cover

སྔ་འགྱུར་བཀའ་མའི་ཆོས་སྡེའི་གླེགས་བམ་བརྒྱ་ཉེ་ཤུ་པ།

གླེགས་བམ། ཨེ༽

བདུད་འཇོམས། རྨེ་བ་མཁན་ཆེན་བསོད་ནམས་ཆོས་འགྲུབ།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

སྡོམ་གསུམ་རྣམ་པར་ངེས་པའི་བསྟན་བཅོས་ཀྱི་འབྲུ་འགྲེལ་བློ་གྲོས་གསར་བུའི་ཡིད་ཀྱི་གདུང་སེལ་ལེགས་བཤད་བདུད་རྩིའི་ཟ་མ་ཏོག །བདུད་འཇོམས།

སྡོམ་གསུམ་རྣམ་པར་ངེས་པའི་བསྟན་བཅོས་ཀྱི་འབྲུ་འགྲེལ་བློ་གྲོས་གསར་བུའི་ཡིད་ཀྱི་གདུང་སེལ་ལེགས་བཤད་བདུད་རྩིའི་ཟ་མ་ཏོག་ཅེས་བྱ་བ་བཞུགས་སོ། །ༀ་སྭསྟི་སིདྡྷཾ། རྣམ་འདྲེན་སྟོང་རྩའི་དབུས་ན་པད་དཀར་བཞིན། །རབ་བསྔགས་རྩོད་ལྡན་གདུལ་བྱའི་དཔལ་ཤར་བ། །ངོ་མཚར་སྟོན་པ་མཚུངས་མེད་ཤཱཀྱའི་རྒྱལ། །ཁྱོད་ཞབས་སྤྱི་བོའི་རྒྱན་དུ་ཐོག་མར་བསྙེན། །འོད་སྣང་མཐའ་ཡས་མགོན་པོའི་ཟློས་གར་ནི། །སིནྡྷུའི་པད་མཚོར་བསྒྱུར་ལས་མཚན་སྐུའི་དཔལ། །འཆི་མེད་རིག་འཛིན་གཞོན་ནུའི་རྣམ་འགྱུར་གྱིས། །སྣང་སྲིད་ཟིལ་གནོན་མཛད་དེར་སྙིང་ནས་གུས། །གངས་ཅན་སྐྱེ་འགྲོ་ཐོག་མའི་འདྲེན་པ་རུ། །བསམ་བཞིན་བྱོན་པ་མཁན་ཆེན་ཞི་བ་འཚོ། །གངས་ལྗོངས་སྨག་རུམ་ཁྲོད་ན་རྒྱལ་བསྟན་གྱི། །སྣང་བྱེད་ཐོག་མར་འདྲེན་བཟོད་ཁྲི་སྲོང་རྗེ། །རྣམ་གསུམ་བོད་ལ་ལྷག་པར་རྗེས་བརྩེའི་སྟོབས། །ངོ་མཚར་རྣམ་ཐར་ད་ལྟའི་བར་དུ་ཡང་། །མངོན་སུམ་ཚད་གྲུབ་བཀའ་དྲིན་ཕུང་པོའི་ཚུལ། །རྗེས་སུ་མི་དྲན་བྱོལ་སོང་ལས་གཞན་སུ། །ཐ་མའི་དུས་འདིར་སླར་ཡང་ཆོས་རྒྱལ་ཉིད། །སྡོམ་བརྩོན་པཎྜི་ཏ་ཡི་ཚུལ་བཟུང་ནས། །རྒྱལ་བའི་གསུང་རབ་དགོངས་དོན་གནད་དྲིལ་ཏེ། །སྡོམ་གསུམ་རྣམ་ངེས་བདུད་རྩིའི་བགོ་སྐལ་སྩལ། །ཚུལ་འདིར་ཤེས་བྱ་ཀུན་གཟིགས་ལོ་ཆེན་རྗེ། །དྷརྨ་ཤྲཱི་སོགས་སྔོན་བྱོན་མཁས་རྣམས་ཀྱིས། །དགོངས་འགྲེལ་ལེགས་བཤད་ཅི་དགར་སྤྲོས་ལས་འདིར། །རྒྱལ་བསྟན་མི་ཉམས་དར་མཛད་བཀའ་དྲིན་དྲན། །སླར་ཡང་རང་འདྲ་ཐོས་ཆུང་གསར་བུའི་ཕྱིར། །རྗོད་བྱེད་ཚིག་ཉུང་བརྗོད་བྱའི་དོན་མ་ནོར། །དོན་གནད་རྗེན་ཕྱུངས་རྒྱས་བཤད་སྤྲོས་པ་བསྐྱུངས། །བལྟ་བདེ་གོ་སླ་ཐོག་མའི་འཇུག་སྒོ་རུ། །འདི་ཙམ་འཚམས་སྙམ་འབད་པས་བཀོད་འདི་ཀོ། །དོན་གཉེར་ཅན་འགར་ཚེགས་ཆུང་དོན་ཆེའི་སྐྱེས། །དེ་ཕྱིར་ལྷག་བསམ་དག་པའི་བརྩོན་པ་འདི། །དོན་ལྡན་ཉིད་དུ་འགྱུར་བར་བྱིན་བརླབས་གསོལ། །དེའང་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཚད་མེད་པ་དང་ལྡན་པ་འདི་ཉིད་ཀྱིས་ཞིང་འདིའི་གདུལ་བྱ་རྣམས་ཐར་པ་བླ་ན་མེད་པའི་ལམ་དུ་དཀྲི་བའི་ཕྱིར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཇི་སྙེད་ཅིག་གསུངས་པ་ཐམས་ཅད་བསྡུ་ན་སྡེ་སྣོད་བཞིར་འདུ་ཞིང་། དེ་དག་གིས་བསྟན་བྱ་མ་ལུས་པའང་སྡོམ་པ་གསུམ་གྱི་ཉམས་ལེན་གྱི་ཁོངས་སུ་འདུ་བའི་ཕྱིར། དེ་ཉིད་མདོ་སྔགས་ཀྱི་བསྟན་པ་མཐའ་དག་གི་སྙིང་པོའི་བཅུད་དུ་ཡོངས་སུ་གཟིགས་ནས། འཇམ་དཔལ་དབྱངས་དངོས་ཆོས་རྒྱལ་ཚངས་པ་ལྷའི་མེ་ཏོག་གི་གསང་བ་གསུམ་གྱི་རྣམ་པར་རོལ་པ་ཡུལ་མངའ་རིས་ཀྱི་པཎྜི་ཏ་ཆེན་པོ་པདྨ་དབང་རྒྱལ་རྡོ་རྗེ་གྲགས་པ་རྒྱལ་མཚན་དཔལ་བཟང་པོ་ཞེས་མཁས་པའི་ཕུལ་དུ་ཕྱིན་ཅིང་གྲུབ་པའི་ས་མཐོར་གཤེགས་པ་དེ་ཉིད་ཀྱིས། རང་རེ་རྗེས་འཇུག་གི་གདུལ་བྱ་རྣམས་ལ་བརྩེ་བ་ཆེན་པོས་ལྷག་པར་རབ་ཏུ་དགོངས་ཏེ་སྡོམ་པ་གསུམ་གྱི་ཉམས་ལེན་གནད་དུ་དྲིལ་བར་མཛད་པའི་ལེགས་བཤད་རྨད་དུ་བྱུང་བ་འདི་ཉིད་འཆད་པར་བྱ་བ་ལ་གསུམ་སྟེ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་ནོ། །དང་པོ་ཐོག་མར་དགེ་བ་ཀླད་ཀྱི་དོན་ལའང་གསུམ། མཚན་སྨོས་པ། མཆོད་པར་བརྗོད་པ། བརྩམ་པར་དམ་བཅའ་བའོ། །དང་པོ་མཚན་སྨོས་པ་ནི། རང་བཞིན་རྫོགས་པ་ཆེན་པོའི་ལམ་གྱི་ཆ་ལག་སྡོམ་པ་གསུམ་རྣམ་པར་ངེས་པ་ཞེས་བྱ་བའི་བསྟན་བཅོས་བཞུགས་སོ། །ཞེས་པ་སྟེ། འདི་ལྟར་སེམས་ཀྱི་རང་བཞིན་མ་བཅོས་པའི་གནས་ལུགས་ཟབ་མོའི་ཀློང་ན་གཞི་ལམ་འབྲས་བུའི་ཆོས་ཐམས་ཅད་མ་བཙལ་ཡེ་རྫོགས་སུ་ལྷུན་གྱིས་གྲུབ་པ་ནི་བླ་ན་མེདཔའི་ཆེན་པོ་སྟེ། དེའི་ཚུལ་མ་ནོར་བར་དངོས་སུ་གཏན་ལ་འབེབས་པར་བྱེད་པས་ན་ལམ་ཀུན་གྱི་མཐར་ཐུག་པ་ནི་ཨ་ཏི་ཡོ་ག་ཡིན་ཅིང་། ཨ་ནུ་མན་ཆད་མདོ་སྔགས་ཀྱི་ཆོས་ཚུལ་ཐམས་ཅད་ཀྱང་འདི་ཉིད་རྟོགས་པར་བྱེད་པའི་ལམ་གྱི་ཆ་ལག་ཏུ་གྲུབ་པ་དང་། དེ་ཐམས་ཅད་ཀྱི་བརྗོད་བྱ་ཉམས་ལེན་གྱི་སྙིང་པོ་ནི་སྡོམ་པ་གསུམ་ཡིན་ལ། དེའི་དོན་དཔྱད་པ་གསུམ་གྱི་སྒོ་ནས་སྒྲོ་སྐུར་དང་བྲལ་བར་གཏན་ལ་ཕབ་པས་ན་རྣམ་པར་ངེས་པ་ཞེས་བྱ་བ་སྟེ། བསྟན་བཅོས་ཞེས་པའི་སྒྲ་དོན་འཆོས་སྐྱོབ་ལ་འཇུག་པས་ན་རྒྱུ་ཉོན་མོངས་པ་ལས་འཆོས་ཏེ་འབྲས་བུ་ངན་འགྲོའི་སྲིད་པ་ལས་སྐྱོབ་པའི་ཡོན་ཏན་དང་ལྡན་པས་ན་བསྟན་བཅོས་ཏེ། རྣམ་བཤད་རིག་པ་ལས། ཉོན་མོངས་དགྲ་རྣམས་མ་ལུས་འཆོས་པ་དང་། །ངན་འགྲོའི་སྲིད་ལས་སྐྱོབ་པ་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་གསུངས། བཞུགས་སོ་ནི་འདིར་ཡོད་དོ་ཞེས་པའོ། །དེ་ལྟར་མཚན་སྨོོས་པའི་དགོས་པའམ། དབང་རབ་རྣམས་མཚན་གྱི་ནང་དུ་གཞུང་དོན་ཚང་བས་དེ་ཙམ་གྱིས་དབུ་ཞབས་ཀྱི་དོན་ཐམས་ཅད་བདེ་བླག་ཏུ་རྟོགས་པར་འགྱུར་བ་དང་། འབྲིང་རྣམས་ཀྱིས་གཞུང་གི་བཞུགས་ཚུལ་དོན་སྤྱི་ལ་ངེས་པ་རྙེད་པར་འགྱུར་བ་དང་། ཐ་མས་ཀྱང་མཚན་དོན་དེ་ལྡན་གྱི་གཞུང་ཉིད་ལ་མྱུར་དུ་འཇུག་པར་སྤྲོ་ཞིང་གླེགས་བམ་ཡང་ངོ་ཤེས་པའི་དགོས་པ་ཡོད་དོ། །གཉིས་པ་མཆོད་པར་བརྗོད་པ་ལ་གཉིས། སྤྱིར་བཀའ་དྲིན་ཅན་གྱི་བླ་མ་ལ་ཕྱག་འཚལ་བ་དང་། ཁྱད་པར་སློབ་དཔོན་ཆེན་པོ་པདྨ་འབྱུང་གནས་ལ་ཕྱག་འཚལ་བའོ། །དང་པོ་སྤྱིར་བཀའ་དྲིན་ཅན་གྱི་བླ་མ་ལ་ཕྱག་འཚལ་བ་ནི། ན་མོ་གུ་ར་ཝེ། ཞེས་ལེགས་སྦྱར་གྱི་སྐད་དེ་ཉིད་བོད་སྐད་དུ་བསྒྱུར་ན། ན་མོ་ཞེས་པ་ཕྱག་འཚལ་བའི་དོན་དང་། གང་ལ་ན། གུ་ར་ཝེ་ཞེས་པ་བླ་མ་ལའོ། །དེའང་གུ་རུའི་སྒྲ་ལྕི་བ་ལ་འཇུག་པས་ལུང་རྟོགས་ཡོན་ཏན་རྒྱ་ཆེ་བའི་ཁུར་གྱིས་ལྕི་བའི་མཁྱེན་པ་བླ་ན་མེད་ཅིང་ཐུགས་རྗེ་བརྩེ་བ་ཆེན་པོ་མ་དང་མཚུངས་པའི་བཀའ་དྲིན་ཆེ་བ་དེ་ལ་སྒོ་གསུམ་གུས་པ་ཆེན་པོས་འདུད་པའི་དོན་ནོ། །དེ་ལྟར་བླ་མ་ལ་དང་པོ་ཉིད་དུ་ཕྱག་འཚལ་དགོས་པའི་རྒྱུ་མཚན་གང་ཞེ་ན། སློབ་དཔོན་བྷ་བི་ལྷས། དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་སེམས་ཅན་ཁམས་བཞུགས་པའི། །དུས་གསུམ་དུ་ནི་མངོན་ཕྱག་འཚལ། །ཞེས་གསུངས་པ་ལྟར་རོ། །གཉིས་པ་ཁྱད་པར་སློབ་དཔོན་ཆེན་པོ་པདྨ་འབྱུང་གནས་ལ་ཕྱག་འཚལ་བ་ནི། དཔལ་ལྡན་ཚོགས་གཉིས་ཆུ་གཏེར་བསྲུབས་པ་ལས། །མཁྱེན་བརྩེའི་འོད་དཀར་ངེས་གསང་གྲུ་ཆར་འབེབས། །གངས་ཅན་མཁས་གྲུབ་ཡོངས་ཀྱི་གཙུག་རྒྱན་མཆོག །མཚོ་སྐྱེས་རྡོ་རྗེ་འགྲོ་བའི་བླ་མར་འདུད། །ཅེས་པ་སྟེ། འདི་ནི་རིག་བྱེད་པས་རྒྱ་མཚོ་བསྲུབས་པ་ལས་ཟླ་བ་ཐོན་པར་འདོད་པའི་གཏམ་དང་ཆོས་མཚུངས་སྦྱར་ནས་གཟུགས་ཅན་གྱི་རྒྱན་དུ་མཛད་པ་སྟེ། དེའང་རྒྱུ་བསོད་ནམས་དང་འབྲས་བུ་ཡེ་ཤེས་ཀྱི་དཔལ་ཕུན་སུམ་ཚོགས་པ་དང་ལྡན་པའི་ཚོོགས་གཉིས་ཆུ་གཏེར་ཟབ་མོའམ་རྒྱ་མཚོ་ཆེན་པོ་བསྲུབས་ཤིང་བསགས་པ་ལས། ཤེས་བྱ་ཐམས་ཅད་ལ་ཆགས་ཐོགས་མེད་པའི་མཁྱེན་རབ་དང་། དམིགས་པ་མེད་པའི་བརྩེ་བའི་ཐུགས་རྗེ་ཆེན་པོ་ཟུང་དུ་འཇུག་པ་འོད་དཀར་ཅན་ཏེ་ཟླ་བའི་དཀྱིལ་འཁོར་ཆ་ཤས་ཡོངས་སུ་རྫོགས་པ་ལྟ་བུ་ལས། གདུལ་བྱ་རྣམས་ལ་ངེས་སང་བླ་ན་མེད་པ་རྡོ་རྗེ་ཐེག་པའི་ལམ་འབྲས་བུར་བཅས་པ་སྟོན་པའི་ཕྲིན་ལས་ལྷུན་གྱིས་གྲུབ་པའི་གྲུ་ཆར་འབེབས་པ་ནི་ཟླ་བའི་བསིལ་ཟེར་དང་ཆོས་མཚུངས་སྦྱར་ལ། དེ་ལྟ་བུའི་མཁྱེན་བརྩེ་ནུས་པའི་ཡོན་ཏན་ཕུན་སུམ་ཚོགས་པ་དང་ལྡན་པ་དེ་ཉིད་གདུལ་བྱ་ཁྱད་པར་བ་གངས་ཅན་གྱི་ལྗོངས་འདིས་མཚོན་པའི་ས་གསུམ་ལ་གནས་པའི་མཁས་པ་དང་གྲུབ་པ་ཡོངས་ཀྱི་གཙུག་གི་རྒྱན་མཆོག་ཏུ་བསྟེན་པར་འོས་པ་མདངས་ལྡན་དྲི་མེད་རྒྱ་མཚོའི་གླིང་གི་མེ་ཏོག་པདྨའི་སྦུབས་སུ་ཕ་ཡི་རྒྱུ་དང་མ་ཡི་རྐྱེན་ལ་མ་བརྟེན་པར་རིག་པ་ཐོལ་སྐྱེས་ཀྱི་ཚུལ་དུ་སྐུ་འཁྲུངས་ཤིང་སྐྱེ་འཆིའི་གཞོམ་གཞིག་བགྲེས་རྒུད་དང་བྲལ་བ་མི་འགྱུར་རྡོ་རྗེེའི་སྐུས་གདུལ་བྱ་རྣམས་རང་རང་གི་སྐལ་བ་བཞིན་ཕན་བདེའི་དཔལ་བཟང་པོ་ལ་འགོད་པར་མཛད་པའི་འགྲོ་བའི་བླ་མ་དེ་ལ་རྩོམ་པ་པོ་མཆོག་ཏུ་གུས་པ་ཆེན་པོས་འདུད་དོ་ཞེས་ཕྱག་མཛད་པ་ནི་ཀུན་རྫོབ་བརྡའི་ཕྱག་དང་། ཡུལ་དང་ཡུལ་ཅན་གཉིས་མེད་དུ་རྟོགས་པ་དོན་དམ་ལྟ་བ་མཇལ་བའི་ཕྱག་གོ། །དེ་ལྟར་མཆོད་པར་བརྗོད་པའི་དགོས་པའང་མགོན་པོ་ཀླུས། བསྟན་བཅོམ་བྱེད་པོས་སྟོན་པ་ལ། མཆོད་པར་བརྗོད་པ་འབྲས་མེད་མིན། །སྟོན་པ་དང་ནི་བསྟན་བཅོས་ལ། །དད་འདུན་བསྐྱེད་པར་བྱ་ཕྱིར་རོ། །ཞེས་གསུངས་པ་ལྟར་རྩོམ་པ་པོ་རང་གི་ཚོགས་རྫོགས་ནས་བརྩམས་པ་མཐར་ཕྱིན་པ་དང་། རྗེས་མཇུག་རྣམས་ཀྱིས་བསྟན་བཅོས་མཆོག་ཏུ་རིག་ནས་གུས་པས་འཇུག་པའི་དགོས་པ་ཡོད་པས་སོ། །གསུམ་པ་བརྩམ་པར་དམ་བཅའ་བ་ནི། འགྲོ་བློའི་དྲི་མ་འཁྲུད་མཁས་དྲང་སྲོང་གིས། །བློ་གྲོས་བཻ་ཌཱུར་བུམ་བཟང་རབ་ཐོགས་ནས། །ལེགས་བཤད་སྡོམ་གསུམ་བདུད་རྩིའི་ཆུ་སྦྱིན་གྱི། །དོན་གཉེར་སྐྱེ་བོའི་ཚོགས་རྣམས་འདིར་འདུས་ཤིག །ཅེས་པ་སྟེ། འགྲོ་བ་ཐམས་ཅད་ཀྱི་བློའི་མི་ཤེས་རྨོངས་པའི་དྲི་མ་རྣམས་འཁྲུད་པ་ལ་མཁས་པའི་རྩོམ་པ་པོ་རང་ཉིད་འཇིག་རྟེན་ན་ཆེ་བའི་ཡོན་ཏན་དང་ལྡན་པར་གྲགས་པའི་དྲང་སྲོང་གི་གཟུགས་སུ་བཀོད་ནས་མངའ་རིས་པ་བདག་གིས་གསུང་རབ་དགོངས་འགྲེལ་དང་བཅས་པའི་ཚིག་དོན་ཕྱིན་ཅི་མ་ལོག་པར་རྟོགས་པའི་བློ་གྲོས་ཕུན་སུམ་ཚོགས་པ་ནི་བཻ་ཌཱུརྻའི་བུམ་པ་བཟང་པོ་རབ་ཏུ་དག་པ་དྲང་སྲོང་གི་ལག་ཏུ་ཐོགས་པ་དང་ཆོས་མཚུངས་སྦྱར་ནས། མ་རྟོགས་ལོག་རྟོགས་སོགས་ཀྱི་སྐྱོན་མེད་པས་ལེགས་བཤད་སྡོམ་པ་གསུམ་གྱི་བསྟན་བཅོས་གང་ཞིག་བུམ་པ་དེའི་ནང་དུ་ཡོད་པ་གྲིབ་སོགས་ནད་ཀུན་སེལ་བའི་བདུད་རྩིའི་ཆུ་རྒྱུན་དང་འདྲ་བ་འདི་ཉིད་སྦྱིན་པར་བྱ་བ་ཡིན་གྱི། ཐར་པ་མཆོག་གི་གོ་འཕང་ཐོབ་པའི་ལམ་ཚང་ལ་མ་ནོར་བར་སྡོམ་པ་གསུམ་གྱི་ཉམས་ལེན་དོན་དུ་གཉེར་བའི་སྐལ་བཟང་སྐྱེ་བོའི་ཚོགས་རྣམས་འདིར་འདུས་ལ། ཐོས་བསམ་ལ་སོགས་པས་གཏན་ལ་ཕབ་ནས་དོན་གྱི་བཅུད་མྱོང་བར་གྱིས་ཤིག་ཅེས་བསྐུལ་བའོ། །འདིས་བསྟན་བཅོས་ཀྱི་དགོས་སོགས་ཆོས་བཞི་ཡང་ལེགས་པར་བསྟན་པ་ཡིན་ཏེ། སྡོམ་པ་གསུམ་ནི་བརྗོད་བྱ། རྗོད་བྱེད་ཀྱི་ལེགས་བཤད་འདི་ལས་བརྗོད་བྱའི་དོན་ལེགས་པར་རྟོགས་ཏེ་ཐར་པའི་ལམ་ལ་ཞུགས་པ་ནི་དགོས་པ། ཞུགས་པ་མཐར་ཕྱིན་ནས་བྱང་ཆུབ་ཐོབ་པ་ནི་ཉིང་དགོས། དེ་དག་ཀྱང་གཅིག་ལ་བརྟེན་ནས་གཅིག་འབྱུང་བས་འབྲེལ་བ་ཅན་དུ་གྲུབ་པ་ནི་འབྲེལ་བའོ། །གཉིས་པ་བར་དུ་དགེ་བ་གཞུང་གི་དོན་ལ། བཤད་གཞི་རིམ་པར་ཕྱེ་བའི་སྒོ་ནས་མདོར་བསྟན། སྡོམ་གསུམ་སོ་སོའི་རང་བཞིན་དང་བསླབ་བྱ་ཞིབ་ཏུ་སྟོན་པའི་སྒོ་ནས་རྒྱས་པར་བཤད། དེ་གསུམ་གང་ཟག་གཅིག་གི་རྒྱུད་ལ་འགལ་མེད་དུ་ཉམས་སུ་ལེན་ཚུལ་གྱིས་མཐའ་དཔྱད་པའི་སྒོ་ནས་དོན་བསྡུ་བ་སྟེ། སྤྱིའི་ས་བཅད་གསུམ་ལ་ནང་གསེས་ལེའུ་ལྔ་རུ་ཡོད་པ་ལས། ལེའུ་དང་པོ་བཤད་གཞི་རིམ་པར་ཕྱེ་བའི་སྒོ་ནས་མདོར་བསྟན་པ་ལ་གསུམ། སྦྱང་གཞི་ཁམས་དང་བྲལ་འབྲས་མཐར་ཐུག་གི་འབྲས་བུ་ངོས་བཟུང་བ། ཐོབ་བྱེད་ལམ་གྱི་དབྱེ་བ་སྤྱིར་བཤད་པ། ཐེག་པ་ཐམས་ཅད་ཀྱི་ལམ་གྱི་གནད་སྡོམ་པ་གསུམ་གྱི་ཉམས་ལེན་དུ་འདུས་པའི་འབྲེལ་གྱིས་ཁོག་དབུབ་པའོ། །དང་པོ་སྦྱང་གཞི་ཁམས་དང་བྲལ་འབྲས་མཐར་ཐུག་གི་འབྲས་བུ་ངོས་བཟུང་བ་ནི། རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། །ཡོངས་སུ་དག་སྐུ་རྡོ་རྗེ་འཆང་ཆེན་པོ། །འབྲས་བུའི་མཐར་ཐུག་སངས་རྒྱས་ཉག་གཅིག་དེ། །ཞེས་པ་སྟེ། སྤྱི་རྫོགས་པ་ཆེན་པོ་ལ་གསུམ་དུ་དབྱེ་ན། གཞི་རྫོགས་པ་ཆེན་པོ་ནི་སེམས་ཅན་གྱི་ཁམས་ན་བདེ་གཤེགས་སྙིང་པོའི་ངོ་བོར་བཞུགས་པ་དེ་ཡིན་ལ། ལམ་རྫོགས་པ་ཆེན་པོ་ནི་དེའི་སྟེང་གི་གློ་བུར་སྒྲིབ་གཉིས་ཀྱི་བག་ཆགས་སྦྱོང་བྱེད་ཀྱི་ལམ་ཐེག་པ་ཐམས་ཅད་ཀྱི་མཐར་ཐུག་པ་དེ་ཡིན། འབྲས་བུ་རྫོགས་པ་ཆེན་པོ་ནི་སྒྲིབ་པ་ཐམས་ཅད་དང་བྲལ་བ་ནང་གསལ་གཞོན་ནུ་བུམ་པའི་སྐུའི་བདག་ཉིད་སྐུ་དང་ཡེ་ཤེས་བླ་ན་མེད་པ་དེ་ཡིན་ནོ། །དེའང་སྦྱང་གཞི་ནི་བདེ་གཤེགས་སྙིང་པོ་ཡིན་ཅིང་དེ་ལ་བསྟན་བཅོས་རྣམས་སུ་རིགས་ཞེས་གྲགས་པ་ལ་གྲུབ་མཐའི་དབང་གིས་འདོད་ཚུལ་མི་འདྲ་བ་ཡོད་དེ། ཉན་ཐོས་བྱེ་བྲག་སྨྲ་བས་སྲིད་པ་དང་སྲིད་པའི་ཡོ་བྱད་ལ་མ་ཆགས་པའི་སེམས་བྱུང་ཆོག་ཤེས་པ་ལ་འཕགས་པའི་རིགས་སུ་འདོད་དེ། མ་ཆགས་པ་དེ་ལས་ཟག་མེད་ཀྱི་ཆོས་སྐྱེ་བའི་ཕྱིར་ཞེས་འདོད། དེའི་དོན་ཡང་སྲིད་པ་ནི་ཕུང་པོ་ལྔ་དང་། སྲིད་པའི་ཡོ་བྱད་ནི་ཆོས་གོས་སོགས་ཏེ། འདུལ་བ་ལས། ཆོས་གོས་དང་། བསོད་སྙོམས་དང་། གནས་མལ་ངན་ངོན་ཙམ་གྱིས་ཆོག་ཤེས་པ་འཕགས་པའི་རིགས་དང་། སྤོང་བ་དང་སྒོམ་པ་ལ་དགའ་བ་འཕགས་པའི་རིགས་ཏེ་བཞིར་གསུངས་པའི་དེའི་དང་པོ་གསུམ་ནི་སྲིད་པའི་ཡོ་བྱད་ཀྱི་གཉེན་པོ་དང་། ཕྱི་མ་ནི་སྲིད་པའི་གཉེན་པའོ། །དེ་ལ་སྤོང་བ་ནི་འགོག་བདེན་དང་། སྒོམ་པ་ནི་ལམ་བདེན་ནོ། །མདོ་སྡེ་པས་སེམས་ཀྱི་ས་བོན་ཟག་མེད་ཀྱི་ཡེ་ཤེས་འབྱུང་རུང་གི་ནུས་པ་ལ་འདོད་ཅིང་། སེམས་ཙམ་པས་ཐོག་མེད་ནས་སེམས་རྒྱུད་ལ་གནས་པའི་ཟག་མེད་ཀྱི་ཆོས་བསྐྱེད་པར་བྱེད་པའི་ནུས་པ་ཆོས་ཉིད་ཀྱིས་ཐོབ་པ་ལ་འདོད་དེ། བྱང་ས་ལས། དེ་ལ་རང་བཞིན་གྱི་གནས་པའི་རིགས་ནི་སྐྱེ་མཆེད་དྲུག་གིས་ཁྱད་པར་དུ་བྱེད་པ་སྟེ། དེ་ནི་གཅིག་ནས་གཅིག་ཏུ་བརྒྱུད་དེ་འོང་ལ་ཐོག་མ་མེད་པའི་དུས་ཅན་ཆོས་ཉིད་ཀྱིས་ཐོབ་པའོ། །ཞེས་སོ། །དེ་ཐམས་ཅད་འདུས་བྱས་ཏེ་དངོས་པོར་སྨྲ་བའི་ལུགས་སོ། །ཐེག་ཆེན་དབུ་མ་པས། དྲི་བཅས་དེ་བཞིན་ཉིད་ལ་འདོད་པ་ཕལ་ཆེར་མཐུན་ཀྱང་ངོས་འཛིན་ཚུལ་ཅུང་ཟད་མི་འདྲ་བ་མང་མོད། འདིར་ཐེག་ཆེན་ཐུན་མོང་མ་ཡིན་པའི་ལུགས་ལྟར་ན། སེམས་ཉིད་ཡེ་ནས་རྣམ་པར་དག་པ་འདུས་མ་བྱས་པའི་ཡེ་ཤེས་སྟོང་གསལ་འཕོ་འགྱུར་མེད་པར་གནས་པ་ནི་བདེ་གཤེགས་སྙིང་པོ་སྟེ། ཏིང་འཛིན་རྒྱལ་པོ་ལས། དག་པ་དྭངས་པ་འོད་གསལ་བ། །མི་འཁྲུག་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་གསུངས་ཤིང་། སེམས་ཅན་རྣམས་ལ་བདེ་གཤེགས་སྙིང་པོ་དེ་ཚུལ་ཇི་ལྟར་ཡོད་ཅེ་ན། སྟོང་གསལ་འགག་མེད་འདུས་མ་བྱས་པའི་རང་བཞིན་དུ་གནས་ཏེ། དཔེ་ན་འོ་མ་ལ་མར་གྱིས་ཁྱབ་པའམ། ཏིལ་ལ་སྣུམ་གྱིས་ཁྱབ་པ་ལྟར་གནས་པའི་ཕྱིར། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་རྒྱུ་མཚན་གསུམ་གྱིས་སེམས་ཅན་ཐམས་ཅད་བདེ་གཤེགས་སྙིང་པོ་ཅན་དུ་བསྟན་ནས། ངོ་བོ་རྒྱུ་འབྲས་ལས་ལྡན་འཇུག་པ་དང་། །གནས་སྐབས་དེ་བཞིན་ཀུན་ཏུ་འགྲོ་བ་དང་། །རྟག་ཏུ་མི་འགྱུར་ཡོན་ཏན་དབྱེར་མེད་པའི། །དོན་དམ་དབྱིངས་ཀྱི་དགོངས་དོན་ཡིན་ཞེས་བྱ། །ཞེས་རྣམ་གཞག་རྣམ་པ་བཅུས་དེའི་དོན་གཏན་ལ་ཕབ་ཅིང་། སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་སྨྱུག་སོགས་འབྲས་ཆུང་དང་། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང་། །ས་ལ་རིན་ཆེན་གསེར་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །དེ་བཞིན་སེམས་ཅན་རྣམས་ལ་ཁམས་འདི་གནས། །ཞེས་དྲི་མས་བསྒྲིབས་ཚུལ་དཔེ་དགུའི་སྒོ་ནས་ཁྱད་པར་བསྟན་པ་ལྟར་ལ། དེ་ཉིད་གསང་སྔགས་རྡོ་རྗེ་ཐེག་པའི་སྐབས་སུ་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཞེས་གྲགས་ཏེ། མི་འགྱུར་བའི་བདེ་བ་ཆེན་པོ་དང་རྣམ་ཀུན་མཆོག་ལྡན་གྱི་སྟོང་པ་ཉིད་དབྱེར་མི་ཕྱེད་པའི་སེམས་ཀྱི་ཆོས་ཉིད་ལ་བཤད་ཅིང་། ཁྱད་པར་དུ་ཨ་ཏི་ཡོ་གས་སེམས་ཀྱི་ཆོས་ཉིད་རིག་པ་སྟོང་གསལ་གྱི་ངོ་བོ་ལ་སྐུ་དང་ཡེ་ཤེས་ཀྱི་ཆོས་ཐམས་ཅད་ཉི་མ་དང་འོད་ཟེར་བཞིན་འདུ་འབྲལ་མེད་པར་ཡོངས་སུ་རྫོགས་པས་ན་རྫོགས་པ་ཆེན་པོ་ཞེས་གསུངས་པ་སྟེ། ཐུགས་ཐིག་ལས། གཞིར་གནས་རིག་པ་ངོ་བོ་རང་བཞིན་དང་། །ཐུགས་རྗེ་གསུམ་ལྡན་རྒྱལ་བའི་སྙིང་པོ་ལ། །སྐུ་གསུམ་རང་ཆས་བཞུགས་པར་བཤད་པ་ཡིན། །ཅེས་དང་། རྡོ་རྗེ་ཕྲེང་བ་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །ཞེས་དང་། བརྟག་གཉིས་ལས། ལུས་ལ་ཡེ་ཤེས་ཆེན་པོ་གནས། །ཞེས་སོགས་དང་། ཀུན་མཁྱེན་ཀློང་ཆེན་པས། རྒྱལ་བའི་འཁོར་ལོ་བར་པར་རྣམ་ཐར་གསུམ། །བསྟན་བྱའི་ངོ་བོ་སོ་སོར་རང་རིག་ཉིད། །སེམས་ཅན་ཁམས་ལ་བདེ་གཤེགས་སྙིང་པོ་རུ། །རང་བཞིན་བཞུགས་ལ་རྫོགས་པ་ཆེན་པོར་གྲགས། །ཞེས་གསུངས་པ་ལྟར་ལ། ཡེ་ཤེས་དེ་ཉིད་ཀྱང་ངོ་བོ་རང་བཞིན་ཐུགས་རྗེ་སྟེ་གཞིར་གནས་ཀྱི་ཡེ་ཤེས་གསུམ་དང་། ཆོས་ཀྱི་དབྱིངས་ཀྱི་ཡེ་ཤེས་སོགས་མཚན་ཉིད་འཛིན་པའི་ཡེ་ཤེས་ལྔ་དང་། ཇི་ལྟ་ཇི་སྙེད་མཁྱེན་པ་ཞེས་ཡུལ་ལ་འཇུག་པའི་ཡེ་ཤེས་གཉིས་ཏེ། གཞི་འབྲས་ཀྱི་ཡེ་ཤེས་ཐམས་ཅད་གཞན་མ་ཡིན་པ་དང་། འཁོར་བའི་ཆོས་རྣམས་ཐམས་ཅད་ཀྱང་མེད་སྣང་གློ་བུར་བ་ཡིན་ལ། ཆོས་ཉིད་དེ་ལས་གཞན་བརྗོད་དུ་མེད་པས་ན་སྲིད་ཞི་ཀུན་ལ་ཁྱབ་པའི་ཕྱིར་ཡེ་ཤེས་སྤྱི་ཡི་གཟུགས་ཞེས་བརྗོད་ཅིང་། དེ་ལྟ་བུ་སྦྱང་གཞི་ཆོས་ཉིད་བདེ་གཤེགས་སྙིང་པོ་དེ་ཉིད། སྦྱང་བྱ་གློ་བུར་གྱི་དྲི་མ་འཁོར་བའི་ཆོས་སུ་སྣང་བ་ཐམས་ཅད། སྦྱོང་བྱེད་སྡོམ་པ་གསུམ་གྱི་ལམ་གྱི་སྙིང་པོ་རིག་པ་འཛིན་པ་སྔགས་ཀྱི་ལམ་ཟབ་མོས། མེད་སྣང་གློ་བུར་བའི་དྲི་མ་སྒྲིབ་གཉིས་བག་ཆགས་དང་བཅས་པ་ཡོངས་སུ་སྦྱངས་ཤིང་དག་སྟེ། སྦྱང་འབྲས་དོན་གཉིས་ལྷུན་གྱིས་གྲུབ་པ་སྐུ་ལྔ་ཡེ་ཤེས་ལྔའི་ངོ་བོར་འཚང་རྒྱ་བས་ན་ཀུན་ཏུ་བཟང་པོའམ་རྡོ་རྗེ་འཆང་ཆེན་པོ་ཞེས་སོགས་སུ་གྲགས་ཏེ་ཐེག་པ་ཐམས་ཅད་ཀྱི་འབྲས་བུའི་མཐར་ཐུག་པ་སངས་རྒྱས་ཉག་མ་གཅིག་པུ་དེ་ཡིན་ནོ། །དེ་ལ་སྐུ་ལྔ་ནི། དབྱིངས་སྤྲོས་བྲལ་གྱི་ཀློང་དུ་རིག་པའི་ཡེ་ཤེས་རང་གྲོལ་བ་ཟུང་འཇུག་ཆོས་ཀྱི་སྐུ། དེ་ལས་མ་གཡོས་བཞིན་དུ་ས་བཅུའི་སེམས་དཔའ་ལ་མཚན་དཔེའི་གཟུགས་བརྙན་རྣམ་པར་སྣང་བ་ལོངས་སྤྱོད་རྫོགས་པའི་སྐུ། སོ་སྐྱེས་རྣམས་ལ་མོས་པ་དང་མཐུན་པར་སངས་རྒྱས་ཀྱི་གཟུགས་བརྙན་ཅི་རིགས་སུ་སྣང་བ་སྤྲུལ་པའི་སྐུ་དང་། སྐུ་གསུམ་གྱི་སྣང་ཆ་མ་འདྲེས་པའི་ཆ་ནས་མངོན་པར་བྱང་ཆུབ་པའི་སྐུ། སྐུ་གསུམ་དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་སྐུ་ལྔའོ། །དེ་ལ་བརྟེན་པའི་ཡེ་ཤེས་ལྔ་ནི། ཆོས་ཐམས་ཅད་ཅི་ཡང་མི་དམིགས་པ་ཆོས་དབྱིངས་ཡེ་ཤེས། གསལ་ལ་རྟོག་པ་མེད་པ་མེ་ལོང་ཡེ་ཤེས། འཁོར་འདས་ཀྱི་མཐའ་ལ་མི་གནས་པ་མཉམ་ཉིད་ཡེ་ཤེས། ཆོས་ཐམས་ཅད་མ་འདྲེས་མངོན་སུམ་ས་ལེར་མཁྱེན་པ་སོར་རྟོག་ཡེ་ཤེས། འགྲོ་དོན་ཐོགས་པ་མེད་པའི་ཕྲིན་ལས་ལ་འཇུག་པ་བྱ་གྲུབ་ཡེ་ཤེས་སོ། །ཆོས་དབྱིངས་ཡེ་ཤེས་ཇི་ལྟ་བ་མཁྱེན་པའི་ཡེ་ཤེས་དང་། ཕྱི་མ་བཞི་ཇི་སྙེད་པ་གཟིགས་པའི་ཡེ་ཤེས་སུ་འདུ་བས་གཉིས་སོ། །དེ་ཐམས་ཅད་ཀྱང་སྤངས་པ་དང་། རྟོགས་པ་དང་། སེམས་ཏེ་ཆེན་པོ་གསུམ་གྱི་རང་བཞིན་ཅན་ཏེ། མངོན་རྟོགས་རྒྱན་ལས། སེམས་ཅན་ཀུན་མཆོག་ཉིད་སེམས་དང་། །སྤོངས་དང་རྟོགས་དང་གསུམ་པོ་ལ། །ཆེན་པོ་གསུམ་གྱི་རང་བྱུང་གི། །ཆེད་དུ་བྱ་བ་འདི་ཤེས་བྱ། །ཞེས་སོ། །དེས་ན་བླ་མེད་བྱང་ཆུབ་དོན་དུ་གཉེར་བ་རྣམས་ཀྱི་བསམ་པ་ཡོངས་སུ་རྫོགས་པའི་འབྲས་བུའི་མཐར་ཐུག་ཏུ་ངེས་པ་ནི་སངས་རྒྱས་ཉག་གཅིག་པུ་ཡིན་ལ། དེ་ནི་འཆད་པར་འགྱུར་བ་གསང་སྔགས་བླ་མེད་ཀྱི་ལམ་ཁོ་ནས་ཐོབ་དགོས་པ་ཡིན་ནོ། །གཉིས་པ་ཐོབ་བྱེད་ལམ་གྱི་དབྱེ་བ་སྤྱིར་བཤད་པ་ལ་གསུམ། བགྲོད་པ་གཅིག་པུའི་ལམ་མདོར་བསྟན་པ། ལམ་སྟེགས་ཀྱི་ཐེག་པའི་དབྱེ་བསྡུ་བྱེ་བྲག་ཏུ་བཤད་པ། སོ་བྱང་གཉིས་སྔགས་སྡོམ་གྱི་ཡན་ལག་ཏུ་འགྱུར་ཚུལ་བསྟན་པས་གནད་བསྡུ་བའོ། །དང་པོ་བགྲོད་པ་གཅིག་པུའི་ལམ་མདོར་བསྟན་པ་ནི། ཟབ་རྒྱས་ཆོས་ཀྱི་སྒོ་འཕར་བགྲང་ཡས་ཀྱང་། །གསང་ཆེན་སྨིན་གྲོལ་ལམ་མཆོག་མ་བསྟེན་པར། །ཐོབ་པ་མིན་ཞེས་རྫོགས་སངས་རྒྱས་དེས་གསུངས། །ཞེས་པ་སྟེ། ཟབ་པ་ཇི་ལྟ་བ་དོན་དམ་སྟོང་པ་ཉིད་སྟོན་པ་དང་། རྒྱས་པ་ཇི་སྙེད་པ་ཀུན་རྫོབ་ཀྱི་ཕྱོགས་རྣམས་སྟོན་པའི་ཆོས་ཀྱི་སྒོ་འཕར་བགྲང་མཐའ་ཡས་པ་ཞིག་གསུངས་ཡོད་ཀྱང་གསང་ཆེན་རྡོ་རྗེ་ཐེག་པའི་སྨིན་བྱེད་ཀྱི་དབང་དང་། གྲོལ་བྱེད་བསྐྱེད་རྫོགས་ཀྱི་ལམ་མཆོག་གཉིས་ལ་མ་བརྟེན་པར་ལམ་འོག་མ་རྣམས་ཀྱིས་ནམ་ཡང་ཐོབ་པ་མིན་ཏེ། ཅིའི་ཕྱིར་ན་འཁོར་བར་འཆིང་བྱེད་ཀྱི་བག་ཆགས་ཤིན་ཏུ་ཕྲ་བ་དཀར་དམར་རླུང་གསུམ་གྱིས་བསྐྱེད་པའི་སྣང་གསུམ་འཕོ་བའི་སྒྲིབ་པ་དེ་ཉིད་སྦྱོང་བྱེད་ཀྱི་ཐབས་དངོས་ནི་ལམ་དེ་དག་ཏུ་མ་བསྟན་པའི་ཕྱིར་ཏེ། ཀླུ་བྱང་གི་ལས་མཐའ་རྣམ་འབྱེད་ལས། མགོ་དང་རྐང་ལག་སོགས་བྱིན་ཀྱང་། །སྣང་བ་རྣམ་པར་མ་དག་ཕྱིར། །བྱང་ཆུབ་འབྲས་བུ་ཐོབ་མི་འགྱུར། །ཞེས་དང་། སྔགས་བླ་མེད་ལ་བརྟེན་ནས་འཐོབ་པའི་ཚུལ་ཡང་། རྩ་རྒྱུད་གསང་སྙིང་ལས། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །འཇིག་རྟེན་དྲུག་གི་ཕྱོགས་བཅུ་ན། །འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་པ། །བསྟེན་ནས་སྐུ་ལྔ་ལྷུན་གྱིས་རྫོགས། །ཞེས་ཤེས་བྱ་ཐམས་ཅད་ལ་ཆགས་ཐོགས་མེད་པའི་ཡེ་ཤེས་མངའ་ཞིང་བདེན་པ་ཉག་གཅིག་ཏུ་སྨྲ་བ་རྫོགས་པའི་སངས་རྒྱས་དེས་ལེགས་པར་ཡོངས་སུ་གསུངས་སོ། །གཉིས་པ་ལམ་སྟེགས་ཀྱི་ཐེག་པའི་དབྱེ་བསྡུ་བྱེ་བྲག་ཏུ་བཤད་པ་ལ་གཉིས། དབྱེ་གཞི་ཐེག་པའི་མཚན་ཉིད་སྤྱིར་བཤད། །དབྱེ་ཆོས་རྣམ་གྲོལ་གྱི་ལམ་ཐམས་ཅད་ཐེག་དགུར་འདུ་ཚུལ་བྱེ་བྲག་ཏུ་བཤད་པའོ། །དང་པོ་དབྱེ་གཞི་ཐེག་པའི་མཚན་ཉིད་སྤྱིར་བཤད་པ་ནི། ཇི་སྲིད་སེམས་ཀྱི་འཇུག་པ་མ་ཟད་བར། །བསམ་ཡས་ཐེག་པའི་བགྲང་མཐར་ཐུག་པ་མེད། །བགྲོད་གཅིག་ལམ་ལ་དཀྲི་བའི་ངལ་སྟེགས་ཏེ། །རང་རང་རྗེས་མཐུན་འབྲས་བུ་བླ་དང་བཅས། །ཐོབ་ཀྱང་ཐེག་པ་སོ་སོའི་ངེས་འབྱུང་ལས། །ཐེག་གཅིག་ལམ་ལ་མ་ཞུགས་འབྲས་ཐོབ་ཅི། །ཞེས་པ་སྟེ། ཇི་སྲིད་གདུལ་བྱའི་སེམས་དང་སེམས་བྱུང་ཕྲ་རགས་ཀྱི་རྒྱུན་གཅིག་ནས་གཅིག་ཏུ་འཇུག་པ་ཆོས་ཀྱི་དབྱིངས་སུ་མ་ཟད་ཀྱི་བར་དུ་དེ་འདུལ་བྱེད་ཀྱི་གཉེན་པོ་བསམ་གྱིས་མི་ཁྱབ་ཅིང་མཐའ་ཡས་པ་ཐེག་པའི་རྣམ་གྲངས་འདི་ཙམ་མོ་ཞེས་བརྗོད་པའི་མཐར་ཐུག་པ་མེད་ལ། གང་ཚེ་སེམས་ཀྱི་འཇུག་པ་ཟད་པའི་དུས་ན་འགྲོ་བའང་མེད་ལ། ཐེག་པའང་མེད་དེ། ལངྐར་གཤེགས་པ་ལས། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །སེམས་ནི་ནམ་ཞིག་གྱུར་པ་ན། །ཐེག་པ་མེད་ཅིང་འགྲོ་བའང་མེད། །ཅེས་སོ། །དེ་ལྟ་ན་ཐེག་པའི་རྣམ་གྲངས་འོག་མ་རྣམས་ནི་རེ་ཞིག་དེ་དང་དེའི་གདུལ་བྱ་རྣམས་དྲང་བའི་ཐབས་སུ་བསྟན་པ་ཡིན་ལ། མཐར་དེ་དག་ཐམས་ཅད་ཀྱང་སངས་རྒྱས་རྣམས་ཀྱི་བགྲོད་པ་གཅིག་པུའི་ལམ་གསང་སྔགས་རྡོ་རྗེ་ཐེག་པ་བླ་ན་མེད་པ་ལ་དཀྲི་བའི་ངལ་སྟེགས་ཙམ་ཡིན་ཏེ། ཅིའི་ཕྱིར་ན་ལམ་སྟེགས་ཀྱི་ཐེག་པ་དེ་རྣམས་ཀྱིས་རང་རང་གི་ལུགས་དང་རྗེས་སུ་མཐུན་པའི་འབྲས་བུ་རེ་ཐོབ་མོད་ཀྱི། ད་དུང་བླ་སྟེ་གོང་དུ་བགྲོད་བྱ་དང་བཅས་པའི་ཕྱིར། གསང་བ་སྙིང་པོ་ལས། ས་རྣམས་ཁྱད་པར་བཀོད་པ་ཡང་། །གསང་བ་སྙིང་པོར་འགྲོ་བའི་ལམ། །ཞེས་སོ། །དེས་ན་མཚན་ཉིད་སྡེ་གསུམ་དང་། ཕྱི་རྒྱུད་སྡེ་གསུམ་གྱི་ཐེག་པ་རྣམས་ཀྱིས་རང་རང་གི་ལམ་གྱི་མི་མཐུན་ཕྱོགས་འཁོར་དང་བཅས་པ་སྤངས་པའི་འབྲས་བུ་རེ་ཐོབ་ཀྱང་ཐེག་པ་སོ་སོའི་ངེས་པར་འབྱུང་བའི་མྱང་འདས་ཙམ་ལས། བླ་ན་མེད་པའི་ཐེག་པ་གཅིག་པུ་གསང་སྔགས་རྡོ་རྗེ་ཐེག་པའི་ལམ་ལ་མ་ཞུགས་པར་མཐར་ཐུག་གི་འབྲས་བུ་བྱང་ཆུབ་ཆེན་པོ་ཐོབ་པ་ཅི་ཞིག་ཡོད་དེ་མེད་དོ། །དེ་ལྟར་ཡང་མཚན་བརྗོད་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སོ། །གཉིས་པ་དབྱེ་ཆོས་རྣམ་གྲོལ་གྱི་ལམ་ཐམས་ཅད་ཐེག་དགུར་འདུ་ཚུལ་བྱེ་བྲག་ཏུ་བཤད་པ་ནི། འདིར་ནི་རྫོགས་པ་ཆེན་པོའི་རིང་ལུགས་ལྟར། །ཉན་ཐོས་རང་རྒྱལ་བྱང་ཆུབ་སེམས་དཔའ་ལ། །མཚན་ཉིད་རྒྱུ་ཡི་ཐེག་པ་གསུམ་ཞེས་གསུངས། །ཀྲི་ཡ་ཨུ་པ་ཡོ་ག་ཕྱི་རྒྱུད་གསུམ། །བླ་མེད་ཕ་རྒྱུད་མ་ཧཱ་ཡོ་ག་དང་། །མ་རྒྱུད་ཨ་ནུ་ཡོ་གར་གྲགས་པ་དང་། །གཉིས་མེད་རྒྱུད་སྡེ་ཨ་ཏི་ཡོ་ག་ལ། །ནང་རྒྱུད་གསུམ་ཞེས་ཐེག་པ་རིམ་དགུར་བསྡུ། །ཞེས་པ་སྟེ། བསྟན་བཅོས་འདིར་ནི་ཐུན་མོང་མ་ཡིན་པ་གསང་སྔགས་སྔ་འགྱུར་རྫོགས་པ་ཆེན་པོའི་རིང་ལུགས་ལྟར་ཐེག་པ་རིམ་དགུར་རྣམ་པར་བཞག་པ་ཡིན་ཏེ། སྤྱི་མདོ་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་སྣང་བ་སྟེ། །ཀུན་འབྱུང་འདྲེན་དང་དཀའ་ཐུབ་རིགས། །དབང་བསྒྱུར་ཐབས་ཀྱི་ཐེག་པའོ། །ཞེས་པ་ལྟར། དེའང་རང་གིས་ཡོངས་འཛིན་ལས་ཉན་ཅིང་ཐོས་པའི་དོན་གཞན་ལ་སྒྲོགས་པས་ན་ཉན་ཐོས་དང་། སྲིད་པ་ཐ་མ་པའི་ཆེད་གཞན་ལ་མ་བསྟེན་པར་རང་ཉིད་སྲིད་པ་ལས་རྒྱལ་བའི་འབྲས་བུ་མངོན་དུ་བྱེད་པས་ན་རང་རྒྱལ་དང་། རྫོགས་པའི་བྱང་ཆུབ་བསྒྲུབ་པའི་ཆེད་དུ་གཞན་དོན་སྤྱོད་པ་ལ་སེམས་མི་ཞུམ་པར་དཔའ་བས་ན་བྱང་ཆུབ་སེམས་དཔའ་སྟེ། དེ་དག་གི་ཉམས་སུ་བླང་བྱའི་ཐེག་པ་གསུམ་ལ་འབྲས་བུར་སྦྱོར་པའི་ལམ་མཚོན་པས་མཚན་ཉིད་དང་། རང་འབྲས་ཐོབ་པའི་དངོས་རྒྱུ་དང་། མཐར་འབྲས་བྱང་ཆུབ་ཆེན་པོ་ཐོབ་པའི་བརྒྱུད་རྒྱུ་ཙམ་ལས་འབྲས་བུ་ལམ་དུ་བྱེད་པ་མ་ཡིན་པས་ན་རྒྱུ་ཡི་ཐེག་པ་གསུམ་ཞེས་གསུངས་ལ། ཀྲི་ཡ་སྟེ་ཕྱིའི་བྱ་བ་གཙོ་བོར་སྟོན་པས་ན་བྱ་བའི་རྒྱུད་དང་། ཨུ་པ་སྟེ་ལྟ་སྤྱོད་ཆ་མཉམ་པར་སྤྱོད་པས་ན་སྤྱོད་པའི་རྒྱུད་དང་། ཡོ་ག་སྟེ་ནང་གི་སྒོམ་པ་གཙོ་བོར་སྟོན་པས་ན་རྣལ་འབྱོར་གྱི་རྒྱུད་དེ། དེ་གསུམ་པོ་མཚན་ཉིད་ཐེག་པ་དང་ཚུལ་འདྲ་ཞིང་དངོས་གྲུབ་གཞན་ནས་འཚོལ་བས་ཕྱི་རྒྱུད་གསུམ་ཞེས་གྲགས། ཕྱི་རྒྱུད་ལས་ཁྱད་པར་འཕགས་ཚུལ་དུ་མ་ཡོད་ཀྱང་མདོར་བསྡུ་ན་ལྟ་སྒོམ་སྤྱོད་གསུམ་ཐུན་མོང་མ་ཡིན་པའི་དབང་གིས་བླ་ན་མེད་པའི་རྒྱུད་སྡེ་སྟེ། དབྱེ་ན་ཐབས་བསྐྱེད་པའི་རིམ་པ་གཙོ་བོར་སྟོན་པ་ཕ་རྒྱུད་ལ་མ་ཧཱ་ཡོ་ག་སྟེ་རྣལ་འབྱོར་ཆེན་པོ་ཞེས་བཤད་པ་དང་། ཤེས་རབ་རྫོགས་པའི་རིམ་པ་གཙོ་བོར་སྟོན་པ་མ་རྒྱུད་ལ་ཨ་ནུ་ཡོ་ག་སྟེ་རྗེས་སུ་རྣལ་འབྱོར་ཞེས་བྱ་བར་གྲགས་པ་དང་། ཟུང་འཇུག་འོད་གསལ་གྱི་རིམ་པ་གཙོ་བོར་སྟོན་པ་གཉིས་སུ་མེད་པའི་རྒྱུད་སྡེ་ལ་ཨ་ཏི་ཡོ་ག་སྟེ་ཐིག་ལེའི་རྣལ་འབྱོར་ཞེས་གསུངས་ཏེ། དེ་གསུམ་ལ་འཁོར་འདས་དག་མཉམ་དུ་རྟོགས་ཤིང་དངོས་གྲུབ་གཞན་ནས་མི་འཚོལ་བས་ན་ནང་རྒྱུད་གསུམ་ཞེས་གྲགས། །དེས་ན་རྣམ་གྲོལ་གྱི་ལམ་ཐམས་ཅད་ཐེག་པ་རིམ་པ་དགུར་བསྡུ་བ་ཡིན་ནོ། །འདིའི་ཞར་ལ་ཐེག་པ་རིམ་དགུ་སོ་སོའི་རྣམ་གཞག་གོ་དོན་ཅུང་ཟད་ཙམ་སྤྲོས་ཏེ་འཆད་ན། སྤྱིར་རྒྱུའི་ཐེག་པ་དང་། འབྲས་བུའི་ཐེག་པ་གཉིས་ཀྱི། ཐོག་མར་མཚན་ཉིད་རྒྱུའི་ཐེག་པའམ་ཀུན་འབྱུང་འདྲེན་པའི་ཐེག་པ་ལ་གསུམ་ལས། དང་པོ་ཉན་ཐོས་ནི། ཐེག་པའི་འཇུག་སྒོ་སོ་ཐར་རིགས་བདུན་གང་རུང་གི་སྡོམ་པ་བླངས་ནས་མ་ཉམས་པར་བསྲུང་། ལྟ་བ་ནི། གང་ཟག་གི་བདག་རང་བཞིན་མེད་པར་རྟོགས་ཀྱང་ཆོས་བདག་གཟུང་བ་རྡུལ་ཕྲན་ཆ་མེད་དང་ཤེས་པ་སྐད་ཅིག་ཆ་མེད་དོན་དམ་བདེན་པར་ལྟ་བ་སྟེ། སངས་རྒྱས་གསང་བའི་ལམ་རིམ་ལས། གཉིས་མེད་མ་རྟོགས་ཐམས་ཅད་ལ། །བདེན་བཞི་དངོས་པོར་ཡོད་ལྟ་ཞིང་། །སྤངས་དང་མི་སྤངས་བྱེད་གྱུར་ན། །འདི་ནི་ཉན་ཐོས་པ་ཡིན་ནོ། །ཞེས་སོ། །དེ་ལའང་བྱེ་མདོ་གཉིས་ཏེ། སྐ་བ་དཔལ་བརྩེགས་ཀྱི་ལྟ་རིམ་ལས། ཆོས་ཙམ་ལྟ་བའི་ཉན་ཐོས་པ། །མདོ་སྡེ་པ་དང་བྱེ་བྲག་གཉིས། །ཕྱི་རོལ་རྡུལ་ལ་རྩོད་བྱེད་ཅིང་། །ཤེས་པ་སྐད་ཅིག་སྣང་བྱེད་མཐུན། །ཞེས་པས། བྱེ་བྲག་སྨྲ་བས་རགས་པ་ཀུན་རྫོབ་ཀྱི་བདེན་པ་འདི་ནེའུ་སིང་ལྟར་ཚོགས་པ་གཅིག་ཏུ་སྣང་ཡང་། དོན་དམ་པར་རྡུལ་ཕྲ་རབ་བར་དང་བཅས་པ་ཆ་ལྡན་སིལ་བུར་འདོད། མདོ་སྡེ་པས་རྡུལ་ཕྲ་རབ་འབྱར་ཡང་མ་འབྱར། བར་ཡང་མེད་པར་འབྲུའི་ཕུང་པོ་ལྟར་འདོད་པ་ཉིད་དོ། །སྒོམ་པ་ནི། འདོད་ཆགས་ཀྱི་གཉེན་པོར་མི་སྡུག་པ་སྒོམ་པ་སོགས་ཞི་གནས་ཀྱི་སེམས་ལས་རུང་དུ་བསྒྲུབས་ནས། ལྷག་མཐོང་བདེན་བཞི་མི་རྟག་བཅུ་དྲུག་སྒོམ་པ་སྟེ། དེ་ཡང་སྡུག་བསྔལ་གྱི་བདེན་པ་ནད་ལྟ་བུ། ཀུན་འབྱུང་ནད་དེའི་རྒྱུ་ལྟ་བུ། ལམ་བདེན་ནད་ཀྱི་གཉེན་པོ་སྨན་ལྟ་བུ། འགོག་བདེན་ནད་ལས་གྲོལ་བ་ལྟ་བུར་རྟོགས་པས། དེས་ན་སྡུག་བསྔལ་ཤེས་བྱ། ཀུན་འབྱུང་སྤང་བྱ། ལམ་རྒྱུད་ལ་བསྟེན་བྱ། འགོག་པ་མངོན་དུ་ཐོབ་བྱ་དང་། དེ་རེ་རེ་ལའང་བཞི་བཞིར་ཕྱེ་བས་བདེན་འབྱུང་བཅུ་དྲུག་རྣམས་སྒོམ། སྤྱོད་པ་ནི། རང་ཉིད་ཞི་བདེའི་བསམ་པས་སོ་སོར་ཐར་པ་རིགས་བདུན་གང་ལ་ཞུགས་པའི་བསླབ་བྱ་ལམ་དུ་ཁྱེར་ཞིང་། སྦྱངས་པའི་ཡོན་ཏན་ལ་གནས། ཉོན་མོངས་པ་དགྲ་དང་ཚེར་མ་ལྟར་སྤང་། དགེ་བཅུ་སྨན་དང་ཟས་ལྟར་ལེན་ཅིང་། འདུ་ཤེས་བཅུ་བསྟེན་པ་སྟེ། དེ་ཡང་སྲོག་གཅོད་པ་ལ་བཙན་དུག །ཟོས་པས་ཕུང་བ། ལྟ་བུའི་འདུ་ཤེས། གོས་ལ་རྨ་དཀྲིས་ལྟ་བུའི་ཆོས་གོས་གསུམ་དང་མི་འབྲལ་བ། འདུ་ཤེས། ཉོན་མོངས་པ་ལ་དུག་སྦྲུལ་རེག་པས་ཕུང་བ། ལྟ་བུའི་འདུ་ཤེས། ཁ་ཟས་ལ་བུ་ཤ་ཟ་བ་སྲེད་པ་མི་བྱ། ལྟ་བུའི་འདུ་ཤེས། རྙེད་པ་ཀུར་ལ་རྒྱ་དང་རྙི་འཆིང་བར་དོགས་ཏེ་བྱོལ། ལྟ་བུའི་འདུ་ཤེས། བླ་མ་དཀོན་མཆོག་ལ་ནོར་བུ་རིན་པོ་ཆེ་མཆོད་ཅིང་གུས་པས་བསྟེན། ལྟ་བུའི་འདུ་ཤེས། ཆོས་ལ་ལམ་བཟང་པོ་ལྟ་བུའི་འདུ་ཤེས། བདེ་བར་འགྲོ་བ། སངས་རྒྱས་ཀྱི་བསྟན་པ་ལ་གསེར་ལྟ་བུའི་འདུ་ཤེས། དཀོན་ཞིང་བཟང་ལ་རྙེད་པ་དོན་ལྡན། ཚུལ་ཁྲིམས་ལ་རྒྱན་ལྟ་བུའི་གཅེས་སྤྲས་ཀྱིས་བསྲུང་བར་བྱ། འདུ་ཤེས། ཆོས་ཉིད་མངོན་དུ་གྱུར་པ་ལ་མུན་ཁུང་དུ་སྒྲོན་མེ་ཏིང་ངེ་འཛིན་ལ་བརྩོན་པ་མི་འདོར། བཏེགས་པ་ལྟ་བུའི་འདུ་ཤེས་དང་མི་འབྲལ་བར་བྱེད་པའོ། །འབྲས་བུ་ནི། རྒྱུན་དུ་ཞུགས་པ། ལན་གཅིག་ཕྱིར་འོང་བ། ཕྱིར་མི་འོང་བ་སྟེ་གནས་སྐབས་ཀྱི་འབྲས་བུ་གསུམ་དང་། མཐར་ཐུག་གི་འབྲས་བུ་ལྷག་བཅས་ལྷག་མེད་ཀྱི་དགྲ་བཅོམ་པ་ཐོབ། འབྲས་བུ་བཞི་པོ་རེ་རེ་ལའང་བཞུགས་གནས་གཉིས་གཉིས་ཕྱེ་བས་བརྒྱད་དེ། དབྱེ་གཞི་ལ་ལྟོས་ནས་སྐྱེས་བུ་བཟུང་བཞི་དང་། དབྱེ་ཆོས་ལ་ལྟོས་ནས་གང་ཟག་ཡ་བརྒྱད་ཅེས་བྱའོ། །གཉིས་པ་རང་རྒྱལ་ནི། ཐེག་པའི་འཇུག་སྒོ་ཉན་ཐོས་དང་འདྲ་ལ། ལྟ་བ་ནི། མངོན་རྟོགས་རྒྱན་ལས། གཟུང་དོན་རྟོགས་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དུ་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་པ་ལྟར། གང་ཟག་གི་བདག་མེད་རྟོགས་པ་ཉན་ཐོས་དང་འདྲ་ལ། དེའི་སྟེང་དུ་ཆོས་ཀྱི་བདག་གི་གཟུང་ཆ་རྡུལ་ཕྲ་རབ་ཀྱང་རང་བཞིན་མེད་པར་རྟོགས་ཀྱང་། ད་དུང་འཛིན་སེམས་སྐད་ཅིག་མ་དོན་དམ་དུ་ལྟ་ཞིང་འཁོར་འདས་རྟེན་འབྲེལ་རྒྱུ་འབྲས་སུ་འདོད་པས་ན་བདག་མེད་ཕྱེད་དང་གཉིས་རྟོགས་པ་ཞེས་བྱ་སྟེ། སྐ་བ་དཔལ་བརྩེགས་ཀྱི་ལྟ་རིམ་ལས། དེ་བཞིན་རང་རྒྱལ་ཐེག་པ་ཡང་། །ཕྱི་རོལ་བཅུ་གཉིས་སྒྱུ་མ་ཙམ། །རྡུལ་ཀྱང་ཕྱོགས་ཆས་མ་གྲུབ་འཕགས། །ཤེས་པ་སྐད་ཅིག་རྗེས་སུ་མཐུན། །ཅེས་སོ། །སྒོམ་པ་ནི། དེ་ཡང་ཕྱི་ནང་གི་རྟེལ་འབྲེལ་གཉིས་ཏེ། ཕྱིའི་རྟེན་འབྲེལ་འབྲས་བུ་ལས་ཤེས་ཏེ། འབྲས་བུ་དེ་ཅི་ལས་བྱུང་བརྟགས་པས་མེ་ཏོག་ལས་བྱུང་། དེ་འདབ་མ་ལས། དེ་མྱུ་གུ་ལས། དེ་སྡོང་པོ་ལས། དེ་ས་བོན་ལས་བྱུང་སྟེ་རྒྱུ་དང་འབྲེལ་བ་དྲུག །རྐྱེན་དང་འབྲེལ་བ་དྲུག་ནི། ནམ་མཁས་གོ་འབྱེད། ས་ཡིས་རྟེན་བྱེད། ཆུ་ཡིས་བསྡུས། མེས་སྨིན། རླུང་གིས་བསྐྱོད། དུས་དབྱར་དགུན་སྟོན་དཔྱིད་བཞིས་བསྒྱུར་ནས་བྱུང་བར་ཤེས་ཏེ་ཕྱིའི་རྟེན་འབྲེལ་ལོ། །ནང་གི་རྟེན་འབྲེལ་དུར་ཁྲོད་དུ་ཕྱིན་ནས་ཀེང་རུས་ཀྱི་ཕུང་པོ་ལ་བརྟགས་པས་ཤི་བ་ལས་བྱུང་བར་ཤེས། དེ་ན་བ་ལས། དེ་རྒས་པ་ལས། དེ་སྐྱེ་བ་ལས། དེ་ལེན་པ་ལས། དེ་སྲེད་པ་ལས། དེ་ཚོར་བ་ལས། དེ་རེག་པ་ལས། དེ་སྐྱེ་མཆེད་དྲུག་ལས། དེ་མིང་གཟུགས་ལས། དེ་རྣམ་ཤེས་ལས། དེ་འདུ་བྱེད་ལས། དེ་མ་རིག་པ་ལས། དེ་གང་ལས་བྱུང་བརྟགས་པས་མ་རྙེད་དེ་སྟོང་པར་རྟོགས་པས་སྟོང་ཉིད་དུ་ཤེས། རྒྱུ་སྔ་མ་ལ་བརྟེན་ནས་ཕྱི་མ་འབྱུང་བ་ལ་མ་རིག་པ་ནས་རྒ་ཤིའི་བར་བརྟགས་པས་འགྲོ་བའི་རྒྱུར་ཤེས་སོ། །དེ་ལྟར་བདེན་བཞི་བཅུ་དྲུག་གི་སྟེང་དུ་རྟེན་འབྲེལ་ལུགས་འབྱུང་བཅུ་གཉིས་བཀག་ནས་ལུགས་ལྡོག་སྟོང་པ་བཅུ་གཉིས་ཁྲིགས་ཆགས་སུ་སྒྲོམ། སྤྱོད་པ་ནི། ཉན་ཐོས་དང་འདྲ། འབྲས་བུ་ནི། དབང་རྣོན་བསེ་རུ་ལྟ་བུ་གཅིག་པུར་བཞུགས་པ་ནི་ཉན་ཐོས་ཀྱི་སྡེ་སྣོད་ལ་དམིགས་ནས་བསྐལ་པ་བརྒྱར་ཚོགས་བསགས་ཏེ། མཐར་སངས་རྒྱས་མི་བཞུགས་པའི་ཞིང་དུ་སྟན་ཐོག་གཅིག་ཏུ་སྦྱོར་ལམ་དྲོད་ནས་མི་སློབ་ལམ་གྱི་བར་དུ་མངོན་དུ་བྱས་ཏེ་རང་རྒྱལ་དགྲ་བཅོམ་པ་ཐོབ་པ་སྟེ། དབྱིག་གཉེན་ཞབས་ཀྱི་མངོན་པ་མཛོད་ལས། སྟོན་དང་བསེ་རུ་བྱང་ཆུབ་པ། །བསམ་གཏན་མཐའ་རྟེན་གཅིག་ལ་ཀུན། །དེ་ཡི་སྔོན་དུ་ཐར་ཆ་མཐུན། །ཞེས་སོ། །དབང་རྟུལ་ནེ་ཙོ་ལྟ་བུ་ཁྱུར་བཞུགས་པ་ཚོགས་སྤྱོད་ཆེ་ཆུང་གཉིས་ནི་རིམ་པར་ལམ་བཞིའམ་གསུམ་མངོན་དུ་མཛད་དེ་འབྲས་བུ་མངོན་དུ་རྟོགས་པ་སྟེ། རྒྱས་པ་ལས། ཕྱི་ནང་རྟེན་འབྲེལ་སྒྱུ་མ་མིག་ཡོར་ཚུལ། །དངོས་པོའི་གཟུགས་ལ་ཐོགས་མེད་རབ་ཏུ་འཇུག །དགེ་བཤེས་མི་སློབ་རང་གི་རིག་པས་རྟོགས། བྱང་ཆུབ་སར་བགྲོད་ཡིད་བཞིན་བདེ་བ་མཆོག །ཅེས་སོ། །གསུམ་པ་བྱང་སེམས་ནི། ཐེག་པའི་འཇུག་སྒོ་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་མཆོག་ཏུ་སེམས་བསྐྱེད་པའི་སྡོམ་པ་བླང་། ལྟ་བ་ནི། སེམས་ཙམ་པས་གཟུང་བ་རང་བཞིན་མེད་པ་དང་། དེར་འཛིན་གྱི་ཤེས་པའང་སྟོང་པར་རྟོགས་ཀྱང་རང་གསལ་གྱི་ཤེས་པ་ངོ་བོས་མི་སྟོང་པར་འདོད་པས་རང་ལུགས་ལ་བདག་མེད་གཉིས་རྟོགས་པར་འདོད་ཀྱང་། དབུ་མ་པས་གཞལ་ན་ཆོས་ཀྱི་བདག་མེད་ཕྲ་བ་མ་རྟོགས་ལ། དབུ་མ་པས་ནི་ཀུན་རྫོབ་ཏུ་ཆོས་ཐམས་ཅད་ཆུ་ཟླ་ལྟར་སྣང་བ། དོན་དམ་པར་སྤྲོས་པ་ཐམས་ཅད་ཡོངས་སུ་ཞི་བའི་ཚུལ་དུ་བདག་གཉིས་ཀྱིས་སྟོང་པ་མཐའ་བྲལ་དབུ་མ་ཆེན་པོར་རྟོགས་པ་སྟེ། སངས་རྒྱས་གསང་བའི་ལམ་རིམ་ལས། མཉམ་པའི་དོན་ཉིད་མི་ཤེས་ཤིང་། །ཀུན་རྫོབ་དོན་དམ་གཉིས་འབྱེད་ལ། །ཆོས་དང་གང་ཟག་བདག་མེད་པ། །འདི་ནི་བྱང་ཆུབ་སེམས་དཔའ་ཡིན། །ཅེས་སོ། སྒོམ་པ་ནི། གཞན་དོན་ཁོ་ནར་ཡོངས་སུ་དམིགས་པའི་སྙིང་རྗེ་ཆེན་པོ་སྒོམ་པ་ཀུན་རྫོབ་བྱང་སེམས་དང་། དེ་དག་རྣམ་པ་མ་འགག་པར་ཅིང་ཡང་སྣང་ལ། དོན་ལ་གང་དུའང་མ་དམིགས་པས་སྤྲོས་པ་ཐམས་ཅད་དང་བྲལ་བའི་ངང་དུ་བཞག་པ་ནི་དོན་དམ་བྱང་ཆུབ་མཆོག་ཏུ་སེམས་བསྐྱེད་པ་སྟེ། སློབ་ལམ་བཞིར་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་སྒོམ། སྤྱོད་པ་ནི། བདག་བས་གཞན་གཅེས་ཀྱི་སྒོ་ནས་སེམས་ཅན་གྱི་དོན་བྱེད་པའི་སྤྱོད་པ་ཕ་རོལ་ཏུ་ཕྱིན་པ་དྲུག་དང་བསྡུ་བའི་དངོས་པོ་བཞི་ལ་སྤྱོད། འབྲས་བུ་ནི། བསྐལ་པ་གྲངས་མེད་གསུམ་དུ་ས་བཅུ་ལམ་ལྔ་རིམ་གྱིས་བགྲོད་ནས་མི་སློབ་པའི་ལམ་བཅུ་གཅིག་ཀུན་ཏུ་འོད་ཀྱི་ས་ལ་རང་དོན་ཆོས་ཀྱི་སྐུར་གྲོལ་ཏེ་གཞན་དོན་གཟུགས་སྐུ་གཉིས་ལ་བརྟེན་ནས་སེམས་ཅན་གྱི་དོན་འཁོར་བ་མ་སྟོངས་ཀྱི་བར་དུ་མཛད་པ་སྟེ། རྒྱས་པ་ལས། བདག་མེད་གཉིས་རྟོགས་ཕ་རོལ་ཕྱིན་རྫོགས་པའི། །ས་བཅུ་རིམ་གྱིས་བགྲོད་པའི་རྣལ་འབྱོར་པས། །སངས་རྒྱས་སར་བགྲོད་གོ་འཕང་ཐོབ་པའི་ལམ། །བདེན་པ་གཉིས་ཀྱིས་རབ་ཏུ་ཐོབ་པར་འགྱུར། །ཞེས་སོ། །ཐེག་པ་དེ་གསུམ་གྱིས་ཀུན་འབྱུང་ལས་དང་ཉོན་མོངས་པའི་ལམ་ལས་ཐར་པར་འདྲེན་པར་བྱེད་པས་ན་ཀུན་འབྱུང་འདྲེན་པའི་ཐེག་པ་དང་། སོ་སོའི་ལམ་དེས་མཐར་ཐུག་གི་འབྲས་བུ་དེ་མཚོན་པར་བྱེད་པས་ན་མཚན་ཉིད་དང་། དེ་ལ་སྦྱོར་བར་བྱེད་པའི་རྒྱུ་མཚན་ཙམ་ཡིན་པས་ན་རྒྱུའི་ཐེག་པ་ཞེས་ཀྱང་བྱའོ། །གཉིས་པ་འབྲས་བུ་སྔགས་ཀྱི་ཐེག་པ་ལ་ཕྱི་ནང་གཉིས་ཀྱི། ཐོག་མར་ཕྱི་རྒྱུད་དཀའ་ཐུབ་རིག་བྱེད་ཀྱི་ཐེག་པ་ལ་གསུམ་ལས། དང་པོ་ཀྲི་ཡ་སྟེ་བྱ་བའི་རྒྱུད་ནི། འཇུག་སྒོ་ཆུ་དང་ཅོད་པན་གྱི་དབང་མཐའ་རྟེན་དང་བཅས་པས་སྣོད་རུང་དུ་སྒྲུབ། ལྟ་བ་བདག་གི་དེ་ཁོ་ན་ཉིད་ཅེས་རང་གི་སེམས་ཉིད་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་སྤྲོས་པའི་མཐའ་ཐམས་ཅད་དང་བྲལ་བར་ལྟ། སྒོམ་པ་དེ་ཁོ་ན་ཉིད་བཞི་སྟེ། བྱ་རྒྱུད་ཙམ་པོ་བ་ལ་བདག་ཉིད་ལྷར་བསྐྱེད་པ་མེད་ཀྱང་། བྱ་རྒྱུད་ཁྱད་པར་ཅན་ལ་ལྷའི་དེ་ཁོ་ན་ཉིད་བདག་ཉིད་ལྷ་དྲུག་གི་སྒོ་ནས་བསྐྱེད་དེ། དེ་ཡང་། བདག་གི་དེ་ཁོ་ན་ཉིད་ལྟ་བའི་ངང་དུ་འཇོག་པ་སྟོང་པའི་ལྷ། དེ་ལས་ཀུན་རྫོབ་ཟླ་དཀྱིལ་གྱི་རྣམ་པར་སྒོམ་པ་ཡི་གེའི་ལྷ། ཟླ་བའི་སྟེང་དུ་བཟླ་བྱའི་སྔགས་རང་སྒྲ་བཅས་བཀོད་པ་སྒྲའི་ལྷ། དེ་ཡོངས་སུ་གྱུར་པ་ལས་རིགས་གསུམ་སོ་སོའི་ལྷ་བསྒོམ་པ་གཟུགས་ཀྱི་ལྷ། དེ་ལྷ་རང་རང་གི་རིགས་གང་ཡིན་པ་དེའི་དམ་རྒྱས་འདེབས་པ་ཕྱག་རྒྱའི་ལྷ། གནས་སྐབས་ཐམས་ཅད་དུ་ལྷའི་ཏིང་ངེ་འཛིན་གྱི་འདུ་ཤེས་དང་མི་འབྲལ་བ་མཚན་མའི་ལྷ་སྟེ་དྲུག་གི་སྒོ་ནས་བདག་དམ་ཚིག་པར་བསྐྱེད། དེའི་མདུན་དུ་ཡེ་ཤེས་པ་སྤྱན་དྲངས་ཏེ་རྗེ་ཁོལ་གྱི་ཚུལ་དུ་བལྟས་ནས་མཆོད་བསྟོད་སོགས་བྱ་བ་ནི་ལྷའི་དེ་ཁོ་ན་ཉིད་དེ། སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ནོ། །ཞེས་སོ། །གཞི་ལ་གཞོལ་བ་བདག་མདུན་ལྷར་བསྒོམ་པ་དང་། སེམས་ལ་གཞོལ་བ་ལྷའི་ཐུགས་ཀར་ཟླ་དཀྱིལ་བསམ་པ། སྒྲ་ལ་གཞོལ་བ་ཟླ་དཀྱིལ་གྱི་སྟེང་དུ་སྔགས་ཕྲེང་རང་སྒྲ་དང་བཅས་པ་གསལ་བཏབ་སྟེ། སྲོག་རྩོལ་བསྡམས་པའི་སྦྱོར་བས་ལྷ་སྔགས་ལ་དམིགས་པ་རྩེ་གཅིག་ཏུ་བསྒྲིལ་ཏེ་བཟླ་བ་ནི་བཟླས་བརྗོད་ཀྱི་དེ་ཁོ་ན་ཉིད་དེ། བསམ་གཏན་ཕྱི་མ་ལས། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ངལ་ན་བདག་ལ་ངས་གསོས་ཤིག །ཅེས་སོ། །ཡང་རང་ཉིད་ལྷར་གསལ་བའི་ཐུགས་ཀར་མེ་དཔུང་གི་དབུས་སུ་ཟླ་བ་སྔགས་ཕྲེང་བཅས་གསལ་བཏབ་པ་མེར་གནས་ཏེ་ཞི་སོགས་ལས་ཐམས་ཅད་སྒྲུབ་པའི་གཞི་དང་། དེ་ལས་སྔགས་ཀྱི་རང་སྒྲ་དྲིལ་བུའི་སྒྲ་ལྟར་གྲགས་པར་བསམ་པ་ནི་སྒྲར་གནས་ཏེ་ཞི་གནས་སྒྲུབ་པའི་རྟེན་གཞི་དང་། སྔགས་ཀྱི་སྒྲ་དེ་ལ་དཔྱད་ཅིང་གཞིག་ན་ཅིར་ཡང་མ་གྲུབ་པ་རྣམ་པར་མི་རྟོག་པའི་ཡེ་ཤེས་ཀྱི་ངང་ལ་མཉམ་པར་འཇོག་པ་སྒྲ་མཐའ་ཞེས་ལྷག་མཐོང་འཆར་བའི་ཉེར་ལེན་གྱི་རྒྱུར་གྱུར་པ་སྟེ་བསམ་གཏན་གྱི་དེ་ཁོ་ན་ཉིད་དེ། སྔ་མ་ལས། གསང་སྔགས་མེར་གནས་དངོས་གྲུབ་སྟེར། །སྒྲར་གནས་དངོས་གྲུབ་སྟེར་བར་དྲན། །སྒྲ་མཐས་ཐར་པ་སྟེར་བར་བྱེད། །ཅེས་སོ། །སྤྱོད་པ་ནི། ཁྲུས་དང་གཙང་སྦྲ་སོགས་ཕྱིའི་བྱ་བ་ལ་གཙོ་བོར་སྤྱོད། འབྲས་བུ་ནི། མི་ཚེ་བདུན་ན་རིགས་གསུམ་རྡོ་རྗེ་འཛིན་པའི་ས་ཐོབ་པའོ། །གཉིས་པ་ཨུ་པ་ཡ་སྟེ་སྤྱོད་རྒྱུད་ནི། འཇུག་སྒོ་ཆུ་དང་ཅོད་པན་གྱི་སྟེང་དུ་རྡོར་དྲིལ་མིང་དབང་བཅས་བསྐུར་བས་སྨིན་པར་བྱེད། ལྟ་བ་ནི། རང་ཤར་ལས། ཨུ་པ་ཡ་ནི་འདི་ལྟ་སྟེ། །ལྟ་བ་ཡོ་གར་ལྟ་བ་ལ། །སྤྱོད་པ་ཀྲི་ཡར་སྤྱད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་སོ། །སྒོམ་པ་ནི། རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་ཉིད། །ཤིན་ཏུ་དམ་པའི་ཡིད་ལས་ནི། །བཟླས་བརྗོད་འབུམ་ཕྲག་གཅིག་བྱའོ། །ཞེས་པ་ལྟར། བདག་གནས་རྣལ་འབྱོར་སྲུང་བ་རྣམས་སྔོན་དུ་འགྲོ་བས། ཡི་གེ་དང་པོ་དོན་དམ་བྱང་ཆུབ་སེམས་སྟོང་པ་ཉིད་དང་། དེའི་སྣང་ཆ་ཀུན་རྫོབ་བྱང་སེམས་ཟླ་དཀྱིལ་བསྒོམ་པ་དང་། ཡི་གེ་གཉིས་པ་དེའི་སྟེང་དུ་བཟླ་བྱའི་སྔགས་རང་སྒྲ་བཅས་བཀོད་པ་དང་། གཞི་དང་པོ་དེ་དག་ཡོངས་སུ་གྱུར་པ་ལས་བདག་ཉིད་ལྷར་བསྐྱེད་པ་ལ་སྔགས་རྒྱ་ལ་སོགས་པས་བྱིན་གྱིས་བརླབས་པ་དང་། གཞི་གཉིས་པ་མདུན་དུ་ཡེ་ཤེས་པ་བསྐྱེད་པ་སྤུན་ནམ་གྲོགས་པོའི་ཚུལ་དུ་བལྟས་ཏེ་ཐུགས་ཀར་ཟླ་དཀྱིལ་ལ་སྔགས་ཕྲེང་བཀོད་ནས་སྲོག་བསྡམས་ཏེ་རྩེ་གཅིག་པའི་སྦྱོར་བས་ཏིང་ངེ་འཛིན་བརྟན་པར་བྱེད་པ་རྣམས་མཚན་བཅས་ཀྱི་རྣལ་འབྱོར། འཇུག་པའི་སེམས་ཆོས་ཐམས་ཅད་རྣམ་པར་དཔྱད་པས་སྐྱེ་མེད་དུ་རྟོགས་པ་དང་། གནས་པའི་སེམས་རྣམ་པར་མི་རྟོག་པའི་ཡེ་ཤེས་མངོན་དུ་གྱུར་པ་དང་། ལྡང་བའི་སེམས་དེ་ལྟར་མ་རྟོགས་པ་རྣམས་ལ་སྙིང་རྗེ་ཆེན་པོས་ལྷག་པར་འཇུག་པའོ། །དེ་ལྟར་འཇུག་གནས་ལྡང་གསུམ་གྱིས་ཁྱད་པར་དུ་བྱས་པའི་དོན་དམ་བྱང་ཆུབ་ཀྱི་སེམས་བསྒོམ་པ་མཚན་མེད་ཀྱི་རྣལ་འབྱོར་ཏེ། དེས་ན་ཐུན་མོང་དང་ཐུན་མོང་མ་ཡིན་པའི་ལས་རབ་འབྱམས་སྒྲུབ་པར་བྱེད་པའོ། །སྤྱོད་པ་ནི། བྱ་རྒྱུད་ལྟར་གཙང་སྦྲ་སོགས་ཕྱིའི་ཀུན་སྤྱོད་གྲོགས་དང་ལྡན་པར་སྤྱོད། །འབྲས་བུ་ནི། མི་ཚེ་ལྔ་ནས་རིགས་བཞི་རྡོ་རྗེ་འཛིན་པའི་ས་ཐོབ་སྟེ། རིགས་བཞི་ནི་ལས་རིགས་རིན་ཆེན་རིགས་ལ་བསྡུས་པའོ། །གསུམ་པ་ཡོ་ག་སྟེ་རྣལ་འབྱོར་རྒྱུད་ནི། འཇུག་སྒོ་རིག་པའི་དབང་ལྔའི་སྟེང་དུ་རྡོ་རྗེ་སློབ་དཔོན་གྱི་དབང་དང་དྲུག་ཐོབ་པར་བྱས། ལྟ་བ་ནི། ཧེ་རུ་ཀ་གལྤོ་ལས། ཡོ་གའི་ཐེག་པར་གནས་འདོད་པས། །འོག་མིན་རྡོ་རྗེ་དབྱིངས་སུ་བལྟ། །ཞེས་གསུངས་པ་ལྟར། དོན་དམ་བདེན་པ་སྤྲོས་པའི་མཚན་མ་ཀུན་དང་བྲལ་བ་རང་བཞིན་འོད་གསལ་སྟོང་པ་ཉིད་དང་། ཀུན་རྫོབ་ཏུ་ཅིར་སྣང་ཐམས་ཅད་ཆོས་ཉིད་རྟོགས་པའི་བྱིན་རླབས་རྡོ་རྗེ་དབྱིངས་ཀྱི་དཀྱིལ་འཁོར་དུ་རང་སྣང་བར་བལྟ། སྒོམ་པ་ནི། དང་པོའི་སྦྱོར་བ་སྔོན་དུ་སོང་ནས། བདག་ཉིད་མངོན་བྱང་ལྔ་དང་ཆོ་འཕྲུལ་བཞིའི་སྒོ་ནས་བསྐྱེད་དེ། གལྤོ་ལས། མི་རྟོག་ཟླ་བ་གསུམ་རྡོ་རྗེ། །སྤྲོ་བསྡུས་བསྒོམ་པའི་སྐུ་རུ་གསལ། །ཏིང་འཛིན་བྱིན་རླབས་དབང་བསྐུར་མཆོད། །མངོན་བྱང་ལྔ་དང་ཆོ་འཕྲུལ་བཞི། །བསྒོམ་ཞིང་མཆོད་པ་བྱས་པ་ཡང་། །བསོད་ནམས་ལྡན་ཕྱིར་བྱ་བ་ཡིན། །ཞེས་པ་ལྟར། གཙོ་བོ་གཞི་སྟོང་ཉིད། གདན་ཟླ་བ། གསུང་ཡིག་འབྲུ། ཐུགས་ཕྱག་མཚན། སྐུ་ཡོངས་རྫོགས་ལ་མངོན་པར་བྱང་ཆུབ་པ་ལྔས་བསྐྱེད་ལ། དེ་ནས་འཁོར་གྱི་ལྷ་བཀོད་པ་ཏིང་ངེ་འཛིན་གྱི་ཆོ་འཕྲུལ། ཕྱག་རྒྱ་བཞིས་རྒྱས་གདབ་པ་བྱིན་གྱིས་བརླབས་པའི་ཆོ་འཕྲུལ། རིགས་གང་ཡིན་གྱིས་དབང་བསྐུར་བ་དབང་བསྐུར་བའི་ཆོ་འཕྲུལ། ཕྱག་མཆོད་བསྟོད་པ་བྱ་བ་མཆོད་པའི་ཆོ་འཕྲུལ་སྟེ་ཆོ་འཕྲུལ་བཞི་དང་། ཕྱག་རྒྱ་བཞི་ནི། ཐུགས་དམ་ཚིག་གི་ཕྱག་རྒྱ། གསུང་ཆོས་ཀྱི་ཕྱག་རྒྱ། སྐུ་ཕྱག་རྒྱ་ཆེན་པོ། ཕྲིན་ལས་ལས་ཀྱི་ཕྱག་རྒྱ་རྣམས་ཀྱིས་རྒྱས་བཏབ་ནས་ཡེ་ཤེས་པ་དགུག་བསྟིམ་བྱས་ཏེ་དམ་ཡེ་དབྱེར་མེད་ཀྱི་ངང་ནས་བཟླས་པ་ཚུལ་བཞིན་དུ་བྱས་མཐར་ཡེ་ཤེས་པ་གཤེགས་པ་ལ་སོགས་པའི་སྒོ་ནས་བསྒྲུབ་པ་མཚན་བཅས་ཀྱི་རྣལ་འབྱོར་དང་། དོན་དམ་པར་མཚན་མ་མེད་པའི་ངོ་བོ་ཉིད་དང་དེའི་བྱིན་རླབས་ལྷར་སྣང་ཡེ་ཤེས་ཀྱི་སྣང་ཆ་གཉིས་པོ་གཉིས་སུ་མེད་པའི་ངང་ལ་འཇོག་པ་མཚན་མེད་ཀྱི་རྣལ་འབྱོར་ཏེ། དེ་གཉིས་ཟུང་འཇུག་ཏུ་བསྒོམ། སྤྱོད་པ་ནི། ཁྲུས་དང་གཙང་སྦྲ་སོགས་ཕྱིའི་ཀུན་སྤྱོད་ཀྱང་གྲོགས་ཙམ་དུ་བསྟེན་ནས། གཙོ་བོར་ལྷའི་རྣལ་འབྱོར་ལ་གནས་པས་རང་གཞན་གྱི་དོན་སྤྱོད་པ་སྟེ། རྡོ་རྗེ་རྩེ་མོ་ལས། ལྷ་ཡི་ཏིང་འཛིན་ལ་གནས་ཏེ། །སེམས་ཅན་ཐམས་ཅད་ཡོངས་མི་བཏང་། །རྟག་ཏུ་སངས་རྒྱས་ཡིད་ལ་བྱེད། །རྟག་ཏུ་སངས་རྒྱས་མཆོད་པས་མཆོད། །ཅེས་སོ། །འབྲས་བུ་ནི། མི་ཚེ་གསུམ་ན་སྟུག་པོ་བཀོད་པའི་ས་ལ་སྐུ་གསུམ་ཡེ་ཤེས་ལྔའི་བདག་ཉིད་ཅན་དུ་འཚང་རྒྱ་བ་སྟེ། ཀུན་བྱེད་ལས། ཡོ་ག་སྟུག་པོ་བཀོད་འདོད་པས། །མི་ཚེ་གསུམ་ན་གྲོལ་བར་འདོད། །ཅེས་སོ། །དེ་གསུམ་གྱིས་ཕྱི་དཀའ་ཐུབ་ལ་བརྟེན་ནས་ནང་གི་དོན་རིག་པར་བྱེད་པའམ། ཡང་ན་དཀའ་ཐུབ་དང་གཙང་སྦྲ་སོགས་བྲམ་ཟེ་རིག་བྱེད་པ་ལྟར་བརྟེན་པས་ན་དཀའ་ཐུབ་རིག་བྱེད་ཀྱི་ཐེག་པ་དང་། བླང་དོར་དང་སྤངས་གཉེན་ཐམས་ཅད་ཕྱི་མཚན་ཉིད་རྒྱུའི་ཐེག་པ་དང་ཚུལ་འདྲ་བས་ན་ཕྱི་ཐུབ་པ་རྒྱུད་ཀྱི་ཐེག་པ་ཞེས་བྱའོ། །གསུམ་པ་དབང་བསྒྱུར་ཐབས་ཀྱི་ཐེག་པ་ལ་གསུམ་ལས། དང་པོ་བླ་མེད་ཕ་རྒྱུད་བསྐྱེད་པ་མ་ཧཱ་ཡོ་ག་ནི། འཇུག་སྒོ་ཕྱི་ཕན་པའི་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་སྟེ་དབང་ཆོག་བཅོ་བརྒྱད་ཀྱིས་རྒྱུད་སྨིན་པར་བྱས། ལྟ་བ་ནི། ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ལྷག་པའི་ཆོས་སྐུ་ཆེན་པོར་ལྟ་བ་དོན་དམ་དང་། དེ་ཉིད་ཀྱི་རྩལ་སྣང་རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་ཀུན་རྫོབ་སྟེ། དེ་གཉིས་ཀྱང་སྣང་སྟོང་ཕྱོགས་རེ་བ་མ་ཡིན་ཏེ་ངོ་བོ་དབྱེར་མི་ཕྱེད་པའི་ཕྱིར། ཐ་སྙད་དུ་དབྱེར་མེད་ཅེས་བརྗོད་ནའང་དེར་འཛིན་བསམ་བརྗོད་ཀྱི་ཡུལ་ལས་འདས་པའི་ཕྱིར་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་གཏན་ལ་ཕབ། སྒོམ་པ་ནི། ནང་གསེས་ཕ་མ་གཉིས་མེད་གསུམ་དུ་ཕྱེ་བས། གསང་འདུས་དང་གཤིན་རྗེ་སོགས་ཕ་རྒྱུད་རྣམས་སུ་ཐབས་བསྐྱེད་རིམ་གྱི་སྤྲོས་པ་དང་། རྫོགས་རིམ་གསང་དབང་གི་ཉམས་ལེན་རླུང་གཙོ་བོར་བྱེད་པས་གསལ་སྟོང་རྣམ་པར་མི་རྟོག་པའི་ཡེ་ཤེས། ཡང་དག་དང་འཁོར་ལོ་སྡོམ་པ་སོགས་མ་རྒྱུད་རྣམས་སུ་བསྐྱེད་རིམ་ཆ་ཙམ་དང་། རྫོགས་རིམ་ཤེར་དབང་གི་ཉམས་ལེན་ཁམས་བྱང་ཆུབ་སེམས་ཀྱི་ཐིག་ལེ་གཙོ་བོར་བྱེད་པས་བདེ་སྟོང་རྣམ་པར་མི་རྟོག་པའི་ཡེ་ཤེས། སྒྱུ་འཕྲུལ་དྲྭ་བ་སོགས་གཉིས་མེད་ཀྱི་རྒྱུད་རྣམས་སུ་བསྐྱེད་རྫོགས་ཟུང་འཇུག་དང་། རྫོགས་རིམ་དབང་བཞི་པའི་ཉམས་ལེན་བདེ་གསལ་རྣམ་པར་མི་རྟོག་པའི་ཡེ་ཤེས་ཆེན་པོ་འོད་གསལ་ལྷན་ཅིག་སྐྱེས་པ་དེ་ཉིད་ཉམས་སུ་ལེན་ཅིང་། སྤྱིར་བསྐྱེད་རིམ་རྣམས་སྒོང་སྐྱེས་དང་མངལ་སྐྱེས་སྦྱོང་བའི་རིམ་པ་གཙོ་ཆེ་བར་སྒོམ་ཞིང་། དེ་ཐམས་ཅད་ཏིང་ངེ་འཛིན་རྣམ་པ་གསུམ་གྱིས་ཁོག་དབུབ་སྟེ། ངོ་བོ་དག་རྫོགས་སྨིན་གསུམ་ཚང་བ་དང་། སྲོག་སྡོམ་གཟེར་བཞིས་རྒྱས་བཏབ་སྟེ་བསྒོམ། སྤྱོད་པ་ནི། ཐབས་ལ་མཁས་པས་ཟིན་པའི་འཁོར་བའི་ཆོས་ཅི་ལའང་མ་ཆགས་པར་ཤ་ལྔ་བདུད་རྩི་ལྔ་སོགས་བླང་དོར་མེད་པར་སྤྱོད་པ་སྟེ། བང་མཛོད་འཕྲུལ་ལྡེ་ལས། བསྐྱེད་པ་མ་ཧཱ་ཡོ་ག་ནི། །ཏ་ན་དང་ནི་ག་ན་དང་། །དམ་རྫས་བདུད་རྩི་ལྔ་པོ་ལ། །ཐབས་ཆེན་ལྟ་བའི་སྤྱོད་པ་སྤྱད། །ཅེས་སོ། །འབྲས་བུ་ནི། ཉེ་རྒྱུད་གསུམ་གྱིས་མཚམས་སྦྱར་ཏེ་རིག་འཛིན་རྣམ་པ་བཞིས་བསྡུས་པའི་ལམ་ལྔ་མཐར་ཕྱིན་ནས་ཚེ་འདིའམ་བར་དོར་སྐུ་ལྔ་ལྷུན་གྱིས་གྲུབ་པ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པ་སྟེ། གསང་འདུས་ལས། འདི་ནི་བཅོམ་ལྡན་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོས་རྣམ་པར་བརྒྱན། །ཚེ་འདི་ཉིད་ལ་ཐོབ་པར་འགྱུར། །ཞེས་དང་། ཡེ་ཤེས་ཐིག་ལེ་ལས། ཡང་ན་ལུས་འདི་སྤངས་མ་ཐག །བརྩོན་པ་མི་ལྡན་པས་ཀྱང་འགྲུབ། །ཅེས་སོ། །གཉིས་པ་མ་རྒྱུད་ལུང་ཨ་ནུ་ཡོ་ག་ལ། འཇུག་སྒོ་ནི། ཕྱི་དབང་རྒྱུད་ཀྱི་ཆུ་བོ་བཅུ། ནང་དབང་འབྱུང་བའི་ཆུ་བོ་བཅུ་གཅིག །སྒྲུབ་དབང་གྲགས་པའི་ཆུ་བོ་བཅུ་གསུམ། གསང་དབང་རྫོགས་པའི་ཆུ་བོ་གཉིས་ཏེ། དབང་ཆོག་སུམ་ཅུ་སོ་དྲུག་ལས་ཡན་ལག་གི་དབང་བརྒྱད་བརྒྱ་སོ་གཅིག་ཏུ་ཕྱེ་བས་སྨིན་པར་བྱས། ལྟ་བ་ནི། དབྱིངས་སྐྱེ་མེད་སྤྲོས་པ་དང་བྲལ་བ་ཡུམ་ཀུན་ཏུ་བཟང་མོའི་མཁའ་ཀློང་རྣམ་པར་དག་པའམ་ཡེ་ཇི་བཞིན་པའི་དཀྱིལ་འཁོར་ཞེས་བྱ། དེ་ཉིད་འགག་པ་མེད་པ་ཡུལ་ཅན་བདེ་བ་ཆེན་པོ་རང་བྱུང་རིག་པར་འོད་གསལ་བ་ནི་ཡེ་ཤེས་ཀུན་ཏུ་བཟང་པོའམ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཞེས་དང་། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཞེས་བྱ་སྟེ། གཡུ་ཐང་ལས། སྣང་སྲིད་བཟང་མོའི་མཁའ་ཀློང་ལས། །མ་བསྐྱེད་དཀྱིལ་འཁོར་ཀུན་ཏུ་ཤར། །ཤར་བ་ཉིད་ནས་ཤར་བ་མེད། །ཡབ་ཡུམ་སྲས་བཅས་བདེ་ཆེན་པོ། །ཞེས་སོ། །དེ་ལྟར་གཞི་ཆོས་ཐམས་ཅད་དཀྱིལ་འཁོར་རྣམ་པ་གསུམ་མ་འདྲེས་པར་རྟོག་དཔྱོད་ཀྱི་རྗེས་སུ་འཇུག་པས་གཏན་ལ་ཕབ། སྒོམ་པ་ནི། དོན་གྱི་རྗེས་སུ་འཇུག་པ་རྣམ་པར་མི་རྟོག་པའི་ཡེ་ཤེས་ཀྱི་ངང་ལ་འཇོག་པ་དང་། ཡི་གེའི་རྗེས་སུ་འཇུག་པ་བསྐྱེད་སྔགས་བརྗོད་པ་ཙམ་གྱིས་ཆུ་ལས་ཉ་ལྡང་བ་ལྟར་རྩལ་སྣང་སྣོད་བཅུད་ལྷའི་འཁོར་ལོར་གསལ་བ་གྲོལ་ལམ་དང་། སྟེང་སྒོ་འཁོར་ལོ་བཞིའམ་དྲུག་དང་། འོག་སྒོ་མཁའ་གསང་གི་སྙོམས་འཇུག་ལ་བརྟེན་ནས་ལྷན་སྐྱེས་ཀྱི་ཡེ་ཤེས་བསྐྱེད་པར་བྱེད་པ་ཐབས་ལམ་སྟེ། དེ་ལྟར་ཐབས་གྲོལ་གྱི་ལམ་གང་རུང་ལ་བརྟེན་ནས་རྟོགས་པའི་ཡོན་ཏན་རྩལ་དུ་འདོན། སྤྱོད་པ་ནི། སྣང་སེམས་ཐམས་ཅད་བདེ་བ་ཆེན་པོའི་ཡེ་ཤེས་ཀྱི་རོལ་པར་ཤེས་པའི་སྒོ་ནས་བླང་དོར་མེད་པར་སྤྱོད་པ་སྟེ། བང་མཛོད་འཕྲུལ་སྡེ་ལས། དབྱིངས་དང་ཡེ་ཤེས་ལོངས་སྤྱོད་རྫོགས། །ཞེས་སོ། །འབྲས་བུ་ནི། གནས་སྐབས་སུ་ཚོགས་ལམ་འདུན་པ་སེམས་དཔའི་རྣལ་འབྱོར། སྦྱོར་ལམ་རིགས་ཆེན་འབྱེད་པའི་རྣལ་འབྱོར། མཐོང་ལམ་དབུགས་ཆེན་འབྱིན་པའི་རྣལ་འབྱོར། སྒོམ་ལམ་ལུང་ཆེན་ཐོབ་པའི་རྣལ་འབྱོར་ཏེ། སློབ་ལམ་བཞི་མཐར་ཕྱིན་ནས། འབྲས་བུ་མི་སློབ་ལམ་རྩལ་ཆེན་རྫོགས་པའི་རྣལ་འབྱོར་ཚེ་འདི་ཉིད་ལ་མངོན་དུ་བྱས་ཏེ་འབྲས་ཆོས་ཉེར་ལྔ་དབྱེར་མེད་ལྷུན་གྱིས་གྲུབ་པའི་བདག་གཉིད་བདེ་བ་ཆེན་པོའི་སྐུ་མངོན་གྱུར་པ་སྟེ། འཕྲུལ་ལྡེ་ལས། ཨ་ནུ་ཡོ་གའི་ཐེག་པ་ནི། བར་མ་ཆོད་པ་ཚེ་གཅིག་གིས། །སངས་རྒྱས་ས་ལ་ངེས་པར་འགྲོ། །ཞེས་སོ། །གསུམ་པ་གཉིས་སུ་མེད་པའི་རྒྱུད་མན་ངག་ཨ་ཏི་ཡོ་ག་ལ། འཇུག་སྒོ་ནི། དབང་བཞི་པ་རྩལ་དུ་བཏོན་པ་སྤྲོས་བཅས། སྤྲོས་མེད། ཤིན་ཏུ་སྤྲོས་མེད། རབ་ཏུ་སྤྲོས་མེད་བཞིའི་དབང་ཐོབ་པར་བྱས། ལྟ་བ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་རིག་པའི་ངོ་བོར་སངས་རྒྱས་པའི་རང་བཞིན་མེད་པ། ཕྱལ་བ། ལྷུན་གྲུབ། གཅིག་པུ་བཞིར་ངེས་པས་གཏན་ལ་ཕབ། སྒོམ་པ་ནི། ལེ་ལོ་ཅན་འབད་མེད་དུ་གྲོལ་བ་ཚིག་གསུམ་གནད་ལ་བརྡེག་པའི་སྒོ་ནས་ཀ་དག་ཡེ་བབས་རང་གནས་སོར་བཞག་གི་ངང་སྐྱོང་བ་དང་། བརྩོན་འགྲུས་ཅན་འབད་བཅས་སུ་གྲོལ་བ་བཞུགས་སྟངས་གསུམ་དང་གཟིགས་སྟངས་གསུམ་གྱི་གནད་གཅུན་ཏེ་ལྷུན་གྲུབ་ཐོད་རྒལ་སྒྲོན་མ་དྲུག་གི་གསེང་ལམ་ལ་བརྟེན་ནས་དེ་བཞིན་གཤེགས་པའི་གསང་མཛོད་ཀྱི་སྒོ་ཕྱེས་ཏེ་དངོས་སུ་བལྟ། སྤྱོད་པ་ནི། ཅིར་སྣང་ཐམས་ཅད་ཆོས་ཉིད་ཀྱི་རོལ་པར་ཤར་བས་དགག་སྒྲུབ་འཛིན་ཞེན་བླང་དོར་ལས་འདས་པར་སྤྱོད་པ་སྟེ། ནམ་མཁའ་ཆེ་ལས། བྱ་བ་མེད་པས་ལས་རྣམས་ཟིན། །ཞེས་དང་། བང་མཛོད་འཕྲུལ་ལྡེ་ལས། ཨ་ཏི་ཡོ་གའི་སྤྱོད་པ་ནི། །ལྟ་སྒོམ་སྲོག་དང་ལྡན་པ་ཡིས། །ཤུགས་ལས་བྱུང་བའི་སྤྱོད་པ་ནི། །ཇི་ལྟར་སྨྱོན་པའི་སྤྱོད་པ་བཞིན། །གང་ལའང་ཐོགས་པ་མེད་པར་སྤྱོད། །ཅེས་སོ། །འབྲས་བུ་ནི། ཆོས་ཉིད་མངོན་སུམ། ཉམས་གོང་འཕེལ། རིག་པ་ཚད་ཕེབས། ཆོས་ཉིད་ཟད་པ་སྟེ་སྣང་བ་བཞི་པོ་མཐར་ཕྱིན་ཅིང་། གདིང་བཞི་ཚད་ལ་འཁྱོལ་ཏེ། ལྷུན་རྫོགས་ཀུན་ཏུ་བཟང་པོའི་སའམ་ཡེ་ཤེས་བླ་མའི་ས་ལ་ད་ལྟ་ཉིད་ནས་གནས་པ་མཐར་ཕྱིན་ཏེ་འཇའ་ལུས་འཕོ་ཆེན་རྡོ་རྗེའི་གར་གྱིས་སྲིད་ཁམས་སྟོངས་ཀྱི་བར་དུ་འགྲོ་བའི་དོན་འབད་མེད་དུ་ལྷུན་གྱིས་གྲུབ་པའོ། །དེ་གསུམ་གྱིས་ཉོན་མོངས་པ་ཐམས་ཅད་ཆེད་དུ་གཉེར་པོས་སྤངས་མི་དགོས་པར་ཆོས་ཐམས་ཅད་མཉམ་པ་ཆེན་པོར་རིག་པའི་ཡེ་ཤེས་ཀྱིས་དབང་བསྒྱུར་ཏེ་ལམ་དུ་བྱེད་པའི་ཐབས་དང་ལྡན་པས་ན་དབང་བསྒྱུར་ཐབས་ཀྱི་ཐེག་པ་དང་། ནང་སེམས་ཉིད་སྐུ་དང་ཡེ་ཤེས་ཀྱི་རོལ་པར་སྣང་བས་དངོས་གྲུབ་གཞན་ལས་མི་འཚོལ་བར་རང་བྱུང་གི་ཡེ་ཤེས་སུ་མཐོང་བས་ན་ནང་རྒྱུད་སྡེ་གསུམ་ཞེས་བྱའོ། །དེ་ལྟ་ན་རྣམ་གྲོལ་གྱི་ལམ་ཐམས་ཅད་ཐེག་པ་རིམ་པ་དགུ་པོ་དེར་འདུ་ལ། དེ་ཐམས་ཅད་ཀྱང་རང་བཞིན་རྫོགས་པ་ཆེན་པོའི་ཐེག་པ་འདིར་འདུས་ཤིང་རྫོགས་པ་ཡིན་ཏེ། ཀུན་བྱེད་རྒྱལ་པོའི་རྒྱུད་ལས། ཡོད་ནི་གཅིག་ལས་མེད་པ་ལ། །བསྟན་ནི་རྣམ་པ་གཉིས་སུ་བསྟན། །བྱུང་ནི་ཐེག་པ་དགུ་རུ་བྱུང་། །འདུས་ནི་རྫོགས་པ་ཆེན་པོར་འདུས། །ཞེས་སོ། །དེ་ལྟར་ཐེག་རིམ་དགུ་པོའི་མཚན་ཉིད་ངོས་འཛིན་བདེ་བའི་སླད་དུ་སོ་སོའི་རྣམ་བཞག་ཕྱོགས་མཚོན་མདོ་ཙམ་ཞར་ལ་བརྗོད་ཟིན་ནས། ད་ནི་རྩ་བའི་གཞུང་ལ་འཇུག་སྟེ། གོང་གི་ས་བཅད་གསུམ་པ་སོ་བྱང་གཉིས་སྔགས་སྡོམ་གྱི་ཡན་ལག་ཏུ་འགྱུར་ཚུལ་བསྟན་པ་ལ་གསུམ། རིགས་ཅན་གསུམ་ལ་སྔགས་ཀྱི་ལམ་ཞུགས་ཡོད་པར་སྒྲུབ་པ། སྔགས་ལམ་ལ་འཇུག་སྒོ་མང་ཡང་འདིར་སྤྲོ་བྱ་མིན་པར་བསྟན་པ། སྐབས་འདིར་གཏན་ལ་དབབ་བྱའི་དོན་ངོས་བཟུང་བའོ། །དང་པོ་རིགས་ཅན་གསུམ་ལ་སྔགས་ཀྱི་ལམ་ཞུགས་ཡོད་པར་སྒྲུབ་པ་ནི། ཉན་རང་བྱང་སེམས་རིགས་ཅན་སོ་སོ་ལ། །རྡོ་རྗེ་འཛིན་པའི་ལམ་ཞུགས་ཡོད་དོ་ཞེས། །འབུམ་ལྔའི་རྒྱུད་ཀྱི་ལུང་ལས་གསལ་བར་གྲུབ། །ཅེས་པ་སྟེ། སྤྱིར་གདུལ་བྱ་རྣམས་ཀྱི་ཁམས་སམ་རིགས་ཀྱི་དབྱེ་བ་དུ་མ་ཞིག་ཡོད་ནའང་། མདོར་དྲིལ་ན། དམན་པ་ཉན་ཐོས་དང་། འབྲིང་པོ་རང་རྒྱལ་དང་། མཆོག་བྱང་ཆུབ་སེམས་དཔའི་རིགས་ཅན་གསུམ་ཡིན་ཅིང་། དེ་དག་སོ་སོ་ལ་གསང་སྔགས་རྡོ་རྗེ་ཐེག་པ་རིག་པ་འཛིན་པའི་ལམ་དུ་ཞུགས་པ་ཡོད་དོ་ཞེས་འབུམ་ཕྲག་ལྔ་པ་དེ་ཁོ་ན་ཉིད་ཡེ་ཤེས་གྲུབ་པའི་རྒྱུད་ཀྱི་ལུང་ལས་གསལ་བར་གྲུབ་སྟེ། དེའང་འདི་སྐད་ཅེས། རྡོ་ཡི་རིགས་ཀྱི་བྱེ་བྲག་ཞིག །བཞུ་བས་ལྕགས་དང་ཟངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་བསྒྱུར་བར་བྱེད། །དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རྡོ་རྗེ་འཛིན་པ་ཞེས་བྱའོ། །ཞེས་གསུངས་པ་ལྟར། དཔེར་བསྟན་པའི་རྡོ་ཁམས་དམན་འབྲིང་རབ་གསུམ་པོ་དེ་གྲུབ་མཐས་བློ་མ་བསྒྱུར་བའི་རིགས་ཅན་གསུམ་གྱི་དཔེ་ཡིན་ལ། རྡོ་དེ་གསུམ་བཞུ་བ་ལས་བྱུང་བའི་ལྕགས་ཟངས་དངུལ་གསུམ་ནི་རིམ་བཞིན་ཉན་ཐོས་རང་རྒྱལ་བྱང་སེམས་ཀྱི་རིགས་ཅན་གསུམ་སོ་སོའི་ལམ་ལ་ཞུགས་བཞིན་པའི་དཔེ་དང་། དེ་གསུམ་ཀའང་གསེར་འགྱུར་གྱི་རྩིས་གསེར་དུ་བསྒྱུར་བ་ནི་ཉན་རང་བྱང་སེམས་ཀྱི་སྡོམ་ལྡན་སྔགས་བླ་མེད་ཀྱི་དཀྱིལ་འཁོར་དུ་ཞུགས་ན་ཐམས་ཅད་ཀྱང་རིག་པ་འཛིན་པར་འགྱུར་བ་ལ་ཁྱད་པར་མེད་པའི་དཔེའོ། །གཉིས་པ་སྔགས་ལམ་ལ་འཇུག་སྒོ་མང་ཡང་འདིར་སྤྲོ་བྱ་མིན་པར་བསྟན་པ་ནི། བསམ་པའི་དབྱེ་བས་སྔགས་ལ་འཇུག་པའི་ཚུལ། །ཆོས་སྒོ་མང་ཡང་དེ་དག་སྤྲོ་བྱ་མིན། །ཞེས་པ་སྟེ། གདུལ་བྱ་རྣམས་ཀྱི་ཁམས་དབང་བསམ་པའི་བྱེ་བྲག་གི་དབྱེ་བས་གསང་སྔགས་རྡོ་རྗེ་ཐེག་པའི་ལམ་ལ་འཇུག་པ་ན། གཞི་ནས་འཇུག་པ་རང་རང་གི་ལམ་ལ་མ་ཞུགས་པར་དབང་རྣོན་འགའ་ཞིག་དང་པོ་ཉིད་ནས་འཇུག་པ་དང་། ལམ་ནས་འཇུག་པ་ལྷ་མི་ཉན་རང་བྱང་སེམས་ཀྲི་ཡོག་སྡེ་གསུམ་སྟེ་ལམ་བཞི་པོ་ལ་སློབ་བཞིན་པས་འཇུག་པ་དང་། འབྲས་བུ་ནས་འཇུག་པ་ལམ་དེ་དག་གི་རང་འབྲས་མཐར་ཕྱིན་ནས་འཇུག་པ་སྟེ། དེ་ལ་སོགས་པ་འཇུག་པའི་ཚུལ་གྱི་བྱེ་བྲག་ཆོས་ཀྱི་སྒོ་འཕར་མང་པོ་ཞིག་སྣང་ན་ཡང་འདིར་དེ་དག་རེ་རེ་ནས་བརྗོད་པ་ལ་དགོས་པ་ཆུང་ཞིང་དོན་གྱི་སྙིང་པོ་ལ་སྒྲིབ་པའི་ཕྱིར་སྤྲོ་བར་བྱ་བ་མིན་པས་མི་འཆད་དོ། །གསུམ་པ་སྐབས་འདིར་གཏན་ལ་དབབ་བྱའི་དོན་ངོས་བཟུང་བ་ལ་གཉིས། དབང་པོ་རབ་འབྲིང་ཐ་གསུམ་གྱི་ཐོབ་ཚུལ་སྤྱིར་བཤད། དབང་འབྲིང་གི་ཐོབ་ཚུལ་བྱེ་བྲག་ཏུ་བཤད་པའོ། །དང་པོ་དབང་པོ་རབ་འབྲིང་ཐ་གསུམ་གྱི་ཐོབ་ཚུལ་སྤྱིར་བཤད་པ་ལའང་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། འདིར་ནི་དབང་པོ་རབ་འབྲིང་ཐ་གསུམ་ལས། ཞེས་པ་སྟེ། སྐབས་འདིར་ནི་གདུལ་བྱ་ལ་དབང་པོ་རབ་དང་། འབྲིང་དང་། ཐ་མ་དང་གསུམ་དུ་ཡོད་པ་ལས་ཞེས་སོ། །གཉིས་པ་རྒྱས་པར་བཤད་པ་ལ་གསུམ། དབང་རབ་སྡོམ་གསུམ་གཅིག་ཅར་དུ་ཐོབ་ཚུལ། དབང་འབྲིང་སྡོམ་གསུམ་སོ་སོར་ནོད་ཚུལ། དབང་རྟུལ་སྡོམ་གསུམ་རིམ་འཇུག་གིས་དཀྲི་ཚུལ་ལོ། །དང་པོ་དབང་རབ་སྡོམ་གསུམ་གཅིག་ཅར་དུ་ཐོབ་ཚུལ་ནི། རབ་མཆོག་སྦྱངས་པ་མཐར་སོན་སྐལ་ལྡན་དེ། །དབང་བསྐུར་ཐོབ་པས་སྡོམ་གསུམ་གཅིག་ཅར་སྐྱེ། །རྟོགས་གྲོལ་དུས་མཉམ་ཨིནྡྲ་བྷུ་ཏི་བཞིན། །ཞེས་པ་སྟེ། དབང་པོ་ཡང་རབ་མཆོག་ཏུ་གྱུར་པ་སྔོན་གྱི་དུས་སུ་ཚོགས་གཉིས་ཀྱི་སྦྱངས་པ་མཐར་སོན་པ་ནི་ལས་འཕྲོ་སྐལ་པ་མཆོག་དང་ལྡན་པའི་ཕྱིར། དེ་འདྲ་བ་ལ་ཚེ་འདིར་ལམ་ཐུན་མོང་པས་རྒྱུད་སྦྱང་བ་ལ་མ་ལྟོས་པར་དབང་བསྐུར་ཐོབ་པ་ཙམ་གྱིས་སོ་བྱང་སྔགས་ཀྱི་སྡོམ་པ་གསུམ་པོ་གཅིག་ཅར་དུ་སྐྱེ་བ་ཡིན་ཏེ། དཔེར་ན་དབང་དོན་གྱི་ཡེ་ཤེས་རྟོགས་པ་དང་རྒྱུད་གྲོལ་བ་དུས་མཉམ་པ་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏི་ལྟ་བུ་སྟེ། སྔོན་རྒྱལ་པོ་དེས་སྟོན་པ་ཐུབ་པའི་དབང་པོ་ལ་འདོད་ཡོན་མ་སྤངས་པར་སངས་རྒྱས་ཐོབ་པའི་ཐབས་ཞུས་པ་ན། སྟོན་པས་ལས་ཅན་དུ་གཟིགས་ནས་དེ་མ་ཐག་དཀྱིལ་འཁོར་ཆེན་པོ་མངོན་དུ་སྣང་བར་མཛད་དེ་དབང་བསྐུར་བས་དུས་དེ་ཉིད་དུ་ཟུག་འཇུག་གི་སྐུ་བརྙེས་པ་བཞིན་ནོ། །དེའང་སྔགས་ཀྱི་སྡོམ་པ་གང་ཞིག་གཞན་གནོད་གཞིར་བཅས་སྤོང་བ་སོ་ཐར། གཞན་ཕན་གཞིར་བཅས་སྒྲུབ་པ་བྱང་སེམས། དེ་ཉིད་དག་མཉམ་ཆེན་པོའི་ཐབས་ཀྱིས་ཟིན་པ་སྔགས་ཀྱི་སྡོམ་པའི་ངོ་བོ་ཡིན་ནོ། །གཉིས་པ་དབང་འབྲིང་སྡོམ་གསུམ་སོ་སོར་ནོད་ཚུལ་ནི། འབྲིང་ནི་སྡོམ་གསུམ་སོ་སོའི་ཆོ་ག་ལ། །བརྟེན་ནས་རིམ་ཐོབ་ནཱ་གརྫུ་ན་ལྟར། །ཞེས་པ་སྟེ། གང་ཟག་དབང་པོ་འབྲིང་ནི་འདུལ་བའི་ལས་ཆོག་ལ་བརྟེན་ནས་སོ་ཐར་རིགས་བདུན་གང་རུང་གི་སྡོམ་པ་ནོད་ཅིང་། དེ་ནས་སྲོལ་གཉིས་གང་རུང་གི་ཆོ་གས་བྱང་ཆུབ་སེམས་དཔའི་སྡོམ་པ་དང་། དེའི་སྟེང་དུ་གསང་སྔགས་ཕྱི་ནང་གི་ཆོ་གས་སྔགས་ཀྱི་སྡོམ་པ་སྟེ། དེ་ལྟར་སྡོམ་པ་གསུམ་པོ་སོ་སོོའི་གཞུང་གི་ཆོ་ག་ལ་བརྟེན་ནས་རིམ་པ་བཞིན་ཐོབ་པར་བྱས་པ་སློ་དཔོན་ཆེན་པོ་ནཱ་ག་རྫུ་ནའམ་མགོན་པོ་ཀླུ་སྒྲུབ་ཀྱི་རྣམ་པར་ཐར་པ་ལྟར་རོ། །གསུམ་པ་དབང་རྟུལ་སྡོམ་གསུམ་རིམ་འཇུག་གིས་དཀྲི་ཚུལ་ནི། ཐ་མ་སྐལ་དམན་ཤིན་ཏུ་གདུལ་དཀའ་དེ། །གསོ་སྦྱོང་བསླབ་པའི་གནས་བཅུ་གྲུབ་མཐའ་བཞི། །བྱ་སྤྱོད་རྣལ་འབྱོར་རྒྱུད་ཀུན་རིམ་ཤེས་ནས། །བླ་མེད་འཇུག་པ་བརྟག་པ་གཉིས་པར་གསུངས། །ཞེས་པ་སྟེ། དབང་པོ་ཐ་མ་སྔོན་དང་ད་ལྟར་ཚོགས་གཉིས་བསགས་པའི་སྐལ་བ་དམན་པ་ཤིན་ཏུ་གདུལ་བར་དཀའ་བ་དེ་རྣམས་རིམ་གྱིས་ལམ་ལ་དཀྲི་དགོས་པས། དང་པོ་འཁོར་བའི་ཉེས་དམིགས་དང་ཐར་པའི་ཕན་ཡོན་བཤད་པས་བློ་བཅོས་ནས། ཐོག་མར་གསོ་སྦྱོང་ཡན་ལག་བརྒྱད་པའི་དུས་ཁྲིམས་ནོད་ཅིང་། དེའི་རྗེས་སུ་དགེ་བསྙེན་གྱི་སྡོམ་པ་དང་། དགེ་ཚུལ་གྱི་བསླབ་པའི་གནས་བཅུ་ནས་དགེ་སློང་གི་སྡོམ་པའི་བར་རིམ་པར་སྦྱིན་ལ། གྲུབ་མཐའ་བཞིའི་དང་པོ་བྱེ་མ དོ་གཉིས་ཀྱི་བདག་མེད་གཏན་ལ་དབབ་ཚུལ་ལ་གོམས་སུ་བཅུག །དེ་རྗེས་བྱང་སེམས་ཀྱི་སྡོམ་པ་བྱིན་ནས་དབུ་སེམས་གཉིས་ཀྱི་ལྟ་བ་ལ་སེམས་སྦྱོང་། མཐར་རང་རང་གི་དབང་བསྐུར་སྔོན་དུ་འགྲོ་བས་གཙང་སྦྲའི་སྤྱོད་ལམ་དང་བཟླས་བརྗོད་སོགས་ལུས་ངག་གི་བྱ་བ་གཙོ་བོར་སྟོན་པ་བྱ་བའི་རྒྱུད་དང་། ལུས་ངག་གི་བྱ་བ་དང་སེམས་ཀྱི་ཏིང་ངེ་འཛིན་ཆ་མཉམ་དུ་སྟོན་པ་སྤྱོད་པའི་རྒྱུད་དང་། སེམས་ཀྱི་ཏིང་ངེ་འཛིན་གཙོ་བོར་སྟོན་པ་རྣལ་འབྱོར་གྱི་རྒྱུད་ཀུན་གྱི་ལྟ་སྒོམ་སྤྱོད་གསུམ་གྱིས་བསྡུས་པའི་ཉམས་ལེན་རྣམས་རིམ་པར་ཤེས་ཤིང་ཉམས་འོག་ཏུ་ཆུབ་པར་བྱས་ནས། ཐབས་ཤེས་གཉིས་སུ་མེད་པའི་རྣལ་འབྱོར་བདེ་བ་ཆེན་པོས་ཁྱད་པར་དུ་བྱས་པའི་ཐབས་སྟོན་པ་ནང་རྒྱུད་བླ་མེད་ཀྱི་དབང་གིས་སྨིན་པར་བྱས་ནས་བསྐྱེད་རྫོགས་ཟུང་འཇུག་གསུམ་གྱི་རྒྱུད་སྡེ་ལ་རིམ་གྱིས་འཇུག་པར་བྱ་བའི་ཚུལ་ཀྱེ་རྡོ་རྗེ་བརྟག་པ་གཉིས་པའི་ཕྱི་མ་འདུལ་བའི་ལེའུ་ལས་གསལ་བར་གསུངས་ཏེ། དེ་ལས། དང་པོ་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པའང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །དེ་རྗེས་ཀྱེ་ཡི་རྡོ་རྗེ་བསྟན། །སློ་མས་གུས་པས་བླངས་ནས་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་སོ། །དེ་དང་མཐུན་པར་ཕུར་པ་ཞེ་སྡང་ཁྲོས་པའི་རྒྱུད་ལས་ཀྱང་། སོ་སོར་ཐར་པ་དང་པོར་སྦྱིན། །དེ་ལ་ཉན་ཐོས་ཆོས་རྣམས་བསྟན། །དེ་ནས་བྱང་ཆུབ་སྡོམ་ཆེན་སྦྱིན། །དེ་ལ་དབུ་མའི་ཆོས་རྣམས་བཤད། །མཐར་ནི་འབྲས་བུ་ཐེག་ཆེན་གྱི། །དབང་སྦྱིན་འབྲས་བུའི་རྒྱུད་འདི་བཤད། །ཅེས་སོ། །དེ་དག་སྤྱིར་བསྟན་པ་ཙམ་ཡིན་གྱི། གོང་གི་སྡོམ་གསུམ་རིམ་ཐོབ་ཡིན་ན་དབང་འབྲིང་དང་། རིམ་འཇུག་ཡིན་ན་དབང་པོ་ཐ་མ་ཁོ་ན་ཡིན་པས་ཁྱབ་པ་མིན་པའང་ཤེས་པར་བྱའོ། །གཉིས་པ་འདིར་བསྟན་དབང་པོ་འབྲིང་གི་ཐོབ་ཚུལ་བྱེ་བྲག་ཏུ་བཤད་པ་ལ་ལྔ། རྟེན་མཆོག་དམན་དམིགས་བསལ་དང་བཅས་པ། སྡོམ་པ་གསུམ་སོ་སོའི་རྣམ་བཞག །སྡོམ་པ་འོག་མ་གཉིས་གོང་མའི་ཡན་ལག་ཏུ་འགྲོ་ཚུལ། སྡོམ་གསུམ་སོ་སོའི་དོན་ཤེས་སླ་བའི་ཕྱིར་སྡོམ་བསྟན་པ། ལེའུའི་སྐབས་བསྡུ་བའོ། །དང་པོ་རྟེན་མཆོག་དམན་དམིགས་བསལ་དང་བཅས་པ་བཤད་པ་ནི། འདིར་ནི་དབང་པོ་འབྲིང་གི་ཚུལ་འཆད་དེ། །དགེ་སློང་དགེ་ཚུལ་དགེ་བསྙེན་སྡོམ་ལྡན་དེ། །རྡོ་རྗེ་འཛིན་པའི་རབ་འབྲིང་ཐ་ཡིན་ཞེས། །ཕུར་བའི་རྒྱུད་དང་དུས་འཁོར་ལས་གསུངས་ཤིང་། །འོན་ཀྱང་ཡེ་ཤེས་ལྡན་པ་གཙོ་བོར་གཟུང་། །ཞེས་པ་སྟེ། སྐབས་འདིར་ནི་དབང་པོ་འབྲིང་གི་ཚུལ་ཉིད་འཆད་པར་བྱ་བ་ཡིན་ཏེ། དེའང་སྤྱིར་བཏང་དུ་སྔགས་ལམ་ལ་འཇུག་པའི་རྟེན་དགེ་སློང་དང་དགེ་ཚུལ་དང་དགེ་བསྙེན་གྱི་སྡོམ་པ་དང་ལྡན་པ་དེ་གསུམ་རིམ་པ་ལྟར་སྔགས་ཀྱི་རྡོ་རྗེ་འཛིན་པའི་རབ་དང་འབྲིང་དང་ཐ་མ་ཡིན་ནོ་ཞེས་ཕུར་པའི་རྒྱུད་དང་དུས་འཁོར་གྱི་རྩ་རྒྱུད་ལས་མཐུན་པར་འདི་སྐད་དུ། གསུམ་ལས་དགེ་སློང་མཆོག་ཡིན་འབྲིང་། །དགེ་ཚུལ་ཞེས་བྱ་དེ་དག་ལས། །ཁྱིམ་ན་གནས་པ་ཐ་མའོ། །ཞེས་གསུངས་ཤིང་། འོན་ཀྱང་མཐའ་གཅིག་ཏུ་མ་ངེས་ཏེ། རྟེན་ཁྱིམ་པ་ཡིན་ཀྱང་མཐོང་ལམ་རྣམ་པར་མི་རྟོག་པའི་ཡེ་ཤེས་རྟོགས་པ་མཆོག་དང་ལྡན་པ་ནི་དོན་དམ་པའི་དགེ་སློང་ཡིན་པས་ན་དེ་ཉིད་གཙོ་བོར་བཟུང་དགོས་པ་དམིགས་བསལ་ཏེ། དུས་འཁོར་ལས། ས་ཐོབ་མ་གཏོགས་ཁྱིམ་པ་ནི། །རྒྱལ་པོའི་བླ་མར་མི་བྱའོ། །ཞེས་དང་། འདུལ་བ་ལུང་ལས། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤངས་པ་སྟེ། །དགེ་སློང་དགེ་སྦྱོང་དེ་ཡིན། །ཞེས་གསུངས་པའི་ཕྱིར་རོ། །གཉིས་པ་སྡོམ་པ་གསུམ་སོ་སོའི་རྣམ་བཞག་བསྟན་པ་ནི། སྔ་འགྱུར་རྒྱུད་སྡེའི་རྩ་བ་ཀུན་འདུས་ལས། །རང་དང་གཞན་དོན་ཕན་པ་ཆེ་བཤད་པ། །སོ་ཐར་སེམས་བསྐྱེད་དབང་བསྐུར་ཉིད་ཡིན་ཏེ། །སོ་སོར་འཛིན་ན་ཉན་ཐོས་བྱང་སེམས་དང་། །རིག་པ་འཛིན་པ་ཞེས་སུ་མཁས་ལ་གྲགས། །ཞེས་པ་སྟེ། སྤྱིར་སྡོམ་པ་གསུམ་གྱི་ཐ་སྙད་དུ་གྲགས་པ་ལ། སོ་ཐར་གྱི་སྐབས་བསླབ་ཚིགས་གསུམ་དང་། བྱང་སེམས་ཀྱི་སྐབས་སྡོམ་སྡུད་དོན་བྱེད་གསུམ་དང་། སྔགས་ཀྱི་སྐབས་སྐུ་གསུང་ཐུགས་ཀྱི་དམ་ཚིག་ལ་སྡོམ་པ་གསུམ་དུ་བཞག་པ་སོགས་མང་དུ་སྣང་མོད། འོན་ཀྱང་སྐབས་འདིར་བསྟན་བྱ་ངོས་བཟུང་བའི་ཚུལ་ནི་སྔ་འགྱུར་གྱི་རྒྱུད་སྡེའི་རྩ་བ་ཀུན་འདུས་རིག་པའི་མདོ་ལས་འདི་སྐད་ཅེས། དེ་ལྟར་སྡོམ་པ་གསུམ་པོ་ཡང་། །རང་དང་གཞན་དོན་ཕན་པ་ཆེ། །ཞེས་གསུངས་པ་ལྟར། རང་དོན་ཞི་བདེ་ཙམ་དང་། གཞན་དོན་དུ་རྫོགས་བྱང་ཐོབ་འདོད་དང་། ཐབས་ཤེས་ཁྱད་པར་ཅན་གྱིས་ཟིན་པས་རང་གཞན་ལ་ཕན་པ་རླབས་པོ་ཆེ་གྲུབ་པར་བཤད་པ་ནི་རིམ་པ་བཞིན་སོ་ཐར་གྱི་སྡོམ་པ་དང་། སེམས་བསྐྱེད་ཀྱི་སྡོམ་པ་དང་། དབང་བསྐུར་བ་ལས་ཐོབ་པའི་སྔགས་ཀྱི་སྡོམ་པ་དང་གསུམ་པོ་འདི་ཉིད་ཡིན་ཏེ། དེ་དག་ཀྱང་སོ་སོར་འཛིན་ན་སྔ་མ་ལ་སོ་ཐར་ཉན་ཐོས་དང་། བར་པ་ལ་སེམས་བསྐྱེད་བྱང་སེེམས་དང་། ཕྱི་མ་ལ་རིག་པ་འཛིན་པ་ཞེས་སུ་མཁས་པ་རྣམས་ལ་གྲགས་པ་ཡིན་ནོ། །གསུམ་པ་སྡོམ་པ་འོག་མ་གཉིས་གོང་མའི་ཡན་ལག་ཏུ་འགྲོ་ཚུལ་ནི། དེ་ལྟར་ཐུན་མོང་སྡོམ་པ་འོག་མ་གཉིས། །འདིར་ནི་བླ་མེད་དབང་གི་ཡན་ལག་ཏུ། །རྒྱུད་སྡེ་རྒྱ་མཚོར་བཤད་ལྟར་འདིར་འཆད་དོ། །ཞེས་པ་སྟེ། བཤད་མ་ཐག་པ་དེ་ལྟར་ཐུན་མོང་གི་སྡོམ་པ་འོག་མ་སོ་ཐར་དང་བྱང་སེམས་གཉིས་པོ་སྐབས་འདིར་ནི་སྔགས་བླ་མེད་རྡོ་རྗེ་ཐེག་པའི་དབང་གི་ཡན་ལག་ཏུ་འགྲོ་བའི་ཚུལ་ཡང་འདི་ལྟ་སྟེ། སོ་བྱང་གི་སྡོམ་ལྡན་དེས་སྔགས་སྡོམ་ཐོབ་པ་ན་སོ་ཐར་སྔགས་ཀྱི་ཉེས་སྤྱོད་སྡོམ་པ་དང་། བྱང་སྡོམ་རྣམ་སྣང་གི་དམ་ཚིག་ཏུ་འགྱུར་བ་གང་ཞིག་སྔགས་བླ་མེད་ཀྱི་སྤྱི་དང་ཁྱད་པར་ལྷག་པའི་དམ་ཚིག་ལས་སྤྱིའི་དམ་ཚིག་ཏུ་སོ་བྱང་དང་སྔགས་ཕྱི་རྒྱུད་ཀྱི་དམ་ཚིག་ཐམས་ཅད་ཚང་བའི་ཕྱིར་དང་། དེར་མ་ཟད་སྡོམ་པ་འོག་མ་གཉིས་སྔོན་དུ་མ་སོང་བའི་རྡོ་རྗེ་འཛིན་པའི་རྒྱུད་ལའང་དབང་བསྐུར་བ་ཁོ་ནས་ཐོབ་པའི་སོ་བྱང་གི་སྡོམ་པ་ཡོད་པར་འགྱུར་ཏེ། ཇི་སྐད་དུ། སོ་སོར་ཐར་དང་བྱང་ཆུབ་སེམས། །རིག་འཛིན་ནང་གི་སྡོམ་པའི་ཚོགས། །མ་ལུས་བདག་གིས་ཡོངས་སུ་བཟུང་། །ཞེས་པ་ལ་སོགས་པས་དབང་གི་སྔོན་འགྲོའི་དུས་སུ་ཁས་བླངས་པའི་ཕྱིར་དང་། མཉམ་པ་ཆེན་པོའི་དམ་ཚིག་དང་ལྡན་པའི་རིག་པ་འཛིན་པའི་རྒྱུད་ལ་འོག་མའི་འདུལ་སྡོམ་ཐམས་ཅད་ངང་གིས་འདུ་བའང་ཡིན་ཏེ། རྩ་རྒྱུད་གསང་བ་སྙིང་པོ་ལས། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་དང་། རྔམ་གློག་ལས། དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་དང་། འཁོར་ལོ་སྡོམ་པའི་རྒྱུད་ལས། །སོ་སོར་ཐར་དང་བྱང་ཆུབ་སེམས། །རིག་འཛིན་ཉིད་ཀྱི་དགེ་སློང་ངོ་། །ཞེས་པ་ལ་སོགས་པའི་རྒྱུད་སྡེ་རྒྱ་མཚོ་ནས་ཇི་སྐད་བཤད་པ་ལྟར་བསྟན་བཅོས་འདིར་ཡང་དེ་བཞིན་འཆད་པར་འདོད་དོ། །བཞི་པ་སྡོམ་གསུམ་སོ་སོའི་དོན་ཤེས་སླ་བའི་ཕྱིར་ལེའུ་འོག་མ་གསུམ་གྱི་སྡོམ་བསྟན་པ་ནི། སྡོམ་གསུམ་སོ་སོར་ཁོག་དབུབ་གླེང་གཞི་དང་། །དང་པོ་སྡོམ་པ་མ་ཐོབ་ཐོབ་པའི་ཚུལ། །བར་དུ་ཐོབ་པ་མི་ཉམས་བསྲུང་བའི་ཐབས། །ཐ་མར་ཉམས་ན་གསོ་ཚུལ་བཞི་རེས་སྡོམ། །ཞེས་པ་སྟེ། དེ་ལྟར་སྡོོམ་གསུམ་སྤྱིའི་ལུས་རྣམ་པར་གཞག་པ་མདོར་བསྟན་ནས། དངོས་དོན་ལེའུ་ཕྱི་མ་གསུམ་གྱིས་རྒྱས་པར་འཆད་པ་ལ་སྡོམ་པ་གསུམ་སོ་སོར་གང་ལས་བྱུང་བའི་ཚུལ་དང་འབྲེལ་བར་ངོ་བོ་དང་དབྱེ་བའི་སྒོ་ནས་ཁོག་དབུབ་པའི་གླེང་གཞི་དང། དང་པོ་སྡོམ་པ་མ་ཐོབ་པ་ཆོ་ག་ལ་སོགས་པའི་སྒོ་ནས་ཐོབ་པའི་ཚུལ་དང་། བར་དུ་ཐོབ་པའི་སྡོམ་པ་སོ་སོའི་བསྲུང་བྱའི་རྣམ་གྲངས་བཤད་པས་མི་ཉམས་པར་བསྲུང་བའི་ཐབས་དང་། ཐ་མར་ལྟུང་བ་བྱུང་བ་སྒོ་བཞིའི་དབང་གིས་ཉམས་པར་འགྱུར་ན་སླར་གསོ་བའི་ཚུལ་ཏེ་རྣམ་གྲངས་བཞི་རེས་སྡོམ་དུ་བསྡུས་ནས་འཆད་པར་བྱ་བ་ཡིན་ནོ། །ལྔ་པ་ལེའུའི་སྐབས་བསྡུ་བ་ནི། སྡོམ་གསུམ་སྤྱིའི་བཤད་གཞིའི་རིམ་པར་ཕྱེ་བ་སྟེ་དང་པའོ། །ཞེས་པ་སྟེ། སྡོམ་པ་གསུམ་གྱི་རྣམ་གཞག་སྤྱིའི་བཤད་གཞིའི་རིམ་པ་ལེགས་པར་ཕྱེ་བ་སྟེ་ལེའུ་དང་པོའི་རྣམ་པར་བཤད་པའོ།། །། ༈ ད་ནི་སྤྱིའི་ས་བཅད་གཉིས་པ་སྡོམ་གསུམ་སོ་སོའི་རང་བཞིན་དང་བསླབ་བྱ་ཞིབ་ཏུ་སྟོན་པའི་སྒོ་ནས་རྒྱས་པར་བཤད་པ་ལ་གསུམ་སྟེ། སོ་ཐར། བྱང་སེམས། གསང་སྔགས་སོ། །དང་པོ་འདུལ་བ་སོ་ཐར་གྱི་ཆོས་ཚུལ་སྟོན་པ་ལེའུ་གཉིས་པའི་གཞུང་འདི་ལ་གསུམ། སྟོན་པས་དམ་པའི་ཆོས་འདུལ་བ་ཇི་ལྟར་གསུངས་པ། དེ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་བ། དེ་ལྟར་བཟུང་བའི་བརྗོད་བྱ་གཏན་ལ་དབབ་པའོ། །སྐབས་འདིར་སྤྱིའི་གོ་དོན་དུ་འོ་སྐོལ་ནང་པ་སངས་རྒྱས་པའི་བསྟན་པའི་འབྱུང་ཁུང་སྟོན་པ་སངས་རྒྱས་ཀྱི་མཚན་ཉིད་དང་བྱོན་ཚུལ་ཉིད་ཤེས་པ་གལ་ཆེ་བས་ན་དམིགས་ཀྱིས་མདོ་ཙམ་བརྗོད་པར་བྱ་སྟེ། དེ་ཡང་རང་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་འདི་ཉིད་ངེས་དོན་ཡིན་ལུགས་ཀྱི་དབང་དུ་བྱས་ན། ཐོག་མ་མེད་པའི་དུས་ནས་མངོན་པར་སངས་རྒྱས་ཏེ་ཆོས་ཉིད་འོད་གསལ་གྱི་ཞིང་ཁམས་སུ་སྐུ་དང་ཡེ་ཤེས་འདུ་འབྲལ་མེད་པའི་ངང་ལ་དུས་གསུམ་གྱི་སངས་རྒྱས་ཐམས་ཅད་དང་དགོངས་པ་རོ་གཅིག་ཏུ་བཞུགས་པ་ལས་མ་གཡོས་བཞིན་དུ་སེམས་ཅན་རྣམས་ཀྱི་དོན་དུ་དེ་བཞིན་གཤེགས་པའི་རྣམ་པར་རོལ་པ་བསམ་གྱིས་མི་ཁྱབ་པར་སྣང་བས་གདུལ་བྱ་རྣམས་སོ་སོའི་སྐལ་བ་དང་འཚམས་པར་འདུལ་བར་མཛད་པ་སྟེ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྩ་བའི་རྒྱུད་ལས། ཐུགས་རྗེ་ཆེན་པོས་འབྲེལ་བ་ན། །འགྲོ་དྲུག་དུས་གནས་མ་ལུས་སྣང་། །ཞེས་དང་། དམ་ཆོས་པད་དཀར་ལས། བསྐལ་པ་བྱེ་སྟོང་བསམ་གྱིས་མི་ཁྱབ་པར། །དེ་ཡི་ཚད་ནི་ནམ་ཡང་མེད་པས་ན། །བྱང་ཆུབ་མཆོག་རབ་འདི་ནི་ངས་ཐོབ་ཀྱི། །ངས་ནི་རྟག་ཏུ་ཆོས་ཀྱང་རབ་འཆད་དོ། །ཞེས་གསུངས་ཤིང་། ཡབ་སྲས་རྒྱལ་བའི་མདོ་ལས་ཀྱང་། །དཔའ་བོ་ཆེན་པོ་ཐབས་མཁས་དེ། །སེམས་ཅན་ཡོངས་སུ་སྨིན་མཛད་ཕྱིར། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོར་སྟོན་པར་མཛད། །ཅེས་གསུངས་པ་ལྟར་ཡིན་ལ། ཐ་སྙད་རྣམ་འཇོག་གི་དབང་དུ་བྱས་ཏེ་ཐེག་པ་ཐུན་མོང་པ་ལྟར་ན། སྤྱིར་དུས་གསུམ་གྱི་སངས་རྒྱས་དཔག་ཏུ་མེད་པ་མཁའ་ཁྱབ་ཏུ་བཞུགས་པ་ལས། བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་འདི་ཉིད། དང་པོར་བྱང་ཆུབ་མཆོག་ཏུ་ཐུགས་བསྐྱེད། །བར་དུ་བསྐལ་པ་གྲངས་མེད་གསུམ་དུ་ཚོགས་བསགས། མཐར་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་མ་ལུས་པ་བསྐོར་བར་མཛད་པ་ཡིན་ཏེ། ཡོན་ཏན་ཡོངས་སུ་བཀོད་པའི་མདོ་ལས། དེས་བླ་ན་མེད་པའི་བྱང་ཆུབ་ཏུ་སེམས་དང་པོ་བསྐྱེད་པ་ནས་བཟུང་སྟེ། བསྐལ་པ་ཆེན་པོ་གྲངས་མེད་པ་གསུམ་དུ་བརྩོན་པ་ཆེན་པོས་ཚོགས་བསགས་ཤིང་། ཚེ་ལོ་བརྒྱ་པའི་ཚེ་སེམས་ཅན་ལོང་བ་འདྲེན་པ་རྣམས་ལ་གཟིགས་ཏེ། འཛམ་བུའི་གླིང་འདི་ཉིད་དུ་སངས་རྒྱས་ཏེ་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་ཡོངས་སུ་བསྐོར་ཏེ། ཞེས་གསུངས་པ་ལྟར། སྟོན་པ་འདི་སྔོན་རྫ་མཁན་གྱི་ཁྱེའུ་སྣང་བྱེད་དུ་གྱུར་པའི་ཚེ། དེ་བཞིན་གཤེགས་པ་ཤཱཀྱ་ཐུབ་པ་ཆེན་པོའི་དྲུང་དུ་ཐུགས་བསྐྱེད་པར་བཤད་པ་དང་། མདོ་བསྐལ་པ་བཟང་པོ་ལས་ཀྱང་། ང་ནི་སྔོན་ཚེ་དམན་པར་གྱུར་པ་ན། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམ་གང་ཞིག་ནི་རབ་ཏུ་ཕུལ་ནས་ཀྱང་། །དང་པོར་བྱང་ཆུབ་མཆོག་ཏུ་ཐུགས་བསྐྱེད་དོ། །ཞེས་གསུངས། དེ་ནས་ཚོགས་བསགས་ཚུལ་ལ་ཐེག་པ་ཆུང་ངུའི་ལུགས་ལྟར་ན། རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང་། །དང་པོ་ཤཱཀྱ་ཐུབ་པ་ཡིན། །ཀུན་ལ་ཐམས་ཅད་སྙིང་རྗེ་ཡིས། །སྦྱིན་པར་བྱས་པས་སྦྱིན་པ་རྫོགས། །ཆགས་བཅས་ཡན་ལག་བཅད་ཀྱང་ནི། །མི་འཁྲུགས་བཟོད་དང་ཚུལ་ཁྲིམས་ཀྱི། །སྐར་རྒྱལ་བསྟོད་པས་བརྩོན་འགྲུས་ཀྱི། །དེ་མ་ཐག་ཏུ་ཏིང་འཛིན་བློ། །ཞེས་གསུངས་ཏེ། བསྐལ་པ་གྲངས་མེད་གསུམ་ལ་རིམ་པར་སངས་རྒྱས་བདུན་ཁྲི་ལྔ་སྟོང་དང་། བདུན་ཁྲི་དྲུག་སྟོང་དང་། བདུན་ཁྲི་བདུན་སྟོང་གི་བར་མཉེས་པར་མཛད་ཅེས་འབྱུང་། ཐེག་ཆེན་ལྟར་ན། ལམ་ལྔ་དང་ས་བཅུ་ཡོངས་སུ་རྫོགས་པར་འགྲོ་དགོས་པ་ཡིན་པས། འཕགས་པའི་ས་བརྙེས་ནས་སྐད་ཅིག་རེ་རེར་ཡང་ཕྱོགས་བཅུ་རབ་འབྱམས་མུ་མེད་པའི་སངས་རྒྱས་གྲངས་མེད་ཚད་མེད་པ་དག་ཡོངས་སུ་མཉེས་པ་དང་། བསོད་ནམས་དང་ཡེ་ཤེས་ཀྱི་ཚོགས་མཐའ་ཡས་པ་བསགས་ཤིང་རྫོགས་པ་དང་། སེམས་ཅན་གྲངས་མེད་པ་ཡོངས་སུ་སྨིན་པ་དང་། ཞིང་ཁམས་ཚད་མེད་པ་ཡོངས་སུ་སྦྱངས་ཤིང་། ས་བཅུ་རིམ་གྱིས་བགྲོད་པའི་མཐར་འོག་མིན་གྱི་ཞིང་ཁམས་སུ་རྒྱུན་མཐའི་ཡེ་ཤེས་ཀྱིས་ཡང་དག་པའི་མཐའ་མངོན་དུ་མཛད་དེ་སངས་རྒྱས་ཀྱི་གོ་འཕང་བརྙེས་ཤིང་། དེ་ལས་མ་གཡོས་བཞིན་དུ་གཙང་མའི་སྟེང་དབང་ཕྱུག་ཆེན་པོའི་འོག་མིན་དང་། གཟུགས་ཀྱི་ཁམས་ཀྱི་འོག་མིན་དང་། དགའ་ལྡན་དང་། འཛམ་བུ་གླིང་རྣམས་སུ་སྤྲུལ་པའི་སྐུ་སྟོན་པར་མཛད་པ་ཡིན་ཏེ། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོལ་བ་༡དང་། །ལྷུམས་སུ་༢འཇུག་དང་བལྟམས་༣པ་དང་། །བཟོ་ཡི་གནས་ལ་མཁས་པ་༤པ་དང་། །བཙུན་མོའི་འཁོར་དགྱེས་རོལ་པ་༥དང་། །ངེས་འབྱུང་༦དཀའ་བ་སྤྱད་པ་༧ དང་། །བྱང་ཆུབ་༨སྙིང་པོར་གཤེགས་པ་དང་། །བདུད་༩སྡེ་བཅོམ་དང་རྫོགས་པར་༡༠ནི། །བྱང་ཆུབ་ཆོས་ཀྱི་༡༡འཁོར་ལོ་དང་། །མྱ་ངན་༡༢འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ལྟར་མཛད་པ་བཅུ་གཉིས་ཀྱི་སྒོ་ནས་དོན་མཛད་པ་སྟེ། གོང་དུ་སྨོས་པ་ལྟར་ཐུགས་བསྐྱེད་པ་ནས་བརྩམས་ཏེ་ཚོགས་ལམ་གྱི་རྟེན་ལ་ཚོགས་གཉིས་ཡོངས་སུ་རྫོགས་པར་མཛད་ནས། སྐྱེ་རྒུ་རྣམས་ཚེ་ལོ་ཉི་ཁྲི་བའི་དུས་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ་བྲམ་ཟེའི་ཁྱེའུ་བླ་མར་གྱུར། དེའི་སྐུ་སྐྱེ་བ་ཕྱི་མ་ལ་དགའ་ལྡན་གྱི་གནས་སུ་ལྷའི་བུ་དམ་པ་ཏོག་དཀར་པོར་སྐྱེ་བ་བཟུང་སྟེ་ལྷ་རྣམས་ཆོས་ཀྱི་སྨིན་པར་མཛད། ཛ་མྦུའི་གླིང་གི་མི་རྣམས་ཚེ་ལོ་བརྒྱ་པའི་དུས་སུ་འདུལ་བའི་སྐབས་སུ་བབས་པར་མཁྱེན་ཏེ། རིགས་དང་། གླིང་དང་། ཡབ་དང་། ཡུམ་དང་། དུས་ཏེ་གཟིགས་པ་རྣམ་པ་ལྔས་གཟིགས་ནས་ལྷ་རྣམས་ལ་འཆི་འཕོ་རྣམ་པར་སྦྱོང་བའི་ཆོས་ཀྱི་རྣམ་གྲངས་གསུངས་མཐར་གླང་པོ་ཆེ་ཐལ་དཀར་མཆེ་བ་དྲུག་ལྡན་གྱི་ཚུལ་དུ་དགའ་ལྡན་གྱི་གནས་ནས་འཕོ་བར་༡མཛད། དེར་ས་མོ་ལུག་གི་ལོའི་ཆུ་སྟོད་ཟླ་བའི་ཉ་ལ་ཤཱཀྱའི་རྒྱལ་པོ་ཟས་གཙང་མའི་བཙུན་མོ་སྒྱུ་འཕྲུལ་མ་གསོ་སྦྱོང་ལ་གནས་པའི་གློ་གཡས་ནས་ཞུགས་ཏེ་ལྷུམས་གཞལ་ཡས་ཁང་དུ་བྱིན་གྱིས་བརླབས་པ་ལ་བཞུགས་ནས་ལྷ་མིའི་འཁོར་ཁྲི་ཕྲག་བྱེ་བ་མང་པོ་ལ་སྐྱེ་གནས་རྣམ་པར་སྦྱོང་བའི་ཆོས་༢བསྟན། དེར་ས་བཅུའི་ངེས་པ་མཚོན་པས་ཟླ་བ་བཅུའི་ཕུང་པོ་རྫོགས་པ་ལྕགས་སྤྲེལ་ས་ག་ཟླ་བའི་ཚེས་བདུན་ལ་ཡུམ་སྒྱུ་འཕྲུལ་མ་ལུམྦི་ནིའི་ཚལ་དུ་འཆག་པར་གཤེགས་ཏེ་ཤིང་ཀླག་ཤའི་ཡལ་ག་ལ་བཟུང་བ་ན་གནོད་པ་མེད་པར་རྩིབ་ལོག་གཡས་པའི་གོ་བར་ནས་ན་བཟའ་དང་བཅས་ཏེ་ལེན་པ་མེད་པར་ཐང་དུ་བྱོན་ཏེ་ཕྱོགས་བཞིར་གོམ་པ་བདུན་བདུན་བོར་ནས། ང་ནི་འཇིག་རྟེན་འདི་ན་མཆོག་ཡིན་ནོ། །ཞེས་གསུངས་པ་ན། བར་སྣང་གི་ལྷས་བསྟོད་པ་སོགས་ངོ་མཚར་བའི་ལྟས་མང་པོ་དང་བཅས་ཏེ་སྐུ་༣བལྟམས། དེ་ཉིད་སྐྱེ་རྒུའི་བདག་མོ་ལ་སོགས་པ་མ་མ་སུམ་ཅུ་རྩ་གཉིས་ཀྱིས་བསྐྱེད་བསྲིངས་ཏེ་ཡིག་དཔོན་ཀུན་གྱི་བཤེས་གཉེན་སོགས་སློབ་དཔོན་སོ་སོ་ལས་ཡི་གེ་དང་། འཕོང་དང་། སྒྱུ་རྩལ་སོགས་ལ་བསླབས་ནས་བཟོའི་གནས་ཐམས་ཅད་ལ་མཁས་ཤིང་སྟོབས་དང་སྒྱུ་རྩལ་ཕུལ་དུ་ཕྱིན་པའི་ཚུལ་བསྟན་ནས་ཤཱཀྱ་པ་རྣམས་ཕམ་པར་༤མཛད། དེ་ནས་འཇིག་རྟེན་པ་དང་ཚུལ་མཐུན་པར་འཇུག་པའི་ཕྱིར་ཤཱཀྱའི་བུ་མོ་ས་འཚོ་མ་དང་། གྲགས་འཛིན་མ། རི་དྭགས་སྐྱེས་རྣམས་འཁོར་དྲུག་ཁྲི་དང་བཅས་ཁབ་ཏུ་བཞེས་ནས་དགྱེས་པར་རོལ་པའི་ཚུལ་བསྟན་བཞིན་དགུང་ལོ་ཉེར་དགུའི་བར་དུ་ཕོ་བྲང་དུ་བཞུགས་ཏེ་རྒྱལ་སྲིད་༥བསྐྱངས། དེ་ནས་དགུང་ལོ་ཉེར་དགུ་པ་ལ་གནས་གཙང་མའི་ལྷས་བསྐུལ་ཏེ་སྐྱེ་རྒ་ན་འཆིའི་ཆུ་བོ་བཞི་དང་དགེ་སྦྱོང་གི་གཟུགས་གཟིགས་པའི་རྐྱེན་བྱས་ཏེ་ངེས་པར་འབྱུང་བར་དམ་བཅས་པ་ན། ཟས་གཙང་མའི་ཚོགས་རྣམས་གཞོན་ནུ་རབ་ཏུ་འབྱུང་གིས་དོགས་ཏེ་ཁོར་ཡུག་མེལ་ཚེས་བསྲུངས་ཀྱང་ཆིབས་བསྔགས་ལྡན་གྱི་སྟེང་ན་རྒྱལ་ཆེན་བཞིས་སྲི་ཞུ་དང་བཅས་ནམ་མཁའི་དབྱིངས་སུ་གཤེགས་ནས་མཆོད་རྟེན་རྣམ་དག་གི་དྲུང་དུ་བབས་ཤིང་ཉིད་ཀྱི་དབུ་སྐྲ་ཉིད་ཀྱིས་བོར་ཏེ་རབ་ཏུ་༦བྱུང་། དེ་ནས་རྟོག་གེ་བ་གདམས་ངག་ཆེ་བར་གྲགས་པ་རིང་འཕུར་དང་ལྷག་སྤྱོད་གཉིས་ལས་འཇིག་རྟེན་པའི་ཏིང་ངེ་འཛིན་ནོད་པའི་ཚུལ་བསྟན་ནས་ལྔ་སྡེ་བཟང་པོ་དང་བཅས་ཆུ་ཀླུང་ནཻ་རཉྫ་ནའི་འགྲམ་ན་ལོ་དྲུག་ཏུ་དཀའ་བ་སྤྱད་ནས་མཁའ་ཁྱབ་ཀྱི་ཏིང་ངེ་འཛིན་ལ་མཉམ་པར་༧བཞག །ཇི་ཞིག་ན་ལྷ་རྣམས་ཀྱིས་བསྐུལ་ནས་ཏིང་ངེ་འཛིན་ལས་བཞེངས་ཏེ་བཞུད་པའི་ལམ་དུ་མཐའ་གཉིས་སྤངས་པ་དབུ་མའི་ལམ་མ་གཏོགས་པ་འཇིག་རྟེན་ན་གྲགས་པའི་དཀའ་ཐུབ་ཙམ་གྱིས་གྲོལ་བར་འཛིན་པ་དགག་པའི་ཕྱིར་བྲམ་ཟེའི་བུ་མོ་ལེགས་སྐྱེས་མས་བ་མེན་ལྔ་བརྒྱའི་འོ་མ་ཉིང་ཁུར་བྱས་པ་དྲངས་པ་གསོལ་བས་སྐུ་ལུས་མཚན་དཔེ་ཤིན་ཏུ་གསལ་བ་གསེར་གྱི་གཏན་པ་ཕྱིས་པ་ལྟར་གྱུར་ཅིང་། ལམ་དུ་རྩྭ་ཚོང་བཀྲ་ཤིས་ལྡན་ལས་རེག་ན་འཇམ་པའི་རྩྭ་ཕྱག་གང་བཞེས་པ་བསྣམས་ནས་རྡོ་རྗེ་གདན་༨དུ་བྱོན། དེ་ནས་དགུང་ལོ་སོ་ལྔ་པ་ཤིང་རྟ་ས་ག་ཟླ་བའི་ཉ་ལ་རྡོ་རྗེ་གདན་བྱང་ཆུབ་ཤིང་གི་སྙིང་པོ་ཅན་དུ་རྩྭའི་འདིང་བ་ལ་སྐྱིལ་མོ་ཀྲུང་བཅས་ནས། སྟན་འདིར་བདག་གི་ལུས་འདི་སྐམ་ཡང་རུང་། །པགས་པ་རུས་པའི་ཚོགས་རྣམས་ཞིག་ཀྱང་རུང་། །བསྐལ་མང་རྙེད་དཀའི་བྱང་ཆུབ་མ་ཐོབ་བར། །སྟན་འདི་ལས་ནི་ལུས་བསྐྱོད་མི་བྱའོ། །ཞེས་དམ་བཅའ་བརྟན་པོ་མཛད། དེར་སྲོད་ཀྱི་ཆ་ལ་བདུད་ཀྱི་རྒྱལ་པོས་བསླུ་བྲིད་ཀྱི་ཚིག་དང་། བདུད་ཀྱི་བུ་མོ་བདུན་གྱིས་ཆགས་པའི་ཟོལ་གྱིས་བསླུ་བར་བརྩམས་ཀྱང་གཡོ་བའི་སྐབས་མ་རྙེད་པ་ན། བདུད་དམག་བྱེ་བ་དུང་ཕྱུར་དྲངས་པའང་བྱམས་པའི་ཏིང་ངེ་འཛིན་གྱིས་༩བཏུལ། ཐུན་དང་པོའི་སྐབས་དེ་ཉིད་དུ་མཉམ་པར་བཞག་སྟེ་རབ་མཐའི་བསམ་གཏན་ལ་བརྟེན་ནས་རྫུ་འཕྲུལ་གྱི་མངོན་ཤེས་དང་ལྷའི་རྣ་བ། གུང་ཐུན་ལ་གཞན་སེམས་ཤེས་པ། སྔོན་གནས་རྗེས་དྲན། ལྷའི་མིག་གི་མངོན་ཤེས་རྣམས་དང་། ཐུན་ཐ་མ་སྐྱ་རེངས་འཆར་ཁར་ཟག་པ་ཟད་པའི་མངོན་ཤེས་བསྒྲུབས་པས་བླ་ན་མེད་པའི་ཡེ་ཤེས་བརྙེས་ནས་མངོན་པར་རྫོགས་པར་སངས་རྒྱས་ཀྱི་བྱང་ཆུབ་བརྙེས་པ་དེའི་ཚེ་ས་ཆེན་པོ་འདི་ཡང་རབ་ཏུ་གཡོས་ཤིང་འོད་ཟེར་གྱི་སྣང་བ་དཔག་ཏུ་མེད་པ་བྱུང་བ་ལ་ལྷ་རྣམས་ཀྱིས་༡༠བསྟོད། དེའི་ཚེ་ན་འཇིག་རྟེན་ན་དགྲ་བཅོམ་པ་གཅིག་གོ། །དེ་ནས་བདུད་རྩི་ཟབ་མོ་རྟོག་གེའི་སྤྱོད་ཡུལ་མ་ཡིན་པར་སྟོན་པའི་སླད་དུ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཞིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་འདུག་པས། །མི་སྨྲ་ནགས་འདབ་ཉིད་དུ་གནས་པར་བྱ། །ཞེས་གསུངས་ཏེ་ཞག་བདུན་ཕྲག་བདུན་དུ་ཆོས་མ་གསུང་བར་བཞུགས་པའི་ཚེ། ལྷའི་དབང་པོ་ཚངས་པ་དང་བརྒྱ་བྱིན་གཉིས་ཀྱིས་ཆོས་ཀྱི་འཁོར་ལོ་བསྐོར་བར་ཡང་ནས་ཡང་དུ་བསྐུལ་བས། ཚངས་པ་མ་ག་དྷ་ཡི་སེམས་ཅན་གང་། །རྣ་བར་ལྡན་ཞིང་དད་དང་ཤེས་རབ་ལྡན། །མི་འཆི་འདུ་བྱེད་རྟག་ཏུ་ཆོས་ཉན་པ། །དེ་དག་ལ་ནི་བདུད་རྩིའི་སྒོ་དབྱེའོ། །ཞེས་ཞལ་གྱིས་བཞེས་པའི་སྒྲ་འོག་མིན་གྱི་བར་དུ་གྲགས། དེ་ནས་རྒྱ་གར་འཕགས་པའི་ཡུལ་དབུས་སྔོན་གྱི་དྲང་སྲོང་རྣམས་ཀྱིས་བརྟེན་པར་མཛད་པའི་གནས། བདག་ཅག་གི་སྟོན་པ་འདིས་ཀྱང་རྒྱལ་བ་བྱེ་བ་ཕྲག་ཁྲིག་ལ་བསྙེན་བཀུར་མཆོད་སྦྱིན་དུ་མ་མཛད་པའི་ཡུལ་ཝཱ་རཱ་ཎ་སཱི་དྲང་སྲོང་ལྷུང་བ་རི་དྭགས་མི་འཇིགས་པའི་ནགས་ཚལ་དུ་གཤེགས་ནས་དེར་རྫོགས་སངས་རྒྱས་ནས་ཞག་བདུན་ཕྲག་བདུན་འདས་པ་ཆུ་སྟོད་ཟླ་བའི་ཚེས་བཞི་ནས་བརྩམས་ཏེ། ཆོས་ལྷག་པ་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་རྗོད་བྱེད་འདུལ་བ་སྡེ་སྣོད་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ། །མིའི་འཁོར་གྱི་ཐོག་མ་ཀུན་ཤེས་ཀཎྜིན་ཡ། རྟ་ཐུལ། རླངས་པ། མིང་ཆེན། བཟང་ལྡན་ཏེ་ལྔ་སྡེ་བཟང་པོ་དང་ལྷ་བརྒྱད་ཁྲི་དང་བཅས་པ་ལ་བདེན་བཞི་ལན་གསུམ་དུ་བཟླས་ཏེ་གསུངས་པས། ལྷ་བརྒྱད་ཁྲིས་བདེན་པ་མཐོང་། ལྔ་སྡེས་ཡེ་ཤེས་ཁོང་ཆུད་ཀྱིས་བསྙེན་པར་རྫོགས་ཏེ་དགྲ་བཅོམ་པ་༡༡ཐོབ། དེའི་ཚེ་འཇིག་རྟེན་ན་དགྲ་བཅོམ་པ་དྲུག་གོ། །དེ་ཡང་སྤྱིར་ལུང་བཞིས་བསྡུས་པའི་འདུལ་བའི་སྡེ་སྣོད་ནི་སྟོན་པ་སངས་རྒྱས་པ་ནས་མྱ་ངན་ལས་མ་འདས་ཀྱི་བར་དུ་བྱུང་བ་དང་བཅས་པའི་རྣམ་པར་བཞག་པ་ཐམས་ཅད་སྟོན་པའི་ཕྱིར་ཆོས་འཁོར་དང་པོ་ཁོ་ནའི་མཚན་གཞིར་ངེས་པ་མ་ཡིན་ཀྱང་། འཁོར་བའི་མཚན་ཉིད་སྤང་བྱ་ལས་ལྡོག་པའི་ལམ་སྟོན་པའི་ཕྱིར་གཙོ་ཆེ་བའི་དབང་དུ་བྱས་ཏེ་བཞག་པ་ཡིན། འདུལ་བ་དེ་ལ་དབྱེ་ན། འདུལ་བའི་འདུལ་བ་བཅས་རང་གི་རྣམ་གཞག་ཆེ་ལོང་ཙམ་དང་། འདུལ་བའི་མདོ་སྡེ་ཏིང་ངེ་འཛིན་དང་ཚངས་པར་སྤྱོད་པའི་རྣལ་འབྱོར་དུ་བྱ་བའི་རིམ་པ་དང་། འདུལ་བའི་མངོན་པ་དེ་རྣམས་ཀྱི་རབ་དབྱེ་རྒྱ་ཆེར་བཤད་པ་སོགས་སྤང་གཉེན་གྱི་རིམ་པས་ཉམས་སུ་ལེན་པའི་ཐབས་རྣམས་བཀའ་དང་པོ་བདེན་པ་བཞིའི་ཆོས་ཀྱི་རྣམ་གྲངས་སོ། །འཁོར་ལོ་བར་པ་དང་ཐ་མ་གཉིས་ཀྱི་ཚུལ་ནི་འོག་ཏུ་འཆད་པར་འགྱུར་བ་བཞིན་དང་། ཁྱད་པར་སྔགས་ཀྱི་རྒྱུད་སྡེ་རྣམས་ལས་ནི། འོག་མིན་གཞན་འཕྲུལ་དབང་བྱེད་ཀྱི་གནས་དང་། རི་རབ་ཀྱི་རྩེ་མོ་དང་། མིའི་གནས་ཀྱི་འཇིག་རྟེན་དཔལ་ལྡན་འབྲས་སྤུངས་དང་། ས་ཧོར། ཨོ་ཌཱི་ཡ་ན། རི་བོ་བྱ་རྐང་ཅན། བསིལ་བའི་ཚལ་ལ་སོགས་པ་གནས་དང་དུས་དང་འཁོར་མཐའ་གཅིག་ཏུ་མ་ངེས་པ་ལ་དཀྱིལ་འཁོར་སྤྲུལ་བཤད་ལ་སོགས་པའི་སྒོ་ནས་རྒྱུད་སྡེ་མཐའ་ཡས་པར་གསུངས་པའི་རྣམ་གཞག་ཐུན་མོང་མ་ཡིན་པ་དུ་མ་འབྱུང་སྟེ། རྒྱལ་བའི་ཕྲིན་ལས་ཚད་མེད་པའི་ཆོས་ཀྱི་སྒོ་དང་། ཐེག་པའི་རྣམ་གྲངས་དང་། འདུལ་བའི་ཐབས་ཚུལ་དང་། དུས་སྔ་ཕྱི་ལ་སོགས་པ་སོ་སོའི་སྐྱེ་བོའི་བློས་ནམ་ཡང་བསམ་པར་ནུས་པ་མ་ཡིན་ལ། དེ་ལྟ་བུའི་ཆོ་འཕྲུལ་ཆེན་པོའི་ཕྲིན་ལས་ཀྱི་རོལ་པ་ཚད་མེད་པས་མཐོང་ཐོས་དྲན་རེག་གི་སྐྱེ་འགྲོ་ཐམས་ཅད་ཐར་པ་བདེ་བའི་ལམ་ལ་འགོད་པར་མཛད་ནས། སྟོན་པ་ཐུབ་པའི་དབང་པོ་ཉིད་དགུང་ལོ་བརྒྱད་ཅུའི་གྲངས་སུ་ཕེབས་ཏེ་སྐུ་དངོས་ཀྱི་གདུལ་བྱ་ཕལ་ཆེ་བ་བཏུལ་ཟིན་པའི་སྐབས་ཤཱ་རིའི་བུ་དང་ལྷན་ཅིག་དགྲ་བཅོམ་པ་བརྒྱད་ཁྲི། མོའུ་གལ་གྱི་བུ་དང་ལྷན་ཅིག་དགྲ་བཅོམ་པ་བདུན་ཁྲི་བཅས་སྔོན་དུ་མྱ་ངན་ལས་འདས། དེ་ནས་སྟོན་པ་ཉིད་གྱད་ཡུལ་གྲོང་ཁྱེར་རྩྭ་ཅན་དུ་གཤེགས་ཏེ་ཤིང་སཱ་ལ་ཟུང་གི་བར་ཐ་མའི་གཟིམས་ཁྲི་ལ་བཞུགས་ནས་ཀྱང་དྲི་ཟ་རབ་དགའ་དང་ཀུན་ཏུ་རྒྱུ་རབ་བཟང་གི་བར་བཏུལ་ནས་དངོས་ཀྱི་གདུལ་བྱ་རྫོགས་པ་དང་། བསྟན་པ་འཁོར་རྣམ་པ་བཞི་དང་བཅས་པ་གནས་བརྟན་ཆེན་པོ་འོད་སྲུང་ལ་གཏད་དེ། སྐྱེ་བོ་རྟག་འཛིན་ཅན་རྣམས་འདུལ་བ་དང་། ལེ་ལོ་ཅན་མང་པོ་ཆོས་ལ་བསྐུལ་བ་དང་། སངས་རྒྱས་འཇིག་རྟེན་དུ་བྱོན་པ་ཤིན་ཏུ་དཀོན་པའི་འདུ་ཤེས་བསྐྱེད་པའི་ཕྱིར། དགུང་གྲངས་གྱ་གཅིག་ཏུ་ཕེབས་པ་ལྕགས་འབྲུག་ས་ག་ཟླ་བའི་ཉ་ལ་དགོངས་པ་ཆོས་ཀྱི་དབྱིངས་སུ་ཡོངས་སུ་མྱ་ངན་ལས་འདས་པའི་ཚུལ་བསྟན།༡༢ དེ་དང་ལྷན་ཅིག་དགྲ་བཅོམ་པ་ཁྲི་བརྒྱད་སྟོང་ཡང་མྱ་ངན་ལས་འདས། དེར་གདུང་ལས་ཞུགས་རང་འབར་ཏེ་སྐུ་གདུང་སིལ་བུར་གྱུར། རང་རང་གི་སྐལ་པའི་ཁྱད་པར་དང་འཚམས་པར་ཆ་བརྒྱད་དུ་བགོས་པ་མཆོད་རྟེན་གྱི་སྙིང་པོར་བྱས་སོ། །དེ་ནས་བཀའི་བསྡུ་བ་ཇི་ལྟར་བྱས་པའི་ཚུལ་སོགས་ནི་འོག་ནས་འབྱུང་བ་ལྟར་ལ། དེ་ལྟར་སྟོན་པ་སངས་རྒྱས་འཇིག་རྟེན་འདིར་བྱོན་ཚུལ་གྱི་རྣམ་པར་ཐར་པ་མདོ་ཙམ་སྤྱིར་ཤེས་པར་བྱས་ནས། སྐབས་དོན་གོང་གི་ནང་གསེས་ས་བཅད་དང་པོ་སྟོན་པས་དམ་ཆོས་འདུལ་བ་ཇི་ལྟར་གསུངས་པའི་ཚུལ་ནི། གླེང་གཞི་སྟོན་པས་ཝཱ་རཱ་ཎ་སཱི་རུ། །ལྷག་པའི་ཚུལ་ཁྲིམས་གཙོར་སྟོན་བདེན་པ་བཞི། །ལྔ་སྡེར་གསུངས་པ། ཞེས་པ་སྟེ། འདིར་ཆོས་འཁོར་དང་པོ་འདུལ་བའི་སྡེ་སྣོད་གླེང་བའི་གཞི་ནི་ཕུན་སུམ་ཚོགས་པ་ལྔ་སྟེ། སྟོན་པ་ཕུན་སུམ་ཚོགས་པ་མཉམ་མེད་ཐུབ་པའི་དབང་པོ་དེ་ཉིད་ཀྱིས། གནས་ཕུན་སུམ་ཚོགས་པ་རྒྱ་གར་འཕགས་པའི་ཡུལ་དབུས་སྔོན་རང་སངས་རྒྱས་མང་པོ་ལྷག་མེད་དུ་སོང་ནས་རིང་བསྲེལ་སར་ལྷུང་བའི་གནས་ཝཱ་རཱ་ཎ་སཱི་དྲང་སྲོང་ལྷུང་བ་རི་དྭགས་མི་འཇིགས་པའི་ནགས་ཚལ་དེ་རུ། དུས་ཕུན་སུམ་ཚོགས་པ་སྟོན་པ་མངོན་པར་རྫོགས་པར་སངས་རྒྱས་ནས་ཞག་གྲངས་བདུན་ཕྲག་བདུན་པ་ཆུ་སྟོད་ཟླ་བའི་ཚེས་བཞི་ནས་བརྩམས་ཏེ། ཆོས་ཕུན་སུམ་ཚོགས་པ་ལྷག་པའི་ཚུལ་ཁྲིམས་ཀྱི་བསླབ་པ་བརྗོད་བྱའི་ག ཙོ་བོར་སྟོན་པ་རྗོད་བྱེད་འདུལ་བའི་སྡེ་སྣོད་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་ཉིད། འཁོར་ཕུན་སུམ་ཚོགས་པ་ལྷ་བརྒྱད་ཁྲི་དང་བཅས་ཏེ་མིའི་འཁོར་གྱི་ཐོག་མ་ལྔ་སྡེ་བཟང་པོར་གསུངས་པའོ། །གཉིས་པ་ཆོས་འཁོར་དེ་ཉིད་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་བའི་ཚུལ་ནི། འོད་སྲུང་སོགས་ཀྱིས་བསྡུས། །བྱེ་བྲག་བཤད་མཛོད་ལ་སོགས་འཕགས་པས་བརྩམས། །ཡོན་ཏན་འོད་དང་ཤཱཀྱ་འོད་ཀྱིས་སྤེལ། །སྔ་འགྱུར་སྡོམ་རྒྱུན་ཞི་བ་འཚོ་དང་ནི། །ཕྱིས་ནས་ཤཱཀྱ་ཤྲཱི་ལས་ཀྱང་དར ། །ཞེས་པ་སྟེ། འདི་ལ་བསྡུ་བ་རིམ་པ་གསུམ་དུ་བྱུང་བ་ལས། བསྡུ་བ་དང་པོ་ནི། དེའང་མཆོག་ཟུང་གཉིས་དང་སྟོན་པ་བཅོམ་ལྡན་འདས་ལྷན་ཅིག་པར་དགྲ་བཅོམ་པ་ཤིན་ཏུ་མང་པོ་མྱ་ངན་ལས་འདས་པ་ན། ལྷ་རྣམས་ཀྱིས་དགེ་སློང་དབང་ཡོད་པ་དག་མྱ་ངན་ལས་འདས་ཏེ་དམ་པའི་ཆོས་ནི་མེ་ཤི་བའི་དུ་བ་ཙམ་དུ་གྱུར་ཏེ་ཞེས་པ་ལ་སོགས་པའི་འཕྱ་བ་བསལ་བའི་ཕྱིར་དུ། མྱ་ངན་ལས་འདས་པའི་རྗེས་ཐོག་ལོ་དེ་ཉིད་ལ། གནས་རྒྱལ་པོའི་ཁབ་ཀྱི་ནྱ་གྲོ་དྷའི་ཕུག་པར། རྒྱལ་པོ་མ་སྐྱེས་དགྲས་གནས་མལ་དང་ཡོ་བྱད་རྣམས་སྦྱར་ནས་གནས་བརྟན་ཆེན་པོ་འོད་སྲུང་ལ་སོགས་དགྲ་བཅོམ་པ་ལྔ་བརྒྱ་འདུས་ཏེ་དབྱར་གནས་པའི་དུས་སུ། འཕགས་པ་ཀུན་དགའ་བོས་མདོ་སྡེ། ཉེ་བར་འཁོར་གྱིས་འདུལ་བ། འོད་སྲུང་ཆེན་པོས་མངོན་པའི་སྡེ་སྣོད་དེ་དགྲ་བཅོམ་པ་དེ་རྣམས་ཀྱིས་བསྡུས་སོ། །བསྡུ་བ་གཉིས་པ་ནི། སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་ལོན་པ་ན་ཡངས་པ་ཅན་གྱི་དགེ་སློང་རྣམས་ཀྱིས། ཧུ་ལུ་ཧུ་ལུ་ཡི་རངས་དང་། །ཀུན་སྤྱོད་སྣོད་དང་ལན་ཚྭ་དང་། །ལམ་དང་སོར་གཉིས་དཀྲུགས་དང་གདིང་། །གསེར་ལ་རུང་བ་བྱ་བ་སྟེ། །འདི་དག་རུང་མིན་གཞི་བཅུར་འདོད། །ཅེས་པ་ལྟར་རུང་བ་མ་ཡིན་པའི་གཞི་བཅུ་བྱས་པ་དེ་བསལ་བའི་ཕྱིར། རྒྱལ་པོ་དྷརྨ་ཨ་ཤོ་ཀས་ཡོན་སྦྱར་ཏེ་ཀུསྨ་པཱུ་རིའི་གཙུག་ལག་ཁང་དུ་གྲགས་པ་ལ་སོགས་པའི་དགྲ་བཅོམ་པ་བདུན་བརྒྱ་འདུས་པས་མི་རུང་བའི་གཞི་བཅུ་སུན་ཕྱུངས། སྡེ་སྣོད་གསུམ་ཀ་ཚང་བ་ཚར་གཅིག་ལེགས་པར་བཏོན། མཐུན་པ་དང་བཀྲ་ཤིས་པའི་གསོ་སྦྱོང་ཡང་མཛད་དོ། །བསྡུ་བ་གསུམ་པ་ནི། རྒྱལ་པོ་དྷརྨ་ཨ་ཤོ་ཀའི་ཚ་བོ་མྱ་ངན་བྲལ་གྱི་བུ་རྒྱལ་པོ་དབའ་བོ་སྡེའི་དུས་ནས་བརྩམས་ཏེ། བདུད་ཀྱི་བྱིན་གྱིས་བརླབས་པའི་དགེ་སློང་ལྷ་ཆེན་པོ་དང་། བཟང་པོ་དང་། གནས་བརྟན་ཀླུ་དང་། ཡིད་བརྟན་རྣམས་རིམ་པར་བྱུང་བས། གཞན་ལན་གདབ་དང་མི་ཤེས་པ། །ཡིད་གཉིས་དང་ནི་ཡོངས་སུ་བརྟག །བདག་ཉིད་གསོ་བར་བྱེད་པ་སྟེ། །འདི་ནི་སྟོན་པའི་བསྟན་པ་ཡིན། །ཞེས་ཆོས་མ་ཡིན་པའི་གཞི་ལྔ་སྒྲགས་ཏེ། རྒྱལ་པོ་དཔའ་བོ་དེའི་ཚེ་སྨད། དགའ་བོ་དང་པདྨ་ཆེན་པོའི་ཚེ་རིལ་པོ། ཀ་ནིཥྐའི་ཚེ་སྟོད་ཡན་ཏེ་རྒྱལ་པོ་བཞིའི་རིང་དགེ་འདུན་རྣམས་རྩོད་པར་གྱུར་ཅིང་། སྟོན་པས་འདུལ་བ་ཡི་གེར་འབྲི་བ་མ་གནང་བས་ཡུན་རིང་པོར་སོང་བ་ན་སོ་ཐར་གྱི་མདོ་འདོན་ཚུལ་མ་མཐུན་པའི་དབང་གིས་སྡེ་པ་བཅོ་བརྒྱད་དུ་གྱེས་ཏེ། ཇི་ལྟར་ན་གནས་བརྟན་ཀླུས་རྩོད་པ་སྤེལ་བའི་རྒྱུས་གཞི་ཐམས་ཅད་ཡོད་པར་སྨྲ་བ་ལས། ཕལ་ཆེན་པ། གནས་བརྟན་པ། མང་པོས་བཀུར་བ་གསུམ་གྱེས་ཏེ་རྩ་བའི་སྡེ་པ་བཞིར་གྱིས། དེ་རྗེས་ཡིད་བརྟན་གྱིས་རྩོད་པ་རྒྱ་ཆེར་སྤེལ་བས། སྡེ་པ་བཞི་ཡང་རིམ་གྱིས་བཅོ་བརྒྱད་དུ་གྱེས་ཏེ། གཞི་ཐམས་ཅད་ཡོད་པར་སྨྲ་བ་བདུན། ཕལ་ཆེན་པ་ལྔ། གཞན་གཉིས་ལས་གསུམ་གསུམ་གྱེས་པར་གྲགས། དེ་ནས་རེ་ཞིག་གི་ཚེ་རྩོད་པ་ཅུང་ཟད་ཞི་ནས་སོ་སོར་གནས་པའི་དུས་རྒྱལ་རབས་བཞི་ཙམ་སོང་བ་ན་རྒྱལ་པོ་ཀ་ནིཥྐས་སྦྱིན་བདག་བྱས་ནས་བཀའ་བསྡུ་གསུམ་པ་མཛད། འདི་ལ་བཞེད་པ་མི་འདྲ་བ་འགའ་ཞིག་སྣང་ཡང་། ཁ་ཆེ་བ་རྣམས་ཁ་ཆེའི་ཡུལ་རྣ་རྒྱན་གྱི་གཙུག་ལག་ཁང་དུ་འཕགས་པ་རྩིབ་ལེགས་སོགས་དགྲ་བཅོམ་ལྔ་བརྒྱ་དང་། བ་སུ་མི་ཏྲ་སོགས་བཙུན་པ་ཆེན་པོ་བཞི་བརྒྱ་དང་། བྱང་ཆུབ་སེམས་དཔའ་ལྔ་བརྒྱ་འདུས་ཏེ། རྒྱལ་པོ་ཀྲི་ཀྲིའི་རྨི་ལམ་ལུང་བསྟན་པའི་མདོ་ལས་དྲངས་ནས་གྱེས་པ་བཅོ་བརྒྱད་པོ་ཐམས་ཅད་སངས་རྒྱས་ཀྱི་བཀར་བསྒྲུབས་ཤིང་། འདུལ་བའི་སྡེ་སྣོད་ཐམས་ཅད་ཡི་གེར་བཀོད། མདོ་སྡེ་དང་མངོན་པ་སྔར་ཡི་གེར་མ་འཁོད་པ་རྣམས་ཀྱང་དུས་དེར་ཡི་གེར་བཀོད་ཅིང་། སྔར་འཁོད་པ་རྣམས་ལའང་དག་ཐེར་བྱས་སོ། །དེ་ནས་དགོངས་འགྲེལ་གྱི་བསྟན་བཅོས་འབྱུང་ཚུལ་དང་འབྲེལ་བར་བསྟན་པ་ཇི་ལྟར་བསྐྱངས་པ་ནི། བྱང་ཕྱོགས་རི་བོ་འབིགས་བྱེད་གར་མཁན་གྱི་གཙུག་ལག་ཁང་དུ། འཕགས་པ་ཉེར་སྦས་དང་། ཐམས་ཅད་འདོད་ལ་སོགས་པའི་དགྲ་བཅོམ་པ་ལྔ་བརྒྱས་སྤྱི་མཐུན་དུ་ཉན་ཐོས་ཀྱི་ཐུན་མོང་མ་ཡིན་པའི་བསྟན་བཅོས་བྱེ་བྲག་བཤད་མཛོད་ཆེན་པོ་བརྩམས་པར་མཛད་ལ། སོགས་ཁོང་ནས་གཞན་ཡང་བསྟན་པ་སྐྱོང་བའི་སྐྱེས་བུ་སངས་རྒྱས་དང་འདྲ་བའི་ཉན་ཐོས་ཆེན་པོ་དང་བླ་མ་གྲགས་པ་སོགས་དགྲ་བཅོམ་པ་འཕགས་པའི་ཚོགས་དང་། རྒྱལ་པོ་ལེགས་རྒྱལ་དགེ་བ་སོགས་བྲམ་ཟེ་ཆེན་པོའི་སྡེ་ལ་སོགས་པ་མཁས་བཙུན་བཟང་པོའི་དཔལ་དང་ལྡན་ཅིང་རྟོགས་པའི་ཡོན་ཏན་ལ་མངའ་བརྙེས་པ་རྣམས་ཀྱིས་དགོངས་འགྲེལ་གྱི་བསྟན་བཅོས་དུ་མ་བརྩམས་ཤིང་། ཁྱད་པར་འོད་བྱེད་ཀྱི་ས་བརྙེས་པའི་སློབ་དཔོན་ཡོན་ཏན་འོད་ཀྱིས་མདོ་རྩ་བ་དང་། དེའི་རང་འགྲེལ་སྟོང་ཕྲག་བཅུ་གཉིས་པ། དེའི་དོན་བསྡུ། འགྲེལ་ཆུང་། ལས་བརྒྱ་རྩ་གཅིག་གི་འགྲེལ་པ་ཀརྨ་ཤ་ཏཾ་སྟེ་གཞུང་ལྔ་མཛད་པ་དང་། སློབ་དཔོན་ཤཱཀྱ་འོད་ཀྱིས་དགེ་ཚུལ་གྱི་སུམ་བརྒྱ་པ་དང་། དེའི་འགྲེལ་པ་འོད་ལྡན་བཅས་མཛད་ཅིང་སྤེལ་བས། ལྷོ་ཕྱོགས་འཕགས་པའི་ཡུལ་ནས་བྱང་ཕྱོགས་ཤམྦྷ་ལ་དང་ཉེ་བའི་བར་གྱི་ས་ཆེན་པོ་འདི་དག་ངུར་སྨྲིག་གི་རྒྱལ་མཚན་འཛིན་པས་ཁྱབ་པར་གྱུར་པ་ནི་སློབ་དཔོན་འདི་གཉིས་ཀྱི་བཀའ་དྲིན་ཁོ་ནའོ། །དེ་ལས་གངས་ཅན་བོད་ཀྱི་ལྗོངས་འདིར་ཆོས་རྒྱལ་ཆེན་པོ་ཁྲི་སྲོང་ལྡེའུ་བཙན་གྱི་བཀས་བཅད་པ་ལྟར་གཞི་ཐམས་ཅད་ཡོད་པར་སྨྲ་བའི་སྡེ་པ་གཅིག་པུ་ལས་མ་བྱུང་ལ། དེའང་བསྟན་པ་སྔ་འགྱུར་གྱི་སྐབས་སུ་བྱུང་བའི་འདུལ་བ་སོ་ཐར་གྱི་སྡོམ་པའི་རྒྱུན་ནི། མཉམ་མེད་སྟོན་པ་ཐུབ་པའི་དབང་པོ་ནས། ཤཱ་རིའི་བུ་ལ་སོགས་པ་རིམ་པར་བརྒྱུད། གངས་ཅན་ཐོག་མའི་འདྲེན་པ་མཁན་ཆེན་ཞི་བ་འཚོ་ལས། རྦ་རཏྣ། དེ་ནས་གཙང་རབ་གསལ། གཡོ་དགེ་བའི་འབྱུང་གནས། སྨར་ཤཱཀྱ་མུ་ནེ་རྣམས་བསྙེན་པར་རྫོགས་ཤིང་། ཕྱིས་རྒྱལ་པོ་གླང་དར་གྱིས་བསྟན་པ་ལ་ཐོ་འཚམས་པའི་དུས་སྨར་གཡོ་གཙང་གསུམ་གྱིས་འདུལ་དཔེ་དྲེའུ་རྒྱབ་གཅིག་བཀལ་ཏེ་རི་བོ་དན་ཏིག་ཏུ་བྱོན། དེར་བླ་ཆེན་དགོངས་པ་རབ་གསལ་དང་། དེ་ལས་དབུས་གཙང་གི་མི་བཅུ་བསྙེན་པར་རྫོགས་ཤིང་། ཀླུ་མེས་ཚུལ་ཁྲིམས་ཤེས་རབ་སོགས་ཀྱིས་རྒྱ་ཆེར་སྤེལ་བ་ལ་བརྟེན་ནས་ད་ལྟའི་བར་སྡོམ་རྒྱུན་མ་ཉམས་པར་བཞུགས་པ་ལ་སྨད་འདུལ་དུ་གྲགས། དེ་དང་མཚུངས་པར་ཕྱི་འགྱུར་གྱི་སྡོམ་རྒྱུན་སྟོད་འདུལ་དུ་གྲགས་པ་ནི་རྒྱ་གར་ཤར་ཕྱོགས་ཀྱི་པཎྜི་ཏ་དྷརྨ་པཱ་ལ་མངའ་རིས་སུ་ཕེབས་ནས་འདུལ་བའི་སྡོམ་རྒྱུན་དང་བཤད་རྒྱུན་སྤེལ་བས། མཁན་བུའི་གཙོ་བོ་ས་དྷུ་པཱ་ལ། གུ་ཎ་པཱ་ལ། པྲ་ཛྙཱ་པ་ལ་སྟེ། པཱ་ལ་རྣམ་གསུམ་དུ་གྲགས་པ་དང་། དེ་ནས་ཞང་ཞུང་རྒྱལ་བའི་འབྱུང་གནས་སོགས་བྱོན་པ་ལས་ཕྱི་ཞིག་གི་བར་དུ་སྡོམ་རྒྱུན་ཡོད་པར་སྣང་ནའང་དེང་སང་ངེས་གསལ་མ་ཐོས། ཡང་ཕྱིས་སུ་ཁྲོ་ཕུ་ལོ་ཙཱ་བ་བྱམས་པ་དཔལ་ནས་ཁ་ཆེ་པཎ་ཆེན་ཤཱཀྱ་ཤྲཱི་གདན་དྲངས་ཏེ་དཔལ་གྱི་མཐའ་ཅན་གསུམ་ཞེས་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོ། བྱང་ཆུབ་དཔལ། རྡོ་རྗེ་དཔལ་རྣམས་བསྙེན་པར་རྫོགས་པས། དེ་གསུམ་ལས་ཀྱང་རྒྱུན་ཤིན་ཏུ་མང་བར་འཕེལ་བ་ད་ལྟའི་བར་དུ་དར་བཞིན་པ་འདི་ལ་བར་འདུལ་དུ་གྲགས་སོ། །གསུམ་པ་དེ་ལྟར་བཟུང་བའི་བརྗོད་བྱ་གཏན་ལ་དབབ་པ་ལ་གཉིས། ཐོབ་བྱ་སྡོམ་པའི་ངོ་བོ་དང་དབྱེ་བ་སྤྱིར་བཤད། །ཐོབ་བྱེད་ཆོ་གའི་ལག་ལེན་བྱེ་བྲག་ཏུ་བཤད་པའོ། །དང་པོ་སྤྱིར་བཤད་པ་ལའང་གཉིས། སྡོམ་པའི་ངོ་བོ་དང་། སྡོམ་པའི་དབྱེ་བའོ། །དང་པོ་སྡོམ་པའི་ངོ་བོ་ནི། ངོ་བོ་ངེས་འབྱུང་བསམ་པས་ཀུན་སླངས་ནས། །གཞན་གནོད་གཞིར་བཅས་ལྡོག་པ་ལུས་ངག་ལས། །སྐྱེ་ཕྱིར་གཟུགས་ཅན་ཡིན་ཅེས་འདོད་པ་དང་། །སྤོང་སེམས་རྒྱུན་ཆགས་ས་བོན་ལ་འདོད་པ། །རང་གི་སྡེ་པ་གོང་འོག་སོ་སོའི་ལུགས། །ཞེས་པ་སྟེ། དེ་ལ་སོ་ཐར་གྱི་སྡོམ་པའི་ངོ་བོའམ་མཚན་ཉིད་ནི། ངེས་པར་འབྱུང་བའི་བསམ་པས་ཀུན་ཏུ་བསླངས་ནས། གཞན་ལ་གནོད་པ་གཞི་དང་བཅས་པ་ལས་ལྡོག་པ་ཉེས་སྤྱོད་སྡོམ་པའི་ཚུལ་ཁྲིམས་གང་ཞིག་འདོད་པའི་སས་བསྡུས་པ་སྟེ། དེའང་ལུས་ངག་གི་ལས་ལམ་བདུན་སྤོང་བ་ལ་རང་སྡེའི་གྲུབ་མཐའ་སྨྲ་བ་ཐམས་ཅད་མཐུན་ཡང་། གཟུགས་ཅན་དང་ཤེས་པ་སོགས་གང་ལ་འཇོག་ཞལ་མི་མཚུངས་ཏེ། ཉན་ཐོས་བྱེ་བྲག་སྨྲ་བས་སོ་ཐར་གྱི་སྡོམ་པ་དེ་རང་དང་མཁན་སློབ་སོགས་ཀྱི་ལུས་དང་ངག་ལས་སྐྱེས་པའི་ཕྱིར། རྣམ་པར་རིག་བྱེད་དང་རིག་བྱེད་མ་ཡིན་པ་གཉིས་ཀའི་ངོ་བོར་སྐྱེེ་ལ། དེ་ནས་སྐད་ཅིག་གཉིས་པ་ཕྱིར་རིག་བྱེད་མ་ཡིན་པའི་གཟུགས་ཅན་དུ་གནས་པ་ཡིན་ཞེས་འདོད་པ་སྟེ། མཛོད་ལས། རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །སྡོམ་པ་སོ་སོར་ཐར་ཞེས་བྱ། །ཞེས་གསུངས་པའི་ཕྱིར་དང་། ཉན་ཐོས་མདོ་སྡེ་བས་རྒྱུད་ཡོངས་སུ་འགྱུར་བའི་ཁྱད་པར་ལ་འདོད་དེ། མཛོད་འགྲེལ་ལས། ལས་སྔོན་དུ་འགྲོ་ཞིང་སེམས་ཕྱིར་ཞིང་འབྱུང་བ་གང་ཡིན་པ་དེ་ནི་རྒྱུད་ཡིན་ལ། དེ་གཞན་དང་གཞན་དུ་སྐྱེ་བ་ནི་ཡོངས་སུ་འགྱུར་བ་ཡིན་ནོ། །ཞེས་གསུངས་པ་ལྟར། དོན་དུ་སེམས་བྱུང་སེམས་པ་ལ་འདོད་པ་ཡིན་ཏེ། སེམས་པ་ཡིད་ཀྱི་ལས་ཡིན་ནོ། །ཞེས་འབྱུང་བའི་ཕྱིར་རོ། །ཐེག་ཆེན་སེམས་ཙམ་པས་ནི་འཆལ་ཚུལ་སྤོང་བའི་སེམས་པ་རྒྱུན་ཆགས་ས་བོན་དང་བཅས་པ་ལ་འདོད་པ་ཡིན་ཏེ། དེའང་སེམས་རྐྱང་པ་ལ་བྱས་ན་རྒྱུན་མེད་ཅིང་། བག་ཆགས་ཙམ་ལ་བྱས་ན་སྟོང་རྒྱུ་བྱུང་བའི་གནས་སྐབས་སུའང་རྗེས་སུ་འབྲང་བས་ན་མི་སྟོང་བའི་ཕྱིར་ཞེས་འདོད། དབུ་མ་པས་ནི་སྤོང་སེམས་མཚུངས་ལྡན་དང་བཅས་པ་ལ་འདོད་པ་ཡིན་ཏེ། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་གསུངས་པའི་ཕྱིར་རོ། །དེ་ལྟ་ན་ནང་པ་སངས་རྒྱས་པ་རང་གི་སྡེ་པ་གྲུབ་མཐའ་གོང་འོག་ལ་སོ་སོའི་བློ་ཁྱད་ཀྱིས་འདོད་ལུགས་ལ་མི་འདྲ་བར་མཐོ་དམན་བྱུང་བ་ཡིན་ནོ། །གཉིས་པ་སྡོམ་པའི་དབྱེ་བ་ནི། དབྱེ་བ་བསྙེན་གནས་དགེ་བསྙེན་ཕ་མ་གཉིས། །ཁྱིམ་པའི་ཕྱོགས་ཡིན་དགེ་ཚུལ་ཕ་མ་དང་། །དགེ་སློབ་མ་དང་དགེ་སློང་ཕ་མ་ལྔ། །རབ་བྱུང་ལ་ཡིན་སོ་ཐར་རིས་བརྒྱད་པོ། །རྫས་སུ་བསྡུ་ན་བཞིར་འདོད་མཛོད་ཀྱི་ལུགས། །ཞེས་པ་སྟེ། དེ་ལྟར་ངོ་བོ་བསྟན་པའི་སྡོམ་པ་དེ་ལ་རྟེན་གྱི་སྒོ་ནས་དབྱེ་བ་བྱས་ན། སྤྱིར་རང་རང་གི་སྡོམ་པ་སྒྲུབ་བྱེད་ཀྱི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་པའི་ངེས་འབྱུང་གི་ཚུལ་ཁྲིམས་ཡིན་པ་ཙམ་དུ་འདྲ་ནའང་། བྱེ་བྲག་རང་རང་གི་མི་མཐུན་པའི་ཕྱོགས་སུ་གྱུར་པའི་སྤང་བྱའི་ཁྱད་པར་ཉིན་ཞག་ཕྲུག་གཅིག་ཏུ་སྤང་བྱ་བརྒྱད་སྤོང་བར་ཁས་བླངས་པ་བསྙེན་གནས་ཡིན་ཏེ་འདི་ལ་དུས་ཁྲིམས་ཞེས་ཀྱང་ཟེར། འདི་དགེ་བསྙེན་གྱིས་བླངས་ན་དེའི་གསོ་སྦྱོང་དུ་འགྲོ་བའི་ཕྱིར་གསོ་སྦྱོང་ཞེས་ཀྱང་གྲགས། དེ་བཞིན་དུ་སྤང་བྱ་གཅིག་ནས་ལྔའི་བར་དུ་ཇི་སྲིད་འཚོའི་བར་སྤོང་བར་ཁས་བླངས་པ་དགེ་བསྙེན་ཕ་མ་གཉིས་ཏེ། འདི་ལ་འདུལ་བར་ཡོངས་རྫོགས་དགེ་བསྙེན་ལས་མ་བཤད་ཀྱང་། མངོན་པ་ལས་ནི་སྐྱབས་གསུམ་འཛིན་པ་སོགས་དབྱེ་བ་མང་། འདི་གསུམ་ཁྱིམ་པའི་ཕྱོགས་ཀྱི་སྡོམ་པ་ཡིན་ནོ། །ཡང་སྤང་བྱ་བཅུ་ཇི་སྲིད་འཚོའི་བར་དུ་སྤོང་བར་ཁ་བླངས་པ་དགེ་ཚུལ་ཕ་མ་གཉིས་དང་། དེའི་སྟེང་སྤང་བྱ་བཅུ་གཉིས་ལོ་གཉིས་ལ་སོགས་པར་སྤོང་བར་ཁས་ལེན་པ་དགེ་སློབ་མ་དང་། སྤོང་བདུན་འཁོར་དང་བཅས་པ་ཇི་སྲིད་འཚོའི་བར་དུ་སྤོང་བར་ཁས་ལེན་པ་དགེ་སློང་ཕ་མ་གཉིས་ཀྱི་སྡོམ་པ་སྟེ། འདི་ལྔ་པོ་ནི་རབ་ཏུ་བྱུང་བའི་ཕྱོགས་ཀྱི་སྡོམ་པ་ལ་དབྱེ་བ་ཡིན་ཏེ། དེ་དག་བསྡོམས་པས་སོ་ཐར་རིས་བརྒྱད་པོ་རྫས་སུ་བསྡུ་ན་དགེ་སློང་ཕ་མ་གཉིས་རྫས་གཅིག །དགེ་ཚུལ་ཕ་མ་གཉིས་དང་དགེ་ཚུལ་མའི་བྱེ་བྲག་དགེ་སློབ་མ་བཅས་རྫས་གཅིག །དགེ་བསྙེན་ཕ་མ་གཉིས་རྫས་གཅིག་སྟེ་དེ་རྣམས་མཚན་ཕན་ཚུན་དུ་གྱུར་པས་མིང་འཕོ་བ་ཙམ་ལས་རྫས་ཐ་དད་པ་མེད་པའི་ཕྱིར་སྡོམ་རྫས་གསུམ་ཡིན་ལ། བསྙེན་གནས་ཀྱི་སྡོམ་པ་དང་བཞིར་བསྡུ་བར་འདོད་པ་མཛོད་ཀྱི་ལུགས་ཏེ། ཇི་སྐད་དུ། སོ་སོར་ཐར་ཅེས་བྱ་རྣམ་བརྒྱད། །རྫས་སུ་རྣམ་པ་བཞི་ཡིན་ནོ། །མཚན་ལས་མིང་ནི་འཕོ་བའི་ཕྱིར། །ཐ་དད་དེ་དག་འགལ་བ་མེད། །ཅེས་གསུངས་སོ། །གཉིས་པ་ཐོབ་བྱེད་ཆོ་གའི་ལག་ལེན་བྱེ་བྲག་ཏུ་བཤད་པ་ལ་ལྔ། མ་ཐོབ་པ་ཐོབ་པར་བྱེད་པའི་ཚུལ། ཐོབ་པ་མི་ཉམས་པར་བསྲུང་བའི་ཐབས། སྡོམ་པ་སྐྱེ་བའི་ལུས་རྟེན། ཉམས་ན་གསོ་བའི་ཐབས། དེ་ལྟར་བསྲུང་བའི་ཕན་ཡོན་ནོ། །དང་པོ་མ་ཐོབ་པ་ཐོབ་པར་བྱེད་པའི་ཚུལ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། དང་པོ་སྡོམ་པ་མ་ཐོབ་ཐོབ་ཚུལ་ལ། །ལེན་ཚུལ་གཉིས་ཏེ། ཞེས་པ་སྟེ། དེ་ལྟ་བུའི་སྡོམ་པ་དེ་ནི་འགའ་ཞིག་ཙམ་མ་གཏོགས་ཆོས་ཉིད་ཀྱིས་ཐོབ་པ་མ་ཡིན་ཅིང་། བརྡ་ལས་བྱུང་བ་ལ་ལྟོས་དགོས་པས་ན། དང་པོ་བསླབ་བྱའི་སྡོམ་པ་དེ་ཉིད་མ་ཐོབ་པ་ཐོབ་པའི་ཚུལ་ལ། ཚེགས་ཆུང་ངུས་རྫོགས་པ་སྔོན་ཆོག་དང་། ཚེགས་དང་བཅས་པས་རྫོགས་པ་ད་ལྟར་གྱི་ཆོ་ག་སྟེ་ལེན་པའི་ཚུལ་གཉིས་སུ་ངེས་པ་ཡིན་ཏེ་ཞེས་སོ། །གཉིས་པ་རྒྱས་པར་བཤད་པ་ལ་གཉིས། སྔོན་གྱི་ཆོ་ག་དང་། ད་ལྟར་གྱི་ཆོ་གའོ། །དང་པོ་སྔོན་ཆོ་ག་ནི། སྔོན་གྱི་ཆོ་ག་ནི། རང་བྱུང་ཡེ་ཤེས་ཁོག་ཆུད་འཕྲིན་གྱིས་རྫོགས། །སྟོན་པར་ཁས་བླངས་ཚུར་ཤོག་གསོལ་བཞི་དང་། །དྲིས་པའི་ལན་ལྡོན་ལྕི་ཆོས་ཁས་བླངས་སོགས། །གདུལ་བྱ་བློ་དག་མཁན་པོ་འཕགས་པས་ཡིན། །ཞེས་པ་སྟེ། དེ་ལ་དང་པོ་སྟོན་པ་སངས་རྒྱས་པའི་སྔོན་དུ་དང་། དེའི་ཚེ་དང་། དེ་ནས་ཡུན་རིང་པོ་མ་ལོན་པ་དང་། མྱ་ངན་ལས་འདའ་ཁ་ཡན་ཆོད་དུ་བྱུང་བ་ལ་སྔོན་གྱི་ཆོ་ག་ཞེས་བྱ་སྟེ། དེ་ནི་ཉན་ཐོས་བྱེ་བྲག་སྨྲ་བས། རྣམ་པ་བཅུས་བསྙེན་པར་རྫོགས་སོ་ཞེས་པ་ལྟར་དབྱེ་ན་བཅུ་ལས། རྫོགས་པའི་སངས་རྒྱས་དང་རང་སངས་རྒྱས་གཉིས་ཟད་པ་ཤེས་པ་དང་མི་སྐྱེ་བ་ཤེས་པས་བྱང་ཆུབ་བརྙེས་པའི་ཚེ་རང་བྱུང་གི་༡དང་། ལྔ་སྡེ་བཟང་པོ་མཐོང་ལམ་གྱི་ཡེ་ཤེས་སྐྱེས་པ་ཁོང་དུ་ཆུད་པས་༢དང་། དེ་གསུམ་ནི་རང་རྒྱུད་ལ་ངང་གིས་དོན་དམ་པའི་དགེ་སློང་སྐྱེས་པས་བསྙེན་པར་རྫོགས་པའོ། །མཆོད་སྦྱིན་མ་ཕ་མའི་དབང་དུ་སོང་བ་ལ་དགེ་སློང་མ་ཨུཏྤ་ལས་ཕོ་ཉ་བྱས་ཏེ་དགེ་འདུན་པའི་འཕྲིན་གྱིས་རྫོགས་༣པ་དང་། འོད་སྲུང་ཆེན་པོས། ཁྱོད་ནི་བདག་གི་སྟོན་པའོ། །བདག་ནི་ཁྱོད་ཀྱི་ཉན་ཐོས་སོ། །ཞེས་སྟོན་པར་ཁས་བླངས་པས་༤དང་། ཤཱ་རིའི་བུ་སོགས་སྲིད་པ་ཐ་མ་བ་འགའ་ཞིག་ལ། སྟོན་པས་བུ་ཚུར་ཤོག་ཚངས་པ་མཚུངས་པར་སྤྱོད་ཅིག་ཅེས་གསུངས་པ་ཙམ་གྱིས་བསྙེན་རྫོགས་ཀྱི་དངོས་པོར་གྱུར་པ་༥དང་། དགེ་འདུན་གྱི་གྲངས་ཡུལ་དབུས་སུ་བཅུ་ཚོགས་དང་། མཐའ་འཁོབ་ཏུ་ལྔ་ཚོགས་ཀྱིས་གསོལ་བཞིའི་ལས་ཀྱིས་རབ་བྱུང་བསྙེན་རྫོགས་གཅིག་ཆར་དུ་བྱས་པ་༦དང་། ལེགས་བྱིན་ལ་སྟོན་པས། གཅིག་ཏུ་བདེ་བ་ནི་གང་ཞེས་དྲིས་པ་ན། ཐར་པའོ་ཞེས་དང་། ལམ་དེ་ལ་མཁོ་བ་ནི་གང་ཞེས་དྲིས་པ་ལ། དད་པའོ་ཞེས་པའི་ལན་ལྡོན་པ་ལ་ཐུགས་དགྱེས་པ་ཙམ་གྱིས་༧དང་། སྲུ་སྐྱེ་རྒུའི་བདག་མོ་དང་། ཤཱཀྱའི་བུ་མོ་ལྔ་བརྒྱས་ལྕི་ཆོས་བརྒྱད་སྤོང་བར་ཁས་བླངས་པས་༨ཏེ། ལྕི་ཆོས་བརྒྱད་ནི། ཕའི་དགེ་འདུན་ལས་བསྙེན་པར་རྫོགས་པ༡། ཟླ་བ་ཕྱེད་ཕྱེད་ནས་ཕའི་དགེ་སློང་ལས་གདམས་སྡོམ་པ་ནོད་པ། ངག་གསོལ་བ༢། ཕའི་དགེ་སློང་ཡོད་སར་དབྱར་ཁས་བླངས་ཏེ་གནས་པ༣། གཉིས་ཀའི་ཚོགས་ལས་དགག་དབྱེ་བྱ་བ༤། དགེ་སློང་གི་ཚུལ་ཁྲིམས་འཆལ་བ་མི་བརྗོད་པ༥། དགེ་སློང་ལ་ཅོ་འདྲི་བ་སོགས་མི་བྱེད་པ༦། དགེ་སློང་གསར་བུ་ལའང་ཕྱག་འཚལ་བ་སོགས་གུས་པ་བྱ་བ༧། ལྕི་ཆོས་ལས་འདས་ན་ཕའི་དགེ་འདུན་ལས་མགུ་བ་སྤྱད་པ་༨རྣམས་སོ། །སོགས་ཀྱི་སྒྲས་བཟང་སྡེའི་ཚོགས་དྲུག་ཅུ་སྐྱབས་གསུམ་ཁས་བླངས་པས་བསྙེན་པར་༩རྫོགས་པའོ། །དེ་ལ་སྔོན་ཆོག་བཏགས་པ་བ་དགུ་དང་། དངོས་གནས་པ་གཅིག་གསོལ་བཞིའི་ལས་ཀྱིས་རྫོགས་པ་སྟེ། དེ་དག་ནི་སྔོན་གྱི་གདུལ་བྱ་རྣམས་ལས་ཉོན་རྣམ་སྨིན་གྱི་སྒྲིབ་པ་གསུམ་ཤས་ཆུང་ཞིང་། ཤེས་རབ་རྒྱུད་དང་དབང་པོ་སྨིན་པས་བློ་དག་པ་དང་། རྫོགས་བྱེད་ཀྱི་མཁན་པོ་ཡང་འཕགས་པ་ཁོ་ནའི་ཁྱད་ཆོས་ཡིན་པས་༡༠ཚེགས་མེད་པའོ། །གཉིས་པ་ད་ལྟར་གྱི་ཆོ་ག་ལ་གསུམ། བསྒྲུབ་བྱ་གང་ཟག་གི་མཚན་ཉིད། སྒྲུབ་བྱེད་མཁན་སློབ་སོགས་ཀྱི་མཚན་ཉིད། ཇི་ལྟར་བསྒྲུབ་པའི་ཚུལ་ལོ། །དང་པོ་བསྒྲུབ་བྱ་གང་ཟག་གི་མཚན་ཉིད་ནི། ད་ལྟའི་ཆོ་ག་ངེས་པ་ལྔ་བྲལ་ཞིང་། །མ་ནིང་ལ་སོགས་སྐྱེ་བའི་བར་ཆད་དང་། །རྒྱལ་པོས་མ་གནང་ལ་སོགས་གནས་པ་དང་། །བྱ་རོག་སྐྲོད་མི་ནུས་སོགས་ཁྱད་པར་དང་། །སྐྲ་སེར་ཅན་སོགས་མཛེས་པའི་བར་ཆད་མེད། །ངེས་འབྱུང་བློ་ཅན་སྐལ་བཟང་སྐྱེས་བུ་དེ། །ཞེས་པ་སྟེ། ད་ལྟའི་ཆོ་ག་འགལ་རྐྱེན་རང་རང་གི་བསླབ་བྱ་ལ་ལྟོས་ནས་ངེས་པ་ལྔ་དང་བྲལ་བ་དགེ་སློང་ལ་དངོས་དང་དགེ་ཚུལ་ལའང་ཆ་འདྲ་བ་ཞིག་དགོས་ཏེ། མཐུན་རྐྱེན་ཚང་བའི་ཡུལ་འདིར་བསྲུང་གི་གཞན་དུ་བསྲུང་མི་ནུས་སྙམ་པ་ལྟ་བུ་ཡུལ་ངེས་པ་དང་། ལོ་དང་ཟླ་བ་འདི་ཙམ་དུ་བསྲུང་གི་དེ་ཕན་ཆོད་བསྲུང་མི་ནུས་སྙམ་པ་ལྟ་བུ་དུས་ངེས་པ། འཐབ་རྩོད་ཀྱི་སྐབས་མ་གཏོགས་གཞན་དུ་བསྲུང་སྙམ་པ་ལྟ་བུ་ཚེ་ངེས་པ་དང་། དགྲ་མ་གཏོགས་གཞན་གྱི་སྲོག་མི་གཅོད་སྙམ་པ་ལྟ་བུ་སེམས་ཅན་ངེས་པ། བསླབ་བྱ་རགས་པ་རྣམས་ལས་ཕྲ་བ་རྣམས་ལ་བསླབ་མི་ནུས་སྙམ་པ་ལྟ་བུ་ཡན་ལག་ངེས་པ་སྟེ་དེ་ལྔ་དང་བྲལ་ཞིང་། དེར་མ་ཟད་འགལ་རྐྱེན་བར་ཆད་ཀྱི་ཆོས་བཞི་དང་མི་ལྡན་པ་ཞིག་དགོས་ཏེ། མ་ནིང་ལ་སོགས་པ་འོག་ཏུ་འཆད་པ་ལྟར་སྡོམ་པའི་རྟེན་མིན་པ་རྣམས་ལ་ནི་སྡོམ་པ་ཕོག་ཀྱང་མི་སྐྱེ་བས་ན་སྐྱེ་བའི་བར་ཆད་ཅན་དང་། རྒྱལ་པོ་དང་ཕ་མས་མ་གནང་བ་ལ་སོགས་པ་ལ་སྡོམ་པ་སྐྱེ་ཡང་རང་དབང་དུ་མ་གྱུར་པས་འབབ་དགོས་པ་སོགས་ཡུན་རིང་པོར་མི་གནས་པའི་བར་ཆད་དང་། བྱ་རོག་སྐྲོད་མི་ནུས་པའི་བྱིིས་པའམ་ནད་དང་སྡུག་བསྔལ་གྱིས་གཟིར་བ་སོགས་ལ་སྡོམ་པ་སྐྱེ་གནས་གཉིས་ཀའི་རྟེན་དུ་རུང་ཡང་བསླབ་པ་ལ་སྦྱོར་མི་བཟོད་པས་ཡོན་ཏན་གོང་ནས་གོང་དུ་ཁྱད་པར་དུ་འགྱུར་མི་ནུས་པའི་བར་ཆད་དང་། སྐྲ་སེར་ཅན་སོགས་ཁ་དོག་ལ་སྐྱོན་ཆགས་པ་དང་། ལག་ཟླུམ་སོགས་ལུས་བྱད་མི་སྡུག་པ་དབྱིབས་ལ་སྐྱོན་ཆགས་པ་དང་། བཤན་པ་སོགས་རིགས་ལ་སྐྱོན་ཆགས་པ་སྟེ་དེ་དག་ལ་སྡོམ་པ་སྐྱེ་གནས་ཁྱད་པར་དུ་འགྱུར་བ་གསུམ་ཀ་རུང་ཡང་ལུས་བྱད་མི་སྡུག་པ་སོགས་ཀྱི་རྐྱེན་གྱིས་ཁྱིམ་པ་རྣམས་བསྟན་པ་ལ་མ་དད་པའི་རྒྱུ་བྱེད་པའི་ཕྱིར་ན་མཛེས་པའི་བར་ཆད་དེ་རྣམས་མེད་པ་དགོས་ལ། འོན་ཀྱང་ཕྱི་མ་གཉིས་པོ་འདི་བསྟན་པ་ལ་ཕན་པ་སོགས་དགོས་པ་ཁྱད་པར་ཅན་ཡོད་ན་སྡོམ་པ་སྐྱེ་ལ་ཉེས་བྱས་ཙམ་ལས་དགག་བྱ་ཆེ་བ་རང་མེད་དོ། །དེ་ལྟ་ན་དགག་ཕྱོགས་ནས་ངེས་པ་ལྔ་དང་བྲལ་ཞིང་བར་ཆད་བཞི་དང་མི་ལྡན་པ་དང་། སྒྲུབ་ཕྱོགས་ནས་མཐུན་རྐྱེན་ཕུན་སུམ་ཚོགས་པ་ལྔ་དང་ལྡན་པ་སྟེ། རྒྱུད་ཚོགས་སུ་མ་ཚང་ཞིང་སྡོམ་རོ་མེད་པ། ལོ་ཉི་ཤུ་ལོན་པ། ཤེས་པ་རང་བཞིན་དུ་གནས་པ། ཆོས་གོས་གསུམ་དང་ལྷུང་བཟེད་ཚང་བ། ཐོབ་མཚམས་སོགས་ཀྱི་དོན་གོ་ཞིང་བརྡའ་འཕྲོད་པ་བཅས་གཞིར་བཞག །ཁྱད་པར་འཇིགས་སྐྱོབ་དང་ལེགས་སྨོན་ཙམ་མ་ཡིན་པར་ངེས་པར་འབྱུང་བའི་བློས་མྱང་འདས་གསུམ་གང་རུང་དོན་དུ་གཉེར་བའི་བློ་ཅན་སྐལ་པ་བཟང་པོའི་སྐྱེས་བུ་དེ་ལྟ་བུ་ནི་སྣོད་དང་ལྡན་པ་ཡིན་ནོ། །གཉིས་པ་སྒྲུབ་བྱེད་མཁན་སློབ་སོགས་ཀྱི་མཚན་ཉིད་ནི། ལེགས་གསུངས་འདུལ་བ་རྒྱ་མཚོ་མཐའ་དག་དང་། །བརྒྱ་རྩ་གཅིག་པའི་ལས་ཕྲན་ལ་བྱང་བའི། །མཁན་པོར་བཅས་པས། ཞེས་པ་སྟེ། སྒྲུབ་པར་བྱེད་པ་པོ་མཁན་སློབ་དགེ་འདུན་རྣམས་ཀྱང་ཁ་སྐོང་གི་ཆོས་བཅུ་གསུམ་ཚང་བ། མཁས་པའི་ཡོན་ཏན་སྡེ་སྣོད་གསུམ་སྤྱི་དང་ཁྱད་པར་དུ་ལེགས་པར་གསུངས་པ་ལུང་བཞིས་བསྡུས་པའི་འདུལ་བ་རྒྱ་མཚོ་མཐའ་དག་གི་ཚིག་དོན་མ་ལུས་པ་ཁོང་དུ་ཆུད་པ་དང་། དེ་ལས་ཀྱང་ལས་བརྒྱ་རྩ་གཅིག་པའི་ལས་ཕྲན་རེ་རེ་བཞིན་ལ་ཚིག་ཕྱེད་ཀྱང་མ་འཁྲུལ་བར་བློ་ཐོག་ནས་ཐོན་ཅིང་ལག་ལེན་སོགས་ཤིག་ཏུ་བྱང་བ། བཙུན་པའི་ཡོན་ཏན་ཚུལ་ཁྲིམས་རྣམ་པར་དག་པ། བཤགས་སྡོམ་བྱིན་རླབས་ཚུན་ཆད་ཀྱིས་ཉེས་བྱས་ཕྲ་བ་ཙམ་གྱིས་ཀྱང་མ་གོས་པ། དམིགས་བསལ་བསྒྲུབ་བྱའི་ངོས་ནས་མཐོང་ཐོས་དོགས་གསུམ་གྱི་སྐྱོན་མེད་པ་དང་། ཁྱད་པར་བསྙེན་པར་རྫོགས་ནས་ལོ་བཅུ་ལོན་ཅིང་བརྟན་མཁས་ཀྱི་ཡོན་ཏན་ཕུལ་དུ་བྱུང་བའི་མཁན་པོ་དང་ལས་སློབ་དག་ཡུལ་དབུས་མཐའི་ཁྱད་པར་གྱིས་དགེ་འདུན་བཅུ་ཚོགས་སམ་ལྔ་ཚོགས་དང་བཅས་པས་སོ། །གསུམ་པ་ཇི་ལྟར་བསྒྲུབ་པའི་ཚུལ་ནི། རིམ་བཞིན་བསྙེན་པར་རྫོགས། །སྔ་མ་མ་བྱས་རྫོགས་པའང་མདོ་སྡེར་སྣང་། །ཐོབ་མཚམས་བརྗོད་པ་གསུམ་གྱི་ཐ་མར་འདོད། །ཅེས་པ་སྟེ། དེ་ལྟ་བུའི་དགེ་འདུན་གྱི་དབུས་སུ་དགེ་བསྙེན། དགེ་ཚུལ། དགེ་སློང་སྟེ་བསླབ་ཚིགས་གསུམ་པོ་རིམ་པར་འབོགས་པའི་ཆོ་ག་བཞིན་དུ་བསྙེན་པར་རྫོགས་པར་བྱ་བ་ཡིན་ལ། གལ་ཏེ་བསླབ་ཚིགས་སྔ་མ་གཉིས་མ་བྱས་པར་བསྙེན་པར་རྫོགས་པའང་དྲིན་ལན་བསབ་པའི་མདོ་སྡེར་སྣང་སྟེ། ཇི་སྐད་དུ། མ་འགག་པས་ཡང་གསོལ་པ། གལ་ཏེ་ཁྱིམ་པ་ཁྲིམས་ལྔ་མ་ནོས་པར་ཐལ་བྱུང་དུ་ཁྲིམས་བཅུ་ནོས་ན། ཁྲིམས་ཐོབ་པར་འགྱུར་རམ། བཀའ་སྩལ་པ། དུས་གཅིག་ཏུ་དགེ་བསྙེན་གྱི་ཁྲིམས་དང་དགེ་སྦྱོང་གི་ཁྲིམས་རྣམ་པ་གཉིས་ཐོབ་བོ། །གལ་ཏེ་ཁྲིམས་ལྔ་ཡང་མ་ནོས། ཁྲིམས་བཅུ་ཡང་མ་ནོས་པར་ཐལ་བྱུང་དུ་ཁྲིམས་རྫོགས་པར་ནོས་ནའང་དུས་གཅིག་ཏུ་ཁྲིམས་གསུམ་ཆར་ཐོབ་པར་འགྱུར་རོ། །ཞེས་དང་། ལུང་ལས། ཁྱིམ་པ་རབ་ཏུ་མ་བྱུང་བ་ཞིག་བསྙེན་པར་རྫོགས་པར་བགྱི་ན་བསྙེན་པར་རྫོགས་ཞེས་བགྱིའམ། མ་རྫོགས་ཞེས་བགྱི། ཉེ་བར་འཁོར་བསྙེན་པར་རྫོགས་ཞེས་བྱའོ། །ཞེས་གསུངས་པའི་ཕྱིར་ཏེ། འདི་ནི་ཚིག་ཕྱི་མ་བླངས་པས་སྔ་མ་ཞར་ལ་ཐོབ་པའི་དོན་དུ་སྣང་མོད། འོན་ཀྱང་འདུལ་བ་རང་ལས་སྡོམ་པ་སྐྱེ་ལ་ཉེས་བྱས་སུ་འགྱུར་ཞེས་བཤད་དོ། །དེ་ལྟར་ནོད་པའི་སྡོམ་པ་དེ་བསྒྲུབ་བྱའི་རྒྱུད་ལ་ཐོབ་པའི་མཚམས་ནི་དགེ་འདུན་གྱིས་གསོལ་བ་སྔོན་དུ་འགྲོ་བས་ལས་བརྗོད་པ་ལན་གསུམ་གྱི་ཐ་མའི་བྱ་བ་བརྗོད་པ་རྫོགས་མ་ཐག་པ་དེར་སྡོམ་པ་སྐྱེ་བར་འདོད་པ་ཡིན་ནོ། །གཉིས་པ་ཐོབ་པ་མི་ཉམས་པར་བསྲུང་བའི་ཐབས་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། བར་དུ་ཐོབ་པ་མི་ཉམས་བསྲུང་བ་ལ། །ཞེས་པ་སྟེ། དེ་ལྟར་སྡོམ་པ་དེ་ཉིད་ཐོབ་པ་ཙམ་གྱིས་མི་ཆོག་གི། བར་དུ་ཐོབ་ཟིན་པ་དེ་ཉིད་མི་ཉམས་པར་ཚུལ་བཞིན་བསྲུང་དགོས་ཏེ། མ་བསྲུང་ན་ཉེས་དམིགས་ཆེན་པོ་དང་། བསྲུང་ན་ཕན་ཡོན་ཆེན་པོ་དང་ལྡན་པའི་ཕྱིར། དགེ་སློང་ལ་རབ་ཏུ་གཅེས་པའི་མདོ་ལས། ལ་ལའི་ཚུལ་ཁྲིམས་བདེ་བ་སྟེ། །ལ་ལའི་ཚུལ་ཁྲིམས་སྡུག་བསྔལ་ཡིན། །ཚུལ་ཁྲིམས་ལྡན་པ་བདེ་བ་སྟེ། །ཚུལ་ཁྲིམས་འཆལ་པ་སྡུག་བསྔལ་ཡིན། །ཞེས་གསུངས། དེས་ན་བསྲུང་བའི་ཐབས་སུ་དགག་སྒྲུབ་ཀྱི་བསླབ་བྱ་གཉིས་སུ་ཤེས་ནས་སྤང་བླང་ཚུལ་བཞིན་དུ་བྱ་དགོས་པས་ན། དང་པོ་དགག་ཕྱོགས་ཀྱི་བསླབ་བྱ་ལ་སློབ་པའི་རྣམ་གྲངས་འདི་ལྟར་རོ་ཞེས་སོ། །གཉིས་པ་རྒྱས་པར་བཤད་པ་ལ་གཉིས། དངོས་བསྟན་བླང་དོར་གྱི་བསླབ་བྱ་རྒྱས་པར་བཤད་པ། ཤུགས་བསྟན་དེའི་རུང་མཐུན་བསྡུས་ཏེ་བསྟན་པའོ། །དང་པོ་དངོས་བསྟན་བླང་དོར་གྱི་བསླབ་བྱ་རྒྱས་པར་བཤད་པ་ལའང་གཉིས། ཁྱིམ་པའི་ཕྱོགས་ཀྱི་བསླབ་བྱ་དང་། རབ་བྱུང་གི་ཕྱོགས་ཀྱི་བསླབ་བྱའོ། །དང་པོ་ཁྱིམ་པའི་ཕྱོགས་ཀྱི་བསླབ་བྱ་ལའང་གསུམ། སྐྱབས་འགྲོ། བསྙེན་གནས། དགེ་བསྙེན་གྱི་བསླབ་བྱའོ། །དང་པོ་སྐྱབས་འགྲོ་ལའང་གཉིས། མཆོག་གསུམ་སོ་སོའི་ཐུན་མོང་མ་ཡིན་པའི་བསླབ་བྱ་དང་། གསུམ་ཀའི་ཐུན་མོང་གི་བསླབ་བྱའོ། །དང་པོ་མཆོག་གསུམ་སོ་སོའི་ཐུན་མོང་མ་ཡིན་པའི་བསླབ་བྱ་ནི། བསླབ་བྱ་སྐྱབས་འགྲོ་ཐུན་མོང་མིན་གསུམ་ནི། །སྐྱབས་གཞན་མི་འཚོལ་སེམས་ཅན་འཚེ་བ་སྤོངས། །མུ་སྟེགས་མི་འགྲོགས་སོ་སོར་གུས་བསྐྱེད་དོ། །ཞེས་པ་སྟེ། ཐོག་མ་ཉིད་དུ་བསླབ་པར་བྱ་བའི་གནས་དཀོན་མཆོག་གསུམ་ལ་སྐྱབས་སུ་འགྲོ་བའི་གང་ཟག་གིས་ཐུན་མོང་མིན་པའི་བསླབ་བྱ་གསུམ་ནི་རིམ་པ་བཞིན། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་སོགས་སྐྱབས་གནས་གཞན་མི་འཚོལ་བ་དང་། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་པའི་སེམས་ཀྱི་འཚེ་བའི་རིགས་སྤོང་བ་དང་། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་ནམ་དེའི་ཕྱོགས་མཐུན་ལྟ་ལོག་ཅན་རྣམས་དང་མི་འགྲོགས་པ་བཅས་དགག་བྱ་གསུམ་སྟེ། མྱང་འདས་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་མི་བྱ། །ཞེས་སོ། །སངས་རྒྱས་ཀྱི་སྐུའི་རྟེན་དང་སཱཙྪའི་ཆག་དུམ་ཙམ་ཚུན་དང་། ཆོས་ཀྱི་རྟེན་གསུང་རབ་ཡིག་འབྲུ་གཅིག་ཚུན་དང་། དགེ་འདུན་གྱི་གཟུགས་ལྷན་པ་སེར་པོ་བཏབ་པ་ཡན་ཆད་ལ་སོ་སོར་དཀོན་མཆོག་དེ་དང་དེའི་འདུ་ཤེས་བཞག་ནས་གུས་པ་བསྐྱེད་དོ ། །དེ་རྣམས་ནི་སྒྲུབ་པའི་བསླབ་བྱའོ། །གཉིས་པ་གསུམ་ཀའི་ཐུན་མོང་གི་བསླབ་བྱ་ནི། སྲོག་དང་བྱ་དགར་དཀོན་མཆོག་གསུམ་མི་སྤང་། །དགོས་གལ་ཆེ་ཡང་ཐབས་གཞན་མི་འཚོལ་ཞིང་། །དུས་མཆོད་མི་བཅག་རང་གཞན་སྐྱབས་འགྲོར་འགོད། །གར་འགྲོའི་ཕྱོགས་ཀྱི་སངས་རྒྱས་ལ་ཕྱག་འཚལ། །ལྔ་རྣམས་ཐུན་མོང་བསླབ་བྱར་ཇོ་བོས་བཞེད། །ཅེས་པ་སྟེ། རང་གི་སྲོག་གི་ཕྱིར་དང་། རྒྱལ་སྲིད་ལ་སོགས་པའི་བྱ་དགའ་ཆེན་པོའི་ཕྱིར་ཡང་དཀོན་མཆོག་གསུམ་མི་སྤོང་པ་དང་། དགོས་གལ་ཇི་ལྟར་ཆེ་ཡང་དཀོན་མཆོག་གསུམ་ལ་བློ་གཏོད་པ་ལས་འཇིག་རྟེན་པའི་ཐབས་གཞན་མི་འཚོལ་ཞིང་། རྟག་ཏུ་དཀོན་མཆོག་གསུམ་གྱི་ཡོན་ཏན་དྲན་པས་དུས་ཀྱི་མཆོད་པ་མི་བཅག་པ་དང་། ཕན་ཡོན་ཤེས་པས་རང་སྐྱབས་སུ་འགྲོ་ཞིང་གཞན་རྣམས་ཀྱང་སྐྱབས་སུ་འགྲོ་བར་འགོད་པ་དང་། རང་ཉིད་གར་འགྲོ་ནའང་དེའི་ཕྱོགས་ཀྱི་སངས་རྒྱས་ཡིད་ལ་བྱ་ཞིང་སྐུ་གཟུགས་སོགས་ལ་ཕྱག་འཚལ་བ་སྟེ། དེ་ལྔ་པོ་རྣམས་ནི་དཀོན་མཆོག་གསུམ་པོ་ཐུན་མོང་གི་བསླབ་བྱ་ཡིན་པར་ཇོ་བོ་རྗེས་བཞེད་པར་གསུངས་སོ། །གཉིས་པ་བསྙེན་གནས་ཀྱི་བསླབ་བྱ་ལ་གཉིས། དུས་ཁྲིམས་ཀྱི་བསླབ་བྱ་དངོས་བཤད་པ། དེ་གཏན་ཁྲིམས་སུ་བྱིན་ན་གོ་མིའི་དགེ་བསྙེན་དུ་འགྱུར་ཚུལ་ལོ། །དང་པོ་དུས་ཁྲིམས་ཀྱི་བསླབ་བྱ་དངོས་བཤད་པ་ནི། །རྩ་བཞི་སྤོང་བ་ཚུལ་ཁྲིམས་ཡན་ལག་ཡིན། །ཆང་སྤོང་བག་ཡོད་ཡན་ལག་མལ་ཆེ་མཐོ། །གར་ཕྲེང་ལ་སོགས་ཕྱི་དྲོའི་ཁ་ཟས་གསུམ། །བརྟུལ་ཞུགས་ཡན་ལག་བསྙེན་གནས་སྡོམ་པ་ཡིན། །ཡན་ལག་འདི་བརྒྱད་གཏན་དུ་མ་ཡིན་པས། །ཡོན་ཏན་བརྟེན་མིན་དེ་ཕྱིར་སོ་ཐར་ནི། །མཚན་ཉིད་ལྡན་པ་རིས་བདུན་ཁོ་ན་ཡིན། །ཞེས་པ་སྟེ། སྲོག་གཅོད་པ། མ་བྱིན་པ་ལེན་པ། མི་ཚང་སྤྱོད་པ། རྫུན་སྨྲ་བ་སྟེ་རྩ་བ་བཞི་ཕྱོགས་མཐུན་དང་བཅས་པ་སྤོང་བ་ཚུལ་ཁྲིམས་བརྟན་པར་བྱེད་པའི་ཡན་ལག་ཡིན་ལ། ཆང་བཏུང་བ་སྤོང་བ་བག་ཡོད་གོང་འཕེལ་དུ་བྱེད་པའི་ཡན་ལག་དང་། མལ་ཆེན་པོ་དང་མཐོན་པོ་གཉིས་དང་། གར་འཁྲབ་པ་དང་། རྒྱན་ཕྲེང་འདོགས་པ་ལ་སོགས་པ་དང་། དུས་མིན་པ་ཕྱི་དྲོའི་ཁ་ཟས་བཅས་དེ་གསུམ་སྤོང་བ་བརྟུལ་ཞུགས་དག་པར་བྱེད་པའི་ཡན་ལག་སྟེ། འདི་བརྒྱད་པོ་བསྲུང་པ་ནི་བསྙེན་གནས་ཀྱི་སྡོམ་པ་ཡིན་ཏེ། མཛོད་ལས། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་དེ་བཞིན་གསུམ་རིམ་བཞིན། །ཞེས་ཡན་ལག་གི་ངེས་པ་དང་། གཞན་ལ་བསྙེན་གནས་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་རྟེན་གྱི་ངེས་པ་བསྟན་པ་བཞིན་དང་། གཞན་ཡང་། དྲན་པ་ཉེར་བཞག་ལས། བདག་ལ་འདི་ཡིས་མི་གནོད་ཅེས། །བློ་ལྡན་ཆང་ལ་ཡིད་མི་རྟོན། །མྱོང་ཚེ་བསིལ་ཡང་རྣམ་སྨིན་ཚ། །ཆང་གིས་དམྱལ་བར་འགྲོ་བར་བྱེད། །ཅེས་སོ། །དེ་ལྟར་ཡན་ལག་འདི་བརྒྱད་པོ་ཉིན་ཞག་ཕྲུག་གཅིག་གི་དུས་ཁྲིམས་ལས་གཏན་དུ་བཅས་པའི་ཁྲིམས་མ་ཡིན་པས་ན། སྡོམ་པ་གོང་མ་རྣམས་ཀྱི་ཡོན་ཏན་སྐྱེ་བའི་རྟེན་མིན་པས་དེའི་ཕྱིར་ན་གོང་མའི་ཡོན་ཏན་གྱི་རྟེན་དུ་གྱུར་པ་སོ་ཐར་ནི་མཚན་ཉིད་དང་ལྡན་པ་རིས་བདུན་ཁོ་ན་ཡིན་པར་ངེས་ཏེ། ལམ་སྒྲོན་ལས། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་པ་ཡོད་ཀྱི་གཞན་དུ་མིན། །ཞེས་གསུངས་སོ། །གཉིས་པ་དེ་ཉིད་གཏན་ཁྲིམས་སུ་བྱིན་ན་གོ་མཱིའི་དགེ་བསྙེན་དུ་འགྱུར་ཚུལ་ནི། འདི་བརྒྱད་ཇི་སྲིད་འཚོ་ཡི་བར་བསྲུང་ན། །གོ་མཱིའི་དགེ་བསྙེན་ཡིན་ཀྱང་ཡོད་སྨྲའི་མིན། །གནས་བརྟན་སྡེ་པའི་ལུགས་སུ་དབྱིག་གཉེན་བཞེད། །ཅེས་པ་སྟེ། གལ་ཏེ་ཡན་ལག་འདི་བརྒྱད་པོ་ཇི་སྲིད་འཚོ་ཡི་བར་དུ་ཁས་བླངས་ནས་བསྲུང་ན། སློབ་དཔོན་ཙནྡྲ་པས་འདི་ལྟར་བླངས་པས་ཙནྡྲ་གོ་མཱི་ཞེས་གྲགས་པ་ལྟར་གོ་མཱིའི་དགེ་བསྙེན་ཡིན་ཀྱང་། གཞི་ཐམས་ཅད་ཡོད་པར་སྨྲ་བའི་ལུགས་ཀྱི་འདུལ་བ་ལས་བཤད་པ་མིན་མོད་ཀྱང་། འཕགས་པ་གནས་བརྟན་སྡེ་པའི་ལུགས་སུ་ཡིན་པར་སློབ་དཔོན་དབྱིག་གཉེན་གྱིས་བཞེད་དེ། ཇི་སྐད་དུ། གོ་མཱིའི་དགེ་བསྙེན་ཞེས་བྱ་བ་འདི་ནི་འཕགས་པ་གནས་བརྟན་སྡེ་པའི་མན་ངག་བརྒྱུད་པ་ལས་ཐོས་ཀྱི་བདེ་བར་གཤེགས་པས་གསུངས་པ་ནི་མ་མཐོང་ངོ་། །ཞེས་གསུངས། འོན་ཀྱང་ཐེག་ཆེན་གྱི་སྡེ་སྣོད་ལས་འབྱུང་སྟེ། རྒྱལ་བུ་སྙིང་རྗེ་ཆེར་སེམས་ཀྱིས་འདི་ལྟར་ཁས་བླངས་པར་དཀོན་མཆོག་བརྩེགས་པ་ལས་གསུངས་པའི་ཕྱིར་རོ། །གསུམ་པ་དགེ་བསྙེན་གྱི་བསླབ་བྱ་ལ་གསུམ། དགེ་བསྙེན་གྱི་སྤང་བྱ་ལྔ་ངོས་བཟུང་བ། དེ་བསྲུང་ཚུལ་གྱི་གྲངས་ལས་དགེ་བསྙེན་གྱི་དབྱེ་བ་བཤད་པ། ཕྱོགས་མཐུན་གྱི་བསླབ་བྱ་བསྟན་པའོ། །དང་པོ་དགེ་བསྙེན་གྱི་སྤང་བྱ་ངོས་བཟུང་བ་ནི། གསོད་རྐུ་རྫུན་སྨྲ་འདོད་པས་ལོག་པར་གཡེམ། །མྱོས་འགྱུར་སྤོང་རྣམས་དགེ་བསྙེན་སྡོམ་པ་སྟེ། །ཞེས་པས། དེ་ལ་བསྲུང་བྱ་ནི་གསོད་པ་སྟེ་སྲོག་གཅོད་པ་དང་། རྐུ་བ་སྟེ་མ་བྱིན་པ་ལེན་པ་དང་། མིའི་ཆོས་བླ་མའི་རྫུན་སྨྲ་བ་དང་། འདོད་པས་ལོག་པར་གཡེམ་པ་སྟེ་རྩ་བ་བཞི་ཡིན་ཅིང་། འདི་དག་ལ་ཡུལ་གྱི་ཡན་ལག་ཏུ་མི་ཡིན་པ་དགོས་ཏེ། དེ་མ་ཚང་ན་རྩ་བར་གཏོགས་པའི་ཉེས་པ་ཙམ་དུ་ཟད་ཀྱི་རྩ་བ་དངོས་མ་ཡིན་པས་སྡོམ་པ་ཉམས་པར་མི་འགྱུར་ལ། འདིར་མི་ཚངས་སྤྱོད་མི་འཇོག་པར་འདོད་ལོག་འཇོག་པ་ནི་ཁྱིམ་པས་བསྲུང་སླ་བ་ལ་སོགས་པའི་ཕྱིར་ཏེ། མཛོད་ལས། ལོག་གཡེམ་ཤིན་ཏུ་དམད་ཕྱིར་དང་། །སླ་ཕྱིར་མི་བྱེད་ཐོབ་ཕྱིར་རོ། །ཞེས་སོ། །དེ་དག་གི་ཡན་ལག་ཏུ་མྱོས་འགྱུར་སྤོང་བ་སྟེ་དེ་མ་སྤང་ན་བསླབ་པ་གཞན་བསྲུང་མི་ནུས་པའི་ཕྱིར་བསླབ་གཞི་ལྔ་པོ་དེ་རྣམས་ནི་དགེ་བསྙེན་གྱི་སྡོམ་པ་སྟེ། དང་པོ་བཞི་རྩ་བ་དང་། ཕྱི་མ་གཅིག་ཡན་ལག་གོ། །གཉིས་པ་དེ་བསྲུང་ཚུལ་གྱི་གྲངས་ལས་དགེ་བསྙེན་གྱི་དབྱེ་བ་བཤད་པ་ལ་གཉིས། ཉན་ཐོས་བྱེ་བྲག་སྨྲ་བའི་ལུགས་དང་། མདོ་སྡེ་པའི་ལུགས་སོ། །དང་པོ་ཉན་ཐོས་བྱེ་བྲག་སྨྲ་བའི་ལུགས་ནི། གང་འདོད་ཁས་ལེན་གྲངས་ལྟར་སྣ་གཅིག་སྤྱོད། །སྣ་འགའ་ཕལ་ཆེར་སྤྱོད་དང་ཡོངས་རྫོགས་སྤྱོད། །གཅིག་གཉིས་གསུམ་དང་ལྔ་སྤོང་། ཞེས་པ་སྟེ། རང་གི་གང་བསྲུང་འདོད་པ་ལྟར་ཁས་ལེན་པའི་གྲངས་ཇི་ལྟ་བར་སྲོག་གཅོད་པ་ཙམ་སྤོང་བ་ལྟ་བུ་སྣ་གཅིག་སྤྱོད་པ་དང་། དེའི་སྟེང་དུ་མ་བྱིན་ལེན་ཙམ་སྤོང་བ་ལྟ་བུ་སྣ་འགའ་སྤྱོད་པ་དང་། དེ་གཉིས་ཀྱི་སྟེང་དུ་རྫུན་སྤོང་བ་ལྟ་བུ་ཕལ་ཆེར་སྤྱོད་པ་དང་། དེ་གསུམ་གྱི་སྟེང་དུ་འདོད་ལོག་ཆང་དང་བཅས་པ་སྤོང་བ་ཡོངས་རྫོགས་སྤྱོད་པ་སྟེ། དེ་དག་རིམ་བཞིན་སྤང་བྱ་གཅིག་དང་། གཉིས་དང་། གསུམ་དང་། ལྔ་སྤོང་བའི་རིམ་པའོ། །དེའང་དང་པོ་ཡོངས་རྫོགས་དགེ་བསྙེན་གྱི་བསླབ་པ་ནོད་ནས་ཕྱིས་སྣ་གཅིག་སོགས་གང་འདོད་ལྟར་བསྲུང་བ་ལ་དེ་དག་སྤྱོད་ཅེས་འདོད་དོ། །གཉིས་པ་མདོ་སྡེ་པའི་ལུགས་ནི། དེ་ཡི་སྟེང་། མི་ཚངས་སྤྱོད་སྤོང་ཚངས་སྤྱོད་དགེ་བསྙེན་ནོ། །འདི་དང་གོ་མཱི་གཉིས་ནི་ཁྱིམ་པ་དང་། །རབ་བྱུང་གཉིས་ཀ་མིན་ཞེས་མཁས་རྣམས་བཞེད། །ཅེས་པ་སྟེ། གོང་གི་བསླབ་གཞི་ལྔ་པོ་དེ་ཡི་སྟེང་དུ་མི་ཚངས་པར་སྤྱོད་པ་སྤོང་བ་ནི་ཚངས་སྤྱོད་དགེ་བསྙེན་ཏེ། ཇི་སྐད་དུ། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ལ། །ཞེས་སོགས་ཀྱིས་བསྟན་པར་མདོ་སྡེ་པས་འདོད་པ་ཡིན་ནོ། །འདི་དང་གོ་མིའི་དགེ་བསྙེན་གཉིས་ནི་ཁྱིམ་ཐབས་སྤངས་པས་འདོད་པ་འཁྲིག་བཅས་ཀྱི་ཁྱིམ་པ་དང་། ངུར་སྨྲིག་སོགས་ཀྱི་རྟགས་མ་བླངས་པས་རབ་བྱུང་གཉིས་ཀ་མིན་ནོ་ཞེས་མཁས་པ་རྣམས་བཞེད་ལ། གཞན་ཡང་། འདི་གཉིས་ཀྱི་ཚུལ་ཆོ་འཕྲུལ་བསྟན་པའི་མདོ་ལས་གསལ་བར་གསུངས་ཏེ། ཇི་སྐད་དུ། རབ་བྱུང་ཡོན་ཏན་དུ་མ་ལྡན་པ་ཞེས། །དེ་བཞིན་གཤེགས་པ་རྣམས་ཀྱིས་བསྔགས་མོད་ཀྱི། །སེམས་ཅན་ཀུན་ལ་སྙིང་རྗེར་གྱུར་པས་ན། །འགྲོ་ལ་ཕན་ཕྱིར་བདག་གིས་རྒྱལ་སྲིད་སྒྲུབ། །ཇི་སྲིད་འཚོའི་བར་ཚངས་པར་སྤྱོད་བྱེད་ཅིང་། །གསོ་སྦྱོང་ཡན་ལག་བརྒྱད་པའང་བླང་བར་བགྱི། །ཞེས་གསུངས་སོ། །གསུམ་པ་ཕྱོགས་མཐུན་གྱི་བསླབ་བྱ་བསྟན་པ་ལ་གཉིས། དངོས་དང་། སྔགས་པ་ཁྱིམ་པས་ཀྱང་བསླབ་དགོས་པར་ག དམས་པའོ། །དང་པོ་དངོས་ནི། མི་དགེ་ལྷག་དྲུག་ཕྱོགས་མཐུན་སྤང་བྱ་དང་། །ཞེས་པ་སྟེ། མི་དགེ་བ་བཅུ་ལས་ལུས་ཀྱི་ལས་གསུམ་བརྗོད་མ་ཐག་པ་ལྟར་དང་། ངག་གི་ལས་རྫུན་དོར་བས་ལྷག་མ་ཕྲ་མ། ཚིག་རྩུབ། ངག་འཁྱལ་གསུམ་དང་། ཡིད་ཀྱི་ལས་བརྣབ་སེམས། གནོད་སེམས། ལོག་ལྟ་གསུམ་སྟེ་དྲུག་དང་། རྩ་བ་བཞིའི་ཕྱོགས་སུ་མཐུན་པ་དུད་འགྲོ་གསོད་པ་ལ་སོགས་པའི་སྤང་བྱ་རྣམས་ནི་སྡོམ་པ་མི་གཏོང་ཡང་འགྱོད་སྡོམ་དང་བཅས་པའི་ཕྱིར་བཅོས་པར་བྱ་དགོས་པའི་བསླབ་བྱ་ཡིན་ནོ། །གཉིས་པ་སྔགས་པ་ཁྱིམ་པས་ཀྱང་བསླབ་དགོས་པར་གདམས་པ་ནི། དགེ་བསྙེན་སྡོམ་ལྡན་རིག་པ་འཛིན་པས་ཀྱང་། །རབ་བྱུང་རྟགས་དང་ཆོ་ག་མ་གཏོགས་པ། །ལྷག་རྣམས་ཉམས་སུ་ལེན་པར་དཔུང་བཟང་བཤད། །ཅེས་པ་སྟེ། དགེ་བསྙེན་གྱི་སྡོམ་པ་དང་ལྡན་པའི་ཁྱིམ་པ་སྔགས་ལམ་ལ་ཞུགས་པའི་རིག་པ་འཛིན་པ་དེས་ཀྱང་། ངུར་སྨྲིག་བགོ་བ་དང་ལྷུང་བཟེད་འཆང་བ་དང་སྐྲ་འདྲེག་པ་སོགས་རབ་བྱུང་བའི་རྟགས་རྣམས་དང་། ལས་ཀྱི་ཆོ་ག་དང་བཅས་རྐྱང་འགའ་ཞིག་མ་གཏོགས་པའི་ལྷག་མ་རྣམས་འདུལ་བ་ལས་ཇི་ལྟར་འབྱུང་བ་བཞིན་དུ་ཉམས་སུ་ལེན་དགོས་པར་དཔུང་བཟང་ལས། རྒྱལ་བ་ངས་གསུངས་སོ་སོར་ཐར་པ་ཡི། །ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པས་རྟགས་དང་ཆོ་ག་སྤངས། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་བཤད་པའི་ཕྱིར་སྔགས་པ་རབ་བྱུང་གིས་ནི་ལྟ་སྨོས་ཀྱང་ཅི་འཚལ་ལོ། །གཉིས་པ་རབ་བྱུང་ཕྱོགས་ཀྱི་བསླབ་བྱ་བསྟན་པ་ལ་གསུམ། དགེ་ཚུལ་ཕ་མའི་བསླབ་བྱ་བཤད་པ། དགེ་སློབ་མའི་བསླབ་བྱ་བཤད་པ། དགེ་སློང་ཕ་མའི་བསླབ་བྱ་བཤད་པའོ། །དང་པོ་དགེ་ཚུལ་གྱི་བསླབ་བྱ་བཤད་པ་ལའང་གསུམ། དགེ་ཚུལ་གྱི་བླང་འདས་དངོས། ཕྱོགས་མཐུན་བསྡམ་བྱའི་ཉེས་བྱས། བར་མ་རབ་བྱུང་གི་དུས་སུ་བླང་བ་ལས་འདས་པའི་ཕྱོགས་མཐུན་ནོ། །དང་པོ་དགེ་ཚུལ་གྱི་བླང་འདས་དངོས་ལ་གཉིས། རྩ་བའི་ཆོས་བཞི་དང་། ཡན་ལག་གི་ཆོས་དྲུག་གོ། །དང་པོ་རྩ་བའི་ཆོས་བཞི་ནི། སྲོག་གཅོད་རྐུ་དང་མི་ཚངས་སྤྱོད་དང་རྫུན། །ཞེས་པ་སྟེ། མིའམ་མིར་ཆགས་པའི་སྲོག་གཅོད་པ་དང་། རིན་ཐང་ཚང་བའི་དངོས་པོ་རྐུ་བ་དང་། ལམ་གསུམ་གང་རུང་ལ་བརྟེན་ནས་མི་ཚངས་པར་སྤྱོད་པ་དང་། མིའི་ཆོས་བླ་མའི་རྫུན་སྨྲ་བ་སྟེ་བཞི་པོ་འདི་བསྲུང་ན་ཚུལ་ཁྲིམས་སུ་འགྱུར་ཞིང་། མ་བསྲུང་ན་ཁྲིམས་འཆལ་དུ་འགྱུར་བས་ན་རྩ་བ་ཞེས་བྱ་སྟེ། དེའང་འཆབ་མེད་གསོར་རུང་དང་འཆབ་བཅས་གསོར་མི་རུང་བ་དགེ་སློང་དང་འདྲ་སྟེ། སུམ་བརྒྱ་པ་ལས། མི་གསོད་ལ་སོགས་བཞི་རྣམས་ཀྱིས། །དགེ་ཚུལ་ལས་ནི་ཉམས་གྱུར་ན། །དགེ་སློང་བཞིན་དུ་དགེ་ཚུལ་ལའང་། །ཕྱི་ནས་སྡོམ་སྐྱེའི་སྐལ་བ་མེད། །ཅེས་སོ། །གཉིས་པ་ཡན་ལག་གི་ཆོས་དྲུག་ནི། ཆང་འཐུང་གར་སོགས་ཕྲེང་སོགས་མལ་ཆེ་མཐོ། །ཕྱི་དྲོའི་ཁ་ཟས་གསེར་དངུལ་སྤོང་བ་སྟེ། །ཞུམ་པ་སྤངས་ཕྱིར་རགས་པ་བཅུར་དྲིལ་གསུངས། །ཞེས་པ་སྟེ། མྱོས་པར་འགྱུར་བའི་ཆང་འཐུང་བ་དང་། རྒོད་བག་གིས་རང་གར་ངག་ནས་གླུ་ལེན་ཅིང་ལུས་ཀྱིས་གར་བསྒྱུར་བ་རོལ་མོའི་རིགས་འབུད་ཅིང་དཀྲོལ་བ་སོགས་རྩེད་མོའི་རིགས་བྱེད་གསུམ་དང་། འཕྱོར་སྒེག་གི་རྣ་ཆ་གདུ་བུ་ལ་སོགས་རྒྱན་འདོགས་པ་དང་། མེ་ཏོག་དང་རིན་པོ་ཆེ་སོགས་ཀྱི་ཕྲེང་བས་སྤྲས་པ་དང་། སྨན་སྤོས་སོགས་ལུས་ལ་དྲི་བཟང་པོས་བགོས་ཏེ་ཁ་དོག་འཆང་བ་སོགས་རྒྱན་གྱི་རིགས་བྱེད་གསུམ་དང་། གསེར་དངུལ་ཟ་འོག་སོགས་རྒྱུ་རིན་ཐང་ཅན་གྱི་མལ་ཆེན་པོ་དང་། རིན་ཐང་ཆུང་ཡང་ཤིང་ཁྲི་ཁྲུ་གང་ལས་ལྷག་པའི་མཐོ་བ་ལ་སྐབས་མ་ཡིན་པར་འདུག་པ་དང་། རང་གླིང་གི་ཉི་མ་ཕྱེད་ཡོལ་ཟིན་ནས་ཕྱི་དྲོའི་དུས་སུ་ཁ་ཟས་ཟ་བ་དང་། རེག་པ་ཙམ་རུང་ཡང་ཆགས་སྲེད་ཀྱིས་གསེར་དངུལ་ཕུག་ནོར་དུ་འཆང་བ་སྤོང་བ་སྟེ། དྲུག་པོ་ལ་ཡན་ལག་ཅེས་རྩ་བ་བསྲུང་བའི་ཐབས་ཡིན་ཅིང་། དེའང་ཆང་ནི་བག་ཡོད་ཀྱི་ཡན་ལག་དང་། གཞན་ལྔ་བརྟུལ་ཞུགས་ཀྱི་ཡན་ལག་གོ། །དེའང་བྲྀ་ཛའི་བུ་བཞིན་དུ་བསླབ་གཞི་མང་པོ་ཐོས་པས་སེམས་ཞུམ་སྟེ་བསླབ་པ་ལེན་པ་ལས་ལྡོག་པ་སྤང་བའི་ཕྱིར་དུ་རགས་པ་བཅུ་པོ་འདིར་དྲིལ་ནས་གསུངས་པ་ཡིན་ལ། དེ་རྣམས་ཆར་གཏོག་དསང་བཅས་པའི་སྒོ་ནས་དབྱེ་ན་བླང་འདས་སོ་གསུམ་དུ་འགྱུར་ཏེ། ཇི་སྐད་དུ། རྩ་བཞི་གསོད་གསུམ་གཞི་མེད་ནས། །སུན་འབྱིན་བར་ལྔ་ཤེས་བཞིན་བཤེས། །འཕྱ་དང་ཟས་ཅུང་ལྷག་མས་སྐུར། །ཉེར་འཇོག་འབྲས་ཆེན་འགེབས་དང་ཆང་། །གར་གསུམ་ཕྲེང་གསུམ་མལ་ཆེ་མཐོ། །དུས་མིན་རིན་ཆེན་བར་མ་གསུམ། །དེ་ལྟར་སུམ་ཅུ་རྩ་གསུམ་མོ། །ཞེས་པས་རྩ་བ་བཞི་དང་། སྲོག་གཅོད་ཀྱི་ཕམ་འདྲའི་ཆར་གཏོགས་དུད་འགྲོ་གསོད་པ། སྲོག་ཆགས་དང་བཅས་པའི་རྩྭ་ཆུར་འདེབས་པ། སྲོག་ཆགས་དང་བཅས་པའི་ཆུར་སྤྱོད་པ་སྟེ་གསོད་པ་གསུམ། རྫུན་གྱི་ཆར་གཏོགས་གཞི་མེད་པ་དང་། བག་ཙམ་སྟེ་ཕམ་པའི་ཀུར་འདེབས་གཉིས། དགེ་འདུན་དབྱེན། དེའི་རྗེས་ཕྱོགས། ཁྱིམ་པ་སུན་འབྱིན་པ། ཤེས་བཞིན་དུ་རྫུན་སྨྲ་བ། བཤེས་ངོར་འཕྱ་བ། ཞལ་ཏ་བར་འཕྱ་བ། ཟས་ཅུང་ཟད་ཀྱི་ཕྱིར་ཆོས་སྟོན་ཞེས་སྐུར་པ་འདེབས་པ། ལྷག་མའི་སྐུར་འདེབས། བསླབ་གཞི་ཁྱད་གསོད། ལྷག་པོར་ལེན་ཕྱིར་འབྲས་ཆེན་འགེབ་པ་སྟེ་བཅུ་གཉིས། དེ་ལྟར་ན་རྩ་བ་བཞི་དང་དེའི་ཆར་གཏོགས་པ་བཅོ་ལྔ་བཅས་བསྡོམས་པས་བཅུ་དགུ། ཆང་འཐུང་བ་དང་། གླུ་གར་དང་། རོལ་མོ་སྟེ་གསུམ། རྒྱན་དང་། ཕྲེང་བ། དྲིའི་ཁ་དོག་འཆང་བ་སྟེ་གསུམ་རྣམས་བསྡོམས་པས་དྲུག །མལ་ཆེན་པོ་དང་། མཐོན་པོ་གཉིས། ཕྱི་དྲོའི་ཁ་ཟས། གསེར་དངུལ་ལེན་པ་རྣམས་བསྣན་པས་སུམ་ཅུ། འོག་ནས་འབྱུང་བའི་ཉམས་པ་གསུམ་དང་བཅས་པས་དགེ་ཚུལ་གྱི་བླང་འདས་སུམ་ཅུ་རྩ་གསུམ་ཡིན་ནོ། །གཉིས་པ་ཕྱོགས་མཐུན་བསྡམ་བྱའི་ཉེས་བྱས་ནི། ཆོས་གོས་ལྷུང་བཟེད་འཆང་བ་འབྲལ་བ་དང་། ས་བརྐོ་རིན་ཆེན་རེག་དང་མེ་ལ་རེག །བཏང་ནས་ཟ་དང་ཤིང་འཛེག་ཤིང་གཅོད་དང་། བྱིན་ལེན་རྩྭ་སྔོན་ཁྲོད་དུ་མི་གཙང་འདོར། །གསོག་འཇོག་ཟ་དང་ས་བོན་འཇོམས་པ་རྣམས། །གནང་བའི་ཉེས་མེད་བཅུ་གསུམ་མ་གཏོགས་པ། །དགེ་སློང་ཇི་ཞིན་སྤང་བླང་མཐའ་དག་གཅིག །འཆང་བའི་ཟླར་བསྡུ་གོས་རྒྱུ་ཟླ་བར་འཇོག །འབྲལ་བའི་ཟླར་བསྡུ་དགོན་པའི་འབྲལ་སྤང་བྱེད། །གསོག་འཇོག་ཟླར་བསྡུ་གསོག་འཇོག་བྱེད་པའང་གནང་། །ཞེས་པ་སྟེ། ཆོས་གོས་ལྷག་པོར་འཆང་བ་དང་། ལྷུང་བཟེད་ཟུང་འཆང་བ་དང་། ཆོས་གོས་དང་འབྲལ་བ་དང་། ས་བརྐོ་བ་དང་། རིན་ཆེན་གྱི་རིགས་ལ་རེག་པ་དང་། མེ་ལ་རེག་པ་དང་། བློས་བཏང་ནས་ཡང་ཟ་བ་དང་། ཤིང་ལ་མི་གང་ལས་མཐོར་འཛེགས་པ་དང་། ཤིང་སོགས་སྐྱེ་བ་གཅོད་པ་དང་། བྱིན་ལེན་མ་བྱས་པར་ཟ་བ་དང་། རྩྭ་སྔོན་གྱི་ཁྲོད་དུ་མི་ག ཙང་བ་འདོར་བ་དང་། གསོག་འཇོག་ཏུ་སོང་བ་ཟ་བ་དང་། རུང་བ་མ་བྱས་བར་ས་བོན་འཇོམས་པ་རྣམས་ནི་དགེ་ཚུལ་རྣམས་ལ་སྟོན་པས་རྗེས་སུ་གནང་བའི་ཉེས་མེད་བཅུ་གསུམ་པ་སྟེ། འདི་རྣམས་བསྟན་བཅོས་བྱེད་བྲག་བཤད་པ་ལས་གསུངས་ལ། དེ་རྣམས་མ་གཏོགས་པ་དགེ་སློང་ཇི་ལྟ་བ་བཞིན་དུ་སྤང་བྱ་དང་བླང་བྱ་མཐའ་དག་ཐུན་མོང་པ་ཡིན་པས་གཅིག་ཏུ་འགྱུར་མོད། འོན་ཏེ་དགེ་ཚུལ་གྱི་སྐབས་འདིར་བཤགས་ཡུལ་ལ་མི་ལྟོས་པར་ཡིད་ཀྱིས་བསྡོམས་པ་ཙམ་གྱིས་འདག་གོ། །དེའི་སྟེང་དུ་གོས་ལྷག་པོར་འཆང་བའི་ཟླར་བསྡུ་བ་གོས་རྒྱུ་ཟླ་བ་ལས་ལྷག་པར་འཇོག་པ་དང་། གོས་དང་འབྲལ་བའི་ཟླར་བསྡུ་བ་འཇིགས་པ་དང་བྲལ་ཡང་དགོན་པའི་གནས་སུ་འབྲལ་སྤང་བྱེད་པ་དང་། གསོག་འཇོག་ཟ་བའི་ཟླར་བསྡུ་བ་འཚོ་བ་ཙམ་གྱི་ཕྱིར་གསོག་འཇོག་བྱེད་པའང་གནང་བ་ཡིན་ལ། དེ་གསུམ་གྱི་སྟེང་དུ་བོད་ཀྱི་འདུལ་འཛིན་རྣམས་ཀྱིས་རུང་མཐུན་བསྡུ་བ་ལ། ཟླ་འཇོག་གསོག་འཇོག་དགོན་པ་འབྲལ། །མ་སྨྲས་འདུན་བསྒྱུར་མ་རྫོགས་ཉལ། །ཞེས་པ་ལྟར་གསུམ་བསྣན་པས་ཉེས་མེད་བཅུ་དགུར་འགྱུར་རོ། །གསུམ་པ་བར་མ་རབ་བྱུང་གི་དུས་སུ་བླངས་པ་ལས་འདས་པའི་ཕྱོགས་མཐུན་ནི། ཁྱིམ་རྟགས་སྤོང་ཉམས་རབ་བྱུང་རྟགས་ལེན་ཉམས། །བརྙས་པས་མཁན་པོར་ཉམས་ཏེ་ཉམས་པ་གསུམ། །སྤང་བ་དགེ་ཚུལ་སྡོམ་པའི་བསླབ་བྱའོ། །ཞེས་པ་སྟེ། དགེ་ཚུལ་གྱིས་གོས་དཀར་པོ་སྦུ་གུ་ཅན་ལྟ་བུ་བསམ་མ་ཐག་པས་ཉིན་གཅིག་ཙམ་གྱོན་ན་ཁྱིམ་པའི་རྟག་སྤོང་བ་ལས་ཉམས་པ་དང་། ཆོས་གོས་སོགས་རབ་བྱུང་གི་རྟགས་ལེན་པ་ལས་ཉམས་པ་དང་། བསླབ་པ་ལ་མ་གུས་ཤིང་བརྙས་པས་མཁན་པོར་གསོལ་བ་བཏབ་པ་ལས་ཉམས་པ་སྟེ། ཉམས་པ་གསུམ་པོ་འདི་བར་མ་རབ་བྱུང་གི་སྡོམ་པ་གཏོང་བྱེད་དངོས་དང་དགེ་ཚུལ་གྱི་བླངས་འདས་སོ། །དེ་ལྟར་ཉམས་པ་གསུམ་པོ་དང་བཅས་པ་སྤང་བར་བྱ་བ་ནི་དགེ་ཚུལ་ཕ་མ་གཉིས་ཀྱི་སྡོམ་པའི་བསླབ་པར་བྱ་པའོ། །གཉིས་པ་དགེ་སློབ་མའི་བསླབ་བྱ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། དགེ་སློབ་མ་ནི་དགེ་ཚུལ་ཐོབ་པའི་སྟེང་། །ཞེས་པ་སྟེ། དགེ་སློབ་མ་ནི་དགེ་ཚུལ་མའི་བསླབ་གཞི་བཅུ་ཐོབ་པའི་སྟེངདུ་དགེ་སློབ་མའི་སྡོམ་པ་བླངས་ནས་ལོ་གཉིས་ལ་དེའི་བསླབ་བྱ་ལ་སློབ་པ་སྟེ། དེ་ཡང་དགེ་ཚུལ་མའི་ཕམ་འདྲའི་ཉེས་བྱས་མ་བྱུང་ན་གཤམ་གསལ་རྩ་བའི་ཆོས་དྲུག་ལྟ་བུ་བྱུང་ཡང་དེ་ལ་བསླབ་པ་འཁྲུགས་པ་ཞེས་སླར་ཡང་སྡོམ་པ་ནོད་དེ་ལོ་གཉིས་ལ་བསླབ་པར་བྱ་དགོས་པ་ལས། དེ་དགེ་སློབ་མའི་སྡོམ་པ་གཏོང་བྱེད་དངོས་མ་ཡིན་ནོ། །གཉིས་པ་རྒྱས་པར་བཤད་པ་ལ་གཉིས། རྩ་བའི་ཆོས་དྲུག་དང་། རྗེས་མཐུན་གྱི་ཆོས་དྲུག་གོ། །དང་པོ་རྩ་བའི་ཆོས་དྲུག་ནི། གཅིག་འགྲོ་ཆུར་རྐྱལ་སྐྱེས་རེག་ལྷན་གཅིག་འདུག །སྨྱན་བྱ་ཉེས་འཆབ་རྩ་བའི་ཆོས་དྲུག་གོ། །ཞེས་པ་སྟེ། ལམ་དུ་རང་གཅིག་པུར་འགྲོ་བ་དང་། ཆུར་རྐྱལ་བ་དང་། སྐྱེས་པའི་ལུས་ལ་རེག་པ་དང་། དེ་དང་ལྷན་གཅིག་ཏུ་འདུག་པ་དང་། ཕོ་མོ་ཕན་ཚུན་སྨྱན་བྱ་བ་དང་། ཟླ་མོའི་ཉེས་པ་འཆབ་པ་བཅས་སྤོང་བ་ནི་རྩ་བའི་ཆོས་དྲུག་གོ། །གཉིས་པ་རྗེས་མཐུན་གྱི་ཆོས་དྲུག་ནི། གསེར་བཟུང་འདོམ་སྤུ་འདྲེག་དང་ས་བརྐོ་སྤང་། །བྱིན་ལེན་མེད་དང་གསོག་འཇོག་བྱས་མི་ཟ། །རྩྭ་སྔོན་མི་གཅོད་འདི་དག་རྗེས་མཐུན་དྲུག །ཅེས་པ་སྟེ། གསེར་ལ་སོགས་པའི་རིན་པོ་ཆེ་བཟུང་བ་དང་། འདོམ་གྱི་སྤུ་འདྲེག་པ་དང་། ས་བརྐོ་བ་རྣམས་སྤང་བ་དང་། ཟས་བྱིན་ལེན་མེད་པར་ཟ་བ་སྤང་བ་དང་། གསོག་འཇོག་བྱས་ཏེ་མི་ཟ་བ་དང་། རྩྭ་སྔོན་པོ་མི་གཅོད་པ་སྟེ་འདི་དག་རྣམས་ནི་རྗེས་སུ་མཐུན་པའི་ཆོས་དྲུག་གོ། །གསུམ་པ་དགེ་སློང་ཕ་མའི་བསླབ་བྱ་བཤད་པ་ལ་གཉིས། དགག་པའི་བསླབ་བྱ་དང་། བསྒྲུབ་པའི་བསླབ་བྱའོ། །དང་པོ་དགག་པའི་བསླབ་བྱ་ལ་གཉིས། དགེ་སློང་ཕའི་དགག་པའི་བསླབ་བ་༤དང་། དགེ་སློང་མའི་དགག་པའི་བསླབ་བྱའོ། །དང་པོ་དགེ་སློང་ཕའི་དགག་པའི་བསླབ་བྱ་ལའང་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། དགེ་སློང་ཁྲིམས་ལ་ཉིས་བརྒྱ་ལྔ་བཅུ་གསུམ། །ཞེས་པ་སྟེ། དགེ་སློང་གི་བསླབ་ཁྲིམས་ལ་ཕམ་པའི་སྡེ་དང་། ལྷག་མའི་སྡེ་དང་། སྤང་ལྟུང་གི་སྡེ་དང་། ལྟུང་བྱེད་ཀྱི་སྡེ་དང་། སོར་བཤགས་ཀྱི་སྡེ་དང་། ཉེས་བྱས་ཀྱི་སྡེ་སྟེ་དེ་དྲུག་པོ་ལ་ནང་གསེས་ཀྱི་དབྱེ་བས་ཁྲིམས་ཉིས་བརྒྱ་ལྔ་བཅུ་རྩ་གསུམ་ཡོད་དོ། །གཉིས་པ་རྒྱས་པར་བཤད་པ་ལ་དྲུག །ཕམ་པའི་སྡེ། ལྷག་མའི་སྡེ། སྤང་ལྟུང་གི་སྡེ། ལྟུང་བྱེད་ཀྱི་སྡེ། སོར་བཤགས་ཀྱི་སྡེ། ཉེས་བྱས་ཀྱི་སྡེ་བཤད་པའོ། །དང་པོ་ཕམ་པའི་སྡེ་ལ་གསུམ། གཞི་མདོར་བསྟན། རྩ་བ་རྒྱས་པར་བཤད། སྐབས་ཀྱི་དོན་བསྡུ་བའོ། །དང་པོ་གཞི་མདོར་བསྟན་པ་ནི། སྡོམ་པའི་རྩ་བ་ཕམ་པ་བཞི་ཞེས་པ། །ཞེས་པ་སྟེ། བཅས་ལྡན་དགེ་སློང་གིས་འདི་དག་བསྲུངས་ན་སྡོམ་པ་ཕྱི་མ་མ་ལུས་པའི་རྩ་བ་ཡིན་ལ། གལ་ཏེ་ཉམས་ན་གཉེན་པོའི་ཕྱོགས་མ་ལུས་པ་མཐུ་མེད་པར་བཅོམ་པའི་ཕྱིར་ཕམ་པ་བཞི་ཞེས་གྲགས་པའོ། །གཉིས་པ་རྩ་བ་རྒྱས་པར་བཤད་པ་ལ་བཞི། མི་ཚངས་སྤྱོད་ཀྱི་ཕམ་པ། མ་བྱིན་ལེན་གྱི་ཕམ་པ། སྲོག་གཅོད་པའི་ཕམ་པ། མི་ཆོས་བླ་མའི་རྫུན་སྨ་བའི་ཕམ་པའོ། །དང་པོ་མི་ཚངས་སྤྱོད་ཀྱི་ཕམ་པ་ནི། གཞི་ཡི་ཡན་ལག་ཆ་ཀུན་བཟུང་འོས་པ། །སྐྱེ་གནས་ལམ་དུ་ཕོ་དབང་ལས་རུང་ནི། །བསམ་པ་ངོ་ཚ་འཇིགས་མེད་ཆགས་སེམས་ཀྱིས། །སྦྱོར་བ་དྲུད་པ་མཐར་ཐུག་སིམ་པ་ཐོབ། །དེས་ནི་ཚངས་པར་སྤྱོད་ལས་རྣམ་པར་ཉམས། །ཞེས་པ་སྡེ། དེའང་དགེ་སློང་གིས་འདི་བཞི་གང་རུང་ལ་སྤྱད་ན་སྐད་ཅིག་མ་དེར་སྡོམ་པ་རྣམ་པར་དག་པའི་ལྷག་མ་ཙམ་ཡང་མེད་པར་བྱེད་པས་ན་རྩ་བའི་ལྟུང་བ་དང་མི་མཐུན་ཕྱོགས་ཀྱི་གཉེན་པོ་མཐུ་མེད་པར་བཅོམ་པའི་ཕྱིར་ཕམ་པ་ཞེས་གྲགས་ཏེ། དེ་ཡང་མི་ཚངས་སྤྱོད་ལ་གཞན་གྱི་གཞི་ཡི་ཡན་ལག་འཁྲིག་པའི་ཚོར་བ་སྐྱེད་ནུས་པའི་ལུས་ཕྱེད་དུ་ལོངས་པ་ཡན་ཆད་ཡན་ལག་གི་ཆ་ཤས་ཀུན་བཟུང་བར་འོས་པ་ཁའམ། གཤང་ལམ་མམ། སྐྱེ་གནས་ཆུ་ལམ་གསུམ་པོ་གང་རུང་དུ། རང་གི་གཞི་ཡི་ཡན་ལག་བརྟེན་བྱེད་ཕོ་ཡི་དབང་པོ་ནད་ལ་སོགས་པས་སྨ་མ་ཕབ་པར་ལས་སུ་རུང་བ་དེ་ནི། བསམ་པ་རང་ངོར་ལྟོས་པའི་ངོ་ཚ་བ་དང་། གཞན་ངོར་ལྟོས་པའི་འཇིགས་པ་སྟེ་ཁྲེལ་འཛེམ་མེད་པར་རེག་བདེ་ཉམས་སུ་མྱོང་བར་འདོད་པའི་ཆགས་སེམས་ཀྱིས། སྦྱོར་བ་བརྟེན་བྱ་དེར་རྩལ་ཞིང་དྲུད་པ་ལས་མཐར་ཐུག་པགས་རིམ་གྱི་མཚམས་ལས་འདས་ནས་ལུས་ཚོར་བདེ་བའི་སིམ་པ་ཐོབ་པ་སྟེ། ཡན་ལག་བཞི་པོ་ཚང་བ་དེས་ནི་ཚངས་པར་སྤྱོད་པའི་སྡོམ་པ་ལས་རྣམ་པར་ཉམས་པས་ན་ཕམ་པར་འགྱུར་པའོ། །གཉིས་པ་མ་བྱིན་ལེན་གྱི་ཕམ་པ་ནི། བརྐུ་བའི་གཞི་ནི་མི་གཞན་ནོར་ཡིན་པ། །བསམ་པ་རང་ཉིད་འཚོ་ཕྱིར་རྐུ་སེམས་ཀྱིས། །ཡུལ་དུས་རིན་ཐང་ཚང་བ་སྦྱོར་བས་བརྐུས། །མཐར་ཐུག་བརྐུས་སམ་བརྐུར་བཅུག་བརྩད་ནས་ཐོབ། །ཅེས་པ་སྟེ། བརྐུ་བར་བྱ་བའི་གཞི་ནི་རང་དང་ནོར་མི་གཅིག་པའི་གཞན་གྱིས་བདག་ཏུ་བཟུང་བའི་ནོར་རྫས་ཡིན་པ། བསམ་པ་རང་ཉིད་ཀྱི་བཟའ་བ་དང་བགོ་བ་ལ་སོགས་པ་འཚོ་བར་བྱ་བའི་ཕྱིར་དུ་རྐུ་བའི་སེམས་ཀྱིས། ཡུལ་གང་དུའང་དུས་དེ་དང་བསྟུན་པའི་རིན་ཐང་ཚང་བ། ལུས་ཀྱི་རྣམ་པ་རིག་བྱེད་ཀྱི་སྦྱོར་བས་དུས་གཅིག་ལ་བརྐུས་པ་མཐར་ཐུག་རང་གིས་བརྐུས་སམ་གཞན་ལ་བརྐུར་བཅུག་པའམ། བརྩད་པ་གང་ཡང་རུང་བའི་སྒོ་ནས་རྫས་དེ་བདག་པོ་དང་བྲལ་ཏེ་རང་ལག་ཏུ་འབྱོར་ནས་ཐོབ་བློ་སྐྱེས་པའོ། །འདི་ལ་བརྐུ་རྫས་རིན་ཐང་གི་ཚད་ནི་ཀ་རི་ཀ་ལྔ་བཅུ་པ་ལས། ཀཪྵ་པ་ཎ་བཞི་ཆ་བརྐུས། །དེ་བསྐུས་ཚུལ་ཁྲིམས་ཞིག་པར་འགྱུར། །ཞེས་གསུངས་པ་སྔོན་གྱི་གསུངས་ཚུལ་དེ་ལ་གཞིག་སྟེ་དེང་སང་བོད་ཡུལ་དུ་ཕྱོགས་ཙམ་གཞིག་ན་འབྲུ་ཁལ་ཕྱེད་ཙམ་སྟེ། ཡུལ་དུས་ཀྱི་དབང་གིས་མཐའ་གཅིག་ཏུ་མ་ངེས་སོ། །གསུམ་པ་སྲོག་གཅོད་པའི་ཕམ་པ་ནི། སྲོག་གཅོད་གཞི་ནི་མི་གཞན་མ་འཁྲུལ་བར། །བསམ་པ་གསོད་སེམས་གསོད་བྱ་དེར་ཤེས་པ། །སྦྱོར་བ་གསོད་པར་བརྩམས་ནས་མ་བཟློག་པར། །མཐར་ཐུག་སྲོག་གི་དབང་པོ་དགག་པ་དང་། །གསོད་བཅུག་ཡི་རང་བསྔགས་སོགས་རྐྱེན་བྱས་ཀྱང་། །ཞེས་པ་སྟེ། སྲོག་གཅོད་ཀྱི་གཞི་ནི་མིའམ་མིར་ཆགས་པ་རང་ལས་རྒྱུད་ཐ་དད་པ་མི་གཞན་དང་མ་འཁྲུལ་བར། བསམ་པ་བདག་གིས་འདི་ཉིད་ངེས་པར་བསད་པར་བྱའོ་སྙམ་པའི་གསོད་སེམས་ཀྱིས། གསོད་པར་བྱ་བ་དེ་ལ་དེར་འདུ་ཤེས་པ། སྦྱོར་བ་དུག་དང་མཚོན་ཆ་ལ་སོགས་པས་གསོད་པར་བརྩམས་ནས་བྱ་བ་ལས་མ་བཟློག་པར་མཐར་ཐུག་རང་ཉིད་མ་ཤི་བའི་སྔོན་དུ་དེ་ཉིད་སྲོག་གི་དབང་པོ་འགག་པ་དང་། དེ་ལྟར་རང་ཉིད་ཀྱིས་བསད་པ་ཙམ་དུ་མ་ཟད་གཞན་ལ་གསོད་དུ་བཅུག་པ་དང་། བསད་པ་ལ་ཤིན་ཏུ་ལེགས་ཤེས་ཡི་རང་བས་བསྔགས་པ་བརྗོད་པ་ལ་སོགས་པས་རྐྱེན་བྱས་ནས་བསད་ཀྱང་འདྲ་ལ། དེར་མ་ཟད་དགེ་སློང་མང་པོས་གྲོས་བྱས་ནས་གཅིག་གིས་བསད་ཀྱང་ཐམས་ཅད་ལ་ཕམ་པ་འབྱུང་སྟེ། མཛོད་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་སོ། །བཞི་པ་མི་ཆོས་བླ་མའི་རྫུན་གྱི་ཕམ་པ་ནི། རྫུན་གྱི་གཞི་ནི་སྨྲ་ཤེས་དོན་གོའི་མིར། །བསམ་པ་འདུ་ཤེས་བསྒྱུར་ནས་བརྗོད་བློ་སྐྱེས། །སྦྱོར་བ་མངོན་ཤེས་ལ་སོགས་ཡོན་ཏན་ཚོགས། །མེད་ཀྱང་ཡོད་ཅེས་བླ་མའི་རྫུན་སྨྲས་པས། །མཐར་ཐུག་གཞན་གྱིས་རྫུན་དེ་གོ་ན་ཉམས། །ཞེས་པ་སྟེ། རྫུན་གྱི་གཞི་ནི་གང་ལ་སྨྲ་བའི་ཡུལ་རང་ལས་རྒྱུད་གཞན་པའི་མི་སྨྲ་ཤེས་པ། དོན་གོ་བ། ཤེས་པ་རང་བཞིན་དུ་གནས་པ། མ་ནིང་དང་། མཚན་གཉིས་མ་ཡིན་པ་སྟེ་ཐ་སྙད་ལྔ་དང་ལྡན་པའི་མིར། བསམ་པ་དེའི་འདུ་ཤེས་གཞན་དུ་བསྒྱུར་ནས་བསླུ་འདོད་ཀྱི་གཏམ་བརྗོད་འདོད་ཀྱི་བློ་སྐྱེས་ཏེ། སྦྱོར་བ་མངོན་པར་ཤེས་པ་ལྔ་ལ་སོགས་པ་འདོད་ཁམས་ལས་གོང་དུ་འཕགས་པའི་བསམ་གཏན་དང་པོ་ནས་སངས་རྒྱས་ཀྱི་སའི་བར་གྱི་ཡོན་ཏན་དུ་མའི་ཚོགས་རང་ལ་མེད་ཀྱང་ཡོད་ཅེས་འཕགས་པའི་ཆོས་བླ་མའི་རྫུན་ངག་མཚན་ཉིད་བཞི་ལྡན་གྱིས་སྨྲས་པས། མཐར་ཐུག་གཞན་གྱིས་རང་གིས་སྨྲས་པའི་རྫུན་དེས་འདུ་ཤེས་བསྒྱུར་མ་ནུས་ཀྱང་དོན་གོ་བར་གྱུར་ན་དགེ་སློང་རང་གི་སྡོམ་པ་ཉམས་པ་ཡིན་ནོ། །མཚན་ཉིད་བཞི་ལྡན་ནི། རང་གི་ངག་ཡིན་པ། ཚིག་མ་ནོར་བ། དོན་གསལ་པོར། ཡུལ་དེའི་རྣ་བར་མངོན་སུམ་དུ་སྨྲས་པའོ། །དེ་ལྟར་ཕམ་པ་བཞི་པོ་འདི་ལ་གཞི། བསམ་པ། སྦྱོར་བ། མཐར་ཐུག་སྟེ་ཡན་ལག་བཞི་ཚང་བའོ། །གསུམ་པ་སྐབས་ཀྱི་དོན་བསྡུ་བ་ནི། འདི་བཞི་གང་སྤྱད་དགེ་སློང་དེ་ཕམ་ཕྱིར། །ཕས་ཕམ་བཞི་ཞེས་ཐམས་ཅད་མཁྱེན་དེས་གསུངས། །ཞེས་པ་སྟེ། དེས་ན་འདི་བཞི་པོ་རང་རང་གི་ཡན་ལག་ཐམས་ཅད་ཚང་བས་གང་སྤྱད་ཀྱང་དགེ་སློང་དེ་མི་མཐུན་ཕྱོགས་ཀྱི་གཉེན་པོ་མཐུ་མེད་པར་བཅོམ་ནས་ཕམ་པའི་ཕྱིར་ན་ཕས་ཕམ་པ་བཞི་ཞེས་རྒྱལ་བ་ཐམས་ཅད་མཁྱེན་པ་དེས་གསུངས་ཏེ། སོ་སོར་ཐར་པ་ལས། དགེ་སློང་དག་གིས་དེ་དག་ལས་ལྟུང་བ་གང་ཡང་རུང་བ་ཞིག་བྱས་ན་ཐོག་མ་ཇི་ལྟ་བར་ཕྱིས་ཀྱང་དེ་བཞིན་དུ་ཕམ་པར་འགྱུར་བ་ཡིན་ཏེ། དགེ་སློང་རྣམས་དང་ལྷན་ཅིག་གནས་པ་དང་། ལོངས་སྤྱོད་དུ་མི་དབང་གིས། གནས་པར་མི་བྱའོ། །ཞེས་གསུངས་སོ། །དེ་ལྟར་ན་བསླབ་བྱ་འདི་རྣམས་ཕྱིའི་རྐྱེན་གནས་ཀྱི་བླ་མ་མཚན་ཉིད་དང་ལྡན་པ་ལས་འདུལ་བ་ནས་གསུངས་པའི་བླང་དོར་གྱི་གནས་མ་ལུས་པ་ལ་ཤིན་ཏུ་མཁས་པར་སྦྱངས་༡ཤིང་། ནང་གི་རྐྱེན་བསམ་པ་ཕུན་སུམ་ཚོགས་པ་བླང་དོར་ལ་སྤྲོ་བའི་བརྩོན་༢ འགྲུས། འཇུག་ལྡོག་གི་གནས་ལ་བཟོད་པའི་བག་༣ཡོད། རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་༤བཞིན་རྣམས་ལ་བརྟེན་ནས་བསླབ་བྱའི་གནས་ཐམས་ཅད་ལ་དྲན་ཤེས་བརྟན་པོ་རྒྱུན་མི་ཆད་པའི་སྒོ་ནས་བསྲུང་དགོས་པ་ཡིན་ནོ། །གཉིས་པ་ལྷག་མའི་སྡེ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། དགེ་འདུན་ལྷག་མ་བཅུ་གསུམ་ཞེས་གྲགས་པ། །ཞེས་པ་སྟེ། གསོ་བ་དགེ་འདུན་ལ་རགས་ལས་ཤིང་སྡོམ་པ་རྣམ་དག་གི་ལྷག་མ་ཅུང་ཟད་ཙམ་ལུས་པ་ལ་གྲངས་བཅུ་གསུམ་ཡོད་པ་ཡིན་ཞེས་གྲགས་པ་ལ་དབྱེ་ན། ནང་སེམས་ཅན་ལ་ཆགས་པ་ལྔ་དང་། ཕྱི་ཡོ་བྱད་ལ་ཆགས་པ་གཉིས་ཏེ་འདོད་པ་ལས་གྱུར་པ་བདུན། གནོད་པ་ལས་གྱུར་པ་གཉིས། བགོ་བ་ལས་གྱུར་པ་བཞི་རྣམས་སུ་ཡོད་དོ། །གཉིས་པ་རྒྱས་པར་བཤད་པ་ནི། བསྒྲོད་མིན་གནས་སུ་ཁུ་བ་འབྱིན་པ་དང་། །ཆགས་པས་བུད་མེད་ལུས་ཀྱི་ཆ་ཤས་འཛིན། །འཁྲིག་ཚིག་རྗེན་སྨྲ་བུད་མེད་ཆགས་ཕྱིར་བཀུར། །ཕོ་མོ་ཕན་ཚུན་སྨྱན་བྱས་འདུས་ཏེ་འཕྲད། །རང་དོན་ཚད་ལྷག་ཁང་པ་ཁང་ཆེན་བརྩིགས། །བརྗོད་གཞི་མེད་དང་སྙད་ཀ་བག་ཙམ་ལ། །བརྟེན་ནས་དགེ་སློང་སྐུར་བཏབ་དགེ་འདུན་དབྱེན། །དབྱེན་དེའི་རྗེས་ཕྱོགས་བསླབ་པ་དང་འགལ་བ། །ཁྱིམ་སུན་བྱིན་ཚེ་སྐྲོད་བྱེད་ལ་བསྙོན་པ། །ལྟུང་བྱུང་བསྐུལ་ཚེ་བཀའ་བློ་མི་བདེ་བའོ། །ཞེས་པ་སྟེ། བསྒྲོད་བྱའི་ལམ་གསུམ་མིན་པར་རང་ངམ་གཞན་གྱི་ཡན་ལག་གི་གནས་སུ་ཁུ་བ་དབྱུང་འདོད་ཀྱི་བསམ་པས་རང་གི་ཕོ་དབང་ལས་སུ་རུང་བས་རེག་ཅིང་བརྩལ་བ་ལས་ཁུ་བ་འབྱིན་པའི་བདེ་བ་མྱོང་བ་དང་༡། ཆགས་པའི་སེམས་ཀྱིས་བརྟེན་རུང་བུད་མེད་ལ་རེག་འདོད་ཁོ་ནས་དེའི་ལུས་ཀྱི་ཆ་ཤས་སྐྲ་སོགས་ལ་རྗེན་པར་འཛིན་ཏེ་བར་དུ་མ་ཆོད་པར་རེག་པའི་བདེ་བ་མྱོང་བ་དང་༢། བརྡ་འཕྲོད་པའི་བུད་མེད་བརྟེན་རུང་ལ་འཁྲིག་པ་སྤྱོད་པའི་དངོས་མིང་ཚིག་ཏུ་རྗེན་པར་སྨྲ་ཞིང་དེས་ཀྱང་དོན་གོ་བ་དང་༣། ཡུལ་བུད་མེད་ལ་ཆགས་པ་དོན་དུ་གཉེར་བའི་ཕྱིར་བདག་ལྟ་བུའི་དགེ་སློང་ལ་འཁྲིག་པས་བསྙེན་བཀུར་ན་བསྙེན་བཀུར་ཐམས་ཅད་ལས་མཆོག་གོ་ཞེས་བསྔགས་པའམ་ཡུལ་གྱིས་སྨྲས་པ་དང་དུ་བླངས་ཀྱང་རུང་སྟེ་དེས་བརྡ་འཕྲོད་པ་དང་༤། རང་ལས་གཞན་པའི་ཕོ་མོ་གཉིས་ཕན་ཚུན་སྦྱོར་འདོད་ཀྱིས་རང་ངམ་བསྐོས་པའི་འཕྲིན་གསུམ་གྱི་སྒོ་ནས་སྨྱན་བྱས་པས་དེ་གཉིས་འདུས་ཏེ་དབང་པོ་༥འཕྲད་པ་སྟེ་དེ་ལྔ་ནི་ནང་སེམས་ཅན་ལ་ཆགས་པ་ལས་གྱུར་པའོ། །གཞི་རྒྱལ་པོས་མ་གནང་བ་སོགས་རྩོད་པ་ཅན་དང་། སྲོག་ཆགས་མང་བ་དང་། ཆུ་སོགས་ཀྱིས་འཇིག་རྐྱེན་ཡོད་པ་བཅས་མ་དག་གསུམ་དང་ལྡན་པའི་ས་གནས་སུ། དགེ་འདུན་ལས་གནང་བ་མ་ཐོབ་པར་རང་གི་དོན་དུ་གཞན་ལ་འབད་པས་བཙལ་བའི་ཡོ་བྱད་ཀྱིས་སྲིད་དུ་མིའི་ཁྲུ་བཅོ་བརྒྱད་དང་། ཞེང་དུ་ཁྲུ་ཕྱེད་དང་བཅུ་གཅིག་གི་ཚད་ལས་ལྷག་པའི་ཁང་པ་རང་ངམ་གཞན་ལ་བསྐོས་པས་བརྩིགས་ཀྱང་རུང་སྟེ་ཐོག་ཕུབ་ཟིན་པ་དང་༦། གང་ཟག་བཞིར་ལོངས་པ་ཡན་ཆད་ཀྱི་དོན་ནམ་དཀོན་མཆོག་གི་ཆེད་དུའང་དགེ་འདུན་ལས་གནང་བ་མ་ཐོབ་པར་མ་དག་གསུམ་གྱི་ས་ན་ཁང་ཆེན་བརྩིགས་ནས་ཐོག་ཕུབ་པ་༧སྟེ་དེ་གཉིས་ནི་ཕྱིའི་ཡོ་བྱད་ལ་ཆགས་པའོ། །ཡུལ་དགེ་སློང་གཞན་ལ་བརྗོད་པའི་གཞི་མཐོང་ཐོས་དོགས་གསུམ་མེད་བཞིན་དུ་ཕམ་པ་བཞི་གང་རུང་བྱུང་ཞེས་སྐུར་འདེབས་ཀྱི་ཚིག་གསལ་པོར་སྨྲས་པ་ཡུལ་དེས་གོ་བ་༨དང་། གླེང་བའི་སྙད་ཀ་བག་ཙམ་ཡོད་པ་ལ་བརྟེན་ནས་ཡུལ་དགེ་སློང་གཞན་ལ་ཚིག་ཟུར་གྱིས་ཕམ་བཞི་གང་རུང་གི་སྒོ་ནས་སྐུར་པ་བཏབ་པ་ཡུལ་གྱིས་གོ་བ་༩ སྟེ་དེ་གཉིས་ནི་གནོད་པ་ལས་གྱུར་པའོ། །མཚམས་ནང་གཅིག་ཏུ་བཅས་ལྡན་དགེ་སློང་གིས་རང་མི་ཐེ་བའི་དབྱེ་བྱ་དགེ་འདུན་དུ་ལོངས་པ་ཕྱོགས་གཉིས་སུ་ཆོས་མིན་དབྱེན་གྱིས་འབྱེད་པ་ལ་ཟློག་བྱེད་ལྔས་བཟློག་ཀྱང་དེའི་ཐ་མ་བརྗོད་པ་གསུམ་པའི་མཐའ་ལ་མི་གཏོང་༡༠བ་དང་། དགེ་སློང་གང་དགེ་འདུན་དབྱེན་བྱེད་པའི་དགེ་སློང་དེའི་རྗེས་སུ་ཕྱོགས་ནས་བསླབ་པ་དང་འགལ་བར་བྱེད་པ་ལ་ཟློག་བྱེད་ལྔས་བཟློག་ཀྱང་མི་གཏོང་བ་༡༡དང་། དགེ་སློང་གང་ཞིག་ཆང་འཐུང་ཞིང་བུད་མེད་དང་ལྷན་དུ་བཟའ་བཏུང་ལ་སྤྱོད་པ་སོགས་བསླབ་པ་དང་འགལ་བའི་ངན་སྤྱོད་ཀྱི་བྱ་བས་ཁྱིམ་པ་རྣམས་ཀྱི་སེམས་སུན་འབྱིན་ཏེ་མི་དད་པར་བྱེད་པའི་ཚེ་དེ་དགེ་འདུན་གྱི་གནས་ནས་བསྐྲད་པ་ན་སྐྲོད་བྱེད་དགེ་འདུན་ལ་འགྲོ་མིན་བཞིའི་བསྙོན་ཚིག་གིས་སྐུར་པ་འདེབས་པ་ཟློག་བྱེད་ལྔའི་མཐར་མི་གཏོང་བ་༡༢དང་། དགེ་སློང་གཞན་ལ་ལྟུང་བ་བྱུང་བ་ན་དགེ་འདུན་གྱི་ཕྱིར་བཅོས་བྱ་བར་བསྐུལ་བའི་ཚེ། ཁྱེད་ཅག་དགེ་ཡང་རུང་། སྡིག་ཀྱང་རུང་། ཁོ་བོ་ལ་ཅི་ཡང་མ་སྨྲ་ཞིག་ཅེས་དང་དུ་མ་བླངས་པ་བཀའ་བློ་མི་བདེ་བའི་གཞིར་ཞུགས་པ་ཟློག་བྱེད་ལྔའི་མཐའ་ལ་མི་གཏོང་༡༣བའོ། །འདི་བཞི་ནི་བགོ་བ་ལས་གྱུར་པའོ། །ཟློག་བྱེད་ལྔ་ནི། གནམ་སྒོ་དང་། གསོལ་བཞིའི་ལས་དང་ལྔའོ། །གསུམ་པ་སྤང་ལྟུང་གི་སྡེ་ལ་གཉིས། རྣམ་གྲངས་མདོར་བསྟན། དབྱེ་བ་རྒྱས་པར་བཤད་པའོ། །དང་པོ་རྣམ་གྲངས་མདོར་བསྟན་པ་ནི། སྤོང་བའི་ལྟུང་བྱེད་སུམ་ཅུའི་སྡེ་བཤད་པ། །ཞེས་པ་སྟེ། གང་ལ་ལྟུང་བ་བྱུང་བའི་དངོས་པོ་དེ་སྤོང་བའི་སྒོ་ནས་ཕྱིར་བཅོས་དགོས་ཤིང་། མ་བཅོས་ན་རྣམ་སྨིན་ངན་སོང་དུ་ལྟུང་བར་བྱེད་པས་ན། དེའི་གྲངས་སུམ་ཅུ་ཡོད་པའི་སྡེ་རྣམས་རིམ་པར་བཤད་པ་ལ་ཞེས་སོ། །གཉིས་པ་དབྱེ་བ་རྒྱས་པར་བཤད་པ་ལ་གསུམ། གོས་སོགས་ཀྱི་སྡེ། སྟན་སོགས་ཀྱི་སྡེ། ལྷུང་བཟེད་སོགས་ཀྱི་སྡེ་གསུམ་པོ་རེ་རེ་ལའང་ནང་གསེས་བཅུ་རེ་ཡོད་པ་ལས། བཅུ་ཚན་དང་པོ་གོས་སོགས་ཀྱི་སྡེ་ནི། རང་གི་གོས་ལྷག་ཞག་བཅུ་འདས་པར་འཆང་། །ཆོས་གོས་དང་བྲལ་ཞག་གཅིག་ལོན་པ་དང་། །གོས་རྒྱུ་ཟླ་གཅིག་འཇོག་དང་དགེ་སློང་མར། །ཆོས་གོས་འཁྲུ་འཇུག་དེ་ལ་གོས་རྒྱུ་ལེན། །ཉེ་མིན་ཁྱིམ་པར་གོས་རྒྱུ་སློང་བ་དང་། །སྟེར་ན་སྟོད་གཡོགས་སྨད་གཡོགས་ལྷག་པོར་ལེན། །རང་ལ་སྟེར་བསམ་ཆོས་གོས་གནས་དཔགས་པ། །རིན་དང་ཁྲུ་ཚད་ཀྱིས་སློང་བརྟགས་དྲན་སློང་། །གོས་རིན་རིན་ཆེན་བསྐུར་བ་ལེན་རྣམས་སོ། །ཞེས་པ་སྟེ། དེ་ལ་སྲ་བརྐྱང་མ་བཏིང་བའི་གང་ཟག་གིས་རང་གི་དབང་བྱར་ཡོད་ཅིང་བདག་ཏུ་བཟུང་བའི་གོས་ལྷག་པོ་འཁོར་གསུམ་ཁེབས་པའི་མཐའི་ཚད་དུ་ལོངས་པའམ། གལ་ཏེ་བྱིན་གྱིས་བརླབ་རུང་གི་ཆོས་གོས་རྣམ་གསུམ་ཡོད་པའམ་མེད་ཀྱང་ཆོས་གོས་ཀྱི་ཁ་སྐོང་བའི་རེ་བ་མེད་ན་ཁྲུ་གང་གི་ཚད་དུ་ལོངས་པ་དང་། ཁ་སྐོང་གི་རེ་བ་དང་བཅས་པ་ན་འཁོར་གསུམ་ཁེབས་པ་ཡན་གྱི་གོས་ལྷག་བྱིན་གྱིས་མ་བརླབས་པར་རང་སྟོབས་སམ་ཤན་སྟོབས་ཀྱིས་ཞག་བཅུ་འདས་པར་འཆང་ན་འཆང་བའི་སྤང་སྟུང་༡དང་། འདིའི་ཤན་ལ་ཤན་འཇུག་མི་འཇུག་གཉིས། རིགས་ལོག་མ་ལོག་གཉིས་ཏེ་མུ་བཞི་ཡོད་ཅིང་། ཤན་འཇུག་པ་ནི་ཞག་བཅུ་པའི་གོས་སྔ་མ་བྱིན་གྱིས་མ་བརླབས་པར་ཞག་དགུ་ལོན་པ་དང་། འདི་ཉིད་རིགས་མཐུན་གྱི་གོས་གཅིག་རྙེད་ན། སྔ་མས་ཞག་དགུ་ལོན་པའི་ཤན་དེ། ཕྱི་མ་ལ་ཞུགས་པས་ཞག་བཅུ་འདས་ཏེ་བཅུ་གཅིག་པའི་སྐྱ་རེངས་ཤར་བ་ན་གོས་སྔ་མས་རང་སྟོབས་དང་། ཕྱི་མས་ཤན་སྟོབས་ཀྱིས་སྤང་ལྟུང་གཉིས་དུས་གཅིག་ལ་བསྐྱེད། ཤན་མི་འཇུག་པ་ནི། སྔོ་དྲོ་ཞག་བཅུ་པའི་གོས་གཅིག་རྙེད། ཕྱི་དྲོ་ཡང་གཅིག་རྙེད་པ་ལྟ་བུའོ། །རིགས་ལོག་པ་ནི། འོང་ཏུ་འཆད་པའི་ཟླ་འཇོག་གི་གོས་དེས་ཟླ་གཅིག་མ་འདས་པར་སྤང་ལྟུང་མི་བསྐྱེད་ཀྱང་། ཟླ་འཇོག་དེས་ཞག་གཅིག་ནས་ཉེར་དགུ་གང་རུང་ལོན་པ་ན། ཕྱིས་ཆོས་གོས་གསུམ་ཚང་བར་རྙེད་ན། ཟླ་འཇོག་དེ་ཞག་བཅུ་པའི་གོས་སུ་རིག་ལོག་སྟེ། ཞག་བཅུ་འདས་པ་ན་ཟླ་འཇོག་གིས་རང་སྟོབས་དང་ཕྱི་མས་ཤན་སྟོབས་ཀྱིས་སྤང་ལྟུང་བསྐྱེད། རིགས་མ་ལོག་པ་ནི། སྔ་ཕྱི་གཉིས་ཀ་ཟླ་བར་ཞག་རུང་བ་ཡིན་ན་རིགས་མ་ལོག་མོད། གོས་སྔ་མ་རྙེད་ནས་གཅིག་ནས་ཉེར་དགུ་བར་གང་རུང་ལོན་པ་ན། ཕྱི་མ་ཞིག་རྙེད་ན་སྔ་མའི་ཤན་ཞུགས་ནས་སོ་གཅིག་པའི་སྐྱ་རེངས་ཤར་བ་ན་སྔ་མས་རང་སྟོབས་དང་ཕྱི་མས་ཤན་སྟོབས་ཀྱིས་སྤང་ལྟུང་བསྐྱེད་པ་སོགས་ལྷུང་བཟེད་སྨན་ལྟུང་བ་བཅས་ཐམས་ཅད་ལ་འགྲེ། ལྷུང་བཟེད་ཀྱི་ཤན་འཇུག་ཚུལ་ནི་སྔ་མའི་རིག་པས་ཤེས་སོ། །བྱིན་གྱིས་བརླབ་ཚུལ་ཀྱང་སྔ་ཕྱི་གཉིས་ཤན་མ་འདྲེས་གོང་སྔ་མ་བྱིན་གྱིས་བརླབ་དགོས། སྔ་མ་བྱིན་གྱིས་མ་བརླབས་ན་ཕྱི་མ་བྱིན་གྱིས་བརླབས་ཀྱང་གོ་མི་ཆོད ། བྱིན་གྱིས་བརླབས་པའི་ཆོས་གོས་གསུམ་གང་རུང་དང་བྲལ་ནས་གནས་ཐ་དད་པར་ཞག་གཅིག་ལོན་པ་ན་ཆོས་གོས་འབྲལ་སྤང་༢དང་། ཆོས་གོས་གང་རུང་མེད་པར་ཁ་སྐོང་གི་རེ་བ་དང་བཅས་པས་གོས་རྒྱུ་ཚད་ཁྲུ་གང་ནས་འཁོར་གསུམ་ཁེབས་པའི་བར་བྱིན་གྱིས་མ་བརླབས་པར་རང་སྟོབས་སམ་ཤན་སྟོབས་ཀྱིས་ཟླ་བ་གཅིག་འདས་ནས་སོ་གཅིག་པའི་སྐྱ་རེངས་ཤར་བ་ན་ཟླ་འཇོག་གི་སྤང་བ་དང་༣། བདུན་བརྒྱུད་ཚུན་གྱི་ཉེ་དུ་མ་ཡིན་པའི་དགེ་སློང་མར་རང་གི་ཆོས་གོས་རྙིང་པ་འཁྲུར་འཇུག་པའི་སྤང་༤བ་དང་། ཉེ་དུ་མ་ཡིན་པའི་དགེ་སློང་མ་དེ་ལ་གོས་ཀྱི་རྒྱུ་འཁོར་གསུམ་ཁེབས་པའི་ཚད་ལོངས་པ་ཡན་ཆད་ལེན་པ་ལ་ཞུགས་ནས་ཐོབ་པ་༥དང་། རང་ལ་ཆོས་གོས་རྣམ་གསུམ་ཚང་བཞིན་དུ་ཉེ་དུ་མིན་པའི་ཁྱིམ་པར་གོས་ཀྱི་རྒྱུ་འཁོར་གསུམ་ཁེབས་པའི་ཚད་ལོངས་པ་ཡན་ཆད་སློང་བ་ལ་ཞུགས་ནས་ཐོབ་པ་དང་༦། ཆོས་གོས་རྣམ་གསུམ་ཚང་བར་མེད་ན་ཉེ་མིན་ཁྱིམ་པར་སློང་བར་རིགས་ཀྱང་གོས་མང་པོ་སྟེར་ན་སྟོད་གཡོགས་དང་སྨད་གཡོགས་གཅིག་ལས་ལྷག་པོར་ལེན་པ་༧དང་། ཉེ་མིན་ཁྱིམ་པས་རང་ལ་སྟེར་བསམ་སྟེ་ཆོས་གོས་འདི་སྦྱིན་གནས་དགེ་སློང་འདི་ལ་འབུལ་དགོས་ཞེས་བློས་དཔགས་པ་ལས། འབུལ་ལམ་མི་འབུལ་བརྟགས་པའི་ཆེད་དུ་རིན་དང་ཁྲུ་ཚད་ཀྱིས་དྲན་པ་བརྗོད་དེ་སློང་བ་ལ་ཞུགས་ནས་ཐོབ་༨ པ་དང་། ཉེ་མིན་ཁྱིམ་བདག་ཕོ་མོ་སོ་སོས་རང་ལ་གོས་རེ་རེའམ་མང་པོ་འབུལ་བར་ཐོས་དཔགས་ཀྱིས་དེ་བརྟགས་པའི་བསམ་པས་དྲན་བསྐུལ་སློང་བ་ལ་ཞུགས་ནས་ཐོབ་པ་༩དང་། སྦྱིན་བདག་ཕོ་ཉ་ཞལ་ཏ་བ་སྟེ་ཁྱིམ་པ་གསུམ་ལས་སྦྱིན་བདག་གིས་ཆོས་གོས་ཀྱི་རིན་རུང་བ་མ་ཡིན་པ་རིན་ཆེན་གསེར་དངུལ་ལྟ་བུ་ཕོ་ཉ་བ་ལ་བསྐུར་བ་ཕོ་ཉས་དགེ་སློང་ལ་འབུལ་བ་ན། དེ་ལེན་དུ་མི་རུང་བས་ན། ཕོ་ཉ་དེས་དགེ་སློང་རང་གི་ཞལ་ཏ་བ་ལ་གཏད་ནས་གོས་འགྲུབ་ཏུ་བཅུག་པ་ལས། གོས་དུས་སུ་མ་བྱུང་ན་དགེ་སློང་གིས་ཞལ་ཏ་བ་ལ་དངོས་སུ་བསྐུལ་བ་ལན་གསུམ་བྱ། དེ་ལ་མ་བྱུང་ན་ཁོའི་གན་དུ་ལན་གསུམ་མཐོང་སར་ཅང་མི་སྨྲ་བས་བསྡད་ནས་བསླངས་པ་ལ་ཉེས་པ་མེད་ཅིང་། བསྐུལ་བསྡད་དྲུག་པོ་དེ་ལས་ལྷག་པར་ལེན་པ་ལ་ཞུགས་ནས་ཐོབ་༡༠པ་རྣམས་སོ། །བཅུ་ཚན་གཉིས་པ་སྟན་སོགས་ཀྱི་སྡེ་ནི། སྲིན་བལ་ནང་ཚངས་བྱས་པའི་སྟན་བྱེད་དང་། །དཀོན་སར་བལ་ནག་འབའ་ཞིག་སྟན་དུ་འདིངས། །བལ་ནག་ཆ་གཉིས་སྟན་བྱེད་ལོ་དྲུག་ནི། །མ་སོང་སྟན་གསར་བྱེད་དང་ཚད་ལྡན་གྱི། །གདིང་བ་ཡོད་ཀྱང་སླར་བཟོ་བལ་ནག་ནི། །རྙེད་ནས་ལམ་གྱི་དཔག་ཚད་གསུམ་མཐར་བྱེད། །དགེ་སློང་མ་ལ་བལ་འཁྲུ་རྨེལ་བཅུག་དང་། །གསེར་དངུལ་ལེན་དང་ཚོང་འབུན་མངོན་མཚན་ཅན། །ཆེད་དུ་ཚོང་བྱེད། ཅེས་པ་སྟེ། རིན་ཐང་ཆེ་བ་སྲིན་བལ་གྱི་ནང་ཚངས་བྱས་པའི་སྟན་བྱེད་པ་༡དང་། ཤིན་ཏུ་དཀོན་སར་བལ་ནག་འབའ་ཞིག་གིས་ནང་ཚངས་བྱས་པ་སྟན་དུ་འདིང་༢བ་དང་། བལ་དཀར་པོ་བསྲེས་ཀྱང་བལ་ནག་སྟན་གྱི་ཆ་གཉིས་ལས་ལྷག་པའི་སྟན་བྱེད་པའམ་བྱེད་དུ་འཇུག་པ་དང་༣། སྟན་སྔ་མ་ཡོད་བཞིན་ལོ་དྲུག་ནི་མ་སོང་ཞིང་དགེ་འདུན་ལ་གནང་བ་མ་ཐོབ་པར་སྟན་གསར་པ་ནང་ཚངས་ཅན་བྱེད་པ་དང་༤། ཚད་ལྡན་གྱི་གདིང་བ་རྙིང་པ་ཡོད་ཀྱང་གསར་པ་སླར་བཟོ་བ་ན་རྙིང་པ་ནས་བདེ་བར་གཤེགས་པའི་མཐོ་གང་སྟེ་མིའི་ཁྲུ་ཕྱེད་དོ་གསར་པ་ལ་མ་བསླན་པར་ལོངས་སྤྱད་པ་༥དང་། རང་དབང་བའི་དངོས་པོ་བལ་ནག་ལ་སོགས་པ་ནི་རྙེད་ནས་ཆགས་སེམས་ཀྱིས་ཉིན་གཅིག་གི་ནང་དུ་དགེ་ཚུལ་ལྟ་བུ་འཁུར་ཁྱེར་གྲོ གས་མེད་ན་ལམ་གྱི་དཔག་ཚད་གསུམ་ཚུན་གནང་ལ་དེ་ཕན་ཆད་མཐར་བྱེད་པ་སྟེ། དེ་ནས་རྒྱངས་གྲགས་སུ་ཁྱེར་བས་སམ་ཁྱེར་གྲོགས་ཡོད་ན་དང་པོ་ནས་བརྩམས་ཏེ་རྒྱངས་གྲགས་གཅིག་འདས་པ་དང་༦། ཉེ་དུ་མ་ཡིན་པའི་དགེ་སློང་མ་ལ་དགེ་སློང་གིས་བལ་འཁྲུ་ཞིང་རྨེལ་དུ་བཅུག་པ་༧དང་། དགེ་སློང་གིས་རུང་བ་མ་བྱས་པའི་གསེར་དངུལ་སོགས་རིན་པོ་ཆེ་ལ་ཆུད་འཛའ་བ་སོགས་ཀྱི་རྐྱེན་མེད་བཞིན་དུ་ཆགས་པས་རེག་གམ་རེག་ཏུ་བཅུག་ནས་བདག་གིར་བྱས་ཏེ་ལེན་པ་༨དང་། ཉེ་མིན་ཁྱིམ་པར་དགེ་སློང་གིས་ཁེ་སྤོག་འདོད་པས་ཚོང་ཟོག་རིན་པོ་ཆེ་སོགས་འབུན་བསྐྱེད་དུ་བཏང་ནས་མངོན་མཚན་ཅན་གྱི་ཟོག་རྩ་དེ་ལས་བསྐྱེད་གོས་ཁྲུ་གང་ཡན་ལོངས་པ་ཐོབ་པ་༩དང་། དགེ་སློང་གི་ཁེ་སྤོག་འདོད་པའི་ཆེད་དུ་ཉེ་མིན་ཁྱིམ་པ་ལ་རིན་པོ་ཆེ་ལས་གཞན་པའི་དངོས་པོ་འབྲུ་དང་གོས་སོགས་མོད་ན་ཉོ་ཞིང་དཀོན་ན་ཚོང་པར་བྱེད་པའི་བསྐྱེད་ཐོབ་པ་༡༠རྣམས་སོ། །བཅུ་ཚན་གསུམ་པ་ལྷུང་བཟེད་སོགས་ཀྱི་སྡེ་ནི། ལྷུང་བཟེད་བྱིན་མ་བསླབས། ཞག་བཅུ་འདས་འཆང་ལྷུང་བཟེད་ཟུང་འཆང་བ། །གླ་རྔན་མེད་པར་འཐག་འཇུག་འཐག་རྒྱ་བསྐྱེད། །དགེ་སློང་གོས་བྱིན་སླར་འཕྲོག་བརྟད་བྱུང་གོས། །སྦྱིན་དུས་བཤད་ལས་སྔ་བར་བདག་གིར་བྱས། །དགོན་པར་འཇིགས་བཅས་གོས་བྲལ་ཞག་བདུན་འདས། །རས་ཆེན་དགག་དབྱེ་ཟིན་ཀྱང་ཟླ་ཕྱེད་འདས། །དགེ་འདུན་བསྔོས་པའི་རྙེད་པ་བདག་ཏུ་བཟུང་། །ན་སྨན་ཞག་བདུན་འདས་ན་གསོག་འཇོག་གོ། །ཞེས་པ་སྟེ། དགེ་སློང་རང་གི་ལྷུང་བཟེད་ཚད་ལྡན་བྱིན་གྱིས་མ་བརླབས་པའམ་བརླབས་ཀྱང་ཤན་སྟོབས་ཀྱིས་ཞག་བཅུ་འདས་པར་འཆང་ནས་བཅུ་གཅིག་པའི་སྐྱ་རེངས་ཤར་བ་༡དང་། རྒྱུ་དབྱིབས་ཁ་དོག་གི་རུང་ཞིང་མཐེ་བོའི་ལྟོ་གང་གིས་ལྷག་མར་ཕུལ་དགུ་ཤོང་བ་ཡན་ཆད་ཀྱི་ལྷུང་བཟེད་ཡོད་བཞིན་དུ་ཉེ་མིན་ཁྱིམ་པ་ལ་ལྷུང་བཟེད་གཞན་བསླངས་པས་ཐོབ་ན་དེ་དང་ཟུང་འཆང་བ་ཡིན་ཅིང་། འདི་ཡང་བྱིན་མ་བརླབས་པར་ཞག་བཅུ་འདས་ན་ལྟུང་བ་སྔ་མར་༢འགྱུར་རོ། །ལྷུང་བཟེད་ཀྱི་ཚད་ཕུལ་དགུ་ཤོང་བ་ཆུང་ཚད་དང་། ཕུལ་བཅོ་བརྒྱད་ཤོང་བ་ཆེ་ཚད། དེ་གཉིས་ཀྱི་བར་འབྲིང་ཚད། ཕུལ་རེ་རེ་ལ་ཁྱོར་བ་ཕྱེད་བ ཞི་རེ་ཡོད་དོ། །ཉེ་དུ་མིན་པའི་ཐག་མཁན་ལ་གླ་རྔན་མེད་པར་རང་ངམ་བསྐོས་པས་གོས་འཐག་ཏུ་འཇུག་སྟེ་ལག་ཏུ་ཐོབ་པ་༣དང་། ཉེ་མིན་ཁྱིམ་པས་རང་ལ་འབུལ་རྒྱུའི་གོས་འཐག་ཏུ་བཅུག་པ་ན། བདག་པོས་མ་གནང་པར་བསྔོ་ཚོད་ལས་ལྷག་པར་འཐག་རྒྱ་བསྐྱེད་དུ་བཅུག་ནས་ཐོབ་པ་དང་༤དང་། རང་དགེ་སློང་གིས་དགེ་སློང་གཞན་ལ་གོས་སོགས་བྱིན་པ་སླར་འཕྲོག་སྟེ་དེ་དང་བྲལ་བ་དང་༥། དབྱར་གནས་པའི་དགེ་འདུན་ལ་ཕུལ་བ་བརྟད་པ་ནི་གློ་བུར་བའི་མིང་སྟེ་དེས་ན་དབྱར་ནང་དུ་བྱུང་བའི་གོས་སོ་སོར་བྱིན་པའི་དུས་སུ་བཤད་པ་དགག་དབྱེ་བྱས་པའི་ཕྱི་དེ་ཉིད་ལས་སྔ་བར་དབྱར་ནང་དུ་བདག་གིར་བྱས་པ་དང་། སོ་སོར་བགོས་པ་དང་། དགག་དབྱེའི་ཕྱི་དེ་ཉིད་དུ་མ་བགོས་པ་སྟེ། དེ་ལྟར་སྔས་ཕྱིས་ཀྱི་ལྟུང་བ་གསུམ་མོ། །གལ་ཏེ་ལུང་ལས། བརྟད་པ་ལས་བྱུང་བའི་གོས་ལྔ་པོ། ནད་པ་དང་ནད་པའི་ཕྱིར་དང་། འཆི་བ་དང་འཆི་བའི་ཕྱིར་དང་། འགྲོ་བར་ཆས་པ་ལ་སྦྱིན་པ། ཞེས་གསུངས་པ་ལྟར། རྐྱེན་ལྡན་དེ་དག་ལ་དབྱར་མཐའི་ཞག་བཅུའི་ནང་དུ་སོ་སོར་སྦྱིན་ན་ཉེས་པ་མེད་ཅིང་། ཡང་དབྱར་ནང་དུ་ཆོས་སྨྲ་བའི་རྙེད་པ་དང་། ནད་པའི་རིམ་གྲོ་ལ་སོགས་པའི་ཆེད་དུ་སྦྱིན་པའི་རྙེད་པ་ནི་འདིར་མ་གཏོགས་༦སོ། །དགེ་སློང་དགོན་པར་གནས་པས་འཇིགས་པ་དང་བཅས་པའི་སར་ཆོས་གོས་རྣམ་གསུམ་དང་ཞག་དྲུག་བྲལ་བར་གནང་ཡང་ཞག་བདུན་འདས་ཏེ་སྐྱ་རེངས་ཤར་བ་༧དང་། དབྱར་གྱིས་གོས་རས་ཆེན་དབྱར་ཁས་ལེན་པ་དེའི་ཟླ་གཅིག་གི་སྔོན་དུ་བཙལ་ཞིང་རྙེད་ན་ཚོལ་སྔས་པའི་སྤང་བ་དང་། དགག་དབྱེ་ཟིན་ནས་ཀྱང་ཟླ་བ་ཕྱེད་ལས་འདས་པར་འཆང་ན་ཞག་ཕྱིས་པའི་སྤང་བ་༨དང་། སྦྱིན་བདག་གིས་དགེ་འདུན་ལ་བསྔོས་པའི་གོས་སོགས་ཀྱི་རྙེད་པར་རང་ལ་བསྒྱུར་ཏེ་བདག་ཏུ་བཟུང་བ་༩དང་། ན་བ་ལ་ཕན་པའི་སྨན་བྱིན་རླབས་ཀྱི་རང་དུས་ཞག་བདུན་འདས་ནས་གསོག་འཇོག་ཏུ་སོང་བ་བཅངས་པ་ལ་སྤང་རུང་ཐ་མར་༡༠བཞག་གོ། །འདིར་ཐུན་ཚོད་དུ་རུང་བའི་སྨན་ཐུན་ཚོད་ལས་འདས་ནས་སོ། །དེ་རྣམས་ཕྱིར་བཅོས་ཀྱི་སྐབས་བྱིན་འཕྲོགས་དང་། ལྷུང་བཟེད་ཚོལ་བ་གཉིས་ཀྱི་རྫས་རྩ་བ་ནས་སྤང་དགོས་ཤིང་། གཞན་རྣམས་ཞག་གཅིག་གི་རིང་སྤང་བ་སྔོན་དུ་བཏང་དགོས་སོ། །བཞི་པ་ལྟུང་བྱེད་འབའ་ཞིག་པའི་སྡེ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ལྟུང་བྱེད་འབའ་ཞིག་དགུ་བཅུ་ཐམ་པ་ནི། །ཞེས་པ་སྟེ། དེ་ཡང་སྤྱད་ན་ངན་སོང་དུ་ལྟུང་བར་བྱེད་ཅིང་བཤགས་དུས་སྤང་བྲལ་སྔོན་དུ་བཏང་མ་དགོས་པས་ན་འབའ་ཞིག་པ་ཞེས་བྱ་ལ། དེའི་གྲངས་དགུ་བཅུ་ཐམ་པ་བཤད་པ་ནི་ཞེས་པའོ། །གཉིས་པ་རྒྱས་པར་བཤད་པ་ལ། རྩ་བའི་མདོར། ཤེས་བཞིན་དང་ནི་ས་བོན་དང་། །མ་བསྐོས་པ་དང་ཡང་ཡང་དང་། །ཆུ་དང་ཁྱིམ་དང་བསམ་བཞིན་དང་། །མགྲོན་མང་རྐུན་མ་ཆོས་སྟོན་ནོ། །ཞེས་པའི་སྡོམ་ལྟར་བཅུ་ཚན་དགུ་ལས། བཅུ་ཚན་དང་པོ་ཤེས་བཞིན་སོགས་ཀྱི་སྡེ་ནི། ཤེས་བཞིན་རྫུན་སྨྲ་དགེ་སློང་སྐྱོན་བརྗོད་པ། །ཕྲ་མས་འབྱེད་དང་སྐྱོ་སྔོགས་བཟླུམ་ཀྱང་དབྱེ། །བུད་མེད་ཆོས་སྟོན་བསྙེན་པར་མ་རྫོགས་དང་། །ལྷན་ཅིག་ཆོས་འདོན་གནས་ངན་ལེན་ལྟུང་བརྗོད། །མི་ཆོས་བླ་མ་བདེན་སྨྲ་བཤེས་ངོར་འཕྱ། །བསླབ་གཞི་ཁྱད་གསོད། ཅེས་པ་སྟེ། སྡེ་ཚན་འདིའི་དང་པོ་ནི། དེ་ཡང་ཕམ་པའི་རྫུན་དང་། གཞི་མེད་བག་ཙམ་གྱི་ལྷག་མའི་རྫུན་དང་། ཤེས་བཞིན་དུ་ཆོས་དང་ཆོས་མིན་འགལ་འདུར་སྨྲ་བ་སྦོམ་པོར་གྱུར་པའི་རྫུན་དང་། ཡང་དག་དྲི་བའི་དུས་ལྟུང་བ་ཡོད་བཞིན་མི་སྨྲ་བ་ཉེས་བྱས་ཀྱི་རྫུན་ཏེ་བཞི་དང་། ལྟུང་བྱེད་རང་གི་ནང་ཚན་དུ་བཤད་པ། བཤེས་༡ངོར། འཕྱ་བ༢། ཟས་ཅུང་ལེན༣། སྐུར་འདེབས༤། ཉེར་འཇོག༥ །ཁྱད་གསོད་བཅས་༦མ་ཡིན་པ་ཤེས་བཞིན་དུ་རྫུན་སྨྲ་བ་ཉན་པ་པོས་གོ་བ་དང་། གཉིས་པ་ནི། ཡུལ་དགེ་སློང་ལ་ཡུལ་དུས་དེར་སྐྱོན་དུ་གྲགས་པའི་ཚིག་ཕན་སེམས་མ་ཡིན་པས་བརྗོད་པ་ཕ་རོལ་པོས་གོ་བ་དང་། གསུམ་པ་ནི། ཡུལ་དགེ་སློང་མཐུན་པ་དག་ཕྲ་མས་འབྱེད་པར་བྱེད་པ་གོ་བ་དང་། བཞི་པ་ནི། དགེ་སློང་གཉིས་རྩོད་པ་དགེ་འདུན་གྱིས་སྐྱོ་སྔོགས་ཀྱིས་བཟླུམ་པར་བྱས་ཟིན་ཀྱང་དེ་ཉིད་སླར་ཡང་དབྱེ་འདོད་པས་བཤིག་པར་བརྩམ་པའི་ཚིག་སྨྲས་པ་གོ་བ་དང་། ལྔ་པ་ནི། ཁྲིམས་གྲོགས་མེད་པར་ཡུལ་ཉན་འདོད་ཀྱི་བུད་མེད་ལ་དེས་མི་ཤེས་པའི་ཆོས་ཚིག་ལྔའམ་དྲུག་ལས་ལྷག་པར་སྟོན་པ་དང་། དྲུག་པ་ནི། རྒོད་བག་གི་བསམ་པས་བསྙེན་པར་མ་རྫོགས་པ་དང་ལྷན་ཅིག་ཏུ་ཆོས་ཀྱི་ཚིག་གདངས་སྣ་ཚོགས་ཀྱིས་འདོན་པར་བྱས་པ་དང་། བདུན་པ་ནི། ཡུལ་ཁྱིམ་པ་ལ་དགོས་པ་མེད་པར་དགེ་སློང་གཞན་ལ་གནས་ངན་ལེེན་ཕམ་ལྷག་གི་ལྟུང་བ་བྱུང་བ་གླེང་བར་མ་བསྐོས་བཞིན་དུ་ལྟུང་བ་བརྗོད་ནས་གོ་བ་དང་། བརྒྱད་པ་ནི། མི་ཆོས་བླ་མའི་ཡོན་ཏན་ཐོབ་པའི་དགེ་སློང་གིས་ཡུལ་བསྙེན་པར་མ་རྫོགས་པ་ལ་དགོས་པ་ཁྱད་པར་ཅན་མེད་བཞིན་དུ་དེ་ཐོབ་པོ་ཞེས་བདེན་པར་སྨྲས་པ་ཡུལ་གྱིས་གོ་བ་དང་། དགུ་པ་ནི། དགེ་འདུན་གྱི་བྱ་བ་བྱས་པའི་དགེ་སློང་ལ་རུང་བ་ཚད་ལྡན་གྱི་ཡོ་བྱད་ཅུང་ཟད་བྱིན་པ་ལ་མི་བཟོད་པས་དགེ་འདུན་གྱི་རྫས་གང་ཟག་ལ་བཤེས་ངོར་བྱས་ནས་བྱིན་ནོ་ཞེས་འཕྱས་པ་ཕ་རོལ་པོས་གོ་བ་དང་། བཅུ་པ་ནི། གསོ་སྦྱོང་གི་དུས་ལྟ་བུ་སོ་ཐར་གྱི་མདོ་འདོན་པའི་ཚེ་བསླབ་གཞི་ཕྲ་ཞིང་ཕྲ་བ་འདི་ལྟ་བུ་འདོན་པས་ཅི་བྱས་ཞེས་ཁྱད་དུ་གསོད་བའི་ཚིག་སྨྲས་པ་གཞན་གྱིས་གོ་བ་རྣམས་སོ། །བཅུ་ཚན་གཉིས་པ་ས་བོན་སོགས་ཀྱི་སྡེ་ནི། ས་བོན་སྐྱེ་བ་གཅོད། བདག་གི་ངོར་འཕྱ་བསྒོ་བ་རྣར་གཟོན་ནི། །ལྟུང་བྱུང་གླེང་ལ་མ་ཐོས་ལན་གཞན་འདེབས། །ཁྲི་དང་འདིང་བ་མ་བསྡུས་བཏིང་སོང་དང་། །དགེ་སློང་སྐྲོད་དང་ཐོ་མཚམས་ཕྱིས་གནོན་བྱས། །མལ་ཁྲིས་བུག་དབྱུང་སྲོག་ཆགས་ལྡན་པའི་ཆུ། །རྩྭར་འདེབས་གཙུག་ལག་ཕ་གུ་རིམ་གཉིས་བརྩིགས། །ཤེས་བཞིན་བགྱིས་སོ། །ཞེས་པ་སྟེ། སྡེ་ཚན་འདིའི་དང་པོ་ནི། རུང་བ་མིན་པ་ནི་མ་ཉམས་པའི་ས་བོན་འཇོམས་པར་བྱེད་ཅིང་རྩྭ་ཤིང་སོགས་སྐྱེ་བ་གཅོད་པའམ་ཉམས་པར་བྱེད་པ་སྟེ། ཉམས་པའི་ཚེ་རྩྭ་དང་ནས་སོགས་རེ་རེའི་གྲངས་བཞིན་ལྟུང་བར་འགྱུར་ཞིང་། སྟར་ཀ་ལ་སོགས་པའི་འབྲས་བུ་སྨིན་པ་སྡོང་བུ་ལས་ཕྲལ་བར་བྱས་པ་སོགས་ཉེས་བྱས་སོ། །རུང་བ་ནི་མེ་དང་། མཚོན་དང་། བཀས་པའི་རུང་བ་གསུམ་ལས། འབྲས་ལྟ་བུ་སྣོད་དུ་བླུགས་ནས་བསྙེན་པར་མ་རྫོགས་པས་ཕྱོགས་བཞི་ནས་མེས་རེག་ཙམ་བྱེད་པ་དང་། ལ་ཕུག་ལྟ་བུ་མཚོན་གྱིས་རྨ་བཏོད་པ་དང་། སྟར་ཀ་ལྟ་བུ་ཁ་བཀས་པ་བཅས་སོ། །གཉིས་པ་ནི། ཞལ་ཏ་བས་ཆོས་དང་མཐུན་པ་བྱས་ཀྱང་འདིས་བདག་གི་ངོར་གནས་མལ་སོགས་གང་ཡང་རུང་བ་ངན་པར་བྱས་སོ་ཞེས་འཕྱ་བ་ལ་དགེ་འདུན་གྱིས་གསོལ་བའི་ལས་ཀྱིས་ངན་པའི་གྲངས་སུ་བཅུག་པ་དང་། གསུམ་པ་ནི། རང་ལ་ལྟུང་བ་བྱུང་བ་བསྒོ་བ་རྣར་གཟོན་པའི་སྒོ་ནས་ནི་དགེ་སློང་གཞན་གྱིས་ཕྱིར་བཅོས་སུ་གཞུག་པའི་ཕྱིར་ཆེད་དུ་ལྟུང་བ་བྱུང་བ་དེ་གླེང་པ་ལྟ་བུ་ཆོས་མཐུན་གྱི་བསྒོ་བ་དང་དྲི་བ་དྲིས་པ་ལ་དེ་མ་ཐོས་པ་ལྟར་རམ་ཁྱད་གསོད་ལྟ་བུས་ལན་གཞན་ལོག་པར་འདེབས་པའི་ཚིག་སྨྲས་པ་ཡུལ་གྱིས་གོ་བ་དང་། བཞི་པ་ནི། དགེ་འདུན་གྱི་ཁྲི་དང་ཁྲིའུ་སོགས་གནས་མལ་ལ་ལོངས་སྤྱད་ནས་རང་གིས་མ་བསྡུས་ཤིང་། གཞན་ལའང་མ་བཅོལ་བར་བླ་གབ་མེད་སར་བོར་བས་ཆུད་ཟོས་པའམ། མ་ཟོས་ཀྱང་དེའི་ཉེ་འཁོར་ནས་འདོམ་ཞེ་དགུ་འདས་ཏེ་ཕྱིན་པ་དང་། ལྔ་པ་ནི། དགེ་འདུན་གྱི་གཙུག་ལག་ཁང་སྲོག་ཆགས་སྐྱེ་བའི་ཉེས་དམིགས་ཡོད་སར་རྩྭ་ལ་སོགས་པའི་འདིང་བ་ལ་ལོངས་སྤྱད་ཟིན་ནས་རང་ངམ་བསྒོས་པས་མ་བསྡུས་པར་བཏིང་བཞིན་བོར་བས་ཆུད་ཟོས་པའམ་མ་ཟོས་ཀྱང་ཉེ་འཁོར་ལས་འདོམ་ཞེ་དགུ་འདས་ཏེ་སོང་བ་དང་། དྲུག་པ་ནི། གཙུག་ལག་ཁང་ནས་དགེ་སློང་གཞན་ཞེ་སྡང་གིས་སྐྲོད་དམ་སྐྲོད་དུ་བཅུག་པས་དེ་ཕྱི་རོལ་དུ་ཐོན་པ་དང་། བདུན་པ་ནི། གཙུག་ལག་ཁང་དུ་སྔར་ཞུགས་པའི་དགེ་སློང་གཞན་ལ་ཐོ་འཚམས་པའི་བསམ་པས་ཕྱིས་གནོན་བྱས་ཏེ་ལུས་ངག་གིས་ཟིལ་གྱིས་གནོན་པ་དང་། བརྒྱད་པ་ནི། གཙུག་ལག་ཁང་གི་སྟེང་ཐོག་སྙི་བ་ལ་མལ་ཁྲི་རྐང་པ་རྣོན་པོས་བཙུག་ནས་ལུས་ལྗིད་ཕབ་སྟེ་འདུག་པས་བུག་པ་དབྱུང་བ་དང་། དགུ་པ་ནི། སྲོག་ཆགས་དང་ལྡན་པའི་ཆུ་དང་རྩྭ་ཤིང་སོགས་ལ་དེར་ཤེས་བཞིན་དུ་ཆུ་ནི་རྩྭ་སོགས་སྐམ་སར་འདེབས་པ་དང་། རྩྭ་སོགས་ཆུར་འདེབས་པས་དུད་འགྲོ་ཇི་སྙེད་ཤི་བ་དེ་སྙེད་ཀྱི་ལྟུང་བྱེད་དང་། བཅུ་པ་ནི། གཞི་མི་བརྟན་པ་དང་ཆུ་ཁུང་མ་བཏོད་པ་སོགས་འཇིག་རྐྱེན་ཡོད་སར་སྤྱོད་ལམ་བཞི་ཤོང་ཡན་ཆད་ཀྱི་གཙུག་ལག་ཁང་རང་ངམ་བསྐོས་པས་ཉིན་གཅིག་ལ་ཕ་གུའི་རིམ་པ་འཇིམ་པ་དང་བཅས་པ་གཉིས་སམ་གསུམ་ལས་ལྷག་པ་བརྩིགས་པ་ཤེས་བཞིན་དུ་བགྱིས་ན་ལྟུང་བར་འགྱུར་བ་རྣམས་སོ། །བཅུ་ཚན་གསུ མ་པ་མ་བསྐོས་པ་སོགས་ཀྱི་སྡེ་ནི། འདི་མན་དགེ་སློང་མར། མ་བསྐོས་ཆོས་སྟོན་བསྐོས་ཀྱང་ཉི་ནུབ་དང་། །ཁ་ཟས་ཕྱིར་སྟོན་གོས་བཙེམས་ཆོས་གོས་སྦྱིན། །དོན་མཐུན་ལམ་འགྲོགས་གྲུ་དེ་གྱེན་མཐུར་འགྲོ། །དབེན་པར་གཅིག་འདུག་པ་དང་འགྲེང་བ་དང་། །སྦྱོར་བཅུག་ཟས་ཟ་རྣམས་ནི་སྤང་བར་བྱ། །ཞེས་པ་སྟེ། འདི་མན་བཅུ་ཚན་འདི་དགེ་སློང་མར་བརྟེན་ནས་འབྱུང་བ་ཡིན་ཏེ། དང་པོ་ནི། དེ་ཡང་དགེ་སློང་མའི་སྟོན་པར་མ་བསྐོས་པའམ་བསྐོས་ཀྱང་མཚན་ཉིད་དང་མི་ལྡན་པའི་དགེ་སློང་གིས་དགེ་སློང་མ་ལ་ཆོས་སྟོན་ནས་གོ་བ་དང་། གཉིས་པ་ནི། དགེ་སློང་མའི་སྟོ ན་པར་བསྐོས་ཀྱང་འཇིགས་པ་དང་བཅས་པའི་གནས་སུ་ཉི་མ་ནུབ་ཟིན་རྗེས་སུའང་ཆོས་སྟོན་པ་དེས་གོ་བ་དང་། གསུམ་པ་ནི། དགེ་སློང་མའི་སྟོན་པར་འོས་ཤིང་བསྐོས་པས་རྙེད་པའི་ཕྱིར་ཆོས་མི་སྟོན་ཀྱང་། ཕྲག་དོག་གིས་ཁ་ཟས་ཅུང་ཟད་ཙམ་གྱི་ཕྱིར་ཆོས་སྟོན་ནོ་ཞེས་སྐུར་པ་བཏབ་པ་ཡུལ་གྱིས་གོ་བ་དང་། བཞི་པ་ནི། ཉེ་མིན་དགེ་སློང་མའི་གོས་བཙེམས་ཏེ་གྲུབ་པ་དང་། ལྔ་པ་ནི། ཉེ་མིན་དགེ་སློང་མ་ལ་བཤེས་ངོ་ཙམ་གྱི་ཕྱིར་རང་གི་ཆོས་གོས་རུང་བ་ཚད་ལྡན་སྦྱིན་པ་དེ་ལག་ཏུ་ཐོབ་པ་དང་། དྲུག་པ་ནི། ཉེ་མིན་དགེ་སློང་མ་དང་ལྷན་ཅིག་དོན་མཐུན་པས་མགྲོན་ཐབས་སུ་ལམ་ལ་འགྲོགས་ཏེ་འགྲོ་ན་རྒྱངས་གྲགས་རེ་རེ་འདས་པ་ལ་ལྟུང་བ་རེ་རེ་དང་ཕྱེད་ལ་ཉེས་བྱས་དང་། བདུན་པ་ནི། དེ་བཞིན་དགེ་སློང་མ་དང་ལྷན་ཅིག་གྲུར་ཞུགས་ནས་གྲུ་དེ་ཉིད་ཐད་ཀར་མི་འགྲོ་བར་གྱེན་དང་མཐུར་དུ་འགྲོ་ན་སྔར་བཞིན་རྒྱངས་གྲགས་རེ་རེ་འདས་པ་དང་། བརྒྱད་པ་ནི། ཉེ་མིན་བུད་མེད་དང་དབེན་པ་སྐྱབས་ཡོད་སར་ཁྲིམས་གྲོགས་མེད་པར་གནས་གཅིག་ཏུ་འདོམ་གང་ཙམ་གྱིས་བར་ཆོད་ཀྱང་གཉིས་ཀ་ས་ལ་འདུག་པ་དང་། དགུ་པ་ནི། དབེན་པར་བུད་མེད་དམ་ཁྱད་པར་དགེ་སློང་མ་དང་ལྷན་ཅིག་འགྲེང་བ་དང་། བཅུ་པ་ནི། དགེ་སློང་གིས་ཉེས་མིན་དགེ་སློང་མ་ལ་སྦྱིན་བདག་ཁྱིམ་པ་ལ་རང་དང་མི་འབྲེལ་བའི་ཡོན་ཏན་བརྗོད་ཅིང་སྦྱོར་དུ་བཅུག་པའི་དུས་རུང་གིས་ཟས་ཟ་བ་ན་ལྟུང་བར་འགྱུར་བ་རྣམས་ནི་སྤང་བར་བྱ་བ་རྣམས་སོ། །བཅུ་ཚན་བཞི་པ་ཡང་ཡང་སོགས་ཀྱི་སྡེ་ནི། ཡང་ཡང་ཟས་ཟ་མུ་སྟེགས་འདུག་པའི་སར། །ཞག་གཅིག་ལྷག་བསྡད་ཟ་དང་ལྷུང་བཟེད་དོ། །ཟ་དང་ཟོས་རྗེས་བཟའ་བཅའ་ཟ་བ་དང་། །སྤང་ཟས་ལྟུང་འབྱུང་ཆེད་དུ་རྫུན་གྱིས་སྟོབ། །གནང་མིན་མཚམས་ནང་ལོགས་སུ་འདུས་ནས་ཟ། །དུས་མིན་ཕྱེད་ཡོལ་ཟ་དང་གསོག་འཇོག་ཟ། །བྱིན་ལེན་མ་བྱས་སྨན་བཞི་ཁར་མིད་པ། །བསོད་པ་ཞིམ་པའི་ཟས་སློང་། །ཞེས་པ་སྟེ། བཅུ་ཚན་འདིའི་དང་པོ་ནི། བསོད་སྙོམས་ལན་གཅིག་གིས་གསོ་མི་ནུས་པའི་ནད་ཀྱི་བཏབ་པ་དང་། དགེ་འདུན་དང་མཆོད་རྟེན་གྱི་ལས་དང་། མུ་གེའི་དུས་དང་། དཔག་ཚད་ཕྱེད་དུ་ཕྱིན་པ་བཅས་མ་ཡིན་ཞིང་སྲ་བརྐྱང་མ་བཏིང་བའི་དགེ་སློང་གིས་ཁྱིམ་པ་ཉེ་དུ་མ་ཡིན་པ་ལ། དུས་རུང་གི་ཟས་ཉི་མ་གཅིག་ལ་ཁྱིམ་སྔ་མར་ཟོས་ཟིན་ཀྱང་ཡང་ཁྱིམ་གཉིས་པ་དང་གསུམ་པ་ལ་སོགས་པ་ལས་ཡང་ཡང་བསླངས་ཏེ་ཁ་ཟས་ཟ་བ་དང་། གཉིས་པ་ནི། ཉེ་མིན་ཁྱིམ་པའི་གནས་སུ་མུ་སྟེགས་པ་འདུག་པའི་སར་སྦྱིན་བདག་གིས་མ་བསྟབ་པར་ཞག་གཅིག་ལས་ལྷག་པར་བསྡད་དེ་ཉི་མ་གཉིས་པའི་ཟས་ཟ་བ་དང་། གསུམ་པ་ནི། ཉེ་མིན་ཁྱིམ་པས་ཅི་བདེར་སྟོབ་པ་མ་ཡིན་པར་དུས་རུང་གི་ཟས་ཆེ་ཚད་ལྷུང་བཟེད་གང་ངམ། འབྲིང་ཚད་དོ། །ཆུང་ཚད་གསུམ་སྟེ་བྲེ་ཕྱེད་དང་ལྔ་ལས་ལྷག་པ་བསླངས་ནས་གནས་གཞན་དུ་ཁྱེར་ཏེ་ཟ་བ་དང་། བཞི་པ་ནི། ན་དུས་དང་མུ་གེའི་དུས་མིན་པར་དུས་རུང་གི་ཟས་ཟོས་ཏེ་བློས་བཅད་ཅིང་ངག་ཏུ་བརྗོད་ནས་དེའི་རྗེས་སུ་བཟའ་བཅའ་གང་རུང་ལྷག་པོ་མ་བྱས་པར་སྔར་གྱི་བཟའ་བཅའ་གང་རུང་ཟ་བ་དང་། ལྷག་པོ་བྱ་ཚུལ་ནི་ཡུལ་དགེ་སློང་གནས་མ་བཏང་བའི་མདུན་དུ་ཙོག་པུས་སྤངས་ཟས་བཟུང་ནས་གསོལ་བ་བཏབ་པས་ཡུལ་དེས་བླངས་ནས་ཁམ་གཉིས་སམ་གསུམ་མམ་ཕུད་ཟ་ཞིང་ཟས་སྤངས་པ་ཡིན་ན་ཟ་མི་དགོས། གང་ལྟར་ཡང་དེ་བཟའ་བ་པོ་ལ་གཏད་ནས་བཟར་རུང་བའོ། །ལྔ་པ་ནི། དགེ་སློང་གཞན་གྱིས་སྤངས་པའི་ཟས་ལྷག་པོར་མ་བྱས་བཞིན་དུ་དེ་ལ་ངན་སེམས་ཀྱི་ལྟུང་བ་འབྱུང་བའི་ཆེད་དུ་ལྷག་པོར་བྱས་སོ་ཞེས་རྫུན་གྱིས་སྟོབ་པའི་ཚིག་སྨྲས་པ་དེས་གོ་ནས་ཟོས་ན་སྟོབ་པ་པོ་ལ་ལྟུང་བ་བྱུང་བ་དང་། དྲུག་པ་ནི། ན་བ་སོགས་གནང་བའི་དུས་མིན་པར་མཚམ་ནང་དུ་བསམ་པ་མི་མཐུན་པས་དགེ་འདུན་སྤྱིའི་ལས་སྒོ་ནས་ལོགས་སུ་དགེ་སློང་གསུམ་ཡན་ཆད་ལྷན་ཅིག་ཏུ་འདུས་ནས་དུས་རུང་གི་ཟས་ཟ་བ་དང་། བདུན་པ་ནི། ན་བ་སོགས་ཀྱི་རྐྱེན་མེད་པར་དུས་རུང་གི་ཟས་ཟ་བའི་དུས་མིན་པ་རང་གང་དུ་གནས་པའི་རང་གླིང་གི་ཉི་མ་ཕྱེད་ཡོལ་ནས་སྐྱ་རེངས་དང་པོ་མ་ཤར་གྱི་བར་དུ་ཟ་བས་མགུལ་དུ་ཇི་ཙམ་མིད་པ་དེ་ཙམ་གྱི་ལྟུང་བ་བྱུང་བ་དང་། ནད་པས་ཀྱང་ཟ་བའི་ཚེ་དུས་དྲན་བྱ་དགོས་སོ། །བརྒྱད་པ་ནི། ན་བ་སོགས་ཀྱི་རྐྱེན་མེད་པར་སྨན་བཞི་གང་རུང་བྱིན་ལེན་བྱས་པ་རང་དུས་ལས་འདས་པས་གསོག་འཇོག་ཏུ་སོང་ཞིང་མ་ཞིག་པ་ཟ་བ་དང་། འདིར་གསོག་འཇོག་ཏུ་འཕྲོས་པ་བཞི་སྟེ། ཆུད་ཟ་བ་སོགས་ཀྱི་རྐྱེན་མེད་པར་ཟས་གང་ལ་བྱིན་ལེན་མ་བྱས་པའི་གོང་དུ་དགེ་སློང་རང་གིས་རེག་པ་དང་༡། དགེ་སློང་རང་དབང་བའི་མཚམས་དངོས་སམ་དེའི་ཉེ་འཁོར་གྱི་ནང་དུ་ཟས་རྗེན་པ་ཞིག་བཙོས་པ་དང་༢། མཚམས་ནང་དེར་དེ་འདྲའི་དངོས་པོ་ཞག་ལོན་པ་དང་༣། དེ་འདྲའི་དངོས་པོ་རྗེན་པར་མཚམས་ཀྱི་ཕྱི་ནང་གང་རུང་དུ་དགེ་སློང་གིས་བཙོས་༤པའོ། །དེ་བཞིན་ནད་ལ་ཕན་པའམ་མུ་གེའི་དུས་མིན་པར་ཟོས་ན་ཉེས་བྱས་སོ། །དགུ་པ་ནི། བདག་ཉིད་ཟན་ཆད་པ་དང་ནད་ལ་ཕན་པ་སོགས་ཀྱི་རྐྱེན་མེད་པར་བྱིན་ལེན་མ་བྱས་པ་ལ་དེར་འདུ་ཤེས་པས། ཆུ་དང་སོ་ཤིང་མ་གཏོགས་སྨན་བཞི་གང་རུང་ཁམ་གཅིག་ཡན་ཆད་ཁར་མིད་པ་དང་། བྱིན་ལེན་ནི། ནོད་པ་པོའི་གློ་དང་རྒྱབ་མ་ཡིན་པ་དང་། མཚམས་གཞན་གྱིས་མ་ཆོད་པར་མདུན་དུ་སྟོབ་པ་པོས་ལག་གཉིས་བཀན་ཏེ་བསྟབ་ཅིང་། ནོད་པ་པོས་ཀྱང་ལག་གཉིས་གན་རྐྱལ་དུ་བཀན་ནས་བླང་ངོ་། །དེ་ལྟར་བྱིན་ལེན་བྱས་པ་འཇིག་པའི་རྒྱུ་ནི་ལུང་རྣམ་འབྱེད་ལས། ཕྲོགས་དང་འདྲིལ་དང་རེག་པ་དང་། །བསྔོས་དང་དགེ་སློང་མིན་གྱུར་དང་། །ངོ་བོ་འགྱུར་དང་སྐྱེ་བ་འགྱུར། །དོར་བ་ཡིས་ནི་བྱིན་ལེན་འཇིག །ཅེས་སོ། །ནད་ལ་ཕན་པ་སོགས་ཀྱི་རྐྱེན་མེད་པར་འོ་མ་སོགས་ཡུལ་དུས་དེར་བསོད་པར་གྲགས་ཤིང་ཞིམ་པའི་ཟས་བཟང་པོ་ཉེ་མིན་ཁྱིམ་པས་ཅི་བདེར་མ་བསྟབས་ཀྱང་ཆོག་མི་ཤེས་པས་སློང་སྟེ་ཟོས་ན་ལྟུང་བྱེད་དུ་འགྱུར་བ་རྣམས་སོ། །བཅུ་ཚན་ལྔ་པ་ཆུ་དང་སོགས་ཀྱི་སྡེ་ནི། སྲོག་ཆགས་བཅས། ཆུར་སྤྱོད་ཉལ་པོ་བྱེད་པའི་ཤུལ་དུ་ཉལ། །དབེན་པའི་སྐྱབས་སུ་འགྲེང་དང་གཅེར་བུར་རྒྱུ། །དམག་བལྟ་དམགས་སར་ཞག་གཉིས་ལྷག་པར་བསྡད། །དམག་གི་རུ་བཀོད་བྱེད་དང་དགེ་སློང་བརྡེག །བརྡེག་ཙམ་གནས་ངན་ལེན་གྱི་ལྟུང་བ་འཆབ། །ཅེས་པ་སྟེ། སྡེ་ཚན་འདིའི་དང་པོ་ནི། རང་དོན་དུ་སྲོག་ཆགས་དང་བཅས་པའི་ཆུར་མ་བརྟགས་པར་ལོངས་སྤྱོད་པ་སྟེ། ལུས་དང་གོས་སོགས་འཁྲུད་པ་དང་འགོག་ཅིང་བསྒྱུར་བ་སོགས་བྱེད་པ་དང་། བཏུང་བ་སོགས་དང་། སྲོག་ཆགས་ཡོད་པའི་རྩྭ་ཤིང་གཅོད་ཅིང་མེར་འཇུག་པ་སོགས་སྲོག་ཆགས་འཆི་བ་མཐོང་ཡང་ལྟོས་མེད་དུ་སྤྱོད་ན་ཤི་བ་ཇི་ཙམ་དེ་སྙེད་ཀྱི་ལྟུང་བའོ། །དེའི་དོན་དུ་ཆུ་ཚགས་ཀྱི་དབྱེ་བ་དཔྱངས་ཚགས་དང་། བུམ་ཚགས་དང་། རིལ་པ་ཞབས་ཚགས་ཅན་སོགས་གང་རུང་བཅང་བར་བྱ་ཞིང་། མར་མེ་འོད་ཁང་བྱ་བ་བཅས་དགོས་སོ། །གཉིས་པ་ནི། ཁྱིམ་པ་ཕོ་མོ་རང་ཁྱིམ་དུ་ཉལ་བོ་བྱེད་པ་ལ་ཞུགས་པའམ་དེར་ཕྱོགས་པ་ལ་དེ་དང་ཉེ་བའི་ཤུལ་དུ་ཉལ་ལམ། འདུག་པ་དེ་དག་དགེ་སློང་དེར་ཡོད་པ་རྣམས་ཀྱི་ཚོར་བ་དང་། གསུམ་པ་ནི། དེར་དབེན་པའི་སྐྱབས་སུ་འགྲེང་སྟེ་གནས་པ་ཚོར་བ་དང་། བཞི་པ་ནི། ནད་པ་དང་ཉེ་དུ་དང་དགེ་བ་ལ་སྦྱོར་བའི་དོན་སོགས་དགོས་པ་ཁྱད་པར་ཅན་མེད་པར་མུ་སྟེགས་པའི་རབ་བྱུང་གཅེར་བུར་རྒྱུ་བ་ཕོ་མོ་གང་རུང་ལ་དུས་རུང་གི་ཟས་རང་གི་ལག་གིས་བྱིན་ཅིང་དེས་ཐོབ་པ་དང་། ལྔ་པ་ནི། རྒྱལ་པོས་བོས་པ་སོགས་རྐྱེན་དང་དགོས་པ་མེད་པར་དགེ་སློང་གིས་རང་གི་གནས་ཀྱི་ཉེ་འཁོར་ལས་འདས་ཏེ་དམག་གི་དཔུང་ལ་བལྟ་བར་ཕྱིན་པས་མཐོང་བ་དང་། དྲུག་པ་ནི། རྐྱེན་དང་དགོས་པ་མེད་པར་དམག་གི་དཔུང་ཡོད་པའི་སར་ཞག་གཅིག་གམ་གཉིས་ལས་ལྷག་པར་བསྡད་པ་དང་། བདུན་པ་ནི། གལ་ཏེ་རྐྱེན་དགོས་ཀྱིས་དམག་གི་ནང་དུ་སྡོད་དགོས་བྱུང་ཡང་རང་དགར་གོ་མཚོན་ལ་རེག་པ་དང་། དམག་དཔུང་གི་རུ་བཤམས་བཀོད་སོགས་བྱེད་པ་དང་། བརྒྱད་པ་ནི། རང་ཁྲོས་པས་དགེ་སློང་གཞན་ལ་བརྡེག་གམ་བརྡེག་ཏུ་བཅུག་པས་ཕོག་པ་ན་བརྡེག་ཐང་དེ་སྙེད་ཀྱི་གྲངས་དང་། དགུ་པ་ནི། ཁྲོས་པས་དགེ་སློང་གཞན་ལ་བརྡེག་པར་བརྩམ་པ་སྟེ་བརྡེག་ཚུལ་བྱས་པ་དེས་གོ་བ་དང་། བཅུ་པ་ནི། མཐོལ་ཡུལ་མཚན་ཉིད་ལྡན་པའི་དབུས་སུ། དགེ་སློང་གཞན་ལ་གནས་ངན་ལེན་གྱི་ལྟུང་བ་ཕམ་ལྷག་གང་རུང་བྱུང་བ་ངོ་ཤེས་སམ་ཐེ་ཚོམ་ཟ་བ་ལ་དགོས་པ་ཁྱད་པར་ཅན་མེད་བཞིན་དུ་འཆབ་སྟེ་མཚན་མཐའ་འདས་ན་ལྟུང་བྱེད་དུ་འགྱུར་བ་རྣམས་སོ། །ཕམ་ལྷག་ལས་གཞན་པའི་ལྟུང་བ་གཞན་འཆབ་ན་ཉེས་བྱས་སོ། །བཅུ་ཚན་དྲུག་པ་ཁྱིམ་དང་སོགས་ཀྱི་སྡེ་ནི། དགེ་སློང་ཟས་གཅོད་མེ་ལ་རེག་ཏུ་བཅུག །དགེ་འདུན་ལས་ལ་འདུན་ཕུལ་ཕྱིར་ལྡོག་སྨྲ། །བསྙེན་མ་རྫོགས་དང་ནུབ་གཉིས་ལྷག་པར་ཉལ། །སྡིག་ལྟའི་ཆོས་ལུགས་མི་གཏོང་ཕེབས་པར་སྨྲ། །དགེ་ཚུལ་སྡིག་ལྟ་མི་གཏོང་ལྷན་ཅིག་ཉལ། །རུང་བའི་ཚོན་མིན་ཁ་དོག་ཅན་གོས་གྱོན། །རིན་ཆེན་དམག་ཆས་རོལ་མོའི་ཆས་ལ་རེག །ཚ་དུས་རང་གར་ཁྲུས་བྱེད། ཅེས་པ་སྟེ། བཅུ་ཚན་འདིའི་དང་པོ་ནི། དགེ་སློང་གཞན་ལ་ཁྱིམ་པས་དུས་རུང་གི་ཟས་འདྲེན་པ་ན་ངན་སེམས་ཀྱིས་དེ་འགོག་པའི་ཚིག་སྨྲས་ནས་གཅོད་དུ་བཅུག་པ་ཁྱིམ་པས་གོ་བ་དང་། གཉིས་པ་ནི། རྒོད་བག་གི་བསམ་པས་མེ་ལ་རེག་གམ་རེག་ཏུ་བཅུག་པ་དང་། འདིར་ཆོས་ལྡན་གྱི་བྱ་བའི་ཆེད་དུ་གནང་བ་ཡིན་སྙམ་པས་དུས་དྲན་བསྟེན་དགོས་སོ། །གསུམ་པ་ནི། དགེ་འདུན་གྱིས་དགེ་སློང་གི་ཆེད་དུ་ལས་བྱས་ཤིང་ཆགས་པ་ལ་དང་པོ་འདུན་པ་ཕུལ་ནས་ཕྱིས་འདུན་པ་ཕྱིར་བྱིན་ཅིག་ཅེས་ལྡོག་པའི་ཚིག་སྨྲ་བ་གོ་བ་དང་། བཞི་པ་ནི། བསྙེན་པར་མ་རྫོགས་པ་དང་ལྷན་ཅིག་གནས་གཅིག་ཏུ་རྐྱེན་དགོས་མེད་པར་ནུབ་གཉིས་ལས་ལྷག་པར་ཉལ་བས་ནུབ་གསུམ་འདས་ཏེ་བཞི་པའི་སྐྱ་རེངས་ཤར་བ་དང་། གལ་ཏེ་གནས་ཁང་གཅིག་ཏུ་ཉལ་ཡང་ཁྲུ་ཕྱེད་དང་དགུས་ཆོད་ན་ལྟུང་བ་མེད་དོ། །ལྔ་པ་ནི། ཆང་འཐུང་བ་དང་ཕྱི་དྲོ་ཟ་བ་སོགས་ལ་ཉེས་པ་མེད་དོ་ཞེས་སྡིག་པ་ཅན་གྱི་ལྟ་བའི་ཆོས་ལུགས་སྨྲ་བ་ཉིད་བཟློག་བྱེད་ལྔའི་མཐའ་ལ་མི་གཏོང་བ་དང་། དྲུག་པ་ནི། དགེ་འདུན་གྱི་གནས་ནས་ཕྱུང་བའི་དགེ་སློང་དང་ལྷན་ཅིག་གཏམ་ཕེབས་པར་སྨྲ་བ་སོགས་སྤྱོད་ལམ་མཐུན་པས་མཚན་མཐའི་སྐད་ཅིག་འདས་པ་དང་། བདུན་པ་ནི། དགེ་ཚུལ་སྡིག་ལྟ་མི་གཏོང་བ་དགེ་འདུན་གྱིས་བསྙིལ་བ་དང་ལྷན་ཅིག་ཉལ་བ་སོགས་སྤྱོད་ལམ་མཐུན་པས་མཚན་མཐའ་འདས་པ་དང་། བརྒྱད་པ་ནི། ཆུ་ཚག་མ་གཏོགས་རུང་བའི་ཚོན་གསུམ་གྱིས་ཁ་བསྒྱུར་བ་མིན་པ་ཁ་དོག་དཀར་པོ་ཅན་གྱི་གོས་ཁྲུ་གང་ཡན་ཆད་གཞན་གྱི་མ་གཡོགས་པར་གྱོན་ན་ལྟུང་བྱེད་དང་། ནག་པོའམ་ཁྲ་བོ། ཚོན་ཆེན་བརྒྱད་ཀྱིས་བསྒྱུར་བ་གྱོན་ན་ཉེས་བྱས་སོ། །དགུ་པ་ནི། ཆུད་འཛའ་བ་དང་། སྦྱིན་བདག་བསོད་ནམས་འདོད་པས་བསྟབས་པ་དང་། ཆོས་འཆད་པ་སོགས་དོན་ཁྱད་པར་ཅན་སྒྲུབ་པའི་སྐབས་མ་ཡིན་པར་རང་ལ་མི་དབང་བའི་ནོར་བུ་མུ་ཏིག་སོགས་རིན་ཆེན་དང་། མདའ་མདུང་སོགས་དམག་ཆས། རྔ་བོ་ཆེ་སོགས་རོལ་མོའི་ཆས་ལ་རྒོད་བག་གིས་རང་ངམ་བསྐོས་པས་རེག་པ་དང་། བཅུ་པ་ནི། དབྱར་ཟླ་གསུམ་དང་ན་བ་སོགས་གནང་བའི་དུས་མིན་པར། ཚ་བ་ཅུང་ཙམ་ཡོད་པའི་དུས་སུ་སྔར་ཁྲུས་བྱས་ནས་རིང་པོར་མ་ལོན་བཞིན་རང་གར་ཁྲུས་བྱེད་ཅིང་ལུས་ཕྱེད་ཆུར་ནུབ་པ་ན་ལྟུང་བར་འགྱུར་པ་རྣམས་སོ། །བཅུ་ཚན་བདུན་པ་བསམ་པ་སོགས་ཀྱི་སྡེ་ནི། དུད་འགྲོ་གསོད། དགེ་སློང་བྱས་ལ་འགྱོད་བསྐྱེད་གག་ཚིལ་བསྒོག །ཆུར་རྩེ་བུད་མེད་གནས་གཅིག་ཉལ་བ་དང་། །དགེ་སློང་དངངས་བྱེད་དེ་ཡི་ཡོ་བྱད་སྦེད། །སྔར་བྱིན་གདེངས་མེད་སླར་བླངས་སྤྱོད་པ་དང་། །གཞི་མེད་སྐུར་བཏབ་བུད་མེད་ལྷན་ཅིག་ཏུ། །སྐྱེས་པ་མེད་པར་ལམ་འགྲོ། ཞེས་པ་སྟེ། བཅུ་ཚན་འདིའི་དང་པོ་ནི། གསོད་སེམས་ཀྱིས་དུད་འགྲོའི་རིགས་གསོད་དམ་གསོད་དུ་བཅུག་ནས་ཇི་སྙེད་ཤི་བ་དེ་སྙེད་ཀྱི་དང་། གཉིས་པ་ནི། དགེ་སློང་བྱས་པ་གཞན་ལ་ཁྱོད་སྡོམ་པ་མ་སྐྱེས་ཞེས་སམ་ཡང་ན་ཉམས་སོ་ཞེས་སོགས་འགྱོད་པ་བསྐྱེད་པའི་ཚིག་སྨྲས་པ་དེས་གོ་བ་དང་། གསུམ་པ་ནི། དགེ་སློང་གཞན་གྱི་ལུས་སྐྱི་གཡའ་བར་བྱ་བའི་ཕྱིར་མཆན་ཁུང་སོགས་ལ་རེག་སྟེ་གག་ཚིལ་བསྒོག་པ་དང་། བཞི་པ་ནི། རྒོད་བག་གི་བསམ་པས་ལུས་ཕྱེད་ནུབ་པའི་ཆུར་རྩེ་བའམ་རྩེར་བཅུག་པ་དང་། ལྔ་པ་ནི། ཁྲིམས་གྲོགས་མེད་པར་དགེ་སློང་བུད་མེད་དང་ལྷན་ཅིག་གནས་གཅིག་ཏུ་ཉལ་བ་ན་མཚན་མཐའ་འདས་པ་དང་། དྲུག་པ་ནི། དགེ་སློང་གཞན་དངངས་པར་བྱེད་འདོད་པས་འཇིགས་སྣང་སྣ་ཚོགས་སྟོན་ནམ་སྟོན་དུ་བཅུག་པས་དེ་དངངས་པར་བྱེད་པ་དང་། བདུན་པ་ནི། དགེ་སློང་སོགས་རབ་བྱུང་སྡེ་ལྔ་གང་ཡང་རུང་བ་དེ་ཡི་ཆོས་གོས་དང་ལྷུང་བཟེད་སོགས་འཚོ་བའི་ཡོ་བྱད་གང་རུང་རྐུ་འདོད་དང་། ཕན་སེམས་མིན་པར་སྦེད་དམ་སྦེད་དུ་བཅུག་ནས་སྦས་པ་དང་། བརྒྱད་པ་ནི། དགེ་སློང་གཞན་ལ་སྔར་རང་གིས་གོས་བྱིན་པ་རྐུ་སེམས་དང་ཡིད་བཅུག་མིན་པར་དེས་གནང་བའི་གདེངས་མེད་བཞིན་སླར་བླངས་ནས་ཅི་དགར་ལོངས་སྤྱོད་པ་དང་། དགུ་པ་ནི། མཐོང་ཐོས་དོགས་གསུམ་གྱི་གཞི་མེད་པའི་དགེ་སློང་གཞན་ལ་ལྷག་མ་བཅུ་གསུམ་གང་རུང་གིས་སྐུར་པ་བཏབ་པ་དེས་གོ་བ་དང་། བཅུ་པ་ནི། ཉེ་མིན་བུད་མེད་དང་ལྷན་ཅིག་ཏུ་སྐྱེས་པའི་ཁྲིམས་གྲོགས་མེད་པར་ལམ་དུ་འགྲོ་ན་རྒྱངས་གྲགས་རེ་ལ་ལྟུང་བ་རེ་དང་། དེའི་ཕྱེད་ལ་ཉེས་བྱས་སུ་འགྱུར་བ་རྣམས་སོ། །བཅུ་ཚན་བརྒྱད་པ་མགྲོན་མང་རྐུན་མ་ལ་སོགས་པའི་སྡེ་ནི། རྐུན་མའང་མཚུངས། ཉི་ཤུ་མ་ལོན་པ་ལ་བསྙེན་རྫོགས་ཕོག །ས་བརྐོ་མགྲོན་བོས་ཟླ་བཞི་ལྷག་པར་ཟོས། །མི་ཤེས་བརྗོད་དང་འཐབ་པའི་ཉན་རྣ་བྱེད། །ཉེས་མེད་མི་སྨྲ་འགྲོ་དང་མི་གུས་འགལ། །ཆང་འཐུང་སྡུས་མིན་ཕྱི་དྲོ་གྲོང་དུ་རྒྱུ། །ཞེས་པ་སྟེ། བཅུ་ཚན་འདིའི་དང་པོ་ནི། ཤོ་གམ་མ་བྱིན་པའམ་རྐུན་མ་དང་ལྷན་ཅིག་འགྲོ་ནའང་སྔ་མ་དང་མཚུངས་ཏེ་རྒྱངས་གྲགས་འདས་པ་དང་། གཉིས་པ་ནི། བསྒྲུབ་བྱ་སྐྱེས་པ་མངལ་བཤོལ་བརྩིས་ཀྱང་ལོ་ཉི་ཤུ་མ་ལོན་པ་ལ་དེར་ཤེས་སམ་ཡིད་གཉིས་ཀྱིས་བསྙེན་རྫོགས་ཕོག་ན་ལས་བརྗོད་པ་གསུམ་པའི་བྱ་བ་བརྗོད་པ་རྫོགས་ནས་བྱེད་པ་བརྗོད་པ་འགོ་རྩོམ་པའི་ཚེ་མཁན་པོ་ལ་ལྟུང་བྱེད་དང་། སློབ་དཔོན་དང་དགེ་འདུན་ལ་ཉེས་བྱས་སུ་གྱུར་བ་དང་། གསུམ་པ་ནི། དགོས་པ་ཁྱད་པར་ཅན་མེད་པར་སོར་བཞི་ཡན་ཆད་ཀྱི་ས་བརྐོ་བའམ་བརྐོར་བཅུག་པ་དང་། བཞི་པ་ནི། སྦྱིན་བདག་གིས་དུས་ཇི་ཙམ་མགྲོན་དུ་བོས་པ་ལས་ལྷག་པར་འདུག་གམ། ཚིགས་བཞག་པ་མེད་ན་ཟླ་བ་བཞི་ལས་ལྷག་པར་བསྡད་ནས་ཟོས་པ་དང་། ལྔ་པ་ནི། དགེ་སློང་གཞན་གྱིས་རང་ལ་བསླབ་བསྐུལ་བྱེད་པ་ན་བསྐུལ་བ་པོ་ལ་ཁྱེད་ཀྱི་མི་ཤེས་པས་གཞན་ལ་མ་དྲིས་པར་མི་སློབ་བོ་ཞེས་པ་ལྟ་བུ་ཁྱད་གསོད་ཀྱི་ཚིག་བརྗོད་པ་གོ་བ་དང་། དྲུག་པ་ནི། རང་དང་རྩོད་ཟླར་གྱུར་པའི་དགེ་སློང་གཞན་གཉིས་ཡན་ཆོད་གྲོས་བྱེད་པ་ལ་འཐབ་མོ་པ་དེ་སླར་སྤར་བའི་ཆེད་དུ་ཉན་རྣ་བྱེད་པས་རང་གི་དོན་གོ་བ་དང་། བདུན་པ་ནི། རང་ཁ་སྐོང་དུ་འོས་པའི་གོས་སྦྱོང་སོགས་ཆོས་ལྡན་གྱི་ལས་གྲལ་དུ་འདུས་ནས་གསོལ་བ་ཙམ་ཡང་མ་བྱས་པའི་གོང་དུ་དགེ་འདུན་མཐུན་པ་སྒྲུབ་བྱེད་ཀྱི་འདུན་པ་མ་ཕུལ་བའམ་ལྟག་འོག་གི་དགེ་སློང་ལ་ཉེས་པ་མེད་པར་ཅང་མི་སྨྲ་བར་འགྲོ་བ་སྟེ་ཐོས་པའི་ཉེས་འཁོར་ལས་འདས་པ་དང་། གསོལ་བ་ཐོས་ནས་ཕྱིན་ན་ཉེས་བྱས་དང་། རང་ཁ་སྐོང་དུ་མི་འོས་པ་སོགས་ལྟུང་བ་མེད་དོ། །བརྒྱད་པ་ནི། སྟོན་པ་སངས་རྒྱས་སམ་དགེ་འདུན་ནམ་དགེ་འདུན་ཞལ་ཏ་བས་རང་ལ་ཆོས་ལྡན་གྱི་བཀའ་བསྒོ་བའི་དོན་ལ་བདག་གིས་བསྒྲུབ་མི་ནུས་པའི་ཚུལ་གྱིས་ཤད་སྦྱང་མེད་པར་མི་གུས་པའི་རྣམ་པས་འགལ་བར་བྱས་པ་དང་། དགུ་པ་ནི། ཕབ་བཏབ་པ་འབྲུའི་ཆང་དང་། རྒུན་ཆང་སོགས་བཅོས་པའི་ཆང་དང་། དེ་དག་གི་སྦང་མ་སོགས་མྱོས་པའི་ནུས་པ་ཅན་འཐུང་ངམ་ཟ་འདོད་ཀྱིས་མགུལ་དུ་མིད་པ་དང་། གལ་ཏེ་བསྐོལ་བས་ཆང་གི་རོ་ནུས་ཉམས་པར་བྱས་པ་དང་། ནད་ལ་ཕན་པ འི་ཕྱིར་ཁར་བསྲེལ་བ་ཙམ་དང་། ལུས་ལ་བསྐུས་པ་ཙམ་བྱས་ན་ཉེས་པ་མེད་དོ། །བཅུ་པ་ནི། དུས་མིན་པར་རང་གླིང་གི་ཉི་མ་བྱེད་ཡོལ་ནས་ཕྱི་དྲོ་ཕན་ཆད་སང་སྐྱ་རེངས་མ་ཤར་གྱི་བར་རྐྱེན་དགོས་མེད་པར་དེར་འཁོད་ཀྱི་གྲོགས་ལ་མ་སྨྲས་པར་ཁྱིམ་པའི་གྲོང་དུ་རྒྱུ་བར་བྱེད་པས་རང་གི་སྒོ་གཏན་དང་ཉེ་འཁོར་ལས་འདས་ན་ལྟུང་བར་འགྱུར་བ་རྣམས་སོ། །བཅུ་ཚན་དགུ་པ་ཆོས་སྟོན་སོགས་ཀྱི་སྡེ་ནི། ཟས་བཅས་ཕྱི་དྲོ་རྒྱུ་དང་ཁྱིམ་གསུམ་འདས། །རྒྱལ་པོ་བཙུན་མོར་རྩེ་བའི་ཁབ་ཏུ་ཉལ། །མདོ་སོགས་འདོན་ལ་ད་གདོད་ཤེས་ཟེར་དང་། །རིན་ཆེན་ཁབ་རལ་ཁྲི་རྐང་ཚད་ལྷག་བཟོས། །ངན་སེམས་ཤིང་བལ་ཁྲི་སྟེང་བརྡལ་ཏེ་བགོས། །གདིང་གཡན་རས་ཆེན་ཆོས་གོས་ཚད་ལྷག་གོ། །ཞེས་པ་སྟེ། བཅུ་ཚན་འདིའི་དང་པོ་ནི། དགེ་སློང་གིས་སྔ་དྲོ་རང་ཚིག་གིས་དགེ་འདུན་རྣམས་ཁྱིམ་པའི་གནས་སུ་ཟས་ལ་སྤྱན་དྲངས་ནས། སྦྱིན་བདག་ལ་དང་བ་དང་བཅས་དུས་ལ་བྲིམ་ཞེས་མ་བསྒོས་པར་རང་ཉིད་ཁྱིམ་ནས་ཁྱིམ་གསུམ་བར་དུ་རྒྱུ་བས་དགེ་འདུན་གྱི་གདུགས་ཚོད་ལ་གནོད་པ་དང་། ཕྱི་དྲོ་ཡང་ཁྱིམ་ནས་ཁྱིམ་དུ་རྒྱུ་བ་དང་བཅས་པས་ཁྱིམ་གསུམ་ཕན་ཆད་འདས་པས་དགེ་འདུན་གྱི་ཆོས་ཀྱི་ལོངས་སྤྱོད་ལ་གནས་པ་དང་། གཉིས་པ་ནི། ཆོས་ལྡན་གྱི་དོན་དུ་བོས་པ་སོགས་དགོས་པ་ཁྱད་པར་ཅན་མེད་བཞིན་རྒྱལ་པོ་བཙུན་མོར་རྩེ་བ་སྟེ་བཙུན་མོ་དང་བཅས་པའི་ཁབ་ཏུ་ཉི་མ་དམར་ཐག་ཆོད་ནས་སྐྱ་རེངས་ཐ་མ་མ་ཤར་གྱི་བར་འགྲོ་ན་དེའི་ཉེ་འཁོར་ལས་འདས་པར་སླེབས་པའམ་ཉིན་མོ་ཕྱིན་ནས་མཚན་མོ་ཉལ་བ་དང་། གསུམ་པ་ནི། སོ་ཐར་གྱི་མདོ་སོགས་འདོན་པ་ལ་ལན་གཉིས་ཡན་ཆད་ཐོས་ཤིང་མདོ་དེ་ལ་དོན་དེ་ཡོད་པར་སྔར་ནས་ཤེས་ཀྱང་དོན་འདི་ཡོད་པ་ད་གདོད་ཤེས་སོ་ཞེས་འདུལ་བར་གཏོགས་པའི་བསླབ་པ་ཁྱད་གསོད་ཀྱི་ཚིག་ཟེར་ཕ་རོལ་པོས་གོ་བ་དང་། བཞི་པ་ནི། བ་སོ་སོགས་རིན་ཐང་ཆེན་པོའི་རིགས་ཀྱིས་ཁབ་རལ་བྱེད་དམ་བྱེད་དུ་བཅུག་སྟེ་ཟིན་པ་དང་། ལྔ་པ་ནི། དགེ་སློང་གིས་ཁྲིའམ་ཁྲིའུའི་རྐང་པ་ཁྲུ་གང་གི་ཚད་ལས་ལྷག་པར་བཟོས་པའམ་བཟོར་བཅུག་སྟེ་བཟོས་ཟིན་པ་དང་། དྲུག་པ་ནི། དགེ་སློང་གིས་ངན་སེམས་ཀྱིས་ཤིང་བལ་དགེ་འདུན་གྱི་ཁྲིའམ་ཁྲིའུའི་སྟེང་དུ་བརྡལ་ཏེ་བགོས་པར་བྱས་པ་དང་། བདུན་པ་ནི། གདིང་བ་སྲིད་དུ་ཁྲུ་གསུམ་དང་ཞེང་དུ་ཁྲུ་དོ་དང་སོར་དྲུག །བརྒྱད་པ་ནི། གཡན་དགབ་སྲིད་དུ་ཁྲུ་དྲུག་དང་། ཞེང་དུ་ཁྲུ་གསུམ། དགུ་པ་ནི། རས་ཆེེན་སྲིད་དུ་ཁྲུ་དགུ་དང་། ཞེང་དུ་ཁྲུ་གསུམ་དང་སོར་བཅོ་བརྒྱད་ཚད་ཡིན་པ་དང་། བཅུ་པ་ནི། རང་རེ་ལ་སྟོན་པའི་སྐུ་ལུས་ཀྱི་ཚད་ཙམ་མེད་པར་དེའི་ཆོས་གོས་ཀྱི་ཚད་དམ་དེ་ལས་ལྷག་པར་བྱེད་དུ་བཅུག་སྟེ་ཟིན་པ་ན་ལྟུང་བར་གྱུར་པ་དག་གོ། །དེ་ལ་སྟོན་པའི་ཆོས་གོས་ཀྱི་ཚད་ནི་སྲིད་དུ་སྟོན་པ་ཉིད་ཀྱི་ཁྲུ་ལྔ་ཡིན་པས་མི་ཕལ་པའི་ཁྲུ་བཅོ་ལྔ་དང་། ཞེང་དུ་སྟོན་པའི་ཁྲུ་གསུམ་ལ་ཕལ་པའི་ཁྲུ་དགུ་ཡོད་དོ། །དེ་ལྟར་གདིང་བ། གཡན་དགབ། རས་ཆེན། ཆོས་གོས་རྣམས་ཚད་ལས་ལྷག་པར་བརྒལ་འདུག་ན་བཤགས་དགོས་པས། དེའི་ཚེ་ཁབ་རལ་བཅག་ཅིང་ཤིང་བལ་བསྡུ། ཁྲི་རྐང་དང་གོས་ཚད་ལྷག་སོང་བ་རྣམས་བཅད་ནས། བཤགས་ཡུལ་གྱིས་བཅག་གམ། བསྡུས་སམ། བཅད་དམ། ཞེས་དྲི་ནས་མ་བཤགས་ན་ཉེས་བྱས་སོ། །ལྔ་པ་སོར་བཤགས་ཀྱི་སྡེ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། སོ་སོར་བཤགས་བྱའི་སྡེ་ནི་བཞི་ཡིན་ཏེ། ཞེས་པ་སྟེ། སྨྲེ་སྔགས་ཀྱི་རྣམ་པས་སོ་སོར་བཤགས་པར་བྱ་བའི་སྡེ་ཚན་བཤད་པ་ནི་རབ་བྱུང་དང་ཁྱིམ་པའི་གཞི་ལས་གྱུར་པ་གཉིས་སུ་ཕྱེ་བས་བཞིར་འགྱུར་བ་ཡིན་ཏེ། ཞེས་སོ། །གཉིས་པ་རྒྱས་པར་བཤད་པ་ནི། དགེ་སློང་མ་ལས་གྲོང་དུ་ཟས་བསླངས་ཟོས། །ཁྱིམ་དུ་དགེ་སློང་མས་བསྒོས་མ་བཟློག་ཟོས། །བསླབ་སྡོམ་སྦྱིན་ལས་རུང་མིན་བསླངས་ཏེ་ཟོས། །ནགས་མ་ཉུལ་བར་དགོན་པར་བསླངས་ཟོས་བཞིའོ། །ཞེས་པ་སྟེ། དང་པོ་ནི། ཉེ་དུ་མ་ཡིན་པའི་དགེ་སློང་མས་རང་ཉིད་ཀྱིས་བཟའ་བའི་ཆེད་དུ་བསྒྲུབས་པའི་དུས་རུང་གི་ཟས་དེ་ལས་གྲོང་ངམ་དེའི་ཉེ་འཁོར་དང་ལམ་པོ་ཆེ་གང་རུང་དུ་ཟས་དེ་ཉིད་བསླངས་ཏེ་ཟོས་པ་དང་། གཉིས་པ་ནི། སྦྱིན་བདག་གིས་མགྲོན་དུ་བོས་པའི་ཁྱིམ་དུ་དགེ་སློང་མས་གྲལ་རིམ་པར་འབྲིམ་དུ་མི་འཇུག་པར་ངའི་མགྲོན་འདི་ལ་འདི་དྲོང་ཞེས་བསྒོས་ནས་འབྲིམ་བཅུག་པ་དགེ་སློང་གཅིག་གི་མ་བཟློག་པར་དགེ་སློང་ཇི་སྙེད་པས་ཟོས་པ་ལས་སོར་བཤགས་སུ་འགྱུར་པ་དང་། གསུམ་པ་ནི། དགེ་འདུན་བློ་མཐུན་པས་གསོལ་བའི་ལས་ཀྱིས་ཁྱིམ་པ་ཅི་རིགས་ལས་དགག་བྱ་དང་དགོས་པའི་དབང་གིས་ཟས་མི་སློང་བའི་བསླབ་སྡོམ་སྦྱིན་པ་ན། ཁྲིམས་དེར་གཏོགས་པའི་དགེ་སློང་གི་དེ་ལས་ལེན་དུ་རུང་བ་ལོ་མ་ལ་སོགས་པ་མོད་པ་མིན་པའི་དུས་རུང་གི་ཟས་བསླངས་ཏེ་ཟོས་པ་དང་། བཞི་པ་ནི། གྲོང་ལས་རྒྱངས་གྲགས་དཔགས་པའི་འཇིགས་བཅས་ཀྱི་གནས་སུ་དགེ་འདུན་གྱིས་ནགས་ཉུལ་བར་བསྐོས་པའི་དགེ་སློང་གིས་དགེ་འདུན་དང་སྦྱིན་བདག་གི་གནོད་པ་བསྲུང་བའི་བྱ་བ་འདིས་ཅི་བྱ་སྙམ་པས་ནགས་མ་ཉུལ་བར་དགོན་པར་ཁྱིམ་པ་ལས་དུས་རུང་གི་ཟས་བླངས་ཏེ་ཟོས་པ་དང་བཞིའོ། །དྲུག་པ་ཉེས་བྱས་ཀྱི་སྡེ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཉེས་བྱས་བརྒྱ་དང་བཅུ་གཉིས་ཞེས་གྲགས་པ། །ཞེས་པ་སྟེ། ཉེས་པ་ཕྲ་མོའི་རང་བཞིན་ཡིན་པས་ཉེས་བྱས་ཞེས་བྱ་སྟེ་དེ་ལ་གྲངས་ནི་སྡོམས་ཀྱིས་བསྡུས་པ་བརྒྱ་དང་བཅུ་གཉིས་ཞེས་གྲགས་པ་རྣམས་འདི་ལྟར་རོ་ཞེས་སོ། །གཉིས་པ་རྒྱས་པར་བཤད་པ་ལ། སྡེ་ཚན་དགུ་ལས། དང་པོ་གོས་བགོ་བའི་སྡེ་ནི། ཤམ་ཐབས་ཟླུམ་མིན་བརྩེངས་འཇོལ་གླང་སྣ་འདྲ། །ལྟེབ་དང་ཕུར་མ་གདེངས་ཀ་ལྟ་བུ་བདུན། །ཟླུམ་མིན་རིང་ཐུང་སྟོད་གསུམ་གོས་ཀྱི་བཅུ། །ཞེས་པ་སྟེ། ཤམ་ཐབས་ཡས་མས་མཐོ་དམན་མི་མཉམ་པས་ཟླུམ་པོར་བགོ་བ་མིན་པ་དང་༡། ཧ་ཅང་བརྩེངས་ཆེ་བས་པུས་མོར་སླེབས་པ་དང་༢། འཇོལ་ཆེ་བས་ལོང་བུ་ལ་རེག་པ་དང་༣། གླང་པོའི་སྣ་དང་འདྲ་བས་མས་ཟུར་གྱི་གྲྭ་མདུན་རྒྱབ་ཏུ་འཆང་བ་དང་༤། སྐ་རགས་ཀྱི་གོང་དུ་ཏཱ་ལིའི་ལོ་མ་ལྟར་བལྟེབ་པ་༥དང་། སྐ་རགས་ཀྱི་བར་ནས་འབྲུའི་ཕུར་མ་ལྟར་འབུར་བ་དང་༦། སྐ་རགས་ཀྱི་སྟེང་དུ་སྦྲུལ་གྱི་གདེངས་ཀ་ལྟ་བུ་མཐོ་དམན་འདུག་པ་༧སྟེ་མི་བྱེད་པ་བདུན་དང་། སྣམ་སྦྱར་དང་བླ་གོས་ཟླུམ་པོར་བགོས་པ་མིན་པ་དང་༨། ཧ་ཅང་རིང་བ་དང་༩། ཧ་ཅང་ཐུང་བ་མ་ཡིན་པ་སྟེ་སྟོད་ཀྱི་གྱོན་ལུགས་གསུམ་བཅས་གོས་ཀྱི་བགོ་ཚུལ་ལ་ཉེས་པའི་ཆ་༡༠བཅུ་རྣམས་སོ། །གཉིས་པ་སྤྱོད་ཡུལ་དུ་འགྲོ་བའི་སྡེ་ཚན་ནི། མ་བསྡམས་བགོ་བ་ཅ་ཅོ་མིག་གཡེང་དང་། རིང་ལྟ་མགོ་བསྟུམས་གོས་བརྫེས་ཕྲག་ལ་གཟར། །ལག་པ་གཉའ་གོང་བསྣོལ་དང་ལྟག་པར་བསྣོལ། །མཆོངས་བརྐྱང་རྐང་པའི་བྲང་དང་རྟིང་བཙུགས་འགྲོ། །ལག་པ་དཀུར་བརྟེན་ལུས་བསྒྱུར་ལག་པ་གཡུགས། །མགོ་བསྒྱུར་ཕྲག་པ་སྤྲད་དང་ལག་སྦྲེལ་རྣམས། །མི་བྱེད་ཁྱིམ་འགྲོའི་སྤྱོད་པ་ཉི་ཤུའོ། །ཞེས་པ་སྟེ། ཁྱིམ་དུ་འགྲོ་བའི་ཚེ་དྲན་ཤེས་ཀྱིས་ལུས་ངག་མ་བསྡམས་པ་དང་༡། བླ་གོས་མཐང་གོས་སོགས་མེད་པའམ་ལེགས་པར་བགོ་བ་མ་ཡིན་པ་༢དང་། རང་དགར་ཅ་ཅོའི་སྒྲ་བྱེད་པ་༣དང་། མིག་གཡས་གཡོན་དུ་གཡེང་བས་བལྟ་བ་དང་༤། མིག་གཉའ་ཤིང་གང་ལས་རིང་བར་བལྟ་བ་དང་༥། མགོ་གོས་ཀྱིས་བསྟུམས་པ་དང་༦། ཤམ་ཐབས་སོགས་གོས་འདོམས་སྣང་བར་བརྫེས་པ་དང་༧། བླ་གོས་ཕྲག་པའི་ཕྱོགས་གཉིས་ལ་གཟར་བ་དང་༨། ལག་པ་གཉིས་གཉའ་གོང་དུ་བསྣོལ་དང་༩། ལག་གཉིས་ལྟག་པར་བསྣོལ་བ་དང་༡༠། རང་དགར་མཆོངས་པ་དང་༡༡། གོམ་པ་ཆེ་བས་སྒྱིད་པ་བརྐྱང་བ་དང་༡༢། རྟིང་པ་བཏེགས་ནས་རྐང་པའི་བྲང་གིས་འགྲོ་བ་དང་༡༣། རྟིང་པ་བཙུགས་ཏེ་ཙོག་པུས་འགྲོ་བ་དང་༡༤། ལག་པ་དཀུར་བརྟེན་ནས་གྲུ་མོ་བརྒྱངས་ཏེ་འགྲོ་བ་དང་༡༥། ལུས་དཀྱོགས་པོར་བསྒྱུར་ཏེ་འགྲོ་བ་༡༦དང་། ལག་པ་གཉིས་གཡུགས་བཞིན་འགྲོ་བ་དང་༡༧། མགོ་གཡས་གཡོན་དུ་བསྒྱུར་ནས་འགྲོ་བ་དང་༡༨། གཞན་དང་ཕྲག་པ་སྤྲད་དེ་འགྲོ་བ་༡༩དང་། གཞན་དང་ལག་པ་སྦྲེལ་ཏེ་འགྲོ་བ་རྣམས་མི་བྱེད་པར་ཞི་དུལ་གྱིས་ཁྱིམ་དུ་འགྲོ་བའི་སྤྱོད་པ་ཉི་ཤུ་༢༠རྣམས་ལ་བསླབ་པར་བྱའོ། །གསུམ་པ་སྟན་ལ་འདུག་པའི་སྡེ་ཚན་ནི། སྟན་ལ་མ་བསྒོས་མ་བརྟགས་འཕོངས་བརྡེག་དང་། །རྐང་བརྐྱང་བསྣོལ་དང་བརླ་བསྣོལ་ལོང་བུ་བརྩེགས། །ཁྲི་འོག་རྐང་དགུག་རྐང་པ་གདངས་ཏེ་འདུག །འདོམས་མཐོང་རྣམ་སྤངས་འདུག་ཚུལ་དགུ་ཡིན་ནོ། །ཞེས་པ་སྟེ། གཞན་གྱི་ཁྱིམ་དུ་སྟན་ལ་ཁྱིམ་བདག་གིས་མ་བསྒོས་པར་འདུག་པ་དང་༡། སྲོག་ཆགས་ཡོད་མེད་མ་བརྟགས་པར་འདུག་པ་༢དང་། ལུས་ལྗིད་ཕབ་ནས་འཕོངས་བརྡེག་གིས་འདུག་པ་༣དང་། རྐང་པ་བརྐྱང་སྟེ་བསྣོལ་ནས་འདུག་པ་དང་༤། བརླ་བསྣོལ་ནས་འདུག་པ་དང་༥། ལོང་བུའི་སྟེང་དུ་ལོང་བུ་བརྩེགས་ནས་འདུག་པ་༦དང་། ཧོར་འདུག་གི་རྣམ་པས་ཁྲི་འོག་ཏུ་རྐང་པ་དགུག་ནས་འདུག་པ་༧དང་། རྐང་པ་ཕན་ཚུན་གདངས་ཏེ་འདུག་པ་དང་༨། འདོམས་མཐོང་བར་བྱས་ནས་འདུག་པ་རྣམས་སྤངས་ཏེ་སྐྱིལ་ཀྲུང་སོགས་འདུག་ཚུལ་ལེགས་པས་འདུག་པ་བཅས་དགུ་པོ་ལ་བསླབ་པར་བྱ་བ་ཡིན་ནོ། །བཞི་པ་ཟས་བསླང་བའི་སྡེ་ཚན་ནི། ལེགས་པར་མི་ལེན་མུ་ཁ་མཉམ་པར་ལེན། །མཐར་ཆགས་མི་ལེན་ལྷུང་བཟེད་ཟུར་མིག་བལྟ། །བཟེད་སྔས་སྔར་བྱུང་སྦས་ནས་བཟེད་པ་དང་། །སྣོད་གཞན་སྟེང་བཟེད་སྤང་བ་ཟས་བླང་བརྒྱད། །ཅེས་པ་སྟེ། འདུལ་བ་དང་མི་འགལ་བར་ཟས་ལེགས་པར་མི་ལེན་པ་༡དང་། ལྷུང་བཟེད་ཀྱི་མུ་དང་ཁ་ད་ཆད་དུ་ལེན་པ་༢དང་། འབྲས་ཆན་དང་ཚོད་མའམ་ཟན་དང་བྱ་ན་མཉམ་པར་ལེན་པ་དང་༣། གྲལ་རིམ་ལྟར་མཐར་ཆགས་སུ་མི་ལེན་པ༤དང་། ལྷུང་བཟེད་ལ་ཡིད་གཏད་དེ་མི་ལེན་པར་ཟུར་མིག་གིས་བལྟ་༥བ་དང་། ཟས་འདྲེན་པ་པོ་མ་སླེབས་པར་སྣོད་བཟེད་སྔས་པ་༦དང་། ལྷག་པོ་འདོད་པས་ཟས་སྔར་བྱུང་སྦས་ནས་ཡང་བཟེད་པ་དང་། སྣོད་གཞན་གྱི་སྟེང་དུ་ལྷུང་བཟེད་བཟུང་ནས་བཟེད་པ་རྣམས་སྤང་བར་བྱས་ཏེ་ཟས་བླང་བ་ལ་བསླབ་པར་བྱ་བ་༨བརྒྱད་དོ། །ལྔ་པ་ཟས་ཟ་བའི་སྡེ་ཚན་ནི། འགལ་ཟ་ཁམ་ཆེ་ཆུང་དང་རན་པར་མིན། །ཁ་གདངས་ཟ་བཞིན་སྨྲ་དང་ཙུག་ཙུག་དང་། །ཅག་ཅག་ཧུ་ཧུ་ཕུ་ཕུ་ལྕེ་ཕྱུང་ཟ། །འབྲུ་ནས་གུད་ཕྱེ་ཟས་ལ་སྐྱོན་འཕྱ་དང་། །ཁམ་གཅིག་མཁུར་སྤོ་རྐན་ཏོག་ཁམ་འཕྲོ་བཅད། །ལག་པ་ལྡག་འགྱོག་ལག་སྤྲུག་སྐྱོམ་སྐྱོམ་བྱེད། །མཆོད་རྟེན་འདྲར་བྱེད་ཉེར་གཅིག་ཟ་ཚེ་སྤངས། །ཞེས་པ་སྟེ། འདུལ་བ་དང་འགལ་བས་ལེགས་པར་མི་ཟ་བ་༡དང་། ཟས་ཀྱི་ཁམ་ཧ་ཅང་ཆེ་བ་༢དང་། ཧ་ཆང་ཆུང་བ་༣དང་། རང་ངམ་འཇིག་རྟེན་དང་མཐུན་པའི་ཁམ་རན་པར་མིན་པ་༤དང་། ཁམ་ཁ་སྒོར་མ་སླེབས་གོང་ནས་ཁ་གདངས་པ་༥དང་། ཟ་བཞིན་དུ་གཏམ་སྨྲ་བ་༦དང་། ཟ་བའི་ཚེ་སྐྱུར་བ་ལ་ཙུག་ཙུག་༧དང་། མངར་བ་ལ་ཅག་ཅག་༨དང་། གྲང་བ་ལ་ཧུ་ཧུ་༩དང་། ཚ་བ་ལ་ཕུ་ཕུའི་སྒྲ་དང་བཅས་པ་༡༠དང་། ལྕེ་ཕྱིར་ཕྱུང་ནས་ཟ་བ་༡༡དང་། ཡོས་སོགས་འབྲུ་རེ་རེ་ནས་གུད་དུ་ཕྱེ་སྟེ་ཟ་བ་༡༢དང་། ཟས་ལ་སྐྱོན་བརྗོད་ནས་འཕྱ་སྨོད་བྱས་པ་༡༣དང་། ཁམ་གཅིག་མཁུར་བ་གཡས་གཡོན་དུ་སྤོ་ཞིང་ཟ་བ་༡༤དང་། རྐན་ཏོག་ཅིང་ཟ་བ་༡༥་དང་། དུད་འགྲོ་ལྟར་ཁམ་འཕྲོ་བཅད་དེ་ཟ་བ་༡༦དང་། ལག་པ་ལ་ཟས་ཆགས་པ་ལྕེས་ལྡག་པ་༡༧དང་། ལྷུང་བཟེད་དང་ཕོར་པ་སོགས་ལྕེས་ལྡག་ཅིང་མཛུབ་མོ་དང་ཐུར་མས་བྲད་ནས་འགྱོག་པ་༡༨དང་། ལག་པ་ལ་ཟས་ཆགས་པ་སྤྲུག་པ་༡༩དང་། ཟས་དང་བཅས་པའི་ལྷུང་བཟེད་སོགས་སྐྱོམ་སྐྱོམ་བྱེད་པ་༢༠དང་། ཟས་ལ་མཆོད་རྟེན་གྱིས་གཟུགས་འདྲ་བར་བྱེད་ནས་གཞོམ་ཞིང་ཟ་བ་༢༡རྣམས་ཏེ་དེ་ལྟར་ཉེར་གཅིག་པོ་ཟས་ཟ་བའི་ཚེ་སྤངས་ལ་ཚུལ་བཞིན་དུ་ཟ་བ་ལ་བསླབ་པར་བྱའོ། །དྲུག་པ་ལྷུང་བཟེད་ལ་སྤྱོད་པའི་སྡེ་ཚན་ནི། ལྷུང་བཟེད་ལ་འཕྱ་ཕྱིར་བལྟ་ལག་པ་ནི། །ཟས་འབགས་ཆུ་སྣོད་མི་རེག་ཆུ་མི་གཏོར། །མ་དྲིས་འབགས་ཆུ་འཕོ་དང་ཟས་ལྷག་བཞག །ས་རྗེན་གད་ཁ་རི་གཟར་བང་རིམ་བཞིར། །མི་བཞག་གད་གཡང་རྐན་གཟར་དུ་མི་འཁྲུ། །ལངས་དང་ཆུ་དྲག་མི་བཅུ་བཅུ་བཞིའོ། །ཞེས་པ་སྟེ། གཞན་གྱི་ལྷུང་བཟེད་ལ་འཕྱ་བའི་ཕྱིར་བལྟ་བར་མི་བྱ་བ་༡དང་། ལག་པ་ལ་ནི་ཟས་ཀྱིས་འབགས་པས་ཆུ་སྣོད་ལ་མི་རེག་པ་༢དང་། ཟས་དང་བཅས་པའི་འབགས་ཆུ་དྲུང་ན་ཡོད་པའི་དགེ་སློང་ལ་མི་གཏོར་བ་༣དང་། ཁྱིམ་བདག་ལ་མ་དྲིས་པར་ཟས་དང་འབགས་པའི་ཁྲུས་ཆུ་དེའི་ཁྱིམ་དུ་འཕོ་བར་མི་བྱེད་པ་༤ དང་། ཟས་ལྷག་ལྷུང་བཟེད་དུ་བཞག་ནས་མི་འདོར་བ་༥དང་། ལྷུང་བཟེད་འོག་གཞི་མེད་པའི་ས་རྗེན་༦དང་། གད་ཁ་༧དང་། རི་དོ་ཆད་ཀྱི་གཡང་གཟར་པོ་༨དང་། རི་གཟར་པོ་རལ་བར་གཞོལ་བ་བང་རིམ་ཅན་ཏེ་དེ་བཞིར་མི་བཞག་པ་༩དང་། དེ་བཞིན་དུ་གད་ཁ་༡༠དང་། གཡང་ས་༡༡དང་། རྐན་གཟར་དུ་ལྷུང་བཟེད་མི་འཁྲུ་བ་༡༢དང་། ལངས་ཏེ་ལམ་གྱི་གཞི་མདོ་རྣམས་སུ་མི་བཀྲུ་བ་༡༣ དང་། འབབ་ཆུ་དྲག་པོའི་རྒྱུན་ལས་ལྡོག་སྟེ་ལྷུང་བཟེད་ཀྱི་ཆུ་མི་བཅུ་བ་སྟེ་བཅུ་བཞི་༡༤པོ་ལ་བསླབ་པར་བྱའོ། །བདུན་པ་ཆོས་འཆད་པའི་སྡེ་ཚན་ནི། ཆོས་སྟོན་སྡེ་ནི་ལངས་ཉལ་རང་དམར་འདུག །མདུན་ནས་འགྲོ་ལ་ཕྱི་བཤད་ལམ་པོའི་འགྲམ། །མགོ་གཡོགས་བརྫེས་གཟར་ལག་པ་གཉའ་ལྟག་བསྣོལ། །དོ་ཀེར་བཅིངས་དང་ཞྭ་གྱོན་ཅོད་པན་བཏགས། །ཕྲེང་བ་དང་ནི་མགོ་དཀྲིས་གླང་རྟ་ཞོན། །ཁྱོགས་དང་བཞོན་པ་མཆིལ་ལྷྭམ་གྱོན་པ་དང་། །མཁར་བ་གདུགས་མཚོན་རལ་གྲི་དགྲ་ཆ་མདའ། །གོ་ཆ་གྱོན་ལ་མི་བཤད་ཉེར་དྲུག་གོ། །ཞེས་པ་སྟེ། ཆོས་སྟོན་པའི་སྡེ་ཚན་འདི་ནི་ཉན་པ་པོ་མིན་བཞིན་དུ་འདུག་པ་ལ་འཆད་པ་པོ་ལངས་ཏེ་ཆོས་མི་འཆད་པ་༡དང་། དེ་བཞིན་དུ་ཉན་པ་པོ་མལ་སར་ཉལ་ནས་ཡོད་པ་ཅན་༢དང་། ཉན་པ་པོ་སྟན་མཐོ་སར་འདུག་པ་ལ་རང་ཉིད་དམའ་བར་འདུག་ནས་༣དང་། མདུན་ནས་འགྲོ་བ་ལ་ཕྱི་བཞིན་འོང་ནས་བཤད་པ་༤དང་། ལམ་པོའི་དབུས་ནས་འགྲོ་བ་ལ་འགྲམ་ནས་འགྲོ་བཞིན་པས་༥དང་། མི་ན་བར་མགོ་གོས་སོགས་ཀྱིས་གཡོགས་པ་༦དང་། གོས་ཧ་ཅང་བརྫེས་པ་༧དང་། གོས་ཕྲག་པར་གཟར་བ་༨དང་། ལག་པ་གཉིས་གཉའ་གོང་དུ་བསྣོལ་བ་༩དང་། ལྟག་པར་བསྣོལ་བ་༡༠དང་། སྐྲ་སྤྱི་བོར་བསྡུས་ནས་དོ་ཀེར་ཏེ་ཐོར་ཅོག་བཅིངས་པ་༡༡དང་། ཞྭ་གྱོན་པ་༡༢དང་། མགོ་ལ་ཅོད་པན་བཏགས་པ་༡༣དང་། མགོ་ལ་རྒྱན་གྱི་ཕྲེང་བ་བཅིངས་པ་༡༤དང་ནི། མགོར་ལྭ་ཐོད་ཀྱིས་དཀྲིས་པ་༡༥དང་། གླང་པོ་ཆེ་ལ་ཞོན་པ་༡༦དང་། རྟ་ལ་ཞོན་པ་༡༧དང་། ཁྱོགས་ཀྱིས་བཏེགས་པ་༡༨དང་། བཞོན་པ་གཞན་ཤིང་རྟ་སོགས་ལ་ཞོན་པ་༡༩དང་། མཆིལ་ལྷྭམ་གྱོན་པ་༢༠དང་། ལག་ན་མཁར་བ་ཐོགས་པ་༢༡དང་། གདུགས་ཐོགས་པ་༢༢དང་། མདུང་སོགས་མཚོན་ཆ་ཐོགས་པ་༢༣དང་། རལ་གྲི་ཐོགས་པ་༢༤དང་། དགྲ་ཆ་སྟེ་མདའ་གཞུ་ཐོགས་པ་༢༥དང་། གོ་ཆ་གྱོན་པ་རྣམས་ལ་ཆོས་མི་བཤད་པ་སྟེ་༢༦ཉེར་དྲུག་པོར་བསླབ་པར་བྱས་ནས་ཚུལ་བཞིན་དུ་བཤད་པ་ལ་འཇུག་གོ། །དེ་ཡང་ཉན་པ་པོ་ན་བའི་རྐྱེན་དབང་དུ་གྱུར་པ་སོགས་ལ་ནི་ཉེས་པ་མེད་དོ། །བརྒྱད་པ་སྒྲུབ་པའི་སྡེ་ཚན་ནི། སྒྲུབ་ཚུལ་གསུམ་ནི་འགྲེངས་ཏེ་བཤང་གཅི་འདོར། །ཆུ་དང་རྩྭ་ལ་བཤང་གཅི་སྣབས་མི་འདོར། །ཞེས་པ་སྟེ། སྒྲུབ་པའི་ཚུལ་ལ་བསླབ་བྱ་གསུམ་པོ་ནི་མི་ན་བར་འགྲེངས་ཏེ་བཤང་གཅི་མི་འདོར་བ་༡དང་། གཞན་དུ་འདོར་ས་མ་རྙེད་པའི་རྐྱེན་མེད་པར་ཆུ་ཡི་ནང་དུ་༢དང་། རྩྭ་སྔོན་པོ་ཡོད་པའི་ཕྱོགས་ལ་གཤང་གཅི་དང་མཆིལ་སྣབས་སྟུགས་པ་སོགས་མི་འདོར་བ་ལ་བསླབ་པར་༣བྱའོ། །དགུ་པ་རྒྱུ་བའི་བསླབ་བྱ་གཅིག་ནི། ཤིང་ལ་མི་གང་མཐོར་འཛེག་རྒྱུ་གཅིག་གོ། །ཞེས་པ་སྟེ། སྟག་ལ་སོགས་པའི་གནོད་པ་མེད་པར་ཤིང་ལ་མི་གང་ཙམ་ལས་མཐོ་བར་འཛེགས་པར་མི་བྱ་བ་སྟེ་རྒྱུ་བའི་བསླབ་བྱ་གཅིག་གོ།། །།གཉིས་པ་དགེ་སློང་མའི་དགག་པའི་བསླབ་བྱ་བཤད་པ་ནི། དགེ་སློང་མ་ལ་ཕམ་བརྒྱད་ལྷག་ཉི་ཤུ། །སྤང་ལྟུང་སོ་གསུམ་ལྟུང་བྱེད་བརྒྱ་བརྒྱད་ཅུ། །སོར་བཤགས་བཅུ་གཅིག་ཉེས་བྱས་བརྒྱ་བཅུ་གཉིས། །སུམ་བརྒྱ་དྲུག་ཅུ་རྩ་བཞི་མདོ་ཙམ་མོ། །ཞེས་པ་སྟེ། དགེ་སློང་མའི་དགག་པའི་བསླབ་བྱ་ལ་མི་ཚངས་པར་སྤྱོད་པ་སོགས་ཐུན་མོང་བ་བཞི་དང་། རེག་པ་ལུས་བཀན་འཆབ་དང་བཟློག་པའོ། །ཞེས་ཐུན་མིན་བཞི་སྟེ་ཕམ་པ་བརྒྱད་དང་། སྨྱན་བྱས་པ་གཞི་མེད་ནས་བཀའ་བློ་མི་བདེ་བའི་བར་ཐུན་མོང་བ་བདུན་དང་། ལྕི་ཡང་ལེན་པ་སོགས་ཐུན་མིན་བཅུ་གསུམ་སྟེ་ལྷག་མ་ཉི་ཤུ་དང་། འཆང་བྲལ་འཇོག་གསུམ་ཐུན་མོང་བ་བཅུ་དགུ་དང་། ལྷུང་བཟེད་ལྷག་པོ་ཞག་གཅིག་འདས་བར་འཆང་བ་སོགས་ཐུན་མིན་བཅུ་བཞི་སྟེ་སྤང་བའི་ལྟུང་བ་སོ་གསུམ་དང་། ཤེས་བཞིན་རྫུན་སྨྲ་སོགས་ཐུན་མོང་བ་བདུན་ཅུ་རྩ་གཉིས་དང་། བསྙེན་པར་རྫོགས་ནས་ལོ་བཅུ་གཉིས་མ་ལོན་པར་གཞན་གྱི་མཁན་མོ་བྱེད་པ་སོགས་ཐུན་མིན་བརྒྱ་དང་བརྒྱད་དེ་ལྟུང་བྱེད་བརྒྱ་དང་བརྒྱད་ཅུ་དང་། བསླབ་པ་བྲལ་ཏེ་ཁྱིམ་དུ་འཇུག་པ་ཐུན་མོང་བ་གཅིག་དང་། འོ་ཞོ་མར་ཞུན་སློང་བ་སོགས་ཐུན་མིན་བཅུ་སྟེ་སོར་བཤགས་བཅུ་གཅིག་པོ་དང་། མ་བསྒོས་པར་སྟན་ལ་འདུག་པ་དང་། རྩྭ་སྔོན་ཁྲོད་དུ་མི་གཙང་བ་འདོར་བ་མ་གཏོགས་པའི་ཐུན་མོང་བ་བརྒྱ་དང་བཅུ། ཤམ་ཐབས་རྙེད་པ་སྣང་བར་དཀྲི་བ་དང་། ཆགས་པས་ཁྱིམ་གཞན་དུ་འགྲོ་བ་སྟེ་ཐུན་མིན་གཉིས་དང་བཅས་ཉེས་བྱས་བརྒྱ་དང་བཅུ་གཉིས་ཏེ། ཐམས་ཅད་བསྡོམས་པས་སུམ་བརྒྱ་དང་དྲུག་ཅུ་རྩ་བཞི་བསྲུང་བར་བྱ་བ་ཡིན་ནའང་། བོད་འདིར་དགེ་སློང་མའི་སྡོམ་རྒྱུན་མ་དར་བས་མདོར་བསྡུས་པ་དེ་ཙམ་མོ། །གཉིས་པ་མཐུན་ཕྱོགས་བསྒྲུབ་པའི་བསླབ་བྱ་ལ་གསུམ། བསླབ་པ་ཡོངས་སུ་སྦྱོང་བའི་གཞི་གསུམ། བདེ་བར་གནས་པའི་རྐྱེན་གྱི་གཞི་ལྔ། འདིར་མ་སྨོས་ཀྱང་ཐམས་ཅད་ལ་ཁྱབ་པ་ལས་ཀྱི་གཞིའོ། །དང་པོ་ནི། བསྒྲུབ་པའི་བསླབ་བྱ་ཡོངས་སུ་སྦྱོང་བའི་ཚུལ། །གསོ་སྦྱོང་དབྱར་གནས་དགག་དབྱེ། །ཞེས་པ་སྟེ། མཐུན་ཕྱོགས་བསྒྲུབ་པའི་བསླབ་བྱ་ནི་སྐྱོན་ཡོངས་སུ་སྦྱོང་བའི་ཚུལ་གྱིས་བསླབ་པ་ཉིད་གོང་ནས་གོང་དུ་འཕེལ་བའི་ཐབས་བསླབ་པ་ཉམས་པ་གསོ་ཞིང་སྤང་བྱ་སྡིག་པ་སྦྱོང་བའི་གཞི་དང་། དགོས་ཆེད་རྣམ་པ་བཅུའི་ཕྱིར་དབྱར་སྔ་ཕྱི་གང་རུང་ལ་ཟླ་བ་གསུམ་དུ་གནས་པ་དང་། དེའི་རིང་ལ་ལྟུང་བ་གླེང་བ་དང་རྫས་བགོ་བ་དགག་པར་སྐབས་དབྱེ་བའོ། །འདི་དག་ཅུང་ཟད་ཞིབ་ཏུ་འཆད་ན། སྤྱིར་འདུལ་བ་གཞིས་བསྟན་དོན་གཞི་བཅུ་བདུན་ཡོད་པ་ལས། དང་པོ་རབ་བྱུང་གི་གཞི་ནི་སྡོམ་པ་མ་ཐོབ་པ་ཐོབ་པའི་ཚུལ་ཏེ་སྔོན་དུ་སོང་། དེ་ལྟར་ཐོབ་པའི་བསླབ་པ་ཡོངས་སྦྱོང་གི་གཞི་ལ། འདིར་གསོ་སྦྱོང་། དབྱར་གནས། དགག་དབྱེ་གསུམ་གཙོ་བོར་སྟོན་པ་ལས། དང་པོ་གསོ་སྦྱོང་གི་ཚུལ་ལ་གཉིས། སྔར་བསགས་ཀྱི་སྒྲིབ་པ་སྦྱོང་ཞིང་ལྷག་པ་སེམས་དང་ཤེས་རབ་དག་པར་བྱ་བའི་ཕྱིར་གཞི་གནས་ཀྱི་གསོ་སྦྱོང་དང་། ཕྱིས་འབྱུང་གི་རྒྱུན་ཚེ་འདིའི་ཟག་པ་སྡོམ་ཞིང་ལྷག་པ་ཚུལ་ཁྲིམས་དག་པར་བྱ་བའི་ཕྱིར་མཐུན་པའི་གསོ་སྦྱོང་ངོ་། །དང་པོ་ནི། གཞི་ཚུལ་ཁྲིམས་ལ་གནས་པའི་གང་ཟག་འདོད་ཆུང་ཆོག་ཤེས་དང་ལྡན་པ་དེས། ལམ་གྱི་རྒྱུ་སྡེ་སྣོད་ཀྱི་གཞུང་ཐོས་ཤིང་། ཐོས་དོན་བསམ། བསམ་དོན་བསྒོམ་པར་བྱེད་པ་སྟེ། དེ་ལ་སྤོང་བའི་གནས་དེར་འགལ་སྤོང་མཐུན་སྒྲུབ་ཀྱི་རྐྱེན་ཚོགས་པ་ན། བསྒོམ་བྱ་ལམ་གྱི་ངོ་བོ་ལ། གཞི་གནས་དང་། ལྷག་མཐོང་གཉིས་ལས། དང་པོ་ལ། འདོད་ཆགས་ཤས་ཆེ་བའི་གཉེན་པོར་མི་སྡུག་པ་བསྒོམ་པ་སྟེ། མདོག་དབྱིབས་རེག་བྱ་བསྙེན་བཀུར་ལ། །ཆགས་པའི་གཉེན་པོ་འདུ་ཤེས་དགུ། །རིམ་བཞིན་རྣམ་པར་སྡོད་༡མེར་༢ཚིག༣ །རྣམ་པར་གནག་ཟོས་༤འཐོར་བ་༥དང་། །འབུས་གཞིག་༦རུས་གོང་རྒྱུས་༧པ་འབྲེལ། །བེམ་པོའི་༨རང་བཞིན་གཡོ་བ་མེད༩། །ཅེས་པའི་སྡོམ་ལྟར་དང་། ཞེ་སྡང་གི་གཉེན་པོར་བྱམས་པ་བསྒོམ་པ་དང་། གཏི་མུག་གི་གཉེན་པོར་རྟེན་ཅིང་འབྲེལ་བར་འབྱུང་བར་བསྒོམ་པ་དང་། རྣམ་རྟོག་ཤས་ཆེ་བའི་གཉེན་པོར། མདོ་ལས། སེམས་དམིགས་པ་གཏད་ནས་འཇོག་པར་བྱེད། དེའི་རྒྱུན་གཡེང་བར་མི་འགྱུར་བས་ཀུན་ཏུ་འཇོག་པར་བྱེད། རྣམ་པར་གཡེང་ན་སླར་ཡང་ངེས་པར་འཇོག་པར་བྱེད། ཡང་སེམས་ནང་དུ་བསྡུ་བས་ཉེ་བར་འཇོག་པར་བྱེད། ཏིང་ངེ་འཛིན་ལ་སེམས་མི་དགའ་བ་དུལ་བར་བྱེད། ཉོན་མོངས་བ་དང་རྣམ་རྟོག་ཞི་བར་བྱེད། སྒྲིབ་པ་ལྔ་ཉེ་བར་ཞི་བར་བྱེད། འདུ་བྱེད་པ་དང་བཅས་པས་རྒྱུད་གཅིག་ཏུ་བྱེད། འདུ་བྱེད་པ་མེད་པར་མཉམ་པར་འཇོག་པར་བྱེད། ཅེས་པ་ལྟར། སེམས་གནས་པའི་ཐབས་དགུས་འདོད་པའི་སེམས་རགས་པ་ཞི་བར་བྱས་ནས་ཞི་གནས་འགྲུབ་པར་བྱེད་པའོ། །གཉིས་པ་ལྷག་མཐོང་ནི། སྔ་མ་ལས། ཞི་གནས་གྲུབ་པར་གྱུར་པ་ཡིས། །དྲན་པ་ཉེར་བཞག་བསྒོམ་པར་བྱ། །ཞེས་པས་ལུས་ཚོར་སེམས་ཆོས་བཞི་ལ་གཙང་བདེ་རྟག་བདག་ཏུ་ལྟ་བའི་གཉེན་པོར། རང་མཚན་མི་གཙང་བ་སོགས་དང་། སྤྱི་མཚན་མི་རྟག་པ་སོགས་བཞིར་བསྒོམ་པའི་རྣལ་འབྱོར་ལ་སྤྱོད་ཅིང་། དེ་ལྟར་ཚོགས་ལམ་ལ་སོགས་པའི་ལམ་ལྔ་བྱང་ཕྱོགས་སོ་བདུན་གྱི་རིམ་པས་བགྲོད་དེ། རྒྱུན་ཞུགས་ལ་སོགས་པའི་འབྲས་བུ་བཞི་ཐོབ་པར་བྱེད་པ འོ། །གཉིས་པ་ཕྱིས་འབྱུང་གི་རྒྱུན་ཚེ་འདིའི་ཟག་པ་སྡོམ་ཞིང་ལྷག་པ་ཚུལ་ཁྲིམས་དག་པར་བྱ་བའི་ཕྱིར་མཐུན་པའི་གསོ་སྦྱོང་ནི། ཀརྨ་ཤ་ཏཾ་ལས། མཐུན་པའི་གསོ་སྦྱོང་ནི་རྣམ་པ་ལྔ་སྟེ། བཅུ་བཞི་པ་དང་། བཅོ་ལྔ་པ་དང་། བཀྲ་ཤིས་པའི་གསོ་སྦྱོང་དང་། གནོད་པ་དབྱུང་བའི་གསོ་སྦྱོང་དང་། བསྡུམ་པའི་གསོ་སྦྱོང་དང་ལྔའོ། །ཞེས་པ་ལྟར་ལྔ་སྟེ། སྤྱིར་གསོ་སྦྱོང་གི་ཚུལ་ཇི་ལྟར་བྱ་བ་ལ། ལྟུང་བ་བཤགས་སྡོམ་བྱིན་བརླབ་བྱ་བ་སོགས་ནས་བག་ཡོད་པར་གདམས་པ་དང་། མ་ལྷགས་པ་ཡོད་ན་འདུན་པ་བླངས་ནས་བརྗོད་པའི་བར་སྦྱོར་བའི་ཆོས་རྣམས་སྔོན་དུ་སོང་ནས། དགེ་འདུན་ཐུགས་བསྟུན་ཏེ་མདོ་འདོན་པ་དངོས་གཞི་སྟེ། དེ་ལ་དང་པོ་བཅུ་བཞི་པ་ནི། ལོ་དྲིས་ལས། རྒྱལ་དང་དབོ་དང་ས་ག་དང་། །ཆུ་སྟོད་ཁྲུམས་སྨད་སྨིན་དྲུག་བཅས། །འདི་རྣམས་ཀྱིས་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པའོ། །ཞེས་པ་ལྟར་ལོ་རེ་ལ་གསོ་སྦྱོང་བཅུ་བཞི་པ་དྲུག་དང་། གཉིས་པ་བཅོ་ལྔ་པ་ནི། ཟླ་བ་དེ་རྣམས་ཀྱི་ཡར་ངོའི་དྲུག་དང་། ཟླ་བ་གཞན་དྲུག་པོའི་ཡར་ངོ་མར་ངོའི་དྲུག་དྲུག་སྟེ་བཅོ་བརྒྱད་ལ་གསོ་སྦྱོང་བཅོ་ལྔ་པ་བྱེད་པ་ནི་ཞག་མི་ཐུབ་པ་དོར་བའི་དབང་གིས་སོ། །དེ་དག་ནི་དུས་ངེས་པའི་གསོ་སྦྱོང་ངོ་། །གསུམ་པ་བཀྲ་ཤིས་པའི་གསོ་སྦྱོང་ནི། རྟེན་གསུམ་རབ་ཏུ་གནས་པ་སོགས་དམིགས་བསལ་བཀྲ་ཤིས་པའི་དུས་སུ་བྱ་བའོ། །བཞི་པ་གནོད་པ་དབྱུང་བའི་གསོ་སྦྱོང་ནི། ནད་ཡམས་སོགས་གནོད་པ་བྱུང་ཟིན་བཟློག་པའམ། སླར་མི་འབྱུང་བའི་ཕྱིར་བྱེད་པའོ། །ལྔ་པ་བསྡུམ་པའི་གསོ་སྤྱོང་ནི། དགེ་འདུན་རྣམས་དབྱེན་བསྡུམ་པའམ་འཁོན་པ་བསྡུམ་པའི་ཕྱིར་བྱ་བའོ། །འདི་རྣམས་ནི་དུས་མ་ངེས་པའི་གསོ་སྦྱོང་ཞེས་བྱ་སྟེ། གསོལ་བའི་ལས་ཀྱི་ཚེ་རང་རང་གི་དུས་བརྗོད་དགོས་པའི་ཁྱད་པར་ཙམ་མ་གཏོགས་གཞན་ཆོ་ག་ཐམས་ཅད་དུས་ངེས་པའི་གསོ་སྦྱོང་དང་འདྲའོ། །དེ་ལྟར་གསོ་སྦྱོང་གི་ཚུལ་ལ། གནས་དེར་དགེ་སློང་གསུམ་མན་ཆད་ལས་མེད་ན་དུས་ཀྱི་བར་དུ་བསྒུག་པའམ། ཡང་ན་གསོ་སྦྱོང་ཡོད་པའི་གནས་སུ་འགྲོ་བའམ། དེ་ལྟར་མ་གྲུབ་ན་དམིགས་བསལ་གྱི་ཆོ་ག་ནི། ཕན་ཚུན་གཅིག་གི་མདུན་དུ་གཅིག་འདུག་ནས་བྱིན་གྱིས་བརླབ་ཅིང་། རང་གཅིག་པུ་ལས་མེད་ན་ཡིད་ཀྱིས་བསམ་ཞིང་བརྗོད། དེ་ཙམ་ཡང་མ་གྲུབ་ན་ཐུབ་པའི་སྔོན་གྱི་གསོ་སྦྱོང་ཚིགས་སུ་བཅད་པ་ཕྱེད་དང་བཞི་ཙམ་འདོན་པར་བྱའོ། །གཉིས་པ་དབྱར་གནས་ནི། ལུང་ལས། འཕྱ་༡དང་སྲོག་ཆགས་༢གནོད་སྤོང་དང་། །ལུས་༣སྲོག་གནོད་སྤོང་རལ་གྲུམ་༤འཆོས། །དོན་བྱ་༥ཉུང་དང་ཐོས་སོགས་༦འཕེལ། །དགག་བྱེ་༧སྲ་བརྐྱང་༨འབྱུང་བའོ། །ཞེས་པ་ལྟར་ཕན་ཡོན་བརྒྱད་དང་ལྡན་པས་ན། དེ་ཇི་ལྟར་བྱ་བ་ལ་གཉིས་ཏེ། ས་གའི་ལྷས། གྲོ་ཞུན་ཟླ་བའི་ཚེས་གཅིག་ནས། །སྔ་མའི་དབྱར་དེ་གཙོ་བོ་ཡིན། །དེ་ཉིད་ཁྲུམ་གྱི་ཟླ་བ་ཡི། །ཚེ་གཅིག་ནས་ནི་ཕྱི་མར་གྲགས། །ཞེས་པ་ལྟར་དབྱར་སྔ་ཕྱི་གང་ཡིན་ཡང་དབྱར་གནས་པའི་ཡུལ་ལ་འཐབ་ཀྲོལ་ཅན་སོགས་མེད་ཅིང་སྡེ་སྣོད་འཛིན་པ་སོགས་ཡོད་པས་བདེ་བར་གནས་པའི་རྐྱེན་ཚང་བ། སྟེང་གཡོགས་སྒོ་གླེགས་དང་བཅས་པའི་གཙུག་ལག་ཁང་རལ་གྲུམ་བཅོས་པ་དང་བྱི་དོར་བྱ་བ་སོགས་ཞག་བཅུའམ་ཟླ་ཕྱེད་ཙམ་གྱི་སྔ་རོལ་ནས་སྟ་གོན་བྱ་བ་སོགས་རིང་བའི་སྦྱོར་བ་དང་། དབྱར་སྔ་ཕྱི་གང་ཁས་ལེན་པའི་ཟླ་བ་དེའི་སྔ་མའི་ཟླ་བ་རྫོགས་པའི་ཉ་ལ་གསོ་སྦྱོང་བྱས་ཏེ་གནས་དང་གནས་མལ་དག་སྟོབ་རྒྱུ་ཡོད་ན། དེ་སྟོབ་པ་པོ་དགེ་སློང་གཅིག་གམ་དུ་མ་བསྐོ་ཞིང་། མེད་ན་ཚུལ་ཤིང་བྲིམ་པ་པོ་ཉིད་བསྐོ་བར་བྱ་སྟེ། ལས་བྱེད་པ་པོས་བསྐོ་བྱར་སྤྲོ་བ་དྲི། སྤྲོ་ན་གསོལ་བ་དང་གཉིས་ཀྱི་ལས་ཀྱིས་བསྐོས་ལ། དེས་ཁྲིམས་སུ་བྱ་བ་བརྟན་པར་བརྗོད་ནས། ཚུལ་ཤིང་བླང་པའི་ཕྱིར་ལས་བྱེད་པས་གསོལ་བ་འབའ་ཞིག་པའི་ལས་ཀྱིས་ཐུགས་བསྟུན་ལ། བསྐོས་པས་ཚུལ་ཤིང་འབྲིམ་ཞིང་བླངས་པའི་གྲངས་གོ་བར་བྱ་བ་དང་། གནས་དང་གནས་མལ་སྟོབ་ཅིང་། གནས་མལ་ལ་ལོག་པར་མི་སྤྱད་པ་དང་། སང་ནངས་པར་གནས་པར་ཁས་བླངས་པ་དག་གོ་བར་བྱ་བ་རྣམས་ཉེ་བའི་སྦྱོར་བའོ། །དེ་ནས་དངོས་གཞི་དབྱར་སྔ་མ་ཡིན་ན་དབྱར་འབྲིང་ཧོར་ཟླ་དྲུག་པའི་ཉ་དང་། ཕྱི་མ་ཡིན་ན་དབྱར་ཐ་ཧོར་ཟླ་བདུན་པའི་ཉ་ལ་གསོ་སྦྱོང་བྱས་ཏེ། དེའི་ཕྱི་ཉིན་ཚེས་བཅུ་དྲུག་གི་ནང་པར་གནས་སྟེང་གཡོགས་དང་བཅས་པར་དགེ་སློང་གི་མདུན་དུ་སྔགས་ལན་གསུམ་བརྗོད་པས་ཁས་བླངས་ངོ་། །དམིགས་བསལ་ཡུལ་མེད་ན་འདིར་གནས་པར་བྱའོ་སྙམ་དུ་དམ་བཅས་པས་ཀྱང་གནས་པའི་གོ་ཆོད་དོ། །དེ་ལྟར་དབྱར་གནས་པའི་ཚེ་ན། དམ་ཚིག་བསྲུང་བ་རྣམ་དྲུག་སྟེ། །དམ་བཅའ་གནས་སུ་འབྲེལ་བ་དང་། །འཁྲུག་ལོང་མི་བྱ་ཐོས་སོགས་བརྩོན། །རལ་གྲུམ་བཅོས་དང་ཡུན་རིང་གསོ་སྦྱོང་སོགས་ཀྱི་ཡུན་དུ། གནས། །འབྲལ་བ་སྤོང་སྟེ་འདི་ལ་གཉིས། །དགེ་འདུན་དང་བྱིན་རླབས། ཞེས་པའི་སྡོམ་ལྟར་ནང་ཁྲིམས་བཅས་ལ་མི་འགལ་བར་བྱའོ། །གསུམ་པ་དགག་དབྱེ་ལ། དུས་ངེས་པ་ནི་ཞག་བདུན་ལ་སོགས་པའི་སྔ་རོལ་ནས་སྤྱོད་ཡུལ་དུ་གོ་བར་བྱ་བ་སོགས་རིང་སྦྱོར་དང་། དབྱར་སྔ་མ་ཡིན་ན་དབྱུག་ཟླ་དང་། ཕྱི་མ་ཡིན་ན་སྨིན་དྲུག་ཟླ་བའི་ཚེས་བཅོ་ལྔའི་སྔ་དྲོ་དགེ་འདུན་རྣམས་འདུས་ནས་བཟོད་གསོལ་དང་རྒྱུན་ཆགས་གསུམ་པ་ནས་དགེ་ཚུལ་གྱི་བཤད་པའི་བར་གསོ་སྦྱོང་ལྟར་བྱས་ལ། འདུ་བར་མ་ནུས་པ་ཡོད་ན་འདུན་པ་དང་དགག་དབྱེ་བླངས་ནས་བརྗོད་པ་དང་། ལྟུང་མཐུན་བྱིན་རླབས་དང་། དགག་དབྱེ་ལ་ཐུགས་བསྟུན་པ་རྣམས་ཉེ་སྦྱོར་རོ། །དེ་ནས་དངོས་གཞི་རྩྭ་དརྦྷ་བྲིམ་ཞིང་དགག་དབྱེའི་སྔགས་ལན་གསུམ་བརྗོད་པ་དང་། རྫས་ཀྱི་དགག་དབྱེ་བྱའོ། །དེ་ལ་ཡུལ། དངོས་པོ། གནས། དུས། ཆོ་ག །བྱེད་པ་པོ་སྟེ་དྲུག་གིས་དབྱེ་བའི་དམིགས་བསལ་རྣམས་ཀྱང་ཤེས་པར་བྱའོ། །དུས་མ་ངེས་པ་ནི། ཟླ་བ་ཕྱེད་དང་གཉིས་འདས་པའི་ཉ་ཤི་གང་རུང་ལ་རྐྱེན་དབང་གིས་དགག་དབྱེ་བྱར་རུང་ཞིང་། དམག་འཁྲུགས་སོགས་བྱུང་ནས་དགེ་འདུན་ཐམས་ཅད་གྱེས་དགོས་ན་ཚོགས་ཀྱི་དགག་དབྱེ་བྱ་བ་དང་། དགེ་སློང་གང་རུང་རྐྱེན་དབང་གིས་འགྲོ་དགོས་ནའང་འདི་བྱར་རུང་ངོ་། །གཉིས་པ་བདེ་བར་གནས་པའི་རྐྱེན་གྱི་གཞི་ལྔ་ནི། གོས་ཀྱི་གཞི། ཀོ་ལྤགས་གནས་མལ་སྨན་སོགས་གཞན་དུ་ཤེས། །ཞེས་པ་སྟེ། དང་པོ་གོས་ཀྱི་གཞི་ནི། རྒྱུ་ལོག་འཚོ་མེད་ཅིང་འདུལ་བ་དང་མཐུན་པའི་སྒོ་ནས་བསྒྲུབ་ཅིང་། སྤྱིར་བཏང་། སྔོན་པོ་བཙག་དང་ངུར་སྨྲིག་རྩི། །འདི་དག་རུང་བའི་ཚོན་གསུམ་སྟེ། །ཞེས་པ་ལྟར་གྱི་ཁ་དོག་བསྒྱུར་བའི་གོས་ཏེ། དེ་ལ་འཚོ། མཁོ། ལྷག་གསུམ་ལས། དང་པོ་ནི། དགེ་སློང་གི་ལུས་འཚོ་བའི་ཆེད་དུ་གནང་བའི་གོས་རུང་བ་ཚད་ལྡན་རེ་རེ་ངེས་པར་རང་མིང་གིས་བྱིན་གྱིས་བརླབ་རུང་བ་སྟེ། དབྱེ་ན། སྣམ་སྦྱར། བླ་གོས། མཐང་གོས། ཤམ་ཐབས། དེའི་གཟན། རྔུལ་གཟན། དེའི་གཟན། གདོང་ཕྱིས། རྣག་གཟན། གཡན་དགབ། སྐྲ་བཟེད། གདིང་བ། རས་ཆེན་ཏེ་ཡོ་བྱད་བཅུ་གསུམ་མོ། །དེ་ལ་སྣམ་སྦྱར་ནི་སྣམ་ཕྲན་དགུ་ནས་ཉེར་ལྔའི་བར་ཏེ། དགུ་པ། བཅུ་གཅིག །བཅུ་གསུམ་པ་གསུམ་ནི་གླེགས་བུ་ཕྱེད་དང་གསུམ་པ། བཅོ་ལྔ། བཅུ་བདུན། བཅུ་དགུ་པ་གསུམ་ནི་གླེགས་བུ་ཕྱེད་དང་བཞི་པ། ཉེར་གཅིག །ཉེར་གསུམ། ཉེར་ལྔ་པ་གསུམ་ནི་གླེགས་བུ་ཕྱེད་དང་ལྔ་པའོ། །ཚད་ནི་ཆེ་སྐོར་གསུམ་དཔངས་སུ་ཁྲུ་གསུམ་དང་སྲིད་དུ་ཁྲུ་ལྔ། ཆུང་གསུམ་དེ་ལས་ཁྲུ་ཕྱེད་ཕྱེད་ཕྲི་བ། འབྲིང་གསུམ་དེ་གཉིས་ཀྱི་བར་རོ། །བླ་གོས་ནི་སྣམ་ཕྲན་བདུན་དང་གླེགས་བུ་ཕྱེད་དང་གསུམ་པ། ཚད་སྣམ་སྦྱར་ལྟར་གསུམ་མོ། །མཐང་གོས་ནི་སྣམ་ཕྲན་ལྔ་དང་གླེགས་བུ་ཕྱེད་དང་གཉིས་པ། ཚད་དཔངས་སུ་ཁྲུ་དོ་དང་། སྲིད་དུ་ཁྲུ་ལྔའམ་བཞི། ཐ་ན་འཁོར་གསུམ་ཁེབས་པས་ཀྱང་རུང་། ཤམ་ཐབས་དང་། དེའི་གཟན་གྱི་ཚད་མཐང་གོས་དང་འདྲ་ཞིང་། རྔུལ་གཟན་དང་། དེའི་གཟན་གྱི་ཚད་བླ་གོས་དང་འདྲ་སྟེ། དེ་དང་དེ་ཉིན་མོ་དང་མཚན་མོ་བླ་གོས་དང་མཐང་གོས་ཀྱི་ནང་དུ་གྱོན་རྒྱུ་ཡིན་པའི་ཕྱིར། གདོང་ཕྱིས་སྲིད་དང་ཞེང་དུ་ཁྲུ་གང་བ། རྣག་གཟན་བླ་གོས་དང་མཉམ་པ། སྐྲ་བཟེད་སྲིད་དུ་ཁྲུ་གསུམ་དང་ཞེང་དུ་ཁྲུ་ཕྱེད་དང་གཉིས་པ། གཡན་དགབ། གདིང་བ། རས་ཆེན་གསུམ་གྱི་ཚད་ནི་སྔར་ལྟུང་བྱེད་ཀྱི་སྐབས་སུ་བཤད་ཟིན་པ་ལྟར་ལ། མཁོ་བའི་ཡོ་བྱད་ནི་སྐ་རགས་སོགས་སོ། །རྒྱུན་དུ་དགོས་པའི་ཡོ་བྱད་དྲུག་ནི། ཆོས་གོས་གསུམ། གདིང་བ། ཆུ་ཚགས། ལྷུང་བཟེད་དང་དྲུག་གོ། །གནས་སྐབས་འབྲལ་སྤངས་ཁེགས་པའི་སྔགས་རྟེན་ལ་ཆོས་གོས་གསུམ་གང་རུང་གི་རྒྱུ་དང་། ཁྱིམ་པའི་གོས་ལྟ་བུ་གང་རུང་ཁྲུ་གང་ཡན་ཆད་དོ། །གཉིས་པ་མཁོ་བའི་ཡོ་བྱད་ཀྱི་གོས་ནི། འཚོ་བའི་ཡོ་བྱད་གང་རུང་གི་དབྱིབས་སུ་མ་གྲུབ་པའི་གོས་ཁྲུ་གང་ཡན་ཆད་རང་གཞན་གཉིས་ཀའི་མིང་གིས་བྱིན་གྱིས་བརླབ་ནས་བཅང་རུང་བ་སྟེ། དར་གོས་སོགས་ནོར་གྱི་འདུ་ཤེས་དང་། ཞྭ་ལ་སོགས་པ་གོས་ཀྱི་འདུ་ཤེས་སྐྱེ་བ་གཉིས་སོ། །གསུམ་པ་ལྷག་པོའི་གོས་ནི། གཞན་མིང་ཉིད་ཀྱིས་བརླབས་པའམ་ཡིད་གཏད་དེ་བཅངས་རུང་གི་གོས་འཚོ་བའི་དང་མཁོ་བའི་ཡོ་བྱད་ཀྱི་ལྷག་པོ་དག་གོ། །དེ་རྣམས་ལ་ཞེན་ཆགས་སྤངས་པའི་སྒོ་ནས་ལུས་ལ་རྨ་དང་གོས་ལ་རྨ་དཀྲིས་ཀྱི་འདུ་ཤེས་སོགས་དགེ་བའི་བསམ་པས་ལོངས་སྤྱད་ནས། མཐར་རྙིང་ནས་བཅོས་སུ་མི་རུང་བའི་དུས་སྦྱིན་བདག་གི་བསོད་ནམས་སྤེལ་བ་སོགས་ཀྱི་ཆེད་དུ་མཆོད་རྟེན་དང་གཙུག་ལག་ཁང་གི་སེར་ཁ་ལ་བསླན་པར་བྱའོ། །དེ་ལྟར་ཆོས་གོས་རྣམ་པ་གསུམ་སོགས་བཅང་ཚུལ་ལ། གང་གིས་ན། སྤྱིར་རབ་བྱུང་ཚུལ་ལྡན་གྱིས་བཅང་ཞིང་། ཁྱད་པར་སྣམ་སྦྱར་ནི་དགེ་སློང་གིས་བཅང་ངོ་། །གང་གི་ཕྱིར་ན། སྤྱིར་ཁྱིམ་པའམ་མུ་སྟེགས་ཅན་དང་། ཁྱད་པར་སྣམ་སྦྱར་ནི་དགེ་ཚུལ་མན་ཆད་ཀྱི་རྟགས་ལས་འཕགས་པར་བྱ་བའི་ཕྱིར་དང་། རང་ཉིད་སྟོན་པའི་རྣམ་ཐར་གྱི་རྗེས་སུ་འཇུག་ཅིང་དགེ་སྦྱོང་གི་དྲན་པ་གསོ་བའི་ཆེད་དུ་བཅངས་པའོ། །གཉིས་པ་ཀོ་ལྤགས་ཀྱི་གཞི་ནི། སྤྱིར་ཡུལ་དབུས་སུ་གནས་མལ་སྐྱོབ་པའི་ཕྱིར་ཀོ་ལྤགས་ཀྱི་ལྷྭམ་ཙམ་དང་། གཙུག་ལག་ཁང་ལས་གཞན་པའི་ཁྱིམ་དུ་སྟན་གཞན་མེད་ན་ཀོ་ལྤགས་ལ་འདུག་པ་ཙམ་གནང་གི། ཉལ་བར་མ་གནང་ལ། མཐའ་འཁོབ་ཏུ་ནི་གྲང་བ་སྐྱོབ་པའི་ཕྱིར་ལྷྭམ་དང་མལ་སྟན་གཉིས་ཀ་བརྟེན་པར་གནང་ཞིང་། མིག་ནད་ཅན་དང་གྲང་ནད་ཅན་ལ་དོམ་ལྤགས་ཀྱི་སྟན་ཡང་གནང་། ཤིན་ཏུ་གྲང་བ་ཆེ་བ་ཆུ་ལ་ཆབ་རོམ་ཆགས་པའི་ཡུལ་དུ་ཞྭ་དང་ལྷྭ མ་ཡུ་བ་ཅན་སོགས་ཅི་དགར་བསྟེན་པ་གནང་བའི་བསླབ་བྱར་གསུངས་སོ། །གསུམ་པ་གནས་མལ་གྱི་གཞི་ནི། མདོ་རྩ་བར། གཙུག་ལག་ཁང་བྱའོ། །ངོས་གཅིག་གི་དབུས་སུ་དྲིའི་གཙང་ཁང་བྱ་བ་ཉིད་དོ། །དེའི་མདུན་དུ་སྒོ་ཁང་ངོ་། །གྲུ་བཞི་བཟང་བ་ཉིད་དོ། །ཞེས་སོགས་ཀྱིས་གཙུག་ལག་ཁང་བརྩིགས་པའི་ཆོ་ག་དང་། བརྩིགས་ནས་སྒོར་གནོད་སྦྱིན་ལག་ན་རྡོ་རྗེ་དང་། སྒོ་ཁང་དུ་འཁོར་བའི་འཁོར་ལོ་ཆ་ལྔ་པ་སོགས་བྲི་བར་བྱའོ། །ཞེས་རི་མོ་འབྲི་བའི་ཚུལ་དང་། དེར་ཕྱག་བྱ་བའི་ཚུལ་ཡང་། སོ་སོར་ཐར་པའི་སྡོམ་པས་མཆོག་ལ་རབ་ཏུ་བྱུང་བས་ཕྱག་བྱའོ། །མཉམ་ན་རྒན་པ་ལའོ། །ཁྱིམ་པས་རབ་ཏུ་བྱུང་བ་ལའོ། །ཐམས་ཅད་ཀྱིས་སངས་རྒྱས་ལའོ། །ཞེས་སོགས་རྒྱས་པར་གསུངས་པ་ལྟར་དང་། གཙུག་ལག་ཁང་ཡལ་བར་མི་དོར་རོ། །ཞེས་སོགས་ཀྱིས་ཇི་ལྟར་བསྐྱང་བའི་སྒོ་ནས་གནས་པར་བྱ་བ་དང་། སྤྱོད་ལམ་ཅི་འདོད་པས་ལུང་དཔོག་གོ། །ཞེས་སོགས་ཀྱིས་དེར་ཆོས་དང་ཟང་ཟིང་གི་ལོངས་སྤྱོད་ལ་ཇི་ལྟར་སྤྱོད་པའི་ཚུལ་རྒྱས་པར་གསུངས་པ་བཞིན་ཤེས་པར་བྱ་ཞིང་། གཙུག་ལག་ཁང་དང་དེར་ཡོད་པའི་གནས་མལ་སོགས་ཡོ་བྱད་ཐམས་ཅད་ལ་ལོངས་སྤྱོད་པའི་ཚུལ་ཡང་། ས་གའི་ལྷས། མི་སློབ་པ་ནི་བདག་པོར་སྤྱོད། །སློབ་པ་སྦྱིན་པ་སྤྱོད་པ་སྟེ། །བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད། །ལྷག་མ་ལེ་ལོས་བཅོམ་པ་ཡི། །བདག་ཉིད་རྣམས་ནི་བུ་ལོན་སྤྱོད། །ཁྲིམས་འཆལ་རྣམས་ལ་ནམ་དུ་ཡང་། །གཙུག་ལག་ཁང་སོགས་ཉེར་སྤྱོད་བཀག །ཞེས་པ་ལྟར། ཁྱད་པར་ཁྲིམས་འཆལ་བཀག་པའི་ཚུལ་ཡང་། སྙིང་གི་ཐུར་མ་ལས། ཚུལ་ཁྲིམས་འཆལ་བས་ས་ནི་གོམ་པ་གང་། །ཟས་ནི་ཁམ་གཅིག་བཏུང་བ་ཆུ་ཕོར་གང་། །ཙམ་ཞིག་དགེ་འདུན་རྫས་ལ་ལོངས་སྤྱོད་ན། །ལོག་འཚོ་ཡིན་ཏེ་དམྱལ་བར་སྐྱེ་བར་གསུངས། །ཞེས་པ་ལ་སོགས་པའི་ཚུལ་ལ་སྤང་བླང་བྱེད་པའོ། །བཞི་པ་སྨན་གྱི་གཞི་ལ་གཉིས། ངོ་བོ་དང་། དབྱེ་བའོ། །དང་པོ་ངོ་བོ་ནི། དེ་ཡང་ལོག་འཚོ་དང་བྲལ་ཞིང་མཐའ་གཉིས་སྤངས་པའི་སྒོ་ནས་བསྒྲུབས་པའི་སྨན་གང་ཞིག་དྲི་རོ་རེག་བྱ་གསུམ་གྱི་བདག་ཉིད་དུ་གྱུར་པའི་ཁམ་ཟས་ཏེ། མཛོད་ལས། ཁམ་གྱི་ཟས་འདི་འདོད་པ་ན། །སྐྱེ་མཆེད་གསུམ་གྱི་བདག་ཉིད་དོ། །ཞེས་སོ། །གཉིས་པ་དབྱེ་བ་ལ་བཞི། དུས་རུང་། ཐུན་ཚོད་དུ་རུང་བ། ཞག་བདུན་པ། འཚོ་བའི་བར་བཅངས་པ་རྣམས་སོ། །དང་པོ་དུས་རུང་ནི། བཀྲེས་པའི་ནད་སེལ་པ་ལ་གཙོ་བོར་གནང་བའི་སྨན་ཚུལ་ལྡན་རབ་ཏུ་བྱུང་བས་སྤྱིར་བཏང་ལ་ཕྱི་དྲོ་ལོངས་སྤྱོད་དུ་མི་རུང་བའི་བཟའ་བ་ལྔ་དང་བཅའ་བ་ལྔ་སྟེ། ས་གའི་ལྷས། སྣ་ཚོགས་འབྲས་ཆན་༡འབྲས་བུ་སྣ་ཚོགས་བཙོས་པ། ཟན་༢དང་ཆུ་དང་སྦྱར་བ། ཤ །༣ལས་ཀྱིས་ཤི་བ་དང་ཚོང་འདུས་གསུམ་བརྒྱུད་པ། ཕྱེ་དང་༤ཁུར་༥བ་སྣུམ་ནང་བཙོས་པ། བཟའ་བ་ལྔ། །ཞེས་དང་། རྩ་བ་སྡོང་བུ་མེ་ཏོག་འབྲས། །ལོ་མ་ཡང་ནི་བཅའ་བ་ལྔ། །ཞེས་སོ། །གཉིས་པ་ཐུན་ཚོད་དུ་རུང་བ་ནི། སྐོམ་པའི་ནད་སེལ་བ་ལ་གཙོ་བོར་གནང་བའི་སྨན་བཅས་ལྡན་དགེ་སློང་གིས་ཐུན་ཚོད་ཀྱི་མཐའི་བར་བྱིན་གྱིས་བརླབ་ནས་ལོངས་སྤྱོད་དུ་རུང་བ་བཏུང་པའི་རྒྱུ་བརྒྱད་ལྟ་བུ་སྟེ། སྨན་གྱི་གཞི་ལས། ཆུ་ཤིང་འབྲས་དང་ཀུ་ཤུ་གོ་ལ་དང་། ཨ་ཤྭརྠ་དང་ཨུ་དུམྦཱ་ར་དང་། བ་རི་ཤ་ཀ་དང་ནི་རྒུ་འབྲུ་དང་། །བརྒྱད་པ་འབྲ་གོ་དག་ནི་ཡིན་པར་བཤད། །ཅེས་པ་ལྟར་དང་། གཞན་ཡང་བཙོས་པའི་ཚྭ་སྟེ་རྒུན་ཆང་སོགས་ཀྱི་སིང་པོ། འབྲུའི་ཚྭ་སྟེ་ནས་ཆང་གྲོ་ཆང་སོགས་ཀྱི་ཤུལ་ནས་བྱུང་བའི་སིང་པོ། ཞོ་ཁ་ཆུ་སྟེ་ཞོའི་ཁུ་བ། དར་བའི་དྭངས་མ་སྟེ་ཆུར་ཁུ། རྩ་བ་མོ་སྟེ་འབྲས་དང་ཁྲེ་སོགས་བཙོས་ནས་ཕབ་མ་བཏབ་པར་མནན་པའི་ཙང་ཤུ་ཞེས་བོད་དུ་རྩབས་སུ་གྲགས་པ་རྣམས་ཏེ། དེ་དག་ཀྱང་བཏུང་བ་མཚན་ཉིད་ལྔ་ལྡན་ཞེས། ཆུས་བཏབ་པ། ཚགས་ཀྱིས་བཙགས་པ། ཤིན་ཏུ་སླ་བ། བཞིན་སྣང་བ། འདམ་བུ་ཉག་མའི་མདོག་ལྟ་བུ་དྭངས་པའོ། །གསུམ་པ་ཞག་བདུན་པ་ནི། རླུང་ནད་སེལ་བ་གཙོ་བོར་གནང་བའི་སྨན་དགེ་སློང་གིས་ཞག་བདུན་པའི་མཐའི་བར་བྱིན་གྱིས་བརླབས་ནས་ལོངས་སྤྱོད་དུ་རུང་བ་སྟེ། ལུང་སྨན་གཞི་ལས། ཞག་བདུན་པ་ནི། མར་དཀར་དང་། ཏིལ་མར་དང་། སྦྲང་རྩིའོ། །ཞེས་གསུངས་པ་ལྟར་དང་། གཞན་ཡང་། ཞུན་མར་དང་། འབྲུ་མར་དང་། བུ་རམ་གྱི་དབུ་བ་སོགས་སོ། །བཞི་པ་འཚོ་བའི་བར་བཅངས་པ་ནི། འདུ་བའི་ནད་སེལ་བ་ལ་གཙོ་བོར་གནང་བའི་སྨན་དགེ་སློང་གིས་ཇི་སྲིད་འཚོའི་བར་བྱིན་གྱིས་བརླབས་ནས་ལོངས་སྤྱོད་དུ་རུང་བ་སྟེ། དེ་ཡང་། རྩ་བ་སྡོང་བུ་འདབ་མ་དང་། །མེ་ཏོག་འབྲས་བུ་སྨན་ལ་སོགས། །ཞེས་པས། རྩ་བའི་སྨན་གླ་སྒང་དང་ཡུང་བ་ལྟ་བུ། སྡོང་བུའི་སྨན་ཙནྡན་དང་སླེ་ཏྲེ་ལྟ་བུ། འདབ་མའི་སྨན་ནིམ་པའི་ལོ་མ་ལྟ་བུ། མེ་ཏོག་གི་སྨན་པ་ཤ་ཀའི་མེ་ཏོག་ལྟ་བུ། འབྲས་བུའི་སྨན་ཨ་བར་སྐྱུར་གསུམ་ལྟ་བུ་སྟེ། དེ་དག་ཀྱང་གཙོ་བོར་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་རྣམས་སོ། །སྨན་དེ་དག་བསྟེན་ཚུལ་ལ། དུས་རུང་གི་སྨན་སྔ་དྲོའི་དུས་ཁོ་ནར་བསྟེན་དུ་རུང་བ་སྟེ། ནད་ལ་ཕན་ན་དུས་མིན་དུ་བསྟེན་པའང་གནང་། སྨན་གཞན་གསུམ་བྱིན་གྱིས་མ་བརླབ་པ་ནི་གང་ཟག་ནད་པ་ཡིན་མིན་ཐམས་ཅད་ལ་གནང་ཞིང་། དུས་ཐམས་ཅད་དུ་བསྟེན་དུ་རུང་མོད། འོན་ཀྱང་བྱིན་གྱིས་བརླབ་དགོས་སོ། །སྨན་ནམ་ཟས་ཇི་ལྟར་བསྟེན་པའི་ཆོ་ག་ནི། བདག་ཉིད་ལ་ནད་པ་དང་། ཟས་ལ་སྨན་གྱི་འདུ་ཤེས་བཞག་སྟེ་དྲན་ཤེས་དང་ལྡན་པས་དཀོན་མཆོག་གསུམ་རྗེས་སུ་དྲན་པའི་སྒོ་ནས། ཟས་ལ་ཆ་བཞིར་བགོ་བྱ་སྟེ། །དང་པོར་ལྷ་ལ་བཤོས་གཙང་འབུལ། །དེ་རྗེས་ཆོས་སྐྱོང་སྲུང་མ་ལ། །གཏོར་མ་ཤིན་ཏུ་རྒྱ་ཆེར་བྱ། །རང་གིས་ཟོས་ཤིང་འཐུངས་པ་ཡི། །ལྷག་མ་འབྱུང་པོ་རྣམས་ལ་བྱིན། །ཞེས་པའི་ཆོ་གས་ཟས་ལ་རན་པར་ལོངས་སྤྱད་དེ་ཡོན་སྦྱོང་མདོ་བསྔོ་རྣམས་བྱ། ཞར་བྱུང་དེ་དག་བཞག་པའི་གནས་མཚམས་ནང་ཡིན་ཡང་རྗེན་བཙོས་དང་ཞག་ལོན་སོགས་རུང་བའི་ཁང་པ་བྱེད་པའི་ཚུལ་ལ། གསར་པ་བརྩིགས་པ་དང་། བྱས་ཟིན་པའི་རྙིང་པ་དང་། མཚམས་ནང་གཅིག་ཏུ་གཙུག་ལག་ཁང་དུ་མའི་རུང་ཁང་གཅིག་ཏུ་བྱས་པ་བ་ལང་གི་ལྷས་ལྟ་བུ་གསུམ་སྟེ། དེ་དག་གི་མཚན་ཉིད་དང་བྱིན་གྱིས་བརླབ་ཚུལ་ནི། རང་བཞིན་ཉེ་༡འཁོར་རང་དབང་༢བ། །ཐུན་མོང་༣གཉིས་མིན་༤མ་འབྲེལ་༥དང་། །འཚོད་ལ་༦བ་གབ་དང་བཅས་དྲུག །འདེགས་༡བསྡུ་༢ལས་༣ཕྲལ་༤བྱུང་བ་བཞི། །ཞེས་པའི་སྡོམ་ལྟར་རོ། །གཞན་ཡང་སོགས་ཞེས་པའི་ཁོངས་ནས་ཐམས་ཅད་ལ་ཁྱབ་པ་ལས་ཀྱི་གཞི་སོགས་སྟོན་ཏེ། དེ་ལ་ལས་ཆགས་པའི་ག ཞི་དང་། བསམ་པ་དང་། ལས་ཀྱི་ངོ་བོ་དང་། ཉམས་སུ་མྱོང་བ་དང་། ཆགས་པའི་དུས་སོགས་རྒྱས་པར་གཞན་དུ་གསལ་བ་ལས་ཤེས་པར་བྱའོ། །ཞེས་སོ། །གཉིས་པ་ཤུགས་བསྟན་དེའི་རུང་མཐུན་བསྡུས་ཏེ་བསྟན་པའི་སྒོ་ནས་དོན་བསྡུ་བ་ནི། མདོར་ན་ཡེ་ནས་གནང་དང་བཀག་པ་མེད། །བྱར་རུང་དང་ཉེ་མི་རུང་བཟློག་བྱེད་ན། །དེ་དག་སྤྱོད་ཅིག་མི་རུང་དང་ཉེ་ཞིང་། །རུང་བ་བཟློག་ན་ཀུན་ཏུ་སྤོང་ཞེས་གསུངས། །ཞེས་པ་སྟེ། དེ་ལྟར་བཤད་པའི་སྤང་བླང་གི་གནད་རྣམས་ངེས་པར་བྱས་ནས་དངོས་སུ་མ་གསུངས་པའི་གནང་བཀག་གི་བསླབ་བྱ་རྣམས་ལ་ཇི་ལྟར་སློབ་པའི་ཚུལ་མདོར་བསྡུ་ན། གཞི་གང་ལ་སྟོན་པ་སངས་རྒྱས་ཀྱིས་ཡེ་ཐོག་མ་ཉིད་ནས་གནང་བ་དང་བཀག་པ་གཉིས་ཀ་མེད་ན། གང་ཞིག་བྱར་རུང་བར་གསུངས་པ་དང་ཉེ་ཞིང་། མི་རུང་བར་གསུངས་པ་ལས་བཟློག་པར་བྱེད་ན་དེ་དག་ཐེ་ཚོམ་མེད་པར་སྤྱོད་ཅིག་དང་ཉེས་པར་མི་འགྱུར་བ་མ་ཟད་ཡོན་ཏན་ཀྱང་ཐོབ་པར་འགྱུར་རོ། །དེ་བཞིན་གང་སྤྱད་དུ་མི་རུང་བར་གསུངས་པ་དང་ཉེ་ཞིང་རུང་བ་ལས་བཟློག་ན་དེ་དག་ཀུན་ཏུ་སྤོངས་ཤིག་ཅེས་གསུངས་ཏེ། ལུང་ཕྲན་ཚེགས་ལས། བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདའ་བའི་དུས་དེའི་ཚེ་ཉིད་ན་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་ཁྱོད་ལ་འདུལ་བ་རྒྱ་ཆེར་ནི་བསྟན་ན། མདོར་བསྡུས་ཏེ་མ་ཡིན་ནོ། །འོན་ཀྱང་མདོར་བསྡུས་པ་ཡང་ཉོན་ཅིག །དགེ་སློང་དག་ངས་ཁྱོད་ལ་གང་ཞིག་ཐོག་མ་ཉིད་ནས་གནང་བ་ཡང་མེད། བཀག་པའང་མེད། གལ་ཏེ་རུང་བ་དང་ཉེ་བ་ཡིན་ཞིང་མི་རུང་བ་བཟློག་པར་བྱེད་པ་ཡིན་ན་ནི་རུང་བ་ཡིན་པར་བཟུང་བར་བྱའོ། །གལ་ཏེ་མི་རུང་བ་དང་ཉེ་བ་ཡིན་ཞིང་རུང་བ་བཟློག་པར་བྱེད་པ་ཡིན་ན་མི་རུང་བ་ཡིན་པས་ཀུན་ཏུ་སྤྱད་པར་མི་བྱའོ། །ཞེས་གསུངས་པ་ཡིན་ནོ། །གསུམ་པ་སྡོམ་པ་སྐྱེ་བའི་ལུས་རྟེན་བཤད་པ་ནི། སྐྱེ་བའི་རྟེན་ནི་མུ་སྟེགས་མཚམས་མེད་བྱས། །སྒྲ་མི་སྙན་དང་ཟ་མ་མཚན་གཉིས་དང་། །མ་ནིང་རིགས་ལྔ་མཚན་གསུམ་གྱུར་པ་དང་། །སྤྲུལ་པ་མ་གཏོགས་གླིང་གསུམ་སྐྱེས་པ་ཡི། །སྐྱེས་པ་བུད་མེད་སྡོམ་པའི་རྟེན་དུ་འདོད། །ཅེས་པ་སྟེ། དེ་ལྟ་བུའི་སོ་ཐར་གྱི་སྡོམ་པ་དེ་སྐྱེ་བའི་ལུས་རྟེན་ནི་ལས་ཀྱི་སྒྲིབ་པ་ཤས་ཆེ་བ་མུ་སྟེགས་ཅན་ནམ་དེར་ཞུགས་པ་དང་། མཚམས་མེད་པ་ལྔ་བྱས་པ་ལ་སོགས་པ་དང་། རྣམ་སྨིན་གྱི་སྒྲིབ་པ་ཤས་ཆེ་བ་སྒྲ་མི་སྙན་པ་ལྟ་བུ་གནས་རིགས་ཉམས་པ་དང་། གང་ཞིག་གྲོང་པའི་ཆོས་མེད་པ། །དེ་ནི་ཟ་མ་ཞེས་སུ་བརྗོད། །ཅེས་པ་ལྟར་ཟ་མ་དང་། མཚན་གཉིས་གཅིག་ཅར་དུ་བྱུང་བ་དང་། སྐྱེ་གནས་ཟླ་ཕྱེད། འཁྱུད་ནས་ལྡང་བ། ཕྲག་དོག་ཅན། ཉམས་པ་སྟེ་མ་ནིང་རིགས་ལྔ་དང་། མཚན་ལན་གསུམ་དུ་གྱུར་པ་སོགས་མཚན་ཉམས་པ་དང་། མི་མ་ཡིན་པ་མིའི་རྣམ་པར་སྤྲུལ་པ་དང་། མི་མ་ཡིན་པའི་འགྲོ་བ་པོ་སོགས་ནི་འགྲོ་བ་ཉམས་པ་ཞེས་དེ་རྣམས་སྡོམ་པ་སྐྱེ་བའི་བར་ཆད་ཅན་ཡིན་པས་ན་མ་གཏོགས་ལ། དེ་ལས་གཞན་ཤར་ནུབ་ལྷོའི་གླིང་གསུམ་དུ་སྐྱེས་པ་ཡི་སྐྱེས་པ་དང་བུད་མེད་རྣམས་སོ་ཐར་གྱི་སྡོམ་པ་སྐྱེ་བ་དང་གནས་པ་གཉིས་ཀའི་རྟེན་དུ་འདོད་དེ། རབ་དབྱེར། གླིང་གསུམ་སྐྱེས་པ་བུད་མེད་ལས། འགྲོ་བ་གཞན་ལ་སྡོམ་པ་བཀག །ཅེས་སོ། །བཞི་པ་ཉམས་ན་གསོ་བའི་ཚུལ་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཐ་མར་ཉམས་ན་གསོ་བའི་ཚུལ་བཤད་པ། །ཞེས་པ་སྟེ། དེ་ལྟར་རུང་བའི་རྟེན་དེ་ལ་ཐོབ་པའི་སྡོམ་པ་ཉིད་ཚུལ་བཞིན་དུ་བསྲུང་ཞིང་། གལ་ཏེ་ཉོན་མོངས་མང་པ་སོགས་ཀྱིས་ཉམས་པར་གྱུར་ན་ཐ་མར་ཉམས་པ་དེ་ཕྱིར་བཅོས་ན་གསོ་བའི་ཐབས་ཡོད་དེ། ལུང་ལས། གཉིས་ནི་རྣམ་པར་བྱང་བར་འགྱུར་ཞིང་། ཉོན་མོངས་པར་མི་འགྱུར་བ་དང་། གཉིས་ཀྱིས་ཟག་པ་འཕེལ་བར་མི་འགྱུར་བ་སྟེ། གཉིས་གང་ཞེ་ན། ལྟུང་བ་མི་བྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་དུ་ཕྱིར་བཅོས་པ་གང་ཡིན་པའོ། །ཞེས་གསུངས་པ་ལྟར་དེའི་ཚུལ་བཤད་པ་ལ། ཞེས་སོ། །གཉིས་པ་རྒྱས་པར་བཤད་པ་ལ་གཉིས། སྡོམ་པ་གཏོང་བའི་རྒྱུ་དང་། ཕྱིར་བཅོས་དངོས་བཤད་པའོ། །དང་པོ་སྡོམ་པ་གཏོང་བའི་རྒྱུ་བཤད་པ་ལའང་གཉིས། ཐུན་མོང་དང་། ཐུན་མོང་མ་ཡིན་པའོ། །དང་པོ་ཐུན་མོང་བ་ནི། གཏོང་བ་བསླབ་པ་ཕུལ་དང་ཤི་འཕོས་དང་། །མཚན་གཉིས་གཅིག་ཅར་བྱུང་དང་ལན་གསུམ་གྱུར། །རྒྱུ་འབྲས་མེད་ལྟས་རྩ་བ་ཆད་རྣམས་ལྕི། །ཞེས་པ་སྟེ། སོ་ཐར་གྱི་སྡོམ་པ་རྩད་ནས་གཏོང་བའི་རྒྱུ་ནི་བཞི་སྟེ། བརྡ་འཕྲོད་པའི་དྲུང་དུ་བསམ་པ་སྙིང་ཐག་པ་ནས་བསླབ་པ་ཕུལ་ན་གཏོང་སྟེ། ཡང་དག་པར་བླངས་པ་དང་འགལ་བའི་རྣམ་རིག་བསྐྱེད་པའི་ཕྱིར། ཇི་ལྟར་འབུལ་པའང་། སྡོམ་བ་རང་གི་ངོ་བོ། རྩ་བ་དཀོན་མཆོག་གསུམ། རྒྱུ་སྡེ་སྣོད་གསུམ། སྦྱོར་བྱེད་མཁན་སློབ། སློབ་པའི་གནས་རྟེན། སློབ་པའི་གྲོགས་རྣམས་འབུལ་ཚུལ་གསུངས་པ་ལྟར། གཞན་ཡང་ཚངས་པར་སྤྱད་དཀའོ་ཞེས་པ་ལ་སོགས་པ་ནི་དངོས་སུ་ཕུལ་བ་མིན་ཡང་དེའི་རྒྱུ་བསྟན་པས་ཉམས་པར་བྱས་པ་ཡིན་པས་ན་སྡོམ་པ་གཏོང་བ་ལ་ཁྱད་པར་མེད་དེ། ལུང་ལས། བསླབ་པ་མ་ཕུལ་བསླབ་པ་ཉམས་པར་མ་བྱས་པར། །ཞེས་གསུངས་པའི་ཕྱིར་༡དང་། དེ་བཞིན་དུ་ཤི་འཕོས་པས་གཏོང་སྟེ། རྟེན་བོར་བའི་ཕྱིར་༢དང་། མཚན་གཉིས་གཅིག་ཅར་བྱུང་བ་དང་། མཚན་ལན་གསུམ་འགྱུར་བས་གཏོང་སྟེ། རྟེན་ཉམས་པའི་༣ཕྱིར། རྒྱུ་འབྲས་མེད་ལྟའི་ལོག་ལྟ་སྐྱེས་པས་གཏོང་སྟེ། དགེ་བའི་རྩ་བ་ཆད་པས་སྡོམ་པའི་རྟེན་གཞི་མེད་པའི་༤ཕྱིར། དེ་རྣམས་ཀྱིས་གཏོང་ཞིང་། ཕྱི་མ་འདི་ནི་ཐེག་པ་ཆེ་ཆུང་ཐམས་ཅད་ཀྱི་སྡོམ་པའི་གཏོང་རྒྱུར་གསུངས་པས་ཤིན་ཏུ་ལྕི་བའོ། །དེ་ལྟར་སྤྱིའི་གཏོང་རྒྱུ་བཞིའི་སྟེང་བསྙེན་གནས་ཀྱི་གཏོང་རྒྱུ་བསྣན་པས་ལྔར་བཤད་དེ། མཛོད་ལས། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་ལས། །སོ་སོར་ཐར་པའི་འདུལ་བ་གཏོང་། །ཞེས་དང་། རང་འགྲེལ་ལས། དེ་དག་ནི་དོན་མདོར་བསྡུ་ན་གཏོང་བའི་རྒྱུ་ལྔ་ཡིན་ནོ། །ཞེས་གསུངས་སོ། །གཉིས་པ་ཐུན་མོང་མ་ཡིན་པ་ལ་གསུམ། བྱེ་བྲག་སོ་སོའི་གཏོང་རྒྱུ། སྤྱི་ལ་འདོད་པ་མི་འདྲ་བའི་ཁྱད་པར། རྩ་ལྟུང་གཏོང་རྒྱུ་ཡིན་མིན་ལས་འཕྲོས་ཏེ་སྡེ་ལྔའི་དངོས་གཞི་མི་བསྐྱེད་པའི་རྒྱུ་བཤད་པའོ། །དང་པོ་བྱེ་བྲག་སོ་སོའི་གཏོང་རྒྱུ་ནི། ཉི་ཤུ་མ་ལོན་བསྙེན་རྫོགས་རྗེས་སུ་ཤེས། །དགེ་སློང་སྡོམ་གཏོང་བསྟེན་ཕྱིར་ཁས་བླངས་འདས། །དགེ་སློབ་མའོ་མཚན་འདས་བསྙེན་གནས་ཀྱི། །སྡོམ་པ་གཏོང་རྣམས་སོ་སོའི་ཐུན་མོང་མིན། །ཞེས་པ་སྟེ། ལོ་ཉི་ཤུ་མ་ལོན་པ་ལ་ལོན་པར་འདུ་ཤེས་ནས་བསྙེན་རྫོགས་བླངས་པ་དེའི་རྗེས་སུ་ཉི་ཤུ་མ་ལོན་གོང་དུ་དེ་ལྟར་ངོ་ཤེས་ན་དེའི་ཚེ་མངལ་བཤོལ་གྱི་ཟླ་བས་ཁ་བསྐང་བར་བྱ་ཞིང་། དེ་ལྟར་བསྐང་ཡང་མ་ཚང་ན་དགེ་སློང་གི་སྡོམ་པ་གཏོང་སྟེ། མདོར། ཤེས་ན་ནི་དེ་ཞིག་གོ། །གལ་ཏེ་དེ་སྐྱེས་པ་ན་མ་ལོན་པའི་འོ། །མངལ་ན་གནས་པ་དང་བཤོལ་གྱི་ཟླ་བ་དག་དང་ཡང་བཅས་ཏེའོ། །ཞེས་སོ། །མི་ཚངས་སྤྱོད་བསྟེན་པར་བྱེད་པའི་ཕྱིར་ཁས་བླངས་ནས་བསླབ་པ་ལས་འདས་པས་དགེ་སློབ་མའི་སྡོམ་པ་གཏོང་བའོ། །དེ་ཡང་མདོར། བསྟེན་པའི་ཕྱིར་གཞན་ལ་ཁས་བླངས་པ་ན། བསླབ་པ་འཁྲུག་པ་ཉིད་དོ། །ཞེས་སོ། །མཚན་མོ་མཐའི་སྐད་ཅིག་མ་འདས་པས་བསྙེན་གནས་ཀྱི་སྡོམ་པ་གཏོང་སྟེ། དེ་སྲིད་དུ་འཕངས་པའི་ཕྱིར་རོ། །དེ་ལྟར་གསུམ་པོ་སྔར་གྱི་སྤྱིའི་གཏོང་བཞིས་གཏོང་བར་མ་ཟད། རང་རང་རྣམས་སོ་སོའི་གཏོང་རྒྱུ་སྡོམ་པ་དེ་དང་དེ་གཏོང་བས་ན་ཐུན་མོོང་མིན་པའི་གཏོང་ཚུལ་ལོ། །གཉིས་པ་སྤྱི་ལ་འདོད་པ་མི་འདྲ་བའི་ཁྱད་པར་ནི། རྩ་ལྟུང་བྱུང་དང་དམ་ཆོས་ནུབ་ནའང་གཏོང་། །ཁ་ཆེའི་ཡུལ་གྱི་བྱེ་བྲག་སྨྲ་བ་རྣམས། །སྡོམ་ལྡན་རྩ་ལྟུང་བྱུང་བ་གཉིས་ལྡན་ན། །ནོར་ལྡན་བུ་ལོན་ཅན་བཞིན་འདོད་པ་དང་། །ཁ་ཅིག་རྩ་བཞི་གཅིག་སྤྱད་ཀུན་ཉམས་ཟེར། །ཞེས་པ་སྟེ། མདོ་སྡེ་པ་ན་རེ། རྩ་ལྟུང་འཆབ་བཅས་བྱུང་བས་གཏོང་སྟེ། རྒྱུད་ངོ་ཚ་ཁྲེལ་མེད་ཆེན་པོས་ཉམས་པའི་ཕྱིར་དང་། གོས་དམར་བའི་སྡེ་པ་ན་རེ། ལུང་གི་དམ་ཆོས་ནུབ་པ་ནའང་གཏོང་སྟེ། བསླབ་པའི་མཚམས་རྣམ་པར་བཞག་པ་མེད་པའི་ཕྱིར་རོ་ཞེས་འདོད་ཅིང་། དེ་ལ་ཐོགས་མེད་སྐུ་མཆེད་ལུང་ཆོས་ནུབ་པ་ཙམ་གྱིས་སྡོམ་པ་སྔར་ཡོད་མི་གཏོང་སྟེ། རྟོགས་པའི་དམ་ཆོས་མ་ནུབ་པའི་ཕྱིར། འོན་ཀྱང་དེ་ཚེ་སྔར་མེད་གསར་སྐྱེ་མེད་དེ། འབོགས་བྱེད་ཀྱི་ཆོ་གའི་རྣམ་བཞག་མེད་པའི་ཕྱིར་གསུངས། ཁ་ཆེའི་ཡུལ་གྱི་ཉན་ཐོས་བྱེ་བྲག་ཏུ་སྨྲ་བ་རྣམས་ནི། རྩ་ལྟུང་འཆབ་བཅས་བྱུང་ཡང་སྡོམ་པ་མི་གཏོང་སྟེ། ཕྱོགས་གཅིག་ཉམས་པས་སྡོམ་པ་ཟད་པར་གཏོང་བ་མི་རིགས་པའི་ཕྱིར། དེ་འ དྲ་དེ་སྡོམ་པ་དང་ལྡན་པ་དང་། རྩ་ལྟུང་བྱུང་བ་གཉིས་ལྡན་ཡིན་པའི་ཕྱིར་ན། མི་འགའ་ཞིག་ནོར་ཡང་ལྡན་ལ་བུ་ལོན་ཡང་ཆགས་པ་ཅན་བཞིན་ནོ་ཞེས་འདོད་པ་ལྟར་དང་། དེ་ལྟར་ཡང་མཛོད་ལས། ཁ་ཅིག་ལྟུང་བར་གྱུར་ལས་སྨྲ། །གཞན་དག་དམ་ཆོས་ནུབ་པ་ལས། །ཁ་ཆེ་རྣམས་ནི་བྱུང་བ་ལ། །བུ་ལོན་ནོར་བཞིན་གཉིས་སུ་འདོད། །ཅེས་གསུངས་པའི་ཕྱིར། འདུལ་འཛིན་ཁ་ཅིག་ཕམ་པ་སྡོམ་པའི་གཏོང་རྒྱུ་མ་ཡིན་ཏེ། ཕམ་པ་བྱུང་བའི་དགེ་སློང་ལ་དགེ་སློང་གི་སྡོམ་པའི་རྫས་ཚང་བར་ཡོད་པའི་ཕྱིར། ཉམས་ཚུལ་ལ་ལྟོས་ན་ཀུན་ཉམས་པ་ཡིན་ཏེ། རྩ་བ་བཞི་ལས་སྲོག་གཅོད་ཀྱི་ཕམ་པ་འཆབ་བཅས་ལྟ་བུ་གཅིག་སྤྱད་པའི་ཚེ། སྡོམ་པ་མཐའ་དག་གི་དགོས་པ་མ་ལུས་པ་ཀུན་སྒྲུབ་པར་ནུས་པ་དེ་ལས་ཉམས་པའི་ཕྱིར་ཞེས་ཟེར་ཏེ། རྒྱ་ཆེར་འགྲེལ་ལས། དགེ་སློང་ཕམ་པར་གྱུར་པ་ལ་ནི་སྡོམ་པ་ཡོད་དུ་ཟིན་ཀྱང་། དེ་ལྟ་མོད་ཀྱི་དགོས་པ་མེད་པ་ཉིད་དུ་འགྱུར་ཏེ། ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་གནས་པ་དང་ལོངས་སྤྱད་པ་མེད་པའི་ཕྱིར་དང་། སྡོམ་པ་ཡང་དག་པར་བླངས་པ་ནི་རྣམ་པར་གྲོལ་བ་ཐོབ་པའི་ཆེད་ཡིན་ལ། དེས་རྣམ་པར་གྲོལ་བ་ཐག་རིང་དུ་བྱས་པའི་ཕྱིར། དེས་ན་དེའི་སྡོམ་པ་ནི་མེད་པ་དང་འདྲའོ། །ཞེས་གསུངས་པའི་ཕྱིར། དེས་ན་ཉམས་པ་དང་མི་ཆགས་པ་གཉིས་ལྟུང་བ་ལ་སྦྱོར་ན་ཉེས་བྱས་ཙམ་མོ། །གསུམ་པ་རྩ་ལྟུང་གཏོང་རྒྱུ་ཡིན་མིན་ལས་འཕྲོས་ཏེ་སྡེ་ལྔའི་དངོས་གཞི་མི་བསྐྱེད་པའི་རྒྱུ་བཤད་པ་ནི། དང་པོའི་ལས་ཅན་སེམས་འཁྲུགས་ཚོར་བས་གཟིར། །སྒྲུབ་པར་མ་ནུས་པ་ལ་ཉེས་པ་མེད། །ཅེས་པ་སྟེ། སྡེ་ལྔའི་དངོས་གཞིའི་ཉེས་པ་བསྐྱེད་མི་བསྐྱེད་ཀྱི་མཚམས་འདི་ལྟར་དང་པོའི་ལས་ཅན་གྱིས་སྤྱད་ན་ཉེས་པ་མི་བསྐྱེད་དེ། སྟོན་པའི་བཅས་པ་དང་མ་འབྲེལ་བའི་སྔོན་དུ་ཡིན་པའི་ཕྱིར། དགེ་སློང་བཟང་སྦྱིན་ལ་མི་ཚངས་སྤྱོད་ཀྱི་ཕམ་པ་མ་བྱུང་བ་བཞིན། སེམས་འཁྲུགས་ཤིང་སྡུག་བསྔལ་གྱི་ཚོར་བས་ཤིན་ཏུ་གཟིར་བས་སྤྱད་ཀྱང་ཉེས་པ་མི་བསྐྱེད་དེ། སེམས་རྣལ་དུ་གནས་པ་མ་ཡིན་པའི་ཕྱིར། སྨྱོན་པས་མི་བསད་པ་བཞིན། བསླབ་པ་ལ་གུས་པས་འབད་ནའང་སྒྲུབ་པར་མ་ནུས་པའི་གནས་སྐབས་སུ་སྤྱད་པ་ལ་ཉེས་པ་མེད་དེ། རྨི་ལམ་དུ་མི་ཚངས་སྤྱོད་སྤྱད་ཀྱང་ཕམ་པ་མི་འབྱུང་བའི་ཕྱིར། དེས་ན་དེ་འདྲའི་རྟེན་གྱི་གང་ཟག་གིས་ལྟུང་བ་ལ་སྤྱད་ཀྱང་དངོས་གཞིའི་ཉེས་པ་ཇི་ལྟ་བ་བཞིན་བསྐྱེད་པ་མེད་དོ། །གཉིས་པ་ཕྱིར་བཅོས་དངོས་བཤད་པ་ལ་གསུམ། ཕྱིར་བཅོས་ཀྱི་དབྱེ་བ་བཤད་པ། ཉེས་པ་སྦྱོང་བའི་ཐབས་སྟོབས་བཞིར་བསྡུ་ཚུལ་བསྟན་པ། ཉེས་དམིགས་ཤེས་པའི་སྒོ་ནས་ནན་ཏན་དུ་བསྲུང་བར་གདམས་པའོ། །དང་པོ་ཕྱིར་བཅོས་ཀྱི་དབྱེ་བ་བཤད་པ་ལ་གཉིས། འཆབ་ཉེས་ངོས་བཟུང་བ་དང་། དབྱེ་བ་དངོས་བཤད་པའོ། །དང་པོ་འཆབ་མཉེས་ངོས་བཟུང་བ་ནི། འཆབ་པ་ཞེས་གྲགས་གསང་སྟེ་མི་བརྗོད་པ། །ཞེས་པ་སྟེ། འཆབ་པ་ཞེས་སུ་གྲགས་པ་ལྟུང་བའི་ཉེས་པ་བྱུང་བ་གཞན་ལ་གསང་འདོད་ཀྱི་བསམ་པས་ཀུན་ནས་བསླངས་ཏེ་ངག་གིས་གཞན་ལ་མི་བརྗོད་པ་དང་། གསང་བའི་ལུས་ཀྱི་རྣམ་འགྱུར་ནི་འཆབ་པའི་ལྟུང་བ་སྟེ། གང་ལ་བྱུང་བའི་རྟེན་ནི་ལྟུང་བ་དང་ལྟུང་མིན་གྱི་རྣམ་དབྱེ་ཤེས་ཤིང་དྲན་ནུས་པའི་དགེ་སློང་ཉིད་ལས་གཞན་ལ་མི་འབྱུང་ཞིང་། དེ་ཡང་ཕམ་པ་ནི་འཆབ་སེམས་སྐད་ཅིག་མ་ཙམ་སྐྱེས་ཀྱང་འཆབ་བཅས་སུ་འགྱུར་ལ། ལྷག་མའི་སྤོ་སྤྱོད་ལ་ཞག་ཏུ་ལོངས་པར་བཅབ་དགོས་སོ། །གཉིས་པ་དབྱེ་བ་དངོས་བཤད་པ་ལ་གཉིས། ཕམ་པའི་ཕྱིར་བཅོས། ལྷག་མ་སོགས་ཕྱིར་བཅོས་པའོ། །དང་པོ་ཕམ་པའི་ཕྱིར་བཅོས་ལའང་གཉིས། ཕམ་པ་འཆབ་བཅས་བཅོས་མེད་དང་། འཆབ་མེད་བཅོས་ཡོད་གཉིས་ལས། དང་པོ་ཕམ་པ་འཆབ་བཅས་བཅོས་མེད་ནི། ཕམ་པ་འཆབ་བཅས་ཚེ་འདིར་གསོར་མི་རུང་། །ཞེས་པ་སྟེ། བསླབ་པ་མ་ཕུལ་བར་ཕམ་པ་བཞི་གང་རུང་བྱུང་ནས་སྐད་ཅིག་མ་ཙམ་བཅབས་ཀྱང་ཕམ་པ་འཆབ་བཅས་སུ་གྱུར་པས་ན་ཚེ་འདིར་ལྟུང་བའི་དངོས་གཞི་ཕྱིར་གསོར་མི་རུང་བ་ཡིན་ཏེ། ཇི་སྐད་དུ། ཉེས་རྩོམ་བྱེད་དང་ཁྱིམ་སུན་འབྱིན་པ་དང་། །འདིར་ནི་གསུམ་པ་ཚུལ་ཁྲིམས་འཆལ་བ་དག །འཐབ་མོ་སྤངས་ཏེ་གཎྜི་བརྡུངས་བྱས་ནས། ཆུ་ཤིང་རུལ་པ་བཞིན་དུ་དེ་བསྐྲད་བྱ། །ཞེས་གསུངས་པ་ལྟར་དགེ་འདུན་གྱི་གནས་ནས་བསྐྲད་པར་བྱ་ཞིང་། འོན་ཀྱང་རང་གི་འགྱོད་སྡོམ་གྱིས་བཤགས་པ་བྱས་ན་རྣམ་སྨིན་གྱི་ཉེས་པ་དག་ནས་ངན་སོང་དུ་ལྟུང་བར་མི་འགྱུར་བ་ཞིག་འོང་བས་ན་འབད་པར་བྱའོ། །དེ་ལྟར་མ་བཤགས་ན་ཚེ་འདི་ཕྱིའི་ཉེས་དམིགས་རང་ལ་འབྱུང་བར་མ་ཟད་ཉེས་དམིགས་ནི་ཚུལ་འཆལ་དེ་དང་ལྷན་ཅིག་ཞག་ལོན་དུ་ཉལ་ན་ལོ་བྱེ་བ་ཕྲག་བཅུ་བཞི་དང་སྟོང་ཕྲག་བཅུ་བཞིར་དམྱལ་བར་སྐྱེ་བར་བཤད་དོ། །གལ་ཏེ་བསྐྲད་པ་དེ་སྡེ་སྣོད་འཛིན་པ་ཡིན་ན་དགེ་འདུན་དང་ལྷན་ཅིག་ལོངས་སྤྱོད་དུ་མི་དབང་ཡང་གནས་ལོངས་སྦྱིན་པ་སོགས་ཀྱིས་རྗེས་སུ་བཟུང་བར་བྱ་ཞིང་། དེ་འདྲ་དེས་བཟོད་པར་གསོལ་བའི་དུས་སུ་མ་བླངས་ན། དེ་ནས་བཟུང་སྟེ་གནས་ཆོས་ཀྱི་རྙེད་པའི་རིན་ཐང་རྩིས་ནས་ཚངས་ན་དགེ་འདུན་ལ་ཕམ་པ་འབྱུང་བར་གསུངས་སོ། །གཉིས་པ་འཆབ་མེད་བཅོས་ཡོད་ནི། འཆབ་པ་མེད་ན་དངོས་པོ་བརྗོད་པ་ཡིས། །དགེ་འདུན་ལ་བཤགས་མཐོང་སྡོམ་བར་གྱིས་འདག །སྡོམ་པ་སླར་ནོད། ཅེས་པ་སྟེ། དེ་ལས་གཞན་གསོ་བར་རུང་བ་རྣམས་ཕྱིར་བཅོས་པའི་ཚུལ་ཕམ་བཞི་གང་རུང་བྱུང་ནས་འཆབ་པའི་སེམས་སྐད་ཅིག་མ་ཙམ་ཡང་མེད་ན་ལྟུང་བའི་དངོས་པོ་དེ་མི་གསང་མི་སྦེད་པར་ངག་ཏུ་བརྗོད་པ་ཡིས་ཡུལ་དགེ་འདུན་མཚན་ཉིད་དང་ལྡན་པ་ལ་བཤགས་ཤིང་། ཡུལ་གྱིས་ཉེས་པ་ལ་ཉེས་པར་མཐོང་ངམ་ཞེས་དྲིས་པ་ན། ཤིས་བཞིན་རྫུན་དུ་མ་སོང་བར་སྙིང་ནས་ལྟུང་བའི་ཉེས་པ་ལ་ཡིད་ཆེས་པའི་སྒོ་ནས་མཐོང་ལགས་ཞེས་བརྗོད་ཅིང་། ཕྱིན་ཆད་ལེགས་པར་སྡོམ་མམ་ཞེས་དྲིས་པའི་ཚེ། སྲོག་ལ་བབ་ཀྱང་དེ་འདྲའི་ཉེས་པ་མི་བྱེད་སྙམ་པའི་བསམ་པས་སྡོམ་ལགས་ཞེས་བརྗོད་དེ་བཤགས་པར་བྱ་བ་ཡིན་ལ། དེ་ཇི་ལྟར་བྱ་བའི་ཚུལ་སྦྱོར་བ་གསོལ་གདབ་སྔོན་དུ་འགྲོ་བས། དངོས་གཞི་གསོལ་བཞིའི་ལས་ཀྱིས་ཆད་པ་ལས་ཀྱི་བསླབ་པ་བྱིན་ནས་ཇི་སྲིད་འཚོའི་བར་དམན་སྤྱོད་ལྔ་དང་དུ་ལེན་ཞིང་ཁྱད་སྤྱོད་ལྔ་སྤང་བའི་ཀུན་སྤྱོད་ཀྱིས་གནས་པར་ཁས་བླངས་པས་འདག་པར་གསུངས་པ་ནི་མདོའི་དངོས་བསྟན་ལྟར་ཡིན་ལ། དེ་ལྟར་བཤགས་རྗེས་དགེ་སློང་གི་སྡོམ་པ་སླར་ནོད་ནས་ཆད་པ་ལས་ཀྱི་བསླབ་པ་བྱིན་པ་ནི་སེམས་ཙམ་པ་ཡན་ཆད་ཀྱི་བཞེད་པ་ཡིན་པར་སྣང་ངོ་། །གཉིས་པ་ལྷག་མ་བཅུ་གསུམ་སོགས་ཕྱིར་བཅོས་པ་ནི། ལྷག་མ་བཅུ་གསུམ་སོགས། །ལྕི་ཡང་ལ་ལྟོས་བཤགས་ཏེ་རིམ་པར་ལྡང་། །ཞེས་པ་སྟེ། དགེ་འདུན་ལྷག་མ་བཅུ་གསུམ་པོ་ནི་ཞག་དང་མ་འབྲེལ་པའི་འཆབ་ཉེས་རྣམས་བགོ་གྱུར་ཡིན་ན་མཚམས་ནང་གི་དགེ་སློང་ཐམས་ཅད་དང་གཞན་རྣམས་གཅིག་གི་དྲུང་དུ་མཐོལ་ལ། ཞག་ཏུ་ལོངས་པའི་བཅབ་ཉེས་ནི་གང་ཟག་ཁྱད་པར་ཅན་མིན་པས་ཅི་ཙམ་བཅས་པའི་ཞག་གྲངས་དང་མཉམ་པར་སྤོ་བ་དང་། དངོས་གཞི་མགུ་བ་སྤྱད་ཚུལ་རྣམས་ནི་སྔར་སྤྱི་དོན་གྱི་སྐབས་སུ་བཤད་གྲུབ་ལ། གང་ཟག་ཁྱད་པར་ཅན་གྱི་ལྷག་མའི་ཕྱིར་བཅོས་ནི། ཇི་སྐད་དུ། ངོ་ཚ་དང་ལྡན་པ་དང་། འདུལ་བ་འཛིན་པ་དང་། མདོ་སྡེ་འཛིན་པ་དང་། མ་མོ་འཛིན་པ་དང་། ཤེས་པས་ནི་གཅིག་གི་མདུན་དུ་བཤགས་པས་དགེ་འདུན་ལྷག་མ་ལས་ལྡང་ངོ་། །ཞེས་སོ། །དེ་ལ་སོགས་པ་ལྟུང་བ་གཞན་རྣམས་ལྕི་ཡང་ལ་ལྟོས་ནས་བཤགས་ཏེ་རིམ་པར་ཉེས་པ་ལས་ལྡང་བའི་ཚུལ་ནི། ཕམ་སྦོམ་ལྕི་བ་ལ་ཡུལ་དགེ་སློང་དྲུག །ཡང་བ་ལ་ལྔ། ལྷག་སྦོམ་ལྕི་བ་ལ་བཞི། ཡང་བ་ལ་གཅིག་གི་དྲུང་དུ་བཤགས་པས་འདགས་ལ། སྤང་ལྟུང་སོགས་སྡེ་ཚན་ཕྱི་མ་རྣམས་དང་། དགེ་ཚུལ་གྱི་ཉེས་ལྟུང་བཤགས་ཚུལ་རྣམས་སྔར་རང་རང་གི་བསྲུང་བྱ་བཤད་པའི་སྐབས་ཕྱོགས་ཙམ་བསྟན་པ་བཞིན་ནོ། །ལར་དུས་ཐམས་ཅད་དུ་ལྟུང་བ་རྣམས་བྱུང་བའི་ཚེ་མཐོལ་བཤགས་བྱ་བ་ལ་འབད་པར་བྱ་ཞིང་འཆི་བའི་ཚེ་ལྟུང་བ་མེད་པ་ཞིག་གལ་ཆེ་ལ། གལ་ཏེ་འཆི་བ་དེའི་ཚེ་ན་ཉེས་པ་མ་བཤགས་པ་དྲན་རྒྱུ་ཡོད་ན་ལུས་ངག་གིས་མཐོལ་བཤགས་ཚད་ལྡན་མ་ནུས་ཀྱང་ཡིད་ཀྱིས་བཤགས་སྡོམ་བྱས་པས་ཀྱང་འདགས་པར་འགྱུར་ཏེ། མདོ་ལས། མཐར་དེ་ལ་རྩལ་རྐྱེན་མ་འབྱོར་བ་ཉིད་ན་ལས་བྱས་པ་དང་འདྲའོ། །ཞེས་གསུངས་པའི་ཕྱིར་རོ། །དེ་རྣམས་ནི་ནུས་པ་ཕྱིར་བཅོས་ཚུལ་ཡིན་ལ། མི་ནུས་པ་བྱིན་གྱིས་བརླབས་པའི་ཚུལ་ནི་ཆད་ལས་དགོས་པའི་རིགས་སྔོན་དུ་མ་སོང་བ་དང་། བཤགས་ཡུལ་མེད་པ་དང་། ལྟུང་ཕྱིར་རྩོད་པ་སོགས་ཀྱི་རྐྱེན་དབང་གིས་བཤགས་པ་མ་གྲུབ་པ་རྣམས་ལས་གྲལ་དུ་མ་འདུས་གོང་དུ་བྱིན་གྱིས་བརླབས་ཤིང་། ལྟུང་བ་ཐུན་མོང་བ་རྣམས་འདུས་ནས་གསོལ་བའི་ལས་ཀྱིས་བྱིན་གྱིས་བརླབས་པ་ཡིན། དེ་ཡང་བཤགས་པས་འདག་པའི་རྒྱུའི་གཙོ་བོ་ནི་འགྱོད་སྡོམ་དྲག་པོའི་སེམས་ཀྱིས་ཡིན་ཏེ། དེ་གཉིས་མེད་པར་ཚིག་ཙམ་གྱིས་བཤགས་པས་ནི་སྡིག་ལྟུང་འདག་པ་ལྟ་ཅི་རྫུན་སྨྲ་བ་ཆེན་པོ་ཡིན་པར་གསུངས་སོ། །གཉིས་པ་ཉེས་པ་སྦྱོང་བའི་ཐབས་སྟོབས་བཞིར་བསྡུ་ཚུལ་བསྟན་པ་ནི། མདོར་ན་སྟོབས་བཞིར་མ་འདུས་བཤགས་པ་མེད། །སྔར་བྱས་འགྱོད་བཤགས་ཁོང་དུ་དུག་སོང་ལྟར། །འགྱོད་པ་སྙིང་ནས་རྣམ་པར་སུན་འབྱིན་སྟོབས། །དུག་ལ་སྨན་བཞིན་འཇུག་པ་དྲག་པོ་ཡིས། །ཉེས་ཕྱིར་དགེ་བའི་གཉེན་པོ་ཀུན་སྤྱོད་སྟོབས། །དུག་མི་འཐུང་ལྟར་ཕྱིས་ནས་ཉེས་སྡོམ་ལ། །ངེས་ཤེས་དྲག་པོ་རྣམ་པར་སོར་ཆུད་སྟོབས། །སྨན་པ་བསྟེན་ལྟར་སྐྱབས་སེམས་ལྟུང་བཤགས་སོགས། །དད་པ་དྲག་པོས་རྟེན་གྱི་སྟོབས་བཞི་སྤྱད། །ཅེས་པ་སྟེ། སྡིག་ལྟུང་གང་ཡིན་ཀྱང་སྦྱོང་བའི་གཉེན་པོ་མདོར་བསྡུས་ན་སྟོབས་བཞིར་མ་འདུས་པའི་བཤགས་པ་མེད་དེ། དེ་ལྟར་ཡང་ཆོས་བཞི་བསྟན་པའི་མདོ་ལས། བྱམས་པ། བྱང་ཆུབ་སེམས་དཔའ་ཆོས་བཞི་དང་ལྡན་ན་སྡིག་པ་བྱས་ཤིང་བཤགས་པ་ཐམས་ཅད་ཟིལ་གྱི་གནོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པ་དང་། གཉེན་པོ་ཀུན་ཏུ་སྤྱོད་པ་དང་། སོར་ཆུད་པའི་སྟོབས་དང་། རྟེན་གྱི་སྟོབས་སོ། །ཞེས་གསུངས་པའི་ཕྱིར། དེའང་སྔར་བྱས་པའི་ཉེས་ལྟུང་ལ་འགྱོད་བཤགས་བྱ་ཚུལ་ཡང་། དཔེར་ན་འགའ་ཞིག་གིས་མ་ཤེས་ཏེ་དུག་འཐུངས་པས་ཁོང་དུ་དུག་སོང་བ་ལྟར་དུག་ནད་ཀྱིས་གཟིར་བ་ན་དེ་ལ་འགྱོད་པ་དྲག་པོས་ཞེ་གཏིང་ནས་སླར་དུག་སྐྱུག་པར་འདོད་པ་ལྟར་ཁ་ཙམ་མ་ཡིན་པར་འགྱོད་པ་སྙིང་ནས་བསྐྱེད་པ་ནི་རྣམ་པར་སུན་འབྱིན་པའི་སྟོབས་དང་། དུག་ནད་སྦྱོང་བའི་གཉེན་པོ་ལ་སྨན་བསྟེན་པ་བཞིན་སྒོ་གསུམ་གྱི་འཇུག་པ་དྲག་པོ་ཡིས་ཉེས་པ་འདགས་པའ་ིཕྱིར་དགེ་བའི་ཕྱོགས་ཀྱི་གཉེན་པོ་ལ་འབད་པ་ཀུན་ཏུ་སྤྱོད་པའི་སྟོབས་དང་། སླད་ནས་ཤེས་བཞིན་དུག་མི་འཐུང་བ་ལྟར་ལྟུང་བ་སྔ་མ་བཤགས་ཏེ་ཕྱིས་སུ་དེ་འདྲ་བའི་ཉེས་པ་མི་བྱེད་སྙམ་དུ་བསམ་ནས་ཉེས་སྤྱོད་སྡོམ་པ་ལ། བཤགས་ན་དག་པའི་ཕན་ཡོན་དང་། མ་བཤགས་ན་འདི་ཕྱིའི་ཉེས་དམིགས་ཡོད་པའི་ཚུལ་ལ་ངེས་ཤེས་དྲག་པོ་བསྐྱེད་པ་རྣམ་པར་སོར་ཆུད་པའི་སྟོབས་དང་། དུག་སྦྱོང་བ་ལ་རང་རྒྱུད་ཀྱི་རྟེན་རྒྱུད་གསོ་རུང་དུ་ཡོད་པ་དང་། ཡུལ་གྱི་རྟེན་དུག་སྨན་ཉེར་བའི་སྨན་པ་བསྟེན་དགོས་པ་ལྟར། རང་རྒྱུད་ཀྱི་རྟེན་བླ་མ་མཆོག་གསུམ་ལ་སྐྱབས་སུ་འགྲོ་ཞིང་བྱང་ཆུབ་མཆོག་ཏུ་སེམས་བསྐྱེད་པ་དང་། ལྟུང་བ་བཤགས་པའི་མདོ་སོགས་ལ་འབད་པས་འདོན་ཅིང་། ཡུལ་གྱི་རྟེན་བཤགས་ཡུལ་བླ་མ་དཀོན་མཆོག་ལ་ཡིད་ཆེས་པའི་དད་པ་དྲག་པོའི་སྒོ་ནས་བཤགས་ན་འདགས་ངེས་པའི་ཕྱིར་རྟེན་གྱི་སྟོབས་ཡིན་ལ། དེ་ལྟར་སྟོབས་བཞི་ཚང་བའི་སྒོ་ནས་སྤྱད་དོ། །འོན་ཀྱང་ཆོས་འདི་པའི་ལུགས་ཀྱི་བཤགས་ཚུལ་རྣམས་སྔར་བཤད་པ་ལྟར་མ་བྱས་ན་རྒྱུད་ལྟུང་བ་དངོས་གཞི་ལས་ལྡང་མི་ནུས་ཀྱང་འབྲས་བུ་རྣམ་སྨིན་ཤིན་ཏུ་ཡང་བ་མྱོང་བར་འགྱུར་བ་ལ་སྟོབས་བཞིའི་བཤགས་པ་འདི་ཉིད་ཤིན་ཏུ་གལ་ཆེ་བས་གཉིས་ཀ་ཆུན་གཅིག་དྲིལ་དུ་བྱེད་པ་གནད་དོ། །གསུམ་པ་ཉེས་དམིགས་ཤེས་པའི་སྒོ་ནས་ནན་ཏན་དུ་བསྲུང་བར་གདམས་པ་ནི། འོན་ཀྱང་སྡིག་ལྟུང་སྟོབས་ལྡན་རེ་སྤྱོད་ན། །ས་ཐོབ་ཡུན་དུ་འགོར་བས་མིག་ལྟར་བསྲུང་། །ཞེས་པ་སྟེ། དེ་ལྟར་ཚུལ་བཞིན་བཤགས་པས་ཉེས་པ་འདགས་པ་དེ་ལྟ་མོད་ཀྱི། དཔེར་ན་རྩ་ལྟུང་འཆབ་མེད་ལ་བསླབ་པ་སྦྱིན་ནས་ཕྱིར་བཅོས་སུ་ཡོད་མོད། འོན་ཀྱང་ཇི་སྲིད་དགྲ་བཅོམ་པ་མ་ཐོབ་ཀྱི་བར་དེ་སྲིད་དུ་ཕམ་པའི་དངོས་གཞི་འདག་མི་ནུས་ཤིང་། དེ་འདྲ་དེས་དགྲ་བཅོམ་པ་ཐོབ་པ་ཡང་གཞན་ལས་ཆེས་དཀའ་སྟེ། སྦྱང་བྱ་སྡིག་ལྟུང་སྟོབས་དང་ལྡན་པ་རེ་རེ་ཙམ་ལ་སྤྱོད་ན། དེའི་གཉེན་པོར་སྦྱོང་བྱེད་ལ་ཆེ་ཐང་གིས་འབད་དུ་ཟིན་ཀྱང་རྒྱུད་ཉེས་པའི་སྒྲིབ་པ་དེ་རྣམ་གྲོལ་གྱི་ས་གོང་མའི་ཡོན་ཏན་ཐོབ་པ་ལ་ཡུན་རིང་དུ་འགྱང་སྟེ་འགོར་བས་ན་ལྟུང་བ་ཕྲ་ཞིང་ཕྲ་བའང་མིག་གི་འབྲས་བུ་ལྟར་གཅེས་སྤྲས་ཀྱིས་བསྲུང་དགོས་ཏེ། ཉེས་པ་ཆུང་ངུས་ཀྱང་རྣམ་སྨིན་ཆེན་པོ་བསྐྱེད་ནུས་པའི་ཕྱིར། ལུང་ལས། གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། །འདི་ན་ལ་ལ་རྒྱལ་པོའི་ཚིག་ཆེན་པོ། །ལན་འགའ་འདས་ནའང་ཆད་པ་ཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་འདའ་བྱས་ན། །དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། །ཞེས་དང་། གཞན་ཡང་ཉམས་པའི་ཉེས་པ་སྔ་མ་ལས། དམ་ཆོས་ཐོས་པར་མི་འགྱུར་ལ། །ཐོས་པ་མྱུར་དུ་བརྗེད་པར་འགྱུར། །ས་ལམ་རྟོགས་པའང་ཡོངས་མི་སྐྱེ། །ཞེས་གསུངས་ཤིང་། གལ་ཏེ་ཚུལ་ཁྲིམས་འཆལ་བར་གྱུར་ནའང་གཞན་ལ་མ་བརྗོད་ན་གཞན་གྱི་ཁྲེལ་བ་ལ་སོགས་པ་མི་འབྱུང་ངོ་སྙམ་ན། སྐྱེས་རབས་ལས། མ་མཐོང་བཞིན་དུ་སྡིག་པ་བྱེད་ན་ཡང་། །དུག་ཟོས་བཞིན་དུ་བདེ་བར་མི་འགྱུར་ཏེ། །ལྷ་དང་རྣལ་འབྱོར་ཅན་གྱི་མི་དག་གི། །རྣམ་དག་མིག་གིས་མི་མཐོང་མི་སྲིད་དེ། །ཞེས་པ་ལྟར། ཉེས་པ་ལྐོག་ཏུ་བྱས་ཀྱང་ས་བླའི་ལྷ་རྣམས་ཀྱིས་བསྒྲགས་པས། གཏམ་ངན་ཕྱོགས་ཐམས་ཅད་དུ་ཁྱབ། །འཇིག་རྟེན་ལྷ་དང་བཅས་པས་ཁྲེལ་ཞིང་བརྙས། མཁན་པོ་དང་སློབ་དཔོན་གྱི་མདུན་དུ་འགྲོ་བ་ལ་ངོ་གནོང་། དགེ་འདུན་ཚོགས་པའི་དབུས་སུ་བག་ཚ། སྦྱིན་བདག་གི་ཡོན་ལེན་པ་ལ་དཔའ་ཞུམ། དཀར་ཕྱོགས་ལྷ་དང་ཆོས་སྐྱོང་རྣམས་ཀྱིས་མི་བསྲུང་། ནག་ཕྱོགས་བདུད་རིགས་རྣམས་ཀྱིས་གླགས་རྙེད། ཚེ་འདིར་ཡང་མི་འདོད་པ་ཐམས་ཅད་ཐོག་ཏུ་འབབ། ཡོན་ཏན་གོང་མ་མི་སྐྱེ། སྔར་ཐོས་པ་རྣམས་བརྗེད། འཆི་བའི་ཚེ་འགྱོད་པ་དང་བཅས་པས་དུས་བྱས་ཏེ་ངན་སོང་དུ་སྡུག་བསྔལ་ཉམས་སུ་མྱོང་བར་འགྱུར་བའི་ཚུལ་ཡང་། མདོར་ན་ཕམ་ལྷག་སྦོམ་པོ་ལྟུང་བྱེད་སོར་བཤགས་ཉེས་བྱས་རྣམས་ལས་འདས་ན་རིམ་པར་ཚ་བའི་དམྱལ་བ་ནས་ཡང་སོས་ཀྱི་བར་དུ་སྐྱེ་བར་མདོ་ལས་གསུངས་པས་ན། རང་ཉིད་བདེ་བར་འདོད་པ་དག་གིས་ཤིན་ཏུ་བག་ཡོད་པའི་སྒོ་ནས་ནན་ཏན་དུ་གསོ་བ་ལ་བརྩོན་པར་བྱའོ། །ལྔ་པ་བསྲུང་བའི་ཕན་ཡོན་ལ་གསུམ། ཚུལ་ཁྲིམས་ཙམ་གྱི་ཕན་ཡོན། །སོ་ཐར་གྱི་སྡོམ་པའི་ཕན་ཡོན། དེ་ཡོན་ཏན་ཐམས་ཅད་ཀྱི་གཞི་རྟེན་དུ་འགྱུར་བའི་ཕན་ཡོན་ནོ། །དང་པོ་ཚུལ་ཁྲིམས་ཙམ་གྱི་ཕན་ཡོན་ནི། ཕན་ཡོན་ནད་དང་རྒྱལ་པོའི་ཆད་ཕྱིར་བླངས། །རྐྱེན་འགའ་སེལ་ཀྱང་འཇིགས་སྐྱོབ་ཚུལ་ཁྲིམས་ཡིན། །ཕྱི་མའི་ཆེད་བླངས་ལེགས་སྨོན་ཚུལ་ཁྲིམས་ཞེས། །ལྷ་མིའི་བདེ་འབྲས་ཐོབ་ཀྱང་ཐར་པ་མིན། །ཞེས་པ་སྟེ། དེ་ལྟར་ཚུལ་བཞིན་དུ་མ་ཉམས་པར་བསྲུངས་ན་དེའི་ཕན་ཡོན་ནི་ཚེ་འདིར་ནད་དང་རྒྱལ་པོའི་ཆད་པ་སོགས་ལས་ཐར་བའི་ཕྱིར་བླངས་ན་དེ་དང་དེའི་རང་རང་གི་འདོད་འབྲས་ཚེ་འདིའི་འཕྲལ་རྐྱེན་འགའ་ཞིག་སེལ་ནུས་ཀྱང་འཇིགས་སྐྱོབ་ཀྱི་ཚུལ་ཁྲིམས་ཙམ་ཡིན་ལ། ཕྱི་མ་ངན་སོང་གི་སྡུག་སྔལ་ལ་འཇིགས་ནས་མངོན་མཐོང་ལྷ་མིའི་བདེ་བ་ཙམ་ཐོབ་པའི་ཆེད་དུ་བླངས་ན་ལེགས་སྨོན་གྱི་ཚུལ་ཁྲིམས་ཞེས་རང་གི་ཇི་ལྟར་འདོད་པ་བཞིན་ལྷ་དང་མིའི་བདེ་བའི་འབྲས་བུ་ཐོབ་པ་ཡིན་ཀྱང་ངེས་འབྱུང་གི་བསམ་པས་མ་ཟིན་པས་ན་འཁོར་བ་ལས་ཐར་པ་ཐོབ་པའི་ཐབས་ནི་མིན་ནོ། །གཉིས་པ་སོ་ཐར་གྱི་སྡོམ་པའི་ཕན་ཡོན་ནི། ངེས་པར་འབྱུང་བའི་ཚུལ་ཁྲིམས་སྡོམ་ལྡན་ན། །དགྲ་བཅོམ་ཐོབ་པ་དགའ་བོའི་རྣམ་ཐར་བཞིན། །ཞེས་པ་སྟེ། དེས་ན་འཁོར་བ་ལས་ངེས་པར་འབྱུང་བ་མྱང་འདས་གསུམ་གང་རུང་ཐོབ་པར་འདོད་པའི་བསམ་པས་ཟིན་པའི་རིགས་བརྒྱད་གང་རུང་གི་ཚུལ་ཁྲིམས་བླངས་ནས་སྡོམ་པ་མ་ཉམས་པར་བསྲུང་བ་དང་ལྡན་ན་དགྲ་བཅོམ་པ་སོགས་མྱང་འདས་གསུམ་གང་དོན་དུ་གཉེར་བ་དེ་ཐོབ་པ་ལ་ཚེགས་མེད་དེ། དཔེར་ན་གཅུང་དགའ་བོས་དང་པོའི་དུས་སུ་སྟོན་པའི་བཀས་དབང་མེད་དུ་སྡོམ་པ་བླངས། དེ་རྗེས་སྟོན་པས་རྫུ་འཕྲུལ་གྱིས་ཁྲིད་དེ་ལྷའི་བུ་མོ་རྣམས་བསྟན་པས་ཕྱི་མ་དེ་དང་ལྷན་ཅིག་སྐྱེ་བར་འདོད་ནས་བསླབ་པ་ལ་བརྩོན་པས་སྔར་གྱི་སྡོམ་པ་དེ་ལེགས་སྨོན་གྱི་ཚུལ་ཁྲིམས་སུ་གྱུར། དེའི་འོག་ཏུ་དམྱལ་བའི་སྡུག་བསྔལ་བསྟན་པས་ངེས་འབྱུང་གི་བསམ་པ་སྐྱེས་ནས་དེ་ཕྱིན་ཆད་སོ་ཐར་གྱི་སྡོམ་པ་མཚན་ཉིད་པར་གྱུར་ནས་ལེགས་པར་བསླབ་པས་དགྲ་བཅོམ་པའི་འབྲས་བུ་མངོན་དུ་བྱས་པའི་རྣམ་པར་ཐར་པ་བཞིན་ནོ། །དེར་མ་ཟད་གནས་སྐབས་ཀྱི་ཕན་ཡོན་ཀྱང་། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་བསྔགས་པར་འོས་པ་དང་། འཕགས་ནོར་བདུན་གྱིས་ཕྱུག་པ་དང་། འགྱོད་པ་མེད་པར་འཆི་བའི་དུས་བྱས་ནས། སྐྱེ་བ་ཕྱི་མར་ཕམ་པ་བསྲུངས་པས་གཞན་འཕྲུལ་དབང་བྱེད། དགེ་འདུན་ལྷག་མས་འཕྲུལ་དགའ། སྦོམ་པོས་དགའ་ལྡན། ལྟུང་བྱེད་ཀྱི་འཐབ་བྲལ། སོར་བཤགས་དང་ཉེས་བྱས་རྣམས་བསྲུངས་པས་རི་རབ་ལ་གནས་པའི་ལྷའི་གནས་སུ་སྐྱེ་བར་འགྱུར་ཞིང་། མཐར་ཐུག་འགྱོད་པ་མེད་པའི་ཚུལ་ཁྲིམས་རྣམ་པར་དག་པ་ལ་བརྟེན་ནས་དམིགས་པ་ལ་རྩེ་གཅིག་པའི་ཏིང་ངེ་འཛིན་འགྲུབ་ཅིང་། དེ་ལ་བརྟེན་ནས་རྣམ་པར་མི་རྟོག་པའི་ཤེས་རབ་ཀྱིས་འཁོར་བའི་རྩ་བ་བདག་ཏུ་འཛིན་པ་བཅད་ནས་ངེས་པར་འབྱུང་བ་ལྷག་མེད་ཀྱི་མྱང་འདས་ཐོབ་པར་འགྱུར་ཏེ། ས་གའི་ལྷས། རབ་བསྔགས་ནོར་ནི་ཕུན་ཚོགས་ཤིང་། །ལྷ་ཡི་ཁང་བཟང་དམ་པར་སྐྱེ། །ཏིང་ངེ་འཛིན་དང་ངེས་འབྱུང་ཐོབ། །ཚུལ་ཁྲིམས་འདི་ནི་འབྲས་བུ་ཆེ། །ཞེས་དང་། དགེ་སློང་ལ་རབ་ཏུ་གཅེས་པའི་མདོ་ལས། ཤིན་ཏུ་ལེགས་པར་ཚུལ་ཁྲིམས་གང་། །བསྡམས་པའི་མི་དེ་མཛེས་པའི་གཟུགས། །འདུལ་བ་ལ་ནི་ཉེ་བར་གནས། །ཚུལ་ཁྲིམས་བསླབ་ལ་རང་ཡིད་ཆེས། །མི་དེ་ཉི་མ་གཅིག་ལ་ཡང་། །བསོད་ནམས་ཕུང་པོ་དཔག་ཏུ་མེད། །གསོག་ཅིང་སངས་རྒྱས་འབྲས་བུ་འགྲུབ། །ཅེས་སོ། །གསུམ་པ་ཡོན་ཏན་ཐམས་ཅད་ཀྱི་གཞི་རྟེན་དུ་འགྱུར་བའི་ཕན་ཡོན་ནི། སྐྱབས་གསུམ་འཛིན་སོགས་ཡོན་ཏན་ཕྱི་མ་མཆོག །སྔ་མ་ཕྱི་མའི་ཐུན་མོང་ལམ་ཡིན་ཕྱིར། །སེམས་བསྐྱེད་སྔགས་ཀྱི་གདུལ་བྱའང་དེ་དང་མཚུངས། །དེ་ཕྱིར་ཡོན་ཏན་ཀུན་གྱི་གཞི་རྟེན་ཡིན། །ཞེས་པ་སྟེ། མྱང་འདས་ལས། གང་སུ་གསུམ་ལ་སྐྱབས་འགྲོ་བ། །དེ་དག་མྱུར་དུ་སངས་རྒྱས་འགྱུར། །ཞེས་གསུངས་པ་ལྟར་གྱི་སྐྱབས་གསུམ་འཛིན་པའི་དགེ་བསྙེན་གྱི་ཕན་ཡོན་དེས་ཡོངས་རྫོགས་དགེ་བསྙེན་གྱི་སྡོམ་པའི་ཕན་ཡོན་བརྒྱའི་ཆར་ཡང་མི་འགྱུར་ཞིང་། དེ་བཞིན་དུ་སོགས་ཁོངས་ནས་དགེ་ཚུལ་དང་དགེ་སློང་གི་སྡོམ་པའི་ཡོན་ཏན་སྔ་མ་སྔ་མ་བས་ཕྱི་མ་ཕྱི་མ་རྣམས་བརྒྱ་འགྱུར་སྟོང་འགྱུར་གྱི་མཆོག་ཏུ་གྱུར་པ་ཡིན་ཅིང་། སྔ་མ་སྔ་མ་རྣམས་ཕྱི་མ་ཕྱི་མའི་ཐུན་མོང་དུ་གྱུར་པའི་ལམ་སྟེགས་ཡིན་པའི་ཕྱིར། དེ་བཞིན་དུ་སོ་ཐར་གྱི་སྡོམ་པ་དེ་དག་ཀྱང་སེམས་བསྐྱེད་ཀྱི་སྡོམ་པའི་རྟེན་དུ་འགྲོ་ཞིང་། དེ་གཉིས་ཀ་གསང་སྔགས་ཀྱི་སྡོམ་པའི་རྟེན་དུ་འགྲོ་བའི་ཕྱིར་ན་སྡོམ་པ་གོང་མ་གཉིས་ཀྱི་གདུལ་བྱ་ལའང་འོག་མ་གཉིས་འགྲོ་དགོས་པའི་ཚུལ་གོང་དུ་བཤད་པ་དེ་དག་དང་མཚུངས་ཤིང་། རྒྱུ་མཚན་དེ་ཡི་ཕྱིར་ན་ངེས་འབྱུང་གི་ཚུལ་ཁྲིམས་ནི་ཐེག་པ་ཀུན་གྱི་ལུང་དང་རྟོགས་པའི་ཡོན་ཏན་མ་ལུས་པ་ཀུན་གྱི་གཞི་རྟེན་དུ་འགྱུར་བ་ཡིན་ཏེ། བཤེས་སྤྲིང་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་སོ། །མདོར་ན་སྔོན་བསྟན་པ་དར་བའི་དུས་སུ་ལོ་གྲངས་མང་པོར་བསླབ་གཞི་ཡོངས་རྫོགས་ཀྱི་ཚུལ་ཁྲིམས་རྣམ་དག་བསྲུང་བ་ལས། ད་ལྟ་བསྟན་པ་ནུབ་ལ་ཉེ་བའི་དུས་འདིར་ཉིན་ཞག་གཅིག་གི་ཡུན་ལ་བསླབ་གཞི་གཅིག་ཙམ་བསྲུང་བ་ཕན་ཡོན་ཆེ་བར་གསུངས་ཏེ། ཏིང་འཛིན་རྒྱལ་པོ་ལས། བསྐལ་པ་བྱེ་བ་གངྒཱའི་བྱེ་སྙེད་དུ། །དང་བའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཕྲག་ཁྲིག་རིམ་གྲོར་བྱས། །གང་ཞིག་དམ་ཆོས་རབ་ཏུ་འཇིགས་པ་དང་། །བདེ་གཤེགས་བསྟན་པ་འགགས་པར་འགྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱད་པ། །བསོད་ནམས་འདི་ནི་དེ་བས་ཁྱད་པར་འཕགས། །ཞེས་གསུངས་པའི་ཕྱིར་རོ། །དེ་ལྟར་བརྗོད་བྱའི་དོན་མཐར་ཕྱིན་ནས་ལེའུའི་སྐབས་བསྡུ་བ་ནི། འདུལ་བ་སོ་ཐར་གྱི་རིམ་པར་ཕྱེ་བ་སྟེ་གཉིས་པའོ། །ཞེས་པ་སྟེ། བསྟན་བཅོས་འདི་ལ་ལེའུ་ལྔ་ལས། བརྗོད་བྱ་འདུལ་བ་སྤོང་འཇུག་གི་ཚུལ་ཁྲིམས་ཉིད། རྗོད་བྱེད་ཀྱི་འདུལ་བ་ལ་ཕ་མའི་འབྱེད། ལུང་གི་གཞི། ལུང་བླ་མ། ལུང་ཕྲན་ཚེགས་ཏེ། ལུང་སྡེ་བཞིའི་སྒོ་ནས། ཉན་ཐོས་དང་ཐུན་མོང་བའི་བསྟན་པའི་ཉམས་ལེན་སོ་ཐར་གྱི་རིམ་པར་ཕྱེ་བ་སྟེ་ལེའུ་གཉིས་པའི་རྣམ་པར་བཤད་པའོ།། །། ༈ གཉིས་པ་བྱང་ཆུབ་སེམས་དཔའི་སྡོམ་པ་བཤད་པ་ལ་གསུམ་སྟེ། སྟོན་པས་ཕ་རོལ་ཏུ་ཕྱིན་པའི་སྡེ་སྣོད་ཇི་ལྟར་གསུངས་ཚུལ། དེ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་ཚུལ། དེ་ལྟར་བཟུང་བའི་བརྗོད་བྱ་གཏན་ལ་དབབ་པའོ། །དང་པོ་སྟོན་པས་ཕ་རོལ་ཏུ་ཕྱིན་པའི་སྡེ་སྣོད་ཇི་ལྟར་གསུངས་ཚུལ་ནི། བསྐལ་བཟང་འགྲོ་བའི་འདྲེན་པ་ཐུབ་ཆེན་དེས། །བྱ་རྒོད་ཕུང་སོགས་ཐེག་ཆེན་རིགས་ཅན་ལ། །ཤིན་ཏུ་རྒྱས་པའི་སྡེ་སྣོད་དཔག་ཡས་གསུངས། །ཞེས་པ་སྟེ། སྟོན་པ་ཐུགས་རྗེ་ཅན་དེ་ཉིད་བསྐལ་པ་གྲངས་མེད་བསམ་གྱིས་མི་ཁྱབ་པའི་སྔ་རོལ་དུ་དབང་པོའི་ཏོག་ཅེས་བྱ་བར་སངས་རྒྱས་སུ་ཟིན་ཀྱང་། བསྐལ་པ་བཟང་པོའི་དུས་འདིར་ཞིང་འདིའི་འགྲོ་བ་རྣམས་སྲིད་པ་འཁོར་བའི་སྡུག་བསྔལ་ལས་ཞི་བ་མྱ་ངན་ལས་འདས་པའི་གྲོང་དུ་འདྲེན་པར་མཛད་པའི་ཆེད་དུ། སླར་ཡང་མཛད་པ་བཅུ་གཉིས་ལ་སོགས་པའི་སྒོ་ནས་བླ་ན་མེད་པའི་བྱང་ཆུབ་ཆེན་པོ་བརྙེས་པའི་ཚུལ་བསྟན་ཏེ། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་བར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ཞེས་པ་ནས། ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་པའི་བར་གསུངས་པའི་ཕྱིར། དེ་ལྟར་སངས་རྒྱས་ནས་གདུལ་བྱའི་བློ་ལ་ལྟོས་ཏེ་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བར་མཛད་པ་ལས། དང་པོའི་ཚུལ་རྣམས་གོང་དུ་བརྗོད་ཟིན་མ་ཐག་པ་ལྟར་ལ། འདིར་བར་མཐའི་དགོངས་པ་ཁྱད་པར་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའི་སྡེ་སྣོད་ཇི་ལྟར་གསུངས་པའི་ཚུལ་ནི་ཕུན་སུམ་ཚོགས་པ་ལྔ་ལྡན་ཏེ། སྟོན་པ་ཕུན་སུམ་ཚོགས་པ་རྣམ་འདྲེན་བཞི་པ་ཐུབ་པ་ཆེན་པོ་དེས། གནས་ཕུན་སུམ་ཚོགས་པ་བྱ་རྒོད་ཕུང་པོའི་རི་བོ་ལ་སོགས་པར། འཁོར་ཕུན་སུམ་ཚོགས་པ་ཐེག་པ་ཆེན་པོའི་རིགས་ཅན་ལྷ་ཀླུ་མི་དང་ལྷ་མ་ཡིན་དྲི་ཟ་སོགས་ཐུན་མོང་བའི་འཁོར་དང་། ཐུན་མོང་མ་ཡིན་པའི་འཁོར་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་དཔག་ཏུ་མེད་པ་ལ། ཆོས་ཕུན་སུམ་ཚོགས་པ་ཤིན་ཏུ་རྒྱས་པའི་སྡེ་སྣོད་ལྷག་པ་སེམས་ཀྱི་བསླབ་པ་གཙོ་བོར་སྟོན་པ་ལས་བརྩམས་ཏེ་མདོ་སྡེའི་འདུལ་བ་བྱང་སེམས་ཀྱི་སྡོམ་པའི་མཚམས་རྣམ་པར་གཞག་པ་དང་། མདོ་སྡེའི་མདོ་སྡེ་ཏིང་ངེ་འཛིན་ཟབ་ཅིང་རྒྱ་ཆེ་བ་དང་། མདོ་སྡེའི་མངོན་པ་ས་ལམ་དང་གཟུངས་ཏིང་གི་རབ་དབྱེ་ཇི་སྙེད་པ་རྣམས་སྟོན་པ་བཀའ་བར་པ་མཚན་ཉིད་མེད་པའི་ཆོས་ཀྱི་རྣམ་གྲངས་དང་། ཡང་གནས་གཅིག་ཏུ་མ་ངེས་པར་ཐེག་པ་ཐམས་ཅད་ཀྱི་རིགས་ཅན་ལ། ཆོས་ལྷག་པ་ཤེས་རབ་ཀྱི་བསླབ་པ་གཙོ་བོར་སྟོན་པ་ཚེགས་ཆུང་ཞིང་ཐབས་སླ་བས་ཉོན་མོངས་པ་འདུལ་བའི་ཐབས་སྟོན་པ་མངོན་པའི་འདུལ་བ་དང་། དེ་ཁོ་ན་ཉིད་ཟབ་མོའི་དོན་ལ་འཇུག་པའི་ཚུལ་སྟོན་པ་མངོན་པའི་མདོ་སྡེ་དང་། རྒྱ་ཆེ་བ་ཕུང་ཁམས་སྐྱེ་མཆེད་ཀྱི་རབ་དབྱེ་སོགས་དང་ཁྱད་པར་དེ་བཞིན་གཤེགས་པའི་སྙིང་པོའི་ཁམས་གཏན་ལ་འབེབས་པ་མངོན་པའི་མངོན་པ་སྟེ། བཀའ་ཐ་མ་ངེས་པ་དོན་གྱི་རྣམ་གྲངས་སྟོན་པ་ལེགས་པ་རྣམ་པར་ཕྱེ་བའི་ཆོས་འཁོར་ཏེ། ཚིག་དོན་ཤིན་ཏུ་ཟབ་ཅིང་རྒྱས་པའི་སྡེ་སྣོད་དཔག་ཏུ་མེད་ཅིང་བསམ་ཡས་པ་རྣམས། དུས་ཕུན་སུམ་ཚོགས་པ་གདུལ་བྱའི་མོས་པ་བཞིན་རིམ་གྱིས་སམ་ཅིག་ཆར་དུ་གསུངས་པ་ལྟར་སྣང་བར་མཛད་དེ། མདོ་སྡེ་ཡོན་ཏན་བཀོད་པའི་རྒྱལ་པོ་ལས། ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་བརྡལ་སྣང་། །གང་ཚེ་རིམ་གྱིས་མངོན་འདོད་པ། །དེ་དག་ཀུན་ལ་དེ་བཞིན་ཏེ། །དུས་གཅིག་ཉིད་དུ་འཇུག་ཅན་ལ། །ཆོས་ཀྱི་རྣམ་གྲངས་རྫོགས་པར་སྣང་། །ཡིད་བཞིན་རེ་བ་རྣམས་སྐོང་བའི། །གསུང་གི་ཆེ་བ་དེ་ཉིད་དོ། །ཞེས་སོ། །དེ་ཡང་འཁོར་ལོ་གསུམ་པོ་གྲངས་ངེས་སུ་འདོད་ཚུལ་ལ། བཀའ་དང་པོར་ཀུན་རྫོབ་ཀྱི་བདེན་པ་གཙོ་བོར་བསྟན་པས་དྲང་དོན་ཡིན་པར་ཐམས་ཅད་མཐུན་ལ། བར་པ་དང་ཐ་མ་གཉིས་དྲང་ངེས་གང་ཡིན་ལ་བཞེད་པ་མི་མཐུན་པ་མང་ཡང་། རང་ལུགས་ནི་བར་པ་དྲང་ངེས་ཕྱེད་མའམ་གནས་སྐབས་པའི་ངེས་དོན་དང་། ཐ་མ་ཉིད་ངེས་དོན་དུ་འདོད་དེ། དགོངས་པ་ངེས་འགྲེལ་ལས། དང་པོ་གཉིས་ཀྱི་སྐབས་སུ་འཁོར་ལོ་བསྐོར་བ་དེ་ཡང་བླ་ན་མཆིས་པ། སྐབས་མཆིས་པ། དྲང་བའི་དོན། རྩོད་པའི་གཞིའི་གནས་སུ་གྱུར་པ། །ཞེས་གསུངས་ཤིང་། ཐ་མའི་སྐབས་སུ། ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་བསྐོར་ཏེ། འཁོར་ལོ་བསྐོར་བ་འདི་ནི་བླ་ན་མ་མཆིས་པ། སྐབས་མ་མཆིས་པ། ངེས་པའི་དོན་ལགས་ཏེ། རྩོད་པའི་གཞིའི་གནས་སུ་གྱུར་པ་མ་ལགས་སོ། །ཞེས་གསུངས་པའི་ཕྱིར་རོ། །གཉིས་པ་དེ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་ཚུལ་ནི། འཇམ་དབྱངས་དཀའ་བསྡུས་ཀླུ་སྒྲུབ་སོགས་ཀྱིས་བཀྲལ། །ཞི་བ་ལྷས་སྤེལ་ཟབ་མོ་ལྟ་བའི་ལུགས། །བྱམས་པས་བཀའ་བསྡུས་ཐོགས་མེད་སྐུ་མཆེད་བཀྲལ། །ཇོ་བོ་རྗེས་སྤེལ་རྒྱ་ཆེན་སྤྱོད་པའི་སྲོལ། །པདྨའི་རིང་ལུགས་ནཱ་གརྫུ་ནར་མཐུན། །ཞེས་པ་སྟེ། སྤྱིར་བཀའ་བསྡུ་ལ་ཐུན་མོང་བ་ནི་རིམ་པ་གསུམ་སྔར་བཤད་པ་ལྟར་ཡིན་ལ། ཐེག་ཆེན་ཐུན་མོང་མ་ཡིན་པ་ལྟར་ན། རྒྱལ་པོའི་ཁབ་ཀྱི་ལྷོ་ཕྱོགས་བི་མ་སམྦྷ་བའི་རི་ལ་རྒྱལ་སྲས་འབུམ་ཕྲག་བཅུ་འདུས་ཏེ། བྱམས་པ་འཇམ་དབྱངས་གསང་བདག་གསུམ་གྱིས་སྡེ་སྣོད་གསུམ་བསྡུས་པར་བཤད་ཅིང་། འདིར་ཁྱད་པར་བ་ཤིང་རྟ་ཆེན་པོའི་སྲོལ་གཉིས་ཀྱི་དབང་དུ་བྱས་ན། སྲོལ་དང་པོ་ཐེག་པ་ཆེན་པོའི་སྡེ་སྣོད་རྣམས་ལས། ཟབ་མོ་སྟོང་པ་ཉིད་ཇི་ལྟ་བའི་ཕྱོགས་རྣམས་རྗེ་བཙུན་འཇམ་དཔལ་དབྱངས་ཀྱིས་བཀའ་བསྡུས་ཤིང་། དེའི་རྗེས་སུ་བཟུང་བ་རྒྱལ་བས་ལུང་བསྟན་སློབ་དཔོན་ཀླུ་སྒྲུབ་ཀྱིས་འཁོར་ལོ་བར་པའི་དགོངས་འགྲེལ་དུ་ཆོས་ཐམས་ཅད་རང་སྟོང་དུ་གཏན་ལ་འབེབས་བྱེད་དབུ་མ་རིགས་ཚོགས་དང་། འཁོར་ལོ་ཐ་མའི་དགོངས་འགྲེལ་གཞན་སྟོང་དུ་གཏན་ལ་འབེབས་བྱེད་བསྟོད་ཚོགས་སོགས་མཛད་ནས་ཟབ་མོ་ལྟ་བའི་ཤིང་རྟའི་སྲོལ་ཕྱེས་ཤིང་། སོགས་ཁོང་ནས་དེའི་སྲོལ་འཛིན་ཟླ་བ་གྲགས་པ། འཕགས་པ་ལྷ། ལེགས་ལྡན་འབྱེད་སོགས་ཀྱིས་ཀྱང་དགོངས་འགྲེལ་གྱི་བསྟན་བཅོས་མང་དུ་མཛད་ནས་བཀྲལ་ལ། སེམས་བསྐྱེད་ཀྱི་ཕྱག་བཞེས་ཞི་བ་ལྷ་དང་ཛེ་ཏ་རི་ལ་སོགས་པས་རྒྱ་ཆེར་སྤེལ་བ་ནི་ཟབ་མོ་ལྟ་བའི་ལུགས་ཡིན་ཅིང་། ཡང་སྲོལ་གཉིས་པ་ཇི་སྙེད་པ་རྒྱ་ཆེན་སྤྱོད་པའི་ཕྱོགས་ཀྱི་མདོ་སྡེ་རྣམས་རྒྱལ་ཚབས་བྱམས་པ་མགོན་པོས་བཀའི་བསྡུ་བ་གནང་ནས་གཞན་སྟོང་དུ་གཏན་ལ་འབེབས་པའི་བསྟན་བཅོས་བྱམས་ཆོས་སྡེ་ལྔ་མཛད་དེ། རྒྱལ་བས་ལུང་སྟན་འཕགས་པ་ཐོགས་མེད་ལ་བསྟན་ཅིང་། དེས་ས་སྡེ་ལྔ་ལ་སོགས་པའི་བསྟན་བཅོས་མཛད་པ་དང་། མཁས་མཆོག་དབྱིག་གཉེན་གྱིས་པྲ་ཀ་ར་ཎ་སྡེ་བརྒྱད་སོགས་མཛད་དེ། དེ་ལྟར་སྐུ་མཆེད་གཉིས་ཀྱིས་ལེགས་པར་བཀྲལ་པའི་སྲོལ་ཉིད་ཕྱོགས་ཀྱི་གླང་པོ། ཆོས་ཀྱི་གྲགས་པ། ཙནྡྲ་གོ་མི་ལ་སོགས་པས་བཟུང་ཞིང་། སེམས་བསྐྱེད་ཀྱི་ཕྱག་བཞེས་ཉིད་བོད་ཡུལ་འདིར་ཇོ་བོ་རྗེ་དཔལ་ལྡན་ཨ་ཏི་ཤས་སྤེལ་བར་མཛད་ཅིང་རིམ་པར་བརྒྱུད་བ་ནི་རྒྱ་ཆེན་སྤྱོད་པའི་སྲོལ་ཡིན་ལ། རང་ཅག་སློབ་དཔོན་ཆེན་པོ་པདྨའི་རྗེས་སུ་འཇུག་པ་གསང་སྔགས་སྔ་འགྱུར་གྱི་རིང་ལུགས་པ་རྣམས་ནི་སྔགས་ཀྱི་རྒྱུད་སྡེ་རྣམས་ལས་གསུངས་པའི་བྱང་སྡོམ་གྱི་ཐོབ་ཚུལ་དང་དེའི་བསླབ་བྱའི་རྐང་གྲངས་ཕལ་ཆེར་འཕགས་པ་ནཱ་གརྫུ་ནའི་ལུགས་དང་མཐུན་ལ། ལྟ་བ་ནི་སྲོལ་གཉིས་ཀ་དང་མཐུན་པ་ཡིན་ནོ། །གསུམ་པ་དེ་ལྟར་བཟུང་བའི་བརྗོད་བྱ་གཏན་ལ་དབབ་པ་ལ་གཉིས། ཐོབ་བྱ་སྡོམ་པའི་ངོ་བོ་དང་དབྱེ་བ་སྤྱིར་བཤད། ཐོབ་བྱེད་སྡོམ་པའི་ལག་ལེན་བྱེ་བྲག་ཏུ་བཤད་པའོ། །དང་པོ་སྤྱིར་བཤད་པ་ལའང་གཉིས། སྡོམ་པའི་ངོ་བོ་དང་། སྡོམ་པའི་དབྱེ་བའོ། །དང་པོ་སྡོམ་པའི་ངོ་བོ་ནི། ངོ་བོ་བྱམས་དང་སྙིང་རྗེས་རྒྱུད་བརླན་ཅིང་། །གཞན་གྱི་དོན་དུ་བྱང་ཆུབ་ཐོབ་འདོད་པས། །སྒོ་གསུམ་ཉེས་པ་སྤོང་བའི་སེམས་པའོ། །ཞེས་པ་སྟེ། བརྗོད་བྱའི་སྙིང་པོ་བྱང་ཆུབ་སེམས་ཀྱི་ངོ་བོ་ནི་སེམས་ཅན་ཐམས་ཅད་ལ་མས་བུ་གཅིག་པ་ལྟར་ཡིད་དུ་འོང་བར་མཐོང་ནས་བདེ་བ་དང་ལྡན་པར་འདོད་པའི་བྱམས་པ་དང་། དེ་དག་གི་སྡུག་བསྔལ་རྒྱུ་དང་བཅས་པ་བྲལ་བར་འདོད་པའི་སྙིང་རྗེས་རྒྱུད་བརླན་ཅིང་། གཞན་གྱི་དོན་ཁོ་ནའི་ཕྱིར་ཆེད་དུ་བྱ་བ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་པས་ཀུན་ནས་བསླངས་ཏེ། ཐབས་ཤེས་ཟུང་དུ་འཇུག་པའི་སེམས་སྨོན་འཇུག་གིས་བསྡུས་པ་ཕར་ཕྱིན་དྲུག་གི་ངོ་བོར་གྱུར་པའི་སྒྲུབ་པ་ཁྱད་པར་བདེའི་མི་མཐུན་ཕྱོགས་གཞན་ལ་ཕན་པའི་གེགས་དང་རང་གི་རྫོགས་བྱང་གི་བར་ཆད་སྒོ་གསུམ་གྱི་ཉེས་པས་སྤོང་བའི་སེམས་པ་རྒྱུན་ཆགས་པའོ། །དེ་ལྟར་ཡང་མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །དེ་ཡང་འཕགས་སེང་གཉིས་ཀྱིས་གཙོ་སེམས་ཏེ་ཡིད་ཤེས་ཉིད་ལ་བཞེད་ཅིང་། ཐོགས་མེད་སྐུ་མཆེད་ནི་སེམས་བྱུང་ལ་བཞེད་དེ། ཐོགས་མེད་ཀྱི་བྱང་སར། བྱང་ཆུབ་སེམས་དཔའི་སྨོན་ལམ་གྱི་མཆོག་ནི་སེམས་བསྐྱེད་པ་སྟེ། ཞེས་འདུན་པ་ལ་བཞེད་པ་དང་། དབྱིག་གཉེན་གྱི་རྒྱན་འགྲེལ་ལས། དོན་གཉིས་ལ་དམིགས་པའི་སེམས་པ་ནི་སེམས་བསྐྱེད་པའོ། །ཞེས་སེམས་པ་ལ་བཞེད། འདིར་སེམས་རང་གིས་བསྐྱེད་པར་བྱ་བས་ན་སེམས་བསྐྱེད་ཅེས་པ་བྱ་བ་ལ་བཤད་ན་གཙོ་སེམས་དང་། སེམས་བསྐྱེད་པར་བྱེད་པས་ན་སེམས་བསྐྱེད་ཅེས་བྱེད་པ་ལ་བཤད་ན་སེམས་བྱུང་ཡིན་པས། གཉིས་ཀ་ལ་སེམས་བསྐྱེད་ཀྱི་སྒྲ་བཤད་དུ་ཡོད་ཅེས་གསུངས། ཀུན་མཁྱེན་ཆེན་པོས་ནི། སེམས་ནི་དོན་གྱི་ངོ་བོ་རིག་པ་ཡིན་ལ། སེམས་བྱུང་དེའི་ཁྱད་པར་ལ་དཔྱོད་པས་ནས། འདིར་ངོ་བོ་བསྐྱེད་པས་ཁྱད་པར་ཞར་ལ་བསྐྱེད་པར་འགྱུར་ཏེ། འདུན་པ་སེམས་བསྐྱེད་ལ་སོགས་པ་ཞར་ལ་ཐོབ་པ་བཞིན་ནོ། །ཞེས་གསུངས་སོ། །གཉིས་པ་སྡོམ་པའི་དབྱེ་བ་ལ་གསུམ། མདོར་བསྟན་པ། རྒྱས་པར་བཤད་པ། དོན་བསྡུ་བའོ། །དང་པོ་མདོར་བསྟན་པ་ནི། དབྱེ་བ་ཀླུ་སྒྲུབ་ཐོགས་མེད་སྲོལ་གཉིས་གྲགས། །རེ་རེའང་གཅིག་ནས་དྲུག་བར་གཉིས་གཉིས་ཏེ། །ཞེས་པ་སྟེ། དབྱེ་བ་ལ་སྤྱིར་ཀླུ་སྒྲུབ་དང་ཐོགས་མེད་ཀྱི་སྲོལ་ཞེས་གཉིས་སུ་གྲགས་པ་ལ། བྱེ་བྲག་སྲོལ་གཉིས་པོ་རེ་རེ་ལའང་གཅིག་ནས་དྲུག་གི་བར་དུ་དབྱེ་ཞིང་། དེ་ཡང་དབྱེ་གཞི་ལ་ལྟོས་ནས་སྨོན་འཇུག་གི་དབྱེ་བས་གཉིས་གཉིས་ཏེ་ཞེས་པའོ། །གཉིས་པ་རྒྱས་པར་བཤད་པ་ལ་གཉིས། གཅིག་ནས་དྲུག་ཚན་གྱི་བར་དུ་དབྱེ་བ་དང་། ས་མཚམས་ཀྱི་དབྱེ་བའོ། །དང་པོ་གཅིག་ནས་དྲུག་ཚན་གྱི་བར་དུ་དབྱེ་བ་ནི། དང་པོ་སྟོང་ཉིད་སྙིང་རྗེའི་སྙིང་པོ་ཅན། །ཚོགས་གཉིས་བསླབ་པ་ཀུན་རྫོབ་དོན་དམ་གཉིས། །ཚུལ་ཁྲིམས་ཏིང་འཛིན་ཤེས་རབ་བསླབ་གསུམ་དང་། །ཚོགས་སྦྱོར་མོས་པས་སྤྱོད་པའི་སེམས་བསྐྱེད་དང་། །མ་དག་ས་བདུན་ལྷག་བསམ་དག་པ་དང་། །དག་པ་ས་གསུམ་རྣམ་པར་སྨིན་པ་དང་། །ཐུགས་རྗེ་ཆེན་པོ་སྒྲིབ་ཀུན་སྤངས་པ་ནི། །སངས་རྒྱས་ས་ཡི་སེམས་བསྐྱེད་དག་དང་བཞི། །ལྔ་ནི་ལམ་ལྔ་དྲུག་ནི་ཕར་ཕྱིན་དྲུག །ཅེས་པ་སྟེ། དེ་ཡང་ཚན་པ་དྲུག་ལས། དང་པོ་གཅིག་ཚན་ནི། སྟོང་ཉིད་རྟོགས་པའི་ཤེས་རབ་ཀྱིས་དེ་མ་རྟོགས་པ་ལ་སྙིང་རྗེས་དྲངས་པའི་བྱང་ཆུབ་ཀྱི་སེམས་སྐྱེས་པ་ལ་ལྟོས་ནས་སྟོང་ཉིད་སྙིང་རྗེའི་སྙིང་པོ་ཅན་གྱི་སེམས་བསྐྱེད་ཅེས་བྱའོ། །གཉིས་ཚན་ནི། བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་གཉིས་ཀྱི་བསླབ་པ་ལ་ལྟོས་ནས་གཉིས་སམ། རགས་པ་བརྡ་ལས་བྱུང་བ་ཀུན་རྫོབ་སེམས་བསྐྱེད་དང་། ཕྲ་བ་ཆོས་ཉིད་ཀྱིས་ཐོབ་པ་དོན་དམ་གྱི་སེམས་བསྐྱེད་པ་གཉིས་སོ། །གསུམ་ཚན་ནི། དག་པར་བྱེད་པ་ཚུལ་ཁྲིམས། གནས་པར་བྱེད་པ་ཏིང་འཛིན། གྲོལ་བར་བྱེད་པ་ཤེས་རབ་ཀྱི་བསླབ་པ་གསུམ་ལ་ལྟོས་ནས་སེམས་བསྐྱེད་གསུམ་མམ། ཡང་ན་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་དང་གསུམ་པོ་ལ་ལྟོས་ནས་ཀྱང་གསུམ་དུ་དབྱེ་བའོ། །བཞི་ཚན་ནི། ཚོགས་སྦྱོར་དུ་སྟོང་ཉིད་མཐའ་བྲལ་ལ་མོས་པས་སྤྱོད་པའི་སྒོ་ནས་གཞན་དོན་ལ་དམིགས་པའི་སེམས་བསྐྱེད་དང་། མ་དག་ས་བདུན་ན་བདག་གཞན་མཉམ་པ་ཉིད་དུ་རྟོགས་པས་ལྷག་བསམ་དག་པའི་སེམས་བསྐྱེད་དང་། དག་པ་ས་གསུམ་ན་རྣམ་པར་མི་རྟོག་པའི་ཡེ་ཤེས་རྩོལ་མེད་དུ་འབྱུང་ཞིང་གཞན་དོན་ངང་གིས་འགྲུབ་པས་རྣམ་པར་སྨིན་པའི་སེམས་བསྐྱེད་དང་། དམིགས་པ་མེད་པའི་ཐུགས་རྗེ་ཆེན་པོ་སྒྲིབ་གཉིས་བག་ཆགས་དང་བཅས་པ་ཀུན་ནས་སྤངས་པ་ནི་སངས་རྒྱས་ཀྱི་ས་ཡི་སེམས་བསྐྱེད་དག་དང་བཞིར་དབྱེ་བ་དང་། ལྔ་ཚན་ནི། ཚོགས་ལམ་ན་སེམས་དང་པོ་བསྐྱེད་ཅིང་ལམ་ལ་གསར་དུ་འཇུག་པ་ལས་དང་པོ་པའི་སེམས་བསྐྱེད་དང་། སྦྱོར་ལམ་ན་དེ་ཡོངས་སུ་སྦྱོང་བ་བྱས་པའི་དང་། མཐོང་ལམ་ན་ཆོས་ཉིད་ཀྱི་དོན་མངོན་སུམ་དུ་མཐོང་བའི་དང་། སྒོམ་ལམ་ན་དེ་ལྷན་སྐྱེས་ཀྱི་སྒྲིབ་པ་ལས་རྣམ་པར་གྲོལ་བཞིན་པའི་དང་། མི་སློབ་པའི་ལམ་ན་འདུས་མ་བྱས་པའི་ཡེ་ཤེས་ཇི་བཞིན་པ་མངོན་དུ་གྱུར་པ་མཐར་ཐུག་པའི་ངང་ལས་འགྲོ་དོན་ལྷུན་གྲུབ་ཏུ་འབྱུང་བ་སར་གནས་རྣམས་ཀྱིས་ཀྱང་ཇི་བཞིན་སྤྱོད་ཡུལ་དུ་མ་གྱུར་པས་ན་བསམ་གྱིས་མི་ཁྱབ་པའི་སེམས་བསྐྱེད་པ་སྟེ། དེ་ལྟར་ལྔར་དབྱེ་བ་ནི་ལམ་ལྔ་དང་སྦྱོར་བའོ། །དྲུག་ཚན་ནི། ཕར་ཕྱིན་དྲུག་གི་ལྡོག་པ་ལ་ལྟོས་ནས་སེམས་བསྐྱེད་དྲུག་ཏུ་འགྱུར་བའོ། །གཉིས་པ་ས་མཚམས་ཀྱི་དབྱེ་བ་ནི། ས་གསེར་ཟླ་བ་མེ་སོགས་ཉེར་གཉིས་ནི། །ས་མཚམས་ཀྱིས་ཕྱེ་ས་བཅུའི་བར་དུའོ། །ཞེས་པ་སྟེ། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་པ་ལྟར། དཔེ་གྲོགས་མཚུངས་ཆོས་གསུམ་དང་སྦྱར་བའི་སྒོ་ནས་དབྱེ་ན། ས་གསེར་ཟླ་བ་མེ་ལ་སོགས་པའི་དཔེ་ཉེར་གཉིས་ནི། གྲོགས་བྱང་ཆུབ་དོན་གཉེར་གྱི་འདུན་པ་དང་མཚུངས་པར་ལྡན་པའི་སེམས་བསྐྱེད་ཆོས་ཅན། དཔེ་ས་ལྟ་བུ་༡ཡིན་ཏེ། དཀར་ཆོས་ཐམས་ཅད་བསྐྱེད་པའི་གཞིའི་དངོས་པོ་བྱེད་པ་ཆོས་མཐུན་པའི་ཕྱིར། དེ་བཞིན་དུ་སྦྱར་ཏེ། རྒྱུན་གནས་པའི་བསམ་པ་བྱང་ཆུབ་ཀྱི་བར་དུ་འགྱུར་བ་མེད་པས་གསེར་༢ལྟ་བུ་དང་། བསམ་པ་དེ་ལྷག་པར་གྱུར་པས་དགེ་ཆོས་གོང་དུ་འཕེལ་བས་ཟླ་བ་༣ལྟ་བུ་དང་། ཕྱིན་དྲུག་ལ་དངོས་སུ་སྦྱོར་བས་སྒྲིབ་པའི་བུད་ཤིང་བསྲེགས་པས་མེ་༤ལྟ་བུ་དང་། སེམས་ཅན་རྣམས་ཚིམ་པར་བྱེད་ཅིང་མི་ཟད་པས་སྦྱིན་པ་གཏེར་༥ལྟ་བུ་དང་། ཡོན་ཏན་རིན་པོ་ཆེ་ཐམས་ཅད་བསྐྱེད་པས་ཚུལ་ཁྲིམས་རིན་པོ་ཆེའི་འབྱུང་གནས་ལྟ་བུ་༦དང་། མི་འདོད་པས་ཡིད་མི་འཁྲུགས་པས་བཟོད་པ་མཚོ་ལྟ་བུ་༧དང་། བདུད་ཀྱིས་མི་ཕྱེད་པས་བརྩོན་འགྲུས་རྡོ་རྗེ་ལྟ་༨བུ་དང་། མཚན་མས་མི་གཡོ་བས་བསམ་གཏན་རི་༩ལྟ་བུ་དང་། སྒྲིབ་གཉིས་ཀྱི་ནད་ཞི་བས་ཤེས་རབ་སྨན་༡༠ལྟ་བུ་དང་། དགེ་རྩ་ཆུད་མི་ཟ་ཞིང་གཞན་དོན་སྒྲུབ་པ་ལ་མཁས་པས་ཐབས་བཤེས་གཉེན་༡༡ལྟ་བུ་དང་། རང་གཞན་གྱི་རེ་བ་སྐོང་བས་སྨོན་ལམ་ཡིད་བཞིན་གྱི་ནོར་བུ་༡༢ལྟ་བུ་དང་། གདུལ་བྱའི་རྒྱུད་ཀྱི་དགེ་བའི་ལོ་ཏོག་སྨིན་པར་བྱེད་པས་སྟོབས་ཉི་མ་༡༣ལྟ་བུ་དང་། གདུལ་བྱ་འདུན་པར་བྱེད་པའི་ཆོས་སྟོན་པས་ཡེ་ཤེས་གླུ་༡༤དབྱངས་ལྟ་བུ་དང་། གཞན་དོན་ཐོགས་མེད་དུ་སྒྲུབ་པས་མངོན་ཤེས་རྒྱལ་༡༥པོ་ལྟ་བུ་དང་། བསོད་ནམས་དང་ཡེ་ཤེས་ཟད་མི་ཤེས་པས་ཚོགས་གཉིས་བང་མཛོད་ལྟ་བུ་༡༦དང་། དུས་གསུམ་གྱི་འཕགས་པ་རྣམས་ཀྱི་གཤེགས་ཤུལ་ཡིན་པས་བྱང་ཕྱོགས་ལམ་པོ་ཆེ་ལྟ་བུ་༡༧དང་། མཐའ་གཉིས་སྤངས་པའི་ལམ་དུ་འགྲོ་བས་ཞི་ལྷག་བཞོན་པ་བཟང་པོ་༡༨ལྟ་བུ་དང་། ཚིག་དོན་མི་བརྗེད་ཅིང་གཞན་ལ་སྟོན་པས་གཟུངས་སྤོབས་བཀོད་མའི་ཆུ་ལྟ་བུ་དང་༡༩། ཐར་འདོད་ཀྱི་གདུལ་བྱ་རྣམས་ལ་ཆོས་སྙན་པར་སྒྲོགས་པས་ཆོས་ཀྱི་དགའ་སྟོན་སྒྲ་སྙན་༢༠ལྟ་བུ་དང་། གཞན་དོན་འབད་མེད་དུ་འབྱུང་ཞིང་རྣམ་པ་ཐམས་ཅད་མཁྱེན་པའི་རྒྱ་མཚོར་ངང་གིས་འབབས་པས་བགྲོད་པ་གཅིག་པའི་ལམ་ཆུ་བོ་༢༡ལྟ་བུ་དང་། ཆོས་ཀྱི་དབྱིངས་ལས་མ་གཡོས་བཞིན་གདུལ་བྱའི་ལོ་ཏོག་སྨིན་པར་མཛད་པས་ཆོས་ཀྱི་སྐུ་སྤྲིན་ལྟ་བུ་སྟེ་ཉི་ཤུ་རྩ་གཉིས་༢༢སོ། །དེ་དག་ས་མཚམས་ཀྱིས་ཕྱེ་ན། འདུན་པ་དང་། བསམ་པ་དང་། ལྷག་པའི་བསམ་པ་དང་གསུམ་ནི་ཚོགས་ལམ་གསུམ་ནའོ། །སྦྱོར་བ་ནི་སྦྱོར་ལམ་ནའོ། །སྦྱིན་པའི་ཕར་ཕྱིན་ནི་མཐོང་ལམ་ནའོ། །ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྨོན་ལམ་དང་། སྟོབས་དང་། ཡེ་ཤེས་དང་དགུ་ནི་སྒོམ་ལམ་གྱིས་བསྡུས་པའི་ས་དགུ་ནའོ། །མངོན་པར་ཤེས་པ་དང་། བསོད་ནམས་ཡེ་ཤེས་གཉིས་དང་། བྱང་ཕྱོགས་སོ་བདུན་དང་། སྙིང་རྗེ་ལྷག་མཐོང་གཉིས་དང་། གཟུངས་དང་། སྤོབས་པ་དང་ལྔ་ནི་ཁྱད་པར་གྱི་ལམ་དག་པ་ས་གསུམ་ཀ་ལ་ཁྱབ་པར་ཡོད་དོ། །ཆོས་ཀྱི་དགའ་སྟོན་དང་། བགྲོད་པ་གཅིག་པའི་ལམ་དང་། ཆོས་ཀྱི་སྐུ་དང་ལྡན་པ་གསུམ་ནི་སངས་རྒྱས་ཀྱི་ས་ཞེས་ཐེག་ཆེན་དགྲ་བཅོམ་བཞུགས་པ་ས་བཅུ་པའི་སྦྱོར་དངོས་རྗེས་གསུམ་ན་ཡོད་པ་སྟེ། དེ་ལྟར་ན་ཚོགས་ལམ་དང་པོ་ནས་རྒྱུན་མཐའི་བར་དུ་བཞག་པའོ། །གསུམ་པ་དོན་བསྡུ་བ་ནི། ཀུན་ཀྱང་བསྡུ་ན་སྨོན་འཇུག་རྣམ་པ་གཉིས། དེ་ཡང་བསམ་པས་སྨོན་དང་སྦྱོར་བས་ཁྱབ། །འགྲོ་བར་འདོད་དང་འགྲོ་བ་ཇི་བཞིན་ནོ། །ཞེས་པ་སྟེ། དེ་ལྟར་དབྱེ་སྒོ་བདུན་གྱི་སྒོ་ནས་བཤད་པའི་སེམས་བསྐྱེད་དེ་དག་ཀུན་ཀྱང་མདོར་བསྡུ་ན་སྨོན་འཇུག་རྣམ་པ་གཉིས་སུ་འདུས་ཏེ། དེ་ཡང་བསམ་པས་གཞན་དོན་དུ་བྱང་ཆུབ་ཐོབ་པར་འདོད་པ་ནི་སྨོན་པ་སེམས་བསྐྱེད་དང་། དེའི་ཆེད་དུ་སྦྱོར་བས་ལག་ལེན་དུ་ཕར་ཕྱིན་དྲུག་ལ་ཁྱབ་པར་བསླབ་པ་ནི་འཇུག་པ་སེམས་བསྐྱེད་དེ། དེའི་ཚུལ་ཡང་དཔེར་ན་སྔ་མ་ནི་སྐྱེས་བུ་དོན་གཉེར་གྱི་ས་དེར་གང་ཞིག་འགྲོ་བར་འདོད་པ་ལྟ་བུ་དང་། ཕྱི་མ་ནི་ལམ་ལ་དངོས་སུ་ཞུགས་ནས་འགྲོ་བ་ཇི་བཞིན་པ་སྟེ། དེ་ལྟར་ཡང་སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་པ་བཞིན་ནོ། །གཉིས་པ་ཐོབ་བྱེད་སྡོམ་པའི་ལག་ལེན་བྱེ་བྲག་ཏུ་བཤད་པ་ལ་ལྔ། མ་ཐོབ་པ་ཐོབ་པར་བྱེད་པ། ཐོབ་པ་མི་ཉམས་པར་བསྲུང་པ། སྡོམ་པ་སྐྱེ་བའི་ལུས་རྟེན། ཉམས་ན་གསོ་བའི་ཐབས། །བསྲུང་བའི་ཕན་ཡོན་ནོ། །དང་པོ་མ་ཐོབ་པ་ཐོབ་པར་བྱེད་པ་ལ་གཉིས། ཀུན་རྫོབ་སེམས་བསྐྱེད་སྐྱེ་བའི་ཆོ་ག་བཤད་པ། དོན་དམ་སེམས་བསྐྱེད་སྐྱེ་བ་ཆོ་ག་ལ་མི་ལྟོས་པར་བཤད་པའོ། །དང་པོ་ཀུན་རྫོབ་སེམས་བསྐྱེད་སྐྱེ་བའི་ཆོ་ག་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། དང་པོ་སྡོམ་པ་མ་ཐོབ་ཐོབ་ཚུལ་ནི། །ལེན་ཚུལ། ཞེས་པ་སྟེ། དེ་ལྟར་སེམས་བསྐྱེད་ཀྱི་རང་བཞིན་གཏན་ལ་ཕབ་ནས། དང་པོ་སེམས་བསྐྱེད་ཀྱི་སྡོམ་པ་དེ་མ་ཐོབ་པ་ཐོབ་པར་བྱེད་པའི་ཚུལ་ནི་འདི་ལྟར་ལེན་པའི་ཚུལ་ལ་ཞེས་པའོ། །གཉིས་པ་རྒྱས་པར་བཤད་པ་ལ། སྤྱིར་བསྐྱེད་བྱ་ཀུན་རྫོབ་སེམས་བསྐྱེད་ཀྱི་མཚན་ཉིད་ནི། གཞན་དོན་དུ་རྫོགས་བྱང་ལ་དམིགས་པའི་ཐེག་ཆེན་སློབ་པའི་སེམས་བསྐྱེད་གང་ཞིག །བྱང་འཕགས་ཀྱི་མཉམ་བཞག་གི་ངོ་བོར་གྱུར་པའི་སེམས་བསྐྱེད་རྣམ་པར་བཅད་པའོ། །མཚན་གཞི་ནི། ཐེག་ཆེན་ཚོགས་སྦྱོར་བའི་རྒྱུད་ཀྱི་དང་། བྱང་འཕགས་ཀྱི་རྗེས་ཐོབ་ཀྱི་ངོ་བོར་གྱུར་པའི་སེམས་བསྐྱེད་ལྟ་བུའོ། །དབྱེ་ན། གྲོགས་དགེ་བའི་བཤེས་གཉེན་གྱི་སྟོབས་དང་། རྒྱུ་རིགས་སད་པའི་སྟོབས། དགེ་རྩ་བྱས་པའི་སྟོབས་དང་། ཐེག་ཆེན་གྱི་སྡེ་སྣོད་ཐོས་པའི་སྟོབས་དང་། ཐོས་པ་མང་དུ་གོམས་པས་བསྐྱེད་པ་དང་ལྔ་ལས། དང་པོ་གྲོགས་ལ་རག་ལས་པས་མི་བརྟན་པའི་སེམས་བསྐྱེད་དང་། ཕྱི་མ་བཞི་མི་མཐུན་ཕྱོགས་ཀྱི་ཉམས་དཀའ་བས་བརྟན་པའི་སེམས་བསྐྱེད་དེ། མདོ་སྡེ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་གསུངས་པ་ལྟར། གཙོ་བོར་གཞན་གྱི་མཐུ་ལས་བྱུང་བ་ཀུན་རྫོབ་སེམས་བསྐྱེད་ལེན་ཚུལ་ལ་བཞི་སྟེ། གང་ལས་བླང་བའི་སློབ་དཔོན་ཇི་ལྟར་ལེན་པའི་ཚུལ། །རྟེན་ལས་ཀྱང་ལེན་རུང་བའི་དམིགས་བསལ། སྡོམ་པའི་ཐོབ་མཚམས་ངོས་བཟུང་བའོ། །དང་པོ་གང་ལ་བླང་བའི་སློབ་དཔོན་ནི། སྡོམ་གནས་དགེ་བའི་བཤེས་གཉེན་ལ། །ཞེས་པ་སྟེ། སྲོལ་གཉིས་ཀ་མཐུན་པར་གང་ལས་བླང་བའི་ཡུལ་བྱང་སེམས་ཀྱི་སྡོམ་པ་ལ་གནས་ཤིང་། དེ་འབོགས་པའི་ཆོ་ག་དང་བསླབ་བྱ་ལ་བཀྲི་མཁས་པ། ཟང་ཟིང་ལྷུར་མི་བྱེད་པར་བརྩེ་བས་རྗེས་སུ་འཛིན་ནུས་པའི་དགེ་བའི་བཤེས་གཉེན་མཚན་ཉིད་དང་ལྡན་པ་ལས་ལེན་དགོས་ལ། དེ་ཡང་སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་བཏང་ངོ་། །ཞེས་དང་། སྡོམ་པ་ཉི་ཤུ་པ་ལས། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་སོ། །གཉིས་པ་ཇི་ལྟར་ལེན་པའི་ཚུལ་ལ་གཉིས། ཀླུ་སྒྲུབ་དང་། ཐོགས་མེད་ཀྱི་ལུགས་སོ། །དང་པོ་ཀླུ་སྒྲུབ་ཀྱི་ལུགས་ལ་གཉིས། གང་གིས་བླང་བའི་གང་ཟག་དང་། ཇི་ལྟར་ལེན་པའི་ཆོ་གའོ། །དང་པོ་གང་གིས་བླང་བའི་གང་ཟག་ནི། ཐེག་ཆེན་སྣོད་གྱུར་དད་ལྡན་སློབ་མ་ཡིས། །ཞེས་པ་སྟེ། ཀླུ་སྒྲུབ་ཀྱི་ལུགས་ལ་བརྡ་ཤེས་ཤིང་སྡོམ་པ་ལེན་འདོད་ཡོད་ན་དལ་འབྱོར་གྱི་ལུས་རྟེན་ཁོ་ན་དགོས་པར་མ་ངེས་ཏེ། ཤེར་ཕྱིན་གྱི་མདོ་ལས། ལྷའི་བུ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་སྐྱེས་པ་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱ། བསྟན་པར་བྱའོ། །ཞེས་དང་། རྒྱ་མཚོས་ཞུས་པ་ལས། ཀླུ་ཁྲི་ཉིས་སྟོང་གིས་སེམས་བསྐྱེད་པ་ལ་སོགས་གསུངས་བའི་ཕྱིར་རོ། །དེས་ན་རྫོགས་བྱང་དོན་གཉེར་གྱི་བསམ་པ་དངོས་སུ་སྐྱེ་རུང་དུ་ཡོད་པའི་སེམས་ཅན་ཀུན་ཐེག་ཆེན་སེམས་བསྐྱེད་ཀྱི་སྣོད་དུ་གྱུར་པ་ཡིན་ཅིང་། བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་དང་། འབྲས་བུ་བླ་ན་མེད་པའི་བྱང་ཆུབ་ཆེན་པོ་ལ་དད་པ་དང་ལྡན་པའི་སློབ་མ་དེ་ཡིས་སོ། །གཉིས་པ་ཇི་ལྟར་ལེན་པའི་ཆོ་ག་ནི། ཡན་ལག་བདུན་མཐར་སྨོན་འཇུག་སྟབས་གཅིག་ཏུ། །ལེན་ཅིང་རང་གཞན་དགའ་བ་བསྒོམ་པ་རྣམས། །ཀླུ་སྒྲུབ་ལུགས་ཡིན། ཞེས་པ་སྟེ། འདི་ལ་སྦྱོར་བ། དངོས་གཞི། རྗེ་གསུམ་ལས། དང་པོ་སྦྱོར་བ་ནི། གདམས་ངག་ཁྱད་པར་ཅན་འཁོར་བའི་མཐའ་ལ་སྐྱོ་བ་བསྐྱེད་ཅིང་། ཞི་བའི་མཐའ་ལ་ཞེན་པ་བཀག་ནས། མཐའ་གཉིས་སྤངས་པའི་བྱང་ཆུབ་ཀྱི་སེམས་ལ་སྤྲོ་བ་བསྐྱེད་དེ། དེ་ལྟར་ཐབས་གསུམ་གྱི་བློ་བཅོས་པ་སྔོན་དུ་འགྲོ་བས། ཡུལ་ཁྱད་པར་ཅན་སློབ་དཔོན་ལ་མཎྜལ་ཕུལ་ནས་གསོལ་བ་བཏབ་རྗེས། རྟེན་ཁྱད་པར་ཅན་དཀོན་མཆོག་གསུམ་ལ་སྐྱབས་འགྲོ་བྱ་ཞིང་། ཐབས་ཁྱད་པར་ཅན་ཡན་ལག་བདུན་པས་ཚོགས་བསགས་པའི་མཐར། གཉིས་པ་དངོས་གཞི་སེམས་བསྐྱེད་ཀྱི་སྡོམ་པ་བླང་བ་ནི། སེམས་ཅན་ཐམས་ཅད་རང་གི་ཕ་མ་དྲིན་ཅན་ཡིན་ལ། དེ་ཐམས་ཅད་སྡུག་བསྔལ་གྱིས་གཟིར་བ་ལ་སྙིང་རྗེའི་ཤུགས་དྲག་པོས། དེ་དག་གི་གནས་སྐབས་དང་མཐར་ཐུག་གི་ཕན་བདེའི་རྒྱུར་རང་གི་བདེ་དགེ་ཐམས་ཅད་གཏོང་ཞིང་། སྡུག་བསྔལ་ཐམས་ཅད་དང་དུ་བླང་བར་བྱའོ་སྙམ་དུ་ཞེ་ཐག་པ་ནས་བློ་སྦྱོང་བར་བྱས་ཏེ། དགོངས་གསོལ་སྔོན་དུ་འགྲོ་བས། ཇི་ལྟར་སྔོན་གྱི་བདེ་གཤེགས་ཀྱིས། །ཞེས་སོགས་སྤྱོད་འཇུག་ལྟར་ཚིགས་སུ་བཅད་པ་གཉིས་པོ་ལན་གསུམ་བཟླས་པས་བླང་ངོ་། །དེ་ལ་ཚིགས་བཅད་དང་པོས་ནི་སྔོན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཐུགས་བསྐྱེད་ཚུལ་བསྟན་ནས། ཚིགས་བཅད་གཉིས་པས་དེ་དག་གིས་ཇི་ལྟར་བསླབ་པ་དེ་བཞིན་དུ་བདག་གིས་ཀྱང་བསླབ་བོ་ཞེས་དམ་བཅའ་བས་སྨོན་འཇུག་གཉིས་ཀྱི་སེམས་བསྐྱེད་དང་སྡོམ་པ་སྟབས་གཅིག་ཏུ་ལེན་པར་བྱེད་པ་ཡིན་ཅིང་། གསུམ་པ་རྗེས་ལ། རང་དགའ་བ་བསྒོམ་པ་དང་། གཞན་དགའ་བ་བསྒོམ་དུ་གཞུག་པ་གཉིས་ལས། དང་པོ་རང་དགའ་བ་བསྒོམ་པ་ནི། དེང་དུས་བདག་ཚེ་འབྲས་བུ་ཡོད། །ཅེས་སོགས་དང་། གཉིས་པ་གཞན་དགའ་བ་བསྒོམ་པ་ནི། བདག་གིས་དེ་རིང་སྐྱོབ་པ་ཐམས་ཅད་ཀྱི། །ཞེས་སོགས་བརྗོད་ནས། གཏང་རག་དབུལ་ཞིང་བསླབ་བྱ་མདོ་ཙམ་བཤད་པ་རྣམས་ནི་འཕགས་མཆོག་ཀླུ་སྒྲུབ་ཀྱི་ལུགས་ཡིན་ནོ། །གཉིས་པ་ཐོགས་མེད་ཀྱི་ལུགས་ལ་གཉིས། གང་གིས་བླང་བའི་གང་ཟག་དང་། ཇི་ལྟར་ལེན་པའི་ཆོ་གའོ། །དང་པོ་ནི། ཐོགས་མེད་བཞེད་པ་ནི། སྨོན་སེམས་ལེན་ལ་སོ་ཐར་མི་དགོས་ཀྱང་། །ཡ་དག་བླངས་པ་རིགས་བདུན་སྔོན་སོང་ནས། །ཞེས་པ་སྟེ། སློབ་དཔོན་ཐོགས་མེད་ཀྱི་བཞེད་པ་ནི་རྟེན་གྱི་གང་ཟག་སྨོན་སེམས་ཙམ་ལེན་པ་ལ་སོ་ཐར་གྱི་སྡོམ་པ་སྔོན་དུ་འགྲོ་མི་དགོས་ཀྱང་འཇུག་སྡོམ་མ་ཐོབ་པ་ཡང་དག་པར་བླང་བ་ལ་སོ་ཐར་རིགས་བདུན་གང་རུང་གི་སྡོམ་པ་སྔོན་དུ་སོང་ནས་ལེན་དགོས་ཏེ། ལམ་སྒྲོན་ལས། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་པ་ཡོད་ཀྱི་གཞན་དུ་མིན། །ཞེས་སོ། །གཉིས་པ་ཇི་ལྟར་ལེན་པའི་ཆོ་ག་ནི་བར་ཆད་དྲི་དང་བསླབ་པ་ཁས་ལེན་སོགས། །སྨོན་འཇུག་ཆོ་ག་སོ་སོའི་སྒོ་ནས་ལེན། །ཞེས་པ་སྟེ། ཇི་ལྟར་ལེན་པའི་ཆོ་ག་ལ་རྟེན་ངེས་པར་བྱ་བ་སྔར་ལྟར་མཐའ་གཉིས་ཀྱི་ཞེན་པ་བཀག་ནས་བྱང་སེམས་ལ་སྤྲོ་བ་བསྐྱེད་པ་སྟེ་གདམས་ངག་གསུམ་གྱིས་བློ་བཅོས་ནས་ཆོ་ག་དངོས་ལ་གཉིས། སྨོན་པ་དང་། འཇུག་པའོ། །དང་པོ་ལ་སྦྱོར་བ། དངོོས་གཞི། རྗེས་གསུམ་ལས། སྦྱོར་བ་ནི། ཡུལ་ཁྱད་པར་ཅན་ལ་མཎྜལ་ཕུལ་ནས་གསོལ་བ་འདེབས་པ་དང་། རྟེན་ཁྱད་པར་ཅན་ལ་སྐྱབས་སུ་འགྲོ་བ་བྱས་ནས། ཐབས་ཁྱད་པར་ཅན་ཡན་ལག་བདུན་ལྡན་གྱིས་ཚོགས་བསག་གོ། །དངོས་གཞི་ནི། རང་སྟོབས་རིགས་སད་པ་དང་། གཞན་སྟོབས་རྫོགས་བྱང་གི་ཕན་ཡོན་མཐོང་བ་ལ་སོགས་པ་དང་། སྦྱོར་བའི་སྟོབས་འདུ་ཤེས་གསུམ་བསྐྱེད་དེ། ཕྱོགས་བཅུ་ན་ཞེས་སོགས་ཀྱི་དགོངས་གསོལ་སྔོན་དུ་འགྲོ་བས། བདག་མིང་འདི་ཞེས་བགྱི་བས་སྐྱེ་བ་འདི་དང་། ཞེས་པ་ནས། མྱ་ངན་ལས་འདས་བར་བགྱིའོ། །ཞེས་པའི་བར་ལན་གསུམ་བཟླས་པས་བླང་ངོ་། །རྗེས་ནི། སྤྲོ་བ་བསྐྱེད་པ། བསླབ་བྱ་བསྟན་པ། གཏང་རག་གཏོང་བ་རྣམས་སོ། །གཉིས་པ་འཇུག་སྡོམ་ནི། སོ་ཐར་རིགས་བདུན་གང་རུང་བླངས་ནས་བྱང་སེམས་ཀྱི་སྡེ་སྣོད་ལ་སྦྱངས་པས་དད་ཅིང་བསྒྲུབ་པར་ནུས་པ་ན། འཇུག་སྡོམ་དངོས་བླང་བའི་ཆོ་ག་ལ། སྦྱོར་དངོས་རྗེས་གསུམ་ལས། སྦྱོར་བ་ནི། གསོལ་བ་གདབ་པ། བསམ་པ་བརྟག་པ། མྱུར་དུ་སྦྱིན་པར་གསོལ་བ་འདེབས་པ། བར་ཆད་དྲི་བ་དང་། བསླབ་པའི་གནས་གོ་བར་བྱས་ནས་སྤྲོ་བ་དྲི་བ་རྣམས་སོ། །དངོས་གཞི་ནི། སློབ་དཔོན་གྱིས། རིགས་ཀྱི་བུ་མིང་འདི་ཞེས་བྱ་བ་ཁྱོད། །ཅེས་པ་ནས། སེམས་ཅན་གྱི་དོན་བྱེད་པའི་ཚུལ་ཁྲིམས་ནོད་ནས། ཞེས་ལན་གསུམ་དྲིས་པ་ན། སློབ་མས་ཀྱང་ནོད་ལགས་ཞེས་ལན་གསུམ་ཁས་ལེན་པས་སྡོམ་པ་ཐོབ་པར་འགྱུར་རོ། །སོགས་ཁོང་ནས་རྗེས་ཀྱི་ཆོ་ག་སྟོན་ཏེ། མཁྱེན་པར་གསོལ་བ། ཕན་ཡོན་བསྟན་པ། གསང་བར་དམས་པ། བསླབ་བྱ་བསྟན་པ། གཏང་རག་འབུལ་བ་རྣམས་སོ། །དེ་ནས་རང་བཞིན་གཏན་ལ་དབབ་པ་ཞེས་མདོར་བསྡུས་ཏེ་ཕན་ཡོན་བརྗོད་པ་ཙམ་བྱ་བ་སྟེ་དེ་ལྟར་སྨོན་འཇུག་གི་ཆོ་ག་སོ་སོའི་སྒོ་ནས་རིམ་པ་བཞིན་དུ་ལེན་པ་ཡིན་ནོ། །གསུམ་པ་རྟེན་ལས་ཀྱང་ལེན་རུང་བའི་དམིགས་བསལ་བཤད་པ་ནི། རྒྱལ་བའི་རྟེན་ལའང་རུང་བར་སྲོལ་གཉིས་མཐུན། །ཞེས་པ་སྟེ། སྤྱིར་བླ་མ་དགེ་བའི་བཤེས་གཉེན་ལས་བླངས་ན་ངོ་ཚ་ཁྲེལ་ཡོད་ཀྱི་རྟེན་དུ་འགྱུར་བ་སོགས་དགོས་པ་ཁྱད་པར་ཅན་ཡོད་མོད། གལ་ཏེ་བཤེས་གཉེན་མཚན་ཉིད་དང་ལྡན་པ་མ་རྙེད་ན། རྒྱལ་བའི་སྐུ་གཟུགས་ཀྱི་རྟེན་དྲུང་ལའང་བདག་ཉིད་ཀྱིས་བླངས་ཀྱང་རུང་བར་སྲོལ་གཉིས་ཀ་དགོངས་པ་མཐུན་པ་ཡིན་ལ། དེར་མ་ཟད་རྒྱལ་བ་སྲས་བཅས་མདུན་གྱི་ནམ་མཁར་མངོན་སུམ་དུ་བཞུགས་པར་བསྒོམ་པའི་དྲུང་ནས་ལེན་པར་གནང་སྟེ། ལམ་སྒྲོན་ལམ། གལ་ཏེ་བླ་མ་མ་རྙེད་ན། །དེ་ལ་གཞན་སྡོམ་ནོད་པ་ཡི། །ཆོ་ག་ཡང་དག་བཤད་པར་བྱ། །དེ་ལ་སྔོན་ཚེ་འཇམ་པའི་དཔལ། །ཨམྦ་རཱ་ཛར་གྱུར་པ་ཡིས། །ཇི་ལྟར་བྱང་ཆུབ་ཐུགས་བསྐྱེད་པ། །འཇམ་དཔལ་གྱི་ནི་སངས་རྒྱས་ཞིང་། །རྒྱན་གྱི་མདོ་ལས་བཤད་པ་ལྟར། །དེ་བཞིན་འདིར་ནི་རབ་གསལ་བྲིས། །མགོན་པོ་རྣམས་ཀྱི་སྤྱན་སྔ་རུ། །རྫོགས་པའི་བྱང་ཆུབ་སེམས་བསྐྱེད་ཅིང་། །འགྲོ་བ་ཐམས་ཅད་མགྲོན་དུ་གཉེར། །དེ་དག་འཁོར་བ་ལས་བསྒྲལ་ཏོ། །གནོད་སེམས་ཁྲོ་བའི་སེམས་ཉིད་དང་། །སེར་སྣ་དང་ནི་ཕྲག་དོག་ཉིད། །དེང་ནས་བཟུང་སྟེ་བྱང་ཆུབ་མཆོག །ཐོབ་ཀྱི་བར་དུ་མི་བྱའོ། །ཚངས་པར་སྤྱོད་པ་སྤྱད་བྱ་ཞིང་། །སྡིག་དང་འདོད་པ་སྤང་བར་བྱ། །ཚུལ་ཁྲིམས་སྡོམ་པ་ལ་དགའ་བས། །སངས་རྒྱས་རྗེས་སུ་བསླབ་པར་བྱ། །བདག་ཉིད་མྱུར་བའི་ཚུལ་གྱིས་ནི། །བྱང་ཆུབ་ཐོབ་པར་མི་སྤྲོ་ཞིང་། །སེམས་ཅན་གཅིག་གི་ཕྱིར་ཡང་ནི། །ཕྱི་མའི་མུ་མཐར་གནས་པར་བགྱི། །ཚད་མེད་བསམ་གྱིས་མི་ཁྱབ་པའི། །ཞིང་དག་རྣམ་པར་སྦྱང་བར་བྱ། །མིང་ནས་བཟུང་བ་བྱ་བ་དང་། །ཕྱོགས་བཅུ་དག་ཏུ་རྣམ་པར་གནས། །བདག་གི་ལུས་དང་ངག་གི་ལས། །ཐམས་ཅད་དུ་ནི་དག་པར་བྱ། །ཡིད་ཀྱི་ལས་ཀྱང་དག་བྱ་སྟེ། །མི་དགེའི་ལས་རྣམས་མི་བྱའོ། །ཞེས་གསུངས་པ་ལྟ་བུའི་ཚུལ་གྱིས་སེམས་བསྐྱེད་བླང་བར་བྱའོ། །བཞི་པ་སྡོམ་པའི་ཐོབ་མཚམས་དངོས་བཟུང་བ་ནི། ཐོབ་མཚམསབརྗོད་པ་གསུམ་གྱི་མཐའ་ལའོ། །ཞེས་པ་སྟེ། སྲོལ་གཉིས་གང་ཡིན་ཀྱང་རུང་སྟེ། སྡོམ་པའི་ཐོབ་མཚམས་བརྡ་ལས་བྱུང་བ་ཡིན་པས་ན། དངོས་གཞི་འབོགས་ཆོག་བཟླས་པའི་བརྗོད་པ་ལན་གསུམ་གྱི་མཐའ་མ་ལ་ཐོབ་པར་བཞེད་པའོ། །གཉིས་པ་དོན་དམ་སེམས་བསྐྱེད་སྐྱེ་བ་ཆོ་ག་ལ་མི་ལྟོས་པར་བཤད་པ་ནི། དོན་དམ་སེམས་བསྐྱེད་ཆོ་གས་བླངས་ཐོབ་པ། །གསང་སྔགས་ལུགས་ཡིན་མདོ་ལས་བཤད་སྲིད་ན། །དམ་བཅའ་ཉིད་ཡིན་སྒོམས་པའི་སྟོབས་ལས་སྐྱེ། །ཞེས་པ་སྟེ། དེ་ལ་དོན་དམ་པའི་སེམས་བསྐྱེད་ནི་རྣམ་པར་མི་རྟོག་པའི་ཆོས་ཉིད་མངོན་སུམ་དུ་རྟོགས་པའི་ཡེ་ཤེས་གང་ཞིག །བྱང་འཕགས་ཀྱི་མཉམ་བཞག་གི་ངོ་བོར་གྱུར་པའི་དང་། སངས་རྒྱས་ཀྱི་སའི་མཉམ་རྗེས་དབྱེར་མེད་ཀྱི་ངོ་བོར་གྱུར་པའི་སེམས་བསྐྱེད་དོ། །དེ་ལ་ཐ་སྙད་འདོད་ཚུལ་གྱིས་དབྱེ་ན་ཕར་ཕྱིན་ཐེག་པའི་སྐབས་དོན་དམ་ནི་ཆོས་དབྱིངས་དང་། སེམས་བསྐྱེད་ནི་དེ་མངོན་དུ་རྟོགས་པའི་ཡེ་ཤེས་ལ་བཤད་ཅིང་། དེ་ཐོབ་པའི་ཚུལ་ཡང་ཡོངས་འཛིན། རྗེས་སྒྲུབ། རྟོགས་པ་སྟེ་དམ་པ་གསུམ་དང་ལྡན་པའི་ཚུལ་མདོ་སྡེ་རྒྱན་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསམས། །ཆོས་ལ་མི་རྟོག་ཡེ་ཤེས་ནི། །སྐྱེ་ཕྱིར་དེ་ནི་དམ་པར་འདོད། །ཅེས་སོ། །སྔགས་ཀྱི་ཐེག་པར་ནི་གཟུང་འཛིན་གཉིས་དང་བྲལ་བའི་འོད་གསལ་བའི་ཡེ་ཤེས་གཞི་ལ་གནས་པ་ལ་བཞེད་དེ། སྒྱུ་དྲྭ་ལས་ཨེ་མ་མཚར་ལྔ་དང་། གསང་འདུས་རྩ་རྒྱུད་ལས། དངོས་པོ་ཐམས་ཅད་དང་བྲལ་བ། །ཕུང་པོ་ཁམས་དང་སྐྱེ་མཆེད་དང་། །གཟུགས་དང་འཛིན་པ་རྣམ་སྤངས་པ། །ཆོས་བདག་མེད་པར་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་སོ་དེ་འདྲ་དེ་ཆོ་ག་བླངས་ནས་ཐོབ་པའི་ཚུལ་སྒྱུ་འཕྲུལ་དྲྭ་བ་དང་། རྣམ་སྣང་མངོན་བྱང་དང་། རིམ་པ་ལྔ་པ་སོགས་ལས་བཤད་པ་ནི་གསང་སྔགས་ཀྱི་ལུགས་ཡིན་པས། འབྲས་བུ་ཡེ་ཤེས་ཀྱི་རྣམ་པ་ལམ་བྱེད་དུ་བྱས་ནས་དེའི་རྟེན་འབྲེལ་སྒྲིག་བྱེད་ཙམ་དུ་རྗེས་མཐུན་ཀུན་རྫོབ་ཀྱི་རྣམ་པས་བསྐྱེད་པ་སྟེ། བྱང་ཆུབ་སེམས་འབྲེལ་ལས། བྱང་ཆུབ་སེམས་དཔའ་གསང་སྔགས་ཀྱི་སྒོར་སྤྱོད་པ་རྣམས་ཀྱིས་དེ་ལྟར་ཀུན་རྫོབ་ཀྱི་རྣམ་པས་བྱང་ཆུབ་ཀྱི་སེམས་སྨོན་པའི་རང་བཞིན་ཅན་བསྐྱེད་ནས། དོན་དམ་པའི་བྱང་ཆུབ་ཀྱི་སེམས་བསྒོམ་པའི་སྟོབས་ཀྱིས་བསྐྱེད་པར་བྱ་བ་ཡིན་ཏེ། ཞེས་པས། སྔགས་ལུགས་ཀྱི་ཆོ་ག་དེའང་སྒོམ་བྱུང་ལ་མ་ལྟོས་པར་ཆོ་ག་རྐྱང་པས་བསྐྱེད་ནུས་པ་མ་ཡིན་པའི་ཕྱིར་མཚན་ཉིད་མ་ཡིན་ལ། གལ་ཏེ་སྤང་སྐོང་ཕྱག་རྒྱ་པར། དོན་དམ་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་པར་བྱའོ། །ཞེས་གསུངས་པ་ལྟར་མདོ་ལས་བཤད་པ་སྲིད་ནའང་། དེ་ནི་དམ་བཅའ་ཙམ་ཉིད་དུ་འདོད་པ་ཡིན་གྱི། དོན་དམ་སེམས་བསྐྱེད་མཚན་ཉིད་པ་ནི་སྒོམ་པའི་སྟོབས་ལས་ངང་གིས་སྐྱེ་བ་ཡིན་ཏེ། དགོངས་པ་ངེས་འགྲེལ་ལས། དོན་དམ་པ་བྱང་ཆུབ་ཀྱི་སེམས་དེ་ནི་འཇིག་རྟེན་ལས་འདས་པ། སྤྲོས་པ་མཐའ་དག་དང་བྲལ་བ། ཤིན་ཏུ་གསལ་བ། དོན་དམ་པའི་སྤྱོད་ཡུལ། དྲི་མ་མེད་པ། མི་གཡོ་བ། རླུང་མེད་པའི་མར་མེའི་རྒྱུན་བཞིན་དུ་མི་གཡོ་བའོ། །དེ་འགྲུབ་པ་ནི་རྟག་ཏུ་གུས་པས་ཞི་གནས་དང་། ལྷག་མཐོང་གི་རྣལ་འབྱོར་གོམས་པ་ལས་འགྱུར་རོ། །ཞེས་ཀ་མ་ལ་ཤཱི་ལས་སྒོམ་རིམ་དུ་དྲངས་པ་ལྟར་རོ། །གཉིས་པ་ཐོབ་པ་དེ་ཉིད་མི་ཉམས་པར་བསྲུང་བའི་ཚུལ་བཤད་པ་ལ། ཐོག་མར་ཇི་ལྟར་བསྲུང་ཚུལ་གྱི་དོན་བཤད་པས་ཁོག་དབུབ་བར་བྱ་སྟེ། བསླབ་བཏུས་ལས། བྱང་ཆུབ་སེམས་དཔའི་སྡོམ་པ་ནི། །རྒྱས་པར་ཐེག་པ་ཆེ་ལས་འབྱུང་། །ཞེས་དང་། དགེ་བའི་བཤེས་གཉེན་མི་བཏང་ཞིང་། །མདོ་སྡེ་དག་ལ་རྟག་བལྟ་བས། །ཞེས་པས། བྱང་ཆུབ་སེམས་དཔའི་བསླབ་པའི་གཞི་རྣམས་ཤེས་པར་བྱ་བའི་ཕྱིར། བདག་རྐྱེན་ཐེག་པ་ཆེན་པོའི་དགེ་བའི་བཤེས་གཉེན་མི་གཏོང་བར་གུས་པས་བསྟེན་ཅིང་། དམིགས་རྐྱེན་བྱང་སེམས་ཀྱི་བསླབ་པའི་གནས་རྒྱ་ཆེར་སྟོན་པའི་མདོ་དང་བསྟན་བཅོས་དྲི་མ་མེད་པ་རྣམས་ལ་ཐོས་བསམ་གྱི་སྒོ་ནས་སྒྲོ་འདོགས་བཅད་དེ་མཁས་པར་བྱ། མཁས་པར་བྱས་པ་དེ་ཡང་ཤེས་པ་ཙམ་དུ་མ་བཞག་པར་རང་ནུས་ཅི་ཡོད་ཀྱིས་འབད་དེ་ཚུལ་བཞིན་སྒྲུབ་དགོས་ཀྱི། གཞན་བླང་དོར་གྱི་གནས་མ་རྨོངས་པར་ཤེས་པ་དོན་མེད་དུ་འགྱུར་ཏེ། སྤྱོད་འཇུག་ལས། ལུས་ཀྱིས་འདི་དག་སྤྱད་པར་བྱ། །ཚིག་ཙམ་བརྗོད་པས་ཅི་ཞིག་འགྲུབ། །སྨན་དཔྱད་བཀླག་པ་ཙམ་གྱིས་ནི། །ནད་པ་དག་ལ་ཕན་འགྱུར་རམ། །ཞེས་གསུངས་པའི་ཕྱིར། དེས་ན་ཇི་ལྟར་བསྲུང་བའི་ཁྱད་པར་ལ། འགལ་རྐྱེན་ཉམས་པའི་རྒྱུ་སྤོང་བ་དང་། མཐུན་རྐྱེན་མི་ཉམས་པའི་རྒྱུ་དང་འཕེལ་བའི་རྐྱེན་ལ་བསླབ་པ་གཉིས་སུ་འདུ་སྟེ། དང་པོ་ལའང་། ཐོས་པ་ལ་མི་མོས། བསམ་པ་ལ་གཡེལ། སྒོམ་པ་ལ་ལྷོད་པ་གསུམ་ནི་རང་དོན་ཤེས་རབ་ཀྱི་གེགས་གསུམ་ཡིན་ལ། སྦྱོར་བ་ལེ་ལོ་ཆེ་བ། སྤྱོད་པ་གཞན་མི་དད་པ་ལ་སྦྱོར་བ། ཀུན་སློང་སྙིང་རྗེ་མེད་པ། བྱེད་ལས་ཕྱིན་ཅི་ལོག་སྒྲུབ་པ་བཞི་ནི་གཞན་དོན་སྤྱོད་པའི་སྐྱོན་བཞི་སྟེ། དེ་ལྟར་རང་གཞན་གྱི་སྤྱོད་པ་ཉམས་པའི་རྒྱུ་བདུན་སྤོང་བ་ལ་འབད་དོ། །གཉིས་པ་མཐུན་རྐྱེན་མི་ཉམས་པའི་རྒྱུ་དང་འཕེལ་བའི་རྐྱེན་ལ་བསླབ་ཚུལ་ཡང་། དང་པོ་སེམས་བསྐྱེད་སྐྱེས་པའི་ཕན་ཡོན་དྲན། ཉམས་པའི་ཉེས་དམིགས་དྲན། རྙེད་པར་དཀའ་བ་ཡང་ཡང་དྲན་པར་བྱེད་པ་ནི་ཚེ་འདིར་མི་ཉམས་པའི་རྒྱུ་དྲན་པ་གསུམ་དང་། གཉིས་པ་དུས་གསུམ་དུ་ཡན་ལག་བདུན་པ་བྱེད་པ། རྒྱལ་བ་སྲས་བཅས་ལ་གསོལ་བ་འདེབས་པ། ཆོས་དང་འགལ་བའི་བདུད་ལས་སྤོང་བ་དང་གསུམ་ནི་ཕྱི་མར་མི་ཉམས་པའི་རྒྱུ་ཕྱིན་ཅི་མ་ལོག་པའི་ཐབས་གསུམ་ཡིན་ལ། གསུམ་པ་བསྒྲུབ་བྱ་སེམས་ཅན་ལ་རང་བས་གཅེས་པ། །སྒྲུབ་བྱེད་ཆོས་ལ་ནོར་བས་གཅེས་པ། གཙོ་བོ་བྱང་སེམས་ལ་སྙིང་བས་གཅེས་པ། བདག་རྐྱེན་བཤེས་གཉེན་ལ་ཕ་མ་བས་གཅེས་པ། ཐོབ་བྱ་སངས་རྒྱས་ལ་ལོངས་སྤྱོད་བས་གཅེས་པ་དང་ལྔ་ནི་འདི་ཕྱི་གཉིས་ཀར་མི་ཉམས་པའི་རྒྱུ་གཅེས་པ་ལྔ་སྟེ། དེ་རྣམས་ཡོངས་བསྡོམས་རྣམ་གྲངས་བཅུ་གཉིས་ནི་མཐུན་རྐྱེན་མི་ཉམས་པའི་རྒྱུ་ཡིན་ནོ། །གཉིས་པ་འཕེལ་བའི་རྐྱེན་ལ་བསླབ་ཚུལ་ཡང་། འདི་ལྟར་འདུས་བྱས་ཀྱི་གཡོ་བ། སྡུག་བསྔལ་གྱི་མཐའ། ཆོས་ཀྱི་ཕན་ཡོན། སྟོན་པའི་ཆེ་བ། བྱང་སེམས་ཀྱི་ཕན་ཡོན་ཏེ། དེ་རྣམས་ཡིད་ཀྱིས་མི་བརྗེད་པར་དྲན་པ་སྟེ་དེ་ལྔ་ལ་བསླབ་པ་ཉིད་གཞིར་བཟུང་ནས། ཤེས་བཞིན་གྱི་མིག་གིས་བལྟ་བ། བརྩོན་འགྲུས་ཀྱི་རྟ་མཆོག་ཞོན་པ། ངེས་འབྱུང་གི་ལྕག་གིས་བསྐུལ་བ། ཐར་པའི་གྲོང་ཁྱེར་ཡིད་ལ་བྱ་བ་རྣམས་ནི་བྱ་བ་བཞི་སྟེ། མདོར་ན་ཀུན་མཁྱེན་ཆེན་པོས། རྟག་ཏུ་དྲན་དང་ཤེས་བཞིན་བག་ཡོད་ཀྱིས། །མི་དགེ་སྤང་ཞིང་དགེ་ཆོས་རྒྱ་མཚོ་སྒྲུབ། །ཅེས་གསུངས་པ་ལྟར་དྲན་པ་དང་བག་ཡོད་དང་ཤེས་བཞིན་གསུམ་མི་ཉམས་པར་བསྐྱེད་དེ། འཆད་འགྱུར་གྱི་རྩ་བ་དང་ཡན་ལག་གི་ལྟུང་བས་མི་གོས་པར་བྱ་ཞིང་། ལས་དང་པོ་པའི་སྐབས་སུ་སྒྲུབ་མི་ནུས་པ་མ་གཏོགས་པ། བྱང་སེམས་ཀྱི་བསླབ་བྱ་ནུས་པའི་ཡུལ་དུ་གྱུར་པ་མཐའ་དག་ལ་བསླབ་དགོས་ཏེ། བསླབ་བཏུས་ལས། མདོར་ན་རང་གི་ནུས་པའི་ཡུལ་མ་ཡིན་པའི་བྱ་བ་རྣམས་ལ་ལྟུང་བ་མེད་དེ། དོན་མེད་པ་ཉིད་ཀྱི་དེ་ལ་བསླབ་པ་བཅས་པ་མེད་པའི་ཕྱིར་རོ། །གཞན་ལ་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་ཉིད་དུ་བཟུང་བ་ཁོ་ནའོ། །རང་གི་ནུས་པའི་ཡུལ་མ་ཡིན་པ་གང་ཞིག་ལ་བརྩོན་པར་བྱེད་ན་ལྟུང་བར་འགྱུར་ཏེ། དེ་ནི་བསམ་མི་དགོས་པར་སྤྱིར་སྡིག་པ་བཤགས་པའི་ཁོངས་སུ་འདུས་པས་དེ་ལས་གྲོལ་བར་འགྱུར་རོ། །དེ་དག་ནི་མདོར་ན་བྱང་ཆུབ་སེམས་དཔའི་བསླབ་པའི་ཁོག་པ་ཡིན་ཏེ། རྒྱས་པར་ནི་བསྐལ་པ་དཔག་ཏུ་མེད་པ་མཐའ་ཡས་པར་བཤད་དུ་ཡོད་དོ། །ཞེས་སོ། །དེ་དག་རྣམས་ཀྱིས་ཇི་ལྟར་བསྲུང་ཚུལ་གྱི་གོ་དོན་བཤད་པས་ཁོག་དབུབ་པ་སོང་ནས། ད་ནི་གང་བསྲུང་བྱའི་ཚུལ་ཁྲིམས་དངོས་ཉིད་བཤད་པ་ལ་གསུམ། མདོར་བསྟན་པ། རྒྱས་པར་བཤད་པ། དོན་བསྡུ་བའོ། །དང་པོ་མདོར་བསྟན་པ་ནི། བར་དུ་མི་ཉམས་བསྲུང་བའི་ཐབས་བཤད་པ། །བྱང་ཆུབ་སེམས་དཔའི་ཚུལ་ཁྲིམས་གསུམ་ཡིན་ཏེ། །ཉེས་སྤྱོད་སྡོམ་དང་དགེ་བ་ཆོས་སྡུད་དང་། །སེམས་ཅན་དོན་བྱེད། ཅེས་པ་སྟེ། དེ་ལྟར་དང་པོ་རང་རྒྱུད་ལ་སྔར་མེད་གསར་དུ་ཐོབ་པའི་སྡོམ་པ་དེ་ཉིད་བར་དུ་མི་ཉམས་པར་བསྲུང་བའི་ཐབས་ལ་འབད་དགོས་ཏེ། ཉམས་ན་སེམས་ཅན་ཐམས་ཅད་བསླུ་བར་འགྱུར་བ་སོགས་ཉེས་དམིགས་ཤིན་ཏུ་ཆེ་ཞིང་། མ་ཉམས་ན་བྱང་ཆུབ་ཆེན་པོ་ཐོབ་པ་སོགས་ཕན་ཡོན་ཤིན་ཏུ་ཆེ་བའི་ཕྱིར། དེས་ན་ཇི་ལྟར་བསྲུང་བའི་ཐབས་བཤད་པས་ལ། སྤྱིར་བྱང་ཆུབ་སེམས་དཔའི་ཚུལ་ཁྲིམས་ཀྱི་རྣམ་པར་བཞག་པ་ལ་རྩ་བའི་ཆིངས་ཆེན་པོ་གསུམ་གྱིས་བསྡུས་པ་ཡིན་ཏེ། སེམས་བསྐྱེད་ཀྱི་བསླབ་བྱ་དང་འགལ་བའི་སྒོ་གསུམ་གྱི་ཉེས་སྤྱོད་ཐམས་ཅད་སྡོམ་པ་དང་། ཕར་ཕྱིན་དྲུག་གིས་བསྡུས་པའི་དགེ་བའི་ཆོས་ཐམས་ཅད་རང་རྒྱུད་ལ་སྡུད་པ་དང་། དེ་དག་ལ་དབང་འབྱོར་བས་བསྡུ་བ་བཞིའི་སྒོ་ནས་སེམས་ཅན་གྱི་དོན་བྱེད་པ་སྟེ། དཀོན་བརྩེགས་ལས། འོད་སྲུང་། དེ་ལ་བྱང་ཆུབ་སེམས་དཔའི་ཚུལ་ཁྲིམས་ནི་རྣམ་པ་གསུམ་སྟེ། སྡོམ་པའི་ཚུལ་ཁྲིམས་དང་། དགེ་བའི་ཆོས་ཐམས་ཅད་སྡུད་པའི་ཚུལ་ཁྲིམས། སེམས་ཅན་གྱི་དོན་སྒྲུབ་པའི་ཚུལ་ཁྲིམས་སོ། །ཞེས་གསུངས། དེ་གསུམ་ཡང་ངོ་བོ་གཅིག་ལ་ལྡོག་པར་ཕྱེ་བ་ཙམ་སྟེ། དཔེར་ན་ནོར་བུ་གཅིག་ཉིད། མུན་པ་སེལ་བ། འདོད་རྒུའི་ནོར་སྡུད་པ། རིམས་ནད་ལ་ཕན་པ་བཞིན་ནོ། །དེ་ལྟར་ཚུལ་ཁྲིམས་གསུམ་ལ་ལེགས་པར་བསླབ་པས་ནམ་ཞིག་འཚང་རྒྱ་བའི་ཚེ། ཚུལ་ཁྲིམས་སྔ་མ་གཉིས་ཀྱིས་སྤངས་རྟོག་ཕུན་ཚོགས་དང་། ཕྱི་མས་ཕྲིན་ལས་ཕུན་ཚོགས་ཐོབ་པའི་རྒྱུར་འགྲོ་བ་ཡིན་ནོ། །གཉིས་པ་རྒྱས་པར་བཤད་པ་ནི། གསུམ་ལས་དང་པོ་ནི། ཞེས་པ་སྟེ། བྱང་ཆུབ་སེམས་དཔའི་ཚུལ་ཁྲིམས་ལ། ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་གསུམ་དུ་ཡོད་པ་ལས། དང་པོ་ཉེས་སྤྱོད་སྡོམ་པའི་ཚུལ་ཁྲིམས་བཤད་པ་ནི། འདི་ལ་གཉིས། ནམ་སྙིང་གི་མདོ་དང་གསང་ཆེན་ཐབས་ལ་མཁས་པའི་མདོའི་རྗེས་སུ་འབྲངས་པ་ཀླུ་སྒྲུབ་ཀྱི་ལུགས་ཞི་བ་ལྷས་བསླབ་བཏུས་སུ་ཕྱེ་བ་དང་། བྱང་སའི་རྗེས་སུ་འབྲངས་པ་ཐོགས་མེད་ཀྱི་ལུགས་ཙནྡྲ་གོ་མིས་སྡོམ་པ་ཉི་ཤུ་པར་ཕྱེ་བའོ། །དང་པོ་ཀླུ་སྒྲུབ་ཀྱི་ལུགས་ལ་གཉིས། རྩ་བའི་ལྟུང་བ་བཤད་པ་དང་། ཡན་ལག་གི་ཉེས་པ་གཞན་དུ་ཞལ་འཕངས་པའོ། །དང་པོ་རྩ་བའི་ལྟུང་བ་བཤད་པ་ལའང་གསུམ། རྩ་ལྟུང་དངོས་བཤད་པ། རྟེན་དང་ལྟུང་བའི་དབྱེ་བསྡུ། ཐུན་མོང་སྨོན་འཇུག་སྤངས་པ་རྩ་ལྟུང་དུ་བསྟན་པའོ། །དང་པོ་རྩ་ལྟུང་དངོས་བཤད་པ་ལ་གསུམ། རྒྱལ་པོ་ལ་འབྱུང་ཉེ་བ་ལྔ། བློན་པོ་ལ་འབྱུང་ཉེ་བ་ལྔ། ཕལ་པ་ལ་འབྱུང་ཉེ་བ་བརྒྱད་བཤད་པའོ། །དང་པོ་རྒྱལ་པོ་ལ་འབྱུང་ཉེ་བ་ལྔ་ནི། དཀོན་མཆོག་དཀོར་འཕྲོག་དང་ནི་ཆོས་སྤོང་ལས། །ཚུལ་ལྡན་ཚུལ་འཆལ་ཁྲིམས་གཅོད་བསླབ་འབེབས་སོགས། །མཚམས་མེད་ལས་བྱེད་ལོག་ལྟ་ལྔ་རྒྱལ་པོ། །ཞེས་པ་སྟེ། སངས་རྒྱས་ཀྱི་སྐུ་གཟུགས་སམ་མཆོད་རྟེན་གྱི་ཡོ་བྱད་དང་། དམ་པའི་ཆོས་ཀྱི་གླེགས་བམ་དང་ཆོས་སྨྲ་བའི་ཆ་རྐྱེན། དགེ་འདུན་འདུ་བའི་རྫས་ཞིང་ལ་སོགས་པ་མདོར་ན་དཀོན་མཆོག་ལ་བསྔོས་པའི་དཀོར་རྫས་རིན་ཐང་ཚང་མ་ཚང་གང་ཡིན་ཀྱང་འདྲ་སྟེ། ཀུན་སློང་དྲག་པོས་འཕྲོག་པའམ་གཞན་བྱེད་དུ་བཅུག་ནས་བརྐུ་བར་བྱེད་པ་སོགས་རྩ་ལྟུང་དང་པོར་འགྲོ་བ་རྣམས་ནི་གཞིར་བཞག །ཐེག་པ་གསུམ་གང་ཡང་རུང་བའི་ལུང་གི་ཆོས་སྡེ་སྣོད་གསུམ་དང་རྟོགས་པའི་ཆོས་བསླབ་པ་གསུམ་ལས་གང་རུང་དུ་གཏོགས་པའི་དགེ་བ་རྣམས་སྟོན་པའི་བཀའ་དང་ཐར་པ་ཐོབ་པའི་ཐབས་མ་ཡིན་ནོ་ཞེས་རང་གིས་སྤོང་བའམ་གཞན་སྤོང་དུ་འཇུག་པ་ནི་རྩ་ལྟུང་གཉིས་པ་ཆོས་སྤོང་གི་ལས་དང་། བསླབ་པ་བཟུང་མ་བཟུང་གི་རབ་བྱུང་ངམ། ཚུལ་ཁྲིམས་ལྡན་པའམ་ཚུལ་ཁྲིམས་འཆལ་བའི་དགེ་སློང་གང་ཡིན་ཀྱང་རུང་སྟེ་རབ་བྱུང་གི་ཆ་ལུགས་འཛིན་པ་ལ། ཀུན་སློང་ཞེ་སྡང་གིས། དེའི་ངུར་སྨྲིག་གི་གོས་འཕྲོག་གམ། བརྡེག་གམ། བཙོན་དུ་འཇུག་པས་ཁྲིམས་གཅོད་པ། བསླབ་པ་ལས་ཁྱིམ་པར་འབེབས་པ་སོགས་གང་རུང་རེ་རེའང་མང་དུ་བྱས་སམ་བྱེད་དུ་བཅུག་ན་རྩ་ལྟུང་གསུམ་པ་དགེ་སྦྱོང་ཆད་པས་གཅོད་པ་དང་། ཕ་མ་དགྲ་བཅོམ་གསུམ་གསོད་པ་དང་། དགེ་འདུན་གྱི་དབྱེན་བྱེད་པ་དང་། སངས་རྒྱས་ལ་ངན་སེམས་ཀྱི་ཁྲག་འབྱིན་པ་སྟེ། དེ་ལྟར་མཚམས་མེད་ལྔ་པོའི་ལས་གང་ཡང་རུང་བ་བྱེད་པ་ནི་རྩ་ལྟུང་བཞི་པ་མཚམས་མེད་ལྔ་བྱེད་པ་དང་། རྒྱུ་དགེ་སྡིག་གི་ལས་ལ་འབྲས་བུ་བདེ་སྡུག་མེད་ཅེས་ལོག་པར་ལྟ་བས་མི་དགེ་བ་བཅུ་ལས་གང་རུང་ཞིག་བྱེད་དམ་བྱེད་དུ་བཅུག་ན་རྩ་ལྟུང་ལྔ་པ་ལོག་ལྟ་ཅན་ཏེ། འདིས་ཀུན་ནས་བླངས་ཏེ་མི་དགེ་བའི་ལས་ཕྲ་མོ་ཙམ་ལའང་དངོས་སུ་སྤྱད་ན་ཉེས་པ་ཤིན་ཏུ་ལྕི་བར་འགྱུར་ལ། དེ་ལྔ་ནི་རྒྱལ་པོ་རྣམས་ཤིན་ཏུ་དབང་ཆེ་བས་འབྱུང་ཉེ་བའི་ཕྱིར་དེའི་ལྟུང་བར་བཞག་གོ། །གཉིས་པ་བློན་པོ་ལ་འབྱུང་ཉེ་བ་ལྔ་ནི། གྲོང་ལྗོངས་གྲོང་ཁྱེར་གྲོང་བརྡལ་ཡུལ་འཁོར་རྣམས། འཇོམས་པར་བྱེད་ལའང་བློན་པོར་ངེས་པ་ལྔ། ཞེས་པ་སྟེ། ཁྱིམ་གཅིག་པ་ལ་སོགས་པ་གྲོང་དང་། མི་རིགས་བཞི་གནས་པ་ལྗོངས་དང་། བཟོ་སྣ་བཅོ་བརྒྱད་ཡོད་པའི་གནས་གྲོང་ཁྱེར་དང་། ཚོང་པ་མང་པོ་འདུ་བའི་གནས་གྲོང་བརྡལ་དང་། ཡུལ་གྲུ་ཆེན་པོ་ཙམ་པ་ཀ་ལྟ་བུ་ཡུལ་འཁོར་ཏེ། དེ་རྣམས་གང་ཡང་རུང་བ་ཀུན་སློང་ཞེ་སྡང་གིས་མེ་ལ་སོགས་པས་འཇོམས་པར་བྱེད་པ་སྟེ། འང་སྒྲ་སྡུད་བྱེད་ཀྱི་ཚིག་ལོག་ལྟ་དོར་བའི་སྔ་མ་བཞི་པོའི་སྟེང་ན་འདི་དག་གཅིག་ཏུ་བརྩིས་པ་ནི་བློན་པོ་རྣམས་རྒྱལ་པོའི་བྱ་བ་བྱེད་པའི་ཕྱིར་ཕྱོགས་རྣམས་སུ་ཁྲིམས་ཀྱི་ལས་ལ་དངོས་སུ་འཇུག་དགོས་པས་ན་དེར་འབྱུང་ངེས་པ་ལྔ་ཡིན་ནོ། །གསུམ་པ་ཕ ལ་པ་ལ་འབྱུང་ཉེ་བ་བརྒྱད་ནི། མ་སྦྱངས་སྟོང་ཉིད་བརྗོད་སྔས་ཉན་ཐོས་སྨོན། །རྫོགས་བྱང་ཕྱིར་ལྡོག་ཐེག་དམན་སེམས་བསྐྱེད་དང་། །སོ་ཐར་སྤངས་ནས་ཐེག་ཆེན་སློབ་པ་དང་། །ཉན་ཐོས་ཐེག་པར་ཆགས་སོགས་མི་བཟློག་པས། །དེ་བཟློག་དེ་ཡི་འབྲས་བུ་མེད་པར་བྱས། །ཕྲག་དོག་དབང་གིས་བདག་བསྟོད་གཞན་སྨོད་དང་། །རྙེད་དང་བཀུར་བསྟིའི་ཆེད་དུ་བདག་འཚོང་དང་། །དགེ་སློང་ཆད་པས་གཅོད་འཇུག་སུག་འབུལ་དང་། །སྤོང་བའི་ལོངས་སྤྱོད་ཁ་ཏོན་པ་ལ་བྱིན། །ཞི་གནས་འདོར་བཅུག་ཕལ་ལ་འབྱུང་ངེས་བརྒྱད། །ཅེས་པ་སྟེ། བློ་མ་སྦྱངས་པའི་སེམས་ཅན་ལས་དང་པོ་པའམ་ཐེག་དམན་གྱི་རིགས་ཅན་སོགས་སྣོད་མ་བརྟག་པར་སྟོང་ཉིད་མཐའ་བྲལ་བརྗོད་སྔས་པའི་དབང་གིས་ཡུལ་དེས་བྱང་ཆུབ་ཀྱི་སེམས་བཏང་ནས་ཉན་ཐོས་ཀྱི་ལམ་དུ་སྨོན་ན་སྟོན་པ་པོ་ལ་ལྟུང་བར་འགྱུར་ཞིང་། གལ་ཏེ་ཡུལ་ཀྱང་འཇུག་སྡོམ་དང་ལྡན་ན་དེ་ལའང་ལྟུང་བ་༡འབྱུང་། ཐེག་ཆེན་གྱི་ལམ་དུ་ཞུགས་པ་ལ་དེར་ཤེས་བཞིན་དུ་ཁྱོད་ཀྱིས་རྒྱུ་ཕྱིན་དྲུག་ལ་སྤྱོད་པ་འདིས་འབྲས་བུ་རྫོགས་བྱང་ཐོབ་པར་མི་ནུས་ཞེས་ཕྱིར་ལྡོག་པར་བྱས་ནས། དེ་བས་ཉན་རང་གི་འབྲས་བུ་བསྒྲུབ་པར་གྱིས་ཤིག་དང་དེས་ཁྱོད་འཁོར་བ་ལས་ངེས་པར་འབྱུང་བར་འགྱུར་རོ། །ཞེས་ཐེག་དམན་དུ་སེམས་བསྐྱེད་དུ་འཇུག་པ་༢དང་། ཉན་ཐོས་ཀྱི་རིགས་ཅན་སོ་སོར་ཐར་པ་ལ་སློབ་བཞིན་པའམ། རབ་ཏུ་བྱུང་མ་ཟིན་ཀྱང་སློབ་པར་འདོད་པ་དག་ལ་དགོས་པ་ཁྱད་པར་ཅན་མེད་བཞིན་ཁྱོད་སོ་ཐར་ལ་བསླབ་པས་ཅི་ཞིག་བྱ་ཞེས་སྤང་དུ་བཅུག་ནས་རྫོགས་བྱང་དུ་སེམས་བསྐྱེད་ལ་ཐེག་པ་ཆེན་པོ་ཀློག་ཅིག་དང་བྱང་ཆུབ་སེམས་ཀྱི་མཐུས་ཉེས་པར་བྱས་པའི་ལས་རྣམས་འཇོམས་སོ་ཞེས་དེ་ལ་སློབ་ཏུ་འཇུག་པ་དང་༣། ཉན་ཐོས་ཀྱི་ཐེག་པས་ཆགས་སོགས་ཉོན་མོངས་པ་མི་བཟློག་པས་ཐེག་ཆེན་ལ་སློབ་ཅིག་ཅེས་ཉན་ཐོས་ཀྱི་ཐེག་པ་དེ་བཟློག་ནས་དེ་ཡི་ལམ་ལ་བསླབ་ན་འབྲས་བུ་ཐར་པ་མྱང་འདས་མེད་པར་རང་འཛིན་ཅིང་། དགོས་པ་ཁྱད་པར་ཅན་མེད་པར་གཞན་ཡང་འཛིན་དུ་བཅུག་པར་བྱས་པ་དང་༤། རྙེད་བཀུར་གྱི་ཕྱིར་ཕྲག་དོག་གི་དབང་གིས་བདག་ཉིད་ལ་ཡོན་ཏན་མེད་ཀྱང་ཡོད་ཅེས་བསྟོད་ཅིང་། རྙེད་བཀུར་ཅན་གྱི་བྱང་སེམས་གཞན་ལ་བདེན་པའམ་བརྫུན་པ་གང་ཡིན་ཀྱང་སྨོད་པར་བྱེད་པ་༥དང་། རྙེད་པ་དང་བཀུར་སྟི་ཐོབ་པའི་ཆེད་དུ་མ་རྟོགས་བཞིན་བདག་གིས་ཆོས་ཟབ་མོ་སྟོང་པ་ཉིད་མངོན་སུམ་དུ་རྟོགས་སོ་ཞེས་མི་ཆོས་བླ་མའི་རྫུན་གྱིས་བདག་འཚོང་པ་དང་༦། རང་ཉིད་ཀྱིས་རྒྱལ་རིགས་ལྟ་བུའི་མི་དབང་པོ་ཆེ་དང་། ཆོས་འདི་བའི་དགེ་སློང་སོགས་དགེ་སྦྱོང་རྣམས་ཕྲ་མས་ཕྱེ་ནས་དབང་པོ་ཆེའི་ཕྱོགས་ལ་བརྟེན་ཏེ་དགེ་སློང་ལ་ནོར་གྱི་ཆད་པས་གཅོད་དུ་འཇུག་པ་དང་། དེའི་རྐྱེན་གྱིས་དགེ་སྦྱོང་གིས་དཀོན་མཆོག་གི་དཀོར་བརྐུས་ནས་ཕྲ་མ་བྱེད་པ་ལ་ཕག་སུག་ཏུ་འབུལ་བ་རང་གིས་ལེན་ནམ་དབང་པོ་ཆེ་ལ་བྱིན་པས་ནོར་བདག་གིར་བྱས་ན་གཉིས་ཀ་ལ་ལྟུང་བར་འ གྱུར་བ་༧དང་། སྤོང་བ་བསམ་གཏན་པ་ལ་སྡང་བའི་བསམ་པ་དེ་དག་གི་ལོངས་སྤྱོད་སོགས་འཕྲོག་ནས་ཀློག་པ་ཁ་ཏོན་པ་ལ་བྱིན་ནམ་སྦྱིན་དུ་འཇུག་པ་སོགས་ཀྱི་སྒོ་ནས་ཞི་གནས་ཀྱི་ཏིང་ངེ་འཛིན་འདོར་དུ་བཅུག་པ་༨རྣམས་ཕལ་པ་ལ་འབྱུང་ངེས་པ་བརྒྱད་དུ་བཞག་གོ། །གཉིས་པ་རྟེན་དང་ལྟུང་བའི་དབྱེ་བསྡུ་བཤད་པ་ནི། དེ་དེར་འབྱུང་ཉེས་བཞག་གིས་ཀུན་ལ་ཀུན། །མིང་དུ་བཅོ་བརྒྱད་རྫས་སུ་བཅུ་བཞི་སྟེ། །ཞེས་པས། དེ་ལྟར་རྒྱལ་བློན་ཕལ་པ་སོ་སོའི་རྩ་ལྟུང་དུ་བཤད་པ་ནི་གཙོ་བོར་གང་ཟག་དེ་དང་དེར་འབྱུང་ཉེ་བ་ཙམ་གྱིས་བཞག་གིས། དོན་ལ་གང་ཟག་གསུམ་པོ་ཀུན་ལ་བཅོ་བརྒྱད་པོ་ཀུན་མ་ལུས་པ་རྩ་ལྟུང་དུ་འགྱུར་བ་ཡིན་ཏེ། མདོ་ལས་མིང་དུ་བཅོ་བརྒྱད་དུ་ཕྱེ་ཡང་དོན་དུ་རྫས་སུ་བསྡུ་ན་རྒྱལ་བློན་གྱི་རྩ་ལྟུང་དང་པོ་བཞི་ལ་ཐ་དད་མེད་པས་བཅུ་བཞི་པོ་ཁོ་ན་སྟེ་ཞེས་སོ། །གསུམ་པ་ཐུན་མོང་སྨོན་འཇུག་སྤངས་པ་རྩ་ལྟུང་དུ་བསྟན་པ་ནི། སྨོན་འཇུག་སེམས་བཏང་དེ་རྣམས་རྩ་ལྟུང་ཡིན། །ཞེས་པ་སྟེ། ཐེག་པ་དམན་པར་སེམས་བསྐྱེད་པའམ་སེམས་ཅན་བློས་སྤངས་ན་སྨོན་སེམས་བཏང་བ་སྟེ། གསང་ཆེན་ཐབས་ལ་མཁས་པའི་མདོ་ལས། རིགས་ཀྱི་བུ་བྱང་ཆུབ་སེམས་དཔའ་ཉན་ཐོས་དང་རང་སངས་རྒྱས་ཡིད་ལ་བྱེད་པས་གནས་པ་འདི་ནི་བྱང་ཆུབ་སེམས་དཔའི་རྩ་བའི་ལྟུང་བ་ལྕི་བའོ། །ཞེས་གསུངས་པ་ལྟར། སྔར་གྱི་རྩ་ལྟུང་བཅོ་བརྒྱད་ཀྱི་སྟེང་དུ་སྨོན་པ་བཏང་བས་བཅུ་དགུ་དང་། དེའི་སྟེང་དུ་དཀོན་བརྩེགས་ལས་གསུངས་པ་ལྟར་འཇུག་སེམས་བཏང་སྟེ་དགེ་ལ་མི་སྦྱོར་བ་བསྣན་པས་རྩ་ལྟུང་ཉི་ཤུར་འགྱུར་ཏེ། དེ་རྣམས་ནི་བྱང་ཆུབ་སེམས་དཔའི་ཚུལ་ཁྲིམས་ཀྱི་རྩ་ལྟུང་ཁོ་ན་ཡིན་ནོ། །དེ་ཡང་བྱང་ཆུབ་སེམས་དཔའི་དབང་པོའི་རིམ་པས་ཕྱེ་ན། གོང་དུ་བཤད་པའི་བཅོ་བརྒྱད་པོ་དབང་རྣོན་གྱི་ཐུན་མོང་མ་ཡིན་པའི་རྩ་ལྟུང་ཡིན་ལ། དབང་འབྲིང་ཡན་ཆད་ཀྱི་བསླབ་བྱ་ལ་བཞིར་བསྟན་ཏེ། ཐབས་ལ་མཁས་པའི་མདོའི་དོན་བསླབ་བཏུས་ལས། བྱང་ཆུབ་སེམས་ནི་ཡོངས་འདོར་དང་། །ཆགས་དང་སེར་སྣ་མི་ཟད་པས། །སློང་ལ་སྦྱིན་པར་མི་བྱེད་དང་། །སྒྲིམས་ཏེ་དགའ་བར་བྱེད་པ་ན། །སེམས་ཅན་ལ་ནི་མི་བཟོད་པས། །ཁྲོས་པས་སེམས་ཅན་རྡེག་པ་དང་། །ཉོན་མོངས་པ་དང་གཞན་མཐུན་པས། །ཆོས་ལྟར་བཅོས་པ་སྟོན་པའོ། །ཞེས་བཞིར་བཤད་ལ། དབང་རྟུལ་ལ་སྨོན་སེམས་མི་འདོར་བ་གཅིག་པུར་བཞག་ཅིང་། དེའི་ཚུལ་ཡང་རྒྱལ་པོ་ལ་གདམས་པའི་མདོ་ལས་གསུངས་པ་ལྟར་སྡོམ་དུ་བྱས་ན། བྱ་དང་བྱེད་པ་མང་བ་དག །ཐམས་ཅད་སྒྲུབ་པར་མི་ནུས་ཀྱང་། །ཡང་དག་རྫོགས་པའི་བྱང་ཆུབ་ལ། །འདུན་དང་དད་དང་སྨོན་པ་གསུམ། །འགྲོ་འདུག་ཟ་ཉལ་སད་ཀྱང་རུང་། །རྟག་ཏུ་དྲན་པས་སྒོམ་བྱ་ཞིང་། །རྗེས་སུ་ཡི་རང་བྱས་ནས་ཀྱང་། །རྒྱལ་དང་ཐུགས་གསུང་སྲས་རྣམས་ལ། །ཕུལ་ཞིང་སེམས་ཅན་དང་ཐུན་མོང་། །རྫོགས་པའི་བྱང་ཆུབ་ཏུ་བསྔོས་ན། །རང་སྲིད་མི་ཉམས་ཚོགས་རྫོགས་འགྱུར། །ཞེས་པའོ། །གལ་ཏེ་དེ་ལྟ་བུའི་སྨོན་སྡོམ་དེ་ཉམས་ན་འཇུག་སྡོམ་ཀྱང་གཏོང་བར་འགྱུར་བས་ཉེས་པ་ཤིན་ཏུ་ལྕི་སྟེ། སྡུད་པ་ལས། གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་རང་རྒྱལ་དགྲ་བཅོམ་ཉིད་ལ་འདོད་བསྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་སོ། །གཉིས་པ་ཡན་ལག་གི་ཉེས་བྱས་གཞན་དུ་ཞལ་འཕང་བ་ནི། ཡན་ལག་ཉེས་བྱས་བརྒྱད་ཅུ་ལ་སོགས་པ། །ཕྲ་ཕྱིར་འདིར་ནི་མ་བཤད་བསླབ་བཏུས་བལྟ། །ཞེས་པ་སྟེ། རྩ་བ་བསྲུང་ཐབས་ཀྱི་ཡན་ལག་ཉེས་བྱས་བརྒྱད་ཅུ་ལ་སོགས་པ་རྣམས་ཅུང་ཟད་ཉེས་པ་ཕྲ་བའི་ཕྱིར་བསྟན་བཅོས་འདིར་ནི་མ་བཤད་ཀྱང་བསླབ་བཏུས་སུ་དེ་དག་གསལ་བར་བསྟན་པ་དེར་བལྟ་བར་བྱོས་ཤིག་ཅེས་ཞལ་འཕང་བར་མཛད་དེ། དེའི་སྡོམ་ནི་ཇི་སྐད་དུ། གཞན་གྱི་སྡུག་བསྔལ་ཡིད་མི་བདེ། །ནུས་བཞིན་ཞི་བར་མི་བྱེད་དང་། །བདེ་དང་ཡིད་བདེ་མི་བསྐྱེད་པ། །ལྟུང་བའི་གཞི་སྟེ་ལུས་སེམས་ཀྱི། །རྟེན་གྱིས་ཕྱེ་ན་རྣམ་པ་བཞི། །ད་ལྟ་དང་ནི་མ་འོངས་པའི། །དུས་ཀྱིས་ཕྱེ་བས་རྣམ་པ་བརྒྱད། །དེ་ཆེད་སྒོ་གསུམ་མི་བརྩོན་དང་། །ཕན་པའི་རྒྱུ་རྐྱེན་མི་འཚོལ་དང་། གཉེན་པོའི་ཕྱོགས་ལ་མི་འབད་པ། །དེ་ལྟར་རྗེས་སུ་བསྒྲུབ་པའི་སྒོ། །གསུམ་གྱི་ཕྱེ་བས་ཉི་ཤུ་བཞི། །བདེ་སྡུག་ཡལ་འདོར་ལྟུང་བའོ། །སྡུག་བསྔལ་ཡིད་མི་བདེ་ཆེན་པོའི། །གཉེན་པོ་ཆུང་ངུ་མི་བསྐྱེད་པ། །ལྟུང་བའི་གཞི་སྟེ་འདི་ཕྱི་ཡི། །སྐྱེ་བས་ཕྱེ་བས་རྣམ་པ་བཞི། །རང་གཞན་རྒྱུད་ཀྱི་ཕྱེ་བས་བརྒྱད། །བདེ་དང་ཡིད་བདེ་ཆེན་པོའི་ཕྱིར། །ཆུང་ངུ་ཉམས་པར་མི་བྱེད་པ། །ལྟུང་བའི་གཞི་སྟེ་སྐྱེ་བ་དང་། །རྒྱུད་ཀྱིས་ཕྱེ་བས་རྣམ་པ་བརྒྱད། །སྒྲུབ་པ་ཡལ་བར་འདོར་བ་ཡི། །ལྟུང་བ་རྣམ་པ་བཅུ་དྲུག་གོ། །དེ་ལྟར་བཞི་བཅུ་རེ་རེ་ལའང་། །རེ་ཞིག་ཡལ་བར་འདོར་བ་དང་། །གཏན་དུ་འདོར་བ་རྣམ་པ་གཉིས། །ཕན་ཡོན་ཉེས་དམིགས་མི་བཟད་པའི། །ཡན་ལག་ལྟུང་བ་བརྒྱད་ཅུའོ། །ཞེས་དང་། སོགས་ཁོངས་ནས་ཕྱོགས་མཐུན་གྱི་ཉེས་པ་མི་དགེ་བ་བཅུ་དང་། འཇིག་རྟེན་གྱི་ཆོས་བརྒྱད་དང་། ལོག་པའི་རྟོག་པ་བརྒྱད་དང་། ལོག་འཚོ་ལྔ་དང་། སྤྱོད་ཡུལ་མིན་པ་ལྔ་དང་། སྡིག་གྲོགས་དང་སྡིག་ལྟ་འཛིན་པ་སོགས་བདུད་ཀྱི་ལས་རྣམས་དང་། ལྟ་བས་གཟིངས་པ་དང་། དགེ་བ་འཛད་པའི་རྒྱུ་བཞི་ལ་སོགས་པ་རྣམས་སྤང་བར་བྱ་ཞིང་། ཡན་ལག་གི་ལྟུང་བ་གཞན་ཡང་། ལུས་ངག་ཡིད་ཀྱི་དགག་པ་དང་སྒྲུབ་པའི་བསླབ་བྱ་རྣམས་ལས་ཉམས་པ་སྟེ། དོན་མེད་པའི་རྒྱུག་མཆོངས་ལ་སོགས་པ་དང་། བྲེ་མོའི་གཏམ་སྨྲ་བ་སོགས་དང་། ཆགས་སྡང་མི་སྤོང་བ་སོགས་དགག་པའི་བསླབ་བྱ་ལས་ཉམས་པ་དང་། མིག་ཕབ་སྟེ་བལྟ་བར་བྱ་བ་སོགས་དང་། ལེགས་པར་འོངས་སོ་ཞེས་བྱ་བ་ལ་སོགས་པ་དང་། བྱམས་སྙིང་རྗེ་སྒོམ་ཞིང་དྲན་པ་དང་ཤེས་བཞིན་དང་བག་ཡོད་བསྟེན་པ་སོགས་སྒྲུབ་པའི་བསླབ་བྱ་ལས་ཉམས་པ་སྟེ། དེ་རྣམས་ཀྱི་ནང་དུ་དབང་པོ་འབྲིང་རྟུལ་གྱི་ཉེས་པ་ཐམས་ཅད་ཀྱང་འདུ་བར་གསུངས་སོ། །གཉིས་པ་ཐོགས་མེད་ཀྱི་ལུགས་བཤད་པ་ལ་གཉིས། སྨོན་པའི་བསླབ་བྱ་དང་། འཇུག་པའི་བསླབ་བྱའོ། །དང་པོ་སྨོན་པའི་བསླབ་བྱ་ལ་གཉིས། སྤྱིར་བཏང་དང་། དཀར་ནག་ཆོས་བརྒྱད་བྱེ་བྲག་ཏུ་བཤད་པའོ། །དང་པོ་སྤྱིར་བཏང་ནི། ཐོགས་མེད་ལུགས་ཀྱི་སྨོན་པའི་བསླབ་བྱ་ལ། སེམས་ཅན་བློས་མི་བཏང་དང་ཕན་ཡོན་དྲན། །ཚོགས་བསགས་བྱང་སེམས་སྦྱོང་ལ་བརྩོན་པ་དང་། །དཀར་ནག་ཆོས་བརྒྱད་བླང་དོར་སྨོན་པའི་ཡིན། །ཞེས་པ་སྟེ། དེ་ནས་རྒྱལ་སྲས་ཐོགས་མེད་ཀྱི་ལུགས་ཀྱི་སྨོན་པའི་བསླབ་བྱ་བཤད་པ་ལ། རྩ་བའི་བསླབ་བྱ་སྨོན་སེམས་མི་འཆོར་བའི་ཐབས་ནི། སེམས་ཅན་གང་ཡང་རུང་བས་རང་གི་སེམས་བསུན་ཕྱུང་བ་ལ་བརྟེན་ནས་ད་ནི་ཁྱོད་ལ་ཕན་ཐོགས་པའི་དུས་བྱུང་ཡང་ཕན་མི་གདགས། གནོད་པ་བཟློག་པའི་དུས་བྱུང་ཡང་གནོད་པ་མི་བཟློག་སྙམ་པ་ནི་སེམས་ཅན་དེ་ཉིད་བློས་བཏང་བ་ཡིན་པས་དེ་འདྲ་སྤངས་ཏེ་ཕན་ལན་དུ་གནོད་པ་བྱས་ནའང་ཡང་ལན་སྙིང་རྗེས་སློན་ཏེ་བློས་མི་བཏང་བ་དང་། བྱང་ཆུབ་ཀྱི་སེམས་དེ་མི་ཉམས་པའི་ཐབས་ཕན་ཡོན་དྲན་པ་ནི། སྡོང་པོ་བཀོད་པའི་མདོར་དཔེ་ཉིས་བརྒྱ་དང་སུམ་ཅུའི་སྒོ་ནས་བཤད་པ་རྣམས་ལེགས་པར་བལྟ་ཞིང་། ཐ་ནའང་བྱམས་སྨོན་ནས་འབྱུང་བའི་ཚིགས་བཅད་གི་དོན་བཞིན་དུས་རྟག་ཏུ་ཕན་ཡོན་དྲན་པས་གཅེས་པར་འཛིན་པ་དང་། བྱང་ཆུབ་སེམས་དེའི་སྟོབས་བསྐྱེད་པའི་ཐབས་ནི། དགེ་བའི་འདུན་པ་སྔོན་དུ་བཏང་ནས་སྦྱིན་པ་སོགས་བསོད་ནམས་ཀྱི་ཚོགས་དང་། དེ་དག་འཁོར་གསུམ་མི་རྟོག་པར་ཤེས་པ་ཡེ་ཤེས་ཀྱི་ཚོགས་ཏེ། ཚོགས་གཉིས་ཟུང་འབྲེལ་དུ་བསགས་པ་ལ་འབད་པ་དང་། བྱང་ཆུབ་ཀྱི་སེམས་དེ་འཕེལ་བའི་ཐབས་ནི། རྒྱུ་ལ་སྦྱང་པ་བྱམས་སྙིང་རྗེ་སྒོམ་པ། སེམས་དངོས་ལ་སྦྱང་བ་ཉིན་མཚན་ཐུན་དྲུག་ཏུ་སེམས་བསྐྱེད་བླང་བ། སྤྱོད་པ་ལ་སྦྱང་བ་རང་གི་བདེ་དགེ་སེམས་ཅན་ལ་བསྔོ་ཞིང་གཞན་གྱི་སྡིག་སྡུག་བདག་ལ་ལེན་པའི་གཏོང་ལེན་སྦྱོང་བ་སྟེ། དེ་གསུམ་གྱི་སྒོ་ནས་བྱང་ཆུབ་ཀྱི་སེམས་སྦྱོང་བ་ལ་རྟག་ཏུ་བརྩོན་པ་དང་། བྱང་ཆུབ་ཀྱི་སེམས་མི་བརྗེད་པའི་ཐབས་ནི། འོག་ནས་འབྱུང་བ་བཞིན་དཀར་ཆོས་བཞི་དང་ནག་ཆོས་བཞི་སྟེ་བརྒྱད་ལ་བླང་དོར་མ་ནོར་བར་བྱེད་པ་ནི་སྨོན་པའི་བསླབ་བྱ་ཡིན་ནོ། །གཉིས་པ་དཀར་ནག་ཆོས་བརྒྱད་བྱེ་བྲག་ཏུ་བཤད་པ་ནི། མཆོད་འོས་བསླུ་དང་འགྱོད་མེད་འགྱོད་པ་བསྐྱེད། །དམ་པར་སྐུར་འདེབས་འགྲོ་ལ་གཡོ་སྒྱུ་སྤྱོད། །ནག་པོའི་ཆོས་བཞི་སྤང་ཞིང་ལྡོག་པ་ནི། །དཀར་པོའི་ཆོས་བཞི་ཡིན་པས་ཀུན་ཏུ་སྤྱད། །ཅེས་པ་སྟེ། རྫུན་གྱིས་མཆོད་འོས་སུ་གྱུར་པ་བླ་མ་དང་མཁན་སློབ་སོགས་བསླུ་བ་དང་། གཞན་འགྱོད་པའི་གནས་མ་ཡིན་པ་དགེ་བའི་ཕྱོགས་སྒྲུབ་པ་སོགས་ལ་དེ་འགྱོད་པ་མེད་ཀྱང་ངན་སེམས་ཀྱིས་འགྱོད་པ་བསྐྱེད་པ་དང་། སེམས་བསྐྱེད་པའི་བྱང་ཆུབ་སེམས་དཔའ་དམ་པར་སྡང་སེམས་ཀྱིས་སྐྱོན་ནས་བརྗོད་ཅིང་སྐུར་པ་འདེབས་པ་དང་། འགྲོ་བ་གཞན་ལ་ཀུན་སློང་གཡོ་སྒྱུའི་སྒོ་ནས་བསླུ་བའི་སྤྱོད་པ་རྩོམ་པ་རྣམས་ནི་ནག་པོའི་ཆོས་བཞི་ཡིན་པས་སྤང་བར་བྱ་ཞིང་། དེ་ལས་ལྡོག་པ་འོད་སྲུང་གི་ཞུས་པ་ལས། འོད་སྲུང་ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་མི་འགྱུར་ཏེ། བཞི་གང་ཞེ་ན། ཤེས་བཞ ིན་དུ་རྫུན་མི་སྨྲ་བ་དང་། བྱང་ཆུབ་སེམས་དཔའ་ལ་སྟོན་པའི་དུ་ཤེས་བསྐྱེད་པ་དང་། སེམས་ཅན་ལ་གཡོ་སྒྱུ་མེད་པར་ལྷག་པའི་བསམ་པས་གནས་པ་དང་། སེམས་ཅན་ཐམས་ཅད་ཐེག་པ་ཆེན་པོ་ལ་ཡང་དག་པར་འགོད་པའོ། །ཞེས་གསུངས་པ་ནི་དཀར་པོའི་ཆོས་བཞི་ཡིན་པས་ཀུན་ཏུ་སྤྱད་པར་བྱའོ། །གཉིས་པ་འཇུག་པའི་བསླབ་བྱ་བཤད་པ་ལ་གཉིས། རྩ་ལྟུང་བཤད་པ་དང་། ཡན་ལག་ཉེས་བྱས་གཞན་དུ་ཞལ་འཕངས་པའོ། །དང་པོ་རྩ་ལྟུང་བཤད་པ་ནི། རྙེད་བཀུར་ལྷག་ཞེན་བདག་བསྟོད་གཞན་སྨོད་དང་། །སེར་སྣས་ཟང་ཟིང་ནོད་དང་ཆོས་མི་སྟེར། །ཁྲོ་བས་གཞན་འཚེ་ཤད་སྦྱང་གིས་མི་བཟློག །གཡོམ་ལས་ཆོས་ལྟར་བཅོས་མོས་སྟོན་པ་བཞི། །རྩ་ལྟུང་བཞི་སྟེ་འཇུག་པའི་བསླབ་བྱའོ། །ཞེས་པ་སྟེ། འཇུག་སེམས་ཀྱི་མི་མཐུན་པའི་ཕྱོགས་རྩ་བའི་ལྟུང་བར་གྱུར་པ་མདོ་སྡེ་ན་འཐོར་བ་རྣམས་ཐོགས་མེད་ཀྱིས་བྱང་སར་བསྡུས་པ་ནི། རྙེད་པ་དང་བཀུར་སྟི་ལ་ལྷག་པར་ཞེན་པས་དེ་ཐོབ་པའི་ཕྱིར་བདག་ལ་བསྟོད་པའམ་རྙེད་བཀུར་ཅན་གཞན་ལ་སྨོད་པ་དང་། སེར་སྣའི་དབང་གིས་སྡུག་བསྔལ་བ་དང་། བཀྲེན་པ་དང་། མགོན་མེད་པའི་སློང་བ་པོ་ལ་ཁ་ཟས་སོགས་ཟང་ཟིང་ཅུང་ཟད་ཙམ་མམ་ཉན་འདོད་ཀྱི་གང་ཟག་སྣོད་དུ་གྱུར་ཅིང་བྱང་སེམས་རང་ལ་ནུས་པ་ཡོད་བཞིན་དེ་གཉིས་ལ་ནོར་དང་ཆོས་མི་སྟེར་བ་དང་། ཁྲོ་བ་དྲག་པོས་ཀུན་ནས་བསླངས་ཏེ་ཚིག་རྩུབ་སྨྲས་པ་ཙམ་གྱིས་མི་ཚིམ་པར་གཞན་ལ་བརྡེག་བཙོག་སོགས་འཚེ་བར་བྱེད་ཅིང་ཤད་སྦྱོང་གིས་ཀྱང་མི་བཟློག་པར་འཁོན་དུ་འཛིན་པ་དང་། གཏི་མུག་གིས་ཀུན་ནས་བསླངས་ཏེ་ཐེག་ཆེན་གྱི་སྡེ་སྣོད་ལ་བཀའ་མིན་ནོ་ཞེས་སྐུར་འདེབས་ཀྱིས་སྤོང་བའམ་རང་ངམ་གཞན་གྱི་གཡོམ་ལས་སམ་རང་བཟོས་ཆོས་མ་ཡིན་པ་ལ་ཆོས་ལྟར་བཅོས་པ་ལ་མོས་ནས་ཆོས་ཡིན་ནོ་ཞེས་དམ་ཆོས་འདྲར་སྣང་སྟོན་པ་དང་བཞི་པོ་འདི་ཀུན་དཀྲིས་ཆེན་པོས་སྤྱད་ན་བྱང་སེམས་ཀྱི་སྡོམ་པ་རྩ་བ་ནས་གཏོང་བར་བྱེད་པས་ན་རྩ་བའི་ལྟུང་བ་སྟེ། དེ་ཡང་ཀུན་སློང་གི་སྒོ་ནས་བཞི་དང་། སྦྱོར་བའི་སྒོ་ནས་བརྒྱད་ཏེ་དེ་རྣམས་སྤང་བ་ནི་འཇུག་པའི་བསླབ་བྱའོ། །འོ་ན་སྲོལ་གཉིས་བཞེད་པ་འདི་དག་གཙོ་ཆེ་བ་ཡིན་ཞེ་ན། བྱང་སེམས་དབང་རྟུལ་དང་ཁྱིམ་པའི་ཕྱོགས་ལྟ་བུས་སེམས་ཅན་བློས་མི་གཏོང་བ་འདི་ཁོ་ན་ལ་ནན་ཏན་བྱེད་དགོས་པ་ཡིན། རྩིག་པ་མེད་ན་ལོགས་རིས་མི་གནས་པ་བཞིན་དུ། དེ་མེད་ན་བྱང་སེམས་ཀྱི་སྡོམ་པ་གཞན་བསྲུང་བའི་ཐབས་གཏན་ནས་མེད། འོ་ན་དེ་སེམས་ཅན་གཅིག་བློས་གཏོང་བ་ཡིན་ནམ། སེམས་ཅན་ཐམས་ཅད་བློས་གཏོང་བ་ཡིན་སྙམ་ན། སེམས་ཅན་ཐམས་ཅད་བློས་གཏོང་བ་ནི་ཉན་རང་གཉིས་ལས་ཁྲ་དང་སྤྱང་ཀི་སོགས་ལའང་མི་སྲིད་པས་སེམས་ཅན་གཅིག་བློས་གཏོང་བའོ། །བྱང་སེམས་དབང་འབྲིང་དང་རབ་བྱུང་གི་ཕྱོགས་ལྟ་བུས་སྔ་མའི་སྟེང་དུ་བྱང་སའི་བཞི་སྤོང་དགོས་པ་ཡིན། དབང་རྣོན་གྱིས་སེམས་ཅན་བློས་མི་གཏོང་བ་གཞིར་བཞག་གི་སྟེང་དུ་ནམ་མཁའི་སྙིང་པོའི་མདོའི་དོན་རྩ་ལྟུང་བཅོ་བརྒྱད་པོ་བསྲུང་དགོས་པའི་དོན་ཡིན་པས་འདི་དག་ཕན་ཚུན་འགལ་འདུ་ཅན་དུ་མ་སེམས་ཤིག །གཉིས་པ་ཡན་ལག་ཉེས་བྱས་གཞན་དུ་ཞལ་འཕངས་པ་ནི། ཉེས་བྱས་ཕྲ་བ་ཞེ་དྲུག་གཞན་དུ་ཤེས། །ཞེས་པ་སྟེ། དེ་ལས་གཞན་ཉེས་བྱས་ཕྲ་བ་ཞེ་དྲུག་ཡོད་པ་འདིར་བཤད་པར་མ་ལོངས་པས་གཞན་དུ་ཤེས་པར་བྱའོ་ཞེས་ཞལ་འཕངས་པར་མཛད་པ་སྟེ། དེ་ཡང་སྡོམ་པ་ཉི་ཤུ་པར་དགེ་བ་ཆོས་སྡུད་དང་འགལ་བ་སོ་བཞི་དང་། སེམས་ཅན་དོན་བྱེད་དང་འགལ་བ་བཅུ་གཉིས་སུ་གསུངས་པ་ལས། དང་པོ་ལའང་ནང་གསེས་སྡེ་ཚན་དྲུག་ལས། སྦྱིན་པ་དང་འགལ་བ་བདུན་ནི། །དཀོན་མཆོག་གསུམ་ལ་གསུམ་མི་མཆོད། །འདོད་པའི་སེམས་ཀྱིས་རྗེས་སུ་འཇུག །རྒན་པ་རྣམས་ལ་གུས་མི་བྱེད། །དྲིས་པ་ལ་ནི་ལན་མི་འདེབས། །མགྲོན་བོས་བདག་གིར་མི་བྱེད་ཅིང་། །གསེར་ལ་སོགས་པ་ལེན་མི་བྱེད། །ཆོས་འདོད་པ་ལ་སྦྱིན་མི་བྱེད། །ཅེས་དང་། ཚུལ་ཁྲིམས་དང་འགལ་བ་དགུ་ནི། ཚུལ་ཁྲིམས་འཆལ་རྣམས་ཡལ་བར་འདོར། །ཕ་རོལ་དད་ཕྱིར་སློབ་མི་བྱེད། །སེམས་ཅན་དོན་ལ་བྱ་བ་ཆུང་། །སྙིང་བརྩེར་བཅས་ན་མི་དགེ་མེད། །འཚོ་བ་ལོག་པ་དང་དུ་ལེན། །འཆལ་ཞིང་རབ་ཏུ་རྒོད་ལ་སོགས། །འཁོར་བ་གཅིག་པུས་བགྲོད་པར་སེམས། །གྲགས་པ་མ་ཡིན་མི་སྤོང་བ། །ཉོན་མོངས་བཅས་ཀྱང་འཆོས་མི་བྱེད། །ཅེས་དང་། བཟོད་པ་དང་འགལ་བ་བཞི་ནི། གཤེ་ལ་ལན་དུ་གཤེ་ལ་སོགས། །ཁྲོས་པ་རྣམས་ནི་ཡལ་བར་འདོར། །ཕ་རོལ་ཤད་ཀྱིས་འཆགས་པ་སྤོང་། །ཁྲོས་པའི་སེམས་ཀྱིས་རྗེས་སུ་འཇུག །ཅེས་དང་། བརྩོན་འགྲུས་དང་འགལ་བ་གསུམ་ནི། །རྙེད་བཀུར་འདོད་ཕྱིར་འཁོར་རྣམས་སྡུད། །ལེ་ལོ་ལ་སོགས་སེལ་མི་བྱེད། །ཆགས་པས་བྲེ་མོའི་གཏམ་ལ་བརྟེན། །ཞེས་དང་། བསམ་གཏན་དང་འགལ་བ་གསུམ་ནི། ཏིང་ངེ་འཛིན་གྱི་དོན་མི་འཚོལ། །བསམ་གཏན་སྒྲིབ་པ་སྤོང་མི་བྱེད། །བསམ་གཏན་རོ་ལ་ཡོན་ཏན་བལྟ། །ཞེས་དང་། ཤེས་རབ་དང་འགལ་བ་བརྒྱད་ནི། ཉན་ཐོས་ཐེག་པ་སྤོང་བར་བྱེད། །རང་ཚུལ་ཡོད་བཞིན་དེ་ལ་བརྩོན། །བརྩོན་མིན་ཕྱི་རོལ་བསྟན་བཅོས་བརྩོན། །བརྩོན་པར་བྱས་ཀྱང་དེ་ལ་དགའ། །ཐེག་པ་ཆེན་པོ་སྤང་བར་བྱེད། །བདག་ལ་བསྟོད་ཅིང་གཞན་ལ་སྨོད། །ཆོས་ཀྱི་དོན་དུ་འགྲོ་མི་བྱེད། །དེ་ལ་སྨོད་ཅིང་ཡི་གེར་རྟོན། །ཞེས་སོ། །གཉིས་པ་སེམས་ཅན་དོན་བྱེད་དང་འགལ་བ་བཅུ་གཉིས་ལ་ནང་གསེས་སྡེ་ཚན་གསུམ་ལས། དང་པོ་གཞན་དོན་ལས་ཉམས་པའི་ཉེས་པ་བཞི་ནི། དགོས་པའི་གྲོགས་སུ་འགྲོ་མི་བྱེད། །ནད་པའི་རིམ་གྲོ་བྱ་བ་སྤོང་། །སྡུག་བསྔལ་སེལ་བར་མི་བྱེད་དང་། །བག་མེད་པ་ལ་རིགས་མི་སྟོན། །ཞེས་དང་། གཉིས་པ་གཞན་ལ་ཕན་མི་འདོགས་པའི་ཉེས་པ་དྲུག་ནི། །བྱས་ལ་ལན་དུ་ཕན་མི་འདོགས། །གཞན་གྱི་མྱ་ངན་སེལ་མི་བྱེད། །ནོར་འདོད་པ་ལ་སྦྱིན་མི་བྱེད། །འཁོར་རྣམས་ཀྱི་ནི་དོན་མི་བྱེད། །གཞན་གྱི་བློ་དང་མཐུན་མི་འཇུག །ཡོན་ཏན་བསྔགས་པ་སྨྲ་མི་བྱེད། །ཅེས་དང་། གསུམ་པ་ངན་པ་ཚར་མི་གཅོད་པའི་ཉེས་པ་གཉིས་ནི། རྐྱེན་དང་འཚམས་པར་ཚར་མི་གཅོད། །རྫུ་འཕྲུལ་བསྡིགས་ལ་སོགས་མི་བྱེད། །ཅེས་སོ། །འདི་དག་འགྲེལ་བ་ཅི་རིགས་པར་གསུམ་གསུམ་དུ་བྱས་ནས་བཤད་དེ། གལ་ཏེ་མ་གུས་པ་དང་། སྙོམས་ལས་པ་དང་། ལེ་ལོས་ཉེས་པ་བྱུང་ན་ནི་ཉོན་མོངས་པ་ཅན་གྱི་ཉེས་པར་འགྱུར་རོ། །གལ་ཏེ་བརྗེད་པས་ཉེས་པ་བྱུང་ན་ནི་ཉོན་མོངས་པ་ཅན་མ་ཡིན་པའི་ཉེས་པར་འགྱུར་ལ། སེམས་འཁྲུགས་པ་ལ་ནི་ཉེས་པ་མེད་དོ། །ཞེས་སོ། །ཉེས་སྤྱོད་སྡོམ་པ་དང་འགལ་བ་ནི་བཤད་མི་དགོས་ཏེ། རྟེན་རབ་བྱུང་ཡིན་ན་སོ་ཐར་གྱི་ཕམ་བཞི་འདིར་ཡང་རྩ་ལྟུང་དང་། དེ་མ་ཡིན་པའི་ལྟུང་བ་རྣམས་བྱང་སེམས་ཀྱི་ཡན་ལག་གི་ཉེས་བྱས་སུ་འགྱུར་བ་དང་། རབ་བྱུང་མིན་ཀྱང་རང་སའི་རྩ་ལྟུང་གི་ཕྱོགས་དང་མཐུན་པའི་ཉེས་པ་ཕྲ་བ་རྣམས་ཉེས་བྱས་སུ་འགྱུར་བས་སོ། །གཉིས་པ་དགེ་བ་ཆོས་སྡུད་ཀྱི་ཚུལ་ཁྲིམས་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོ་བསྟན་པ་ནི། དགེ་བ་ཆོས་སྡུད་ཕར་ཕྱིན་དྲུག་སློབ་སྟེ། །ཞེས་པས། རང་གཞན་ཀུན་ལ་དགེ་བ་བསོད་ནམས་ཀྱི་ཆོས་ཚོགས་ཟབ་མོ་ཡིད་བཞིན་དུ་སྡུད་པར་བྱེད་པ་ནི་ཕ་རོལ་ཏུ་ཕྱིན་པ་དྲུག་ལ་ཚུལ་བཞིན་དུ་སློབ་པར་བྱ་བ་སྟེ། ཞེས་མདོར་བསྟན་ནས། གཉིས་པ་རྒྱས་པར་བཤད་པ་ལ་དྲུག་ལས། དང་པོ་སྦྱིན་པའི་ཕར་ཕྱིན་ལ། དབུལ་བ་སེལ་ཕྱིར་ཆོས་ནོར་མི་འཇིགས་སྦྱིན། །ཞེས་པས། དེ་ལ་སྦྱིན་པའི་ངོ་བོ་ནི་ཁྱད་ཆོས་བཞི་ལྡན་གྱི་གཏོང་སེམས་དགེ་བ་ས་བོན་དང་བཅས་པའོ། །སྒྲ་དོན་ནི། དཱ་ན་ཞེས་པའི་སྒྲ་ལས། ཕ་རོལ་གྱི་དབུལ་བ་སེལ་བའི་ཕྱིར་སྦྱིན་པ་ཞེས་བྱའོ། །དབྱེ་ན་ཆོས་ཀྱི་སྦྱིན་པ་ནི་སྣོད་བརྟག་ཅིང་སྙིང་རྗེ་ཆེན་པོས་སྐལ་བ་དང་འཚམས་པར་ལེགས་བཤད་ཀྱི་དགའ་སྟོན་འགྱེད་པ་དང་། ཟང་ཟིང་ནོར་གྱི་སྦྱིན་པ་ལ་ཟས་གོས་ཁང་ཁྱིམ་རྟ་དང་ཤིང་རྟ་ལ་སོགས་པ་གཏོང་བ་དང་། གཏོང་བ་ཆེན་པོ་ལ་བུ་དང་ཆུང་མ་རྒྱལ་སྲིད་སོགས་གཏོང་བ་དང་། བྱ་དཀའ་བའི་གཏོང་བ་ལ་རང་གི་མགོ་དང་རྐང་ལག་སོགས་གཏོང་བའོ། །འོན་ཀྱང་ཕ་དང་མ་སྦྱིན་པ་དང་། རབ་ཏུ་བྱུང་བས་ཆོས་གོས་གསུམ་སྦྱིན་པ་དང་། བསམ་པ་མ་དག་ན་རང་གིས་ལུས་སྦྱིན་པ་རྣམས་མི་བྱའོ། །དེ་ཡང་བྱང་སེམས་ཁྱིམ་པས་ཟང་ཟིང་དང་རབ་བྱུང་གིས་ཆོས་སྦྱིན་གཙོ་བོར་གཏོང་བར་གསུངས། མི་འཇིགས་པའི་སྦྱིན་པ་ལ། གནས་སྐབས་སུ་ནད་གདོན། ཆོམ་རྐུན་གཅན་གཟན། རྒྱལ་པོ་སོགས་ཀྱི་འཇིགས་པ་དང་། མཐར་ཐུག་འཁོར་བ་དང་ངན་སོང་གི་འཇིགས་པ་ལས་སྐྱོབས་པའོ། །གཉིས་པ་ཚུལ་ཁྲིམས་ཀྱི་ཕར་ཕྱིན་ལ། སྤོང་བའི་སེམས་ཀྱིས་ཚུལ་ཁྲིམས་རྣམ་གསུམ་སྤྱད། །ཅེས་པས། དེ་ལ་ཚུལ་ཁྲིམས་ཀྱི་ངོ་བོ་ནི་ཁྱད་ཆོས་བཞི་ལྡན་གྱི་སྤོང་བའི་སེམས་ཀྱིས་ཉེས་པ་བསྲུང་འདོད་ཀྱི་སེམས་དགེ་བ་ས་བོན་དང་བཅས་པའོ། །སྒྲ་དོན་ནི། ཤཱི་ལའི་སྒྲ་ལས་ཡུལ་གྱི་གདུང་བས་མི་བརྫི་བར་བསིལ་བ་ཐོབ་པར་བྱེད་པས་ན་ཚུལ་ཁྲིམས། དབྱེ་ན། དང་པོ་བྱང་ཆུབ་ཀྱི་སེམས་གནས་པའི་ཐབས་ཉེས་སྤྱོད་སྡོམ་པའི་ཚུལ་ཁྲིམས། གཉིས་པ་རང་རྒྱུད་ཀྱི་ཆོས་སྨིན་པའི་ཐབས་དགེ་བ་ཆོས་སྡུད་ཀྱི་ཚུལ་ཁྲིམས། གསུམ་པ་སེམས་ཅན་རྣམས་སྨིན་པའི་ཐབས་སེམས་ཅན་དོན་བྱེད་ཀྱི་ཚུལ་ཁྲིམས་ཏེ། དེ་ལྟར་ཚུལ་ཁྲིམས་རྣམ་པ་གསུམ་པོ་ལ་བླང་དོར་མ་ནོར་ཞིང་བསམ་སྦྱོར་དག་པའི་སྒོ་ནས་གཞན་དོན་དུ་སྤྱད་པར་བྱ་ཞེས་པ་སྟེ། འདི་དག་ལ་གོ་དོན་དུ་ཉེས་སྤྱོད་སྡོམ་པའི་ཚུལ་ཁྲིམས་ནི་ཐུན་མོང་དུ་རང་གི་སྔར་གང་བླངས་པའི་སོ་ཐར་རིས་བདུན་གྱི་བསླབ་བྱ་རྣམས་དང་། ཐུན་མོང་མ་ཡིན་པ་རྩ་བ་དང་ཡན་ལག་གི་ལྟུང་བ་རྣམས་མ་ཉམས་པར་བྱ་བ་དང་། དགེ་བ་ཆོས་སྡུད་ཀྱི་ཚུལ་ཁྲིམས་ནི། ཐོས་བསམ་སྒོམ་པ་སོགས་ཚོགས་གཉིས་དང་ཕྱིན་དྲུག་གིས་བསྡུས་པའི་དགེ་བའི་ཆོས་རང་རྒྱུད་ལ་མ་སྐྱེས་པ་བསྐྱེད་པ་དང་། སྐྱེས་པ་སྤེལ་ཞིང་དེའི་མི་མཐུན་ཕྱོགས་མཐའ་དག་སྤོང་བ་དང་། སེམས་ཅན་དོན་བྱེད་ཀྱི་ཚུལ་ཁྲིམས་ནི། བསམ་སྦྱོར་མཐའ་དག་གཞན་དོན་དུ་སྤྱོད་པའི་ཐབས་མཁས་ཀྱི་དངོས་བརྒྱུད་ཐམས་ཅད་ནས་ཕ་རོལ་པོའི་དོན་བསྒྲུབ་པ་དང་། དེ་དག་དད་ཅིང་། རང་ཉིད་མི་ཉམས་པའི་ཆེད་དུ་སྒོ་གསུམ་གྱི་འདུ་བྱེད་མ་དག་པ་ཐམས་ཅད་སྤངས་ཤིང་དག་པ་གསུམ་བསྟེན་པར་བྱའོ། །གསུམ་པ་བཟོད་པའི་ཕར་ཕྱིན་ལ། ཁོང་ཁྲོ་ཟབ་མོ་སྡུག་བསྔལ་བཟོད་པར་བྱ། །ཞེས་པས། དེ་ལ་བཟོད་པའི་ངོ་བོ་ནི་ཁྱད་ཆོས་བཞི་ལྡན་གྱི་མི་འཁྲུག་པའི་སེམས་དགེ་བ་ས་བོན་དང་བཅས་པའོ། །སྒྲ་དོན་ནི། ཀྵནྟའི་སྒྲ་ལས་སྡུག་བསྔལ་སོགས་མི་བདེ་མི་དགའ་བའི་ཡུལ་ལ་སེམས་མི་འཁྲུགས་པར་བསྲན་ཚུགས་པས་ན་བཟོད་པའོ། །དབྱེ་ན། གནོད་བྱེད་ལ་ཇི་མི་སྙམ་པའི་བཟོད་པ་དང་། སྡུག་བསྔལ་དང་དུ་ལེན་པའི་བཟོད་པ་དང་། ཆོས་ལ་ངེས་རྟོག་གི་བཟོད་པ་དང་གསུམ་ལས། དང་པོ་ནི། བདག་དང་བདག་གི་ཡིད་དུ་འོང་བའི་གྲོགས་ལ་གཞན་གྱིས་བརྡེག་གཤེ་ཁྲོ་བ་མཚང་འབྲུ་བ་སོགས་མི་འདོད་པར་བྱེད་པ་དང་། འདོད་པའི་གེགས་བྱེད་པ་ལ་བཟོད་པའོ། །ཇི་ལྟར་བཟོད་ན་ཁོང་ཁྲོའི་ཉེས་དམིགས་ལ་བསམ་སྟེ་ཕ་རོལ་གྱིས་གནོད་པ་བྱེད་པ་ལ་ཇི་མི་སྙམ་དུ་སེམས་མི་འཁྲུགས་པར་གནོད་ལན་མི་བྱེད་པ་དང་། འཁོན་ཞེ་ལ་མི་འཛིན་པར་མ་ཟད་སླར་ཡང་སྙིང་རྗེ་བསྐྱེད་པ་བྱ་བ་དང་། གཉིས་པ་ནི། བྱང་ཆུབ་བསྒྲུབ་པའི་དཀའ་སྤྱད་ཀྱི་སྡུག་བསྔལ་མཐའ་དག་དང་དུ་ལེན་པ་སྟེ། ནད་ཀྱི་ཟུག་རྔུ་འབྱིན་པ་ལ་དཔྱད་བརྟེན་པ་བཞིན་ནོ། །གསུམ་པ་ནི། སྟོང་ཉིད་ལ་སོགས་པ་ཟབ་མོའི་དོན་ལ་མི་སྐྲག་ཅིང་གཞན་དོན་ལ་མི་སྐྱོ་བ་དང་། ཕུག་གི་བདེ་བ་བླ་ན་མེད་པའི་དོན་དུ་འཕྲལ་གྱི་སྡུག་བསྔལ་དམ་ཆོས་སྒྲུབ་པའི་དཀའ་སྤྱད་སོགས་ཀྱིས་མི་སྐྱོ་བར་དང་དུ་བླང་ནས་བཟོད་པར་བྱ་བའོ། །བཞི་པ་བརྩོན་འགྲུས་ཀྱི་ཕར་ཕྱིན་ལ། གོ་ཆ་དགེ་སྡུད་གཞན་ཕན་བརྩོན་འགྲུས་བརྩམ། །ཞེས་པས། དེ་ལ་བརྩོན་འགྲུས་ཀྱི་ངོ་བོ་ནི་ཁྱད་ཆོས་བཞི་ལྡན་གྱི་སྤྲོ་བའི་སེམས་པ་དགེ་བ་ས་བོན་དང་བཅས་པའོ། །སྒྲ་དོན་ནི། བཱིརྻའི་སྒྲ་ལས་སྙིང་སྟོབས་མ་ཞུམ་པས་མཆོག་གི་གནས་ལ་སྦྱོར་བས་ན་བརྩོན་འགྲུས་སོ། །དབྱེ་ན། དང་པོ་གོ་ཆའི་བརྩོན་འགྲུས་དང་། གཉིས་པ་དགེ་བ་ཆོས་སྡུད་ཀྱི་བརྩོན་འགྲུས་དང་། གསུམ་པ་གཞན་ལ་ཕན་པའི་བརྩོན་འགྲུས་དང་གསུམ་ལས། དང་པོ་ནི། བསམ་པ་བདུད་ཀྱིས་མི་བརྗི་བའི་རྒྱུ་སེམས་ཅན་ཐམས་ཅད་རྫོགས་བྱང་ལ་མ་འཁོད་ཀྱི་བར་དུ་བདག་གིས་བརྩོན་པ་འདོར་བར་མི་བྱའོ་སྙམ་དུ་བསམ་པའི་གོ་ཆ་བགོ་བ་དང་། གཉིས་པ་ནི། ལུས་དང་སྲོག་ལའང་མི་བལྟ་བར་བྱང་ཆུབ་ཆེན་པོ་ཐོབ་པའི་རྒྱུ་དགེ་བའི་ཚོགས་ཐམས་ཅད་སྡུད་པར་འཇུག་ཅིང་དེ་ཡང་སྒྲུབ་པ་ལ་མི་ཞུམ་ཞིང་ཅུང་ཟད་ཙམ་གྱིས་མི་ངོམས་པ་རྐྱེན་གྱི་མི་ལྡོག་པའི་སྒོ་ནས་གུས་རྟག་གིས་བརྩོན་པར་བྱ་བ་དང་། གསུམ་པ་ནི། དོན་གཉིས་འགྲུབ་པའི་རྒྱུ་གཞན་ལ་ཕན་པའི་དངོས་པོ་སྒྲུབ་པ་ལ་སྤྲོ་བའི་སྒོ་ནས་འཇུག་པའི་བརྩོན་འགྲུས་བརྩམ་པའོ། །ལྔ་པ་བསམ་གཏན་གྱི་ཕར་ཕྱིན་ལ། འཇིག་རྟེན་འཇིག་རྟེན་འདས་པའི་བསམ་གཏན་བསྒོམ། །ཞེས་པས། དེ་ལ་བསམ་གཏན་གྱི་ངོ་བོ་ནི་ཁྱད་ཆོས་བཞི་ལྡན་གྱི་དམིགས་པ་ལ་རྩེ་གཅིག་པའི་སེམས་པ་དགེ་བ་ས་བོན་དང་བཅས་པའོ། །སྒྲ་དོན་ནི། རྟྱཱེན་ཞེས་པའི་སྒྲ་ལས་སེམས་པའི་རྒྱུན་གཞན་དུ་མི་ཡེངས་པར་འཛིན་པས་ན་བསམ་གཏན་ནོ། །དབྱེ་ན། ཕྱི་རོལ་པ་དང་ཐུན་མོང་དུ་གྱུར་པའི་བསམ་གཟུགས་བརྒྱད་སྒོམ་པ་འཇིག་རྟེན་པའི་དང་། འདས་ལམ་གྱིས་ཐོབ་པའི་ཐེག་གསུམ་སོ་སོའི་ཏིང་ངེ་འཛིན་འཇིག་རྟེན་ལས་འདས་པའི་བསམ་གཏན་སྒོམ་པ་གཉིས་སོ། །དེ་ཡང་ལང་གཤེགས་ལས་གསུངས་པ་ལྟར་གསུམ་དུ་དབྱེ་ན་ལམ་ལ་མ་ཞུགས་པའི་རྒྱུད་ཀྱི་བསམ་གཟུགས་བྱིས་པ་ཉེར་སྤྱོད་ཀྱི་དང་། ལམ་ཞུགས་ཚོགས་སྦྱོར་གྱི་ཏིང་ངེ་འཛིན་དོན་རབ་འབྱེད་པའི་དང་། མཐོང་ལམ་ཡན་ཆད་ཀྱི་འཕགས་པའི་ཏིང་ངེ་འཛིན་རྣམས་ལ་དེ་བཞིན་གཤེགས་དགེའི་བསམ་གཏན་ཞེས་བྱ་བ་དེ་རྣམས་སོ། །དྲུག་པ་ཤེས་རབ་ཀྱི་ཕར་ཕྱིན་ལ། ཐོས་བསམ་སྒོམ་པའི་ཤེས་རབ་ཟབ་མོ་སྤྱད། །ཞེས་པས། དེ་ལ་ཤེས་རབ་ཀྱི་ངོ་བོ་ནི་ཁྱད་ཆོས་བཞི་ལྡན་གྱི་ཆོས་རབ་རྣམ་པར་འབྱེད་པའི་སེམས་པ་དགེ་བ་ས་བོན་དང་བཅས་པའོ། །སྒྲ་དོན་ནི། པྲཛྙཱ་ཞེས་པའི་སྒྲ་ལས་རབ་ཏུ་རྟོགས་པའམ་རབ་ཏུ་ཁོང་དུ་ཆུད་པས་ན་ཤེས་རབ་བོ། །དབྱེ་ན། ཐོས་བསམ་སྒོམ་པའི་ཤེས་རབ་ཅེས་པ་སྟེ། འདི་དག་གི་གོ་དོན་ལྷོངས་པ་གནད་ཆེ་བས་ན་ཅུང་ཟད་ཞིབ་ཏུ་སྤྲོས་ན། དང་པོ་ཐོས་པ་ལས་བྱུང་བའི་ཤེས་རབ་ནི། གསུང་རབ་དགོངས་འགྲེལ་དང་བཅས་པ་ནང་རིག་པ་དང་། དེས་གདུལ་བྱ་རྗེས་སུ་འཛིན་པའི་ཡན་ལག་ཏུ་ཐུན་མོང་གི་རིག་གནས་བཟོ་གསོ་སྒྲ་ཚད་བཞི་དང་བཅས་པ་ལ་མཁས་པར་བྱ་བ་སྟེ། མདོ་སྡེ་རྒྱན་ལས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་གཅོད་རྗེས་བཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་གསུངས་ཤིང་། ཁྱད་པར་དུ་གསུང་རབ་ཀྱི་དོན་རྣམས་དཔྱིས་ཕྱིན་པ་ཁོང་དུ་ཆུད་པར་བྱེད་པ་ལ། སྤྱིར་དྲང་ངེས་ལྡེམ་དགོངས་ལ་སོགས་པའི་སྒོ་ནས་འཇལ་དགོས་ཀྱང་། འདིར་ཆོས་རྣམས་ཀྱི་གནས་ལུགས་ཇི་བཞིན་པ་ལ་ངེས་པ་ཐོབ་པའི་ཤེས་རབ་བསྐྱེད་པའི་ཕྱིར་ཡོད་པ་སྒྲོ་འདོགས་ཀྱི་མཐའ་སེལ་བྱེད་ངོ་བོ་ལ་དཔྱོད་པ་གཅིག་དུ་བྲལ། རྒྱུ་ལ་དཔྱོད་པ་རྡོ་རྗེའི་ཟེ ག་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག །རྒྱུ་འབྲས་གཉིས་ཀ་ལ་དཔྱོད་པ་མུ་བཞི་སྐྱེ་འགོག་སྟེ་བཞི་དང་། ཡོད་མེད་གཉིས་ཀའི་སྤྲོས་པ་གཅོད་བྱེད་རྟེན་འབྲེལ་ཆེན་མོ་སྟེ་གཏན་ཚིག་ཆེན་པོ་ལྔས་ཀུན་རྫོབ་སྤྲོས་པའི་སྣང་ཞེན་ཐམས་ཅད་སྤྲོས་བྲལ་དུ་གཏན་ལ་འབེབས་པ་བཀའ་བར་པའི་དགོངས་དོན་ལྟར་དང་། བློ་ལས་འདས་པའི་ཆོས་ཉིད་དོན་དམ་འོད་གསལ་བའི་ཡེ་ཤེས་སྟོང་མི་སྟོང་ལ་སོགས་པའི་དཔྱོད་ཡུལ་ལས་འདས་པའི་བསམ་གྱིས་མི་ཁྱབ་པའི་ངོ་བོ་བཀའ་ཐ་མ་དང་། སྔགས་རྒྱུད་རྣམས་སུ་གསུངས་པའི་དོན་ལ་ངེས་པ་ནང་ནས་འདྲོངས་པ་ཞིག་བྱེད་དགོས་སོ། །དེ་ནས་བསམ་བྱུང་གི་ཤེས་རབ་བསྐྱེད་པ་ནི། ཇི་སྐད་ཐོས་པའི་དོན་ལ་ཉེ་བར་དཔྱོད་པས་ནང་དུ་སེམས་པར་འཇུག་པ་ན་བྱེ་བྲག་འབྱེད་པའི་བསམ་ཤེས་ཀྱི་དོན་སྤྱི་ཙམ་དུ་མ་ལུས་པར་རེ་རེ་ནས་ཚིག་དང་དོན་གྱི་རིམ་པ་རྣམས་ནོར་མ་ནོར་བརྟག་ཅིང་ངེས་པར་བྱ་སྟེ། ཡེ་ཤེས་སྙིང་པོ་ཀུན་ལས་བཏུས་པ་ལས། བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་པ་ལྟར་དད་པས་འཇུག་པ་ཙམ་མ་ཡིན་པར་ཡིད་ཆེས་བསྐྱེད་པའི་ལུང་དང་། དངོས་སྟོབས་ཀྱི་རིག་པ་དང་། སྔ་ཕྱི་མི་འགལ་བ་གསུམ་གྱི་བརྟགས་ནས་བླང་བར་བྱ་སྟེ། བཞི་བརྒྱ་པ་ལས། དོན་གང་ལུང་དང་རིག་པ་ཡིས། །ལེགས་པར་མངོན་པར་བརྗོད་པ་དང་། །སྔ་ཕྱི་འགལ་བ་མེད་པ་སྟེ། །དམ་པ་རྣམས་ཀྱིས་ཡོངས་སུ་བཟུང་། །ཞེས་སོ། །དེ་ལྟར་བསམ་བྱ་ཡོངས་སུ་རྫོགས་པ་ན་སྒོམ་པ་ལས་བྱུང་བའི་ཤེས་རབ་ཟབ་མོ་རྒྱུད་ལ་བསྐྱེད་པར་བྱ་སྟེ། དེ་ཡང་སྤྱིར་ཇི་ལྟར་ངེས་པའི་དོན་རྣམས་བླང་དོར་གྱི་སྒོ་ནས་སྒྲུབ་ཅིང་ཉམས་སུ་ལེན་པ་དང་། ཁྱད་པར་ལྷག་མཐོང་གི་ཤེས་རབ་རྣམ་པར་མི་རྟོག་པའི་ཡེ་ཤེས་ཉམས་སུ་བླང་བ་ནི། འཁོར་ལོ་བར་ཐ་དང་སྔགས་ཀྱི་རྒྱུད་དེ་ཟབ་མོ་རྣམས་སུ་བཤད་པའི་དགོངས་དོན་རྣམས་འགལ་མེད་དུ་བསམ་བྱུང་གིས་གཏན་ལ་ཕེབས་པའི་ངང་དུ་བློ་རྟོག་གི་སྤྲོས་པ་ཐམས་ཅད་བཅད་ནས་འཇོག་པར་བྱ་བ་སྟེ། སྒྲ་གཅན་འཛིན་གྱིས་ཡུམ་ལ་བསྟོད་པ་ལས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་སོ། །དེ་ལྟར་བཞག་པས་སྤྲིན་དེངས་པ་ན་ཉི་མའི་དཀྱིལ་འཁོར་གསལ་བ་ལྟར་མཉམ་བཞག་གི་རིག་ངོ་ན་ངོས་བཟུང་གང་དུའང་མ་གྲུབ་པའི་བློ་བྲལ་གྱི་ཡེ་ཤེས་རང་གསལ་རྗེན་པར་གནས་པ་ནི་སེམས་ཀྱི་རང་བཞིན་འོད་གསལ་བ་ཁོང་ནས་ཤར་བ་སྟེ། དེ་ལ་ཡང་ཡང་གོམས་པའི་སྟོབས་ཀྱིས་རང་གནས་ཀྱི་ཡེ་ཤེས་མ་རྟོགས་པའི་སེམས་ཅན་རྣམས་ལ་སྙིང་རྗེ་ཆེན་པོ་ངང་གིས་འབྱུང་བ་ནི་ཆོས་ཉིད་ཡིན་པས། དེ་ལྟ་བུའི་སྟོང་ཉིད་སྙིང་རྗེ་ཟུང་དུ་འཇུག་པ་དེ་ནི་ཐེག་པ་ཆེན་པོའི་མདོ་སྔགས་ཀྱི་ལམ་ཐམས་ཅད་ཀྱི་དངོས་གཞིར་ངེས་པས་གནད་མ་འཆུག་པར་བྱ་དགོས་ལ། དེ་ཡང་སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་བསྔོ་བ་སྟེ་དམ་པ་གསུམ་གྱིས་རྩིས་ཟིན་པའི་སྒོ་ནས་སྤྱད་པར་བྱ་བ་སྟེ་ཤེས་རབ་རྣམ་པ་གསུམ་མོ། །གསུམ་པ་སེམས་ཅན་དོན་བྱེད་ཀྱི་ཚུལ་ཁྲིམས་ལ་གཉིས། དོན་བྱེད་ཀྱི་ཚུལ་ཁྲིམས་དངོས་དང་། ཚུལ་ཁྲིམས་གསུམ་ཀ་དང་འབྲེལ་བའི་བསླབ་པ་བཤད་པའོ། །དང་པོ་དོན་བྱེད་ཀྱི་ཚུལ་ཁྲིམས་དངོས་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། སེམས་ཅན་དོན་བྱེད་ཚུལ་ཁྲིམས་བསྡུ་དངོས་གཞི། །ཞེས་པས། སེམས་ཅན་རྣམས་ཀྱི་དོན་བྱེད་པའི་ཚུལ་ཁྲིམས་ནི་ཕྱིན་དྲུག་གིས་རང་རྒྱུད་སྨིན་པར་བྱས་ནས་རང་དོན་ཡིད་བྱེད་ཀྱི་བློ་དང་མ་འདྲེས་པར་བསྡུ་བའི་དངོས་པོ་བཞི་ཡི་སྒོ་ནས་གདུལ་བྱ་རྣམས་ཀྱི་དོན་བྱེད་པའོ། །གཉིས་པ་རྒྱས་པར་བཤད་པ་ནི། ཐོག་མར་སྦྱིན་པས་གདུལ་བྱ་རབ་བསྡུས་ནས། །སྙན་པར་སྨྲ་བའི་གཏམ་གྱིས་ཡིད་རབ་དྲངས། །ཐེག་པ་རིམ་དགུར་དཀྲི་བ་དོན་སྤྱོད་དེ། །དེ་དག་འདྲེན་ཕྱིར་རང་ཡང་དོན་དེ་སྤྱོད། །ཅེས་པ་སྟེ། བྱང་ཆུབ་སེམས་དཔའ་དེ་དགེ་བ་ཆོས་སྡུད་ཀྱིས་རང་རྒྱུད་སྨིན་པར་བྱས་ནས། གཞན་རྒྱུད་སྨིན་པའི་ཕྱིར་དུ་ཐོག་མར་ཟང་ཟིང་གི་སྦྱིན་པས་གདུལ་བྱ་འཁོར་དུ་མ་འདུས་པ་རྣམས་རབ་ཏུ་བསྡུས་ནས། དེ་ནས་འཁོར་དུ་འདུས་པ་དེ་དག་ལ་སྙད་པར་སྨྲ་བའི་གཏམ་གྱིས་ཡིད་རབ་ཏུ་དྲངས་ཏེ་དམ་པའི་ཆོས་ལ་ཡིད་ཆེས་ཀྱི་སྒོ་ནས་དོན་དུ་གཉེར་བའི་མོས་འདུན་བསྐྱེད་དུ་འཇུག །དེ་ནས་དོན་གཉེར་དང་ལྡན་པ་དེ་རྣམས་ཀྱང་ཆོས་གཅིག་གིས་བློ་རིམ་ཐ་དད་པ་སྨིན་པར་མི་ནུས་པས། བློ་ཐ་མའི་ཆུང་འབྲིང་ཆེ་གསུམ་ལ་ཉན་རང་བྱང་སེམས་གསུམ་དང་། བློ་འབྲིང་གསུམ་ལ་བྱ་སྤྱོད་རྣལ་འབྱོར་གསུམ་དང་། བློ་རབ་གསུམ་ལ་བསྐྱེད་རྫོགས་རྫོགས་ཆེན་གསུམ་སྟེ། ཐེག་པ་རིམ་པ་དགུར་རིམ་གྱིས་དཀྲི་བ་ནི་དོན་སྤྱོད་པ་ལ་བཤད་དེ། པདྨ་སྤུངས་པ་ལས། སྦྱིན་པའི་གཡབ་མོས་ལེགས་པོས་ཏེ། །སྙན་པར་སྨྲ་བའི་ཚིག་གིས་བསུ། །དོན་མཐུན་པ་ཡི་བག་ཕབ་སྟེ། །དོན་སྤྱོད་གྲོས་ཆེན་གདབ་པར་བྱ། །ཞེས་སོ། །དེ་ལྟར་དཀྲི་བའི་གདུལ་བྱ་དེ་དག་གི་དོན་ཡང་ཉམས་སུ་ལེན་པའི་སྒོ་ནས་འདྲེན་དགོས་པའི་ཕྱིར་རང་ཡང་དོན་དེ་དག་ལ་མཐུན་པར་སྤྱོད་དགོས་ཏེ། རང་གིས་མ་བསྒྲུབ་ན་མཛེ་ཕོས་བྱ་ཁྱུང་གི་གདམས་ངག་སྟོན་པ་ལྟར་གཞན་ལ་བླང་དོར་གྱི་བསླབ་བྱ་འདོམས་ཀྱང་ཉན་དུ་མི་འདོད་པའི་ཕྱིར་རོ། །གཉིས་པ་ཚུལ་ཁྲིམས་གསུམ་ཀ་དང་འབྲེལ་བའི་བསླབ་པ་བཤད་པ་ནི། མཐུན་ཕྱོགས་ཀུན་སློབ་མི་མཐུན་མཐའ་དག་སྤངས། །རྟག་ཏུ་དྲན་དང་ཤེས་བཞིན་བག་ཡོད་བརྟེན། །འགྲོ་འདུག་ཟ་ཉལ་སྤྱོད་ལམ་རྣམ་པ་བཞིར། །སྤྱོད་ཡུལ་ཡོངས་སུ་དག་པའི་མདོ་སྡེ་ལྟར། །གང་བྱེད་རིགས་མཐུན་ཚིག་གིས་སྨོན་ལམ་འདེབས། །ཞེས་པ་སྟེ། རྫོགས་པའི་སངས་རྒྱས་བསྒྲུབ་པའི་ཐབས་ཀྱི་མཐུན་ཕྱོགས་ཀྱི་དགེ་བ་རང་རྒྱུད་ལ་མ་སྐྱེས་པ་ཀུན་བསྐྱེད་པ་ལ་སློབ་ཅིང་སྐྱེས་པ་རྣམས་གོང་དུ་སྤེལ་བ་དང་། མི་མཐུན་པའི་ཕྱོགས་མི་དགེ་བ་མཐའ་དག་མི་བསྐྱེད་ཅིང་སྐྱེས་པ་རྣམས་སྤངས་པ་དང་། དེ་ཡང་དུས་རྟག་ཏུ་བསླབ་པ་བསྲུང་སེམས་མི་བརྗེད་པའི་དྲན་པ་དང་། རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་བཞིན། འཇུག་ལྡོག་གི་གནས་མི་འཆོལ་བར་གཟོབ་པའི་བག་ཡོད་དང་གསུམ་པོ་རྒྱུན་ཆགས་སུ་བརྟེན་ཅིང་། དེ་ལྟར་དྲན་ཤེས་བག་ཡོད་གསུམ་དང་ལྡན་པའི་ངང་ནས་འགྲོ་ན་མིག་གཉའ་ཤིང་ཙམ་དུ་ལྟ་བ་དང་། འདུག་ན་ལུས་དྲང་པོར་བསྲང་སྟེ་དྲན་པ་མངོན་དུ་བཞག་པ་དང་། ཟས་ཟ་ན་ཕུད་དཀོན་མཆོག་ལ་མཆོད་ཅིང་ལུས་ཀྱི་སྲིན་བུ་རྣམས་ལ་ཕན་འདོགས་པའི་བསམ་པས་ཆགས་ཞེན་མེད་པར་སྤྱོད་ནས་བསྔོ་བ་བྱ་བ་དང་། ཉལ་བ་ན་གཞོགས་གཡས་ས་ལ་ཕབ་ཅིང་མགོ་བོ་བྱང་དུ་བསྟན་ཏེ་དཀོན་མཆོག་གསུམ་རྗེས་སུ་དྲན་པའི་ངང་ནས་ཉལ་བ་སོགས་སྤྱོད་ལམ་རྣམ་པ་བཞིར་དགེ་བའི་བྱ་བས་དུས་འདའ་བར་བྱ་སྟེ། དེ་ཡང་ཇི་ལྟར་ན་ཕལ་པོ་ཆེ་སྤྱོད་ཡུལ་ཡོངས་སུ་དག་པའི་མདོ་སྡེ་ལས་ཇི་སྐད་གསུངས་པ་ལྟར། བྱ་བ་གང་དང་གང་བྱེད་པ་ཐམས་ཅད་དེ་དང་དེའི་རིགས་མཐུན་པར་ཚིག་གི་སྒོ་ནས་ཀྱང་སྨོན་ལམ་འདེབས་པར་བྱའོ། །གསུམ་པ་དོན་བསྡུ་བ་ལ་གཉིས། མཁས་པ་གཞན་གྱི་བཞེད་པ་ཟློས་པ་དང་། རང་གི་བཞེད་པ་འགོད་པའོ། །དང་པོ་མཁས་པ་གཞན་གྱི་བཞེད་པ་ཟློས་པ་ནི། མཁྱེན་རབ་དབང་ཕྱུག་ཀློང་ཆེན་རབ་འབྱམས་ནི། །སྨོན་པའི་བསླབ་བྱ་ཚང་མེད་བཞི་སྒོམ་ཞིང་། །འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱོད། །བསྡུ་ན་དཀར་ནག་ཆོས་བརྒྱད་འདུ་ཞེས་གསུངས། །ཞེས་པ་སྟེ། ཤེས་བྱ་རྣམ་པར་འབྱེད་པའི་མཁྱེན་རབ་འཕུལ་དུ་བྱུང་ཞིང་གསུང་རབ་དགོངས་འགྲེལ་དང་བཅས་པའི་ཚིག་དོན་དབང་འབྱོར་ལ། ལུང་དང་རྟོགས་པའི་ཡོན་ཏན་གྱིས་ཐུགས་རྒྱུད་ཕྱུག་པ་ཀློང་ཆེན་རབ་འབྱམས་དཔལ་བཟང་པོས་ནི། སྨོན་པའི་བསླབ་བྱ་གནད་བསྡུས་པ་ཚད་མེད་བཞིས་བློ་སྦྱངས་ནས་ཡང་ཡང་བསྒོམ་ཞིང་སེམས་ཅན་གྱི་ཕན་བདེ་སྙིང་ཁོངས་སུ་ཆུབ་པར་འདུ་སྟེ་བྱང་ཆུབ་ཀྱི་སེམས་མི་འདོར་བ་ཉིད་སྨོན་པ་མི་འཆོར་བའི་བསླབ་བྱར་བཤད་པའི་ཕྱིར་དང་། འཇུག་པའི་བསླབ་བྱ་རྒྱལ་སྲས་རྣམས་ཀྱིས་བསྒྲུབ་བྱའི་དགེ་བ་མཐའ་དག་ཕ་རོལ་ཏུ་ཕྱིན་པ་དྲུག་ཏུ་བསྡུ་བས་དེ་དག་ལ་ཚུལ་བཞིན་དུ་སྤྱོད་པ་སྟེ། དེ་ཡང་བསྡུ་ན་དཀར་ནག་ཆོས་བརྒྱད་ལ་བླང་དོར་བྱེད་པར་འདུ་ཞེས་གསུངས་སོ། །གཉིས་པ་རང་གི་བཞེད་པ་འགོད་པ་ནི། འདིར་ནི་ཕན་དང་བདེ་བ་རྣམས་བྱ་ཞིང་། །འདིར་ཡང་མི་ཕན་ཕྱི་མར་གནོད་པ་སྤངས། །སྲོལ་གཉིས་བསླབ་བྱར་མ་འདུས་མེད་ཅེས་སྨྲ། །ཞེས་པ་སྟེ། གཞན་ཡང་བྱམས་པས་ཀུན་ནས་བསླངས་ཏེ་གང་ཅི་སྤྱོད་ཀྱང་རུང་། རང་གཞན་ལ་ཚེ་འདིར་ནི་ཕན་པ་དང་། ཕྱི་མ་ཕན་ཆད་མཐར་ཐུག་ཏུ་བདེ་བ་བསྒྲུབ་པའི་རྒྱུར་འགྱུར་བ་རྣམས་ནི་ཐབས་ལ་མཁས་པས་བླང་བར་བྱ་ཞིང་། ཞེ་སྡང་གིས་ཀུན་ནས་བླངས་ཏེ་ཁྲོ་རྩོད་ཀྱིས་ཕན་ཚུན་གཉིས་ཀའི་རྒྱུད་མ་རུང་བར་བྱེད་པ་སོགས་ཅི་སྤྱད་ཀྱང་རུང་རང་གཞན་ལ་ཚེ་འདིར་ཡང་མི་ཕན་ཞིང་ཕྱི་མར་ཡང་ངན་སོང་གི་རྒྱུར་འགྱུར་བ་སོགས་མཐར་ཐུག་ཏུ་གནོད་པའི་རྒྱུར་འགྱུར་བ་ཐམས་ཅད་གཟབ་པར་བྱས་ཏེ་སྤང་བར་བྱ་དགོས་པར་མ་ཟད་འདིར་བདེ་བ་ལྟར་སྣང་ཡང་ཕྱི་མར་གནོད་པའི་རྒྱུ་ཐམས་ཅད་བརྟགས་ཏེ་ནུས་པ་ཅི་ཡོད་ཀྱིས་སྤོང་བ་ཡང་གནད་བསྡུས་པ་ཡིན་ནོ། །དེས་ན་རྒྱལ་སྲས་རྣམས་ཀྱིས་སྤང་བླང་གི་གནས་ཐེག་ཆེན་གྱི་མདོ་སྡེ་རྣམས་ལས་གསུངས་པ་མཐའ་དག་ལ་ཇི་ལྟར་སློབ་པའི་ཐབས་ཤིང་རྟའི་སྲོལ་གཉིས་ཀྱི་བསླབ་བྱ་སྔར་བཤད་པ་དེ་དག་ལ་མ་འདུས་པ་མེད་ཅེས་སྨྲ་བ་ཡིན་ནོ། །གསུམ་པ་སྡོམ་པ་སྐྱེ་བའི་རྟེན་ནི། སྐྱེ་བའི་རྟེན་ནི་ལྷ་ཀླུ་འཕྲོག་མ་སོགས། །སྡིག་ཅན་ལ་ཡང་སྐྱེ་བར་ཀླུ་སྒྲུབ་བཞེད། །ཐོགས་མེད་དེ་རྟེན་སོ་ཐར་དགོས་ཞེས་གསུངས། །སྤྱིར་ན་སངས་རྒྱས་ཆོས་ལ་དད་བྱེད་ཅིང་། །འབྲས་བུ་བླ་མེད་བྱང་ཆུབ་ལ་དད་ཅིང་། །རྒྱལ་སྲས་སྤྱོད་པ་རྒྱ་མཚོར་དད་བྱེད་ན། །བྱང་སེམས་སྐྱེ་བར་དཀོན་མཆོག་ཏཱ་ལར་གསུངས། །ཞེས་པ་སྟེ། དེ་ལྟ་བུའི་བྱང་ཆུབ་སེམས་ཀྱི་སྡོམ་པ་གང་ལ་སྐྱེ་བའི་རྟེན་ནི་བརྡ་ཤེས་ཤིང་། དོན་གོ་ལ། ལེན་འདོད་ཡོད་ན། ལྷ་ཀླུ་འཕྲོག་མ་ལ་སོགས་པའི་མི་མ་ཡིན་སོར་སྡོམ་གྱི་རྟེན་མི་རུང་བ་རྣམས་དང་། མཚམས་མེད་བྱས་པ་ལ་སོགས་པའི་སྡིག་ཅན་སོགས་རྟེན་དམན་པ་ལ་ཡང་སྐྱེ་བར་གསུངས་པ་ནི་འཕགས་མཆོག་ཀླུ་སྒྲུབ་ཀྱི་བཞེད་པ་སྟེ། དེ་ཡང་དཀོན་མཆོག་བརྩེགས་པ་ལས། དེའི་ཚེ་ཆོས་ཀྱི་རྣམ་གྲངས་འདི་བཤད་པ་ན་ལྷ་དང་། ཀླུ་དང་། ལྷ་མ་ཡིན་དང་། ནམ་མཁའ་ལྡིང་དང་། ལྟོ་འཕྱེ་ཆེན་པོ་བགྲངས་པ་ལས་འདས་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞེས་གསུངས་པའི་རྗེས་སུ་འབྲང་བ་ཡིན་ལ། དེ་ཡང་སྨོན་སེམས་ཙམ་ཞིག་ངེས་པར་སྐྱེ་བ་ལ་དགོངས་པའོ། །འཕགས་པ་ཐོགས་མེད་ཀྱི་ལུགས་ལྟར་ན་འཇུག་སྡོམ་མ་ཐོབ་པ་ཐོབ་པར་བྱེད་པ་དེའི་རྟེན་གླིང་གསུམ་གྱི་སྐྱེས་པ་བུད་མེད་མཚན་དོན་བྱེད་ནུས་པ་ཞིག་དགོས་ཏེ། སོ་ཐར་རིགས་བདུན་གྱིི་སྡོམ་པ་གང་རུང་འཇུག་སྡོམ་གྱི་རྟེན་དུ་འགྲོ་དགོས་པའི་ཕྱིར་ཞེས་གསུངས་པས་སོ། །དེས་ན་སྲོལ་གཉིས་པོ་ལ་རྟེན་རྒྱ་ཆེ་ཆུང་དང་འཇུག་སྒོ་ཡངས་དོག་སོགས་ཡོད་པར་མངོན་ཡང་དོན་ལ་གནད་གཅིག་སྟེ། རིགས་བདུན་སྔོན་དུ་སོང་མ་སོང་གང་ཡིན་ཀྱང་རུང་སྲོག་གཅོད་སོགས་ཉེས་པ་སྣ་གཅིག་སྤོང་བའི་སེམས་ཙམ་ཡང་མེད་ན་བྱང་སྡོམ་མི་སྐྱེ་བས་ཉེས་སྤྱོད་གང་རུང་སྤོང་བར་དམ་བཅའ་ནུས་པ་ཞིག་ངེས་པར་དགོས་ཏེ་གཞན་དུ་ན་སེམས་བསྐྱེད་ཀྱི་བསླབ་བྱ་དང་འགལ་བའི་ཕྱིར་རོ། །དེ་བས་བཞེད་པ་སྤྱིར་བཤད་ན་གང་ལེན་པ་པོ་འགྲོ་བའི་ས་པས་བསྡུས་པ་ནི་ལུས་རྟེན་ཡིན་ལ། གཙོ་བོ་ནི་བསམ་པའི་རྟེན་ཏེ། སྟོན་པ་སངས་རྒྱས་བཅོམ་ལྡན་འདས་དང་། དེའི་བསྟན་པ་དམ་པའི་ཆོས་ཐེག་པ་ཆེན་པོའི་སྡེ་སྣོད་རྣམས་ལ་དད་པར་བྱེད་ཅིང་ཐོབ་བྱའི་འབྲས་བུ་བླ་ན་མེད་པའི་བྱང་ཆུབ་ལ་དད་ཅིང་རྒྱལ་སྲས་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་ཐེག་ཆེན་གྱི་མདོ་སྡེར་ཇི་སྐད་གསུངས་པ་ཐམས་ཅད་ལ་སློབ་འདོད་ཀྱི་འདུན་པ་དང་དད་པར་བྱེད་ན་བྱང་ཆུབ་ཀྱི་སེམས་སྐྱེ་བར་དཀོན་མཆོག་ཏཱ་ལའི་མདོར་གསུངས་ཏེ། ཇི་སྐད་དུ། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །བྱང་ཆུབ་བླ་ན་མེད་ལའང་དད་གྱུར་ལ། །རྒྱལ་སྲས་རྣམས་ཀྱི་སྤྱོད་ལའང་དད་བྱེད་ན། །བློ་དང་ལྡན་པ་རྣམས་ཀྱི་སེམས་སྐྱེའོ། །ཞེས་སོ། །གནས་པའི་རྟེན་ནི་གང་ལ་སྐྱེས་པའི་རྟེན་དང་། གཏོང་རྒྱུ་མ་བྱུང་ན་ཕྱི་མ་གང་དང་གང་དུ་སྐྱེས་པའི་རྟེན་དེ་དང་དེ་ལའང་ཡོད་དེ་བྱང་ཆུབ་སྙིང་པོའི་བར་དུ་བླངས་པའི་ཕྱིར། དེས་ན་ཚེ་ཕྱི་མ་རྣམས་སུ་དགེ་བའི་བཤེས་གཉེན་དང་འཕྲད་ནས་དྲན་གསོའི་ཚུལ་དུ་སྡོམ་པ་ནོད་པ་ཙམ་ལས་གསར་དུ་ལེན་དགོས་པ་མ་ཡིན་ནོ། །དེ་ལྟར་བསླབ་པའི་རྣམ་གྲངས་ཐམས་ཅད་དབང་པོ་རབ་འབྲིང་ཐ་གསུམ་གྱི་རང་རང་གི་ནུས་པ་དང་བསྟུན་ཏེ། སྡོམ་ཆོག་ཏུ། དེ་བཞིན་དུ་ནི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་པ་ལྟར་དྲན་ཤེས་ཀྱིས་བཟུང་ནས་བསླབ་པར་བྱས་ཀྱང་། གལ་ཏེ་ལྟུང་བ་འབྱུང་བའི་རྒྱུའི་དབང་གིས་ཉམས་པར་གྱུར་ན། ཉེས་དམིགས་ནི་ཀུན་གྱི་སྨད་པའི་གནས་སུ་འགྱུར་བ་དང་། སངས་རྒྱས་རྣམས་མི་མཉེས་པ་དང་། སེམས་ཅན་རྣམས་མི་མགུ་བ་དང་། རང་དོན་ཉམས་པ་དང་། མིང་དོན་ཤོར་བ་ལ་སོགས་པ་ཚེ་འདིར་འབྱུང་བར་མ་ཟད་ཕྱི་མ་དམྱལ་བ་ཆེན་པོར་སྐྱེ་བའི་རྒྱུར་འགྱུར་ཏེ། བསླབ་བཏུས་ལས། དགེ་བའི་རྩ་བ་ལྟུང་བ་དེ། །སེམས་ཅན་དམྱལ་བ་ཆེན་པོའི་རྒྱུ། །ཞེས་སོ། །ཁྱད་པར་བྱང་སྡོམ་ཕུལ་བ་ནི་ཉེས་པ་ཤིན་ཏུ་ལྕི་སྟེ། སྤྱོད་འཇུག་ལས། བླ་ན་མེད་པའི་བདེ་བ་ལ། །བསམ་པ་ཐག་པས་མགྲོན་གཉེར་ན། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཇི་ག་འགྲོ་འགྱུར་རམ། །ཞེས་གསུངས་པའི་ཕྱིར་རོ། །བཞི་པ་ཉམས་ན་ཕྱིར་བཅོས་པའི་ཚུལ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཐ་མར་ཉམས་ན་གསོ་བའི་ཚུལ་བཤད་པ། །ཞེས་པས། དང་པོ་བྱང་སྡོམ་མ་ཐོབ་པ་ཐོབ་པར་བྱས། བར་དུ་ཐོབ་པ་དེ་ཉིད་མ་ཉམས་པར་བསྲུང་བར་བྱ་དགོས་ལ། ཐ་མར་གལ་སྲིད་ཉམས་པར་འགྱུར་ན་སླར་གསོ་བའི་ཚུལ་བཤད་པ་ནི་འདི་ལྟ་སྟེ་ཞེས་སོ། །གཉིས་པ་རྒྱས་པར་བཤད་པ་ལ་གསུམ། ལྟུང་བའི་རྣམ་གཞག་མུ་བཞིར་བསྟན་པ། གཞན་དོན་དུ་འགྱུར་ན་ལུས་ངག་གི་མི་དགེ་བ་བདུན་གནང་བའི་སྐབས་ཡོད་པར་བསྟན་པ། ཕྱིར་བཅོས་དངོས་བཤད་པའོ། །དང་པོ་ལྟུང་བའི་རྣམ་གཞག་མུ་བཞིར་བསྟན་པ་ནི། གང་གི་རིགས་དང་མི་རིགས་མ་བརྟགས་པར། །རྩོམ་མམ་ལྡོག་གམ་བཏང་སྙོམས་འཇོག་ཀྱང་རུང་། །འོས་ལས་འདས་བྱེད་ཐམས་ཅད་ལྟུང་བའི་སྡེ། །དོན་ཆེན་བསྒྲུབ་ལ་ཆུང་བཏང་གཟུགས་བརྙན་ཏེ། །ནུས་པའི་ཡུལ་མིན་ཐམས་ཅད་ལྟུང་བ་མེད། །མི་ནུས་དེར་བརྩོན་དེ་ཡི་གཟུགས་བརྙན་ཡིན། །ཅེས་པ་སྟེ། གང་ཟག་གང་གི་དགག་སྒྲུབ་ཀྱི་གནས་ལ་བློ་ནུས་ཅི་ཡོད་ཀྱིས་བརྩམ་པར་རིགས་པ་དང་མི་རིགས་པ་གང་ཡིན་ཐོག་མར་བརྟགས་དགོས་པ་ལས་མ་བརྟགས་བཞིན་དུ་ལྡོག་པར་བྱ་བའི་གནས་ལ་རྩོམ་མམ། བར་ཙམ་པར་བྱ་བ་ལས་ལྡོག་གམ། འཇུག་ལྡོག་གི་གནས་ལ་བཏང་སྙོམས་སུ་འཇོག་ཀྱང་རུང་སྟེ། གང་ལྟར་ཡང་བླང་དོར་བྱ་བར་འོས་པ་ལས་འདས་པར་བྱེད་པ་ཐམས་ཅད་ལྟུང་བའི་སྡེ་ཡིན་ལ། དེ་ཡང་མུ་བཞི་སྟེ། དེ་ལ་དཀོན་མཆོག་བརྩེགས་པ་ལས། གང་ཞིག་དགའ་བའི་ཡིད་ཀྱིས་ནི། །ལོ་བརྒྱར་སྦྱིན་པ་བྱིན་པ་བས། །གང་གིས་ཉིན་གཅིག་ཚུལ་ཁྲིམས་དག །བསྲུང་བ་དེ་ནི་ཁྱད་པར་འཕགས། །ཞེས་པ་ལྟར། དོན་ཆེན་ཚུལ་ཁྲིམས་ཀྱི་བསླབ་པ་བསྲུང་ཞིང་བསྒྲུབ་པའི་ཆེད་ལ་དེ་བས་དོན་ཆུང་བ་སྦྱིན་པ་གཏོང་བ་བཤོལ་ཏེ་བཏང་བ་ལྟ་བུ་ལྟུང་བའི་གཟུགས་བརྙན་ཏེ་དོན་ལ་ལྟུང་མེད་དང་། ལས་དང་པོ་པས་མགོ་སོགས་གཏོང་བ་ལྟ་བུ་རང་གི་ནུས་པའི་ཡུལ་མིན་པས་ན་མི་བསྒྲུབ་པའམ་འཇུག་ལྡོག་མ་ནོར་བར་བརྩོན་པ་ཐམས་ཅད་ལ་ལྟུང་བ་མེད་ཅེས་དང་། རང་རང་གི་བློ་སྟོབས་ཀྱི་མི་ནུས་བཞིན་དུ་ཡན་ལག་གཏོང་བ་ལྟ་བུ་བྱ་དཀའ་བའི་གནས་དེར་བརྩོན་པར་བྱེད་པའམ། ཀུན་སློང་ངན་པས་སྦྱོར་བ་དཀར་བ་ལྟ་བུ་ལྟུང་མེད་དེ་ཡི་གཟུགས་བརྙན་ཙམ་ཡིན་ཏེ་དོན་ལ་ལྟུང་བའོ། །གཉིས་པ་གཞན་དོན་དུ་འགྱུར་ན་ལུས་ངག་གི་མི་དགེ་བ་བདུན་གནང་བའི་སྐབས་ཡོད་པར་བསྟན་པ་ནི། གཞན་ཕྱིར་ཕན་ན་ལུས་ངག་མི་དགེ་འདུན། །གནང་བའི་སྐབས་ཡོད་དོན་ལ་དགེ་བ་ཡིན། །ཞེས་པ་སྟེ། སྐྱེ་འགྲོ་གཞན་གྱི་དོན་ཕྱིར་ཕན་ངེས་ཡིན་ན་ལུས་ངག་གིས་སྤྱད་པ་བྱ་བ་མི་དགེ་བདུན་ལ་གནང་བའི་སྐབས་ཡོད་དེ། ཇི་ལྟར་གནང་བ་ཡིན་ཞེ་ན། འགྲོ་བ་མང་པོའི་སྲོག་བསྐྱབ་པའི་ཕྱིར་དང་བསྟན་འགྲོ་སྤྱི་ལ་གནོད་ཅིང་འཚེ་བའི་གཤེད་མ་གསོད་པ་ལྟ་བུ་སྲོག་གཅོད་པ་དང་། ཉམས་ཐག་པའི་འགྲོ་བ་ཟས་སྐོམ་ཚ་གྲང་གི་གདུང་བས་འཆི་བར་ཕྱོགས་པ་ལ་འབྱོར་ལྡན་ལས་ཟས་གོས་བརྐུས་ནས་སྦྱིན་པ་ལྟ་བུ་མ་སྦྱིན་ལེན་པ་དང་། བུད་མེད་འདོད་པས་གདུང་སྟེ་འཆི་བར་ཉེ་བ་ལ་གནས་སྐབས་དེའི་གདུང་བ་སེལ་ཕྱིར་དང་། མཐར་ཐུག་དགེ་བ་ལ་རིམ་གྱིས་སྦྱོར་བའི་སླད་དུ་དེ་ལ་འདོད་ལོག་སྤྱད་པ་དང་། གསོད་ངེས་ཀྱི་སྐྱེ་བོ་སྲོག་སྐྱོབ་པའི་ཕྱིར་དོན་ཕྱིན་ཅི་ལོག་ཏུ་སྦས་ནས་རྫུན་སྨྲ་བ་དང་། ཆོས་ལྡན་གྱི་གང་ཟག་སྡིག་གྲོགས་ཀྱིས་བསླུས་ནས་ངན་འགྲོར་འཁྲིད་པ་ལས་ལྡོག་པའི་ཕྱིར་ཕྲ་མས་འབྱེད་པ་དང་། མི་དགེ་བའི་བྱ་བ་ལས་ལྡོག་པའི་ཕྱིར་གཤེ་བའི་ཚིག་རྩུབ་སྨྲ་བ་དང་། མྱ་ངན་གྱིས་ནོན་པའི་དུབ་པ་བསང་ཞིང་ཆོས་ལམ་དུ་འཁྲིད་པའི་ཕྱིར་གཏམ་རྒྱུད་སོགས་ངག་འཁྱལ་མང་པོ་སྨྲ་བ་རྣམས་གནས་སྐབས་དེར་མི་དགེ་བ་ལྟར་སྣང་ཡང་དོན་ལ་དགེ་བ་ཁོ་ན་ཡིན་ཏེ། སེམས་ཀྱི་འཕེན་པ་ལས་གཞན་པའི་དགེ་སྡིག་མ་གྲུབ་པའི་ཕྱིར། བཞི་བརྒྱ་པ་ལས། བསམ་པ་བྱང་ཆུབ་སེམས་དཔའ་ཡི། །དགེ་འམ་ཡང་ན་མི་དགེ་བ། །ཐམས་ཅད་དགེ་བ་ཉིད་འགྱུར་ཏེ། །གང་ཕྱིར་སེམས་དེ་གཙོ་བོའི་ཕྱིར། །ཞེས་དང་། སྡོམ་པ་ཉི་ཤུ་པ་ལས། སྙིང་རྗེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་སོ། །གསུམ་པ་ཕྱིར་བཅོས་དངོས་ཇི་ལྟར་བྱ་བའི་ཚུལ་ལ་གཉིས། ཀླུ་སྒྲུབ་ཀྱི་ལུགས་དང་། ཐོགས་མེད་ཀྱི་ལུགས་སོ། །དང་པོ་ཀླུ་སྒྲུབ་ཀྱི་ལུགས་ནི། ཐུན་འདས་ཉམས་ན་འཕགས་པ་ནམ་སྙིང་ལ། །ཐོ་རངས་གསོལ་བཏབ་རྨི་ལམ་ལྟུང་བ་འཆགས། །ལྷག་མ་ཕུང་པོ་གསུམ་པ་ཉིན་མཚན་དུ། །ལན་གསུམ་འདོན་པས་གཞིལ་བ་ཀླུ་སྒྲུབ་ལུགས། །ཞེས་པ་སྟེ། སྤྱིར་སྡོམ་པ་གཏོང་བ་དང་ཉམས་པའི་རྐྱེན་ནི། །རྟེན་གཞི་སྨོན་སེམས་བཏང་བ། འགལ་ཟླ་རྩ་ལྟུང་བྱུང་བ། སྤོང་རྐྱེན་བསླབ་པ་ཕུལ་བ་གསུམ་ལས། དང་ཐ་གཉིས་ནི་དེ་མ་ཐག་ཏུ་སྡོ མ་པ་རྩད་ནས་མེད་པར་འགྱུར་བའི་རྒྱུ་དང་རྐྱེན་ཡིན་པའི་ཕྱིར་བཤགས་པ་ཙམ་གྱིས་མི་ཆོག་གིས་སྡོམ་པ་སླར་བླང་དགོས་ལ། དེ་ལས་གཞན་རྩ་ལྟུང་རྣམས་ཉིན་ལ་ཆ་གསུམ་མཚན་ལ་ཆ་གསུམ་སྟེ་དྲུག་ཏུ་ཕྱེ་བའི་ཆ་གང་རུང་གི་ནང་ལྟུང་བ་བྱུང་ནས་དེའི་ཐུན་ཕྱི་མའི་ནང་གཉེན་པོས་མ་སླེབ་བར་འདས་ན་ཐུན་འདས་ཀྱི་ལྟུང་བ་ཞེས་བྱ་སྟེ། དེ་ལྟར་ཉམས་པའི་ལྟུང་བ་བྱུང་ན་དེ་ཉིད་ཕྱིར་བཅོས་པའི་ཚུལ་ལ་དབང་འ བྲིང་རྣམས་ཡི་དམ་ལྷའི་མདུན་དུ་བཤགས་པས་ལྟུང་བ་ལས་ལྡང་བ་ཡིན་པས། འདིར་རིགས་ལྔ་སྤྱིའི་ལྷ་འཕགས་པ་ནམ་མཁའི་སྙིང་པོའི་མདུན་དུ་བཤགས་པར་འདོད་ན་ཉིན་མཚན་གྱི་བར་མ་ཆོད་པར་ཁྲུས་དང་གཙང་སྦྲ་ལ་གནས་པས་སྤོས་བཏུལ་ཏེ་མཚན་ནས་བརྗོད་ཅིང་ཕྱག་འཚལ་ནས། འཕགས་པས་བདག་ལ་ཞལ་བསྟན་ཏེ་སྡིག་པ་དག་པར་མཛད་དུ་གསོལ། ཞེས་གསོལ་བ་དྲག་ཏུ་བཏབ་པས་དངོས་སམ་རྨི་ལམ་དུ་སྐལ་བ་དང་འཚམས་པར་དེ་ཉིད་ཀྱི་གཟུགས་སམ་མིང་ནས་བྱ་བའི་བར་ཅི་རིགས་པའི་གཟུགས་ཀྱིས་ལྟུང་བ་ལས་འབྱིན་པའི་ཐབས་སྟོན་པར་འགྱུར་ལ། གལ་ཏེ་རྟགས་མ་བྱུང་ན་ཐོ་རངས་ཀྱི་དུས་སུ་སྤྱོད་ལམ་སྔར་ལྟར་བྱས་ལ། སྐྱ་རེངས་སྐྱ་རེངས་སྙིང་རྗེ་ཆེན་པོ་ལེགས་པ་ཁྱོད་འཛམ་བུའི་གླིང་དུ་ཤར་མ་ཐག་ཏུ་བདག་ལ་ཐུགས་རྗེས་ཁྱབ་པར་མཛོད་ཅིག །ནམ་མཁའི་སྙིང་པོ་སྙིང་རྗེ་ཆེན་པོ་དང་ལྡན་པ་ལ་ཡང་བདག་གི་ཚིག་གིས་མྱུར་དུ་བསྐུལ་ཏེ་ཐབས་གང་གིས་ལྟུང་བ་མྱུར་དུ་འཆགས་པར་འདོད་པ་དང་། ཐེག་པ་ཆེན་པོ་འཕགས་པ་ལ་ཐབས་དང་ཤེས་རབ་ཐོབ་པར་འགྱུར་བའི་ཐབས་དེ་བདག་གི་རྨི་ལམ་དུ་བསྟན་དུ་གསོལ་ཞེས་གསོལ་བ་བཏབ་ནས་ཉལ་བའི་རྨི་ལམ་དུ་གཟུགས་སྐལ་བ་བཞིན་སྟོན་པས་ལྟུང་བ་འཆགས་སུ་འཇུག །དབང་པོ་དམན་པ་དག་གིས་ནི་སྟོབས་བཞིའི་སྒོ་ནས་བཤགས་པ་སྟེ། རྟེན་གྱི་སྟོབས་ཐེག་ཆེན་དགེ་བའི་བཤེས་གཉེན་དང་། བདེ་བར་གཤེགས་པའི་རྟེན་ཁྱད་པར་ཅན་གྱི་དང་། ནང་གི་རྟེན་སྐྱབས་འགྲོ་དང་སེམས་བསྐྱེད། །ཀུན་ཏུ་སྤྱོད་པའི་སྟོབས་ལྟུང་བའི་གཉེན་པོ་ལ་བསྔགས་པའི་ཐེག་པ་ཆེན་པོའི་མདོ་གཟུགས་ཁྱད་པར་ཅན་བཀླགས་ཤིང་བརྗོད་པ་ལ་སོགས་པ་ཡིན་ལ། སུན་འབྱིན་པ་དང་སོར་ཆུད་པ་གཉིས་ནི་སྔར་སོ་ཐར་གྱི་སྐབས་སུ་བཤད་པ་དང་འདྲའོ། །དབང་པོ་རབ་ཀྱི་ནི་སྒྱུ་མ་དང་རྨི་ལམ་ལྟ་བུའི་ཚུལ་གྱིས་མཁའ་ཁྱབ་ཀྱི་རྒྱལ་བ་སྲས་དང་བཅས་པའི་སྤྱན་སྔར་ཚིག་གིས་བཤགས་རྗེས་ཡང་དག་པའི་དོན་ལ་མཉམ་པར་འཇོག་པར་བྱ་སྟེ། ཕྱོགས་སུ་རྒྱས་པའི་མདོ་ལས། གང་ཞིག་འགྱོད་ཚངས་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་ནོ། །ཞེས་སོ། །གཞན་ཡང་ཉེས་བྱས་དང་། བརྗེད་ངེས་དང་། ཤེས་བཞིན་གྱིས་མ་ཟིན་པས་ཕྱིར་བཅོས་མ་གྲུབ་པའི་ལྟུང་བའི་ལྷག་མ་རྣམས་ཕུང་པོ་གསུམ་པའི་མདོ་ཉིན་མཚན་དུ་ལན་གསུམ་གསུམ་འདོན་པས་གཞིལ་བར་བྱ་བ་ཡིན་ནོ། །ལར་བྱང་སྡོམ་འདི་ནི་སོ་ཐར་དང་མི་འདྲ་སྟེ། ཉིན་རེ་བཞིན་ཡང་ཡང་བླང་ན་སྡོམ་པ་གོང་འཕེལ་དུ་འགྲོ་བའི་ཐབས་སུ་འགྱུར་བར་མ་ཟད་རྩ་ལྟུང་བྱུང་བ་ཐུན་ཚོད་ལས་མ་འདས་ན་བཤགས་པ་ཙམ་གྱིས་གསོ་རུ་ཡོད་ཀྱང་། འདས་ན་ཚུལ་ཁྲིམས་གཏུགས་པར་འགྱུར་བས་སྡོམ་པ་སླར་ལེན་དགོས་པར་བཤད་ཅིང་། གྲངས་ངེས་པ་ནི་མེད་པ་བཅས་རང་གི་ཁ་ན་མ་ཐོ་བ་སྤྱི་དང་བྱེ་བྲག་བྱང་སེམས་ཀྱི་བསླབ་པ་ཐམས་ཅད་ལ་སྐྱོན་བྱུང་བའི་གཉེན་པོར་ཡང་མཆོག་ཏུ་ཟབ་པ་གལ་ཆེ་བ་ཡིན་ཏེ་དེ་རྣམས་ནི་ཀླུ་སྒྲུབ་ཀྱི་ལུགས་ཡིན་ནོ། །གཉིས་པ་རྒྱལ་སྲས་ཐོགས་མེད་ཀྱི་ལུགས་ལ་གཉིས། གཏོང་རྒྱུ་ངོས་བཟུང་བ་དང་། ཉེས་ལྟུང་ཕྱིར་བཅོས་པའོ། །དང་པོ་གཏོང་རྒྱུ་ངོས་བཟུང་བ་ནི། སྨོན་པའི་སེམས་ནི་ནག་པོའི་ཆོས་བཞི་སྤྱད། །སེམས་ཅན་སྙིང་ནས་བློས་བཏང་དེ་གཏོང་འགྱུར། །རྒྱུན་མི་འཆད་སྤྱོད་ངོ་ཚ་ཁྲེལ་མེད་དང་། །དེ་མགུ་དགའ་དང་དེ་ཉིད་ཡོན་ཏན་དུ། །ལྟ་བ་ཀུན་དཀྲིས་ཆེན་པོས་སྡོམ་པ་འཇོམས། །ཕམ་པ་ཞེས་བརྗོད་ཆུང་དང་འབྲིང་ལ་མིན། །ཞེས་པ་སྟེ། དེ་ལ་སྡོམ་པ་གཏོང་བའི་རྒྱུ་ནི། སྨོན་པའི་སེམས་ནི་ཡན་ལག་ནག་པོའི་ཆོས་བཞི་སྤྱད་པ་དང་། རྩ་བ་སེམས་ཅན་སྙིང་ཐག་པ་ནས་བློས་བཏང་ན་དེ་གཏོང་བར་འགྱུར་ལ། དེ་བཏང་བས་འཇུག་སེམས་ཀྱང་ཉམས་པར་འགྱུར་རོ། །རྙེད་བཀུར་གྱི་ཕྱིར་བདག་བསྟོད་གཞན་སྨོད་སོགས་ཕམ་པའི་གནས་ལྟ་བུའི་ཆོས་བཞི་གང་རུང་རྒྱུན་མི་ཆད་པར་སྤྱོད་པ་དང་། ངོ་ཚ་དང་ཁྲེལ་ཡོད་ཆུང་ངུ་ཙམ་ཡང་མེད་པ་དང་། བྱ་བ་དེས་མགུ་ཞིང་དགའ་བར་བྱེད་པ་དང་། བྱ་བ་དེ་ཉིད་ལ་ཡོན་ཏན་དུ་ལྟ་བ་དེ་ཡན་ལག་བཞི་ཚང་ན་ཀུན་དཀྲིས་ཆེན་པོས་བསྐྱེད་པའི་ལྟུང་བ་ཞེས་བྱ་སྟེ་སྡོམ་པ་འཇོམས་པར་བྱེད་པས་ན་ཕམ་པ་ཞེས་བརྗོད་པ་ཡིན་ལ། ཡན་ལག་གང་རུང་ཡང་དེ་ལ་ངོ་ཚ་ཆེར་བསྐྱེད་ཅིང་གཞན་རྐྱེན་ལ་མ་ལྟོས་པར་རང་ཉིད་དེ་ལས་མྱུར་དུ་ལྡོག་པར་བྱེད་ན་ཀུན་དཀྲིས་ཆུང་ངུ་དང་། ཡན་ལག་གང་རུང་ཚང་ལ་ངོ་ཚ་དང་ཁྲེལ་ཡོད་ཅུང་ཟད་སྐྱེ་ཞིང་གཞན་གྱིས་བསྐུལ་བས་ལྡོག་ན་ཀུན་དཀྲིས་འབྲིང་པོ་ཞེས་བྱ་ལ། དེ་གཉིས་ཀྱིས་སྡོམ་པ་གཏོང་བ་མིན་ནོ། །གཉིས་པ་ཉེས་ལྟུང་ཕྱིར་བཅོས་པ་ནི། ཕས་ཕམ་བྱུང་ན་སླར་བླང་འབྲིང་ན་གསུམ། །ཐ་མ་གཅིག་མདུན་དངོས་པོ་བརྗོད་པས་བཤགས། །མཐུན་པའི་གང་ཟག་མེད་ན་ཡིད་ཀྱིས་བསྡམས། །རྒྱ་ཆེན་སྤྱོད་པའི་རིང་ལུགས་ཟླ་མེད་དོ། །ཞེས་པ་སྟེ། དེ་དག་ཇི་ལྟར་བཤགས་པའི་ཚུལ་ནི་སྨོན་སེམས་བཏང་བ་དང་། ཀུན་དཀྲིས་ཆེན་པོས་ཕས་ཕམ་པའི་གནས་ལྟ་བུའི་རྩ་ལྟུང་གིས་གཏོང་བས་དེ་དག་བྱུང་ན་ཐེག་པ་ཆེན་པོའི་སྡོམ་ལྡན་བཞི་ཡན་ཆད་ཀྱི་དྲུང་དུ་བཤགས་སྡོམ་དང་བསགས་སྦྱངས་ལ་ནན་ཏན་བྱས་ལ་སྡོམ་པ་སླར་བླངས་བླང་བར་བྱ་ཞིང་ལན་གསུམ་ལས་ལྷག་པར་བསྐྱར་དུ་མེད་པར་བཤད་ཅིང་། ཀུན་དཀྲིས་འབྲིང་གིས་བསྐྱེད་པའི་ཕམ་འདྲ་རྣམས་ནི་གསུམ་ཡན་ཆད་དང་། ཐ་མ་ཀུན་དཀྲིས་ཆུང་ངུས་སྤྱད་པའི་རྩ་ལྟུང་དང་། དེ་ལས་གཞན་པའི་ཉེས་བྱས་ཞེ་དྲུག་ལ་ཀུན་སློང་གི་དབང་གིས་ཉོན་མོངས་པ་ཅན་ཡིན་མིན་དང་ལྟུང་མེད་དུ་འགྱུར་བའང་ཡོད་པས་དེ་དག་གང་བྱུང་ཡང་གང་ཟག་གཅིག་ཡན་ཆད་ཀྱི་མདུན་དུ་ཉེས་པའི་དངོས་པོ་བརྗོད་པས་བཤགས་བསྡམས་བྱས་ན་དག་པར་འགྱུར་ཏེ། སྡོམ་པ་ཉི་ཤུ་པ་ལས། སྡོམ་པ་སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མི་མང་བདག་སེམས་བཞིན། །ཞེས་སོ། །དེ་ཐམས་ཅད་ལ་བཤགས་ཡུལ་མཐུན་པའི་གང་ཟག་ཐེག་ཆེན་སྡོམ་ལྡན་མེད་ན་རྒྱལ་བ་སྲས་བཅས་ཡིད་ཀྱིས་བསམ་པའི་སྤྱན་སྔར་བཤགས་ཤིང་བསྡམ་པར་བྱའོ། །དེ་ཡང་ལམ་སྒྲོན་འགྲེལ་པར། དུམ་བུ་དང་པོར་ལེགས་པར་གསོ་བྱེད་པ། །སྐྱེས་བུ་རབ་ཡིན་འབྲིང་ནི་གཉིས་ལའོ། །དུམ་བུ་ཐ་མ་གསོ་བ་ཐ་མ་སྟེ། །ཞེས་སྤྱིར་དུས་དྲུག་དང་ཁྱད་པར་དུས་རེ་རེ་ལ་ཆ་གསུམ་གསུམ་དུ་ཕྱེ་ནས་དེ་དང་དེར་གཉེན་པོས་སླེབས་པ་གང་ཟག་རབ་འབྲིང་ཐ་གསུམ་གྱི་གསོ་ཚུལ་ཡིན་པར་བཤད་དོ། །དེ་ལྟར་རྒྱ་ཆེན་སྤྱོད་པའི་རིང་ལུགས་འདི་ནི་བསྲུང་བའི་མཚམས་དང་གསོ་བའི་ཚུལ་སོགས་ལས་དང་པོ་པ་རྣམས་ལ་དགོངས་ནས་ཤིན་ཏུ་གུ་དོགས་པར་མཛད་པས་ན་བྱང་ཆུབ་སེམས་ཀྱི་བསླབ་ནོར་མི་ཉམས་བསྲུང་གསོའི་མན་ངག་མཁས་ཚུལ་གཞན་གྱིས་འགྲན་ཟླ་བྱ་བའི་ཡུལ་དུ་མ་གྲུབ་པ་འདི་ཉིད་མཚུངས་མེད་རྒྱལ་བའི་སྲས་དེས་ཕྱི་རབས་གདུལ་བྱའི་བསོད་ནམས་ཀྱི་བགོ་སྐལ་དུ་སྩལ་བ་ཉིད་དོ་ཞེས་མངོན་པར་བསྔགས་སོ། །ལྔ་པ་བྱང་ཆུབ་སེམས་སྡོམ་ཚུལ་བཞིན་བསྲུང་བའི་ཕན་ཡོན་ལ་གསུམ། བསོད་ནམས་རྒྱུན་ཆགས་སུ་འབྱུང་བ་དང་། སངས་རྒྱས་ཀྱི་སྲས་སུ་འགྱུར་བ་དང་། བླ་ན་མེད་པའི་བྱང་ཆུབ་ཐོབ་པའི་ཕན་ཡོན་ནོ། །དང་པོ་བསོད་ནམས་རྒྱུན་ཆགས་སུ་འབྱུང་བའི་ཕན་ཡོན་ནི། འདི་འདྲའི་བྱང་ཆུབ་སེམས་ཀྱི་རྩིས་ཟིན་ན། །གཉིར་སོགས་བག་མེད་གྱུར་ལའང་བསོད་ནམས་ཤུགས། །རྒྱུན་མི་ཆད་འབྱུང་། ཞེས་པ་སྟེ། རེ་ཞིག་སྨོན་པ་བྱང་ཆུབ་སེམས་བསྐྱེད་ཀྱི་དབང་དུ་བྱས་ན་གནས་སྐབས་སུ་འཁོར་ལོས་སྒྱུར་བ་དང་ལྷའི་དབང་པོ་སོགས་མཐོ་རིས་ཀྱི་འབྲས་བུ་ལན་གྲངས་དུ་མར་མྱོང་ཡང་མི་ཟད་པར་འཕེལ་བར་འགྱུར་ཏེ། སྤྱོད་འཇུག་ལས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་ནས་མི་ཟད་འཕེལ་བར་འགྱུར། །ཞེས་དང་། ད་དུང་འདི་འདྲ་བའི་སྨོན་སེམས་ཀྱི་སྟེང་དུ་འཇུག་པ་བྱང་ཆུབ་ཀྱི་སེམས་ཀྱི་རྩིས་ཟིན་ན། དགེ་བ་བྱེད་པའི་དུས་མ་ཡིན་པར་གཉིད་དང་རྩེ་མོས་གཡེང་བར་གྱུར་པ་ལ་སོགས་པ་བག་མེད་པའི་དབང་དུ་གྱུར་པའི་གནས་སྐབས་ལའང་རྒྱུ་བསོད་ནམས་ཀྱི་ཤུགས་ཀྱང་རྒྱུན་མི་ཆད་པར་འབྱུང་བར་གསུངས་ན་འབྲས་བུ་མི་ཟད་པར་འབྱུང་བ་ལྟ་ཡང་ཅི་སྨོས་ཏེ། སྔ་མ་ལས། དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པར་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་སོ། །གཉིས་པ་མིག་དོན་གནས་འགྱུར་བའི་ཕན་ཡོན་ནི། རྒྱལ་བའི་སྲས་སུ་འགྱུར། ཞེས་པ་སྟེ། དེ་ལྟར་བྱང་ཆུབ་ཀྱི་སེམས་རྒྱུད་ལ་སྐྱེས་མ་ཐག་ཏུ་མིང་འཕོ་སྡེ་རྒྱལ་བའི་སྲས་ཞེས་འཇིག་རྟེན་ལྷ་དང་མིར་བཅས་པ་ཀུན་གྱིས་ཕྱག་བྱ་བའི་གནས་སུ་འགྱུར་བ་ཡིན་ཏེ། སྔ་མ་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམ་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་སོ། །གལ་ཏེ་ཉེས་པ་འགའ་ཞིག་བྱུང་ཡང་སྨོན་སེམས་མ་བཏང་ན་རིགས་ཀྱི་སྒོ་ནས་ཉན་རང་དང་དགྲ་བཅོམ་ཟིལ་གྱིས་གནོན་ཅིང་། བྱང་སེམས་ཀྱི་མིང་ཡང་མི་འདོར་བ་ཡིན་ཏེ། བྱམས་པའི་རྣམ་ཐར་ལས། རིགས་ཀྱི་བུ་འདི་ལྟ་སྟེ། དཔེར་ན་རྡོ་རྗེ་རིན་པོ་ཆེ་ནི་ཆག་ཀྱང་གསེར་གྱི་རྒྱན་ཐམས་ཅད་ཟིལ་གྱིས་གནོན་ཅིང་རྡོ་རྗེ་རིན་པོ་ཆེའི་མིང་ཡང་མི་འདོར་ལ། དབུལ་བ་ཡང་རྣམ་པར་བཟློག་གོ། །དེ་བཞིན་དུ་རྣམ་པ་ཐམས་ཅད་མཁྱེན་པར་སེམས་བསྐྱེད་པའི་རྡོ་རྗེ་རིན་པོ་ཆེ་ནན་ཏན་དང་བྲལ་ཡང་ཉན་ཐོས་དང་རང་སངས་རྒྱས་ཀྱི་ཡོན་ཏན་ཐམས་ཅད་ཟིལ་གྱིས་གནོན་ཅིང་བྱང་ཆུབ་སེམས་དཔའ་མིང་ཡང་མི་འདོར་ལ། འཁོར་བའི་དབུལ་བ་ཐམས་ཅད་ཀྱང་རྣམ་པར་བཟློག་གོ། །ཞེས་སོ། །གསུམ་པ་བླ་མེད་བྱང་ཆུབ་ཀྱི་གོ་འཕང་ཐོབ་པའི་ཕན་ཡོན་ནི། གྲངས་མེད་གསུམ་བདུན་སོ་གསུམ་བྱང་ཆུབ་ཐོབ། །ཅེས་པ་སྟེ། དེ་ཡང་མཐར་ཐུག་གི་འབྲས་བུ་ཐོབ་ཚུལ་ལ། སྤྱིར་ཚོགས་ལམ་དུ་དྲན་པ་ཉེ་བར་བཞག་པ་བཞི། ཡང་དག་པར་སྤོང་བ་བཞི། རྫུ་འཕྲུལ་གྱི་རྐང་པ་བཞི་རྣམས་བསྒོམ་པས། མངོན་ཤེས་ལྔ་དང་ཆོས་རྒྱུན་གྱི་ཏིང་ངེ་འཛིན་སོགས་ཐོབ་ཅིང་། དེ་ནས་དྲོད་རྩེ་གཉིས་དང་བཟོད་པ་ཆོས་མཆོག་གཉིས་ཏེ་ངེས་འབྱེད་ཆ་བཞིའི་དང་པོ་གཉིས་སུ་དབང་པོ་ལྔ་དང་། ཕྱི་མ་གཉིས་སུ་སྟོབས་ལྔ་བསྒོམ་པས་གཟུང་རྟོག་དང་འཛིན་རྟོག་རྣམས་ཉམས་སྨད་པར་བྱས་ཏེ། ཡོན་ཏན་ཀྱང་ཚོགས་ལམ་ལས་ཆེས་ཆེ་བ་ཐོབ་ཅིང་། དེ་ནས་དང་པོར་ཆོས་ཉིད་ཀྱི་བདེན་པ་མངོན་སུམ་དུ་མཐོང་བས་ཀུན་བརྟགས་ཀྱིས་བསྡུས་པའི་སྒྲིབ་པ་གཉིས་པོ་དྲུང་འབྱིན་གྱི་ཚུལ་དུ་སྤངས་ཏེ་བརྒྱ་ཕྲག་བཅུ་གཉིས་ལ་སོགས་པའི་ཡོན་ཏན་ཐོབ་ལ། དེ་ནས་བསྒོམ་པའི་ལམ་ས་དགུ་པོར་ཆོས་ཉིད་མངོན་སུམ་དུ་མཐོང་བའི་ཡེ་ཤེས་དེ་ཡང་ཡང་གོམས་པའི་སྟོབས་ལས་དང་པོ་དྲུག་ཏུ་ལྷན་སྐྱེས་ཀྱིས་བསྡུས་པའི་སྒྲིབ་པ་གཉིས་པོ་རིམ་གྱིས་སྤངས་ཏེ། དག་པ་གསུམ་དུ་ཉོན་སྒྲིབ་ཟད་ནས་ཤེས་སྒྲིབ་ཕྲ་བའང་རིམ་གྱིས་སྤོང་བ་ཡིན་ཅིང་། ས་དེ་དག་གི་གནས་སྐབས་སུ་སྟོང་ཕྲག་བཅུ་གཉིས་ལ་སོགས་པའི་ཀུན་རྫོབ་ཀྱི་ཡོན་ཏན་ཆེར་འཕེལ་བར་འགྱུར་ལ། མཐར་རྒྱུན་མཐའི་རྡོ་རྗེ་ལྟ་བུའི་ཏིང་ངེ་འཛིན་གྱིས་བག་ཆགས་ཕྲ་བ་བཅོམ་སྟེ་མངོན་པར་རྫོགས་པར་འཚང་རྒྱ་བ་ཡིན་ལ། དེ་ཡང་བྱང་ཆུབ་སེམས་དཔའ་དབང་པོ་རབ་འབྲིང་ཐ་གསུམ་གྱི་ལམ་བགྲོད་ཚུལ་ཡང་། དང་པོ་དབང་རྣོན་རྫི་བོ་ལྟ་བུའམ་དཔེ་མེད་པའི་སེམས་བསྐྱེད་ཅེས་ཐོག་མར་སེམས་ཅན་ཐམས་ཅད་སངས་རྒྱས་ཀྱི་སར་བཀོད་ནས། རྗེས་ལ་རང་ཉིད་གྲོལ་བར་འདོད་པ་རྣམས་ནི་གྲངས་མེད་གསུམ་ལས་མི་ཐོགས་ཏེ། དང་པོས་ཚོགས་སྦྱོར། གཉིས་པས་མ་དག་ས་བདུན། གསུམ་པས་དག་པ་ས་གསུམ་མཐར་ཕྱིན་པར་བྱས་ནས་མཐར་འབྲས་བྱང་ཆུབ་ཆེན་པོའི་གོ་འཕང་ཐོབ་ལ། གཉིས་པ་དབང་འབྲིང་མཉན་པ་ལྟར་རམ་ཡེ་ཤེས་དམ་པའི་སེམས་བསྐྱེད་ཅེས་རང་དང་འགྲོ་བ་མཉམ་དུ་ཐར་པར་འདོད་པའི་བྱང་སེམས་རྣམས་ནི་གྲངས་མེད་བདུན་ཏེ། ཚོགས་སྦྱོར་གཉིས་སུ་གཉིས་རེ། མཐོང་ལམ་དུ་གཅིག །སྒོམ་ལམ་དུ་གཉིས་ཀྱིས་ལམ་མཐར་ཕྱིན་པར་བྱེད་དོ། །གསུམ་པ་དབང་རྟུལ་རྒྱལ་པོ་ལྟ་བུའམ་འདོད་ཆེན་པོའི་སེམས་བསྐྱེད་ཅེས་ཐོག་མར་རང་ཉིད་གྲོལ་ནས་དེ་རྗེས་གཞན་སྒྲོལ་བར་འདོད་པའི་བྱང་སེམས་རྣམས་ནི་གྲངས་མེད་སུམ་ཅུ་སོ་གསུམ་ཐོགས་ཏེ། ཚོགས་སྦྱོར་དུ་གསུམ། ས་བཅུ་རེ་རེ་ལ་གསུམ་གསུམ་གྱིས་མཐར་བྱང་ཆུབ་ཆེན་པོའི་གོ་འཕང་ཐོབ་པ་ཡིན་ནོ། །དེ་ལྟར་བརྗོད་བྱའི་དོན་མཐར་ཕྱིན་ནས་ལེའུའི་སྐབས་བསྡུ་བ་ནི། བྱང་ཆུབ་སེམས་དཔའི་སེམས་བསྐྱེད་ཀྱི་བསླབ་བྱ་རིམ་པར་ཕྱེ་བ་སྟེ་གསུམ་པའོ། །ཞེས་པ་སྟེ། བྱང་ཆུབ་སེམས་དཔའི་སེམས་བསྐྱེད་ཀྱི་བསླབ་བྱ་དོན་དམ་བྱང་ཆུབ་ཀྱི་སེམས་རང་གནས་ཀྱི་ཡེ་ཤེས་ཉིད་ཀུན་རྫོབ་ཐབས་ཀྱི་བརྡ་ལ་བརྟེན་ནས་གདུལ་བྱའི་ངོ་སྐལ་དང་འཚམས་པར་བཅད་པ་སྨོན་པ་དང་འཇུག་པའི་སེམས་གཉིས་པོ་བསྐྱེད་ཚུལ་སྲོལ་གཉིས་ཀྱི་རིང་ལུགས་ལྟར་བཤད་པའི་རིམ་པ་གསལ་བར་ཕྱེས་པ་སྟེ་སྐབས་གསུམ་པའི་རྣམ་པར་བཤད་པའོ།། །། ༈ རྩ་བའི་གསུམ་པ་རིག་པ་འཛིན་པ་རྣམས་ཀྱི་བསླབ་བྱ་གསང་སྔགས་རྡོ་རྗེ་ཐེག་པའི་དམ་ཚིག་སྡོམ་པའི་རིམ་པར་ཕྱེ་བ་གཏན་ལ་དབབ་པ་ལ་གསུམ། རྡོ་རྗེ་ཐེག་པའི་བསྟན་པ་ཐོག་མར་ཇི་ལྟར་བྱུང་ཚུལ་སྨོས་པས་ཁོག་དབུབ་པ། དེ་ལྟར་བྱུང་བའི་བསྟན་པ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་ཚུལ། དེ་ལྟར་བཟུང་བའི་བརྗོད་བྱ་སྐབས་དོན་གཞུང་བསྲང་ཚུལ་གཏན་ལ་དབབ་པའོ། །དང་པོ་རྡོ་རྗེ་ཐེག་པའི་བསྟན་པ་ཐོག་མར་ཇི་ལྟར་བྱུང་ཚུལ་བཤད་པ་ནི། ཀུན་བཟང་རྡོ་རྗེ་འཆང་དབང་སྟོན་པ་དེས། །འོག་མིན་ཆེན་པོར་རྒྱུད་སྡེ་རྒྱ་མཚོ་གསུངས། །ཕྱིས་ནས་འབྲས་སྤུངས་སོགས་སུ་བཟླས་ཏེ་བསྟན། །ཞེས་པ་སྟེ། ཐོག་མར་སྟོན་པས་རྒྱུད་སྡེ་རྣམས་ཇི་ལྟར་གསུངས་པའི་ཚུལ་ཕུན་སུམ་ཚོགས་པ་ལྔ་ལྡན་ཏེ། དེ་ཡང་སྟོན་པ་ཕུན་སུམ་ཚོགས་པ་ནི་བདག་ཅག་གི་སྟོན་པ་འདི་ཉིད་ཐོག་མ་མེད་པའི་དུས་སུ་གཞི་གདོད་མའི་དབྱིངས་སུ་རིག་པའི་ཡེ་ཤེས་གྲོལ་བས་མངོན་པར་བྱང་ཆུབ་སྟེ་སྐུ་དང་ཡེ་ཤེས་འདུ་འབྲལ་མེད་པའི་ངང་ལ་དུས་གསུམ་གྱི་སངས་རྒྱས་ཐམས་ཅད་དང་དགོངས་པ་རོ་གཅིག་ཏུ་བཞུགས་པ་ལས་ལོངས་སྤྱོད་རྫོགས་པའི་སྐུར་སྣང་སྟེ། ཡེ་ཤེས་གསང་བ་ལས། རང་བཞིན་མི་གཡོ་ལྷུན་རྫོགས་ཤིང་། །སྤྱོད་ཡུལ་ཀུན་ཏུ་བཟང་པོ་སྟེ། །ཞེས་པ་ལྟར་སྤྱོད་ཡུལ་ཐམས་ཅད་ཡེ་ཤེས་རང་སྣང་གི་ངོ་བོ་འབའ་ཞིག་ཏུ་དག་པས་ཀུན་ཏུ་བཟང་པོ། གཟུང་འཛིན་གྱི་རྟོག་པས་མི་ཕྱེད་པས་རྡོ་རྗེ། དབྱིངས་དང་ཡེ་ཤེས་འདུ་འབྲལ་མེད་པར་འཆང་ཞིང་། དཀྱིལ་འཁོར་ཐམས་ཅད་ཀྱི་དབང་ཕྱུག་དམ་པར་གྱུར་པའི་སྟོན་པར་སྣང་བ་དེས། གནས་ཕུན་སུམ་ཚོགས་པ་རང་སྣང་ཤིན་ཏུ་རྣམ་པར་དག་པའི་ཞིང་ཁམས་འོག་མིན་ཆེན་པོར། འཁོར་ཕུན་སུམ་ཚོགས་པ་ཉིད་ལས་མི་གཞན་པའི་རང་སྣང་གི་འཁོར་རྒྱལ་བ་ཞི་ཁྲོའི་དཀྱིལ་འཁོར་ཚད་མེད་པས་ཡོངས་སུ་བསྐོར་པའི་དབུས་ན། ཆོས་ཕུན་སུམ་ཚོགས་པ་ཡེ་ཤེས་འོད་གསལ་བའི་དགོངས་པ་བརྗོད་དུ་མེད་པ་ཉིད། དུས་ཕུན་སུམ་ཚོགས་པ་གཞི་རྫོགས་འཕོ་འགྱུར་མེད་པའི་དབྱིངས་སུ་རང་ཤར་བའི་ཚུལ་གྱིས་སྣང་བར་གྱུར་ཏོ། །དེའི་ངང་ལས་ས་བཅུའི་རྒྱུན་མཐའ་ལ་སྣང་བའི་གནས་ཁྱད་པར་ཅན་འོག་མིན་དུ། སྟོན་པ་རིགས་དྲུག་པའི་རྣམ་པས། འཁོར་ས་མཐའི་བྱང་ཆུབ་སེམས་དཔའ་རིག་པ་འཛིན་པ་རྣམས་ལ། ཆོས་གསང་སྔགས་ཀྱི་རྒྱུད་སྡེ་རྒྱ་མཚོ་ལྟ་བུ་དགོངས་པ་བརྡའི་གསུང་གིས། དུས་རྟག་པ་རྒྱུན་གྱི་འཁོར་ལོར་བསྟན་པར་མཛད་ཅིང་། དེ་བཞིན་དུ་བྱང་སེམས་ས་དགུ་པ་ལ་སྣང་བའི་འོག་མིན་ཙམ་པོ་བ་དང་། ས་བརྒྱད་པ་ལ་སྣང་བའི་འོག་མིན་བཏགས་པ་བ་རྣམས་སུའང་ཚུལ་དེ་དང་འདྲ་བར་གསུངས་ཤིང་། དེའི་ཚེ་གདུལ་བྱ་གདུག་པ་ཅན་རྣམས་ཀྱི་ངོར་དཔལ་ཧེ་རུ་ཀའི་རྣམ་པར་སྣང་བས་ཁྲོ་བོའི་དཀྱིལ་འཁོར་རབ་འབྱམས་སྤྲུལ་བཤད་ཀྱིས་དོན་མཛད་པ་དང་། གཞན་ཡང་རང་བཞིན་སྤྲུལ་པའི་ཞིང་ཁམས་ལྔ་དང་། དག་མ་དག་གི་འཇིག་རྟེན་གྱི་ཁམས་རྣམས་སུ་འགྲོ་འདུལ་སྤྲུལ་པའི་རྣམ་པ་ཚད་མེད་པར་སྣང་བས་དེ་དང་དེར་གནས་པའི་གདུལ་བྱ་རང་རང་གི་མོས་པ་དང་མཐུན་པར་འདུལ་བྱེད་ཀྱི་ཐབས་ཚུལ་དཔག་ཏུ་མེད་པས་དོན་མཛད་དོ། །དེ་ལྟ་བུའི་རྒྱུད་སྡེ་རྣམས་རྡོ་རྗེ་འཆང་གི་ཐུགས་ཀྱི་རྣམ་པར་འཕྲུལ་པ་རིགས་གསུམ་སེམས་དཔས་ལྷ་ཀླུ་གནོད་སྦྱིན་གྱི་ཡུལ་རྣམས་སུ་བསྟན་ནས་དར་བར་མཛད་ཅིང་། ཁྱད་པར་མི་ཡུལ་སོགས་སུ་ཇི་ལྟར་བྱུང་བའི་ཚུལ་ལ་མཆོག་གི་སྤྲུལ་སྐུའི་རྣམ་པར་སྣང་བ་བདག་ཅག་གི་སྟོན་པ་འདི་ཉིད་དཀའ་ཐུབ་ལ་གནས་པའི་ཚེ་ཐུགས་འོག་མིན་དུ་སངས་རྒྱས་ནས་རིམ་བཞིན་རི་རིབ་ཀྱི་རྩེ་དང་། རྒྱ་མཚོའི་འགྲམ་ལ་སོགས་པར་གསང་སྔགས་ཀྱི་ཆོས་དུ་མ་བསྟན་ཏེ་སླར་བཏགས་པའི་ལུས་ལ་ཞུགས་ཏེ་འཚང་རྒྱ་ཚུལ་སོགས་བསྟན་པར་བཞེད་པ་དང་། སྤྱིར་གསང་སྔགས་རྡོ་རྗེ་ཐེག་པའི་རྒྱུད་རྣམས་ཕྱག་ན་རྡོ་རྗེས་བསྡུས་ཏེ། སཾ་སྐྲྀ་ཏ་དང་། པྲཱ་ཏི་ཏ་དང་། ཨ་བ་བྷྲཾ་ཤ་དང་། ཌཱ་ཀི་ནིའི་སྐད་དང་། ཀླ་ཀློའི་སྐད་ལ་སོགས་པ་སྐད་རིགས་དང་ཡིག་རིགས་སྣ་ཚོགས་པས་གླེགས་བམ་ལ་བཀོད་པར་བཤད་དེ། ཡེ་ཤེས་ཐིག་ལེའི་རྒྱུད་ལས། མ་འོངས་པའི་དུས་སུ་གསང་བའི་རྒྱུད་སྐལ་བ་དང་ལྡན་པའི་སེམས་ཅན་ལ་སུས་འཆད་པར་བྱེད། བཀའ་སྩལ་པ། ཕྱག་ན་རྡོ་རྗེ་མགོན་པོས་བཤད་པར་བྱེད་དོ། །ཞེས་སོ། །དེ་ནས་ཡང་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏིས་སྟོན་པའི་ཉན་ཐོས་མཁའ་ལ་འཕུར་ཏེ་འགྲོ་འོང་བྱེད་པ་གཟིགས་པ་ན་ཐག་རིང་བས་ཆ་མ་ཕྱེད་དེ། བློན་པོ་ལ་བྱ་དམར་པོའི་ཁྱུ་འདི་དག་ཅི་ཡིན་དྲིས་པས། དེ་རྣམས་ན་རེ། འདི་ནི་བྱ་མ་ལགས་ཏེ། སངས་རྒྱས་ཀྱི་ཉན་ཐོས་ལགས་སོ་བྱས་པས། རྒྱལ་པོ་སངས་རྒྱས་བལྟ་འདོད་ནས་གསོལ་བ་བཏབ་པས། ནངས་པར་ཝཱ་ར་ཎཱ་སི་ནས་བཅོས་ལྡན་འདས་འཁོར་དགྲ་བཅོམ་པ་ལྔ་བརྒྱ་དང་བཅས་པ་རྫུ་འཕྲུལ་གྱིས་བྱོན། དེར་རྒྱལ་པོས་མཆོད་ནས་འཚང་རྒྱ་བའི་ཐབས་ཞུས་པས། རབ་ཏུ་བྱུང་ལ་བསླབ་པ་གསུམ་རྒྱུད་ལ་བརྟེན་ཅིག་གསུངས་པས། ཛམྦུའི་ཚལ་ནི་ཉམས་དགའ་བར། །ཝ་སྐྱེས་ཉིད་དུ་གྱུར་ཀྱང་སླའི། །འདོད་ཡོན་སྤངས་པའི་ཐར་པ་ནི། །ནམ་ཡང་མི་འདོད་ག་ཏ་མ། །ཞེས་ཞུས་པ་དང་། སྐད་ཅིག་ལ་ཉན་ཐོས་ཀྱི་ཚོགས་རྣམས་མི་སྣང་བར་གྱུར་ཏེ། འདི་ན་གང་ཟག་བརྒྱད་མེད་ཅིང་། །ཉན་ཐོས་རང་རྒྱལ་འགའ་ཡང་མེད། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་དག་དེ་ཡིས་གཟུགས་སུ་སྤྲུལ། །ཞེས་ནམ་མཁའ་ནས་སྒྲ་བྱུང་བ་དང་། དེར་ཡེ་ཤེས་ཀྱི་དཀྱིལ་འཁོར་སྤྲུལ་ནས་རྒྱལ་པོ་ལ་དབང་བསྐུར་བས། དེ་ཉིད་དུ་ཟུང་འཇུག་གི་སྐུ་འགྲུབ་སྟེ། དེ་ལ་སྟོན་པས་རྒྱུད་ཐམས་ཅད་གཏད་པར་བཞེད་དོ། །གཞན་ཡང་རི་བོ་བྱ་རྐང་ཅན་དང་། བསིལ་བའི་ཚལ་དང་། ལངྐའི་བདག་པོ་སྒྲ་སྒྲོགས་ཀྱི་གནས་ལ་སོགས་པར་སྟོན་པ་ཉིད་དཀྱིལ་འཁོར་གྱི་བདག་པོའི་རྣམ་པར་བསྒྱུར་བའམ། མ་བསྒྱུར་བ་ཆགས་བྲལ་གྱི་རྣམ་པ་ཅི་རིགས་པས་རྒྱུད་སྡེ་མང་དུ་གསུངས་པ་ལྟར་ཡིན་ལ། དེ་ཡང་དུས་འཁོར་བ་རྣམས་ནི་སྔར་བསྟན་པའི་རྒྱུད་སྡེ་རྣམས་སྟོན་པས་ཞིང་འདིར་ཐེག་གསུམ་བསྟན་པའི་ཕྱིས་ནས་དཔྱིད་འབྲིང་ནག་པའི་ཉ་ལ་དཔལ་ལྡན་འབྲས་སྤུངས་ཀྱི་མཆོད་རྟེན་དུ་འོག་ཏུ་ཆོས་དབྱིངས་གསུངས་དབང་དང་། སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་སྤྲུལ་ཏེ་འདུས་པའི་འཁོར་ལ་དབང་བསྐུར་ནས་རྣལ་འབྱོར་དང་རྣལ་འབྱོར་མའི་རྒྱུད་སྡེ་མཐའ་དག་བསྟན་པ་དང་། གཞན་ཡང་ཆགས་བྲལ་གྱི་རྣམ་པས་བྱ་སྤྱོད་ཀྱི་རྒྱུད་ཕལ་ཆེར་དང་། ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏི་ལ་གསང་བ་འདུས་པའི་རྒྱུད་དང་། རྡོ་རྗེ་སྙིང་པོ་ལ་ཀྱཻ་རྡོར་གྱི་རྒྱུད་སོགས་དེ་དང་དེའི་དཀྱིལ་འཁོར་གྱི་གཙོ་བོའི་སྐུར་བཞེངས་ནས་གསུངས་པ་སོགས་སྔར་འོག་མིན་དུ་གསུངས་པ་སོ་སོའི་གནས་སུ་སླར་ཡང་བཟླས་ཏེ་བསྟན་པའང་བརྗོད་ཀྱིས་མི་ལངས་སོ། །གཉིས་པ་དེ་ལྟར་བྱུང་བའི་བསྟན་པ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་ཚུལ་ནི། ཕྱག་རྡོར་དང་ནི་ཞུ་བའི་འཁོར་གྱིས་བསྡུས། །གྲུབ་ཆེན་བརྒྱད་སོགས་རྒྱ་བོད་མཁས་པས་བཀྲལ། །ཅེས་པ་སྟེ། དེ་ཡང་བཀའ་བསྡུ་སོགས་ཀྱིས་བསྟན་པ་སྤེལ་བའི་ཚུལ་ནི་རི་རབ་ཀྱི་བྱང་ཤར་ལྕང་ལོ་ཅན་གྱི་ཕོ་བྲང་དུ་བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་རྩ་དྲུག་འདུས་པ་ལ་ཕྱག་རྡོར་གྱིས་བཀའ་བསྡུ་བའི་ཚུལ་དུ་རྒྱུད་སྡེ་མ་ལུས་པ་གསུངས་པ་དང་ནི། དུས་འཁོར་རྩ་རྒྱུད་ཟླ་བ་བཟང་པོས་དང་། བརྟག་གཉིས་རྡོ་རྗེ་སྙིང་པོས་དང་། རྡོ་རྗེ་མཁས་འགྲོ་ཕག་མོས་བསྡུས་པ་སོགས་ཞུ་བ་པོའི་འཁོར་གྱིས་བསྡུས་པའང་ཡོད་ལ། དེ་སྟོན་པ་དང་སྡུད་པ་པོ་ཐ་དད་དུ་སྣང་ཡང་དོན་ལ་ཐ་དད་མེད་དེ། གསང་བ་གྲུབ་པ་ལས། རྒྱུད་འཆད་པ་དེ་ཐུགས་རྡོ་རྗེ། །འཆད་པ་པོ་དེ་སྡུད་པའང་དེ། །ཞེས་གསུངས་པའི་ཕྱིར་རོ། །འོ་ན་མདོ་སྡེ་གདམས་ངག་འབོགས་པའི་རྒྱལ་པོ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་ཞུས་པའི་ལན་དུ། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་པས། ལུང་བསྟན་པ་ཙམ་ལས་དངོས་སུ་མ་གསུངས་པ་མ་ཡིན་ནམ་ཞེ་ན། དེ་ནི་རེ་ཞིག་གསང་སྔགས་ཀྱི་སྒྲ་མི་ཡུལ་དུ་ཁྱབ་བརྡལ་དུ་མ་གྲགས་པ་ཙམ་ལ་བཤད་ཀྱི་གཏན་ནས་མ་གསུངས་པ་ནི་མ་ཡིན་ཏེ་སྔར་བཤད་པ་དག་གིས་ཀྱང་ཤེས་ལ། ཕྱིས་འབྱུང་བར་ལུང་བསྟན་པ་ནི་ཡོངས་སུ་གྲགས་པ་ལ་དགོངས་པའོ། །དེ་ཡང་སྔ་འགྱུར་བ་རྣམས་ལྟར་ན་རྒྱུད་སྡེ་དང་། སྒྲུབ་སྡེ་གཉིས་སུ་དབྱེ་བ་ལས། རྒྱུད་སྡེ་རྣམས་མི་ཡུལ་དུ་དར་ཚུལ་ནི། །སྤྱི་མདོ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛཿཞེས་བྱ་བ་ལ། །སྔོན་དུ་ལྟས་སྣང་སྣང་གྱུར་ཏེ། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་དཔའ་དམན་པའི་ལུས། །ལངྐའི་བདག་པོ་ལ་སོགས་ལ། །ལག་ན་རྡོ་རྗེས་སྣང་བར་འགྱུར། །ཞེས་པ་ལྟར་ཐུབ་པའི་དབང་པོ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན་དམ་པའི་རིགས་ཅན་ལྷ་གྲགས་ལྡན་མཆོག་སྐྱོང་། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མིའི་རིག་འཛིན་ལི་ཙ་བཱི་དྲི་མ་མེད་པར་གྲགས་པ་སྟེ་དྲྭ་མ་ལྔ་པོ་ལངྐའི་ཡུལ་གྱི་རི་མ་ལ་ཡའི་རྩེར་རང་རང་གི་མངོན་ཤེས་དང་རྫུ་འཕྲུལ་གྱིས་འདུས་ཏེ་གདུང་ཚིག་ཉེར་གསུམ་བཏོན་པས། གསང་བདག་མངོན་སུམ་དུ་བྱོན་ནས་རིགས་ཅན་དྲྭ་མ་ལྔ་སོགས་རིག་འཛིན་འདུས་པ་ཕལ་མོ་ཆེ་ལ་སྔོན་འོག་མིན་དང་། དགའ་ལྡན་དང་། སུམ་ཅུ་རྩ་གསུམ་རྣམས་སུ་གྲགས་པའི་གསང་བའི་ཐེག་པ་ཉིད་སྟོན་པར་མཛད་ཅིང་། དེ་རྣམས་སྲིན་པོ་བློ་གྲོས་ཐབས་ལྡན་གྱི་གསེར་གྱི་གླེགས་བམ་ལ་བཻ་ཌཱུརྻའི་ཞུན་མས་བྲིས་ནས་དགོངས་པའི་རྩལ་བདུན་གྱིས་ནམ་མཁའ་ལ་སྦས་སོ། །དེའི་ཚེ་དེའི་བྱིན་རླབས་ཀྱིས་ས་ཧོ་རའི་རྒྱལ་པོ་ཛཿལ་རྨིས་ལྟས་ངོ་མཚར་བ་བདུན་རྨིས་པ་ལ་བརྟེན་ནས་སྒྲུབ་པ་མཛད་པས། རྨི་ལྟས་དང་མཐུན་པར་རྒྱུད་སྡེའི་གླེགས་བམ་རྣམས་མི་ཡུལ་དུ་དངོས་སུ་བབས་ཏེ། མ་ཧཱ་ཡོ་གའི་རྒྱུད་སྡེའི་གླེགས་བམ་རྣམས་ཕོ་བྲང་གི་སྟེང་དུ་བབས་པ་དང་། ཀྲི་ཡའི་རྒྱུད་རྣམས་ཝཱ་ར་ཎཱ་སི། ཡོ་ག་རྣམས་མེ་རི་འབར་བའི་རྩེ་མོར། ཨ་ནུ་ཡོ་ག་རྣམས་ལངྐའི་ཡུལ་དུ་གྲགས་པ་སིངྒ་ལའི་གླིང་གི་ནགས་ཚལ་དུ་བབས་པ་ནས་རྒྱ་བལ་བྲུ་ཤའི་ཡུལ་རྣམས་ལ་རིམ་གྱིས་དར་བ་ལས། ཕྱིས་སུ་ཡུལ་དེ་དག་གི་ལོ་པཎ་ལས་གནུབས་ཆེན་གྱིས་གསན་ཏེ་བོད་དུ་དར་རོ། །ཨ་ཏི་ཡོ་ག་རྣམས་ནི་ནུབ་ཕྱོགས་ཨོ་ཌི་ཡ་ནའི་ཡུལ་དུ་སློབ་དཔོན་དགའ་རབ་རྡོ་རྗེས་རྡོ་རྗེ་སེམས་དཔའམ་ཕྱག་ན་རྡོ་རྗེ་ལས་དངོས་སུ་གསན་པ་ལྟར་བསྡུ་བར་མཛད་དེ་གླེགས་བམ་ལ་བཀོད་དེ་འཇམ་དཔལ་བཤེས་གཉེན་ལ་གསུངས། དེས་ཤྲཱི་སིང་ཧ་ལ། དེས་ཨོ་རྒྱན་སངས་རྒྱས་གཉིས་པ་དང་། པཎ་ཆེན་བི་མ་ལ་མི་ཏྲ། ལོ་ཆེན་བཻ་རོ་ཙ་ན་གསུམ་ལ་གནང་བ་ལས་རྒྱ་ཆེར་འཕེལ་ལོ། །སྒྲུབ་སྡེ་རྣམས་ནི་སྔོན་འོག་མིན་གསང་བ་མཆོག་གི་གནས་སུ་ཆེ་མཆོག་ཧེ་རུ་ཀས་ཆོས་ཉིད་ཀྱི་རང་སྒྲས་གསུངས་པ་གསང་བདག་རྡོ་རྗེ་ཆོས་ཀྱིས་རང་ཉིད་ཚོམ་བུ་དགུ་ཡི་དཀྱིལ་འཁོར་གྱི་ནང་དུ་སྣང་བར་མཛད་ནས་ཐོག་མར་ངག་ཏུ་བསྡུས། དེ་ནས་གླེགས་བམ་དུ་བཀོད་ཅིང་། དེའི་དགོངས་འགྲེལ་དུ་ལུང་ལྔ་ཐུགས་རྗེ་དཔྱངས་ཐག་གནས་ཀྱི་ལུང་། མཛད་པ་ཆོ་འཕྲུལ་ལྷ་ཡི་ལུང་། ཕྲིན་ལས་མཐར་ཕྱིན་སྒྲུབ་པའི་ལུང་། གསང་སྔགས་ངེས་པ་དོན་གྱི་ལུང་། གསང་བ་སྒོ་འབྱེད་སྒྲོན་མའི་ལུང་། མཆན། ཡང་མཛད་ནས། རེ་ཞིག་མིའི་ཡུལ་དུ་བསྟན་པའི་ཡུལ་མ་གཟིགས་ནས་མཁའ་འགྲོ་མ་ལས་ཀྱི་དབང་མོ་ཆེ་ལ་གཏད། དེས་སྒྲུབ་པ་བཀའ་བརྒྱད་ཀྱི་སྤྱི་རྒྱུད་ལྔ་སྒོས་རྒྱུད་བཅུ་རྣམས་རིན་ཆེན་སྣ་བརྒྱད་ཀྱི་སྒྲོམ་བུར་བཅུག །སྒོས་རྒྱུད་རྣམས་རིན་པོ་ཆེ་ཐ་དད་པའི་སྒྲོམ་བུར་བཅུག་ནས་དུར་ཁྲོད་བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པའི་ཚལ་དུ་མི་སྣང་བར་རྒྱས་བཏབ། དུས་ཕྱིས་གྲུབ་པའི་སློབ་དཔོན་བརྒྱད་ཀྱིས་མངོན་ཤེས་ཀྱིས་མཁྱེན་ནས་གནས་དེར་འདུས་ཤིང་དགོངས་པ་ཏིང་ངེ་འཛིན་གྱི་མཐུས་བསྐུལ་བས་མཁའ་འགྲོ་མ་ལས་ཀྱི་དབང་མོ་ཆེ་མངོན་སུམ་དུ་བྱོན་ནས་སྒྲོམ་བུ་རྣམས་བླངས་ཏེ། ཆེ་མཆོག་གི་བསེ་སྒྲོམ་བི་མ་ལ། ཡང་དག་གི་དངུལ་སྒྲོམ་ཧཱུྃ་ཀ་ར། གཤིན་རྗེའི་ལྕགས་སྒྲོམ་འཇམ་དཔལ་བཤེས་གཉེན། རྟ་མགྲིན་གྱི་ཟངས་སྒྲོམ་ནཱ་ག་རྫུ་ན། ཕུར་པའི་གཡུ་སྒྲོམ་པདྨ་འབྱུང་གནས། མ་མོའི་བསེ་སྒྲོམ་དྷ་ན་སཾ་སྐྲྀ་ཏ། མཆོད་བསྟོད་ཀྱི་མཆོང་སྒྲོམ་རཾ་བུ་གུ་ཧྱ། དྲག་སྔགས་ཀྱི་གཟི་སྒྲོམ་ཤཱིནྟཾ་གརྦྷ་རྣམས་ལ་སོ་སོར་གཏད་པ་བཞིན་རང་རང་ལ་བཀའ་བབས་པའི་དོན་ལ་མཁས་ཤིང་སྔགས་ཀྱི་དངོས་གྲུབ་བརྙེས་པར་གྱུར། རིན་པོ་ཆེ་སྣ་བརྒྱད་ཀྱི་སྒྲོམ་བུ་ལས་བདེ་གཤེགས་འདུས་པའི་ཚོམ་བུ་གཅིག་ཏུ་འདུས་པའི་རྒྱུ་དང་མན་ངག་གི་བཀའ་རྣམས་བྱུང་བ་སྐབས་དེར་རྒྱ་མ་འཁྲོལ་བས་སླར་དེ་ཉིད་དུ་སྦས་ཤིང་། ཕྱིས་སུ་ཀུན་འདུས་རིག་འཛིན་སློབ་དཔོན་ཆེན་པོ་པདྨ་སམྦྷ་ཝ་ལ་བཀའ་བབས་པ་བཞིན་བོད་དུ་ལས་ཅན་རྗེ་འབངས་སྙིང་གི་བུ་དགུ་རྣམས་ཐོག་མར་དབང་གིས་སྨིན་པར་མཛད་ནས་གདམས་པ་ཡོངས་རྫོགས་ལེགས་པར་སྩལ་ཞིང་། གཞན་ཡང་སྐལ་ལྡན་འབངས་རིགས་ཉེར་ལྔ་སོགས་ལའང་ཅི་རིགས་པར་སྩལ། དཔེ་རྒྱུན་རྣམས་ཟབ་མོའི་གཏེར་དུ་གཏམས་པ་བསྟན་ཞབས་གཏེར་གྱིས་སྐྱོང་བའི་ཐུགས་བསྐྱེད་བླ་ན་མེད་པར་གོ་ཞིང་། གཞན་ཡང་རྒྱུད་སྡེ་དང་སྒྲུབ་སྡེའི་སྐོར་སོགས་ལ་རྒྱ་བོད་ཀྱི་མཁས་པ་དང་དངོས་གྲུབ་བརྙེས་པའི་སློབ་དཔོན་རྣམས་ཀྱིས་སོ་སོའི་དགོངས་པ་མ་ནོར་བར་བཀྲལ་ཞིང་སྤེལ་བར་མཛད་པ་ཡིན་ནོ། །གསུམ་པ་དེ་ལྟར་བཟུང་བའི་བརྗོད་བྱ་སྐབས་དོན་གཏན་ལ་དབབ་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། སྔ་འགྱུར་རིང་ལུགས་བཀའ་གཏེར་གྲགས་པ་དང་། །གསར་མའི་བཞེད་སྲོལ་དཔག་ཏུ་མེད་ན་ཡང་། །རྒྱུད་སྡེ་སྤྱི་ཡི་དམ་ཚིག་འདིར་འཆད་དོ། །ཞེས་པ་སྟེ། དེ་ལྟར་གསང་སྔགས་སྔ་འགྱུར་བ་རྣམས་ཀྱི་རིང་ལུགས་ལ། སྤྱི་མདོ་ལས། དགོངས་པ་རིག་པ་རྣ་བར་གཏད། །རྒྱལ་བ་སེམས་དཔའ་རྣལ་འབྱོར་པ། །གང་ལ་ཐུག་གི་བར་དུའོ། །ཞེས་གསུངས་པ་ལྟར། རིང་བརྒྱུད་བཀའ་མ་དང་། ཉེ་བརྒྱུད་གཏེར་མ་སྟེ། གཉིས་ཀའི་ཐུན་མོང་གི་བརྒྱུད་ཁུངས་རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་གསུམ་པོའི་སྟེང་དུ། གཏེར་མའི་ཕྱོགས་སུ་བཀའ་བབས་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱ་སྟེ་དེ་གསུམ་བསྣན་པས་བརྒྱུད་ཚུལ་དྲུག་གི་སྒོ་ནས་བཟུང་བའི་ཚུལ་སོགས་ཡོངས་སུ་གྲགས་པ་ལྟར་དང་། ཕྱི་འགྱུར་གསར་མ་བའི་བཞེད་སྲོལ་ལ་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏིས་རྒྱུད་རྣམས་གླེགས་བམ་དུ་བྱས་ཤིང་ཡུལ་དེའི་སྐྱེ་བོ་ཐམས་ཅད་ལ་བསྟན་པས་ཡུལ་དེའི་སྲོག་ཆགས་ཕྲ་མོ་ཡན་ཆད་ཀྱིས་དངོས་གྲུབ་ཐོབ་སྟེ་འཇའ་ལུས་སུ་སོང་། སླར་ཡུལ་དེ་མཚོར་གྱུར་པ་ཀླུ་རྣམས་ཀྱིས་གང་བ་ན། ཕྱག་རྡོར་གྱིས་ཀླུ་རྣམས་སྨིན་པར་མཛད་པས། དེ་དག་ཀྱང་རིམ་གྱིས་མིར་གྱུར་ནས་མཚོ་འགྲམ་དུ་གྲོང་བཅས་ཏེ་ཉམས་སུ་བླངས་པས་ཐམས་ཅད་ཀྱི་གྲུབ་པ་ཐོབ། བུ་དང་བུ་མོ་རྣམས་མཁའ་འགྲོ་དང་མཁའ་འགྲོ་མར་གྱུར་པས་ཨོ་རྒྱན་མཁའ་འགྲོའི་གླིང་ཞེས་གྲགས། མཚོ་དེའང་སྐམ་སྟེ་ཧེ་རུ་ཀའི་ལྷ་ཁང་རང་བྱུང་བས་དེའི་དཀོར་མཛོད་དུ་རྒྱུད་སྡེ་ཐམས་ཅད་ཀྱི་གླེགས་བམ་བཞུགས་པ་ལས། ཕྱིས་རྒྱལ་པོ་བི་པུ་ཀ་ཝ། ཀླུ་སྒྲུབ། ཌོམྦི་ཧེ་རུ་ཀ །ཀུ་ཀུ་རི་པ། ལ་ལི་ཏ་བཛྲ། གྲུབ་ཆེན་ཏེ་ལོ་པ་སོགས་ནས་རིམ་གྱིས་སྤྱན་དྲངས་པ་དང་། དེ་བཞིན་དུ་ཤམྦྷ་ལ་སོགས་ཡུལ་གཞན་དག་ནས་ཀྱང་སྤྱན་དྲངས་པ་བཅས། དེ་དག་ཀྱང་གྲུབ་ཆེན་བརྒྱད་དང་གྲུབ་ཐོབ་བརྒྱད་ཅུ་སོགས་མཁས་གྲུབ་མང་པོས་དོན་ལ་རྟོན་པའི་དགོངས་འགྲེལ་གྱིས་བཀྲལ་ཞིང་བཤད་སྒྲུབ་ཀྱིས་བཟུང་ཚུལ་སོགས་ལོ་རྒྱུས་རྣམ་གཞག་དཔག་ཏུ་མེད་པ་ཞིག་ཡོད་ན་ཡང་། འདི་དག་གི་བྱུང་ཚུལ་ཞིབ་ཏུ་རྟོགས་པར་འདོད་ན་གཞན་ལས་ཤེས་པར་བྱ་ཞིང་། འདིར་སྐབས་སུ་བབས་པ་ཕྱི་རྒྱུད་རྣམས་ཕྱོགས་ཙམ་དང་། ནང་རྒྱུད་ཡོ་ག་སྡེ་གསུམ་སྤྱི་ཡི་དམ་ཚིག་རྣམས་ཟབ་དོན་ཉམས་སུ་ལེན་པའི་སྐལ་པ་ཅན་གྱི་ཕྱིར་བསྲུང་བྱའི་རྣམ་གྲངས་ཞིབ་ཏུ་བསྟན་པར་བཞེད་ནས་སྐབས་འདིར་དེ་འཆད་པར་མཛད་དོ། །གཉིས་པ་རྒྱས་པར་བཤད་པ་ལ་བདུན། སྔགས་སྡོམ་གྱི་ངོ་བོ། དེའི་དབྱེ་བ། མ་ཐོབ་པ་ཐོབ་པར་བྱེད་པ། ཐོབ་པ་མི་ཉམས་པར་བསྲུང་བ། སྐྱེ་བའི་རྟེན། ཉམས་པ་གསོ་ཚུལ། བསྲུང་བའི་ཕན་ཡོན་བཤད་པའོ། །དང་པོ་སྔགས་སྡོམ་གྱི་ངོ་བོ་ནི། ངོ་བོ་སྒོ་གསུམ་ཐབས་ཤེས་ཀྱིས་ཟིན་པར། །སྡོམ་པའི་ཚུལ་ཁྲིམས་སོ་སོའི་རིང་ལུགས་བཞིན། །ཞེས་པ་སྟེ། དེ་ལ་སྔགས་སྡོམ་གྱི་ངོ་བོ་གང་ཞེ་ན། བསྡམ་བྱ་སྒོ་གསུམ་ཕྲ་བའི་བག་ཆགས་མཚན་འཛིན་གྱི་རྟོག་པ་དང་བཅས་པ། སྡོམ་བྱེད་ཐབས་ཤེས་ཁྱད་པར་ཅན་རྣམས་ཀྱིས་ཟིན་པའི་བདེ་བ་ཆེན་པོའི་ཡེ་ཤེས་ཀྱིས་བསྡོམ་པར་བྱས་པའི་སེམས་དཔའ་ས་བོན་དང་བཅས་པ་གང་ཞིག་རང་རྒྱུད་དབང་བསྐུར་བ་ལས་གསར་དུ་ཐོབ་པའི་ཚུལ་ཁྲིམས་སོ། །དེ་ཡང་བལྟས་པའི་བདེ་བ་དང་། དགོད་པའི་དང་། ལག་བཅངས་ཀྱི་དང་། གཉིས་སྦྱོར་གྱི་བདེ་བ་དང་། དེ་དག་པར་བྱེད་པའི་ཡེ་ཤེས་རང་རྒྱུད་ལ་འཛིན་པའི་ཁྱད་པར་ནི་རྒྱུད་སྡེ་བཞི་པོ་སོ་སོའི་རིང་ལུགས་བཞིན་ནོ། །གཉིས་པ་དབྱེ་བ་ལ་གཉིས། རྒྱུད་སྡེ་བཞིའི་ལུགས་སྤྱིར་དབྱེ་བ་དང་། བླ་མེད་ཀྱི་ལུགས་བྱེ་བྲག་ཏུ་དབྱེ་བའོ། །དང་པོ་རྒྱུད་སྡེ་བཞིའི་ལུགས་སྤྱིར་དབྱེ་བ་ནི། དབྱེ་བ་བྱ་སྤྱོད་རྣལ་འབྱོར་བླ་མེད་བཞིར། །རྩ་ལྟུང་བཅུ་བཞི་སོ་སོར་གྲངས་ངེས་པར། །དུས་ཀྱི་འཁོར་ལོར་བཤད་པས་གཞན་དུ་བལྟ། །ཞེས་པ་སྟེ། དེ་ལ་དབྱེ་བ་བྱས་ན་བྱ་སྤྱོད་རྣལ་འབྱོར་བླ་མེད་ཀྱི་རྒྱུད་བཞིར་རྩ་ལྟུང་བཅུ་བཞི་སོ་སོར་གྲངས་ངེས་པར་དཔལ་ལྡན་དུས་ཀྱི་འཁོར་ལོའི་འགྲེལ་པར་བཤད་པས་གཞན་དུ་བལྟ་ཞེས་ཞལ་འཕངས་པ་སྟེ། འདིར་མིང་ཙམ་སྨོས་ན། དང་པོ་བྱ་རྒྱུད་ལ། དཀོན་མཆོག་ལ་དད་པ་དང་། སྔགས་ལ་དད་པ། ཐེག་ཆེན་ལ་མོས་པ། བླ་མ་དང་མཆེད་ལ་གུས་པ། འདས་མ་འདས་ཀྱི་ལྷ་གཞན་ལ་མི་སྡང་བ། རང་གི་ལྷ་དུས་དུས་སུ་མཆོད་པ། གཞུང་གཞན་མི་མཆོད་པ། གློ་བུར་བའི་མགྲོན་མཆོད་པ། བྱམས་པ་མི་གཏོང་བ། སེམས་ཅན་གྱི་དོན་ལ་བརྩོན་པ། བཟླས་བརྗོད་ལ་བརྩོན་པ། དམ་ཚིག་གཞན་ཡང་ཅི་ནུས་བསྲུངས་པ། སྣོད་མིན་ལ་སྔགས་རྒྱ་མི་སྦྱིན་པ། རང་གི་སྔགས་རྒྱུད་སྲུང་ཞིང་དེའི་དོན་རྟོགས་པར་བྱེད་པ་རྣམས་ཏེ། དེ་དག་བཟློག་ན་རྩ་ལྟུང་དུ་འགྱུར་བ་ཡིན་ནོ། །སྤྱོད་རྒྱུད་ལ། མི་དགེ་བཅུ་དང་། རྩ་བ་བཞི་སྤོང་བའོ། །དེ་ལ་རྩ་བ་བཞི་ནི་དམ་པའི་ཆོས་སྤོང་བ་དང་། བྱང་ཆུབ་ཀྱི་སེམས་སྤོང་བ་དང་། སེར་སྣས་མི་སྦྱིན་པ་དང་། སེམས་ཅན་ལ་གནོད་པ་བྱ་བའོ། །རྣལ་འབྱོར་རྒྱུད་ལ་རིགས་ལྔའི་སྡོམ་བཟུང་ལྟར། དེ་བཞིན་གཤེགས་པའི་རིགས་ལ་སྐྱབས་གསུམ་འཛིན་པ་སྟེ་གསུམ། རྡོ་རྗེའི་རིགས་ལ་རྡོར་དྲིལ་ཕྱག་རྒྱ་སློབ་དཔོན་བཟུང་བ་བཞི། རིན་ཆེན་རིགས་ལ་སྦྱིན་པ་རྣམ་བཞི་གཏོང་བ་བཞི། པདྨའི་རིགས་ལ་དམ་ཆོས་མ་ལུས་འཛིན་པ་སྟེ་གཅིག །ལས་རིགས་ལ་སྔར་གྱི་སྡོམ་པ་རྣམས་འཛིན་པ་དང་། མཆོད་པའི་ལས་ལ་འབད་པ་སྟེ་གཉིས་བཅས་བཅུ་བཞི་བསྒྲུབ་པའི་བསླབ་བྱ་དང་། དེ་ལས་བཟློག་པ་རྩ་ལྟུང་བཅུ་བཞིའོ། །བླ་མེད་ཀྱི་རྩ་ལྟུང་ནི་འཆད་པར་འགྱུར་བས་ཤེས་སོ། །གཉིས་པ་བླ་མེད་ཀྱི་ལུགས་བྱེ་བྲག་ཏུ་དབྱེ་བ་ནི། བླ་མེད་ལུགས་ལ་བརྟུལ་ཞུགས་ཉི་ཤུ་ལྔ། །རིགས་ལྔའི་སྡོམ་པ་རྩ་ལྟུང་བཅུ་བཞི་དང་། །སྦོམ་པོ་དང་ནི་རྫོགས་པ་ཆེན་པོའི་སྲོལ། །ཞེས་པ་སྟེ། འདིར་གཙོ་བོ་བླ་མེད་ཀྱི་ལུགས་ཀྱི་སྡོམ་པ་བཤད་པ་ལ་བརྟུལ་ཞུགས་ཉི་ཤུ་རྩ་ལྔ་ཐུན་མོང་དང་། ཁྱད་པར་རིགས་ལྔའི་སྡོམ་པ་དང་། རྒྱུད་སྡེ་སྤྱི་ལ་གྲགས་པའི་རྩ་བའི་ལྟུང་བ་བཅུ་བཞི་དང་། དེའི་ཡན་ལག་སྦོམ་པོའི་བརྒྱད་དང་ནི་རྫོགས་པ་ཆེན་པོའི་སྲོལ་གྱི་རྩ་བ་དང་ཡན་ལག་གི་དམ་ཚིག་རྣམས་ཏེ་རིམ་བཞིན་འཆད་པར་འགྱུར་རོ། །གསུམ་པ་སྔགས་སྡོམ་མ་ཐོབ་པ་ཐོབ་པར་བྱེད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། དང་པོ་མ་ཐོབ་ཐོབ་པའི་ཚུལ་བཤད་པ། །ཞེས་པ་སྟེ། འདིར་ཅུང་ཟད་ཞིབ་ཏུ་སྨོས་ན། དེའང་ནང་གསེས་སུ་དང་པོ་མ་ཐོབ་པ་ལ་གསར་དུ་བསྐུར་བ་ནི་རྒྱུའི་དབང་ཡིན་ལ། དེ་ནས་བླ་མས་བསྐུར་བ་དང་རང་གིས་བདག་འཇུག་ལེན་པ་སོགས་ལ་ལམ་དབང་ཞེས་བྱ་ཞིང་། རྒྱུན་མཐར་ལོངས་སྤྱོད་རྫོགས་པའི་སྐུའི་དབང་བསྐུར་བས་བག་ཆགས་ཕྲ་བ་དག་ནས་སྟོན་འཁོར་དབྱེར་མེད་དུ་གྱུར་པ་ནི་འབྲས་བུའི་དབང་ཡིན་པས་ན་རྒྱུ་ལམ་གཉིས་ཀྱི་དབང་ཇི་ལྟར་ཐོབ་པའི་ཚུལ་བཤད་པ་ནི་འདི་ལྟ་སྟེ་ཞེས་སོ། །འདི་ལས་འཕྲོས་པ་དབང་བསྐུར་བ་པོ་རྡོ་རྗེ་སློབ་དཔོན་ནི། སྤྱི་མདོ་ལས། བརྟན་ཞིང་དུལ་ལ་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོར་བ་ཤེས། །དཀྱིལ་འཁོར་བྲི་བའི་ལས་ལ་མཁས། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་རྣམས་ལ་མི་འཇིགས་སྦྱིན། །ཐེག་པ་ཆེ་ལ་རྟག་དགའ་བ། །དེ་ནི་སློབ་དཔོན་ཡིན་པར་གསུངས། །ཞེས་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། ཕྱིར་བཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། །ཁ་སྦྱོར་འབྱེད་པའི་ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་སྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟངས་སྟབས་འདུག་སྟངས་བཟླས་བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་ཡང་སྡུད་པའི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་པ་ལ་སོགས་པ་རྒྱུད་ལས་གསུངས་པའི་མཚན་ཉིད་དང་ལྡན་པ་དང་། གཙོ་བོ་རང་གི་བླ་མ་རྡོ་རྗེ་སློབ་དཔོན་ལ་མཆོག་ཏུ་གུས་པས་དམ་ཚིག་ལ་ཉམས་སྐྱོན་མེད་པ་དང་། གདུལ་བྱ་བློས་མི་གཏོང་བའི་བྱམས་སྙིང་སེམས་བསྐྱེད་ཆེ་ཞིང་། བསྟན་པའི་རྒྱུད་ཡལ་བར་མི་དོར་བའི་ལྷག་བསམ་ནུས་ཤུགས་དང་ལྡན་པ་ནི་དབང་བསྐུར་བ་པོ་སློབ་དཔོན་གྱི་མཚན་ཉིད་ཡིད་ལ། དེས་གང་ལ་དབང་བསྐུར་བའི་ཡུལ་སློབ་མ་ནི། མན་ངག་གསང་བ་ལས། དད་བརྩོན་ཤེས་རབ་གཏོང་ཕོད་ཆེ། །སྒོམ་སྒྲུབ་དམ་ཚིག་ལ་ཡིད་རྟོན། །སྒྲུབ་དང་སྒོམ་ལ་དགའ་བ་དང་། །རྟག་ཏུ་བླ་མ་ལ་གུས་ཤིང་། །དུས་གསུམ་བླ་མ་མཆོད་བྱེད་པ། །ཡོན་ཏན་དང་ལྡན་སློབ་མ་ཡིན། །ཞེས་སོགས་ཀྱི་མཚན་ཉིད་ཚང་བའི་སློབ་མ་ལ། ཇི་ལྟར་བསྐུར་བའི་ཚུལ་མཐོང་བརྒྱུད་ཀྱིས་གཏན་ལ་ཕབ་པའི་དོན་བཞིན་མ་ནོར་མ་འཁྲུགས་པར་བསྐུར་བར་བྱའོ། །གཉིས་པ་རྒྱས་པར་བཤད་པ་ལ་ལྔ། དཀྱིལ་འཁོར་གྱི་རྣམ་གཞག །དབང་བཞིའི་རྣམ་གཞག །བྲལ་ཐོབ་ཀྱི་རྣམ་གཞག །ཐོབ་མཚམས་ཀྱི་རྣམ་གཞག །རྗེས་ཀྱི་རྣམ་གཞག་གོ། །དང་པོ་དཀྱིལ་འཁོར་གྱི་རྣམ་གཞག་ནི། །རྡུལ་ཚོན་དང་ནི་དེ་བཞིན་བྷ་ག་དང་། ཀུན་རྫོབ་དོན་དམ་བྱང་སེམས་དཀྱིལ་འཁོར་བཞིར། །ཞེས་པ་སྟེ། དབང་དང་པོ་བུམ་དབང་ནི་ཕྱི་མཚན་མའི་དཀྱིལ་འཁོར་ལ་བསྟེན་དགོས་པའི་ཕྱིར། བློ་རབ་ལ་ཚོམ་བུ། བློ་འབྲིས་ལ་རས་བྲིས། བློ་ཐ་མ་ལ་རྡུལ་ཚོན་གྱི་དཀྱིལ་འཁོར་ལྷག་པའི་ལྷ་གང་ཡིན་གྱི་གཞུང་དང་མཐུན་པ་དང་ནི་དེ་བཞིན་ཁྱད་པར་དབང་གཉིས་པ་ལ་སྔགས་ཀྱི་དེ་ཁོ་ན་ཉིད་ཡི་གེ་བྷ་གའི་དང་། དབང་གསུམ་པ་ལ་ལྷའི་དེ་ཁོ་ན་ཉིད་ཀུན་རྫོབ་བྱང་ཆུབ་སེམས་ཀྱི་དང་། དབང་བཞི་པ་ལ་ཡེ་ཤེས་ཀྱི་དེ་ཁོ་ན་ཉིད་དོན་དམ་བྱང་ཆུབ་སེམས་སྙིང་པོ་ཡེ་ཤེས་རླུང་གི་དཀྱིལ་འཁོར་ཏེ་དེ་བཞིར་བརྟེན་ནས་དབང་བསྐུར་བར་བྱའོ། །གཉིས་པ་ཇི་ལྟར་བསྐུར་བའི་དབང་བཞིའི་རྣམ་གཞག་ནི། བུམ་པ་གསང་བ་ཤེས་རབ་བཞི་པའི་དབང་། །མཚན་ཉིད་ལྡན་པའི་སློབ་བུར་རིམ་པར་བསྐུར། །ཞེས་པ་སྟེ། ཐོག་མར་བུམ་དབང་ལ། སའི་ཆོ་ག་དང་། བུམ་པ་དང་། ལྷ་དང་། སློབ་མ་སྟ་གོན་སོགས་སྔོན་དུ་སོང་ནས། བདག་ཉིད་དཀྱིལ་འཁོར་དུ་ཞུགས་ནས་སློབ་མ་སྣོད་དུ་རུང་བར་བྱ་བའི་ཕྱིར་དཀྱིལ་འཁོར་དུ་འཇུག་པར་བྱས་ནས་དམ་ཚིག་དང་སྡོམ་པ་འཛིན་དུ་བཅུག་ལ། དེ་ནས་དབང་དངོས་གཞི་བསྐུར་བ་ནི་སློབ་དཔོན་སྐུ་རྡོ་རྗེ་སྤྲུལ་སྐུའི་ངོ་བོ་དཀྱིལ་འཁོར་གྱི་ལྷ་དང་གཉིས་སུ་མེད་པར་བཞུགས་ལ་དེ་ལས་སྤྲུལ་པའི་ལྷ་དང་རང་བཞིན་གྱི་གནས་ནས་སྤྱན་དྲངས་པའི་ལྷ་སྟེ་དེ་ཐམས་ཅད་ཀྱང་གདན་གསུམ་ཚང་བའི་རྣམ་པར་བཞུགས་པ་རྣམས་ཀྱིས། སློབ་མ་དབང་རྫས་དང་བཅས་པ་ལྷར་བསྐྱེད་དེ་ཡེ་ཤེས་པ་བཅུག་ལ་དབང་རྫས་ཀྱི་ལྷ་རྣམས་འོད་དུ་ཞུ་ནས་དབང་རྫས་སོ་སོའི་རྣམ་པར་གྱུར་པ་ཐོགས་ཏེ་རིག་པའི་དབང་ལྔ་དང་། ཐབས་རྡོ་རྗེ་རྟུལ་ཞུགས་ཀྱི་དབང་སྟེ་སློབ་མའི་དབང་དྲུག་དང་། ཐབས་བྱུང་རྡོ་རྗེ་སློབ་དཔོན་གྱི་དབང་སྟེ་བུམ་པའི་དབང་དངོས་གཞི་བདུན་དང་། དེའི་ཡན་ལག་མཐའ་རྟེན་དང་བཅས་པ་བསྐུར་བས་སྣང་སྟོང་གཉིས་སུ་མེད་པའི་ཡེ་ཤེས་ཉམས་སུ་མྱོང་བ་དང་། སློབ་དཔོན་གསུང་རྡོ་རྗེ་ལོངས་སྤྱོད་རྫོགས་སྐུའི་ངོ་བོར་ཡབ་ཡུམ་སྙོམས་པར་ཞུགས་ཏེ་སངས་རྒྱས་ཐམས་ཅད་སྤྱན་དྲངས་པ་བསྟིམས་ནས་རྗེས་ཆགས་ཀྱིས་ཞུ་བ་བདུད་རྩི་བྱང་ཆུབ་ཀྱི་སེམས་དཀར་དམར་གྱི་ངོ་བོ་གསང་དཀྱིལ་དུ་གནས་པ་དེ་གསང་རྩེ་གཉིས་གང་རུང་ནས་སློབ་བུས་ལེན་པའམ། མ་ནུས་ན་མེ་ལོང་ཡུ་བ་ཅན་གྱིས་བླངས་ཏེ་བདུད་རྩི་དང་སྦྱར་ནས་སློབ་མའི་ལྕེ་ལ་བཞག་པ་སྙིང་གར་བསྟིམས་ཏེ་གསང་བའི་དབང་བསྐུར་བས་གསལ་སྟོང་བརྗོད་བྲལ་གྱི་ཡེ་ཤེས་ཉམས་སུ་མྱོང་བ་དང་། རྡོ་རྗེ་སློབ་དཔོན་ཐུགས་རྡོ་རྗེ་ཆོས་ཀྱི་སྐུའི་ངོ་བོར་བཞུགས་ཏེ་སློབ་མ་ཡབ་ཡུམ་སྙོམས་པར་ཞུགས་པ་ལ་བརྟེན་ནས་ཤེས་རབ་ཡེ་ཤེས་ཀྱི་དབང་བསྐུར་བ་ནི་ཡེ་ཤེས་པ་བསྟིམས་ནས་ཡས་བབ་དགའ་བཞིའི་འགྲོས་ཀྱིས་ཕྱིན་པ་རྡོ་རྗེ་ནོར་བུའི་བུམ་པར་འཛག་མེད་དུ་བཟུང་བས་བདེ་སྟོང་གཉིས་སུ་མེད་པའི་ཡེ་ཤེས་ཉམས་སུ་མྱོང་བ་དང་། སློབ་དཔོན་ཡེ་ཤེས་རྡོ་རྗེ་ངོ་བོ་ཉིད་སྐུའི་ངོ་བོར་བཞུགས་ལ་གསུམ་པའི་དུས་ཀྱི་དགའ་བཞི་རྫོགས་ནས་ཐབས་ཀྱིས་ལྡོག་པ་ལས་མས་བརྟན་གྱི་དགའ་བ་བཅུ་དྲུག་མཐར་ཕྱིན་པའི་ཚེ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་ནི་བཞི་པའི་དབང་ཡིན་ལ། དེ་ལ་ཡང་ཚིག་ཙམ་གྱིས་ཡེ་ཤེས་ངོ་སྤྲོད་པ་ཚིག་གི་དང་། བདེ་བ་ཆེན་པོའི་ཡེ་ཤེས་མཆོག་གི་ཏིང་ངེ་འཛིན་རྒྱུད་ལ་སྐྱེས་པ་དོན་གྱི་དང་། ལས་རྒྱ་ལ་བརྟེན་ནས་ཉམས་མྱོང་འདྲེན་པ་རྟེན་ཅན་གྱི་དང་། དེ་གོམས་པར་བྱེད་པ་ལམ་གྱི་དང་། དེ་མཐར་ཕྱིན་པ་འབྲས་བུའི་བཞི་པ་སྟེ་ལྔའོ། །གང་ལ་བསྐུར་ན་རང་དོན་ནུས་པའི་དད་པ་ཅན་དང་། གཞན་དོན་ནུས་པའི་བརྩོན་འགྲུས་ཅན་དང་། བདུད་རྩི་ལྔ་སོགས་དམ་ཚིག་གི་རྫས་ཁྱད་པར་ཅན་ལ་སྤོང་ལེན་མེད་པར་སྤྱོད་ནུས་ཤིང་རང་བྱིན་གྱི་རློབ་པའི་ལམ་བསྒོམ་ནུས་པའི་བརྟུལ་ཞུགས་ཅན་དང་། རྩ་ཐིག་རླུང་གསུམ་ལས་སུ་རུང་ནས་ཕྱག་རྒྱ་བརྟེན་ནུས་པ་རིག་མའི་བརྟུལ་ཞུགས་ཅན་དང་། དབྱེར་མེད་བླང་དོར་དང་བྲལ་བར་འཇོག་ནུས་པའི་མཉམ་པའི་བརྟུལ་ཞུག་ཅན་ཏེ་མཚན་ཉིད་དང་ལྡན་པའི་སློབ་བུར་དབང་བཞི་པོ་གོ་རིམ་མ་འཆོལ་བར་དུམ་བུའི་ལུགས་སམ་མཐར་ཆགས་ཀྱི་ལུགས་གང་རུང་གིས་རིམ་པར་བསྐུར་བར་བྱ་སྟེ། རྒྱུད་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་སོ། །གསུམ་པ་བྲལ་ཐོབ་ཀྱི་རྣམ་གཞག་ནི། སད་རྨི་གཉིད་འཐུག་སྙོམས་འཇུག་གནས་སྐབས་བཞིས། །བསྐྱེད་པའི་སྒོ་གསུམ་ཤེས་བྱའི་དྲི་མ་སྦྱངས། །བསྐྱེད་རིམ་གཏུམ་མོ་དཔེ་དོན་ཡེ་ཤེས་གཉིས། །སྒོམ་དང་སྐུ་བཞི་ཐོབ་པའི་ནུས་རུང་བྱ། །ཞེས་པ་སྟེ། དེ་ལྟར་དབང་བཞི་བསྐུར་བས་རིམ་པ་བཞིན་སད་པའི་གནས་སྐབས་ཀྱི་སྣང་བ་རགས་པ་དང་། རྨི་ལམ་གྱི་གནས་སྐབས་ཐིག་ལེ་རླུང་གིས་བསྐྱོད་པ་ལས་སྣང་བ་ཕྲ་བ་དང་། གཉིད་འཐུག་གི་གནས་སྐབས་ཅི་ཡང་མི་རྟོག་པའི་ཡིད་ཀྱི་ཐིག་ལེ་ཁོ་ན་དང་། སྙོམས་འཇུག་གི་གནས་སྐབས་བདེ་བའི་ངང་དུ་རྟོག་ཚོགས་ཐམས་ཅད་འགག་པ་སྟེ། དེ་ལྟར་གནས་སྐབས་བཞིས་བསྐྱེད་པའི་རགས་པ་ལུས་དང་། ཕྲ་བ་ངག་དང་། ཤིན་ཏུ་ཕྲ་བ་ཡིད་དེ་སྒོ་གསུམ་དང་། ཆེས་ཤིན་ཏུ་ཕྲ་བ་ཀུན་གཞི་ཙམ་སྟེ་ཤེས་བྱའི་དྲི་མ་རྣམས་དང་། གཞན་ཡང་རིམ་པ་བཞིན་དུ་ཕུང་པོའི་བདུད་དང་། ཉོན་མོངས་པའི་བདུད་དང་། འཆི་བདག་གི་བདུད་དང་། ཡུལ་ལ་ཞེན་པ་ལྷའི་བུའི་བདུད་རྣམས་བཅོམ་སྟེ། ལས་སྒྲིབ་དང་། ཉོན་སྒྲིབ་དང་། ཤེས་སྒྲིབ་རགས་པ་དང་། ཤེས་སྒྲིབ་ཕྲ་བ་འཕོ་བའི་བག་ཆགས་ཀྱི་སྒྲིབ་པ་རྣམས་སྦྱངས་ཤིང་དག་པའི་ནུས་པ་འཇོག་གོ། །དེ་རྣམས་ནི་གཙོ་བོར་སྦྱངས་བྱ་གཞི་དང་སྦྱར་བ་ཡིན་ལ། སྦྱོང་བྱེད་ལམ་དང་སྦྱར་ན། བུམ་དབང་གིས་གཙོ་བོར་བསྐྱེད་རིམ་དང་། གསང་དབང་གིས་གཏུམ་མོ་དང་། ཤེས་དབང་གིས་དཔེའི་ཡེ་ཤེས་དང་། ཚིག་དབང་གིས་དོན་གྱི་ཡེ་ཤེས་ཏེ། དབང་ཕྱི་མ་གཉིས་ཀྱིས་དཔེ་དོན་གྱི་ཡེ་ཤེས་གཉིས་སྒོམ་པ་ལ་དབང་བ་དང་། འབྲས་བུ་དང་སྦྱར་ན། བུམ་དབང་གིས་སྤྲུལ་སྐུ། གསང་དབང་གིས་ལོངས་སྐུ། ཤེར་དབང་གིས་ཆོས་སྐུ། ཚིག་དབང་གིས་ངོ་བོ་ཉིད་སྐུ་སྟེ་སྐུ་བཞི་ཐོབ་པའི་ནུས་པ་རྒྱུད་ལ་བཞག་པས་ན་མཐར་ཐུག་སྐུ་བཞི་མངོན་དུ་འགྱུར་རུང་དུ་བྱ་བ་ཡིན་ནོ། །བཞི་པ་ཐོབ་མཚམས་ཀྱི་རྣམ་གཞག་ནི། དང་པོ་གནས་གསུམ་རྡོ་རྗེ་གསུམ་བསྐྱེད་ནས། །ཐ་མ་དབང་བཞི་ཡོངས་སུ་རྫོགས་པའི་ཚེ། །རིག་འཛིན་སྡོམ་པ་ཐོབ་ཅིང་། །ཞེས་པ་སྟེ། དེ་ནས་སྔགས་སྡོམ་ཐོབ་མཚམས་ངོས་བཟུང་བ་ལ། དང་པོ་སློབ་མའི་གནས་གསུམ་དུ་རྡོ་རྗེ་གསུམ་གྱི་ལྷའམ་ཡིག་འབྲུ་བསྐྱེད་ནས་སྒོ་གསུམ་བྱིན་གྱིས་བརླབས་པའི་དུས་དེ་ནས་འགོ་བརྩམ་སྟེ། དངོས་གཞི་བུམ་པའི་དབང་དང་མཆོག་དབང་གསུམ་བཅས་རིམ་པར་བསྐུར་ཞིང་ཐོབ་པ་ལས། ཐ་མ་དབང་བཞི་ཡོངས་སུ་རྫོགས་པའི་ཚེ་ན་རིག་པ་འཛིན་པའི་སྡོམ་པ་མཐའ་དག་ཐོབ་ཟིན་པ་ཡིན་ཅིང་། དེ་ལྟར་ཐོབ་མ་ཐག་པ་ནས་བསླབ་བྱའི་གནས་རྣམས་ལ་སློབ་པའི་འདུ་ཤེས་བསྐྱེད་པ་ལ་ནན་ཏན་དུ་བྱའོ། །ལྔ་པ་རྗེས་ཀྱི་རྣམ་གཞག་ནི། དེ་ཡི་རྗེས། ཁས་བླངས་སྡོམ་དང་དམ་ཚིག་བསླབ་ལ་འབད། །ཅེས་པ་སྟེ། དེ་ལྟར་སྣོད་དང་འཚམས་པར་དབང་བཞི་མཐའ་རྟེན་དང་བཅས་པ་བསྐུར་ཐོབ་ཟིན་པ་དེ་ཡི་རྗེས་སུ་སློབ་དཔོན་གྱིས་དམ་ཚིག་གི་རྣམ་གཞག་རྒྱས་པར་བསྒྲགས་པ་རྣམས། སློབ་མས་བསྡུས་ཏེ་ཁས་བླངས་པས་བཟུང་བ་དང་། བཟུང་ནས་ཀྱང་གསང་སྔགས་རིག་པ་འཛིན་པའི་སྡོམ་པ་དང་དམ་ཚིག་གི་ཚུལ་ལ་བླང་དོར་མ་ནོར་བར་བསླབ་པ་ལ་འབད་པར་བྱ་དགོས་སོ། །བཞི་པ་ཐོབ་པ་མི་ཉམས་པར་བསྲུང་བ་ལ་གསུམ། མདོར་བསྟན་པ། རྒྱས་པར་བཤད་པ། དོན་བསྡུ་བའོ། །དང་པོ་མདོར་བསྟན་པ་ནི། བར་དུ་མི་ཉམས་བསྲུང་བའི་ཐབས་བཤད་པ། །ཞེས་པ་སྟེ། དེ་ལྟར་སྔགས་སྡོམ་མ་ཐོབ་པ་ཉིད་ཐོབ་པ་ཙམ་ཁོ་ནས་མི་ཆོག་སྟེ། བར་དུ་ཐོབ་པའི་རྒྱུན་དེ་མི་ཉམས་པར་བསྲུང་བའི་ལྷག་བསམ་ཁྱད་པར་ཅན་གྱིས་བསྲུང་བར་བྱ་དགོས་ལ། དམ་ཚིག་དང་སྡོམ་པ་ནི་སྔགས་ཀྱི་བསླབ་པ་མ་ལུས་པའི་གཞི་རྟེན་ཡིན་པས། དེ་ཉམས་ན་བསླབ་པ་ཐམས་ཅད་དོན་མེད་པར་འགྱུར་བའི་ཕྱིར། དཔེར་ན་སྲོག་གི་དབང་པོ་འགག་ན་དབང་པོ་ཐམས་ཅད་འགག་པར་འགྱུར་བ་བཞིན། དེས་ན་བསྲུང་ཐབས་ཤེས་པ་ལ་རགས་ལས་པས་ན་འདིར་དེའི་ཚུལ་བཤད་པ་ལ་ཞེས་སོ། །གཉིས་པ་རྒྱས་པར་བཤད་པ་ལ་ལྔ། བརྟུལ་ཞུགས་ཉེར་ལྔ། རིགས་ལྔའི་སྡོམ་པ། རྩ་བའི་ལྟུང་བ་བཅུ་བཞི། ཡན་ལག་སྦོམ་པོའི་ལྟུང་བ། ཁྱད་པར་སྔ་འགྱུར་རྫོགས་པ་ཆེན་པོའི་ལུགས་བཤད་པའོ། །དང་པོ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཐོག་མའི་བརྟུལ་ཞུགས་དུས་ཀྱི་འཁོར་ལོ་ལས། །ཞེས་པ་སྟེ། ཐོག་མར་སྔགས་ཀྱི་བསླབ་པ་ཐམས་ཅད་ཀྱི་རྟེན་གཞི་རྡོ་རྗེ་སེམས་དཔའི་དམ་ཚིག་གི་ཡན་ལག་བརྟུལ་ཞུགས་ཉེར་ལྔ་པོ་དཔལ་ལྡན་དུས་ཀྱི་འཁོར་ལོ་ལས་གསུངས་པ་ལྟར་ཤེས་པར་བྱའོ། །གཉིས་པ་རྒྱས་པར་བཤད་པ་ལ་ལྔ། སྤང་བ་ལྔ། མི་བྱ་བ་ལྔ། གསོད་པ་ལྔ། མི་འཁུ་བ་ལྔ། མི་ཞེན་པ་ལྔ་རྣམས་སུ་ཡོད་པ་ལས། དང་པོ་སྤང་བ་ལྔ་ནི། གསོད་རྫུན་རྐུ་དང་འདོད་ལོག་ཆང་འཐུང་བ། །སྤང་བྱ་བསླབ་པའི་གཞི་ལྔ་སྤང་ཞེས་གསུངས། །ཞེས་པ་སྟེ། སྲོག་ཆགས་ཕྲ་མོ་གཅིག་ཡན་ཆད་གསོད་པར་བྱེད་པ་ལྟ་ཅི། སྐད་ཅིག་ཙམ་ཡང་མནར་སེམས་ཀྱིས་འཚེ་བ་དང་། རང་འདོད་ཀྱིས་གཞན་བསླུ་བསམ་པའི་རྫུན་སྨྲ་བ་དང་། དུད་འགྲོ་བདག་ཏུ་བཟུང་བ་ཡན་ཆད་ཀྱི་གཞན་ནོར་བརྐུ་བ་དང་། གཞན་གྱི་བུད་མེད་ལ་འདོད་པའི་ལོག་པར་གཡེམ་པ་དང་། ཉེས་པ་བསྐྱེད་པའི་གཞི་ཆང་འཐུང་བས་མྱོས་པ་སྟེ། དེ་ལྔའི་ཕྱོགས་མཐུན་ཆར་གཏོགས་དང་བཅས་པ་སྤང་བར་བྱ་དགོས་ཏེ། འཁོར་བའི་གནས་སུ་འཆིང་བྱེད་དམ་པོ་རྡོ་རྗེའི་ཞགས་པ་དང་མཚུངས་ཤིང་། རང་གཞན་གྱི་དགེ་བ་ཐམས་ཅད་འཇོམས་པར་བྱེད་པས་ན། འདི་རྣམས་བརྟུལ་ཞུགས་ཕྱི་མ་ཐམས་ཅད་ཀྱི་རྟེན་གཞི་ཡིན་པས་སྤང་བྱ་བསླབ་པའི་གཞི་ལྔ་འདི་དག་ཀུན་སྤང་ཞེས་གསུངས་པ་ཡིན་ནོ། །གཉིས་པ་མི་བྱ་བ་ལྔ་ནི། ཆོ་ལོ་ཁ་ན་མ་ཐོའི་ཟས་ཟ་དང་། །ངན་ཚིག་འབྱུང་པོ་ལྷ་མིན་ཆོས་བསླབ་པ། །རྣམ་པ་ལྔ་ནི་བྱ་བ་མིན་ལྔའོ། །ཞེས་པ་སྟེ། ཤྭ་དང་མིག་མང་རྒྱལ་བློན་སོགས་ཆོ་ལོ་རྩེ་བ་དང་། རང་གིས་བསད་པའི་ཤ་མ་གཏོགས་ལས་ཀྱིས་ཤི་བའི་ཤ་མི་ཟ་བ་སོགས་ཁ་ན་མ་ཐོའི་ཟས་ཟ་བ་དང་། ངན་ཚིག་གི་བསྟན་བཅོས་དམག་འཁྲུག་གི་ལོ་རྒྱུས་སྒྲུང་གཏམ་སོགས་སྨྲ་བ་དང་། འབྱུང་པོའི་ཆོས་ཕྱུགས་ཀྱི་མཆོད་སྦྱིན་བྱ་བ་སོགས་མུ་སྟེགས་པའི་ལུགས་དང་། བྱ་གག་གི་བཏུང་བ་འབའ་ཞིག་བསྟེན་པ་སོགས་ལྷ་མིན་གྱི་ཆོས་ཞེས་ཀླ་ཀློའི་ཆོས་ལུགས་ལ་བསླབ་པ་སྟེ་རྣམ་པ་ལྔ་ནི་དགེ་བའི་ཕྱོགས་ཉམས་པར་བྱེད་པའི་ཉེ་བའི་སྡིག་པ་ལྔ་ཞེས་གྲགས་ལ་བྱ་བ་མིན་པ་ལྔའོ། །གསུམ་པ་གསོད་པ་ལྔ་ནི། བ་ལང་བྱིས་པ་སྐྱེས་པ་བུད་མེད་དང་། །མཆོད་རྟེན་བསྣུན་པ་གསོད་པ་ལྔ་རུ་གྲགས། །ཞེས་པ་སྟེ། སྤྱིར་རྐང་པ་དང་པོའི་གསོད་པ་བཞི་སྔར་བཤད་པའི་གསོད་པའི་ནང་དུ་འདུ་ནའང་། མུ་སྟེགས་པ་རྣམས་ཀྱིས་སྤྱིར་འཚེ་བ་སྡིག་པ་ཡིན་ཀྱང་། མཐོ་རིས་ཀྱི་ཆེད་དུ་མཆོད་སྦྱིན་བྱ་བ་དང་། མ་མོ་མཆོད་པ་དང་སྐྱེས་པ་དང་བུད་མེད་ཐོབ་པའི་ཆེད་དུ་རིམ་པ་བཞིན། བ་ལང་དང་། བྱིས་པ་དང་། སྐྱེས་པ་དང་། བུད་མེད་གསོད་པ་ལ་དགེ་བར་འདོད་པས་དེ་དགག་པའི་ཆེད་དུ་འདིར་དམིགས་ཀྱིས་བཀར་ནས་གསུངས་པ་དང་། ཡང་ཀླ་ཀློ་རྣམས་ཀྱིས་ལྷ་མིའི་བླ་མ་གསོད་པ་ཞེས་སྐུ་གསུང་ཐུགས་རྟེན་མཆོད་རྟེན་ལ་བསྣུན་ཏེ་བཤིགས་པ་བསོད་ནམས་སུ་འདོད་པ་དེ་དག་ལ་གསོད་པ་ལྔ་རུ་གྲགས་པ་དེ་རྣམས་སྤང་བར་བྱའོ། །བཞི་པ་མི་འཁུ་བ་ལྔ་ནི། དགེ་གྲོགས་རྗེ་བོ་སངས་རྒྱས་དགེ་འདུན་དང་། །བླ་མར་ཁོང་ཁྲོ་བསྒོམ་རྣམས་འཁུ་བ་ལྔ། །ཞེས་པ་སྟེ། ཆོས་དང་འཇིག་རྟེན་གང་རུང་གིས་སྦྲེལ་བའི་མཉམ་པོར་དགེ་བར་འགྲོགས་པའི་གྲོགས་པོ་དང་། རང་ལས་རྒན་པའི་རྗེ་བོ་བཀུར་བར་འོས་པ་དང་། ལྷ་མིའི་བླ་མ་སངས་རྒྱས་དང་། དགེ་སློང་གི་དགེ་འདུན་དང་། ཡིད་བརྟན་པར་འོས་པའི་མཁན་སློབ་བླ་མ་སྟེ་ཡུལ་དེ་དང་དེར་ཁོང་ཁྲོ་བསྒོམ་ཞིང་འཁང་བ་རྣམས་འཁུ་བ་ལྔ་སྟེ་སྤང་བར་བྱའོ། །ལྔ་པ་མི་ཞེན་པ་ལྔ་ནི། གཟུགས་སྒྲ་དྲི་རོ་རེག་བྱ་ཡུལ་ལྔ་ལ། །མིག་དང་རྣ་བ་སྣ་ལྕེ་ལུས་དབང་ལྔས། །ཞེན་པར་མི་བྱེད་བརྟུལ་ཞུགས་ཉེར་ལྔའོ། །ཞེས་པ་སྟེ། དེ་ཡང་གཟུགས་སྒྲ་དྲི་རོ་རེག་བྱ་སྟེ་ཡུལ་ལྔ་པོ་དེ་ལ། མིག་དང་རྣ་བ་དང་སྣ་དང་ལྕེ་དང་ལུས་ཀྱི་དབང་པོ་སྟེ་ཡུལ་ཅན་དེ་ལ་བརྟེན་པའི་ཤེས་པ་ལྔས་ཞེན་ཅིང་ཆགས་པར་མི་བྱེད་དེ། ཡང་སྲིད་འཕེན་ནུས་ཀྱི་ལས་སུ་རྫོགས་པས་ན། བསྐྱེད་རིམ་གྱིས་དབང་ཡུལ་ལྷར་བསྒྱུར་བ་དང་། རྫོགས་རིམ་སོ་སོར་སྡུད་པའི་རྣལ་འབྱོར་གྱིས་འཇུག་པ་གཅོད་པ་སོགས་དྲན་ཤེས་ཀྱི་གཉེན་པོ་བསྟེན་པ་ལ་འབད་པར་བྱའོ། །དེ་དག་ལ་རྡོ་རྗེ་སེམས་དཔའི་བརྟུལ་ཞུགས་ཉེར་ལྔ་ཞེས་བྱའོ། །གཉིས་པ་རིགས་ལྔའི་སྡོམ་པ་བཤད་པ་ལ་གཉིས། ཐུན་མོང་དང་། ཁྱད་པར་བའོ། །དང་པོ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཐུན་མོང་གྱུར་པ་རིགས་ལྔའི་སྡོམ་པ་ལྔ། །ཞེས་པ་སྟེ། འདི་རྣམས་རྣལ་འབྱོར་ཕྱི་པའི་གཞུང་དུ་བཤད་པ་ལས་དོན་འཕགས་ཀྱང་སྒྲར་མཐུན་པ་འབྱུང་ཞིང་། དེར་མ་ཟད་སྨོན་འཇུག་གི་སེམས་བསྐྱེད་དང་ཚུལ་ཁྲིམས་གསུམ་སོགས་ཐེག་ཆེན་སྤྱིའི་བསླབ་བྱ་དང་འདྲ་བས་ཐུན་མོང་དུ་གྱུར་པ་ཞེས་བྱ་སྟེ། གཞི་དེ་ལས་འདིར་རྡོ་རྗེ་ཐེག་པ་མཆོག་གི་དགོངས་པ་ལྟར་འཆད་དེ། དེ་ལ་རིགས་བྱེ་བྲག་གི་རྣལ་འབྱོར་པས་ཀྱང་རིགས་ལྔ་ཀའི་སྡོམ་པ་བསྲུང་དགོས་མོད་ཀྱང་། རང་རིགས་གང་ཡིན་གྱི་སྡོམ་པ་གཙོ་བོར་བསླབ་དགོས་པས། རིགས་ལྔ་སོ་སོའི་སྡོམ་པའམ་དམ་ཚིག་ལྔ་ཞེས་གྲགས་སོ། །གཉིས་པ་རྒྱས་པར་བཤད་པ་ནི། སྨོན་འཇུག་གཉིས་དང་ཚུལ་ཁྲིམ ས་རྣམ་པ་གསུམ། །སློབ་པ་སངས་རྒྱས་རྣལ་འབྱོར་སྡོམ་པའོ། །རྡོར་དྲིལ་ཕྱག་རྒྱ་བླ་མར་བཟུང་རྡོ་རྗེ། །ནོར་ཆོས་མི་འཇིགས་བྱམས་སྦྱིན་རིན་ཆེན་འབྱུང་། །ཕྱི་ནང་གསང་པའི་ཐེག་འཛིན་པདྨའི་རིགས། །མཆོད་གཏོར་ལས་རིམ་འཛིན་པ་ལས་ཀྱིའོ། །ཞེས་པ་སྟེ། དེ་རྣམས་རིམ་པ་བཞིན་འཆད་པའི་དང་པོ་ནི། དངོས་བསྟན་ལྟར་ན། སྨོན་པ་དང་འཇུག་པའི་སེམས་གཉིས་བསྐྱེད་པ་དང་། སྡོམ་སྡུད་དོན་བྱེད་ཀྱི་ཚུལ་ཁྲིམས་རྣམ་པ་གསུམ་པོ་སོ་སོའི་མཚན་ཉིད་ཚང་བར་བརྟན་པོར་བཟུང་ཞིང་། དེ་ཐམས་ཅད་ཀྱི་རྟེན་དུ་ཐུན་མོང་མིན་པའི་མཆོག་གསུམ་ལ་སྐྱབས་སུ་འགྲོ་བར་སློབ་པ་དང་། སྦས་དོན་ལྟར་ན་བདེ་སྟོང་དབྱེར་མེད་ཀྱི་བྱང་སེམས་དང་སེམས་ཉིད་གདོད་ནས་དག་པ་མཆོག་གསུམ་གྱི་རང་བཞིན་དུ་བཟུང་བའོ། །དེ་ཡང་སངས་རྒྱས་རྣལ་འབྱོར་ཏེ་རྣམ་པར་སྣང་མཛད་ནི་གཙོ་བོ་སྐུའི་རིགས་ཡིན་ལ། སྐུ་ནི་འབྲས་ཆོས་ཐམས་ཅད་ཀྱི་རྟེན་ཡིན་པ་ལྟར་ཚུལ་ཁྲིམས་ནི་ཡོན་ཏན་ཀུན་གྱི་རྟེན་དང་། དེའི་རྟེན་ནི་སྐྱབས་འགྲོ་ཡིན་པའི་ཕྱིར། རིགས་དེའི་སྡོམ་པར་བཞག་པའོ། །གཉིས་པ་ནི། དངོས་བསྟན་ལྟར་ན་ཕྱི་མཚན་མ་རྫས་ཀྱི་རྡོར་དྲིལ་བཟུང་ནས་རང་ཉིད་ལྷ་སྐུ་ཕྱག་རྒྱ་ཆེན་པོར་བསྐྱེད་ནས་དག་དྲན་བྱ་བ་སྟེ། དེ་ཉིད་འདུས་པ་ལས། དེ་ཉིད་ཀྱིས་ནི་རྡོ་རྗེ་བཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་སོ། །སྦས་དོན་ལྟར་ན་ནང་གི་རྡོ་དྲིལ་ནི། ཐབས་ཡབ་ཀྱི་ནོར་བུ་རྡོ་རྗེ་དང་། ཤེས་རབ་ཡུམ་གྱི་པདྨ་དྲིལ་བུ་སྟེ། ཕྱག་རྒྱ་ནི་ཕན་ཚུན་རྒྱས་བཏབ་ནས་མཉམ་པར་སྦྱོར་བའོ། །གསང་བ་ཁམས་དཀར་དམར་གཉིས་འབར་འཛག་གིས་ཟུང་དུ་འཇུག་པ་དང་། དེ་ཁོ་ན་ཉིད་མི་འགྱུར་བའི་བདེ་ཆེན་དང་། རྣམ་ཀུན་མཆོག་ལྡན་གྱི་སྟོང་ཉིད་དབྱེར་མེད་དུ་བསྒོམ་པ་སྟེ། དེ་དག་ཟུང་དུ་འཇུག་པའི་ཡེ་ཤེས་ནི་ཕྱག་རྒྱ་ཆེན་པོའོ། །དེ་དག་གི་དེ་ཁོ་ན་ཉིད་སྟོན་པར་མཛད་པའི་བླ་མ་ཡང་བསྙེན་བསྐུར་ལ་སོགས་པས་ཡང་དག་པར་བཟུང་ཞིང་བརྟེན་པར་བྱ་བ་རྣམས་ནི་རྡོ་རྗེ་མི་བསྐྱོད་པ་གཙོ་བོར་ཐུགས་ཀྱི་རིགས་ཡིན་ལ་ཐབས་ཤེས་གཉིས་མེད་ཀྱི་ཐུགས་མཚོན་པར་བྱེད་པ་མཚན་མ་རྫས་ཀྱི་དང་། ནང་གསང་དེ་ཁོ་ན་ཉིད་ཀྱི་རྡོར་དྲིལ་རྣམས་མཚོན་བྱ་ཐུགས་ཀྱི་ངོ་བོ་ཡིན་པས་རིགས་དེའི་དམ་ཚིག་ཏུ་བཞག་གོ། །གསུམ་པ་ནི། དངོས་བསྟན་ལྟར་ན་ཟང་ཟིང་ནོར་གྱི་སྦྱིན་པ་དང་། ཆོས་ཀྱི་སྦྱིན་པ་དང་། མི་འཇིགས་པ་སྐྱབས་ཀྱི་སྦྱིན་པ་དང་། དེའི་རྩ་བ་བྱམས་པ་ཆེན་པོའི་སྦྱིན་པ་བཞི་པོ་ཉིན་རེ་བཞིན་དུས་དྲུག་ཏུ་བྱ་བ་དང་། སྦས་དོན་ལྟར་ན་རྗེས་ཆགས་ཀྱི་མེས་བྱང་སེམས་དབབ་ལྡོག་གི་དགའ་བཞིའི་ཡེ་ཤེས་སྦྱིན་པ་སྟེ། དེ་ཡང་རིན་ཆེན་འབྱུང་ལྡན་ནི་ཡོན་ཏན་ཀུན་གྱི་འབྱུང་གནས་རིན་པོ་ཆེའི་རིགས་ཡིན་ལ། སྦྱིན་པ་ཡང་དགོས་འདོད་སྟེར་བའི་ངོ་བོ་ཡིན་པས་དེའི་དམ་ཚིག་ཏུ་བཞག་གོ། །བཞི་པ་ནི། དངོས་བསྟན་ལྟར་ན་ཕྱི་མཚན་ཉིད་སྡེ་གསུམ་དང་། ནང་ཀྲྀ་ཡོག་སྡེ་གསུམ་དང་། གསང་བ་ནང་རྒྱུད་སྡེ་གསུམ་པོའི་ཐེག་པ་ཀུན་གྱི་ཚིག་དོན་འཛིན་ཞིང་། སྦས་དོན་ལྟར་ན་རླུང་དབུ་མར་བཅིངས་པས་གཞོ མ་མེད་ཀྱི་གསུང་སྒྲུབ་པ་སྟེ། དེ་ཡང་འོད་དཔག་མེད་གསུང་པདྨའི་རིགས་ཡིན་པ་ལྟར། ཆོས་ཀྱང་གསུང་གི་ངོ་བོ་ཡིན་པའི་ཕྱིར་དེའི་དམ་ཚིག་ཏུ་བཞག་གོ། །ལྔ་པ་ནི། དངོས་བསྟན་ལྟར་ན་སྡོམ་པ་དེ་ཐམས་ཅད་དང་ལྡན་པའི་སྟེང་དུ་ཕྱི་ནང་གསང་བའི་མཆོད་པ་དང་། གཏོར་མ་དང་། སྦྱིན་སྲེག་སོགས་ལས་བཞིའི་རིམ་པ་ཐམས་ཅད་ཅི་ནུས་སུ་འཛིན་པར་བྱེད་ཅིང། སྦས་དོན་ལྟར་ན་དེ་ཐམས་ཅད་ཟུང་འཇུག་ཨེ་ཝཾ་གྱི་སྡོམ་པས་རྒྱས་འདེབས་པ་དང་། ཞུ་བདེས་ཕུང་ཁམས་དབང་ཡུལ་གྱི་ལྷ་རྣམས་ཚིམ་པར་མཆོད་པ་སྟེ། དེ་ཡང་དོན་ཡོད་གྲུབ་པ་ནི་ལས་ཐམས་ཅད་པའི་བདག་ཉིད་ཡིན་པ་ལྟར་འདི་དག་ཀྱང་གཙོ་བོ་ལས་ཀྱི་ངོ་བོ་ཡིན་པས་དེའི་དམ་ཚིག་ཏུ་བཞག་པའོ། །གཉིས་པ་ཁྱད་པར་གྱི་རིགས་ལྔའི་སྡོམ་པ་ནི། ཁྱད་པར་སྲོག་གཅོད་རྡོ་རྗེའི་རིགས་ཡིན་ཏེ། །ཞིང་བཅུ་ཚང་དང་རླུང་དང་རྟོག་པ་ཡིན། །རིན་ཆེན་རིགས་ལ་མ་བྱིན་ལེན་པ་ནི། །ནོར་དང་བུད་མེད་ཐེག་ཆེན་ཟབ་མོའི་ཆོས། །རང་དང་གཞན་དོན་སྒྲུབ་ལ་དགོངས་པས་སུངས། །པདྨའི་རིགས་ལ་ལས་ཆོས་དམ་ཚིག་དང་། །ཕྱག་རྒྱ་ཆེ་སྟེ་བུད་མེད་བསྟེན་པར་གསུངས། །ལས་ཀྱི་རིགས་ལ་རྫུན་དུ་སྨྲ་གསུངས་པ། །བདག་དང་སེམས་ཅན་མི་དམིགས་བདེན་མེད་སྟོན། །འཁོར་ལོའི་རིགས་ལ་ཆང་དང་ཤ་ལྔ་དང་། །ཡུལ་ཀུན་བསྟེན་གསུངས་ཕྱི་ནང་གསང་བའི་ཐེག །རིམ་པར་མ་ཉམས་སྤྱོད་པ་བླ་མེད་ལུགས། །ཞེས་པ་སྟེ། ཐུན་མོང་མ་ཡིན་པ་རིགས་ལྔའི་སྡོམ་པ་འདི་ནི་བསད་པ་གསོ་ནུས་པ་སོགས་རྣལ་འབྱོར་པ་རྟོགས་གོམས་ཀྱི་གདིང་དང་ལྡན་པ། ལྷ་དང་བླ་མས་གནང་བ་ཐོབ་པ། སྙིང་རྗེའི་ཀུན་སློང་ཁྱད་པར་ཅན་གྱིས་ཟིན་པ་ཡིན་ན་གཞན་དོན་དུ་སྒྲ་ཇི་བཞིན་པར་སྤྱོད་པ་དྲང་དོན་བསྐྱེད་རིམ་གྱི་དམ་ཚིག་དང་། དེ་ལྟར་མིན་ན་སྒྲ་བསྒྱུར་ཏེ་དགོངས་གཞིའི་དོན་དེ་ཉིད་བླངས་ནས་དབང་གོང་མའི་དམ་ཚིག་དང་སྡོམ་པ་རྫོགས་རིམ་ལ་སྦྱར་བར་བྱ་བ་ཡིན་པས་ན་ཁྱད་པར་ཞེས་བསྟན་ཏེ། དང་པོ་སྲོག་གཅོད་པ་ནི་ཞེ་སྡང་རྣམ་པར་དག་པ་རྡོ་རྗེའི་རིགས་མི་བསྐྱོད་པའི་དམ་ཚིག་ཡིན་ཏེ། དྲང་དོན་ལྟར་ན་ཞིང་བཅུ་ཚང་བའི་དགྲ་བོ་དྲག་པོའི་ལས་ཁོ་ནས་མ་གཏོགས་འདུལ་བར་མི་ནུས་པ་རྣམས་ཀྱི་ལས་ངན་རྒྱུན་གཅོད་ཕྱིར་མངོན་སྤྱོད་ཀྱི་ལས་ཀྱིས་སྒྲོལ་བར་བྱ་བ་དང་། དེ་ཡང་རང་ཉིད་ལ་ཉེས་པར་མི་འགྱུར་བར་མ་ཟད་དོན་ཡང་ཆེ་སྟེ། གསང་སྙིང་ལས། ཡོད་མེད་དབུ་མའང་མི་དམིགས་ཤིང་། །སྒྱུ་མ་མིག་གཡོར་ལྟ་བུའི་ཚུལ། །སྲོག་མེད་སྲོག་ཀྱང་བཅད་དུ་མེད། །སྲོག་དང་སྐྱེས་བུ་ལོག་རྟོག་ཙམ། །ཞེས་དང་། ངེས་བརྗོད་ལས། སངས་རྒྱས་བསྟན་པ་གནོད་བྱེད་དང་། །བླ་མར་སྨོད་བརྩོན་མ་རུང་དང་། །རྟག་ཏུ་སེམས་ཅན་གནོད་བརྩོན་པ། །མཁས་པས་བསྒྲིམས་ཏེ་བསད་པར་བྱ། །ཞེས་སོ། །ངེས་པའི་དོན་དུ་སྲོག་ནི་རོ་རྐྱང་གི་རླུང་ཡིན་ལ། དེ་བཅད་པའི་ཐབས་ཀྱིས་བཀག་པས་དབུ་མར་འཛུད་ཅིང་གཙུག་ཏོར་དུ་བརྟན་པ་དང་། ཡང་ན་སྲོག་ནི་རྣམ་པར་རྟོག་པ་དང་བཅས་པའི་སེམས་ཡིན་ལ། དེ་བཅད་པ་ནི་དེའི་རྒྱུན་སྐྱེ་མེད་ཀྱི་དབྱིངས་སུ་དག་པར་བྱ་བའོ། །གཉིས་པ་ང་རྒྱལ་རྣམ་པར་དག་པ་རིན་ཆེེན་རིགས་ཀྱི་དམ་ཚིག་ལ་མ་བྱིན་པ་ལེེན་པར་བཤད་པ་ནི། དྲང་དོན་ལྟར་ན་གཞན་གྱི་ཚོགས་རྫོགས་པ་དང་། སྦྱིན་ཡུལ་གྱི་དབུལ་བ་སེལ་བ་སོགས་ཕན་པར་འགྱུར་ན་སྔགས་ཀྱི་མཐུས་གཞན་ནོར་བླང་བ་དང་། དེས་མཆོད་སྦྱིན་སོགས་བྱས་ན་ཉེས་པར་མི་འགྱུར་ཏེ། གསང་སྙིང་ལས། བདེན་པ་གཉིས་ཀ་དབྱེར་མེད་པ། །འཕྲུལ་དགའི་ཚུལ་ཏེ་ཐ་དད་མིན། །གཞན་དང་མ་བྱིན་མེད་པའི་ཕྱིར། །བླང་མེད་ཐམས་ཅད་ཉིད་ཀྱི་དབྱིངས། །ཞེས་སོ། །ངེས་དོན་དུ་སྔགས་ཀྱི་ཡེ་ཤེས་སྒྲུབ་ཕྱིར་ཕ་རོལ་གྱི་བུད་མེད་དགུག་པའི་ཐབས་ཀྱིས་འཕྲོག་ནས་དེའི་བྱང་སེམས་རླུང་སྟོབས་ཀྱིས་ལེན་པ་དང་། ཡང་ན་དོན་དམ་པའི་བཙུན་མོ་ཐེག་ཆེན་གྱི་དགོངས་དོན་གཏོང་པ་ཉིད་ཡིན་ལ། དེའི་ཁུ་བ་ཟབ་མོའི་ཆོས་གཉིས་མེད་ཀྱི་ཡེ་ཤེས་ཉིད་གོམས་སྟོབས་ཀྱིས་བླངས་ཏེ། རང་དང་གཞན་གྱི་དོོན་གཉིས་བསྒྲུབ་པ་ལ་མངའ་དབང་འབྱོར་བ་ལ་དགོངས་པས་གསུངས་ཏེ། མདོ་ལས། གང་ཕྱིར་ཐེག་པ་ཆེན་པོ་འདི། །གང་གིས་ཀྱང་ནི་བྱིན་མ་ལགས། །དེ་ཉིད་རྟོགས་པས་མ་བྱིན་བླངས། །ཞེས་སོ། །གསུམ་པ་འདོད་ཆགས་རྣམ་པར་དག་པ་པདྨའི་རིགས་ཀྱི་དམ་ཚིག་ལ་རྟོགས་གོམས་ཀྱི་གདིང་དང་ལྡན་པའི་གང་ཟག་གིས་གཉིས་མེད་དུ་ཤེས་པའི་ལྟ་བ་དང་། ཡབ་ཡུམ་ལྷའི་འདུ་ཤེས། མཁའ་གསང་གཉིས་རྡོ་རྗེ་དང་པདྨའི་འདུ་ཤེས། བདེ་ཆེན་ཡེ་ཤེས་ལ་ཆོས་ཀྱི་འདུ་ཤེས་ཏེ། འདུ་ཤེས་གསུམ་ལྡན་གྱི་སྒོམ་པ་དང་། ཐབས་ཀྱི་སྤྱོད་པ་གསུམ་གྱིས་ཟིན་པས། དངོས་རིག་ལས་ཀྱི་ཕྱག་རྒྱ་ལ་བསྟེན་པ་སྟེ། གསང་སྙིང་ལས། མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །ཞེས་སོ། །དེ་བཞིན་དུ་ཡིད་རིག་ཆོས་ཀྱི་ཕྱག་རྒྱ་དང་། གཏུམ་མོ་དམ་ཚིག་གི་ཕྱག་རྒྱ་དང་གཉིས་བསྟེན་པ་སྟེ་དེ་གསུམ་གྱིས་ཞུ་བདེ་དཔེའི་ཡེ་ཤེས་སྒྲུབ་པས། དྲང་ངེས་གཉིས་ཀའི་ཆ་ཡོད་ཅིང་། ངེས་དོན་དུ་རྣམ་ཀུན་མཆོག་ལྡན་གྱི་སྟོང་ཉིད་དང་མི་འགྱུར་བའི་བདེ་ཆེན་ཁ་སྦྱོར་ལས་བདེ་སྟོང་ཕྱག་རྒྱ་ཆེན་པོ་དོན་གྱི་ཡེ་ཤེས་སྒྲུབ་པ་སྟེ་དེ་དག་ལ་བུད་མེད་ཀྱི་སྒྲས་བསྟན་ནས་བསྟེན་པར་གསུངས་པ་ཡིན་ནོ། །བཞི་པ་ཕྲག་དོག་རྣམ་པར་དག་པ་ལས་ཀྱི་རིགས་ཀྱི་དམ་ཚིག་ལ་རྫུན་དུ་སྨྲ་བར་གསུངས་པ་ནི། དྲང་དོན་དུ་གཞན་ལ་ཕན་པར་འགྱུར་ན་རྫུན་དུ་སྨྲ་བར་བྱ་སྟེ། རྡོ་རྗེ་ལས། སེམས་ཅན་རྣམས་ལ་ཕན་སྤྱོད་པ། །རྟག་ཏུ་དམ་ཚིག་བླ་མའི་ནོར། །སེམས་ཅན་སྲོག་ནི་བསྲུང་བའི་ཕྱིར། །རྫུན་དུ་ཡང་ནི་སྨྲ་བར་བྱ། །ཞེས་སོ། །ངེས་དོན་དུ་སྒྲོལ་བ་པོ་བདག་དང་། བསྒྲལ་བྱ་སེམས་ཅན་གང་དུའང་མི་དམིགས་པའི་ངང་ནས་སེམས་ཅན་ཐམས་ཅད་བདེན་མེད་འཁོར་བ་ལས་བསྒྲལ་བར་བྱའོ་ཞེས་པའི་དོན་སྟོན་ཏེ། དེ་ལྟར་ཡང་གསང་སྙིང་ལས། ཆོས་རྣམས་སྒྱུ་མ་ལྟ་བུ་དང་། མིང་དང་ཚིག་ཏུ་བཏགས་པ་རྫུན། །རྫུན་ཉིད་ལ་ནི་རྫུན་སྤྱོད་པས། །རྫུན་ཞེས་བཏགས་ཙམ་ཡོད་མ་ཡིན། །ཞེས་སོ། །ཡང་ན་སྙིང་གའི་འཁོར་ལོར་རླུང་ཐིམ་པས་གཞོམ་མེད་ཀྱི་སྒྲ་རྣམ་པ་ཐམས་ཅད་པར་ཤར་བ་སྟེ་ངེས་དོན་དང་། དེ་ལས་གཞན་སྣང་དུ་སེམས་ཅན་རྣམས་ལ་ཆོས་སྒོ་སྣ་ཚོགས་པ་གཅིག་ཅར་དུ་སྟོན་པ་དྲང་དོན་དུ་གསུངས་པའང་ཡོད་དེ། རྡོ་རྗེ་སྙིང་འགྲེལ་ལས། གང་གིས་སྲོག་རླུང་བྲོས་པ་ན། །གཅིག་ཅར་འགྲོ་ཀུན་སྐད་ཀྱིས་ནི། །གང་དང་གང་ལ་དེ་དང་དེ། །མཐུན་པའི་ཆོས་སྟོན་རྫུན་པའི་ཚིག །ཅེས་སོ། །ལྔ་པ་གཏི་མུག་རྣམ་པར་དག་པ་འཁོར་ལོའི་རིགས་རྣམ་སྣང་གི་དམ་ཚིག་ལ། དྲང་དོན་དུ་སྨྱོས་པའི་སྐྱོན་མེད་ན་ཆང་བཏུང་བ་དང་རིགས་ཀྱིས་དྲེགས་ཤིང་ང་རྒྱལ་དང་གཙང་རྨེའི་རྟོག་པ་གཞིག་པའི་སླད་དུ་ཡུལ་དབུས་སུ་བཟའ་བའི་དོན་དུ་གསོད་པར་མི་བྱེད་པའི་ཤ་ལྔ་གནང་བ་ལྟར་རང་གི་ལས་ཀྱིས་ཤི་བའི་ཤ་རྣམས་དམ་ཚིག་གི་རྫས་སུ་བཟའ་བ་དང་། དེ་བཞིན་དུ་བདུད་རྩི་ལྔ་དང་གཟུགས་སོགས་ཡུལ་ཀུན་ཅི་དགར་སྤྱོད་པའི་བདེ་བ་བསྟེན་པར་གསུངས་པ་དང་། ངེས་དོན་དུ་ཤ་ལྔ་བཟའ་བ་ནི་དབང་ལྔའི་དྭངས་མ་འཆིང་བ། ཆང་འཐུང་བ་ནི་ཡས་བབས་ཀྱི་ལྷན་དུ་སྐྱེས་ཞུ་བདེ་འཛག་མེད་དུ་འཆིང་བ། བདུད་རྩི་ལྔ་ནི་འབྱུང་ལྔའི་དྭངས་མ་བཅིངས་པ་ལས་ཞུ་བའི་ཐིག་ལེ་རྡུལ་ཕྲ་རབ་ཀྱི་ཚོགས་དག་པར་བྱེད་པ། ཡུལ་ནི་གཤང་གཅི་ཁུ་བའི་དྭངས་མ་ལྟེ་བར་ལུགས་ལྡོག་ཏུ་བརྟེན་པའོ། །ཡང་ན་དེ་དག་བསྟེན་པ་དེ་ནི་རྣམ་པར་རྟོག་པ་ཐམས་ཅད་མཉམ་པ་ཉིད་ཀྱི་དབྱིངས་སུ་རོ་གཅིག་ཏུ་བྱེད་པའོ། །དེ་ལྟར་དམ་ཚིག་དང་སྡོམ་པ་དེ་རྣམས་ཀྱི་གོ་རིམ་ཡང་། ཐོག་མར་བརྟུལ་ཞུགས་ཉེར་ལྔ་བསྟན་ཏེ་དེའི་ལྔ་ཚན་དང་པོ་སེམས་ཅན་ལ་གནོད་པ་ཤས་ཆེ་བ་དང་། ལྔ་པ་ཡུལ་ལ་དབང་པོ་ཞེན་པའང་ཉོན་མོངས་པ་སྐྱེ་བའི་རྒྱུ་ཡིན་པས་ཕྱི་མཚན་ཉིད་དང་ནང་ཀྲི་ཡོག་སྡེ་གསུམ་གྱི་ཐེག་པས་ཀྱང་དོན་ལ་སྤང་དགོས་པའི་ཕྱིར། དེ་ནས་རིགས་ལྔའི་དམ་ཚིག་ཐུན་མོང་བ་བསྟན་ཏེ། དེའི་དངོས་བསྟན་རྣམས་རྣལ་འབྱོར་གྱི་རྒྱུད་ཀྱི་དམ་ཚིག་དང་སྒྲ་མཐུན་པའི་ཕྱིར། དེ་ནས་ཁྱད་པར་རིགས་ལྔའི་དམ་ཚིག་བསྟན་ཏེ། དེའི་དྲང་ངེས་གཉིས་ཀ་གསང་བ་བླ་ན་མེད་པའི་ཐེག་པའི་ཁྱད་ཆོས་ཡིན་པའི་ཕྱིར། དེས་ན་གདུལ་བྱ་རྣམས་འཇུག་པའི་རིམ་པ་མ་ཉམས་པའི་སྒོ་ནས་བཀྲི་ཞིང་སྤྱོད་པ་ནི་བླ་མེད་ཀྱི་ལུགས་སུ་ཤེས་པར་བྱའོ། །གསུམ་པ་རྩ་བའི་ལྟུང་བ་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། རྩ་བའི་ལྟུང་བ་བཅུ་བཞི་བསྟན་པ་ནི། ཞེས་པ་སྟེ། རྩ་བའི་ལྟུང་བ་ཞེས་པ། དཔེར་ན་ལྗོན་ཤིང་རྩ་བ་དང་འདྲ་སྟེ། བརྟན་ན་ཡལ་ག་ལོ་འདབ་ཐམས་ཅད་རྒྱས་ལ། ཉམས་ན་རྩ་བ་ནས་འགྱེལ་བ་ལྟར། འདི་ཡང་བསྲུང་ན་ལམ་དང་འབྲས་བུའི་ཡོན་ཏན་ཐམས་ཅད་བསྐྱེད་པའི་རྩ་བ་དང་། ཉམས་ན་མནར་མེད་ཡ་ང་བའི་གནས་སུ་ལྟུང་ནས་ཐར་པའི་གོ་སྐབས་མེད་པར་སྡུག་བསྔལ་ཐམས་ཅད་ཀྱི་རྩ་བར་ཡང་འགྱུར་ཏེ། དེ་ལ་གྲངས་བཅུ་བཞིར་ངེས་པ་རྣམས་བསྟན་པ་ནི་ཞེས་སོ། །གཉིས་པ་རྒྱས་པར་བཤད་པ་ལ་བཅུ་བཞི་ལས། དང་པོ་སློབ་དཔོན་སྨོད་པ་ནི། སློབ་དཔོན་རྣམ་གསུམ་སྙིང་ནས་སྨོད་པ་དང་། །བརྙས་དང་ཐུགས་དཀྲུགས་ལྟུང་བའི་སྒོ་ཀུན་ལས། །ཤིན་ཏུ་ལྕི་ཕྱིར་འདི་ཉིད་དང་པོར་བཤད། །ཅེས་པ་སྟེ། དེ་ལ་སྤྱིར་བླ་མ་རུ་བཟུང་ནས་དམ་པའི་ཆོས་ཀྱིས་འབྲེལ་ཕན་ཆད་བླ་སློབ་ཀྱི་འདུ་ཤེས་གོ་མ་ལོག་པ་ཞིག་དགོས་པ་གཞིར་བཅས་ནའང་། འདིར་ཁྱད་པར་གྱི་སློབ་དཔོན་རྣམ་པ་གསུམ་སྟེ་བདེ་འདུས་ཞི་བ་འདུས་པ་རྩ་བའི་རྒྱུད་ལས། རྒྱུད་དགྲོལ་དབང་བསྐུར་དེ་ཉིད་བསྟན། །ཞེས་གསུངས་པ་ལྟར། རང་ཉིད་ལ་དབང་བསྐུར་བ་དང་། རྒྱུད་བཤད་པ་དང་། མན་ངག་སྟོན་པའི་སློབ་དཔོན་ཏེ། བཀའ་དྲིན་གསུམ་ལྡན་ནམ། གཉིས་ལྡན་ནམ། གཅིག་ལྡན་གང་རུང་ལ་སྙིང་ཐག་པ་ནས་སྨ་འབེབས་པར་འདོད་པས་ངག་གིས་འཁུ་ཞིང་འཕྱ་བའི་སྒོ་ནས་ལྐོག་ཏུ་སྨོད་པ་དང་། དངོས་སུ་ལུས་ངག་གིས་མི་དགེ་བའི་རྣམ་འགྱུར་བསྟན་ནས་བརྙས་པ་དང་། རང་ཉིད་ཀྱི་བྱ་བ་མ་ཡིན་པ་ལ་སྤྱོད་པའམ། བླ་མའི་འཁོར་ལ་འཚེ་བ་སོགས་ཀྱིས་ཐུགས་དཀྲུགས་པ་སོགས་མི་མཉེས་པར་བྱས་པ་དེ་ནི་ལྟུང་བའི་སྒོ་ཀུན་ལས་ཀྱང་ཤིན་ཏུ་ལྕི་བ་ཡིན་ཏེ། རྡོ་རྗེ་སློབ་དཔོན་ནི་སངས་རྒྱས་ཐམས་ཅད་ཀྱི་ངོ་བོ་ཡིན་པས་ཡུལ་གཉན་པར་མ་ཟད་རང་ཉིད་ཀྱི་ལམ་དང་འབྲས་བུའི་ཡོན་ཏན་ཐམས་ཅད་དེ་ཉིད་མཉེས་པས་རྗེས་སུ་བཟུང་བ་ལ་རག་ལས་པའི་ཕྱིར་འདི་ཉིད་དང་པོར་བཤད་པས། གལ་སྲིད་འདི་ལས་ཉམས་ན་དེ་ནས་བཟུང་སྟེ་སྒོམ་སྒྲུབ་ཅི་བྱས་པ་ཐམས་ཅད་རུ་དྲའི་རྒྱུ་འབའ་ཞིག་པ་ཡིན་པས་ཤིན་ཏུ་ནས་ཀྱང་གཟབ་པར་བྱའོ། །གཉིས་པ་བདེ་གཤེགས་བཀའ་འདས་ནི། བླང་དོར་གནས་སྟོན་བདེ་བར་གཤེགས་པའི་བཀའ། །བླ་མས་གསུངས་ཤིང་རང་གིས་གོ་བཞིན་དུ། །ཁྱད་གསོད་མི་མཐུན་སྤྱོད་འབྲེལ་བཀའ་འདས་གཉིས། །ཞེས་པ་སྟེ། གདུལ་བྱ་ལ་བླང་དོར་གྱི་གནས་སྟོན་པ་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པ་བདེ་བར་གཤེགས་པའི་བཀའ་ལས་གསུངས་པའི་དོན་རྣམས་བླ་མས་གསུངས་ཤིང་རང་གིས་ཀྱང་དེའི་དོན་གོ་བཞིན་དུ། ཁྱད་དུ་གསོད་ནས་སྡོམ་པ་གསུམ་གང་ཡང་རུང་བའི་བསླབ་པ་དང་མི་མཐུན་པར་སྤྱོད་པའམ། དེ་དང་འབྲེལ་བ་གཞན་ལ་བསྟན་ཀྱང་རུང་སྟེ་བདེ་བར་གཤེགས་པའི་བཀའ་ལས་འདས་པ་ཡིན་པས་རྩ་ལྟུང་དང་པོའི་འོག་ནས་འདི་ཉེས་པ་ཆེ་བས་ན་གཉིས་པར་བཞག་གོ། །གསུམ་པ་མཆེད་ལ་འཁུ་བ་ནི། སྤྱི་རིང་ཉེ་དང་ནང་འདྲེས་སྤུན་ལ་ཁྲོས། །འཁོན་འཛིན་ཕྲག་དོག་བརྙས་སོགས་གསུམ་པའོ། །ཞེས་པ་སྟེ། སྤྱིའི་མཆེད་སེམས་ཅན་ཐམས་ཅད། རིང་བའི་མཆེད་སངས་རྒྱས་ཀྱི་བསྟན་པ་ལ་ཞུགས་སོ་ཅོག །ཉེ་བའི་མཆེད་སྔགས་ཀྱི་ཐེག་པར་ཞུགས་པ་རྣམས་དང་། དེ་ལས་ཀྱང་ཁྱད་པར་ནང་འདྲེས་པའི་མཆེད་བླ་མ་གཅིག་གིས་བསྡུས་པ་ཕ་གཅིག་པའི་སྤུན་དང་། དེའི་ཤུགས་ཀྱིས་དཀྱིལ་འཁོར་གཅིག་གིས་བསྡུས་པ་མ་གཅིག་པའི་སྤུན་དང་། གཉིས་ཀས་བསྡུས་པ་ཕ་མ་གཉིས་ཀ་གཅིག་པའི་སྤུན་ཏེ། དེའང་དབང་ཐོབ་པ་སྔ་ཕྱི་ཡོད་ན་སྤུན་རྒན་གཞོན་དང་། དུས་མཉམ་དུ་ཐོབ་ན་མཚེ་མ་ལྟ་བུ་ཡིན་པས། སྤུན་དེ་དག་སྔ་མ་སྔ་མ་ལས་ཕྱི་མ་ཕྱི་མ་ཤིན་ཏུ་ཉེ་བ་ཡིན་པས་ན་སྤུན་དེ་རྣམས་ལ་ཡིད་ཀྱིས་ཁྲོས་ཤིང་འཁོན་ཞེ་ལ་འཛིན་པ་དང་། ཕྲག་དོག་གི་བསམ་པས་སྦྱོར་བ་ལུས་ངག་གི་བརྙས་པ་དང་། ངག་གི་ཚིག་རྩུབ་སྐྱོན་བརྗོད་པ་ལ་སོགས་པས་དེའི་སེམས་སུན་ཕྱུང་ན་རྩ་ལྟུང་གསུམ་པའོ། །དེའང་ནང་འདྲེས་པའི་སྤུན་ལ་འཐབ་པ་སོགས་ནི་རྡོ་རྗེའི་ནང་དམེ་ཡིན་པས་ཤིན་ཏུ་ལྕི་ཞིང་ཉེས་པ་སྦྱོང་དཀའ་བས་གཟབ་པར་བྱའོ། །བཞི་པ་བྱམས་པ་འདོར་བ་ནི། སེམས་ཅན་བདེ་བ་ཀུན་དང་བྲལ་ན་བསམ། །སྙིང་ནས་བྱམས་པ་བཏང་བ་བཞི་པའོ། །ཞེས་པ་སྟེ། ཡུལ་སེམས་ཅན་གང་ཡང་རུང་བ་གཅིག་གམ་འགའ་ལ་དམིགས་ནས། འདི་བདེ་བ་ཀུན་དང་བྲལ་ཞིང་སྡུག་བསྔལ་དང་འཕྲད་ན་ཅི་མ་རུང་སྙམ་དུ་ཁྲོ་བོའི་བསམ་པས་སྙིང་ཐག་པ་ནས་བྱམས་པ་བཏང་བ་ནི་རྩ་ལྟུང་བཞི་པའོ། །ལྔ་པ་བྱང་སེམས་འདོར་བ་ནི། འདོད་ཆགས་སེམས་ཀྱིས་གནས་སྐབས་མ་ཡིན་པར། །བསམ་བཞིན་ཁུ་བ་འབྱིན་དང་སེམས་ཅན་ལ། །བྱང་ཆུབ་སེམས་བསྐྱེད་བཏང་བ་ལྔ་བ་ཡིན། །ཞེས་པ་སྟེ། ཇི་སྐད་དུ། གསང་བའི་དབང་དང་གསུམ་པ་དང་། །རོ་མཉམ་པ་དང་ལྷ་མཆོད་དང་། །རིགས་བརྒྱུད་སྤེལ་དང་རིལ་བུ་དང་། །འཆི་ལྟས་བརྟག་པའི་དུས་ཡིན་ཏེ། །ཞེས་པ་ལྟར་འདོད་ཆགས་ཀྱི་སེམས་ཀྱིས་གནང་བའི་གནས་སྐབས་བདུན་མ་ཡིན་པར་བསླབ་པ་ཁྱད་གསོད་ཀྱི་མི་འགྱུར་བའི་བདེ་བ་ལ་མ་དད་ཅིང་། ཞུ་བདེ་འགྱུར་མེད་ལ་དགོས་པ་མེད་པར་བལྟས་ནས་བསམ་བཞིན་དུ་ཁུ་བ་འབྱིན་པ་དང་། སྤྱིར་བསྐྱེད་རིམ་པས་སེམས་ཅན་ལ་སྨོན་པ་བྱང་ཆུབ་ཀྱི་སེམས་བསྐྱེད་བཏང་པའམ་འཇུག་པའི་རྩ་ལྟུང་ཐུན་མོང་བ་སྤྱད་པས་འཇུག་སེམས་བཏང་བ་རྩ་ལྟུང་ལྔ་པ་ཡིན་ནོ། །དྲུག་པ་གྲུབ་མཐའ་སྨོད་པ་ནི། ལམ་འཚོལ་མུ་སྟེགས་ལམ་ཞུགས་ཉན་རང་དང་། །ལམ་ཆེན་ཐེག་ཆེན་གྲུབ་མཐར་སྨོད་ན་དྲུག །ཅེས་པ་སྟེ། ངན་འགྲོ་ལས་ཐར་པའི་ཐབས་ཀྱི་ལམ་འཚོལ་བ་མུ་སྟེགས་ཁ་ཅིག་དང་། འཁོར་བ་ལས་ངེས་པར་འབྱུང་བའི་ལམ་ལ་ཞུགས་པ་ཉན་རང་གཉིས་དང་། མཐའ་གཉིས་ལས་ངེས་པར་འབྱུང་བའི་ལམ་ཆེན་པོ་ལ་ཞུགས་པ་ཐེག་པ་ཆེན་པོའི་གྲུབ་མཐའ་ལ། ལམ་གོང་མ་ལ་དྲང་པ་སོགས་ཀྱི་དགོས་པ་མེད་པར་སྡང་སེམས་ཀྱིས་སྨོད་ན་རྩ་ལྟུང་དྲུག་པའོ། །བདུན་པ་གསང་བ་སྒྲོག་པ་ནི། སྣོད་དང་ཆོ་ག་མ་བྱས་མ་རྫོགས་དང་། །ཉམས་དང་ཟབ་མོས་འཇིགས་ལྔར་གསང་སྒྲོག་བདུན། །ཞེས་པ་སྟེ། སྣོད་ཀྱིས་མ་སྨིན་པ་ནི་ལོག་སྲེད་ཅན་ཏེ་རྒྱུས་མ་སྨིན་པ་དང་། ཆོ་ག་མ་བྱས་པས་མ་སྨིན་པ་ནི་བུམ་དབང་མ་ཐོབ་པ་དང་། ཆོ་ག་མ་རྫོགས་པས་མ་སྨིན་པ་ནི་དབང་གོང་མ་གསུམ་མ་ཐོབ་པ་དང་། དབང་ཐོབ་ཀྱང་རྩ་ལྟུང་བྱུང་བས་ཉམས་པ་དང་། ཆོས་ཟབ་མོས་འཇིགས་པ་ཉན་རང་སོགས་ནི་རྐྱེན་གྱིས་མ་སྨིན་པ་སྟེ། ཡུལ་ལྔ་པོ་དེར་གསང་སྔགས་ཀྱི་ཐུན་མོང་མ་ཡིན་པའི་རྫས་དང་། སྤྱོད་པ་དང་། ཟབ་དོན་གྱི་གསང་བ་སྒྲོགས་པས་དེས་ཀྱང་གོ་བཞིན་མ་དད་པ་སྐྱེས་ན་རྩ་ལྟུང་བདུན་པའོ། །བརྒྱད་པ་ཕུང་པོར་སྨོད་པ་ནི། ཕུང་ལྔ་སངས་རྒྱས་ལྔ་ལ་བརྙས་པ་ཡིས། །སྨོད་དང་གདུང་བ་བསྐྱེད་ན་བརྒྱད་པ་ཡིན། །ཞེས་པ་སྟེ། །ཕུང་པོ་ལྔ་ནི་སངས་རྒྱས་རིགས་ལྔ་ཡིན་པ་ལྟར་དབང་དུས་སུ་ངོ་སྤྲད་ནས་དེ་འདོད་ཡོན་གྱིས་མཉེས་པར་མཆོད་པས་རྟེན་བདེ་བ་འཕེལ། དེས་བརྟེན་པ་ཡེ་ཤེས་མངོན་དུ་འགྱུར་བ་ཡིན་པ་ལ་དེ་མི་ཤེས་པ་ཀུན་འབྱུང་གི་གཙོར་བོར་བཟུང་སྟེ་ངག་གིས་བརྙས་པ་ཡིས་སྨོད་པ་དང་ཡན་ལག་གཅོད་པ་སོགས་དང་། དཀའ་ཐུབ་ཀྱིས་ལུས་ལ་གདུང་བ་བསྐྱེད་པར་བྱས་ན་རྩ་ལྟུང་བརྒྱད་པ་ཡིན་ནོ། །དགུ་པ་ཆོས་ལ་ཐེ་ཚོམ་ཟ་བ་ནི། གཞི་ལམ་འབྲས་བུའི་རང་བཞིན་དག་པ་ལ། །དཀྲི་བར་ཐེ་ཚོམ་ཟ་བ་དགུ་པར་བཤད། །ཅེས་པ་སྟེ། གཞི་ལམ་འབྲས་བུའི་ཆོས་ཐམས་ཅད་རང་བཞིན་གྱིས་རྣམ་པར་དག་པས་དབྱེར་མི་ཕྱེད་པའི་ཟུང་འཇུག་འོད་གསལ་བྱང་ཆུབ་ཀྱི་སེམས་བདེ་བར་གཤེགས་པའི་སྙིང་པོ་གདོད་མའི་གནས་ལུགས་སུ་བཞུགས་པར་བཤད་པ་ནི། ལམ་ལ་དཀྲི་བར་བྱ་བའི་ཆེད་དུ་སྤྲོ་བ་བསྐྱེད་པ་ཙམ་ལས་དོན་ལ་དེ་ལྟར་མ་ཡིན་སྙམ་དུ་ཐེ་ཚོམ་ཟ་བས་ཡིད་མ་ཆེས་ཏེ་མ་དད་ན་རྩ་ལྟུང་དགུ་པར་བཤད་དོ། །བཅུ་པ་ཞིང་བཅུ་མི་སྒྲོལ་བ་ནི། བསྒྲལ་བའི་ཞིང་བཅུ་ཚང་བ་ནུས་བཞིན་དུ། །མི་སྒྲོལ་བ་དང་བྱམས་པར་བྱེད་ན་བཅུ། །ཞེས་པ་སྟེ། དེའང་སྤྱིར་བསྟན་པ་ལ་གནོད་པ་དཀོན་མཆོག་གསུམ་གྱི་སྐུ་དགྲ་དང་། ཁྱད་པར་རང་ཉིད་ཀྱི་བླ་མའི་སྐུ་དགྲ། སྔགས་ཀྱི་དམ་ཚིག་ཉམས་པ་གསོ་བར་མི་བྱེད་པ། སྔགས་ཀྱི་ལྟ་སྤྱོད་ལ་ཞུགས་ནས་དེ་ལ་ལོག་ལྟ་སྐྱེས་ནས་སྤངས་པ། བླ་མ་དང་མཆེད་ལ་ཞེ་སྡང་ཞིང་འཁུ་བ། སྔགས་སྤྱོད་ལ་འདུ་བར་མི་དབང་བར་རྐུ་ཐབས་ཀྱིས་འདུ་ནས་ནང་དུ་འོང་བ། སེམས་ཅན་ཡོངས་ལ་གནོད་པ། དམ་ཚིག་དང་ལྡན་པའི་དགྲར་གྱུར་ན། མི་དགེ་བ་ཁོ་ནར་སྤྱོད་པ་ངན་པའི་ངང་ཚུལ་ཅན་ཏེ་སྙིང་རྗེས་བསྒྲལ་བའི་ཞིང་སྡུག་བསྔལ་གྱི་རྒྱུ་ལ་སྤྱོད་པ་དགུ་དང་། སྡུག་བསྔལ་དངོས་ལ་སྤྱོད་པ་ངན་སོང་གསུམ་གཅིག་ཏུ་བསྡོམས་པས་བཅུ་སྟེ། དེ་དག་གང་རུང་ཚང་བ་དང་། ཁྱད་པར་བླ་མ་དང་བསྟན་འགྲོར་འཚེ་བའི་གདུག་པ་ཅན་དེ་དག་མངོན་སྤྱོད་ཀྱི་ལས་ཀྱིས་སྒྲོལ་བར་ནུས་བཞིན་དུ་ཡལ་བར་དོར་ནས་མི་སྒྲོལ་བ་དང་། ལོག་པའི་སྲེད་པས་མཛའ་བོར་བྱས་ནས་ཐ་མལ་བའི་བྱམས་པ་དང་ལུས་ངག་གི་སྤྱོད་ལམ་མཐུན་པར་བྱེད་ན་རྩ་ལྟུང་བཅུ་པའོ། །དེ་དག་ལ་ཡང་ཡིད་ཀྱི་བྱམས་པ་བཏང་ན་རྩ་ལྟུང་བཞི་པར་འགྱུར་རོ། །བཅུ་གཅིག་པ་ཆོས་ལ་ཚད་མས་གཞལ་བ་ནི། མིག་སོགས་བྲལ་ལ་དངོས་དང་དངོས་མེད་རྟོག །རྟོག་གེས་འཇལ་བར་བྱེད་ན་བཅུ་གཅིག་པའོ། །ཞེས་པ་སྟེ། མིང་དང་བརྡའམ་མཚན་མ་སོགས་སྤྲོས་པའི་མཐའ་ཐམས་ཅད་དང་བྲལ་བ་དོན་དམ་སྟོང་པ་ཉིད་ཀྱི་གནས་ལུགས་ལ་དངོས་པོ་དང་དངོས་མེད་ཀྱི་མཐའ་གང་རུང་ཞིག་ཏུ་རྟོག་ཅིང་ཞེན་ནས་རྟོག་གེས་རིག་པའི་སྒྲོ་སྐུར་གྱིས་འཇལ་བར་བྱེད་ན་རྩ་ལྟུང་བཅུ་གཅིག་པའོ། །བཅུ་གཉིས་པ་དད་ལྡན་སེམས་སུན་འབྱིན་པ་ནི། དད་གསུམ་ལྡན་པའི་སེམས་ཅན་དོན་མི་བྱེད། །སེམས་མི་བསྲུང་དང་བསླུ་བ་བཅུ་གཉིས་པ། །ཞེས་པ་སྟེ། བླ་མ་དང་དཀོན་མཆོག་གི་ཡོན་ཏན་ལ་སྤྲོ་བ་དང་བའི་དད་པ། དེ་དོན་དུ་གཉེར་བ་འདོད་པའི་དད་པ། དེ་དང་དེས་བསྟན་པའི་ཆོས་ལ་ཐེ་ཚོམ་དང་བྲལ་བས་ཡིད་ཆེས་པའི་དད་པ་གསུམ་དང་ལྡན་པའི་སེམས་ཅན་ཆོས་འདོད་ཅིང་སྦྱིན་དུ་རུང་བ་ལ་རང་ལ་ནུས་པ་ཡོད་བཞིན་ཆོས་སྟོན་པ་སོགས་དེའི་དོན་མི་བྱེད་པར་མ་ཟད་དེའི་སེམས་མི་བསྲུང་བར་ཚིགས་བརླང་པོར་བརྗོད་པའམ། རང་གི་སྤྱོད་ངན་བསྟན་པ་དང་། གཡོ་སྒྱུས་བསླུ་བ་རྣམས་གང་ཡང་རུང་བས་དེའི་སེམས་སུན་ཕྱུང་བས་དད་འདུན་ལོག་ན་རྩ་ལྟུང་བཅུ་གཉིས་པའོ། །བཅུ་གསུམ་པ་དམ་རྫས་ཇི་བཞིན་མི་བསྟེན་པ་ནི། སྐབས་བབ་ཡོ་བྱད་ལོངས་སྤྱོད་དམ་ཚིག་རྫས། །དུས་ཚོད་འབྲེལ་ཀྱང་མི་བསྟེན་བཅུ་གསུམ་པ། །ཞེས་པ་སྟེ། སྔགས་ཀྱི་སྤྱོད་པའི་སྐབས་སུ་བབ་པ་ཚོགས་ཀྱི་འཁོར་ལོའམ་དཔའ་བོ་དང་དཔའ་མོའི་དགའ་སྟོན་སོགས་ཀྱི་ཚེ་རྡོར་དྲིལ་གོས་རྒྱན་སོགས་བཅང་བར་འོས་པའི་ཡོ་བྱད་དང་། ཤ་ལྔ་བདུད་རྩི་ལྔ་ཆང་སོགས་ལོངས་སྤྱོད་པར་འོས་པའི་དམ་ཚིག་གི་རྫས་དང་། བྲོ་གར་གླུ་ཚིག་སོགས་དམ་ཚིག་གི་སྤྱོད་པ་དུས་ཚོད་དང་འབྲེལ་ཀྱང་ཉན་ཐོས་ཀྱི་བསླབ་པ་ལ་འཆལ་ནས་མི་གཙང་བ་དང་ཉེས་དམིགས་ཀྱི་བསམ་པས་མི་བསྟེན་པ་རྩ་ལྟུང་བཅུ་གསུམ་པའོ། །བཅུ་བཞི་པ་ཤེས་རབ་མར་སྨོད་པ་ནི། སྤྱི་དང་བྱེ་བྲག་ལ་ལྟོས་ཤེས་རབ་མར། །ངོས་ལྐོག་སྙིང་ཚིམ་སྨད་གོ་བཅུ་བཞི་པ། །ཞེས་པ་སྟེ། བུད་མེད་ཀྱི་རིགས་འདི་རྣམས་གཡོ་སྒྱུ་ཆེའོ་ཞེས་པ་ལྟ་བུ་སྤྱི་ལ་ལྟོས་ནས་སྨོད་པ་དང་། བྱེ་བྲག་ལ་ལྟོས་པ་རང་གི་བརྟེན་བྱར་འོས་པའི་ཤེས་རབ་མ་སོགས་ལ་ངོས་ནས་སམ། ལྐོག་ཏུའང་རུང་སྟེ། དེ་དག་གི་སྐྱོན་བརྗོད་པའི་སྒོ་ནས་སྙིང་ཚིམ་པར་སྨད་པ་ཡུལ་དེ་གོོ་ན་རྩ་ལྟུང་བཅུ་བཞི་པའོ། །དེ་ཡང་བླ་མེད་ཀྱི་སྡོམ་པ་དང་མི་ལྡན་པ་ཞིག་དགོས་ཏེ། དེ་ལྟར་མིན་ན་རྩ་ལྟུང་དང་པོའི་གསུམ་པར་འགྱུར་རོ། །དེ་དག་གི་གོ་རིམ་ཀྱང་གཉེན་པོའི་སྔགས་ཀྱི་གོ་རིམ་དང་སྔ་མ་སྔ་མ་ལས་ཕྱི་མ་ཕྱི་མ་ཡང་བས་ལྕི་ཡང་གི་སྒོ་ནས་དེ་ལྟར་བཞག་ལ། དབང་བཞི་སོ་སོའི་སྡོམ་པའི་རྩ་ལྟུང་དུ་འགྱུར་ཚུལ་གཙོ་ཆེ་བའི་དབང་དུ་བྱས་ན་བཅུ་གསུམ་པ་དང་། ལྔ་པ་རྒྱུ་འབྲས་བུ་བྱས་ནས་གསང་དབང་གི་དང་། བཅུ་བཞ ི་པ་ཁྱད་པར་ཤེར་དབང་གི་དང་། དགུ་པ་དང་བཅུ་གཅིག་པ་དབང་བཞི་པའི་དང་། ལྷག་མ་དགུ་པོ་བུམ་དབང་དང་འགལ་བའི་རྩ་ལྟུང་ཡིན་ཞིང་། དབང་ཕྱི་མ་ཕྱི་མའི་ཚེ་ན་སྔ་མ་སྔ་མ་ཐུན་མོང་དང་། དབང་རང་སྐལ་གྱི་དེ་ཉིད་ཐུན་མིན་དུ་འགྱུར་རོ། །དེས་ན་བུམ་དབང་ཙམ་ཐོབ་པས་རང་འགལ་བའི་དགུ་པོ་སྤྱད་ན་རྩ་ལྟུང་དུ་འགྱུར་གྱི། དེ་ལས་གཞན་པ་ལྔ་ལ་སྤྱད་ཀྱང་རྩ་ལྟུང་དངོས་སུ་མི་འགྱུར་ཏེ། དེ་སྤོང་བའི་སྡོམ་པ་མ་ཐོབ་པའི་ཕྱིར་རོ། །བཞི་པ་ཡན་ལག་སྦོམ་པོའི་ལྟུང་བ་བཤད་པ་ལ་གསུམ། མདོར་བསྟན་པ། རྒྱས་པར་བཤད་པ། དོན་བསྡུ་བའོ། །དང་པོ་མདོར་བསྟན་པ་ནི། ད་ནི་ཡན་ལག་སྦོམ་པོའི་ལྟུང་བ་བཤད། །ཅེས་པ་སྟེ། ད་ནི་རྩ་བ་དང་རྗེས་སུ་མཐུན་པའི་ཡན་ལག་སྡོ མ་པ་གཏོང་བྱེད་ཀྱི་རྒྱུ་མ་ཡིན་ཀྱང་དངོས་གྲུབ་མྱུར་དུ་འགྲུབ་པ་ལ་གེགས་བྱེད་པའི་ཉེས་པ་ལྕི་བས་ན་སྦོམ་པོ་ཞེས་བྱ་སྟེ། དཔེར་ན་ལྗོན་ཤིང་གི་ཡལ་ག་རགས་པ་ཆད་པ་ལྟར་ཉམས་སྐྱོན་ཆེ་བས་ན་སྦོམ་པོའི་ལྟུང་བའི་རྣམ་གྲངས་བཤད་པར་བྱ་སྟེ་ཞེས་སོ། །གཉིས་པ་རྒྱས་པར་བཤད་པ་ལ་གཉིས། སྦོམ་པོ་བརྒྱད་བཤད་པ་དང་། རྣམ་གྲངས་གཞན་བཤད་པའོ། །དང་པོ་སྦོམ་པོ་བརྒྱད་བཤད་པ་ནི། དབང་དང་དམ་ཚིག་མ་སྨིན་རིག་མ་བསྟེན། །ཚོགས་ཀྱི་འཁོར་ལོའི་དུས་སུ་ལུས་ངག་རྩོད། །མ་གསུངས་རིག་མར་རང་སྟོབས་བདུད་རྩི་ལེན། །སྣོད་ལྡན་སློབ་མར་གསང་སྔགས་མི་སྟོན་དང་། །དད་ལྡན་ཆོས་འདྲི་བ་ལ་ཆོས་གཞན་སྟོན། །ཉན་ཐོས་ནང་དུ་ཞག་བདུན་ལོངས་པར་བསྡད། །རྣལ་འབྱོར་ཡེ་ཤེས་མི་ལྡན་སྔགས་པར་རློམ། །སྣོད་མིན་ལ་བཤད་ཡན་ལག་ལྟུང་བ་བརྒྱད། །ཅེས་པ་སྟེ། དབང་མ་ཐོབ་པ་དང་དམ་ཚིག་དང་མི་ལྡན་པ་རྒྱུད་མ་སྨིན་པའི་རིག་མ་བསྟེན་པ་ཙམ་༡དང་། ཚོགས་ཀྱི་འཁོར་ལོ་ལ་སོགས་པའི་དུས་སུ་རྡོ་རྗེའི་སྤུན་ལ་མནར་སེམས་མེད་ཀྱང་ལུས་ངག་གིས་རྩོད་བརྡེག་དང་ཁ་ཤག་ཙམ་བྱས་པ་༢དང་། མཚན་ཉིད་མ་ཚང་བས་རྒྱུད་ལས་བསྟེན་བྱར་མ་གསུངས་པའི་རིག་མ་ཕལ་པར་རིལ་བུའམ་བདེ་བའི་རྒྱུར་སྔགས་ཀྱི་ཆོ་ག་བཞིན་དུ་མ་ཡིན་པར་རང་གི་རླུང་སྟོབས་ཙམ་གྱིས་རིལ་བུ་སོགས་ཀྱི་རྒྱུ་བདུད་རྩི་ལེན་པ་༣དང་། གསང་སྔགས་ཀྱི་སྣོད་དང་ལྡན་ཞིང་དོན་གཉེར་ཅན་གྱི་སློབ་མར་གསང་སྔགས་ཀྱི་ཆོས་དཔེ་མཁྱུད་ཀྱིས་མི་སྟོན་པ་༤དང་། དད་པ་དང་ལྡན་ཅིག་ཆོས་དོན་དུ་གཉེར་བའི་སློབ་མས་ཚིག་དོན་འདྲི་བ་ལ་དེ་མི་སྟོན་པར་ཆོས་གཞན་སྟོན་པ་༥དང་། སྔགས་ཀྱི་ལྟ་སྤྱོད་ལ་སྐུར་པ་འདེབས་པའི་ཉན་ཐོས་དངོས་སམ་དེ་དང་འདྲ་བ་རྟོག་གེ་བའི་ནང་དུ་ཞག་བདུན་ལོངས་པར་བསྡད་པ་༦དང་། རྣལ་འབྱོར་པ་རང་ཉིད་དེ་ཁོ་ན་ཉིད་ཀྱི་ཡེ་ཤེས་དང་མི་ལྡན་བཞིན་དུ་ང་ནི་སྔགས་འཆང་རྡོ་རྗེ་འཛིན་པ་ཡིན་པར་སྨྲ་ཞིང་རློམ་པ་༧དང་། ཚོགས་བཤད་ཙམ་ལས་མན་ངག་སློབ་བཤད་སྟོན་པའི་སྣོད་མིན་པ་ལ་ཟབ་དོན་རྗེན་པར་བཤད་པ་སྟེ་དེ་རྣམས་ནི་ཡན་ལག་གི་ལྟུང་བ་བརྒྱད་༨དོ། །གཉིས་པ་རྣམ་གྲངས་གཞན་བཤད་པ་ནི། བསྙེན་སོགས་མ་བྱས་དབང་རབ་ལས་ལ་འཇུག །ཕྱི་ཆོས་མོས་ལ་ལུས་ཀྱི་ཕྱག་རྒྱ་བསྟན། །སྡོམ་པ་གཉིས་ཀྱི་བཅས་ལས་དགོས་མེད་འདའ། །ཞེས་པ་སྟེ། དེའང་རང་གི་བསྙེན་སྒྲུབ་སོགས་མ་བྱས་པར་སློབ་མ་ལ་དབང་བསྐུར་བ་དང་། རྟེན་ལ་རབ་གནས་བྱས་པ་དང་། སྦྱིན་སྲེག་གི་ལས་སོགས་ལ་བསམ་པས་འཇུག་པར་རྩོམ་ཞིང་སྦྱོར་བས་དངོས་སུ་ལག་ལེན་ལ་ཞུགས་པ་དང་། སྔགས་ཀྱི་ཟབ་དོན་ལ་སྐྲག་པའི་རིགས་ཅན་མ་ཡིན་ཀྱང་ཕྱི་མཚན་ཉིད་ཐེག་པའི་ཆོས་ལ་མོས་པ་ཆེ་བའི་གང་ཟག་ལ་དགོས་པ་མེད་པར་ལུས་ཀྱི་ཕྱག་རྒྱ་འཁྲུལ་འཁོར་སོགས་བསྟན་པ་དང་། སྡོམ་པ་འོག་མ་སོ་བྱང་གཉིས་ཐོབ་པའི་སྔགས་པས་ཆང་འཐུང་བ་དང་ཕྱི་དྲོའི་ཁ་ཟས་བཟའ་བ་སོགས་སོ་བྱང་གཉིས་ཀྱི་བཅས་པ་ལས་ཚོགས་འཁོར་དང་ནང་གི་སྦྱིན་སྲེག་སོགས་དགོས་པ་ཁྱད་པར་ཅན་མེད་བཞིན་དུ་འདའ་བར་བྱེད་པ་ནི་སྦོམ་པོའོ། །གསུམ་པ་དོན་བསྡུ་བ་ནི། ཞེས་སོགས་སྦོམ་པོའི་ལྟུང་བ་དུ་མ་རྣམས། །ཡོད་ཀྱང་ཉེས་པ་ཆུང་ཞེས་དུས་འཁོར་བཤད། །ཅེས་པ་སྟེ། ཞེས་བཤད་པ་ལ་སོགས་པའི་སྦོམ་པོའི་ལྟུང་བ་ངོས་འཛིན་དང་། གོ་རིམ་དང་། གྲངས་མ་ངེས་པ་དང་། ཡན་ལག་གང་རུང་མ་ཚང་བའི་ཉེས་བྱས་སོགས་དུ་མ་རྣམས་ཡོད་ཀྱང་ཉེས་པ་ཆུང་བའི་ཚུལ་ཇི་སྐད་དུ། ལྟུང་བ་སྦོམ་པོ་རྣམས་ནི་དུ་མ་ཏེ། དེ་རྣམས་ལ་ཆད་པ་ཤིན་ཏུ་ཆུང་བར་འགྱུར་རོ། །ཞེས་དུས་འཁོར་འགྲེལ་ཆེན་ལས་བཤད་པས་འདིར་བཏང་སྙོམས་སུ་བྱས་སོ། །དེ་ཡན་ཆད་ཀྱིས་གསར་རྙིང་ཐུན་མོང་བའི་དམ་ཚིག་རྣམས་བསྟན་ཏེ། ལྔ་པ་ཁྱད་པར་སྔ་འགྱུར་རྫོགས་པ་ཆེན་པོའི་ལུགས་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཁྱད་པར་སྔ་འགྱུར་རྫོགས་པ་ཆེན་པོའི་སྲོལ། །ཞེས་པ་སྟེ། གསར་མའི་རྒྱུད་གཞུང་རྣམས་སུ་མ་གྲགས་པས་ན་ཁྱད་པར་བ་སྟེ། སྔ་འགྱུར་རྫོགས་པ་ཆེན་པོ་གཙོ་བོར་བྱས་པའི་རྒྱུད་སྡེ་རྣམས་སུ་གསུངས་པའི་ལུགས་སྲོལ་འཆད་པ་ལས། སྤྱིར་དམ་ཚིག་ལ་སྒྲ་དོན་གྱི་དབང་དུ་བཏང་ན་ས་མ་ཡའི་སྒྲ་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་པས་ཇི་ལྟར་དམ་བཅས་པ་ལས་འདའ་བར་བྱ་བ་མ་ཡིན་པས་ན། ཀུན་འདུས་ལས། འདའ་དཀའ་རྡོ་རྗེའི་དམ་ཚིག་གཏན་གྱི་གཉེར། །ཞེས་སོ། །དེ་ལ་བསྲུང་མ་བསྲུངས་ཀྱི་ཁེ་ཉེན་གྱི་དམ་ཚིག་ཏུ་བཞག་པའང་ཡོད་དེ། ཧེ་རུ་ཀ་འདུས་པའི་རྒྱུད་ལས། མི་འདའ་ད མ་པ་མཆོག་གྱུར་པ། །འདས་པར་གྱུར་ན་ཚིག་པར་བཤད། །ཅེས་སོ། །དབྱེ་ན་སྔ་འགྱུར་གྱི་རྒྱུད་སྡེ་ཐུན་མོང་མ་ཡིན་པ་རྣམས་རྒྱུད་ལུང་མན་ངག་གསུམ་དུ་འདུ་ཞིང་། དེ་རྣམས་སུ་སྤྱི་དང་། ཁྱད་པར། ལྷག་པའི་དམ་ཚིག་གསུམ་དུ་བཤད་པ་ལས། དང་པོ་སྤྱིའི་དམ་ཚིག་ནི། སོ་བྱང་དང་ཕྱི་རྒྱུད་ཀྱི་སྡོམ་པའི་བསྲུང་མཚམས་སུ་གྲགས་པའི་དམ་ཚིག་རྣམས་ཏེ། བདེ་འདུས་ཞི་རྒྱུད་ལས། སོ་སོར་ཐར་དང་བྱང་ཆུབ་སེམས། །བྱ་སྤྱོད་རྣལ་འབྱོར་རྒྱུད་རྣམས་ལས། །བསྲུང་བར་བྱ་བ་གང་གསུངས་པ། །ཐུན་མོང་སྤྱི་ཡི་དམ་ཚིག་ཡིན། །ཞེས་སོ། །གཉིས་པ་ཁྱད་པར་གྱི་དམ་ཚིག་ནི། རྒྱུད་ཐམས་ཅད་ཀྱི་གཞི་མར་གྱུར་པ་སྒྱུ་འཕྲུལ་རྩ་རྒྱུད་ལས་ནི་རྩ་བའི་དམ་ཚིག་ལྔ་དང་། ཡན་ལག་གི་དམ་ཚིག་བཅུར་བཤད་པ་ལས། སྔ་མ་ནི་འདིར་བཤད་པའི་རྩ་བའི་དམ་ཚིག་གི་ནང་དུ་འདུ་ལ། ཕྱི་མ་འདིའི་ཡན་ལག་གི་དམ་ཚིག་ཉེར་ལྔའི་ནང་ཚན་མི་སྤང་བ་དང་། དང་བླང་གཉིས་ལས་གཞན་མེད་ཅིང་། ལུང་ཐམས་ཅད་ཀྱི་རྩ་བ་སྤྱི་མདོ་དགོངས་པ་འདུས་པ་ལས་རྩ་བའི་དམ་ཚིག་གསུམ་དང་ཡན་ལག་ཉེར་ལྔ་བཤད་པ་ལས་སྔ་མའང་འདིར་བཤད་པར་འདུ་ཞིང་། ཕྱི་མའང་ཉེར་ལྔ་པོ་འདིར་བཤད་པ་དང་དོན་གཅིག་པ་དེས་ན་བསྟན་བཅོས་འདིར་ནི་མན་ངག་ཨ་ཏི་ཡོ་གའི་དམ་ཚིག་རྣམས་བསྟན་ཏོ། །གསུམ་པ་ལྷག་པའི་དམ་ཚིག་ནི་འོག་ཏུ་འཆད་པར་འགྱུར་ལ། གཉིས་པ་རྒྱས་པར་བཤད་པ་ལ་གཉིས། རྩ་བ་དང་། ཡན་ལག་གོ། །དང་པོ་རྩ་བའི་དམ་ཚིག་ནི། རྫོགས་པ་ཆེན་པོའི་དམ་ཚིག་དེ་ལའང་བསྲུང་དུ་མེད་པ་གཅིག་ཅར་བའི་དམ་ཚིག་དང་། བསྲུང་མཚམས་ཅན་རིམ་གྱིས་པའི་དམ་ཚིག་གཉིས་སུ་དབྱེ་བ་ལས། དང་པོ་གཅིག་ཅར་བའི་དམ་ཚིག་ནི། རིན་ཆེན་སྤུངས་པ་ལས། དེ་དུས་བསྲུང་བའི་མཚམས་འདས་པས། །དམ་ཚིག་ལྷུན་གྲུབ་ཆེན་པོ་དང་། །མེད་དང་གཅིག་པུ་ཕྱ་བ་ཡིན། །དེའི་གྲོགས་སུ་དེ་འགྱུར་རོ། །ཞེས་གསུངས་པ་ལྟར། ཆོས་ཐམས་ཅད་ཡེ་ནས་བླང་དོར་རྒྱུ་འབྲས་བསྲུང་བྱ་སྲུང་བྱེད་བསྲུང་མཚམས་ལས་འདས་པ་འཁོར་འདས་མཉམ་ཉིད་བདེ་བ་ཆེན་པོའི་ཀློང་དུ་མཉམ་བརྡལ་གྱི་དགོངས་པ་ཟབ་མོ་མངོན་དུ་གྱུར་པ་ཅིར་སྣང་ཡེ་ཤེས་ཆེན་པོའི་རོལ་པ་འབའ་ཞིག་ཏུ་འཆར་བ་ནི་བསྲུང་དུ་མེད་པ་གཅིག་ཅར་བའི་དམ་ཚིག་གི་ཐ་སྙད་དུ་བཞག་པའོ། །གཉིས་པ་བསྲུང་མཚམས་ཅན་རིམ་གྱིས་པའི་དམ་ཚིག་ནི། དེ་ལྟ་བུའི་གདམས་ངག་ཟབ་མོ་ཐོབ་ཀྱང་ཉམས་ལེན་གྱི་ངོས་ནས་རྟོགས་གོམས་ཀྱི་གདིང་ཚད་མ་ལོངས་པའི་གང་ཟག་དད་བརྩོན་ཤེས་རབ་ཅན་ཐུན་མོང་གི་འཇུག་སྒོར་བསྲུང་མཚམས་ཅན་རིམ་གྱིས་པའི་དམ་ཚིག་གི་རྣམ་གཞག་དམ་ཚིག་རྣམ་པར་བཀོད་པའི་རྒྱུད་ལས་གསུངས་པ་བཞིན་འཆད་པ་སྟེ། རྩ་བ་བླ་མའི་སྐུ་གསུང་ཐུགས་གསུམ་ལ། །དགུ་དགུར་ཕྱེ་བ་ཉི་ཤུ་རྩ་བདུན་དང་། །ཞེས་པ་སྟེ། རྩ་བའི་དམ་ཚིག་ནི་རང་གི་སྒོ་གསུམ་སངས་རྒྱས་ཀུན་འདུས་བླ་མའི་སྐུ་གསུང་ཐུགས་རྡོ་རྗེ་གསུམ་དང་དབྱེར་མི་ཕྱེད་པར་བསྡོམས་པས་སམ། ཡང་ན་གུ་རུའི་སྒྲ་ལས་ལྕི་བ་སྟེ་ཉམས་ན་སྦྱངས་དཀའ་བའི་དོན་གྱིས་དེ་སྐད་ཅེས་བྱ་ལ། དེ་ལ་དབྱེ་ན་སྐུ་གསུང་ཐུགས་གསུམ་རེ་རེ་ལ་ཕྱི་ནང་གསང་བ་གསུམ་གསུམ་དུ་ཕྱེ་བས་དགུ་དགུར་ཕྱེ་བ་ལས། དང་པོ་སྐུའི་དམ་ཚིག་གསུམ་ཚན་གསུམ་ནི། རིམ་པར་མ་བྱིན་པར་ལེན་པ། མི་ཚངས་པ་སྤྱོད་པ། སྲོག་གཅོད་པ་གསུམ་སྤོང་བ་སྐུའི་ཕྱིའི་གསུམ་དང་། ཕ་མ་སྤུན་སྲིང་དང་རང་ལུས་ལ་སྨོད་པ། ཆོས་དང་གང་ཟག་ལ་སྨོད་པ། རང་ལུས་ལ་བརྡེག་བཙོགས་དང་དཀའ་ཐུབ་ཀྱིས་བརྙས་ཤིང་གདུང་བ་རྣམས་སྤང་བ་སྐུའི་ནང་གི་གསུམ་དང་། རྡོ་རྗེ་སྤུན་སྲིང་གི་ལུས་ལ་བརྡེག་གམ་བརྡེག་པར་གཟས་ཤིང་རྒྱན་ལ་སྨོད་པ། བླ་མའི་ཡུམ་ལ་གཙེས་པ། བླ་མའི་སྐུའི་གྲིབ་མར་འགོངས་པ་དང་སྤྱན་སྔར་ལུས་ངག་གི་སྤྱོད་པ་བག་མེད་པ་རྣམས་སྤོང་བ་སྐུའི་གསང་བའི་དམ་ཚིག་གོ། །གཉིས་པ་གསུང་གི་དམ་ཚིག་གསུམ་ཚན་སུམ་ནི། རྫུན་ཚིག །ཕྲ་མ། ཚིག་རྩུབ་སྨྲ་བ་རྣམས་སྤོང་བ་གསུང་གི་ཕྱིའི་གསུམ་དང་། ཆོས་སྨྲ་བ། དེའི་དོན་སེམས་པ། གནས་ལུགས་སྒོམ་པ་རྣམས་ལ་གཤེ་སྐུར་འདེབས་པ་སྤོང་བ་རྣམས་གསུང་གི་ནང་གི་དང་། རྡོ་རྗེ་སྤུན་སྲིང་གི་ཚིག །བླ་མའི་ཕྱག་རྒྱ་དང་ཉེ་འཁོར་གྱི་ཚིག །བླ་མའི་གསུང་རྣམས་ལ་བརྙས་ཤིང་གཅོག་པར་བྱེད་པ་རྣམས་སྤོང་བ་གསུང་གི་གསང་བའི་དམ་ཚིག་གོ། །གསུམ་པ་ཐུགས་ཀྱི་དམ་ཚིག་གསུམ་ཚན་གསུམ་ནི། གནོད་སེམས། བརྣབ་སེམས། ལོག་ལྟ་གསུམ་སྤོང་བ་ཐུགས་ཀྱི་ཕྱིའི་དང་། སྤྱོད་པ་ལོག་པ་བག་མེད་དང་ཐོ་ཅོ། །སྒོམ་པ་ལོག་པ་བྱིང་རྒོད་དང་གོལ་སྒྲིབ། ལྟ་བ་ལོག་པ་རྟག་ཆད་དང་མཐར་འཛིན་སྤངས་པ་རྣམས་ཐུགས་ཀྱི་ནང་གི་དང་། ཉིན་ཞག་གི་ཐུན་རེ་རེ་བཞིན་ལྟ་བཞིན་ལྟ་སྒོམ་སྤྱོད་གསུམ་ཡིད་ལ་མ་བྱས་པ། ཡི་དམ་གྱི་ལྷ་ཡིད་ལ་མ་བྱས་པ་དང་། བླ་མའི་རྣལ་འབྱོར་དང་། མཆེད་ལྕམ་ལ་བརྩེ་གདུང་ཡིད་ལ་མ་བྱས་པ་རྣམས་སྤང་བ་ཐུགས་ཀྱི་གསང་བའི་དམ་ཚིག་སྟེ་ཉི་ཤུ་རྩ་བདུན་དང་། ཞེས་སོ། །གཉིས་པ་ཡན་ལག་གི་དམ་ཚིག་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཡན་ལག་དམ་ཚིག་ཉི་ཤུ་རྩ་ལྔ་ནི། །ཞེས་པ་སྟེ། རྩ་བའི་དམ་ཚིག་དེ་དག་བསྲུང་བའི་ཐབས་སམ་གྲོགས་སུ་གྱུར་པས་ན་ཡན་ལག་གི་དམ་ཚིག་སྟེ་དབྱེ་ན་གྲངས་ལྔ་ཚན་ལྔ་སྟེ་ཉི་ཤུ་རྩ་ལྔ་བཤད་པ་ནི་ཞེས་སོ། །གཉིས་པ་རྒྱས་པར་བཤད་པ་ལ་ལྔ། སྤྱད་པར་བྱ་བ་ལྔ། མི་སྤང་བ་ལྔ། དང་དུ་བླང་བ་ལྔ། ཤེས་པར་བྱ་བ་ལྔ། བསྒྲུབ་པར་བྱ་བ་ལྔའོ། །དང་པོ་སྤྱད་པར་བྱ་བ་ལྔ་ནི། ཏ་ན་ག་ན་མ་བྱིན་ལེན་དང་རྫུན། །ངག་འཁྱལ་རྣམས་ནི་སྤྱད་པར་བྱ་བ་ལྔ། །ཞེས་པ་སྟེ། འདི་དག་ལ་རང་འདོད་ཀྱི་ཞེན་འཁྲིས་མེད་ཅིང་རྟོགས་གོམས་ཀྱི་གདིང་རྙེད་ན་གཞན་དོན་དུ་སྤྱད་པར་བྱ་བ་སྟེ། དངོས་བསྟན་ཏ་ན་སྒྲོལ་བ་དང་། ག་ན་སྦྱོར་བ་དང་། མ་བྱིན་པ་ལེན་པ་དང་། རྫུན་དུ་སྨྲ་བ་རྣམས་སྔར་ལྟར་ལ། གདུལ་བྱ་མ་རུང་བའི་རྒྱུད་འཆོས་པའི་ཕྱིར་ཞེ་གཅོད་ཀྱི་བརླང་ཚིག་ངག་འཁྱལ་སྨྲ་བ་རྣམས་དང་། སྦས་དོན་དུ་རླུང་རྟོག་དབུ་མར་གསོད་པ་དང་། ཁ་སྦྱོར་ལས་ཞུ་བདེ་འགྱུར་མེད་དུ་སྒྲུབ་པའི་འདོད་སྤྱོད་དང་། བཙུན་མོའི་ཤུ་ཏྲ་མ་བྱིན་པར་ལེན་པ་དང་། འཁོར་བ་མེད་སྣང་ལས་སྒྲོལ་བའི་རྫུན་ཚིག་དང་། བརྗོད་མེད་རྟོག་པས་གབ་སྦས་མེད་པར་སྨྲ་བའི་ངག་འཁྱལ་རྣམས་ནི་སྤྱད་པར་བྱ་བ་ལྔའོ། །གཉིས་པ་མི་སྤང་བ་ལྔ་ནི། འདོད་ཆགས་ཞེ་སྡང་གཏི་མུག་ང་རྒྱལ་དང་། ཕྲག་དོག་ལྔ་ནི་མི་སྤང་དམ་ཚིག་ལྔ། །ཞེས་པ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་སྟེ། དངོས་བསྟན་ལོག་པའི་དུག་ལྔ་པོ་དེ་ནི་ཉན་ཐོས་པ་ལྟར་དགྲར་བལྟས་ནས་སྤང་མི་དགོས་ཏེ། ཆོས་ཐམས་ཅད་རང་རང་གི་ངོ་བོས་སྟོང་པས་སྤང་བྱའི་རྫས་མ་གྲུབ་པའི་ཕྱིར་སྨིག་སྒྱུ་ལ་ཆུ་རགས་མི་དགོས་པ་བཞིན་ཏེ། རྡོ་རྗེ་ལས། ཉོན་མོངས་རྣམས་ནི་སྒྱུ་འདྲ་ངོ་བོས་སྟོང་། །རང་གི་མ་རིག་རང་བཞིན་ཤེས་པས་སྒྲོལ། །ཞེས་སོ། །ཐབས་ཀྱིས་ཟིན་ན་སྤྱད་ཀྱང་མི་འཆིང་བར་མ་ཟད་རྣམ་པར་གྲོལ་བའི་མྱུར་ལམ་ཡིན་པས་ཀྱང་མི་སྤང་སྟེ། རྣ་བར་ཆུ་ཞུགས་པ་ཆུས་འགུགས་པ་བཞིན་ཏེ། རྒྱ་མཚོ་ལས། ཉོན་མོངས་ལམ་ནི་དག་པ་ཆེ། །ཐབས་ཀྱི་འདོད་ཡོན་རྒྱན་གྱི་མཆོག །ཐམས་ཅད་ཐམས་ཅད་རོལ་པ་ཡིས། །མྱུར་དུ་ཧེ་རུ་ཀ་དཔལ་འགྱུར། །ཞེས་སོ། །ཉོན་མོངས་པ་ལྔ་ཡེ་ནས་རིགས་ལྔ་ཡེ་ཤེས་ལྔའི་རང་བཞིན་ཡིན་པས་ཀྱང་མི་སྤང་སྟེ། སྣུམ་འདོད་པས་ཏིལ་འབྲུ་སྒྲུབ་པ་བཞིན་ཏེ། ཐབས་ཞགས་ཀྱི་འགྲེལ་པར་སློབ་དཔོན་ཆེན་པོ་པདྨས། གཏི་མུག་ནི་རྣམ་པར་སྣང་མཛད་ཀྱི་དམ་ཚིག་སྟེ། ཅིའི་ཕྱིར་ཞེ་ན། མ་རིག་པ་ནི་སྤང་དུ་མེད། རིག་པ་ནི་སྒྲུབ་དུ་མེད་དེ་ཆོས་ཀྱི་དབྱིངས་སུ་རོ་གཅིག་པའི་ཕྱིར་རོ། །ཞེས་སོགས་གསུངས་སོ། །སྦས་དོན་ཡང་དག་པའི་དུག་ལྔ་ནི། ཆོས་ཐམས་ཅད་མཉམ་པ་ཉིད་དུ་རྟོགས་པས་ལྟ་བ་ལ་ཕྱོགས་རིས་དང་། སྤྱོད་པ་ལ་བླང་དོར་གྱིས་འབྱེད་པ་མེད་པའི་གཏི་མུག །དེ་ལྟར་མ་རྟོགས་པ་ལ་དམིགས་པ་མེད་པའི་སྙིང་རྗེས་རྗེས་སུ་ཆགས་པའི་འདོད་ཆགས། རང་རིག་པའི་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང་། མཉམ་ཉིད་རྟོགས་པའི་ལྟ་བ་གཤོངས་སུ་མི་འབེབས་པའི་ང་རྒྱལ། གཉིས་འཛིན་གྱི་ལྟ་སྤྱོད་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་རྣམས་རྟོགས་གོམས་ཀྱི་ཐབས་ཀྱིས་མི་སྤོང་བ་སྟེ། དེ་དག་ནི་མི་སྤང་བའི་དམ་ཚིག་ལྔའོ། །གསུམ་པ་དང་དུ་བླང་བ་ལྔ་ནི། དྲི་ཆེན་དྲི་ཆུ་རཀྟ་མཱཾ་ས་དང་། །རྡོ་རྗེ་ཟིལ་པ་དང་དུ་བླངས་པ་ལྔ། །ཞེས་པ་སྟེ། དངོས་བསྟན་ལྟར་ན། དྲི་ཆེན་དང་། དྲི་ཆུ་དང་། རཀྟ་དང་། མཱཾ་ས་དང་། རྡོ་རྗེ་ཟིལ་པ་སྟེ་བདུད་རྩི་ལྔ་པོ་དེ་ཉིད་ཆོས་ཉིད་ངོ་བོས་གྲུབ། ཆོས་ཅན་རང་བཞིན་གྱིས་གྲུབ། ནུས་པའི་མཐུས་གྲུབ། བྱིན་གྱིས་རླབས་ཀྱིས་གྲུབ་པ་སྟེ། གྲུབ་པ་བཞི་དང་། ནད་ལྔ་སེལ་པའི་སྨན་ཡིན་པ་དང་། མཆོག་ཐུན་དངོས་གྲུབ་སྒྲུབ་པའི་རྫས་ཡིན་པ་དང་། རིམ་པ་བཞིན་དུ། དྲི་ཆེན་རྣམ་སྣང་། དྲི་ཆུ་དོན་གྲུབ། རཀྟ་སྣང་མཐའ། མཱཾ་ས་རིན་འབྱུང་། རྡོ་རྗེ་ཟིལ་པ་མི་བསྐྱོད་པ་སྟེ། རིགས་ལྔ་ཡེ་ཤེས་ལྔའི་རང་བཞིན་ཡིན་པས་ན། ཡིན་པ་གསུམ་གྱི་ཚུལ་ཇི་ལྟ་བ་བཞིན་ཤེས་ནས་བསྟེན་པ་དང་། སྦས་དོན་དུ་ཕུང་པོ་ལྔའི་དྭངས་མ་འཛག་མེད་དུ་འཆིང་བ་སྟེ་དེ་རྣམས་ནི་དང་དུ་བླང་བ་ལྔའོ། །བཞི་པ་ཤེས་པར་བྱ་བ་ལྔ་ནི། ཕུང་ལྔ་འབྱུང་ལྔ་ཡུལ་ལྔ་དབང་པོ་ལྔ། །ཁ་དོག་ལྔ་རྣམས་ལྷ་རུ་ཤེས་པ་ལྔ། །ཞེས་པ་སྟེ། ཆོས་ཐམས་ཅད་ཡེ་ནས་སངས་རྒྱས་པས། ཕུང་པོ་ལྔ་དེ་བཞིན་གཤེགས་པ་ཡབ་ལྔ། འབྱུང་བ་ལྔ་ཡུམ་ལྔ། ཡུལ་ལྔ་སེམས་མ། དབང་པོ་ལྔ་དང་དབང་ཤེས་ལྔ་སེམས་དཔའ། ཁ་དོག་ལྔ་རིགས་ལྔ་ཡེ་ཤེས་ལྔ་སོགས་ལྔ་ཚན་གྱི་རྟོག་ཚོགས་རྣམས་ཀྱི་རང་བཞིན་ལྷ་རུ་དག་པས་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཤེས་རབ་ཀྱིས་སྒྲོ་འདོགས་བཅད་ནས་ཤེས་པར་བྱེད་པ་སྟེ། དེ་དག་ནི་ཤེས་བྱ་ལྟ་བའི་དམ་ཚིག་ལྔའོ། །ལྔ་པ་བསྒྲུབ་པར་བྱ་བ་ལྔ་ནི། དེ་བཞིན་གཤེགས་དང་རྡོ་རྗེ་རིན་པོ་ཆེ། །པདྨ་ལས་རིགས་བསྒྲུབ་བྱ་ལྔ་རྣམས་ནི། །དུས་ཚོད་འབྲེལ་བའི་སྤྱོད་པས་དགོངས་པ་བླངས། །ཞེས་པ་སྟེ། ཤེས་པར་བྱ་བའི་དམ་ཚིག་རྣམས་ལྟ་བུའི་ངེས་པ་རྙེད་པ་ན་རྟོགས་གོམས་ཀྱི་སྦྱོར་བས་དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་ཏེ་ལྔ་པོ་རང་རྒྱུད་ལ་ཚུལ་བཞིན་ཉམས་སུ་བླངས་ནས་བསྒྲུབ་པར་བྱ་བ་ལྔ་སྟེ། དེ་རྣམས་ནི་ལས་དང་པོ་པ་དང་ཉམས་མྱོང་ཅུང་ཟད་སྐྱེས་པ་སོགས་ལྟ་དགོངས་ཀྱི་གདིང་དང་། ཚོགས་དང་དབེན་པ་ལ་སོགས་པའི་ཡུལ་དང་། དུས་ཚོད་ཀྱི་གནས་སྐབས་བརྩིས་ནས་དེ་དང་འབྲེལ་བའི་སྒོ་ནས་སྤྱོད་དགོས་པས་དེ་དག་དངོས་བསྟན་དང་། གཞན་ཡང་སྦས་དོན་གྱི་ཚུལ་དུ་གསུངས་པའི་དགོངས་པ་བླངས་ཏེ་སྤྱད་པ་ལ་མཁས་པར་བྱའོ། །གསུམ་པ་ལྷག་པའི་དམ་ཚིག་ནི། སྤྱི་དང་ཁྱད་པར་གྱི་དམ་ཚིག་ལ་གནས་པའི་རྣལ་འབྱོར་པས་སྒྲུབ་པ་ལ་སོགས་པའི་སྐབས་སུ་བསྲུང་བྱ་ལྷག་པར་བསྟན་པའི་དམ་ཚིག་ཉི་ཤུ་ལྡེམས་དགོངས་ཀྱི་སྒྲས་བཤད་པ་སྟེ། ཞི་རྒྱུད་ལས། གཞུང་དོན་ལྷག་པའི་དམ་ཚིག་ནི། །རབ་ཏུ་ལྷག་པར་བསྲུང་བར་བྱ། །གཅན་གཟན་རྒྱལ་པོའི་ཁྲི་མི་གཞིག །ཅེས་རྡོ་རྗེ་སློབ་དཔོན་གྱི་སྐུ་ལ་མི་འཚེ་ཞིང་བཀའ་མི་གཅོག་པ་དང་། ཟ་མ་ཏོག་ཏུ་དུག་མི་བླུག །ཅེས་བླ་མའི་ཡུམ་ལ་མི་སྤྱོད་པ་དང་། རིན་ཆེན་ལྕུག་ཕྲན་མི་འབྲག་ཅིང་། །ཞེས་དད་པ་ཅན་གྱི་ཚོགས་མི་བཅག་པ་དང་། ཞུན་ཁོལ་ལྟ་བུ་མི་བཏུང་སྟེ། །ཞེས་དཀོན་མཆོག་དང་མཁས་པའི་དཀོར་ལ་མི་འབག་ཅིང་ཆང་མྱོས་པར་མི་འཐུང་བ་དང་། པདྨའི་ཟེའུ་འབྲུ་ཁ་མི་གསེང་། །ཞེས་རྡོ་རྗེ་སྤུན་གྱི་ཡུམ་ལ་མི་སྤྱོོད་པ་དང་། བུག་རྡོལ་སྣོད་དུ་བཅུད་མི་བླུག །ཅེས་མཚན་ངན་གྱི་གཟུངས་མ་མི་བསྟེན་པ་དང་། དོན་དང་མི་ལྡན་རྫས་མི་བསྟེན། །ཞེས་མཚན་ཉིད་དང་མི་ལྡན་པའི་དམ་རྫས་མི་བསྟེན་པ་དང་། ཤེལ་སྒོང་འདམ་དུ་བསུབ་མི་བྱ། །ཞེས་མཁས་པའི་ཡོན་ཏན་ལ་མི་སྨོད་པ་དང་། མ་དག་སྣོད་དུ་དག་པ་མིན། །ཞེ་སྣོད་མིན་ལ་གསང་ཆོས་མི་སྟོན་པ་དང་། ཡིད་བཞིན་ནོར་བུ་མི་འབྲེག་སྟེ། །ཞེས་མཚན་ལྡན་གྱི་གཟུངས་མ་དང་སྣོད་ལྡན་གྱི་སློབ་མ་མི་སྤང་བ་དང་། ཁྱུང་ཆེན་གཤོག་པ་ཡ་མི་འབྲལ། །ཞེས་དོན་བདེ་སྟོང་དང་རྟགས་ཡབ་ཡུམ་མི་འབྲལ་བ་དང་། གནམ་ལྕགས་ངུར་མོའི་མཚོན་མི་རྡེག །ཅེས་མཆེད་ལ་ཀྱལ་ཀ་ཙམ་དུའང་ནང་འཐབ་མི་བྱེད་པ་དང་། གཅན་གཟན་རོལ་པའི་ལྷག་མི་སྤྱད། །ཅེས་གཞན་གྱིས་སྤྱད་པའི་ལྷག་མི་སྤྱོད་པ་དང་། རྡོ་རྗེ་བྲག་ཆེན་མི་གཞིག་ཅིང་། །ཞེས་བླ་མའི་གདན་ས་མི་རློམ་པ་དང་། ར་བ་དྲྭ་བའི་མཚམས་མི་འདྲལ། །ཞེས་རང་གཞན་གྱི་མཚམས་མི་འདྲལ་བ་དང་། སྒྲོན་མེ་རླུང་གི་བསད་པ་མིན། །ཞེས་ཏིང་ངེ་འཛིན་བྱིང་རྒོད་ཀྱི་དབང་དུ་མི་གཏོང་བ་དང་། ཡེ་ཤེས་ཆུ་རྒྱུན་གཅོད་པ་སྤང་། །ཞེས་བཟླས་བརྗོད་དང་ཆོ་ག་མི་ཚིག་གིས་བར་མི་གཅོད་པ་དང་། བཀའ་རྟགས་ཕྱག་རྒྱ་མི་དབྱེ་ཞིང་། །ཞེས་དབང་རྟགས་ཀྱི་ཕྱག་རྒྱ་ལས་མི་འདའ་ཞིང་བརྡ་མི་བརྗོད་པ་དང་། རྡོ་རྗེ་ཕ་ལམ་མཁར་མི་ལྡོག །ཅེས་རྣལ་འབྱོར་པའི་དཀྱིལ་འཁོར་མི་དཀྲུགས་ཤིང་སྐྱེ་བོའི་མཐུ་ཟློག་མི་བྱེད་པ་དང་། གཙུག་གི་ནོར་བུ་སྨ་མི་དབབ། །ཅེས་སློབ་དཔོན་གཙུག་ཏུ་ཁུར་བ་ལས་ཉམས་པར་མི་བྱ་བའོ། །འདི་དག་བསྲུང་བར་བྱ་བ་སྟེ། །ལྷག་པར་གཅེས་པའི་དམ་ཚིག་ཡིན། །ཞེས་སོ། །གསུམ་པ་དོན་བསྡུ་བ་ནི། དེ་སོགས་དམ་ཚིག་རྣམ་གཞག་མང་གསུངས་པ། །རྩ་བ་ཡན་ལག་བཅས་འདིར་མ་འདུས་མེད། །མདོར་ན་རང་ལུས་རྡོ་རྗེ་གསུམ་ཤེས་ན། །སྔགས་ཀྱི་དམ་ཚིག་ས་ཡ་འབུམ་སྡེ་འདུས། །ཞེས་པ་སྟེ། གོང་དུ་ཇི་སྐད་བཤད་པ་དེས་མཚོན་ཏེ་སོགས་ཁོངས་ནས་སྔར་བཤད་པའི་སྒྱུ་འཕྲུལ་གྱི་རྩ་བ་དང་ཡན་ལག་གི་དམ་ཚིག་བཅོ་ལྔ་ལས་རྣམ་གྲངས་སུམ་བརྒྱ་དྲུག་ཅུར་སྤྲོས་པ་དང་། བཤད་རྒྱུད་རྒྱས་པར་དམ་ཚིག་དགུ་བཅུ་རྩ་བདུན་དང་། སྤྱི་མདོར་གལ་མདོ་ངེས་པའི་དམ་ཚིག་བཞི། ཐུན་མོང་གི་དམ་ཚིག་ཉི་ཤུ་རྩ་བརྒྱད། ལྷག་པའི་བཞི། བརྟུལ་ཞུགས་ཀྱི་ཉེར་གསུམ། སྒྲུབ་པའི་ཉི་ཤུ། སྤྱོད་ལམ་རྒྱུན་གྱི་བཞི། བདུད་ལྔ་སྤོང་བ། དགྲ་བཞི་གཞོམ་པ། ལྟ་བའི་དམ་ཚིག་སྟེ་དགུར་ཕྱེ་བ་དང་། གཞན་ཡང་རྒྱུད་སྡེ་སོ་སོར་རྩ་བ་དང་ཡན་ལག་གིས་བསྡུས་པའི་བསྲུང་བའི་དམ་ཚིག་དང་། ཏིང་ངེ་འཛིན་དང་། སྤྱོད་ལམ་དང་། བཟའ་བའི་དམ་ཚིག་དང་། མི་འབྲལ་བའི་ཡོ་བྱད་ཀྱི་དམ་ཚིག་སོགས་རྣམ་གཞག་མང་པོ་ཞིག་གསུངས་པ་ཡོད་ནའང་དེ་ཐམས་ཅད་རྩ་བ་དང་ཡན་ལག་གི་དམ་ཚིག་དང་བཅས་པ་འདིར་མ་འདུས་པ་མེད་དོ། །གང་སྤྱད་ན་སྔགས་སྡོམ་གཏོང་བའི་རིགས་དང་། མི་གཏོང་ནའང་ཡན་ལག་ཉམས་པར་བྱེད་པའི་རིགས་གཉིས་སུ་འདུས་པའི་ཕྱིར་རོ། །འོ་ན་གསར་རྙིང་ཐུན་མོང་བའི་རྩ་ལྟུང་བཅུ་བཞི་དང་། སྔ་འགྱུར་བའི་ཁྱད་པར་གྱི་དམ་ཚིག་སྔར་བཤད་པ་རྣམས་མི་འགལ་ལམ་སྙམ་ན། བཅུ་བཞི་པོ་ཁྱད་པར་གྱི་རྩ་བའི་དམ་ཚིག་དེ་དག་གི་ཁོངས་སུ་འདུས་པས་འགལ་བ་མེད་དོ། །དེ་ཐམས་ཅད་ཀྱང་མདོར་བསྡུ་ན་རང་གི་ལུས་གཉུག་མའི་རྩ་རླུང་ཐིག་ལེ་ཡེ་ཤེས་དང་བཅས་པ་གདོད་མ་ནས་སྐུ་གསུང་ཐུགས་རྡོ་རྗེ་གསུམ་དབྱེར་མེད་པའི་ཡེ་ཤེས་རྡོ་རྗེའི་བདག་ཉིད་དུ་བཞུགས་པ་ཉིད་ཤེས་རབ་ཀྱིས་སྒྲོ་འདོགས་བཅད་དེ་ཤེས་ནས་གསང་སྔགས་ཀྱི་དམ་ཚིག་ས་ཡ་འབུམ་སྡེ་ཇི་སྐད་གསུངས་པ་ཐམས་ཅད་དེར་ལྷུན་གྱིས་གྲུབ་པར་འདུས་ཤིང་སྐྱོན་རྣམ་པར་དག་པ་ཉིད་ཡིན་ནོ། །ལྔ་པ་སྡོམ་པ་སྐྱེ་བའི་རྟེན་བཤད་པ་ནི། སྐྱེ་བའི་རྟེན་ནི་ཉིན་བཞིན་བྲམ་ཟེ་གསོད། །མཚམས་མེད་ལྔ་བྱེད་ལ་སོགས་ཀུན་ལའོ། །ཞེས་པ་སྟེ། དེ་ལྟ་བུའ་ིརིག་པ་འཛིན་པའི་སྡོམ་པ་དེ་སྐྱེ་བའི་རྟེན་ནི་གཙོ་བོར་ཁམས་དྲུག་ལྡན་གྱི་མི་ཡིན་པར་བཤད་ཅིང་། དཔེར་ན་མཚོན་རྟུལ་པོས་ཤིང་སྡོང་གཅོད་པ་ལ་ཡུན་རིང་ཐོགས་པ་དེ་རྣོན་པོས་སྐད་ཅིག་ལ་གཅོད་པ་ལྟར་མཚན་ཉིད་ཐེག་པས་ཚེ་རབས་མང་པོར་ཚོགས་བསགས་ནས་བསྒྲུབ་དགོས་པའི་འབྲས་བུ་དེ་སྔགས་ཀྱི་ཐེག་པ་འདིར་ཞུགས་ན་ཚོགས་གཉིས་ཀྱི་བསགས་པ་སྔོན་དུ་འགྲོ་མི་དགོས་པར་མ་ཟད། ཐེག་པ་གཞན་དུ་སྤངས་པའི་གདུལ་བྱ་ཉིན་བཞིན་བྲམ་ཟེ་གསོད་པ་དང་། མཚམས་མེད་པ་ལྔ་བྱེད་པ་ལ་སོགས་པའི་སྡིག་པ་ཚབ་པོ་ཆེའི་ལས་བྱེད་བཞིན་པ་ཞིག་ཡིན་ཀྱང་། དབང་རྣོན་སེམས་སྟོབས་ཆེན་པོ་དང་ལྡན་ཅིང་། མོས་འདུན་བཟློག་ཏུ་མེད་པ་ཞིག་ཡོད་ཕྱིན་སྐྱེ་བ་འདི་ལས་སངས་རྒྱས་ཉིད་འགྲུབ་སྟེ་ཐབས་ཟབ་ཅིང་ཡངས་པའི་གནད་ཀྱིས་སོ། །གཞན་ཡང་སྐལ་ལྡན་ལས་འཕྲོ་ཅན་བསགས་པ་ཡང་རབ་ཡིན་ན་མིའི་རྟེན་ཁོ་ན་དགོས་པའི་ངེས་པ་མེད་དེ། རྒྱུད་སྡེ་རྣམས་ལས་ལྷ་དང་ལྷ་མིན་སོགས་རྒྱུད་མཉན་པའི་སྣོད་དུ་བསྡུས་པ་དང་། གསང་བདག་གིས་སྔགས་ཀྱི་ཐེག་པ་གསུངས་པའི་གདུལ་བྱའི་གཙོ་བོ་དྲྭ་མ་ལྔ་ལས་བཞི་མི་མ་ཡིན་པའི་རྟེན་ཅན་ཡིན་པ་དང་། ཨོ་རྒྱན་གྱི་གནས་སུ་ཀླུ་རྣམས་སྔགས་ལམ་གྱིས་གྲོལ་བ་དང་། དགྲ་བཅོམ་ལྷག་མེད་རྣམས་སྔགས་ཀྱི་ཐེག་པར་འཇུག་པ་ཡོད་དགོས་པ་ལ་སོགས་པའི་ཕྱིར་སྐལ་བ་དང་ལྡན་པའི་འགྲོ་བ་ཀུན་ལ་སྔགས་ཀྱི་སྣོད་རྒྱུ་ཡོད་པར་བཤད་པའོ། །དྲུག་པ་ཉམས་པ་གསོ་བའི་ཚུལ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། ཐ་མར་ཉམས་ན་གསོ་བའི་ཚུལ་བཤད་པ། །ཞེས་པས། དེ་ལྟ་བུའི་དམ་ཚིག་རྣམས་མ་ཉམས་པར་བསྲུང་བ་ལ་འབད་ཅིང་། གལ་ཏེ་ལྟུང་བ་འབྱུང་བའི་རྒྱུའི་དབང་གིས་ཐ་མར་ཉམས་པར་གྱུར་ན་སླར་གསོ་བའི་ཚུལ་བཤད་པ་ལ་ཞེས་སོ། །གཉིས་པ་རྒྱས་པར་བཤད་པ་ལ་གཉིས། ཕྱིར་བཅོས་བྱ་ཚུལ་དང་། མ་བྱས་པའི་ཉེས་པའོ། །དང་པོ་ཕྱིར་བཅོས་བྱ་ཚུལ་ལ་ལྔ། ལྟུང་བའི་རྒྱུ་གཉེར་པོ་བཅས་བཤད་པ། ལྟུང་བ་ལྕི་ཡང་གི་ལྡང་ཚད། ལྟུང་མེད་ཀྱི་རྒྱུ། བཤགས་ཚད་ལས་འདས་པ། ཕྱིར་བཅོས་བྱ་ཚུལ་དངོས་སོ། །དང་པོ་ལྟུང་བའི་རྒྱུ་གཉེར་པོ་བཅས་བཤད་པ་ནི། ལྟུང་མཚམས་མི་ཤེས་བླ་མ་སོགས་མི་གུས། །བག་མེད་སྤྱོད་ཅིང་ཉོན་མོངས་མང་བ་བཞི། །ལྟུང་བ་འབྱུང་བའི་སྒོ་བཞི་ཐོགས་མེད་བཞེད། །དེ་ཡི་གཉེན་པོར་བསླབ་བྱར་བསླབ་པ་དང་། །ཀུན་ལ་གུས་བསྐྱེད་རྟག་པར་དྲན་ཤེས་བསྟེན། །ཉོན་མོངས་གང་ཆེའི་གཉེན་པོར་འབད་དེ་བསླབ། །སྤང་བྱ་བཞིའི་སྟེང་བརྗེད་ངས་དྲན་མི་གསལ། །གཉིས་བསྣན་དམ་ཚིག་ཉམས་པའི་རྒྱུ་དྲུག་ཅེས། །དཔལ་ལྡན་སྡོམ་པའི་རྒྱུད་ལས་གསལ་བར་གསུངས། །ཞེས་པ་སྟེ། དམ་ཚིག་ལ་བསླབ་པར་འདོད་ཀྱང་ལྟུང་བ་སོ་སོའི་བླང་དོར་གྱི་མཚམས་མི་ཤེས་པ་དང་། ཤེས་ཀྱང་བླ་མ་དང་། དེས་འདོམས་པའི་བསླབ་བྱ་ལ་སོགས་པ་ལ་མི་གུས་པ་དང་། སྤྱིར་གུས་ཀྱང་ཉེས་དམིགས་མ་མཐོང་བའམ་དྲན་ཤེས་མེད་པས་གཟོབ་པར་མི་བྱེད་པས་བག་མེད་པར་སྤྱོད་ཅིང་། དེས་ཉེས་པ་འབྱུང་བའི་རྒྱུ་བྱེད་པ་དང་། འཛེམ་བག་ཅུང་ཟད་སྐྱེས་ཀྱང་ཉོན་མོངས་ཤས་ཆེ་ཞིང་མང་བ་སྟེ་བཞི་ནི་ལྟུང་བ་འབྱུང་བའི་སྒོ་བཞིར་རྒྱལ་སྲས་ཐོགས་མེད་ཀྱི་བཞེད་ལ། བཞི་བོ་དེ་ཡི་གཉེན་པོར་བླང་དོར་རྣམས་ཤེས་པར་བྱས་ནས་བསླབ་བྱར་བསླབ་པ་དང་། ཕན་ཡོན་ལ་བྲོད་པ་བསྐྱེད་ནས་བླ་མ་དང་བསླབ་པ་ཀུན་ལ་གུས་པ་བསྐྱེད་པ་དང་། དགྲ་ཆེ་སར་ཟོན་བྱེད་པ་ལྟར་ཉེས་དམིགས་ལ་འཇིགས་ནས་སེམས་བསྒྲིམས་ཏེ་རྟག་པར་དྲན་ཤེས་དང་བག་ཡོད་བརྟེན་པ་དང་། རང་རྒྱུད་ལ་ཉོན་མོངས་གང་ཤས་ཆེ་བ་དེའི་གཉེན་པོར་འབད་དེ་བསླབ་པ་དང་བཞིའོ། །སྤང་བྱ་རྒྱུ་བཞི་པོ་དེའི་སྟེང་བསླབ་བྱའི་མཚམས་བརྗེད་ངས་པ་དང་། ཤེས་བཞིན་མེད་པས་དྲན་པ་མི་གསལ་བ་གཉིས་བསྣན་ཏེ་དམ་ཚིག་ཉམས་པའི་རྒྱུ་དྲུག་ཅེས་དཔལ་ལྡན་སྡོམ་པའི་རྒྱུད་ལས་གསལ་བར་གསུངས་ཏེ། ཇི་སྐད་དུ། མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་དང་། །བརྗེད་ངས་དྲན་པ་མི་གསལ་བ། །འདི་དྲུག་དམ་ཚིག་ཉམས་པའི་རྒྱུ། །ཞེས་སོ། །ཕྱི་མ་གཉིས་ཀྱི་གཉེན་པོ་གནང་བཀག་གི་མཚམས་མི་བརྗེད་པའི་དྲན་པ་དང་། དམ་ཚིག་ལས་འདས་མ་འདས་དཔྱོད་པའི་ཤེས་བཞིན་ནོ། །གཞན་ཡང་ཉམས་ན་བདག་ཉིད་ངན་ནོ་སྙམ་དུ་རང་ལ་བརྟེན་ནས་འཛེམ་པའི་ངོ་ཚ་ཤེས་པ་དང་། གཞན་གྱིས་ཁྲེལ་ནས་སྨད་པའི་གནས་སུ་འགྱུར་བ་དང་། རྒྱལ་བ་སྲས་བཅས་རྣམས་དང་དྲིན་ལྡན་བླ་མ་རྣམས་ཀྱི་ཟག་པ་མེད་པའི་མངོན་ཤེས་ཀྱིས་དགོངས་པར་འགྱུར་བ་ནི་གདོན་མི་ཟ་བས་ན་ཉེས་སྤྱོད་ལ་འཛེམ་པར་བྱ་དགོས་སྙམ་དུ་གཞན་ལ་བརྟེན་པའི་ཁྲེལ་ཡོད་སོགས་ཀྱི་སྒོ་ནས་འབད་པས་བསྲུང་བར་བྱ་སྟེ། སྡོམ་འབྱུང་ལས། ཇི་སྟེེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབ་ཀྱང་སླའི། །རྟག་ཏུ་དམ་ཚིག་བསྲུང་བར་བྱ། །ཞེས་གསུངས་པའི་ཕྱིར་རོ། །གཉིས་པ་ལྟུང་བ་ལྕི་ཡང་གི་ལྡང་ཚད་ནི། ཀུན་ལ་ཡུལ་བསམ་སྦྱོར་བ་མཐར་ཐུག་གམ། །ཀུན་སློང་ཉོན་མོངས་གང་འགལ་དེར་ཤེས་དང་། །ལུས་ངག་སྦྱོར་བྱས་དངོས་གཞི་བར་ཆོད་པ། །མ་འཁྲུལ་སྤྱད་དང་འགྱོད་མེད་བཤགས་ཚད་འདས། །ཕམ་པ་ཞེས་བརྗོད་དངོས་གཞི་མ་ཚང་ན། །ཐུན་འདས་ལྟུང་བ་ཞེས་བརྗོད་ལྷག་མ་ལྟར། །རིམ་པས་དམན་ན་སྦོམ་པོ་ལྟུང་བྱེད་དང་། །ཉེས་བྱས་ལྟུང་བའི་གཟུགས་བརྙན་ཤེས་པར་བྱ། །ཞེས་པ་སྟེ། དེ་ནས་ལྟུང་བ་དང་ལྟུང་མེད་ཀྱི་ཚུལ་ཤེས་པར་བྱ་བ་ལ། ལྟུང་བ་ཀུན་ལ་ཡན་ལག་བཞི་ལྡན་ནམ་བདུད་ལྡན་ཏེ། དེ་ཡང་གང་ལ་བརྟེན་ནས་ལྟུང་བ་འབྱུང་བའི་ཡུལ་དང་། དེར་འདུ་ཤེས་པའི་བསམ་པ་དང་། ལས་ལམ་ལ་འཇུག་པའི་སྦྱོར་བ་དང་། སྒོ་གསུམ་གང་གིས་གྲུབ་པའི་ལས་ལམ་རྫོགས་ནས་མཐར་ཐུག་པ་སྟེ་ཡན་ལག་བཞི་ལྡན་དག་གམ། ཡང་ན་ཀུན་སློང་ཉོན་མོངས་དྲག་པོས་བསླང་བ་དང་། གང་ལ་བརྟེན་ནས་དམ་ཚིག་དང་འགལ་བར་འགྱུར་བའི་ཡུལ་དེ་ལ་དེར་ཤེས་པ་དང་། ཀུནྡ་འདོར་བ་ལྟ་བུ་ལུས་དང་། གསང་སྒྲོག་ལྟ་བུ་ངག་གི་སྦྱོར་བས་གྲོགས་ལ་ལྟོས་བའི་བྱ་བ་དེ་བྱས་ཟིན་ན་རྩ་ལྟུང་དངོས་གཞིར་གྲུབ་པ་དང་། ཡིད་ཀྱིས་གྲུབ་པ་རྣམས་ཉིན་མཚན་གྱི་དྲུག་ཆའི་ནང་དུ་གཉེན་པོས་མ་སླེབས་པར་ཐུན་ཚོད་ཀྱིས་བར་ཆོད་པ་དང་། ཡང་སྒོ་གསུམ་གྱིས་བསྐྱེད་པའི་ལྟུང་བ་གང་ཡིན་ཡང་། ལྟུང་བ་གཅིག་ཙམ་ལ་ཡན་ལག་བདུན་ཀ་ཚང་དགོས་པའི་དབང་དུ་བྱས་ན། བར་ཆོད་པ་ཞེས་པ་འདི་དེ་ལྟར་འགྲེལ་ན་ཐུན་ཚོད་འདས་ཞེས་པ་དང་གཅིག་ཏུ་འགྱུར་བས་སྲོག་གཅོད་ལྟ་བུས་མཚོན་ཏེ་གོང་དུ་བཤད་པའི་བསམ་སྦྱོར་དེ་དང་ལྡན་པས་དངོས་གཞིར་གྲུབ་པ་ནི། བར་དུ་སྲོག་གཅོད་པ་ན་བྱ་བ་དེ་རྫོགས་ནས་སྲོག་གཅོད་པ་ན་ཞེས་པའམ། ཡང་ན་དངོས་གཞིའི་ལྟུང་བ་བསྐྱེད་པ་ལ་མཐར་མ་ཕྱིན་གོང་། བར་དུ་གཉེན་པོས་ཆོད་པ་མིན་པ་ཞེས་འགྲེལ་ནའང་རུང་ངམ་སྙམ་དུ་སེམས་སོ། །སྨྱོས་པ་ལ་སོགས་པ་འདུ་ཤེས་མ་འཁྲུལ་བས་སྤྱད་པ་དང་། དེས་མགུ་བས་འགྱོད་པ་མེད་པ་དང་། བཤགས་པས་མ་ཟིན་པར་ཐུན་ཚོད་ལས་འདས་པ་སྟེ། དེ་ལྟར་ཡན་ལག་བདུན་ཚང་བར་སྤྱོོད་ན་སྔགས་སྡོམ་གཏོང་བས་ཤིན་ཏུ་ལྕི་ཞིང་མི་མཐུན་ཕྱོགས་ཀྱིས་གཉེན་པོ་བཅོམ་པས་ཕས་ཕམ་པ་ཞེས་བརྗོད་ཅིང་། གལ་ཏེ་རྩ་ལྟུང་གང་རུང་གཉེན་པོ་དང་སྤེལ་ནས་སྐྱེས་པ་ལྟ་བུ་དངོས་གཞི་འགྲུབ་བྱེད་ཀྱི་ཡན་ལག་གང་རུང་མ་ཚང་ནས་མ་བཤགས་པར་ཐུན་ཚོད་འདས་ན་ཐུན་འདས་ཀྱི་ལྟུང་བ་ཞེས་བརྗོད་དེ། སོ་ཐར་གྱི་དགེ་འདུན་ལྷག་མ་ལྟར་ཕམ་པའི་འོག་ནས་ཉེས་པ་ལྕི་བ་ཡིན་ལ། དེ་བཞིན་དུ་རིམ་པས་ཉེས་པ་དམན་ན་འདི་ལྟར་ཕམ་པའི་སྡེར་གཏོགས་པ་ཡན་ལག་མ་ཚང་བ་ཉོན་མོངས་པ་ཅན་ནི་སྦོམ་པོ་དང་། ཡན་ལག་གི་ལྟུང་བ་གཞན་ཐམས་ཅད་ནི་ལྟུང་བྱེད་ལྟ་བུ་དང་། ཕྱོགས་མཐུན་གྱི་ཉེས་པ་ཕྲ་མོ་རྣམས་ནི་ཉེས་བྱས་དང་འདྲའོ། །གལ་ཏེ་རྡོ་རྗེའི་མཆེད་ལ་ཕན་སེམས་ཀྱིས་ཁྲོས་པ་ལྟ་བུ་ནི་ལྟུང་བའི་གཟུགས་བརྙན་ཏེ་དོན་ལ་ལྟུང་མེད་དུ་ཤེས་པར་བྱའོ། །གསུམ་པ་ལྟུང་མེད་ཀྱི་རྒྱུ་བཤད་པ་ནི། ན་དང་དབ ང་ཉམས་བྱ་བ་གཞན་གྱིས་དང་། །དོན་ཆེན་སྐྱེ་མེད་བརྟན་དང་དགོས་ལྡན་དང་། །ནུས་རྙེད་གནང་དང་བཀའ་བསྒོ་བར་ཆད་ལས། །ཉེས་པ་མེད་ཅེས་སྙིང་པོ་རྒྱན་ལས་གསུངས། །ཞེས་པ་སྟེ། དེ་དག་ཐམས་ཅད་ལ་རང་ཉིད་ན་བ་དང་། གཞན་དབང་དུ་སོང་བས་རང་དབང་ཉམས་པ་དང་། བྱ་བ་དེ་ལས་ཆེ་བའི་བྱ་བ་གཞན་གྱིས་བྲེལ་བ་དང་། གཞན་དོན་དུ་འགྱུར་ངེས་པའི་དོན་ཆེན་པོ་མཐོང་བ་དང་། རང་རྒྱུད་ལ་སྐྱེ་བ་མེད་པའི་དོན་སྐྱེས་ནས་བརྟན་པ་ཐོབ་པ་དང་། གཞན་དྲང་བ་ལ་སོགས་པའི་དགོས་པ་ཆེན་པོ་དང་ལྡན་པ་དང་། རྟོགས་གོམས་ཀྱི་ནུས་པ་རྙེད་པ་དང་། ལྷག་པའི་ལྷ་ལྟ་བུའི་ཡུལ་ཁྱད་པར་ཅན་གྱིས་གནང་བ་ཐོབ་པ་དང་། རང་གི་བླ་མས་འདི་ལྟ་བུ་ཞིག་གྱིས་ཤིག་ཅེས་བཀའ་བསྒོ་བ་དང་། དོན་དེས་རང་གི་སྲོག་ལ་བར་ཆད་དུ་འགྱུར་བ་ལས་ལྟུང་བ་དེ་དག་བྱས་ཀྱང་ཉེས་པ་མེད་ཅེས་སྙིང་པོ་རྒྱན་ལས་གསུངས་ཏེ། དེ་ལས། ན་དང་དབང་ཉམས་བྱ་བ་ནི། །གཞན་གྱི་དོན་དང་དོན་ཆེན་དང་། །སྐྱེ་མེད་བརྟན་དང་དགོས་ལྡན་དང་། །ནུས་པ་རྙེད་དང་གནང་བ་དང་། །བཀའ་བསྒོ་བ་དང་བར་ཆད་ལས། །ཉེས་པ་མེད་པར་ཤེས་པར་བྱ། །ཞེས་སོ། །བཞི་པ་བཤགས་ཚད་ལས་འདས་པ་བསྟན་པ་ནི། དེ་ལྟར་ཉིན་མཚན་ཐུན་ལ་ལན་དྲུག་ཏུ། །སྤང་བླང་དམ་ཚིག་གནས་ལ་བསྒྲིམས་ཏེ་དཔྱད། །དྲུག་ཆ་འདས་ན་ཐུན་ཚོད་འདས་ཞེས་བྱ། །ཞག་གཅིག་ཟླ་གཅིག་ལོ་གཅིག་ལོ་གཉིས་འདས། །འགལ་ཉམས་འདས་རལ་ཞེས་བརྗོད་དེ་དག་ཀྱང་། །སྙིང་ནས་བཤགས་ན་གསོར་རུང་ཕྱི་རིམ་ལྕི། །ལོ་གསུམ་འདས་ན་གསོར་མི་རུང་བ་ཡིན། །ཞེས་པ་སྟེ། དེ་ལྟར་ཉིན་མཚན་གྱི་ཐུན་ལ་ཉིན་ལན་གསུམ། མཚན་ལན་གསུམ་སྟེ་དྲུག་ཏུ་ཐུན་རེ་རེ་བཞིན་སྤང་བླང་དམ་ཚིག་གི་གནས་ལ་འགལ་མ་འགལ་སེམས་ལེགས་པར་བསྒྲིམས་ཏེ་བརྟགས་ཤིང་དཔྱད་པས་དུས་དྲུག་ཆའི་ནང་དུ་གཉེར་པོས་མ་སླེབས་པར་འདས་ན་ཐུན་ཚོད་ལས་འདས་པ་ཞེས་བྱ་བ་དང་། དེ་བཞིན་དུ་ལྟུང་བ་བྱུང་ནས་མ་བཤགས་པར་ཞག་གཅིག་དང་། ཟླ་བ་གཅིག་དང་། ལོ་གཅིག་དང་། ལོ་གཉིས་རྣམས་འདས་ན་འགལ་བ་དང་། ཉམས་པ་དང་། འདས་པ་དང་། རལ་བ་ཞེས་བརྗོད་དེ། དེ་དག་ཀྱང་སྙིང་ཐག་པ་ནས་བཤགས་ན་གསོར་རུང་ཡང་ཕྱི་རིམ་རྣམས་ཉེས་པ་ལྕིའོ། །གལ་ཏེ་ལོ་གསུམ་འདས་པར་གྱུར་ན་གསོར་མི་རུང་བ་ཡིན་ཏེ། དམ་ཚིག་བཀོད་པའི་རྒྱུད་ལས། ལོག་གསུམ་དག་ལས་འདས་པ་ན། །དེ་ནས་གསོ་རུ་མི་རུང་སྟེ། །གལ་ཏེ་བླངས་ནི་གཉིས་ཀ་འཚིག །ངེས་པར་ས་སྤྱོད་སྡུག་བསྔལ་ལ། །རྒྱུན་དུ་སྤྱོད་པ་ཁོ་ནའོ། །ཞེས་སོ། །དེ་ཡང་ངོ་བོ་ལ་ལྟོས་པ་རྩ་བ་དང་ཡན་ལག་ཉམས་པ་དང་། དུས་ལ་ལྟོས་པ་ཐུན་འདས་ཞེས་འགལ་ཉམས་སོགས་ཀྱིས་བཤགས་བྱའི་ལྕི་ཡང་ཤེས་པར་བྱའོ། །གཞན་ཡང་སྤྱི་མདོ་ལས། ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་པས། ཀུན་ཏུ་ཉམས་པའི་ཡུལ་ཆེས་གཉན་པ་ལ་ཀུན་དཀྲིས་དྲག་པོས་སྤྱད་པའམ། ལན་གྲངས་མང་དུ་བྱུང་བ་དང་། དུས་འདས་རལ་བ་ལ་སོགས་པ་ཡུན་རིང་པོར་ལོན་པ་ཡིན་ལ། ཟླས་ཉམས་ནི་ཉམས་པ་དང་འགྲོགས་པའི་ཉེས་པ་དང་། ཞར་ཉམས་ནི་གཞན་གྱི་ངོ་དགར་ཐལ་བ་ལ་སོགས་པའོ། །ལྔ་པ་ཕྱིར་བཅོས་དངོས་ལ་བཞི། དབང་བཞི་ལ་ལྟོས་པའི་གསོ་ཐབས། དུས་འདས་ལ་ལྟོས་པའི་གསོ་ཐབས། སྙིང་པོ་རྒྱན་ལས་བཤད་པའི་ཕྱིར་བཅོས་ཉེར་ལྔ། ཡོ་ག་གསུམ་གྱི་རྣལ་འབྱོར་སྤྱི་ཁྲུས་ཀྱིས་གསོ་བའོ། །དང་པོ་དབང་བཞི་ལ་ལྟོས་པའི་གསོ་ཐབས་ནི། །དབང་བདུན་ཐོབ་ལ་ལྷ་གྲངས་རེ་རེ་ལ། །བཟླས་པ་སུམ་ཁྲི་དྲུག་སྟོང་བྱས་པས་སྦྱངས། །བུམ་གསང་ཐོབ་ཉམས་སྔོན་དུ་ཆད་ལས་སྦྱང་། །དེ་རྗེས་དཀྱིལ་འཁོར་ཞུགས་ལ་དབང་བཞི་ལེན། །ཤེར་དབང་ཚིག་དབང་ཐོབ་ཉམས་བསྐྱེད་རིམ་དང་། །འཕོ་མེད་ཚུལ་ཁྲིམས་རྫོགས་པའི་རིམ་པ་དང་། །རང་རྒྱུད་བྱིན་རླབས་མ་གཏོགས་གཞན་མི་འདག །ཅེས་པ་སྟེ། དེ་ཡང་དབང་ཐོབ་མཚམས་ཐ་དད་པའི་དབང་གིས་ལྟུང་བ་སྦྱོར་བའི་ཐབས་ཀྱང་ཐ་དད་པ་དུས་འཁོར་ལས་གསུངས་པ་ལྟར་ན། འདི་ལྟར་བུམ་དབང་བདུན་ཙམ་ཐོབ་པའི་ཉེས་ལྟུང་གི་གཉེན་པོ་ལ། དཀྱིལ་འཁོར་གྱི་ལྷ་གྲངས་རེ་རེ་ལའམ་གཙོ་བོའི་བཟླས་པ་སུམ་ཁྲི་དྲུག་སྟོང་བྱས་པས་སྦྱང་བ་དང་། བུམ་གསང་ཐོབ་པས་ནི་ཉམས་པའི་ཉེས་པ་བྱུང་ན་བཤད་མ་ཐག་པའི་སྦྱང་ཐབས་དེའི་སྟེང་བཤགས་པའི་སྔོན་དུ་སློབ་དཔོན་གྱིས་འདི་གྱིས་ཞེས་གསུངས་པའི་ཆད་ལས་ཀྱི་བརྟུལ་ཞུགས་སྤྱད་པས་སྦྱང་བ། དབང་བཞི་རྫོགས་པར་ཐོབ་པ་ཞིག་ཡིན་ན་ཉམས་པའི་ཉེས་པ་བཤགས་ཤིང་དག་པའི་མཚན་མ་མཐོང་ན་དེའི་རྗེས་སུ་དཀྱིལ་འཁོར་དུ་ཞུགས་ལ་བླ་མ་ལས་སམ་བདག་འཇུག་གིས་དབང་བཞི་ལེན་པ་དང་། ཁྱད་པར་དུ་ཤེར་དབང་དང་ཚིག་དབང་ཐོབ་པ་ལས་ཉམས་ན་དབེན་པའི་གནས་སུ་བསྐྱེད་རྫོགས་ཀྱི་རིམ་པ་གཉིས་ཟུང་འཇུག་ཏུ་བསྒོམ་པ་དང་། འཕོ་མེད་ཀྱི་ཚུལ་ཁྲིམས་ཐུན་མོང་མ་ཡིན་པའི་རྫོགས་པའི་རིམ་པ་མཚན་བཅས་དང་། མཚན་མེད་སོགས་རང་རྒྱུད་བྱིན་གྱིས་བརླབས་པའི་ལམ་མ་གཏོགས་བཟླས་པ་ཙམ་ལ་སོགས་པ་གཞན་གྱི་མི་འདག་གོ། །དེ་ཐམས་ཅད་ཀྱང་དག་པའི་མཚན་མ་མཐོང་བ་ན་སླར་དཀྱིལ་འཁོར་དུ་ཞུགས་ཏེ་སྡོམ་པ་བཟུང་ཞིང་དབང་བླང་བར་བྱ་བ་ཡིན་ལ། དེའི་ཚེ་སྔར་གྱི་དབང་ཐོབ་པའི་བསླབ་གྲལ་དང་རྙེད་བཀུར་ལེན་པ་སོགས་མི་བྱ་བར་གསུངས་སོ། །གཉིས་པ་དུས་འདས་ལ་ལྟོས་པའི་གསོ་ཐབས་ནི། འགལ་ན་ཚོགས་འཁོར་ཉམས་ན་བདོག་པས་བསྐང་། །འདས་ན་བུ་དང་ཆུང་མ་ནོར་སོགས་དང་། །རལ་ན་རང་གི་སྲོག་གིས་གསོ་བར་བཤད། །ཅེས་པ་སྟེ། འགལ་བའི་ཉེས་པ་འབྱུང་ན་ཚོགས་ཀྱི་འཁོར་ལོ་ཕུལ་ཞིང་དཔའ་བོ་དང་དཔའ་མོའི་དགའ་སྟོན་བྱས་ཏེ་བཤགས་པ་དང་། ཉམས་པའི་ཉེས་པ་བྱུང་ན་རང་གི་བདོག་པའི་དངོས་པོ་གང་བཟང་བླ་མ་ལ་སོགས་པའི་ཕྱོགས་སུ་ཕུལ་ནས་བཤགས་པ་བྱས་པས་བསྐང་བ་དང་། འདས་པའི་ཉེས་པ་བྱུང་ན་བུ་དང་ཆུང་མ་དང་ནོར་གྱི་ནང་ནས་གསེར་ལ་སོགས་པའི་རིན་པོ་ཆེ་དུ་མས་དཀྱིལ་འཁོར་གྱི་ལྷ་དང་བླ་མ་ལ་མཆོད་དེ་བཤགས་པ་དང་། རལ་བའི་ཉེས་པ་བྱུང་ན་རང་གི་སྲོགས་ལའང་མི་ལྟ་བར་བླ་མ་དང་བསྟན་པའི་དོན་དུ་རང་སྲོག་བློས་བཏང་གི་བརྩོན་པ་དྲག་པོས་བཤགས་ཤིང་གསོ་དགོས་པར་དམ་ཚིག་རྣམ་པར་བཀོད་པའི་རྒྱུད་ལས་བཤད་དོ། །ཚོགས་འཁོར་བདོག་པ་སོགས་ནི་གང་ལས་ལྟུང་བ་བྱུང་བའི་ཡུལ་དངོས་བཞུགས་ན་དེ་ལ་ཕུལ་ནས་བཤགས་དགོས་སོ། །གསུམ་པ་སྙིང་པོ་རྒྱན་ལས་བཤགས་པའི་ཕྱིར་བཅོས་ནི། སྙིང་པོ་རྒྱན་ལས་གསོ་བའི་ཆོ་ག་ནི། །ཚོགས་ཞིང་ལ་བཤགས་དྲལ་བའི་སྔགས་རྒྱ་དང་། །བཀྲུ་བའི་རིམ་པ་གཏུམ་མོའི་མེས་སྲེག་དང་། །མི་དམིགས་བསྒོམ་དང་དབང་བཞི་བླང་བ་དང་། །ཚོགས་སུ་ཞུ་དང་རྟེན་ལ་སྨྲ་བ་དང་། །མཎྜལ་ཕུལ་དང་མཆོད་རྟེན་བྱ་བ་དང་། །མེ་ལ་སྦྱོང་དང་གཏོར་མ་གཏོང་བ་དང་། །གསང་སྔགས་བཟླ་དང་ཟབ་མོའི་བསམ་གཏན་དང་། །སྲོག་སྐྱོབ་བཀའ་ཀློག་བླ་མ་བསྟེན་པ་དང་། །བདག་འཇུག་རྒྱལ་བའི་ཡིག་བརྒྱ་དུས་བཟང་བཟླ། །ཕུང་པོ་གསུམ་པ་རྡོར་སེམས་བླ་མ་དང་། །ཐིག་ལེ་ཕྲ་མོའི་རྣལ་འབྱོར་བསྒོམས་པས་གསོ། །ཞེས་པ་སྟེ། དེ་ནས་སྙིང་པོ་རྒྱན་ལས་ཉམས་པ་སླར་གསོ་བའི་ཐབས་སུ་གསུངས་པའི་ཆོ་ག་བཤད་པ་ནི། ཚོགས་ཞིང་སྤྱན་དྲངས་ལ་དེའི་དྲུང་དུ་སྟོབས་བཞི་ཚང་བས་བཤགས་སྡོམ་བྱ་བ་དང་། ཡོ་ག་ནས་བཤགས་པ་དྲལ་བའི་སྔགས་རྒྱ་གཉིས་ཏེ་ལྟུང་བ་ལྷོང་བའི་ཕྱག་རྒྱ་དང་། དེའི་སྔགས་ཀྱི་རིམ་པ་ལ་བརྟེན་ནས་ངན་འགྲོ་དགུག་བྲལ་དང་། དེ་བཞིན་དུ་རྡོ་རྗེ་ཡང་ཏོག་གི་རྒྱུད་ལས། ཡིག་འབྲུ་སྔགས་ཀྱིས་སྦྱང་བ་ནི། །རྐང་མཐིལ་ཉིས་སུ་ཡྃ་གཉིས་བསམ། །གསང་བའི་སྒོ་རུ་རྃ་བསམ་མོ། །ལྟེ་བར་རིགས་དྲུག་ཡིག་འབྲུ་བསམ། །སྙིང་གར་ཕཊ་ཀྱི་གདན་དག་ལ། །སྐུ་གསུང་ཐུགས་ཀྱི་སྙིང་པོ་བསམ། །ཡྃ་ལས་ཡེ་ཤེས་རླུང་བྱུང་སྟེ། །རྃ་ལས་ཡེ་ཤེས་མེ་འབར་ནས། །རིགས་དྲུག་བག་ཆགས་ཐམས་ཅད་བསྲེགས། །སྒོ་གསུམ་སྐུ་གསུང་ཐུགས་སུ་གྱུར། །ཕཊ་ཀྱིས་ཆོས་ཉིད་དབྱིངས་སུ་འཕང་། །ཞེས་པའང་མན་ངག་ཤིན་ཏུ་ཟབ་བོ། །བྃ་ལས་ཆུ་མཱ་མ་ཀཱིའི་བདག་ཉིད་དུ་མོས་ལ་སྦྱོང་བའི་བརྟུལ་ཞུགས་ཀྱིས་ལུས་བཀྲུ་བ་དང་། སོ་སྐྱེས་ནས་སློབ་ལམ་གྱི་ཉེས་བྱས་ཐམས་ཅད་གྲིབ་ཏུ་མི་གྱུར་བ་མེད་པས་རྣམ་འཇོམས་སོགས་གཟུངས་སྔགས་ཀྱིས་སྒྲུབ་པའི་བུམ་ཆུས་དངོས་སུ་བཀྲུ་བ་དང་། མཁའ་དབྱིངས་སུ་ཤར་བའི་དབང་ལྷ་ལས་རིག་པའི་དབང་ལྔ་བླངས་ནས་བཀྲུ་བའི་རིམ་པ་དང་། ལྟེ་བར་ཀཾ་ཡིག་དང་སྙིང་གར་ཤ་ཟའི་གཟུགས་ཀྱི་རྣམ་པར་བསམ་པའི་སྡིག་སྒྲིབ་རྣམས་གཏུམ་མོའི་མེས་བསྲེག་པ་དང་། འཁོར་གསུམ་མི་དམིགས་པའི་ཤེས་རབ་བསྒོམ་པ་དང་། བླ་མ་ལས་སམ་བདག་འཇུག་གི་དབང་བཞི་བླང་བ་དང་། ཚོགས་འཁོར་རམ་དཔའ་བོ་དཔའ་མོ་སྟོན་མོས་མཆོད་ནས་དེ་རྣམས་སུ་ཞུ་ཞིང་བཤགས་པ་དང་། རྟེན་ཁྱད་པར་ཅན་རབ་གནས་ཅན་གྱི་དྲུང་དུ་འདུག་ལ་ཡན་ལག་བདུན་པ་སྔོན་དུ་འགྲོ་བས་སྨྲེ་སྔགས་ཀྱིས་བཤགས་པ་བྱ་བ་དང་། མཎྜལ་གྱིས་མཚོན་ལུས་སྲོག་ལོངས་སྤྱོད་དགེ་ཚོགས་ཐམས་ཅད་འབུལ་བ་དང་བཅས་བཤགས་པ་དང་། མཆོད་རྟེན་ཚད་ལྡན་བཞེངས་པར་བྱ་བའམ་སཱཙྪ་གདབ་པ་དང་། ཞི་བའི་བསྲེག་བླུགས་རྒྱས་པ་བྱ་བའམ་ཟ་བྱེད་རྡོ་རྗེ་མཁའ་འགྲོའི་སྦྱིན་སྲེག་ལྟ་བུ་མེ་ལ་སྦྱོང་བ་དང་། གཏོར་མ་སྦྱངས་རྟོག་སྦར་གསུམ་གྱི་བྱིན་གྱིས་བརླབས་པ་འཁོར་འདས་ཐམས་ཅད་འཁོར་ལོའི་དབང་ཕྱུག་གི་རྣམ་པར་སད་པ་ལ་གཏོང་ཞིང་འདོད་དོན་གསོལ་བ་དང་། རང་གི་ལྷག་པའི་ལྷའི་གསང་སྔགས་བཟླ་བ་དང་། ཟབ་མོའི་བསམ་གཏན་ཞི་ལྷག་གི་ཏིང་ངེ་འཛིན་བསྒོམས་པ་དང་། ཉེའུ་འདོན་ཆུ་མིག་ལྟེང་ཀ་ནས་སྲོག་ཆགས་སྐྱོབ་པ་དང་། སྦྲང་རྩི་བསླུ་བ། རྙི་ལས་དགྲོལ་བ། རྔོན་པ་ལ་བརྔན་སྟེར་བ། ནད་པ་ལ་ཕན་གདགས་པ། མཚོན་ཆའི་འོག་ནས་ཐར་བར་བྱ་བ་སྲོག་སོགས་སྐྱོབ་པ་དང་། སྡིག་སྒྲིབ་ཀྱི་གཉེན་པོར་བསྔགས་པའི་ཐར་པ་ཆེན་པོའི་མདོ་དང་། དྲི་མེད་བཤགས་པའི་རྒྱུད་སོགས་བཀའ་ཟབ་མོ་ཀློག་པ་དང་། བླ་མ་གཙུག་གི་ནོར་བུ་ལྟར་བསྟེན་པ་དང་། སྙིང་གར་དམ་ཚིག་རྡོ་རྗེ་དོན་གྲུབ་ཡབ་ཡུམ་བསྒོམ་པའི་ཐུགས་ཀའི་ས་བོན་ལས་བདུད་རྩིའི་རྒྱུན་བབས་པས་སྡིག་སྒྲིབ་སྦྱོང་བར་བསམ་ལ་ༀ་ཨཱཿཁཾ་ཧཱུྃ་ཞེས་པའི་བསྙེན་པ་སྔོན་དུ་འགྲོ་བས་ལུས་དཀྱིལ་ལམ་ཕྱི་དཀྱིལ་གང་རུང་དུ་བདག་འཇུག་བླང་བ་དང་། རྟེན་བྱིན་ཅན་ལ་བསྐོར་བ་བྱེད་པའམ་དྲུང་དུ་འདུག་ནས་དུས་གསུམ་རྒྱལ་བའི་ཐུགས་ཀྱི་ཡང་སྙིང་ཡིག་བརྒྱ་ལྔ་སྟོང་སོགས་བཟླ་བ་དང་། ཡར་ངོ་བརྒྱད་དང་བཅོ་ལྔ་སོགས་དུས་བཟང་པོར་སྡིག་སྦྱོང་ལ་བསྔགས་པའི་གཟུངས་སྔགས་མང་དུ་བཟླ་བ་དང་། ཉིན་མཚན་དུས་དྲུག་ཏུ་ཕུང་པོ་གསུམ་པའི་མདོ་འདོན་པ་དང་། སྤྱི་བོར་བླ་མ་རྡོར་སེམས་ཀྱི་རྣམ་པར་བསྒོམས་ལ་སྡིག་སྒྲིབ་བཀྲུ་བའི་དམིགས་པས་ཡི་གེ་བརྒྱ་པ་བཟླ་བ་དང་། རང་གཉུག་མའི་ལྷར་གསལ་བའི་སྤྱ་ིབོར་བླ་མ་རྡོ་རྗེ་འཆང་གི་རྣམ་པར་བསྒོམ་པའི་གནས་གསུམ་འབྲུ་གསུམ་གསལ་བ་ཡིད་བཟླས་བྱ་བ་དང་། རང་ལྷར་གསལ་ལ་རྩ་འཁོར་གསལ་བཏབ་སྟེ་འབར་འཛག་བསྒོམ་པ་ཐིག་ལེའི་རྣལ་འབྱོར་དང་། རྩ་འཁོར་ལྔའི་ལྟེ་བར་རིགས་ལྔའི་ཕྱག་མཚན་ཕྲ་མོ་གསལ་བ་ལ་སེམས་བཟུང་སྟེ་མགོན་པོ་ལྔའི་རླུང་གཅུན་པ་ཕྲ་མོའི་རྣལ་འབྱོར་བསྒོམ་པས་གསོ་བ་རྣམས་སོ། །བཞི་པ་ཡོ་ག་གསུམ་གྱི་རྣལ་འབྱོར་སྤྱི་ཁྲུས་ཀྱིས་གསོ་བ་ནི། གླང་ཆེན་རབ་འབོགས་རྒྱུད་ལས་གསུངས་པ་ཡི། །རྣལ་འབྱོར་སྤྱི་ཁྲུས་འགྱོད་ཚངས་དོང་སྤྲུག་གི། །བཤགས་པས་མི་འདག་མེད་ཕྱིར་ཉམས་སུ་བླངས། །ཞེས་པ་སྟེ། གཞན་ཡང་གླང་ཆེན་རབ་འབོག་གི་རྒྱུད་ལས་རྟོག་པ་གཅིག་ཁོལ་དུ་ཕྱུང་བ་ཀལྤ་དུམ་བུའི་རྒྱུད་དྲི་མེད་བཤགས་རྒྱུད་ལས་ཇི་སྐད་གསུངས་པ་ཡི་ཡོ་ག་རྣམ་པ་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་ཉམས་ཆག་སྐོང་ཞིང་རྟོག་སྒྲིབ་སྦྱོང་བའི་སྤྱི་ཁྲུས་རྨད་དུ་བྱུང་བ་འགྱོད་ཚངས་ཐམས་ཅད་ཀྱི་རྒྱལ་པོ་ན་རཀ་དོང་སྤྲུག་གི་མན་ངག་ལ་བརྟེན་ནས། ཕྱི་ཡོ་བྱད་ཚོགས་ཀྱི། ནང་ཕུང་པོ་རྟེན་གྱི། གསང་བ་བྱང་ཆུབ་སེམས་ཀྱི་བསྐང་བཤགས་གསུམ་ཉ་སྟོང་ཚེས་བརྒྱད་སོགས་ལ་བྱས་ན། དེ་ཚུན་ཆད་ཀྱི་ཉམས་ཆག་ཐམས་ཅད་འདག་པར་གསུངས་ཤིང་། དེ་ཙམ་མ་གྲུབ་ནའང་ཕྱག་གི་བཀོལ་བྱང་ཙམ་རྒྱུན་དུ་ཡི་དམ་དུ་བགྱིས་ནས་བཤགས་པས་ཀྱང་ཉམས་ཆག་ཐམས་ཅད་མི་འདག་པ་མེད་པར་གསུངས་པའི་ཕྱིར་ན་ཅི་ནས་འབད་པས་ཉམས་སུ་བླངས་པར་བྱ་སྟེ། ཇི་སྐད་དུ། གང་གིས་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་བཙལ་ན། །ཉམས་ཆག་ཀུན་ཀྱང་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱང་། །ན་རཀ་གནས་ཀྱང་དོར་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་དང་། གང་གིས་དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣལ་འབྱོར་ཕོ་མོ་རྣམས་ཀྱིས་ཐོས་པ་ཙམ་གྱིས་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་སྐོངས་ཏེ། ཞེས་སོ། །དེ་ལྟར་བཤགས་པ་ཡང་མདོར་ན་རྨི་ལམ་དུ་བླ་མ་དང་ལྷས་ལེགས་སོ་སྟེར་བ་དང་། ཁྲུས་བྱས་པ། གོས་དཀར་པོ་གྱོན་པ། རི་བོ་ཆེན་པོའི་རྩེར་འཛེགས་པ། ཉི་ཟླ་ཤར་བ་སོགས་སྡིག་ལྟུང་དག་པའི་རྟགས་མ་བྱུང་གི་བར་དེ་སྲིད་དུ་སྟོབས་བཞི་ཚང་བའི་བཤགས་པ་ལ་འབད་པར་བྱ་ཞིང་། དེ་ཡང་ཡན་ལག་ཚང་བའི་རྩ་ལྟུང་ནི་བཤགས་པས་དག་པའི་རྟགས་བྱུང་བ་དང་སླར་དཀྱིལ་འཁོར་དུ་ཞུགས་ནས་དབང་བླང་བར་བྱ་བ་ཁྱད་པར་རོ། །གཉིས་པ་ཕྱིར་བཅོས་མ་བྱས་པའི་ཉེས་དམིགས་ནི། མ་བཤགས་ཚེ་འདིར་ཡིད་མི་འོང་བས་མནར། །ཕྱི་མ་རྡོ་རྗེའི་དམྱལ་བ་ཞེས་བྱ་བ། །མནར་མེད་དོ་ཟླ་མེད་པའི་གནས་སུ་སྐྱེ། །ཞེས་པ་སྟེ། དེ་ལྟར་ཉེས་པ་བྱུང་བ་ཚུལ་བཞིན་དུ་མ་བཤགས་པའི་ཉེས་དམིགས་ནི་བསམ་གྱིས་མི་ཁྱབ་སྟེ། རྩ་བའི་དམ་ཚིག་ཉམས་ན་སྒྲུབ་པ་ཐམས་ཅད་ཕྱིན་ཅི་ལོག་ཏུ་འགྱུར་ཞིང་། སྐུའི་དམ་ཚིག་ཉམས་པས་ལུས་ལ་ནད་སྣ་ཚོགས་འབྱུང་བ་དང་། གསུང་གི་དམ་ཚིག་ཉམས་པས་ངག་དིག་ལྐུག་སོགས་སུ་འགྱུར་བ་དང་། ཐུགས་ཀྱི་དམ་ཚིག་ཉམས་པས་ཡིད་སྨྱོ་འབོགས་སུ་འགྱུར་བ་སྟེ། ཚེ་འདིར་ཡིད་དུ་མི་འོང་བའི་དངོས་པོ་སྣ་ཚོགས་ཁབ་ལེན་ལ་ལྕགས་བཞིན་དུ་འདུ་བས་མནར་བར་འགྱུར་ཏེ། གསང་སྙིང་ལས། རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་སོ། །ཡན་ལག་གི་དམ་ཚིག་ཉམས་པར་གྱུར་ན་དངོས་གྲུབ་རྣམ་པ་གཉིས་ཐོབ་པའི་གེགས་སུ་འགྱུར་ཞིང་། དེ་གཉིས་ཀས་ཕྱི་མ་རྡོ་རྗེའི་དམྱལ་བ་ཞེས་བྱ་བ་སྡུག་བསྔལ་གྱི་མནར་བ་ལ་དེ་བས་ཆེ་བ་མེད་པས་དོ་ཟླ་མེད་པའི་གནས་སུ་འཇིག་རྟེན་གྱི་ཁམས་བརྒྱུད་ཅིང་སྐྱེ་བར་འགྱུར་ཏེ། གསང་སྙིང་ལས། ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་དང་། གསལ་བཀྲ་ལས། རྩ་ཀུན་ཉམས་པའི་འཆལ་བ་དག །གསོ་ལ་ཉེ་བར་མི་བརྩོན་པ། །རྡོ་རྗེ་དམྱལ་བར་དེ་ལྟུང་སྟེ། །དམྱལ་བ་ཕལ་པ་ཐམས་ཅད་ཀྱི། །སྡུག་བསྔལ་གཅིག་ཏུ་བསྡོམས་པས་ནི། །དེ་ཡི་འབུམ་གྱི་ཆར་མི་ཕོད། །ཅེས་སོ། །དེ་ལྟ་བུའི་སྐྱེ་བོ་སྡིག་པོ་ཆེ་རྩ་ལྟུང་ཅན་དེས་ནི་རང་ཉིད་ཉམས་པར་མ་ཟད་གཞན་ལའང་ཟླས་ཉམས་ཀྱི་ཉེས་པ་སྟེར་བར་བྱེད་དེ། ཀུན་འདུས་ལས། ཇི་ལྟར་འོ་མ་རུལ་བ་དག །རུལ་བས་འོ་མ་ཀུན་རུལ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་བྱེད། །ཅེས་སོ། །དེར་མ་ཟད་རྨི་ལམ་དུ་ཉེས་པ་བྱས་པ་དང་། གཞན་ཅི་ཟེར་བརྟག་པའམ་གཞན་གྱི་ངོ་དགར་ཐལ་བའི་ཞོར་ཉམས་བྱུང་ཡང་དེ་མ་ཐག་མ་བཤགས་ན་ཉེས་པ་ཆེན་པོར་འགྱུར་ཏེ། བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །རྡོ་རྗེ་སྤུན་དང་སྲིང་མོ་ལ། །ངན་སྨྲས་ཚིག་གི་ཟུང་ཙམ་ཡང་། །བརྡའམ་དངོས་པོར་བརྗོད་མི་བྱ། །གལ་ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཞེ་ཡིས་བྱས་པ་དང་། །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །མཐུར་དུ་བལྟས་ཏེ་དམྱལ་བར་འགྲོ། །ཞེས་དང་། རྡོ་རྗེ་སྙིང་རྒྱན་ལས། དེ་ལས་སྔགས་པས་ཡོངས་འདས་ན། །ངེས་པར་བདུད་དང་འཕྲད་པར་འགྱུར། །ནད་དང་སྡུག་བསྔལ་འཕེལ་འགྱུར་ཏེ། །བསྟིར་མེད་སྤྱིའུ་ཚུགས་དམྱལ་བར་འགྲོ། །སྦོམ་པོའི་ལྟུང་བྱེད་ཉེས་དམིགས་ཀྱང་། །དེ་དང་འདྲ་བར་ཤེས་པར་བྱ། །ཞེས་རྩ་བ་དང་ཡན་ལག་གི་ལྟུང་བ་གཉིས་ཀས་དམྱལ་བར་སྐྱེ་བ་འདྲ་བ་ལྟ་བུར་གསུངས་ནའང་། སྡུག་བསྔལ་ཆེ་ཆུང་དང་མནར་ཡུན་རིང་ཐུང་གི་ཁྱད་པར་ཆེའོ། །བདུན་པ་དམ་ཚིག་མ་ཉམས་པར་ཚུལ་བཞིན་བསྲུང་བའི་ཕན་ཡོན་ནི། །མ་ཉམས་རིང་མཐའ་སྐྱེ་བ་བཅུ་དྲུག་གམ། །མྱུར་ན་ཚེ་འདིའམ་འཆི་ཁ་བར་དོ་རུ། །ཐུན་མོང་གྲུབ་པ་བརྒྱད་དང་དབང་ཕྱུག་བརྒྱད། །མཆོག་གི་དངོས་གྲུབ་ཁ་སྦྱོར་བདུན་ལྡན་ཐོབ། །དེ་ཕྱིར་རང་གཞན་དོན་གཉིས་ལྷུན་གྱིས་གྲུབ། །ཅེས་པ་སྟེ། སྤྱིར་དམ་ཚིག་ནི་ཡོན་ཏན་ཐམས་ཅད་སྐྱེ་བ་དང་གནས་པའི་གཞི་རྟེན་དུ་གྱུར་པ་སྟེ། སྤྱི་མདོ་ལས། ཇི་ལྟར་ས་གཞི་གཤིན་པ་ལ། །བརྟེན་ནས་ས་བོན་བཏབ་པ་ལས། །འབྲས་བུ་སྨིན་པར་གྱུར་པ་ཡིས། །གང་དག་འཚོ་བའི་སྲོག་འཛིན་ལྟར། །ཆོས་རྣམས་ཀུན་གྱི་གཞིར་གྱུར་པ། །དམ་ཚིག་འདི་ལ་གནས་པ་ན། །བླ་མེད་བྱང་ཆུབ་རྣམ་སྨིན་པས། །དགེ་བའི་སྲོག་འཛིན་དམ་པའོ། །ཞེས་སོ། །ཁྱད་པར་གནས་སྐབས་སུའང་བསམ་པའི་དོན་ཐམས་ཅད་ཇི་ལྟ་བ་བཞིན་དུ་འགྲུབ་པ་དང་། ཀུན་གྱི་ཡིད་དུ་འོང་བ་དང་། འཇིག་རྟེན་གྱི་ལྷ་ཆེན་པོ་རྣམས་ཀྱི་བཀུར་གནས་ཐོབ་པ་དང་། སངས་རྒྱས་དང་བྱང་ཆུབ་སེམས་དཔའ་དཔའ་བོ་རྣལ་འབྱོར་མ་རྣམས་ཀྱིས་སྲས་དང་སྤུན་དུ་དགོངས་པས་བྱིན་གྱིས་བརླབས་པ་དང་། དེ་བཞིན་གཤེགས་པ་ཉིད་ཀྱི་སྤྱོད་ཡུལ་ལ་ཞུགས་པས་རིག་པ་འཛིན་པའི་ས་ལ་རིམ་གྱིས་སྦྱོར་བར་བྱེད་པ་སྟེ། སྒྱུ་འཕྲུལ་རྩ་རྒྱུད་ལས། རྒྱལ་བའི་རིག་མཆོག་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡི། །སྲས་དང་སྤུན་དགོངས་བྱིན་གྱིས་བརླབ། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་དང་། དམ་ཚིག་གསུམ་བཀོད་ལས། གསང་སྔགས་རྡོ་རྗེའི་དམ་ལ་གནས། །དེ་ཡི་སྨོན་པ་ཀུན་འགྲུབ་ཅིང་། །ལྷ་རྣམས་ཀྱིས་ཀྱང་རྟག་ཏུ་བསྲུང་། །རྒྱལ་བ་རྒྱལ་མཆོག་སྲས་བཅས་ཀྱིས། །བུ་བཞིན་དགོངས་པ་དམ་པ་མཛད། །ཏིང་འཛིན་ཡོན་ཏན་དཔག་ཡས་ཤིང་། །ཀུན་བཟང་རིགས་ཀྱི་དམ་པ་འགྲུབ། །ཅེས་སོ། །གལ་ཏེ་ཚེ་འདིར་རིམ་གཉིས་ཀྱི་ལམ་ལ་བརྩོན་མ་ནུས་ཀྱང་དམ་ཚིག་མ་ཉམས་ན་ཇི་ལྟར་འགོར་ཡང་རིང་མཐའ་སྐྱེ་བ་བཅུ་དྲུག་གམ། སྐྱེ་བ་བདུན་ན་རིམ་གཉིས་ཀྱི་ལམ་དང་འཕྲད་ནས་གྲོལ་བར་འགྱུར་ལ། ཤིན་ཏུ་མྱུར་བའི་དབང་དུ་བྱས་ན་དམ་ཚིག་རྣམ་པར་དག་ཅིང་ལམ་རིམ་ལ་འབད་པས་དབང་པོ་རྣོན་པོ་ཚེ་འདིར་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པ་འགྱུར་བའམ། དབང་པོ་འབྲིང་རྣམས་ནི་ཚེ་འདིར་དཔེའི་འོད་གསལ་མངོན་དུ་གྱུར་པ་ཞིག་ཡིན་ན་འཆི་ཁ་དོན་གྱི་འོད་གསལ་དུ་གྱུར་ནས་སློབ་པའི་ཟུང་འཇུག་གི་སྐུར་ལྡང་ལ། གལ་ཏེ་དོན་གྱི་འོད་གསལ་མངོན་དུ་གྱུར་པ་ཞིག་ཡིན་ན། འཆི་སྲིད་གཞི་དུས་ཀྱི་འོད་གསལ་དང་འདྲེས་པས་ཡང་དག་པའི་མཐའ་མངོན་དུ་བྱས་ཏེ་མི་སློབ་པའི་ཟུང་འཇུག་གི་སྐུར་ལྡང་ཞིང་། འབྲིང་གི་ཐ་མས་ཀྱང་སྲིད་པ་བར་དོ་རུ་རང་གི་ཉམས་ལེན་དང་བླ་མ་ལ་མོས་གུས་དང་དག་པའི་ཞིང་ཡིད་ལ་བྱས་པས་རང་བཞིན་སྤྲུལ་སྐུའི་ཞིང་དུ་དབུགས་དབྱུང་སྟེ་གྲོལ་བར་འགྱུར་རོ། །དེ་དག་གི་ཚེ་ཐོབ་བྱའི་ཡོན་ཏན་མཐའ་ཡས་པ་ཡོད་ནའང་ཐུན་མཆོག་གི་དངོས་གྲུབ་གཉིས་སུ་འདུ་བ་ཡིན་པས། ཐུན་མོང་གི་དངོས་གྲུབ་ཆུང་ངུ་ནི་ལས་ཆེན་བརྒྱད་ཐོབ་སྟེ། དགྱེས་རྡོར་ལས་གསུངས་པ་སྡོམ་དུ་བྱས་ན། དབང་དང་མངོན་སྤྱོད་དགྲ་སྡེ་འཇིག །བསྐྲད་དང་བསད་དང་དགུག་དང་ཞི། །རྒྱས་པ་ཡང་དག་འགྲུབ་པར་འགྱུར། །ཞེས་པ་དང་། འབྲིང་ནི་གྲུབ་པ་བརྒྱད་དེ། མགུར་ལས། གང་ཕྱིར་དེས་ནི་དཀའ་བ་མིན། །མིག་སྨན་དང་ནི་རྐང་མགྱོགས་དང་། །རལ་གྲི་དང་ནི་ས་འོག་གྲུབ། །རིལ་བུ་གྲུབ་དང་མཁའ་སྤྱོད་ཉིད། །མི་སྣང་བ་དང་བཅུད་ཀྱིས་ལེན། །གང་ཕྱིར་དེས་ནི་རྡོ་རྗེ་འཛིན། །མཉེས་པར་བྱས་ལས་མྱུར་དུ་ཐོབ། །ཅེས་པ་དང་། ཆེན་པོ་ནི་དབང་ཕྱུག་གི་ཡོན་ཏན་བརྒྱད་དེ། ཇི་སྐད་དུ། གཟུགས་ཕྲ་རགས་པ་ཡངས་པ་དང་། །ཁྱབ་པ་ཡང་དག་ཐོབ་པ་ཉིད། །རབ་ཏུ་གསལ་བ་ཉིད་བརྟན་པ། །དབང་ཕྱུག་ཉིད་དང་འདོད་རྒུར་བསྒྱུར། །ཞེས་པ་སྟེ། འདི་དག་ནི་བསྐྱེད་རིམ་ཁོ་ནས་ཀྱང་འགྲུབ་ནུས་པ་ཡིན་ནོ། །ཐུན་མོང་ཞེས་པའི་དོན་ནི་ཡོན་ཏན་འདི་དག་ཕྱི་རོལ་པ་ལའང་ཡོད་པས་འཇིག་རྟེན་པ་དང་འདས་ལམ་གཉིས་ཀའི་ཐུན་མོང་བ་དང་བསྐྱེད་རྫོགས་གཉིས་ཀའི་ཐུན་མོང་གི་ཡོན་ཏན་ཡིན་པས་ཀྱང་དེ་སྐད་ཅེས་བྱའོ། །མཆོག་གི་དངོས་གྲུབ་ནི། སྐུ་བཞི་ཡེ་ཤེས་ལྔའི་བདག་ཉིད་མི་སློབ་པའི་ཟུང་འཇུག་མངོན་དུ་བརྙེས་པའོ། །དེ་ཡང་ལྡོག་ཆས་དབྱེ་ན་ཁ་སྦྱོར་ཡན་ལག་བདུན་ལྡན་ཐོབ་པར་གྱུར་བ་སྟེ། གསུང་རྣམ་པ་ཐམས་ཅད་པ་ཐེག་པ་ཆེན་པོའི་ཆོས་ལ་ལོངས་སྤྱོད་པས་ན་ལོངས་སྤྱོད་རྫོགས་པ་༡དང་། སྐུ་ཤེས་བྱའི་སྣང་བརྙན་ཡོད་རྒུར་འཆར་བ་ནི་ཁ་སྦྱོར་༢དང་། མི་འགྱུར་བའི་བདེ་བ་ཆེན་པོ་༣དང་། རང་བཞིན་གྱིས་མེད་པ་ནི་སྤྲོས་པ་ཐམས་ཅད་ལས་འདས་པའི་སྟོང་ཉིད་༤དང་། སྙིང་རྗེས་ཡོངས་གང་ནི་དམིགས་པ་མེད་པའི་ཐུགས་རྗེ་ཆེན་པོ་༥དང་། རྒྱུན་མི་ཆད་པའི་ཐུགས་རྗེ་དེ་ཉིད་ནམ་དུའང་རྒྱུན་ཆད་མེད་པར་འཇུག་པས་རྟག་པ་༦དང་། འགོག་པ་མེད་པ་ནི་སེམས་ཅན་སོ་སོའི་མོས་པ་ལྟར་སྐུ་དང་ཆོས་སྒོ་མཐའ་ཡས་པར་འཆར་བ་༧དང་། དེ་ཡང་དང་པོ་བཞིས་རང་དོན་དང་། ཕྱི་མ་གསུམ་གྱིས་གཞན་དོན་ཕུན་ཚོགས་བསྟན་པ་བཅས། དེའི་ཕྱིར་ན་རང་གཞན་གྱི་དོན་གཉིས་ལྷུན་གྱིས་གྲུབ་པར་འགྱུར་རོ། །ལེའུའི་སྐབས་བསྡུ་བ་ནི། གསང་སྔགས་རིག་འཛིན་སྡོམ་པའི་རིམ་པར་ཕྱེ་བ་སྟེ་བཞི་པའོ། །ཞེས་པ་སྟེ། རྡོ་རྗེ་ཐེག་པ་ཐུན་མོང་མ་ཡིན་པའི་བསྟན་པའི་ཉམས་ལེན་གསང་སྔགས་རིག་པ་འཛིན་པའི་སྡོམ་པའི་དོན་རྣམ་པར་གཞག་པ་བསླབ་བྱ་དང་བཅས་པ་བཤད་པའི་རིམ་པར་ཕྱེ་བ་སྟེ་ལེའུ་བཞི་པའི་འགྲེལ་པའོ།། །། ༈ གསུམ་པ་སྡོམ་པ་གསུམ་གང་ཟག་གཅིག་གི་རྒྱུད་ལ་འགལ་མེད་དུ་ཉམས་སུ་ལེན་ཚུལ་གྱིས་མཐའ་དཔྱད་པས་དོན་བསྡུ་བ་ལ་གསུམ། བརྗོད་བྱའི་ལུས་ངོས་བཟུང་བའི་སྒོ་ནས་མདོར་བསྟན་པ། ཡན་ལག་རྒྱས་པར་བཤད་པའི་སྒོ་ནས་མཐའ་དཔྱད་པ། སྡོམ་པ་གསུམ་ཉམས་སུ་ལེན་ཚུལ་བསྡུས་ཏེ་བསྟན་པའི་སྒོ་ནས་མཇུག་བསྡུ་བའོ། །དང་པོ་བརྗོད་བྱའི་ལུས་ངོས་བཟུང་བའི་སྒོ་ནས་མདོར་བསྟན་པ་ནི། དེ་ལྟའི་སྡོམ་གསུམ་གང་ཟག་རྒྱུད་གཅིག་ལ། །རང་ལྡོག་མ་འདྲེས་དགག་དགོས་ཡོངས་སུ་རྫོགས། །ངོ་བོ་གནས་འགྱུར་ཡོན་ཏན་ཡར་ལྡན་པས། །གནད་ཀྱིས་མི་འགལ་དུས་སྐབས་གང་གཙོར་སྤྱོད། །ཅེས་པ་སྟེ། ད་ནི་དེ་ལྟའི་སོ་བྱང་སྔགས་ཀྱི་སྡོམ་པ་གསུམ་པོ་དེ་རིམ་པར་ནོད་པའི་གང་ཟག་གི་རྒྱུད་གཅིག་ལ་འགལ་མེད་དུ་ཉམས་སུ་ལེན་ཚུལ་གྱི་མཐའ་དཔྱད་པས་དོན་བསྡུ་བའི་ཚུལ་བཤད་པར་བྱ་སྟེ། དེ་ལ་མདོ་རྒྱུད་དགོངས་འགྲེལ་དང་བཅས་པའི་དོན་ལ་ཤེས་རབ་གསུམ་གྱིས་སློབ་པ་ཟད་མི་ཤེས་པ་མངའ་བ་གསར་རྙིང་གི་མཁས་གྲུབ་དུ་མའི་དགོངས་པ་རྨ་མེད་པ་ཉིད་གཞུང་འདིར་བཀོད་པའི་དོན་ངོས་བཟུང་བ་སྟེ། སྡོམ་པ་གསུམ་པོ་དེ་རང་རང་གི་ལྡོག་པ་མ་འདྲེས་པ་དང་། དགག་བྱ་དང་དགོས་པ་ཡོངས་སུ་རྫོགས་པ་དང་། སྡོ མ་པ་འོག་མའི་ངོ་བོ་གོང་མར་གནས་འགྱུར་བ་དང་། འོག་མའི་ཡོན་ཏན་གོང་མར་ཡར་ལྡན་གྱི་ཚུལ་ཡོད་པས་དང་། རྣམ་པ་འགལ་བར་སྣང་ཡང་གནད་ཀྱིས་མི་འགལ་བ་དང་། དུས་དང་སྐབས་གང་དུ་གོང་འོག་གང་གཙོ་བོར་སྤྱོད་དགོས་པའི་ཚུལ་ཏེ་རྣམ་པ་དྲུག་པོ་འདི་ནི་ཀུན་མཁྱེན་ཀློང་ཆེན་པའི་བསམ་གཏན་ངལ་གསོ་ལས། ཉན་ཐོས་བྱང་ཆུབ་སེམས་དང་རིག་པ་འཛིན། །སྡོམ་པ་གསུམ་པོ་དག་དང་མི་འགལ་བར། །རང་རྒྱུད་སྡོམ་ཞིང་གཞན་ཕན་ཅི་འགྲུབ་དང། །ཅིར་སྣང་དག་པའི་ལམ་དུ་བསྒྱུར་བར་བྱ། །ཞེས་པའི་དོན་འགྲེལ་བ་ཤིང་རྟ་རྣམ་དག་ཏུ་འཆད་པ་ནི། ཇི་སྐད་དུ། འོ་ན་གང་ཞེ་ན། གང་ཟག་གཅིག་གི་རྒྱུད་ལ་གསུམ་ལྡན་དུ་བསྲུང་བ་ལ། རང་ལྡོག་མ་འདྲེས། དགག་དགོས་ཡོངས་རྫོགས། ངོ་བོ་གནས་འགྱུར། ཡོན་ཏན་ཡར་ལྡན། སྡོམ་པ་གསུམ་གནད་ཀྱིས་མི་འགལ་བ། དུས་སྐབས་ཀྱི་གཙོ་བོར་གང་འགྱུར་དུ་བྱ་བ་དང་དྲུག་གོ། །ཞེས་གསུངས་པ་དང་དགོངས་པ་གཅིག་གོ། །གཉིས་པ་ཡན་ལག་རྒྱས་པར་བཤད་པའི་སྒོ་ནས་མཐའ་དཔྱད་པ་ལ་ནང་གསེས་དོན་ཚན་དྲུག་ཏུ་ཡོད་པ་ལས། དང་པོ་སྡོམ་གསུམ་རང་ལྡོག་མ་འདྲེས་པའི་ཚུལ་ནི། དེ་ཡང་བླང་ཡུལ་བསམ་པ་ཆོ་ག་རྣམས། །སོ་སོར་ངེས་ཕྱིར་རང་ལྡོག་མ་འདྲེས་ཡིན། །ཞེས་པ་སྟེ། སྡོམ་པ་གསུམ་པོ་དེ་ཡང་། གང་ལས་བླང་བའི་ཡུལ། གང་གིས་ལེན་པའི་བསམ་པ། ཇི་ལྟར་ལེན་པའི་ཆོ་ག་རྣམས་ཐ་དད་པའི་སྒོ་ནས། ཇི་སྲིད་དུ་བླངས་པའི་དུས་ཀྱང་སོ་སོར་ངེས་པའི་ཕྱིར་ན། ངོ་བོ་གནས་འགྱུར་ཡང་རང་རང་གི་ལྡོོག་པ་ལ་གཞི་མཐུན་པ་མི་སྲིད་པས་མ་འདྲེས་པར་ཡོད་པ་ཡིན་ཏེ། ཐོབ་པ་མ་ཉམས་པར་སོ་སོར་གནས་པའི་ཕྱིར། དེ་ཡང་ཡིན་ཏེ་སོ་ཐར་ནི་ཇི་སྲིད་འཚོའི་བར་དང་། བྱང་སྡོམ་ནི་སྙིང་པོ་བྱང་ཆུབ་ཀྱི་བར་དུ་ཁས་བླངས་ཀྱི། སྔགས་སྡོམ་ཐོབ་དུས་དེ་དང་དེ་ཉམས་རྐྱེན་དང་གཏོང་རྒྱུར་མ་བཤད་པས། དཔེར་ན་བསམ་པ་སེམས་བསྐྱེད་ཀྱིས་ཟིན་པས་ཆོ་ག་ཉན་ཐོས་ཀྱི་ལུགས་ལྟར་བླངས་པའི་ཐེག་ཆེན་སོ་ཐར་རམ་ཉན་ཐོས་ཀྱི་དགེ་སློང་གི་སྡོམ་པ་ཉིད་སླར་སེམས་བསྐྱེད་བླངས་པས་དེར་གནས་འགྱུར་བའི་རྒྱུད་ཀྱི་སོ་ཐར་གྱི་སྡོམ་པ་གང་ཡིན་ཀྱང་རུང་སྟེ། དེ་ལ་ཀུན་སློང་བྱང་ཆུབ་སེམས་ཀྱི་ལྡོག་པ་དང་། སྡོམ་པའི་ལྡོག་པ་གཉིས་ཡོད་པ་ལས་སྔ་མ་ཚེ་འཕོས་པའི་དུས་སུ་མི་གཏོང་སྟེ། དེ་བྱང་སེམས་ཀྱི་སྡོམ་པའི་གཏོང་རྒྱུ་མ་ཡིན་པའི་ཕྱིར། ཕྱི་མ་སྡོམ་པ་ཁས་བླངས་པའི་དུས་ཀྱི་ལྡོག་ཆ་ནི་གཏོང་སྟེ། ཇི་སྲིད་འཚོའི་མཐའ་ཅན་ཡིན་པའི་ཕྱིར། དེ་ལྟར་ཡང་རབ་དབྱེ་ལས། ཐེག་ཆེན་སོ་སོར་ཐར་ཡིན་ཡང་། །དགེ་སློང་ལ་སོགས་སྡོམ་པ་ཡི། །ལྡོག་པ་ཤི་བའི་ཚེ་ན་གཏོང་། །བྱང་ཆུབ་སེམས་ཀྱི་ལྡོག་པ་དང་། །དེ་ཡི་འབྲས་བུ་ཤི་ཡང་འབྱུང་། །ཞེས་གསུངས་པའི་ཕྱིར་རོ། །གཉིས་པ་དགག་དགོས་ཡོངས་རྫོགས་ནི། དགག་བྱ་ཉོན་མོངས་དགོས་པ་མི་འཆིང་བར། །རང་རང་ལམ་གྱི་ངོས་ནས་ཡོངས་སུ་རྫོགས། །སྤོང་བསྒྱུར་ལམ་དུ་བྱེད་པ་སོ་སོ་ཡང་། །ཉོན་མོངས་རང་མཚན་སྤོང་བར་མཁས་རྣམས་མཐུན། །ཅེས་པ་སྟེ། སྡོམ་པ་གསུམ་ཀས་དགག་བྱ་རང་རྒྱུད་ཀྱི་ཉོན་མོངས་པ་དང་། དེས་ཀུན་ནས་བསླངས་པའི་མི་དགེ་བ་སྡོམ་པར་གཅིག་སྟེ། འདུལ་བ་ལུང་ལས། ཆོས་གང་ཞིག་དངོས་དང་བརྒྱུད་ནས་ཀུན་ཏུ་འདོད་ཆགས་པའི་རྒྱུར་འགྱུར་གྱི་ཀུན་ཏུ་འདོད་ཆགས་དང་བྲལ་བར་མི་འགྱུར་བ་འདི་ནི་ཆོས་མ་ཡིན། འདུལ་བ་མ་ཡིན། སྟོན་པའི་བསྟན་པ་མ་ཡིན་པར་ཤེས་པར་གྱིས་ཤིག །ཆོས་གང་ཞིག་དངོས་དང་བརྒྱུད་ནས་ཀུན་ཏུ་འདོད་ཆགས་དང་བྲལ་བའི་རྒྱུར་འགྱུར་གྱི་ཀུན་ཏུ་འདོད་ཆགས་ཀྱི་རྒྱུར་མི་འགྱུར་བ་འདི་ནི་ཆོས་ཡིན། འདུལ་བ་ཡིན། སྟོན་པའི་བསྟན་པ་ཡིན་པར་ཤེས་པར་བྱོས་ཤིག །ཞེས་པ་ལ་སོགས་པ་གསུངས་སོ། །དགོས་པ་ཉོན་མོངས་པ་དེས་རང་རྒྱུད་མི་འཆིང་བར་ཡང་མཚུངས་ཏེ། མི་ཚངས་སྤྱོད་ལྟ་བུ་ཉན་ཐོས་པས་མི་སྤྱོད་པ་དང་། གོང་མ་གཉིས་ཀྱི་ཐབས་ཀྱིས་ཟིན་པས་སྤྱད་པ་གཉིས་ཀ་འདོད་པའི་དྲི་མས་མ་གོས་པར་འདྲ་བས་རྣམ་པ་མི་འདྲ་ཡང་རར་རང་གི་ལམ་གྱི་ངོས་ནས་དགག་དགོས་ཀྱི་ཡོན་ཏན་ཡོངས་སུ་རྫོགས་པ་སྟེ། ཉན་ཐོས་པས་བདེན་གཉིས་རྫ ས་ཡོད་དུ་བལྟས་ནས་སོ་ཐར་གྱིས་ཉོན་མོངས་པ་སྤོོང་བ་དང་། བྱང་ཆུབ་སེམས་དཔའ་རང་བཞིན་མེད་པར་ཤེས་ནས་ཆོས་ཉིད་དུ་བསྒྱུར་བ་དང་། གསང་སྔགས་པས་དེ་ཡེ་ཤེས་ཀྱི་རང་བཞིན་དུ་བལྟས་ཏེ་ལམ་དུ་བྱེད་པའི་ཚུལ་སོོ་སོ་བ་ལྟར་སྣང་ཡང་འཆིང་བྱེད་ཀྱི་ཉོན་མོོངས་རང་མཚན་པ་རྣམས་སྤོང་བར་མཁས་པ་རྣམས་མཐུན་ཏེ། དཔེར་ན་དུག་སྤོང་བ་དང་། སྨན་གྱིས་སྦྱོང་བ་དང་། སྔགས་ཀྱིས་བཏབ་སྟེ་བཟའ་བ་གསུམ་ཀས་ཀྱང་དུག་གིས་མི་གནོད་པའི་དགོས་པ་སྒྲུབ་པར་གཅིག་པ་བཞིན་ནོ། །གསུམ་པ་ངོ་བོ་གནས་འགྱུར་ནི། སོ་ཐར་ཀུན་སློང་སེམས་བསྐྱེད་ཀྱིས་ཟིན་ན། །ཉེས་སྤྱོད་སྡོམ་པ་ཞེས་བྱའི་ཚུལ་ཁྲིམས་ཡིན། །དབང་ཐོབ་རྡོ་རྗེ་འཛིན་པའི་སྡོམ་པར་འགྱུར། །དེ་ཕྱིར་ངོ་བོ་གནས་འགྱུར་ཡིན་ནོ་ཞེས། །འབུམ་ཕྲག་ལྔ་པའི་ལུང་གིས་གསལ་བར་གྲུབ། །ཅེས་པ་སྟེ། ཉོན་མོངས་རང་ག་མས་ཀུན་ནས་བསླངས་པའི་སྒོ་གསུམ་གྱི་ལས་ཀྱིས་འཁོར་བར་འཆིང་བས་དེ་ཉིད་ཤེས་རབ་དང་སྙིང་རྗེ་ཕྱོགས་གཅིག་གིས་བཟུང་ནས་ཉེས་སྤྱོད་སྤོང་བའི་སྡོམ་པ་ལ་ཞུགས་པ་ན་གནས་སྐབས་མངོན་མཐོ་དང་། མཐར་ཐུག་ཐར་པའི་རྒྱུར་འགྱུར་བའི་སོོ་ཐར་དེ་ཉིད་ཀུན་སློང་སེམས་བསྐྱེད་དང་ཤེས་རབ་ཆེན་པོ་གཉིས་ཀྱིས་ཟིན་ནས་གཞན་དོན་གྱི་བྱ་བ་ལ་ཞུགས་ན་བྱང་ཆུབ་ཆེན་པོར་གྲོལ་བའི་རྒྱུར་འགྱུར་བ་བྱང་ཆུབ་སེམས་དཔའི་ཉེས་སྤྱོད་སྡོམ་པ་ཞེས་བྱ་བའི་ཚུལ་ཁྲིམས་ཡིན་ལ། དེ་ཉིད་ཀྱང་དབང་ཐོབ་ཅིང་ཐབས་ཤེས་ཆེན་པོས་ཡོངས་སུ་ཟིན་པ་ནི་བླ་ན་མེད་པའི་བྱང་ཆུབ་ཆེན་པོར་འབད་རྩོལ་མེད་པར་ལྷུན་གྱིས་གྲུབ་པའི་རྒྱུར་རྡོ་རྗེ་འཛིན་པའི་སྡོམ་པར་འགྱུར་བ་དེའི་ཕྱིར་འོག་མ་གཉིས་ཀྱི་སྐབས་སུ་རང་དོན་ཡིད་བྱེད་ཐ་མལ་སྣང་ཞེན་རེ་ཡོད་པ་བཏང་ནས་གཞན་གནོད་གཞིར་བཅས་སྤོང་བ་དང་། གཞན་ཕན་གཞིར་བཅས་སྒྲུབ་པའི་སེམས་པ་གཉིས་སྔགས་སྡོམ་གྱི་ངོ་བོར་གནས་འགྱུར་བ་ཡིན་ནོ་ཞེས་འབུམ་ཕྲག་ལྔ་པའི་ལུང་གིས་གསལ་བར་གྲུབ་སྟེ། དེ་ཉིད་ལས། རྡོ་ཡི་རིགས་ཀྱི་བྲེ་བྲག་ཞིག །ཅེས་པ་ལ་སོགས་པ་སྔར་དྲངས་པ་ལྟར་རམ། ཡང་ན་གསང་བ་སྤྱོད་པའི་རྒྱུད་ལས། དཔེར་ན་རྡོ་ལས་ཟངས་སུ་འགྱུར། །ཟངས་ལས་གསེར་གྱི་རྣམ་པ་སྟེ། །ཟངས་ཀྱི་དུས་ན་རྡོ་མེད་ལ། །གསེར་དུ་གྱུར་པས་ཟངས་མི་སྣང་། །རིག་འཛིན་ནང་གི་དགེ་སློང་ལ། །སོ་སོར་ཐར་དང་བྱང་ཆུབ་སེམས། །གཉིས་པོ་གནས་པ་ཉིད་དུ་ནི། །སངས་རྒྱས་ཉིད་ཀྱིས་མ་གསུངས་སོ། །ཞེས་པ་ལྟར་སྔགས་སྡོམ་ཐོབ་སྟེ་ཐབས་ཤེས་ཁྱད་པར་ཅན་གྱི་ཡེ་ཤེས་རྒྱུད་ལ་སྐྱེས་ན་འོག་མ་གཉིས་ཀྱི་དམན་སེམས་དང་། ཐ་མལ་སྣང་ཞེན་གྱི་ལྡོག་ཆ་དེ་དུས་མི་གནས་ལ། སྡོམ་པའི་ངོ་བོ་ནི་རིགས་ལྔ་སྤྱིའི་རྣམ་སྣང་གི་དམ་ཚིག་ཏུ་གནས་འགྱུར་བས་ཐ་དད་པ་མེད་དོ། །བཞི་པ་ཡོན་ཏན་ཡར་ལྡན་ནི། འཇིག་རྟེན་རྣལ་འབྱོར་རྣལ་འབྱོར་བློ་ཁྱད་ཀྱིས། །གོང་མ་གོང་མས་གནོད་ཕྱིར་འོག་མ་ཡི། །ཡོན་ཏན་ཡར་ལྡན་འོག་མ་ཟིན་གྱིས་གནོན། །ཞེས་པ་སྟེ། གང་ཟག་འཇིག་རྟེན་པ་དང་། བསླབ་གསུམ་གྱི་ཉམས་ལེན་ཅུང་ཟད་རྒྱུད་ལ་འབྱོར་པའི་རྣལ་འབྱོར་པ་དང་། དེ་ཡང་ཐབས་ཤེས་ཁྱད་པར་ཅན་གྱིས་ཟིན་པའི་རྣལ་འབྱོར་པ་རྣམས་བློ་ན་འཕར་བའི་ཁྱད་པར་གྱིས་གོང་མ་གོང་མས་འོག་མ་འོག་མ་རྣམས་ཀྱི་རྒྱུད་ཀྱི་དམན་སེམས་དང་། སྣང་ཞེན་ལ་སོགས་པ་ལ་གནོད་ཅིང་སྤོང་བའི་ཕྱིར་དང་། འོག་མའི་སྡོམ་པ་བསྲུངས་པ་ཡི་ཡོན་ཏན་གོང་མའི་སྡོམ་པའི་ངང་དུ་ཡར་ལྡན་གྱི་ཚུལ་གྱིས་འོག་མ་ཟིལ་གྱིས་གནོན་པའི་ཕྱིར་ཏེ། གསང་སྙིང་ལས། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་སོ། །ལྔ་པ་གནད་ཀྱིས་མི་འགལ་བ་ནི། །འདུ་ཤེས་གསུམ་གྱིས་འཁྲིག་ན་རྣལ་འབྱོར་དེ། །ཡུལ་བསམ་སྦྱོར་བ་མཐར་ཐུག་མ་ཚང་བས། །རྨི་ལམ་ཇི་བཞིན་གནད་ཀྱིས་འགལ་མི་སྲིད། །ཅེས་པ་སྟེ། སྡོམ་པ་འོག་མ་གཉིས་གོང་མར་འདུས་པ་མི་འཐད་དེ་སོ་ཐར་གྱི་ཕམ་བཞི་འཆབ་བཅས་སྤོང་བ་དང་། བྱང་སེམས་ཀྱི་སེམས་ཅན་འཚེ་བ་ཆ་བཅས་ལས་ལྡོག་ནས་གཞན་ལ་ཕན་འདོགས་པ་དེ་སྔགས་སྡོམ་གྱི་སྤྱད་པར་བྱ་བའི་དམ་ཚིག་ལྔ་དང་དངོས་སུ་འགལ་བའི་ཕྱིར་སྙམ་ན། རྣམ་པ་འགལ་བ་ལྟར་སྣང་ཡང་། ཕམ་པ་བཞིའི་ནང་ཚན་མི་ཚངས་སྤྱོད་ལྟ་བུ་ལ་མཚོན་ན་འདུ་ཤེས་གསུམ་གྱི་སྒོ་ནས་ལས་རྒྱ་བསྟེན་པའི་ཚེ་འཁྲིག་སྤྱོད་ཀྱི་རྣམ་པ་ལྟར་སྣང་ནའང་། རྣལ་འབྱོར་པ་དེ་ལ་ཡུལ་གྱི་འདུ་ཤེས་རང་མཚན་པ་དེ་ལོག་ནས་ཡབ་ཡུམ་ལྷའི་འདུ་ཤེས་སུ་གནས་འགྱུར་བས་ཡུལ་གྱི་ཡན་ལག་མ་ཚང་ཞིང་། སྲིད་པ་རང་མཚན་པ་དེ་བདེ་ཆེན་ཆོས་ཀྱི་འདུ་ཤེས་སུ་གནས་འགྱུར་བས་བསམ་པའི་ཡན་ལག་མ་ཚང་ལ། ཆགས་པས་བྱ་བའི་སྦྱོར་བ་དེ་བྱེད་པ་སྡོམ་པའི་ཐབས་མཁས་ཀྱིས་ཟིན་པས་སྦྱོར་བའི་ཡན་ལག་མ་ཚང་བ་དང་། མཐར་ཐུག་ཐིག་ལེ་འཕོས་པས་བདེ་བའི་སིམ་པ་བདག་གིར་བྱེད་པ་དེ་ཆགས་པའི་རོ་ཡེ་ཤེས་སུ་བསྒྱུར་ཞིང་ཐིག་ལེ་འཛག་མེད་དུ་འཆིང་བའི་ཕྱིར་མཐར་ཐུག་གི་ཡན་ལག་མ་ཚང་བས་ན། ཆོས་ཐམས་ཅད་སེམས་ཉིད་རང་སྣང་དུ་ཤེས་པས་རྨི་ལམ་གྱི་གནས་སྐབས་ན་བྱ་བ་བྱས་པ་ཇི་བཞིན་དུ་གནད་ཀྱིས་འགལ་བ་ནི་མི་སྲིད་དེ། གསང་སྙིང་ལས། མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །ཞེས་དང་། ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་གསུངས་པའི་ཕྱིར་རོ། །དྲུག་པ་གནས་སྐབས་གང་གཙོར་སྤྱོད་པ་ནི། སྡིག་ཏོ་མི་དགེའི་ཕྱོགས་དང་ཚོགས་པའི་གསེབ། འོག་མ་གཙོར་བྱེད་འདོད་པས་དབེན་པ་དང་། །སྤྱོད་པའི་དུས་དང་དབེན་པར་གསང་སྔགས་སྤྱད། །ནང་མ་འདོམས་ན་མ་འདྲེས་ཡོངས་རྫོགས་བསྲུང་། །འདོམས་ན་དགག་དགོས་བརྩི་ཞེས་མཁས་རྣམས་བཞེད། །ལས་དང་པོ་དང་རྣལ་འབྱོར་གྲུབ་ཐོབ་དང་། །ཐམས་ཅད་མཁྱེན་པའི་སྤྱོད་པ་གང་ཡིན་པ། །དུས་ཚོད་འབྲེལ་བར་དགོས་ཞེས་དུས་འཁོར་བཤད། །ཅེས་པ་སྟེ། སྡིག་ཏོ་མི་དགེ་བའི་ཕྱོགས་རང་བཞིན་གྱི་ཁ་ན་མ ཐོ་བ་རྣམས་དང་། ཚོགས་པ་མང་པོའི་གསེབ་ཏུ་ལས་དང་པོ་པ་རྣམས་ལྟ་ཅི་སྨོས། རང་རྒྱུད་ལ་ཉེས་པས་མི་གོས་པའི་རྣལ་འབྱོར་པ་རྣམས་ཀྱིས་ཀྱང་གདུལ་བྱའི་རྒྱུད་ཆུད་མི་ཟ་བའི་ཕྱིར་འོག་མ་ཉན་ཐོས་ཀྱི་ལུགས་གཙོ་བོར་བྱེད་དགོས་ཏེ། གསང་འདུས་ལ། ཕྱི་རུ་ཉན་ཐོས་སྤྱོད་པ་སྐྱོངས། །ནང་དུ་འདུས་པའི་དོན་ལ་དགའ། །ཞེས་དང་། སློབ་དཔོན་ཆེན་པོ་པདྨས། ཕྱི་ལྟར་ལག་ལེན་མདོ་སྡེའི་ལུགས་སུ་སྤྱད། །རྒྱུ་འབྲས་སྤང་བླང་ཞིབ་པའི་དགོས་པ་ཡོད། །ཅེས་གསུངས་པའི་ཕྱིར་རོ། །ཡང་བྱང་ཆུབ་སེམས་དཔའ་རང་འདོད་ཡིད་ལ་བྱེད་པས་དབེེན་པ་ན་གཞན་དོན་དུ་འགྱུར་ངེས་པའི་ལུས་ངག་གི་མི་དགེ་བ་བདུན་གནང་བ་དང་། གསང་སྔགས་ཐུན་མོང་མ་ཡིན་པའི་སྤྱོད་པ་སྤྱད་པའི་དུས་དང་དབེན་པར་ནི་གསང་སྔགས་ཀྱི་སྤྱོད་པ་རྣམས་སྤྱད་ན་འོག་མ་རྣམས་དང་འགལ་བ་ལྟར་སྣང་ཡང་ལྟུང་བའི་གཟུགས་བརྙན་ཙམ་ལས་དོན་ལ་ཉེས་པ་མེད་པར་མ་ཟད་དགོས་པ་དང་ལྡན་ཏེ། སློབ་དཔོན་ཆེན་པོས། ནང་ལྟར་གསང་སྔགས་ཐུན་མོང་ལུགས་སུ་སྤྱད། །བསྐྱེད་རྫོགས་དོན་དང་འབྲེལ་བའི་དགོས་པ་ཡོད། །གསང་བ་གསང་ཆེན་ཨ་ཏིའི་ལུགས་སུ་སྤྱད། །ཚེ་གཅིག་འོད་སྐུར་གྲོལ་བའི་དགོས་པ་ཡོད། །ཅེས་དང་། རབ་དབྱེ་ལས། འདི་ལ་སྡིག་ཏོ་མི་དགེའི་ཕྱོགས། །ཕལ་ཆེར་ཉན་ཐོས་ལུགས་བཞིན་བསྲུང་། །འདོད་པས་དབེན་པའི་ལྟུང་བ་དགའ། །བྱང་ཆུབ་སེམས་དཔའི་ལུགས་བཞིན་བསྲུང་། །འཇིག་རྟེན་མ་འདས་གྱུར་པའི་ཆ། །གཉིས་ཀ་མཐུན་རྣམས་འབད་པས་བསྲུང་། །འཇིག་རྟེན་འཇུག་པའི་རྒྱུར་འགྱུར་ན། །ཐེག་ཆེན་སོ་སོར་ཐར་ལ་གནང་། །ཞེས་གསུངས་པའི་ཕྱིར་རོ། །སྡོམ་པ་གསུམ་ཀ་ནང་མ་འདོམས་པ་སྟེ་མཐུན་པར་གྱུར་ན་གཞན་མི་དད་པར་གྱུར་པའི་ཆ་ལ་སོགས་པ་སྤང་བླང་གི་གནས་ཐམས་ཅད་སོ་སོར་མ་འདྲེས་པར་ཡོངས་སུ་རྫོགས་པར་བསྲུང་བར་བྱ་ཞིང་། ནང་འདོམས་པ་སྟེ་གཅིག་གི་སྤང་བྱར་བཤད་པ་གཅིག་གི་བསྲུང་བྱར་སོང་ནས་འགལ་བར་གྱུར་ན་རང་རྒྱུད་ཀྱི་དགག་བྱ་ཉོན་མོངས་པའི་གཉེན་པོར་འགྲོ་བ་དང་། དགོས་པ་མི་འཆིང་བ་གཉིས་གང་དུ་ཚང་བ་བརྩིས་ནས་གང་དུ་ཚང་བ་དེ་སྤྱད་པར་བྱ་དགོས་སོ་ཞེས་མཁས་པ་རྣམས་བཞེད་དེ། མི་དགེ་བ་དང་ཉེས་པ་སྐྱེ་བ་གང་ཡང་འགོག་ཅིང་། དགེ་བ་དང་ཡོན་ཏན་བསྐྱེད་ན་གང་ལ་ཡང་བསླབ་པར་བྱ་དགོས་པས། སྤྱིར་བཏང་དང་དམིགས་བསལ་གྱི་གནད་ཤེས་པ་གལ་ཆེ་བའི་ཕྱིར་རོ། །དེ་ཡང་གསུམ་ལྡན་རྡོ་རྗེ་འཛིན་པས་སྤྱོད་པ་ཁ་ན་མ་ཐོ་བ་མེད་ཅིང་དུས་ཚོད་དང་འབྲེལ་བར་སྤྱོད་དགོས་པས་གནས་སྐབས་སོ་སོའི་བླང་དོར་ཀྱང་ཤེས་པར་བྱ་སྟེ། ལས་དང་པོ་པས་སོ་ཐར་གྱི་དགག་བྱ་དང་བྱང་སྔགས་ཀྱི་རྩ་བ་དང་ཡན་ལག་གི་ལྟུང་བ་རྣམས་གཙོ་བོར་བསྲུང་བ་དང་། དེ་ཡང་སྔགས་སམ་ཏིང་འཛིན་གྱིས་ཆང་གི་རོ་བསྒྱུར་བ་དང་། དུག་ཞི་བ་ལ་སོགས་པའི་དྲོད་མ་ཐོབ་པ་དེ་སྲིད་དུ་ལས་དང་པོ་པ་ཞེས་བྱའོ། །བརྟན་པ་ཐོབ་ནས་བློ་ན་འཕར་བའི་རིམ་པ་ལྟར་བསྐྱེད་རྫོགས་ཀྱི་རྣལ་འབྱོར་ལ་གནས་པའི་སྒོ་ནས་དམ་རྫས་ཁྱད་པར་ཅན་བརྟེན་པ་སོགས་སྔགས་ནང་རྒྱུད་ཀྱི་སྤྱོད་པ་ཐུན་མོང་བ་དང་། བསྐྱེད་རྫོགས་ལ་གོམས་པའི་འབྲས་བུ་གནས་སྐབས་གྲུབ་པ་ཐོབ་པ་ན་བླང་དོར་མེད་པའི་སྤྱོད་པ་དང་། མཐར་ཐུག་གི་འབྲས་བུ་ཐམས་ཅད་མཁྱེན་པའི་ཡེ་ཤེས་མངོན་དུ་གྱུར་པའི་ཚེ་ན་གཞན་ལ་ཕན་པའི་སྤྱོད་པ་ཁོ་ན་གང་ཡིན་པ་དེ་དང་དེ་དག་དུས་ཚོད་དང་འབྲེལ་བ་སྤྱོད་དགོས་ཞེས་དུས་འཁོར་ལས་བཤད་དེ། དེའི་འགྲེལ་ཆེན་ལས། དེའི་ཕྱིར་ལས་དང་པོ་པས་རྣལ་འབྱོར་པའི་བྱ་བ་མི་བྱའོ། །རྣལ་འབྱོར་པས་གྲུབ་པའི་བྱ་བ་མི་བྱའོ། །གྲུབ་པས་ཐམས་ཅད་མཁྱེན་པའི་བྱ་བ་མི་བྱའོ། །ཞེས་སོ། །གསུམ་པ་སྡོམ་པ་གསུམ་ཉམས་སུ་ལེན་ཚུལ་བསྡུས་ཏེ་བསྟན་པའི་སྒོ་ནས་མཇུག་བསྡུ་བ་ནི། ཡོན་ཏན་གཞི་རྟེན་སོ་ཐར་གང་ནུས་སྟེང་། །བྱ་ཆུབ་སེམས་བསྐྱེད་སྔགས་ཀྱི་ཡན་ལག་ཡིན། །སྨིན་བྱེད་དབང་ཐོབ་སྡོམ་གསུམ་མིག་ལྟར་བསྲུང་། །གདན་གསུམ་ལྷ་རུ་ཤེས་པའི་བསྐྱེད་རིམ་དང་། །མཚན་བཅས་མཚན་མ་མེད་པའི་རྫོགས་རིམ་བསྒོམ། །ཉེ་རྒྱུའི་སྤྱོད་པས་རིམ་བཞིན་མཚམས་སྦྱར་ནས། །འདིའམ་འཆི་ཁ་དང་ནི་བར་དོ་རུ། །རང་བཞིན་སྤྲུལ་པའི་ཞིང་དུ་རྫོགས་འཚང་རྒྱ། །ཞེས་པ་སྟེ། ཉན་ཐོས་དང་ཐུན་མོང་བའི་ལམ་དུ་འཁོར་བ་ལ་སྐྱོ་ཤས་དང་ངེས་འབྱུང་གིས་ཀུན་ནས་བསླངས་ཏེ་ཡོོན་ཏན་ཐམས་ཅད་ཀྱི་གཞི་རྟེན་སྤོང་བ་བཞིའམ་བདུན་ལྡན་གྱི་སོ་སོར་ཐར་པ་རིགས་བདུན་གྱི་སྡོམ་པ་གང་ནུས་བླངས་ལ་ལུས་ངག་ཉེས་སྤྱོད་ལས་ལྡོག་པར་བྱ་ཞིང་། དེའི་སྟེང་དུ་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་བྱང་ཆུབ་ཐོབ་འདོད་ཀྱི་བསམ་པས་སེམས་བསྐྱེད་ཀྱི་སྡོམ་པ་བླངས་ན། དེ་གཉིས་གསང་སྔགས་ཀྱི་སྡོམ་པའི་ཡན་ལག་ཏུ་འགྱུར་བ་ཡིན་ལ། དེ་ཡང་སེམས་ཅན་ཐམས་ཅད་གདོད་མ་ནས་རྣམ་པར་དག་ཀྱང་དེ་ལྟར་མ་རྟོགས་པས་སྡུག་བསྔལ་རྒྱུ་འབྲས་ཀྱིས་གཟིར་བ་ལ་བཟོད་ཕོད་པའི་སྙིང་སྟོབས་དྲག་པོས། ཀུན་ནས་བསླངས་ཏེ་སྨིན་བྱེད་ཀྱི་དབང་ལ་བརྟེན་ནས་རིག་པ་འཛིན་པའི་སྡོམ་པ་རྒྱུད་ལ་ཐོབ་པར་བྱས་ནས་སྡོམ་པ་གསུམ་པོ་དེའི་བསླབ་བྱ་རྣམས་དགག་དགོས་ཀྱི་གནད་ཤེས་པའི་སྒོ་ནས་མིག་གི་འབྲས་བུ་ལྟར་གཅེས་སྤྲས་ཀྱིས་བསྲུང་བར་བྱ་ཞིང་སྦྱང་གཞི་སྦྱང་བྱེད་ངོ་འཕྲོད་པའི་སྒོ་ནས་གདན་གསུམ་ལྷ་རུ་ཤེས་པའི་ལྟ་བ་དང་མ་བྲལ་བར་བསྐྱེད་རིམ་ཟབ་མོ་རྣམས་བསྒོམ་པ་དང་། རྩ་རླུང་ཐིག་ལེ་ལ་དངོས་སུ་གནད་དུ་བསྣུན་པས་ལམ་མཚན་བཅས་ཀྱི་རྫོགས་རིམ་ཐབས་ལམ་སྟེང་འོག་གི་སྒོ་དང་། དེ་ཐམས་ཅད་ཀྱི་རྒྱས་གདབ་ཏུ་གྱུར་པ་མཚན་མ་མེད་པའི་རྫོགས་རིམ་བསྒོམ་ཞིང་། གོམས་པ་ན་ཟག་པ་མེད་པའི་འབྲས་བུ་ལ་མྱུར་དུ་སྦྱོར་བའི་ཉེ་རྒྱུའི་སྤྱོད་པས་རིམ་པ་བཞིན་མཚམས་སྦྱར་ནས་དབང་པོ་རབ་ཚེ་འདི་ཟུང་འཇུག་གི་སྐུ་འགྲུབ་པའམ། འབྲིང་འཆི་ཁ་འོད་གསལ་ལས་ཟུང་འཇུག་གི་སྐུར་ལྡང་བ་དང་ནི། ཐ་མ་སྲིད་པ་བར་དོ་རུ་ཆོས་ཉིད་ཀྱི་བདེན་པའི་བྱིན་རླབས་ཀྱིས་རང་བཞིན་སྤྲུལ་པ་སྐུའི་ཞིང་དུ་རྡོ་རྗེ་སེམས་དཔའ་ལ་སོགས་པའི་རིགས་ལྔའི་སངས་རྒྱས་ཀྱི་ཞལ་མཐོང་ཞིང་དབང་བསྐུར་ལ་བྱང་ཆུབ་ཏུ་ལུང་བསྟན་ཏེ་དབུགས་དབྱུང་བ་ཐོབ་ནས་མངོན་པར་རྫོགས་པར་འཚང་རྒྱ་བ་ཡིན་ནོ། །ལེའུའི་སྐབས་བསྡུ་བ་ནི། སྡོམ་གསུམ་སྤྱིར་དཔྱད་པའི་རིམ་པར་ཕྱེ་བ་སྟེ་ལྔ་པའོ། །ཞེས་པས། སྔོམ་པ་གསུམ་གྱི་བསྲུང་བྱ་ཉམས་སུ་ལེན་ཚུལ་གྱི་གནད་སྤྱིར་དཔྱད་པའི་རིམ་པར་ཕྱེ་བ་སྟེ་ལེའུ་ལྔ་པའི་རྣམ་པར་བཤད་པའོ། །རྩ་བའི་གསུམ་པ་བཤད་པ་མཐར་ཕྱིན་པའི་བྱ་བ་ལ་ལྔ། དང་པོ་རྩོམ་པའི་རྒྱུ་བརྩེ་བའི་སྙིང་རྗེ་ཆེན་པོ་ཐུགས་རྒྱུད་ལ་ཇི་ལྟར་འཁྲུངས་པའི་ཚུལ་ནི། དེང་སང་མ་སྦྱངས་མུ་ཅོར་སྨྲ་བ་བརྒྱས། །རང་གི་ཡེ་ཤེས་རྡུལ་ཙམ་མ་རྟོགས་པར། །རང་བཟོའི་ཆོ་གས་རྨོངས་རྣམས་ཚིམ་པའི་དུས། །སྐྱབས་དེ་བསམ་གྱིན་སྙིང་ནས་མཆི་མ་དཀུ། །ཞེས་པ་སྟེ། དེང་སང་གསུང་རབས་དགོངས་འགྲེལ་དང་བཅས་པ་ལ་ཐོས་བསམ་གྱིས་ལེགས་པར་མ་སྦྱངས་ཤིང་བླུན་པོ་མཁས་རློམ་ཅན་གཞན་ལ་མུ་ཅོར་སྨྲ་བ་བརྒྱ་ཕྲག་དུ་མས། སྒོམ་པ་ཉམས་ལེན་གྱི་སྒོ་ནས་རང་གི་གནས་ལུགས་ཀྱི་ཡེ་ཤེས་རྡུལ་ཕྲན་གྱི་ཆ་ཤས་ཙམ་ཡང་མ་རྟོགས་པར་རང་བཟོས་བསླད་པའི་ཆོ་གས་རིགས་མཐུན་རྨོངས་པ་རྣམས་དགའ་བ་བསྐྱེད་ཅིང ཚིམ་པའི་དུས་འདིར། རང་གཞན་གཉིས་ཀ་བརླག་པའི་སྐྱབས་གནས་དེ་འདྲ་བ་ལ་བསྟེན་པའི་སྙིགས་དུས་ཀྱི་སྐྱེ་བོ་འདི་རྣམས་ཀྱེ་མ་ཀྱེ་ཧུད་སྙིང་རེ་རྗེ་བསམ་གྱིན་སྐྱེས་བུ་དམ་པ་རྣམས་ནི་སྙིང་ནས་མྱ་ངན་གྱི་མཆི་མ་དཀུ་བར་འོས་པའི་གནས་སུ་གྱུར་པ་ཡིན་ནོ། །གཉིས་པ་འདི་ལྟར་རྩོམ་དགོས་པའི་རྒྱུ་མཚན་ནི། མདོ་སྔགས་ལམ་རྣམས་མུ་མེད་འགྲོ་བའི་ཕྱིར། །ཚང་ལ་མ་ནོར་ལམ་འདི་རྒྱལ་བས་གསུངས ། །གངས་ཅན་འདི་ན་དེ་དག་ཕྱོགས་རེར་འཛིན། །གཅིག་ཏུ་སེམས་ཀྱང་སྡོམ་གསུམ་མིང་ཙམ་ལུས། །ཞེས་པ་སྟེ། མདོ་སྔགས་ལམ་རིམ་རྣམས་ནི་མཐར་ཡས་ཤིག་མུ་མེད་པའི་འགྲོ་བ་རྣམས་ཀྱི་ཁམས་དབང་དང་མཐུན་པར་དེ་དག་ཐར་པ་དང་ཐམས་ཅད་མཁྱེན་པའི་གོ་སར་དཀྲི་བའི་ཕྱིར། གང་ཟག་གཅིག་འཚང་རྒྱ་བའི་ཐབས་ཚང་ལ་མ་ནོར་བའི་ལམ་འདི་རྒྱལ་བས་གསུངས་མོད། འོན་ཀྱང་གངས་ཅན་འདི་ན་མདོ་སྔགས་གཉིས་འགལ་ལོ་ཞེས་བླུན་པོ་སྤྱི་བརྟོལ་ཅན་དེེ་དག་གིས་ནི་མེ་ཆུ་ལྟར་འགལ་འདུའི་ཕུང་པོར་མཐོང་ནས་ཕྱོགས་རེ་བར་འཛིན་ཏེ། །མཁས་པ་རྣམ་དཔྱོད་དང་ལྡན་པ་གཅིག་ཏུ་བསྡུ་བར་སེམས་པ་དག་གིས་ཀྱང་བཤད་ཡམས་ཀྱི་ས་བཅད་པ་ཙམ་ལས་སྡོམ་པ་གསུམ་གྱི་བསླབ་བྱ་གོང་འོག་མི་འགལ་བར་ཤེས་དགོས་པ་རྣམས་ནི་མིང་ཙམ་དུ་ལུས་སོ། །གསུམ་པ་ཇི་ལྟར་བརྩམས་པའི་ཚུལ་ནི། །འདི་ནི་མཁས་གྲུབ་དུ་མའི་ལེགས་བཤད་ལས། །སྒྲིམས་པའི་བློ་ཡིས་ཕྱོགས་གཅིག་དག་ཏུ་བཀོད། །དེ་ཕྱིར་ནོངས་པའི་དྲི་མ་མེད་སྙམ་རློམ། །ཞེས་པ་སྟེ། ཚུལ་དེ་ལྟར་མཐོང་ནས་བསྟན་བཅོས་འདིར་ནི་རང་བཟོ་དང་ཕྱོགས་རིས་སྤངས་ཏེ་མདོ་རྒྱུད་ཀྱི་དོན་ཇི་ལྟ་བ་བཞིན་དུ་གཏན་ལ་འབེབས་པར་བྱེད་པའི་མཁས་གྲུབ་དུ་མའི་ལེགས་པར་བཤད་པ་ལས། ཇི་སྐད་བསྟན་པ་རྣམས་སྒྲིམས་པོའི་བློ་ཡིས་བརྟགས་ཤིང་དཔྱད་པའི་སྒོ་ནས་མདོ་རྒྱུད་མན་ངག་རྣམས་དང་མི་འགལ་བར་ཕྱོགས་གཅིག་དག་ཏུ་བཀོད་པ་ཡིན་པས། རྒྱུ་མཚན་དེ་ཡི་ཕྱིར་ན་མ་རྟོགས་པ་དང་ལོག་པར་རྟོགས་པའི་དབང་གིས་ཉེས་པར་བཤད་པ་སོགས་ཀྱི་ནོངས་པའི་དྲི་མ་ཆ་ཙམ་མེད་དོ་སྙམ་དུ་རློམ་པ་ཡིན་པས་ན་ལམ་མཆོག་འདི་ཉིད་ཀྱི་རྗེས་སུ་འཇུག་པའི་སྐལ་བཟང་གི་གདུལ་བྱ་རྣམས་སྙིང་ནས་ཡིད་ཆེས་པའི་ནོར་སྐལ་དུ་བཟུང་བར་མཛོད་ཅིག་ཅེས་བསྐུལ་བར་མཛད་དོ། །བཞི་པ་དེས་ཐོབ་པའི་དགེ་བ་བསྔོ་བ་ནི། དགེ་དེས་ཀུན་བཟང་གོ་འཕང་མྱུར་ཐོབ་ཤོག །ཅེས་པ་སྟེ། མདོ་སྔགས་ཆོས་ཚུལ་རྒྱ་མཚོ་ཚང་ལ་མ་ནོར་བ་སྐལ་བཟང་ཀུན་ཏུ་དགའ་བའི་འཇུག་ངོགས་གཅིག་པུར་གྱུར་པ་སྡོམ་གསུམ་རྣམ་པར་ངེས་པའི་བསྟན་བཅོས་ངོ་མཚར་བ་འདི་ཉིད་བརྩམས་པ་ལས་བྱུང་བའི་བསོད་ནམས་ཀྱི་ཕུང་པོ་མཁའ་མཐར་གཏུགས་པའི་དགེ་ཚོགས་དེས་མཁའ་ཁྱབ་ཀྱི་འགྲོ་བ་ཐམས་ཅད་སྐུ་ལྔ་ཡེ་ཤེས་ལྔ་དང་འདུ་འབྲལ་མེད་པར་རང་བྱུང་གདོད་མའི་སངས་རྒྱས་ཀུན་ཏུ་བཟང་པོའི་གོ་འཕང་མྱུར་དུ་ཐོབ་པར་ཤོག་ཅིག་ཅེས་སོ། །མཐར་བསྟན་བཅོས་ཇི་ལྟར་བརྩམས་པའི་མཛད་བྱང་སྨོས་པ་ནི། ཅེས་སྡོམ་གསུམ་རྣམ་ངེས་ཚིག་གིས་རིམ་པར་ཕྱེ་བ་འདི་གངས་རིའི་ཕྲེང་བས་བསྐོར་བའི་ཡུལ་ལྗོངས་ལྷོ་ཕྱོགས་ཀྱི་རྒྱུད་དུ་བྱུང་བ་ངེས་པར་འབྱུང་བའི་བསམ་པ་ཅན་མངའ་རིས་ཀྱི་པཎྜི་ཏ་པདྨ་དབང་གི་རྒྱལ་པོས་བཀོད་པ། ཕྱོགས་དུས་ཐམས་ཅད་དུ་རང་བཞིན་རྫོགས་པ་ཆེན་པོའི་བསྟན་པ་བྱ་བ་བྱེད་ནུས་པར་གྱུར་ཅིག །ཅེས་པ་སྟེ། དེ་སྐད་ཅེས་སྡོམ་པ་གསུམ་རྣམ་པར་ངེས་པ་ཞེས་བྱ་བའི་བསྟན་བཅོས་འདི་ཉིད་མཛད་པ་པོའི་མཚན་གྱི་རྣམ་གཞག་ལ། གངས་ཅན་པའི་ལམ་སྟོན་ཐུ་མི་སམྦྷོ་ཊས། ཡི་གེའི་ཁུངས་ནས་མིང་བྱུང་སྟེ། །མིང་གི་ཁུངས་ནས་ཚིག་བྱུང་ལ། །ཚིག་གིས་དོན་རྣམས་སྟོན་པར་བྱེད། །ཅེས་པ་ལྟར། ཡི་གེ་འདུས་པ་ལས་མིང་། མིང་འདུས་པ་ལས་ཚིག །ཚིག་འདུས་པ་ལས་དོན་གྱི་རྣམ་གྲངས་རྣམས་སྟོན་པ་ལས། འདིར་ཚིག་གི་སྒོ་ནས་བསྟན་པའི་གཞུང་ཚོགས་ལེའུ་རིམ་པར་ཕྱེ་བ་ལྔའི་བདག་ཉིད་ཅན་གྱི་གཞུང་བཟང་པོ་ཚིག་ཉུང་ལ་དོན་བསྡུས་པ་ལུང་རིག་མན་ངག་དུ་མའི་བང་མཛོད་དུ་གྱུར་པ་འདི་ཉིད་བར་ཆད་མེད་པར་བརྩམས་པ་མཐར་ཕྱིན་པའི་སྐབས་སུ་བབས་པ་ན་བར་སྣང་གི་ལྷ་རྣམས་ཀྱིས་མངོན་པར་ཤེས་པའི་ལེགས་སོའི་མེ་ཏོག་གི་ཆར་བསྙིལ་བ་དང་བཅས་ཡོངས་སུ་གྲུབ་པ་ཡིན་ལ། བསྟན་བཅོས་མཛད་པ་པོའི་མཚན་དང་། གང་དུ་མཛད་པའི་གནས་ཀྱི་ཁྱད་པར་ནི་བསིལ་ལྡན་གངས་རིའི་ཕྲེང་བས་ཡོངས་སུ་བསྐོར་བའི་བོད་ཀྱི་ཡུལ་ལྗོངས་ལས་བྱེ་བྲག་ལྷོ་ཕྱོགས་ཀྱི་རྒྱུད་མངའ་རིས་གློ་བོ་མ་ཐང་དུ་བྱུང་བ་ཡོན་ཏན་གྱི་ཁྱད་པར་ཤེས་རབ་དང་སྙིང་རྗེས་སྲིད་ཞིའི་མཐའ་གཉིས་ལས་ངེས་པར་འབྱུང་བའི་བླ་ན་མེད་པའི་བྱང་ཆུབ་དོན་གཉེར་གྱི་བསམ་པ་བཟང་པོས་ཀུན་ནས་བསླངས་ཏེ། སྦྱོར་བ་གཞན་དོན་སྒྲུབ་པའི་ཐབས་ལ་མཁས་པ་ཅན་རིག་པའི་གནས་ཆེན་ལྔ་དང་གནས་ཕྲན་ལྔ་རྣམས་ཐུགས་སུ་ཆུད་པའི་མངའ་རིས་ཀྱི་པཎྜི་ཏ་པདྨ་དབང་གི་རྒྱལ་པོ་རྡོ་རྗེ་གྲགས་པ་རྒྱལ་མཚན་དཔལ་བཟང་པོས་གསུང་རབ་དགོངས་འགྲེལ་དང་བཅས་པའི་དོན་ཇི་ལྟ་བ་བཞིན་དུ་བཀོད་པར་མཛད་པ་འདི་ནི་ཐར་འདོད་ཀྱི་གང་ཟག་རྣམས་ནས་སྤྱི་བོའི་རྒྱན་དུ་བླངས་པར་འོས་པ་ཁོ་ན་སྟེ། རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་གསུངས་པའི་ཕྱིར་རོ། །དེ་ལྟར་བརྩམས་པའི་དགེ་བ་ཅི་ཡོད་པ་དེས་ཕྱོགས་བཅུ་དང་དུས་གསུམ་གྱིས་བསྡུས་པའི་འཇིག་རྟེན་གྱི་ཁམས་ཐམས་ཅད་དུ་མདོ་སྔགས་རྒྱལ་པའི་བསྟན་པ་ཡིན་ནོ་ཅོག་སྤྱི་དང་། ཁྱད་པར་ཐེག་པ་ཀུན་གྱི་རྩེ་མོར་སོན་པ་རང་བཞིན་རྫོགས་པ་ཆེན་པོ་ཨ་ཏི་ཡོ་གའི་བསྟན་པ་ལ་བཤད་སྒྲུབ་ཀྱི་སྒོ་ནས་བྱ་བ་རླབས་པོ་ཆེ་བྱེད་ནུས་པར་གྱུར་ཅིག་ཅེས་སྨོན་ལམ་དུ་མཛད་པ་ནི་བསྔོ་བ་རྣམས་ཀྱི་ནང་ནས་མཆོག་ཏུ་གྱུར་པ་སྟེ། སྨོན་ལམ་ཐམས་ཅད་ཀྱང་དམ་པའི་ཆོས་ཡོངས་སུ་འཛིན་པར་བསྔོས་ན་དེར་འདུ་བར་གསུངས་བའི་ཕྱིར། བཟང་པོ་སྤྱོད་པ་ལས། རྒྱལ་བ་ཀུན་གྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྦྱོང་པ་ཡང་། །མ་འོངས་བསྐལ་པ་ཀུན་ཏུ་སྤྱོད་པར་ཤོག །ཅེས་གསུངས་པ་དང་ཚུལ་མཐུན་པ་ཡིན་ནོ། །སླར་སྨྲས་པ། དེ་ལྟར་རྣམ་འདྲེན་བཞི་པའི་རིང་ལུགས་མཆོག །ཐོག་མཐར་བར་དགེའི་ལམ་གྱི་སྲོལ་ཕྱེས་ནས། །ཀུན་ཁྱབ་ཡིད་བཞིན་ནོར་བུའི་གཏེར་ཁ་ཞིག །ཐང་མར་བརྡལ་འདི་ཁྲི་སྲོང་ཁྱོད་མིན་སུ། །ཐོག་མར་དགེ་བ་སྒོ་གསུམ་ཉེས་སྤྱོད་སྡོམ། །བར་དུ་དགེ་བ་གཞན་ཕན་གཞིར་བཅས་བསྒྲུབ། །ཐ་མར་དགེ་བ་དོན་གཉིས་ལྷུན་གྲུབ་ཀྱི། །རྒྱལ་སར་དབུགས་ཆེན་འབྱིན་ལ་བསླུ་བ་མེད། །རྨོངས་པ་བདག་ཀྱང་དེ་ལྟའི་ཚུལ་ཤེས་ནས། །ཁྱོད་ཀྱི་ལམ་བཟང་བྱི་དོར་ཅུང་བགྱིས་པ། །འདི་ལས་ལམ་བཟང་ནོར་བ་མེད་པའི་རྒྱུན། །རྣམ་འདྲེན་ལྔ་པའི་བར་དུ་གསལ་གྱུར་ཅིག །ཚུལ་འདིར་འཆད་ཉན་སྒོམ་སྒྲུབ་ཟབ་མོའི་སྲོལ། །ལྔ་བ དོའི་མཐར་ཡང་ནུབ་མེད་སླར་གསལ་ནས། །འཇིག་རྟེན་ཕན་བདེར་སྤྱོད་པའི་སྐལ་བཟང་གིས། །ཞིང་རྣམས་ཀུན་ཁྱབ་བཀྲ་ཤིས་དཔལ་འབར་ཤོག །དེ་ལྟར་སྡོམ་གསུམ་རྣམ་པར་ངེས་པའི་གཞུང་འདི་ལ་འདྲེན་པ་བཀའ་དྲིན་མཚུངས་མེད་ཨོ་རྒྱན་ཆོས་འབྱོར་རྒྱ་མཚོའི་སྐུ་དྲུང་ནས་རང་ལོ་བཅུ་གཉིས་པར་རྫོགས་ཆེན་དཔལ་སྤྲུལ་འཇིགས་མེད་ཆོས་ཀྱི་དབང་པོའི་ཞལ་རྒྱུན་གཙོ་བོར་བྱས་པའི་སྨིན་ཁྲིད་ཞིབ་རྒྱས་སུ་ནོས་པ་ལས། རང་ཉིད་ནས་དེ་མ་ཐག་ཏུ་བྲིས་པའི་བརྗེད་ཟིན་འབྲུ་འགྲེལ་ལྟ་བུ་ཞིག་ཡོད་པ་ལ་ཕྱིས་སུ་ཞིབ་པར་བལྟས་པ་ན་བརྗོད་བྱའི་དོན་ལ་ནོར་འཁྲུལ་མི་འདུག་ཀྱང་རྗོད་བྱེད་ཚིག་ཚོགས་མང་ཉུང་ཅི་རིགས་པས་སྐབས་འགར་ཟློས་སྐྱོན་ལྟ་བུ་དང་། སྐབས་རེར་འབྲུ་གཉེར་མ་ཐུབ་པ་སོགས་ཁོངས་སྙོམས་པ་ཞིག་བྱུང་མི་འདུག་ཅིང་། སྤྱིར་ཡང་སྐབས་དེར་རང་ཉིད་ལོ་ན་ཕྲ་ཞིང་སྦྱངས་སྟོབས་ཀྱི་ཤེས་ཡོན་ཞན་པ་སོགས་ཀྱིས་བལྟ་གོ་ཆོད་པ་ཁྱེར་བདེ་དོན་ཚང་ཞིག་ཀྱང་བྱུང་མི་འདུག་པས་ན་ཕྱིན་ཆད་ཡིག་རྒྱུན་མི་འཕེལ་བར་བྱ་སེམས་ཁོ་ནའི་ངང་གཞན་རྐྱེན་འདུ་འཛི་མང་པོས་ཡེངས་ཏེ་རིམ་ལུས་སུ་གྱུར། ཕྱིས་སུ་རང་ལྟོས་སློབ་ཚོགས་བླ་སྤྲུལ་ཁ་ཤས་ན་རང་རེའི་འབྲུ་འགྲེལ་འདི་ལ་བལྟ་བདེ་དོན་ཚང་ཞིག་ངེས་པར་མཐའ་སྐྱོང་ཡོད་པ་ཞེས་ཡང་ཡང་དྲན་བསྐུལ་བྱེད་མཁན་ཁ་ཤས་ཤིག་བྱུང་བ་དང་། ད་ལྟ་སྔ་འགྱུར་བཀའ་མའི་ཕྲིན་ཆོག་རྒྱབ་ཆོས་བཅས་སྤར་འདེབས་སྐབས་སུ་སྡོམ་འགྲེལ་འདི་ཡང་སྡེབས་སུ་ཚུད་ན་རྨོངས་པ་རང་འདྲ་འགའ་ལ་ཅུང་ཟད་ཕན་ཐོགས་ཡོང་རྒྱུའི་རེ་བ་བཅས་ཏེ། ལྷ་རིགས་ཤཱཀྱའི་དགེ་བསྙེན་རྣལ་འབྱོར་སྤྱོད་པ་འཇིགས་བྲལ་ཡེ་ཤེས་རྡོ་རྗེས་རང་ལོ་བརྒྱད་ཅུ་གྱ་གཅིག་པ་ཤིང་བྱི་ཧོར་ཟླ་བཅུ་པའི་ཤེས་རབ་ཀྱི་ཆ་ལ་ནུབ་ཕྱོགས་དགའ་བ་འཁྱིལ་བའི་ལྗོངས་སུ་བསྐྱོད་སྡོང་སྐབས་ཞིབ་མོར་དཔྱད་པའི་སྒོ་ནས་སྦྱར་བ་ལས། ཡི་གེ་པ་ནི་རང་གི་གམ་དུ་ཉེ་བར་གནས་པ་བློ་གསལ་བསོད་ནམས་ནོར་བུ་ནས་རྩོམ་གཞིའི་ཟིན་བྲིས་ཅི་རིགས་པར་བཏབ་ཅིང་། ཡོངས་སུ་རྫོགས་པར་སྔོན་དགའི་བག་ཆགས་བཟང་པོ་ལས་འཕྲོ་མཐུད་པ་ལ་མི་ཞུམ་པ་རང་སློབ་མོན་གྱི་སྔགས་བཙུན་ཀུན་བཟང་དབང་འདུས་ཀྱིས་བགྱིས་པའོ། །འདིས་ཀྱང་མཆོག་གསང་པདྨའི་རིང་ལུགས་ནམ་ཡང་མི་ཉམས་པར་གོང་ནས་གོང་དུ་འཕེལ་ཞིང་རྒྱས་ཏེ་རྟག་ཁྱབ་ལྷུན་གྲུབ་འབྱུང་བའི་ཆ་རྐྱེན་དམ་པར་གྱུར་ཅིག །སརྦ་དཱ་མངྒ་ལཾ།། །།

སྡོམ་པ་གསུམ་གྱི་དྲིས་ལན་ཉི་འོད་སྣང་བ། རྨེ་བ་མཁན་ཆེན་བསོད་ནམས་ཆོས་འགྲུབ།

སྡོམ་པ་གསུམ་གྱི་དྲིས་ལན་ཉི་འོད་སྣང་བ་ཞེས་བྱ་བ་བཞུགས། ལགས། དགོངས་དོན་དང་པོ་ལྟར་ན་སྤྱིར་རྒྱལ་བའི་བསྟན་པ་ནི་རྗོད་བྱེད་ལུང་དང་བརྗོད་བྱ་རྟོགས་པ་གཉིས་དང་། དེ་ལའང་རྒྱུ་ལམ་དུ་བྱེད་པ་མདོ་དང་འབྲས་བུ་ལམ་དུ་བྱེད་པ་སྔགས་ཀྱི་ཐེག་པ་གཉིས། དེའང་གནས་སྐབས་དྲང་དོན་དང་མཐར་ཐུག་ངེས་དོན་གཉིས་དང་། དེའང་ཟབ་མོ་ལྟ་བའི་ཆ་དང་རྒྱ་ཆེན་སྤྱོད་པའི་ཆ་གཉིས་རེ་དབྱེར་ཡོད་ཅིང་འཇིག་རྟེན་མཐུན་འཇུག་གི་ཚུལ་གྱི་ལྷ་མིའི་ཐེག་པ་རྣམས་དང་འཇིག་རྟེན་ལས་འདས་པའི་ཐེག་པ་རྣམས་ལ་དྲང་དོན་དགོངས་པ་ཅན་སོགས་ཀུན་ཀྱང་དངོས་དང་བརྒྱུད་པའི་སྒོ་ནས་མཐར་ཐུག་སངས་རྒྱས་འཐོབ་པའི་རྒྱུར་མི་འགྲོ་བ་མེད་པས་གནས་སྐབས་སོ་སོའི་གདུལ་བྱ་རང་རང་གི་ངོར་བདེན་ཞིང་གཙོ་ཆེ་ལ། ཁྱད་པར་དུ་བརྗོད་བྱ་རྟོགས་པའི་ཆོས་རྣམས་སྡོམ་པ་གསུམ་དུ་བསྡུས་ནས་ཉམས་སུ་ལེན་པས་བསྟན་པ་ཀུན་གྱི་གནད་བསླབ་པ་གསུམ་ལ་ཚང་དགོས་པས་སྡོམ་པ་གསུམ་པོའང་གཙོ་ཆེ་ཆུང་འདྲ་སྟེ། རྗོད་བྱེད་ཀྱི་ཐེག་པ་ལ་རྒྱུ་འབྲས་གཉིས་སུ་ངེས་པ་ལྟར་བརྗོད་བྱ་སྡོམ་པ་གསུམ་ལའང་སྔ་མ་སྔ་མ་རྒྱུད་དང་ཕྱི་མ་ཕྱི་མ་འབྲས་བུ་སྔ་མ་ཡན་ལག་དང་ཕྱི་མ་ཉིང་ལག་གམ་རྟེན་དང་བརྟེན་པ་སོགས་ཀྱི་འབྲེལ་བའི་ཕྱིར་རོ། །བསྟན་པ་གོ་རིམ་དང་བསྟུན་ནའང་འདུལ་བ་ནི་འཁོར་ལོ་དང་པོའི་བརྗོད་བྱ་བདེན་པ་བཞི་དང་ལྷག་པའི་ཚུལ་ཁྲིམས་ཀྱི་བསླབ་པ་ཡིན་པས་དེ་རྩ་བར་གཟུང་དགོས་ཏེ། འདུལ་བསྟོད་ལས། ཇི་ལྟར་འདི་ན་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། དེ་བཞིན་དམ་ཆོས་ཚོགས་རྣམས་ཀུན་གྱི་ཡང་། །གཞི་དང་རྩ་བ་འདུལ་བ་ཡིན་པར་བཤད། །ཅེས་བསྟན་པ་ཀུན་གྱི་རྩ་བར་གསུངས་ཤིང་། ཨུཏྤ་ལས་ཞུས་པར། གང་ན་ལས་ཡོད་ཅིང་དེ་ལ་ནན་ཏན་བྱེད་པ་དེ་ན་བསྟན་པ་ཡོད་ཅིང་གང་ན་ལས་མེད་ཅིང་དེ་ལ་ནན་ཏན་མི་བྱེད་པ་དེ་ན་བསྟན་པ་མེད་ཅེས་གསུངས་པའི་ཕྱིར་རོ། །བསྟན་པ་འཛིན་པའི་རྟེན་གྱི་དབང་དུ་བྱེད་ནའང་སྤྱོད་འཇུག་ལས། བསྟན་རྩ་དགེ་སློང་ཉིད་ཡིན་ན། །ཞེས་པ་དོན་དམ་པའི་དགེ་སློང་ཡང་ཡིན་མོད་སོ་སོར་ཐར་པའི་དགེ་སློང་ཡང་ཡིན་ཏེ། ཇི་སྐད་དུ། ཐུབ་བསྟན་རིན་ཆེན་སྒྲོན་མེ་མཆོག །འབར་བའི་སྣོད་དུ་དཀའ་ཐུབ་ཅན། །ངུར་སྨྲིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་ཕྱིར་རོ། །ཞེས་དང་། གང་ན་འདུལ་བ་འཛིན་པ་ཡོད་པ་དེ་ན་དེ་བཞིན་གཤེགས་པའི་ཕྲིན་ལས་ཆུང་བ་ཡིན་ནོ། །ཞེས་སོགས་གསུངས་པའི་ཕྱིར། གང་ཟག་གི་བློ་རིགས་ཀྱི་བསྟན་པ་ལ་འཇུག་རིམ་གྱི་དབང་དུ་བྱེད་ན། ལམ་མས་སྦྱངས་དང་ལས་དང་པོ་པ་རྣམས་ལ་ནི་འཁོར་ལོ་དང་པོའི་དགོངས་དོན་སྤྱོད་པ་སྤོང་བདུན་གྱི་ཚུལ་ཁྲིམས་དང་སྒོམ་པ་བདེན་བཞིའི་བླང་དོར་དང་ལྟ་བ་གང་ཟག་གི་བདག་མེད་པ་ཙམ་དེ་གཙོ་ཆེ་སྟེ་བློ་དམན་འཇུག་བདེ་ཞིང་ལམ་གོང་མའི་སྒོའམ་དྲང་བྱེད་ཡིན་པའི་ཕྱིར། འདུལ་བ་ལས་ཀྱང་། སེམས་རྟ་ཁ་བླན་དཀའ་བ་ལ། །མཐུན་པའི་གཟིར་རྣོན་བརྒྱ་བ་ཡི། །སྲབ་ནི་སོ་སོར་ཐར་འདི་ཡིན། །ཞེས་གང་ཟག་གི་རྒྱུད་འདུལ་བའི་ཐབས་དང་པོ་ཡིན་པར་གསུངས་སོ། །དེ་ལྟར་ན་སོ་ཐར་དང་དེའི་སྡོམ་པ་ནི་རྩ་བའམ་གཞི་ཡིན་ལ་བྱང་སེམས་དང་དེའི་སྡོམ་པ་ནི་གྲོགས་སམ་ཐབས་ཡིན་ལ། རྡོ་རྗེའི་ཐེག་པ་དང་དེའི་སྡོམ་པ་ནི་སྙིང་པོའམ་འབྲས་བུ་ཡིན་པས་མཐར་ཐུག་ཐེག་པ་གཅིག་པུ་རྡོ་རྗེའི་ཐེག་པའི་ལམ་འབྲས་མཐར་ཐུག་འགྲུབ་པ་ལ་ནི་དོན་གྱི་གནད་ཐམས་ཅད་དངོས་དང་བརྒྱུད་ནས་ཚང་དགོས་ལ། གནས་སྐབས་ཀྱི་ཐེག་པ་རང་རང་ལ་ལྟོས་ནས་ཉན་རང་ལྟ་བུའི་གང་ཟག་གི་རང་ལམ་གྱི་འབྲས་བུ་ཉི་ཚེ་བ་འཐོབ་པ་ལ་ནི་ལམ་གོང་མ་གཉིས་ཀྱི་བསླབ་བྱ་ཐུན་མོང་མ་ཡིན་པ་རྣམས་མི་དགོས་པར་རང་ལམ་ནོར་འཁྲུལ་མེད་པ་དེས་ཆོག །བྱང་ཆུབ་སེམས་དཔའི་འབྲས་བུ་འབྲིང་འཐོབ་པ་ལ་སྔགས་ཀྱི་ལྟ་སྒོམ་སྤྱོད་པ་ཐུན་མིན་དེ་མི་དགོས་པར་སེམས་བསྐྱེད་སོགས་རང་ལམ་གནད་མ་འཆུག་པ་དེ་ཉིད་ཀྱིས་ཆོག་མོད། འོག་མ་ཉན་ཐོས་ཀྱི་སྤྱོད་པ་འདུལ་བའི་བསླབ་བྱ་རྣམས་ཀྱང་དངོས་སམ་བརྒྱུད་ནས་ཉམས་སུ་བླང་དགོས། རིག་པ་འཛིན་པའི་ལམ་འབྲས་མཐར་ཐུག་འཐོབ་པ་ལ་ནི་འོག་མ་གཉིས་ཀྱང་ཞར་ལ་ཐོབ་པའམ་སྡོམ་གསུམ་རིམ་གྱིས་ནོད་དེ་དངོས་སུ་ཚང་བར་བསྒྲུབ་དགོས་སོ། །འོན་ཀྱང་སྦྱངས་པ་སྔོན་སོང་དང་ལམ་ཐོད་རྒལ་བའི་གང་ཟག་དབང་རྣོན་ཡིན་ན་སྨིན་གྲོལ་ཟབ་མོའི་ལམ་གོང་མ་ལ་བསྙེགས་ཏེ་དེ་ཚུལ་བཞིན་ཤེས་པས་གཙོ་བོར་གཟུང་ན་འོག་མའི་སྤང་བླང་གིས་གནད་ཐམས་ཅད་ཞོར་ལ་རྫོགས་པ་ཡིན་པས་ལམ་འོག་མ་སྔོན་དུ་འགྲོ་དགོས་པར་མ་ངེས་ཏེ། དགེ་བསྙེན་དང་དགེ་ཚུལ་གྱི་སྡོམ་པ་སྔོན་དུ་མ་སོང་བར་ཐལ་བྱུང་དུ་བསྙེན་རྫོགས་བླངས་ན་ཐོབ་པར་བཤད་པ་བཞིན་ནོ། །གཞན་དྲངས་པ་སོགས་ཀྱི་དགོས་པ་ཡོད་ན་འོག་མའང་བླངས་ཏེ་ཕྱིའི་ཀུན་སྤྱོད་སོ་ཐར་ལྟར་བྱེད་དགོས་པ་སོགས་ནི་དམིགས་བསལ་ཡིན་ནོ། །མདོར་ན་ལས་དང་པོ་པ་བློ་དམན་རྣམས་ལ་སོར་སྡོམ་གཙོ་ཆེ་སྟེ་རང་རྒྱུད་སྦྱངས་པ་འདི་དང་པོ་ཆོས་ལ་འཇུག་པའི་གཞི་ཡིན་པའི་ཕྱིར། དཔེར་ན་བྱང་སེམས་ལས་དང་པོ་པས་ཀྱང་དང་པོ་ཉེས་སྤྱོད་སྡོམ་པའི་ཚུལ་ཁྲིམས་གཙོ་བོར་སྲུང་བ་དང་། རིག་པ་འཛིན་པ་དང་པོའི་ལས་ཅན་རྣམས་ཀྱང་དང་པོ་སྤྱིའི་དམ་ཚིག་བརྟུལ་ཞུགས་ཉེར་ལྔ་སོགས་ཉེས་སྤྱོད་སྡོམ་པ་གཙོ་བོར་སྲུང་བར་བྱེད་དགོས་པ་བཞིན་ཏེ་འདུལ་སྡོམ་ཇི་བཞིན་ཐུབ་ན་བྱང་སྡོམ་སླ་ཞིང་། བྱང་སྡོམ་བསླབ་གསུམ་བསྲུངས་ན་སྔགས་ལ་འཇུག་སླ་ཞིང་དམ་ཚིག་ཐུབ་ཅིང་ཚེགས་ཆུང་ངུས་ཚོགས་རྫོགས་པར་འགྱུར་རོ། །བློ་ན་འཕར་བའི་དབང་འབྲིང་གཞན་དོན་ནུས་པའི་ཐེག་ཆེན་རིགས་ཅན་རྣམས་ལ་བྱང་སྡོམ་གཙོ་ཞིང་། མདོ་ལམ་ཡུན་རིང་པའི་སྒྲུབ་མི་ནུས་པའམ་སྔགས་ལ་མོས་པ་ཆེ་ཞིང་སྒྲུབ་ནུས་པའི་གང་ཟག་ཤིན་ཏུ་བློ་ཆེན་ལས་འཕྲོ་ཅན་རྣམས་ལ་སྔགས་སྡོམ་གཙོ་ཆེ་སྟེ། དབང་རྣོན་གྱིས་ཚེ་འདིར་འགྲུབ་པའི་ཉེ་ལམ་དང་དོན་གཉིས་རླབས་ཆེན་འགྲུབ་པའི་ཐབས་ཤེས་ཁྱད་པར་ཅན་གྱི་ཆོས་ཡིན་པའི་ཕྱིར་དཔེར་ན་ཨིནྡྲ་བྷུ་ཏི་བཞིན་ནོ། །རྒྱུད་ལས། གསང་སྔགས་ཚུལ་ཆེན་ཤིན་ཏུ་རྨད་བྱུང་བ། །ལམ་གྱི་ནང་ནས་ཉེ་ལམ་ཆེན་པོ་དང་། །ཐབས་ཀྱི་ནང་ནས་མ་ནོར་དམ་པ་སྟེ། །ཤེས་རབ་ནང་ནས་ཤེས་རབ་ཁྱད་པར་ཅན། །ཞེས་དང་། རྟོགས་བྱ་དེ་ཁོ་ན་ཉིད་དང་ཐོབ་བྱ་སངས་རྒྱས། འཐོབ་བྱེད་བྱང་ཆུབ་ཀྱི་སེམས་སོགས་མདོ་སྔགས་གཉིས་དོན་གཅིག་ཀྱང་། དེ་དག་རྒྱུད་ལ་མྱུར་དུ་སྐྱེ་བའི་ཐབས་མ་རྨོངས་པ་དང་ཐབས་མང་བ་དང་དཀའ་བ་མེད་པ་དང་། དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་འཕགས་ཆོས་བཞི་ཚུལ་གསུམ་པའི་སྒྲོན་མེ་སོགས་ལས་མང་དུ་གསུངས་སོ། །རང་ཉིད་ལ་མཆོག་གི་ཉེ་ལམ་སྒྲུབ་པའི་ནུས་པ་ཡོད་བཞིན་དེ་དོར་ནས་དམན་ལམ་སྒྲུབ་པ་དོན་མེད་དེ་རྩ་ལྟུང་ཆེན་པོ་འབྱུང་བ་དང་རིགས་ཉམས་་པ དང་ཟབ་མོའི་སྐལ་བ་འཆད་པའི་ཕྱིར། ནུས་པ་མེད་ཅིང་མོས་པ་ཞན་ན་འོག་མ་ནས་སློབ་དགོས་པ་སོགས་སོ། །དེས་ན་བཀའ་ཐམས་ཅད་ཀྱང་གང་ཟག་གི་བློའི་བྱེ་བྲག་ལས་རིས་ཐ་དད་པ་དུ་མར་གྱུར་པ་ཡིན་ཏེ། དགོངས་པ་ལུང་སྟོན་ལས། རྟོག་པ་མེད་ཅིང་འཁྲུག་མེད་པ། །ཡིད་འོང་རྡོ་རྗེའི་གསུང་གཅིག་པུ། །གདུལ་བྱ་སོ་སོའི་དབང་གིས་ནི། །བྱེ་བྲག་མང་པོར་གྱུར་པ་ཡིན། །ཞེས་གསུངས་པའི་ཕྱིར། དེ་ལྟར་འཁོར་ལོ་གསུམ་པོའི་སྤྱོད་པའི་ཆ་རྣམས་ཀྱི་འཇུག་རིམ་དང་གཙོ་ཕལ་རྣམས་གདུལ་བྱའི་བློ་དང་བསྟུན་དགོས་པ་བཞིན་ལྟ་བའི་ཆ་རྣམས་ཀྱང་ལས་དང་པོ་པའི་གང་ཟག་རྣམས་ལ་འཁོར་ལོ་དང་པོའི་བསྟན་དོན་འདུས་བྱས་མི་རྟག་པ་དང་། གང་ཟག་གི་བདག་མེད་པ་དང་བདག་དེས་ཕུང་པོ་སྟོང་པ་ཙམ་གཙོ་ཆེ་ཞིང་། དེ་ནས་བློ་ཅུང་ཟད་སྨིན་པ་ལ་ཆོས་ཐམས་ཅད་བདག་གཉིས་ཀྱིས་སྟོང་པ་ཉིད་འཁོར་ལོ་བར་པའི་བསྟན་དོན་མཐའ་བཞི་བྲལ་བའི་ལྟ་བ་དང་། དེ་ནས་བློ་ཤིན་ཏུ་སྨིན་པའི་གང་ཟག་ལ་ཐ་མའི་བསྟན་དོན་རིག་སྟོང་བདེ་བར་གཤེགས་པའི་སྙིང་པོ་དང་སྔགས་ཀྱི་དབང་བཞི་པའི་ལྟ་བ་འོད་གསལ་བའི་ཡེ་ཤེས་བདེ་སྟོང་ལྷན་ཅིག་སྐྱེས་པའི་དོན་དམ་གཙོ་ཆེ་སྟེ་ངེས་དོན་མཐར་ཐུག་ཡིན་པའི་ཕྱིར། དེ་ཡང་སྨིན་བྱེད་ཀྱི་དབང་དང་དམ་ཚིག་དང་གྲོལ་བྱེད་ཀྱི་ལམ་རིམ་པ་གཉིས་ཀྱི་ཐབས་ལ་མཁས་ན་འདིའི་ལྟ་བ་སྟོང་པ་ཉིད་དང་རང་བྱུང་གི་ཡེ་ཤེས་ཟུང་དུ་འཇུག་པ་དེ་ཉིད་ཚེ་འདིར་འགྲུབ་ནུས་ལ། སྤྲོས་པ་ཐམས་ཅད་འགོག་པ་དབུ་མའི་ལྟ་བ་ཟབ་ཅིང་བཟང་མོད་མདོ་ལམ་ཡིན་པས་ཇི་ལྟར་མྱུར་ཀྱང་གྲངས་མེད་གསུམ་དུ་ཚོགས་གཉིས་མ་བསགས་པར་ལྟ་བ་དེ་མཐར་ཕྱིན་པར་རྟོགས་མི་ནུས་ཏེ། ཇི་སྐད་དུ། ཇི་སྲིད་དགེ་བའི་རྩ་བ་དེ་ནི་མ་རྫོགས་པར། །དེ་སྲིད་སྟོང་ཉིད་དམ་པ་དེ་ནི་རྟོགས་མི་བྱེད། །ཅེས་གསུངས་པའི་ཕྱིར། འཁོར་ལོ་དང་པོ་གཉིས་ཀྱི་བདག་མེད་དང་སྟོང་ཉིད་བཅུ་དྲུག་སོགས་ཀྱང་ཕྱི་མར་འདུ་ཞིང་རྣམ་གྲངས་པའི་དོན་དམ་དེ་དག་ཀྱང་རྣམ་གྲངས་མིན་པའི་དོན་དམ་ཐ་མའི་བརྗོད་བྱ་མཐར་ཐུག་ཁས་ལེན་ཀུན་བྲལ་འོད་གསལ་བའི་ཡེ་ཤེས་ཉིད་དུ་རོ་གཅིག་པར་འགྱུར་རོ། །དེས་ན་འཁོར་ལོ་བར་ཐའི་སྟོང་རྐྱང་དང་སྙིང་པོ་བསྟན་པ་གཉིས་ཀྱང་གདུལ་བྱའི་བློའི་རྟག་ཆད་བཟློག་ཅིང་དགོས་དབང་ཙམ་ལས་གཉིས་ཀ་གནད་གཅིག་ཏུ་འབབ་སྟེ། བར་བའི་དུས་སུ་ཕྱི་མའི་སྙིང་པོ་དང་ཡེ་ཤེས་སོགས་ཀྱང་གབ་ཅིང་སྟོང་པ་ཉིད་གཙོ་བོར་བསྟན། ཕྱི་མའི་དུས་སྙིང་པོ་འོད་གསལ་རྩལ་དུ་བཏོན་ནས་གསུངས་པས་བར་བའི་དུས་སུའང་ཡེ་ཤེས་ཀྱི་སྣང་ཆ་ཐ་སྙད་དུའང་མེད་པ་མ་ཡིན་ཞིང་། ཕྱི་མ་སྙིང་པོ་སྟོན་པ་ནའང་གཞི་སྟོང་པ་ཆེན་པོ་ལས་མ་འདས་པར་རིག་པའི་ཡེ་ཤེས་བདེན་སྟོང་ཉིད་རྩལ་དུ་བཏོན་ནས་བསྟན་པ་ཤེས་དགོས་པ་སོགས་བཀའ་དང་དགོངས་འགྲེལ་ཐམས་ཅད་དྲང་ངེས་སོགས་ཞིབ་པར་མ་ཕྱེས་ན་རྟག་ཆད་དུ་ལྷུང་བ་དང་སྤང་བླང་གི་ཉེས་པར་འགྱུར་བ་ཡིན་ནོ། ༈ །ཡང་སྡོམ་པ་གསུམ་པོ་གང་ཟག་གཅིག་གི་རྒྱུད་ལ་ཇི་ལྟར་གནས་ཞེས་གསུངས་པ་ལ། སོ་སོའི་དབང་དུ་ནི་བཤད་མ་ཐག་པ་ལྟར་དང་། སྡོམ་པ་གསུམ་རིམ་གྱིས་ནོད་པའི་གསུམ་ལྡན་རྡོ་རྗེ་འཛིན་པའི་རྒྱུད་གཅིག་ལ་གསུམ་པོ་ཐོབ་ལ་མ་ཉམས་པར་ལྡན་ཚུལ་ལ་བཞེད་ཚུལ་མང་པོ་རྒྱ་བོད་གཉིས་ཀར་བྱུང་ཡང་རྙིང་མ་སོགས་ཕལ་ཆེས་ངོ་བོ་གཅིག་ལ་ལྡོག་པ་ཐ་དད་དུ་གནས་པར་འདོད་པ་འདི་ཤེས་ན་བདེའམ་སྙམ་པས། འབུམ་ལྔའི་ལུང་ལས་རྡོ་ཡི་རིགས་ཀྱི་སོགས་ལྕགས་ཟངས་དངུལ་གསུམ་ལ་འགྱུར་རྩིས་བཏབ་པས་ཐམས་ཅད་གསེར་གྱི་ངོ་བོ་གཅིག་ཏུ་གནས་འགྱུར་ཡང་གསུམ་པོའི་རིན་ཐང་སོགས་ཀྱི་ལྡོག་པ་ཙམ་ཐ་དད་དུ་མིང་གི་དབྱེར་མེད་པ་ལྟར་སྡོམ་པ་གསུམ་ཀྱང་ངོ་བོ་ཤེས་པར་འདོད་དགོས་པས་དོན་གསུམ་པོ་དེའི་ངོ་བོ་འཛིན་པ་ནི་གཙོ་སེམས་ཡིད་ཤེས་ཁོ་ན་ཡིན་པས་ངོ་བོ་ལ་གཞི་མཐུན་ཡོད་པ་མི་འགལ་ལ། ལྡོག་པ་ལ་གཞི་མཐུན་མི་སྲིད་པས་གསུམ་པོའི་སྐབས་སོ་སོར་ལེན་ཡུལ་ཆོ་ག་དུས་ཚོད་ཕན་ཡོན་ཉམས་ན་གསོར་ཡོད་མེད་སོགས་ཀྱི་ལྡོག་པ་ཐ་དད་དུ་ཡོད་པས་གསུམ་ལྡན་ཤི་བའི་ཚེ་དང་གཏོང་རྒྱུ་བྱུང་བའི་ཚེ་ཡང་སོར་སྡོམ་གྱི་ལྡོག་པ་དེ་གཏོང་ལ། གསུམ་ལྡན་གྱིས་མི་བསད་པ་ལ་ཡན་ལག་བཞི་ཚང་ན་ཉམས་པའི་ཆ་ནས་གསུམ་ཀ་ཉམས་ཀྱང་གཏོང་བའི་ཆ་ནས་སྲོག་གཅོད་སྤོང་བའི་སྡོམ་པ་དེ་གཏོང་ཡང་ཐམས་ཅད་གཏོང་བ་མིན་ཏེ། ཡན་ལག་གཞན་ལ་གཏོང་རྒྱུ་མ་བྱུང་ཞིང་ལྟུང་བ་གཅིག་བྱུང་བས་ཐམས་ཅད་ཅིག་ཅར་གཏོང་ན་སྡོམ་པ་གཅིག་བླངས་པས་ཐམས་ཅད་ཅིག་ཅར་ཐོབ་པར་འགྱུར་བའི་ཕྱིར་རོ། །དེས་ན་གཙོ་སེམས་ཡིད་ཤེས་གཅིག་གི་འཁོར་དུ་དོན་གསུམ་པོའི་ཁྱད་པར་འཛིན་པའི་སེམས་བྱུང་རིགས་མི་གཅིག་པའི་ལྡོག་པ་གསུམ་རིམ་ཅན་དུ་འབྱུང་བའང་མི་འགལ་ཏེ། ངེས་འབྱུང་གི་བསམ་པས་ཟིན་པའི་གཞན་གནོད་གཞི་བཅས་སྤོང་བའི་སོར་སྡོམ་གྱི་རིགས་ཅན་གྱི་སེམས་བྱུང་གཅིག་དང་། གཞན་ཕན་དོན་དུ་གཉེར་བ་བྱང་སྡོམ་གྱི་རིགས་ཅན་སེམས་བྱུང་གཅིག་དང་། སྣང་སྲིད་དག་མཉམ་ཆེན་པོ་ཐབས་ཤེས་ཁྱད་པར་ཅན་སྔགས་སྡོམ་གྱི་རིགས་ཅན་སེམས་བྱུང་གཅིག་སྟེ་གསུམ་གྱི་ལྡོག་པ་དབྱེར་རུང་བའི་ཕྱིར། དཔེར་ན་བུམ་པའི་ལྟོ་ལྡིར་བ་དང་འདུས་བྱས་ཡིན་པ་དང་། མི་རྟག་པ་ཡིན་པ་གསུམ་པོ་བུམ་པ་ཙམ་དུ་ངོ་བོར་གཅིག་ཀྱང་ལྡོག་པ་ཐ་དད་དུ་དབྱེར་ཡོད་ཅིང་། གཙོ་སེམས་ཀྱིས་བུམ་པའི་ངོ་བོ་ཙམ་འཛིན་སེམས་བྱུང་གིས་དོན་གྱི་ཁྱད་པར་རྣམས་འཛིན་པ་བཞིན་ཏེ། རྣམ་ངེས་ལས། དེ་ལ་དོན་མཐོང་རྣམ་པར་ཞེས། །དེ་ཡི་ཁྱད་པར་སེམས་ལས་བྱུང་། །ཞེས་པ་ལྟར་རོ། །སྤྱིར་ཡང་སྡོམ་པ་གསུམ་གྱི་ངོ་བོ་ལ་ལྟོས་ནས་སྡོམ་པ་ཐོབ་པ་དང་སྐྱེ་ཚུལ་སོགས་འདི་ལྟར་ལགས་ཏེ། དཔེར་ན་དཀོན་མཆོག་གསུམ་ལ་ཡིད་ཆེས་ཀྱི་དད་པ་སྐྱེས་ན་དགེ་བསྙེན་གྱི་སྡོམ་པ་སྐྱེ་བ་ཡིན། ངན་སོང་གསུམ་ལ་སྐྲག་པས་ཡིད་འབྱུང་སྟེ་བསླབ་པ་སྲུང་ཚེ་སྡོམ་པ་གནས་པ་དང་ཆགས་པ་ཡིན། སྤྱིར་འཁོར་བ་དང་སྒོས་གྲུ་དེ་ཇི་འདྲ་ཁྱིམ་དེ་འདྲ། ཞེས་པའི་ཁྱིམ་ལ་དུར་ཁྲོད་ཙམ་དུ་འཇིགས་ཚེ་དགེ་ཚུལ་གྱི་སྡོམ་པ་སྐྱེ་ནུས་ཡིན། ཁྱིམ་ནས་སྦྲུལ་ཤུབས་འདོན་ལྟར་བྱས་ནས་འདོད་ཡོན་ལ་ཞེན་པ་ཆུང་བ་དང་བསླབ་པ་མིག་འབྲས་བཞིན་སྲུང་ཚེ་སྡོམ་པ་གནས་ཤིང་ཆགས་པ་ཡིན་ཏེ། དེ་ལྟར་དགེ་ཚུལ་གྱུར་མ་ཐག །འདི་ལ་ཁྱིམ་པ་ཐམས་ཅད་ཀྱིས། །ཕྱག་འཚལ་སྨོན་པར་འགྱུར་བ་སྟེ། །གང་ཕྱིར་ཁྱིམ་གྱི་འཆིང་གྲོལ་ཕྱིར། །ཞེས་གསུངས། འཁོར་བ་མཐའ་དག་ལ་སྙིང་པོ་མེད་ཅིང་མེའི་འོབས་ལྟ་བུར་འཇིགས་ཤིང་། དགེ་ཚུལ་ལས་ཀྱང་ལྷག་པར་ཕྱི་འདོད་ཡོན་དང་ནང་སེམས་ཅན་ལ་མི་རྟག་སྡུག་བསྔལ་སོགས་ཤེས་ནས་སྐྱུག་བྲོ་བ་བྱུང་ཚེ་དགེ་སློང་གི་སྡོམ་པ་སྐྱེ་བ་ཡིན། འདོད་པ་དང་བྲལ་ཞིང་ཐར་ལམ་ལ་འདུན་ནས་གཡག་རྔའི་རྩེ་མོ་བཞིན་དུ་བསླབ་པ་སྲུང་ཚེ་སྡོམ་པ་གནས་ཤིང་ཆགས་པ་ཡིན་ཏེ། འདུལ་བ་ལས། དགེ་བ་སློང་དང་ཟས་སློང་དང་། །ཉེ་བར་ཞི་དང་ཆགས་བཅོམ་དང་། །ཡིད་འོང་ཕྱིར་ན་དགེ་སློང་ཡིན། །ཞེས་གསུངས། གཞན་ལ་སྙིང་རྗེ་ལྷག་པར་སྐྱེས་ན་བྱང་སྡོམ་སྐྱེ། །གཞན་དོན་དུ་རྫོགས་བྱང་དོན་དུ་གཉེར་ནས་སྨོན་འཇུག་གི་བསླབ་པ་སྲུང་ཚེ་སྡོམ་པ་གནས་པ་དང་ཆགས་པ་ཡིན། དེའང་དབང་བསྐུར་ཐོབ་ནས་ཚེ་འདིར་རྫོགས་བྱང་ཐོབ་པར་འདོད་ཚེ་སྔགས་སྡོམ་སྐྱེ། སྒོ་གསུམ་རྒྱལ་བའི་སྐུ་གསུང་ཐུགས་སུ་མོས་པ་བརྟན་ནས་དམ་ཚིག་སྲོག་ལྟར་སྲུང་ཚེ་སྔགས་སྡོམ་གནས་ཤིང་ཆགས་པ་ཡིན་ནོ། །དེ་ལྟར་མ་ཡིན་པར་རང་རང་གི་ཆོ་གས་རྟགས་ལེན་པ་དང་བསྲུང་བྱ་ཁས་བླངས་ནས་ཅི་མི་སྙམ་དུ་འདུག་པ་ལ་སྡོམ་པ་མཚན་ཉིད་པ་ཡོད་པར་མ་གསུངས་སོ། །སོ་ཐར་གྱི་སྡོམ་པ་བྱེ་བྲག་སྨྲ་བ་ལྟར་རྣམ་རིག་མིན་པའི་གཟུགས་ཅན་བེམ་པོར་འདོད་ན་ནི་སྡོམ་པའི་ངོ་བོ་གནས་འགྱུར་མི་རུང་སྟེ་བེམ་པོ་ཤེས་པ་རུ་འགྱུར་མི་སྲིད་པའི་ཕྱིར་དང་། འདིའི་སྡོམ་པ་ལུས་ངག་ལས་སྐྱེ་ཞིང་འབྱུང་གྱུར་གྱི་རྡུལ་དྭངས་མ་ཞིག་རྟེན་དུ་འདོད་པས་ཤི་འཕོས་ཚེ་འབྱུང་བཞིའི་ཕུང་པོ་འདོར་བས་ཀྱང་གཏོང་བའི་རྒྱུ་མཚན་ནོ། །གནས་འགྱུར་འདོད་དགོས་ཏེ་གསུམ་པོ་བླངས་པ་བཞིན་སོ་སོར་ངོ་བོ་ཐ་དད་དུ་འདོད་ན་རྡོ་རྗེ་འཛིན་པ་ཡིན་ན་ཉན་ཐོས་ཀྱི་དགེ་སློང་ཡིན་པ་དང་། བྱང་ཆུབ་སེམས་དཔའ་ཡིན་ན་ཉན་ཐོས་ཡང་ཡིན་དགོས་པ་སོགས་ཀྱི་སྐྱོན་དུ་འགྱུར་ཞིང་བྱང་སེམས་རྒྱུད་ལྡན་གྱི་གང་ཟག་ལ་རང་དོན་དོན་གཉེར་གྱི་བློ་ཡོད་པར་ཐར་བར་འགྱུར་དགོས་པའི་ཕྱིར། དཔེར་ན་ལྕགས་ཟངས་དངུལ་གསུམ་ལ་འགྱུར་རྩིས་བཏབ་པས་གསེར་དུ་བསྒྱུར་ཡང་གསུམ་པོ་གནས་མ་གྱུར་པར་ངོ་བོ་ཐ་དད་དུ་ཡོད་ན་གསེར་ཡིན་ན་ལྕགས་ཀྱང་ཡིན་དགོས་པ་སོགས་ཀྱི་སྐྱོན་འབབ་པ་བཞིན་ནོ། །ཡང་ཚིགས་གསུམ་རིམ་ཅན་དུ་བླངས་པའི་དགེ་སློང་གི་རྒྱུད་ལ་དགེ་བསྙེན་དགེ་ཚུལ་གྱི་བསླང་བའི་ལྡོག་ཆ་རྣམས་ཐོབ་ལ་མ་ཉམས་པར་ཡོད་ཀྱང་ཐམས་ཅད་སྤོང་སེམས་གཅིག་གི་ངོ་བོར་གནས་གྱུར་ཅིང་ཡོན་ཏན་ཡར་ལྡན་དུ་གྱུར་ཟིན་པའི་ཕྱིར་དགེ་སློང་ཡིན་ན་དགེ་བསྙེན་ཀྱང་ཡིན་དགོས་པ་དང་ལྟུང་བ་གཅིག་བྱུང་ན་ཉེས་པ་གསུམ་ཅིག་ཆར་དུ་སྐྱེད་དགོས་པ་སོགས་ཀྱི་སྐྱོན་མེད་པ་བཞིན་ནོ། ༈ །སྤང་བླང་ནང་མི་འགལ་བར་ཉམས་སུ་ལེན་ཚུལ་གསུངས་པ་ལ། སྡོམ་པ་གསུམ་གའི་སྐབས་སུའང་རང་གཞན་ལ་ཕན་པར་མི་འགྱུར་ཞིང་གནོད་པའི་ཆ་རྣམས་སྤང་དགོས་པ་ནི་གནད་གཅིག་པ་ཡིན་པས། ལས་དང་པོ་པའི་རབ་བྱུང་ཞིག་གིས་དབང་ཐོབ་པ་ཙམ་གྱིས་འོག་མ་ལྟོས་མེད་དུ་བཏང་ནས་སྔགས་སྤྱོད་གཙོ་བོར་བྱེད་པ་སོགས་ཀྱི་རྩ་ལྟུང་འབྱུང་བའི་རྒྱུ་ཡིན་པས་མི་རུང་སྟེ་བསྲུང་བྱ་རྣམས་གོང་མར་འདུ་ཞིང་ཀུན་སློང་དམན་པ་སོགས་ཀྱི་ལྡོག་པ་རེ་བཏང་ཡོན་ཏན་གྱི་ཆ་གསར་བ་རེ་ཐོབ་པ་ལ་སྤྱི་དབང་ཐོབ་པ་ཙམ་གྱིས་གནས་འགྱུར་བཏགས་པ་བ་ཐོབ་ཅེས་བརྗོད་ཀྱང་། གནས་འགྱུར་མཚན་ཉིད་པ་ནི་དབང་ཐོབ་ཅིང་དམ་ཚིག་དང་ལྡན་པས་རིམ་གཉིས་བསྒོམ་པ་ལས་བྱུང་བའི་གོང་མའི་ལྟ་བ་མཉམ་པ་ཆེན་པོའི་དོན་མཐོང་བ་ལ་བྱ་དགོས་པའི་ཕྱིར། དེས་ན་གང་ཟག་རང་གི་རྒྱུད་ཚོད་དང་སྦྱར་ནས་ཉམས་སུ་ལེན་དགོས་པ་ཡིན་པས་ཚོགས་འཁོར་གྱི་དུས་ལྟ་བུར་ཆང་དང་ཕྱི་དྲོའི་ཁ་ཟས་སྤྱོད་དགོས་པ་སོགས་བྱ་བ་མི་འདྲ་བ་གཉིས་ཐོ་ཐུག་པ་བྱུང་ཚེ་བརྟགས་ནས། རྟོགས་གོམས་བརྟན་ཅིང་དོན་ཆེན་པོར་འགྱུར་བར་ཤེས་ན་སྔགས་གཙོ་བོར་བྱས་ན་འོག་མར་འགལ་བ་ལྟར་སྣང་ཡང་དོན་ལ་མི་འགལ་ཏེ། ལྟུང་བ་དངོས་གཞི་སྐྱེད་པ་ནི་བདག་འཛིན་མ་རིག་པ་ལ་རག་ལས་པའི་ཕྱིར། ཆོས་རྣམས་རྨི་ལམ་ལྟ་བུ་མཉམ་པ་ཉིད་རྟོགས་པ་ལ་བཅས་ལྟུང་དངོས་གཞི་མི་བསྐྱེད་པ་མདོ་ལས་ཀྱང་། སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་ཅིང་། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །ཅེས་དང་། རྨི་ལམ་ནི་མེད་པ་དང་འདྲའོ། །ལས་ནི་མ་བྱས་པ་ཉིད་དོ། །ཞེས་དང་། ཤེས་གཙོ་བོ་ཞེས་དང་། རྒྱུད་སྡེ་རྣམས་ལས་ཀྱང་མང་དུ་གསུངས། དཔེར་ན་བཅས་འགལ་བྱུང་བའི་དགྲ་བཅོམ་པ་ལ་ལྟུང་བའི་དངོས་གཞི་མི་འཇོག་པ་བཞིན་ནོ། །ཐོ་ཐུག་ཀྱང་སྲེད་པ་རང་མཚན་པ་དང་རང་རྒྱུད་ལ་སྐྱོན་གྱིས་གོས་པར་དོགས་པ་དང་བཅས་ཤིང་དོན་གཞན་མེད་པར་ཤེས་ན་ནི་འོག་མ་གཙོ་བོར་བྱ་དགོས་ཏེ་ཆོས་སྔགས་ཡིན་ཀྱང་གང་ཟག་སྔགས་སུ་མ་སོང་བའི་ཕྱིར། སྔགས་ནུས་རྒྱུད་ལྡན་ཅན་ནི་སྔགས་ཀྱི་ཐབས་ཤེས་གཉིས་ཀ་ཁྱད་པར་ཅན་ཡིན་པས། རྨ་བྱས་དུག་རྗེན་པར་ཟ་བ་ལྟ་བུའི་གནད་ལ་རྟོགས་གོམས་ཡོད་ན་འོག་མའི་སྤང་བྱ་ཐམས་ཅད་གོང་མའི་ལམ་དུ་ཤར་བས་མི་འཆིང་བར་མ་ཟད་ཡོན་ཏན་སྐྱེད་བྱེད་དུའང་འགྲོ་སྟེ་རྨ་བྱའི་མདངས་དུག་གིས་འཕེལ་བ་བཞིན་ནོ། །དཔེར་ན་འོ་མ་ཉིད་མི་ལ་སྨན་དང་སྦྲུལ་ལ་དུག་ཏུ་འགྱུར་བ་ལྟར། རྣམ་རྟོག་གི་རྐྱེན་གྱིས་འཆིང་བའི་རྒྱུར་འགྱུར་གྱི་ཡུལ་ལ་འཆིང་བའི་དངོས་པོ་མ་གྲུབ་བོ། །བརྟག་གཉིས་ལས། དེ་ལྟར་འཁོར་བར་འདོད་པ་ཡི། །ཡོན་ཏན་ལྔ་ལྡན་རིན་ཆེན་ཉིད། །མ་དག་པས་ནི་དུག་ཏུ་འགྱུར། །དག་པས་བདུད་རྩིར་འགྱུར་བ་ཡིན། །ཞེས་དང་། སྐྱེ་བོ་མི་བཟད་པ་ཡི་ལས། །གང་དང་གང་གིས་འཆིང་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །ཞེས་སོགས་གསུངས་སོ། །དེ་ལྟར་མིན་ན་དུག་རྒྱུས་ཡོད་པའི་ཕལ་པ་སོགས་ཀྱིས་དུག་མི་སྤྱོད་པའི་ཐབས་སོགས་ཀྱིས་རང་ལ་མི་གནོད་པར་བྱེད་པ་ལྟར་ཉན་ཐོས་པས་སྤང་བྱའི་གཙོ་བོ་ཉོན་མོངས་པ་ལ་དགྲ་བཞིན་བལྟས་ཏེ་ཐབས་ཤེས་ཉི་ཚེ་བས་སྤང་བྱར་བྱས་ནའང་རང་རྒྱུད་མི་འཆིང་ཞིང་ཡོན་ཏན་ཉི་ཚེ་བ་སྐྱེད་པ་བཞིན་ཤེས་དགོས་སོ། །གཅིག་ལ་བཀག་པ་ཀུན་ལ་བཀག་པ་དང་གཅིག་ཞུགས་པའི་ལམ་ལ་དང་པོ་ནས་ཀུན་འཇུག་དགོས་པ་མིན་པས་རང་རྒྱུད་ཀྱི་ཁམས་དང་ནུས་པ་དང་གཞན་དོན་འགྱུར་མི་འགྱུར་སོགས་ཀྱི་གནད་དང་བསྟུན་དགོས་པའི་དབྱེ་བསལ་ཤེས་དགོས་སོ། །ནང་ཐུག་པ་ལྟ་བུའི་རྐྱེན་མེད་ཅིང་གཞན་དོན་མི་འགྱུར་བ་དང་རང་རྒྱུད་མ་སྨིན་པར་ཤེས་ན་སོ་སོར་རང་ལམ་ལྟར་སྲུང་སྡོམ་དང་གུ་དོགས་བྱ་དགོས། རང་རྒྱུད་སྨིན་ཅིང་གཞན་དོན་འགྱུར་བའི་དགོས་པ་སོགས་མཐོང་ན་གོང་མའི་སྦྱོར་སྒྲོལ་གྱི་སྤྱོད་པ་བརླང་པོ་རྣམས་ཀྱང་སྒྲ་ཇི་བཞིན་སྤྱད་ན་འདོད་ཆེན་པ་ལའང་འགལ་བ་མེད་དེ། མདོ་ལམ་ནའང་། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །འཁོར་བ་ཞི་བའི་བདག་ཉིད་ལ། །དེ་ཕྱིར་རྒྱལ་སྲས་བསམ་མི་ཁྱབ། །ཅེས་དང་རྡོ་རྗེ་གུར་ལས། འདོད་ཆགས་ཀྱིས་བསྐྱེད་འཇིག་རྟེན་པ། །འདོད་ཆགས་ཉིད་ཀྱིས་རྣམ་གྲོལ་འགྱུར། །ཞེས་སོགས་དང་། བྱང་སེམས་ཀྱི་སྤང་བྱའི་གཙོ་བོ་བདེན་འཛིན་གྱི་རྣམ་རྟོག་ཡིན་པས་ལྷག་བསམ་དག་པར་ཆུད་པའི་བྱང་ཆུབ་སེམས་དཔའ་ལ་ལུས་ངག་གི་ལས་ལམ་བདུན་ཡང་གནང་བ་བཞིན་ནོ། །ཡང་ཚིགས་གསུམ་བླངས་པའི་དགེ་སློང་གི་རྒྱུད་ལ་སྲོག་གཅོད་ཀྱི་ལྟུང་བ་གཅིག་བྱུང་ན་ལྟུང་བ་རྫས་ཐ་དད་པ་གསུམ་ཅིག་ཅར་དུ་མི་སྐྱེད་པ་བཞིན་སྡོམ་པ་གསུམ་གར་སྲོག་གཅོད་པ་སོགས་བསྲུང་བྱ་གནད་གཅིག་པས་རྫས་མི་འདྲ་བ་གསུམ་ཐ་དད་དུ་སྲུང་དགོས་པ་དང་སྲོག་གཅོད་ཀྱི་ལྟུང་བ་ཐ་དད་པ་གསུམ་ཅིག་ཅར་འབྱུང་བ་མིན་ཀྱང་སྲོག་གཅོད་པ་ལྟ་བུ་ནི་སོ་ཐར་གྱི་རྟེན་དུ་རུང་བའི་མི་བསད་པ་ཉན་ཐོས་ལ་ཕམ་པ་དང་སྲོག་ཆགས་གཞན་བསད་པ་ལྟུང་བྱེད་དང་། བྱང་སེམས་ཀྱིས་ཕ་མར་ཤེས་པ་དང་སྔགས་ཀྱི་ལྷར་ཤེས་དགོས་པས་ཉེས་དམིགས་སྔ་མ་ལས་ཕྱི་མར་ཤིན་ཏུ་ཇེ་ཆེར་གྱུར་པ་དང་ལྡོག་ཆ་ནས་གསུམ་ག་ཉམས་པ་ཡིན་པས་སོ་སོ་ནས་བསྲུང་མཚམས་མ་འདྲེས་པར་བཤགས་སྡོམ་སོགས་བྱས་ན་ལེགས་ལ། གསུམ་ལྡན་ཤི་བའི་ཚེ་ཡང་ཇི་སྲིད་འཚོ་བར་ཞེས་ཀུན་སློང་གི་འཕེན་ཚད་ཀྱིས་བླངས་པའི་སོར་སྡོམ་གྱི་ལྡོག་ཆ་རྣམས་གཏོང་ཡང་བྱང་སྔགས་ཀྱི་སྡོམ་པའི་ལྡོག་ཆ་རྣམས་ནི་བྱང་ཆུབ་བར་དུ་ཞེས་འཕང་ཚད་རིང་བའི་ཕྱིར་དང་འདིའི་སྡོམ་པ་སེམས་ལས་སྐྱེ་བའི་ཕྱིར་སྲུང་སེམས་མ་ཉམས་བར་དུ་གཏོང་བ་མིན་ནོ། །དཔེར་ན་གསུམ་ལྡན་གྱིས་ཐེག་ཆེན་གསོ་སྦྱོང་གི་དུས་ཁྲིམས་གཏོང་ལེན་བཞིན་ནོ། །དེས་ན་ངོ་བོ་གནས་འགྱུར་ཐོབ་པའི་གསུམ་ལྡན་གྱི་གང་ཟག་རྟེན་བརྗེས་པའི་ཚེ་སོར་སྡོམ་མི་གཏོང་བ་དང་ཕྱི་མར་ཡང་བཅས་རྐྱང་གི་ལྟུང་བ་འབྱུང་བ་དང་། བྱིས་པའི་དགེ་སློང་ཡོད་པར་ཁས་ལེན་དགོས་པ་སོགས་ཀྱི་སྐྱོན་མི་འོང་ངོ་། །འཐོབ་གཏོང་གི་ཚུལ་མདོ་ཙམ་ནི་དེ་ལགས། འདི་དག་ད་དུང་སྤྲོ་ན་ཞིབ་རྒྱས་སུ་ཞུ་འཚལ། ༈ སོར་སྡོམ་ཉམས་པ་གསོ་རྒྱུ་ཡོད་མེད་གསུངས་པ་ལ། སྤྱིར་ཉན་ཐོས་རང་རྐང་གི་སོར་སྡོམ་ལ་ནི་རྩ་ལྟུང་འཆབ་བཅས་བྱུང་བ་ངོ་ཚ་ཁྲེལ་མེད་ཀྱིས་ཉམས་པ་ཡིན་ན་ནི་ཚེ་འདིར་གསོ་བའི་སྐལ་པ་མེད་ལ་རང་རང་གིས་འགྱོད་བཤགས་ཆེན་པོ་བྱས་ན་རྣམ་སྨིན་སྲབ་པ་དང་མ་འོངས་པར་ཕན་པ་སོགས་ནི་ལོས་ཡོད། འཆབ་སེམས་སྐད་ཅིག་ཀྱང་མ་སྐྱེས་ན་སྡོམ་པ་ཕུལ་ཏེ་བསླབ་པ་སྦྱིན་པར་བཤད་ཀྱང་ཡོན་ཏན་ཁྱད་པར་ཅན་མ་ཐོབ་བར་དུ་གནས་བརྟན་གཞན་དང་སྐལ་པ་མི་མཉམ་ཞིང་མཁན་པོ་བྱེད་པ་སོགས་མཆོག་གི་སྤྱོད་པ་རྣམས་སྤོང་དགོས་པ་ཕྱག་དར་སོགས་དམན་སྤྱོད་རྣམས་བྱེད་དགོས་སོ། །ད་ལྟར་རང་ཅག་ལྟ་བུའི་སྡོམ་པ་ནི་སྔགས་མན་ཆད་དང་འབྲེལ་ཡོད་པས་སོར་སྡོམ་རང་མཚན་པ་ཉན་རང་གི་སྡོམ་པ་ལྟ་བུ་མ་ཡིན་ཏེ། ཆོ་ག་འདུལ་བ་ཉན་ཐོས་ལུགས་ཀྱིས་བླངས་པའི་སྡོམ་པ་དེ་དང་པོ་ནས་སམ་རྗེས་གང་རུང་དུ་གཞན་ཕན་སེམས་བསྐྱེད་ཀྱིས་ཟིན་ཚེ་སྡོམ་པ་དེ་བྱང་སེམས་ཀྱི་ཉེས་སྐྱོད་སྡོམ་པའི་ཚུལ་ཁྲིམས་སམ་ཐེག་ཆེན་སོར་སྡོམ་དུ་འགྱུར་ཏེ། ས་པཎ་གྱིས། ཆོ་ག་ཉན་ཐོས་ལུགས་ཡིན་ཀྱང་། བསམ་པ་སེམས་བསྐྱེད་ཀྱིས་ཟིན་ན། སོ་སོར་ཐར་པ་རིགས་བརྒྱད་པོ། བྱང་སེམས་སོ་སོར་ཐར་བར་འགྱུར། །ཞེས་གསུངས་པ་དང་དབང་ཐོབ་པ་དང་སྔགས་སྡོམ་དུ་འགྱུར་བ་ཡིན་ལ། གང་ཟག་དེ་ལ་སྨོན་འཇུག་གཉིས་ཀ་ཡོད་པས་བྱང་ཆུབ་སེམས་དཔའ་དང་དབང་དོན་གྱི་ལྟ་སྤྱོད་ལ་མོས་པ་བརྟན་པོ་ཡོད་ན་རིག་པ་འཛིན་པའང་ཡིན་པས་ལྟུང་བ་ལ་འཆབ་སེམས་ཡོད་མེད་གང་ཡིན་ཡང་གསོ་རྒྱུ་ངེས་པར་ཡོད་ལ། ཐེག་པ་ཆེ་ཆུང་སེམས་བསྐྱེད་ཁྱད་ཟེར་བ་དེ་བདེན་ན་སེམས་བསྐྱེད་ཀྱི་ཟིན་བཞིན་སྡོམ་པ་ཉན་ཐོས་སུ་ཇི་ལྟར་རུང་། དམན་སེམས་མ་བཏང་ན་བྱང་སེམས་སུའང་འགྱུར་མི་རུང་བས་གོང་མ་ཐོབ་པ་དང་ཉམས་པ་གསོར་རུང་བ་ཙམ་རེའི་ཕན་ཐོགས་གསར་དུ་འཐོབ་རྒྱུ་མེད་ན་གོང་མ་ཐོབ་པའི་དོན་ཡང་མེད་དོ། ༈ །གཞན་ཡང་ཁྱིམ་པ་སྔགས་པ་སོགས་གསུངས་པ་ལ། སྤྱིར་ན་དགོས་པ་མེད་པར་རྟེན་ཁྱིམ་པ་ཁོ་ནས་བསྟན་འགྲོའི་དོན་བྱེད་པར་འདོད་པ་ནི་རབ་ཏུ་བྱུང་བ་ལ་དགའ་བའི་གདུལ་བྱ་ཡལ་བར་འདོར་བའི་ཕྱིར་བྱང་ཆུབ་སེམས་དཔའི་ལམ་དང་ཤིན་ཏུ་འགལ་ཞིང་ལས་དང་པོ་པའི་བྱང་སེམས་དང་སྔགས་པ་ལ་གེགས་ཆེ་སྟེ། རབ་བྱུང་དང་ཁྱིམ་པའི་ཡོན་ཏན་དང་སྐྱོན་མང་ཉུང་བཤད་པ་རྣམས་འདིར་ཡང་མི་མཚུངས་པའི་ཕྱིར། རྒྱན་ལས་ཀྱང་། དེ་ལྟའི་སྡོམ་བརྩོན་ཁྱིམ་པ་ཡི། །བྱང་སེམས་རྣམས་ལས་ཁྱད་པར་འཕགས། །ཞེས་དང་རྒྱུད་ལས། ས་ཐོབ་མ་གཏོགས་ཁྱིམ་པ་ཡིས། །རྒྱལ་པོའི་བླ་མ་མི་བྱའོ། །ཞེས་དང་། ས་མ་ཐོབ་བར་ཁྱིམ་གྱི་ཉེས་དམིགས་ལ་སྐྲག་སྟེ་བྱང་ཆུབ་སེམས་དཔའ་རྣམས་རྟེན་རབ་བྱུང་ཁོ་ན་ལ་སྨོན་ལམ་འདེབས་པའང་དེ་ལྟ་བུ་ལ་དགོངས་པ་ཡིན་ནོ། །སྔོན་གྱི་དུས་སུ་སངས་རྒྱས་རི་རབ་ལྟ་བུའི་གསུང་རབ་ལ་དགེ་སློང་སྨྲ་བ་ཆོས་ཀྱི་རྒྱལ་མཚན་ཞེས་བྱ་བ་བྱུང་། ཡང་རྒྱལ་པོ་དགེ་བའི་བཀོད་པ་ཞེས་བྱ་བ་ལ་བུ་སྟོང་ཡོད་པ་རྣམས་དགེ་སློང་དེའི་མདུན་ནས་རབ་ཏུ་བྱུང་། རྒྱལ་བུ་ཐ་ཆུང་སྙིང་རྗེ་ཆེར་སེམས་ཞེས་བྱ་བ་རབ་ཏུ་མ་བྱུང་ཞིང་སྙིང་རྗེའི་དབང་གིས་རྒྱལ་སྲིད་ཀྱང་བཟུང་། གསོ་སྦྱོང་ཡན་ལག་བརྒྱད་པ་ཇི་སྲིད་འཚོའི་བར་བསྲུང་བར་ཁས་བླངས་པ་ལ་དགེ་སློང་གིས་ལེགས་སོ་ཞེས་གནང་། རྟེན་ཁྱིམ་པ་ཡིན་ཡང་ཡོན་ཏན་རབ་ཏུ་བྱུང་བ་དང་འདྲ་བར་གསུངས། རབ་བྱུང་གིས་རྒྱལ་སྲིད་གཟུང་བར་མི་འོས་བྱང་ཆུབ་སེམས་དཔའ་རྒྱལ་སྲིད་བསྐྱང་ན་དོན་ཆེ་ཡང་ཁྱིམ་གྱི་ཉེས་པ་བསྲུང་ཕྱིར་གསོ་སྦྱོང་བླངས་པ་ཡིན་ནོ། །དེའི་ཚེ་དགེ་སློང་དེ་ནི་འཇམ་དཔལ་ཡིན་ལ། རྒྱལ་བུ་དེ་ནི་བདག་ཅག་གི་སྟོན་པ་ཤཱཀྱ་ཐུབ་པའོ། །བུ་གཞན་རྣམས་ནི་བསྐལ་བཟང་འདིའི་སངས་རྒྱས་སྟོང་ཡིན་ནོ། །དེས་ན་ཡོན་ཏན་ཀུན་གྱི་གཞི་རྟེན་ངེས་འབྱུང་གིས་ཟིན་པའི་སོ་ཐར་རིས་བདུན་ལས་གང་ཐུབ་ཙམ་བླངས་ཏེ་རང་འདོད་ཙམ་མ་ཡིན་པར་སེམས་བསྐྱེད་ཀྱིས་ཟིན་ན་སྔགས་སྡོམ་གྱི་རྩ་བར་འགྲོ་བ་ཡིན་ལ་དབང་ཐོབ་པ་དང་ཐུན་མོང་གི་ལམ་གྱི་རྒྱུད་སྦྱངས་པ་སྔོན་སོང་ཡིན་པས་སྔགས་ཀྱི་ཐུན་མོང་མ་ཡིན་པའི་མན་ངག་དང་འབྲས་བུ་རྣམས་ཀྱང་རྒྱུད་ལ་སྨིན་སླ་བ་ཡིན་ཏེ་སྔགས་ཀྱིས་བཏབ་པའི་ལོ་ཏོག་ཉིན་གཅིག་ལ་འབྱུང་བ་བཞིན་ནོ། །དེས་ན་ཕྱི་སོ་ཐར་ནང་བྱང་སེམས་གསང་བ་སྔགས་སྡོམ་སྟེ་ཕྱི་ནང་གསང་གསུམ་གྱི་ཉེས་པ་དག་ཅིང་ཡོན་ཏན་གྱི་སྨིན་བྱེད་དང་རྟེན་བརྟེན་པའི་དོན་ཤིན་ཏུ་གལ་ཆེ་བ་ཡིན། དེ་ལ་དགོངས་ནས་མཁས་པ་ཁ་ཅིག་སྡོམ་པ་གསུམ་རྟེན་དང་བརྟེན་པར་བཞེད་པ་ཡིན་གྱི། རྣམ་པ་ཀུན་ཏུ་མ་ཡིན་པར་ཤེས་དགོས་སོ། །རྒྱུད་ལས། ཕྱི་རུ་ཉན་ཐོས་སྤྱོད་པས་སྐྱོངས། །ནང་དུ་འདུས་པའི་དོན་ལ་དགའ། །ཞེས་དང་ཨོ་རྒྱན་རིན་པོ་ཆེས། ཕྱི་ལྟར་ལག་ལེན་མདོ་སྡེའི་ལུགས་སུ་སྤྱད། །རྒྱུ་འབྲས་སྤང་བླང་ཞིབ་པའི་དགོས་པ་ཡོད། །ནང་ལྟར་གསང་སྔགས་ཐུན་མོང་ལུགས་སུ་སྤྱད། །བསྐྱེད་རྫོགས་དོན་དང་འབྲེལ་བའི་དགོས་པ་ཡོད། །གསང་བ་གསང་ཆེན་ཨ་ཏིའི་ལུགས་སུ་སྤྱད། །ཚེ་གཅིག་འོད་སྐུར་གྲོལ་བའི་དགོས་པ་ཡོད། །ཅེས་དང་ཙོང་ཁ་བ་ཆེན་པོས། ཕྱི་རུ་ཉན་ཐོས་སྤྱོད་པས་ཞི་ཞིང་དུལ། །ནང་དུ་རིམ་གཉིས་རྣལ་འབྱོར་གདེངས་དང་ལྡན། །མདོ་སྔགས་ལམ་རྣམས་འགལ་མེད་གྲོགས་སུ་འགྱུར། །ཞེས་སོགས་གསུངས་སོ། །འོན་ཀྱང་ཁྱིམ་པ་ཞིག་གིས་ཐལ་བྱུང་དུ་སྔགས་སྡོམ་བླངས་ཤིང་དེ་རྒྱུད་ལྡན་ཞིག་ཡིན་ན་འོག་མ་གཉིས་རང་ཆོག་གི་སྒོ་ནས་མ་བླངས་པ་ཙམ་ལས་སྡོམ་པའི་གནད་རྣམས་ནི་ཞར་ལ་འཐོབ་སྟེ། སྲོག་གཅོད་སྤོང་བ་སོགས་ནི་སྔགས་ལའང་ཡོད་ཅིང་འཁོར་བ་རང་མཚན་པ་ལས་ངེས་པར་འབྱུང་དགོས་པ་དང་། ཉོན་སྒྲིབ་རང་མཚན་པ་སྤོང་དགོས་པ་སོགས་དང་སྔགས་རྒྱུད་ལྡན་ཡིན་ན་བྱང་ཆུབ་སེམས་དཔའ་འང་ཡིན་པས་ཁྱབ་པའི་ཕྱིར་ཏེ་ཕ་རོལ་ཏུ་ཕྱིན་པ་དང་གསང་སྔགས་ཀྱི་ཐེག་པ་གཉིས་ཀ་ཐེག་པ་ཆེན་པོ་ཡིན་པའི་ཕྱིར་རོ། །སོ་ཐར་གྱི་དགེ་སློང་གི་ཐ་སྙད་མ་ཚང་བ་ཙམ་ལས་དོན་གྱིས་གསུམ་ལྡན་ཡིན་ལ། སྔགས་ཀྱི་རྟོགས་པ་ཀློང་དུ་གྱུར་པ་ན་དོན་དམ་པའི་དགེ་སློང་མཚན་ཉིད་པར་འགྱུར་བའང་ཡིན་ནོ། །འོན་ཀྱང་རབ་བྱུང་གི་རྟགས་ཆ་ལུགས་འཆང་མི་དགོས་པ་དང་འདུལ་བའི་ལས་ཆོག་རྣམས་སུ་འདུ་མི་དགོས་པ་སོགས་དམིགས་བསལ་ཕྲན་བུ་རེ་མ་གཏོགས་ཆོས་འདུལ་བ་ནས་བཤད་པའི་ཕྱི་དྲོའི་ཁ་ཟས་ཚུན་ཆད་ཀྱང་ནུས་རྙེད་དང་དགོས་པ་མེད་ན་ལས་དང་པོ་པའི་སྔགས་པ་ཁྱིམ་པས་ཀྱང་བླང་དོར་བྱ་དགོས་ལ། རྒྱུད་ལས་ཀྱང་། རྒྱལ་བ་ངས་གསུངས་སོ་སོར་ཐར་བ་ཡི། །ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པས་རྟགས་དང་ཆོ་ག་སྤང་། །ལྷག་མ་རྣམས་ནི་ཉམས་སུ་ལེན་པར་བཤད། །ཅེས་གསུངས། གང་ལྟར་ཡང་རྟག་ཏུ་དྲན་ཤེས་དང་ལྡན་པས་རུང་མཐུན་བརྩིས་ནས་རང་རྒྱུད་ལ་ཉེས་པ་སྐྱེད་ཅིང་གཞན་ལའང་ཕན་པར་མི་འགྱུར་བའི་ཆ་རྣམས་ནི་མ་སྤངས་ན་བདེ་བར་གཤེགས་པའི་བཀའ་ལས་འདས་པའི་རྩ་ལྟུང་ངམ་སྦོམ་པོ་འབྱུང་བས་ཚུལ་འཆལ་དུ་འགྱུར་བ་ཡིན་ལ། ཞེན་པ་ཆེ་བ་ལྟ་བའི་བར་ཆད་དང་ཡེངས་བ་ཆེ་བ་སྒོམ་པའི་བར་ཆད་དང་ཚུལ་ཁྲིམས་འཆལ་བ་ནི་སྤྱོད་པའི་བར་ཆད་ཡིན་པར་གསུངས་པས་ལྟ་སྒོམ་ཀྱང་ཉམས་ཤིང་དངོས་གྲུབ་འགྲུབ་པའི་གེགས་སུ་གསུངས་ཏེ། རྩ་རྒྱུད་ལས། ཟློས་པ་འདི་ལ་ཚུལ་ཁྲིམས་ཉམས། །དེ་ལ་གྲུབ་པ་ཐམས་ཅད་མེད། །ཚུལ་ཁྲིམས་འཆལ་ལ་ཐུབ་དབང་གིས། །སྔགས་འགྲུབ་པ་ནི་མ་གསུངས་སོ། །ཞེས་སོགས་མང་དུ་གསུངས་པའི་ཕྱིར་རོ། །སྐྱེ་བོ་ཕལ་པ་བརྒྱ་ཡིས་དོ་ཟླ་མིན། །ཞེས་པའི་གང་ཟག་གི་མཚན་གཞི་སྔགས་པ་ཁྱིམ་པ་སོགས་ལ་མི་གོ་བར་ཚུལ་ཁྲིམས་ཉམས་པའི་གང་ཟག་ལ་གཙོ་བོར་གོ་དགོས་ཏེ། སངས་རྒྱས་ཀྱི་བསྟན་པ་འདི་ནི་འབྲེལ་ཚད་དོན་ལྡན་ཡིན་པས་འདི་ལ་དད་པ་ཙམ་སྐྱེས་པའམ་ཐེ་ཚོམ་ཟོས་སམ་ངེས་ཤེས་ཐོབ་བམ་འབྲེལ་བ་ཅི་བཞག་ཚད་དངོས་སམ་བརྒྱུད་ནས་ཐར་བའི་རྒྱུར་མི་འགྲོ་མི་སྲིད་པའི་ཕྱིར་ཏེ། ཕལ་པ་སྡོམ་པ་མ་ཞུས་པ་རྣམས་ནི་རང་བཞིན་གྱི་སྡིག་པ་ཁོ་ནས་དམྱལ་བར་འགྲོ་བ་ལས་ཐར་པའི་ས་བོན་སོར་བྱང་སྔགས་དང་འབྲེལ་བ་མེད་ན་ཁྱི་ཤི་བའི་རོ་དང་འདྲ་ཞིང་། བསྟན་པ་ལ་ཞུགས་ནས་བཅས་པའི་སྡིག་པ་ཅན་ཚུལ་ཁྲིམས་འཆལ་བ་རྣམས་རེ་ཞིག་དམྱལ་བར་འགྲོ་ཡང་འཁོར་བ་མཐའ་ཅན་དུ་བྱེད་པའི་བག་ཆགས་ཡོད་ཅིང་དེ་དག་ལ་དད་པ་རྣམས་ལྷ་ཡུལ་དུ་སྐྱེ་བར་བཤད་པས་ན་ཚུལ་ཁྲིམས་འཆལ་བ་རྣམས་ནི་གླ་བ་ཤི་བའི་རོ་བཞིན་གཞན་ལ་ཕན་པའི་རྒྱུ་ཡང་ཡོད་པའི་ཕྱིར་རོ། །ད་ལྟར་སྙིགས་མའི་དུས་ཀྱི་རབ་ཏུ་བྱུང་བ་རྣམས་རྟགས་ཙམ་དུ་གྱུར་ཀྱང་མུ་སྟེགས་པའི་དྲང་སྲོང་གི་རྒྱལ་མཚན་འཛིན་པ་རྣམས་ལས་ཀྱང་ཁྱད་པར་དུ་འཕགས་པ་ཡིན་ཏེ། ས་སྙིང་འཁོར་ལོ་བཅུ་པའི་མདོ་ལས། ཙམ་པ་ཀ་ཡི་མེ་ཏོག་རྒས་གྱུར་ཀྱང་། །མེ་ཏོག་གཞན་པ་རྣམས་ལས་ཤིན་ཏུ་ལྷག །དགེ་སློང་ཚུལ་ཁྲིམས་ཉམས་ཤིང་སྡིག་སྤྱོད་ཀྱང་། །མུ་སྟེགས་ཅན་དག་ཐམས་ཅད་ཀུན་བས་མཆོག །ཅེས་གསུངས་པའི་ཕྱིར། འདི་ལ་ཆོ་གའི་ཚུལ་ཁྲིམས་དང་ལྡན་ཡང་སྡོམ་པའི་ཚུལ་ཁྲིམས་དང་མི་ལྡན་པ་ཞེས་དང་། བསྟན་པའི་ཆོམ་རྐུན་པར་བཤད་ཀྱང་མིང་ཙམ་དེས་ཀྱང་གཞན་ཟིལ་གྱིས་གནོན་ནུས་པ་སོགས་དཔེར་ན་སེང་གེའི་པགས་པ་དང་དྲི་ཙམ་གྱིས་ཀྱང་རི་དྭགས་རྣམས་སྐྲག་པ་བཞིན་ནོ། །དེས་ན་རྟགས་ཙམ་བཟུང་བ་ལའང་ཕན་བཏགས་ན་བདེ་བ་ཆེན་པོ་འཐོབ་པ་དང་གནོད་པ་བྱས་ན་དུས་གསུམ་གྱི་སངས་རྒྱས་སྲས་དང་བཅས་པ་ལ་གནོད་པར་བྱས་པ་དང་ཕྱོགས་འདྲ་བར་འགྱུར་བ་དང་། སེམས་བསྐྱེད་བླངས་པའི་གང་ཟག་གིས་ཚུལ་ཁྲིམས་འཆལ་བའི་དགེ་ཚུལ་སློང་ལ་བརྡུང་བཅོམ་སོགས་བྱས་ན་རྩ་ལྟུང་འབྱུང་བར་གསུངས་པ་སོགས་ལུང་མང་བའི་ཕྱིར་དགེ་བསྙེན་ལྕགས་ཀྱི་རྐང་པ་ཅན་གྱིས་ཚུལ་ཁྲིམས་ཉམས་པའི་གང་ཟག་ཞིག་ལ་རྟགས་འཆང་བའི་གེགས་ཙམ་བྱས་པས་ཡི་དམ་གྱི་ཞལ་མཐོང་བའི་སྒྲིབ་པར་བཤད་པའི་ཕྱིར་རོ། དེར་མ་ཟད་སྡོམ་པ་མེད་ཀྱང་སྔར་རབ་བྱུང་གི་རྟགས་བླངས་པ་དང་རྟགས་ངུར་སྨྲིག་གི་ཚལ་བུ་དེ་ལ་གུས་པ་ཙམ་ལའང་ཕན་ཡོན་ཆེ་སྟེ། སྔོན་དགེ་སློང་ཞིག་ཉལ་ཡོད་པ་གླང་ཆེན་སྨྱོས་པས་མཐོང་ནས་སྣས་བླངས་ནས་འཕེན་པར་བརྩམས་པ་ན། དེའི་མགུལ་ན་ཆོས་གོས་ཀྱི་ཚལ་བུ་ཐོགས་པ་མཐོང་བས་དད་པ་སྐྱེས་ཏེ་ཞེ་ས་དང་བཅས་དལ་བུས་བཞག་སོགས་གཏམ་ལུང་དེ་འདྲ་མང་ངོ་། །ས་སྙིང་ལས། དྲང་སྲོང་ཆེན་པོའི་རྒྱལ་མཚན་ན་བཟའ་འདིར། །མཁས་པ་ཐམས་ཅད་ཤིན་ཏུ་བསྟོད་ཅིང་བསྔགས། །གང་ཞིག་འདི་ལ་མཆོད་པ་བྱེད་པ་རྣམས། །སྲིད་པའི་འཆིང་བ་ཀུན་ལས་ངེས་པར་གྲོལ། །ཞེས་སོགས་གསུངས་པའི་ཕྱིར། རབ་བྱུང་གི་རྟགས་ཆ་ལུགས་ལ་མི་གུས་པར་བརྙས་བཅོས་བྱས་ན་དམྱལ་བ་ཡང་སོས་སུ་སྐྱེས་ཏེ་མེ་འབར་བའི་ཡོ་བྱད་ལ་སྤྱོད་དགོས་པར་གསུངས་པའི་ཕྱིར། སྤྱིར་སྡོམ་པ་མེད་པའི་ཆ་ལུགས་འཆང་བ་མདོ་ལས་བཀག་ཅིང་། ཞི་བ་ལྷས། སེམས་སྲུང་བརྟུལ་ཞུགས་མ་གཏོགས་པའི། །བརྟུལ་ཞུགས་མང་པོས་ཅི་ཞིག་བྱ། །ཞེས་དང་། ཕག་མོ་མངོན་འབྱུང་གི་རྒྱུད་ལས། དེ་ཉིད་སེམས་ཀྱི་ཁྱད་པར་མཐོང་གྱུར་ན། །བརྟུལ་ཞུགས་མེད་ཀྱང་སངས་རྒྱས་ས་ལ་འགྲོ། །སེམས་ཉིད་གཉིས་ཀྱི་གནད་དང་མ་བྲལ་ན། །བརྟུལ་ཞུགས་སྤྱད་ཀྱང་སྡུག་བསྔལ་སྣ་ཚོགས་སྐྱེད། །ཅེས་གསུངས་མོད་ཀྱི་རྩོད་དུས་སྙིགས་མ་ལ་བབ་པ་ན་རབ་བྱུང་རྣམས་བུ་སྨད་དང་བཅས་ཤིང་ཆང་ལ་སྤྱོད་པ་སེར་ཁྱིམ་པར་གྱུར་ཀྱང་དེ་དག་སངས་རྒྱས་མོས་པའི་དུས་སུ་ཐར་བ་འཐོབ་པ་སྙིང་རྗེ་པད་དཀར་གྱི་མདོ་ལས་གསུངས་པས་ད་ལྟར་རྟགས་ཙམ་ལེན་པ་ལའང་རྗེས་སུ་ཡི་རངས་བྱ་དགོས། སྔགས་དང་བྱང་སེམས་ལ་འབྲེལ་བའང་དེ་ལས་ལྷག་པར་ཤེས་པར་བྱའོ། །དཔེར་ན་ཆོས་ལྡན་གྱི་རྒྱལ་རིགས་ཤིག་ཇི་ལྟར་དམན་སར་ལྷུང་ཡང་གཞན་དང་མི་འདྲ་ཞིང་གུས་བཀུར་བྱ་དགོས་པ་བཞིན་རྗེས་འཇུག་དམན་པ་དང་ཕལ་པ་དམན་པ་གཉིས་གཏན་ནས་མི་འདྲ་ཞིང་ཚུལ་ཁྲིམས་ཉམས་པ་དང་མ་ཉམས་པའི་ཁྱད་པར་ཙམ་ཡོད་པ་ཡིན་ནོ། ༈ །ཡང་ཉམས་སུ་མ་བླངས་པའི་ཆོས་བཤད་རུང་མི་རུང་སོགས་གསུངས་པ་ལ། སྤྱིར་ན་ཆོས་བཤད་དབང་བསྐུར་སོགས་ཀྱིས་གཞན་དོན་བྱེད་པ་ལ་རང་ལ་རང་འདོད་མེད་པ་དང་གདུལ་བྱ་ལ་མོས་པ་ཡོད་པ་ཞིག་གལ་ཆེ་བས་དེ་ལྟར་བྱུང་ཚེ་མདོ་སྡེ་རྣམས་ལྟ་བུ་དང་ལས་འབྲས་ཀྱི་ཆོས་ཐུན་མོང་བ་རྣམས་ནི་འཆད་སྤེལ་གྱི་ནུས་པ་ཡོད་པས་འཆད་ཅི་ཐུབ་བྱས་ན་དགག་བྱ་མེད་ཅིང་ཕན་ཡོན་ཤིན་ཏུ་ཆེ་སྟེ། རིན་པོ་ཆེ་སྣ་ཚོགས་ཀྱིས་རྟེན་བཞེངས་པ་དང་དེ་ལ་མཆོད་པའི་ལས་བརྩོན་པ་ནི་ཆོས་མི་ཤེས་པ་དང་ཁྱིམ་པ་རྣམས་ལ་གསུངས་ལ། རབ་ཏུ་བྱུང་བ་རྣམས་ནི་ཀློག་སྤོང་ལ་བརྩོན་པར་དཀོན་བརྩེགས་ལས་བཤད་ཅིང་། མདོ་གཞན་ཡང་། གང་ལ་ཕན་ཕྱིར་ང་ཡི་ཆོས། །ཚུལ་བཞིན་བསྟན་པས་མཆོད་འགྱུར་གྱི། །མེ་ཏོག་བྱུག་པ་མར་མེ་ཡིས། །རྒྱལ་བ་ཡང་དག་མཆོད་པ་ཡིན། །ཞེས་དང་། བྱམས་པ་སེང་གེ་སྒྲ་ལས། གང་གཱའི་བྱེ་སྙེད་འཇིག་རྟེན་གསེར་དག་གིས། །བཀང་སྟེ་གང་ལ་སྦྱིན་པ་བྱིན་པ་བས། །དུས་ངན་ཚེ་ན་ཚིགས་བཅད་གཅིག་བརྗོད་པ། །དེ་ཡིས་ཕན་འདོགས་ཇི་འདྲ་དེ་ལ་མེད། །ཅེས་སོགས་བཤད་སྒྲུབ་ཀྱི་ཕན་ཡོན་མཐའ་ཡས་པ་ཡོད་པའི་ཕྱིར། སྔགས་ཡིན་ཡང་དབང་ངམ་རྗེས་གནང་ཐོབ་པ་ལ་སྤྱི་བཤད་ཙམ་རེ་འཆད་ན་ཉེས་པ་མེད་ཅིང་གསུང་པདྨའི་རིགས་ཀྱི་དམ་ཚིག་ཡིན་པས་སེར་སྣས་མི་སྟོན་པ་སོགས་མི་རུང་ངོ་། །ཡང་ཇི་སྐད་དུ། ཇི་བཞིན་སྒྲ་དང་དགོངས་མིན་དང་། །དྲང་བའི་དོན་དུ་གང་གྱུར་དང་། །ཡི་གེའི་དོན་དང་སྤྱི་དོན་གྱིས། །ཚོགས་པ་ལ་ནི་བཤད་པར་བརྗོད། །ཅེས་མཐའ་དྲུག་ལས་སྒྲ་ཇི་བཞིན་པ་དང་དགོངས་པ་ཅན་མིན་པ་སྟེ་དྲང་པོར་དགོངས་པ་དང་། དྲང་དོན་ཏེ་གསུམ་དང་། ཚུལ་བཞི་ལས་ཡིག་དོན་དང་སྤྱི་དོན་ཏེ་གཉིས་ཚོགས་བཤད་རུང་བར་གསུངས་པའང་འདི་ཙམ་ཉན་པའི་སྣོད་རུང་མང་བ་ལ་དགོངས་པ་ཡིན་གྱི། སྣོད་མིན་ལོག་ལྟ་ཅན་ཡིན་ན་འདི་ཡང་འཆད་མི་རུང་ངོ་། །ཇི་བཞིན་མིན་སྒྲ་ངེས་དོན་དང་། །དེ་བཞིན་དགོངས་ཏེ་བཤད་པ་དང་། །སྦས་དང་མཐར་ཐུག་རྣམ་པ་ཡིས། །སློབ་མ་ལ་ནི་བཤད་པར་བརྗོད། །ཅེས་མཐའ་དྲུག་ལས་དང་པོ་གསུམ་དང་ཚུལ་བཞི་ལས་ཕྱི་མ་གཉིས་ནི་སྣོད་ལྡན་གྱི་སློབ་མ་ཤ་སྟག་ལ་བཤད་དགོས་པར་གསུངས་སོ། །དེ་ཡང་སྣོད་ལྡན་ཤ་སྟག་ཡིན་ན་ཇི་ཙམ་མང་ཡང་མི་འགལ་ལོ། །མཐའ་དྲུག་ལ་ཚུལ་བཞིར་ཞུགས་པ་རྡོ་རྗེའི་ཐེག་པ་ཁོ་ན་ལ་ཡོད་ཅིང་། མ་ཞུགས་པ་ཅི་རིགས་ནི་ཐུན་མོང་གི་ཐེག་པ་ཡན་ཆད་ལའང་ཡོད་པ་ཡིན་པས་སྤྱིར་རྒྱུད་འཆད་པ་ལྟ་བུ་དེ་འདྲའི་དབྱེ་བ་དགོས་སོ། །གསང་སྔགས་བོན་དུ་གྱེར་བ་ཞེས་གསང་རྫས་གསང་སྤྱོད་སོགས་ཐ་མལ་གྱི་ཁྲོམ་དུ་སྟོན་པ་དང་འདོན་གྱེར་བྱེད་པ་ལ་བྱ། རུ་ཏྲར་སྐྱེ་བའི་རྒྱུ་ཡིན། སྔགས་ཁྲོམ་ཆོས་སུ་བཙོང་པ་ནི་གསེར་བྱེ་ཐལ་བ་དང་བརྗེ་བ་ལྟར་གསུངས། སྐལ་མིན་གསང་སྒྲོགས་ཀྱིས་ལྕེ་ལ་ཞིང་རྨོ་བའི་དམྱལ་བར་སྐྱེ་བར་བཤ་དོ། །འོན་ཀྱང་ཆོས་དཀོན་པའི་ཡུལ་དང་དུས་སྙིགས་མ་བསྟན་པ་ནུབ་པ་ལ་ཉེ་བའི་དུས་སུ་ནི་བློ་མཆོག་བྱང་ཆུབ་སེམས་དཔའ་རྣམས་ཀྱིས་འཁོར་བའི་མཐའ་ལ་བསམས་ནས་དབང་བསྐུར་རྒྱུད་བཤད་སོགས་གཞན་དོན་ཅི་ཐུབ་བྱེད་པ་ཡིན་ཞིང་སློབ་མ་ཡང་གྲངས་ངེས་མེད་པར་མཛད་པ་ཡོད་དེ། དཔེར་ན་ཐབས་ལ་མཁས་པའི་རྒྱལ་པོས་མཐར་རྒྱལ་ཁམས་མང་པོ་མངའ་འོག་ཏུ་སྡུད་ཕྱིར་གནས་སྐབས་སུ་སྡེ་ཉུང་ཤས་རེ་དང་བྱ་བ་གཞན་ཉམས་ཤིང་ཤོར་བ་ལ་མི་ལྟ་བ་བཞིན་ནོ། །ཨོ་རྒྱན་ཆེན་པོ་པདྨ་སཾ་བྷ་ཝས། ལམ་གྱི་ལམ་མཆོག་གཞན་དོན་ཡིན། །འདི་ལ་སྒྱིད་ལུགས་སུས་བྱེད་པ། །དེ་ཡི་བྱང་ཆུབ་རྒྱང་ཐག་རིང་། །ཞེས་གསུངས་སོ། །ཡང་མན་ངག་གི་བྱིན་རླབས་ཀྱི་བརྒྱུད་པ་ཅན་ལྟ་བུ་ནི་རང་ལ་ཉམས་མྱོང་གི་རྒྱུན་མ་སྐྱེས་པར་འཆད་ན་སྒྲོན་མེ་ལག་བརྒྱུད་དང་བུམ་པ་གང་བྱོའི་དཔེ་ལྟར། གཞན་ལ་ཅུང་ཟད་ཕན་ཡང་རང་རྒྱུད་སྟོང་པར་བཤད་པ་དང་། ཕལ་པོ་ཆེ་ལས་ཀྱང་། ཇི་ལྟར་འོན་པ་རོལ་མོ་མཁན། །གཞན་དག་དེ་ཡིས་དགའ་བྱེད་ཀྱང་། །རང་ཉིད་ཀྱིས་ནི་མི་ཐོས་ལྟར། །མ་བསྒོམས་ཆོས་ཀྱང་དེ་དང་འདྲ། །ཞེས་གསུངས་སོ། །སྤྱིར་ན་གང་ཟག་ལ་མི་རྟོན་ཅིང་ཆོས་བདེན་བཞིའི་བླང་དོར་ལ་རྟོན་པས་སྟོན་པ་སོ་སོ་སྐྱེ་བོ་ཡིན་ཀྱང་གདུལ་བྱ་སྐལ་ལྡན་རྣམ་གྲོལ་ལ་འགོད་ནུས་པའི་ལོ་རྒྱུས་མང་པོ་ཡོད་དོ། །རང་ལ་ཞལ་ནས་སྙན་དུ་བརྒྱུད་པ་དང་ཉམས་མྱོང་གི་རྟོགས་པའི་ཉེ་བརྒྱུད་དང་བཅས་པ་ཡོད་ན་ནི་གདུལ་བྱ་མང་པོ་སྨིན་གྲོལ་ལ་འགོད་ནུས་པ་དང་རང་ལའང་མི་གནོད་པ་ཙན་དན་གྱི་སྡོང་པོ་དང་འདྲའོ། །རང་ལ་ཉམས་མྱོང་ཡོད་བཞིན་གཞན་ལ་མི་སྟོན་པ་ནི་ཐེག་ཆེན་དང་འགལ་བའི་ལྟུང་བ་ཡིན། དེད་དཔོན་མཁས་པས་གཞན་མི་ཁྲིད་པ་བཞིན་ནོ། །རང་སྨིན་ནས་གཞན་སྨིན་པ་ནི་བྱང་ཆུབ་སེམས་དཔའི་ས་ལམ་སྦྱོང་བ་ཡིན། ཉན་རང་ལ་དེ་མེད་དོ། །དེས་ན་ཉེ་འབྲེལ་རྣམས་ཐོག་མར་འདུལ་བ་ནས་བཟུང་གཞན་རྒྱུད་འདུལ་བ་ཁོ་ན་གཙོ་ཆེའོ། །ཉམས་མྱོང་དང་བརྒྱུད་པའི་བྱིན་རླབས་མེད་ན་ལུང་ཁྲིད་ཙམ་ནི་གང་ཟག་མཆོག་དམན་སུ་ལས་ཐོབ་ཀྱང་དོན་འདྲ། དཔེར་ན་གསེར་བུམ་དང་ས་བུམ་གྱི་ཆུ་བཞིན་ནོ། །ཆོས་འཆད་ཉན་འདི་ཡང་རྒྱུ་འབྲས་ཡིན་པས་ཡན་ལག་བཞི་ཚང་དགོས་ཏེ། གཞི་ཆོས་སྦྱིན། བསམ་པ་བསྟན་པ་དང་གདུལ་བྱ་ལ་ཕན་སེམས་སྤྲོ་བ་དང་བཅས། སྦྱོར་བ་ཡི་གེ་རེ་རེ་ནས་མ་ཆད་པར་བགྲང་བ། མཐར་ཐུག་ཐོབ་བློ་བཅས་བཞི་ཚང་དགོས། དེའི་གཅིག་མ་ཚང་ན་ཡན་ལག་ཉམས་པའི་ལུང་དེ་གཅིག་ཏུ་དཀར་བའི་ལས་དང་ཐར་བའི་རྒྱུར་མི་འགྲོ་གསུངས། བརྒྱད་སྟོང་པ་ལས། ཀུན་དགའ་བོ་ཤེར་ཕྱིན་འདིའི་ཡི་གེ་གཅིག་ཀྱང་མི་ནུབ་པར་ཁྱོད་ལ་གཏད་དོ། །ཞེས་དང་། བྱང་ས་ལས། ཚིག་དང་ཡི་གེ་གོ་རིམ་བཞིན་སྟོན་ཅིང་། །ཞེས་དང་། ཉན་ས་ལས། དེ་བཞིན་གཤེགས་པའམ་དེའི་ཉན་ཐོས་རྣམས་ལས་ཇི་ལྟར་མནོས་པ་དེ་བཞིན་དུ་ཆད་ལྷག་མེད་པར་བྱས་ཤིང་གཞན་ལ་འདོམས་པར་བྱེད་པ་སྟེ། ཞེས་དང་། རྣམ་བཤད་རིག་པ་ལས་ཀྱང་གསུངས། མདོ་རྩ་བ་ལས། ལུང་འབོགས་པ་མནོས་པ་ན། ཤིན་ཏུ་ལེགས་པར་བཀླག་པ་དང་ལེགས་པར་བྱང་བ་དང་ཐེ་ཚོམ་མེད་པར་བྱས་ཏེའོ། །ཞེས་གསུངས། དེ་ལྟར་མིན་ན་སྡོམ་པ་ཉི་ཤུ་པར། དམ་ཆོས་འདྲ་སྣང་སྟོན་པའོ། །ཞེས་རྩ་ལྟུང་དང་བསྟན་པ་འཇིགས་པར་བྱེད་པ་ཡིན་ནོ། །རང་ལ་ཉམས་རྟོགས་མེད་པར་ཀུན་སློང་དམན་པས་ཆོས་ཟབ་མོ་སྟོན་ན་ལོག་ཆོས་སུ་སོང་བས་འཁོར་བའི་རྒྱུར་འགྲོ་སྟེ། དེད་དཔོན་བླུན་པོས་བསུ་སྐྱེལ་བཞིན་ནོ། །གཞན་ཡང་བརྒྱུད་པའང་མེད་ཇི་བཞིན་འཆད་ཀྱང་མི་ཤེས་པར་ཟང་ཟིང་གི་ཕྱིར་དུ་བསྟན་པའི་ཆོས་ནི་གང་ཟག་མཆོག་ཏུ་བརྩི་བ་ཞིག་ལས་ཐོབ་ཀྱང་ཕན་པ་མེད་ཅིང་གནོད་པའང་ཡིན་ཏེ་རིན་པོ་ཆེའི་བུམ་པའི་ཆུ་དུག་ཏུ་འགྱུར་བ་བཞིན་དང་། རྙེད་པའི་ཕྱིར་ཆོས་འཚོང་བ་དེའི་རྙེད་པ་དེ་ལོག་འཚོ་ཡིན་པས་ཡི་དྭགས་སུ་སྐྱེ་བར་བཤད་དོ། །མདོ་ལས། བླུན་པོ་གང་ཞིག་ཆོས་སྟོན་པ། །དགེ་བའི་རྩ་བ་འཇིག་བྱེད་པས། །སྐྱེ་དགུ་དག་ནི་མང་པོ་རྙེད། །སེམས་ཅན་དམྱལ་བར་འཚེད་པར་འགྱུར། །ཞེས་སོགས་དང་། འཇམ་དཔལ་ཞིང་བཀོད་ལས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དགྲ་བཅོམ་པ་ལ་བཀོད་པ་དེ་དག་བསད་པ་བས་ཚིགས་སུ་བཅད་པ་གཅིག་མ་དག་པར་སྟོན་ན་ཉེས་པ་དེ་བས་ཆེ་བར་གསུངས་པ་དང་། ཆོས་ཀྱི་ངོས་ནས་དུ་མ་དང་གནོད་པ་མི་སྲིད་ཀྱང་གང་ཟག་གི་ཁམས་ཀྱི་ཆོས་ལ་སྐྱོན་ཡོན་མཆོག་དམན་དུ་མའི་རྣམ་པར་སྣང་བའི་ཕྱིར་རོ། །བརྒྱུད་ལྡན་གྱི་ཆོས་ཚུལ་བཞིན་སྟོན་པ་ནི་གང་ཟག་ཕལ་པ་ཅི་འདྲ་ཞིག་ལས་ཐོབ་ཀྱང་གང་ཟག་དེ་ཡང་རང་ལ་ཕན་པ་ཆེ་བས་བཀའ་དྲིན་གྱི་ངོས་ནས་སངས་རྒྱས་ལས་ལྷག་པ་དང་། ལུང་ནི་སངས་རྒྱས་ཀྱི་གསུང་གི་ཕྲིན་ལས་དང་། རྟོགས་པ་ནི་ཐུགས་ཀྱི་ཕྲིན་ལས་ཡིན་པས་ལུང་རྟོགས་ཀྱི་ཆོས་སྣང་བའི་གང་ཟག་དེ་ཡང་སྐུ་གསུང་ཐུགས་ཀྱི་ཕྲིན་ལས་ཀྱི་རྟེན་གཟུགས་སྐུར་བལྟ་དགོས་སོ། །འདིའང་མདོའི་ཐུན་མོང་གི་ལམ་སྟོན་པའི་བླ་མ་ཉིད་ཀྱིས་གནས་སྐབས་ལྷ་མིའི་བདེ་བ་དང་མཐར་ཐུག་མཆོག་གི་འབྲས་བུ་རིམ་གྱིས་འགྲུབ་པའི་རྒྱུ་ཙམ་སྟོན་པ་ལ་བླ་མ་སངས་རྒྱས་སུ་བལྟ་དགོས་པ་ལས་དངོས་ཡིན་པར་མ་བཤད་ལ། གསང་སྔགས་ཀྱི་དབང་བསྐུར་རྒྱུད་འཆད་པའི་བླ་མ་ནི་སངས་རྒྱས་དངོས་ཡིན་པར་གསུངས་པས་དེ་ལྟར་བལྟ་དགོས་ཏེ། ཚེ་འདིའམ་འཆི་ཁ་བར་དོར་འཚང་རྒྱ་བའི་གདམས་ངག་རང་རྒྱུད་ལ་འཇོག་པའི་ཕྱིར་རོ། །སློབ་དཔོན་དབྱིག་གཉེན་གྱིས། ཆོས་སྨྲ་བ་ནི་མདོར་ན་སངས་རྒྱས་ཀྱི་མཛད་པ་ཐམས་ཅད་བྱེད་པ་ཡིན་པས་དགེ་བའི་བཤེས་གཉེན་ཆེན་པོ་ཡིན་ནོ། །ཞེས་གསུངས་སོ། །དེས་ན་བཤད་བྱའི་ཆོས་ཀྱི་ཡན་ལག་ལ་བརྒྱུད་པའི་སྲོལ། གདམས་ངག་གི་ལག་ལེན། ཉམས་མྱོང་གི་བྱིན་རླབས། མཁས་པའི་ཁྲིད་ཚུལ་རྣམས་ཚང་བ་གཙོ་བོར་གཟུང་དགོས། འཆད་པ་པོ་གང་ཟག་གི་གོ་ས་མཐོ་དམན་ལ་ནི་ཅི་ཡང་རྟོན་པ་མིན་ཏེ་བཤད་མ་ཐག་པ་ལྟར་ཡིན་པའི་ཕྱིར། དོན་དེའི་ཞར་ལ་འདི་ལྟར་འོང་སྟེ་ཕལ་སྐད་ཀྱི་དཔེ། རྒྱན་དྲུག་རྟ་ལ་བཏགས་ན་ཆེ་བ་མི་ལ་ཐོབ་ཅེས་པ་ལྟར། ཆེ་བ་ཆོས་ལ་ཐོབ་དགོས་ན་རྒྱན་ལྟ་བུའི་བསྟོད་བཀུར་དང་གོས་དེ་འཆད་པ་པོ་ལ་ཐོབ་དགོས་པ་ཡིན་པའི་ཕྱིར་ན་ཆོས་ཉན་པ་པོ་དེ་འཇིག་རྟེན་འདིར་སྣང་གི་གོ་ས་མཐོན་པོར་སླེབས་པ་ཞིག་ཡིན་ཕྱིན་དེ་གཙོ་བོར་བཟུང་ནས། ཆོས་འཆད་པ་པོ་དེ་འཇིག་རྟེན་འདིར་ལུགས་ཀྱི་ཐོབ་ཙམ་དམའ་བ་ཡིན་ན་དེ་ལ་གོང་དུ་བཀུར་བ་དང་གོ་ས་བརྗེ་བ་སོགས་མི་བྱེད་པ་དང་བཞུགས་གདན་མཐོ་དམན་ཙམ་ཡང་མི་བརྗེ་བའི་གང་ཟག་དེས་ནི་བླ་མའི་དམ་ཚིག་དང་ཡང་འགལ་བར་འགྱུར་བར་ཐེ་ཚོམ་མེད་ཅིང་། ལུང་རིགས་གཉིས་ཀར་ཡང་མི་མཐུན་ཏེ། ཇི་སྐད་དུ། གང་གིས་ཚིགས་བཅད་གཅིག་མཉན་པ། །དེ་ཡང་བླ་མར་མ་བཟུང་ན། །ཁྱི་ཡི་སྐྱེ་བ་བརྒྱ་བླངས་ཏེ། །སྨེ་ཤ་ཅན་དུ་སྐྱེ་བར་འགྱུར། །ཞེས་དང་། རབ་ཏུ་དམན་པའི་ས་ལ་འདུག །ཅེས་སོགས་དང་། མ་གུས་པ་ལ་ཆོས་མི་འཆད། །ཅེས་དང་ལུས་ངག་གི་གུས་པ་མེད་པ་ལ་སྡོམ་པ་མི་སྐྱེ་བར་བཤད་པ་དང་། མཐོན་པོར་འདུག་པ་ལ་དམའ་བར་འདུག་སྟེ་ཆོས་འཆད་པར་མི་བྱའོ། །ཞེས་དང་། རྒྱ་གར་པའི་རྒྱལ་རིགས་སམ་ཁྱིམ་བདག་ཕྱུག་པོ་ཇི་འདྲ་ཡིན་ཡང་ཆོས་ཉན་པའི་ཚེ་སྟན་ཆེས་དམའ་བ་ཞིག་བཏང་ནས་སོགས་མང་དུ་གསུངས་པའི་ཕྱིར། འཆད་པོ་ཉན་པོ་ཐམས་ཅད་སྡོམ་ལྡན་ཡིན་ན་བཅས་འགལ་གྱི་ལྟུང་བ་འབྱུང་བའི་ཕྱིར་རོ་ཞེས་ལུང་མང་ངོ་། །རིགས་པ་དང་ཡང་མི་མཐུན་ཏེ། འདིར་ལུགས་ཀྱི་གོ་ས་ཙམ་མཐོ་ཡང་དེ་སྔོན་གྱི་དགེ་འབྲས་དཀོན་མཆོག་གི་དྲིན་ལས་བྱུང་བ་ཞིག་ངེས་པར་ཡིན་པས་ཆོས་ཞུ་ཚེ་ཆོས་ལ་ཐོབ་དགོས། ཆོས་གང་ཟག་ལས་འབྱུང་ཕྱིར་གང་ཟག་དེ་ཡང་འདིར་སྣང་གི་གོ་ས་ཙམ་དམན་ཡང་སྐབས་དེར་རང་ལས་གོ་ས་མཐོན་པོར་འཇོག་དགོས་པའི་ཕྱིར་དང་། ལུགས་གཉིས་ནས་ཐམས་ཅད་ཀྱི་འོག་ཏུ་མ་གྱུར་པ་ཞིག་ཡིན་ན་ཆོས་ཞུ་དགོས་པའང་མིན་ཏེ་རྫོགས་པའི་སངས་རྒྱས་བཞིན་ནོ། །ཆོས་ཉན་པ་པོ་དེ་འཕགས་པ་དང་འཆད་པ་པོ་སོ་སོ་སྐྱེ་བོ་ཞིག་ཡིན་ན་མ་ངེས་སྙམ་ན་གང་ཟག་དེ་འཕགས་པར་བྱེད་པ་ནི་ཆོས་ཁོ་ན་ཡིན་ཅིང་ཆོས་དེ་གང་ཟག་ལ་རག་ལས་པ་ཡིན་ན་དེའི་ཕྱིར་ཡང་གོང་ལྟར་བྱ་དགོས། དཔེར་ན་འབྲས་བུ་དང་ལྗོན་ཤིང་བཞིན་ནོ། །དེར་མ་ཟད་རྟེན་ཁྱིམ་པ་རབ་བྱུང་གི་ཁྱད་པར་ཡང་མང་ཞིང་ཡེ་ཤེས་དང་ལྡན་པ་གཙོ་བོར་འཛིན་དགོས་པར་གསུངས་པ་ནི་དོན་གཞན་དུ་མ་ལས་དགོངས་སོ། །སྤྱིར་ཡང་བསྟན་པའི་གོ་རིམ་དང་ཆོས་ཀྱི་ཆེ་བ་མི་ཉམས་པ་གཙོ་བོར་འཛིན་དགོས་སོ། །དེས་ཉམས་མྱོང་ཡོད་མེད་ཀྱིས་ཆོས་འཆད་རུང་མི་རུང་གང་ཟག་མཆོག་དམན་ལས་ཆོས་མཆོག་དམན་དུ་འགྱུར་མི་འགྱུར་སོགས་ཀྱི་གོ་དོན་རགས་རིམ་ཙམ་དེ་ལགས་པས་ཐུགས་ཆུབ་ཞུ། ༈ ཡང་སྙིགས་དུས་བསླབ་པ་ཕྲ་མོ་བསྲུངས་པའི་ཕན་ཡོན་ཆེས་ཆེ་ཚུལ་སོགས་གསུངས་པ་ལ། སྙིགས་མས་མ་སྦགས་པའི་ཞིང་གཞན་དང་བསྟན་པ་དར་བའི་དུས་སུ་ཚེ་ཧྲིལ་པོ་དང་བསླབ་པ་རྫོགས་པར་བསྲུངས་བ་བས་ཞིང་འདི་ལྟ་བུ་དང་བསྟན་པ་ནུབ་ཉེ་བའི་དུས་ད་ལྟར་ལྟ་བུ་ལ་ནི་ཉིན་ཞག་གཅིག་གམ་ཐུན་ཚོད་གཅིག་ལ་བསླབ་པ་སྣ་རེ་ལ་སྲུང་སེམས་ཙམ་རེ་སྐྱེས་པའི་ཕན་ཡོན་ཡང་ཆེས་ཆེ་བའི་ལུང་ནི་བྱང་ཤར་མཚམས་ཀྱི་སངས་རྒྱས་དབང་ཕྱུག་རྒྱལ་པོའི་ཞིང་དུ་བསྐལ་པའི་བར་ཚུལ་ཁྲིམས་བསྲུངས་པ་བས་ཞིང་འདིར་ཚུལ་ཁྲིམས་སྣ་རེ་ལོ་ཟླ་ཞག་དུས་བསྲུངས་བ་ཕན་ཡོན་ཆེ་བར་མདོ་ལས་གསུངས་པ་དང་། མ་སྐྱེས་དགྲའི་འགྱོད་བསལ་གྱི་མདོ་ལས། འོག་གི་ཕྱོགས་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་འདས་ནས་འཇིག་རྟེན་གྱི་ཁམས་སྣང་བ་དང་ལྡན་ཞེས་བྱ་བ་ན་སངས་རྒྱས་འོད་ཟེར་གྱི་རྒྱལ་པོ་བཞུགས་པའི་ཞིང་དེར་བསྐལ་པ་བཅུར་བསམ་གཏན་ལ་གནས་ཤིང་སྤྱོད་པ་བས། མི་མཇེད་ཀྱི་ཞིང་འདིར་སྔ་དྲོ་གཅིག་བྱམས་པ་བསྒོམ་པ་བསོད་ནམས་ཆེས་མང་དུ་འཕེལ་བ་དང་། ཞིང་འདིར་དམ་ཆོས་སྲུང་བའི་སེམས་དཔའ་ཆེན་པོ་རྣམས་ཀྱིས་ལས་དང་ཉོན་མོངས་ཐམས་ཅད་མྱུར་དུ་བྱང་བར་གསུངས་པ་དང་གཞན་ཡང་ཟླ་བ་སྒྲོན་མེ་སོགས་མང་པོར་འདུག་པ་བྲི་མི་དགོས་ལ། རིགས་པ་ནི་བསྟན་པ་རྫོགས་པར་དར་བ་ན་གང་ཟག་རྣམས་ཀྱང་ཆོས་ཀྱིས་ཚིམས་ཡོད་པ་ཡིན་པས་བརྒྱགས་པའི་དུས་སུ་ཟས་ཟོས་པ་བཞིན་ཕན་ནུས་ཆེར་མི་སྣང་བ་ལྟ་བུ་ཡིན་ལ། སྙིགས་དུས་སུ་ཆོས་ཀྱིས་ཕོངས་བ་རྣམས་ལ་ཆོས་སྣ་རེས་ཀྱང་ཕན་པ་ཆེ་བར་སྣང་བ་ནི་ལྟོགས་པའི་དུས་སུ་ཟས་ཟོས་པ་བཞིན་ནོ། །དེའང་དཔེར་ན་མེ་ཆུང་ངུ་འབར་བ་ལ་གཉེན་པོ་ཆེན་པོ་བསྟེན་མི་དགོས་ཤིང་མེ་ཆེར་འབར་བ་ལ་གཉེན་པོ་ཆེན་པོ་དང་མང་པོ་བསྟེན་དགོས་པ་ལྟ་སྤང་བྱ་ཆེ་ཆུང་དང་མང་ཉུང་ལས་གཉེན་པོ་ཡང་དེ་ལྟར་འགྱུར་དགོས་པར་དགོངས་པ་དང་། སྤང་བྱ་ཉན་མོངས་པ་དར་གྲག་པའི་ཚེ་གཉེན་པོ་བསྲུང་བྱ་སྣ་རེ་ཡང་དཀོན་པའི་དུས་ཀྱི་ནོར་བཞིན་ཕན་པ་ཆེ་བ་དང་ལས་ཀ་ཆེ་ཆུང་དང་མང་ཉུང་ལས་ལས་བྱེད་མི་མང་ཉུང་གིས་ཕན་འདོགས་ཆེ་ཆུང་ལྟར། སྔར་བསྟན་པ་དར་བའི་ཚེ་སྒྲུབ་མཁན་མང་བས་བསྒྲུབ་བྱའི་བསླབ་པ་སྣ་རེས་ཕན་ཐོགས་ཧ་ཅང་མི་ཆེ་བ་ལྟར་ཡང་། ད་ལྟར་བསྟན་པའི་བྱ་བ་ནི་རྒྱ་ཆེ་དགོས་ཀྱང་བསྟན་པའི་ལས་བྱེད་མི་ནི་ཤིན་ཏུ་རྒྱ་ཆུང་བའི་ཚེ་བསླབ་པ་སྣ་རེ་བསྲུངས་པ་དང་ཆོས་ཚིག་རེས་ཀྱང་བསྟན་པ་ལ་ཕན་ཐོགས་ཆེ་བར་དགོངས་པ་དང་། ལུང་རྟོགས་ཀྱི་བསྟན་པ་མྱུར་དུ་ནུབ་འགྲོ་བས་དེ་ལ་བག་ཆགས་འཇོག་པ་སོགས་ལ་དགོངས་ནས་གསུངས་པ་ཡིན་པས། སྔོན་བསྟན་པ་ལ་དངོས་སུ་ཞུགས་ནས་བསྒྲུབ་པ་བས་ད་ལྟར་མོས་པ་ཙམ་སྐྱེས་པའི་ཕན་ཡོན་ཆེ་བར་ཤེས་དགོས་སོ། །སྤྱིར་བསྟན་པའི་གནས་ཚད་ཀྱང་དུ་མར་གསུངས་པ་རྣམས་ཕལ་ཆེར་གདུལ་བྱར་སྐྱོ་བ་སྐྱེད་ཕྱིར་དྲང་དོན་ཡིན་ཡང་སྟོང་ཕྲག་ལྔར་གནས་པར་གསུངས་པ་དེ་ཡང་སྤྱིར་ཐུགས་བསྐྱེད་ཀྱིས་འཕངས་ཚད་རྫོགས་པ་དང་དེ་ཕན་ཆད་ཉམས་སུ་ལེན་པའི་སེམས་ཅན་སྙིགས་མར་གྱུར་པས་བསྟན་པ་གནས་ཀྱང་སྒྲོ་སྐུར་དང་འགྱུར་བ་ལས་དོན་མེད་པ་དང་། བསྟན་པ་འབྱུང་དཀའ་ཞིང་ནུབ་སླ་བར་ཤེས་ན་ངེས་འབྱུང་དང་ཆོས་ལ་དོན་གཉེར་སྐྱེ་བར་དགོངས་ཏེ་ཚུལ་བསྟན་ཡིན་ལ་ངེས་པའི་དོན་དུ་ནི་བསྟན་པ་ནུབ་པ་མེད་དེ། མདོ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །སེམས་ཅན་རྣམས་ལ་ཕན་པའི་ཕྱིར། །བཀོད་པ་རྣམ་པ་སྣ་ཚོགས་སྟོན། །ཅེས་དང་། བསྐལ་པ་མུན་པར་གྱུར་པ་ནའང་ཐེག་ཆེན་འཕགས་པའི་འཇུག་པོ་རྒྱུན་ཆད་པ་མི་སྲིད་ཅིང་དེ་དག་གི་ཐུགས་རྒྱུད་ན་བཞུགས་པའི་ཆོས་དཀོན་མཆོག་ལས་ལྷག་པའི་བསྟན་པ་མེད་པའི་ཕྱིར། འོན་ཀྱང་འགྲོ་བ་སྤྱིའི་ལས་ཀྱི་དབང་ལས་ནི་ནུབ་པར་འཐད་པ་ཡིན་ནོ། །དེས་ན་ལྔ་བརྒྱ་པ་ཕྲག་བཅུའི་དབང་དུ་བྱས་ན་འབྲས་བུའི་བསྟན་པ་རྫོགས་ལ་ཚུལ་ཁྲིམས་ཀྱི་ལེའུ་ཡང་རྫོགས་ཟིན་པར་བཤད་ནའང་བསླབ་པ་འདུལ་བའི་ཚུལ་ཁྲིམས་ཀྱིས་མི་ཕན་ཟེར་མི་རུང་སྟེ། ད་དུང་ལུང་གི་བསྟན་པ་ལ་འདུལ་བའི་ལས་ཆོག་དངོས་སུ་བཞུགས་ཤིང་དེའི་ལག་ལེན་ཤེས་པའི་མཁན་སློབ་དངོས་སུ་བཞུགས་པའི་དུས་སུ་བསྟན་པ་ལ་ལས་འཕྲོ་འཇོག་པ་དང་སྡོམ་པ་སྣ་རེའི་ཕན་ཡོན་གོང་བཤད་ལྟར་དང་། གང་ཟག་རེ་རེའི་ངོས་ནས་བཞག་ན་ད་དུང་འདུལ་བའི་ཚུལ་ལྡན་གྱི་དགེ་སློང་སོགས་ཡོད་དེ། ལུང་ལས་ཀྱང་། མ་འོངས་པའི་དུས་ལྔ་བརྒྱའི་ཐ་མ་ལ་དམ་པའི་ཆོས་རབ་ཏུ་རྣམ་པར་འཇིག་པར་འགྱུར་བ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་ཤེས་རབ་དང་ལྡན་པ་དག་འབྱུང་ངོ་། །ཞེས་གསུངས་པའི་ཕྱིར། ཡང་གང་ཟག་ཆོས་ལ་གཏན་མི་མོས་ཤིང་ལས་མཐའ་ལོག་པ་རེའི་ངོར་ནི་ད་ལྟར་མ་ཟད་སྔ་ནས་ཀྱང་བསྟན་པ་ནུབ་ཚར་བ་དཔེར་ན་མིག་མེད་པ་ཉི་མའི་ངོགས་ལ་བསྡད་པ་ལྟ་བུ་དུ་མ་ཡོད་ལ། བསམ་པ་དག་པས་སྨོན་ལམ་བཏབ་པ་རྣམས་ནི་གང་དུ་སྐྱེས་ཀྱང་ཆོས་ཀྱི་སྒྲ་ཐོས་པ་མི་ནུབ་སྟེ། འཐབ་བྲལ་གྱི་ལྷ་ཡུལ་ན་ངང་པའི་རྒྱལ་པོ་དུས་བཟང་ཞེས་པས་རྟག་ཏུ་ལྷ་རྣམས་ལ་ཆོས་སྟོན་པ་ཡོད་པ་སོགས་དཔེ་ལུང་མང་པོ་ཡོད་དོ། །ནམ་ཞིག་ལུང་གི་བསྟན་པ་ལས་ཆོག་སོགས་ཀྱི་སྒྲ་མི་སྣང་བར་གྱུར་ཀྱང་སྡིག་པ་མི་བྱེད་སྙམ་པ་རེ་ཡིད་ལ་འཆར་བའི་གང་ཟག་རེ་ཡོད་ན་དེའི་ཕྱོགས་དེ་ན་ད་དུང་བསྟན་པ་ཡོད་ཅེས་སྨྲ་དགོས་གསུངས་པས་སེམས་ཅན་གྱི་རྒྱུད་ན་དགེ་སེམས་ཕྲན་བུའང་མེད་པའི་དུས་སུ་བསྟན་པ་མཐའ་དག་ནུབ་པར་འདོད་དགོས་སོ། །དེ་ལྟར་ན་བསྟན་པའི་ལྷག་ཞབས་འདི་ལ་ཆེ་ཟིན་ཆུང་ཟིན་བྱེད་དགོས་པ་ནི། དཔེར་ན་ཉི་མ་ནུབ་ཁར་སླེབ་པ་དང་ལས་བྱེད་པ་རྣམས་བྲེལ་ཞིང་རྩོལ་བ་ཆེས་ཆེར་སྐྱེད་པ་བཞིན་ནོ། །བཅོམ་ལྡན་འདས་ཀྱིས་ཀྱང་། མར་མེ་འཆི་བའི་འོད་བཞིན་དུ། །ང་ཡི་བསྟན་པ་ནུབ་ཁར་གསལ། །ཞེས་དང་། མདོ་བསྐལ་བཟང་ལས། ཆོས་ནུབ་མཐའ་དང་ངན་སོང་འཕེལ་བ་ན། །མཁས་པ་ཤིན་ཏུ་ཡིད་དབྱུང་བསྐྱེད་བྱས་ནས། །ཞེས་སོགས་དང་། འདུལ་བ་ལས། དགེ་སློང་དག་ཤེས་པ་ནི་འགྲིབ། །སྲོག་གི་འཆད། ཚེ་ཡི་འདུ་བྱེད་ནི་འདོར། སྟོན་པའི་བསྟན་པ་ཡང་ངེས་པར་འཇིག་པར་འགྱུར་ན། ཅིའི་ཕྱིར་བརྩོན་འགྲུས་དང་བརྟུལ་བ་བརྟན་པོ་སྒྲུབ་པར་མི་བྱེད། ཅེས་སོགས་མང་དུ་གསུངས་པའི་ཕྱིར་རོ། །ད་ལྟ་འབྲས་བུ་མཐར་ཐུག་རྡོ་རྗེའི་ཐེག་པ་དང་ཡང་གསང་ཀུན་བཟང་ཐུགས་ཀྱི་བསྟན་པ་དར་བ་འདི་ལྟ་བུ་ལས་ལམ་གཞན་གྱིས་ཉོན་མོངས་པ་གདུལ་དཀའ་བར་གསུངས་པའང་གང་ཟག་གི་ངོས་ནས་འཇོག་དགོས་ཏེ། གང་ཟག་ཤེས་རབ་ཅན་ནི་ཐུན་མོང་མ་ཡིན་པའི་ལམ་སྒྲུབ་པའི་སྐལ་བ་ཅན་ཡིན་པས་ཟབ་ལམ་ལ་ཞུགས་པས་ཆོ ག་ཅིང་དེའི་རྒྱུད་ན་ཉོན་མོངས་པ་རགས་ཤིང་མང་བ་བཞིན་དུ་ཐབས་ཤེས་ཁྱད་པར་ཅན་སྔགས་ཀྱི་ལམ་ཡང་ཇེ་མྱུར་ཇེ་ཟབ་ཏུ་འགྲོ་བ་ཡིན་པའི་ཕྱིར་ཏེ་སྤང་བྱ་བུད་ཤིང་མང་ན་གཉེན་པོ་མེ་ཆེར་འབར་བའི་གྲོགས་སུ་འགྱུར་བ་བཞིན་ནོ། །ཉན་ཐོས་པ་ལ་ཐར་བའི་གེགས་སུ་གྱུར་པའི་འདོད་ཡོན་ལ་བག་མེད་དུ་སྤྱོད་པའི་སྡིག་པ་ཆེན་པོ་ཡང་བྱང་ཆུབ་ཀྱི་སེམས་དང་ཐབས་མཁས་ཟབ་མོའི་ལམ་གྱིས་ནི་སྤང་བྱ་འདོད་པའི་ཡོན་ཏན་ལྔར་སྤྱོད་ཀྱང་དགེ་བ་ཆེན་པོར་གྱུར་བས་གཉེན་པོའི་གྲོགས་སུ་འགྱུར་བའི་ཕྱིར་རོ། །གང་ཞིག་སྤང་བྱ་ཉོན་མོངས་ཆེ་ལ་མང་ཡང་སྤང་བར་མི་སྤྲོ་ལམ་དུ་བྱེད་པའི་གཉེན་པོ་བསྟེེན་ནུས་ཤིང་བྱང་ཆུབ་འདོད་པའི་དབང་རྣོན་ལ་དགོངས་ནས་རྡོ་རྗེའི་ཐེག་པ་གསུངས་ཏེ། གསང་འདུས་ལས། སྒོ་གསུམ་དང་འདོད་ཆགས་ཞེ་སྡང་གཏི་མུག་རྣམས་རྡོ་རྗེ་ཡི་རང་བཞིན་ཡིན་པ་ལ་དགའ་ཞིང་རྣམ་པར་རྣལ་འབྱོར་དེ་ལ་གནས། དེས་ན་སངས་རྒྱས་རྣམས་ཀྱི་ཐབས་རྡོ་རྗེའི་ཐེག་པ་ཞེས་བྱའོ། །ཞེས་གསུངས་སོ། །སྤང་བྱ་མེད་ན་གཉེན་པོ་ལ་ཟབ་པའི་ཁྱད་ཆོས་འདོན་རྒྱུ་མེད་པ་ནི་འདུལ་བ་ལས་ཀྱང་འདོད་པ་མེད་པའི་མ་ནིང་སོགས་ལ་སྡོམ་པའི་ཁྱད་པར་བཞག་ཏུ་མེད་པར་བཤད་པ་ལྟར་རོ། །ལམ་གང་ཡིན་ཡང་སྤང་བྱའི་གཉེན་པོར་སོང་ན་ཟབ་ཅེས་བྱ་ལ་གཞན་དུ་ན་ཟབ་པའི་དོན་མེད་དོ། །སྤྱིར་ཡང་སྔགས་ཀྱི་ཐེག་པ་ན་སྤང་བྱ་ཤིན་ཏུ་ཟབ་ཅིང་ཕྲ་བ་དུག་གསུམ་ཆ་མཉམ་མམ་སྣང་གསུམ་འཕོ་བའི་བག་ཆགས་སྤྱོད་བྱེད་ཡིན་ཏེ། སྤང་བྱ་ཕྲ་བ་མཐར་ཐུག་སྤོང་བ་ལ་ལམ་མཐར་ཐུག་བརྟེན་དགོས་པ་ལུང་རིགས་གཉིས་ཀས་གྲུབ་པས་སངས་རྒྱས་ཐམས་ཅད་མཐར་ཐུག་སྔགས་ཀྱི་ཐེག་པར་མ་བརྟེན་པ་མེད་པར་གསུངས་པས། སྔགས་ཀྱི་ལམ་ཟབ་པ་ཡིན་མོད་སྒྲུབ་པ་པོ་གང་ཟག་མ་ཟབ་ན་བསྒྲུབ་བྱའི་ཆོས་ཟབ་པས་མི་འོང་སྟེ། དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཅེས་པའང་དེ་ཡིན་པའི་ཡིར། དཔེར་ན་གསེར་འགྱུར་ལྕགས་ལ་བཏབ་སྟེ་གསེར་དུ་འགྱུར་པའང་ལྕགས་ལ་གསེར་ལེན་པའི་ནུས་པ་ཡོད་པས་ཡིན་གྱི། གཞན་ཤིང་སོགས་ལ་བཏབ་པས་གསེར་མི་འབྱུང་བ་བཞིན་ནོ། །སྡིག་པོ་ཆེ་བཙན་ཐབས་ཀྱིས་གྲོལ་བར་བཤད་པ་སོགས་ཀྱང་སྦྱངས་འཕྲོའི་བག་ཆགས་ཡོད་པ་དང་དབང་རབ་དད་ལྡན་ཞིག་ངེས་པར་དགོས་པ་ཡིན་ནོ། །གང་ཟག་དབང་རྟུལ་ཡིན་ན་ནི་འདུལ་བའི་རྟགས་ཙམ་ཡིན་ལ་རིམ་སློབ་བྱེད་དགོས་མ་གཏོགས་སྡོང་པོ་བཞག་སྟེ་ཡལ་གར་བསྙེགས་པས་ལྟུང་བ་བཞིན་ཐམས་ཅད་མེད་པར་འགྱུར་བས་སྔར་བཤད་པ་ལྟར་བྱའོ། །ཤེས་རབ་མེད་ན་ཐབས་ལམ་འབའ་ཞིག་གིས་མི་གྲོལ་བ་ནི་མདོ་ལམ་ནའང་ཡོད་ཅིང་ཐབས་མང་བ་དང་ཐབས་ལ་མཁས་པའང་ཤེས་རབ་ཆེ་བས་ཡིན་ནོ། །དེས་ན་ཚེ་འདིར་མཆོག་གི་དངོས་གྲུབ་མ་འགྲུབ་ཀྱང་དབང་ཐོབ་པའི་དམ་ཚིག་དང་ཡི་དམ་གྱི་ལྷ་སྒྲུབ་པ་དང་དེའི་བསྙེན་པའང་ལྷག་པོར་བཟླས་ན་ཕན་ཡོན་ཆེས་ཆེ་བ་དང་། ཆོས་གཞན་པས་ཀྱང་ཉེ་ལམ་ཟབ་མོ་སྔགས་ལ་ཞུགས་པའི་བག་ཆགས་ཁྱད་པར་ཅན་ཐོབ་པ་དང་། ཕར་ཕྱིན་ཐེག་པ་བས་བསྐལ་པ་གྲངས་མེད་བརྩོན་ཀྱང་ཐོབ་དཀའ་བའང་དབང་པོ་ཤིན་ཏུ་ཐ་མས་ཀྱང་དཀྱིལ་འཁོར་མཐོང་ཞིང་། དམ་ཚིག་དག་པ་སྔགས་བཟླ་བ་ཙམ་ལས་རིམ་གཉིས་ལ་འབད་པ་མེད་ཀྱང་སྐྱེ་བ་བཅུ་དྲུག་ན་མཆོག་གི་དངོས་གྲུབ་འགྲུབ་སྟེ། དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ན་འགྲུབ། །ཅེས་སོགས་གསུངས་པ་ནི་ངེས་པ་ཡིན་ལ། དེ་མིན་པར་འདུལ་བས་མི་ཕན་ཞེས་རྟགས་ཙམ་དེ་ཡང་དོར་ནས་སྔགས་ཁོ་ན་ལ་འབད་པ་མང་ཡང་ཚེ་འདིར་མཆོག་ཐུན་གྱི་དངོས་གྲུབ་ཐོབ་པ་འགའ་ལ་རུང་མོད་ཐམས་ཅད་ལ་མ་ངེས་ཏེ། སྔོན་ཉན་ཐོས་ཀྱི་ལམ་ལ་བརྟེན་ནས་ཚེ་དེར་འབྲས་བུ་ཐོབ་པ་དེ་འདྲ་ད་ལྟ་སྔགས་ལ་ཞུགས་པ་དག་ལའང་དངོས་སུ་མཐོང་ཆོས་སུ་སྣང་བ་དཀོན་འདུག་པ་འདི་ལ་བལྟས་ན་འོག་མ་སྤངས་ཏེ་སྔགས་ཟབ་ཅེས་དེ་གཙོ་བོར་འཛིན་པའང་དཀའ་འོ། །ཡང་བློ་ཆུང་གང་དག་རང་བློས་མ་ལྕོག་པའི་ལན་གྱིས་སྔགས་ཀྱིས་ཚེ་གཅིག་ལ་འཚང་རྒྱ་བ་དང་། ལུས་ངག་ཡིད་གསུམ་མ་སྤངས་པར་སྐུ་གསུང་ཐུགས་འགྲུབ་པའི་ཉེ་ལམ་ལ་ཐེ་ཚོམ་ཟ་ཞིང་ཁས་མི་ལེན་ཅིང་། ཐུན་མོང་གི་ལམ་ཁོ་ནས་སངས་རྒྱས་འགྲུབ་ཅིང་དེ་ཡང་གྲངས་མེད་གསུམ་སོགས་ཀྱིས་སྦྱང་དགོས་ཞེས་འདོད་པ་དེས་ལམ་ལྔ་ས་བཅུ་གྲངས་མེད་གསུམ་སོགས་བགྲོད་ཀྱི་བར་ཙམ་དུ་སྡུག་བསྔལ་མྱོང་དགོས་པ་འཕགས་པ་སྲོང་བཙན་སྒམ་པོས་གསུངས་སོ། །ལར་སྡོམ་པ་གསུམ་པོ་གཅིག་འགྲོ་གཅིག་འདུག་དགོས་རྒྱུ་རྭ་ཅན་དང་ལོང་ཅན་ལྟ་བུ་ཞིག་ནི་གཏན་ནས་མིན་པས་སྔར་བཤད་པ་བཞིན་མདོ་སྔགས་ཐམས་ཅད་རང་རྒྱུད་དང་སྦྱར་ནས་ཉམས་སུ་ལེན་པ་ལ་མཁས་པ་འདི་ནི་ཤིན་ཏུ་གནད་འགག་དམ་པ་ཞིག་ཡིན་ནོ། །དེ་དག་གི་གནད་མདོར་བསྡུ་ན་འདི་ལྟར་ལགས་ཏེ། སྦྱང་གཞི་འོད་གསལ་བའི་སྙིང་པོ་ལ་སྦྱང་བྱ་སྒྲིིབ་པ་གསུམ་རྟེན་སྒོ་གསུམ་ཀུན་སློང་ཉོན་མོངས་གསུམ་འབྲས་བུ་ཁམས་གསུམ་རྒྱུ་ལས་གསུམ་སྟེ་དེ་རྣམས་སྦྱོང་བྱེད་སྡོམ་པ་གསུམ་སྦྱངས་འབྲས་སྐུ་གསུམ་སོགས་སུ་འདུས་ལ། སྡོམ་པ་གསུམ་པོའི་སྐབས་ཀྱི་ཉེས་སྤྱོད་སྡོམ་པ་དང་དགེ་ཆོས་སྡུད་པ་ལ། སོ་ཐར་གྱི་གཞན་ལ་གནོད་པ་སྤོང་བ་གཙོ་བོར་བྱེད། བྱང་སེམས་ཀྱི་གཞན་གནོད་སྤོང་བའི་སྟེང་ཕན་པ་སྒྲུབ་པ་གཙོ་བོར་བྱེད་པ་སྟེ་ལྕགས་ཟངས་དངུལ་དུ་གྱུར་པ་བཞིན་ནོ། །གསང་སྔགས་ཀྱི་གཞན་གནོད་སྤོང་བ་དང་ཕན་བདེ་སྒྲུབ་པ་ལ་སོགས་པ་དངུལ་གསེར་དུ་གྱུར་པ་བཞིན་འོག་མ་ལས་ཟབ་ཅིང་རྒྱ་ཆེ་ལ། དེ་མིན་གསུམ་པོ་གནད་གཅིག་པ་ལས་མི་འགལ་ཞིང་། སྡིག་སྤོང་དགེ་སྒྲུབ་རྣམས་གསུམ་པོ་ལ་དོན་གྱིས་ཚང་དགོས་པ་དེ་དག་གཅིག་ཏུ་སོང་ན་ངོ་བོ་གནས་གྱུར་ཡིན། སོ་ཐར་ངེས་འབྱུང་གིས་ཟིན་པའི་སྡོམ་པ་ལུས་ངག་གཙོ་བས་ཕྱི་དང་། བྱང་སེམས་གཞན་ཕན་སྙིང་རྗེས་ཟིན་པའི་སྡོམ་པ་སེམས་གཙོ་བས་ནང་དང་། སྔགས་སུ་སེམས་ཅན་རང་བཞིན་གྱིས་དག་པའི་སངས་རྒྱས་སུ་བལྟས་ཏེ་གློ་བུར་གྱི་དྲི་མ་སྦྱོང་བའི་སེམས་བསྐྱེད་པ་སོགས་ཐབས་ཤེས་ཁྱད་པར་ཅན་དག་སྣང་གིས་ཟིན་པའི་རྡོ་རྗེ་གསུམ་གྱི་དམ་ཚིག་སོགས་འོག་མར་མ་གྲགས་པས་གསང་བ་ཞེས་དབྱེ་བ་ཙམ་མོ། །མདོ་ལས། སྡིག་པ་ཅི་ཡང་མི་བྱ་ཞིང་སོགས་གསུངས་པ། སོ་ཐར་བས་བསླབ་པ་གསུམ་ལ་སྦྱར། བྱང་སེམས་ཀྱི་ཚུལ་ཁྲིམས་གསུམ་ལ་སྦྱར་ཏེ་བྱང་སེམས་ཀྱི་རང་སེམས་འདུལ་བ་ནི་སེམས་ཅན་དོན་བྱེད་ཀྱི་མི་མཐུན་སོགས་རང་དོན་ཡིད་བྱེད་དེ་འདུལ་ཞིང་གཞན་སེམས་འདུལ་བའང་གཙོ་བོར་བྱེད། སྔགས་ཀྱི་བསྐྱེད་རྫོགས་ཟུང་འཇུག་གསུམ་ལ་སྦྱར་ཏེ། སྔགས་ཀྱི་སྡིག་པའི་རྩ་བ་མ་དག་མཚན་འཛིན་སོགས་ཡིན་ཞིང་དམན་ལམ་སྐབས་འཁོར་བ་སྡུག་བསྔལ་དང་མ་དག་སྣང་ཞེན་རང་དོན་ཡིད་བྱེད་སོགས་སྔགས་ཀྱི་སྦྱང་བྱ་སྟེ། དེ་ལྟར་བལྟ་བ་རྩ་ལྟུང་ཡིན་དེ་དག་གནས་འགྱུར་དགོས་སོ། །འཇམ་དཔལ་གྱིས་དམན་ལམ་སྐབས་དགེ་བ་རང་མཚན་ཅན་དུ་བལྟས་ནས་བསྒྲུབ་པ་སོགས་བཤགས་བྱར་གསུངས་པ་ལྟར་རོ། ༈ །ཡང་སངས་རྒྱས་ཀྱི་མཚན་བཟུང་བ་སོགས་གསུངས་པ་ལ། སྤྱིར་སྔགས་བཟླ་བའང་སངས་རྒྱས་བྱང་སེམས་ཀྱི་མཚན་བཟུང་བ་དང་ལྷ་སྒོམ་པའང་སངས་རྒྱས་རྗེས་སུ་དྲན་པ་ཡིན་པས་ཅི་མང་བཟླས་ན་ཕན་ཡོན་བསམ་གྱིས་མི་ཁྱབ་ཅིང་། ཁྱད་པར་དུ་ཚེ་འདིར་སངས་རྒྱས་པར་བྱེད་པའི་ཐབས་སྒོ་དབང་གིས་ཕྱེས། གཞི་དམ་ཚིག་གིས་བཟུང་། ཐག་ལྟ་བས་བཅད། བོགས་སྒོམ་པས་དབྱུང་། ལ་སྤྱོད་པས་དོར་བ་སྟེ། སྔགས་མཚན་ཉིད་པའི་ཡན་ལག་ཚང་བས་ལྷ་སྒོམ་སྔགས་བཟླས་སོགས་ནི་ཚེ་འདིའམ་འཆི་ཁ་བར་དོའམ་རིང་པོར་མི་ཐོགས་པར་འཚང་རྒྱ་བའི་ལམ་ཡིན་པས་སྒྲ་ཇི་བཞིན་པར་གཟུང་དགོས། གཞན་ཡང་ལུང་དང་བསྟུན་ན། སྙིགས་དུས་སུ་ཐུན་མོང་གི་ཐེག་པ་བས་འབྲས་བུ་མི་འགྲུབ་སྟེ། རྣལ་འབྱོར་མ་ཀུན་ཏུ་སྤྱོད་པ་ལས། གཞན་ཡང་ཕྱི་མའི་དུས་ཀྱི་ཚེ། །དུས་མཐར་དངོས་གྲུབ་མི་ཐོབ་སྟེ། །ཆོས་འདི་དེ་ལྟར་ཤེས་ནས་ནི། །བསམ་པ་ཐམས་ཅད་རྫོགས་བྱེད་ཡིན། །ཞེས་གསུངས་པའི་ཕྱིར། སྔགས་ཀྱི་ཐེག་པས་ནི་དུས་མཐའི་ཚེ་དེར་དངོས་གྲུབ་ཐོབ་སྟེ། ཁྲག་འཐུང་མངོན་འབྱུང་ལས། ཧེ་རུ་ཀ་དཔལ་བཟུང་བྱས་ན། །སྙིགས་མའི་དུས་སུ་འགྲུབ་པར་འགྱུར། །ཞེས་གསུངས་པའི་ཕྱིར་ད་ལྟའི་དུས་སུ་སྔགས་ལ་འཇུག་པ་ཁོ་ན་གལ་ཆེའོ། །བསྐལ་པ་རྫོགས་ལྡན་དུས་ལས་རིམ་པར་བཟླས་པའི་གྲངས་གཉིས་འགྱུར་སོགས་བཟླ་བར་གསུངས་པ་ནི་སངས་རྒྱས་ཀྱི་གསུང་དང་སྔགས་ཀྱི་བྱིན་རླབ་ཉམས་པ་མི་སྲིད་ཀྱང་གདུལ་བྱའི་བློ་ཉམས་ཤིང་ཐེ་ཚོམ་དང་ལས་སྒྲིབ་ཆེ་ཞིང་ཏིང་ངེ་འཛིན་བརྟན་པོ་མེད་པ་ལ་དགོངས་སོ། །སངས་རྒྱས་རེའི་མཚན་བསྒྲགས་པས་འཚང་རྒྱ་བར་གསུངས་པ་དེ་འདྲ་དུས་གཞན་ལ་དགོངས་ནས་བཤད་པ་སྟེ་སྐྱེ་བ་བརྒྱུད་ནས་འཚང་རྒྱ་བའི་རྒྱུར་འགྲོ་བའི་ཕྱིར་དྲང་དོན་ཡང་ཡོད། མཚན་བཟུང་བ་དང་ཐོས་པ་ཙམ་གྱི་གནས་སྐབས་ཀྱི་ཕན་ཡོན་བཤད་པ་རྣམས་ནི་ངེས་པ་སྟེ་སངས་རྒྱས་ཀྱི་མཚན་ཐོས་པས་དུད་འགྲོའི་སྐྱེ་བ་བཟློག་པ་སོགས་ལོ་རྒྱུས་མང་དུ་ཡོད་པའི་ཕྱིར་རོ། ༈ །ཡང་སངས་རྒྱས་བདུད་བཞི་བཅོམ་པ་ལ་བདུད་ཀྱིས་གླགས་ལྟ་བ་ཞེས་སོགས་གསུངས་པ་ལ། བྱམས་པའི་སྟོབས་དང་རྒྱལ་བའི་ཆེ་བ་སྟོན་པའི་ཕྱིར་དང་འཇིག་རྟེན་གྱི་ཆེ་རྒུ་དྲེགས་པ་ཅན་རྣམས་ཐོག་མར་འདུལ་བའི་ཕྱིར། བདུད་བསྐུལ་བ་དང་བཅོམ་པ་སོགས་ཚུལ་བསྟན་གྱི་མཛད་པ་སོགས་སྤྱོད་ཡུལ་བསམ་གྱིས་མི་ཁྱབ་པ་ཡིན་ལ། སངས་རྒྱས་ཉིད་ལ་ཆོས་དབྱིངས་མངོན་དུ་གྱུར་པའི་ཕྱིར་བདུད་ཀྱི་མིང་ཙམ་ཡང་མི་རྒྱུ་ཞིང་གློ་བུར་གྱི་བདུད་ནི་སྤངས་ཟིན་པའི་ཕྱིར་སླར་ལྡང་བ་མི་སྲིད་དེ། དཔེར་ན་དགོས་པའི་དབང་གིས་ཞབས་ལ་སེང་ལྡེང་གི་ཚལ་བ་ཟུག་པ་སོགས་ལས་ཀྱི་རྣམ་སྨིན་མྱོང་བའི་ཚུལ་སྟོན་པ་བཞིན་ནོ། །འདུལ་མངོན་ལས་སངས་རྒྱས་གང་ཟག་རང་རྒྱུད་པ་ལམ་མས་སྦྱང་གི་སངས་རྒྱས་སུ་སྟོན་པ་ནི་གདུལ་བྱའི་ངོར་དང་དོན་ཡིན་ལ། ཐེག་པ་ཆེན་པོ་རྣམས་སུ་བསྐལ་པ་གྲངས་མེད་སྔོན་ནས་སངས་རྒྱས་པར་བཤད་ཅིང་ཤཱཀྱ་ཐུབ་པ་སྤྲུལ་པ་ཡིན་པས་དེ་ལ་བདུད་དང་ལས་ཀྱི་རྣམ་སྨིན་མྱོང་བ་སོགས་མི་སྲིད་དོ། །བསྟན་པ་དང་རྗེས་འཇུག་ལ་བདུད་ཀྱི་གླགས་ལྟ་བའང་བསྟན་པ་དངོས་ནི་ཆོས་ཀྱི་སྐུ་ཡིན་པས་གླགས་ལྟ་བ་སྲིད་ཀྱང་གླགས་རྙེད་པར་མི་སྲིད་དེ་བསྟན་པ་རིན་པོ་ཆེ་ཉིད་སེང་གེ་ཤི་བའི་རོ་བཞིན་གཞན་གྱིས་འཇིག་མི་ནུས་པར་བཤད་ལ། རྗེས་འཇུག་གི་ཉམས་སུ་ལེན་པའི་ཚེ་བདུད་དང་བདུད་ལས་འབྱུང་བ་ནི། རིན་ཆེན་ཆོས་ཀྱང་དཀོན་ལ་འཚེ་བའང་མང་ཞེས་པས་ཟབ་མོའི་ཆོས་དང་འཕྲད་པ་ལ་བར་ཆད་མང་བ་དེ་ཡང་སེམས་ཅན་རང་རང་གི་བདག་འཛིན་ལས་ཉོན་གྱིས་བསྐྱེད་པ་ཡིན་གྱི་ཕྱིའི་ཡུལ་ན་བདུད་ཅེས་པ་མེད་དེ། སྤྱོད་འཇུག་ལས། འཇིག་རྟེན་དག་ན་འཚེ་བ་གང་ཡོད་དང་། །འཇིགས་དང་སྡུག་བསྔལ་ཇི་སྙེད་ཡོད་པ་རྣམས། །དེ་ཀུན་བདག་ཏུ་འཛིན་པ་ལས་བྱུང་ན། །འདྲེ་ཆེན་དེས་ཀོ་བདག་ལ་ཅི་ཞིག་བྱ། །ཞེས་སོགས་མང་དུ་གསུངས་པའི་ཕྱིར། བདུད་ལ་སོགས་པ་རྣམས་ཕྱི་ན་ཡོད་ན་ནི་སེམས་ཅན་སུ་ལའང་བདུད་ཀྱི་གླགས་ལྟ་བ་མི་སྲིད་དེ། སངས་རྒྱས་རེ་རེས་ཀྱང་ཁམས་གསུམ་གྱི་བདུད་མ་ལུས་པ་སྤངས་ཟིན་པའི་ཕྱིར། དེས་ན་སེམས་ཅན་རང་རང་གི་བདག་འཛིན་ལས་ཉོན་མ་ཟད་པར་བདུད་ཀྱང་མི་མཛད་དོ། །སེམས་ཅན་སྤྱི་མཐུན་གྱི་འཁྲུལ་གཞི་བདུད་དགའ་རབ་དབང་ཕྱུག་ལྟ་བུའང་རང་རང་གི་ལས་སྣང་ཡུལ་ལ་ཤར་བ་ཡིན་ནོ། །སེམས་ཅན་རྣམས་ཀྱིས་རང་སེམས་ཐུལ་ན་བདུད་ཀྱང་ཐུལ་བ་ཡིན་ཏེ། རྒྱུད་ལས། གང་གིས་རང་གི་སེམས་འདུལ་ན། །གང་ལས་བདུད་ནི་འབྱུང་བར་འགྱུར། །བདུད་མེད་བདུད་ཀྱི་ལས་ཀྱང་མེད། །རང་གིས་སེམས་ཀྱིས་བཅིངས་པ་བཞིན། །ཞེས་གསུངས་པའི་ཕྱིར། ཡང་བཅས་འགལ་དང་སྲུང་སྡོམ་གྱི་ཉེས་ཕན་ཆེ་ཆུང་སོགས་གསུངས་པ་ལ། སྤྱིར་བཅས་པ་དང་འབྲེལ་ཚུན་ཆད་སྡོམ་པ་སྣ་རེ་བསྲུངས་པའི་ཕན་ཡོན་སྔར་བཤད་པ་ལྟར་ལ་ཉམས་པའི་བཅས་སྡིག་གི་ཉེས་དམིགས་ལོས་ཡོད། དཔེར་ན་ཞིང་ས་བཟང་པོ་ཡོད་པའི་སོ་ནམ་ལ་བརྩོན་དགོས་སད་སེར་གྱི་གནོད་པའང་བསྲུང་དགོས་ཀྱང་འབྲས་བུ་ལོངས་སྤྱོད་རྒྱུན་མི་འཆད་པའི་བདེ་བ་མྱོང་རྒྱུ་ཡོད་ལ། ཞིང་མེད་པའི་སྤྲང་པོ་ལྟ་བུ་ལ་དེ་དག་མེད་དོ། །དེ་བཞིན་དུ་བཅས་ལྡན་གྱི་རབ་ཏུ་བྱུང་བ་རྣམས་བསླབ་པ་ལ་འབད་ཅིང་ལྟུང་བ་ལས་བསྲུང་དགོས་ཀྱང་རྒྱུ་སྡོམ་པའི་དགེ་བ་དང་འབྲས་བུ་འཕྲལ་ཕུགས་ཀྱི་བདེ་བ་རྒྱུན་མི་འཆད་པ་ཡོད་ལ། བཅས་ཁྲིམས་དང་མི་ལྡན་པའི་ཁྱིམ་པ་ལྟ་བུ་ལ་བསླབ་པ་བསྲུང་བ་དང་འགལ་ཟླ་སྤོང་བའི་བརྩོན་པ་མི་དགོས་ཤིང་། ཉམས་པ་དང་བསྲུངས་པའི་ཉེས་ཕན་ཡང་མེད་དོ། །དེས་ན་སྡོམ་པའི་རྩ་བ་ནས་བསྲུང་དགོས་ཏེ། སོར་སྡོམ་གྱི་རྩ་བའི་ཕམ་པ་གཅིག་བྱུང་ན་ཉིས་བརྒྱ་ལྔ་བཅུ་པོ་ཉམས་ཤིང་སྲུང་ནུས་མེད་པར་བྱེད་པས་ཡན་ལག་གཞན་རྣམས་ཀྱང་ནུས་པ་ཆུང་བ་དང་འགལ་ནའང་ཉམས་པ་ལྟུང་བ་ལ་སྦྱོར་ན་ཉེས་བྱས་ཙམ་རེ་ལས་མི་སྐྱེད་པ་ཡིན་ཅིང་ལྟུང་བ་དེ་ལས་ཡན་ལག་ལྷག་མ་ཙམ་དེ་དག་བསྲུངས་པས་སྐྱོབ་མི་ནུས་པས་དམྱལ་བར་ངེས་པར་ལྟུང་སྟེ། ཨེ་ལའི་འདབ་ཀྱི་ལོ་རྒྱུས་དང་སྣ་རེ་ཉམས་སྣ་རེ་བསྲུངས་པའི་ཉེས་ཕན་ལས་བདེ་སྡུག་འདྲེས་མ་མྱོང་ཚུལ་གྲོ་བཞིན་སྐྱེས་ཀྱི་གཏམ་རྒྱུད་སོགས་མང་དུ་ཡོད་པའི་ཕྱིར་རོ། །བྱང་སྡོམ་ཉམས་ནའང་དམྱལ་བར་སྐྱེ་སྟེ་བྱང་སེམས་ལ་ཕྲག་དོག་གམ་ཁྲོ་བ་ལྟ་བུ་ཤིན་ཏུ་ལྟུང་བ་ཆེན་པོ་བྱུང་ན་གཉེན་པོ་སེམས་བསྐྱེད་དང་བཅས་པ་མཐུ་མེད་པར་བྱེད་པས་ན་སྨོན་སེམས་ཙམ་རེ་ཡོད་པས་རེ་ཞིག་མི་སྐྱོབ་ཅིང་འཇུག་སེམས་བསྲུངས་པའི་དགེ་བའི་ས་བོན་ཙམ་རེ་ཡོད་ཀྱང་ལན་གྲངས་གཞན་ལ་སྨིན་པའི་ལས་སུ་འགྲུབ་པའི་ཕྱིར། བྱང་ཆུབ་ཀྱི་སེམས་བསྲུང་བས་བྱང་སེམས་གཞན་ལ་སྐུར་འདེབས་ཀྱི་རྒྱུ་མཐུན་མྱོང་ལ་རྣམ་སྨིན་དམྱལ་བ་སོགས་མི་མྱོང་བའི་ལུང་ཡང་ཡོད་དོ། །སེམས་བསྐྱེད་ཀྱིས་མཚམས་མེད་པའི་སྡིག་པ་སོགས་ཟིལ་གྱིས་གནོན་པར་གསུངས་པ་རྣམས་ནི་རང་བཞིན་གྱི་སྡིག་པ་སྔར་ཡོད་རྣམས་རེ་ཞིག་རྣམ་སྨིན་མི་འབྱིན་ཅིང་ཉེས་པ་རིམ་གྱིས་སྲབ་པ་ལ་དགོངས་པ་ཡིན། འདི་ནི་བཅས་ལྟུང་ཡིན་ལ་བསྒོམ་པའི་སྟོབས་ལས་བྱུང་བའི་བཟོད་པ་དང་དོན་དམ་སེམས་བསྐྱེད་དང་ཟག་མེད་ཀྱི་སྡོམ་པ་མ་སྐྱེས་བར་དུ་ལས་ཀྱི་དབང་གིས་ངན་སོང་དུ་མི་སྐྱེ་བའི་ངེས་པའང་མེད་དེ། ལས་ཀྱི་རྣམ་པར་སྨིན་པ་བསམ་མི་ཁྱབ། །སྙིང་རྗེའི་བདག་ཉིད་ཅན་ཡང་དུད་འགྲོར་སྐྱེ། །ཞེས་དང་སངས་རྒྱས་ཀྱི་སྐྱེས་རབས་རྣམས་ལས་འབྱུང་བ་ལྟར་ཡིན་ནོ། །འོན་ཀྱང་སེམས་བསྐྱེད་བཏང་བའི་རྩ་ལྟུང་མ་བྱུང་ན་ལྟུང་བ་གཞན་གྱིས་ལན་རེར་དམྱལ་བར་འཕེན་བྱེད་ཀྱིས་རྣམ་སྨིན་གཅིག་འཕངས་པ་དེ་ལ་རྫོགས་བྱེད་ཀྱིས་ཚེ་ཚད་དང་སྡུག་བསྔལ་གྱི་ཁྱད་པར་རྣམས་ཡུད་ཙམ་གྱིས་རྫོགས་ཏེ་མྱོང་ནས་སེམས་བསྐྱེད་ཀྱི་སྟོབས་ལས་མྱུར་དུ་ཐར་བར་འགྱུར་བའང་ཡོད་དོ། །སྔགས་ཀྱི་དབང་བསྐུར་ཐོབ་པའི་དམ་སྡོམ་ཚུལ་བཞིན་མ་བྱུང་བར་ཉམས་ན་ལྷ་བསྒོམ་སྔགས་བཟླས་ཀྱི་ཕན་ཡོན་མང་པོ་བཤད་པས་མི་སྐྱོབ་པར་ངེས་པར་རྡོ་རྗེའི་དམྱལ་བར་འགྲོ་སྟེ་བསྲུངས་བའི་ཕན་ཡོན་ལ་ཟབ་མྱུར་གྱིས་ཁྱད་པར་ཡོད་པ་བཞིན་ཉམས་པའི་ཉེས་དམིགས་ལའང་ཁྱད་པར་ཆེས་ཡོད་པའི་ཕྱིར། ཁྱད་པར་དུ་བླ་མ་སྨོད་པའི་རྩ་ལྟུང་དང་བཀའ་འདས་ཀྱི་རྩ་ལྟུང་བྱུང་ན་ནི་དེ་མ་བཅོས་ཀྱི་བར་དུ་ལམ་བསྒྲུབས་པ་ལ་འབྲས་བུ་མེད་ཅིང་ཡན་ལག་གཞན་བསྲུངས་པས་ཀྱང་ཕན་པ་མེད་དེ། དེས་ན་སྡོམ་པ་སྣ་རེ་ཙམ་ཡོད་པ་དང་བསྟན་པ་ལ་ཞུགས་པ་ཙམ་བྱས་པའི་འབྲས་བུ་ནི་འཁོར་བའི་མཐའ་ལ་འབྱུང་གི། ཉམས་པའི་འབྲས་བུ་ནི་འཕྲལ་དུ་འབྱུང་བས་གནས་སྐབས་སུ་ནི་ཕན་ཡོན་ལས་ཉེས་དམིགས་ཆེའོ། །ཡང་ཆོས་ལ་འབྲེལ་བའི་བག་ཆགས་ཡོད་པའི་ངན་སོང་གི་སེམས་ཅན་རྣམས་ནི་ངན་འགྲོ་གཞན་དང་ཡང་མི་འདྲ་སྟེ། ཨོ་རྒྱན་ཆེན་པོས་ལོ་རེ་བཞིན་དུ་དབང་བསྐུར་བྱིན་བརླབས་ཞུས། ལོ་བརྒྱ་ལོན་ན་དབང་བརྒྱ་ཐོབ་པ་ཡིན། །ཕྱི་མར་དུད་འགྲོ་སྐྱེས་ཀྱང་དབང་ཆེར་སྐྱེ། །ཞེས་གསུངས་པའི་ཕྱིར་དགེ་སྡིག་གི་རྒྱུ་འབྲས་བསླུ་མེད་འདི་ཡང་ཤིན་ཏུ་ཡིད་ཆེས་པའི་གནས་སུ་བལྟ་དགོས་སོ། །ཇོ་བོ་རྗེ་ལྷ་གཅིག་གིས། གཞན་ལས་འབྲས་ལ་ཅུང་ཟད་གཡེལ་བ་གཟིགས་ནས་ལས་འབྲས་ལ་གཟོབ། ལས་འབྲས་འདི་ཕྲ། སྙིང་ཁམས་མ་ཆེ། ཚེ་ཕྱི་མ་ལ་ཇི་ལྟར་འགྱུར་ཞེས་སྤྱན་ཆབ་འབྲུལ་ལོ། །དེའི་ཕྱིར་སྡོམ་པ་གསུམ་པོའི་བཅས་འགལ་ཐམས་ཅད་ཇི་མི་སྙམ་དུ་མི་འཇོག་པར་སྔར་བྱས་ལ་འགྱོད་སེམས་དང་ཕྱིན་ཆད་སྲོག་ལ་བབ་ཀྱང་མི་བྱེད་པའི་སྡོམ་སེམས་ཀྱིས་བཤགས་སྦྱངས་ལ་འབད་ན་ནི་རྣམ་སྨིན་མྱོང་མི་དགོས་ཀྱང་ལམ་སྟེགས་ཀྱི་ཡོན་ཏན་ཐོབ་པ་ལ་ནི་ཤིན་ཏུ་འགོར་བས་དང་པོ་ནས་མི་ཉམས་པ་ལ་འབད་དགོས། བཤགས་པ་ལ་ཁག་འགེལ་ཏེ་ལྟུང་བ་ལ་བག་མེད་དུ་སྤྱོད་པ་ནི་སྨན་ལ་ཁག་འགེལ་ཏེ་དུག་ལ་འཛེམ་མེད་དུ་སྤྱོད་པ་བཞིན་ནོ། །མདོར་ན་བདག་ནི་འདི་ལྟར་བསྙམས་ཏེ། རང་བཞིན་གྱི་དགེ་བ་བར་མ་ཙམ་རེས་མཐོ་རིས་སུ་ནས་མཐོ་རིས་སྐྱེས་པ་བས། སྡོམ་པ་གསུམ་ཞུས་ཏེ་ཉམས་པས་ངན་སོང་ནས་ངན་སོང་དུ་འགྲོ་བར་གདམས་པ་ཡིན་ལགས། དེར་མ་ཟད་ལས་དང་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་བོ་ཞེས་གསུངས་པས་འདི་རིགས་ཀྱི་རྣམ་བཞག་མཐར་ཐུག་པ་ནི་རྣམ་མཁྱེན་མ་ཐོབ་བར་ཇི་བཞིན་དཔོག་མི་ནུས་ལ། ཕྱོགས་ཙམ་རེ་ལ་ལུང་དང་རིགས་པས་ད་དུང་ཡང་འཆད་པར་སྤྲོ། དེ་ལྟར་དམ་པ་ཁྱོད་ཀྱིས་དྲི་བ་འདི་ནི་བསྟན་པ་ཐམས་ཅད་འགལ་མེད་དུ་ཉམས་སུ་ལེན་ཅིང་མི་ལུས་དོན་ཅན་དུ་བྱེད་པ་རྣམས་ལ་གནད་འགག་ཆེན་པོ་གཅིག་ཡོད་པར་ཤེས་ཏེ། འཕྲལ་དུ་བློ་ལ་གང་དྲན་ཙམ་བྲིས་པ་དེ་ག་ལགས། སྒྲའི་ཡི་གེའི་དོན་གསུངས་པ་འདི་ཟུར་གསལ་ཞུ། ཞེས་གངས་ཅན་གྱི་རྡོ་རྗེ་འཆང་ཆེན་པོ་འཇམ་དབྱངས་མཁྱེན་བརྩེ་དབང་པོའི་དྲུང་ཡིག་མཁས་པ་ཚེ་རིང་བཀྲ་ཤིས་ཀྱིས་དགོངས་བཞེད་དྲིས་ལན་དུ་མང་དུ་ཐོས་ཀྱང་དོན་ལ་བླུན་པོའི་མཚན་གཞི་ཅན་མཁས་པའི་སྒྲོ་བཏགས་པ་རྨེ་རི་དགེ་སློང་བསོད་ནམས་ཆོས་འགྲུབ་ཀྱིས་དཔལ་སྤུངས་ཡང་ཁྲོད་ནས་བྲིས་པ་འདི་ཀུན་གྱི་ཐུགས་ཉམས་སུ་འཐད་པར་གྱུར་ཅིག །སརྦ་མངྒ་ལཾ། །དགེའོ།། །།