རྫོགས་པ་ཆེན་པོའི་གཞི་ལམ་འབྲས་བུའི་གཏམ་ཉུང་བསྡུས་གནད་ཀྱི་ཟ་མ་ཏོག །
རྫོགས་པ་ཆེན་པོའི་གཞི་ལམ་འབྲས་བུའི་གཏམ་ཉུང་བསྡུས་གནད་ཀྱི་ཟ་མ་ཏོག་བཞུགས། ན་མོ་མཉྫུ་ཤྲཱྀ་ཛྙཱ་ན་ས་ཏྭ་ཡེ། ངོ་བོ་ཀ་དག་ཆོས་སྐུའི་དགོངས་པ་བརྙེས། །རང་བཞིན་ལྷུན་གྲུབ་ལོངས་སྐུའི་སྣང་བ་རྫོགས། །ཐུགས་རྗེ་འགྲོ་འདུལ་ཕྲིན་ལས་བསམ་མི་ཁྱབ། །ཟུང་འཇུག་རྡོ་རྗེ་འཆང་དབང་དེ་ལ་འདུད། །གང་གི་ཞལ་སྐྱིན་འཇའ་ལུས་རྡོ་རྗེ་སྐུ། །མཐོང་ཐོས་རིག་འཛིན་གྲུབ་པའི་སར་བཀོད་ནས། །གསང་གསུམ་སྤྲུལ་པའི་རོལ་པ་འབྱམས་ཀླས་པའི། །རྔ་ཡབ་ཞིང་གི་མགོན་པོ་དེར་ཕྱག་འཚལ། །ཟབ་གསང་རྡོ་རྗེའི་སྙིང་པོ་རྩོལ་མེད་ལམ། །མ་ནོར་རིག་འཛིན་བརྒྱུད་པའི་ཞལ་གྱི་བཅུད། །མངོན་རྟོགས་སྤོབས་པའི་གཏེར་གྱིས་སྐལ་ལྡན་རྣམས། །གྲོལ་མཛད་བཤེས་གཉེན་ཚོགས་ཀྱིས་དགེ་ལེགས་རྩོལ། །བརྒྱུད་གསུམ་དགོངས་པའི་ཐུགས་གཏེར་སྐྱབས་གཅིག་རྗེའི། །ཉམས་རྟོགས་ཕྱག་རྒྱ་མཆོག་གི་གཏན་ཚིགས་ལ། །བརྟེན་ནས་སྒྲུབ་བརྒྱུད་བསྟན་པའི་སྙིང་པོའི་གཏམ། །ཅུང་ཟད་རྟོགས་པའི་ལམ་དུ་སྨྲ་བར་སྤོབས། །འདིར་ཐེག་པ་ཀུན་གྱི་ཡང་རྩེ། མན་ངག་ཀུན་གྱི་ཉིང་ཁུ། གྲུབ་མཐའ་ཀུན་ལས་ཕ་རོལ་ཏུ་ཕྱིན་པ། འོད་གསལ་རྫོགས་པ་ཆེན་པོ་ཞེས་བྱ་བ་ལས་འཕྲོ་ཅན་ཚེ་འདིར་གྲོལ་བ། ཤེས་རབ་བརྩོན་འགྲུས་ཅན་དབང་སྟོབས་ཀྱིས་གྲོལ་བ། མོས་འབྲེལ་ཙམ་གྱིས་ཀྱང་སྲིད་པའི་ས་བོན་སྐེམ་ཞིང་། ངན་འགྲོའི་འཇིགས་པ་འཕྲོག་པའི་མྱུར་ལམ་འདིར་འཇུག་པ་ལ་དད་པ་དང་ཤེས་རབ་བརྩོན་འགྲུས་གསུམ་གྱིས་དཔྱད་སྒོམ་དབུ་སེམས་ཀྱི་རིགས་པ་དང་། བརྟག་གཞིགས་ཚད་མའི་རིགས་པས་བདག་རྟོག་གཉིས་གཞི་མེད་རྩ་བྲལ་གྱི་སྒོ་ནས་སྐྱེ་མེད་རིག་པའི་གཤིས་ཐོག་ཏུ་འགྲོ་དགོས་པའང་ཡོད་དེ། ཡུལ་འཁོར་སྐྱོང་གིས་ཞུས་པའི་མདོ་ལས། སྟོང་པ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་གྱུར་ཏེ། །དེ་དག་ཐུགས་རྗེ་མངའ་བས་ཐབས་ཚུལ་གྱི། །རིགས་པ་བརྒྱ་དག་གིས་ནི་གཟུད་པར་མཛད། །ཅེས་གསུངས་སོ། །དེ་ལྟར་མིན་ཡང་ཡེ་ཤེས་བླ་མ་ལྟ་བུ་དབང་པོ་རབ་ལ་ཅིག་ཆར་དུ་ངོ་སྤྲོད་པ་ཡིན་ཡང་དབང་པོ་རྟུལ་པོ་ལ་རིམ་གྱིས་ངོ་སྤྲོད་དགོས་པས་ལམ་འདིའི་རང་གཞུང་གི་ལྟ་གྲུབ་ཙམ་ལ་ཐོས་བསམ་གྱིས་སྒྲོ་འདོགས་ཆོད་པ་ཞིག་བྱས་ཏེ། མཁས་གྲུབ་བླ་མའི་མན་ངག །མོས་གུས་སྙིང་གི་ལྕགས་ཀྱུ། དྲན་ཤེས་ཆུ་བོའི་རྒྱུན་ཐག །ཞེན་ལོག་སྲིད་པའི་འཇིགས་པ། མཐུན་རྐྱེན་དབེན་པའི་འདུན་པ་སོགས་ལ་བསྟེན་ནས་འཇོག་སྒོམ་ཉིན་མཚན་འདྲེས་པར་མ་བྱུང་ན། བཤད་ཡམ་ལ་ཇི་ལྟར་མཁས་ཀྱང་ཚིག་དོན་གོ་ཡུལ་དུ་སྒྲོགས་པའི་རྣལ་འབྱོར་ཙམ་ལས། དོན་གྱི་རྣལ་འབྱོར་པ་མི་འོང་ངོ་། །དེ་ལ་དང་པོ་གཞི་ལམ་འབྲས་གསུམ་གྱི་དོན་ཅུང་ཟད་ངེས་པར་བྱ་དགོས་པས། མདོ་རྒྱུད་ཀུན་གྱི་ངེས་དོན་མཐར་ཐུག་ནི་གཞི་བདེར་གཤེགས་སྙིང་པོ་སྟེ། འཁོར་འདས་ཀུན་ལ་ཁྱབ་པས་རིས་སུ་མ་ཆད་དེ། ཡུལ་ཐམས་ཅད་ལ་དབྱིངས་ཀྱིས་ཁྱབ་ཡུལ་ཅན་ཐམས་ཅད་ལ་ཡེ་ཤེས་ཀྱིས་ཁྱབ་པའི་ཕྱིར། ཡུལ་ཡུལ་ཅན་ཡང་གཉིས་སུ་སྣང་ཡང་གཉིས་སུ་མ་གྲུབ་སྟེ། ཡུལ་སྣང་འདི་དག་ནང་སེམས་ལས་གཅིག་དང་ཐ་དད་གང་དུའང་མེད་པས་མེད་སྣང་སྟོང་པའི་གཟུགས་བརྙན་རྨི་ལམ་བཞིན་ཡིན་པའི་ཕྱིར། ལ་ལས་སེམས་ཀྱིས་བཏགས། ལ་ལས་སེམས་ལས་སྣང་སེམས་ཀྱིས་བྱས། ལ་ལས་སེམས་ཡིན་ཟེར་བ་