ། འདི་ནི་ལུས་ངག་ལ་སྐྱོན་གྱིས་མ་གོས་པའི་རྟགས་ཡིན། འབྱུང་བ་སའི་དྭངས་མ་འདུས་པ་ལས། སྨིན་པས་ཉུངས་དཀར་གྱི་རྡོག་མ་ལྟ་བུར་སྨིན་པ་སྟེ། འདི་ནི་ཀུན་རྫོབ་ཀྱི་ཐིག་ལེ་ལ་འབྱོར་བའི་རྟགས་ཡིན། འབྱུང་བ་རླུང་འདུས་པ་ལས་སྨིན་པས་འདི་ནི་རབ་ཏུ་ཡང་པ་སྟེ། ཡེ་ཤེས་ཀྱི་རླུང་ལས་སུ་རུང་བའི་རྟགས་ཡིན་ནོ། །དེའི་གནས་གང་ནས་འབྱུང་ན། སྐལ་པ་དང་ལྡན་པ་དེའི་མཁལ་མ་ལས་འབྱུང་བ་ཡིན་ནོ་མཁའ་འགྲོ་མ། ཞེས་བསེ་རི་རམ་གྱི་ཁ་དོག་ལ་སོགས་པ་བསྟན་ནས། ད་ནི་ཉ་རི་རམ་གྱི་ཁ་དོག་ལ་སོགས་པ་བསྟན་པ་ནི་ཉ་རི་རམ་ནི་ཨིནྜ་སྟེ་ཞེས་པ་ལ་སོགས་བསྟན་ཏེ། ཉ་རི་རམ་གྱི་ཁ་དོག་ལ་སོགས་པ་ནི་གང་ཞེ་ན། ཨིནྜ་ནི། ཁ་དོག་ལྗང་གུའོ། །ཆེ་ཆུང་གི་ཚད་ནི་ཉུངས་ནག་གི་འབྲུ་ཙམ་ལ་ཁ་དོག་ལྔ་གཏིང་ནས་གསལ་བའོ། །འདིའི་རྒྱུ་གང་ལས་བྱུང་ན། ཤེས་པ་འགྱུར་བའི་དྭངས་མ་ལས་ལྗང་གུ་འབྱུང་བ་ནི། ཡེ་ཤེས་ཀྱི་ལས་མཐར་ཕྱིན་པའི་རྟགས་ཡིན། ཤེས་པ་གཅིག་ཏུ་གནས་པའི་དྭངས་མ་ལས་བྱུང་བས་ཉུངས་ནག་གི་འབྲུ་ཙམ་དུ་བྱུང་བ་ཡིན་ཏེ། འདི་ནི་དོན་དམ་གྱི་ཐིག་ལེ་ལས་འབྱོངས་པའི་རྟགས་ཡིན་ནོ། །འདིའི་གནས་ནི་སྐལ་ལྡན་དེའི་གློ་བའི་སྟེང་ནས་འབྱུང་བ་ཡིན་ནོ། །ཞེས་ཉ་རི་རམ་གྱི་ཁ་དོག་ལ་སོགས་པ་བསྟན་ནས། ད་ནི་སྤྱིའི་དབྱིངས་དང་རིང་བསྲེལ་གྱི་རྣམ་པ་བསྟན་པ་ནི། འདི་ཀུན་སྤྱིའི་དབྱིབས་ཟླུམ་ལ་འདྲིལ། །ཞེས་པ་ལ་སོགས་པས་བསྟན་ཏེ། གདུང་འདི་ཀུན་གྱི་སྤྱིའི་དབྱིབས་ནི་ཟླུམ་ལ་རབ་ཏུ་འདྲིལ་བར་མཐུན་པའོ། །དེ་ཀུན་གྱི་གཏིང་ནས་འོད་ལྔ་གསལ་ཞིང་ཁ་དོག་ལྔ་རང་མ་འདྲེས་པར་རང་གསལ་བར་ཡོད་པ་མཐུན་ནོ། །གདུང་གི་རྣམ་པ་འདི་དང་ཡང་ནི་འདྲ་བའི། རིང་བསྲེལ་བྱ་བ་ཉིད་རབ་ཏུ་ཕྲ་མོས་ཏེ། ཆེ་ཆུང་གི་ཚད་ཏིལ་གྱི་འབྲུ་ཙམ་དང་། ཡང་ན་ཉི་ཟེར་གྱི་རྡུལ་གྱི་ཚ་ཙམ། གདུང་དང་རིང་བསྲེལ་གྱི་ཁྱད་པར་ནི། རིང་བསྲེལ་འདི་ནི་འབྱུང་བས་བཤིགས་པར་ནུས་ཏེ། མེས་འཚིག་པ་དང་། རླུང་གིས་ཁྱེར་བ་དང་། ས་རྡོས་གཅོད་པ་དང་། ཆུས་ཁྱེར་བར་ནུས་པས། འདིའི་འབྲས་བུ་གང་ཟག་འདིས་ནི་སྤྲུལ་པའི་ཞིང་ཁམས་སུ་ངལ་གསོ་བ་ཡིན་ནོ། །ཞེས་རིང་བསྲེལ་བསྟན་ནས། ད་ནི་དེ་དག་གི་འབྲས་བུའི་ཁྱད་པར་དང་སོ་སོའི་གནས་བསྟན་པ་ནི། གདུང་ནི་སུས་ཀྱང་འཇིག་མི་ནུས་ཞེས་པ་ལ་སོགས་པས་བསྟན་ཏེ། གོང་གི་གདུང་དེ་དག་ནི་ལྕགས་ཀྱི་རྡོ་གཏུན་གྱི་བར་དུ་བཏིམ་ཀྱང་འཇིག་པར་མི་ནུས་པ་ཡིན་ནོ། །ཤིན་ཏུ་སྲ་སྟེ་རྡོ་རྗེ་ཕ་ལམ་དང་འདྲ། ཁྲེགས་པ་ནི་འབྱུང་བ་བཞིའི་གནོད་པ་དང་བྲལ་ཏེ། སྔོན་དུ་འབྱུང་བ་བཞིས་དྭངས་མས་འབྱུང་བ་ཡིན་ལ། འཇིག་པ་ནི་སྐལ་པས་འཇིག་པའི་དུས་ན་མཁའ་འགྲོ་མས་ཕྱག་མཛད། ལ་ལས་བྱང་ཆུབ་སེམས་དཔའི་ས་ནས་ས་འཕར་བ་ཡིན་པས་ན། རིག་པ་སྐྱེ་འཇིག་དང་བྲལ་བར་རྟོགས་པའི་རྟགས་ཡིན། དེ་ཀུན་དང་བྲལ་བས་ན། གང་ཟག་རྟགས་འབྱུང་བ་འདི་ཀུན་གྱི་འཇིག་རྟེན་འདིའི་ཚད་ཟད་པའི་འོག་ཏུ་སངས་རྒྱས་ཐོབ་པའོ། །གདུང་གི་གནས་ནི་གོང་དུ་བཤད་པ་བཞིན་དུ་ཆོས་ཉིད་ཀྱི་བར་མ་དོ་ལ་སོ་སོའི་རིགས་ཀྱི་སངས་རྒྱས་ཀྱི་སྐུ་མཐོང་ནས་སངས་རྒྱའོ། །གདུང་དེ་དག་ཀྱང་རྒྱུ་ནི་སེམས་ཅན་རྣམས་ལ་ཡེ་ཉིད་ནས་སུས་ཀྱང་བྱས་པ་མེད་པར་སྐུ་དང་གདུང་འདི་དག་རང་བཞག་ཆེན་པོར་ཐོག་མའི་གཞི་ལ་གནས་ཏེ། འདིར་ནི་དེ་དག་སྨིན་པ་དང་མ་སྨིན་པའི་ཁྱད་པར་ནི་གོང་དུ་གོམས་པ་དང་མ་གོམས་པའི་ཁྱད་པར་ལས་འབྱུང་བ་ཡིན་ནོ། །དེའི་ཁྱད་པར་གྱི་གོམས་པ་རྣམས་ལ་མངོན་པར་འབྱུང་བ་དང་མ་གོམས་པ་རྣམས་ལ་བག་ལ་ཞ་ནས་དངོས་སུ་མི་སྣང་བའོ། །གོང་དུ་གདུང་གི་གནས་བསྟན་པ་དེ་བཞིན་དུ་སྐུ་ནི་གང་ཟག་གི་མགོ་ལས་འབྱུང་བ་དེ་བཞིན་དུ། ཡང་ན་རྒལ་པ་བརྩེགས་པའི་མཚམས་ནས་འབྱུང་བ་ཡིན་ནོ། །རིང་བསྲེལ་གྱི་གནས་ནི་ཚིག་མཚམས་ཀྱི་བར་རམ། ཡང་ན་ཤ་དང་ལྤག་པའི་བར་ནས་རིང་བསྲེལ། འདི་ཀུན་ལས་ནི་བསྐྱེད་ཅིང་འབྱུང་བ་ཡིན་ནོ། །ཞེས་དེ་དག་གི་འབྲས་བུ་དང་གནས་བསྟན་ཏེ། དེ་རྣམས་ཀྱིས་ནི་གདུང་གི་རྣམ་པ་ཇི་ལྟར་འབྱུང་བར་བསྟན་ནས། ད་ནི་འོད་ཀྱི་རྣམ་པ་ཇི་ལྟར་འབྱུང་བ་ལ་གཉིས་ཡོད་པའི། དང་པོ་འོད་ཀྱི་དབྱེ་བ་ངེས་པའི་རྟགས་བསྟན་པ་ནི། འོད་ལ་རྣམ་པ་གསུམ་ཡིན་ཏེ། །ཞེས་པ་ལ་སོགས་པས་བསྟན་ཏེ། འོད་ལ་ནི། འོད་ཀྱི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །འོད་ཀྱི་ངོ་བོ་ནི་གསལ་བྱེད་གཞན་དབང་དུ་མ་གྱུར་པ་ཉིད་ལ། ངེས་ཚིག་ནི་སྣང་བར་བྱེད་པས་ན་འོད། རྒྱུན་ཐུང་བས་ན་འོད་དོ། །དབྱེ་བ་ནི་སྣང་བ་སྤྱི་མཐུན་གྱི་འོད་དང་། བསོད་ནམས་ལས་ཀྱི་འོད་དང་། མྱང་འདས་ལམ་ཞུགས་ཀྱི་འོད་དང་། སྤྲུལ་པ་རྗེས་སྣང་གི་འོད་དང་། རིག་པ་རང་གི་ངོ་བོའི་འོད་དང་། སྣང་བ་སྤྱི་མཐུན་གྱི་འོད་ནི། ཉི་མ་དང་ཟླ་བ་དང་། སྐར་མའི་འོད་དང་། འཇའ་ཚོན་ལ་སོགས་པའོ། །བསོད་ནམས་ཀྱི་འོད་ནི་ལྷ་རྣམས་ཀྱི་འོད་ལ་བྱ། མྱང་འདས་ལམ་ཞུགས་ཀྱི་འོད་ནི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། རིག་འཛིན་གྱི་འོད་ལ་སོགས་པའོ། །སྤྲུལ་པ་རྗེས་སྣང་གི་འོད་ནི། འཇིག་རྟེན་གྱི་སྤྲུལ་པ་དང་། འཇིག་རྟེན་མ་ཡིན་པའི་སྤྲུལ་པའི་འོད་དོ། །འཇིག་རྟེན་པ་ནི་ལྷ་དང་ཀླུ་དང་། གནོད་སྦྱིན་ལ་སོགས་པའི་འོད་དོ། །འཇིག་རྟེན་པ་མ་ཡིན་པ་རྣམས་ནི་སངས་རྒྱས་ཀྱི་སྤྲུལ་པའི་འོད་ཟེར་རྣམས་སོ། །རིག་པ་རང་གི་ངོ་བོའི་འོད་ནི། གྱེན་འགྲེང་དང་། རྩིབས་ཤར་དང་། མུ་ཁྱུད་དང་གསུམ་ཡིན་ནོ། །མཚན་ཉིད་སྟོང་པ་གསལ་བ་དང་། སྣང་བ་གསལ་བའོ། །སྟོང་པ་ཆོས་ཉིད་ལ་ཁྱབ་པའི་འོད་ཡེ་ཤེས་ལྔའི་མཚན་ཉིད་འཛིན་པའོ། །སྣང་བ་ལ་ཁྱབ་པ་ནི་སྣང་བ་ཙམ་ལ་ཁྱབ་པས་ས་བོན་གྱི་མཚན་ཉིད་འཛིན་ལ། སྣང་བ་བྱེ་བྲག་ལ་ཁྱབ་པས་རང་བྱུང་རང་ཤར་བའི་མཚན་ཉིད་འཛིན་པའོ། །འབྲས་བུ་ནི་ལྷུན་གྲུབ་རིན་པོ་ཆེའི་སྣང་བ་ལ་ངེས་པ་རྙེད་པར་འགྱུར་བ་ཉིད་ཡིན་ནོ། །དེ་ལྟ་བུ་ལས་རྣམ་པ་གསུམ་ནི་རིག་པ་རང་གི་ངོ་བོའི་འོད་ཡིན་ཏེ། མུ་ཁྱུད་འཁོར་ཡུག་དང་བཅས་པར་བྱུང་བ་ནི། གང་ཟག་འདི་ནི་བར་མ་དོ་ཡི་སྣང་བར། སྐད་ཅིག་མ་གཅིག་ལས་ནི་སངས་རྒྱས་ཀྱི་ས་ལ་འབྲས་བུ་ཐོབ་པའོ། །ཡང་འོད་ནི་རྩིབས་ལ་སྣང་ཞིང་འགྱུར་ན་སྐལ་ལྡན་འདི་ནི་བར་དོ་ཐ་མ་ལ་ལྷུན་གྲུབ་རིན་པོ་ཆེ་ལ་མངོན་པར་རྟགས་སྟོན་ནས་བྱང་བ་ཆོས་ཀྱི་སྐུ་དང་། ཆུབ་པ་ལོངས་སྐུ་ཉིད་རྙེད་དོ། །ཞེས་འོད་ཀྱི་དབྱེ་བ་ངེས་པའི་དོན་རྟགས་དང་ལྡན་པར་བསྟན་ནས། ད་ནི་འོད་ལ་བརྟེན་ནས་སངས་རྒྱས་པའི་སྐལ་ལྡན་ལ་སྤྲུལ་པའི་སྐུ་ཇི་ལྟར་འབྱུང་བ་བསྟན་པ་ནི། དེ་ལྟར་འོད་ཀྱི་དཀྱིལ་འཁོར་དུ་ཞེས་པ་ལ་སོགས་པས་བསྟན་ཏེ། གོང་དུ་བསྟན་པ་དེ་ལྟར་འོད་ལྔའི་དཀྱིལ་རིག་པ་འཁོར་ཡེ་ཤེས་ཉིད་དུ། རྟེན་གྱི་གང་ཟག་གང་ཞིག་བྱང་ཆུབ་རྙེད་པའི་མི་འདི་ནི་སྐལ་ལྡན་བྱང་ཆུབ་སེམས་དཔའ་ཆེན་པོ་ཞེས་བྱ་བ་ཡིན་པས། དེ་ཉིད་ཀྱིས་དེ་ལྟར་སངས་རྒྱས་ནས་སྤྲུལ་པའི་སྐུ་འཇིག་རྟེན་གྱི་ཁམས་ཕྱོགས་བཅུ་རུ་བཀྱེ་ནས། སེམས་ཅན་ཐམས་ཅད་ཀྱི་དོན་ཀྱང་སྩོལ་བ་མེད་པར་རང་བཞིན་དུ་སྐལ་ལྡན་འདི་ཡིས་བྱེད་དོ་མཁའ་འགྲོ་མ་ཞེས་སྡུད་པ་པོ་ལ་ཉེ་བར་བོས་ཏེ་གདམས་པའོ། །སྐལ་པ་དང་ལྡན་པའི་རྣལ་འབྱོར་པ་དེ་ནི་དེ་བཞིན་ནོ། །ཞེས་སྤྲུལ་པའི་སྐུའི་འབྱུང་ལུགས་བསྟན་པ་སྟེ། དེ་དག་གིས་འོད་ཀྱི་རྟགས་དང་ལྡན་པའི་གང་ཟག་གིས་སངས་རྒྱས་ཀྱི་འབྲས་བུ་ཐོབ་ལུགས་བསྟན་པའོ། །ད་ནི་སྒྲའི་རྟགས་བྱུང་བའི་འབྲས་བུ་ཐོབ་ལུགས་བསྟན་པ་ལ་གཉིས་ཡོད་པའི་དང་པོ་སོ་སོའི་རིགས་དང་སངས་རྒྱ་བའི་འབྲས་བུ་ངེས་པར་བསྟན་པ་ནི། གང་དུ་འདས་པའི་གནས་ཁང་གི་ཞེས་པ་ལ་སོགས་པས་བསྟན་ཏེ། གྲུབ་པ་ཐོབ་པའི་རྟེན་གྱི་གང་ཟག་དེ་གང་དུ་འདས་པའི་གནས་ཁང་ནི། ཤར་གྱི་ཕྱོགས་ནས་ཤིན་ཏུ་ཉེ་བའི་སར། སྒྲ་ནི་ངོ་བོ་དང་ངེས་ཚིག་དང་། དབྱེ་བ་དང་། མཚན་ཉིད་དང་། འབྲས་བུའོ། །སྒྲའི་ངོ་བོ་ནི་ཡུལ་གང་ཡིན་པ་སློང་བར་བྱེད་པ་ཡིན་ལ། ངེས་ཚིག་ནི་མཚན་ཉིད་གསལ་བར་སྟོན་པས་སྒྲ་ཞེས་བྱ་ལ། དབྱེ་ན་བརྗོད་པའི་སྒྲ་དང་། གནས་པའི་སྒྲ་དང་། རང་བཞིན་གྱི་སྒྲ་དང་། རྟགས་མཚོན་པའི་སྒྲའོ། །བརྗོད་པ་ནི་སྐྱེས་བུའི་ཚིག་དང་བཅས་པས་ཡུལ་ལ་འཇུག་པར་བྱེད་པ་ཉིད་དོ། །གནས་པའི་སྒྲ་ནི་སེམས་ཅན་ཀུན་གྱི་རྩའི་ནང་ནས་རང་བཞིན་རྩ་གནས་ཀྱི་ཡི་གེ་སྒྲ་ཐམས་ཅད་ཀྱི་རྟེན་དུ་གནས་པའོ། །རང་བཞིན་གྱི་སྒྲ་ནི། བེམ་པོའི་སྒྲ་དང་། རིག་བཅས་ཀྱི་སྒྲ་སྟེ། བེམ་པོ་འབྱུང་བ་བཞིའི་སྒྲའོ། །འབྱུང་བའི་རྐྱེན་ཕྲད་པ་ལས་སྒྲ་བྱུང་བ་རྣམས་སོ། །རིགས་བཅས་ནི་འགྲོ་བ་རིགས་དྲུག་གི་སྐད་ཀྱི་བྱེ་བྲག་རྣམས་སོ། །རྟགས་མཚོན་པའི་སྒྲ་ནི། རང་སྒྲ་དང་། གཞན་སྒྲའོ། །རང་ནི་བརྗོད་པའི་ཚིག་ཙམ་གྱི་སྒྲ་ལ་བརྟེན་ནས་དོན་གཉིས་མེད་དུ་རྟོགས་པའོ། །གཞན་ནི་སྒྲ་བྱུང་བ་དེ་ལ་བརྟེན་ནས་རྒྱུ་ངེས་པར་སྟོན་པ་ཉིད་དོ། །སྒྲའི་མཚན་ཉིད་ནི། གང་གི་སྐད་སྟོན་པ་དེའི་རིག་ཤེས་པར་འགྱུར་བ་ཡིན་ལ། མཚན་ཉིད་ཐ་དད་པས་མཚོན་པའོ། །འབྲས་བུ་ལོངས་སྐུ་ཐོབ་པའོ། །དེ་ལྟ་བུའི་སྒྲ་ཤར་དུ་རབ་ཏུ་གྲགས་པ་ན། གང་ཟག་འདི་ནི་རྡོ་རྗེའི་རིགས་ཀྱི་ལོངས་སྐུའི་སངས་རྒྱས་སུ་འགྱུར་རོ། །དེ་བཞིན་ལྷོ་ཕྱོགས་སུ་ཡང་སྒྲ་ནི་གོང་ལྟར་ཉེ་བར་གྲགས་ན་རིན་པོ་ཆེའི་རིགས་སུ་སྣང་བ་མཐའ་ཡས་པའི་འོད་དང་བཅས་པའི་ལོངས་སྐུར་འགྱུར་རོ། །ཡང་ནུབ་ཏུ་བྱུང་ན་པད་མའི་རིགས་ཀྱི་ལོངས་སྐུ་དེ་བཞིན་ནོ། །དེ་ལྟར་ན་བྱང་དུ་བྱུང་ན་ལས་ཀྱི་རིགས་སུ་འགྱུར་བ་ཡིན། དེ་བཞིན་དུ་སྟེང་དུ་སྒྲ་བྱུང་ན་དེ་བཞིན་གཤེགས་པའི་རིགས་ཀྱི་སྐུར་འགྱུར་བ་ཡིན་ནོ། །སྒྲ་ཡི་རང་བཞིན་ནི་འདི་ལྟ་བུ་སྟེ། དང་པོ་འུར་ཞེས་རིང་བར་གནས་ཞིང་དེའི་འཕྲོས་ཐུག་པ་གསུམ་རྩེགས་དང་བཞི་རྩེག་དང་ལྡན་པ་རྡོ་རྗེའི་རིགས། དེ་བཞིན་དུ་རྒྱུན་རིང་བ་སྟེ་བར་ཆད་མེད་པར་རིན་པོ་ཆེ། འཇམ་པ་སྟེ་ཡུན་དུ་ཕྲ་ལ་ཐུག་པ་མེད་པ་པད་མ། དལ་བས་ཏེ་སྒྲ་མཐུག་པ་ལས་ཀྱི་རིགས། རིང་པོའི་སྒྲ་སྟེ་ནར་གྱིས་སོང་ནས་འཇུག་ལ་ལྡིགས་པ་ནི། དེ་བཞིན་གཤེགས་པའི་རིགས་སོ། །དེ་ཡང་ཞི་བའི་ལོངས་སྐུ་དང་མཉམ་པར་སྦྱོར་བ་ཤིན་ཏུ་ཡུན་རིང་བར་འདིར་འོང་ལ། ཁྲོ་བོའི་ཁྱད་ནི་ཐུག་ཐུག་མང་ཞིང་རབ་ཏུ་ངར་བའི་སྒྲ་དང་ལྡན་པ་ཉིད་ཀྱིས་སོ། །ཞེས་སོ་སོའི་རིགས་དང་འབྲས་བུ་བསྟན་ནས། འབྲས་བུའི་མིང་ངེས་པ་ནི། དེ་ལྟར་གང་ཟག་དེ་སྒྲ་དང་ལྡན་པར་བྱུང་ན། སྐྱེས་བུ་འདི་ནི་ལོངས་སྤྱོད་རྫོགས་སྐུ་ཞི་བ་དང་ཁྲོ་བོའི་འབྲས་བུ་ཐོབ་པར་ངེས་པའོ། །རྟེན་གྱི་གང་ཟག་དེ་ཀུན་ལོངས་སྐུའི་ཚེ། སྐལ་པ་གྲངས་མེད་པ་བདུན་དུ་གནས་ནས། ཆོས་ཉིད་སྤྲོས་པ་དང་བྲལ་བའི་ས་མཉམ་པ་ཆེན་པོར་གནས་པའི་ཚེ། སྣང་བ་དང་སྟོང་པ་ལ་ལྟར་ལོངས་སྤྱད་ནས་གཞན་དོན་ལ་འཇུག་ཅིང་། རང་དོན་རྫོགས་ནས་ཀྱང་སེམས་ཅན་གྱི་དོན་དུ་སྤྲུལ་པའི་སྐུ་ཡང་ཉི་མ་ལས་འོད་བཞིན་དུ་འབྱུང་བར་ནུས་སོ། །དེ་ལྟར་ན་འདི་ནི་ནུས་དང་ཞེས་པས་སྔོན་སྟོབས་ཀྱི་ནུས་པ་བསགས་པ་ཁྱད་པར་ཅན་ལས་འབྱུང་བ་དང་། ལས་ཀྱི་མཐུའི་ནུས་པ་རྣམ་སྨིན་གྱི་བག་ཆགས་ཁྱད་པར་ཅན་ལས་གྱུར་པ་སྟེ། དེ་ཡང་རང་ཤུགས་ཀྱི་ནུས་པ་བེམ་པོའི་རྣམ་པ་ལྟ་བུ་ཡིན་པས། མོས་པའི་ནུས་པས་འབད་རྩོལ་ལས་བྱུང་བ་ནི་མ་ཡིན། བཅད་པའི་ནུས་པ་སྐྱོན་བསལ་བ་ཡང་མ་ཡིན་ལ། བྱིིན་བརླབས་ཀྱི་ནུས་པ་རྒྱུན་མི་རྟག་པ་ཡང་མ་ཡིན་ལ། སྔོན་སྟོབས་ཀྱི་ནུས་པ་བསགས་པ་ཁྱད་པར་ཅན་ལས་བྱུང་བ་མི་འགྱུར་བར་འཕེལ་བར་ནུས་པ་ལ། ལས་ཀྱི་མཐའི་ནུས་པ་རྣམ་སྨིན་གྱི་བག་ཆགས་ཁྱད་པར་ཅན་ལས་བྱུང་བ་ནི་གྲུབ་པས་ཏེ། ལྡོག་པའི་ནུས་པ་མེད་ཅིང་འཇུག་པའི་ནུས་པ་ཐོགས་པ་མེད་པའམ་མཐུན་པ་ནི། དེ་ལྟ་བུའི་ནུས་པ་དེ་དང་སུ་མཐུན་ན་རང་བཞིན་རྫོགས་པ་ཆེན་པོའི་རྣལ་འབྱོར་པ་དང་མཐུན། ཅིའི་ཕྱིར་མཐུན་ན་སྔོན་སྟོབས་དང་ལས་ཀྱི་མཐའི་སྟོབས་ཀྱིས་མཐུན། དེ་ལྟར་མཐུན་པས་དོན་གང་བྱེད་ན། རང་དོན་དུ་ཞེས་བྱ་རང་གི་མཚན་ཉིད་དང་སོ་སོའི་གནས་ལུགས་ཤེས་ལ། གཞན་དོན་དུ་ཤེས་བྱ་གཞན་གྱི་མཚན་ཉིད་གདུལ་བྱའི་བསམ་པ་ཤེས་པའོ། །དེ་ལྟར་ཤེས་པས་འཇུག་པ་ནི་ཟག་པ་དང་། ཟག་མེད་ཀྱི་འཇུག་པ་དང་། མཁྱེན་པའི་ཡེ་ཤེས་ཀྱི་འཇུག་པའོ། །ཟག་པ་ནི་ཕུང་པོའི་ཟག་པ་རྣམས་རང་བཞག་རང་གྲོལ་པས་འབྲས་བུ་གཟུགས་ཀྱི་སྐུ་གཉིས་ལ་འཇུག་པ་སྟེ། ཕུང་པོ་གཟུགས་ཕྲ་རགས་ཆེད་དུ་འཛིན་པ་བདག་ཏུ་རྟོག་ཅིང་སྤྱོད་པ་མེད་པས། ཉན་ཐོས་ཀྱི་ཆོས་མ་ཡིན། གཟུགས་ཀྱི་ཕུང་པོའི་མཐའ་ལས་རྣམ་པར་རྟོག་པའི་མིང་ཙམ་དུ་འཛིན་པའི་བློ་མེད་པས་རང་རྒྱལ་ཉིད་ཀྱི་ཆོས་ཉིད་མ་ཡིན། གཟུགས་ཀྱི་འཕྲ་བ་ཀུན་ཞེན་པའི་བློའི་ཀུན་རྫོབ་ཡུལ་ལས་འདས་པས་བྱང་སེམས་ཀྱི་ཆོས་མ་ཡིན་པས། གཟུགས་ཀྱི་ཕུང་པོ་བདག་མ་ཡིན་ལ། བདག་ཉིད་ཀྱང་གཟུགས་ཀྱི་ཕུང་པོ་མ་ཡིན་པས། གཟུགས་ཀྱི་དེ་བཞིན་ཉིད་ཅེས་དོན་དམ་པ་ལ་གྲུབ་པ་མེད་པས། འབྲས་བུའི་གཟུགས་དང་། རྒྱུའི་གཟུགས་སུ་གྲུབ་པ་མེད་པ་ནི། ཀུན་རྫོབ་གཟུགས་ཀྱི་དེ་བཞིན་ཉིད་དེ་སྣང་བའི་ཆ། དེ་དག་རྣམས་རང་བཞིན་གཉིས་མེད་དུ་གནས་པས་དོན་དམ་པའི་གཟུགས་ཀྱི་དེ་བཞིན་ཉིད་དེ། དེ་ལྟར་ན་གཟུགས་ཀྱི་ཟག་པའི་དེ་བཞིན་ཉིད་ཤེས་པས་ཆོས་ཐམས་ཅད་མདོ་དང་རྒྱས་པར་ཤེས་པར་འགྱུར་རོ། །གང་ལ་རེག་པའམ་ཉམས་སུ་མྱོང་བ་ཡོད་པ་དེ་ནི་ཚོར་བའི་ཟག་པ་སྟེ། འདི་ཉིད་སྙམ་བྱེད་བློ་དང་བྲལ་བས་ཤེས་རབ་ཡིན་པར་ཤེས་པས། ཡིད་དཔྱོད་ཚིག་ཏུ་མེད་དེ། རང་གི་དོན་མངོན་སུམ་དུ་ཤེས་ཤིང་མཐོང་བ་དེ་ནི་ཀུན་རྫོབ་ཚོར་བའི་དེ་བཞིན་ཉིད་དེ་ཡང་ཤེས་རབ་ཀྱི་སྤྱོད་ཡུལ་དུ་མ་ཡིན་པས་ན་དོན་དམ་ཚོར་བའི་དེ་བཞིན་ཉིད་དེ་དེ་ལྟར་ན་ཚོར་བའི་ཟག་པ་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པར་ཤེས་པར་འགྱུར་རོ། །འདུ་ཤེས་ཀྱི་ཟག་པ་ནི་གང་ལ་ལྟ་བསྒོམ་གྱི་ཚིག་དང་དེའི་བྱེད་པ་ནི་འདུ་ཤེས་ཀྱི་ཟག་པ་སྟེ། འདི་ནི་འབད་རྩོལ་དམིགས་གཏད་དང་བྲལ་བར་ཤེས་ནས་རང་བཞག་ཉིད་དེ། དེ་ལ་བསྒོམ་བསྒྲུབ་བར་ཆད་པའི་རྐྱེན་དང་བྲལ་བས་དེ་ཉིད་ཀུན་རྫོབ་འདུ་ཤེས་ཀྱི་དེ་བཞིན་ཉིད་དེ། དེ་ཡང་བརྡ་ཐབས་དང་བྲལ་བས་དེ་ནི་དོན་དམ་འདུ་ཤེས་ཀྱི་དེ་བཞིན་ཉིད་ལ། དེ་ལྟར་ན་འདུ་ཤེས་ཀྱི་ཟག་པའི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པར་འགྱུར་རོ། །འདུ་བྱེད་ཀྱི་ཟག་པ་ནི་གང་ལ་མངོན་པར་འདུ་བྱེད་པ་སྟེ། དེ་ཉིད་ཡིད་དཔྱོད་ཚིག་གིས་སྒྲོས་མ་བཏགས་པ་ནི། ཀུན་རྫོབ་འདུ་བྱེད་ཀྱི་དེ་བཞིན་ཉིད་ལ། དེ་ལ་རྟོག་པའི་ཞེན་པ་རང་ཆོད་པ་ནི། དོན་དམ་འདུ་བྱེད་ཀྱི་དེ་བཞིན་ཉིད་དེ། དེ་ལྟར་ན་འདུ་བྱེད་ཀྱི་ཟག་པའི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པར་ཤེས་པའོ། །རྣམ་པར་ཤེས་པའི་ཟག་པ་ནི། ཀུན་གཞིའི་རྣམ་ཤེས་དང་ཡིད་ཀྱི་རྣམ་པར་ཤེས་པ་ཡུལ་ལ་འཇུག་པ་རྗེས་འགྲོ་དང་བཅས་པ་སྟེ། ཀུན་གཞི་ཆོས་ཀྱི་སྐུ་མ་ཡིན་པར་ཤེས་པ་ནི། ཀུན་རྫོབ་རྣམ་པར་ཤེས་པའི་དེ་བཞིན་ཉིད་དེ། དེ་ཉིད་དབང་པོ་ལ་རྣོ་བཏུལ་གྱི་ཞེན་པ་དང་བྲལ་བ་ནི། དོན་དམ་རྣམ་པར་ཤེས་པའི་དེ་བཞིན་ཉིད། དེ་ལྟར་རྣམ་པར་ཤེས་པའི་ཟག་པའི་དེ་བཞིན་ཉིད་ཤེས་ན་ཐམས་ཅད་ཀྱི་མདོ་དང་རྒྱས་པར་ཤེས་པ་ནི་ཟག་པའི་འཇུག་པ་སྟེ། ཕུང་པོ་ལྔའི་བདག་རང་བཞིན་མེད་པར་ལས་ཕུང་པོ་ལྔ་ཐ་དད་དུ་འཛིན་པའི་ཞེན་པ་ལ་སོགས་པས། ཕུང་པོའི་ཟག་པ་མེད་པ་ལ་འཇུག་པའོ། །ཟག་མེད་ཀྱི་འཇུག་པ་ནི། དེ་ལྟར་ན་ཉོན་མོངས་པའི་ཟག་པ་རྣམས་རང་བཞག་རང་གྲོལ་དུ་ཤེས་པས། གཉེན་པོ་གཞན་ལ་རག་མ་ལས་ཏེ། འདོད་ཆགས་ཉིད་ནི་འདོད་ཆགས་ཉིད་ཀྱིས་གྲོལ། འདོད་ཆགས་ཀྱིས་འདོད་ཆགས་མ་གྲོལ་ན་འདི་ལྟར་སྲིད་པའི་ཆོས་ཀྱི་མཐའ་ལྡོག་མི་སྲིད། དེ་ཡང་འདོད་ཆགས་རང་བཞག་པས་དྲི་མ་རང་སར་གྲོལ་བ་ནི་དཔེར་ན་ཆུའི་རྙོག་མ་ཉིད་མ་རྙོགས་པར་རང་སར་གཞག་པས་གྲོལ་བ་དང་འདྲ། འདི་ལ་གཉེན་པོས་གྲོལ་ན་ནི་འདོད་ཆགས་ལ་སོགས་པའི་ཉོན་མོངས་པའི་གཉེན་པོར་ཡེ་ཤེས་ཏེ། ཉོན་མོངས་པ་ཉིད་ཡེ་ཤེས་ཀྱིས་གྲོལ་ན། འདིའི་དུས་ན་ཡེ་ཤེས་སུ་འཛིན་པའི་ཞེན་པ་དེ་གང་གིས་གྲོལ་དེ་ཡེ་ཤེས་རང་གི་གྲོལ་ན་འདོད་ཐོག་སྟེ། ཉོན་མོངས་པ་ཉིད་ཉོན་མོངས་པ་ཉིད་ཀྱིས་གྲོལ་བའི་ཕྱིར། གཉེན་པོ་གཞན་ཞིག་ཡོད་ན་ནི་གཉིས་པོ་ལ་ཐུག་པ་མེད་པར་འགྱུར་བའི་སྐྱོན་སྤང་བར་མི་ནུས་སོ། །དེ་ལྟར་ན་འདོད་ཆགས་ཉིད་རང་སར་བཞག་པས་དེ་ཉིད་རང་ས་ན་གྲོལ་བ་ནི། ཉོན་མོངས་པའི་ཟག་པའི་འཇུག་པ་སྟེ། དེ་ཉིད་ལ་ཞུགས་པས་ཉོན་མོངས་པའི་བག་ཆགས་ཅིག་ཆར་དུ་གྲོལ་བས་ན། ཉོན་མོངས་པའི་ཟག་པ་མེད་པའི་འཇུག་པ་སྟེ། དེ་ལྟར་ན་ཟུང་དུ་འཇུག་པ་དང་། ཟུང་ལ་འཇུག་པ་དང་། ཟུང་གིས་འཇུག་པ་དང་། ཟག་པ་དང་། ཟག་པ་མེད་པའི་འཇུག་པའོ། །མཁྱེན་པའི་ཡེ་ཤེས་ཀྱི་འཇུག་པ་ནི། དེ་ལྟར་རང་བཞག་རང་གྲོལ་དུ་ཤེས་པས། འཁོར་འདས་གཉིས་ཟུང་དུ་འཇུག་པ་སྟེ། འཁོར་བ་མྱང་འདས་ལ་ཞུགས་པས་རྩོལ་བྲལ་བཞག་པའི་དོན་མཁྱེན་ལ། མྱང་འདས་ཉིད་འཁོར་བ་ལ་ཞུགས་པས་འཁྲུལ་གཞི་སྣ་ཚོགས་པ་མཁྱེན་པ་ཡིན་ལ། འཁོར་འདས་གཉིས་མེད་དུ་ཞུགས་པས་རོལ་པ་འགགས་མེད་དུ་མཁྱེན་པའོ། །དེ་ལྟར་འཁོར་འདས་གཉིས་ནི་ཟུང་སྟེ་དོན་གྱིས་ཟླའོ། །འཁོར་བའི་བློ་འདས་པ། འདས་པའི་བློ་འཁོར་བ་སྟེ། དེ་ལྟར་གཉིས་མེད་ཟུང་འཇུག་ཏུ་མཁྱེན་པས། རང་བཞིན་གནས་སུ་དག་པ་ནི། དཔེར་ན་ནམ་མཁའ་ལ་སྤྲིན་དེངས་པ་དང་འདྲའོ། །དེ་ལྟར་ཐབས་ཤེས་རབ་ཟུང་འཇུག་ནི། ཐབས་ཀྱིས་ཤེས་རབ་ལ་ཞུགས་པས་ཚིག་གི་མཐའ་བཅད་པས། ཡིད་དཔྱོད་སྙམ་བྱེད་མེད་པར་མཁྱེན། ཤེས་རབ་ཀྱིས་ཐབས་ལ་ཞུགས་པས་བདེ་བ་རང་རྒྱུད་པའི་ཞེན་པ་རང་བཅད་ནས་ཐབས་ཀྱིས་བཅིངས་པ་ལས་རང་གྲོལ་བར་མཁྱེན། ཐབས་དང་ཤེས་རབ་གཉིས་མེད་དུ་ཞུགས་པ་ཐིག་ལེ་ཉག་གཅིག་ཟླ་དང་བྲལ་བར་མཁྱེན་པའོ། །དེ་ལྟར་སྣང་བ་སྟོང་པ་ལ་ཞུགས་པས་སོ་སོ་རང་རྒྱུད་དུ་འཛིན་པའི་ཞེན་པ་རང་སར་གྲོལ་བར་མཁྱེན། སྟོང་པས་སྣང་བ་ལ་ཞུགས་པས་རགས་པའི་སྣང་བ་ཐམས་ཅད་རང་བཞིན་རྣམ་པར་མཁྱེན། སྣང་སྟོང་གཉིས་མེད་དུ་ཞུགས་པས་གནས་ལུགས་སུ་རང་གྲོལ་བར་མཁྱེན་པའོ། །བདེ་སྡུག་ཟུང་འཇུག་ནི། བདེ་ནས་སྡུག་བསྔལ་ལ་ཞུགས་པས་སྡུག་བསྔལ་བདེ་བ་ཆེན་པོར་སྤྱོད་སྡུག་བསྔལ་བདེ་བ་ལ་ཞུགས་པས་ལྷུན་འགྲུབ་འགགས་པ་མེད་པར་མཁྱེན། བདེ་སྡུག་གཉིས་མེད་དུ་ཞུགས་པ་ལས་སྡུག་བསྔལ་རྒྱུན་ཆད་པར་མཁྱེན་པའོ། །ཡོད་མེད་ཟུང་འཇུག་ནི། ཡོད་པས་མེད་པ་ལ་འཇུག་པས་བཏགས་པའི་མིང་བདག་འཛིན་མེད་པར་མཁྱེན། མེད་པས་ཡོད་པ་ལ་ཞུགས་པས་གདགས་གཞི་གང་དུ་ཡང་མ་འགགས་པར་མཁྱེན། ཡོད་མེད་གཉིས་མེད་དུ་ཞུགས་པས་གདགས་བྱ་གདགས་གཞི་ཐ་དད་པ་མ་ཡིན་པར་མཁྱེན་པའོ། །ཡིན་མིན་ཟུང་འཇུག་ནི། ཡིན་པས་མིན་པ་ལ་ཞུགས་པས་གོལ་སྒྲིབ་སྣ་ཚོགས་པར་མཁྱེན། མིན་པས་ཡིན་པ་ལ་ཞུགས་པས་སྐྱོན་ངོས་ཟིན་པར་མཁྱེན་པ་དང་། ཡིན་མིན་གཉིས་མེད་དུ་ཞུགས་པས་རྫོགས་པ་ཆེན་པོ་ཡང་བླང་དོར་བྲལ་བར་མཁྱེན་པའོ། །རིག་དང་མ་རིག་ཟུང་འཇུག་ནི། མ་རིག་པས་རིག་པ་ལ་ཞུགས་པས་འཁྲུལ་པའི་རྩ་བ་རང་ཆོད་པར་མཁྱེན་པ་དང་། རིག་པས་མ་རིག་པ་ལ་ཞུགས་པས་འཁྲུལ་གཞི་གཞི་ལས་རང་ལོག་པར་མཁྱེན་པ་དང་། རིག་མ་རིག་གཉིས་མེད་དུ་རང་ཞུགས་པས་འཁྲུལ་དང་མ་འཁྲུལ་བརྡར་ཤ་ཆོད་པར་མཁྱེན་པའོ། །སངས་རྒྱས་སེམས་ཅན་ཟུང་འཇུག་ནི། སངས་རྒྱས་ཀྱིས་སེམས་ཅན་ལ་ཞུགས་པས་མཉམ་པ་རིས་མེད་དུ་མཁྱེན་པ་དང་། སེམས་ཅན་གྱིས་སངས་རྒྱས་ལ་ཞུགས་པས་འབྲས་བུ་རྣམ་དག་ཏུ་མཁྱེན་པ་དང་། སངས་རྒྱས་སེམས་ཅན་གཉིས་མེད་དུ་ཞུགས་པས་རྣམ་དག་ཡེ་གྲོལ་དུ་མཁྱེན་པའོ། །དོན་དམ་ཀུན་རྫོབ་ཟུང་འཇུག་ནི། ཀུན་རྫོབ་ཀྱིས་དོན་དམ་ལ་ཞུགས་པས་མ་སྤངས་རང་དག་ཏུ་མཁྱེན་པ་དང་། དོམ་དམ་ཀུན་རྫོབ་ལ་ཞུགས་པས་བདེན་པ་དབྱེར་མེད་དུ་མཁྱེན་པ་དང་། དེ་གཉིས་མེད་དུ་ཞུགས་པ་ཅེར་སྣང་ཡོངས་གྲོལ་དུ་མཁྱེན་པའོ། །སྐྱོན་ཡོན་ཟུང་འཇུག་ནི། སྐྱོན་ཡོན་ཏན་ལ་ཞུགས་པས་སེལ་མེད་པར་རང་སྣང་དུ་མཁྱེན་པར། ཡོན་ཏན་གྱིས་སྐྱོན་ལ་ཞུགས་པས་ཡེ་མེད་རང་རྫོགས་སུ་མཁྱེན་པ་དང་། སྐྱོན་ཡོན་གཉིས་མེད་དུ་ཞུགས་པས་མཐའ་བཞི་རང་གྲོལ་བར་མཁྱེན་པའོ། །དེ་ལྟར་ན་འཁོར་འདས་ཟུང་འཇུག་དང་གཅིག །ཐབས་ཤེས་རབ་ཟུང་འཇུག་དང་གཉིས། སྣང་སྟོང་ཟུང་འཇུག་དང་གསུམ། བདེན་བརྫུན་ཟུང་འཇུག་དང་བཞི། ཡོད་མེད་ཟུང་འཇུག་དང་ལྔ། ཡིན་མིན་ཟུང་འཇུག་དང་དྲུག །རིག་པ་དང་མ་རིག་ཟུང་འཇུག་དང་བདུན། ས་སངས་རྒྱས་སེམས་ཅན་ཟུང་འཇུག་དང་བརྒྱད། དོན་དམ་ཀུན་རྫོབ་ཟུང་འཇུག་དང་དགུ། སྐྱོན་ཡོན་ཟུང་འཇུག་དག་བཅུ་ཡིས་ནི། མཁྱེན་པའི་ཡེ་ཤེས་ཀྱི་འཇུག་པ་སྟེ། མཁྱེན་པའི་ཡེ་ཤེས་ཀྱི་ཆའི་འཇུག་པ་ནི། རྟོག་དང་མ་རྟོག་གཉིས་ཟུང་འཇུག་ཏུ་འཇུག་པར། བསྒོམ་པ་དང་མ་བསྒོམ་པ་གཉིས་ཟུང་དུ་འཇུག་པར། གཉིས་ཆའི་འཇུག་པ་དེ་མཁྱེན་པའི་ཡེ་ཤེས་ཀྱི་ཡོན་ཏན་གྱི་ཆའི་འཇུག་པའོ། །དེ་ལྟར་ཀྱང་གང་འཇུག་ན་ཟུང་འཇུག །གང་གིས་འཇུག་ན་འཁོར་འདས་ལ་སོགས་པར་ཟག་པ་དང་ཟག་པ་མེད་པ་ལ་སོགས་པས་འཇུག །གང་ལ་འཇུག་ན་སོ་སོའི་ཕན་ཚུན་ནས་འཇུག །ཅིའི་ཕྱིར་འཇུག་ན་ཆོས་ཐམས་ཅད་གྱི་དོན་གཅིག་པའི་ཕྱིར་འཇུག །དེ་ལྟར་ཞུགས་པ་ལ་དགོས་པ་ཅི་ཡོད་ན། ཆོས་ཐམས་ཅད་གཉིས་མེད་དུ་རྟོགས་པའི་དགོས་པ་ཡོད་པའོ། །དེ་ཡང་འབྲུ་རེ་བསྡུས་པའི་དོན་དུ་སྡེབས་ན། ནུས་པ་རབ་ལས་བྱུང་། དེ་གང་ཟག་དང་མཐུན། དེ་ལྟར་མཐུན་པ་གཉིས་མེད་དུ་འཇུག་པའོ། །ཐབས་ནི་ནུས་པའི་ཐབས་དབང་བཞི་རྫོགས་པར་བྱས་པས་གོང་གི་ནུས་པ་གཉིས་ལ་སྤྱོད་པ་ནུས་པ་ཡིན་ལ། མཐུན་པའི་ཐབས་ནི། རང་དོན་རྟོགས་པའི་ཐབས་རིག་པ་མངོན་གསུམ། གཞན་དོན་ཐབས་ཀྱི་མན་ངག་འབྱུང་བ་རྩིས་སྦྱོར་ཀྱི་ཡི་གེ་གཉིས་སྡེབས་མཐུན་ལ། འཇུག་པའི་ཐབས་ནི་ཟག་པ་རང་གྲོལ་དུ་མཁྱེན་པས་རང་ཀ་མ་རང་གྲོལ་གྱི་ཐབས་དང་། རང་ཀ་མ་རང་བཞག་ཏུ་མཁྱེན་པས་ཟག་མེད་རང་གཞག་གི་ཐབས་སོ། །དེ་ཡང་སོ་སོའི་མཚན་ཉིད་གཉིས་མེད་དུ་མཁྱེན་པས་ཡེ་ཤེས་ཀྱི་ཐབས་རྫོགས་པ་ཆེན་པོ་ལ་རེ་དྭོགས་དང་སྤང་བླང་ལས་འདས་པ་ཡིས། དེ་ཉིད་མཐར་ཐུག་རང་གྲོལ་བར་ཡིན་པར་རྟོགས་པས་ན་ཐབས་ཀྱིས་ནི། ཕ་རོལ་ཏུ་ཕྱིན་པའི་ཐེག་པ་ལས་ཁྱད་པར་དུ་བྱས་ནས། ཐབས་དེ་དག་ལས་བརྟེན་པས་གོང་མའི་རྟགས་དེ་དག་འབྱུང་བ་ཡིན་ལ། དེ་ལྟར་རྟགས་བྱུང་བས་འབྲས་བུ་སངས་རྒྱ་བ་ཡིན་ནོ། །དེ་ཡང་ཕ་རོལ་དུ་ཕྱིན་པས་ནི་སྐལ་པ་དཔག་ཏུ་མེད་པར་བསྒོམ་ཀྱང་། རྟགས་འབྱུང་མི་སྲིད་རྟགས་མ་བྱུང་ན་སངས་རྒྱས་མིན་པའོ། །དེ་ལྟར་ན་དོན་གྱིས་ཕ་རོལ་ཏུ་ཕྱིན་པས་སངས་རྒྱ་བའི་ཕྱིར་ཏེ། འདི་ནི་འབྲས་བུ་གསང་སྔགས་ཀྱི་ལམ་དུ་འཇུག་པའི་སྟེགས་ཡིན་པས་ན། ལམ་དེ་ལ་བརྟེན་ན་གསང་སྔགས་ཀྱི་ལམ་ལ་ཞུགས་ན་སངས་མི་རྒྱ་བའི་ཕྱིར་ན། གསང་སྔགས་ལ་འཇུག་པའི་ངལ་གསོའི་གནས་སམ་ལམ་སྟེགས་ཡིན། ཕ་རོལ་ཏུ་ཕྱིན་པས་སྔགས་ལ་ཞུགས་ནས་སངས་རྒྱ་བའི་ཕྱིར་ན། འདིའི་ས་ལ་མཐར་ཕྱིན་པའོ། །ཞེས་སྒྲའི་རྟགས་རྫོགས་པའི་སྤྲུལ་པའི་སྐུའི་ནུས་པ་འབྱིན་པ་བསྟན་ནས། ད་ནི་བྱང་ཆུབ་སེམས་དཔའ་ལམ་ལ་གོམས་པའི་ཐུན་མོང་གི་ཡོན་ཏན་ས་གཡོ་བའི་མཚན་ཉིད་བསྟན་པ་ལ། གཉིས་ཀྱིས་བསྟན་པའི་དང་པོ་སོ་སོའི་རིགས་ངེས་པའི་ཚད་བསྟན་པ་ནི། ས་ནི་གཡོ་བའི་སྐྱེས་བུ་དེས། །ཞེས་པ་ལ་སོགས་པས་བསྟན་ཏེ། ས་ནི་སའི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་འབྲས་བུའོ། །སའི་ངོ་བོ་ནི་འདེགས་ཞིང་ཁྱབ་པའམ་བསྐྱེད་པར་བྱེད་པའོ། །ངེས་ཚིག་ནི་འདེགས་ཤིང་གྲོལ་བ་འཛིན་པས་ན་ས་དང་། གཡོ་ཞིང་འབར་བར་བྱེད་པས་ན་ས་དང་། བསྐྱེད་ཅིང་ཆགས་པར་བྱེད་པས་ན་སའོ། །དབྱེ་བ་ནི་བཏགས་པ་མིང་གིས་ས་མིང་དུ་བཏགས་པ་རྣམས་དང་། འགྲོ་བའི་གཞི་འཛིན་རགས་པའི་ས་ཕྱི་ནང་རྫས་སུ་ཡོད་པ་འདི་དང་། བསགས་པ་ཡོན་ཏན་གྱི་ས་ཉན་ཐོས་དང་། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་དང་། གསང་སྔགས་རྣམས་ཡིན་ནོ། །མཚན་ཉིད་ནི་ཁྱབ་པ་གཞི་ཆེ་བ་དང་། བརྟན་པ་འཛིན་པ་དང་། ལྕི་ཞིང་སྲ་བ་ཆེ་བའོ། །འབྲས་བུ་ནི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། རིག་འཛིན་གྱི་དངོས་གྲུབ་ཐོབ་པའོ། །དེ་ལྟ་བུའི་ས་གཡོ་བ་ནི་རླུང་གི་ལས་ཀྱི་འབྱེད་པའོ། །སྐྱེས་བུ་དེའི་ལུས་སེམས་བྲལ་བའི་ཚེ། དབུགས་དང་བྲལ་མ་ཐག་པའི་ཚེ་ས་གཡོས་དབུས་སུ་བྱུང་ན། གང་ཟག་འདིས་ནི་ཉན་ཐོས་ཀྱི་ས་ཐོབ་པའོ། །དེ་བཞིན་ཤི་ནས་ཞག་ནི་གསུམ་ན་ཡང་དེ་ཉིད་ཀྱི་ཤར་དུ་ས་གཡོས་བྱུང་ན། གང་ཟག་འདི་ནི་རང་སངས་རྒྱས་ཀྱི་ས་ཐོབ་པའོ། །ཡང་ཚེ་འདས་ནས་ཞག་དྲུག་ནས། ལྷོ་ནས་ས་གཡོས་བྱུང་། གང་ཟག་འདིས་ནི་བྱང་ཆུབ་སེམས་དཔའི་ས་ལ་འཇུག་གོ་མཁའ་འགྲོ་མ། ཞེས་གདམས་པའོ། །ཡང་གང་ཟག་གཅིག་ཤི་ནས་གལ་ཏེ་ཞག་དགུ་ན་སྟེང་གི་ནམ་མཁའ་ཤིག་གིས་ས་ནི་གཡོ་བར་གྱུར་ན་ནི། གང་ཟག་འདི་ནི་རིག་པ་འཛིན་པ་སྟེ། ཚེ་ལ་དབང་བའི་རིག་འཛིན་དང་། ལྷུན་གྱིས་གྲུབ་པའི་དང་། ཕྱག་རྒྱ་ཆེན་པོའི་དང་། རྣམ་པར་སྨིན་པའི་རིག་འཛིན་གྱི་ས་ལ་ཅི་དགར་སྤྱོད་པར་ནུས་ཏེ། སྟོང་པ་ཆེན་པོའི་རྣལ་འབྱོར་པ་ལ་སོགས་པར་རིམ་པར་ནུས་པ་ལ་བརྟེན་ནས་འཇུག་གོ། །ཞེས་སོ་སོའི་རིགས་ངེས་པར་ཚད་བསྟན་ནས། ད་ནི་ས་ལམ་གྱི་རིམ་པས་འཇུག་བསྡུ་བ་དང་བཅས་པ་བསྟན་པ་ནི། ས་ནི་ཉན་ཐོས་ཀྱི་ས་བརྒྱད་དང་། རང་སངས་རྒྱས་ཀྱི་གསུམ་དང་། བྱང་ཆུབ་སེམས་དཔའི་ས་བཅུ་དང་། འབྲས་བུ་གསང་སྔགས་ཀྱི་ས་བཅུ་གཉིས་དང་། གསང་སྔགས་ནང་གི་བཅུ་བདུན་ནམ་ཉི་ཤུ་རྩ་གཅིག་ཐོབ་པའི་རྟགས་སུ། འབྱུང་བ་ཕྱིའི་རགས་པ་རྫས་སུ་སྣང་བ་འདི་གང་ཟག་ཚེའི་དུས་བྱས་པ་ལས་གོང་ལྟར་གཡོ་བའི་སྐལ་ལྡན་ལ། ཡང་དག་པར་རྫོགས་པའི་སངས་རྒྱས་ཀྱི་འབྲས་བུ་སྔོན་དུ་མི་སྣང་སྟེ། དེ་བཞིན་དུ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། རིག་འཛིན་གྱི་ས་དང་ལམ་རྣམས་ལ་ཡུན་རིང་པོར་རིམ་གྱིས་སྦྱོང་ཞིང་གནས་པའོ། །ཞེས་ས་གཡོ་བའི་རྟགས་ཀྱི་རིམ་པ་བསྟན་པ་སྟེ། དེ་དག་ཀུན་གྱིས་ནི་མྱ་ངན་ལས་འདས་པའི་རྟགས་ཀྱི་རིམ་པ་སྤྱི་དོན་གཉིས་པ་བསྟན་ནས། ད་ནི་སྤྱི་དོན་ཐ་མ་འགྲོ་བ་རིགས་དྲུག་སོ་སོའི་ལས་ཀྱི་ལེན་པོའི་རྟགས་ལ་ནང་དོན་བརྒྱད་ཡོད་པའི་དང་པོ། དམྱལ་བར་སྐྱེ་བའི་རྟགས་བསྟན་པ་ནི། ཡང་ཉོན་རྡོ་རྗེ་མཁའ་འགྲོ་མ་ཞེས་པ་ལ་སོགས་པས་བསྟན་ཏེ། ཡང་ཉོན་ཅིག་ཅེས་ཉན་པར་བསྐུལ་ནས། རྡོ་རྗེ་རིགས་ཀྱི་མཁའ་འགྲོ་མ་ཞེས་ཉན་པར་བསྐུལ་ནས། སྟོན་པ་ང་ཡིས་བསྟན་པའི་ཚིག་འདི་ཉོན། འདི་ལ་འཁྲུལ་པ་ཡོད་མ་མྱོང་བས་ཁྱོད་ཀྱིས་ཀྱང་མ་འཁྲུལ་པར་ཉོན་ཞེས་པའོ། །འདི་ལྟར་སྣང་བའི་སེམས་ཅན་ཐམས་ཅད་ལ་ནི། འགྲོ་བའི་ལམ་ལ་གཉིས། འབྲས་བུ་གཉིས་ཏེ་བཞི། འགྲོ་བའི་ལམ་ནི་ཆོས་ཉིད་ཀྱི་བར་མ་དོ་དང་། སྲིད་པའི་བར་དོ་གཉིས་མ་ཡིན་པའི་ལམ་ཡོད་མི་སྲིད། འབྲས་བུ་སངས་རྒྱས་དང་། སེམས་ཅན་རང་དུ་གཏོགས་པ་གཉིས་ལས་འགྲོ་ས་མེད་དོ། །སངས་རྒྱས་ཀྱི་ལམ་ལ་ཡང་ལྔ། ཚོགས་ལམ་དང་། སྦྱོར་ལམ་དང་། མཐོང་ལམདང་། བསྒོམ་ལམ་དང་། མཐར་ཕྱིན་པའི་ལམ་དང་ལྔ། སེམས་ཅན་གྱི་ཁམས་ལ་ཡང་རྒྱུད་ལྔ་སྟེ། རྨི་ལམ་གྱི་ལམ་དང་། བག་ཆགས་ཀྱི་ལམ་དང་། ལམ་གྱི་ལམ་དང་། འཁྲུལ་འཁོར་མ་ངེས་པའི་ལམ་དང་། རྒྱུ་དང་འབྲས་བུ་སོ་སོར་ངེས་པའི་ལམ་མོ། །འབྲས་བུ་གཉིས་ལས་ཁྱད་པར་དུ་སངས་རྒྱས་ནི། ཡེ་ཇི་བཞིན་པའི་སངས་རྒྱས་ཀྱི་འབྲས་བུ་དང་། རྟོགས་པ་མངོན་དུ་གྱུར་པའི་འབྲས་བུའོ། །སེམས་ཅན་གྱི་འབྲས་བུ་ནི། དམྱལ་བ་དང་། ཡི་དྭགས་དང་། བྱོལ་སོང་དང་། མི་དང་། ལྷ་མ་ཡིན་དང་། ལྷ་དང་དྲུག་ལས་འགྲོ་ས་མེད་དོ། །དེ་ལྟར་སེམས་ཅན་ནི་སེམས་ཉིད་རང་གིས་རང་བཅིངས་པའི་སེམས་ཅན་ཐར་པ་རིང་དུ་གྱུར་པ་དང་། ལུང་དུ་མ་བསྟན་པའི་སེམས་ཅན་དོན་ལ་ཤེད་མ་བྱེ་བ་དང་། ལུང་དུ་བསྟན་པའི་སེམས་ཅན་དོན་ལ་རྗེས་སུ་འཛིན་པ་རྣམས་ཀྱིས་འབྲས་བུ་སངས་རྒྱས་ཚིག་ལ་རྗེས་སུ་འཛིན་པའི་སེམས་ཅན་དོན་ལ་ངེས་པ་སྟེ་ཉན་ཐོས་ལ་སོགས་པའི་ས་ལ་གནས་པའོ། །གོང་མའི་གཉིས་པོ་དེ་ཚེའི་འདུ་བྱེད་བྱེད་པའི་ཚེ། ཕྱི་རོལ་གྱི་ནམ་མཁའ་མཚན་ཉིད་དྲུག་ལ་བཏགས་པས་རིགས་དྲུག་གི་འབྲས་བུ་ཇི་ལྟར་ལེན་བརྟགས་པ་ནི། ཚེ་འཕོས་པ་འདི་ཀུན་སྐྱེས་པའི་གནས་ལ་སྤྱོད་པ་དེ་སྐྱེས་པའམ་བུད་མེད་གང་ཞིག་ཤི་བ་དབུགས་དང་བྲལ་མ་ཐག་པ་དེའི་ཚེ་ན། ནམ་མཁའི་སྤྲིན་སྨུག་པོ་ལས་རབ་ཏུ་ནག་པས་ཕྱོགས་ཀུན་ནས་འཐིབས་པ་མུན་པ་གནག་ཅིང་ཉི་ཟླ་ལ་སོགས་པའི་འོད་འབྱིན་པར་མི་ནུས་པ། དེ་བཞིན་དུ་ཡང་རབ་ཏུ་གྲགས་པའི་ཆར་འབབས་པ་དང་། ཁུ་འཕང་དྲག་པོ་འབེབས་པ་དང་། རླུང་ནག་གི་འཚུབ་མས་བར་སྣང་མི་མཐོང་བ་དང་། སེར་བ་དྲག་པོ་གློག་མེད་པར་འབབ་པ་དང་། བུ་ཡུག་གི་འཚུབ་མ་དང་། འདི་ཀུན་སུ་ལ་བྱུང་བ་དེ། དམྱལ་བའི་སྐྱེ་གནས་ནི་གོང་གི་རྟགས་ཀྱི་རིམ་པས་ནས་ཚ་བའི་དམྱལ་བ་བརྒྱད་དང་། གྲང་བ་བརྒྱད་དང་། ཉི་ཚེ་བ་དང་། ཉེ་འཁོར་བ་དང་། སེམས་ཅན་དམྱལ་བ་དང་། མནར་མེད་དམྱལ་བ་དང་། རྡོ་རྗེ་དམྱལ་བ་དང་བདུན་དུ་གོང་མའི་རྟགས་རྣམས་དང་རིམ་གྱིས་དེ་དག་གི་གནས་རྣམས་སུ་གང་ཟག་འདི་ལ་བར་མ་དོར་མེད་པར་དམྱལ་བའི་གནས་དེ་དག་ཏུ་གྱུར་པ་ཡིན་ནོ་མཁའ་འགྲོ་མ། ཞེས་དམྱལ་བའི་སྐྱེ་གནས་སུ་སྐྱེ་བའི་རྟགས་བསྟན་ནས། ད་ནི་ཡི་དྭགས་ཀྱི་སྐྱེ་གནས་སུ་སྐྱེས་པའི་རྟགས་བསྟན་པ་ནི། ནམ་མཁའ་ན་བུན་ལྟ་བུ་ལ། །ཞེས་པ་ལ་སོགས་པས་བསྟན་ཏེ། ཡང་ཡི་དྭགས་ཀྱི་གནས་སུ་སྐྱེ་བའི་གང་ཟག་ཚེ་འཕོས་པའི་དུས་ན། ནམ་མཁའ་ན་བུན་ལྟ་བུའམ་རླངས་པའམ། ཉི་མ་མེད་ཀྱང་ནམ་མཁའ་ལ་འོད་ནི་སེར་ལམ་གྱིས་སོང་བ་ཉི་མ་ལྟ་བུ་དང་། ཤི་ནས་ཟླ་བའི་འོད་ཕྱིར་འབྱིན་པའི་ནུས་པ་མེད་པ་དང་། ཡང་དེ་བཞིན་དུ་རླུང་དང་སེར་བུ་མེད་པ་ལ་བར་སྣང་ཐམས་ཅད་ཀྱི་སྤྲིན་སེར་པོས་ཉི་མ་མི་སྣང་བ་དང་། ཡང་ན་ཆར་བབ་པའི་ཤུལ་ལམ་ཡང་ནི་དེའི་ཕྱི་ནུབ་ཀྱི་སྲོད་ལ་ཆར་བ་འབབ་པར་འགྱུར་བ། འདི་ལྟར་སུ་ལ་བྱུང་བ་དེ་ནི་གོང་དུ་བསྟན་པའི་རིམ་པས། ཡི་དྭགས་ཕྱིའི་སྒྲིབ་པ་ཅན་དང་། ནང་གི་སྒྲིབ་པ་ཅན་དང་། གློ་བུར་བའི་སྒྲིབ་པ་ཅན་དང་། བྱེ་བྲག་པའི་སྒྲིབ་པ་ཅན་དང་། དམིགས་པ་ཕྱིན་ཅི་ལོག་ཏུ་སོང་བའི་སྒྲིབ་པ་ཅན་དང་། ལས་དང་ལས་ཀྱི་རྣམ་གྲངས་གི་སྒྲིབ་པ་ཅན་དང་། ལོངས་སྤྱོད་རྣམ་པར་སྤྲུལ་པ་རབ་ཏུ་མ་གྱུར་པའི་སྒྲིབ་པ་ཅན་རྣམས་ཀྱིི་སྐྱེ་གནས་སུ་སྐྱེས་པ་ཡིན་ནོ་མཁའ་འགྲོ་མ། ཞེས་ཡི་དྭགས་ཀྱི་སྐྱེ་གནས་སུ་སྐྱེ་བའི་རྟགས་བསྟན་ནས། ད་ནི་བྱོལ་སོང་དུ་སྐྱེ་བའི་རྟགས་བསྟན་པ་ནི། སྐྱེས་བུ་གང་ཚེ་འཕོས་པའི་དུས་ན་ཕྱིའི་ནམ་མཁའ་སྨུག་ཅིང་བག་དྲོ་ལ། རླུང་ཡང་མེད་པ་དང་། ཡང་དེའི་ཚེ་སྤྲིན་ནི་ནག་པོས་ཕྱོགས་ཐམས་ཅད་དུ་ཁྱབ་པ་གོ་མཚམས་མེད་པ་དང་། ཡང་ན་ན་བུན་ལང་ལོང་དུ་སྣང་བའམ། སྨུག་པའི་རྣམ་པའམ། དུ་བའི་རྣམ་པ་ལྟར་སྣང་བ་དང་། ཡང་སྨུགས་ཤིང་ཉམས་མི་དགའ་བ་ལ་ཚེའི་འདུ་བྱེད་སུས་བྱས་པ་དེ་ནི། གོང་གི་རྟགས་ཀྱི་གོ་རིམ་གྱི་འགྲོ་བ་འདི་ནི་བྱོལ་སོང་རྐང་མང་དང་། རྐང་མེད་དང་། རྐང་པ་བཞི་པ་དང་། འདབས་ཆགས་དང་། སྡེར་ཆགས་རྣམས་ཀྱི་སྐྱེ་གནས་སུ་སྐྱེས་སོ། །ཞེས་བྱོལ་སོང་དུ་སྐྱེ་བའི་རྟགས་བསྟན་ནས། ད་ནི་ལྷ་མིན་དུ་སྐྱེ་བའི་རྟགས་བསྟན་པ་ནི། ཡང་སྐྱེས་བུ་ཚེ་འདས་པའི་དུས་ན་ཤིན་ཏུ་དྲག་ཅིང་རླུང་ཆེན་པོ་ཕྱོགས་ངེས་པ་མེད་པ་ནས་འཁྲུག་པར་བྱེད་པ་དང་། ཡང་སྤྲིན་ཁམ་ནག་སྲོག་ཆགས་འཇིགས་པའི་གཟུགས་དང་འདྲ་བ་དང་། སྤྲིན་པ་དེ་དག་ཀྱང་རབ་ཏུ་འཁྲུག་པར་བྱེད་ཅིང་ཕན་ཚུན་དུ་འགྲོ་བ་དང་སོང་བའི་ས་མེད་པ་དང་། ཡང་འབྲུག་དྲག་པོ་དང་གློག་གྱེན་འགྲེང་དུ་འཁྱུག་པ་ལ་འབྲུག་གི་སྐད་རབ་ཏུ་གཤང་བར་འབྱིན་པ་དང་། ཡང་ཉི་མ་དང་ཟླ་བ་སྣང་བར་མི་ནུས་པ་སྟེ། སྤྲིན་པས་དེ་ཉིད་སྒྲིབ་པ་དང་། རྟགས་འདི་ལྟར་སུ་ལ་བྱུང་བ་དེ་ནི་རྟགས་ལྔ་གོ་རིམ་གྱིས་འདི་ནི་ལྷ་མིན་ཟུར་ཕུད་ལྔ་པ་དང་། གདོང་དྲུག་པ་དང་། ལག་རིང་པ་དང་། ལྟོ་འཕྱེ་ཆེན་པོ་དང་། ནམ་མཁའ་ལྡིང་རལ་བ་ཅན་རྣམས་ཀྱི་སྐྱེས་གནས་སུ་སྐྱེ་བ་ཉིད་ཡིན་ནོ། །ཞེས་ལྷ་མིན་དུ་སྐྱེ་བའི་རྟགས་བསྟན་ནས། ད་ནི་ལྷའི་གནས་སུ་སྐྱེ་བའི་རྟགས་བསྟན་པ་ནི། ཡང་ཚེ་འདས་པའི་སྐྱེས་བུ་དབུགས་དང་བྲལ་བའི་ཚེ་ནམ་མཁའི་ཁ་དོག་གསལ་ཞིང་དྭངས་པ་ལ་ཉི་མའི་སྣང་བ་གསལ་བ་དང་། ཡང་ཟླ་བའི་སྣང་བ་གསལ་བ་དང་། ཡང་དེའི་དུས་ན་རླུང་དང་སེར་བུ་སྣང་མི་ནུས་པ་དང་། འདི་ལྟར་བྱུང་བ་འདི་ནི་གོང་མའི་རྟགས་བཞིའི་གོ་རིམ་གྱིས་འདོད་པའི་ཁམས་ཀྱི་ལྷ་རིགས་དྲུག་དང་། གཙང་མ་རིས་ཀྱི་ལྷ་གནས་ལྔ་དང་། འོད་གསལ་ལ་སོགས་པའི་སྐྱེ་གནས་བཅྭོ་ལྔ་དང་། སྐྱེ་མཆེད་མུ་བཞིའི་སྐྱེ་གནས་སུ་སྐྱེ་བ་དག་གིས་སོ། །ཞེས་ལྷའི་འགྲོ་བར་སྐྱེ་བའི་རྟགས་བསྟན་ནས། ད་ནི་ལུས་མཆོག་ཏུ་གྱུར་བ་མིའི་ལུས་སུ་སྐྱེས་པའི་རྟགས་བསྟན་པ་ནི། ཡང་ན་གང་ཟག་ཚེ་འདས་པའི་དུས་ན་ནམ་མཁའ་རབ་ཏུ་གསལ་ཞིང་དག་པ་ལ་སེར་བུ་མེད་པ་དང་། ཡང་མི་འབྱེད་པའི་སྤྲིན་པ་དཀར་ཞིང་ཤིན་ཏུ་སྲ་བའི་རྣམ་པ་ཅན་བར་སྣང་དང་། ཡང་དེའི་དུས་ནི་ཉི་མ་དང་ཟླ་བ་འོད་ལྔའི་ཁྱིམ་ཅན་དུ་འདི་ལྟར་སུ་ལ་བྱུང་བ་ནི་གོང་གི་རྟགས་གསུམ་གྱི་གོ་རིམ་གྱིས་མིའི་ལུས་ཙམ་པོ་དང་། གཙང་མ་དང་། མི་ལུས་རིན་པོ་ཆེའི་སྐྱེ་གནས་སྐྱེས་བུ་འདི་ས་ཐོབ་པའོ། །ཞེས་མིའི་སྐྱེ་གནས་སུ་སྐྱེ་བའི་རྟགས་བསྟན་ནས། ད་ནི་རྟགས་དེ་དག་གི་དུས་ཀྱི་ངེས་པ་བསྟན་པ་ནི། དེ་ལྟར་རྟགས་དང་སུ་ལྡན་པ། །ཞེས་པ་ལ་སོགས་པས་བསྟན་ཏེ། གོང་དུ་བསྟན་པའི་རིས་ཀྱི་རྟགས་དེ་ལྟར། ད་རྟགས་ངེས་པ་དང་སུ་ལྡན་པ་དེ་དག་ནི། དུས་མ་ནོར་བ་ལ་ཤི་ངེས་པར་འགྲོ་བ་རིགས་དྲུག་གི་སར་ངེས་པ་ཡིན་ནོ། །འདི་ལྟར་མ་ཡིན་པའི་ཚེའི་འདུ་བྱེད་པ་རྣམས་ནི། གོང་གི་དུས་ངེས་པའི་རྟགས་མེད་ན་གར་སྐྱེ་ངེས་པ་མེད་པ་ཡིན་ནོ། །འདི་ལྟར་གོང་མའི་རྟགས་དེ་དག་ཀུན། སྐྱེས་བུ་དེ་ཤི་ནས་ཞག་ནི་གཉིས་ནས་གསུམ་དུ་བརྟགས་པའོ། །དེ་ནས་ཡང་ནམ་ཤི་བའི་དུས་ཚོད་བཟུང་བའི་ཞག་གསུམ་ཚུན་ཆོད་ལ་ཤེས། གོང་དུ་མ་ཤེས་ན་དུས་ངེས་པ་ལ་བརྟགས། ཡང་ཕུང་པོ་བསྲེགས་པའམ་དུས་ངེས་པ་ལ་དེའི་དུས་སུ་བརྟག་གོ། །དེ་ལྟར་བརྟགས་པས་གོང་མའི་རྟགས་དེ་དག་བྱུང་བའི་སོ་སོའི་སྐྱེ་གནས་དེར་སྐྱེ་བའི་རྟགས་ཡིན་ནོ། །ཞེས་དེ་དག་གི་རྟགས་ངེས་པ་བསྟན་ནས། ད་ནི་མཇུག་བསྡུ་བའི་རྒྱུད་ཀྱི་ལྡང་ཚད་ངེས་པའི་མན་ངག་ལག་ཏུ་བླངས་པ་དང་བཅས་ཏེ་བསྟན་པ་ནི། ཡང་ནི་ཉོན་ཅིག་མཁའ་འགྲོ་མ། །ཞེས་པ་ལ་སོགས་པས་བསྟན་ཏེ། ཡང་རྒྱུད་ཐམས་ཅད་ཀྱི་དོན་བསྡུ་ནི་དྲིལ་བའི་མན་ངག་གི་ཚིག་འདི་མཁའ་འགྲོ་མ་ཁྱོད་ཀྱིས་ཡིད་གཞན་དུ་མ་ཡེངས་པར་ཉོན་མཁའ་འགྲོ་མ། ཞེས་སྡུད་པ་པོ་ལ་བསྐུལ་ཞིང་སྐྱོན་བསལ་ནས། ཚིག་འདི་ཀུན་རྒྱུད་ཀྱི་རང་བཞིན་དུ་བསྟན་པ་འདི་ལྟར་འབྱུང་སྟེ། དེ་ཡང་རྟེན་གྱི་གང་ཟག་འཁོར་བ་ལས་བློ་ལོག་ཅིང་ཚེ་འདིའི་ཆེད་དུ་མི་བྱེད་པའི་སྐལ་ལྡན་གྱིས། རང་དད་པ་ཕྱིན་ཅི་ལོག་ཏུ་མ་གྱུར་པར་བརྟགས་པ་བྱས་ལ། སྔོན་དུ་ལས་རྒྱུ་འབྲས་ཀྱི་ཆོས་ལ་བློ་གཟུད་དོ། །དེ་ནས་དབུ་མའི་སྒྲུབ་པའི་མཐའ་ལ་བསླབ་བོ། །དེ་དག་གཉིས་ཀྱིས་ནི། ལས་རྒྱུ་འབྲས་བསླུ་མེད་དུ་ཤེས་པས་འཁོར་བ་ལས་བློ་ལོག་པའི་དགོས་པ་ཡོད་དོ། །དེ་ནས་ཕ་རོལ་དུ་ཕྱིན་པའི་དོན་དབུ་མ་ལ་བསླབས་པ་ནི། གསང་སྔགས་སུ་འཇུག་པར་བྱེད་པའི་ལམ་སྟེགས་སུ་འགྲོ་བ་ཡིན་ནོ། །དེ་དག་གིས་སངས་རྒྱ་བ་ནི་མ་ཡིན་པས། ད་གསང་སྔགས་སུ་འཇུག་དགོས་པ་ཡིན་པས། སྔགས་ཕྱི་ནང་གི་དབང་བསྐུར་བ་ལ་སོགས་པའི་སྒོ་མཐོང་ན་ཡང་ལེགས། གལ་ཏེ་མ་མཐོང་ན་རྫོགས་པ་ཆེན་པོའི་སྒོར་ཞུགས་ཏེ། མྱུར་དུ་མངོན་པར་རྫོགས་པ་སངས་རྒྱ་བའི་མན་ངག་ཞུ། སྔོན་དུ་བླ་མ་དག་པ་གལ་ཆེ་བས། བླ་མ་བཙལ་བར་བྱའོ། །བླ་མ་དེ་ཡང་གསང་སྔགས་ཕྱི་ནང་གི་དབང་རྫོགས་པར་བྱས་པ། རྒྱུད་སྡེ་མང་པོ་མཁྱེན་པ། རིགས་བཙུན་ཞིང་འདོད་པ་ཆུང་བ། རང་བཞིན་རྫོགས་པ་ཆེན་པོའི་དོན་ཉམས་སུ་ལེན་པ། བླ་མ་གོང་མ་རྣམས་ཀྱིས་གྲུབ་པ་ཐོབ་པའི་བརྒྱུད་པ་རྒྱུན་མ་ཆད་པ། ཚེ་འདི་བློས་ཐོངས་པ། སྔགས་ཕྱི་ནང་གི་མཚན་ཉིད་མཐོང་བ། རྒྱུད་སྡེ་མང་པོ་ལ་གོམས་པས་ཐུགས་སྦྱངས་ཤིང་ཐོས་པ་དང་ལྡན་པ་ཉམས་སུ་བླངས་ཤིང་ཉམས་མྱོང་ཡོད་པས། གནས་ལུགས་རྟོགས་ཤིང་ལྟ་བའི་དོན་ལ་མཁས་པ། ཆོས་ཀྱི་ཚིག་ལ་ཡིད་དཔྱོད་ཀྱི་སྒྲོས་མེད་པ་དང་། མན་ངག་གི་རྒྱུད་པ་མ་ཉམས་ཤིང་འདྲ་མིན་གྱི་བསླད་མ་བཙུད་པ། མན་ངག་ལ་ཚིག་གི་འཕྲ་མས་མ་བསླད་པ། ཤེས་རབ་མ་དག་པ་དང་། ཕྱིན་ཅི་ལོག་གི་ཤེས་རབ་དུ་མ་གྱུར་པའི་བླ་མ་བཙལ་ལ། དེ་ལྟར་སྔོན་དུ་བླ་མ་དག་པ་གལ་ཆེའོ། །དེ་ནས་དད་པ་དང་ལྡན་པའི་སློབ་མ་དེས། སྔོན་དུ་དབང་བཞི་རྫོགས་པར་བྱས་ཏེ། ལོ་གཉིས་ནས་གསུམ་གྱི་གོང་ནས་བླ་མ་ལ་དབང་ཞུ་བའི་ཞུ་བ་ཕུལ་ལ། སྔོན་དུ་སྤྲོས་བཅས་ཀྱི་དབང་རྫོགས་པར་བྱས་ལ་སྤྲོས་པའི་མཐའ་ཐམས་ཅད་བཅད་དོ། །དེ་ལྟར་སྤྲོས་པ་གཅད་ནས། ད་སྤྲོས་པ་མེད་པའི་དོན་ལ་གནས་པའི་དོན་དུ་སྤྲོས་མེད་ཀྱི་དབང་རྫོགས་པར་ཞུ། དེ་ལྟར་སྤྲོས་པ་མེད་པའི་དོན་རྟོགས་པར་བྱས་ནས། ད་ནི་སྤྲོས་པ་མེད་དོ་ཞེས་བྱ་བ་ལ་ཡང་མི་གནས་པར་བྱ་བའི་ཕྱིར་དུ་ཤིན་ཏུ་སྤྲོས་པ་མེད་པའི་དབང་རྫོགས་པར་བྱས་ནས། སྤྲོས་པ་མེད་པའི་ཚིག་ཕྲ་བའི་ཕྲ་བ་ཙམ་ཡང་མི་གནས་པའི་ཕྱིར་ན་མ་བསྐུར་གཞི་ནས་རྫོགས་པའི་རབ་ཏུ་སྤྲོས་པ་མེད་པའི་དབང་བསྐུར་ནས། རང་གི་བླ་མ་དེ་ལ་རྫས་དང་ཡོ་བྱད་ཐམས་ཅད་རང་གི་འཚོ་བ་ཙམ་བཞག་ལ། འཁོར་གསུམ་ཡོངས་དག་ཏུ་དབུལ་བར་བྱའོ། །དེ་ལྟར་དབང་རྫོགས་པར་བསྐུར་བའི་སློབ་མ་དེ་ཡང་། སློབ་དཔོན་གྱིས་མཚན་ཉིད་བརྟགས་པ་གལ་ཆེ་བས། སློབ་མའི་མཚན་ཉིད་ལྔ་དང་ལྡན་པ་ག ཅེས། དད་པ་དང་ལྡན་ཞིང་བླ་མ་ལ་སངས་རྒྱས་ཀྱི་འདུ་ཤེས་མི་འབྲལ་བ་དང་། གཏོང་ཕོད་ཆེ་ཞིང་གསང་ཐུབ་པ་དང་། བརྩོན་འགྲུས་ཆེ་ཞིང་ཡང་དག་པའི་ཤེས་རབ་དང་ལྡན་པར། སྒྲུབ་པ་ལ་བརྩོན་ཆེ་ཞིང་དམ་ཚིག་དང་ལྡན་པ་དང་། ང་རྒྱལ་ཞི་ཞིང་དབང་པོ་དུལ་བ་དང་ལྡན་པ་རབ་ཏུ་གཅེས་སོ། །དེ་ལ་དབང་བསྐུར་བ་དབང་བཞི་སྤྲོས་བཅས་ཀྱི་དབང་གིས་གང་ལ་དབང་ནི། ཕྱི་སྣང་བ་ལ་དབང་། ནང་སྤྱོད་པ་ལ་དབང་། གསང་བ་ལུས་ལ་དབང་། ཡོངས་སུ་རྫོགས་པ་སྤྲུལ་པའི་སྐུ་ལ་དབང་ངོ་། །གང་གིས་དབང་ན་སློབ་མ་མཚན་ཉིད་དང་ལྡན་པ་དེས་དབང་། ཅིའི་ཕྱིར་དབང་ནི་རང་ལ་ཡོད་པའི་དོན་རང་གིས་རང་དབང་དུ་གྱུར་པ་དབང་། དབང་ལ་དགོས་པ་ཅི་ཡོད་ན་རྒྱུད་ཉན་པ་དང་བཤད་པ་དང་། ལྟ་བ་དང་། རྒྱུད་ཀྱི་དོན་སྤྱོད་པའི་དགོངས་པ་དང་། ཕྱིའི་སྤྲོས་པ་ཆོད་པའི་དགོས་པ་ཡོད་དོ། །སྤྲོས་མེད་ཀྱི་དབང་གིས་གང་ལ་དབང་ན། ཕྱི་འབྱུང་བ་ལ་དབང་། ནང་རྩ་རླུང་སྒོམ་པ་ལ་དབང་། གསང་བ་ངག་ལ་དབང་། ཡང་གསང་བླ་ན་མེད་པ་ལོངས་སྐུ་ལ་དབང་ངོ་། །གང་གིས་དབང་ན་སློབ་མ་མཚན་ཉིད་ལྔ་དང་ལྡན་པ་དེས་དབང་། ཅིའི་ཕྱིར་དབང་ན་རང་ལ་ཡོད་པའི་དོན་རང་གིས་རང་དབང་དུ་གྱུར་པ་ན་དབང་། དབང་བ་ལ་དགོས་པ་ཅི་ཡོད་ན། མན་ངག་ལ་ལོངས་སྤྱོད་པ་དང་། ཐབས་ཀྱི་མན་ངག་རྣམས་ལ་སྤྱོད་པ་དང་། རང་བཞིན་རྩ་གནས་ཀྱི་ཡི་གེ་བརྗོད་པ་དང་། བསྒོམ་དུ་རུང་བའི་དགོས་པ་ཡོད་དོ། །ཤིན་ཏུ་སྤྲོས་མེད་ཀྱིས་གང་ལ་དབང་ན། ཕྱི་སྣང་ཡང་དག་པ་ལ་དབང་། ནང་ལྟ་བ་ལ་དབང་། གསང་བ་སེམས་ལ་དབང་། ཡང་གསང་བླ་ན་མེད་པ་ཆོས་སྐུ་ལ་དབང་ངོ་། །གང་གིས་དབང་ན་སློབ་མ་མཚན་ཉིད་དང་ལྡན་པ་དེ་ཡི་དབང་། ཅིའི་ཕྱིར་དབང་ན་རང་ལ་གནས་པའི་དོན་དེ་རང་གིས་རང་དབང་བའོ། །དབང་བ་ལ་དགོས་པ་ཅི་ཡོད་ན། ཉམས་སུ་བླང་དུ་རུང་བ་དང་། དགོན་པ་རྟེན་དུ་རུང་བ་དང་། ལྟ་བའི་དོན་ལ་ལོངས་སྤྱོད་དུ་རུང་བའི་དགོས་པ་དང་། དེས་སློབ་མ་རྟེན་དུ་རུང་བའི་དགོས་པ་ཡོད་དོ། །དེ་ལྟར་དབང་རྫོགས་ནས་བླ་མ་དེས་སློབ་མ་ལ། སྔོན་དུ་འགྲོ་བའི་མན་ངག་ལ་བསླབ་བོ། །རྟགས་མཚན་ལ་དབང་བའོ། །དེ་ནས་དུར་ཁྲོད་ལ་སོགས་པ་གནས་དབེན་པར་སོང་སྟེ། བརྗོད་པ་མེད་པའི་དོན་རྒྱུད་ལ་གོམས་པར་བྱ་བའི་ཕྱིར་ངག་བཅད། ལུས་ཀྱི་མཐའ་ལས་གྲོལ་བར་བྱ་བའི་ཕྱིར་བཞུགས་སྟངས་གསུམ་ལ་གནས་པར་བྱ། ཡིད་ཀྱི་སྤྲོ་བསྡུ་བཅད་པའི་ཕྱིར་རང་སར་བཞག་པའོ། །དེ་དག་གི་མན་ངག་ལ་ཡང་བཞུགས་སྟངས་དང་། གཟིགས་སྟངས་གཉིས་སུ་འདུག །ངག་གི་མན་ངག་མང་ཡང་། ངག་བཅད་པ་དང་བསྒྱུར་བ་གཉིས་སུ་འདུས་ལ། ཡི་དམ་སེམས་ཀྱི་མན་ངག་མང་ཡང་། རྩ་བ་བཅད་པ་དང་དངོས་པོ་འདུལ་བ་གཉིས་སུ་འདུས་པའོ། །དེ་ནས་དངོས་གཞི་ཟག་པ་མེད་པའི་ཡེ་ཤེས་མན་ངག་བསྟན་ལ་ཉམས་སུ་བླང་བ་ནི། མ་འགུལ་བ་གསུམ་ལ་གཞི་བཅའ་བ་དང་། མི་འགུལ་བ་གསུམ་གྱིས་གནད་གཟིར་བ་དང་། སྡོད་པ་གསུམ་གྱིས་ཚད་བཟུང་བ་སྟེ། མན་ངག་རྣམ་པ་དགུ་ཡིས་དངོས་གཞི་ལ་སློབ་པའོ། །དེ་ལྟར་གདམས་པ་རྫོགས་ནས་འཕེལ་སྣང་ངོས་བཟུང་བ་དང་། ཚད་སྣང་སྲང་ལ་གདབ་པ་དང་། ཟད་པ་ངོ་ཤེས་པ་དང་གསུམ་གྱིས། འབྲས་བུ་སྐུ་གསུམ་ལས་གྲོལ་བའོ། །དེ་ལྟར་དབང་དང་མན་ངག་རྫོགས་ནས་རྟེན་གྱི་གང་ཟག་གིས་གྲོགས་དམ་ཚིག་དང་ལྡན་པ་བརྟེན་པ་རབ་ཏུ་གལ་ཆེའོ། །དམ་ཚིག་ཉམས་ན་མན་ངག་ཟབ་པས་མི་ཕན་པས་དམྱལ་བར་འགྲོ་བ་ངེས་སོ། །དཔེར་ན་ལོ་ཐོག་ལེགས་པར་སྨིན་པའི་ཁར་སད་དང་སེར་བ་འབྱུང་བའི་འབྲས་བུ་གཏན་བརླགས་པ་དང་འདྲའོ། །དེ་ཡང་དམ་ཚིག་གི་རྣམ་གྲངས་དང་། བསྲུངས་མཚམས་ངོ་ཤེས་པར་བྱ་བ་དང་། དེ་དག་རྒྱུད་ལ་བརྟེན་པའི་མན་ངག་དང་། དམ་ཚིག་ཉམས་བའི་ལྟས་དང་། དེ་དག་བསྐང་བའི་ཆོ་ག་དང་། སྐོངས་པའི་རྟགས་དང་། མ་བསྐངས་པའི་རྟགས་ལ་སོགས་པ་ནི་བླ་མའི་རིམ་པའི་ཡི་གེ་དང་སྦྱར་བར་བྱའོ། །དེ་ལྟར་ལུང་མ་ནོར་བར་བྱས་ནས། སློབ་མ་དང་བླ་མ་གཉིས་ཀས་སངས་རྒྱ་བར་ངེས་པའོ། །དེ་དག་རྒྱུད་དང་སྦྱར་ན། དེ་ལྟར་སློབ་མ་དད་པ་དང་ལྡན་པ་དེ། བླ་མ་མཚན་ཉིད་དང་ལྡན་པ་བསྟན་པའི་ཕྱིར། སྔོན་འབྱུང་དུ་སྟོན་པ་ཁྱད་པར་ཅན་གྱི་ཡོན་ཏན་ཕུན་སུམ་ཚོགས་པ་ལྔ་དང་ལྡན་པ། རྗེས་འཇུག་ཏུ་བླ་མ་རྡོ་རྗེ་འཆང་བ་ཡིས་མན་ངག་ཕྱིན་ཅི་མ་ལོག་པར་སྟོན་པ། མཚན་ཉིད་བཅུ་བཞི་དང་ལྡན་པར་བྱས་ཏེ། དེ་ལྟ་བུའི་བླ་མ་དེ་ལ་སློབ་མ་སྣ་གཅིག་པ་དག་པ་རབ་ཀྱིས་རྡོ་རྗེ་འཆང་བས་ལྷག་པར་མཐོང་བ་དང་། འབྲིང་གིས་རྡོ་རྗེ་འཆང་དང་མཉམ་པར་མཐོང་བ་དང་། ཐ་མས་རྡོ་རྗེ་འཆང་ཐ་མི་དད་པར་མཐོང་བའོ། །དེ་ལྟ་བུའི་བླ་མ་མཚན་ཉིད་བཅུ་བཞིའམ་བཅོ་ལྔ་དང་ལྡན་པ་དེ་ལ། སློབ་མ་མཚན་ཉིད་ལྔ་དང་ལྡན་པ་མོས་པ་དང་ལྡན་པ་དག་པའི་སྒོ་ནས་ཞུ་བ་ནི། སྔོན་འབྱུང་དུ་སྟོན་པའི་མཁའ་འགྲོ་ཡིན་ལ། རྗེས་འཇུག་ཏུ་སློབ་མ་མཚན་ཉིད་ལྔ་དང་ལྡན་པ་དེ་བླ་མའི་འཁོར་དུ་སྣང་བ་ཡིན་ལ། དེ་ལྟ་བུའི་མཚན་ཉིད་དང་ལྡན་པའི་སློབ་མ་དེ་སྣང་བ་དག་པས་བླ་མ་རྡོ་རྗེ་འཆང་དུ་ལྷག་པར་མཐོང་བས་ཀུན་ནས་ཉོན་མོངས་པའི་རྣམ་རྟོག་མི་གནས་ཏེ། ལས་དང་སྒྲིབ་པ་བླ་མའི་ལུས་ཀྱི་བྱ་བ་མ་ལོག་པས་འདགས་པ་དང་། ངག་གི་བྱ་བ་མ་ལོག་པས་ཉོན་མོངས་པའི་སྒྲིབ་པ་འདགས་ལ། ཡིད་ཀྱི་བྱ་བ་མ་ལོག་པས་ཤེས་བྱའི་སྒྲིབ་པ་འདགས་པས་ན། སྐུ་གསུང་ཐུགས་ཀྱི་དམ་ཚིག་ལ་གནས་པ་གལ་ཆེའོ། །དེ་ལྟར་སློབ་དཔོན་གྱིས་འབྲེལ་པ་བརྟགས་ནས། དབང་རྫོགས་པར་བསྐུར་བ་ལ། མ་བསྐུར་བ་ནི་ཡེ་ནས་གནས་པའི་དོན་དེ་དང་པོ་སུས་ཀྱང་བསྐུར་བ་མེད་པས། ད་ལྟ་ཕན་ཆོད་དུ་སྐྱེ་བ་གྲངས་མེད་པར་འཁོར་བ་ཡིན་པས། ད་རེས་འཁོར་བ་ལས་བཟློག་པར་བྱ་བའི་དོན་དུ། བླ་མ་མཚན་ཉིད་དང་ལྡན་པས་རང་གི་གཞི་ནས་དབང་པོའི་དབང་བཞི་རྫོགས་པར་བྱས་པའི། དབང་བཞི་བདེ་ལུགས་སུ་ཐོབ་ནས། སློབ་མ་དད་པ་དང་ལྡན་པ་དེས་བླ་མ་དྲིན་ཆེན་དེ་ལ་ལུས་ངག་གུས་པ་དང་ལྡན་པས་ཡོན་དབུལ་བ་ནི། དེ་ལྟར་དབང་རྫོགས་པར་བསྐུར་བས། རྗེས་འཇུག་སློབ་མ་དེ་དག་རབ་ཏུ་དགའ་ཞིང་སེམས་འགྱུ་ནས་ལུས་ཀྱི་ཐལ་མོ་སྙིང་ཀར་སྦྱར་ནས་དབང་བསྐུར་བའི་དུས་དབང་གསུམ་པའི་ཚེ་རིག་པའི་མེ་ཏོག་ཕུལ་བས། བླ་མའི་ཐུགས་གཉིས་སུ་མེད་པའི་ཡེ་ཤེས་དང་གཉིས་སུ་མེད་པར་འགྱུར་བ་དང་། དབང་རྫོགས་ནས་རང་གི་ཡིད་ལ་འཐད་པའི་ནོར་བུ་རིན་པོ་ཆེ་ལ་སོགས་པ་ཕུལ་བས་བྱིན་རླབས་འཇུག་པའི་རྒྱུར་འགྲོ་བའོ། །སྔོན་འབྱུང་དུ་སྟོན་པའི་འཁོར་གྱི་རྒྱུད་གསུམ་ལ་ངག་དག །སེམས་འགྱུ། ལུས་ཐལ་མོ་སྦྱར་ནས་བསྟོད་པའོ། །དེ་ལྟར་དབང་རྫོགས་ནས་བླ་མས་སློབ་མ་དེ་ལ་མན་ངག་བསྟན་པ་ནི། སྔོན་འབྱུང་དུ་སྟོན་པ་ཉིད་ཀྱིས་འཁོར་ལའོ། །རྗེས་འཇུག་ཏུ་དབང་རྫོགས་པའི་སློབ་མ་ལ། ཅོག་གཞག་ནི་བརྡའ་དང་ཐབས་ལ་བརྟེན་ནས་རང་གི་རིག་པ་ཉིད་རང་སར་བཞག་པའི་མན་ངག་ཡུལ་དང་རིག་པ་དབང་པོ་དང་། མ་འཁྲུལ་པ་གསུམ་གྱི་གནད་བསྟན་པས་འབད་རྩོལ་དང་བྱས་བཅོས་ལས་འདས་པའི་དོན་དེ་ཉིད་ཚིག་གིས་གཏན་ལ་མི་ཕེབས། ཤེས་རབ་ཀྱི་སྤྱོད་ཡུལ་མ་ཡིན་པ་ཉིད་དེ། ཅོག་གིས་གཞག་པས་མི་འགུལ་བ་རྣམ་པ་གསུམ་གྱི་གནད་དོ། །དེ་ལྟར་སྔོན་དུ་འགྲོ་བའི་མན་ངག་རྫོགས་ནས། དངོས་གཞི་ཟག་པ་མེད་པ་དེ་ཉིད་གནས་རབ་ཏུ་དབེན་པར་ཉམས་སུ་ལེན་པ་ནི། རང་གི་གནས་ནི་རྐྱེན་མ་ཡིན་པ་སྟེ། རང་གི་ཡུལ་གྱི་རྐྱེན་གྱིས་མི་གནོད་པ། བར་ཆོད་མི་འབྱུང་བ་སྟེ་རབ་ཏུ་བཀྲ་ཤིས་པ་སོ་སོའི་ལུས་དང་མཐུན་པ། མི་མི་རྒྱུ་བའི་དུར་ཁྲོད་དུ་རྟེན་འབྲེལ་གྱི་མན་ངག་ཞུས་ལ་སྒྲུབ་བོ། །དེ་ཡང་གྲོགས་སྤངས་ལ་རང་གཅིག་པུར་སུ་དང་ཡང་མི་འགྲོགས་པར་གནས་རབ་ཏུ་དབེན་པའི་ས་ཕྱོགས་དེར། བླ་མའི་མན་ངག་བསྟན་པའི་དགོངས་པ་ཉིད་ལ་ངག་བཅད་ནས་གནས་པར་བྱའོ། །བླ་མ་དམ་པའི་དོན་གྱི་མན་ངག་བདེན་པ་ཚིག་དང་ཡི་གེ་ལ་མ་བརྟེན་པས་དབང་པོ་རྣོ་བརྟུལ་མེད་པའི་གནད་ཀྱིས་དེའི་དོན་ཉམས་སུ་ལེན་པ་ལ་ཡུན་རིང་པོར་གནས་པར་བྱའོ། །ཞེས་སྔོན་འབྱུང་དུ་སྟོན་པའི་འཁོར་གྱིས་སྒོམ་པར་དམ་བཅས་ལ། རྗེས་འཇུག་ཏུ་བླ་མའི་སློབ་མས་སྒོམ་པར་དམ་བཅས་པའོ། །དེ་ལྟར་དམ་བཅས་ནས་ཉམས་སུ་བླང་བས། འཕེལ་སྣང་ངོས་ཟིན་པ་དང་། ཚད་སྣང་སྲང་ལ་འདེབས་པར་འབྱུང་བ་ནི་ཐིག་ལེའི་སྣང་བ་སྣ་ཚོགས་པར་སྣང་བ་དང་། དེ་མི་འགྱུར་བའི་ཚད་ཐིག་ལེ་དེ་དག་གི་ནང་དུ་སྐུ་དང་སྟོན་པ་ལ་སོགས་པ་ཉམས་གོང་འཕེལ་གྱི་སྣང་བ་དང་། རིག་པ་ཚད་ལ་ཕེབ་པའོ། །དེ་ནས་ཟད་པར་ངོ་ཤེས་པ་ནི། ཉམས་གོང་འཕེལ་པའི་སྣང་བ་རྣམས་དམིགས་སུ་མེད་པ་ནི་ཆོས་ཉིད་ཟད་པའི་སྣང་བའོ། །ཟད་པ་དེ་ཉིད་ལ་དྲི་མ་དང་ཆོས་ཟད་པས་སངས་ཞེས་བྱ་བ་ལས། རང་ངོ་རྣམ་དག་ཏུ་གནས་པས་རྒྱས་པའོ། །དེ་ཚེ་འཁྲུལ་པ་ཐམས་ཅད་ཞིག་ཐ་སྙད་ཚིག་གི་དབང་དུ་བྱས་ན་འབྲས་བུ་ཞེས་མིང་དུ་གདགས་སོ། །དེ་གང་ལས་བྱུང་ན་རང་བཞིན་རྫོགས་པ་ཆེན་པོའི་དོན་ཉམས་སུ་བླངས་པ་ལས་བྱུང་བའོ། །དེ་ལྟར་དབང་དང་མན་ངག་དེ་བརྟེན་པའི་གྲོགས་དམ་ཚིག་རྟེན་པ་ནི། འདས་པ་ནི་དམ་ཚིག་གི་རྣམ་གྲངས་ཏེ། སྐུ་དང་གསུང་དང་ཐུགས་ཀྱི་དམ་ཚིག་ལས་འདས་ན་རྡོ་རྗེའི་དམྱལ་བར་འགྲོ་ལ། མ་འདས་ན་མཆོག་གི་དངོས་གྲུབ་ཐོབ་པས། དེའི་ཕྱིར་ན་དེ་ལས་འདའ་བ་མེད་པའི་བསྲུང་མཚམས་ངོ་ཤེས་པར་བྱའོ། །སྐུའི་དམ་ཚིག་ཅེས་བྱ་བ་ནི། རྡོ་རྗེ་སློབ་དཔོན་མཆེད་དང་ཡང་། །སངས་རྒྱས་རྣམས་ཀྱི་སྐུ་གཟུགས་དང་། །ལུས་ཅན་ཀུན་གྱི་རྟེན་རྣམས་ལ། །སྨད་ཅིང་གནོད་པ་ལུས་ཀྱི་ལས། །བྱས་ན་འདས་ཏེ་འབྲས་བུ་བརླག །སྤངས་ལ་དངོས་གྲུབ་ཆེན་པོ་ཐོབ། །གསུང་གི་དམ་ཚིག་ཞེས་བྱ་བ། །བླ་མའི་གསུང་དང་རྡོ་རྗེའི་སྤུན། །སངས་རྒྱས་རྣམས་ཀྱིས་གསུངས་པ་ཡི། །བཀའ་ལ་རས་ཆོད་གཟུ་ལུམ་དང་། །སྒྲོ་བཏགས་ཡིད་ཀྱི་དཔྱོད་པ་དང་། །རང་གཞན་གྲུབ་པའི་མཐའ་རྣམས་ལ། །སྨོད་ཚིག་དག་གི་ལས་རྣམས་ནི། །དངོས་སུ་བརྗོད་དང་ཞར་གྱིས་བྱས། །འདིས་ནི་གསུང་གིས་དམ་ཚིག་ཉམས། །དེ་དག་སྤངས་པས་དངོས་གྲུབ་ཐོབ། །ཐུགས་ཀྱི་དམ་ཚིག་ཞེས་བྱ་བ། །རྡོ་རྗེ་སློབ་དཔོན་སྤུན་དང་ཡང་། །སངས་རྒྱས་ཐུགས་ཀྱི་དགོངས་པ་དང་། །རང་གནས་བསམ་གཏན་ཏིང་འཛིན་དང་། །སངས་རྒྱས་བཀའ་དང་མན་ངག་ལ། །ལོག་པར་བལྟས་དང་མ་དག་པ། །འཁྲུལ་ཞིང་རྨོངས་དང་མ་ཤེས་པ། །ཡིད་ཀྱིས་བརྩམ་པའི་ལས་རྣམས་ཀྱིས། །རིམ་གྱི་པ་དང་གཅིག་ཆར་དུ། །བྱ་བ་ལོག་པས་འབྲས་བུ་བརླག །དེ་དག་ཤེས་པར་བྱས་ནས་ནི། །རྣམ་པར་སྤངས་ན་འབྲས་བུ་རྫོགས། །དེ་བཞིན་དེའི་གྲོགས་སུ་ཡང་། །གསང་བར་འོས་དང་གཉེར་གཏད་དང་། །དམ་རྫས་དང་ནི་དབང་བསྐུར་ཚིག །བླ་མའི་མན་ངག་རྒྱས་བཏབ་དང་། །བརྡ་དང་རྡོ་རྗེའི་གླུ་གར་དང་། །གསང་བར་འོས་དང་གཉེར་དུ་གཏད། །བསྒྲགས་ན་བདུད་ཀྱིས་ཟིན་པར་འགྱུར། །རབ་ཏུ་སྤངས་པས་དངོས་གྲུབ་ཐོབ། །ཅེས་བཀོད་པ་ཆེན་པོ་ལས་གསུངས་པས་ན། དེ་དག་ངོ་ཤེས་པ་ལ་འདའ་བར་མི་བྱའོ། །དེ་ལྟར་མ་འདས་པས་བསྲུང་བའི་མཚམས་དང་བྲལ་ཏེ། རང་བཞིན་རྫོགས་པ་ཆེན་པོའི་དམ་ཚིག་མེད་པ་དང་གཅིག་པུ་དང་ཕྱལ་བ་དང་ལྷུན་གྱིས་གྲུབ་པ་སྟེ། དེ་ལྟར་ཤེས་པས་མེད་པ་སྟེ་ཉམས་པའི་རྒྱུར་མེད། དེ་ལྟར་ཉམས་པའི་རྒྱུར་མེད་པས་གཅིག་པུ། དེ་ཉིད་གང་ལྟར་བསྟུན་དུ་བཏུབ་པས་ཕྱལ་བ་ན་ཇི་ལྟར་བྱས་ཀྱང་ཉམས་པ་མེད་པའོ། །དེ་སྣ་ཚོགས་སུ་གྲུབ་པས་ལྷུན་གྲུབ་བོ། །དེ་ལྟར་བར་དང་མཚམས་མེད་པའི་དོན་ཉམས་སུ་ལེན་པར་བྱས་པས་དམ་ཚིག་ལ་ཉམས་པའི་རྒྱུ་མེད་པའོ། །དེ་སྐད་ཚིག་ཏུ་སྔོན་འབྱུང་དུ་སྟོན་པས་གསུངས་པའོ། །སྔོན་འབྱུང་གིས་འཁོར་གྱིས་རྟོགས་པ་རྙེད་ནས། རྗེས་འཇུག་དུ་བླ་མ་ཉིད་ཀྱིས་གསུངས་པའི་ཚིག་ལ་བརྟེན་ནས་སློབ་མས་ཆོས་ཉིད་སྐྱེ་བ་མེད་པའི་དོན་རྟོགས་ཏེ། སྔོན་འབྱུང་དུ་སྟོན་པའི་འཁོར་རྣམས་རྗེས་སུ་ཡི་རང་ནས་ལྐོག་གྱུར་མ་ཡིན་པའི་སྐུ་ལ་མངོན་པར་བསྟོད་པའོ། །རྗེས་འཇུག་ཏུ་བླ་མའི་སློབ་མས་དེ་ལ་རྟོགས་པ་ཁྱད་པར་ཅན་སྐྱེས་པས། འདི་སུ་ལས་བྱུང་ན་བླ་མ་ལས་བྱུང་བ་ཡིན་སྙམ་པས། རང་གི་བླ་མ་ལ་དད་པས་རྗེས་སུ་འཇུག་པའི་སློབ་མ་ཡིད་རང་བ་ནི་ཡིད་ལ་རྟེན་པའི་རྟོགས་པ་ཁྱད་པར་ཅན་སྐྱེ་བས་ཡིད་རངས་པས་ཐོབ་པའོ། །དེ་དག་གིས་ནི་རྒྱུད་ཀྱི་གཞུང་ལེའུ་གསུམ་པ་བསྟན་ནས། ལེའུའི་མཚན་ནི། སྐུ་ལུས་ཀྱི་རྟགས། གསུང་ངག་གི། འབར་བའི་སེམས་ཀྱི་རྟགས། དེ་ལྟར་སྦྱངས་པ་ལ་ཡོན་ཏན་དུ་བྱུང་བས་རིན་པོ་ཆེའི་རྒྱུད་ལས། སྐྱེས་བུའི་ཕྱི་ནས་རྟགས་ཇི་ལྟར་འབྱུང་བསྟན་པ་ནི་ཚིག་དང་ཡི་གེ། ལེའུ་ནི་གཞུང་གི་དུམ་བུ་ངེས་པའི་དོན། གསུམ་པ་ནི་གྲངས་ཏེ། གཉིས་ལས་གཞན་དུ་གྱུར་པས་ཏེ། དེ་ལྟར་ན་གསུམ་ལས་མང་བས་དགོས་པ་མེད། ཉུང་ན་དགོས་པའི་དོན་མི་ཚངས་ཏེ། འདི་ནས་སྔོན་དུ་སྦྱངས་པའི་རྟགས་དང་། ད་ལྟའི་དང་། ཕྱིས་འབྱུང་བའི་རྟགས་གསུམ་སྟོན་པས་ན་ཡང་གསུམ་དུ་ངེས་ལ། སྐུ་དང་། གསུང་དང་། ཐུགས་དང་། གསུང་སྟོན་པས་ན་ཡང་གསུམ་དུ་ངེས། འགྲོ་བའི་ལུས་ངག་ཡིད་དང་གསུམ་ངེས་པའོ། །གོ་རིམ་ངེས་པ་ནི། དང་པོ་སྔོན་དུ་སྦྱངས་པའི་རྟགས། ཐོག་མ་གོམས་ཟིན་པ་ལས་བྱུང་བས། འདས་པ་ཡིན་པའི་ཕྱིར་སྔོན་དུ་བསྟན་ལ། དེ་ལྟའི་རྟགས་མངོན་སུམ་དུ་བསྟན་དུ་ཡོད་པའི་ཕྱིར་བར་དུ་ངེས་པ་ལ། ཕྱི་ནས་ཕུང་པོའི་ཤུལ་ནས་འོང་བའི་རྟགས་ཕྱིས་འབྱུང་ཡིན་པས་ན་ཐ་མར་ངེས་པའོ། །དེ་ལྟར་རྒྱུད་ཀྱི་དོན་ལེའུ་གསུམ་དུ་འདུས་པར་བསྟན་པས། སྔོན་འབྱུང་གི་སྟོན་པའི་འཁོར། ལྷ་དང་། མི་དང་། ལྷ་མ་ཡིན་དང་། ཀླུ་དང་། དྲི་ཟར་བཅས་པ་ཐམས་ཅད་ཀུན་ཆོས་ཉིད་སྤྲོས་པ་མེད་པའི་ངང་དུ་དེ་དག་ཀུན་གྱིས་སྐྱེ་བ་མེད་པར་ཆོས་ཉིད་ཀ་དག་གི་སར་གྲོལ་ལོ། །ཞེས་གཞུང་ཚིག་ཡི་གེར་བཀོད་པ་ལ་བདག་དོན་དང་གཞན་དོན་གཉིས་འབྱུང་བར་བསྟན་པ། ནམ་མཁའ་མེད་པ་ནི་སྟོང་པ་ལས་འདས་པའི་ཤེས་རབ་བོ། །རྒྱུད་མཚན་དུ་བསྟན་པ་ནི། རིན་པོ་ཆེ་སྐུ་ངོ་བོ་དེ། གདུང་རིགས་མཚོན་པར་བྱེད་པ། འབར་བའི་རྟགས་སྟོན་པ། རྒྱུད་ཆེན་པོ་ཁྱད་པར་དུ་འཕགས་པ། ཉན་ཐོས་ལ་སོགས་པ་ལ་གསང་བས་ཡང་བསྡུས་ཏེ། རྫོགས་པ་ཆེན་པོ་རྣམས་ལས་ཁྱད་པར་དུ་ཟབ་པ། སྙིང་པོ་ནི་བཅུད་དུ་བསྡུས་རང་བཞིན་ནི་སུས་ཀྱང་མ་བཅོས་པ། རྫོགས་པ་ཆེན་པོའི་ནི་གཞི་དང་། ལམ་དང་། འབྲས་བུ་རྫོགས་པ་ཆེན་པོ་སྤྱིར་རྒྱུད། ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི་ལས་ཁྱད་པར་དུ་རྒྱུད་འདི་ཕྱུང་བའོ། །རྫོགས་སོ།། །།ནི་ཚིག་དང་ཡི་གེ་ལས་འདས་པའོ། །སྒྲོན་མ་ཕྲེང་བ་བཀོད་པ་ཞེས་བྱ་བ། སློབ་དཔོན་ཆེན་པོ་བྷི་མ་ལ་མི་ཏྲས་མཛད་པ་རྫོགས་སོ། །ཧེ་ཧེ། ཨ་ཏི། ས་མ་ཡ།། །། |