རྣམས་དོན་ལ་མི་འགལ་ལོ། །འདིར་ནི་དེ་གཉིས་བསྡོམས་ཏེ་དབྱིངས་དང་ཡེ་ཤེས་གཉིས་སུ་མེད་པ་ཟུང་འཇུག་འདུས་མ་བྱས་སུ་འདོད་པ་ཡིན་ཏེ། རྒྱུད་བླ་མ་ལས། ཇི་ལྟར་སྔར་བཞིན་ཕྱིས་དེ་བཞིན། འགྱུར་བ་མེད་པའི་ཆོས་ཉིད་དོ། །ཞེས་གསུངས་སོ། །ཡང་གཞི་དེ་ལ་མིང་གི་ཁྱད་པར་ཀ་དག་ལྷུན་གྲུབ་ཟུང་འཇུག་ཅེས་བཏགས་པ་ཡང་། དེ་ལས། ལུས་ཅན་ལ་ཡོད་ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། ཞེས་པའི་དོན་ཟག་པ་མེད་ཅེས་པས་གཟུང་འཛིན་རྟོག་པའི་དྲི་མ་གློ་བུར་བ་རྣམས་གཤིས་ལ་མེད་པ་ངོ་བོ་ཀ་དག་དང་། ཤེས་པ་ཞེས་རིག་པའི་ཡེ་ཤེས་དང་། སྦྲང་མའི་རྩི་ཞེས་སྦྲང་རྩི་མངར་བ་དང་རོ་གཅིག་པ་ལྟར་རང་བཞིན་ལྷུན་གྲུབ་ཀྱི་ཡོན་ཏན་བསྟན་ཏེ། དབྱིངས་རང་གི་ངོ་བོ་ལ་དབྱིངས་སྣང་སྐུ་དང་ཡེ་ཤེས་སོགས་འབྲལ་མེད་དུ་ཡོད་ཅིང་གསར་དུ་བཞག་པའི་བཅོས་མ་མིན་པ་རང་ཆས་སུ་གནས་པ་གཤིས་རང་གི་ཡིན་ལུགས་སམ་རང་བཞན་ཡིན་ཏེ། དེ་ལས། གློ་བུར་དག་གིས་ཁམས་སྟོང་གི །བླ་མེད་ཆོས་ཀྱིས་སྟོང་མ་ཡིན། །ཞེས་སོ། །དེ་ཡང་ཆོས་ཐམས་ཅད་ཀྱི་ངོ་བོ་བདེན་དངོས་ཀྱིས་སྟོང་པའི་རང་བཞིན་དང་འབྲལ་བ་མེད་པའི་ཚུལ་ནི། དབུ་མ་ལས། མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་བསྟན། །ཅེས་སོ། །དེ་བཞིན་དུ་སྣང་སྟོང་གཉིས་ཀའི་རང་བཞིན་ཆོས་ཐམས་ཅད་ལ་གྲུབ་བསལ་མེད་པར་གནས་ཚུལ་ཀྱང་། རྩ་ཤེས་ལས། རང་བཞིན་དག་ནི་བཅོས་མིན་དང་། གཞན་ལ་ལྟོས་པ་ཡོད་མ་ཡིན། །ཞེས་སོ། །དེས་ན་ཀ་དག་སྟོང་པའི་ངོས་ནས་དཔྱད་ན་བློ་དང་དེས་བཞག་པའི་ཡོད་མེད་ཀྱི་སྤྲོས་པ་མེད། སྐྱོན་དང་ཡོན་ཏན་འཁོར་འདས་གང་ཡང་མ་གྲུབ་པས་མེད་ཅེས་བཤད་པ་ནི་རང་བཞིན་བདེན་གྲུབ་མེད་པ་ཡིན་པས་རྟག་མཐའ་སེལ་ཞིང་ཡང་དག་པར་བཟུང་བ་ཡིན་ལ། ལྷུན་གྲུབ་གསལ་བའི་ཆ་ནས་བཞག་ན་ནང་གདངས་འོད་གསལ་ཆེན་པོའི་རིག་པ་ཕྱིར་གསལ་སྐུ་དང་ཞིང་ཁམས་ཀྱི་འཆར་གཞིར་ཡོད་པར་བཤད་པ་ནི་སྣང་ཙམ་ཐ་སྙད་ངོས་ནས་བཏགས་པ་ཡིན་པས་ཆད་མཐའ་སེལ་ཞིང་ཡང་དག་པ་ཡིན་ཏེ། དེ་ལས། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མེད། །དེ་ནི་དེ་ཉིད་མཚན་ཉིད་དོ། །ཞེས་དང་། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །ཞེས་དཔྱད་ན་ངོས་བཟུང་མེད་པ་བློའི་སྤྱོད་ཡུལ་ལས་འདས་པར་བསྟན་ཏོ། །མ་དཔྱད་པར་འཇོག་ན་གདངས་མི་འགག་པའི་ཚུལ། བུམ་ནང་གི་མར་མེ་ལ་སོགས་པའི་དཔེས་གཟུང་འཛིན་གཉིས་མེད་ཀྱི་ཡེ་ཤེས་བསྟན་པ་ལྟར། དངོས་པོ་རྟག་མཐའ་དང་དངོས་མེད་ཆད་མཐའ་སོགས་གང་ཡང་རང་དབང་གི་ཚུལ་དུ་ནི་ཁས་ལེན་པ་མེད་དེ། བློས་བྱས་ཀྱི་ཞེན་པས་གནས་ལུགས་སྒྲིབ་པར་འགྱུར་བས་སོ། །ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་པ་འདི་ཤིན་ཏུ་གལ་ཆེའོ། །དེ་ནི་གཞི་ཀ་དག་ལྷུན་གྲུབ་ཀྱི་གནད་ཡེ་བབ་དོན་གྱི་སྙིང་པོ་ཡིན་ལ་དེ་བླ་མས་ངོ་སྤྲད་ཡོད་པ་ནི་རང་ཐོག་ཏུ་སྤྲད་པ་སྟེ་དེ་ཉིད་ལམ་དུ་བྱེད་ཚེ་སྒོམ་བྱའི་སྤྲོས་པ་མེད་ཀྱང་བག་ཆགས་མ་དག་པར་གོམས་གསལ་ཇེ་ཆེར་འགྲོ་དགོས་པས། ཐག་གཅིག་ཐོག་ཏུ་བཅད་ནས་ལམ་ཁྲེགས་ཆོད་ཅེས་བྱ་བ་ཤེས་རབ་ཡིན་པས་ཀ་དག་གི་རིག་པ་སྟོང་གསལ་དེ་ཀ་འཛིན་མེད་རང་སར་བཅད་དེ་བསྐྱངས་པར་བྱ་ལ། དེའི་ཚེ་སླར་ཡང་རྟོག་པ་ཤར་ཡང་རང་གི་ངོ་བོ་ཡེ་གྲོལ་དུ་ཡོད་པའི་གནད་ཀྱིས་དགག་སྒྲུབ་མེད་པར་རང་བབ་བཞག་ན་ཤར་བས་མི་གནོད་དེ་སྦྲུལ་གྱི་མདུད་པ་ལྟར་རང་གྲོལ་ལ་འགྲོ་བ་ན་ཤར་གྲོལ་ཁྱད་མེད་པ་ཞེས་བྱ་བས་གདངས་གྲོལ་ཐོག་ཏུ་བཅའ་བའི་སྒོ་ནས་ལ་བཟླ་བའོ། །དེའང་རྒྱལ་པོས་གདན་ཟིན་པ་ལྟར་རིག་པས་རང་ས་ཟིན་དགོས། བློན་པོ་བཙོན་དུ་བཟུང་བ་ལྟར་ཡིད་ཤེས་ལ་དཔྱོད་དུ་མི་འཇུག་འབངས་ཆམ་ལ་ཕབ་པ་ལྟར་སྒོ་ལྔ་ཡུལ་ལ་ཡན་དུ་མི་འཇུག་པ་དགོས་སོ། །རྣམ་པར་ཤེས་པ་མ་བཅིངས་མ་གྲོལ་བའོ། །ཞེས་གསུངས་པས་བཅིངས་སྣང་དང་གྲོལ་སྣང་ཙམ་ལས་སེམས་ཀྱི་ངོ་བོ་ནམ་མཁའ་ལྟར་གནས་པ་ལ་དངོས་གཞི་བཅོས་མེད་རང་བབ་འཇོག་ན་ཡེ་གྲོལ་གྱི་ཐོག་ཏུ་སླེབ་པར་འགྱུར་གྱི། གཞན་དུ་རྣམ་རྟོག་ཤར་བ་ལ་བཟང་ངན་དུ་ཞེན་པས་དགག་སྒྲུབ། ཞེན་པ་པོ་སེམས་ལ་བལྟས་ནས་འཁྲུལ་མ་འཁྲུལ་གསལ་མི་གསལ་སོགས་བསམ་བློ་མང་པོའི་རྒྱུན་མ་བཅད་ན། མར་མེ་བསྒུལ་བས་མི་གསལ་བ་དང་ཆུ་རྙོགས་བསྒུལ་བས་མི་དྭངས་བ་ལྟར་ཤེས་རིག་དངས་མའི་རང་ཞལ་མཇལ་བ་མི་འོང་ངོ་། །དཔྱད་པ་ནི་དང་པོ་སྦྱོར་བ་བཙལ་སྒོམ་གྱི་དུས་སུ་ཡིན་ནོ། །སྐབས་འདིར་སེམས་རིག་ཕྱེས་ཏེ་རིག་པ་སེམས་ལས་འདས་པའི་དགོངས་པ་ལྷག་གེར་ཤར་བ་ནི་ལྷག་མཐོང་ཆེན་པོ་སྟེ། མ་མཐོང་བའི་ཡེ་ཤེས། མ་བསམ་པའི་དྲན་པ། མ་བཅོས་པའི་ཆོས་ཉིད་ཅེས་བྱའོ། །དྲན་བསམ་སེམས་སེམས་བྱུང་གི་འཛིན་རྩོལ་ཅན་ནི་མཉམ་བཞག་རང་བབ་གཤིས་ཐོག་ན་མེད་ཀྱང་གཉིས་སུ་མེད་པའི་ཡེ་ཤེས་ཀྱི་ངང་མ་བརྗེད་པའི་ལྡོག་པ་ལ་དྲན་པ་ཞེས་བཏགས་ཏེ། རྒྱུད་ལས། སྟོང་ཉིད་ཡེ་ཤེས་རྡོ་རྗེ་གང། །མཉམ་བཞག་དྭང་བས་དྲན་པར་བྱ། །ཞེས་སོ། །སེམས་དང་ཡེ་ཤེས་གཉིས་ཡུལ་གྱི་ངོ་བོ་ཤེས་ཙམ་དུ་གཅིག་ཅེས་བརྗོད་ཀྱང་སེམས་ནི་རྨོངས་ཤིང་ཡུལ་ཕྱིར་དེད་ནས་འཁྲུལ་རྟོག་འཛིན་པ་དང་བཅས་པ་ལས་སྣ་ཚོགས་བསགས་པ་གཉིས་སྣང་གི་རྣམ་པ་ཅན་ཡིན་ལ། ཡེ་ཤེས་ནི་ཡུལ་ལ་མི་རྟོག་ཅིང་རང་ངོ་ཤེས་པ་ལ་མ་རྨོངས་མ་འཁྲུལ་བ་གཉིས་སུ་མེད་པའི་རྣམ་པ་ཅན་ནོ། །རྒྱུད་ལས། སེམས་ཀྱིས་སུ་ནི་ལས་རྣམས་གསོག །ཡེ་ཤེས་ཀྱིས་ནི་རྣམ་པར་འབྱེད། །ཅེས་སོགས་གསུངས་སོ། །གཉིས་སུ་མེད་པའི་ཡེ་ཤེས་ནི་འཕགས་པའི་མཉམ་བཞག་སྐབས་ཡིན་པས་ཡུལ་མེད་རང་གསལ་འབའ་ཞིག་ཡིན་ལ། ཡུལ་དུ་གྲུབ་པ་ལྟར་སྣང་བ་ནི་སེམས་ཡིན་ནོ། །སྐབས་འདིར་རིག་པ་དང་ཡེ་ཤེས་ཀྱང་དོན་གཅིག་གོ །དེ་བས་ན་ངང་པས་ཆུ་ལས་འོ་མ་ལེན་པ་ལྟར་རྣལ་འབྱོར་པས་སྒོམ་པའི་ཚེ་སེམས་ལས་ཡེ་ཤེས་ཉིད་ལེན་པ་ཡིན་ཏེ། རྣམ་ཤེས་ལ་མི་རྟོན་ཡེ་ཤེས་ལ་རྟོན། །ཅེས་པས་སོ། །སྐབས་འདིའི་རིག་པར་གྲགས་པ་འདི་སེམས་ཙམ་པའི་ཀུན་གཞིའི་རིག་པ་བདེན་གྲུབ་སྨྲ་བ་དང་མི་འདྲ་སྟེ། སྟོང་གསལ་སྐུ་གསུམ་གྱི་རང་བཞིན། གྲུབ་མཐའི་བློས་བསླད་པའི་ཕྱོགས་ལྷུང་དང་བྲལ་བའི་ཕྱིར་རོ། །ཀུན་གཞི་དང་ཆོས་སྐུ་ཡང་རིག་པ་ཉིད་ལ་ངོ་བོ་གཅིག་དང་ཐ་དད་བཙལ་དུ་མེད་ཀྱང་། རིག་པའི་ངོ་བོ་གདོད་ནས་སམ་ཀ་ནས་དག་པའི་ལྡོག་ཆ་ལ་ཆོས་སྐུ་ཞེས་བྱ་སྟེ། སྐྱེ་མེད་སྟོང་པ་རིག་པའི་སྙིང་པོ་ཅན་བློའི་ཡུལ་ལས་འདས་པའི་ཕྱིར་རོ། །རྣམ་པ་འཁྲུལ་རྟོག་གློ་བུར་གྱི་དྲི་མས་མ་དག་པའི་ལྡོག་ཆ་ལ་ཀུན་གཞིར་བཏགས་ཏེ། སེམས་སེམས་བྱུང་གི་འཆར་གཞི་ཡོད་པའི་ཕྱིར་རོ། །ཡིད་དང་ཤེས་རབ་གཉིས་ཀྱང་རིག་པའི་རྩལ་ཡིན་པར་འདྲ་ཡང་། ཡིད་ནི་གཟུང་འཛིན་གཉིས་ལ་ཆོས་དང་གང་ཟག་སོགས་སུ་བདེན་པར་འཛིན་པའི་བློ་ཨ་འཐས་སུ་གོལ་བ་དེ་ཡིན་ལ། ཤེས་རབ་ནི་ཕྱི་ནང་ཀུན་ལ་བདག་དང་བདག་གི་བའི་དངོས་པོ་བདེན་པར་མེད་པར་ཤེས་ཏེ་རྟོག་པ་ཤར་གྲོལ་ཐད་ཀར་གཅོད་པའི་བློ་དམ་པ་དེའི་ཆ་ནས་དབྱེ་བ་ལས། དེ་དག་གི་ངོ་བོ་ནི་ཆུ་དང་ཆབ་རོམ་བཞིན་རིག་པ་ཉིད་ལས་གཅིག་དང་ཐ་དད་གང་དུའང་མི་རྙེད་དོ། །དེ་འདྲའི་གཞི་ལ་སྐུ་གསུམ་གྱི་ཡོན་ཏན་འབྱུང་རུང་གི་ས་བོན་ཙམ་མ་ཡིན་པར། སྐུ་གསུམ་རང་ཆས་སུ་བཞུགས་པ་འབྲལ་མི་ཤེས་པ་ཉི་མ་དང་འོད་ཟེར་ལྟར་དང་། སྒྲིབ་བྱེད་འབྲལ་རུང་དུ་ཡོད་པ་སྤྲིན་གློ་བུར་བ་དང་འདྲ་སྟེ། རྒྱུད་ལས། ཀུན་ཤེས་ཀུན་རིག་དམ་པ་པོ། །རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །རྣམ་པར་རྟོག་མེད་ལྷུན་གྱིས་གྲུབ། །ཞེས་དང་། གཞན་ཡང་པདྨ་རྩེ་མོ་ལས། དྲི་མེད་དབྱིངས་ཀྱི་རང་བཞིན་ནི། །སྐུ་གསུམ་ཡེ་ཤེས་གཞི་དང་བཅས། །གང་ཚེ་དག་པ་དེ་ཉིད་དུ། །རང་གསལ་མངོན་དུ་འཆར་བ་དང་། །འདྲ་བ་ལམ་དུ་བྱེད་པ་ལ། །འབྲས་བུའི་ཐེག་པར་ཡང་དག་བརྗོད། །ཅེས་དང་ངེས་དོན་གྱི་རྒྱུད་ལུང་མཐའ་ཡས་པས་ཐེ་ཚོམ་མེད་པར་མཛོད། རྣལ་འབྱོར་པས་མྱོང་ཐོག་ཏུ་ཕེབ་ཚེ་སོ་སོ་རང་རིག་པའི་ཚུལ་གྱིས་རྟོགས་པ་ལས། ཐ་སྙད་ཀྱི་ཤེས་བརྗོད་ཆད། རྩོད་པའི་གཞི་སྟོང་། རྟོག་གེའི་སྤྱོད་ཡུལ་ལས་འདས་པ་ཁོ་ན་སྟེ། དགོངས་པ་ངེས་འགྲེལ་ལས། སོ་སོ་རང་རིག་ཚད་མེད་སྤྱོད་ཡུལ་ནི། །བརྗོད་དུ་མེད་ཅིང་ཐ་སྙད་ཡོངས་ཆད་པ། །རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེའི་ཡུལ་ལས་འདས་པའོ། །ཞེས་སོ། །དེ་ལྟར་མིན་པར་གཞི་སྟོང་རྐྱང་མེད་དགག་ཁོ་ན་ལྷུར་ལེན་པ་མེད་པ་མཐར་འཛིན་དང་སྐུ་དང་ཡེ་ཤེས་དངོས་པོ་རང་མཚན་པ་ཐོབ་བྱར་ལྷུར་ལེན་པ་ཡོད་པ་མཐར་འཛིན་གཉིས་ཀ་གྲུབ་མཐའ་ཕྱོགས་རེ་བ་ཡིན་པས་སྐྱོན་གྱི་ཆ་དུ་མ་ཡོད་པར་གསུངས་ལ། འདིར་ནི་བློས་བྱས་བདེན་དངོས་ཀྱི་སྤྲོས་པ་ཐམས་ཅད་བཅད་པ་མེད་དགག་ཡིན་པས་ཀ་དག་སྟོང་པའི་ཆ་ནས་ཡོད་པར་མ་བཟུང་། བདེན་སྟོང་སྒྱུ་མ་ལྟ་བུའི་རྟེན་འབྲེལ་རྒྱུན་མི་འཆད་པས་མ་ཡིན་དགག་དང་ཡང་མི་འགལ་བ། ལྷུན་གྲུབ་གསལ་བའི་ཆ་ནས་མེད་པར་མ་བཟུང་། ཕྱོགས་རེས་ཞེན་འཛིན་གྱི་ལྟ་བ་ངན་པ་དྲུང་ནས་འབྱིན་པའི་ཤེར་ཕྱིན་དབུ་མ་ཆེན་པོའི་ལྟ་བའོ། །ཀ་དག་གི་ཆ་ནས་སངས་ལྷུན་གྲུབ་ཀྱི་ཆ་ནས་རྒྱས་པས་གཞི་ལྷུན་གྲུབ་ཀྱི་སངས་རྒྱས་དང་། དེ་མངོན་སུམ་ངོ་སྤྲད་དེ་ལམ་དུ་བསྒོམས་པས་གསལ་བ་ལ་ལམ་རྟོགས་པ་མངོན་གྱུར་གྱི་སངས་རྒྱས་དང་། དྲི་མ་ཐམས་ཅད་དག་པ་ན་འབྲས་བུ་དག་པ་གཉིས་ལྡན་གྱི་སངས་རྒྱས་ཞེས་འདོད་པས། གཞི་འབྲས་ལྟོ་སྦྱར། འཁོར་འདས་རྒྱ་མི་འཆད། རྒྱུད་ཀྱི་རྣམ་བཞག་འཐད་པ་སོགས་དགོས་པ་ཆེ་ལ། རྒྱུ་འབྲས་དངོས་མཚན་ཅན་ཁས་མ་བླངས་པས་ཟན་ཟ་མི་གཙང་ཟ་བ་སོགས་ཀྱི་སྐྱོན་མེད་པའི་གྲུབ་མཐའ་འདི་ནི། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ཏེ། །ཆོས་ཀྱི་སྙིང་པོ་སྒྲུབ་བྱེད་པས། །ཆོས་ཀྱི་དབྱིངས་དང་ཡང་དག་ལྡན། །ཞེས་གསུངས་པ་ལྟར་མདོ་རྒྱུད་དགོངས་འགྲེལ་དང་བཅས་པས་བསྟན་དོན། མཁས་པ་ཀུན་གྱིས་བསྔགས་ཡུལ། གྲུབ་ཐོབ་ཀུན་གྱི་དགོངས་ཕུག །རྣལ་འབྱོར་ཀུན་གྱི་སྤྱི་ནོར་ཡིན་པར་ཁོ་བོས་ད་གཟོད་ཁོང་དུ་ཆུད་དོ། །དེའང་མདོར་ན་གཞི་ཀ་དག་གི་ངོ་བོ་ཕྱི་ནང་གཞན་གསུམ་གྱི་སྟོང་པ་ཉིད་སྐྱེ་མེད་ཆོས་ཀྱི་སྐུ་དང་། གཞི་སྣང་ལྷུན་གྲུབ་ཀྱི་རང་བཞིན་དོར་བ་མེད་པ་སྟོང་པ་ཉིད་ཡེ་ཤེས་འགག་མེད་ནང་གསལ་གྱི་ལོངས་སྐུ་དང་། རྩལ་རྟོག་ཐུགས་རྗེ་གང་ཤར་འགྲོ་འོང་སྣང་ཡང་དོན་ལ་འགྲོ་འོང་མེད་པ་གཉིས་མེད་སྤྲུལ་སྐུའི་ལྟ་བ་ངོ་སྤྲད། ལམ་ཁྲེགས་ཆོད་ཀྱིས་ཅོག་བཞག་བཞི་ལ་བརྟེན་ནས་བསྒོམས་པས་དྲི་མ་རང་སངས་ལ་སོང་ནས་འབྲས་བུ་གཞི་ཐོག་ཏུ་རིག་པས་གྲོལ་ས་ཟིན་ཏེ་ཆོས་སྐུ་རང་མལ་ནས་རྙེད་པའོ། །སླར་ཡང་ཐུགས་རྗེ་དང་སྨོན་ལམ་གྱི་དབང་སྟོབས་བཙན་པས་ལྷུན་གྲུབ་ཡེ་ཤེས་ཀྱི་སྣང་བ་ཕྱིར་གསལ་དུ་མཆེད་དེ་གཟུགས་སྐུ་གཉིས་ཀྱིས་འགྲོ་བའི་དོན་མཛད་པ་ནི་ཤེས་རབ་ཅན་ཁྲེགས་ཆོད་ཀྱིས་གྲོལ་བ་ཞེས་བྱའོ། །བརྩོན་འགྲུས་ཅན་ཐོད་རྒལ་གྱིས་གྲོལ་བ་ནི། གཞི་ན་ལྷུན་གྲུབ་གཟུགས་སྐུའི་ཡོན་ཏན་སྦྲུལ་གྱི་རྐང་ལག་ལྟར་ཡོད་པ་ལམ་རྩོལ་མེད་ཀྱི་ཐབས་བཞུགས་སྟངས་དང་གཟིགས་སྟངས་སོགས་ལ་བརྟེན་ནས་གོམས་པས་སྦྲུལ་གཅུར་བས་རྐང་ལག་མངོན་པ་བཞིན། སྐུ་དང་ཞིང་ཁམས་ཀྱི་སྣང་བ་ཡེ་ཤེས་ཀྱི་རྩ་ལམ་ནས་ཕྱིའི་ཡུལ་ལ་ཤར་བ་དབང་པོས་མངོན་སུམ་མཐོང་བ་ནི་ལྷུན་གྲུབ་ཡེ་ཤེས་ཀྱི་སྣང་བ་ཕྱིར་གསལ་ཞེས་བྱ་སྟེ། འཇམ་དཔལ་སྒྱུ་འཕྲུལ་ལས། ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །ཞེས་སོགས་གསུངས་སོ། །དེ་དག་ཕྱི་ནས་ཤར་བའི་དངོས་པོ་མ་ཡིན་པར་ནང་རིག་པའི་གདངས་སམ་རྩལ་ཕྱིར་ཤར་བའི་དངོས་མེད་སྟོང་གཟུགས་ཀྱི་སྣང་བ་ཙམ་ཡིན་ཏེ། འཕགས་པ་ཀླུས། སྟོང་པ་ཁོ་ནའི་ཆོས་རྣམས་ལས། །སྟོང་པའི་ཆོས་རྣམས་བྱུང་བ་ཡིན། །ཞེས་དང་། སྟོང་པ་ཉིད་གཟུགས་སོ། །ཞེས་པ་བཞིན་ནོ། །ཤེར་ཕྱིན་ནས་རྣམ་དག་སྒོམ་ལམ་སྐབས་སུ་ལམ་ཤེར་ཕྱིན་དག་པ། ཡུལ་གཟུགས་སྣང་དག་པ། འབྲས་བུ་རྣམ་གྲོལ་དག་པ་གསུམ་གཉིས་སུ་མེད་ཅིང་གཉིས་སུ་བྱར་མེད་དེ་ཐ་མི་དད་ཅིང་གཅད་དུ་མེད་པར་གསུངས་པ་སོགས་དང་དོན་གཅིག་པ་ནི་ཁྲེགས་ཆོད་ཀྱིས་ནང་འཛིན་པ་དག་པས་ཕྱིའི་གཟུང་ཡུལ་ཀྱང་དག་པའི་སྣང་བ་གང་ཤར་ཐམས་ཅད་རང་ཐོག་ཏུ་ངོ་སྤྲད། ལམ་ཐོད་རྒལ་གྱི་གནད་གསུམ་ལ་བརྟེན་ནས་བསྒོམས་པས་སྒྲོན་མ་བཞི་དང་ཤེས་རབ་རང་བྱུང་གི་སྒྲོན་མའི་རྩལ་རིག་པ་རྡོ་རྗེ་ལུ་གུ་རྒྱུད་དང་བཅས་པ་རྟེན་འབྲེལ་གཅིག་ལ་གཅིག་བརྟེན་ནམ་དེ་ལས་དེ་བྱུང་དུ་སྣང་ཡང་། མིག་ནི་ལམ་ཕྱེ་བའི་སྒོ་ཙམ་ཡིན་ཏེ། རྒྱུད་ལས། མིག་ནི་ཡེ་ཤེས་འཆར་བའི་སྒོ། །ཞེས་སོ། །ཉི་ཟླ་ལ་སོགས་པ་ནི་ཕྱིའི་དམིགས་རྐྱེན་ཙམ་སྟེ། ཤེལ་གྱི་འོད་ཟེར་འཆར་བ་ལ་ཉི་འོད་ཕོག་དགོས་པ་བཞིན་ནོ། །ནམ་མཁའ་ཡང་འཆར་གཞིའི་གོ་འབྱེད་པ་དང་ནང་སེམས་ཉིད་དོན་གྱི་ནམ་མཁའ་མཚོན་བྱེད་ཀྱི་དཔེ་ཙམ་ཡིན་ཏེ། སྡུད་པ་ལས། དོན་འདི་གང་ཡིན་ནམ་མཁའ་དག་ལ་བལྟ་བར་གྱིས། །ཞེས་སོ། །དེས་ན་གཞི་ཤེས་རབ་བྱུང་གི་སྒྲོན་མ་འོད་གསལ་སྟོང་པ་ཆེན་པོ་དང་གཞི་སྣང་ཐིག་ལེ་སྟོང་སྒྲོན་སོགས་དང་། རིག་པ་ཡུལ་མེད་བསམ་བརྗོད་ལས་འདས་པ་རྣམས་སྣང་རིག་སྟོང་གསུམ་པོ་གཞི་གཅིག་ལ་འདྲེས་ཤིང་འགལ་མེད་དུ་ཉམས་སུ་ལེན་པ་ལ་མིང་གི་ལྡོག་པས་བཏགས་ན་ཆོས་ཉིད་ཀྱི་སྤྱན་གྱིས་སྟོང་པ་མཐོང་། ཆོས་ཀྱི་སྤྱན་གྱིས་སྣང་བ་མཐོང་། ཤེས་རབ་ཀྱི་སྤྱན་གྱིས་རིག་པ་མཐོང་བ་ཞེས་བྱའོ། །གནད་དེ་དག་ལྟ་སྒོམ་ཡིན་ལུགས་སུ་ཐག་བཅད་དེ་ཞེན་མེད་རང་བཞག་ཏུ་གོམ་པས་སྣང་བཞིའི་ས་མཚམས་རྫོགས་དགོས་ཤིང་། དེའང་དང་པོ་ལམ་སྒོམ་ཚེ་རྐྱེན་གསུམ་ལས་རང་བྱུང་གི་ཆོས་གསུམ་ངོ་ཤེས་པར་བྱ་སྟེ། རྒྱུ་རྐྱེན་གཞིའི་རིག་པ། ཡུལ་རྐྱེན་གཞི་སྣང་གི་སྒྲོན་མ། དེ་གཉིས་ངོ་བོ་བདག་གཅིག་པས་སྣང་རིག་དུས་མཚུངས་པ་དེ་མ་ཐག་རྐྱེན་ནོ། །དེའི་ཚེ་རིག་པ་ཡེ་གྲོལ་ཀ་དག་འདུས་མ་བྱས་པ་ཉིད་རྒྱུ་ལས་མ་བྱུང་བའི་འབྲས་བུ། བློ་དང་བྲལ་བའི་རང་བྱུང་གི་ཡེ་ཤེས་རང་ངོར་སྣང་བ་ནི་སེམས་ལས་མ་བྱུང་བའི་སངས་རྒྱས། སོ་སོ་རང་གིས་རིག་པ་ནི་ལུང་ལས་མ་བྱུང་བའི་མན་ངག་ཅེས་བྱའོ། །དེ་འདྲའི་ལྟ་སྒོམ་ཟབ་མོའི་ངེས་ཟིན་གྱི་ཚད་རྫོགས་པས་འཁྲུལ་སྣང་གི་ཡུལ་གྲོལ་ཏེ་གང་སྣང་ལོངས་སྐུའི་ཞིང་དུ་གསལ། འཁྲུལ་རྟོག་གི་སེམས་གྲོལ་ཏེ་རིག་པ་ཆོས་སྐུར་སྨིན། ཤ་ཁྲག་གི་ལུས་གྲོལ་ཏེ་རྡོས་བཅས་འོད་ལུས་སུ་སྨིན་ནས་སྐུ་གསུམ་ལམ་སྣང་དུ་རྩལ་རྫོགས་པའི་གཟུགས་སྐུས་འགྲོ་དོན་ཚེ་འདིར་མཛད་ཅིང་། སླར་ཡང་གཞི་སྣང་གཞིར་བསྡུས་ཏེ་སྐུ་གསུམ་ནང་གདངས་ཀྱི་རྒྱལ་ས་ཟིན་པའི་ཚེ། སྐད་ཅིག་གིས་ལྷུན་གྲུབ་ཀྱི་སྣང་བ་རང་ངོ་ཤེས་པས་ཀུན་གཞི་དག་པས་རིག་པ་ཉིད་དང་པོའི་འཁྲུལ་གཞི་ལུང་མ་བསྟན་ནས་འཕགས། རང་བྱུང་ཡེ་ཤེས་མངོན་སུམ་ཤར་བས་ཆོས་ཉིད་རང་གསལ་དུ་མཐོང་། སོ་སོ་རང་རིག་པའི་ཡེ་ཤེས་རྗེན་པར་ཐེར་ལ་བུད་པས་འཁྲུལ་གྲོལ་བྱེ་བྲག་ཕྱེས། གཉིས་མེད་ཡེ་ཤེས་ཀྱི་རོལ་པ་འབའ་ཞིག་ལ་སྤྱོད་པས་གཉིས་སྣང་རང་མལ་དུ་སངས་སངས་རྒྱས་གཞན་དུ་མེད་པའི་གདེང་རྙེད་པས་འབྲས་བུ་གཞན་བྱུང་ལ་མ་ལྟོས། གདོད་མའི་གྲོལ་གཞི་ཟིན་པས་དོན་དམ་རང་གཤིས་ལས་མི་གཡོ་བའི་ཚུལ་གྱིས་ལྷུན་གྲུབ་གཞོན་ནུར་བུམ་སྐུར་སྙོམས་པར་ཞུགས་ཏེ་སྟོང་ཉིད་སྙིང་རྗེའི་ཆོས་སྐུ་ཐིག་ལེ་ཉག་གཅིག་གི་གྲོལ་ཐོག་ཏུ་གདེང་བཅའ་བའོ། །དེའི་ཕྱིར་ཆོས་སྐུ་ནང་གསལ་ཐིམ་ལ་མ་རྨུགས་པས་རང་དོན་དང་གཟུགས་སྐུ་ཕྱིར་གསལ་སྐྱོན་གྱིས་མ་གོས་པས་གཞན་དོན་མཛད་དེ། འཁོར་བ་མ་སྟོངས་བར་དུ་དོན་གཉིས་ཀྱི་དཔལ་ལ་སྤྱོད་པ་ནི་བརྩོན་འགྲུས་ཅན་ཐོད་རྒལ་གྱིས་གྲོལ་བ་ཞེས་བྱའོ། །ཤེས་རབ་ཅན་ཁྲེགས་ཆོད་ཁོ་ནས་གྲོལ་བར་འདོད་པ་ཐོད་རྒལ་ལ་མི་ལྟོས་པ་ཡོད་ཀྱང་། ཐོད་རྒལ་བ་ཁྲེགས་ཆོད་ལྟ་བས་སྲིད་རྩ་བདག་རྟོག་གི་རྩ་གདར་ཆོད་པའི་གདེང་མེད་ན་ལྷུན་གྲུབ་ཕྱིར་སྣང་ལ་དངོས་པོར་ཞེན་པས་འཁྲུལ་སྣང་ལམ་དུ་བྱས་པས་གོལ་བར་འགྱུར་ལ། ཁྲེགས་ཆོད་པའང་གཤིས་ངོ་བོའི་རང་ཐོག་ཏུ་ངོ་འཕྲོད་ན་ཁམས་གསུམ་ཡོངས་གྲོལ་གྱི་དགོངས་པ་ཡིན་མོད། ཐོག་མེད་ཀྱི་གོམས་ཆགས་ལས་བདེ་གསལ་མི་རྟོག་པའི་ཉམས་ལ་ཞེན་བློ་ཤོར་ན་ཁམས་གསུམ་དུ་གོལ་བའི་སྒྲིབ་པར་འགྱུར་བས། རང་ཉམས་ལ་ཆགས་པའི་ཉིད་འཁྲུལ་ངོས་བཟུང་ནས་ཞེན་པའི་འཛིན་སྟངས་གཞིག་པ་དང་། ཐོད་རྒལ་པས་དབྱིངས་སྣང་རང་བཞིན་མེད་པ་ཀ་དག་གི་ལྟ་བའི་གཤིས་ལས་འགྲོ་ས་མེད་པ་ཤེས་ནས་ལམ་ཀ་དག་ལྷུན་གྲུབ་ཟུང་འཇུག་ཏུ་འགྲོ་དགོས་སོ། །དེ་ཡང་ཀ་དག་གི་ངོ་བོ་བདག་གཉིས་ཀྱིས་ཡེ་ནས་དབེན་པས་སྟོང་པ་ཉིད་དང་། ལྷུན་གྲུབ་ཡེ་ཤེས་ཀྱི་སྣང་བ་གཞི་ལ་མ་ཆད་ཅིང་འཁོར་བ་གཟུང་འཛིན་ཙམ་དུ་ཤེས་པས་སྨོན་པ་མེད་པ། ཟུང་འཇུག་འདུས་མ་བྱས་པའི་གནས་ལུགས་ཁས་ལེན་དང་བྲལ་བས་མཚན་མ་མེད་པ་སྟེ་རྣམ་ཐར་སྒོ་གསུམ་དང་། ཀ་དག་ལ་ཆོས་ཉིད་དོན་གྱི་ལྷ་དང་ལྷུན་གྲུབ་ཕྱིར་ཤར་བ་ལ་ཆོས་ཅན་རྟགས་ཀྱི་ལྷ་ཞེས་བྱ་ལ། དེ་བཞིན་དུ་དམིགས་མེད་དང་དམིགས་བཅས་ཀྱི་ཚོགས་གཉིས་དང་། རྫོགས་རིམ་དང་བསྐྱེད་རིམ། སྟོང་པའམ་དོན་གྱི་འོད་གསལ་དང་། སྣང་བའམ་དཔེའི་འོད་གསལ་དང་། ཁྲེགས་ཆོད་སྣང་མེད་ཀྱི་མཉམ་བཞག་ཐོད་རྒལ་སྣང་བཅས་ཀྱི་མཉམ་བཞག་དང་། སྔ་མ་དོན་དམ་བྱང་ཆུབ་ཀྱི་སེམས་དང་ཕྱི་མ་ཀུན་རྫོབ་བྱང་ཆུབ་ཀྱི་སེམས་དེ་གཉིས་ཟུང་འཇུག་མཉམ་ཉིད་བྱང་ཆུབ་ཀྱི་སེམས་ཞེས་བྱ་བས་ལམ་གནད་ཀུན་ཞར་ལ་ཚང་ཞིང་། ལྡོག་པས་གཉིས་སུ་བཤད་པ་ཐམས་ཅད་ངོ་བོ་གཅིག་ཐ་དད་བྲལ་བར་བསྒོམས་པས་འབྲས་བུ་ཀ་དག་ཆོས་སྐུ་དང་ལྷུན་གྲུབ་གཟུགས་སྐུ་ཟུང་འཇུག་ལ་ཐུག་པ་ནི་ལམ་འདིའི་རང་ལུགས་ཐུན་མོང་མ་ཡིན་པའོ། །སྣང་གཞི་ལས་ས་ལམ་གྱི་དོད་ཐུབ་བརྩི་རྒྱུ་ཡོད་ཀྱང་ཐུན་མོང་གི་ལམ་ལྟར་རིམ་བགྲོད་མ་ཡིན་པར་འདིར་བློ་མཆོག་ཅིག་ཆར་བའི་སྐལ་ལྡན་རྣམས་ལ་ནི་ས་ལམ་ཅིག་ཆོད་ཡིན་ནོ། །མདོར་ན་དེ་འདྲའི་ལྟ་བ་ལ་མི་སྐྲག་ཅིང་མོས་པས་འཇུག་ཅིང་ཤེས་རབ་ཀྱིི་དྲན་རྒྱུན་མི་བརྗེད་པར་བྱ་ཞིང་། ལས་འབྲས་ཐུན་མོང་གི་དགེ་རྩ་ཡང་ཅི་ནུས་གྲོགས་སུ་བརྟེན་ན་གནས་སྐབས་བཟོད་པའི་རྒྱུ་དང་གོམས་པས་བཟོད་པའི་གཟུངས་ཞེས་བྱ་ལ། གཞན་ཕན་སྙིང་རྗེའི་དབང་གིས་དམ་པ་གསུམ་དང་འབྲེལ་བས་ཤེས་རབ་ཐབས་དང་ལྡན་པའི་ལམ་དུ་སོང་བས། ཤེས་རབ་ཀྱིས་གནས་ལུགས་ཤེས། སྙིང་རྗེས་འགྲོ་བ་སྐྱོབ་པ་སྟེ་མནྡྲ་ཞེས་པའི་སྔགས་དོན་དང་། རིག་པ་ཆེན་པོའི་སྔགས་བླ་ན་མེད་པའི་སྔགས་ཀྱང་ཚང་བས་སྔགས་ཀྱི་གཟུངས་སོགས་མི་བརྗེད་པའི་གཟུངས་ཐམས་ཅད་མྱུར་དུ་ཐོབ་པ་སོགས་ཕན་ཡོན་མཐའ་ལས་འདས་པ་ཡིན་ཏེ། འདི་ལྟ་བུའི་དོན་ལ་བཟོད་པ་ལྟ་ཞོག་གི་ཆོས་ཐམས་ཅད་སྐྱེ་བ་མེད་དོ་སྙམ་པ་ཡིད་ལ་བྱེད་པའི་བསོད་ནམས་ལ་དགེ་བ་གཞན་གྱིས་དཔག་ཏུ་མེད་པ་སྟེ། ལྷའི་བུ་བློ་གྲོས་རབ་གནས་ཀྱིས་ཞུས་པའི་མདོ་ལས། གང་ཟག་ལ་ལས་གངྒཱའི་བྱེ་སྙེད་ཀྱི། །འཇིག་རྟེན་ཁམས་རྣམས་འདིར་ནི་སྦྱིན་བྱས་དང་། །འདུས་བྱས་སྟོང་པར་བཟོད་པ་གང་ལགས་པ། །བཟོད་པ་དེ་ནི་སྦྱིན་ལས་ཁྱད་པར་འཕགས། །ཞེས་གསུངས་པའི་ཕྱིར་རོ། །ཡང་འཁོར་འདས་རང་ཐོག་ནས་ཕྱེ་བ་ཞེས་འཁོར་བ་ནི་ཐོག་མེད་ནས་ལྷན་ཅིག་སྐྱེས་པའི་ལུང་སེམས་གཟུང་འཛིན་གྱི་རྟོག་པ་གཉིས་དོན་ལ་མེད་པ་ལ་ནོར་བའི་བློས་ཡོད་པར་བཟུང་བའི་འཁྲུལ་སེམས་གཏི་མུག་དང་མཚུངས་ལྡན་མུན་པའི་རྣམ་པ་ཅན་འདི་ཡིན་ཏེ། རྒྱལ་བ་བྱམས་པས། གང་ཞིག་ཡོད་པ་མི་མཐོང་མེད་མཐོང་བ། །འདི་འདྲའི་མུན་ནག་རྣམ་པ་དེ་གང་ཞིག །ཅེས་སོ། །མྱང་འདས་ནི་རིག་རྩལ་རླུང་གིས་ཁུར་བའི་རྣམ་རྟོག་དེ་ཟད་ཅིང་དེའི་གནས་ལུགས་སམ་རང་བཞིན་ཀ་དག་གི་ཡེ་ཤེས་ལྷན་ཅིག་སྐྱེས་པ་ཁོང་དུ་ཆུད་པ་ཉིད་ཡིན་ཏེ། བྱམས་པས། དེ་ཕྱིར་ཐར་པ་ནོར་ཙམ་ཟད་པ་ཡིན། །ཞེས་དང་། འདའ་ཀ་ཡེ་ཤེས་ལས། སེམས་རྟོགས་ན་ཡེ་ཤེས་ཡིན་པས་ན་སངས་རྒྱས་གཞན་དུ་མི་འཚོལ་བའི་འདུ་ཤེས་བསྒོམ་པར་བྱའོ། །ཞེས་སོ། །དེས་ན་ཁྲེགས་ཆོད་ཀྱིས་ནང་འཛིན་པའི་སེམས་དག །ཐོད་རྒལ་གྱིས་ཕྱི་གཟུང་བའི་ཡུལ་དག །གཟུང་འཛིན་གཉིས་མེད་ཀྱི་རིག་སྟོང་མངོན་དུ་བྱེད་པའི་ལམ་འདི་ཁོང་དུ་ཆུད་པ་ལ་འཁོར་འདས་སྤང་ཐོབ་ཀྱི་རྩོལ་བས་འཇིགས་པར་སྣང་བ་ནི་གནས་མེད་ཅིང་སྐབས་མེད་དོ། །སྨྲས་པ། དངོས་འཛིན་གདོན་གྱིས་གཙེས་པའི་འཁྲུལ་སྣང་གི། འདོད་འཇིགས་སྒྱུ་མ་མཁན་དེས་བསླུས་བསླུས་ནས། །རང་འདོད་ལམ་གྱི་ཞགས་པས་མཐོ་རིས་གྲོང་། །གཏི་མུག་རྒན་པོའང་བདག་ལ་མཛའ་བ་མིན། །ཀུན་རྟོག་དམག་གིས་བསྐོར་བའི་ར་བ་ན། །མཐར་འཛིན་གྲུབ་མཐའི་གཟེབ་ཏུ་རྟག་ཚུད་ཀྱང་། །ཁྲེགས་ཆོད་རྡོ་རྗེའི་གོ་མཚོན་རྣོན་པོ་དེས། །འགྲོལ་མེད་གོ་སྐབས་ཡངས་པོར་ད་བྱས་སོ། །བླུན་སྒོམ་ཐུན་གསུམ་མུན་པའི་ཁྱིམ་དང་བྲལ། །རྟོག་གེའི་ཁ་ཆར་འཚུབ་པས་མ་བསྒྲིབས་ཤིང་། །རླུང་སེམས་རྩོལ་བའི་སྤྲིན་ལས་རང་གྲོལ་བའི། །གཞི་དབྱིངས་རིག་པའི་ཉི་མ་ཁོང་ནས་འཆར། །ཐོད་བཅིངས་མུན་པའི་ཟློས་གར་ཡལ་བ་དང་། །རྣམ་གཡེང་རྒྱུ་སྐར་ཕྲེང་བ་དབྱིངས་སུ་བསྐུམ། །གཞན་དག་ཟླ་བའི་ཟེར་ལའང་ཅི་ཞིག་རྟོན། །གདེང་ཐོབ་མི་དེ་སྲིད་པའི་མཁའ་ལ་མཛེས། །ཀྱེ་ཧོ། བདེན་པའི་ཆོས་ཀྱི་ངེས་ཤེས་མ་ཐོབ་ན། །བདེན་མེད་རྫུན་གྱིས་བཅིངས་པའི་ཆོས་གཟུགས་ཀྱང་། །བརྙན་པོའི་རྒྱན་གྱིས་བྱིས་པ་བྲིད་པའི་དཔེས། །འདུ་བྱེད་སྲིད་པའི་ཁུར་དུ་མ་སོང་ངམ། །ཉི་མའི་འགྲོས་ནི་མྱུར་ཞིང་འོད་ཐག་ཆད། །རླུང་ཟེར་གྲིབ་མའི་བགྲོད་པ་མཆེད་པའི་ཚེ། །བྱ་བྱེད་ཅན་རྣམས་ལས་འཕྲོའི་དབང་གིས་བྲེལ། །བྱར་མེད་རྒན་པོ་མལ་ཆུང་གྲུ་བཞིར་ཉལ། །བསྟན་པའི་ཉིན་སྣང་ཡལ་དང་ཆོས་མིག་ཅན། །ཀུན་ཀྱང་མི་སྣང་མུན་པའི་གྲོང་ཁྱེར་འདིར། །ཟིན་མེད་བྱ་བྱེད་བྲེལ་བའི་ཁུར་བོར་ནས། །བྱར་མེད་ཆོས་སྐུའི་མལ་དུ་སྙོམས་པར་ཞུགས། །ཀུན་འབྱུང་གཉིད་དུག་སློང་པའི་གཏི་མུག་ཅན། །སེམས་འཛིན་ཟོལ་འགྲོགས་སྒོམ་པའི་སྟོང་སྐད་ཀྱིས། །དགའ་བྱེད་བྱིས་པ་བསླུ་བའི་རྣམ་ཐར་ལས། །ངང་བཟང་དམ་པ་མགུ་བྱེད་ཅི་ཞིག་ཡོད། །དུས་ཚོད་སྙིགས་མས་འགྱུར་ལྡོག་ཤིན་ཏུ་མང་། །སྣང་ཤེས་མི་རྟག་གཏན་གྱི་འདུན་གྲོས་སོམས། །ཚེ་ཡི་སྙིགས་མར་གྱུར་པས་ཚེ་ཐུང་ཞིང་། །བར་ཆད་མང་བས་ནམ་འཆི་ཆ་མེད་སྒོམས། །སེམས་ཅན་སྙིགས་པས་དམུ་རྒོད་གདུལ་དཀའ་ཞིང་། འགྲོགས་ན་ཕན་ཚུན་བསླུ་བའི་རང་བཞིན་སེམས། །ལྟ་བ་སྙིགས་པའི་ཐེ་ཚོམ་ལོག་ལྟས་བཅིངས། །མཆོག་འཛིན་མང་བས་གྲུབ་མཐའ་ཞེན་ལོག་སྒོམས། །ཉོན་མོངས་སྙིགས་པས་དུག་ལྔ་མེ་ལྟར་འབར། །གཉེན་པོ་གཞན་གྱིས་འདུལ་བར་ཤིན་ཏུ་དཀའ། །མྱུར་ལམ་འོད་གསལ་མཆོག་གི་གདམས་ངག་འདིས། །ཚེ་འདིར་ཀ་དག་སྙོགས་ལ་བཟོད་པར་མཛོད། །གྲུབ་བརྒྱས་ཟང་ཐལ་བརྙེས་པའི་གསང་ལམ་འདི། །བཀའ་སྡོད་དབྱིངས་ཀྱི་མཁའ་འགྲོས་གནང་ཐོབ་ཀྱང་། །སྒྲུབ་གསང་སྦས་པར་འཆང་ན་མི་འཚལ་ཞེས། །མཚུངས་མེད་རིག་འཛིན་བླ་མའི་ཞལ་ལུང་བདེན། །འདི་བརྩམས་དོན་ལ་རྟོན་པ་དགེ་བའི་ཆ། །སྲིད་པའི་མངལ་རྒྱར་འཐུམས་པའི་འགྲོ་ལ་བསྔོ། །མ་རྟོགས་ནོངས་པར་གྱུར་པའི་ཆ་གང་མཆིས། །ལུས་མེད་ཡེ་ཤེས་ཌཱཀྐིའི་ཚོགས་ལ་བཤགས། །མ་བརྟགས་ཆོས་ལ་སྡང་བའི་གང་ཟག་འགས། །མ་རྟོགས་འཆལ་བར་གྱུར་པའི་གཏན་ཚིགས་ཀྱིས། །མ་དག་འཁྲུལ་བའི་ལམ་དུ་སྒྱུར་བྱེད་ན། །མ་བསྙེལ་མཁའ་འགྲོའི་ཚོགས་རྣམས་གཟུ་དཔང་མཛོད། །ཅེས་པ་འདི་ཡང་ཆོས་འདིའི་ཁྲིད་འཆད་པའི་སྐབས་སུ་སྐལ་ལྡན་གྱི་སློབ་བུ་རྣམས་ཀྱིས་བསྐུལ་བའི་རྐྱེན་བྱས་ཏེ་ཆོས་འདིའི་བདག་པོར་ལུང་ཐོབ་པ་བསོད་ནམས་ཆོས་འགྲུབ་ཅེས་འབོད་པའམ་བཏགས་མིང་གཞན་ཆོས་དབྱིངས་རིག་རྩལ་རྡོ་རྗེ་ཞེས་བྱ་བས་གང་ཤར་ཉུང་བསྡུས་ཤིག་འཕྲལ་དུ་བྲིས་ཤིང་སླར་ཡང་རྒྱས་པར་འཆད་སྤྲོའོ། །དགེའོ། །དགེའོ། །དགེའོ། །ཟབ་རྒྱ། དཀར་མཛེས་བོད་རིགས་རང་སྐྱོང་ཁུལ་རྩོམ་སྒྱུར་ཅུས་ནས་སྤར་དུ་བཏབ་པའོ།། །།