cover

སྔ་འགྱུར་བཀའ་མའི་ཆོས་སྡེའི་གླེགས་བམ་བརྒྱ་ཉེར་གཅིག་པ།

གླེགས་བམ། ཀོ༽

འཇམ་དབྱངས་བློ་གྲོས་རྒྱ་མཚོ།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

ཐེག་པ་ཆེན་པོའི་རྣལ་འབྱོར་ལ་འཇུག་པའི་ཐབས་བྱེ་བྲག་ཏུ་འབྱེད་པ།

མ ཧཱ ཡཱ ན ཎོ གཱ བ ཏ རོ པ པ བྷེ ཏོ ཡ྄ཌ྅྅྅ ཋ ན ནཱ མཱ སཱ དྷྲ བི ཧ ར ཏི སྨ།
ཐེག་པ་ཆེན་པོའི་རྣལ་འབྱོར་ལ་འཇུག་པའི་ཐབས་བྱེ་བྲག་ཏུ་འབྱེད་པ་ཞེས་བྱ་བ་ལེགས་པར་བཞུགས་སོ། །
ཉེས་པའི་སྐྱོན་བྲལ་ཡོན་ཏན་མཐའ་དག་རྫོགས། །བདེ་ལེགས་ཇི་སྙེད་ཐམས་ཅད་འབྱུང་བའི་གནས། །མཆོག་གསུམ་དཀོན་མཆོག་གསུམ་ལ་ཕྱག་འཚལ་ལོ། །ཐེག་ཆེན་རྣལ་འབྱོར་འཇུག་ཐབས་བརྗོད་པར་བགྱི། །གང་ཞིག་བདག་གཞན་སྡུག་བསྔལ་སྤངས་འདོད་ཅིང་། །བདེ་ཐོབ་འདོད་པས་དགོན་པར་གནས་པར་བགྱི། །དེ་ཡང་དམ་ཆོས་གཞུང་ལས་འདི་ལྟར་གདའ། །འཁོར་བར་སྡུག་བསྔལ་ཉེས་དམིགས་མང་པོའི་གཞི། །རྣམ་རྟོག་བདག་ཏུ་འཛིན་པ་འཁོར་བའི་རྒྱུ། །མྱ་ངན་འདས་པ་ཞི་བ་བདེ་བའི་མཆོག །བདག་མེད་རྟོགས་པ་མྱ་ངན་འདས་པའི་རྒྱུ། །བདེ་བས་བྱ་བྱེད་བུན་ལོང་ཐག་བསྲིངས་ལ། །དགོན་པར་བདག་འཛིན་གཉེན་པོར་སྟོང་ཉིད་བསྒོམ། །འཁོར་བ་ཇི་ལྟར་ཉེས་དམིགས་སྟོང་ཞེ་ན། །འཁོར་བའི་མཚན་ཉིད་ཆོས་ནི་བཞིར་འདུས་ཏེ། །འཁོར་བའི་མཚན་ཉིད་མི་རྟག་སྡུག་བསྔལ་དང་། །དེ་ཡི་རང་རིག་སྟོང་དང་བདག་མེད་པའོ། །དེ་ལ་མི་རྟག་མཚན་ཉིད་བཤད་པར་བྱ། །སྣོད་ཀྱི་འཇིག་རྟེན་རི་རབ་གླིང་ཁམས་ཀྱང་། །འཇིག་པའི་དུས་ཚེ་བསྐལ་པའི་མེ་བྱུང་བས། །ཐལ་པའི་ལྷག་མ་ཙམ་ཡང་མི་ལུས་སོ། །ཆུ་དང་རླུང་གིས་འཇིགས་པའང་དེ་བཞིན་ནོ། །གཞན་ཡང་དབྱར་དྲོ་སྐྱེ་ལ་དགུན་གྲང་སྐམ། །ལོ་ལེགས་ལོ་ཉེས་ཐན་ཞོད་ངེས་པ་མེད། །ལོ་ཟླ་འདས་ཤིང་འཇིག་པའི་དུས་དང་ཉེ། །དེ་ལ་སོགས་པའི་མི་རྟག་དགོངས་ནས་གདའ། །རྟག་པ་ལགས་ན་ཅི་ཕྱིར་འགྱུར་ཞིང་འགྲོ། །བཅུད་ཀྱི་འཇིག་རྟེན་སེམས་ཅན་ཚེ་འདི་ལ། །ཉིན་ཞག་ལོ་ཟླ་རིམ་གྱིས་གཅོད་བྱེད་པས། །ཉིན་ཞག་འདས་ཤིང་ཤི་དང་ཕར་ཕར་ཉེ། །མི་འཆི་སྡོད་ཀྱང་བདག་ལ་རང་དབང་མེད། །སྐྱེ་རྒ་ན་འཆི་ར་ཐག་རི་མོ་འདྲ། །འཆི་བདག་བདུད་ནི་སོ་བྱ་ཉ་སྡོད་འདྲ། །འཆི་བའི་རྐྱེན་ནི་བསམ་གྱི་མི་ཁྱབ་སྟེ། །འཆི་སྐྱེ་མ་སོང་དངོས་པོ་གང་ཡང་མེད། །ལུས་ནི་ཟས་ཀྱིས་གསོ་ཡང་བརྣངས་ནས་འཆི། །འཇིག་རྟེན་འདི་ན་ཆེ་ཆུང་ཕྱུག་དབུལ་ཀུན། །འཆི་བདག་དབང་དུ་མ་གྱུར་གང་ཡང་མེད། །སྔ་མ་ཤི་བའི་མི་རྣམས་ཀུན་གྱིས་ཀྱང་། །རྟག་ཏུ་རེ་ཞིང་བུ་དང་ནོར་བསགས་ཀྱང་། །བུ་ནོར་ཕྱིར་ལུས་བདག་ལ་ཕན་པ་མེད། །རང་ཉིད་དགེ་སྡིག་གཉིས་དང་འགྲོགས་ཏེ་འགྲོ། །ད་ལྟ་རང་རེ་གནས་པའི་རིང་འདི་ལའང་། །ཉེ་བཤེས་གཉེན་འདུན་མཛའ་དང་མི་མཛའ་ལས། །ན་ཚོད་ཀུན་དང་རྒན་གཞོན་ཇི་སྙེད་གཅིག །ཤི་བར་མཐོང་ཞིང་ཐོས་པ་མ་ལགས་སམ། །ད་ལྟའི་ས་སྟེང་སེམས་ཅན་འདི་ཀུན་ཀྱང་། །ལོ་བརྒྱ་ཚུན་ཆད་གཅིག་ཀྱང་མི་ལུས་འཆི། །དེ་བས་རང་རེའང་འཆི་བའི་ཆོས་ཅན་ཡིན། །དེང་ཤི་སང་ཤི་སུས་ཀྱང་མི་ཤེས་ཏེ། །ཚོད་འཛིན་པའང་མི་འཇིགས་སྦྱིན་མེད་པས། །སང་ཕོད་དེང་སང་བདག་ནི་ཇི་ལྟར་འགྱུར། །འཆི་བའི་ཚེ་ན་ཕ་མ་བུ་ཚ་དང་། །ཕུ་ནུ་མཛའ་བཤེས་བྲན་ཁོལ་ནོར་རྣམས་ཀྱང་། །བདག་ཉིད་འཆི་བའི་ཕྱིར་ན་འོང་མེད་པས། །སྡུག་བསྔལ་སྐལ་ཆེན་འགའ་ཡང་མ་མཆིས་ཏེ། །བདག་ཉིད་དགེ་སྡིག་གཉིས་དང་ཆས་ཏེ་འགྲོ། །དེ་ནས་སྐྱེས་ཀྱང་བདག་ཉིད་གཅིག་པུ་སྐྱེས། །ཐ་མར་འཆི་ཡང་བདག་ཉིད་གཅིག་པུ་འཆི། །སྐད་ཅིག་ཚེ་འདིར་ལས་མཐུན་ཉེ་གཞི་རྣམས། །མགྲོན་པོ་གནས་མཐུན་ཙམ་སྟེ་སོ་སོར་འགྲོ། །འོ་ན་བུ་ཚ་གཉེན་གཞིས་ཅི་ཞིག་ཕན། །སྐད་ཅིག་ཙམ་ཡང་མི་དབྱེ་མི་ཕོད་པའི། །བུ་དང་ཆུང་མ་ཉེ་གཞི་རྩ་ལགས་དང་། །ཡུལ་མཁར་ནོར་ཕྱུག་ལོངས་སྤྱོད་ཀུན་བོར་ནས། །དེ་རིང་སོང་ནི་བདག་ཉིད་གཅིག་པུར་འགྲོ། །ཇི་ཙམ་སྡིག་དང་བརྡོས་ཤིང་ནོར་བསགས་ཀྱང་། །སྡིག་པའི་རྣམ་སྨིན་རྨོངས་པ་བདག་གིས་ཁུར། །བསགས་པའི་ནོར་ནི་ཁོང་ཅག་བུ་ཚས་ཁྱེར། །དེ་ཕྱིར་བསགས་པའི་ནོར་གྱིས་ཅི་ཞིག་ཕན། །བདག་ལ་ཤིན་ཏུ་ཕངས་པའི་ལུས་འདི་ཡང་། །དེ་རིང་སོང་ནི་རྫ་ཆག་བཞིན་དུ་བོར། །ལྷན་ཅིག་སྐྱེས་པའི་ཤ་རུས་གཉིས་ཀྱང་འབྱེ། །དབང་མེད་བདག་ནི་གཅིག་པུར་འཁྱམས་ནས་ནི། །ལས་ཀྱི་དབང་གིས་གང་དུ་སྐྱེ་འགྱུར་ཡང་། །དེ་བས་ལུས་ཀྱི་ཕྱིར་ནི་སྡིག་མི་བྱ། །ལུས་འདི་ས་གཏིང་འདྲ་སྟེ་ཆོག་མི་ཤེས། །མི་གཙང་ལས་བྱུང་མི་གཙང་ཕུན་པོ་ཡིན། །ན་རྒས་འཆི་སོགས་སྡུག་བསྔལ་ཀུན་གྱི་གནས། །ཤི་ནས་བོར་ན་ས་ཡི་ཕྱོགས་ཙམ་ཟློག །བྱ་དང་ཁྱི་སྤྱང་ལ་སོགས་རྣམས་ཀྱི་ཟས། །བསྙེན་བཀུར་འབད་ཀྱང་འཆི་བདག་སྲིན་པོས་འཕྲོག། །མཁས་པས་སྨོད་ཅིང་བླུན་པོའི་ཆགས་པའི་གནས། །དེ་བས་ལུས་ལ་མཁས་པ་སུ་ཞིག་ཆགས། །ལུས་ཀྱི་ཕྱིར་ནི་ཡལ་ངར་འཇུག་མི་བྱ། །འདི་ལ་གླ་བརྔན་སོ་ཟས་བྱིན་ནས་སུ། །ཡུན་གྱི་ཕན་ཕྱིར་དགེ་རྩ་བྱེད་དུ་གཞུག །བདག་གི་གྲོགས་ནི་དགེ་སྡིག་གཉིས་ལས་མེད། །དེ་ཡང་དགེ་བ་མཐོ་རིས་ཐར་པའི་རྒྱུ། །སྡིག་པ་ངན་སོང་གསུམ་འཚོགས་སྡུག་བསྔལ་རྒྱུ། །མ་ཤི་བར་དུའང་ལུས་འདི་མི་རྟག་སྟེ། །ཁུལ་ཞོ་བྱིས་སྦ་གཞོན་ནུ་ཉིད་དུ་འགྱུར། །དེ་ནས་དར་ལ་བབ་དང་དར་ཡོལ་བ། །རྒས་པར་གྱུར་ཏེ་ལུས་འདི་རྟག་ན་ནི། །གནས་སྐབས་དེ་སྙེད་ཅིག་ཏུ་ཅི་སྟེ་འགྱུར། །ལོངས་སྤྱོད་བདེ་སྡུག་རྣམས་ཀྱང་མི་རྟག་སྟེ། །བཙན་ཕྱུག་འཛོམ་པ་སྡུག་ཕོངས་ཅན་དུ་འགྱུར། །སྡུག་ཕོངས་ཅན་ཡང་བཙན་ཕྱུག་འཛོམ་པར་སྣང་། །ལང་ཚོ་ལོངས་སྤྱོད་ན་རྒ་འཆི་བས་འཇོམས། །དེ་ལ་སོགས་པའི་མི་རྟག་དགོངས་ན་བརྡ། །དེ་བས་འཇིག་རྟེན་མཚན་ཉིད་མི་རྟག་གོ། ༈ །ད་ནི་སྡུག་བསྔལ་མཚན་ཉིད་བཤད་པར་བྱ། སྡུག་བསྔལ་མཚན་ཉིད་སྐྱེ་རྒ་ན་འཆི་བཞི། །སྐྱེ་བའི་སྡུག་བསྔལ་འོག་ནས་བཤད་པར་བྱ། །རྒས་པ་ཡང་ནི་འདི་ལྟར་སྡུག་བསྔལ་ཏེ། །སྐྲ་དཀར་གཉེར་འདུས་གཞན་གྱིས་མཐོང་མི་ཐོས། །ཁ་སྣའི་ཆུ་ཟག་རྐང་ལག་ཀུན་ཀྱང་འདར། །སེམས་ཀྱིས་དྲན་ཡང་ལུས་ལ་ཉམས་སྟོབས་མེད། །བུ་ཚ་ཀུན་ཀྱང་ཤི་ན་རུང་སྙམས་སེམས། །ཞལ་ལྟ་བྱས་ཀྱང་མི་ཉན་དབང་ཡང་ཤོར། །ཁ་ཅིག་སྲིན་རྒན་ཤི་མཆིས་ཤེས་ཀྱང་ཟེར། །ཁ་ཅིག་བེར་དབྱུག་ཐོགས་ནས་རྡུང་བར་བྱེད། །དེ་ལྟར་མཐོང་ཐོས་ཤི་འདོད་ཤི་མི་བཏུབ། །ན་བ་རྣམས་ཀྱང་འདི་ལྟར་སྡུག་བསྔལ་ཏེ། །ལུས་ཀྱི་འབྱུང་བ་ཆ་ནི་མི་མཉམ་པས། །རླུང་མཁྲིས་བད་ཀན་འདུས་པས་ལུས་གདུངས་ཏེ། །ལོངས་སྤྱོད་མཐོང་ཡང་ཡིད་ལ་འདོད་པ་མིན། །ལུས་ཀྱི་ཉམས་སྟོབས་ཤོར་བས་ལྡང་མི་ནུས། །མཛེས་པའི་གཟི་མདངས་ཤོར་བས་ཡིད་བཏགས་འདྲ། །ཤི་བ་རྣམས་ཀྱང་འདི་ལྟར་སྡུག་བསྔལ་ཏེ། །གཉེན་བཤེས་ཚོགས་ཀྱིས་ཆོ་ངེ་འདེབས་བྱེད་ཀྱང་། །དེ་ལ་ཉན་བལྟ་བསམ་པའི་ཡུལ་མེད་དེ། །གནད་གཅོད་པ་ནི་མཚོན་ཆས་གཏུབས་པ་འདྲ། །མཛའ་དང་མི་མཛའི་དོན་དུ་འདིར་བྱས་པའི། །དགེ་སྡིག་ལས་ནི་རྨི་ལམ་ཡུལ་བཞིན་སྣང་། །གཤིན་རྗེའི་ཕོ་ཉ་ཤིན་ཏུ་འཇིགས་པས་བསྐོར། །བྲེད་ཤ་ཐོན་ནས་ཀུན་ཏུ་བལྟས་བྱས་ཀྱང་། །མགོན་སྐྱབས་མེད་ཅིང་སུ་ཡང་མ་མཐོང་ནས། །ཤིན་ཏུ་འཇིགས་བཞིན་ཀུན་ཏུ་ཡི་མུག་སྟེ། །བདག་ཉིད་གར་འགྲོ་གཏོལ་མེད་བར་དོར་ལྟུང་། །བར་དོ་ན་ཡང་གཡང་དུ་ལྷུང་སྙམས་འཇིགས། །དེ་ནས་གཤིན་རྗེའི་ཕོ་ཉས་ཁྲིད་ནས་ནི། །གཤིན་རྗེ་ཆོས་ཀྱི་རྒྱལ་པོའི་སྤྱན་སྔར་ཕྱིན། །ཚེ་འདིར་དགེ་དང་མི་དགེའི་ལས་བྱས་པ། །ལྷན་ཅིག་སྐྱེས་པའི་ལྷས་ནི་དགེ་བ་ཟློ། །ལྷན་ཅིག་སྐྱེས་པའི་འདྲེས་ནི་མི་དགེ་བརྗོད། །གལ་ཏེ་མི་དགེ་ལས་ཀྱིས་ངན་སོང་དུ། །སྐྱེ་བར་མཐོང་ནས་ཆོས་རྒྱལ་འདི་སྐད་ཟེར། །ཁྱོད་ཀྱིས་མི་ཡི་ལུས་འདི་ཐོབ་པའི་ཚེ། །ཐོབ་ནས་སྡིག་པའི་རྒྱུ་ནི་མ་སྤངས་པས། །ཀྱེ་མ་འདི་འདྲའི་སྡུག་བསྔལ་མི་བཟད་མྱོང་། །རང་གིས་ལས་བྱས་རང་ལ་རྣམ་པར་སྨིན། །ངས་ནི་འདི་ལ་ཅི་ཡང་མ་ལེན་ཟེར། །དེ་བས་དམྱལ་སྲུང་ཁྲོ་གཏུམ་འཇིགས་པ་ཡིས། །རྒྱོབ་སོད་གཏོགས་ཁྲོལ་ང་རོ་ཆེར་སྒྲོགས་ཤིང་། །བརྔམ་ཞིང་མཚོན་ཆ་སྣ་ཚོགས་བརྡེག་འཚོགས་ཏེ། །ས་གཞི་ཐམས་ཅད་མེ་དཔུང་འབར་བ་ཡིས། །གྲང་བའི་དམྱལ་བའི་གནས་སུ་ཁྲིད་ནས་སོང་། །ད་ནི་སྐྱེ་བའི་སྡུག་བསྔལ་ཤེས་པར་བྱ། །དམྱལ་སྲུང་དེ་དང་དམྱལ་བའི་མེ་མཐོང་ནས། །ཤིན་ཏུ་སྐྲག་སྔངས་ཆོ་ངེས་ཆེར་འདེབས་ཤིང་། །རང་ལ་བརྔན་གྲངས་སྔོན་གྱི་སྡིག་པ་ལ། །ཤིན་ཏུ་འགྱོད་ཀྱང་ཕན་པ་ཅི་ཡང་མེད། །ལུས་ནི་ཤིན་ཏུ་ཆེ་ལ་གཞོན་ཤ་ཅན། །ཚོར་བ་ཆེ་ཞིང་དྲན་པའི་ལུས་ཐོབ་ནས། །ཁ་ཅིག་རང་ལུས་མེ་དཔུང་བཞིན་དུ་འབར། །ཁ་ཅིག་ལྕགས་འབར་ཁང་པ་སྦྲུམ་མར་འདུག །འགྲོ་ལྡོག་བྱེད་ཅིང་ཕྱོགས་ནི་ཀུན་ན་བཟློག །ཁ་ཅིག་ལྕགས་ལས་བྱས་པའི་ཟངས་ཆེན་དུ། །སྤྱི་ཚུགས་འབྲུ་ཉུང་ཆུ་ཁོལ་བླུགས་བཞིན་འཚོད། །ཁ་ཅིག་སོག་ལེས་འདྲ་ཞིང་གཏུན་ལ་བརྡུང་། །དེ་ལ་སོགས་པ་སྡུག་བསྔལ་བསམ་མི་ཁྱབ། །འཇིག་རྟེན་འདི་ན་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ཡིན་པ། །དེས་ནི་དམྱལ་བའི་སྡུག་བསྔལ་ཆུང་ངུ་ལའང་། །འོལ་དང་མི་བྱི་ཆར་ཡང་མི་ཕོད་དོ། །མི་ཡི་ལོ་ནི་འབུམ་དང་བརྒྱད་ཁྲི་ལ། །དམྱལ་བ་ཁ་ཅིག་ཉིན་ཞག་གཅིག་ཏུ་བརྩི། །དེས་བསྒྲེས་ཁོ་བདག་ལོ་ནི་དཔག་མེད་ཐུབ། །ཁ་ཅིག་བསྐལ་པ་ཆེན་པོའི་བར་དུ་གནས། །ཤི་བར་དགའ་ཡང་ཤི་ཡང་མི་བཏུབ་བོ། །ལས་མ་ཟད་པ་ཁ་ཅིག་འཇིགས་ཆགས་ཚེ། །འཇིག་རྟེན་བརྒྱུད་ཅུང་འཇིག་ཆགས་མེད་པར་སྐྱེ། །ཡི་དྭགས་སྐྱེས་ཀྱང་བཀྲེས་དང་སྐོམ་པས་གདུངས། །མགོ་བོ་རི་རབ་ཁ་ནི་ཁབ་མིག་ཙམ། །རྐེ་རྩ་རབ་ཕྲ་གསུས་པ་ཡུལ་ལྗོངས་ཙམ། །བཟའ་བཏུང་མཐོང་ཡང་གཞན་གྱིས་བསྲུངས་པ་དང་། །རྣག་ཁྲག་ངན་སྐྱུག་ལ་སོགས་བཞིན་དུ་མཐོང་། །ཁ་ཅིག་ཟོས་ཀྱང་ཁྲོ་ཆུ་ཁོལ་མར་འགྲོ། །བྱོལ་སོང་སྐྱེས་ཀྱང་གཅིག་ལ་གཅིག་ཟ་དང་། །རང་དབང་མེད་པར་བཀོལ་སྤྱོད་བརྟེག་འཚོགས་དང་། །གཞན་གྱིས་གསོད་སོགས་གཏི་མུག་རྨོངས་པས་སྡུག །མིར་སྐྱེ་བ་ཡང་མངལ་ན་གནས་པའི་ཚེ། །མ་ནི་འགྲང་ཚེ་བྲག་བར་འཚིར་བ་འདྲ། །བཀྲེས་པའི་ཚེ་ན་དཔྱང་ལ་བཏགས་པ་འདྲ། །དྲག་ཤུལ་བྱས་ཚེ་བྲག་བར་བརྡུང་བ་འདྲ། །ཉལ་བའི་ཚེ་ན་རི་ཡིས་མནན་པ་འདྲ། །བཙས་པའི་ཚེ་ན་པགས་པ་བཤུས་ནས་ནི། །རྩིད་པའི་ངོས་ལ་བྲུད་པ་བས་ཀྱང་སྡུག །ཚང་བྲུལ་བཀྲེས་སྐོམ་རྐང་ལག་ན་སར་སྡུག །ཆེར་སྐྱེས་ན་ཡང་སོ་ནམ་བྲེལ་ཕོངས་དང་། །ཉེ་དུ་བྲལ་དང་དགྲ་ཆོམས་བུ་ལོན་དང་། །བཀྲེས་སྐོམ་ཚ་གྲང་མགྲོན་ལ་སོགས་པས་སྡུག །ཕོངས་པ་རྣམས་ནི་བཙལ་ཐབས་མེད་ནས་སྡུག །ཡོད་པ་རྣམས་ནི་འཚོ་སྐྱོང་མེལ་ཚེས་སྡུག །ཞིང་རྨོ་ཚོང་བྱེད་འདུ་བྱེད་ལས་ཀྱིས་སྡུག །དེ་ལ་སོགས་པའི་སྡུག་བསྔལ་བསམ་མི་ཁྱབ། །སྡུག་པའི་གཞི་ནི་ཕལ་ཆེར་ལྟོ་རྒྱབ་གཉིས། །ཕལ་ཆེར་འཇིག་རྟེན་འདི་ཡི་ལོངས་སྤྱོད་ཀྱང་། །ཕལ་ཆེར་ཕྱི་མའི་ངན་སོང་སྡུག་བསྔལ་རྒྱུ། །བཀྲ་ཤིས་མ་དང་སྣ་ནག་ཇི་བཞིན་ནོ། །ལྷ་མིན་སྐྱེས་ཀྱང་ང་རྒྱལ་ཕྲག་དོག་དང་། །ཁྲོ་གཏུམ་འཐབ་རྩོད་ལ་སོགས་དབང་གིས་སྡུག །ལྷར་སྐྱེས་ཀྱང་ནི་འཆི་འཕོ་ལྟུང་བ་དང་། །འཆི་ལྟས་ལྔ་དང་འདུ་བྱེད་དབང་གིས་སྡུག །དེ་ལྟར་འཁོར་བར་སྐྱེས་པའི་ཉེས་པ་ནི། །སྡུག་བསྔལ་མདོར་བསྟན་བཤད་པ་དེ་གཉིས་ཡིན། །ཞིབ་ཏུ་མདོ་ཡི་ནང་དུ་བལྟ་བར་བྱ། །མི་རྟག་སྡུག་བསྔལ་ཆོས་ནི་ཡུན་རིང་འདིས། །ཐོག་མ་མེད་ནས་ད་ལྟའི་བར་དུ་གསུངས། །འཕགས་ལམ་མ་ཐོབ་བར་དུ་ད་རུང་གདུང་། །དེ་གཉིས་གཞི་དང་རྩ་བ་རང་སེམས་ཡིན། །ལུས་ནི་སེམས་ཡིན་སེམས་ཀྱི་རང་བཞིན་ནི། །ཡེ་ནས་རྣམ་དག་ཆོས་སྐུ་ཡིན་པ་ལ། །རྣམ་རྟོག་མ་ཡིན་བདག་ཏུ་འཛིན་པ་ཡིས། །ཡུལ་འདི་སེམས་ཉིད་ཡིན་པར་མ་ཤེས་ནས། །ཕྱི་ནང་དངོས་པོ་མཚན་མ་སོ་སོར་བཟུངས། །ལུས་དང་ལོངས་སྤྱོད་ལ་སོགས་འདོད་ཅིང་ཆགས། །ལུས་ངག་ཡིད་ནི་འདོད་པའི་ཁོལ་པོ་བྱེད། །བདག་གི་ཡིད་དང་མཐུན་པ་མི་མཐུན་ལས། །ཞེ་སྡང་ལ་སོགས་ཉོན་མོངས་གཞན་ཡང་སྐྱེས། །ཉོན་མོངས་དབང་གིས་དགེ་སྡིག་ལས་སྤྱོད་པས། །འབྲས་བུ་མི་རྟག་སྡུག་བསྔལ་འབྱུང་བ་ཡིན། །དེ་བས་དགྲ་ནི་རྣམ་རྟོག་བདག་འཛིན་ཡིན། །འདི་ནི་རྒྱུ་བཞིན་དངོས་པོ་མེད་བཞིན་དུ། །ཐོག་མ་མེད་ནས་བདག་ལ་རང་གནས་སུ། །བདག་ཉིད་མནར་ཡང་མ་ཚོར་ད་དངོས་ཟིན། །བདག་གི་ཆོས་སྐུ་ཡིད་བཞིན་རིན་ཆེན་ཏེ། །བཟོད་པའི་མུན་པས་དགྲ་འདིས་བརྐུས་ནས་སུ། །མཚན་མའི་ཚང་ཚིང་གསེབ་ཏུ་སྦས་ནས་བདག །ད་རུང་འཆིང་ཞིང་འཁོར་བར་འཁྱམས་དུ་འཇུག །ཕུང་པོའི་རྒྱུན་ལ་ཐ་སྙད་བདག་ཅེས་བྱ། །འཇིག་རྟེན་དགྲས་ནི་གསོད་དམ་ནོར་རྣམས་འཕྲོག །དེ་ལ་བཟོད་བྱས་བསོད་ནམས་ཚོགས་ཀྱང་རྫོགས། །དགྲ་འདིས་ཞི་བདེ་ཐར་པའི་སྲོག་ཀྱང་གཅོད། །དེ་སྟེང་བཟོད་བྱས་འཁོར་བར་དམ་དུ་འཆིང་། །དཔེར་ན་དངུལ་རྡོ་དངུལ་གྱི་རང་བཞིནཡང་། །བཞུ་བཏུལ་མ་བྱས་བར་དུ་དངུལ་མི་སྣང་། །དེ་བཞིན་སེམས་ཉིད་སངས་རྒྱས་ཡིན་མོད་ཀྱི། །ལོག་རྟོག་དགྲ་མ་བཅོས་པར་སངས་མི་རྒྱ། །དེ་བཞིན་ཕྱིན་ཅི་ལོག་དང་ཉོན་མོངས་དང་། །སྡུག་བསྔལ་ཉིད་ཀྱང་བྱང་ཆུབ་ཡིན་མོད་ཀྱི། །རང་གི་ཡེ་ཤེས་མ་ཐོབ་བར་དུ་ནི། །བདེ་སྡུག་རྒྱུ་འབྲས་ཀུན་ལ་མངོན་སུམ་དུ། །འཁྲུལ་རྟོག་འདུ་ཤེས་དབང་གིས་བདེ་བར་སྣང་། །རྨི་ལམ་བདེ་སྡུག་མངོན་སུམ་སྣང་བ་བཞིན། །རྣམ་རྟོག་དེ་ནི་ཤེས་བྱའི་སྒྲིབ་པའང་མིན། །བདག་འཛིན་དེ་ནི་ཉོན་མོངས་སྒྲིབ་པའི་རྒྱུ། །སྟོང་དང་བདག་མེད་འོག་ནས་བཤད་པར་བྱ། ༈ །ད་ནི་ཞི་བདེ་མྱ་ངན་འདས་པ་བཤད། །འཁོར་དང་ཞི་བ་སོ་སོ་མ་ཡིན་ཏེ། །སྲིད་པ་སྟོང་པར་རྟོགས་པ་ཞི་བ་ཡིན། །ཞི་བ་ཐོབ་པ་དེ་ཡི་ཡོན་ཏན་ནི། །ཆོས་རྣམས་ཐམས་ཅད་སྟོང་པ་ཉིད་རྟོགས་པས། །རྣམ་རྟོག་བདག་ཏུ་འཛིན་དང་ཉོན་མོངས་མེད། །ངན་སོང་གསུམ་ཕོངས་བཀྲེས་སྐོམ་གྲང་དྲོ་དང་། །སྐྱེ་རྒས་ན་འཆི་ལ་སོགས་སྡུག་བསྔལ་མེད། །འཁོར་བ་མི་རྟག་སྡུག་བསྔལ་གཏན་ཟད་ནས། །ལས་སུ་གཞན་དོན་འབའ་ཞིག་སྤྱོད་བྱེད་ཅིང་། །མཐུ་དང་རྫུ་འཕྲུལ་བསམ་གྱིས་མི་ཁྱབ་ཐོབ། །ཉན་ཐོས་རྣམས་ཀྱི་རྫུ་འཕྲུལ་ཚད་དང་ནི། །མགྱོགས་ཚད་གློག་དང་འདྲ་མ་བྱས་ན་ནི། །རི་རབ་བདུན་བདུན་གོམས་པ་རེ་རེར་བྱེད། །མཉམ་པར་གཞག་ཚེ་སྟོང་གསུམ་རང་སར་མཐོང་། །བྱང་ཆུབ་སེམས་དཔའི་རྫུ་འཕྲུལ་དཔེར་བྱས་ནས། །སྟོང་གསུམ་འདི་ཡང་ཡུངས་འབྲུ་གཅིག་ཏུ་ཚུད། །ཡུངས་འབྲུ་མ་འཕེལ་སྟོང་གསུམ་མ་བསྒྲིབས་སོ། །ཡུངས་འབྲུ་གཅིག་ཀྱང་སྟོང་གསུམ་ཙམ་དུ་སྤྲུལ། །ནང་གི་སེམས་ཅན་ཀུན་གྱིས་མ་ཚོར་བར། །སྟོང་གསུམ་འདི་ཡང་འཇིག་རྟེན་གཞན་དུ་འཕེན། །འདི་ནས་རང་གི་སྟན་ལས་མ་གཡོས་པར། །འཇིག་རྟེན་འབུམ་ཕྲག་མང་པོའི་ཕ་རོལ་ནས། །སངས་རྒྱས་ཞིང་ཁམས་རང་སར་ལག་པས་ལེན། །སངས་རྒྱས་མང་པོ་སོ་སོའི་སྤྱན་སྔ་ནས། །མཆོད་དང་ཆོས་ཉན་འཆད་སོགས་དུས་གཅིག་སྟོན། །བྱང་ཆུབ་སེམས་དཔའི་རྫུ་འཕྲུལ་དེ་འདྲ་ན། །དེ་བཞིན་གཤེགས་པའི་རྫུ་འཕྲུལ་ཚད་ཅི་ཡོད། །འོན་ཀྱང་སངས་རྒྱས་སྐུ་གཅིག་བསྟན་པ་ལ། །འཇིག་རྟེན་རྡུལ་གྱི་གྲངས་ཙམ་སེམས་ཅན་གྱིས། །རེ་རེར་ཐེ་ཚོམ་མི་གཅིག་སྣ་རེ་དྲིས། །དེ་བཞིན་གཤེགས་པས་ཚིག་གཅིག་གསུངས་པ་ལ། །སོ་སོ་རང་གི་ལན་ནི་བཏབ་པར་ཐོས། །སྐུ་གཅིག་དེ་ལ་སེམས་ཅན་ཇི་སྙེད་ཀྱིས། །ལ་ལས་ཞི་བར་ལ་ལས་ཁྲོ་བོར་མཐོང་། །ལ་ལས་རབ་བྱུང་ལ་ལས་ཁྱིམ་པའི་གཟུགས། །ལ་ལས་ཉན་ཐོས་ལ་ལས་རང་སངས་གཟུགས། །ལ་ལས་སེམས་ཅན་སོ་སོའི་རྣམ་པ་དང་། །འབྱུང་བ་ཆེ་དང་རྩི་ཤིང་ནགས་ཚལ་སོགས། །རང་རང་མོས་པ་ཇི་ལྟར་བཞིན་མཐོང་བས། །སངས་རྒྱས་རྣམས་ནི་གཅིག་ཏུ་མ་ངེས་ཏེ། །སྐུ་གཅིག་བསྟན་པས་སྣ་ཚོགས་རྣམས་སུ་མཐོང་། །ཆུ་ཡི་རྐྱེན་གྱིས་ཟླ་བ་གཟུགས་མང་སྣང་། །དེ་ཕྱིར་སངས་རྒྱས་ལ་ནི་གཉིས་མེད་དོ། །སངས་རྒྱས་དངོས་ནི་ཆོས་ཀྱི་སྐུ་ལ་བྱ། །དེ་ལ་རྟོག་མི་མངའ་ཡང་སྨོན་ལམ་མཐུས། །ཆོས་ཀུན་སྐུ་གསུང་ཐུགས་ཀྱི་ངོ་བོར་གནས། །སྐུ་གསུང་ཐུགས་ཀྱིས་གདུལ་བྱའི་ཞིང་ཀུན་ཁྱབ། །ལས་རྟོག་སྒྲིབ་པས་འགྲོ་བས་དེ་མི་མཐོང་། །ཉི་མ་ཟེར་གྱི་རང་བཞིན་དེ་ཟེར་གྱིས། །ཀུན་ཏུ་ཁྱབ་ཀྱང་དམུས་ལོང་དེས་མི་མཐོང་། །སྐུ་གསུང་ཐུགས་ཀྱི་གཟུགས་བརྙན་ཞི་ཁྲོ་སོགས། །དེ་མཐོང་སྐལ་བ་འགྲོ་བའི་མོས་རྟོག་མིན། །དེ་ཕྱིར་གཟུགས་སྐུ་གདུལ་བྱའི་སེམས་ཉིད་སྣང་། །དེ་ལྟར་འཁོར་བའི་ཉེས་སྐྱོན་དེ་དང་ནི། །མྱ་ངན་འདས་པའི་ཡོན་ཏན་དེ་ལགས་པས། །དེ་བས་དགོན་པར་འདུ་འཛི་ཐག་བསྲིངས་ལ། །གཙོར་ནི་རྣམ་རྟོག་བདག་འཛིན་དགྲ་འདི་འཇོམས། །རྣམ་རྟོག་དགྲ་ལ་རྒོལ་བའི་ཤོམ་ར་ཡང་། །དད་པས་གཞི་བཏིང་ཚུལ་ཁྲིམས་མཁར་བརྩིགས་ལ། །ཆོས་སྤྱོད་བཅུ་པོ་སྒོ་ནས་འཇུག་པར་བྱ། །དགེ་བ་བཅུ་ནི་མི་དགེའི་གཉེན་པོར་སྤྱོད། །ཚད་མེད་བཞི་དང་འདུ་བ་རྣམ་བཞི་དང་། །ཕ་རོལ་ཕྱིན་རྣམས་བདག་གཞན་དོན་དུ་སྤྱད། །བདག་རྟོག་དབང་གིས་འཁོར་བའི་སེམས་ཅན་རྣམས། །སྙིང་རྗེས་སེམས་ཅན་བསྒྲལ་བར་དམ་བཅས་ཏེ། །བྱང་ཆུབ་སེམས་བསྐྱེད་སྨོན་ལམ་རྩེ་གཅིག་གདབ། །དེ་ལ་སོགས་པའི་དགེ་བའི་དཔུང་བཅས་ལ། །བརྩོན་འགྲུས་གོ་བགོས་ཐེག་ཆེན་རྟ་ཞོན་ཏེ། །དྲན་དང་ཤེས་བཞིན་གཉིས་ཀྱི་སོ་བཙུགས་ཤིང་། །ཤེས་རབ་མདའ་ཐོགས་བསམ་གཏན་གཞུ་བརྡུང་སྟེ། །བདག་མེད་རྟོགས་པའི་སྟོང་པ་མཚོན་ཆེན་གྱིས། །རྣམ་རྟོག་བདག་འཛིན་རི་བྲག་རྩེ་ནས་གཞོམས། །དེ་ཕྱིར་དད་བརྩོན་དྲན་དང་ཤེས་བཞིན་དང་། །ཞི་གནས་ལྷག་མཐོང་རྣམས་ཀྱི་སྟོང་ཉིད་བསྒོམ། །སྟོང་ཉིད་བསྒོམས་པ་ཞི་བདེ་རྒྱུ་ཡི་མཆོག །ཆུང་ངུ་དེ་དག་དགྲ་བཅོམ་འབྲས་བུ་ཐོབ། །ཕྱིན་ཅི་ལོག་དག་ཉོན་མོངས་སྡུག་བསྔལ་དང་། །མཚམས་མེད་ལ་སོགས་སྡིག་པ་འཇོམས་པའི་མཆོག །དེས་ཟིན་སྦྱིན་སོགས་སྤྱོད་པའི་མཆོག་ཏུ་འགྱུར། །དེས་མ་ཟིན་ན་སོ་སོའི་འབྲས་བུ་ཙམ། །མྱོང་ནས་ཟད་འགྱུར་རྣམ་གྲོལ་རྒྱུར་མི་འགྱུར། །བདག་ཏུ་ལྟ་ལ་གནས་པའི་བྱིས་པ་གང་། །བདག་ནི་ཁྲིམས་ལྡན་ཚུལ་ཁྲིམས་བསྲུང་འཛིན་པ། །དེ་ཡི་ཁྲིམས་སྲུང་འབྲས་བུ་མྱོང་ནས་ནི། །ཕྱིར་ཡང་ངན་སོང་གསུམ་དུ་དེ་འཁོར་འགྱུར། །བདག་འཛིན་སྒྱུ་མཁན་ཡོད་ཀྱི་བར་དུ་ནི། །རི་འདྲའི་ཞི་གནས་ཡོད་ཀྱང་མི་གྲོལ་ཏེ། །དངོས་ཀུན་དངོས་མེད་སྒྱུ་བཞིན་མ་རྟོགས་ན། །གཏོང་ཕོད་ཐོད་འཛིན་དད་བརྩོན་ཡོན་ཏན་གྱིས། །བདག་རྟོགས་བཅས་པའི་དགེ་ཚོགས་ཅི་སྤྱད་ཀྱང་། །འཁོར་བའི་རྒྱུ་ཕྱིར་བདུད་ཀྱི་ལས་ཡིན་གསུངས། །དེ་བས་སྟོང་ཉིད་རྟག་ཏུ་བསྒོམས་པར་བྱ། །ཆོས་ཀུན་རང་བཞིན་འདི་འདྲར་ཡེ་གནས་པས། །བསྒོམ་ཚེ་སྟོང་པ་ཉིད་དུ་དེ་ལྟར་བརྟག །འཁོར་དང་མྱ་ངན་འདས་པའི་ཆོས་ཉིད་ནི། །འཁྲུལ་རྟོག་ཅན་ལ་ཀུན་རྫོབ་གྱི་ན་ཙམ། །ལོག་རྟོག་འདུ་ཤེས་རྟག་པའི་དབང་གིས་ནི། །སངས་རྒྱས་སེམས་ཅན་ལམ་དང་འབྲས་བུ་དང་། །དགེ་སྡིག་བདེ་སྡུག་སྣོད་བཅུད་འཇིག་རྟེན་སོགས། །བྱ་བྱེད་ནུས་དང་རྒྱུ་འབྲས་སྣ་ཚོགས་པ། །རྨི་ལམ་ཡུལ་བཞིན་མངོན་སུམ་སྣང་མོད་ཀྱིས། །དོན་དམ་གཞིག་ན་གང་ལའང་རང་བཞིན་མེད། །དངོས་པོ་སོ་སོར་སྣང་བ་ཀུན་རྫོབ་ཡིན། །སྣང་ཡང་གང་ལའང་དངོས་མེད་དོན་དམ་མོ། །ཇི་སྲིད་བསམ་བརྗོད་ཡུལ་འགྱུར་ཀུན་རྫོབ་ཡིན། །དེ་ནི་སོ་སོར་རྟོག་པ་ཤེས་རབ་ཡུལ། །དོན་དམ་བསམ་ཤིང་བརྗོད་དུ་མེད་པའི་ཕྱིར། །དེ་ནི་སེམས་ཀྱི་ཡུལ་མིན་རང་རིག་ཡུལ། །དེ་ཚེ་ཡང་ནི་འདི་ཞེས་བསྟན་དུ་མེད། །རྨི་ལམ་ཡུལ་དངོས་གཞན་ལ་བསྟན་མེད་བཞིན། །དོན་དམ་དེ་ཡང་བདག་མེད་རྣམ་གཉིས་ཡིན། ༈ །དེ་ལ་གང་ཟག་བདག་མེད་བསྟན་པར་བྱ། །གང་ཟག་ལྔ་ཕུང་རྒྱུན་ཡིན་ཅི་ཡི་ཕྱིར། །རྒྱུ་ནི་ལས་དང་ཉོན་མོངས་བས་གང་ནས། །འབྲས་བུ་ཕུང་པོར་ཟག་སྟེ་དེ་བདག་ནི། །སེམས་ཅན་སོ་སོ་རང་རང་ཡུལ་འདི་ལ། །ང་དང་བདག་ཏུ་བཟུང་ནས་ཆགས་འགྱུར་ཏེ། །བདག་ནི་ན་དང་འཆི་བཀྲེས་གང་གིས་དོགས། །བསྟོད་ན་དགའ་ཞིང་སྨད་ན་མི་དགའ་སྟེ། །དེ་ལ་དམིགས་ཏེ་མུ་སྟེགས་ལྟ་རྣམས་འཇུག །ངའམ་བདག་དེ་ཡོད་པ་མ་ཡིན་ནོ། །ཕུང་པོ་ལ་ནི་འཁྲུལ་ནས་བརྟགས་པ་ཡིན། །དཔེར་ན་ཐོ་ཡོར་མཐོང་བས་མི་འཁྲུལ་བཞིན། །ངའམ་བདག་ནི་ཡོད་པར་ཅིས་མངོན་ན། །མིང་ནི་བདག་མ་ཡིན་ཏེ་བཏགས་པའམ། །ལུས་ཀྱང་བདག་མ་ཡིན་ཏེ་ཤ་ཁྲག་རུས་པ་རྣམས། །འབྱུང་ཆེན་འདུས་པས་ཕྱི་རོལ་བརྩིགས་པ་འདྲ། །སེམས་ཀྱང་བདག་མིན་དངོས་པོ་མིན་ཕྱིར་རོ། །ཆོས་ལ་བདག་མེད་པའང་འདི་ལྟར་བརྟག །ཆོས་ནི་གཟུགས་སོགས་དངོས་པོ་ཐམས་ཅད་ཡིན། །བྱེད་པ་མེད་ལ་མཚན་ཉིད་འཛིན་ཕྱིར་སོགས། །དེ་ཡི་བདག་པོ་ལོག་རྟོག་མཚན་མར་བཅས་པ་དག །ལྷ་མི་མཐུན་པ་ཡིན་ཏེ་དེ་མེད་དོ། །ཅི་ཕྱིར་ཞེ་ན་ཕྱི་ནང་ཆོས་འདི་ལ། །དངོས་ནི་སྤངས་ནས་སྟོང་ཉིད་མི་བཙལ་གྱི། །སྣང་བ་ཉིད་ན་སྟོང་པ་ཉིད་ཀྱི་ཕྱིར། །གཞིག་བཅོམ་མི་རྟག་ཙམ་ལ་སྟོང་མི་བཏགས། །སྟོང་པ་ཉིད་ནའང་གང་ལའང་རང་བཞིན་མེད། །སྨིགས་སྒྱུ་སྣང་བ་ཉིད་ན་མེད་པ་བཞིན། །སྣང་ཡང་ངོ་བོ་ཉིད་ཀྱིས་མེད་པས་ན། །ཡོད་མེད་གང་དུའང་བསམ་ཞིང་བརྗོད་དུ་མེད། །སྣང་ཡང་རང་བཞིན་མེད་པར་ཅི་མངོན་ན། །ཡོད་མེད་དབུས་ན་གསུམ་དུ་མི་དམིགས་ཏེ། །ཡོད་པར་གྲགས་པས་འཁོར་དང་ཞི་བའི་ཆོས། །འཁོར་བའི་རང་བཞིན་ཡུལ་དང་སེམས་ཉིད་ཡིན། །ཡུལ་ནི་སྟོང་པ་ཉིད་དུ་འདི་ལྟར་བརྟག །ཕྱི་ནང་སྣོད་བཅུད་འཇིག་རྟེན་རང་བཞིན་ནི། །འདི་བཞིན་ཡེ་ནས་ཡོད་པ་མ་ཡིན་ནོ། །གལ་ཏེ་འདི་བཞིན་ཡེ་ནས་ཡོང་བདེན་ན། །ཉོན་མོངས་སྤང་ཞིང་བྱང་ཆུབ་སྒྲུབ་ཏུ་མེད། །ཀུན་གྱིས་བདེན་མཐོང་ཟིན་པས་འབྲས་ཐོབ་སྟེ། །སྐྱེ་རྒས་ན་འཆི་ལ་སོགས་མེད་པའི་རིགས། །འདི་བཞིན་ཡེ་ནས་མེད་པར་ཅིས་མངོན་ན། །རེག་སྣང་རྡུལ་བཤིག་རྡུལ་ཡང་ཆས་བཤིག་མེད། །དེ་བས་དངོས་ནི་སེམས་ཡིན་རྨི་ལམ་བཞིན། །དངོས་འདི་སེམས་ཉིད་ཡིན་པར་ཅིས་མངོན་ན། །གལ་ཏེ་སེམས་མིན་ལོགས་སུ་དངོས་ཡོད་ན། །ཆུ་ལ་ལྷ་དང་ཡི་དྭགས་ཉ་སོགས་ཀྱིས། །རིན་ཆེན་རྣག་ཁྲག་ཁྱིམ་སོགས་མཐོང་མི་རིགས། །དངོས་པོ་འདི་ལ་རྣལ་འབྱོར་པ་རྣམས་ཀྱིས། །ཟད་པར་བརྒྱད་དང་ཀེང་རུས་སོགས་བསྒོམས་ཚེ། །ཏིང་འཛིན་གོམས་ཀྱང་དེ་བཞིན་མཐོང་མི་རིགས། །སེམས་ཉིད་ཡུལ་འདིར་ཇི་ལྟར་སྣང་ཞེ་ན། །སེམས་ཀྱི་རང་བཞིན་ནམ་མཁའ་ལྟ་བུ་ལ། །དེ་ཡི་མཚན་ཉིད་རྣམ་རྟོག་སྤྲིན་བཞིན་སྣང་། །རང་བཞིན་མི་འགྱུར་ཙམ་ཉིད་ཅིར་ཡང་རྟོག །རང་གིས་རང་སྒྲིབ་རྒྱ་མཚོའི་ལྦུ་སོགས་བཞིན། །སེམས་ཀྱི་རྣམ་རྟོག་བག་ཆགས་མཐུ་བརྟས་ཚེ། །སེམས་དང་བག་ཆགས་གཅིག་མིན་ཐ་དད་མིན། །རྣམ་རྟོག་བག་ཆགས་སྣོད་བཅུད་གཉིས་སུ་སྣང་། །དཔེར་ན་མིག་གི་རབ་རིབ་རྐྱེན་ཉིད་ནི། །སྐྲ་ཤད་འཇིངས་དང་ཟླ་བ་གཉིས་སྣང་ཞིང་། །དེ་བས་ལུས་འདི་གཞན་དབང་སེམས་ཉིད་ཡིན། །དེ་ལས་དམིགས་ཏེ་རྣམ་ཤེས་འབྱུང་བའི་ཕྱིར། །ཡུལ་སེམས་གཉིས་ཀྱང་རྟེན་འབྲེལ་སྒྱུ་མ་བཞིན། །དེ་ལྟར་ཡུལ་འདི་སེམས་ཉིད་ཡིན་པ་ལ། །དེ་ལས་འཁྲུལ་ནས་གཞན་དུ་མཚན་མར་བཟུང་། །ཐག་བུ་སྦྲུལ་དུ་མཐོང་ནས་སྦྲུལ་ལྟ་བཞིན། །མཚན་མ་དེ་ཡང་དངོས་སུ་གང་ཞེ་ན། །དངོས་པོ་སོ་སོར་མངོན་སུམ་ཡོན་སྣང་བའི། །སངས་རྒྱས་སེམས་ཅན་བདག་གཞན་བཟང་ངན་དང་། །རྩི་ཤིང་ནགས་ཚལ་ཡུལ་མཁར་ཁང་ཁྱིམ་སོགས། །མདོར་ན་སེམས་ཅན་ཀུན་ལ་མངོན་སུམ་པའི། །རྣམ་ཤེས་དྲུག་གི་ཡུལ་འདི་ཐམས་ཅད་ཡིན། །དེ་ནི་བཏགས་པ་ཙམ་ཡིན་གཏན་མེད་དོ། །མེད་ཀྱང་རང་ཉིད་དེ་ལ་སྤྱོད་བྱེད་དེ། །དེ་བས་བྱིས་པ་མཚན་མར་འཛིན་པ་རྣམས། །འཇིག་རྟེན་འདི་ན་མེད་པའི་ཆོས་ལ་སྤྱོད། །དཔེར་ན་སྨིག་སྒྱུ་སྣང་བ་ཆུར་འཛིན་དང་། །མིག་སྐྱོན་སྣང་ལ་སྐྲ་ཟླ་དངོས་འཛིན་དང་། །རྨི་ལམ་ཡུལ་ལ་ཡོང་བཟུང་རང་སྤྱོད་བཞིན། །དེ་ནས་ཀུན་བརྟགས་སོ་སོ་སྐྱེ་བོའི་ཡུལ། །སེམས་ཉིད་ཡུལ་སྣང་དག་པ་འཇིག་རྟེན་ཡུལ། །གཉིད་སད་པ་ན་རྨི་ལམ་ཡུལ་མེད་བཞིན། །ཕྱི་ནང་དངོས་པོར་སྣང་བའི་ཡུལ་འདི་ཡང་། །མ་རིག་གཉིད་སད་མེད་པ་མཐོང་ན་མེད། །དེ་བས་ཡུལ་སེམས་རང་གི་རྟོག་པ་ཡིན། །ཡང་ན་མི་རྟོག་ལྷུན་གྲུབ་སངས་རྒྱས་ཀྱིས། །དངོས་གཅིག་མ་གཟིགས་ཕྱིར་ཡང་ཡུལ་མེད་དོ། །རྣམ་རྟོག་བདག་ཏུ་འཛིན་དང་བཅས་པ་ཡི། །རྟོག་པའི་སེམས་ཀྱང་ཁ་དོག་དབྱིབས་དང་ནི། །ཕོ་མོ་ལ་སོགས་དངོས་པོར་མ་གྲུབ་མེད། །ཡང་ན་སྐད་ཅིག་མ་སྟེ་རང་བཞིན་མེད། །ཡང་ན་ཡུལ་མེད་པས་ན་སེམས་མེད་དོ། །ཡང་ན་རྟེན་འབྲེལ་ཡིན་ཕྱིར་སྐྱེ་བ་མེད། །དེ་བས་འཁོར་བ་སྟོང་ཞིང་བདག་མེད་པའོ། །འཁོར་བ་མེད་པས་མྱ་ངན་འདས་པའང་མེད། །མྱ་ངན་འདས་པའི་མཐར་ཐུག་སངས་རྒྱས་ཡིན། །དེ་ཡི་ཆོས་སྐུ་དབྱིངས་དང་ཡེ་ཤེས་ཡིན། །དེ་གཉིས་ལ་ཡང་དངོས་མེད་ཐ་སྙད་ཙམ། །གཟུགས་སྐུ་རྣམ་གཉིས་ཡེ་ཤེས་གཟུགས་བརྙན་ཡིན། །ཡེ་ཤེས་མེད་པས་གཟུགས་བརྙན་ག་ལ་ཡོད། །ཡང་ན་གཟུགས་བརྙན་ཡིན་ཕྱིན་དངོས་མེད་པས། །སངས་རྒྱས་མེད་དེ་མིང་ཙམ་མིང་ཡང་མེད། །མདོར་ན་འཁོར་དང་མྱ་ངན་འདས་པའི་ཆོས། །རང་བཞིན་སྒྱུ་མ་ཙམ་དུའང་མེད་པའི་ཕྱིར། །ཅི་སྣང་ཅི་སྲིད་ཆོས་ཉིད་སྟོང་པ་ཡིན། །ཆོས་ཉིད་དེ་ལ་བྱང་ཆུབ་ཅེས་བྱ་བས། །བྱང་ཆུབ་བྱ་དང་བྱེད་པ་མི་དམིགས་ཕྱིར། །སངས་རྒྱས་བྱང་ཆུབ་ཐ་སྙད་ཙམ་སྟེ་མེད། །ཡོད་མེད་གཉིས་ནི་ལྟོས་པའི་ཆོས་ཡིན་པས། །ཡོད་པར་མ་གྲུབ་པས་ན་མེད་པའང་མེད། །ཆོས་ཅན་མེད་ཕྱིར་ཆོས་ཉིད་སྟོང་པའང་མེད། །མཐའ་གཉིས་མེད་ཕྱིར་དབུས་ཀྱང་མི་འགྲུབ་སྟེ། །ཆོས་ཉིད་བསམ་ཞིང་བརྗོད་དུ་མེད་པ་ལ། །དབུས་སུ་བཏགས་ན་མཐའ་བཞི་སྐྱོན་དུ་འགྱུར། །དེ་ཕྱིར་ཆོས་རྣམས་ཀུན་གྱི་རང་བཞིན་ནི། །ལྷོ་སྤྲིན་སྣང་ཞིང་ཅི་ཡང་མེད་པ་བཞིན། །ཆོས་ཀུན་སྣང་ཞིང་གང་ལའང་དངོས་མེད་པར། །སྣང་བ་ཉིད་ན་དངོས་པོ་སྣང་མེད་དེ། །ཡོད་མེད་དབུས་དང་གསུམ་དུ་མ་གྲུབ་ཕྱིར། །ཅི་ཡང་མེད་པས་ཅི་ཡང་བསམ་དུ་མེད། །མཐོང་ཐོས་ལ་སོགས་ཐ་སྙད་རྣམས་དང་བྲལ། །སེམས་དང་སེམས་བྱུང་ཤེས་པའི་ཡུལ་ལས་འདས། །མངོན་སུམ་ལ་སོགས་ཚད་མས་གཞལ་དུ་མེད། །དེ་བས་རྒྱལ་བས་ཆོས་གཅིག་མ་གཟིགས་ཕྱིར། །ཚིག་གཅིག་ཙམ་གྱི་ཆོས་ཀྱང་བཤད་པ་མེད། །གདུལ་བྱའི་རྟོག་པས་སྡེ་སྣོད་བཤད་པར་སྣང་། །སོ་སོར་ཡོད་ན་ཅི་ཡང་ཡིན་པའི་ཕྱིར། །བསམ་པའི་ཡུལ་དུ་གྱུར་ནའང་དེ་མིན་པས། །བསམ་བརྗོད་ཡུལ་འདི་བརྟགས་ཙམ་འཁྲུལ་པ་ཡིན། །དེ་བས་ཆོས་ཀུན་ནམ་མཁའི་མཚན་ཉིད་ཡིན། །ནམ་མཁའ་མིང་ཙམ་མཚན་ཉིད་ཅི་ཡང་མེད། །དེ་བས་ཐམས་ཅད་ཡེ་ནས་སྟོང་ཉིད་ཕྱིར། །ཉོན་མོངས་སྤངས་མེད་བྱང་ཆུབ་སྒྲུབ་མེད་དེ། །བྱང་ཆུབ་ཐོབ་དང་རེ་དོགས་སྤངས་བླངས་དང་། །རྣམ་ཐར་གསུམ་དང་ལམ་དང་གཉེན་པོའང་མེད། །དོན་དམ་བདེན་པ་ཉིད་ཀྱང་དངོས་མེད་པས། །དོན་དམ་རྣམ་གྲངས་སྐྱེ་འགགས་མེད་སོགས་དང་། །སྟོང་ཉིད་བསྒོམ་པའང་ཐ་སྙད་ཙམ་ཡིན་ཕྱིར། །བསྒོམ་པའི་ཡུལ་མེད་སྒོམ་མེད་སེམས་ཀྱང་མེད། །བསྒོམ་རྒྱུ་མེད་ཕྱིར་མི་སྒོམ་བཞག་མེད་དེ། །ལུས་སེམས་ཆོས་སོགས་སྐྱོན་ཡོན་མི་དམིགས་ཕྱིར། །དམིགས་བྱ་དམིགས་བྱེད་མི་དམིགས་ནམ་མཁའ་བཞིན། །དོན་འདི་རྟོགས་པར་འདོད་པའི་རྣལ་འབྱོར་པས། །མཉན་བསམ་གསུམ་གྱི་སྒོ་ནས་རྟོགས་ནས་བྱ། །དེ་གསུམ་ཡུལ་ཡང་མིང་དང་གཉིས་ཀ་དང་། །དོན་ཉིད་ཡིན་པས་བསམ་སྒོམ་རྣམ་གཉིས་ཀྱིས། །ལུང་དང་མན་ངག་བསྟེན་ནས་རིགས་པས་ཀྱང་། །ཆོས་ཀུན་བདག་མེད་ཡིན་པའི་གཏན་ཚིགས་ནི། །གོང་དུ་སོ་སོར་ཕྱེ་ཞིང་བསྟན་པ་བཞིན། །དངོས་ཀུན་གཞིག་ཅིང་ཡང་དང་ཡང་དཔྱད་ན། །ཚིག་ཙམ་མ་ཡིན་བློ་རྟིང་གོ་བར་འགྱུར། །གོ་བའི་ཚེ་ན་རིག་པ་འདི་ལྟར་སྐྱེ། །ཅི་ཡང་མིན་པས་བརྟགས་པ་བཞིན་སྣང་ཞིང་། །སེམས་ཅན་རྣམས་ཀྱི་མངོན་སུམ་གྱུར་པ་ཡིན། །སངས་རྒྱས་སེམས་ཅན་ལ་སོགས་མཚན་མ་རྣམས། །རྨི་ལམ་ཡུལ་བཞིན་རྟོག་པ་ཙམ་ཡིན་པས། །སྒྱུ་མ་ཤེས་པས་ཅི་ཡང་མཐོང་མེད་བཞིན། །སྣང་ཡང་ཅི་ཡང་མི་མཐོང་རིག་པ་སྐྱེ། །རིག་པ་དེ་ཡང་རང་གི་ཙམ་དུ་ཟད། །དེ་ཚེ་དངོས་ཀུན་ཅི་ཡང་མིན་པར་མཐོང་། །ཅི་ཡང་མིན་ལའང་བསམ་པའི་ཡུལ་མེད་པས། །དེ་བས་བསམ་བརྗོད་མི་འཇུག་མཐོང་སྣང་མེད། །བརྗོད་མེད་ངང་ཙམ་དུ་ཡང་མི་མཐོང་བས། །སེམས་ལ་མྱོང་རེག་དགའ་སྡུག་མེད་པར་འགྱུར། །སེམས་ཀྱང་དངོས་མེད་ནམ་མཁའ་བཞིན་མཐོང་བས། །ནམ་མཁའ་བཞིན་དུ་ཅི་ལའང་མི་གནས་སོ། །དེ་ཚེ་བླང་དོར་མི་མཐོང་རྟོག་སྐྱེ་སྟེ། །འཕགས་དང་སེམས་ཅན་བདག་གཞན་བཟང་ངན་དང་། །དགེ་སྡིག་བདེ་སྡུག་གཙང་དམེ་སྤངས་བླང་སོགས། །གཉིས་པར་སྣང་ཀུན་གཉིས་སུ་མེད་རྟོགས་པས། །སོ་སོར་མཐོང་དམིགས་འདུ་ཤེས་མི་འཇུག་གོ། །དེ་ཕྱིར་ཐམས་ཅད་གཉིས་མེད་མཉམ་པར་མཐོང་། །དེ་ལྟར་རྟོགས་ན་ཆོས་སྐུ་མཐོང་བ་ཡིན། །བདེ་གཤེགས་རྣམས་དང་ཡུལ་གཅིག་སྤྱོད་ཕྱིར་རོ། །འཕགས་དང་རྣལ་འབྱོར་རྟོགས་པའི་ཁྱད་པར་ནི། །རྣལ་འབྱོར་པ་ལ་ཇི་སྲིད་མཉམ་བཞག་ཙམ། །བྱང་ཆུབ་སེམས་དཔའི་རྟོགས་པ་མངོན་དུ་གྱུར། །སངས་རྒྱས་པ་ལ་རྟོགས་པ་ལྷུན་གྱིས་གྲུབ། །སངས་རྒྱས་སེམས་ཅན་རང་བཞིན་གཅིག་མོད་ཀྱི། །རྣམ་རྟོག་ཡོད་མེད་དབང་གིས་ཁྱད་ཞུགས་པས། །ཐ་ན་ཆོས་ཉིད་ངང་ལ་དམིགས་ཀྱང་རུང་། །རྣམ་རྟོག་ཐམས་ཅད་འཁོར་བའི་ཆིངས་མ་སྟེ། །མི་རྟོག་བསམ་འདས་རང་རིག་ཆོས་སྐུ་བས། །རྣམ་རྟོག་སྤང་ཞིང་རང་རིག་ཐོབ་བྱའི་ཕྱིར། །བསྒོམ་ཚེ་འདི་ལྟར་བསམ་ཞིང་བཞག་པར་བྱ། །སྲིད་དང་ཞི་བར་སྣང་བའི་ཆོས་འདི་ནི། །ཡོད་མེད་ལ་སོགས་གང་དུའང་མ་གྲུབ་ཕྱིར། །ཅི་ཡང་མིན་པས་ཅིར་ཡང་བསམ་དུ་མེད། །བསམ་དུ་མེད་པས་ཅི་ཡང་མི་བསམ་ཞིང་། །འབད་རྩོལ་བསྟོད་འཛིན་དམིགས་པ་ཀུན་སྤངས་ནས། །མི་གསལ་མི་རྟོག་ཙམ་ལ་མི་གསན་པར། །ལུས་སེམས་མི་སྡོམ་ཁོང་ལྷོད་གྱི་ན་ཙམ། །མི་གཡོ་གསལ་བའི་ངང་ལ་རང་བཞིན་ཏེ། །རྟོག་མེད་བཏང་སྙོམས་གནས་ལ་བརྩོན་འགྲུས་བྱ། །འཕྲལ་བྱུང་ཡུལ་རྟོག་རང་བྱུང་རང་ཞིར་བཞག །དེ་ཚེ་རྟོགས་པ་ཀུན་བྱུང་འོང་ཞེས་བྱ། །བར་བར་སེམས་ཀྱིས་སེམས་ཀྱང་ཅི་བྱེད་བརྟག །བྱིང་རྒོད་བྱུང་ན་སྤྲོ་དང་སྐྱོ་བ་སྐྱེད། །སྣང་བ་མི་འགོགས་པ་ནི་ཐབས་ཡིན་ཏེ། །སྣང་བ་མི་འཛིན་མི་གནས་ཤེས་རབ་ཡིན། །མ་གོམས་བར་དུ་མཚན་མ་སེམས་ཀྱང་སྦྱང་། །ཆོས་ཉིད་དོན་ལ་བསམ་ཞིང་གཏོང་འཛིན་བྱ། །ཡང་ན་སེམས་ཀྱིས་སེམས་ལ་བལྟ་བར་བྱ། །ཡང་ན་སྣང་ལ་རང་བཞིན་མེད་པར་ནི། །བསམ་ཞིང་གསལ་ལ་རྟོག་པ་མེད་པར་བཞག །དྲན་དང་ཤེས་བཞིན་བསྲུང་ཞིང་སྐྱོན་བྱུང་ན། །བརྩོལ་བས་ཡང་དང་ཡང་དུ་མཉམ་པར་བཞག །གློ་བུར་ཡུལ་རྟོག་བྱུང་བ་ཞིག་ཅིང་གཏང་། །དེ་ལྟར་བསྒོམས་ན་སེམས་ཉམས་རྣམ་གསུམ་བྱུང་། །དང་པོར་རི་གཟར་ཆུ་དྲག་མགྱོགས་པ་འདྲ། །གཉིས་པ་ཤིན་ཏུ་དལ་བབ་ཆུ་ཀླུང་བཞིན། །གསུམ་པ་མི་གཡོ་གསལ་བས་མཚོ་གཏིང་འདྲ། །དེ་ནི་ཞི་གནས་ལྷག་མཐོང་ཟུང་འབྲེལ་ཡིན། །བཏང་སྙོམས་གསུམ་ཡང་དེ་ཚེ་རིམ་བཞིན་འབྱུང་། །དེ་ཚེ་ལུས་སེམས་ཤིན་ཏུ་སྦྱངས་པའང་ཐོབ། །སྟོང་ཉིད་གོམས་ཚེ་རྟགས་ཀྱང་འདི་ལྟར་འབྱུང་། །དངོས་ཀུན་མཚན་མར་འཛིན་ཅིང་འབྱེད་བྱེད་དེ། །ལོག་རྟོག་འདུ་ཤེས་ཇེ་ཉུང་ཇེ་ཞིར་འགྱུར། །ཆགས་སྡང་ལ་སོགས་ཉོན་མོངས་ཇེ་ཆུང་འགྱུར། །དགེ་སྡིག་ལ་སོགས་སྤང་བླང་ཇེ་གསལ་རྟོགས། །སྙིང་རྗེ་ཕན་སེམས་ཇེ་འཕེལ་ཇེ་འཕེལ་འགྱུར། །མཐོང་སྣང་ཡུལ་ནི་སེམས་རྟོགས་བག་ཆགས་པས། །སེམས་རྟོག་ཇེ་ཕྲ་མཐོང་སྣང་མེད་པར་འགྱུར། །མངོན་ཤེས་ལ་སོགས་ཡོན་ཏན་རིམ་གྱིས་འབྱུང་། །མ་བྱུང་བར་དུའང་བརྟགས་དང་ཅི་མཐུན་བྱ། །མཉམ་པར་བཞག་ལ་ལྡང་ཚེའང་འདི་ལྟར་དཔྱད། །ཆོས་སྐུ་སྟོང་པ་ཉིད་དུ་རྟོགས་མོད་ཀྱང་། །རྨི་ལམ་གཉིས་ན་རྒྱུ་འབྲས་མི་བསླུ་བཞིན། །འཁྲུལ་རྟོག་མ་ཟད་བར་དུ་ལས་ཡོད་པས། །དགེ་སྡིག་ལས་ལ་རྟག་ཏུ་སྤང་བླང་བྱ། །སྡིག་བྱས་བཤགས་དང་མི་དགེ་སེམས་ཀྱིས་སྦྱངས། །མཉམ་པ་གདེང་དུ་གྱུར་ན་རྟོགས་དང་སྦྱར། །དངོས་ཀུན་དངོས་མེད་སྒྱུ་མ་བཞིན་དུ་ལྟ། །དགེ་སྤྱོད་ཐམས་ཅད་མི་དམིགས་བཞིན་དུ་སྤྱད། །དྲན་དང་ཤེས་བཞིན་བསྒོམ་ཞིང་ཅི་ཟིན་བྱ། །འདུས་བྱས་དགེ་རྩ་མི་འགལ་ནུས་ཚད་བྱ། །ཉོན་མོངས་སྐྱེས་ན་གཉེན་པོར་སྟོང་ཉིད་བསྒོམ། །དགོན་པས་སྐྱོ་ན་མི་རྟག་སྡུག་བསྔལ་བསམ། །དུས་གསུམ་འཕགས་པ་མངོན་སུམ་བཞུགས་པས་ན། །ཡན་ལག་བདུན་པ་རྩེ་གཅིག་སེམས་ཀྱིས་བྱ། །དགེ་རྩ་ཅི་བྱས་བྱང་ཆུབ་ཆེན་པོར་བསྔོ། །སེམས་ཅན་རྣམས་ལ་སྙིང་རྗེའི་ཕན་སེམས་བསྐྱེད། །ཁྲོ་གཉེར་ངོ་གནག་སྤངས་ལ་འཛུམ་བཞིན་བྱ། །ཞི་དེས་གསོང་པོར་བྱ་ཞིང་འབྲེལ་པ་བསྐྱུང་། །བདག་ལ་མི་བསྟོད་རང་སྐྱོན་བལྟ་བར་བྱ། །སྙན་གྲགས་བདུད་ཀྱི་ལས་ཡིན་སེམས་གཡེང་བས། །མངོན་ཤེས་ཐོབ་ཀྱང་ཡོན་ཏན་མི་སྦྲག་ན། །གཟུགས་མཐོང་སྒྲ་ཐོབ་ལ་སོགས་སྨོས་ཅི་དགོས། །གྲགས་དང་གྲགས་བསྟོད་བསྟོད་སྨོད་བདེ་སྡུག་དང་། །བརྙེད་དང་མ་བརྙེད་འཇིག་རྟེན་ཆོས་བརྒྱད་པོ། །བྲག་ཆ་རྨི་ལམ་འདྲ་བར་གོ་མཉམ་བྱ། །སེམས་ཅན་རང་བཞིན་སྐྱོན་གྱིས་རང་བཞིན་པས། །བྱེད་མིན་བྱས་པས་གཞན་སྐྱོན་མི་རྟོག་གོ། །དེ་ལྟར་སྟོང་ཉིད་ཡུན་རིང་གོམས་བྱས་ལ། །ཚོགས་ཆེན་གཉིས་ཀྱང་རང་བཞིན་རྫོགས་པར་འགྱུར། །སྒྲིབ་པ་གཉིས་ཀྱང་རིམ་གྱིས་འབྱང་གྱུར་ཏེ། །རྣམ་རྟོག་བདག་འཛིན་སོས་ཁའི་ཆབ་དྲོན་འདྲ། །ཇེ་ཞི་ཇེ་ཕྲ་མི་རྟོག་དབྱིངས་སུ་འགྱུར། །མི་རྟོག་ལྷུན་གྱིས་གྲུབ་པ་ཆོས་སྐུ་ཡིན། །དེ་ཚེའང་མཐོང་བའི་ཡུལ་དང་སེམས་བྲལ་ནས། །ཡེ་ཤེས་ཆོས་ཉིད་རང་རིག་རང་ལ་གནས། །རྟོག་འཛིན་མེད་པར་ཤེས་བྱ་ངང་གིས་མཁྱེན། །མཐུ་དང་རྫུ་འཕྲུལ་ཡོན་ཏན་བསམ་མི་ཁྱབ། །དེ་ཐོབ་ནས་ནི་སྨོན་ལམ་ཐུགས་རྗེ་ཡིས། །འགྲོ་བའི་དོན་དུ་གཟུགས་སྐུ་རང་བཞིན་འབྱུང་། །དེ་ནས་སེམས་ཅན་སོ་སོའི་མོས་པ་བཞིན། །སྐུ་གསུང་ཐུགས་ཀྱི་རྣམ་འཕྲུལ་སྟོན་བྱེད་ཅིང་། །འཁོར་བ་མ་སྟོངས་བར་དུ་གཞན་དོན་སྤྱད། །དེ་ཕྱིར་བདག་ཀྱང་དགོན་པར་འཆི་བ་ལགས། །ཡས་བདག་ཀྱང་ནི་དེ་བཞིན་དགོངས་མཛོད་ལ། །དམ་ཆོས་བསྒྲུབ་ལ་བརྩོན་འགྲུས་འབད་པར་རིགས། །འཁོར་བ་མི་རྟག་སྡུག་བསྔལ་དེ་དང་ནི། །བྱང་ཆུབ་འོ་སྐོལ་ཀུན་གྱི་ཐུན་མོང་ལགས། །སྟོན་པའི་བསྟན་པའི་གདུགས་བཞིན་ཀུན་སྙོམས་ཀྱང་། །བྱང་བལྟས་ཕུག་འདྲ་སྐྱེ་བོས་མི་རྟོགས་པས། །དེ་ཕྱིར་ཆོས་མཛད་རྣམས་ལ་ཞུ་བ་ནི། །དོ་གཅིག་མཆིས་པས་སང་ཕོད་མཆིས་པ་བཞིན། །ཚེ་འདི་མཆིས་པས་སླད་མ་མཆིས་པར་ངེས། །སང་ཕོད་ལོ་དང་སྐུ་ཚེ་སླད་མ་གཉིས། །གང་སྔར་འོང་བ་སུ་ལའང་བརྟོལ་མེད་ན། །སང་ཕོད་དོན་དུ་སོང་འམ་འབོད་པ་བཞིན། །སླད་མའི་དོན་དུ་ཅི་ཕྱིར་འབད་མི་མཛད། །མི་རྟག་སྲིན་པོས་གཟུངས་བ་མ་ཚོར་རམ། །འཆི་བར་ངེས་པས་བསོད་ནམས་མྱུར་དུ་མཛོད། །ངེས་པར་འཆི་བསམ་ལས་ཀྱིས་བསགས་པ་འགྲངས། །ཚེ་འདི་ཟིལ་པ་འདྲ་སྟེ་མེད་ལ་ཁད། །དབུགས་འདི་ན་བུན་འདྲ་སྟེ་ཡལ་ལ་ཁད། །ལུས་འདི་སྒྱུ་མ་འདྲ་སྟེ་སྣང་ལ་མེད། །སེམས་འདི་གློག་དང་འདྲ་སྟེ་སྐད་ཅིག་མ། །བུ་སྨད་ཉེ་བཞི་ལུས་དང་ལོངས་སྤྱོད་ནི། །སྡུག་ཅིང་ཕོངས་དང་མི་རྟག་འཇའ་ཚོན་འདྲ། །ཕུང་པོ་གཡར་པོ་འདྲ་བར་དགོངས་མཛོད་ལ། །དམ་ཆོས་བསྒྲུབ་ལ་ཚེ་འདིར་མ་འབད་ན། །དལ་འབྱོར་མི་ལུས་ཐོབ་པ་ཆུད་པ་ཟོས། །སླད་མར་མི་ཡི་ལུས་ཀྱང་མི་ཐོབ་ན། །བླ་མེད་བྱང་ཆུབ་འབྲས་བུ་ག་ལ་ཐོབ། །ངན་སོང་སྐྱེས་ནས་སྡུག་བསྔལ་སྐྱེས་པའི་ཚེ། །ཚེ་འདིའི་བཙན་ཕྱུག་སྙན་གྲགས་དེས་ཅི་ཕན། །སྔར་འགྲང་ད་ལྟ་བཀྲེས་ལ་མི་ཕན་བཞིན། །དམྱལ་བའི་སྡུག་བསྔལ་ཤེས་ཀྱང་མི་འཇིགས་པ། །མི་རྟག་ལུས་ལ་ཆགས་པས་སྡིག་སྤྱོད་པ། །རང་གིས་རང་བརླག་ཀྱེ་མའོ་སྙིང་རེ་རྗེ། །འཁོར་བའི་གཅོང་རོང་སྡུག་བསྔལ་གནས་འདི་ནི། །རྨོངས་པ་བདག་གིས་བརྟགས་ཀྱང་འདི་ལྟར་གདའ། །སྡུག་བསྔལ་གསུམ་དང་བརྒྱད་ཀྱིས་ཉམ་རེ་ཐག །ངན་སོང་གསུམ་གྱི་སྡུག་བསྔལ་སྐྱི་རེ་གཡའ། །དམྱལ་ཁམས་བཅོ་བརྒྱད་སྡུག་བསྔལ་ཡ་རེ་ཆ། །སྐྱེ་རྒས་ན་འཆིའི་སྡུག་བསྔལ་རྒྱུན་རེ་རིང་། །དེ་ཕྱིར་བདག་དང་བདག་ལ་སྙིང་རྗེ་ན། །ཆོས་མཛད་རྣམས་ཀྱིས་དེ་ལྟར་མ་གཟིགས་སམ། །གཟིགས་ན་ཅི་ཕྱིར་ཁྱེད་སེམས་བདེ་བར་འདུག །དེ་བས་རྣམ་རྟོག་བདག་འཛིན་ཁ་མ་འཛིན། །བུ་དང་ཆུང་མ་གཉེན་བཤེས་ལ་སོགས་དང་། །ལུས་དང་ལོངས་སྤྱོད་ཀུན་ལ་ཡིད་མ་ཆགས། །མི་རྟག་སྡུག་བསྔལ་བསམ་ཞིང་འཇིགས་པ་བསྐྱེད། །མི་དགེ་སྤང་ཞིང་དགེ་སྤྱོད་ཆོས་བཞིན་མཛོད། །ཆོས་བཞིན་མེད་ན་ཆོས་པའི་མིང་ཅི་ཡོད། །ཚུལ་ཁྲིམས་མེད་ན་དགེ་སློང་ཅི་ལ་ཟེར། །དམ་ཚིག་མེད་ན་སྔགས་པ་ཅི་ལ་ཟེར། །སྡིག་ནི་ཆུང་ཡང་མི་བརྙས་སྤང་ཞིང་བཤགས། །ཆུ་ཐིག་ཉུང་བསགས་སྣོད་ཆེན་གང་བ་བཞིན། །དགེ་བ་ཆུང་ཡང་དང་དུ་བླང་ཞིང་སྤྱད། །རྡུལ་ཕྲན་བསགས་པས་སྣོད་ཀྱི་འཇིག་རྟེན་བཞིན། །ཐར་པ་བདག་ལ་རག་ལས་འདི་ལ་ནི། །གཞན་གྱི་གྲོགས་བགྱིར་ཅི་ཡང་མ་མཆིས་ཏེ། །གྲོགས་བགྱིར་མཆིས་ན་ཐུགས་རྗེ་ཆེ་མངའ་བའི། །འཕགས་པས་འགྲོ་ཀུན་དུས་གཅིག་གྲོལ་བར་རིགས། །དེ་ཕྱིར་འགྲོ་ལ་སྙིང་རྗེ་ཕན་སེམས་བསྐྱེད། །རྣམ་རྟོག་དགྲ་ཡི་གཉེན་པོར་སྟོང་ཉིད་བསྒོམ། །དགེ་བ་ཅི་མཛད་བྱང་ཆུབ་ཆེན་པོར་བསྔོས། །དེ་ལྟར་སྤྱད་ན་ཡུན་དུ་བདེ་བར་འགྱུར། །ཡུན་དུ་བདེ་བའི་ཆོས་དོན་མ་རྟོགས་ན། །སྐྲ་དཀར་སྐྱེས་ཤིང་གཉེར་མའི་ཚོགས་འདུས་ཀྱང་། །བྱིས་པ་ཤེད་མ་བྱེད་དང་འདྲ་བས་ན། །དོན་ལ་མཁས་པས་བརྟག་ན་སྙིང་རེ་རྗེ། །དེ་བས་དམ་ཆོས་གཞུང་བཞིན་སྤྱད་པར་རིགས། །སླད་མ་ཉན་བཤད་མཛད་ལ་ཞུ་བ་ནི། །ཆོས་ཀྱིས་བདག་བཤད་བདག་གིས་ཆོས་མ་བཤད། །དོན་རྟོགས་བྱ་ཕྱིར་དང་པོར་ཉན་ཀྱང་དགོས། །ངེས་པ་སྙེད་ནས་ཚིག་མང་བསླབ་མི་དགོས། །ཚིག་མི་ཟད་ཕྱིར་ཉན་པས་མཐར་ཕྱིན་མེད། །ཆོས་ཀྱང་ཤེས་པས་མི་ཆོག་སྒྲུབ་པ་གཅེས། །ལམ་རྒྱུད་ཤེས་ཀྱང་མི་འགྲོ་ཤེས་ཅི་ཕན། །ཉན་བཤད་དགོས་པས་སྒྲུབ་ཐབས་བཙལ་ཕྱིར་ཡིན། །མི་སྒྲུབ་མཉན་བཤད་དོན་ཆུང་ཡི་རེ་ཆད། །བྲོ་མཁན་བསྒྲུང་མཁན་བྲོ་བསྲུང་འཆད་པ་བཞིན། །དེ་ནི་མི་ནག་ཆོས་ཀྱི་ལོ་རྒྱུས་མཁན། །བསྒྲུབ་ཐབས་མཆོག་ནི་སྟོང་ཉིད་བསྒོམ་པ་ཡིན། །སྟོང་ཉིད་བསྒོམས་པས་གོ་འཕང་གཅོད་མཐོང་ན། །ཐོས་མང་ཚིག་ལ་མཁས་པ་དེ་ཚོ་འདྲ། །བསྒྲུབ་པའི་ལམ་བསྟན་ལྟ་བུའི་འབྲས་བུ་ཐོབ། །མ་སྒྲུབས་ཀུན་དགའ་བོས་ཀྱང་མ་ཐོབ་བཞིན། །ཤེས་ཙམ་ཕན་མེད་གཞུང་ལས་འདི་སྐད་འབྱུང་། །གལ་ཏེ་མང་དུ་ཐོས་པས་དེ་རྒྱགས་ཤིང་། །ཐོས་པས་རྒྱགས་ནས་ཚུལ་ཁྲིམས་མི་བསྲུང་ན། །ཚུལ་ཁྲིམས་འཆལ་བས་ངན་འགྲོར་དེ་འགྲོ་སྟེ། །ཐོས་པ་མང་པོས་དེ་ལ་སྐྱོབ་མི་ནུས། །གཞན་ཡང་ཆོས་ཤེས་ང་རྒྱལ་གྲགས་པ་ཡིས། །དམྱལ་བར་སྐྱེས་ནས་བྱ་ངང་དགགས་བརྒྱད་སྐྱེ། །གཞན་ཡང་ཤེས་རབ་མ་སྒྲུབ་འདི་འདྲ་གསུང་། །རྒྱ་མཚོའི་ནང་དུ་སྐམ་ནས་འཆི་བ་དང་། །གཞན་ཡང་སྦྱིན་གཏོང་བདག་ཉིད་ལྟོག་ཤི་དང་། མི་བཀྲེན་ཁ་གཡོས་མཁན་དང་ནད་པ་རྣམས། །སྨན་གཏོང་མི་ནུས་ཕན་ཚུན་སྨན་སློབ་དང་། །གླ་མིས་གཞན་གྱི་ནོར་བགྲངས་འདྲ་ཞེས་གསུངས། །གཞན་ཡང་ཁེ་ཕྱིར་གཞན་ལ་ཆོས་འཆད་པ། །རིན་ཆེན་སྙེད་ཀྱང་སྤང་བ་འདྲ་ཞེས་གསུངས། །དེ་ཕྱིར་དོན་ལ་དཔྱོད་སེམས་ཚིག་ཕྱིར་མིན། །ཚིག་འདི་དོན་མིན་དོན་ནི་དངོས་འདི་ཡིན། །དོན་ནི་གསེར་འདྲ་ཚིག་ནི་སྒྲོན་མ་བཞིན། །གསེར་སྙེད་ནས་ནི་སྒྲོན་མས་ཅི་ཞིག་བྱ། །དོན་ལ་དཔྱད་ཅིང་བསམ་ན་རང་རིག་སྐྱེ། །ཚིག་གི་ཉན་བཤད་བསྐལ་པར་བྱས་ཀྱང་ནི། །རང་རིག་མེད་དེ་ཉོན་མོངས་འཕེལ་བའི་རྒྱུ། །དེ་ཕྱིར་དོན་ལ་མཁས་པས་མཁས་པ་ཡིན། །ཚིག་ལ་མཁས་པས་མཁས་པ་མ་ཡིན་ཏེ། །དེ་ཕྱིར་ཕྱི་ནང་དངོས་འདི་བཤིག་ཅིང་དཔྱོད། །འོན་ཀྱང་ཚིག་མིན་བློ་རྟིང་རང་རིག་འབྱུང་། །ཁ་ཅིག་དེང་སང་སྒྲུབ་པའི་དུས་ཀྱང་མིན། །གང་ཟག་གིས་ཀྱང་དེ་མི་རྟོགས་ཟེར་བ། །རང་ལ་སྤགས་ནས་བཀའ་ལ་སྐུར་འདེབས་ཡིན། །སྐལ་ལྡན་བཟང་ངན་མེད་པར་རྟོགས་པར་སྣང་། །སྡེ་སྣོད་གསུམ་པོ་འཆད་ཀྱང་སྐལ་མེད་ན། །ཐ་སྙད་འཆད་ཀྱིས་སྟོང་ཉིད་དོན་མི་རྟོགས། །ཐེག་པ་དགུ་ཡང་གང་ཟག་མོས་དབང་དང་། །སྙིང་རྗེ་ཤེས་རབ་ཆེ་ཆུང་དབང་གསུངས་པས། །བསྒྲུབ་པ་པོས་ཀྱང་རང་གི་ཉམས་སྦྱར་ལ། །གང་ལྕོགས་པ་ཡི་སྒོ་ནས་འཇུག་པར་བྱ། །རང་གིས་མི་ལྕོགས་བཞིན་དུ་གོང་གི་ཆེ་ལ་རེ་ནས་གོང་མ་ཁས་ལེན་པ། །ཐང་སྟོང་སྡིག་པ་རང་གིས་ཁས་ལེན་པས་དམྱལ་བར་སྐྱེ་ཞེས་གཞུང་ལས་འབྱུང་། །ཐེག་པའི་རང་བཞིན་ཤེས་རབ་སྙིང་རྗེ་ཁོ་ན་སྟེ། །བདག་དང་སངས་རྒྱས་དབྱེར་མེད་རྟོགས་པ་ཤེས་རབ་ཡིན། །སེམས་ཅན་ཀུན་ལ་བུ་བཞིན་བྱམས་པ་སྙིང་རྗེ་ཡིན། །དེ་གཉིས་ཆེ་ཆུང་དབང་གིས་ཐེག་པའི་ཁྱད་པར་བསྟན། །གང་ཞིག་དེ་གཉིས་མི་ལྡན་ཐེག་ཆེན་ཁས་འཆེས་པ། །ལོང་སྤྲང་ང་ཉིད་རྒྱལ་པོ་ཡིན་ཞེས་ཟེར་བ་བཞིན་དུ་བརྫུན། །དེ་བས་གོང་མ་ཁས་བླངས་པས་ནི་རང་གི་གཞུང་བཞིན་ཤིན་ཏུ་འབད་པར་རིགས། །ཁས་ལེན་མི་ནུས་པས་ཀྱང་མོས་དང་སྨོན་སེམས་བསྐྱེད་བྱའི་བསྐུར་མི་གདབ། །གསང་སྔགས་སྐྱེ་ས་གཉིས་ནི་རྡོ་རྗེ་དམྱལ་དང་སངས་རྒྱས་ས་ཡིན་གཞན་ནི་མེད། །ལྟ་སྤྱོད་དམ་ཚིག་ལྡན་ཞིང་བསྒྲུབ་པ་ལ་ཤིན་ཏུ་བརྩོན་པར་སངས་རྒྱས་སར་འགྲོ་གསུང་། །དེ་གསུམ་མི་ལྡན་སྒྲུབ་ལ་གཡེལ་ཞིང་སྤྱོད་པ་འདོད་ཕྱོགས་ཙམ་སྤྱོད་དམྱལ་བར་སྐྱེ། །དེ་བས་གསང་སྔགས་སྤྱོད་པས་པང་དུ་སྦྲུལ་འོག་བཞིན་དུ་ཤིན་ཏུ་འབད་པར་རིགས། །བདེ་གཤེགས་སྤྱོད་ཡུལ་བསམ་འདས་ཟབ་མོའི་དོན་ལ་སྤྱོད་པ་དང་། །རྒྱལ་སྲས་བསྐུལ་བར་བདག་འདྲ་རྨོངས་པ་བསྐུལ་བར་མ་འོས་ཀྱང་། །བདག་བས་རྨངས་པ་འགའ་ལ་ཕན་གྲང་སྙམ་ནས་ཆོས་འདི་བགྱིས། །ནོངས་གྱུར་ཅི་མཆིས་འཕགས་དང་མཁས་པ་རྣམས་ལ་བཟོད་པར་གསོལ། །དགེ་རྩ་འདིས་ནི་ཀུན་གྱིས་གཞུང་བཞིན་བསྒྲུབས་ནས་ཞི་བདེ་ཐོབ་པར་ཤོག །ཐེག་པ་ཆེན་པོའི་རྣལ་འབྱོར་ལ་འཇུག་པའི་ཐབས་བྱེ་བྲག་ཏུ་འབྱེད་པ་རྫོགས་སོ།། །།

ཐེག་པ་ཆེན་པོའི་ཚུལ་ལ་འཇུག་པ་ཞེས་བྱ་བའི་བསྟན་བཅོས།

ཤཱསྟྲཾ མ ཧཱ ཡཱ ནསྱ ན ཡེ ཥྭ བ ཏཱ ར ནཱ མ བི ཧ ར ཏི སྨ།
ཐེག་པ་ཆེན་པོའི་ཚུལ་ལ་འཇུག་པ་ཞེས་བྱ་བའི་བསྟན་བཅོས་བཞུགས་སོ། །
ཐེག་པ་ཆེན་པོའི་ཚུལ་ལ་འཇུག་པ་མདོ་ཙམ་བརྗོད་པ། གང་ཟག་གང་དག་འཁོར་བའི་རྒྱ་མཚོ་ལས་ཐར་བར་འདོད་ཅིང་། བླ་ན་མེད་པའི་བྱང་ཆུབ་བསྒྲུབ་པར་འདོད་པ་རྣམས་ཀྱིས། ཐོག་མར་ཁོ་ནར་ཉོན་མོངས་པ་རྣམས་ཀྱི་མཚན་ཉིད་ལ་བརྟགས་པར་རིགས་སོ། །གང་གི་ཕྱིར་ཉོན་མོངས་པ་རྣམས་ཀྱིས་བཅིངས་ཏེ། འགྲོ་བ་རྣམས་འཁོར་བའི་རྒྱ་མཚོར་འཁྱམས་སོ། །ཞེས་བཀའ་སྤྱི་ལས་གྲགས་པའི་ཕྱིར་རོ། །དེའི་འོག་ཏུ་དེ་རྣམས་ཀྱི་གཉེན་པོར་གྱུར་པའི་ལམ་གྱི་མཆོག་ཏུ་གྱུར་པ་གང་ཡིན་པ་ཞིག་བཙལ་ཏེ། དེ་ལ་གོམས་པར་བྱ་བར་རིགས་སོ། །གང་གི་ཕྱིར་ཉོན་མོངས་པ་རྣམས་ཀྱི་མཚན་ཉིད་ཁོང་དུ་མ་ཆུད་པར། དེའི་གཉེན་པོའང་ཁོང་དུ་ཆུད་པར་མི་འགྱུར་ལ། དེ་དག་ཁོང་དུ་མ་ཆུད་ན་གོམས་པར་བྱ་བའི་ཐབས་ཀྱང་མི་ཤེས་ཏེ། དེ་རྣམས་དང་མ་བྲལ་ན་ཐར་པའི་གོ་སྐབས་མི་རྙེད་པའི་ཕྱིར་རོ། །འདི་དག་ཙམ་གྱིས་ཤེས་བྱ་མ་ལུས་པ་ཁོང་དུ་ཆུད་པར་འགྱུར་ཏེ། གང་གི་ཕྱིར་སེམས་ཀྱི་རང་བཞིན་ཇི་ལྟ་བར་ཡིན་པ་དང་། སེམས་འཁྲུལ་པའི་གནས་སྐབས་དང་། སེམས་མ་འཁྲུལ་པའི་གནས་སྐབས་ཙམ་ཤེས་པས། ཤེས་བྱ་ཐམས་ཅད་འདུས་པའི་ཕྱིར་ཏེ། ཉན་ཐོས་དང་རང་སངས་རྒྱས་ཀྱི་བྱང་ཆུབ་ལྟར། རྣམ་པར་གྲོལ་བའི་སྒོ་ཕྱོགས་གཅིག་ལ་སྐྱེས་པར་ཡང་མི་འགྱུར་རོ། །དེ་ལ་ཉོན་མོངས་པ་རྣམས་ཀྱི་མཚན་ཉིད་ལ་བརྟག་པ་བསྟན་པར་བྱ་སྟེ། འདི་ལྟ་བ་ཉོན་མོངས་པ་ཞེས་བྱ་བ་འདིའི་མཚན་ཉིད་རྫས་སུ་གྲུབ་པ་ཞིག་ཡིན་ཏེ། དེས་འགྲོ་བ་རྣམས་བཅིངས་པར་གྱུར་ཏམ། འོན་ཏེ་སྤང་བར་བྱ་བའི་རྫས་མེད་ཀྱང་བཅིངས་པ་ལྟ་བུ་ཞིག་སྣང་བར་འགྱུར་བ་ཞིག་ཡིན་ཞེ་ན། ཉོན་མོངས་པ་རྣམས་ལ་ནི་སྤང་བར་བྱ་བའི་རྫས་ཀྱི་མཚན་ཉིད་མེད་པར་ཤེས་སོ། །ཇི་ལྟར་ཞེ་ན། འདི་ལྟར་ཉན་ཐོས་ཀྱི་ཚུལ་ལས། འཕགས་པ་དགྲ་བཅོམ་པ་རྣམས་ཀྱིས་ཁམས་གསུམ་གྱི་ཉོན་མོངས་པ་མཐོང་བ་དང་བསྒོམ་པས་སྤང་བར་བྱ་བ་མཐའ་དག་མ་ལུས་པར་སྤངས་ཏེ། སྲིད་པར་ཀུན་དུ་སྦྱོར་བ་ཐམས་ཅད་ཡོངས་སུ་བཅད་ནས། དགྲ་བཅོམ་པའི་འབྲས་བུ་ཐོབ་པའོ། །ཞེས་གྲགས་ན། འདི་ལྟར་དགྲ་བཅོམ་པ་རྣམས་ཀྱིས་སྤངས་པའི་ཉོན་མོངས་པ་དེ་རྣམས་ལ། རྫས་ཀྱི་རྣམ་གྲངས་དུ་ཞིག་ཡོད་ཅེས་བརྟག་ན། རྫས་ཀྱི་རྣམ་གྲངས་རྙེད་པར་མི་འགྱུར་རོ། །ཇི་ལྟ་ཞེ་ན། རེ་ཤིག་འདི་ལྟར། མཐོང་བས་སྤང་བར་བྱ་བའི་ཉོན་མོངས་པ་རྣམས་ལས། སྡུག་བསྔལ་མཐོང་བས་སྤང་བར་བྱ་བ་དེ་དག་དང་། ཀུན་འབྱུང་མཐོང་བས་སྤང་བར་བྱ་བ་ལ་སོགས་པ་དེ་དག །རྫས་གཅིག་ཡིན་ནམ། འོན་ཏེ་རྫས་ཐ་དད་རེ་རེ་ཡོད་ཅེས་བརྟག་གྲང་ན། དེ་ལ་རྫས་གཅིག་ཡིན་པར་གྱུར་ན་ནི། སྡུག་བསྔལ་མཐོང་བས་སྤང་བ་འབའ་ཞིག་སྤངས་པས། ཐམས་ཅད་སྤོངས་པར་འགྱུར་ཏེ། དེ་ལྟ་ན་ལམ་གཞན་བསྒོམ་པ་དོན་མེད་པར་འགྱུར་རོ། །གལ་ཏེ་རྫས་ཐ་དད་རེ་རེ་ཡོད་དོ་ཞེ་ན། དེ་ལྟ་ན་ནི་བདེན་པ་བཞི་ནི། ཤེས་བྱ་མ་ལུས་པ་མདོར་བསྡུས་ནས་བདེན་པ་བཞིར་རྣམ་པར་ཕྱེ་བ་ཙམ་དུ་ཟད་པས། ཡུལ་བདེན་པ་བཞི་ལ་དམིགས་པའི་དབང་གིས། སྤང་བར་བྱ་བའི་ཉོན་མོངས་པའང་བཞི་བཞིར་འགྱུར་བར་གདོན་མི་ཟ་སྟེ། དེ་ལྟ་ན་ནི་ཤེས་བྱའི་རབ་ཏུ་དབྱེ་བ་ལ་གྲངས་ངེས་པར་གཟུང་བ་མེད་དེ། འདི་ལྟར་སྡུག་བསྔལ་་གྱིབདེན་པ་འབའ་ཞིག་ལའང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་རྣམ་པར་ཤེས་པ་ནི། སྡུག་བསྔལ་ལ་ཆོས་ཤེས་པའི་བཟོད་པ་ཡིན་པས། དེའི་དབང་གིས་སྡུག་བསྔལ་མཐོང་བས་སྤང་བར་བྱ་བ་རེ་རེའང་བཞི་བཞིར་འགྱུར་རོ། །དེ་དག་སྡུག་བསྔལ་གྱི་མཚན་ཉིད་དུ་གཅིག་པར་མི་འགྱུར་རོ་ཞེ་ན། དེ་ལྟ་ན་ནི་ཀུན་འབྱུང་གི་བདེན་པའང་སྡུག་བསྔལ་གྱི་མཚན་ཉིད་ལས་མ་འདས་ཏེ། འདུ་བྱེད་ཐམས་ཅད་སྡུག་བསྔལ་བའི་མཚན་ཉིད་ཡིན་པ་དང་། གང་ཅི་ཚོར་ཡང་རུང་སྟེ་འཕགས་པ་རྣམས་ཀྱིས་སྡུག་བསྔལ་དུ་བཤད་པའི་ཕྱིར་རོ། །དེ་བཞིན་དུ་སྡུག་བསྔལ་གྱི་བདེན་པ་ཉིད་ཀྱང་ཀུན་འབྱུང་གི་མཚན་ཉིད་ལས་མ་འདས་ཏེ། འདི་ལྟར། མུ་སྟེགས་ཅན་བྱེད་པ་པོར་རྒྱུར་སྨྲ་བ་ལྟར། འདི་ལྟར་རྒྱུ་ནི་འབྲས་བུ་ལ་མི་ལྟོས་ཏེ། རྟག་ཏུ་རྒྱུ་ཁོ་ནའི་བྱ་བ་བྱེད་ལ། འབྲས་བུའང་རྟག་ཏུ་རྒྱུའི་བྱ་བ་མི་བྱེད་དོ། །ཞེས་སྨྲ་བ་ལྟར། སངས་རྒྱས་པ་ཆོས་རྟེན་ཅིང་འབྲེལ་ཏེ་འབྱུང་བར་སྨྲ་བ་ནི་དེ་ལྟ་མ་ཡིན་ཏེ། རྒྱུའང་འབྲས་བུ་ལ་ལྟོས། འབྲས་བུའང་རྒྱུ་ལ་ལྟོས་ཏེ། དངོས་སུ་ན་ཉེ་བར་ལེན་པའི་ཕུང་པོ་ལྔ་ཉིད་རྣམ་པར་སྨིན་པའི་ཚུལ་གྱི་ཁུར་ལྟར་གནོན་པའི་བདག་ཉིད་དུ་གྲུབ་པས། སྡུག་བསྔལ་གྱི་མཚན་ཉིད་ཡིན་ལ། དེ་ཉིད་མ་འོངས་པ་ན་སྡུག་བསྔལ་མངོན་པར་འགྲུབ་པའི་གནས་སུ་གྱུར་པས་ཀུན་འབྱུང་བའི་མཚན་ཉིད་ཡིན་ཏེ། དེ་བས་ན་ཕུང་པོ་ལྔ་ཙམ་ལ་དམིགས་ཏེ། ཆོས་བདག་མེད་པ་རྟོགས་པས་ཀྱང་། ཉོན་མོངས་པ་ཐམས་ཅད་སྤངས་པར་གདོན་མི་ཟའོ། །གཞན་ཡང་གང་ཞིག་གིས་ཤེས་བྱ་རྣམས་ལ་རྣམ་པར་དབྱེ་བ་གྲངས་ལས་འདས་པ་ཞིག་ཏུ་རྣམ་པར་ཕྱེ་སྟེ། དེ་རྣམས་ལ་ཆོས་བདག་མེད་པར་རྟོགས་པར་བྱས་ན། དེ་དག་ཐམས་ཅད་ཀྱིས་ཀྱང་ཉོན་མོངས་པ་སྤོང་བར་འགྱུར་བ་གདོན་མི་ཟའོ། །རྣམ་པ་གཅིག་ཏུ་གང་ཟག་གི་དབང་དུ་བྱ་ན། སྐྱེས་བུ་ཞིག་གི་ཕ་ཤིང་གིས་བསད་དེ། དེའི་རྐྱེན་གྱིས་ཤིང་ལ་ཞེ་སྡང་སྐྱེས་པར་གྱུར་ན། དེ་ཤིང་གཅིག་ལ་ཞེ་སྡང་སྐྱེས་པ་ནས། ཤིང་གཉིས་དང་། གསུམ་ནས་ཤིང་ཇི་སྙེད་པ་ལ་ཞེ་སྡང་སྐྱེས་པར་གྱུར་པ་ན། ཞེ་སྡང་དེ་དག་ཐམས་ཅད་རྫས་གཅིག་ཡིན་ནམ། འོན་ཏེ་རྫས་ཐ་དད་རེ་རེ་ཡོད། དེ་ལ་གཅིག་ཡིན་ན་ནི་ཤིང་གཅིག་ཐལ་བར་བསྲེགས་པས་ཞེ་སྡང་ཐམས་ཅད་ལྡོག་པར་རིགས་ན་དེ་ལྟའང་མ་ཡིན་ནོ། །གལ་ཏེ་ཐ་དད་རེ་རེ་ཡོད་ན་ནི་དེའི་རྣམ་གྲངས་བརྗོད་པ་ཙམ་ཡང་བསྐལ་པའི་མཐར་ཐུག་པར་བརྗོད་ཀྱང་རྫོགས་པར་མི་འགྱུར་ཏེ། གལ་ཏེ་དེ་དག་སྤང་བར་བྱ་བ་ན། དུས་མཐའི་སྐད་ཅིག་མ་རེ་རེས་ཞེ་སྡང་རེ་རེ་སྤངས་ཀྱང་ཟད་པར་འགྱུར་བའི་མཐའ་རྙེད་པར་མི་འགྱུར་རོ། །གལ་ཏེ་ཉོན་མོངས་པ་མང་པོ་ལམ་གཅིག་གིས་སྤོངས་པར་འགྱུར་ན། ལམ་གྱི་བྱེ་བྲག་མང་པོའི་བསྒོམ་པ་དོན་མེད་པར་འགྱུར་རོ། །གལ་ཏེ་ཉོན་མོངས་པ་གཅིག་ལམ་མང་པོས་སྤོང་བར་འགྱུར་ན། ཉོན་མོངས་པའི་བྱེ་བྲག་གསུངས་པ་ཡང་དོན་མེད་པར་འགྱུར་ལ། གལ་ཏེ་ལམ་གྱི་བྱེ་བྲག་རྣམས་ཀྱིས། ཉོན་མོངས་པ་ཅུང་ཟད་ཀྱང་ཉམས་པར་མ་བྱས་ན་ནི། ལམ་མང་པོ་ཡིས་སྤངས་པར་ཡང་མི་འགྱུར་ལ། བྱས་པར་གྱུར་ན་ནི་ཉོན་མོངས་པ་རྫས་གཅིག་ཏུ་ཡང་མི་འགྱུར་རོ། །དེ་ལྟ་ན་ཉོན་མོངས་པ་རྣམས་ལ་རྫས་ཀྱི་གྲངས་ངེས་པ་མེད་དེ། དེ་བས་ན་ཉན་ཐོས་ཀྱི་ཚུལ་ལྟར་ན། ཉོན་མོངས་པ་རྣམས་ལ་སྤང་བར་བྱ་བའི་རྫས་མ་གྲུབ་བོ། །འོ་ན་འཕགས་པ་དགྲ་བཅོམ་པ་རྣམས་ཀྱིས་ཉོན་མོངས་པ་རྣམས་ཇི་ལྟར་སྤངས་ཞེས་བརྗོད་ཅེ་ན། འདི་ལྟར་དགྲ་བཅོམ་པ་རྣམས་ནི། གང་ཟག་ལ་བདག་མེད་པར་རྟོགས་པས། འཇིག་ཚོགས་ལ་ལྟ་བའི་སྒྱུ་མ་མཁན་ཉེ་བར་ཞི་བར་གྱུར་ཏེ། དེས་ཉོན་མོངས་པའི་སྒྱུ་འཕྲུལ་ཐམས་ཅད་ཞི་བར་གྱུར་པར་ཟད་དོ། །འཇིག་ཚོགས་ལ་ལྟ་བ་དེ་ཉིད་ཀྱང་། སྨོན་པ་བྱང་ཆུབ་ཀྱི་སེམས་ཀྱིས་ཟིན་ན། བསོད་ནམས་ཀྱི་ཚོགས་ཚད་མེད་པའི་གནས་སུ་འགྱུར་ལ། བདག་མེད་པའི་ཤེས་རབ་ཀྱི་ཟིན་ན། ཉོན་མོངས་པའི་དྲི་མ་དག་པར་སྣང་བར་འགྱུར་ཏེ། འོན་ཀྱང་དྲི་མའི་རྫས་ནི་ཡོད་པ་མ་ཡིན་ནོ། །དཔེར་ན་རྨི་ལམ་ལ་བརྟེན་ནས་རྨི་ལམ་སྣང་། སྒྱུ་མ་ལ་བརྟེན་ནས་སྒྱུ་མ་སྣང་ཡང་། གཉིས་ག་ལ་རྫས་མེད་པར་འགོ་མཚུངས་ཤིང་། རྫས་སུ་གྲུབ་པ་ལྟར་སྣང་བ་ཡང་དམིགས་པ་བཞིན་ནོ། །འཕགས་པ་རང་རྒྱལ་པ་རྣམས་ཀྱི་ཚུལ་ལྟར་ན། རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ཀྱི་སྒོ་ནས། ཆོས་ཉིད་ཟབ་མོ་རྟོགས་ཏེ། ཁམས་གསུམ་གྱི་ཉོན་མོངས་པ་མཐོང་བ་དང་བསྒོམ་པས་སྤང་བར་བྱ་བ་མ་ལུས་པ་སྤངས་ཏེ། རང་བྱང་ཆུབ་ཀྱི་འབྲས་བུ་ཐོབ་པའོ། །ཞེས་འབྱུང་བས། དེ་བས་ན་རྟེན་འབྲེལ་ཡན་ལག་བཅུ་གཉིས་ཀྱི་དབང་གིས། རེ་རེ་ལའང་བར་ཆད་མེད་པའི་ལམ་དང་། རྣམ་པར་གྲོལ་བའི་ལམ་གཉིས་གཉིས་སུ་འགྱུར་བས། མཐོང་བས་སྤང་བར་བྱ་བའི་ཉོན་མོངས་པ་གཅིག་ཀྱང་བཅུ་གཉིས་བཅུ་གཉིས་སུ་འགྱུར་རོ། །གཞན་ཡང་ཡན་ལག་དེ་དག་རེ་རེའང་བདེན་པ་བཞིའི་མཚན་ཉིད་ཅན་ཡིན་ཏེ། འདི་ལྟར་མ་རིག་པའི་རྐྱེན་གྱིས་འདུ་བྱེད་ལ་སོགས་པ་མངོན་པར་འགྲུབ་པའི་སྒོ་ནས། ཁུར་ལྟར་གནོད་པའི་བདག་ཉིད་དུ་གྱུར་པས། སྡུག་བསྔལ་གྱི་བདེན་པའི་མཚན་ཉིད་ཡིན་ནོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ལ་སོགས་པ། མ་འོངས་པ་ན་སྡུག་བསྔལ་མངོན་པར་འགྲུབ་པའི་གནས་སུ་གྱུར་པས། ཀུན་འབྱུང་གི་བདེན་པ་ཡིན་ནོ། །མ་རིག་པ་འགགས་པས་འདུ་བྱེད་འགག་པ་ལ་སོགས་པས། འགོག་པའི་བདེན་པ་ཡིན་ལ། དེ་རྣམས་འགོག་པར་བྱ་བའི་ཕྱིར། རྟེན་འབྲེལ་གྱི་མཚན་ཉིད་ལམ་བསྒོམ་པས། ལམ་གྱི་བདེན་པ་ཡིན་ཏེ། དེ་བས་ན་བདེན་པ་བཞིའི་དབང་གིས། སྤང་བར་བྱ་བའི་ཉོན་མོངས་པ་གཅིག་ཀྱང་བཞི་བཅུ་རྩ་བརྒྱད་དུ་འགྱུར་རོ། །ཚུལ་འདི་ལྟར་ནའང་ཉོན་མོངས་པ་རྣམས་ལ་རྫས་ཀྱི་གྲངས་ངེས་པར་གཟུང་བ་མི་རྙེད་དོ། །རྣལ་འབྱོར་སྤྱོད་པ་རྣམས་ཀྱི་ཚུལ་ལྟར་ནའང་། ཁམས་གསུམ་པའི་སེམས་དང་སེམས་ལས་བྱུང་བ། ཡང་དག་པ་མ་ཡིན་པའི་ཀུན་ཏུ་རྟོག་པའི་མཚན་ཉིད་ནི། གང་གིའང་གཟུང་བ་མ་ཡིན་ཞིང་། གང་ལའང་འཛིན་པར་བྱེད་པ་མ་ཡིན་ཏེ། གཉིས་པོས་སྟོང་པ་རང་རིག་པ་ཙམ་གྱི་མཚན་ཉིད་ཡིན་པར་གྲུབ་པའི་མཐས་འདོད་ལ། དེ་ལྟ་ན་ནི་ཉོན་མོངས་པ་རྣམས་ཀྱི་མཚན་ཉིད་དང་འགལ་ཏེ། ཉོན་མོངས་པ་རྣམས་ནི། ཡུལ་ལ་སྐྱེ་བ་ཕྱིན་ཅི་ལོག་གི་རྣམ་པ་ཅན་ཡིན་པའི་ཕྱིར་རོ། །གང་ཡང་འདི་སྐད་དུ་དཔེར་ན་ས་ཁོང་ན་གསེར་ཡོད་པ་ལ། ས་དང་གསེར་དང་སའི་ཁམས་གསུམ་དམིགས་སོ། །དེ་ལ་གསེར་ལ་སར་མཐོང་བ་ནི་ཕྱིན་ཅི་ལོག་ཏུ་མཐོང་བའོ། །གསེར་དུ་མཐོང་བ་ནི་ཡང་དག་པར་མཐོང་བའོ། །སའི་ཁམས་ནི་གཉི་གའི་ཆར་གཏོགས་པའོ། །དེ་བཞིན་དུ་གཞན་གྱི་དབང་གི་མཚན་ཉིད་ལ་གཟུང་བ་དང་འཛིན་པར་མཐོང་བ་ནི་ཕྱིན་ཅི་ལོག་ཏུ་མཐོང་བའོ། །ཡོངས་སུ་གྲུབ་པར་མཐོང་བ་ནི་ཡང་དག་པར་མཐོང་བའོ། །གཞན་གྱི་དབང་ནི་གཉི་གའི་ཆར་གཏོགས་པའོ། །ཞེས་གྲུབ་པའི་མཐའ་ལས་གྲགས་ན། གཞན་དབང་ལ་ཆ་གཉིས་ཀྱི་རྫས་མི་རྙེད་དེ། དེ་ནི་འདི་ལྟར་འགལ་མེའི་འཁོར་ལོ་ལ་འགལ་དུམ་དང་འཁོར་ལོ་དང་གསལ་བ་གསུམ་དམིགས་སོ། །དེ་ལ་འགལ་དུམ་ལ་འཁོར་ལོར་མཐོང་བ་ནི་ཕྱིན་ཅི་ལོག་ཏུ་མཐོང་བའོ། །འགལ་དུམ་དུ་མཐོང་བ་ནི་ཡང་དག་པར་མཐོང་བའོ། །གསལ་བ་ནི་གཉིས་གའི་ཆར་གཏོགས་པའོ། །ཞེས་ཟེར་བ་ལྟ་བུ་ཡིན་ཏེ། འདི་ལྟར་འགལ་དུམ་ཡང་རྫས་སུ་གྲུབ་ལ་འཁོར་ལོ་ཡང་རྫས་སུ་གྲུབ་པ་ཞིག་ན། གསལ་བའང་གཉིས་གའི་ཆར་གཏོགས་པ་ཡོད་པར་གྲུབ་ཏུ་རུང་ལ། གལ་ཏེ་འཁོར་ལོ་རྫས་སུ་གྲུབ་ལ་འགལ་དུམ་རྫས་སུ་མ་གྲུབ་པ་ཞིག་ན། གསལ་བའང་འཁོར་ལོ་ཉིད་ཀྱི་མཚན་ཉིད་ཡིན་ཏེ། ཆ་གཉིས་པ་མེད་དོ། །འགལ་དུམ་རྫས་སུ་གྲུབ་ལ་འཁོར་ལོ་མ་གྲུབ་པ་ཡིན་ཡང་དེ་བཞིན་ཏེ། དེ་བས་ན་འདིར་འཁོར་ལོར་སྣང་བའི་དུས་ཉིད་ན། འགལ་མེ་གཅིག་ཡུལ་རིམ་གྱིས་གནོན་པ་ཡིན་ཏེ། འཁོར་ལོ་ནི་གཏན་མ་གྲུབ་པས། དེ་བས་ན་གསལ་བའང་འགལ་དུམ་ཉིད་ཡིན་པར་ཟད་དེ། གསལ་བ་ཆ་གཉིས་མེད་དོ། །དེ་བཞིན་དུ་གཉིས་པའང་རྫས་སུ་གྲུབ། ཡོངས་སུ་གྲུབ་པའང་རྫས་སུ་གྲུབ་པ་ཞིག་ན། ཀུན་དུ་རྟོག་པའང་གཉིས་གའི་ཆར་གཏོགས་སུ་རུང་ན། གཉིས་སུ་སྣང་བའི་དུས་ཉིད་ན་རང་རིག་པའི་མཚན་ཉིད་ཡིན་ཏེ། གཉིས་པོ་གཏན་མ་གྲུབ་པས། དེ་བས་ན་ཀུན་ཏུ་རྟོག་པ་ཆ་གཉིས་མི་འགྲུབ་བོ། །དེ་བས་ན་ཉོན་མོངས་པ་རྣམས་ལ་སྤང་བར་བྱ་བའི་རྫས་རྙེད་པར་མི་འགྱུར་རོ། །དེ་ལྟར་དངོས་པོར་ལྟ་བ་རྣམས་ཀྱི་རང་རང་གི་གྲུབ་པའི་མཐའི་དབང་དུ་བྱས་ཀྱང་། ཉོན་མོངས་པ་རྣམས་ལ་སྤང་བར་བྱ་བའི་རྫས་ཀྱང་མི་རྙེད་ན། དབུ་མའི་ཚུལ་གྱིས་ཆོས་ཐམས་ཅད་ལ་དོན་དམ་པར་བསྒྲུབ་པར་བྱ་བ་གང་ཡང་མེད་དེ། སྤྲོས་པ་ཐམས་ཅད་ཉེ་བར་ཞི་བར་འདོད་པ་ལ། སྤང་བར་བྱ་བའི་རྫས་རྙེད་པར་ག་ལ་འགྱུར། ཞེས་ཤེས་པར་བྱའོ། །དེ་ལ་འདི་སྐད་དུ། དོན་དམ་པར་སྤང་བར་བྱ་བའི་རྫས་མེད་ཀྱང་ཀུན་རྫོབ་ཏུ་ཡང་དག་པའི་ཀུན་རྫོབ་དང་ཡང་དག་པ་མ་ཡིན་པའི་ཀུན་རྫོབ་ཀྱང་དམིགས་པས། དེ་བས་ན་ཡང་དག་པའི་ཀུན་རྫོབ་ཏུ་ཉོན་མོངས་པ་རྣམས་ལ་སྤང་བར་བྱ་བའི་རྫས་ཡོད་པ་ལ་འགལ་བ་མེད་དོ་ཞེ་ན། དེ་ལ་འདི་བརྗོད་པར་བྱ་སྟེ། གང་གི་ཚེ་ཡང་དག་པར་བསྒྲུབ་པར་བྱ་བ་ཞིག་ཡོད་པར་འདོད་པ་དེའི་ཚེ་ནི། ཀུན་རྫོབ་ཀྱི་བྱེ་བྲག་ཇི་སྙེད་དུ་དབྱེ་བ་ཐམས་ཅད་ཀྱང་དེ་བཞིན་དུ་བསྒྲུབ་ཏུ་རུང་བར་འགྱུར་ལ། གང་གི་ཚེ་ཡང་དག་པར་བསྒྲུབ་པར་བྱ་བ་ཞིག་བསྒྲུབ་ཏུ་མེད་པར་འདོད་པ་དེའི་ཚེ། ཀུན་རྫོབ་ཀྱི་བྱེ་བྲག་ཐམས་ཅད་འགོ་མཉམ་པར་འགྱུར་རོ། །གཞན་ཡང་འདི་སྐད་དུ། ཡང་དག་པ་དང་ཡང་དག་པ་མ་ཡིན་པའི་ཀུན་རྫོབ་ཀྱི་དབྱེ་བ་རྣམ་པར་གཞག་པ། སྣང་དུ་འདྲ་ཡང་དོན་བྱེད་ནུས་པ་དང་མི་ནུས་པའི་བྱེ་བྲག་གིས་རྣམ་པར་གཞག་སྟེ། འདི་ལྟར་བུམ་པའི་གཟུགས་ཀྱིས་ནི་ཆུ་འཛིན་པའི་བྱ་བ་བྱེད་ལ། བུམ་པའི་གཟུགས་བརྙན་གྱི་གཟུགས་ཀྱིས་ནི་ཆུ་འཛིན་པའི་བྱ་བ་བྱེད་མི་ནུས་པ་ལྟ་བུའོ། །ཞེས་རྣམ་པར་གཞག་པ་འདི་ཉིད། གང་ཟག་གི་རྫས་ཀྱིས་བྱ་བ་བྱེད་པར་བསྒྲུབ་པར་ཟད་དེ། ཆོས་ཀྱི་རྫས་ཀྱིས་བྱ་བ་བྱེད་པར་བསྒྲུབ་པ་ནི་མ་ཡིན་ནོ། །དེ་ལ་གང་ཟག་གི་རྫས་བསྒྲུབ་པ་ཇི་ལྟ་བུ་ཞེ་ན། ཕྱི་དང་ནང་གི་རྒྱུད་དུ་གཏོགས་པ་རྣམ་པ་གཉིས་ཏེ། དེ་ལ་ནང་གི་རྒྱུད་ནི། སྐྱེས་པ་དང་བུད་མེད་དང་མི་དང་ལྷ་ལ་སོགས་པའི་གང་ཟག་གི་རྒྱུད་དུ་གཏོགས་པ་རེ་རེ་རྫས་རེ་རེར་འཛིན་ཏེ། ཆོས་ཀྱི་དབང་ལྟར་ན་ནི། གང་ཟག་རེ་རེའང་། ཁམས་དྲུག་པ། སྐྱེ་མཆེད་དྲུག་པ། ཕུང་པོ་ལྔ་པ་སྟེ། དུ་མ་འདུས་པ་ཙམ་ལ་གཅིག་གི་བློ་འབྱུང་བར་ཟད་དེ། ལྷ་དང་མི་ལ་སོགས་པའི་སེམས་ཅན་གྱི་རྫས་མི་རྙེད་དོ། །ཕྱི་རོལ་གྱི་རྒྱུད་ཀྱི་དབང་དུ་ན། ཀ་བ་དང་བུམ་པ་ལ་སོགས་པ་མཐུན་པ་གཅིག་གི་རྒྱུན་གནས་པ་ལ། བུམ་པའི་ངོ་བོ་ཉིད་གཅིག་ཅེའམ། ཀ་བའི་ངོ་བོ་ཉིད་གཅིག་ཅེས་འཛིན་ཏེ། ཆོས་ནི་དེ་དག་ཀྱང་ཁམས་ལྔ་པ་ཕྱིའི་སྐྱེ་མཆེད་དྲུག་པ་ཙམ་སྟེ། བུམ་པའི་ངོ་བོ་ཉིད་གཅིག་གི་རྫས་མི་རྙེད་དོ། །དེ་བས་ན་འདི་ལྟར་བུམ་པས་ནི་ཆུ་འཛིན་པའི་བྱ་བ་བྱེད་དོ། །ཞེས་བྱ་བ་འདིའང་། གང་ཟག་གི་རྫས་ཀྱིས་བྱ་བ་བྱེད་པར་བསྒྲུབས་པ་སྟེ། ཆོས་ཀྱི་རྫས་ལྟ་ན་བློ་གང་ལ་དོན་གྱི་མཚན་ཉིད་གང་སྣང་བ་དེ་ཉིད་ཆོས་ཡིན་ཏེ། དེ་ལྟ་ན་བུམ་པའི་གཟུགས་བརྙན་བུམ་པའི་དབང་གིས་སྣང་བ་ཡིན་པས་ན། བུམ་པའི་ཁ་དོག་དང་དབྱིབས་ཀྱི་དབང་ཡིན་པར་ཟད་དེ། རེག་བྱ་ལ་སོགས་པའི་མ་ཡིན་ནོ། །ཁ་དོག་གི་བྱ་བ་ནི་གཟུགས་བརྙན་གྱིས་ཀྱང་བྱེད་དེ། བྱ་བ་བྱེད་པ་ཡང་ཕལ་ཆེར་ཕན་གནོད་ཀྱིས་གཞག་པ་ཡིན་ན། འདི་ལྟར་ཉི་མའི་གཟུགས་བརྙན་གྱིས་ནི་མིག་ལ་གནོད་པར་བྱེད་དོ། །ཟླ་བའི་གཟུགས་བརྙན་གྱིས་ནི་ཕན་པར་བྱེད་དོ། །གཉི་གས་ཀྱང་གྲིབ་མ་སེལ་བར་བྱེད་དོ། །ཆུ་འཛིན་པར་བྱེད་པ་ནི་རེག་བྱ་ཡིན་ཏེ། ཁ་དོག་གིས་ནི་མ་ཡིན་ནོ། །དེ་བས་ན་ཁ་དོག་དང་རེག་བྱ་གཉིས་འགྲན་ཟླར་གཞག་ཏུ་མེད་དེ། ཆོས་ཐ་དད་ཀྱིས་བྱ་བ་ཐ་དད་བྱེད་པར་ཟད་དོ། །དེ་བས་ན་འདི་ལྟར་བུམ་པས་ནི་ཆུ་འཛིན་པའི་བྱ་བ་བྱེད། བུམ་པའི་གཟུགས་བརྙན་གྱི་ནི་མི་བྱེད་དོ། །ཞེས་གཞག་པ་འདི་ནི། འཇིག་རྟེན་གྱི་གྲགས་པ་དང་མཐུན་པར་གང་ཟག་གི་རྫས་ཀྱིས་བྱ་བ་བྱེད་པར་འདོད་དུ་ཟད་དེ། གང་ཟག་ཉིད་མ་གྲུབ་པར་དེ་ལ་བྱ་བ་བྱེད་པའི་རྫས་ག་ལ་ཡོད་དེ། འདི་ལྟ་བུ་བསྒྲུབ་པ་ནི་ཆུས་ཁྱེར་བ་རྩྭ་དྲུངས་ཕྱུང་ལ་འཇུ་བ་དང་འདྲའོ། །དེ་ལ་འདི་སྐད་དུ། དོན་དམ་པར་བསྒྲུབ་པར་བྱ་བ་མི་འདོད་ན། ཀུན་རྫོབ་ནི་མ་བརྟགས་ན་ཉམས་དགའ་བ། བརྟགས་ན་རིགས་པའི་སྤུངས་མི་བཟོད་པ་ཡིན་པས། རིགས་པས་གནོད་པ་ལ་འགལ་བ་མེད་དོ་ཞེ་ན། འོ་ན་ཀུན་རྫོབ་ཏུ་བསྒྲུབ་པ་ཙམ་ལ་རིགས་པ་མི་དགོས་པ་ཞིག་ན། སྣང་དུ་འདྲ་ཡང་དོན་བྱེད་ནུས་པ་དང་མི་ནུས་པའི་བྱེ་བྲག་གིས་ཡང་དག་པ་དང་ཡང་དག་པ་མ་ཡིན་པར་རྣམ་པར་གཞག་གོ། །ཞེས་པ་དེ་ཉིད་རིགས་པ་མ་ཡིན་ནམ། འདི་ལྟར་ཡང་དག་པར་སྒྲུབ་ཀྱང་རུང་། རེ་ཞིག་ཙམ་དུ་སྒྲུབ་ཀྱང་རུང་སྟེ། རང་རང་གི་ཚད་ཙམ་སྒྲུབ་པར་བྱེད་པའི་རིགས་པའི་སྤུངས་ཙམ་ཡང་མི་བཟོད་ན། ཐ་སྙད་ཙམ་ཡང་ཇི་ལྟར་འགྲུབ་པར་འགྱུར། དཔེར་ན་དགྲའི་དཔུང་འཇོམས་པར་བྱེད་པའི་གླང་པོ་ཆེ་ལ་དཔུང་གི་ཚོགས་ཁུར་ནས་ཐོ་བའི་ལྕག་གིས་བསྐུལ་བའི་སྤུངས་བཟོད་པ་ལྟ་བུ་མ་ཡིན་དུ་ཟིན་ཀྱང་། ཞིང་ཙམ་རྨོ་བའི་བྱ་བ་བྱེད་པའི་བ་ལའང་གཉའ་ཤིང་ཁུར་ནས། འཁྲི་ཤིང་གི་ལྕག་གིས་བསྐུལ་བའི་སྤུངས་ཙམ་ཡང་མི་བཟོད་ན། ཞིང་རྨོ་བའི་བྱ་བ་བྱེད་ཅེས་བྱ་བའི་ཐ་སྙད་ཀྱང་ཇི་ལྟར་འཇུག་སྟེ། ར་སྐྱེས་ཀྱི་སྤུངས་དང་བྱེ་བྲག་ཏུ་གྱུར་པ་ཅི་ཞིག་ཡོད། དེ་བཞིན་དུ་དོན་དམ་པར་རྫས་སུ་ཡོད་པར་བསྒྲུབ་པའི་རིགས་པའི་སྲུངས་མི་བཟོད་ཀྱང་། ཡང་དག་པའི་ཀུན་རྫོབ་ཙམ་དུ་རྫས་སུ་ཡོད་པར་བསྒྲུབ་པ་ལ་ཡང་། ཆོས་ཀྱི་རྫས་ཀྱིས་བྱ་བ་བྱེད་པར་མི་སྒྲུབ་པར། གང་ཟག་གི་རྫས་ཀྱིས་བྱ་བ་བྱེད་པར་སྒྲུབ་པ་འདི་ལ། ཡང་དག་པའི་ཀུན་རྫོབ་ཅེས་ཀྱང་ཇི་ལྟར་ཐ་སྙད་འཇུག་སྟེ། འཇིག་རྟེན་ཕལ་པའི་ལྟ་བ་དང་བྱེ་བྲག་ཏུ་གྱུར་པ་ཅི་ཞིག་ཡོད། འདི་ལྟ་བུའི་ལྟ་བ་ཡ་བྲལ་འཆང་བ་འདི་ནི། ཤིན་ཏུ་ངོ་མཚར་བའི་གནས་ཡིན་ནོ། །དཔེར་ན་སྔོན་བྱུང་བ་འཁོར་ལོས་སྒྱུར་བའི་རྒྱལ་པོ་གྲགས་པ་མཐའ་ཡས། མིའི་འདོད་པས་མ་ངོམས་ནས་སུམ་ཅུ་རྩ་གསུམ་གྱི་གནས་སུ་ཕྱིན་པ་ལས། ལྷའི་དབང་པོ་བརྒྱ་བྱིན་གྱིས་སྟན་ཕྱེད་བགོས་ཏེ། ལྷའི་དབང་པོ་དང་ལོངས་སྤྱོད་མཉམ་པར་ཐོབ་པ་ལས། དེ་ལས་ཀྱང་འདོད་པའི་བརྣབ་སེམས་ཆེར་སྐྱེས་པས། དེའི་དབང་གིས་འཛམ་བུ་གླིང་ཉིད་དུ་སླར་ལྷུང་སྟེ། རྨོངས་པར་གྱུར་ནས་མི་རྣམས་ལ་དྲིས་པ། ཡུལ་འདི་སུའི་ཡུལ་ཡིན། སླར་སྨྲས་པ། བདག་ཅག་རྣམས་ཀྱིས་རྒན་རབས་རྒན་རབས་རྣམས་ལས་ཐོས་ན། ཡུལ་འདི་ནི་དང་པོ་རྒྱལ་པོ་གྲགས་པ་མཐའ་ཡས་ཞེས་བྱ་བའི་ཡུལ་ཡིན་ནོ། །ཞེས་ཐོས་སོ། །ཞེས་སྨྲས་པ་དང་། འདོད་པའི་སེམས་ནད་ཀྱིས་མར་མེ་རླུང་གིས་བསྐྱོད་པ་བཞིན་དུ་དེ་ཉིད་དུ་ཤི་བར་གྱུར་ཏོ། །དེ་ལྟར་གྱུར་པ་མི་རྣམས་ཀྱིས་ཐོས་པ་དང་། ཤིན་ཏུ་ངོ་མཚར་བའི་གནས་སུ་གྱུར་ཏེ་སྨྲས་པ། སྤྱི་བོ་ལས་བྱུང་རིན་ཆེན་བདུན་ཐོབ་གྲགས་པ་མཐའ་ཡས་འདི། །ལྷ་དབང་བརྒྱ་བྱིན་མཉམ་པས་འདི་ལས་ལྷག་པའི་མི་མ་བྱུང་། །འདོད་པའི་ནད་ཀྱིས་ཤི་བས་འདི་ལས་དམན་པའི་མིའང་མེད། །ཨེ་མའོ་ཀྱི་ཧུད་འདི་ལ་བདག་ཅག་རྣམས་ཀྱིས་མཚར་དུ་བརྩིས། །ཞེས་སྨྲས་པ་ལྟ་བུ་སྟེ། ཆོས་ཐམས་ཅད་དོན་དམ་པར་སྤྲོས་པ་ཐམས་ཅད་ཉེ་བར་ཞི་སྟེ། བསྒྲུབ་པར་བྱ་བ་གང་ཡང་མི་སྒྲུབ་པར་ལྟ་བཞིན་དུ། ཡང་དག་པའི་ཀུན་རྫོབ་ཀྱི་མཚན་ཉིད་སྤང་བ་དང་བླང་བར་བྱ་བའི་རྫས་ཡོད་པར་འཛིན་པ་འདི་ནི། ཤིན་ཏུ་མི་འཚམ་པ་འཛིན་པ་སྟེ་ངོ་མཚར་བའི་གནས་ཡིན་ནོ། །དེ་ལ་ཡང་དག་པར་བསྒྲུབ་པར་བྱ་བ་མི་འདོད་ན། ཀུན་རྫོབ་ཐམས་ཅད་འགོ་མཉམ་པར་འགྱུར་བ་ཇི་ལྟ་བུ་ཞེ་ན། དཔེར་ན་ཐག་པ་ལ་སྦྲུལ་དུ་མཐོང་བའི་ཚེ། ཐག་པ་ནི་ཡང་དག་པར་ཡོད་པའོ། །སྦྲུལ་ནི་གཏན་མེད་པའོ། །ཐག་པར་མཐོང་བའི་བློ་ནི་ཡང་དག་པའི་ཤེས་པའོ། །སྦྲུལ་དུ་མཐོང་བའི་བློ་ནི་འཁྲུལ་པའི་ཤེས་པའོ། །འཁྲུལ་ན་མ་དག་པ་ཡིན་པའི་ཕྱིར་བློ་དེ་ཉིད་ཀྱང་ཇི་ལྟར་སྣང་བ་དེ་བཞིན་དུ་ཡོད་པ་མ་ཡིན་པས། དེའི་བདག་ཉིད་ཐོབ་པར་མི་འགྱུར་ཏེ། གཞན་ལས་གཞན་དུ་བཏགས་པ་ཙམ་མོ། །དེ་ནས་ཡང་ཐག་པ་དེ་ཉིད་ལ་ཞིབ་ཏུ་བརྟགས་ན། རྩྭའམ་སྤུའི་ཆ་ཤས་དུ་མ་འདུས་པ་ཙམ་དུ་མཐོང་སྟེ། ཐག་པ་ཟླུམ་རིལ་གཅིག་པུའི་བློ་ཞིག་པ་ན། ཆ་ཤས་འདུས་པ་ནི་ཡང་དག་པར་ཡོད་པའོ། །ཐག་པ་དང་སྦྲུལ་ནི་འགོ་མཉམ་སྟེ་གཏན་མེད་པའོ། །ཆ་ཤས་འདུས་པ་ཙམ་དུ་མཐོང་བའི་བློ་ནི་ཡང་དག་པའི་ཤེས་པའོ། །ཐག་པའི་བློ་ནི་སྦྲུལ་གྱི་བློ་དང་འདྲ་སྟེ་འཁྲུལ་པའི་ཤེས་པའོ། །དེ་ནས་ཡང་སྤུ་དང་རྩ་དེ་ཉིད་ལ་ཞིབ་ཏུ་བརྟགས་ན། རྡུལ་འདུས་པ་ཙམ་དུ་མཐོང་སྟེ། སྤུ་དང་རྩྭའི་ཆ་ཤས་ཀྱང་མ་གྲུབ་པར་རྟོགས་པ་ན། དོན་དང་བློའི་ཚུལ་ཐམས་ཅད་སྔ་མ་བཞིན་ནོ། །དེ་ནས་ཡང་རྡུལ་དེ་ཉིད་ལ་བློས་རྣམ་པར་ཕྱེ་ན། རྡུལ་ཉིད་ཀྱང་མ་གྲུབ་པར་རྟོགས་ཏེ། གཟུགས་ཀྱིས་སྟོང་པའི་སྟོང་པ་ཉིད་ཙམ་ཡོད་པར་མཐོང་བ་དེའི་ཚེ། དོན་དང་བློར་བཅས་པ་ཐམས་ཅད་སྔ་མ་བཞིན་ནོ། །དེ་ནས་ཡང་སྟོང་པ་ཉིད་ལ་རྣམ་པར་བརྟགས་ན། སྟོང་པ་ཞེས་བྱ་བ་འདིའང་དངོས་པོ་ལ་ལྟོས་ནས་རྣམ་པར་བཞག་པ་ཙམ་སྟེ། དངོས་པོ་ཉིད་མ་གྲུབ་ན་སྟོང་པ་ཉིད་མི་འགྲུབ་སྟེ། གང་ཞིག་སྟོང་ཆོས་གང་གིས་སྟོང་། སུའི་སྟོང་པ་སྟེ། བསྒྲུབ་པར་བྱ་བའི་ཆོས་གང་ཡང་མེད་པར་རྟོགས་པ་ན། དོན་ཐམས་ཅད་མེད་པར་འགོ་མཉམ་མོ། །བློ་ཐམས་ཅད་འཁྲུལ་པར་འགོ་མཉམ་མོ། །འཁྲུལ་པ་ཐམས་ཅད་ཇི་ལྟར་སྣང་བ་དེ་ལྟར་མ་ཡིན་པར་འགོ་མཉམ་མོ། །དེ་ལྟར་མ་ཡིན་པ་ཐམས་ཅད་དེའི་བདག་ཉིད་ཐོབ་པ་མེད་པར་འགོ་མཉམ་མོ། །བདག་ཉིད་ཐོབ་པ་མེད་པར་གྱུར་པ་ན། དོན་དང་བློ་གཉིས་ཀ་ལའང་མཚན་ཉིད་འགོ་མི་མཉམ་པ་མེད་དོ། །དེ་ལ་དང་པོ་སྦྲུལ་དུ་མཐོང་བ་ན་སྐྲག་སྟེ་སྡང་བ་སྐྱེས་སོ། །དེ་ནས་ཐག་པར་མཐོང་བ་ན་སྡང་བ་སྤངས་པའི་རློམ་སེམས་འབྱུང་སྟེ། ཆགས་པ་སྐྱེས་པའི་བློ་འབྱུང་ངོ་། །དེ་ནས་ཐག་པའི་བློ་ཞིག་པ་ན་ཐག་པ་ཟླུམ་རིམ་ལ་ཆགསཔའི་བློ་སྤངས་ནས། དུ་མ་འདུས་པ་ཙམ་ལ་ཆག ས་པའི་བློ་སྐྱེ་སྟེ། ཇི་སྲིད་དུ་དངོས་པོར་ལྟ་བ་མ་ལོག་པ་དེ་སྲིད་དུ་ཆགས་སྡང་སྤང་བ་དང་སྐྱེ་བའི་བློ་ནི་ལྡོག་པར་མི་འགྱུར་མོད་ཀྱི། དོན་གྱི་མཚན་ཉིད་ལ་ནི་ཡང་དག་པར་གཞག་པའི་རྫས་མ་གྲུབ་ཙམ་ན། རེ་ཤིག་བར་བཞག་པའི་རྫས་དང་འགོ་མི་མཉམ་པར་མི་འགྲུབ་སྟེ། སྣང་བ་ཙམ་ལ་མི་སྐུར་པ་མ་གཏོགས་པ། མཚན་ཉིད་ཐམས་ཅད་འགོ་མཉམ་མོ། །དེ་བཞིན་དུ་ཀུན་རྫོབ་ཀྱི་བྱེ་བྲག་ཏུ་སྣང་བ་ཐམས་ཅད་ནི་འདི་ལྟ་སྟེ། ཐུན་མོང་གི་སྣང་བ་མཐུན་པ་ཞིག་གཞིར་བྱས་པ་ལ། བྱེ་བྲག་མི་མཐུན་པར་སྣང་བ་ནི་འདི་ལྟར། ལས་ཀྱི་བགོ་སྐལ་ལ་སྤྱོད་པ་མཐུན་པ་དང་མི་མཐུན་པར་སྣང་བ་དག་དང་། ཡོངས་སུ་དག་པ་དང་ཡོངས་སུ་མ་དག་པར་སྣང་བ་དག་དང་། ཉེ་བར་སྤྱོད་པ་དང་བཅས་པ་དང་ཉེ་བར་སྤྱོད་པ་དང་ལྡན་པ་མ་ཡིན་པར་སྣང་བ་དག་དང་། ཕྱིན་ཅི་ལོག་ཏུ་སྣང་བ་དང་ཕྱིན་ཅི་མ་ལོག་པར་སྣང་བ་དང་། གཉི་གའི་ཆ་དང་ལྡན་པར་སྣང་བ་རྣམས་དང་། ཕྱིན་ཅི་ལོག་ཏུ་སྣང་བ་མཐོང་བ་ཕྱིན་ཅི་ལོག་དང་བཅས་པ་དང་། ཕྱིན་ཅི་ལོག་ཏུ་སྣང་བ་མཐོང་བ་ཕྱིན་ཅི་མ་ལོག་པ་དང་ལྡན་པ་དག་དང་། སྣང་བ་རྟེན་གཞི་ཡོད་པ་དང་། རྟེན་གཞི་མེད་པ་དང་། རྟེན་གཞི་ཡང་དག་པ་མ་ཡིན་པ་དང་ལྡན་པ་རྣམས་དང་། བྱ་བ་བྱེད་ནུས་པ་དང་ནུས་པ་མ་ཡིན་པར་སྣང་བ་དག་དང་། རྫས་སུ་ཡོད་པ་དང་བཏགས་པའི་ཡོད་པར་སྣང་བ་དག་དང་། ཀུན་ཏུ་བརྟགས་པ་དང་མཚན་ཉིད་པར་སྣང་བ་ལ་སོགས་ཏེ། ཀུན་རྫོབ་ཏུ་སྣང་བའི་བྱེ་བྲག་རྣམ་པར་གཞག་པ་ཐམས་ཅད་ཀྱང་ཇི་ལྟར་གྲགས་པ་བཞིན་དུ་སོ་སོའི་བྱེ་བྲག་ཡོད་པར་བསྒྲུབ་ཏུ་རུང་བ་དང་། ཐམས་ཅད་འགོ་མཉམ་པར་འགྱུར་བའི་སྐབས་སུ་འགྱུར་རོ། །དེ་ལ་ལས་ཀྱི་བགོ་སྐལ་ལ་སྤྱོད་པ་མཐུན་པ་དང་མི་མཐུན་པར་སྣང་བ་དག་གང་ཞེ་ན། དེ་ལ་ཕྱི་རོལ་གྱི་དོན་ཡོད་པར་སྨྲ་བའི་དབང་དུ་ན། ཐུན་མོང་གི་ལས་ཀྱི་དབང་གིས་གྲུབ་པའི་གཟུགས་ཀྱི་བྱེ་བྲག་མེ་ལྟ་བུ་གཅིག་ལ་ཞེའམ། ཕྱི་རོལ་གྱི་དོན་མེད་པར་སྨྲ་བའི་དབང་ལྟར་ན། ཐུན་མོང་གི་ལས་ཀྱི་བག་ཆགས་ཀྱི་དབང་གིས་སེམས་ཉིད་ཕྱི་རོལ་གྱི་དོན་ལྟར་སྣང་བ། གཟུགས་ཀྱི་བྱེ་བྲག་མེར་སྣང་བ་གཅིག་ལ་ཞེས་ཆོས་ཅན་གཅིག་ཐུན་མོང་དུ་གྲུབ་པ་གཞིར་བྱས་པ་ལ། ནང་གི་བྱེ་བྲག་མི་མཐུན་པར་སྣང་བ་ནི་འདི་ལྟར། མི་རྣམས་དང་དུད་འགྲོ་ཕལ་ལ་ནི་མེ་ལ་རེག་ན་འཚིག་པར་སྣང་སྟེ། སྡུག་བསྔལ་གྱི་གནས་སུ་སྣང་ངོ་། །དུད་འགྲོའི་རིགས་ལས་རི་དྭགས་མེའི་གཙང་སྦྲ་ཅན་ཞེས་བྱ་བ་ནི། མེ་ཡིས་ཁྲུས་བྱེད་དེ་འཚིག་པར་མི་འགྱུར་ཞིང་སྤུའི་ཁ་དོག་དང་གྲྭ་ཤིན་ཏུ་རྒྱས་པར་འགྱུར་ཏེ། ཆུའི་བྱ་བ་མེས་བྱེད་དོ། །དུད་འགྲོའི་རིས་ལས་མེའི་བྱི་བ་ཞེས་བྱ་བ་ནི་མེ་རྒོད་རྒྱུན་དུ་གནས་པའི་གནས་དག་ན་གནས་ནས། མེ་དོང་རབ་ཏུ་འབར་བ་དག་ཏུ་ཞུགས་ཏེ། གནས་དང་ཟས་ཀྱི་བྱ་བ་ཐམས་ཅད་མེས་བྱེད་དོ། །ཡི་དྭགས་ཀྱི་རིགས་ལས་མེའི་ཡི་དྭགས་མ་ཞེས་བྱ་བ་དང་། ལྷའི་རིགས་ལས་ལྷའི་དྲང་སྲོང་བྲམ་ཟེའི་རིགས་སྦྱིན་བསྲེག་ལེན་པར་བྱེད་པ་མེ་ལྷ་ཞེས་བྱ་བ་རྣམས། ལུས་ཉིད་མེའི་ཁམས་ལས་གྲུབ་པ་ཡོད་པར་གྲགས་སོ། །འདི་ལྟ་བུ་ནི་ལས་ཀྱི་གོ་སྐལ་ལ་སྤྱོད་པ་མཐུན་པ་དང་མི་མཐུན་པར་སྣང་བ་དག་གོ། །དེར་ཡང་མ་ཟད་དེ་རྩྭ་ལྟ་བུ་གཅིག་ལ་དུད་འགྲོ་ཕལ་ལ་ནི་ལོགས་སྤྱོད་པའི་གནས་སུ་སྣང་སྟེ། སྲོག་འཛིན་པའི་བྱ་བ་ཡང་བྱེད་དོ། །ཕལ་དང་མི་རྣམས་ལ་ནི་དེ་ལྟར་མི་སྣང་སྟེ། འཚོ་བའི་བྱ་བ་ཡང་མི་བྱེད་དོ། །འདི་ལྟ་བུའང་ལས་ཀྱི་གོ་སྐལ་ལ་སྤྱོད་པ་མཐུན་པ་དང་མི་མཐུན་པའི་བྱེ་བྲག་དག་གོ། །གཞན་ཡང་སེམས་ཅན་དམྱལ་བའི་གནས་ན། ལྕགས་བསྲེགས་པའི་ས་གཞི་དང་ཤལ་མ་རིའི་ཚལ་ལྟ་བུ་སྡུག་བསྔལ་གྱི་གནས་སུ་སྣང་བ་དང་། ལྷའི་གནས་ན་དཔག་བསམ་གྱི་ཤིང་དང་བུམ་པ་བཟང་པོ་ལ་སོགས་པ་ལོངས་སྤྱོད་ཀྱི་གནས་སུ་སྣང་བ་དེ་དག །སོ་སོ་རང་རང་གི་སྣང་བ་ཁོ་ན་ཙམ་ནི་མ་ཡིན་ཏེ། འགྲོ་བ་མིར་གྱུར་པ་རྣམས་ཀྱིའང་ཐུན་མོང་གི་ལས་ཀྱི་དབང་གིས་གྲུབ་པའམ། ཐུན་མོང་གི་ལས་ཀྱི་བག་ཆགས་ཀྱི་དབང་གིས་སེམས་ཉིད་ཐུན་མོང་གི་དོན་དུ་སྣང་བར་ནི་གྲུབ་མོད་ཀྱི། འོན་ཀྱང་དེ་དག་གི་དབང་གིས་མི་རྣམས་ཀྱི་བདེ་བ་དང་སྡུག་བསྔལ་གྱི་རྐྱེན་ཡང་མི་བྱེད་དོ། །དེར་ཡང་མ་ཟད་དེ་མི་རྣམས་ཀྱི་བཟའ་བ་དང་བཏུང་བ་དང་བགོ་བ་ལ་སོགས་པ་མངོན་སུམ་དུ་གྲུབ་ཅིང་ཐུན་མོང་དུ་ལོངས་སྤྱོད་དུ་རུང་བ་ཡིན་མོད་ཀྱི། ལ་ལ་ནི་དབང་ཕྱུག་གཞན་དང་གཞན་གྱིས་དབང་བྱས་ཏེ་ལོངས་སྤྱོད་པའི་དབང་མེད་དོ། །ལ་ལ་ནི་རང་དབང་ཐོབ་སྟེ་ཅི་དགར་ལོངས་སྤྱོད་དོ། །འདི་ལྟ་བུ་དག་ནི་ལས་ཀྱི་བགོ་སྐལ་ལ་སྤྱོད་པ་མཐུན་པ་དང་མི་མཐུན་པར་སྣང་བའི་བྱེ་བྲག་དག་གོ། །དེ་ལ་ཡོངས་སུ་དག་པ་དང་ཡོངས་སུ་དག་པ་མ་ཡིན་པར་སྣང་བ་དག་གང་ཞེ་ན། འདི་ལྟར་ཆུ་ཀླུང་འགའ་འགའ་ལྟ་བུ་གཅིག་ལ། མི་དང་ཡི་དྭགས་གཉི་གས་ཀྱང་ས་ཕྱོགས་ཞིག་ན། ཆུ་ཀླུང་ཆེན་པོ་ཞིག་འབབ་པར་ནི་མཐུན་པར་སྣང་སྟེ། གཞི་ཆོས་ཅན་ཐ་དད་ནི་མེད་དོ། །འོན་ཀྱང་ཡི་དྭགས་རྣམས་ལ་ནི་ཆུར་ཡང་སྣང་ལ་མ་དག་པར་ཡང་སྣང་སྟེ། རྣག་ལ་སོགས་པས་ཡོངས་སུ་གང་ཞིང་ལོངས་སྤྱོད་དུ་མི་རུང་བར་སྣང་ངོ་། །མི་རྣམས་ལ་ནི་ཆུར་ཡང་སྣང་ཞིང་དག་པར་སྣང་སྟེ། དྲི་མ་མེད་ཅིང་ལོངས་སྤྱོད་དུ་རུང་བར་སྣང་ངོ་། །གཞན་ཡང་བཅོམ་ལྡན་འདས་ཤཱཀྱ་ཐུབ་པའི་ཞིང་ཁམས་གླིང་བཞི་པའི་འཇིག་རྟེན་འདི་ཉིད་ཡོངས་སུ་མ་དག་པའི་ཞིང་ཁམས་ཡིན་པར་གྲགས་ཏེ། དེ་བཞིན་དུ་ཚེ་དང་ལྡན་པ་ཤཱ་རིའི་བུ་ན་རེ། ངས་ནི་བཅོམ་ལྡན་འདས་ཀྱི་ཞིང་འདི་མཐོ་དམན་དང་གཅོང་རོང་དང་གཡང་ས་དང་ལྗན་ལྗིན་གྱིས་གང་བར་མཐོང་ངོ་། །ཞེས་ཟེར་རོ། །སངས་རྒྱས་མྱ་ངན་མེད་པའི་ཞིང་ནས་འོངས་པའི་ཚངས་པ་རལ་པ་ཅན་ན་རེ། ཚེ་དང་ལྡན་པ་ཤཱ་རིའི་བུ་དེ་སྐད་མ་ཟེར་ཅིག །ཁྱོད་རང་གི་སེམས་ལ་མཐོ་དམན་ཡོད་པར་ཟད་དེ། བཅོམ་ལྡན་འདས་ཀྱི་ཞིང་ལ་ནི་ཡོངས་སུ་མ་དག་པ་མེད་དོ། །ངས་ནི་བཅོམ་ལྡན་འདས་ཀྱི་ཞིང་འདི་གཞན་འཕྲུལ་དབང་བྱེད་ཀྱི་ལྷའི་གནས་རིན་པོ་ཆེའི་གཞི་བཀོད་པ་ཕུན་སུམ་ཚོགས་པ་བཞིན་དུ་དག་པར་མཐོང་ངོ་། །ཞེས་ཟེར་རོ། །དེའི་ཚེ་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་དུ་སངས་རྒྱས་ཀྱི་ཞིང་འདི་ཤར་ཕྱོགས་ཀྱི་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་དུ་སྣང་བར་མཛད་ནས། ཤཱ་རི་བུ་ལ་བཀའ་སྩལ་པ། ཅི་ཉི་མ་དང་ཟླ་བ་ཡོངས་སུ་མ་དག་གམ། དམུས་ལོང་རྣམས་ཀྱིས་མི་མཐོང་ངོ་། །ཤཱ་རིའི་བུས་གསོལ་པ། ཉི་མ་དང་ཟླ་བས་མ་ནོངས་ཀྱི། །དམུས་ལོང་རྣམས་ཀྱིས་ནོངས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་ངའི་སངས་རྒྱས་ཀྱི་ཞིང་འདི་ནི་ཤར་ཕྱོགས་ཀྱི་སངས་རྒྱས་རིན་པོ་ཆེ་རྒྱན་བཀོད་པའི་ཞིང་ཁམས་བཞིན་དུ་རྟག་ཏུ་འདི་འདྲ་བ་སྟེ། ཁྱེད་རྣམས་ཀྱིས་མ་མཐོང་ངོ་། །དཔེར་ན་ལྷའི་བུ་རྣམས་རིན་པོ་ཆེའི་སྣོད་གཅིག་གི་ནང་ནས་བདུད་རྩིའི་ཟས་ཟའང་། ཇི་ལྟར་བསོད་ནམས་བསགས་པ་བཞིན་དུ་བདུད་རྩིའི་རོ་སོ་སོར་མྱོང་བར་འགྱུར་རོ། །དེ་བཞིན་དུ་སངས་རྒྱས་ཀྱི་ཞིང་གཅིག་ཏུ་སྐྱེས་ཀྱང་ཇི་ལྟར་ལས་དག་པ་དེ་བཞིན་དུ། སངས་རྒྱས་ཀྱི་ཞིང་ཡང་མ་དག་པ་དང་དག་པར་མཐོང་ངོ་། །ཞེས་གསུངས་སོ། །དེ་བས་ན་སྣང་བ་འདི་ལྟ་བུ་ལ་ཐམས་ཅད་དུ་ཐ་དད་པར་སྣང་བ་མ་ཡིན་ཏེ། གཞི་གཅིག་ཏུ་སྣང་ངོ་། །ཐམས་ཅད་དུ་མཐུན་པར་སྣང་བ་མ་ཡིན་ཏེ། དག་པ་དང་མ་དག་པ་སོ་སོར་སྣང་ངོ་། །འདི་ལྟ་བུ་ནི་ཡོངས་སུ་དག་པ་དང་ཡོངས་སུ་དག་པ་མ་ཡིན་པར་སྣང་བའི་བྱེ་བྲག་དག་གོ། །དེ་ལ་ཉེ་བར་སྤྱོད་པ་དང་བཅས་པ་དང་ཉེ་བར་སྤྱོད་པ་དང་ལྡན་པ་མ་ཡིན་པར་སྣང་བ་དག་གང་ཞེ་ན། འདི་ལྟར་འགྲོ་བ་མིར་གྱུར་པ་གཉིས་ལྷན་ཅིག་ན་གནས་པ་ལས། གཅིག་ནི་ར་རོའམ་བརྒྱལ་བར་གྱུར་ཏེ། ཚོར་བ་དང་ཉེ་བར་སྤྱོད་པའི་འདུ་ཤེས་དང་མི་ལྡན་ནོ། །གཅིག་ནི་དྲན་པ་དང་ཤེས་བཞིན་དུ་ལྡན་ཏེ་གནས་པ་ལས། གཉིའ་ག་ལ་མེས་མཉམ་དུ་རེག་པར་གྱུར་པ་ལ་གཅིག་ནི་མེས་རེག་པའི་སྡུག་བསྔལ་ཉམས་སུ་མ་མྱོང་བཞིན་དུ་ཚིག་གོ། །གཅིག་ནི་མྱོང་བཞིན་དུ་ཚིག་སྟེ། གཉིའ་གའང་ལས་ཀྱི་བགོ་སྐལ་ལ་སྤྱོད་པ་མཐུན་པར་སྣང་བ་ཡིན་པས་ཚིག་ནི་མཉམ་དུ་ཚིག་གོ། འདི་ལྟ་བུ་ནི་ཉེ་བར་སྤྱོད་པ་དང་བཅས་པ་དང་ཉེ་བར་སྤྱོད་པ་དང་ལྡན་པ་མ་ཡིན་པར་སྣང་བའི་བྱེ་བྲག་དག་གོ། །དེ་ལ་ཕྱིན་ཅི་ལོག་ཏུ་སྣང་བ་གང་ཞེ་ན། འགལ་མེ་མྱུར་དུ་བསྐོར་བ་ལ་འཁོར་ལོར་སྣང་བ་ལྟ་བུའོ། །ཕྱིན་ཅི་མ་ལོག་པར་སྣང་བ་གང་ཞེ་ན། གང་དོན་ཇི་ལྟ་བ་བཞིན་དུ་སྣང་བའོ། །གཉིའ་གའི་ཆ་དང་ལྡན་པར་སྣང་བ་གང་ཞེ་ན། ཐག་པ་ལ་སྦྲུལ་དུ་མཐོང་བའི་ཚེ་དབང་པོའི་ཤེས་པ་ནི་ཐག་པའི་རྣམ་པར་སྣང་ངོ་། །རྣམ་པར་རྟོག་པ་དང་བཅས་པའི་ཤེས་པ་ནི། སྦྲུལ་གྱི་རྣམ་པར་སྣང་བ་དང་ཡང་ལྡན་ཏེ། འདི་ལྟ་བུ་ནི་གཉིས་གའི་ཆ་དང་ལྡན་པར་སྣང་བ་ཞེས་བྱའོ། །དེ་ལ་ཕྱིན་ཅི་ལོག་ཏུ་སྣང་བ་མཐོང་བ་ཕྱིན་ཅི་ལོག་དང་བཅས་པ་གང་ཞེ་ན། གང་བྱིས་པ་རྣམས་ཀྱི་མདུན་དུ་འགལ་མེ་བསྐོར་བ་ལྟ་བུའོ། །ཕྱིན་ཅི་ལོག་ཏུ་སྣང་བ་མཐོང་བ་ཕྱིན་ཅི་མ་ལོག་པ་དང་ལྡན་པ་གང་ཞེ་ན། མཁས་པ་རྣམས་ཀྱི་མདུན་དུ་མགལ་མེ་བསྐོར་བ་ལྟ་བུའོ། །དེ་ལ་སྣང་བ་བརྟེན་གཞི་དང་བཅས་པ་གང་ཞེ་ན། འགལ་མེ་མྱུར་དུ་བསྐོར་བས་འཁོར་ལོར་སྣང་བ་དང་། རབ་རིབ་ཅན་ལ་ཟླ་བ་གཉིས་སུ་སྣང་བ་དང་། གྲུར་ཞུགས་པ་ལ་རི་གཡོ་བར་སྣང་བ་རྣམས་སོ། །རྟེན་གཞི་མེད་པ་གང་ཞེ་ན། རབ་རིབ་ཅན་ལ་ནམ་མཁའ་ལ་སྐྲ་ཤད་སྣང་བ་དང་། ལང་ཏང་ཙེ་ཟོས་པ་ལ་ནམ་མཁའ་ཁབ་ཀྱིས་གང་བར་སྣང་བ་དང་། གཞན་ཡང་སྣང་བའི་བག་ཆགས་ལས་གཞན་དུ་སྣང་བ་འབྱུང་སྟེ། འདི་ལྟར་རྒྱལ་པོའི་དམག་མི་དང་རྔ་སྒྲའི་ཆ་དང་ལྡན་པར་ལམ་དུ་ཞུགས་ཏེ། ཡུན་རིང་དུ་ལྷན་ཅིག་འགྲོགས་པ་ལས། ཕ་རོལ་གྱི་སྡེའི་སོ་མཚམས་སུ་ཕྱིན་པ་དང་། དེས་རང་གི་སྡེའི་དམག་གི་ཆ་བོར་ཏེ་ཕ་རོལ་གྱི་དམག་མི་བྱུང་ངམ་མ་བྱུང་ལྟར་ཕྱིན་པ་དང་། དེས་ཕ་རོལ་གྱི་གཟུགས་ནི་མ་མཐོང་རྔ་སྒྲ་ནི་གྲགས་པར་ཐོས་ཏེ། དེས་རང་གི་བག་ཆགས་ཀྱིས་རྔའི་སྒྲ་གྲགས་པར་སྣང་བ་ཙམ་ཡིན་པར་མ་གཏོགས་ནས། རིང་མོ་ཞིག་ན་ཚུར་ཕ་རོལ་གྱི་དམག་ཚོགས་བྱུང་ངོ་སྙམ་སྟེ། གཟུགས་མ་མཐོང་ཡང་རྔ་སྒྲ་གྲག་གོ་སྙམ་དུ་སེམས་པ་ལྟ་བུའོ། །རྟེན་གཞི་ཡང་དག་པ་མ་ཡིན་པ་དང་ལྡན་པ་གང་ཞེ་ན། གང་སྨིག་རྒྱུ་ལ་ཆུ་མཐོང་བ་ལྟ་བུ་སྟེ། སྨིག་རྒྱུ་ཉིད་ཀྱང་རྟེན་གཞི་འབྱུང་བ་ཆེན་པོ་མེད་པའི་ཕྱིར། ཇི་ལྟར་སྣང་བ་དེ་ལྟ་བུའི་རྫས་མེད་པ་ཡིན་ན། དེ་ལས་ཀྱང་ཆུའི་རྣམ་པ་འབྱུང་བ་ལྟ་བུའོ། །སྣང་བ་འདི་དག་མཐུན་པ་དང་མི་མཐུན་པའི་དབང་གིས། འགྲོ་བ་སོ་སོའི་རྒྱུད་ལ། བྱ་བ་བྱེད་ནུས་པར་སྣང་བ་ནི་ནུས་པ་མ་ཡིན་པར་སྣང་བར་འགྱུར། ནུས་པ་མ་ཡིན་པ་ནི་ནུས་པར་སྣང་བར་འགྱུར་རོ། །རྫས་སུ་ཡོད་པར་སྣང་བ་ནི་བཏགས་པའི་ཡོད་པར་སྣང་བར་འགྱུར་རོ། །བཏགས་པའི་ཡོད་པར་སྣང་བ་ནི་རྫས་སུ་ཡོད་པར་སྣང་བར་འགྱུར་རོ། །ཀུན་ཏུ་བརྟགས་པ་བར་སྣང་བ་ནི་མཚན་ཉིད་པར་སྣང་བར་འགྱུར་རོ། །དེ་བས་ན་སོ་སོའི་མཚན་ཉིད་ཀྱི་བྱེ་བྲག་འདི་དག་སོ་སོར་གྲུབ་པར་སྒྲུབ་པར་བྱེད་པ་ན། ཡང་དག་པར་བསྒྲུབ་པར་བྱ་བ་གཅིག་ཀྱང་ཡོད་པར་བསྒྲུབ་ཅིང་། གང་ཟག་ཐུན་མོང་གི་སྣང་བ་ཡང་མཐུན་པ། བྱེ་བྲག་གི་སྣང་བ་ཡང་མཐུན་པ། ཁོ་རེ་ཆུང་ངུ་ཙམ་ལ་སྒྲུབ་པར་བྱེད་ན། ཀུན་རྫོབ་ཀྱི་བྱེ་བྲག་དེ་དག་ཐམས་ཅད་ཇི་ལྟར་གྲགས་པ་བཞིན་དུ་བསྒྲུབ་ཏུ་རུང་བར་འགྱུར་རོ། །ཡང་དག་པར་བསྒྲུབ་པར་བྱ་བ་མི་འདོད་ན། གང་ཟག་སྣང་བ་མཐུན་པ་རྣམས་ལ་སྒྲུབ་ཀྱང་བྱེ་བྲག་མི་འགྲུབ་སྟེ། ཀུན་རྫོབ་ཐམས་ཅད་འགོ་མཉམ་པར་འགྱུར་རོ། །གལ་ཏེ་གང་ཟག་སྣང་བ་མི་མཐུན་པ་རྒྱ་ཆེན་པོའི་དབང་དུ་སྒྲུབ་པར་བྱེད་ན། ཡང་དག་པར་བསྒྲུབ་པར་བྱ་བ་ཅིག་འདོད་དུ་ཟིན་ཀྱང་། སྣང་བ་གཅིག་གིས་གཅིག་བསལ་ཏེ། བྱེ་བྲག་གང་ཡང་མི་འགྲུབ་ཅིང་ཐམས་ཅད་མགོ་མཉམ་པར་འགྱུར་རོ། །དེ་བས་ན་དབུ་མ་དང་གསང་བ་བླ་ན་མེད་པའི་ཚུལ་གྱིས་ནི། ཆོས་ཐམས་ཅད་ཡང་དག་པར་བསྒྲུབ་པར་བྱ་བ་གང་ཡང་མི་སྒྲུབ་ཅིང་། གདུལ་བྱ་ཚད་མེད་པའི་དབང་དུ་གསུངས་པ་ཡིན་པས། འཇིག་རྟེན་གྱི་གྲགས་པའི་བྱེ་བྲག་ཐམས་ཅད་ཀྱང་། རང་རང་གི་སྣང་ཚད་ཙམ་དུ་ཟད་ཀྱི་མཚན་ཉིད་ནི་འགོ་མཉམ་པར་འགྱུར་ཏེ། འདི་ལྟར་རྨི་ལམ་གྱི་བུམ་པའི་གཟུགས་ཀྱིས་ནི་ཆུ་འཛིན་པའི་བྱ་བ་བྱེད་ནུས་པར་སྣང་ལ། བུམ་པའི་གཟུགས་བརྙན་གྱི་གཟུགས་ཀྱིས་ནི་ཆུ་འཛིན་པའི་བྱ་བ་བྱེད་མི་ནུས་པར་སྣང་སྟེ། འོན་ཀྱང་རྨི་ལམ་གྱི་སྣང་ཚོད་ཙམ་ལས་མ་གཏོགས་པ། རང་གི་ངོ་བོ་ལ་ནི། བྱ་བ་བྱེད་ནུས་པ་དང་མི་ནུས་པའི་མཚན་ཉིད་ཐ་དད་མེད་དོ། །དེ་བས་ན་ཆོས་ཐམས་ཅད་ནི། སྒྱུ་མ་ལྟ་བུའོ། །སྨིག་རྒྱུ་ལྟ་བུའོ། །རྨི་ལམ་ལྟ་བུའོ། །གཟུགས་བརྙན་ལྟ་བུའོ། །སྤྲུལ་པ་ལྟ་བུའོ། །ཞེས་གསུངས་སོ། །དེ་ལ་སྒྱུ་མའི་མཚན་ཉིད་གང་ཞེ་ན། འདི་ལྟར་སྒྱུ་མ་མཁན་གྱིས་རྡེའུ་དང་ཤིང་བུ་དང་གསེག་མ་ལ་སོགས་པ་ལ་འདྲ་གཟུགས་བྱས་ཏེ། གྱོ་མོ་ལ་སྔགས་ཀྱིས་བཏབ་ནས་སྦྱོར་བ་གོམས་པས་བསྣུན་ན། སྐྱེས་པ་དང་བུད་མེད་དང་རྟ་དང་གླང་པོ་ལ་སོགས་པའི་གཟུགས་སྣ་ཚོགས་སྣང་བ་འབྱུང་བར་འགྱུར་ཏེ། དེ་དང་པོ་བྱུང་བའི་ཚེ་ན་གང་ནས་ཀྱང་མ་བྱུང་། སྣང་བ་ཉིད་ཀྱི་ཚེ་ནའང་སྒྱུ་མ་ཡིན་པའི་ཕྱིར། མཚན་ཉིད་གང་ཡང་ཡོད་པ་མ་ཡིན་སྒྱུ་མ་བསྡུས་ནས་འགགས་ཤིང་མི་སྣང་བར་གྱུར་ཏེ། དེའི་ཚེའང་གང་དུའང་མ་སོང་། གང་ཡང་འདི་སྐད་དུ་སྒྱུ་མ་བསྡུས་པའི་རྐྱེན་གྱིས་དབང་པོའི་སྤྱོད་ཡུལ་དུ་མ་གྱུར་ནས་མི་སྣང་བ་ཙམ་དུ་ཟད་དེ། དེའི་སྐད་ཅིག་མའི་རྒྱུན་ནི་འཆད་ཅིང་ལྡོག་པའང་མ་ཡིན་ནོ། །ཞེས་རྣམ་པར་གཞག་པའང་མེད་དེ། འདི་ལྟར་སྣང་བ་དང་མི་སྣང་བ་གཉིའ་གའང་མཚན་ཉིད་མེད་པར་མཚན་ཉིད་གཅིག་པ་ཡིན་མོད་ཀྱི། ཇི་སྲིད་དུ་རྐྱེན་ཉེ་བར་གནས་ཀྱི་བར་དུ་སྣང་བའང་དམིགས་ལ། སྣང་ཙམ་དེའི་མཚན་ཉིད་ཡོངས་སུ་རྫོགས་པ་ཡིན་ཏེ། འདི་ལ་དོན་གྱི་ཆ་གཞན་བསྒྲུབ་པར་བྱ་བ་ནི་གང་ཡང་མེད་པས་སྒྱུ་མ་སྒྱུ་མ་ཞེས་བརྗོད་དོ། ། དེ་ལ་སྨིག་རྒྱུའི་མཚན་ཉིད་གང་ཞེ་ན། ས་ཕྱོགས་ན་ས་རྒོ་ཉེ་བར་གནས་པ་དང་། ཉི་མ་ཚ་བས་གདུངས་པ་དང་། སེར་བུའི་གཞོལ་ཕྱོགས་སུ་བབ་པ་དང་། ལྟ་བ་པོ་རྒྱང་མ་ན་གནས་པའི་རྐྱེན་གྱིས། ཀླུང་ཆུས་གང་བ་ལྟ་བུར་སྣང་བ་འབྱུང་བར་འགྱུར་ཏེ། དེ་དང་པོ་བྱུང་བའི་ཚེ་ནའང་གང་ནས་ཀྱང་མ་བྱུང་། སྣང་བ་ཉིད་ཀྱི་ཚེ་ནའང་རྟེན་གྱི་འབྱུང་བ་ཆེན་པོ་མེད་པའི་ཕྱིར། མཚན་ཉིད་གང་ཡང་ཡོད་པ་མ་ཡིན། ཉི་མ་ནུབ་ནས་འགགས་ཤིང་མི་སྣང་བར་འགྱུར་ཏེ། དེའི་ཚེའང་གང་དུའང་མ་སོང་། གང་ཡང་འདི་སྐད་དུ་ཉི་མ་ནུབ་པའི་རྐྱེན་གྱིས་དབང་པོའི་སྤྱོད་ཡུལ་དུ་མ་གྱུར་ནས་མི་སྣང་བ་ཙམ་དུ་ཟད་དེ། དེའི་སྐད་ཅིག་མའི་རྒྱུན་ནི་འཆད་ཅིང་ལྡོག་པའང་མ་ཡིན་ནོ། །ཞེས་རྣམ་པར་གཞག་པའང་མེད་དེ། འདི་ལྟར་སྣང་བ་དང་མི་སྣང་བ་གཉིིའ་གའང་དབྱེར་མེད་པར་མཚན་ཉིད་མེད་པར་མཚན་ཉིད་གཅིག་པ་ཡིན་མོད་ཀྱི། ཇི་སྲིད་དུ་རྐྱེན་ཉེ་བར་གནས་ཀྱི་བར་དུ་སྣང་བའང་དམིགས་ལ། སྣང་བ་ཙམ་དེའི་མཚན་ཉིད་ཡོངས་སུ་རྫོགས་པ་ཡིན་ཏེ། འདི་ལ་དོན་གྱི་ཆ་གཞན་བསྒྲུབ་པར་བྱ་བ་ནི་གང་ཡང་མེད་པས། སྨིག་རྒྱུ་སྨིག་རྒྱུ་ཞེས་བྱའོ། །དེ་ལ་རྨི་ལམ་གྱི་མཚན་ཉིད་གང་ཞེ་ན། སྐྱེས་བུ་གཉིད་ཀྱིས་ལོག་པའི་རྨི་ལམ་ན། ཀུན་དགའི་ར་བ་དང་སྐྱེད་མོས་ཚལ་ལ་སོགས་ཏེ་ལོངས་སྤྱོད་ཀྱི་གནས་ཀྱང་དམིགས་ཤིང་སྣང་བར་འགྱུར་ལ། བཙོན་ར་དང་ཁྲི་མུན་ལ་སོགས་ཏེ་སྡུག་བསྔལ་གྱི་གནས་ཀྱང་དམིགས་ཤིང་སྣང་བར་འགྱུར་ཏེ། དེ་དང་པོ་འབྱུང་བའི་ཚེ་ནའང་གང་ནས་ཀྱང་མ་བྱུང་། སྣང་བ་ཉིད་ཀྱི་ཚེ་ནའང་རྨི་ལམ་ཡིན་པའི་ཕྱིར་མཚན་ཉིད་གང་ཡང་ཡོད་པ་མ་ཡིན། གཉིད་སད་ནས་འགགས་ཤིང་མི་སྣང་བར་འགྱུར་ཏེ། དེའི་ཚེའང་གང་དུའང་མ་སོང་། གང་ཡང་འདི་སྐད་དུ་གཉིད་སད་པའི་རྐྱེན་གྱིས་དབང་པོའི་སྤྱོད་ཡུལ་དུ་མ་གྱུར་ནས་མི་སྣང་བ་ཙམ་དུ་ཟད་དེ། དེའི་སྐད་ཅིག་མའི་རྒྱུན་ནི་འཆད་ཅིང་ལྡོག་པའང་མ་ཡིན་ནོ། །ཞེས་རྣམ་པར་གཞག་པའང་མེད་དེ། སྣང་བ་དང་མི་སྣང་བ་གཉིའ་ག་དབྱེར་མེད་པར་མཚན་ཉིད་མེད་པར་མཚན་ཉིད་གཅིག་པ་ཡིན་མོད་ཀྱི། ཇི་སྲིད་དུ་རྐྱེན་ཉེ་བར་གནས་ཀྱི་བར་དུ་སྣང་བའང་དམིགས་ལ། སྣང་བ་ཙམ་དེའི་མཚན་ཉིད་ཡོངས་སུ་རྫོགས་པ་ཡིན་ཏེ། འདི་ལ་དོན་གྱི་ཆ་གཞན་བསྒྲུབ་པར་བྱ་བ་ནི་གང་ཡང་མེད་པར་རྨི་ལམ་རྨི་ལམ་ཞེས་བརྗོད་དོ། །དེ་ལ་གཟུགས་བརྙན་གྱི་མཚན་ཉིད་གང་ཞེ་ན། འདི་ལྟར་མེ་ལོང་ལ་སོགས་པ་དྭངས་པའི་གཟུགས་དང་བཞིན་ལ་སོགས་པ་གསལ་བའི་གཟུགས་ཉེ་བར་གནས་པ་ན། གཟུགས་བརྙན་སྣང་བ་འབྱུང་བར་འགྱུར་ཏེ། དེ་དང་པོ་བྱུང་བའི་ཚེ་ནའང་གང་ནས་ཀྱང་མ་བྱུང་། སྣང་བ་ཉིད་ཀྱི་ཚེ་ནའང་རྟེན་གྱི་འབྱུང་བ་ཆེན་པོ་མེད་པའི་ཕྱིར། མཚན་ཉིད་གང་ཡང་ཡོད་པ་མ་ཡིན། རྐྱེན་ཞིག་མ་ཚང་བས་འགགས་ཤིང་མི་སྣང་བར་འགྱུར་ཏེ། དེའི་ཚེའང་གང་དུའང་མ་སོང་། གང་ཡང་འདི་སྐད་དུ་རྐྱེན་མ་ཚང་བའི་དབང་གིས་དབང་པོའི་སྤྱོད་ཡུལ་དུ་མ་གྱུར་ནས་མི་སྣང་བ་ཙམ་དུ་ཟད་དེ། དེའི་སྐད་ཅིག་མའི་རྒྱུན་ནི་འཆད་ཅིང་ལྡོག་པའང་མ་ཡིན་ནོ། །ཞེས་རྣམ་པར་བཞག་པའང་མེད་དེ། སྣང་བ་དང་མི་སྣང་བ་གཉིས་གའང་དབྱེར་མེད་པར་མཚན་ཉིད་མེད་པར་མཚན་ཉིད་གཅིག་པ་ཡིན་མོད་ཀྱི། ཇི་སྲིད་དུ་རྐྱེན་ཉེ་བས་གནས་ཀྱི་བར་དུ་སྣང་བའང་དམིགས་ལ། སྣང་བ་ཙམ་དེའི་མཚན་ཉིད་ཡོངས་སུ་རྫོགས་པ་ཡིན་ཏེ། འདི་ལ་དོན་གྱི་ཆ་གཞན་བསྒྲུབ་པར་བྱ་བ་ནི་གང་ཡང་མེད་པར་གཟུགས་བརྙན་གཟུགས་བརྙན་ཞེས་བྱའོ། དེ་ལ་སྤྲུལ་པའི་མཚན་ཉིད་གང་ཞེ་ན། འདི་ལྟར་ཡེ་ཤེས་ཀྱི་སྤྲུལ་པའམ། ཏིང་ངེ་འཛིན་གྱི་སྤྲུལ་པའམ། དེ་མ་ཡིན་པ་རིག་སྔགས་གྲུབ་པའི་སྤྲུལ་པ་དག་ཀྱང་། འདི་ལྟར་མེ་ཏོག་དཀར་པོ་ལ་སྔགས་ཀྱིས་བཏབ་སྟེ་ནམ་མཁའ་ལ་གཏོར་ན། དེ་བཞིན་གཤེགས་པ་སྟོང་སྙེད་ལ་སོགས་པ་ནམ་མཁའ་ལ་བཞུགས་པར་སྣང་བར་འགྱུར་རོ། །དེ་བཞིན་དུ་མེ་ཏོག་སེར་པོ་ལ་བཏབ་སྟེ་གཏོར་ན་དགྲ་བཅོམ་པ་མང་པོ་སྣང་བར་འགྱུར་རོ། །མེ་ཏོག་དམར་པོ་ལ་བཏབ་སྟེ་གཏོར་ན་ལྷའི་རྣམ་པ་མང་པོ་སྣང་བར་འགྱུར་རོ། །མེ་ཏོག་སྔོན་པོ་ལ་བཏབ་སྟེ་གཏོར་ན་གནོད་སྦྱིན་དང་སྲིན་པོ་མང་པོ་སྣང་བར་འགྱུར་ཏེ། དེ་དང་པོ་བྱུང་བའི་ཚེ་ནའང་གང་ནས་ཀྱང་མ་བྱུང་། སྣང་བ་ཉིད་ཀྱི་ཚེ་ནའང་སྤྲུལ་པ་ཡིན་པའི་ཕྱིར། མཚན་ཉིད་གང་ཡང་ཡོད་པ་མ་ཡིན། སྤྲུལ་པ་བསྡུས་ན་འགགས་ཤིང་མི་སྣང་བར་འགྱུར་ཏེ། དེའི་ཚེའང་གང་དུའང་མ་སོང་། གང་ཡང་འདི་སྐད་དུ་སྤྲུལ་པ་བསྡུས་པའི་རྐྱེན་གྱིས་དབང་པོའི་སྤྱོད་ཡུལ་དུ་མ་གྱུར་ནས་མི་སྣང་བ་ཙམ་དུ་ཟད་དེ། དེའི་སྐད་ཅིག་མའི་རྒྱུན་ནི་འཆད་ཅིང་ལྡོག་པའང་མ་ཡིན་ནོ། །ཞེས་རྣམ་པར་གཞག་པའང་མེད་དེ། སྣང་བ་དང་མི་སྣང་བ་གཉིའ་གའང་དབྱེར་མེད་པར་མཚན་ཉིད་མེད་པར་མཚན་ཉིད་གཅིག་པ་ཡིན་མོད་ཀྱི། ཇི་སྲིད་དུ་རྐྱེན་ཉེ་བར་གནས་ཀྱི་བར་དུ་སྣང་བའང་དམིགས་ལ། སྣང་བ་ཙམ་དེའི་མཚན་ཉིད་ཡོངས་སུ་རྫོགས་པའང་ཡིན་ཏེ། འདི་ལ་དོན་གྱི་ཆ་གཞན་བསྒྲུབ་པར་བྱ་བ་ནི་གང་ཡང་མེད་པས་སྤྲུལ་པ་སྤྲུལ་པ་ཞེས་བརྗོད་དོ། །དེ་བཞིན་དུ་ཕྱི་ནང་གི་དངོས་པོ་སྣ་ཚོགས་སྣང་བ་འདི་དག་ཐམས་ཅད་ཀྱང་། ཇི་སྲིད་དུ་གཟུང་བ་དང་འཛིན་པའི་རྣམ་པར་རྟོག་པའི་བག་ཆགས་ཀྱི་དབང་ཉེ་བར་གནས་པ་དེ་སྲིད་དུ། དངོས་པོ་སྣ་ཚོགས་སྣང་བ་འབྱུང་བར་འགྱུར་ཏེ། དེ་དང་པོ་བྱུང་བའི་ཚེ་ནའང་གང་ནས་ཀྱང་མ་བྱུང་། སྣང་བ་ཉིད་ཀྱི་ཚེ་ནའང་བག་ཆགས་ཀྱི་དབང་གིས་སྣང་བ་ཡིན་པའི་ཕྱིར། མཚན་ཉིད་གང་ཡང་ཡོད་པ་མ་ཡིན། གཟུང་བ་དང་འཛིན་པ་གཉིས་ཀྱི་བག་ཆགས་ཟད་ན་འགགས་ཤིང་མི་སྣང་བར་འགྱུར་ཏེ། དེའི་ཚེའང་གང་དུའང་མ་སོང་། གང་ཡང་འདི་སྐད་དུ་གཟུང་འཛིན་གྱི་རྣམ་པར་རྟོག་པ་དང་བྲལ་བའི་མི་རྟོག་པའི་ཡེ་ཤེས་ཀྱི་སྤྱོད་ཡུལ་དུ་མ་གྱུར་ནས་མི་སྣང་བ་ཙམ་དུ་ཟད་དེ། སྣང་བ་འདི་དག་གི་སྐད་ཅིག་མའི་རྒྱུན་ནི་འཆད་ཅིང་ལྡོག་པའང་མ་ཡིན་ནོ། །ཞེས་རྣམ་པར་གཞག་པའང་མེད་དེ། སྣང་བ་དང་མི་སྣང་བ་གཉིའ་གའང་དབྱེར་མེད་པར་མཚན་ཉིད་མེད་པར་མཚན་ཉིད་གཅིག་པ་ཡིན་མོད་ཀྱི། ཇི་སྲིད་དུ་རྐྱེན་ཉེ་བར་གནས་ཀྱི་བར་དུ་སྣང་བའང་དམིགས་ལ། སྣང་བ་ཙམ་དེའི་མཚན་ཉིད་ཡོངས་སུ་རྫོགས་པ་ཡིན་ཏེ། འདི་ལ་དོན་གྱི་ཆ་གཞན་བསྒྲུབ་པར་བྱ་བ་ནི་གང་ཡང་མེད་པས། དེ་བས་ན་ཆོས་ཐམས་ཅད་ནི། སྒྱུ་མ་ལྟ་བུ། སྨིག་རྒྱུ་ལྟ་བུ། རྨི་ལམ་ལྟ་བུ། གཟུགས་བརྙན་ལྟ་བུ། སྤྲུལ་པ་ལྟ་བུའོ། །ཞེས་བརྗོད་དོ། །དེ་བས་ན་དངོས་པོ་ཐམས་ཅད་ཀྱི་མཚན་ཉིད་འདི་ལྟ་བུ་ཡིན་པའི་ཕྱིར། ཤིན་ཏུ་འཁྲུལ་པའི་མཚན་ཉིད་ཅན་གྱི་ཉོན་མོངས་པ་རྣམས་ལ་རྫས་ཀྱི་མཚན་ཉིད་མི་རྙེད་དོ། །འདི་ལྟར་ཉོན་མོངས་པ་རྣམས་ལ་སྤང་བར་བྱ་བའི་རྫས་མེད་པར་བསྟན་པའི་རིགས་པ་འདི་དག་ཉོན་མོངས་པ་རྣམས་ལ་སྤང་བར་བྱ་བའི་རྫས་ཡོད་པར་འདོད་པའི་གྲུབ་མཐའ་རྣམས་ལ་གནོད་པ་དམིགས་པ་འདིའང་། གཞན་གྱི་གྲུབ་མཐའ་དང་འགལ་བས་གནོད་དོ། །ཞེས་བརྗོད་པ་ནི་མ་ཡིན་ཏེ། རང་རང་གི་གྲུབ་མཐའ་ཉིད་ཀྱིས་རང་རང་གི་གྲུབ་མཐའ་འཇོམས་པར་བྱེད་པ་མཐོང་བ་བརྗོད་པ་ཡིན་ཏེ། དཔེར་ན་ནགས་ལ་རླུང་གི་གནོད་པ་བྱུང་ན་ཤིང་སྐྱབས་སུ་ཤིང་འགྱུར་ཏེ། ཤིན་ཏུ་གནོད་པར་ཡང་མི་འགྱུར་ལ། ནགས་ལ་མེའི་གནོད་པ་བྱུང་ན་ཤིང་གཤེད་དུ་ཤིང་འགྱུར་ཏེ། སྐྱབས་མེད་ཅིང་ལྷག་མ་མ་ལུས་པའི་བར་དུ་ཡང་འགྱུར་བ་བཞིན་ནོ། །འོ་ན་རང་གིས་རང་ལ་གནོད་པའི་གྲུབ་མཐའ་དེ་དག་སུ་ཞིག་བསྒྲུབ་པར་བྱེད་ཅེ་ན། འདི་ནི་གྲུབ་མཐའ་འཛིན་པ་རང་རང་གི་བློ་དྲི་མ་མེད་པར་མཐོང་བ་རྣམས་ཀྱི་སྐྱོན་མེད་པར་བསྒྲུབས་པ་ཡིན་མོད་ཀྱི། དེ་བས་བློ་ཟབ་ཅིང་ཡངས་པ་རྣམས་ཀྱིས་བལྟས་ན། ཆུ་རྙོགས་པ་བཞིན་དུ་རང་གིས་རང་ཉམས་པར་བྱས་པ་མཐོང་བ་བརྗོད་པ་ཡིན་ནོ། །དཔེར་ན་སྔོན་བྱུང་བ་ཚང་པ་སའི་མེ་ཏོག་ཅེས་བྱ་བས། ཚངས་པ་མི་འཆི་བ་ཞེས་བྱ་བ་ལ་སྨྲས་པ། ཀྱེ་མ་ཚངས་པ་ཁྱོད་ཀྱི་བློ། །ཤིན་ཏུ་དྲི་མ་མེད་པ་དག །བློ་གྲོས་ལྡན་པ་ངས་བལྟས་ན། །ཚིག་རེ་ལ་ནི་རྙོགས་པ་བཞིན། །ཞེས་པ་ལྟ་བུ་སྟེ། ཚངས་པ་མི་འཆི་བའི་བློ་རང་གིས་ཤིན་ཏུ་དྲི་མ་མེད་པར་མཐོང་བས་སྨྲས་པའི་ཚིག་རྣམས། ཚངས་པ་སའི་མེ་ཏོག་གིས་བལྟས་ན། ཚིག་རེ་རེ་ལའང་བརྙོགས་པ་བཞིན་དུ་རང་གིས་རང་ཉམས་པར་བྱེད་པར་མཐོང་བ་བཞིན་ནོ། །དེ་ཡང་འདི་ལྟར་ཉན་ཐོས་ཀྱི་ཚུལ་ལས་ཉོན་མོངས་པ་རྣམས་ལ་སྤང་བར་བྱ་བའི་རྫས་རྣམ་གྲངས་ཀྱི་མཚན་ཉིད་དུ་ཡོད་པར་འདོད་དེ། དེའི་དབང་གིས་རྣམ་གྲངས་ཀྱི་དབྱེ་བ་བྱས་པས། དེ་ཉིད་ཀྱིས་གྲངས་ཀྱི་ངེས་པ་ཉམས་པར་བྱས་ཏེ། བརྙོགས་པ་བཞིན་དུ་རང་གི་འདོད་པའི་རྫས་ཉམས་པར་བྱས་སོ། །རྣལ་འབྱོར་སྤྱོད་པའི་ཚུལ་ལས་སྤང་བར་བྱ་བའི་རྫས་ཀྱི་མཚན་ཉིད་འདོད་པས། མཚན་ཉིད་ཀྱི་དབྱེ་བ་བྱས་པས། བརྙོགས་པ་བཞིན་དུ་རང་གིས་རང་ཉམས་པར་བྱས་སོ། །དབུ་མའི་ཚུལ་ལས་ཡང་དག་པ་དང་ཡང་དག་པ་མ་ཡིན་པའི་ཁྱད་པར་གྱི་དབྱེ་བ་བྱས་པས། དེ་ཉིད་ཀྱིས་བརྙོགས་པ་བཞིན་དུ་རང་གིས་རང་ཉམས་པར་བྱས་པ་བརྗོད་་པ ཙམ་ཡིན་ཏེ། གསང་བ་བླ་ན་མེད་པའི་ཚུལ་དང་འགལ་བས་གནོད་དོ་ཞེས་ནི་མ་སྨྲས་ཏེ། འདི་ནི་གནོད་དུ་ཟིན་ཀྱང་རང་རང་གི་གྲུབ་པའི་མཐའ་སྐྱབས་ལ་ཞེན་པས་གནོད་པར་མཐོང་བར་ཡང་མི་འགྱུར་རོ། །རང་རང་གི་གྲུབ་པའི་མཐའ་ཉིད་ཀྱིས་རང་འཇོམས་པར་བྱེད་པ་སྣང་བ་བརྗོད་པ་ནི། སྐྱབས་མེད་ཅིང་ལྷག་མ་མ་ལུས་པའི་བར་དུ་ཡང་འགྱུར་བས། དེ་བས་ན་སྐྱོན་འདི་དག་བརྗོད་པ་ཡིན་ནོ། །ཐེག་པ་ཆེན་པོའི་ཚུལ་ལ་འཇུག་པར་འདོད་པ་རྣམས་ཀྱིས། ཉོན་མོངས་པ་རྣམས་ལ་སྤང་བར་བྱ་བའི་རྫས་མེད་པར་ཤེས་པར་བྱ་ཞིང་། ཆོས་ཐམས་ཅད་སྒྱུ་མ་ལྟ་བུར་འགོ་མཉམ་པར་བསྟན་པའི་སྐབས་ཏེ། དང་པོའོ།། །།འདིར་བརྒལ་བ། བཀའ་རྣམས་ལས་ཆོས་ཐམས་ཅད་སྒྱུ་མ་ལྟ་བུར་གསུངས་པ་ནི། འདུས་བྱས་ཐམས་ཅད་མི་རྟག་པ་དང་། ཆོས་ཐམས་ཅད་ལ་གང་ཟག་གི་བདག་མེད་པའི་སྒོ་ནས་ཀྱང་སྒྱུ་མ་ལྟ་བུའི་སྒྲ་འཇུག་ལ། ཆོས་དང་གང་ཟག་ལ་བདག་མེད་ཅིང་ངོ་བོ་ཉིད་རྣམ་པ་གསུམ་གྱི་ངོ་བོ་ཉིད་མེད་པ་རྣམ་པའང་གསུམ་ལ་དགོངས་ནས། ཆོས་ཐམས་ཅད་ངོ་བོ་ཉིད་མེད་པར་གསུངས་པ་ཡིན་ཞིང་། རྒྱུ་རྐྱེན་གཞན་གྱི་དབང་ལས་སྐྱེ་བས་སྒྱུ་མ་ལྟ་བུའི་སྒྲ་འཇུག་གོ། །ཆོས་རྣམས་ལ་དོན་དམ་པའི་ངོ་བོ་ཉིད་མེད་པས། ཡང་དག་པའི་ཀུན་རྫོབ་ཏུ་རྫས་སུ་ཡོད་པར་འདོད་དུ་ཟད་ཀྱང་། སྒྱུ་མ་ལྟ་བུར་གསུངས་པར་ཟད་དེ་སྒྱུ་མ་དང་ཕུང་པོ་གཉིས་ཤིན་ཏུ་འགོ་མཉམ་པ་ནི་མ་ཡིན་ནོ། །ཇི་ལྟ་བུ་ཞེ་ན། སྒྱུ་མ་ནི་སྐད་ཅིག་ཙམ་སྣང་བ་ཡིན་ལ། འགྲོ་བའི་ཕུང་པོ་ནི་ཡུན་རིང་དུ་བརྟན་པར་སྣང་བ་ཡིན་ནོ། །སྒྱུ་མ་ནི་སེམས་དང་སེམས་ལས་བྱུང་བས་ཡོངས་སུ་ཟིན་པའང་མ་ཡིན་ཏེ། ཚོར་བ་དང་འདུ་ཤེས་ཀྱི་ཉེ་བར་སྤྱོད་པ་ཅན་མ་ཡིན་ལ། འགྲོ་བའི་ཕུང་པོ་ནི་སེམས་དང་སེམས་ལས་བྱུང་བས་ཡོངས་སུ་ཟིན་པ། ཚོར་བ་དང་འདུ་ཤེས་ཀྱི་ཉེ་བར་སྤྱོད་པ་ཅན་ཡིན་པས། དེ་བས་ན་འདི་གཉིས་ཤིན་ཏུ་འགོ་བསྙམ་དུ་མི་རུང་ངོ་། །དེ་ལ་འདི་བརྗོད་པར་བྱ་སྟེ། འདི་ལྟ་བུའི་བྱེ་བྲག་ཏུ་སྣང་བ་ནི། སྒྱུ་མ་དང་སྤྲུལ་པའང་ཡོད་དེ། འདི་ལྟར་སྤྲུལ་པ་དག་ལའང་། དེ་བཞིན་གཤེགས་པའམ། བྱང་ཆུབ་སེམས་དཔའི་དབང་ཐོབ་པ་རྣམས་ཀྱིས། འགྲོ་བའི་དོན་དུ་སྤྲུལ་པ་རྣམ་པར་འཕྲུལ་པ་ལ་ལ་དག་བསྐལ་པའམ་བསྐལ་པ་ལས་ལྷག་པར་སངས་རྒྱས་ཀྱི་མཛད་པ་བསྒྲུབ་པར་བྱེད་པ་ཡོད་དོ། །ལ་ལ་ནི་ལོ་གཅིག་དང་ཟླ་བ་གཅིག་དང་ཞག་གཅིག་དང་ཉིན་གཅིག་དང་སྔ་དྲོ་གཅིག་དང་ཆུ་ཚོད་གཅིག་ཙམ་སངས་རྒྱས་ཀྱི་མཛད་པ་སྒྲུབ་པར་བྱེད་པ་ཡོད་དོ། །དེ་རྣམས་ལའང་ལ་ལ་ཡེ་ཤེས་ཀྱིས་ཡོངས་སུ་ཟིན་པར་སྣང་ཞིང་མ་ཟིན་པར་སྒྲུབ་པར་བྱེད་དོ། །ལ་ལ་ནི་ཟིན་པར་སྣང་ཞིང་ཟིན་པ་ཉིད་དུ་སྒྲུབ་པར་བྱེད་པ་ཡོད་དོ། །ལ་ལ་ནི་མ་ཟིན་པར་སྣང་ཞིང་མ་ཟིན་པ་ཉིད་དུ་སྒྲུབ་པར་བྱེད་པ་ཡོད་དོ། །ལ་ལ་ནི་མ་ཟིན་པར་སྣང་ཞིང་ཟིན་པར་སྒྲུབ་པར་བྱེད་པ་ཡོད་དེ། འོན་ཀྱང་སྤྲུལ་པའི་མཚན་ཉིད་ལ་ནི་བྱེ་བྲག་མེད་དེ་འགོ་མཉམ་མོ། །འདི་ལྟར་གཟུགས་བརྙན་དག་ལ་ཡང་། པྲ་སེ་ནའི་སྔགས་གྲུབ་པས་མངོན་པར་བསྔགས་པའི་མེ་ལོང་ལ་གཞོན་ནུ་མ་གཙང་མས་བལྟས་ན། ལྐོག་ཏུ་གྱུར་པ་རྐུན་མོའི་གཟུགས་བརྙན་མཐོང་པ་ཡོད་ལ། ཕལ་པས་ནི་མ་ཡིན་ཏེ། གཟུགས་བརྙན་གྱི་མཚན་ཉིད་ལ་ནི་བྱེ་བྲག་མེད་དོ། །རྨི་ལམ་དག་ལའང་། ལྷ་ཁྱད་པར་ཅན་གྱི་དབང་གིས་ལྟས་ཉེ་བར་སྟོན་པའི་རྨི་ལམ་མཐོང་པ་དག །མ་འོངས་པའི་དངོས་པོའི་ལྟས་སྟོན་པར་ནུས་པ་ཡོད་དོ། །ཕལ་གྱིས་ནི་མ་ཡིན་ཏེ་རྨི་ལམ་གྱི་མཚན་ཉིད་ལ་ནི་བྱེ་བྲག་མེད་དོ། །སྨིག་རྒྱུ་དག་ལའང་། རྐྱེན་གྱི་དབང་གིས་ལ་ལ་ནི་ལམ་སྒྲིབ་པའི་བྱ་བ་བྱེད་ལ། ལ་ལས་ནི་མ་ཡིན་ཏེ། སྨིག་རྒྱུའི་མཚན་ཉིད་ལ་ནེ་བྱེ་བྲག་མེད་དོ། །སྒྱུ་མ་དག་ལའང་། སྒྱུ་མའི་གསང་སྔགས་ཀྱི་བདེན་པའི་མཐུ་ཆེ་ཆུང་གི་དབང་གིས། ལ་ལས་ནི་ཅུང་ཟད་ཙམ་སྣང་ལ། ལ་ལ་ནི་དེ་བས་ཡུན་རིང་དུ་སྣང་ངོ་། །ལ་ལ་ནི་ཁ་དོག་དང་དབྱིབས་ཙམ་སྣང་ལ། ལ་ལ་ནི་དྲི་དང་རོ་དང་རེག་བྱའང་སྣང་སྟེ། འདི་ལྟར་སྒྱུ་མ་མཁན་བཟང་པོས། བཅོམ་ལྡན་འདས་ལ་ཐམས་ཅད་མཁྱེན་པ་ཡིན་ནམ་མ་ཡིན་སད་པའི་ཕྱིར། སྒྱུ་མའི་ལོངས་སྤྱོད་ཀྱི་རྣམ་པ་མང་པོ་སྤྲུལ་ཏེ། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་སྤྱན་དྲངས་པས། བཅོམ་ལྡན་འདས་དུས་མཁྱེན་ཅིང་རྒྱུད་རིག་པས། དེ་བཞིན་དུ་གཤེགས་ཏེ། བཟང་པོས་སྤྲུལ་པའི་སྒྱུ་མའི་ལོངས་སྤྱོད་རྣམས་ཀྱང་བརྟན་པར་བྱིན་གྱིས་བརླབས་ནས། གདུགས་ཚོད་ཀྱང་གསོལ། སྨོན་ལམ་ཡོངས་སུ་རྫོགས་པར་མཛད་དེ། འདི་སྐད་དུ། གང་གིས་བྱིན་དང་གང་ལ་སྦྱིན། །སྦྱིན་པ་ཇི་ལྟར་མི་དམིགས་པ། །སྦྱིན་པ་མཉམ་པ་དེ་ཉིད་ཀྱིས། །བཟང་པོ་ལ་ནི་ཡོངས་རྫོགས་ཤོག །ཅེས་གསུངས་ཏེ། ཚོགས་རྣམ་པ་གཉིས་རྫོགས་པར་བྱེད་པའི་སྒྱུ་མའང་ཡོད་དོ། །དེ་ཡང་བཟང་པོའི་གསང་སྔགས་ཀྱི་བྱིན་རླབས་ནི་མཐུ་ཆུང་བས། དེ་ལྟ་བུར་བརྟན་པར་སྣང་བར་ནུས་པ་ཡང་མ་ཡིན་ན། བཅོམ་ལྡན་འདས་ཀྱི་བདེན་པའི་བྱིན་རླབས་དེ་བས་མཐུ་ཆེས་ཆེ་བས། བརྟན་པར་སྣང་བ་ནུས་པ་སྟེ། འོན་ཀྱང་སྒྱུ་མའི་མཚན་ཉིད་ལ་ནི་བྱེ་བྲག་ཏུ་གྱུར་པ་མེད་དེ་འགོ་མཉམ་མོ། །སེམས་ཀྱི་ས་ཡོངས་སུ་ཟིན་པར་སྣང་བའང་རང་གི་ཉམས་སུ་མྱོང་བ་མ་གཏོགས་པ། གཞན་གྱི་སྤྱོད་ཡུལ་དུ་སྣང་བ་ནི་བྱེ་བྲག་མེད་པར་དུས་ཡུན་རིང་པོར་སྣང་བར་ནུས་པ། སྒྱུ་མ་མཁན་གྱི་སྔགས་ཀྱི་མཐུ་ཆེ་བ་རྣམས་ལ་འབྱུང་སྟེ། འདི་ལྟར་རྒྱལ་པོ་ར་མ་ནའི་བུ་འབའ་ལེ་ཞེས་བྱ་བ་དྲང་སྲོང་ལ་བཅོལ་ནས། མས་གྲོང་གཞན་ཞིག་ཏུ་བྱ་བ་ཞིག་གི་ཕྱིར་ཕྱིན་པ་དང་། བུ་མ་ཕྱིར་འབྲངས་པ་དང་དྲང་སྲོང་གིས་མ་ཚོར་ཏེ། བུ་སྟོར་ནས་བཙལ་བས་ནི་མ་རྙེད། ཐབས་གཞན་མེད་ནས་སྒྱུ་མའི་བུ་འབའ་ལེ་ཅི་འདྲ་བ་ཞིག་བྱས་ཏེ་བསྡད་པ་དང་། ལྷ་མོ་སི་ཏ་ལོག་ཙམ་ན་བུ་འབའ་ལེ་ཡང་མ་ཕྱི་ནས་ཚུར་བྱུང་། བཅོལ་ས་ན་ཡང་བུ་འབའ་ལེ་གཅིག་འདུག །མས་ཀྱང་ངོ་མ་ཤེས་པར་གྱུར་ནས། གཅིག་ཀྱང་བརྫུས་ཏེ་སྐྱེས་པའི་བུ་ཞིག་ཡིན་པར་བསམ་སྟེ། གཉིས་ག་ཁྲིད་ནས་རྒྱལ་པོའི་དྲུང་དུ་ཕྱིན་ཏེ། ཞིབ་ཏུ་བསྙད་པ་དང་། རྒྱལ་པོའང་དེ་བཞིན་དུ་བསམས་ནས། དུས་ཡུན་རིང་མོར་སྲས་འབའ་ལེ་མཆེད་གཉིས་ཀྱི་རྒྱལ་པོའི་སྲས་ཀྱི་བྱ་བ་བྱས་སོ། །འདི་ལྟ་བུའང་དྲང་སྲོང་གི་མཐུ་སྒྱུ་མ་མཁན་ལས་ཆེས་ཆེ་བས། སྒྱུ་མ་དེའང་སྒྱུ་མ་གཞན་བས་བརྟན་པར་སྣང་ངོ་། །དེ་བཞིན་དུ་སྒྱུ་མའི་གསང་སྔགས་ཀྱི་མཐུ་ནི་ཆུང་བས་བརྟན་པར་སྣང་བར་མི་ནུས་པར་ཟད་ལ། ལས་དང་ཉོན་མོངས་པའི་མཐུ་ནི་དེ་བས་ཆེས་ཆེ་བས། དེ་བས་ན་ལས་དང་ཉོན་མོངས་པ ས་སྤྲུལ་པ་རྣམས་ཡུན་རིང་དུ་བརྟན་པར་སྣང་བར་ཟད་དོ། །ཀུན་བརྟགས་པའི་གཟུགས་དང་། དབང་འབྱོར་བའི་གཟུགས་ཀྱང་དེ་འདྲ་སྟེ། སྔོན་བྱུང་བ་རྣལ་འབྱོར་བྱ་བར་འདོད་པའི་གང་ཟག་གཅིག །སློབ་དཔོན་ལ་ལུང་ནོད་དུ་ཕྱིན་པ་དང་། སློབ་དཔོན་གྱིས་སྒོམ་ནུས་སམ་མི་ནུས་སད་པའི་ཕྱིར་སྒོམ་པའི་ལུང་མ་ཕོག་པར། འདི་སྐད་དུ་ཁྱོད་ཀྱིས་མགོ་ལ་མ་ཧེའི་རྭ་ཤིན་ཏུ་ཆེ་བ་གཉིས་ཡོད་པར་སྒོམ་ཤིག །ཅེས་སྨྲས་སོ། །དེས་དེ་བཞིན་དུ་མཉན་ཏེ་རང་གི་གནས་སུ་ཕྱིན་ནས་མི་གཡོ་བར་བསྒོམས་པ་དང་། ནམ་ཞིག་ན་ཏིང་ངེ་འཛིན་ཐོབ་སྟེ། མ་ཧེའི་རྭ་མངོན་སུམ་བཞིན་དུ་གསལ་བར་གྱུར་ཏོ། །དེ་ནས་ལག་པས་བྱུགས་པ་དང་གཟུང་དུ་རུང་བ་ནི་མི་སྣང་ངོ་། །དེའི་ཚེ་ཀུན་བརྟགས་པའི་གཟུགས་ཞེས་བྱ་བ་ཡིན་ནོ། །དེ་བཞིན་དུ་ཡུན་རིང་དུ་བསྒོམས་པས་ནམ་ཞིག་ན་རེག་ཏུ་རུང་བར་གྱུར་ཏོ། །དེས་བསམ་པ། མ་ཧེའི་རྭ་ནི་གྲུབ་ན་འདིས་ཇི་ལྟར་བྱ་བ་སློབ་དཔོན་ལ་དྲིའོ། །སྙམ་བསམས་ནས་སྒོར་འབྱུང་བར་གཟས་པ་ལས། སྒོ་ལ་མ་ཤོང་སྟེ། གྲོང་མི་རྣམས་སྦྲན་ནས་ངའི་སྒོ་འདི་ཤིགས་ཤིག་ཅེས་སྨྲས་པ་དང་། གྲོང་མི་རྣམས་ཀྱིས་ཕྱིན་པ་ན་མི་དེའི་མགོ་ལ་མ་ཧེའི་རྭ་ཤིན་ཏུ་བཟང་བ་འདུག་གོ། །དེ་ནས་སྒོ་བཤིག་སྟེ་སློབ་དཔོན་གྱི་དྲུང་དུ་ཕྱིན་པ་དང་། སློབ་དཔོན་ཡང་ངོ་མཚར་སྐྱེས་ཏེ་ལུང་ལེགས་པར་ཕོག་པ་དང་། ཕྱག་རྒྱ་ཆེན་པོའི་དངོས་གྲུབ་ཐོབ་བོ། །བྱ་བ་བྱེད་ནུས་པའི་རྭ་དེ་ནི་རང་ལ་ནུས་པ་ཙམ་ན་དབང་འབྱོར་བའི་གཟུགས་ཞེས་བྱ་སྟེ་ཡིད་ཀྱི་ཡུལ་ལོ། །དེ་ཀུན་གྱི་ཐུན་མོང་དུ་དབང་པོ་གཟུགས་ཅན་གྱི་སྤྱོད་ཡུལ་དུ་གྱུར་ཙམ་ན། གྲུབ་པའི་གཟུགས་ཞེས་བྱ་སྟེ། སྔོན་གྱི་ལས་ཀྱི་རྣམ་པར་སྨིན་པའི་གཟུགས་དང་བྱེ་བྲག་མེད་དོ། །རང་གི་རྟོགས་པ་མ་ཡིན་པ་གཞན་གྱི་སྨོན་ལམ་གྱིས་ཀྱང་ལུས་འགྲུབ་སྟེ། སྔོན་བྱུང་བ་ཐ་ག་པ་ཞིག་ནགས་ཚལ་དུ་ཐགས་ཆ་གཅོད་དུ་ཕྱིན་པ་དང་། ཤིང་ལེགས་པ་རྣམས་ལ་ཤིང་འདི་ལྟ་བུ་ནི་ངའི་ཐགས་ཆ་ཙམ་གྱི་ཕྱིར་གཅད་པར་མི་རིགས་སོ། །སྙམ་དུ་བསམས་ཏེ། འཚམས་པའི་ཤིང་ཚོལ་དུ་ཕྱིན་པ་དང་རྙེད་པར་མ་གྱུར་ནས། དཀའ་བས་ནགས་ཀུན་བསྐོར་བ་དང་། ནགས་ཀྱི་ལྷ་མོ་དགའ་བར་གྱུར་ནས་དྲུང་དུ་ཕྱིན་ཏེ། མི་ཁྱོད་བྱ་བ་འཕྲ་མོའི་ཕྱིར་ཤིང་ལེགས་པ་མི་གཅོད་པ་ནི་ལེགས་སོ། །དངོས་གྲུབ་ཅི་འདོད། ཅེས་སྨྲས་པ་དང་། དེས་རང་གིས་འདམ་མ་ཤེས་ཏེ་གྲོགས་པོ་ཞིག་ལ་དྲིས་པ་དང་། གྲོགས་པོ་བློ་ཆུང་སྟེ། ཡུ་བུ་ཅག་ཐ་ག་བ་ཡིན་པས། མདུན་རྒྱབ་གཉིའ་གས་ཐགས་འཐག་ཤེས་པ་ཞིག་མི་རུང་ངམ་ཟེར་ནས། དེར་མཉན་ཏེ་ལྷ་མོའི་དྲུང་དུ་ཕྱིན་ནས། མདུན་རྒྱབ་གཉིའ་གས་ཐགས་འཐག་ཤེས་པ་ཞིག་འཚལ་ལོ། །ཞེས་བགྱིས་པ་དང་། ལྷ་མོས་དེ་བཞིན་དུ་གྱུར་ཅིག །ཅེས་སྨྲས་མ་ཐག་ཏུ། ལྟག་པར་ཡང་བྱད་དབང་པོ་ཚང་བ་ཞིག་བྱུང་བར་གྱུར་ཏོ། །ལག་པ་གཉིས་དང་རྐང་པ་གཉིས་ཀྱང་རྒྱབ་ཏུ་བྱུང་སྟེ། མི་མ་ཡིན་པའི་ལས་འདྲ་བ་ཞིག་ཏུ་གྱུར་ཏོ། །དེས་གྲོང་དུ་ཕྱིན་པ་དང་གྲོང་མི་རྣམས་ན་རེ། འདྲེ་མངོན་སུམ་དུ་བྱུང་ངོ་། །ཞེས་ཟེར་ཏེ། རྡོ་རུབ་བྱས་པས་མི་དེ་ཤི་བར་གྱུར་ཏོ། །དེ་ནས་དེ་བཞིན་དུ་བཞག་པ་དང་རོ་དེ་བརྟན་པར་འདུག་ནས། མི་རྣམས་ན་རེ། ཀྱེ་མ་འདྲེ་བསད་པ་ལ་ནི་རོ་མི་འོང་ན། །འདི་ཅི་ཞིག་ཡིན་ཟེར་ཏེ་བཤས་པ་དང་། ཤ་དང་ཁྲག་དང་རུས་པ་དང་དབང་པོ་ཐམས་ཅད་ཀྱང་མི་ཉིད་དུ་འདུག་པ་ལ་ཡན་ལག་མང་བར་འདུག་ནས། གཏམ་གྲགས་པ་དང་ཐ་ག་པ་གྲུབ་པ་ཐོབ་པ་ཡིན་པར་ཐོས་སོ། །དེ་ལྟར་གཞན་གྱི་སྨོན་ལམ་གྱི་མཐུས་ཀྱང་ལས་ཀྱི་རྣམ་པར་སྨིན་པའི་ལུས་དང་བྱེ་བྲག་མེད་པར་འགྲུབ་བོ། །ཅུང་ཟད་བྱེ་བྲག་ཏུ་ན། ལས་དང་ཉོན་མོངས་པའི་མཐུ་ནི་དུས་ཕྱིས་སྣང་བར་འགྱུར། མཉམ་པར་བཞག་པའི་མཐུ་ཆེན་པོ་ནི་མཐོང་བའི་ཆོས་ལ་སྣང་བར་འགྱུར། བདེན་པའི་ཚིག་གྲུབ་པ་རྣམས་ཀྱི་སྨོན་ལམ་བཏབ་པའི་མཐུས་ནི་དེ་མ་ཐག་ཏུ་སྣང་བར་འགྱུར་རོ། །འདི་ལྟར་རྒྱུ་དང་རྐྱེན་གཞན་དང་གཞན་གྱི་དབང་གིས་སྣ་ཚོགས་སུ་སྣང་བ་ཙམ་དུ་ཟད་དོ། །སྒྱུ་མ་ཞེས་བྱ་བའི་ངེས་པའི་ཚིག་ཀྱང་། མ་ཡ་ཞེས་བྱ་བའི་སྒྲ་སླུ་ཞིང་ཡང་དག་པ་མ་ཡིན་པའི་དོན་སྟོན་པའོ། །ནི་ར་མ་ན་ཞེས་བྱ་བ་རང་གི་ངོ་བོ་ཉིད་མ་ཡིན་པ་གཞན་དང་གཞན་དུ་རྣམ་པར་འཕྲུལ་བ་སྟེ་སྤྲུལ་པ་ཞེས་བྱའོ། །དེ་ལྟར་ན་སྣང་བའི་དངོས་པོ་ཐམས་ཅད་ཀྱང་རང་གི་ངོ་བོ་ཉིད་ཐོབ་པ་མེད་དེ། རྒྱུ་རྐྱེན་གཞན་དང་གཞན་གྱི་དབང་གིས་སྣང་ཞིང་། སླུ་བའི་ཆོས་ཅན་ཡང་དག་པ་མ་ཡིན་པའི་དོན་སྟོན་པ་ཁོ་ན་ཙམ་སྟེ། དེ་བས་ན་སྣང་བའི་དངོས་པོ་ཐམས་ཅད་ནི་སྒྱུ་མ་དང་སྤྲུལ་པ་དང་འགོ་མཉམ་པ་ཁོ་ན་ཙམ་དུ་ཤེས་པར་བྱའོ། །ཡང་གཞན་དག་གིས་བརྒལ་བ། རྒྱུ་དང་འབྲས་བུར་སྣང་བའི་དངོས་པོ་འདི་དག་ནི་ཡུན་རིང་དུ་བརྟན་པར་སྣང་བ་ཙམ་དུ་མ་ཟདདེ། རྒྱུ་དང་འབྲས་བུས་སྐད་ཅིག་མའི་རྒྱུན་ནི་དུས་ནམ་དུའང་འཆད་ཅིང་ལྡོག་པར་མི་འགྱུར་ཏེ། དག་པ་འཇིག་རྟེན་པའི་ཡེ་ཤེས་ལའང་སྣང་བའི་ཕྱིར་དང་། གལ་ཏེ་རྒྱུན་ཆད་པར་གྱུར་ན་ཆད་པར་སྨྲ་བ་ཉིད་དུའང་འགྱུར་རོ། །དེ་ལ་འདི་བརྗོད་པར་བྱ་སྟེ། འདི་ལྟར་བཅོམ་ལྡན་འདས་ཀྱིས་ཆོས་རྟེན་ཅིང་འབྲེལ་བར་འབྱུང་བ་གསུངས་པ་ནི། འདི་ལྟར་རྒྱུ་ཡོད་ན་འབྲས་བུ་འབྱུང་བར་འགྱུར་ལ། རྒྱུ་དང་རྐྱེན་འགགས་ན་འབྲས་བུའང་འགག་པར་འགྱུར་ཏེ། འདི་ཉིད་ཙམ་མཐའ་གཉིས་བསལ་བའི་རྣམ་པར་གྲོལ་བའི་ལམ་པོ་ཆེ་ཡིན་པར་གསུངས་ཀྱི། རྒྱུ་འབྲས་ཀྱི་རྒྱུན་ནམ་ཡང་མི་ལྡོག་གོ། །ཞེས་མ་གསུངས་སོ། །འདི་ལྟར་བཅོམ་ལྡན་འདས་ཀྱིས་དམ་པའི་ཆོས་ཀྱི་གསུང་རབ་མཐའ་དག་དང་། སངས་རྒྱས་ཀྱི་སྐུ་གདུང་རིང་བསྲེལ་མཐའ་དག་ལ། འཇིག་རྟེན་གྱི་གཙུག་ལག་དང་མཆོད་རྟེན་ཐམས་ཅད་དང་ཐུན་མོང་མ་ཡིན་པའི་ཕྱག་རྒྱས་བཏབ་པ་ནི། རྟེན་འབྲེལ་གྱི་སྙིང་པོ་ཡིན་ཏེ། འདི་ལྟར། ཡེ་དྷརྨ་ཧེ་ཏུ་པྲ་བྷ་བཱ། ཧེ་དུན་ཏེ་ཥན་ཏ་ཐ་ག་ཏོ་ཧྱ་བ། ཏད་ཏེ་ཥན་ཙ་ཡོ་ནི་རོ་དྷ། ཨེ་བཾ་བཱ་དཱི་མ་ཧཱ་ཤྲ་མ་ཎ། ཞེས་བྱ་བ་འདིས་རྒྱས་བཏབ་པ་ཐམས་ཅད། སངས་རྒྱས་ཀྱི་ཕྱག་རྒྱས་བཏབ་པར་ཤེས་སོ། །འདིའི་དོན་ནི། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །དེ་ལ་འགོག་པ་གང་ཡིན་པ། །དགེ་སྦྱོང་ཆེན་པས་འདི་སྐད་གསུངས། །ཞེའམ། ཆོས་གང་རྒྱུས་འབྱུང་དེ་དག་ནི། །རྒྱུ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུང་པ་དགེ་སྦྱོང་ཆེ། །ཞེས་བཤད་དེ། འདི་ལྟར་ཆོས་རྣམས་ནི། འཇིག་རྟེན་པའི་སྟོན་པ་རྣམས་ཀྱིས་བཤད་པ་ལྟར། བྱེད་པ་པོས་མ་བྱས་དབང་ཕྱུག་གིས་མ་སྤྲུལ། རང་བཞིན་མ་བྱུང་། དུས་ཀྱིས་མ་བསྒྱུར། རྒྱུ་མེད་པ་ལས་མ་བྱུང་སྟེ། ཆོས་རྣམས་ནི་རྒྱུ་དང་རྐྱེན་ལས་མ་བྱུང་བར་གསུང་པ་འདིའང་། དེ་བཞིན་གཤེགས་པས་ཡིན་ཏེ་གཞན་གྱིས་མ་ཡིན་ནོ། །ཆོས་གང་རྒྱུ་འགག་པས་འབྲས་བུ་འགག་པར་འགྱུར་བ་འདིའང་། འདི་སྐད་གསུང་པ། དགེ་སྦྱོང་ཆེན་པོ་སངས་རྒྱས་བཅོམ་ལྡན་འདས་ཡིན་ཏེ། ལྷ་དང་བཅས་པའི་འཇིག་རྟེན་ན་འདི་སྐད་སྨྲ་བ་གཞན་མེད་དོ། །ཞེས་བཤད་པ་སྟེ། རྒྱུ་འབྲས་ཀྱི་རྒྱུན་ནམ་ཡང་མི་ལྡོག་གོ་ཞེས་ནི་མ་གསུངས་སོ། །རྟེན་ཅིང་འབྲེལ་བར་འབྱུང་བའི་དོན་བཤད་པའི་མདོ་གཞན་ལས་ཀྱང་། ཇི་ལྟར་འཇིག་རྟེན་ལས་དང་ཉོན་མོངས་རྒྱུར་བཅས་བྱེད་འབྱུང་ལྡན་འགྱུར་ཅིང་། ལས་དང་ཉོན་མོངས་པ་དག་ལྡོག་རྒྱུ་དེའི་འདྲེན་པས་མཁྱེན་ཏེ་རབ་ཏུ་གསུངས། གང་ན་སྐྱེ་དང་རྒ་དང་རྒུད་པའི་སྡུག་བསྔལ་རབ་ཏུ་མི་གནས་པ། ཐར་པའི་མཆོག་དེ་སྨྲ་བའི་ཁྱུ་མཆོག་དེ་ཡིས་རང་གིས་མཁྱེན་ཏེ་གསུངས། ཞེས་གསུངས་པའི་དོན་ཡང་དེ་འདྲའོ། །དགེ་སློང་དག་འདི་ཡོད་ན་འདི་འབྱུང་། འདི་སྐྱེས་པའི་ཕྱིར་འདིར་སྐྱེ་སྟེ། འདི་ལྟར། མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ནས། འཁོར་བ་ཇི་སྲིད་པའི་ཕུང་པོ་འབྱུང་བར་འགྱུར་རོ། །ཞེས་བྱ་བའི་བར་དང་། འདི་འགགས་པས་ནི་འདི་འགག་སྟེ། མ་རིག་པ་འགགས་པས་འདུ་བྱེད་འགག་ཅེས་བྱ་བ་ནས། འཁོར་བ་ཇི་སྲིད་པའི་ཕུང་པོ་འགག་པར་འགྱུར་རོ། །ཞེས་གསུངས་པའི་དོན་ཡང་དེ་འདྲ་སྟེ། རྒྱུ་འབྲས་ཀྱི་རྒྱུན་ནམ་ཡང་མི་འཆད་དོ་ཞེས་ནི་མ་གསུངས་སོ། །མཐའ་གཉིས་བསལ་བའང་གང་ཟག་པ་འཕོ་བ་མེད་པ་ཉིད་ཀྱིས་རྟག་པའི་མཐའ་བསལ་བ་ཡིན་ཏེ། འདི་སྐད་དུ། ཁ་ཐོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བའང་། མི་འཕོ་བར་ཡང་མཁས་རྟོགས་བྱ། །ཞེས་གསུངས་པ་ལྟ་བུའོ། །རྒྱུ་དང་རྐྱེན་ལས་སྐྱེ་བ་ཉིད་ཀྱིས་ཆད་པའི་མཐའ་བསལ་བ་ཡིན་ཏེ། འདི་སྐད་དུ། ཤིན་ཏུ་འཕྲ་བའི་དངོས་ལའང་། །གང་གིས་ཆད་པར་རྣམ་བརྟགས་པ། །རྣམ་པར་མི་མཁས་དེ་ཡིས་ནི། །རྐྱེན་ལས་བྱུང་བའི་དོན་མ་མཐོང་། །ཞེས་བཤད་པ་ལྟ་བུ་ཡིན་ཏེ། རྒྱུ་འབྲས་ཀྱི་རྒྱུན་ནམ་ཡང་མི་འཆད་པས་ཆད་པའི་མཐའ་བསལ་བ་ཡིན་ནོ་ཞེས་ནི་མ་བཤད་དོ། །དག་པ་འཇིག་རྟེན་པའི་ཡེ་ཤེས་ལ་སྣང་བའང་། བྱང་ཆུབ་སེམས་དཔའ་རྣམས་ཀྱི་དག་པ་འཇིག་རྟེན་པའི་ཡེ་ཤེས་ལ་སྣང་བ་ནི། ད་དུང་འཛིན་པ་གཉིས་ཀྱི་བག་ཆགས་མ་ཟད་པའི་དབང་ཡིན་ནོ། །དེ་བཞིན་གཤེགས་པ་རྣམས་ལ་ནི། དག་པ་འཇིག་རྟེན་པའི་ཡེ་ཤེས་མངའ་འམ་མི་མངའ་བ་ཉིད་ཀྱང་བརྟག་པར་བྱ་བ་གཞན་ཡོད་དོ། །དེ་བས་ན་འདི་ལྟ་བུའི་གྲུབ་མཐའ་འཛིན་པའི་གང་ཟག་ནི། དཔེར་ན་སྐྱེས་བུ་ཕོ་རོག་གི་ཁུ་འཕྲིག་ཅན་ཞིག །ལམ་པོ་ཆེ་སྲོལ་བཏོད་པ་ཞིག་ཏུ་རྒྱུ་བ་ལས། ལམ་གྱི་གཞི་ཅུང་ཟད་ཅིག་འགྱུར་བ་མཐོང་བས། རླུབས་ཡོད་པར་དོགས་ཏེ་ལམ་གྱི་མཐར་བཟུང་བ་ལས། ཤིང་ཚལ་ཟུག་པར་གྱུར་པ་ལྟ་བུ་ཡིན་ཏེ། བཅོམ་ལྡན་འདས་ཀྱིས་གསུངས་པའི་ཆོས་རྟེན་ཅིང་འབྲེལ་བར་འབྱུང་བ། རྒྱུ་དང་རྐྱེན་ཡོད་ན་འབྲས་བུ་འབྱུང་བར་འགྱུར་ལ། རྒྱུ་དང་རྐྱེན་འགགས་ན་འབྲས་བུ་འགག་པར་འགྱུར་བ། མཐའ་གཉིས་བསལ་བར་གྱུར་པ་རྣམས་པར་གྲོལ་བ་ལམ་པོ་ཆེའི་སྲོལ་བཏོད་པར་ཞུགས་པ་ལས། འདི་ལྟར་གལ་ཏེ་རྒྱུ་འབྲས་ཀྱི་རྒྱུན་ཆད་པར་གྱུར་པ་ན་ཆད་པའི་ལྟ་བར་ལྟུང་བར་དོགས་ནས། རྒྱུན་གྱི་རྟག་པར་འཛིན་པའི་མཐའ་ལ་བཟུང་བས། དངོས་པོར་ལྟ་བའི་ཤིང་ཚལ་ཟུག་པར་གྱུར་པ་ཡིན་ནོ། །ཡང་གཞན་དག་གིས་བརྒལ་བ། ཀུན་ནས་ཉོན་མོངས་པའི་རྒྱུ་འབྲས་ཡོངས་སུ་མ་དག་པའི་སྤྱོད་ཡུལ་རྣམས་ནི། རྒྱུ་འགགས་པས་འབྲས་བུ་འགག་པར་འ གྱུར་བ་བདེན་ན། བསོད་ནམས་དང་ཡེ་ཤེས་ཀྱི་ཚོགས་ཚད་མེད་པ་ལས་བསྒྲུབས་པའི་རྣམ་པར་སྨིན་པའི་སྐུ་དང་། ཡོངས་སུ་དག་པའི་ཞིང་གི་བཀོད་པ་དང་། སྐུ་གསུང་ཐུགས་མི་ཟད་རྒྱན་གྱི་འཁོར་ལོ་ཕུན་སུམ་ཚོགས་པར་སྣང་བ་ནི་ལྡོག་པར་མི་འགྱུར་རོ། །དེ་ལ་འདི་བརྗོད་པར་བྱ་སྟེ། བསོད་ནམས་དང་ཡེ་ཤེས་ཀྱི་ཚོགས་ཀྱིས་ལུས་དང་སྤྱོད་ཡུལ་ཡོངས་སུ་དག་པ་འཛིན་ཅིང་སྣང་བའི་རྒྱུ་དང་རྐྱེན་དུ་འགྱུར་བ་ནི་བདེན་མོད་ཀྱི། སྣང་བའི་དངོས་གཞིའི་རྒྱུ་ནི་མ་ཡིན་ནོ། །ཇི་ལྟ་ཞེ་ན། དེ་ལ་རེ་ཞིག་བསོད་ནམས་ཀྱི་ཚོགས་ནི་གང་གི་ཚེ་གནས་ངན་ལེན་གྱི་ལས་ཀྱིས་གནོད་པར་འགྱུར་བའི་གཞི་ཡོད་པ་དེའི་ཚེ། བསོད་ནམས་ཀྱི་ལས་ཀྱིས་ཀྱང་ཕན་འདོགས་པར་སྣང་སྟེ། དཔེར་ན་གཞི་རས་ཡུག་དཀར་པོ་ཡོད་ན། དྲི་མས་ཀྱང་གནོད་པ་བསྒོར་རུང་། ཁྲུས་ཀྱིས་ཀྱང་འདག་ཏུ་རུང་། ཚོན་བཟང་པོས་ཀྱང་བགོར་རུང་ལ། གཞི་མེད་ན་དེ་ལྟ་མ་ཡིན་པ་བཞིན་ནོ། །འདི་ལྟར་སང་དང་ཆུ་དང་དུས་ཀྱི་ཁམས་དང་ལྡན་ན། ས་བོན་སྣ་ཚོགས་རང་རང་གི་འབྲས་བུ་འབྱིན་པར་འགྱུར་ཏེ། དེ་ལས་ཆུ་ཙམ་མེད་ཀྱང་སྐྱེ་བར་མི་ནུས་སོ། །དེ་བཞིན་དུ་འཛིན་པ་གཉིས་ཀྱི་བག་ཆགས་དང་བཅས་པའི་ས་གཞི་ལ། སྲིད་པའི་རླན་གྱིས་བརླན་ན་ལས་ཀྱི་ས་བོན་ཐམས་ཅད་སྐྱེ་བར་འགྱུར་ཏེ། སྲེད་པའི་རླན་ཙམ་དང་བྲལ་ཡང་ལས་ཀྱི་ས་བོན་རྣམས་སྐྱེ་བར་མི་འགྱུར་ཏེ། འདི་ལྟར་འཕགས་པ་དགྲ་བཅོམ་པ་རྣམས་དམིགས་པ་དང་བཅས་པའི་ས་ལ་གནས་ཀྱང་། སྲེད་པའི་རླན་དང་བྲལ་བས་བསོད་ནམས་ཀྱི་ལས་ཀྱི་རྣམ་པར་སྨིན་པའི་ཕུང་པོའང་སྐྱེ་བར་མི་བྱེད་པ་བཞིན་ནོ། །གཞན་ཡང་འདི་ལྟར། ཇི་སྲིད་དུ་ཆུ་ཀླུང་གི་གནོད་པ་ཡོད་པ་དེ་སྲིད་དུ། གྲུ་གཟིངས་ཀྱིས་ཀྱང་ཕན་འདོགས་པའི་བྱ་བ་བྱེད་ལ། ཆུ་ཀླུང་གི་གནོད་པ་དང་བྲལ་ཏེ་སྐམ་ས་ལ་འགྲོ་བ་དེའི་ཚེ་གྲུ་གཟིགས་ཀྱིས་ཀྱང་ཕན་འདོགས་པའི་བྱ་བ་མི་བྱེད་དོ། །དེ་བཞིན་དུ་གནས་ངན་ལེན་གྱི་ལས་ཀྱིས་གནོད་པ་ཡོད་པ་དེ་སྲིད་དུ། བསོད་ནམས་ཀྱི་ལས་ཀྱི་ཀྱང་ཕན་འདོགས་པར་བྱེད་ལ། གང་གི་ཚེ་གནས་ངན་ལེན་གྱི་ལས་ཀྱིས་གནོད་པ་མེད་པ་དེའི་ཚེ། བསོད་ནམས་ཀྱི་ལས་ཀྱིས་ཕན་འདོགས་པའང་མེད་དོ། །གང་ཕན་གནོད་ཐམས་ཅད་དང་བྲལ་བ་དེ་ཉིད་བྱང་ཆུབ་ཅེས་སངས་རྒྱས་ཀྱིས་ཀྱང་གསུངས་ཏེ། འདི་སྐད་དུ། དཔེར་ན་ཆུས་གང་ཆུ་ཀླུང་གི། །ཕ་རོལ་འགྲོ་བའི་འགྲོ་གང་དག །རྩྭ་དང་ཤིང་ལ་སོགས་བསྡུས་ནས། །ཆུ་ལས་བརྒལ་བའི་གཟིངས་བྱས་ཏེ། །དེ་ལ་འཇུས་ཏེ་ལེགས་པ་བརྒལ་ནས། །བོར་ཏེ་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །ཆོས་ཀྱི་ལམ་ནི་བསྐྱེད་ནས་ཀྱང་། །ཆོས་དང་ཆོས་མིན་རྣམ་སྤངས་ནས། །བྱང་ཆུབ་བདེ་བར་ཐོབ་པ་བཞིན། །ཞེས་གསུངས་པའམ། སྒྱུ་མ་འདྲ་བའི་དངོས་པོ་ཀུན། །འབྱིན་དང་སྡུད་པར་བྱེད་པ་པོ། །དེས་ན་དེ་ལ་སྡིག་མི་འགྱུར། །བསོད་ནམས་དག་ཀྱང་དེ་བཞིན་ནོ། །གང་ལ་བསོད་ནམས་སྡིག་མེད་པ། །དེ་ལ་བྱང་ཆུབ་བར་དུ་གསུངས། །ཞེས་གསུངས་པ་ལྟ་བུ་ཡིན་ཏེ། བྱང་ཆུབ་ཀྱི་མཚན་ཉིད་ནི་ངེས་པའི་དོན་དུ་ན། སྡིག་པ་དང་བསོད་ནམས་གཉིའ་ག་ཉེ་བར་ཞི་བའི་མཚན་ཉིད་ཙམ་ཡིན་ནོ། །བྱང་ཆུབ་ནི་ཞི་བ་མྱ་ངན་ལས་འདས་པའི་མཚན་ཉིད། ཅེས་གསུངས་པའང་འདི་ལྟ་བུ་ཡིན་ཏེ། སྒྲའི་བསྟན་ཆོས་ལས་ཀྱང་། ཎིརྦན་ཞེས་བྱ། མི་ཤི་བའི་མིང་ཡང་ཡིན། དགེ་སློང་མྱ་ངན་ལས་འདས་པའི་མིང་ཡང་ཡིན་ཏེ། ཎིརྦ་ཎོ་ཨག་ནི་ཞེས་བྱ་བ་མེ་ཤི་བའི་མིང་སྟེ། འདི་ལྟར་མེ་ཤི་ཞེས་བརྗོད་པ་ན། འབར་བའི་མཚན་ཉིད་ཉེ་བར་ཞི་བར་ཟད་དེ། གང་དུའང་མ་སོང་གང་ནའང་མི་གནས་པ་ཙམ་ལ་ཎི་རྦ་ཎ་ཞེས་ཟེར་རོ། ། ཎི་རྦ་ཎོ་བི་ཀྵུ་ཞེས་བྱ་བ་དགེ་སློང་མྱ་ངན་ལས་འདས་པའི་མིང་ཡིན་ཏེ། འདི་ལྟར་དོན་དམ་པའི་དགེ་སློང་། འདོད་ཆགས་དང་ཞེ་སྡང་དང་གཏི་མུག་གི་འབར་བ་ཉེ་བར་ཞི་བ་ཙམ་ལ་མྱ་ངན་ལས་འདས་ཞེས་བརྗོད་དོ། །གང་དུའང་མ་སོང་གང་ནའང་མི་གནས་པ་ཙམ་གྱི་མཚན་ཉིད་ལ་ཎི་རྦ་ཎ་ཞེས་ཟེར་རོ། །དེ་བས་ན་བསོད་ནམས་ཀྱི་ལས་ཀྱང་སྣང་བ་དག་པར་བྱེད་པའི་རྐྱེན་ཡིན་ཡང་། དངོས་གཞིའི་རྒྱུ་དང་རྐྱེན་ནི་མ་ཡིན་ནོ། །ཡེ་ཤེས་ཀྱི་ཚོགས་ཀྱང་མ་ཡིན་ཏེ། དེ་ལ་རེ་ཤིག་རྣམ་པར་མི་རྟོག་པའི་ཡེ་ཤེས་ནི། རིགས་དང་བཤེས་གཉེན་གྱི་སྟོབས་ཀྱིས། བྱང་ཆུབ་ཀྱི་སེམས་བསྐྱེད་པ་ནས་ཉེ་བར་བཟུང་སྟེ། དགེ་བ་རྩ་བ་ཚད་མེད་པ་བསགས་པའི་རྒྱུན་དང་། ཆོས་ཀྱི་དབྱིངས་ཕྱིན་ཅི་མ་ལོག་པ་ལ་དམིགས་པ་དང་། དྲན་པའི་དབང་ལས་སྐྱེས་པ་ཡིན་ཡང་། ཡེ་ཤེས་ཀྱི་མཚན་ཉིད་ནི་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་མཚན་ཉིད་དུ་སྐྱེ་བས། སྣང་བའི་རྐྱེན་དུ་མི་འཚམ་སྟེ། དཔེར་ན་བསྐལ་པའི་མེ་འབར་བ་ནི་མངོན་པར་འདུ་བྱེད་པ་རྣམས་ཀྱི་འདུ་འཕྲོད་ཀྱི་རྐྱེན་དུ་མི་འཚམས་པ་བཞིན་ནོ། །དག་པ་འཇིག་རྟེན་པའི་ཡེ་ཤེས་ཀྱང་གཟུང་འཛིན་དུ་སྣང་བ་དང་བཅས་ཤིང་། འཁོར་གསུམ་ཡོངས་སུ་དག་པའི་དགེ་བའི་རྩ་བ་ལ་བརྟེན་ཏེ་སྐྱེ་བས། སྣང་བ་ལ་བརྟེན་ཏེ་སྐྱེ་བ་ནི་ཡིན་མོད་ཀྱི། དེའི་མཚན་ཉིད་ནི་སྣང་བ་ཕྱིན་ཅི་ལོག་དང་བཅས་པ་ཡིན་ཡང་། མཐོང་བ་ཕྱིན་ཅི་མ་ལོག་པ་དང་ལྡན་པ་ཡིན་ཏེ། དཔེར་ན་མཁས་པ་རྣམས་ཀྱི་མདུན་དུ་འགལ་མེ་བསྐོར་བ་བཞིན་ནོ། །དེ་བས་ན་དེའང་རྐྱེན་དུ་མི་འཚམ་སྟེ། དཔེར་ན་བུད་ཤིང་མང་པོ་སྤུང་པ་ལས་མེ་སྦར་ན། དེ་ན་ཤིང་ཚིག་པ་ཡང་ཡོད། མ་ཚིག་པ་ཡང་ཡོད། ཉེ་བར་ཚིག་པའང་ཡོད་ལ། མེ་དེའང་ཤིང་ལ་བརྟེན་ཏེ་སྐྱེ་བ་ཡིན་མོད་ཀྱི། འོན་ཀྱང་མེ་དེ་ནི་ཤིང་གི་རྒྱུན་ཡུན་རིང་དུ་གནས་པར་བྱེད་ཅིང་རྒྱས་པར་བྱེད་པའི་རྐྱེན་མ་ཡིན་ཏེ། ཤིང་ཉམས་པར་བྱེད་པའི་རྐྱེན་དུ་ཉེ་བར་གནས་སོ། །དེ་བཞིན་དུ་དག་པ་འཇིག་རྟེན་པའི་ཡེ་ཤེས་ཀྱང་། ཐོག་མ་མེད་པའི་དུས་ཀྱི་འཛིན་པའི་བག་ཆགས་ཀྱི་དབང་གིས་སྣང་བ་ས་བོན་དང་བཅས་པ་དང་། འཁོར་གསུམ་ཡོངས་སུ་དག་པའི་དགེ་བའི་རྩ་བ་ལ་བརྟེན་ནས་སྐྱེ་སྟེ། ཆོས་ཐམས་ཅད་སྒྱུ་མ་དང་སྤྲུལ་པ་ལྟ་བུར་ཁོང་དུ་ཆུད་དེ། རང་གི་ངོ་བོ་ཉིད་མེད་དེ་མིང་དང་རྒྱུ་མཚན་གྱིས་སྟོང་པ། རྒྱུ་དང་རྐྱེན་ལས་སྐྱེ་བ་ཙམ་དུ་ཐུགས་སུ་ཆུད་པ་ཡིན་པས། སྣང་བའི་རྒྱུན་རྒྱས་པར་བྱེད་པའི་རྐྱེན་དུ་མི་འཚམ་མོ། །རྒྱུ་དང་རྐྱེན་མེད་པར་སྐྱེད་པ་དང་། རྒྱུ་དང་རྐྱེན་དུ་མི་རུང་བ་ལས་སྐྱེ་བའི་ཆོས་ནི་ཅུང་ཟད་ཙམ་ཡང་མེད་དེ། དེ་བས་ན་སྣང་བའི་རྣམ་པར་ཤེས་པ་གནས་གྱུར་པའི་ཚེ། དག་པ་འཇིག་རྟེན་པའི་ཡེ་ཤེས་སྐྱེ་བའི་རྒྱུ་དང་རྐྱེན་གཞན་མི་རྙེད་དོ། །གང་ཡང་འདི་སྐད་དུ་དོན་དམ་པར་སྐྱེ་བ་མི་འདོད་ན། ཀུན་རྫོབ་རྒྱུ་ཙམ་དུ་སྐྱེ་བར་སྣང་བ་ལ་འགལ་བ་མེད་དོ་ཞེ་ན། དོན་དམ་པར་རང་བཞིན་མེད་ན་ཀུན་རྫོབ་ཏུ་སྐྱེ་བར་མི་འགྱུར་ཞེས་འགལ་བ་ནི་མེད་ན། རྒྱལ་བས་གསུངས་པའི་ཆོས་རྟེན་ཅིང་འབྲེལ་བར་འབྱུང་བའི་མཚན་ཉིད་ནི། དོན་དམ་པར་འདོད་ཀྱང་རུང་ཀུན་རྫོབ་ཏུ་འདོད་ཀྱང་རུང་སྟེ། རྐྱེན་རྣམས་རྒྱུན་ཆད་པར་གྱུར་ཀྱང་། འབྲས་བུ་དམིགས་པར་འགྱུར་བ་ལ་འགལ་བ་མེད་པ་ནི། ཀུན་རྫོབ་ཙམ་དུ་ཡང་མེད་ལ་ཆ་ཤས་ཙམ་དུ་ཡང་ཡོད་དུ་མི་རུང་ངོ་། །དེ་བས་ན་ཡོངས་སུ་དག་པའི་སྣང་བའང་རྒྱུན་མི་འཆད་ཅེས་བརྗོད་དུ་མི་རུང་ངོ་། །ཡེ་ཤེས་ཆེན་པོའི་རྟེན་གྱི་བདག་ཉིད་རྣམ་པར་སྨིན་པའི་སྐུ་མངའ་ཞེས་ཟེར་བའང་། བདག་ཏུ་ལྟ་བ་བག་ཆགས་དང་བཅས་ནས་སྤངས་པ་ལ་ལུས་ཁོར་བུ་འཛིན་ཅིང་གནས་བོགས་གླིང་ན་གནས་པར་ཇི་ལྟར་འགྱུར། སྣང་བའི་རྒྱུན་གནས་སུ་མི་རུང་ན། དེ་བཞིན་གཤེགས་པ་རྣམས་ལ་དག་པ་འཇིག་རྟེན་པའི་ཡེ་ཤེས་མངའ་བར་གང་གིས་བསྒྲུབ། ཡོང་ནི་བློ་ཞིབ་མོས་བརྟགས་ན། དེ་བཞིན་གཤེགས་པ་རྣམས་ལ་རྣམ་པར་མི་རྟོག་པའི་ཡེ་ཤེས་ཉིད་ཀྱང་མངའ་བར་བསྒྲུབ་ཏུ་མི་རུང་བར་སྣང་སྟེ། གང་གི་ཕྱིར་འདི་ལྟར་བྱང་ཆུབ་སེམས་དཔའ་རྣམས་ཀྱི་མཉམ་བཞག་གི་དུས་ན། རྣམ་པར་མི་རྟོག་པའི་ཡེ་ཤེས་སྐྱེ་བ་ནི། བྱང་ཆུབ་སེམས་དཔའ་ཤེས་པ་ཚོགས་བརྒྱད་དུ་སྨྲ་བའི་གཞུང་ལྟར་ན། ཀུན་གཞི་རྣམ་པར་ཤེས་པ་རྣམ་པར་སྨིན་པ་གནས་མ་གྱུར་པ་ས་བོན་ཐམས་ཅད་པ་ལ་བརྟེན་ནས། ཡིད་ཀྱི་རྣམ་པར་ཤེས་པ་སྐྱེ་ལ། དགེ་བའི་རྩ་བ་ཚད་མེད་པ་བསགས་པའི་ས་བོན་དང་། ཡུལ་ཆོས་ཀྱི་དབྱིངས་ཕྱིན་ཅི་མ་ལོག་པ་ལ་དམིགས་པ་དང་། དྲན་པའི་དབང་ལས་སྐྱེས་པའི་ཤེས་རབ་དང་ཏིང་ངེ་འཛིན་དང་ལྡན་པའི་ཡིད་བདག་ཏུ་ལྟ་བའི་གནས་དང་བྲལ་ཞིང་། གཟུང་བ་དང་འཛིན་པའི་རྣམ་པར་རྟོག་པའི་སྣང་བ་དང་བྲལ་བར་སྐྱེས་པ་ན། ཟག་པ་མེད་པའི་སེམས་འཇིག་རྟེན་ལས་འདས་པའི་སེམས་སམ་ཡེ་ཤེས་ཞེས་གདགས་པ་ཐོབ་པ་ཡིན་ན། རྣམ་པར་སྨིན་པའི་ཀུན་གཞི་གནས་གྱུར་ན། །བྱང་ཆུབ་སེམས་དཔའ་རྣམས་ཀྱི་མི་རྟོག་པའི་ཡེ་ཤེས་དེའི་རིགས་མཐུན་པའི་ཡེ་ཤེས་དེ་ལྟ་བུ་རྒྱུ་རྐྱེན་གང་ལ་བརྟེན་ཏེ་སྐྱེ། གལ་ཏེ་ཀུན་གཞི་གནས་གྱུར་པ་ཉིད་མེ་ལོང་ལྟ་བུའི་ཡེ་ཤེས་སུ་གྱུར་པས། དེ་ཉིད་མི་རྟོག་པའི་ཡེ་ཤེས་ཡིན་ནོ་ཞེའམ། དེ་ཉིད་ལས་ཡིད་གནས་གྱུར་པའི་སོ་སོར་རྟོག་པའི་ཡེ་ཤེས་དོན་དམ་པའི་བདེན་པའི་ཡུལ་ཅན་སྐྱེ་བོ་ཞེས་བརྟག་གྲང་ན། དེ་ཉིད་ཡིན་པར་གྱུར་ན་ནི་གནས་འཕོ་བ་འགལ་ལོ། །གལ་ཏེ་བསམ་གྱིས་མི་ཁྱབ་པའི་ཆོས་ཡིན་ནོ་ཞེ་ན་ནི། ནན་གྱིས་ཀུན་བརྟགས་པ་ཐམས་ཅད་ཀྱང་བསམ་གྱིས་མི་ཁྱབ་པ་ཡིན་པར་ཁུངས་དབྱུང་དུ་རུང་བར་འགྱུར་རོ། །གལ་ཏེ་དེ་ལས་སྐྱེས་པ་ཡིན་ནོ་ཞེ་ན་ནི། དེའི་རྒྱུ་དང་རྐྱེན་བཙལ་དགོས་པ་དག་པ་འཇིག་རྟེན་པའི་ཡེ་ཤེས་དང་འདྲའོ། །གཅིག་པུར་སྨྲ་བའི་གཞུང་ལྟར་ན། དཔེར་ན་གསེར་རྡུལ་གྱི་རྡོ་ལས་མེས་བཞུ་བས་གསེར་རྡུལ་བྱུང་བ་ནམ། དང་པོ་རྡོར་སྣང་བ་བསྟན་པ་ལས་ཕྱིས་གསེར་བྱུང་བ་མཐོང་བ་ན། གསེར་རྡུལ་གྱི་རྒྱུ་ཅན་གྱི་རྡོ་ལས་གསེར་རྡུལ་བྱུང་ངོ་སྙམ་དུ་ཐ་སྙད་འདོགས་སོ། །དེ་ནས་གསེར་རྡུལ་གྱི་བདག་ཉིད་བརྟན་པ་ཐོབ་པ་ན། སྐབས་སུ་རྐྱེན་གྱིས་གཡའ་ལྡང་བ་མཐོང་བ་ལས། གཡའི་རྒྱུ་ཅན་གྱི་གསེར་རྡུལ་ལས་གཡའ་དང་ངོ་སྙམ་དུ་ཐ་སྙད་འདོགས་སོ། །ཞིབ་མོའི་བློས་བརྟགས་ན་དེ་གཉིས་ཕན་ཚུན་རྒྱུ་དང་འབྲས་བུའི་ངོ་བོ་མ་ཡིན་ཏེ། གསེར་རྡུལ་དང་རྡོ་གཉིའ་གའང་སའི་ཁམས་ཀྱི་མཚན་ཉིད་གཅིག་ཡིན་པ་ལས། མེས་ཉེན་ཅིང་ཁམས་ངན་པ་སྔོན་ལ་ཟད་པར་འགྱུར། བཟང་པོ་ཕྱིན་ལུས་པར་འགྱུར་བ་ལས། ཁམས་ངན་པ་ཕལ་ཆེ་བ་ན་རྡོ་ཡིན་ནོ་སྙམ་མོ། །ཁམས་བཟང་པོ་སྣང་བར་འགྱུར་པ་ན་དེར་གསེར་རྡུལ་བྱུང་ངོ་སྙམ་མོ། །དེ་ནས་གསེར་རྡུལ་གྱི་བདག་ཉིད་སྣང་ནས་རྐྱེན་གྱིས་ཁམས་ངན་པ་སྣང་བ་ལ། གསེར་རྡུལ་ལས་གཡའ་ལྡང་ངོ་སྙམ་མོ། །དེ་ནས་གསེར་ཚུར་ལ་སོགས་པའི་རྐྱེན་གྱིས་དྲི་མ་མི་སྣང་བ་ན་གསེར་རྡུལ་དག་གོ་སྙམ་མོ། །དེ་བཞིན་དུ་ཤེས་པའི་ཁམས་གཅིག་ལ་ཤེས་རབ་དང་ཏིང་ངེ་འཛིན་གྱི་འདུ་བྱེད་ཀྱིས་སྦྱངས་པའི་དུས་ན། ཤེས་པའི་ཁམས་ངན་པ་སྔོན་ལ་ཟད་ཅིང་བཟང་པོ་ཕྱི་ནས་ལུས་པ་ལ། སེམས་དང་ཡེ་ཤེས་སུ་ཐ་སྙད་འདོགས་སོ། །ཡང་རྐྱེན་འགས་ནི་དྲི་མ་མི་སྣང་ལ། རྐྱེན་འགས་ནི་དྲི་མ་ལྡང་བ་ལ། རྣམ་པར་མི་རྟོག་པ་དང་། དག་པ་འཇིག་རྟེན་པར་ཐ་སྙད་འདོགས་སོ། །ཚུལ་འདི་ལྟར་ནའང་ཁམས་བཟང་པོ་ཁམས་ངན་པ་དང་བྲལ་བ་མེད་དེ། གསེར་རྡུལ་ཡང་མེས་བསྲེགས་ཤིང་ཚུར་དུ་ཇེ་བཟང་ཇེ་བཟང་དྲི་མ་ཇེ་ཆུང་འགྱུར་ཏེ། མཐར་ལྷན་ཅིག་ཟད་པར་འགྱུར་རོ། །དེ་བཞིན་དུ་རྣམ་པར་ཤེས་པའང་ཤེས་པའི་ཁམས་གཅིག་ཡིན་པའི་ཕྱིར། ངན་པ་དང་བྲལ་བའི་བཟང་པོ་ཁོ་ན་མེད་པས། མཐར་སྣང་བར་མི་འགྱུར་རོ། །གནོད་པ་འདི་ནི་ཚོགས་བརྒྱད་དུ་འདོད་ཀྱང་གནོད་པ་ལས་མ་གྲོལ་ཏེ། ཡིད་ཟག་མེད་དུ་སྐྱེས་པས་ཀུན་གཞིའི་ས་བོན་ཐམས་ཅད་འཇོམས་པའི་དུས་ན། ཤེས་རིག་ཏུ་སྐྱེ་བའི་ས་བོན་ཞིག་ལྷག་མར་ལུས་པ་ནི་རྒྱུ་མཚན་གང་ཡང་རྙེད་པ་མཐོང་ངོ་། །ཡོངས་ནི་རྣམ་པར་མི་རྟོགས་པའི་ཡེ་ཤེས་དེའང་། ཚུལ་གཉིའ་གའི་ལྟར་ནའང་ཤེས་རིག་གི་མཚན་ཉིད་ལས་མ་འདས་པར་བསྒྲུབ་ཏུ་མི་རུང་སྟེ། འདི་ལྟར་ཡེ་ཤེས་དེ་ཚོར་བ་དང་མཚུངས་པར་ལྡན་པར་སྐྱེའམ། བྲལ་བར་སྐྱེ། གལ་ཏེ་ཚོར་བ་དང་ལྡན་ན་ནི་མི་རྟོག་པར་ཡང་ཇི་ལྟར་འགྱུར། བྲལ་ན་ནི་ཤེས་རིག་ཏུའང་ཇི་ལྟར་འགྱུར། ཚོར་བ་ལ་མ་ལྟོས་ན་བེམས་པོར་ཡང་ཐ་སྙད་ཇི་ལྟར་མི་གདགས། དེ་ལྟར་ན་ཚོར་བ་དང་བྲལ་བར་སྨྲ་ན་ནི་རྩོད་མི་དགོས་སོ། །ཡང་ལ་ལ་དག་འདི་སྐད་དུ། ཆོས་ཉིད་ཀྱི་བག་ཆགས་ལས་འབྱུང་ངོ་། །རང་གི་ཉེ་བར་ལེན་པའི་རྒྱུ་ལས་འབྱུང་ངོ་ཞེས་ཟེར་ན། ཆོས་ཉིད་ཀྱི་བག་ཆགས་གཞན་གྱིས་བསྒོས་པ་ཞིག་གམ། མ་བསྒོམ་པ་ཞིག །བསྒོས་ན་ནི་ཆོས་ཉིད་དུའང་ཇི་ལྟར་དུང་། མ་བསྒོམ་ན་ནི་རང་བཞིན་རྒྱུར་སྨྲ་བར་ཇི་ལྟར་མི་འགྱུར། ཉེ་བར་ལེན་པའི་རྒྱུ་དེ་ཡང་རྐྱེན་གཞན་གྱི་དབང་ལ་ལྟོས་པ་ཞིག་གམ། མ་ལྟོས་པ་ཞིག །མ་ལྟོས་ན་ནི་ཆོས་རྟེན་ཅིང་འབྲེལ་ཏེ་འབྱུང་བར་ཡང་ཇི་ལྟར་འགྱུར། བྱེད་པ་པོ་རང་དབང་ཐོབ་པ་རྒྱུར་སྨྲ་བར་ཡང་ཇི་ལྟར་མི་འགྱུར། ལྟོས་ན་ནི་རྒྱུ་རྐྱེན་སྤྱི་དང་རང་བཞིན་བྱེ་བྲག་ཏུ་གྱུར་པ་ཅི་ཞིག་ཡོད། གལ་ཏེ་འདི་སྐད་དུ། འདི་ནི་ཆོས་ཉིད་ཀྱི་རིགས་པས་གྲུབ་པ་ཡིན་ཏེ། རིགས་པ་གཞན་གྱིས་བསྒྲུབ་ཀྱང་མི་དགོས། གནོད་པ་བྱར་ཡང་མེད་ཅེས་ཟེར་ན་ནི། ཆོས་ཉིད་ཀྱི་རིགས་པའི་ཡུལ་དང་ཚད་དང་ཐལ་བ་ལ་སོགས་པ་འོག་ནས་འཆད་དོ། །དེ་བས་ན་རྣམ་པར་བྱང་བའི་ཆོས་སུ་སྣང་བ་རྣམས་ཀྱི་རྒྱུ་འབྲས་ཀྱི་རྒྱུན་མི་ལྡོག་གོ། །ཞེས་བསྒྲུབ་ཏུ་མི་རུང་སྟེ། ཆོས་ཐམས་ཅད་ནི་སྒྱུ་མ་དང་འགོ་མཉམ་མོ། །འོ་ན་འདི་སྐད་དུ། ཆོས་ཐམས་ཅད་སྒྱུ་མ་ལྟ་བུ་ཡིན་ན། བྱང་ཆུབ་ཀྱི་མཚན་ཉིད་དོན་དམ་པ་ཞི་བ་མྱ་ངན་ལས་འདས་པ་འདུས་མ་བྱས་པའི་མཚན་ཉིད་དེ། ཇི་ལྟར་སྒྱུ་མ་ལྟ་བུར་བཞག་ཅེ་ན། འདིའང་བྱང་ཆུབ་ཀྱི་མཚན་ཉིད་ནི་ཐ་སྙད་དང་བྲལ་མོད་ཀྱི། འགྲོ་བ་རྣམས་ཀྱིས་བྱང་ཆུབ་ཐོབ་པ་འདུས་མ་བྱས་ཀྱི་མཚན་ཉིད་ཐོབ་ཏུ་ཡོད་དོ། །ཞེས་ཐ་སྙད་ཀྱི་ཤེས་པ་ལ་དམིགས་པས། དམིགས་སུ་ཡོད་པ་ན་ཡོད་པར་སྒྲུབ་པ་ནི་སྒྱུ་མ་ལྟ་བུ་ཡིན་ཏེ། འདི་སྐད་དུ། སེམས་ནི་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་ལ་ནི་སྔགས་བཟླས་ནས། །ལེགས་པར་བྱས་པའི་གཟུགས་དག་ལ། །སྦྱོར་བ་གོམས་པས་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །ཞེན་པའི་སེམས་ལ་སྣང་བར་འགྱུར། །དེ་བཞིན་བསོད་ནམས་ཡེ་ཤེས་ལས། བྱུང་བའི་ཚོགས་ཀྱིས་བསྒོས་པའི་སེམས། །སེམས་ཅན་རྣམས་ཀྱི་བསམ་པ་ལ། །བླ་མེད་བྱང་ཆུབ་སྣང་བར་བྱེད། །ཅེས་གསུངས་པ་ལྟ་བུའམ། ཇི་སྐད་དུ་མྱ་ངན་ལས་འདས་པ་ལས་ཆེས་ཁྱད་པར་དུ་འཕགས་པའི་ཆོས་གཞན་ཞིག་ཡོད་ནའང་། དེའང་སྒྱུ་མ་ལྟ་བུ་རྨི་ལམ་ལྟ་བུར་སྨྲའོ། །ཞེས་གསུངས་པ་ལྟ་བུ་སྟེ། གང་ཡོད་པའི་ཐ་སྙད་ཀྱི་ཡུལ་དུ་གཞག་ཏུ་རུང་བ་ཐམས་ཅད་སྒྱུ་མ་ལྟ་བུ་མ་ཡིན་པ་མེད་དོ། །མྱ་ངན་ལས་འདས་པ་རང་གི་ངོ་བོའི་དབང་དུ་བརྗོད་ན་ནི། སྒྱུ་མ་ལྟ་བུའི་མཚན་ཉིད་དུ་བསྒྲུབ་པའི་མཚན་གཞི་མེད་དེ། འོན་ཀྱང་ཆོས་ཐམས་ཅད་ནི་སྒྱུ་མ་ལྟ་བུའོ། །ཞེས་བྱ་བ་ལ་སོགས་པ། ཁྱབ་པ་ངེས་པའི་ཚིག་ཏུ་གསུངས་པ་ཁ་ཅིག་ཚིག་ལྷག་མ་ཅན་དུ་གསུངས་པར་མདོ་ལས་འབྱུང་སྟེ། འདི་སྐད་དུ། ཆུ་བོ་ཐམས་ཅད་གྱ་གྱུར་འབབ། །བུད་མེད་ཐམས་ཅད་སྒྱུ་གཅམ་བཅས། །ནགས་ཚལ་གཏོགས་པ་ཐམས་ཅད་ནི། །གདོན་མི་ཟ་བར་ཤིང་དུ་ངེས། །བྱས་པ་ཐམས་ཅད་མི་རྟག་སྟེ། །ཇི་ཙམ་སྐྱེ་བ་སྡུག་བསྔལ་བཅས། །ཆོས་ཀུན་སྒྱུ་མ་ལྟ་བུའོ། །ཞེས་ཁྱབ་པ་ངེས་པའི་ཚིག་ཏུ་གསུངས་ནས། ཡང་དེ་ཉིད་ཚིག་ལྷག་མ་ཅན་དུ་གསུངས་པ། ཆུ་བོ་ཐམས་ཅད་གྱ་གྱུར་འབབ། །ནེ་ར་འཛའ་ན་དྲང་པོར་འགྲོ། །བུད་མེད་ཐམས་ཅད་སྒྱུ་གཅམ་བཅས། །དགྲ་བཅོམ་མ་ལ་སྒྱུ་གཅམ་མེད། །ནགས་ཚལ་ཐམས་ཅད་ཤིང་དུ་ངེས། །རིན་ཆེན་ནགས་ཚལ་ཤིང་མ་ཡིན། །བྱས་པ་ཐམས་ཅད་མི་རྟག་སྟེ། །བདེར་གཤེགས་སྐུ་མཆོག་རྟག་པར་བཞུགས། །ཇི་ཙམ་སྐྱེ་བ་སྡུག་བསྔལ་བཅས། །མི་རྟོག་ཡེ་ཤེས་སྐྱེས་པ་བདེ། །ཆོས་ཀུན་སྒྱུ་མ་ལྟ་བུ་སྟེ། །མྱ་ངན་འདས་པ་སྒྱུ་འཕྲུལ་བྲལ། །ཞེས་གསུངས་པ་ལྟ་བུའོ། །དེ་བས་ན་གང་མཚན་ཉིད་འཛིན་པར་ཡོད་པ་ནི་ཆོས་ཞེས་དངོས་སུ་བསྒྲུབ་ཏུ་རུང་ལ། མཚན་ཉིད་མེད་པའི་མཚན་ཉིད་ཅན་ཞེས་བརྗོད་པ་ནི་བཏགས་པ་ཙམ་དུ་ཟད་དོ། །གང་ཡང་འདི་སྐད་དུ། ཡེ་ཤེས་ཆེན་པོའི་རྒྱུན་ཙམ་ཡང་མི་དམིགས་ན། ཐུགས་རྗེ་ཆེན་པོའི་མཛད་པ་འབྱུང་བ་བརྟེན་མེད་པའི་ཕྱིར། ཞི་བ་ཕྱོགས་གཅིག་པའི་མྱ་ངན་ལས་འདས་པར་ཇི་ལྟར་མི་འགྱུར། མི་གནས་པའི་མྱ་ངན་ལས་འདས་པ་ཞེས་བྱ་བའི་སྒྲའང་ཇི་ལྟར་འཇུག་ཅེ་ན། དེ་ནི་འདི་ལྟར་སྔོན་གྱི་ལས་ཀྱིས་འཕངས་པ་འདུ་བྱེད་རྣམས་གནས་པའི་དུས་ངེས་པ་མངོན་པར་འགྲུབ་པ་ན། འགྲོ་བ་རྣམས་ཀྱི་སྤྱི་མཐུན་གྱི་ལས་ཀྱི་དབང་གིས། སྣོད་ཀྱི་འཇིག་རྟེན་བསྐལ་པ་ཆེན་པོ་གཅིག་གི་བར་དུ་འཇིགས་ཆགས་སྟོང་གནས་མཐུན་པར་འགྲུབ་པར་འཕེན་ནུས་ན། སངས་རྒྱས་རྣམས་ཀྱིས་ཐུགས་དང་པོ་བསྐྱེད་པ་ནས། རྡོ་རྗེ་ལྟ་བུའི་ཏིང་ངེ་འཛིན་ལ་ཐུགས་གི་བར་དུ། ཕ་རོལ་ཏུ་ཕྱིན་པ་བཅུའི་སྒོ་ནས་འགྲོ་བའི་དོན་དུ་བྱང་ཆུབ་ཀྱི་སྤྱོད་པ་རླབས་པོ་ཆེ་བསྒྲུབ་པའི་དབང་གིས། ཐུགས་རྗེའི་སྤྱོད་པ་འགག་པ་མེད་པར་འཕེན་ནུས་པ་ལ་མི་ནུས་པའི་གནས་ཀྱང་ཅི་ཞིག་ཡོད་ལ། ངོ་མཚར་བའི་གནས་ཀྱང་ཅི་ཞིག་ཡོད། ཡང་འདི་སྐད་དུ། སྣོད་ཀྱི་འཇིག་རྟེན་འགྲུབ་པ་ནི་འགྲོ་བ་རྣམས་ཀྱི་རྒྱུན་རྒྱུད་མ་ཆད་པ་ལ། འཇིག་རྟེན་མངོན་པར་འགྲུབ་པའི་ལས་ད་ལྟར་བྱུང་བ་ཡོད་པའི་དབང་ཡིན་ནོ་ཞེ་ན། དེ་ལྟ་ན་འཇིག་རྟེན་སྟོངས་པའི་ཚེ་འཇིག་རྟེན་མངོན་པར་འགྲུབ་པར་ཇི་ལྟར་འགྱུར། ཡང་འདི་སྐད་དུ། སྔོན་གྱི་འཕེན་པའི་ལས་དང་ད་ལྟར་བྱུང་བའི་ལས་ཆ་མཉམ་པ་ལས་འཇིག་རྟེན་འགྲུབ་བོ་ཞེ་ན། དེ་ལྟ་ན་དགྲ་བཅོམ་པ་སྐྱེས་ནས་མྱ་ངན་ལས་འདས་པ་རྣམས་འདུས་མ་བྱས་ཐོབ་མ་ཐག་ཏུ་ལུས་ཇི་ལྟར་འཇིག་པར་མི་འགྱུར། སྐུ་གདུང་རིང་བསྲེལ་ཀྱང་ཅི་ལ་ལུས། དེ་བས་ན་སྔོན་གྱི་ལས་ཀྱི་ཤུགས་དྲག་པོས་འཕངས་པ་ནི། ད་ལྟར་བྱུང་བའི་ལས་ལ་ལྟོས་མི་དགོས་སོ། །གལ་ཏེ་ད་ལྟར་བྱུང་བའི་ལས་ཀྱི་རྩལ་དྲག་པོ་ཡོད་ནའང་། སྔོན་གྱི་ལས་ཀྱི་རྣམ་པར་སྨིན་པ་ལྡོག་ནུས་ནའང་འགལ་བ་མེད་དོ། །གཞན་ཡང་འདི་ལྟར། དྲང་སྲོང་འགའི་སྨོན་ལམ་གྱི་མཐུས། དྲང་སྲོང་ཤི་ནས་ལོ་བརྒྱའམ་སྟོང་འདས་ཀྱང་རུང་སྟེ། གང་དུ་སྨོན་ལམ་བཏབ་པའི་ཕྱོགས་དེར་དགེ་ཤིས་དང་གནོད་སྡིག་འབྱུང་བ་འཕེན་ནུས་ན། སངས་རྒྱས་ཐམས་ཅད་ཀྱི་ས་དང་པོ་སྨོན་པའི་ཐུགས་བསྐྱེད་པ་ནས་ཉེ་བར་བཟུང་སྟེ། ས་དགུ་པ་སྨོན་ལམ་ཡོངས་སུ་རྫོགས་པའི་མཐར་ཐུག་པར་སྨོན་ལམ་ཚད་མེད་པ་བསྒྲུབ་པའི་མཐུས། གདུལ་བྱ་རྣམས་ལ་ཇི་ལྟར་འཚམ་པའི་འཕྲུལ་པ་སྣང་བར་འཕེན་ནུས་པ་འདི་ལ། དེ་ལྟར་མི་རུང་བའི་གནས་ཀྱང་ཅི་ཞིག་ཡོད་ལ། ངོ་མཚར་བའི་གནས་ཀྱང་ཅི་ཞིག་ཡོད། ཡང་འདི་སྐད་དུ། དྲང་སྲོང་གི་སྨོན་ལམ་གྱི་རྟེན་ཡུལ་དང་སེམས་ཅན་ལ་བྱིན་གྱིས་བརླབས་ཏེ་བཞག་པ་ཡིན་ནོ་ཞེ་ན། ཚུལ་འདི་ལ་བཀག་མེད་དེ། སྨོན་ལམ་འདེབས་པ་པོ་རང་གི་རྒྱུད་ལ་མི་རྟེན་ན། སེམས་ཅན་ལ་རྟེན་བཅས་པ་འདོད་པ་ཉིད་ཡིན་ཏེ། འདི་ལྟར་སྙིང་རྗེའི་ཡུལ་ཡང་སེམས་ཅན་ཡིན་ཏེ། འདི་སྐད་དུ་འགྲོ་བ་རྣམས་ཀྱི་ཉོན་མོངས་པའི་ནད་མ་སོས་ཀྱི་བར་དུ། བྱང་ཆུབ་སེམས་དཔའི་རྣམས་ཀྱི་སྙིང་རྗེའི་སྙུན་མི་གདངས་སོ། །ཞེས་འབྱུང་བ་དང་། སྨོན་ལམ་གྱི་མཐའ་བསྟན་པ་ལས། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པར། །བདག་གི་སྨོན་ལམ་མཐའ་ཡང་དེ་བཞིན་ནོ། །ཞེས་གསུངས་པ་ལྟ་བུ་ཡིན་ནོ། །ཡང་འདི་སྐད་དུ། སྣོད་ཀྱི་འཇིག་རྟེན་དང་བཅུད་ཀྱི་འཇིག་རྟེན་དུ་བཅས་པ་རྣམས། རྡུལ་ཕྲ་མོ་རེ་རེ་དང་བ་སྤུའི་བུ་ག་རེ་རེ་ལའང་། ཐུགས་རྗེ་ཆེན་པོའི་བྱིན་བརླབས་གྲངས་མེད་པ་འཇུག་གོ། །ཞེས་ཀྱང་བཤད་པ་ཡིན་ནོ། །འདི་དག་ཙམ་དུ་བཤད་པ་འདི་ནི་རིགས་པ་ཙམ་དུ་མ་ཟད་ཀྱི། ངེས་པའི་དོན་གྱི་མདོ་རྣམས་ལས་ཀྱང་གསལ་བར་མང་དུ་འབྱུང་སྟེ། འདི་སྐད་དུ། འདུས་མ་བྱས་ཀྱིས་ཕྱེ་བ་ནི་འཕགས་པའི་གང་ཟག་གོ། །ཞེའམ། སངས་རྒྱས་གཟུགས་སུ་མི་བལྟ་མཚན་དང་ནི། རིགས་དང་རྒྱུད་དུ་མི་བརྟག་སྒྲ་དང་ནི། །ཆད་པར་འགྱུར་བ་མ་ཡིན་སེམས་དང་ནི། །རྣམ་ཤེས་ཡིད་ཀྱིས་རབ་ཏུ་ཕྱེ་མ་ཡིན། །ཆོས་ཉིད་གང་ཡིན་དེ་ནི་བཅོམ་ལྡན་འདས། །ཞེའམ། ཇི་སྲིད་མཚན་ཉིད་རྣམ་བཞག་པ། །དེ་དག་བྱིས་པའི་སྤྱོད་ཡུལ་ཏེ། །གང་ཞིག་མཚན་ཉིད་ཀུན་མེད་པའི། །སངས་རྒྱས་རྣམས་ནི་མི་མཐོང་ངོ་། །ཞེའམ། དེ་བཞིན་གཤེགས་པ་དགེ་ཆོས་ཟག་མེད་ནི། །ཆོས་ཀྱི་སྐུ་མཆོག་ཡིན་ཏེ་དེ་ལ་ནི། །དེ་བཞིན་ཉིད་མེད་དེ་བཞིན་གཤེགས་མེད་དེ། །འཇིག་རྟེན་དག་ན་གཟུགས་བརྙན་ཀུན་ཏུ་སྣང་། །ཅེའམ། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་དག །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེའམ། གང་གིས་ང་ལ་གཟུགས་སུ་མཐོང་། །གང་གིས་ང་ལ་སྒྲར་ཤེས་པ། །ལོག་པར་སྤོང་བ་ཞུགས་པ་སྟེ། །སྐྱེ་བོ་དེས་ནི་ང་མི་མཐོང་། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་དུ་ནི་སངས་རྒྱས་བལྟ། །ཞེས་བྱ་བ་ལ་སོགས་པ་རྒྱ་ཆེར་གསུངས་ཏེ། དེ་བས་ན་སངས་རྒྱས་ཀྱི་རང་གི་ངོ་བོ་ནི། ཆོས་ཀྱི་དབྱིངས་རྣམ་པར་དག་པ་ཉིད་ཡིན་པར་ལུང་དང་རིགས་པ་གཉིའ་གས་མངོན་ནོ། །དེ་ལྟ་ན་སེམས་ཅན་དང་སངས་རྒྱས་རང་བཞིན་མཉམ་སྟེ། ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་པའོ། །ཆོས་ཐམས་ཅད་ནི་རང་བཞིན་གྱིས་མྱ་ངན་ལས་འདས་པའོ། །ཆོས་ཐམས་ཅད་ནི་རང་བཞིན་གྱིས་འོད་གསལ་བའོ། །ཆོས་ཐམས་ཅད་ནི་ཡེ་ནས་མངོན་པར་རྫོགས་པར་སངས་རྒྱས་པའོ། །གང་གིས་དོན་འདི་ལྟ་བུ་རྟོགས་ཏེ། བདག་དང་སངས་རྒྱས་དབྱེར་མེད་པའི་བློ་དང་ལྡན་ཞིང་། ཕུང་པོ་ལྔ་སྒྱུ་མ་ཙམ་དུ་སྣང་བའང་དེ་བཞིན་གཤེགས་པ་ཉིད་ཡིན་པའི་བློ་དང་ལྡན་ན། ལམ་གྱི་མཆོག་ཡིན་ཏེ། གང་གིས་ཁྱད་པར་ཡོད་པར་མཐོང་བ་ནི་ལམ་གྱི་མཆོག་མ་ཡིན་ནོ། །དོན་གྱི་ཚུལ་འདི་ལྟ་བུ་ནི་གསང་སྔགས་ཀྱི་ཚུལ་འབའ་ཞིག་ཏུ་མ་ཟད་ཀྱི། ངེས་པའི་དོན་གྱི་མདོ་སྡེ་ལས་ཀྱང་གསུངས་པ་ཡིན་ཏེ། འདི་ལྟར་འཕགས་པ་སྡོང་པོས་བརྒྱན་པའི་མདོ་ལས། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་བདེ་བར་གཤེགས་པར་འགྱུར། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་དག །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་གསུངས་པ་ལྟ་བུ་ཡིན་ཏེ། ལ་ལ་དག་ཕུང་པོ་རྒྱལ་བའི་དཀྱིལ་འཁོར་དུ་བསྟན་པ་ལ་སྐུར་པ་རྣམས། འདི་ལྟ་བུའི་དོན་སྟོན་པའི་མདོ་སྡེ་རྣམས་ལའང་མཉམ་དུ་བསྐུར་དགོས་སོ། །ཡང་ལམ་གྱི་དོན་དུ་གཉེན་པོའི་དོན་ལ་དགོངས་ནས་ཀུན་བརྟགས་ཙམ་བསྒོམས་པར་བསྟན་པ་ཡིན་པར་འདོད་ན། གོང་དུ་སྨོས་པའི་ཀུན་བརྟགས་པ་དང་། དབང་འབྱོར་བའི་གཟུགས་ལ་སོགས་པ་བསྟན་པ་དང་། གཞན་ཡང་། ཀུན་ཏུ་རྟོག་པ་དང་ཀུན་ཏུ་བརྟགས་པའི་མཚན་ཉིད་འོག་ནས་འཆད་དོ། །ཡང་གཞན་དག་གིས་བརྒལ་བ། ཉོན་མོངས་པ་རྣམས་ལ་སྤང་བར་བྱ་བའི་རྫས་མེད་ཅིང་། ཆོས་ཐམས་ཅད་རང་བཞིན་གྱིས་མྱ་ངན་ལས་འདས་པ་ཡིན་ན། འོ་ན་འགྲོ་བ་རྣམས་གང་གིས་བཅིངས་ཏེ་འཁོར་བའི་རྒྱ་མཚོར་སྡུག་བསྔལ་སྣ་ཚོགས་མྱོང་བར་འགྱུར། དེ་ལ་འདི་བརྗོད་པར་བྱ་སྟེ། འདི་ལྟར་འཆིང་བར་བྱེད་པ་མེད་ཀྱང་བཅིངས་པ་ལྟར་སྣང་བ་ལས། སྡུག་བསྔལ་མྱོང་བར་སྣང་བར་འགྱུར་ཏེ། དཔེར་ན་རྒྱལ་པོའི་བུའམ་ཁྱིམ་བདག་གི་བུ་གཞོན་ནུ་ཤེད་མ་བྱེ་མ་འདོད་པས་རྒྱགས་ཤིང་མྱོས་པ་ཞིག །རྩེད་མོའི་ཕྱིར་རང་གི་ཁྱིམ་དུ་ཞུགས་ཏེ། དེས་བང་མཛོད་ན་ཟ་མ་ཏོག་གི་ནང་ན་ནོར་བུ་རིན་པོ་ཆེ་རས་དམར་པོའི་ནང་དུ་དྲིལ་ཏེ་བཞག་པའང་ཕྱུང་སྟེ་བཏུང་བའི་ནང་དུ་བསྒྱུར། ཟ་མ་ཏོག་གི་ཐག་པའང་འབྲས་ཆན་གྱི་ནང་བསྒྱུར། དེ་བཞིན་དུ་བྱ་བ་མང་པོས་གཡེན་སྤྱོས་ཤིང་རྩེ་བ་ལས། དེ་ཉིད་ཀྱི་རྐྱེན་གྱིས་བཀྲེས་པར་གྱུར་ནས་ཟས་ཚོལ་དུ་ཕྱིན་པ་ལས། འབྲས་ཆན་གྱི་ནང་ན་སྦྲུལ་འདུག་པར་མཐོང་། དེ་ནས་རབ་ཏུ་སྐྲག་སྟེ་ཕྱིར་ལོག་ནས་བཏུང་བ་ཚུལ་དུ་ཕྱིན་པ་ན་བཏུང་པ་ཁྲག་ཏུ་གྱུར་པར་མཐོང་ནས་ཡང་ཕྱིར་ལོག་སྟེ་སྐྲག་པ་དང་། བཀྲེས་པ་དང་སྐོམ་པས་ཉེན་པར་གྱུར་ནས་ངུ་ཞིང་ང་རོ་ཆེན་པོ་འདོན་ཞིང་འདུག་པ་ལས། ཉེ་གནས་ཞིག་གིས་དྲུང་དུ་ཕྱིན་ཏེ་སྨྲས་པ། བུ་ཁྱོད་ཅིའི་ཕྱིར་དུ། ང་བཀྲེས་ཤིང་སྐོམ་ནས་ཟས་ཚོལ་དུ་ཕྱིན་ན། འབྲས་ཆན་གྱི་ནང་ན་ནི་སྦྲུལ་འདུག །བཏུང་བ་ནི་ཁྲག་ཏུ་གྱུར་ནས་འཇིགས་ཤིང་སྐྱུག་བྲོ་ལ་བཀྲེས་ཤིང་སྐོམ་ཡང་བཟའ་བའི་དབང་མེད་དེ་ངུའོ། །དེ་ནས་ཉེ་གནས་དེས་གཞོན་ནུ་དེ་གདམས་ངག་གི་གནས་ཅུང་ཟད་ཀྱང་མེད་པ་ཞིག་ཡིན་ན་ནི། འདི་སྐད་དུ་བུ་མ་ངུ་ཤིག །ངས་སྦྲུལ་ཡང་བསལ། ཁྲག་ཀྱང་བསལ་ལ་དྲི་མ་དང་བྲལ་བའི་བཟའ་བཏུང་སྦྱིན་ནོ། །ཞེས་སྨྲས་ཏེ། ཐག་པ་དང་ནོར་བུ་བསལ་ནས་བཟའ་བཏུང་བྱིན་པ་ན། གཞོན་ནུ་དེ་འདི་སྙམ་དུ། ཉེ་གནས་འདིས་དྲི་མ་བསལ་ནས་དྲི་མ་དང་བྲལ་བའི་བཟའ་བཏུང་སྦྱིན་ནོ་སྙམ་དུ་བསམས་ཏེ་སྡུག་བསྔལ་གྱི་འཆིང་བ་ལས་གྲོལ་ལོ། །གལ་ཏེ་གཞོན་ནུ་དེ་གདམས་ངག་བསྟན་པའི་གནས་ཅུང་ཟད་ཡོད་པ་ཞིག་ཡིན་ན་ནི། འདི་སྐད་དུ། འདི་ན་སྦྲུལ་ག་རེ། འདི་ནི་ཁྱོད་རང་གིས་བཞག་པའི་ཐག་པ་ཡིན་ན། འདི་ན་ཁྲག་ག་རེ། འདི་ཁྱོད་རང་གིས་བཞག་པའི་ནོར་བུའི་འོད་ཡིན་ན། ཞེས་བརྗོད་པ་ན། གཞོན་ནུ་དེས་བཟའ་བཏུང་རྣམས་གདོད་མ་ནས་དྲི་མ་དང་བྲལ་བར་ཤེས་ནས་བཅིངས་པ་ལས་གྲོལ་ལོ། །དེ་བཞིན་དུ་ཆོས་ཐམས་ཅད་སྒྱུ་མ་ལྟ་བུ་ཡིན་ཡང་། སེམས་ཅན་རྣམས་ཀྱིས་དེ་ལྟར་མ་ཤེས་ཏེ་དངོས་པོར་ལྟ་བའི་དབང་གིས་ཉོན་མོངས་པས་བཅིངས་བར་སྣང་ཞིང་སྡུག་བསྔལ་མྱོང་བར་སྣང་སྟེ། འདི་ལྟར་སྒྱུ་མ་ཙམ་དུ་སྣང་བ་ལ་དངོས་པོར་ཞེན་ཏོ། །དེ་ལས་མཚན་མར་འཛིན་ཏོ། །དེ་ལས་སྨོན་ཆགས་འབྱུང་སྟེ་ཉོན་མོངས་པ་རྣམས་ཀུན་ནས་འཁྲུག་གོ། །དེའི་དབང་གིས་ལས་སྣ་ཚོགས་མངོན་པར་འདུ་བྱེད་དོ། །དེའི་དབང་གིས་སྡུག་བསྔལ་གྱི་ཕུང་པོ་འབའ་ཞིག་པ་འདི་འབྱུང་བར་སྣང་བར་འགྱུར་རོ། །སྣང་བའི་དབང་གིས་ཡང་དངོས་པོར་ཞེན་པ་འབྱུང་བ་ལ་སོགས་པ་འབྱུང་བ་སྔ་མ་བཞིན་ནོ། །ཡང་འདི་སྐད་དུ། དེ་ལྟར་ན་ཉོན་མོངས་པ་དང་ལས་དང་སྡུག་བསྔལ་གྱི་མཚན་ཉིད་རྒྱུ་དང་འབྲས་བུའི་ཚུལ་དུ་འབྱུང་བ་འདི་ཉིད་ཁོ་ན་དངོས་པོ་རྣམས་ཀྱི་ངོ་བོ་ཉིད་ཡིན་མོད། རྫས་སུ་ཡོད་པའང་དེ་ཉིད་ཡིན་མོད་ཞེ་ན། འདི་ལྟར་དངོས་པོར་སྣང་བ་རྣམས་ལ་དངོས་གཞི་གཞན་མི་ཚོལ། དངོས་གཞིའི་ཆ་གཞན་མི་ཚོལ། ཡོན་ཏན་གྱི་ཆ་གཞན་མི་ཚོལ། རྟེན་གཞི་གཞན་མི་ཚོལ་ན། མཚན་མར་སྣང་བ་ཙམ་ལ་མཚན་ཉིད་འདོགས་ན་འདོགས་སུ་ཟད་དེ་བཟོད་པར་བྱའོ། །དེ་ལ་དངོས་གཞན་ཚོལ་བ་གང་ཞེ་ན། དཔེར་ན་རས་ཡུག་སྔོན་པོ་མཐོང་བ་ན། རྣམ་པར་ཤེས་པ་ཉིད་སྔོན་པོའི་རྣམ་པར་སྣང་བ་ཙམ་མ་གཏོགས་པ། དོན་རང་གི་མཚན་ཉིད་འབྱུང་བ་ཆེན་པོ་ལས་གྲུབ་པ་བྱ་བ་བྱེད་ནུས་ཤིང་རྫས་སུ་ཡོད་པའི་དངོས་གཞན་ཤེས་པར་བྱ་བ་ཡོད་དོ། །ཞེས་ཟེར་བ་ལྟ་བུའོ། །དེ་ལ་དངོས་གཞིའི་ཆ་ལས་གཞན་སྒྲུབ་པར་བྱེད་པ་གང་ཞེ་ན། འདི་སྐད་དུ་སྣང་བ་འདི་ནི་རས་ཡུག་གི་སྔོན་པོ་ཙམ་ཡིན་གྱི། སྔོན་པོའི་ཆ་གཞན་བཻཌཱུརྻ་དང་ཨིནྡྲ་ནི་ལ་དང་ལོ་མ་སོགས་པ་སྔོན་པོའི་ཆ་གཞན་དང་རས་ཡུག་འདི་ཉིད་ཀྱིའང་སྒྲིབ་གཡོགས་ཀྱི་ཆོད་པ་ཙམ་སྣང་བར་ཟད་དེ་སྒྲིབ་གཡོགས་ཀྱིས་ཆོད་པ་རྣམས་ཀྱི་སྔོན་པོའི་ཆ་མ་མཐོང་བ་ཤེས་པར་བྱ་བ་གཞན་ཡོད་དོ། །ཞེས་ཟེར་བ་ལྟ་བུའོ། །དེ་ལ་ཡོན་ཏན་གྱི་ཆ་གཞན་སྒྲུབ་པར་བྱེད་པ་གང་ཞེ་ན། འདི་སྐད་དུ། འདི་ནི་རས་ཡུག་གི་ཁ་དོག་དང་དབྱིབས་ཙམ་མཐོང་བར་ཟད་དེ། འདིའི་རིགས་དང་རྒྱུ་དང་འབྱུང་ཁུང་དང་བཟོད་པ་ལྕི་ཡང་དང་འཇམ་རྩུབ་དང་ནུས་པ་དང་རིན་ཐང་ལ་སོགས་པ་ཤེས་པར་བྱ་བ་གཞན་ཡོད་དོ། །ཞེས་ཟེར་བ་ལྟ་བུའོ། །དེ་ལ་རྟེན་གཞི་གཞན་སྒྲུབ་པར་བྱེད་པ་གང་ཞེ་ན། འདི་ལྟར་ལོ་མ་སྔོན་པོ་ལ་རས་ཡུག་སྔོན་པོར་མཐོང་བའི་ཚེ། འདི་སྐད་དུ། འདི་ནི་རས་ཡུག་སྔོན་པོ་ལྟ་བུར་སྣང་བ་སྟེ། འདིའི་དངོས་གཞི་ནི་ལོ་མ་སྔོན་པོ་ཡིན་ཏེ། མ་ཤེས་པ་ཤེས་པར་བྱ་བ་གཞན་ཡོད་དོ། །ཞེས་ཟེར་བ་ལྟ་བུའོ། །འདི་ལྟར་མཚན་ཉིད་གཞན་སྒྲུབ་པར་བྱེད་པ་འདི་རྣམས་ནི། གང་ཟག་དང་ཆོས་ཀྱི་རྫས་ཡོད་པར་འདོད་པ་ལས་བྱུང་བ་ཡིན་ཏེ། དེ་ལ་དངོས་གཞི་ཆ་གཞན་སྒྲུབ་པར་བྱེད་པ་དང་། ཡོན་ཏན་གྱི་ཆ་གཞན་སྒྲུབ་པར་བྱེད་པ་གཉིས་ནི། གང་ཟག་གི་རྫས་འདོད་པ་ལས་བྱུང་ངོ་། །དངོས་གཞི་གཞན་སྒྲུབ་པར་བྱེད་པ་དང་། རྟེན་གཞི་གཞན་སྒྲུབ་པར་བྱེད་པ་གཉིས་ནི་ཆོས་ཀྱི་རྫས་ཡོད་པར་འདོད་པ་ལས་འབྱུང་སྟེ། འདི་ལྟར་གང་ཟག་གི་རྫས་འདོད་པ་རྣམས་རས་ཡུག་དམིགས་པ་ན། དེ་རིགས་མི་མཐུན་པ་བུམ་པ་ལ་སོགས་ལས་ཀྱང་བཟློག །རིགས་མཐུན་པ་རས་ཡུག་གཉིས་པ་ལ་སོགས་པ་ལས་ཀྱང་བཟློག་ནས། རས་ཡུག་གི་ངོ་བོ་ཉིད་གཅིག་རྫས་སུ་སྒྲུབ་པར་བྱེད་པ་ན། ཁ་དོག་དང་རེག་བྱ་ལ་སོགས་པ་ཐམས་ཅད་ངོ་བོ་དེའི་ཡོན་ཏན་གྱི་བྱེ་བྲག་ཡིན་པར་འཛིན་ཏེ། དེ་བས་ན་ངོ་བོ་གཅིག་གི་ཡོན་ཏན་གྱི་ཆ་གཅིག་མཐོང་ཡང་ཆ་གཞན་མ་མཐོང་བར་འགྱུར་རོ། །བུམ་པ་ལ་སོགས་པ་གཞན་དང་རས་ཡུག་གཉིས་པ་ལ་སོགས་པ་གཞན་ཡང་ངོ་བོ་སོ་སོ་རེ་རེ་ཡིན་པས། དེ་རྣམས་ལ་ཡོད་པའི་སྔོན་པོའང་། རས་ཡུག་གི་སྔོན་པོ་དང་ཐ་དད་དེ་རས་ཡུག་གི་སྔོན་པོའི་དངོས་གཞི་ལས་ཆ་གཞན་ཡིན་ནོ། །དེ་བས་གང་ཟག་གི་རྫས་ཞིག་ནས་ཆོས་ཀྱི་རྫས་ཙམ་སྒྲུབ་པར་བྱེད་པ་ན། ཆ་དེ་གཉིས་ལྡོག་སྟེ། འདི་ལྟར་རས་ཡུག་སྔོན་པོ་མཐོང་ཡང་རུང་ལོ་མ་སྔོན་པོ་མཐོང་ཡང་རུང་སྟེ། རྣམ་པར་ཤེས་པ་སྔོན་པོའི་རྣམ་པར་སྐྱེས་པ་ན། དེའི་ངོ་བོ་ཉིད་མ་ལུས་པར་མཐོང་བ་སྟེ། དངོས་གཞིའི་ཆ་གཞན་མ་མཐོང་བའང་མེད་ལ་ཡོན་ཏན་གྱི་ཆ་གཞན་མ་མཐོང་བའང་མེད་དོ། །ཞེས་བྱ་བ་འདིར་འགྱུར་རོ། །དེ་ལ་ཆོས་ཀྱི་རྫས་འདོད་པ་ན་ཕྱི་རོལ་གྱི་དོན་རྫས་སུ་འདོད་པའི་ཚེ་ནི། དངོས་གཞི་གཞན་སྒྲུབ་པར་བྱེད་པར་འགྱུར་ཏེ། གོང་དུ་བརྗོད་པ་བཞིན་དུ་རས་ཡུག་སྔོན་པོ་མཐོང་བ་ན། རྣམ་པར་ཤེས་པ་ཉིད་སྔོན་པོར་སྣང་བ་ཙམ་མ་གཏོགས་དོན་རང་གི་མཚན་ཉིད་དོན་བྱེད་ནུས་པ་རྫས་སུ་ཡོད་དོ། །ཞེས་འདོད་པར་འགྱུར་རོ། །གང་གི་ཚེ་ཕྱི་རོལ་གྱི་དོན་རྫས་སུ་མེད་པར་འདོད་ལ་རྣམས་པར་ཤེས་པ་རྫས་སུ་འདོད་པ་དེའི་ཚེ། འདི་སྐད་དུ་རས་ཡུག་སྔོན་པོ་མཐོང་ན་ཁྱེད་འདོད་པ་ལྟར་ཤེས་པ་ལས་གུད་ན་རྫས་སུ་ཡོད་པ་ནི་མ་ཡིན་ཏེ། འོན་ཀྱང་རྣམ་པར་ཤེས་པ་ཉིད་སྔོན་པོ་ལྟ་བུར་སྣང་བ་ན། སྣང་བའི་དངོས་གཞི་ཡང་དག་པ་མ་ཡིན་པའི་ཀུན་ཏུ་རྟོག་པའི་མཚན་ཉིད་གཞན་རྫས་སུ་ཡོད་པའི་མཚན་ཉིད་ཤེས་པར་བྱ་བ་ཡོད་དོ། །ཞེས་བསྒྲུབ་པར་འགྱུར་རོ། །འདི་ལྟ་བུ་དག་སྒྲུབ་པར་མི་བྱེད་ན་མཚན་མ་སྣང་བ་ཙམ་ལ་མཚན་ཉིད་དུ་འདོགས་པ་ཙམ་ལ་སྐྱོན་དུ་མི་གཟུང་ངོ་། །ཡང་གཞན་དག་གིས་བརྒལ་བ། ཆོས་ཐམས་ཅད་ངོ་བོ་ཉིད་ཀྱིས་སྟོང་པ་ཡིན་ན། སྣང་བའི་གནས་ཀྱང་ཅི་ཞིག་ཡོད། འཁྲུལ་པའི་གནས་ཀྱང་ཅི་ཞིག་ཡོད། སྣང་བ་ལ་ཡང་སྣང་གཞི་དགོས་ལ། འཁྲུལ་པ་ལ་ཡང་འཁྲུལ་གཞི་དགོས་པ་མ་ཡིན་ནམ། དེ་ལ་འདི་བརྗོད་པར་བྱ་སྟེ། སྣང་བ་དང་འཁྲུལ་པ་ལ་གཞི་མེད་ཀྱང་། རྐྱེན་ཉེ་བར་གནས་ན་སྣང་དུ་རུང་ཞིང་འཁྲུལ་དུ་རུང་ངོ་། །དངོས་པོ་རྣམས་ཀྱི་འགལ་བ་ནི་གཞི་དངོས་པོར་མ་གྲུབ་པ་ལ། ད་ལྟར་དངོས་པོར་གྲུབ་པ་ཞིག་བྱུང་ན་འགལ་གྱི། སྨིག་རྒྱུ་ལྟར་སྣང་བ་ཉིད་ན་དངོས་པོ་གཟོད་མ་ནས་ཐ་མར་མ་གྲུབ་པ་བཞིན་ནོ། །ཡང་གཞི་ངོ་བོ་ཉིད་མེད་པར་རྟོགས་ལ་འཕྲལ་དུ་དངོས་པོར་འཁྲུལ་ན་ནི་འགལ་གྱི། ངོ་བོ་ཉིད་མེད་པ་ཡིན་ཡང་དེ་ལྟར་མ་རྟོགས་ཤིང་གོམས་པར་མ་བྱས་པ་ལ་འགལ་བ་ཅི་ཞིག་ཡོད། འོ་ན་སྣང་འཁྲུལ་གཞི་མི་དགོས་ན་རྐྱེན་གང་ཡིན་ཞེ་ན། འདི་གཉིས་ནི་གཅིག་གི་རྒྱུར་གཅིག་འགྱུར་ཏེ། འཁྲུལ་པའི་དབང་གིས་མེད་བཞིན་དུ་སྣང་ངོ་། །མེད་བཞིན་དུ་སྣང་བའི་དབང་གིས་བློ་དེ་འཁྲུལ་པ་ཡིན་ནོ། །འོ་ན་འདི་གཉིས་དང་པོ་གང་སྔ་ཞེ་ན། འདི་དག་ནི་འགོ་མཉམ་སྟེ། དཔེར་ན་རྨི་ལམ་ན་ཕྱི་རོལ་གྱི་དོན་མེད་བཞིན་དུ་དོན་དུ་སྣང་བའི་བློ་སྐྱེས་པ་ན། གང་གི་ཚེ་དོན་མེད་བཞིན་དུ་དོན་དུ་སྣང་བའི་རྣམ་པར་ཤེས་པ་སྐྱེས་པའི་སྐད་ཅིག་མ་དང་པོ་དེ་ཉིད་ཀྱི་ཚེ། བློ་འཁྲུལ་པར་སྐྱེས་པ་ཡིན་ནོ། །གང་གི་ཚེ་བློ་འཁྲུལ་པར་སྐྱེས་པའི་སྐད་ཅིག་མ་དང་པོ་དེ་ཉིད་ཀྱི་ཚེ། དོན་དུ་སྣང་བའི་རྣམ་པ་དང་བཅས་པར་སྐྱེས་པ་ཡིན་ནོ། །དེ་བས་ན་འདི་གཉིས་ནི་འགོ་མཉམ་མོ། །དེ་བཞིན་དུ་འགྲོ་བའི་འཁྲུལ་སྣང་ཐམས་ཅད་ཕན་ཚུན་འགོ་མཉམ་མོ། །འོ་ན་འཁྲུལ་སྣང་འདི་གང་ཞིག །གང་ན་དུས་ཇི་ཙམ་ནས་འཁྲུལ་ཅེ་ན། རེ་ཞིག་ཐ་སྙད་ཙམ་དུ་ནི། གང་སུ་ཞིག་འཁྲུལ་ན་ནི་རྒྱུད་དྲུག་གི་སེམས་ཅན་རྣམས་འཁྲུལ་ལོ། །གང་ན་འཁྲུལ་ན་ནི་ཁམས་གསུམ་གྱི་འཁོར་བ་ན་འཁྲུལ་ལོ། །དུས་ཇི་ཙམ་ནས་འཁྲུལ་ན་ནི་ཐོག་མ་མེད་པའི་དུས་ནས་འཁྲུལ་ལོ། །ཞེས་ཐ་སྙད་ཙམ་དུ་བརྗོད་པར་ཟད་དེ། དངོས་སུ་དེ་ལྟར་མ་ཡིན་ནོ། །ཇི་ལྟར་ཞེ་ན། ཡུལ་དང་དུས་དང་གང་ཟག་ཏུ་སྣང་བ་ཉིད་འཁྲུལ་སྣང་ཡིན་ཏེ། དཔེར་ན་རྨི་ལམ་ན་དོན་མེད་བཞིན་དུ་དོན་དུ་སྣང་བའི་བྱེ་བྲག་ནི། ཡུལ་དང་དུས་དང་གང་ཟག་ཏུ་སྣང་བའི་སྒོ་ནས། བདེ་བ་དང་སྡུག་བསྔལ་ཉམས་སུ་མྱོང་བར་སྣང་སྟེ། འདི་ལྟར་གང་ཟག་བདག་དང་གཞན་རྣམས། ཡུལ་ཡིད་དུ་འོང་བམ་མི་འོང་བའི་ས་ཕྱོགས་ཞིག་ན་གནས་ཤིང་བདེ་བའམ་སྡུག་བསྔལ་ཉམས་སུ་མྱོང་བར་སྤྱོད་པ་དེ་དག །དུས་ཡུན་རིང་མོའམ་ཐུང་ངུ་ན་ཞིག་ན་གནས་པར་སྣང་མོད་ཀྱི། སྣང་ཙམ་ཉིད་ན་ཡུལ་ཡང་མེད། གང་ཟག་ཀྱང་མེད། དུས་ཀྱང་མེད། བདེ་སྡུག་ཀྱང་མེད་དོ། །འོན་ཀྱང་མེད་བཞིན་དུ་ཡོད་པར་ལྟར་སྣང་ངོ་། །དེ་བཞིན་དུ་མ་རིག་པའི་གཉིད་ཀྱི་དབང་དུ་གྱུར་པའི་འགྲོ་བ་རྣམས། ཐོག་མ་མེད་པའི་དུས་ཅན་ནས་འཁོར་བར་སྣང་མོད་ཀྱི། རང་གི་ངོ་བོ་ནི་ཀུན་གཞི་སེམས་ཀྱི་སྐད་ཅིག་མ་གཅིག་ལ། འཇིག་རྟེན་མཐའ་ཡས་པར་སྣང་སྟེ། དེ་ཡང་གཟུགས་བརྙན་མེ་ལོང་གི་ཕུག་ན་གནས་པར་ཡང་སྣང་། ཁ་ན་གནས་པར་ཡང་སྣང་མོད་ཀྱི། མེ་ལོང་ལ་ཕུག་མེད་པས་གཟུགས་བརྙན་ལ་གནས་ཐ་དད་མེད་དོ། །དེ་བཞིན་དུ་སེམས་ལ་གནས་ཐ་དད་མེད་པས་འཇིག་རྟེན་ལ་རྒྱ་ཆེ་ཆུང་མེད་དོ། །དུས་ཀྱང་རྨི་ལམ་ན་དུས་ཆུ་ཚོད་གཅིག་ཙམ་ཡང་མ་འདས་པར། བསྐལ་པའམ་བསྐལ་པ་ལས་ལྷག་པའི་ཚེ་ཐུབ་པར་རྨིའང་དུས་ཡུན་རིང་མོ་འདས་པའང་མེད་ལ། བྱང་ཆུབ་སེམས་དཔའ་རྣམས་ཞག་བདུན་གྱིས་བསྐལ་པ་ཆེན་པོ་འདའ་བར་བྱིན་གྱིས་རློབས་ཏེ། ཞག་བདུན་ཡང་བློའི་སྣང་བ་ཙམ་བསྐལ་པ་ཆེན་པོའང་བློའི་སྣང་བ་ཙམ་སྟེ། དུས་ཡུན་རིང་མོ་ཐུང་ངུར་བསྡུས་པ་མེད་དོ། །ཞག་བདུན་ལ་བསྐལ་པ་གྲངས་མེད་པར་བྱིན་གྱིས་རློབ་སྟེ། དེའི་ཚེའང་དུས་ཐུང་ངུ་དུས་རིང་པོར་བསྲིང་པ་མེད་དོ། །དེ་བཞིན་དུ་འཁོར་བ་ཐོག་མ་མེད་པའི་དུས་ཅན་དུ་འདོད་པ་རྣམས་ཀྱང་། བློ་དུས་ལྟར་འཁྲུལ་པ་ཙམ་དུ་ཟད་དོ། །འོ་ན་སྣང་བ་ཐམས་ཅད་འཁྲུལ་སྣང་ཡིན་ན། འཁྲུལ་པའི་བློ་ལ་ཚུལ་ཇི་ལྟར་སྣང་བར་འགྱུར་ཞེ་ན། འདི་བརྗོད་པར་བྱ་སྟེ། བྱང་ཆུབ་ཀྱི་སེམས་བསྒོམ་པ་ལས། ཀུན་ཏུ་རྟོག་ཅན་ཡང་དག་མ་ཡིན་ཀུན་ཏུ་རྟོག་པས་རྩོལ་མེད་ཉམས། །བློ་གྲོས་ཕྱིན་ཅི་ལོག་ཏུ་གྱུར་ཅིང་མ་རིག་རྐྱེན་གྱི་དབང་སོང་བས། །སེམས་དང་སེམས་ལས་བྱུང་བ་དེ་ཉིད་ལུས་གསུམ་དོན་དུ་སྣང་བ་ཡིན། །ཞེས་གསུངས་པ་ལྟ་བུ་སྟེ། འགྲོ་བ་རྣམས་ཀྱི་སེམས་ནི་མ་རིག་པའི་དབང་དུ་སོང་བས། ཐོག་མའི་རྩོམ་པ་མེད་པ་ནས་རང་བཞིན་གྱིས་ཀུན་ཏུ་རྟོག་པ་ཅན་དུ་གྱུར་ཅིང་། ཡང་དག་པ་མ་ཡིན་པའི་ཀུན་ཏུ་རྟོག་པས་བསླད་པས། དེའི་དབང་གིས་སེམས་དང་སེམས་ལས་བྱུང་བ་ཉིད་ཡུལ་གྱི་དངོས་གཞི་གསུམ་དུ་སྣང་སྟེ། དེ་ལ་དངོས་གཞི་གསུམ་ནི་སེམས་དང་སེམས་ལས་བྱུང་བ་ཉིད་ཕུང་པོ་གསུམ་དུ་སྣང་བ་ཡིན་ཏེ། གསུམ་གང་ཞེ་ན། སེམས་དང་ཡིད་དང་རྣམ་པར་རིག་པའོ། །འདི་ཡང་ཤེས་པ་ཚོགས་བརྒྱད་དུ་སྨྲ་བ་ནི། སེམས་ནི་ཀུན་གཞི། ཡིད་ནི་ཉོན་མོངས་པ་ཅན་གྱི་ཡིད། རྣམ་པར་རིག་པ་ནི་ཚོགས་དྲུག་ཅེས་འདོད་དོ། །གཅིག་པུར་སྨྲ་བ་ནི་ཤེས་པའི་ངོ་བོ་ཉིད་གཅིག །རྒྱུ་དང་རྐྱེན་གྱི་བྱེ་བྲག་གིས་ཕྲ་རགས་སུ་སྐྱེ་བ་ཙམ་དུ་ཟད་དེ། དཔེར་ན་མཚོའི་ངོ་བོ་ཉིད་གཅིག་ལ་གཤེར་ཞིང་མཉེན་ལ་གཡོ་བ་མེད་པར་གནས་པའི་མཚན་ཉིད་དང་། རང་གི་ཉེ་བར་ལེན་པའི་རྐྱེན་གྱིས་རྟག་ཏུ་ཅུང་ཟད་ཙམ་གཡོ་བ་དང་ཕྱི་རོལ་གྱི་རྐྱེན་གྱིས་རླབས་དྲག་ཞན་དང་མང་ཉུང་དུ་གཡོ་བར་བྱེད་པ་བཞིན་དུ། རྣམ་པར་ཤེས་པ་ཤེས་ཤིང་རིག་པའི་མཚན་ཉིད་ནུས་པ་སྣ་ཚོགས་ཅན་གྱི་བདག་ཉིད་དུ་གནས་པ་ནི་སེམས་ཞེས་བྱ། དེ་ཉིད་རང་གི་ཉེ་བར་ལེན་པའི་དབང་གིས་རྟག་ཏུ་ངར་འཛིན་པའི་བདག་ཉིད་ལ་ནི་ཡིད་ཅེས་བྱ། དེ་ཉིད་ཡུལ་དང་དབང་པོའི་སྒོ་ནས་ཕྲ་རགས་སྣ་ཚོགས་མངོན་དུ་སྐྱེ་བ་ལ་ནི་རྣམ་པར་ཤེས་པ་ཞེས་བྱ་ཞེས་ཟེར་ཏེ། དོན་བསྡུས་ན་དེ་ལྟར་ཕུང་པོ་གསུམ་གྱི་དབང་གིས་ཡུལ་གསུམ་དུ་སྣང་བ་ལ་བྱའོ། །དེ་ལ་སེམས་དོན་དུ་སྣང་བ་ནི། འདི་སྐད་དུ། འདུ་བྱེད་སྣ་ཚོགས་དག་གིས་བག་ཆགས་བསགས་ལས་གང་གོམས་མཐུ་བརྟས་ཚེ། །སེམས་ཉིད་ཡུལ་དང་ལུས་འདྲར་སྣང་བ་རུས་པས་གང་བ་བཞིན་དུ་སྣང་། །ཞེས་གསུངས་པ་སྟེ། རྣམ་པར་རིག་པ་རྣམས་ཀྱིས་འདུ་བྱེད་སྣ་ཚོགས་ཀྱི་ལས་སྣ་ཚོགས་མངོན་པར་འདུ་བྱེད་པའི་བག་ཆགས་སེམས་ལ་བསགས་པའི་དབང་གིས། སེམས་ཉིད་མཐུ་བརྟས་པར་གྱུར་པ་ན། ཕྱིའི་ཡུལ་དང་དབང་པོ་བཅས་པའི་ལུས་ལྟ་བུར་སྣང་ངོ་། །འདི་ནི་འཁྲུལ་སྣང་བརྟེན་གཞི་མེད་པ་ཡིན་ཏེ། རབ་རིབ་ཅན་གྱི་སྐྲ་ཤད་དང་། རྒྱལ་པོའི་དམག་མིའི་རྔ་སྒྲ་དང་། མི་སྡུག་པ་བསྒོམས་པ་རྣམས་ཀྱི་རུས་གོང་ལྟར། ཕྱི་རོལ་གྱི་རྟེན་གཞི་མེད་པར་ནང་གི་རྐྱེན་གྱི་དབང་གིས་སྣང་ངོ་། །ཡུལ་གྱི་དངོས་གཞི་གཉིས་པ་ནི། བག་ཆགས་བསགས་པའི་རྒྱུན་ལ་དམིགས་རྐྱེན་ཡིད་ལས་བརྟག་པའི་བདག་ནི་མེད། །ཅེས་གསུངས་པ་སྟེ། སེམས་བག་ཆགས་དང་བཅས་པའི་རྒྱུན་ལ་བདག་ཏུ་དམིགས་ཤིང་རློམ་སེམས་པ་ནི་ཡིད་དེ། འདིས་སེམས་ལ་བདག་མེད་བཞིན་དུ་བདག་ཏུ་བཟུང་བས་ན། དེའི་དབང་གིས་སྦྲུལ་ལྕེ་གཉིས་པ་བཞིན་དུ་བདག་དང་གཞན་དུ་འབྱེད་པར་བྱེད་དོ། །འདི་ནི་འཁྲུལ་སྣང་རྟེན་གཞི་དང་བཅས་པ་ཡིན་ཏེ། འགལ་མེ་ལས་འཁོར་ལོ་དང་། ཐག་པ་ལས་སྦྲུལ་དུ་སྣང་བ་བཞིན་དུ། སེམས་ལ་དམིགས་ནས་བདག་ཏུ་སྣང་ངོ་། །ཡུལ་གྱི་དངོས་གཞི་གསུམ་པ་ནི། འདུ་བྱེད་མཐུ་ཡིས་བསྒྲིབས་ཤིང་འཕྲ་བ་མ་མཐོང་དེ་ལས་རྣམ་རིག་སྐྱེ། ཞེས་གསུངས་སྟེ། རྣམ་པར་རིག་པ་སེམས་ལས་བྱུང་བ་དང་བཅས་པ་འདུ་བྱེད་རིགས་པར་སྐྱེ་བས་བསྒྲིབས་ནས། སེམས་དོན་དང་སེམས་ཅན་དུ་སྣང་བ་འདུ་བྱེད་ཆ་ཕྲ་བ་མ་རྟོགས་པ་ལས་དངོས་པོ་སྣ་ཚོགས་གཞན་དང་གཞན་དུ་ཞེན་པ་སྐྱེའོ། །འདི་ནི་འཁྲུལ་སྣང་རྟེན་གཞི་ཡང་དག་པ་མ་ཡིན་པ་དང་བཅས་པ་ཡིན་ཏེ། དཔེར་ན་སྨིགས་རྒྱུ་བ་ཡིན་པར་མ་ཤེས་པ་ལས་ཆུར་ཞེན་པའམ། བག་འདྲའི་རྩེད་མོ་བྱེད་ཅིང་གནས་པ་ལས། དེ་རྐྱེན་གཞན་ཞིག་གིས་བློ་དཀྲུགས་ཏེ། ཆགས་སྡང་ཆེར་སྐྱེས་པའི་སྐབས་ཞིག་ཏུ། རང་གིས་བྱས་པའི་བག་འདྲའི་རྩེད་མོ་སྣང་བ་ལ། སྐྱེས་པའམ་བུད་མེད་གཞན་ཞིག་ཏུ་མཐོང་སྟེ། དངོས་པོར་ཞེན་ཅིང་ཆགས་སྡང་སྐྱེས་པ་ལྟ་བུ་ཡིན་ནོ། །འཁྲུལ་སྣང་འདི་གསུམ་ཡང་གཅིག་གི་རྐྱེན་དུ་གཅིག་གྱུར་པ་ཡིན་ཏེ། རྣམ་པར་རིག་པའི་དངོས་པོ་རྣམས་སེམས་སྣང་བར་མ་ཤེས་ཏེ། དངོས་པོ་གཞན་དང་གཞན་དུ་ཞེན་ཅིང་། འདུ་བྱེད་སྣ་ཚོགས་ཀྱིས་ལས་ཀྱི་བག་ཆགས་སྣ་ཚོགས་སེམས་ལ་བསགས་པའི་དབང་གིས་སེམས་འཁྲུལ་པ་དོན་དང་སེམས་ཅན་དུ་སྣང་བ་བྱུང་ངོ་། །དེའི་དབང་གིས་ཡིད་བདག་དང་གཞན་དུ་རློམ་སེམས་ཤིང་འབྱེད་པར་འབྱུང་ངོ་། །དེ་གཉིས་ཀྱི་དབང་གིས་རྣམ་པར་རིག་པ་སེམས་དབང་པོར་སྣང་བ་ལ་བརྟེན་ནས་ཡུལ་དུ་སྣང་བས་འདྲ་གཞི་བྱས་ཏེ། དངོས་པོ་སྣ་ཚོགས་སུ་ཞེན་ཅིང་སྣང་ལ། ཡིད་བདག་ཏུ་རློམ་སེམས་པ་ལ་བརྟེན་ནས་རྣམ་པར་རིག་པ་འཇིག་ཚོགས་ལ་ལྟ་བ་དང་མཚུངས་པར་ལྡན་པ་སྐྱེ་སྟེ། སེམས་དང་སེམས་ལས་བྱུང་བ་ཐམས་ཅད་ཟག་པ་དང་བཅས་པར་བྱིན་གྱིས་རློབ་པར་བྱེད་དོ། །དེའི་དབང་གིས་བདག་སྣ་ཚོགས་དང་ཆོས་སྣ་ཚོགས་ཀྱི་བློ་སྐྱེ་བས་སྲིད་པའི་འཁོར་ལོ་རྒྱུན་མི་འཆད་པ་ཡིན་ནོ། །འཁྲུལ་སྣང་འདི་དག་ལས་བཟློག་པར་འདོད་ན། སྣང་བ་ཐམས་ཅད་སེམས་ཉིད་སྣང་བ་ཡིན་པར་ཤེས་ཏེ། བདག་ཏུ་འཛིན་པའི་རྟོད་ཕུར་ཕྱུང་། དངོས་པོ་དང་མཚན་མར་ལྟ་བའི་ཞེན་པ་བཟློག་པས་སྣང་བ་མ་ལོག་ཀྱང་སེམས་ལ་བདག་ཏུ་ལྟ་ཞིང་ཡུལ་ལ་མཚན་མར་འཛིན་པའི་བློ་ལོག་པ་ན། གནས་ངན་ལེན་གྱི་ལས་རྣམས་ཀྱང་མཐུ་ཆུང་བར་འགྱུར་རོ། །བསོད་ནམས་ཀྱི་ལས་རྣམས་ཀྱང་མི་དམིགས་པའི་ཤེས་རབ་ཀྱིས་ཟིན་པར་འགྱུར་ཏེ། དཔེར་ན་རྨི་ལམ་ན་དོན་སྣང་བ་དག་གཉིད་ཅུང་ཟད་བསྲབས་པར་གྱུར་ནས་རྨི་ལམ་དུ་ཤེས་པ་ན། སྣང་བ་མ་ལོག་ཀྱང་ཞེན་པ་ལོག་པས་ཆགས་སྡང་སྐྱེ་མི་ནུས་པ་ལྟ་བུའོ། །དེ་ནས་ཀྱང་གཉིད་སད་པ་ན་སྣང་བ་ཉིད་ཀྱང་ལོག་ན་ཆགས་སྡང་ལྟ་ག་ལས་སྐྱེ། དེ་བཞིན་དུ་དངོས་པོར་ལྟ་བའི་ཞེན་པ་དང་བྲལ་ཏེ། སྒྱུ་མ་ཙམ་དུ་སྣང་བ་ལ་ཤེས་རབ་དང་ཏིང་ངེ་འཛིན་གྱི་སྟོབས་བསྐྱེད་པས་སྣང་བ་ཉིད་ཀྱང་ལོག་པར་གྱུར་པ་ན། ཉོན་མོངས་པ་དང་ལས་མངོན་པར་འདུ་བྱེད་པར་ཇི་ལྟར་འགྱུར་ཏེ། དེ་བས་ན་ཆོས་རྣམས་ཀྱི་རང་བཞིན་ཤེས་པ་དང་མ་ཤེས་པ་ཙམ་ལ། ཀུན་ནས་ཉོན་མོངས་པ་དང་རྣམ་པར་བྱང་བར་ཐ་སྙད་བཏགས་པ་ཙམ་མ་གཏོག་པ། འདི་ལ་བསལ་བར་བྱ་བའི་རྫས་སམ། གཞག་པར་བྱ་བའི་རྫས་ཀྱི་ངོ་བོ་གང་ཡང་མེད་དེ། འོན་ཀྱང་མ་ཤེས་པའི་དུས་ན་འཁྲུལ་སྣང་གི་ཚུལ་དེ་ལྟར་སྣང་བ་ཙམ་ཡིན་ནོ། །ཆོས་ཐམས་ཅད་སྒྱུ་མ་ལྟ་བུར་འགོ་མཉམ་པར་བསྟན་པ་ལ། བརྒལ་ལན་བསྟན་པའི་སྐབས་ཏེ། གཉིས་པའོ།། །།དེ་ལྟར་ཆོས་ཐམས་ཅད་སྒྱུ་མ་ལྟ་བུའི་མཚན་ཉིད་ཡིན་པར་རྟོགས་པ་ནི། ཐེག་པ་ཆེན་པོའི་ཚུལ་ལ་འཇུག་པར་ནུས་པ་ཡིན་ལ། ཆོས་ཐམས་ཅད་སྒྱུ་མ་ལྟ་བུར་འགོ་མཉམ་པ་རྟོགས་པ་ཚད་དུ་ཆུད་ཅིང་མཐར་ཕྱིན་པ་ནི་རྫོགས་པ་ཆེན་པོའི་ཚུལ་ཡིན་ནོ། །དེ་ལ་འདི་སྐད་དུ། རྫོགས་པ་ཆེན་པོའི་ཚུལ་གྱིས་འཁྲུལ་སྣང་འདི་དག་དམིགས་པར་འདོད་དམ་མི་འདོད་ཙ་ན། ཅི་འདི་དག་སྣང་ངམ་མི་སྣང་ཞེས་འདྲི་བར་བྱེད་དམ། འོན་ཏེ་སྣང་བ་ལ་མཚན་ཉིད་ཡོད་དམ་མེད་ཅེས་འདྲི་བར་བྱེད། དེ་ལ་སྣང་ངམ་མི་སྣང་ཞེས་འདྲི་ན་ནི། མི་སྣང་ན་ལྟ་བ་སྣ་ཚོགས་ཀྱི་རྩོད་པའི་གཞི་ཅི་ལ་བྱེད་དེ། ཐུན་མོང་གི་དབང་པོའི་མཐུན་སྣང་འདི་ལ་སྣང་མི་སྣང་ནི་སུའང་མི་རྩོད་དོ། །གལ་ཏེ་སྣང་བ་ལ་མཚན་ཉིད་ཡོད་དམ་མེད་འདྲི་ན་ནི། མཚན་ཉིད་ཡོད་པར་འཛིན་ན་རྫོགས་པ་ཆེན་པོའི་ཚུལ་སྒྱུ་མ་ལྟ་བུ་མཐར་ཕྱིན་པར་རྟོགས་པར་ཡང་ཇི་ལྟར་འགྱུར་ཏེ། དེ་ལྟ་བས་ན་ལྟ་བ་མཐོན་དམན་ནི་སྣང་བ་ལ་དངོས་པོར་ཞེན་པ་ཆེ་ཆུང་གི་བྱེ་བྲག་ཙམ་སྟེ། དཔེར་ན་ཆུའི་ནང་ན་སྦྲུལ་ནག་པོའི་གཟུགས་བརྙན་སྣང་བ་ལ། ཁ་ཅིག་གིས་ནི་སྦྲུལ་ཉིད་དུ་མཐོང་སྟེ་སྐྲག་ནས་སྤོང་བར་བྱེད་དོ། །དེ་བཞིན་དུ་སྡུག་བསྔལ་གྱི་གནས་ཀྱི་ཆོས་རྣམས་སྒྱུ་མ་ལྟ་བུ་ཡིན་ཡང་། ཉན་ཐོས་རྣམས་ཀྱིས་དངོས་པོར་མཐོང་སྟེ་སྤོང་བར་བྱེད་དོ། །ཁ་ཅིག་གིས་ནི། གཟུགས་བརྙན་དུ་ཤེས་ཀྱང་རེག་ན་ཉེས་པ་ཡོད་པར་མཐོང་ནས་སྨན་བསྟེན་ཏོ། །དེ་བཞིན་དུ་ཕ་རོལ་དུ་ཕྱིན་པའི་ཚུལ་ནི། ཀུན་རྫོབ་སྒྱུ་མ་ལྟ་བུ་ཡིན་ཡང་། བྱ་བ་བྱེད་ནུས་པའི་ཡོད་པར་ལྟ་བས་ཤེས་བྱ་ལ་ཡེ་ཤེས་བསྐྱེད་པ་དང་སྙིང་རྗེ་ཆེན་པོའི་སྨན་སྟེན་པར་བྱེད་དོ། །ཁ་ཅིག་གིས་ནི། གཟུགས་བརྙན་དུ་ཤེས་པས་རེག་ཀྱང་མི་གནོད་པར་རྟོགས་ཀྱང་། །ཉམ་ང་བས་རང་གིས་རེག་མི་ནུས་ཀྱི་གཞན་ལ་སྐུལ་ནི་ནུས་སོ། །དེ་བཞིན་དུ་བྱ་བ་དང་རྣལ་འབྱོར་ཕྱི་པའི་ཚུལ་གྱིས། དམན་པའི་སྤྱོད་པ་དང་རྫས་རྣམས་ལ་སྐྱོན་མེད་པར་རྟོགས་ཀྱང་། རང་གི་བག་ཡངས་སུ་སྤྱོད་ནི་མི་ནུས། ལྷ་ལ་དབུལ་བ་དང་། བརྟུལ་ཞུགས་ཀྱི་སྤྱོད་པ་དང་། དངོས་གྲུབ་ཀྱི་རྫས་ལ་སོགས་པར་ནི་སྤྱོད་ནུས་སོ། །ཁ་ཅིག་གིས་ནི། རེག་ན་སྐྱོན་མེད་པར་ཡང་ཤེས། རེག་ཀྱང་ནུས་ལ། ཉམ་ང་བ་དེ་ཉིད་མྱུར་དུ་མེད་པར་བྱ་བའི་ཕྱིར། ཆེད་དུ་རྫི་བའི་བརྟུལ་ཞུགས་སྤྱོད་དོ། །དེ་བཞིན་དུ་རྣལ་འབྱོར་ནང་པའི་ཚུལ་གྱིས། ཆོས་མཉམ་པ་ཉིད་མྱུར་དུ་ཉམས་སུ་ལེན་པར་བྱ་བའི་གཉའ་ནོན་དུ། ཆོས་ལ་དགེ་སྡིག་མེད་པ་དང་ཟས་ལ་གཙང་སྨེ་མེད་པའི་བརྟུལ་ཞུགས་ཆེད་དུ་དང་དུ་བླངས་ཏེ་སྤྱོད་དོ། །ཁ་ཅིག་གིས་ནི། གཟུགས་བརྙན་གྱི་མཚན་ཉིད་ལ་ཕྱིན་ཅི་མ་ལོག་པའི་བློ་དང་ལྡན་པས་སྤྱོད་པ་དེ་དག་ཐམས་ཅད་བྱིས་པའི་སྤྱོད་པར་མཐོང་སྟེ། འདི་ལྟར་དངོས་སུ་སྤོང་བ་ལ་སོགས་པ་གཞན་ལྟ་ཞོག་གི། གཟུགས་བརྙན་གཅིག་ལ་དཔའ་དཔའ་ལྟར་རྫི་བ་དེ་ཉིད་ཀྱང་བྱིས་པའི་བློ་ཅན་དུ་མཐོང་སྟེ། བླང་བའམ་དོར་བའམ་དེའི་རྐྱེན་གྱིས་མངོན་པར་འདུ་བྱེད་པའི་བློ་གང་ཡང་སྐྱེད་མི་ནུས་ཤིང་། གཡོ་རྩོལ་མི་འབྱུང་ངོ་། །དེ་བཞིན་དུ་རྫོགས་པ་ཆེན་པོའི་ཚུལ་གྱིས་ཆོས་ཐམས་ཅད་སྒྱུ་མ་ལྟ་བུར་ཤིན་ཏུ་འགོ་མཉམ་པ་ཉིད་དུ་རྟོགས་ཤིང་མཐར་ཕྱིན་པར་ཁོང་དུ་ཆུད་པས། དེ་བས་ན་སྣང་བའི་དབང་གིས་བློ་མི་རྨོངས་ཤིང་མངོན་པར་འདུ་བྱེད་པ་སྐྱེད་མི་ནུས་ཤིང་། མི་ལེན་མི་འདོར་མི་གཡོ་མི་རྩོལ་ལོ། །དེ་ལྟར་སྒྱུ་མ་ལྟ་བུ་མཐར་ཕྱིན་པར་རྟོགས་པ་འདི་ནི། བདེན་པ་གཉིས་དབྱེར་མེད་པར་རྟོགས་པའང་མཐར་ཕྱིན་པར་གྲུབ་པ་ཡིན་ནོ། །དེ་ཡང་ཆོས་དང་ཆོས་ཅན་བདག་ཉིད་གཅིག་པར་འདོད་པ་ཙམ་གྱིས་བདེན་པ་གཉིས་དབྱེར་མེད་པར་རྟོགས་པའི་གྲངས་སུ་མི་ཆུད་དེ། འདི་ལྟར་ཉན་ཐོས་ཀྱི་ཚུལ་ལས་ཀྱང་། འདུ་བྱེད་རྣམས་མི་རྟགས་པའི་མཚན་ཉིད་དུ་འདོད་པ་ན། མི་རྟག་པ་ཉིད་འདུ་བྱེད་ལས་གཞན་ཡིན་པར་མི་འདོད་དོ། །རྣལ་འབྱོར་སྤྱོད་པ་ཡང་དག་པ་མ་ཡིན་པའི་ཀུན་ཏུ་རྟོག་པ་གཉིས་པོས་སྟོང་པའི་མཚན་ཉིད་ཅན་དུ་འདོད་པ་ན། སྟོང་པ་ཉིད་གཞན་དབང་ལས་གཞན་ཡིན་པར་མི་འདོད་དོ། །དེ་ལྟར་ན་ཆོས་ཅན་ལ་ཆོས་ཉིད་ཡོད་པར་འདོད་པ་དག་ཀྱང་གཞན་ཡིིན་པར་མི་འདོད་ན། དབུ་མ་པ་ཆོས་རྣམས་རང་བཞིན་མེད་པ་ཉིད་ཡིན་པར་འདོད་པ་ལ། གཞན་དུ་འདོད་པ་ལྟ་སྨོས་ཀྱང་ཅི་དགོས་ཏེ། འོན་ཀྱང་བདེན་པ་གཉིས་ཀྱི་བློ་མི་འདོར་བས། གཉིས་སུ་མེད་པར་ལྟ་བའི་གྲངས་སུ་མི་ཆུད་དེ། ནམ་ཕྱི་ནང་གི་དངོས་པོར་སྣང་བ་འདི་དག་ཀུན་ཏུ་བརྟགས་པའི་མཚན་ཉིད་དང་འགོ་མཉམ་པར་རྟོགས་པ་དེའི་ཚེ། བདེན་པ་གཉིས་དབྱེར་མེད་པར་ལྟ་བ་ཞེས་བྱའོ། །སྒྱུ་མ་དང་སྤྲུལ་པ་ལ་སོགས་པ་ནི་སྣང་བ་ཙམ་དམིགས་པས། དེ་དག་དང་ཕྱི་ནང་གི་དངོས་པོ་སྣང་བ་གཉིས་སྣང་བར་འདྲ་བས་མཚན་ཉིད་འགོ་མཉམ་པར་བསྒྲུབ་ཏུའང་རུང་ན། ཀུན་ཏུ་བརྟགས་པ་ནི་མུ་སྟེགས་ཅན་གྱི་བདག་རྟག་པ་ལ་སོགས་པ་ལྟ་བུ་གཏན་མེད་པ། སྒྲོ་སྐུར་གྱི་གནས་སུ་གྱུར་པ་རི་བོང་གི་རྭ་དང་འདྲ་བ་ཡིན་ལ། ཕྱི་ནང་གི་དངོས་པོ་འདི་དག་ནི་རྒྱུ་དང་རྐྱེན་ལས་སྐྱེ་བ་མངོན་སུམ་དང་མི་དམིགས་པས་གྲུབ་པ་ཡིན་ན། དེ་གཉིས་ཇི་ལྟར་འགོ་སྙོམ་པར་བྱ། གལ་ཏེ་ཀུན་ཏུ་བརྟགས་པའི་དངོས་གཞི་གཅིག་སྙེད་ན་ནི་མཉམ་མི་མཉམ་གཞལ་དུའང་རུང་ལ། ཀུན་ཏུ་བརྟགས་པ་ལ་དངོས་གཞི་ཉིད་མ་གྲུབ་པར། གང་དང་གང་མཉམ་པར་བསྒྲུབ་ཅེ་ན། དེ་ལ་འདི་བརྗོད་པར་བྱ་སྟེ། ཀུན་ཏུ་བརྟགས་པ་དང་དོན་རང་གི་མཚན་ཉིད་པར་བསྒྲུབ་པའི་མཚན་གཞི་ནི་སྣང་བ་ཉིད་ཡིན་ཏེ། མུ་སྟེགས་ཅན་གྱི་གྲུབ་མཐའ་ཡན་ཆད་ནས། རྫོགས་པ་ཆེན་པོའི་ལྟ་བ་ལ་ཐུག་གི་བར་དུ་ལྟ་བའི་བྱེ་བྲག་ཐམས་ཅད་སྣང་བ་མཚན་ཉིད་གཞིར་བྱས་ཏེ། དེའི་མཚན་ཉིད་ཇི་ལྟར་ཡིན་པ་དང་ཇི་ལྟར་ཡོད་པ་ལ་རྩོད་དོ། །དེ་ལ་ཡིན་པ་ནི་བདེན་པར་སྒྲུབ་པའོ། །ཡོད་པ་ནི་དམིགས་པར་སྒྲུབ་པའོ། །སྣང་བ་དེ་ཉིད་ལ་གཞན་གྱིས་ཀུན་ཏུ་བརྟགས་པ་འགེགས་པར་བྱེད་པ་ན། མེད་པ་དང་མ་ཡིན་པར་འགེགས་སོ། །དེ་ལ་མེད་པར་དགག་པས་ནི་གཞན་གྱིས་ཀུན་བརྟགས་པ་ཙམ་འགེགས་པར་བྱེད་དོ། །མ་ཡིན་པར་དགག་པས་ནི་དེའི་སྟེང་དུ་རང་འདོད་པའི་མཚན་ཉིད་པའང་སྒྲུབ་པར་བྱེད་དོ། །དགག་སྒྲུབ་འདི་བཞིའི་ཚུལ་ནི་འདིར་སྨོས་པ་ཙམ་སྟེ་འོག་ནས་འཆད་དོ། །འདི་ལྟར་དགག་སྒྲུབ་འདི་བཞིའི་ཚུལ་གྱིས་གཞན་གྱི་གྲུབ་མཐའ་འགེགས་ཤིང་རང་གི་གྲུབ་མཐའ་སྒྲུབ་པ་ན། ལྟ་བ་ཐམས་ཅད་ཀྱང་བྱེ་བྲག་མེད་པར་རྒྱུ་དང་རྐྱེན་ལས་འབྲས་བུ་བྱུང་བར་འདོད་པ་དང་། མངོན་སུམ་དང་མི་དམིགས་པས་སྒྲུབ་པར་འདོད་པར་མཐུན་པ་ལས། གང་ཞིག་གིས་མཚན་ཉིད་པར་ཡོད་པ་དང་ཡིན་པར་བསྒྲུབས་པ་དེ། གཞན་དག་གིས་དེ་ལྟ་བུའི་མཚན་ཉིད་དུ་མེད་པ་དང་མ་ཡིན་པར་བཀག་སྟེ། ཀུན་ཏུ་བརྟགས་པ་ཡིན་པར་སྒྲུབ་བོ། །འདི་བཞིན་དུ་ལྟ་བ་མཐོན་དམན་རིམ་པར་སྒྲུབ་པར་བྱེད་པ་ན། དང་པོ་རང་རང་གི་ལྟ་བ་ཐམས་ཅད་མཚན་ཉིད་པ་ཡིན་པར་གྲུབ་བོ། །དེ་གཞན་དང་གཞན་གྱིས་ཀུན་བརྟགས་པ་ཡིན་པར་སྒྲུབ་བོ། །དེ་བཞིན་དུ་རིམ་པར་གྲུབ་པ་ན་མཐར་དོན་གང་རང་གི་མཚན་ཉིད་པ་ཁོ་ན་ཡིན་ཏེ། ཀུན་ཏུ་བརྟགས་པ་མ་ཡིན་པའི་དོན་ལྷག་མ་ལུས་པའང་མི་རྙེད་དོ། །དེ་དག་ཀྱང་མུ་སྟེགས་ཅན་རྟག་པར་ལྟ་བ། བྱེད་པ་པོ་རྒྱུར་ལྟ་བ་རྣམས་ཀྱང་གཞི་རྣམ་པ་ལྔ་ལ་ལྟ་སྟེ། འདི་ལྟར་ཚངས་པ་ཆེན་པོ་རྟག །དབང་སྒྱུར་གྱི་ལྷ་རྟག །བདག་རྟག །རང་བཞིན་རྟག །རྡུལ་ཕྲ་རབ་རྟག་སྟེ། དེ་དག་ནི་རྟག་ཀྱང་རྟག་ལ་རྒྱུའང་ཡིན་ནོ། །ཕྱི་ནང་གི་དངོས་པོར་སྣང་བ་འདི་དག་ནི་དེའི་དབང་ལས་གྲུབ་ཅིང་སྤྲུལ་པའི་འབྲས་བུ་ཡིན་ཏེ་མི་རྟག་གོ། །དེ་ལ་རྒྱུ་རྣམས་ནི་རྟག་ཏུ་རྒྱུ་ཁོ་ནའི་བྱ་བ་བྱེད་དེ་ནམ་ཡང་འབྲས་བུའི་བྱ་བ་མི་བྱེད་དོ། །ཕྱི་ནང་གི་དངོས་པོ་འདི་དག་ནི། རྒྱུན་དུ་འབྲས་བུ་ཁོ་ནའི་བྱ་བ་བྱེད་དེ་ནམ་ཡང་རྒྱུའི་བྱ་བ་མི་བྱེད་དོ། །དེ་ལྟ་ན་རྒྱུ་དང་འབྲས་བུའི་རང་གི་ངོ་བོ་ནི་སོ་སོར་ངེས་པ་ཐོབ་པའོ་ཞེས་ལྟ་སྟེ། དེ་ལྟ་ན་ཕྱི་ནང་གི་དངོས་པོ་འདི་དག་ཀྱང་རྒྱུ་དང་རྐྱེན་ལས་གྲུབ་པ། འབྲས་བུ་རང་གི་ངོ་བོ་མི་རྟག་པ་ཡིན་པར་ཡང་ལྟ་ལ། མངོན་སུམ་དང་མི་དམིགས་པས་ཀྱང་གྲུབ་པ་ཡིན་ཏེ། འདི་ལྟར་བསམ་གཏན་གྱི་ཏིང་ངེ་འཛིན་ཐོབ་ནས་ལྷའི་མིག་དང་ལྡན་པར་གྱུར་པའི་དྲང་སྲོང་རྣམས་ཀྱིས། སེམས་ཅན་འཆི་འཕོ་བ་རྣམས་ལ་བལྟས་ན། གང་འཆི་འཕོ་བ་དེའི་རྡུལ་ཕྲ་རབ་བསྡུས་པ་ལས་གྱུར་པའི་ལུས་དེ་ལས། རྫུས་ཏེ་སྐྱེས་པའི་སེམས་ཅན་ཅིག་བྱུང་སྟེ་སྐྱེ་གནས་གཞན་དུ་འཕོས་པ་ལས། ཡང་རྡུལ་ཕྲ་རབ་བསྡུས་པ་ལས་གྱུར་པའི་ལུས་ཅན་སྐྱེ་བ་རྣལ་འབྱོར་གྱི་མངོན་སུམ་གྱིས་དམིགས་ལ། རྫུས་ཏེ་སྐྱེས་པའི་སེམས་ཅན་འཕོ་བ་མེད་པར། རྡུལ་ཕྲ་རབ་བསྡུས་པ་ལས་གྱུར་པའི་ལུས་ཅན་སྐྱེ་བ་རྣལ་འབྱོར་གྱི་མངོན་སུམ་གྱིས་མ་དམིགས་པ་ལས། སེམས་ཅན་ཞེས་བྱ་བ་གང་ཟག་པ་འཕོ་བར་ལྟ་བར་བྱུང་སྟེ། དེས་འདི་སེམས་ཅན་རྟག་པ་དེའི་དབང་གིས་རྡུལ་ཕྲ་རབ་རྟག་པར་ཡོད་པ་རྣམས་བསྡུས་ནས། རྡུལ་བསྡུས་པ་ལས་གྲུབ་པའི་ཕུང་པོ་སྤྲུལ་ཅིང་བྱས་པ་ཡིན་ལ། དེ་ནས་གང་ཟག་གཞན་དུ་འཕོས་པའི་ཚེ། རྡུལ་ཕྲ་རབ་འདུས་པ་ནི་མི་རྟག་སྟེ་ཞིག་ནས། རྡུལ་ཕྲ་རབ་ཉིད་ནི་རྟག་སྟེ་ནམ་དུ་ཡང་མི་འཇིག་གོ་ཞེའོ། །ཡང་ལྷའི་མིག་དེས་སྔོན་གྱི་མཐའ་ལ་བརྟགས་ན། དང་པོ་སེམས་ཅན་གཞན་མེད་པ་ན། ཚངས་པ་ཆེན་པོ་བྱུང་བ་མཐོང་སྟེ། ཚངས་པ་ཆེན་པོ་མ་བྱུང་བའི་སྔོན་རོལ་ནི་མ་མཐོང་ངོ་། །དེ་ནས་ཚངས་པ་ཆེན་པོའི་འདོད་པ་བཞིན་དུ། འཇིག་རྟེན་ཆགས་ནས་ཚངས་པ་ཆེན་པོས་བསམས་པའང་འཇིག་རྟེན་ཐམས་ཅད་ངས་སྤྲུལ་ཏོ་སྙམ་མོ། དེ་ལྟར་གྱུར་པ་དེ་དག་ལྷའི་མིག་གིས་མཐོང་ངོ་། །དེ་ནས་ཕྱི་མའི་མཐར་བརྟགས་ན། སེམས་ཅན་གཞན་ནི་འཆི་བར་མཐོང་ལ་འཇིག་རྟེན་འདི་ཡང་འཇིག་པར་མཐོང་སྟེ། དེ་ཙམ་ནའང་ཚངས་ཚེ་ཆེན་པོ་ནི་འཆི་བར་འདུག་པ་མཐོང་ངོ་། །དེ་མན་ཆད་ཀྱི་དུས་ནི་མ་མཐོང་ངོ་། །འདི་ལྟ་བུ་རྣལ་འབྱོར་གྱི་མངོན་སུམ་གྱིས་དམིགས་ཤིང་། རྣལ་འབྱོར་གྱི་མངོན་སུམ་གྱིས་མི་དམིགས་པས་གྲུབ་པ་ཡིན་ཏེ། འདི་དག་ཀྱང་རྒྱུ་དང་འབྲས་བུའི་དངོས་པོར་སྣང་བ་མངོན་སུམ་དང་མི་དམིགས་པས་གྲུབ་པ་ལ། ཇི་ལྟར་སྣང་བ་དེ་བཞིན་དུ་ཡོད་པ་དང་ཡིན་པར་ལྟ་བ་ཡིན་ནོ། །དེ་ལ་སངས་རྒྱས་པ་ལས་ཉན་ཐོས་བྱེ་བྲག་ཏུ་སྨྲ་བའི་ལྟ་བའི་ཆར་གཏོགས་པ། གནས་མ་བུའི་སྡེ་ལ་སོགས་པ་ན་རེ། ཚངས་པ་ཆེན་པོ་དང་དབང་སྒྱུར་གྱི་ལྷ་ནི་ཡོད་ཀྱང་རྟག་པ་ཡང་མ་ཡིན་རྒྱུའང་མ་ཡིན་ནོ། །བདག་དང་རང་བཞིན་ནི་གཏན་མེད་དོ། །རྫུས་ཏེ་སྐྱེས་པའི་སེམས་ཅན་གང་ཟག་པ་ནི་ཕུང་པོ་དང་དེ་ཉིད་དང་གཞན་དུ་བརྗོད་དུ་མེད་པའི་ཚུལ་དུ་ཡོད་དེ་ཆུ་དང་ཀླུ་འདྲའོ། །གང་ཟག་པ་དེ་འཕོ་བ་ནི་ཡོད་དེ་ཆུ་སྐམས་ན་ཀླུ་འབྲོས་པ་བཞིན་ནོ། །འོན་ཀྱང་དེ་ལ་སྐད་ཅིག་མའི་མི་རྟག་པ་ནི་ཡོད་དོ། །རྡུལ་ཕྲ་རབ་ལའང་འཇིག་པའི་མི་རྟག་པ་ནི་མེད། སྐད་ཅིག་མའི་མི་རྟག་པ་ནི་ཡོད་དོ། །ཞེས་འདོད་དོ། །འདིའི་གྲུབ་མཐའ་ལྟར་ན་མུ་སྟེགས་ཅན་གྱིས་ཚངས་པ་ཆེན་པོ་ལ་སོགས་པ་དེ་དག་རྟག་པ་དང་རྒྱུ་ཡིན་པར་ལྟ་བ་ནི། ཀུན་ཏུ་བརྟགས་པ་ཡིན་ཏེ་མེད་དོ། །ཞེས་མེད་པར་དགག་པས་སྒྲུབ་པར་བྱེད་དོ། །གང་ཟག་པ་ནི་ཡོད་པ་དང་དེ་འཕོ་ཞིང་མི་འཇིག་པ་དང་རྡུལ་ཕྲ་རབ་མི་འཇིག་པ་ནི་མ་ཡིན་པར་དགག་པས་བསྒྲུབས་ཏེ། དོན་དམ་པའི་མཚན་ཉིད་པ་རྫས་སུ་ཡོད་པ་དང་ཡིན་པར་སྒྲུབ་པར་བྱེད་དོ། །མང་པོར་བརྗོད་མི་དགོས་ཏེ། བྱེ་བྲག་ཏུ་སྨྲ་བ་ཉིད་ལའང་དེ་ལ་སོགས་པ་སྡེ་བའི་དབང་དང་། ཁ་ཆེ་བ་དང་དབུས་པ་ལ་སོགས་པ་ཡུལ་གྱི་དབང་གིས་ལྟ་བ་མི་མཐུན་པ་མང་དུ་ཡོད་ལ། མདོ་སྡེ་པའི་བར་དུ་ཡང་དེ་བཞིན་ཏེ། རེ་ཤིག་མཐར་བསྡུ་ན། ཉན་ཐོས་ཀྱི་ཚུལ་ལས། ཕྱི་ནང་གི་དངོས་པོ་འདི་དག་ལ་མུ་སྟེགས་ཀྱིས་མཚན་ཉིད་པར་བཞག་པ་དེ་དག་ནི། ཀུན་ཏུ་བརྟགས་པ་སྟེ་གཏན་མེད་ལ། དེ་ལྟ་བུ་མ་ཡིན་པ་ཕུང་པོ་དང་ཁམས་དང་སྐྱེ་མཆེད་ཀྱི་མཚན་ཉིད། ཕྱི་ནང་གི་དངོས་པོ་གཉིས་སུ་གྲུབ་པ་རྒྱུ་དང་རྐྱེན་ལས་སྐྱེ་བ་མངོན་སུམ་དང་མི་དམིགས་པས་གྲུབ་པ་དངོས་པོ་རང་གི་མཚན་ཉིད་པ། དོན་དམ་པར་རྫས་སུ་གྲུབ་པར་ཡོད་པ་དང་ཡིན་པས་གྲུབ་པ་ཡིན་ནོ། །མུ་སྟེགས་ཅན་གྱི་རྣལ་འབྱོར་གྱི་མངོན་སུམ་དང་མི་དམིགས་པས་གྲུབ་པ་དེ་ནི། དེ་ལྟར་མཐོང་བ་ལ་ནི་ཕྱིན་ཅི་ལོག་མེད་མོད་ཀྱི། དེ་ལ་མ་དམིགས་པ་གཞན་ཞིག་ཡོད་དེ། འདི་ལྟར་འཆི་བའི་སྲིད་པ་འགག་པ་ན་དེ་ཉིད་ལ་བརྟེན་ནས་བར་མ་དོའི་སྲིད་པ་མངོན་པར་འགྲུབ་ལ། དེ་ཉིད་འགག་པ་ལ་རྟེན་ནས་སྐྱེ་བའི་སྲིད་པ་མངོན་པར་འགྲུབ་པ་ཡིན་ཏེ། ཕུང་པོ་ལྔའི་རྒྱུན་བར་ཆད་མེད་པ་ཡིན་པ་ལ། སྲིད་པ་གསུམ་པོ་གཅིག་འགག་པ་ལ་རྟེན་ནས་གཅིག་སྐྱེ་བ་འཐོབ་པའི་མཚན་ཉིད་མ་རྟོགས་པ་ལས་ཀུན་བརྟགས་འཛིན་པ་ཇི་ལྟ་བ་བྱུང་བར་ཟད་དེ། རྣལ་འབྱོར་གྱི་མངོན་སུམ་ལ་ནི་འཁྲུལ་པ་མེད་དོ། །བདག་དང་འཇིག་རྟེན་གྱི་སྔོན་གྱི་མཐའ་དང་ཕྱི་མའི་མཐའ་རྟོགས་པ་ལ་དེ་བཞིན་ནོ། །དེ་ལ་རྣལ་འབྱོར་སྤྱོད་པའི་ཚུལ་ལས། ཕྱི་ནང་གི་དངོས་པོ་སྣང་བ་འདི་དག་ལ། ཉན་ཐོས་རྣམས་ཀྱིས་ཕྱིའི་ཡུལ་དོན་རང་གི་མཚན་ཉིད་པ་ཤེས་པ་ལས་གུད་ན་གཟུང་བར་བྱ་བའི་ངོ་བོ་རྫས་སུ་ཡོད་ལ། ཤེས་པའང་དེ་ལ་འཛིན་པར་བྱེད་པའི་ངོ་བོར་རྫས་སུ་ཡོད་དོ། །ཞེས་འདོད་པ་ནི། ཀུན་ཏུ་བརྟགས་པ་སྟེ་གཏན་མེད་ཅེས་མེད་པར་འགགས་པར་བྱེད་ལ། དེ་མ་ཡིན་པའི་ཡང་དག་པ་མ་ཡིན་པའི་ཀུན་ཏུ་རྟོག་པ་གཉིས་མེད་ཀྱང་གཉིས་ལྟ་བུར་སྣང་བའི་མཚན་ཉིད་ཅན། རྒྱུ་དང་རྐྱེན་ལས་སྐྱེ་བ་འདི་མངོན་སུམ་དང་མི་དམིགས་པ་སྤྱི་དང་ཡང་མི་འགལ་ལ། སེམས་དང་སེམས་ལས་བྱུང་བ་ཉིད་རང་རིག་པའི་མངོན་སུམ་མ་ཡིན་ནམ། མངོན་སུམ་ཉིད་ཡང་དག་པའི་ཤེས་པ་མ་ཡིན་ནམ། དེ་ལྟ་ན་ཡང་དག་པའི་ཤེས་པ་ལ་རིགས་པ་གཞན་གྱིས་བསྒྲུབ་ཅི་ཞིག་དགོས། དེ་སུན་འབྱིན་པར་བྱེད་པའི་ཡང་དག་པའི་ཤེས་པ་གཉིས་པ་མཐུ་སྟོབས་ཀྱིས་ཆེ་བ་གཞན་གང་ཞིག་ཡོད་ཅེས་ཏེ། དོན་དམ་པ་ཉིད་དུ་རྫས་སུ་ཡོད་པ་དང་ཡིན་པར་སྒྲུབ་བོ། །ད་ཡང་ནང་གི་བྱེ་བྲག་གིས་རྣམ་པ་བདེན་པར་སྨྲ་བ་ནི། ཇི་ལྟར་སྣང་བ་དེ་ལྟར་དོན་དམ་པར་རྫས་སུ་ཡོད་དོ། །ཞེས་ཟེར་རོ། །རྣམ་པ་རྫུན་པར་སྨྲ་བ་ནི། ཡང་དག་པ་མ་ཡིན་པའི་ཀུན་ཏུ་རྟོག་པ་གཟུང་བ་དང་འཛིན་པའི་རྣམ་པར་སྣང་བ་དང་བཅས་པར་སྐྱེ་བ་ཡོད་པ་ནི་བདེན་ན། དེ་ནི་ཀུན་རྫོབ་ཀྱི་བདེན་པ་ཡིན་ཏེ། ཡང་དག་པར་ནི་གཉིས་ཀྱིས་སྟོང་པ་རང་རིག་པའི་མཚན་ཉིད་འདི་དོན་དམ་པར་རྫས་སུ་ཡོད་དོ། །ཞེས་ཟེར། རྣམ་པ་མེད་པར་སྨྲ་བ་ནི། ཁམས་གསུམ་པའི་སེམས་དང་སེམས་ལས་བྱུང་བ་ཐམས་ཅད། གཟུང་འཛིན་གྱི་རྣམ་པ་དང་བཅས་པར་སྐད་ཅིག་ཀྱང་སྐྱེ་མ་མྱོང་སྟེ། གཟུང་འཛིན་དུ་སྣང་བ་ནི་སེམས་དང་དེ་ཉིད་དང་གཞན་དུ་བརྗོད་དུ་མེད་པའི་བག་ཆགས་ཡིན་ཏེ། དེ་ཉིད་ཁོ་ན་ལ་ཀུན་ཏུ་བརྟགས་པ་ཞེས་ཀྱང་བྱ་སྟེ། དེ་བས་ན་ཉོན་མོངས་པ་ལ་སོགས་པའི་སྒྲིབ་པ་ཐམས་ཅད་ཀྱང་གློ་བུར་བའི་བག་ཆགས་ཡིན་ཏེ། ཀུན་ཏུ་བརྟགས་པའི་མཚན་ཉིད་ཡིན་ནོ། །སེམས་ཀྱི་རང་བཞིན་ནི་སེམས་ཅན་གྱི་དུས་ནའང་གསལ་བ་རང་རིག་པ་རང་བཞིན་གྱིས་གྲུབ་པ་ཡིན་ལ། འཕགས་པའི་དུས་ནའང་དེ་ལས་བོགས་དབྱུང་དུ་མེད་དེ་ཡེ་ཤེས་རྣམ་པ་དང་བྲལ་བའི་རང་བཞིན་དུ་གནས་སོ། །ཅུང་ཟད་བྱེ་བྲག་ཏུ་ན་སེམས་ཅན་གྱི་དུས་ན་གློ་བུར་བའི་བག་ཆགས་ཀྱིས་བསྒྲིབས་ནས་མི་གསལ་བར་ཉམས་སུ་མྱོང་ངོ་། །འཕགས་པའི་དུས་ན་གསལ་བར་ཉམས་སུ་མྱོང་ངོ་། །ཞེས་ཟེར་རོ། །མཐའ་བསྡུས་ན་ཐམས་ཅད་ཀྱང་རྣམ་པར་མི་རྟོག་པའི་ཡེ་ཤེས་གཉིས་པོས་སྟོང་པའི་དེ་བཞིན་ཉིད་དང་བཅས་པ། དོན་དམ་པར་རྫས་སུ་ཡོད་དོ། །ཞེས་ཟེར་རོ། །དེ་ལ་དབུ་མའི་ཚུལ་ལས། ཇི་ལྟར་རྣལ་འབྱོར་སྤྱོད་པ་རྣམས་ཀྱིས་དོན་དམ་པའི་མཚན་ཉིད་དུ་ཡོད་པ་དང་ཡིན་པར་ལྟ་བ་དེ་དག་ནི། ཀུན་ཏུ་བརྟགས་པ་སྟེ་གཏན་མེད་དོ་ཞེས་མེད་པར་འགེགས་པར་བྱེད། མ་ཡིན་པར་དགག་པར་བསྒྲུབ་པར་བྱ་བའི་དོན་དམ་པ་ནི་དབུ་མ་པ་མི་སྒྲུབ་བོ། །ཀུན་རྫོབ་སྒྱུ་མ་ཙམ་དུ་ཡང་དག་པའི་ཀུན་རྫོབ་རྒྱུ་དང་རྐྱེན་ལས་སྐྱེ་བ་དོན་བྱེད་ནུས་པ། མ་བརྟགས་ན་ཉམས་དགའ་བ་བརྟགས་ན་རིགས་པའི་སྤུངས་མི་བཟོད་དེ། རང་གི་ངོ་བོས་དབེན་པ་འདི་ནི་ཇི་ལྟར་སྣང་བ་དེ་བཞིན་དུ་ཡོད་པ་དང་ཡིན་པར་གྲུབ་སྟེ། མངོན་སུམ་དུ་མི་དམིགས་པ་དང་ཡང་མི་འགལ་ལོ། །ཞེས་ཟེར་རོ། །གསང་སྔགས་ཀྱི་ཚུལ་ལས། དོན་དམ་པར་དངོས་པོར་མ་གྲུབ་པ་ཀུན་རྫོབ་འཁྲུལ་པའི་ཤེས་པའི་སྣང་བ་ཙམ་ལ། ཇི་ལྟར་སྣང་བ་དེ་བཞིན་དུ་ཡོད་པ་དང་ཡིན་པའི་མཚན་ཉིད་དུ་འཛིན་པ་ནི། ཀུན་ཏུ་བརྟགས་པ་ཡིན་ཏེ་གཏན་མེད་དོ། །གང་གི་ཕྱིར་འཁྲུལ་པའི་ཤེས་པའི་སྣང་བ་ཡིན་པ་དེའི་ཕྱིར། སྣང་བ་ལྟར་མཚན་ཉིད་དུ་བཟུང་དུ་མི་རུང་སྟེ། དཔེར་ན་རྨི་ལམ་ན་རྒྱུ་དང་རྐྱེན་ལས་སྐྱེ་བར་སྣང་བ། འདི་ལྟར་ཞིང་རྨོས་པ་ལས་ལོ་ཐོག་དང་། དུག་འཐུངས་པ་ལས་ནད་དང་། སྨན་ཟོས་པ་ལས་སོས་པ་རྣམས་རྒྱུ་དང་རྐྱེན་ལས་སྐྱེ་བར་སྣང་ངོ་། །བྱ་བ་བྱེད་པ་སྣང་བའང་དེ་ཉིད་ཀྱང་ཡིན་ནོ། །གཞན་ཡང་རྨི་ལམ་གྱི་བུམ་པའི་གཟུགས་ཀྱིས་ནི་ཆུ་འཛིན་པའི་བྱ་བ་བྱེད་ནུས་པར་སྣང་ལ། བུམ་པའི་གཟུགས་བརྙན་གྱིས་ནི་ཆུ་འཛིན་པའི་བྱ་བ་བྱེད་མི་ནུས་པར་སྣང་ངོ་། །དེ་ལྟ་ན་རྨི་ལམ་གྱི་གནས་སྐབས་ཙམ་ལའང་དེ་ལྟར་སྣང་བ་ནི་བསྒྲུབ་ཀྱང་མི་དགོས་ལ་མཚན་ཉིད་བྱེ་བྲག་ཏུ་གྱུར་པ་ནི་ཅུང་ཟད་ཀྱང་མེད་དོ། །དེ་བཞིན་དུ་ཕྱི་ནང་གི་དངོས་པོ་རྒྱུ་དང་རྐྱེན་གྱིས་སྐྱེ་བར་སྣང་བ་དང་། དོན་བྱེད་ནུས་པ་དང་མི་ནུས་པར་སྣང་བའི་བྱེ་བྲག་འདི་དག་ཀྱང་། སྣང་བ་ཙམ་ནི་མཁས་པ་པཎ་ཌི་ཏ་ནས་བླུན་མོ་བ་གླང་རྫི་ཡན་ཆད་གང་ཡང་རུང་སྟེ། ལས་ཀྱི་བགོ་སྐལ་ལ་སྤྱོད་པ་མཐུན་པར་སྣང་བ་དང་། ཡོངས་སུ་དག་པ་དང་མ་དག་པ་ལ་སོགས་པ་སྣང་བ་བྱེ་བྲག་མཐུན་པ་རྣམས་ལ་སྣང་ངོ་། །ཞེས་བསྒྲུབ་མི་དགོས་ཏེ། མཚན་ཉིད་སྣ་ཚོགས་རྣམ་པར་འཇོག་པའི་མཚན་གཞི་ཡིན་ནོ། །མཚན་ཉིད་ནི་ཇི་ལྟར་སྣང་བ་དེ་ལྟར་བསྒྲུབ་པ་རྡུལ་ཕྲ་མོ་ཙམ་ཡང་མེད་དོ། །དེ་བས་ན་དངོས་པོ་རང་གི་མཚན་ཉིད་པར་བཞག་པ་ཐམས་ཅད་ཀུན་ཏུ་བརྟགས་པའི་མཚན་ཉིད་པར་མ་གྱུར་པ་མཐར་འགའ་ཡང་མེད་དོ། །དེ་བས་ན་ཤེས་བྱ་རྣམས་ལ་ཀུན་ཏུ་བརྟགས་པས་སྟོང་པའི་རང་གི་མཚན་ཉིད་པ། ཡོད་པ་དང་ཡིན་པར་བསྒྲུབ་ཏུ་རུང་བར་མྱེད་པར་དགག་པས་བསྟན་པའི་གཞིར་གྱུར་པ་འགའ་འང་ལྷག་མ་མི་ལུས་སོ། །སྣང་བ་ཙམ་ནི་ལས་ཀྱི་གོ་སྐལ་ལ་སྤྱོད་པ་མི་མཐུན་པ་རྣམས་ལ་མཚན་ཉིད་པར་བཞག་པ་རྣམས་ཀྱང་མི་སྣང་ངོ་། །ཀུན་ཏུ་བརྟགས་པར་བཞག་པ་རྣམས་ཀྱང་རྟོག་པ་ཅུང་ཟད་བརྟས་པ་རྣམས་ལའང་སྣང་ངོ་། །ཡང་དག་པའི་ཀུན་རྫོབ་རྒྱུ་དང་རྐྱེན་ལས་སྐྱེ་བ་དོན་བྱེད་ནུས་པའི་མཚན་ཉིད་ཡོད་པར་བཤད་པ་འདི་དག །ཀུན་ཏུ་བརྟགས་པའི་མཚན་ཉིད་ཡིན་པར་གསང་སྔགས་ཀྱིི་ཚུལ་ལས་སྔོན་གྱི་མཁན་པོ་རྣམས་ཀྱིས་བཤད་པ་ཅུང་ཟད་ཙམ་བརྗོད་པར་བྱ་སྟེ། དེ་ལ་དབུ་མའི་ཚུལ་ལས་ཕྱི་ནང་གི་དངོས་པོ་འདི་དག་རྟེན་ཅིང་འབྲེལ་ཏེ་འབྱུང་བའི་ཕྱིར་དོན་དམ་པར་སྐྱེ་བ་ནི་མེད། ཀུན་རྫོབ་ཏུ་རྒྱུ་དང་རྐྱེན་གྱི་དབང་ལས་སྐྱེ་ཞིང་འགག་སྟེ། མི་རྟག་པ་རྣམ་པར་འགྱུར་བའི་ཆོས་ཅན་ནོ། །ཞེས་འདོད་པ་དེ་ཉིད་ལས་བརྩམས་ཏེ་གསུངས་པ། འདི་ཀུན་རྟེན་ཅིང་འབྲེལ་འབྱུང་ཚུལ་ཏེ་སྐྱེ་དང་འགག་པར་འགྱུར། །ཞེས་པ། ཚིག་པའི་ས་བོན་བཞིན་དུ་མེད་ལས་མེད་པ་མི་འབྱུང་རྒྱུ་འབྲས་མེད། ཅེས་བྱ་བ་ལ་སོགས་པའོ། །འོ་ན་རྒྱུ་འབྲས་སུ་སྣང་བ་འདིའི་མཚན་ཉིད་ཅི་ཞེ་ན། དངོས་པོར་ཞེན་ཅིང་རྒྱུ་དང་འབྲས་བུར་རྟོགས་པའི་སེམས་ཉིད་ནི་རྒྱུ་དང་རྐྱེན་དུ་སྣང་སྟེ། ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །དེ་བས་ན་གསང་སྔགས་ཀྱི་ཚུལ་ལས། ཆོས་ཐམས་ཅད་ནི་ཀུན་ཏུ་བརྟགས་པ་ཙམ་མོ། །བརྟགས་པ་ཙམ་གང་ཡིན་པ་དེ་ཉིད་ཀྱང་ཀུན་ཏུ་རྟོག་པ་ཙམ་མོ། །ཀུན་ཏུ་རྟོག་པ་རྣམས་ཀྱི་རང་གི་ངོ་བོ་གང་ཡིན་པ་ནི་ཀུན་ཏུ་བརྟགས་པའི་མཚན་ཉིད་དོ། །ཡོངས་སུ་གྲུབ་པའི་མཚན་ཉིད་ནི་གཏན་མེད་དོ། །ཀུན་ཏུ་བརྟགས་པ་དེ་ཉིད་ཤེས་བྱའི་ཆོས་ཀྱི་མཚན་ཉིད་ཀྱང་ཡིན་ནོ། །ལམ་ཡང་ཡིན་ནོ། །འབྲས་བུའང་ཡིན་ནོ། དེ་བས་ན་གསང་སྔགས་ཀྱི་ཚུལ་ལ་གནས་པའི་རྣལ་འབྱོར་པས། ཀུན་ཏུ་བརྟགས་པ་ཙམ་གྱི་བློ་ལ་བརྟེན་ནས་ཤེས་བྱ་ལ་བལྟ་བར་བྱའོ། །འབྲས་བུ་མངོན་དུ་བྱའོ། །འོ་ན་ཆོས་ཀྱི་མཚན་ཉིད་འདི་ལྟ་བུར་བདེན་ན། རྒྱལ་བ་རྣམས་ཀྱིས་ཀྱང་ཐོག་མ་ཉིད་དུ་དེ་ལྟར་ཅི་སྟེ་མི་བསྟན་ཅེ་ན། ཤེས་རབ་དང་མོས་པ་ཟབ་ཅིང་རྒྱ་ཆེ་བ་རྣམས་ཀྱི་སྤྱོད་ཡུལ་ཡིན་ཏེ། གང་ཟག་ཉོན་མོངས་པས་ཁེངས་ཤིང་ཉོན་མོངས་པར་བྱས་པ་རྣམས་ལ་བསྟན་པར་གྱུར་ན། ཆད་པར་སྨྲ་བ་ཉིད་དང་བྱེ་བྲག་མེད་དེ། འགྲོ་བའི་རྒྱུན་ཆུད་གསོན་པར་འགྱུར་ཏེ། རྣམ་པར་དཀར་བའི་རྩོལ་བ་ཐམས་ཅད་ཟློག་པར་བྱེད་དོ། །དེ་བས་ན་ཀུན་ལ་བསྟན་པར་བྱ་བ་མ་ཡིན་པ་དང་། རྟོགས་པར་དཀའ་བའི་ཕྱིར་གསང་སྔགས་ཀྱི་ཚུལ་ཞེས་བྱའོ། །དེ་བས་ན་དངོས་པོར་ཞེན་པ་རྣམས་ཀྱི་བློ་ཁད་དང་རིམ་གྱིས་གཞུག་དགོས་ཏེ། དཔེར་ན་མི་ཆུས་ཁྱེར་བ་ཞིག་གིས་རྟེན་ས་བཙལ་བ་ལས། ཤིང་ཆུར་འགྱེལ་བ་ཞིག་གི་རྩེ་མོ་ལ་ཟིན་ཏེ། དེས་བསམས་པ་རྩེ་མོ་འདི་ནི་རབ་ཏུ་མི་བརྟན་པས་རྟེན་མི་ནུས་ཏེ། མྱུར་དུ་འདི་བོར་ལ་རྩ་བའི་ཆ་ལ་འཇུས་ཏེ་སྐམས་ལ་འབྱུང་ངོ་སྙམ་ནས་རིམ་གྱིས་རྩ་བའི་དྲུང་དུ་ཉེ་བར་ཕྱིན་པ་དང་། རྩ་བ་དྲུངས་ཕྱུང་དུ་ཆུས་ཁྱེར་རོ། །དེ་ནས་བལྟས་ན་རྩ་བའི་ཆ་ཉིད་ཆུར་བྱིང་བར་གྱུར། རྩེ་མོའི་ཆ་ཁར་བྱུང་མཐོང་ནས། རྩེ་མོའི་ཕྱོགས་སུ་སླར་བྲོས་སོ། །དེས་བསམས་པ་སྔོན་ཆད་བརྟན་པར་བསམས་པའི་རྩ་བའི་ཆ་ནི་འགྱིང་བའི་གཏིང་རྡོ་ཉིད་དུ་འདུག །མི་བརྟན་པར་བསམས་པའི་རྩེ་མོའི་ཆ་ནི་རྟེན་དང་སྐྱབས་སུ་རུང་བར་འདུག་པས། ང་ཅི་རན་ཅིག་ཏུ་བཅད་ལ། རྩེ་མོའི་ཆ་ཉིད་ལ་བརྟེན་ཏེ། ཡན་ལག་རྣམས་ཀྱང་བཅད་ལ། ལ་ལ་ནི་གནས་སུ་བྱ། ལ་ལ་ནི་རླུང་ཕྱོགས་དང་མཐུན་པའི་ཚེ་རླུང་ཡབ་བྱ། ལ་ལ་ནི་རླུང་ཕྱོགས་དང་མི་མཐུན་པའི་ཚེ་གཏིང་རྡོ་བྱ། ལ་ལ་ནི་སྐྱ་བར་བྱས་ཏེ་འགྲོ་བར་བསམས་ནས། དེ་བཞིན་དུ་བྱས་པས་ཆུ་ལས་ཐར་བ་དེ་བཞིན་དུ། ཐར་པའི་ལམ་འདོད་པ་རྣམས་ཀྱིས། དང་པོར་འཇིག་རྟེན་པའི་ལམ་ནས་འཇུག་སྟེ་བལྟས་ན། ཀུན་ཏུ་བརྟགས་པ་ཙམ་ལ་སྤྱོད་པར་མཐོང་ནས། ཀུན་ཏུ་བརྟགས་པ་དང་བྲལ་བ་རང་གི་ངོ་བོ་ཉིད་ཀྱིས་ཕྱིན་ཅི་མ་ལོག་པར་ཡོངས་སུ་གྲུབ་པའི་མཚན་ཉིད་ཅན་གྱི་ལམ་དང་འབྲས་བུར་བཅས་པ་ཞིག་འདོད་ནས། རིམ་པ་བཞིན་དུ་བརྟགས་ཤིང་བཙལ་ན། ཡང་དག་པར་བརྟགས་པ་ཐམས་ཅད་དྲུངས་ཕྱུང་དུ་མ་གྲུབ་པར་མཐོང་ངོ་། །དེ་ནས་ཇི་ལྟར་བགྲོད་བལྟས་ན་ཡང་དག་པར་ཞེས་བྱ་བར་བཟུང་ན། དོན་དམ་པར་བཟུང་བལྟ་ཨ་ཅང་ཡང་ཆེས། ཀུན་རྫོབ་ཏུ་ཡང་དག་པའི་མཚན་ཉིད་དུ་བཟུང་ཡང་། དེ་ཉིད་འཆིང་བའི་གཏིང་རྡོར་མཐོང་ཡང་དག་པར་ལྟ་བ་ཐམས་ཅད་ཤེས་རབ་ཀྱི་མཚོན་གྱིས་བཅད་ནས། ཀུན་ཏུ་བརྟགས་པ་ཙམ་ལ་བློ་གནས་ཏེ། ཐབས་མཁས་པའི་སྤྱོད་པས། ཅི་ལ་ཡང་མི་ཆགས་མི་གནས་ཤིང་བཅིངས་པ་མེད་བཞིན་དུ། ཐབས་མཁས་པའི་སྤྱོད་པ་ཇི་ལྟར་འདོད་པ་བཞིན་རོལ་ཅིང་བརྩེན་པས་དེ་བཞིན་དུ་འགྲུབ་པར་འགྱུར་བ་ནི། བྱ་ནམ་མཁའ་ལ་འཕྱོ་བ་བཞིན་ནོ། །འོ་ན་རྣལ་འབྱོར་སྤྱོད་པ་དག་གིས་ཀུན་རྟོག་པ་ནི། ཀུན་བརྟགས་པར་བཤད་པ་མ་ཡིན་པ་འདི་ཇི་ལྟ་བུ་ཞེ་ན། དེ་ནི་འདི་ལྟར་རང་གི་གྲུབ་པའི་མཐའ་ཀུན་ཏུ་བརྟགས་པར་འཛིན་པར་ནི་སུའང་མི་བྱེད་དོ། །རེ་ཤིག་དེ་ཉིད་ཀྱི་དབང་ལྟར་ན། བྱེད་པ་དང་ལས་རང་དབང་དུ་བརྗོད་པ་དང་། གཞན་དབང་དུ་བརྗོད་པ་གཉིས་ཡོད་དེ། དེ་དག་གང་སྒྲུབ་པར་བྱེད་པ་དེའི་ཚེ་གཅིག་ཤོས་འགེགས་པར་བྱེད་དོ། །འདི་ལྟར་བྱེད་པ་སྟྭ་རེ་ལས། ཤིང་བྱ་བ་དུམ་བུ་གཉིས་སུ་གྱུར་པ་ཡིན་པའི་ཚེ། གཞན་དབང་དུ་བརྗོད་པ་ཡིན་ཏེ། སྟྭ་རེ་རང་ལ་རང་གཅོད་ཅེས་ནི་སྒྲུབ་པར་མི་བྱེད་དོ། །མར་མེ་སྣང་བར་བྱེད་པ་ལྟ་བུ་སྒྲུབ་པར་བྱེད་པའི་ཚེ། གཞན་དབང་དུ་སྒྲུབ་པར་བྱེད་ན། གསལ་བར་བྱེད་པ་ནི་མར་མེ། གསལ་བར་བྱ་བ་ནི་མུན་པ་དང་ལྡན་པའི་ས་ཕྱོགས། གསལ་བར་བྱས་པ་ནི་ས་ཕྱོགས་མུན་པ་དང་བྲལ་བར་བྱས་པའོ། །རང་དབང་དུ་སྒྲུབ་པར་བྱེད་པ་ན། གསལ་བར་བྱེད་པའང་མར་མེ། གསལ་བར་བྱ་བའང་མར་མེ། གསལ་བར་བྱས་པའང་མར་མེ་ཉིད་རྒྱུན་མུན་པ་དང་བྲལ་བར་སྐྱེས་པའོ། །ཞེས་སྒྲུབ་པར་བྱེད་དོ། །རང་དབང་གཞན་དབང་གང་སྒྲུབ་ཀྱང་རུང་སྟེ། གཅིག་ཤོས་དགག་པ་མ་ཡིན་པ་བྱེད་པ་ཡོད་ལ་བྱས་པ་མེད་དོ། །ཞེས་ནི་དགག་ཏུ་མི་རུང་སྟེ། འདི་ལྟར་ཤིང་གཅོད་པར་བྱེད་པ་ནི་ཡོད་ལ་ཤིང་བཅད་པ་ནི་མེད་དོ། །ཞེའམ། མུན་པ་གསལ་བར་བྱེད་པ་ནི་ཡོད་ལ་བྱས་པ་ནི་མེད་དོ། །ཞེས་ནི་བསྒྲུབ་ཏུ་མི་རུང་ངོ་། །དེ་བཞིན་དུ་ཀུན་ཏུ་རྟོག་པ་ནི་ཡོད་ལ་ཀུན་བརྟགས་པ་ནི་མེད་དོ། །ཞེས་བསྒྲུབ་ཏུ་ནི་མི་རུང་སྟེ། འོན་ཀྱང་གཞུང་དེར་བྱེད་པ་དང་ལས་གཞན་གྱི་དབང་དུ་བརྗོད་པའི་ཚུལ་བཀག་པར་ཟད་དེ། འདི་ལྟར་ཀུན་བརྟག་པར་བྱ་བའང་གཞན་དབང་། ཀུན་རྟོག་པར་བྱེད་པའང་གཞན་དབང་གི་ཕྱོགས་གཅིག་སྟེ། རྣམ་པར་རྟོག་པ་དང་བཅས་པའི་བློའི་བྱེ་བྲག་ཐ་སྙད་འདོགས་པར་ནུས་པའི་ལས་ཅན། ཀུན་བརྟགས་པ་ནི་གཟུང་བ་དང་འཛིན་པའི་མཚན་ཉིད་ཅེས་བཞག་པ་ན། གཞན་དུ་ཀུན་བརྟགས་པ་དེ་ལྟ་བུ་མེད་དོ། །ཞེས་དགག་ཏུ་རུང་ངོ་། །རང་དབང་གི་ཚུལ་ལྟར་ན། མར་མེ་གསལ་བར་བྱེད་པའང་ཡིན་ལ་བྱ་བའང་ཡིན་ཏེ། བྱས་པ་ནི་མེད་དོ། །ཞེས་བསྒྲུབ་ཏུ་མི་རུང་བ་བཞིན་དུ། ཁམས་གསུམ་པའི་སེམས་དང་སེམས་ལས་བྱུང་བ་ཡང་དག་པ་མ་ཡིན་པའི་ཀུན་ཏུ་རྟོག་པ་ཡིན་པ་ན། ཀུན་ཏུ་བརྟག་པར་བྱ་བའང་སེམས་དང་སེམས་ལས་བྱུང་བ་ལས་གཞན་ན་མེད་དོ། །ཀུན་ཏུ་བརྟགས་པའང་སེམས་དང་སེམས་ལས་བྱུང་བ་དེ་ཉིད་རྒྱུ་དང་འབྲས་བུའི་ཚུལ་དུ་གྲུབ་ཅིང་། གཉིས་མེད་བཞིན་དུ་གཉིས་སུ་སྣང་བར་གྱུར་པ་ཉིད་ཡིན་ནོ། །དེ་བས་ན་སྐབས་གཞན་དག་ཏུའང་ཀུན་ཏུ་བརྟགས་པ་ཞེས་བརྗོད་པ་ན། རྣམ་པར་རྟོག་པ་བྱེ་བྲག་ཅན་གྱིས་ནན་གྱིས་བརྟགས་པ་ཙམ་ལ་འཇུག་པ་མཐོང་བས། ཐམས་ཅད་དུའང་དེ་ལྟར་སྦྱོར་བར་བྱེད་པ་ཡིན་ནོ། །རྟོག་པ་དང་བརྟགས་པའི་མཚན་ཉིད་ཐམས་ཅད་སྤྱིར་བསྡུ་ན། རྟོག་པའང་གསུམ་སྟེ། རྟོག་པ་དང་། ཀུན་རྟོག་པ་དང་། རྣམ་པར་རྟོག་པའོ། །འདི་གསུམ་ནི་དཔེར་ན། ཉོན་མོངས་དང་། ཉེ་བའི་ཉོན་མོངས་པ་དང་། ཀུན་ནས་ཉོན་མོངས་པ་ཞེས་བརྗོད་པ་ན། སྒྲ་འདོམས་པའི་ཚེ་ནི་ཡུལ་ཁྱབ་ཆེ་ཆུང་ཡོད་ལ། མ་འདོམ་པའི་སྐབས་ལ་ལར་ནི་ཐུན་མོང་དུ་གྱུར་པའང་ཡོད་པ་བཞིན་དུ། རྟོགས་པ་འདི་གསུམ་ཡང་དེ་འདྲ་སྟེ། དེ་ལ་རྟོག་པ་ཞེས་བྱ་བའི་སྒྲ་ནི། ཡུལ་རྒྱ་ཆེ་སྟེ་ལམ་དང་འབྲས་བུ་དང་བསྟན་པའི་གསུང་རབ་རྣམས་ལའང་འཇུག་གོ། །ཀུན་ཏུ་རྟོག་པ་ནི། ཁམས་གསུམ་པའི་སེམས་དང་སེམས་ལས་བྱུང་བ་ཐམས་ཅད་ལའང་འཇུག་གོ། །རྣམ་པར་རྟོག་པ་ནི། སེམས་པ་དང་ཤེས་རབ་ཀྱི་བྱེ་བྲག་ཐ་སྙད་འདོགས་པའི་ལས་ཅན་ཕྱོགས་འགའ་ལའང་འཇུག་གོ། །སྐབས་ལ་ལར་ནི་ཀུན་ཏུ་རྟོག་པ་ཉིད་ལ་རྣམ་པར་རྟོག་པའི་སྒྲས་ཀྱང་སྟོན་ཏོ། །དེ་ལས་སངས་རྒྱས་འཕྲུལ་པ་དང་བཅས་པ་དང་ལམ་དང་བསྟན་པའི་ཆོས་ལ་སྒྲ་འཇུག་པའི་ཚེ་ནི། ཐབས་ཀྱི་རྟོག་པ་ཞེས་ཀྱང་བྱའོ། །དེ་ལ་རྟོག་པ་དེ་རྣམས་ཀྱིས་བརྟགས་པ་གང་དང་གང་ཡིན་ཞེ་ན། དེ་ལ་ཐབས་ཀྱི་རྟོག་པས་བརྟགས་པ་ནི་དེ་ཉིད་ཡིན་ཏེ། རྟོག་པ་དེ་དག་ཉིད་ལ་ཐབས་སུ་བརྟགས་པ་ཞེས་ཀྱང་བྱའོ། །དེ་ཡང་འདི་སྐད་དུ། རྣམ་པར་མི་རྟོག་ཆོས་དག་ལས། །སེམས་ཅན་དོན་དུ་ཡོངས་སུ་རྟོག །རྟོག་པས་བརྟགས་པ་གང་ཡིན་དེ། །དེ་ཕྱིར་རྟོག་པ་ཞེས་བྱའོ། །ཞེས་བྱ་བ་ལ་སོགས་པ་གསང་སྔགས་ཀྱི་རྒྱུད་དང་རྟོག་པ་སོ་སོ་ལས་ཇི་སྐད་སྨོས་པ་དེ་དག་ལ། རྟོག་པའང་ཡིན་ལ་བརྟགས་པའང་ཡིན་པར་རྒྱ་ཆེར་འབྱུང་ངོ་། །ཀུན་ཏུ་རྟོག་པས་བརྟགས་པ་ནི་གོང་དུ་བཤད་ཟིན་ཏོ། །རྣམ་པར་རྟོག་པས་བརྟགས་པ་ནི། མུ་སྟེགས་ཀྱི་བདག་དང་ཉན་ཐོས་ཀྱི་གཟུང་འཛིན་ལ་སོགས་པ་གོང་དུ་སོ་སོའི་གྲུབ་མཐའ་བཤད་པའི་སྐབས་སུ་ཞིབ་ཏུ་བཤད་ཟིན་ཏོ། །དེ་ལ་རྟོག་པ་དེ་རྣམས་ཀྱི་བརྟགས་སྣང་གང་དང་གང་ཡིན་ཅེ་ན། དེ་ལ་ཐབས་ཀྱི་རྟོག་པའི་བརྟགས་སྣང་ནི། དངོས་གྲུབ་ཐོབ་པ་རྣམས་ཀྱིས་རྣམ་པར་སྨིན་པའི་ལུས་འདི་མ་བོར་བར། ལྷའི་སྐུ་ཕྱག་རྒྱ་ཆེན་པོ་དང་མཚན་དང་དཔེ་བྱད་དུ་ལྡན་པ། མངོན་པར་ཤེས་པ་དྲུག་དང་ལྡན་པ་ཐོབ་སྟེ། ལུས་མ་བོར་བར་སངས་རྒྱས་ཀྱི་ས་ལ་སྦྱོར་ནུས་པ་ལྟ་བུ་དང་། དེ་ལྟར་མ་གྱུར་ཀྱང་རྫས་མེ་ལྟར་འབར་བར་གྱུར་ཏེ། ནམ་མཁའ་ལ་འགྲོ་ཞིང་ཡོངས་སུ་དག་པའི་ཞིང་ཁམས་སུ་རྒྱུ་ཞིང་། ཚེ་བསྐལ་པའི་ཚད་ཙམ་དུ་གནས་པར་ནུས་པ་ལ་སོགས་པའོ། །ཀུན་རྟོག་པའི་བརྟགས་སྣང་ནི། ཁམས་གསུམ་པའི་ལུས་དང་གནས་དང་ལོངས་སྤྱོད་དུ་བཅས་པ་ན་སྨིན་ཞིང་སྣང་བ་ཐམས་ཅད་དོ། །རྣམ་པར་རྟོག་པའི་བརྟགས་སྣང་ནི། སྔོན་དགེ་སློང་རྣམས་ཀྱིས་མི་སྡུག་པ་བསྒོམས་པས་མངོན་དུ་གྱུར་ཏེ། གྲོགས་པོ་རྣམས་ལྷན་ཅིག་གནས་པའི་གླགས་མེད་དེ་ཞེ་སྡང་གི་ཡུལ་དུ་གྱུར་པ་ལྟ་བུའོ། །དེ་ལ་རྟོག་པ་དེ་རྣམས་ཀྱིས་བརྟགས་ཀྱང་དེ་ལྟར་སྣང་བར་མ་ནུས་པ་གང་ཞེ་ན། དེ་ལ་ཐབས་ཀྱི་རྟོག་པས་བརྟགས་ཀྱང་སྣང་བར་མ་ནུས་པ་ནི། གསང་སྔགས་ཀྱི་ལམ་སྒོམ་པ་ན། ཡི་གེ་དང་ཕྱག་རྒྱ་ལ་སོགས་པ་བསྒོམས་ཀྱང་མངོན་དུ་སྨིན་པར་མ་ནུས་པ་རྣམས་སོ། །འོན་ཀྱང་ས་བོན་ནི་སོགས་སོ། །ཀུན་ཏུ་རྟོག་པས་བརྟགས་ཀྱང་སྣང་བར་མ་ནུས་པ་ནི། སེམས་དང་སེམས་ལས་བྱུང་བ་གང་གིས་ལས་མངོན་པར་འདུ་བྱ་བ་ཡོད་ཀྱང་རྣམ་པར་སྨིན་པ་འབྱིན་མ་ནུས་པ་རྣམས་སོ། །འོན་ཀྱང་ས་བོན་ནི་སོགས་སོ། །རྣམ་པར་རྟོག་པས་བརྟགས་ཀྱང་སྣང་བར་མ་ནུས་པ་ནི། མུ་སྟེགས་ཅན་གྱི་བདག་ལ་སོགས་པ འོ། །འོན་ཀྱང་ས་བོན་ནི་སོགས་སོ། །དེ་ལ་རྟོག་པ་དེ་རྣམས་ཀྱིས་མ་བརྟགས་པས་མི་སྣང་བ་གང་ཞེ་ན། དེ་ལ་ཐབས་ཀྱི་རྟོག་པས་མ་བརྟགས་པས་མི་སྣང་བ་ནི་སོ་སོའི་སྐྱེ་བོ་རྣམས་ཀྱིས་ལམ་མ་བསྒོམས་པས་འཕགས་པའི་ཆོས་མི་སྣང་བའོ། །ཀུན་རྟོག་པས་མ་བརྟགས་པས་མི་སྣང་བ་ནི། ཤེས་པ་རྐྱེན་མ་ཚང་བས་ལས་མངོན་པར་འདུས་མ་བྱས་པ་རྣམས་ཕུང་པོ་མི་སྐྱེ་བ་རྣམས་སོ། །རྣམ་པར་མི་རྟོག་པས་མ་བརྟགས་པ་ནི། གཉིས་ཏེ། རྐྱེན་མ་ཚང་བས་རྟོག་པ་མ་སྐྱེས་ཏེ་མ་བརྟགས་པ་ནི་སྔ་མའི་ཁོངས་སུ་འདུས་སོ། །སོ་སོར་རྟོག་པའི་ཤེས་རབ་ཀྱིས་སོ་སོར་བརྟགས་ནས་སྟོང་པ་དང་བདག་མེད་པར་རྟོགས་ཏེ། བདག་དང་དངོས་པོར་མ་བཏགས་པས་མི་སྣང་བ་ནི། ལམ་བསྒོམ་པས་འདུས་མ་བྱས་ཐོབ་པའོ། །མ་བརྟགས་ཀྱང་སྣང་བ་ནི་འགའ་ཡང་མེད་དེ། རབ་རིབ་ཅན་གྱི་སྐྲ་ཤད་ཀྱང་ཀུན་རྟོག་པའི་བརྟགས་སྣང་ཡིན་ནོ། །རི་བོང་གི་རྭའང་ཀུན་རྟོག་པས་མ་བརྟགས་པས་མི་སྣང་བ་ཡིན་ཏེ། དེའི་རྒྱུད་ལ་རྭ་སྐྱེ་བའི་ལས་མ་བསགས་པར་ཟད་དོ། །དེ་ལ་རྣམ་པར་རྟོག་པས་བརྟགས་པ་དང་། རྟོགས་པ་ཞེས་བྱ་བའི་ཐ་སྙད་འཇུག་པ་ནི། འདི་ལྟར་རྣམ་པར་རྟོག་པ་དང་བཅས་པའི་བློ་ཕྱིན་ཅི་ལོག་གིས་མཐོང་བ་ནི་བརྟགས་པ་ཞེས་གདགས་སོ། །ཕྱིན་ཅི་ལོག་པའི་བློས་མཐོང་བ་ནི་རྟོགས་པ་ཞེས་གདགས་སོ། །འདིིར་བརྒལ་བ། སྒྲ་འདི་གཉིས་ནི་ཐུན་མོང་ཡིན་ཏེ། འདི་ལྟར་ཕྱིན་ཅི་ལོག་གིས་མཐོང་བ་ལའང་རྟོགས་པའི་སྒྲ་འཇུག་སྟེ། འདི་ལྟར་མ་རྟོགས་པ་དང་ལོག་པར་རྟོགས་ཞེས་བྱ་བ་ལྟ་བུའོ། །ཕྱིན་ཅི་མ་ལོག་པར་མཐོང་བ་ལའང་བརྟགས་པའི་སྒྲ་འཇུག་སྟེ། འདི་ལྟར་སོ་སོར་རྟོགས་པའི་ཤེས་རབ་ཀྱིས་ལེགས་པར་བརྟགས་ན་ཞེའམ། སོ་སོར་བརྟགས་པའི་འགོག་པ་ཞེས་བྱ་བ་ལྟ་བུའོ་ཞེ་ན། དེ་ནི་དེ་ལྟ་མ་ཡིན་ཏེ། རྟོགས་པ་དང་བརྟགས་པ་གཉིས་ལས་སྟོན་པའི་ཚིག་ཏུ་འདྲའང་། བྱ་བའི་ལས་དང་བྱེད་པའི་ལས་ལ་འཇུག་པའི་སྐབས་གཉིས་ཡོད་དེ། དེ་ལ་བྱ་བའི་ལས་སྟོན་པའི་ཚེ་མཐོང་བ་ཕྱིན་ཅི་ལོག་ལ་རྟོགས་པའི་སྒྲ་མི་འཇུག་གོ། །མཐོང་བ་ཕྱིན་ཅི་མ་ལོག་པ་ལ་བརྟགས་པའི་སྒྲ་མི་འཇུག་གོ། །བྱེད་པའི་ལས་སྟོན་པའི་ཚེ་ནི། མཐོང་བ་ཕྱིན་ཅི་ལོག་ལའང་རྟོགས་པའི་སྒྲ་འཇུག་ལ། མཐོང་བ་ཕྱིན་ཅི་མ་ལོག་པ་ལའང་བརྟགས་པའི་སྒྲ་འཇུག་སྟེ། དེ་ཡང་། ཀ་ལ་བི་ཏ་ཞེས་བྱ་བའི་སྒྲ་ནི་བརྟགས་པར་སྟོན་པ་སྟེ། ཕྱིན་ཅི་མ་ལོག་པ་ལ་ནི། ཨ་བ་བོ་དྷ་ཞེའམ། པྲ་ཏི་སང་ཀྱ་ཞེས་བྱ་བ་ལྟ་བུ་བྱེད་པའི་ལས་སྟོན་པའོ། །དེ་བས་ན་འདི་ལྟར་ཕྱིན་ཅི་ལོག་གི་རྣམ་པར་རྟོག་པའི་བློས་ཀུན་ཏུ་བརྟགས་པ་ཞེས་བྱ་བ་ནི། སྒྲོ་སྐུར་གྱི་གནས་སུ་གྱུར་པ་སྟེ། དེ་ལ་སྒྲོ་འདོགས་ཀྱི་གནས་ནི། གོང་དུ་སྨོས་པའི་རྟག་པར་ལྟ་བའི་གཞི་ལྔ་ལྟ་བུའོ། །སྐུར་པ་འདེབས་པའི་གནས་ནི་གཞི་ལ་འདེབས་ཏེ། འདི་ལྟར་རྒྱུ་མེད། འབྲས་བུ་མེད། བྱེད་པ་མེད། ཡོན་ཏན་ཁྱད་པར་ཅན་མེད། ཅེས་ཟེར་བ་ལྟ་བུའོ། །དེ་ལ་རྣམ་པར་རྟོག་པ་དང་བཅས་བློ་ཕྱིན་ཅི་མ་ལོག་པས་མཐོང་བ་ལ་རྟོགས་པ་ཞེས་བྱ་བའི་ཐ་སྙད་གདགས་པ་ནི། འདི་ལྟར་སྒྲོ་སྐུར་གྱི་གནས་ལས། སྒྲོ་འདོགས་ཀྱི་གནས་ལ་ཕྱིན་ཅི་མ་ལོག་པར་རྟོགས་པ་ནི་གོང་དུ་བཤད་ཟིན་ཏོ། །སྐུར་འདེབས་ཀྱི་གནས་ལ། རྒྱུ་ཡོད་དེ་ས་བོན་ནི་མྱུ་གུའི་རྒྱུ་ཡིན་ནོ། །འབྲས་བུ་ཡོད་དེ་མྱུ་གུ་ནི་ས་བོན་གྱི་འབྲས་བུ་ཡིན་ནོ། །བྱེད་པ་པོ་ཡོད་དེ་སྐྱེས་བུ་ནི་ས་བོན་འདེབས་པའི་བྱ་བ་བྱེད་པ་ཡིན་ནོ། །ཡོན་ཏན་ཁྱད་པར་ཅན་ཡོད་དེ། དཀོན་མཆོག་གསུམ་ནི་འཇིག་རྟེན་ཐམས་ཅད་ལས་མངོན་པར་ཁྱད་ཞུགས་ཤིང་འཕགས་པ་ཡིན་ནོ། །ཞེས་བྱ་བ་ལྟ་བུའོ། །འདི་བཞིན་དུ་ཇི་སྲིད་དུ་ཀུན་ཏུ་བརྟགས་པར་བཞག་པ་དང་མཚན་ཉིད་པར་གཞག་པ་ཐམས་ཅད་ཀྱང་། རྣམ་པར་རྟོག་པའི་བློ་ཕྱིན་ཅི་ལོག་ཏུ་མཐོང་བས་བརྟགས་པར་བཞག་པ་དང་། རྣམ་པར་རྟོག་པའི་བློ་ཕྱིན་ཅི་མ་ལོག་པར་མཐོང་བས་རྟོགས་པ་མཚན་ཉིད་པར་གཞག་པ་རྣམ་པ་གཉིས་ཡིན་ནོ། །གང་ཞིག་གིས་ཕྱིན་ཅི་མ་ལོག་པའི་བློས་རྟོགས་པར་བཞག་པ་དེ་ཉིད། གཞན་གྱིས་ཕྱིན་ཅི་ལོག་གི་བློས་བརྟགས་པ་ཡིན་པར་སྒྲུབ་སྟེ། དེ་བས་ན་མཐར་དོན་མཚན་ཉིད་པ་མི་རྙེད་པ་དེ་བཞིན་དུ། བློ་ཕྱིན་ཅི་མ་ལོག་པའང་མི་རྙེད་ལ། དེ་མ་རྙེད་པས་དོན་མཚན་ཉིད་པའང་མི་རྙེད་པ་ཡིན་ཏེ། རྣམ་པར་རྟོག་པ་བྱེ་བྲག་ཅན་གྱི་དབང་གིས་རྣམ་པར་གཞག་པ་འདི་བཞིན་དུ། ཡང་དག་པ་མ་ཡིན་པ་ཀུན་ཏུ་རྟོག་པ་ཕྲ་རགས་སུ་སྐྱེ་བ་ཐམས་ཅད་ཀྱི་མཚན་ཉིད་ཀྱང་དེ་འདྲའོ། །དེ་ལྟ་བས་ན་ཤེས་པ་ཤེས་རིག་གི་ངོ་བོར་གྲུབ་པ་ཉིད་ཀྱང་བརྟགས་སྣང་ཡིན་ཏེ། ཡོངས་སུ་གྲུབ་པའི་ངོ་བོ་ཉིད་དུ་གྲུབ་པ་མེད་དོ། །དཔེར་ན་མི་ཞིག་དགྲས་བསད་དོ་ཞེས་བརྗོད་པ་དང་། མཚོན་གྱིས་བསད་དོ་ཞེས་བྱ་བ་དོན་འདྲ་སྟེ། མཚོན་གྱིས་བསད་པ་དེ་ཉིད་དགྲས་བསད་པ་ཡིན་ནོ། །དེ་བཞིན་དུ་རྣམ་པར་ཤེས་པ་ཐམས་ཅད་རང་གི་ས་བོན་ལས་སྐྱེའོ། །ཞེས་བརྗོད་པ་དང་། རྣམ་པར་རྟོག་པའི་བརྟགས་སྣང་ཡིན་ནོ། །ཞེས་བརྗོད་པ་དོན་འདྲ་སྟེ། རང་གི་ས་བོན་ལས་སྐྱེ་ཞེས་བརྗོད་པས། བརྟགས་སྣང་མ་ཡིན་པའི་ཤེས་པ་རང་གི་བདག་ཉིད་ཐོབ་པ་མེད་དོ། །དེ་ལྟར་ན་བདེན་པ་རྣམ་པ་གཉིས་དབྱེར་མེད་པར་འགྱུར་རོ། །བདེན་པ་གཉིས་དབྱེར་མེད་པར་རྟོགས་པས་ཆོས་གཉིས་སུ་མེད་པར་འཇུག་པར་ནུས་པར་འགྱུར་རོ། །དེས་རྫོགས་པ་ཆེན་པོའི་ལྟ་བ་ལ་གནས་པ་ཞེས་བྱ་བའི་མིང་ཐོབ་བོ། །དེ་ཡང་ལྟ་བར་འཛིན་པ་ཐམས་ཅད་དང་བྲལ་བ་ཙམ་ལ་བྱ་སྟེ། འདི་ལྟར་ཉན་ཐོས་ཀྱི་གང་ཟག་པ་མེད་པར་རྟོགས། རང་སངས་རྒྱས་ཀྱིས་སྣང་བ་གཟུགས་ཀྱི་ཕུང་པོ་ལས་བརྩམས་ནས་གཟུང་བའི་དོན་མེད་པར་རྟོགས། རྣལ་འབྱོར་སྤྱོད་པས་གཟུང་འཛིན་གཉི་ག་མེད་པར་རྟོགས། དབུ་མས་དོན་དམ་པ་མེད་པར་རྟོགས། གསང་སྔགས་ཀྱིས་བདེན་པ་གཉིས་དབྱེར་མེད་པར་རྟོགས་ཞེས་བཤད་དེ། དེ་དག་ནི་ལྟ་བར་འཛིན་པ་དང་བཅས་པ་ཡིན། དེ་ལྟ་བུ་ལྟ་བར་འཛིན་པ་དང་བྲལ་བ་ལ། རྫོགས་པ་ཆེན་པོའི་ལྟ་བ་ཞེས་ཐ་སྙད་དུ་གདགས་ཏེ། ལྟ་བ་ཡེ་བཏང་ཆེན་པོ་ཞེས་ཀྱང་བྱའོ། །ད་ནི་ལྟ་བའི་ཞར་ལ་སྤོངས་ཚད་དང་མཐུའི་ཁྱད་པར་ཀྱང་ཅུང་ཟད་བཤད་པར་བྱ་སྟེ། དེ་ལ་ཉན་ཐོས་ཀྱིས་གང་ཟག་མེད་པར་རྟོགས་པས། ནང་གི་འཇིག་ཚོགས་ལ་ལྟ་བ་དང་། དེའི་དབང་ལས་གྱུར་པའི་ཉོན་མོངས་པ་ཐམས་ཅད་དང་། ཉོན་མོངས་པ་ཅན་གྱི་ཡིད་འཁོར་དང་བཅས་པའང་དམིགས་བཞིན་དུ་སྤོངས་སོ། །དེའི་དབང་གིས་ལས་ཀྱི་ཚེ་རྣམ་པར་སྦྱོང་བ་མཐུ་ཆུང་ངུ་ཐོབ་བོ་ཞེའོ། །རང་སངས་རྒྱས་ཀྱིས་སྣང་བ་གཟུགས་ཀྱི་ཕུང་པོ་ཕྱི་རོལ་གྱི་དོན་མེད་པར་རྟོགས་པས། བདག་ཏུ་རྟོག་པ་དང་གཟུང་བར་རྟོག་པ་གཉིའ་གའང་ཉམས་པར་བྱས་ཤིང་། བག་ཆགས་ཀྱི་མཚམས་སྦྱོར་བ་ཆུང་ངུ་སྤངས་པ་ཐོབ་བོ་ཞེའོ། །དེའི་དབང་གིས་ལས་ཀྱི་ཚེ་རྣམ་པར་སྦྱོང་བའི་མཐུ་ཆེན་པོ་ཐོབ་བོ། །ཐེག་པ་ཆེན་པོ་སྤྱིར་བསྡུས་ནས་ཆོས་དང་གང་ཟག་གཉིས་ག་ལ་བདག་མེད་པར་རྟོགས་པས། བདག་ཏུ་རྟོག་པ་དང་གཟུང་བའི་རྟོག་པ་དང་འཛིན་པའི་རྟོགས་པ་ཐམས་ཅད་དང་བྲལ་བའི་ཡེ་ཤེས་ཐོབ་ནས། བག་ཆགས་ཀྱི་མཚམས་སྦྱོར་བ་ཐམས་ཅད་ཡོངས་སུ་སྤངས་པ་ཐོབ་སྟེ། དེ་བཞིན་གཤེགས་པའི་བྱིན་རླབས་བསམ་གྱིས་མི་ཁྱབ་པའི་མཐུ་ཆེན་པོ་ཐོབ་པར་འགྱུར་རོ་ཞེའོ། །ཞལ་ལས་འོངས་པ་ཆོག་གོ། །དེ་ལྟར་ན་ལྟ་བ་ཐམས་ཅད་དང་བྲལ་བའི་རྫོགས་པ་ཆེན་པོའི་ཚུལ་འདི་ནི། ཐེག་པ་ཐམས་ཅད་ཀྱི་ཡང་རྩེ། ལུང་ཐམས་ཅད་ཀྱི་རྒྱལ་པོ། གསུང་རབ་ཐམས་ཅད་ཀྱི་ཉིང་ཁུ། རྒྱུད་ཐམས་ཅད་ཀྱི་སྤྱི་འགྲེལ། དགོངས་པ་ཐམས་ཅད་ཀྱི་ཞེ་ཕུགས། མན་ངག་ཐམས་ཅད་ཀྱི་སྙིང་པོ། ཞེས་བྱའོ། །དེ་ལ་ཐེག་པ་ཞེས་བྱ་བ་ནི། ཡཱ་ན་ཞེས་བྱ་བའི་སྒྲ་འགྲོ་བའི་བྱ་བ་ལ་འཇུག་སྟེ། དངོས་སུ་ལམ་ལ་བྱའོ། །སྐབས་སུ་འགྲོ་བར་བྱ་བ་དང་། གསུང་རབ་ལ་འཇུག་སྟེ། དེ་སྟོན་པ་ནི་འོག་ནས་ཀྱང་འབྱུང་བས། འདིར་ལམ་ཉིད་ལ་བྱ་སྟེ། དེ་བས་ན་ལམ་ཐམས་ཅད་ཀྱི་ཡང་རྩེ་བླ་ན་མེད་པ་ཞེས་བྱའོ། །དེ་ལ་ཉན་ཐོས་ཀྱི་རྣམ་པར་གྲོལ་བ་ནི། རྒྱུ་དང་རྐྱེན་དང་བྲལ་བ་ལས་སྐྱེས་པ། ཏིང་ངེ་འཛིན་ནི་དམིགས་པ་དང་བཅས་པའི་ས་ལ་གནས་པ། རང་སངས་རྒྱས་རྣམས་ཀྱི་རྣམ་པར་གྲོལ་བ་ནི། ངག་གི་ལམ་དང་བྲལ་བ་ལས་སྐྱེས་པ། ཏིང་ངེ་འཛིན་ནི་བརྗོད་དུ་མེད་པའི་ཆོས་ཀྱི་ཚུལ་ལ་གནས་པ། ཐེག་པ་ཆེན་པོའི་རྣམ་པར་གྲོལ་བ་ནི། གཟུང་བ་དང་འཛིན་པའི་རྣམ་པར་རྟོགས་པ་དང་བྲལ་བའི་ཡེ་ཤེས་ལས་སྐྱེས་པ། ཏིང་ངེ་འཛིན་ནི་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ལ་སྤྱོད་པ། གསང་སྔགས་ཀྱི་ཚུལ་ནི། རྣམ་པར་གྲོལ་བ་ཏིང་ངེ་འཛིན་གཉིའ་ག་དབྱེར་མེད་པར། རྡོ་རྗེ་ལྟ་བུ་རྣམ་པ་གསུམ་གྱི་ཉམས་རྙེད་པ་ཞེས་འབྱུང་ན། དེ་དག་ཐམས་ཅད་ནི་བགྲོད་ཅིང་འབྱུང་བ་ལ་ལྟོས་པ་ཡིན་ལ། འདིར་དེ་ལྟ་བུ་གང་ཡང་མི་སྒྲུབ་སྟེ། བགྲོད་དུ་མེད་པ་ཉིད་ལམ་གྱི་མཆོག་ཡིན་པས། དེའི་ཕྱིར་ན་ཐེག་པ་ཐམས་ཅད་ཀྱི་ཡང་རྩེ། ཞེས་བྱའོ། །དེ་ལ་ལུང་ཞེས་བྱ་བའི་དོན་ནི། ཨ་ག་མ་ཞེས་བྱ་བའི་སྒྲ། གཞན་ལས་འོངས་པ་ལ་ཡང་བྱ། རྟེན་དང་གཞིར་གྱུར་པ་ལའང་བྱ་སྟེ། དངོས་སུ་རྒྱལ་བའི་བཀའི་མཚན་ཉིད་ལ་བྱ། དེ་ལྟ་བུའི་བཀའ་ཐམས་ཅད་ཀྱིས་ཀྱང་རྫོགས་པ་ཆེན་པོའི་ཚུལ་སྟོན་པར་བྱེད་ཀྱང་མི་ནུས། གནོད་པ་སྒྲུབ་པར་བྱེད་ཀྱང་མི་ནུས་ཏེ་ཟིལ་གྱིས་གནོན་མི་ནུས་ལ། རྫོགས་པ་ཆེན་པོའི་ཚུལ་གྱིས་ནི། ཐེག་པ་ཐམས་ཅད་ཀྱི་གྲུབ་པའི་མཐའ་ཐམས་ཅད་ཀྱང་སོ་སོ་མ་འདྲེས་པར་སྟོན་པར་བྱེད་ཀྱང་ནུས་ལ། ཐམས་ཅད་སུན་འབྱིན་པར་བྱེད་ཀྱང་ནུས་ཏེ། བཀའ་ཐམས་ཅད་ཟིལ་གྱིས་གནོན་པ་ནི། དཔེར་ན་བརྒྱ་བྱིན་གྱིས་རྒྱལ་མཚན་གྱི་རྩེ་མོ་ལ་ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོ་བཙུགས་པ་བཞིན་དུ་འགྲན་ཟླ་མེད་ཅིང་རྫི་བ་མེད་དེ། དེའི་ཕྱིར། ལུང་ཐམས་ཅད་ཀྱི་རྒྱལ་པོ། ཞེས་བྱའོ། །དེ་ལ་གསུང་རབ་ཅེས་བྱ་བ་ནི། པྲ་ཙ་ན་ཞེས་བྱ་བའི་སྒྲ། ཙ་ན་ནི་ཚིག་གམ་ངག །པྲ་ནི་ཉེ་བར་བསྒྱུར་བ་དོན་ལྷག་པར་སྟོན་པའི་ཚིག་སྟེ། གསུང་རབ་ཅེས་བཏགས་ཏེ་འཇིག་རྟེན་གྱི་གཙུག་ལག་དོན་ཆུང་བ་རྣམས་ལ། ཀུ་བ་ཙ་ན་ཞེས་བྱ་སྟེ། ཀུ་ནི་ངན་པར་བསྟན་པའི་ཚིག་གོ། །དེ་ལྟ་བུ་མ་ཡིན་པ་ཚིག་གམ་ངག་གང་གིས་ཐར་པའི་ལམ་སྟོན་པར་བྱེད་པ་སྟེ། དངོས་སུ་གསུང་རབ་ཡན་ལག་བཅུ་གཉིས་ཀྱིས་བསྡུས་པའི་ཆོས་ཀྱི་ཕུང་པོ་ལ་བྱའོ། །དེ་རྣམས་ལས་བསྟན་པར་བྱ་བའི་དོན་ནི། དྲང་བའི་དོན་དང་ངེས་པའི་དོན་གཉིས་སྟོན་ཏེ། དེ་ཡང་གང་ཞིག་གིས་ངེས་པའི་དོན་དུ་བསྟན་པ་དེ་གཞན་གྱིས་དྲང་བའི་དོན་དུ་སྟོན་པར་ཡང་བྱེད་ལ། གཞུང་ཁ་ཅིག་ལ་ཡང་དྲང་བའི་དོན་དང་ངེས་པའི་དོན་གཉིའ་ག་ལྡན་པར་སྟོན་པའང་ཡོད་ན། རྫོགས་པ་ཆེན་པོའི་ཚུལ་ལ་ནི། དྲང་བའི་དོན་དུ་སྟོན་པར་བྱེད་པའི་བཀའ་གཞན་གང་ཡང་མེད་ཅིང་། ངེས་པའི་དོན་གྱི་མཆོག་ཏུ་གྱུར་པ་འབའ་ཞིག་མ་གཏོགས་པ། སེལ་མེད་ཅིང་སྙིགས་མར་གཞག་པ་གང་ཡང་མེད་པས། དེའི་ཕྱིར། གསུང་རབ་ཐམས་ཅད་ཀྱི་ཉིང་ཁུ། །ཞེས་བྱའོ། །དེ་ལ་རྒྱུད་ཅེས་བྱ་བ། ཏན་ཏྲ་ཞེས་བྱ་བའི་སྒྲ། འབྲེལ་པའམ་རག་ལས་པའམ་འཁྲུགས་པ་ལ་བྱ་སྟེ། དངོས་སུ་བྱ་བ་དང་རྣལ་འབྱོར་གྱི་རྒྱུད་རྣམས་ལས། བླ་ན་མེད་པའི་བྱང་ཆུབ་བསྒྲུབ་པའི་ཐབས་དང་། མངོན་པར་ཤེས་པ་ལ་སོགས་པ་འཇིག་རྟེན་གྱི་དངོས་གྲུབ་ཆེན་པོ་རྣམས་བསྒྲུབ་པའི་ཐབས་དང་། ཞི་བ་ལ་སོགས་པ་ལས་ཀྱི་སྤྲོས་པའི་ཐབས་སྣ་ཚོགས་སྒྲུབ་པ་པོའི་བྱ་བར་གྱུར་པ་མཐའ་ཡས་པ་ཐམས་ཅད་ཀྱང་། རྫོགས་པ་ཆེན་པོའི་དོན་གྱིས་མ་ཟིན་ན་མཚན་མའི་འཆིང་བས་ཟིན་པར་འགྱུར་ལ། རྫོགས་པ་ཆེན་པོའི་དོན་གྱིས་ཟིན་ན་ལས་རྒྱ་མཚོ་ཇི་ལྟར་སྤྱད་ཀྱང་འཆིང་བར་མི་འགྱུར་བས། དེའི་ཕྱིར། རྒྱུད་ཐམས་ཅད་ཀྱི་སྤྱི་འགྲེལ་ཅེས་བྱའོ། །དེ་ལ་དགོངས་པ་ཞེས་བྱ་བ་ནི། ཨ་བི་སནྡི་ཞེས་བྱ་བའི་སྒྲ། ཚིག་གང་གཟུགས་པོར་མ་བསྟན་ཏེ་ལྡེའུ་དང་ཟུར་གྱིས་སྟོན་པ་ལ་བྱ། ཨ་བི་པྲ་ཡ་ཞེས་བྱ་བའི་སྒྲ། ཚིག་གཞན་དང་གཞན་གྱིས་དོན་གཞན་དང་གཞན་བསྟན་པར་བྱ་བ་ཡོད་པ་ལ་བྱ་སྟེ། བསྡུས་ན་ལྡེམ་པོར་དགོངས་པའམ་དགོངས་པ་ཞེས་བྱའོ། །དེ་ཡང་ཉན་ཐོས་ཀྱི་ཚུལ་ལས་འདི་ལྟར། རྒྱལ་བའི་བཀའ་རྣམས་ལས། ཡོད་པ་དང་མེད་པའི་ཚིག་གིས་བསྟན་པ་ཐམས་ཅད་ཀྱི་དགོངས་གཞི་ནི། གང་ཟག་དང་ཆོས་ཀྱི་མཚན་ཉིད་ལ་དགོངས་ཏེ་གསུངས་པ་ཡིན་ནོ་ཞེའོ། །རྣལ་འབྱོར་སྤྱོད་པའི་ཚུལ་ལས། འདི་ལྟར་རྒྱལ་བའི་བཀའ་རྣམས་ལས། ཡོད་པ་དང་མེད་པའི་ཚིག་གིས་བསྟན་པ་ཐམས་ཅད་ཀྱི་དགོངས་གཞི་ནི། ངོ་བོ་ཉིད་རྣམ་པ་གསུམ་གྱི་མཚན་ཉིད་ལ་དགོངས་ཏེ་གསུངས་པ་ཡིན་ནོ་ཞེའོ། །དབུ་མའི་ཚུལ་ལས་འདི་ལྟར། རྒྱལ་བའི་བཀའ་རྣམས་ལས་ཡོད་པ་དང་མེད་པའི་ཚིག་གིས་བསྟན་པ་ཐམས་ཅད་ཀྱི་དགོངས་གཞི་ནི། དོན་དམ་པ་དང་ཀུན་རྫོབ་ཀྱི་བདེན་པའི་མཚན་ཉིད་ལ་དགོངས་ཏེ་གསུངས་པ་ཡིན་ནོ་ཞེའོ། །དེ་དག་ནི་དགོངས་གཞི་ཡིན་ཡང་ཞེ་ཕུག་ནི་མ་ཡིན་ཏེ། འདི་ལྟར་རྒྱལ་བའི་བཀའ་རྣམས་ལས་ཐ་སྙད་སྣ་ཚོགས་ཀྱི་སྒོ་ནས་དགོངས་པ་སྣ་ཚོགས་བསྟན་པ་ཐམས་ཅད་ཀྱི་ཞེ་ཕུགས་ནི། ཆོས་གཉིས་སུ་མེད་པའི་དོན་འདི་ཉིད་བསྟན་པར་བྱ་བའི་ཆེད་ཡིན་ཏེ། རྒྱལ་བ་ཐམས་ཅད་ལ་དགོངས་པའི་ཕུགས་འདི་ལས་གཞན་མི་མངའ་བས་ན། དེའི་ཕྱིར། དགོངས་པ་ཐམས་ཅད་ཀྱི་ཞེ་ཕུགས། ཞེས་བྱའོ། །དེ་ལ་མན་ངག་ཅེས་བྱ་བ་ནི། ཨུ་པ་དེ་ཤ་ཞེས་པའི་སྒྲ། དོན་ཉེ་བར་བསྟན་ཅིང་གཏན་ལ་ཕབ་སྟེ་བསྟན་པ་ལ་བྱ་སྟེ། དོན་གྱི་ཁ་བརྒྱུད་པ་ཐམས་ཅད་དང་བྲལ་བ་ལ་མན་ངག །ཅེས་བྱའོ། །དེ་ལ་མན་ངག་གིས་དོན་གཏན་ལ་ཇི་ལྟར་ཕབ་ཅེ་ན། དོན་ཉེ་བར་ཐོག་ཏུ་ཕབ་སྟེ་བསྟན་ན། འདི་ལྟར་ཆོས་རྣམས་ཀྱི་དོན་ནི། སྟོང་ཞིང་བདག་མེད་པ་དང་། རང་བཞིན་མེད་པ་དང་། སྐྱེ་བ་མེད་པ་དང་། མཉམ་པ་ཉིད་དང་། གཉིས་སུ་མེད་པར་གཏན་ལ་ཕབ་བོ། །ཞེས་ཤེས་པར་བྱ་སྟེ། སྒྲ་འདི་རྣམས་ཀྱང་རེས་འགའ་ནི་དོན་གྱི་བྱེ་བྲག་མེད་པར་སྟོན། རེས་འགའ་ནི་ཚིག་གི་སྒོ་ཇི་ལྟ་བ་བཞིན་དུ་ཚིག་གི་ཡུལ་སོ་སོར་ཡོད་པར་སྟོན་ཏེ་སྐབས་ཀྱིས་སྦྱར་རོ། །དེ་ལ་འདི་ལྟར་ཉན་ཐོས་ཀྱི་ཚུལ་ལས། ཆོས་རྣམས་ནི་བདག་གི་ངོ་བོ་མ་ཡིན་ཞིང་། ཆོས་རྣམས་ལ་བདག་པོ་ཡོད་པའང་མ་ཡིན་པར་འདོད་པས། ཆོས་ཐམས་ཅད་སྟོང་ཞིང་བདག་མེད་པར་གཏན་ལ་ཕབ་པ་ཞེས་བྱ་སྟེ། འོན་ཀྱང་གཟུང་བ་དང་འཛིན་པའི་ངོ་བོ་ཉིད་འདོད་པས། རང་བཞིན་མེད་པར་གཏན་ལ་ཕབ་པ་ཞེས་བྱ་བའི་གྲངས་སུ་ནི་མི་ཆུད་དོ། །ཞེའོ། །རྣལ་འབྱོར་སྤྱོད་པའི་ཚུལ་ལས་གཟུང་བ་དང་འཛིན་པའི་ངོ་བོ་ཉིད་མེད་པར་འདོད་པས། རང་བཞིན་མེད་པར་གཏན་ལ་ཕབ་པ་ཞེས་བྱ་སྟེ། དེའི་ཚེ་རང་བཞིན་མེད་པ་དང་སྟོང་ཞིང་བདག་མེད་པའང་བྱེ་བྲག་མེད་དོ། །འོན་ཀྱང་གཞན་གྱི་དབང་རྒྱུ་དང་རྐྱེན་ལས་སྐྱེ་བ་ཡོད་པར་འདོད་པས། སྐྱེ་བ་མེད་པར་གཏན་ལ་ཕབ་པ་ཞེས་བྱ་བའི་གྲངས་སུ་ནི་མི་ཆུད་དོ། །ཞེའོ། །དབུ་མའི་ཚུལ་ལས་དོན་དམ་པར་སྤྲོས་པ་དང་བྲལ་བར་འདོད་པས། སྐྱེ་བ་མེད་པར་གཏན་ལ་ཕབ་པ་ཞེས་བྱ་སྟེ། དེའི་ཚེ་སྐྱེ་བ་མེད་པ་དང་། རང་བཞིན་མེད་པ་དང་། སྟོང་ཞིང་བདག་མེད་པའང་བྱེ་བྲག་མེད་དོ། །འོན་ཀྱང་ཡང་དག་པའི་ཀུན་རྫོབ་འདོད་པས། མཉམ་པ་ཉིད་དུ་གཏན་ལ་ཕབ་པ་ཞེས་བྱ་བའི་གྲངས་སུ་མི་ཆུད་དོ། །ཞེའོ། །གསང་སྔགས་ཀྱི་ཚུལ་ལས་བདེན་པ་གཉིས་དབྱེར་མེད་པར་འདོད་པས། མཉམ་པ་ཉིད་དུ་གཏན་ལ་བབ་པ་ཞེས་བྱ་སྟེ། དེའི་ཚེ་མཉམ་པ་ཉིད་དང་། སྐྱེ་བ་མེད་པ་དང་། རང་བཞིན་མེད་པ་དང་། སྟོང་ཞིང་བདག་མེད་པ་རྣམས་ཀྱང་བྱེ་བྲག་མེད་དོ། །འོན་ཀྱང་མཉམ་པའི་སྤྱོད་པ་ཉམས་སུ་ལེན་མི་ནུས་པའི་ཉམ་ང་བ་དང་། ཉམ་ང་བ་དེ་ཉིད་དུ་མྱུར་དུ་མེད་པར་བྱ་བའི་ཕྱིར་ཆེད་དུ་བརྟུལ་ཞུགས་དང་དུ་ལེན་པ་ལྟ་བུའང་ཡོད་པས། དེའི་ཕྱིར་ཆོས་ཐམས་ཅད་གཉིས་སུ་མེད་པར་གཏན་ལ་ཕབ་པ་ཞེས་བྱ་བའི་གྲངས་སུ་མི་ཆུད་དོ། །ཞེའོ། །རྫོགས་པ་ཆེན་པོའི་ཚུལ་ནི། ཆོས་ཐམས་ཅད་ལ་ཤེས་པར་བྱ་བ་བཞི་པོ་འདི་ལྟར། ཤེས་ཏེ་སྤང་བར་བྱ་བའམ། ཤེས་ཏེ་དང་དུ་བླང་བར་བྱ་བའམ། ཤེས་ཏེ་བཏང་སྙོམས་སུ་བཞག་པར་བྱ་བའམ། ཤེས་ཏེ་མངོན་དུ་བྱ་བ་རྣམས་གང་ཡང་མི་སྒྲུབ་པས། ཆོས་ཐམས་ཅད་གཉིས་སུ་མེད་པར་གཏན་ལ་ཕབ་པ་ཞེས་བྱ་སྟེ། དེའི་ཚེ་ཆོས་གཉིས་སུ་མེད་པ་ཞེས་བྱ་བ་དང་། མཉམ་པ་ཉིད་ཅེས་བྱ་བ་དང་། སྐྱེ་བ་མེད་པ་ཞེས་བྱ་བ་དང་། རང་བཞིན་མེད་པ་ཞེས་བྱ་བ་དང་། སྟོང་ཞིང་བདག་མེད་པ་ཞེས་བྱ་བ་རྣམས་ཀྱང་བྱེ་བྲག་མེད་དོ། །དེ་བས་ན་ཆོས་ཐམས་ཅད་གཉིས་སུ་མེད་པར་གཏན་ལ་འབེབས་པར་བྱེད་པ་འདི་ནི། མན་ངག་ཐམས་ཅད་ཀྱི་སྙིང་པོ་ཉིད་དུ་གྱུར་པ་ཡིན་པས། དེའི་ཕྱིར། མན་ངག་ཐམས་ཅད་ཀྱི་སྙིང་པོ། ཞེས་བྱའོ། །རྫོགས་པ་ཆེན་པོའི་ཚུལ་སྒྱུ་མ་ལྟ་བུ་མཐར་ཕྱིན་པ་དང་། སྒྱུ་མའི་མིང་འཛིན་པའི་ཐེག་པ་གཞན་རྣམས། ཤན་དབྱེ་བ་བསྟན་པའི་སྐབས་ཏེ། གསུམ་པའོ།། །།དེ་ལྟར་སྟོན་པའི་རྫོགས་པ་ཆེན་པོའི་ཚུལ་འདི་ཡང་བསྡུས་ཏེ་བསྟན་ན། ཆོས་ཐམས་ཅད་ཀྱི་རྩ་བ་ནི་སེམས་དང་སེམས་སྣང་བ་ཙམ་དུ་འདུས་ལ། སེམས་ཀྱི་རང་བཞིན་ཉིད་བྱང་ཆུབ་ཡིན་པས་བྱང་ཆུབ་ཀྱི་སེམས་ཞེས་བྱའོ། །བསྟན་པར་བྱ་བ་ནི་འདི་ཙམ་ལས་མེད་ལ། རྫོགས་པ་ཆེན་པོའི་ཚུལ་ལ་དད་པའི་གང་ཟག་རྣམས་ཀྱང་། འདི་ཉིད་བསྟན་པ་ཙམ་གྱིས་རྟོགས་ཤིང་འཇུག་པར་འགྱུར་བ་ཡིན་ན། འོན་ཀྱང་སྒྲའི་བསྟན་ཆོས་དང་། རིགས་པའི་བསྟན་བཅོས་ལ་མངོན་པར་ཞེན་པའི་གང་ཟག་དག་འདི་སྙམ་དུ། བདག་ཅག་གི་གྲུབ་པའི་མཐའ་འདི་དག་ནི། སྒྲའི་དོན་དང་རིགས་པས་གྲུབ་པ་ཡིན་ལ། རྫོགས་པ་ཆེན་པོའི་ཚུལ་ནི་རིགས་པ་དང་འགལ་ཏེ། གང་རིགས་པ་དང་འགལ་བ་དེ་ནི་བླང་བར་བྱ་བ་མ་ཡིན་ནོ། །སྙམ་དུ་སེམས་ཏེ། རྫོགས་པ་ཆེན་པོ་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བ་ལྟ་བུ་སྤངས་ནས། ནོར་བུ་འཆིང་བུ་དང་འདྲ་བའི་གྲུབ་མཐའ་སྣ་ཚོགས་ལ་ཞེན་པའི་གང་ཟག་ལ། རྫོགས་པ་ཆེན་པོའི་ཚུལ་ལས་གྲགས་པའི་ཐིག་ལེ་དང་ཆེ་བ་ལ་སོགས་པའི་སྐད་རྣམས་བཞག་སྟེ། སྤྱིར་གྲགས་པའི་སྐད་ཀྱིས་རིགས་པའི་ཚུལ་ཕྱོགས་འགའ་བཤད་དོ། །དེ་ལ་བྱང་ཆུབ་ཀྱི་སེམས་ཞེས་བྱ་བ་ལ། བྱང་ཆུབ་ནི། བོ་དྷི་ཞེས་བྱ་བ་ཨ་བ་བོ་དྷ་སྟེ། ཟད་པ་དང་མི་སྐྱེ་བ་ཤེས་པའམ། དྲི་མ་ཐམས་ཅད་ཡོངས་སུ་དག་པར་གྱུར་པའམ། ཕྱིན་ཅི་མ་ལོག་ལོགས་པར་ཁོང་དུ་ཆུད་པའམ། མ་ལུས་པར་ཀུན་ཆུབ་པ་ལ་བྱ། སེམས་ཞེས་བྱ་བ་ནི། ཙི་ཏ་ཞེས་བྱ་བ། ནི་ན་བི་ཙི་ཏ་སྟེ། སྣ་ཚོགས་པའི་དོན་ཏེ། དམིགས་པ་སྣ་ཚོགས་རྣམ་པར་རིག་པའམ། རྣམ་པ་གཅིག་ཏུ་འདུ་བྱེད་ཐམས་ཅད་ཀྱི་ས་བོན་བསགས་པས། ཆུན་པའི་སྒྱེའུ་སྣོད་ལྟར་གྱུར་པ་ལ་བྱ། ཙིན་ཏེན་ཙིད་དྷ་སྟེ། སེམས་པར་བྱེད་པས་སེམས་ཏེ། འདུ་བྱེད་སེམས་པ་དང་མཚུངས་པར་ལྡན་པ་གང་གིས། བྱ་བ་སྣ་ཚོགས་ལ་སེམས་པར་བྱེད། གཡོ་བར་བྱེད། འཇུག་པར་བྱེད་པས་སེམས་ཞེས་བྱའོ། །ཙི་ཏ་མ་ན་བིདྱཱན་ཏེ་སེམས་དང་ཡིད་དོན་གཅིག་སྟེ། གཟུགས་ལྟར་བེམས་པོར་གྱུར་པ་མ་ཡིན་ཏེ། ཤེས་ཤིང་རིག་པའི་བདག་ཉིད་དུ་གྱུར་པས་སེམས་ཞེས་བྱའོ། །དེ་ལྟར་སེམས་དང་བྱང་ཆུབ་ཀྱི་རང་བཞིན་ཐ་དད་དུ་བཞག་པ་འདི་ནི་དམིགས་པའི་མཚན་ཉིད་ཡིན་ཏེ། ངོ་བོ་ཉིད་ཀྱི་མཚན་ཉིད་ནི་གཉིས་མེད་དོ། །སྣང་བ་ནི་གཉིའ་ག་དུས་ཅིག་ཏུ་མི་ལྡན་ནོ། །དེ་ལ་དམིགས་པ་ནི་འདུ་ཤེས་ཀྱིས་བྱེ་བྲག་ཏུ་བྱས་པའི་བློའི་སྤྱོད་ཡུལ་ལོ། །སྣང་བ་ནི་ཚོར་བས་བྱེ་བྲག་ཏུ་བྱས་པའི་བློའི་སྤྱོད་ཡུལ་ལོ། །ངོ་བོ་ཉིད་ཀྱི་མཚན་ཉིད་ནི་ཤེས་རབ་དྲི་མ་མེད་པས་བྱེ་བྲག་ཏུ་བྱས་པའི་བློའི་སྤྱོད་ཡུལ་ལོ། །དེ་ལ་དམིགས་པའི་སྒོ་ནས་ནི། ཡོད་པ་དང་མེད་པ་ལ་སོགས་པའི་ཐ་སྙད་འདོགས་པར་བྱེད་དོ། །སྣང་བའི་སྒོ་ནས་ནི་ཡང་དག་པ་དང་ཡང་དག་པ་མ་ཡིན་པའི་ཐ་སྙད་འདོགས་པར་བྱེད་དོ། །ངོ་བོ་ཉིད་ཀྱི་སྒོ་ནས་ནི་གྲུབ་པ་དང་མ་གྲུབ་པའི་ཐ་སྙད་འདོགས་པར་བྱེད་དོ། །དེ་ལ་དམིགས་པའི་སྒོ་ནས་ནི་སྒྲོ་སྐུར་གྱི་གནས་ཀྱང་སེལ་བར་མི་ནུས་སོ། །སྣང་བའི་སྒོ་ནས་ནི་སྒྲོ་སྐུར་ནི་ཡོངས་སུ་གཅོད་པར་ནུས་ལ་འཁྲུལ་པ་ནི་སེལ་བར་མི་ནུས་སོ། །ངོ་བོ་ཉིད་ཀྱི་སྒོ་ནས་ནི་འཁྲུལ་པའང་ཡོངས་སུ་གཅོད་པར་བྱེད་དེ། དེ་བས་ན་འདུ་ཤེས་ཀྱི་སྤྱོད་ཡུལ་གྱི་རྗེས་སུ་འབྲེངས་པའི་བློ་ནི་དམན་པའོ། །ཚོར་བའི་རྗེས་སུ་འབྲེངས་བའི་བློ་ནི་བར་མའོ། །ཤེས་རབ་དྲི་མ་མེད་པའི་སྤྱོད་ཡུལ་གྱི་རྗེས་སུ་འབྲངས་པའི་བློ་ནི་མཆོག་གོ། །དེ་ནི་དཔེར་ན་འགལ་མེའི་འཁོར་ལོ་ལ་དམིགས་པའི་སྒོ་ནས་ནི། འགལ་མེ་དང་འཁོར་ལོ་གཉིའ་ག་འགོ་མཉམ་དུ་སོ་སོར་ཡོད་པར་དམིགས། སྣང་བའི་སྒོ་ནས་ནི་དུས་ཅིག་ཏུ་གཉིས་མི་སྣང་སྟེ། གང་གི་ཚེ་འཁོར་ལོར་སྣང་བ་དེའི་ཚེ་འགལ་མེར་མི་སྣང་ངོ་། །གང་གི་ཚེ་འགལ་མེར་སྣང་བ་དེའི་ཚེ་འཁོར་ལོར་མི་སྣང་ངོ་། །ངོ་བོ་ཉིད་ཀྱི་སྒོ་ནས་ནི་གཉིས་མི་འགྲུབ་སྟེ། གང་འཁོར་ལོའི་ངོ་བོ་ཉིད་གྲུབ་པ་ན། འགལ་མེ་གཏན་མེད་པར་འགྱུར་རོ། །གང་འགལ་མེའི་ངོ་བོ་ཉིད་དུ་གྲུབ་པ་ཞིག་ན་འཁོར་ལོ་གཏན་མེད་པར་འགྱུར་ཏེ། དེ་བས་ན་འདིར་འཁོར་ལོར་སྣང་ཙམ་ཉིད་ན་འགལ་མེའི་ངོ་བོ་ཉིད་དུ་གྲུབ་པ་ཡིན་ཏེ། འཁོར་ལོའི་ངོ་བོ་ཉིད་ནི་གཏན་མ་གྲུབ་པར་ཤེས་པར་བྱའོ། །སེམས་དང་བྱང་ཆུབ་ཀྱང་དེ་འདྲ་སྟེ། དམིགས་པའི་སྒོ་ནས་ནི་སེམས་དང་བྱང་ཆུབ་གཉིའ་ག་འགོ་མཉམ་དུ་རྫས་སོ་སོར་ཡོད་པར་དམིགས་སོ། །སྣང་བའི་སྒོ་ནས་ནི་གཉིས་དུས་གཅིག་ཏུ་མི་སྣང་སྟེ། གང་གི་ཚེ་སེམས་སུ་སྣང་བ་དེའི་ཚེ་བྱང་ཆུབ་མི་སྣང་ངོ་། །གང་གི་ཚེ་བྱང་ཆུབ་ཏུ་སྣང་བ་དེའི་ཚེ་སེམས་མི་སྣང་ངོ་། །དེ་ལ་སེམས་སུ་སྣང་བ་ནི་སླུ་བའི་ཕྱིར་འཁྲུལ་པའོ། །བྱང་ཆུབ་ཏུ་སྣང་བ་ནི་མི་སླུ་བའི་ཕྱིར་ཕྱིན་ཅི་མ་ལོག་པའོ། །དེ་ལ་ངོ་བོ་ཉིད་ཀྱི་སྒོ་ནས་ནི་གང་སེམས་ཀྱི་ངོ་བོ་ཉིད་དུ་གྲུབ་པ་ཞིག་ན་བྱང་ཆུབ་ཀྱི་ངོ་བོ་ཉིད་གཏན་མི་འགྲུབ་བོ། །གང་བྱང་ཆུབ་ཀྱི་ངོ་བོ་ཉིད་དུ་གྲུབ་པ་ཞིག་ན་སེམས་ཀྱི་ངོ་བོ་ཉིད་གཏན་མི་འགྲུབ་སྟེ། དེ་བས་ན་སེམས་སུ་སྣང་བ་ནི་འཁྲུལ་པ་ཡིན་ཏེ། ཇི་ལྟར་སྣང་བ་དེ་ལྟ་བུའི་ངོ་བོ་ཉིད་མེད་པས། སྣང་བ་ཉིད་ན་བྱང་ཆུབ་ཀྱི་ངོ་བོ་ཉིད་ཡིན་ཏེ་སེམས་ཀྱི་ངོ་བོ་ཉིད་ཡིན་ཏེ་སེམས་ཀྱི་ངོ་བོ་ཉིད་ནི་གཏན་མ་གྲུབ་བོ། །ཞེས་ཤེས་པར་བྱའོ། །དོན་འདིས་རྫོགས་པ་ཆེན་པོའི་ཚུལ་ལས་ཉོན་མོངས་པ་ཉིད་རྣམ་པར་གྲོལ་བའི་ལམ་ཆེན་པོ། ལས་ཉིད་རང་བྱུང་གི་ཡེ་ཤེས། སྡུག་བསྔལ་ཉིད་བྱང་ཆུབ་བོ། །ཞེས་གསུངས་པའི་དོན་ཡང་འདི་ལྟ་བུ་ཡིན་ནོ། །དེ་ལ་རྣམ་པར་གྲོལ་བ་དང་། རང་བྱུང་གི་ཡེ་ཤེས་དང་། བྱང་ཆུབ་ཅེས་བསྟན་པའང་། སེམས་ཅན་གྱི་ཉོན་མོངས་པ་དང་ལས་དང་སྡུག་བསྔལ་དུ་ཞེན་པའི་བློ་བཟློག་པའི་ཐ་སྙད་སོ་སོར་བསྟན་པར་ཟད་དེ། ངོ་བོ་ཉིད་ནི་དབྱེར་མེད་ཅིང་གཅིག་གོ། །དེ་ལ་གཅིག་པ་ཞེས་བྱ་བའི་དོན་ཡང་གསུམ་སྟེ། འདི་ལྟར་མཚུངས་པའི་གཅིག་པ་དང་། གྲངས་ཀྱི་གཅིག་པ་དང་། དབྱེར་མེད་པའི་གཅིག་པའོ། །དེ་ལ་གཅིག་པའི་ཐ་སྙད་ཐམས་ཅད་ཀྱང་དུ་མའི་བློ་ཟློག་པར་འདྲ་མོད་ཀྱི། རྟེན་གཞིའི་བྱེ་བྲག །དུ་མ་དམིགས་པ་དང་། གཅིག་དམིགས་པ་དང་། མི་དམིགས་པའི་བྱེ་བྲག་གིས་ཕྱེ་བ་ཡིན་ནོ། །དེ་ལ་མཚུངས་པའི་གཅིག་པ་གང་ཞེ་ན། འདི་ལྟར་ཀ་བ་ནི་བླ་གབ་འཛིན་པའི་མཚན་ཉིད་དེ། བུམ་པ་ནི་ཆུ་འཛིན་པའི་མཚན་ཉིད་དེ། གཉིའ་གའང་བྱས་པའོ་ཞེས་བརྗོད་པ་ན། ཀ་བ་བྱས་པ་ནི་ཀ་བ་རང་གི་ངོ་བོ་ལ་གནས། བུམ་པ་བྱས་པ་ནི་བུམ་པ་རང་གི་ངོ་བོ་ལ་གནས་ཏེ། རང་རང་གི་མཚན་ཉིད་ཅན་ཡིན་པར་དམིགས་ཀྱང་། བྱས་པ་ཉིད་ལའང་ཐ་དད་མི་དམིགས་སོ། །བྱས་པ་ཐ་དད་མི་དམིགས་ཀྱང་དེ་ཀ་བའང་བུམ་པར་མི་ལྡོག །བུམ་པའང་ཀ་བར་མི་ལྡོག །བླ་གམ་འཛིན་པ་དང་ཆུ་འཛིན་པའི་མཚན་ཉིད་ཀྱང་མི་འདོར་རོ། །ཚུལ་འདི་ལྟ་བུ་ནི་མནར་མེད་པའི་སེམས་ཅན་དམྱལ་བ་ནི་སྡུག་བསྔལ་གྱི་མཐར་ཕྱིན་པའི་མཚན་ཉིད། སངས་རྒྱས་བཅོམ་ལྡན་འདས་ནི་བདེ་བའི་མཐར་ཕྱིན་པའི་མཚན་ཉིད། གཉིའ་ག་ཡང་བདག་དང་བདག་གི་མཚན་ཉིད་ཀྱིས་སྟོང་པའོ་ཞེས་བརྗོད་ན། སྟོང་པ་ཉིད་ལ་ཐ་དད་མི་དམིགས་ཀྱང་། ངོ་བོ་ཉིད་ཀྱིས་སྟོང་པ་ཡིན་པར་མ་གྲུབ་ན། བདག་དང་བདག་གིས་སྟོང་པ་ཙམ་གྱིས་དམྱལ་བ་ཡང་སངས་རྒྱས་སུ་མི་ལྡོག །སངས་རྒྱས་ཀྱང་དམྱལ་བར་མི་ལྡོག །བདེ་བ་དང་སྡུག་བསྔལ་གྱི་མཚན་ཉིད་ཀྱང་མི་འདོར་ཏེ། དཔེར་ན་ཅིག་བརྒྱ་ཉིས་བརྒྱ་ཅིག་སྟོང་ཉིས་སྟོང་ཞེས་བརྗོད་པ་ན། བརྒྱ་དང་སྟོང་ཉིད་ཀྱང་མང་པོ་ཡིན་མོད་ཀྱི། བརྒྱ་པ་གཅིག་ལ་བརྒྱ་པ་གཉིས་ལ་སོགས་པའི་དབྱེ་བ་མེད་པས། གཅིག་བརྒྱ་ཞེས་གཅིག་གི་ཐ་སྙད་འཇུག་པ་བཞིན་ནོ། །དེ་ལ་གྲངས་ཀྱི་གཅིག་པ་གང་ཞེ་ན། དཔེར་ན་བསེ་རུ་ལྟ་བུ་ཞེས་བྱ་བ། རི་དྭགས་བསེ་ལ་རྭ་གཉིས་ལྷན་ཅིག་སྐྱེས་པ་མེད་དེ། རལ་གྲི་ལྟ་བུ་གཅིག་ཡོད་པ་ལ། བསྭེ་རུ་གཅིག་ཅེས་བརྗོད་པ་བཞིན་དུ། འདི་ལྟར་གང་ཟག་དང་ཕུང་པོ་གཉིས་ནི་མེད་ཕུང་པོ་ནི་ཡོད་ཅེའམ། རང་རྒྱལ་བ་རྣམས་ཀྱི་གཟུང་བ་ནི་མེད་འཛིན་པ་ནི་ཡོད་ཅེའམ། དེ་བཞིན་དུ་གཉིས་པོ་ནི་མེད་རང་རིག་པ་ནི་ཡོད་ཅེས་བྱ་བ་ལ་སོགས་པ་ཀུན་ཏུ་བརྟགས་པ་ལ་བསལ་ནས་མཚན་ཉིད་པ་ཡོད་པར་སྒྲུབ་པ་དང་། མཚན་ཉིད་པ་དེ་ཉིད་ལའང་ཆོས་དང་ཆོས་ཅན་བདག་ཉིད་གཅིག་པར་འདོད་པ་དང་། ཆོས་ཕན་ཚུན་ཀྱང་ངོ་བོ་ཉིད་གཅིག་པ་ལྟ་བུ་ཐ་དད་ནི་འགེགས་པར་བྱེད་ལ། དངོས་པོ་གཅིག་ནི་སྒྲུབ་པས་དེ་འདི་སྐད་དུ། གཉིས་ནི་མེད་དོ་གཅིག་ནི་ཡོད་དོ་ཞེས་དངོས་པོ་གཅིག་གི་བློ་མི་གཏོང་བ་འདི་ནི་གྲངས་ཀྱི་གཅིག་པ་ཞེས་བྱའོ། །དེ་ལ་དབྱེར་མེད་པའི་གཅིག་པ་ནི། དཔེར་ན་ནམ་མཁའི་རང་བཞིན་ནི་ནམ་མཁའ་ཉིད་དོ་ཞེས་བརྗོད་ན། རེ་ཤིག་ཐ་སྙད་ཀྱི་ཡུལ་དུ་ནམ་མཁའ་དང་ནམ་མཁའི་རང་བཞིན་ཞེས་ཐ་སྙད་ཀྱི་ཡུལ་དུ་ཆོས་དང་ཆོས་ཅན་དུ་འཇོག་ཀྱང་། ནམ་མཁའ་ཞེས་བྱ་བའང་སྟོང་པ་ཉིད་ཀྱི་ཚིག་བླ་དྭགས། ནམ་མཁའི་རང་བཞིན་ནམ་མཁའ་ཉིད་ཅེས་བྱ་བའང་སྟོང་པ་ཉིད་ཀྱི་ཚིག་བླ་དྭགས་ཏེ། འདི་ལ་གཉིས་སུ་གཞག་པའི་དོན་གང་ཡང་མི་རྙེད་དོ། །དེ་བཞིན་དུ་བྱང་ཆུབ་ཀྱི་སེམས་ཞེས་བྱ་བ་ལའང་། སེམས་བཀག་ནས་བྱང་ཆུབ་སྒྲུབ་པར་བྱེད་པ་དེའི་ཚེ་ནི། གྲངས་ཀྱི་གཅིག་པ་ཞེས་བྱ་བར་འགྱུར་རོ། །གང་གི་ཚེ་ཆོས་ཅན་སེམས་མ་གྲུ་པས། དེ་ལ་རྟེན་ནས་བཞག་པའི་བྱང་ཆུབ་ཀྱང་མ་གྲུབ་སྟེ། ཇི་ལྟར་ནམ་མཁའི་རང་བཞིན་ནམ་མཁའ་ཉིད་ཅེས་བརྗོད་པ་དང་འདྲ་བར། སེམས་དང་བྱང་ཆུབ་ཀྱི་དབྱེ་བ་མི་རྙེད་པར་འདོད་པ་དེའི་ཚེ། དབྱེར་མེད་པའི་གཅིག་པ་ཞེས་བྱའོ། །རྫོགས་པ་ཆེན་པོའི་ཚུལ་ལས་ཀྱང་ཚུལ་འདི་གཉིས་སྟོན་ཏོ། །དེ་ལ་བྱང་ཆུབ་ཀྱི་སེམས་ཀྱི་ཆེ་བ་སྟོན་པའི་ཚེ་ནི། གྲངས་ཀྱི་གཅིག་པའི་ཚུལ་ལས་བརྩམས་ཏེའང་སྟོན་ཏོ། །བྱང་ཆུབ་ཀྱི་སེམས་ཀྱི་རང་བཞིན་སྟོན་པའི་ཚེ་ནི་དབྱེར་མེད་པའི་གཅིག་པ་ཉིད་དུ་སྟོན་ཏོ། །འདི་ནི་དོན་གྱི་རྩ་བ་མདོར་བསྡུས་ནས་བསྟན་པ་ཡིན་ཏེ། འོག་ནས་འབྱུང་བའི་རྫོགས་པ་ཆེན་པོའི་གཞུང་ཉིད་བསྟན་པའི་སྐབས་ནས་བཤད་པ་ཀུན་གྱིས་ཀྱང་འདི་ལས་བོགས་དབྱུང་དུ་མེད་དོ། །ད་ནི་སྐབས་འདིར་གཅིག་པ་དང་ཐ་དད་པར་སྒྲུབ་པ་དང་དགག་པ་ལ་སོགས་པའི་སྤྱིའི་ཚུལ་ཅུང་ཟད་ཙམ་བརྗོད་དེ། དེ་ལ་གང་དག་རང་གི་གྲུབ་པའི་མཐའ་སྒྲུབ་པར་འདོད་ཅིང་། གཞན་གྱི་གྲུབ་པའི་མཐའ་དགག་པར་འདོད་པ་རྣམས་སོ་སོའི་སྒོ་ཇི་སྙེད་པ་ཐམས་ཅད་ཀྱང་། དངོས་པོ་བསྒྲུབ་པ་དང་། དངོས་པོ་དགག་པ་གཉིས་སུ་འདུས་སོ། །དེ་ལ་དགག་པ་ཇི་སྙེད་པ་ཐམས་ཅད་ཀྱང་། མེད་པར་དགག་པ་དང་། མ་ཡིན་པར་དགག་པ་གཉིས་སུ་འདུས་སོ། །དེ་ལ་མེད་པར་དགག་པ་ཞེས་བྱ་བ་ནི། ཡོད་པ་བཀག་པ་ཙམ་ཡིན་ཏེ། གཞན་བསྒྲུབ་པར་བྱ་བའི་དོན་མེད་དེ། འདི་ལྟར་མ་རྟོགས་པ་དང་ལོག་པར་རྟོགས་པ་དང་ཐེ་ཚོམ་ཟ་བ་ཙམ་སེལ་བར་བྱེད་པ་ཀུན་བརྟགས་པ་ཙམ་འགོགས་པར་བྱེད་པ་ཡིན་ཏེ། དོན་གཞན་སྟོན་པ་མེད་དོ། །དཔེར་ན་བུམ་པ་མེད་ཅེས་བརྗོད་ན། བུམ་པ་ཡོད་པར་རྟོག་པ་བཟློག་པ་ཙམ་དུ་ཙམ་དེ། བུམ་པ་མེད་པའི་ས་ཕྱོགས་ལ་སོགས་པ་ནི་སྟོན་པར་མི་བྱེད་དོ། །དེ་བཞིན་དུ་གང་ཟག་མེད་ཅེས་བརྗོད་ན། གང་ཟག་ཡོད་པར་རྟོག་པ་ཙམ་བཟློག་པར་ཟད་དེ། གང་ཟག་གིས་སྟོང་པའི་ཕུང་པོ་ཡོད་པར་སྟོན་པར་ནི་མི་བྱེད་པའོ། །དེ་བཞིན་དུ་ཀུན་ལ་སྦྱར་རོ། །མ་ཡིན་པར་དགག་པ་གང་ཞེ་ན། གཞན་དགག་ནས་གཞན་སྟོན་པ་སྟེ། འདི་ལྟར་བུམ་པ་མེད་པ་ཞེས་བརྗོད་པ་ན། བུམ་པས་སྟོང་པའི་ས་ཕྱོགས་གོ་བར་བྱེད་པ་བཞིན་དུ། གང་ཟག་མེད་པ་ཞེས་བརྗོད་ན། གང་ཟག་གིས་སྟོང་པའི་ཕུང་པོ་སྟོན་པར་བྱེད་པ་ལྟ་བུའོ། །དེ་ལྟ་བས་ན་མེད་པར་དགགས་པ་ནི། གཞན་གྱི་གྲུབ་པའི་མཐའ་སེལ་བ་ཙམ་ཡིན་ལ། མ་ཡིན་པར་དགག་པ་ནི། དེ་ཙམ་གྱིས་མི་ཆོག་སྟེ། རང་གི་གྲུབ་པའི་མཐའ་འང་སྒྲུབ་པར་བྱེད་པ་ཡིན་ནོ། །དངོས་པོ་བསྒྲུབ་པ་ཇི་སྙེད་པའང་མདོ་རྣམ་པ་གཉིས་སུ་འདུས་ཏེ། འདི་ལྟར་ཡོད་པར་སྒྲུབ་པ་དང་། དམིགས་པར་སྒྲུབ་པའོ། །དེ་དག་གི་གཞི་ཡང་རྣམ་པ་གཉིས་ཏེ། གཅིག་པ་དང་། ཐ་དད་པའོ། །དེ་དག་གི་གཞི་ཡང་རྣམ་པ་གཉིས་ཏེ། ངོ་བོ་ཉིད་དང་། ཁྱད་པར་རོ། །དེའི་བློ་ཡང་རྣམ་པ་གཉིས་ཏེ། རིལ་པོར་འཛིན་པའི་བློ་དང་། རྗེས་སུ་གཞིག་པའི་བློའོ། །བློ་འདི་ཉིད་ནི་རང་བཞིན་གྱིས་ལྡན་མོད་ཀྱི། འོན་ཀྱང་རྒོལ་བ་དང་ཕྱིར་རྒོལ་བ་བརྩོད་པ་ན། འདི་སྐད་དུ། རང་གི་གྲུབ་མཐའ་ནི་རིལ་པོར་འཛིན་པའི་བློས་བཟླུམས་ཏེ། ཁྱེད་ཀྱི་གྲུབ་མཐས་མི་ཕྱེད་པར་བྱེད་དོ། །ཁྱོད་ཀྱི་གྲུབ་མཐའ་ནི་རྗེས་སུ་གཞིག་པའི་བློས་བཤིག་སྟེ་མ་གྲུབ་པར་བྱེད་དོ། །ཞེས་ཁས་ནི་མི་ལེན་ཏོ། །དེ་ལ་དངོས་པོ་སྒྲུབ་པ་ཐམས་ཅད་ཀྱི་གཞི་ངོ་བོ་ཉིད་དང་ཁྱད་པར་ཡིན་པས། དེ་ཁོང་དུ་མ་ཆུད་ན་དངོས་པོ་སྒྲུབ་པ་ཐམས་ཅད་ཁོང་དུ་མི་ཆུད་པས། དེ་བས་ན་དང་པོ་འདི་བསྟན་ཏོ། །དེ་ལ་ངོ་བོ་ཉིད་གང་ཞེ་ན། བློ་གང་ལ་དོན་གང་སྣང་བ་ན། འདི་ལྟར་གྲངས་ཀྱིས་མ་ཕྱེ་རྒྱ་ཆེ་ཆུང་གིས་མ་ཕྱེ་སྟེ། དོན་གང་སྣང་བ་དེ་ཉིད་མཚན་མར་བྱར་རུང་བར་སྣང་བའོ། །དེ་མཚོན་པར་བྱེད་པ་ནི་མིང་ཡིན་ཏེ། འདི་ལྟར། ནཱ་མ་ཞེས་བྱ་བའི་སྒྲ། ན་ཡ་ནི་ཞེས་བྱ་སྟེ་ཁྲིད་པར་བྱེད་པས་མིང་སྟེ། བློ་གང་དོན་གྱི་ངོ་བོ་ཉིད་ལ་ཁྲིད་པར་བྱེད་སྦྱོར་བར་བྱེད་པས་མིང་ཞེས་བྱ་སྟེ། དེ་ནི་འདི་ལྟར་ཀ་བ་དང་བུམ་པ་ཞེས་བྱ་བ་ལྟ་བུ་ངོ་བོ་ཉིད་རྒྱ་ཆུང་བ་ལ་སྦྱོར་བར་བྱེད་ཀྱང་རུང་། འདུས་བྱས་དང་འདུས་མ་བྱས་ཞེས་བྱ་བ་ལྟ་བུ་ངོ་བོ་ཉིད་རྒྱ་ཆེ་བ་ལ་སྦྱོར་བར་བྱེད་ཀྱང་རུང་སྟེ། ཇི་ཙམ་དུ་མིང་གིས་ཁྲིད་པའི་དོན་དེ་ལ་ངོ་བོ་ཉིད་ཅེས་བྱའོ། །ལ་ཀྵ་ན་ཞེས་བྱ་བ། རྒྱུའམ་མཚན་མའམ་རྟགས་ལ་འཇུག་སྟེ། དེ་བས་ན་རྣམ་པར་རྟོག་པའི་བློ་གང་གིས་མིང་ཅན་བསྲེས་ཏེ་གཅིག་ཏུ་ཞེན་པར་བྱས་ནས། དོན་གྱི་མཚན་མ་རྟགས་སུ་བྱས་ནས། རྒྱུ་མཚན་ཞེས་བྱའོ། །སངས་རྒྱས་ཀྱི་མཚན་བཟང་པོ་ལ་ཡང་། ལ་ཀྵ་ན་ཞེས་བྱ་སྟེ། མཚན་མའམ་རྟགས་སུ་བྱའོ། །དེ་ལ་མིང་རྒྱུ་མཚན་དེ་དག་ནི། སྒྲའི་བསྟན་ཆོས་པ་འདོད་པ་ལྟར་དོན་གྱི་ངོ་བོ་ཉིད་ལ་ལྡན་པ་ནི་མ་ཡིན་ཏེ་ངོ་བོ་ཉིད་ནི་མིང་དང་རྒྱུ་མཚན་དང་བྲལ་བའོ། །དེ་ལ་དོན་གྱི་ཁྱད་པར་གང་ཞེ་ན། །ངོ་བོ་ཉིད་དེ་ལ་བརྟེན་ནས་བྱེ་བྲག་གང་གིས་ངོ་བོ་ཉིད་དེ་རྣམ་པར་ཕྱེ་སྟེ་ཁྱད་པར་དུ་བྱས་པས་ཁྱད་པར་ཞེས་བྱའོ། །དེ་ཉིད་མཚན་ཉིད་ཀྱང་ཡིན་ཏེ། མཚན་པར་བྱ་བའམ་བྱེད་པའི་དངོས་པོ་ཡིན་པའི་ཕྱིར་རོ། །དེ་ཉིད་ཆོས་ཞེས་ཀྱང་བྱ་སྟེ། དྷ་མ་ཞེས་བྱ་བ་དྷཱ་ར་ནི་འཛིན་པ། མ་ནི་ཚིག་གི་རྐྱེན་ཡིན་ཏེ་འཛིན་པས་ཆོས་ཞེས་བྱའོ། །དེ་ཡང་འདིས་འཛིན་པར་བྱེད་པའམ། འདི་འཛིན་ཅིང་བཟུང་བས་ན་ཆོས་ཏེ། དེ་ལ་སྐབས་ལ་ལར་ནི་ལྟུང་བ་ལས་འཛིན་པར་བྱེད་པ་དང་། རིགས་པ་འཛིན་པར་བྱེད་པ་དང་། མཚན་ཉིད་འཛིན་པར་བྱེད་པས་ཆོས་ཞེས་བྱའོ། །ལ་ལར་ནི་ཁྱད་པར་འདི་ངོ་བོ་ཉིད་ཀྱིས་བཟུང་བ་ཡིན་ཞིང་ངོ་བོ་ཉིད་ལ་རྟེན་པ་ཡིན་པས། གཞན་ལ་རྟེན་པའི་ཕྱིར་ཆོས་ཞེས་བྱ་སྟེ། འདིར་ནི་འདི་བཞིན་དུ་སྦྱར་རོ། །དེ་བས་ན་ཆོས་གང་ལ་ཡོད་པ་དེ་ནི་ཆོས་ཅན། མཚན་ཉིད་གང་ལ་ཡོད་པ་དེ་ནི་མཚན་གཞི། ཁྱད་པར་གང་ལ་ཡོད་པ་དེ་ནི་ཁྱད་པར་གྱི་གཞི་ཡིན་ཏེ། དེ་ལྟར་ན་དེ་རྣམས་དང་ངོ་བོ་ཉིད་ལ་དོན་གྱི་བྱེ་བྲག་མེད་དོ། །ཅུང་ཟད་བྱེ་བྲག་ཏུ་ན་ངོ་བོ་ཉིད་ནི་དོན་གཞན་ལ་མ་ལྟོས་པར་དོན་དེ་ལྟ་བུའི་བློ་འབྱུང་བའོ། །ཆོས་ཅན་དང་མཚན་གཞི་ལ་སོགས་པ་ནི། ཆོས་ལ་སོགས་པ་ལ་ལྟོས་ནས་ཆོས་ཅན་ལ་སོགས་པའི་བློ་འབྱུང་བ་སྟེ། འདི་ནི་བྱེ་བྲག་གོ། །ངོ་བོ་ཉིད་དང་ཁྱད་པར་དུ་གཞག་པའང་། ངོ་བོ་ཉིད་ནི་ཁྱད་པར་ལ་མ་རྟེན་པར་གྲུབ་པའོ། །ཁྱད་པར་ནི་ངོ་བོ་ཉིད་ལ་རྟེན་ནས་བྱེ་བྲག་སོ་སོར་རྣམ་པར་ཕྱེ་བའོ། །དེ་ལ་ཁྱད་པར་དེ་སྟོན་པར་བྱེད་པ་ནི་ཚིག་ཡིན་ཏེ། འདི་ལྟར། བྱ་ཛཱ་ན་ཞེས་བྱ་བ། དཔེ་བྱད་བཟང་པོའི་མིང་ཡང་ཡིན། ཚོད་མའི་མིང་ཡང་ཡིན། ཚིག་འབྲུ་ལ་ཡང་བྱ་སྟེ། དེ་ལ་དཔེ་བྱད་བཟང་པོ་ལ། བྱ་ཛཱ་ན་ཞེས་བྱ་བ། མེ་ཏོག་གི་ཟེའུ་འབྲུ་ཉིད་ཀྱང་མེ་ཏོག་ཡིན་མོད་ཀྱི། མེ་ཏོག་གི་སྤྱི་ཟེའུ་འབྲུས་འབྱེས་པར་བྱེ ད་པ་ལྟར། དཔེ་བྱད་ཉིད་ཀྱང་མཚན་གྱི་ཁོངས་སུ་གཏོགས་མོད་ཀྱི། མཚན་སྤྱི་དཔེ་བྱད་ཀྱིས་འབྱེས་པར་བྱེད་པ་བཞིན་དུ། བུམ་པ་མི་རྟག་ཅེས་བྱ་བ་ལྟ་བུ་ཚིག་གང་གིས་ངོ་བོ་ཉིད་དེ་བྱེ་བྲག་ཏུ་འབྱེད་པར་བྱེད་པས་དེ་སྐད་དུའོ། །ཇི་ལྟར་ཚོད་མས་ཟན་གྱི་རོ་བྱེ་བྲག་ཏུ་འབྱེད་ཅིང་ཁྲིད་པར་བྱེད་པ་ལྟར། ཁྱད་པར་གྱི་ཚིག་གང་གིས་ངོ་བོ་ཉིད་དེ་བྱེ་བྲག་ཏུ་འབྱེད་པར་བྱེད། ཕྱོགས་གཅིག་ཏུ་འདྲེན་པར་བྱེད་པས། ཚིག་འབྲུ་ཞེས་བྱའོ། །དེ་ལྟར་ངོ་བོ་ཉིད་དང་ཁྱད་པར་དེ་གཞིར་བྱས་ནས། གཅིག་དང་ཐ་དད་དུ་སྒྲུབ་པར་བྱེད་དེ། འདི་ལྟར་ངོ་བོ་ཉིད་གཅིག་གོ། །ངོ་བོ་ཉིད་ཐ་དད་དོ། །ཆོས་གཅིག་གོ། །ཆོས་ཐ་དད་དོ། །ཞེས་སྒྲུབ་པར་བྱེད་དོ། །དེ་དག་ལ་རྟེན་ནས་ཡོད་པ་དང་ཡིན་པ་སྒྲུབ་པར་བྱེད་དེ། འདི་ལྟར་ངོ་བོ་ཉིད་གཅིག་ཡིན་ནོ། །གཅིག་ཡོད་དོ། །ངོ་བོ་ཉིད་ཐ་དད་ཡིན་ནོ། །ཐ་དད་ཡོད་དོ། ཆོས་གཅིག་ཡིན་ནོ། །གཅིག་ཡོད་དོ། །ཆོས་ཐ་དད་ཡིན་ནོ། །ཐ་དད་ཡོད་དོ། །ཞེས་སྒྲུབ་པར་བྱེད་དོ། །དེ་ལ་ཡིན་པར་སྒྲུབ་པ་ནི་བདེན་པར་སྒྲུབ་པའོ། །ཡོད་པར་སྒྲུབ་པ་ནི་དམིགས་པར་སྒྲུབ་པའོ། །ཡང་ཡིན་པར་སྒྲུབ་པ་ནི་ལྟོས་ནས་སྒྲུབ་པར་བྱེད་དོ། །ཡོད་པར་སྒྲུབ་པ་ནི། རྟེན་ནས་སྒྲུབ་པར་བྱེད་དོ། །དེ་དག་ཀྱང་ཇི་ལྟར་ཞེ་ན། དེ་ལ་ངོ་བོ་གཅིག་སྒྲུབ་པ་གང་ཞེ་ན། རིགས་མཐུན་པའམ་རིགས་མི་མཐུན་པ་དུ་མ་ལས་བཟློག་སྟེ། འདི་ལྟར་བུམ་པ་ནི་རིགས་མི་མཐུན་པ་ཀ་བ་ལ་སོགས་པ་ལས་ཀྱང་བཟློག །རིགས་མཐུན་པ་བུམ་པ་གཉིས་པ་ལས་ཀྱང་བཟློག་སྟེ། བུམ་པའི་ངོ་བོ་ཉིད་གཅིག་ཏུ་སྒྲུབ་པར་བྱེད་དོ། །དེ་ལ་ངོ་བོ་ཐ་དད་དུ་སྒྲུབ་པར་བྱེད་པ་གང་ཞེ་ན། ངོ་བོ་གཅིག་ལ་ལྟོས་ཏེ་སྒྲུབ་པར་བྱེད་དེ། འདི་ལྟར་རིགས་མཐུན་པ་བུམ་པ་གཅིག་ལས་ལྟོས་ཏེ་བཟློག་ནས། བུམ་པ་གཉིས་པ་ལ་སོགས་པ་ཐ་དད་དུའང་སྒྲུབ་པར་བྱེད། རིགས་མི་མཐུན་པ་ཀ་བ་ལྟ་བུ་ཕྱོགས་གཅིག་ཏུ་བྱས་ཏེ། བཟློག་ནས། བུམ་པ་དང་རེ་ལྡེ་དང་རྟ་དང་གླང་པོ་ལ་སོགས་པ་ཐ་དད་དུ་སྒྲུབ་པར་བྱེད་དོ། །དེ་ལ་ཆོས་གཅིག་དང་ཐ་དད་དུ་སྒྲུབ་པར་བྱེད་པའང་ཚུལ་དེ་དང་འདྲའོ། །གཞན་ཡང་གཅིག་ཏུ་སྒྲུབ་པར་བྱེད་པའི་ཚུལ་ཡང་རྣམ་པ་གཉིས་ཏེ། བཀར་ཏེ་གཅིག་ཏུ་སྒྲུབ་པར་བྱེད་པ་དང་། བསྡུས་ཏེ་གཅིག་ཏུ་བསྒྲུབ་པར་བྱེད་པའོ། །ཐ་དད་དུ་སྒྲུབ་པར་བྱེད་པའི་ཚེ་ནའང་གཉིས་ཏེ། བཟློག་སྟེ་ཐ་དད་དུ་བསྒྲུབ་པར་བྱེད་པ་དང་། ཕྱེ་སྟེ་ཐ་དད་དུ་སྒྲུབ་པར་བྱེད་པའོ། །དེ་ལ་ངོ་བོ་གཅིག་ཡོད་པར་བསྒྲུབ་པ་གང་ཞེ་ན། སྤྱི་རྫས་སུ་ཡོད་པར་འདོད་ཀྱང་རུང་། བཏགས་པའི་ཡོད་པར་འདོད་ཀྱང་རུང་སྟེ། སྤྱི་གཅིག་ལ་ངོ་བོ་ཉིད་དུ་མ་ཡོད་པ་ལས། འདི་ངོ་བོ་ཉིད་གཅིག་ཏུ་ཡོད་དོ་ཞེས། བཀར་ཏེ་ངོ་བོ་ཉིད་གཅིག་ཡོད་པར་བསྒྲུབ་བོ། །བཀར་ཏེ་ངོ་བོ་ཉིད་གཅིག་ཡིན་པར་སྒྲུབ་པ་ནི། སྤྱི་ལ་རྟེན་པ་མེད་པར་ངོ་བོ་ཉིད་དུ་མར་གནས་པ་རྣམས་ལས་ལྟོས་ཏེ། བཟློག་ནས་བཀར་ཏེ་འདི་ངོ་བོ་ཉིད་གཅིག་ཡིན་ནོ། །ཞེས་ཡིན་པར་སྒྲུབ་པར་བྱེད་དོ། །དེ་ལ་བསྡུས་ཏེ་ངོ་བོ་ཉིད་གཅིག་ཏུ་བསྒྲུབ་པར་བྱེད་པ་གང་ཞེ་ན། འདི་ལྟར་གང་དང་གང་གཅིག་གང་དུ་གཅིག་ཅེས་སྒྲུབ་པར་བྱེད་དོ། །འདི་ལྟར་ཆོས་དང་ཆོས་ཅན་བདག་ཉིད་གཅིག་པར་སྒྲུབ་པར་བྱེད་པ་ན། ངོ་བོ་ཉིད་གཅིག་པར་སྒྲུབ་སྟེ། ཨུད་པ་ལའང་དེ་ཉིད། སྔོན་པོའང་དེ་ཉིད། བུམ་པའང་དེ་ཉིད། བྱས་པའང་དེ་ཉིད་ཅེས་ངོ་བོ་ཉིད་གཅིག་ཏུ་སྒྲུབ་པར་བྱེད་དོ། །ཆོས་དང་ཆོས་ཅན་ངོ་བོ་ཉིད་དུ་གཅིག་པར་ཡང་སྒྲུབ་པར་བྱེད་དོ། །འདི་ལྟར་སྔོན་པོའང་ཨུད་པ་ལ་ཉིད། རྩུབ་པའང་ཨུད་པ་ལ་ཉིད། བྱས་པའང་བུམ་པ་ཉིད། མི་རྟག་པའང་བུམ་པ་ཉིད་ཅེས་བསྡུས་ཏེ་ངོ་བོ་ཉིད་གཅིག་ཏུ་སྒྲུབ་པར་བྱེད་དེ། ཚུལ་འདི་ཉིད་ལའང་ཡོད་པ་དང་ཡིན་པའི་ཚུལ་གཉིའ་གར་སྒྲུབ་པར་བྱེད་དོ། །དེ་ལ་ངོ་བོ་ཉིད་ཐ་དད་ཡོད་པར་བསྒྲུབ་པ་ན། སྤྱི་ལས་ཕྱེ་སྟེ་སྒྲུབ་པར་བྱེད་དོ། །ཡིན་པར་སྒྲུབ་པ་ན་གཅིག་ལས་བཟློག་སྟེ་སྒྲུབ་པར་བྱེད་དོ། །དེ་ལ་ཆོས་གཅིག་ཏུ་སྒྲུབ་པར་བྱེད་པ་ན། བཀར་ཏེ་སྒྲུབ་པར་བྱེད་པའི་ཚེ། བུམ་པའི་ངོ་བོ་ཉིད་གང་ཡིན་པ་དེའི་ཆ་ཤས་མ་ལུས་པར་ཆུ་འཛིན་པར་བྱེད་པ་ཡིན་བྱས་པ་ཡིན་མི་རྟག་པ་ཡིན་ནོ། །ཞེས་ཁྱད་པར་གཞན་སྤངས་ཤིང་ཆོས་གཅིག་ལས་བཟློག་ནས་སྒྲུབ་བོ། །ཆོས་དང་ཆོས་ཅན་གཉིས་ཆོས་གཅིག་པར་སྒྲུབ་པར་བྱེད་ན། ངོ་བོ་ཉིད་ཕྱོགས་སུ་བྱས་ནས་དེའི་ཆ་ཤས་མ་ལུས་པར་ཆོས་གཅིག་ཏུ་སྒྲུབ་པར་བྱེད་དོ། །ངོ་བོ་ཐ་དད་བསྡུས་ཏེ་ཆོས་གཅིག་ཏུ་སྒྲུབ་པར་བྱེད་པའི་ཚེ་ན། གང་དང་གང་གཅིག་གང་དུ་གཅིག་ཅེ་ན། ཀ་བའི་ངོ་བོ་ཉིད་དང་བུམ་པའི་ངོ་བོ་ཉིད་གཉིའ་གའང་བྱས་པར་གཅིག་གོ། །ཞེས་བསྡུས་ཏེ་ཆོས་གཅིག་ཏུ་སྒྲུབ་པར་བྱེད་དེ། ཡོད་པའམ་ཡིན་པར་སྒྲུབ་བོ། །དེ་ལ་ཆོས་ཐ་དད་དུ་སྒྲུབ་པར་བྱེད་པ་ན་ཕྱེ་སྟེ་ཐ་དད་དུ་སྒྲུབ་པར་བྱེད་པ་ནི་འདི་ལྟར། བུམ་པའི་ངོ་བོ་ཉིད་གཅིག་ལ་ཁ་དོག་དང་དབྱིབས་དང་རེག་བྱ་དང་མཚན་ཉིད་དག་སོ་སོར་འབྱེད་དོ། །མཚན་ཉིད་ལའང་བྱས་པ་དང་མི་རྟག་པ་ལ་སོགས་པ་མཚན་ཉིད་སོ་སོར་འབྱེད་དོ། །བཟློག་སྟེ་ཆོས་ཐ་དད་དུ་སྒྲུབ་པར་བྱེད་པ་ན། འདི་ལྟར་བྱས་པ་ནི་མི་རྟག་པ་ལས་བཟློག་ནས་ཆོས་གཞན་ཡིན་ཏེ། འདི་ལྟར་བྱས་པ་ནི་འདུ་བྱེད་རྣམས་མངོན་པར་འགྲུབ་པའི་མཚན་ཉིད། མི་རྟག་པ་ནི་འདུ་བྱེད་རྣམས་འགག་པའི་མཚན་ཉིད་དེ། དེ་བས་ན་བྱས་པ་ཉིད་མི་རྟག་པ་ཡིན་པར་གྱུར་ན། འདུ་བྱེད་རྣམས་མངོན་པར་འགྲུབ་པར་མི་འགྱུར་རོ། །དེ་བཞིན་དུ་མི་རྟག་པ་ཉིད་བྱས་པ་ཡིན་ན། འདུ་བྱེད་རྣམས་འགག་པར་མི་འགྱུར་རོ། །ཞེས་སྒྲུབ་པར་བྱེད་པའོ། །དེ་དག་ཐམས་ཅད་ལ་ཡང་ཡོད་པ་དང་ཡིན་པའི་མཚན་ཉིད་སྒྲུབ་པར་བྱེད་དེ། དེ་ལ་ཡོད་པའི་སྒྲ་དང་བློས་ནི་ཁྱད་པར་གཞན་མ་སྤངས་པའི་ཚུལ་དུ་སྟོན། ཡིན་པའི་སྒྲ་དང་བློས་ནི་ཁྱད་པར་གཞན་སྤངས་པའི་ཚུལ་དུ་སྟོན་ཏོ། །དེ་ལྟར་སྒྲུབ་པའི་བྱེད་པ་དེ་ཡང་བློ་རྣམ་པ་གཉིས་ཀྱི་དབང་དུ་བྱས་པ་ཡིན་ཏེ། འདི་ལྟར་རིལ་པོར་འཛིན་པའི་བློས་གཅིག་ཏུ་སྒྲུབ་པར་བྱེད་པའི་ཚེ། ངོ་བོ་ཉིད་གཅིག་ཏུ་སྒྲུབ་པར་བྱེད་ན། ཆོས་དང་ཆོས་ཅན་ཡང་ངོ་བོ་ཉིད་ཐ་དད་མི་རྙེད། ཆོས་དང་ཆོས་ཀྱང་ངོ་བོ་ཉིད་ཐ་དད་མི་རྙེད་དེ། ངོ་བོ་ཉིད་དེ་ནི་གཅིག་ཏུ་ཡོད་པའམ་མ་ཡིན་པར་རྫས་སུ་གྲུབ་པར་འགྱུར་ལ། དེའི་ཆོས་ནི་ངོ་བོ་ཉིད་དེའི་བྱེ་བྲག་དང་མཚན་མ་ཙམ་དུ་བྱས་པ་སྟེ། སོ་སོ་ན་རྫས་ཀྱི་ཆ་ཤས་མེད་པར་འགྱུར་ཏེ། དེ་ལྟ་ན་ངོ་བོ་ཉིད་ནི་ཆ་ཤས་དུ་མ་མེད་པ་རྫས་གཅིག་ཡོད་པའམ་ཡིན་པར་སྒྲུབ་པར་བྱེད་དོ། །དེ་ལ་རྫས་སུ་གཞིག་པའི་བློས་རྣམ་པར་ཕྱེ་བའི་དུས་ན་ནི། སྤྱི་གཅིག་ཏུ་ཡོད་པར་འདོད་པ་ནི་ངོ་བོ་ཉིད་དུ་མར་ཕྱེ་བས་སྤྱི་གཅིག་པོ་འཇིག་གོ། །ངོ་བོ་ཉིད་ཁྱད་པར་དུ་མར་ཕྱེ་བས་ངོ་བོ་ཉིད་གཅིག་པ་ཆ་ཤས་མེད་པའི་རྫས་འཇིག་གོ། །ཁྱད་པར་གཅིག་པོ་ཆ་ཤས་སུ་ཕྱེ་བས་ཆོས་གཅིག་པོའི་རྫས་འཇིག་སྟེ་མི་འགྲུབ་བོ། །དེ་ལྟར་རིམ་གྱིས་རྣམ་པར་ཕྱེ་ན། གཅིག་དང་དུ་མའི་བློ་ནི་བསྐལ་པའི་བར་དུ་ཕྱེ་ཡང་མི་ལྡོག་ཏུ་རུང་ལ། དངོས་པོ་རྣམས་ཀྱི་རང་བཞིན་དེ་བཞིན་ཡོད་པར་བསྒྲུབ་ཏུ་ནི། གཟུགས་ནི་བོང་ཚད་ཀྱིས་མི་ཐུབ། སེམས་དང་སེམས་ལས་བྱུང་བ་ནི་རྣམ་པས་མི་ཐུབ་སྟེ། མཐར་ནམ་མཁའ་ལྟ་བུའི་མཚན་ཉིད་དུ་མི་འགྱུར་བའི་གནས་མེད་དོ། །སྐབས་ཁ་ཅིག་ཏུ། བློ་རྣམ་པ་གཉིས་སུ་ཕྱོགས་པ་བོར་ཏེ། གཉིའ་གའི་ཆ་ལ་བརྟེན་ནས་བརྟགས་ན། འདུ་བྱེད་རྣམས་དང་དེའི་མཚན་ཉིད་མི་རྟག་པ་གཉིས། གཅིག་པ་དང་ཐ་དད་པ་གཉིས་ག་ལའང་སྐྱོན་དམིགས་ནས། གཉིའ་ག་ལས་གྲོལ་བར་བྱའོ་ཞེས་ཀྱང་སྟོན་ལ། དེ་བཞིན་དུ་གཞན་དབང་དང་ཡོངས་སུ་གྲུབ་པའི་མཚན་ཉིད་ཀྱང་དེ་འདྲ་སྟེ། དེ་ལྟ་ན་དངོས་པོར་ལྟ་བའི་གྲུབ་མཐའ་ཐམས་ཅད་ཀྱིས། རང་གི་གྲུབ་པའི་མཐའ་ནི་རིལ་པོར་འཛིན་པའི་བློས་ངོ་བོ་ཉིད་གཅིག་གི་རྫས་ཡོད་པར་བསྒྲུབས། གཞན་གྱི་གྲུབ་པའི་མཐའ་ནི་རྗེས་སུ་གཞིག་པའི་བློས་བཤིག་སྟེ་རྫས་སུ་མེད་པར་བསྒྲུབས་ཀྱང་། ཇི་ལྟར་བསྒྲུབས་པ་དེ་ལྟར་ཚད་ཟིན་ཅིང་ཤེས་བྱའི་མཐར་ཕྱིན་པ་མེད་དེ་དྲི་མ་ཆེ་ཆུང་ཙམ་དུ་ཟད་དོ། །ཡང་ན་འདི་ལྟར་ངོ་བོ་དང་ཁྱད་པར་གཅིག་ཏུའང་བསྒྲུབ་ཏུ་རུང་། ཐ་དད་དུའང་བསྒྲུབ་ཏུ་རུང་། གཉིའ་ག་ལས་གྲོལ་བར་ཡང་བསྒྲུབ་ཏུ་རུང་། གཅིག་ཏུ་སྒྲུབ་པར་བྱེད་པའི་ཚེ། ཆོས་ངོ་བོ་ཉིད་དུ་གཅིག་ཏུའང་རུང་། ངོ་བོ་ཆོས་གཅིག་ཏུའང་རུང་། འདི་ལྟ་བུར་ཆོས་ཐམས་ཅད་རྣམ་པར་བསྒྲུབ་པར་ཉེ་བར་གཞག་པའི་མཚན་ཉིད་དམིགས་ན། རིགས་པའི་གནོད་པ་འདི་དག་ཀྱང་ཁྱེད་དངོས་པོར་ལྟ་བ་རྣམས་ཕན་ཚུན་གཅིག་ལ་གཅིག་འགལ་བ་དམིགས་པ་ཙམ་དུ་ཟད་དེ། རྫོགས་པ་ཆེན་པོའི་ཚུལ་ལ་རིགས་པ་དེ་དག་གིས་ཕྱོགས་ཆ་ཙམ་དུའང་སླེབས་པ་མེད་དེ། དཔེར་ན་རྒྱ་མཚོ་ཆེན་པོའི་གཏིང་དང་ནམ་མཁའི་མཐའ་མདའ་རྒྱང་དང་མིག་རྒྱང་གིས་གཞལ་བར་འདོད་པ་བཞིན་ནོ། །སྒྲའི་བསྟན་ཆོས་ལས་ཀྱང་། ཐ་སྙད་ཅི་བརྗོད་ཀྱང་མེད་པ་དང་མ་ཡིན་པར་དགག་པ་དང་། ཡོད་པ་དང་ཡིན་པར་བསྒྲུབ་པ་ཙམ་ལས་མེད་དེ། དེ་ལ་དངོས་པོ་བསྒྲུབ་པའང་ཕལ་ཆེར་དེ་ལ་ཕན་པའི་རྐྱེན་དང་། བྱེད་པའི་རྐྱེན་གྱིས་བརྗོད་དེ། དེ་ལ་ཕན་པའི་རྐྱེན་ནི་འདི་ལྟར། ཅན་ལྟ་བུའི་སྤྱི་སྟོན་པ་དང་། གང་ཡིན་པ་ལྟ་བུ་ངོ་བོ་ཉིད་སྟོན་པ་དང་། ཉིད་ལྟ་བུ་ཁྱད་པར་སྟོན་པ་དང་། བྱེད་པའི་རྐྱེན་ཡང་འདི་ལྟར། རིང་དུ་འགྲོ་བར་བྱེད་པ་ནི་རིང་དུ་འགྲོ་བ་ཞེས་ཡོན་ཏན་སྟོན་པ་དང་། རིང་དུ་འགྲོ་བར་བྱེད་པ་ནི་རིང་འགྲོ་ཞེས་ཡོན་ཏན་སྟོན་པ་ལྟ་བུའང་ཡོད་པ་དང་ཡིན་པར་སྟོན་པ་ལས་གུད་ན་མེད་དོ། །གཞན་ཡང་མིང་ཁ་མ་ཚང་བ་ལས་ཁ་ཚང་བར་བྱས་པ་ཙམ་དང་། རྣམ་པར་དབྱེ་བ་དང་བཅས་པ་ཙམ་ལ་ཡིད་བྱེད་ཀྱི་མཐའ་ཅན་ཞེས་བྱ་སྟེ། རས་ཡུག་གི་དཀར་པོ་བྱ་བ་ལྟ་བུ་ཡོད་པ་དང་ཡིན་པར་སྟོན་པའི་རྐྱེན་མེད་པའང་དོན་དེ་ལས་མི་མདའོ། །གཞན་ཡང་། རིགས་པའི་བསྟན་ཆོས་ལས་རིགས་པ་རྣམ་པ་བཞིའི་སྒོ་ནས་དགག་སྒྲུབ་བྱེད་པ་རྣམས་ཀྱང་། དགག་པ་རྣམ་པ་གཉིས་དང་། བསྒྲུབ་པ་གཉིས་ལས་མི་འདའ་སྟེ། རིགས་པ་རྣམ་པ་བཞིའི་སྒོ་ནས་གཞལ་ཡང་། དངོས་པོར་ལྟ་བ་རྣམས་ཀྱིི་གྲུབ་མཐའ་གཅིག་ལ་གཅིག་གནོད་པ་ཙམ་ཡང་དམིགས་ལ། གཞན་ཡང་རིགས་པ་ཉིད་ཐལ་བར་གྱུར་ནས་སླར་གནོད་པ་དམིགས་པར་ཟད་དེ། དེས་རྫོགས་པ་ཆེན་པོའི་ཚུལ་ལ་མི་གནོད་པ་ནི་སྔ་མ་བཞིན་ནོ། །དེ་ལ་རིགས་པ་བཞིའི་ཚུལ་ནི། སྤྱིར་ཆོས་རྟེན་ཅིང་འབྲེལ་ཏེ་འབྱུང་བ་བསྒྲུབ་པའི་མཚན་ཉིད་ལ། ངོ་བོ་ཉིད་ཀྱི་སྒོ་ནས་སྒྲུབ་པར་བྱེད་པ་ཆོས་ཉིད་ཀྱི་རིགས་པ། འབྲས་བུའི་སྒོ་ནས་སྒྲུབ་པར་བྱེད་པ་ནི་བྱ་བ་བྱེད་པའི་རིགས་པ། རྒྱུའི་སྒོ་ནས་སྒྲུབ་པར་བྱེད་པ་ནི་ལྟོས་པའི་རིགས་པ། རིགས་པ་ཉིད་དྲི་མ་མེད་པར་བྱས་ཏེ་སྒྲུབ་པར་བྱེ ད་པ་ནི་འཐད་པ་སྒྲུབ་པའི་རིགས་པའོ། །འདི་རྣམས་ཀྱི་སེལ་བ་བཞི་ནི། ངོ་བོ་ཉིད་ལ་ཐེ་ཚོམ་ཟ་བ་དང་། བྱེད་པ་ལ་ཐེ་ཚོམ་ཟ་བ་དང་། མངོན་པར་འགྲུབ་པ་ལ་ཐེ་ཚོམ་ཟ་བ་དང་རིགས་པ་ལ་ཐེ་ཚོམ་ཟ་བ་རྣམས་གོ་རིམ་བཞིན་དུ་སེལ་བར་བྱེད་དོ། །འདི་རྣམས་ཀྱི་ཡུལ་དང་ཚད་ནི། ཆོས་ཉིད་ཀྱི་དངོས་གཞི་ལ་དྲི་མ་མེད་ཅིང་དངོས་གཞི་མ་ལོག་ན་ཆོས་ཉིད་ཀྱི་རིགས་པར་གཞག་ཏུ་རུང་ངོ་། །དེ་བཞིན་དུ་བྱེད་པ་དང་། མངོན་པར་འགྲུབ་པ་དང་། རིགས་པའི་དངོས་གཞི་རྣམས་ལ་དྲི་མ་མེད་ཅིང་དངོས་གཞི་མ་ལོག་ན་དེ་རྣམས་རིགས་པར་གཞག་ཏུ་རུང་ངོ་། །དེ་ལ་ཆོས་ཉིད་ཀྱི་དངོས་གཞི་ལ་དྲི་མ་ཡོད་པ་ནི། མེ་ཤེལ་ལ་ཚ་བའི་རེག་པ་ཡོད་པ་ལྟ་བུའོ། །དེ་ལ་དངོས་གཞི་ལོག་པ་ནི་རི་དྭགས་མེའི་གཙང་སྦྲ་ཅན་ལ་མེ་ཚ་བའི་དངོས་གཞི་ལོག་པ་ལྟ་བུའོ། །གཞན་ལ་ཡང་ཅི་རིགས་སུ་སྦྱར་རོ། །རིག་པ་བཞིའི་ཐལ་བ་ནི། ཆོས་ཉིད་ཀྱི་རིགས་པས་བསྒྲུབ་པ་ཐལ་དྲགས་ན། དངོས་པོ་ཐམས་ཅད་མི་ལྡོག་སྟེ། མཐའ་རང་བཞིན་རྒྱུར་སྨྲ་བར་འགྱུར་རོ། །བྱ་བ་བྱེད་པའི་རིགས་པ་ཐལ་དྲགས་ན། བྱེད་པ་དང་རྩོལ་བ་ཐམས་ཅད་མི་ལྡོག་སྟེ། མཐའ་བྱེད་པ་པོ་རྒྱུར་སྨྲ་བར་འགྱུར་རོ། །ལྟོས་པའི་རིགས་པ་ཐལ་དྲགས་ན། དབང་ཐམས་ཅད་མི་ལྡོག་སྟེ། མཐའ་དབང་ཕྱུག་རྒྱུར་སྨྲ་བར་འགྱུར་རོ། །འཐད་པ་སྒྲུབ་པའི་རིགས་པ་ཐལ་དྲགས་ན། རིགས་པ་གནས་སྐབས་ཐམས་ཅད་དུ་དྲི་མ་མེད་པར་འགྱུར་ཏེ། མཐར་མངོན་པའི་ང་རྒྱལ་དུ་འགྱུར་རོ། །དེ་ལ་དངོས་པོར་སྨྲ་བ་རྣམས་དངོས་པོ་སྒྲུབ་པ་ན། ཕལ་ཆེར་ཆོས་ཉིད་ཀྱི་རིགས་པ་དང་མངོན་སུམ་གྱིས་སྒྲུབ་པར་བྱེད་དེ། དེ་བས་ན་འདི་གཉིས་ཀྱིས་ཚད་དང་ཐལ་བ་བརྗོད་པར་བྱའོ། །དེ་ལ་དོན་ལ་བློས་འཇལ་བ་ན། གོང་དུ་བརྗོད་པ་བཞིན་དུ་འདུ་ཤེས་ཀྱིས་ཁྱད་པར་དུ་བྱས་པའི་བློས་དམིགས་པ་དང་། ཚོར་བས་ཁྱད་པར་དུ་བྱས་པའི་བློ་ལ་སྣང་བ་དང་། ཤེས་རབ་དྲི་མ་མེད་པས་ཁྱད་པར་དུ་བྱས་པའི་བློས་རྟོགས་པའོ། །དེ་ལ་ཚོར་བའི་སྤྱོད་ཡུལ་དུ་སྣང་བ་ནི་ཉམས་སུ་མྱོང་བ་ཡིན་ཡང་། འཁྲུལ་པ་སེལ་མི་ནུས་པས་ད་རུང་གཞལ་བྱ་ཡིན་ཏེ། རྫས་ལྟ་བུ་ཞིག་ཏུ་ཟད་དོ། །འདུ་ཤེས་ཀྱིས་དམིགས་པ་ནི་སྒྲོ་སྐུར་ཡང་སེལ་མི་ནུས་པས་ངོས་མི་ལྟ་བུ་ཞིག་ཏུ་ཟད་དོ། །དེ་ལ་འཇལ་བར་བྱེད་པའི་སྲང་ལྟ་བུ་ནི་ཤེས་རབ་དྲི་མ་མེད་པས་རྟོགས་པ་ཡིན་ནོ། །ཤེས་རབ་ཀྱང་གཉིས་ཏེ་སོ་སོར་རྟོག་པའི་ཤེས་རབ་དང་། རྣམ་པར་མི་རྟོག་པའི་ཤེས་རབ་བོ། །དེ་ལ་སོ་སོར་རྟོག་པའི་ཤེས་རབ་ཀྱིས་ཆོས་ཉིད་ལ་གཞལ་ན། དྲི་མ་རིམ་པ་ནས་རིམ་པར་བསལ་དུ་ཡོད་དེ། གོང་དུ་བསྟན་པ་བཞིན་དུ་མཚན་ཉིད་རྣམ་པར་གཞག་པ་རྣམས་ལ། ཀུན་ཏུ་བརྟགས་པའི་དྲི་མ་རིམ་པ་ནས་རིམ་པར་བསལ་དུ་ཡོད་པས། མཐའ་ཆོས་ཉིད་ཀྱི་དངོས་གཞི་མ་ལོག་གི་བར་དུ་དྲི་མ་མི་ཟད་དོ། །རྣམ་པར་མི་རྟོག་པའི་ཡེ་ཤེས་ཀྱིས་རྟོགས་པ་ན། ཆོས་ཉིད་ཀྱི་དངོས་གཞི་ལྡོག་གོ། །དེ་བས་ན་ཆོས་ཉིད་ཀྱི་རིགས་པས་སྒྲུབ་པ་འདི་ཡང་ཆོས་ཉིད་མ་ལོག་པ་ལ་དྲི་མ་ཕྱོགས་རེ་ཆོད་པ་ཙམ། ཆོས་ཉིད་ཀྱི་རིགས་པར་འཇོག་ཏུ་ཟད་དོ། །དེ་ལས་ཐལ་བར་གྱུར་ན། དབུ་མའི་ཡང་དག་པའི་ཀུན་རྫོབ། དུག་གིས་འཆི་བའི་ཆོས་ཉིད་དང་། སྨན་གྱི་འཚོ་བའི་ཆོས་ཉིད་བཞིན་དུ། དངོས་པོ་རྣམས་ཀྱི་ཆོས་ཉིད་ཡིན་ན་རྣལ་འབྱོར་སྤྱོད་པའི་སེམས་དང་ཡེ་ཤེས་དོན་དམ་ཡོད་པའང་ཆོས་ཉིད་དུ་འགྱུར། ཉན་ཐོས་ཀྱི་གཟུང་འཛིན་དང་། མཐའ་རང་བཞིན་རྒྱུར་ལྟ་བ་ཉིད་དུ་འགྱུར་ཏེ། དངོས་པོར་ལྟ་བ་ཐམས་ཅད་ཀྱི་སྲུང་མར་འགྱུར་རོ། །མངོན་སུམ་གྱིས་གྲུབ་པ་ཡང་འདི་ལྟར། གོང་དུ་བསྟན་པ་བཞིན་དུ་ཉན་ཐོས་ཀྱི་ཚུལ་ལས། ཕྱི་རོལ་གྱི་དོན་མངོན་སུམ་གྱིས་གྲུབ་པ་འདི་རིགས་པ་གཞན་གང་གིས་སུན་དབྱུང་ཞེའོ། །རྣལ་འབྱོར་སྤྱོད་པའི་ཚུལ་ལས། ཁྱོད་ཀྱི་དོན་དེ་ཆོས་ཉིད་ཀྱི་དངོས་གཞི་ལ་འཁྲུལ་པ་ཡིན་ཏེ། ཆོས་ཉིད་དྲི་མ་མེད་པ་ནི་རྣམ་པར་རིག་པ་ཉིད་ཕྱི་ནང་གི་སྐྱེ་མཆེད་དུ་སྣང་བར་ཟད་དེ། དེ་བས་ན་རང་རིག་པ་ནི་གང་གི་ཡང་གཟུང་བ་མ་ཡིན་ལ་གང་ལ་ཡང་འཛིན་པར་བྱེད་པ་མ་ཡིན་ཏེ། གཉིས་ཀྱིས་སྟོང་པའི་མཚན་ཉིད་རང་རིག་པ་ཙམ་གྱི་ཆོས་ཉིད་དུ་གྲུབ་པ་ནི་ཆོས་ཉིད་དྲི་མ་མེད་པ་ཡིན་ནོ། །འདི་ནི་རིགས་པས་བསྒྲུབ་ཀྱང་མི་དགོས་ལ། རིགས་པས་གནོད་ཀྱང་མི་ནུས་ཏེ། འདི་ལྟར་སེམས་དང་སེམས་ལས་བྱུང་བ་ཐམས་ཅད་རང་རིག་པའི་མངོན་སུམ་མ་ཡིན་ནམ། དེ་ལྟར་ན་མངོན་སུམ་ཉིད་ཡང་དག་པའི་ཤེས་པ་མ་ཡིན་ནམ། དེ་ལྟ་ན་དེ་ལ་རིགས་པ་གཞན་གྱིས་བསྒྲུབ་ཅི་དགོས། གཞན་ཡང་ཡང་དག་པའི་ཤེས་པ་དེ་སུན་འབྱིན་པར་བྱེད་པའི་ཡང་དག་པའི་ཤེས་པ་གཉིས་པ། དེ་ལས་མཐུ་རྩལ་གྱིས་ཆེ་བ་གཞན་གང་ཞིག་ཡོད། ཤེས་བྱ་ཐམས་ཅད་སེམས་ཙམ་ཡིན་ན། ཡང་དག་པའི་ཤེས་པ་དེས་གཞལ་ཞིང་བསྒྲུབ་པར་བྱ་བའི་དོན་གཞན་ཡང་ཅི་ཞིག་བཙལ་དགོས། ཞེས་ཆོས་ཉིད་དྲི་མ་མེད་པ་དང་མངོན་སུམ་དྲི་མ་མེད་པར་འཛིན་ཏོ། །གཞན་དུ་ན་དེ་དག་དྲི་མ་ཅན་དུ་སྒྲུབ་པར་བྱེད་པ་ཡང་ཡོད་དེ། འདི་ལྟར་ཐུན་མོང་ལྟར་ན་མངོན་སུམ་གྱི་བློ་དེ་རྣམ་པ་དང་བཅས་པར་སྐྱེ་བ་ཞིག་གམ། འོན་ཏེ་རྣམ་པ་མེད་པར་སྐྱེ་བ་ཞིག །དེ་ལ་རྣམ་པ་མེད་པར་སྐྱེ་ན་ནི་དོན་ལ་མངོན་སུམ་དུའང་ཇི་ལྟར་བྱེད། གལ་ཏེ་རྣམ་པ་དང་བཅས་པར་སྐྱེ་ན་ནི་མ་འཁྲུལ་པའི་དཔང་པོའང་གང་གིས་བྱ། དེ་བས་ན་མངོན་སུམ་ནི་ཚད་མར་མི་རུང་ངོ་ཞེས་སུན་འབྱིན་པ་ཡང་ཡོད་དོ། །རྣལ་འབྱོར་སྤྱོད་པ་ཉིད་ཀྱི་ལྟར་ན། ཁམས་གསུམ་པའི་སེམས་དང་སེམས་ལས་བྱུང་བ་ཐམས་ཅད་ཡང་དག་པ་མ་ཡིན་པའི་ཀུན་ཏུ་རྟོག་པ་མ་ཡིན་ནམ། ཀུན་ཏུ་རྟོག་པ་ཡིན་ན་ཇི་ལྟར་མངོན་སུམ་གྱི་བློ་རྟོག་པ་དང་བྲལ། ཡང་དག་པ་མ་ཡིན་པར་གྲུབ་ན་ཇི་ལྟར་མངོན་སུམ་གྱི་བློ་མ་འཁྲུལ། རྟོག་པ་དང་བཅས་ཤིང་འཁྲུལ་པ་དང་བཅས་པར་གྱུར་ན་ཚད་མར་ཇི་ལྟར་རུང་། གཞན་ཡང་འདི་ལྟར་རྟོག་པ་དང་མ་འཁྲུལ་ཞེས་དགག་པའི་སྒྲ་གཉིས་ཀྱིས་བསྟན་པ་འདི། ཞེན་པར་དགག་པ་དང་བྲལ་བར་དགག་པར་བསྟན་པ་ཡིན་ཏེ། འདི་ལྟར་ཉི་མའི་སྙིང་པོ་ལ་མུན་པ་མེད་པ་ཞེས་བྱ་བའི་སྒྲས་བསྟན་པ་བཞིན་དུ། མུན་པའི་གཞི་ཅུང་ཟད་ཀྱང་མེད་པར་སྟོན་པ་ཞིག་ན་ནི། དབང་པོའི་བློ་ངོ་བོ་ཉིད་ཀྱིས་གཡེང་བར་མི་འགྱུར་ཏེ། ངོ་བོ་ཉིད་ཀྱི་ཡེ་ཤེས་སུ་འགྱུར་རོ། །གལ་ཏེ་ཕྲ་ཞིང་ཆུང་བར་དགག་པ་ཡིན་ཏེ། འདུ་ཤེས་ཕྲ་བ་ལ་འདུ་ཤེས་མེད་ཅེས་དགག་པ་ལྟར། རྟོག་པ་ཕྲ་བ་ལ་རྟོག་པ་མེད་ཅེས་བརྗོད་ལ། གཟུགས་ཆུང་བ་ལ་གཟུགས་མེད་ཅེས་བརྗོད་པ་ལྟར། འཁྲུལ་པ་ཆུང་བ་ལ་མ་འཁྲུལ་ཞེས་བརྗོད་ན་ནི། ངོ་བོ་ཉིད་རྟོག་པ་དང་བཅས་ཤིང་འཁྲུལ་པ་དང་བཅས་པ་ཡིན་པས་ཚད་མར་ཇི་ལྟར་བུར། གཞན་ཡང་གཟུང་འཛིན་གྱི་ངོ་བོ་བསལ་ཡང་། ཤེས་ཤིང་རིག་པའི་མཚན་ཉིད་དུ་སྐྱེ་བ་ཉིད་ཚོར་བས་ཉམས་སུ་མྱོང་བ་ཡིན་ན། ཚོར་བས་སྤྱོད་ཡུལ་གྱིས་འཁྲུལ་པ་མི་ཆོད་པས་རང་རིག་པ་ཉིད་དེ་ལྟ་བུར་གྲུབ་བམ་མི་གྲུབ་མ་ངེས་ཏེ་ད་རུང་གཞལ་བྱ་ཡིན་ནོ། །འདི་སྐད་དུ། འོ་ན་རིགས་པ་ཐམས་ཅད་དྲི་མ་ཅན་ཡིན་ན། ཁྱེད་ལ་རིགས་པ་དྲི་མ་མེད་པ་གཞན་ཇི་ལྟ་བུ་ཞིག་ཡོད་ཅེ་ན། ཁོ་བོ་ཅག་ནི་རིགས་པ་དྲི་མ་མེད་པ་ཡོད་པར་མི་སྨྲ་སྟེ། འོན་ཀྱང་དྲི་མ་ཆེ་ཆུང་གི་བྱེ་བྲག་ཡོད་པས་ཆུང་བས་ཆེ་བ་སུན་འབྱིན་པར་ནུས་སོ། །རིགས་པ་དྲི་མ་མེད་པ་གཅིག་གིས་ཤེས་བྱའི་མཐར་ཕྱིན་པར་བྱེད་པ་ཞིག་ཡོད་ན། རྒྱལ་བ་རྣམས་ཀྱིས་བཀའ་ཐམས་ཅད་དུ་དེ་ཉིད་ཐོག་མར་ཅིའི་ཕྱིར་མི་བསྟན་ཏེ། དེ་ལྟའང་མ་ཡིན། རིགས་པ་ལ་རྟེན་ཅིང་ཕན་མི་འདོགས་པའང་མ་ཡིན་ཏེ། དཔེར་ན་སྐྱེས་བུ་ལམ་རིང་པོར་འགྲོ་བར་འདོད་ན། མིག་རྒྱང་དང་པོ་དང་གོམ་པ་དང་པོས་མཐར་ཕྱིན་པའང་མ་ཡིན། དེ་ལ་མ་རྟེན་པར་ཡང་མ་ཡིན། དེད་དཔོན་གྱིས་ལུང་དང་དབང་ལ་མ་རྟེན་པར་ཡང་མ་ཡིན་ཏེ། དེ་རྣམས་ལ་རྟེན་པས་མཐར་ཕྱིན་པ་བཞིན་དུ་ལུང་དང་མན་ངག་དང་རང་གི་བློ་རིགས་པས་བསྐྱེད་པ་རྣམས་ཀྱིས་མཐར་རྟོགས་པར་འགྱུར་རོ། །ཇི་སྐད་དུ། མཁས་པ་གོམ་པ་སྔ་མ་མ་བརྟན་པར་དུ་ཕྱི་མ་འདོར་མི་བྱེད། །དེ་བརྟན་གྱུར་ནས་དེ་བཞིན་རིམ་པར་འདོར་བྱེད་པ། །ཉམ་ཉེས་གཡང་སར་མི་ལྟུང་བདེ་བར་གནས་སུ་ཕྱིན་པར་འགྱུར། །དེ་བཞིན་མཁས་པ་རིགས་པ་སྔ་མ་མ་བརྟན་བར་དུ་གཞན་མི་སྒྲུབ། །དེ་བརྟན་གྱུར་ནས་དེ་བཞིན་རིམ་པར་སྒྲུབ་བྱེད་པ། །སྐྱོན་གྱི་གཡང་སར་མི་ལྟུང་བདེ་བར་དོན་རྣམས་རྟོགས་པར་འགྱུར། །ཞེས་གསུངས་པ་ལྟ་བུའོ། དེ་ལྟ་བས་ན་སྒྲའི་བསྟན་ཆོས་དང་རིགས་པའི་བསྟན་ཆོས་ལ་མངོན་པར་ཞེན་པ་རྣམས་ཀྱིས་ཀྱང་། རང་གི་གྲུབ་པའི་མཐའ་ནི་རིགས་པ་དྲི་མ་མེད་པས་གྲུབ་ཡིན་པས་བླང་བར་བྱ་བ་ཡིན་ལ། རྫོགས་པ་ཆེན་པོའི་ཚུལ་ནི་རིགས་པས་མ་གྲུབ་སྟེ་དོར་བར་བྱ་བ་ཡིན་ནོ་སྙམ་དུ་ཡིད་ལ་མ་བྱེད་པར་འདི་ལ་དད་པས་འཇུག་པར་གྱིས་ཤིག །དེ་ལྟ་མ་ཡིན་ན་མངོན་པའི་ང་རྒྱལ་ཅན་དུ་གྱུར་ཏ་རེ། རྫོགས་པ་ཆེན་པོའི་ཚུལ་རིགས་པས་མི་གནོད་པའི་སྐབས་ཏེ། བཞི་པའོ།། ༧ །།ད་ནི་རྫོགས་པ་ཆེན་པོའི་གཞུང་ཉིད་ལ་འཇུག་པར་བྱ་སྟེ། དེ་ལ་རྫོགས་པ་ཆེན་པོའི་ཚུལ་སྟོན་པའི་གཞུང་ཇི་སྙེད་པ་ཐམས་ཅད་ལས་ཀྱང་། དོན་མདོར་བསྡུ་ན་རྣམ་པ་བཞིར་འདུས་ཏེ། འདི་ལྟར། བྱང་ཆུབ་སེམས་ཀྱི་རང་བཞིན་བསྟན་པ་དང་། བྱང་ཆུབ་སེམས་ཀྱི་ཆེ་བ་བསྟན་པདང་། བྱང་ཆུབ་སེམས་ཀྱི་གོལ་སྒྲིབ་བསྟན་པ་དང་། བྱང་ཆུབ་སེམས་ཀྱི་གཞག་ཐབས་བསྟན་པའོ། །དེ་ལ་ཆེ་བ་དང་གོལ་སྒྲིབ་བསྟན་པས་ཀྱང་རང་བཞིན་བསྟན་པར་འགྱུར། རང་བཞིན་བསྟན་པས་ཀྱང་ཆེ་བ་རྟོགས་ཤིང་གོལ་སྒྲིབ་ཆོད་པར་འགྱུར་ཏེ། དེ་བས་ན་གཞུང་རྣམས་ལས་ཀྱང་ལྷག་པར་འདི་ལྟར་གུད་དུ་ཕྱེ་ཞིང་བསྟན་པའང་མེད་ལ། འདི་རྣམས་ལས་འདའ་བའང་མེད་དོ། །དེ་ལ་མདོར་བསྡུ་ན་བྱང་ཆུབ་སེམས་ཀྱི་རང་བཞིན་ནི། ཕྱི་ནང་སྣང་སྲིད་ཀྱི་ཆོས་ཐམས་ཅད་གཉིས་སུ་མེད་པའི་བྱང་ཆུབ་ཀྱི་སེམས། སྙིང་པོ་བྱང་ཆུབ་ཀྱི་རང་བཞིན་དུ་གདོད་མ་ཉིད་ནས་སངས་རྒྱས་ཏེ། ད་ལམ་གྱིས་བཅོས་ཤིང་གཉེན་པོས་བསྒྲུབ་ཏུ་མེད་དེ་བརྩལ་བ་མེད་པར་ལྷུན་གྱིས་གྲུབ་པའོ། །བྱང་ཆུབ་སེམས་ཀྱི་ཆེ་བ་ནི། དཔེར་ན་རིན་པོ་ཆེ་གསེར་གླིང་ནས་རྡོ་མིང་ཡང་མེད་དེ། ཐམས་ཅད་གསེར་གྱི་རང་བཞིན་དུ་གནས་པ་བཞིན་དུ། ཕྱི་ནང་སྣང་སྲིད་ཀྱིས་བསྡུས་པའི་ཆོས་ཐམས་ཅད་ལ། འཁོར་བ་དང་ངན་སོང་ལ་སོགས་ཏེ་ཉེས་སྐྱོན་གྱི་ཆོས་སུ་བཏགས་པ་ནི་མིང་ཙམ་ཡང་མེད་དེ། ཐམས་ཅད་ཀུན་ཏུ་བཟང་པོའི་རོལ་པའི་རྒྱན་མ་འགགས་པ་ཙམ་དུ་སྣང་བ་དེ་བཞིན་གཤེགས་པའི་ཆེ་བ་ཉིད་དོ། །བྱང་ཆུབ་སེམས་ཀྱི་གོལ་སྒྲིབ་ནི། དེ་ལྟར་མ་རྟོགས་པ་དང་ལོག་པར་རྟོགས་པའི་འཇིག་རྟེན་པ་ནས། ཐེག་པ་འོག་མ་པའི་ལྟ་སྤྱོད་ཐམས་ཅད་ཡིན་ཏེ། མདོར་བསྡུས་ན་གོལ་སྒྲིབ་སུམ་ཅུ་ལྟ་བུའོ། །བྱང་ཆུབ་སེམས་ཀྱི་གཞག་ཐབས་ནི། རྣལ་འབྱོར་གྱི་སྐྱེས་བུ་བློ་ཡང་རབ་ཏུ་གྱུར་པ་གང་གིས། རྫོགས་པ་ཆེན་པོའི་དོན་ཇི་ལྟ་བ་བཞིན་དུ་ཤེས་བཞིན་ཆེན་པོའི་སྣོད་ཀྱིས་བཟུང་ནས་བཏང་སྙོམས་ཆེན་པོའི་ངང་ལ་གནས་པའོ། །འདི་ལྟ་བུར་སྟོན་པའི་རྫོགས་པ་ཆེན་པོའི་ཚིག་འདི་དག་ཀྱང་། ཆེ་ཆེ་རགས་རགས་སྐད་དུ་སྨྲའང་། འཕྲ་ཞིང་ཞི་སྟེ་ནམ་མཁའི་ཁམས་དང་འདྲ་ལ། ཐེག་པ་འོག་མ་པའི་ཚུལ་ནི་ཕྲ་ཞིང་ཞི་ཞི་སྐད་དུ་སྨྲ་ཡང་རགས་ཤིང་བརྔོ་སྟེ། རྡུལ་གྱི་ཕུང་པོ་བཞིན་ནོ། །དེ་བས་ན་རྫོགས་པ་ཆེན་པོའི་ཚུལ་འདི་ལ་བློ་ཡངས་ཟབ་པ་འཕྲ་བས་བརྟག་དགོས་སོ། །དེ་ལ་རྫོགས་པ་ཆེན་པོའི་གཞུང་ཉིད་ལས་འབྱུང་བ་ནི། འདི་སྐད་དུ། ཆོས་ཐམས་ཅད་བྱང་ཆུབ་ཀྱི་སེམས་ཐིག་ལེ་ཆེན་པོ་གཅིག་གི་རང་བཞིན་དུ་སངས་རྒྱས་པར་ལྟའོ་ཞེའམ། དེ་བཞིན་དུ་འཁྲུལ་སྣང་ཐམས་ཅད་ཀུན་ཏུ་བཟང་པོའི་རོལ་པར་ལྟའོ་ཞེའམ། སེམས་ཅན་ཐམས་ཅད་ཟབ་མོ་བྱང་ཆུབ་ཀྱི་ཞིང་དུ་ལྟའོ་ཞེའམ། སྤྱོད་ཡུལ་ཐམས་ཅད་རང་བྱུང་གི་ཡེ་ཤེས་རང་ཤར་བར་ལྟའོ་ཞེའམ། གཞན་ཡང་རྣམ་གྲངས་ཀྱིས་ན་ཆོས་ཐམས་ཅད་ནི་ཆེ་བ་རྣམ་པ་ལྔའི་རང་བཞིན་དུ་སངས་རྒྱས་པར་ལྟའོ་ཞེའམ། ཐིག་ལེ་ཆེན་པོ་དྲུག་གི་རང་བཞིན་དུ་སངས་རྒྱས་པར་ལྟའོ་ཞེའམ། གཞན་ཡང་འདི་ལྟར་གོལ་སྒྲིབ་སུམ་ཅུས་ནི་གོལ་བ་དང་སྒྲིབ་པ་གཅད། ཡིན་པ་རྣམ་པ་གསུམ་གྱིས་ནི་ཐེ་ཚོམ་གྱི་གེགས་བསལ། གདེང་ཆེན་པོ་གསུམ་གྱིས་ནི་དགོངས་པའི་རྡེང་གཅད། མན་ངག་གི་རྩ་བ་གསུམ་གྱིས་ནི་མན་ངག་གི་གཞི་བཟུང་། བྱང་ཆུབ་ཀྱི་སེམས་ཐིག་ལེ་ཆེན་པོ་གཅིག་གིས་ནི་ཤེས་བྱ་ཐམས་ཅད་ཀྱི་གདར་ཤ་གཅད། ཐམས་ཅད་ནས་ཐམས་ཅད་དུ་སངས་མ་རྒྱས་པ་མེད་པའི་ཆེ་བས་ནི་ལ་བཟླ་སྟེ། ཀུན་ཏུ་བཟང་པོ་དབྱེ་བ་མེད་པའི་ས་ལ་ད་ལྟ་ཉིད་ནས་བརྩལ་བ་མེད་པར་ལྷུན་གྱིས་འཇུག་པ་འདི་ནི། དཔལ་རྡོ་རྗེ་སེམས་དཔའ་གཉིས་པ་ཉིད་ཡིན་པས་སྲིད་པ་དང་མི་སྲིད་པ་ཐམས་ཅད་ཀྱིས། ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོ་བཞིན་དུ་སྤྱི་བོས་བཀུར་བར་འོས་སོ། །ཞེས་བྱའོ། །ད་ནི་ཇི་སྐད་དུ་སྨོས་པ་དེ་རྣམས་བསྟན་པར་བྱ་སྟེ། དེ་ལ་བྱང་ཆུབ་ཀྱི་སེམས་ཞེས་བྱ་བ་ནི་གོང་དུ་བསྟན་པ་བཞིན་དུ་སེམས་དང་བྱང་ཆུབ་དབྱེར་མེད་པའི་དོན་ཏོ། །ཇི་སྐད་དུ། སེམས་དེ་ཁོ་ན་བྱང་ཆུབ་སྟེ། །བྱང་ཆུབ་གང་ཡིན་སེམས་ཡིན་ནོ། །སེམས་དང་བྱང་ཆུབ་གཉིས་མེད་དེ། །དབྱེར་མེད་དེ་བཞིན་ཡོ་གིས་སོ། །ཞེས་གསུངས་པ་ལྟ་བུའོ། །ཐིག་ལེ་ནི་སྤྲོས་པ་དང་བྲལ་བའི་དོན། ཆེན་པོ་ནི་ཆོས་ཐམས་ཅད་ཀྱི་རང་བཞིན་དུ་ཁྱབ་བདལ་བའོ། །དེའི་རང་བཞིན་དུ་སངས་རྒྱས་པ་ནི། སྙིང་པོ་བྱང་ཆུབ་ཀྱི་རང་བཞིན་ལ་སྒྲིབ་པ་བསལ་དུ་མེད་ཅིང་ཡེ་ཤེས་བསྐྱེད་དུ་མེད་དེ། དཔེར་ན་ལྕེ་སྤྱང་གི་མིག་ལ་ཉིན་མཚན་བྱེ་བྲག་མེད་པ་ཤིན་ཏུ་གསལ་བར་མཐོང་བའི་ཚེ། མུན་པ་བསལ་མི་དགོས་པས་སྣང་བའི་མཐུ་ལ་བརྟེན་མི་དགོས་ཏེ། དེའི་ཚེ་ནམ་མཁའ་རང་བཞིན་གྱིས་འོད་གསལ་བར་ཤེས་སོ། །དེ་བཞིན་དུ་ཆོས་ཐམས་ཅད་སྙིང་པོ་བྱང་ཆུབ་སེམས་ཀྱི་རང་བཞིན་དུ་རྟོགས་པ་ན། སྒྲིབ་པ་བསལ་དུ་མེད་པས་ཡེ་ཤེས་བསྐྱེད་མི་དགོས་ཏེ། དེའི་ཚེ་བྱང་ཆུབ་ཀྱི་སེམས་རང་བཞིན་གྱིས་འོད་གསལ་བར་ཤེས་སོ། །དེ་ལ་ཀུན་ཏུ་བཟང་པོའི་རོལ་པ་ཞེས་བྱ་བ་ནི། འགྲོ་བའི་འཁྲུལ་སྣང་དུ་གྲགས་པ་ཐམས་ཅད་ལ། ཐམས་ཅད་ནས་ཐམས་ཅད་དུ་ངན་ཅིང་དོར་བར་བྱ་བ་མེད་པས་ཀུན་ཏུ་བཟང་པོའོ། །དོན་དུ་གཉེར་བར་བྱ་བ་མེད་ཅིང་མཐིལ་ཕབ་པའི་དོན་དང་བྲལ་བས། སྒྱུ་མ་རྩེད་མོ་དང་འདྲ་བར་གནས་པའི་ཕྱིར་རོལ་པའོ། །ཅིར་ཡང་བཀག་པ་མེད་པར་སྣང་ཡང་ཆོས་ཉིད་ལས་མ་གཡོས་ཤིང་ཆོས་ཉིད་འབྱེས་པར་བྱེད་པས་རྒྱན་ནོ། །སངས་མ་རྒྱས་པའི་ཆོས་ནི་གང་ཡང་མེད་ལ། ཐམས་ཅད་ཀྱང་དེ་བཞིན་གཤེགས་པའི་མཛད་པ་སྒྲུབ་པ་ཉིད་པས་སངས་རྒྱས་ཀྱི་ཆེ་བ་ཉིད་ཡིན་ཏེ། ཇི་སྐད་དུ། ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིས་སེམས་ཅན་རྣམས་ཉོན་མོངས་པར་བྱེད་པ་དེ་དག་ཐམས་ཅད་ཀྱིས་སངས་རྒྱས་ཀྱི་མཛད་པ་མི་སྒྲུབ་པ་མེད་དོ། །ཐ་ན་བདུད་བཞི་པོ་རྣམས་ཀྱིས་ཀྱང་། སངས་རྒྱས་རྣམས་ཀྱི་མཛད་པ་སྒྲུབ་པར་བྱེད་དོ། །ཞེས་མདོ་སྡེ་ལས་གསུངས་པ་ལྟ་བུའོ། །ཀུན་ཏུ་བཟང་པོའི་རོལ་པོ་གཙོར་སྨོས་པ་འདི་ནི། བྱང་ཆུབ་ཀྱི་སེམས་རྡོ་རྗེ་ཚིག་དྲུག་པ་ལས། ཚིག་དང་པོ་གཉིས་ཀྱིས་ནི་བྱང་ཆུབ་སེམས་ཀྱི་རང་བཞིན་གོལ་ས་བཅད་པ་དང་བཅས་པ་བསྟན་ཏེ། ཚིག་བར་མ་གཉིས་ཀྱིས་ནི་བྱང་ཆུབ་སེམས་ཀྱི་ཆེ་བ་ཀུན་ཏུ་བཟང་པོའི་རོལ་པའི་རྒྱན་མི་འགོག་པར་བསྟན་ཏོ། །ཚིག་ཐ་མ་གཉིས་ཀྱིས་ནི་བྱང་ཆུབ་སེམས་ཀྱི་གཞག་ཐབས་ལ་བཟླ་བ་དང་བཅས་པར་བསྟན་ཏོ། །སེམས་ཅན་ཟབ་མོ་བྱང་ཆུབ་ཀྱི་ཞིང་ཞེས་བྱ་བ་ནི། བྱང་ཆུབ་ཀྱི་སེམས་རྡོ་རྗེ་སེམས་དཔའ་ནམ་མཁའ་ཆེ་ལས། ཆེ་བ་ཆོས་ཉིད། ཆེ་བའི་ཆེ་བ་ནི་སེམས་ཅན་ཐམས་ཅད་ཟབ་མོ་བྱང་ཆུབ་ཀྱི་ཞིང་ཡིན་པས་སོ། །ཞེས་བྱ་བ་ལྟ་བུ་སྟེ། སེམས་ཅན་གྱི་འགྲོ་བའི་ཕུང་པོའོ། །བྱང་ཆུབ་ཀྱང་ཡིན་ལ་ཞིང་ཡང་ཡིན་པས་བྱང་ཆུབ་ཀྱི་ཞིང་སྟེ། ཡོན་ཏན་ཐམས་ཅད་ཀྱི་གནས་ཀྱི་ཕྱིར་རོ། །དེ་ལྟར་འགྲོ་བ་རྣམས་ཀྱི་བློ་ལ་མི་སྣང་ཞིང་མི་རྟོགས་པས་ཟབ་མོའི་ཞིང་ཞེས་བྱའོ། །དེ་ལ་སྤྱོད་ཡུལ་ཐམས་ཅད་རང་བྱུང་གི་ཡེ་ཤེས་རང་ཤར་བར་ལྟའོ། །ཞེས་བྱ་བ་ནི། སྤྱོད་ཡུལ་ནི་འགྲོ་བའི་དབང་པོ་དྲུག་གི་སྤྱོད་ཡུལ་ལོ། །རང་བྱུང་གི་ཡེ་ཤེས་ནི། འདུ་བྱེད་ཐམས་ཅད་རང་བཞིན་གྱིས་ཞི་བ་ཡིན་པས། ཡེ་ཤེས་རང་འབྱུང་ཡིན་ཏེ། ཚུལ་འདི་ནི་རྣལ་འབྱོར་སྤྱོད་པ་རྣམ་པ་མེད་པར་སྨྲ་བའང་འདོད་དོ། །ངེས་པའི་དོན་གྱི་མདོ་སྡེ་གཞན་ལས་ཀྱང་འདི་སྒྲུབ་སྟེ། འདི་སྐད་དུ། གསོག་དང་གསོབ་དང་སྙིང་པོ་མེད་པ་ཡིན་ཡང་། བསོད་ནམས་གསོག་མ་ཡིན་པ་དང་། ཡེ་ཤེས་གསོབ་མ་ཡིན་པ་དང་། རང་འབྱུང་གི་ཡེ་ཤེས་སུ་དབང་བསྐུར་བའི་སྙིང་པོ་མེད་པ་མ་ཡིན་ནོ། །ཞེས་གསུངས་པ་ལྟ་བུ་སྟེ། འདི་ལྟར་ཆོས་ཐམས་ཅད་ནི་གསོག་ཡིན་ཏེ་སླུ་བའི་ཆོས་ཅན་ཡིན་ཡང་། བསོད་ནམས་ཀྱི་ཚོགས་མི་སླུ་བར་ཡང་བལྟས་ཏེ་སྤྱད་དོ། །དེ་བཞིན་དུ་གསོབ་ཡིན་ཏེ་བཅུད་དུ་བྱ་བ་མེད་པ་ཡིན་ཡང་། དོན་ལ་ཕྱིན་ཅི་མ་ལོག་པའི་ཡེ་ཤེས་བཅུད་དུ་བྱས་ཏེ་བསྟེན་པར་བྱའོ། །ཐམས་ཅད་སྙིང་པོ་མེད་པ་ཡིན་ཡང་རང་འབྱུང་གི་ཡེ་ཤེས་སུ་དབང་བསྐུར་བ་སྙིང་པོ་ཞེས་བྱ་བ། ཤེས་པ་ངོ་བོ་ཉིད་ཀྱིས་དྲི་མ་དག་པ་མེད་པ་མ་ཡིན་པར་ཡང་བལྟའོ། །འདི་དག་རྣལ་འབྱོར་སྤྱོད་པ་འདོད་པ་ལྟར་ཡང་དག་པར་ཡོད་པ་མ་ཡིན་པས། གསོབ་དང་གསོག་དང་སྙིང་པོ་མེད་པ་ཡང་ཡིན་ནོ། །སྡོང་པོས་བརྒྱན་པའི་མདོ་ལས། འཇིག་རྟེན་ཁམས་རྣམས་ལ་ལ་དང་། །བསམ་གྱིས་མི་ཁྱབ་ཚིག་འགྱུར་ཀྱང་། །ནམ་མཁའ་འཇིག་པར་མི་འགྱུར་ཏེ། །རང་འབྱུང་ཡེ་ཤེས་དེ་བཞིན་ནོ། །ཞེས་གསུངས་པའི་ཚུལ་ཡང་དེ་འདྲའོ། །འདི་ནི་ཁྱུང་ཆེན་ལས། མི་གནས་དམིགས་པའི་ཡུལ་མེད་མི་རྟོག་ཆོས་ཀྱི་ལམ། བསྔོ་བའི་ཆ་ཤས་འཕྲ་མོའི་ཡུལ་ལས་དབྱུང་བ་སྟེ། རྟོག་སྒོམ་ཆོས་ཀྱི་སྐུ་ནི་ཁྱད་པར་དོན་མེད་པས། རང་བྱུང་ཡེ་ཤེས་མི་རྟོག་ཀུན་ཏུ་ཇི་བཞིན་གནས། །ཞེས་གསུངས་པ་སྟེ། འདི་ནི་བསམ་གཏན་གྱི་གལ་གེགས་ཡིན་པས་བྱང་ཆུབ་སེམས་ཀྱི་གཞག་ཐབས་ཀྱི་སྐབས་སུ་དགོས་པ་ཡིན་ཡང་། རང་བྱུང་གི་ཡེ་ཤེས་ཀྱི་གནས་ལུགས་ཡིན་པས་འདིར་ཡང་བསྟན་ཏེ། འདི་ལྟར་རྣམ་པར་མི་རྟོག་པའི་ཏིང་ངེ་འཛིན་ནི། རྟེན་གང་ལ་ཡང་མི་གནས། ཡུལ་གང་ལའང་མི་དམིགས། རྣམ་པར་ཇི་ལྟ་བུར་ཡང་མི་རྟོག་པ་ཡིན་པས་དེ་ལྟར་བསྒོམ་མོ། །ཞེས་ཟེར་བ་ནི། བླང་དོར་གྱི་མཐར་ལྷུང་བས་བསྔོ་བའི་ཆ་ཤས་དང་མ་བྲལ་བ་སྟེ། ཆོས་ཀྱི་སྐུ་བླང་དོར་གྱིས་ཁྱད་པར་དུ་དབྱེ་ཞིང་ལྷག་པར་བོགས་དབྱུང་བའི་ཆོས་གཅིག་མེད་དོ། །དབང་པོ་དྲུག་གི་སྤྱོད་ཡུལ་དུ་ཇི་ལྟར་རྣམ་པར་རྟོགས་ཤིང་གཡེངས་པར་གྱུར་ཀྱང་། དོན་ལའང་བླང་དོར་མེད་ཅིང་ཤེས་པའང་རང་བཞིན་གྱིས་འོད་གསལ་བ་ཡིན་ནོ། །བླང་དོར་མེད་པའི་ཚུལ་འདིའང་གོང་དུ་བསྟན་པའི་ལྕེ་སྤྱང་གི་མིག་གི་དཔེ་བཞིན་དུ་ཤེས་པར་བྱའོ། །འདི་ཡང་རྣལ་འབྱོར་སྤྱོད་པ་འདོད་པ་ལྟར་ནི་མ་ཡིན་ཏེ། །རང་བྱུང་ཡེ་ཤེས་ཉིད་ཀྱང་བསྙད་པ་ཀུན་དང་བྲལ། །ཞེས་གསུངས་པ་ལྟ་བུ་ཡིན་ནོ། །ལ་ལ་དག་འདི་སྙམ་དུ། ཡེ་ཤེས་རང་བྱུང་ཡོད་ན། སྒྲིབ་པ་ཅི་སྟེ་མི་སྤང་། ཞེས་བསམ་པར་མི་བྱ་སྟེ། དཔེར་ན་མི་རྣམས་ཀྱི་མིག་ལ་མུན་པ་བསལ་དུ་ཡོད་པར་སྣང་བས། དེའི་གཉེན་པོ་སྣང་བའི་མཐུ་ལའང་བལྟོས་དགོས། ལྕེ་སྤྱང་གི་མིག་ཐོབ་པ་ན་མུན་པ་ལ་སྤང་བའི་རྫས་མེད་པར་རྟོགས་ཏེ། ནམ་མཁའ་རང་བཞིན་གྱིས་འོད་གསལ་བ་ན། སྣང་བ་ལ་རྟེན་གྱི་འབྱུང་བ་ཆེན་པོ་ཡོད་པས། རྫས་ཡོད་པར་ཤེས་ཀྱང་མུན་པ་སེལ་བའི་བྱ་བ་མི་བྱེད་དོ། །དེ་བཞིན་དུ་ཆོས་ཀྱི་མིག་དྲི་མ་མེད་པ་ཐོབ་པ་ན། ཉོན་མོངས་པ་དང་ཉོན་མོངས་པ་ཅན་མ་ཡིན་པའི་མི་ཤེས་པ་ལ་རྫས་མེད་པར་ཤེས་པ་ན། སེམས་རང་བཞིན་གྱིས་འོད་གསལ་བར་ཤེས་ཏེ། དེའི་ཚེ་རྣམ་པར་མི་རྟོག་པའི་ཡེ་ཤེས་སྒྲིབ་པ་དང་མཚུངས་པ་མ་ཡིན་ཏེ། ཤེས་ཤིང་རིག་པའི་མཚན་ཉིད་རྫས་སུ་ཡོད་པར་མཐོང་ཡང་། དེས་སྒྲིབ་པ་སེལ་བའི་བྱ་བ་བྱེད་པར་མི་དམིགས་སོ། །དེ་བས་ན་འཁྲུལ་པའི་བློ་ཚོར་བའི་སྤྱོད་ཡུལ་དུ་གང་སྣང་སྣང་ལ་རྫས་སུ་མི་གཟུང་ངོ་། །དེ་བས་ན་སྒྲིབ་པ་སྤོང་མི་སྤོང་གི་ཐ་སྙད་ནི་བྱིས་པའི་སྤྱོད་ཡུལ་ཡིན་ཏེ། མཁས་པའི་སྤྱོད་ཡུལ་ནི་མ་ཡིན་ནོ། །འདི་ལྟར་སྡུད་པ་ཚིགས་སུ་བཅད་པ་ལས། འགྲོ་བ་འཁྲུལ་པ་རི་དྭགས་རྒྱར་ཆུད་འདྲར་ཤེས་ནས། །ཤེས་རབ་ལྡན་པ་མཁའ་ལ་བྱ་བཞིན་རྣམ་པར་རྒྱུ། །ཞེས་གསུངས་པའི་དོན་ཡང་དེ་དང་འདྲའོ། །དེ་ལྟར་ཚིག་རེ་རེའི་སྒོ་ནས་རྫོགས་པ་ཆེན་པོའི་དོན་མདོར་བསྟན་ནས། ད་ནི་རྣམ་གྲངས་ཀྱི་སྒོ་ནས་བསྟན་པར་བྱ་སྟེ། དེ་ལ་ཆོས་ཐམས་ཅད་ཆེ་བ་རྣམ་པ་ལྔའི་རང་བཞིན་དུ་སངས་རྒྱས་པར་ལྟའོ། །ཞེས་བྱ་བ་ལ། ཆོས་ཐམས་ཅད་ནི། མ་འདྲེས་པ་དང་། ཡོངས་སུ་རྫོགས་པའི་ཆོས་སོ། །དེ་ལ་མ་འདྲེས་པ་ནི་སྣ་ཚོགས་སུ་སྣང་བའོ། །ཡོངས་སུ་རྫོགས་པ་ནི་རང་བཞིན་མི་གཉིས་པའོ། །ཆེ་བ་རྣམ་པ་ལྔ་ནི། མངོན་པར་སངས་རྒྱས་པའི་ཆེ་བ་དང་། བདག་ཉིད་ཆེན་པོར་སངས་རྒྱས་པའི་ཆེ་བ་དང་། ཆོས་ཀྱི་དབྱིངས་སུ་སངས་རྒྱས་པའི་ཆེ་བ་དང་། དེ་ཡིན་པའི་སངས་རྒྱས་པའི་ཆེ་བ་དང་། ཐམས་ཅད་ནས་ཐམས་ཅད་དུ་སངས་རྒྱས་པ་མེད་པའི་ཆེ་བའོ། །སངས་རྒྱས་པའི་སྒྲ་ནི་གོང་དུ་བཤད་ཟིན་ཏོ། །མངོན་པའི་སྒྲ་ནི་མངོན་སུམ་འམ་ངོ་འཐོན་ཉིད་དུའོ། །བདག་ཉིད་ཆེན་པོ་ནི་ཐམས་ཅད་ལ་མངའ་བརྙེས་པའོ། །ཆོས་ཀྱི་དབྱིངས་ནི་མཚན་མ་ཐམས་ཅད་དང་བྲལ་བའོ། །དེ་ཡིན་པ་ནི་ཐེ་ཚོམ་མི་ཟ་བའོ། །སངས་རྒྱས་པ་མེད་པ་ནི་ཐ་སྙད་ལས་འདས་པའོ། །དེ་ལ་ཆེ་བ་ཞེས་བྱ་བ་ནི། ཆུང་ངུ་རྣམས་ཟིལ་གྱིས་གནོན་པར་བྱེད་པས་ཆེན་པོ་ཞེས་བྱ་སྟེ། དེ་ཡང་ལན་གཅིག་གི་ཚེ་ཐེག་པ་འོག་མའི་བློ་མཚན་མའི་དྲི་མ་དང་བཅས་པ་རྣམས། བློ་ཡངས་ཤིང་རྒྱ་ཆེ་བ་འདིས་ཟིལ་གྱིས་གནོན་པར་བྱེད་པས་ཆེན་པོ་ཞེས་བྱ་སྟེ། ངོ་བོ་ཉིད་དུ་ཆེ་བ་དང་ཆུང་བའི་བློ་ཡོད་ན་དེ་ཉིད་ཆེན་པོར་མི་རུང་སྟེ། ཆེ་ཆུང་གི་དམིགས་པ་དང་བྲལ་བ་ཉིད་ཡིན་ནོ། །འདི་ལྟར་ཁྱུང་ཆེན་ལས། ཡངས་སོ་ཆེའོ་ཆོས་ཆེན་པོ། །ཆུང་ངུ་རྣམས་ཀྱི་གཉེན་པོར་གསུངས། །ཆེ་ལ་དམིགས་པའི་ཆ་སྙོམས་ན། །ཆུང་ཆེ་དེ་རྣམས་དམིགས་དང་བྲལ། །ཞེས་གསུངས་པ་ལྟ་བུ་ཡིན་ནོ། །དེ་ལ་ཆེ་བ་རྣམ་པ་ལྔས་ཟིལ་གྱིས་གནོན་པར་བྱ་བའི་ཡུལ་ལྔ་ནི། ལྟ་བ་དམན་པ་དང་། ཆད་པར་ལྟ་བ་དང་། དངོས་པོར་ལྟ་བ་དང་། ཐེ་ཚོམ་དང་། རྩོལ་སྒྲུབ་རྣམས་ཟིལ་གྱིས་གནོན་པའི་ཕྱིར་ཆེ་བ་ཞེས་བྱའོ། །དེ་ལ་མངོན་པར་སངས་རྒྱས་པས་ལྟ་བ་དམན་པ་ཟིལ་གྱིས་གནོན་པ་ནི་འདི་ལྟར། ཐེག་པ་འོག་མ་པ་རྣམས། སྒྲིབ་པ་བསལ། སྣང་བ་གནས་བསྒྱུར་ནས་སངས་རྒྱས་བསྒྲུབ་པར་འདོད་པ་རྣམས་ལ། སྤང་བ་བྱ་བའི་ཆོས་སྤང་དུ་མེད། གནས་གྱུར་པར་བྱ་བའི་ཆོས་གནས་བསྒྱུར་དུ་མེད། མངོན་དུ་བྱ་བའི་ཆོས་ཐོབ་པར་བྱར་མེད་དེ། མངོན་སུམ་ངོ་འཐོན་ཁོ་ནར་སངས་རྒྱས་པར་བསྟན་པས། ལྟ་བ་དམན་པ་དེ་དག་ཟིལ་གྱིས་གནོན་ཅིང་དེའི་གཉེན་པོར་འགྱུར་ཏེ། སྤང་བླང་གི་བློ་འཇིག་པས་ཆེན་པོ་ཞེས་བྱའོ། །འོག་མ་རྣམས་ལ་ཡང་དེ་བཞིན་དུ་སྦྱར་རོ། །དེ་ལ་ཐམས་ཅད་ལ་མངའ་བརྙེས་པ་ནི་རིག་པའི་རྒྱལ་པོ་རང་དབང་དུ་གྱུར་པ་སྟེ། བྱང་ཆུབ་ཀྱི་སྙིང་པོ་གཞན་གྱི་དབང་ལ་མི་ལྟོས་པའོ། །ལྷག་མ་གསུམ་ནི་གོ་སླའོ། །ཆེ་བ་ལྔ་པོ་འདི་ཡང་རྣམ་གྲངས་ལྔས་རྫོགས་པ་ཆེན་པོའི་དོན་གཅིག་སྟོན་པར་བྱེད་པ་ཡིན་ཏེ། འདི་ལྟར་དང་པོ་ནི་དམ་བཅའ་བ། དེའི་འོག་མ་གཉིས་ནི་དེའི་མཚན་ཉིད། བཞི་པ་ནི་དེའི་གཏན་ཚིགས། ལྔ་པ་ནི་དེ་རྣམས་ལ་བཟླ་བའོ། །དེ་ཡང་། འདི་ལྟར་མངོན་སུམ་དུ་སངས་རྒྱས་པ་དེ་མཚན་ཉིད་ཇི་ལྟར་སངས་རྒྱས་ཞེ་ན། ཐམས་ཅད་སྙིང་པོ་བྱང་ཆུབ་ཀྱི་རང་བཞིན་གཞན་ལ་ལྟོས་པ་མེད་པར་རང་འབྱུང་གི་ཡེ་ཤེས་རང་ཤར་བ་ཡིན་ལ། ཡེ་ཤེས་དེ་ཉིད་ཀྱང་མཚན་མ་ཐམས་ཅད་ལས་འདས་ཏེ། བསྙད་པ་ཐམས་ཅད་དང་བྲལ་བའི་མཚན་ཉིད་དོ། །དེ་ཅིའི་ཕྱིར་ཞེ་ན། དེའི་རང་བཞིན་དེ་ཡིན་པའི་ཕྱིར་རོ། །དེ་ལྟར་སངས་རྒྱས་པ་ཞེས་བསྟན་པ་འདི་ཡང་སྐྱོན་མེད་པའི་ཡོན་ཏན་ཞིག་ལ་གནས་པར་བྱ་བའམ། དེ་ལྟ་བུའི་མཚན་ཉིད་དུ་གནས་པ་མེད་དེ། ཐམས་ཅད་ནས་ཐམས་ཅད་དུ་སངས་རྒྱས་པ་ཞེའམ། སངས་མ་རྒྱས་པ་ཞེས་གདགས་པའི་ཐ་སྙད་ཙམ་དང་ཡང་བྲལ་ཏེ། མངོན་པར་འདུ་བྱེད་པའི་རྩོལ་བ་ཐམས་ཅད་ཀྱི་ཡུལ་ལས་འདས་པས་བརྩལ་དུ་མེད་པར་བཟླ་བའོ། །ཞེས་བྱ་བའི་དོན་འདི་སྟོན་པར་འགྱུར་བ་ཡིན་ནོ། །དེ་ལ་ཐིག་ལེ་ཆེན་པོ་དྲུག་གང་ཞེ་ན། ཆོས་ཉིད་ཀྱི་ཐིག་ལེ་དང་། དབྱིངས་ཀྱི་ཐིག་ལེ་དང་། དབྱིངས་རྣམ་པར་དག་པའི་ཐིག་ལེ་དང་། ཡེ་ཤེས་ཆེན་པོའི་ཐིག་ལེ་དང་། ཀུན་ཏུ་བཟང་པོའི་ཐིག་ལེ་དང་། ལྷུན་གྱིས་གནས་པའི་ཐིག་ལེའོ། །དེ་ལ་ཆོས་ཉིད་ནི་འགྱུར་བ་མེད་པ། ཐིག་ལེ་ནི་སྤྲོས་པ་དང་བྲལ་བའི་དོན་ཏེ། དཔེར་ན་སྨིགས་རྒྱུའི་ཆོས་ཉིད་ནི་ཆུས་སྟོང་པ་ཙམ་ཡིན་པར་མ་ཟད་དེ། སྔོ་བ་དང་གཡོ་བ་ཙམ་ཉིད་ཀྱིས་ཀྱང་སྟོང་པ་ཡིན་ལ། སྟོང་པ་ཉིད་དེ་ནི་སྨིགས་རྒྱུ་སྐྱེ་བར་སྣང་ཡང་རུང་འགག་པར་སྣང་ཡང་རུང་སྟེ། སྟོང་པ་ཉིད་ལ་མཚན་ཉིད་གཞན་དུ་འགྱུར་བའང་མེད་ལ། དངོས་པོའི་སྤྲོས་པས་ཟིན་པའང་མེད་དོ། །དེ་བཞིན་དུ་ཆོས་ཐམས་ཅད་ཀྱི་ཆོས་ཉིད་ནི། གོང་དུ་མན་ངག་གི་སྐབས་སུ་བསྟན་པ་བཞིན་དུ། སྟོང་ཞིང་བདག་མེད་པ་ནས་གཉིས་སུ་མེད་པའི་བར་དུ་བསྟན་པ་བཞིན་ཏེ། སྣ་ཚོགས་པའི་ཆོས་ཀྱིས་རང་གི་རང་བཞིན་གཞན་དུ་འགྱུར་བའང་མེད་ལ། མཚན་མའི་སྤྲོས་པས་ཟིན་པའང་མེད། མཚན་མ་བསལ་ཞིང་དོར་བ་ཡང་མ་ཡིན་ཏེ། མཚན་མ་ཉིད་ཀྱི་ངོ་བོ་ཉིད་དེ་ལྟ་བུ་ཡིན་པས། ཆོས་ཉིད་ཀྱི་ཐིག་ལེ་ཞེས་བྱའོ། །དེ་ཉིད་སངས་རྒྱས་ཀྱི་ཆོས་ཐམས་ཅད་ཀྱི་གནས་སུ་གྱུར་པས་དབྱིངས་ཀྱི་ཐིག་ལེའོ། །དེ་ཉིད་དྲི་མ་ཐམས་ཅད་གདོད་མ་ནས་དག་པས་དབྱིངས་རྣམ་པར་དག་པའི་ཐིག་ལེའོ། །དེ་ཉིད་རང་བཞིན་གྱིས་འོད་གསལ་ཏེ་རང་བྱུང་གི་ཡེ་ཤེས་རང་ཤར་བས། ཡེ་ཤེས་ཆེན་པོའི་ཐིག་ལེའོ། །དེ་ཉིད་ལས་ཀུན་ཏུ་བཟང་པོའི་རོལ་པའི་རྒྱན་མི་འགོག་པས། ཀུན་ཏུ་བཟང་པོའི་ཐིག་ལེའོ། །དེ་ལྟ་བུའི་དོན་དེ་ཡང་ད་གཟོད་བགྲོད་ཅིང་སྤྱོད་པ་ལ་མི་ལྟོས་ཏེ་ཡེ་ནས་ལྷུན་གྱིས་གྲུབ་པས། ལྷུན་གྱིས་གནས་པའི་ཐིག་ལེའོ། །དེ་ལ་དང་པོ་གཉིས་ནི་སེམས་ཅན་གྱི་འཁྲུལ་པས་མ་བསླད་པའོ། །བར་མ་གསུམ་ནི་གཉེན་པོའི་ཐབས་ཀྱིས་མ་བཅོས་པའོ། །ཐ་མ་ནི་བརྩལ་བ་ལས་འདས་པར་ལ་བཟླ་བའོ། །ཆེ་བ་དང་ཐིག་ལེ་འདི་དག་གིས་ཀྱང་། བྱང་ཆུབ་སེམས་ཀྱི་རང་བཞིན་དང་། བྱང་ཆུབ་སེམས་ཀྱི་ཆེ་བ་དང་། བྱང་ཆུབ་སེམས་ཀྱི་གོལ་ས་བཅད་པ་རྣམས་བསྟན་པ་ཡིན་ལ། བྱང་ཆུབ་སེམས་ཀྱི་གཞག་ཐབས་ཀྱང་བརྩལ་བ་དང་བྲལ་བར་ལ་དང་རྡིང་ཆོད་པ་ཉིད་ཡིན་ནོ། །ད་ནི་འདི་ནས་མར་རྣམ་གྲངས་ཀྱི་དོན་གྱིས་བློའི་རྡིང་བཅད་ནས། བརྩལ་བ་མེད་པར་ལྷུན་གྱིས་གནས་པའི་ཐབས་སྟོན་ཏེ། དེ་ལ་གོལ་སྒྲིབ་སུམ་ཅུས་གོལ་ས་དང་སྒྲིབ་པ་གཅད་པ་ནི། སྤྱིིར་གྲགས་པ་མིང་དུ་སུམ་ཅུ། རྫས་སུ་བཅུ། རྩ་བ་གཉིས་སོ། །དེ་ལ་རྩ་བ་གཉིས་ནི་གོལ་ས་དང་སྒྲིབ་པ་སྟེ། དེ་ལ་སྒྲིབ་པ་ནི་བྱང་ཆུབ་ཆེན་པོ་ལ་སྒྲིབ་པར་བྱེད་པ་སྟེ། འདི་ལྟར་དེ་སྒྲུབ་པར་མི་རྩོལ་བའོ། །དེ་དག་ཀྱང་གང་ཞེ་ན། འཇིག་རྟེན་པ་དང་། ཉན་ཐོས་དང་། རང་སངས་རྒྱས་སོ། །གོལ་ས་ནི་ཐུན་མོང་དང་ཁྱད་པར་གཉིས་སོ། །དེ་ལ་ཐུན་མོང་ནི་ནང་སེམས་ཀྱི་རྣལ་འབྱོར་ལས་གོལ་བའོ། །དེ་ཡང་འདི་ལྟར། མདོ་སྡེ་ཕ་རོལ་ཏུ་ཕྱིན་པའི་ཚུལ་དང་། ཀྲི་ཡ་དང་། ཨུ་པ་ཡའོ། །ཁྱད་པར་གྱི་གོལ་ས་ནི། རྣལ་འབྱོར་གྱི་ཚུལ་གཅིག་ལ་ཡང་ཡོ་ག་རྣམ་པ་བཞིར་ཕྱེ་སྟེ། འདི་ལྟར། ཡོ་ག་དང་། མ་ཧཱ་ཡོ་ག་དང་། ཨ་ནུ་ཡོ་ག་དང་། ཨ་ཏི་ཡོ་གར་ཕྱེ་བས། དེ་དག་འོག་མ་གོང་མའི་གོལ་སར་འགྱུར་རོ། །དེ་བས་ན་རྫས་སུ་བཅུའོ། །མིང་དུ་སུམ་ཅུ་ནི་ཡོ་ག་རྣམ་པ་བཞི་རེ་རེ་ལ་ཡང་ཐུན་མོང་གི་གོལ་སྒྲིབ་དྲུག་དྲུག་སྟེ། དྲུག་བཞི་ཉི་ཤུ་བཞིའོ། །ཁྱད་པར་གྱི་གོལ་ས་གཅིག་དང་གཉིས་དང་གསུམ་སྟེ། དྲུག་གིས་བསྣན་ནས་སྤྱིར་སུམ་ཅུའོ། །དེ་ལ་འཇིག་རྟེན་པ་སྨོས་མི་དགོས། ཉན་ཐོས་ཀྱི་ལྟ་སྒོམ་བདེན་པ་བཞིའི་དོན་ལ་གནས་ཤིང་། སྡོམ་པའི་རྩ་བ་འཕམ་པ་བཞི་ལ་སོགས་ཏེ། སོ་སོར་ཐར་པའི་སྡོམ་པ་ལ་གནས་ནས། ཁམས་གསུམ་ལས་ངེས་པར་འབྱུང་བ་ཡིན་ཡང་། དེ་ཁོ་ན་ཉིད་ཀྱི་རྣལ་འབྱོར་དང་བྲལ་བས་རྣལ་འབྱོར་སྤྱི་ལས་གོལ་ལ། རྩོལ་བའི་ནད་ཀྱིས་ཟིན་པས་རྫོགས་པ་ཆེན་པོ་ལས་གོལ་ལོ། །འདི་ཡང་མཐར་སངས་རྒྱས་སུ་འགྱུར་བར་བཤད་པས་ནི་གོལ་ས་ཡིན་ལ། བྱང་ཆུབ་ཆེན་པོར་སེམས་མ་བསྐྱེད་པས་ནི་སྒྲིབ་པ་ཡིན་ནོ། །སྤྱིར་ནི་གོལ་ས་ཐམས་ཅད་ཀྱང་སྒྲིབ་པ་ཡིན་ནོ། །རང་སངས་རྒྱས་ཀྱི་ལྟ་སྒོམ་རྟེན་འབྲེལ་གྱི་ཚུལ་ལ་གནས་ཤིང་། སྡོམ་པའི་གཞི་ཉན་ཐོས་དང་མཐུན་པར་གནས་པས། ཁམས་གསུམ་ལས་འབྱུང་བའང་དེ་འདྲའོ། །མདོ་སྡེ་ཕ་རོལ་ཏུ་ཕྱིན་པའི་ཚུལ་ལ་གནས་པས་བྱང་ཆུབ་ཆེན་པོར་སེམས་བསྐྱེད་ནས་ལྟ་སྒོམ་སྡོམ་པ་དང་བཅས་པ་ཕ་རོལ་དུ་ཕྱིན་པ་དྲུག་དང་བཅུ་ལ་སྤྱོད་དེ། བྱེ་བྲག་ཏུ་ན་ལྟ་བ་བདེན་པ་གཉིས་ཀྱི་ཚུལ་ལ་གནས་ཤིང་། སྡོམ་པའི་གཞི་སོ་སོར་ཐར་པ་ལ་བརྟེན་ནས། ཐུན་མོང་མ་ཡིན་པའི་སྡོམ་པ་ཕམ་པ་བཞི་དང་། ཉེས་བྱས་ཀྱིས་བསྡུས་པའི་བྱང་ཆུབ་ཆེན་པོའི་སྡོམ་པ་ལ་གནས་ནས། དཀོན་མཆོག་དང་སེམས་ཅན་ལ་རྟེན་ནས་བྱང་ཆུབ་ཆེན་པོ་སྒྲུབ་པ་ལ། གཙོ་བོར་སྙིང་རྗེ་ཆེན་པོས་སེམས་ཅན་གྱི་དོན་བྱེད་པའི་སྤྱོད་པ་ཉམས་སུ་བླངས་པའི་སྒོ་ནས་བྱང་ཆུབ་ཆེན་པོ་སྒྲུབ་པའང་། དེ་ཁོ་ན་ཉིད་ཀྱི་རྣལ་འབྱོར་དང་བྲལ་བས་ཡོ་ག་སྤྱི་ལས་གོལ་ལ། རྩོལ་བ་མངོན་དུ་བྱེད་པས་རྫོགས་པ་ཆེན་པོ་ལས་གོལ་ལོ། །གསང་སྔགས་ཀྱི་ཚུལ། སྤྱིར་དཀོན་མཆོག་དང་སེམས་ཅན་ལ་བརྟེན་ནས་བྱང་ཆུབ་བསྒྲུབ་པའང་། གཙོ་བོར་རིག་སྔགས་དང་གསང་སྔགས་མཉེས་པར་བྱ་བ་སྤྱོད་ཅིང་། སེམས་ཅན་གྱི་དོན་ཞར་ལ་སྤྱོད་པ་ཡིན་པ་ལས། དེ་ལ་ཀྲི་ཡའི་ལྟ་སྒོམ་ནི། བྱང་ཆུབ་སེམས་དང་དེ་ཉིད་གསུམ་ལ་གནས་པས། རིག་སྔགས་དང་གསང་སྔགས་ཡོངས་སུ་མཉེས་པར་བྱེད་ཅིང་། སྡོམ་པའི་གཞི་ནི་སོ་སོར་ཐར་པ་དང་། བྱང་ཆུབ་ཆེན་པོའི་གཞི་ལ་བརྟེན་ནས། བསླབ་པའི་གཞི་ལྔ་ལ་གནས་ཏེ། སྤང་བར་བྱ་བའི་རྩ་བའི་ལྟུང་བ་ཆེན་པོ་བཞི་སྤངས་ཏེ། བླང་བར་བྱ་བའི་རྩ་བའི་དམ་ཚིག་བཅུ་གསུམ་དང་། ཡན་ལག་གི་དམ་ཚིག་མང་པོ་ལ་གནས་ནས། བྱང་ཆུབ་ཆེན་པོ་སྒྲུབ་པར་བྱེད་དོ། །དེ་ལ་སྡོམ་པའི་གཞི་འདི་རྣམས་ནི། གསང་སྔགས་ཀྱི་འདུལ་བ་ཡིན་པས། གཞི་ཐམས་ཅད་འདི་ལ་བརྟེན་ཏེ། དེ་ནས་རྣལ་འབྱོར་གྱི་རྒྱུད་རྣམས་སུ་གསུངས་པའི། སྡོམ་པ་ཁྱད་པར་དུ་གསུངས་པ་རྣམས་ཀྱང་སྲུང་བར་བྱེད་ཅིང་། ཐུན་མོང་གི་སྡོམ་པ་རྣམས་ཀྱང་སྲུང་བར་འོས་པ་ནི་སྲུང་། སྡུད་པར་འོས་པ་ནི་སྡུད་པར་བྱེད་པས་གཞི་དེ་ལ་རྟེན་པ་ཡིན་ནོ། །བྱང་ཆུབ་སེམས་དང་དེ་ཉིད་གསུམ་ཡང་། གསང་སྔགས་ཀྱི་ལྟ་སྒོམ་ཐམས་ཅད་ཀྱི་གཞི་ཡིན་ཏེ་ཤེས་བྱ་མ་ལུས་པ་མདོར་བསྡུས་པ་ཡིན་པས། གསང་སྔགས་ཀྱི་རྣལ་འབྱོར་བྱེད་པ་ཀུན་ལ་གཅེས་པའི་ཕྱིར་ཅུང་ཟད་ཙམ་བཤད་དོ། །དེ་ལ་བྱང་ཆུབ་ཀྱི་སེམས་ནི། འདིར་ཤེས་རབ་དང་སྙིང་རྗེས་བསྡུས་པའི་སེམས་བསྐྱེད་པའོ། །དེ་ཉིད་གསུམ་ནི་བདག་གི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་དང་། བཟླས་བརྗོད་ཀྱི་དེ་ཁོ་ན་ཉིད་དོ། །དེ་ལ་བདག་གིས་དེ་ཁོ་ན་ཉིད་ཀྱིས་ནི། འཁོར་བའི་ཆོས་ཀྱི་རང་བཞིན་ཇི་ལྟ་བ་ཡིན་པ་བསྡུས་སོ། །ལྷའི་དེ་ཁོ་ན་ཉིད་ཀྱིས་ནི། མྱ་ངན་ལས་འདས་པའི་ཆོས་ཀྱི་མཚན་ཉིད་ཇི་ལྟ་བ་ཡིན་པ་བསྡུས་སོ། །བཟླས་བརྗོད་ཀྱི་དེ་ཁོ་ན་ཉིད་ཀྱིིས་ནི། དེ་བསྒྲུབ་པའི་ཐབས་ཀྱི་མཚན་ཉིད་བསྡུས་སོ། །དེ་ལ་བདག་ཅེས་བྱ་བ་ནི། ཕུང་པོ་ལྔའི་དོན་བློས་རྣམ་པར་མ་ཕྱེ་བ་ཙམ་མོ། །དེའི་དེ་ཁོ་ན་ཉིད་ནི་སྒོ་གསུམ་གྱི་དབང་གིས་རྣམ་པ་གསུམ་དུ་འགྱུར་རོ། །དེ་ལ་ཉན་ཐོས་དང་སྒོ་བསྟུན་ན། ཕུང་པོ་ལྔའི་ཚོགས་འདི་ནི། མུ་སྟེགས་ཅན་གྱིས་ཀུན་ཏུ་བརྟགས་པའི་བདག་དང་བདག་གི་དང་རྟག་པ་དང་ཆད་པ་ལ་སོགས་པར་ཀུན་བརྟགས་པས་སྟོང་པ། ཕུང་པོ་དང་ཁམས་ཀྱི་སྐྱེ་མཆེད་ཀྱི་མཚན་ཉིད། ཆོས་ཙམ་མེད་པར་སྐུར་པ་གདབ་ཏུ་མི་རུང་བ་འདི་ནི་བདག་གི་དེ་ཁོ་ན་ཉིད་ཡིན་ནོ་ཞེའོ། །རྣལ་འབྱོར་སྤྱོད་པ་དང་སྒོ་བསྟུན་ན། ཕུང་པོ་ལྔའི་ཚོགས་པ་འདིའི་དེ་ཁོ་ན་ཉིད་ནི། བདག་དང་བདག་གིས་སྟོང་པར་མ་ཟད་ཀྱི། ཉན་ཐོས་ཀྱི་གཟུང་བ་དང་འཛིན་པར་ཀུན་ཏུ་བརྟགས་པས་ཀྱང་སྟོང་པ། སེམས་དང་སེམས་ལས་བྱུང་བ་རང་རིག་པ་ཙམ། གང་གི་ཡང་གཟུང་བ་མ་ཡིན་ཞིང་། གང་ལའང་འཛིན་པར་བྱེད་པ་མ་ཡིན་པ་འདི་ནི། དེའི་དེ་ཁོ་ན་ཉིད་ཡིན་ནོ། །དེ་ཡང་གཟུང་འཛིན་གྱི་རྟོག་པས་མ་བསླད་ན་ནི་སངས་རྒྱས་ཉིད་དང་བྱེ་བྲག་མེད་པ་ཡིན་ན། བསླད་པས་ན་བྱེ་བྲག་ཕྱེ་བ་ཡིན་ནོ་ཞེའོ། །དབུ་མ་དང་སྒོ་བསྟུན་ན། ཕུང་པོའི་ཚོགས་འདིའི་དེ་ཁོ་ན་ཉིད་ནི། རྣལ་འབྱོར་སྤྱོད་པ་བས་རྣམ་པར་མི་རྟོག་པའི་ཡེ་ཤེས་དོན་དམ་པར་ཡོད་པར་བརྟགས་པས་ཀྱང་སྟོང་སྟེ། སྤྲོས་པ་ཐམས་ཅད་ཡོངས་སུ་ཞི་བ་འདི་ནི་དེའི་དེ་ཁོ་ན་ཉིད་དོ་ཞེའོ། །དེ་ལྟར་དེ་ཁོ་ན་ཉིད་གསུམ་པོ་གང་ཡང་རུང་བ་ཞིག་ལ། ལྷའི་དེ་ཁོ་ན་ཉིད་ཀྱིས་བསྒོས་ཏེ་དམ་ཚིག་སེམས་དཔའ་བསྒོམས་ནས། ཡེ་ཤེས་སེམས་དཔའ་མདུན་དུ་དམིགས་ཏེ། བཟླས་བརྗོད་དང་ལྡན་པར་བྱས་པས་གྲུབ་པའི་ཁྱད་འགྲུབ་པར་འདོད་དོ། །དེ་ལ་ལྷ་ནི་ཕན་འདོགས་ཤིང་ཁྱད་པར་དུ་འཕགས་པས་ལྷ་ཞེས་བྱ་སྟེ་སངས་རྒྱས་སོ། །དེའི་དེ་ཁོ་ཉིད་ནི་ཆོས་བརྒྱད་ལྷ་དྲུག་ཏུ་བསྡུས་པ་སྟེ། དེ་ལ་ཆོས་བརྒྱད་ནི། ཆོས་ཀྱི་དབྱིངས་རྣམ་པར་དག་པ་དང་། རྣམ་པར་མི་རྟོག་པའི་ཡེ་ཤེས་དང་། དེ་གཉིས་སུ་མེད་པའི་ཏིང་ངེ་འཛིན་དང་། རྣམ་པར་རྟོག་པ་དང་བཅས་པའི་ཡེ་ཤེས་དང་། གཟུགས་ཀྱི་བྱེ་བྲག་ཏུ་སྣང་བ་བཞི་སྟེ་བརྒྱད་དོ། །དེ་ལ་གཟུགས་སུ་སྣང་བའི་བྱེ་བྲག་བཞི་ནི། སྒྲར་སྣང་བ་དང་། མིང་དུ་སྣང་བ་དང་། གཟུགས་སུ་སྣང་དང་། ཕྱག་རྒྱར་སྣང་བའོ། །དེ་ལ་ལྷ་བསྒོས་པ་ནི། ལྷའི་ཆོས་ཉིད་དག་པ་དང་། བདག་གི་ཆོས་ཉིད་མ་དག་པ་གཉིས་ལའང་རང་བཞིན་བྱེ་བྲག་མེད་པར་རྟོགས་ཏེ། དེ་བཞིན་དུ་བསྒོམ་པ་དང་། ལྷའི་ཡེ་ཤེས་རང་རིག་དག་པ་དང་། བདག་གི་ཤེས་པ་རང་རིག་མ་དག་པ་གཉིས་ཀྱང་དེ་བཞིན་དུ་དབྱེར་མེད་ལ། ལྷའི་སྐུ་དང་གསུང་ཁྱད་པར་དུ་འཕགས་པར་སྣང་བ་དང་། བདག་གི་ལུས་ངག་ཁྱད་པར་ཅན་མ་ཡིན་པར་སྣང་བའང་དེ་བཞིན་དུ་ཤེས་ཏེ། དེ་ལ་བརྟེན་ནས་ལྷར་བསྒྱུར་ཞིང་བསྐྱེད་དེ་བསྒོམ་པས། ལྷར་གྲུབ་པས་ལྷས་བསྒོས་པ་ཞེས་འདོགས་སོ། །དོན་འདི་ལྟ་བུ་ལ། ལ་ལ་དག་ན་རེ། ཡི་གེ་དང་ཕྱག་རྒྱ་དང་སྐུ་ལ་སོགས་པ་སྒོམ་པ་ན། འདི་སྐད་དུ། འདི་དག་ནི་གཉེན་པོའི་དོན་ཙམ་དུ་ཀུན་ཏུ་བརྟགས་པ་སྒོམ་པ་ཡིན་ནོ། །ཞེས་སྐུར་པ་འདེབས་པར་བྱེད་པ་ནི། ཤིན་ཏུ་ལྕི་བའི་ལས་བསོགས་པ་ཡིན་ཏེ། བདག་གི་དེ་ཁོ་ན་ཉིད་ངོ་བོ་ཉིད་དུ་གྲུབ་པར་བསམས་ནས། ལྷའི་དེ་ཁོ་ན་ཉིད་ཀུན་ཏུ་བརྟགས་པར་ཡིན་པར་སེམས་པ་འདི་ནི། དཔེར་ན་བླུན་པོ་དག་རྒྱན་འདོགས་པ་ན། ནོར་བུ་འཆིང་བུ་རྒྱན་གྱི་སྙིང་པོར་བྱས་ནས། ནོར་བུ་རིན་པོ་ཆེ་རྒྱན་རྟེན་ཙམ་དུ་བྱེད་པ་དང་འདྲའོ། །ལྷའི་དེ་ཁོ་ན་ཉིད་འདི་ནི། གསང་སྔགས་ཀྱི་ཚུལ་ཀུན་ལས་ཀྱང་འདིར་མ་འདུས་པ་གང་ཡང་མེད་དེ། འདི་ཉིད་ལ་བསྡུ་ལུགས་དང་། སྦྱོར་ལུགས་དང་། ལྟ་ལུགས་མི་འདྲ་བ་ཙམ་དུ་ཟད་དོ། །ཧ་ཅང་སྤྲོས་པས་ཆོག་གོ། །འདི་ལྟ་བུར་སྟོན་པ་འདིའང་ཕྱིའི་ལས་དང་བྱ་བ་གཙོར་བྱེད་པས་རྣལ་འབྱོར་སྤྱི་ལས་གོལ་ལ། རྩོལ་བ་མངོན་དུ་བྱེད་པས་རྫོགས་པ་ཆེན་པོ་ལས་གོལ་ལོ། །ཨུ་པ་ཡའང་བྱ་བ་མི་གཏོང་བས་ཚུལ་དེ་འདྲའོ། །ཡོ་ག་རྣམ་པ་བཞི་ནི་ནང་སེམས་ཀྱི་རྣལ་འབྱོར་གཙོར་བྱེད་པས་སྤྱི་མཐུན་ནོ། །ནང་གི་ཁྱད་པར་ནི། ཡོ་ག་ནི་སྤྱོད་པ་བླང་དོར་དང་ཡང་ལྡན་ལ། བསམ་པ་ལྷ་དང་བདག་གཉིས་སུའང་བྱེད་དོ། །མ་ཧཱ་ཡོ་ག་ནི་དེ་ལས་བཟློག་པའོ། །ཨ་ནུ་ཡོ་ག་ནི་རྗེས་སུ་མཐུན་པའི་རྣལ་འབྱོར་ཞེས་བྱ་སྟེ། དབྱིངས་དང་ཡེ་ཤེས་གཉིས་སུ་མེད་པའི་རིག་པ་སྐད་ཅིག་མ་གཅིག་ལ། ལྟ་སྤྱོད་ཐམས་ཅད་རྫོགས་པར་འདོད་པས། ཨ་ཏི་ཡོ་ག་དང་རྗེས་སུ་མཐུན་ཏེ། ཅུང་ཟད་བརྩའ་བ་དང་བྲལ་བར་ལ་མ་ཟློས་པས་རྗེས་སུ་མཐུན་པའི་རྣལ་འབྱོར་ཞེས་བྱའོ། །གསང་སྔགས་ཀྱི་ནང་གི་བྱེ་བྲག་འདི་དག་ཀྱང་། བདེན་པ་གཉིས་དབྱེར་མེད་པར་འདོད་པའི་དང་པོ་ཀྲི་ཡ་ནས་བརྩམས་ནས། རྫོགས་པ་ཆེན་པོར་མཐར་ཕྱིན་ཏོ། །དེའི་དབང་གིས་བདག་གི་དེ་ཁོ་ན་ཉིད་དང་ལྷའི་དེ་ཁོ་ན་ཉིད་རང་བཞིན་མཉམ་པར་ལྟ་བའི་དང་པོ་ཀྲི་ཡ་ནས་བརྩམས་ནས། རྫོགས་པ་ཆེན་པོར་མཐར་ཕྱིན་ཏོ། །ཇི་ལྟར་མཉམ་པར་ལྟ་བགས་ཆེ་བ་ལྟར། མི་མཉམ་པར་ལྟ་བ་འགྲིབ་པར་འགྱུར་རོ། །མདོར་ན་དངོས་པོར་ལྟ་བའི་ཞེན་པ་ཁད་ཀྱིས་བྲི་བར་ཟད་དོ། །ལྷ་དང་རང་བཞིན་མཉམ་པར་ལྟ་བ་འདི་ལྟ་བུ་ནི། ངེས་པའི་དོན་གྱི་མདོ་སྡེ་ལའང་ཡོད་དེ། འོན་ཀྱང་སྨོས་པ་ཙམ་ལས་ཇི་ལྟར་མཉམ་པར་བསྒྲུབ་པའི་ཐབས་མེད་དོ། །དཔེར་ན་ཉན་ཐོས་ཀྱི་ཚུལ་ལས་ཀྱང་། བྱང་ཆུབ་སེམས་དཔའ་རྣམས་ཀྱི་སྐྱེས་རབས་དང་། དུས་ཡུན་རིང་མོར་སེམས་ཅན་གྱི་དོན་སྤྱོད་པས་བྱང་ཆུབ་བསྒྲུབ་པར་བསྟན་པ་ཙམ་ཡོད་དེ། འོན་ཀྱང་དེར་བྱང་ཆུབ་ཀྱི་སྤྱོད་པ་ཇི་ལྟར་བསྒྲུབ་པའི་ཐབས་མ་བཤད་པ་བཞིན་ནོ། །གོལ་སྒྲིབ་འདི་དག་ཀྱང་རྡོ་རྗེ་སེམས་དཔའ་ནམ་མཁའ་ཆེ་ལ་བརྟེན་ནས་བཤད་པ་ཡིན་ཏེ། སྔོན་གྱི་མཁན་པོ་རྣམས་ཀྱི་ལུང་ཁོང་ཐོན་ལས། མི་ནུབ་རྒྱལ་མཚན་ནམ་མཁའ་ཆེ་ནི་མཁའ་ལ་ཉི་ཤར་བཞིན་ཏེ་གོལ་སྒྲིབ་སོ་སོར་སྟོན། ཞེས་ཀྱང་གྲགས་སོ། །གོལ་སྒྲིབ་དེ་དག་ཀྱང་མཐའ་དེ་ལས་མི་འདའ་བས་ར་བ་ཙམ་དུ་བཤད་པར་ཟད་དེ། བཅར་ཏེ་འབྲུ་འཐུས་སུ་གཟུང་ན། གོལ་ས་ཉི་ཤུ་རྩ་གསུམ། སྒྲིབ་པ་བདུན་ཏེ་སུམ་ཅུའོ། །དེ་ལ་གོལ་ས་ཉི་ཤུ་རྩ་གསུམ་ལ། བཅུ་ཕྲག་དང་པོ་ནི། བྱང་ཆུབ་ཀྱི་སྙིང་པོའི་གོལ་ས་གསུམ། བསམ་གཏན་གྱི་གོལ་ས་གསུམ་སྟེ་དྲུག །ཆོས་ཉིད་ལམ་གྱི་གོལ་ས་བཞི་སྟེ་བཅུའོ། །བཅུ་ཕྲག་གཉིས་པ་ལ། ཡེ་ཤེས་ཆེན་པོ་བདེ་བའི་རྣམ་པ་ལ་ཆགས་པའི་གོལ་ས་གཅིག །རེ་སྨོན་གྱི་མཐའ་ལ་གནས་པའི་གོལ་ས་གཉིས་ཏེ་གསུམ། ལུང་གི་གོལ་ས་གསུམ་སྟེ་དྲུག །རྒྱུའི་གོལ་ས་གཅིག་སྟེ་བདུན། ཏིང་འཛིན་ཐོབ་པ་འབྲས་བུའི་གོལ་ས་གསུམ་སྟེ་བཅུའོ། །ཆོས་ཀྱི་གོལ་ས་གསུམ་ལ། ཆོས་ལས་ཆོས་མི་འབྱུང་བ་དང་། ཆོས་ལ་ཆོས་མི་ལྟོས་པ་དང་། ཆོས་ཀྱིས་ཆོས་མི་རྟོགས་པ་གསུམ་སྟེ། གོལ་ས་ཉི་ཤུ་རྩ་གསུམ་མོ། །སྒྲིབ་པ་བདུན་ལ། སྙིང་པོ་བྱང་ཆུབ་ཀྱི་རང་བཞིན་ལ་བསླད་པས་བསྒྲིབས་པའི་སྒྲིབ་པ་གསུམ། རྣལ་འབྱོར་གྱི་བྱ་བ་དོན་གྱིས་མ་ཟིན་ཏེ་ཉོན་མོངས་པའི་འཆིང་བའི་ནད་ཀྱིས་ཟིན་པའི་སྒྲིབ་པ་གསུམ་སྟེ་དྲུག །ལུང་སྒྲོ་སྐུར་གྱིས་ཟིན་པའི་སྒྲིབ་པ་གཅིག་སྟེ་བདུན་ནོ། །དེ་ལ་བྱང་ཆུབ་ཀྱི་སྙིང་པོའི་གོལ་ས་གསུམ་ལ། དང་པོ་ནི་ཆོས་ཉིད་བྱང་ཆུབ་ཀྱི་སེམས་བྱང་ཆུབ་ཀྱི་སྙིང་པོའི་རང་བཞིན་ནི། སྣང་བའི་མཚན་ཉིད་ཐམས་ཅད་དང་བྲལ་བ་ཡིན་པ་ལ། ཆོས་ཉིད་མངོན་དུ་བྱ་བར་འདོད་ནས་བརྩལ་བས་གོལ་བ་ནི། སྣང་བ་མེད་པའི་ཆོས་ཉིད་ནི། །མ་བརྩལ་བཞག་པས་བསྒོམས་པ་ཡིན། །དེ་དང་དེ་ནི་རྣམ་བཙལ་ན། །དེ་ལས་དེ་བཞིན་དེ་མི་འབྱུང་། །ཞེས་གསུངས་པ་ཡིན་ཏེ། བྱང་ཆུབ་ཀྱི་སྙིང་པོའི་རང་བཞིན་སྣང་བའི་མཚན་ཉིད་དང་བྲལ་བས་ཅིར་ཡང་མ་བརྩལ་ན་བསྒོམ་པ་ཡིན་ཏེ། མངོན་དུ་བྱ་བར་འདོད་ནས་བརྩལ་བས་གོལ་སར་གྱུར་ཏོ། །གཉིས་པ་བྱང་ཆུབ་ཀྱི་སྙིང་པོ་གཞན་གྱི་དབང་གིས་མི་འགྱུར་བ་ལ། འགྲོ་བ་ལས་ཀྱིས་བཀོལ་བར་བརྟགས་པས་གོལ་སར་གྱུར་པ་ནི། ཁྱད་པར་ཅིར་ཡང་མཚུངས་པ་ལས། །ལས་སོ་ཞེས་ནི་རྣམ་པར་བརྟགས། །ཅི་སྟེ་ལས་ཀྱི་དབང་གྱུར་ན། །རང་བྱུང་ཡེ་ཤེས་ཡོད་མ་ཡིན། །ཞེས་གསུངས་པ་སྟེ། མངོན་པར་འདུ་བྱེད་ཀྱི་རྟོག་པ་སྣ་ཚོགས་ཇི་ལྟར་སྣང་ཡང་། བྱང་ཆུབ་ཀྱི་སྙིང་པོའི་རང་བཞིན་དུ་མཚན་ཉིད་དབྱེར་མེད་པར་མཉམ་པ་ཡིན་པ་ལ། འགྲོ་བ་འཁྲུལ་པས་ལས་དགེ་སྡིག་ཏུ་ཀུན་ཏུ་བརྟགས་པར་ཟད་དོ། །ཚུལ་འདི་ལྟ་བུ་ནི་རྣམ་པར་སྣང་མཛད་སྒྱུ་འཕྲུལ་དྲ་བའི་རྒྱུད་ལས་ཀྱང་། སེམས་ཅན་མི་ཤེས་པས་རྨོངས་ནས། །རྣམ་རྟོག་དྲྭ་བས་བླུན་བྱས་གང་། །དེ་དག་གིས་ནི་དགེ་སྡིག་གི། །ཕུང་པོ་གཉིས་སུ་རྣམ་པར་བརྟགས། །ཆོས་འདི་རང་བཞིན་གྱིས་དག་སྟེ། །ནམ་མཁའ་ལྟ་བུར་དྲི་མེད་ལས། །སེམས་ཅན་ཤེས་པ་སྤེལ་བའི་ཕྱིར། །ལས་ཀྱི་ཚུལ་ནི་སྣ་ཚོགས་ཡིན། །ཞེས་གསུངས་པ་དང་ཡང་མཐུན་ནོ། །དེ་ལྟ་ན་མངོན་པར་འདུ་བྱེད་པའི་དུས་ཉིད་ན་རང་འབྱུང་གི་ཡེ་ཤེས་རང་ཤར་བ་ཡིན་ཏེ། གཞན་དུ་ན་དེ་ལྟ་མ་ཡིན་ཏེ། ལས་རྫས་སུ་གྲུབ་པ་ཞིག་ན་རང་བྱུང་གི་ཡེ་ཤེས་གཏན་མ་གྲུབ་པ་འགྱུར་ཏེ། དཔེར་ན་འགལ་མེའི་འཁོར་ལོ་རང་གསལ་བ། གལ་ཏེ་འཁོར་ལོའི་མཚན་ཉིད་རང་གསལ་བར་རྫས་སུ་ན་གྲུབ་པ་ཞིག་ན། འགལ་མེ་རང་བཞིན་གྱིས་འོད་གསལ་བ་གཏན་མ་གྲུབ་པ་བཞིན་ནོ། །གསུམ་པ། བྱང་ཆུབ་ཀྱི་སྙིང་པོ་རྒྱུ་དང་རྐྱེན་གྱིས་མ་བསྐྱེད་པ་ལ། བྱང་ཆུབ་རྒྱུ་རྐྱེན་གྱིས་གྲུབ་པར་འདོད་ནས་བརྩལ་བས་གོལ་སར་གྱུར་པ་ནི། རྒྱུ་ཉིད་རྡོ་རྗེ་རྐྱེན་དང་འདྲ། །མ་སྐྱེས་པས་ན་འཇིག་པ་མེད། །གདོད་ནས་སྙིང་པོ་བྱང་ཆུབ་ལ། །བརྩལ་བའི་བསམ་པས་དབྱིངས་མི་བསྐྱོད། །ཞེས་གསུངས་པ་སྟེ། རྒྱུ་དང་རྐྱེན་དུ་སྣང་བའི་མཚན་ཉིད་རྡོ་རྗེ་ལྟར་དབྱེར་མེད་པའི་མཚན་ཉིད་པས། སྐྱེ་འགག་མེད་པ་ལ་རྒྱུ་རྐྱེན་གྱི་རྩོལ་བས་གཡོ་བའི་གནས་མེད་དོ། །ཞེའོ། །བསམ་གཏན་གྱི་གོལ་ས་གསུམ་ལ། དང་པོ་ནི། ཡོན་ཏན་ཆེན་པོའི་བསམ་གཏན་ནི། །བསམ་གཏན་ཉིད་པས་བསམ་དུ་མེད། །མ་བསམས་མ་བསྐྱངས་ཆོས་བཞིན་དུ། །རྣམ་རྟོག་ཉིད་ལས་ཡེ་ཤེས་སྐྱེ། །ཞེས་གསུངས་པ་སྟེ། མཉམ་པ་ཉིད་ཀྱི་སྙིང་པོ་ལ་བསོད་ནམས་མངོན་པར་འདུ་བྱ་བ་ཐམས་ཅད་ཀྱང་བཀག་པ་མེད་ལ། རྣམ་པར་མ་དག་པའི་ལས་ཀྱང་རང་ཞི་བར་འགྱུར་བ་ནི། ཡོན་ཏན་ཆེན་པོའི་བསམ་གཏན་ཡིན་བཞིན་དུ། དེ་ལྟར་མ་རྟོགས་ཏེ་ཉོན་མོངས་པ་སྦྱང་ཞིང་ཡོན་ཏན་མངོན་པར་བསྒྲུབ་པར་འདོད་པའི་བསམ་གཏན་གྱི་གནས་ལ་གནས་པ་ནི། བླང་དོར་གྱི་ནད་ཀྱིས་ཟིན་ཏེ་འཆིང་བའོ། །བསམ་ཞིང་སྦྱང་བའི་རྩོལ་བ་ལ་མི་ལྟོས་པར་མ་བཅོས་པའི་ངང་ལ་གནས་ན། རྣམ་རྟོག་ཉིད་ཡེ་ཤེས་སུ་འོད་གསལ་བར་འགྱུར་རོ། །ཞེའོ། །གཉིས་པ་ཕྲ་བའི་གོལ་ས་ནི། ཕྲ་བའི་སྒོ་མོར་མིང་བཏགས་ནས། །སེམས་ཀྱི་དབེན་པས་ལམ་ཚོལ་ཞིང་། །དགོན་པའི་རྒྱུད་དུ་དབེན་འཛིན་ཏེ། །བརྟགས་ན་རྣམ་པར་རྟོག་འགྱུར་སྒོམ། །ཞེས་གསུངས་པ་སྟེ། དེ་ལ་ཕྲ་བ་ཞེས་བྱ་བའི་སྒྲ་ནི། དོན་གཉིས་ལ་འཇུག་སྟེ། འདིར་ཡང་དེ་བཞིན་དུ་སྦྱར་ཏེ། དེ་ལ་བསླད་པས་ཕྲ་བ་ནི། ཡུལ་མེད་པ་ལ་ཡུལ་དུ་བཟུང་ནས། སེམས་ཡུལ་ལས་དབེན་པ་ཐར་པའི་ལམ་དུ་མཐོང་བ་དང་། ལུས་འདུ་འཛི་ལས་དབེན་པ་ཐར་པའི་ལམ་དུ་མཐོང་བ་ནི། བློ་ཞིབ་མོས་བརྟགས་ན་རྣམ་རྟོག་ཉིད་སྒོམ་པའོ། །ཞེའོ། །ཕྲ་བ་ཟབ་པའི་སྒྲར་སྦྱར་ན། རྣམ་པར་མི་རྟོག་པའི་སྒོམ་ལུང་ལས། རྣམ་པར་མི་རྟོག་བསྒོམ་པ་ན། །བློ་རྟེན་གང་ལའང་མི་འཆའ། ཡུལ་གང་ལའང་མི་དམིགས། རྣམ་པ་ཅི་ལ་ཡང་མི་རྟོག་པར་སྒོམ་མོ། །ཟེར་བ་ནི། སྐྱོན་གསུམ་དང་བྲལ་བའི་བདག་ཉིད་མངོན་དུ་ཐོབ་པར་འདོད་པས། བླང་དོར་གྱི་ཆ་ཤས་འཕྲ་མོ་ཡོད་པ་ཡིན་ཏེ། འདི་ལྟར་སེམས་དངོས་པོ་དང་མཚན་མ་ལས་དབེན་པ་ལམ་དུ་འདོད་ཅིང་། ལུས་འདུ་འཛི་ལས་དབེན་པ་ཚོལ་བ་འདི་ནི་བློ་ཞིབ་མོས་བརྟགས་ན་རྣམ་པར་རྟོག་པ་ཉིད་སྒོམ་པར་ཟད་དོ། །ཞེའོ། །ཕྱོགས་ཕྱི་མ་འདི་ནི་རྫོགས་པ་ཆེན་པོའི་གོལ་ས་ཡིན་ཡང་། ཐུན་མོང་གི་བླང་བྱར་གཟུང་ངོ་། །གསུམ་པ་རྒྱུ་འབྲས་ཀྱི་གོལ་ས་ནི། རྒྱུ་དང་འབྲས་བུར་མིང་བཏགས་ཤིང་། །དགེ་སྡིག་གཉིས་ག་རྣམ་པར་སེལ། །འཇིག་རྟེན་འདི་ལས་འབྱུང་ངོ་ཞེས། །བླང་དོར་བྲོད་པ་མཆོག་ཏུ་སྐྱེད། །ཅེས་གསུངས་པ་སྟེ། ཆོས་རྒྱུ་འབྲས་དང་། ལས་དགེ་སྡིག་དོན་དམ་པར་ཡོད་པར་མཐོང་བས། འཇིག་རྟེན་འཁོར་བའི་སྡུག་བསྔལ་འདིས་སྐྱོ་སྟེ། སྡུག་བསྔལ་གྱི་འཇིག་རྟེན་འདི་ལས་ཐར་པའི་སྐམ་སར་མངོན་པར་འབྱུང་བར་བྱའོ་སྙམ་དུ་བླང་དོར་གྱི་བྲོད་པ་ལ་གནས་པ་རྣམས་སོ། །འདི་ནི་ཕལ་ཆེར་ཐེག་པ་ཆུང་ངུ་ལ་འཇུག་གོ། །དེ་ལ་དགེ་སྡིག་གཉིའ་ག་རྣམ་པར་སེལ་ཞེས་བྱ་བའི་སྒྲ། རྣམ་པ་གཅིག་ཏུ་དགེ་སྡིག་གཉིའ་ག་འགོག་པ་ལ་བྱ་སྟེ། ཉན་ཐོས་དང་རང་སངས་རྒྱས་རྣམས་ལས་ཀྱི་ཚེ་འགོག་པ་སྒྲུབ་སྟེ། དེ་བས་ན་ཚེ་དགག་པར་བྱ་བའི་ཕྱིར་ལས་འགོག་པ་སྒྲུབ་བོ། །ལས་འགོག་པར་བྱ་བའི་ཕྱིར་ཉོན་མོངས་པ་འགོག་པ་སྒྲུབ་བོ། །ཉོན་མོངས་པ་འགགས་ན་སྡུག་བསྔལ་གྱི་ཕུང་པོ་འབའ་ཞིག་པའི་འཇིག་རྟེན་འདི་ལས། མྱ་ངན་ལས་འདས་པའི་སྐམ་སར་མངོན་པར་འབྱུང་ངོ་། །ཞེས་བླང་དོར་གྱི་བྲོད་པ་མཆོག་ཏུ་སྐྱེད་པ་རྣམས་སོ། །ཆོས་ཉིད་ལམ་གྱི་གོལ་ས་བཞི་ལ། དང་པོ་ལམ་དབུ་མ་ཚོལ་བ་གཉིས་སུ་མེད་པའི་ལམ་ལ་གོལ་བ་ནི། ཆགས་དང་མ་ཆགས་ཚིག་གི་ལམ། །དབུ་མ་བཞིན་ཏེ་བྲག་ཆ་འདྲ། །བདེ་དང་སྡུག་བསྔལ་རྒྱུ་མཐུན་ཞེས། །འགྲོ་བའི་མགོན་པོ་སེམས་དཔས་གསུངས། །ཞེས་གསུངས་པ་སྟེ། དེ་ལ་ཆགས་པ་ནི་འདོད་པ་ལ་གནས་པ་སྟེ་འཇིག་རྟེན་པའོ། །མ་ཆགས་པ་ནི་དེ་ལས་གྲོལ་བ་སྟེ་མྱ་ངན་ལས་འདས་པའོ། །དེ་གཉིས་ནི་ཚིག་གི་ལམ་མོ། །ཞེས་བསྟན་པ་སྟེ། ཚིག་གི་ལམ་ནི་ཚིག་གི་དོན་ཏོ། །ཚིག་གི་དོན་ནི་ཐ་སྙད་ཀྱི་ཡུལ་ལོ། །ཐ་སྙད་ཀྱི་ཡུལ་ནི་བདག་ཉིད་ཐོབ་པ་མེད་པའོ། །དེ་ལྟར་འཁོར་བ་དང་མྱ་ངན་ལས་འདས་པའི་མཐའ་རྣམ་པ་གཉིས་བདག་ཉིད་ཐོབ་པ་མེད་ན། དབུ་མའང་དེ་དང་འདྲ་བས་དབུ་མ་བཞིན་ཏེ། ཞེས་བྱ་བ་སྨོས་སོ། །ཐམས་ཅད་ཀྱང་ཚིག་གི་ལམ་སྟེ་དོན་དུ་བྱ་བ་མེད་པས་བྲག་ཆ་འདྲ། ཞེས་གསུངས་པ་ཡིན་ནོ། །དེ་བས་ན་ཆགས་པའི་སྡུག་བསྔལ་དང་མ་ཆགས་པའི་བདེ་བ་གཉིས་རྒྱུའམ་རང་བཞིན་དབྱེར་མེད་པར། ཀུན་གྱི་བླ་མར་གྱུར་པ་དཔལ་ལྡན་རྡོ་རྗེ་སེམས་དཔས་གསུངས་སོ། །ཞེའོ། །གཉིས་པ་དབང་པོ་དྲུག་གི་སྤྱོད་ཡུལ་མཚན་མའི་སྐྱོན་དུ་བལྟས་ནས། ཆོས་ཉིད་ཞི་བ་མཚན་མ་མེད་པ་གཞན་དུ་ཚོལ་བར་བྱེད་པ་ན་ལམ་གྱི་རང་གི་ངོ་བོ་ལས་གོལ་བར་གྱུར་པ་ནི། ཨེ་མའོ་སངས་རྒྱས་སྤྱོད་ཡུལ་འདི། བཙལ་བས་རྙེད་པའི་གནས་མེད་དེ། །དྲུག་གི་ཆོས་བཞིན་ཡུལ་མེད་པས། །མདོངས་པས་ནམ་མཁའ་བརྙབས་པ་བཞིན། །ཞེས་གསུངས་པ་སྟེ། དེ་བཞིན་གཤེགས་པའི་སྤྱོད་ཡུལ་ནི་སེམས་ཅན་གྱི་དབང་པོ་དྲུག་གི་སྤྱོད་ཡུལ་ལས་གཞན་དུ་བཙལ་དུ་མེད་དེ། དབང་པོ་དྲུག་གི་སྤྱོད་ཡུལ་འདི་ཉིད་རང་གི་ངོ་བོ་ཇི་ལྟར་གནས་པ་གང་ཡིན་པ་དེ་ཉིད་སངས་རྒྱས་ཀྱི་སྤྱོད་ཡུལ་ཡང་ཡིན་ཏེ། དེ་ལྟ་བུའི་མཚན་ཉིད་ལ། གང་གིས་འདི་ལྟར་མཚན་མའི་སྤྱོད་ཡུལ་འདི་དག་ནི། སེམས་ཅན་གྱི་སྤྱོད་ཡུལ་ཕྱིན་ཅི་ལོག་ཡིན་པས་བསྒོམ་པར་བྱ་བའི་དོན་མ་ཡིན་ལ། བསྒོམ་པའི་དོན་ནི་དེ་བཞིན་གཤེགས་པའི་སྤྱོད་ཡུལ་ཆོས་ཉིད་མཚན་མ་ཞི་བ་ཡིན་པས། དེ་བསྒོམ་པར་བྱའོ་སྙམ་དུ་སེམས་ན། མདོངས་པས་ནམ་མཁའ་བསྙབས་པ་དང་འདྲ་སྟེ་ལམ་གྱི་རང་གི་ངོ་བོ་ལས་གོལ་ལོ། །དེ་ནི་དཔེར་ན་ནམ་མཁའ་མཐའ་ཡས་སྐྱེ་མཆེད་བསྒོམ་པས་གཟུགས་ཟིལ་གྱིས་མནན་ཏེ། གཟུགས་ཀྱི་འདུ་ཤེས་ལས་འདས་ཤིང་ཐོགས་པའི་འདུ་ཤེས་ནུབ་པར་གྱུར་ཀྱང་། གཟུགས་ཀྱི་བཅིངས་པ་ལས་མི་གྲོལ་ཏེ། གཟུགས་ཀྱི་བག་ལ་ཉལ་མི་སྤོངས་པ་བཞིན་ནོ། །གལ་ཏེ་གང་ཞིག་གིས་གཟུགས་ཀྱི་ངོ་བོ་ཉིད་ནམ་མཁའི་ངོ་བོ་ཉིད་དང་དབྱེར་མེད་པར་རྟོགས་ནས། ཏིང་ངེ་འཛིན་དེ་ལྟ་བུ་ཐོབ་ན་ནི། གཟུགས་ཀྱི་བཅིངས་པ་ལས་གྲོལ་བར་ཡང་འགྱུར་རོ། །དེ་བཞིན་དུ་གང་ཞིག་གིས་མཚན་མར་སྣང་བ་སྐྱོན་དུ་བལྟས་ནས། མཚན་མ་མེད་པ་ཞི་བ་བསྒོམ་ན་ནི་མཚན་མ་ཟིལ་གྱིས་གནོན་པར་འགྱུར་གྱི། མཚན་མའི་བཅིངས་པ་ལས་གྲོལ་བར་མི་འགྱུར་རོ། །གང་གི་ཚེ་གང་ཞིག་གིས་མཚན་མར་སྣང་བ་རྣམས་ཀྱི་ངོ་བོ་ཉིད་མཚན་མ་དང་བྲལ་བ་ཡིན་པར་རྟོགས་ནས། མཚན་མ་ལ་སྐྱོན་དུ་མ་བལྟས་ཤིང་མཚན་མ་མ་བོར་བར་མཚན་མའི་རང་བཞིན་ཡོངས་སུ་ཤེས་པར་བྱ་བ་གོམས་པར་བྱས་པས། མཚན་མ་མེད་པའི་ཏིང་ངེ་འཛིན་ན། མཚན་མའི་བཅིངས་པ་ལས་གྲོལ་བར་ཡང་འགྱུར་རོ། །གསུམ་པ་ལམ་གྱི་རིམ་པ་ལ་བགྲོད་པར་འདོད་པས། བགྲོད་དུ་མེད་པའི་ལམ་ལས་གོལ་བར་གྱུར་པ་ནི། གོང་ནས་གོང་དུ་ཚངས་པའི་ལམ། །བྱ་བྲལ་ཆོས་དང་མཐུན་པ་མིན། །ཅི་སྟེ་ལམ་ལ་བགྲོད་འགྱུར་ན། །ནམ་མཁའི་མཐའ་བཞིན་ཐོབ་པ་མེད། །ཅེས་གསུངས་པ་སྟེ། ཆོས་ཇི་བཞིན་པ་ནི་ཆོས་རྣམས་ཀྱི་ངོ་བོ་ཉིད་ཡིན་པ་ལ། ལམ་དང་སའི་རིམ་པས་བགྲོད་དུ་མེད་དེ། གལ་ཏེ་སའི་རིམ་པ་བཞིན་དུ་དག་པ་དང་ཚངས་པ་དང་གྲོལ་བ་རིམ་པས་བསྒྲུབ་ཏུ་ཡོད་ན། ཆོས་རྣམས་ཀྱི་ཆོས་ཉིད་གཏན་མེད་པར་འགྱུར་བས། གལ་ཏེ་གཞན་དང་གཞན་ཐོབ་པར་བྱ་བ་ཡོད་ན། དེ་མཐར་ཐུག་པའང་རྙེད་པར་མི་འགྱུར་རོ། །ཞེའོ། །བཞི་པ་སྙིང་པོ་བྱང་ཆུབ་ཀྱི་རང་བཞིན་ཕྱོགས་དང་རིས་མེད་པ་ལ། ལམ་ལ་ཕྱོགས་ཆར་བཟུང་བས་མཉམ་པ་ཉིད་ཀྱི་ལམ་ལས་གོལ་བར་གྱུར་པ་ནི། དེ་དང་འདྲ་བ་ཡོངས་ཀྱི་ལམ། །ཟླ་བ་ལས་བྱུང་རྟེན་དང་བཅས། །ཀུན་གྱི་མཉམ་ཉིད་ཡིན་པ་ལ། །ཕྱོགས་སུ་བལྟས་པས་གྲུབ་པ་མེད། །ཅེས་གསུངས་པ་སྟེ། དེ་ནི་དེ་བཞིན་ཉིད་དེ་སྙིང་པོ་བྱང་ཆུབ་ཀྱི་རང་བཞིན་ནོ། །དེ་དང་འདྲ་བ་ནི་སྙིང་པོ་བྱང་ཆུབ་ལ་ཆ་ཤས་མེད་དེ། སེམས་ཅན་དང་སངས་རྒྱས་ལམ་ཐུན་མོང་ཡིན་པས་ཡོངས་ཀྱི་ལམ་ཞེས་བྱ་སྟེ། ལམ་ཞེས་བྱ་བ་དང་ས་ཞེས་བྱ་བ་དོན་འདྲ་སྟེ། སྡུད་པ་ཚིགས་སུ་བཅད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། ཞེས་གསུངས་པ་ལྟ་བུ་སྟེ། འདི་ནས་གཞན་དུ་བགྲོད་པ་ལ་མི་བྱའི། དེའི་རང་བཞིན་དུ་གནས་པ་ཙམ་ལ་བྱའོ། །དེ་ནི་དཔེ་ཆུ་ཟླ་དང་འདྲ་བས། ཟླ་བ་ལས་བྱུང་རྟེན་དང་བཅས། །ཞེས་སྨོས་ཏེ། འདི་ལྟར་རྟེན་ཆུས་གར་ཁྱབ་པ་དེ་ཙམ་དུ་ཆུ་ཟླས་ཁྱབ་སྟེ། ཁྱབ་མ་ཁྱབ་ཀྱི་ཕྱོགས་ཆ་མེད་བཞིན་དུ། མི་རྣམས་འདི་སྐད་དུ། རང་རང་གང་ན་གནས་པའི་ས་ཕྱོགས་དེ་ནས་བལྟས་པ་ན། ཆུ་ཟླ་ཕྱོགས་ཆ་རེ་རེ་ན་གནས་པར་མཐོང་སྟེ། དེའི་དབང་གིས་འདི་སྐད་དུ། ཆུ་ཟླ་འདི་ན་སྣང་ངོ་། །ཕ་ཀི་ན་སྣང་ངོ་། །སྙམ་དུ་སེམས་སོ། །དེ་བཞིན་དུ་སྙིང་པོ་བྱང་ཆུབ་ཀྱི་རང་བཞིན་ལ། ཕྱོགས་དང་ཆ་ཤས་མེད་དེ། ཆོས་ཐམས་ཅད་ཀྱི་རང་བཞིན་ཡིན་པ་ལས། གང་ཟག་རྣམས་ལམ་ལ་ཕྱོགས་ཆར་འཛིན་པས་མཉམ་པ་ཉིད་ལས་གོལ་ལོ། །བཅུ་ཕྲག་དང་པོའོ།། །།བཅུ་ཕྲག་གཉིས་པ་ལ། ཡེ་ཤེས་ཆེན་པོའི་བདེ་བའི་རྣམ་པ་ལ་ཆགས་པའི་གོལ་ས་ནི། ད་ལྟའི་བདེ་དང་ཕྱི་མའི་བདེ། །མངོན་སུམ་པ་དང་རྒྱབ་ལས་བྱུང་། །དེའང་རྣམ་པའི་སྐྱོན་ཡིན་པས། །དེ་ལ་རྟེན་པར་མི་བྱའོ། །ཞེས་གསུངས་པ་སྟེ། དེ་ལ་ད་ལྟའི་བདེ་བ་མངོན་སུམ་པ་ནི་རྣམ་པར་མི་རྟོག་པའི་ཡེ་ཤེས་སོ། །ཕྱི་མའི་བདེ་བ་རྒྱབ་ལས་བྱུང་བ་ནི་དག་པ་འཇིག་རྟེན་པའི་ཡེ་ཤེས་སོ། །ཡེ་ཤེས་ཆེན་པོ་འདི་གཉིས་སངས་རྒྱས་ཀྱི་ལམ་དུ་མཐོང་སྟེ་བླང་བར་བྱ་བར་མཐོང་ལ། མི་མཐུན་པ་སྤང་བར་བྱ་བར་མཐོང་ནའང་། རྣམ་པའི་འཆིང་བས་ཟིན་པ་ཡིན་པས། དེ་ལའང་བློའི་རྟེན་མི་བཅའོ། །ཞེས་བྱ་བའི་དོན་ཏོ། །རེ་སྨོན་གྱི་མཐའ་ལ་གནས་པའི་གོལ་ས་གཉིས་ལ། དང་པོ་འཇིག་རྟེན་མངོན་པར་མཐོ་བ་ལ་སྨོན་པ་འཇོག་པའི་གོལ་ས་ནི། སྲིད་པ་གསུམ་ན་སྦྱོར་བའང་། །མིང་ཙམ་སྒྱུ་མར་སྣང་བ་སྟེ། །འཁོར་ལོས་སྒྱུར་བའི་གནས་ཆེན་ཡང་། །སྒྱུ་མས་སྦྱོང་བའི་བསྟི་གནས་ཡིན། །ཞེས་གསུངས་པ་སྟེ། སྲིད་པ་གསུམ་ནི་ཁམས་གསུམ་མོ། །དེ་ན་སྦྱོར་བའི་མངོན་པར་མཐོ་བ་ཇི་སྙེད་པ་ཐམས་ཅད་ཀྱང་། མིང་ཙམ་སྒྱུ་མར་སྣང་བ་ཡིན་པས་རེ་སྨོན་གྱི་གནས་སུ་མི་རུང་ངོ་། །མིའི་འཇིག་རྟེན་འདི་ན་མངོན་པར་མཐོ་བར་གྲུབ་པའི་འཁོར་ལོའི་སྒྱུར་བའི་རྒྱལ་པོའི་གནས་ཐོབ་པའང་། མིའི་འཇིག་རྟེན་སྒྱུ་མ་ཙམ་སྦྱོང་ཞིང་འདུལ་བར་བྱེད་པའི་བསྟི་གནས་ཙམ་ཡིན་པས། རེ་སྨོན་གྱི་གནས་མ་ཡིན་ནོ། །ཞེའོ། །གཉིས་པ་འབྲས་བུ་དུས་ཕྱིས་འབྱུང་བའི་རེ་སྨོན་འཇོག་པའི་གོལ་ས་ནི། རྣམ་སྤྱོད་དུས་ལ་ལྟོས་པ་རྣམས། དུས་དེར་འབྱུང་བར་མི་འགྱུར་ཏེ། །མ་བྲལ་སྨོན་པ་སྤྱོད་པས་ན། །སྟོང་པའི་མཚན་ཉིད་གསུངས་པ་བཞིན། །ཞེས་གསུངས་པ་སྟེ། མཚན་མའི་རྣམ་པ་ལ་ཞེན་པ་རྣམས། རྒྱུ་ལས་འབྲས་བུ་དུས་ཕྱིས་འབྱུང་བར་སྣང་བ་དེ་བཞིན་དུ་བདེན་པར་ཞེན་ནས། འབྲས་བུ་དུས་གཞན་དུ་འབྱུང་བའི་རེ་སྨོན་འཇོག་པ་ནི། དེ་བཞིན་དུ་འབྱུང་བར་མི་འགྱུར་ཏེ། དཔེར་ན་བཅོམ་ལྡན་འདས་ཀྱིས་གདུལ་བྱའི་དབང་གི་ཕྱིར་སྟོང་པ་ཉིད་ཡོད་དོ། །ཞེས་གསུངས་པ་ལས། དེའི་དབང་གིས་གང་ཟག་དེ་སངས་རྒྱས་ཀྱི་བཀའ་ལ་དད་པར་གྱུར་ཏེ་ཞུགས་ནས། དེ་ནས་སྟོང་པའི་དངོས་པོ་བཙལ་བ་ན་མ་རྙེད་པ་བཞིན་ནོ། །འདི་ནི་སྙིང་པོ་བྱང་ཆུབ་ཀྱི་རང་བཞིན་ལ་དུས་སྔ་ཕྱི་མེད་བཞིན་དུ། དུས་ཀྱི་མཐའ་ལ་རེ་སྨོན་འཇོག་པས་གོལ་བ་ཡིན་ནོ། །ལུང་གི་གོལ་ས་གསུམ་ལ། དང་པོ་ལུང་སྒྲོ་འདོགས་ཀྱིས་ཟིན་པའི་གོལ་ས་ནི། གཅིག་སྟེ་རྣམ་པ་ཡོངས་ཀྱིས་མེད། །རྣལ་འབྱོར་ནམ་མཁའི་བྱ་ལམ་གནས། །མ་བྱུང་མ་སྐྱེས་སྙིང་པོ་ལ། །སྒྲོས་བརྟགས་ཆོས་ཀུན་ག་ལ་ཡོད། །ཅེས་གསུངས་པ་སྟེ། དེ་ལུང་ཞེས་བྱ་བ་ནི། བཀའི་མཚན་ཉིད་དེ་རྟེན་པར་འོས་པའོ། །དེ་ཡང་ངེས་པའི་ལུང་དང་ཐ་མལ་པའོ། །དེ་ལ་ངེས་པའི་ལུང་ནི་ཐོག་ཏུ་ཕབ་པ་སྟེ། སྒྲོ་འདོགས་དང་བྲལ་བ་ཡིན་ན། ལུང་གི་རང་བཞིན་ནི་སྙིང་པོ་བྱང་ཆུབ་ཀྱི་དོན་ཉིད་ཡིན་ལ། དེ་ནི་མངོན་དུ་བྱ་བའི་ཆོས་དང་བྲལ་བས་གང་གིས་ཀྱང་བསྟན་པར་མི་ནུས་ལ། དེ་བས་ན་དེ་མཚོན་པའི་ལུང་གི་ཚིག་རྣམས་ཀྱང་སྒྲོ་འདོགས་ཡིན་ཏེ། ལུང་གི་རང་བཞིན་ལས་གོལ་ལོ། །ཞེའོ། །གཉིས་པ་ནི་ཏིང་ངེ་འཛིན་གྱི་གོལ་ས་སྟེ། ནང་མ་དག་པ་ལ་ཕྱི་རོལ་རྩོལ་བའི་ནད་ཀྱིས་ཟིན་པས། མཉམ་པ་ཉིད་ཀྱི་ཏིང་ངེ་འཛིན་ལས་གོལ་བར་གྱུར་པ་ནི། ཕྱི་ནང་གཉིས་ག་ཕྱི་ཉིད་ནང་། །ཟབ་མོའི་ཆ་ཤས་རྟོགས་ཡུལ་མེད། །སྲིད་པ་མིང་ཙམ་ལོག་པའི་སྟོབས། །དེ་བས་ཏིང་འཛིན་མཉམ་དང་བྲལ། །ཞེས་གསུངས་པ་སྟེ། དེ་ལ་ཕྱི་ནི་སེམས་ཀྱི་བདེ་བ་ཐོབ་པར་འདོད་པའི་རྩོལ་སེམས་སོ། །ནང་ནི་བདེ་བ་ཐོབ་པའོ། །ཕྱི་ཉིད་ནང་ཞེས་བྱ་བ་ནི། ཕྱི་ནང་བཟློག་པར་བསྟན་པ་སྟེ། རྩོལ་བ་ངང་གིས་ཞི་བ་ནི་ནང་དུ་འགྱུར་རོ། །བདེ་བ་ཆགས་པའི་འཆིང་བས་ཟིན་པ་ནི་ཕྱིར་འགྱུར་རོ། །དེས་ཟབ་མོའི་དོན་མི་རྟོགས་ཏེ། སྲིད་པའི་འཆིང་བའི་དབང་དུ་འགྱུར་བས། ཟབ་མོའི་ཆ་ཤས་རྟོགས་ཡུལ་མེད། །སྲིད་པ་མིང་ཙམ་ལོག་པའི་སྟོབས། །ཞེས་བྱའོ། །དེ་བས་ན་མཉམ་པ་ཉིད་ཀྱི་ཏིང་ངེ་འཛིན་ལས་གོལ་བར་གྱུར་པས། དེ་བས་ཏིང་འཛིན་མཉམ་དང་བྲལ། །ཞེས་གསུངས་པ་ཡིན་ནོ། །གསུམ་པ་ནི་དམ་ཚིག་གི་གོལ་ས་སྟེ། དེ་ཡང་མཉམ་པ་ཉིད་ཀྱི་སྙིང་པོ་ལ་དམ་ཚིག་ཕྱི་ནང་དུ་དབྱེ་བ་མེད་དེ། ཇི་ལྟར་འགྲོ་བ་རྣམས་ཕུང་པོ་དང་ཁམས་ཀྱི་རང་བཞིན་ཡིན་པའི་ཕྱིར། མཚན་ཉིད་དེ་ལས་འདའ་བའི་ཐབས་མེད་པ་བཞིན། ཕུང་པོ་དང་ཁམས་ཀྱི་རང་བཞིན་ཉིད་སངས་རྒྱས་ཀྱི་ཆེ་བ་ཡིན་པས་དེ་ལས་འདའ་བའི་ཐབས་མེད་པའི་ཕྱིར། བསྲུང་བ་དང་མི་བསྲུང་བ་མེད་བཞིན་དུ། དམ་ཚིག་ཕྱི་ནང་དུ་བསྟན་པས་གོལ་ལོ། །ཞེས་བསྟན་པའི་ཕྱིར། དེ་ལ་ཐ་ཚིག་ཕྱི་དང་ནང་། །རང་བཞིན་ཕུང་པོ་ཁམས་བཞིན་གནས། །དུས་གསུམ་དེ་དང་མི་འབྲལ་བས། །ཐ་ཚིག་མིང་དུ་བཏགས་པ་མེད། །ཅེས་གསུངས་པ་ཡིན་ནོ། །དེ་ལ་རྒྱུའི་གོལ་ས་ནི། འདི་ལ་བརྟུལ་ཞུགས་དྲག་ཤུལ་གྱིས། །གནས་སུ་བྱ་བའི་གཞི་མེད་དེ། །ཨ་དང་བར་ནི་རྣམ་ལྡན་ན། །སྒྱུ་མའི་བདེ་བ་འབྱུང་བར་འདོད། །ཅེས་གསུངས་པ་སྟེ། སྙིང་པོ་བྱང་ཆུབ་ཀྱི་རང་བཞིན་གནས་སུ་བྱ་བ་དང་བྲལ་བ་ལ། ཕྱི་རོལ་གྱི་དཀའ་ཐུབ་དང་བརྟུལ་ཞུགས་ཀྱིས་ནན་དང་ཚན་གྱིས་བསྒྲུབ་པར་བྱ་བའི་གནས་གཞི་མེད་དེ། འོན་ཀྱང་མ་སྐྱེས་པའི་དོན་ལ་མ་ཆགས་པའི་བློ་དང་ལྡན་ན། སྒྱུ་མ་ཙམ་དུ་ཡོན་ཏན་སྣང་ངོ་། །ཞེས་བྱ་བའི་དོན་ཏོ། །ཏིང་འཛིན་ཐོབ་པ་འབྲས་བུའི་གོལ་ས་གསུམ་ལ། དང་པོ་བདེ་བ་ཐོབ་པར་འདོད་ནས་རྩོལ་བའི་གོལ་ས་ནི། རང་བཞིན་གཅིག་ཏུ་མ་ངེས་པས། །ཇི་ལྟར་བལྟས་པ་དེར་སྣང་སྟེ། །སྣང་འདོད་རྩོལ་སེམས་བདེ་བ་ཡང་། །དེ་ནི་སྒྲིབ་སྐྱོན་ཆེན་པོ་ཡིན། །ཞེས་གསུངས་པ་སྟེ། ཆོས་རྣམས་ཀྱི་རང་བཞིན་ཇི་ལྟ་བུའི་ངོ་བོ་ཡང་མ་ཡིན་པའི་ཕྱིར། བློས་ཇི་ལྟར་བལྟས་པ་བཞིན་སྣང་བ་ལ། ཡང་དག་པའི་ངོ་བོ་ཞིག་སྣང་བའི་བདེ་བ་ཐོབ་ཏུ་རེ་ནས་རྩོལ་བས་གོལ་ལོ། །གཉིས་པ་བྱང་ཆུབ་ཀྱི་ཡན་ལག་གི་མཚན་མ་ཕྲ་མོའི་གོལ་ས་ནི། བྱང་ཆུབ་ཡན་ལག་ཀུན་གྱི་སྒོ། །ཆ་ལུགས་བསྒོམས་པས་ཆུ་ཟླ་བཞིན། །མ་ཆགས་མ་གོས་བྱུང་གྱུར་ཀྱང་། །བསྒོམས་པས་བྱིས་པའི་སྤྱོད་ཡུལ་བཞིན། །ཞེས་གསུངས་པ་སྟེ། བྱང་ཆུབ་ཀྱི་ཡན་ལག་གི་སྒོར་གྱུར་པ་མཚན་མ་ལྷའི་ཆ་ལུགས། ཆ་ཤས་ཡོངས་སུ་རྫོགས་པའམ་མ་རྫོགས་པས་བསྡུས་པ་གང་ཡང་རུང་བ་མངོན་དུ་གྱུར་ཏེ། སྒྲིབ་པའི་དྲི་མས་མ་གོས་པ་གསལ་བར་གྱུར་ཀྱང་། མཚན་མར་སྣང་བ་ཞིག་གསལ་བར་ཟད་པས། བྱིས་པའི་སྤྱོད་ཡུལ་བཞིན་ནོ། །གསུམ་པ་མཚན་མ་རགས་པའི་གོལ་ས་ནི། དཀྱིལ་འཁོར་ཁྲོ་གཉེར་ཆ་ལུགས་ཀྱིས། །ཁྲོ་བདག་ཆེན་པོའི་ལུས་བཟུང་ནས། །ཡི་གེ་མངོན་དུ་གྱུར་ནའང་། །ཞི་བ་དེ་ཉིད་མཐོང་བ་མིན། །ཞེས་གསུངས་པ་སྟེ། འདིའི་དོན་ཡང་སྔ་མ་བཞིན་ནོ། །ཡི་གེ་ཞེས་བྱ་བའི་སྒྲ་ནི། གནས་སྐབས་ཀྱིས་ཆོས་ཉིད་དང་། ཡེ་ཤེས་དང་། མིང་དང་། གཟུགས་དག་ལ་འཇུག་ན། འདིར་ལྷའི་སྐུ་ཉིད་ལ་བྱའོ། །བཅུ་ཕྲག་གཉིས་པ་སྟེ་སྤྱིར་ཉི་ཤུའོ།། །།ཆོས་ཀྱི་གོལ་ས་གསུམ་ལ། དང་པོ་ཆོས་ལས་ཆོས་མི་འབྱུང་བ་ནི། རྣམ་གྲངས་བརྒྱ་སྟོང་ཕྲག་ཡས་པ། །གང་ལྟར་བསྐྱེད་ཀྱང་མེ་ཏོག་སྐྱེ། །མཚན་མ་མེད་པའི་དབང་གིས་ན། །བསྟི་གནས་དེ་ལས་འབྱུང་མི་འགྱུར། །ཞེས་གསུངས་པ་སྟེ། ཆོས་ཀྱི་སྒོ་མོ་དཔག་ཏུ་མེད་པ་གསུངས་པའང་། ཐམས་ཅད་ཀྱང་སེམས་ཅན་གྱི་དོན་དུ་འགྱུར་ཏེ། ཆེ་བའི་ཡོན་ཏན་སྐྱེད་པ་ཡིན་མོད་ཀྱི། ཆོས་ཉིད་ལ་མཚན་མ་མེད་པས། རྣམ་གྲངས་ཀྱི་ཆོས་ལས་སྙིང་པོའི་ཆོས་འབྱུང་བར་མི་འགྱུར་རོ། །གཉིས་པ་ཆོས་ལ་ཆོས་མི་ལྟོས་པ་ནི། ལྷག་མ་མེད་པར་ཡོངས་སུ་རྫོགས། །འགྱུར་བ་མ་ཡིན་དྲང་པོར་གནས། །ནམ་མཁའ་བཞིན་དུ་མཐའ་མཉམ་ཞིང་། །གཞན་ལ་ལྟོས་འགྱུར་ཆོས་མ་ཡིན། །ཞེས་གསུངས་པ་སྟེ། ཆོས་ཞེས་བྱ་བ་ནི་རང་རང་གི་ཆོས་སམ་མཚན་ཉིད་ཡིན་ཏེ། གཞན་ལ་ལྟོས་ན་རང་གི་ཆོས་སུ་མི་འགྱུར་རོ། །དཔེར་ན་དངོས་པོའི་ཆོས་སྒྲུབ་པ་ནའང་། མེ་ཤེལ་གྱི་འོད་ཚ་བ་ཉི་མ་ལ་ལྟོས་མི་དགོས་པ་ཞིག་ན། མེ་ཤེལ་ཚ་བའི་མཚན་ཉིད་དུ་མ་གྲུབ་པ་ཞིག་ན། ལྟོས་པའི་ཕྱིར་མི་གྲུབ་བོ། །མེ་ནི་གཞན་ལ་ལྟོས་མི་དགོས་པར་ཚ་བས། མེ་ཚ་བའི་ཆོས་སུ་གྲུབ་བོ། །དངོས་པོ་མེད་པའི་ཆོས་སྒྲུབ་པ་ན། དཔེར་ན་སྨིགས་སྒྱུའི་ཆོས་ཆུ་ཡིས་སྟོང་པ་དང་སྔོ་བ་དང་གཡོ་བས་སྟོང་པ་ཡིན་པར་གྲུབ་པ་ན། ཐ་སྙད་ཀྱི་བློ་སྨིགས་རྒྱུ་ལ་རྟེན་ནས་འཇུག་པར་བྱེད་མོད་ཀྱི། སྟོང་པ་ཉིད་ཀྱི་ཆོས་ནི་སྨིགས་རྒྱུ་ལ་ལྟོས་པ་མེད་དེ། ཉི་མ་ཤར་ཏེ་སྨིགས་རྒྱུ་ཡོད་ཀྱང་རུང་། ཉི་མ་ནུབ་སྟེ་སྨིགས་རྒྱུ་འགགས་ཀྱང་རུང་། སྟོང་པ་ཉིད་ལ་རང་བཞིན་བྱེ་བྲག་ཏུ་གྱུར་པ་མེད་དོ། །དེ་བཞིན་དུ་ཆོས་ཅན་མཚན་མར་སྣང་བ་ལ་རྟེན་ནས་ཐ་སྙད་ཀྱི་བློ་འཇུག་པར་ཟད་དེ། ངོ་བོ་ཉིད་ཀྱིས་དག་པའི་ཆོས་གཞན་གང་ལའང་ལྟོས་པ་མེད་དོ། །གསུམ་པ་ཆོས་ཀྱིས་ཆོས་མི་རྟོགས་པ་ནི། ལྷུན་གྱིས་གནས་པའི་བདེ་ཆེན་དེ། །མཚུངས་པ་མེད་པའི་ཡེ་ཤེས་ཀྱིས། །རང་གི་མཐུ་ཡིས་རིག་པ་ལས། །ཆོས་ནི་གཞན་ནས་འབྱུང་མི་འགྱུར། །ཞེས་གསུངས་པ་སྟེ། ཆོས་ཉིད་སྙིང་པོ་བྱང་ཆུབ་ཀྱི་རང་བཞིན་བྱང་ཆུབ་ཀྱི་སེམས་བདེ་བ་ཆེན་པོ་དེ་ནི། ངོ་བོ་ཉིད་ཀྱི་དྲི་མས་མ་སླད། རང་འོད་གསལ་ཞིང་རང་རིག་པ་ལས་མ་གཏོགས་པ། ཆོས་ཉིད་ལ་ཡེ་ཤེས་ཀྱིས་དམིགས་ཤིང་རྟོགས་པ་ཞིག་ན་ཆོས་ཉིད་དུའང་མི་རུང་ངོ་། །དེ་ལྟར་གོལ་ས་ཉི་ཤུ་རྩ་གསུམ་མོ། །སྒྲིབ་པ་བདུན་ལས། བསླད་པའི་སྒྲིབ་པ་གསུམ་ལ། དང་པོ་སྙིང་པོ་བྱང་ཆུབ་ཀྱི་རང་བཞིན་གུད་ན་མེད་བཞིན་དུ་བསླད་པས་བསྒྲིབས་པ་ནི། སླ་ཞིང་དཀའ་ལ་བསླད་ཕྱིར་དཀའ། །མངོན་སུམ་མི་གནས་ཀུན་ཏུ་ཁྱབ། །མིང་ཙམ་འདི་ཞེས་བསྟན་པར་ནི། །རྡོ་རྗེ་སེམས་དཔས་མཚོན་དུ་མེད། །ཅེས་གསུངས་པ་སྟེ། སྙིང་པོ་བྱང་ཆུབ་ཀྱི་རང་བཞིན་གུད་ན་མེད་ཅིང་བརྩལ་དུ་མེད་པས་སླ་ལ། བསླད་པས་བསྒྲིབས་ཏེ་མ་རྟོགས་པས་དཀའ་འོ། །དེ་ནི་ནམ་མཁའི་དབྱིངས་དང་འདྲ་སྟེ། མངོན་སུམ་དུ་མི་སྣང་ལ་ཀུན་ལ་ཁྱབ་བོ། །དེའི་རང་བཞིན་ནི་མཚན་མའི་ཐ་སྙད་ལས་འདས་ཏེ། མིང་ཙམ་འདི་ཞེས་བསྟན་པར་ནི། །རྡོ་རྗེ་སེམས་དཔས་མཚོན་དུ་མེད། །ཅེས་གསུངས་པ་ཡིན་ནོ། །གཉིས་པ་བསླད་པས་བསྒྲིབས་པའི་ཕྱིར་དགེ་བའི་བཤེས་གཉེན་གྱིས་སྐབས་དབྱེ་དགོས་པར་བསྟན་པ་ནི། འདི་ནི་ཐམས་ཅད་མཚུངས་པའི་ལམ། །འགྲོ་བ་ཀུན་ལ་རང་བཞིན་གནས། །བྱིས་པས་བསླད་པས་འཁྲུལ་པའི་ཕྱིར། །སྨན་ཉིད་སྨན་པ་ཚོལ་བ་བཞིན། །ཞེས་གསུངས་པ་སྟེ། རང་བཞིན་ཡིན་ཡང་བསླད་པས་བསྒྲིབས་པས་ངོ་མ་ཤེས་ཏེ། དཔེར་ན་སྨན་ནི་རང་བཞིན་གྱིས་ནད་ལ་སྨན་བསོད་དུ་གྱུར་པ་ཉིད་ཡིན་ཡང་། སྨན་དེ་ཚོལ་བ་སྨན་པ་ཡིན་པ་བཞིན་དུ། འགྲོ་བ་རང་བཞིན་གྱིས་གྲོལ་བ་ཡིན་ཡང་། བསླད་པས་དེ་ལྟར་མ་ཤེས་པ་ལ་དགེ་བའི་བཤེས་གཉེན་གྱི་སྐབས་དབྱེ་དགོས་པས། དགེ་བའི་བཤེས་གཉེན་དམ་པ་སྟེན་ཅིག་པའོ། །གསུམ་པ་ནི་བདེ་བ་ཆེན་པོ་ཕྱོགས་དང་རིས་མེད་པ་ལ། བསླད་པས་སྣོད་ཀྱི་འཇིག་རྟེན་ཕྱོགས་ཆད་པ་དང་། བཅུད་ཀྱི་འཇིག་རྟེན་རིས་སུ་བྱེ་བར་སྣང་བ་ནི། གོ་བའི་ཡུལ་ན་བདེ་བ་ཆེ། །དེ་ཉིད་རྣམ་དག་འཇིག་རྟེན་ཡིན། །དེ་ལ་ཕྱོགས་ཀྱི་འོད་འདུས་པས། །ཕྱོགས་བཞི་མཚམས་དང་བླ་འོག་འགྲུབ། །མ་ངེས་འཇའ་ཚོན་ཁ་དོག་ལས། །རིགས་ཀྱི་ཁྱད་པར་མངོན་པར་སྣང་། །ཞེས་གསུངས་པ་སྟེ། བདེ་བ་ཆེན་པོ་ཕྱོགས་དང་རིས་མེད་པ་ལ། ཕྱོགས་རིས་སུ་སྣང་བ་ཐམས་ཅད་ཡེ་ཤེས་ཆེན་པོའི་རོལ་པ་རྒྱ་ཆེ་བའི་རྒྱན་ཉིད་ཡིན་མོད་ཀྱི། བསླད་པས་སྣོད་བཅུད་ཀྱི་འཇིག་རྟེན་དུ་སྣང་བ་ཡང་ཡིན་ནོ། །ཞེས་པའོ། །དེ་ལ་འོད་འདུས་པ་ཞེས་བྱ་བ་ནི། ཅིར་ཡང་མ་གྲུབ་པ་ལ་གྲུབ་གྲུབ་ལྟར་ཕྱོགས་སུ་ཆད་པར་སྣང་བ་སྟེ་སྣོད་ཀྱི་འཇིག་རྟེན་དུ་སྣང་བའོ། །འཇའ་ཚོན་ཁ་དོག་ཅེས་བྱ་བ་ནི། སོ་སོར་དབྱེ་བ་མེད་པ་ལ་སོ་སོར་ངེས་ངེས་ལྟར་སྣང་བ་སྟེ། བཅུད་ཀྱི་འཇིག་རྟེན་དུ་སྣང་བའོ། །མདོར་ན་གཞི་གཅིག་ལ་རྣམ་པར་དག་པ འི་འཇིག་རྟེན་དུ་སྣང་བ་དང་། མ་དག་པའི་འཇིག་རྟེན་དུ་སྣང་བ་སྟེ། དེ་ལ་མ་དག་པར་སྣང་བ་ནི། བསླད་པས་བསྒྲིབས་པ་ཡིན་ནོ། །ཞེའོ། །ཚུལ་འདི་ལྟ་བུ་ནི་མདོ་སྡེ་ལས་ཀྱང་གསུངས་ཏེ། སྣོད་དང་བཅུད་ཀྱིས་བསྡུས་པའི་འཇིག་རྟེན་ཐམས་ཅད་སངས་རྒྱས་ཀྱི་ཞིང་དུ་མ་གྱུར་པ་མེད་ལ། གདུལ་བྱའི་རྒྱུད་ཀྱང་རྣམ་པ་གཉིས་ཏེ། སེམས་ཅན་དུལ་བ་དང་། ཁེངས་པའོ། །དེ་ལ་དུལ་བ་ནི་བྱང་ཆུབ་སེམས་དཔའོ། །ཁེངས་པ་ནི་སོ་སོའི་སྐྱེ་བོ་དང་ཉན་ཐོས་སོ། །དེ་ལ་སེམས་ཅན་དུལ་བ་གདུལ་བར་བྱ་བའི་ཕྱིར། ཡོངས་སུ་དག་པའི་འཇིག་རྟེན་དང་། ལོངས་སྤྱོད་རྫོགས་པའི་སྐུར་སྣང་བར་བྱིན་གྱིས་རློབ་བོ། །སེམས་ཅན་ཁེངས་པ་རྣམས་གདུལ་བའི་ཕྱིར། ཡོངས་སུ་མ་དག་པའི་འཇིག་རྟེན་དང་། སངས་རྒྱས་ངན་ཅིང་དབུལ་བར་སྣང་བར་བྱིན་གྱིས་རློབ་བོ། །འཇིག་རྟེན་འཇིག་པའི་བསྐལ་པས་འཇིག་པའང་། དེས་འདུལ་བ་ལ་དེ་ལྟར་བྱིན་གྱིས་རློབ་བོ། །ཐ་ན་ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིས་འགྲོ་བ་རྣམས་ཉོན་མོངས་པར་བྱེད་པ་གང་ཡིན་པ་དང་། བདུད་བཞི་པོ་དག་གིས་ཀྱང་སངས་རྒྱས་རྣམས་སངས་རྒྱས་ཀྱི་མཛད་པ་མི་སྒྲུབ་པ་མེད་པར་འབྱུང་ལ། ཐུན་མོང་གི་བཀའ་རྣམས་ལས་སྣོད་དང་བཅུད་ཀྱི་འཇིག་རྟེན་ནི། སེམས་ཅན་གྱི་ལས་དབང་གིས་གྲུབ་པ་ཡིན་པར་འབྱུང་སྟེ། འོན་ཀྱང་ཚུལ་འདི་གཉིས་ལ་སྣང་བ་ཐ་དད་མེད་ཅིང་སྣང་བའི་རྟེན་གཞི་ཡང་མེད་དེ། སྣང་བའི་རྐྱེན་ཙམ་ནི་ཐུགས་རྗེ་དང་ལས་གཉིས་གའང་ཐུན་མོང་དུ་འགྱུར་དུ་རུང་ལ། སྣང་བ་དེ་ཉིད་ཀྱང་བྱང་གྲོལ་དང་འཆིང་བ་གཉིས་གའི་རྐྱེན་དུ་འགྱུར་བར་མཉམ་པས། ཚུལ་གཉིའ་ག་ལྟར་ཡང་བསྒྲུབ་ཏུ་རུང་བར་སྣང་ངོ་། །རྗེས་སུ་མཐུན་པའི་བློ་མི་སླུ་བ་གང་ཡིན་པ་དེ་ལྟར་བདེན་པར་སྒྲུབ་པ་ལྟར་ན་ནི། ཐུགས་རྗེའི་བྱིན་རླབས་ལྟར་བདེན་པར་འགྱུར་རོ། །རྣལ་འབྱོར་གྱི་བྱ་བ་དོན་གྱིས་མ་ཟིན་ཏེ། ཉོན་མོངས་པའི་འཆིང་བས་ཟིན་པའི་སྒྲིབ་པ་གསུམ་ནི། འདི་ལྟར་རྣལ་འབྱོར་པའི་བྱ་བ་ཐམས་ཅད་ཀྱང་མདོར་བསྡུས་ན་རྣམ་པ་གསུམ་ཡིན་ཏེ། འཕགས་པ་མཆོད་པར་བྱ་བའི་ཕྱིར། རོལ་པ་རྒྱན་གྱི་དཀྱིལ་འཁོར་གྱི་ཚུལ་གྱིས་ཚོགས་ཀྱི་མཆོད་པ་བསྔོ་ཞིང་དབུལ་བ་དང་། འགྲོ་བའི་དོན་དུ་ལས་རྒྱ་མཚོ་བརྩམས་པ་དང་། བསོད་ནམས་ཀྱི་ཚོགས་བསྐྱེད་པའི་ཕྱིར། བླ་མ་མཆོད་པ་དང་སྦྱིན་པ་གཏོང་བ་ལ་སོགས་ཏེ། བསོད་ནམས་བྱ་བའི་དངོས་པོ་ཐམས་ཅད་ཀྱང་མི་སྤང་བར་དོན་གྱིས་ཟིན་པར་བྱ་སྟེ། སྤྱད་པར་བྱ་བ་ཡིན་པ་ལས། ཉོན་མོངས་པའི་འཆིང་བར་གྱུར་ན་སྒྲིབ་པར་བསྟན་པའོ། །དེ་གསུམ་གྱི་དཀྱུས་དང་དོན་ནི་གོ་སླ་བས་མ་བཀོད་དོ། །ཐ་མ་ལུང་སྒྲོ་སྐུར་གྱིས་ཟིན་པའི་སྒྲིབ་པ་ནི། དེ་བས་དེ་ལུང་དེ་ཉིད་ལ། །དེ་ལས་དེ་བྱར་སྒྲིབ་པར་འགྱུར། །དེ་ལྟར་དེ་ལ་དེ་རྟོགས་ན། །དེ་ལ་དེ་ཉིད་ཐོབ་པ་མེད། །ཅེས་གསུངས་པ་སྟེ། དེ་ལ་ལུང་དེ་ཉིད་ནི་བྱང་ཆུབ་ཀྱི་སེམས་སྙིང་པོ་བྱང་ཆུབ་ཀྱི་རང་བཞིན་དེ་ཉིད་རྟེན་གཞིའི་མཆོག་ཡིན་པས་ལུང་དེ་ཉིད་དོ། །དེ་ལ་བྱ་བ་ནི་དེ་ཉིད་ཐོབ་ཅིང་རྟོགས་པར་བྱ་བའི་ཕྱིར། ཡོད་མེད་ཀྱི་བློ་དང་། སྒྲའི་རྩོལ་བ་བསྐྱེད་པ་ཐམས་ཅད་སྒྲིབ་པ་ཉིད་ཡིན་ཏེ། མཚོ་རླུང་གིས་བསྐྱོད་པ་ལྟ་བུའོ། །དེ་བས་ན་རང་གི་རང་བཞིན་རང་བཞག་ན་བདེ་བ་ཆེན་པོར་རང་གནས་བཞིན་དུ། དེ་ལ་རྟོགས་པས་ཐོབ་པར་མི་འགྱུར་རོ། །ཞེའོ། །འདི་ནི་ཆུ་དང་མེ་ནི་མ་བཅོས་ན་རང་དང་ཞིང་གསལ་ལ། ཇི་ལྟར་འདུ་བྱེད་པ་དེ་ལྟར་རང་ལ་རང་སྒྲིབ་བོ། །དེ་བཞིན་དུ་སེམས་ངོ་བོ་ཉིད་མེད་པར་རྟོགས་ན་བཅོས་མི་དགོས་ལ། བཅོས་པར་བྱ་བ་དང་བྱེད་པའི་དངོས་གཞིའང་མི་རྙེད་དོ། །མ་ཤེས་ན་ཇི་ལྟར་ནན་གྱིས་བཅོས་ཀྱང་རྟོག་པ་སྔ་ཕྱི་བརྗེ་བ་ཙམ་དུ་ཟད་དེ། དཔེར་ན་སྤྲིན་དཀར་ནག་གཉི་ག་ནམ་མཁའ་ལ་སྒྲིབ་པ་ལྟ་བུའོ། །དེ་ལྟར་གོལ་སྒྲིབ་སུམ་ཅུའི་གོལ་ས་དང་སྒྲིབ་པ་བཅད་པ་དེ་ཉིད། བྱང་ཆུབ་སེམས་ཀྱི་རང་བཞིན་བསྟན་པའང་ཡིན་ལ། བྱང་ཆུབ་སེམས་ཀྱི་གཞག་ཐབས་བསྟན་པའང་ཡིན་ནོ། །ཡིན་པ་རྣམ་པ་གསུམ་ནི། ཀུན་ཏུ་བཟང་པོ་ཡིན་པ་དང་། ཀུན་ཏུ་བཟང་མོ་ཡིན་པ་དང་། གཉིས་སུ་མེད་པ་ཡིན་པའོ། །འདི་གསུམ་ནི་ཆེ་བ་རྣམ་པ་ལྔ་མདོར་བསྡུས་པའི་མན་ངག་ཡིན་ཏེ། ཅིར་སྣང་ཡང་ཀུན་ཏུ་བཟང་པོའི་རོལ་པ་ལ་མངའ་བརྙེས་པ་ཡིན་པས། ཀུན་ཏུ་བཟང་པོ་ཡིན་པ་ཞེས་བྱའོ། །ཅིར་སྣང་ཡང་རང་གི་ངོ་བོ་མ་གྲུབ་པས། ཀུན་ཏུ་བཟང་མོ་ཡིན་པ་ཞེས་བྱའོ། །དེ་ལ་ཡང་མཚན་ཉིད་གཉིས་སུ་གྲུབ་པ་མེད་དེ། སྣང་བ་ཉིད་མ་སྐྱེས་པའོ། །མ་སྐྱེས་པ་ཉིད་སྣ་ཚོགས་སུ་སྣང་ཞིང་ཐུགས་རྗེའི་བྱིན་རླབས་རྒྱུན་མི་འཆད་དོ། །ཚིག་འདི་གསུམ་གྱིས་ཀྱང་རྫོགས་པ་ཆེན་པོའི་དོན་ཐམས་ཅད་བསྡུས་སོ། །དེ་ལ་གདིང་ཆེན་པོ་གསུམ་ནི། ཐིག་ལེ་ཆེན་པོ་དྲུག་མན་ངག་ཏུ་བསྡུས་པ་ཡིན་ཏེ། གསུམ་གང་ཞེ་ན། ངང་དང་། རང་བཞིན། བདག་ཉིད་ཆེན་པོའོ། །དེ་ལ། ངང་མ་བྱས་པ། རང་བཞིན་མ་བཅོས་པ། བདག་ཉིད་ཆེན་པོ་ལྷུན་གྱིས་གྲུབ་པའོ། །དེ་ལ་མ་བྱས་པ་ནི་སེམས་ཅན་གྱི་འཁྲུལ་པས་ཇི་ལྟར་བསླད་ཀྱང་། སེམས་ཀྱི་རང་བཞིན་གཞན་དུ་འགྱུར་བ་མེད་པའོ། །མ་བཅོས་པ་ནི་རྒྱལ་བ་རྣམས་ཀྱི་ཐབས་ཀྱིས་ཇི་ལྟར་བཅོས་ཀྱང་། བྱང་ཆུབ་སེམས་ཀྱི་ཡོན་ཏན་བོགས་དབྱུང་དུ་མེད་པའོ། །ལྷུན་གྱིས་གྲུབ་པ་ནི་དེ་ལྟ་བས་ན་བགྲོད་ཅིང་སྦྱོང་བ་ལས་འདས་པའོ། །དོན་འདིས་ཀྱང་རྫོགས་པ་ཆེན་པོའི་དོན་མཐའ་དག་བསྡུས་སོ། །དེ་ལ་མན་ངག་གི་རྩ་བ་གསུམ་ནི། གོལ་སྒྲིབ་སུམ་ཅུའི་གོལ་ས་བཅད་པ་མདོར་བསྡུས་པ་སྟེ། གསུམ་གང་ཞེ་ན། ལུང་ལ་མ་བརྟེན་པའི་མན་ངག །རྒྱུ་ལས་མ་བྱུང་བའི་འབྲས་བུ། སེམས་ལས་མ་བྱུང་བའི་ཆོས་སོ། །དེ་ལ་གོལ་སྒྲིབ་སུམ་ཅུས་ཀྱང་བྱང་ཆུབ་སེམས་ཀྱི་རང་བཞིན་མ་རྟོགས་པ་དང་། རྩོལ་སྒྲུབ་ཀྱི་མཐུ་ལས་ཐོབ་པར་འགྱུར་བ་བཅད་དོ། །འདིར་ཡང་དེ་ཉིད་བསྟན་ཏེ། དེ་ལ་བྱང་ཆུབ་ཀྱི་སེམས་ནི་ཆོས་ཐམས་ཅད་ཀྱི་སྙིང་པོ་ཡིན་པས། བློ་ལ་བཅང་བའི་མན་ངག་གི་དམ་པ་ཡིན་ཡང་། ལུང་གི་སྒྲ་ལ་རྟེན་པའང་མ་ཡིན་ནོ། །བྱང་ཆུབ་ཀྱི་སེམས་ནི་རང་བཞིན་གྱིས་འོད་གསལ་བ་ཡིན་ཡང་། སེམས་ལས་བྱུང་བའི་ཆོས་ཤེས་རབ་དང་ཏིང་ངེ་འཛིན་དང་སྙིང་རྗེས་བསྡུས་པའང་མ་ཡིན་ནོ། །བྱང་ཆུབ་ཀྱི་སེམས་ནི་མངོན་པར་རྫོགས་པར་སངས་རྒྱས་པ་ཡིན་ཡང་། བསོད་ནམས་དང་ཡེ་ཤེས་ཀྱི་ཚོགས་ཀྱི་རྒྱུ་ལས་བསྒྲུབས་པའང་མ་ཡིན་ནོ། །དེ་ལ་བྱང་ཆུབ་ཀྱི་སེམས་ཐིག་ལེ་ཆེན་པོ་གཅིག་གིས་ཤེས་བྱ་ཐམས་ཅད་ཀྱི་གདར་ཤ་ཇི་ལྟར་གཅད་ཅེ་ན། ཆོས་ཐམས་ཅད་སེམས་སུ་འདུས་པས་སེམས་ལས་མ་གཏོགས་པའི་ཤེས་བྱ་གཞན་མེད་ལ། སེམས་ཀྱི་རང་བཞིན་ཉིད་བྱང་ཆུབ་ཡིན་པས། གོང་དུ་བསྟན་པ་ལྟར་ཤེས་བྱའི་བྱ་བ་བཞི་ལས་འདས་པར་ཐེ་ཚོམ་མེད་ཅིང་དྲི་མ་མེད་པས་གདར་ཤ་བཅད་ཅེས་བྱའོ། །ཐམས་ཅད་ནས་ཐམས་ཅད་དུ་སངས་རྒྱས་པ་མེད་པའི་ཆེ་བས་ལ་བཟླ་བ་ཞེས་བྱ་བ་ནི། སངས་རྒྱས་པ་དང་སངས་མ་རྒྱས་པ་གཉིས་མེད་ན་ཅི་ཞིག་བརྩལ་ཏེ་བརྩལ་དུ་མེད་པར་ལ་བཟླའོ། །དེ་ལྟ་བུའི་དོན་དང་ལྡན་པའི་རྣལ་འབྱོར་གྱི་སྐྱེས་བུ་རྣམས་ནི། ཀུན་ཏུ་བཟང་པོ་དབྱེ་བ་མེད་པའི་ས་ལ་ལྷུན་གྱིས་གནས་པ་ཡིན་ཏེ། དེ་ལ་ཀུན་ཏུ་བཟང་པོ་དབྱེ་བ་མེད་པའི་ས་ནི། སངས་རྒྱས་ཀྱིས་ཐམས་ཅད་ཀྱི་སྤྱི་ཆིངས་ཡིན་ཏེ། རྫོགས་པ་ཆེན་པོའི་དོན་ཇི་ལྟ་བ་གང་ཡིན་པ་དེ་ཉིད་དོ། །དཔལ་རྡོ་རྗེ་སེམས་དཔའ་གཉིས་པ་ཞེས་བྱ་བ་ནི། དཔལ་རྡོ་རྗེ་སེམས་དཔའ་དང་དགོངས་པ་མཐུན་པའོ། །སྲིད་པ་དང་མི་སྲིད་པ་ཞེས་བྱ་བ་ལ། སྲིད་པ་ནི། སེམས་ཅན་ལས་ཀྱི་ཚེ་བསྐྱེད་པ་རྣམས་ཏེ། སོ་སོའི་སྐྱེ་བོ་དང་བྱང་ཆུབ་སེམས་དཔའོ། །མི་སྲིད་པ་ཞེས་བྱ་བ་ནི། ལས་ཀྱི་ཚེ་བཀག་པ་རྣམས་ཏེ། ཉན་ཐོས་དང་རང་སངས་རྒྱས་རྣམས་སོ། །དེ་དག་ཐམས་ཅད་ཀྱིས་ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོ་བཞིན་དུ་སྤྱི་བོས་བཀུར་བའི་འོས་སུ་གྱུར་པ་ནི། རྫོགས་པ་ཆེན་པོའི་དོན་རྟོགས་ཤིང་རྡེང་དུ་གྱུར་པའི་རྣལ་འབྱོར་གྱི་སྐྱེས་བུ་ཆེན་པོ་དག་ཡིན་ཏེ། གང་གི་ཕྱིར་དཔལ་རྡོ་རྗེ་སེམས་དཔའ་གཉིས་པ་ཡིན་པ་དེའི་ཕྱིར་རོ། །ཞེས་བསྟན་པར་འགྱུར་རོ། །དེ་དག་གང་གིས་བྱང་ཆུབ་སེམས་ཀྱི་རང་བཞིན་དང་། བྱང་ཆུབ་སེམས་ཀྱི་ཆེ་བ་དང་། བྱང་ཆུབ་སེམས་ཀྱི་གོལ་སྒྲིབ་རྣམས་གཞུང་གི་ཚོགས་དང་བཅས་ཏེ་བསྟན་པ་ཡིན་ནོ། །ད་ནི་བྱང་ཆུབ་སེམས་ཀྱི་གཞག་ཐབས་བསྟན་ཏེ། དེ་ཡང་མདོར་བསྡུས་ཏེ་བསྟན་ན། ཆོས་ཐམས་ཅད་སྒྱུ་མ་དང་སྨིགས་རྒྱུ་ལ་སོགས་པ་དང་འགོ་མཉམ་པར་ཤེས་ཏེ། ཤེས་བཞིན་ཆེན་པོའི་སྣོད་ཀྱིས་བཟུང་ནས། བཏང་སྙོམས་ཆེན་པོའི་ངང་ལ་གནས་པ་ཙམ་ལ་བྱང་ཆུབ་སེམས་ཀྱི་གཞག་ཐབས་ཞེས་བྱའོ། །དེ་ལ་སྒྱུ་མ་དང་འགོ་མཉམ་པ་ནི་གོང་དུ་རྒྱས་པར་བཤད་ཟིན་ཏོ། །དེ་ལྟར་སྒྱུ་མ་དང་འགོ་མཉམ་པ་དང་མི་མཉམ་པར་ལྟ་བའི་དབང་གིས། ཤེས་བཞིན་དང་ཤེས་བཞིན་ཆེན་པོའི་བྱེ་བྲག་ཏུ་འགྱུར་ཏེ། དེ་ལ་ཤེས་བཞིན་ནི་དྲན་པ་དང་ཤེས་རབ་བྱེ་བྲག་གང་གིས། ལུས་དང་ངག་དང་ཡིད་ཀྱི་ལས་རྣམས་ལ་ཤེས་བཞིན་དུ་འཇུག་པ་སྟེ། གང་དེ་ཡོད་ན་སེམས་ནང་དུ་ཡང་དག་འཇོག་ལ་མཉམ་པར་འཇོག་པའི་ཚེ་ནའང་། འདི་ལྟར་བྱིང་ནའང་བྱིང་ངོ་ཞེས་བྱ་བར་རབ་ཏུ་ཤེས། རྒོད་ནའང་རྒོད་དོ་ཞེས་བྱ་བར་རབ་ཏུ་ཤེས། བྱིང་བའི་གཉེན་པོ་སེམས་པས་འཕང་བསྟོད་པ་ཡིན་པར་ཡང་རབ་ཏུ་ཤེས། རྒོད་པའི་གཉེན་པོ་བཏང་སྙོམས་ཀྱིས་མགོ་མནོན་པ་ཡིན་པར་ཡང་རབ་ཏུ་ཤེས། བྱིང་རྒོད་གཉིས་ཀྱི་ཟུག་རྔུ་དང་བྲལ་ཏེ་བློ་མཉམ་པར་གནས་ན་ཡང་དེ་བཞིན་དུ་རབ་ཏུ་ཤེས་ཏེ། ལྷག་པར་གཉེན་པོ་བསྟེན་པའི་རྩོལ་བ་བསྐྱེད་པ འི་གནས་མ་ཡིན་པར་ཡང་རབ་ཏུ་ཤེས་པའི་བློ་བྱ་ར་བ་དང་འདྲ་བ་སྟེ། དཔེར་ན་སྣོད་ཆུས་གང་བ་ཕྱིར་མ་བོ་བར་སྲུང་བ་ལྟ་བུའོ། །དེ་ནི་སྒྱུ་མ་དང་འགོ་མི་མཉམ་པར་ལྟ་བ་ལས་བྱུང་བ་ཡིན་ཏེ། དཔེར་ན་གླང་པོ་ཆེ་རང་བཞིན་གྱིས་དྲེགས་ཤིང་མྱོས་པ་དག །རྒུན་ཆང་འཐུངས་པར་གྱུར་ན་ཤིན་ཏུ་མྱོས་པར་འགྱུར་ཏེ། དེ་ལྕགས་ཀྱུ་དང་ལྕགས་ཐག་གིས་མ་ཟིན་ན། རྩིག་ཁྱིམ་གཞོམ་པ་དང་སྲོག་ཆགས་གསད་པ་ལ་སོགས་པ་ཉེས་པ་སྣ་ཚོགས་ལ་སྦྱོར་བར་དོགས་པ་དེས་འཇིགས་ཏེ། གཟུངས་གཉིས་ཀྱིས་རྟག་ཏུ་འཛིན་ཏོ། །དེས་ཟིན་ཅིང་དུལ་ན་དགྲའི་དཔུང་འཇོམས་ཤིང་གཡུལ་བརྟན་པར་བྱེད་པའི་ཡོན་ཏན་ཆེན་པོ་ཡོད་པས། ད་ལྟར་སྐྱོན་དང་ཡོན་ཏན་གཉིས་ཀྱི་དབང་གིས་རེ་དོགས་ཀྱི་བློ་དང་ལྡན་པས། དེའི་ཕྱིར་རྟག་ཏུ་གཟུངས་གཉིས་ཀྱིས་སྲུང་ངོ། །དེ་བཞིན་དུ་སེམས་ཀྱི་གླང་པོ་ཆེ་རང་བཞིན་གྱིས་གདུལ་དཀའ་བར་གྱུར་པ་ལ། འདོད་ཆགས་ལ་སོགས་པ་ཉོན་མོངས་པ་རྣམས་དང་། བྱིང་རྒོད་ལ་སོགས་པ་ཉེ་བའི་ཉོན་མོངས་པ་རྣམས་ཀྱི་རྒུན་ཆང་འཐུངས་ཏེ། ཤིན་ཏུ་འཁྲུགས་ཤིང་ཉོན་མོངས་པར་གྱུར་པ་ལ། ཤེས་བཞིན་གྱི་ལྕགས་ཐག་དང་ལྕགས་ཀྱུས་མ་ཟིན་ན། རྟག་ཏུ་འཁོར་བ་དང་ངན་སོང་གི་རྒྱུ་གནས་ངན་ལེན་གྱི་ལས་ཁོ་ན་སོག་པར་བྱེད་པས། དེའི་ཉེས་སྐྱོན་ཆེན་པོས་འཇིགས་པའི་དོགས་པ་ཡོད་པ་དང་། ཤེས་བཞིན་གྱི་གཟུངས་ཀྱིས་ཟིན་ན་ཉོན་མོངས་པ་རྣམས་ཀྱི་དབང་དུ་མི་འགྱུར་ཏེ། མཐོ་རིས་དང་ཐར་པའི་འབྲས་བུ་ཆེན་པོ་ལ་སྦྱོར་བའི་ཡོན་ཏན་ཆེན་པོ་ཡོད་པས་རེ་བ་དང་ལྡན་ཏེ། དེ་ལྟར་རེ་དོགས་ཆེན་པོ་གཉིས་ཡོད་པས་དེའི་ཕྱིར་ཤེས་བཞིན་གྱི་གཟུངས་ཀྱིས་སྲུང་བར་བྱེད་དོ། །དེ་ལ་ཤེས་བཞིན་ཆེན་པོ་གང་ཞེ་ན། དཔེར་ན་ཁོར་ཡུག་ཆེན་པོའི་སྣོད་ཀྱིས་བཟུང་བའི་རྒྱ་མཚོ་ཆེན་པོ་ནི། ཆུ་བོ་ཆེན་པོ་མཐའ་ཡས་པ་འབབ་ཀྱང་ལྟུང་བའི་དོགས་པ་མེད་དོ། །དུས་ཀྱི་རླུང་གིས་བསྐྱོད་དམ་ནམ་མཁའ་ལྡིང་གི་འདབ་མས་གཏོར་ཡང་ཁོར་ཡུག་ཆེན་པོ་ལས་ཕྱིར་འདའ་བའི་དོགས་པ་མེད་པ་བཞིན་དུ། ཆོས་ཐམས་ཅད་སྒྱུ་མ་དང་འགོ་མཉམ་པར་རྟོགས་པ་ན། རེ་དོགས་ཀྱི་བློ་དང་བྲལ་བས་བསྲུང་བ་དང་མི་བསྲུང་བ་གཉིས་མེད་པར་རྟོགས་པའི་བློ་དང་ལྡན་པ་སྟེ། དཔེར་ན་སྒྱུ་མའི་གླང་པོ་ཆེ་སྣང་ཞིང་མཐོང་ན། དེ་སྒྱུ་མར་ཤེས་པས། ཤོར་བས་ཡུལ་ཕུང་བའི་དོགས་པའི་བློ་ཡང་མི་སྐྱེ། གཟུངས་ཀྱིས་ཟིན་ཅིང་དུལ་བས་གཡུལ་སྲུང་བའི་རེ་བའི་བློའང་མི་སྐྱེ་སྟེ། དེའི་དབང་གིས་ལྕགས་ཀྱུ་དང་ལྕགས་ཐག་གི་གཟུངས་ཀྱང་མི་སྟེན་པ་བཞིན་ནོ། །ཤེས་བཞིན་རྣམ་པ་གཉིས་ལ་རྟེན་ནས། བཏང་སྙོམས་དང་བཏང་སྙོམས་ཆེན་པོ་ལ་གཉིས་སུ་འགྱུར་ཏེ། དེ་ལ་བཏང་སྙོམས་ནི་ཉོན་མོངས་པ་མེད་པར་གནས་པའི་བློ་གང་ཞིག །བྱིང་རྒོད་ཀྱི་ཟུག་རྔུ་གཉིས་ཀྱི་མི་མཉམ་པ་མེད་པས་ན། སེམས་མཉམ་པ་ཉིད་ཐོབ་པ་ཞེས་བྱ་སྟེ་བཏང་སྙོམས་ཐོག་མའོ། །དེ་ནས་དེ་བས་ཆེས་སེམས་དབང་དུ་གྱུར་པ་ན། ཟུག་རྔུ་གཉིས་གཉེན་པོས་བཅོས་མི་དགོས་པར། སེམས་རྣལ་དུ་འདུག་པ་ཐོབ་སྟེ། བཏང་སྙོམས་བར་མ་ཞེས་བྱའོ། །དེ་ནས་སེམས་དེ་ཤིན་ཏུ་ཡང་དབང་དུ་གྱུར་པས་ན། ཟུག་རྔུ་གཉིས་འབྱུང་བའི་དོགས་པའང་མེད་ལ། གཉེན་པོ་བསྟེན་པའི་རྩོལ་བའང་མེད་པར་སེམས་ལྷུན་གྱིས་གྲུབ་པ་ཐོབ་པ་སྟེ། བཏང་སྙོམས་ཐ་མའོ། །དེ་ལ་བཏང་སྙོམས་ཆེན་པོ་གང་ཞེ་ན། སྒྱུ་མ་དང་འགོ་མཉམ་པར་རྟོགས་པ་ན། མི་མཐུན་པ་དང་གཉེན་པོ་དབྱེར་མེད་པའི་ཤེས་བཞིན་ཆེན་པོ་དང་ལྡན་པས་ན། མི་མཐུན་པ་སྤང་བར་མི་རྩོལ། གཉེན་པོ་སྟེན་པར་མི་རྩོལ། དོན་མངོན་དུ་བྱ་བར་མི་རྩོལ་ཏེ། མ་བཅོས་པའི་ངང་ལ་ལྷུན་གྱིས་གནས་པ་ཙམ་མོ། །ཡང་སྨིགས་རྒྱུའི་དཔེས་བསྟན་ན། ནམ་མཁའི་ངང་ལས་མ་གཡོས་བཞིན་དུ། ཀླུང་ཆུས་གང་བ་བཞིན་དུ་སྣང་ངོ་། །སྣང་བའི་དུས་དེ་ཉིད་ན་ཆུ་མེད་པ་ཙམ་དུ་མ་ཟད་ཀྱི། སྔོ་བ་དང་གཡོ་བར་སྣང་བ་ཉིད་ན་སྔོ་བ་དང་། གཡོ་བ་ཉིད་ཀྱང་མེད་དེ། ནམ་མཁའི་རང་བཞིན་དུ་གནས་སོ། །ནམ་མཁའི་རང་བཞིན་ཉིད་ཇི་ལྟ་བུ་ཞེ་ན། སེམས་ཅན་རྣམས་གཟུགས་ལས་བཟློག་པའི་དངོས་པོ་སྟོང་པ་ཞིག་ཡོད་པར་བརྟགས་ནས། ནམ་མཁའ་ནམ་མཁའ་ཞེས་ཐ་སྙད་ཀྱི་ཡུལ་དུ་བྱེད་པ་ཙམ་མ་གཏོགས་པ། ནམ་མཁའ་ལ་ངོ་བོ་ཉིད་གང་ཡང་མེད་དོ། །དེ་བཞིན་དུ་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ངང་ལས་མ་གཡོས་བཞིན་དུ། སངས་རྒྱས་ཀྱི་སྐུ་དང་ཡེ་ཤེས་མན་ཆད་ནས། སེམས་ཅན་གྱི་གནས་དང་སྡུག་བསྔལ་གྱི་བར་དུ་སྣང་སྟེ། དེ་ལྟར་སྣང་བའི་དུས་ཉིད་ན་ཆུ་དང་འདྲ་བའི་དངོས་པོ་སྣ་ཚོགས་སུ་ཀུན་ཏུ་བརྟགས་པས་སྟོང་པ་ཙམ་དུ་མ་ཟད་ཀྱི། སྔོ་བ་དང་གཡོ་བ་དང་འདྲ་བའི་སེམས་རང་རིག་པ་དང་ཡེ་ཤེས་རང་རིག་པ་ཉིད་ཀྱང་དེ་ལྟར་གྲུབ་པ་མེད་དེ། ཆོས་ཉིད་དག་པའི་རང་བཞིན་དུ་གནས་སོ། །ཆོས་ཉིད་དག་པ་ཞེས་བྱ་བ་དེ་ཉིད་ཀྱང་ནམ་མཁའ་དང་འདྲ་སྟེ། སེམས་ཀྱི་ཐ་སྙད་ཀྱི་བློའི་ཡུལ་དུ་བདག་མེད་པ་སྤྲོས་པ་ཉེ་བར་ཞི་བ་ཞེས་བཞག་པར་ཟད་ཀྱི། ངོ་བོ་ཉིད་གང་ཡང་མེད་དོ། །དེ་ལྟར་རྟོགས་པ་ནི་སྨིགས་རྒྱུ་དང་འགོ་མཉམ་པར་རྟོགས་པ་ཞེས་བྱའོ། །དེ་ལྟར་རྟོགས་པས་ནི་སྨིག་རྒྱུས་གནོད་པར་ཡང་མ་དོགས། ཕན་འདོགས་པར་ཡང་མི་རེ་བས་རེ་དོགས་དང་བྲལ་བའི་བློ་དང་ལྡན་པ་བཞིན་དུ། ཀུན་ནས་ཉོན་མོངས་པའི་ཆོས་ཀྱིས་གནོད་པ་སྒྲུབ་པར་ཡང་མི་དོགས། རྣམ་པར་བྱང་བའི་ཆོས་ཀྱིས་ཕན་པ་སྒྲུབ་པར་ཡང་མི་རེ་བའི་བློ་དང་ལྡན་པ་ནི། ཤེས་བཞིན་ཆེན་པོའི་སྣོད་ཀྱིས་ཟིན་པ་ཞེས་བྱ། དེའི་དབང་གིས་རྩོལ་བ་གང་ཡང་མི་སྐྱེད་དེ། མ་བཅོས་པའི་ངང་ལ་གནས་པ་ནི། བཏང་སྙོམས་ཆེན་པོའི་ངང་ལ་གནས་པ་ཞེས་བྱའོ། །མདོར་བསྡུས་ན་ཆོས་ཐམས་ཅད་སྒྱུ་མ་དང་སྨིགས་རྒྱུ་དང་འགོ་མཉམ་པར་རྟོགས་པ་ནི། རྫོགས་པ་ཆེན་པོའི་དོན་རྟོགས་པ་སྟེ་ལྟ་བ་ཞེས་བྱ། རྟོགས་པའི་བློ་དང་མི་འབྲལ་བར་གནས་པ་ནི་ཤེས་བཞིན་ཆེན་པོའི་སྣོད་ཀྱིས་ཟིན་པ་ཞེས་བྱ། དེའི་དབང་གིས་འདུ་བྱེད་ཀྱི་རྩོལ་བ་ཆེད་དུ་མི་སྐྱེད་པ་ནི། བཏང་སྙོམས་ཆེན་པོའི་ངང་ལ་གནས་པ་ཞེས་བྱ་སྟེ། དེ་ལ་སྒོམ་པ་ཞེས་ཀྱང་བྱའོ། །ཚིག་དེ་གསུམ་གྱིས་རྫོགས་པ་ཆེན་པོའི་ལྟ་སྒོམ་མ་ལུས་པར་རྫོགས་པ་ཡིན་ནོ། །ད་ནི་དོན་དེ་དག་ཉིད་ལུང་གི་ཁུངས་ཀྱི་སྒོ་ནས་བསྟན་ན། མ་དད་པ་ཁ་གཅིག་ཀྱང་དད་པར་འགྱུར། མ་རྟོགས་པ་ཁ་ཅིག་ཀྱང་རྟོགས་པར་འགྱུར། དེ་བས་ན་གཞུང་གི་ཚོགས་ཀྱི་ཚིག་གིས་བསྟན་ཏོ། །དེ་ལ་ཤེས་བཞིན་གྱིས་ཟིན་པར་བྱ་བ་མ་གཏོགས་པ་རྩོལ་བས་བཅོས་སུ་མེད་དོ། །རྣམ་པར་རྟོག་པ་དང་རྣམ་པ་མི་རྟོག་པ་གཉིའ་གའང་རང་བཞིན་གྱིས་མཉམ་པའི་ཕྱིར། རྩོལ་བས་བཅོས་མི་དགོས་པ་ནི། ལྟ་བ་ཡང་དག་སྒྲོན་མ་ལས། རྨི་ལམ་དག་གི་བདེ་དང་སྡུག་བསྔལ་ཡང་། །སད་པར་གྱུར་ན་རང་བཞིན་མཉམ་པར་ལྟར། །རྣམ་པར་རྟོག་དང་མི་རྟོག་གཉིའ་གའང་། ཤེས་པས་རིག་ན་རང་བཞིན་ཡོངས་ཀྱིས་མཉམ། །དེ་ལྟར་དུས་གསུམ་རྣམ་པ་ཐམས་ཅད་དག །རང་བཞིན་ཉིད་ལས་མ་འདས་ཤེས་ནས་ནི། །སྒྲོ་འདོགས་བྱིས་པའི་རྗེས་སུ་མ་འབྲངས་ན། །རང་བཞིན་ཉིད་ནི་ཡོང་གིས་བཅོས་མི་དགོས། །ཞེས་གསུངས་པ་སྟེ། ཤེས་བཞིན་ཆེན་པོས་ཟིན་ཅིང་སྒྲོ་འདོགས་ཀྱི་རྗེས་སུ་མ་འབྲངས་པ་ཙམ་སྟེ། རྩོལ་བས་བཅོས་པའི་དོན་ནི་མེད་དོ། །གང་གི་ཕྱིར་ཆོས་ཉིད་ཅེས་བརྗོད་པའང་། ཆོས་ཐམས་ཅད་སེམས་སུ་འདུས་པས། སེམས་ལས་མ་གཏོགས་པའི་ཆོས་གཞན་མེད་ལ། སེམས་ངོ་བོ་ཉིད་ཀྱིས་མ་སྐྱེས་པ་ཉིད་ཆོས་ཉིད་ཅེས་བྱ་བར་ཟད་ན། ད་སུ་ཞིག་གིས་གང་ཞིག་བསྒོམ། དེ་ལྟར་ཡང་གསུངས་པ། ཇི་ལྟར་ནམ་མཁའ་མཚན་ཉིད་མེད་པའི་ཕྱིར། །ནམ་མཁའ་དེ་ཉིད་བསྒོམ་པར་མི་འགྱུར་བཞིན། །ངོ་བོ་ཉིད་ཀྱིས་མ་སྐྱེས་སེམས་ཀྱིས་ནི། །མ་སྐྱེས་དེ་ཉིད་བསྒོམ་པར་ག་ལ་འགྱུར། །ཞེས་གསུངས་པ་ཡིན་ནོ། །འོ་ན་བསྒོམ་ཞེས་བྱ་བའི་ཐ་སྙད་ཇི་ཙམ་ལ་གདགས་ཞེ་ན། མི་མཐུན་པ་དང་གཉེན་པོ་དབྱེར་མེད་དོན། །གང་གིས་ཤེས་ནས་རྩོལ་བ་ཀུན་སྤངས་ཏེ། །བཏང་སྙོམས་ཆེན་པོར་མ་བཅོས་ངང་བཞག་ན། །ཐ་སྙད་ཙམ་དུ་བསྒོམ་ཞེས་དེ་ལ་བྱ། །ཞེས་གསུངས་ཏེ། སྤང་བར་བྱ་བའི་མི་མཐུན་པའི་ཕྱོགས་དང་། བསྟེན་པར་བྱ་བའི་གཉེན་པོ་གཉིས་རང་བཞིན་གྱིས་དབྱེར་མེད་པར་ཤེས་པའི་དུས་ན། སྤང་བླང་གི་རྩོལ་བ་ཐམས་ཅད་ངང་གིས་ཞི་སྟེ། བཏང་སྙོམས་ཆེན་པོའི་ངང་ལ་བཞག་པ་ཙམ་ལ་ཐ་སྙད་དུ་སྒོམ་ཞེས་བྱའོ། །འོ་ན་སྔོན་གྱི་བག་ཆགས་ཀྱི་དབང་གིས་ཡུལ་གྱི་འཁྲུལ་སྣང་མངོན་སུམ་དུ་སྣང་བ་དང་། སེམས་ཀྱི་རྟོག་པ་བྱུང་ཚོར་སྣ་ཚོགས་སྐྱེ་བ་ཇི་ལྟར་བྱ་ཞེ་ན། སྐྱོན་དང་ཡོན་ཏན་གཉིས་པོ་མ་སྐྱེས་ཕྱིར། །རྣམ་པར་རྟོག་པའི་མཚན་མ་ཅི་བྱུང་ཡང་། །མ་བཀག་རང་བྱུང་མ་འབྲང་རང་ཞི་སྟེ། །མ་བཅོས་མ་བྱས་རང་གིས་ངང་གིས་གསལ། །ཞེས་གསུངས་ཏེ། སྐྱོན་དུ་བརྟགས་པའི་འཁྲུལ་སྣང་དུ་རྟོག་པ་དང་། ཡོན་ཏན་དུ་བརྟགས་པའི་སྣང་རྟོག་དང་བྲལ་བའི་ཡེ་ཤེས་གཉིས། རང་བཞིན་དབྱེར་མེད་པར་རྟོགས་པའི་དུས་ན། ཡུལ་གྱི་རྣམ་པ་གང་སྣང་། སེམས་ཀྱི་རྟོག་པ་ཅི་སྐྱེའང་། ཐེག་པ་འོག་མ་པ་ལྟར། སྣང་རྟོག་ལ་སྐྱོན་དུ་བལྟས་ཏེ་དགག་ཏུ་མེད་པས། མ་བཀག་རང་བྱུང་ཞེས་བྱ། སེམས་ཅན་ཕལ་པ་ལྟར་མཚན་མའི་རྗེས་སུ་འབྲང་དུ་མེད་པས་མ་འབྲང་རང་ཞི་ཞེས་བྱ་སྟེ། དེ་བས་ན་བྱང་ཆུབ་སེམས་ཀྱི་རང་བཞིན་ནི། རྐྱེན་རྩོལ་བ་གཞན་གྱིས་མ་བཅོས་ཤིང་། སུས་ཀྱང་མ་བྱས་རང་གི་ངང་གིས་གསལ་བར་གཞག་གོ། །ཞེས་བྱ་བའི་དོན་ཏོ། །དོན་འདི་ཉིད་བྱང་ཆུབ་ཀྱི་སེམས་བསྒོམ་པ་ལས་ཀྱང་གསུངས་ཏེ། དེ་ལྟར་དངོས་པོའི་མཐའ་རྣམས་བརྟགས་དང་རང་བཞིན་སྒྱུ་མའང་མེད་འགྱུར་ཕྱིར། །ཡོད་ལ་ལྟོས་པའི་མེད་པའང་མེད་དེ་མེད་པའང་མེད། །མཐའ་རྣམས་མེད་ཕྱིར་དབུས་མེད་དབུས་ལའང་གནས་པར་མི་བྱེད་དོ། །ལྡང་དང་མི་ལྡང་ཆེད་དུ་མི་སྤོང་སེམས་རྟེན་མི་འཆའ་མངོན་དུ་མིན། །ཞེས་གསུངས་ཏེ། དེ་ལྟར་ཞེས་བྱ་བའི་སྒྲ་ནི། གོང་དུ་ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཐམས་ཅད་མ་གྲུབ་པར་བསྟན་པས། དོན་དམ་པ་དང་ཀུན་རྫོབ་ཀྱི་བདེན་པ་ཞེས་བྱ་བའང་བཀྲི་བའི་ཐ་སྙད་ཙམ་ཡིན་ཏེ། ངེས་པའི་དོན་ལ་ནི་བདེན་པ་གཉིས་སུའང་གཞག་ཏུ་མེད་པར་བསྟན་པ་དེ་ལྟར། དངོས་པོ་རྣམས་ཀྱི་མཐའ་ཞིབ་མོའི་བློས་བརྟགས་ན། ཀུན་རྫོབ་ཀྱི་རང་བཞིན་སྒྱུ་མ་ཙམ་དུའང་མེད་པར་འགྱུར་ན། ཡང་དག་པར་ཡོད་པ་ལྟ་ག་ལ་འགྲུབ་སྟེ། དེ་བས་ན་ཡོད་པའི་ཐ་སྙད་ཀྱི་དོན་ཐམས་ཅད་མ་གྲུབ་ན། དེ་ལ་ལྟོས་པའི་མེད་པའང་མི་འགྲུབ་བོ། །གཞན་ཡང་རང་བཞིན་མེད་པ་དང་མ་སྐྱེས་པའི་སྒྲས་བསྟན་པའི་དོན། སྤྲོས་པ་ཉེ་བར་ཞི་བ་ཞིག་བསྒྲུབ་ཏུའང་མེད་པས། མེད་པའི་མེད་པའང་མེད་ཅེས་སྨོས་སོ། །དེ་ལྟར་མཐའ་མེད་ན་དབུས་ཀྱང་མི་འགྲུབ་ལ། དབུས་ལ་གནས་པའང་མི་གྲུབ་བོ། །ལྟ་བས་དེ་ལྟར་རྟོགས་ནས་དེ་དང་མཐུན་པར་བློ་གཞག་པའི་ཐབས་གསུངས་པ། ལྡང་མི་ལྡང་ཆེད་དུ་མི་སྤོང་སེམས་གཏན་མི་འཆའ་མངོན་དུ་མིན། །ཞེས་གསུངས་པ་སྟེ། མི་མཐུན་པ་དང་གཉེན་པོ་དབྱེར་མེད་པར་རྟོགས་པས་མཚན་མ་དང་རྟོག་པ་ལྡང་བ་ལ་ཆེད་དུ་མི་སྤོང་། མི་ལྡང་བ་ལ་སེམས་ཀྱི་རྟེན་མི་འཆའ། ཐོབ་པར་འདོད་པའི་དོན་མངོན་དུ་མི་བྱེད་དོ། །བླང་དོར་དང་བྲལ་བར་གཞག་པའི་གཏན་ཚིགས་གསུངས་པ། འཇམ་དཔལ་མ་ཡིན་རྡུལ་ཙམ་གཡོ་བ་དེ་ཉིད་དེ་ཡིན་དེར་མི་གནས། །ཞེས་གསུངས་པ་སྟེ། ཆོས་ཉིད་མཉམ་པ་ཉིད་མ་ཡིན་པའི་ལོག་རྟོག་རྡུལ་ཙམ་གཡོ་བར་ཚོར་ནའང་། དེ་ཉིད་ཆོས་ཉིད་ཡིན་པའི་ཕྱིར། མཚན་མ་དང་རྟོག་པ་ལ་སྤང་བར་མི་རྩོལ་ལོ། །ཆོས་ཉིད་ལ་ངོ་བོ་ཉིད་མེད་པའི་ཕྱིར་དེར་མི་གནས། ཞེས་གསུངས་ཏེ། རྟོག་པ་མི་ལྡང་བ་ལ་སེམས་ཀྱི་རྟེན་མི་འཆའ་འོ། །མངོན་དུ་བྱར་མེད་པའང་། བསྒོམ་པའི་ས་མི་རྙེད་ཕྱིར་བསྒོམས་པས་རྙེད་པར་མི་འགྱུར་ཏེ། ཞེས་གསུངས་པ་སྟེ། ཐ་སྙད་དུ་སེམས་ཀྱིས་ཆོས་ཉིད་སྒོམ་ཞེས་བརྟགས་ཀྱང་། སེམས་དངོས་པོར་མ་གྲུབ་པ་ཉིད་ལ་ཆོས་ཉིད་ཅེས་བརྗོད་པ་ཡིན་པས། གང་གིས་གང་ལ་བསྒོམས་པས་འབྲས་བུ་ཅི་ཞིག་འཐོབ་སྟེ། དེ་བས་ན་མངོན་དུ་བྱར་མེད་དོ། །འོ་ན་སྔོན་གྱི་བག་ཆགས་ཀྱི་དབང་གིས་འཁྲུལ་སྣང་གི་སྤྱོད་ཡུལ་མངོན་སུམ་དུ་སྣང་བ་དང་། འདུ་བྱེད་ཀྱི་རྟོག་པ་སྣ་ཚོགས་སྐྱེ་བ་ཇི་ལྟར་བྱ་ཞེ་ན། དེ་ལ་སྣང་བའི་རང་བཞིན་ཤེས་ན་སྐྱོན་གྱི་ངོ་བོ་ཉིད་མེད་པའི་ཕྱིར་སྐྱོན་བསལ་དུ་མེད་པར་བསྟན་པ། སེམས་ཀྱི་སྤྱོད་ཡུལ་ཤེས་པ་དེ་ལ་དེ་དག་ཆོས་རྣམས་ཀྱི་ནི་ཆོས་ཉིད་ཡིན། ཞེས་གསུངས་ཏེ། སེམས་ཀྱི་སྤྱོད་ཡུལ་ཕྱིན་ཅི་མ་ལོག་པར་ཤེས་པ་དེ་ལ། ཅིར་སྣང་བ་དེ་དག་ཉིད་ཆོས་ཉིད་ལས་གུད་དུ་གྱུར་པ་མེད་པས་སྐྱོན་དུ་གཟུང་དུ་མེད་དོ། །སྣང་བ་ལ་སྐྱོན་མེད་ན་སེམས་ཅན་གང་གིས་བསླུས་ཏེ་འཁོར་ཞེ་ན། སེམས་ཅན་ནི་སྣང་བ་ལ་དངོས་པོའི་རྣམ་པར་ཞེན་ཅིང་། མཚན་མའི་རྣམ་པར་འཛིན་པས་འཁོར་ལ། སྣང་བ་ལ་དངོས་པོ་མེད་པར་རྟོགས་ཏེ། དེ་ལྟ་བུའི་རྣམ་པ་དང་བཅས་པས་སྣང་བའི་རྗེས་སུ་མི་འབྲང་བར་བསྟན་པའི་ཕྱིར། རྣམ་བྲལ་གང་ལ་མཆོག་དང་ཐ་མ་མེད་པའི་ལམ་མཆོག་འདི་བསྒོམ་མོ། །ཞེས་གསུངས་ཏེ། སྣང་བ་ལ་དངོས་པོ་མེད་པར་རྟོགས་པས་སྣང་བའི་རྗེས་སུ་མི་འབྲང་ངོ་། །དེ་བཞིན་དུ་སེམས་ཀྱི་རྟོག་པ་ཅི་སྐྱེའང་སྐྱོན་གྱི་དངོས་པོ་མེད་པས་མི་དགག་སྟེ། རང་བྱུང་རང་གི་ངོ་བོ་མ་གྲུབ་པས་རྗེས་སུ་མི་འབྲང་སྟེ་རང་ཞིར་གཞག་པའི་དོན་གསུངས་པ། འདུ་བྱེད་མ་སྐྱེས་ཆོས་ཀུན་འབྱུང་མེད་ཤིན་ཏུ་ཆོས་རྣམས་མྱ་ངན་འདས། །དངོས་མེད་དེ་ཚེ་ཀུན་ཀྱང་ཆོས་ཀྱི་དབྱིངས་ཤེས་དགྲ་བཅོམ་རབ་འབྱོར་ཡིན། །ཞེས་གསུངས་པ་སྟེ། མངོན་པར་འདུ་བྱེད་པའི་ཆོས་ཐམས་ཅད་རང་བཞིན་གྱིས་སྐྱེ་བ་མེད་པ་ཡིན་པས། ཆོས་གང་ཡང་འབྱུང་བ་མེད་པ་དེ་རང་བཞིན་གྱིས་མྱ་ངན་ལས་འདས་པའོ། །དེ་ལྟར་དངོས་པོ་གང་ཡང་མེད་པར་རྟོགས་པའི་ཚེ། སྣང་རྟོག་ཀུན་ཀྱང་ཆོས་ཀྱི་དབྱིངས་སུ་ཤེས་པ་ན། དགྲ་བཅོམ་རབ་འབྱོར་གྱི་བློ་དང་འདྲའོ། །ཞེས་སོ། །འདི་དཔེ་གསུངས་པ། ནམ་མཁའ་མི་དམིགས་མིང་ཙམ་དགེ་དང་མི་དགེར་འབྱེད་མེད་སྐྱེ་བ་མེད། ཅེས་གསུངས་ཏེ། དཔེར་ན་ནམ་མཁའ་ཞེས་མིང་དུ་བརྗོད་པ་ཙམ་དུ་ཟད་དེ། ངོ་བོ་ཉིད་དམིགས་སུ་མེད་དོ། །དེ་བཞིན་དུ་དགེ་བ་དང་མི་དགེ་བ་ལ་སོགས་པའང་ངོ་བོ་ཉིད་པས། དགག་ཏུའང་མེད་ལ་རྗེས་སུ་འབྲང་དུའང་མེད་དོ། །དེ་ལྟ་བས་ན་དོན་དེ་ལྟ་བུ་ལ་བློ་མཉམ་པར་འཇོག་པའི་ཚེ། དམིགས་པ་འདི་རྣམས་དང་བྲལ་བར་བྱ་བར་གསུངས་པ། རྩོལ་བར་ཡིད་ལ་མི་བྱེད་གང་ལའང་སེམས་མེད་ཤེས་དང་མི་ཤེས་བྲལ། དྲན་དང་འབྱེད་མེད་སྤོང་ལེན་གང་ལའང་དགའ་དང་མཚུངས་མེད་མི་དམིགས་ཤིང་། མཉམ་གནས་གཉིས་སུ་བརྟག་མེད་བརྗོད་བྲལ་བྱ་དང་མི་བྱ་མེད་དེ་སོགས་འབྲི་མེད། ཅེས་གསུངས་ཏེ། སྐྱོན་དང་ཡོན་ཏན་གྱི་དངོས་པོ་མ་གྲུབ་པས་སྤོང་ལེན་གྱི་རྩོལ་བར་ཡིད་ལ་མི་བྱེད། མངོན་དུ་བྱ་བའི་ཆོས་ཉིད་མ་གྲུབ་པས། གང་ལའང་སེམས་པ་མེད། སེམས་ཉིད་ཀྱང་མ་གྲུབ་པས་ཤེས་རིག་གི་མཚན་ཉིད་ཀྱང་མ་ཡིན། བེམས་པོའི་མཚན་ཉིད་ཀྱང་མ་ཡིན་པས་ཤེས་དང་མི་ཤེས་བྲལ། མི་མཐུན་པ་དང་གཉེན་པོ་དབྱེར་མེད་པས། །གཉེན་པོ་དྲན་པར་བྱ་བ་ཡང་མེད་ཅིང་སྤོང་ལེན་གཉིའ་ག་ལ་ཡང་དགའ་བ་མེད། གཉིའ་ག་མཉམ་ཞིང་མཚུངས་པར་གཞག་པའང་མེད་དེ་ཅིར་ཡང་མི་དམིགས་ཤིང་། འདོད་པ་དང་མི་འདོད་པ་མེད་པས་མཉམ་པར་གནས། ཐ་དད་དུ་མི་འབྱེད་པས་གཉིས་སུ་བརྟག་པ་མེད། ཐ་སྙད་ལས་འདས་པས་བརྗོད་པ་དང་བྲལ། དོན་དུ་གཉེར་བ་མེད་པས་བྱ་བ་མེད། སྒོ་གསུམ་གྱི་ལས་ལ་སྐྱོན་དུ་མི་ལྟ་བས་མི་བྱ་བའང་མེད་དེ། ཚོགས་རྣམ་པ་གཉིས་རྫོགས་པར་བྱ་བའམ། སྒྲིབ་པ་བྲི་བར་བྱ་བའང་མེད་དེ། ཤེས་རབ་ཀྱི་ཕ་རོལ་དུ་ཕྱིན་པ་ལས། བྲི་བ་མེད་པ་གང་བ་མེད་པའོ། །ཞེས་གསུངས་པ་ལྟ་བུའོ། །དོན་འདི་ཉིད་ཁྱུང་ཆེན་ལས་ཀྱང་གསུངས་ཏེ། འདི་སྐད་དུ། གཏང་ངོ་གཞག་གོ་རང་བཞིན་ཏེ། །འདོད་པ་མེད་ཅིང་ལེན་པའང་མེད། །བྲོད་བ་རྡུལ་ཙམ་མི་སྐྱེད་ཅིང་། །ཁྱུང་ཆེན་ནམ་མཁར་ལྡིངས་པ་བཞིན། །སྤྲོས་པ་མེད་ཅིང་བསྡུ་བའང་མེད། །སྟོར་བར་མི་དོགས་གཟའ་བའང་མེད། །རྒྱ་མཚོ་འདྲ་བར་ཡེ་གནས་ལ། །ཆོས་རྣམས་སྣ་ཚོགས་འབྱུང་བར་བྱེད། །ཞེས་གསུངས་ཏེ། བསྒྲུབ་པར་བྱ་བ་མེད་པས་གཏང་ངོ་། །དོར་བར་བྱ་བ་མེད་པས་གཞོག་གོ། །མངོན་དུ་བྱ་བའི་ཡུལ་མེད་པས་འདོད་པ་མེད། དངོས་པོ་ཉིད་མ་གྲུབ་པས་ལེན་པའང་མེད། གང་ལའང་དགའ་བ་མེད་པས་བྲོད་པ་རྡུལ་ཙམ་མི་སྐྱེད་ཅིང་། དཔེར་ཁྱུང་ཆེན་ནམ་མཁའ་ལྡིང་བ་འདབ་ཤོག་སྤྲོ་བསྡུ་མེད་བཞིན་དུ། སྤྱི་རྒྱ་རླབས་ཀྱིས་ཆོད་དེ་ཅི་ལ་ཡང་མི་རྟེན་བཞིན་དུ་གཡང་སར་ལྟུང་བའང་མེད་པ་བཞིན་ནོ། །དངོས་པོ་མེད་པས་འཇིགས་པ་མེད་པས་སྟོར་བར་མི་དོགས། དེ་ཉིད་ཀྱི་ཕྱིར་གཟའ་གཏད་ཀྱི་ཡུལ་ཡང་མེད་དེ། འོན་ཀྱང་དེ་དག་གིས་འཇིགས་པར་མི་བྱའོ། །གང་གི་ཕྱིར་འཇིགས་པ་ཐམས་ཅད་སེལ་བ་ནི་སྟོང་པ་ཉིད་ཡིན་ཏེ། དངོས་པོར་འཛིན་པས་ནི་སུ་ལ་ཡང་མི་བསྐྱབས་ཤིང་གྲོལ་བར་མ་བྱས་སོ། །ཇི་ལྟ་ཞེ་ན། ཉན་ཐོས་ཀྱང་བདག་མེད་པར་རྟོགས་པས་གྲོལ་གྱི། གཟུང་འཛིན་ཡོད་པར་ལྟ་བས་མ་གྲོལ་ལོ། །རང་རྒྱལ་བའང་གཟུང་བ་མེད་པར་རྟོགས་པས་གྲོལ་གྱི། འཛིན་པ་ཡོད་པར་ལྟ་བས་མ་གྲོལ་ལོ། །རྣལ་འབྱོར་སྤྱོད་པའང་གཟུང་འཛིན་མེད་པར་རྟོགས་པས་གྲོལ་གྱི་སེམས་ཡོད་པར་ལྟ་བས་མ་གྲོལ་ལོ། །དབུ་མ་པའང་དོན་དམ་པ་མེད་པར་རྟོགས་པས་གྲོལ་གྱི། ཀུན་རྫོབ་ཡོད་པར་ལྟ་བས་ནི་མ་གྲོལ་ལོ། །འོ་ན་དངོས་པོར་ཅུང་ཟད་ཀྱང་མི་ལྟ་ན། ཐབས་ཀྱི་སྤྱོད་པ་རྒྱུན་ཆད་དེ་སྙིང་རྗེ་དང་བྲལ་བས། ཤེས་རབ་དང་སྙིང་རྗེ་ཟུང་དུ་མ་འབྲེལ་ན་ཐར་བར་ཡང་མི་འགྱུར་རོ་ཞེ་ན། སྙིང་རྗེ་ནི་སེམས་ཅན་ལ་དམིགས་ནས་སྐྱེ་སྟེ། འོན་ཀྱང་སེམས་ཅན་གྱི་རྫས་དངོས་པོར་གྲུབ་པར་བལྟ་ནི་མི་དགོས་ཏེ། སེམས་ཅན་མ་གྲུབ་བཞིན་དུ་སེམས་ཅན་བདེ་སྡུག་ཏུ་སྣང་བ་རྣམས་ལ། སྒྱུ་མ་ཙམ་དུ་ཕན་འདོགས་པ་ལ་ཞུགས་པས། མ་ཞེན་མི་ངལ་བའི་སྙིང་རྗེ་ཆེན་པོ་དག་པར་འགྱུར་རོ། །དེ་བས་ན་ཐབས་ཀྱི་སྤྱོད་པ་ལ་དངོས་པོར་བལྟ་མི་དགོས་སོ། །དེའི་ཕྱིར་ན་སྟོང་པ་ཉིད་ནི་འཇིགས་པ་ཐམས་ཅད་སེལ་བ་ཡིན་གྱིས་འདི་ལ་སྐྲག་པར་མི་བྱའོ། རྒྱ་མཚོ་འདྲ་བ་ཡེ་གནས་ལ། ། ཆོས་རྣམས་སྣ་ཚོགས་འབྱུང་བར་བྱེད། །ཅེས་བྱ་བ་ནི། རྒྱ་མཚོ་ལས་རླབས་འབྱུང་རླབས་ཉིད་རྒྱ་མཚོ་ཡིན་པ་བཞིན་དུ། སྟོང་པ་ཉིད་ལས་མ་གཡོས་བཞིན་དུ་མཚན་མ་སྣ་ཚོགས་སུ་སྣང་བ། སྣང་བ་དེ་ཉིད་སྟོང་པ་ཡིན་པས། མ་བཀག་སྟེ་རང་བྱུང་། མ་བླངས་ཏེ་རང་ཞིར་གཞག་གོ། །ཡང་འདི་ཉིད་ལས། མངོན་སུམ་ཀུན་ཏུ་མི་རྟོག་ཡངས་པའི་སྙིང་པོ་ལ། །རྣམ་དག་ལམ་འདིར་ཞུགས་ན་མཉམ་པའི་རྒྱལ་པོ་ཐོབ། །ཅེས་གསུངས་ཏེ། སྣང་རྟོག་མངོན་སུམ་དུ་སྣང་ཡང་སྣང་བ་ཉིད་ན་གཉིའ་ག་མ་གྲུབ་པས་བླང་དོར་མེད་ལ། སེམས་ལའང་དངོས་པོ་མེད་པས་རྟོག་པ་ངང་གིས་མེད་དེ། རང་བཞིན་གྱིས་གནས་སུ་བྱ་བ་མེད་པས་ཡངས་པའི་སྙིང་པོ་ལ་ཞེས་བྱའོ། །འཛིན་པ་ཐམས་ཅད་དང་བྲལ་བས་རྣམ་པར་དག་པའི་ལམ་དུ་ཞུགས་པའོ། །དེ་ལྟ་བུའི་བློ་དང་ལྡན་ན་མཉམ་པའི་རྒྱལ་པོ་སངས་རྒྱས་ཐོབ་པར་འགྱུར་གྱི། བླང་དོར་གྱི་བློས་ཐོབ་པར་མི་འགྱུར་རོ། །ཞེས་བྱ་བ་ཡིན་ནོ། །ཚུལ་འདི་ཉིད་རྩལ་ཆེན་སྤྲུགས་པ་ལས་ཀྱང་གསུངས་ཏེ། འདི་སྐད་དུ། བསྒྲུབ་མེད་རྩལ་སྤྲུགས་སྨོན་པ་མེད་པ་ཡི། །བྱ་མེད་ལྷུན་རྫོགས་སྔ་མའི་དེ་བཞིན་ཉིད། །རྟོགས་སྤྱོད་རྣམ་དག་བདེ་ཆེན་རང་བཞིན་ལ། །ལོག་རྟོག་བྱིས་པའི་སྤྱོད་པས་ཅི་ཞིག་བསླུ། །གཉིས་མེད་བདེ་ཆེན་སེམས་ཅན་ཀུན་སྤྱོད་ལ། །འཁྲུལ་པའི་ནོར་བའི་ལམ་དུ་བརྟགས་པའང་། །གོང་དུ་བསྟན་པའི་ལམ་ཆེན་དེ་ལ་མི་གཉིས་པས། །མཉམ་པར་ཤེས་ན་སངས་རྒྱས་ཀུན་གྱི་རྗེ། །ཞེས་གསུངས་ཏེ། སེམས་ཅན་དང་སངས་རྒྱས་རང་བཞིན་དབྱེར་མེད་པའི་ཕྱིར། ལམ་གྱིས་བཅོས་སུ་མེད་པས་བསྒྲུབ་ཏུ་མེད་དེ། ཤེས་པ་དང་ཤེས་བྱ་ལ་བོགས་དབྱུང་དུ་མེད་པས་རྩལ་སྤྲུགས་སོ། །ཡོན་ཏན་གྱི་ཁྱད་པར་གོང་དུ་བགྲོད་དུ་མེད་པས་སྨོན་པ་མེད་དོ། །མི་མཐུན་པ་དང་གཉེན་པོའི་དབྱེར་མེད་པས་བྱ་བ་མེད་དོ། །སངས་རྒྱས་ཀྱི་ཆོས་ཐམས་ཅད་ཡེ་ནས་གནས་པས་ལྷུན་གྱིས་རྫོགས་ཏེ། སྔ་མ་དེ་བཞིན་ཉིད་ཅེས་བྱའོ། །དེ་ལྟ་བུའི་དོན་ལ་འཁྲུལ་པའི་བློས་བསླད་ཀྱང་རང་བཞིན་འགྱུར་བ་མེད་དེ། དེའི་ཕྱིར། རྟོག་སྤྱོད་རྣམ་དག་བདེ་ཆེན་རང་བཞིན་ལ། །ལོག་རྟོག་བྱིས་པའི་སྤྱོད་པས་ཅི་ཞིག་བསླུ། །ཞེས་གསུངས་ཏེ། རྟོག་པའི་སེམས་ཉིད་ངོ་བོ་ཉིད་ཀྱིས་མ་གྲུབ་ན། དེས་བསྐྱོད་པའི་འདུ་བྱེད་ཀྱི་སྤྱོད་པ་རྣམས་ག་ལ་འགྲུབ་སྟེ། དེའི་ཕྱིར་སེམས་ཉིད་གཉིས་སུ་མེད་པའི་བྱང་ཆུབ་ཀྱི་སེམས་བདེ་བ་ཆེན་པོའོ། །དེ་ལ་བསླད་པས་ག་ལ་འགྱུར་ཏེ། སྨིགས་རྒྱུའི་ཕུང་པོས་ནམ་མཁའ་བསླད་དུ་མེད་པ་བཞིན་ནོ། །བསླད་པ་ལྟ་བུར་སྣང་བ་དེ་ཉིད་རྣམ་པར་དག་པའི་ལམ་པོ་ཆེ་ཡིན་ཏེ། ཇི་ལྟར་སྨིགས་རྒྱུ་དང་ནམ་མཁའ་ལ་རང་བཞིན་ཐ་དད་མེད་དེ་དབྱེར་མེད་པ་བཞིན། འཁྲུལ་པས་འཁོར་བའི་ལམ་དུ་བརྟགས་པ་དང་། མ་འཁྲུལ་པས་ཐར་པའི་ལམ་དུ་བརྟགས་པ་གཉིའ་གའང་རང་བཞིན་དབྱེར་མེད་པའི་ཕྱིར། རྣལ་འབྱོར་གྱི་སྐྱེས་བུ་གང་གིས་དོན་དེ་རྟོགས་ཤིང་རྡེང་དུ་གྱུར་ཏེ། དེའི་ངང་ལ་གནས་ན་ཀུན་ཏུ་བཟང་པོ་རྡོ་རྗེ་སེམས་དཔའ་ཉིད་དང་དགོངས་པ་མཐུན་པའི་ཕྱིར། མཉམ་པར་ཤེས་ན་སངས་རྒྱས་ཀུན་གྱི་རྗེ། །ཞེས་གསུངས་པ་ཡིན་ནོ། །ཚུལ་འདི་ཉིད་རྡོ་རྗེ་ཚིག་དྲུག་པ་ལས་ཀྱང་། ཟིན་པས་རྩོལ་བའི་ནད་སྤངས་ཏེ། །ལྷུན་གྱིས་གནས་པས་བཞག་པ་ཡིན། །ཞེས་གསུངས་ཏེ། ཆོས་ཐམས་ཅད་ཀྱི་རང་བཞིན་ནི་ཀུན་ཏུ་བཟང་པོའི་སྐུ་གསུང་ཐུགས་རྡོ་རྗེ་བདེ་བ་ཆེན་པོའི་ངང་དུ་རྫོགས་ཟིན་པའི་ཕྱིར། མི་མཐུན་པ་དང་གཉེན་པོ་བླང་དོར་གྱི་ནད་སྤངས་ཏེ། བཏང་སྙོམས་ཆེན་པོའི་ངང་ལ་ལྷུན་གྱིས་གནས་པ་འདི་ནི། མཉམ་པར་བཞག་པ་ཅེས་བྱ་བའི་དོན་ཡིན་ནོ། །རྡོ་རྗེ་སེམས་དཔའ་ནམ་མཁའ་ཆེ་ལས་ཀྱང་། འདི་སྐད་དུ། རྡོ་རྗེ་སེམས་དཔའ་ནམ་མཁའ་ཆེ། །ཀུན་བཟང་ཡངས་པ་ཆོས་ཀྱི་དབྱིངས། །རྣམ་དག་ལམ་ཆེན་ཀུན་སྒྲོལ་ཕྱིར། །མི་སྐྱེ་མི་འགག་ཅིར་མི་དགོངས། །ཞེས་གསུངས་ཏེ། རྡོ་རྗེ་སེམས་དཔའ་ནི་བྱང་ཆུབ་སེམས་ཀྱི་རང་བཞིན་དུས་གསུམ་དུ་འདུས་མ་བྱས་ཤིང་། འཕོ་འགྱུར་གྱི་གནས་མེད་དེ། ཤིན་ཏུ་བརྟན་པའི་ཕྱིར་རྡོ་རྗེ་སེམས་དཔའ་འོ། །སེམས་དཔའི་སྒྲ་རྟོགས་པ་ལ་ཡང་འཇུག་སྟེ། དོན་དེ་ལྟ་བུ་ཉིད་རང་བྱུང་གི་ཡེ་ཤེས་ཆེན་པོས་དབང་བསྐུར་ཏེ། རང་བཞིན་གྱིས་འོད་གསལ་བའི་ཕྱིར་ཡང་རྡོ་རྗེ་སེམས་དཔའ་འོ། །ནམ་མཁའ་ནི་དངོས་པོ་མེད་བཞིན་དུ་ཀུན་ལ་ཁྱབ་པའི་དཔེ། ཆེ་བ་ནི་བྱང་ཆུབ་སེམས་ཀྱི་ཡོན་ཏན་ཏེ། བྱང་ཆུབ་ཀྱི་སེམས་རྡོ་རྗེ་སེམས་དཔའ་དེའང་རྟག་ཏུ་ཆེ་བ་རྣམ་པ་ལྔ་དང་ལྡན་ནས་བཞུགས་སོ། །ཞེས་བྱ་བའི་དོན་ཏོ། །མདོར་བསྡུ་ན། གཟུགས་ཐམས་ཅད་ཀྱི་རང་བཞིན་ནམ་མཁའི་ངོ་བོ་ཉིད་ཡིན་པ་དེ་བཞིན་དུ། ཆོས་ཐམས་ཅད་ཀྱི་རང་བཞིན་རྡོ་རྗེ་སེམས་དཔའི་རང་བཞིན་དུ་སངས་རྒྱས་སོ། །ཞེས་བྱ་བའི་དོན་ཏོ། །བྱང་ཆུབ་ཀྱི་སེམས་ཀུན་ཏུ་བཟང་པོའི་སྒྲས་ཆོས་ཐམས་ཅད་དེའི་རང་བཞིན་དུ་སངས་རྒྱས་པར་བསྟན་པ། ཀུན་བཟང་ཡངས་པ་ཆོས་ཀྱི་དབྱིངས། །ཞེས་བྱ་སྟེ། དེ་ལ་ཀུན་ཞེས་བྱ་བའི་སྒྲ་ནི་མ་འདྲེས་པ་དང་ཡོངས་སུ་རྫོགས་པའི་ཆོས་ཐམས་ཅད་དེ། དེ་ལ་མ་འདྲེས་པ་ནི་སྣ་ཚོགས་སུ་སྣང་བ། ཡོངས་སུ་རྫོགས་པ་ནི་རང་བཞིན་མི་གཉིས་པའོ། །དེ་དག་ཐམས་ཅད་ཀྱི་ཐམས་ཅད་དུ་ངན་ཅིང་དོར་བར་བྱ་བ་མེད་པས་ཀུན་ཏུ་བཟང་པོའོ། །ཆོས་ཐམས་ཅད་ཀྱི་ངོ་བོ་ཉིད་དེ་ཡིན་ཏེ། དཔེར་ན་ནམ་མཁའ་ནི་གཟུགས་ཅན་ཐམས་ཅད་ཀྱི་རང་བཞིན་དུ་གནས་ཤིང་གོ་འབྱེད་པ་ཡིན་ཡང་དོགས་པ་མེད་པ་བཞིན་དུ། ཀུན་ཏུ་བཟང་པོའི་རང་བཞིན་དུ་མ་གྱུར་པའམ་མ་འདུས་པ་མེད་པས་ཡངས་པ་སྟེ། དེའི་ཕྱིར་ཆོས་ཀྱི་དབྱིངས་སོ། །མདོར་བསྡུ་ན། ཆོས་ཐམས་ཅད་ནི་བྱང་ཆུབ་ཀྱི་རྡོ་རྗེ་སེམས་དཔའི་རང་བཞིན་ནམ། བྱང་ཆུབ་ཀྱི་སེམས་ཀུན་ཏུ་བཟང་པོའི་རང་བཞིན་དུ་སངས་རྒྱས་ཏེ། ཐམས་ཅད་ནས་ཐམས་ཅད་དུ་ཆེ་ཞིང་ཡངས་སོ། །དེ་བས་ན་རྡོ་རྗེ་སེམས་དཔའ་དང་ཀུན་ཏུ་བཟང་པོའང་དོན་འདྲ་ལ། ཆེ་བ་དང་ཡངས་པའང་དོན་འདྲ་སྟེ། ཇི་སྐད་དུ། ཀུན་ཏུ་བཟང་པོ་རྡོ་རྗེ་སེམས་དཔའི་ངང་། །ཞེས་བྱ་བ་དང་། ཡངས་སོ་ཆའོ་ཆོས་ཆེན་པོ། ཞེས་གསུངས་པ་ལྟ་བུའོ། །དོན་དེ་ཉིད་ཁོ་ན་ལམ་པོ་ཆེན་པོ་ཡིན་ཏེ། ཐེག་པ་འོག་མ་ལྟར་ལམ་གཞན་ལ་སྦྱངས་པས། འབྲས་བུ་གཞན་ཐོབ་པ་ནི་མ་ཡིན་ཏེ། དེའི་རང་བཞིན་དུ་སེམས་ཅན་ཐམས་ཅད་རང་བཞིན་གྱིས་གྲོལ་བ་ཉིད་དུ་གནས་པ་ནི་ལམ་ཆེན་པོ་ཞེས་བྱ། དེ་ཉིད་རྣལ་འབྱོར་གྱི་སྐྱེས་བུ་གང་གིས་རྟོགས་ཤིང་རྡེང་དུ་གྱུར་པས། དཔལ་རྡོ་རྗེ་སེམས་དཔའ་འམ་ཀུན་ཏུ་བཟང་པོ་དང་མཉམ་པར་གྱུར་པ་ནི་གྲོལ་བ་ཞེས་ཀྱང་བྱ། ཡང་སངས་རྒྱས་ཞེས་ཀྱང་བྱ་སྟེ། དེ་ཉིད་ལས། དོན་རྣམས་ཇི་བཞིན་མི་བསྐྱེད་དེ། །བྱ་བ་མེད་པས་གྲོལ་བ་གྲོལ། །ཞེས་གསུངས་པ་དང་། རྨད་དུ་བྱུང་བ་ལས། རྨད་འབྱུང་བྱང་ཆུབ་འདི་རྟོགས་ཏེ། །རྡོ་རྗེ་སེམས་དཔའ་བདག་ཉིད་ཀྱང་། །རྡོ་རྗེ་གདན་ལ་ཡང་སངས་རྒྱས། །ཞེས་གསུངས་པ་ལྟ་བུའོ། །མདོར་ན་རྫོགས་པ་ཆེན་པོའི་གཞུང་གིས། བྱང་ཆུབ་སེམས་ཀྱི་རང་བཞིན་དང་། བྱང་ཆུབ་སེམས་ཀྱི་གཞག་ཐབས་གཉིས་ལ་ཚུལ་ཐ་དད་མེད་དེ། རང་བཞིན་ཇི་ལྟར་རྟོགས་པ་དེ་དང་མཐུན་པར་བློ་གནས་པ་ཙམ་དུ་ཟད་དོ། །དེ་ལ་མི་སྐྱེ་མི་འགག་ཅེས་བྱ་བ་ནི། བྱང་ཆུབ་སེམས་ལ་རྒྱུ་རྐྱེན་མེད་པས་སྐྱེ་འགག་གི་ངོ་བོ་ཉིད་མེད་པའོ། །ངོ་བོ་ཉིད་སྐྱེ་འགག་མེད་པ་ལ་རྟོག་པའི་གནས་མེད་པས། ཅིར་མི་དགོངས་ཞེས་གསུངས་པ་ཡིན་ནོ། །ཡང་འདི་ཉིད་ལས། སྣང་བ་མེད་པའི་ཆོས་ཉིད་ནི། །མ་བརྩལ་བཞག་པས་བསྒོམས་པ་ཡིན། །ཞེས་གསུངས་པའི་ཚུལ་ཡང་དེ་འདྲའོ། །བླང་དོར་མེད་ཅིང་བཅོས་སུ་མེད་པར་གཞག་པའི་ལམ་འདི་ནི། གཞན་ལས་ཀྱང་གསུངས་ཏེ། མཐའི་མུན་སེལ་སྒྲོན་མ་ལས། འགྲོ་ལ་སེམས་རྒྱུད་གཉིས་མི་འཆང་། །དེ་ནི་མ་སྐྱེས་རང་མི་དམིགས། །དེ་ལས་གཞན་པའི་སེམས་མེད་ཕྱིར། །འཆོས་ཤིང་གནས་པ་གང་ཞིག་ཡོད། །ཅེས་གསུངས་ཏེ། འགྲོ་བ་རྣམས་ལ་ཤེས་པའི་རྒྱུད་གཉིས་དང་མི་ལྡན་ལ། གཅིག་པོ་དེའི་རང་བཞིན་ནི་མ་སྐྱེས་པ་ཡིན་ཞིང་། འཁྲུལ་པའི་དབང་ཤེས་རིག་ཏུ་སྐྱེ་བར་སྣང་བའི་ཚེའང་རང་ལ་རང་མི་དམིགས་ཏེ། དེའི་ཕྱིར་འཆོས་ཤིང་གནས་པའི་ངོ་བོ་ཉིད་མེད་དོ། །འོ་ན་མ་བཅོས་ན་མཚན་མའི་སྐྱོན་གྱིས་མི་གོས་སམ་ཞེ་ན། འཁྲུལ་རྟོག་རྐྱེན་དང་ལྡན་གྱི་བར། །སྨིགས་རྒྱུ་ལྟ་བུར་སེམས་སྣང་ལ། །རང་བཞིན་ཤེས་པས་བཅོས་སུ་མེད། །མི་ཤེས་སྨིགས་རྒྱུ་འཆོས་པ་བཞིན། །ཞེས་གསུངས་ཏེ། ཇི་སྲིད་དུ་འཁྲུལ་རྟོག་གི་རྐྱེན་མ་ཟད་པ་དེ་སྲིད་དུ། དོན་མེད་ཀྱང་དོན་དུ་སྣང་བའི་ཤེས་པ་སྨིགས་རྒྱུ་ལྟ་བུར་སྐྱེ་བ་རྒྱུན་ཆད་པར་མི་འགྱུར་ལ། དེའི་རང་བཞིན་ཤེས་ན་བཅོས་སུ་མེད་དེ། བཅོས་སུ་མེད་བཞིན་དུ་འཆོས་པ་ལྟར་བྱེད་པ་ནི། སྨིགས་རྒྱུ་འཆོས་པར་འདོད་པ་དང་འདྲའོ། །དེས་ནི་སྣང་རྟོག་བཅོས་སུ་མེད་ཅིང་དགག་ཏུ་མེད་པར་བསྟན་ཏོ། །གཞན་ཡང་སྣང་རྟོག་གི་རྗེས་སུའང་འབྲེང་དུ་མེད་པར་སྟོན་ཏེ། མི་རྟོག་མཚན་མེད་སེམས་ཉིད་ཀྱིས། །མཚན་མ་མེད་ལའང་གནས་མི་བྱེད། །མཚན་མ་མེད་ལའང་མི་གནས་ན། །མཚན་མར་མི་གནས་སྨོས་ཅི་དགོས། །ཞེས་གསུངས་ཏེ། དངོས་པོ་ཚོལ་བའི་བློ་མི་སྐྱེད་པས་ན་རྣམ་པར་མི་རྟོགས་པའོ། །དེ་ལ་མཚན་མར་ཞེན་ཅིང་འཛིན་པ་དང་བྲལ་བས་མཚན་མ་མེད་པའི་སེམས་ཞེས་བྱ་སྟེ། དེ་ལྟ་བུའི་བློ་གང་གིས་མཚན་མེད་པ་ལའང་རྟེན་མི་འཆའ་ན། མཚན་མ་ལ་གནས་རྟེན་མི་འཆའ་བ་སྨོས་ཅི་ཞིག་དགོས་ཞེའོ། །ལྟ་བ་རིན་པོ་ཆེ་སྒྲོན་མ་ལས་ཀྱང་། སྒྱུ་མའི་མཚན་ཉིད་མ་བཀག་མངོན་སུམ་སྟེ། མཚན་མེད་རོ་གཅིག་དོན་དམ་དབྱིངས་སུ་རྟོགས། །ཞེས་གསུངས་པའི་ཚུལ་དེ་ཡང་འདྲའོ། །དེ་ལྟ་བུར་བཅོས་མེད་པར་གཞག་པའི་དོན་འདི། ལུས་སེམས་བཅོས་མེད་ཐབས་ཀྱི་སྒྲོན་མ་ལས་ཀྱང་གསུངས་པ། ཇི་ལྟར་མཚན་མེད་ནམ་མཁའ་ནི། །དམིགས་དང་མི་དམིགས་རྩོལ་དང་བྲལ། །དེ་བཞིན་སེམས་ཉིད་ནམ་མཁའ་ཡང་། །རང་བཞིན་གྱིས་ནི་དེ་ལྟའོ། །ལུས་ལ་སོགས་པའང་དེ་བཞིན་ཏེ། །རྩ་བ་མེད་ཕྱིར་གང་ལྟར་ཡང་། །གནས་པ་མེད་དེ་མི་གནས་ན། །མི་འགལ་ཙམ་དུ་གྱུར་པ་ཡིན། །ཞེས་གསུངས་ཏེ། དཔེར་ན་ནམ་མཁའ་ནི་རང་གི་མཚན་ཉིད་མེད་པའི་ཕྱིར། ཡུལ་ལ་དམིགས་པ་དང་མི་དམིགས་པའི་རྩོལ་བ་མེད་དོ། །དེ་བཞིན་དུ་སེམས་ཀྱང་རང་བཞིན་ཉིད་མེད་པའི་ཕྱིར་རྩོལ་བའི་གནས་མེད་དོ། །ལུས་ངག་གི་འདུ་བྱེད་ཐམས་ཅད་ཀྱང་དེ་འདྲའོ། །ཞེས་བྱ་བའི་དོན་ཏོ། །ད་ནི་བསམ་གཏན་གྱི་གལ་གེགས་ཅུང་ཟད་ཙམ་ཞིག་བསྟན་པར་བྱ་སྟེ། དེ་ཡང་སྤྱི་ནི་གོང་དུ་བསྟན་པའི་གོལ་སྒྲིབ་སུམ་ཅུ་པོ་ཉིད་ཀྱང་། ལྟ་སྒོམ་གཉིས་ཀྱི་གལ་གེགས་ཡིན་ན། དེ་ལས་འདིར་ཅུང་ཟད་ཉེ་བར་བསྟན་པའི་གལ་གེགས་སུ་གྱུར་པ། འཛིན་པ་ཆ་འཕྲ་ཞིང་དེ་ཉིད་གེགས་ཡིན་ནམ་མ་ཡིན་རྟོགས་པར་དཀའ་བ་ཅུང་ཟད་ཙམ་ཞིག་བཤད་དོ། །དེ་ཡང་བསམ་གཏན་གྱི་གལ་གེགས་གཙོར་སྟོན་པའི། བྱང་ཆུབ་ཀྱི་སེམས་ཡུལ་ཀུན་ལ་འཇུག་ལས། མི་གནས་དམིགས་པའི་ཡུལ་མེད་མི་རྟོག་ཆོས་ཀྱི་ལམ། །བསྔོ་བའི་ཆ་ཤས་འཕྲ་མོའི་ཡུལ་ལས་བྱུང་བ་སྟེ། །རྟོག་སྒོམ་ཆོས་ཀྱི་སྐུ་ནི་ཁྱད་པར་དོན་མེད་པས། །རང་བྱུང་ཡེ་ཤེས་མི་རྟོག་ཀུན་ཏུ་ཇི་བཞིན་གནས། །ཞེས་གསུངས་ཏེ། རྣམ་པར་མི་རྟོག་པའི་སྒོམ་ལུང་དག་ལས་འདི་སྐད་དུ། རྣམ་པར་མི་རྟོག་བསྒོམ་པའི་ཚེ། །སེམས་གནས་གང་ལའང་མི་རྟེན་ཅིང་མི་གནས། ཡུལ་ག་ལའང་མི་དམིགས། རྣམ་པ་ཇི་ལྟ་བུར་ཡང་མི་རྟོག་པར་སྒོམ་པ་ནི། ཆོས་ཀྱི་སྐུའི་ལམ་ཡིན་ནོ། །ཞེས་འདོད་དོ། །སེམས་ཀྱི་གནས་དང་དམིགས་པ་དང་རྣམ་པ་རྣམས་སུ་སྣང་ཞིང་རྟོག་པ་ནི་སྒྲིབ་སྐྱོན་དུ་བལྟས་ནས། དེ་དག་དང་བྲལ་བ་ནི་ཕྱིན་ཅི་མ་ལོག་པའི་ལམ་ཡིན་ནོ། །ཞེས་འདོད་པ་དེ་ཉིད། བསྔོ་བའི་ཆ་ཤས་འཕྲ་མོ་དང་མ་བྲལ་ཞིང་། ཡོངས་སུ་བསྔོ་བའི་ཡུལ་འདོད་པ་ལས་བྱུང་བ་སྟེ། དངོས་སུ་རྣམ་རྟོག་ཉིད་སྒོམ་པ་ཡིན་ནོ། །ཞེས་བྱ་བའི་དོན་ཏོ། །དེ་ལ་བསྔོ་བའི་ཆ་ཤས་ཞེས་བྱ་བ་ནི་སྨོན་པ་སྟེ་འདུན་པའི་མཚན་ཉིད་དོ། །ཆ་ཤས་འཕྲ་མོ་ཞེས་བྱ་བ་ནི། ཉན་ཐོས་ལྟར་དམིགས་པ་དང་བཅས་པའི་ས་ལ་གནས་པ་མ་ཡིན་ཡང་། རེ་སྨོན་གྱི་མཐའ་ལ་གནས་པས་བླང་དོར་གྱི་མཐར་ལྷུང་བའི་བློ་ཉིད་རྣམ་པར་རྟོག་པ་ཡིན་ནོ། །ཞེའོ། །འོ་ན་ཇི་ལྟར་གནས་པར་བྱ་ཞེ་ན། ཆོས་ཀྱི་སྐུ་ནི་ཁྱད་པར་དོན་མེད་པས། །ཞེས་བྱ་བ་ལ་སོགས་པ་གསུངས་ཏེ། ཆོས་ཀྱི་སྐུ་ཞེས་བྱ་བ་ནི། སེམས་ཅན་གྱི་འཁྲུལ་སྣང་ལས་ཁྱད་པར་དུ་དབྱུང་ཞིང་ལྷག་པར་འཕགས་པའི་དོན་གཞན་ཞིག་མེད་དེ། འཁྲུལ་སྣང་གི་ངོ་བོ་ཉིད་གང་ཡིན་པ་དེ་ཉིད་ངོ་བོ་ཉིད་ཀྱི་སྐུ་ཞེས་བྱ། ཆོས་ཀྱི་སྐུ་ཞེས་བྱ་བར་ཟད་དོ། །འཁྲུལ་སྣང་ཡང་སེམས་ཉིད་ཡིན་ལ། སེམས་རང་གི་ངོ་བོར་མ་གྲུབ་པས་རྟོག་པ་རང་བཞིན་གྱིས་མེད་དེ། དེ་བས་ན་ཡུལ་གྱི་རྣམ་པ་གང་སྣང་། སེམས་ཀྱི་རྟོག་པ་ཅི་སྐྱེའང་། སྣང་རྟོག་ཉིད་རང་བཞིན་གྱིས་འོད་གསལ་བས། རང་བྱུང་གི་ཡེ་ཤེས་རང་ཤར་བ་ཡིན་ནོ། །རྡོ་རྗེ་སེམས་དཔའ་ནམ་མཁའ་ཆེ་ལས་ཀྱང་། ནམ་མཁའི་རྟོག་པ་སྐྱེ་མེད་ཅིང་། །རྟོག་པ་དེ་ཉིད་ནམ་མཁའ་འདྲ། །མི་ཆགས་ནམ་མཁའི་བསྔོ་བ་ལས། །རང་དོན་ཆེན་པོ་ནམ་མཁའ་འབྱུང་། །ཞེས་གསུངས་ཏེ། དཔེར་ན་རི་བོང་གི་རྭ་ཞེས་བརྗོད་ན། རི་བོང་གི་རྭ་གཏན་མེད་པའི་ཕྱིར། མིང་དེས་ཀྱང་དོན་མ་བརྗོད་དེ་བརྫུན་པ་ཡིིན་ནོ། །དེ་བས་ན་རི་བོང་གི་རྭའི་དོན་དང་རི་བོང་གི་རྭའི་སྒྲ་གཉིས་དོན་མེད་པ་དང་དོན་ལ་བརྗོད་པ་མ་མྱོང་བས་དངོས་པོར་མ་གྲུབ་པར་འདྲའོ། །དེ་བཞིན་དུ་ནམ་མཁའ་དང་ནམ་མཁའ་ལ་དམིགས་ཏེ་སྐྱེས་པའི་རྟོག་པ་གཉིས་མ་སྐྱེས་བར་འགོ་མཉམ་སྟེ། གང་གི་ཕྱིར་ནམ་མཁའ་ནི་ངོ་བོ་ཉིད་མེད་པའི་ཕྱིར་མ་སྐྱེས། དེ་ལ་དམིགས་པའི་རྟོག་པ་ནི་ཡུལ་མེད་པའི་ཕྱིར་མ་སྐྱེས་ཏེ། དེ་བས་ན་ནམ་མཁའ་ལ་དམིགས་པ་སྙམ་བྱེད་པའི་རྟོག་པ་དེ་ནི། ནམ་མཁའ་ཉིད་དང་འདྲ་བར་སྐད་ཅིག་ཀྱང་སྐྱེ་མ་མྱོང་བ་ཡིན་ནོ། །དམིགས་པའི་རྐྱེན་ལས་ལྟོས་ནས་སྐྱེ་བར་སྣང་བའི་རྣམ་པར་རྟོག་པ་ཐམས་ཅད་ཀྱང་དམིགས་རྐྱེན་དོན་ལ་མེད་པས། ཚུལ་དེ་འདྲའོ། །དེ་བས་ན་ནམ་མཁའ་ལྟར་གང་ལའང་མ་ཆགས་པའི་བློ་ནི། ཅིའང་མི་འདོད་མི་སྤོང་བས་ནམ་མཁའི་བསྔོ་བ་ཞེས་བྱ་སྟེ། དེའི་ངང་ལ་གནས་ཤིང་རྡེང་དུ་གྱུར་ན་སངས་རྒྱས་སུ་འགྱུར་བས། རང་དོན་ཆེན་པོའི་ནམ་མཁའ་འབྱུང་། །ཞེས་བྱའོ། །ཚུལ་འདི་ཉིད་ལུས་སེམས་བཅོས་མེད་ཐབས་ཀྱི་སྒྲོན་མ་ལས་ཀྱང་གསུངས་ཏེ། སེམས་ནི་ཅི་ལའང་མི་དམིགས་དང་། །ཅི་ལའང་མི་གནས་ཞེས་བྱ་བ། །སེམས་ལ་གནས་དམིགས་སྐྱོན་སེལ་བའི། །སེམས་འཛིན་འཕྲ་མོ་དེ་ལ་ཡོད། །སྨིགས་རྒྱུ་བཞིན་དུ་སེམས་མེད་ན། །མི་གནས་མི་དམིགས་བྱེད་པ་གང་། །ནམ་མཁའ་རང་ལ་མ་གནས་ཞེས། །བསྒོ་བ་དོན་དང་ལྡན་པ་ཡིན། །ཞེས་གསུངས་ཏེ། དཔེར་ན་སྨིགས་རྒྱུའི་རང་བཞིན་ནམ་མཁའ་ཡིན་པའི་ཚེ། སྨིགས་རྒྱུ་ལ་བསམ་སྟེའང་། སྨིགས་རྒྱུ་ཁྱོད་རྟེན་གང་ལ་ཡང་མ་གནས་ཤིག །ཡུལ་གང་ལའང་མ་དམིགས་ཤིག །ཅེས་གཞན་གྱིས་བསྒོ་བར་མི་རིགས་ལ། ནམ་མཁའ་ལ་དམིགས་ཏེའང་། ནམ་མཁའ་ཁྱོད་ནམ་མཁའི་རང་བཞིན་དུའང་མ་གནས་ཤིག །ཅེས་གཞན་གྱིས་བསྒོ་བར་མི་རིགས་སོ། །དེ་བཞིན་དུ་སེམས་འཁྲུལ་སྣང་ཙམ་ནི་སྨིགས་རྒྱུ་དང་འདྲ་བའི་ཕྱིར། རྟེན་གང་ལའང་གནས་པར་མི་བྱའོ། །ཡུལ་གང་ལའང་དམིགས་པར་མི་བྱའོ། །ཞེས་རྣམ་པར་རྟོག་པའི་ཆ་གཞན་གྱིས་ཀྱང་བཅོས་པར་མི་རིགས་ལ། སེམས་ཀྱི་རང་བཞིན་ནམ་མཁའ་ལྟར་ངོ་བོ་ཉིད་མེད་པའི་ཕྱིར། དེ་ལའང་བཅོས་པར་མི་རིགས་སོ། །ཞེས་བྱ་བའི་དོན་ཏོ། །ཚུལ་འདི་ཉིད་བྱང་ཆུབ་ཀྱི་སེམས་བསྒོམ་པ་ལས་ཀྱང་གསུངས་ཏེ། འདི་སྐད་དུ། གཟུགས་དང་མཚན་མ་སྨོན་པར་འཛིན་པ་རབ་ཏུ་སྤངས་ནས་ནི། རྣམ་ཐར་གསུམ་པོ་སྒོམ་པའང་བདུད་ཀྱི་ལས་ཡིན་གཟུགས་ཉིད་སྟོང་པའོ། །ཞེས་བྱ་བ་ལ་སོགས་པ་གསུངས་ཏེ། འདི་ལྟར་རྣམ་པར་ཐར་པའི་སྒོའི་ཏིང་ངེ་འཛིན་སྒོམ་པ་ན། སྤང་བར་བྱ་བ་ནི། དངོས་པོར་ལྟ་དང་། མཚན་མར་འཛིན་པ་དང་། སྨོན་ཆགས་གསུམ་ཡིན་ལ། དེའི་གཉེན་པོ། རྣམ་པར་ཐར་པའི་སྒོ་སྟོང་པ་ཉིད་དངོས་པོས་དབེན་པའི་མཚན་ཉིད་དང་། དེ་བཞིན་དུ་མཚན་མ་མེད་པའི་ཏིང་ངེ་འཛིན་ཞི་བའི་མཚན་ཉིད་དང་། སྨོན་པ་མེད་པའི་ཏིང་ངེ་འཛིན་སྡུག་བསྔལ་སེལ་བའི་མཚན་ཉིད་རྣམས་བསྒོམ་མོ། །ཞེས་འདོད་པ་ནི། བླང་དོར་གྱི་མཐར་ལྷུང་བས་ཆོས་མཉམ་པ་ཉིད་ཀྱི་བློ་སྐྱེ་བའི་བར་དུ་གཅོད་པའི་ཕྱིར་བདུད་ཀྱི་ལས་ཡིན་ནོ། །འོ་ན་ཇི་ལྟར་བྱ་ཞེ་ན། གཟུགས་ཉིད་སྟོང་པའོ། །ཞེས་གསུངས་ཏེ། མི་མཐུན་པ་དང་གཉེན་པོ་དབྱེར་མེད་པར་རྟོགས་པས། ཐབས་ལ་མཁས་པའི་རྣམ་པར་ཐར་པ་ཞེས་ཀྱང་བྱ། མི་མཐུན་པ་ལ་སྤང་བར་བྱ་བའི་རྫས་མེད་པར་རྟོགས་པས། རང་བཞིན་གྱིས་འོད་གསལ་བའི་རྣམ་པར་ཐར་པ་ཞེས་ཀྱང་བྱ། ཐམས་ཅད་དུ་རང་གི་ངོ་བོ་གྲུབ་པ་མེད་པར་རྟོགས་པས། མངོན་པར་འདུས་མ་བྱས་པའི་རྣམ་པར་ཐར་པ་ཞེས་བྱ་སྟེ། འདི་ལྟ་བུའི་དོན་གྱིས་ཟིན་པར་བྱའོ། །ཞེས་བྱ་བའི་དོན་ཏོ། །གཞན་ཡང་། འཁོར་བའི་ལམ་གསུམ་སྤོང་ཞིང་མྱ་ངན་འདས་ལམ་སྒོམ་པའང་བདུད་ཀྱི་ལས་ཉིད་དེ། དེ་ཉིད་རང་བཞིན་མ་ཞི་རང་བཞིན་བཙལ་སྤངས་གར་མི་གནས། །ཞེས་གསུངས་ཏེ། འདོད་ཆགས་ཞེ་སྡང་གཏི་མུག་གསུམ་འཁོར་བའི་ལམ་དུ་མཐོང་ནས་སྤོང་ཞིང་། མ་ཆགས་པའི་དགེ་བའི་རྩ་བ་ལ་སོགས་པ་མྱ་ངན་ལས་འདས་པའི་ལམ་དུ་མཐོང་ནས་སྒོམ་པར་བྱེད་པ་དེ་ཡང་། བླང་དོར་གྱི་མཐར་ལྷུང་བས་བདུད་ཀྱི་ལས་ཡིན་ཏེ། དེས་ཆོས་ཐམས་ཅད་རང་བཞིན་གྱི་ཞི་བའི་དོན་མ་མཐོང་ངོ་། །གང་གི་ཕྱིར་ཆོས་ཀྱི་རང་བཞིན་ནི་བརྩལ་སྤངས་གཉིས་ལ་གནས་བཅར་མེད་པའི་ཕྱིར་རོ། །འདི་སྐད་དུ། དྲི་མ་མེད་པར་གྲགས་པས་བསྟན་པ་ལས། རྣམ་པར་གྲོལ་བ་ནི་འདོད་ཆགས་དང་ཞེ་སྡང་གཏི་མུག་སྤངས་པས་རྣམ་པར་གྲོལ་བ་མ་ཡིན་ནམ། སྨྲས་པ། འདོད་ཆགས་དང་ཞེ་སྡང་དང་གཏི་མུག་སྤངས་པས་རྣམ་པར་གྲོལ་ལོ་ཞེས་ཟེར་བ་ནི། ང་རྒྱལ་བ་རྣམས་ཀྱི་སྟེ། གང་ང་མེད་པ་རྣམས་ཀྱི་ནི་འདོད་ཆགས་དང་ཞེ་སྡང་དང་གཏི་མུག་གི་རང་བཞིན་ཉིད་རྣམ་པར་གྲོལ་བ་ཡིན་ནོ། །ཞེས་གསུངས་པ་དང་ཡང་མཐུན་ནོ། །གཞན་ཡང་དེ་ཉིད་ལས། འདི་ལྟར་འཕགས་པ་དགྲ་བཅོམ་པ་རྣམས་ནི། བདག་གིས་ཉོན་མོངས་པ་ཐམས་ཅད་སྤངས་སོ་སྙམ་དུ་རློམ་སེམས་ཡོད་ནའང་། དགྲ་བཅོམ་པར་མི་འགྱུར་རོ། །ཞེས་གསུངས་པའི་ཚུལ་ཡང་དེ་འདྲའོ། །འོ་ན་འཕགས་པའི་ལམ་གྱི་དངོས་གཞི་གང་ཡིན་ཞེ་ན། འཕགས་པ་ཀུན་གྱི་ཡུལ་དང་གནས་ཀྱང་འདས་སོགས་ལམ་ཉིད་གཞན་ན་མེད། ཅེས་གསུངས་ཏེ། འཕགས་པ་ཀུན་གྱིས་གཟིགས་པའི་ཡུལ་དང་གྲུབ་པའི་གནས་ཀྱང་། ཆོས་མཉམ་པ་ཉིད་གཉིས་སུ་མེད་པ་ལས་གཞན་མེད་ལ། མྱ་ངན་ལས་འདས་པ་ཐོབ་པའི་ལམ་ཡང་ཆོས་མཉམ་པ་ཉིད་གཉིས་སུ་མེད་པ་ལས་གཞན་མེད་དེ། དེ་བས་ན་ཇི་སྲིད་དུ་ཆོས་མཉམ་པ་ཉིད་གཉིས་སུ་མེད་པའི་དོན་རྟོགས་པ་རྡེང་དུ་མ་གྱུར་ཅིང་། སྤང་བླང་གི་བློ་ཆ་ཤས་འཕྲ་མོ་ཙམ་ཡོད་པ་དེ་སྲིད་དུ། ཐར་པའི་བསྟི་གནས་ཙམ་ཡིན་ཏེ། ལམ་གྱི་རང་གི་ངོ་བོ་མ་ཡིན་ནོ། །དེ་བས་ན་རྒྱལ་བའི་བཀའ་རྣམས་སུ་ལམ་འདི་མ་རྟོགས་པར་ལམ་གཞན་གྱིས་སངས་མི་རྒྱའོ། །ཞེས་གསུངས་པའང་། ཆོས་མཉམ་པ་ཉིད་གཉིས་སུ་མེད་པའི་དོན་མ་རྟོགས་པར་སངས་རྒྱས་ཉིད་མི་འཐོབ་པས། དེ་བས་ན་དགོངས་པ་ཐམས་ཅད་ཀྱི་ཞེ་ཕུགས་ཞེས་ཞེས་གསུངས་པའི་དོན་ཡང་དེ་ཡིན་ནོ། །ཚུལ་འདི་ནི་སྡོང་པོས་བརྒྱན་པའི་མདོ་ལས་ཀྱང་། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་བདེ་བར་གཤེགས་པར་འགྱུར། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་དག །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་གསུངས་པ་དང་ཡང་མཐུན་ནོ། །ད་ནི་བྱང་ཆུབ་ཀྱི་སེམས་གོམ་པ་ཀློང་དུ་གྱུར་ཅིང་རྡེང་དུ་གྱུར་ནས་སེམས་ལ་དབང་ཐོབ་པར་གྱུར་པའི་ཚད་ཅུང་ཟད་བསྟན་པར་བྱ་སྟེ། དེ་ཡང་བྱང་ཆུབ་སེམས་བསྒོམ་པ་ལས། ཇི་སྲིད་ཡིད་ཀྱི་གཡོ་བ་དེ་སྲིད་བདུད་ཀྱི་ཡུལ་ཏེ་འཕྲ་བའི་ལམ། །གཡོ་དང་མི་གཡོ་ཐ་སྙད་མི་གནས་གནས་ལ་གནས་པ་མེད། །སྣང་མེད་དབུ་མའི་ལམ་དེ་བྱང་ཆུབ་སེམས་ཞེས་པ་དེར་གཤེགས་གསུངས། །ཞེས་གསུངས་པ་སྟེ། འདི་ལྟར་སྣང་རྟོག་ཅི་སྐྱེའང་མ་བཀག་སྟེ་རང་བྱུང་། མ་འབྲངས་ཏེ་རང་ཞི་སྟེ། རྩོལ་བ་མེད་པར་བཏང་སྙོམས་ཆེན་པོའི་ངང་ལ་ཡུན་རིང་དུ་བཞག་པའི་ཚེ། ནུས་པ་ཅུང་ཟད་རྙེད་པ་ན། སྣང་རྟོག་རྒྱུན་དུ་སྐྱེའང་དངོས་པོ་དང་མཚན་མའི་ཞེན་པ་དང་བྲལ་བར་སྐྱེ་སྟེ། དཔེར་ན་རྨི་ལམ་གྱི་དོན་སྣང་བ་གཉིད་དེ་བས་བསྲབས་པར་གྱུར་ཏེ། སྣང་བ་མ་ལོག་ཀྱང་དངོས་པོར་ལྟ་བ་དང་མཚན་མར་འཛིན་པའི་ཞེན་པ་ལོག་པ་ལྟ་བུའོ། །དེ་ནས་དེ་བས་ཀྱང་ཤེས་རབ་དང་ཏིང་ངེ་འཛིན་ལས་སུ་རུང་བ་ན། མཚན་མར་འཛིན་པ་ཕྲ་བ་ཙམ་དུ་མ་ཟད་ཀྱི། སྐྱེ་བ་ཉིད་ཀྱང་ཕྲ་བར་འགྱུར་ཏེ། དཔེར་ན་རྨི་ལམ་ན་གཉིད་ཆེར་བསྲབས་པར་གྱུར་པ་ན་ཞེན་པ་ལོག་པ་ཙམ་དུ་མ་ཟད་ཀྱི། སྣང་བ་ཉིད་ཀྱང་ཕྲ་བར་སྣང་བ་ལྟ་བུའོ། །དེ་ནས་ཤེས་རབ་དང་ཏིང་ངེ་འཛིན་ཤིན་ཏུ་དབང་དུ་གྱུར་པ་ན། ཡིད་ཀྱི་གཡོ་བའི་འདུ་བྱེད་ཉམས་སུ་མྱོང་བ་སྙམ་བྱེད་པའམ། མི་གཡོ་བར་ཉམས་སུ་མྱོང་བ་སྙམ་བྱེད་པའམ། དེ་གཉིས་ཀྱི་ཐ་སྙད་ལས་འདས་པར་ཉམས་སུ་མྱོང་བ་ཡང་མེད་དེ། དེ་བས་ན་སྣང་མེད་དབུ་མའི་ལམ་ཞེས་བྱ་སྟེ། དེ་ལྟ་བུའི་དུས་ན་ཉམས་སུ་མྱོང་བའམ། འགགས་ནས་དེ་ལྟ་བུ་ཞིག་ཉམས་སུ་མྱོང་བར་ཤེས་པའམ། དེ་ལྟ་བུའི་ཚོར་བའི་སྣང་བ་གཉིས་དང་ཡང་བྲལ་ལ། འདུ་ཤེས་ཀྱིས་དོན་འདི་ལྟ་བུ་ཞིག་གོ། །ཞེས་ཐ་སྙད་གདགས་སུ་རུང་བའི་སྣང་བ་དང་བྲལ་བ་ནི། སྣང་མེད་དབུ་མའི་ལམ་ཞེས་བྱའོ། །ཚུལ་འདི་ཉིད་མཐའི་མུན་སེལ་སྒྲོན་མ་ལས་ཀྱང་གསུངས་པ། ཇི་ཙམ་རྟོག་མེད་ཟབ་མོ་ཞིག །བློ་ཡི་ཡུལ་དུ་སྣང་ཞེ་ན། །མི་རྟོག་ཟབ་མོའི་ཉམས་མྱོང་བ། །མྱོང་བ་ཡིན་ཕྱིར་དེ་ཉིད་མིན། །ཞེས་གསུངས་ཏེ། དུས་གང་གི་ཚེ་རྣམ་པར་མི་རྟོག་པའི་དོན་ཟབ་མོ་གཞན་ལ་བསྟན་པའི་ཐབས་མེད་པ་ཞིག །རང་གི་བློས་ཉམས་སུ་མྱོང་ངོ་ཞེ་ན། དེ་ལྟ་ན་ཡང་ཉམས་སུ་མྱོང་བ་ཉིད་ཀྱི་ཕྱིར་རྟོག་པ་ཞིག་ཏུ་ཟད་པས། བདེན་པ་མཐོང་བ་ཞེས་མི་བྱའོ། །འདི་ལྟར་རང་གིས་མྱོང་བ་གཞན་ལ་བསྟན་པར་མི་ནུས་པ་ནི་མངོན་སུམ་ཀུན་གྱི་ཆོས་ཉིད་ཡིན་ཏེ། དཔེར་ན་ལན་ཚྭའི་རོ་ནི་མི་དང་དུད་འགྲོ་ཕལ་མོ་ཆེས་ཀྱང་ཐུན་མོང་དུ་ཉམས་སུ་མྱོང་བ་ཡིན་མོད་ཀྱི། འོན་ཀྱང་ལན་ཚྭའི་རོ་མ་མྱོང་བ་ཞིག་ལ། ལན་ཚྭའི་རོ་ནི་འདིའ་འདྲའོ། །ཞེས་བསྟན་པའི་ཐབས་ནི་མེད་དོ། །དེ་བཞིན་དུ་རང་ལ་ཏིང་ངེ་འཛིན་གྱི་རོ་མྱོང་བ་ཡོད་ན། གཞན་ལ་བསྟན་པར་མི་ནུས་ཀྱང་། ཟབ་མོའི་གྲངས་སུ་མི་ཆུད་དེ་རྣམ་པར་རྟོག་པ་ཞིག་ཏུ་ཟད་དོ། །ཚུལ་འདི་ནི་གཞན་ལས་ཀྱང་གསུངས་ཏེ། ཚོར་བྲལ་བདེ་བའི་ལམ་ཞེས་ཀྱང་གསུངས་ལ། བླ་ན་མེད་པའི་བྱང་ཆུབ་ཀྱང་ཚོར་བ་དང་བྲལ་ཞིང་ཡིད་ཀྱི་སྤྱོད་པ་དང་བྲལ་བར་གསུངས་ཏེ། དྲི་མ་མེད་པར་གྲགས་པས་བསྟན་པ་ལས། ཐུབ་དབང་ཁྱོད་ཀྱིས་བདུད་དཔུང་སྟོབས་ཅན་རབ་བཏུལ་ནས། །བྱང་ཆུབ་མཆོག་རབ་ཞི་བ་མི་འཆི་བདེ་བ་བརྙེས། །དེ་ལ་ཚོར་བྱེད་སེམས་དང་ཡིད་ཀྱི་སྤྱོད་པ་མེད། །ཅེས་གསུངས་པ་ལྟ་བུའོ། །འདི་ནི་བྱང་ཆུབ་བརྙེས་པའི་སྐབས་སུ་གསུངས་པའོ། །སངས་རྒྱས་ཀྱི་དགོངས་པར་འདི་དང་བདེན་པ་མཐོང་བའི་བྱེ་ཁྱད་པར་བྲག་ནི། ཤེས་པ་ཚོགས་བརྒྱད་དུ་སྨྲ་བ་དང་། གཅིག་པུར་སྨྲ་བའི་བྱེ་བྲག་གིས་ཅུང་ཟད་ཐ་དད་པར་བཞག་པའང་ཡོད་ན། མདོར་བསྡུ་ན་སྣང་རྟོག་མངོན་དུ་རྒྱུ་ལོག་པ་ནི་བདེན་པ་མཐོང་བའོ། །བག་ལ་ཉལ་ཟད་པ་ནི་བྱང་ཆུབ་ཉིད་བརྙེས་པའོ། །བདེན་པ་མཐོང་བ་ཞེས་བྱ་བ་འདིའང་། ཆོས་གང་ཡང་མ་མཐོང་བའི་ཚིག་བླ་དྭགས་ཏེ། ཇི་སྐད་དུ་དྲི་མ་མེད་པར་གྲགས་པས་བསྟན་པ་ལས། བདེན་པ་མཐོང་བ་རྣམས་ཀྱིས་ཀྱང་བདེན་པ་ཉིད་མཐོང་བ་མེད་ན། བརྫུན་པ་ལྟ་ག་ལ་མཐོང་། ཞེས་གསུངས་པ་དང་། སྡུད་པ་ཚིགས་སུ་བཅད་པ་ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། ནམ་མཁའ་ཇི་ལྟར་མཐོང་སྟེ་དོན་འདི་བརྟག་པར་གྱིས། །དེ་བཞིན་ཆོས་མཐོང་བའང་དེ་བཞིན་གཤེགས་པས་བསྟན། །ཞེས་གསུངས་པའང་དེ་འདྲའོ། །ཡོངས་ནི་བདེན་པ་མཐོང་བ་རྣམས་ཀྱི་ཏིང་ངེ་འཛིན་རྣམ་པར་རྟོག་པ་དང་བྲལ་བ་ལ། དེ་དེ་བཞིན་གཤེགས་པ་དང་ཁྱད་པར་མེད་པ་སྐད་དུ་འབྱུང་བའང་ཡོད་ན། འོན་ཀྱང་བག་ལ་ཉལ་ཞེས་བྱ་བའི་སྒྲའང་། རྟོག་པ་འཕྲ་བས་མ་ཚོར་བ་ཙམ་ལ་བྱའི། རྟོག་པ་གཞི་ནས་མི་གཡོ་བ་ལ་ནི་མི་བྱ་སྟེ། ཨ་ནུ་ཤ་ཡ་ཞེས་བྱ་བའི་མིང་ཆུ་སྲིན་ཆུ་བྱའི་གྲིབ་མ་སྙེགས་པའི་མིང་ངོ་། །གྲིབ་མ་ཞེས་བྱ་བ་ནི་གཟུགས་བརྙན་གྱི་མིང་སྟེ། རྒྱ་མཚོ་ཆེན་པོའི་སྟེང་གི་བར་སྣང་ལ་བྱ་འཕུར་བའི་གཟུགས་བརྙན་རྒྱ་མཚོའི་ནང་ན་གནས་པ། ཆུ་སྲིན་གྱིས་སྙེགས་པ་ན་བྱས་མ་ཚོར་བ་ལ། ཨ་ནུ་ཤ་ཡ་ཞེས་ཟེར་ཏེ། མདོ་སྡེའི་སྐབས་སུ་བག་ལ་ཉལ་ཞེས་བཏགས། ཆོས་མངོན་པའི་སྐབས་སུ་ཕྲ་རྒྱས་ཞེས་བཏགས། དེ་ནས་བྱ་ཆུ་བྱའི་སྟེང་དུ་བབས་པ་ན་གཟུགས་བརྙན་དང་བྱ་ལྷན་ཅིག་གྱུར་པའི་ཚེ། ཆུ་སྲིན་བྱ་ཉིད་ལ་སྙེགས་པ་བྱས་མངོན་དུ་ཚོར་བ་ན། པ་དྱུད་ཐ་ན་ཞེས་བྱ་སྟེ་ཀུན་ནས་ལྡང་བ་ཞེས་བྱ་བར་བཏགས་པར་ཟད་དེ། དངོས་སུ་རྟོག་པ་འཕྲ་རགས་སུ་རྒྱུ་བ་ཉམས་སུ་ཚོར་བ་དང་མ་ཚོར་བ་ལས། མངོན་དུ་རྒྱུ་དང་བག་ལ་ཉལ་ཞེས་བཏགས་པར་ཟད་དེ། གཞི་མི་གཡོ་བ་ནི་མ་ཡིན་ནོ། །ཚུལ་འདི་ནི་མདོ་སྡེ་ལས་ཀྱང་གསུངས་ཏེ། བློ་གྲོས་རྒྱ་མཚོས་ཞུས་པ་ལས། བློ་གྲོས་རྒྱ་མཚོ་ཆེན་པོ་རྒྱང་མ་ནས་བལྟས་ན་ཤིན་ཏུ་མི་གཡོ་བར་སྣང་བ་དེ་ནི། དྲུང་དུ་ཐུག་ན་མི་གཡོ་བ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་གང་ཤིན་ཏུ་མི་གཡོ་བར་སྣང་བ་དེ་ནི། དེ་བཞིན་གཤེགས་པའི་ཡེ་ཤེས་ཀྱི་སྤྱན་གྱིས་གཟིགས་ན་མི་གཡོ་བ་མ་ཡིན་ནོ། །ཞེས་གསུངས་སོ། །གཞན་ཡང་ཤེས་བྱའི་སྒྲིབ་པའི་རང་གི་ངོ་བོ་ཡང་། མཉམ་བཞག་གི་དུས་ན་སེམས་གནས་པ་ཐོབ་པ་ན། རྟོག་པ་ཕྲ་བ་ཡོད་པ་མ་ཚོར་བ་ལ་གསུངས་ཏེ། འདི་སྐད་དུ། བྱང་ཆུབ་སེམས་དཔའ་རྣམས་ཀྱི་ཤེས་བྱའི་སྒྲིབ་པ་གང་ཞེ་ན། སེམས་གནས་པ་དེ་ནི་དེ་བཞིན་ཉིད་མ་ཡིན་ནོ། །དེ་ནི་ཆུ་མ་མགྱོགས་པ་དང་འདྲ་སྟེ་རྒྱང་མ་ནས་བལྟས་ན་གནས་པར་སྣང་ཡང་མི་འབབ་པ་ཡང་མ་ཡིན་ནོ། །དེ་ནི་མཆོག་ཏུ་ཕྲ་བའི་སྙིང་པོ་རྟོག་པ་ཡིན་ནོ། །ཞེས་གསུངས་སོ། །ཡང་འདི་སྐད་དུ། གནས་པ་བཅུའི་བྱང་ཆུབ་སེམས་དཔའ་རྣམས་ཀྱིས། དེ་བཞིན་གཤེགས་པའི་རང་བཞིན་མཐོང་ནི་མཐོང་གི་ལེགས་པར་མ་མཐོང་ངོ་། །དཔའ་བར་འགྲོ་བའི་ཏིང་ངེ་འཛིན་གྱི་སྟོབས་བསྐྱེད་པས་བྱེ་བྲག་ཕྱེད་པར་མཐོང་བར་འགྱུར་རོ། །ཞེས་གསུངས་ཏེ། དེ་བཞིན་གཤེགས་པའི་རང་བཞིན་མཐོང་མ་མཐོང་ཞེས་བྱ་བ་འདི་ཡང་མི་རྟོག་པའི་ཡེ་ཤེས་ཀྱི་རང་བཞིན་གྱི་དབང་ཡིན་པར་ཟད་དེ། དག་པ་འཇིག་རྟེན་པའི་ཡེ་ཤེས་ཀྱིས་དེ་བཞིན་གཤེགས་པའི་རང་བཞིན་མཐོང་། ཞེས་ཐ་སྙད་སུའང་མི་འདོགས་སོ། །ཡོངས་སུ་མྱ་ངན་ལས་འདས་པ་ལས་ཀྱང་། ཉན་ཐོས་རྣམས་ནི་ཞི་གནས་ཀྱི་ཤས་ཆེ་ལ་ལྷག་མཐོང་གི་ཤས་ཆུང་བས། དེ་བཞིན་གཤེགས་པའི་རང་བཞིན་མ་མཐོང་ངོ་། །བྱང་ཆུབ་སེམས་དཔའ་རྣམས་ནི་ཞི་གནས་ཀྱི་ཤས་ཆུང་ལ་ལྷག་མཐོང་གི་ཤས་ཆེ་བས། དེ་བཞིན་གཤེགས་པའི་རང་བཞིན་ལེགས་པར་མ་མཐོང་ངོ་། །དེ་བཞིན་གཤེགས་པ་རྣམས་ནི་ཞི་གནས་དང་ལྷག་མཐོང་ཟུང་དུ་འབྲེལ་བས་ལེགས་པར་གཟིགས་སོ། །ཞེས་གསུངས་པའི་ཚུལ་ཡང་དེ་འདྲའོ། །དེ་བས་ན་གསང་སྔགས་ཀྱི་ཚུལ་ལས། སྣང་རྟོག་ཆོས་ཉིད་དུ་ཤེས་པར་བྱ་བ་མ་གཏོགས་པ། མ་སྐྱེས་མི་གཡོ་བསྒོམ་པ་རྣམས། སེམས་མི་གཡོ་མི་རྟོག་པར་གཞག་ཟེར་བ་ནི། རྟོག་པ་ཉིད་ལ་ཆགས་སུ་ཟད་དེ། ནམ་སངས་མ་རྒྱས་ཀྱི་བར་དུ་མི་རྟོག་པའི་དབྱིངས་སུ་ཆུད་མི་སྲིད་དོ། །ཞེས་གསུངས་པ་ཡིན་ཏེ། དེ་བས་ན་སེམས་ཉམས་སུ་ལེན་པའི་ཚད་བསྟན་པ་འདི་ཡང་། སྣང་རྟོག་མངོན་དུ་རྒྱུ་ལོག་པ་ཙམ་རེ་ཤིག་ཚད་བཞག་པར་ཟད་དེ། སྣང་རྟོག་གི་ཞེན་པ་ལོག་པར་ཚོར་བ་ཉིད་བྱང་ཆུབ་སེམས་ཀྱི་དྲོད་ཐོབ་པ་ཡིན་ནོ། །ད་ནི་དྲོད་ཀྱི་རྟགས་ཅུང་ཟད་བསྟན་པར་བྱ་སྟེ། དེ་ཡང་བྱང་ཆུབ་སེམས་བསྒོམ་པ་ལས་འདི་སྐད་དུ། ཆེད་དུ་རྩོལ་བྲལ་ཡིད་ལ་མི་བྱེད་ཅིས་ཀྱང་མི་འཁྲུགས་མཉམ་ཤེས་དང་། །གང་ལའང་ཆགས་དང་ཡུལ་གྱིས་མྱོས་སྐྲག་མེད་དེ་མི་འབྲལ་མི་གནས་ཤིང་། །མི་འཁྲུགས་མཉམ་ཤེས་བཞི་པོ་ཕྱོགས་དང་ཕ་རོལ་ཕྱིན་རྣམས་དེར་ཤེས་ཏེ། །ཞེས་གསུངས་ཏེ། གོང་དུ་བསྟན་པ་ལྟར་བསྒོམས་ཏེ་གོམས་པ་དང་། རྟགས་འདི་ལྟ་བུ་དག་འབྱུང་སྟེ། གང་གི་ཚེ་ཏིང་ངེ་འཛིན་ལས་ལངས་པའི་དུས་ནའང་། ཡུལ་གྱི་རྣམ་པ་གང་སྣང་ཡང་། དངོས་པོར་མ་ཞེན་པའི་སྟོབས་ཀྱིས། ཡིད་དུ་འོང་བ་སྣང་ཡང་ཆགས་ཤིང་འདོད་པའི་སེམས་མི་སྐྱེ། ཡིད་དུ་མི་འོང་བ་སྣང་ཡང་སྐྲག་ཅིང་མི་འདོད་པའི་སེམས་ཀྱང་མི་སྐྱེ། མངོན་སུམ་གྱི་སྟོབས་ཀྱིས་དངོས་པོར་སྣང་ཡང་མི་ལྟ་ཞིང་མངོན་སུམ་གྱིས་རྨོངས་པར་གྱུར་པ་མེད་དེ། འབྲལ་བའི་བློ་དང་གནས་པའི་བློ་མི་སྐྱེ་ནའང་། བྱང་ཆུབ་ཀྱི་སེམས་གོམས་པའི་རྟགས་ཡིན་ནོ། །གཞན་ཡང་ལམ་དང་འབྲས་བུར་བཅས་པའི་ཆོས་ཕྱོགས་དང་། ཕ་རོལ་ཏུ་ཕྱིན་པ་དང་། ཡེ་ཤེས་ཆེན་པོས་བསྡུས་པ་ཐམས་ཅད་ཀྱང་། ཆོས་གཉིས་སུ་མེད་པའི་དོན་རྟོགས་པ་ལས་གཞན་མེད་པའི་བློ་འབྱུང་སྟེ། དེའི་ཚེའང་བྱང་ཆུབ་ཀྱི་སེམས་གོམས་པའི་རྟགས་ཐོབ་པ་ཡིན་ནོ། །དེ་ལྟར་རྟོགས་ན་ལམ་མང་པོ་ལ་སྦྱང་མི་དགོས་ཏེ། རང་གི་སེམས་ཀྱི་རང་བཞིན་ཇི་ལྟ་བ་བཞིན་རྟོགས་ཤིང་གོམས་པར་བྱས་པ་ཁོ་ན་མ་ནོར་བའི་ལམ་ཡིན་པས། སེམས་ཀྱི་དབྱིངས་སུ་བསྒོམ་པས་ལམ་གྱི་གཞན་དུ་བསྒོམས་པས་འོད་གསལ་མི་འགྱུར་རོ། །ཞེས་པ་དང་། རྡོ་རྗེ་སེམས་དཔར་བསྒོམས་པས་ལམ་ཀུན་མ་ནོར་བསྒོམས་པ་ཡིན། །ཞེས་གསུངས་པ་ཡིན་ནོ། །ད་ནི་བྱང་ཆུབ་སེམས་ཀྱི་ཡོན་ཏན་ཅུང་ཟད་ཙམ་བཤད་དེ། གང་གི་ཕྱིར་ཐེག་པ་འོག་མའི་ཚུལ་དག་ལས། དང་པོ་རིགས་དང་བཤེས་གཉེན་གྱི་སྟོབས་ཀྱིས་སྨོན་པའི་སེམས་བསྐྱེད་པས། སེམས་ཅན་ཐམས་ཅད་བདག་གིར་བཟུང་བའི་སྙིང་རྗེ་ཆེན་པོའི་སྟོབས་ཀྱིས་འཕངས་ཏེ། དཀར་པོའི་ཆོས་ཡོངས་སུ་རྫོགས་པར་བྱས་ཤིང་། སྨོན་ལམ་ལྷུན་གྱིས་གྲུབ་པར་མཛད་པ་ལས། ཆོས་ཀྱི་སྐུ་བརྙེས་པས་ན། ཆོས་བསགས་པས་ན་ཆོས་ཀྱི་སྐུ་ཞེས་ཀྱང་བྱ་སྟེ། དེའི་དབང་གིས་གཟུགས་ཀྱི་རྣམ་གཉིས་ཀྱི་མཛད་པ་རྒྱུན་མི་འཆད་དོ། །ཞེས་ཀྱང་འབྱུང་ལ། གསང་སྔགས་ཀྱི་ཚུལ་ཁ་ཅིག་ལས། རྒྱུ་ཇི་ལྟ་བ་བཞིན་དུ་འབྲས་བུ་འབྱུང་བས། དང་པོ་ཉིད་ནས་སྙིང་རྗེ་ཆེན་པོའི་མཐུས་བསླང་སྟེ། སངས་རྒྱས་ཀྱི་མཛད་པ་ཉམས་སུ་བླངས་ནས། གཟུགས་ཀྱི་སྐུ་རྣམ་གཉིས་བསྒོམས་ཏེ། སེམས་ཅན་གྱི་དོན་བྱ་བ་དང་། དེ་བཞིན་གཤེགས་པའི་རིགས་མཉེས་པར་བྱ་བའི་སྒོ་ནས། བསོད་ནམས་ཀྱི་ཚོགས་ཆེན་པོའང་སྤྱོད་ཅིང་། ཆོས་ཀྱི་དབྱིངས་ཕྱིན་ཅི་མ་ལོག་པའང་བསྒོམས་པ་ལས། འབྲས་བུ་སྐུ་གསུམ་གྱི་བདག་ཉིད་ཅན་གྱི་སངས་རྒྱས་ཉིད་ཐོབ་པར་འདོད་པའང་ཡོད་པས། དེའི་ཕྱིར་བྱང་ཆུབ་སེམས་ཀྱི་ཡོན་ཏན་མ་བཤད་ན་སྐུར་བའི་གནས་སུ་འགྱུར་བའི་ཕྱིར་རོ། །དེ་ལ་ཐེག་པ་འོག་མ་པའི་ཚུལ་ལས་རྒྱུ་འབྲས་ཀྱི་ཚུལ་དེ་སྐད་དུ་བཤད་པ་དེ་དག་ཀྱང་། འགྲོ་བ་རྣམས་ལ་འཁྲུལ་པ་སྣང་བར་འགྱུར་བའི་རྒྱུར་བཤད་པ་ནི་འགལ་བ་མེད་དེ། རྒྱུ་རྐྱེན་སྒྱུ་མ་ལས་འབྲས་བུ་སྒྱུ་མར་སྣང་བ་འགྲུབ་པའི་ཕྱིར་རོ། །འོན་ཀྱང་འགྲོ་བའི་དོན་དུ་སྣང་བ་རྣམས་ཀྱང་། དེ་དག་ཁོ་ན་ལ་རག་ལས་པའང་མ་ཡིན་ཏེ། རྫོགས་པ་ཆེན་པོའི་ཚུལ་དེ་དག་བཀག་པའང་མེད་དེ། ཐབས་རྒྱ་མཚོ་བསམ་གྱིས་མི་ཁྱབ་པའི་མཐུས། སྣང་བ་རྒྱ་མཚོ་འབྱུང་བར་ཟད་དོ། །འོན་ཀྱང་སངས་རྒྱས་ཀྱི་ཡོན་ཏན་ཐམས་ཅད་ནི། བྱང་ཆུབ་སེམས་ཀྱི་མཐུ་ལས་བརྩལ་བས་མེད་པར་འབྱུང་སྟེ། དེ་ཡང་རང་བཞིན་དང་མངོན་དུ་གྱུར་པའི་མཐུའོ། །དེའང་ཁྱུང་ཆེན་ལས། བྱང་ཆུབ་སྙིང་པོར་དེ་མ་ཐག །ཏིང་འཛིན་རྒྱ་མཚོ་ཆེན་པོ་འབྱུང་། །སྣང་བ་རྒྱ་མཚོ་ཆེན་པོ་བཞིན། །མི་རྟོག་ནམ་མཁའི་མཐའ་ལྟར་ཡངས། །ཞེས་གསུངས་ཏེ། འདི་ལྟར་བྱང་ཆུབ་ཀྱི་སྙིང་པོའི་དོན་རྟོགས་མ་ཐག་ཏུ། གཟུངས་དང་ཏིང་ངེ་འཛིན་དང་སྟོབས་དང་མ་འདྲེས་པ་ལ་སོགས་པ་ཆེ་བའི་ཡོན་ཏན་ཐམས་ཅད་ཀྱང་། རྒྱ་མཚོ་ཆེན་པོ་ལྟར་མི་གཡོ་བ་ལ་བྱིན་རླབས་འབྱུང་ལ། གདུལ་བྱ་ལ་སྣང་བ་ཡང་རྒྱ་མཚོ་ལྟར་བརྩལ་བ་མེད་པར་འབྱུང་སྟེ། འོན་ཀྱང་རྣམ་པར་མི་རྟོག་ཅིང་ནམ་མཁའི་མཐའ་ལྟར་ཁྱབ་ཅིང་ཡངས་སོ། །ཞེའོ། །ཚུལ་འདི་ཉིད་རྡོ་རྗེ་སེམས་དཔའ་ནམ་མཁའ་ཆེ་ལས་ཀྱང་གསུངས་ཏེ། ཆོ་འཕྲུལ་ཆེན་པོ་དཀའ་བ་མིན། །ཡོན་ཏན་ཀུན་དང་སྟོབས་ཀྱི་རྣམས། །ཇི་བཞིན་རྟོགས་པ་འཕྲ་བ་ཡིས། །དེ་མ་ཐག་ཏུ་རང་ལས་འབྱུང་། །ཞེས་གསུངས་པའི་ཚུལ་ཡང་དེ་འདྲའོ། །འབྲས་བུ་བརྩལ་བ་མེད་པར་འདོད་པ་ནི། ངེས་པའི་དོན་གྱི་མདོ་སྡེ་ལས་ཀྱང་གསུངས་ཏེ། འདི་སྐད་དུ། བླ་མེད་གསང་ཆེན་གང་གིས་འདི་རྟོགས་ན། །བརྩལ་མེད་འབྲས་བུ་ཡིན་ཏེ་དེར་སངས་རྒྱས། །ཞེས་གསུངས་པ་དང་ཡང་མཐུན་ནོ། །སྙིང་རྗེ་ཆེན་པོས་འགྲོ་བའི་དོན་མཛད་པའི་ཚུལ་ཡང་དེ་ཉིད་ལས། རྟོག་མེད་མཉམ་ཉིད་ཆོས་ཀྱི་སྐུ། །གཟུང་བས་མི་ཟིན་ཆུ་ཟླ་འདྲ། །ཀུན་ཏུ་བཟང་པོའི་རོལ་པ་ཡིས། །ཨ་ལི་ཀཱ་ལི་ཟབ་ཏུ་བསྟན། །ཞེས་གསུངས་ཏེ། ཆོས་ཀྱི་སྐུའི་རང་བཞིན་ནི་མི་རྟོག་ཅིང་མཉམ་པ་ཉིད་ཡིན་པས། ནམ་མཁའ་ལྟར་ཀུན་ལ་ཁྱབ་བོ། །དེ་ལས་མ་གཡོས་བཞིན་དུ་སངས་རྒྱས་ཀྱི་འཕྲུལ་པ་ཐམས་ཅད་ཀྱང་མེད་པ་མ་ཡིན་ཏེ། སྒྱུ་མ་རྩེད་མོ་དང་འདྲ་བར་རོལ་པས། གཟུང་བས་མི་ཟིན་ཆུ་ཟླ་འདྲ། །ཞེས་སོ། །དེ་ལྟ་བུའི་རང་བཞིན་གྱིས་འགྲོ་བ་ཐམས་ཅད་ཀུན་ཏུ་བཟང་པོའི་རྒྱན་ལ་འགོད་པར་མཛད་ཅིང་། ཐབས་དང་ཤེས་རབ་ཀྱི་སྤྱོད་པ་ཟབ་མོས་གྲོལ་བར་མཛད་པས། ཀུན་ཏུ་བཟང་པོའི་རོལ་པ་ཡིས། །ཨཱ་ལི་ཀཱ་ལི་ཟབ་ཏུ་བསྟན། །ཞེས་གསུངས་ཏེ། ཨཱ་ལི་ཀཱ་ལི་ནི་འདིར་ཀུན་ཏུ་བཟང་པོ་ཡིན་པ་དང་། ཀུན་ཏུ་བཟང་མོ་ཡིན་པ་དང་། གཉིས་སུ་མེད་པ་ཡིན་པའི་དོན་གྱིས། སྒྱུ་མའི་འཇིག་རྟེན་སྦྱོང་ཞིང་འདུལ་བའི་མཛད་སྤྱོད་སྟོན་པ་ཡིན་ཏེ། དེ་ལ་ཨ་ཐུང་ནི་ཐམས་ཅད་མ་སྐྱེས་པའི་དོན། ཨཱ་རིང་པོ་ནི་ཐུགས་རྗེའི་མཛད་སྤྱོད་རྒྱུན་མི་འཆད་པའི་དོན། ཀ་ཐུང་ནི་བྱེད་པའི་དོན་ཏེ། ཡེ་ཤེས་ཆེན་པོས་ཐམས་ཅད་ལ་དབང་སྒྱུར་བའི་དོན། ཀཱ་རིང་པོ་ནི་འགྲོ་བ་གནས་ནས་གནས་སུ་བསྐྱོད་པར་མཛད་པའི་དོན། ལ་ནི། ལ་ཡ་ཏི་གྲི་ན་ཞེས་བྱ་སྟེ་ལེན་ཅིང་འཛིན་པའི་དོན། གུ་གུ་ནི་གུད་དུ་བཤད་ན་དབྱིབས་ཀྱི་སྒོ་ནས། ཨི་གླང་པོ་ཆེའི་སྣ་འདྲ་བ་ཞེས་བྱ་སྟེ། ཐུགས་རྗེ་ཆེན་པོས་འགྲོ་བ་མི་གཏོང་བའི་གཟུངས་ཀྱི་དོན། སྒྲའི་སྒོ་ནས། ཨི་སྟྲི་ལིང་ག་ཞེས་བྱ་སྟེ། ཤེས་རབ་ཆེན་པོའི་གཟུངས་ཀྱིས་ཆོས་ཐམས་ཅད་འཛིན་པའི་དོན། ལ་དང་སྦྱར་ཏེ་བཤད་ན། ཐབས་དང་ཤེས་རབ་ཟབ་མོའི་མཛད་སྤྱོད་ལ་མངའ་བརྙེས་པའི་དོན་ཏོ། །དེས་དོན་ཇི་ལྟར་མཛད་པའི་ཚུལ་བསྟན་པ་ནི། དེ་ནི་ཨ་དང་མཛེས་པའི་ཏ། །པ་དང་ཡན་ལག་སྤྲོས་པ་བཞིན། །འཇིག་རྟེན་ཡོངས་ཀྱི་སྤྱོད་ཡུལ་ལ། །སངས་རྒྱས་གསུང་གི་ཟབ་མོ་འབྱུང་། །ཞེས་གསུངས་ཏེ། དེ་ལ་ཨ་ནི་ཨ་རིང་པོ་སྟེ། ཐུགས་རྗེ་ཆེན་པོའི་མཛད་སྤྱོད་རྒྱུ་མི་འཆད་པའི་དོན། མཛེས་པའི་ཏ་ནི་མཛད་སྤྱོད་དེ། མཛེས་པར་བྱེད་པ་ནི་ཤེས་རབ་ཆེན་པོ་དག་ཅིང་སྤྲོས་པ་མེད་པའི་ངང་ལ་གནས་ཤིང་དེ་ལས་མ་གཡོས་པ་སྟེ། ཏ་ཞེས་བྱ་བ་ནི་ཤེས་རབ་ཀྱི་རང་བཞིན་ཟླ་བའི་དཀྱིལ་འཁོར་གྱི་གཟུགས་སོ། །བ་ཞེས་བྱ་བ་ནི་དེ་གཉིས་ཀྱི་ངང་དུ་འགྲོ་བ་ཐམས་ཅད་གྲོལ་བར་མཛད་པ་སྟེ། དེ་ཡང་གུད་ན་ཡོད་པ་མ་ཡིན་ཏེ། འགྲོ་བ་རྣམས་ཀྱི་ཐུན་མོང་གི་སྤྱོད་པ་འདི་ཉིད་ཡིན་མོད་ཀྱི། འོན་ཀྱང་ལས་འཕྲོ་དང་སྐལ་བར་ལྡན་པ་རྣམས་ལ། དབང་པོའི་རིམ་པ་བཞིན་སྐྱོབ་པར་སྣང་བར་འགྱུར་ལ། སྐལ་བ་མེད་པ་རྣམས་ལ་ནི་སྣང་བར་ཡང་མི་འགྱུར་རོ། །དེ་ལྟར་མི་སྣང་ཡང་ཐབས་དང་ཤེས་རབ་ཀྱི་རང་བཞིན་ནི་ཡན་ལག་སྤྲོས་པ་བཞིན་དུ་ཐུན་མོང་དུ་ཁྱབ་པས། པ་དང་ཡན་ལག་སྤྲོས་པ་བཞིན། །འཇིག་རྟེན་ཡོངས་ཀྱི་སྤྱོད་ཡུལ་ལ། །སངས་རྒྱས་གསུང་གི་ཟབ་མོ་འབྱུང་། །ཞེས་གསུངས་པ་ཡིན་ནོ། །ཁྱུང་ཆེན་ལས་ཀྱང་། བརྟགས་ན་མེད་ལ་བཞག་ན་ལེགས་པ་འབྱུང་བ་ཆེ། །མངོན་སུམ་མི་སྣང་ཆགས་པས་ཆ་ལུགས་ཀུན་ནས་སྐོང་། །བདག་དང་གཞན་དུ་བྲལ་བའི་སྟོན་མཁན་རིན་ཆེན་མཛོད། །ཐམས་ཅད་གྲུབ་པའི་ཡུལ་མེད་བདག་མེད་སྙིང་རྗེར་བསྟན། །ཞེས་པ་དང་། ཡུལ་ཕྱིར་ཆགས་ལ་ཡུལ་ལ་བསྔོ་བའི་དམིགས་པ་མེད། །ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་ཀྱི་སེམས་ནི་མངོན་དུ་བྱ་བའི་ཆོས་མེད་ཀྱང་ཀུན་གྱི་དགོས་འདོད་སྐོང་། །བདག་དང་གཞན་དུ་མི་དམིགས་ཀྱང་བདག་དང་གཞན་གྱི་དོན་མཐར་ཕྱིན་པར་མཛད། གྲུབ་པར་བྱ་བའི་ཡུལ་མེད་ཀྱང་བདག་མེད་པའི་སྙིང་རྗེ་སྐྱེ། སེམས་ཅན་གྱི་ཕྱིར་ཐུགས་རྗེས་ཆགས་ཀྱང་ཡོངས་བསྔོ་བའི་དམིགས་པ་མེད་པ་ནི། བདག་མེད་པའི་སྙིང་རྗེ་ཞེའོ། །ལྟ་བ་རིན་པོ་ཆེ་སྒྲོན་མ་ལས་ཀྱང་། ཤེས་རབ་གནས་མེད་ཆགས་པའི་རྡུལ་བྲལ་ཡང་། །སྙིང་རྗེས་སེམས་ཅན་ཁམས་ལ་སྐྱོ་བ་མེད། །ཞེས་གསུངས་པ་དང་། ཐབས་དང་ཤེས་རབ་གསལ་བའི་སྒྲོན་མ་ལས། །སེམས་ཅན་སངས་རྒྱས་བདེན་པར་ཚུལ་གཅིག་ཅིང་། །རང་གི་སེམས་ཉིད་སངས་རྒྱས་ཡིན་ཤེས་ན། །གཞན་ནས་བསྒྲུབ་པར་བྱ་བ་ཅི་ཡང་མེད། །དེ་ལྟ་བས་ན་སྤང་བར་བྱ་བའང་མེད། །དེ་ལྟ་བུ་ཡི་ཆོས་ཀྱི་ཚུལ་རིག་ནས། །མ་རིག་རྣམས་ལ་སྙིང་རྗེ་ཡོངས་ཀྱི་སྐྱེ། །སྙིང་རྗེ་སྐྱེས་ནས་སྒྱུ་མའི་ཏིང་འཛིན་གྱིས། །ཕན་འདོགས་ཐབས་ཀྱི་སྤྱོད་པ་ཅིར་ཡང་སྟོན། །ཞེས་གསུངས་པའི་ཚུལ་ཡང་དེ་འདྲའོ། །མདོར་ན་ཆོས་མཉམ་པ་ཉིད་གཉིས་སུ་མེད་པར་རྟོགས་པས། སྙིང་རྗེ་ཆུང་བར་མི་འགྱུར་ཏེ། སངས་རྒྱས་དང་བྱང་ཆུབ་སེམས་དཔའ་བཞིན་ནོ། །དངོས་པོར་ལྟ་བས་སྙིང་རྗེ་ཆེ་བར་མི་འགྱུར་ཏེ། ཉན་ཐོས་དང་སོ་སོའི་སྐྱེ་བོ་བཞིན་ནོ། །ཐེག་པ་འོག་མའི་ཚུལ་ལས་སྨོན་ལམ་དང་བསྒོམས་པའི་སྟོབས་ལས། གཟུགས་ཀྱི་སྐུའི་ཡོན་ཏན་འབྱུང་བར་འགྱུར་རོ། །ཞེས་ཟེར་བ་དེའང་། ལས་ཀྱི་སྟོབས་ཡིན་པར་ཟད་ཀྱི། གཉིས་སུ་མེད་པའི་བྱང་ཆུབ་ཀྱི་སེམས་ཀྱི་སྟོབས་ནི་མ་ཡིན་ཏེ། འདི་སྐད་དུ། ཁྱུང་ཆེན་ལས། གསུང་དང་རྒྱས་ལ་དམིགས་དང་སྣང་། །སྒྱུ་མཁན་རི་མོའི་རྣམ་པ་བཞིན། །འབྱུང་འཇུག་ཡེ་ཤེས་རྨུགས་པ་ཡིས། །དེའི་དབང་ལས་སྐྱེ་བར་འགྱུར། །ཞེས་གསུངས་ཏེ། དམ་པ་ཆོས་ཀྱི་གསུང་རབ་ལ་དམིགས་པ་དང་། སངས་རྒྱས་ལ་དམིགས་པའི་མཐུ་ལས། ཆེ་བའི་ཡོན་ཏན་སྣང་བ་འབྱུང་བ་རྣམས་ཀྱང་། དཔེར་ན་སྒྱུ་མའི་རྣམ་པ་མེད་བཞིན་དུ་སྣང་བའམ། རི་མོའི་རྣམ་པ་གཞི་མཐོན་དམན་མེད་བཞིན། མཐོན་དམན་དུ་སྣང་བ་རྣམས། སྒྲིབ་པར་བྱེད་པའི་རྐྱེན་ཞིག་གི་དབང་ལས་སྣང་བ་བཞིན་དུ། དམིགས་པ་དང་བཅས་ཅིང་འབྱུང་འཇུག་གི་རྟོག་པ་དང་བཅས་པའི་སྒྲིབ་པས། ཡེ་ཤེས་ཆེན་པོ་བསྒྲིབས་ཤིང་རྨུགས་པར་བྱས་པའི་དབང་ལས། ཡོན་ཏན་གྱི་རྣམ་པ་ལྟ་བུར་སྣང་བ་འབྱུང་བར་འགྱུར་ཏེ། འོན་ཀྱང་བྱང་ཆུབ་སེམས་ཀྱི་རང་བཞིན་གྱི་ཡོན་ཏན་ནི་མ་ཡིན་ནོ། །མང་པོ་བརྗོད་མི་དགོས་ཏེ། རྫོགས་པ་ཆེན་པོའི་ཚུལ་ལ་སངས་རྒྱས་ཀྱི་ཆོས་མི་རྫོགས་པའི་ཉེས་སྐྱོན་མེད་དོ། །རྫོགས་པ་ཆེན་པོའི་གཞུང་ཉིད་བསྟན་པའི་སྐབས་ཏེ། ལྔ་པའོ།། །།ད་ནི་རྫོགས་པ་ཆེན་པོའི་ཚུལ་ལ་ཇི་ལྟ་བ་བཞིན་དུ་གནས་པར་མི་ནུས་པ་རྣམས་ལ། རྩོལ་བ་དང་བཅས་པའི་ཐབས་ཀྱིས་ལམ་བཙལ་བ་བསྟན་པར་བྱ་སྟེ། དེ་ཡང་རྫོགས་པ་ཆེན་པོའི་ལྟ་བས་ཟིན་པར་བྱའོ། །གང་གི་ཕྱིར་བྱང་ཆུབ་ཀྱི་སེམས་བདེ་བ་ཆེན་པོ་ནི་ཆོས་ཀྱི་རྩ་བ་ཡིན་ཏེ། འཆིང་བའི་ནད་ཐམས་ཅད་འབྱིན་པར་བྱེད་པའོ། །འདི་སྐད་དུ། བྱང་ཆུབ་ཀྱི་སེམས་བསྒོམ་པ་ལས། ཀུན་ཏུ་བཟང་མོས་མ་ཟིན་དགེ་བའི་ཆོས་ནི་གང་ཡང་རུང་། ཀུན་ཏུ་བཟང་པོའི་སྤྱོད་པའང་བདུད་ཀྱི་ལས་ཏེ་ཟད་ཅིང་མཐར་ཐུག་འགྱུར། དེ་དང་ལྡན་པའི་ལས་ནི་བདུད་ཀྱི་ལས་ཀྱང་བྱང་ཆུབ་སྤྱོད་པར་གསུངས། ཞེས་གསུངས་པ་ལྟ་བུ་ཡིན་ནོ། །དེ་ལ་སེམས་བཅོས་པའི་ཐབས་ཀྱང་། ཕ་རོལ་ཏུ་ཕྱིན་པའི་ཚུལ་དང་། གསང་སྔགས་ཀྱི་ཚུལ་ལས་སྒོ་མང་དུ་སྣང་སྟེ། འདི་ལྟར་བསམ་གཏན་གྱི་སྐྱོན་དྲུག་སྤངས་ཤིང་སྒྲིབ་བཅུ་བསལ་བའི་བསམ་གཏན་ནི་ཐར་པའི་ལམ་མོ། །ཞེས་ཀྱང་འབྱུང་། ཉེས་པ་ལྔ་སྤོང་པའི་འདུ་བྱེད་བརྒྱད་དང་ལྡན་པའི་ཏིང་ངེ་འཛིན་ནི་ཐར་པའི་ལམ་མོ། །ཞེས་ཀྱང་འབྱུང་། ཕུང་པོ་དང་ཁམས་དང་སྐྱེ་མཆེད་ཀྱི་ཆོས་ལ། བཟུང་བཏགས་བཀག་ཕྱེ་བཅོམ་པའི་ཏིང་ངེ་འཛིན་ནི་ཐར་པའི་ལམ་མོ། །ཞེས་ཀྱང་འབྱུང་། སེམས་རང་བཞིན་གྱིས་གདུལ་བར་དཀའ་བའི་ཆོས་དྲུག་བཏུལ་བའི་བཟླས་བརྗོད་དང་བསམ་གཏན་ནི་ཐར་པའི་ལམ་མོ། །ཞེས་ཀྱང་འབྱུང་། ལུས་སེམས་ལྷ་དང་གསུམ་ལ་དམིགས་པའི་ཏིང་ངེ་འཛིན་ནི་ཐར་པའི་ལམ་མོ། །ཞེས་ཀྱང་འབྱུང་སྟེ། འདི་ལྟ་བུ་ལ་སོགས་པ། སེམས་བཅོས་པའི་ཐབས་མང་དུ་གསུངས་པའང་། ཐམས་ཅད་མཐོང་བར་ཡང་མི་ནུས་ལ། བསྟན་པར་ཡང་མི་ནུས་པས་རེ་ཤིག་འདི་དག་ཙམ་བཤད་དོ། །སྒོ་འདི་དག་བསྟན་པ་ནི། གང་ཟག་མོས་པའི་དབང་གིས་འཇུག་པ་སོ་སོ་ཡང་འབྱུང་ལ། ཕན་ཚུན་གཅིག་ལ་གཅིག་ཕན་འདོགས་པའང་འབྱུང་བས་འདི་དག་ཙམ་བཤད་དོ། །དེ་ལ་བསམ་གཏན་གྱི་སྐྱོན་དྲུག་ནི། བྱུང་ཚོར་དབང་གིས་གཡེང་བ་དང་། བྱིང་རྨུགས་དབང་གིས་འཐིབས་པ་དང་། ཐེར་ཟུག་དབང་གིས་འཐས་པ་གསུམ་ནི། ཞི་གནས་ལས་སུ་མ་རུང་བའི་སྐྱོན་ཡིན་ཏེ། དེ་ལ་སྔ་མ་གཉིས་ནི་དཔེར་ན་མར་མེ་ཕྱི་རོལ་གྱི་རླུང་གིས་བསྐྱོད་ན་ཡང་མི་གསལ། རང་གི་ཉེ་བར་ལེན་པའི་རླུང་བཀག་ནའང་། འཆི་བའམ་འཆི་བ་ལ་ཐུག་པར་གྱུར་རོ། །དེ་བཞིན་དུ་སེམས་གནས་པ་ནི་འདུ་བྱེད་སྣ་ཚོགས་ཀྱི་བསྐྱོད་ནའང་གཡེངས་བར་འགྱུར་ལ། རང་གི་ཉེ་བར་ལེན་པའི་འདུ་བྱེད་བཀག་ནའང་སེམས་ཉིད་ཀྱང་འགག་པའམ་མ་འགག་པ་ལ་ཐུག་པར་འགྱུར་བས། དེ་བས་ན་འདུ་བྱེད་གཞན་བཀག་ལ་རང་གི་འདུ་བྱེད་མི་བཀག་གོ། །གསུམ་པ་ནི་དྲན་པ་སྔ་མའི་སྟེང་དུ་ཕྱི་མ་རྟག་ཏུ་འབབ་པ་ཡིན་ཏེ། དཔེར་ན་ཆུའི་ཐིགས་པ་བཞིན་ནོ། །འདི་ནི་དམིགས་པ་གཅིག་ལས་སུ་རུང་ཡང་། བསམ་གཏན་གྱི་ཡུལ་བསམ་གྱིས་མི་ཁྱབ་པ་ལ་འཇུག་པའི་ཐབས་མེད་དེ་སྒྲིབས་པའོ། །ལྷག་མཐོང་གི་སྒྲིབ་པ་གསུམ་ལ། འཛིན་ཆགས་དབང་གིས་འགོག་པ་ཞེས་བྱ་བ་ནི། ཆོས་བདག་མེད་པར་རྟོགས་པའི་ཤེས་རབ་དང་བྲལ་བས། བསམ་གཏན་གྱི་ཡུལ་ཅི་སྣང་ཡང་འཛིན་ཆགས་དང་མ་བྲལ་བས། ཐར་པ་འགོག་སྟེ་སྒྲིབ་པའོ། །ཡོད་མེད་དབང་གིས་ཉམས་པ་ཞེས་བྱ་བ་ནི། ཆོས་རྟེན་ཅིང་འབྲེལ་ཏེ་འབྱུང་བ་ལ་རྨོངས་པས། ཇི་ལྟར་བསམས་ཀྱང་ཡོད་མེད་ཀྱི་མཐར་ལྷུང་སྟེ། ཡེ་ཤེས་ཉམས་པར་གྱུར་པ་སྟེ་སྒྲིབ་པའོ། །ཤེས་རྒྱ་ཆུང་བས་འཁོར་བ་ཞེས་བྱ་བ་ནི། མཉན་བསམ་གྱི་ཤེས་རབ་རྒྱ་ཆུང་བས་བསམ་གཏན་གྱི་ཡུལ་གང་ལ་འཇུག་མ་ཤེས་ཏེ། བྱ་མུན་པ་ལ་རྡུགས་པ་བཞིན་དུ་སེམས་འཁོར་ཞིང་འཚོམས་པ་སྟེ་སྒྲིབ་པའོ། །འདི་དག་ནི་དངོས་སུ་སྒྲིབ་པ་ཡིན་ཡང་ཞི་གནས་དང་ལྷག་མཐོང་སྐྱེ་བ་ཉིད་ལ་གེགས་སུ་གྱུར་པས། ཉེས་སྐྱོན་ཆེ་བའི་ཕྱི་བསམ་གཏན་གྱི་སྐྱོན་དྲུག་ཅེས་བྱའོ། །དེ་ལ་རྣམ་རྟོག་གཡེང་བའི་སྐྱོན་འབའ་ཞིག་ལ་ཡང་སྐྱོན་ལྔ་གསུངས་ཏེ། འདི་སྐད་དུ། རྟོག་པ་རགས་པའི་རི་བོ་དང་། །མཚན་མ་རྒྱུ་བ་ཚོར་བ་དང་། །བྱུང་ཚོར་སྐྱོན་ལྔ་སྤང་བར་བྱ། །རྟོག་པ་རགས་དང་འཕྲ་བ་གཉིས། །མཚན་མ་ཆེ་དང་ཆུང་བ་གཉིས། །རྒྱུ་བ་རིང་པོ་ཐུང་ངུ་གཉིས། །དེ་བཞིན་ཚོར་བ་གསལ་མི་གསལ། །བྱུང་ཚོར་གཉིས་སུ་སྣང་བའང་། །མྱུར་བ་དང་ནི་བུལ་བའོ། །ཞེས་གསུངས་ཏེ། འདི་རྣམས་རྟོག་པའི་བྱེ་བྲག་ཏུ་འདྲ་ཡང་། ཕྲ་རགས་ཀྱི་བྱེ་བྲག་དང་རྣམ་པའི་བྱེ་བྲག་གིས་ཁྱད་པར་དབྱེ་སྟེ། དེ་ལ་རྣམ་པའི་བྱེ་བྲག་ནི། རྟོག་པ་ནི་དོན་གྱི་དངོས་པོ་ཚོལ་བས་ཕྱེ། མཚན་མ་ནི་ཞེན་ཅིང་འཛིན་པས་ཕྱེ། རྒྱུ་བ་ནི་རྒྱུན་གྱིས་ཕྱེ། ཚོར་བ་ནི་ཉམས་སུ་མྱོང་བས་ཕྱེ། བྱུང་ཚོར་ནི་འབྱུང་འཇུག་གིས་ཕྱེ། ཕྲ་རགས་ནི་གོ་རིམ་དང་བྱེ་བྲག་གཉིས་བརྗོད་པ་དག་ཡིན་ནོ། །སྤྱིར་བསྡུ་ན་ཕྲ་བའང་རྣམ་པ་གཉིས་ཡིན་ཏེ། སྐྱེ་བ་ཕྲ་བ་དང་། འཛིན་པ་ཕྲ་བའོ། །རགས་པའང་རྣམ་པ་གཉིས་ཡིན་ཏེ། སྐྱེ་བ་རགས་པ་དང་། འཛིན་པ་རགས་པའོ། །དེ་ལ་མཁས་པ་རྣམས་ཀྱི་བློ་ནི་སྐྱེ་བ་རགས་ལ་འཛིན་པ་ཕྲ་སྟེ། སྐྱེ་བ་རགས་ཏེ། ཤེས་བྱ་ཐམས་ཅད་ལ་རྟོག་ཅིང་འཇུག་ལ། འཛིན་པ་ཕྲ་སྟེ། དེ་ལ་དངོས་པོ་དང་མཚན་མར་ཞེན་པ་མེད་དོ། །བླུན་པོ་རྣམས་ཀྱི་བློ་ནི་སྐྱེ་བ་ཕྲ་ལ་འཛིན་པ་རགས་ཏེ། སྐྱེ་བ་ཕྲ་སྟེ། ཤེས་བྱ་རྣམས་ལ་རྟོགས་ཤིང་འཇུག་མི་ནུས་ལ། འཛིན་པ་རགས་ཏེ། དངོས་པོར་འཛིན་ཅིང་ཞེན་པ་དང་མི་འབྲལ་ལོ། །དེ་བས་ན་རྣམ་པར་མི་རྟོག་པ་སྒོམ་པའི་ཚེ། སྐྱེ་བ་འཕྲ་ལ་འཛིན་པ་རགས་པའི་སེམས་ནི་ཐར་པའི་ལམ་མ་ཡིན་ཏེ། འདུ་ཤེས་མེད་པའི་སྙོམས་པར་འཇུག་པ་དང་ཆ་མཐུན་པས་ལམ་གྱི་སྒྲིབ་པ་ཡིན་ནོ། །དེ་བས་ན་དང་པོར་སྐྱེ་བ་རགས་ལ་འཛིན་པ་ཕྲ་བའི་སེམས་ལས་གོམས་པ་ཀློང་དུ་གྱུར་ཅིང་འཛིན་པ་ཕྲ་བའི་མཐུས་སྐྱེ་བ་ཉིད་ཀྱང་ཇེ་ཕྲ་ཇེ་ཕྲར་གྱུར་ནས། ཐ་མ་རྟོག་པའི་རྣམ་པ་ལྔ་པོ་འདི་དང་བྲལ་ལ། སེམས་རང་རིག་པ་ནི་མ་འགགས་ན་བདེན་པ་མཐོང་བ་ཞེས་བྱ། འདི་རྣམས་ཡུལ་དུ་འཛིན་པའི་རྟོག་པ་དང་། ཡུལ་འཛིན་པ་འཛིན་པའི་རྟོག་པ་གཉིས་ཀྱི་སྒོ་ནས་ཁད་ཀྱིས་ཞི་བར་ཚོར་ན། སེམས་ཀྱི་དྲོད་ཐོབ་པར་གཟུང་ངོ་། །གང་གི་ཚེ་འཛིན་པ་ཕྲ་བར་མ་ཚོར་བའི་སྐྱེ་བ་ཕྲ་བར་ཚོར་བ་ནི་ལམ་གྱི་དྲོད་དུ་མི་གཟུང་ངོ་། །དེ་ལ་ལམ་གྱི་སྒྲིབ་པ་དགུ་ལ། བསམ་གཏན་མི་གཡོ་བ་དང་། ལམ་ཐིམ་པ་དང་། གསལ་བ་གསུམ་ནི། ཡང་དག་པའི་རྩོལ་བ་ལ་སྒྲིབ་པ་སྟེ། འདི་ལྟར་མི་གཡོ་ནའང་ལམ་སྔ་མ་མི་གཏོང་ཞིང་། ལམ་གཞན་ཐོབ་པར་མི་རྩོལ་ཏེ། ཚང་ན་གནས་པའི་བྱེའུ་ཕྲུག་ལྟ་བུའོ། །དེ་བཞིན་དུ་ལམ་ནི་ཐིབ་ནའང་མི་རྩལ་ཏེ། འབེན་ཐིམ་པའི་མདའ་ལྟ་བུའོ། །ཤིན་ཏུ་གསལ་བར་གྱུར་ནའང་མི་རྩོལ་ཏེ། ཡུལ་གསལ་བས་དབང་པོའི་བློ་གཟུང་བ་ལྟ་བུའོ། །སེམས་ལ་ཤེས་པ་མང་པོ་སྐྱེ་བར་འདོད་པ་དང་། མངོན་པར་ཤེས་པ་ཐོབ་པར་འདོད་པ་དང་། མཚན་མའི་རྫུ་འཕྲུལ་འབྱིན་པར་འདོད་པ་གསུམ་ནི། ཡང་དག་པའི་ཏིང་ངེ་འཛིན་ལ་སྒྲིབ་པ་སྟེ། དཔེར་ན་ཁྱིམ་བདག་གིས་མར་གྱི་སྙིང་པོ་འདོད་པའི་ཕྱིར་བ་བཞོན་མང་པོ་བསྟེན་པ་ལས། དེའི་འོ་མ་དང་ཞོའི་ལོངས་སྤྱོད་ལ་ཆགས་པ་གྱུར་ན། མར་གྱི་སྙིང་པོ་ལ་སྒྲིབས་པར་གྱུར་པ་ལྟ་བུའོ། །འདི་བདག་གི་ལས་བླ་འམ་གང་ན་གཞན་མེད་པའི་ཆོས་ཐོབ་བོ་སྙམ་པ་དང་། རང་གི་ལྟ་བ་ལའང་བསྙེམས་པ་དང་། གཞན་གྱི་ལྟ་བ་ལ་ཁྱད་དུ་གསོད་པ་གསུམ་ནི། ཡང་དག་པའི་དྲན་པ་ལ་སྒྲིབ་སྟེ། འདི་ལྟར་ཡང་དག་པའི་དྲན་པ་ནི། ངེས་པའི་དོན་གྱི་མདོའི་དོན་དང་། དགེ་བའི་བཤེས་གཉེན་དམ་པ་རྣམས་ཀྱི་གདམས་ངག་མ་བརྗེད་པར་སྲུང་བ་ཡིན་ན། སྒྲིབ་པ་འདི་རྣམས་ཡོད་ན་དེ་དག་ཡལ་བར་འདོར་ཏེ། དཔེར་ན་རྒྱལ་པོའམ་བློན་པོའི་བུ་གཞོན་ནུ་རྒྱགས་པས་མྱོས་པ་དག །དམ་པ་རྣམས་ཀྱི་གདམས་ངག་ཡིད་ལ་མི་བྱེད་པ་བཞིན་ནོ། །བཅུ་པ་ནི་རང་བཞིན་གྱི་སྒྲིབ་པ་ཡིན་ཏེ། ཆོས་སྤྱོད་རྣམ་བཅུ་ཤིང་ལེབ་ཀྱི་ངོས་ལྟར་གཅིག་ལ་གཅིག་སྒྲིབ་པར་གྱུར་པས། དེ་བས་ན་བསམ་གཏན་ལ་སོགས་པ་དོན་ཆེན་པོ་ལ་གནས་པ་རྣམས་ཀྱིས། ཡི་གེ་འདྲི་བ་ལ་སོགས་པ་དོན་ཆུང་ངུའི་ཆོས་སྤྱོད་མི་སྤྱད་དོ། །ཞེས་བྱ་བའི་དོན་ཏོ། །དོན་འདི་རྣམས་ཀྱིས་ཀྱང་བསམ་གཏན་གྱི་སྒྲིབ་སྐྱོན་མཐའ་དག་བསལ་ཏེ་ཐར་པའི་ལམ་ལ་འཇུག་པར་གསུངས་པ་ཡིན་ནོ། །དེ་ལ་ཉེས་པ་ལྔ་སྤོང་བའི་འདུ་བྱེད་བརྒྱད་དང་ལྡན་པའི་ཏིང་ངེ་འཛིན་གང་ཞེ་ན། ཉེས་པ་ལྔ་ནི། ལེ་ལོ་དང་། དམིགས་པ་བརྗེད་པ་དང་། ཞུམ་རྒོད་དང་། མངོན་པར་འདུ་མི་བྱེད་པ་དང་། འདུ་བྱེད་པའོ། །དེ་ལ་ལེ་ལོས་ནི་དམ་པའི་ལུང་མི་ཉན་ཅིང་མི་འཇུག་གོ། །དམིགས་པ་བརྗེད་པས་ནི་བསམ་པ་ཉམས་ཏེ་ཐོས་པ་རྣམས་ཀྱང་དྲན་པ་མེད་པར་བྱེད་དོ། །ཞུམ་རྒོད་ཀྱིས་ནི་དོན་ལ་གོམས་པར་བྱེད་པའི་བློ་འཇུག་ཏུ་མི་སྟེར་རོ། །མངོན་པར་འདུ་མི་བྱེད་པ་དང་། བྱེད་པ་གཉིས་ཀྱིས་ནི། ཞི་གནས་དང་ལྷག་མཐོང་ཟུང་དུ་འབྲེལ་བའི་གེགས་བྱེད་དོ། །དེ་ལ་སྤོང་བའི་འདུ་བྱེད་བརྒྱད་ནི། དད་པ་དང་། འདུན་པ་དང་། བརྩོན་འགྲུས་དང་། ཤིན་ཏུ་སྦྱངས་པ་བཞིས་ནི། ལེ་ལོ་སྤོང་ངོ་། །དྲན་པས་ནི་དམིགས་པ་བརྗེད་པ་སྤོང་བའོ། །ཤེས་བཞིན་གྱིས་ནི་ཞུམ་རྒོད་སྤོང་ངོ་། །སེམས་པས་ནི་མངོན་པར་འདུ་མི་བྱེད་དྲགས་ན་གཟེང་བསྟོད་པར་བྱེད་དོ། །བཏང་སྙོམས་ཀྱིས་ནི་མངོན་པར་འདུ་བྱེད་དྲགས་ན་འགོ་གནོན་པར་བྱེད་དོ། །དེ་ནས་ཞི་གནས་དང་ལྷག་མཐོང་ཆ་མཉམ་པར་ཚོར་ན་ལྷག་པར་གཉེན་པོ་བསྟེན་པའི་རྩོལ་བ་མི་སྐྱེད་དོ། །བཏང་སྙོམས་སུ་བག་ཡངས་སུ་བཞག་སྟེ། དོན་ལ་གོམས་པར་བྱེད་དོ། །ཚུལ་འདིའང་ཐར་པའི་ལམ་མོ། །ཞེས་འབྱུང་ངོ་། །དེ་ལ་བཟུང་བཏགས་བཀག་ཕྱེ་བཅོམ་པ་དང་ལྡན་པའི་ཏིང་ངེ་འཛིན་གང་ཞེ་ན། འདི་སྐད་དུ། གཏོགས་འདོད་སྤྲེའུ་འདི་བཟུང་ནས་ཀྱང་། །རྐུན་མོ་བྱི་ལ་བཏགས་བྱས་ཏེ། །ཁང་སྟོང་ཕད་ཕུང་ཀུན་བཤིག་ནས། །གསེར་ཁུང་སྐར་ཁུང་ཀུན་བཀག་སྟེ། །རྒྱལ་པོའི་དཀོར་མཛོད་ཁ་ཕྱེ་ན། །དེ་དག་རྟག་ཏུ་སངས་རྒྱས་ཡིན། །ཞེས་གསུངས་པ་སྟེ། དེ་ལ་གཏོགས་འདོད་སྤྲེའུ་གཟུང་བ་ནི། ཕུང་པོ་དང་ཁམས་དང་སྐྱེ་མཆེད་ཀྱི་ཆོས་ལས་གཟུང་བར་འོས་པ་གཟུང་བ་སྟེ། འདི་ལྟར་ཡིད་ཀྱི་རྣམ་པར་ཤེས་པ་སྤྲེའུའི་གཏོགས་འདོད་ལྟར། རིགས་པ་དང་ལྡན་པའི་དོན་ལ་ནི་ཆེད་དུ་གཏད་ཀྱང་འཇུག་པར་མི་ནུས། རིགས་པ་དང་མི་ལྡན་པའི་དོན་ལ་ནི་སྐུལ་བ་མེད་པར་རང་ཞུགས་བྱེད་དེ། རྟག་ཏུ་དོན་མེད་པ་འཕྱན་པ་འདི། ཤེས་བཞིན་དྲན་པའི་སྣོད་དུ་བཅུག་སྟེ། གཞན་དུ་མི་གཡོ་བར་བསྡམ་དགོས་སོ། །རྐུན་མོ་བྱི་ལ་གདགས་པ་ནི། དེ་བཞིན་དུ་ཆོས་རྣམས་ལས་གདགས་པར་འོས་པ་གདགས་པ་སྟེ། དཔེར་ན་བྱི་ལ་ནི་ཤིན་ཏུ་དལ་ཞིང་འཇམ་པའི་སྤྱོད་པས། གཞན་གྱིས་མ་ཚོར་བར་གཞན་གྱི་སྲོག་རྐུ་བར་བྱེད་དོ། །དེ་བཞིན་དུ་ཉོན་མོངས་པ་ཅན་གྱི་ཡིད་ནི། ཤིན་ཏུ་རྒྱུ་བ་ཕྲ་བའི་ཚུལ་གྱིས་ཀུན་གཞི་ལ་ཁ་ནང་དུ་བལྟས་ཏེ་བདག་ཏུ་རློམ་སེམས་པས། དེའི་དབང་གིས་ཡིད་ཀྱི་རྣམ་པར་ཤེས་པའང་འཇིག་ཚོགས་ལ་ལྟ་བ་དང་མཚུངས་པར་ལྡན་པར་སྐྱེ་སྟེ། ཐམས་ཅད་ཟག་པ་དང་བཅས་པར་བྱིན་གྱིས་རློབ་པར་བྱེད་དོ། །དེ་བས་ན་འདི་ཆོས་ཐམས་ཅད་ལ་བདག་མེད་པར་རྟོགས་པ འི་ཤེས་རབ་ཀྱི་གཟུངས་ཀྱིས་མ་བཏགས་ན། ནམ་ཡང་ཐར་པའི་གོ་སྐབས་མི་འབྱེད་དོ། །འདི་ནི་ལྷག་མཐོང་སྤྱོད་པ་ཡིན་ནོ། །སྔ་མ་ནི་ཞི་གནས་སྤྱོད་པ་ཡིན་ནོ། །ཁང་སྟོང་ཕང་ཕུང་བཤིག་པ་ནི། ཕུང་པོ་དང་སྐྱེ་མཆེད་ཀྱི་གྲོང་སྟོང་བཤིག་པ་སྟེ། འདི་རྣམས་ལ་བདག་པོ་མེད་པས་གྲོང་སྟོང་ཡིན་ཏེ། རང་གི་ངོ་བོ་ཡང་མ་གྲུབ་པར་བཤིག་པས་གྲོང་སྟོང་ཉིད་ཀྱང་མེད་དེ་ནམ་མཁའ་ལྟ་བུར་རྟོགས་པར་བྱའོ། །འདི་ཡང་ལྷག་མཐོང་སྤྱོད་པའོ། །གསེབ་ཁུང་སྐར་ཁུང་དགག་པ་ནི། སྒོ་ལྔའི་རྣམ་པར་ཤེས་པ་སྟེ། དབང་ལྔའི་སྐར་ཁུང་ནས་བྱུང་ནས་ཡུལ་ལ་རང་བཞིན་གྱིས་གཡེང་བ་འདི་དག་ཡིད་ནང་དུ་བསྡུས་པའི་མཐུས་བཀག་སྟེ། མི་འཕྲོ་བར་བྱས་པ་སྟེ། འདི་ཡང་ཞི་གནས་སྤྱོད་པ་ཡིན་ནོ། །རྒྱལ་པོའི་དཀོར་མཛོད་ཁ་ཕྱེ་ཞེས་བྱ་བ་ནི། ཀུན་གཞི་རྣམ་པར་ཤེས་པའི་མཚན་ཉིད་ལ་མཁས་པར་བྱས་པ་སྟེ། དཔེར་ན་རྒྱལ་པོའི་མཛོད་ན་ནོར་བུ་རིན་པོ་ཆེ་ལ་སོགས་པ་ནོར་རིན་ཐང་མེད་པའང་ཡོད་ལ། དུག་ལ་སོགས་པ་དམན་པའི་རྫས་ཀྱང་ཡོད་དོ། །དེ་བཞིན་དུ་ཀུན་གཞི་རྣམ་པར་ཤེས་པ་ནི་ཟག་པ་དང་བཅས་པ་དང་། ཟག་པ་མེད་པའི་ཆོས་ཐམས་ཅད་ཀྱི་མཛོད་ཡིན་ཏེ། ཤེས་བྱ་ཐམས་ཅད་ཀྱི་གནས་ཡིན་ནོ། །དེ་ཡང་ཐེག་པ་འོག་མ་པའི་ཚུལ་གྱིས། ཀུན་གཞིའི་མཚན་ཉིད་ནི་ཟག་པ་དང་བཅས་པའི་ཆོས་ཐམས་ཅད་ཀྱི་རྒྱུ་དང་འབྲས་བུའི་ངོ་བོར་གནས་ཤིང་སྨིན་པ་ཡིན་པས། ཤིང་ཐོག་སྨིན་པ་དང་འདྲ་ལ། ཟག་པ་མེད་པ་རྣམས་ཀྱི་རྟེན་དང་གནས་ཙམ་ཡིན་ཏེ། དུག་གི་བུམ་པའི་ནང་ན་སྨན་གནས་པ་ལྟ་བུའོ། །ཞེས་བཤད། ཐེག་པ་གོང་མའི་ཚུལ་ལས་ནི། ཀུན་གཞིའི་མཚན་ཉིད་ནི་གདོད་མ་ནས་བྱང་ཆུབ་ཀྱི་སྙིང་པོའི་རང་བཞིན་དུ་དག་པ་ཡིན་པས་ཀུན་གཞི་བྱང་ཆུབ་ཀྱི་སེམས་ཞེས་བྱ་ལ། ཉོན་མོངས་པ་དང་གནས་ངན་ལེན་གྱི་བག་ཆགས་ནི་གློ་བུར་གྱི་དྲི་མ་སྟེ། གསེར་གཡས་གཡོགས་པའམ། ནོར་བུ་རིན་པོ་ཆེ་འདམ་དུ་བསུབས་པ་བཞིན་ཡོན་ཏན་ཅུང་ཟད་མི་སྣང་བར་ཟད་དེ། རང་བཞིན་ཉམས་པར་བྱས་པ་མེད་དོ། །ཇི་སྐད་དུ། རྡོ་རྗེ་བཀོད་པ་ལས། སྒྲོན་མ་འབར་བའི་རིན་ཆེན་ནི། གནས་ངན་འདམ་བུ་བྱིང་འགྱུར་ཡང་། །དེ་ཉིད་ཡོན་ཏན་རང་སྣང་བས། །འོད་ནི་མཁའ་ལ་གསལ་བ་ཡིན། །དེ་བཞིན་སེམས་ཉིད་རིན་པོ་ཆེ། །ལུས་ངན་འཁོར་བར་བྱིང་འགྱུར་ཡང་། །དེ་ཉིད་རང་བཞིན་འོད་གསལ་བས། །ཤེས་རབ་ཆོས་ཉིད་མཁའ་ལ་གསལ། །ཞེས་གསུངས་ལྟ་བུ་ཡིན་ནོ། །མདོར་ན་གང་ལྟར་ཡང་རུང་སྟེ་དཀར་ནག་གི་ཆོས་ཐམས་ཅད་ཀུན་གཞི་རྣམ་པར་ཤེས་པའི་སྣང་བ་ཙམ་ཡིན་ལ། སྣང་བ་དེའང་འདུ་བྱེད་ཀྱི་བག་ཆགས་ཀྱི་དབང་གིས་སྣང་བ་ཡིན་ཏེ། ཇི་ལྟར་སྣང་བ་དེ་བཞིན་ཡོད་པ་མ་ཡིན་པས། ཆོས་ཐམས་ཅད་རང་བཞིན་གྱི་མྱ་ངན་ལས་འདས་པར་རྟོགས་ན། རྒྱལ་པོའི་དཀོར་མཛོད་ཁ་ཕྱེ་བ་ཡིན་ཏེ། དེའི་ཚེ་སྤྲེའུ་ཡང་བཟུང་བ་ཡིན་ནོ། །བྱི་ལ་ཡང་བཏགས་པ་ཡིན་ནོ། །ཁང་སྟོང་ཡང་བཤིག་པ་ཡིན་ནོ། །སྐར་ཁུང་ཡང་ཁེགས་པ་ཡིན་ནོ། །འདི་ལྟ་བུའི་བློ་དང་ལྡན་ན་སངས་རྒྱས་ཀྱི་ལམ་གཞན་ནས་བཙལ་མི་དགོས་སོ། །ཞེའོ། །དེ་ལ་སེམས་གདུལ་བར་དཀའ་བའི་ཆོས་དྲུག་གདུལ་བ་ནི། ཇི་སྐད་དུ། དཔུང་བཟངས་ལས། སེམས་ནི་གློག་དང་རླུང་དང་སྤྲེའུ་དང་མཚུངས། །རྒྱ་མཚོ་ཆེན་པོ་ཡི་ནི་རླབས་དང་འདྲ། །སྒྱུ་ཅན་རྟག་ཏུ་ཡུལ་ལ་མངོན་དགའ་བ། །གཡོ་ཞིང་འཕྱན་པའི་སེམས་ནི་གདུལ་བར་བྱ། །ཞེས་གསུངས་པ་སྟེ། སེམས་ནི་གློག་དང་འདྲ་སྟེ་སྐད་ཅིག་ཙམ་གསལ། རྒྱུན་དུ་གསལ་བར་མི་གནས་པ་ཡིན། རླུང་དང་འདྲ་སྟེ་ངོ་བོ་ཉིད་ཀྱིས་གནས་པའི་ཆོས་མེད་དེ། གཡོ་ཞིང་རྣམ་པར་གཡེང་བའི་མཚན་ཉིད་ཅན་ཡིན། སྤྲེའུ་དང་འདྲ་སྟེ་བྱ་བ་ལ་མི་འཇུག་ཅིང་། བྱ་བ་མ་ཡིན་པ་ལ་འཇུག་པའི་ལས་ཅན་ཡིན། རྒྱ་མཚོ་ཆེན་པོའི་རླབས་དང་འདྲ་སྟེ། རྣམ་པར་རྟོག་པ་མི་ཟད་པ་ཡིན། སྒྱུ་ཅན་ཡིན་ཏེ་རྟག་ཏུ་ཡང་དག་པ་མ་ཡིན་པའི་དོན་བསྟེན་པ་ཡིན། རྟག་ཏུ་ཡུལ་ལ་མངོན་པར་དགའ་བ་ཡིན་ཏེ། ནང་དུ་ཡང་དག་འཇོག་ལ་མི་དགའ་བ་ཡིན། དེ་ལྟ་བུ་རང་བཞིན་གྱིས་གདུལ་བར་དཀའ་བ་དེ། བཟླས་བརྗོད་དང་བསམ་གཏན་གྱིས་བརྟུལ་ཏེ་ཐར་པའི་ལམ་ལ་སྦྱར་རོ། །ཞེའོ། །དེ་ལ་གདུལ་བའི་ཐབས་ཀྱང་མདོར་བསྡུ་ན་རྣམ་པ་གཉིས་ཡིན་ཏེ། ཨ་ནུ་གྲ་ཧ་ཞེས་བྱ་བ་རྗེས་སུ་མཐུན་པས་གཟུང་བ་དང་། བི་གྲ་ཧ་ཞེས་བྱ་བ་བཟློག་སྟེ་གཟུང་བའམ་ཚར་བཅད་པས་གཟུང་བ་གཉིས་སོ། །དེ་ལ་རྗེས་སུ་མཐུན་པས་གཟུང་བ་ནི། གློག་ཅུང་ཟད་གསལ་བ་བཞིན་དུ་བསམ་གཏན་གྱི་ཡུལ་ལ་དང་པོ་ཅུང་ཟད་ཙམ་གཞག་སྟེ་ཡུན་རིང་དུ་མི་གཏད་དོ། །རླུང་ལྟར་འདུ་བྱེད་སྣ་ཚོགས་ཀྱི་སྒོ་ནས་འཇུག་པར་བྱའོ། །སྤྲེའུ་ལྟར་མཐུན་མཐུན་ལ་འཇུག་པར་བྱའོ། །རྒྱ་མཚོ་ལྟར་རྟོག་པ་སྣ་ཚོགས་དང་མཐུན་པར་བྱའོ། །སྒྱུ་ཅན་ལྟར་ཡང་དག་པ་མ་ཡིན་པའང་གདུལ་བའི་སྐབས་སུ་བསྟེན་པར་བྱའོ། །ཡུལ་ལ་མངོན་པར་དགའ་བ་བཞིན་དུ་འདོད་པའི་ཡུལ་ལའང་གཏད་དོ། །བཟློག་སྟེ་གཟུང་བ་ནི། གློག་ལས་བཟློག་སྟེ་ཡུན་རིང་དུའང་གསལ་བར་གཟུང་། རླུང་ལས་བཟློག་སྟེ་མི་གཡོ་བར་ཡང་བྱ། སྤྲེའུ་ལས་བཟློག་སྟེ་བྱ་བའི་དོན་ལ་གཏད། རྒྱ་མཚོ་ལས་བཟློག་སྟེ་རྟོག་པའི་རླབས་ཞི་བར་བྱ། སྒྱུ་ཅན་ལས་བཟློག་སྟེ་ཡང་དག་པའི་དོན་ལ་བརྟག །ཡུལ་ལ་མངོན་པར་དགའ་བ་ལས་བཟློག་སྟེ། ནང་དུ་ཡང་དག་འཇོག་ལ་གཞག་གོ། །མདོར་ན་སེམས་ཐ་མལ་པའི་ཆོས་ལུགས་དང་རྗེས་སུ་མཐུན་པས་གདུལ་བའི་ཐབས་འདི་ལ། ཐབས་འདི་དང་འདི་ཞེས་རིས་སུ་ཆད་པ་མེད་དེ། སེམས་ཀྱི་འདུ་བྱེད་ཇི་ལྟར་འཕྲོ་ཞིང་གང་ལ་འཇུག་པ་དང་། ཇི་སྙེད་དུ་འཇུག་པ་དེ་དག་ཐམས་ཅད་ཀྱི་རྗེས་སུ་བསམ་གཏན་གྱི་ཡུལ་གང་ཡང་རུང་བ་ཞིག་རྗེས་སུ་མཐུན་པར་བསམ་པས། མཐའ་རྟོག་པ་ཉིད་ཀྱང་བསམ་གཏན་གྱི་ཡུལ་ལས་འདས་ནས་གཞན་དུ་འགྲོ་བའི་ས་གནས་མི་རྙེད་དོ། །འདི་ནི་ཕལ་ཆེར་ཞི་གནས་སྤྱོད་པའི་དབང་དུ་གསུངས་པའོ། །དེ་ལ་རྣལ་འབྱོར་གྱི་ཡན་ལག་དྲུག་དང་ལྡན་པའི་ཏིང་ངེ་འཛིན་ནི། འདི་སྐད་དུ། འདུས་པ་ལས། སོ་སོར་སྤོང་དང་བསམ་གཏན་དང་། །དབུགས་དགག་གཏོང་དང་གཟུང་བ་དང་། །རྗེས་སུ་དྲན་དང་ཏིང་འཛིན་ནི། །སྦྱོར་བའི་ཡན་ལག་དྲུག་ཅེས་བྱ། །ཞེས་གསུངས་པ་སྟེ། དེ་ལ་ནང་སེམས་ཀྱི་རྣལ་འབྱོར་འཐོབ་པའི་ཡན་ལག་འདི་དྲུག་ཡིན་ཏེ། དེ་ལ་སོ་སོར་སྤོང་བ་ནི། སྡོམ་པ་ལ་གནས་པ་ཡིན་ཏེ། ཇི་ལྟར་ཚུལ་ཁྲིམས་རྣམ་པར་དག་པ་འདོད་པས་གཡེང་བ་མེད་ཅིང་འགྱོད་པའི་དྲི་མ་མེད་པས་རྟག་ཏུ་དབང་པོ་བསྡམས་པའི་པའི་ཕྱིར། ཏིང་ངེ་འཛིན་འཐོབ་པ འི་རྒྱུ་ཡིན་པ་དེ་བཞིན་དུ། སོ་སོར་སྤོང་བ་ཞེས་བྱ་བ་འདི་ཡང་ཡུལ་དང་དབང་པོའི་སྒོ་ནས་རྣམ་པར་ཤེས་པ་སྐྱེ་བ་ཐམས་ཅད་སྐྱོན་དུ་བལྟས་ཏེ་སྤང་བར་བྱ་བའང་མ་ཡིན། དངོས་པོར་བལྟས་ཏེ་མཚན་མའི་རྗེས་སུ་འབྲང་བའང་མ་ཡིན་ཏེ། རྟག་ཏུ་རང་གི་ལྷའི་བདག་ཉིད་དུ་བལྟས་ཏེ་སྤྱད་པར་བྱ་ལ་དངོས་པོར་ཞེན་པ་དང་དགག་པ་གཉིས་སྤང་བར་བྱ་བ་འདི་ནི། དབང་པོ་རང་བཞིན་གྱིས་བསྡམས་ཤིང་། འདོད་པ་བཀག་པའི་གདུང་བས་ཀྱང་མ་ཟིན་པ་དང་། རྒྱལ་བའི་བྱིན་རླབས་ཀྱང་ཉེ་བར་འགྱུར་བས། བསམ་གཏན་གྱི་སྣོད་དུ་འགྱུར་བ་ཡིན་ནོ། །འདི་ལ་སོ་སོར་སྤྱོད་པ་ཞེས་ཀྱང་བྱ་སྟེ། བདེ་བས་ལོངས་སྤྱོད་དོ། །སོ་སོར་སྤོང་བ་ཞེས་ཀྱང་བྱ་སྟེ། འདོད་པས་གཡེང་བར་འགྱུར་བ་སྤོང་ངོ་། །བསམ་གཏན་ནི། འདོད་པ་དང་སྡིག་ཏོ་མི་དགེ་བའི་ཆོས་ལས་དབེན་པ་ལས་སྐྱེས་པ་ཡིན་པས། དེའི་འོག་ཏུ་བསམ་གཏན་བསྟན་པར་རིགས་སོ། །དེ་ཡང་ཡན་ལག་རྣམ་པ་ལྔ་སྟེ། འདི་ལྟར། རྟོག་དཔྱོད་གཉིས། དགའ་བདེ་གཉིས། སེམས་རྩེ་གཅིག་པ་དང་ལྔའོ། །བསམ་གཏན་གྱི་ཡུལ་ཡང་འདིའི་སྐབས་སུ་གསང་བ་གསུམ་ཉིད་ཡིན་ཏེ། གསང་བ་གསུམ་གྱིས་ནི་ཕྱག་རྒྱ་ཐམས་ཅད་བསྡུས་སོ། །ཕྱག་རྒྱས་ནི་ཡོངས་སུ་དག་པའི་ལྷ་ཐམས་ཅད་ཀྱང་དོན་དང་རྟགས་ཀྱི་ཚུལ་གྱིས་བསྡུས་སོ། །དེ་ལ་གསང་བ་གསུམ་ལས། སྐུའི་གསང་བ་ནི། ལྷའི་གཟུགས་ཀྱི་སྐུ་ཁ་དོག་དང་དབྱིབས་དང་གཡོ་བའི་བྱེ་བྲག །འདི་སྐད་དུ། བསམ་གཏན་ཕྱི་མ་ལས། སྨིན་མ་མིག་དང་སོ་དང་མཆུ། །བཞིན་དང་ལུས་དང་རྐང་ལག་གིས། །རྡོ་རྗེ་སེམས་དཔའ་དཔལ་གྱི་རྒྱ། །རང་དོན་ལས་རྣམས་སྒྲུབ་བྱེད་པའོ། །ཞེས་གསུངས་པ་བཞིན། སྐུའི་ཚུལ་ཐམས་ཅད་ཀྱི་སྒོ་ནས། བསམ་གཏན་གྱི་ཡུལ་དུ་དམིགས་པའོ། །གསུང་གི་གསང་བ་ནི། སྒྲ་དང་སྒྲ་མིན་རྣམ་དཔྱད་པ། །ང་རོ་སྦས་པ་རྡོ་རྗེའི་གསུང་། །ཞེས་བྱ་བ་ལ་སོགས་པ་གསུངས་པ་ལྟར། ལྷའི་ཐུགས་ཀ་དང་ལྗགས་སྟེངས་སུ་ཆོས་ཀྱི་ཡི་གེ་ཁ་དོག་དང་དབྱིབས་ཀྱི་མཚན་མར་བསམ་པ་དང་། དེ་ཡང་སྒྲ་དང་སྒྲའི་དོན་གྱི་ཆོས་ཉིད་དང་བཅས་པར་བརྟག་ཅིང་དཔྱད་པ་ནི་བསམ་གཏན་ཐོབ་པའི་རྒྱུ་ཡིན་ཏེ། ཇི་སྐད་དུ། སྒྲ་ལ་གནས་པའི་བསམ་གཏན་ནི་རྣལ་འབྱོར་ཐོབ་པར་བྱེད་པ་ཡིན་ལ། སྒྲའི་མཐའ་ལ་གནས་པའི་བསམ་གཏན་ནི་ཐར་པ་སྟེར་བར་བྱེད་པར་གསུངས་པ་དང་འདྲའོ། །ངག་སྒྲ་གྲགས་པར་བརྗོད་པ་ནི་བསམ་གཏན་གཙོར་སྨོས་པའི་སྐབས་འདིར་གཡེང་བའི་རྒྱུར་འགྱུར་རོ། །ཐུགས་ཀྱི་གསང་བ་ནི། ཐུགས་ཀར་སེམས་དཔའི་རྡོ་རྗེ་བསྒོམ་པ་དང་། ཡེ་ཤེས་སེམས་དཔའ་ལྟ་བུར་བསྒོམ་པ་ནི་ཐུགས་ཀྱི་མཚན་མ། དེའི་དོན་བྱང་ཆུབ་ཀྱི་སེམས་དང་ཆོས་ཀྱི་སྐུར་གནས་པའི་མཚན་ཉིད་རྣམ་པར་དཔྱད་པ་ནི་ཐུགས་ཀྱི་བདག་ཉིད་དེ། དེ་ལྟར་གསང་བ་གསུམ་ལ་དམིགས་པ་ནི་བསམ་གཏན་གྱི་ཡུལ་ལོ། །དེ་ལ་དམིགས་པར་བྱེད་པ་ནི། ཡན་ལག་ལྔའི་ཚུལ་གྱིས་དམིགས་པར་བྱེད་དེ། དེ་ལ་རྟོག་པ་ནི་གསང་བ་གསུམ་གྱི་མཚན་ཉིད་ཇི་ལྟ་བ་བཞིན་དུ་རྟོག་པའི་བློ་སྐྱེ་བའོ། །དཔྱོད་པ་ནི་དེ་ཉིད་ལ་བློ་ཡང་དང་ཡང་དུ་སྦྱོང་ཞིང་། དེའི་དོན་དང་བཅས་པ་ལ་དཔྱོད་པ་ཡང་དང་ཡང་འཇུག་པའོ། །དགའ་བ་ནི་རྟོག་དཔྱོད་གཉིས་ཀྱི་བསམ་གཏན་ཐོབ་པས་གསང་བ་གསུམ་གྱི་འདྲ་སྣང་གི་རྣམ་པ་འབྱུང་བར་འགྱུར་ཏེ། དེའི་ཚེ་འདོད་པས་དབེན་པར་གྱུར་པ་དང་། སྔར་མ་མྱོང་བའི་དོན་ཉམས་སུ་མྱོང་བས་ཐུན་མོང་མ་ཡིན་པའི་དགའ་བ་རླབས་པོ་ཆེ་སྐྱེའོ། །བདེ་བ་ནི་དེའི་དབང་གི་སེམས་བསྡུས་པ་ཐོབ་པ་ན་ལུས་དང་སེམས་ཀྱི་ཚོར་བ་བདེ་བ་ཉམས་སུ་མྱོང་བར་འགྱུར་རོ། །སེམས་རྩེ་གཅིག་པ་ནི་དེ་ལྟར་སེམས་ཤིན་ཏུ་བསྡུས་པར་གྱུར་པ་ལས། ཤེས་པ་དང་ཤེས་བྱ་གཉིས་སུ་སྣང་བར་མི་སྐྱེ་སྟེ། རང་རིག་པ་ཙམ་དུ་གྱུར་པའོ། །དེ་ལྟར་བསམ་གཏན་གྱིས་སེམས་ཞི་བར་བྱས་པ་ལ། དེ་ཤིན་ཏུ་དུལ་བར་བྱ་བའི་ཕྱིར་དབུགས་དགག་ཅིང་གཏོང་བ་ལ་བསླབ་པར་བྱའོ། །དེ་ལ་ཇི་ལྟར་བསླབ་པའི་ཐབས་ནི་སྒོ་མང་བས་གང་ལྟར་བསླབས་ཀྱང་འགལ་བ་མེད་དོ། །དེ་ནས་སེམས་དུལ་ཞིང་དབུགས་ཞི་ནས། བརྟན་ཞིང་སྟོབས་དང་ལྡན་པར་བྱ་བའི་ཕྱིར། དབུགས་ནང་དུ་གཟུང་བ་ལ་བསླབ་པར་བྱའོ། །དེ་ནས་དབུགས་ཟིན་ཏེ་སེམས་ཀྱང་ཤིན་ཏུ་ཞི་བར་གྱུར་ནས་བརྟན་པ་ཐོབ་པ་ན། མཚན་མ་རྣམ་པ་ལྔ་འབྱུང་བར་འགྱུར་ཏེ། འདི་སྐད་དུ། དང་པོ་སྨིགས་རྒྱུ་འདྲ་བ་དང་། །གཉིས་པ་ལ་ནི་དུ་བའི་ཚུལ། །གསུམ་པ་སྲིན་བུ་མེ་ཁྱེར་འདྲ། །བཞི་པ་མར་མེ་བཞིན་དུ་འབར། །ལྔ་པ་རྟག་ཏུ་སྣང་བ་ནི། །སྤྲིན་མེད་པ་ཡི་ནམ་མཁའ་བཞིན། །ཞེས་གསུངས་ཏེ། དེ་ལ་རྟགས་འདི་ཡང་ཕྱི་ནང་རྣམ་པ་གཉིས་ཏེ། དེ་ལ་ཕྱིའི་རྟགས་ནི་དབུགས་ནང་དུ་ཟིན་པར་གྱུར་པ་ན། ཕྱི་རོལ་དུ་མདུན་གྱི་ནམ་མཁའ་ལ་མིག་ལམ་དུ་འོད་སྣང་བར་འགྱུར་ཏེ། དེ་ཡང་དང་པོ་དབུགས་བརྟན་པར་ཟིན་ནས་ནམ་མཁའ་ལ་ཡུན་རིང་དུ་བརྟན་པར་བལྟས་པ་ན། འོད་སྣང་བའི་སྔ་རྟགས། དུ་བའི་རྣམ་པ་སྨིགས་རྒྱུའི་རྣམ་པ་འདྲ་བ་མཐོང་བར་འགྱུར་རོ། །དེ་བརྟན་པར་གྱུར་ནས་དུ་བ་འདྲ་བ་མཐོང་བར་འགྱུར་རོ། །དེ་བརྟན་པར་གྱུར་ནས་སྲིན་བུ་མེ་ཁྱེར་གྱི་འོད་འདྲ་བ་མཐོང་བར་འགྱུར་རོ། །དེ་བརྟན་པར་གྱུར་ནས་མར་མེའི་འོད་འདྲ་བ་མཐོང་བར་འགྱུར་རོ། །དེ་བརྟན་པར་གྱུར་ནས་སྲིན་མེད་པའི་ནམ་མཁའ་བཞིན་དུ་ཐམས་ཅད་གསལ་བར་འགྱུར་ཏེ། རྟགས་ཚད་དུ་ཕྱིན་ཏོ། །འདི་ནི་ཉིན་པར་གྱི་དབང་དུ་གསུངས་པ་ཡིན་ཏེ། མཚན་མོ་བལྟས་ན་ནི་ཐམས་ཅད་དུ་མེའི་འོད་འདྲ་བ་རིམ་གྱིས་རྒྱས་པར་མཐོང་བར་འགྱུར་རོ། །ནང་གི་རྟགས་ནི་སེམས་ཇེ་ཞི་ཇེ་གསལ་གྱུར་པ་ཉིད་དང་སྦྱར་རོ། །དེ་ལྟར་བརྟན་པའི་རྟགས་ཐོབ་ནས། སེམས་ཤིན་ཏུ་སྦྱངས་པ་ཐོབ་པར་བྱ་བའི་ཕྱིར། རྗེས་སུ་དྲན་པ་བསྒོམ་པར་བྱ་སྟེ། སྟེང་འོག་གི་སྒོ་གང་རུང་ཞིག་ནས་གསང་བ་གསུམ་གྱི་རྣམ་པའི་འོད་ཟེར་གྱི་སྤྲོ་བསྡུ་རྒྱ་ཆེ་ཆུང་དང་གྲངས་མང་ཉུང་གིས་སེམས་ཀྱི་རྩལ་སྦྱང་བར་བྱའོ། །དེ་ལྟར་རྩ་འབྱོངས་ནས་ཏིང་ངེ་འཛིན་ལ་བསླབ་པ་ནི། གོང་མ་ལྟར་རྩལ་འབྱོངས་པའི་ཤུགས་ཀྱིས་ཡེ་ཤེས་རང་རིག་པ་ཐོབ་སྟེ། རྣམ་པར་མི་རྟོག་པའི་ཡེ་ཤེས་མངོན་དུ་གྱུར་ཏེ་སྒྲིབ་པའི་དྲྭ་བ་ཐམས་ཅད་གཅོད་པར་འགྱུར་རོ། །ཡན་ལག་གཞན་གྱི་ཡོན་ཏན་ནི། སོ་སོར་སྦྱང་པས་བདེར་གཤེགས་རྣམས་དགོངས་པར་འགྱུར། བསམ་གཏན་ཐོབ་པ་ལས་མངོན་པར་ཤེས་པ་འཐོབ་བོ། །དབུགས་དང་དབང་དུ་གྱུར་པ་ལས་འོད་ཀྱི་དཀྱིལ་འཁོར་འབྱུང་ངོ། །དེ་ལུས་དང་སེམས་དང་ལྷ་ལ་དམིགས་པའི་ཚུལ་གང་ཞེ་ན། ལུས་ལ་དམིགས་པ་ནི་དབུགས་ཀྱི་སྒོ་ནས་དམིགས་ཏེ། དེ་ཡང་། དབུགས་ཀྱི་རང་བཞིན་དང་། དེ་བཞིན་དུ། གནས་དང་། ཡུལ་དང་། ལམ་དང་། ལས་དང་། དམིགས་པའི་ཐབས་དང་། ཡོན་ཏན་ནོ། །དེ་ལ་དབུགས་ཀྱི་རང་བཞིན་ནི། ལུས་ཉིད་ཁམས་ལྔའི་རང་བཞིན་དུ་གནས་པས། དབུགས་ཀྱི་རང་བཞིན་ཁམས་ལྔའི་རང་བཞིན་ཡིན་ཏེ། དེ་ལ་སའི་དབུགས་ནི་སྲ་ཞིང་ལྕིའོ། །ཆུའི་དབུགས་ནི་དལ་ཞིང་འཇམ་མོ། །མེའི་དབུགས་ནི་ཡང་ཞིང་དྲོའོ། རླུང་གི་དབུགས་ནི་ཡང་ཞིང་རྩུབ་བོ། །ནམ་མཁའི་དབུགས་ནི་ཕྲ་ཞིང་རྒྱུ་བ་མི་ཚོར་རོ། །དབུགས་ཀྱི་གནས་ནི་སྙིང་ཁོང་སྟོང་དང་། གློ་བ་ཁོང་སྟོང་ངོ་། །དབུགས་ཀྱི་ཡུལ་ནི་ནང་དུ་ལུས་ཀུན་ལ་ཡང་ཁྱབ་པར་རྒྱུ་ན། ཤས་ཆེར་ལྟེ་བ་ཡན་ཆད་ནས། ཕྱི་རོལ་གྱི་སོར་བཅུ་དྲུག་ཚུན་ཆད་དོ། །དབུགས་ཀྱི་ལམ་ནི་གཙོར་མགྲིན་པའི་གསང་ནས་སྣའི་བུ་གའོ། །དབུགས་ཀྱི་ལས་ནི་གཉིས་ཏེ། འཛིན་པའི་ལས་དང་། བྱེད་པའི་ལས་སོ། །དེ་ལ་འཛིན་པའི་ལས་ནི་རེག་པས་ལུས་ལ་ཕན་འདོགས་ཤིང་། ལུས་འཛིན་པར་ཡང་བྱེད། སེམས་ཀྱི་བཞོན་པ་བྱེད་ཅིང་སེམས་ཀྱང་འཛིན་པར་བྱེད་དེ། ལུས་སེམས་གཉིས་ག་འཛིན་པར་བྱེད་པས་སྲོག་འཛིན་པའི་ལས་བྱེད་ཅེས་བྱ། བྱེད་པའི་ལས་ནི། གཡོ་བའི་ཚེ་ལུས་སེམས་གཉིས་ག་ཡང་གཡོ་བར་བྱེད། མི་གཡོ་བའི་ཚེ་གཉིའ་ག་ཡང་མི་གཡོ་བར་བྱེད་དོ། །དབུགས་ལ་དམིགས་པའི་ཐབས་ནི་སྒོ་མང་སྟེ། གང་ལྟར་ཡང་འགལ་བ་མེད་དོ། །མདོར་བསྡུ་ན་དབུགས་ཀྱི་ཆོས་དང་མཐུན་པར་དམིགས་པ་དང་། ཆོས་ལ་མ་བརྟེན་པར་དམིགས་པའོ། །དེ་ལ་མཐུན་པ་ནི། གཡས་ནས་རྒྱུ་བ་མེ་དང་རླུང་གི་ཁམས། །གཡོན་ནས་རྒྱུ་བ་ས་དང་ཆུ་ཡི་ཁམས། །དབུས་ནས་རྒྱུ་བ་ནམ་མཁའི་ཁམས། །ཞེས་བཤད་པ་དང་། དེ་ལས་ཀྱང་ཕྱེ་ན། གཡས་གཡོན་རེ་རེ་ལའང་ཁམས་ལྔ་ལྔ་ཚང་བར་རྒྱུ་བ་དང་། རགས་རིམ་མདོར་བསྡུ་ན། གཡས་གཡོན་རེ་རེ་ལའང་འབྱུང་བ་རེ་རེའི་ཤས་སུ་བསྟན་པ་དག་གི་སྒོ་ནས། ཁ་དོག་དང་། དབྱིབས་དང་། བོང་ཚོད་དང་། རྣམ་པའི་སྒོ་ནས་སོ་སོར་ཕྱེ་ནས་དམིགས་པའོ། །རྣམ་པའང་འོད་དང་། ཡི་གེ་དང་། མཚན་མ་དང་། སྐུ་ཕྲ་མོ་ལྟ་བུའི་རྣམ་པར་དམིགས་པའོ། །ཆོས་ལ་མ་རྟེན་པ་ནི་བྱེ་བྲག་སོ་སོར་ཕྱེ་བ་མེད་པར། དབུགས་ཕྱི་ནང་དུ་རྒྱུ་བ་ཙམ་ལ་དམིགས་ཏེ། མཚན་མའི་རྣམ་པ་གང་ཡང་རུང་བ་གཅིག་ལ་དམིགས་པའམ། རེག་བྱ་ཙམ་ལ་དམིགས་ཀྱང་རུང་སྟེ། སེམས་མ་ཡེང་བར་གཏད་པ་འབའ་ཞིག་ཙམ་གྱིས་ཀྱང་ཆོག་གོ། །སྤྱིར་གྲགས་པའི་ཁ་དོག་དང་བོང་ཚོད་ཀྱི་སྐྱོན་དང་ཡོན་ཏན་ནི། ཁམས་རྣམས་ནི་གདུགས་པའི་མཚན་ཉིད་ཡིན་པས། བསམགཏན་གྱི་ཡུལ་དམིགས་པ་ཙམ་ལའང་མཐུ་བརྟས་པའི་དུས་ན། སྐྱོན་དང་ཡོན་ཏན་ཡོད་དེ། དེ་ལ་ཁ་དོག་དཀར་པོ་ནི་གདུག་པ་ཞི་བར་བྱེད་པའི་མཚན་ཉིད། སེར་པོ་ནི་གདུགས་པ་འཛིན་པའི་མཚན་ཉིད། དམར་པོ་ནི་གདུགས་པ་མཆེད་པའི་མཚན་ཉིད། ནག་པོ་ནི་གདུགས་པ་སློང་བའི་མཚན་ཉིད་ཅེས་འབྱུང་། རེག་བྱ་དང་བོང་ཚོད་ཀྱང་སྲ་ཞིང་སྦོམ་པ་ལྟར་ལུས་ལ་མི་བདེ་བ་འབྱུང་། ཕྲ་ཞིང་དང་ལ་ཆུ་ཟླ་ལྟར་དངོས་པོའི་ཤས་ཆུང་བར་དམིགས་ན། ལུས་ལ་མི་བདེ་བ་མི་འབྱུང་ངོ། །ཞེའོ། །དབུགས་ལ་དམིགས་པའི་ཡོན་ཏན་ནི། ལུས་ཀྱི་རྣམ་པ་ལ། མཁས་པས། གཅིག་པུར་ལྟ་བ་དང་། དངོས་པོར་ལྟ་བ་དང་། བདེ་ཞིང་གཙང་བར་ལྟ་བ་རྣམས་ལྡོག་སྟེ། ལྷག་མཐོང་སྐྱེད་དོ། །སེམས་གནས་པ་ཐོབ་པས་ཞི་གནས་ལས་སུ་རུང་བར་འགྱུར་རོ། །སེམས་ལ་དམིགས་པའང་དེ་བཞིན་སྦྱར་ཏེ། སེམས་ཀྱི་རང་བཞིན་ནི་སྣང་བའི་ཁམས་དང་། རློམ་སེམས་པའི་ཁམས་དང་། དངོས་པོ་སོ་སོ་རྣམ་པར་རིག་པའི་ཁམས་སེམས་ཀྱི་གནས་ནི་ཁམས་ལྔ་པའི་རླུང་ལ་ཞོན་ནས། ཁམས་ལྔ་པའི་ལུས་ལ་གནས་སོ། །སེམས་ཀྱི་ཡུལ་ནི། སྣང་བའི་ཡུལ་ནི་ཆོས་ཐམས་ཅད་དོ། །རློམ་སེམས་པའི་ཡུལ་ནི། སེམས་ཉིད་དོ། །རྣམ་པར་རིག་པའི་ཡུལ་ནི་ཕྱིའི་སྐྱེ་མཆེད་རྣམས་སོ། །སེམས་ཀྱི་ལམ་ནི་དབང་པོ་རྣམས་སོ། །སེམས་ཀྱི་ལས་ནི་གཉིས་ཏེ། འཛིན་པའི་ལས་ནི་ཆོས་ཐམས་ཅད་འཛིན་པར་བྱེད་དོ། །བྱེད་པའི་ལས་ནི་དཀར་ནག་གི་འདུ་བྱེད་ཐམས་ཅད་མངོན་པར་འདུ་བྱེད་དོ། །སེམས་ལ་དམིགས་པའི་ཐབས་ནི། གོང་དུ་དབུགས་ལ་དམིགས་པ་ལས་སུ་རུང་བས། དེ་ནས་དྲན་པ་དང་ཤེས་བཞིན་གྱིས་བཟུང་སྟེ། སེམས་ཇི་ལྟར་སྐྱེ་བ་ཉིད་ལ་དམིགས་པས་སེམས་ཀྱི་མཚན་ཉིད་ཁོང་དུ་ཆུད་པར་འགྱུར་རོ། །དམིགས་པའི་ཡོན་ཏན་ནི། བདག་ཏུ་ལྟ་བ་དང་། རྟག་པ་ལྟ་བ་དང་། དངོས་པོར་ལྟ་བ་ཐམས་ཅད་ལྡོག་སྟེ། ལྷག་མཐོང་སྐྱེད་དོ། །སེམས་ལས་སུ་རུང་བར་འགྱུར་ཏེ་ཞི་གནས་འཐོབ་བོ། །དེ་ལྟར་ལུས་དང་སེམས་ལ་དམིགས་པ་ལས་སུ་རུང་ནས། ལྷ་ལ་དམིགས་པར་བྱ་སྟེ། ལྷ་ལའང་རེ་ཤིག་གི་མཚན་མ་ལུས་སེམས་དང་མཐུན་པར་བསྟན་ཏེ། དེ་ཡང་འདི་ལྟར་ལྷའི་རང་བཞིན་ནི། ཆོས་ཉིད་དག་པ་དང་། རྣམ་པར་མི་རྟོག་པའི་ཡེ་ཤེས་དང་། ཅི་ཡང་ས་ལེ་མཁྱེན་པའི་ཡེ་ཤེས་དང་། འགྲོ་བ་འདུལ་བའི་གཟུགས་ཀྱི་སྐུ་དང་། སོ་སོའི་སྐད་དུ་དམ་པའི་ཆོས་སྟོན་པའི་གསུང་སྟེ། ཆོས་ལྔའི་རང་བཞིན་ནོ། །ལྷའི་གནས་ནི། སེམས་ཅན་གྱི་ལུས་དང་། སེམས་ཉིད་དོ། །ལྷའི་ཡུལ་ནི་ཆོས་ཀྱི་དབྱིངས་དང་། ཐུགས་རྗེའི་ཞིང་རྣམས་སོ། །ལྷའི་ལམ་ནི་འགྲོ་འོང་མི་མངའ་འང་། ལྷའི་ཡོངས་སུ་གཟུང་བ་ནི་སེམས་ཅན། སེམས་ཅན་གྱི་སྐྱབས་ནི་ལྷ་སྟེ། འབྲེལ་པ་གཉིས་ཀྱི་སྒོ་དང་ལམ་དུ་གྱུར་པ་ནི། སེམས་ཅན་དང་ལྷར་འབྲེལ། ལམ་གྱི་ཆོས་དང་། ལྷ་དང་སེམས་དུ་འབྲེལ། ལུང་གི་ཆོས་སོ། །ལྷའི་ལས་ནི། འཛིན་པའི་ལས་ནི་ཡོན་ཏན་ཐམས་ཅད་ལྡན་པའོ། །བྱེད་པའི་ལས་ནི་སེམས་ཅན་སྒྲོལ་བར་མཛད་པའོ། །ལྷ་ལ་དམིགས་པའི་ཐབས་ནི་ལུས་དང་སེམས་ཉིད་ལྷར་བསྒོམས་པ་སྟེ། དེ་ཡང་རྣལ་འབྱོར་རྣམ་པ་གསུམ་གྱི་ཚུལ་གྱིས། བྱིན་གྱིས་རློབ་པའི་ཚུལ་ལམ། ཡོངས་སུ་བརྟགས་པའམ། རྫོགས་པའི་ཚུལ་གང་ཡང་རུང་བར་བསྒོམ་མོ། །ཡོན་ཏན་ནི། ཚོགས་རྣམ་པ་གཉིས་དུས་གཅིག་ཏུ་རྫོགས་པར་འགྱུར་བའོ། །དེ་ལྟར་དམིགས་པ་རྣམ་པ་གསུམ་ལ་རིམ་གྱིས་བསླབ་ཅིང་། རིམ་གྱིས་པར་བཤད་པ་འདི་ནི། བྱིས་པ་དང་པོ་གཞུག་པ་ཙམ་སྟེ། དངོས་སུ་ནི་ལུས་ཉིད་སེམས་ཀྱི་རྣམ་པ་ཡིན་ལ། སེམས་ཀྱི་རང་བཞིན་ནི་ལྷ་ཡིན་ནོ། །དེ་བས་ན་ཕྱི་ནང་སྣོད་བཅུད་ཀྱི་ཆོས་ཐམས་ཅད་ཀྱི་རང་གི་ངོ་བོ་ལྷ་ཉིད་དུ་ཤེས་པ་ནི། དང་པོ་ལྷ་ངོ་ཤེས་པ་ཡིན་ནོ། །བར་དུ་ལྷ་བསྒོམ་པའི་ཐབས་ཤེས་པ་ནི། བསྒྲུབ་ཐབས་སྣ་ཚོགས་ནས་གསུངས་པ་དང་། གོང་དུ་བསྟན་པའི་བསམ་གཏན་གྱི་ལུང་སེམས་ལོན་གྱིས་བཅོས་པའི་ཐབས་བསྟན་པ་རྣམས་ཡིན་ནོ། །ཐ་མ་ལས་སུ་རུང་བའི་ཚད་བསྟན་པ་ནི། མཚན་མ་མེད་པའི་ལྷའི་ཚད་ནི་གོང་དུ་བསྟན་ཟིན་ཏོ། །མཚན་མའི་ལྷའི་སྐུ་བསྒོམས་པའི་ཚད་ནི། ལྷའི་ལུང་བཅུར་བསྟན་པའང་ཡོད་ན། མདོ་གསུམ་དུ་འདུས་ཏེ། ལྷམ་མེ། ལྷན་ནེ། ལྷང་ངེ་བ་དང་གསུམ་སྟེ། དེ་ལ་ལྷམ་མེ་ནི་མ་བརྡོས་པ། ལྷན་ནེ་ནི་མ་གཡོས་པ། ལྷང་ངེ་ནི་མ་བསྒྲིབས་པའོ། །དེ་ལ་མ་བརྡོས་པ་ནི་སྣང་ལ་རང་བཞིན་མེད་པ་སྟེ། གཟུགས་བརྙན་ནམ་ཆུ་ཟླ་ལྟ་བུའོ། །མ་གཡོས་པ་ནི་བྱིང་རྒོད་ཀྱི་ཟུག་རྔུས་མ་བསྐྱོད་པ་སྟེ། ནོར་བུ་རིན་པོ་ཆེའི་འོད་ལྟ་བུའོ། །མ་བསྒྲིབས་པ་ནི་དེ་གཉིས་དང་ལྡན་པས་མ་རྟོགས་པའི་སྒྲིབ་པ་དང་། མི་གསལ་བའི་སྒྲིབ་པ་གཉིས་མེད་པར་ཤིན་ཏུ་གསལ་བར་སྣང་བ། དབང་པོས་བལྟ་བར་མི་བཟོད་པ་ལྟར་ཤིན་ཏུ་གསལ་བའོ། །དེ་དག་ནི་ཚུལ་བཞིན་དུ་སློབ་པར་འདོད་པ་རྣམས་ཀྱི་དབང་དུ་བཤད་པའོ། །གང་དག་མོས་པ་དང་བྱ་བས་གཡེངས་པར་གྱུར་ཅིང་ཚུལ་བཞིན་དུ་སྦྱོར་མི་ནུས་པ་རྣམས་ཀྱིས་ནི། རྫོགས་པ་ཆེན་པོའི་དོན་དང་། ལྷའི་རང་བཞིན་ཇི་ལྟ་བ་ཡིད་ལ་བྱ་སྟེ། དེས་ཟིན་པར་བྱས་ལ། ཆོ་གའི་རིམ་པས་བསྐྱེད་ཀྱང་རུང་། སྐད་ཅིག་གཅིག་ལ་རྫོགས་པའི་ཚུལ་ལམ། བག་ཆགས་ཀྱི་ཤུགས་སམ། མོས་པ་དང་ང་རྒྱལ་གྱི་སྒོ་ནས་ཀྱང་མ་ཡེངས་པའི་སེམས་ཀྱི་བཟུང་སྟེ། བཟླས་བརྗོད་དང་བསམ་གཏན་ལ་འཇུག་གོ། །བཟླས་བརྗོད་ཀྱི་ཚེའང་མདུན་དུ་ལྷ་དམིགས་ཀྱང་རུང་། མ་དམིགས་ཀྱང་རུང་། འཕྲོ་འདུ་ཡོད་ཀྱང་རུང་། མེད་ཀྱང་རུང་། ལས་སམ་འབྲས་བུ་གང་ལ་དམིགས་ཀྱང་རུང་སྟེ། སྤྱིར་དམིགས་པ་རྩེ་གཅིག་པས་འབད་པ་ལྟར་མཐུ་དང་བྱིན་རླབས་ཆེའོ། །སྤྱིར་ལྷའི་དེ་ཁོ་ན་ཉིད་ལ། ལྷ་དྲུག་ཏུ་གྲགས་པ་དང་། ཆོས་ཉིད་ཀྱི་ལྷ། དོན་དམ་པའི་ལྷ་དང་། གཞན་ཀུན། སེམས་པའི་བྱེ་བྲག་གི་ལྷ་ཞེས་བྱ་བ་དང་། ལྷར་བཏགས་པ་དང་། དམ་ཚིག་ཅན་གྱི་སྐྱེ་བོས་བརྟགས་པའི་ལྷ་ཞེས་སྤྱིར་གྲགས་མོད་ཀྱི། ཕྱག་རྒྱའི་མཚན་མ་ལ་ལྷར་གྲགས་པ་ན། བརྟག་པ་རྣམ་པ་དུ་མ་ལ་འཇུག་སྟེ། ཕ་རོལ་ཏུ་ཕྱིན་པའི་ལུགས། རྣམ་པར་སྨིན་པའི་ལུས་ཀྱི་དབྱིབས་ཀྱི་བྱེ་བྲག་ཅེས་བརྟག་པ་དང་། སྔགས་ཀྱི་ལུགས། དེ་ཉིད་བདག་ཉིད་ཆེན་པོ་རྣམས་ཀྱི་མཚན་མའི་གཟུགས་སོ། །ཞེས་བརྟག་པ་དང་། དེ་ཉིད་སྐྱེ་བོ་བྱིན་གྱིས་རློབ་པ་ལ་སོགས་པའི་ནུས་མཐུ་ཅན་ནོ། །ཞེས་བརྟག་པ་དང་། དེ་ཉིད་དམ་ཚིག་ཅན་གྱི་སྐྱེ་བོས་ལྷར་བརྟགས་པའོ། །ཞེས་བརྟགས་པ་དང་། དེ་ཉིད་རྣམ་པར་སྨིན་པའི་གཟུགས་ཀྱི་བྱེ་བྲག་དང་། ཡེ་ཤེས་ཆེན་པོའི་བྱིན་རླབས་གཉིས་དབྱེར་མེད་པར་འདྲེས་པའོ། །ཞེས་བརྟག་པ་དང་། དེ་ཉིད་བདག་ཉིད་ཆེན་པོ་རྣམས་ཀྱི་ཐུགས་གསང་བའི་ཡེ་ཤེས་ཉིད་མཚན་མའི་གཟུགས་སུ་སྤྲུལ་པ་སྟེ། ཆུ་གྲང་བའི་རྐྱེན་གྱིས་ཆབ་རོམ་དུ་གྱུར་པ་ལྟ་བུའོ། །ཞེས་བརྟག་པ་དང་། ཆོས་ཐམས་ཅད་ལྷུན་གྱིས་གྲུབ་པའི་ཕྱག་རྒྱའི་རང་བཞིན་ཡིན་པ་ལས། ལས་འཕྲོ་དང་སྐལ་བའི་དབང་གིས་སོ་སོར་སྣང་སྟེ། དེ་ལ་ཤིན་ཏུ་དག་པ་དུལ་བར་གྱུར་པ་རྣམས་ལ་ནི་ལོངས་སྤྱོད་རྫོགས་པའི་སྐུར་སྣང་ངོ་། །སེམས་ཅན་ཁེངས་པ་ལས་དག་པར་གྱུར་པ་རྣམས་ལ་ནི། སྤྲུལ་པའི་སྐུ་རབ་ཏུ་བྱུང་བའི་ཆ་ལུགས་སུ་སྣང་ངོ་། །དེའི་འོག་མ་རྣམས་ལ་ནི་ཆ་ཤས་ཀྱི་ཕྱག་རྒྱ་སྣང་ངོ་། །དེའི་འོག་མ་རྣམས་ལ་ནི་ཐུན་མོང་གི་གཟུགས་ལ་རྟེན་པའི་ཕྱག་རྒྱ་སྣང་སྟེ། ཐམས་ཅད་ཀྱང་ལྷུན་གྱིས་གྲུབ་པའི་ཕྱག་རྒྱར་བྱེ་བྲག་མེད་དོ། །ཞེས་འདོད་དོ། །དེ་ལ་གོང་མ་ལྔ་ནི་དངོས་པོར་ལྟ་བའི་དབང་དུ་བཤད་པའོ། །ཐ་མ་གཉིས་ནི་དངོས་པོར་ཞེན་པ་དང་བྲལ་བའི་དབང་དུ་བཤད་པའོ། །བརྟག་པ་དེ་ལྟར་འཇུག་ཀྱང་ཡོངས་སུ་གཟུང་བར་བྱ་བ་ནི། ཕྱི་མ་ལྟར་གཟུང་བར་བྱའོ། །མདོར་ན་བསམ་གཏན་གྱི་བྱེ་བྲག་འདི་དག་ཐམས་ཅད་ལའང་། རྫོགས་པ་ཆེན་པོའི་དོན་གྱིས་ཟིན་པར་བྱས་ན་ཐབས་མཁས་པའི་སྤྱོད་པར་འགྱུར་རོ། །མ་ཟིན་ན་ཐབས་མི་མཁས་པའི་སྤྱོད་པར་འགྱུར་རོ། །བརྒྱུད་པའི་ཐབས་བསྟན་པ་སྟེ། སྐབས་དྲུག་པའོ།། །།ཆོས་རྣམས་སྒྱུ་མ་ལྟ་བུ་ཞེས། །གསུང་རབ་སྤྱི་ལས་གྲགས་མོད་ཀྱི། །སྒྱུ་མ་སྨིགས་རྒྱུ་ལ་སོགས་དང་། །འགོ་མཉམ་ཉིད་དུ་སྟོན་བྱེད་པ། །ངེས་དོན་རྫོགས་པ་ཆེན་པོའི་ཚུལ། །ཚུལ་འདི་བསྒྲུབ་པར་བྱ་བ་ལ། །བརྒལ་ལན་བཅས་ཤིང་ཤན་དང་བཅས། །རིགས་པས་གནོད་མེད་ཚུལ་དང་བཅས། །ངེས་དོན་བྱང་ཆུབ་སེམས་ཀྱི་དོན། །རང་བཞིན་དང་ནི་ཆེ་བ་དང་། །གོལ་སྒྲིབ་དང་ནི་གཞག་ཐབས་ཀྱང་། །བརྒྱུད་ཐབས་བཅས་པར་བསྟན་པ་ལགས། །རྐྱེན་རྣམས་ཉེ་བར་གནས་བཞིན་དུ། །འབྲས་བུ་སྣང་བར་མི་འགྱུར་ཞེས། །གང་དུའང་སྐུར་པ་མ་བཏབ་པས། །འདི་ལ་སྐུར་བའི་གནས་མ་མཐོང་། །རྒྱུ་འབྲས་རྟེན་ཅིང་འབྲེལ་ཚུལ་དུ། །སྣང་བ་ཙམ་ལས་མ་གཏོགས་པ། །རྒྱུ་འབྲས་དངོས་པོ་མི་སྒྲུབ་པས། །འདི་ལ་སྒྲོ་འདོགས་གནས་མ་མཐོང་། །གང་གཞན་སྒྲོ་སྐུར་བྲལ་བའི་དོན། །ཚུལ་གཞན་དག་གིས་སྒྲུབ་བྱེད་ཀྱང་། །ངེས་དོན་བཀའ་ཡི་རྗེས་འབྲངས་ནས། །དོན་ལ་བདག་བློ་འདི་ལྟར་སྐྱེས། །ཐེག་ཆེན་ཚུལ་ལ་འཇུག་པ་ཙམ། །ལྷ་སྒོམ་དོན་དུ་འདི་བགྱིས་ཏེ། །ཐེག་པ་སྣོད་དུ་གྱུར་པ་ཡི། །འགྲོ་བ་རྣམས་ཀྱིས་མཐོང་གྱུར་ཏམ། །འཇིག་རྟེན་གྲགས་མཐུན་སྒྲུབ་བྱེད་པའི། །བསྟན་ཆོས་རྗེས་སུ་ཞུགས་པའི་བློ། །འཛིན་བཅས་རྣམས་ཀྱི་མཐོང་ཡང་རུང་། །ཐེག་ཆེན་བདེན་པའི་བྱིན་རླབས་ཀྱིས། །བླངས་དོར་བྲལ་བའི་དོན་རྟོགས་ཏེ། །ཁྱུང་ཆེན་ནམ་མཁར་ལྡིང་བ་བཞིན། །བཅིངས་མེད་བསྐྱོད་པ་མེད་བཞིན་དུ། །སྤྱི་རྒྱ་རླབས་ཀྱིས་ཆོད་པར་ཤོག །ཐེག་པ་ཆེན་པའི་ཚུལ་ལ་འཇུག་པའི་ཐབས། །འཇུག་པའི་ཡན་ལག་དང་བཅས་པར་བསྟན་པ། རྫོགས་སོ། །མཁས་པའི་དབང་པོ་རོང་ཟོམ་ཆེན་པོས་སོ།། ༈ །།ལེའུ་དང་པོ་ཉོན་མོངས་ཀྱི་མཚན་ཉིད། གཉིས་པ་ལ་བརྒལ་ལན། གསུམ་པ་ལ་ཤན་སྦྱར། བཞི་པར་རིགས་པས་མི་གནོད་ཚུལ། ལྔ་པར་རྫོགས་པ་ཆེན་པོའི་གཞུང་། དྲུག་པར་བརྒྱུད་པའི་ཐབས་བསྟན་པའོ། །སརྦ་མངྒ་ལཾ། །ཤུ་བྷཾ།། ༈ །།སྔོན་དུས་ཀུན་མཁྱེན་མཚོ་སྐྱེས་རྗེས། །སྲིད་གསུམ་བདུད་བརྟུལ་ཆོས་འཁོར་བསྐོར། །ཐུགས་སྲས་རོང་ཟོམ་ཆོས་རྗེས་ཀྱང་། །ལྷ་སྲིན་དབང་བསྡུད་གསང་བསྟན་སྤེལ། ༡ །གང་གི་ཐུགས་རྗེའི་བཀའ་དྲིན་གྱིས། །ཕྱི་རབས་བོད་ཕྲུག་སྐལ་ལྡན་རྣམས། །ཐེག་བརྒྱད་སྤོང་རྟོགས་མཐར་ཕྱིན་ནས། །འོད་གསལ་ཐེག་རྩེའི་ས་མཐོར་གཤེགས། ༢ །གང་ལ་དད་པས་རྗེས་འགྲོ་བ། །ངེད་ཅག་ལྔ་བདོའི་སེམས་ཅན་རྣམས། །འབྲེལ་ཚད་རྣམ་གྲོལ་དབུགས་དབྱུང་ཕྱིར། །གསུང་རབ་ཆོས་སྦྱིན་བསྐྲུན་ལ་གུས། ༣ །ཞེས་པའང་སློབ་དཔོན་རྣམ་གཉིས་ཀྱི་ཆོས་བརྒྱུད་གྲལ་མཐར་སྐྱེས་པ་པདྨ་ཀུན་གྲོལ་ནས་རྣམ་དཀར་བྱེད་པའི་མོས་བློ་དང་འབྲེལ་སུག་བྲིས་བགྱིས་པ་དགེ། མངྒ་ལཾ།། །།

ཐེག་པ་ཆེན་པོའི་རྣལ་འབྱོར་གྱི་ཚུལ་ལ་འཇུག་པའི་མན་ངག་གི་འགྲེལ་པ་རྒྱལ་སྲས་ལམ་བཟང་།

ཛི ན པུ ཏྲ སུ པ ནྠི ནཱ མ མ ཧཱ ཡཱ ན ཡོ ག སྱ ནཱ ཡཱ བ ཏ རོ པ དེ ཤ སྱ བྲྀ ཏྟི བི ཧ ར ཏི སྨ།
ཐེག་པ་ཆེན་པོའི་རྣལ་འབྱོར་གྱི་ཚུལ་ལ་འཇུག་པའི་མན་ངག་གི་འགྲེལ་པ་རྒྱལ་སྲས་ལམ་བཟང་ཞེས་བྱ་བ་བཞུགས་སོ། །
ༀ་སྭ་སྟི། བསྐལ་བཟང་རྣམ་འདྲེན་སྟོང་ལས་ཐུགས་བསྐྱེད་དང་། །སྨོན་ལམ་རྒྱ་མཚོ་རྫོགས་པའི་མཐུ་མངའ་བ། །ཞིང་འདིའི་སྟོན་པ་ཤཱཀྱ་སེང་གེ་ཞེས། །སྙན་པས་ས་གསུམ་ཁྱབ་ལ་ཕྱག་འཚལ་ལོ། །བརྒྱད་གཉིས་ལང་ཚོས་སྒེགས་པ་གཞོན་ནུའི་ཚུལ། །ཡེ་ཤེས་འཕྲུལ་གྱི་སྣང་བ་འབྱམས་ཀླས་པ། །དྲན་པས་མུན་སེལ་ཤེས་རབ་སྟེར་བའི་ལྷ། །གཉིས་མེད་ཡིད་དང་མཉམ་ལ་གུས་པས་འདུད། །ལུང་རིགས་མན་ངག་ཐུགས་རྗེའི་ག ཏེར་ཆེན་གྱིས། །དུས་གསུམ་བསྟན་འགྲོའི་རྒུད་པ་སེལ་བའི་གཉེན། །སྐྱེས་བུ་དམ་པ་ཀུན་ལ་ཕྱག་འཚལ་ནས། །གཞུང་འདིའི་དགོངས་པ་ཅུང་ཟད་བཀྲལ་བར་བྱ། །ཞེས་མཆོད་པར་བརྗོད་ནས་གང་བཤད་པར་བྱ་བ་ནི་སློབ་དཔོན་ཨ་རོ་ཡེ་ཤེས་འབྱུང་གནས་ཀྱིས་མཛད་པའི་ཐེག་པ་ཆེན་པོའི་རྣལ་འབྱོར་ལ་འཇུག་པའི་ཐབས་རིམ་པར་ཕྱེ་བ་འདི་ལ་སྤྱི་དོན་རྣམ་པ་གསུམ་སྟེ། ཀླད་ཀྱི་དོན་དང་། མངོན་པར་འདོད་པ་གཞུང་གི་དོན་དང་། མཇུག་ཁེང་སྐྱུང་ཞིང་དགེ་རྩ་བསྔོ་བར་བསྟན་པའོ། །ཀླད་ཀྱི་དོན་ལ་གཉིས་ཏེ། ཕྱག་འཚལ་བ་དང་བཤད་པར་དམ་བཅའ་བའོ། །དང་པོ་ནི། ཉེས་པའི་སྐྱོན་བྲལ་སོགས།༣ སྒྲིབ་གཉིས་བག་ཆགས་དང་བཅས་པ་ཉེས་པའི་སྐྱོན་དང་བྲལ་བ་སྤང་བ་ཕུན་ཚོགས་དང་། མཁྱེན་པ་དང་བརྩེ་བས་བསྡུས་པའི་ཡོན་ཏན་མཐའ་དག་རྫོགས་པ་རྟོགས་པ་ཕུན་ཚོགས་དང་། འགྲོ་བ་རྣམས་ཀྱི་གནས་སྐབས་དང་མཐར་ཐུག་གི་ཕན་པ་དང་བདེ་བའི་ལེགས་ཚོགས་ཇི་སྙེད་པ་ཐམས་ཅད་འབྱུང་བའི་གནས་གཅིག་པུ་སྟེ་ཕྲིན་ལས་ཕུན་སུམ་ཚོགས་པའོ། །མངོན་རྟོགས་རྒྱན་ལས། སེམས་ཅན་ཀུན་མཆོག་ཉིད་སེམས་དང་། །སྤང་དང་རྟོགས་དང་གསུམ་པོ་ལ། །ཆེན་པོ་གསུམ་ཞེས་རང་བྱུང་གི། །ཆེད་དུ་བྱ་བ་འདི་ཤེས་བྱ། །ཞེས་སོ། །དེ་ལྟར་དོན་གཉིས་ལྷུན་གྱིས་གྲུབ་པའི་ཐུན་མོང་གི་དཀོན་མཆོག་རྣམ་གསུམ་དང་ཐུན་མོང་མ་ཡིན་པའི་དཀོན་མཆོག་རྩ་བ་གསུམ་ལ་གུས་པས་ཕྱག་འཚལ་ལོ། །དགོས་པ་ནི་བསོད་ནམས་བསགས་པས་བསམ་པ་འགྲུབ་པ་དང་བྱ་བ་རྐྱེན་གྱིས་མི་འཕྲོག་པ་དང་། གདུལ་བྱ་བསྟན་བཅོས་ལ་སྤྲོ་བ་སྐྱེད་པའོ། །གཉིས་པ་ནི། ཐེག་ཆེན་རྣལ་འབྱོར་འཇུག་ཐབས་བརྗོད་པར་བགྱི། ཞེས་སོ། །འདིར་མཚན་གྱི་ཁོངས་སུ་གཞུང་དོན་འདུས་པས་ཅུང་ཟད་བཤད་ན། སྤྱིར་ཐེག་པའི་དབྱེ་བ་མང་ཡང་བསྡུ་ན་ཐེག་པ་ཆེ་ཆུང་གཉིས་སུ་འདུ་བ་ལ་འདིར་ཕ་རོལ་དུ་ཕྱིན་པའི་ཐེག་པ་ཆེན་པོ་ཡིན་ལ། མ་ཧཱ་ཡཱ་ནའི་སྒྲ་ཐེག་ཆེན་དང་ཡཱ་ན་ཐེག་པ་ཙམ་སྟེ་འགྲོ་བའི་བྱ་བ་ལ་འཇུག་པས་གོང་ནས་གོང་དུ་བགྲོད་པར་བྱ་བ་ལམ་དང་གསུང་རབ་ལའང་འཇུག་གོ། །ཆེན་པོ་ནི་ཐེག་དམན་ལས་ཆེན་པོ་བདུན་གྱིས་འཕགས་ཚུལ་མདོ་སྡེ་རྒྱན་ལས་བཤད་པ་དང་། ཕར་ཕྱིན་སྡུད་པ་ལས། ཅི་ཕྱིར་འདི་ནི་ཐེག་ཆེན་བྱ་ཞེ་ན། །དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །ཅེས་ནམ་མཁའ་ལ་དངོས་པོ་ཀུན་ཤོང་བ་ལྟར་ཐེག་དམན་གྱི་ལམ་ཐམས་ཅད་ཀྱང་འདིར་ཡོན་ཏན་ཡར་ལྡན་གྱི་ཚུལ་གྱི་ཤོང་བ་དང་། ཐར་པའི་མདོ་ལས། ཐེག་ཆེན་དཔེ་ཚད་རྒྱ་མཚོ་བཞིན། །ཐེག་པ་ཆུང་ངུ་རྨིག་རྗེས་ཆུ། །ཞེས་རྨིག་རྗེས་ཀྱི་ཆུ་རྒྱ་མཚོར་འདུས་ཤིང་རྒྱ་མཚོ་ཉིད་མི་ཟད་པའི་གཏེར་དང་ལྡན་པ་ལྟར། ཟབ་པ་དང་རྒྱ་ཆེ་བའི་ཆོས་མཐའ་ཡས་པ་དང་ལྡན་པའོ། །མདོར་ན་རིན་ཆེན་ཕྲེང་བ་ལས། སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་ཐབས་སྙིང་རྗེ་ཆེན་པོ་དང་ཤེས་རབ་བདག་མེད་གཉིས་རྟོགས་པའི་ཁྱད་པར་དུ་བྱས་པས་འཕགས་སོ། །དེ་ཡང་དུས་གསུམ་རྒྱལ་བ་ཐམས་ཅད་ཀྱི་ཡུམ་དེ་ལས་གཞན་མེད་དེ། སྡུད་པར། རྒྱལ་བ་འདས་དང་མ་བྱོན་ཕྱོགས་བཅུར་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཞེས་སོ། །ཐེག་ཆེན་འདིའི་ལམ་གྱི་དངོས་གཞི་ནི་གཟུང་འཛིན་གྱི་རྟོག་པ་དང་བྲལ་ཞིང་། སྙིང་རྗེའི་རླན་དང་ལྡན་པ་མི་རྟོག་པའི་ཡེ་ཤེས་ལས་སྐྱེས་པའི་ཏིང་ངེ་འཛིན་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ལ་སྤྱོད་པའོ། །དེའང་ཞི་ལྷག་ཟུང་འབྲེལ་གྱི་ལམ་དབྱིངས་དང་ཡེ་ཤེས་གཉིས་སུ་མེད་པ་ཡིན་ལ། མི་རྟོག་པའི་ཏིང་ངེ་འཛིན་གྱིས་རྣམ་རྟོག་འགགས་པ་ལ་གཟུང་འཛིན་ལས་གྲོལ་བ་ཞེས་བྱ་སྟེ། མི་རྟོག་པའི་ཏིང་ངེ་འཛིན་ནི་སྤང་བྱའི་དངོས་གཉེན་ཡིན་པས་ཟག་མེད་བར་ཆད་མེད་ལམ་དང་། རྣམ་རྟོག་འགགས་པ་ནི་རྣམ་གྲོལ་ལམ་ཡིན་ཞིང་སྔ་མ་ནི་རྐུན་པོ་ཕྱིར་ཕྱུང་བ་དང་། ཕྱི་མ་ནི་སྒོ་གླེགས་བསྡམས་པ་ལྟ་བུའོ། །ཡོ་གའི་སྒྲས་རྣལ་འབྱོར་ཏེ་ནང་སེམས་ཀྱི་དོན་རྣལ་མ་ལ་དབང་འབྱོར་བར་འཇོག་པ་ལ་འཇུག་པའི་ཐབས་ཀྱི་རིམ་པ་རྣམས་བརྗོད་པར་བགྱིའོ། །ཞེས་དགོས་པ་ནི་བྱ་བ་ལ་ལོང་ཡོད་མི་བྱེད་པར་མྱུར་དུ་འགྲུབ་པ་སྟེ། ཤེས་རབ་སྡོང་བུ་ལས། དམ་པས་མང་པོ་ཁས་ལེན་མི་བྱ་ཞིང་། །གལ་ཏེ་བཀའ་བ་ཁས་ནི་བླངས་གྱུར་ན། །རྡོ་ལ་རི་མོ་བྲིས་པ་ཇི་བཞིན་དུ། །ཤི་ཡང་གཞན་དུ་འདོར་བ་མ་ཡིན་ནོ། །ཞེས་སོ། །གཉིས་པ་མངོན་པར་འདོད་པ་གཞུང་གི་དོན་ལ་གསུམ་སྟེ། ལུས་ཀྱི་ཚུལ་དུ་མདོར་བསྟན་པ་དང་། ཡན་ལག་གི་ཚུལ་དུ་རྒྱས་པར་བཤད་པ་དང་། མཇུག་གདམས་པ་དང་བཅས་ཏེ་བསྟན་པའོ། །དང་པོ་ལ་གསུམ་ལས། ཆོས་སྒྲུབ་པའི་འགལ་རྐྱེན་ཐག་བསྲིང་བའི་ཕྱིར་དབེན་པ་བསྟེན་པ་ནི། གང་ཞིག་སོགས།༢ བྱང་ཆུབ་སྒྲུབ་པའི་རྣལ་འབྱོར་པ་གང་ཞིག་བདག་དང་གཞན་གྱི་འཁོར་བ་དང་ངན་སོང་གི་སྡུག་བསྔལ་སྤོང་བར་འདོད་ཅིང་། ཞི་བ་མྱ་ངན་ལས་འདས་པའི་བདེ་བ་ཆེན་པོ་འཐོབ་པར་འདོད་པས་ཐོག་མ་ཁོ་ནར། གྲོང་ལས་རྒྱང་གྲགས་ཞེས་རྔ་འམ་དུང་ཆེན་པོའི་སྒྲ་ཐོས་པ་ཚུན་ཆད་དམ། གཞུ་འདོམ་ལྔ་བརྒྱས་ཆོད་པའི་དགོན་པའི་གནས་སུ་གནས་པར་བགྱི་དགོས། ཞེས་སོ། །དེ་ཡང་སློབ་དཔོན་ཆེན་པོའི་མན་ངག་ལྟ་ཕྲེང་ལས། ཆོས་བྱེད་པ་ལ་གནས་ཀྱང་གལ་ཆེ་བས། གོང་དུ་ཏིང་ངེ་འཛིན་དམ་པ་གྲུབ་ན་དེ་བས་ལྷག་པ་གཞན་དུ་མི་རྙེད་པས་བསྟེན་པ་ལ་གདམས་པའོ། །གང་དུ་རྩོད་པ་དང་མི་དགེ་བ་འཕེལ་ན་ཐར་པའི་ལམ་ལ་བར་དུ་གཅོད་པས་སྤང་བར་བྱའོ། །ཞེས་དང་། ཆགས་སྡང་གི་རྣམ་རྟོག་འཕེལ་བའི་རྐྱེན་ཅན་དུ་ཅི་ཙམ་བསྒོམས་ཀྱང་འགྲུབ་པར་མི་འགྱུར་བས་གནས་ངན་དང་བྲལ་དགོས་པ་ནི། ལྷག་བསམ་བསྐུལ་པའི་མདོ་ལས། གང་ན་སྤྲོས་པའམ་རྩོད་པ་ཡོད་པ་ལས། །དཔག་ཚད་བརྒྱ་ཡི་ཕ་རོལ་འགྲོ་བ་མཆོག །གང་ན་ཉོན་མོངས་སྐྱེས་པ་དེ་དག་ཏུ། །ཡུད་ཙམ་ཞིག་ཀྱང་གནས་ཤིང་འདུག་མི་བྱ། །ཞེས་དང་། སྐྱེས་རབས་ལས། ཕར་བསྲེ་ཚུར་བསྲེའི་སྒྲུབ་པ་ཡུན་རིང་ལས། །རིག་པ་དྭངས་སེའི་སྒྲུབ་པ་ཞག་གཅིག་དགའ། །ཞེས་སོ། །འདོད་བྱའི་དོན་ལ་ཐོས་བསམ་གྱི་སྒྲོ་འདོགས་ཆོད་ནས་དབེན་པར་བསྟེན་དགོས་ཀྱི། གཞན་དུ་ན་ལམ་ལ་ཐེ་ཚོམ་སྐྱེས་ནས་ངེས་པ་མི་རྙེད་པའི་ཕྱིར་རོ། །འདུལ་བ་ལས། མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ནི་གནས་པ་བདེ། །ཞེས་དང་། བསླབ་བཏུས་ལས། བཟོད་བྱ་ཐོས་པ་བཙལ་བར་བྱ། །དེ་ནས་ནགས་སུ་གནས་པར་བྱ། །ཞེས་སོ། །དབེན་པ་བསྟེན་པའི་ཕན་ཡོན་མང་དུ་ཡོད་ཅིང་། ཏིང་འཛིན་རྒྱལ་པོའི་མདོར། རྟག་ཏུ་ནགས་ཁྲོད་དབེན་པ་བརྟེན་པར་གྱིས། །གྲོང་དང་གྲོང་ཁྱེར་དགའ་བ་རྣམས་སྤངས་ལ། །བསེ་རུ་ལྟ་བུ་གཉིས་སུ་མེད་པར་གྱིས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །ཅེས་སོ། །གཉིས་པ་དབེན་པའི་གནས་སུ་བདེན་པ་བཞིའི་དོན་ཁོང་དུ་ཆུད་པར་བསྟན་པ་ནི། གོང་དུ་བཤད་པ་བདེ་སྡུག་གི་རྒྱུ་འབྲས་ལ་བླང་དོར་བྱ་དགོས་པ་དེ་ཡང་གསུང་རབ་དམ་པའི་ཆོས་མཐའ་དག་གི་གཞུང་རྣམས་ལས་ལམ་གྱི་རིམ་པ་འདི་ལྟར་བཤད་པ་གདའ་སྟེ། ཁམས་གསུམ་འཁོར་བའི་སྡུག་བསྔལ་གསུམ་ལ་སོགས་པ་ཉེས་དམིགས་མང་པོ་ཇི་སྙེད་ཡོད་པ་རྣམས་ནི་ཞེས་འབྲས་བུ་སྡུག་བདེན་དང་། བདག་མེད་པ་ལ་བདག་ཏུ་འཛིན་པ་ཕྱིན་ཅི་ལོག་གི་རྣམ་རྟོག་དང་དེས་བསྐྱེད་པའི་ཆགས་སོགས་ཉོན་མོངས་པ་དང་། དེས་ཀུན་ནས་བསླང་པའི་ཟག་བཅས་ཀྱི་ལས་རྣམས་རྒྱུ་ཀུན་འབྱུང་བདེན་པ་སྟེ་འཁོར་བའི་རྒྱུ་ཀུན་ཉོན་ཕྱོགས་ཀྱི་རྒྱུ་འབྲས་གཉིས་དང་། སྡུག་བསྔལ་རྒྱུ་བཅས་སྤངས་ནས་མྱ་ངན་ལས་འདས་པ་ནི་ཞི་བ་བསིལ་བ་བདེ་བ་ཀུན་གྱི་མཆོག་ཅེས་འབྲས་བུ་འགོག་བདེན་དང་། ཕྱི་ནང་གི་ཆོས་ཀུན་ལ་སོ་སོར་རྟོག་པའི་ཤེས་རབ་ཀྱིས་བདག་གཉིས་མེད་པར་རྟོགས་པ་ནི། མྱ་ངན་ལས་འདས་པའི་རྒྱུའི་གཙོ་བོ་ལམ་གྱི་བདེན་པ་སྟེ་རྣམ་བྱང་ཕྱོགས་ཀྱི་རྒྱུ་འབྲས་གཉིས་ཏེ། བདེན་པ་བཞིའི་དོན་བསྡུས་ཏེ་བསྟན་ནོ། །དེ་ལ་སྡུག་ཀུན་ལ་ངེས་འབྱུང་དང་འགོག་ལམ་ལ་འཇུག་འདོད་དེ་ལམ་ཀུན་གྱི་རྩ་བ་ཡིན། ཐེག་ཆེན་གྱིས་དེ་ལས་གཞན་དོན་གྱི་བློ་སྦྱར་དགོས། ཐེག་ཆེན་གྱི་འགོག་བདེན་ནི་ཆོས་སྐུ་དོན་དམ་བདེན་པ་མཐར་ཐུག་ཡིན་པས་སྤྲོས་པའི་སྒྲོ་འདོགས་ཐམས་ཅད་དང་བྲལ་བ་སོགས་ཞིབ་པར་གཞན་ནས་ཤེས་པར་བྱའོ། །འདིར་བདག་འཛིན་གྱི་རྣམ་པར་རྟོག་པ་ཉིད་སྲིད་པའི་ཡན་ལག་བཅུ་གཉིས་ཀྱི་ནང་ཚན་མ་རིག་པ་སྟེ། མདོ་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྷུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་དང་དེ་ཉིད་འཁོར་བའི་རྒྱུ་ཡིན་པའང་མདོ་སྡུད་པར། སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ། །དེ་ཀུན་མ་རིག་ལས་བྱུང་བདེ་བར་གཤེགས་པས་བསྟན། །ཞེས་སོ། །གསུམ་པ་བྱ་བ་སྤངས་ནས་བདག་འཛིན་གྱི་གཉེན་པོ་སྟོང་ཉིད་བསྒོམ་པར་བསྟན་པ་ནི། རྒྱུ་མཚན་དེ་བས་ན་འཇིག་རྟེན་ཕལ་པ་དང་འབྲེལ་བའི་འདོད་ཡོན་ལོངས་སྤྱོད་གསོག་བསྐྲུན་གྱི་བྱ་བྱེད་བུན་ལོང་ངམ་འདུ་འཛི་ཐགས་བསྲིང་སྟེ་སྤངས་ལ། རྒྱལ་བས་བསྔགས་པའི་རི་ཁྲོད་དགོན་པ་མཐུན་རྐྱེན་དང་ལྡན་ཞིང་འགལ་རྐྱེན་མེད་པར་གནས་ནས། བདག་འཛིན་གྱི་གཉེན་པོར་ཞི་སྒོ་གཅིག་པུ་སྟོང་པ་ཉིད་བསྒོམ་པར་བྱའོ། །ཞེས་སྟོང་ཉིད་དང་སྒོམ་ཚུལ་འོག་ཏུ་འབྱུང་ངོ་། །འདུལ་བ་ལས། རང་དབང་ཐམས་ཅད་བདེ་བ་ཡིན། །གཞན་དབང་ཐམས་ཅད་སྡུག་བསྔལ་ཡིན། །ཐུན་མོང་དག་གིས་གནོད་བྱེད་དེ། །འབྲེལ་བ་ཤིན་ཏུ་འདའ་བར་དཀའ། །ཞེས་དང་། ལྷག་བསམ་བསྐུལ་བར། ཁྱིམ་གྱི་བྱ་བ་ལ་དགའ་བའི་ཉེས་པ་ཉི་ཤུ་གསུངས་པ་ལས། ཁྱིམ་ན་གནས་པའི་ལམ་རྣམས་རྟག་སེམས་དང་། དེ་ནི་རྟག་ཏུ་འདོད་པས་རྣམ་པར་གཡེང་། བསམ་གཏན་དང་ནི་སྤོང་བ་དེ་མི་བྱེད། ཉེས་པ་འདི་དག་ལས་ལ་དགའ་བས་ཡིན། ཞེས་དང་། ཁྱིམ་བདག་དྲག་ཤུལ་ཅན་གྱིས་ཞུས་པ་ལས། ཁྱིམ་གྱི་ཉེས་དམིགས་བརྒྱ་རྩ་གཅིག་གསུངས་པ་དང་། སྐྱེས་རབས་ལས། ལས་རྣམས་རྣམ་པ་མང་པོས་རྣམ་པར་གཡེང་། །ཡོངས་སུ་བཟུང་དང་སྒྲུབ་དང་སྲུང་བས་བྲེལ། །སེམས་ནི་མ་ཞི་སྡུག་བསྔལ་འབྱུང་བའི་གནས། །ཁྱིམ་པས་ནམ་ཡང་ཞི་བའི་ལས་མི་འགྲུབ་ཅེས་སོ། །གཉིས་པ་ཡན་ལག་གི་ཚུལ་རྒྱས་པར་བཤད་པ་ལ་བཞི་སྟེ། སྡུག་བསྔལ་གྱི་བདེན་པ་རྒྱས་པར་བསྟན་པ་དང་། ཀུན་འབྱུང་གི་བདེན་པ་རྒྱས་པར་བསྟན་པ་དང་། འགོག་པའི་བདེན་པ་རྒྱས་པར་བསྟན་པ་དང་། ལམ་གྱི་བདེན་པ་རྒྱས་པར་བསྟན་པའོ། །དང་པོ་ལ་གཉིས་ཏེ། མདོར་བསྟན་རྒྱས་བཤད་དོ། །དང་པོ་ལ་གཉིས། སྡུག་བསྔལ་དྲི་བ་དང་། ལན་ལ་སྡུག་བསྔལ་གྱི་རྣམ་གྲངས་བསྟན་པའོ། །དང་པོ་ནི། འཁོར་བ་ཇི་ལྟར་ཉེས་དམིགས་མང་ཞེ་ན། །ཞེས་སོ། །གཉིས་པ་ནི། འཁོར་བའི་ཆོས་ནི་སོགས།༣ འཇིག་རྟེན་འཁོར་བའི་ཆོས་རྣམས་ནི་བསྡུ་ན་མཚན་ཉིད་བཞི་རུ་འདུས་ཏེ། གང་ཞེ་ན། འཁོར་བ་ཟག་བཅས་ཕུང་པོ་ལྔ་པ་ཉིད་རང་སྐད་ཅིག་གིས་འཇིག་ཅིང་གཉེན་པོས་རབ་ཏུ་འཇིག་པས་ན་མི་རྟག་པའི་མཚན་ཉིད་དེ། མདོ་ལས། འཇིག་ཅིང་རབ་ཏུ་འཇིག་པས་ན་འཇིག་རྟེན་ནོ། །ཞེས་སོ། །སྐྱེ་འཇིག་གི་ངོ་བོར་གནས་པའི་མཚན་ཉིད་ཀྱང་བཤད། གང་མི་རྟག་པ་ནི་སྡུག་བསྔལ་བའོ། །ཞེས་པས་ཟག་བཅས་ཐམས་ཅད་འདུ་བྱེད་ཀྱི་སྡུག་བསྔལ་ལས་མ་འདས་པས་སྡུག་བསྔལ་དང་། ཕུང་པོ་ལས་དོན་གཞན་རྟགས་བདག་གིས་སྟོང་པ་དང་ཕུང་པོ་རང་གི་ངོ་བོ་རང་རྐྱ་ཐུབ་པའི་རྫས་ཡོད་ཀྱི་བདག་མེད་པའམ། ཡང་ན་རྟེན་པར་བྱེད་པའི་བདག་དང་འབྲེལ་བ་མེད་པས་སྟོང་པ་དང་། རང་ཉིད་བདག་མ་ཡིན་པས་བདག་མེད་པ་སྟེ་དེ་དག་ནི་རང་རང་གི་མཚན་ཉིད་དང་། ཆོས་ཐམས་ཅད་རང་བཞིན་མེད་པའི་སྟོང་པ་ཉིད་ནི་ཀུན་ལ་ཁྱབ་པས་ཐམས་ཅད་ཀྱི་ངོ་བོའམ་སྤྱིའི་མཚན་ཉིད་དོ། །དེ་ལྟ་བུའི་སྒོ་ནས་སྡུག་བསྔལ་གྱི་རང་བཞིན་མ་ཤེས་ན་སྡུག་བསྔལ་ལས་ངེས་འབྱུང་མི་སྐྱེའོ། །དེའི་རང་བཞིན་ཞེས་སྔ་མ་གཉིས་རང་མཚན་དང་ཕྱི་མ་གཉིས་སྤྱི་མཚན་དུ་བཞག་པ་འདྲའོ། །གཉིས་པ་རྒྱས་བཤད་ལ་གཉིས་ཏེ། མི་རྟག་པ་རྒྱས་བཤད་དང་། སྡུག་བསྔལ་རྒྱས་བཤད་དོ། །དང་པོ་ལ་གཉིས། ཕྱི་སྣོད་ཀྱི་འཇིག་རྟེན་མི་རྟག་པ་དང་། ནང་བཅུད་ཀྱི་སེམས་ཅན་མི་རྟག་པར་བཤད་པའོ། །དང་པོ་ལ་ལྔ་སྟེ། དམ་བཅའ་བ་དང་། ཆགས་འཇིག་བྱེད་པའི་ཕྱིར་མི་རྟག་པ་དང་། གནས་སྐབས་འགྱུར་བའི་ཕྱིར་མི་རྟག་པ་དང་། མཇུག་བསྡུས་ཏེ་བསྟན་པ་དང་། སྐྱོན་སྤོང་བསྟན་པའོ། །དང་པོ་ནི། གོང་དུ་མི་རྟག་པའི་མཚན་ཉིད་བསྡུས་ཏེ་བསྟན་པ་དེ་ལ་སླར་ཡང་རྒྱས་པར་བཤད་པར་བྱའོ། །ཞེས་སོ། །གཉིས་པ་ནི། སྣོད་ཀྱི་འཇིག་རྟེན་སོགས།༤ འདི་ལྟར་སེམས་ཅན་སྤྱི་མཐུན་གྱི་ལས་ལས་གྲུབ་པའི་འགྲོ་བའི་རྟེན་གནས། ཕྱི་སྣོད་ཀྱི་འཇིག་རྟེན་རི་རབ་རི་བདུན་གླིང་བཞི་ལྷ་གནས་སོགས་འབྱུང་བཞིའི་ཁམས་ཤིན་ཏུ་བརྟན་པ་བསྐལ་བར་གནས་པ་འདི་དག་ཀྱང་། ནམ་ཞིག་འཇིག་པའི་དུས་ལ་བབ་པའི་ཚེ། ནང་བཅུད་ཀྱི་སེམས་ཅན་རྣམས་མས་རིམ་ནས་སྟོང་སྟེ་བསམ་གཏན་དང་པོའི་ལྷ་གནས་མན་ཆད་ན་སེམས་ཅན་གཅིག་ཀྱང་མེད་པར་འགྱུར་ལ། མདོ་སྡེ་བརྒྱད་བརྒྱ་པར། སེམས་ཅན་རེ་ལུས་ནས་བསྲེག་པའི་སྡུག་བསྔལ་མྱོང་བར་བཤད། དེ་ནས་བསྐལ་པ་འཇིག་པའི་མེ་ཉི་མ་བདུན་རིམ་པར་ཤར་བྱུང་བས། རྩི་ཤིང་ནགས་ཚལ་ནས་ཁོར་ཡུག་ལྕགས་རི་ཚུན་བསྲེགས་ནས་མེ་ལྕེ་གཅིག་ཏུ་གྱུར། ཐུར་དུ་དམྱལ་བའི་གནས་དང་གྱེན་དུ་ཚངས་པའི་གནས་ཀྱང་བསྲེག་ནས་ཐལ་བའི་ལྷག་མ་ཙམ་ཡང་མི་ལུས་སོ། །དེ་འདྲའི་མེས་ལན་བདུན་ཞིག་རྗེས། བསམ་གཏན་གཉིས་པའི་ལྷ་གནས་ནས་ཆར་ཆེན་པོ་བྱུང་བས་དེ་མན་ཆད་ལན་ཚྭ་ཆུ་ལ་ཐིམ་པ་ལྟར་འཇིག །དེ་འདྲའི་ཆུས་ལན་བདུན་ཞིག་པའི་རྗེས་སུ་འོག་གཞི་རླུང་རྡོ་རྗེ་རྒྱ་གྲམ་ཅན་གྱེན་དུ་ལངས་ཏེ། བསམ་གཏན་གསུམ་པའི་ལྷ་གནས་མན་ཆད་ཐལ་བ་རླུང་གིས་གཏོར་བ་ལྟར་གཏོར་ནས་འཇིག་པ་ཡང་དེ་བཞིན་ནོ། །དེར་མ་ཟད་རི་གླིང་ལྷ་གནས་བཅས་བྱེ་བ་ཕྲག་བརྒྱ་སྟོང་གསུམ་འཇིག་རྟེན་གཅིག་ཏུ་ཆུད་པ་ཐམས་ཅད་མཉམ་དུ་ཞིག་ནས་ནམ་མཁའ་སྟོང་པར་གྱུར་པའི་སྐབས་ཡོད་ཅིང་། དེ་ལ་བསམ་ནས་བློ་སྦྱོང་ན་སྣོད་ལ་ཞེན་པ་ལྡོག་གོ། །གཉིས་པ་ནི། གཞན་ཡང་དབྱར་དྲོ་སོགས། མཐར་ཐུག་མི་རྟག་པར་བཤད་པ་དེ་ལས་གཞན་ཡང་གནས་སྐབས་སུའང་དུས་བཞིའི་འགྱུར་བ་ནི། དབྱར་ནི་དྲོད་ཀྱིས་སྨིན་པའི་རྩི་ཤིང་མེ་ཏོག་ལ་སོགས་པ་སྐྱེས་ཤིང་ཉམས་དགའ་བ་ལ། དགུན་ནི་གྲང་ངར་ཆེ་ཞིང་དབྱར་གྱི་མཐོང་སྣང་ཐམས་ཅད་སྐམ་ནས་མེད་པས་ཡིད་མུག་པར་འགྱུར་བ་དང་། འབད་རྩོལ་བྱས་པའི་ལོ་ཏོག་རྣམས་ཀྱང་རེ་འགའ་ལེགས་རེ་འགའ་ཉེས་པའང་ཉི་ཚན་གྱི་ཐན་པ་དང་། ཆར་ཆུ་ཧ་ཅང་ཞོད་ཆེ་བ་སད་དང་སེར་བ་སོགས་ཀྱིས་ཉམས་པ་དང་བརླག་པས་གཅིག་ཏུ་ངེས་པ་མེད་ལ། བསྐལ་པ་ཆེན་པོ་ཡང་རིལ་པོ་གཅིག་མ་ཡིན་ཏེ། སྐད་ཅིག་དང་ཐང་ཅིག་དང་ཡུད་ཙམ་ནས་ཞག་དང་ཟླ་བ་ལོར་ལོངས། ལོ་ཡང་ཕུང་པོར་སྤུངས་པ་མེད་སྐད་ཅིག་ཀྱང་སྡོད་པ་མེད་པར་རིམ་པར་འདས་ཤིང་། མཐར་འཇིག་པ་ཆེན་པོའི་དུས་དང་ཉེ་བར་འོང་ནས་འཇིག་གོ། །གསུམ་པ་ནི། དེ་ལ་སོགས་པ་གཞུང་རྣམས་ལས་དཔེ་དོན་མང་དུ་གདའ་བས་མི་རྟག་པ་བསྒོམ་པར་དགོངས་ན་གཟིགས་པར་འཚལ་ལོ། །བཞི་པ་ནི། ཁ་ཅིག་ན་རེ། མཐར་འཇིག་པ་ནི་བདེན་མོད། སྣོད་ཀྱི་ཁམས་ནི་ཐོག་མ་ནས་ཐ་མའི་བར་དུ་ཡོད་ཅིང་། བུམ་པ་ལྟ་བུ་སྔ་དྲོ་ཡོད་པ་ཕྱི་དྲོ་ཡང་ཡོད་ལ། རྐྱེན་དང་མ་འཕྲད་ན་མི་འཇིག་པས་དེ་བར་དུ་རྟག་པ་ལགས་སོ་ཞེ་ན་མི་འཐད་དེ། རྟག་པ་ལ་འཕོ་འགྱུར་མེད་པས་ཅིའི་ཕྱིར་གོང་དུ་བཤད་པའི་གནས་སྐབས་འགྱུར་ཞིང་འགྲོ་བ་དེ་འཐད་དེ་མི་འཐད་དོ། །དེ་ནི་མངོན་སུམ་ཡིན་ནོ། །འདི་ནི་འདུས་བྱས་སྐད་ཅིག་མའི་རྒྱུན་འདྲ་བ་གཞན་དང་གཞན་འབྱུང་བ་ལ་གཅིག་ཏུ་འཁྲུལ་བ་སྟེ་མགལ་མེའི་འཁོར་ལོ་བཞིན་ནོ། །དཔེར་ན་སྐད་ཅིག་ཕྲ་བའི་མི་རྟག་པ་མ་ཤེས་པ་དག་ཆུ་འདི་ལ་བདག་སྔར་ཡང་བརྒལ་ལོ་ཟེར་བ་ལ། སྔར་གྱི་ཆུ་དེའི་རླན་ཙམ་ཡང་ད་ལྟ་མེད་དེ། ཆུའི་རྡུལ་སྐད་ཅིག་སྔ་མ་རྣམས་འགག་པའི་རྒྱུན་བར་མ་ཆད་པ་ལ་གཅིག་ཏུ་འཁྲུལ། བརྒལ་བ་པོ་རང་ཡང་སྔ་ཕྱི་གཅིག་མ་ཡིན་ཏེ། རྣམ་པར་རྟོག་པའི་སྐད་ཅིག་མ་བཞིན་ནོ། །ཨཱརྱ་དེ་བས། ཇི་ལྟར་རྒྱུན་ལ་བལྟ་ཉེས་ན། །རྟག་པ་ཡོད་ཅེས་བྱ་བར་འགྱུར། །ཇི་ལྟར་ཚོགས་ལ་བལྟ་ཉེས་ན། །དངོས་པོར་ཡོད་ཅེས་བྱ་བར་འགྱུར། །ཞེས་གསུངས་པ་བཞིན་ནོ། །དང་པོ་མི་འགྱུར་བར་ཡོད་པ་ཕྱི་རྐྱེན་གྱིས་མེད་པར་འགྱུར་ན་ཆད་པར་ལྟ་བ་ཡང་འགྱུར་ཏེ། རྩ་ཤེས་ལས། སྔོན་བྱུང་ད་ལྟར་མེད་ཅེས་པ། །དེས་ན་ཆད་པར་ཐལ་བར་འགྱུར། །ཞེས་སོ། །དེས་ན་འཇིག་པ་ཕྱིས་འབྱུང་གི་རྒྱུ་ལ་མི་ལྟོས་པར་རང་སྐད་ཅིག་ཀྱང་མི་སྡོད་པར་ཤེས་དགོས་སོ། །གཉིས་པ་ནང་བཅུད་ཀྱི་སེམས་ཅན་མི་རྟག་པར་བཤད་པ་ལ་གཉིས་ཏེ། བཤད་པར་དམ་བཅའ་བ་དང་། བཤད་པ་དངོས་བསྟན་པའོ། །དང་པོ་ནི། སྣོད་ཀྱི་འཇིག་རྟེན་མི་རྟག་པར་མ་ཟད་བཅུད་ཀྱི་འཇིག་རྟེན་སེམས་ཅན་གྱི་ཚེ་འདི་ཡང་མི་རྟག་པར་བཤད་དོ། །ཞེས་སོ། །དངོས་ལ་གཉིས་ཏེ། རྟེན་པའི་སེམས་ཅན་མི་རྟག་པ་དང་། བརྟེན་རྫས་ཡོ་བྱད་མི་རྟག་པར་བསྟན་པའོ། །དང་པོ་ལ་གཉིས་ཏེ། སེམས་ཅན་འཆི་བ་ལས་མ་འདས་པས་མི་རྟག་པ་དང་། མ་ཤི་བར་དུ་མི་རྟག་པར་བསྟན་པའོ། །དང་པོ་ལ་བཅུ་གསུམ་ལས། དང་པོ་ཉིན་མཚན་འདས་ནས་ཚེ་ཟད་པ་ལ་མི་འཆི་བའི་དབང་མེད་པའི་དཔེ་དང་བཅས་བསྟན་པ་ནི། ཉིན་ཞག་སོགས།༥ འདི་ལྟར་སྐྱེས་བུ་རྣམས་ཀྱི་ཚེ་ནི་སྔོན་ལས་ཀྱིས་འཕང་པའི་ཡུན་དེ་ཉིད་སྐད་ཅིག་ཐང་ཅིག་ཡུད་ཙམ་ལས་ཉིན་ཞག་ལོ་ཟླ་རྣམས་རིམ་གྱིས་གཅོད་པར་བྱེད་པར་འཛད་པ་ཡིན་པས། ཉིན་ཞག་རེ་འདས་ཤིང་ཚེ་བསྟུང་བས་ཤི་བ་དང་ཕར་ཕར་ཉེ་བ་ཡིན་ལ། དེའི་ཚེ་མི་འཆི་བར་འདོད་ཀྱང་སྐྱེ་བ་ཐམས་ཅད་འཆི་བའི་གཞན་དབང་ཅན་ཡིན་པས་བདག་ལ་རང་དབང་མེད་ལ། རྒྱུ་མཚན་ནི་སྡུག་བསྔལ་གྱི་འཁྲུལ་འཁོར་སྐྱེ་རྒ་ན་འཆི་བཞི་པོ་གཅིག་རྗེས་སུ་གཅིག་བརྒྱུད་མར་འོང་བ་རང་འཐག་གི་རི་མོ་འདྲ་བ་དང་། ཕྱོགས་བཞི་ནས་རི་ཆེན་པོ་མཐོ་ཞིང་ལྷུན་སྟུག་པ་བཞི་འོང་བ་སུས་ཀྱང་བཟློག་མི་ནུས་པ་རྒྱལ་པོ་ལ་གདམས་པའི་མདོ་ལས་གསུངས། འཆི་བདག་གི་བདུད་ཀྱི་མིག་གིས་ལྟ་ཞིང་གཟས་པ་ནི་ཟིན་ན་མི་འཆོར་ངེས་པ་སོ་ཡོད་པའི་ཆུ་བྱས་ཉ་སྡོད་པ་སྟེ་སྒུག་པ་འདྲའོ། །ཚོམ་ལས། ཆུ་ཀླུང་དྲག་ཏུ་འབབ་པའི་རྒྱུན། །ལྡོག་པ་མེད་པར་འགྲོ་བ་བཞིན། །མི་ཡི་ཚེ་ནི་དེ་བཞིན་ནོ། །ཞེས་སོ། །གཉིས་པ་འཚོ་རྐྱེན་དུ་བསམ་པའི་དངོས་ཀུན་འཆི་རྐྱེན་འགྲོ་ཞིང་ཐམས་ཅད་འཆི་བའི་གཞན་དབང་ཡིན་པ་ནི། འཆི་བའི་རྐྱེན་ནི་སོགས།༥ རྩ་བ་གོ་སླ། ཇི་སྐད་དུ། འཆི་བའི་རྐྱེན་ནི་ཤིན་ཏུ་མང་། །འཚོ་བའི་རྐྱེན་ནི་ཤིན་ཏུ་ཉུང་། །དེ་ཡང་འཆི་བའི་རྐྱེན་དུ་འགྱུར། །ཞེས་དང་། མྱ་ངན་བསལ་བའི་སྤྲིང་ཡིག་ལས། སའམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་བ། །འགའ་ཞིག་ཁྱོད་ཀྱིས་མཐོང་བའམ། །ཐོས་སམ་འོན་ཏེ་ཐེ་ཚོམ་ཟ། །ཞེས་གསུངས། ངེས་པར་འཆི་བའི་དཔེ་མདོ་ལས། འབྲས་བུ་སྨིན་པའི་ཤིང་ཏོག་བཞིན། །ལུས་ཅན་རྣམས་ནི་འཆི་བར་འགྱུར། །ཞེས་དང་། ཚེ་གློ་བུར་བ་ཡིན་པས་མ་ངེས་པ་དང་སྣོན་པ་མེད་པས་མྱུར་དུ་འཆི་བ་བསམ་པ་གལ་ཆེ་སྟེ། མི་རྟག་པའི་གཏམ་ལས། ལྟག་ཆུ་བཅད་པའི་རྫིང་བུ་བཞིན། །སྣོན་མེད་བྲི་བ་དང་བཅས་པས། །ཀུན་ནས་འཆི་བའི་ལམ་ཞུགས་ན། །གློ་བུར་ཚེ་ལ་སུ་ཡིད་རྟོན། །ཞེས་གསུངས། གསུམ་པ་འཆི་བའི་ཚེ་བུ་ནོར་གྱིས་མི་ཕན་ཞིང་གནོད་པའི་གྲོགས་སུ་འགྱུར་བ་ནི། སྔ་མ་ཤི་བའི་སོགས།༥ སྔ་མ་སྔ་མ་ཤི་བའི་མི་རྣམས་ཀུན་གྱིས་ཀྱང་རྟག་འཛིན་དང་སེར་སྣས་བུ་ནོར་བསགས་པ་ཐམས་ཅད་ཤི་བའི་ཚེ་ཕྱིར་ལུས་ནས་བདག་ལ་ཕན་པ་མེད་པ་བཞིན་དུ། ད་ལྟ་རང་རེ་རྣམས་ཀྱང་རྟག་ཏུ་རེ་ནས་བུ་དང་ནོར་བསགས་ཀྱང་ཤི་བའི་ཚེ་བུ་ནོར་ཀུན་ཕྱིར་ལུས་ཏེ་བ་དག་ལ་ཕན་པ་མེད་ལ། མ་ཟད་བློས་མི་ཐོངས་རྗེས་སུ་མི་འབྲང་བས་མྱ་ངན་གྱི་རྒྱུ་རུ་འགྱུར་རོ། །དེའི་ཚེ་རང་ཉིད་ལ་ཕན་པ་ནི་དགེ་བ་དང་གནོད་པ་ནི་བུ་ནོར་གྱི་དོན་དུ་སྡིག་བསགས་པ་དེ་གཉིས་དང་འགྲོགས་ཏེ་གཤིན་ཡུལ་དུ་འགྲོའོ། །དེ་བས་ད་ལྟ་བཏང་བར་བྱ་སྟེ། རྒྱལ་པོ་ལ་གདམས་པར། དུས་ཀྱིས་ཉེན་ཏེ་རྒྱལ་པོ་འགྲོ་འགྱུར་ན། །འཁོར་དང་ལོངས་སྤྱོད་གཉེན་བཤེས་རྗེས་མི་འབྲང་། །སྐྱེས་བུ་དེ་ནི་གང་དང་གང་སྐྱེས་ཀྱང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །ཞེས་དང་། ལྗོན་ཤིང་རྡིབ་པར་གྱུར་པའི་ཚེ། །ཡལ་ག་ལོ་མས་ཅི་ཞིག་བྱ། །དེ་བཞིན་སྐྱེས་བུ་འཆི་བའི་ཚེ། །ཡོངས་སུ་བཟུང་བས་ཅི་ཞིག་བྱ། །ཞེས་སོ། །བཞི་པ་ཤི་བ་མཐོང་ཐོས་སུ་གྱུར་ཅིང་ལོ་བརྒྱ་ན་ད་ལྟའི་སེམས་ཅན་གཅིག་ཀྱང་མེད་པ་ནི། ད་ལྟ་རང་རེ་སོགས།༦༤ སྔོན་འདས་པ་ཐམས་ཅད་མཐོང་བར་མི་འགྱུར་ཡང་ད་ལྟ་རང་རེ་གནས་པའི་རིང་འདི་ལ་ཡང་། དགྲ་གཉེན་སོགས་ཇི་སྙེད་ཅིག་ཤི་བ་མཐོང་ཐོས་ཀྱི་མངོན་སུམ་དུ་གྱུར་པ་མ་ལགས་སམ་སྟེ་ལགས་ན། དེ་ལྟར་དུ་ད་ལྟའིུ་ས་སྟེང་ན་ཡོད་པའི་སེམས་ཅན་འདི་དག་ཀུན་ཀྱང་ལོ་བརྒྱ་ཚུན་ཆོད་ན་གཅིག་ཀྱང་མི་ལུས་པར་འཆི་བ་ཡིན་པས། དེས་ན་རང་རེ་ཡང་འཆི་བའི་ཆོས་ཅན་ཡིན་ན་ཅིའི་ཕྱིར་བག་ཕབ་སྟེ་བདེ་བར་འདུག་སྟེ་མི་རིགས་སོ། །མྱ་ངན་བསལ་བར། འདི་ལྟར་སྐྱེ་བ་ཐམས་ཅད་ཀྱི། །མདུན་ན་གནས་པ་འཆི་བ་ཡིན། །ཞེས་སོ། །ལྔ་པ་འཆི་བ་ལ་སྐད་ཅིག་ཀྱང་ཚོད་འཛིན་མེད་ཅིང་དམ་པ་སྦྱིན་པ་མེད་པ་ནི། དེང་འཆི་སོགས། རང་རེ་ལ་མཁྱེན་པ་མེད་ཅིང་འཆི་བ་གློ་བུར་བ་ཡིན་པས་དེང་འཆིའམ་སང་འཆི་བ་ནི་སུས་ཀྱང་མི་ཤེས་ཏེ། དེང་ནས་ལོ་ཟླ་འདི་ཙམ་ཞེས་དུས་ཚོད་འཛིན་པའང་མེད་དེ་འཆི་རྐྱེན་ནམ་འོང་མི་ཤེས་པའི་ཕྱིར། ལྷག་པའི་ལྷའམ་འཆི་བདག་གིས་མི་འཇིགས་པ་སྦྱིན་པའང་མེད་ཅིང་། ཚེ་ལ་དབང་ཐོབ་པའང་མེད་ན་སང་ཕོད་འཆི་དེང་སང་མི་འཆི་ཞེས་བདག་གིས་ཇི་ལྟར་ཚོད་ངོས་ཟིན་པར་འགྱུར་ཏེ་མི་འགྱུར་རོ། །མཚན་མོ་བཟང་པོའི་མདོར། སང་ཙམ་འཆི་བ་སུས་ཤེས་ཀྱི། །དེ་རིང་ཉིད་ནས་བརྟུན་ཏེ་བྱ། །འཆི་བདག་སྡེ་ཆེན་དེ་དང་ནི། །ཁྱོད་ཉིད་བཤེས་པ་མ་ཡིན་ནོ། །ཞེས་སོ། །དྲུག་པ་འཆི་བའི་ཚེ་གཉེན་འདུན་སོགས་དང་ལྷན་ཅིག་མི་འཆི་བས་དེ་དག་གི་དོན་དུ་སྡིག་བསགས་པའི་འབྲས་བུ་རང་འབའ་ཞིག་ལ་ཐོབ་པ་ནི། འཆི་བའི་ཚེ་སོགས།༥ དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་བཤད་པས། ད་ལྟ་ཕ་མ་སོགས་ཀྱི་ཆེད་དུ་སྡིག་བསགས་ཀྱང་ཕྱིས་སུ་རྣམ་སྨིན་བགོ་བྱར་ཡོད་དོ་སྙམ་ན་མ་ཡིན་ཏེ། རང་འཆི་བའི་ཚེ་ཕ་མ་སོགས་མཉམ་དུ་མི་འོང་ཞིང་སྡུག་བསྔལ་གྱི་སྐལ་བ་ལེན་པ་ནི་འགའ་ཡང་མ་མཆིས་ཏེ། བདག་ཉིད་གཅིག་པུ་དགེ་སྡིག་གཉིས་དང་ལྷན་ཅིག་ཆས་ཏེ་འགྲོ་དགོས་པ་དེའི་ཚེ་གྲོགས་དགེ་སྡིག་གཉིས་ལས་སུ་ཡང་མེད་དོ། །དེས་ན་རང་དོན་དུ་མ་ཟད་གཞན་གྱི་དོན་དུའང་སྡིག་བྱེད་པར་མི་རིགས་སོ། །རྒྱལ་པོ་གླང་པོ་ལ་གསུངས་པའི་མདོ་ལས། ས་ཡི་བདག་པོ་རྟག་ཏུ་བག་ཡོད་ཀྱིས། །ཚེ་ནི་རྟག་ཏུ་འགྲོ་ཞིང་མི་གནས་ཏེ། །ནད་དང་མྱ་ངན་རྒ་བས་གཟིར་བ་ལ། །ཁྱོད་ལ་དགེ་བའི་ལས་འདྲ་སྐྱོབ་གཞན་མེད། །ཅེས་སོ། །སྔོན་མི་ཞིག་གིས་ཤིང་འཚོང་བ་ལ་ཆོམ་རྐུན་པ་དག་ན་རེ། འདི་ལྟ་བུའི་འཚོ་བ་སྒྲུབ་པས་ཁོ་བོ་ཅག་དང་ལྷན་ཅིག་འདོང་དང་རྙེད་པ་ཆེའོ་ཟེར། དེ་ན་རེ་སྡིག་པ་མི་ཆེའམ་ཟེར། དེ་དག་གིས་སྨྲས་པ། སྡིག་པ་དང་རྣམ་སྨིན་བགོ་བྱར་ཡོད་དོ། །དེས་རེ་ཞིག་ལྟའོ་ཞེས་སྨྲས། ནམ་ཞིག་ཁོའི་མགོ་ན་བས་གཟེར་བ་ལ་ཆོམ་རྐུན་རྣམས་དང་འཕྲད། དེ་དག་གིས་ད་ལྷན་ཅིག་འགྲོ་བྱས། དེ་ན་རེ་ངའི་ནད་འདིའི་བགོ་སྐལ་ལོངས་དང་བྱས། དེ་ཁྱོད་རང་ལས་ངེད་ཅག་གིས་ལེན་དུ་ག་ལ་ཡོད་བྱས། འོ་ན་སྡིག་པའི་རྣམ་སྨིན་ཡང་དེ་ལྟ་བུ་ཡིན་པས་ཆོམ་རྐུན་མི་འདོད་དོ། །ཞེས་པ་བཞིན་ནོ། །བདུན་པ་རང་ཉིད་གཅིག་པུར་འཆི་ཞིང་གཉེན་འདུན་མགྲོན་པོ་དང་འདྲ་བ་ནི། དེ་བས་སྐྱེ་སོགས།༤༠ ཇི་སྐད་བཤད་པ་དེ་བས་ན་དང་པོ་སྐྱེ་བའང་བདག་ཉིད་གཅིག་པུར་སྐྱེ་ཞིང་། མཐའ་མ་འཆི་བ་ན་ཡང་བདག་ཉིད་གཅིག་པུར་འཆི་སྟེ། འདུལ་བ་ལས། སྐྱེ་བ་ན་ཡང་འདི་གཅིག་སྐྱེ་འགྱུར་ཞིང་། །དེ་བཞིན་འཆི་བ་ན་ཡང་འདི་གཅིག་འཆི། །འཁོར་བ་ལ་ནི་གྲོགས་ཡོད་མ་ཡིན་ཏེ། །སྐྱེ་བོ་གཅིག་པུས་འདི་ན་སྡུག་བསྔལ་མྱོང་། །ཞེས་གསུངས། འོ་ན་ད་ལྟ་ལྷན་ཅིག་འདུས་པའི་གཉེན་རྣམས་ཇི་ལྟར་ཞེ་ན། མི་ཚེ་སྐད་ཅིག་མ་འདི་ལ་སྔོན་ལས་མཐུན་པར་བསགས་པའི་ཉེ་བཞི་སྟེ་རུས་དང་སྣག་གི་གཉེན་དང་བུ་ཚ་རྣམས། དཔེར་ན་ཕྱོགས་སོ་སོ་ནས་འོང་བའི་མགྲོན་པོ་རྣམས་ཞག་གཅིག་གནས་མཐུན་པར་བཟུང་ནས་འགྲོ་བ་ཙམ་སྟེ། ཅི་ཙམ་འགྲོགས་ཀྱང་འདུས་པའི་ཐ་མ་འབྲལ་བའི་ཆོས་ཅན་ཡིན་པས་མཐར་སོ་སོའི་འགྲོ་བ་ཡིན་པས། རྟག་ཏུ་འགྲོགས་པའི་རེ་བ་མི་བྱའོ། །རྒྱལ་པོ་ལ་གདམས་པར་ཡང་དེ་ཁོ་ན་ལྟར་འབྱུང་ངོ་། །བརྒྱད་པ་ཕན་པ་གཏན་ཐུབ་མེད་པ་འདིར་སྣང་འཁྲུལ་པའི་ཡུལ་རྣམས་བོར་ནས་ངེས་མེད་གཅིག་པུར་འགྲོ་དགོས་པ་ནི། འོ་ན་སོགས།༥ འོ་ན་བུ་ཚ་ཉེ་བཞིས་ཅི་ཞིག་ཕན་ཏེ་མི་ཕན་པ་ལ། ད་ལྟར་རང་དབང་ཡོད་ཚེ་དེ་དག་ལས་སྐད་ཅིག་ཙམ་ཡང་འབྲལ་བར་མི་ཕོད་པའི། བུ་དང་ཆུང་མ་ལ་སོགས་བདེ་བའི་རྒྱུར་རློམ་པ་དེ་ཀུན་མཐར་རང་དབང་མེད་པར་ཁ་ལུད་བཞིན་དུ་བོར་ནས། དེ་རིང་ངམ་སང་ཉིན་ཙམ་ནས་བདག་ཉིད་གཅིག་པུར་ལག་སྟོང་མཆན་དུ་བཅུག་སྟེ་གཤེད་དམ་ངེས་མེད་དུ་འགྲོ་དགོས་སོ། །ཟིལ་གྱིས་མི་ནོན་པའི་སྐྱེས་རབས་སུ་རྒྱུ་རྐྱེན་མེད་པར་མྱུར་དུ་ཆུད་ཟ་བའི། ནོར་ནི་ཤིན་ཏུ་མི་བཟད་ནོར་མིིན་རིགས། །འཇིག་རྟེན་དག་ན་ནོར་ནི་ཕལ་ཆེར་ཡང་། །ཆགས་པའི་གཞི་དང་ངན་འགྲོའི་གྲོགས་སུ་འགྱུར། །ཞེས་དང་། དྲན་ཉེར་ལས། གཉེན་བཤེས་ཚུལ་ནི་དགྲ་ཡིན་ཏེ། མི་ཕན་ཕན་པའི་ཚུལ་གྱིས་ཁྱོད། །བཅོམ་ནས་མི་ཡི་འཇིག་རྟེན་ནས། །དེ་རིང་མུན་ནག་ཆེན་པོར་འགྲོ། །ཞེས་གསུངས་སོ། །དགུ་པ་བསགས་པའི་ལོངས་སྤྱོད་རྣམས་སྡིག་པའི་ཁུར་དུ་སོང་བ་ནི། ཅི་ཙམ་སྡུག་སོགས།༤ ཚེ་འདིར་ཅི་ཙམ་སྡུག་བསྔལ་དང་དོ་བསྡོས་ནས་ནོར་བསགས་ཀྱང་སྡིག་པའི་ལོངས་སྤྱོད་རྣམས་སྡིག་པའི་ཁུར་དུ་སོང་བ་ནི། ཅི་ཙམ་སྡུག་སོགས།༤ ཚེ་འདིར་ཅི་ཙམ་སྡུག་བསྔལ་དང་དོ་བསྡོས་ནས་ནོར་བསགས་ཀྱང་སྡིག་པའི་རྣམ་སྨིན་ནི་ཆུད་མི་ཟ་བས། ལས་འབྲས་ལ་རྨོངས་པ་བདག་ཉིད་ཀྱི་ཁུར་དུ་འགྱུར་ལ། བསགས་པའི་ནོར་རྣམས་ནི་ཁོང་བདག་བྱེད་པ་བུ་ཚ་རྣམས་ཀྱིས་འཁྱེར་བ་དེ་ཡི་ཕྱིར་བསགས་པའི་ནོར་གྱིས་ཅི་ཞིག་ཕན་ཏེ་མི་ཕན་པས། དོན་མེད་སྡིག་སྡུག་བསགས་པ་ཁོ་ནར་ཟད་དོ། །མདོ་ལས། ནད་མེད་གསོན་ན་དགྲ་འདུལ་ཞིང་། །གཉེན་སྐྱོང་ནོར་བསོགས་སྙམ་ན་ཡང་། །བྱིས་པའི་བྱེ་མའི་ཁང་བུ་བཞིན། །དོན་མེད་སྡུག་བསྔལ་ཁོ་ནར་ཟད། །ཅེས་དང་། བཤེས་སྤྲིང་ལས་ཀྱང་མང་དུ་གསུངས། བཅུ་པ་ལྷན་ཅིག་སྐྱེས་པའི་ལུས་དང་བྲལ་ནས་འགྲོ་བ་ནི། བདག་ལ་ཤིན་ཏུ་སོགས།༤ བུ་ནོར་ལོངས་སྤྱོད་སོགས་འདོར་བ་མ་ཟད་བདག་ལ་ད་ལྟར་ཤིན་ཏུ་ཕོངས་པའི་ལུས་འདི་ཡང་། དེ་རིང་ངམ་སང་ཙམ་གྱི་དུས་ནི་རྫ་བུམ་ཆག་པའི་གྱོ་མོ་བཞིན་དུ་འདོར་ཏེ། ལྷན་ཅིག་སྐྱེས་པའི་ཤ་རུས་གཉིས་དང་བྲལ་ནས་རང་དབང་མེད་པར་གཅིག་པུར་འཁྱམས་ནས་ནི་འགྲོ་དགོས་ཏེ། ཐོ་ཞིག་པ་དང་བྱ་འཕུར་བ་བཞིན་ནོ། །དྲན་ཉེར། དཔེར་ན་རྫ་ཡི་མཁན་པོ་ཡིས། །འཇིམ་པ་ལས་ནི་སྣོད་བྱས་པའི། །མཐའ་མ་ཐམས་ཅད་འཇིག་པ་ལྟར། །མི་ཡི་སྲོག་ཀྱང་དེ་བཞིན་ནོ། །ཞེས་སོ། །བཅུ་གཅིག་པ་སྡུག་བསྔལ་ཀུན་གྱི་འབྱུང་གནས་ལུས་ཀྱི་ཕྱིར་སྡིག་པ་མི་བྱ་བ་ནི། ལས་ཀྱི་དབང་གིས་སོགས།༢ ཟླ་བ་སྒྲོན་མེའི་མདོ་ལས། འགྲོ་བ་རྣམས་ནི་ལས་ཀྱིས་འགྲོ། །དེ་མིན་འགྲོ་བར་ནུས་མ་ཡིན། །ཞེས་གསུངས་པ་ལྟར། དགེ་སྡིག་གི་ལས་ཀྱིས་འཕེན་པའི་དབང་དུ་འགྲོ་བ་གང་སྐྱེས་པར་གྱུར་ན་ཡང་། ད་ལྟའི་ལས་བསགས་པ་ནི་དེ་ཁོ་ན་ལ་སྨིན་པར་འགྱུར་གྱི་གཞན་ལ་ནི་མ་ཡིན་ཏེ། འདུལ་བ་ལས། ལས་བསགས་པ་ནི་ཕྱི་རོལ་གྱི་སའི་ཁམས་ལ་མི་སྨིན་སོགས་ནས་ཟིན་པའི་ཕུང་པོ་འབའ་ཞིག་ལ་སྨིན་ཞེས་གསུངས། ཟིན་པ་ནི་ཤེས་རྒྱུད་ཀྱིས་ཟིན་པའི་དོན་ནོ། །དེ་ལྟ་བས་ན་ད་ལྟའི་ལུས་ངག་ཡིད་ཀྱིས་ཕྱི་མའི་ལུས་ལ་ཡང་འབྱུང་བའི་ཕྱིར་སྡིག་པ་མི་བྱའོ། །བཅུ་གཉིས་པ་ལུས་མི་གཙང་བ་ལ་ཆགས་པར་མི་རིགས་པ་ནི། ལུས་འདི་སོགས།༨ ལུས་འདི་ནི་འདོད་པས་མི་ངོམས་ཤིང་ཆོག་ཤེས་མེད་པ་ནི་དཔེར་ན་ས་ཆེན་པོ་ནི་གཏིང་ནས་སྟེང་དུ་ནོར་གྱིས་གང་ཞིང་ཆར་ཇི་ཙམ་བབ་ཀྱང་ངོམས་པ་མེད་པ་ལྟར་གྱུར་པ་བཞིན་ནོ། །ཚོམ་ལས། གངས་ཅན་དང་ནི་མཉམ་པ་ཡི། །གསེར་གྱི་རི་བོ་ཡོད་གྱུར་ཀྱང་། །ནོར་དེས་གཅིག་ཀྱང་མི་ཚིམ་པར། །རྟོགས་པར་གྱིས་ལ་ལེགས་པར་དཔྱོད། །ཅེས་དང་། ཆོག་ཤེས་འཕགས་པའི་སྤྱི་ནོར་ཡིན་ཞིང་ཆོག་ཤེས་ཅན་ནོར་མེད་ཀྱང་ཕྱུག་པོ་དང་། ཆོག་མེད་ནོར་གྱིས་འབྱོར་ཡང་དབུལ་པོ་ཉིད་དེ། དེས་པས་ཞུས་པ་ལས། ནོར་མང་གིས་ནི་ཅི་ཞིག་བྱ། །རྒྱ་མཚོ་ལ་ནི་ཀླུ་རྣམས་བཞིན། །གང་དག་ལ་ནི་ཆོག་མེད་པ། །མ་བསྡམས་དེ་དག་དབུལ་པོ་ཡིན། །ཞེས་སོ། །ལུས་ལ་ཆགས་ནས་གསོ་སྲུང་བྱེད་པ་འཁྲུལ་ཏེ། དཔལ་བྱིན་གྱིས་ཞུས་པ་ལས། ལུས་ནི་ས་སྟེང་འདྲ་སྟེ་ཆོག་མི་ཤེས། །གཤེད་མ་མི་འཛའ་འདྲ་ཡང་བྱིས་པས་ག སོ། །རྟག་ཏུ་ནད་འདྲ་སྡུག་བསྔལ་འཁྲུལ་འཁོར་ཏེ། །མཁས་པ་སུ་ཞིག་ལུས་ལ་སྲེད་པ་སྐྱེ། །ཞེས་གསུངས་པ་ལྟར། ལུས་ནི་རྒྱུ་མི་གཙང་བ་ཕ་མའི་ཁུ་ཆུ་ལས་བྱུང་བ་དང་། འབྲས་བུ་མི་གཙང་བ་ཤ་ཁྲག་ནང་ཁྲོལ་སོགས་མི་གཙང་བ་དུ་མའི་ཕུང་པོ་ཡིན་ཏེ། དགའ་བོ་མངལ་འཇུག་གི་མདོ་སོགས་ལས་རྒྱ་ཆེར་གསུངས། དེ་ཡང་ན་རྒ་འཆི་སོགས་སྡུག་བསྔལ་ཀུན་གྱི་གནས་དང་། ཤི་ནས་ལུས་བོར་ཏེ་འཐོར་བའི་ཚེ་ས་གཙང་མའི་ཕྱོགས་ཙམ་བཙོགས་པར་འགྱུར་བ་མངོན་སུམ་ཡིན་ན་ཅིའི་ཕྱིར་ཆགས། ཡང་ན་བྱ་དང་ཁྱི་སྤྱང་ལ་སོགས་པ་མི་གཙང་བ་ཟ་བ་ཀུན་གྱི་ཁ་ཟས་སུ་སྲུང་བར་ཟད་ལ། ད་ལྟར་ཟས་གོས་སོགས་ཀྱིས་བསྙེན་བཀུར་ལ་ཇི་ཙམ་འབད་ཀྱང་མཐར་འཆི་བདག་སྲིན་པོས་དབང་མེད་དུ་འཕྲོག་གོ། །དེ་ལྟར་མཐོང་ནས་མཁས་པས་སྨོད་ཅིང་ཁྱི་ཕག་ལྟ་བུ་བླུན་པོས་ཆགས་པའི་གནས་སུ་མཐོང་ལ། དེ་བས་ན་ལུས་ཀྱི་རང་བཞིན་ལ་མཁས་པ་སུ་ཞིག་ཆགས་ཏེ་མི་ཆགས་སོ། །དཔལ་བྱིན་གྱིས་ཞུས་པར། འདི་ལྟར་མི་གཙང་ཕུང་པོའི་ལུས་འདི་ལ། །གཟུགས་སྔོན་ང་རྒྱལ་ཅན་གང་གུས་བྱེད་པ། །བྱིས་པའི་བློ་ཅན་དེ་ནི་སྔོན་བཞིན་དུ། །མི་ཤེས་ངན་སྐྱུགས་བུམ་པ་ཐོགས་ནས་འགྲོ། །ཞེས་དང་། གང་པོས་ཞུས་པ་ལས། སྲིན་བུ་མི་གཙང་མོས་པ་བཞིན། །བླུན་པོའི་ལུས་སྲེད་དེ་དང་འདྲ། །ཞེས་སོགས་མང་དུ་གསུངས་སོ། །བཅུ་གསུམ་པ་ལས་འབྲས་མི་བསླུ་བས་ལུས་ལ་དགེ་སྡིག་གི་བླང་དོར་བྱེད་དུ་འཇུག་པ་ནི། ལུས་ཀྱི་སོགས་སོ། །ལུས་སྙིང་པོ་མེད་པ་ཉིད་ཀྱི་ཕྱིར་ནི་སྡིག་བསགས་པས་རང་ཉིད་ཕྱི་མར་ཡ་ང་བའི་གནས་སུ་འཇུག་པར་མི་བྱའོ། །འོ་ན་འཕྲལ་གྱི་ལུས་འདི་ལ་བྲན་གཡོག་ལྟར་གླ་རྔན་ཟས་གོས་རན་པ་ཙམ་བྱིན་ནས་སུ། ཡུན་གྱི་ཕན་པ་དང་བདེ་བའི་ཕྱིར་བསོད་ནམས་སོག་ཏུ་གཞུག་དགོས་ཏེ། འཁོར་བ་ན་འཁོར་བའི་ཚེ་བདག་གི་གྲོགས་ནི་དགེ་སྡིག་གཉིས་ལས་མེད་པའི་ཕྱིར། དེ་ཡང་དགེ་བཅུ་སོགས་ཟག་པའི་གཉེན་པོར་མི་འགྱུར་བ་ཟག་བཅས་གང་པོས་ཞུས་པ་ལས་མཐོ་རིས་ཀྱི་རྒྱུ་དང་། ཟག་པའི་གཉེན་པོར་ཟག་མེད་ཐར་པའི་རྒྱུ་དང་། སྡིག་པ་མི་དགེ་བཅུ་ནི་མཐའ་གཅིག་ཏུ་ངན་སོང་གསུམ་སོགས་སྡུག་བསྔལ་ཀུན་གྱི་རྒྱུ་ཡིན་ནོ། །གཉིས་པ་མ་ཤི་བར་དུ་ཡང་མི་རྟག་པར་བསྟན་པ་ལ་གཉིས། གནས་སྐབས་འགྱུར་བ་དང་། ཞར་ལ་དོགས་པ་སྤང་བའོ། །དང་པོ་ནི། མ་ཤི་སོགས་རྐང་པ་ཕྱེད་གསུམ། གནས་སྐབས་མ་ཤི་བར་དུ་ཡང་ལུས་འདི་མི་རྟག་སྟེ། ཁུར་ཞོ་ཞེས་མའི་པང་གིས་འཚོ་བ་བུ་ཆུང་བྱིས་པའི་གནས་སྐབས་དང་། དེ་ནས་གཞོན་ནུ་ལོ་བརྒྱད་ཉིད་དུ་འགྱུར་བ་དང་། དེ་ནས་དར་ལ་བབ་པ་བཞི་བཅུ་དང་། དར་ལས་ཡོལ་བ་ལྔ་བཅུ་དང་། རྒས་པར་གྱུར་ཏེ་དྲུག་ཅུར་རིམ་གྱིས་འགྱུར་བའི་ཕྱིར། །གཉིས་པ་ནི། གལ་ཏེ་གནས་སྐབས་དེ་ལྟར་སྣང་ཡང་ལུས་རིལ་པོ་འདི་མ་ཤི་བར་ཡོད་པས་རྟག་གོ་སྙམ་ན་ནི། འོ་ན་གནས་སྐབས་དེ་དག་ཉིད་སྔ་ཕྱི་གཅིག་ཏུ་ཅི་སྟེ་མི་འགྱུར་ཏེ་འགྱུར་དགོས་ལ། འདོད་ན་གཞོན་ནུ་རྒན་པོ་དང་རྒན་པོ་གཞོན་ནུ་ཉིད་དུ་ཐལ་བར་འགྱུར་རོ། །གནས་སྐབས་དེ་དག་ལུས་རིལ་པོའམ་ཚོགས་པ་མ་གྲུབ་པས་སྔར་བཤད་པ་ལྟར་རྒྱུན་གྱིས་འཁྲུལ་བ་སྟེ། མུ་སྟེགས་བྱེད་ཀྱིས་གནས་སྐབས་མི་རྟག་ངོ་བོ་དང་སྤྱི་རྟག་པར་སྨྲ་བ་དང་མཚུངས་པར་འགྱུར་རོ། །དྲན་ཉེར། གང་འདི་འཆི་བ་འབྱུང་བ་ནི། །དྲན་པའི་མཆོག་ཏུ་རབ་ཏུ་བསྔགས། །འཆི་བདག་འཇིགས་པ་དྲན་པ་ནི། །སྐྱོན་ལ་ཇི་ལྟར་ཡིད་རྒྱུག་འགྱུར། །ཞེས་སོ། །གཉིས་པ་བརྟེན་རྫས་ཡོ་བྱད་མི་རྟག་པར་བཤད་པ་ལ་གཉིས། ལོངས་སྤྱོད་བདེ་སྡུག་འགྱུར་བ་དང་། མཇུག་བསྡུ་བའོ། །དང་པོ་ནི། ལོངས་སྤྱོད་སོགས།༥ འདོད་ཁམས་ཀྱི་སེམས་ཅན་རྣམས་བསྟེན་པར་བྱ་བའི་འདོད་ཡོན་ལོངས་སྤྱོད་ཀྱི་བདེ་བ་དང་། དེ་ཟད་པས་སྡུག་བསྔལ་ཀུན་ཀྱང་མི་རྟག་སྟེ། འཇིག་རྟེན་ན་རེ་ཞིག་བཙན་པོ་དང་ཕྱུག་པོ་གཉིས་ཀ་འཛོམ་པའམ་རེ་རེ་འཛོམ་པ་དག །ནམ་ཞིག་ཉམ་ཆུང་དང་དབུལ་པོ་སྡུག་ཕོངས་ཅན་དུ་འགྱུར་བ་དང་། སྡུག་ཕོངས་ཅན་ཡང་བཙན་ཕྱུག་འཛོམ་པར་འགྱུར་བ་མཐོང་ཆོས་སུ་གསལ་ལ། དེ་ཡང་ལང་ཚོ་དར་ཚེ་ལོངས་སྤྱོད་ནུས་ཀྱང་ན་བ་དང་རྒས་པའི་ཚེ་སྤྱོད་ནུས་མེད་པའི་སྡུག་བསྔལ་དང་། འཆི་བས་འཇིག་ཚེ་ལོངས་སྤྱོད་བློས་མི་ཐོང་རྗེས་སུ་མི་འབྲང་བའི་སྡུག་བསྔལ་དང་། སྔོན་གྱི་དུས་ཤ་དུམ་བུ་ཁྱེར་བའི་བྱ་ཞིག་བྱ་མང་པོས་དེད་པའི་སྡུག་བསྔལ་བར་དགེ་སློང་ཞིག་གིས་མཐོང་ནས་འདོད་ཡོན་ལ་ཞེན་པ་ལོག་སྟེ། སྨྲས་པ། བྱ་ཡིས་ཤ་ཡི་དུམ་བུ་ཁྱེར་བ་ན། བྱ་གཞན་ཀུན་ཀྱང་བསྐོར་ཞིང་འབྲང་བ་མཐོང་། དེ་བཞིན་འདོད་པའི་ཡོན་ཏན་རིག་བྱས་ནས། བསེ་རུ་ལྟ་བུ་གཅིག་པུར་གནས་པར་བྱ། ཞེས་འདུལ་བ་ལས་གསུངས་པ་དང་། དྲན་ཉེར། ཇི་ལྟར་རྨ་བྱའི་སྒྲོ་དག་ནི། །རླུང་གིས་ཀུན་ཏུ་ཁྱེར་གྱུར་པ། །དེ་ནི་ཟད་པར་བྱ་ཕྱིར་འཇིག །བདེ་བའི་གཞི་ནི་དེ་དང་འདྲ། །ཞེས་སོ། །དེ་ལ་སོགས་པ་ལུས་དང་ལོངས་སྤྱོད་ཀུན་མི་རྟག་ཅིང་སྙིང་པོ་མེད་པ་ཕུང་ཁྲོལ་གྱི་རྒྱུ་ཡིན་པར་དགོངས་ནས་ངེས་པར་འབྱུང་ན་བདེའོ། །ཡང་དེ་ལས། འདོད་པའི་དབང་སོང་དགའ་བ་གང་། །དེ་ནི་རྟག་ཏུ་སྡུག་བསྔལ་འབྱུང་། །ཉོན་མོངས་བཅོམ་པའི་དགའ་བ་གང་། །དེ་ནི་རྟག་ཏུ་བདེ་བ་ཡིན། །ཞེས་དང་རིན་ཆེན་ཕྲེང་བ་སོགས་ལས་རྒྱ་ཆེར་འབྱུང་ངོ་། །གཉིས་པ་ནི། གོང་དུ་ཇི་སྐད་བཤད་པ་དེ་བས་ན་འཇིག་རྟེན་ཕྱི་ནང་སྣོད་བཅུད་ཐམས་ཅད་རྒྱུ་རྐྱེན་གྱིས་བྱས་པའི་ཕྱིར་མི་རྟག་པའི་མཚན་ཉིད་དག་གོ། །གཉིས་པ་སྡུག་བསྔལ་གྱི་མཚན་ཉིད་རྒྱས་པར་བཤད་པ་ལ་གསུམ། དམ་བཅའ། མདོར་བསྟན། དངོས་སོ། དང་པོ་ནི། ད་ནི་སོགས་ཚིག་གཅིག །གཉིས་པ་ནི། སྡུག་བསྔལ་གཙོ་བོ་སོགས་རྐང་པ་གཉིས་གོ་སླ། གསུམ་པ་དངོས་ལ་བཞི་སྟེ། རྒས་པ་ན་བ་འཆི་བ་སྐྱེ་བ་སྟེ་བཞི་ལས། སྐྱེ་བའི་སྡུག་བསྔལ་འོག་ཏུ་བཤད། དང་པོ་རྒས་པ་ནི། རྒས་པ་སོགས།༩ སྐྱེ་བའི་རྐྱེན་གྱིས་རྒ་ཤི་ཡིན་ཞིང་སྐྱེ་སོགས་བཞི་པོ་སྔ་མ་ལས་ཕྱི་མ་སྡུག་བསྔལ་རགས་པ་དང་། འབྲས་བུ་རྒས་པའི་སྡུག་བསྔལ་གྱིས་འཇིགས་པས་རྒྱུ་སྐྱེ་བ་འགོག་པར་དགོངས་ཏེ་རྒྱུ་འབྲས་གོ་ལྡོག་ནས་བཤད། དེ་ཡང་གཞོན་ཚེ་འཁོར་བའི་བྱ་བྱེད་ཟིན་མེད་ཀྱི་ངང་ནས་ཚེ་གཏུགས་ཤིང་རྒས་པ་སྟེ། ས་ར་ཧས། ཀྱེ་ཧོ་བཞིན་བཟང་སྙིམ་པ་ཆུས་བཀང་བ། །ཟག་པ་བཞིན་དུ་ཉམས་པ་མ་ཚོར་རོ། །ཞེས་སོ། །གཞོན་ཚེ་སྡུག་བསྔལ་ཡོད་ཀྱང་རྒས་པའི་ཚེ་ན་ཡང་ནི་དེ་བས་ལྷག་པའི་སྡུག་བསྔལ་འདི་ལྟར་ཡོད་དེ། རྒས་པའི་མཚན་ཉིད་མགོ་སྐྱེས་དཀར་ཞིང་ཤ་ཁྲག་བྲི་བས་གཉེར་མ་འདུས། གཞོན་ཚེ་ཡིད་དུ་འོང་བའང་གཞན་གྱིས་མཐོང་མི་མོས་པར་འགྱུར། །མེ་དྲོད་ཉམས་པས་ཁ་སྣ་ལས་ཆུ་འཛག་པ་བྱི་དོར་མི་ནུས། ལུས་ཀྱི་འབྱུང་བ་རྒུད་པས་ཡན་ལག་ཀུན་འདར། སེམས་ཀྱིས་དྲན་ཡང་ལུས་ལ་ཉམས་སྟོབས་མེད་པས་འགུལ་བསྐྱོད་མི་ནུས། བུ་ཚ་ཀུན་གྱིས་ཀྱང་འདི་ཤི་ན་ཅི་མ་རུང་སྙམ་དུ་སེམས། གཞན་གྱིས་ཞལ་ཏ་ཇི་ལྟར་བྱས་ཀྱང་མི་ཉན་ཅིང་རང་གི་དབང་ཡང་ཤོར། གཤིས་ངན་ཁ་ཅིག་མི་རྒན་འདི་ཤི་འཕྱི་ཞེས་ཀྱང་ཟེར་ནས་ངག་གིས་མནར་སྙིང་རྗེ་མེད་པ་ཁ་ཅིག་གིས་བེར་དབྱུག་ཐོགས་ནས་བརྡུང་བར་བྱེད་ལ། དེ་ལྟར་མཐོང་ཞིང་ཐོས་པས་མྱུར་དུ་ཤི་བར་འདོད་ཀྱང་དུས་ལ་མ་བབ་པར་འཆི་བར་མི་བཏུབ་པ་སོགས་སྡུག་བསྔལ་མཐའ་ཡས་སོ། །གཉིས་པ་ན་བའི་སྡུག་བསྔལ་ནི། ན་བ་ན་མས་སོགས།༦ དེར་མ་ཟད་ན་བ་རྣམས་ཀྱང་འདི་ལྟར་སྡུག་བསྔལ་བར་འགྱུར་ཏེ། ལུས་ཀྱི་འབྱུང་བ་ཆེན་པོ་བཞི་པོ་ཆ་ནི་མ་མཉམ་པས་འཁྲུགས་ཏེ། ནད་ཀུན་གྱི་སྣ་འདྲེན་རླུང་དང་མཁྲིས་པ་བད་ཀན་ཏེ་གསུམ་པོ་འདུས་པས་ལུས་རབ་ཏུ་གདུང་སྟེ། བཟའ་བཏུང་ལོངས་སྤྱོད་མཐོང་ཡང་ཡིད་ལ་སྤྱོད་པའི་འདོད་པ་མེད། ལུས་ཀྱི་ཉམ་སྟོབས་ཤོར་བས་མལ་ལས་ལྡང་མི་ནུས། མཛེས་པའི་གཟི་མདངས་ཉམས་པས་སྐྱ་ལ་སྐེམ་པ་ཡི་དྭགས་དང་འདྲ་བ་སོགས་བསམ་ལས་འདས་སོ། །གསུམ་པ་འཆི་བའི་སྡུག་བསྔལ་ལ་དྲུག་སྟེ། གཉེན་བཤེས་ཚོགས་ལ་ཉན་ལྟ་བསམ་པའི་ཡུལ་མེད་པ། བར་དོའི་སྣང་བ་འཆར་བ། དེའི་ཚེ་སྐྱབས་མེད་པ། གཤིན་རྗེའི་ཕོ་ཉས་ཁྲིད་པ། གཤིན་རྗེའི་རྒྱལ་པོས་སྡིག་པ་སྟོབས་ཆེ་བར་བསྟན་པ། གཤིན་རྗེས་དམྱལ་བར་ཁྲིད་པའོ། །དང་པོ་ནི། འཆི་བ་སོགས།༤ འཆི་བ་རྣམས་ཀྱང་འདི་ལྟར་སྡུག་བསྔལ་ཏེ། གཉེན་བཤེས་ཚོགས་ཀྱིས་བསྐོར་ནས་ཆོ་ངེ་འདེབས་པར་བྱེད་ཀྱང་། དབང་པོ་འགགས་ཤིང་གནད་གཅོད་ཀྱིས་དྲན་པ་ཉམས་པས། དེ་ལ་ཉན་པ་དང་ལྟ་བ་དང་བསམ་པའི་ཡུལ་མྱོང་བ་མེད་དེ། གནད་གཅོད་པའི་ཚོར་བའི་སྡུག་བསྔལ་མཚོན་ཆས་གཏུབ་པ་འདྲ་བ་ནི་རང་གཅིག་པུས་མྱོང་བར་འགྱུར་རོ། །གཉིས་པ་ནི། མཛའ་དང་སོགས།༢ དེའི་ཚེ་འཁྲུལ་སྣང་སྣ་ཚོགས་དང་བར་དོའི་སྣང་བ་སྔོན་ལ་འཆར་བ་ལ། སྔར་མཛའ་དང་མི་མཛའི་དོན་དུ་བྱས་པའི་ཆགས་སྡང་གི་ལས་རྣམས་ནི་རྨི་ལམ་གྱི་ཡུལ་བཞིན་དུ་སྣང་བས་གདུང་ངོ་། །གསུམ་པ་ནི། གཤིན་རྗེའི་སོགས།༦ གཤིན་རྗེའི་ཕོ་ཉ་ཤིན་ཏུ་འཇིགས་པས་བསྐོར་ཚེ། སྐྲག་པའི་ཉམས་འགྱུར་བྲེད་ཤ་ཐོན་ནས་ཕྱོགས་ཀུན་ཏུ་བལྟས་ཀྱང་མགོན་སྐྱབས་བྱེད་པ་སུ་ཡང་མ་མཐོང་ཞིང་། དེའི་ཚེ་དགེ་བ་གཅིག་པུ་སྐྱབས་སུ་གྱུར་པ་དེ་ཡང་བདག་གིས་མ་བསྒྲུབས་པ་མཐོང་ནས། ཤིན་ཏུ་འཇིགས་ཤིང་རྣམ་པ་ཀུན་ཏུ་སེམས་ཞུམ་ཞིང་ཡི་མུག་སྟེ། བདག་ཉིད་ཤི་ནས་གར་འགྲོ་གཏོལ་མེད་ཅིང་བར་དོའི་སུན་མ་སྔོན་ལ་འབྱུང་ངོ་། །དེ་ནས་བར་མ་དོར་ཡང་གཡང་དུ་ལྷུང་བ་སྙམ་བྱེད་པ་ལ་སོགས་པ་འཇིགས་སྐྲག་གི་སྡུག་བསྔལ་བསམ་གྱིས་མི་ཁྱབ་བོ། །མདོ་ལས། བར་མ་དོར་ཞེས་པའི་ཚིག་དེ་མེད་ཀྱང་། གཞུང་འདིར་དེ་ལྟར་གསུངས་པ་འཆི་ཁའི་བར་དོ་ལས་བར་དོ་ཕྱི་མ་གཉིས་ཀྱང་འབྱུང་བར་དགོངས་ནས་དེ་ལྟར་བསྟན་པ་ཡིན་ནམ་སྙམ་སྟེ་དཔྱད་པར་བྱ། བཞི་པ་ནི། དེ་ནས་སོགས།༥ དེ་ནས་གཤིན་རྗེའི་ཕོ་ཉ་རྣམས་ཀྱིས་ཞགས་པས་བཅིངས་ཏེ་ཁྲིད་ནས་ནི། གཤིན་རྗེ་ཆོས་ཀྱི་རྒྱལ་པོའི་སྤྱན་སྔར་ཕྱིན་པ་དེའི་ཚེ། ཚེ་འདིར་དགེ་བ་དང་མི་དགེ་བའི་ལས་བྱས་པ་རྣམས་རང་དང་ལྷན་ཅིག་སྐྱེས་པའི་ལྷས་ནི་དགེ་བའི་གྲངས་ཟློས། ལྷན་ཅིག་སྐྱེས་པའི་འདྲེས་ནི་མི་དགེ་བ་བྱས་པའི་གྲངས་བརྗོད་དོ། །ལྷ་འདྲེ་དེ་གཉིས་གཞན་མ་ཡིན་ཏེ། རང་གི་ཡེ་ཤེས་དང་བདག་འཛིན་གཉིས་ཀྱི་སྣང་བ་ཤར་བ་ཡིན་པར་བཤད། འདི་དག་དཔལ་བྱིན་གྱི་མདོ་དང་མདོ་བརྒྱད་བརྒྱ་པར་ཕྱོགས་ཙམ་འབྱུང་། རྒྱས་པར་གཞན་དང་གཞན་ལས་འབྱུང་ལ་འདིར་ཡིག་ཚོགས་ཆེ་བས་ཁུངས་མང་པོ་མ་བྲིས། ལྔ་པ་ནི། གལ་ཏེ་སོགས། གལ་ཏེ་མི་དགེ་བའི་ལས་བྱས་པ་གྲངས་མང་བ་ཡིན་ན་དེ་ཉིད་ཀྱི་དབང་དག་སྟོབས་ཆེ་བས། ལན་ངན་པ་དེ་ངན་སོང་དུ་སྐྱེ་བ་མཐོང་ནས་ཆོས་རྒྱལ་འདི་སྐད་ཟེར་ཏེ། མི་ཁྱོད་སྔོན་དགེ་བའི་ལས་ཀྱིས་མིའི་ལུས་ནི་ཐོབ་པའི་ཚེ། ཐོབ་པ་དོན་མེད་པར་བྱས་ཏེ་སྡིག་པ་སྤང་རྒྱུ་མ་སྤངས། དགེ་བ་བསྒྲུབ་རྒྱུ་མ་བསྒྲུབས་པས་ཀྱེ་མའོ། །འདི་འདྲའི་སྡུག་བསྔལ་མི་བཟད་པར་མྱོང་ངོ་། །རང་གིས་ལས་བྱས་པ་རང་ལ་རྣམ་པར་སྨིན་པ་རྒྱུ་འབྲས་ཆོས་ཉིད་ཡིན་པས་ངས་ནི་འདི་ལ་ཅི་ཡང་མི་ཕན་བྱ་ཐབས་བྲལ་ལོ་ཟེར། དྲུག་པ་ནི། དེ་ནས་དམྱལ་སྲུང་སོགས། དེ་ནས་དམྱལ་སྲུང་ལས་མཁན་ཁྲོ་གཏུམ་ཤིན་ཏུ་འཇིགས་པ་དུ་མ་ཡིས། རྒྱོབ་སོད་དང་རྡོག་རོལ་ལམ་དྲག་ཤུལ་ང་རོ་ཆེས་ཆེར་སྒྲོགས་ཤིང་། རྔམ་ཞིང་སྙིང་མེད་པོ་ཁྱོད་ཆོས་མ་བྱས་པར་ལས་ངན་བྱས་པའི་ལན་འདི་ཡིན་ཞེས། མཚོན་ཆ་སྣ་ཚོགས་ཀྱིས་རྡེག་འཚོག་བྱེད་བཞིན་དུ། ས་གཞི་ཐམས་ཅད་མེ་ཕུང་འབར་བས་ཁེངས་པ་ཡིས་གང་བའི་དམྱལ་བའི་གནས་སུ་ཁྲིད་ནས་སོང་ངོ་། །མདོ་སྡེ་ལས་བརྒྱ་པར། ལུས་ཅན་རྣམས་ཀྱི་བདེ་སྡུག་ནི། ལས་རྣམས་ཡིན་པར་ཐུབ་པས་གསུངས། ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །སྣ་ཚོགས་རྣམ་པར་འཁྱམས་ཤིང་འཇུག །ལས་ཀྱི་དྲྭ་བ་འདི་ཆེའོ། །བཞི་པ་སྐྱེ་བའི་སྡུག་བསྔལ་ལ་གསུམ། དམ་བཅའ་དང་། དངོས་དང་། མཇུག་བསྡུ་བ་དང་བཅས་པའོ། །དང་པོ་ནི། ད་ནི་སྐྱེ་བའི་སྡུག་བསྔལ་བཤད་པར་བྱ། གཉིས་པ་དངོས་བཤད་པ་ལ་དྲུག །དམྱལ་བ་དང་། ཡི་དྭགས་དང་། བྱོལ་སོང་དང་། མི་དང་། ལྷ་མ་ཡིན་དང་། ལྷར་སྐྱེ་བའི་སྡུག་བསྔལ་བཤད་པའོ། །དང་པོ་ལ་དྲུག །དམྱལ་བ་མཐོང་ནས་ལས་ལ་འགྱོད་པ་དང་། ལུས་ཀྱི་ཚད་དང་། སྡུག་བསྔལ་གྱི་བྱེ་བྲག་དང་། སྡུག་བསྔལ་གྱི་ཚད་དང་། ཚེ་ཚད་དང་། ཞར་ལ་སྐྱོན་སྤོང་བསྟན་པའོ། །དང་པོ་ནི། དམྱལ་བར་སྐྱེ་བའི་ལས་ཅན་དག་ཤི་ནས་དམྱལ་བར་སྐྱེས་ཏེ། དམྱལ་བའི་སྲུང་མ་འཇིགས་སུ་རུང་བ་དང་དམྱལ་བའི་མེ་དཔུང་ཆེན་པོ་མི་བཟད་པ་མཐོང་ནས། ཤིན་ཏུ་སྐྲག་ཅིང་དངངས་ལ་ཁ་ནས་ཆོ་ངེ་ཆེར་འདེབས་ཤིང་། རང་ལ་རྔན་བགྲང་བའམ་སྨད་ཅིང་སྔོན་གྱི་སྡིག་པ་བྱས་རྣམས་དྲན་ཏེ། ཤིན་ཏུ་འགྱོད་ཀྱང་དུས་མ་ཡིན་པས་ཕན་པ་ཅི་ཡང་མེད་དེ། འཇུག་པ་ལས། གང་ཚེ་རང་དབང་འཇུག་ཅིང་མཐུན་གནས་པ། །གལ་ཏེ་འདི་བདག་འཛིན་པར་མི་བྱེད་ན། །གཡང་སར་ལྷུང་ནས་གཞན་དབང་འཇུག་འགྱུར་བ། །དེ་ལས་ཕྱི་ནས་གང་གིས་སློང་བར་འགྱུར། །ཞེས་དང་། གཞོན་ཚེ་ཆོས་མི་བསྒྲུབ་པར། རྒས་པ་སྲོག་མཐར་ཐུག་པའི་གནོད་པའི་ཚེར་མས་གནད་ལ་ཕིག་ཚེ་ཆོས་དྲན་པ་དང་། ཤི་ནས་གཤིན་རྗེའི་ཁར་ཚུད་ཚེ་ཆོས་དྲན་པ་དང་། སྡིག་པའི་མྱ་ངན་བྱེད་པ་ནི་དུག་ཅན་གྱི་སྦྲུལ་ཁ་དོག་པར་ཚུད་པའི་སྦལ་བ་ང་རོ་འདོན་པ་དང་མཚུངས། བུ་མོ་བདུན་གྱིས་རྟོགས་བརྗོད་ལས་གསུངས། གཉིས་པ་ནི། དམྱལ་བའི་ལུས་ནི་ཤིན་ཏུ་ཆེ་བ་ལ་དཔག་ཚད་ལྔ་བརྒྱ་ཡོད་པ་སོགས་ལུས་ཆེ་ཆུང་གི་ཚད་དང་། རེག་ཏུ་མི་བཟོད་པའི་གཞོམ་ཤ་ཅན་དང་། དེ་ལ་ཚོར་བ་ཡང་ལང་ཆེ་ཞིང་རབ་ཏུ་དྲག་པོས་གདུང་བའི་ལུས་ཐོབ་ནས་ཡུན་རིང་དུ་འདུག་གོ། །འབུམ་གྱི་རྣམ་དག་ལས། བཅོམ་ལྡན་འདས་ཀྱིས་ཆོས་སྤོང་པའི་ལུས་ཀྱི་ཚད་ནི་སེམས་ཅན་རྣམས་ཀྱིས་ཐོས་ན། ཁ་ནས་ཁྲག་དྲོན་མོ་སྐྱུགས་པའམ་ལྡུམ་བུ་བརྔས་པ་བསྐམ་པར་འགྱུར་བ་ཙམ་གྱི་ཉེས་པ་ཡོད་པས་མ་བསྟན་གསུངས། ལས་ཙམ་གྱི་ཚད་ལ་ལུས་དང་སྡུག་བསྔལ་ཚེ་ཚད་ཀྱང་ཆེ་ཞིང་རིང་བ་སྟེ། ལྷའི་ལུས་སོགས་བཞིན་ནོ། །ལས་ཆུང་ནའང་དེ་བཞིན་དུ་ཆུང་སྟེ། འཛམ་གླིང་གི་ཚེ་ལོ་བརྒྱ་བའི་མི་བཞིན་ནོ། །གསུམ་པ་ནི། ལས་ཀྱི་བྱེ་བྲག་གིས་སེམས་ཅན་ཁ་ཅིག་རང་ལུས་མེ་དཔུང་བཞིན་དུ་འབར་བས་གདུངས། ཁ་ཅིག་ལྕགས་མཁར་ཁང་པ་སྦྲུམ་མའམ་ཉིས་རིམ་དུ་རྡུང་ཞིང་། འགྲོ་ལྡོག་བྱེད་ཅིང་ཕྱོགས་ནི་ཀུན་ནས་བསྲོས་པར་བྱེད་ལ། གཅིག་ལྕགས་ལས་བྱས་པའི་སྣོད་ཆེན་པོའི་ནང་དུ། ལས་མཁན་དག་གིས་བསྡུས་ནས་མགོ་སྤྱིའི་ཚུགས་སུ་བསྟན་ཏེ་ཡུངས་འབྲུ་ཁུ་ཁོལ་དུ་བླུགས་པ་བཞིན་དུ་འཚེད། ཁ་ཅིག་གི་ལུས་ལ་ཐིག་བཏབ་སྟེ་སོག་ལེ་མེ་འབར་བས་སྟོད་སྨད་ནས་གཤག་འབྱར་རེས་མོའི་ཚུལ་དུ་འདྲ་ཞིང་། ཁ་ཅིག་ལྕགས་ཀྱི་གཏུན་ཆེན་པོར་བཅུག་ནས་རིལ་བཞིན་དུ་རྡུང་བ་དང་། དེ་ལ་སོགས་པ་སྡུག་བསྔལ་གྱི་རྣམ་གྲངས་བསམ་གྱིས་མི་ཁྱབ་པ་ཡོད་དོ། །བཞི་པ་སྡུག་བསྔལ་གྱི་ཚད་ནི། བཤེས་སྤྲིང་ལས། འཇིག་རྟེན་འདི་ན་མི་སྟོབས་དང་ལྡན་པས་གཞན་གྱི་ལུས་ལ་མདུང་ཐུང་སུམ་བརྒྱ་ཞིག །དུས་གཅིག་ལ་རབ་ཏུ་ཤུགས་དྲག་པོས་བཏབ་པའི་སྡུག་བསྔལ་གང་ཡིན་པ་དེས་ནི་དམྱལ་བ་ཡང་སོས་ལྟ་བུའི་སྡུག་བསྔལ་ཆུང་ངུ་ཙམ་ལ་ཡང་འོལ་སྤྱི་ཙམ་ཡང་དཔེར་མི་བགྱི་ཞིང་བརྒྱ་སྟོང་གི་ཆར་ཡང་མི་ཕོད་དོ། །ཁ་ཅིག་ཏུ་ཉི་ཚེ་བའི་དམྱལ་བར་བཤད། ལྔ་པ་ཚེ་ཚད་ནི། མི་ཡི་ལོ་སོགས་ནི། མདོ་ལས་བཤད། མི་ལོ་འབུམ་དང་བརྒྱ་བརྒྱད་ཁྲི་ལ་དམྱལ་བ་ཡང་སོས་ཀྱི་ཉིན་ཞག་གཅིག །དེ་སུམ་ཅུ་ཟླ་གཅིག །ཟླ་བ་བཅུ་གཉིས་ལོ་གཅིག །དེ་ལྔ་བརྒྱ་ཡང་སོས་ཀྱི་ཚེ་དང་། དེ་ཐིག་ནག་པའི་ཉིན་ཞག་གཅིག་གོང་ལྟར་བསྒྲིལ་བའི་རང་ལོ་སྟོང་དང་། དེས་བསྒྲེས་ན་ཉིས་སྟོང་། བཞི་སྟོང་། བརྒྱད་སྟོང་རྣམས་ཁྲི་དྲུག་སྟོང་ཚ་བའི་ཚེ་ཚད་དང་། ཁ་ཅིག་ལོ་ནི་དཔག་མེད་ཐུག་ཅེས་པ་རབ་ཏུ་ཚ་བ་ཡིན་ན་དེ་ནི་བར་སྐལ་ཕྱེད་ཐུབ་ལ། མནར་མེད་ཀྱི་ཚེ་ཚད་ནི་བར་སྐལ་གཅིག་ཡིན་ལ། མི་ལོ་ཐེར་འབུམ་ཉི་ཤུ་ཡིན་ནོ། །མཛོད་ལྟར་ན། ཡང་སོས་སོགས་དྲུག་པོ་རིམ་བཞིན། འདོད་ལྷའི་ཚེ་ཇི་ཙམ་པ་དང་ཡང་སོས་སོགས་ཀྱི་ཉིན་ཞག་མཉམ་སྟེ། རྒྱལ་ཆེན་བཞིའི་ཚེ་ཚད་རང་ལོ་ལྔ་བརྒྱ་ལ་ཡང་སོས་ཀྱི་ཞག་གཅིག་ཏུ་བརྩི་བ་སོགས་རང་གི་ཞག་སུམ་ཅུ་ཟླ་བ། དེ་བཅུ་གཉིས་ལོ་གཅིག་ཏུ་བརྩིས་པ་དེས་ན་ཡང་སོས་སོགས་དེ་དག་རྣམས་ཀྱི་ཚེ་ཚད་རང་ལོ་སྟོང་སོགས་གོང་ལྟར་བགྲང་ན་འདོད་ལྷ་དྲུག་དང་འདྲའོ། །མི་དང་འདོད་ལྷའི་ཚེ་ཉིན་ཞག་མཉམ་ཚུལ་ནི། རྒྱལ་ཆེན་བཞི་ནི། མི་ལོ་ལྔ་བཅུ་ཉིན་ཞག་གཅིག་ཏུ་བྱས་པའི་རང་ཞག་སུམ་ཅུ་ཟླ་བ། དེ་བཅུ་གཉིས་ལོ་གཅིག་ཏུ་བརྩིས་པའི་རང་ལོ་ལྔ་བརྒྱར་གནས་སོ། །དེ་བཞིན་དུ་སུམ་ཅུ་རྩ་གསུམ་མི་ལོ་བརྒྱ་རང་ལོ་སྟོང་ཕྲག་གཅིག །འཐབ་བྲལ་མི་ལོ་ཉིས་བརྒྱ་རང་ལོ་ཉིས་སྟོང་ཐུབ། དགའ་ལྡན་མི་ལོ་བཞི་བརྒྱ་ལ་རང་ལོ་བཞི་སྟོང་ཐུབ། འཕྲུལ་དགའ་མི་ལོ་བརྒྱད་བརྒྱ་ལ་རང་ལོ་བརྒྱད་སྟོང་བར་ཐུབ། གཞན་འཕྲུལ་མི་ལོ་སྟོང་དྲུག་བརྒྱ་ཉིན་ཞག་གཅིག་ཏུ་བྱས་པའི་རང་ལོ་ཁྲི་དང་དྲུག་སྟོང་སྙེད་ཚེ་ཐུབ་པའོ། །དེ་ཚ་དམྱལ་གྱི་ཞག་གཅིག་བྱས་པའི་རང་ལོ་ཁྲི་དྲུག་སྟོང་ཐུབ་བོ། །ལས་ཤིན་ཏུ་ངན་པ་ཁ་ཅིག་བསྐལ་པ་ཆེན་པོའི་བར་དུ་གནས་པའང་ཡོད་ལ། ལས་ཀྱིས་ཚེ་བསྲིང་བ་ཡིན་པས་ཚེ་ཟད་ཀྱང་ལས་མ་ཟད་བར་དུ་ཤི་བར་དགའ་ཡང་འཆིར་ནི་མི་བཏུབ་པོ། །ལས་མ་ཟད་པ་ཁ་ཅིག་བསྐལ་པའི་འཇིག་པ་ཆེན་པོ་བྱུང་ཚེ། བསྐལ་པ་འཇིག་པ་ལས་ཟད་པའི་རྒྱུ་མ་ཡིན་པས། འཇིག་རྟེན་གྱི་ཁམས་བརྒྱུད་ནས་རེ་ཞིག་འཇིག་པ་མེད་པའི་དམྱལ་བར་སྐྱེའོ། །གསུམ་པ་སྐྱོན་སྤང་བ་ནི། མནར་མེད་ལས་གཞན་མ་བཤད་ཅིང་དེའི་ཚེ་ཚད་བར་བསྐལ་གཅིག་ལས་མ་བཤད་པས་འདིར་བསྐལ་ཆེན་བཤད་པ་མི་འཐད་སྙམ་ན། འདིར་རྡོ་རྗེའི་དམྱལ་བ་མ་བཤད་ཀྱང་རྡོ་རྗེའི་ཐེག་པར་བཤད་ཅིང་། ཆོས་སྤོང་བ་དང་མཚམས་མེད་པའི་ལས་དང་། རྡོ་རྗེའི་དམ་ཚིག་ཉམས་པའི་རྣམ་སྨིན་གྱི་ལུས་ཆེན་པོ་འདེགས་པར་བཟོད་པའི་འོག་གཞི་རྡོ་རྗེའི་རྒྱ་གྲམ་ཡོད་པར་བཤད། ཨོ་རྒྱན་ཆེན་པོས། ཇི་སྲིད་ནམ་མཁའ་མ་ཞིག་བར་དུ་ནི། མི་འཇིག་པ་ནི་རྡོ་རྗེའི་དམྱལ་བའོ། །ཞེས་གསུངས། རྒྱ་གར་རྡོ་རྗེ་གདན་བསྐལ་བཟང་སངས་རྒྱས་རྣམས་ཀྱི་བྱིན་རླབས་ལས་གྲུབ་པ་དང་། རྡོ་རྗེའི་དམྱལ་བ་སེམས་ཅན་སྤྱི་མཐུན་གྱི་ལས་ངན་ལས་གྲུབ་པས་མི་འཇིག་པ་ཇི་འགལ། ཆོས་སྤངས་པའི་ལས་སོགས་ཀྱི་མནར་མེད་དུ་སྐྱེས་ནས་བསྐལ་པ་ཆེན་པོར་གནས་པ་མདོ་ལས་ཀྱང་མང་དུ་གསུངས་པས་འགལ་བ་མེད། དཀོན་མཆོག་ཏཱ་ལ་ལས། ཆོས་སྤངས་པས་མནར་མེད་དུ་ལྟུང་ནས་བསྐལ་པ་དུ་མར་སྡུག་བསྔལ་ཚད་མེད་པ་མྱོང་བ་སོགས་མང་དུ་ཡོད་པས། ལས་ཚུལ་བསམ་གྱིས་མི་ཁྱབ་པས་དོགས་པར་མི་རིགས་སོ། །རྡོ་རྗེའི་སྙིང་པོའི་མདོར། ལྕགས་ཀྱི་ས་གཞི་འབར་ཞིང་ཚ། །འབར་བའི་མེ་ལྕེས་ཀུན་ནས་ཁྱབ། །ལྕགས་ཀྱི་སོག་ལེ་རྣོན་པོ་ཡིས། །ལུས་གཅིག་ཆ་ཤས་བརྒྱར་གཤག་པ། །ལུས་ངག་ཡིད་ཀྱི་སྡིག་པ་ཅན། །རྣམས་ཀྱི་སེམས་ལས་བྱུང་བ་ཡིན། །ཞེས་དང་། བཤེས་སྤྲིང་ལས། དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླག་དང་གཟུགས་སུ་བགྱིས་པས་ཀྱང་། །འཇིགས་པ་སྐྱེ་བར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་ན་སྨོས་ཅི་དགོས། །ཞེས་དང་། མཛངས་བླུན་ལས། སྡིག་པ་ཆུང་ངུ་ཙམ་ལ་ཡང་། །མི་གནོད་སྙམ་དུ་བརྙས་མི་བྱ། །མེ་སྟག་ཆུང་ངུ་ཙམ་གྱིས་ཀྱང་། །རྩྭ་ཕུང་རི་ཙམ་བསྲེག་པར་འགྱུར། །ཞེས་དང་། བླུན་པོས་སྡིག་པ་ཁྱད་དུ་བསད་ན་ཆུང་ངུར་ཟིན་ཀྱང་དམྱལ་བར་འཕེན་ཏེ། དྲན་ཉེར། མེ་སྟག་ཤིན་ཏུ་ཕྲ་བས་ཀྱང་། །ཇི་ལྟར་རུང་བ་བསྲེག་པ་བཞིན། །དེ་བཞིན་སྡིག་པ་ཆུང་ངུས་ཀྱང་། །བློ་མེད་དེ་དག་དམྱལ་བར་འགྲོ། །ཞེས་གསུངས་པས། དམྱལ་བའི་རྒྱུ་སྤངས་པ་དང་། དེར་སྐྱེས་པ་རྣམས་ལ་སྙིང་རྗེ་ཤས་མི་བཟོད་པ་བསྐྱེད་པར་བྱའོ། །གཉིས་པ་ཡི་དྭགས་ནི། ཡི་དྭགས་སོགས།༦ ཡི་དྭགས་སུ་སྐྱེས་ཀྱང་དམྱལ་བའི་སྡུག་བསྔལ་ཙམ་མེད་ཀྱང་སེར་སྣའི་ལས་ཀྱི་མེས་གདུང་བས། རྟག་ཏུ་བཀྲེས་པ་དང་སྐོམ་པས་གདུང་བ་ལས་ལོ་དུ་མར་བཟའ་བཏུང་མི་རྙེད་པ་དང་། དེའི་ལུས་ཀྱི་རང་བཞིན་ནི་མགོ་བོ་རི་རབ་ཙམ་ལ་ཁ་ནི་ཁབ་མིག་ཙམ་ལས་མེད་ལ། སྐེ་མགྲིན་རབ་ཏུ་ཕྲ་བ་སོག་སྦུབས་ལྟ་བུ། གསུས་པ་ཡུལ་ལྗོངས་ཙམ་ལ་རྐང་ལག་འཇག་སྐྱ་ལྟ་བུ་ཤིན་ཏུ་མི་འཚམས་པས། གན་རྐྱལ་དུ་ཉལ་ནས་རྒྱབ་ཀྱིས་འགྲོ་བ་ཡོད་པར་བཤད། བརྒྱ་ལ་བཟའ་བཏུང་མཐོང་ཡང་གཞན་གྱིས་བསྲུང་བས་དབང་མེད་པ་དང་། ཕྱི་སྒྲིབ་ཅན་ཁ་ཅིག་རྒྱང་ནས་བཟའ་བཏུང་སོགས་མཐོང་ཡང་དྲུང་དུ་ཉེ་བ་ན། རྣག་ཁྲག་ངན་སྐྱུགས་ལ་སོགས་པ་གཞན་ཕྱིན་ཅི་ལོག་ཏུ་མཐོང་བ་དང་། ནང་སྒྲིབ་ཅན་ཁ་ཅིག་གིས་ཟོས་ཀྱང་ནང་ནས་མེ་འབར་བས་ཁྲོ་ཆུ་ཁོལ་མར་གྱུར་ནས་ནང་ཁྲོལ་ཚིག་པས་སྡུག་བསྔལ་བའོ། །འདིའི་སྡུག་བསྔལ་གྱི་ཁྱད་པར་རྒྱས་པ་དང་ཚེ་ཚད་ནི་གཞན་དུ་ཤེས་པར་བྱ། དམྱལ་བ་དང་དུད་འགྲོ་ལས་འདི་ཤེས་པ་གསལ་བས་ཐར་སླ་བར་བཤད་དོ། །གསུམ་པ་བྱོལ་སོང་ནི། བྱོལ་སོང་སོགས།༣ བྱོལ་སོང་དུ་སྐྱེས་པ་ལ་འོག་མ་གཉིས་ཀྱི་སྡུག་བསྔལ་ཙམ་མེད་ཀྱང་། ཆེ་ཆུང་ཀུན་གྱིས་གཅིག་ལ་གཅིག་གིས་ཟ་བ་དང་། སྒོ་ཕྱུགས་རྣམས་རང་དབང་མེད་པར་བདག་པོ་བཀོལ་ཞིང་སྤྱོད་པས་བརྡེག་འཚོག་བྱེད་ཅིང་མཐར་གསོད་པ་དང་། རི་དྭགས་རྣམས་ནི་རྔོན་པ་གཞན་གྱིས་བཤོལ་ཞིང་གསོད་པ་དང་། གཙོ་ཆེར་གཏི་མུག་རྨོངས་པས་བླང་དོར་གང་ཡང་མི་ཤེས་པས་ཤིན་ཏུ་སྡུག་བསྔལ་བའོ། །བཞི་པ་མིའི་སྡུག་བསྔལ་བཤད་པ་ལ་བཞི་མངལ་དུ་གནས་པ་དང་། བཙས་པའི་དུས་དང་། དར་ལ་བབ་པ་དང་། བདེ་བའི་གཞི་སྡུག་བསྔལ་གྱི་གཞིར་འགྱུར་བའོ། །དང་པོ་ནི། མིར་སྐྱེས་ཀྱང་སོགས།༧ མཐོ་རིས་མི་རུ་སྐྱེས་ན་ཡང་སྡུག་བསྔལ་ཡོད་དེ་དང་པོ་མངལ་ན་གནས་པའི་ཚེ། མ་ནི་ལྟོ་འགྲང་བའི་ཚེ་བྲག་བར་དུ་བཙིར་བ་དང་འདྲ་ཞིང་། བཀྲེས་པའི་ཚེ་ན་གཡང་ལ་བཏང་བ་ལྟ་བུའི་སྡུག་བསྔལ་བར་སྙམ་སྟེ་མྱོང་བ་དང་། མའི་སྤྱོད་ལ མ་དྲག་ཤུལ་བྱེད་ཚེ་གཏུན་དུ་བརྡུང་བ་སྙམ་པའོ། །གཉིས་པ་ནི། བཙས་ནས་ཕྲུ་མ་ཕྱི་བ་སོགས་ཀྱི་ཚེ་པགས་པ་བཤུས་ནས་ནི། རྩིག་པའི་ངོས་ལ་དྲུད་པ་བས་ཀྱང་སྡུག་བསྔལ་བ་དང་། གོས་ཀྱིས་བཏུམ་ནས་བསྙལ་བའི་ཚེ་འཚུབ་བམ་ཚ་འབྲུམ་ཞེས་ཀྱང་ཡོད་པ། གོས་ཀྱིས་བསྡམས་པས་ཚ་གྲང་བཀྲེས་སྐོམ་དང་བཤང་གཅིར་ནུབ་པ་དང་། རྐང་ལག་ན་བ་སོགས་ཅི་བྱུང་ཡང་དུ་བ་ལས་མེད་ནས་སྡུག་བསྔལ་བའོ། །གསུམ་པ་ནི། ན་ཚོད་ཆེ་རུ་སྐྱེས་ནས་ཀྱང་ཁ་རྒྱབ་དོན་དུ་སོ་ནམ་སོགས་ལ་འབད་རྩོལ་དང་། རྒུད་པས་བྲེལ་ཕོངས་སུ་འགྱུར་བ་དང་། གཉེན་ཉེ་དུ་དང་བྲལ་ཞིང་ལན་རེར་དགྲས་བཅོམ་ཞིང་བུ་ལོན་ཆགས་པ་དང་། དེར་མ་ཟད་བཀྲེས་སྐོམ་དང་ཚ་གྲང་གིས་གདུང་བཞིན་འགྲོན་ལ་འགྲོ་བ་སོགས་ཀྱིས་སྡུག་བསྔལ་བ་དང་། ཕོངས་པ་རྣམས་ནི་བཙལ་ཐབས་མེད་པས་སྡུག་ཅིང་ཡོད་པ་རྣམས་ནི་འཚོ་སྐྱོང་དང་མེལ་ཚེ་བྱེད་པས་སྡུག་བསྔལ་ལོ། །གཞན་ཡང་ཞིང་རྨོ་ཚོང་བྱེད་པ་སོགས་སྒོ་གསུམ་རྩོལ་བའི་འདུ་བྱེད་པའི་ལས་ཀྱིས་སྡུག་བསྔལ་བ་དང་། དེ་ལ་སོགས་པའི་སྡུག་བསྔལ་བསམ་གྱིས་མི་ཁྱབ་པ་ཡོད་དོ། །བཞི་པ་ནི། མིའི་སྡུག་བསྔལ་གྱི་གཞི་ནི་ཕལ་ཆེར་ལྟོ་རྒྱབ་གཉིས་ཡིན་ལ། དེའི་དོན་དུ་ངལ་བས་བསྒྲུབས་པའི་འཇིག་རྟེན་འདིའི་བདེ་བའི་རྒྱུར་རློམ་པའི་ལོངས་སྤྱོད་རྣམས་ཀྱང་། ཕལ་ཆེར་ཆགས་པ་སོགས་ཀྱི་དབང་གིས་ཕྱི་མའི་དུས་སུ་ངན་སོང་གསུམ་གྱི་སྡུག་བསྔལ་ཉོ་བའི་རྒྱུ་རུ་འགྲོའོ། །དྲན་ཉེར། ཇི་ལྟར་མཆིལ་པས་ཟིན་པ་ཡི། །ཉ་ནི་འཆི་བའི་དབང་དུ་འགྲོ། །དེ་ལྟར་སྲེད་པས་ཟིན་པ་ཡི། །མི་རྣམས་ཡི་དྭགས་དབང་དུ་འགྲོ། །ཞེས་དང་། ནོར་སོགས་ལ་ཆགས་པའི་དབང་གིས་མཚམས་མེད་ཀྱི་ལས་བསགས་པའང་ཡོད་དེ། དེ་ལས། མནར་མེད་པར་ནི་སྐྱེས་པ་དག །ནོར་ལ་འདོད་པས་བསྲེག་པ་ཡིན། །འདོད་པ་མེད་པར་མ་བྱས་ན། །མྱ་ངན་འདས་པ་ཐག་རིང་ངོ་། །ཞེས་སོ། །འཇིག་རྟེན་གྱི་བདེ་བའི་སྣང་བ་ནི་སྡུག་བསྔལ་ཕྱིར་བཅོས་པ་ཙམ་སྟེ། བཞི་བརྒྱ་པར། གསེར་གྱི་སྣོད་དུ་སྐྱུགས་པ་ན། །ཇི་ལྟར་འགའ་ཞིག་དགར་འགྱུར་བ། །དེ་ཕྱིར་སྡུག་བསྔལ་ཕྱིར་བཅོས་དེ། །བདེའོ་སྙམ་དུ་སེམས་པར་བྱེད། །ཅེས་སོ། །འཇིག་རྟེན་གྱི་ལོངས་སྤྱོད་འབྱོར་བའི་བདེ་བ་ལྟར་སྣང་བ་ལ་རྒུད་པའི་སྡུག་བསྔལ་གྱིས་ཁྱབ་ཅིང་འགྲོགས་ནས་ཡོད་པའི་དཔེ། བཀྲ་ཤིས་མ་དང་རྣ་ནག་མའམ་བཀྲ་ཤིས་པ་ཇི་ལྟ་བ་བཞིན་ནོ། །ཞེས་ཏེ། སྔོན་དུད་ཅིག་གི་སྒོར་རྩར་བུད་མེད་མཛེས་མ་ཞིག་བྱུང་བ་ཁྱིམ་བདག་གིས་སུ་ཡིན་དྲིས། མོ་ནི་ལྷ་མོ་བཀྲ་ཤིས་མ་སྟེ་སུའི་ཁྱིམ་དུ་འདུག་ཀྱང་རིན་པོ་ཆེ་སྣ་བདུན་སོགས་ཀྱི་འབྱོར་པ་ཕུན་སུམ་ཚོགས་སོ། །དེ་དགའ་ནས་ནང་དུ་བོས་ཏེ་མཆོད་ཅིང་བཀུར་རོ། །ཡང་སྒོ་ན་བུད་མེད་མི་སྡུག་པ་ཞིག་བྱུང་བ་ལ་སྔར་བཞིན་དྲིས། བདག་ནི་རྣ་ནག་མའོ་ཟེར། ཅིའི་ཕྱིར་དེ་སྐད་བཏགས་བདག་སུའི་ཁྱིམ་དུ་འདུག་ཀྱང་ནོར་སོགས་ཀུན་རྒུད་ཅིང་བརླག་པར་འགྱུར་བས་བཀྲ་མི་ཤིས་པའི་ཕྱིར་རོ་ཟེར། །འོ་ན་སོང་སྨྲས། བདག་གི་ནུ་མོ་ཁྱིམ་འདིར་ཡོད་ན་བདག་ཀྱང་དེར་འདུག་གོ་ཞེའོ། །དེ་སྐྲག་ནས་ཁྱིམ་གྱི་ལྷ་མོ་ལ་དྲིས་པས་དེ་ཡིན་ཏེ། བདག་འདུག་ན་དེའང་རྟག་ཏུ་ཕྱི་བཞིན་འབྲང་བས་ལྷན་ཅིག་འདུག་དགོས། གལ་ཏེ་སྐྲོད་ན་བདག་ཀྱང་སྐྲོད་ཅིག་ཅེས་པས་ཁྱིམ་བདག་གི་འབྱོར་རྒུད་ཀྱི་ཉེས་པ་ལ་སྐྲག་ནས་གཉིས་ཀ་བསྐྲོད་དོ། །ཡང་དེ་གཉིས་སྤྲང་པོ་གླེན་པ་ཞིག་གི་སྒོར་སོང་ནས་གོང་ལྟར་སྨྲས་ཀྱང་། དེ་འདོད་པས་བསླུས་ནས་གཉིས་ཀ་ཁྱིམ་དུ་བཞག་པས་འབྱོར་རྒུད་ཀྱི་སྡུག་བསྔལ་མྱོང་ངོ་། །དེ་བཞིན་དུ་མཁས་པས་ལྷ་མིའི་དཔལ་ཡང་མི་འདོད་དེ། དང་པོ་བཀྲ་ཤིས་པའི་བདེ་བ་ཙམ་ཡོད་ཀྱང་དེ་དང་མི་འབྲལ་བར་བཀྲ་མི་ཤིས་པ། ན་རྒ་འཆི་བ་སོགས་ཡོད་པས་ཐམས་ཅད་སྤངས་ཏེ་མཐའ་གཅིག་ཏུ་བཀྲ་ཤིས་པ་མྱ་ངན་ལས་འདས་པར་འདོད་ལ། རྨོངས་པ་རྣམས་ནི་དེ་ལས་བཟློག་པའོ། །ལྔ་པ་ལྷ་མ་ཡིན་ནི། ལྷ་མིན་སོགས།༢ འདི་སྔོན་དང་པོ་རི་རབ་ཀྱི་སྟེང་ན་ལྷའི་རྒྱལ་པོ་གཏོར་མ་ཡིན་པ་ལ། ཁྱབ་འཇུག་གི་གཡོ་རྒྱུས་བསླུས་ནས་རི་རབ་ཀྱི་ཁོང་དུ་ལྟུང་། གནས་ལུས་ལོངས་སྤྱོད་སོགས་དམན་པ་ལ་དགག་སྒྲ་སྦྱར་ནས་ལྷ་མིན་ཏེ། དེར་སྐྱེས་ཀྱང་ལྷའི་དཔལ་ལ་སྡང་ཞིང་ང་རྒྱལ་དང་ཕྲག་དོག་ཁོ་ནས་ཡིད་འཁྲུགས་པ་དང་། ཁྲོ་གཏུམ་དང་གདུབ་རྩུབ་ཆེ་བ་སྲིན་པོ་དང་འདྲ་བས་རྟག་ཏུ་ལྷ་དང་འཐབ་རྩོད་ཀྱི་དབང་གིས་བག་མི་ཕེབ་པ་དང་། གསོད་པ་དང་རྨས་པ་ལ་སོགས་པའི་སྡུག་བསྔལ་ལོ། །ཤེས་རབ་ཅན་ཡིན་ཡང་རྣམ་སྨིན་གྱི་སྒྲིབ་པ་ཆེ་བས་འདིའི་རྟེན་ལ་བདེན་པ་མཐོང་བའང་མེད་པར་བཤད་དོ། །དྲུག་པ་ལྷའི་སྡུག་བསྔལ་ནི། ལྷ་རུ་སོགས།༢ རེ་ཞིག་མཐོ་ཞིང་སྐྱིད་པའི་ལྷ་རུ་སྐྱེས་ཀྱང་འདོད་ལྷ་དྲུག་ན་འདོད་པས་མྱོས་ཤིང་ལེ་ལོས་གཡེང་བས་དུས་འདའ་ཞིང་། འཆི་འཕོ་བའི་ཚེ་གང་དུ་སྐྱེ་བ་མཐོང་བ་ལྟུང་བའི་སྡུག་བསྔལ་དེ་ཉིད་ལྷའི་ཞག་བདུན་དུ་མྱོང་བ་དང་། འཐབ་རྩོད་དང་ཡིད་ཀྱི་སྡུག་བསྔལ་མང་ཞིང་འཆི་བར་ཉེ་བ་ན་མི་རྣམས་ལ་འཆི་ལྟས་འབྱུང་བ་བཞིན། ལུས་ཀྱི་བཀྲག་ཉམས་པ་དང་། སྟན་ལ་སྡོད་མི་ཚུགས་པ་དང་། མེ་ཏོག་གི་ཕྲེང་བ་རྙིང་པ་དང་། གོས་ལ་དྲི་མ་ཆགས་པ་དང་། ལུས་ལ་རྡུལ་འབྱུང་བ་སྟེ་འཆི་འཕོའི་སྔ་ལྟས་ལྔ་ཤར་བས་སྡུག་བསྔལ། དེ་ཡང་སྔར་བསྐལ་བར་གནས་པའི་བདེ་སྐྱིད་དྲན་ཀྱང་སྡོད་དབང་མེད་པ་འཕོ་བའི་སྡུག་བསྔལ། ཕྱི་མའི་སྐྱེ་གནས་མཐོང་ནས་འཇིགས་པ་ལྟུང་བའི་སྡུག་བསྔལ་ཏེ། མནར་མེད་ཀྱི་སྡུག་བསྔལ་དང་འདྲ་བ་མདོ་དྲན་པ་ཉེར་བཞག་ལས་གསུངས། སྔོན་སུམ་ཅུ་རྩ་གསུམ་གྱི་ལྷའི་བུ་ཞིག་ཚེ་འཕོས་ཏེ་དུད་འགྲོ་ཕག་ཏུ་སྐྱེ་བ་མཐོང་ནས། བཅོམ་ལྡན་འདས་ལ་ཞུས་པས། སྲོག་གཅོད་པ་སྤོང་བ་བསྟན་པས་ལྷ་གོང་མར་སྐྱེས་པ་ལྟ་བུའོ། །ཧ་གོང་མ་གཉིས་ན་འཕོ་ལྟུང་གི་སྡུག་བསྔལ་མངོན་གྱུར་མེད་ཀྱང་། ལས་ཟད་པ་དང་ལག་པ་བརྐྱང་བསྐུམ་ཙམ་གྱིས་གཉིད་སད་པ་བཞིན། འོག་མར་ལྟུང་ནས་ཉིང་མཚམས་སྦྱོར་བའི་སྡུག་བསྔལ་ཡོད། མི་རྟག་པ་ལ་སྡུག་བསྔལ་གྱིས་ཁྱབ་པས་གཙོ་ཆེར་ཁྱབ་པ་འདུ་བྱེད་ཀྱི་དབང་གིས་སྡུག་བསྔལ་ལོ། །གསུམ་པ་མཇུག་བསྡུས་ཏེ་ཁུང་བསྟན་པ་ནི། དེ་ལྟར་སོགས།༣ དེ་ལྟར་ཁམས་གསུམ་འཁོར་བར་སྐྱེས་པའི་ཉེས་པ་རྣམས་ནི་མི་རྟག་པ་མདོར་བསྟན་སྡུག་བསྔལ་རྒྱས་པར་བཤད་པ་དེ་གཉིས་ཡིན་ལ། ཞིབ་ཏུ་ནི་མདོ་སྡེ་དྲན་པ་ཉེར་བཞག་ལ་སོགས་པའི་ནང་དུ་བལྟ་བར་བྱའོ། །དྲན་ཉེར། སྲོག་ཆགས་སེམས་ནི་རྨོངས་པ་དག །འཁོར་བ་ལས་ནི་ཡིད་མི་འབྱུང་། །ཞེས་དང་། ཨཱརྱ་དེ་བས། སྡུག་བསྔལ་རྒྱ་མཚོ་འདི་ལ་མཐའ། །རྣམ་པ་ཀུན་ཏུ་ཡོད་མིན་ན། །བྱིས་ཁྱོད་འདིར་ནི་བྱིང་བ་ལ། །འཇིགས་པ་ཞེས་ན་སྐྱེ་མི་འགྱུར། །ཞེས་གསུངས་པས་འཇིག་ནས་ཡིད་འབྱུང་དགོས་སོ། །མི་རྟག་པ་དང་སྡུག་བསྔལ་ཤེས་པ་འདི་ཐེག་དམན་དང་ཐུན་མོང་ཡིན་ཡང་། ཁྱད་པར་ཐེག་ཆེན་ལམ་གྱི་སྔོན་འགྲོ་བྱས་ན། ཚེ་མི་རྟག་པར་ཤེས་ན་ཚེ་འདི་ལ་བློ་ལྡོག་ཅིང་སྒྲུབ་པ་ལ་ལོང་ཡོད་དུ་མི་གཏོང་། འཁོར་བ་སྡུག་བསྔལ་དུ་ཤེས་ན་རང་དོན་དུ་འཁོར་བ་ལ་མི་སྨོན། འཁོར་བའི་སེམས་ཅན་ལ་སྙིང་རྗེ་ཕྱོགས་མེད་དུ་ཤར་ནས་གཞན་དོན་ཁུར་དུ་ལེན། བྱང་ཆུབ་མཆོག་ཏུ་སེམས་བསྐྱེད་པས་ཐེག་དམན་དུ་མི་ལྟུང་བའི་དགོས་པ་ཡོད་དེ། ཐབས་སྙིང་རྗེ་ཆེན་པོ་དང་ཤེས་རབ་མཐའ་གཉིས་ལ་མི་གནས་པ་ནི་ཐེག་ཆེན་གྱི་ཁྱད་ཆོས་ཡིན་པའི་ཕྱིར། སྡུད་པ་ལས། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྷུང་། །ཞེས་དང་། འཕགས་པ་ཀླུས། རང་གི་དོན་ལ་མི་ལྟ་ཞིང་། གཞན་དོན་རོ་གཅིག་དགའ་བ་གང་། །ཡོན་ཏན་འབྱུང་གནས་ཐེག་ཆེན་ཏེ། །ཞེས་སོ། །སྔར་རྩ་བའི་ས་བཅད་གཉིས་པ་ནི། འབྲས་བུ་སྡུག་བསྔལ་དེ་དག་འབྱུང་བར་བྱེད་པའི་རྒྱུ་ཀུན་འབྱུང་གི་བདེན་པ་བཤད་པ་ལ་གཉིས། ཀུན་འབྱུང་ངོས་བཟུང་བ་དང་། དེ་ངོས་འཛིན་པའི་གདམས་པའོ། །དང་པོ་ལ་བཞི། མི་རྟག་པ་དང་སྡུག་བསྔལ་གྱིས་ལུས་གདུང་ཡང་རྩ་བ་སེམས་ཡིན་པ་དང་། སེམས་ཉིད་ངོ་མ་ཤེས་པས་འཁྲུལ་ནས་གཟུང་འཛིན་སོ་སོར་སྣང་བ་དང་། ལུས་ལོངས་སྤྱོད་ལ་ཆགས་པས་ཉོན་མོངས་སྐྱེ་བ་དང་། དུག་ལྔ་དགེ་སྡིག་གི་ལས་ཀྱི་འབྲས་བུ་སྡུག་བསྔལ་འབྱུར་བར་བསྟན་པའོ། །དང་པོ་ནི། མི་རྟག་སོགས།༤ ཇི་སྐད་བཤད་པའི་མི་རྟག་སྡུག་བསྔལ་མི་བཟད་པ་ཡུན་རིང་པོ་འདིས་བྱིས་པ་རྣམས། ཐོག་མ་མེད་པ་ནས་ད་ལྟའི་བར་དུ་རྒྱུན་མི་ཆད་པར་གདུང་ལ། ད་དུང་བདེན་བཞི་མངོན་སུམ་མཐོང་བའི་འཕགས་ལམ་མ་ཐོབ་བར་དུ་རྟག་ཏུ་གདུང་བས། ལམ་ལ་འབད་དེ་ཀུན་འབྱུང་སྤང་བར་བྱའོ། །རྒྱུད་བླར། འཕགས་པས་འཆི་དང་ན་བ་དང་། །རྒ་བའི་སྡུག་བསྔལ་རྩད་ནས་སྤངས། །ཞེས་དང་། བདེན་པ་མཐོང་ལ་འཕེན་པ་མེད། །སྲེད་པ་སྤངས་ལ་ཡང་སྲིད་མེད། །ཅེས་སོ། །ཀུན་འབྱུང་གི་བདེན་པ་ཞེས་བྱ་བ་དེ་ལ་རྣམ་པ་ཐུན་མོང་དུ་དབྱེ་བ་བཞི་ཡོད་དེ། སྡུག་བསྔལ་ཐམས་ཅད་ཀྱི་གཞིའམ་སྐྱེད་བྱེད་ཀྱི་རྩ་བར་གྱུར་པས་ན་རྒྱུ་དང་། སྡུག་བསྔལ་ཐམས་ཅད་འབྱུང་བས་ན་ཀུན་འབྱུང་བ་དང་། སྡུག་བསྔལ་དྲག་པོ་འཕྲལ་དུ་སྐྱེ་བས་ན་རབ་ཏུ་སྐྱེ་བ་དང་། སྡུག་བསྔལ་གྱི་མཚམས་སྦྱོར་བ་ལ་དེ་མ་ཐག་རྐྱེན་གྱི་ངོ་བོ་ཉིད་དེ་བཞིའོ། །དཔེར་ན་ནད་ངོ་ཤེས་པ་དེའི་རྒྱུ་སྤངས་པའི་ཕྱིར་སྨན་བསྟེན་པ་བཞིན། །སྡུག་བསྔལ་ཤེས་ན་དེ་ལ་སྐྲག་ནས་ཀུན་འབྱུང་སྤོང་བའི་ལམ་བསྟེན་པར་འདོད་པས་འབྲས་བུ་སྔོན་དང་རྒྱུ་ཕྱིས་བསྟན་པ་རྒྱུ་འབྲས་ཀྱི་འགྲོ་ལྡོག་གོ། །དེ་ལྟར་རྟག་ཏུ་གདུང་བར་སྣང་བ་དེ་ཉིད་ཀྱི་གཞི་དང་རྩ་བ་རང་གི་སེམས་མ་རིག་པའི་རང་བཞིན་ཅན་འདི་ལས་གཞན་མ་ཡིན་ནོ། །རྣམ་འབྱེད་ཀྱི་མདོ་དང་རྡོ་རྗེའི་སྙིང་པོའི་མདོ་སོགས་ལས་མང་དུ་གསུངས། གཉིས་པ་ནི། ཡུལ་ནི་སོགས།༥ གཉིས་སུ་སྣང་བའི་གཟུགས་སོགས་ཡུལ་འདི་རྣམས་ནི་ནང་གི་སེམས་གཉིས་སུ་སྣང་བ་ཡིན་ཏེ། ཟླ་བ་གཉིས་སྣང་བཞིན་ནོ། །སེམས་ཉིད་ཀྱི་རང་བཞིན་ནི་ཡེ་ནས་གཟུང་འཛིན་གྱིས་རྣམ་པར་དག་པ་ཆོས་ཀྱི་སྐུ་སྟེ་སྟོང་པ་ཉིད་ཡིན་ཏེ། ཡུམ་ལས། སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་ནི་འོད་གསལ་བའོ། །ཞེས་གསུངས་པ་ལྟར་ཡིན་པ་ལ། གློ་བུར་གྱི་རྣམ་པར་རྟོག་པ་མ་རིག་པ་བདག་ཏུ་འཛིན་པས་བསླད་པ་ཡིན་ལ། དེའི་ཕྱིར་ཡུལ་སྣང་འདི་སེམས་ཉིད་ཡིན་པར་ངོ་མ་ཤེས་པས་འཁྲུལ་ནས། ཕྱི་དང་ནང་གི་དངོས་པོ་ཞེས་བརྟགས་ནས་གཟུང་འཛིན་གྱི་མཚན་མ་སོ་སོར་བཟུང་བ་ཡིན་ནོ། །སྟོང་པ་ཉིད་ལ་ཆོས་སྐུར་བརྗོད་པ་ནི། རྒྱུད་བླ་མ་ལས། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །ཞེས་སོ། །འདིར་ཐེག་ཆེན་རྣལ་འབྱོར་སྤྱོད་པ་ནི། ལང་གཤེགས་སོགས་ལས། ཕྱི་རོལ་སྣང་བ་ཡོད་མིན་ལ། །སེམས་ནི་སྣ་ཚོགས་རྣམས་སུ་སྣང་། །ཞེས་དང་། བག་ཆགས་ཀྱིས་ནི་དཀྲུག་པའི་སེམས། །དོན་དུ་སྣང་བ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། །ཞེས་དང་། ཀྱེ་རྒྱལ་བའི་སྲས་སྲིད་པ་གསུམ་ནི་སེམས་ཙམ་མོ། །ཞེས་གསུངས་པའི་གྲུབ་མཐའ་འཛིན་པ་དག་གིས། ཕྱི་སྣང་ཀུན་བརྟག་ཅེས་བཀག་སྟེ་ནང་གཞན་དབང་ཤེས་པ་བདེན་པར་འཛིན་ལ། འདིར་ཆོས་སྐུ་ཞེས་སེམས་ཀྱང་ངོ་བོ་སྟོང་པར་བསྟན་པས་ཁྱད་པར་ཕྱེས་ཤིང་། སྟོང་ཉིད་ཡེ་ཤེས་ཀྱི་གདངས་ཅན་འོད་དུ་འབྱུང་། དབུ་མས་ཀྱང་ཐ་སྙད་དུ་ཡུལ་སེམས་ཐ་དད་དུ་འདོད་ཅིང་ཡོད་མེད་མཉམ། སེམས་ལ་མ་ལྟོས་པའམ་མ་བྱུང་བའི་ཡུལ་མི་འདོད་དེ་རྟེན་འབྲེལ་ཡིན་པའི་ཕྱིར། འཕགས་པ་ཀླུས། འཇིག་རྟེན་མ་རིག་རྐྱེན་ཅན་དུ། །གང་ཕྱིར་སངས་རྒྱས་རྣམས་གསུངས་པས། །དེ་ཡི་ཕྱིར་ན་འཇིག་རྟེན་འདི། །རྣམ་རྟོག་ཡིན་ཞེས་ཅིའི་མི་འཐད། །ཅེས་དང་། ཟླ་གྲགས་ཀྱིས། ཨུཏྤལ་རྩྭ་ཐ་མ་ལས། ལོ་མ་ལ་སོགས་རྒྱུན་འབྱུང་ལྟར། །དེ་བཞིན་སེམས་རྫས་མེད་པ་ཡང་། །ཆོས་རྣམས་ཀུན་གྱི་རྩ་བ་ཡིན། །ཞེས་གསུངས། ཁ་ཅིག་གིས་ཡུལ་འདི་དག་རྣམ་པར་རྟོག་པས་མེད་པ་ལ་ཡོད་པར་བཏགས་པ་ཡིན་ཏེ། ཉེ་བ་འཁོར་གྱིས་ཞུས་པ་ལས། སྣ་ཚོགས་མཛེས་དགའ་མེ་ཏོག་ཁ་ཕྱེ་ཞིང་། །གསེར་གྱི་ཁང་བཟང་འབར་བ་ཡིད་འོང་པ། །འདི་ན་དེ་དག་བྱེད་པོ་འགའ་ཡང་མེད། །དེ་དག་རྟོག་པའི་དབང་གིས་བཞག་པ་སྟེ། །རྟོག་པའི་དབང་གིས་འཇིག་རྟེན་འདི་དག་བརྟག །ཅེས་གསུངས་ཤེ་ན། དེའང་རྣམ་རྟོག་ལས་གཞན་དུ་ཡུལ་མེད་པ་དོན་གྱིིས་གྲུབ་བོ། །ཡུལ་རྣམས་སེམས་ལས་སྣང་ངོ་སྙམ་ནའང་སྣང་གཞི་སེམས་མེད་ན་མི་འབྱུང་བས་དོན་འདྲའོ། །དམྱལ་བ་ལྕགས་བསྲེག་གི་ས་གཞི་སོགས་ལས་ཀྱིས་བྱས་པ་ཡིན་སེམས་མིན་སྙམ་ནའང་། ལས་ནི་སེམས་ཀྱིས་བྱས་པ་ཡིན་ནོ། །ཡུལ་གྱི་རྣམ་པར་སྣང་བ་སེམས་ཡིན་གྱི། སྣང་ཡུལ་གཟུགས་སོགས་སེམས་མིན་སྙམ་ན། འོ་ན་དོན་སྨྲ་ལྟར་རམ། དེ་ཡང་མ་ཡིན་ཏེ་ཐོག་མེད་ཀྱི་བག་ཆགས་གོམས་པས་མེད་པ་གསལ་སྣང་གློ་བུར་བ་སྟེ། ཕྱི་ནང་གང་དུའང་མ་གྲུབ་པ་སྐྲ་ཤད་བཞིན་ནོ་སྙམ་ནའང་། སེམས་མེད་ན་བག་ཆགས་མི་འབྱུང་ངོ་། །སྤྲོས་པའི་ཆོག་གོ། །གསུམ་པ་ནི། ལུས་དང་སོགས།༧ དང་པོ་བདག་གོ་སྙམ་དུ་བདག་འཛིན་གྱི་དབང་གིས་ལུས་དང་ལོངས་སྤྱོད་སོགས་ཕྱི་ནང་གི་དངོས་པོ་ཀུན་ལ་བདག་གིར་བྱེད་འདོད་ཅིང་། དེ་ལས་ཆགས་པའི་མེ་རབ་ཏུ་འཕེལ་བ་ནི་ལས་ལམ་ཀུན་གྱི་གཙོ་བོ་ཡིན་ལ། ལུས་ངག་གཉིས་ནི་འདོད་པའི་སེམས་ཀྱི་ཁོལ་བོ་ཙམ་བྱེད་ཅིང་། དེ་གཉིས་ཀྱི་ལས་ནི་བསམ་པའི་ལས་ཏེ་སེམས་པའི་ཀུན་ནས་བསླང་བ་ཡིན་པས་ལས་ལམ་དངོས་མིན་ནོ། །དེ་བཞིན་དུ་བདག་གི་ཡིད་དང་མཐུན་པ་མཛའ་བཤེས་དང་མི་མཐུན་པ་དགྲ་བགེགས་སོགས་མནར་སེམས་ཀྱི་དངོས་པོ་དགུ་ལ་བསྟེན་ནས། ཞེ་སྡང་དང་ལ་སོགས་པ་ཕྲ་རྒྱས་ཀུན་དཀྲིས་མངོན་གྱུར་ང་རྒྱལ་མ་རིག་པ་ཐེ་ཚོམ་སྟེ་ལྟ་མིན་ལྔ་དང་། འཇིག་ལྟ་མཐར་ལྟ་ལོག་ལྟ་ལྟ་བ་མཆོག་འཛིན། ཚུལ་ཁྲིམས་བརྟུལ་ཞུགས་མཆོག་འཛིན་སྟེ་ལྟ་བ་ལྔ་དང་། དེ་ལས་ཁྲོ་བ་དང་འཁོན་འཛིན་སོགས་ཉེ་བའི་ཉོན་མོངས་པ་གཞན་མང་པོ་ཡང་སྐྱེ་ཤིང་འཕེལ་བར་འགྱུར་རོ། །དྲན་ཉེར། ཀུན་རྟོག་ལས་ནི་འདོད་ཆགས་སྐྱེ། །ཆགས་ལས་ཁོང་ཁྲོ་རབ་ཏུ་འབྱུང་། །ཞེས་སོ། །དགེ་སློང་འབར་བ་གསུམ་གྱི་ལོ་རྒྱུས་སྦྱར་རོ། །དེས་ན་སྡུག་བསྔལ་ལས་ལས་བྱུང་ལས་ཉོན་མོངས་ལས་བྱུང་ཉོན་མོངས་ཡུལ་ལ་བསྟེན་ནས་སྐྱེ་བས་ན། འདོད་པའི་ཡུལ་ལ་སྲེད་པ་མ་སྤངས་ན་སྡུག་བསྔལ་སྤོང་བར་མི་ནུས་ཏེ། ལག་པའི་མེ་མ་བཏང་ན་སྲེག་པའི་སྡུག་བསྔལ་སྤོང་མི་ནུས་པ་བཞིན་ནོ། །དྲན་ཉེར་ལས། དགྲ་བོ་དང་འདྲ་ཡུལ་ཤེས་བྱ། །གྲོགས་པོ་དང་འདྲ་མྱ་ངན་འདའ། །ཞེས་དང་། ཤིང་མེས་བསྲེག་པའི་ཉེས་པ་ནི། །མི་ཡིས་ཡོངས་སུ་སྤོང་ནུས་ཀྱི། །འདོད་པའི་མེ་ཡིས་བསྲེག་པ་ནི། །ཡོངས་སུ་སྤོང་བར་མི་ནུས་སོ། །ཞེས་དང་། ཀིམ་པའི་འབྲས་བུ་དང་འདྲ་བ། །འདོད་པ་དགྲ་བོ་གྲོགས་པོའི་གཟུགས། །ཞེས་སོ། །ཉན་ཐོས་པའི་གཞུང་དུ་རང་རྒྱུད་ན་ཡོད་པ་ནི་ཐོབ་པ་ཆད་པ་དང་བྲལ་ཐོབ་སྐྱེས་པས་སྤང་། གཞན་གཟུགས་སོགས་ལ་དམིགས་པའི་ཉོན་མོངས་པ་ནི་འདུན་པའི་འདོད་ཆགས་དང་བྲལ་བས་སྤངས་བར་བཤད། འདིར་ནི་ཕྱི་ནང་གི་ཆོས་ཀུན་རང་བཞིན་མེད་པར་ཤེས་པས་སྤོང་དགོས་སོ། །བཞི་པ་ནི། ཉོན་མོངས་སོགས།༢ དེ་ལྟར་བདག་འཛིན་ལས་ཆགས་སོགས་ཉོན་མོངས་པ་དང་། དེའི་དབང་གིས་སམ་དེས་ཀུན་ནས་བསླངས་པའི་དགེ་སྡིག་གི་ལས་སྣ་ཚོགས་ལ་སྤྱད་པས། འབྲས་བུ་འཁོར་བ་མི་རྟག་པ་དང་སྡུག་བསྔལ་བའི་འཁྲུལ་འཁོར་མི་བཟད་པ་དེ་འབྱུང་བ་ཡིན་ལ། རྩ་ཤེས་ལས། ལས་དང་ཉོན་མོངས་རྣམ་རྟོག་ལས། །དེ་ནི་སྤྲོས་དང་སྤྲོས་པ་ནི། །སྟོང་པ་ཉིད་ཀྱི་འགག་པར་འགྱུར། །ཞེས་སོ། །དེ་ཡང་རྩ་བ་བདག་འཛིན་མ་རིག་པའི་རྣམ་པར་རྟོག་པ་ཡིན་གྱི། གཙོ་བོ་དང་དབང་ཕྱུག་སོགས་ནི་མ་ཡིན་ནོ། །ཇི་སྐད་དུ། སེམས་ཅན་འཇིག་རྟེན་སྣོད་ཀྱི་འཇིག་རྟེན་དག །སྣ་ཚོགས་སེམས་ཉིད་ཀྱི་ནི་སྤྲོས་པ་སྟེ། །འགྲོ་བ་མ་ལུས་ལས་ལས་སྐྱེས་པར་བསྟན། །སེམས་ལས་མ་གཏོགས་ལས་ནི་ཡོད་མ་ཡིན། །ཞེས་དང་། བཤེས་སྤྲིང་ལས། འདོད་པ་སྤངས་བགྱི་འདི་ཡི་ལྕགས་སྒྲོགས་ཀྱིས། །འཁོར་བའི་བཙོན་རར་འཇིག་རྟེན་འདི་དག་བཅིངས། །ཞེས་སོ། །གཉིས་པ་ཀུན་འབྱུང་ལས་ཉོན་གྱི་རྩ་བ་ངོས་འཛིན་པའི་གདམས་པ་དྲུག །བདག་འཛིན་གྱི་དགྲ་ངོས་འཛིན་པ་དང་། དེའི་བྱེད་ལས་དང་། དེ་ལ་བཟོད་པ་འཁོར་བའི་རྒྱུ་ཡིན་པ་དང་། དེ་མ་བཏུལ་བར་སངས་མི་རྒྱ་བ་དང་། རྟོག་པའི་དབང་གིས་གཉིས་མེད་གཉིས་སུ་སྣང་བའི་དཔེ་དང་། སྒྲིབ་པ་གཉིས་ཀྱི་རྒྱུ་བསྟན་པའོ། །དང་པོ་ནི། དེ་བས་དགྲ་ནི་སོགས།༩ རྒྱུ་མཚན་དེ་བས་ན་ཐོག་མ་མེད་ནས་རྟག་ཏུ་གནོད་པའི་དགྲ་མ་རུང་བ་ནི། རྣམ་པར་རྟོག་པ་བདག་ཏུ་འཛིན་པ་འདི་ཁོ་ན་ཡིན་ལ། འདི་རང་གི་ངོ་བོ་ནི་བརྟག་ན་སྒྱུ་མ་བཞིན་ལས་གནོད་པར་བྱེད་པའི་དངོས་པོ་མེད་ཀྱང་། མེད་བཞིན་དུ་ཐོག་མ་མེད་པ་ནས་བདག་གི་ཡིད་ལ་ལྷན་སྐྱེས་སུ་གནས་ནས་སུ་གནོད་པར་བྱས་ལ། ཤེས་རབ་ཀྱི་མིག་དང་མི་ལྡན་པ་བདག་ཉིད་ཀྱི་ཁོང་དུ་དགྲ་དེ་ཡོད་པར་སྣང་ཡང་། ཁྱིམ་ཕུག་གི་རྐུན་མ་བཞིན་དུ་ཞིབ་ཏུ་ལུང་ལས་མ་ཚོར་རིག་པས་ཀྱང་ངོས་མ་ཟིན་པས་སྡུག་བསྔལ་བའོ། །གཉིས་པ་དགྲ་དེའི་བྱེད་ལས་ནི། བདག་གི་ཆོས་སྐུ་ནོར་བུ་རིན་ཆེན་སོགས།༥ བདག་གི་གནས་ལུགས་ཆོས་ཀྱི་སྐུ་འདོད་དགུ་འབྱུང་བ་ནོར་བུ་རིན་པོ་ཆེ་ལྟ་བུ་དེ་ཉིད། གཟོད་མའམ་ཐོག་མའི་མུ་དེ་ཉིད་ནས་གཟུགས་མེད་པའི་དགྲ་འདིས་བརྐུས་ནས་སུ། བརྐུས་ནས་གང་དུ་ཁྱེར་ན། གནས་དེ་ཉིད་དུ་གཟུང་འཛིན་ནམ་སེམས་སེམས་བྱུང་གི་སྤྲོས་པའི་མཐའ་ཀུན་གྱིས་བསྐོར་ཞིང་། མཚན་མ་སྣ་ཚོགས་པའི་ཚང་ཚིང་འཐུག་པོའི་གསེབ་ཏུ་སྦས་ནས་བཞག་གོ། །རྨོངས་པ་བདག་གནི་དབུལ་པོའི་ཁྱིིམ་གྱི་གཏེར་མ་མཐོང་བ་བཞིན་དུ། ད་དུང་ལས་ཉོན་གྱིས་འཆི་ཞིང་འཁོར་བར་འཁྱམ་དུ་འཇུག་གོ། །འོ་ན་ངར་འཛིན་རྒྱུའི་བདག་དེ་གང་ལ་བྱ་ཞེ་ན། གཟུགས་སོགས་ཉེར་ལེན་གྱི་ཕུང་པོ་ལྔ་པོ་འདིའི་རྒྱུན་ཙམ་ལ་བདག་གོ་ཞེས་ཐ་སྙད་བཏགས་པ་ཡིན་གྱི་དངོས་པོ་མེད་ཅེས་བྱ་བ་ཡིན་ནོ། །རྒྱས་པར་འོག་ཏུ་སྟོན། མདོ་ལས། དགེ་སློང་དག་དགེ་སྦྱོང་ངམ་བྲམ་ཟེ་གང་སུ་དག་ཅིག་བདག་གོ་སྙམ་དུ་ཡང་དག་པར་རྗེས་སུ་ལྟ་བ་དེ་དག་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ཁོ་ན་ལ་ཡང་དག་པར་རྗེས་སུ་བལྟའོ། །ཞེས་དང་། དྲན་ཉེ་ལས། སེམས་ནི་དགྲ་དང་དགྲ་ཆེན་ཏེ། །སེམས་ལས་གཞན་པའི་དགྲ་མེད་དོ། །རྩུབ་ཤིང་རང་གིས་རང་སྲེག་ལྟར། །སེམས་ནི་རང་གི་སེམས་ཀྱིས་བསྲེག །ཅེས་སོ། །གསུམ་པ་ནི། འཇིག་རྟེན་སོགས།༤ དགྲ་ལ་བཟོད་པ་སྒོམ་པར་མ་བཤད་དམ་ཞེ་ན། དེ་ནི་ཕྱིའི་དགྲ་ཡིན་ཏེ། འཇིག་རྟེན་གྱི་དགྲ་འདི་ཀུན་གྱིས་ནི་བསད་ནས་རྒྱུ་ནོར་འཕྲོག་པ་ཙམ་ལས་གནོད་པ་གཞན་ནི་མི་ནུས་ལ། དེ་ལ་བཟོད་པ་བསྒོམ་པར་བྱས་ན་སྡིག་པ་འཛད་ཅིང་བསོད་ནམས་ཀྱི་ཚོགས་ཀྱང་རྫོགས་པ་ཡིན་ལ། དགྲ་འདིས་ནི་ཚེ་འདིར་རང་གཞན་ཀུན་གྱི་སྲོག་བརླག་པའི་སྐབས་ཀྱང་ཡོད་པ་ཡིན་ལ། ལས་དང་ཉོན་མོངས་པའི་མཚོན་རྣོན་པོ་དག་མངོན་པར་འདུ་བྱས་པའི་ཞི་བདེ་ཐར་པའི་སྲོག་ཀྱང་གཅོད་པར་བྱེད་ན། དེ་ལ་བཟོད་ཅིང་བསྟེན་ནས་ཟག་བཅས་ཀྱི་བསོད་ནམས་བསགས་པས་ནི། ཁམས་གསུམ་འཁོར་བར་དམ་དུ་འཆིང་ནས་ཐར་བ་མེད་པར་བྱད་དོ། །དེས་ན་དེ་བརླག་པར་བྱ་དགོས་སོ། །བཞི་པ་ནི། དཔེར་ན་སོགས།༩ དཔེར་ན་དངུལ་གྱི་ཁམས་ཡོད་པའི་རྡོ་ནི་དངུལ་གྱི་རང་བཞིན་ཡང་། བཟོ་བོ་དག་གིས་བཞུ་བཏུལ་ན་གྲངས་མ་བྱས་བར་དུ་དངུལ་དངོས་མི་སྣང་ལ། དེ་བཞིན་དུ་སེམས་ཉིད་ཀྱི་རང་བཞིན་གསེར་ལྟར་འགྱུར་བ་མེད་ཅིང་རྣམ་པར་དག་པ་ཡིན་མོད་ཀྱང་། ཕྱིན་ཅི་ལོག་པར་རྟོག་པའི་དགྲ་བོ་འཁོར་དང་བཅས་པ་འདི་མ་ཆོམས་ཀྱི་བར་དུ། དག་པ་གཉིས་ལྡན་དུ་སངས་མི་རྒྱ་སྟེ་སྒྲིབ་པ་གཉིས་དང་མ་བྲལ་བའི་ཕྱིར། སངས་རྒྱས་ནི་ཀུན་ཏུ་རྟོག་པ་ཡུལ་དང་བཅས་པ་ཟད་པ་ལ་བྱ་སྟེ། མདོ་ལས། འདོད་པ་ཁྱོད་ཀྱི་རྩ་བ་ནི། །ཤེས་ཏེ་ཀུན་ཏུ་རྟོག་ལས་བྱུང་། །ཁྱོད་ལ་རྟོག་པར་མི་འགྱུར་བ། །དེ་ཕྱིར་ང་ལ་མི་འབྱུང་ངོ་། །ཞེས་སོ། །སེམས་ཅན་གྱི་རང་བཞིན་སངས་རྒྱས་ཡིན་ཡང་ལམ་གྱི་རྩོལ་བས་སྦྱོང་དགོས་པ་ཆོས་དབྱིངས་བསྟོད་པ་ལས། ཁམས་ཡོད་ན་ནི་ལས་བྱས་པས། །ས་ལེ་སྦྲམ་ནི་མཐོང་བར་འགྱུར། །ཁམས་མེད་ན་ནི་ལས་བྱས་པས། །ཉོན་མོངས་ངལ་བ་ཙམ་དུ་ཟད། །ཅེས་གསུངས་པ་ལྟར་རོ། །ལྔ་པ་ནི། དེ་བཞིན་སོགས།༦ སེམས་ཉིད་སངས་རྒྱས་ཡིན་པ་དེ་བཞིན་དུ་ལུས་སོགས་ལ་གཙང་བདེ་བདག་རྟག་ཏུ་འཛིན་པའི་རྣམ་རྟོག་ཕྱིན་ཅི་ལོག་པ་རྣམས་དང་། དེ་ལས་བྱུང་བའི་ཆགས་སོགས་ཉོན་མོངས་པ་རྣམས་དང་། འབྲས་བུ་སྡུག་བསྔལ་ཉིད་ཀྱང་རང་བཞིན་མེད་པས་དོན་ལ་བྱང་ཆུབ་ཡིན་མོད་ཀྱི་ཞེས་ཇི་ལྟར་ཞེ་ན། ལྷའི་བུ་རབ་རྩལ་སེམས་ཀྱི་ཞུས་པ་ལས། གང་ཚེ་སེམས་ནི་ཆགས་མེད་པས། །བླ་མེད་བྱང་ཆུབ་སེམས་ཡིན་ཏེ། །སེམས་ཀྱི་རང་བཞིན་མངོན་སུམ་པ། །དེ་ནི་ཤེས་རབ་མཚན་ཉིད་དོ། །ཞེས་སེམས་ཀྱི་རང་བཞིན་བྱང་ཆུབ་དང་དེ་མངོན་དུ་བྱེད་པ་ཤེས་རབ་ཏུ་བསྟན། འཇམ་དཔལ་རྣམ་པར་རོལ་པའི་མདོ་ལས་ཀྱང་མང་དུ་འབྱུང་། མདོ་གཞན་ལས། ཉོན་མོངས་པ་ལྔ་ནི་ཡེ་ཤེས་ཡིན་ཏེ་སོར་མོའི་རྩེ་མོ་དེ་ཉིད་ཀྱིས་སོར་མོའི་རྩེ་མོ་དེ་ཉིད་ལ་རེག་པར་མི་བྱ་བ་བཞིན་ནོ། །ཡེ་ཤེས་དེ་ཉིད་ཀྱིས་ཡེ་ཤེས་དེ་ཉིད་སྤང་བར་མི་བྱའོ། །ཞེས་དང་། ཁྱེའུ་རིན་ཆེན་བྱིན་གྱིས་ཞུས་པར། འདོད་ཆགས་སྤང་བར་མི་བྱའོ། །ཞེ་སྡང་གཞིལ་བར་མི་བྱའོ། །གཏི་མུག་བསལ་བར་མི་བྱའོ། །ཞེས་རང་བཞིན་ཤེས་ན་བསྒྲུབ་བྱ་ལས་སྤང་བྱའི་རྫས་མ་གྲུབ་པར་དགོངས། འོན་ཀྱང་དེ་ལྟར་མ་རྟོགས་པས་ལམ་ལ་འབད་ནས་མ་རིག་པས་བསྡུས་པའི་སྲིད་པའི་ཡན་ལག་བཅུ་གཉིས་དབྱིངས་སུ་ཞི་ནས། རང་རིག་པའི་ཡེ་ཤེས་ཆོས་དབྱིངས་ཀུན་ཏུ་འགྲོ་བའི་བྱང་ཆུབ་ཆེན་པོ་མ་ཐོབ་བར་དུ་ནི། གློ་བུར་གྱི་དྲི་མ་ཀུན་ནས་ཉོན་མོངས་པ་བདེ་སྡུག་རྒྱུ་འབྲས་སོགས། བདག་འཛིན་གྱི་རིང་དུ་སྐྱེ་བོ་ཀུན་ལ་མངོན་སུམ་བསླུ་མེད་དུ་ཡོད་པས་བླང་དོར་བྱ་དགོས་ལ། དེ་ཡང་ཕུགས་ཀྱི་འཁྲུལ་རྟོག་འདུ་ཤེས་ཕྱིན་ཅི་ལོག་པའི་དབང་གིས་དངོས་པོར་མ་གྲུབ་ཀྱང་དངོས་པོར་སྣང་ངོ་། །དེ་ལྟར་ན་ད་ལྟའི་ཆོས་སྐྱེ་འགག་གནས་གསུམ་སོགས་དངོས་པོ་སྣ་ཚོགས་པ་འདི་འཐད་དམ་སྙམ་ན། དེའི་རང་བཞིན་ནམ་བདེན་འཛིན་ཟློག་བྱེད་དུ་དཔེར་ན། གཉིད་ཀྱིས་ནོན་པའི་རྨི་ལམ་དུ་བདེ་སྡུག་གི་སྣང་བ་སྣ་ཚོགས་པ་མངོན་སུམ་དུ་སྣང་བ་བཞིན་ནོ། །སད་པ་ན་ཅི་ཡང་མེད་པ་བཞིན་གཏི་མུག་གི་གཉིད་ཟད་པ་ན་ཅི་ཡང་མི་སྣང་ངོ་། །རྩ་ཤེས་ལས། རྨི་ལམ་ཇི་བཞིན་སྒྱུ་མ་བཞིན། །དྲི་ཟའི་གྲོང་ཁྱེར་ཇི་བཞིན་དུ། །དེ་བཞིན་སྐྱེ་དང་དེ་བཞིན་གནས། །དེ་བཞིན་དུ་ནི་འཇིག་པར་གསུངས། །ཞེས་སོ། །རྒྱུ་འབྲས་རང་བཞིན་གྱིས་མེད་ན་ས་བོན་མྱུ་གུར་འཕོ་བ་མེད་སྙམ་ན། འདུས་བྱས་སྐད་ཅིག་མའི་རྒྱུན་འཇུག་པ་དངོས་པོར་འཛིན་པ་ཟློག་བྱེད་དུ་འགལ་མེའི་འཁོར་ལོའི་དཔེ་སྟོན་པ་སོགས་རྒྱ་ཆེར་ཤེས་པར་བྱའོ། །དྲུག་པ་བདག་འཛིན་དེ་སྒྲིབ་པ་གཉིས་ཀྱི་རྒྱུར་བསྟན་པ་ནི། རྣམ་རྟོག་སོགས་གོང་དུ་བཤད་པའི་ཚུལ་མིན་ཡིད་ཀྱི་རྟོག་པ་གཟུང་འཛིན་གཉིས་སུ་བདེན་པར་ཞེན་པ་དང་། གང་གིས་ཤེས་པར་བྱ་བ་དེ་ནི་ཤེས་བྱ་དང་གང་གིས་ཤེས་སོ་ཞེས་པ་ནི་དེའི་ལས་དང་། ཤེས་པ་པོ་ནི་བྱེད་པ་པོ་སྟེ། དེ་ལྟ་བུ་རྣམས་ལ་འཁོར་གསུམ་བདེན་འཛིན་གྱི་རྣམ་པར་རྟོག་པ་ནི་ཆོས་ཀྱི་བདག་དང་ཤེས་བྱ་ཡོངས་སུ་གཅོད་པའི་གེགས་ཤེས་བྱའི་སྒྲིབ་པའང་ཡིན་ལ། བདག་དང་བདག་གིར་རམ་ང་དང་ང་ཡིར་འཛིན་པ་དེ་ཉིད་ནི་ཉོན་མོངས་པའི་སྒྲིབ་པ་ཀུན་གྱི་རྒྱུའོ། །སྟོང་དང་བདག་མེད་གཉིས་འོག་ནས་བཤད་པར་བྱའོ། །གཟུགས་སོགས་ལས་དང་བྱ་བ་རྫས་དང་ངོ་བོ་ཉིད་དངོས་པོར་མངོན་པར་ཞེན་པ་ཆོས་ཀྱི་བདག་འཛིན་ཤེས་སྒྲིབ་དང་། དེ་དག་རང་བཞིན་གྱིས་མེད་པ་ཆོས་བདག་མེད་དང་། ཤེས་པ་པོའམ་བྱེད་པ་པོར་འཛིན་པ་གང་ཟག་གི་བདག་འཛིན་དང་དེའང་རྟག་བདག་དང་རང་རྐྱ་ཐུབ་པའི་རྫས་ཡོད་ཅེས་སྦྱར་བདེན་མེད་སོགས་ཀྱི་ཁྱད་པར་སྦྱར་མི་དགོས་ཞེས་རྒྱ་བོད་ཀྱི་སློབ་དཔོན་ཕལ་མོ་ཆེས་བཞེད། དེས་བསྐྱེད་པའི་ཆགས་སོགས་དང་དེ་ལ་བདེན་པར་འཛིན་པའང་ཉོན་སྒྲིབ་དང་། དེ་མེད་པ་གང་ཟག་གི་བདག་མེད་པའོ། །ཉོན་སྒྲིབ་ཤེས་སྒྲིབ་དང་མི་འགལ་ཏེ་དེས་ཀྱང་ཤེས་བྱ་ལ་མི་སྒྲིབ་པ་མ་ཡིན་པའི་ཕྱིར། ཤེས་སྒྲིབ་ཉོན་སྒྲིབ་དང་འགལ་ཏེ། མི་ཤེས་པའི་རྒྱུ་བཞི་སོགས་ཉན་རང་ལ་ཡོད་ཀྱང་དེ་ཉོན་མོངས་ཅན་མ་ཡིན་པའི་ཕྱིར། དེས་ན་འཁོར་བ་ལ་འཕེན་བྱེད་ཀྱི་ལས་གསོག་ཅིང་ཐར་བ་ལ་སྒྲིབ་པ་ཉོན་སྒྲིབ་དང་། ཤེས་བྱ་ཕྲ་བ་ནས་རྣམ་མཁྱེན་གྱི་བར་ལ་སྒྲིབ་པ་ཤེས་སྒྲིབ་ཅེས་བྱའོ། །དེས་ན་ཐ་སྙད་དུ་འཁོར་བའི་རྒྱུ་ཀུན་འབྱུང་སྤོང་ཚུལ། ཏིང་རྒྱལ་ལས། མི་གཙང་བས་ནི་འདོད་ཆགས་རྟག་ཞི་གྱིས། །བཟོད་པའི་སྟོབས་ཀྱིས་ཞེ་སྡང་ཚར་ཆོད་ཅིག །ཤེས་རབ་སྟོབས་ཀྱིས་གཏི་མུག་བསལ་བར་གྱིས། །རྒྱལ་བས་བསྔགས་པའི་བྱང་ཆུབ་ཐོབ་པར་འགྱུར། །ཞེས་དང་། ཉོན་མོངས་ཟད་ན་དེས་བྱས་པའི་ལས་ཀྱང་འཛད་པ་ནི། ཡབ་སྲས་མཇལ་བའི་མདོར། ཉོན་མོངས་ཚར་གཅོད་བསྟེན་ན་ནི། །ལས་ཀྱི་ལམ་ཡང་ཆད་པར་འགྱུར། །ལས་ཀྱི་ལམ་ནི་ཆད་གྱུར་ན། འཇིག་རྟེན་གྱི་ནི་མཆོད་རྟེན་འགྱུར། །ཞེས་སོ། །དེ་ཡང་སོ་སོར་རྟོག་པའི་ཤེས་རབ་ཀྱིས་དངོས་ཀུན་བཙལ་ཏེ་རང་བཞིན་མེད་པར་ཤེས་ནས་གོམས་ན་བྱང་ཆུབ་འཐོབ་པ་ནི། ཤེར་ཕྱིན་བདུན་བརྒྱ་པར། རབ་ཏུ་བཙལ་ན་མི་དམིགས་ཆོས། །སེམས་ལ་དངོས་པོར་མི་སྣང་བའི། །ཆོས་ཉིད་ལེགས་པར་ཤེས་པ་ཡིས། །བློ་ལྡན་བྱང་ཆུབ་ཐོབ་པར་འགྱུར། །ཞེས་དང་། གཞན་ཡང་ལས་ཉོན་སྡུག་བསྔལ་རྒྱུ་འབྲས་ཐམས་ཅད་ལྡོག་རིམ་ནས་སྤང་ཚུལ་ནི། རྩ་ཤེས་ལས། ལས་དང་ཉོན་མོངས་རྣམ་རྟོག་ལས། །དེ་ནི་སྤྲོས་དང་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་གསུངས་པའི་ཚུལ་གྱིས་ཉམས་སུ་ལེན་པར་བྱེད་པའོ། །རྩ་བའི་ས་བཅད་གསུམ་པ་འགོག་པའི་བདེན་པ་ལ་བཞི་སྟེ། བཤད་པར་དམ་བཅའ་བ་དང་། མྱང་འདས་ཀྱི་ཡོན་ཏན་མདོར་བསྟན་པ། འབྲས་བུ་རྒྱས་པར་བསྟན་པ། མཇུག་བསྡུ་བའོ། །དང་པོ་ནི། ད་ནི་སོགས།༢ འཁོར་བའི་རྒྱུ་འབྲས་ལ་སྐྱོ་བ་སྐྱེས་ནས་མྱང་འདས་ཀྱི་རྒྱུ་འབྲས་ལ་བྲོད་པ་སྐྱེ་བའི་ཕྱིར་འབྲས་བུ་མྱ་ངན་ལས་འདས་པ་བཤད་པར་བྱའོ། །ཞེས་མཚམས་སྦྱར་ནས། གཉིས་པ་ལ་གཉིས། འཁོར་འདས་སོ་སོར་བདེན་པར་འཛིན་པ་བཟློག་པ་དང་། ཞི་བའི་བདེ་བ་མཆོག་ཏུ་བསྟན་པའོ། །དང་པོ་ནི། དེ་ཡང་འཁོར་བ་སྡུག་བསྔལ་བའི་སྣང་བ་འདི་དང་འགོག་པ་ཞི་བའི་བདེ་བ་གཉིས་ངོ་བོ་སོ་སོ་ཐ་དད་པ་མ་ཡིན་ཏེ། སྲིད་པ་རང་བཞིན་གྱིས་བདེན་པར་སྣང་བ་འདི་དཔྱད་ནས་རང་བཞིན་མེད་པ་སྟོང་པར་རྟོགས་པ་ནི་ཞི་བ་མྱང་འདས་ཡིན་པའི་ཕྱིར། གཟུགས་ཀྱི་དེ་བཞིན་ཉིད་དང་དེ་བཞིན་གཤེགས་པའི་དེ་བཞིན་ཉིད་ནི་སོ་སོ་མ་ཡིན་ཐ་མི་དད་སོགས་ཤེར་མདོ་ལས་དང་། རྩ་ཤེས་ལས། འཁོར་བ་མྱ་ངན་འདས་པ་ལས། །ཁྱད་པར་ཅུང་ཟད་ཡོད་མ་ཡིན། །མྱ་ངན་འདས་པ་འཁོར་བ་ལས། །ཁྱད་པར་ཅུང་ཟད་ཡོད་མ་ཡིན། །འདི་གཉིས་ཁྱད་པར་ཅུང་ཟད་ནི། །ཤིན་ཏུ་ཕྲ་བའང་ཡོད་མ་ཡིན། །ཞེས་སོ། །འཁོར་བ་རང་བཞིན་གྱིས་མེད་པ་དོན་དམ་དང་མེད་བཞིན་སྣང་བ་སྒྱུ་མ་ལྟ་བུ་ཀུན་རྫོབ་ཡིན་པས། དེ་གཉིས་དབྱེར་མེད་ལ་དེ་ལྟར་རྟོགས་ན་སྒྱུ་མ་ཙམ་གྱིས་འཁོར་བའི་བྱ་བ་བྱེད་མི་ནུས་སོ། །འགོག་བདེན་ལའང་ལྡོག་ཆ་ནས་རྣམ་པ་བཞི་ཡོད་དོ། །འབྱུང་འགྱུར་གྱི་རྒྱུ་ཀུན་འབྱུང་དང་བཅས་པ་འགག་པས་ན་འགོག་པ། ཉོན་མོངས་འཁྲུལ་པ་ཐམས་ཅད་དབྱིངས་སུ་ཞི་བས་ཞི་བ། ཕུན་སུམ་ཚོགས་པ་མཆོག་གི་ཡིན་པས་ན་གྱ་ནོམ་པ། གཏན་དུ་འཁོར་བ་ལ་ཕྱིར་མི་ལྡོག་པར་ངེས་པར་འབྱུང་བ་སྟེ་བཞིའོ། །གཉིས་པ་ནི། ཞི་བ་སོགས།༨ འཁོར་བའི་སྡུག་བསྔལ་རྒྱུ་དང་བཅས་པ་འགོག་པའི་ཞི་བ་ཐོབ་པ་དེའི་ཡོན་ཏན་ནི་ཇི་ལྟ་བུ་ཞེ་ན། གཟུང་འཛིན་གྱིས་བསྡུས་པའི་ཆོས་ཐམས་ཅད་རང་བཞིན་གྱིས་སྟོང་པ་ཉིད་དུ་རྟོགས་པས། ཚུལ་བཞིན་མིན་པའི་རྣམ་པར་རྟོག་པ་བདག་ཏུ་འཛིན་པ་གཉིས་དང་། དེས་བསྐྱེད་པའི་ལས་དང་ཉོན་མོངས་རྣམས་མེད་ཅིང་། ངན་སོང་གསུམ་གྱི་བཀྲེས་སྐོམ་གྲང་དྲོ་སོགས་དང་། མིའི་སྐྱེ་རྒ་ན་འཆི་དང་ལྷ་འཕོ་ལྟུང་ལ་སོགས་པའི་སྡུག་བསྔལ་ཐམས་ཅད་མེད་ལ། དེའི་ཕྱིར་འཁོར་བ་མི་རྟག་སྡུག་བསྔལ་གྱི་མཚན་ཉིད་རྣམས་སྔར་ཡོད་གཏན་ཟད་ཅིང་ཕྱིས་མི་སྐྱེ་བར་བྱས་ཏེ། རྩ་ཤེས་ལས། ནང་དང་ཕྱི་རོལ་ཉིད་དག་ལ། །བདག་དང་བདག་གིར་སྙམ་ཟད་ན། །ཉེ་བར་ལེན་པ་ཟད་འགྱུར་ཞིང་། །དེ་ཟད་པས་ན་སྐྱེ་བ་ཟད། །ཅེས་གསུངས་པ་ལྟར་ཉན་ཐོས་རྣམས་ཀྱིས་དེ་ལྟར་རྟོགས་པས། དེའི་གཞུང་ལས། ལུས་ཞིག་ཚོར་བ་བསིལ་བར་འགྱུར། །འདུ་ཤེས་མེད་ཅིང་འདུ་བྱེད་འགགས། །རྣམ་པར་ཤེས་པ་ནུབ་གྱུར་པ། །དེ་ལྟར་འདི་ནི་སྡུག་བསྔལ་མཐའ། །ཞེས་ལྷག་མེད་ཀྱི་དུས་ཞི་བ་ཕྱོགས་གཅིག་ཏུ་མྱ་ངན་ལས་འདའོ། །དེའང་གཟུགས་སོགས་ལ་འདུན་པའི་འདོད་ཆགས་དང་བྲལ་བའི་ཚུལ་གྱིས་བདག་གིར་མི་བྱེད་དེ་རྟག་པས་སྟོང་པ་དང་སྡུག་བསྔལ་དང་རིལ་པོར་མེད་པར་རྟོགས་པའི་ཕྱིར་སྤྱིར་ཆོས་བདག་མེད་རགས་ལ་རྟོགས་ཙམ་བྱ་ལ། ཕྲ་བ་ནས་རྟོགས་པ་མ་ཡིན་ཏེ་དེ་དག་གི་གཞུང་དུ་གསལ་རྒྱས་རྫོགས་གསུམ་མ་བསྟན་ཞིང་དེའི་ཚུལ་གྱིས་མ་རྟོགས་པའི་ཕྱིར་རོ། །བྱང་ཆུབ་སེམས་དཔའ་ནི་བདག་མེད་གཉིས་དང་འཁོར་འདས་མཉམ་པ་ཉིད་རྟོགས་ཤིང་སྡུག་བསྔལ་བདེ་བར་འགྲོ་བའི་ཏིང་འཛིན་ཐོབ་པ་དང་། སྙིང་རྗེ་ཆེན་པོ་དང་སྨོན་ལམ་གྱི་འཕེན་པའི་དབང་གིས་བྱང་ཆུབ་བར་དུ་སྲིད་པར་ཉིང་མཚམས་སྦྱར་ནས། ལས་སུ་གཞན་དོན་འབའ་ཞིག་ལ་སྤྱོད་པར་བྱེད་ཅིང་། ཏིང་ངེ་འཛིན་གྱི་སྒོ་དུ་མ་ལ་དབང་འབྱོར་བས་མཐུ་དང་རྫུ་འཕྲུལ་བསམ་གྱིས་མི་ཁྱབ་པ་ཡང་ཐོབ་བོ། །མདོ་སྡེ་རྒྱན་ལས། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །འཁོར་བ་ཞི་བའི་བདག་ཉིད་ལ། །དེ་ཕྱིར་རྒྱལ་སྲས་བསམ་མི་ཁྱབ། །ཅེས་སོགས་མང་ངོ་། །གསུམ་པ་འབྲས་བུ་རྒྱས་པར་བཤད་པ་ལ་གསུམ་སྟེ། ཐེག་དམན་ཉན་རང་དང་། བྱང་ཆུབ་སེམས་དཔའ་དང་། སངས་རྒྱས་ཀྱི་རྫུ་འཕྲུལ་གྱི་ཚད་བསྟན་པོ། །དང་པོ་ནི། ཉན་ཐོས་སོགས།༤ ཉན་ཐོས་རྣམས་ཀྱི་རྫུ་འཕྲུལ་གྱི་ཚད་ཀྱང་ནི་ཇི་ཙམ་ཡོད་ཅེ་ན། འདི་ལྟར་ཏིང་ངེ་འཛིན་གྱི་ངོར་རྫུ་བ་ཙམ་གྱིས་གཞན་ངོར་འཕྲུལ་བ་ནི་མགྱོགས་ཆེད་གློག་དང་འདྲ་བར་བྱས་ནས་ནི་རི་རབ་བདུན་བདུན། གོམ་པ་རེ་རེས་བགྲོད་པར་བྱེད་ནས་འགྲོ་ལ། མཉམ་པར་བཞག་ཚེ་ལྷའི་མིག་གིས་སྟོང་གསུམ་རངས་པོ་དུས་གཅིག་ཏུ་མཐོང་ངོ་། །འདི་མཛོད་ལྟར་ན། ཉན་རང་སངས་རྒྱས་གསུམ་གྱིས་མངོན་པར་འདུ་བྱེད་པ་མེད་པས་རིམ་པ་ལྟར་སྟོང་དང་སྟོང་གཉིས་དང་སྟོང་གསུམ་མཐོང་། མངོན་པར་འདུ་བྱེད་པ་དང་བཅས་པས་ཉན་ཐོས་ཀྱིས་སྟོང་གཉིས་དང་རང་རྒྱལ་གྱིས་སྟོང་གསུམ་དང་སངས་རྒྱས་ཀྱིས་སྟོང་གསུམ་གྲངས་མེད་པ་མཐོང་ངོ་། །མདོ་ལས། མོའུ་འགལ་གྱི་བུའི་མ་སངས་རྒྱས་ཀྱི་ཞིང་འོད་ཟེར་ཅན་དུ་སྐྱེས་པ་ཚོལ་དུ་སོང་བ་དང་། ཡང་དེས་སངས་རྒྱས་ཀྱི་གསུང་གི་གསང་བའི་མཐའ་གཞལ་བའི་ཕྱིར། ནུབ་ཕྱོགས་ཀྱི་འཇིག་རྟེན་ཁམས་གཱངྒའི་ཀླུང་དགུ་བཅུ་རྩ་དགུའི་བྱེ་མ་སྙེད་འདས་པ་ན་སངས་རྒྱས་ཀྱི་ཞིང་འོད་ཟེར་གྱི་རྒྱལ་མཚན་ན། སངས་རྒྱས་འོད་ཟེར་ཀྱི་རྒྱལ་པོའི་དྲུང་དུ་སངས་རྒྱས་ཀྱི་མཐུས་འཕངས་པ་ལ་གསུང་གི་མཐའ་མ་རྙེད། སླར་བྱོན་མ་ནུས་པས་སངས་རྒྱས་ལ་ཕྱག་འཚལ་བས་ཡུད་ཙམ་གྱིས་ཐོན་པའི་ལོ་རྒྱུས་སོགས་ཡོད། གཉིས་པ་ལ་གཉིས། བསྟན་བཤད་དོ། །དང་པོ་ནི། བྱང་ཆུབ་སེམས་དཔའི་རྫུ་འཕྲུལ་གྱི་ཚད་དཔེར་བྱ་ན་ཞེས་སོ། །གཉིས་པ་ལ་གཉིས། དངོས་པོ་ཆེ་ཆུང་སྤྲུལ་བསྒྱུར་བྱེད་པ། སྐུ་གཅིག་ལ་སྐུའི་མཛད་པ་དུ་མ་སྟོན་པའོ། །དང་པོ་ནི། སྟོང་གསུམ་སོགས།༦ དབང་ཐོབ་པའི་བྱང་ཆུབ་སེམས་དཔའ་རྣམས་ནི་བཞེད་ན། སྟོང་གསུམ་འདི་ཡང་ཉུང་འབྲུ་གཅིག་ཏུ་འཛུད་ཅིང་ཉུང་འབྲུ་སྔར་ལས་མ་འཕེལ། སྟོང་གསུམ་འགྲིབ་སྟེ་ཆུང་ངུར་མ་སོང་ལ། ཉུང་འབྲུ་གཅིག་ཀྱང་སྟོང་གསུམ་ཙམ་དུ་སྤྲུལ་ཞིང་འགེབས་པར་བྱེད་དོ། །ནང་གི་སེམས་ཅན་ཀུན་གྱིས་མ་ཚོར་བར་སྟོང་གསུམ་འདི་ཡང་འཇིག་རྟེན་གཞན་དུ་རྡོལ་འཕེན་པ་ལྟར་མཛད། གཞན་ཡང་བསྐལ་པ་སྐད་ཅིག་དང་སྐད་ཅིག་བསྐལ་པར་བསྒྱུར་བ་སོགས་སྤྲུལ་བསྒྱུར་མཛད་དོ། །གཉིས་པ་ནི། དེ་སོགས།༥ བྱང་ཆེན་དེ་ནི་རང་གི་སྟན་ལས་ཅུང་ཟད་ཀྱང་མ་གཡོས་པར་གནས་བཞིན་དུ། འཇིག་རྟེན་འབུམ་ཕྲག་མང་པོའི་ཕ་རོལ་ནས་མི་འཁྲུག་པའི་ཞིང་ཁམས་སོགས་རང་གི་ལག་པས་ལེན་ཅིང་སྟོན། སངས་རྒྱས་མང་པོ་སོ་སོའི་སྤྱན་སྔར་གནས་ནས་མཆོད་པའི་སྤྲིན་གྱིས་མཆོད་ཅིང་། ལ་ལར་ཆོས་འཆད་ཅིང་ཉན་པ་དང་རྩོད་པ་སོགས་དུས་གཅིག་ལ་སྟོན་པར་མཛད་དེ། ས་དང་པོ་ནས་ཡོན་ཏན་བརྒྱ་ཕྲག་བཅུ་གཉིས་ཐོབ་པར་བཤད་པ་བཞིན་ནོ། །བཟང་སྤྱོད་སྨོན་ལམ་ལས་བཤད་པ་དང་། ཁུངས་རྒྱས་པ་དཀོན་བརྩེགས་དང་དྲི་མ་མེད་པར་གྲགས་པས་བསྟན་པ་སོགས་ལས་འབྱུང་ངོ་། །དཀོན་མཆོག་ཏཱ་ལ་ལས། ལག་པའི་མཐིལ་ནས་མཆོད་པ་བསམ་ཡས་རྣམས། །རྒྱལ་བ་གཅིག་ལ་དེ་དག་བྱེད་པ་ལྟར། །རྒྱལ་བ་མ་ལུས་ཀུན་ལའང་དེ་བཞིན་ཏེ། །དྲང་སྲོང་ཏིང་འཛིན་རྣམ་འཕྲུལ་དེ་འདྲའོ། །ཞེས་སོ། །གསུམ་པ་སངས་རྒྱས་ཀྱི་རྫུ་འཕྲུལ་ལ་དྲུག་སྟེ། རྫུ་འཕྲུལ་གྱི་ཚད་དྲི་བ། གསུང་ཚིག་གཅིག་བསྟན་པས་གདུལ་བྱའི་འདོད་པ་སོ་སོར་གོ་བ། སྐུ་གཅིག་ལ་གདུལ་བྱ་སོ་སོའི་མོས་པ་བཞིན་སྣང་བ། །སྣང་ཡང་དུ་མ་མེད་པའི་དཔེ་དང་། རྟོག་པ་མེད་ཀྱང་སྨོན་ལམ་གྱི་མཐུ་བརྟན་པ། སྒྲིབ་པ་ཅན་གྱིས་མི་མཐོང་བ་བསྟན་པའོ། །དང་པོ་ནི། བྱང་ཆུབ་སེམས་དཔའི་སོགས། བྱང་ཆུབ་སེམས་དཔའི་རྫུ་འཕྲུལ་དེ་འདྲ་ན་དེ་བཞིན་གཤེགས་པའི་རྫུ་འཕྲུལ་གྱི་ཚད་ཅི་ཙམ་ཡོད་ཅེའོ། །གཉིས་འདི་ལྟར་སོགས།༥ འདི་ལྟར་སངས་རྒྱས་གཟུགས་ཀྱི་སྐུ་གཅིག་བསྟན་པ་ལ་འཇིག་རྟེན་གྱི་ཁམས་རྡུལ་ཕྲ་རབ་ཀྱི་གྲངས་ཙམ་གྱི་སེམས་ཅན་རྣམས་ཀྱིས། རེ་རེས་ཐེ་ཚོམ་མི་གཅིག་པ་སྣ་རེ་དུས་གཅིག་ཏུ་དྲིས་པ་ལ། དེ་བཞིན་གཤེགས་པས་ཚིག་གཅིག་གསུངས་པ་ལས་གདུལ་བྱ་སོ་སོ་རང་རང་གིས་དྲིས་པའི་ལན་ནི་བཏབ་སྟེ་ཐེ་ཚོམ་ཆོད་པར་མཐོང་བ་ནི། གསུང་གི་གསང་བ་བསམ་གྱིས་མི་ཁྱབ་པའོ། །དཔེར་ན་སྦྲིང་སངས་ཞེས་པའི་སྒྲ་གཅིག་ལས། ལ་ལས་དུག་གིས་སྦྲིད་པ་སངས་པ་གོ། །ལ་ལས་འདུག་སྟངས་ཉེས་པས་སྦྲིད་པ་སངས་པ་གོ། །ལ་ལས་རིག་སྔགས་ཀྱིས་སྦྲིད་པ་སངས་པ་གོ་བ་བཞིན་ནོ། །དཀོན་བརྩེགས་ལས། འགྲོ་བའི་བསོད་ནམས་ལས་དག་ལས། རྒྱལ་བའི་གསུང་དབྱངས་གཅིག་སྣང་བ། །མོས་པའི་དབང་གིས་སོ་སོར་ཐོས། །འདི་ཡང་གསུང་གི་གསང་བའོ། །ཞེས་སོ་སངས་རྒྱས་ཀྱིས་མ་གསུངས་ཀྱང་ཐུགས་རྗེའི་དབང་གིས་དེ་ལྟར་སྣང་བ་ནི་རང་བཞིན་བྱིན་གྱིས་རླབས་ཀྱིི་རྟེན་འབྲེལ་ཟབ་མོ་ཡིན་ནོ། །ཏིང་རྒྱལ་ལས། ཀའུ་དཱི་ནྱ། ངས་ནི་གཟུགས་ཀྱི་དེ་བཞིན་ཉིད་འབའ་ཞིག་གསུངས་ན། ལ་ལས་ནི་གཟུགས་སྟོང་ཞེས་བྱ་བར་ཐོས། ལ་ལས་ནི་གཟུགས་མི་སྟོང་ཞེས་བྱ་བར་ཐོས། ལ་ལས་ནི་གཟུགས་བདེ་ཞེས་བྱ་བར་ཐོས། ལ་ལས་ནི་གཟུགས་སྡུག་བསྔལ་ལོ་ཞེས་བྱ་བར་ཐོས། ཞེས་གསུངས། དཔེར་ན་བྲག་ཅའི་སྒྲ་དེ་རྐྱེན་ལས་ཇི་སྐད་བརྗོད་པ་ལྟར་སྣང་ཡང་ཕྱི་ནང་གང་ན་མེད་པ་བཞིན། གདུལ་བྱ་ལས་དག་པའི་རྐྱེན་དང་སངས་རྒྱས་ཀྱི་ཐུགས་རྗེའི་རྒྱུ་ལས་གསུང་མི་ཟད་པ་རིགས་དྲུག་སོ་སོའི་སྐད་ཀྱིས་ཆོས་སུ་སྣང་བ་ཐོས་པའང་། རྒྱུད་བླ་མ་ལས། ཇི་ལྟར་སྒྲ་བརྙན་གྱི་ནི་སྒྲ། །གཞན་གྱི་རྣམ་རིག་ལས་བྱུང་བ། །དེ་ལྟར་དེ་བཞིན་གཤེགས་པའི་གསུང་། །ཕྱི་དང་ནང་ནའང་གནས་མ་ཡིན། །ཞེས་གསུངས་པ་ལྟར་རོ། །གསུམ་པ་ནི། སྐད་ཅིག་སོགས།༩ དེ་བཞིན་དུ་སྐུའི་གསང་བ་ཡང་སྐུ་གཅིག་བསྟན་པའི་སྐད་ཅིག་དེ་ཉིད་ལ། སྐུ་མི་ཟད་པ་སེམས་ཅན་ཇི་སྙེད་ཀྱི། ལ་ལས་ཞི་བ་དང་ལ་ལས་ཁྲོ་བོར་མཐོང་། ལ་ལས་རབ་ཏུ་བྱུང་བ་དང་ལ་ལས་ཁྱིམ་པའི་གཟུགས་སུ་མཐོང་། ལ་ལས་ཉན་ཐོས་དང་ལ་ལས་རང་རྒྱལ་གྱི་གཟུགས་སུ་མཐོང་ནས་དོན་ཐོབ་པ་དང་། ལ་ལས་བྱ་དང་རི་དྭགས་སོགས་སེམས་ཅན་རིག་མཐུན་པ་དང་མི་མཐུན་པ་སོ་སོའི་རྣམ་པ་སྣ་ཚོགས་སུ་མཐོང་བའི་ཕྱིར་རོ། །དེར་མ་ཟད་འབྱུང་བ་ཆེན་པོ་དང་རྩི་ཤིང་ནགས་ཚལ་གཟིངས་དང་ཟམ་པ་སོགས་བེམ་པོའི་རྣམ་པའང་མཐོང་ནས། སྐལ་བ་དང་ལྡན་པ་རྣམས་ལ་ཆོས་ཀྱི་སྒྲ་ཐོས་པ་སོགས་ཀྱིས་དོན་བྱེད་དོ། །དེས་ན་སེམས་ཅན་རང་རང་གི་མོས་པ་ཇི་ལྟ་བ་བཞིན་མཐོང་བས། སངས་རྒྱས་རྣམས་ནི་གཅིག་ཏུ་མ་ངེས་ཏེ། དེ་ལྟར་སྐུ་གཅིག་བསྟན་པས་སྣ་ཚོགས་པ་རྣམས་མཐོང་བའི་ཕྱིར་རོ། །བཞི་པ་ནི། ཆུ་ཡི་སོགས།༢ ཉེར་ལེན་ཆུ་མང་པོའི་རྐྱེན་གྱིས་ཟླ་བ་གཅིག་ལས་གཟུགས་བརྙན་མང་པོ་སྣང་ཞིང་། དེ་དག་ཟླ་བ་ལས་མི་འདའ་ཡང་ཟླ་བ་མང་དུ་སོང་བ་མ་ཡིན་ལ། དེ་བཞིན་དུ་གདུལ་བྱའི་དབང་གིས་སངས་རྒྱས་དུ་མར་སྣང་ཡང་སངས་རྒྱས་ཉིད་ཀྱི་ངོ་བོ་ཆོས་ཀྱི་སྐུ་ལ་ནི་གཉིས་སུ་མེད་དོ། །ལྔ་པ་ནི། སངས་རྒྱས་དངོས་ནི་སོགས།༤ ཡང་དག་པ་ཉིད་དུ་གཞལ་ན་མཐར་ཐུག་སངས་རྒྱས་དངོས་ནི་སྤྲོས་པ་དང་བྲལ་བ་ཐུགས་ཆོས་ཀྱི་སྐུ་ལ་བརྗོད་པར་བྱ་སྟེ། རྡོ་རྗེ་གཅོད་པ་ལས། སངས་རྒྱས་རྣམས་ནི་ཆོས་ཉིད་ལྟ། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་དང་། དེ་ལ་གཟུགས་དང་སྒྲར་འཛིན་པ་མི་རུང་སྟེ། དེ་ལས། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དེ་དག་ང་མི་མཐོང་། །ཞེས་གསུངས་པས། ཆོས་ཀྱི་སྐུ་གདུལ་བྱའི་ངོར་མི་སྣང་ཞིང་སྣང་བའི་གཟུགས་སྐུ་ལ་ཡང་རང་བཞིན་མེད་པ་རྟེན་ཅིང་འབྲེལ་བར་འབྱུང་བ་ཙམ་དུ་བལྟ་བར་བྱའོ། །སངས་རྒྱས་ཆོས་སྐུ་དེ་ལ་ནི་འདི་བྱ་འདི་བྱེད་ཀྱི་རྟོག་པ་དང་རྩོལ་བ་མི་མངའ་སྟེ། ཁམས་གསུམ་གྱི་སེམས་སེམས་བྱུང་ཐམས་ཅད་འགགས་པའི་ཕྱིར། འོན་ཏེ་གདུལ་བྱ་ལ་ལ་སྣང་བ་སྐུ་དང་གསུང་གི་རྣམ་པར་རོལ་པ་ནི། སྔོན་གྱི་སྨོན་ལམ་དང་ཐུགས་རྗེའི་འཕེན་པའི་མཐུ་དང་བྱ་བ་གྲུབ་པའི་ཡེ་ཤེས་ཀྱི་རྩལ་ལས་སྣང་བ་ཡིན་ནོ། །ཆོས་ཀྱི་སྐུ་ནི་སྤྲུལ་པ་སྐུ་གསུང་ཐུགས་ཀྱི་ངོ་བོར་གནས་ཏེ་གཞན་ནི་མ་ཡིན་ལ། དེ་ལྟར་ན་ཤེས་རབ་སྙིང་པོ་ལས་སྟོང་ཉིད་བཞི་སྦྱོར་བཤད་པ་ཇི་ལྟ་བ་བཞིན་ཤེས་པར་བྱའོ། །སྐུ་གསུང་ཐུགས་ཀྱི་རྣམ་པར་རོལ་པས་ནི་གདུལ་བྱའི་ཞིང་ཀུན་ཏུ་ཁྱབ་ཅིང་སྲིད་པ་ཇི་སྲིད་དུ་མི་ཟད་པ་ཇི་ལྟར་ཇི་སྙེད་མཁྱེན་པས་འགྲོ་བའི་དོན་མཛད་དོ། །དེ་ཡང་སྐུ་གསུང་རེ་རེས་གར་ཁྱབ་ཏུ་རེ་རེས་ཀྱང་ཁྱབ་པར་གསུངས་སོ། །འཁོར་ལོ་བཅུ་པའི་མདོ་ལས། བདེ་གཤེགས་ཐུགས་རྗེ་དུས་རིང་འགྲོ་བ་ལ། །འདུལ་བའི་ཡུལ་དུ་མཁྱེན་ནས་དོན་མཛད་པ། །དུས་ལས་མི་ཡོལ་སྐད་ཅིག་སོ་སོར་སྣང་། །ཡེ་ཤེས་གཟིགས་པ་ཁྱོད་ལ་ཕྱག་འཚལ་ལོ། །ཞེས་སོ། །དྲུག་པ་སྒྲིབ་པ་ཅན་གྱིས་མི་མཐོང་བ་ནི། ལོག་རྟོག་སོགས།༥ ཐམས་ཅད་ཀྱིས་མཐོང་ངམ་ཞེ་ན། ཕྱིན་ཅི་ལོག་གི་རྟོག་པས་སྒྲིབ་ཅིང་ལས་ངན་པའི་འགྲོ་བ་རྣམས་ཀྱིས་ནི། སྐུ་གསུང་ཐུགས་ཀྱི་རྣམ་པར་རོལ་པ་དེ་དག་མི་མཐོང་སྟེ། དཔེར་ན་ཉི་མའི་འོད་ཟེར་གྱི་རང་བཞིན་དེ་ཉིད་ཀྱིས་ནི་ཕྱོགས་ཀུན་ཏུ་སྒྲིབ་པ་མེད་པར་ཁྱབ་ཀྱང་། མིག་ལོང་གིས་ནི་ཅུང་ཟད་ཀྱང་མི་མཐོང་བ་བཞིན་ནོ། །སྐུ་གསུང་ཐུགས་ཀྱི་གཟུགས་བརྙན་ཞི་ཁྲོ་ལ་སོགས་པ་དེ་དག་མཐོང་བ་ནི། ལས་ཅན་སྐལ་བ་དང་ལྡན་པ་འགྲོ་བའི་མོས་གུས་ཀྱི་རྐྱེན་གྱི་རིགས་སད་པའི་རྟགས་ཡིན་ནོ། །དེའི་ཕྱིར་ན་གཟུགས་ཀྱི་སྐུ་ནི་གདུལ་བྱའི་སེམས་ཉིད་དག་པ་ལ་སྣང་བའོ། །མངོན་རྟོགས་རྒྱན་ལས། ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུང་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་བ་མེད་པས་བཟང་མི་མྱོང་། །ཞེས་དང་། སེམས་དག་མ་དག་གི་ཁྱད་པར་ལས་རྒྱལ་བའི་སྐུ་མཐོང་མི་མཐོང་བའི་དཔེ་ནི། རྒྱུད་བླ་མར། ཇི་ལྟར་བཻ་ཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །འགྲོ་བར་གཟུགས་བརྙན་འཆར་ནུབ་རྙོག་མེད་དང་། །རྙོག་པའི་རང་སེམས་རབ་འཇུག་དབང་གིས་འཇུག །ཅེས་སོ། །བཞི་པ་མཇུག་བསྡུ་བ་ནི། དེ་ལྟར་སོགས།༣ དེ་ལྟར་གོང་དུ་འཁོར་བའི་ཉེས་སྐྱོན་མི་རྟག་སྡུག་བསྔལ་བཤད་པ་དེ་དང་། འགོག་བདེན་མྱ་ངན་ལས་འདས་པའི་ཡོན་ཏན་ནི་དེ་ལགས་པས་དེ་དག་གི་རྒྱུ་སྤང་བླང་ལ་འབད་པར་བྱའོ། །རྩ་བའི་ས་བཅད་བཞི་པ་ལམ་གྱི་བདེན་པ་ལའང་རྣམ་པ་བཞི་སྟེ། ཐར་པ་ལ་གོང་ནས་གོང་དུ་བགྲོད་པར་བྱེད་པས་ན་ལམ་དང་། སྤང་བྱའི་དངོས་གཉེན་དུ་གྱུར་པས་ན་རིགས་པ། སེམས་ཕྱིན་ཅི་མ་ལོག་པས་བསྒྲུབ་བྱ་ཡིན་པས་ན་སྒྲུབ་པ། གཏན་དུ་ཐར་བ་མྱང་འདས་ཀྱི་གནས་སུ་ཁྲིད་པར་བྱེད་པས་ན་ངེས་པར་འབྱིན་པའོ། །ལམ་གྱི་བདེན་པ་ལ་ནང་གསེས་ལྔ་སྟེ། བྱང་ཆུབ་ཆེན་པོའི་རྒྱུ་ཚོགས་བསགས་པའི་ཕྱིར་ཚོགས་ལམ། མཐོང་ལམ་གྱི་བདེན་པ་ལ་སྦྱོར་བའི་ཕྱིར་སྦྱོར་ལམ། སྔར་མ་མཐོང་བའི་ཡེ་ཤེས་གསར་དུ་མཐོང་བས་མཐོང་ལམ། མཐོང་ཟིན་གོམས་པར་བྱེད་པས་སྒོམ་ལམ། བསླབ་བྱ་ཐམས་ཅད་མཐར་ཕྱིན་པའི་མི་སློབ་པའི་ལམ་མོ། །དང་པོ་ཚོགས་ཀྱི་ལམ་ལ་གཉིས་ཏེ། རྒྱུ་བསོད་ནམས་ཀྱི་ཚོགས་དང་། འབྲས་བུ་ཡེ་ཤེས་ཀྱི་ཚོགས་བསགས་པའོ། །དང་པོ་ལ་བདུན་ཏེ། དགྲའི་གཙོ་བོ་བདག་འཛིན་གཞོམ་པ་དང་། །དགོན་པར་ཕྱིན་ལ་ཆོས་སྤྱོད་བཅུ་སྒྲུབ་པ། །བྱང་ཆུབ་མཆོག་ཏུ་སེམས་བསྐྱེད་པ། །དགེ་བའི་དཔུང་གིས་དགྲ་འཇོམ་པ། །སྡིག་པའི་གཉེན་པོ་སྟོང་ཉིད་སྒོམ་པ། སྟོང་ཉིད་ཀྱིས་ཟིན་ན་དགེ་བ་ཚོགས་སུ་འགྱུར་ཞིང་མ་ཟིན་ན་ཐར་ལམ་དུ་མི་འགྱུར་བ། ངར་འཛིན་གྱི་དགེ་བ་བདུད་ལས་སུ་བསྟན་པའོ། །དང་པོ་ནི། དེ་བས་སོགས།༢ འབྲས་བུ་ཆོས་སྐུ་དེ་ཉིད་མངོན་དུ་བྱ་དགོས་པས་རྒྱུ་མཚན་དེ་བས་ན། ཡིད་དང་མཐུན་པའི་རི་ཁྲོད་དགོན་པར་སོང་སྟེ་འདུ་འཛིའི་གཡེང་བ་རྣམས་ཐག་བསྲིང་ལ། ཀུན་འབྱུང་ལས་ཉོན་སྡུག་བསྔལ་ཀུན་གྱི་རྒྱུ་གཙོ་བོ་ནི་རྣམ་རྟོག་བདག་ཏུ་འཛིན་པའི་དགྲ་འདི་ཡིན་པས། དང་པོ་ཉིད་དུ་གཞོམ་ཞིང་སྤོང་བ་ལ་འབད་པར་བྱའོ། །བདག་འཛིན་མགོ་གནོན་གྱི་ཚུལ་དུ་མ་བཅོམ་ན་དགེ་རྩ་ལ་མི་འཇུག་ཅིང་ཞུགས་པ་ལ་བར་ཆད་འབྱུང་བའི་རྐྱེན་ཏུ་འགྱུར་བ་ལ་དགོངས་སོ། །མདོ་བསྐལ་བཟང་ལས། ངོ་ཚ་ཤེས་གོས་དབེན་པ་རོ་ཡིས་ཟས། །བསམ་གཏན་མལ་ཆ་སྟན་དང་དབེན་པའི་ཁྱིམ། །བདག་མེད་རྟོགས་ལ་རབ་ཏུ་དགའ་བྱེད་ན། །མཁས་པ་གཞན་གྱི་བདེ་ལ་འདོད་མི་བྱ། །ཞེས་གསུངས། ཐོག་མར་མངོན་པ་ཀུན་བཏུས་ལས་གསུངས་པའི་ཚོགས་ལམ་གྱི་རྣལ་འབྱོར་བདུན་ལས། ཐོས་པས་བསམ་ལ་བརྩོན་པ་དང་། དབང་པོའི་སྒོ་བསྡོམ་པ་དང་། ཟད་ཀྱི་ཚོད་རིག་པ། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་རྣམས་སྔོན་དུ་གལ་ཆེའོ། །གཉིས་པ་ནི། རྣམ་རྟོག་སོགས།༦ བདག་འཛིན་གྱི་རྣམ་པར་རྟོག་པ་འཁོར་ཀུན་འགྲོ་དགུའི་དཔུང་དང་བཅས་པ་ལ་རྒོལ་བའི་ཤོམ་ར་ཡང་འདི་ལྟར་བྱ་སྟེ། འཇིག་རྟེན་ན་དགྲ་དཔུང་གཞོམ་པ་དང་རང་ལ་མི་ཚུགས་པའི་ཐབས་བྱེད་པ་བཞིན་དུ། དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། ཞེས་དང་དད་པ་ནི་ཆོས་སྣང་བའི་སྒོ་ཡང་ཡིན་པས་ཐར་ལམ་ལ་དང་འདོད་ཡིད་ཆེས་ཀྱི་དད་པ་ས་གཞི་བརྟན་པོའི་གཞི་ལ། སོ་སོའི་སྐྱེ་བོའི་ཚུལ་ཁྲིམས་ཉེས་ལྟུང་གིས་ཞིག་རལ་དུ་མ་སོང་བའི་མཁར་དམ་པོར་བརྩིགས་ཤིང་། དེ་ལ་ཆོས་སྤྱོད་བཅུ་ཡི་སྒོ་ནས་འཇུག་པར་བྱའོ། །ཆོས་སྤྱོད་བཅུ་ནི། ཡི་གེ་འབྲི་མཆོད་སྤྱིན་པ་དང་། །མཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་སྟེ། །འདི་བཅུ་ཆོས་ཀྱི་སྒོ་མོ་ཡིན། །བསོད་ནམས་ཕུང་པོ་དཔག་ཏུ་མེད། །ཅེས་སོ། །རྣམ་སྨིན་ཡིད་དུ་འོང་བ་འབྱིན་པར་བྱེད་པའི་དགེ་བ་བཅུ་ནི་མི་དགེ་བ་བཅུ་ལས་ལོག་ཙམ་མ་ཡིན་པར། གཞན་ལ་སྲོག་བྱིན་པའི་ཚུལ་ཁྲིམས་དང་། སེར་སྣ་མེད་པའི་སྦྱིན་པ་དང་། སྒོ་གསུམ་ཉེས་སྤྱོད་སྡོམ་པ་དང་། རྟག་ཏུ་བདེན་པར་སྨྲ་བ་དང་། འཁྲུག་སློང་དང་འཁོན་པ་ལྡུམ་པ་དང་། གཞན་ཡིད་དགའ་བའི་ཚིག་འཇམ་པ་དང་། དོན་དང་ལྡན་པའི་གཏམ་དང་ཁ་ཏོན་བྱེད་པ་དང་། འདོད་པ་ཆུང་ཞིང་ཆོག་ཤེས་པ་དང་། བྱམས་སྙིང་རྗེ་སྒོམ་པ་དང་། རྒྱུ་འབྲས་ཡིད་ཆེས་ཀྱི་དད་པས་ཆོས་ལ་བརྩོན་པའོ། །དེ་ནི་མི་དགེ་བ་བཅུའི་དངོས་ཀྱི་གཉེན་པོ་ཁྱད་པར་ཅན་ཡིན་པས་ཁྱད་པར་བྱའོ། །འཁོར་ལོ་བཅུ་པར། གང་ཞིག་མྱུར་དུ་བྱང་ཆུབ་མཆོག་འདོད་ན། དགེ་བཅུའི་ལས་ཀྱི་ལམ་ལ་ནན་ཏན་བྱོས། །ང་ཡི་ཆོས་ལ་མ་སྨད་ཤིན་ཏུ་བསྲུང་། །ཞེས་སོགས་སོ། །ཚོགས་སྦྱོར་གཉིས་ལ་མོས་པས་ཐོབ་པའི་ས་ཞེས་བཏགས་པ་དང་སྤྱོད་པས་ཐོབ་པ་ཆོས་སྤྱོད་བཅུ་དང་དགེ་བ་བཅུ་ཡིན་པས་དེ་ལ་དགོངས་སོ། །ཚད་མེད་བཞི་ནི། སེམས་ཅན་ཐམས་ཅད་བདེ་དང་ལྡན་པར་འདོད་པའི་བྱམས་པ། སྡུག་བསྔལ་དང་བྲལ་བར་འདོད་པའི་སྙིང་རྗེ། བདེ་བ་ཡོད་པ་ལ་དེ་དང་མི་འབྲལ་བར་འདོད་པའི་དགའ་བ། ཆགས་སྡང་ཅན་རྣམས་ཉེ་རིང་ཆགས་སྡང་དང་བྲལ་ནས་དགྲ་གཉེན་བར་མ་ཀུན་ལ་སེམས་སྙོམ་པར་འདོད་པའི་བཏང་སྙོམས་སོ། །དམིགས་ཡུལ་ཚད་མེད་པ་དང་བསོད་ནམས་ཚད་མེད་པས་ན་ཚད་མེད་ཅེས་བྱ། བསྡུ་བ་རྣམ་བཞི་ནི་གདུལ་བྱ་འཁོར་དུ་འདུ་བའི་ཕྱིར་སྦྱིན་པ་གཏོང་བ་དང་། མཆོག་གསུམ་གྱི་བསྔགས་པ་སོགས་སྙན་པར་སྨྲ་བའི་གཏན་གྱིས་ཡིད་དགའ་བར་བྱ། དེ་ནས་རང་རང་གི་བློ་དང་འཚམས་པའི་ཆོས་འཆད་ཅིང་སྒྲུབ་ཏུ་འཇུག །དེ་དག་དྲངས་བའི་ཐབས་སུ་རང་གིས་ཀྱང་སྒྲུབ་པའོ། །ཕ་རོལ་ཕྱིན་པ་དྲུག་ནི། སེར་སྣ་མེད་ཅིང་ལན་དང་རྣམ་སྨིན་ལ་མི་རེ་བའི་གཏོང་སེམས་དང་ལྡན་པ་སྦྱིན་པ་དང་། ངེས་འབྱུང་གིས་ཟིན་ཅིང་འཆལ་ཚུལ་སྡོམ་པའི་ཚུལ་ཁྲིམས་དང་། དཀའ་སྤྱད་དང་གནོད་པ་ཀུན་ལ་ཁོང་མ་འཁྲུགས་པའི་བཟོད་པ་དང་། ལེ་ལོ་དང་ཞུམ་པ་མེད་ཅིང་ཆོས་ལ་སྤྲོ་བས་སྒྲུབ་པ་རྒྱུན་བསྲིང་བའི་བརྩོན་འགྲུས་དང་། རྣམ་གཡེང་མེད་པ་དགེ་བའི་དམིགས་པ་ལ་སེམས་རྩེ་གཅིག་འཇོག་པ་བསམ་གཏན་དང་། རྟག་ཆད་དང་བྲལ་བའི་སེམས་ཉིད་ཇི་བཞིན་དུ་རྟོགས་པ་ཤེས་རབ་སྟེ་དྲུག་གོ། །དེ་ཡང་རེ་རེ་ལའང་དྲུག་དྲུག་ཕྱེ་བའི་སོ་དྲུག་དང་། མཆོད་སྦྱིན་ལྟ་བུ་དགེ་བ་སྣ་རེ་ལའང་གཞན་དོན་དུ་སེམས་པ་དང་། མི་མཐུན་ཕྱོགས་སྡོམ་པ་དང་གཞན་ལ་མི་གནོད་ཅིང་དཀའ་བར་བཟོད་པ་དང་། ལྷག་པར་སྤྲོ་བ་དང་ཡིད་གཏོད་པ་དང་བདེན་མེད་སྒྱུ་མ་ལྟར་བལྟ་བར་བྱས་ན་དྲུག་ཀ་ཚང་ངོ་། །དེ་དྲུག་ལ་ཚད་མེད་བཞི་ཡང་ཚང་སྟེ། སྦྱིན་སོགས་ཀྱི་སྒོ་ནས་བདེ་བ་ལ་དངོས་སུ་སྦྱོར་བ་བྱམས་པ། དྲུག་གི་མི་མཐུན་ཕྱོགས་དང་ལྡན་པ་དེ་དང་བྲལ་འདོད་ཀྱི་སྙིང་རྗེ། དྲུག་དང་ལྡན་པ་ལ་ད གའ་བ། དྲུག་གི་འབྲས་བུ་ཅན་ལ་ཆགས་པ་དང་དེ་མེད་པའི་སྡུག་བསྔལ་ཅན་ལ་ཁོང་མི་འཁྲུགས་པའི་བཏང་སྙོམས་སོ། །ཐབས་དང་ཤེས་རབ་གཉིས་ཀས་ཟིན་པ་ལ་ཕ་རོལ་ཏུ་ཕྱིན་པ་ཞེས་བྱའོ། །གཞན་དུ་ན་སྦྱིན་པ་དང་ཚུལ་ཁྲིམས་ཙམ་ལས་ཕ་རོལ་ཏུ་ཕྱིན་པའི་མིང་མེད་དོ། །བྱང་ཆུབ་སེམས་དཔའི་སྤྱོད་པ་ཐམས་ཅད་བསྡུ་ན། ཐེག་ཆེན་གྱི་རིགས་ཅན་རྗེས་སུ་འཛིན་པའི་ཕྱིར་ཕར་ཕྱིན་དྲུག་གི་སྤྱོད་པ། ཐེག་དམན་གྱི་རིགས་ཅན་རྗེས་སུ་འཛིན་པའི་ཕྱིར་བྱང་ཆུབ་ཕྱོགས་མཐུན་གྱི་སྤྱོད་པ། དེ་གཉིས་ཀའི་ཡིད་འདུན་པར་བྱེད་པའི་ཕྱིར་མངོན་ཤེས་རྫུ་འཕྲུལ་གྱི་སྤྱོད་པ། དེ་གཉིས་ཀའི་རྒྱུད་ཆུད་མི་ཟ་བའི་ཕྱིར་སེམས་ཅན་ཡོངས་སྨིན་གྱི་སྤྱོད་པ་བསྡུ་བ་བཞིའོ། །དེ་རྣམས་བདག་དང་གཞན་གྱི་དོན་དུ་ལེགས་པར་སྤྱོད་པར་བྱའོ། །གསུམ་པ་ནི། བདག་རྟོགས་སོགས།༣ བདག་རྟོག་མ་རིག་པའི་དབང་གིས་ལས་བསགས་ལས་ཀྱིས་ཁམས་གསུམ་དུ་འཁོར་བའི་སེམས་ཅན་སྡུག་བསྔལ་བ་རྣམས་ལ་དམིགས་ཏེ། སྙིང་རྗེ་ཆེན་པོའི་ཐབས་ཀྱིས་དེ་དག་བསྒྲལ་བར་བྱའོ་ཞེས་དམ་བཅས་པ་ནི་སྙིང་རྗེས་སེམས་ཅན་ལ་དམིགས་པ་དང་། ཐོག་མར་རང་ཉིད་སངས་མ་རྒྱས་པར་གཞན་སྒྲོལ་མི་ནུས་པས། དེ་ནས་ཤེས་རབ་ཀྱིས་རྫོགས་བྱང་ལ་དམིགས་ཏེ། སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ཅིང་གཞན་དོན་ཁོ་ན་ལ་དམིགས་པའི་སྨོན་ལམ་ཟབ་མོ་རྩེ་གཅིག་ཏུ་བཏབ་བོ། །བློ་གྲོས་རྒྱ་མཚོས་ཞུས་པར། བྱང་ཆུབས་སེམས་དཔའི་སྙིང་རྗེ་ཆེན་པོ་ནི་ཐེག་པ་ཆེན་པོ་ཡང་དག་པར་སྒྲུབ་པ་ཡིན་ནོ། །ཕལ་ཆེན་སོགས་ལས་ཐེག་པ་ཆེན་པོའི་ཆོས་ཐམས་ཅད་ཀྱི་སྔོན་དུ་སྙིང་རྗེ་དང་བྱང་ཆུབ་ཀྱི་སེམས་འགྲོ་དགོས་པ་དང་། དེ་གཉིས་ཀྱི་ཕན་ཡོན་མང་དུ་ཡོད། དེ་གཉིས་ཀའི་གྲོགས་རྣམ་པར་མི་རྟོག་པའི་ཡེ་ཤེས་ཀྱང་མོས་པ་ཡིད་བྱེད་ཡན་ཆད་དགོས་པ་ཡིན་ནོ། །བཞི་པ་ནི། དེ་ལ་སོགས།༦ དེ་ལ་སོགས་པ་དགེ་བའི་རྒྱབ་དཔུང་གི་གྲོགས་དང་བཅས་པ་ལ་བརྟེན་ནས། སྒྱིད་ལུག་མེད་པའི་བརྩོན་འགྲུས་ཀྱི་གོ་གྱོན་ཞིང་། ཐེག་པ་ཆེན་པོའི་སེམས་བསྐྱེད་པའི་རྟ་བཟང་པོ་ལ་ཞོན་ཏེ། གཉེན་པོའི་ཐབས་རྣམས་མི་བརྗེད་པའི་དྲན་པ་དང་། ཡེང་པ་མེད་པའི་ཤེས་བཞིན་གཉིས་ཀྱི་སོ་བཙུག་པ་སྟེ། དྲན་ཤེས་ཀྱི་མིག་གིས་བྱ་ར་བྱས་ནས་སྤང་བྱའི་གླགས་ཡོད་མེད་ལྟ་བ་དང་། ཐོས་བསམ་གྱི་ཤེས་རབ་རལ་གྲི་རྣོན་པོའི་མཚོན་ཐོགས་ཤིང་རྩེ་གཅིག་པའི་ཞི་གནས་བསམ་གཏན་གྱི་གཞུང་བརྡུངས་ཏེ། ལྷག་མཐོང་བདག་མེད་རྟོགས་པ་སྟོང་པ་ཉིད་ཀྱི་མཚོན་ཆ་ཆེན་པོ་རྡོ་རྗེ་ལྟ་བུ་དེ་ཉིད་ཀྱིས། གང་གཞོམ་ན་རྣམ་རྟོག་བདག་ལྟ་རི་རབ་ལྷུན་སྟུག་ཅིང་མཐོ་བ། ཉོན་མོངས་པའི་བྲག་རྡོ་རབ་ཏུ་བརྩིགས་པའི་སྲ་ཞིང་བརྟན་པ་དེ་ཉིད་ཀྱི་རྩེ་ནས་བརྒྱ་བྱིན་ལག་གི་རྡོ་རྗེས་རིའི་རྐང་པ་བཅག་པ་བཞིན་དུ་གཞོམ་པར་བྱའོ། །འདི་འཇིག་ལྟ་ལ་རིའི་རྩེ་མོ་ཉི་ཤུ་ཞེས་མདོ་ལས་དཔེ་དཔེ་ཅན་སྦྱར་ནས་གསུངས་པ་ལྟར་རོ། །སྐབས་འདིར་ཚོགས་ལམ་ཡིན་ཚེ་ཐོས་བསམ་གྱི་ཤེས་རབ་ལ་བསྟེན་ནས་བདག་ལྟ་མགོ་མནན་པའི་ཚུལ་གྱིས་སྤོང་བ་ལས། དྲུང་ནས་སྤངས་པ་མ་ཡིན་ཏེ་སོ་སྐྱེ་ལ་བདག་མེད་མངོན་སུམ་རྟོགས་པ་མི་འཇོག་པས་སོ། །དབང་པོ་རབ་ཏུ་རྣོན་པོ་སྔོན་གོམས་པ་རྒྱུའི་སྟོབས་ཅན་ཚེ་འདིར་སྦྱོར་ལམ་སྐྱེ་ངེས་ཀྱི་གང་ཟག་ཡིན་ན་གཉེན་པོ་ཟབ་པས། སྤང་བྱ་ཉམས་སུ་སྨད་པར་བྱེད་པ་ཡོད་རུང་ངོ་། །ཚོགས་ལམ་ན་གོ་བ་སྤྱིའི་འོད་གསལ། སྦྱོར་ལམ་ན་མྱོང་བ་དཔེའི་འོད་གསལ། མཐོང་ལམ་ན་རྟོགས་པ་དོན་གྱི་འོད་གསལ་ཞེས་བཤད་སྲོལ་ཡོད། ལྔ་པ་ནི། དེ་ཕྱིར་སོགས།༦ རྒྱུ་མཚན་དེའི་ཕྱིར་ན། རིན་ཆེན་ཕྲེང་བ་ལས། དད་ཅན་ཉིད་ཕྱི་ཆོས་ལ་བསྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་ཤེས་རབ་སྟེ། །དེ་ཡི་སྔོན་འགྲོ་དད་པ་ཡིན། །ཞེས་པ་ལྟར་ལས་འབྲས་དང་ཐར་ལམ་ལ་དང་བ་གསུམ་གྱིས་དྲངས་ཏེ། བརྩོན་འགྲུས་ནི། རྒྱན་ལས། རྒྱལ་སྲས་བརྩོན་འགྲུས་མཆོག་ལ་བསྟེན་པ་སྟེ། །སེམས་ཅན་ཚོགས་རབ་སྨིན་པར་བྱེད་པ་ན། །ཕ་རོལ་སེམས་དགེ་གཅིག་གི་ཕྱིར་ཡང་ནི། །བསྐལ་པ་བྱེ་བ་སྟོང་དུའང་སྐྱོ་མི་འགྱུར། །ཞེས་དང་། བློ་གྲོས་རྒྱ་མཚོས་ཞུས་པ་ལས། གང་ལ་བརྩོན་འགྲུས་ཡོད་པ་དེ་ལ་བྱང་ཆུབ་ཡོད་མོད་ཀྱི། །ལེ་ལོ་ཅན་རྣམས་ལ་ནི་མ་ཡིན་ནོ། །ཞེས་དང་། བརྩོན་འགྲུས་གང་ཞེ་ན། དགེ་བ་ལ་སྤྲོ་བའོ། །མི་དགེ་བ་དང་ལུང་མ་བསྟན་གྱི་ཆོས་ལ་སྤྲོ་བ་ནི་ལེ་ལོའོ། །དྲན་པ་ནི། གཙུག་ན་རིན་པོ་ཆེས་ཞུས་པ་ལས། དྲནཔ་གང་གིས་ཉོན་མོངས་པ་ཐམས་ཅད་འབྱུང་བར་མི་འགྱུར་བ་དང་། བདུད་ཀྱི་ལས་ཐམས་ཅད་ཀྱིས་སྐབས་མི་པ་དང་། ལམ་གོལ་བའམ་ངན་པར་མི་འགྲོ་བ་དང་། དྲན་པ་སྒོ་པ་ལྟ་བུར་གྱུར་པ་གང་གིས། སེམས་དང་སེམས་ལས་བྱུང་བའི་ཆོས་མི་དགེ་བ་ཐམས་ཅད་ཀྱིས་སྐབས་མི་འབྱེད་པ་འདི་ནི་ཡང་དག་པའི་དྲན་པའོ། །གནང་བཀག་གཉིས་དང་དམིགས་པ་མི་བརྗེད་པ་སྟེ། དྲན་པ་ནི་འདས་པའི་ཡུལ་ཅན་ཡིན་པས། དྲན་པ་ནི་འདྲིས་པའི་དངོས་པོ་མ་བརྗེད་པའོ། །ཞེས་གསུངས། ཤེས་བཞིན་ནི། ཤེར་མདོར། སྤྱོད་ནའང་བདག་སྤྱོད་དོ་ཞེས་རབ་ཏུ་ཤེས་སོ་ནས་འགྲོ་འདུག་ཟ་ཉལ་སོགས་ནང་དུ་མཉམ་པར་འཇོག་པའི་བར་དེ་དག་ཤེས་བཞིན་དུ་སྤྱོད་པ་ལ་བཤད་དོ། །ཤུགས་ལ་བག་ཡོད་ཀྱང་འབྱུང་རིགས་པས། བསླབ་བཏུས་ལས། བག་ཡོད་པ་གང་ཞེ་ན། མ་ཆགས་པ་དང་ཞེ་སྡང་མེད་པ་དང་གཏི་མུག་མེད་པ་བརྩོན་འགྲུས་དང་བཅས་པ་ལ་གནས་ནས། དགེ་བའི་ཆོས་རྣམས་སྒོམ་པ་དང་ཟག་པ་དང་བཅས་པའི་ཆོས་རྣམས་ལས་སེམས་སྲུང་བ་སྟེ། ཞེས་སོགས་ཀྱིས་འཇུག་ལྡོག་གི་གནས་ལ་གཟོབ་པ་ལྷུར་ལེན་པའོ། །གཞན་ཡང་འདུལ་བ་དང་སྲེད་པའི་ཚོམ་ལས། བག་ཡོད་པའི་ཕན་ཡོན་དང་བག་མེད་ཀྱི་ཉེས་དམིགས་མང་དུ་གསུངས། འདི་སྐད་དུ། ཟག་པ་ཟད་པ་མ་ཐོབ་ཀྱང་། །དུས་འདིར་བག་མེད་མི་བྱ་སྟེ། །རི་དྭགས་མ་ཡིས་སེང་གེ་ལྟར། །བག་མེད་པ་དག་གསད་པར་འགྱུར། །ཞེས་སོ། །བྱམས་པ་འཇུག་པའི་མདོར། །རྩ་བའི་སྒོ་དང་ཚུལ་གྱི་ལམ། བག་ཡོད་པ་དང་བརྩོན་འགྲུས་ཡིན། །མཁས་པ་རྣམས་ཀྱིས་འདི་ལ་སློབས། །ཞེས་སོ། །ཞི་གནས་ནི། དཀོན་མཆོག་སྤྲིན་ལས། ཞི་གནས་ནི་སེམས་རྩེ་གཅིག་པའོ། །ཞེས་དང་ལྷ་མཐོང་ཡང་དེ་ལས། ལྷག་མཐོང་ནི་ཡང་དག་པ་ཇི་ལྟ་བ་བཞིན་དུ་ཆོས་ལ་སོ་སོར་རྟོག་པའོ། །དོན་དམ་དཔྱོད་པའི་རིགས་པས་ཕྱི་ནང་གི་ཆོས་རྣམས་སོ་སོར་རྟོག་ཅིང་དཔྱོད་པས་གནས་ལུགས་ལ་ངེས་པ་རྙེད་པ་ནི་དཔྱད་སྒོམ་གྱི་ལྷག་མཐོང་རྗེས་སུ་མཐུན་པ་ཡིན་ཏེ་ཕུང་པ་ལྔ་པོ་དེ་དག་ལ་རང་བཞིན་གྱིས་སྟོང་པ་རྣམ་པར་ཡང་དག་པར་རྗེས་སུ་བལྟའོ། །ཞེས་པ་ལྟར་རོ། །ཆོས་ཡང་དག་པར་སྡུད་པར། ཡིད་མཉམ་པར་བཞག་པ་ལས་ཡང་དག་པ་ཇི་ལྟ་བཞིན་དུ་མཐོང་བར་འགྱུར་རོ། །ཞེས་གསུངས་པ་ནི་ཞི་ལྷག་ཟུང་འབྲེལ་གྱི་དོན་ནོ། །དེ་རྣམས་ཀྱིས་སྟོང་ཉིད་བསྒོམ་ཞེས་པ་ཐོས་བསམ་གྱིས་དཔྱད་པའི་སྟོང་ཉིད་དོན་སྤྱིའི་གོ་བ་དེ། ཞི་གནས་ལ་བསྟེན་ནས་བསྒོམ་པས་མྱོང་རྟོགས་ཀྱི་རིགས་པ་སྐྱེས་པ་ལྷག་མཐོང་མཚན་ཉིད་པ་སྟེ། བསླབ་བཏུས་ལས། མཉམ་བཞག་ཡང་དག་ཇི་བཞིན་དུ། །ཤེས་པར་འགྱུར་ཞེས་ཐུབ་པས་གསུངས། །ཞེས་སོ། །དཔེར་ན་རི་མཐོན་པོའི་ཁར་ཕྱིན་ཏེ་བལྟས་ན་ཐམས་ཅད་གསལ་བར་མཐོང་བ་བཞིན་དུ། ཏིང་ངེ་འཛིན་འདི་གཉིས་ཀྱི་ནང་དུ་ཏིང་ངེ་འཛིན་ཐམས་ཅད་རང་སྣང་བར་གསུངས་པས་ལམ་གྱི་གནད་ཐམས་ཅད་འདི་གཉིས་སུ་འདུ་བའོ། །དེའང་གནས་སྐབས་རྟོག་པས་སྒོམ་པ་ཡིན་པས་རྟོགས་པ་ཀློང་དུ་མ་གྱུར་བར་དུ། བདག་འཛིན་སོགས་ཀྱི་གཉེན་པོ་འཛིན་སྟངས་འགལ་བ་བདག་མེད་ཡིད་བྱེད་ཀྱི་སྐྱོང་དགོས་པའོ། །འོན་ཀྱང་སོ་སྐྱེས་མཉམ་བཞག་ལ་གནས་ལུགས་མངོན་གྱུར་མེད་ཀྱང་ངེས་ཤེས་ཕུ་ཐག་ཆོད་པ་ཐོབ་ཚེ་ངེས་ཤེས་ཀྱི་ཡུལ་དེ་ལ་འཛིན་སྟངས་ཀྱིས་དམིགས་པ་ཆེད་གཏད་མི་བྱེད་པར་རེ་འགའ་རྟོག་མེད་དུའང་འཇོག །རྗེས་ཐོབ་དཔྱད་སྒོམ་འཛིན་སྟངས་ཅན་སྨོས་མ་དགོས། སྟོང་ཉིད་བསྒོམས་པས་འཁོར་བའི་སྡུག་བསྔལ་ཞི་ཞིང་ཐར་བའི་བདེ་བ་ཀུན་གྱི་རྒྱུ་ཡི་མཆོག་གོ། །ཞེས་སྤྱིར་བསྟན་ནས་གང་ཟག་གི་བདག་སྟོང་པ་དང་ཆོས་ལ་རྟག་པས་སྟོང་པ་སོགས་གཉེན་པོ་ཆུང་ངུ་རྟོགས་པས་ཀྱང་། སྲིད་པའི་རྒྱུ་ཟད་ནས་ཉན་ཐོས་དགྲ་བཅོམ་གྱི་འབྲས་བུ་དང་བདག་མེད་ཕྱེད་གཉིས་དང་ཆོས་རྟེན་ཅིང་འབྲེལ་བར་འབྱུང་བ་མཐོང་བས་རང་རྒྱལ་དགྲ་བཅོམ་པའི་འབྲས་བུ་ཐོབ་བོ། །ཐབས་དང་ཤེས་རབ་འབྲེལ་བའི་བདག་མེད་གཉིས་ཀྱིས་སྟོང་པ་ཉིད་ཕྱིན་ཅི་མ་ལོག་པ་བསྒོམས་པས། ཆོས་ཐམས་ཅད་ལ་བདག་གཉིས་སུ་འཛིན་པའི་བློ་ཕྱིན་ཅི་ལོག་དང་། དེས་བསྐྱེད་པའི་ཉོན་མོངས་པ་དང་སྡུག་བསྔལ་དང་མཚམས་མེད་པ་ལྔ་ལ་སོགས་པ་སྡིག་པ་ཆེན་པོ་འཇོམས་པའི་གཉེན་པོ་མཆོག་ཏུ་གསུངས། ཆོས་ཐམས་ཅད་རང་བཞིན་གྱིས་མ་སྐྱེས་པའོ་ཞེས་ཡིད་ལ་བྱེད་པས་ཀྱང་མཚམས་མེད་ཀྱི་སྡིག་པ་འདག་པ་སོགས་མདོ་ལས་མང་དུ་འབྱུང་། དཀོན་མཆོག་བརྩེགས་པ་ལས། འོད་སྲུངས་ཚུལ་བཞིན་ཡིད་ལ་བྱེད་པའི་སོ་སོར་རྟོག་པ་གཅིག་གིས་བསྐལ་པ་འབུམ་དུ་བསགས་པའི་ལས་དང་ཉོན་མོངས་པ་རྣམས་བྱང་བར་འགྱུར་རོ། །ཞེས་སོ། །གཉེན་པོ་སྟོབས་བཞིས་བཤགས་པ་སྔོན་དུ་བཏང་ནས་དངོས་གཞི་སྟོང་ཉིད་སྒོམ་པ་ཤིན་ཏུ་ལེགས། ཨཱརྱ་དེ་བས། བསོད་ནམས་ཆུང་ངུའི་ཆོས་འདི་ལ། །ཐེ་ཚོམ་ཙམ་ཡང་སྐྱེ་མི་འགྱུར། །གལ་ཏེ་ཐེ་ཚོམ་སྐྱེས་གྱུར་ན། །སྲིད་པའི་རྩ་བ་ཧྲུལ་པོར་བྱེད། །ཅེས་དང་། འཕགས་པ་ཀླུས། གཞི་མེད་སྲིད་པ་འཇིག་བྱེད་པ། །སྟོང་ཉིད་འདི་ནི་རྟག་ཏུ་བསྒོམ། །ཞེས་སོ། །དྲུག་པ་ནི། དེས་ཟིན་སོགས།༧ བྱང་ཆུབ་ཀྱི་སེམས་དང་སྟོང་ཉིད་རྟོགས་པའི་ཤེས་རབ་དེས་ཟིན་ན་སྦྱིན་སོགས་ལྔ་པོ་སྤྱོད་པ་ཕ་རོལ་དུ་ཕྱིན་པའི་ཚོགས་སུ་འགྱུར་ལ། དེས་མ་ཟིན་ན་སྦྱིན་སོགས་སོ་སོའི་འབྲས་བུ་ལྷ་མའི་དཔལ་ཙམ་རེ་མྱོང་ནས། ཆུ་ཤིང་བཞིན་དུ་ཟད་པར་འགྱུར་ཏེ་རྣམ་པར་གྲོལ་བའི་རྒྱུར་མི་འགྱུར་རོ། །སྡུད་པར། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །ཞེས་གསུངས་པས་རྣམ་གྲོལ་ཐར་པའི་རྒྱུ་ཤེས་རབ་ཡིན་ནོ། །བདག་དང་བདག་གིར་ལྟ་བ་ལ་གནས་པའི་བྱིས་པ་གང་ཞིག །འཇིག་རྟེན་པའི་ལྟ་བ་ལ་གནས་ནས་བདག་ནི་ཚུལ་ཁྲིམས་དང་ལྡན་པའོ་ཞེས། ཚུལ་ཁྲིམས་ལ་མངོན་རློམ་ཞུགས་ནས་སྲུང་སེམས་ཡོད་ཀྱང་འཁོར་གསུམ་དུ་ཞེན་པ་དེ་ཡིས། ཚུལ་ཁྲིམས་བསྲུང་བའི་འབྲས་བུས་ལྷ་མའི་བདེ་བ་ཙམ་མྱོང་ནས་ནི་ཕྱིིར་ཡང་ངན་སོང་གསུམ་དུ་བྱིས་པ་དེ་འཁོར་བར་འགྱུར་རོ། །འཇུག་པ་ལས། གལ་ཏེ་དེ་ནི་ཁྲིམས་དག་རང་བཞིན་ལྟ། །དེ་ཕྱིར་དེ་ནི་ཚུལ་ཁྲིམས་དག་མི་འགྱུར། །ཞེས་ལྟ་བས་མ་དག་པའོ། །འོ་ན་ཚུལ་ཁྲིམས་བརྟུལ་ཞུགས་མཆོག་འཛིན་དང་འདྲའམ་ཞེ་ན། དེ་ནི་ངེས་འབྱུང་དང་ཤེས་རབ་གང་གིས་ཀྱང་མ་ཟིན་པའི་ལྟ་བ་ངན་པའི་རྗེས་སུ་འབྲང་བའི་ཚུལ་ཁྲིམས་དང་ཁྱི་དང་བ་ལང་གི་བརྟུལ་ཞུགས་ལ་ཐར་ལམ་དུ་འཛིན་པ་ཡིན། དེ་ཕྱི་རོལ་པ་ལས་ནང་པ་སངས་རྒྱས་པ་ལ་མེད། ནང་པའི་ཚུལ་ཁྲིམས་ངེས་འབྱུང་གིས་ཟིན་ཅིང་ལྟ་བ་དང་ལྡན་ན་དག་གྲོལ་ངེས་འབྱིིན་དུ་འཛིན་པ་ལམ་མ་ནོར་བ་ཡིན་པས་མི་འདྲ་ཞེས་ཟེར། འོན་ཀྱང་ལྟ་བ་མེད་ན་ངེས་འབྱུང་དང་རྒྱུ་འབྲས་ཡིད་ཆེས་ཀྱི་ལྟ་བ་ཡོད་པ་ཙམ་གྱིས་དག་གྲོལ་གྱི་ལམ་དུ་མི་འགྱུར་རོ། །ཚངས་པ་ཁྱད་པར་སེམས་ཀྱིས་ཞུས་པ་ལས། ལུས་ནི་གཟུགས་བརྙན་ཉིད་དང་འདྲ། །ངག་ནི་བྲག་ཆ་ཇི་བཞིན་ཏེ། །སེམས་ནི་སྒྱུ་མ་འདྲར་རིག་ནས། །དེ་དག་ཚུལ་ཁྲིམས་མི་སྙེམས་སོ། །ཞེས་གསུངས་པས་ཚུལ་ཁྲིམས་ཀྱིས་སྙེམས་པའི་ང་རྒྱལ་སྤོང་འདོད་ན་དེ་ལྟ་བུ་དགོས་སོ། །ཨཱརྱ་དེ་བས། ཆོས་ཆགས་དེ་བཞིན་གཤེགས་རྣམས་ཀྱིས། །མཐོ་རིས་འདོད་པ་རྣམས་ལ་གསུངས། །ཐར་པ་འདོད་པ་ལ་དེ་ཉིད། །སྨད་འགྱུར་གཞན་དུ་སྨོས་ཅི་དགོས། །ཞེས་སོ། །བདུན་པ་ནི། བདག་འཛིན་སྒྱུ་མ་མཁན་སོགས།༧ བདག་དང་བདག་གིར་འཛིན་པ་སྒྱུ་མ་མཁན་ལྟ་བུ་སྒྱུ་འཕྲུལ་སྣ་ཚོགས་ཀྱི་བདག་པོ་དེ། རང་རྒྱུད་ལ་བག་ལ་ཉལ་གྱི་ཚུལ་དུ་ཡོད་པ་དེ་སྲིད་ཀྱི་བར་དུ་ནི། བསམ་གཏན་གྱི་ལྷ་ལྟ་བུ་གཡོ་འགུལ་མེད་པ་རི་དང་འདྲ་བའི་ཞི་གནས་དང་བསམ་གཏན་བསྒོམ་ཀྱང་འཁོར་བ་ལས་མི་གྲོལ་བའི་ཕྱིར། ཕྱི་ནང་གི་དངོས་པོ་ཐམས་ཅད་རྒྱུ་རྐྱེན་ལས་སྐྱེས་པའི་རྟེན་འབྲེལ་ཙམ་ཤེས་ཀྱང་དངོས་པོའི་རང་བཞིན་མེད་པ་སྒྱུ་མའི་རྟེན་འབྲེལ་བཞིན་མ་རྟོགས་ན་རྒྱུ་འབྲས་མི་བསླུ་བར་ཤེས་ནས་མཆོད་སྦྱིན་གྱི་གཏོང་ཕོད་དང་། ཐོས་པ་མང་པོ་འཛིན་པའི་ཡོན་ཏན་དང་དད་བརྩོན་སོགས་ཀྱིས་འབད་པའི་དཀའ་ཐུབ་ལ་ཡུན་རིང་དུ་སྤྱད་ཀྱང་། བདག་འཛིན་གྱི་རྣམ་པར་རྟོག་པ་དང་བཅས་པའི་དགེ་ཚོགས་ཡིན་པས། འཁོར་བའི་རྒྱུ་ལས་མ་འདས་པའི་ཕྱིར་རྣམ་གཡེང་བདུད་ཀྱི་ལས་ཡིན་པར་མདོ་ལས་གསུངས་སོ། །དེ་བས་ན་ཐར་ལམ་གྱི་གཙོ་བོ་སྟོང་པ་ཉིད་ནི་རྟག་ཏུ་བསྒོམ་པར་བྱའོ། །ཆོས་ཟབ་མོ་ལ་འཚེ་བ་མང་བའི་རྒྱུ་མཚན་ཤེར་ཕྱིན་སྒོམ་པ་ལ་བདུད་ཀྱི་གླག་ལྟ་བ་བཞིན་དང་། བསྔགས་འོས་བསྔགས་བསྟོད་དུ། ཁྱོད་ཀྱི་བསྟན་ལ་མི་ཕྱོགས་པའི། །སྐྱེ་བོ་མ་རིག་མདོང་རྣམས་ཀྱིས། །སྲིད་རྩེ་བར་དུ་ཕྱིན་གྱུར་ཀྱང་། །སྡུག་བསྔལ་ཡང་འབྱུང་སྲིད་པ་སྒྲུབ། །ཁྱོད་ཀྱི་བསྟན་པའི་རྗེས་འབྲང་བ། །བསམ་གཏན་དངོས་གཞི་མ་ཐོབ་ཀྱང་། །བདུད་ཀྱི་མིག་རིས་བཙའ་བཞིན་དུ། །སྲིད་པ་རྣམས་ནི་ལྡོག་པར་འགྱུར། །ཞེས་དང་། འཕགས་པ་ཀླུས། ཚངས་རིས་ལ་སོགས་བསམ་གཏན་ལྷུན་གྲུབ་ཀྱང་། །བདག་རྟོག་བག་ལ་ཉལ་བ་མ་གཟིགས་པས། །ཕྱི་ནས་དམྱལ་བར་སྐྱེ་བ་ཆ་མེད་དོ། །ཞེས་སོ། །མཆོད་སྦྱིན་གཏོང་ཕོད་རྟེན་བཞེང་སོགས་གཙོ་བོ་ཁྱིམ་པ་རྣམས་ལ་གསུངས་ཀྱི། རབ་ཏུ་བྱུང་བ་རྣམས་ལ་ཀློག་སྤོང་གི་བྱ་བ་ལ་འབད་དགོས་པ་དཀོན་བརྩེགས་སོགས་ལས་མང་དུ་གསུངས་སོ། །གཉིས་པ་འབྲས་བུ་ཡེ་ཤེས་ཀྱི་ཚོགས་ལ་གསུམ། ཆོས་ཀུན་སྟོང་ཉིད་དུ་བརྟགས་པ། འཁོར་འདས་ཀྱི་ཆོ་འཕྲུལ་ཤེས་ངོར་སྣ་ཚོགས་སྣང་ཡང་དོན་ལ་མེད་པ། བདེན་གཉིས་སོ་སོར་ཕྱེ་ནས་བསྟན་པའོ། །དང་པོ་ནི། ཆོས་ཀུན་སྟོང་པ་སོགས་འཁོར་འདས་ཀྱི་ཆོས་ཀུན་གྱི་རང་བཞིན་ནི་འདི་ལྟར་ཡེ་ནས་སྤྲོས་པ་དང་བྲལ་བ་སྟོང་པ་ཉིད་དུ་གནས་པས། ལུང་རིགས་དུ་མས་དཔྱད་ནས་སྒོམ་ཚེ་འདི་ལྟར་བརྟག་གོ་ཞེས་མདོར་བསྟན་ལ། རྩ་ཤེས་ལས། མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་བཤད། །ཅེས་སོ། །གཉིས་པ་ནི། འཁོར་དང་སོགས།༨ སྤང་བྱ་འཁོར་བར་སྣང་བ་འདི་དང་བླང་བྱ་མྱ་ངན་ལས་འདས་པའི་ཆོས་འདི་རྣམས་ནི། ཡེ་ནས་དངོས་འཛིན་དུ་གོལ་བའི་འཁྲུལ་རྟོག་ཅན་རྣམས་ལ་ཕྱིན་ཅི་ལོག་གི་ཀུན་རྫོབ་གྱི་ན་ཙམ་སྟེ། དྷ་དྷུ་ར་ཟོས་པའི་མེད་པ་གསལ་སྣང་བཞིན་ནོ། །རྟེན་ཅིང་འབྲེལ་བར་འབྱུང་བའི་དབང་གིས། སྣང་བ་ཙམ་ལས་བདེན་དངོས་སུ་སྣང་བ་ནི། ཡེ་ནས་ལོག་རྟོག་གོམས་པའི་འདུ་ཤེས་བརྟས་པའི་དབང་གིས་ནི་འཁྲུལ་སྣང་ཙམ་ལས་དོན་གྱི་རང་བཞིན་ལ་མེད་ཀྱང་། མེད་བཞིན་འདི་ལྟར་སྣང་སྟེ། དག་པ་སངས་རྒྱས་དང་མ་དག་པ་སེམས་ཅན་དང་རྒྱུ་ལམ་དང་འབྲས་བུ་འགོག་པ་དང་། རྒྱུ་དགེ་སྡིག་དང་འབྲས་བུ་བདེ་སྡུག་དང་ཕྱི་དང་ནང་དང་སྣོད་བཅུད་སྐྱེ་འཇིག་སོགས་དང་། བྱ་བ་དང་བྱེད་པ་པོ་དང་དོན་བྱེད་ནུས་པ་དང་། མི་ནུས་པ་དང་། འདུས་བྱས་དང་འདུས་མ་བྱས་དང་། རྒྱུ་དང་འབྲས་བུ་སོགས་གཉིས་མེད་གཉིས་སུ་སྣང་བ་དངོས་མེད་དངོས་པོར་སྣང་བ་སྣ་ཚོགས་པ་འདི་ལ་བརྟགས་ན། སྣ་ཚོགས་སྣང་ཡང་མི་བདེན་པ་རྨི་ལམ་གྱི་ཡུལ་ཇི་ལྟ་བ་བཞིན་དུ་ད་ལྟར་འཁྲུལ་ངོར་མངོན་སུམ་དུ་སྣང་མོད་ཀྱང་། དོན་དམ་དཔྱོད་བྱེད་ཀྱི་རིག་པ་གཅིག་ཏུ་བྲལ་སོགས་ཀྱིས་དཔྱད་ཅིང་གཞིག་ན་སྣང་བ་དེ་དག་གང་ལའང་རང་བཞིན་རྡུལ་ཙམ་མེད་དོ། །ཡབ་སྲས་མཇལ་བ་ལས། ནོར་བུ་རིན་ཆེན་རང་བཞིན་ཡོངས་དག་པ། །གོས་ཀྱི་དྲུང་བཞག་སྣ་ཚོགས་ཚོན་དུ་འགྱུར། །དེ་བཞིན་རང་བཞིན་ཡོངས་དག་ཆོས་རྣམས་ཀྱང་། །ལོག་པའི་རྣམ་པར་རྟོག་པས་དེ་ལྟར་འགྱུར། །ཞེས་དང་། མདོ་སྡེའི་རྒྱན་ལས། ཇི་ལྟར་ཚུལ་བཞིན་བྲིས་པའི་རི་མོ་ལ། །མཐོ་དམན་མེད་ཀྱང་སྣང་བ་དེ་བཞིན་དུ། །ཡང་དག་མ་ཡིན་རྟོགས་ལ་རྣམ་ཀུན་ཏུ། །གཉིས་པོ་རྟག་ཏུ་མེད་ཀྱང་སྣང་བར་འགྱུར། །ཞེས་གསུངས། འཁོར་འདས་ཀྱི་ཆོས་ཐམས་ཅད་མེད་ན་སངས་རྒྱས་ཀྱིས་ཆོས་གསུངས་སེམས་ཅན་འཁོར་བ་ལས་བསྒྲལ་བ་སོགས་མི་འཐད་ཅེ་ན། དེ་ནི་ཐ་སྙད་རྟེན་འབྲེལ་གྱི་སྣང་བ་ལས་དོན་ལ་མེད་དེ། ཏིང་རྒྱལ་ལས། ཀུན་རྫོབ་ཏུ་ནི་རྒྱལ་བས་ཆོས་བཤད་དེ། །འདུས་བྱས་འདུས་མ་བྱས་ཡིན་དེ་ལྟར་ལྟོས། །ཡང་དག་ཉིད་དུ་བདག་དང་སེམས་ཅན་མེད། །འགྲོ་བ་ཀུན་གྱི་མཚན་ཉིད་དེ་འདྲའོ། །ཞེས་དང་། ཐམས་ཅད་བསམ་ཡས་ཐམས་ཅད་འབྱུང་མིན་པས། །དངོས་དང་དངོས་མེད་ཤེས་པ་རྣམ་པར་བཤིག །བྱིས་པ་གང་དག་སེམས་ཀྱི་དབང་སོང་བ། །དེ་དག་སྲིད་པ་བྱེ་བ་བརྒྱར་སྡུག་བསྔལ། །ཞེས་སོ། །ངག་གི་དངོས་པོར་སྨྲ་བ་དང་ཡིད་ཀྱིས་དངོས་པོར་འཛིན་པའི་ཉེས་པ་ཐམས་ཅད་སྡོམ་པར་བྱེད་པ་ལ་རྨི་ལམ་གྱི་དཔེ་འདི་ཟབ་སྟེ། མདོ་དེ་ལས། དོན་དམ་བདེན་པ་རྨི་ལམ་འདྲ་བ་དང་། །མྱ་ངན་འདས་པ་རྨི་ལམ་མཚུངས་པར་འགྱུར། །གང་གིས་མཁས་པ་དེ་ལྟར་འཇུག་པ་ཡང་། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཅེས་དང་། འགོག་པའི་བདེན་པ་རྨི་ལམ་ཇི་བཞིན་ཏེ། །མྱ་ངན་འདས་པའང་རྨི་ལམ་རང་བཞིན་དུ། །གང་ལ་བྱང་ཆུབ་སེམས་དཔའ་ངག་འཇུག་པ། །དེ་ནི་ངག་གི་སྡོམ་པ་དེ་ཞེས་བྱ། །ཞེས་སོ། །གཞན་ཡང་སྣ་ཚོགས་བདེན་པར་འཛིན་པ་ཟློག་བྱེད་རྨི་ལམ་དང་མགོ་མཚུངས་ཀྱི་ལུང་མང་ངོ་། །རྨི་ལམ་ན་བདེ་སྡུག་དང་བྱ་བྱེད་སོགས་རྨི་ལམ་གྱི་རིང་དུ་བདེན་པར་སྣང་ཞིང་དོན་བྱེད་པར་སྣང་བ་བཞིན་དུ། སད་དུས་ཀྱང་རྨོངས་པའི་དབང་གིས་དེ་ལྟར་སྣང་བ་ཙམ་ལས་དོན་ལ་ཅི་ཡང་མྱོང་བ་མེད་དོ། །དབུ་མ་ཐལ་འགྱུར་བ་ནི་བདེན་མེད་སྒྲུབ་བྱེད་གཅིག་དུ་བྲལ་དང་རྟེན་འབྲེལ་སྒྱུ་མ་སོགས་ཀྱིས་ཉེ་བར་གཞལ་ན་ཚེགས་མེད་པར་ངེས་སླ་ལ། བསྒྲུབ་བྱ་སྒྲུབ་བྱེད་གཉིས་ཀ་རང་བཞིན་མེད་པར་མཚུངས་ཤིང་གཏན་ཚིགས་དེ་དག་ལ་ཞེན་པའང་མེད་དོ། །རྟོག་གེའི་གཞུང་ལས་གྲགས་པའི་མངོན་རྗེས་ལ་སོགས་པ་ནི་གོ་དཀའ་ཞིང་ཚད་མ་བསླུ་མེད་ཅེས་སོ་སྐྱེས་ཤེས་པ་ལ་བདེན་པར་མངོན་པར་ཞེན་ནོ། །ཐ་སྙད་རྒྱུ་འབྲས་ཀྱི་ཆོས་རྣམས་འཆོལ་མེད་དུ་སྒྲུབ་བྱེད་ཡིན་པས་ཞེན་ཡང་སྐྱོན་མེད་སྙམ་ན། རང་བཞིན་མེད་པར་ངེས་ནས་མེད་བཞིན་སྣང་བ་ཙམ་འཕགས་པའི་རྗེས་ཐོབ་དང་འཇིག་རྟེན་རྒན་པོ་ཕན་ཆད་ལ་ཡོངས་སུ་གྲགས་པ་དེས་མི་ཚིམ་པར། སླར་ཡང་རིགས་ཤེས་རྣོན་པོས་དཔྱད་ནས་རྙེད་པ་ལ་ཐ་སྙད་བཏགས་ཀྱང་སྤྲོས་པའི་སྣོན་པར་མི་འགྱུར་རམ། དོན་དམ་དཔྱོད་པས་དངོས་པོ་མི་རྙེད་པས་ཐ་སྙད་སྐབས་སུ་དོན་བྱེད་ནུས་པའི་དངོས་པོ་གཉིས་ཡོད་མི་སྲིད་པས་དངོས་མེད་ལ་དངོས་པོར་བཏགས་པའི་སྣང་བ་ནན་གྱིས་ཆོག་ཤེས་པར་གྱིས་ཤིག །སྟོང་ཉིད་ལ་ཞེན་པའང་འཆིང་བྱེད་དུ་གསུངས་ན་གཞན་ལྟ་ཅི་སྨོས་སོ། །དེས་ན་སྣང་བ་སྣ་ཚོགས་པ་དང་དེ་ལ་འཁྲུལ་བ་གཉིས་ལ་གཞི་མེད་ཀྱང་། རྐྱེན་དང་འཕྲད་ན་སྣང་དུ་རུང་ཞིང་འཁྲུལ་ཏུའང་རུང་ངོ་། །གཞི་དངོས་པོ་མ་གྲུབ་པ་ལ་ད་ལྟར་དངོས་པོར་གྲུབ་པ་ཞིག་བྱུང་ན་འགལ་ཡང་། རྨི་ལམ་ལྟར་སྣང་བ་ཉིད་ན་དངོས་པོ་ཐོག་མཐའ་ཀུན་ཏུ་མ་གྲུབ་བོ། །རྨི་ལམ་ལྟར་ངོ་བོ་ཉིད་མེད་ཀྱང་དེ་མ་རྟོགས་ཤིང་མ་གོམས་པ་ལ་དངོས་པོར་འཁྲུལ་བ་མི་འགལ་ལ། རྒྱ་མཚོའི་ལྦུ་བ་ལ་ཐང་དུ་འཁྲུལ་བ་བཞིན་ནོ། །གཞི་ངོ་བོ་ཉིད་མེད་པར་རྟོགས་ཤིང་གོམས་ལ་འཕྲལ་དུ་དངོས་པོར་འཁྲུལ་ན་འགལ་བ་ཡིན། སྣང་འཁྲུལ་གཉིས་གཅིག་གི་རྐྱེན་གཅིག་གིས་བྱེད་དེ། འཁྲུལ་བའི་དབང་གིས་མེད་བཞིན་དུ་སྣང་། མེད་བཞིན་དུ་སྣང་བའི་དབང་གིས་འཁྲུལ་བ་ཡིན། དེ་གཉིས་དུས་མཉམ་ཡིན་པར་རོང་ཟོམ་སྨྲ་བའི་དབང་ཕྱུག་གིས་གསུངས། འདིར་རང་བཞིན་མེད་ཅེས་པ་མེད་པའི་དོན་མིན་ཏེ། འོན་ཀྱང་དེར་འཛིན་པ་འཁྲུལ་བའི་དོན་ཏེ། རྫུན་ཞིང་བསླུ་བའི་ཆོས་ཅན་ཉིད་ཀྱི་དོན་ནོ་ཞེས་དཔལ་ལྡན་ཟླ་བས་གསུངས། མེའི་རང་བཞིན་ཚ་བ་ལྟ་བུ་ཐ་སྙད་དང་། མེ་ལ་རང་བཞིན་ཡོད་ཅེས་པ་ལྟ་བུ་དོན་དམ་པར་གྲུབ་པ་དགག་བྱ་ངོ་བོ་ཉིད་དང་། རང་བཞིན་དང་། དངོས་པོ་དང་། བདེན་གྲུབ་སོགས་དབུ་མའི་ལུགས་ལ་དགག་བྱ། མིང་ཙམ་བཏགས་ཙམ་སྣང་ཙམ་ཐ་སྙད་ཙམ་སོགས་ནི་བསྒྲུབ་བྱ་ཡིན་གསུངས་སོ། །དེས་ན་གསུང་རབ་རྣམས་ལས་རང་བཞིན་མེད་ཅེས་པ་མང་བས་དེ་ལྟར་སྦྱར་དགོས་ཤིང་བདེན་སྟོང་ངམ་བདེན་གྲུབ་མེད་ཅེས་པ་བུམ་པ་མ་སྟོང་བདེན་གྲུབ་ཀྱིས་སྟོང་ཞེས་པར་འགྱུར་བས་དེ་མི་སྦྱར་རོ། །གསུམ་པ་བདེན་གཉིས་ནི། དངོས་པོ་སོགས། ཕྱི་ནང་གི་དངོས་པོ་གཟུང་བ་དང་འཛིན་པ་སོ་སོར་སྣང་བ་འདི་དག་ནི་བྱིས་པའི་སྣང་ངོར་ཐ་སྙད་དུ་བདེན་པས་ཀུན་རྫོབ་བདེན་པ་དང་། བྱིས་པ་ལ་ཇི་ལྟར་སྣང་ཡང་དེ་ལྟར་བདེན་པའི་དངོས་པོ་མེད་པ་ནི་དོན་དམ་བདེན་པ་སྟེ་འཕགས་པའི་གཟིགས་ངོར་མི་བསླུ་བས་སོ། །ཇི་ལྟར་བསམ་བརྗོད་དེ་སྒྲ་རྟོག་གི་ཡུལ་དུ་གྱུར་པ་ནི་ཀུན་རྫོབ་ཡིན་ཏེ། དེ་ནི་ཆོས་རྣམས་རང་དང་སྤྱིའི་མཚན་ཉིད་སོགས་སོ་སོར་རྟོགས་ཅིང་དཔྱོད་པའི་ཤེས་རབ་ཀྱི་ཡུལ་ཡིན་པའི་ཕྱིར་དོན་དམ་དེའི་ངོ་བོ་ནི་ཡིད་ལ་འདི་ཞེས་བསམ་དུ་མེད་ཅིང་ངག་གིས་བརྗོད་དུ་ཡང་མེད་པའི་ཕྱིར་ཏེ། དཔྱད་ན་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལས་ཀྱང་འདས་པར་བཤད་དོ། །ཡུམ་བསྟོད་ལས། སྨྲ་བསམ་བརྗོད་མེད་ལ་སོགས་པ་བཞིན་ནོ། །དོན་དམ་དེ་ནི་རྣམ་པར་རྟོག་པའི་སེམས་ཀྱི་ཡུལ་མིན་ན་དེའི་ཡུལ་ཅན་གང་གིས་ཡུལ་ཞེ་ན། འཇུག་ཤེས་སོ་སོའི་ཕྱོགས་སུ་མ་ལྷུང་བ་རང་རིག་རྣམ་པར་མི་རྟོག་པའི་ཡེ་ཤེས་ཀྱི་ཡུལ་ཞེས་ཐ་སྙད་བཏགས་པའོ། །འཕགས་པའི་མཉམ་བཞག་ན་གཉིས་སྣང་ནུབ་པས་གཟུང་འཛིན་ལྟར་མིན་ལ། དེའི་དོན་དམ་འདི་ཡིན་ཞེས་སྟོན་དུ་མེད་དེ། ལྐུགས་པས་བུ་རམ་གྱི་རོ་མྱོང་བ་དང་རྨི་ལམ་ཡུལ་གྱི་དངོས་སྣང་རྣམས་གཞན་ལ་སྟོན་དུ་མེད་པ་བཞིན་ནོ། །མདོ་ལས། སོ་སོ་རང་རིག་ཚད་མེད་སྤྱོད་ཡུལ་ནི། བརྗོད་དུ་མེད་ཅིང་ཐ་སྙད་ཡོངས་ཆད་པ། །རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེའི་ཡུལ་ལས་འདས་པའོ། །ཞེས་དང་། དྲི་མ་མེད་པར་གྲགས་པའི་མདོ་ལས་ཀྱང་མང་དུ་འབྱུང་། སོ་སོར་རྟོག་པས་རིང་དུ་དཔྱད་དོན་ལ་ཞི་གནས་དང་འབྲེལ་བར་བསྒོམ་པ་ལས་སྐྱེས་པའི་མི་རྟོག་པའི་ཡེ་ཤེས་ཏེ། ལྷག་མཐོང་མཚན་ཉིད་པའོ། །འོན་ཀྱང་ལམ་གྱི་ཡེ་ཤེས་གཙོ་བོ་ནི་རང་བྱུང་ལྷན་ཅིག་སྐྱེས་པའི་ཡེ་ཤེས་ཏེ་ཐོས་བསམ་སྒོམ་པའི་བྲལ་འབྲས་ཡིན་པས། ངོ་བོ་སྐྱེ་བ་མེད་པ་འདུས་མ་བྱས་པ་ལ་ཟླ་བ་འཕེལ་བ་ལྟར་གསལ་སྣང་འཕེལ་བ་ཙམ་མོ། །འདིར་བདེན་གཉིས་སོ་སོར་ཕྱེ་བ་ནི་ལས་དང་པོ་བ་ལ་བརྡའ་སྤྲོད་པ་ཙམ་སྟེ་ངོ་བོ་གཅིག་ལ་ལྡོག་པ་ཐ་དད་སོགས་མང་དུ་བཤད་པ་ཡིན་ཡང་། དོན་དམ་དཔྱོད་པས་སྣང་བ་ལ་བདེན་དངོས་ཡོད་མེད་སོགས་ཀྱི་སྤྲོས་པ་ཅུང་ཟད་ཀྱང་མ་རྙེད་པ་དེའི་ཚེ། མིང་གི་ལྡོག་པ་ཙམ་ལས་དོན་དུ་མེད་བཞིན་སྣང་བ་གཟུགས་བརྙན་ཙམ་ཡོད་པ་དེ་ལ་སྣང་སྟོང་ངམ་བདེན་གཉིས་ཟུང་འཇུག་ཅེས་བྱ་སྟེ། གཟུགས་བརྙས་དེ་བདེན་པར་སྒྲུབ་ཏུའང་མེད། མེད་པར་སྒྲུབ་ཀྱང་མི་དགོས། ཡོད་མེད་ཀྱི་སྒྲོ་སྐུར་བྲལ་བ་བཞིན་དུ་འདི་ཡང་དེ་བཞིན་ནོ། །འཇིག་རྟེན་ཀུན་རྫོབ་ནི་གཏི་མུག་ལ་སྣང་བ་རང་བཞིན་སྒྲིབ་བྱེད་ཡོད་མེད་སྐྱེ་འགག་ལས་མ་འདས་ལ། འདི་ནི་དེ་ལས་ལྡོག་པ་སྐྱེ་བ་མེད་པའི་དབྱིངས་སྣང་སྟེ། རྩ་ཤེས་ལས། སྟོང་པ་ཁོ་ནའི་ཆོས་རྣམས་ལས། །སྟོང་པའི་ཆོས་རྣམས་བྱུང་བ་ཡིན། །ཞེས་གསུངས་པའི་ཕྱིར། མདོ་དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་སོ། །འོན་ཀྱང་ཐ་སྙད་དུ་སྣང་སྟོང་དབྱེར་མེད་ལ་འདོད་དགོས་ཀྱི། གཞན་དུ་ན་བདེན་གཉིས་ཐ་དད་གྱུར་པ་ན། ཡེ་ཤེས་ལམ་ནི་དོན་མེད་འགྱུར། ཞེས་པས་མཁྱེན་པའི་སྐད་ཅིག་གཅིག་གིས་བདེན་གཉིས་ཅིག་ཆར་བ་གཟིགས་པ་ཉིད་རེས་འཇོག་ཅན་དུ་འགྱུར་རོ། །དེས་ན་ཆོས་རྣམས་སྣང་ཙམ་ལ་དམིགས་པ་དམིགས་བཅས་བསོད་ནམས་ཀྱི་ཚོགས་དང་བདེན་པར་མི་དམིགས་པ་ནི་དམིགས་མེད་ཡེ་ཤེས་ཀྱི་ཚོགས་སོ། །མདོ་ལས་སྣང་ཡང་མི་དམིགས་པ་ཞེས་གསུངས་པའང་དེའོ། །གཉིས་པ་སྦྱོར་བའི་ལམ་ལ་གཉིས། བདག་མེད་མདོར་བསྟན་པ་དང་། རྒྱས་བཤད་དོ། །དང་པོ་ནི། དོན་དམ་དེ་ཡང་སོགས།༡༡ གཉིས་པ་ལ་གཉིས། གང་ཟག་ལ་བདག་མེད་པ་དང་། ཆོས་ལ་བདག་མེད་པའོ། །དང་པོ་ལ་གཉིས། གང་ཟག་དངོས་བསྟན་པ། བདག་མེད་པའི་གཏན་ཚིགས་བསྟན་པའོ། །དང་པོ་ལ་ལྔ་སྟེ། བཤད་པར་དམ་བཅའ། གང་ཟག་སྲིད་པའི་རྒྱུན་ཡིན་པར་བསྟན། གང་ཟག་གི་ངེས་ཚིག །བདག་འཛིན་གྱི་དབང་གིས་འཇིག་རྟེན་ཆོས་བརྒྱད་ལ་དམིགས་ནས་མུ་སྟེགས་པར་འཇུག་པ། མེད་ཀྱང་འཁྲུལ་ནས་སྣང་བའི་དཔེའོ། །དང་པོ་ནི། དེ་ལ་གང་ཟག་སོགས།༡ གཉིས་པ་ནི། གང་ཟག་ལྔ་ཕུང་རྒྱུན་ཡིན་ཞེས་ཏེ། འཇིག་རྟེན་ན་གྲགས་པ་དང་ལུང་ལས་སྐྱེས་བུ་གང་ཟག་འདི་ནི་ཁམས་དྲུག་པའོ། །ཞེས་གསུངས་པས། གང་ཟག་ནི་ཕུང་པོའི་ངོ་བོ་མིན་ཕུང་པོ་དང་གཅིག་མིན་ཕུང་པོ་ལས་ཐ་དད་མིན། ཡིད་ཀྱི་རྣམ་ཤེས་གཅིག་པུ་མིན་ཞིང་གཟུགས་སོགས་ལྔ་འདུས་པའི་ཕུང་པོའི་རྒྱུན་ཙམ་ལ་བརྟེན་ནས་བཏགས་པ་ཡིན་ལ། ཐ་སྙད་ཙམ་དུ་བདག་དང་ཕུང་པོ་ཉེ་བར་བླང་བྱ་ལེན་པ་ཞེས་ཐ་དད་དུ་བཞག་པ་མི་འགལ། བཏགས་པའི་བདག་དེ་ལ་ངའོ་བདག་གོ་གང་ཟག་གོ་ཞེས་སོགས་ངར་འཛིན་ལྷན་སྐྱེས་ཀྱི་ཞེན་ཡུལ་ཡིན། དེ་ཤིང་རྟ་རྣམ་བདུན་གྱི་རིགས་པས་བཙལ་སླ་བས་བློ་དམན་ཉན་ཐོས་ལ་བསྟན། ངར་འཛིན་ལྷན་སྐྱེས་ལ་གཉིས་ཡོད་དེ། ངར་འཛིན་པ་ནི་གོང་ལྟར་དང་། ང་ཡི་བའམ་བདག་གི་བར་འཛིན་པ་ནི་མིག་རྣ་བ་སོགས་ལ་ངའི་མིག་སོགས་སུ་འཛིན་ལ། དེའི་ཕྱིར་ང་ཡི་བའི་གདགས་གཞི་མིག་རྣ་སོགས་འཇོག་ཀྱང་ང་ཡི་བའི་རང་ལྡོག་ཙམ་ལས་ངོ་བོ་ཐ་དད་དབྱེར་མི་བཏུབ། འཇིག་ཚོགས་ཀྱི་ཕུང་པོ་ལ་བདག་ཏུ་ལྟ་བས་འཇིག་ལྟ་ལྷན་སྐྱེས་ཏེ་ངར་འཛིན་དང་འཇིག་ལྟ་མིང་གི་རྣམ་གྲངས་སོ། །དེས་ན་རང་རྒྱུད་ལ་དམིགས་ནས་ངར་འཛིན་པ་ནི་གང་ཟག་གི་བདག་འཛིན་དང་འཇིག་ལྟ་ཡིན། གཞན་རྒྱུད་ལ་དམིགས་ནས་འཇིག་ལྟ་བདག་དང་གང་ཟག་དང་སེམས་ཅན་ལ་སོགས་པ་འཛིན་ཀྱང་ངར་མི་འཛིན་ནོ། །མདོ་ལས། དགེ་སློང་དག་དགེ་སྦྱོང་ངམ་བྲམ་ཟེ་གང་སུ་དག་ཅིག་བདག་གོ་སྙམ་དུ་ཡང་དག་པར་རྗེས་སུ་ལྟ་བ་དེ་དག་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ཁོ་ན་ལ་ཡང་དག་པར་རྗེས་སུ་བལྟའོ། །ཞེས་སོ། །གཉིས་པ་ནི། ཅིའི་ཕྱིར་སོགས།༥ ཅིའི་ཕྱིར་གང་ཟག་ཅེས་བྱ་ཞེ་ན། འབྱུང་འགྱུར་སྡུག་བསྔལ་གྱི་རྒྱུ་ནི་ད་ལྟར་ལས་དང་ཉོན་མོངས་པས་རྒྱུད་གང་ནས། ཕྱི་མར་འབྲས་བུ་སྡུག་བསྔལ་གྱི་ཕུང་པོར་ཟག་སྟེ། ཉམས་སུ་མྱོང་བ་པོ་དེ་དག་ནི་སོ་སོ་རང་གི་ལུས་འདི་ལ་ང་དང་བདག་ཏུ་བདེན་པར་བཟུང་ནས་ཆགས་ཤིང་ཞེན་པས་ལས་བསགས་ཏེ་འཁོར་བར་འགྱུར་རོ། །བཞི་པ་ནི། བདག་ནི་སོགས། བདག་ལ་ཆགས་པ་དེས་ན་དང་འཆི་བཀྲེས་གྲང་གིས་དོགས་པ་དང་། བསྟོད་ན་དགའ་ཞིང་སྨད་ན་མི་དགའ་བ་སོགས་འཇིག་རྟེན་པའི་ཆོས་བརྒྱད་བདག་གིར་བཟུང་སྟེ། དོན་དུ་མ་གྲུབ་པ་དེ་ལ་དམིགས་ནས་མུ་སྟེགས་པའི་ལྟ་བ་རྣམས་ལོག་པར་འཇུག་གོ། །མུ་སྟེགས་ལྔ་རྣམས་འཇུག་ཅེས་ཀྱང་ཡོད་པས། མུ་སྟེགས་པ་དཔེར་བཀོད་དམ་ལྟ་བ་ངན་པ་མ་སྤངས་ན་མུ་སྟེགས་པའི་ལྟ་བར་ལྷུང་ཞེས་པའི་དོན་དོ། །འཇུག་པ་ལས། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བ་བློ་ཡིས་མཐོང་གྱུར་ཏེ། །བདག་ནི་འདི་ཡི་ཡུལ་དུ་རྟོགས་བྱས་ན། །རྣལ་འབྱོར་པ་ཡིས་བདག་ནི་འགོག་པར་འགྱུར། །ཞེས་སོ། །ལྔ་པ་ནི། ངའམ་སོགས།༣ ངའམ་བདག་ཅེས་བྱ་བ་དེ་ནི་རང་བཞིན་གྱིས་ཡོད་པ་མ་ཡིན་ཏེ། འཇིག་ཚོགས་ཀྱི་ཕུང་པོ་ལྔ་པོ་འདི་ལ་འཁྲུལ་ནས་བདག་ཏུ་བཟུང་ཡང་བཏགས་པ་ཙམ་ཡིན་གྱི་དངོས་པོ་མེད་དེ། དཔེར་ན་རྡོ་སོགས་བརྩེགས་པ་མིའི་དབྱིབས་སུ་བཀོད་པའི་ཐོ་ཡོར་མཐོང་བ་ལ་ཕྱི་ནང་གི་རྐྱེན་ལས་མིའམ་སྙམ་དུ་འཁྲུལ་བ་བཞིན་ནོ། །གཉིས་པ་བདག་མེད་པའི་གཏན་ཚིགས་ལ་བཞི། དྲིས་པ། མིང་ལ་མེད་པ། ལུས་ལ་མེད་པ། སེམས་ལ་བདག་མེད་ཚུལ་བསྟན་པའོ། །དང་པོ་ནི། ངའམ་སོགས།༡ ངའམ་བདག་ནི་མེད་པར་རྒྱུ་མཚན་ཅིས་མངོན་ཞེ་ན། །གཉིས་པ་ནི། མིང་ནི་སོགས།༡ སྐྱེས་བུ་ཞེས་པའི་མིང་ནི་བདག་མ་ཡིན་ཏེ་དེ་ནི་བཏགས་པ་ཙམ་སྟེ། མིང་ཙམ་གྱིས་གང་ཟག་གི་དོན་བྱེད་མི་ནུས་ཤིང་མིང་ལ་ང་གོ་ནས་སུ་མི་འཛིན་པའི་ཕྱིར་རོ། །གསུམ་པ་ནི། ལུས་ཀྱང་སོགས། ལུས་ཀྱང་བདག་མིན་ཏེ་ཤ་ཁྲག་རུས་པ་རྣམས་ནི། ས་སོགས་འབྱུང་བ་ཆེན་པོ་རྣམས་ལྷན་ཅིག་འདུས་པས་ཕྱི་རོལ་གྱི་རྩིགས་པ་དང་འདྲའོ། །བཞི་པ་ནི། སེམས་ཀྱང་སོགས། དེར་མ་ཟད་སེམས་ཀྱང་བདག་མིན་ཏེ་སེམས་ལ་དངོས་པོ་མེད་ཅིང་མི་རྟག་པ་དང་རྣམ་ཤེས་ཚོགས་དྲུག་ཡོད་པས་བདག་མང་པོ་ཉིད་དུ་འགྱུར་བའི་ཕྱིར་རོ། །དེས་ན་འབྱུང་བ་བཞི་དང་ནམ་མཁའ་རྣམ་ཤེས་ཁམས་དྲུག་འདུས་པ་ལ་བརྟེན་ནས་སྐྱེས་བུ་ཞེས་བཏགས་པ་ཙམ་ཡིན། དེ་བཞིན་དུ་ཆོས་ཐམས་ཅད་བརྡའ་ཙམ་བཏགས་པ་ཙམ་ལས་བཏགས་དོན་བཙལ་ན་མི་རྙེད་ཀྱང་། ལས་འབྲས་སོགས་ཀྱི་རྣམ་བཞག་འཇོག་ཚེ་ཉེ་བར་བརྟག་དཔྱད་མེད་པར་འཇིག་རྟེན་ན་གྲགས་པ་ཙམ་ལ་བསྟེན་པ་ཡིན་ནོ། །དེས་ན་འཇིག་རྟེན་འདི་ནས་འགྲོ་བའི་བདག་རྟག་པའང་མེད། མེ་ཤི་བ་ལྟར་གཏན་མེད་དུ་ཆད་པའང་མེད་ཀྱང་། ཕུང་པོ་སྐད་ཅིག་མའི་རྒྱུན་ལ་འགལ་མེའི་འཁོར་ལོ་དང་མར་མེ་བཞིན་དུ་སྐྱེ་བ་གཞན་དུ་འགྲོ་བ་ནི་རྟེན་འབྲེལ་ལོ། །རྒྱ་ཆེར་རོལ་པ་ལས། རྒྱ་ལས་རྒྱ་ཡི་འབུར་ནི་སྣང་མོད་ཀྱི། །རྒྱ་དེ་འཕོས་པར་དམིགས་པའང་ཡོད་མ་ཡིན། །དེ་ལ་དེ་མེད་གཞན་ལ་མ་ཡིན་ཏེ། །དེ་ལྟར་འདུས་བྱས་རྟག་མེད་ཆད་པ་མེད། །ཞེས་དང་། ཤི་ནས་འཇིག་རྟེན་ཕ་རོལ་འགྲོ་བ་ཡི། །སེམས་ཅན་ཤེད་ལས་སྐྱེ་བ་མ་དམིགས་ཀྱང་། །ལས་རྣམས་བྱེད་པ་མེད་པར་མི་འགྱུར་ཏེ། །དཀར་ནག་ཇི་བཞིན་འབྲས་བུ་སྨིན་པར་འགྱུར། །རིགས་པའི་ཚུལ་གྱི་སྒོ་འདི་བཟང་པོ་སྟེ། །ཕྲ་ཞིང་མཐོང་དཀའ་རྒྱལ་བའི་སྤྱོད་ཡུལ་ཡིན། །ཞེས་གསུངས། དེས་ན་ངར་འཛིན་གྱི་ཞེན་ཡུལ་བདག་དེ་རིགས་པ་དུ་མས་སུན་ཕྱུང་ནས་ཕུང་པོ་ལ་བཏགས་པ་ཙམ་ལས་རང་བཞིན་མེད་པར་ཤེས་དགོས་ཏེ། རིག་པའི་དབང་ཕྱུག་གིས། འདི་ཡུལ་སུན་ཕྱུང་མེད་པར་ནི། །དེ་སྤོང་བ་ནི་ནུས་མ་ཡིན། །ཞེས་གསུངས། གཞན་དུ་ན་སོར་ཕྲེང་མདོ་ལས། ཀྱེ་མ་འཇིག་རྟེན་ན་དམ་པའི་ཆོས་འཇིག་པའི་སྐྱེས་བུ་གཉིས་ཡོད་དེ། གང་ཤིན་ཏུ་སྟོང་པ་ཉིད་དུ་ལྟ་བ་དང་། གང་འཇིག་རྟེན་ན་བདག་ཏུ་སྨྲ་བ་འདི་གཉིས་ནི་དམ་པའི་ཆོས་འཇིག་པ་དང་དམ་པའི་ཆོས་ཁས་བུམ་པའོ། །ཞེས་སོ། །གཉིས་པ་ཆོས་ལ་བདག་མེད་པ་ལ་གཉིས། རིགས་པས་བདག་མེད་པ་དང་། དེའི་གདམས་པ་གཏན་ཚིགས་སོ། །དང་པོ་ལ་བཅུ་སྟེ། དམ་བཅའ་བ། ངོ་བོ་དང་། ངེས་ཚིག །རང་བཞིན་སྟོང་ཉིད། བསམ་བརྗོད་མེད་པ། འཁོར་བ་རང་བཞིན་མེད་པ། སྣང་བ་སེམས་ཡིན་པ། ཆུ་ལ་མཐོང་ཚུལ་མི་འདྲ་བས་སྣང་བ་སེམས་ཡིན་པར་སྒྲུབ། ཟད་པར་དང་ཀེང་རུས་སྒོམ་པའི་ཚུལ་གྱིས་སྒྲུབ། སེམས་ཉིད་ཡུལ་དུ་སྣང་བའོ། །དང་པོ་ནི། ཆོས་ལ་སོགས།༡ གཉིས་པ་ནི། ཆོས་ནི་སོགས། ཆོས་ནི་གཟུགས་སོགས་ཕུང་པོ་ལྔས་བསྡུས་པའི་དངོས་པོ་ཐམས་ཅད་ཡིན་ནོ། །གསུམ་པ་ནམི། བྱེད་པ་མེད་སོགས།༣ དེ་ལ་གཙོ་བོ་དབང་ཕྱུག་སོགས་བྱེད་པ་པོ་མེད་པའམ། རྒྱུ་མཚན་བྱེད་པ་གཞན་མེད་ལ། །རང་རང་གི་མཚན་ཉིད་འཛིན་པའི་ཕྱིར་ཏེ་གཟུགས་གཟུགས་སུ་རུང་བའི་མཚན་ཉིད་སོགས་དང་། ཚ་བ་མེའི་མཚན་ཉིད་སོགས་ཐུན་མོང་མ་ཡིན་པ་སོ་སོར་འཛིན་པ་སྟེ། དྷ་ར་འཛིན་པའམ་དྷ རྨའི་སྒྲ་ལས་ཆོས་སོ། །མཚན་ཉིད་རྣམས་ཀྱང་གཅིག་ལ་གཅིག་མེད་པས་རང་མཚན་ཞེས་དང་དེའང་ལྟོས་འཇོག་ཡིན་གྱི་ངོ་བོས་གྲུབ་པ་མ་ཡིན་ནོ། །ཆོས་དེ་ཡི་མཚན་ཉིད་ལ་བརྟགས་ནས་དངོས་པོ་དང་རང་བཞིན་དུ་འཛིན་པ་དང་གཙང་བདེ་རྟག་བདག་སོགས་ལོག་པར་རྟོག་པའི་འདུ་ཤེས་ཀྱི་མཚན་མ་སྣ་ཚོགས་པའི་དབང་གིས་རྩོད་པ་དང་འགྱེད་པ་དང་བཅས་པ་དང་། ཕྱི་རོལ་པ་དག་སྣོད་བཅུད་དབང་ཕྱུག་དང་གཙོ་བོ་དང་རྡུལ་ཕྲན་རྟགས་པས་བྱས་ཞེས་རྒྱུ་དང་རྟག་པ་གཞི་མཐུན་དང་རྒྱུ་འབྲས་གཉིས་ལྟོས་མེད་དུ་འདོད། ཁ་ཅིག་རྡུལ་ཕྲན་མི་རྟག་པས་བྱེད་པར་འདོ། །ཁ་ཅིག་རྒྱུ་མེད་ལས་བྱུང་བར་འདོད་པ་སོགས་ལྟ་བ་མི་མཐུན་པ་སྣ་ཚོགས་ཀྱི་གནས་ཡིན་ལ། འདིར་ནི་རྟེན་ཅིང་འབྲེལ་བར་འབྱུང་བ་སྟོང་པ་ཉིད་ཀྱི་རང་བཞིན་ལ་དངོས་པོ་བདེན་པར་མི་འདོད་པས་ལྟ་བ་ངན་པ་དེ་དག་གི་གནས་མེད་དོ། །ཏིང་འཛིན་རྒྱལ་པོ་ལས། ཇི་ལྟར་དྲི་ཟའི་གྲོང་ཁྱེར་སྨིག་རྒྱུ་དང་། །སྒྱུ་མ་ཇི་བཞིན་རྨི་ལམ་ཅི་འདྲ་བ། །ཆོས་རྣམས་ཐམས་ཅད་དེ་བཞིན་ཤེས་བྱ་སྟེ། །མཚན་མ་སྒོམ་པ་ངོ་བོ་ཉིད་ཀྱིས་སྟོང་། །ཞེས་དང་། འདུས་བྱས་འདུས་མ་བྱས་ཀུན་དབེན་པ་སྟེ། །དྲང་སྲོང་དེ་དག་ལ་ནི་རྣམ་རྟོག་མེད། །འགྲོ་བ་ཀུན་ཏུ་འདུས་མ་བྱས་ཐོབ་པས། །ལྟ་བ་དག་ལས་ཁོར་མོར་རྣམ་པར་དབེན། །ཞེས་སོགས་གསུངས། ཆོས་རང་བཞིན་མེད་པའི་དཔེ་ནི་ལྗོན་པས་ཞུས་པ་ལས། མེ་ལོང་ཤིན་ཏུ་ཡོངས་དག་ལ། །ཇི་ལྟར་རང་བཞིན་མེད་པ་ཡི། །གཟུགས་བརྙན་སྣང་བ་དེ་བཞིན་དུ། །ལྗོན་པ་ཆོས་རྣམས་ཤེས་པར་གྱིས། །ཞེས་སོ། །ཕུང་པོ་བདེན་མེད་ཀྱི་མཐུན་དཔེ་དེས་དབང་པོ་རྟུལ་པོས་ཀྱང་ཆོས་རང་བཞིན་མེད་པ་ངེས་སླའོ། །གང་ཟག་གི་གདགས་གཞི་ཕུང་སོགས་ཀྱི་སྟེང་དུ་ཆོས་བདག་མེད་ཕྲ་མོ་དེས་དཀའ་བས་དེ་དབང་རྣོན་བྱང་ཆུབ་སེམས་དཔའ་ལ་བསྟན་པས། ཞིབ་པར་དཔྱད་ན་ཕུང་པོ་ཐག་པ་དང་དེ་བདག་དང་ཆོས་སུ་སྣང་བ་ཐག་པ་ལ་སྦྲུལ་དུ་འཛིན་པ་འཁྲུལ་ཤེས་ལོག་པ་དང་། བདག་དང་ཆོས་སུ་མ་གྲུབ་པ་ནི་ཐག་པ་ལ་སྦྲུལ་མེད་པར་ཤེས་པ་ལྟར་ཡིན་པས། ཐག་པ་དང་ཕུང་པོ་ཙམ་དམིགས་པ་ཡང་དག་པའི་བློ་དང་། སླར་ཡང་དཔྱད་ན་ཕུང་པོ་དང་ཐག་པ་རིལ་པོར་འཛིན་པ་ལོག་ཤེས་ཡིན། ཕུང་པོ་དང་ཐག་པ་ཆ་ཤས་དུ་མ་འདུས་པར་མཐོང་བས་རིལ་འཛིན་གྱི་བློ་ཞིག །འདུས་པ་ཙམ་ཡོད་པས་དེ་མཐོང་བའི་བློ་མ་འཁྲུལ་བ་དང་། ཡང་དཔྱད་པས་ཕུང་པོ་དང་ཐག་པའི་ཆ་ཤས་རེ་རེ་ནས་རྡུལ་ཕྲན་བར་དུ་བཤིག་པས། འདུས་པ་དང་དེར་འཛིན་པའི་བློ་ཡང་འཁྲུལ་བའོ། །རྡུལ་དེ་དག་ཀྱང་རྡུལ་ཕྲན་འགོག་པའི་རིགས་པའམ། བློས་གཞིག་ན་ནམ་མཁའ་བཞིན་དེས་ན་རྡུལ་ཡང་མེད། ཅེས་པས་ལོག་རྟོག་ཡུལ་དང་བཅས་པ་སྟོང་པ་ཉིད་དུ་ཞི་བར་འགྱུར་རོ། །སྟོང་པ་ཉིད་དེ་ཡང་ཡོད་མེད་ལྟོས་ཏེ་བཞག་པ་ཙམ་ཡིན་པས་མཐའ་ཐམས་ཅད་དང་བྲལ་བར་ཤེས་དགོས་སོ། །དཔྱད་ན་དེ་ལྟར་ཡིན་པ་ལས་ཐ་སྙད་མི་འགོག་སྟེ། ཚངས་པ་ཁྱད་པར་སེམས་ཀྱིས་ཞུས་པ་ལས། ཆོས་ཀྱི་རང་བཞིན་ཤེས་ནས་ནི། །འཇིག་རྟེན་དག་ཀྱང་འཇིག་མི་བྱེད། །ཕུང་པོ་རྣམས་ལ་རང་བཞིན་མེད། །འདི་ནི་འཇིག་རྟེན་ཆོས་ཉིད་དོ། །ཞེས་སོ། །བཞི་པ་ནི། ཅིའི་ཕྱིར་སོགས།༤ ཆོས་རང་བཞིན་མེད་པ་རྒྱུ་མཚན་ཅིའི་ཕྱིར་ཞེ་ན་ཕྱི་དང་ནང་གི་ཆོས་འདི་རྣམས་དཔྱད་གཞིར་བཟུང་ནས་རིགས་པས་དཔྱད་ཀྱི། ཀ་བུམ་སོགས་ཀྱི་དངོས་པོ་འདི་དག་སྤངས་ནས་སྟོང་ཉིད་གཞན་དུ་མི་བཙལ་གྱི། དང་པོ་དགག་བྱ་རང་བཞིན་གྱིས་གྲུབ་པ་ནི་དོན་སྤྱི་བློ་ལ་མ་ཤར་བར། དགག་བྱ་བཀག་པའི་མེད་དགག་སྟོང་ཉིད་བློ་ཡུལ་དུ་མི་འཆར་བའི་ཕྱིར། དཔེར་ན་དགག་བྱ་བུམ་པའི་དོན་སྤྱི་བློ་ལ་ཤར་བ་སྔོན་དུ་མ་སོང་བར་དེས་སྟོང་པའི་བུམ་མེད་ཀྱི་ས་ཕྱོགས་ཚད་མས་ངེས་མི་ནུས་པ་བཞིན་ནོ། །དངོས་པོ་འདི་དག་སྣང་ཙམ་ཉིད་ནས་རང་གི་ངོ་བོ་སྟོང་པ་ཉིད་ཡིན་པའི་ཕྱིར། སོ་སྐྱེས་ལ་ཡུལ་བདེན་པར་སྣང་བ་དང་བདེན་འཛིན་གྱི་བློ་གཉིས་ཀ་འདི་ལྟར་གཏན་ནས་མེད་ཅེས་བཀག་ནས། རྟེན་འབྲེལ་གྱི་ཡུལ་སྒྱུ་མ་ཙམ་དང་སྣང་ཙམ་འཛིན་པའི་བློ་གཉིས་འགགས་པ་མ་ཡིན་པས། དགག་པ་གཉིས་ཀྱང་ཚང་ལ། དེ་བས་ཀུན་རྫོབ་སྒྲུབ་མི་དགོས་དེ་ལ་དགག་བྱ་མེད། དཔལ་ལྡན་ཟླ་བས། དངོས་པོ་ཞེན་པ་བཀག་ནས་ནི། །རང་ལ་སྒྲུབ་ཏུ་ཅུང་ཟད་མེད། །ཅེས་སོ། །རིགས་ངོ་ཞེན་པ་ཡུལ་བཅས་བཀག་པའི་རྗེས་སུ་བསྒྲུབ་བྱ་སྒྲུབ་ཏུ་མེད་ཀྱང་སྣང་བ་ཆད་དུ་མ་སོང་བ་ནི་ལྟ་བ་མ་ཡིན་དགག་འདི་འཕགས་པའི་དགོངས་པ་སྟེ། ཀ་བ་ཀ་བའི་ངོ་བོས་སྟོང་བཞིན་སྣང་བ་བབ་ཀྱིས་འབྱུང་། ཡུམ་ལས་གཟུགས་གཟུགས་ཀྱིས་སྟོང་ཞེས་སོགས་གསུངས། དེས་ན་ཉན་ཐོས་རྣམས་ཀྱིས་གཟུགས་བཤིག་ཅིང་བཅོམ་པ་ན་རྟག་པས་སྟོང་པའི་མི་རྟག་པ་དང་། རགས་པས་སྟོང་པས་རྡུལ་ཕྲན་དུ་བསིལ་བ་ཙམ་ལ་སྟོང་པར་གདགས་པ་ཙམ་སྟེ། དཔྱད་མ་དཔྱད་གང་ལྟར་ཡང་རང་བཞིན་མེད་པའི་སྟོང་པ་ཉིད་དོ། །ལྔ་པ་ནི། སྣང་བ་ཉིད་སོགས།༤ སྣང་བ་ཉིད་ནི་སྣ་ཚོགས་ཀྱང་གང་ལའང་དངོས་པོ་མེད་དེ། དཔེར་ན་རྐྱེན་ཚོགས་པའི་སྨིག་རྒྱུ་ནི་ཐོག་མར་སྣང་བ་ཉིད་ནས་བར་དང་ཐ་མར་གང་ཡང་དངོས་པོ་མེད་ཅིང་། སྟོང་གཟུགས་ཀྱི་སྣང་བ་ཙམ་ཡིན་པ་བཞིན། དངོས་པོ་ཇི་ལྟར་སྣང་ཡང་ངོ་བོ་ཉིད་ཀྱིས་མེད་པས་ན། དེ་ལ་ཡོད་པ་དང་མེད་པ་ཉིད་དུ་བཞོམ་ཞིང་ངག་ནས་བརྗོད་དུའང་མེད་དོ། །འཕགས་པ་ཀླུ་སྒྲུབ་ཀྱིས། སྨིག་རྒྱུ་ལ་ནི་འདི་ཆུ་ཞེས། །བསམ་སྟེ་དེར་ནི་སོང་བ་ལས། །གལ་ཏེ་ཆུ་དེ་མེད་དོ་ཞེས། །འཛིན་པ་དེ་ནི་བླུན་པོ་ཉིད། །དེ་བཞིན་སྨིག་རྒྱུ་ལྟ་བུ་ཡི། །འཇིག་རྟེན་ཡོད་ཅེས་མེད་པ་ཞེས། །འཛིན་པ་དེ་ནི་རྨོངས་པ་ཡིན། །ཞེས་དཔེ་འདི་མེད་པ་ལ་ཟློག་པ་མེད་ཅེས་པ་བདེན་པར་འཛིན་པ་འགོག་བྱེད་དོ། །དྲུག་པ་ནི། སྣང་ཡང་སོགས།༡༡ ད་ལྟའི་དངོས་པོ་སྣང་བ་འདི་རྣམས་རང་བཞིན་མེད་པར་རྒྱུ་མཚན་ཅིས་མངོན་ཞེ་ན། འདི་རྣམས་ཐ་སྙད་ཙམ་དུ་ཡོད་མེད་མ་ཡིན་པར། ཡོད་ཅེས་པ་རང་བཞིན་གྱིས་ཡོད་པ་ཡིན་ན་མེད་པར་མི་འགྱུར་ལ། མེད་ཅེས་པའང་རང་བཞིན་གྱིས་གྲུབ་ན་ཡོད་པར་ནམ་ཡང་མི་འགྱུར་རོ། །ཡོད་མེད་གཉིས་མ་གཏོགས་པར་དབུས་ཞེས་མི་འགྲུབ་པས། དེ་ལྟར་གསུམ་དུ་དཔྱད་ན་སྟོང་པ་ཉིད་ལས་ཅི་ཡང་མི་དམིགས་ཏེ་རིགས་པས་དཔྱད་མི་བཟོད་པའི་ཕྱིར། དེ་ཡང་ཡོད་པར་གྲགས་པ་འཁོར་བ་དང་མྱང་འདས་ཞི་བའི་ཆོས་གཉིས་ཡིན་ལ། ཐ་སྙད་འཁོར་བའི་རང་བཞིན་ནི་ཡུལ་སེམས་གཟུང་འཛིན་རྣམ་པ་གཉིས་ཡིན་ཞིང་། དང་པོ་ཡུལ་གྱི་རང་བཞིན་སྟོང་པ་ཉིད་དུ་གཏན་ལ་དབབ་པ་ལ་འདི་ལྟར་བརྟག་པར་བྱ་སྟེ། བཞི་བརྒྱ་པ་ལས། སྲིད་པའི་ས་བོན་རྣམ་ཤེས་ཏེ། །ཡུལ་རྣམས་དེ་ཡི་སྤྱོད་ཡུལ་ལོ། །ཡུལ་ལ་བདེན་མེད་མཐོང་ན་ནི། །སྲིད་པའི་ས་བོན་འགག་པར་འགྱུར། །ཞེས་གསུངས་པ་ལྟར། ཕྱི་ནང་སྣོད་བཅུད་ཀྱིས་བསྡུས་པའི་འཇིག་རྟེན་འདིའི་རང་བཞིན་ནི། གནག་རྫི་རྒན་པོ་ཡན་ཆད་ལ་སྣང་བ་འདི་ལྟར་དུ་ཡེ་ནས་ཡོད་པ་མ་ཡིན་ནོ། །གལ་ཏེ་ཚུར་མཐོང་ལ་སྣང་བ་འདི་ལྟར་དུ་ཡེ་ནས་ཡོད་ཅིང་བདེན་པར་གྲུབ་ན། དེ་ལྟར་ན་འཁོར་བའི་རྒྱུ་ཉོན་མོངས་པ་སྤང་ཞིང་ཞི་བ་བྱང་ཆུབ་ཀྱི་གོ་འཕང་སྒྲུབ་ཏུ་མེད་ཅིང་། སེམས་ཅན་ཀུན་གྱིས་བདེན་པ་མཐོང་ཟིན་པས་འབྲས་བུ་བྱང་ཆུབ་ཐོབ་སྟེ། སྐྱེ་རྒ་ན་འཆི་ལ་སོགས་པ་འཁོར་བའི་སྡུག་བསྔལ་འདི་མེད་པར་རིགས་ཀྱང་དེ་ནི་མ་ཡིན་ནོ། །བྱིས་པའི་བློས་དམིགས་པ་དེ་བདེན་ན་བྱིས་པ་འཕགས་པར་འགྱུར་བ་དང་། འཕགས་པས་གཟིགས་པ་རྫུན་པར་འགྱུར་ཞིང་བྱིས་པ་ཉིད་དུ་ཐལ་བ་སོགས་ཀྱི་སྐྱོན་ཡོད་དོ། །དེས་ན་ཆོས་རྣམས་སེམས་ཅན་གྱི་དུས་ན་ངན་པར་གྱུར་པ་དང་། སངས་རྒྱས་བྱོན་ནས་བཟང་པོར་སོང་བ་མེད་དེ། གློ་བུར་གྱི་འཁྲུལ་པ་ཟད་པ་ཙམ་མོ། །མདོ་ལས། དེ་བཞིན་གཤེགས་པ་རྣམས་འཇིག་རྟེན་དུ་བྱོན་ཡང་རུང་མ་བྱོན་ཡང་རུང་ཆོས་རྣམས་ཀྱི་ཆོས་ཉིད་ནི་གནས་པའོ། །ཞེས་སོགས་མང་ངོ་། །བདུན་པ་ནི། འདི་བཞིན་སོགས།༢ གོང་ན་བཤད་པ་བཞིན་དུ་དངོས་པོ་རྣམས་ཡེ་ནས་མེད་པར་ཅིས་མངོན་ན། འདི་ལྟར་ཕྱིའི་དངོས་པོར་རགས་པར་སྣང་བ་རྣམས་རྡུལ་དུ་བཤིག །རྡུལ་ཡང་ཆ་ཤས་སུ་བསྒོས་ནས་བཤིག་ན་མཐར་ཅི་ཡང་མེད་ལ། དེ་བས་ན་ཡུལ་དུ་སྣང་བའི་དངོས་པོ་འདི་རྣམས་ནང་གི་སེམས་ཡིན་ཏེ། རྨི་ལམ་ན་ཡིད་ཀྱི་ཤེས་པ་ཉིད་གཉིད་ཀྱི་རྐྱེན་ལས་ཡུལ་དུ་སྣང་བ་བཞིན་ནོ། །བརྒྱད་པ་ནི། དངོས་འདི་སོགས། དངོས་པོ་འདི་རྣམས་སེམས་ཉིད་ཡིན་པར་རྟགས་ཅིས་མངོན་ན། གལ་ཏེ་སེམས་མིན་པའི་གཞན་ལོགས་སུ་དངོས་པོ་ཞིག་ཡོད་ན། གཞི་ཆུ་གཅིག་ལ་ལྷ་དང་ཡི་དྭགས་སོགས་སེམས་ཅན་རྣམས་ཀྱིས། རིན་པོ་ཆེའམ་བདུད་རྩི་དང་རྣག་ཁྲག་དང་ཉ་ལ་སོགས་པ་རྣམས་ཀྱི་ཁྱིམ་དང་ཁ་ཅིག་ལ་བཏུང་བ་ལ་སོགས་པ་མི་འདྲ་བ་མཐོང་མི་རིགས་ཀྱང་། རང་རང་གི་ལས་ཀྱིས་བགོས་པའི་སེམས་དེ་ལྟར་སྣང་བ་ཡིན་ལ་གཞི་ཆུ་ཙམ་ནི་མཐུན་པར་སྣང་ཡང་དག་མ་དག་གཉིས་སུ་འགྱུར་བ་ནི་རང་རང་གི་ལས་ཀྱི་བགོ་སྐལ་ཡིན་ལ། དེ་དག་ཕྱི་ན་བདེན་པར་གྲུབ་ན་གཅིག་ལ་སྣང་བ་དེ་ཀུན་ལ་སྣང་དགོས་པའི་སྐྱོན་འབབ་བོ། །དེ་བཞིན་དུ་མི་དང་དུད་འགྲོ་ཕལ་ལ་མེས་རེག་ན་ཚིག་པར་སྣང་བ་ལ། དུད་འགྲོའི་རིགས་ལས་རི་དྭགས་མེའི་གཙང་སྦྲ་ཅན་ཞེས་བྱ་བས་མེས་ཁྲུས་བྱེད་ཅིང་ཆུས་བྱ་བ་བྱེད་ཀྱང་། མི་འཚིག་ཅིང་མདོག་རྒྱས་པ་དང་། དེ་བཞིན་དུ་མེ་བྱི་དང་ཆུ་བྱི་ཞེས་བྱ་བ་དང་། མེ་དང་མཉམ་དུ་སྐྱེ་ཞིང་འཆི་བའི་སྲོག་ཆགས་དུ་མ་ཡོད་པར་གྲགས་སོ། །འདིས་ནི་རྫས་སུ་མ་གྲུབ་ན་དོན་བྱེད་མི་ནུས་པ་དང་། ཉོན་མོངས་པ་ལ་སྤང་བྱའི་རྫས་ཡོད་པར་འདོད་པ་རྣམས་ཁེགས་ཏེ། རྫས་སུ་མེད་ཀྱང་བཏགས་པ་ཙམ་གྱིས་དོན་བྱེད་ནུས་པར་སྣང་བ་ནི་དེ་ལྟ་བུའོ། །དགུ་པ་ནི། དངོས་པོ་སོགས།༣ དེ་བཞིན་དུ་ས་སོགས་དངོས་པོ་འདི་རྣམས་ལ་སྔར་མ་སྦྱངས་པའི་རྣལ་འབྱོར་པ་རྣམས་ཀྱིས། བསམ་གཏན་དང་གཟུགས་མེད་ཀྱི་སེམས་གང་རུང་ལ་བརྟེན་ནས་ས་སོགས་འབྱུང་བ་བཞི་དང་། འབྱུང་འགྱུར་སྔོ་སེར་དཀར་དམར་ཏེ་ཁ་དོག་བཞི་ལ་དམིགས་རྟེན་བྱས་ནས། ཏིང་ངེ་འཛིན་གྱིས་ཕྱིའི་ས་སོགས་ཐམས་ཅད་ལ་ཟད་ཟད་དེ་ཁྱབ་པར་སྤྲུལ་ནས་བསྒོམས་པས་གྲུབ་ཚེ། བརྒྱད་པོའི་བྱེད་ལས་ས་ལ་ཆུའི་བྱ་བ་དང་ཆུ་ལ་སའི་བྱ་བ་དང་། ས་མེད་པ་ལ་ས་དང་ཆུ་མེད་པ་ལ་ཆུ་སྤྲུལ་པ་སོགས་མཐའ་ཡས་སོ། །སྔོན་སྦྱངས་པས་ནི་དགེ་སློང་ལེགས་འོང་གིས་ཨུཏྤལ་སྔོན་པོ་མཐོང་བ་ཙམ་གྱིས་ཟད་པར་སྔོན་པོའི་ཏིང་ངེ་འཛིན་གྲུབ་པ་བཞིན་ནོ། །འདོད་ཆགས་ཀྱི་གཉེན་པོ་ཀེང་རུས་སྒོམ་པའི་ཚེ་དཔྲལ་བའི་རུས་པ་མཐེ་བོང་ཙམ་ནས་ལུས་རིལ་པོ་དང་། དེ་ནས་རིམ་པར་རྒྱ་མཚོའི་བར་དུ་ཀེང་རུས་སྐྱ་ཁྲ་ལེར་བསྒོམས་པས་རེག་མཐོང་གི་མཚན་མ་གྲུབ་སྟེ་ཀུན་བརྟགས་པའི་གཟུགས་མངོན་པར་མཐོང་ལ། སྣང་བ་སེམས་མིན་ན་ཏིང་འཛིན་དེ་དག་བསྒོམ་ཀྱང་དེ་བཞིན་དུ་མཐོང་མི་རིགས་ཀྱང་མཐོང་ངོ་། །བཅུ་པ་ནི། སེམས་ཉིད་སོགས།༣ སེམས་རང་ཉིད་ཡུལ་འདིར་ཇི་ལྟར་སྣང་ཞེ་ན། ཆོས་ཀྱི་གྲགས་པས། སེམས་ཀྱི་རང་བཞིན་འོད་གསལ་བ། །དྲི་མ་རྣམས་ནི་གློ་བུར་བ། །ཞེས་གསུངས་པ་ལྟར། སེམས་ཀྱི་རང་བཞིན་ནམ་ངོ་བོ་ནི་སྤྲོས་བྲལ་ནམ་མཁའ་ལྟ་བུ་ལ་རྣམ་ཤེས་ཀྱི་བཞོན་པའི་ལས་ཀྱི་རླུང་གི་རྐྱེན་གྱིས། སེམས་ཉིད་དེའི་མཚན་མ་གློ་བུར་གྱི་དྲི་མ་རྣམ་པར་རྟོག་པ་རྣམས་ནི་སྤྲིན་བཞིན་དུ་ཡུལ་ལ་མཆེད་ནས་སྣང་བ་ཡིན་ནོ། །མདོ་ལས། ཆོས་ཐམས་ཅད་སྟོང་པ་ཡིན་ཏེ་སྟོང་པ་ཉིད་ཀྱི་མཚན་ཉིད་སེམས་ཡིན་ཞིང་། ཆོས་ཐམས་ཅད་རྣམ་པར་དབེན་པ་དང་རྣམ་པར་དབེན་པའི་མཚན་ཉིད་ཀྱང་སེམས་ཡིན་ནོ། །ཞེས་གསུངས་པས་ཆོས་ཐམས་ཅད་ཀྱི་ངོ་བོ་སྤྲོས་པས་དབེན་ཀྱང་གློ་བུར་གྱི་མཚན་མ་གཟུང་འཛིན་གཉིས་སུ་སྣང་ཡང་། རྣམ་པར་རྟོག་པ་གཅིག་གི་ཁོངས་སུ་འདུའོ། །གཉིས་པ་དེའི་གདམས་པ་གཏན་ཚིགས་ལ་གསུམ། ཀུན་བརྟག་འཁྲུལ་བ་སྣ་ཚོགས་སྣང་བ་དང་། གཞན་དབང་འཁྲུལ་བར་བརྟགས་ནས་སྣང་བ་དང་། ཡོངས་སུ་གྲུབ་པའི་མཚན་ཉིད་དོ། །དང་པོ་ནི། རང་བཞིན་སོགས།༧ འདི་ལྟར་སེམས་ཀྱི་རང་བཞིན་ཡོངས་གྲུབ་ནི་རྒྱ་མཚོ་བཞིན་དུ་མི་འགྱུར་ཡང་། བག་ཆགས་ཀྱི་ནུས་པས་ཀུན་བརྟག་དང་གཞན་དབང་གི་མཚན་ཉིད་ཅིར་ཡང་རྟོགས་པས་དཀྲུགས་པ་ཡིན། དེ་ཡང་རང་གིས་རང་སྒྲིབ་པ་རྒྱ་མཚོའི་རླབས་ཀྱིས་རྒྱ་མཚོ་རང་རྙོག་པ་བཞིན་ནོ། །མེད་པ་ལ་ཀུན་ཏུ་སྣང་བ་སེམས་ཀྱི་རྣམ་པར་རྟོག་པ་གོམས་པའི་བག་ཆགས་མཐུ་བརྟས་པ་ཡིན་ཏེ། སེམས་དང་བག་ཆགས་གཉིས་གཅིག་མིན་ཞིང་ངོ་བོ་ཐ་དད་མིན་ཏེ། རིམ་པ་ལྟར་སྤང་དུ་མི་རུང་ཞིང་སྤང་མི་དགོས་པའི་ཕྱིར། དེས་ན་རྣམ་རྟོག་བག་ཆགས་གོམས་པ་ལས་དོན་ལ་གཉིས་མེད་པར་སྣོད་བཅུད་གཉིས་སུ་སྣང་བ་དེ་ནི། དཔེར་ན་མིག་གི་སྐྱོན་རབ་རིབ་དེ་ཉིད་ནི་མེད་པ་གསལ་སྣང་སྐྲ་ཤད་དང་ཟླ་བ་གཉིས་སུ་སྣང་བ་བཞིན་ནོ། །རིག་པའི་དབང་ཕྱུག་གིས། འདོད་འཇིགས་མྱ་ངན་གྱིས་བསླད་དང་། །རྐུན་པོ་རྨི་སོགས་ཀྱིས་བསླད་པས། །མདུན་ན་གནས་པ་ཇི་བཞིན་ནི། །ཡང་དག་མིན་པའང་མཐོང་བར་འགྱུར། །ཞེས་གསུངས་པ་བཞིན། ཐལ་འགྱུར་བའི་ལུགས་ལ་བུམ་པ་རྐྱེན་གྱིས་གཞན་དབང་དེ་ལ་བདེན་པར་སྣང་བ་ཀུན་བརྟག །བུམ་པ་རང་བཞིན་གྱིས་སྟོང་པ་ཆོས་ཉིད་ཡོངས་གྲུབ་ཅེས་བྱ། ནང་རྣམ་པར་ཤེས་པ་ལའང་དེ་ལྟར་སྦྱར། སེམས་ཙམ་ལྟར་ན། བུམ་སོགས་ཤེས་པ་ལས་ཕྱི་རོལ་དོན་དུ་སྣང་བ་ཀུན་བརྟག །བུམ་སོགས་ཀྱི་རྣམ་པ་རགས་པར་སྣང་བ་གཞན་དབང་། རགས་པར་སྣང་བ་འདི་བེམ་པོའི་དོན་དུ་འཇོག །གཞན་དབང་ལ་ཀུན་བརྟག་བདག་གཉིས་ཀྱིས་སྟོང་པ་ཡོངས་གྲུབ་དང་། དེ་ཡང་ཀུན་བརྟག་བཏགས་པར་ཡོད་དངོས་པོ་མེད། གཞན་དབང་རྫས་སུ་ཡོད་དོན་བྱེད་ནུས། ཡོངས་གྲུབ་དོན་དམ་པ་ཡོད་དེ་རྣམ་པར་མི་རྟོག་པའི་ཡུལ་ཡིན་པོའི་ཕྱིར་རོ། །དེ་ལ་མཚན་ཉིད་གསུམ། ངོ་བོ་ཉིད་གསུམ། དེ་ཁོ་ན་ཉིད་གསུམ་ཞེས་བརྗོད། གཉིས་པ་ནི། དེ་བས་སོགས།༢༡ དེ་བས་ན་ཡུལ་སྣང་འདི་དག་རྒྱུ་རྐྱེན་གྱིས་གཞན་དབང་སེམས་ཉིད་ཡིན། དེ་ལ་དམིགས་ནས་རྣམ་པར་ཤེས་པ་རྣམས་འབྱུང་བའི་ཕྱིར། ཡུལ་སེམས་གཉིས་ཀྱང་ཕན་ཚུན་རྟེན་འབྲེལ་སྒྱུ་མ་བཞིན་ལས། སེམས་ཙམ་ལྟར་གཞན་དབང་བདེན་པར་མི་འདོད། འཕགས་པ་ཀླུས། ནང་དང་ཕྱི་ཡི་སྐྱེ་མཆེད་ལ། །རྟེན་ནས་རྣམ་པར་ཤེས་པ་འབྱུང་། །དེ་ལྟ་བས་ན་རྣམ་ཤེས་མེད། །སྨིག་རྒྱུ་སྒྱུ་མ་བཞིན་དུ་སྟོང་། །ཞེས་སོ། །དེ་ལྟར་ཡུལ་འདི་སེམས་ཉིད་ཡིན་པ་ལ་ཡིན་པར་མ་ཤེས་པས། དེ་ལས་འཁྲུལ་ནས་སེམས་ལས་གཞན་དུ་མཚན་མར་བཟུང་བ་ནི། ཐ་གུ་སྦྲུལ་དུ་མཐོང་ནས་སྦྲུལ་གྱི་དངོས་པོར་ལྟ་བ་བཞིན་ཏེ། ཐ་གུ་གཞན་དབང་གི་དཔེ་དང་སྦྲུལ་ཀུན་བརྟག་གི་དཔེ་དང་། ཐ་གུ་ལ་སྦྲུལ་ཡེ་ནས་མེད་པ་ཡོངས་གྲུབ་བོ། །ཀུན་བརྟག་གི་མཚན་ཉིད་དེ་དངོས་སུ་གང་ཡིན་ཞེ་ན། འདུས་བྱས་སྣ་ཚོགས་པའི་དངོས་པོ་རྣམས་སོ་སོར་ཤེས་ངོར་མངོན་སུམ་དུ་ཡོད་པ་ལྟར་སྣང་བའི། སངས་རྒྱས་དང་སེམས་ཅན་དང་བདག་གཞན་དང་བཟང་ངན་རྒྱུ་འབྲས་སྐྱེ་འཇིག་གནས་གསུམ་དང་། རྩི་ཤིང་ནགས་ཚལ་ཡུལ་འཁོར་ཁང་ཁྱིམ་ལ་སོགས་ཏེ། མདོར་ན་སེམས་ཅན་ཀུན་ལ་མངོན་སུམ་དུ་གྱུར་པའི་རྣམ་ཤེས་དྲུག་གི་ཡུལ་ནི་ཐམས་ཅད་ཡིན། དེ་ནི་མེད་པ་ལ་ཡོད་པར་བཏགས་པ་ཙམ་ཡིན་གྱི་སེམས་ལས་གཞན་དུ་བདེན་པར་གྲུབ་པ་གཏན་ནས་མེད་དོ། །འོ་ན་སངས་རྒྱས་ཀྱིས་མངོན་པ་ལ་སོགས་པ་ལས་གསུངས་སོ་ཞེ་ན། དེ་ནི་དགོས་པའི་དབང་གིས་འཇིག་རྟེན་ཐ་སྙད་ཀྱི་དོན་ཏེ། སྟོང་ཉིད་བདུན་ཅུ་པ་ལས། གནས་པའམ་སྐྱེ་འཇིག་ཡོད་མེད་དམ། །དམན་པའམ་མཉམ་དང་ཁྱད་པར་ཅན། །སངས་རྒྱས་འཇིག་རྟེན་སྙད་དབང་གིས། །གསུང་གི་ཡང་དག་དབང་གིས་མིན། །ཞེས་གསུངས་དེ་ལ་གནས་པའམ་ཞེས་གནས་པ་དང་པོར་བརྗོད་དོན། རྒྱུ་འབྲས་དངོས་པོ་རྣམས་ད་ལྟའི་ཆོས་ཡིན་ལ་དེ་ནི་དབུ་སེམས་ཀྱི་རྩོད་གཞི་གཙོ་བོ་ཡིན། སེམས་ཅན་གྱི་དངོས་པོ་ལ་རྟག་བདེན་དུ་འཛིན་པའི་བློ་ལྷན་སྐྱེས་དེ་སྲིད་པའི་ཡན་ལག་བཅུ་གཉིས་ཀྱི་ནང་ཚན་འཁོར་རྩ་མ་རིག་པ་ཉོན་མོངས་པ་ཀུན་གྱི་གཙོ་བོ་ཡིན་ཞིང་། དེ་ལས་དགེ་སྡིག་གི་འདུ་བྱེད་དང་དེ་སྲེད་ལེན་གྱིས་གསོས་བཏབ་པ་ལས་འབྲས་དུས་ཀྱི་རྣམ་ཤེས་སོགས་བཅུ་གཉིས་འབྱུང་བདག་འཛིན་མ་རིག་པ་དང་བློའི་འཛིན་སྟངས་དངོས་སུ་འགལ་བའི་ཤེས་རབ་དང་། ཆོས་ཀུན་བདེན་མེད་དུ་རྟོགས་པ་རིང་དུ་གོམས་པ་ལས་གཞན་གྱིས་ཟློག་མི་ནུས་པས། མ་རིག་པའི་མུན་པ་ལ་སྣང་བའི་ཀུན་བརྟག་འཁོར་བའི་ཆོས་རྣམས་རང་བཞིན་མེད་པ་ཉིད་དུ་གཏན་ལ་ཕབ་པ་ཡིན་ནོ། །ཀུན་བརྟགས་གཏན་ནས་མེད་ན་གཞན་དབང་ཡང་མེད་དེས་ན་ཡོངས་གྲུབ་ཀྱང་མེད་པས་མཚན་ཉིད་གསུམ་ཆར་ལ་སྐུར་བ་བཏབ་པར་འགྱུར་ཞེས་གསུངས་ན། ཡུལ་སྣང་འདི་སེམས་གཉིས་སུ་སྣང་བ་ཡིན་དེ་ལ་དངོས་པོ་མེད་པས་ཀུན་བརྟག་ཡིན་ཞེས་ཡུལ་ལ་ཞེན་པ་བཀག །དེ་ནས་སེམས་བདེན་མེད་དུ་བཤད་པས་ཡུལ་ཅན་ལ་ཞེན་པ་འགོག་པ་ཡིན་ལ། གཉིས་སུ་མེད་ཀྱང་ཐ་སྙད་དུ་ཕན་ཚུན་དམིགས་པ་དང་དམིགས་རྐྱེན་དུ་བཞག་པ་གོང་དུ་བཤད། དེ་ལྟར་བརྟགས་ན་བྱ་བ་དང་བྱེད་པོ་མེད་ཀྱང་ཤེས་པ་རང་ཉིད་དེ་ལ་རྨི་ལམ་ལྟར་སྤྱོད་པར་བྱེད་དོ། །དེ་བས་ན་བྱིས་པ་མཚན་མར་འཛིན་པའི་བློ་ཅན་རྣམས་ནི། འཇིག་རྟེན་འདི་ན་དངོས་པོ་མེད་པའི་ཆོས་ལ་སྤྱོད་པ་དེ་ནི་དཔེར་ན། རྒྱང་རིང་པོ་ནས་སྨིག་རྒྱུ་མཐོང་བ་དེ་ལ་ཆུར་འཛིན་པ་དང་། མིག་སྐྱོན་ཅན་ལ་སྐྲ་ཤད་དང་ཟླ་བ་གཉིས་པ་ལ་ཟླ་བའི་དངོས་པོར་འཛིན་པ་དང་། རྨི་ལམ་གྱི་ཡུལ་ན་ཤེས་པ་ལས་གཞན་པའི་ཡུལ་མེད་ཀྱང་ཡོད་པར་བཟུང་ནས་རང་ཉིད་དེ་ལ་སྤྱོད་པ་བཞིན་ནོ། །ཡེ་ཤེས་སྣང་བ་རྒྱན་གྱི་མདོ་ལས། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཐམས་ཅད་དེ་བཞིན་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་རྣམས། །འཇིག་རྟེན་ན་ནི་མེད་པའི་ཆོས་ལ་སྤྱོད། །ཅེས་དང་། མདོ་སྡེ་རྒྱན་ལས། གང་ཞིག་ཡོད་པ་མི་མཐོང་མེད་མཐོང་བ། །འདི་འདྲའི་མུན་ནག་རྣམ་པ་དེ་གང་ཞིག །ཅེས་སོ། །དེ་བས་ན་ཀུན་བརྟག་དངོས་མེད་ལ་དངོས་པོའི་མཚན་མར་བཟུང་ནས་དོན་བྱེད་པར་རློམ་པ་ནི་སོ་སོ་སྐྱེ་བོ་རང་ཁའི་ཡུལ་ཏེ། སྨིག་རྒྱུ་ལ་ཆུར་བཟུང་ནས་དོན་བྱེད་པར་རློམ་པ་དང་འདྲ་བའི་ཕྱིར། རང་བཞིན་མེད་ཀྱང་སེམས་ཀྱི་ཡུལ་དུ་མེད་བཞིན་ཐ་སྙད་དུ་སྣང་བ་དག་ལ་བསྟེན་པ་རྒྱུ་འབྲས་ཀྱི་བྱ་བྱེད་འཇོག་ནུས་པ་འཇིག་རྟེན་རྣལ་འབྱོར་པ་རྣམས་ཀྱི་ཡུལ་ཡིན་ཏེ། རྨི་ལམ་ལ་དངོས་མེད་ཀྱང་དོན་བྱེད་པར་སྣང་ལ་ཆོས་ཐམས་ཅད་རྨི་ལམ་ལྟར་རྟོགས་པ་ལ་དངོས་པོ་མེད་ཀྱང་དོན་བྱེད་པར་སྣང་བ་མི་འགལ་བའི་ཕྱིར། ཏིང་འཛིན་རྒྱལ་པོ་ལས། སྲིད་གསུམ་རྨི་ལམ་དང་འདྲ་སྙིང་པོ་མེད། །མྱུར་དུ་འཇིག་ཅིང་མི་རྟག་སྒྱུ་མ་བཞིན། །འོང་བ་མེད་ཅིང་འདི་ནས་འགྲོ་བའང་མེད། །རྒྱུན་རྣམས་རྟག་ཏུ་སྟོང་ཞིང་མཚན་མ་མེད། །ཅེས་དང་། དབུ་མ་ལས། ཆོས་རྣམས་སྟོང་པ་འདི་ཤེས་ནས། །ལས་དང་འབྲས་བུ་བརྟེན་པ་གང་། །ངོ་མཚར་བས་ཀྱང་འདི་ངོ་མཚར། །རྨད་བྱུང་བས་ཀྱང་འདི་རྨད་བྱུང་། །ཞེས་སོ། །གསུམ་པ་ཡོངས་གྲུབ་ལ་བཞི། ཆོས་ཉིད་ལ་མཐོང་དུ་མེད་པ། །སྣོད་བཅུད་སྟོང་པར་བསྟན་པ། །མཇུག་འཁོར་འདས་ཀྱི་ཆོས་ཐམས་ཅད་སྟོང་པར་བསྟན་པ། དེའི་གདམས་པ་གཏན་ཚིགས་དང་བཅས་པའོ། །དང་པོ་ནི། གཉིད་སད་སོགས།༣ དཔེར་ན་གཉིད་སད་པ་ན་རྨི་ལམ་གྱི་ཡུལ་དབང་ཤེས་གསུམ་མེད་པ་བཞིན། ཕྱི་ནང་གི་དངོས་པོར་སྣང་བའི་ཡུལ་དབང་ཤེས་པ་འདི་ཡང་། མ་རིག་པའི་གཉིད་སད་དེ་ཆོས་ཉིད་ཀྱི་བདེན་པ་མངོན་སུམ་མཐོང་ནས་མེད་དེ། འཇུག་པ་ལས། འདི་ན་ཇི་ལྟར་སད་བཞིན་ཇི་སྲིད་དུ། །མ་སད་དེ་སྲིད་དེ་ལ་གསུམ་ཆར་ཡོད། །སད་པར་གྱུར་ན་གསུམ་ཆར་མེད་པ་ལྟར། གཏི་མུག་གཉིད་སད་ལས་ཀྱང་དེ་བཞིན་ནོ། །ཞེས་སོ། །འཕགས་པའི་མཉམ་བཞག་ན་གཟུང་འཛིན་མེད་ཅིང་རྗེས་ཐོབ་དག་པ་འཇིག་རྟེན་པའི་ཡེ་ཤེས་ལ་གཟུང་འཛིན་གཉིས་སྣང་ཡོད་ཀྱང་འཛིན་པ་མེད་དེ་མཁས་པའི་མདུན་ན་མགལ་མེ་བསྐོར་བ་བཞིན་ནོ། །གཉིས་པ་ལ་གཉིས། འཁོར་བ་མ་གྲུབ་པ། མྱང་འདས་མ་གྲུབ་པའོ། །དང་པོ་ལ་ལྔ་སྟེ། ཡུལ་མ་གྲུབ་པ། སེམས་མ་གྲུབ་པ། སྐད་ཅིག་མའི་རིགས་པ། ལྟོས་པའི་རིགས་པ། རྟེན་འབྲེལ་གྱི་རིགས་པས་མ་གྲུབ་པར་བསྟན་པའོ། །དང་པོ་ནི། དེ་བས་ཡུལ་སོགས།༣ དེ་བས་ན་ད་ལྟའི་ཡུལ་སྣང་རྣམས་འདི་ལྟར་དུ་མེད་དེ། རང་གི་རྣམ་པར་རྟོག་པས་མེད་པ་ལ་ཡོད་པར་བརྟགས་པ་ཡིན། ཡང་ན་སངས་རྒྱས་ལ་ཡུལ་སྣང་འདི་ལྟར་ཡོད་དམ་སྙམ་ན་མེད་དེ། རྣམ་པར་མི་རྟོག་པའི་ཡེ་ཤེས་ལྷུན་གྱིས་གྲུབ་པའི་སངས་རྒྱས་ཀྱིས་འདུས་བྱས་སྐད་ཅིག་མ་འདི་དག་མ་གཟིགས་པའི་ཕྱིར་ཡང་ཡུལ་མེད་དོ། །རྩ་ཤེས་ལས། འབྱུང་བ་དང་ནི་འཇིག་པ་དག །གཏི་མུག་གཉིད་ཀྱིས་མཐོང་བ་ཡིན། །ཞེས་པས་སངས་རྒྱས་ལ་གཏི་མུག་མི་མངའོ། །སངས་རྒྱས་ལ་ཇི་སྙེད་མཁྱེན་པ་མི་མངའ་འམ་ཞེ་ན་མངའ་མེད། རང་སྣང་གི་ལྡོག་པ་དེ་མཁྱེན་ནོ། །འོ་ན་ངའི་སངས་རྒྱས་ཀྱི་སྤྱན་གྱིས་འཇིག་རྟེན་གྱི་ཁམས་ལ་ལ་དག་ལ་ལ་མ་དག་པ་གཟིགས་ཞེས་པ་ཅི། སེམས་ཅན་གཞན་གྱི་སྣང་བའོ། །དེའི་དཔེ་མདོ་ལས་འབྱུང་ངོ་། །གཉིས་པ་ནི། རྣམ་རྟོག་སོགས།༣ ཡུལ་མ་ཟད་པར་རྣམ་རྟོག་བདག་ཏུ་འཛིན་པ་དང་བཅས་པ་ཡི་རྟོག་པའི་སེམས་ཀྱང་ཡོད་ནའང་སོ་སོར་རྟོག་པའི་ཡེ་ཤེས་རབ་ཀྱིས་དཔྱད་དེ་སྔོ་སེར་སོགས་ཁ་དོག་དང་གྲུ་བཞི་སོགས་དབྱིབས་དང་ནི། ཕོ་མོ་ལ་སོགས་པའི་དངོས་པོར་མ་གྲུབ་པས་སྣང་རུང་མ་དམིགས་པས་ཁེགས་སོ། །གསུམ་པ་ནི། ཡང་ན་སོགས།༡ ཡང་ན་སེམས་ནི་སྐད་ཅིག་མ་དུ་མ་ཡིན་པས་དེ་ལ་རང་བཞིན་གཅིག་ཏུ་གྲུབ་པ་མེད་ལ། རྒྱུན་ཡོད་པས་སྙམ་ན་སྐད་ཅིག་སྔ་ཕྱི་མིན་པའི་རྒྱུན་མི་རྙེད། ཡུམ་ལས། རབ་འབྱོར་སེམས་ཀྱི་རྒྱུན་ཞེས་བྱ་བ་ནི་དེ་རྒྱུན་མེད་པར་དེ་བཞིན་གཤེགས་པས་གསུངས་པའི་ཕྱིར་ཏེ། ཞེས་སོ། །བཞི་པ་ནི། ཡང་ན་ལྟོས་པའི་རིག་པས་དཔྱད་ན་ཡུལ་མེད་པས་ན་ཡུལ་ཅན་སེམས་མེད་དེ་དེ་གཉིས་ཕན་ཚུན་ལྟོས་འཇོག་ཡིན་པའི་ཕྱིར། ལྔ་པ་ནི། ཡང་ན་རྟེན་འབྲེལ་སོགས།༣ ཡང་ན་རྟེན་འབྲེལ་གྱི་རིགས་པས་དཔྱད་ན་སེམས་ནི་བདག་རྐྱེན་དབང་པོ་དང་དམིགས་རྐྱེན་གཟུགས་སོགས་ལས་སྐྱེ་བས་རྟེན་འབྲེལ་ཡིན་པའི་ཕྱིར་རང་གི་ངོ་བོས་སྐྱེ་བ་མེད་དོ། །ཡང་ན་སེམས་ནི་དུས་གསུམ་གྱི་སངས་རྒྱས་རྣམས་ཀྱིས་མ་གཟིགས་པ་དཀོན་བརྩེགས་ལས་བཤད་པས་ཁེགས་སོ། །དེ་བས་ན་རླུང་སེམས་ཙམ་ལས་གྲུབ་པའི་ཁམས་གསུམ་འཁོར་བའི་འདི་ངོ་བོ་ཉིད་ནས་སྟོང་ཞིང་བདག་གཉིས་སུ་གྲུབ་པ་མེད་དོ། །གཉིས་པ་མྱང་འདས་མ་གྲུབ་པ་ནི། འཁོར་བ་སོགས།༦ དེ་ལྟར་འཁོར་བ་རང་བཞིན་གྱིས་མེད་པས་དེ་སྤངས་པའི་མྱ་ངན་ལས་འདས་པའང་རང་བཞིན་གྱིས་མེད་དེ། འཁོར་འདས་ཡེ་ནས་འཆིང་གྲོལ་མེད་པ་ལ་འཆིང་གྲོལ་དུ་བཏགས་པ་ནི། མདོ་ལས། མྱ་ངན་འདས་མེད་མྱང་འདས་སུ། །འཇིག་རྟེན་མགོན་གྱིས་བསྟན་པ་སྟེ། །མཁའ་ལ་མདུད་པ་བོར་བ་ནི། །ནམ་མཁའ་ཉིད་ཀྱིས་བཀྲོལ་བ་ཡིན། །ཞེས་གསུངས་པའི་ཕྱིར། མྱ་ངན་ལས་འདས་པའི་མཐར་ཐུག་སངས་རྒྱས་ཉག་གཅིག་ཡིན་ལ། སངས་རྒྱས་དེ་ཡི་ཆོས་ཀྱི་སྐུ་ནི་ཆོས་དབྱིངས་སྤྲོས་པ་ཐམས་ཅད་དང་བྲལ་བ་དང་དབྱེར་མེད་པའི་ཡེ་ཤེས་ཡིན་ཞིང་། དེ་ཉིད་ལའང་རང་རྒྱུད་དུ་བཞག་པའི་དངོས་པོ་མེད་པར་འཇིག་རྟེན་པའི་ངོས་ནས་བཞག་པའི་ཐ་སྙད་ཙམ་མོ། །གདུལ་བྱ་ལ་སྣང་བའི་གཟུགས་སྐུ་རྣམ་པ་གཉིས་ནི་ཡེ་ཤེས་ཆོས་སྐུའི་བདག་རྐྱེན་ལས་བྱུང་བའི་གཟུགས་བརྙན་ཙམ་ཡིན་ཏེ། མདོ་ལས། དེ་བཞིན་གཤེགས་པ་ཟག་པ་མེད་པ་ཡི། །དགེ་བའི་ཆོས་ཀྱི་གཟུགས་བརྙན་ལྟ་བུ་ཡིན། །དེ་བཞིན་ཉིད་དང་བདེ་གཤེགས་བྱང་ཆུབ་མེད། །འཇིག་རྟེན་ཐམས་ཅད་ཀྱིས་ནི་གཟུགས་བརྙན་མཐོང་། །ཞེས་སོ། །ཡེ་ཤེས་ལའང་རང་བཞིན་མེད་པས་དེའི་གཟུགས་བརྙན་ཡིན་ཕྱིར་དངོས་པོ་མེད་པའམ། ཡང་ན་ཆུ་ཟླའི་གཟུགས་བརྙན་ལྟ་བུ་ཡིན་པའི་ཕྱིར་དངོས་པོ་མེད་པས་ན། ཡང་དག་པར་ནི་སངས་རྒྱས་མེད་ཅིང་མིང་བཏགས་པ་ཙམ་སྟེ་མིང་ཡང་དངོས་པོ་མེད་དོ། །རྩ་ཤེས་ལས། གང་དག་སངས་རྒྱས་སྤྲོས་འདས་ཤིང་། །ཟད་པ་མེད་ལ་སྤྲོ་བྱེད་པ། །སྤྲོས་པས་ཉམས་པ་དེ་ཀུན་གྱིས། །དེ་བཞིན་གཤེགས་པ་མི་མཐོང་ངོ་། །ཞེས་སོ། །བཞི་པ་དེའི་གདམས་པ་གཏན་ཚིགས་ལ་བཞི་སྟེ། དང་པོ་སྣང་སྟོང་དབྱེར་མེད་ཀྱང་ལྟ་བས་ཐག་བཅད་པ། བར་དུ་བསམ་བརྗོད་ཀྱི་མཐའ་དང་བྲལ་བར་འཇོག་པ། ཐ་མ་ཆོས་ཐམས་ཅད་ནམ་མཁའ་དང་འདྲ་བ། དེ་ཉིད་ཐོས་བསམ་གྱིས་རྟོགས་པའི་ཐབས་བསྟན་པའོ། །དང་པོ་ནི། མདོར་ན་འཁོར་བ་དང་མྱ་ངན་ལས་འདས་པའི་ཆོས་རྣམས་ལ། རང་བཞིན་ནམ་ངོ་བོ་དང་བདག་དང་བདེན་པར་གྲུབ་པ་སོགས་མིང་གི་རྣམ་གྲངས་ཏེ། བཞི་བརྒྱ་པའི་འགྲེལ་བར། དེ་ལ་བདག་ཅེས་བྱ་བ་ནི་གང་ཞིག་དངོས་པོ་རྣམས་ཀྱི་གཞན་ལ་རག་མ་ལུས་པའི་ངོ་བོ་རང་བཞིན་ཏེ། དེ་མེད་པ་ནི་བདག་མེད་པའོ། །དེ་ནི་ཆོས་དང་གང་ཟག་གི་དབྱེ་བས་གཉིས་སུ་རྟོགས་ཏེ། ཆོས་ཀྱི་བདག་མེད་པ་དང་གང་ཟག་གི་བདག་མེད་པའོ། །ཞེས་པ་ལྟར་བདག་མེད་ཀྱི་གནས་ལུགས་ལ་གཞལ་ན་སྒྱུ་མའི་སྤྲོས་པ་ཙམ་དུའང་ཁས་བླང་དུ་མེད་པའི་ཕྱིར། ཐ་སྙད་ལ་ཅིར་སྣང་ཅི་སྲིད་ཐམས་ཅད་སྣང་བཞིན་དུ་གནས་ཚོད་ལ་ཆོས་ཉིད་སྟོང་པ་ཉིད་ལས་མ་འདས་ལ། ཆོས་ཉིད་དེ་ལ་བྱང་ཆུབ་ཀྱི་སེམས་ཞེས་བྱ་སྟེ། བདག་མེད་ལ་དྲིས་པའི་མདོར། དངོས་པོ་མེད་ཅིང་དམིགས་སུ་མེད། །ཐམས་ཅད་སྟོང་པ་གནས་མེད་པ། །སྤྲོས་པ་རྣམས་ལས་ཡན་ལག་འདས། །བྱང་ཆུབ་སེམས་ཀྱི་མཚན་ཉིད་ཡིན། །ཞེས་གསུངས་པ་ནི་དོམ་དམ་བདེན་པ་མཐར་ཐུག་པའི་མཚན་ཉིད་དོ། །དེ་ཡང་བྱང་ཆུབ་པར་བྱ་བ་དང་བྱེད་པ་མི་དམིགས་པའི་ཕྱིར་སངས་རྒྱས་བྱང་ཆུབ་ཐ་སྙད་ཙམ་སྟེ་དངོས་པོ་མེད་ཅིང་། ཡོད་མེད་གཉིས་ནི་ཕན་ཚུན་ལྟོས་པའི་དབང་གིས་བཞག་པའི་ཆོས་ཡིན་ལ་རང་གི་མཚན་ཉིད་ཀྱིས་མ་གྲུབ་ལ། ཡོད་པ་མ་གྲུབ་པས་ན་དེ་ལ་ལྟོས་ནས་མེད་པའང་གྲུབ་པ་མེད་དེ། དེ་གཉིས་ཕན་ཚུན་མེད་ན་མི་འབྱུང་གི་རྒྱུ་ཡིན་པས་དོན་ལ་གཉིས་ཀ་མེད་ལ། དེ་བས་ཡོད་པ་ཡང་མ་ཡིན་མེད་པ་ཡང་མ་ཡིན་པ་མི་སྲིད་དོ། །དེ་བཞིན་དུ་ཆོས་ཅན་ཀ་བུམ་སོགས་ཀྱི་རང་མཚན་ལ་དཔྱད་ནས་ཅི་ཡང་མེད་པ་ཆོས་ཉིད་སྟོང་པ་དེའང་མེད་དེ། རྩ་ཤེས་ལས། གལ་ཏེ་མི་སྟོང་ཅུང་ཟད་ཡོད། །སྟོང་པའང་ཅུང་ཟད་ཡོད་པར་འགྱུར། །མི་སྟོང་ཅུང་ཟད་ཡོད་མིན་ན། །སྟོང་པ་ཡོད་པར་ག་ལ་འགྱུར། །ཞེས་དང་། སློབ་དཔོན་ལེགས་ལྡན་འབྱེད་ཀྱིས། །གཟུགས་ཀྱི་སྐྱེ་བ་མེད་དོ་སྙམ་དུ་དཔྱད་ན་ཤེར་ཕྱིན་ལ་སྤྱོད་ཀྱི། གཟུགས་ཀྱི་སྐྱེ་བ་མེད་པ་ཡོད་དོ་སྙམ་ན་ཤེར་ཕྱིན་ལ་མི་དཔྱོད་དོ། །གསུངས། འདི་ལྟར་སོ་སྐྱེས་ཀྱི་གཅིག་ཏུ་བྲལ་གྱི་རིགས་པ་དང་འཕགས་པའི་མཉམ་བཞག་གི་རིག་ངོར་སྐྱེ་བ་འགོག་པ་ཡིན་གྱི་སྐྱེ་མེད་སྒྲུབ་པ་མ་ཡིན་ནོ། །སྟོང་ཉིད་ལ་དངོས་པོར་ཞེན་པ་ནི་གསོར་མི་རུང་བའི་ལྟ་བ་སྟེ། འཕགས་པ་ཀླུས། ཀུན་རྟོག་ཐམས་ཅད་སྤང་བའི་ཕྱིར། །སྟོང་ཉིད་བདུད་རྩི་བསྟན་པར་མཛད། །གང་ཞིག་དེ་ལ་ཞེན་གྱུར་པ། །དེ་ཡང་ཁྱོད་ཀྱིས་སྤོང་བ་ཡིན། །ཞེས་སོ། །དེས་ན་ཡོད་མེད་ཀྱི་མཐའ་གཉིས་མ་གྲུབ་ཅིང་མེད་པའི་ཕྱིར་དེ་གཉིས་ལ་ལྟོས་པའི་དབུས་ཀྱང་མི་འགྲུབ་ལ། རྩ་ཤེས་ལས། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མེད། །དེ་ནི་དེ་ཉིད་མཚན་ཉིད་དོ། །ཞེས་གསུངས་པས། ཆོས་ཉིད་ཟབ་མོ་དེ་ཡིད་ལ་བསམ་ཞིང་ངག་གིས་བརྗོད་དུ་མེད་པ་ལ། མཐའ་ཐམས་ཅད་དང་བྲལ་བའི་དབུ་མའོ་སྙམ་དུ། དབུས་སུ་གནས་པར་བརྟགས་ན་མཐའ་གཉིས་འཇོག་བྱེད་ཀྱི་གཞི་ཡོད་པར་བཟུང་བས་དེ་ལ་ལྟོས་པའི་མཐའ་ཡང་མི་ཁེགས་པའི་སྐྱོན་དུ་འགྱུར་རོ། །འཕགས་པ་ཏིང་ངེ་འཛིན་རྒྱལ་པོ་ལས། རྟག་དང་མི་རྟག་འདི་ཡང་མཐའ་ཡིན་ཏེ། །ཡོད་དང་མེད་ཅེས་བྱ་བ་གཉིས་ཀ་མཐའ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པས་དབུས་ལའང་གནས་པར་མི་བྱའོ། །ཞེས་སོ། །དེ་ཕྱིར་ཆོས་རྣམས་ཀུན་གྱི་རང་བཞིན་ནི་དཔེར་ན་ནམ་མཁའ་ལ་ཁ་དོག་སྣ་ཚོགས་པའི་ལྷོ་སྤྲིན་ཇི་ལྟར་སྣང་ཡང་སྣང་བཞིན་སྟོང་པས་དངོས་པོ་ཅི་ཡང་མེད་པ་བཞིན་དུ། དོན་དམ་དཔྱོད་བྱེད་ཀྱི་རིགས་པ་སྔོན་དུ་སོང་བའི་ལག་རྗེས་ལས་བྱུང་བའི་ཆོས་ཀུན་ཇི་ལྟར་སྣང་ཡང་། དེ་ལ་དགག་པ་དང་སྒྲུབ་པའི་རྟོག་པ་གང་ཡང་མི་དགོས་ཏེ་དངོས་མེད་དུ་དཔྱད་ཟིན་ཅིང་། སྣང་སྟོང་ཟུང་འཇུག་ཡིན་པས་སྣང་བ་ཉིད་ནས་དངོས་པོར་དམིགས་པ་མེད་དེ། ཡོད་མེད་དབུས་དང་གསུམ་དུ་མ་གྲུབ་པ་བཤད་མ་ཐག་པའི་ཕྱིར་རོ། །མདོ་ལས། གང་ཞིག་དངོས་རྣམས་དངོས་མེད་ཤེས་པ་དེ། །ནམ་ཡང་དངོས་པོ་ཀུན་ལ་ཆགས་མི་འགྱུར། །གང་ཞིག་ནམ་ཡང་དངོས་ཀུན་ཆགས་མེད་པ། །དེ་ནི་ཏིང་འཛིན་མཚན་མ་མེད་ལ་རེག །ཅེས་དང་། ལྷའི་བུས་ཞུས་པ་ལས། སྨྲས་པ། འཇམ་དཔལ་བྱང་ཆེན་བརྗོད་ངེས་པ་གང་མཉམ་པར་བཞག་པར་འགྱུར་བའི་རྣམ་གྲངས་ཡོད་དམ། ལྷའི་བུ་ཡོད་དེ། བྱང་ཆེན་གང་ལ་ལ་རྨི་ལམ་དུ་ཡང་དོན་དམ་པར་རྫས་དང་དངོས་པོ་དང་ངོ་བོའི་སེམས་མི་སྐྱེ་བ་དེ་ནི་མི་དམིགས་པའི་ཚུལ་གྱིས་ཤིན་ཏུ་མཉམ་པར་བཞག་པར་འགྱུར་རོ། །ཞེས་གསུངས། དངོས་པོ་ལ་མངོན་པར་ཞེན་པ་ནི་བརྗེད་པ་མེད་པར་མཉམ་པར་བཞག་ཀྱང་རྣམ་པར་གཡེང་བ་དང་འདྲའོ། །སྐབས་འདིར་ཆོས་ཐམས་ཅད་རྟེན་ཅིང་འབྲེལ་ཏེ་འབྱུང་བ་ཡིན་པས་དེ་གྲུབ་པའི་མཚན་ཉིད་ལ་རིགས་པ་བཞི་སྟེ། རང་དང་སྤྱིའི་མཚན་ཉིད་ཅན་ཆོས་རྣམས་ཀྱི་རང་བཞིན་ཏེ། མེ་ཁོ་ན་ཚ་ཆུ་ཁོ་ན་གཤེར་གྱི་གཞན་ནི་མ་ཡིན་ནོ་ཞེས་པ་ལྟ་བུ་ནི་ཆོས་ཉིད་ཀྱི་རིགས་པ་སྟེ་ངོ་བོ་ཉིད་ཀྱི་སྒོ་ནས་གྲུབ་པ། ཆོས་ཐམས་ཅད་རྒྱུ་ལ་མ་ལྟོས་པ་ཡིན་པས་ཐམས་ཅད་འབྲས་བུའི་དོན་དུ་འབྱུང་ཞིང་རྟག་པ་མེད་ཅིང་མི་རྟག་པ་ཡང་རྒྱུ་ལ་ལྟོས་པ་ཡིན་ཞེས་པ་ལྟ་བུ་ལྟོས་པའི་རིགས་པ་སྟེ་རྒྱུའི་སྒོ་ནས་སྒྲུབ་པའོ། །རྒྱུ་དང་འབྲས་བུའི་རིགས་པ་ནི་འབྲས་བུ་ཁྱད་པར་ཅན་སྐྱེ་བར་ངེས་པ་སྟེ། མིག་ཁོ་ནས་མིག་གི་རྣམ་པར་ཤེས་པ་སྐྱེད་ཀྱི་གཞན་ནི་མ་ཡིན་ནོ་ཞེས་པ་ལྟ་བུ་འབྲས་བུའི་སྒོ་ནས་སྒྲུབ་པ་སྟེ་བྱ་བ་བྱེད་པའི་རིགས་པ་དང་གཅིག་བཤད་ཚུལ་མི་འདྲ་བ་ཡོད། མཚན་ཉིད་གསུམ་པའི་གཏན་ཚིགས་ཀྱིས་བསྒྲུབ་བྱའི་དོན་སྒྲུབ་པར་བྱེད་པ་ནི་འཐད་པས་སྒྲུབ་པའི་རིགས་པའོ། །འདི་ནི་ཤེས་པར་བྱེད་པའི་ཡུལ་ཅན་དང་། རྒྱུ་དང་འབྲས་བུའི་དེ་གཉིས་ནི་སྐྱེད་པའི་ཡུལ་ཅན་ནོ། །འདི་རྣམས་ཀྱི་སེལ་བ་བཞི་ནི། ངོ་བོ་ཉིད་ལ་ཐེ་ཚོམ་ཟ་བ་དང་། བྱེད་པ་ལ་ཐེ་ཚོམ་ཟ་བ་དང་། མངོན་པར་འགྲུབ་པ་ལ་ཐེ་ཚོམ་ཟ་བ་དང་། རིགས་པ་ལ་ཐེ་ཚོམ་ཟ་བའོ། །དེ་ལ་ཆོས་ཉིད་ཀྱི་རིགས་པ་ལ་སྐྱོན་མེད་པ་མེ་ཤེལ་ལ་ཚ་བ་ཡོད་པ་ལྟ་བུ་སོགས་ཅི་རིགས་སྦྱར་རོ། །བསམ་གྱིས་མི་ཁྱབ་པའི་གནས་ལ་ནི་འཐད་པས་སྒྲུབ་མི་ནུས་པས་ལུང་གིས་སོ། །རིགས་པ་བཞིས་ཆོས་ཐམས་ཅད་ཀླན་ཀ་དང་ལན་དུ་བཅས་པས་སྟོན་པར་ནུས་པའི་ཕྱིར་རིགས་པའི་སྤོབས་པ་ཞེས་བྱའོ། །གཉིས་པ་ནི། ཅི་ཡང་སོགས།༡༠ དེ་ལྟར་གཏན་ཚིགས་དུ་མས་དཔྱད་ཚེ་འདིའོ་ཞེས་བློ་ཡུལ་ན་ཅི་ཡང་མེད་པ་དེའི་ཚེ་དངོས་དང་དངོས་མེད་ཀྱི་རྣམ་པ་ཅི་ཡང་བསམ་དུ་མེད་ཅིང་། མིག་དང་རྣ་བས་མཐོང་ཐོས་ལ་སོགས་པའི་ཐ་སྙད་རྣམས་དང་བྲལ་བ་དང་སེམས་དང་སེམས་བྱུང་གི་ཤེས་པ་ཀུན་གྱི་ཡུལ་ལས་འདས་ཏེ། དེ་ལ་རྣམ་པར་ཤེས་པའི་གནས་མེད་ཅིང་དོན་དམ་བློ་ཡི་སྤྱོད་ཡུལ་མིན་ཞེས་པའི་དོན་ནོ། །དེ་ལ་མངོན་སུམ་དང་རྗེས་སུ་དཔག་པ་ལ་སོགས་པའི་ཚད་མ་གཞན་གྱི་ཡུལ་དུ་བྱས་ནས་གཞལ་དུ་མེད་དེ། ཐ་སྙད་དུ་མི་རྟོག་པའི་ཡེ་ཤེས་དང་རོ་གཅིག་ཏུ་གྱུར་པའི་ཕྱིར། ཕར་ཕྱིན་སྡུད་པ་ལས། གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ནམ་མཁའ་གང་ལའང་ཅུང་ཟད་མི་གནས་དེ་དང་འདྲ། །ཞེས་སོ། །དེ་བས་ན་གླང་པོ་རྩལ་གྱི་མདོ་ལས། གལ་ཏེ་ཆོས་རྣམས་རང་བཞིན་འགའ་ཡོད་ན། །རྒྱལ་བ་ཉན་ཐོས་བཅས་པས་དེ་མཁྱེན་འགྱུར། །ཞེས་སོགས་གསུངས་པས། ཀུན་མཁྱེན་རྒྱལ་བས་ཀྱང་དངོས་པོའི་ཆོས་གཅིག་ཀྱང་མ་གཟིགས་པའི་ཕྱིར་དང་། དཀོན་མཆོག་སྤྲིན་ལས། ཆོས་ཀྱི་འཁོར་ལོ་བསྐོར་བ་ན། །གཟོད་ནས་ཞི་ཞིང་མ་སྐྱེས་པའི། །རང་བཞིན་མྱ་ངན་འདས་པ་ཡི། །ཆོས་རྣམས་མགོན་པོ་ཁྱེད་ཀྱིས་བསྟན། །ཞེས་པས་ཆོས་ཐམས་ཅད་དེ་བཞིན་ཉིད་ཁོ་ན་ལས་བརྩམ་སྟེ་བསྟན་པས། སྒྲ་རྟོག་གི་མཚན་ཉིད་ཅན་གྱི་ཚིག་གཅིག་ཙམ་གྱི་ཆོས་ཀྱང་བཤད་པ་མེད་དེ། གསང་བ་བསམ་གྱིས་མི་ཁྱབ་པའི་མདོར། བཅོམ་ལྡན་འདས་སངས་རྒྱས་ནས་མྱ་ངན་ལས་འདས་ཀྱི་བར་དུ་ལྕེ་རྐན་གྱི་རྩོལ་བ་ལས་བྱུང་བའི་ཐ་ན་ཡིག་འབྲུ་གཅིག་ཀྱང་མ་གསུངས་སོ། །ཞེས་པ་ནི་དེ་བཞིན་གཤེགས་པ་ལ་དབུགས་དབྱུང་རྔུབས་དང་སློང་བྱེད་ཀྱི་རྟོག་པ་མི་མངའ་ཞིང་སངས་རྒྱས་ཀྱི་གསུང་གི་གསང་བ་བསམ་གྱིས་མི་ཁྱབ་པའོ། །འོ་ན་སྡེ་སྣོད་གསུམ་བཤད་པས་སོ་ཤེ་ན། དེ་ནི་གདུལ་བྱའི་རྟོགས་པའི་དབང་གིས་སོ་སོའི་མོས་པ་ལྟར་སྡེ་སྣོད་གསུམ་པོ་དེ་བཞིན་ཉིད་ཀྱི་ངང་ལས་བྲག་ཆ་བཞིན་དུ་བཤད་པར་སྣང་ངོ་། །དེས་ན་གདུལ་བྱ་འདུལ་བྱེད་དམ་ཆོས་དང་ཆོས་ཉིད་འདུས་བྱས་འདུས་མ་བྱས་སོགས་རང་བཞིན་གྱིས་སོ་སོར་ཡོད་ན་ཅི་ཡང་ཡིན་དུ་རུང་བའི་ཕྱིར། བསམ་པའི་ཡུལ་དུའང་འགྱུར་ན་དེ་ལྟ་བུ་མིན་ཏེ་བསམ་བརྗོད་ལས་འདས་པ་ཡིན་ཏེ་བློ་ནི་ཀུན་རྫོབ་ཡིན་པར་བརྗོད། ཅེས་གསུངས་པས། བསམ་བརྗོད་ཀྱི་ཡུལ་དུ་གྱུར་པ་ནི་ཀུན་རྫོབ་བརྟགས་པ་ཙམ་སྟེ་དོན་ལ་གཉིས་སྣང་འཁྲུལ་བ་ཡིན་ནོ། །དེ་ལྟར་དཔྱད་འཇོག་སྤེལ་མ་ཅི་རིགས་པ་སྔོན་དུ་བཏང་ནས་སྒོམ་པ་ལ་འཇུག་ན་ལེགས་ཏེ། གཞན་དུ་ན་དངོས་པོའི་མཚན་ཉིད་གཏན་ལ་མ་ཕེབས་པས་དེ་སྒོམ་པ་ལ་འཇུག་པར་ཡང་མི་འགྱུར་ལ། ཞུགས་ཀྱང་ཐེ་ཚོམ་ཟ་བར་ཡང་འགྱུར་ཞིང་སྒྲིབ་པ་སྤོང་བའི་གཉེན་པོར་མི་འགྱུར་བ་མུ་སྟེགས་ལྷག་སྤྱོད་ཀྱི་ཏིང་ངེ་འཛིན་བསྒོམ་པ་དང་འདྲ་བར་གསུངས། གཏན་ལ་ཕབ་ནས་བསྒོམ་ན་ཐོག་མར་སྒོམ་པ་ལ་འཇུག་ཅིང་། ཞུགས་ནས་ཐེ་ཚོམ་མི་ཟ་ཞིང་སྒྲིབ་པའི་གཉེན་པོར་འགྱུར་བས་མྱ་ངན་ལས་འདས་པའི་རྒྱུར་འགྱུར་རོ། །ཏིང་རྒྱལ་ལས། གལ་ཏེ་ཆོས་ལ་བདག་མེད་སོ་སོར་རྟོག །སོ་སོར་དེ་བརྟགས་གལ་ཏེ་སྒོམ་པ་ནི། དེ་ནི་མྱ་ངན་འདས་ཐོབ་འབྲས་བུའི་རྒྱུ། རྒྱུ་གཞན་གང་ཡིན་དེས་ནི་ཞི་མི་འགྱུར། །ཞེས་སོ། །གསུམ་པ་ནི། དེ་བས་ཆོས་ཀུན་སོགས། དེ་བས་ན་ཆོས་ཀུན་ནི་སྤྲོས་པ་མེད་པ་ནམ་མཁའི་མཚན་ཉིད་ཡིན་ཏེ། ནམ་མཁའ་ནི་མིང་ཙམ་ལས་མཚན་མ་ཅི་ཡང་མེད་པ་དེ་ལྟར་ན། ཆོས་ཐམས་ཅད་ནི་ད་ལྟར་དཔྱད་མཐས་སྟོང་པ་ཙམ་མིན་པར་ཡེ་ནས་སྟོང་པ་ཉིད་ཡིན་པའི་ཕྱིར། ཚངས་པ་ཁྱད་པར་སེམས་ཀྱིས་ཞུས་པ་ལས། འཇིག་རྟེན་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །དེ་དག་དེ་ཡི་འགྲོ་རིག་ནས། །འཇིག་རྟེན་ཆོས་ཀྱིས་མི་གོས་སོ། །ཞེས་སོ། །ཡང་དག་པའི་གནས་ལུགས་དེ་ལ་གཞལ་ན་ཉོན་མོངས་པ་སྤང་དུ་མེད་ཅིང་བྱང་ཆུབ་སྒྲུབ་ཏུ་མེད་དེ། ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། འདོད་ཆགས་མི་དམིགས་དེ་བཞིན་ཞེ་སྡང་དང་། །གཏི་མུག་འདི་ཡང་ནམ་ཡང་མི་དམིགས་སོ། །ཆོས་ཀུན་ནམ་མཁའ་འདྲ་བར་རབ་ཤེས་པ། །དེ་ལྟར་སུས་ཤེས་དེ་ནི་རྒྱལ་པོར་འགྱུར། །ཞེས་སོ། །དེ་ལྟར་ན་བྱང་ཆུབ་ཐོབ་པ་དང་མི་ཐོབ་པའི་རེ་དོགས་ཏེ་ཕུང་པོ་སྤངས་ནས་བྱང་ཆུབ་ཐོབ་བྱའམ་བླང་བྱར་སེམས་པ་མེད་དེ། ཐམས་ཅད་རང་བཞིན་གྱིས་དབེན་ཞིང་སྟོང་པའི་ཕྱིར། ཏིང་རྒྱལ་ལས། ཕུང་པོ་རང་བཞིན་དབེན་ཞིང་སྟོང་པ་ཉིད། །བྱང་ཆུབ་རང་བཞིན་དབེན་ཞིང་སྟོང་པ་ཉིད། །གང་སྤྱོད་དེ་ཡང་རང་བཞིན་སྟོང་པ་སྟེ། །ཡེ་ཤེས་ལྡན་གྱིས་ཤེས་རབ་བྱིས་པས་མིན། །ཞེས་སོ། །མཉམ་པ་ཉིད་ཀྱི་དོན་མ་མཐོང་བས་རེ་དོགས་སྤང་བླང་གི་མཐར་ལྷུང་བ་བདུད་ལས་ཏེ། དྲི་མ་མེད་པར་གྲགས་པའི་མདོ་ལས། རྣམ་པར་གྲོལ་བ་ནི་འདོད་ཆགས་དང་ཞེ་སྡང་དང་གཏི་མུག་སྤངས་པས་གྲོལ་བ་མ་ཡིན་ནམ། སྨྲས་པ། འདོད་ཆགས་དང་ཞེ་སྡང་དང་གཏི་མུག་སྤངས་པས་རྣམ་པར་གྲོལ་ལོ་ཞེས་ཟེར་བ་ནི་ང་རྒྱལ་བ་རྣམས་ཀྱི་སྟེ། གང་ང་མེད་པ་རྣམས་ཀྱིས་ནི་འདོད་ཆགས་དང་ཞེ་སྡང་དང་གཏི་མུག་གི་རང་བཞིན་ཉིད་རྣམ་པར་གྲོལ་བ་ཡིན་ནོ། །ཞེས་གསུངས། ཡང་དེ་ལས། འདི་ལྟར་འཕགས་པ་དགྲ་བཅོམ་པ་རྣམས་ནི་བདག་གིས་ཉོན་མོངས་པ་ཐམས་ཅད་སྤངས་སོ་སྙམ་པའི་རློམ་སེམས་ཡོད་ནའང་དགྲ་བཅོམ་པར་མི་འགྱུར་རོ། །ཞེས་དང་། རྡོ་རྗེ་གཅོད་པ་ལས། འཕགས་པ་རབ་འབྱོར་གྱིས། བཅོམ་ལྡན་འདས་བདག་འདོད་ཆགས་དང་བྲལ་བ་དགྲ་བཅོམ་པ་ལགས་ཀྱང་དགྲ་བཅོམ་པའོ་སྙམ་དུ་མི་སེམས་ལགས་སོ། །ཞེས་གསུངས་པས་འཕགས་པའི་གང་ཟག་ཐམས་ཅད་ཀྱི་ལམ་གྱི་དངོས་གཞི་འདུས་མ་བྱས་པ་ཡིན་པས་དེ་ལ་སྤང་བླང་གི་རློམ་སེམས་མེད་དོ། །རྣམ་པར་ཐར་པ་གསུམ་དང་ལམ་དང་གཉེན་པོ་ཡང་མེད་དེ། རྣམ་པར་ཐར་པའི་སྒོ་སྟོང་པ་ཉིད་ནི་དབེན་པའི་མཚན་ཉིད་ཅན་ཏེ་དངོས་པོར་ལྟ་བའི་གཉེན་པོ་དང་། དེ་བཞིན་དུ་མཚན་མ་མེད་པའི་ཏིང་ངེ་འཛིན་ནི་ཞི་བའི་མཚན་ཉིད་ཅན་ཏེ་མཚན་མར་ལྟ་བའི་གཉེན་པོ་དང་། སྨོན་པ་མེད་པའི་ཏིང་ངེ་འཛིན་ནི་སྨོན་པ་ལ་ཆགས་པའི་གཉེན་པོ་སྟེ་སྡུག་བསྔལ་སེལ་བའི་མཚན་ཉིད་ཅན་ནོ། །དེ་ལྟར་སྒོམ་པར་འདོད་པ་ཡང་མཉམ་པ་ཉིད་ཀྱི་དོན་མ་མཐོང་བས་བླང་དོར་གྱིས་བཅིངས་པའོ། །འོ་ན་རྣལ་འབྱོར་པའི་རྣམ་ཐར་གང་ཞེ་ན། ངེས་དོན་གྱི་མདོ་ལས་གསུངས་པ་ལྟར། སྤང་གཉེན་དབྱེར་མེད་པར་རྟོགས་པ་ནི་ཐབས་ལ་མཁས་པའི་རྣམ་པར་ཐར་བའོ། །སྤང་བྱ་ལ་རྫས་ཀྱི་མཚན་མ་མེད་པར་རྟོགས་པ་ནི་རང་བཞིན་གྱིས་འོད་གསལ་བའི་རྣམ་པར་ཐར་བའོ། །ཆོས་གང་ཡང་རང་གི་ངོ་བོས་གྲུབ་པ་མེད་པར་རྟོགས་པ་ནི་མངོན་པར་འདུས་མ་བྱས་པའི་རྣམ་པར་ཐར་བའོ། །ཞེས་རྣམ་གྲངས་པའི་དོན་དམ་དེ་ཙམ་མོ། །དོན་དམ་པའི་བདེན་པ་ཉིད་ཀྱང་དངོས་པོ་མེད་དེ་སྟོང་པ་ཉིད་སྟོང་པ་ཉིད་ཅེས་གསུངས་པའི་ཕྱིར། དབུ་མ་སྣང་བ་དང་རྒྱན་ལས་གསུངས་པའི་དོན་དམ་རྣམ་གྲངས་བ་སྐྱེ་བ་མེད་འགག་པ་མེད་ལ་སོགས་པ་མེད་དེ་སྤྲོས་པ་ཀུན་ལས་འདས་པའི་ཕྱིར། དེའི་ཕྱིར་སྟོང་པ་ཉིད་བསྒོམ་ཞེས་བྱ་བའང་ཚིག་བླ་དྭགས་ཏེ་ཐ་སྙད་ཙམ་ཡིན་གྱི་བྱིས་པ་འཛུབ་མོས་ཟླ་བ་བཞིན་བརྟགས་སོགས་གང་གིས་ཀྱང་མཚོན་དུ་མེད་པའི་ཕྱིར། རྟོགས་མེད་ཚུལ་གྱིས་རྟོགས་པས་ན། །སྟོང་ཉིད་མཐོང་བའི་ཐ་སྙད་བཏགས། །ཞེས་པ་ལྟར་རོ། །བསྒོམ་པར་བྱ་བའི་ཡུལ་མེད་ཅིང་སྒོམ་བྱེད་ཀྱི་སེམས་ཀྱང་མེད་དེ་གཟུང་འཛིན་གྱི་སྤྲོས་པ་ཞི་བའི་ཕྱིར། བསྒོམ་རྒྱུ་མེད་དེ་དམིགས་གཏད་མེད་པའི་ཕྱིར། མི་བསྒོམ་པར་བཞག་ནས་ཡོད་པའང་མེད་དེ་ངོ་བོ་གཞན་དུ་མི་འགྱུར་བའི་ཕྱིར། རྣམ་སྣང་ཆོས་བདུན་གྱིས་ལུས་སེམས་འཆོས་པ་སོགས་དང་སྒྲིབ་པའི་སྐྱོན་དང་ཤིན་སྦྱང་སོགས་ཀྱི་ཡོན་ཏན་ཡང་མི་དམིགས་པའི་ཕྱིར་ན། དམིགས་བྱ་དམིགས་བྱེད་ཐམས་ཅད་མི་དམིགས་པ་ནམ་མཁའི་རང་བཞིན་ནོ། །ཉེ་བ་འཁོར་གྱིས་ཞུས་པ་ལས། གང་དག་རང་བཞིན་མེད་ཆོས་འདི་ཤེས་པ། །དཔའ་བོ་དེ་དག་འཇིག་རྟེན་མྱ་ངན་འདའ། །འདོད་པའི་ཡོན་ཏན་སྤྱད་ཀྱང་ཆགས་མེད་ཅིང་། །ཆགས་པ་རྣམས་སྤངས་སེམས་ཅན་འདུལ་བར་བྱེད། །ཅེས་སོ། །དོན་དམ་དཔྱོད་པས་སྟོང་ཉིད་གཏན་ལ་འབེབས་པ་ནི་དོན་དམ་པའི་ངོ་བོ་ལ་དཔྱད་བྱ་ཙམ་མེད་ཀྱང་གློ་བུར་སྒྲོ་བཏགས་བསལ་བ་ཡིན་ལ། གཤིས་ན་སྤྲོས་པ་མེད་པར་ངེས་པ་དང་སྒྲོ་བཏགས་སེལ་བ་དུས་མཉམ་མོ། །དེས་ན་སྟོང་པ་ཉིད་དེ་མ་མཐོང་བའི་ཚུལ་གྱིས་མཐོང་བའི་ཐ་སྙད་བུམ་མེད་ཀྱི་ཕྱོགས་སུ་བུམ་པ་མ་མཐོང་བར་བུམ་པ་མེད་པ་མཐོང་ངོ་ཞེས་པ་ལྟ་བུའོ། །མདོ་སྡུད་པ་ལས། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་ཞེས་དོན་འདི་བརྟག་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །མཐོང་བ་དཔེ་གཞན་གྱིས་ནི་བསྙད་པར་ནུས་མ་ཡིན། །ཞེས་སོ། །སྟོང་པ་ཉིད་ཁོ་ན་བསྒོམ་ན་ཕར་ཕྱིན་དྲུག་དགོས་སམ་སྙམ་ན། རྗེས་ཐོབ་སྤྱོད་པ་དང་འབྲེལ་བ་གོང་དུ་བཤད་ལ། ཞི་ལྷག་ཟུང་འབྲེལ་གྱི་ཏིང་ངེ་འཛིན་དུ་མཁྱེན་གསུམ་གྱི་རྣམ་པ་ཡོངས་རྫོགས་ཚང་བ་ཤེར་ཕྱིན་ལས་གསུངས་པ་དང་། རྡོ་རྗེ་ཏིང་ངེ་འཛིན་གྱི་མདོ་ལས། སེམས་སྟོང་པ་ཉིད་དུ་མི་གཡོ་ན་ཕ་རོལ་ཏུ་ཕྱིན་པ་དྲུག་འདུས་སོ། །ཞེས་དང་། ཚངས་པ་ཁྱད་པར་སེམས་ཀྱིས་ཞུས་པ་ལས། མི་འཛིན་པ་ནི་སྦྱིན་པ་ཡིན་པ་སོགས་རྒྱ་ཆེར་གསུངས་སོ། །བཞི་པ་ནི། དོན་དམ་སོགས།༩ ཇི་སྐད་བཤད་པའི་དོན་དམ་པ་དེ་ཇི་བཞིན་རྟོགས་པར་འདོད་པའི་རྣལ་འབྱོར་པས། དང་པོ་ལུང་དང་རྟོགས་པའི་ཆོས་རྣམས་མཉན་པ་དང་བསམ་པ་དང་སྒོམ་པ་གསུམ་གྱི་སྒོ་ནས་རྟོགས་པར་བྱ་ལ། དེ་གསུམ་གྱི་ཡུལ་ཡང་དང་པོ་ཐོས་པ་ནི་གཙོ་བོར་མིང་ལ་དམིགས་པ་དང་། བསམ་པ་ནི་སྒྲ་དོན་འབྲེལ་བ་སྟེ་མིང་དོན་གཉིས་ཀ་དང་། སྒོམ་པའི་ཡུལ་ནི་དོན་ཉིད་ཡིན་ཏེ་ཐོས་བསམ་གྱི་ཤེས་རབ་ནི་དོན་སྤྱིར་སོ་སོར་རྟོག་པའི་རྣམ་པར་རྟོག་པ་མཚན་འཛིན་དང་། སྒོམ་པ་ནི་རང་མཚན་ལ་རྣམ་པར་མི་རྟོག་པའི་ཡེ་ཤེས་ཡིན་པས་སོ། །དེས་ན་བསམ་པ་དང་སྒོམ་པ་རྣམ་པ་གཉིས་ཀྱི་བསྒོམ་པ་དང་། ཡང་དག་པའི་ལུང་དང་བླ་མ་དམ་པ་རྟོགས་གོམས་ཅན་གྱི་མན་ངག་ལ་བརྟེན་ནས་དཔྱད་སྒོམ་བྱེད་ཅིང་། གཅིག་ཏུ་བྲལ་སོགས་ཀྱི་རིགས་པས་ཀྱང་དཔྱད་ནས་སྒོམ་པ་སྟེ། ཡུལ་འཁོར་སྐྱོང་གིས་ཞུས་པ་ལས། སྟོང་པ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་འགྱུར་ཏེ། །དེ་དག་ཐུགས་རྗེ་མངའ་བས་ཐབས་ཚུལ་གྱིས། །རིགས་པ་བརྒྱ་དག་གིས་ནི་གཟུད་པར་མཛད། །ཅེས་སོ། །ཆོས་ཀུན་སྟོང་ཉིད་ཡིན་པའི་གཏན་ཚིགས་ནི་གོང་དུ་སོ་སོར་ཕྱེས་ཤིང་བསྟན་པ་དང་། ད་དུང་དེ་བཞིན་དུ་དངོས་པོ་ཀུན་གཞིག་ཅིང་ཡང་དང་ཡང་དུ་དོན་སྤྱིའི་ཚུལ་གྱིས་དཔྱད་ན། ནམ་ཞིག་ཚིག་ཙམ་ལ་བསྟེན་པ་མ་ཡིན་པར་བློ་ཤེས་རབ་ཀྱིས་མངོན་སུམ་དུ་གོ་བར་འགྱུར་རོ། །འཇུག་པ་ལས། སོ་སོ་སྐྱེ་བོ་རྣམས་ནི་རྟོག་པས་བཅིངས། །མི་རྟོག་རྣལ་འབྱོར་པ་དེ་གྲོལ་བར་འགྱུར། །རྟོག་རྣམས་ལོག་པར་གྱུར་པ་གང་ཡིན་པ། །རྣམ་པར་དཔྱོད་པའི་འབྲས་བུར་མཁས་རྣམས་བཞེད། །ཅེས་གསུངས། འདིར་ཚོགས་ལམ་ན་ལུང་མང་པོ་ལ་ཐོས་བསམ་གྱིས་དམིགས་པ་ཚོལ་བས་དམིགས་པ་རྣམ་བྱང་ཟེར་གོ་བ་ཤུགས་ཆེ། དམིགས་དོན་དེ་ཐོས་སོགས་གསུམ་གྱི་ཤེས་རབ་ལ་བསྟེན་པ་ལམ་ཐམས་ཅད་ཀྱིས་རྟོགས་བྱ་ཆོས་ཉིད་ཡོངས་གྲུབ་བདག་མེད་གཉིས་ལ་གོ་མྱོང་ཅི་རིགས་ཐོན་པ་ནི་རང་བཞིན་རྣམ་བྱང་སྟེ་སྒོམ་བྱུང་གི་ཤེས་རབ་ཤུགས་ཆེ། མོས་སྤྱོད་འདིར་ནི་སྟོང་ཉིད་ཀྱི་དོན་སྤྱི་རྟོགས་པས་ཡིད་ལ་བྱེད། དེ་ལ་དོན་སྤྱིའི་ཚུལ་དུ་རྟོགས་ཞེས་ཟེར། དེ་ལ་རང་རིག་མངོན་སུམ་ཡིན་པར་ཁ་ཅིག་བཞེད་པ་དེ་ལེགས། ཁ་ཅིག་མོས་སྤྱོད་དུ་སྟོང་ཉིད་ཡིན་འགྱུར་གྱི་མྱོང་བ་ཙམ་ཡིན་པས་རྟོག་མེད་དུ་བཞག་ན་ལྷག་མཐོང་མེད་པར་འགྱུར་རོ་ཞེ་ན། གཟུང་འཛིན་གྱི་སྣང་བ་གཟུགས་བརྙན་དང་སྒྱུ་མ་ལྟ་བུ་འདི་ལས་སྟོང་ཉིད་གཞན་ན་མེད་པས་དེ་རང་རིག་མངོན་སུམ་གྱིས་མྱོང་བ་ཁས་ལེན་ན། རེ་འགའ་དེའི་ངང་དུ་རྟོག་མེད་དུ་བཞག་ན་སྐྱོན་མེད་ལ། སྤང་བྱར་ཞེན་པའི་གཉེན་པོ་བསྟན་པ་དེ་ལ་ཞེན་པ་གཏོང་མི་ཐུབ་པ་དེ་འདྲའི་ལམ་དེ་འདིར་མི་འདོད་དོ། །སྦྱོར་ལམ་དུ་འཁོར་བ་དང་མྱ་ངན་ལས་འདས་པའི་རྒྱུ་འབྲས་ཀྱི་གཟུང་རྟོག་ཀྱང་མ་གྲུབ་པའི་གསལ་སྣང་དང་། གང་ཟག་གི་བདག་རྫས་སུ་གྲུབ་པ་མེད་པ་དང་བཏགས་པའི་འཛིན་རྟོག་ཀྱང་རང་བཞིན་མ་གྲུབ་པའི་གཟུང་འཛིན་གཉིས་མེད་ཀྱི་ཤེས་རབ་སྟེ་ཤེས་སྒྲིབ་དགག་རྟོག་བཞིའོ། །དེ་དག་སྒྲ་དོན་འབྲེལ་བའི་རྟོག་པ་ལས་དངོས་མ་ཡིན་པར་དོན་སྤྱི་གསལ་བའི་སྣང་བ་ཟླ་བ་གཉིས་པ་དང་ལྷའི་གསལ་སྣང་ལྟར་ཡིན་པར་གསུངས། སྣང་ངོའི་ངེས་པ་དེ་དབྱིབས་དང་ཁ་དོག་གིས་ཟླ་བ་དཔོག་པ་ལྟར་སྟོང་ཉིད་དངོས་མིན་ཡང་གཉིས་སྣང་ཇེ་ཕྲར་གྱུར་པའི་ངེས་པ་ལྷག་པར་གྱུར་པ་སྟེ་ཆུ་སྣོད་ཀྱི་ཟླ་བ་ལྟར་དེ་ནི་སྟོང་ཉིད་དངོས་དང་འདྲ་ཞེས་ཀྱང་བཤད། དེ་ནས་གཉིས་སྣང་ནུབ་ནས་མཐོང་ལམ་དུ་སྟོང་ཉིད་མངོན་སུམ་མཐོང་ནས་དེ་ལ་གནས། སྒོམ་ལམ་དུ་མཐོང་རྟོགས་ཀྱི་རྒྱུན་དེ་རྒྱུད་ལ་ལྡན་པའི་ཚུལ་གྱིས་གོམས་པར་བྱེད་ལ། དེ་དག་གི་སྐབས་སུ་བྱང་ཕྱོགས་དང་ཕར་ཕྱིན་དྲུག་སོགས་ལམ་གྱི་ཡན་ལག་མང་བས་ལམ་དེ་གཉིས་ལ་ལམ་རྣམ་བྱང་གསུངས། མི་སློབ་པའི་ས་ནི་སྒྲིབ་གཉིས་དག་པས་དྲི་མེད་རྣམ་བྱང་སྟེ་འདིར་འཕྲོས་དོན་ནོ། །གསུམ་པ་མཐོང་བའི་ལམ་ལ་གཉིས། མཐོང་ལམ་དངོས་དང་། དེ་སྐྱེ་བའི་རྟགས་བསྟན་པའོ། །དང་པོ་ལ་གཉིས། ཆོས་ཐམས་ཅད་རང་རིག་ཙམ་དུ་མཐོང་བ་དང་། རང་རིག་དེ་ཅི་ལ་ཡང་མི་གནས་པར་བསྟན་པའོ། །དང་པོ་ནི། གོ་བའི་ཚེ་སོགས།༨ དེ་ལྟར་མོས་སྤྱོད་དུ་དཔྱོད་སྒོམ་དང་འཇོག་སྒོམ་རིང་དུ་བྱས་པའི་གོ་བ་མངོན་དུ་གྱུར་པའི་ཚེ་རིག་པ་འདི་ལྟར་སྐྱེ་སྟེ། མཐོང་ལམ་མཉམ་བཞག་ནི་ཆོས་དབྱིངས་ཀུན་ཏུ་འགྲོ་བའི་དོན་རྟོགས་པ་ཡིན་པས། དོན་གྱི་འོད་གསལ་ཆོས་ཉིད་སྤྲོས་བྲལ་དེ་དང་གཉིས་སུ་མེད་པ་རིག་སྟོང་རྣམ་པར་མི་རྟོག་པའི་ཡེ་ཤེས་མཐོང་སྤང་ཁམས་གསུམ་གྱི་རྟོག་པ་ལས་གྲོལ་ཞིང་སྙིང་རྗེའི་རླན་དང་ལྡན་པ། རྟོག་མེད་རྣལ་འབྱོར་མངོན་སུམ་ཞེས་ཀྱང་བྱ། སྒྲ་རྟོག་གི་ཡུལ་མ་ཡིན་ཞིང་གཉིས་སྣང་ནུབ་པས། ཡུལ་ཡུལ་ཅན་སོགས་ཀྱི་དགག་བྱའི་སྤྲོས་པ་ཅི་ཡང་ཡོད་པ་མིན་པས་ཆོས་ཉིད་གཅིག་ཏུ་ཟད་ལ། འཇུག་ཤེས་རྟེན་བཅས་ཀྱི་སྒོ་ལྔ་འགག་པར་བཤད་ཀྱང་འོན་ལོང་ལྟ་བུ་མ་ཡིན་ཞིང་དེ་ལ་ཐ་སྙད་བཏགས་པ་རྣམས་གཟུགས་བརྙན་བཞིན་དུ་སྣང་ལ། སེམས་ཅན་རྣམས་ཀྱི་མངོན་སུམ་གྱི་ཡུལ་དུ་སྣང་བར་གྱུར་པའི་སངས་རྒྱས་དང་སེམས་ཅན་ལ་སོགས་པའི་མཚན་མ་རྣམས་རྨི་ལམ་གྱི་ཡུལ་སྣང་བཞིན་དུ་རྣམ་པར་རྟོག་པ་ཙམ་ཡིན་པས། ཕྱི་ནང་ཀུན་ལ་རང་བཞིན་མེད་པར་ཤེས་པ་ནི་དཔེར་ན་སྒྱུ་མ་ངོ་ཤེས་པས་དངོས་པོ་ཅི་ཡང་མཐོང་བ་མེད་ཅིང་རེ་དོགས་དང་དགག་སྒྲུབ་མེད་པ་བཞིན་ནོ། །ཞིབ་ཏུ་དཔྱད་ན་ཁྱད་པར་ཅན་གྱི་རྣལ་འབྱོར་པ་ལ་ཡུལ་སྣང་མི་འགག་ཅིང་ཐ་སྙད་ཙམ་སྣང་ཡང་ཡོད་མེད་སོགས་ཀྱི་དངོས་པོ་ཅི་ཡང་མི་མཐོང་ཞིང་རིག་པ་ཡེ་ཤེས་ཀྱི་གསལ་སྣང་འགག་མེད་དུ་སྐྱེ་ལ། རིག་པ་དེ་ཡང་སོ་སོ་རང་རིག་པའི་ཡེ་ཤེས་ཙམ་དུ་ཟད་དོ། །འདི་ལ་མཉམ་བཞག་སྣང་མེད་དང་རྗེས་ཐོབ་སྣང་བཅས་ལྟར་ན་མཉམ་བཞག་ཏུ་སྒོ་ལྔའང་འགག་ནས་ཀུན་རྫོབ་ཀྱང་མི་སྣང་བར་ཆོས་ཉིད་འབའ་ཞིག་ཏུ་འདོད་དེ། འགོག་པའི་སྙོམ་འཇུག་བཞིན་ནོ། །འདིར་གཟུང་འཛིན་གྱི་རྟོགས་པ་སོགས་དགག་བྱའི་སྣང་བ་མེད་པས་སྣང་མེད་དང་སྒོ་ལྔ་རྟོག་མེད་ལ་ཡུལ་སྣང་འཆར་བ་སྣང་བཅས་ཏེ་མཉམ་བཞག་གཅིག་གི་རང་ལྡོག་ནས་ཕྱེ་བ་ཡིན་ཏེ། ཡོད་མེད་སོགས་རྣམ་རྟོག་མཚན་མ་ཀུན་དབྱིངས་སུ་ནུབ་པའི་ཆོས་ཉིད་རིག་པ་རོ་གཅིག་ཏུ་མཉམ་པར་བཞག་ཚེ། ཕུ་བཏབ་ནས་ཡལ་འགྲོ་བའི་གཟུགས་བརྙན་ཙམ་གྱི་སྣང་བ་ལ་འགལ་བ་མེད་དེ། ཡུལ་ཡུལ་ཅན་གཉིས་ཀ་སྟོང་གསལ་རོ་མཉམ་པའི་ཕྱིར། ཇི་སྐད་དུ། རྒྱུ་དང་འབྲས་བུའི་ཆོས་རྣམས་ནི། །དམ་པ་ཉིད་དུ་ཡོད་མིན་ཞིང་། །རང་བཞིན་གསལ་བ་ཉིད་ཀྱི་ཕྱིར། །མེད་པ་ཉིད་ཀྱང་མ་ཡིན་ནོ། །ཞེས་སོ། །དེ་ལྟར་ན་ཇི་ལྟ་ཇི་སྙེད་ཀྱི་ཡེ་ཤེས་གཉིས་ཀྱང་ཡོད་པ་མི་འགལ་ལོ། །གཉིས་པ་ནི། དེ་ཚེ་དངོས་སོགས།༧ དབྱིངས་རིག་མངོན་དུ་གྱུར་པ་དེའི་ཚེ་ཕྱི་ནང་གི་དངོས་པོ་ཀུན་ཅི་ཡང་གྲུབ་པ་མིན་པར་མཐོང་ལ། ཅི་ཡང་མིན་པ་དེ་ལའང་འདིའོ་ཞེས་བསམ་པའི་ཡུལ་མེད་དེ། རྣམ་ཤེས་ལ་ཡུལ་ཡོད་ཡེ་ཤེས་ལ་ཡུལ་མེད་ཅེས་གསུངས། རིག་པའི་ཡེ་ཤེས་ཉིད་ཡུལ་ཆོས་ཀྱི་དབྱིངས་དང་ཆུ་ལ་ཆུ་བཞག་པ་ལྟར་རོ་གཅིག་ཏུ་སོང་བའི་ཕྱིར། ཡུལ་མེད་པ་དེ་བས་ན་སྒྲ་རྟོག་གམ་བསམ་བརྗོད་ཀྱང་མི་འཇུག་ཀྱང་གཉིས་ཀྱི་ཚུལ་དུ་མཐོང་བའི་སྣང་བ་མེད་ལ། རི་བོང་ལ་རྭ་གཏན་ནས་མེད་པས་དེ་བརྗོད་ཚེ་རཱའི་སྒྲ་དང་དོན་གཉིས་ཀ་མེད་པ་བཞིན་དུ་བརྗོད་པར་བྱ་བ་མེད་པས་རྗོད་བྱེད་མིང་བཏགས་པ་ཙམ་དུ་ཡང་མི་མཐོང་བས། སེམས་ལ་ཐ་དད་དུ་མྱོང་བའམ་རིག་རྒྱུའི་དངོས་པོ་རྡུལ་ཙམ་མེད་པར་འགྱུར་རོ། །རྩ་ཤེས་ལས། བརྗོད་པར་བྱ་བ་ལྡོག་པ་སྟེ། སེམས་ཀྱི་སྤྱོད་ཡུལ་ལྡོག་པས་སོ། །ཞེས་སོ། །བློ་རིག་ཤེས་གསུམ་དོན་གཅིག་པས་རིག་པ་ཡེ་ཤེས་ལ་སེམས་ཞེས་རྗོད། སེམས་ཀྱང་དངོས་པོ་མེད་པ་ནམ་མཁའ་བཞིན་མཐོང་བས་ནམ་མཁའ་ཀུན་ལ་ཁྱབ་ཀྱང་གང་ལའང་མི་གནས་པ་བཞིན་དུ། རིག་པའི་ཡེ་ཤེས་སྟོང་གསལ་འདུས་མ་བྱས་པ་ཆོས་ཀྱི་དབྱིངས་ལ་ཁྱབ་ཀྱང་དངོས་པོ་ཅི་ལ་ཡང་མི་གནས་སོ། །ཏིང་འཛིན་རྒྱལ་པོ་ལས། སེམས་ནི་དམིགས་མེད་བསམ་དུ་ཡོད་མ་ཡིན། །རང་བཞིན་དག་ཅིང་ངོ་བོ་ཉིད་ཀྱིས་སྟོང་། །ཡེ་ནས་བདག་མེད་ཆོས་ཉིད་ཟབ་མོ་སྟེ། །ནམ་མཁའ་བཞིན་དུ་ཟབ་ཞི་སྤྲོས་དང་བྲལ། །ཞེས་སོ། །འོ་ན་ཇི་སྙེད་པའི་ཡེ་ཤེས་ཀྱང་དེ་ལྟར་ཁྱབ་བམ་སྙམ་ན་ལམ་པ་དང་སངས་རྒྱས་ཀྱི་ཁྱད་པར་ཡོད་དོ། །ཤོ་ལོ་ཀ་སྔ་མ་གཉིས་ཀས་ཐེག་ཆེན་སེམས་ཙམ་ལྟར་ཆོས་ཐམས་ཅད་རང་རིག་ཙམ་དུ་མཐོང་བ་དང་། ཕྱི་མ་རྣམས་ཀྱིས་དབུ་མ་ལྟར་སེམས་ཀྱང་རང་བཞིན་མེད་པར་མཐོང་བས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོའོ། །འཕགས་པ་ཀླུས། ནང་དང་ཕྱི་ཡི་སྐྱེ་མཆེད་ལ། །བརྟེན་ནས་རྣམ་པར་ཤེས་པ་འབྱུང་། །དེ་ལྟ་བས་ན་རྣམ་ཤེས་མེད། །སྨིག་རྒྱུ་སྒྱུ་མ་བཞིན་དུ་སྟོང་། །ཞེས་སོ། །གཉིས་པ་མཐོང་ལམ་གྱི་རྟགས་ལ་གསུམ། མཉམ་ཉིད་མཐོང་ན་ཆོས་སྐུ་མཐོང་བ། རྣལ་འབྱོར་པ་དང་སངས་རྒྱས་ཀྱི་དགོངས་པའི་ཁྱད་པར། ཁྱད་པར་ཡོད་པའི་རྟོག་པ་སྤང་དགོས་པའོ། །དང་པོ་ནི། དེ་ཚོ་སོགས།༨ ཆོས་ཀུན་ཆོས་ཀྱི་དབྱིངས་དང་མཉམ་པར་རྟོགས་པ་དེའི་ཚེ་ཆོས་ཀུན་ལ་བླང་དོར་དུ་བྱ་བ་མི་མཐོང་བའི་རྟོགས་པ་སྐྱེ་སྟེ། གང་ལྟར་ན་འཕགས་པ་སངས་རྒྱས་དང་སེམས་ཅན་བདག་དང་གཞན་དང་བཟང་ངན་དང་དགེ་སྡིག །བདེ་སྡུག་གཙང་སྨེ་སྤང་བླང་ལ་སོགས་པ་གཉིས་པར་སྣང་བ་ཀུན་དོན་ལ་གཉིས་སུ་མེད་པར་རྟོགས་པས། དེ་དག་ངོ་བོ་སོ་སོར་ཡོད་པར་མི་མཐོང་ཞིང་ཐ་དད་པའི་འདུ་ཤེས་ཀྱང་མི་འཇུག་གོ། །བདེན་གཉིས་དབྱེར་མེད་བཞིན་ནོ། །དེའི་ཕྱིར་གཉིས་ཆོས་ཐམས་ཅད་གཉིས་མེད་མཉམ་པར་མཐོང་ཞིང་གཉིས་འཛིན་གྱི་རྟོག་པ་མི་འཇུག་པ་དེ་ལྟར་རྟོགས་ན་ཆོས་ཀྱི་སྐུ་མཐོང་བ་ཡིན་ཏེ། བདེ་བར་གཤེགས་པ་རྣམས་ཀྱི་ངོ་བོ་ཡེ་ཤེས་འདུས་མ་བྱས་པ་ཆོས་ཀྱི་སྐུ་སྟེ་དབྱིངས་དང་རོ་གཅིག་པའི་ཕྱིར་རོ། །ཇི་སྐད་དུ། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཐམས་ཅད་དེ་བཞིན་གཤེགས་དང་འདྲ། །ཞེས་སོ། །འཁོར་འདས་ཐམས་ཅད་ཆོས་དབྱིངས་ཙམ་ལས་ཁྱད་པར་མེད་དེ། འཁྲུལ་སྣང་ཐམས་ཅད་རང་བཞིན་མེད་པར་ཤེས་པ་ལས་གཞན་ན་ཆོས་སྐུ་བྱ་བ་མེད་པའི་ཕྱིར། འདི་འདྲ་གསང་སྔགས་ཀྱི་སྐབས་སམ་སྙམ་ན། ངེས་དོན་གྱི་མདོ་རྣམས་སུ་ཆོས་ཐམས་ཅད་ལ་ངོ་བོ་མེད་པ་རང་བཞིན་གྱིས་མྱ་ངན་ལས་འདས་པ་དང་། རང་བཞིན་གྱིས་འོད་གསལ་བ་དང་། ཆོས་ཐམས་ཅད་ཡེ་ནས་མངོན་པར་རྫོགས་པར་སངས་རྒྱས་པར་གསུངས། དེའི་དོན་རྟོགས་ན་བདག་དང་སངས་རྒྱས་ཁྱད་པར་མེད་པའི་བློ་འབྱུང་བ་ནི་ཤེས་རབ་ཁྱད་པར་ཅན་ཡིན། ནམ་མཁའ་ལ་སྒྱུ་མའི་སྤྲུལ་པ་སྣང་བ་དང་ནམ་མཁའ་ལ་ཁྱད་པར་མེད་པ་གཞན་ཕུང་ལྔ་སྒྱུ་མ་ཙམ་དུ་སྣང་བའང་དེ་བཞིན་གཤེགས་པ་ཉིད་ཡིན་པར་ཤེས་ན་ལམ་གྱི་མཆོག་སྟེ་གཟུགས་སྐུ་གཉིས་ཀྱང་སྒྱུ་མ་ལྟ་བུ་ཡིན་པའི་ཕྱིར་དང་། ཁྱད་པར་ཡོད་པར་མཐོང་ན་ཐེག་པ་ཆེན་པོའི་ལམ་མིན་པར་གསུངས། དྲི་མ་ཡོད་པས་ཤེ་ན། དེ་གཤིས་ན་མེད་པ་གློ་བུར་བ་ཡིན་ལ་སྤང་བྱའི་རྫས་མེད་ཅིང་གཞི་མ་གྲུབ་པ་སྨིག་རྒྱུའི་ཆུ་དང་སྐྲ་ཤད་བཞིན་བྲི་གང་མེད་པ་ཟད་མེད་སྐྱེ་མེད་དུ་འདོད་པ་ཡིན་ནོ། །སྡོང་པོ་བཀོད་པ་ལས། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་དེ་བཞིན་གཤེགས་པར་འགྱུར། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་དག །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་སོ། །ཉོན་མོངས་པ་ལ་སྤང་བྱའི་རྫས་མེད་ཅིང་འཁོར་བ་རང་བཞིན་གྱིས་མྱ་ངན་ལས་འདས་པ་དེ་ལྟ་ན། སེམས་ཅན་རྣམས་གང་གིས་བཅིངས་ཏེ་འཁོར་བར་འཁྱམས་ཞེ་ན། བརྟགས་ན་འཆིང་བྱེད་མེད་ཀྱང་འཆིང་བ་ལྟར་སྣང་བ་ནི་རྨི་ལམ་གྱི་སྡུག་བསྔལ་བཞིན་དང་། ཐག་པ་ལ་སྦྲུལ་དུ་སྣང་ནས་འཇིགས་པ་དང་དུག་ཁོང་དུ་མ་སོང་ཡང་དོགས་པའི་འདུ་ཤེས་ཀྱིས་དུག་ལངས་པ་དང་། སྒྱུ་མ་ལ་སྒྱུ་མར་མ་ཤེས་པས་གནོད་པའི་དཔེ་ཡོད་པས་ཡུལ་ལ་དངོས་པོ་མེད་ཀྱང་ཡོད་པར་སྣང་ནས་གནོད་པ་ཡིན་ནོ། །གཉིས་པ་ནི། འཕགས་པ་སོགས།༤ རྣལ་འབྱོར་པ་དང་སངས་རྒྱས་གཉིས་ཆོས་དབྱིངས་ལ་ཁྱད་མེད་ཀྱང་། དགོངས་པ་མངོན་དུ་གྱུར་པ་ལ་ཁྱད་པར་ཡོད་དམ་ཞེ་ན་ཡོད་དོ། །འཕགས་པ་སངས་རྒྱས་དང་ལམ་པའི་རྣལ་འབྱོར་པའི་རྟོགས་པའི་ཁྱད་པར་ནི། རྣལ་འབྱོར་པ་རྣམས་ལ་ནི་ཡུན་ཇི་སྲིད་དུ་མཉམ་པར་བཞག་པ་ཙམ་གྱིས་བྱང་ཆུབ་སེམས་དཔའ་དེས་རྟོགས་པ་མངོན་དུ་གྱུར་ནས་རྗེས་ཐོབ་ཏུ་ལྡང་བ་ཡིན་ལ། སངས་རྒྱས་དང་འཕགས་པ་དགྲ་བཅོམ་པ་རྣམས་ཀྱི་རྟོགས་པ་ནི་ལྷུན་གྱིས་གྲུབ་སྟེ། དེའང་རྫོགས་པའི་སངས་རྒྱས་ནི་དགོངས་པ་ནམ་མཁའ་ལྟ་བུའི་ངང་དུ་འཇུག་ལྡང་མེད་པར་བཞུགས་པའོ། །གསུམ་པ་ནི། སངས་རྒྱས་སོགས།༦ དེ་ལྟར་སངས་རྒྱས་དང་སེམས་ཅན་གཉིས་རང་བཞིན་གཅིག་མོད་ཀྱང་རྣམ་པར་རྟོག་པ་ཡོད་མེད་ཀྱི་དབང་གིས་ཁྱད་ཞུགས་པས། འདུས་བྱས་ཀྱི་ཆོས་ལ་དངོས་པོར་དམིགས་པ་ལྟ་ཞོག །ཐ་ན་ཆོས་ཉིད་ཀྱི་ངང་ལ་ཡོད་མེད་མཚན་མར་དམིགས་ཀྱང་རུང་རང་སའི་སྒྲིབ་པ་ཡིན་ལ། ཇི་སྐད་དུ་མདོ་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་སོ། །བཟང་རྟོག་ངན་རྟོག་གང་ཡང་ཐམས་ཅད་འཁོར་བའི་འཆིང་བ་ཡིན་པར་བལྟ་སྟེ། སྡུད་པར། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་དང་། ཀཱ་མ་ཤི་ལའི་སྣང་བའི་ཕྲེང་བ་ལས། དམ་པའི་དོན་གྱི་རྟོག་པ་ལའང་། །མཁས་པས་དེར་ནི་གནས་མི་བྱ། །དགེ་བའམ་མི་དགེ་བ་ཡི་ཡང་། །རྟོག་ལ་བྱེ་བྲག་ཅི་ཞིག་ཡོད། །རྟེན་གྱི་དབྱེ་བ་ལ་བརྟེན་པའི། །མེ་བསྲེག་ཉིད་དུ་བྱེ་བྲག་མེད། །ཙནྡན་གྱི་ནི་མེ་ཡིས་ཀྱང་། །རེག་པ་ཙམ་གྱིས་བསྲེག་པ་ཉིད། །རྣམ་པར་རྟོག་པ་ཆུང་ངུ་ཡང་། །ཐམས་ཅད་དུ་ནི་སྤང་བར་བྱ། །ཞེས་གསུངས། དང་པོ་དཔྱད་པའི་དུས་རང་བཞིན་མེད་དོ་སྙམ་པ་ལ་མི་བྱ་སྟེ་རང་བཞིན་མེད་པ་ལ་ཡོད་པར་ལྟ་བ་དང་། ཆོས་ཉིད་མངོན་དུ་གྱུར་པ་ལ་རྟོག་གེའི་དཔྱོད་པར་བྱེད་པ་ལྟ་བུ་ལ་བྱའོ། །ཚད་མ་ཀུན་བཏུས་ལས། གང་ཞིག་རྟོག་གེའི་ལམ་ནས་ཆོས་ཉིད་ལ་ཁྲིད་ན། །ཐུབ་པའི་བསྟན་ལས་ཆེས་བསྲིང་ཉམས་པར་བྱས་པ་ཡིན། །ཞེས་སོ། །ངེས་ཤེས་ཀྱི་ཡུལ་ལ་འཛིན་སྟངས་ཀྱིས་བཅིངས་པ་རང་སའི་སྒྲིབ་པ་ཡིན་པར་བཤད་དོ། །དེ་བས་ན་རྣམ་པར་མི་རྟོག་པ་བསམ་བརྗོད་ལས་འདས་པ་རང་རིག་འོད་གསལ་ཆོས་སྐུ་ཉག་གཅིག་ཏུ་བས་ཏེ་ཟད་པས། རྣམ་རྟོག་སྤང་ཞིང་མི་རྟོག་པའི་ཡེ་ཤེས་རང་རིག་ཉིད་འཐོབ་པར་བྱ་བའི་ཕྱིར་འབད་པར་བྱའོ། །རིག་པ་སྟོང་གསལ་འཛིན་མེད་དུ་བཞག་པས་རེ་དོགས་དང་གེགས་ཐམས་ཅད་སེལ་ཏེ། ས་ར་ཧས། གང་ལ་ཞེན་པ་ཡོད་ན་དེ་ཡང་ཐོངས། །རྟོགས་པར་གྱུར་ན་ཐམས་ཅད་དེ་ཡིན་ཏེ། །ཞེས་སོ། །བཞི་པ་སྒོམ་པའི་ལམ་ལ་གསུམ། སྒོམ་ལམ་བཤད་པར་དམ་བཅའ་བ་དང་། མཉམ་པར་འཇོག་ལུགས་དང་། རྗེས་ཐོབ་བསྟན་པའོ། །དང་པོ་ནི། ལྟ་བ་རྟོགས་པ་དེའི་རྒྱུན་སྒོམ་ཚེ་འདི་ལྟར་རྣམ་རྟོག་ཐམས་ཅད་སྤང་ཞིང་ཞི་ལྷག་ཟུང་འབྲེལ་གྱི་ངང་ལ་རྩེ་གཅིག་ཏུ་བཞག་པར་བྱའོ། །གཉིས་པ་ལ་དྲུག །ཆོས་ཉིད་བསམ་དུ་མེད་པར་བཞག་པ་དང་། ལུས་སེམས་ཁོང་ཀློད་དེ་རྟོག་མེད་བཏང་སྙོམས་ལ་བརྩོན་པ་དང་། རྟོག་པ་ཕྲ་རགས་བྱུང་ན་ཐབས་དང་ཤེས་རབ་ཀྱིས་དགག་སྒྲུབ་མེད་པར་འཇོག་པ་དང་། དྲན་ཤེས་རྒྱུན་གྱིས་གློ་བུར་ཡུལ་ལ་ཞེན་རྟོག་བྱུང་ན་བརྟགས་ནས་ནང་དུ་འཇོག་པ་དང་། དེ་ལྟར་གོམས་པའི་ཉམས་གསུམ་འབྱུང་བ་དང་། ཉམས་སྐྱེས་ན་རྟགས་འབྱུང་བའོ། །དང་པོ་ནི། སྲིད་དང་སོགས།༣ འདི་ལྟར་སྲིད་པ་འཁོར་བ་དང་ཞི་བ་མྱ་ངན་ལས་འདས་པའི་ཆོས་སུ་སྣང་བ་འདི་རྣམས་ནི་ཡོད་མེད་ལ་སོགས་པ་གང་དུའང་མ་གྲུབ་པ་གཏན་ལ་ཕབ་ཟིན་པའི་ཕྱིར། ཡུལ་ཅི་ཡང་ཡོད་པ་མིན་པས་ཡུལ་ཅན་ཅི་ཡང་བསམ་དུ་མེད་པའི་ངང་ལ་རང་བབ་ཏུ་འཇོག་པ་སྟེ། དོན་འདི་གང་ཡིན་ནམ་མཁའ་དག་ལ་བལྟ་བར་གྱིས། ཞེས་པ་ལྟར་རོ། །དཔལ་ལྡན་ཟླ་བས་དབུ་མ་ཤེས་རབ་ལ་འཇུག་པར། ཡེ་ནས་སྐྱེ་མེད་ངང་ཉིད་ལས། །དགག་བྱ་མེད་ལ་བསྒྲུབ་བྱ་མེད། །མྱ་ངན་འདས་དང་མ་འདས་པ། །སྐྱེ་མེད་ངང་དུ་ཁྱད་པར་མེད། །ཅེས་པའི་དོན་ལ་རྟོག་པ་མེད་པའི་བློ་རང་ཞིར་འཇོག་པར་གསུངས། ཡུམ་ལས། ཤེས་རབ་ཀྱི་ཕ་རོལ་ཏུ་ཕྱིན་བསྒོམ་པ་ནི་ནམ་མཁའ་བསྒོམ་པ་ལགས་སོ། །ཞེས་སོ། །གཉིས་པ་ནི། བསམ་དུ་སོགས།༦ གཉིས་ཆོས་ཐམས་ཅད་གཉིས་མེད་དུ་ཤེས་ནས་སྤང་བླང་གི་རྩོལ་བ་ངང་གིས་ཞི་བ་ལ་དྲན་པ་ཉེ་བར་འཇོག་པ་ཙམ་ལ་སྒོམ་ཞེས་ཐ་སྙད་འདོགས་དགོས་པ་དེའི་ཚེ། ཡིད་ཀྱིས་བསམ་དུ་མེད་པས་ཡུལ་ཅི་ལ་ཡང་མི་བསམ་ཞིང་གཟུང་འཛིན་གྱི་འཆིང་བ་ལྷོད་དགོས་པ་སྟེ། སྐྱེ་མེད་རིན་པོ་ཆེའི་མཛོད་ལས། གང་ཡང་མ་རྟོག་ཅིར་ཡང་མ་སེམས་ཤིག །བཅས་བཅོས་མ་བྱེད་རང་བབ་ལྷུག་པར་ཞོག །མ་བཅོས་པ་དེ་སྐྱེ་མེད་རིན་ཆེན་མཛོད། །དུས་གསུམ་རྒྱལ་བ་རྣམས་ཀྱི་གཤེགས་ཤུལ་ཡིན། །ཞེས་གསུངས་པ་ལྟར། སེམས་འཇོག་ཐབས་མང་པོའི་འབད་རྩོལ་དང་། བསམ་གཏན་སེམས་འཛིན་གྱི་བྱེད་པ་ལྟར་གཏད་པ་ལ་འཛིན་པའི་དམིགས་པ་ཀུན་སྤངས་ནས། ཅི་ཡང་མི་བསམ་མོ་སྙམ་པ་དང་རྣམ་པར་མི་རྟོག་པ་ཙམ་ལའང་མི་རྟོག་གོ་སྙམ་དུ་མི་གནས་པར། ཧ་ཅང་བསྡོམས་ཆེས་པའི་ལུས་སེམས་ཁོང་ཀློད་དེ་བསྒྲིམ་ལྷོད་རན་པ་གྱི་ན་ཙམ་དུ། རྐྱེན་གྱིས་མི་གཡོ་ཞིང་ངོ་བོ་སྟོང་ལ་གདངས་གསལ་བའི་ངང་ལ་རང་བབ་ཏུ་བཞག་པ་སྟེ། སྔོན་གྲོ་བཞིན་སྐྱེས་ཀྱིས་སྒོམ་བསླབ་པ་ལྟར་གྲིམ་ལྷོད་གཉིས་ཀའི་ཆ་ཡོད་པར་བྱས་ཏེ། ཡུལ་སྣང་སྒྱུ་མ་ལྟ་བུ་ལ་སྤང་བླང་དང་རེ་དོགས་སོགས་འདུ་བྱེད་ཀྱི་རྟོག་པ་མེད་པར་བཏང་སྙོམས་ཆེན་པོའི་གནས་ལ་ཡུན་རིང་དུ་བརྩོན་འགྲུས་བྱའོ། །སློབ་དཔོན་དཔའ་བོས། རྒྱུན་མི་འཆད་པའི་རྣལ་འབྱོར་གྱིས། །བསམ་གཏན་བསྒྲུབ་ལ་བརྩོན་པར་བྱ། །ཡང་དང་ཡང་དུ་ངལ་བསོས་ན། །གཙུབ་པས་མེ་འབྱིན་མི་འགྱུར་ལྟར། །རྣལ་འབྱོར་ཚུལ་ལའང་དེ་བཞིན་ཏེ། །ཁྱད་པར་མ་ཐོབ་བཏང་མི་བྱ། །ཞེས་གསུངས་པ་ལྟར། གཙུབ་ཤིང་གཙུབ་པ་ལྟར་དུམ་རེ་དུམ་རེ་བསྒོམ་ནས་བཞག་པའི་སྔ་ཕྱི་ཐམས་ཅད་བསྡོམས་པས་ནི་འབྲས་བུ་མི་འབྱུང་བའི་དོན་ནོ། །གསུམ་པ་ནི། འཕྲལ་དུ་སོགས། བག་ཆགས་ཀྱི་འཁྲུལ་སྣང་དང་འདུ་བྱེད་ཀྱི་རྟོག་པ་གང་ཤར་གྱི་ངོ་བོ་ཆོས་ཉིད་ཡིན་པར་ཤེས་ན་སྤང་བྱ་མེད་ཅིང་། འབྲས་བུ་ཚོགས་དྲུག་གི་ཡུལ་ལ་རྣམ་རྟོག་བྱུང་ཚེ་ངོས་ཟིན་ན་རང་བྱུང་ཡིན་པས་རང་ཞིར་འགྲོ་ཞིང་རང་ཤར་རང་གྲོལ་དུ་བཞག་གོ། །དེ་ཡང་དམན་ལམ་ལྟར་སྤང་བྱར་བཟུང་ནས་མི་དགག་བྱང་སེམས་ལྟར་རྐྱེན་རྩོལ་གྱིས་བཅོས་བསྒྱུར་མི་བྱེད། ཕལ་པ་ལྟར་རྗེས་སུ་མི་འབྲང་བར་རང་གི་ངང་གིས་གསལ་བར་བཞག་གོ། །དེ་དག་གི་ཚེ་འོག་འགྱུའི་རྣམ་པར་རྟོག་པ་ཤིན་ཏུ་ཕྲ་བའང་མི་མངོན་པར་རྒྱུ་བ་རྐུན་བུ་ལྟར་ངོ་ཤེས་པར་བྱ། བར་བར་དུ་སེམས་སེམས་བྱུང་ལྷན་ཅིག་ཡིན་པ་མདོ་ལས་ཀྱང་གསུངས་པས་སེམས་ཀྱིས་སེམས་ཀྱང་ཅི་བྱེད་བརྟགས་ལ་འཇོག །སེམས་འཐུམ་སྟེ་བྱིང་ན་སྡུག་བསྔལ་ལ་སྐྱོ་ཞིང་སྐུ་གཟུགས་སོགས་ཡིད་བྱེད་ཀྱིས་སེམས་གཟེང་བསྟོད་ཅིང་གསེང་བར་བྱ། ཡུལ་ལ་རྣམ་པར་འཕྲོ་བའི་རྒོད་པ་བྱུང་ན་འཁོར་བ་ལས་ཡིད་འབྱུང་སྟེ་མྱང་འདས་ལ་སྤྲོ་བ་སྐྱེད་པས་སེམས་ནང་དུ་འདུའོ། །ཡང་ན་རྒོད་པའི་གཉེན་པོ་བཏང་སྙོམས་ཀྱིས་མགོ་གནོན་པར་བྱའོ། །དེ་ལྟར་སྒོམ་ཚེ་ཡུལ་སྣང་འདི་ལྡོག་གམ་སྙམ་ན་བཤད་མ་ཐག་པ་ལྟར་མི་ལྡོག་ཀྱང་སྣང་བ་མི་འགོག་པ་ནི་ཐབས་ཡིན་ཏེ། སྣང་ཙམ་ལས་མེད་པར་ཤེས་པ་ནི་བསོད་ནམས་ཀྱི་ཚོགས་སུ་འགྱུར་ཞིང་དེས་འཆིང་བར་ཡང་མི་ནུས་ཏེ་དེ་ལ་ཞེན་པས་འཆིང་བ་ཡིན་ལ། སྣང་བ་མ་ལོག་ཀྱང་དངོས་པོ་དང་མཁྱེན་རྟོག་ལྡོག་དགོས་པས་སྣང་བ་ལ་བདེན་པར་མི་འཛིན་ཅིང་ཞེན་ནས་མི་གནས་པ་ནི་ཤེས་རབ་ཡིན་ནོ། །དཔྱད་པའི་ཚེ་ལྟ་བས་སྣང་བའི་ཐོག་ཏུ་སྤྲོས་པ་བཅད་པ་ཡིན་གྱི་སྣང་བ་དགག་པ་མིན་ཏེ་གཟུགས་མེད་ཁམས་དང་འདྲ་བའི་ཕྱིར། ཇི་སྐད་དུ། བླུན་པོ་གང་གིས་འཆིང་འགྱུར་བ། །མཁས་པ་དེ་ཡིས་ཡོངས་སུ་གྲོལ། །ཞེས་སོ། །གནས་ལུགས་མ་གོམས་བར་དུ་མཚན་མས་སེམས་ཀྱང་སྦྱངས་ཞེས་པ་དགེ་བའི་མཚན་མས་སེམས་སྦྱངས་པ་ཡིན་འདྲ་བས། བློ་གྲོས་རྒྱ་མཚོས་ཞུས་པ་ལས། ལུས་དང་ངག་རྣམས་དང་ནི་ཡིད་བསྡོམས་ཤིང་། །རྣམ་པར་དག་པའི་ལས་ལམ་བཅུ་ལ་སློབ། །བྱམས་པས་སེམས་ཅན་ཀུན་ལ་ཡང་དག་བལྟ། །འདི་ནི་ཐམས་ཅད་མཁྱེན་པའི་སེམས་སྦྱོང་ཡིན། །སྙིང་རྗེ་ལྡན་པས་གཞན་གྱི་བྱ་བར་བརྩོན། །དགའ་དང་ལྡན་པས་ཆོས་ལ་ཕ་རོལ་སྦྱོར། །བཏང་སྙོམས་ལྡན་པས་ཆོས་མཆོག་འཚེ་བ་མེད། །འདི་ནི་ཐམས་ཅད་མཁྱེན་པའི་སེམས་སྤྱོད་ཡིན། །ཞེས་སོགས་མང་དུ་གསུངས་པ་ལྟར། མཚན་མའི་སེམས་སྦྱངས་ལྟར་ནི་སྐབས་སུ་སྦྱངས་བཞིན་པའོ། །གཙོ་ཆེར་ཆོས་ཉིད་ཀྱི་དོན་ཁོ་ན་ལ་བསམ་ཞིང་གཏོང་འཛིན་ཀྱང་བྱས་ཡང་ན་སེམས་ཀྱིས་སེམས་ཉིད་ཀྱི་ངོ་བོ་ལ་བལྟ་བར་བྱ། ཡང་ན་སྒོ་ལྔའི་ཡུལ་གྱི་གཟུགས་སོགས་སྣང་ལ་རང་བཞིན་མེད་པར་སྟོང་པ་ཉིད་དུ་ནི་བསམ་ཞིང་གསལ་ལ་མཚན་མའི་རྟོག་པ་མེད་པར་བཞག་གོ། །བཞི་པ་ནི། དྲན་དང་སོགས།༣ ནང་དུ་ཡང་དག་པར་འཇོག་ཚེ་རྒྱུན་མི་བརྗེད་པའི་དྲན་པ་དང་ཤེས་བཞིན་ནི་ཤེས་རབ་དང་འདྲ་ཞིང་། སྔར་བཤད་པ་ལྟར་བྱིང་ན་བྱིང་ངོ་ཞེས་ཤེས་རྒོད་ན་རྒོད་ངོ་ཞེས་སོགས་བྱ་ར་བས་བསྲུང་ཞིང་བསྐྱངས་ལ། གལ་ཏེ་བརྗེད་ངས་ལྟ་བུས་བྱིང་རྒོད་ཀྱི་སྐྱོན་བྱུང་ན་བརྩོན་འགྲུས་དང་སེམས་པ་སོགས་ཐབས་སྣ་ཚོགས་ཀྱིས་རྩོལ་བས་ཡང་ནས་ཡང་དུ་མཉམ་པར་བཞག་གོ། །ལས་དང་པོ་པ་ཡིན་ན་སེམས་བྱུང་དྲན་པ་འདི་གལ་ཆེ་སྟེ། གནས་ལུགས་དྲན་པས་ཟིན་པ་དང་རྣམ་རྟོག་མ་རིག་པ་འགགས་པ་དུས་མཉམ་ཡིན་པའི་ཕྱིར། སྤྱོད་འཇུག་བརྩོན་ལེར། ཡུངས་མར་བཀང་བའི་སྣོད་བསྐུར་ལ། །རལ་གྲི་ཐོགས་པས་དྲུང་བསྡད་དེ། །བོ་ན་གསོད་བསྡིགས་འཇིགས་པ་ལྟར། །བརྟུལ་ཞུགས་ཅན་གྱིས་དེ་བཞིན་བསྒྲིམ། །ཞེས་གསུངས་པ་ལྟར་བྱ། མཐར་དྲན་རྟོག་ཡེ་ཤེས་སུ་སོང་དབྱིངས་རིག་འོད་གསལ་དུ་འདྲེས་ནས་ཉིན་མཚན་གྱི་ཆ་མེད་ཚེ་འདུ་བྱེད་ཀྱི་དྲན་པ་མེད་དེ། ཡུམ་ལས། རབ་འབྱོར་ཤེས་རབ་ཀྱི་ཕ་རོལ་དུ་ཕྱིན་པ་ནི་དྲན་པ་མེད་ཅིང་ཡིད་ལ་བྱར་མེད་པའི་ནམ་མཁའ་ལྟ་བུའོ། །ཞེས་སོ། །ཡང་གློ་བུར་དུ་ཚོགས་དྲུག་གི་ཡུལ་ལ་དངོས་པོར་ཞེན་པའི་རྟོག་པ་བྱུང་ན་ཡུལ་དེ་བློས་གཞིག་ཅིང་བརྟགས་ནས་དངོས་མེད་དུ་བྱས་ན། འཁྲུལ་སྣང་སྟོང་ནས་སེམས་ཏིང་ངེ་འཛིན་དུ་ཞི་བར་འགྱུར་རོ། །ཞེས་འགྲེལ་ཀྱང་རུང་ངམ་སྙམ་མོ། །ལྔ་པ་ནི། དེ་ལྟར་སོགས།༤ དེ་ལྟར་རྒྱུན་བསྲིང་ནས་བསྒོམ་ན་སེམས་ཉམས་རྣམ་པ་གསུམ་ཡང་འབྱུང་སྟེ། དང་པོ་གཡོ་བའི་ཉམས་རི་གཟར་གྱི་འབབ་ཆུ་དྲག་པོ་ཆུ་ལེན་གྱིས་འགོག་དཀའ་བ་དང་འདྲ་བ། སེམས་ཀྱི་ངོ་བོ་འགག་ཅིང་རྣམ་པར་རྟོག་པ་བཟློག་དཀའ་བ་སྟེ་སེམས་གནས་པའི་མགོ་རྩོམ་པ་ཡིན་གསུངས། གཉིས་པ་ཅུང་ཟད་གོམས་པའི་ཉམས་ཤིན་ཏུ་དལ་བར་འབབ་པའི་ཆུ་ཀླུང་དུ་རྡེའུ་ཕྲ་མོ་མཐོང་བ་བཞིན། རྣམ་རྟོག་ཕྲ་མོ་མཐོང་བའི་ཤེས་པ་གསལ་ཞིང་དྭངས་པར་འགྱུར། གསུམ་པ་བརྟན་པའི་ཉམས་མཚན་རྟོག་གིས་མི་གཡོ་ཞིང་རབ་ཏུ་གསལ་བ་རྒྱ་མཚོ་རླབས་དང་བྲལ་བའི་གཏིང་དང་འདྲའོ། །དེ་ནས་བཏང་སྙོམས་གསུམ་ཡང་རིམ་གྱིས་འབྱུང་། ཞེས་པ་འདི་སྤྱིར་བཏང་སྙོམས་ནི་སེམས་མཉམ་པར་འདུག་པ་སྟེ། དགག་སྒྲུབ་ཕྱོགས་ཀྱི་ཆ་གཉིས་བཏང་ནས་སེམས་རྣལ་དུ་འདུག་པ་ལ་བྱ། ཁྱད་པར་སེམས་བྱིང་རྒོད་ཀྱི་དབང་དུ་མི་གཏོང་བར་ལྷུན་གྲུབ་ཏུ་འབྱུང་བའི་ཉོན་མོངས་པས་སྐབས་མི་འབྱེད་པའི་ལས་ཅན་གྱི་བཏང་སྙོམས་ཏེ། དེ་ལ་དབྱེ་ན། འདུ་བྱེད་བཏང་སྙོམས་ཚོར་བ་བཏང་སྙོམས། ཚད་མེད་བཏང་སྙོམས་དང་གསུམ་ལ་འགྲེལ་ནའང་ཆོག་གམ་སྙམ་སྟེ། ཆོས་ཐམས་ཅད་གཉིས་མེད་མཉམ་པར་བལྟས་ཏེ་བཏང་སྙོམས་ཆེན་པོར་འཇོག་པས་སོ། །འོན་ཀྱང་རྩ་བར་རིམ་གྱིས་འབྱུང་ཞེས་པའི་ཚིག་ཟུར་ལས་བཏང་སྙོམས་ཆུང་འབྲིང་ཆེ་གསུམ་ཡིན་པར་འདྲ་ཞིང་། རྩ་བའི་མཚན་རྙིང་ལ་འབད་རྩོལ་གྱིས་བྱིང་རྒོད་མགོ་ནོན་པས་སེམས་མི་གཡོ་བ་དང་རྣལ་དུ་ཕེབ་པ་དང་བྱིང་རྒོད་མེད་པར་ལྷུན་གྲུབ་ཏུ་གནས་པ་གསུམ་ལ་བཤད་པར་སྣང་ངོ་། །འདིར་དབུས་མཐའ་ལས་བཤད་པའི་ཏིང་ངེ་འཛིན་གྱི་སྦྱོར་བའི་སྒྲིབ་པ་ལེ་ལོ་དང་གདམས་ངག་བརྗེད་པ་གཉིས། དངོས་གཞིའི་སྒྲིབ་པ་བྱིང་རྒོད་དང་། བསམ་གཏན་གྱི་སྒྲིབ་པ་བྱིང་རྒོད་སོགས་བྱུང་བ་ན་སོ་སོའི་གཉེན་པོའི་ཚུལ་བཞིན་དུ་འདུ་བྱེད་དགོས་པ་ལ་དེ་ལྟར་འདུ་མི་བྱེད་པ་དང་། བྱིང་རྒོད་ཞི་ཡང་ད་དུང་འདུ་བྱེད་ཆེ་ན་དེས་གཡོ་བའི་སེམས་མི་བསྟན་པ་སྟེ་དེ་གཉིས་ནི་ཏིང་ངེ་འཛིན་གོང་འཕེལ་དུ་འགྲོ་བའི་སྒྲིབ་པ་ཡིན་ནོ། །དེས་ན་ལེ་ལོ་དང་གདམས་ངག་བརྗེད་པ་དང་བྱིང་རྒོད་དང་འདུ་མི་བྱེད་པ་དང་འདུ་བྱེད་དེ་སྒྲིབ་པ་ལྔའོ། །དེ་ལ་དད་འདུན་རྩོལ་བ་ཤིན་སྦྱངས་བཞིས་ལེ་ལོ་སྤོང་བ་དང་། དེ་བཞིན་དུ་དྲན་པ་ཤེས་བཞིན་སེམས་པ་བཏང་སྙོམས་བཞི་ལས་དྲན་པས་གདམས་ངག་གི་དམིགས་རྣམས་མི་བརྗེད་པར་འཛིན་པ་དང་། ཤེས་བཞིན་གྱིས་བྱིང་རྒོད་བྱུང་བ་རྟོགས་པ་དང་སེམས་པ་ནི་ཡུལ་གྱི་རྣམ་པ་ནང་དུ་སེམས་པ་ཡིན་པས་བྱིང་རྒོད་ཀྱིི་ཉེས་པ་དེ་སྤང་བའི་གཉེན་པོ་མངོན་པར་འདུ་བྱེད་པ་དང་། བཏང་སྙོམས་ཀྱིས་བྱིང་རྒོད་ཞི་ཚེ་སེམས་རྣལ་དུ་འདུག་པ་སྟེ། སེམས་མཉམ་པར་བཞག་པའི་ཚེ་རྩོལ་ན་གཡེང་བར་འགྱུར་ལ། བྱིང་བའི་ཚེ་རྩོལ་ན་ལྷག་མཐོང་མེད་པས་ལོང་བ་ལྟ་བུར་འགྱུར་རོ། །འདི་རྣམས་གལ་ཆེ་བར་འདུག་པས་བྲིས་སོ། །དེ་ལྟར་ཏིང་ངེ་འཛིན་གྱི་སྤང་གཉེན་ལ་འབད་ནས་གོམས་པ་དེའི་ཚེ་ལུས་སེམས་ལས་སུ་རུང་བའི་ཤིན་ཏུ་སྦྱངས་པ་སྟེ་དབང་ཤེས་འཁོར་གྱི་བདེ་བ་དང་ཡིད་ཤེས་འཁོར་གྱི་བདེ་བ་ཐོབ་སྟེ། ལུས་སེམས་ཀྱི་གནས་ངན་ལེན་ཐམས་ཅད་འཇོམས་པར་བྱེད་ཅིང་བདེ་བ་ཆེན་པོ་འདྲེན་པར་བྱེད་དོ། །དྲན་ཉེ་ལས། སེམས་དང་དབང་པོ་རབ་ཞི་བ། །རྣལ་འབྱོར་སྙིང་ལ་དགའ་བ་གང་། །དེ་ནི་བརྒྱ་བྱིན་སྟོང་སྙེད་ཀྱིས། །ཤིན་ཏུ་དགའ་བར་མི་འགྱུར་རོ། །ཞེས་སོ། །དྲུག་པ་ནི། སྟོང་ཉིད་སོགས།༡༠ དེ་ལྟར་སྟོང་པ་ཉིད་ལ་ཡུན་རིང་དུ་གོམས་ཚེ་ཤེས་ཉམས་འཕེལ་འགྲིབ་ཅན་དང་དུས་མིན་གློ་བུར་དུ་འབྱུང་བ་བར་ཆད་བདུད་ཀྱི་རྟགས་མ་ཡིན་པར། ངེས་པའི་རྟགས་ཀྱང་འདི་ལྟར་འབྱུང་སྟེ་དངོས་པོ་ཀུན་ལ་མཚན་མར་འཛིན་ཅིང་སོ་སོར་འབྱེད་པར་བྱེད་པའི་ལོག་རྟོག་གི་འདུ་ཤེས་ཆུང་ཞིང་ཞི་བར་གྱུར་ནས། ཆགས་སྡང་དང་ལ་སོགས་པའི་རྩ་བ་དང་ཉེ་བའི་ཉོན་མོངས་པ་རྣམས་ཇེ་ཆུང་ངུ་འགྱུར་ཞིང་། དགེ་སྡིག་དང་བདག་གཞན་འཁོར་འདས་སོགས་ཀྱི་གཉིས་སྣང་ཐམས་ཅད་ཇེ་མཉམ་ཇེ་མཉམ་དུ་རྟོགས་པ་དང་། གནས་ཚུལ་ལ་མཉམ་ཡང་དེ་ལྟར་མ་རྟོགས་པའི་སྣང་ཚུལ་གློ་བུར་གྱི་དྲི་མ་ཅན་རྣམས་ལ་སྙིང་རྗེ་དང་ཕན་འདོགས་པའི་སེམས་ཇེ་འཕེལ་ཇེ་འཕེལ་དུ་འགྱུར་བ་དང་། མཐོང་སྣང་གི་ཡུལ་རྣམས་ནི་སེམས་རྣམ་པར་རྟོག་པའི་བག་ཆགས་ཙམ་ཡིན་པས། སེམས་ཀྱི་རྟོག་པ་ཇེ་ཕྲར་སོང་བ་དང་མཐོང་སྣང་འཁྲུལ་བའི་དངོས་པོ་རྣམས་མེད་པར་འགྱུར་ལ། མངོན་ཤེས་ལྔ་དང་སྤྱན་ལྔ་ལ་སོགས་པ་ལམ་རྟགས་ཀྱི་ཡོན་ཏན་རྣམས་ཀྱང་མཐུན་པའི་རྒྱུ་ལས་རིམ་གྱིས་འབྱུང་ངོ་། །རྣམ་འགྲེལ་ལས། རྗེས་སུ་འགྲོ་དང་ལྡོག་པ་ལས། །གང་ཞིག་གང་གི་རྗེས་འགྲོ་མཐོང་། །ཕན་ཚུན་རང་གཞན་དེ་རྒྱུ་ཅན། །དེ་ཕྱིར་མི་མཐུན་ལས་མི་འབྱུང་། །ཞེས་དང་། དེ་ལྟར་རྒྱུ་དང་འབྲས་བུ་དག །ཕན་ཚུན་རང་གཞན་ངེས་པ་ཉིད། །ཅེས་སོ། །མི་བསླུ་བའི་ཡོན་ཏན་མ་བྱུང་བར་དུ་གོང་དུ་བཤད་པའི་རྟགས་དང་ཅི་མཐུན་བྱ་དགོས་ཀྱི། ཏིང་ངེ་འཛིན་དང་མངོན་ཤེས་སོགས་གློ་བུར་དུ་འབྱུང་བ་མ་ངེས་པ་ཡོད་པའི་ཕྱིར། དཀོན་བརྩེགས་ལས་མང་དུ་འབྱུང་། འཕགས་པ་ཀླུས། དེ་ལྟར་སྟོང་པ་ཉིད་འདི་ནི། །རྣལ་འབྱོར་པ་ཡིས་བསྒོམ་བྱས་ནས། །གཞན་གྱི་དོན་ལ་ཆགས་པའི་བློ། །འབྱུང་བར་འགྱུར་བ་ཐེ་ཚོམ་མེད། །ཅེས་སོ། །གསུམ་པ་རྗེས་ཐོབ་ལ་གསུམ། ཐུན་མོང་གི་དགེ་བ་ཅི་འགྲུབ་བྱེད་པ། བདག་བསྟོད་གཞན་སྨོད་ཀྱི་བདུད་ལས་སྤོང་བ། །དེ་ལྟར་བྱས་པས་ཚོགས་གཉིས་རྫོགས་པར་བསྟན་པའོ། །དང་པོ་ནི། མཉམ་པར་བཞག་སོགས།༡༠ དེ་ལྟར་སྟོང་པ་ཉིད་ལ་སེམས་མཉམ་པར་བཞག་པ་ནི་འཛིན་པའི་རྟོག་པ་དང་གཟུང་བའི་མཚན་མ་ཞི་བ་དང་། བློ་དང་བློས་བཞག་གི་སྤྲོས་པ་ཐམས་ཅད་རྣམ་པར་བཅད་པའི་ཤུགས་ལས་བདེན་པ་མཐོང་ཞེས་ཐ་སྙད་བཏགས་ཀྱི་ཡོངས་གཅོད་ཀྱིས་འགྲུབ་པ་མིན་ཏེ། མཐོང་ཞེས་པ་ནི་ཆོས་གང་ཡང་མ་མཐོང་བའི་ཚིག་བླ་དྭགས་ཏེ། དྲི་མ་མེད་པར་གྲགས་པའི་མདོ་ལས། བདེན་པ་མཐོང་བ་རྣམས་ཀྱིས་བདེན་པ་ཉིད་མཐོང་བ་མེད་ན་རྫུན་པ་ལྟ་ག་ལ་མཐོང་། ཞེས་དང་། ཡུམ་ལས། དོན་འདི་གང་ཡིན་ནམ་མཁའ་དག་ལ་བལྟ་བར་གྱིས། ཞེས་སོ། །དེས་ན་མཐོང་བྱ་མཐོང་བྱེད་མེད་པ་ནམ་མཁའ་ལྟ་བུའི་ངང་ནས་རྗེས་ཐོབ་ཏུ་ལངས་ཚེ་སྤྱོད་པ་འདི་ལྟར་སྤྱད་དེ། ཆོས་ཅན་ཐམས་ཅད་རང་བཞིན་སྟོང་པ་ཉིད་དུ་རྟོགས་མོད་ཀྱང་དཔེར་ན་རྨི་ལམ་ཉིད་ནའང་རྒྱུ་འབྲས་མི་བསླུ་བ་ལྟར་སྣང་བ་བཞིན། འཁྲུལ་རྟོག་མ་ཟད་བར་དུ་ལས་དང་ལས་ཀྱི་འབྲས་བུ་མྱོང་བ་ཡོད་པས་དགེ་སྡིག་གི་ལས་ལ་རྟག་ཏུ་སྤང་བླང་བྱ། སྡིག་པ་བྱས་པ་རྣམས་དང་པོ་སྟོབས་བཞིས་བཤགས་པར་བྱ་སྟེ། དེ་ལ་སྟོབས་བཞི་ནི། ཆོས་བཞི་བསྟན་པའི་མདོ་ལས། བྱམས་པ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྡིག་པའི་ལས་བྱས་ཤིང་བསགས་པ་ཐམས་ཅད་དག་པར་འགྱུར་ཏེ། བཞི་གང་ཞེ་ན། རྣམ་པར་སུན་འབྱིན་པ་དང་། བྱང་ཆུབ་ཀྱི་སེམས་ལ་བསྟེན་པ་དང་། གཉེན་པོ་བསྒོམ་པ་དང་། ཉེས་པ་བཟློག་པའོ། །ཞེས་སོ། །ལས་རྣམ་འབྱེད་ལས། ཤིན་ཏུ་མི་བཟད་ལས་རྣམས་བྱས་པ་ནི། །བདག་ལ་རྣམ་པར་སྨོད་པས་བསྲབ་པར་འགྱུར། །རབ་ཏུ་བཤགས་དང་སྡོམ་པར་བྱེད་པ་ཡིས། །དེ་དག་ཤིན་ཏུ་རྩད་ནས་བཏོན་པ་བཞིན། །ཞེས་སོ། །དེའི་རྗེས་སུ་བཤགས་བྱ་བཤགས་བྱེད་མི་དམིགས་པ་སེམས་ཉིད་འཁོར་གསུམ་དག་པའི་ངང་དུ་བཞག་ནས་སྦྱངས། སྤང་གཉེན་ལ་སོགས་པའི་རེ་དོགས་ཐམས་ཅད་ཆོས་ཀྱི་དབྱིངས་སུ་མཉམ་པ་ཉིད་གདེང་དུ་གྱུར་ན་སྡིག་དང་བསོད་ནམས་ལས་འདས་པ་ཐར་བ་ཡིན་པས་རྟགས་དང་སྦྱར་ནས་མཐུན་པར་བྱུང་ན། དགོས་པའི་དབང་མ་གཏོགས་སྤྲོས་པ་དོར་བར་བྱ་སྟེ་ཆུ་ལ་བརྒལ་ཚེ་གཟིངས་དགོས་ཀྱི་བརྒལ་ནས་སྐམ་ལ་ཕྱིན་ཚེ་གཟིངས་དགོས་པ་མེད་དོ། །གང་ལྟར་ཡང་འཁོར་འདས་ཀྱི་ཆོས་དངོས་པོར་སྣང་བ་ཀུན་སྒྱུ་མ་དང་འདྲ་བས་སྒྱུ་མའི་སྤྲུལ་པ་བཞིན་དུ་དབྱེར་མེད་པར་བལྟ་སྟེ། བརྒྱད་སྟོང་དང་ལྷའི་བུས་ཞུས་པ་རྣམས་སུ་སེམས་ཅན་ནས་སངས་རྒྱས་ཀྱི་བར་དུ་ཆོས་ཐམས་ཅད་རྨི་ལམ་ལྟ་བུ་སྒྱུ་མ་ལྟ་བུ་གཉིས་སུ་མེད་གཉིས་སུ་བྱར་མེད་སོགས་གསུངས། དེའང་སེམས་ཅན་ལ་ལས་ཀྱི་སྒྱུ་མ། རྣལ་འབྱོར་པ་ལ་ཉམས་ཀྱི་སྒྱུ་མ། སངས་རྒྱས་ལ་དག་པའི་སྒྱུ་མ་ཞེས་གཉིས་མེད་རྣམ་རྒྱལ་ལས་བཤད། སྒྱུ་མ་མཁན་བཟང་པོས་ཞུས་པ་ལས། ལས་ཀྱིས་སྤྲུལ་པའི་སྒྱུ་མ་ནི། །འགྲོ་དྲུག་སེམས་ཅན་ཐམས་ཅད་དོ། །རྐྱེན་གྱིས་སྤྲུལ་པའི་སྒྱུ་མ་ནི། །མེ་ལོང་གཟུགས་བརྙན་ལ་སོགས་སོ། །ཆོས་ཀྱིས་སྤྲུལ་པའི་སྒྱུ་མ་ནི། །ང་ཡི་འཁོར་གྱི་དགེ་སློང་ངོ་། །ང་ནི་ཡང་དག་རྫོགས་སངས་རྒྱས། །ཡེ་ཤེས་སྤྲུལ་པའི་སྒྱུ་མའོ། །ཞེས་སོ། །སྒྱུ་མ་དང་སྤྲུལ་པ་ལ་དངོས་པོ་མེད་པས་དོན་བྱེད་ནུས་སམ་སྙམ་ན། སྒྱུ་མའི་དམག་ངོ་མ་ཤེས་པས་མགྲོན་པོ་མང་པོ་ལ་གནོད་པ་དང་། དཀོན་བརྩེགས་ལས། སྤྲུལ་པའི་དགེ་སློང་གཉིས་ཀྱིས་དགེ་སློང་དམིགས་ལྟ་ཅན་ལྔ་བརྒྱ་བཏུལ་བ་སོགས་མང་དུ་ཡོད། ཏིང་རྒྱལ་ལས། གང་ཚེ་བདེར་གཤེགས་གཏམ་རྣམས་སྟོན་པ་ན། །མགོན་པོ་སྲང་བཞུད་མི་ལ་ཐུགས་བརྩེའི་ཕྱིར། །རྒྱལ་བས་དེར་ནི་སྤྲུལ་པ་རྣམས་སྤྲུལ་ཏེ། །དེ་དག་ལ་ཡང་སངས་རྒྱས་ཆོས་བཟང་སྟོན། །ཞེས་སོ། །དེའི་ཕྱིར་དགེ་སྦྱོར་ཐམས་ཅད་བྱེད་པར་སྣང་ཡང་བདེན་པར་མི་དམིགས་བཞིན་དུ་སྤྱད། སྡུད་པ་ལས། ཤིང་མཁན་བཟོ་བོ་མཁས་པས་སྐྱེས་པ་བུད་མེད་དང་། །འདྲ་བའི་བཟོ་བྱས་དེ་ཡང་བྱ་བ་ཐམས་ཅད་བྱེད། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །ཅེས་སོ། །སླེབ་སར་མ་ཕྱིན་བར་དུ་ལམ་མཁན་དགོས་པ་བཞིན། རྟག་ཏུ་དྲན་ཤེས་བཞིན་དང་མི་འབྲལ་བར་སྒོམ་གྱི་གདེང་ཅི་ཟིན་བྱ་སྟེ། ལམ་ལ་སྐྱེད་ཐོན་དགོས་པའི་ཕྱིར་དང་། སྤྱོད་པས་ལ་དོར་དགོས་པས་འདུས་བྱས་ཀྱི་དགེ་བ་དམན་པར་བལྟས་ནས་མི་དགག་པར་ནུས་ཚད་བྱ། སྐབས་སུ་ཉོན་མོངས་པ་སྐྱེས་ན་སྨིག་རྒྱུ་བཞིན་དུ་བཅོས་མེད་དུ་འཇོག་གམ་གཉེན་པོ་སྟོང་ཉིད་བསྒོམ་པའི་ངང་དུ་ཞི་བར་བྱ། གང་པོས་ཞུས་པ་ལས། སྟོང་ལ་འདོད་ཆགས་བྲལ་བ་མེད། །སྟོང་ལ་ཀུན་ནས་ཉོན་མོངས་མེད། །རྟག་ཏུ་སྟོང་དབེན་བསྒོམ་པས་ན། །སྒྲིབ་པ་རྣམས་ནི་སྤོང་བར་བྱེད། །ཅེས་སོ། །དགོན་པར་འདུག་མི་སྤྲོ་བར་སྐྱོན་མི་རྟག་པ་དང་འཁོར་བའི་སྡུག་བསྔལ་བསམས་ནས་སྡོད་ཚུགས་པར་བྱ། དུས་གསུམ་གྱི་འཕགས་པ་རྣམས་མངོན་སུམ་དུ་བཞུགས་པར་བསམ་ལ། བཟང་སྤྱོད་ལས་བྱུང་བ་ལྟ་བུའི་ཡན་ལག་བདུན་པ་རྩེ་གཅིག་པའི་སེམས་ཀྱིས་བྱ། དེས་མཚོན་ནས་དུས་གསུམ་གྱི་དགེ་རྩ་ཅི་བྱས་ཐམས་ཅད་གཞན་དོན་དུ་བྱང་ཆུབ་ཆེན་པོར་བསྔོ་བས་རྒྱས་འདེབས་པར་བྱའོ། །དཔལ་ལྡན་ཟླ་གྲགས་ཀྱིས། རྟོག་མེད་བློ་ནི་རང་ཞིར་བཞག །ངོས་བཟུང་མེད་ཅིང་ཡེང་བ་མེད། །མཚན་མ་མེད་ཅིང་གསལ་བར་བསྒོམ། །ལངས་ལ་དངོས་པོར་སྣང་བ་ཀུན། །སྒྱུ་མ་ཙམ་དུ་ཤེས་བྱས་ནས། །སྡོམ་པ་རྣམ་གསུམ་འབད་པས་བསྲུང་། །ཡན་ལག་བདུན་པ་ལ་སོགས་བྱ། །སྙིང་རྗེ་ཕན་སེམས་ཆེ་བར་བྱ། །ཡུལ་ལ་ཆགས་པ་སྤང་བྱ་ཞིང་། །མགྲོན་པོའི་ཚུལ་གྱིས་གནས་པར་བྱ། །ཞེས་སོགས་གསུངས་སོ། །གཉིས་པ་ནི། སེམས་ཅན་སོགས།༡༢ ཐེག་པ་ཆེན་པོའི་ལམ་གྱི་རྩ་བ་སེམས་ཅན་རྣམས་ལ་སྙིང་རྗེ་དང་ཕན་འདོད་ཀྱི་སེམས་བསྐྱེད་པར་བྱ་སྟེ། འཕགས་པ་ཀླུས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ཡང་དེ་འདྲའོ། །ཞེས་སོ། །བྱམས་པའི་ལུས་ཀྱི་ལས་ཁྲོ་གཉེར་དང་ངོ་འཛུམ་གནག་པ་སྤངས་ལ་རྟག་ཏུ་འཛུམ་པའི་བཞིན་དུ་བྱ། ཟླ་བ་སྒྲོན་མེའི་མདོར། ཟླ་རྒྱས་བཞིན་འཛུམ་དུལ་བ་དང་། །རྒན་རབས་དང་ནི་གསར་བུ་ལའང་། །རྟག་ཏུ་གསང་པོར་སྨྲ་བ་དང་། །དེས་ཤིང་ང་རྒྱལ་མེད་པར་བྱ། །ཞེས་སོ། །སྒོ་གསུམ་ཞི་ཞིང་དུལ་བ་དང་ཀུན་ལ་དྲང་པོའམ་གསང་པོར་ཞེས་རྒྱབ་དང་གཡས་གཡོན་མིན་པར་མདུན་ནས་ལེགས་པར་སྨྲ་བ་དང་། ཧ་ཅང་བྲེལ་བ་བསྐྱུང་བར་བྱ་བ་དང་། བདག་ལ་མི་བསྟོད་ཅིང་རང་སྐྱོན་ལ་བལྟ་བར་བྱ་ཞིང་གཞན་ལ་མི་སྨོད་པར་ཡོན་ཏན་ཅན་དུ་བལྟ་ཞིང་བསྔགས་པར་བྱ། སྡུད་པ་ལས། བདག་སྟོད་གཞན་ལ་སྨོད་པའི་བྱང་ཆུབ་སེམས་དཔའ་ནི། །བདུད་ཀྱིས་ཡོངས་སུ་བཟུང་ཞིང་བློ་ཆུང་རིག་པར་བྱ། །ཞེས་སོ། །རང་ལ་སྙན་གྲགས་བྱུང་བ་བདུད་ཀྱི་ལས་ཡིན་ཞིང་སེམས་གཡེང་བར་འགྱུར་བས། མ་ལེགས་སོ་སྙམ་སྟེ་མི་དགའ་བར་བྱའོ། །མི་ཆོས་བླ་མ་བདེན་པ་མངོན་ཤེས་སོགས་གོང་མའི་ཡོན་ཏན་ཐོབ་ཀྱང་གཞན་ལ་མི་བསྒྲགས་པ་ཡིན་ན། མི་མ་ཡིན་པའི་གཟུགས་མཐོང་སྒྲ་ཐོས་ལ་སོགས་པ་དོན་མེད་པ་དེ་མི་བསྒྲགས་པ་སྨོས་ཅི་དགོས་ཏེ། མ་མཐོང་བཞིན་དུ་མཐོང་ཞེས་སྨྲ་བ་ནི་མི་ཆོས་བླ་མའི་རྫུན་དུ་འགྱུར་ཞིང་། མཐོང་ནའང་དེ་འདྲ་འཇིག་རྟེན་ཕལ་པ་ལའང་ཡོད་པས་དེ་ལམ་གྱི་ཡོན་ཏན་དུ་རློམ་ནས་གཞན་ལ་སྨྲས་ན་མངོན་པའི་ང་རྒྱལ་དང་། གཞན་གྱིས་ཁྱད་པར་ཅན་དུ་མོས་ནས་རྙེད་བཀུར་འདུ་བས་ལམ་ལས་ཉམས་པར་འགྱུར་རོ། །གཞན་ཡང་དཔུང་བཟང་དང་བཤེས་སྤྲིང་སོགས་ལས་བཤད་པའི་སྙན་ཅིང་གྲགས་པ་ལ་རེ་ཞིང་དགའ་བ་དང་། མི་སྙན་པ་མ་གྲགས་པ་ལ་དོགས་ཤིང་མི་དགའ་བ་དང་། དེ་བཞིན་དུ་སྦྱར་ཏེ་ངོར་བསྟོད་པ་དང་ལྐོག་ཏུ་སྨད་པ་དང་ནད་མེད་པ་སོགས་ཀྱི་བདེ་བ་དང་དེ་ལས་བཟློག་པའི་སྡུག་བསྔལ་བ་དང་། ལོངས་སྤྱོད་ཀྱི་རྙེད་པ་དང་དེ་མ་རྙེད་པ་དེ་རྣམས་ལ་དགའ་མི་དགའ་རེ་དོགས་བྱེད་པས་གཡེང་བ་ནི་འཇིག་རྟེན་ཕལ་པ་རྣམས་དང་མཐུན་པའི་ཆོས་ཡིན་ལ། དེ་བརྒྱད་པོར་འཇིག་རྟེན་ལས་འདས་པའི་ཆོས་ཐོབ་པར་འདོད་པ་རྣམས་ཀྱིས་སྙིང་པོ་མེད་པ་བྲག་ཆ་དང་རྨི་ལམ་འདྲ་བར་མགོ་མཉམ་པར་བྱའོ། །མདོ་ལས། བཅོས་མིན་སྙན་པར་གྲགས་པའི་ཡོན་ཏན་གྱིས། །འགྲོ་བ་མགུ་བར་ནུས་པའི་མཐུ་ལྡན་ན། །ཡོན་ཏན་བཅོས་མའི་བཀུར་སྟི་ཐོབ་པ་རྣམས། །མི་བཟད་ཕྲག་དོག་མེ་ནི་འབར་བར་འགྱུར། །ཞེས་དང་། འོད་སྲུང་གིས་ཞུས་པ་ལས། ལྟ་གྱུར་འཆིང་དང་རྙེད་དང་བཀུར་སྟི་དང་། །གྲགས་པའི་འཆིང་བ་རབ་ཏུ་བྱུང་བ་ཡི། །འཆིང་བ་དམ་ཞེས་འཕགས་པ་རྣམས་ཀྱིས་གསུངས། །དེ་དག་རྟག་ཏུ་རབ་ཏུ་བྱུང་བས་སྤང་། །ཞེས་སོ། །སེམས་ཅན་རྣམས་ནི་ལས་དང་ཉོན་མོངས་པའི་སྐྱོན་གྱི་རང་བཞིན་ཡིན་པས་བྱིས་པས་བྱིས་པ་གཞན་གྱི་སྐྱོན་ལ་མི་བརྟག་གོ། །ཞེས་པ་འདྲ་སྟེ་འཕགས་པས་གཞན་སྐྱོན་མི་བརྟག་པས་སོ། །དཀོན་བརྩེགས་ལས། བདག་གིས་སྐྱོན་རྣམས་འཆབ་བྱེད་ཅིང་། །གཞན་གྱི་ཉེས་ལ་རྟོགས་པར་བྱེད། །འདི་གཉིས་དུག་གི་མེ་དང་འདྲ། །མཁས་པ་རྣམས་ཀྱིས་རྨ་འདི་སྤོངས། །ཞེས་དང་། ཡང་ན་བཅོམ་ལྡན་འདས་ཀྱིས་ང་དང་ང་འདྲ་བ་མ་གཏོགས་གང་ཟག་གིས་གང་ཟག་གི་ཚོད་བཟུང་བར་མི་བྱ་ཞེས་གསུངས་ཤིང་། མདོག་ངན་གླེན་ནམ་ཡང་ན་རྙེད་མེད་དམ། །བརྙས་ཤིང་སྨད་པར་བྱ་བ་ཡིན་ན་ཡང་། །མི་ཡི་ཁམས་དང་སྤྱོད་པ་ཤེས་དཀའ་བས། །དེ་ལ་གྱ་ཚོམ་སྐྱོན་ནི་གདགས་མི་བྱ། །ཞེས་དང་། ངེས་པ་དང་མ་ངེས་པར་འགྲོ་བའི་མདོར། །གང་གི་འཁྲུལ་བ་ཅི་མཐོང་ཡང་། །དེ་དག་ལ་ནི་ཉེས་མི་བརྗོད། །ཅི་འདྲ་བ་ཡི་ལས་བྱས་ན། །འབྲས་བུ་དེ་འདྲ་འཐོབ་པར་འགྱུར། །ཞེས་དང་། བློ་གྲོས་རྒྱ་མཚོས་ཞུས་པ་ལས། ཐེག་པ་ཆེན་པོ་ལ་བར་དུ་གཅོད་པའི་ཆོས་བཞི་གསུངས་ཏེ་བདག་གི་ཡོན་ཏན་ལ་བསྟོད་པ་དང་། གཞན་གྱི་ཡོན་ཏན་ལ་ལོགས་པར་བརྗོད་པ་དང་། ངའོ་སྙམ་པའི་ང་རྒྱལ་འབར་བ་དང་། ཁྲོ་བ་བརྟན་པའོ། །ཞེས་སོ། །གསུམ་པ་ནི། དེ་ལྟར་སོགས།༥ དེ་ལྟར་མཉམ་བཞག་ཏུ་ལྟ་བ་སྟོང་པ་ཉིད་ལ་ཡུན་རིང་དུ་གོམས་པ་དང་རྗེས་ཐོབ་ཏུ་དགེ་བའི་སྤྱོད་པ་དང་འབྲེལ་བར་བྱས་ན། དམིགས་བཅས་བསོད་ནམས་དང་དམིགས་མེད་ཡེ་ཤེས་ཀྱི་ཚོགས་ཆེན་པོ་གཉིས་ཀྱང་རིམ་གྱིས་རྫོགས་པར་འགྱུར་ཞིང་། སྤང་བྱ་ཉོན་ཤེས་ཀྱི་སྒྲིབ་པ་གཉིས་ཀྱང་རིམ་གྱིས་འབྱུང་བར་འགྱུར་ཏེ། དེ་བཞིན་གཤེགས་པའི་གསང་བའི་མདོ་ལས། ཡེ་ཤེས་ཀྱི་ཚོགས་ཀྱིས་ནི་ཉོན་མོངས་པ་ཐམས་ཅད་སྤོང་བར་འགྱུར་ལགས་སོ། །བསོད་ནམས་ཀྱི་ཚོགས་ཀྱིས་ནི་སེམས་ཅན་ཐམས་ཅད་ཉེ་བར་འཚོ་བར་འགྱུར་ལགས་སོ། །ཞེས་བསོད་ནམས་ཀྱི་ཚོགས་ལམ་གཟུགས་སྐུ་གཉིས་འབྱུང་བས་འགྲོ་བའི་ཉེར་འཚོ་བྱེད་པའོ། །དེ་བཞིན་དུ་ཐོག་མེད་ནས་གོམས་པའི་གཟུང་འཛིན་གྱི་རྣམ་པར་རྟོག་པ་དང་ལྷན་ཅིག་སྐྱེས་པའི་བདག་འཛིན་མ་རིག་པ་སྒོམ་ལམ་མ་གཏོགས་གཞོམ་དཀའ་བ་རྣམས། དཔེར་ན་སོས་ཀའི་དུས་སུ་ཆབ་རོམ་འཐུག་པོ་རྣམས་ཉི་མ་རིམ་པར་ཤར་བས་ཞུ་བ་བཞིན། སྤང་བྱ་ཡང་དེ་ཞི་ཇེ་ཕྲར་གྱུར་ཏེ་རྣམ་པར་མི་རྟོག་པའི་དབྱིངས་སུ་ཞི་བར་འགྱུར་རོ། །ལྔ་པ་མཐར་ཕྱིན་མི་སློབ་པའི་ལམ་ལ་གཉིས། ཇི་ལྟ་ཇི་སྙེད་མཁྱེན་པའི་ཡེ་ཤེས་ཆོས་སྐུ་དང་། སྙིང་རྗེ་དང་སྨོན་ལམ་གྱི་འཕེན་པའི་གཞན་དོན་གཟུགས་སྐུ་སྟོན་པའོ། །དང་པོ་ནི། མི་རྟོག་སོགས།༥ གཟུང་འཛིན་གཉིས་སུ་རྣམ་པར་མི་རྟོག་ཅིང་དབྱིངས་དང་ཡེ་ཤེས་དབྱེར་མེད་ལྷུན་གྱིས་གྲུབ་པ་དག་པ་གཉིས་དང་ལྡན་པ་ནི་ཆོས་ཀྱི་སྐུ་སྟེ་སངས་རྒྱས་ཡིན་ལ། དེའི་ཚེ་སྒྲིབ་གཉིས་བག་ཆགས་དང་བཅས་པ་དབྱིངས་སུ་དག་པས་མཐོང་སྣང་འཁྲུལ་པའི་ཡུལ་དང་། ཁམས་གསུམ་གྱི་སེམས་སེམས་བྱུང་ཐམས་ཅད་རྣམ་པར་དག་པའི་ཚུལ་གྱིས་བྲལ་ནས། རྣམ་པ་ཐམས་ཅད་མཁྱེན་པའི་ཡེ་ཤེས་ནམ་མཁའི་སྤྱོད་ཡུལ་ཆོས་ཉིད་འདུས་མ་བྱས་པ་རང་རིག་རང་ལ་ལྷུན་གྲུབ་ཏུ་གནས་སོ། །རྣམ་མཁྱེན་འདུས་མ་བྱས་མི་འཐད་སྙམ་ན། །ལང་ཀར་གཤེགས་པ་ལས། རྣམ་པར་ཤེས་པ་ནི་སྐྱེ་ཞིང་འཇིག་པ་ཡུལ་ལ་ཐོགས་པ་ཡོད་མེད་སོགས་མཐར་ལྷུང་བ་དང་། ཡེ་ཤེས་ནི་མི་སྐྱེ་མི་འགག་སོགས་དེ་ལས་ལྡོག་པ་རྣམས་ཡིན་པར་གསུངས་པ་དང་། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །ཅེས་དང་། དཀོན་མཆོག་གི་ཟ་མ་ཏོག་ལས་ཀྱང་གསུངས་ཤིང་རིགས་པས་ཀྱང་གྲུབ་པས་རྣམ་མཁྱེན་འདུས་མ་བྱས་སོ། །དེ་ལས་རྟོག་འཛིན་མེད་པར་ཇི་ལྟ་ཇི་སྙེད་ཀྱིས་བསྡུས་པའི་ཤེས་བྱ་ཐམས་ཅད་མེ་ལོང་ལ་གཟུགས་བརྙན་ཤར་བ་བཞིན་དུ་ངང་གིས་མཁྱེན་ལ། མཐུ་དང་རྫུ་འཕྲུལ་གྱིས་མཚོན་པའི་ཡོན་ཏན་གྱི་སྡེ་ཚན་ཉེར་གཅིག་སོགས་བསམ་གྱིས་མི་ཁྱབ་པ་མངའ་འོ། །གཉིས་པ་ནི། དེ་ཐོབ་སོགས།༥ དེ་ལྟར་ཀུན་ཏུ་འོད་ཀྱི་ས་ལ་བཞུགས་པའི་སངས་རྒྱས་ཆོས་སྐུ་དེ་ཐོབ་ནས་ནི། གདོད་མའི་གནས་ལུགས་ཀྱི་དབྱིངས་ཉིད་སྤྲོས་པ་ཐམས་ཅད་ལས་འདས་པས་སྤྲུལ་པ་སྤྲོ་བ་སོགས་མེད་ཀྱང་སྔོན་སྤྱོད་པ་ལམ་གྱི་དུས་ནས། སྨོན་ལམ་མང་པོ་བཏབ་པའི་མཐུ་དང་ཐུགས་རྗེ་ཆེན་པོས་གཟིགས་པ་རྒྱུན་མི་ཆད་པ་ཡི་དབང་གིས། འགྲོ་བའི་དོན་དུ་ས་དང་པོ་ནས་བཅུ་པའི་བར་ལ་སྤྲུལ་སྐུ་ལ་ལོངས་སྐུ་བཏགས་པའི་ལོངས་སྐུ་ཐུན་མོང་དང་། ས་བཅུ་ཁོ་ནར་སྣང་བའི་ལོངས་སྐུ་ཐུན་མོང་མ་ཡིན་པ་དང་། གླིང་བཞི་བྱེ་བ་ཕྲག་བརྒྱ་རྣམས་སུ་འགྲོ་འདུལ་སྤྲུལ་པའི་སྐུ་སྣ་ཚོགས་པ་སྟེ་གཟུགས་སྐུ་གཉིས་ཆོས་ཀྱི་སྐུ་ལས་མ་གཡོས་བཞིན་རང་ཤུགས་ཀྱིས་འབྱུང་ངོ་། །དེ་ནས་གདུལ་བྱ་སེམས་ཅན་སོ་སོའི་མོས་པ་དང་བསམ་པ་བཞིན་དུ་སྐུ་གསུང་ཐུགས་ཀྱི་རྣམ་པར་འཕྲུལ་བ་བསམ་གྱིས་མི་ཁྱབ་པས། རྣམ་པར་མི་རྟོག་བཞིན་དུ་ཐེག་པ་སྣ་ཚོགས་ཀྱི་ཆོས་སྟོན་པར་བྱེད་ཅིང་། དུས་འཁོར་བ་ཇི་སྲིད་མ་སྟོང་བར་དུ་གཞན་དོན་ཁོ་ན་ལ་སྤྱོད་ནས་བཞུགས་པའོ། །རྒྱུད་བླ་མ་ལས། ཇི་ལྟར་ནོར་བུ་རིན་ཆེན་རྟོག་མེད་འདོད་པར་ནོར། །འབད་པ་མེད་པར་གཞན་པ་དག་ལ་རབ་སྟེར་ལྟར། དེ་བཞིན་དུ་ཐུབ་པ་འབད་མེད་ཇི་ལྟར་འོས་པར་ནི། །གཞན་གྱི་དོན་དུ་སྲིད་པ་ཇི་སྲིད་རྟག་ཏུ་བཞུགས། །ཞེས་སོ། །དེ་ལྟར་སྐུ་དང་གསུང་གི་རོལ་པ་རྣམས་གདུལ་བྱའི་མོས་པ་ཁོ་ནས་བསྡུས་པར་མི་བསམ་སྟེ། དེ་ལྟར་ན་ལམ་ལ་མ་ཞུགས་པ་ཡན་ཆད་ལ་རང་རྒྱུད་ཀྱིས་མོས་པས་བསྡུས་པའི་སངས་རྒྱས་ཀྱི་གཟུགས་སྐུ་སྣང་དུ་ཡོད་པ་སོགས་ཐལ་བར་འགྱུར་བས། དེས་ན་སངས་རྒྱས་ཀྱི་ཐུགས་རྗེ་དང་འགྲོ་སེམས་དག་པ་གཉིས་རྟེན་ཅིང་འབྲེལ་བར་འབྱུང་བ་སྟེ། འགྲོ་སེམས་ལ་སྐུ་གསུང་གི་རྣམ་པར་ཤར་བ་ནི་བུམ་པའི་རྣམ་ལྡན་གྱི་ཤེས་པ་བཞིན་ནོ། །གཟུགས་སྐུ་ཟག་མེད་ཀྱི་དགེ་བའི་གཟུགས་བརྙན་ཡིན་ཡང་ངོ་བོ་ཆོས་སྐུ་ལས་མ་འདས་པས། ཡེ་ཤེས་དང་ཡོན་ཏན་མཐའ་དག་མངའ་ཞིང་ཆོས་སྐུ་ལའང་གཟུགས་སྐུའི་ཡོན་ཏན་ཐམས་ཅད་རང་རྒྱུད་ཅན་མ་ཡིན་པར། ཆུ་ལ་རླན་དང་མེ་ལ་ཚ་བ་བཞིན་ལྡན་པ་ནི་སེམས་ཅན་གྱི་ཁམས་ལ་ཇི་སྐད་བཤད་པ་བཞིན་ཏེ། འོན་ཀྱང་ངོ་བོ་སྤྲོས་པ་དང་བྲལ་ཞིང་དག་པ་གཉིས་དང་ལྡན་པའོ། །ཕྱོགས་མཐུན་གྱི་དཔེ་ནོར་བུ་ལ་སོགས་པ་སྟེ་གཞན་དུ་ན་སྨོན་ལམ་དང་ཐུགས་རྗེས་འཕེན་རྒྱུས་དབེན་པའི་བེམ་སྟོང་བཞིན་ནོ། །སྔར་རྩ་བའི་ས་བཅད་གསུམ་པ་མཇུག་གདམས་པའི་དོན་ལ་གཉིས། སོ་སྐྱེ་ལ་གདམས་པ། ཆོས་ཉན་བཤད་བྱེད་པ་གཞན་ལ་གདམས་པའོ། །དང་པོ་ལ་བཅུ་གཅིག་སྟེ། བྱང་ཆུབ་རང་གཞན་ཀུན་གྱི་ཐུན་མོང་ཡིན་པས་སྒྲུབ་པར་གདམས་པ། སྟོན་པའི་བསྟན་པ་དཔེས་ཀུན་གྱིས་རྟོགས་རུང་བ་དང་། མི་རྟག་པའི་སྐྱོ་བས་ཆོས་ལ་བསྐུལ་བ་དང་། དལ་འབྱོར་རྙེད་དཀའ་བསམ་ནས་ཆོས་ལ་བསྐུལ་བ་དང་། འབྲས་བུ་སྡུག་བསྔལ་ཤེས་ཀྱང་རྒྱུ་སྡིག་པ་བྱེད་པ་ལ་སྙིང་རྗེ་བ་དང་། སློབ་དཔོན་ཉིད་ཀྱང་འཁོར་བའི་སྡུག་བསྔལ་གྱིས་སྐྱོ་ནས་གཞན་ལ་གདམས་པ་དང་། བྱིས་པ་རྣམས་བདག་འཛིན་གྱི་ཁར་མི་བཟུང་བར་ཐར་བ་ལ་བྲོད་པ་སྐྱེད་པ་དང་། གང་ཟག་ཆོས་མཛད་བྱེ་བྲག་ལ་གདམས་པ་དང་། དགེ་སྡིག་ཕན་གནོད་ཆེ་བ་དཔེས་བསྟན་པ་དང་། ཐར་པ་རང་ལ་རག་ལུས་པ་དང་། ཡུན་གྱིས་དོན་མེད་པར་རྒས་པ་ལ་སྙིང་རྗེ་བའོ། །དང་པོ་ནི། དེ་ཕྱིར་སོགས།༥ དེ་ཕྱིར་རམ་དེ་ནས་སློབ་དཔོན་བདག་ཀྱང་རི་ཁྲོད་དགོན་པར་མཆི་བ་ལགས་ན། བདེན་པ་བཞིའི་སྒོ་ནས་ཐར་པ་བྱང་ཆུབ་ཆེན་པོ་བསྒྲུབ་པའི་ཚུལ་ཡན་ལག་པའི་དོན་དེ་དག་ཀྱང་ནི་གོང་དུ་བཤད་པ་དེ་བཞིན་དུ་ཐར་འདོད་རྣམས་ཀྱིས་དགོངས་པར་མཛོད་ལ། དམ་པའི་ཆོས་ཚུལ་བཞིན་བསྒྲུབ་པར་བྱ་བ་ལ་བརྩོན་འགྲུས་ཀྱིས་འབད་པར་རིགས་ཏེ། ཁམས་གསུམ་འཁོར་བའི་སྡུག་བསྔལ་དེ་དང་ནི་འབྲས་བུ་བྱང་ཆུབ་ཀྱི་གོ་འཕང་ནི་ཁ་ཅིག་ཙམ་མ་ཡིན་པར་འོ་སྐོལ་སྐྱེ་བོ་ཀུན་གྱི་ཐུན་མོང་ལགས་པའི་ཕྱིར་རོ། །གཉིས་པ་ནི། སྟོན་པའི་སོགས།༡༡ བདག་ཅག་གི་སྟོན་པའི་བསྟན་པ་རིན་པོ་ཆེ་ནི་གདུགས་ཏེ་ཉི་མ་བཞིན་དུ་རིས་མེད་པའི་འགྲོ་བ་ཀུན་ལ་སྙོམས་པར་བཞུགས་ཀྱང་། ཁ་བྱང་དུ་བལྟས་པའི་ཕུགས་པར་ཉི་མ་མི་འཆར་བ་དང་འདྲ་བའི་སྐྱེ་བོ་ལོག་སྲེད་ཅན་གྱིས་མི་རྟོགས་པས་སྟོན་པ་དང་དེའི་བསྟན་པ་ལ་ཡིད་ཆེས་ཀྱི་དད་པའི་སྒོ་ནས་དམ་པའི་ཆོས་སྒྲུབ་པ་ལ་འབད་དགོས་ཞེས་གདམས་སོ། །སླད་ནས་ཆོས་མཛད་རྣམས་ལ་ཞུ་བར་བྱ་བ་ནི་འདི་ལྟར་ཏེ། དོ་ཅིག་གམ་ད་ལོ་ཞེས་མཆིས་པས་སང་ཕོད་ཅེས་པའང་ངེས་པར་མཆིས་པ་འཇིག་རྟེན་ན་ཡོངས་སུ་གྲགས་པ་བཞིན་དུ། ཚེ་འདི་མཆིས་པས་ཚེ་སླད་མའང་ངེས་པར་མཆིས་པ་ཡིན་ལ། གློ་བུར་གྱི་ཚེ་ལ་ངེས་པ་མེད་པས་སང་ཕོད་ཀྱི་ལོ་དང་སྐུ་ཚེ་སླད་མ་གཉིས་གང་སྔར་འོང་བ་སུ་ལའང་གཏོལ་མེད་པ་ཡིན་ན། སང་ཕོད་དོན་དུ་ད་ལོ་ནས་སོ་ནམ་ལ་འབད་པ་བཞིན་དུ་ཚེ་སླད་མའི་དོན་དུ་ད་ལྟ་ནས་ཆོས་ལ་ཅིའི་ཕྱིར་འབད་པར་མི་མཛད་དེ་འབད་པར་རིགས་སོ། །ཅིའི་ཕྱིར་ཞེ་ན་མི་རྟག་པ་སྲིན་པོ་ལྟ་བུའི་སོ་བར་དུ་བཟུང་བཞིན་པ་དེ་མ་ཚོར་རམ་སྟེ་ཚོར་ན། མྱུར་དུ་འཆི་བ་ལས་མི་ཐར་ངེས་པས་འཕྲལ་དང་ཡུན་གྱི་བདེ་བའི་རྒྱུ་བསོད་ནམས་མྱུར་དུ་མཛོད་ཅིག །སྐྱེས་རབས་ལས། ལམ་རྣམས་ཐམས་ཅད་འཆི་བདག་ཉིད་ཀྱིས་བཀག །དོག་པ་མེད་པར་རབ་ཏུ་དགའ་བཞིན་སྤྱོད། །འགྲོ་བ་འདི་ལྟ་བུར་ནི་འཁོད་པ་ལ། །སྐྱེ་བོ་འཇིགས་པ་མེད་པ་ངོ་མཚར་ཆེ། །ཞེས་སོ། །གསུམ་པ་ནི། ངེས་པར་སོགས།༧ དམ་པའི་ཆོས་སྒྲུབ་པ་ལ་བརྩོན་འགྲུས་དགོས་དེའི་མི་མཐུན་ཕྱོགས་ལེ་ལོ་དང་དེའི་གཉེན་པོ་མི་རྟག་པར་བསམ་པ་ལས་ལྷག་མེད་པས། ངེས་པར་འཆི་བ་དང་ནམ་འཆི་ཆ་མེད་ལ་བསམ་སྟེ་ཆོས་མེད་དུ་སྐད་ཅིག་ཀྱང་མི་འདུག་པར་དགེ་བའི་ལས་ཀྱི་བསགས་པ་རྣམས་ཉིན་རེ་ཞིང་བགྲང་ལ། འགྲུབ་པ་ལ་ཡི་རངས་སྟེ་བསྔོ་བར་བྱ་སླན་ཆད་ཀྱང་མུ་མཐུད་ནས་བསྒྲུབ་པར་བྱ། སྔོན་བྲམ་ཟེ་སྒྲ་མཁན་བྱ་བས་དགེ་སྡིག་གཉིས་རྡེའུ་དཀར་ནག་གིས་བགྲངས་ནས་བརྩོན་པའི་དཔེ་ལྟར་རོ། །དེ་ལྟར་ཚོད་ཡོད་དང་ལོང་ཡོད་མི་བྱ་བར་མ་འབད་ན་ཚེ་འདི་ནི་རྟག་མི་ཐུབ་པ་རྩ་རྩེའི་ཟིལ་བ་དང་འདྲ་སྟེ་མེད་ལ་ཁད་དང་། ཁའི་དབུགས་ཀྱི་རྒྱུ་བ་འདི་ནི་ན་བུན་དང་འདྲ་སྟེ་ཡུན་མེད་པ་ཡལ་ལ་ཁད་དང་། འབྱུང་འདུས་ཀྱི་ལུས་འདི་ཡང་གསོག་ཅིང་ཡ་མ་བརླ་སྒྱུ་མའི་སྐྱེས་བུ་དང་འདྲ་སྟེ་དངོས་པོའི་སྣང་བ་མེད་པ་ཡུད་ཙམ་ནས་འཇིག་ལ་ཁད་པ་དང་། སེམས་དངོས་མེད་འདི་ནི་གློག་དང་འདྲ་སྟེ་མེད་སྣང་སྐད་ཅིག་མའི་རང་བཞིན་ནོ། །བུ་སྨད་སོགས་ཉེ་བཞི་གཞོན་ལུས་མཛེས་ཤིང་གོས་རྒྱན་ལོངས་སྤྱོད་ཕུན་སུམ་ཚོགས་པ་རྣམས་ནི། སྙིང་ལ་སྡུག་ཅིང་འབྲལ་དུ་ཕོངས་པ་ཡིན་ཀྱང་མི་རྟག་པའི་ཆོས་ཅན་བྱིས་པ་འདྲིད་པའི་འཇའ་ཚོན་དང་འདྲའོ། །ཁྱིམ་བདག་དཔལ་བྱིན་གྱིས་ཞུས་པ་ལས། ལོ་སྟོང་བྱེ་བར་སུ་ཞིག་འཚོ་འགྱུར་བ། །དེས་ཀྱང་ཆགས་པ་ཡོངས་སུ་སྤང་བྱ་ན། །སུ་ཞིག་ལོ་བརྒྱ་ཐུབ་པར་མི་འགྱུར་བ། །དེ་ཕྱིར་དགའ་བ་མི་རྙེད་སྨོས་ཅི་དགོས། །ཞེས་སོ། །བཞི་པ་ནི། ཕུང་པོ་སོགས།༨ གཡར་པོའི་ཆ་སྤྱད་ནི་བདག་པོས་ནམ་འཁྱེར་མ་ངེས་པ་ལྟར་ཕུང་པོ་འདི་ཡང་གཡར་པོ་དང་འདྲ་བར་དགོངས་མཛོད་ལ། དམ་པའི་ཆོས་སྒྲུབ་པ་ལ་མྱུར་དུ་མ་འབད་ན་དལ་འབྱོར་གྱི་མི་ལུས་ལན་ཅིག་ཐོབ་པ་ཉིད་ཀྱང་ཆུད་ཟ་བར་འགྱུར་ཞིང་། སྔོན་གྱི་དགེ་འབྲས་དེ་སྟོང་ཟད་དུ་སོང་ན་སླད་ནས་ནི་རྒྱུ་མེད་པར་འབྲས་བུ་མི་ལུས་འདི་འདྲ་བའང་མི་འཐོབ་ན། བླ་མེད་བྱང་ཆུབ་ཆེན་པོའི་འབྲས་བུ་ནི་ལྟ་ག་ལ་ཐོབ་སྟེ་མི་ཐོབ་བོ། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །ཅེས་གསུངས་པ་ལྟར། སྡིག་པའི་དབང་གིས་ངན་སོང་དུ་སྐྱེས་ནས་སྡུག་བསྔལ་བྱུང་བའི་ཚེ། ཚེ་འདིར་བཙན་ཕྱུག་སྙན་སྒྲགས་སོགས་ཀྱི་བདེ་བ་དེ་ནི་དྲན་པའི་ཡུལ་ཙམ་དུའང་མེད་པས་ཅི་ཞིག་ཕན་ཏེ་མི་ཕན་པ་ནི། དཔེར་ན་སྔར་ཟས་ཟོས་པས་ལྟོ་འགྲང་བ་དེས་ད་ལྟར་བཀྲེས་པ་ལ་མི་ཕན་པ་བཞིན་ནོ། །སློབ་མ་ལ་སྤྲིང་ཡིག་ཏུ། གང་ཞིག་ཐོབ་ན་སྐྱེ་བའི་རྒྱ་མཚོ་མཐར་བྱས་ཤིང་། །བྱང་ཆུབ་མཆོག་གི་ས་བོན་དགེ་བའང་འདེབ་འགྱུར་བ། །ཡིད་བཞིན་ནོར་བུ་བས་ཀྱང་ཡོན་ཏན་ཆེས་ལྷག་པའི། །མི་ཉིད་དེ་ནི་སུ་ཞིག་འབྲས་བུ་མེད་པར་བྱེད། །ཅེས་དང་། ཁྱད་པར་དུ་ཐེག་པ་ཆེན་པོའི་ལམ་གྱིས་མི་ལུས་དོན་ལྡན་དུ་བྱ་དགོས་པ་ནི། དབུ་མའི་སྙིང་པོ་ལས། དམ་ཆོས་སྒྲོན་མ་དང་བཅས་ཤིང་། །མི་ཁོམ་བརྒྱད་སྤངས་དལ་བ་འདི། །སྐྱེས་བུ་ཆེན་པོའི་སྤྱོད་པ་ཡིས། །འབྲས་བུ་ཡོད་པར་བྱ་བའི་རིགས། །ཞེས་སོ། །ལྔ་པ་ནི། དམྱལ་བའི་སོགས།༢ འདི་ན་དམྱལ་བའི་སྡུག་བསྔལ་མཐོང་ཞིང་ཐོས་པས་ཤེས་ཀྱང་མི་འཇིགས་པར་མ་ཟད། མི་རྟག་ཅིང་སྙིང་པོ་མེད་པའི་ལུས་ལ་ཆགས་ནས་དེའི་དོན་དུ་སྲོག་གཅོད་པ་ལ་སོགས་པའི་སྡིག་པ་ཁོ་ན་ལ་སྤྱོད་པ་དག་ནི། གཞན་སུ་ཡང་མ་ཡིན་པར་བྱིས་པས་བླུན་པོ་རང་གིས་རང་བརླག་པ་ཁོ་ནར་ཟད་དེ་ཀྱེ་མའོ། །ཞེས་རུས་པའི་གཏིང་ནས་སྙིང་རེ་རྗེའོ། །དྲན་པ་ཉེར་བཞག་ལས། བྱིས་པ་སྡུག་བསྔལ་གྱིས་དུབ་ཅིང་། །སྡུག་བསྔལ་རྒྱུ་མ་འཇུག་པར་བྱེད། །ཅེས་དང་། སྤྱོད་འཇུག་ལས། སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག །ཅེས་སོ། །དྲུག་པ་ནི། འཁོར་བའི་སོགས།༩ ཁམས་གསུམ་འཁོར་བ་གཅོང་རོང་ཉམ་ང་བ་ལྟ་བུ་སྡུག་བསྔལ་གྱི་གནས་འདི་ནི་རྨོངས་པ་བདག་གིས་བརྟགས་ཀྱང་ཡིད་འབྱུང་བའི་གནས་འདི་ལྟར་གདའ་སྟེ། སྡུག་བསྔལ་གསུམ་དང་བརྒྱད་ཀྱིས་རྟག་ཏུ་གཟིར་བས་ཉམ་རེ་ཐག་པ་ནི། ངན་སོང་གསུམ་གྱི་སྡུག་བསྔལ་ནི་སྐྱི་རེ་གཡའ་སྟེ་ཐོས་པ་ཙམ་ཡང་མི་བཟོད་པ་དང་། ཁྱད་པར་དུ་ཡང་ཚ་གྲང་དམྱལ་ཁམས་བཅོ་བརྒྱད་ཀྱི་སྡུག་བསྔལ་ནི་ཤིན་ཏུ་ཡ་རེ་ཆ་ཞེས་པ་ཡ་ང་བ་དང་། མི་ལ་སྐྱེ་རྒ་ན་འཆི་བཞི་དང་དགྲ་སྡང་བ་དང་འཕྲད་གཉེན་བྱམས་པ་དང་བྲལ་འདོད་པའི་ཐོག་ཏུ་མི་ཁེལ་མི་འདོད་པ་ཐོག་ཏུ་འབབ་པ་དང་བརྒྱད། སྡུག་བསྔལ་གྱི་སྡུག་བསྔལ་དང་འགྱུར་བའི་སྡུག་བསྔལ་དང་ཁྱབ་པ་འདུ་བྱེད་ཀྱི་སྡུག་བསྔལ་དང་བཅུ་གཅིག་གོ། །ངན་སོང་གི་སྡུག་བསྔལ་དེར་འདུའོ། །སྡུག་བསྔལ་དེ་རྣམས་ཀྱང་ཐོག་མཐའ་མེད་པར་འཁོར་བ་ཡུན་རེ་རིང་བས་ཞིབ་ཏུ་བསམ་ན་སྙིང་གིས་བཟོད་པར་དཀའ་འོ། །དྲན་པ་ཉེར་བཞག་ལས། མེལ་ཚེ་བྱེད་ལ་མཚན་ཡང་རིང་། །ངལ་བ་དག་ལ་དཔག་ཚད་རིང་། །དམ་ཆོས་རྣམ་པར་མི་ཤེས་པའི། །བྱིས་པ་རྣམས་ལ་འཁོར་བ་རིང་། །ཞེས་གསུངས་སོ། །དེའི་ཕྱིར་སློབ་དཔོན་བདག་ཀྱང་བདག་རང་ལ་སྙིང་རྗེ་བ་ཡིན་ན། ཁྱེད་ཆོས་མཛད་རྣམས་ཀྱིས་འཁོར་བའི་སྡུག་བསྔལ་དེ་ལ་མ་གཟིགས་སམ། གཟིགས་ན་ཅིའི་ཕྱིར་ཁྱེད་ཅག་སེམས་བདེ་བར་འདུག་སྟེ་སྐད་ཅིག་ཀྱང་བག་མེད་དུ་འདུག་མི་རིགས་སོ། །སློབ་དཔོན་ས་འཚོ་སྦྱིན་གྱིས། སྐྱེ་དང་འཆི་དང་སྡུག་བསྔལ་མཐར་ནི་མ་བྱས་པར། །སྲིད་པའི་རྒྱ་མཚོ་དག་ཏུ་བྱིང་འགྱུར་བག་མེད་མ་བྱེད་ཅིག །མཐར་བྱེད་དག་གིས་སྲོག་ཀྱང་འཕྲོག་པར་བྱེད་པ་གང་འདི་ནི། །རྒྱུན་མི་འཆད་པར་འགྲོ་ལ་སྟྭ་རེའི་སོ་དག་བརྡར་བར་བྱེད། །ཅེས་སོ། །བདུན་པ་ནི། དེ་བས་སོགས།༦ རྒྱུ་མཚན་དེ་བས་ན་བྱིས་པའི་སྐྱེ་བོ་དག་རྣམ་པར་རྟོག་པ་བདག་འཛིན་གྱི་ཁ་མ་འཛིན་ཞེས་དེའི་དབང་དུ་མ་གཏོང་ངམ་བདག་འཛིན་གཙོ་བོ་མ་བྱེད་པར། བུ་དང་ཆུང་མ་གཉེན་བཤེས་ལ་སོགས་པ་དང་ལུས་དང་ལོངས་སྤྱོད་ཀུན་ལ་ད་ལྟ་ནས་ཡིད་མ་ཆགས་ཏེ། འདི་དག་དང་ཡུན་དུ་འགྲོགས་པའི་དབང་མེད་མི་རྟག་པ་མྱུར་དུ་འབྲལ་བའི་སྡུག་བསྔལ་གྱི་རྒྱུ་ཡིན་པར་བསམ་ཞིང་། གཙོ་ཆེར་ཚེ་ཕྱི་མའི་སྡུག་བསྔལ་ལ་འཇིགས་པ་སྐྱེད་ཅིང་བདེ་བའི་ཕུལ་ཞི་བ་མྱ་ངན་ལས་འདས་པའི་བདེ་བ་ལ་འདོད་པ་བསྐྱེད་ལ། སྡིག་པ་མི་དགེ་བ་སྤང་ཞིང་དགེ་བའི་སྤྱོད་པ་ལ་ཚུལ་བཞིན་དུ་ཞུགས་པར་མཛོད་ཅིག །དྲན་པ་ཉེར་བཞག་ལས། གང་ཞིག་དགེ་ལ་ཉེར་བསྟན་པའི། །མི་ནི་ཤིན་ཏུ་བཀྲ་ཤིས་འགྱུར། །གང་ཞིག་སྡིག་ལ་ཉེར་བསྟེན་པ། །དེ་ནི་ཤིན་ཏུ་བཀྲ་མི་ཤིས། །ཐོག་མ་བར་དང་མཐར་ངན་པ། །དམ་པས་དེ་ནི་རྣམ་པར་སྨད། །ཅེས་སོ། །བརྒྱད་པ་ནི། ཆོས་བཞིན་སོགས།༣ ཚེ་བློས་བཏང་བ་འཁོར་བའི་སྡུག་བསྔལ་ལ་འཇིགས་པ་འགྲོ་ལ་བུ་ལྟར་སེམས་པ་སོགས་ཀྱི་ཆོས་ཚུལ་བཞིན་སྒྲུབ་པ་མེད་ན། ཆོས་པའི་མིང་དེ་དོན་ཅི་ཞིག་ཡོད་པ་ལ་བཏགས་ཏེ་ཆོས་པའི་གཟུགས་བརྙན་ཙམ་ལས་དོན་འབྲས་མེད་དོ། །དེ་བཞིན་དུ་ཆོས་འདུལ་བ་ལས་བཤད་པའི་ཚུལ་ཁྲིམས་ཀྱི་སྡོམ་པ་རྣམ་པར་དག་པ་མེད་ན་དགེ་སློང་ཞེས་དོན་ཅི་ཞིག་ལ་ཟེར། དགེ་སློང་ལ་མིང་གི་དགེ་སློང་ཁས་འཆེ་བའི་དགེ་སློང་སློང་བའི་ངང་ཚུལ་ཅན་གྱི་དགེ་སློང་ཞེས་བྱ་བ་ལ་སོགས་པ་ཙམ་ལས་དགེ་སློང་དུ་བྱེད་པའི་དོན་མེད་ལ། སྒོ་གསུམ་སྐུ་གསུང་ཐུགས་ཀྱི་རྡོ་རྗེ་གསུམ་ལས་མི་འདའ་བའི་སྟེང་རྩ་བ་དང་ཡན་ལག་གི་དམ་ཚིག་ཚུལ་བཞིན་བསྲུང་བ་མེད་ན་སྔགས་པ་ཞེས་ཅི་འདྲ་བ་ལ་ཟེར་གདགས་གཞི་མེད་དོ། །བཙུན་པ་ཚུལ་ཁྲིམས་མེད་པའི་སྤྱང་པོ་དང་སྔགས་པ་དམ་ཚིག་མེད་པའི་གླེན་པ་དེ་འདྲས་བསྟན་པ་འཇིག་པར་གསུངས། དགུ་པ་ནི། སྡིག་ནི་སོགས།༤ སྡིག་པ་ནི་ཇི་ལྟར་ཆུང་ཡང་འདིས་ཅི་གནོད་སྙམ་དུ་བརྙས་པར་མི་བྱ་ཞིང་སྤང་ཞིང་བཤགས་དགོས་ཀྱི། དུག་གསུམ་གྱིས་བསྐྱེད་པའི་ལས་ཡིན་ན་སྡིག་པ་ཡིན་དགོས་དེ་ཡིན་ན་རྣམ་སྨིན་མྱོང་དགོས། དཔེར་ན་ཤིག་བསད་པ་ཙམ་ཡང་ཀུན་སློང་ཉོན་མོངས་སྔ་མ་གཉིས་མེད་ཀྱང་གཏི་མུག་གི་ལས་ཡིན་ནོ། །སྦྲུལ་ཆུང་ངུས་ཟིན་ཀྱང་དུག་ལངས་ན་སྦྲུལ་ཆེན་པོས་ལྟ་ཅི་སྨོས་སོ། །དེ་བཞིན་དུ་ཆུ་ཐིགས་ཆུང་ངུས་ཀྱང་རིམ་པར་བསགས་ན་སྣོད་ཆེན་པོ་གང་བ་བཞིན་དུ། དགེ་བ་ཆུང་ཡང་འདིས་ཅི་ཕན་ཞེས་ཁྱད་དུ་མི་གསོད་པར་དང་དུ་བླང་ཞིང་སྤྱད་ན་རྡུལ་ཕྲན་དུ་མ་བསགས་པས་སྣོད་ཀྱི་འཇིག་རྟེན་གྲུབ་པ་བཞིན་དུ་དགེ་བ་ཆེན་པོ་འགྲུབ་པའོ། །འདུལ་བ་ལས། དགེ་བ་ཆུང་ཡང་བརྙས་མི་བྱ། །དེ་ནི་བདག་ལ་མི་ཕན་མིན། །ཆུ་ཡི་ཐིགས་པ་བསགས་པ་ཡིས། །སྣོད་ཆེན་གང་བར་འགྱུར་བ་བཞིན། །དམ་པ་མཆོག་གི་བསོད་ནམས་ནི། །ཉུང་ངུ་ཉུང་ངུ་བསགས་ནས་རྫོགས། །ཞེས་སོ། །བཅུ་པ་ནི། ཐར་བ་སོགས།༤ ཐར་འདོད་རྣམས་ཀྱིས་ཐར་པ་སྒྲུབ་པ་ནི་བདག་རང་ལ་རག་ལས་ཀྱི་འདི་ལ་ནི། གཞན་གྱིས་གྲོགས་བགྱི་བར་བྱས་ནས་འགྲུབ་པ་ནི་ཅི་ཡང་མ་མཆིས་ཏེ། གལ་ཏེ་གཞན་གྱིས་གྲོགས་བགྱིས་ནས་འགྲུབ་པ་ཞིག་མཆིས་ན། ཐུགས་རྗེ་ཆེན་པོ་མངའ་བའི་འཕགས་པ་སངས་རྒྱས་རྣམས་ཀྱིས་འགྲོ་བ་ཀུན་དུས་གཅིག་ལ་སྒྲོལ་བར་རིགས་ཀྱང་དེ་ནི་མ་ཡིན་ནོ། །ཚོམ་ལས། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་། །འགྲོ་བའི་སྡུག་བསྔལ་ཕྱག་གིས་ཡོངས་མི་སེལ། །ཉིད་ཀྱི་རྟོགས་པ་གཞན་ལ་འཕོ་མིན་ཏེ། །སྙིང་རྗེས་བདེན་པའི་བསྟན་པ་འགྲོ་ལ་བཤད། །ཅེས་དང་། ངས་ནི་ཁྱོད་ལ་ཐར་པའི་ཐབས་བསྟན་གྱི། །ཐར་པ་རང་ལ་རག་ལས་ཤེས་པར་གྱིས། །ཞེས་སོ། །བཅུ་གཅིག་པ་ནི། དེ་ཕྱིར་སོགས།༩ ཐར་པ་རང་གིས་སྒྲུབ་དགོས་པ་དེའི་ཕྱིར་བྱང་ཆུབ་སེམས་དཔའི་ལམ་གྱི་རྩ་བ་འགྲོ་བ་མཐའ་ཡས་པ་ལ་དམིགས་ནས་སྙིང་རྗེ་དང་ཕན་སེམས་བསྐྱེད། ལམ་གྱི་དངོས་གཞི་ཀུན་ཉོན་འཁོར་བའི་ཆོས་དང་རྣམ་བྱང་མྱང་འདས་ཀྱི་ཆོས་ལ་གཟུང་བྱ་བདེན་པར་ཞེན་པ་དང་། བདག་གང་ཟག་རྫས་སུ་གྲུབ་པ་དང་བདེན་པར་གྲུབ་པ་ཡོད་པར་འཛིན་གྱི་གཟུང་འཛིན་གྱི་རྣམ་པར་རྟོག་པ་བཞི་ལ་སོགས་པའི་ཀུན་རྟོག་ཐམས་ཅད་ཐར་བའི་དགྲ་གཅིག་པུ་དེ་ཡི་གཉེན་པོ་ཟབ་མོ་སྟོང་པ་ཉིད་སྔར་བཤད་པ་ལྟར་བསྒོམ་པར་བྱ། ཐབས་དང་ཤེས་རབ་དེ་གཉིས་ཀས་ཟིན་པའི་དགེ་རྩ་ཆེ་ཆུང་ཅི་མཛད་ཐམས་ཅད་ཉན་རང་གི་སར་མ་ཡིན་པར་བྱང་ཆུབ་ཆེན་པོ་ཐོབ་པའི་ཕྱིར་དུ་བསྔོ་བ་སྟེ། དེ་ལྟར་དམ་པ་གསུམ་གྱིས་ཟིན་པའི་དགེ་རྩ་སྤྱད་ན་འཕྲལ་དང་ཡུན་དུ་བདེ་བའི་རྒྱུར་འགྱུར་ལ། ཡུན་དུ་བདེ་བའི་རྒྱུ་ཆོས་ཟབ་མོའི་དོན་དེ་ལྟར་མ་རྟོགས་ན་རྒས་ནས་སྐྲ་དཀར་པོ་སྐྱེས་ཤིང་གདོང་ལ་གཉེར་མའི་ཚོགས་འདུས་ཀྱང་། ཆོས་སྒྲུབ་མི་ནུས་པའི་བྱིས་པ་ཤེད་མ་ཕྱེད་པར་ཁྱེའུ་དང་འདྲ་སྟེ་དེ་གཉིས་ཀ་ཆོས་མ་བསྒྲུབ་པ་ནི་འདྲ་ཞིང་ན་ཚོད་ནི་མི་འདྲ་བའི་རྒྱུ་མཚན། གཞོན་པའི་དུས་སུ་ནུས་ཀྱང་མ་བསྒྲུབ་རྒས་པའི་དུས་སུ་མོས་ཀྱང་མི་འགྲུབ་པའི་གནས་སྐབས་དེ་ལྟ་བུར་གྱུར་པས་ན། དོན་དེ་ལ་མཁས་པས་བལྟས་ན་ཁྲེལ་ཞིང་སྙིང་རེ་ཡང་རྗེའོ། །དེ་བས་ན་དམ་པའི་ཆོས་བཀའ་སྡེ་སྣོད་ཀྱི་གཞུང་ལས་བྱུང་བ་བཞིན་དུ་སྤྱད་པར་བྱའོ། །བུ་མོ་བདུན་གྱི་རྟོགས་བརྗོད་ལས། རྨི་ལམ་མིག་འཕྲུལ་ཆུ་ཟླ་ལྟ་བུ་རང་བཞིན་གྱིས། །གཡོ་བར་རྟོགས་ལ་ཇི་སྲིད་སྲོག་འདི་ལྷག་མ་དང་། །བཅས་ཤིང་ལུས་གཞོན་གྱུར་ཚེ་ཆགས་དང་ཉེར་བྲལ་བྱོས། །གཤིན་རྗེ་ཆུ་སྲིན་རྒ་བའི་ཁར་ནི་ཚུད་གྱུར་ཅིང་། །སྐྲ་དཀར་ཚོགས་ཀྱི་གཉེར་མས་སྤྱི་ནས་བཟུང་ནས་ནི། །སྲོག་མཐར་གྱུར་པའི་གནོད་པའི་ཚེར་མས་གནད་ཕིག་པ། །མཆི་མས་མིག་ཁེངས་གྱུར་ཚེ་དགེ་བ་ཇི་ལྟར་བྱ། །ཞེས་སོ། །འདིར་མི་རྟག་པ་དྲན་པ་ཡང་ཡང་གསུངས་པ་ནི། །ཆོས་མི་བསྒྲུབ་པ་ནི་ལེ་ལོའི་དབང་གིས་ཡིན་ལ་སྒྲུབ་པ་ནི་བརྩོན་འགྲུས་ལ་རག་ལས་པས། མི་རྟག་པ་དྲན་པ་ལེ་ལོའི་གཉེན་པོ་དང་བརྩོན་འགྲུས་ཀྱི་རྒྱུ་བྱེད་པ་ཡིན་པའི་ཕྱིར་རོ། །མདོ་ལས། བྲམ་ཟེ་ལ་སྦྱིན་པ་ཆེན་པོ་ཇི་ལྟར་བཏང་བ་བས། ཕྱི་རོལ་པའི་འདོད་པའི་ཆགས་བྲལ་བརྒྱ་ལ་སྦྱིན་པའི་བསོད་ནམས་ཆེས་མང་བར་བཤད་དེ། ཇི་སྐད་དུ། ཞིང་གི་སྐྱོན་ནི་རྩྭ་ཡིན་ལྟར། །སྐྱེ་རྒུ་རྣམས་ལ་འདོད་ཆགས་སྐྱོན། །དེ་བཞིན་ཆགས་པ་བྲལ་རྣམས་ལ། །ཕུལ་ན་བསོད་ནམས་ཆེན་པོ་འབྱུང་། །ཞེས་པས་སོ། །དེ་བས་ནི་རྒྱུན་ཞུགས་པ་དང་དེ་བས་འབྲས་གནས་སོགས་ནས་བསྒྲེས་ཏེ་དགྲ་བཅོམ་པ་ལ་ཕུལ་ན་བསོད་ནམས་ཆེས་མང་བ་དང་། དེ་བས་གཙུག་ལག་ཁང་སོགས་བྱེད་པ་དང་། དེ་བས་སྐྱབས་སུ་འགྲོ་བ་སོགས་དང་དེ་བས་མི་རྟག་པ་སྒོམ་པ་ཆེས་བསོད་ནམས་མང་བར་གསུངས་ན། དེ་བས་སྟོང་པ་ཉིད་དང་སྙིང་རྗེ་དང་བྱང་ཆུབ་ཀྱི་སེམས་སྒོམ་པ་ལྟ་ཅི་སྨོས། ཨཱརྱ་དེ་བས། སྦྱིན་པ་དམན་པ་ལ་གསུངས་ཤིང་། །འབྲིང་ལ་ཚུལ་ཁྲིམས་གསུངས་པ་སྟེ། །མཆོག་ལ་ཞི་བ་གསུངས་གྱུར་པ། །དེས་ན་རྟག་ཏུ་མཆོག་གོམས་བྱ། །ཞེས་གསུངས་པ་ལྟར་བྱའོ། །འདུལ་བ་ལས། ཆུ་སྙིང་མྱུར་པོས་སྡོང་པོ་ཁྱེར་བའི་དཔེས་ལམ་ལ་གེགས་མེད་པར་བསླབ་ན་རིམ་པར་རྣམ་མཁྱེན་གྱི་རྒྱ་མཚོར་འགྲོ་བ་ནི། བསྟན་པ་དམ་པའི་ཆོས་ཀྱི་ཆུ་བོ་ལ་ཞུགས་ཏེ། མི་རྟག་པ་དང་བརྩོན་འགྲུས་ཀྱི་རླུང་དང་བྱམས་སྙིང་རྗེ་བྱང་ཆུབ་ཀྱི་རླན་དང་བཅས་པ་བསྟན་པའི་ཆུ་སྙིང་འདུལ་ཁྲིམས་ལ་བརྟེན་ནས། སྡོང་པོ་དེ་སྐམ་ལ་མི་གནས་པ་ལྟར་མངོན་མཐོ་ལ་མི་སྨོན། ཆུ་གཏིང་དུ་མི་ལྷུང་བ་ལྟར་ངན་སོང་དུ་མི་འགྲོ། མིས་མ་བཟུང་བ་ལྟར་མི་དང་མི་འདྲེ། མི་མ་ཡིན་པས་མ་བཟུང་བ་ལྟར་ལྷ་དང་མི་འདྲེ། ཚུ་རོལ་དུ་མི་ལྟུང་བ་ལྟར་ནང་དབང་པོ་བསྡམས་ཤིང་ཕུང་པོ་ལ་མི་ཆགས། ཕ་རོལ་དུ་མི་ལྷུང་བ་ལྟར་ཕྱི་ཚོགས་དྲུག་ལ་མི་ཆགས། སྡོང་པོ་ནང་མི་འདྲུལ་བ་ལྟར་ཚུལ་ཁྲིམས་མི་ཉམས་པ་སྟེ། ཐར་པ་བསྒྲུབ་པར་བྱ་བ་ནི་དེ་ལྟ་བུ་དགོས་པར་གསུངས་སོ། །གཉིས་པ་ཆོས་ཉན་བཤད་བྱེད་པ་ལ་གདམས་པ་དགུ། ཐོས་པ་དགོས་ཀྱང་ཚིག་རྗེས་མི་འབྲང་བ་དང་། སྒྲུབ་པ་གཙོ་བོར་བསྟན་པ་དང་། སྟོང་ཉིད་བསྒོམ་ན་འབྲས་བུ་ཐོབ་པ་དང་། ཐོས་པ་གཉེན་པོར་མ་སོང་ཉོན་མོངས་པའི་གྲོགས་སུ་སོང་བ་དང་། དོན་ལ་དཔྱད་ན་སྙིང་པོ་མཐོང་བའི་དཔེ་དང་། རང་བློས་གང་ལྕོགས་སྒྲུབ་པ་དང་། ཐབས་ཤེས་མི་ལྡན་ཐེག་ཆེན་རློམ་པའི་དཔེ། ཐེག་ཆེན་མ་མོས་ཀྱང་སྐུར་འདེབས་སྤངས་ནས་གང་མོས་ལྟར་བྱེད་པ་དང་། གསང་སྔགས་ཁེ་ཉེན་ཆེ་བར་བསྟན་པའོ། །དང་པོ་ནི། སླད་མའི་སོགས།༥ སླད་མའི་དུས་ཆོས་ཉན་བཤད་མཛད་པ་རྣམས་ལ་ཞུ་བ་ནི་འདི་ལྟར། དམ་པའི་ཆོས་ཀྱི་གཞུང་ལས་ནི་བདག་ཅག་གི་སྐྱོན་ཡོན་ཐམས་ཅད་བཤད་པས་ཆོས་ཀྱིས་བདག་བཤད་ན། བདག་ཅག་གིས་ཆོས་མ་བཤད་པས་སྐྱོན་ཡོན་བླང་དོར་སོགས་ཅི་ཡང་མི་མཐོང་བའི་ཕྱིར། ད་ནི་བསྒྲུབ་བྱའི་དོན་རྟོགས་པར་བྱ་བའི་ཕྱིར་དང་པོ་ལུང་གི་ཆོས་མཉན་ཡང་དགོས་པས་སྐྱེས་བུ་དམ་པའི་ཞལ་ནས་གསུང་རབ་ཟབ་མོ་ཚུལ་བཞིན་དུ་ཐོས་པར་བྱའོ། །ཕར་ཕྱིན་བསྡུས་པ་ལས། ཐོས་མེད་དམུས་ལོང་བསྒོམ་པའི་ཚུལ་མི་ཤེས། །དེ་མེད་དེས་ཀོ་ཅི་ཞིག་བསམ་པར་བྱ། །དེ་བས་ཐོས་ལ་བརྩོན་བྱ་དེའི་རྒྱུ་ལས། །བསམ་ཞིང་བསྒོམས་པས་ཤེས་རབ་ཡངས་པ་འབྱུང་། །ཞེས་དང་། བྱང་ཆུབ་མཆོག་ཏུ་སེམས་བསྐྱེད་ནས་ཐོས་པ་མང་པོ་ལ་མངོན་པར་མི་བརྩོན་པ་ནི་བདུད་སྡིག་ཅན་གྱི་བྱིན་གྱིས་བརླབས་པ་ཉིད་ཡིན་ནོ་ཞེས་བྱང་སེམས་སོ་ཐར་ལས་གསུངས། ལྷག་བསམ་བསྐུལ་བ་ལས། བྱང་སེམས་གང་དག་སྦྱོར་བ་མེད་ཅིང་བསམ་གཏན་མེད་ལ་སྤོང་བ་མེད་ཅིང་། འདོན་པ་མེད་པ་དང་མང་དུ་ཐོས་པ་མེད་པ་དེ་དག་ནི་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་མ་ཡིན་ནོ། །ཞེས་སོ། །ཆོས་འཆད་པའི་སྣོད་ཀྱང་བཞི་བརྒྱ་པར། གཟུར་གནས་བློ་ལྡན་དོན་གཉེར་བ། །ཉན་པོ་སྣོད་ཅེས་བྱ་བར་བརྗོད། །ཅེས་དང་། སྐྱེ་བོ་གང་གང་ལ་དགའ་བ། །དེ་ནི་དེ་ཡིས་སྔར་བཤད་བྱ། །ཉམས་པར་གྱུར་པ་དམ་ཆོས་ཀྱི། །སྣོད་ནི་ཅིས་ཀྱང་མ་ཡིན་ནོ། །ཞེས་སོ། །ཆོས་འཆད་པ་པོས་ཀྱང་ཚུལ་བཞིན་དུ་བཤད་དགོས་ཚུལ་མང་ཡང་། དཀོན་བརྩེགས་ལས། དག་ཅིང་ཟང་ཟིང་མེད་པའི་སེམས་ཀྱིས་སུ། །ཆོས་ཀྱི་སྦྱིན་བྱེད་རྒྱལ་བས་རབ་ཏུ་བསྔགས། །ཞེས་སོ། །ཕན་ཡོན་མཐའ་ཡས་ཀྱང་དབང་ལུང་ལ་ཐོས་བསམ་བྱས་པས་མིག་ལྡན་གྱི་གཟུགས་མཐོང་བ་ལྟར་སྤང་བླང་ལ་མི་རྨོངས་ཤིང་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་གསུམ་གྱིས་རྣམ་པར་གྲོལ་བ་ཐོབ་བོ། །མདོ་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་འགྱུར། །ཐོས་པས་དོན་མ་ཡིན་པ་སྤོང་། །ཐོས་པས་རྣམ་པར་གྲོལ་བ་ཐོབ། །ཅེས་སོ། །དེས་ན་དང་པོ་ཆོས་འཆད་ཉན་ཉམས་སུ་མྱོང་བ་ཅི་རིགས་པས་དོན་ལ་ངེས་པ་རྙེད་ནས། ཚིག་མང་པོ་ལ་བསླབ་མི་དགོས་ཏེ་ཚིག་གི་ཚོགས་ནི་མི་ཟད་པའི་ཕྱིར་ཉན་པ་ཁོ་ནས་ཤེས་བྱ་མཐར་ཕྱིན་པ་མེད་པས་ཐོས་པ་ལ་འབད་པ་ཙམ་གྱིས་ཚེ་འདའ་བར་འགྱུར་རོ། །གཉིས་པ་ནི། ཆོས་ཀྱང་སོགས།༦ ཆོས་ཀྱི་བརྡ་དང་ཐ་སྙད་མང་པོ་ཤེས་པ་དེས་ཀྱང་མི་ཆོག་པར་དོན་ཉམས་སུ་བླངས་ནས་སྒྲུབ་པ་གཅེས་ཏེ། དཔེར་ན་གཞན་ལས་ཐོས་པས་ལམ་གྱི་རྒྱུས་ཤེས་ཀྱང་དེར་ཆེད་དུ་མི་འགྲོ་ན་དེ་ཤེས་པས་ཅི་ཕན་ཏེ་དོན་ཐོག་ཏུ་མི་སླེབ་པའི་དེ་བཞིན་ནོ། །མཉན་བཤད་དགོས་པ་ནི་དོན་སྒྲུབ་པའི་ཐབས་བཙལ་བའི་ཕྱིར་ཡིན་ལ། དོན་མི་བསྒྲུབ་ན་ཉན་བཤད་ཙམ་ནི་སྒྲུབ་པ་ལ་ལྟོས་ན་དོན་ཆུང་ངུ་ལ་ཚིག་རེ་ཆད་དེ་ངལ་བ་ཙམ་མོ། །དཔེར་ན་བྲོ་མཁན་དང་སྒྲུང་མཁན་དག་གིས་བྲོ་སྒྲུང་འཆད་པ་བཞིན་དུ་ཐོས་པ་ཁོ་ན་ལྷུར་ལེན་པ་དེ་ནི་མི་ནག་ཆོས་ཀྱི་ལོ་རྒྱུས་མཁན་དང་འདྲ་བར་འགྱུར་རོ། །སྤྱིར་ཐོས་པའི་ཕན་ཡོན་བསམ་གྱིས་མི་ཁྱབ་པ་དང་ལུང་གི་བསྟན་པའི་གསོས་སུ་ཆེ་ཡང་། དེ་ཙམ་ལས་དོན་ཉམས་སུ་ལེན་པ་མེད་ན་སྒྲུབ་པའི་བསྟན་པ་ཉམས་པར་འགྱུར་བ་ལ་དགོངས་པ་སྟེ། བཅོམ་ལྡན་འདས་ཀྱིས་ཀྱང་བསྟན་པའི་ཕྱོགས་གང་ཉམས་ན་དེ་ཉིད་མཆོག་ཏུ་བསྔགས་ཏེ་ཅིག་ཤོས་སྨད་པར་མཛད་དོ། །དཔེར་ན་སྦྱིན་པ་གཙིགས་སུ་བཟུང་ནས་ཚུལ་ཁྲིམས་གལ་ཆུང་བྱེད་པ་ལ་ཚུལ་ཁྲིམས་མཆོག་ཏུ་བསྔགས་ཏེ་ཅིག་ཤོས་སྨད་པར་མཛད་པ་ལྟ་བུའོ། །ཀུན་རྫོབ་ཚིག་གི་དོན་མང་པོ་ལ་ངལ་བ་ཁོ་ནས་ཉོན་མོངས་པ་སྤོང་མི་ནུས་ཏེ། ཟླ་བའི་སྙིང་པོའི་མདོ་ལས། དཔེར་ན་མེ་སྟག་གང་གིས་ཀྱང་ཀྱང་། །རྒྱ་མཚོ་ཆེན་པོ་སྐེམ་མི་ནུས། །དེ་བཞིན་ཀུན་རྫོབ་བདེན་པས་ཀྱང་། །རང་གི་ཉོན་མོངས་སྐེམ་མི་ནུས། །སེམས་ཅན་གཞན་ལྟ་སྨོས་ཅི་དགོས། །ཞེས་སོ། །གསུམ་པ་ནི། སྒྲུབ་ཐབས་སོགས།༥ སྒྲུབ་ཐབས་ཐམས་ཅད་ཀྱི་སྙིང་པོ་མཆོག་ནི་སྟོང་པ་ཉིད་སྒོམ་པ་ཡིན་ལ། སྟོང་པ་ཉིད་བསྒོམས་པས་གོ་འཕང་མཆོག་ཐོབ་པར་མཐོང་ན། ཐོས་པ་མང་པོའི་ཚིག་ལ་མཁས་པ་ནི་ནེ་ཙོ་མི་སྐད་ཤེས་པས་གཞན་གྱི་ངག་རྗེས་ཟློས་མཁས་པ་དང་འདྲའོ། །ཐོས་པ་ཉུང་ངུ་ལ་བསྟེན་ནས་བསྒྲུབས་པས་ན་འཕགས་པ་ལམ་ཕྲན་བརྟན་ལྟ་བུ་ཡིན་པས་འབྲས་བུ་བདེ་བླག་ཏུ་ཐོབ་བོ། །འདིའི་སྔོན་བྱུང་ནི་གནས་བརྟེན་ལམ་ཆུང་བ་དེས་དང་པོ་བྲམ་ཟེའི་ཆོས་ཀློག་པ་ལ་སིད་རྗོད་ཚེ་དྷཾ་བརྗོད། ༀ་བྷཱུ་རྗོད་ཚེའང་དེ་བཞིན་དུ་གྱུར་པས་དེ་དག་གིས་བསྐྲད་དོ། །ཕྱིས་ལམ་ཆེན་པས་རབ་ཏུ་བྱུང་ལ། ལུས་ངག་ཡིད་ཀྱིས་སྡིག་པ་མི་བྱ་ཞིང་། །འཇིག་རྟེན་ཀུན་ལ་ཡོངས་འཛིན་འདོད་བྲལ་བ། །དྲན་དང་ལྡན་ཞིང་ཤེས་བཞིན་ཅན་གྱིས་ནི། །གནོད་ལྡན་སྡུག་བསྒྲལ་གང་ཡིན་བསྟེན་མི་བྱ། །ཞེས་གསུངས་པ་དེ་ཟླ་བ་གསུམ་དུ་མ་ལོབ་པར་རྫིའུ་ལ་སོགས་པས་ཀྱང་ཤེས་ནས་དེ་དག་གིས་དེ་ལ་བསྟན་ཏོ། །ཕྱིས་སྟོན་པས་དེ་ལ་དགེ་འདུན་གྱི་མཆིལ་ལྷྭམ་ཕྱི་བ་དང་ཕྱག་དར་བྱེད་བཅུག་པ་མཛད་པས་སྒྲིབ་པ་སྦྱངས་ནས་དགྲ་བཅོམ་ཐོབ། དེའི་ཚེ་དགེ་སློང་མ་རྣམས་ཀྱི་སྟོན་པར་བསྐོ་བ་རིས་སུ་བབས་པ་ན་འཕགས་པ་ལམ་ཆུང་བ་བྱོན་ཏེ། སྔར་གྱི་ཚིགས་བཅད་དེ་ཞག་བདུན་གྱི་བར་དུ་ཚིག་དང་ཡི་གེ་གཞན་གྱིས་ཕྱེས་ནས་བསྟན་པས། ཚིགས་བཅད་ཕྱེད་ཀྱི་དོན་ཁྲོལ་བ་དང་འཁོར་ཁྲི་ཉིས་སྟོང་གིས་བདེན་པ་མཐོང་ཞིང་། འབྲས་བུ་བཞི་ལ་བཀོད་དེ་སོ་སོའི་བྱང་ཆུབ་ཏུ་སེམས་བསྐྱེད་དོ། །སྟོན་པས་དེ་གདམས་ངག་ཕྲན་བུས་འབྲས་བུ་ཆེན་པོ་ལ་བཞག་པའང་སྔོན་སྟོན་པ་ཉིད་ཚོང་དཔོན་གྱི་སྐྱེ་བ་བཞེས་ཚེ། ལམ་པ་དེ་ཚོང་བའི་བུ་དབུལ་པོར་གྱུར་པ་ལ་བྱི་བའི་རོའི་ཐབས་བསྟན་པས་དེས་ཕྱི་རོལ་དེར་ཚོང་པ་ཞིག་གི་བྱི་ལ་བཏགས་པ་ལ་བྱིན་པ་དེས་སྲན་མ་སྤར་གང་ཁུག །དེ་ཤིང་ཐུ་བ་རྣམས་ངལ་བསོ་བཅུག་ནས་བྱིན་དེ་དག་གིས་དེ་ལ་ཤིང་ཤར་རེ་བྱིན་པས་ཁུར་དུ་ལོངས་པ་བཙོང་བའི་མཐར་དབྱིག་ཚོང་བ འི་སོང་ཚེ་དེད་དཔོན་བྱི་དབྱིག་པའོ། །སྔོན་རྒྱལ་བ་འོད་སྲུང་གི་དུས་དགེ་སློང་སྡེ་སྣོད་གསུམ་པར་གྱུར་པ་ན་ཆོས་ལ་སེར་སྣ་བྱས་ཏེ་ཚིག་གཅིག་ཀྱང་མ་བསྟན་པས་རྟུལ་པོར་གྱུར། ཡང་ཕག་ཚོང་བར་གྱུར་ཚེ་ཕག་མང་པོ་བསྲེག་ནས་གྲུར་བཅུག་དེ་སྐལ་བས་གྲུ་རྡིབ་ནས་ཆུས་ཁྱེར། ཆུའི་ཕར་འགྲམ་ན་རང་སངས་རྒྱས་ཤིག་བཞུགས་པས་བླངས་ནས་བྱེ་མ་ལ་སྦུབ་སྟེ་བཞག །ཡར་སོས་ཚེ་བལྟས་པའི་མི་རྗེས་རིག་ནས་སོང་པས་རང་སངས་རྒྱས་དེ་མཇལ། དེ་ལ་ལོ་མ་དང་སོ་ཤིང་འབྲས་བུ་སོགས་ཕུལ། དེས་ལྷུང་བཟེད་ཀྱི་ལྷག་མ་བྱིན། དེ་བསམ་གཏན་བྱེད་པ་ལ་བལྟས་ཏེ་ཁོ་རང་ཡང་མཐའ་གཅིག་ཏུ་སོང་ནས། མཉམ་བཞག་བྱས་པས་ཆོས་ཉིད་ཀྱིས་འདུ་ཤེས་མེད་པའི་སྙོམས་འཇུག་གྲུབ་ནས་དེར་བསྐལ་པ་གྲངས་མེད་དུ་སྐྱེས་པ་དེ་དང་། ཆོས་ལ་སེར་སྣ་བྱས་པ་དང་ཕག་བཙོང་བའི་སྒྲིབ་པས་ཤེས་པ་བུལ་བའོ། །དེ་སྔོན་ཐོས་པའི་རྒྱུའི་སྟོབས་ཅན་དང་འཕྲལ་རྐྱེན་སངས་རྒྱས་ཀྱི་མཐུ་ཡིན་ཡང་། དེ་འདྲ་མིན་པར་དབང་པོ་རྣོན་པོ་ཡོངས་འཛིན་དམ་པའི་གདམས་ངག་གིས་སྒྲུབ་པ་ལ་བརྩོན་ན་ཐོས་པ་ཆུང་ཡང་འབྲས་བུ་ཐོབ་པ་སྲིད་དོ། འདུལ་བ་ལས། གདམས་ངག་མེད་པར་བསམ་གཏན་བྱེད་ན་འགལ་ཚབ་ཅན་དུ་འགྱུར་རོ། །ཞེས་གསུངས་པ་ཡང་ལམ་པའི་སྔོན་བྱུང་ལྟ་བུའོ། །ཐོས་དོན་མ་བསྒྲུབ་ན་གསུང་རབ་རྒྱ་མཚོ་ལྟ་བུ་ཐུགས་སུ་ཆུད་པ་འཕགས་པ་ཀུན་དགའ་བོས་ཀྱང་རེ་ཞིག་འབྲས་བུ་མ་ཐོབ་པ་བཞིན་ནོ། །འདི་ཡང་སྟོན་པའི་ཉེ་གནས་ཞབས་འབྲིང་བ་ཡིན་པས་བསྒྲུབ་ལོང་མེད་པ་ལ་ཕྱིས་བཀའ་བསྡུ་བའི་ཚེ་འོད་སྲུངས་ཆེན་པོའི་བཀས་སྤྱོ་བས་བྲེ་ཛའི་ཡུལ་དུ་བྱོན། བྲི་ཛའི་བུ་རྣམས་རབ་ཏུ་བྱུང་བ་དགྲ་བཅོམ་ཐོབ་པས་སློབ་དཔོན་ཉིད་སློབ་པ་ལམ་ཞུགས་ཡིན་པར་ཤེས་ནས་བསྐུལ་ཏེ་དགྲ་བཅོམ་ཐོབ་པར་མཛད་དོ། །འདིའང་དཔེར་འོས་ཏེ་མ་བསྒྲུབ་ན་འཕགས་པ་ཀུན་དགའ་བོ་ལྟ་བུས་ཀྱང་འབྲས་བུ་མི་ཐོབ་པའི་ཕྱིར་རོ། །བཞི་པ་ནི། ཤེས་ཙམ་སོགས།༡༥ གཞན་ཡང་ཤེས་བྱ་ཅི་ཙམ་ཤེས་ཀྱང་རང་རྒྱུད་ལ་ཕན་པ་མེད་ན་སྒྲུབ་པའི་བར་ཆད་དུ་འགྱུར་བ་གསུང་རབ་ཀྱི་གཞུང་ལས་འདི་སྐད་འབྱུང་སྟེ། གལ་ཏེ་མང་དུ་ཐོས་པ་དེས་རྒྱགས་ཤིང་ཞེས་ངར་འཛིན་ལ་བསྟེན་ནས་ཐོས་པ་མང་པོའི་ཡོན་ཏན་དེས་རང་གི་སེམས་ཁེངས་པ་དང་། ཐོས་པས་རྒྱགས་ཤིང་སྟེ་རྒྱགས་པར་མ་ཟད་ང་རྒྱལ་ཏེ་གཞན་བརྙས་ཤིང་ཚར་གཅོད་ཅིང་ཐོས་པས་ཉེས་ལྟུང་འདག་གོ་སྙམ་ནས་ཚུལ་ཁྲིམས་མི་བསྲུང་ན། དགེ་སྦྱོང་གི་ཆོས་དང་མི་ལྡན་པ་སོགས་ཀྱིས་ཚུལ་ཁྲིམས་འཆལ་བའི་དབང་གིས་ངན་འགྲོ་དེར་འགྲོ་སྟེ། དེའི་ཚེ་ཐོས་པ་མང་པོས་དེ་ལ་སྐྱོབ་པར་བྱེད་མི་ནུས་ཏེ། ཆོས་ལ་བསྟེན་པའི་ང་རྒྱལ་དང་ཁྲོ་བའི་ལས་ཚན་ཆེ་བས་སོ། །རྩ་ཚིག་མདོ་ལྟར་ལ། ལྷག་བསམ་བསྐུལ་བ་ལས། ཐོས་པས་རྒྱགས་ནས་གུས་པར་མི་འགྱུར་ཏེ། །རྣམ་པར་འགྱེད་པའི་སྨྲ་བ་རྣམས་ལ་ཆགས། །བརྗེད་པར་འགྱུར་ཞིང་ཤེས་བཞིན་མེད་པར་འགྱུར། །སྨྲ་ལ་དགའ་བའི་ཉེས་པ་འདི་དག་གོ། །ཞེས་དང་། ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། ཆོས་ཀྱི་རང་བཞིན་ཡོངས་སུ་མི་ཤེས་ན། །ཚིག་གི་དམ་པས་བྱང་ཆུབ་འཚང་མི་རྒྱ། །ཞེས་སོ། །དེས་ན་དཀོན་བརྩེགས་ལས། ཚུལ་ཁྲིམས་ལྡན་དང་མང་དུ་ཐོས་གྱིས་ལ། །དམ་པའི་དོན་གྱི་མུ་གཅིག་ཤེས་པར་མཛོད། །ཅེས་གསུངས་ལ་ལྟར་བྱའོ། །གཞན་ཡང་ཆོས་ཤེས་པས་ང་རྒྱལ་དང་དྲེགས་པའི་དབང་གིས་དམྱལ་བར་སྐྱེས་ནས་ཕྲ་མེན་བྱ་དང་དྲེགས་པ་བརྒྱད་དུ་སྐྱེ་སྟེ། གང་ཞེ་ན་ཨ་བ་གླང་མགོ། ཡཀྴ་ཕག་མགོ། གདུག་པ་སྦྲུལ་མགོ། གཏུམ་པ་དོམ་མགོ། རུས་རིགས་དམིགས་བུའི་མགོ། གཟུགས་ངན་སྦལ་བའི་མགོ། འཕྱར་བྱེད་བྱའི་མགོ། འཁྲེན་བྱེད་ཁྱིའི་མགོ་ཅན་ཏེ་བརྒྱད་དོ། །དེ་དག་རང་རང་གི་ངོ་བོའི་སྒོ་ནས་མིང་བཏགས་པ་ལ་རུས་རིགས་ཅེས་པ་སྲོག་ཆགས་ཀྱི་རིགས་ལས་རུས་རིགས་དམིགས་བུ་ཡིན་པའམ་ཡང་ན་སྨིག་བུ་ཞེས་པའང་ཡོད་ཅིང་མིང་གཞན་བྱེ་མའི་མྱུ་གུ་དང་བྱེ་ཁྱུག་ཀྱང་ཟེར། ཆུ་ཆེན་གྱི་འགྲམ་བྱེ་མའི་ནང་གནས་བཅས་ནས་འདུག་པས་སྦལ་ཆུང་མཇུག་མ་རིང་པོ་མྱུར་མགྱོགས་ཅན་ཞིག་ཡོད་པར་བཤད། མདོ་ལས། མང་དུ་ཐོས་པའི་གང་ཟག་ནི་རིའམ་རྒྱ་མཚོ་ལྟར་ང་རྒྱལ་ཆེའོ། །དེ་ལྟར་ང་རྒྱལ་ཆེ་བ་ནི་ངན་སོང་དུ་བསྐལ་པ་གྲངས་མེད་པར་སྡུག་བསྔལ་མྱོང་བར་འགྱུར་རོ། །དེ་ལས་ཐར་ན་ཡང་འདབ་ཆགས་བྱ་ཞིག་ཏུ་སྐྱེ་བར་འགྱུར་བ་ལ་སོགས་པ་མང་དུ་གསུངས། བདག་ཅག་སྟོན་པ་འདི་ཉིད་སྔོན་བསྐལ་པ་དཔག་མེད་ཀྱི་དུས་སུ་དགེ་སློང་ཆོས་ཞེས་བྱ་བ་མཁས་པ་ང་རྒྱལ་ཅན་དུ་གྱུར་ཚེ། དགེ་སློང་ཡོན་ཏན་ཅན་ཞིག་ལ་འདིས་ཆོས་མི་ཤེས་ཀྱི་ཞེས་སོགས་ཀྱིས་སྐུར་བ་བཏབ་པས་བསྐལ་པ་དུ་མར་ལྕེ་ལ་ཞིང་རྨོ་བའི་དམྱལ་བར་སྐྱེས། ཚེ་རབས་དུ་མར་དུད་འགྲོ་ལྕེ་མེད་པ་སོགས་དང་། མི་ལྕེ་མེད་པ་ལྐུགས་པ་སོགས་སུ་སྐྱེས་བྱང་ཆུབ་ཀྱི་སེམས་བརྗེད། སངས་རྒྱས་པའི་ཚེ་བདུད་ཀྱི་བར་ཆད་དང་རྩྭ་མིས་སྐུར་བ་འདེབས་པའང་དེའི་ལྷག་མ་ཡིན་གསུངས། དེ་བཞིན་དུ་སྔོན་ཝཱ་རཱ་ཎ་སཱིར་ནགས་སུ་མ་ཧེ་ལྔ་བརྒྱའི་ཁྱུ་དཔོན་གཏུམ་པོ་མ་རུང་བ་ཞིག །སྟོན་པའི་ཐོག་ཏུ་རྔ་མ་གདེངས་ཏེ་བརྒྱུག་པ་སྟོན་པས་བཏུལ་ནས་ལྷར་སྐྱེས། དེ་ཡང་སྔོན་སངས་རྒྱས་འོད་སྲུང་དུས་སུ་དགེ་སློང་སྡེ་སྣོད་འཛིན་པ་མཁས་པས་སྙེམས་ཏེ་རྩོད་པས་གཞན་ཚར་བཅད་དེ་ནགས་ཀྱི་མ་ཧེ་འདྲ་བ་ཁྱེད་ཅི་ཤེས་ཞེས་སྨྲས་པ་དང་། ལྔ་བརྒྱ་པོ་ཡང་དེ་དུས་དེའི་འཁོར་ལྔ་བརྒྱའོ། །ཐོས་པས་རྒྱགས་ནས་ཚུལ་ཁྲིམས་ཉམས་ན་དེ་ལྟ་བུ་དང་། ཐོས་པ་ཤེས་པས་འཇིག་རྟེན་པའི་ཡང་དག་པའི་ལྟ་བ་དང་ལྡན་པ་ཡང་ཀླུའི་འཁོར་དུ་སྐྱེ་བ་ཀླུའི་རྒྱལ་པོ་རྒྱ་མཚོས་ཞུས་པ་ལས་གསུངས། བྱང་ཆུབ་ཀྱི་སེམས་བརྗེད་པ་ལའང་ང་རྒྱལ་དང་རྒྱགས་པ་འདི་ངན་ཏེ། སྔོན་སངས་རྒྱས་འཁོར་བ་འཇིག་གི་དུས་སུ་བྲམ་ཟེ་ནོར་བཟང་ཞེས་བྱང་ཆུབ་སེམས་དཔའ་མཁས་པ་ང་རྒྱལ་གྱིས་རྩོད་པ་ལ་དགའ་བ་ཞིག་བྱང་ཆུབ་ཀྱི་སེམས་ཚེ་རབས་མང་པོར་བརྗེད་ཀྱང་སྔོན་བྱང་ཆུབ་ཀྱི་སེམས་བསྐྱེད་པས་ནམ་ཡང་ངན་སོང་དུ་མ་སྐྱེས་གསུངས། གཞན་ཡང་ཆོས་ཤེས་ནས་མ་བསྒྲུབ་ན་ཐེག་པ་ཆེན་པོའི་མདོ་རྣམས་ལས་འདི་ལྟར་གསུངས་ཏེ། སྡོང་བཀོད་ལས། ཡང་དག་སངས་རྒྱས་བསྟན་པ་འདི། །ཐོས་པ་ཙམ་གྱིས་མི་འགྲུབ་བོ། །དཔེར་ན་ལ་ལ་ཆུ་ཀླུང་གིས།་།སྟོབས་མེད་ནན་གྱིས་ཁྱེར་བ་དག །སྐོམ་ནས་ཤི་བར་གྱུར་པ་བཞིན། །མ་བསྒོམ་ཆོས་ཀྱང་དེ་དང་འདྲ། །ཇི་ལྟར་མཉེན་པ་མཁས་པ་ཞིག །སྐྱེ་བོ་མང་པོ་སྒྲོལ་བྱེད་ཀྱང་། །རང་ཉིད་དེ་ན་འཆི་བ་ལྟར། །མ་བསྒོམ་ཆོས་ཀྱང་དེ་དང་འདྲ། །ཇི་ལྟར་འོན་པ་རོལ་མོ་མཁན། །གཞན་དག་དེ་ཡིས་དགའ་བྱེད་ཀྱང་། །རང་ཉིད་ཀྱིས་ནི་མི་ཐོས་ལྟར། །མ་བསྒོམ་ཆོས་ཀྱང་དེ་དང་འདྲ། །ཞེས་སོ། །དེ་བཞིན་དུ་སྐྱེ་བོ་སྐོམ་གྱིས་གདུང་བས་ཆུ་མཐོང་བ་དང་ཐོས་པས་སྐོམ་མི་སེལ་བ་ལྟར། ཆོས་ཉམས་སུ་མ་བླངས་ན་ཐོས་པ་ཙམ་གྱིས་ལས་ཉོན་གྱིས་གདུང་བ་མི་སེལ་བར་གསུངས། གཙུག་ཏོར་ཆེན་པོའི་མདོ་ལས། མཐའ་ཡས་འཛིན་པར་ཡིད་གཞུངས་ཀྱང་། །ལྡོག་པར་བསམ་པས་མཐའ་མར་ལྷུང་། །རྗེས་སུ་འཁོར་བ་མ་ཡིན་ནམ། །ཞེས་སོ། །སྐྱེ་བོ་གང་ཞིག་གཞན་ལ་སྦྱིན་པ་ཆེན་པོ་བཏང་ནས་བདག་ཉིད་ལྟོག་གྲིར་ཤི་བ་ལྟར་གཞན་ལ་ཆོས་ཀྱི་སྦྱིན་པ་རྒྱ་ཆེན་པོ་བཏང་ནས་རང་ཉིད་ཐ་མལ་དུ་འཆི་བ་དང་། མི་བཀྲེས་པས་ཉེན་པ་ཞིག་གཞན་གྱི་ཁ་ཟས་གཡོས་མཁན་དུ་གྱུར་ཀྱང་རང་ལ་མི་ཕན་པ་ལྟར། གཞན་ལ་གདམས་ངག་གིས་བླང་དོར་ལེགས་པར་བསྟན་ནས་ཚིམ་པར་བྱས་ཏེ་རང་རྒྱུད་ཕོངས་ཤིང་དབུལ་བ་དང་། ནད་པ་རྣམས་ཀྱིས་སྨན་གཏོང་མི་ནུས་ཤིང་མི་ཤེས་པས་ཕན་ཚུན་སློབ་པ་བཞིན། རང་ཉིད་ཆོས་ཀྱི་སྨན་མ་བཏུང་བས་ལས་ཉོན་གྱི་ནད་ལས་མ་གྲོལ་བཞིན། འགྲོ་བ་ལས་ཉོན་གྱི་ནད་པ་གཞན་ལས་དམ་པའི་ཆོས་ཀྱི་སྨན་བསྟན་པས་གྲོལ་ཐབས་བཤད་པ་སྟེ། མཛེ་ནད་ཅན་གྱིས་མཛེ་ནད་ཅན་ལ་བྱ་ཁྱུང་གི་རིག་སྔགས་སྟོན་པའི་དཔེ་ལྟར་རོ། །ཏིང་འཛིན་རྒྱལ་པོ་ལས། ང་ཡིས་རབ་ཏུ་བཟང་བའི་ཆོས་བཤད་ལ། །ཁྱོད་ཀྱིས་ཐོས་ནས་ཚུལ་བཞིན་མ་བསྒྲུབ་ན། །ནད་པ་སྨན་གྱི་རྐྱལ་བ་ཐོགས་ན་ཡང་། །རང་གི་ནད་ནི་གསོ་བར་མི་ནུས་བཞིན། །ཞེས་དང་། དཀོན་བརྩེགས་ལས། མ་རྒལ་བས་ནི་བསྒྲལ་མི་ནུས། །མ་གྲོལ་བས་ནི་སྒྲོལ་མི་ནུས། །ལོང་བས་ལམ་ཡང་སྟོན་མི་ནུས། །གྲོལ་བས་སྒྲོལ་བར་བྱེད་པ་ནུས། །མིག་ལྡན་ལོང་ལ་ལམ་སྟོན་ནུས། །ཞེས་སོ། །གླ་མི་ཁོལ་པོ་རྣམ་གཞན་གྱི་ནོར་བགྲངས་ཤིང་དེ་ལ་ཕན་པ་སྒྲུབ་པ་ཙམ་ལས་རང་ལ་ཅི་ཡང་མི་བདོག་པ་ལྟར། རང་ལ་སྤང་རྟོགས་ཀྱི་ཡོན་ཏན་སྣ་གཅིག་མེད་པར་གཞན་ལ་སྒྲུབ་ཐབས་ཀྱི་རྣམ་གྲངས་དུ་སློབ་པ་དང་། གཞན་ཡང་འདི་སྐད་དུ། རང་གི་ཉམས་སུ་མི་ལེན་པའི། །དམ་ཆོས་ཟབ་རྒྱས་ཀུན་བཙལ་ཡང་། །ཡུག་ས་མོ་ཡི་མདའ་གཞུ་བཞིན། །འཚོ་རྫི་དཀའ་ལ་ཡས་མི་ནུས། །ཞེས་སོ། །གཞན་ཡང་ཟང་ཟིང་སོགས་ཀྱི་ཁེ་དང་གྲགས་པའི་ཕྱིར་གཞན་ལ་ཆོས་འཆད་པ་ནི་རིན་པོ་ཆེ་རྙེད་ཀྱང་དེས་དོན་མི་བསྒྲུབ་པར་སློང་མོ་བྱེད་པའི་སྤྲང་པོ་དང་འདྲ་ཞེས་གསུངས། འདིར་དམ་པའི་ཆོས་རིན་པོ་ཆེ་གང་ཞིག་རྙེད་ན་འཕྲལ་ཕུག་གི་དབུལ་བ་སེལ་བ་ཉིད་ཚེ་འདིའི་ཁེ་གྲགས་ཙམ་གྱི་ཆེད་དུ་བཙོང་བའི་དོན་ཏེ། སྔོན་རྒྱལ་པོ་ཀྲི་ཀྲིའི་བུ་མོ་གསེར་ཕྲེང་ཅན་གྱི་རྨི་ལམ་ལྟར་རོ། །དེས་ན་བསམ་སྦྱོར་དག་པས་ཆོས་འཆད་ཉན་བྱེད་ཚུལ་འོད་སྲུང་གི་ལེའུ་ལས། ཆོས་སྨྲ་བ་ལ་གུས་དང་བཅས་པ་ཡིན། །ཟང་ཟིང་མེད་ཅིང་རྙེད་དང་བཀུར་སྟི་ལ། །རེ་བ་མེད་ཅིང་ཚིག་བཅད་མི་སེམས་པར། །ཇི་ལྟར་ཐོས་པས་ཆོས་རྣམས་གཞན་ལ་སྟོན། །ཞེས་དང་། ཆོས་སྦྱིན་ཉོན་མོངས་མེད་སེམས་ཀྱིས། །མདོ་སོགས་ཡང་དག་ཇི་བཞིན་སྟོན། །ཞེས་སོ། །ལྔ་པ་ནི། དེ་ཕྱིར་དོན་ལ་སོགས།༡༡ རྒྱུ་མཚན་དེའི་ཕྱིར་ཐོས་པའི་སྙིང་པོ་དོན་ལ་སྤྱོད་པར་བྱེད་ཅིང་ཚིག་ལ་སྤྱོད་པའི་ཕྱིར་མིན་ལ། ཚིག་གི་དོན་སྟོན་བྱེད་ཡིན་གྱི་དོན་དངོས་ནི་མིན་ཞིང་དོན་དངོས་ནི་འདི་ཡིན་ཏེ། དོན་ནི་གསེར་དང་འདྲ་ལ་ཚིག་ནི་གསེར་འཚོལ་བྱེད་ཀྱི་སྒྲོན་མེ་དང་འདྲ་བས་གསེར་རྙེད་ནས་ནི་སྒྲོན་མེ་དེས་ཅི་ཞིག་བྱ། གསེར་ལྟ་བུའི་དོན་ལ་དཔྱད་ཅིང་བསམ་ནས་ཉམས་སུ་མྱོང་བར་བྱས་ན་གནས་ལུགས་དོན་སྤྱི་མྱོང་བ་ནས། མཐར་རང་རིག་མངོན་སུམ་སྐྱེས་ནས་དོན་དངོས་མྱོང་བར་འགྱུར་རོ། །ལྷག་བསམ་བསྐུལ་བ་ལས། བུ་རམ་ཤིང་ཤུན་སྙིང་པོ་ཅི་ཡང་མེད། །དགའ་བར་བྱ་བའི་རོ་ནི་ནང་ན་འདུག །ཤུན་པ་ཟོས་པའི་མིས་ནི་བུ་རམ་རོ། །ཞིམ་པོ་རྙེད་པར་ནུས་པ་མ་ཡིན་ནོ། །ཇི་ལྟར་ཤུན་པ་དེ་བཞིན་སྨྲ་བ་སྟེ། །རོ་ལྟ་བུ་ནི་འདི་ལ་དོན་སེམས་ཡིན། །དེ་ལྟ་བས་ན་སྨྲ་ལ་དགའ་སྤོང་སྟེ། །རྟག་ཏུ་བག་ཡོད་བྱོས་ལ་དོན་སོམས་ཤིག །ཅེས་སོ། །དེ་ལ་ཤུན་པ་ལྟ་བུ་ནི་ཚིག་རྗེས་འབྲང་བའི་གོ་བ་དང་རོ་མྱོང་བ་ལྟ་བུ་ནི་སེམས་བསྐྱེད་སོགས་མཚན་ཉིད་པའོ། །གཙུག་ཏོར་ཆེན་པོའི་མདོ་ལས། རྡུལ་སྙེད་ཀྱི་བསྐལ་བར་དམ་པའི་ཆོས་ཀྱི་མདོ་སྡེ་ཀློག་ཅིང་ཁ་ཏོན་བྱེད་པ་བས། ཉིན་གཅིག་གམ་མཚན་གཅིག་ཟག་པ་མེད་པའི་ཤེས་རབ་བསྒོམ་ན་བསོད་ནམས་དཔག་ཏུ་མེད་པར་ཆེའོ། །དེ་ཅིའི་ཞེ་ན་སྐྱེ་ཤི་ལས་རིང་དུ་གྱུར་པའི་ཕྱིར་རོ། །ཞེས་སོ། །ཚིག་གི་ཉན་བཤད་བསྐལ་བའི་བར་དུ་བྱས་ཀྱང་དེ་ལས་ནི་སེམས་བྱུང་གི་ཤེས་རབ་ཙམ་ལས་རང་རིག་པའི་ཡེ་ཤེས་མྱོང་བ་ནི་མེད་དེ། རྟོག་དཔྱོད་ཀྱི་གྲུབ་མཐའ་ཆོས་ཉིད་དུ་ཞི་བའི་དགོས་པ་ལ་མ་རེག་བར་དུ། རྟོག་གེའི་རིགས་པ་རྣོན་པོ་ཅན་དུ་མས་ཁེ་རྔམ་ཕྱེད་པ་ནི་གང་ཟག་ཕལ་ལ་ཆགས་སྡང་སོགས་ཉོན་མོངས་འཕེལ་བའི་གྲོགས་སུ་འགྱུར་ཏེ། གུ་རུ་སངས་རྒྱས་གཉིས་པས། ཆོས་བཤད་ཕལ་གྱིས་དུག་ལྔ་སྤེལ། །སྒོམ་ཆེན་བཤད་པའི་སྒྲ་ལ་གཡེང་། །བཤད་གྲྭ་སྐྱེ་བོའི་གཤག་འདྲིས་དུས། །སྙིང་པོའི་བསྟན་པ་རླུང་ལ་སྐུར། །ཞེས་གསུངས། དེས་ན་འཕགས་པ་ལྷའི་གཞུང་ལས་འབྱུང་བ་ལྟར་བྱ་སྟེ། ཅུང་ཟད་མཐོང་ན་བཟང་འགྲོ་སྟེ། །ཡང་དག་མཐོང་ན་གནས་མཆོག་ལ། །དེ་ཕྱིར་ནང་བདག་བསམ་པ་ལ། །མཁས་རྣམས་རྟག་ཏུ་དགའ་བ་བསྐྱེད། །ཅེས་སོ། །དེའི་ཕྱིར་ནང་དོན་སྙིང་པོ་ལ་མཁས་ན་མཁས་པ་དངོས་གནས་ཡིན་ལ། དོན་སྒྲུབ་པ་མེད་པར་ཚིག་མང་པོ་ལ་མཁས་ན་མཁས་པ་མིན་ཏེ། ཤེར་ཕྱིན་ལས། ཆོས་ཀྱི་དབྱིངས་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཡང་ཤེས་པ་ཡིན་ནོ་གསུངས་པས། དོན་ལ་མཁས་པ་ནི་ཐོས་པའི་མཆོག་ཡིན་ཞིང་། སྒྲ་ཕྱིར་འབྲང་ན་རྣམ་པར་མི་རྟོག་པའི་བར་ཆད་དུ་འགྱུར་བར་གསུངས་སོ། །དེའི་ཕྱིར་ཕྱི་དང་ནང་གིས་བསྡུས་པའི་དངོས་པོ་རྣམས་ལན་ཅིག་མ་ཡིན་པར་ཡང་ཡང་གཞིག་ཅིང་དཔྱོད་དང་། དཔྱད་སྟོབས་ཀྱིས་དྲང་བའི་གནས་ལུགས་ལ་ངེས་པ་ཕུ་ཐག་ཆོད་པ་མི་སྐྱེ་མི་སྲིད་ལ། འོན་ཀྱང་ཁ་ཕྱིར་བལྟས་ཀྱི་ཐོས་པའི་ཚིག་གི་གོ་ཡུལ་དཔེ་ཐོག་ཏུ་འཆེལ་བ་མིན་པར་ནང་བློ་གཏིང་རང་རིག་པའི་རྣལ་འབྱོར་དང་རོ་གཅིག་འབྱུང་བའོ། །དེའི་ཚེ་ཤེས་བྱ་ཕྱིའི་གནས་ལུགས་དཔེ་སོགས་ཀྱིས་དོན་སྤྱི་ངོ་སྤྲོད་པ་ལྟར་མ་ཡིན་པར། མན་ངག་པས་ནང་རང་རིག་མངོན་སུམ་དུ་ངོ་སྤྲད་པས་ཚེགས་མེད་པར་དབྱིངས་རིག་ལྷུན་གྲུབ་ཏུ་འབྱུང་བ་ལྟར་རོ། །དཀོན་མཆོག་བརྩེགས་པར་ལྷའི་བུས་ཞུས་པ་ལས། བདེར་གཤེགས་བསྟན་ལ་དད་པ་རྙེད་གྱུར་པའི། །མཁས་པ་རྣམས་ཀྱིས་རིག་པའི་རྣལ་འབྱོར་སྤྱོད། །སྒྲ་ལ་འཆེལ་ཞིང་འདུག་པར་མ་བྱེད་པར། །ཆོས་ཐོབ་གྱུར་ནས་རྟག་ཏུ་ནན་ཏན་གྱིས། །ཞེས་སོ། །དེ་ལྟར་ལུང་དང་རིགས་པ་དུ་མས་གཏན་ལ་ཕབ་པའི་དོན་མྱུར་དུ་རྟོགས་པ་ལ་བླ་མའི་མན་ངག་ལ་བསྟེན་དགོས་པ་མདོ་རྒྱུད་ཡོངས་ལ་གྲགས་པ་དང་། དོ་ཧ་མཛོད་ལས། གང་ཞིག་བླ་མའི་མན་ངག་བདུད་རྩིའི་ཆུ། །གདུང་སེལ་བདུད་རྩི་ངོམས་པར་མི་འཐུང་བས། །དེ་ནི་བསྟན་བཅོས་དོན་མེད་མྱ་ངན་གྱི། །ཐང་ལ་སྐོམ་པས་གདུང་སྟེ་ཤི་བར་ཟད། །ཅེས་སོ། །འདིར་རང་རིག་ཅེས་བྱ་བ་བེམ་པོ་མིན་པའི་དོན་དང་རྣལ་འབྱོར་པ་རང་ལ་མངོན་སུམ་གྱུར་པས་སོ། །འདི་ཚད་མ་གཞན་གྱིས་སྒྲུབ་ཏུའང་མེད་ཅིང་ཚད་མ་གཞན་གྱིས་གནོད་པའང་མེད་པར་འདོད། ཀུན་གཞིའི་རྣམ་ཤེས་གསལ་རིག་དང་གཅིག་གམ་སྙམ་ན། གཅིག་ཀྱང་ཆོག་སྟེ་གློ་བུར་གྱི་དྲི་མ་དང་བཅས་པའི་ཀུན་གཞི་དང་། ངོ་བོ་རྣམ་པར་དག་པ་ཆོས་སྐུ་ཞེས་ལྡོག་པས་ཕྱེའོ། །འོན་ཀྱང་རྣམ་རིག་པའི་རང་རིག་ལ་གྲུབ་མཐའི་བློ་སྐྱོན་ཡོད་འདིར་རང་བཞིན་མེད་པར་འདོད་པའི་ཁྱད་པར་རོ། །སེམས་དང་སེམས་ཉིད་གཉིས་ལས་འདི་ནི་སེམས་ཉིད་དེ་རྣམ་པར་མི་རྟོག་ཅིང་རང་ངོ་མི་རྨོངས་པ་དང་སེམས་ནི་ཡུལ་ལ་རྟོག་ཅིང་རྨོངས་པའོ། །རང་རིག་ཡུལ་ལ་མི་འཕྲོ་ཞིང་དོན་གྱི་རྣམ་པ་མྱོང་བ་རང་རིག་ལ་ཐུག་ཀྱང་རང་རིག་དོན་གྱིས་བསླང་པ་མེད་དོ། །ཟླ་བས་ཀྱང་། སྡུག་བསྔལ་རང་རིག་ཉིད་དུ་མཐོང་ནས་ནི། །ཞེས་གསུངས་པ་བཞིན་ནོ། །སྣང་བ་ཡུལ་དང་རིག་པ་ཡུལ་ཅན་དེ་གཉིས་རང་བཞིན་མེད་པར་མཉམ་པ་སྟེ། སྣང་རིག་སྟོང་གསུམ་དབྱེར་མེད་པ་བདེན་གཉིས་ཟུང་འཇུག་ཆེན་པོ་མདོ་རྒྱུད་ཀུན་གྱི་དགོངས་པ་ཉག་གཅིག་གོ། །དྲུག་པ་ནི། ཁ་ཅིག་སོགས།༡༠ གང་ཟག་རྨོངས་པ་ཁ་ཅིག་བསྟན་པ་ལྔ་བརྒྱ་ཐ་མ་རྟགས་ཙམ་གྱི་དུས་དེང་སང་སྒྲུབ་པའི་དུས་ཀྱང་མིན་ལ། སྙིགས་དུས་ཀྱི་གང་ཟག་བློ་དམན་པས་ཟབ་མོའི་དོན་མི་རྟོགས་ཟེར་བས་རང་གི་རྒྱུད་ལ་དཔགས་ནས་རྒྱལ་བའི་བཀའ་དང་གང་ཟག་ལ་ཆབས་གཅིག་སྐུར་བ་འདེབས་པ་ཡོད་པ་ཡིན་ཡང་། ལས་དང་སྨོན་ལམ་གྱི་སྐལ་བ་དང་ལྡན་ན་གང་ཟག་བཟང་ངན་མེད་པར་བསྒྲུབས་ན་རྟོགས་པར་སྣང་སྟེ། ཤེར་ཕྱིན་སུམ་བརྒྱ་པར། རབ་འབྱོར་མ་འོངས་པའི་དུས་ལྔ་བརྒྱའི་ཐ་མལ་དམ་པའི་ཆོས་རབ་ཏུ་རྣམ་པར་འཇིག་པར་འགྱུར་བ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་ཤེས་རབ་དང་ལྡན་པ་དག་འབྱུང་སྟེ། ཞེས་སོ། །བདག་ཅག་གི་སྟོན་པ་ཉིད་སྔོན་དྲང་སྲོང་མཆོག་ཅེས་བྱ་བས་ཁྲག་གིས་སྣག་ཚ་བྱས་པགས་པས་ཤོག་གུ་བྱས་ནས་ཆོས་བཙལ་ཞིང་། མུན་བསྐལ་ཞིག་ལ་སངས་རྒྱས་མང་པོ་སྤྱན་དྲངས་ཏེ་ཆོས་ཞུས་ཏེ་གཞན་ལའང་བསྟན་པ་དེས་ན། ཆོས་ལ་སྙིང་ནས་དོན་གཉེར་གྱི་མོས་འདུན་ཡོད་པ་ལ་ནི་སངས་རྒྱས་མྱ་ངན་ལས་མི་འདའ་ཞིང་ཆོས་ཀྱང་མི་ནུབ་ཅེས་བྱ། བསམ་པ་ཕུན་སུམ་ཚོགས་ཤིང་དད་པ་ཡོད་ན་མུན་བསྐལ་དུ་སྐྱེས་ཀྱང་སངས་རྒྱས་ཀྱི་ཞལ་སྟོན། ཆོས་ཀྱི་གཏེར་དང་རི་སུལ་དང་ཤིང་གི་ནང་དུ་བཅུག་པ་དག་ཀྱང་ཡོད་དེ། ཆོས་ཀྱི་གླེགས་བམ་དུ་བྱས་པ་དག་ཀྱང་ལག་ཏུ་འོང་ངོ་ཞེས་མདོ་ལས་བཤད། དཔེར་ན་གཏེར་ཆོས་འདི་ལྟ་བུའོ། །དུས་ཀྱི་ཐ་མ་ལ་དགེ་བ་སྒྲུབ་པ་ཕན་ཡོན་ལྷག་པར་ཆེ་ཞིང་། འོག་ཕྱོགས་ཀྱི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་འདས་པ་ན། སངས་རྒྱས་འོད་ཟེར་གྱི་རྒྱལ་པོའི་ཞིང་ཁམས་སྣང་ལྡན་དུ་བསྐལ་པ་བཅུར་བསམ་གཏན་བསྒོམ་པ་བས་མི་མཇེད་ཀྱི་ཞིང་འདིར་སྔ་དྲོ་གཅིག་ལ་བྱམས་པ་སོགས་བསྒོམ་པ་བསོད་ནམས་ཆེ་བ་མདོ་ལས། ཚངས་པ་ཁྱད་པར་སེམས་ཀྱིས་ཞུས་པ་ལས། ཤར་ཕྱོགས་ཀྱི་སངས་རྒྱས་ཀྱི་ཞིང་ཡོངས་དག་པར་བསྐལ་པ་བརྒྱ་སྟོང་དུ་ཚངས་པར་སྤྱོད་པ་སྤྱད་པ་བས། སུ་དག་བྱམས་པའི་སེམས་ཀྱིས་ཤིན་ཏུ་འདིར། །སྐད་ཅིག་སྤྱོད་ན་འདི་ནི་ཁྱད་པར་འཕགས། །ཞེས་སོགས་གསུངས། གཞན་ཡང་འདི་ལྟར་བསླབ་པར་བྱ་སྟེ། འཁོར་འདས་ཀྱི་ཆོས་ཐམས་ཅད་བདེན་པ་བཞིར་དྲིལ་ཏེ་ཞིབ་ཏུ་ཕྱེས་ནས་བསྒྲུབ་ན་དཔག་ཏུ་མེད་ཀྱང་། ཉན་ཐོས་ལྷག་བཅས་ཀྱི་ཕུང་པོ་སྡུག་བསྔལ་ཡིན་ཡང་ཀུན་འབྱུང་མིན་ལ། གཞན་སོ་སོའི་སྐྱེ་བོའི་ཕུང་པོ་ལྔ་པོ་ཉིད་སྡུག་བསྔལ་དང་ཀུན་འབྱུང་གཉིས་ཀ་ཡིན་པས། ཕུང་པོ་ལ་བདག་ཅེས་བཏགས་པ་དེ་མིང་ཙམ་ལས་དངོས་པོ་མེད་པས་དེ་ལ་བདག་གོ་ངའོ་སྙམ་དུ་བདེན་པར་མི་འཛིན་པར་རང་བཞིན་མེད་པར་གོམས་ན་གང་ཟག་གི་བདག་མེད་དང་། ཕུང་པོ་ལྔ་པོ་དེ་མི་རྟག་པ་དང་སྡུག་བསྔལ་བ་དང་ལུས་མི་གཙང་བ་དང་ངོ་བོ་མེད་པ་རང་བཞིན་གྱིས་སྟོང་པ་གཟུགས་བརྙན་གྱི་རྣམ་པ་ཁོ་ན་ཡིད་ལ་བྱས་པར་གོམས་ན། ཆོས་ཀྱི་བདག་མེད་པ་སྟེ་བདག་མེད་དེ་རྟོགས་པའི་ཤེས་རབ་གཉིས་ནི་ལམ་གྱི་བདེན་པ་ཡིན་ཞིང་དེས་ཕུང་པོ་ལ་བདག་གཉིས་སུ་བདེན་པར་མི་ཞེན་ལ། དེས་ན་ཕུང་པོ་ལ་ཞེན་ཅིང་ཆགས་པའི་ཉོན་མོངས་པ་སྤངས་དེས་ཀུན་ནས་བསླང་བའི་ལས་ཀྱང་འདུ་མི་བྱེད་པས་འགོག་པ་ལ་འཇུག་པར་འགྱུར་རོ། །དེ་ལ་སྙིང་རྗེ་དང་སེམས་བསྐྱེད་ཀྱིས་ཟིན་ན་ཚོགས་གཉིས་ཡོངས་སུ་རྫོགས་པར་འགྱུར་བ་དེས་ན་མང་དུ་སྤྲོས་པས་ཞུམ་ན་དེ་ཙམ་གྱིས་ཆོག་གོ། །དཔེར་ན་ཉན་ཐོས་ཆོས་སྲུང་སྡེ་བ་ཁ་ཅིག་བདེན་པ་མངོན་རྟོགས་གཅིག་ཏུ་འདོད་དེ་སྡུག་བསྔལ་ཤེས་པ་ཁོ་ནས་འཕགས་པའི་བདེན་པ་བཞི་རྟོགས་པས་སོ། །ཞེས་རྣམ་པ་སོ་སོར་མི་ཕྱེ་བར་སྡུག་བསྔལ་ལ་བདག་མེད་པར་ཤེས་ན་ཐམས་ཅད་བདག་མེད་པར་ཤེས་པའམ། བཞི་པོ་ལ་བདག་མེད་པའི་རྣམ་པ་གཅིག་པོ་བསྒོམ་ན་བཞི་པོ་མཐོང་བའི་དོན་ནོ། །བཀའ་སྡེ་སྣོད་གསུམ་པོ་བཤད་ནས་ཚུལ་བཞིན་མཉན་པར་བྱས་ཀྱང་ལས་དང་སྐལ་བ་མེད་ན་ཐ་སྙད་ཁོ་ན་འཆད་ཉན་བགྱིས་པ་ལས་སྟོང་ཉིད་ཀྱི་དོན་མི་རྟོགས་སོ། །སྐལ་ལྡན་ཤེས་རབ་ཆེན་པོ་ཁ་ཅིག་ཚིགས་སུ་བཅད་པ་རེས་ཀྱང་དོན་རྟོགས་པ་ཡོད། ཁ་ཅིག་སངས་རྒྱས་དངོས་བྱོན་ནས་ཆོས་ཀྱི་འཁོར་ལོ་བསྐོར་བ་མ་ཐོས་པའམ་ཐོས་ཀྱང་སྒྲུབ་པ་མེད་པས་མ་རྟོགས་པ་ཡོད་པས་སོ། །གཞན་ཡང་དམ་པའི་ཆོས་ཀྱི་ཐེག་པ་གསུམ་ནས་དགུ་ལ་སོགས་པ་ཡང་གདུལ་བྱ་གང་ཟག་བྱེ་བྲག་མི་འདྲ་བ་ཁམས་དང་མོས་པ་དང་སྙིང་རྗེ་དང་ཤེས་རབ་ཆེ་ཆུང་གི་དབང་གསུམ་ལ་ལྟོས་ནས་གསུངས་པ་ལས། ཀུན་ལ་གཅིག་གིས་ཆོག་པ་མིན་ཞིང་གཅིག་ལ་ཐམས་ཅད་དགོས་པའང་མིན་པས། སྒྲུབ་པ་པོས་ཀྱང་རང་གི་ཉམས་ཚོད་དང་སྦྱར་ལ་ཁམས་ཀྱིས་གང་ཅི་ཙམ་ལྕོགས་པ་ལ་འཇུག་པར་བྱ་སྟེ། ཁམས་དང་འཚམས་པས་བསྒྲུབ་སླ་ཞིང་འགྲུབ་པའི་ཕྱིར་རོ། །གདུལ་བྱའི་རྒྱུད་རིམ་པར་སྨིན་པ་ལ་བྱིས་པ་ཟས་ཀྱིས་གསོ་བ་དང་ནོར་བུ་སྦྱོང་བའི་དཔེ་མདོ་ལས་མང་དུ་འབྱུང་ངོ་། །དེ་ལྟར་མིན་པར་རང་གིས་མི་ལྕོགས་བཞིན་དུ་གོང་མའི་ཆོས་ལ་རེ་ནས་གོང་མ་ཁས་བླངས་པས་ནི་མཐར་དེ་སྤོང་བར་འགྱུར་བས། ཐང་སྟོང་སྡིག་པ་རང་གིས་བླངས་པས་དམྱལ་བར་སྐྱེ་ཞེས་མདོ་སྡེའི་གཞུང་ལས་འབྱུང་ངོ་། །འདིར་ཆོས་སྟོན་པ་པོས་ཀྱང་སྣོད་ཡིན་མིན་མངོན་ཤེས་ཀྱི་བརྟགས་ནས་སྟོན་དགོས་ཀྱི། གཞན་དུ་ན་ཐེག་ཆེན་གྱི་སྣོད་ལྡན་ལ་ཐེག་དམན་སྟོན་པ་དང་། ཐེག་དམན་རིགས་ལ་ཐེག་ཆེན་སྟོན་པ་སོགས་ནི་ཆོས་སྤང་བླང་དུ་འགྱུར་ཞིང་བྱང་སེམས་ལས་དང་པོ་པ་ལ་རྩ་ལྟུང་བརྒྱད་ལས་སྣོད་མིན་ལ་ཟབ་མོ་བསྟན་པའི་ཕམ་པ་དང་། གཞན་ཡང་སོ་ཐར་སྤོང་བ་དང་ཐེག་ཆེན་ལས་བཟློག་པའི་ཕམ་པ་དང་བྱང་ཆུབ་སེམས་དཔའི་འཁྲུལ་བ་ཡིན་པར་འོད་སྲུང་གིས་ཞུས་པ་ལས་གསུངས་སོ། །འོ་ན་མངོན་ཤེས་མེད་པས་ཇི་ལྟར་བྱ་སྙམ་ན་ཐབས་དུ་མས་ཡུན་རིང་དུ་བརྟགས་ནས་ཤེས་ན་ཆོག་མོད་ཀྱང་ལས་དང་པོ་ལ་མངོན་ཤེས་མེད་ཅིང་རང་རྒྱུད་མ་སྨིན་པས་གཞན་དོན་ཇི་བཞིན་མི་འགྲུབ་པས། དང་པོ་རང་རྒྱུད་སྦྱོང་ཞིང་མངོན་ཤེས་བསྒྲུབ་ནས་གཞན་དོན་བྱ་བ་དོན་ལ་གནས་ཤིང་དཀོན་བརྩེགས་ཀྱི་ལུང་སྔར་དྲངས་པ་ལྟར་རོ། །འདུལ་བ་ལས། འཕགས་པ་ཉེ་སྡེས་འཁོར་འཇོག་པར་བརྩམ་པ་ལ་བཅོམ་ལྡན་འདས་ཀྱི་ཉེ་སྡེས་ཐོག་མ་ཉིད་ནས་འཁོར་བསྡུ་བར་སེམས་སོ་ཞེས་གསུངས་ནས་བཀག་པར་མཛད་དོ། །ཤེར་ཕྱིན་ལས། སེམས་གཡེང་པས་ནི་བདག་གི་དོན་ཡང་འགྲུབ་པར་མི་འགྱུར་ན་གཞན་གྱི་དོན་ལྟ་ཅི་སྨོས། དེའི་ཕྱིར་སེམས་གཡེང་བའི་གོ་སྐབས་ནི་འགའ་ཙམ་ཡང་དབྱེ་བར་མི་བྱའོ། །ཞེས་སོགས་གསུངས་པ་ནི་དང་པོ་མངོན་ཤེས་ལ་སོགས་པ་བསྒྲུབ་དགོས་པའི་དོན་ནོ། །དེས་ན་བྱང་ཆུབ་སེམས་འགྲེལ་ལས། གཞན་དོན་ལས་ལ་མཐུ་མེད་ཀྱང་། །དེ་ཡི་བསམ་པ་རྟག་ཏུ་བྱ། །གང་ལ་བསམ་པ་དེ་ཡོད་པ། །དེ་ནི་དེ་ལ་དོན་གྱིས་ཞུགས། །ཞེས་གསུངས་པ་ལྟར་བྱའོ། །བདུན་པ་ནི། ཐེག་པའི་རང་བཞིན་སོགས།༦ ཐེག་པའི་རང་བཞིན་ནི་ཤེས་རབ་དང་ཐབས་སྙིང་རྗེ་ཁོ་ན་ཡིན་པར་བལྟ་སྟེ། དེ་ཡང་བདག་དང་སངས་རྒྱས་གཉིས་གནས་སྣང་ཀུན་ཏུ་དབྱེར་མེད་པར་རྟོགས་པ་ཤེས་རབ་ཡིན་ལ། སེམས་ཅན་ཀུན་ལ་བུ་གཅིག་པ་ལ་མས་ཇི་ལྟར་བྱ་བ་བཞིན་དུ་བྱམས་པ་དང་སྙིང་རྗེ་བ་ནི་ཐབས་ཡིན་ལ། ཐབས་དང་ཤེས་རབ་དེ་གཉིས་ཆེ་ཆུང་གི་དབང་གིས་ཐེག་པའི་ཁྱད་པར་མཐོ་དམན་དུ་བསྟན་པ་ཡིན་ནོ། །ཉན་རང་ལའང་ཐབས་དང་ཤེས་རབ་ཡོད་ཀྱང་ཆེ་ཆུང་གི་ཁྱད་པར་ལས་དམན་པ་ལ་དགག་སྒྲ་སྦྱར་ནས་མདོ་སྡུད་པར། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྷུང་། ཞེས་སོ། །བྱང་ཆུབ་སེམས་དཔའི་ཐབས་ལ་མཁས་པ་ཡང་ཤེས་རབ་ཆེ་བས་ཡིན་གྱི་ཤེས་རབ་དམན་པ་ལ་ཐབས་མང་པོ་མེད་ཅིང་ཐབས་ཀྱིས་འཆིང་བ་ཉིད་དུ་འགྱུར་རོ། །དཀོན་བརྩེགས་ལས། འོད་སྲུང་ཤེས་རབ་དང་ལྡན་པ་རྣམས་ནི་ཐབས་ཀྱིས་རྣམ་པར་གྲོལ་ལོ། །ཤེས་རབ་དང་མི་ལྡན་པ་རྣམས་ནི་རབས་ཀྱིས་ཡོངས་སུ་འཆིང་ངོ་། །ཞེས་དང་། དོ་ཧ་མཛོད་ལས། སྙིང་རྗེ་དང་བྲལ་སྟོང་པ་ཉིད་ཞུགས་གང་། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་འབའ་ཞིག་བསྒོམ་ན་ཡང་། །འཁོར་བ་འདིར་གནས་ཐར་པ་ཡོད་དམ་ཅི། །གང་དག་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། །ཞེས་སོ། །དེའི་ཕྱིར་གང་ཟག་གང་ཞིག་ཐབས་ཤེས་ཁྱད་པར་ཅན་དེ་གཉིས་དང་མི་ལྡན་ཞིང་ཐེག་ཆེན་གྱི་མདོ་སྡེ་ཟབ་མོ་བཀླག་པའི་ཕན་ཡོན་མཐོང་བས་གྲོལ་བར་སེམས་ཏེ། སེམས་བསྐྱེད་བཅོས་མ་རེ་ཐོབ་ཀྱང་དེའི་བསླབ་བྱ་རྣམས་ཇི་བཞིན་སྒྲུབ་པར་མི་ནུས་པར་བདག་ནི་ཐེག་པ་ཆེན་པོའི་ཞེས་ཁས་འཆེ་བ་ནི། དཔེར་ན་ལོང་བ་སྤྲང་པོ་ཞིག་གིས་ང་ཉིད་རྒྱལ་པོ་ཡིན་ནོ་ཞེས་ཟེར་བ་བཞིན་དུ་རྫུན་ཁོ་ན་ཉིད་དུ་ཟད་དེ། ས་སྙིང་འཁོར་ལོ་བཅུ་པ་ལས། ཚུལ་ཁྲིམས་ཉམས་པ་སྡིག་ལ་དགའ་བ་ཅན། །ཐེག་པ་ཆེན་པོའི་ཡོན་ཏན་མཆོག་ཐོས་ནས། །ཁེ་དང་གྲགས་ཕྱིར་ཐེག་ཆེན་ཁས་ཆེ་བ། །བོང་བུ་སེང་གེའི་པགས་པ་གྱོན་པ་བཞིན། །ཞེས་སོ། །དེས་ན་བརྟག་དཔྱད་མེད་པར་ཆོས་བསྟན་ན་གདུལ་བའི་རྒྱུད་ཆུད་ཟོས་སུ་འགྱུར་ཉེན་ཆེ་བས་རྒྱུད་ཚོད་དང་འཚམ་པའི་སྒོ་ནས་བསྟན་པར་བྱ་སྟེ། དེ་ལས། མཁས་པ་ཆོས་ཀྱི་སྦྱིན་པ་སྤྱོད་པ་དག །སྣོད་བཞིན་ཐེག་པ་གསུམ་གྱི་ཆོས་སྟོན་ཏོ། །ཐེག་པ་གཞན་དག་དེ་ལ་སྟོན་མི་བྱེད། །ཐོས་ནས་དེ་ལ་འཕྱ་ཞིང་སྐུར་མི་འགྱུར། །དབང་པོ་སྣོད་བཞིན་དམ་པའི་ཆོས་སྟོན་གྱི། །དབང་པོ་སྣོད་མིན་དག་ལ་མ་ཡིན་ནོ། །སོ་སོར་ཇི་ལྟར་ཅི་ལ་མོས་པ་བཞིན། །དེ་དང་དེ་ཡི་ཆོས་སྟོན་མགུ་བར་བྱེད། །ཅེས་སོ། །ཨཱརྱ་དེ་བས་ཀྱང་དེ་ལྟར་གསུངས་པ་གོང་དུ་སོང་། བརྒྱད་པ་ནི། དེ་བས་སོགས།༢ རང་གི་རྒྱུད་དང་འཚམ་པ་ལ་འཇུག་དགོས་པ་རྒྱུ་མཚན་དེ་བས་ན་རྒྱུའི་ཐེག་པ་དང་འབྲས་བུའི་ཐེག་པ་རྣམས་ལ། གང་ཟག་ཀྱང་འོག་མ་རྣམས་ཀྱིས་གོང་མ་སྒྲུབ་མི་ནུས་བཞིན་དུ་དེ་ཁས་བླངས་པ་ལས། འོག་མ་སོ་སོ་རང་རང་གི་གཞུང་བཞིན་དུ་ཤིན་ཏུ་འབད་པར་རིགས་སོ། །གོང་མ་ཁས་ལེན་མི་ནུས་པ་རྣམས་ཀྱིས་ཀྱང་གོང་མའི་ཆོས་ལ་རྒྱབ་ཀྱིས་མི་ཕྱོགས་པར་ཐེག་པ་ཆེན་པོ་ནི་ཤིན་ཏུ་ཟབ་ཆེས་པས་རང་གི་བློར་མ་ཤོང་བའོ་སྙམ་ནས་མོས་འདུན་དང་། ནམ་ཞིག་འདི་ལྟ་བུ་སྒྲུབ་པའི་སྐལ་བ་དང་ལྡན་པར་གྱུར་ཅིག་ཅེས་སྨོན་ལམ་དང་སེམས་བསྐྱེད་བྱ་དགོས་ཀྱི། འདི་ནི་མི་རིགས་པའོ་ཞེས་ཟེར་ན་ལྟ་ཅི་སྨོས། འདི་ནི་བྱང་ཆུབ་སེམས་དཔའ་རྣམས་ཀྱི་ཆེད་དུ་བསྟན་པའོ་ཞེས་ཟེར་བ་དང་། འདི་ནི་ཉན་ཐོས་རྣམས་ཀྱི་ཆེད་དུ་གསུངས་པའོ་ཟེར་ན་ཆོས་སྤོང་བ་དང་། དེ་བཞིན་དུ་དེ་བཞིན་གཤེགས་པས་གསུངས་པའི་བཀའ་ལ་ལ་ནི་བཟང་བར་འདུ་ཤེས་ལ་ལ་ནི་ངན་པར་འདུ་ཤེས་ན་ཆོས་སྤོང་བ་དང་། ཆོས་སྤང་བ་དེས་ཆོས་སྤངས་པས་དེ་བཞིན་གཤེགས་པ་ལ་སྐུར་བ་འདེབས་པ་ཡིན། དགེ་འདུན་ལ་ངན་དུ་བརྗོད་པ་ཡིན་ཞེས་རྣམ་པར་འཐག་པ་བསྡུས་པའི་མདོ་ལས་གསུངས། ཆོས་སྤོང་བའི་ལས་སྒྲིབ་ནི་ཤིན་ཏུ་ཕྲ་བ་གོང་དུའང་ཅུང་ཟད་བཤད་དེ། ཟླ་བ་སྒྲོན་མེའི་མདོ་ལས། གང་གིས་འཛམ་བུའི་གླིང་འདིར་ནི། །མཆོད་རྟེན་ཐམས་ཅད་བཤིག་བྱེད་པས། །གང་གིས་མདོ་སྡེ་སྤོང་བྱེད་པའི། །སྡིག་པ་དེ་ནི་ཆེས་ཁྱད་འཕགས། །གང་གིས་གངྒཱའི་བྱེ་སྙེད་ཀྱི། །དགྲ་བཅོམ་བསད་པར་གྱུར་པ་བས། །གང་གིས་མདོ་སྡེ་སྤོང་བྱེད་པའི། །སྡིག་པ་དེ་ནི་ཆེས་ཁྱད་འཕགས། །ཞེས་སོ། །མདོ་ལས། ཟབ་མོའི་ཆོས་ནི་སྟོན་པ་ལ། །གལ་ཏེ་མོས་པར་མ་གྱུར་ཀྱང་། །སྐུར་བ་དག་ནི་མི་གདབ་སྟེ། །ཆོས་ཉིད་བསམ་མི་ཁྱབ་དྲན་བྱ། །ཞེས་གསུངས་པ་ལ་བསམ་པར་བྱའོ། །དགུ་པ་ནི། གསང་སྔགས་སོགས།༤ གསང་སྔགས་རྡོ་རྗེའི་ཐེག་པ་ནི་ཟབ་པ་ལས་ཀྱང་ཆེས་ཟབ་པའི་ཆོས་ཡིན་ཞིང་། གང་ཟག་ཀྱང་དབང་པོ་རབ་མཆོག་ཏུ་གྱུར་པ་རྣམས་ཀྱིས་བསྒྲུབ་བྱ་ཡིན་ལ། དེ་ལ་ཞུགས་པའི་སྐྱེས་བུ་དེ་ཡང་ནི་ཐུན་མོང་མ་ཡིན་པའི་ཁེ་ཉེན་གཉིས་དང་ལྡན་པ་སྟེ། སྒྲུབ་པ་མེད་ཅིང་དམ་ཚིག་ཉམས་ན་ཤིན་ཏུ་ཐར་དཀའ་བའི་རྡོ་རྗེའི་དམྱལ་བ་ཆེན་པོ་ཉིད་དུ་མཚམས་མེད་པར་འགྲོ་བ་དང་། སྒྲུབ་ཅིང་དམ་ཚིག་བསྲུང་ན་སངས་རྒྱས་རྡོ་རྗེ་འཆང་གི་ས་རུ་ཐེ་ཚོམ་མེད་པར་སྐྱེ་སྟེ། དེ་གཉིས་ལས་སྐྱེས་གཞན་གསུམ་པ་ནི་མེད་ཅེས་བཤད་དོ། །དེའི་ཕྱིར་རྒྱུད་ལས་བཤད་པའི་ལྟ་བ་དང་སྤྱོད་པ་ཐུན་མོང་དང་ཐུན་མོང་མ་ཡིན་པ་རྣམས་དང་ཕྱི་ནང་གསང་བའི་དམ་ཚིག་དང་ལྡན་ཅིང་། སྒྲུབ་སྡེ་སོ་སོའི་གཞུང་ལས་བཤད་པ་བཞིན་དེ་ལ་ཤིན་ཏུ་བརྩོན་པར་བྱས་པས་ནི་ཚེ་འདིའམ། འཆི་ཁ་བར་དོ་གང་རུང་དུ་གེགས་མེད་པར་སངས་རྒྱས་རྡོ་རྗེ་འཆང་གི་སར་འགྲོ་བ་རྒྱུད་སྡེ་མཐའ་དག་ལས་གསུངས། དམ་ཚིག་མ་ཉམས་ན་སྒྲུབ་པ་མེད་ཀྱང་སྐྱེ་བ་བཅུ་དྲུག་ལས་མི་འགྱང་བར་གསུངས་སོ། །རྒྱུད་ལས། ལྟ་བ་མི་ལྡན་སྤྱོད་པ་དང་། །སྤྱོད་པ་མི་ལྡན་ལྟ་བ་གཉིས། །འདི་ནི་གསང་སྔགས་དམ་སྲི་སྟེ། །མནར་མེད་སེམས་ཅན་དམྱལ་བར་སྐྱེ། །ཞེས་དང་། དམ་ཚིག་དག་དང་མི་ལྡན་ན། །བསྒྲུབ་ཀྱང་འགྲུབ་པར་མི་འགྱུར་ཏེ། །རྒྱུ་མེད་འབྲས་བུ་འདོད་པ་བཞིན། །ཚེ་ཡི་དུས་བྱས་དམྱལ་བར་འགྲོ། །ཞེས་གསུངས་པས། དབང་མཚན་ཉིད་པ་ཐོབ་པ་སྔོན་དུ་སོང་ནས་ལྟ་སྤྱོད་དམ་ཚིག་དང་ལྡན་པས་སྒྲུབ་པ་ནི་ལམ་འདིའི་གནད་མ་འཆུགས་པའོ། །དེ་གསུམ་དང་མི་ལྡན་ཅིང་བསྒྲུབ་པ་ལ་གཡེལ་ཞིང་སྔགས་ཙམ་ལ་འཆེལ་ནས་སྤྱོད་པ་འདོད་ཕྱོགས་ཙམ་བག་མེད་དུ་སྤྱོད་ན་ངེས་པར་དམྱལ་བར་སྐྱེ་སྟེ། ཁྲག་འཐུང་མངོན་འབྱུང་ལས། རྣལ་འབྱོར་མི་ལྡན་རྣལ་འབྱོར་ཚུལ། །ཕྱག་རྒྱ་ལ་ནི་བསྒྲོད་པ་དང་། །ཡེ་ཤེས་མི་ལྡན་ཡེ་ཤེས་ཚུལ། །ཐེ་ཚོམ་མེད་པར་དམྱལ་བར་འགྲོ། །ཞེས་སོ། །གསང་བ་འདུས་པ་ལས། ཆགས་ཅན་ཡེ་ཤེས་འདོད་པ་ཡིས། །རྟག་ཏུ་འདོད་ཡོན་རྣམ་ལྔ་བསྟེན། །བུ་མོ་ཨུཏྤལ་མཐིང་ཁའི་མདོག །རྙེད་ནས་འདོད་པས་རབ་ཏུ་མཆོད། །ཅེས་གསུངས་པ་དེ་ཡང་ལྟ་བ་བདག་མེད་གཉིས་དང་འཁོར་འདས་མཉམ་ཉིད། ཐབས་ཁྱད་པར་ཅན་སྙིང་རྗེ་ཆེན་པོ་ལ་སོགས་པས་མ་ཟིན་ན་ངན་སོང་ལོག་པར་ལྟུང་བའི་རྒྱུ་ཡིན་ཞེས་འགྲོ་མགོན་བསོད་ནམས་རྩེ་མོས་རྒྱུད་སྡེ་སྤྱིའི་རྣམ་བཤད་ལས་གསུངས། དེ་བས་ན་གསང་སྔགས་སྤྱོད་པ་རྣམས་ཀྱིས་སྡར་མའི་པང་དུ་སྦྲུལ་འོང་བ་བཞིན་དུ་ཉམས་པའི་ཉེས་དམིགས་དང་བསྲུངས་བའི་ཕན་ཡོན་ལ་བསམས་ནས་འབད་པར་རིགས་ཏེ། མངོན་འབྱུང་རྒྱུད་ལས། ཧེ་རུ་ཀ་དཔལ་བཟུང་བྱས་ན། །སྙིགས་མའི་དུས་སུ་འགྲུབ་པར་འགྱུར། །ཞེས་དང་། རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལས། གཞན་ཡང་ཕྱི་མའི་དུས་ཀྱི་ཚེ། །དུས་མཐར་དངོས་གྲུབ་མི་ཐོབ་སྟེ། །ཆོས་འདི་དེ་ལྟར་ཤེས་ནས་ནི། །བསམ་པ་ཐ་མས་རྫོགས་བྱེད་ཡིན། །ཞེས་གསུངས་པས། ད་ལྟར་གསང་སྔགས་སྒྲུབ་པའི་དུས་དང་འགྲུབ་པའི་དུས་ཡིན་པར་གསུངས་པའི་ཕྱིར་སྔགས་ལ་ཞུགས་ནས་ཚུལ་བཞིན་བསྒྲུབ་པར་བྱ་རིགས་སོ། །སྔར་རྩ་བའི་ས་བཅད་གསུམ་པ་ཐ་མ་སློབ་དཔོན་ཉིད་ཁེངས་སྐྱུང་ཞིང་དགེ་རྩ་བསྔོ་བ་ལ་གསུམ། དངོས་དང་། ནོངས་པ་བཤགས་པ་དང་། དགེ་རྩ་བསྔོ་བའོ། །དང་པོ་ནི། བདེར་གཤེགས་སོགས། དེ་ལྟར་བདག་གིས་ཆོས་འཆད་ཉན་བྱེད་པ་སྤྱི་ལ་བསྐུལ་བ་ལགས་པས་མཚང་ལ་རྒོལ་བ་ལྟ་བུའི་བརྗོད་པ་ཅུང་ཟད་ཐལ་དྲག་ན་ཡང་། འདི་ལྟར་བདག་སེམས་པ་འཇིག་རྟེན་སེམས་པ་སེམས་ཅན་གྱི་ལས་འབྲས་སེམས་པ་སངས་རྒྱས་དང་བྱང་ཆུབ་སེམས་དཔའི་སྤྱོད་ཡུལ་སེམས་པ་སྟེ། བསམ་གྱིས་མི་ཁྱབ་པའི་གནས་དེ་ལྟ་བུ་ལས། བདེ་བར་གཤེགས་པ་རྣམས་ཀྱི་སྤྱོད་ཡུལ་བསམ་ལས་འདས་པ་ཟབ་མོའི་དོན་ལ་སྤྱོད་པ་རྣམས་དང་། གང་ཟག་གི་གནས་སྣང་ཡང་ཤེས་པར་དཀའ་བས་ཐབས་ལ་མཁས་པའི་མཛད་སྤྱོད་ངེས་པ་དང་མ་ངེས་པར་སྣང་བའི་རྒྱལ་སྲས་བྱང་ཆུབ་སེམས་དཔའ་རྣམས་ལ་སྐུར་བ་བཏབ་པ་དང་འདྲ་བའི་ཕྱིར། དེ་ལྟ་བུ་ལ་རྨོངས་པ་བདག་གིས་བསྐུལ་བ་མིན་ཞིང་བསྐུལ་བར་མི་འོས་ཀྱང་། བདག་རང་དང་འདྲ་བའི་རྨོངས་པ་འགའ་ལ་ཕན་སྲིད་སྙམ་ནས་ཆོས་འདི་བགྱིས་པའོ། །གཉིས་པ་ནི། གཞུང་འདི་བགྱིས་པ་ལ་འགལ་འཁྲུལ་གྱི་ནོངས་པར་གྱུར་པ་ཅི་མཆིས་པ་རྣམས། འཕགས་པ་མཆོག་རྣམས་དང་རྣམ་དཔྱོད་དང་ལྡན་པའི་མཁས་པའི་དབང་པོ་རྣམས་ལ་སྙིང་ནས་བཟོད་པར་གསོལ་ལོ། །གསུམ་པ་ནི། བདག་གི་ལྷག་བསམ་དག་པས་བརྩམས་པའི་དགེ་རྩ་འདིས་ནི་འགྲོ་བ་ཀུན་གྱི་དོན་གཞུང་ལས་ཇི་སྐད་བཤད་པ་བཞིན་དུ་བསྒྲུབ་ནས། རིང་པོར་མི་ཐོགས་པར་ཞི་བདེ་ཐར་པ་མཆོག་གི་གོ་འཕང་ཐོབ་པར་ཤོག་ཅིག་ཅེས་སོ། །མཛད་བྱང་ནི། ཐེག་པ་ཆེན་པོའི་རྣལ་འབྱོར་ལ་འཇུག་པའི་ཐབས་བྱེ་བྲག་ཏུ་ཕྱེ་བ་སློབ་དཔོན་ཨ་རོ་ཡེ་ཤེས་འབྱུང་གནས་ཀྱིས་མཛད་པའོ། །འདིར་སྨྲས་པ། རྒྱལ་བསྟན་དབང་ཆེན་གསེར་གྱི་བྱེ་སྙེད་ལས། །བདེན་པ་རྣམ་བཞི་རིན་ཆེན་ལྷུན་པོ་གང་། །སྐལ་བཟང་མིག་སྟོང་ལྡན་པའི་འབབ་སྟེགས་ཏེ། །གྲོང་ཁྱེར་གསུམ་གྱི་དགའ་ཚལ་མཆོག་ཏུ་འཁྲུངས། །རྣམ་བཤད་སྣང་བརྙན་སྒྱུ་མའི་དོ་ཤལ་ལ། །བདེན་གསུང་ལུང་གི་ཟུར་བརྒྱན་མཛེས་འབར་བ། །རིགས་དང་ལང་ཚོ་པདྨ་ཕྱེས་འདྲ་བའི། །མིག་གི་ལོངས་སྤྱོད་མཛའ་བར་འགྱུར་ལགས་གྲངས། །ཡུན་རིང་འཕྲད་པར་དཀའ་བ་དམ་ཆོས་མཛོད། །རྒྱས་མཛད་དམ་པའི་བྱ་བ་རྣམ་གསུམ་གྱི། །རྒྱལ་རྔ་དུས་མཐར་བསྒྲགས་པས་འོག་མིན་གྱི། །ལྷ་རྣམས་དགྱེས་པའི་མེ་ཏོག་ཆ ར་དུ་འབེབ། །དེ་ཚེ་ནམ་མཁའི་གོས་ཀྱིས་སྡིག་ཏོའི་བཞིན། །སྒྲིབ་གྱིན་སྙིང་ལ་མི་མཐུན་རྟོག་པ་ཡི། །མྱ་ངན་གྱིས་གཟིར་རང་དགའི་ནགས་ཚལ་དུ། །གོམ་འགྲོས་འཁྱོལ་ལ་ཕྱོགས་པར་མི་འགྱུར་རམ། །དབྱར་རྔའི་གདངས་ལ་སྡོད་པའི་མགྲིན་སྔོན་རྣམས། །ཆར་སྤྲིན་ལྷུང་ལྷུང་འཁྲིགས་ཚེ་གར་གྱིས་རྩེ། །དེ་བཞིན་རྣམ་དཔྱོད་ལྡན་རྣམས་ཅིག་ཆར་དུ། །ཆོས་ལ་དགའ་བའི་འཛུམ་རིས་ཅིས་མི་ངོམ། །རིགས་ལམ་ཟླ་འོད་ཡུན་དུ་དཔྱད་པའི་མཐར། །ཤེས་རབ་གྲོགས་ཀྱིས་བསྒྱུར་བའི་དོན་གཅིག་ཉིད། །ངེས་པར་གཟིགས་ལ་རྒྱལ་རྣམས་མགྲིན་གཅིག་ཏུ། །བསྔགས་པར་མཛད་ན་གཞན་གྱིས་ཅི་ཞིག་སྨོས། །འཕགས་མཆོག་མི་ཡི་ཟོལ་དུ་བྱོན་པ་ཡིས། །དབང་པོའི་གཞུ་ལ་ངལ་སྟེགས་མི་འཆའ་བར། །སྨོན་ལམ་དུས་སུ་སྨིན་པའི་རྣམ་ཐར་གྱིས། །བྱ་བ་མཆོག་ལ་བརྩོན་པའི་ངོ་མཚར་རྨད། །སྲིད་ན་གྲགས་པའི་ལྷ་ཆེན་འབུམ་ཕྲག་གིས། །ཆོས་དུང་ལན་ཅིག་སྒྲོགས་པའི་ཆར་མི་ཉེ། །ཆོས་སྤྱོད་ཀུན་འདུས་ཀུན་དགའ་ར་བ་གང་། །ཡ་རབས་ཀུན་གྱིས་འཇུག་ངོགས་ལགས་པར་འཚལ། །དེ་ཕྱིར་སྐྱེ་འགྲོའི་ཕན་བདེ་ཇི་སྙེད་པ། །ཐུབ་བསྟན་ཡིད་བཞིན་ནོར་མཆོག་ལས་བྱུང་བ། །འདི་གཅིག་བསྟན་འཛིན་ཡོངས་ཀྱི་ཐུགས་མཐུན་པས། །སྲོག་ལས་གཅེས་པར་འཛིན་པ་དེ་གང་ཞིག །དམ་པ་དུ་མའི་ཞལ་གྱི་བདུད་རྩིའི་རྒྱུན། །རང་བློས་ངོམས་པར་མྱོང་བའི་ཟེགས་མ་རྣམས། །གང་ལ་དམིགས་པ་བསྟན་པའི་གསོས་སྨན་དུ། །ལྷག་བསམ་དག་པའི་ཡིག་གཟུགས་སྤེལ་བ་འདིས། །རྣམ་དཀར་དགེ་བ་ཆུ་ཐིགས་ཙམ་སྲིད་ན། །བཟང་སྤྱོད་རྒྱ་མཚོའི་དཔལ་དང་ལྷན་ཅིག་ཏུ། །སྨོན་པའི་བྱེ་བྲག་རྡུལ་གྱི་གྲངས་སྙེད་ཀྱིས། །འབྱུང་པོའི་རྟེན་མ་བཞིན་དུ་ཁྱབ་པར་གྱུར། །རྡོ་རྗེ་འཆང་དངོས་དུས་ཀྱི་འགྲོ་ཁམས་དང་། །རྗེས་མཐུན་སྤྲུལ་པའི་རོལ་མཛད་བསྟན་འགྲོའི་གཉེན། །བཤད་སྒྲུབ་རྒྱལ་མཚན་མཐོན་པོ་སྒྲེང་བཞིན་དུ། །འགྱུར་མེད་མཁའ་དང་མཉམ་པར་བཞུགས་གྱུར་ཅིག །རྒྱུད་གཙང་འདུལ་བའི་ཀུན་སྤྱོད་ངུར་སྨྲིག་འཆང་། །ཚུལ་མིན་རྟོག་པ་ཞི་བའི་ལེགས་བཤད་ལ། །ཉིན་མཚན་རབ་དགའི་སྣང་བ་འགོག་མེད་དུ། །ཉམས་སུ་བཞེས་པའི་འདུས་སྡེ་འཕེལ་བར་གྱུར། །ཆོས་ཚུལ་རྒྱང་གྲགས་འབར་བའི་རོལ་མོ་ཡིས། །འགལ་ཟླ་འབྱུང་པོའི་ཚོགས་ཀྱི་མགོ་འཕང་དང་། །བགེགས་ངན་གཉིས་འཐུང་དྲེགས་པའི་སྤོབས་པ་བཅས། །རང་ཚུགས་འཛིན་པ་མེད་པར་ཞིག་གྱུར་ཅིག །བཀྲ་ཤིས་ངོ་མཚར་བྱེ་བ་འབྱུང་བའི་དཔལ། །དཔལ་ལྡན་ཐོས་བསམ་སྒོམ་པ་དགེ་བའི་མཆོག༦ །མཆོག་གསུམ་བསྔགས་པའི་དགེ་ལེགས་ཇི་སྙེད་གང་། །གང་ཡང་ཕྱོགས་དུས་ཀུན་ཏུ་ཤིས་གྱུར་ཅིག །ཅེས་འདི་ནི།༣ གངས་རིའི་ཁྲོད་ཀྱི་རྡོ་རྗེ་འཆང་གཉིས་པའི་ཡང་སྲིད་རིན་པོ་ཆེ། དཔལ་ལྡན་རྫོང་གསར་གྱི་རྒྱལ་བསྟན་ཡོངས་ཀྱི་བདག་པོ་གང་གི་ཞལ་སྔ་ནས་གཞུང་འདི་ལ་འགྲེལ་བ་བྲི་དགོས་ཞེས། རྟེན་གསུམ་གྱིས་མཚོན་པའི་གནང་སྐྱེས་གྱ་ནོམ་པ་བཅས་པས་བསྐུལ་བར་མཛད་ཀྱང་། ངོས་ཉིད་ནི་ན་ཚོད་ཤིན་ཏུ་སྨིན་ཐོག་འབྱུང་འཁྲུགས་མེ་ལྟར་འབར་དབང་པོ་རབ་ཏུ་འཐིབ་ཀྱང་། སྐྱེས་མཆོག་དེའི་བཀའ་ཅིས་ཀྱང་ལྡོག་མ་སྤོབས་པར། སྐྱབས་མགོན་དགེ་དབོན་རིན་པོ་ཆེ་སོགས་དམ་པ་དུ་མའི་ཞལ་གྱི་བདུད་རྩི་ཐོབ་པ་ཐུབ་བསྟན་བསོད་ནམས་ཆོས་འགྲུབ་བམ་བཤད་སྒྲུབ་བསྟན་པའི་རྒྱལ་མཚན་ཞེས་འབོད་པས། ལོ་གྲངས་བདུན་ཅུ་དོན་གསུམ་དུས་སུ་ཡིད་ལ་གང་ཤར་སྤྱི་བརྟོལ་གྱིས་བྲིས་པ། འདི་ལ་འགལ་འཁྲུལ་ནོངས་པ་ཅི་མཆིས་དམ་པ་ཡོངས་ལ་སྙིང་ནས་བཤགས་སོ། ༈ །ༀ་སྭ་སྟི། མཁས་པ་ཆེན་པོ་ཨ་རོ་ཡི། །བསྟན་བཅོས་ཐེག་ཆེན་ཚུལ་འཇུག་གི། །འགྲེལ་པ་མཁས་པ་ཆོས་འགྲུབ་གསུང་། །སྤར་དུ་བསྐྲུན་པའི་དགེ་ཚོགས་ཀྱིས། །རྒྱལ་བསྟན་དར་ཞིང་རྒྱས་པ་དང་། །བདག་གཞན་སྐྱེ་བ་ཐམས་ཅད་དུ། །ཐེག་མཆོག་ལམ་དང་མི་འབྲལ་ཞིང་། །སྤངས་རྟོགས་རྒྱ་མཚོར་བྱང་ཆུབ་ཤོག །ཅེས་པའང་འགྲེལ་བ་བསྐུལ་བ་པོ་རང་ཉིད་ཀྱིས་སྤར་དུ་བསྐྲུན་པའི་སྨོན་ཚིག་ཏུ་སྦྱར་བའོ། །མངྒ་ལཾ། ཤུབྷཾ།། །།

ཟུར་ཆུང་ཤེས་རབ་གྲགས་པའི་ཞལ་གྱི་གདམས་པ་བརྒྱད་ཅུ་པ་བསླབ་གསུམ་རིན་པོ་ཆེའི་གདམས་ངག་གི་མཆན་འགྲེལ་རིན་པོ་ཆེའི་ཕྲེང་བ། འཇམ་དབྱངས་བློ་གྲོས་རྒྱ་མཚོ།

ཟུར་ཆུང་ཤེས་རབ་གྲགས་པའི་ཞལ་གྱི་གདམས་པ་བརྒྱད་ཅུ་པ་བསླབ་གསུམ་རིན་པོ་ཆེའི་གདམས་ངག་གི་མཆན་འགྲེལ་རིན་པོ་ཆེའི་ཕྲེང་བ་བཞུགས་སོ། །སྡེ་སྣོད་སྤྱི་དང་མདོ་སྒྱུ་སེམས་གསུམ་གྱི་སྙིང་པོའི་མན་ངག་གོ། །ན་མོ་རཏྣ་གུ་རུ་བྷྱཿ རྡོ་རྗེ་སེམས་དངོས་བླ་མ་ལ། །བཏུད་ནས་བསླབ་གསུམ་རིན་ཆེན་མཛོད། །ཞལ་གདམས་བརྒྱད་ཅུའི་ས་བཅད་དང་། །གཞུང་ཆེན་རིན་ཆེན་ཕྲེང་བ་སྤེལ། །དེ་ལ་སངས་རྒྱས་ཀྱིས་སེམས་ཅན་གྱི་བློ་རིགས་སྣ་ཚོགས་ལ་དགོངས་ཏེ་ཆོས་ཐེག་པ་སྣ་ཚོགས་གསུངས་པ་ལས། བདེ་གཤེགས་རྒྱལ་པོ་བས་མདོ་རྒྱུད་བལ་བཞིན་གཡེངས། སྡེ་སྣོད་ཞོ་བཞིན་དཀྲོགས། མཁས་པ་རྣམས་ཀྱི་རྒྱ་གད་ཆུ་བཞིན་འཐུངས། གོང་མ་རྣམས་ཀྱི་དགོངས་ཉམས་ལན་ཚྭ་བཞིན་དུ་མྱོང་། སྣང་ཚུལ་འདི་ལ་མེ་ལོང་བཞིན་བལྟས་པས། གང་ལྟར་བྱས་ཀྱང་དུཿཁ་འབའ་ཞིག་ལས་མི་འདུག་པས། འཇིག་རྟེན་བློས་གཏོང་དགོས་པར་མཐོང་། ཕྱི་མའི་དོན་གཅིག་མ་འགྲུབ་ན་མི་ཕན་པས། ཆེ་གྲགས་མཆིལ་སྣབས་བཞིན་དོར་དགོས་པར་མཐོང་། མིའི་ངོ་སྲུང་དཀའ་བས་འཁོར་དང་འདུ་འཛི་སྤངས་ལ་གཅིག་པུར་བསྒོམ་དགོས་པར་མཐོང་བས་བྲག་རྒྱ་བོར་སྒྲུབ་པ་དྲག་པོ་མཛད་དོ། །དེས་ཆོས་ཐམས་ཅད་ཀྱི་ལག་ལེན་ཞལ་གདམས་བརྒྱད་ཅུ་རང་གིས་ཉམས་སུ་མྱོང་བ། སྐྱེ་ཤིའི་འཇིགས་པ་རྣམས་ཀྱི་ཉི་མ་དེ་རིང་གི་ལག་ལེན། བྱམས་པས་སྙིང་གཏམ་རང་གི་ཤ་ལ་བབ་པའི་གྲོས་འདེབས་དང་འདྲ་བ་འདི་རྡོལ་ཆོས་སུ་གསུངས་པའོ། ༈ །འདི་ལ་དོན་ལྔ་སྟེ། ལུང་ལས། དད་པའི་ཀུན་སློང་བརྟན་བྱས་ནས། །ཚུལ་ཁྲིམས་དག་པའི་ཞིང་ས་ལ། །ཏིང་ངེ་འཛིན་གྱི་ས་བོན་གདབ། །ཤེས་རབ་ལོ་ཏོག་སྨིན་པར་བྱེད། །ཞེས་པ་ལྟར། འཇུག་སྒོ་དད་པ་ལ་གདམས་པ། གཞི་ཚུལ་ཁྲིམས་ལ་གདམས་པ། ཐབས་ཏིང་ངེ་འཛིན་ལ་གདམས་པ། ངོ་བོ་ཤེས་རབ་ལ་གདམས་པ། དེ་རྣམས་ཀྱི་མཇུག་བསྡུ་བའོ། །དང་པོ་ལ་ལེའུ་ལྔ་ལས། ལེའུ་དང་པོ་དད་པ་སྔོན་དུ་འགྲོ་དགོས་པ་དང་། དད་པ་མེད་པའི་སྐྱོན་བསྟན་པ་ནི། ༈ །ཆོས་ཐམས་ཅད་ཀྱི་སྔོན་དུ་འགྲོ་བས། དད་པ་མེད་པའི་སྐྱོན་དང་། ཡོད་པའི་ཡོན་ཏན་ཤེས་པར་བྱ་བ་གལ་ཆེ། དེ་ཡང་དད་པའི་ངོ་བོ་ནི། རང་རྒྱུད་དང་རྣམ་དཀར་གྱི་ཆོས་དབྱེར་མི་ཕྱེད་པ། ངེས་ཚིག་།གང་དོན་དུ་གཉེར་བ་དེའི་འདོད་པ། དབྱེ་ན་དངས་འདོད་ཡིད་ཆེས་ཀྱི་དད་པ་གསུམ་མོ། །དེ་ལ་དད་པ་མེད་པའི་སྐྱོན་དྲུག་ནི། དད་པ་མེད་པ་རྒྱ་མཚོའི་གཏིང་གི་ཕ་ཝོང་དང་འདྲ། ཆོས་ཀྱིས་རང་རྒྱུད་ལ་མི་ཕན། མཉན་པ་མེད་པའི་གྲུ་དང་འདྲ། འཁོར་བའི་ཕ་རོལ་དུ་མི་བགྲོད། ལོང་བ་ལྷ་ཁང་དུ་ཕྱིན་པ་དང་འདྲ། །བྱང་ཆུབ་ཀྱི་མྱུ་གུ་མི་འབྱུང་། གཡང་མོ་འཁོར་དོང་དུ་ཚུད་པ་དང་འདྲ། སྡུག་བསྔལ་གྱི་གནས་ནས་མི་ཐར། ལག་རྡུམ་གསེར་གླིང་དུ་ཕྱིན་པ་དང་འདྲའོ་བུ། དལ་འབྱོར་སྟོང་ལོག་ཏུ་འགྲོ་བའི་སྐྱོན་ཡོད་དོ། ། ༈ །ལེའུ་གཉིས་པ་དད་པའི་ཡོན་ཏན་ནི། ༈ །དད་པའི་ཡོན་ཏན་དྲུག་ལ། དད་པ་ཞིང་ས་གཤིན་པོ་དང་འདྲ། དཀར་པོའི་ལོ་ཏོག་ཐམས་ཅད་འཕེལ། དད་པ་ཡིད་བཞིན་ནོར་བུ་དང་འདྲ། རང་གཞན་གྱི་དགོས་འདོད་ཐམས་ཅད་འབྱུང་། དད་པ་ཁྲིམས་ཆགས་པའི་རྒྱལ་པོ་དང་འདྲ། བདག་གཞན་བདེ་སྐྱིད་ལ་འགོད། དད་པ་གགས་ཡོད་པའི་མཁར་ཟིན་པ་དང་། ཉེས་པས་མི་གོས་ཤིང་ཡོན་ཏན་ཐམས་ཅད་སྡུད། དད་པ་ཆུ་བོ་ཆེན་པོའི་གཟིངས་དང་འདྲ། སྐྱེ་རྒ་ན་འཆིའི་སྡུག་བསྔལ་ལས་གྲོལ། དད་པ་འཇིགས་སར་སྐྱེལ་མ་དང་འདྲའོ་བུ། འཁོར་བ་དང་ངན་སོང་གི་འཇིགས་པ་ལས་སྒྲོལ་བར་བྱེད་པའོ། ༈ །ལེའུ་གསུམ་པ། དད་པའི་ཡོན་ཏན་བླང་བྱ་དེ་ཉིད་ཉེར་ལེན་རྒྱུའི་ཚུལ་དུ་གསོས་གདབ་པ་ནི། ༈ །དད་པ་སྐྱེ་བའི་རྒྱུ་རྐྱེན་བཅུ་ལ། ད་ལྟར་བྱེད་སྤྱོད་གྲོགས་དང་བཅས་པ་འདི་ལ་བདེ་བ་མེད་པར་ཤེས་དགོས། ནམ་ཕུགས་སྡུག་བསྔལ་གྱི་རྒྱུ་ཡིན། ལས་རྒྱུ་འབྲས་ལ་ཡིད་ཆེས་དགོས། ནམ་ཡང་བསླུ་བ་མི་སྲིད། འཆི་བ་མི་རྟག་པ་རྗེས་སུ་དྲན་དགོས། ནམ་འཆི་ཆ་མེད། འཁོར་འདབ་ལོངས་སྤྱོད་རྣམས་དང་མི་འགྲོགས་པར་འགྲོ་བ་དྲན་དགོས། རང་འཆི་དུས་ཐམས་ཅད་སྐྱུར་ནས་འགྲོ་བས་ཕན་མེད། ཕྱི་མའི་སྐྱེ་གནས་ལ་འདམ་དབང་མེད་པ་དྲན་དགོས། ལས་དབང་གིས་གར་འགྲོ་ངེས་པ་མེད། མི་ལུས་གཙང་མ་འདི་ལྟ་བུ་ཐོབ་པར་དཀའ་བ་དྲན་དགོས། དལ་འབྱོར་གྱི་ངོ་བོ་དང་རྒྱུ་རྐྱེན་ཚོགས་པ་དཀའ། འཁོར་བ་ཐམས་ཅད་དུཿཁ་འདུག་པ་དྲན་དགོས། ནམ་ཡང་སྡུག་བསྔལ་གསུམ་ལས་མ་འདས། དཀོན་མཆོག་གསུམ་གྱི་ཆེ་བའི་ཡོན་ཏན་མཐོང་དགོས། གཏན་དུ་འཁོར་བའི་སྡུག་བསྔལ་ལས་སྐྱོབ་ངེས། དམ་པ་རྣམས་ཀྱི་མཛད་སྤྱོད་མཐོང་དགོས། སྐུ་གསུང་ཐུགས་ཀྱི་མཛད་པ་ལ་ཉེས་སྐྱོན་གྱི་དྲི་མ་མེད། གྲོགས་བཟང་པོ་དགེ་བ་ལ་གནས་པ་དང་འགྲོགས་དགོས་བུ། དེས་རང་ཉིད་ལ་བཟང་སྤྱོད་ཤུགས་ཀྱིས་འགོས་པས་དད་སོགས་དཀར་ཆོས་རྣམས་གོང་འཕེལ་དུ་འགྱུར་རོ། ༈ །ལེའུ་བཞི་པ། ཞེན་ལོག་གི་ཆོས་བཅུ་གསུམ་གྱིས་རང་གིས་རང་ལ་ཤག་གདབ་པ་ནི། ༈ །ཞེན་ལོག་བཅུ་གསུམ་ལ། ཕ་ཡུལ་རྒྱབ་ཏུ་མ་བསྐྱུར་ན་ང་རྒྱལ་གྱི་བདུད་མི་ཆོམ། མི་ཡུལ་དང་དུ་ལོངས། ཁྱིམ་གྱི་བྱ་བ་མ་བཏང་ན་ཆོས་བྱ་བའི་སྐབས་མི་རྙེད། ཁྱིམ་གྱི་སོ་ཚིས་ཞོག །དད་པ་ནམ་སྐྱེས་སུ་མ་ཐོན་ན་བྱ་བའི་ལས་ལ་ཟིན་པ་མི་འོང་། བློ་ཐག་རང་གིས་ཆོད། རང་ལ་དད་པ་མེད་པའི་བསྙད་ཁ་གཞན་ལ་མ་བསྒོ། སྣ་ཐག་མགོ་ལ་དཀྲིས། རང་གི་ཡོ་བྱད་རླུང་ལ་མ་བསྐུར་བས་མི་ཆོས་ཀྱི་ཁོ་ཐག་མི་ཆོད། ཅི་ཡོད་བླ་མ་དང་དཀོན་མཆོག་གི་ཕྱོགས་སུ་ཕུལ། ཉེ་འབྲེལ་དང་མ་སྲིང་ན་ཆགས་སྡང་གི་རྒྱུན་མི་ཆད། རྟག་ཏུ་དབེན་པ་བརྟེན། དུས་ད་རེས་མ་བྱས་ན་ཕྱི་མ་གར་འགྲོ་ཆ་མེད། མཐུན་རྐྱེན་འཛོམ་དུས་འདིར་འཁོར་བ་ལས་ཅི་ཐར་བྱ། ད་ལྟ་བྱར་ཡོད་པ་མི་བྱེད་པར་ཕྱི་མ་ལ་སྨོན་ལམ་འདེབས་པ་ཁ་སྐད་ཡིན། རང་ལ་ནུས་པ་ཡོད་བཞིན་མི་བྱེད་ལ་རང་བསླུས། རང་ལ་བརྫུན་མི་ཟེར་ན་དམ་པའི་ཆོས་ཀྱིས། རང་སེམས་དཔང་དུ་ཚུགས། ནམ་ཡང་འབོར་བ་ལ་ད་ལྟ་བོར་ན་དོན་ཅན་འགྲོ །ལུས་དང་ལོངས་སྤྱོད་ཅི་ཡོད་ཆོས་ཕྱོགས་སུ་ཐོངས། མི་འཁྱོངས་ངེས་པའི་སྲིད་པར་ཡོང་མ་བསྐྱངས་པར་འཁྱོང་ངེས་པའི་ཉམས་མྱོང་སྐྱོངས། ཆོས་ཕྱིར་དཀའ་ཐུབ་བཟོད་ཐུབ་པར་གྱིས། ཡོང་མི་ཡོང་ཆ་མེད་པའི་སང་ཕོད་ཀྱི་ཚིས་མ་བྱེད་ངེས་པའི། ལོང་མེད་ཀྱི་བློ་སྣ་བསྟུང་དགོས། ཉམས་སུ་ལེན་པ་ལ་ལྟོ་རྒྱབ་ཞར་ལ་འབྱུང་གིས་རེ་དོགས་མ་ཆེ་བུ། ཆོས་བྱེད་པ་ལ་ཚེ་འདི་བློས་ཐོང་བ་གལ་ཆེའོ། ༈ །ལེའུ་ལྔ་པ། གལ་ཆེ་བ་བཅུ་གསུམ་གྱི་སྒོ་ནས་ལམ་ཕྱིན་ཅི་མ་ལོག་པར་བསྟན་པ་ནི། ༧ གལ་ཆེ་བ་བཅུ་གསུམ་ལ། རྟོགས་པ་ནམ་མཁའ་ལྟར་ཕྱོགས་རིས་མེད་པ། ཉམས་མྱོང་རྒྱ་མཚོ་ལྟར་བྲི་གང་མེད་པ། ཐུགས་རྗེ་ཉི་མ་ལྟར་གསལ་འགྲིབ་མེད་པའི། ཡོན་ཏན་གསུམ་དང་ལྡན་པའི་བླ་མ་ལ་གུས་པར་བྱ་བ་གལ་ཆེ། ལམ་གྱི་རྩ་བ་ཡིན་པས་མཉེས་པ་གསུམ་གྱི་སྒོ་ནས་བསྟེན། མ་གུས་པའི་ལས་རྨི་ལམ་དུའང་མི་བྱ། སྣོད་དང་ལྡན་པའི་སློབ་མ་ལ་གདམས་ངག་སྦྱིན་པ་གལ་ཆེ། དེས་བརྒྱུད་པ་འཛིན་ཅིང་རང་གཞན་བསྟན་འགྲོའི་དོན་འབྱུང་། ཆོས་ལ་དཔེ་མཁྱུད་མི་བྱ། ཕྱི་ནང་གི་དངོས་པོ་ལ་ཆགས་ཞེན་བསྐྱུར་བ་གལ་ཆེ། འདོད་ཡོན་ལྔ་ལ་ཆགས་པའི་ཉེས་དམིགས་དྲན་པར་བྱ། གདམས་པ་སྤྱོད་པའི་ཕྱིར་ཡུན་བསྲིང་བ་གལ་ཆེ། ཆོས་ལ་ངང་ཐུང་མི་བྱ། བླ་མ་དང་འགྲོགས་ཡུན་རིང་དགོས། གཡག་འགྲོགས་མི་བྱ། ལྷ་དཀོན་མཆོག་ལ་མོས་གུས་བསྐྱེད་པ་གལ་ཆེ། མོས་གུས་མེད་ན་བྱིན་རླབས་མི་འཇུག །དུས་རྒྱུན་སྐྱབས་འགྲོ་ལ་འབད། དགེ་བའི་ཆོས་ལ་བརྩོན་འགྲུས་བསྐྱེད་པ་གལ་ཆེ། དཔེ་སྒེག་མོའི་མགོ་ལ་མེ་ཤོར་བ་ལྟར་བྱ། ལེ་ལོའི་དབང་དུ་མི་གཏོང་། སྡིག་པ་མི་དགེ་བའི་ཆོས་ལ་འཛེམ་པ་གལ་ཆེ། རྣམ་སྨིན་གྱི་འབྲས་བུ་བསམ་སྟེ་མིག་ཏུ་རྡུལ་སྤང་བ་ལྟར་བྱ། རྣམ་པར་མི་རྟོག་པ་རྒྱུད་ལ་བསྟེན་པ་གལ་ཆེ། དུག་ལྔའི་རྣམ་རྟོག་རང་སར་ཞི་བར་བྱ། རྗེས་ལ་སྙིང་རྗེ་བྱང་ཆུབ་ཀྱི་སེམས་བསྟེན་པ་གལ་ཆེ། ཐེག་ཆེན་ལམ་གྱི་རྩ་བ་ཡ ིན་པས་ནམ་ཡང་མེད་དུ་མི་རུང་། བདག་བས་གཞན་གཅེས་པ་ལ་བསླབ། ཕྱིན་ཅི་མ་ལོག་པའི་གདམས་ངག་ལ་ངེས་ཤེས་སྐྱེས་པ་གལ་ཆེ། ཐེ་ཚོམ་མེད་ན་དངོས་གྲུབ་མྱུར་དུ་འབྱུང་། སྡོམ་དང་དམ་ཚིག་ལ་གནས་པ་གལ་ཆེ། རང་རྒྱུད་སྡོམ་གསུམ་གྱི་ཉེས་ལྟུང་གིས་མ་གོས་པར་བྱ། སེམས་སྐྱེ་མེད་དུ་གཏན་ལ་དབབ་པ་གལ་ཆེ། སྣང་སེམས་ཆོས་ཉིད་ཀྱི་རོལ་པས་སེམས་ཉིད་སྐྱེ་མེད་ནམ་མཁའ་ལྟར་ཐག་བཅད། གསང་བའི་མན་ངག་སྣོད་ངན་ལ་མི་སྟེར་བ་གལ་ཆེའོ་བུ། དེས་གསང་བ་འཁྱལ་ཞིང་སྒྲོ་སྐུར་གྱི་རྒྱུར་འགྱུར་བས་གཟབ་སྟེ་གདུལ་བྱའི་སྣོད་བརྟག་པ་གཅེས་སོ། །ཞལ་གྱི་གདམས་པ་བརྒྱད་ཅུ་པ་ལས། འཇུག་སྒོ་དད་པ་བརྟན་པོ་ལ་གདམས་པའི་སྐབས་ཏེ་དང་པོའོ། ༈ །རྩ་བའི་ས་བཅད་གཉིས་པ། རྟེན་རྣམ་པར་དག་པ་ལྷག་པ་ཚུལ་ཁྲིམས་ཀྱི་བསླབ་པ་རིན་པོ་ཆེ་ལ་གདམས་པ་ལ། ལེའུ་དྲུག་པ། ཆོས་བྱ་བའི་དུས་ལ་བབས་པར་གདམས་པ་ནི། ༧ ཡིན་པ་བཅུ་ལ། སངས་རྒྱས་ཀྱི་བསྟན་པ་གནས་པ་དང་དད་པ་དུས་འཛོམ་ན་ཚེ་སྔ་མ་ལ་བསོད་ནམས་བསགས་པ་ཡིན། ད་རེས་ལན་གཅིག་རྙེད་པའི་དལ་འབྱོར་འདི་སྟོང་ཟད་དུ་མ་གཏོང་། རང་ཆོས་ལ་མོས་པ་དང་སློབ་དཔོན་གདམས་ངག་ཅན་དང་འཕྲད་ན་ལོང་བས་རིན་པོ་ཆེ་རྙེད་པ་ཡིན། ཕྱིས་ཡང་ཡང་རྙེད་དཀའ་བས་དཔྲལ་བའི་མིག་ལྟར་འབྲལ་མེད་ཡུན་དུ་བརྟེན། སྐྱོན་མེད་པའི་ལུས་ལ་དད་བརྩོན་ཤེས་རབ་འཛོམ་པ་ཡོན་ཏན་སྦྱང་བའི་ལས་འཕྲོ་ཡིན། དེ་གསུམ་གོང་འཕེལ་གྱི་ཐབས་ལ་བརྩོན། རང་འཁོར་བར་སྐྱེས་པ་དང་གཉེན་འབྲེལ་རྒྱ་གད་ཟེར་བ་འཛོམ་ན་ཆོས་ལ་བསྐུལ་མ་འདེབས་པ་ཡིན། བློ་ཐག་རང་གིས་ཆོད་ལ་ཆོས་ཀྱིས། རང་ལ་ཡོ་བྱད་ཡོད་པ་དང་གཏོང་ལ་དགའ་བ་དང་སློང་མོ་པ་དུས་འཛོམ་ན་སྦྱིན་པ་རྫོགས་པ་ཡིན། སེར་སྣའི་མདུད་པས་མ་འཆིང་ཕྱོགས་མེད་དུ་ཐོངས། རང་ཉམས་སུ་ལེན་པའི་དུས་སུ་དུཿཁའི་མཚོ་རྡོལ་ན་སྡིག་པ་འདག་པ་ཡིན། དགའ་བ་བསྒོམ། ལོག་ལྟ་སྤོངས། ཆོས་བྱེད་ལ་མ་ཉེས་པའི་དགྲ་བྱུང་ན་བཟོད་པའི་ལམ་ལ་འགོད་པ་ཡིན། འཁོན་འཛིན་སྤོང་ལ་བཟོད་པའི་ཕན་ཡོན་དྲན་པར་བྱ། རང་ལ་དད་པ་ཕུལ་དུ་བྱུང་བ་དང་གདམས་པ་བཏབ་པ་དུས་མཉམ་ན་ལས་ཀྱི་མཐའ་རྫོགས་པ་ཡིན། ཕྱིས་འཁོར་བར་མི་སྐྱེ། ཆོས་ཐམས་ཅད་ཆགས་སྡང་གི་གཉེན་པོར་འགྲོ་བར་བྱ། རང་ཤི་བས་འཇིགས་པ་དང་གཞན་ཤི་བ་དུས་འཛོམས་ན་འཁོར་བ་ལས་བློ་ལྡོག་པའི་དུས་ཡིན། ཚེ་འདིའི་བདེ་སྐྱིད་ལ་མ་ཆགས་པར་མཛོད། སྔོན་ལ་ཚེ་འདིའི་བྱ་བ་བསྒྲུབས་ལ་དེ་ནས་ཆོས་གཅིག་བྱ་མནོ་ན་བདུད་ཀྱི་བཤོལ་ཐེབ་པ་ཡིན་ནོ་བུ། བདུད་དབང་དུ་མ་སོང་བ་གལ་ཆེའོ། ༈ །ལེའུ་བདུན་པ། གདམས་པ་བཅུ་གསུམ་གྱི་གདམས་ངག་ལག་ལེན་གདམས་པ་ནི། གདམས་པ་བཅུ་གསུམ་ལ། བསྒྲུབ་པའི་བརྩོན་འགྲུས་ཀྱི་ལྕག་ཏུ་བདག་གཞན་གྱི་འཆི་བ་ལ་བརྟག །ནམ་མཆི་ངེས་པ་མེད་པས་ཚེ་འདི་ཡི་བྱ་བཞག་ཐམས་ཅད་བོར་ཐོངས། གུས་པ་ཁྱད་པར་ཅན་སྐྱེ་བར་འདོད་པས་བླ་མའི་ཕྱི་ནང་གི་ཡོན་ཏན་ལ་བརྟག །སྐྱོན་རྟོག་སྤོངས། སྐྱོན་དུ་སྣང་བ་དེ་རང་སྣང་མ་དག་པས་ལན། སྤྱོད་པ་ཀུན་དང་མཐུན་པར་འདོད་པས་གཞན་གྱི་རྩོལ་བ་མི་དགག །ཐེག་པ་ཐམས་ཅད་རང་ས་བདེན་པས་ཆོས་དང་གྲུབ་མཐའི་ཁ་འཛིན་ཆེ། བླ་མའི་ཐུགས་ཟིན་པ་མི་འགྱུར་བར་བྱ་བའི་ཕྱིར་ཉམས་སུ་ལེན་པ་དྲག་ཏུ་བྱ། ཡོན་ཏན་མ་ལུས་པ་རང་ལ་འོང་། དངོས་གྲུབ་མྱུར་དུ་ཐོབ་པར་འདོད་ན་སྡོམ་པ་དམ་ཚིག་མ་ཉམས་པར་བསྲུང་། བསྲུང་མཚམས་མཐའ་དག་མི་དགེ་བཅུ་དང་དུག་ལྔ་རང་མཚན་ལ་སློང་བར་འདུ། ཆུ་བོ་བཞིན་བཅད་པར་འདོད་པས་ཀུན་གཞི་སྐྱེ་མེད་དུ་རྩད་བཅད། ཀུན་གཞི་སྐྱེ་མེད་དུ་ཤེས་པར་སྐྱེ་ཤིའི་ཁ་མི་བརྒྱུད་དོ། །བྱང་ཆུབ་སྒྲུབ་པ་ལ་བར་ཆད་མེད་པར་འདོད་པས་ཚེ་འདིའི་གཡེང་བ་རྒྱབ་ཏུ་བོར། མི་ནུས་པའི་གཞན་དོན་བྱེད་པའང་གཡེང་བ་ཡིན། རང་མ་སྨིན་པར་གཞན་དོན་མ་བྱེད། གཞན་དོན་འབད་མེད་དུ་འགྲུབ་པར་འདོད་པས་ཚད་མེད་བཞི་བསྒོམ། བྱང་ཆུབ་ཀྱི་སེམས་འབྱོང་ན་ཅི་བྱེད་གཞན་དོན་ལས་མི་འདའ། ཕྱི་མ་ངན་སོང་གསུམ་ལ་འཚེར་ན་མི་དགེ་བ་བཅུ་ལ་འཛེམ། རྟག་ཏུ་བག་ཡོད་པར་བྱ། འདི་དང་ཕྱི་མར་བདེ་བ་འདོད་ན་དགེ་བ་བཅུ་ལ་འབད། ད་ལྟ་འདེམ་ཁ་ཡོད་དུས་བླང་དོར་གོ་མ་འཛོལ། ཆོས་ལ་བློ་འཇུག་པར་འདོད་པས་སྡུག་བསྔལ་གྱི་དཀའ་བ་ཉམས་སུ་བླངས། ངལ་བ་དོན་མེད་ལ་བསམ་ནས་སྙིང་ལ་རུས་པ་བསྐྱེད། སྐྱིད་དེ་བའི་ཆོས་དེ་སུས་ཀྱང་མ་བྱུང་བ་ཞིག་ཡིན། འཁོར་བ་ལ་བློ་ལྡོག་པར་འདོད་པས་བླ་ན་མེད་པའི་བྱང་ཆུབ་བཙལ། ཐར་བ་བྱང་ཆུབ་ཀྱི་ཕན་ཡོན་ཤེས་དགོས། འདི་ཐེག་པ་གསུམ་ཆར་ལ་གལ་ཚེ། འབྲས་བུ་སྐུ་གསུམ་ཐོབ་པར་འདོད་པས་ཚོགས་གཉིས་ཟུང་དུ་འཇུག་གོ་བུ། དེས་སྐུ་གསུམ་ལ་བསྒྲིབས་པའི་དྲི་མ་སེལ་བའི་རྒྱུ་བྱེད་དོ། ༈ །ལེའུ་བརྒྱད་པ། དགོས་མེད་ལྔས་ཆོས་མིན་ངོས་བཟུང་བ་སྟོན་པ་ནི། དགོས་མེད་ལྔ་ལ། འཁོར་བ་ལ་བློ་མ་ལོག་པའི་ཆོས་ལ་མོས་པ་སྐད་བྱས་པ་ལ་དགོས་པ་མེད། ཅི་བྱེད་ཚེ་འདིར་སོང་ནས་ཆོས་མི་འགྲུབ། ཆོས་རྣལ་མ་བྱེད་པ་ལ་འཁོར་བའི་སྣང་ཞེན་ལྡོག་དགོས། དངོས་པོ་ལ་སྣང་ཞེན་པ་མ་ལོག་པའི་སྟོང་ཉིད་བསྒོམས་པ་ལ་དགོས་པ་མེད། སྟོང་ཉིད་བསྒོམས་པ་དངོས་འཛིན་གྱི་ཞེན་པ་གྲོལ་ཕྱིར་ཡིན། དེ་མ་གྲོལ་ན་སྟོང་ཉིད་ཚིག་ཙམ་མོ། །འདོད་པ་ལ་བློ་མ་ལོག་པའི་བསྒོམ་བྱས་པ་ལ་དགོས་པ་མེད། མཐར་སྒོམ་ཆེན་གྲོང་ཆོག་ལ་གཡེང་སྟེ་ཐ་མལ་དུ་འཆི་ཉེན་ཡོད། རང་དོན་དང་མི་ལྡན་པའི་ཁ་ཚིག་བཟང་པོ་ལ་དགོས་པ་མེད། ལྟ་བ་ཁ་ཁྱེར་གྱིས་བསླུས་པ་མང་པས་ཡིན་ལུགས་གནད་ཐོག་ཏུ་ཕོབས། མོས་གུས་མེད་པ་ལ་གདམས་ངག་བཏབ་པ་ལ་དགོས་པ་མེད་དོ་བུ། ཉམས་རྟོགས་ཡོན་ཏན་གང་སྐྱེས་བླ་མའི་བྱིན་རླབས་ལ་རག་ལས་མོས་གུས་མེད་པ་ལ་བྱིན་རླབས་འཇུག་པའི་གནས་མེད་དོ། ༈ །ལེའུ་དགུ་པ། དགོས་ཡོད་ལྔ་ཡིས་སྙིང་རུས་དང་གོ་ཆ་ཆེན་པོས་ཉམས་སུ་བླང་ལུགས་བསྟན་པ་ནི། དགོས་པ་ཡོད་པ་ལྔ་ལ། བླ་མ་ལ་མོས་གུས་དྲག་པོ་བྱས་ན། བརྒྱུད་པའི་བྱིན་རླབས་ཤུགས་ལ་འགོ་བའི་དགོས་པ་ཡོད། གསང་སྔགས་བྱ་བ་མོས་གུས་དང་བྱིན་རླབས་ཀྱི་ལམ་པ་ཡིན། རྩ་བརྒྱུད་ཀྱི་བླ་མ་རྣམས་ངོ་བོ་གཅིག །སངས་རྒྱས་ཆོས་སྐུར་བལྟ་དགོས། དེས་སངས་རྒྱས་ཐམས་ཅད་ཀྱི་བྱིན་རླབས་འཇུག་པ་ཡིན། ཚོགས་ཁྱད་པར་ཅན་བསགས་ན་ཅི་བསམ་པ་ལས་སུ་རུང་བའི་གོས་པ་ཡོད། བསོད་ནམས་ལྡན་པའི་མི་ཡི་བསམ་པ་འགྲུབ་བྱ་བ་ཡིན། དུས་རྒྱུན་དུ་སེམས་བསྐྱེད་ཀྱིས་ཟིན་པའི་ཡན་ལག་བདུན་པ་འབུལ། དེས་སེམས་བཟང་པོ་སྐྱེ་བའི་དགོས་པ་ཡོད། བསམ་པ་ལས་སུ་རུང་ན་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བའི་དགོས་པ་ཡོད། ལུས་སེམས་ལས་རུང་གི་ཤིན་སྦྱང་བསྒོམ་པ་གལ་ཆེ། ཏིང་འཛིན་ཁྱད་པར་ཅན་རྒྱུད་ལ་སྐྱེ་ན་ཉོན་མོངས་པ་ཟིལ་གྱིས་གནོན་པའི་དགོས་པ་ཡོད། ཞི་གནས་མགོ་གནོན་ཞིང་ལྷག་མཐོང་གིས་ས་བོན་དྲུང་ནས་འབྱིན་ནོ། །ཉོན་མོངས་མེད་ན་བྱང་ཆུབ་མྱུར་དུ་ཐོབ་པའི་དགོས་པ་ཡོད་དོ་བུ། རང་སེམས་སྒྲིབ་པ་དང་བྲལ་བ་དེ་ལས་བྱང་ཆུབ་གཞན་ན་བཙལ་དུ་མེད་དོ། ༈ །ལེའུ་བཅུ་པ། ཆོས་འདྲ་ཆོས་མིན་ངོས་བཟུང་བ་ནི། བརྫུན་དུ་འགྲོ་བ་ལྔ་ལ། འཇིག་རྟེན་ལ་མངོན་པར་དགའ་བར་བྱས་ནས་སྐྱེ་ཤིས་འཇིགས་ཟེར་བ་ཡང་བརྫུན་ཡིན། ཆགས་བྲལ་མངོན་དུ་མ་བྱས་པར་སྐྱེ་ཤི་ལས་གྲོལ་བའི་སྐབས་མེད། སྐྱེ་ཤིས་འཇིགས་པ་མེད་པས་སྐྱབས་འགྲོ་བྱེད་པ་ཡང་བརྫུན་འགྲོ །ཚིག་ཙམ་གྱིས་ཕན་ཐོག །འདོད་པ་མ་སྤངས་པར་སྒོམ་ཆེན་ཡིན་ཟེར་ཡང་བརྫུན་དུ་འགྲོ །ཕྱི་ནང་གང་ལའང་ཆགས་ཤིང་ཞེན་པ་དེ་འཆིངས་བའི་གཟེབ་ཡིན། གསེར་སྒྲོག་དང་ཐག་སྒྲོག་འཆིང་བྱེད་དུ་འདྲ། ལས་རྒྱུ་འབྲས་མི་ཤེས་པའི་ལྟ་བ་རྟོགས་ཟེར་བ་ཡང་བརྫུན་དུ་འགྲོ །ཚིག་ཙམ་གྱིས་ཕན་མི་ཐོག །འདོད་པ་མ་སྤངས་པར་སྒོམ་ཆེན་ཡིན་ཟེར་ཡང་མ་སྤངས་པར་སངས་རྒྱས་ཡིན་ཟེར་བའང་བརྫུན་དུ་འགྲོའོ་བུ། རྒྱུ་ཉོན་མོངས་དུག་ལྔ་མ་སྤངས་པར་འབྲས་བུ་སྲིད་པའི་གཡང་ས་མི་ཁེགས་པས། གཉེན་པོ་བསླབ་གསུམ་ལ་བརྩོན་པར་བྱའོ། ༈ །ལེའུ་བཅུ་གཅིག་པ། སྙིང་རུས་དང་གོ་ཆ་ཐོག་བརྫིས་ཀྱི་ངང་བསྲིངས་ལ་ཉམས་སུ་བླང་བ་ནི། བདེན་པ་ལྔ་ལ། མ་བསྒོམ་སངས་རྒྱས་མི་འོང་ཟེར་བ་བདེན། རང་གིས་ལམ་ཉམས་སུ་མ་བླང་ན་སངས་རྒྱས་ཀྱི་ཕྱག་གིས་བཟུང་ཡང་མི་ཕན། ཞིང་འདི་ཡང་རྣམ་སྣང་གང ས་ཆེན་མཚོའི་ཕྱག་མཐིལ་ན་གནས་པ་ཡིན། དམ་ཚིག་མ་ཉམས་ན་དམྱལ་བར་མི་འགྲོ་ཟེར་བ་བདེན། རྟག་ཏུ་རང་སེམས་དཔང་དུ་བཙུག་ནས་དྲན་ཤེས་བཞིན་དང་མ་བྲལ་བར་བྱ། ཐབས་ཤེས་རབ་ཡ་བྲལ་ན་ཉན་ཐོས་སུ་ལྷུང་ཟེར་བ་བདེན། ཐེག་ཆེན་ལ་སློབ་པས་ཐབས་ཤེས་ཡ་མ་བྲལ་བར་བྱ། ལམ་ཕྱིན་དྲུག་ལ་སློབ། ལྟ་སྤྱོད་ཟུང་འཇུག་མ་ཤེས་ན་ལམ་ལོག་ཟེར་བ་བདེན། ལྟ་བའི་ཕྱོགས་སུ་སྤྱོད་པ་དང་སྤྱོད་པའི་ཕྱོགས་སུ་ལྟ་བ་མ་ཤོར་བ་གཅེས། སེམས་རང་བཞིན་གྱིས་རྣམ་པར་དག་པ་གསལ་བ་ལ་སྐྱོན་མ་དགོས་ཟེར་བ་བདེན་ནོ། །སེམས་ཉིད་རང་བཞིན་གྱིས་འོད་གསལ་བ་ལ་གློ་བུར་གྱི་དྲི་མས་ནམ་ཡང་མ་གོས་པས་རང་བཞིན་རྣམ་དག་ཆེན་པོར་གྲུབ་བོ། །དེའི་ཕྱིར་ལམ་ལ་འབད་པ་དོན་ཡོད་པ་ཡིན་གྱི །གལ་ཏེ་རང་བཞིན་གྱིས་མ་དག་ན་དེ་དག་པར་བསྒྱུར་དུ་མེད་པས་ལམ་ལ་འབད་པ་དོན་མེད་དུ་འགྱུར་རོ། །ལེའུ་བཅུ་གཉིས་པ། བྱས་ཀྱང་འབྲས་བུ་ལོག་པ་ནི། དོན་མེད་ལྔ་ལ། བཅུད་དང་མི་ལྡན་པའི་སློབ་དཔོན་བསྟེན་པ་ལ་དོན་མེད། ཐོག་མར་མཚན་ཉིད་བརྟག་པ་གལ་ཆེ། སྣོད་དང་མི་ལྡན་པའི་སློབ་བུ་བསྟེན་པ་དོན་མེད། ལུས་དང་གྲིབ་མ་བཞིན་འགྲོགས་ཀྱང་གདམགས་ངག་སྦྱིན་པར་མི་བྱ། རང་གཞན་གཉིས་ཀ་ལ་ཕན་མི་ཐོག །དམ་ཚིག་མི་བསྲུང་བའི་མི་དང་འབྲེལ་བ་བྱས་པ་དོན་མེད། རང་ལ་ཉམས་པའི་ཉེས་པ་འགོ་ཞིང་དེ་ལའང་མི་ཕན། སྡིག་དང་འདྲེས་པའི་དགེ་བ་བྱས་པ་ལ་དོན་མེད། སྦྱོར་རྗེས་སྡིག་དང་མ་འདྲེས་པར་བྱ་དགོས། འདྲེས་མའི་ལས་ཀྱིས་བདེ་སྡུག་སོ་སོར་སྨིན་པ་ལ་ཆོས་ཉིད་ཡིན། ཆོས་བཞིན་མི་བྱེད་ན་ཆོས་ཤེས་པ་དོན་མེད་དོ་བུ། དེ་བས་གང་ཤེས་རང་གི་རྒྱུད་ཐོག་ཏུ་དྲིལ་ནས་ཉམས་སུ་ལེན་པ་གལ་ཆེའོ། ༈ །ལེའུ་བཅུ་གསུམ་པ། གདམས་ངག་སྙིང་རུས་དང་གོ་ཆ་དང་ཐོག་བརྫིས་ཀྱིས་ངང་བསྲིངས་ལ་ཉམས་སུ་བླང་བ་ནི། གདམས་པ་བརྒྱད་ལ། བསྒྲུབ་པ་ཉམས་སུ་ལེན་ན་ཆགས་སྡང་གི་ལ་སྒྲོལ། ཐོག་མར་ཆོས་བརྒྱད་ཆམ་ལ་ཕོབ། ཐོས་པ་གཞུང་བཞིན་བྱེད་ན་བཟོད་པ་གོ་ཆ་གྱོན། ཕྱི་དཀའ་སྤྱད་དང་ནང་ཟབ་མོའི་དོན་ལ་མི་སྐྲག་པའི་བཟོད་པ་ལ་ནན་ཏན་བྱ། གནས་དང་དགོན་པར་སྡོད་ན་ཡིད་ཟས་ནོར་ལ་མ་འཇུག །འདོད་ཆུང་ཆོག་ཤེས་བརྟེན་པ་གལ་ཆེ། ཟབ་མོའི་ཆོས་འདོད་ན་མཁས་པའི་སློབ་དཔོན་བསྟེན། གོ་ལོ་ཐོས་ལོར་མ་བཞག་པར་གདམགས་ངག་ལ་སྒྲོ་འདོགས་ཆོད་པར་མཛོད། མཁས་ངེས་པའི་སློབ་དཔོན་དང་འཕྲད་ན་ཐུགས་ཅི་ལྡོག་མ་བྱེད་པར་ཐུགས་ཅི་ཟིན་གྱིས། མཁས་པའི་ཡོན་ཏན་ཐམས་ཅད་དེ་ལས་བྱུང་ངོ་། །སྤྱོད་ལམ་ཀུན་ཏུ་གཟོབ། ཆོས་འགག་པ་བབ་ན་མི་ཕོད་པ་བརྫིས། ལུས་སྲོག་ཐང་ལ་བོར་ནས་བླ་མའི་ཞབས་ཏོག་དང་རོ་སྙོམས་ཀྱི་སྤྱོད་པ་སྤྱད། གཉེན་གྱིས་སྐྱུག་ལོག་ན་སེམས་ཀྱི་འཁྲི་བ་ཆོད། དགྲ་གཉེན་ངོ་མཉམ་ཆགས་སྡང་རང་གྲོལ་ལ་ཐོངས། བློའི་སྟེང་ཤོར་ན་ཤེས་པ་བཅུད་པ་བོར་ཅིག་བུ། བློ་ཡུལ་ཐོག་ཏུ་ཤོར་ན་ཉོན་མོངས་སྐྱེ་བས་དད་བརྩོན་དང་དྲན་ཤེས་ཀྱི་ཐག་པས་བཟུང་། སྙིང་རུས་དང་སྡུག་བསྲན་བསྐྱེད། གཉེན་པོ་ཡེ་ཤེས་ཀྱིས་འཁྲུལ་རྟོག་རང་གྲོལ་གཏོང་བ་གནད་ཡིན་ནོ། ༈ །ལེའུ་བཅུ་བཞི་པ། སྒྲུབ་པ་ཉམས་སུ་ལེན་པོའི་འཕྲལ་གནས་སྐབས་གང་དུ་གང་དགོས་སུ་གཟུད་པར་བསྟན་པ་ནི། ཞལ་ཆོས་སུམ་ཅུ་རྩ་བཞི་ལ། །ཕྱི་འདུ་འཛིའི་གཡེང་བས་དགེ་སྦྱོར་གཡེལ། ནང་རྣམ་རྟོག་གི་གཡེང་བས་ཉོན་མོངས་ལྡང་། བར་མཐུ་ཆེ་བྱིན་རླབས་ཀྱི་གཡེང་བས་རང་སྲོག་ལ་བརྒོལ་བའི་ཕྱིར། བར་ཆད་འབྱུང་གིས་གཡེང་བ་ཐོངས། །འཆི་བ་དུག་གི་ཐུག་ན་ཕན་མེད་པས། སྡོད་ལོང་མེད་ཀྱིས་མྱུར་དུ་སྒོམས། །དགྲ་འདུལ་གཉེན་སྐྱོང་སོགས་ཚེ་འདིའི། སོ་ཚིས་མ་མཛད་ཤི་ཚིས་མཛོད། །དཔེ་གཞོན་ནུ་མའི་གདུ་བུ་དང་འདྲ། དོན་གཡོག་ལ་མ་དགའ་གཅིག་པུར་སྒོམས། །ཁྱད་པར་དུ་སྡིག་གྲོགས་སྤོངས། གཉེན་འདུན་ལ་ཆགས་པ་རང་སེམས་ཀྱི། འཁྲུལ་སྣང་ཡིན་གྱིས་བོར་ལ་ཐོངས། །ལུས་བྱ་བྱེད་ངག་སྨྲ་བརྗོད། སེམས་རྣམ་རྟོག་གི །འབྱུང་འཇུག་མ་མང་རྐྱེན་ངན་འབྱུང་། ངོ་སྲུང་མཐུན་འཇུག་སོགས་མི་དགོས་པས། མི་དང་མི་འགྲོག་བདེ་བ་ཆེ། །དེས་ཆགས་སྡང་མི་འབྱུང་བས། མི་དང་མ་འགྲོགས་ཆགས་སྡང་མེད། སེམས་ཅན་རྣམས་ནི་འདོད་པས་ཆོག་མི་ཤེས། །ཐམས་ཅད་སངས་རྒྱས་ཀྱིས་ཀྱང་། མགུ་བ་མེད་པས་ངོ་སྲུང་སྤོངས། །ཆགས་སྡང་གི་རྟོགས་པ་མེད་པའི་དཔེ། ཤི་བའི་རོ་བཞིན་གཅིག་པུར་སྡོད། །ཆགས་སྡང་གི་གནས་སྤོངས་ལ་ཆགས་མེད་ཞེན་མེད་ཀྱིས། ཚེར་ཁུང་མ་འགྲོ་བདེ་སར་སྡོད། །དེ་སྔ་ཆགས་སྡང་གི་ཕྱོགས་སུ་ལས་སྲོག་བཏང་བ། སྔ་མས་ཆོག་གི་ད་མ་གཏོང་། །ད་ལུས་སྲོག་ཆོས་ཕྱོགས་སུ་ཐོངས། སེམས་ཅན་ཐམས་ཅད་བདེ་གཤེགས་སྙིང་པོའི་རང་བཞིན་ཅན་ཡིན་པས། དགྲ་གཉེན་མ་བཟུང་ཡེ་ཤེས་ཟུངས། །མཉམ་པ་ཉིད་ལ་ནན་ཏན་བྱ། ཆོས་བརྒྱད་ཀྱི་རོ་མྱོང་བ་སོགས། གྲགས་སྙན་མ་ལྟ་རང་སེམས་ལྟོས། །སེམས་བསྲུང་བརྟུལ་ཞུགས་ལ། །བརྩོན་པར་མ་བྱས་འོག་ཏུ་འགྲོ། །སྡིག་སེམས་སྐད་ཅིག་མ་རེས་ཀྱང་ངན་སོང་དུ་འཕེན་པའི་རྒྱུ་བྱེད། ཐོག་མེད་ནས་དངོས་འཛིན་གྱི་ཞེན་པས་འཁོར་བར་བཅིངས་བས། ད་ནི། སྔ་མ་བཞིན་དུ་འཁྱམས་པ་བོར། །འཕགས་པའི་ནོར་གྱི་གཙོ་བོ་འམ་འབྱུང་གནས་ཆོག་ཤེས་ཡིན་པས། ནོར་འདོད་རྒྱ་མཚོའི་གླིང་དུ་སོངས། །ཆོག་ཤེས་མེད་ན་རྒྱལ་པོ་ཡིན་ཡང་སྤྲང་པོ་དང་འདྲ། །ཟས་གོས་སྲོག་འཚོ་ཙམ་གྱིས་ཆོག་ཤེས་པར་བྱས་ཏེ། གླིང་དུ་ཕྱིན་ནི་ཕྱིར་མི་ལྡོག །རང་ལ། ཡོ་བྱད་ཡོད་པ་ཕ་ལ་ཕོག །ཅི་ཡོད་བླ་མའི་ཕྱོགས་སུ་ཕུལ་ལ་བླ་མ་མཉེས་ཤིང་ཐུགས་ཟིན་ན་གདམས་ངག་ཟབ་དགུ་འབྱུང་བས། ཕ་རྒན་མགུ་ན་སྙིང་གཏམ་འབྱུང་། །བླ་མས་ཀྱང་། སྙིང་གཏམ་གཤའ་མ་བུ་ལ་སྨྲ། །སྣོད་ལྡན་གྱི་གདམས་ངག་རྫོགས་པར་སྦྱིན་ཞིང་། དེས་ཀྱང་སྙིང་ལྟར་བཅིངས་ཏེ་ཉམས་སུ་ལེན་དགོས་པས། རིན་ཆེན་རྙེད་ནས་མ་བོར་ཅིག །འཁོར་བའི་འཁྲུལ་སྣང་ལ་བློ། ལོག་གིས་བཟློག་ལ་དྲང་པོར་སྲོང་། །སྟེ་བྱང་ཆུབ་ཀྱི་ལམ་དུ་སོངས། རྡོ་རྗེའི་སྤུན་དང་སྲིང་འཚོགས་ན་རང་ཉིད་ཀུན་ལས་དམན་པར་ལྟ་དགོས་པས། མིང་སྲིང་འཚོགས་ན་ཁ་ཉན་སྒྲུབས། །ཉམས་ལེན། སྟོར་གྱི་དོགས་ན་ར་བར་ཆུག །དྲན་ཤེས་འབྲལ་མེད་བསྟེན། ཚོགས་དྲུག་གི་ཡུལ་ལ། བྲོས་ཀྱིས་དོགས་ན་ལྕགས་ཀྱུས་ཟུངས། དྲན་པའི་སོ་བ་བརྟེན་དགོས། ཅིར་སྣང་ཆོས་སྐུར་ཤེས་པས་རིན་ཆེན་གསེར་གླིང་དུ་ཕྱིན་པ་ལྟ་བུའི་གདེང་གིས། ལྟ་བ་རང་རྐྱ་ཚུགས་པར་གྱིས། །ལྷ་དང་བླ་མ་རང་སེམས་གྲོགས་ཀྱིས་མ་ཁྲེལ་པའོ། །ཚུལ་ཁྲིམས་ངོ་ལྐོག་མེད་པར་སྲུངས། །ལན་དང་རྣམ་སྨིན་ལ་རེ་བ་སྤོང་བའི། སྦྱིན་པ་ཕྱོགས་རིས་མེད་པར་ཐོངས། །གནོད་ལེན་ཕན་གྱིས་འཇལ་བའི། བཟོད་པ་རྐྱེན་ངན་ཐུབ་པར་གྱིས། །ཆོས་ཕྱིར་ན་ཚ་བཀྲེས་སྐོམ་སོགས་དང་གཞན་གྱི་སྡུག་བསྔལ་ཡང་བདག་གིར་དང་དུ་ལེན་དགོས་པས། ཐོས་བསམ་དུཿཁས་ཐེག་པར་གྱིས། །སྙན་གྲགས་འབྱུང་དུ་རེ་བ་སོགས། བསྒོམ་པ་གྲགས་པའི་ཁར་མ་གཏོང་། །ཆོས་བརྒྱད་ཀྱིས། བདུད་ཀྱིས་མ་ཁྱེར་སྤྱོད་པ་གྱིས། །དུས་ཚོད་དང་འབྲེལ་བ་གལ་ཆེ། སྣང་བ་ཡུལ་ཕྱིར་འབྲིང་ན་རྣམ་རྟོག་དུག་ལྔའི་བདུད་ལྡང་བས། སྣང་བ་བདུད་ཀྱི་སླུས་པ་ཡོང་ངོ་བུ། །དེས་ན་སེམས་ཡུལ་ཕྱིར་མ་འབྲང་བར་གཅེས་སོ། ༈ །ལེའུ་བཅོ་ལྔ་པ། གདམས་པ་དྲུག་གིས་ཉེས་པ་ལས་བཟློག་པར་བསྟན་པ་ནི། ཕ་དང་མེས་པོའི་རུས་མ་འཚོང་། །རྩ་བའི་བླ་མ་དང་བརྒྱུད་པའི་རྐང་མ་འདྲེན་། སྤུན་དང་ཕ་སྤུན་དམེ་མ་བྱེད། །བླ་མ་གཅིག་པ་དང་རྡོ་རྗེ་ཐེག་པ་ལ་ཞུགས་པའི་མཆེད་ལ་དམ་ཚིག་མི་བསྲུང་བའི་འཐབ་རྩོད་སྤོང་། ཉེ་རིང་གཞན་ལ་རྡུལ་མ་གཏོར། །ཆོས་མཛད་གཞན་རྣམས་ཚིག་རྩུབ་མ་སྨྲ། རྗེ་ལ་བཅའ་མ་ཕུལ་བའི་འབངས་མ་རེ། །བླ་མ་མཉེས་པར་མ་བྱས་པ་ལ་ཐུགས་རྗེ་དང་བྱིན་རླབས་མི་འབྱུང་། སྡིག་པའི་ཕྱོགས་སུ། བོང་ཐུར་ལ་མ་རྒྱུག །གཡོ་ཁྲོམ་ཟོལ་ཟོག་སོགས། ལོག་པའི་ལམ་མ་མཁས་ཤིག་བུ། ༈ །ལེའུ་བཅུ་དྲུག་པ་མི་ལྟོ་བ་བཅུའི་ཡུལ་རྐྱེན་བཟང་ངན་ཐེག་པར་བྱེད་པའི་གདམས་པ་ནི། མི་ལྟོ་བ་བཅུ་ལ། ཐེག་ན་ཞེས་པ་འདམ་ཀ་སྟེ་ཐེག་ན་ཁུར་མི་ཐེག་ན་མ་ཁུར། མི་ལྟ་ཞེས་པ་རྐྱེན་དེ་དང་དེས་མི་གནོད་པ་ན་གྱིས། གནོད་ན་མ་བྱེད་ཅེས་པའི་དོན་ཡིན་པས་ཡུལ་ཅན་ངན་པ་ཐམས་ཅད་ཀྱིས་མི་གནོད་པར་ལམ་དུ་ལོངས་ནུས་པས། ཡུལ་གྱི་ནད་ཐེག་ན་ཡུལ་དུ་བསྡད་ཀྱང་མི་སྟོ། དགྲ་གཉེན་ལ་ཆགས་སྡང་མི་སྐྱེ་བས། འབྲེལ་བའི་ནད་ཐེག་ན་གཉེན་ན་མ་བྲལ་ཡང་མི་ལྟོ། སྒེགས་ཆོས་ངོ་ཚ་སོགས་ཀྱི་ཤུབ་ནས་ཐོན་ཏེ། གོས་ཀྱི་ནད་ཐེག་ན་གཅེར་བུར་བྱས་ཀྱང་མི་ལྟོ། སྐྱིད་སྡུག་རོ་མཉམ་ལམ་དུ་ཁྱེར་ནུས་པས། ཆགས་སྡང་གི་ནད་ཐེག་ན་སྤྱོད་པ་བྱས་ཀྱང་མི་ལྟོ། རང་སེམས་བླ་མར་རྟོགས་ནས་ཐ་དད་ཀྱི་མཚན་འཛིན་རང་སར་གྲོལ་བས། བླ་མའི་ནད་ཐེག་ན་མོས་གུས་ཀྱི་འཕྲོ་བཅད་ཀྱང་མི་ལྟོ། འཁོར་འདས་མིང་མེད་ཅིར་སྣང་རང་བྱུང་གི་ཡེ་ཤེས་སུ་རྟོགས་པས། འཁོར་བའི་ནད་ཐེག་ན་ཆོས་བྱས་མི་ལྟོ། སྣང་སེམས་ཆོས་ཉིད་གྲོལ་ཏེ་བག་ཆགས་ཀྱི་རྗེས་མེད་པས། ངན་སོང་གི་ནད་ཐེག་ན་སྡིག་པ་བྱས་ཀྱང་མི་ལྟོ། །གཞན་དོན་དུ་གང་ཡང་སྤྱོད་པས་ཆོག །ཆོས་ཉིད་བྱ་རྩོལ་དང་བྲལ་བས། ངོ་བོ་ཐ་དད་དུ་ཤར་ཡང་། དམ་ཚིག་བསྲུང་མཚམས་ལས་འདས་ཤིང་འཁོར་འདས་རང་སེམས་སུ་ཤེས་པས། དམྱལ་བའི་ནད་ཐེག་ན་གསང་སྔགས་ཀྱི་སྒོར་ཞུགས་ནས་དམ་ཚིག་མ་བསྲུང་ཡང་མི་ལྟོ། བྱས་ཆོས་འཁྲུལ་པས་ཤེས་ཏེ་བྱར་མེད་བློ་འདས་ཀྱི། ལྟ་བའི་གདེང་ཡོད་ན་ཅོག་གེ་ཉལ་ཡང་མི་ལྟོ། གནས་ཁང་བཟང་ངན་གྱི་ཞེན་འཛིན་མེད་པས། གནས་ཀྱི་ནད་ཐེག་ན་གང་དུ་བསྡད་ཀྱང་མི་ལྟོ། ཟས་ལ་བཟང་ངན་མེད་ཅིང་གཙང་རྨེ་གཉིས་འཛིན་དང་བྲལ་བས། ལྟོ་བའི་ནད་ཐེག་ན་ཅི་ཟོས་ཀྱང་མི་ལྟོ། བདག་གཅེས་འཛིན་གྱི་ཁྲི་བ་ཆོད་པས། ལས་ཀྱི་ནད་ཐེག་ན་འགོས་ནད་ལ་མ་འཛེམས་ཀྱང་མི་ལྟོའོ་བུ། ༈ །ལེའུ་བཅུ་བདུན་པ། ཆོས་པ་སྤྱི་དང་རང་གི་སྐྱོན་བརྟག་པ་རྒྱ་གད་འཆའ་བ་སྟེ། རྒྱ་གད་བཅོ་བརྒྱད་ལ། སྤྱིར་རྒྱ་གད་དང་ལོག་ཆུས་དང་བླུན་པ་དང་དམ་ཚིག་ཉམས་པའི་སྐྱོན་རྣམས་མི་འབྱུང་བའི་རྒྱུ་བརྒྱད་ཡོད་དོ། །མི་གཞི་ལེགས་པས་འཁྲིད་བཏུབ་པ། གྲོགས་བཟང་པོས་འཁྲིད་མཁས་པ། འཆི་བ་རྗེས་སུ་དྲན་པས་ཚེ་ཕྱི་མ་དོན་དུ་གཉེར་བ། བདེ་སྡུག་ལས་འབྲས་སུ་ཡིད་ཆེས་པས་སྡིག་ལ་འཛེམ། ངོ་ཚ་ཤེས་པ། ཁྲེལ་ཡོད་པ། སྙིང་རུས་ཆེ་བ། ཚིག་བཙུན་པས་ཁས་ལེན་ལས་མི་འགལ་བར་བློ་གཏད་ཐུབ་པའོ། །དེའི་ལྡོག་ཕྱོགས་ཀྱིས་སྐྱོན་བརྒྱད་ཡོད་པ་ལ། རྒྱ་གད་སོགས་འདི་རྣམས་འབྱུང་ངོ་། །རྒྱ་གད་ནི། ཁྲེལ་གད་དམ་འཕྱ་སྨོད་དེ། མི་ཆོས་ལྷ་ཆོས་གཉིས་ཀ་ནས་ཁྲེལ་བའོ། །དེ་ཡང་། དད་པ་སྐྱེས་ཏེ་གནས་ལ་མཆོང་ལ་ཁད། ཆོས་ཞུ་དུས་སྐྲ་འབལ་བ་དང་ངུ་བ་སོགས་མི་ཕྱེད་དགུ་གཅིག་བྱེད། བར་དུ་ཐེ་ཚོམ་ཟོས་ནས་ལུང་སྟོང་རྗེས་ཀྱིས་བཀང་། གདམས་ངག་སྒྲོ་འདོགས་མ་ཆོད་པར་ཐེ་ཚོམ་སྐྱེས་ཏེ་ཕྱོགས་ཀུན་ཉུལ། ཐ་མ་དད་པ་ལོག་ནས་དམྱལ་བའི་གཏིང་རྡོ་བྱེད། མཐར་ཆོས་དང་བླ་མ་ལ་ལོག་ལྟ་སྐྱེས་པ་སྟེ་དད་པ་མི་བརྟན་པའི་སྐྱོན་གསུམ་མོ། །དང་པོ་སློབ་དཔོན་རྙེད་ནས་ཅི་བྱའི་ལུང་ཁུང་མང་། བློ་སྙིང་བྲང་གསུམ་གཏད་ནས་ངེད་ཀྱི་བླ་མའི་ཟབ་ཆོས་གསུང་གི་གཅེས་པ་ཞེས་གསང་བ་ཀུན་ལ་སྒྲོགས། བར་དུ་སློབ་དཔོན་སུན་ནས་སྒྲོ་དང་སྐུར་བ་འདེབས། སྔར་ཕུལ་བ་ལ་འགྱོད་ཅིང་སྐྱོན་མཚངས་སྒྲོགས། ཐ་མ་སློབ་དཔོན་བོར་ནས་དགྲ་ཡི་དམ་པར་འཛིན། གསར་འགྲོགས་ཀྱིས་གཞན་བསྟེན་པ་སྟེ་སློབ་དཔོན་བརྟེན་ལུགས་ཉེས་པའི་སྐྱོན་གསུམ་མོ། །དང་པོ་སེམས་འཛིན་བྱུང་ནས་ཆོས་པ་ང་ལས་མེད། ཞི་གནས་ཀྱི་ཉམས་ཐན་ཐུན་སྐྱེས་པ་ལ་སྙེམས ནས་སྒོམ་ཆེན་དང་ཆོས་པ་བྱ་བ་རང་ལས་ལྷག་པ་མེད་པར་འཛིན། བར་དུ་བསྒོམ་པས་སུན་ནས་བརྩོན་བུ་གཉའ་མེད་འདྲ། དགོན་པར་ཉིན་སྐྱོ་མཚན་འཇིགས་ཤིང་ནུབ་ཟ་ཉལ་ལ་དགའ། ཐ་མ་བསྒོམ་པ་བོར་ནས་གྲོང་ཁྱེར་ཉུལ་ལེ་མ། དཔེ་སྨྱོན་པ་དང་འདྲ། དོན་ཀུན་རྫོབ་ཁྱད་དུ་གསོད་བྱེད་པ་སྟེ། ཉམས་ལེན་གཞུང་མ་སྲོང་བའི་སྐྱོན་གསུམ་མོ། དང་པོ་ཉམས་ལེན་སྐྱེས་པས་རས་ཆོད་སྤྱོད་པ་བྱེད། དཔེ་སྨྱོན་པ་དང་འདྲ། དོན་ཀུན་རྫོབ་ཁྱད་དུ་གསོད། བར་དུ་བསྒོམ་པ་བོར་ནས་ཡིག་སྣའི་རྩལ་བཤད་བྱེད། དཔེ་རང་ལ་ལམ་རྒྱུས་མེད་པར་གཞན་ལ་སྟོན་པ་དང་འདྲ། རང་ལ་གོ་རྟོགས་མེད་པར་གཞན་ལ་བཤད། ཐ་མ་ཕུང་པོ་འབོར་ཁར་ཐ་མལ་ངང་དུ་འཆི། །དཔེ་སྐྱེ་བོ་ཐ་མལ་པ་ལྟར། དོན་འཆི་ཁར་ལམ་སྣ་མ་ཟིན་པ་སྟེ་ཉམས་མྱོང་ལ་བརྟན་པ་མ་ཐོང་བའི་སྐྱོན་གསུམ་མོ། །དང་པོ་ལྟ་བ་རྟོགས་པའི་ངེས་ཤེས་བག་ཙམ་སྐྱེས། དོན་སྤྱིའི་གོ་ཡུལ་ཙམ་རྙེད་པ་རྟོགས་པ་བཟང་པོར་རློམ། གཞན་ཁྱད་དུ་གསོད། བར་དུ་ཐེ་ཚོམ་ཟོས་པས་ཤེས་བརྫུན་གཞན་ལ་འདྲི། ཡེ་ཤེས་ཤེས་བརྫུན་བྱས་ནས་གཞན་ལ་འདྲི་བཙུག་བྱེད། ཐ་མ་ལྟ་བ་འགྱངས་བས་གོལ་སྒྲིབ་དབང་དུ་ཤོར། མུ་སྟེགས་དང་ཆ་འདྲ་རྟག་ཆད་ཀྱི་དབང་དུ་ཤོར་ནས་ཟུང་འཇུག་སྤྲོས་བྲལ་མཉམ་པ་ཉིད་མ་རྟོགས་པ་སྟེ་རྟོགས་པའི་གདེང་མ་རྙེད་པའི་སྐྱོན་གསུམ་མོ། །འབྲས་བུ་གོལ་སར་སོང་བས་ཐར་པའི་སྐར་ཁུང་འགགས། ཐབས་ཤེས་སོགས་ཟུང་དུ་མ་ཆུད་ཅིང་ལམ་གནད་འཆོལ་བས་འབྲས་བུ་མྱང་འདས་སྒོ་འགགས། ཐར་པའི་སྐར་ཁུང་འགགས་པས་སྐྱེ་ཤི་རྒྱུན་མི་ཆད། ཅིར་སྣང་དངོས་པོར་བཟུང་ཞིང་ལུས་སེམས་ལ་བདག་ཏུ་བཟུང་བའི་དབང་གིས་ལས་ཉོན་གྱིས་རང་བཅིང་སྟེ་མི་ཐར། སྐྱེ་ཤི་རྒྱུན་མི་ཆད་པས་སྐྱེ་གནས་ལ་འདམ་དབང་མེད་དོ་བྱ། ལས་ཉོན་གྱི་དབང་གིས་རང་དབང་མེད་པར་སྲིད་པར་ཉིང་མཚམས་སྦྱོར་བ་སྟེ་འབྲས་བུ་ཕྱིན་ལོག་ཏུ་གྱུར་བའི་སྐྱོན་ནམ་རྒྱ་གད་གསུམ་མོ། །དེས་ཆོས་དང་རང་སེམས་མ་འདྲེས་པའི་སྐྱོན་རྣམས་ངོས་བཟུང་ནས་སྤོང་བ་ལ་འབད་པར་བྱའོ། ༈ །ལེའུ་བཅོ་བརྒྱད་པ། ལོག་ཆོས་བཅོ་ལྔའི་སྒོ་ནས་གོལ་སྒྲིབ་ཀྱི་མཐའ་བཅད་པ་ནི། ལྷ་ཆོས་ལས་ལོག་ནས་མི་ཆོས་སུ་སོང་ཡང་ཆ་ལུགས་ལྷ་ཆོས་སུ་གནས་པས། ལོག་ཆོས་བཅོ་ལྔ་ལ། ལྟ་བ་གཡོ་མ་ལ་རྒྱུགས། གཞན་གྱི་ཁ་རྒྱུག་བྱས་ཏེ་རང་རྒྱུད་མ་ཐུལ། སྒོམ་པ་གླེན་སྒོམ་དུ་ཤོར། ལྷག་མཐོང་མེད་པས་ཉོན་མོངས་གཞི་རྩད་ནས་མ་ཆོད་དེ་ཉམས་རྟོགས་མ་སྐྱེས། སྤྱོད་པ་ཐོ་ཅོར་ཤོར། ཆོས་མིན་ལ་སྤྱོད་པས་སྨྱོན་པ་དང་འདྲ། བསགས་སྦྱང་གི་གནད་མི་ཤེས། དམ་ཚིག་ཚོད་ཡོད་དུ་ཤོར། བསྲུང་མཚམས་མི་ཤེས་ཤིང་འདི་ཙམ་ཉམས་ཀྱང་སླ་ཞེས་ཁྱད་དུ་གསོད། སློབ་དཔོན་རང་ཅག་གི་འབྲེལ་ལ་བྱེད། རང་གི་ཨ་ཁུའམ་ཨ་ཞང་ལྟ་བུར་བཟུང་ནས་དད་གུས་མི་བསྐྱེད་པ། ཉན་པ་ངོ་ལོག་ཏུ་ཉན། གཞན་གྱི་ངོ་བསྲུང་དང་མིའི་འཕྱ་དོགས་སུ་ཉན་པས་ཆོས་མི་གོ བསྒྲུབ་པ་དལ་ཁོམ་དུ་འཇོག །གཉིད་དང་སྙོམ་ལས་ཀྱི་དབང་དུ་སོང་བས་འབྲས་བུ་མི་ཐོབ། ཉམས་མྱོང་འདྲེ་མཐོང་ལ་བྱེད། དཔེ་མིག་རྣོན་མཁན་དང་འདྲ། འདྲེ་འཛིན་དང་འདྲེ་རྟོག་འཕེལ། འབྲས་བུ་འཇིག་རྟེན་པའི་གྲགས་པ་བསྒྲུབ། ཆོས་བརྒྱད་ཀྱི་ཆགས་སྡང་རྒྱས། ཐ་མལ་པ་དང་ཁྱད་མེད། གདམས་ངག་གཟུ་ལུམ་དུ་ལེན། ཞབས་ཏོག་དང་ཉམས་ལེན་མེད་པར་དཔེ་ཡོད་དང་ལུང་ཐོབ་ཙམ་ལ་བརྟེན། དེས་ཉམས་མྱོང་གི་རྡོ་རུས་མི་འཕྲོད། འཛམ་བུ་གླིང་གི་མི་ལུས་ཐོབ་ནས་སྟོང་ལོག་བྱེད། དཔེ་རིན་པོ་ཆེའི་གླིང་ནས་སྟོང་ལོག་བྱས་པ་དང་འདྲ། ཆོས་པའི་མལ་ནས་ཐ་མལ་པའི་རོ་བྱུང་། མི་ལུས་ཐོབ་པ་དོན་མེད་དུ་སོང་། འཆི་ཁར་འགྱོད་པ་ཅན་དུ་འཆི། དེ་དུས་འགྱོད་ཀྱང་བྱ་ཐབས་ཟད། ཆོས་པ་མིང་གིས་བསླུས། ཆོས་མ་བྱས་ན་མིང་ཆོས་པར་བཏགས་ཀྱང་མི་ཕན། ཆོས་མིན་སྤྱོད་ན་མིང་དགེ་བཤེས་ཟེར་ཡང་སྡིག་བཤེས་སུ་སོང་བ་ཡིན། ལོ་སྐམ་རྣ་བས་ཉན། བྲོ་གླུའི་བསྟོད་སྒྲ་ལ་ཉན་པ་བཞིན་སྙན་གྲགས་ངོ་བསྟོད་ཟེར་ལོ་སྐམ་པོ་ཉན་པས་མི་ཡོང་། མི་ཚེ་སྟོང་ཟད་དུ་རྒྱུར་ཉེན། ཆོས་མིན་སྤྱད་ན། ཤི་ནས་དམྱལ་བ་ལས་འོས་མེད་དོ་བུ། དེ་ཐམས་ཅད་ཀྱི་རྩ་བ་ཚེ་འདི་ལ་ཆགས་ཤིང་ཞེན་པ་ལས་བྱུང་བས་སྐྱོན་ངོས་བཟུང་ལ་སྤང་བར་བྱའོ། ༈ །ལེའུ་བཅུ་དགུ་པ། བླུན་པ་ཉི་ཤུ་རྩ་དྲུག་གི་སྒོ་ནས་བྲོད་སྡིགས་ཀྱི་མཐའ་བསྟན་པ་ནི། མི་ཆོས་ཀྱི་བླུན་པ་ཉེར་དྲུག་ལ་དཔེ་བྱས་ནས། ལྷ་ཆོས་ཀྱི། བླུན་པ་ཉི་ཤུ་རྩ་དྲུག་ལ། ཡོང་ངེས་པའི་དམག་ལ་མི་འཇིགས་པ་བླུན། དོན་འཆི་བ་ལ་མི་འཇིགས་པ། ཆགས་ངེས་པའི་བུ་ལོན་མི་འཇལ་བ་བླུན། ལན་ཆགས་སྡིག་སྒྲིབ་མི་སྦྱང་བ། འཛིན་ངེས་པའི་དགྲ་ཁར་འགྲོ་བ་བླུན། འཁོར་བར་མི་འཇིགས་ཤིང་ཞེན་པ། མི་ཐེག་པའི་ཁུར་འཁུར་བ་ལ་དགའ་བས་བླུན། སྡིག་པའི་རྣམ་སྨིན་ལ་མི་འཛེམ་པ། སྐྱིད་མེད་པའི་གནས་སུ་འགྲོ་བ་ལ་བྲོད་པ་བླུན། སྡིག་པའི་ཕྱོགས་ལ་དགའ་བ། འཆི་ངེས་པའི་གཡང་ས་ལ་འཆོང་བ་བླུན། ངན་སོང་གསུམ་དུ་འཆོང་བ། ས་བོན་བྲ་བོ་ལ་བྱས་ནས་འབྲས་བུ་ནས་རེ་བ་བླུན། སྡིག་པ་བྱས་པའི་འབྲས་བུ་བདེ་བ་འབྱུང་དུ་རེ་བ། བྲག་ཕུག་ཁ་བྱང་བལྟས་སུ་ཉི་མ་འཆར་དུ་རེ་བས་བླུན། རང་ལ་མོས་གུས་མེད་པར་བླ་མའི་བྱིན་རླབས་འབྱུང་བར་རེ་བ། བསླུ་ངེས་པ་ལ་རེ་བ་དང་ལྟོས་པ་འཇོག་པས་བླུན། ཚེ་འདིའི་ཕུན་སུམ་ཚོགས་ལ་ཞེན་པ། གནོད་བུ་རྒྱལ་བུ་ཅན་ལ་འདྲེན་པས་བླུན། བྲན་བུ་རྒྱལ་བུར་འགྲན་པ་བཞིན་རང་ཐ་མལ་དུ་སྡོད་པར་ཡོན་ཏན་འབྱུང་དུ་རེ་བ། ཡོ་བྱད་མེད་པར་ཕྱུག་པོར་རེ་བས་བླུན། རང་ལ་ཡོན་ཏན་མེད་པར་གཞན་གྱི་སློབ་དཔོན་དུ་རེ་བ། མི་ཆགས་པར་རྟ་ལ་ཞོན་པ་བླུན། མི་ཐུབ་པ་ལ་དམ་བཅའ་བྱེད་པ། ལས་མ་བྱས་པར་ཟིན་ལ་སྐད་ཟེར་བ་བླུན། གནས་ལུགས་མ་རྟོགས་པར་ཐབས་ཁྱད་དུ་བསད་པ། ནད་མ་སོས་པར་སྨན་པ་ལ་མི་མགུ་བར་དུག་སྡུད་པ་ལ་ཡིད་དུ་འོངས་པ་བླུན། དུག་ལྔའི་ནད་གསོ་བའི་སྨན་པ་ལ་མི་མོས་པ་སྡིག་གྲོགས་ལ་མོས་པ། ཚང་པ་ཟོང་མེད་པར་ཟ་ལ་དགའ་བས་བླུན། རང་ལ་གོ་རྟོགས་མེད་པར་གཞན་ལ་བཤད་པ། ཕས་ཞལ་ཏ་བྱས་པ་མི་ཉན་པར་རྦད་པ་བཞིན་དུ་འགྲོ་བ་བླུན། བླ་མའི་གདམས་ངག་མི་ཉན་པར་ཕྱིན་ཅི་ལོག་ཏུ་འགྲོ་བ། བུད་མེད་བློ་ཉེས་མ་བུའི་བཅས་པས་བུ་མོའི་བཅས་ལ་དགའ་བ་བླུན། ཕྱི་མའི་ཆོས་ལས་ཚེ་འདིའི་འདོད་ཡོན་ལ་དགའ་བ། གཅེར་བུར་ཁྱིམ་ནས་ཐོན་ནས་གོས་རྙེད་ནས་ཁྱིམ་དུ་ལོག་ནས་འོང་བ་བླུན། ཆོས་ཤེས་ནས་ཆོས་མི་བྱེད་པར་ནོར་བསྒྲུབ་པ། ཆུ་མ་ཐོན་པར་ལྷམ་འབུད་པ་བླུན། རྟོགས་པའི་གདེང་དང་མི་བར་ཆོས་སྤྱོད་རྒྱུན་གཅོད་པ། མི་ངོམས་པར་ལན་ཚའི་ཆུ་ལ་འཐུང་བ་བླུན། འདོད་པ་ལ་ཆོག་ཤེས་མེད་པ། ཕྱི་ཞིག་པ་ནང་གིས་མ་ཚོར་བ་བླུན། ལུས་རྒས་ཀྱང་སེམས་ཆགས་སྡང་ཆེ་བ། གཞན་ལ་གྲོས་འདེབས་པ་མཁས་ཀྱང་རང་གི་འདུན་མ་ལོག་པར་གཏང་བས་བླུན། རང་གི་ཁ་བཤད་དང་ལག་ལེན་འཛོལ་བ། སྐས་མེད་པར་མི་ཐར་བའི་རྫོང་ལ་འཛེག་པ་བླུན། ཚོགས་མ་རྫོགས་པར་ཐར་བར་འགྲོ་བར་རློམ། བྱིས་པ་རྣམས་འོངས་ངེས་པའི་ལས་བྱེད་དུ་མི་འདོད་པས་བླུན། ལས་དང་པོ་པས་དགེ་སྦྱོར་ཕྱི་བཤོལ་དུ་འཇོག་པ། མི་ཐར་བའི་ཆུ་ལ་སྒྲོལ་བ་ལ་ཡིད་མི་འཚེར་བས་བླུན། སྐྱེ་རྒ་ན་འཆིས་མི་འཚེར་བ་སངས་རྒྱས་ཀྱི་དགོངས་པ། རང་ལ་བཞག་ནས་གཞན་དུ་ཚོལ་བས་བླུན་ནོ་བུ། མདོར་ན་དེ་ཐམས་ཅད་ཀྱང་། ཚེ་འདིར་ཞེན་པ་དང་། རྒྱུ་མེད་ཀྱི་འབྲས་བུ་འདོད་པ་དང་། བླ་མའི་གསུང་ལ་མི་ཉན་པ་དང་། ལྷ་ཆོས་པར་ཁས་བླངས་ནས་མི་ཆོས་སྐྱོང་བ། བཤད་པ་དང་ལག་ལེན་འགལ་བའི་སྐྱོན་ཏེ་ལྔར་འདུས་སོ། ༈ །ལེའུ་ཉི་ཤུ་པ། ཞལ་གདམས་དགུ་པའི་སྒོ་ནས་རང་རྒྱུད་ཀྱི་གྱོང་བཅག་པ་ནི། ༧ ཞལ་ལུང་སྙིང་ལ་བཅང་བྱ་ཡིན་པས་ཞལ་གདམས་ཏེ། ཞལ་གདམས་དགུ་ལ། འགྲན་སངས་རྒྱས་ལ་ཚུག །ཐུབ་པའི་རྣམ་ཐར་ལྟོས་ལ་རང་ཉིད་དེའི་རྗེས་སུ་སློབ། ལྐོག་རྨུགས་ཡི་དམ་ལ་གྱིས། དུས་རྒྱུན་མ་བརྗེད་པར་བསྙེན་སྒྲུབ་ལ་བརྩོན། གནག་པ་གདམས་ངག་ལ་གྱིས། གསང་ཞིང་སྒྲུབ་ན་བྱིན་རླབས་དང་ཉམས་རྟོགས་འཕྲལ་དུ་འབྱུང་། གཞུང་ངན་སྡིག་པ་ལ་གྱིས། མི་དགེ་བ་དང་དེ་སྤྱོད་པའི་གྲོགས་ལ་ཕྱི་མིག་མི་བལྟ། གཏོང་ཕོད་བླ་མའི་ཕྱོགས་སུ་གྱིས། དུས་གསུམ་གྱི་སངས་རྒྱས་མཆོད་པ་བས་དོན་ཆེ། རྒྱབ་ལོག་འཁོར་བ་ལ་གྱིས། རང་སེམས་རྩད་ཆོད་ལ་ཕྱིས་འཁོར་བར་མི་སྐྱེ་བའི་ཐབས་ལ་བརྩོན། བརྔན་རང་ལ་གྲངས། རང་མཚངས་ངན་པ་ཡུལ་ནས་ཐོན། རྒྱལ་ཁ་གཞན་ལ་བྱིན། དེས་ཕུགས་རང་བཟང་པོར་འགྲོ། མདོ་རྒྱུད་བལ་བཞིན་གཡེངས་ཤིག་བུ། ཐོས་པ་ཕྱོགས་མེད་དུ་བཙལ་ཞིང་རང་རྒྱུད་ལ་སྦྱར་ཏེ་ཆོས་དང་རང་སེམས་ཞུ་དག་བྱ་བ་གལ་ཆེའོ། ༈ །ལེའུ་ཉེར་གཅིག་པ། སྙིང་གཏམ་དགུའི་སྒོ་ནས་རང་དམན་པའི་ཆ་གཟུང་བ་ནི། སྙིང་གཏམ་དགུ་ལ། རིའི་བུ་ཡིས། སྒོམ་ཆེན་རི་དང་མ་བྲལ་ན་ཡོན་ཏན་ཞག་སྐྱེད་ཀྱི་འཕེལ། མུ་གེའི་ཟས་སོ། །གྱོང་ལྟོ་གོས་གཏམ་གསུམ་ལ་བསྐུར་དགོས། དགྲ་དགའ་བའི་ལས་ཀྱིས། མི་ཆོས་རླུང་ལ་མ་བསྐུར་ན་ཆགས་སྡང་མཁར་པོ་མི་ཞིག །སྐྱགས་ལྡོག་པའི་གོས་དོན། ཆགས་ཞེན་མེད་ཅིང་སྒྲུབ་སླ། མང་པོའི་གསེབ་ནས་གཅིག་པུར་བྲོས། འཕྲལ་དགེ་སྦྱོར་འཕེལ་བར་ཆད་མི་འབྱུང་འཚོ་བ་ཞར་ལ་ཡོང་། གཉེན་ལ་ལུང་མེད་ཀྱིས། གདུང་སེམས་བློས་མ་ཐོངས་ན་འཁྲི་བ་མི་ཆོད། སྣ་ཐག་མི་ལ་མ་ཤོར། ཅོལ་ཆུང་ཐག་པས་ཟུངས། མི་བློ་དང་ཆུ་སྣ་གར་ཁེལ་དུ་འགྲོ་བས་རང་སེམས་དྲན་པའི་ཐག་པ་ཟུངས། ཉམས་དགའི་གནས་བོར། འཁོར་བའི་བདེ་བ་ལ་མ་ཆགས། འདི་མ་བོར་ན་སྡིག་སྡུག་གཏམ་ངན་རྒྱུད་མི་འཆད། བློ་ཕུག་ནམ་མཁའ་ལ་གཏོད་ཅིག་བུ། བདག་མེད་གཉིས་ཀྱི་དོན་ལ་གོམས་འདྲིས་བྱ་བ་གལ་ཆེའོ། ༈ །ལེའུ་ཉེར་གཉིས་པ། བདེ་བ་ལྔའི་སྒོ་ནས་རྐྱེན་བཟང་ངན་སྙོམ་པར་ཁྱེར་བའི་གདམས་ངག་ནི། བདེ་བ་ལྔ་ལ། འཁོར་བ་དུཿཁ་དུག་སྡོང་ལ། །དུག་སྡོང་སུས་ཤེས་སྐྱེས་བུ་བདེ། །སྡུག་བསྔལ་རང་བཞིན་ཡིན་པར་ཤེས་ནས་སྤོངས། ཉོན་མོངས་སྐྱེ་བའི་རྒྱུ་རྣམས་ལ། །དགེ་བཤེས་ཡིན་པར་སུས་མཐོང་བདེ། །དགྲ་མཐོང་ན་བཟོད་པ་སྐྱེ་བའི་སློབ་དཔོན་ཡིན་པ་ལྟ་བུས་མཚོན་ནོ། །ཤེས་རབ་གསུམ་སྦྱོང་སློབ་དཔོན་ལ། །ལེགས་པར་མཐོང་བའི་སྐྱེས་བུ་བདེ། །བླ་མ་སངས་རྒྱས་དང་གདམས་ངག་བདུད་རྩིར་ཤེས་པ་དེས་གཏན་དུ་ཐར་པའི་ལམ་སྣ་ཟིན་པ་ཡིན། ཕྱི་ནང་དངོས་ཅན་ཐམས་ཅད་ལ། །སྐྱེ་བ་མེད་པས་སུས་མཐོང་བ་དེ། དེས་སངས་རྒྱས་ཀྱི་དགོངས་པ་ལོངས་པ་ཡིན། བྱ་བ་ཐམས་ཅད་ཕྱིར་བཤོལ་ནས། མ་ནོར་ལམ་ལ་ཞུགས་ན་བདེའོ་བུ། མདོར་ན་ཚེ་འདིའི་བྱ་བ་ཐམས་ཅད་བཏང་ནས་ཡང་དག་པའི་གདམས་ངག་ཉམས་སུ་ལོངས་ན་བདེ་སྐྱིད་ཀྱི་ཉི་མ་སེམས་ལ་འཆར་ངེས་སོ། ༈ །ལེའུ་ཉེར་གསུམ་པ། མདོ་སྔགས་གཉིས་ཀྱི་སོ་མཚམས་སུ་དམ་ཚིག་ཉམས་པའི་རྒྱུ་ཉི་ཤུ་ལ་འཛེམ་པ་ནི། ༧ དམ་ཚིག་ཉམས་པའི་རྒྱུ་ཉི་ཤུ་ལ། གནས་སྐབས་དགོས་དབང་ལྟ་བུ་མ་ཡིན་པར་སྙིང་ཐག་པ་ནས། སློབ་དཔོན་གསང་ནས་རང་གི་ཆེ་བའི་ཡོན་ཏན་བརྗོད་ན་དམ་ཚིག་ཉམས་པའི་རྒྱུ། དགག་བྱ་དགོས་པ་མེད་བཞིན། མཁས་པ་དང་མི་མཁས་པ་མཉམ་པར་བལྟ་ན་དམ་ཚིག་ཉམས་པའི་རྒྱུ། རང་མཐོང་སྡང་སེམས་ཀྱིས། ཡོན་བདག་དང་སློབ་མ་གཉིས་ཀ་འགྲན་ན་དམ་ཚིག་ཉམས་པའི་རྒྱུ། རང་དབང་ཡོད་བཞིན་བླ་མ་ལ་ནོར་ལོངས་སྤྱོད་སོགས། དབུལ་བར་བསམ་ཞིང་བཤོལ་ན་དམ་ཚིག་ཉམས་པའི་རྒྱུ། བརྒྱུད་པ་ལ་སེལ་ཡོད་མེད་སོགས་མི་རྟོག་པར། ཆོས་ཐོས་ཚད་དུ་ཞུ་ན་དམ་ཚིག་ཉམས་པའི་རྒྱུ། ཡང་ན་འདི་ལ་རྣམ་བཤད་དུ་ཆོས་ཐུབ་ཆོས་སུ་ཞུ་ན་ཞེས་གསུངས་ཏེ་ཆོས་གང་ཞུ་ནའང་ཐོག་མར་བླ་མའི་ཐུགས་དང་བསྟུན་དགོས། དུས་སུ་མ་བབས་བཞིན་དུ་དབང་ཡོད་དང་བྱས་ཡུས་ཀྱིས། གདམས་པ་ནན་གྱིས་ལེན་ན་དམ་ཚིག་ཉམས་པའི་རྒྱུ། བརྫུས་དང་གཡོ་སྒྱུས། བླ་དང་མཆེད་གྲོགས་བསླུ་ན་དམ་ཚིག་ཉམས་པའི་རྒྱུ། རང་གིས་མ་བྱས་པའི། ངན་སྐྱོན་སློབ་དཔོན་ལ་འགེལ་ན་དམ་ཚིག་ཉམས་པའི་རྒྱུ། འདྲེན་སེམས་ཀྱིས། སློབ་དཔོན་ལ་ཞེ་འདྲེན་ན་དམ་ཚིག་ཉམས་པའི་རྒྱུ། གསང་བ་གཉེར་གཏད་ལ་གཞན་ལ་འཁྱལ་བའམ་རང་སྐྱོན་བླ་མ་ལ་གསང་བ་སྟེ། སློབ་དཔོན་ལ་གསང་འཁུན་དམ་ཚིག་ཉམས་པའི་རྒྱུ། ནུས་པ་ཡོད་བཞིན་དུ་མི་གཟོ་བར། བཀའ་དྲིན་ཁྱད་དུ་གསོད་ན་དམ་ཚིག་ཉམས་པའི་རྒྱུ། རང་འདོད་ཧ་ཅང་ཆེ་དྲག་པ་དང་རང་མཐོང་ང་རྒྱལ་གྱིས། རང་གིས་དོན་མཐོང་དྲག་ན་དམ་ཚིག་ཉམས་པའི་རྒྱུ། བླ་མ་དང་མཆེད་ལ་མ་ཞུས་པར་ལྐོག་ཏུ་འབྲི་བ་དང་ལྷག་པར་དཔེ་དངོས་བརྐུས་ཏེ་རྩད་བཅད་པ་སྟེ། གདམས་པ་དཔེ་རྐུན་བྱེད་ན་དམ་ཚིག་ཉམས་པའི་རྒྱུ། བླ་མ་བླ་མའི་འཁོར་གྱི་སྐྱོན་མཚངས་ཏེ། སློབ་དཔོན་བརྔན་ལྐོག་ཏུ་བགྲང་ན་དམ་ཚིག་ཉམས་པའི་རྒྱུ། དད་ཅན་སུན་ཕྱུང་བ་སྟེ། གཞན་གྱི་མོས་པ་བཟློག་ན་དམ་ཚིག་ཉམས་པའི་རྒྱུ། དུས་མིན་དུ་གསང་སྤྱོད་བྱེད་པ་སྟེ། ནང་སྤྱོད་ཕྱིར་འདོན་ན་དམ་ཚིག་ཉམས་པའི་རྒྱུ། སྤྱི་དང་འདྲེས་པའི། རྡོ་རྗེའི་སྤུན་ལ་ཕྲག་དོག་བྱེད་ན་དམ་ཚིག་ཉམས་པའི་རྒྱུ། རང་གིས་མ་ཐོས་པའམ་ཐོབ་ཀྱང་བཀས་མ་གནང་བར་རང་དགར་སྤྱོད་པ་སྟེ། བླ་མ་དང་གདམས་ངག་མེད་པར་རས་ཆོད་བྱེད་ན་དམ་ཚིག་ཉམས་པའི་རྒྱུ། རང་གི་མི་ཤེས་ཤིང་རྣ་བརྒྱུད་མེད་པར་རང་བཟོས་རྩལ་བཤད་བྱེད་པ་སྟེ། གཟུ་ལུམ་དུ་བཤད་ན་དམ་ཚིག་ཉམས་པའི་རྒྱུ། སྡང་ཞེན་གྱིས་མུ་སྟེགས་ཅན་ལའང་མི་སྨད་པར་གསུངས་ན་གཞན་ལ་ལྟ་ཅི་སྨོས། དེས་ན། ཆོས་དང་ཆོས་པ་ལ་སྐུར་པ་འདེབས་ན་དམ་ཚིག་ཉམས་པའི་རྒྱུ། ཐེག་དམན་སོགས་ལ་གསང་བ་སྒྲ་ཇི་བཞིན་པར་སྟོན་པ་སྟེ། སྣོད་མིན་ལ་གདམས་ངག་ལོགས་སུ་བཏབ་ན་དམ་ཚིག་ཉམས་པའི་རྒྱུའོ་བུ། གཞན་ཡང་རྩ་བ་དང་ཡན་ལག་གི་བསྲུང་བྱའི་རྣམ་གྲངས་དང་། ཉམས་པའི་རྒྱུ་དང་། ཉམས་པའི་ཉེས་དམིགས། བསྲུང་བའི་ཕན་ཡོན་རྣམས་ཤེས་པར་བྱས་ནས་དྲན་ཤེས་དང་བག་ཡོད་ཀྱིས་རྟག་ཏུ་བརྩོན་པར་བྱའོ། ༧ །དེ་རྣམས་ཀྱི་སྒོ་ནས་སྟོད་དད་ཅན་ཆོས་ལ་དྭངས་པ་བསྐྱེད་ཅིང་། སྡེ་སྣོད་སྤྱི་དང་མཐུན་པར་ལྷག་པ་ཚུལ་ཁྲིམས་ཀྱི་བསླབ་པ་ལ་བརྟེན་ནས་བསྒྲུབ་པའི་གཞི་བཅའ་བས་རང་རྒྱུད་འདུལ་བར་བྱེད་པ་མ་བུ་འཁྲིད་ཅིང་སྐྱོང་བ་ལྟ་བུའི་གདམས་ངག་ཐལ་ལོ། །ཞལ་གྱི་གདམས་པ་བརྒྱད་ཅུ་པ་ལས། གཞི་ཚུལ་ཁྲིམས་རྣམ་པར་དག་པ་ལ་གདམས་པའི་སྐབས་ཏེ་གཉིས་པའོ། ༈ །རྩ་བའི་ས་བཅད་གསུམ་པ། །ཐབས་རྣམ་པར་དག་པ་ལྷག་པ་སེམས་ཀྱི་ལྷག་ལ་གདམས་པ་ལ། ལེའུ་བཅུ་བདུན་དུ་བཞུགས་པ་ལས། ལེའུ་ཉེར་བཞི་པ་བྱིན་བརླབས་བཞིའི་སྒོ་ནས་སྒོམ་པའི་གྲོགས་བསྟན་པ་ནི། ༧ བླ་མའི་བྱིན་རླབས། སློབ་མའི་མོས་གུས། གདམས་ངག་གི་ཟབ་ཁྱད་གསུམ་འཛོམས་པས། ཉམས་མྱོང་བཙན་ཐབས་སུ་སྐྱེད་པར་བྱེད་པར། བྱིན་རླབས་ཀྱི་ལག་ལེན་བཞི་ལ། རང་སེམས་ཆོས་ཉིད་དུ་ཤེས་པས་ཡུལ་ཐམས་ཅད་ཆོས་ཉིད་དུ་གྲོལ་ཏེ་ཡུལ་རྐྱེན་གྱིས་མི་གནོད་པ། ལྷམ་མཐིལ་གྱི་དཔེས་མཚོན་ནས་བདག་བྱིན་གྱིས་རློབས་པ་དང་། ཆོས་ཐམས་ཅད་རང་བྱུང་གི་ཡེ་ཤེས་སུ་ངོ་འཕྲོད་པས་གློ་བུར་གྱི་མཚན་མ་མེད་པ། རི་གཟར་ཤྭ་བུད་ཀྱི་དཔེས་མཚོན་ནས་སྣང་བ་བྱིན་གྱིས་རློབས་པ་དང་། ཏིང་ངེ་འཛིན་རྩེ་གཅིག་པས་རྒྱུན་ཆད་མེད་པ། ཆུ་བོའི་གཞུང་གི་དཔེས་མཚོན་ནས་སེམས་བྱིན་གྱིས་རློབས་པ་དང་། ཅེ་སྤྱང་ནག་པོའི་མིག་གིས་ཉིན་མཚན་མེད་པར་མཐོང་བ་ལྟར་གཟུང་འཛིན་གཉིས་མེད་དུ་ངོ་སྤྲོད་པ། ཅེ་སྤྱང་གི་དཔེས་མཚོན་ནས་གཉིས་མེད་དུ་བྱིན་གྱིས་རློབ་པའོ་བུ། དེ་ཡང་སྣང་བ་སེམས། སེམས་སྟོང་པ། སྟོང་པ་གཉིས་མེད། གཉིས་མེད་རང་གྲོལ་དུ་ཤེས་པས་ཕྱི་ནང་གནང་བ་དེ་ཁོ་ན་ཉིད་ཀྱི་སྒྲོ་འདོགས་ཆོད། འོན་ཀྱང་རང་བློ་ཆོས་ཉིད་དུ་མ་གྲོལ་ན་ཡིན་པ་ཙམ་གྱིས་མི་ཕན་ཏེ་འཁྱགས་པ་ཆུ་ཡིས་ཀྱང་མ་ཞུ་ན་ཆུའི་བྱ་བ་མི་བྱེད་པ་བཞིན། དེས་ན་མོས་གུས་དྲག་པོས་བསྒོམ་པ་གལ་ཆེའོ། །ད་ལྟ་ལམ་པའི་རྣལ་འབྱོར་པས་རང་སེམས་ཀྱི་ཆོས་ཉིད་མངོན་སུམ་རྟོགས་ཀྱང་། ཆོས་ཅན་ཐམས་ཅད་ཆོས་ཉིད་དུ་གྲོལ་བ་མིན་པས་བརྒྱ་ཕྲག་བཅུ་གཉིས་སོགས་ཀྱིས་ཡོན་ཏན་དངོས་སུ་མི་སྣང་ཡང་། རིམ་གྱིས་གོམས་པས་ཆོས་ཅན་ཐམས་ཅད་ཆོས་ཉིད་དུ་གྲོལ་བའམ་ཐིམ་པའི་ཚེ་མཐར་ཕྱིན་སངས་རྒྱས་ཀྱི་ས་ཡི་བར་གྱི་ཡོན་ཏན་རྣམས་མངོན་གྱུར་དུ་སྣང་བ་ཡིན། དེས་ན་ད་ལྟ་སོ་སྐྱེའི་སྐབས་ཀྱི་རྟོག་པ་ལ། འཕེལ་འགྲིབ་གཉིས་ཀ་ཡོད། ས་ཐོབ་ཡན་གྱི་རྟོགས་པ་ལ་འགྲིབ་པ་མེད་འཕེལ་བ་ཡོད། སངས་རྒྱས་ཀྱི་ས་ན་གཉིས་ཀ་མེད་གསུངས། ༈ །ལེའུ་ཉེར་ལྔ་པ། ལམ་ཁྱེར་དཔེ་དོན་གྱིས་བསྒོམ་པའི་གྲོགས་བསྟན་པ་ནི། ལམ་ཁྱེར་གྱི་གདམས་ངག་བཞི་ལ། བསམ་གཏན་ཆོས་དྲུག་ལས། ཟང་ཟིང་ཕྱིར་ནི་དུཿཁ་སྟེ། །ཟང་ཟིང་མེད་ན་བདེ་བའི་མཆོག །ཟང་ཟིང་ཡོངས་སུ་སྤངས་པ་ལས། །ཆུ་སྐྱར་བདེ་བ་འཕེལ་བར་འགྱུར། །ཞེས་གསུངས་པ་ལྟར། སྐྱར་མོ་ཉ་ཁྱེར་གྱི་དཔེས་མཚོན་ནས་ཞེན་མེད་ལམ་ཁྱེར་བ་ལ། ཉོན་མོངས་ཡེ་ཤེས་སུ་ཤར་བས། དུག་ལ་སྔགས་བཏབ་ཀྱི་དཔེས་མཚོན་ནས་དུག་ལྔ་ལམ་དུ་ཁྱེར་བ་དང་། ཚོགས་བརྒྱད་སྐྱེ་མེད་དུ་ཤེས་པས་སྲིད་རྩ་བདག་འཛིན་ཆོད་པ། ལྗོན་ཤིང་རྩ་བཅད་ཀྱི་དཔེས་མཚོན་ནས་ཚོགས་བརྒྱད་ཀྱི་སྐྱེ་མེད་དུ་ལམ་དུ་ཁྱེར་བ་དང་། ཆོས་ཀྱིས་སྐྱེ་མེད་ལ་མཚན་མའི་ཆོས་ཀྱིས་གོས་སུ་མེད་པས། འདམ་སྐྱེས་པདྨའི་དཔེས་མཚོན་ནས་དག་པ་ཆེན་པོར་ལམ་དུ་ཁྱེར་རོ་བུ། ༈ །ལེའུ་ཉེར་དྲུག་པ། ཤེས་བྱ་དཔེ་དོན་གྱི་སྒོ་ནས་བསྒོམ་པ་གྲོགས་དང་བཅས་པ་ནི། ༧ ཤེས་བྱ་བཞིའི་གདམས་ངག་ལ། སྣང་སྲིད་འཁོར་འདས་ཀྱི་ཆོས་ཀུན་བདེན་པས་སྟོང་པ། སྒྱུ་མ་མཁན་གྱི་དཔེས་མཚོན་ནས་ཞེན་མེད་དུ་ཤེས་པར་བྱ། ཆོས་ཐམས་ཅད་རང་བཞིན་གཉིས་སུ་མེད་པས། ཙནྡ་གླ་བའི་དཔེས་མཚོན་ནས་གཉིས་མེད་དུ་ཤེས་པར་བྱ། འདུས་བྱས་མཚན་མའི་ཆོས་ལ་ཡིད་བརྟན་མེད་པས། གྲོགས་པོ་མཛའ་བོས་བསླུས་པའི་དཔེས་མཚོན་ནས་གཉེན་འདུན་གྱིས་བསླུ་བར་ཤེས་པར་བྱ། ཡེ་ནས་ཆོས་ཉིད་རང་ལ་རང་ཆས་སུ་ཡོད་པས། ཏིལ་དང་སྒྲོན་མེའི་དཔེས་མཚོན་ནས་འདུ་འབྲལ་མེད་པར་བྱའོ་བུ། དེ་ལྟར་ཤེས་ན་བདེན་ཞེན་གཉིས་འཛིན་གྱི་འཆིང་བ་རང་སར་གྲོལ་བའི་ཤེས་རབ་དྲི་མེད་རྒྱུད་ལ་སྐྱེའོ། ༈ །ལེའུ་ཉེར་བདུན་པ། བསྒོམ་པ་གྲོགས་དང་བཅས་པ་སྟོན་པ་ནི། ༧ གནད་ཀྱི་གདམས་ངག་བཞི་ལ། ཆོས་ཉིད་སྟོང་པའི་རྩལ་སྣ་ཚོགས་སུ་ཤར་ཡང་ཤར་དུས་ནས་རང་བཞིན་མེད་པས་སྣང་སྟོང་ཟུང་དུ་འཇུག་པ། དངུལ་དཀར་མེ་ལོང་ཕྱིས་པའི་དཔེས་མཚོན་ནས་སྣང་བ་མ་འགགས་པ་ཆིག་ཆོད་དུ་སྟོན་པའི་གདམས་ངག་གི་གནད། གཉིས་མེད་ལ་གཉིས་སུ་འཛིན་པས་མ་བཅིང་བར་མཚན་མ་རང་སར་གྲོལ་བ། བརྩོན་བཀྲོལ་བའི་དཔེས་མཚོན་ནས་མཚན་མས་མ་བསྡམས་པས་གདམས་ངག་གི་གནད། རང་སེམས་སྐྱེ་མེད་ཀྱི་དོན་ལ་བསྒོམ་རྒྱུ་རྡུལ་ཙམ་མེད་ཀྱང་ཡེངས་སུ་སྐད་གཅིག་མེད་པར་བློ་བྲལ་འཛིན་མེད་དུ། མདའ་བསྲང་བ་དང་འབེན་ལ་འཕེན་པའི་དཔེས་མཚོན་ནས་དོན་སྐྱེ་མེད་ལ་མ་ཡེངས་པ་གདམས་ངག་གི་གནད། ནམ་མཁའ་སུམ་ཕྲུག་གི་དགོངས་པས་དབྱིངས་རིག་འདུ་འབྲལ་མེད་པའི་དོན་ལས་མི་གཡོ་བ། མིག་འབྱེད་སྨན་པའི་དཔེས་མཚོན་ནས་དམིགས་པ་རྩེ་གཅིག་ཏུ་བཞག་པའི་གདམས་ངག་གི་གནད་དགོས་སོ་བུ། དེས་འཁྲུལ་སྣང་གཞི་མེད་དུ་སངས་ནས་མཚན་མ་རང་སར་གྲོལ་བར་འགྱུར་རོ། །ལེའུ་ཉེར་བརྒྱད་པ། ཕྱི་ནང་གི་སྤྲོས་པ་གཅོད་པའི་ཞལ་གདམས་ནི། བཅད་པ་བཞི་ལ། མཚན་རྟོག་གང་ཤར་ཆོས་ཉིད་ལས་གཞན་དུ་འདའ་ས་མེད་པ། རུས་སྦལ་དངུལ་གཞོང་དུ་བཞག་པའི་དཔེས་མཚོན་ནས་མཚན་མའི་འབྱུང་འཇུག་རྒྱུན་བཅད། ཅིར་སྣང་ཆོས་ཉིད་ལས་མ་གཡོས་པ། གསེར་ལས་བཟོ་བྱས་པའི་དཔེས་མཚོན་ནས་རང་བཞིན་ཆོས་ཉིད་ལས་མི་འདའ་བར་ཐག་བཅད། བདེ་སྡུག་སྣ་ཚོགས་རིག་པའི་ངང་དུ་གཅིག་པ། བུ་རམ་དང་མངར་བའི་དཔེས་མཚོན་ནས་གཉིས་སུ་མེད་པར་ཐག་བཅད། འཁོར་འདས་ཐམས་ཅད་རང་བྱུང་ཡེ་ཤེས་ཀྱི་རྩལ་ལས་ཤར་བ། ཆུ་ཟླ་དང་ནམ་མཁའི་ཟླ་བའི་དཔེས་མཚོན་ནས་རིག་པ་རང་བྱུང་དུ་ཐག་བཅད་དོ་བུ། ༈ །ལེའུ་ཉེར་དགུ་པ། འཁོར་འདས་ཀྱི་བྱུས་གདབ་པའི་སྒོ་ནས་བསྒོམ་པའི་གྲོགས་བསྟན་པ་ནི། ༧ ལྟ་བ་བཞི་ལ། ངོ་བོ་ཟུང་དུ་ཆུད་པས་རོལ་པ་བརྒྱན་དུ་བཀོད་པ། འཇའ་ཚོན་ནམ་མཁའི་རྒྱན་གྱི་དཔེས་མཚོན་ནས་དྲན་སྣང་ཆོས་ཉིད་ཀྱི་རྒྱན་དུ་ལྟ་བ། རྣམ་རྟོག་ཆོས་ཉིད་དུ་ཤེས་པས་ཆགས་སྡང་གི་སྲོག་ཆོད་པ། རལ་གྲི་ངར་བླུད་ཀྱི་དཔེས་མཚོན་ནས་རྣམ་རྟོག་ཆོས་ཉིད་དུ་ལྟ་བ། བག་ཆགས་ཀྱི་རྗེས་མི་གསོག་པ། མཁའ་ལ་བྱ་འཕུར་གྱི་དཔེས་མཚོན་ནས་དྲན་སྣང་རྗེས་མེད་དུ་ལྟ་བ། ཆོས་ཅན་ཆོས་ཀྱི་ཉིད་དུ་གྲོལ་བ། རྨི་ལམ་གཉིད་སད་ཀྱི་དཔེས་མཚོན་ནས་སྣང་སྲིད་མི་བདེན་པར་ལྟ་བའོ་བུ། ༈ །ལེའུ་སུམ་ཅུ་པ། བཞག་ཐབས་དངོས་བསྟན་པ་ནི། ༧ །བསྒོམ་པ་བཞི་ལ། ཏིང་ངེ་འཛིན་གྱི་རྒྱུ་ཚོགས་ཚང་ཞིང་བཞག་ཐབས་ཀྱི་གནད་ལ་མཁས་པས་བརྩོན་པ་དྲག་པོས། ཟླ་བ་ཡར་ངོའི་དཔེས་མཚོན་ནས་གོམས་པ་གོང་དུ་འཕེལ་བར་བྱས་ལ་བསྒོམ། སྨྲ་བསམ་བརྗོད་མེད་ཡེ་ཤེས་དམ་པའི་སྤྱོད་ཡུལ་དུ་གྱུར་པ་རྒྱལ་བའི་ཡུམ་གྱི་དགོངས་དོན། ཁ་ཆུས་བཀང་བའི་དཔེས་མཚོན་ནས་དྲན་སྣང་བརྗོད་མེད་བདེ་བ་ཆེན་པོར་བསྒོམ། ཁུག་སྣ་བདེན་མེད་ཀྱི་དཔེས་གྲགས་སྣང་། སྟེ་འཇིག་རྟེན་ཆོས་བརྒྱད་ཀྱི་རྟོག་པ། ཡང་དག་མིན་པར་བསྒོམ། སེམས་ཉིད་དུ་སྟོང་པ་ནམ་མཁའ་ལྟ་བུའི་དོན། ཆུ་དང་ཆུ་བུར་གྱི་དཔེས་མཚོན་ནས་གཉུག་མ་ཁོག་སྟོང་དུ་བསྒོམ་མོ་བུ། ༈ །ལེའུ་སོ་གཅིག་པ། སྤྱོད་པ་ཉམས་རྟོགས་དང་ལྡན་པར་བསྟན་པ་ནི། ༧ སྦྱོར་བ་བཞི་ལ། བག་མ་གསར་བག་དང་ལྡན་པ་ལྟར་ངོ་ཚ་དང་ཁྲེལ་ཡོད་ཤེས་པར་བྱ་ཞིང་། སྨྱོན་པ་དྲན་ཚད་བྱེད་པ་ལྟ་བུའི་ཆོས་དང་འགལ་བའི་ལས་མི་བྱེད་པའི་དོན་ཏེ། བག་མ་དང་སྨྱོན་པའི་དཔེས་མཚོན་ནས་འཇིག་རྟེན་པ་དང་རྒྱབ་ལོག་ཏུ་སྤྱད། ཆོས་ཅན་གྱི་སྣང་བ་སྣ་ཚོགས། རྒྱ་མཚོ་དང་ཉ་མོའི་དཔེས་མཚོན་ནས་ཆོས་ཉིད་ལས་མི་འདའ་བར་སྤྱོད། ཉོན་མོངས་དུག་ལྔ་སོགས། ནག་ལ་མེ་མཆེད་ཀྱི་དཔེས་མཚོན་ནས་ཅིར་སྣང་ཡེ་ཤེས་སུ་སྤྱོད། ཆོས་དང་ཆོས་ཅན་ནམ་སྣང་སྟོང་དབྱེར་མེད་པ། ལན་ཚྭ་ཆུར་ཐིམ་པའི་དཔེས་མཚོན་ནས་དུ་མ་རོ་གཅིག་ཏུ་སྤྱོད་དོ་བུ། ༈ །ལེའུ་སོ་གཉིས་པ། ཉམས་མྱོང་འཆར་ཚུལ་བསྟན་པ་ནི། ༧ ཉམས་བཞི་ལ། སྣང་ལ་དེར་འཛིན་མེད་པ། བུ་ཆུང་མེ་ལོང་གི་དཔེས་མཚོན་ནས་རྟོག་འཛིན་མེད་པའི་ཉམས། ཉམས་རྟོགས་གསར་དུ་སྐྱེས་པ། དབུལ་མོས་གཏེར་རྙེད་པའི་དཔེས་སྔར་མ་སྐྱེས་པའི་ཡེ་ཤེས་སྐྱེ་བའི་ཉམས། ཐག་ཆོད་ཀྱི་གདེང་རྙེད་པ། ཐི་བྱ་ཚང་འཇུག་དང་སེང་གེའི་དཔེས་མཚོན་ནས་ཉམས་དང་རྩིས་གདབ་མེད་པའི་ཉམས། ཐེག་པ་དམན་པའི་ལྟ་སྤྱོད་ཀྱིས་མི་འཇིགས་པ། ཝས་སེང་གེ་མི་འཇིགས་པའི་དཔེས་མཚོན་ནས་གྲུབ་མཐས་སྐྲག་སྔངས་མེད་པའི་ཉམས་སོ་བུ། ལེའུ་སོ་གསུམ་པ། ཉམས་མྱོང་ལས་རྟགས་འཆར་བ་ནི། ༧ རྟགས་བཞི་ལ། ཉམས་རྟོགས་ནང་དུ་རྒྱས་པ། བུམ་ནང་མར་མེའི་དཔེས་མཚོན་ནས་རིག་པ་ཁ་གསལ་གྱི་རྟགས། འདི་ལ་ཤེས་བྱ་གཤིས་ཐོག་གྲོལ་བའི་ཆོས་བཞི་སྟེ། རང་གིས་རང་གྲོལ་བ་ལྕགས་ཀྱིས་ལྕགས་གཅོད་པ་ལྟ་བུ། གཅིག་ཐོག་ཏུ་གཅིག་གྲོལ་བ་སྣང་སེམས་དབྱེར་མེད་མེས་མེ་འབར་བ་ལྟ་བུ་རང་ངོ་རང་གིས་ཤེས་པས་གཤིས་ཐོག་ཏུ་གྲོལ་བ་ནམ་མཁའ་ལ་འདྲེས་པ་ལྟ་བུ། སྣང་བ་རང་སྣང་དུ་ངོ་ཤེས་པ་མ་དང་བུ་འཕྲད་པ་ལྟ་བུའོ། །འབད་རྩོལ་དང་བྲལ་བ། རྒྱལ་པོ་གདན་ལ་བཞུགས་པའི་དཔེས་མཚོན་ནས་འདོད་ཡོན་ལ་བློ་མི་འཇུག་པའི་རྟགས། ལོངས་མེད་ཀྱི་བློ་སྣ་མི་བཏུང་བའམ་ཆོས་ཀུན་སྐྱེ་མེད་དུ་ཐག་ཆོད་པ། ནད་པ་དུར་ཁྲོད་ཀྱི་དཔེས་མཚོན་ནས་སྐྱེ་མེད་ཡིད་ལ་བྱེད་པའི་རྟགས། སྤང་གཉེན་གཉིས། ཕུག་རོན་དང་ཁྲ་ཡིས་མཚོན་ནས་ཉོན་མོངས་པ་ཐོག་བརྫིས་བྱེད་པའི་རྟགས་སོ། ༈ །ལེའུ་སོ་བཞི་པ། ཉམས་རྟོགས་དང་མི་ལྡན་ན་འཁོར་བར་རང་དབང་མེད་པར་སྐྱེ་བར་བསྟན་པ་ནི། ༧ རྒྱལ་པོ་སྒྱུ་མས་བསླུས་པའི་དཔེ་སྟེ། རྒྱལ་པོ་མིག་ཡོར་གྱི་བདེན་པ་བཞི་ལ། དངོས་མེད་ལ་དངོས་པོར་བཟུང་བ། །སྨིག་རྒྱུ་ཆུར་མཐོང་གི་དཔེ་ཡིས་མཚོན་ནས་འདོད་ཡོན་འཁྲུལ་པར་མ་ཤེས་པས་འཁྱམས། དེ་མ་ཡིན་ལ་དེར་བཟུང་བ། ཐག་པ་སྦྲུལ་མཐོང་གི་དཔེ་ཡིས་མཚོན་ནས་རང་འཁྲུལ་པར་མ་ཤེས་པས་འཁྱམས། མ་རྟོགས་པར་རྟོགས་སྤྱོད་བྱེད་པ། ནེ་ཙོས་རྨ་བྱའི་ལད་མོ་བྱས་པས་ཤི་བའི་དཔེ། ནེ་ཙོ་དུག་བཟོས་ཀྱི་དཔེ་ཡིས་མཚོན་ནས་དངོས་པོ་ལ་བདེན་པར་ཞེན་པས་འཁྱམས། མེད་པ་ལ་ཡོད་པར་བཟུང་བས་རང་དབང་མེད་པར་ཆགས་སྡང་གི་འཁོར་བ། བྱིས་པ་ཆང་སྟོང་གིས་ཟིད་ནས་འདིར་ཟན་ཆང་ཡོད་ཅེས་མགོ་བསྐོར་བའི་དཔེས་མཚོན་ནས་སྣང་བས་བསླུས་པས་འཁོར་བར་འཁྱམས་སོ་བུ། ༈ །ལེའུ་སོ་ལྔ་པ། རྒྱུད་ཚོད་མཐོན་པོའི་དམ་བཅའ། ༧ བསླུ་བ་བཅུ་ལ། འདི་རྣམས་མི་འབྱུང་བའི་རྒྱུ་དུས་གསུམ་གྱི་སངས་རྒྱས་དཔང་དུ་བཙུག་པ་ཡིན་པས། དམ་བཅའ་ཉམས་པའི་ཉེས་དམིགས་དཔག་ཏུ་མེད་ཅིང་། མ་ཉམས་ན་ཡོན་ཏན་བསམ་གྱིས་མི་ཁྱབ་སྟེ་དུས་གསུམ་གྱི་སངས་རྒྱས་ཐམས་ཅད་ཀྱི་སྲས་ཀྱི་ཐུ་བོར་གྱུར་པས་ན་ཐུན་ཚོད་རེའི་ནང་དུ་བསྔོ་བགྲང་བྱ་ཞིང་ཉམས་ན་བཤགས་སྡོམ་དྲག་པོས་སོར་ཆུད་པར་བྱའོ། །དེ་ལ་བདེ་སྡུག་ཐམས་ཅད་རང་གི་སྔོན་གྱི་ལས་སྣང་དུ་ཤེས་པས། བདག་ལ་འཇིག་རྟེན་གྱི་ཁམས་དགྲར་ལངས་ཀྱང་ཆོས་ཉིད་ལས་མ་འཁྲུལ་བར་བྱ། འཁྲུལ་ན་དུས་གསུམ་སངས་རྒྱས་བསླུས་སོ། །རྟག་ཏུ་དྲན་ཤེས་ཀྱིས་ཟིན་པས་བདག་གིས་ཅི་བྱེད་ཀྱང་ཆོས་ཉིད་སྐྱེ་མེད་ཀྱི་ངང་ལས་མ་འཁྱལ་བར་བྱ། འཁྱལ་ན་དུས་གསུམ་གྱི་སངས་རྒྱས་བསླུས་སོ། །རྐྱེན་ཅི་བྱུང་ཡང་། གཉེན་པོའི་ཁར་ཐུག །དད་པས་ཁམས་སོས། གདམས་ངག་ལ་བྱན་ཚུད། ཚུལ་ཁྲིམས་ལ་ངོ་ལྐོག་མེད། ལས་འབྲས་ལ་ཡིད་ཆེས་པའི་སྒོ་ནས། བདག་གིས་ལུས་སྲོག་ལ་བབ་ཀྱང་ཆོས་རང་མ་ཤོར་བར་བྱའོ། །ཤོར་ན་དུས་གསུམ་གྱི་སངས་རྒྱས་བསླུས་སོ། །ཁེ་ཉན་གྱི་ཁྱད་པར་དང་བཀའ་དྲིན་དྲན་པས། བདག་གི་བླ་མ་དམ་པ་དང་དམ་ཚིག་རྡུལ་ཙམ་ཡང་མ་ཉམས་པར་བྱ། ཉམས་ན་དུས་གསུམ་སངས་རྒྱས་བསླུས་སོ། །འཆི་བ་རྗེས་དྲན་དང་འཁོར་བའི་ཉེས་དམིགས་བསམ་པ་སོགས་ཀྱིས། བདག་གིས་དུས་འདིར་ཚེ་འདིའི་སྙན་གྲགས་སོགས་ཆོས་བརྒྱད་མི་བསྒྲུབ་པར་བྱང་ཆུབ་ཀྱི་སེམས་སྦྱོང་བའི་ལས་ལ་བརྩོན་པར་བྱ། ཚེ་འདི་བསྒྲུབས་ཤིང་སེམས་སྦྱོང་བ་ལ་བརྩོན་པར་མ་བྱས་ན་དུས་གསུམ་སངས་རྒྱས་བསླུས་སོ། །མདོ་རྒྱུད་ཀུན་ནས་གསུངས་པ་བཞིན། བླ་མ་རྗེ་བཙུན་རྣམས་རྡོ་རྗེ་སེམས་དཔའ་དངོས་སུ་བལྟ་ཞིང་མོས་གུས་བྱ། དེ་ལྟར་མ་བྱས་ན་དུས་གསུམ་སངསརྒྱས་བསླུས་སོ། །ཅིར་སྣང་སེམས། སེམས་ཉིད་སྟོང་པ། གཉིས་མེད་ཡེ་ཤེས་སུ་ཤེས་པས། བདག་གིས་ཕྱི་ནང་གི་དངོས་པོ་ཐམས་ཅད་སེམས་སུ་ཤེས་པར་བྱས་ལ་ཆགས་སྡང་མི་བྱ། དེ་བྱས་ན་དུས་གསུམ་སངས་རྒྱས་བསླུས་སོ། །མར་ཤེས་དྲིན་དྲན་དྲིན་གཟོའི་བསམ་པས། བདག་གིས་སྙིང་རྗེ་ཆེན་པོ་བསྐྱེད་ཅིང་སེམས་ཅན་གྱི་དོན་བསྒྲུབ་པར་བྱ། གལ་ཏེ་སེམས་བསྐྱེད་ལས་འདས་ཏེ། རང་གཅིག་པུའི་དོན་བསྒྲུབས་ན་དུས་གསུམ་སངས་རྒྱས་བསླུས་སོ། །ཕྱི་ནང་གི་དངོས་པོ་ཐམས་ཅད་ལ་བདེན་པར་ཞེན་པའི་དབང་གིས། གཉིས་འཛིན་ཐམས་ཅད་བདུད་ཀྱི་ལས་ཡིན་པས་གཉིས་མེད་དུ་ཤེས་པར་བྱ། མ་བྱས་ན་དུས་གསུམ་སངས་རྒྱས་བསླུས་སོ། །བདག་གི་ལུས་འདི་ལ་བརྟེན་ནས་སངས་རྒྱས་ཀྱི་འབྲས་ཚོལ་བ་ལ་སྤྱོད་ལམ་བཞིར་དྲན་པས་ཟིན་པར་བྱས་ཏེ་ལུས་སྲུང་བ་སོགས། བག་དང་ལྡན་པར་བྱ། མ་བྱས་ན་དུས་གསུམ་སངས་རྒྱས་བསླུས་སོ་བུ། ༈ །ལེའུ་སོ་དྲུག་པ། མ་གཡེངས་པའི་གདམ་ངག་གི་སྒོ་ནས་བསྒོམ་པ་ནི། ༧ མ་ཡེངས་པ་བཞི་ལ། ཏིང་ངེ་འཛིན་གྱི་བཞག་ཐབས་ཀྱི་གནད་ལ་མཁས་པ། དཔེ་བས མ་གཏན་ཆོས་དྲུག་ལས་གསུངས་བཞིན། ཤེས་པ་འཛིན་མེད་ཀྱི་བློ་ལས་མ་ཡེངས་པ་མདའ་སྲོང་བ་ལྟ་བུ། སྐྱེ་མེད་ཀྱི་དོན་ལ་བློས་ཅིར་ཡང་མི་འཛིན་པ། དྲན་མེད་ཀྱི་དབྱིངས་ལས་མ་ཡེངས་པ་གྱད་ཀྱི་རྩལ་སྦྱོང་བ་ལྟ་བུ་ཡང་ན་རྩི་སྦྱོར་བ་སྟེ་ལྷ་བཟོ་མཁས་པས་ཚོན་རྩི་སྦྱོར་བ་ལྟ་བུའོ། །ཆོས་སྤྱན་ཐམས་ཅད་ཆོས་ཉིད་ལས་མ་འདས་པས་རང་བཞིན་གཉིས་མེད་དམ། མཉམ་ཉིད་ཀྱི་ཀློང་ལས་མ་ཡེངས་པ་ཉ་འཛིན་པ་ལྟ་བུ། ལྟ་བ་མཐར་འཛིན་དང་བསྒོམ་པ་བློས་བྱས་ལས་གྲོལ་བས། བསམ་དུ་མེད་པ་ལས་མ་ཡེངས་པ་ཚེར་མ་འདོན་པ་ལྟ་བུའོ་བུ། ༈ །ལེའུ་སུམ་ཅུ་སོ་བདུན་པ། བཞག་ཐབས་གདམས་ངག་གི་སྒོ་ནས་བསྒོམ་པ་ནི། ༧ གདམས་ངག་ཐབས་བཞི་ལ། སྤྱི་ཚོགས་དྲུག་གི་ཡུལ་ལ་ནང་དེ་དར་འཛིན་གྱི་མཁན་པོ་སྟོར་བ། ཤེས་པ་འཛིན་མེད་ཧད་པོའི་གདམས་ངག་གི་མགོ་སྐམ་པོ་ལྟ་བུ། །འདིའི་བཞག་ཐབས་ཀྱི་གདམས་ངག་དངོས་ནི། དམིགས་མེད་ཀྱི་ཀློང་དུ་རྩོལ་མེད་དུ་བཞག །འདུས་མ་བྱས་པའི་དབྱིངས་སུ་མ་བཅོས་པར་བཞག །ཐམས་ཅད་རང་སེམས་སུ་ཤར་བ་ལ་ང་བདག་མེད་པར་བཞག །མ་བཅོས་པའི་ཀློང་དུ་མི་དམིགས་པར་བཞག །གཟུང་འཛིན་མེད་པའི་ཀློང་དུ་རང་ལུགས་སུ་བཞག །མ་སྐྱེས་པའི་ཀློང་དུ་བརྗོད་བྲལ་དུ་བཞག་པ་སྟེ་དྲུག་གོ །ཤེས་པ་ཅེ་རེ་ལོང་གི་གདམས་ངག་སྐྱེས་བུ་དུག་ཟོས་པ་ལྟ་བུ། དཔེ་ཐང་ཁྲོམ་ཟོས་པའི་མིག་ལ་སྐྲ་ཤད་འཛག་པ། དོན་ཚོགས་དྲུག་གི་ཡུལ་སྣང་བདེན་མེད་དུ་ཤེས་པས་བདེན་འཛིན་ལོག་པ། གདམས་ངག་དངོས་ལ་གདོད་ནས་མ་སྐྱེས་པའི་ཆོས་དྲུག་སྟེ། གདོད་ནས་མ་ཆགས་པའི་ཆོས་ཉིད། མ་ཞེན་རང་གྲོལ་གྱི་རྟོགས་པ། མ་བཟུང་རང་བྱུང་གི་ཤར་ལུགས། མ་བྱས་ལྷུན་གྲུབ་ཉམས་མྱོང་། མ་སྐྱེས་བདག་མེད་ཀྱི་གནས་ལུགས། མ་བཙལ་རང་ཤར་གྱི་རོལ་པའོ། །ཕྱི་སྣང་བ་ལ་ནང་ཞེན་འཛིན་གྱིས་མ་བསླད་པ། ཤེས་པ་རྩིས་མེད་ཀྱི་གདམས་ངག་བུ་ཆུང་ལྟ་བུ། གདམས་ངག་དངོས་ནི། མ་བཅོས་སེམས་ཀྱི་ཆོས་ཉིད། མི་རྟོག་སེམས་ཀྱི་ལྟ་བ། མི་དམིགས་སེམས་ཀྱི་ཡེ་ཤེས། མ་ཡེངས་སེམས་ཀྱི་བསྒོམ་པ། མི་གཡོ་སེམས་ཀྱི་ངོ་བོ། མི་མདའ་སེམས་ཀྱི་དམ་ཚིག །མི་གཏོང་སེམས་ཀྱི་སྤྱོད་པའོ། །ཤེས་པ་ཅོག་བཞག་ཧོར་རྡོལ་གྱི་གདམས་ངག་སྐྱེས་བུའི་སྙིང་བཏོན་པ་ལྟ་བུའོ་བུ། དཔེ་སྐྱེས་བུ་སྙིང་བཏོན་པ་སོས་རེ་མེད་ཅིང་བསམ་རྟོག་རྒྱུན་ཆད་པ། དོན་གདམས་ངག་ཅོག་བཞག་ཧོར་རྡོར་ཏེ་མ་བཅོས་རང་ལུགས་སུ་ཅོག་གེར་བཞག་པས། འཇོག་མཁན་དང་བདག་པོ་མེད་པ་ཧོར་རྡོལ་བ་ཡུལ་ཤེས་སྣ་ཚོགས་སུ་ཤར་བ་ལ་གཉེར་མེད་པར་འཛིན་མེད་ལྷུག་པར་འཇོག་པ་སྟེ། བདེན་གཉིས་དབྱེར་མེད་ཀྱི་གནས་ལུགས་ལ། རྒྱུ་རྐྱེན་རྩོལ་སྒྲུབ་དང་བྲལ་བར་རིག་པ་སྟོང་གསལ་གྱི་ངང་ལ་མ་བཅོས་གཉུག་མར་འཇོག་པའོ། ༈ །ལེའུ་སོ་བརྒྱད་པ། རང་བབས་སུ་བཞག་པའི་གདམས་ངག་ནི། ༈ །འདུག་པ་བཞི་ལ། སངས་རྒྱས་ཀྱི་དགོངས་པ་ཡེ་ནས་རང་ལ་ཡོད་པས་ནམ་ཡང་། སྟོར་རྒྱུ་མེད་པར་མ་ཚོལ་གསལ་ལ་རྟོག་པ་མེད་པ་འདུག །སེམས་ཡེ་ནས་མ་བཟུང་མ་བཅིངས་པས། ཤོར་རྒྱུ་མེད་པར་མ་འགུགས་བདེ་ལ་མི་རྟོག་པར་འཇུག །ཡེངས་ཡུལ་ཆོས་ཉིད་ལས་མ་འདས་པས། ཡེངས་པ་མེད་པར་མ་ཡེངས་ལྷང་ངེ་མེ་རེ་ཞོག །ཇི་ལྟར་འཇོག་ན་མ་བཅོས་པའི་ཆོས་དྲུག་སྟེ། སེམས་ཉིད་བཙལ་ན་སྟོང་། བཀག་ན་ཉམས། བཅོས་ན་བསླད། བསྒོམ་ན་འཆིང་། བལྟས་ན་ཡལ། རྩོལ་ན་སྒྲིབ་པས་མ་བཙལ། མི་དགག །མ་བཅོས། མི་བསྒོམ། མ་ལྟ། མི་རྩོལ་བར་རང་ལུགས་སུ་འཇོག་པའོ། །ཡིད་ལ་བྱ་རྒྱུའི་ཆོས་མེད་ཅིང་བྱས་པའི་ཆོས་ཀྱིས་བྱར་མེད་མི་འགྲུབ་པས། བྱ་རྒྱུ་མེད་པར་མ་བྲེལ་ཐང་ངེར་སྦྲེང་ངེ་། སྟེ་ཉམས་ལེན་ཐང་ལྷོད་མེད་པར་གཞུ་བརྡུང་བའི་རྒྱུད་བཞིན་དུ་འདུག་ཅིག་བུ། ༈ །ལེའུ་སོ་དགུ་པ། ཤུགས་འབྱུང་འགགས་པ་མེད་པ་སེམས་ཀྱིགནད་ནི། ༧ སེམས་ཀྱི་གནད་བཟུང་བ་དྲུག་ལ། བཞི་ཆ་གསུམ་བྲལ་གྱི་རིག་པ་གཟུང་འཛིན་གྱི་རྟོག་པས་མ་བསླད་པའི་མ་བཅོས་ཐད་ཀ་འདི་གཉུག་མའི་ཆོས་སྐུ་ཡིན་པས། དམིགས་པ་རང་ཡན་གྱི་གདམས་ངག་གིས་སེམས་ཟིན་པར་བྱེད་པ། ལས་ཟིན་པའི་སྐྱེས་བུའི་དཔེས་མཚོན་ནས་ཡིད་དལ་བཙལ་བ་སེམས་ཀྱི་གནད། དངོས་འཛིན་གྱི་བདེན་ཞེན་ལས་གྲོལ་བས་བཟང་ངན་གྱི་རྟོག་པའི་འཕྲིག་མེད་པ། སྐྱེས་བུ་ནད་ཀྱིས་ཟིན་པའི་དཔེས་མཚོན་ནས་འཕྲིག་པ་མེད་པ་སེམས་ཀྱི་གནད། ཡེ་ནས་སངས་མ་རྒྱས་པའི་ཆོས་གཅིག་ཀྱང་མེད་པས་གང་ལའང་དགག་སྒྲུབ་ཀྱི་གཟའ་གཏད་མེད་པ། སྐྱོན་པ་གཡང་ལ་འཕྱོང་བའི་དཔེས་མཚོན་ནས་ཚོམ་ཚོམ་མེད་པ་སེམས་ཀྱི་གནད། ཅིར་སྣང་ཡེ་ཤེས་སུ་གྲོལ་བས། ལྟ་བ་གཉིས་འཛིན། བསྒོམ་པ་དམིགས་མེད་གཏད། སྤྱོད་པ་རྩོལ་སྒྲུབ། འབྲས་བུ་ལ་ཡིད་སྨོན་དང་བྲལ་བ། དཔེ་རང་ཉིད་ཀྱི་དོན་དུ་གཉེར་བའི་མི་དང་འཕྲད་ཟིན་པའི་དཔེས་མཚོན་ནས་རེ་དོགས་མེད་པ་སེམས་ཀྱི་གནད། ཨ་ཏིའི་རང་སྐད་བཏོན་པས་ཐེག་དམན་ཟིལ་གྱིས་གནོན་པ། སེང་གེ་སྡེར་ཆགས་ཀྱི་གསེབ་ཏུ་འགྲོ་བའི་དཔེས་མཚོན་ནས་ཉམས་ང་མེད་པ་སེམས་ཀྱི་གནད། གནས་ལུགས་རང་གསལ་སྒྲིབ་གཡོག་དང་བྲལ་བ། ཏིལ་གྱི་མར་མེའི་དཔེས་མཚོན་ནས་གསལ་ལ་རྟོག་པ་མེད་པ་སེམས་ཀྱི་གནད་དོ་བུ། ༈ །ལེའུ་བཞི་བཅུ་པ། ལྟ་བསྒོམ་སྤྱོད་འབྲས་རང་ཆད་ལས་གཞན་དུ་མེད་པར་བསྟན་པ་ནི། ༧ མི་ཚོལ་བའི་ཆོས་བཞི་ལ། བློ་བྲལ་ཆོས་ཉིད་ཀྱི་དགོངས་པ་རང་ཆུས་སུ་གནས་པས་བློས་བྱས་ཕྱོགས་འཛིན་གྱི་ལྟ་བས་གསར་དུ་ཚོལ་མི་དགོས་པ། ཉི་མ་འོད་ཚོལ་བའི་དཔེས་མཚོན་ནས་གཟའ་གཏད་མེད་པའི་ལྟ་བས་གཏད་ཅན་དུ་མི་ཚོལ། རང་བབས་གཉུག་མའི་དོན་ལ་དམིགས་གཏད་སེམས་འཛིན་གྱིས་གསར་དུ་བསྒོམ་མི་དགོས་པ། ཡིད་བཞིན་གྱི་ནོར་བུ་དགོས་འདོད་མི་ཚོལ་བའི་དཔེས་དམིགས་གཏད་མེད་པའི་བསྒོམ་པས་དམིགས་གཏད་ཅན་དུ་མི་ཚོལ། ཉོན་མོངས་ཡེ་ཤེས་སོགས་སྤང་གཉེན་རོ་མཉམ་པས་བླང་དོར་གྱི་སྤྱད་བྱ་སྤྱོད་བྱེད་གཉིས་མེད་པར། སྐྱེས་བུ་རང་ཉིད་སྐྱེས་བུ་རང་ལ་མི་ཚོལ་བའི་དཔེས་མཚོན་ནས་བླང་དོར་མེད་པའི་སྤྱོད་པས་བླང་དོར་ཅན་དུ་མི་ཚོལ། ཡེ་སངས་རྒྱས་པའི་འབྲས་བུ་རང་ལ་གནས་པས་གཞན་ལ་རག་མི་ལས་པ་རྒྱལ་པོ་གདན་ནོན་པ་ལྟ་བུ་སྟེ། བཙད་པོ་བཙད་པོ་ལ་མི་ལྡག་པའི་དཔེས་མཚོན་ནས་རེ་དོགས་མེད་པའི་འབྲས་བུ་རེ་དོགས་ཅན་དུ་མི་ཚོལ་ལོ་བུ། དེ་ལྟར་འཁོར་འདས་ཀྱི་ཆོས་ཐམས་ཅད་རང་བཞིན་དབྱེར་མེད་པས་རེ་དོག་སྤྲོས་རྩོལ་ལས་འདས་པའི་ཆོས་ཉིད་མཉམ་པའི་དོན་ལས་མ་གཡོས་པར་བྱའོ། ༈ །དེའང་ལྷག་པའི་སེམས་ཀྱི་བསླབ་པའི་ལེའུ་རྣམས་རྣམ་བཤད་དུ་གོང་འོག་གི་འབྲེལ་བསྡེབས་ནས། ལེའུ་སུམ་ཅུ་པའི་རྗེས་སུ་སོ་དྲུག་དང་སོ་དགུའི་བར་དང་། དེ་མཚམས་སུ་ཤེས་རབ་ཀྱི་བསླབ་པའི་ནང་གི་ལེའུ་བདུན་ཅུ་རྩ་བདུན་པ་ཡར་དྲངས། དེ་ནས་ལེའུ་སོ་གཅིག་པ་ནས་སོ་ལྔའི་བར་དང་། དེའི་རྗེས་སུ་ལེའུ་བཞི་བཅུ་པ་བཞག་པར་མཛད་ནའང་འདིར་ནི་རྩ་བ་རང་གི་དཀྱུས་བཞིན་དུ་བྲིས་པའོ། །མདོར་ན། དེ་རྣམས་ཀྱི་སྒོ་ནས་བར་དོ་དང་། སྒྱུ་འཕྲུལ་དང་མཐུན་པར་ལྷག་པ་ཏིང་ངེ་འཛིན་གྱི་བསླབ་པ་ལ་བརྟེན་ནས་ལམ་ཁྱེར་ལྟ་སྒོམ་དང་བཅས་པ་བུ་ཆུང་གསོ་བ་ལྟ་བུ། ཐབས་ཤེས་ཟུང་དུ་འབྲེལ་བ་མཁའ་ལ་བྱ་འཕུར་གྱི་ཚུལ་དུ་བློ་ཆེ་ཆུང་ཀུན་ལ་མཚམས་པར་བཤད་པའི་གདམས་ངག་ཐལ་ལོ། །ཞལ་གྱི་གདམས་པ་བརྒྱད་ཅུ་པ་ལས་ཐབས་བསམ་གཏན་རྩེ་གཅིག་ལ་གདམས་པའི་སྐབས་ཏེ་གསུམ་པའོ། ༈ །རྩ་བའི་ས་བཅད་བཞི་པ། ངོ་བོ་རྣམ་པར་དག་པ་ལྷག་པ་ཤེས་རབ་ཀྱི་བསླབ་པ་ལ་གདམས་པ་ལེའུ་སུམ་ཅུ་རྩ་བརྒྱད་དུ་བཞུགས་པ་ལས། ལེའུ་ཞེ་གཅིག་པ། ཡིན་པ་བཅུ་གཉིས་ཀྱི་ལྟ་བ་བསྟན་པ་ནི། ༧ སྨད་སེམས་ཕྱོགས་ཀྱི་དགོངས་པ་སྤུ་གྲི་སོ་བརྟེབ་ལྟ་བུ། དོན་འཁོར་གསུམ་མི་དམིགས་པའི་ཤེས་རབ་ཀྱིས་ཉོན་མོངས་རྣམ་རྟོག་ཐམས་ཅད་དུ་རྩ་བྲལ་དུ་གཅོད་པ་སྟེ། གཅོད་ལུགས་འཁོར་འདས་སོགས་གཞི་ལམ་འབྲས་བུའི་ཆོས་ཐམས་ཅད་རང་སེམས་སྐྱེ་མེད་ཀྱི་རོལ་བར་ཤར་བར་བཟང་ངན་མེད་པར་མཐའ་གྲོལ་ནམ་མཁའ་ལྟ་བུའི་དོན། རང་བཞིན་སྐྱེ་མེད། རོལ་པ་འགགས་མེད། མཚན་ཉིད་གཉིས་མེད་སོགས་སུ་ངོ་སྤྲོད་པ་ནི། ཀུན་བྱེད་ལས། ཆོས་ཀུན་རྩ་བ་སེམས་སུ་འདུས་པའི་ཕྱིར། །དེས་ན་རྩ་བའི་དོན་དེ་བསྟན་པར་བྱ། །ཞེས་སོ། །དེ་ཡང་། ཡིན་པ་བཅུ་གཉིས་ལ། རང་སེམས་ཆོས་ཉིད་སྐྱེ་མེད་ཀྱི་དོན་དེ་གར་ཡང་མ་སྤས་ཀྱང་མཚན་མའི་སྤྱོད་ཡུལ་དུ་སུས་ཀྱང་། མཐོང་བ་མེད་པ་ཡིན། ཡེ་ནས་རང་ཆས་སུ་མ་བྲལ་བར་ཡོད་ཀྱང་སྔར་རང་གིས་རང་ངོ་མ་ཤེས་པ་ཡིན། ཅི་ཡི་ངོ་བོར་ཡང་མ་གྲུབ་པས་བརྟགས་ན་མི་མཐོང་ཡང་མ་བརྟགས་ཉམས་དགའ་ཙམ་དུ་འཁོར་འདས་ཀྱི་ཆོས་ཀུན་མ་འགགས་པར་ཅིར་ཡང་སྣང་བ་ཡིན། དོན་ལ་མེད་བཞིན་འཁྲུལ་སྣང་སྣ་ཚོགས་སྣང་ཡང་རང་གི་རང་བཞིན་ཅིར་ཡང་མ་གྲུབ་པས་དངོས་པོ་མེད་པ་ཡིན། རྒྱུན་རིང་བསྐལ་པར་སྲིད་པར་འཁྱམས་ཀྱང་བདེ་གཤེགས་སྙིང་པོའི་རང་བཞིན་ལ་སྟོར་འབྲལ་མེད་པ་ཡིན། འཁོར་འདས་སྣ་ཚོགས་སུ་སྣང་ཡང་ཆོས་ཉིད་ཀྱི་རང་བཞིན་ལ་ནམ་ཡང་འགྱུར་བ་མེད་པ་ཡིན། དངོས་པོར་གྲུབ་པ་རྡུལ་ཕྲ་རབ་ཀྱི་ཆ་ཙམ་མེད་པར་ནམ་མཁའ་བཞིན་དུ་ཀུན་ལ་ཁྱབ་པ་ཡིན། ནམ་མཁའ་ལྟ་བུའི་སྟོང་པ་ཉིད་དེའི་ངང་ལ་རྒྱུ་འབྲས་རྟེན་འབྱུང་གི་ཆོས་སྣ་ཚོགས་མ་འགགས་པར་འབྱུང་བ་ཡིན། སེམས་རྟ་རྨུ་རྒོད་དང་འདྲ་བས་སྒྲིམས་ཏེ་ཙབ་ཙུམ་མང་ན་མི་ཟིན་གློད་ན་ཟིན་པས། མ་བཟུང་མ་བཏགས་གར་ཡང་ཆགས་པའམ་གནས་པ་ཡིན། ཞི་ལྷག་ཟུང་དུ་འབྲེལ་བས་ཁྱུང་མཁའ་ལ་ལྡིང་བ་བཞིན། འདེགས་པ་མེད་པར་ཆོས་ཉིད་ཀྱི་མཁའ་ལ་འགྲོ་བ་ཡིན། ཆོས་ཉིད་ཅི་ཡང་མ་ཡིན་པ་ལས་ཅིར་ཡང་འཆར་དུ་རུང་བས། རྩོལ་བ་མེད་པར་ཅི་སྒྲུབ་འགྲུབ་པ་ཡིན། སེམས་ཉིད་ལ་ཁ་དོག་དབྱིབས་གཟུགས་དང་མཚན་མ་མེད་པར་ཅི་ལྟར་ལྟས་ཤིང་བསྒོམ་པ་དེ་ལྟ་བུ་སྣང་བ་ཡིན་ནོ་བུ། མདོར་ན་རང་བཞིན་སྐྱེ་མེད་དུ་འདུག་པས་དངོས་གཞི་མེད། རོལ་པ་འགག་མེད་དུ་འདུག་པས་སྣ་ཚོགས་སུ་ཤར། ཆོས་ཉིད་གཉིས་མེད་དུ་འདུག་པས་བདེན་ཞེན་བྱ་རྒྱུ་མེད། བློ་ངོ་བོ་ཉིད་དུ་གྲོལ་བས་ཆོས་ཉིད་ལས་འདའ་ས་མེད་པར་ངོ་སྤྲད་པའོ། ༈ །ལེའུ་ཞེ་གཉིས་པ། ཡིད་ཆེས་བཅུ་གཉིས་ཀྱིས་བློ་ལ་དམ་བཅའ་བ་ནི། དོན་རྗེན་པར་མཐོང་བས་བློ་ལ་ཐེ་ཚོམ་མེད་པར་ཡིད་ཆེས་བཅུ་གཉིས་ལ། སྣང་སྲིད་ཐམས་ཅད་ནམ་མཁར་སྐྱེ་འཇིག་བྱེད་པའི་དཔེས་དོན་འཁོར་འདས་ཀྱི་ཆོས་ཐམས་ཅད་དེ་བཞིན་ཉིད་དུ་གཅིག་པས་རང་བཞིན་མེད་པར་ཡིད་ཆེས། ཆོས་ཀུན་གྱི་རྩ་བ་སེམས་སུ་འདུས་པས་སངས་རྒྱས་གཞན་ནས་བཙལ་དུ་མེད་པར་ཡིད་ཆེས། སེམས་ལ་རང་བཞིན་གྱིས་སྐྱེ་བ་དང་འགག་པ་མེད་པས་འདུས་བྱས་མིན་པར་ཡིད་ཆེས། སྣང་བ་ཐམས་ཅད་འཁྲུལ་པ་ཡིན་པས་དོན་ལ་དགྲ་གཉེན་གཉིས་སུ་མེད་པར་ངོ་བོས་མེད་པར་ཡིད་ཆེས། འཁྲུལ་པའི་བྱ་བ་བྱས་ཚད་དུཿཁ་སྟེ་སྡུག་བསྔལ་གྱི་རྒྱུ་ཡིན་པས་ཆོས་ཉིད་ཀྱི་དོན་ལ་བྱ་རྒྱུ་མེད་པར་ཡིད་ཆེས། ཆོས་དབྱིངས་སྐྱེ་མེད་ནི་ཆོས་ཀུན་གྱི་རང་བཞིན་ཡིན་པས་རང་བཞིན་གཉིས་སུ་མེད་པར་ཡིད་ཆེས། རང་སེམས་སྐྱེ་མེད་ཀྱི་དོན། རྟོགས་ན་སངས་རྒྱས་ཡིན་པས་ལམ་ལ་བགྲོད་དུ་མེད་པར་ཡིད་ཆེས། ཅིར་སྣང་མི་བདེན་སྒྱུ་མ་ལྟ་བུ་ཡིན་པས་ཆགས་སྡང་གིས་ཡིད་དཀྲུག་ཏུ་མེད་པར་ཡིད་ཆེས། སྣང་སེམས་དུ་མ་ར་ོགཅིག་པས་ཆགས་སྡང་སོགས་དུག་ལྔའི་རྟོག་པ་རང་བཞིན་སྐྱེ་མེད་ཡིན་པར་ཡིད་ཆེས། ཉོན་མོངས་སྐྱེ་ཡུལ་དགྲ་གཉེན་སོགས་བློས་གསར་དུ་བཏགས་པ་ཙམ་ལས་རང་གི་ངོ་བོས་གྲུབ་པ་མེད་པས་ཐམས་ཅད་སེམས་སུ་གྲོལ་བར་ཡིད་ཆེས། འཁོར་འདས་ཀྱི་ཆོས་ཀུན་གྱི་འབྱུང་གནས་ཡིན་པས་སེམས་ཉིད་དབྱིངས་ཀྱི་ཡུམ་ཡིན་པར་ཡིད་ཆེས། ནམ་མཁའ་བཞིན་དུ་ཆོས་ཀུན་གྱི་གནས་ཡིན་པས་སེམས་ཀྱི་ཆོས་ཉིད་གནས་ལུགས་ཡངས་པ་ཆེན་པོར་ཡིད་ཆེས་སོ་བུ། ༈ །ལེའུ་ཞེ་གསུམ་པ། ཆོས་ཉིད་དགུ་ལྡན་དུ་མཐོང་བའི་གདམས་ངག་ནི། ༧ ལམ་པའི་རྣལ་འབྱོར་པས། མཐོང་བ་དགུ་ལ། འཁོར་འདས་ཀྱི། ཆོས་ཐམས་ཅད་རང་བཞིན་སྟོང་པར་མཐོང་། ཆོས་ཀུན་གྱི་རྩ་བ་སེམས་སུ་མཐོང་། རང་སེམས་ཀྱི་ངོ་བོ་སྐྱེ་མེད་དུ་མཐོང་། སྣང་བ་བཅུ་བདུན་སོགས་འཆར་ཚུལ་མ་འགགས་པས། གནས་སྐབས་ངེས་མེད་དུ་མཐོང་། ཆོས་ཐམས་ཅད་ཀྱི་ཆོས་ཉིད་བདེན་མེད་དུ་མཐོང་། སྣ་ཚོགས་སུ་སྣང་ཡང་ཆོས་ཉིད་དབྱིངས་ཀྱི་ཡིན་ལུགས་འགྱུར་མེད་དུ་མཐོང་། རང་བྱུང་རྐྱེན་དང་བྲལ་བས། གནས་ལུགས་གཉིས་མེད་དུ་མཐོང་། རྐྱེན་གྱིས་སྣ་ཚོགས་སུ་སྣང་བས་གཞི་ཕྱོགས་མེད་དུ་མཐོང་། མཐའི་འཛིན་རྟོག་དང་བྲལ་བས། གཤིས་སྤྲོས་བྲལ་དུ་མཐོང་ངོ་བུ། ༈ །ལེའུ་ཞེ་བཞི་པ། དམ་པ་བདུན་ལྡན་དུ་མཐོང་བ་ནི། སྒོམ་མཁན་རང་གི་བློ་ལ་བདག་པོ་དང་གཉེར་མེད་པས་གྲོལ་བ། དམ་པ་བདུན་ལ། ཡོད་མེད་སྣང་སྟོང་སོགས་དམིགས་གཏད་ཀྱི་མིས་འཚོལ་བར། ཡིད་བཞག་པ་དང་བྲལ་བ་ནི་བཞག་པ་དམ་པའོ། །དམིགས་སུ་མེད་པའི་ཆོས་ཉིད་ལ་གཟུང་འཛིན་གྱི་བློའི་དམིགས་པ་དང་བྲལ་བ་ནི་དམིགས་པ་དམ་པའོ། །རྟོག་མི་རྟོག་གཉིས་ཀ་བློ་ལས་མ་འདས་ཤིང་བློས་བྱས་ཀྱིས་བློ་བྲལ་གྱི་དོན་ལ་བསྒྲིབས་པས། མི་རྟོག་པ་ཉིད་མི་བསྒོམ་པ་ནི་མི་རྟོག་པ་དམ་པའོ། །ཤེས་བྱ་གང་ལའང་རྟེན་མི་འཆའ་བ་ནི་རྟེན་དམ་པའོ། །ཡུལ་དུ་བྱས་ཏེ་སྣང་སྟོང་སོགས་ཅིར་ཡང་མི་བསྒོམ་པ་ནི་བསྒོམ་པ་དམ་པའོ། །ཆེད་དུ་སེམས་སེམས་བྱུང་གི་འགྱུ་བ་མ་བཀག་ལ་ཡེངས་པ་མེད་པ་ནི་བསམ་གཏན་དམ་པའོ། །སེམས་ཚོགས་བརྒྱད་ཀྱི་ཡུལ་གང་ལའང་མི་འཇུག་པ་ནི་ཏིང་ངེ་འཛིན་དམ་པའོ་བུ། མདོར་ན་འདི་ཐམས་ཅད་དམིགས་གཏད་དང་བཅོས་བསླད་མེད་པར་འཇོག་པ་ཡིན་ནོ། ༈ །ལེའུ་ཞེ་ལྔ་པ། དབང་པོ་དྲུག་གི་སྒོ་ནས་ཐ་དད་མ་སྤངས་གཉིས་མེད་དུ་མཐོང་བའི་གདམས་ངག་ནི། ༈ །ཆོས་ཉིད་ལ་དོན་ལ་ངེས་ཤེས་སྐྱེས་པ། ཤེས་རབ་ཀྱི་དབང་པོ་དྲུག་ལ། གཟུགས་སྣང་སྐྱེ་མེད་དུ་ཤེས་པས་དེར་འཛིན་དང་བྲལ་བས། རང་སྣང་གི་གཟུགས་མཐོང་བ་ཤེས་རབ་ཀྱི་སྤྱན། ཆོས་ཉིད་སྟོང་པ་ཉིད་ཀྱི་དོན་གོ་བ་ཤེས་རབ་ཀྱི་སྙན། རང་བཞིན་སྐྱེ་མེད་དུ་ཚོར་བ་ཤེས་རབ་ཀྱི་ཤངས། སྣ་ཚོགས་གཉིས་མེད་དུ་མྱོང་བ་ཤེས་རབ་ཀྱི་ལྗགས། དོན། ཆོས་ཉིད་ལ་རེག་པ་ཤེས་རབ་ཀྱི་ལུས། རང་སྣང་དུ་ཤར་བ་ཐམས་ཅད་སྐྱེ་མེད་རང་དུ་ཤར་བ་ཡིན་པར་ཤེས་པ་ཤེས་རབ་ཀྱི་ཡིད་དོ་བུ། ༈ །ལེའུ་ཞེ་དྲུག་པ། མཐོང་ལུགས་དེ་ཉིད་ཀྱིས་ཐ་དད་དུ་མ་སྤངས་གཉིས་མེད་དུ་མཐོང་བ་ནི། ༈ རང་སེམས་ཆོས་ཉིད་དུ་གྲོལ་ན་ཕྱི་རོལ་གྱི་སྣང་བ་ཐམས་ཅད་ཆོས་ཉིད་དུ་འཆར་བས། ཤེས་རབ་ཀྱི་ཡུལ་དྲུག་ལ། ཆོས་ཉིད་གསལ་སྟོང་དུ་མཐོང་བ་ཤེས་རབ་ཀྱི་གཟུགས། བདག་པོ་མེད་པ་སྒྲ་སྙན་བཞིན་དུ། རང་ཤར་དུ་གོ་བ་ཤེས་རབ་ཀྱི་སྒྲ། བླ་མའི་གདམས་ངག་གིས་ཚིམ་པ་ཤེས་རབ་ཀྱི་དྲི། ཆོས་ཐམས་ཅད་ཀྱི་དོན་སྐྱེ་མེད་དུ་ཉམས་སུ་མྱོང་བ་ཤེས་རབ་ཀྱི་རོ། །ཆོས་ཉིད་བདེ་བ་ཆེན་པོ་ལ་རེག་པ་ཤེས་རབ་ཀྱི་རེག་བྱ། གནས་ལུགས་ཆོས་ཉིད་ཀྱི་རང་ངོ་རང་གིས་ཤེས་པ་ཤེས་རབ་ཀྱི་ཆོས་སོ་བུ། ༈ །ལེའུ་ཞེ་བདུན་པ། བརྟགས་ན་མེད་པའི་སྒོ་ནས་མེད་པ་དྲུག་ལྡན་དུ་མཐོང་བ་ནི། ༧ ཡང་དག་པ་དྲུག་ལ། ཆོས་ཐམས་ཅད་ཅིའི་ངོ་བོར་ཡང་བདེན་པར་གྲུབ་པ་མེད་པས། ཅིར་ཡང་མ་མཐོང་བ་ནི་མཐོང་བ་ཡང་དག་པའོ། །ཆོས་ཉིད་ཀྱི་དོན་ལ་ཐོས་བྱ་ཐོས་བྱེད་གཉིས་མེད་པས། ཅིར་ཡང་ཐོས་པ་མེད་པ་ནི་ཐོས་པ་ཡང་དག་པའོ། །དོན་ལ་ཚོར་བྱ་ཚོར་བྱེད་གཉིས་མེད་པས། ཅིར་ཡང་ཚོར་བ་མེད་པ་ནི་ཚོར་བ་ཡང་དག་པའོ། །དེ་བཞིན་དུ་ཅིར་ཡང་མ་མྱོང་བ་དམ་པའོ། །བདེན་རྫུན་སོགས་ཡུལ་གང་ལ་ཡང་བློས་མ་རེག་པ་ནི་རེག་པ་ཡང་དག་པའོ། །ཆོས་ཐམས་ཅད་ཀྱི་མཚན་ཉིད། ཅིར་ཡང་རིག་པ་མེད་པ་ནི་རིག་པ་དམ་པའོ། ༈ །ལེའུ་ཞེ་བརྒྱད་པ། རྩོལ་མེད་དྲུག་གི་ཆོས་ཉིད་ལ་བླང་དོར་མི་བྱེད་པར་བསྟན་པ་ནི། ༈ །ཆོས་ཐམས་ཅད་བྱ་རྩོལ་དང་བྲལ་བར་འཇོག་ཤེས་ན་གཤིས་ཡིན་ལུགས་སུ་གྲོལ་བས། རྩོལ་བ་མེད་པའི་དགོངས་པ་དྲུག་ལ། རང་སེམས་སྐྱེ་མེད་ཀྱི་ནམ་མཁའ་ལ་བལྟ་བྱ་ལྟ་བྱེད་གཉིས་མེད་པས་བཅོས་བསྒྱུར་དགག་སྒྲུབ་དང་བྲལ་བའི་ལྟ་བ་རང་སོར་བཞག་པས་བློ་ལ་ཡང་དོག་མེད་པར་ཅམ་ཅམ་གྱིས་གནས་པའོ། །སྒོམ་པ་གཏིང་གསལ། འཛིན་མེད་ལ་ཕྱི་ནང་གི་རྟོག་པའི་གྲ་ཟུར་མེད་པས་ཆོས་ཉིད་ཞི་མལ་མལ། མ་བཅོས་ཤུགས་འབྱུང་གི་སྤྱོད་པ་ལ་དང་དུ་ལེན་པ་དང་དོར་བྱའི་འབད་རྩོལ་མེད་པ་ཅི་དགའ་དགའ། ཡིན་ལུགས་མངོན་དུ་གྱུར་པས་འབྲས་བུ་ལ་ཐོབ་མ་ཐོབ་ཀྱི་རེ་དོགས་མེད་པ་ཞི་ཐེས་ཐེས་ཏེ། གཟུང་འཛིན་གྱི་རྣམ་རྟོག་རང་སར་གྲོལ་བའོ། །ཆོས་ཅན་གྱི་དངོས་པོ་གང་ལའང་བཟང་ངན་མེད་པར་ཆོས་ཉིད་ཀྱི་ངང་དུ་མཉམ་ཕྲིལ་ཕྲིལ། འཁོར་བ་མ་སྤངས་ཡེ་ནས་མྱང་འདས་སུ་གྲོལ་བས་སེམས་ལ་ཟུག རྔུ་མེད་པ་བདེ་ལྷན་ལྷན་ནོ་བུ། ༈ །ལེའུ་ཞེ་དགུ་པ། བརྡའ་ཆོས་བཅུ་དྲུག་གི་གདམས་ངག་བསྟན་པ་ནི། ༧ བརྡ་ཆོས་བཅུ་དྲུག་ལ། མཚན་མའི་སྒྲིབ་གཡོག་དང་བྲལ་བའི་རིག་པ་རྟག་ཏུ་གཏེར་བུར་བྱུང་། དངོས་འཛིན་དང་བདེན་ཞེན་གྱི་གཉེན་པོར་སྟོང་ཉིད་ཀྱི་ཁྲུས་ཆེན་རྟག་ཏུ་གྱིས། སྟོང་ཉིད་དང་སྙིང་རྗེའི་ཉི་ཟླ་ལག་པས་ཟུངས། ལྟ་སྒོམ་གྱི་འཁོར་ལོ་ཀླད་ལ་བསྐོར། རང་སེམས་འཕྲུལ་གྱི་མེ་ལོང་ལ་ལྟོས། ཉོན་མོངས་པའི་དུག་ནད་སོས་པར་གྱིས། དུག་གསུམ་མམ་གསུང་འཛིན་གྱི་ཐག་པས་བཅིང་པ་ཁྲོལ། སྡིག་པའི་གྲོགས་པོ་གཅན་དང་འདྲ་བའི་གཟེབ་ནས་གྲོལ། རང་བྱུང་གི་ཡེ་ཤེས་ངོས་ཟིན་པ་བྱས་ནས་རིག་པ་སྟོང་གསལ་ཤེལ་གྱི་བུམ་པར་སྡོང་། དད་བརྩོན་དྲན་ཤེས་བག་ཡོད་ཀྱིས་ཆོས་སྤྱོད་བཅུ་སོགས་ཀྱི་སྤྱོད་པ་རིན་ཆེན་སྐས་ལ་མལ་ནས་ཡར་འཛོགས། བདག་འཛིན་གྱི་ལྗོན་ཤིང་རྩད་ནས་ཆོད། རིག་པ་མུ་དང་བྲལ་བ་ནམ་མཁའ་མཐོངས་སུ་ཉོལ། རང་གི་འགྱུ་བྱེད་ཀྱི་རྟོག་པ་རང་སྲོག་རང་གིས་ཆོད། ཅིར་སྣང་ཆོས་ཉིད་དུ་ཤར་བའི་གསེར་གླིང་དུ་རྒྱུགས། ཆགས་སྡང་གི་ཚད་པ་ལ་ཏིང་ངེ་འཛིན་གྱི་བསིལ་སྨན་ལུས་ལ་ཆོངས། ཆོས་ཐམས་ཅད་མིང་ཙམ་ལས་དོན་ལ་མ་གྲུབ་པ། ནམ་མཁའི་མེ་ཏོག་ཐུས་ཤིག་བུ། ༈ །ལེའུ་ལྔ་བཅུ་པ། བླང་དོར་མེད་པར་དགག་སྒྲུབ་དང་བྲལ་བའི་ལྟ་བ་ནི། ལྟ་བ་ལྔ་ལ། རྣམ་རྟོག་གང་ཤར་ཆོས་ཉིད་སྐྱེ་མེད་པས་རྟོག་པ་ལ་ཞེ་མ་སྡང་། མི་རྟོག་ཡེ་ཤེས་ལོགས་སུ་བསྒོམ་དུ་མེད། ཉོན་མོངས་རྟོག་ཚོགས་སྤངས་པའི་ཕ་རོལ་ན་ཡེ་ཤེས་སམ་ཆོས་ཉིད་ལ་འདོད་མ་ཆགས། ཆགས་ན་འཁོར་བར་འཁྱམས་པའི་རྒྱུ་བྱེད། ཆོས་ཐམས་ཅད་མཉམ་པ་ཉིད་དུ་ཤེས་པས་རང་གི་ཏིང་ངེ་འཛིན་ལ་ང་མ་རྒྱལ། མི་འདོད་པ་དང་ཕྱིན་ཅི་ལོག་གི་རྟོག་པ་ཐམས་ཅད་རང་སེམས་ཀྱི་ཆོ་འཕྲུལ་ཡིན་པས། ཕྱིན་ཅི་ལོག་ལ་ཕྲག་མ་དོག །རང་བྱུང་གི་ཡེ་ཤེས་རང་ལ་ཡོད་པས། ཡེ་ཤེས་ལ་གཏི་མ་མུག་ཅིག་སྟེ་དེའི་དོན་ཤེས་པས་གྱིས་ཤིག་བུ། ༈ །ལེའུ་ང་གཅིག་པ། གནས་ལུགས་ཀྱི་དོན་ལ་ཞེ་གདེང་བཅུ་དང་ལྡན་པར་བསྟན་པ་ནི། ༧ བདེ་སྡུག་སོགས་མཚན་མ་ཐམས་ཅད་དབྱིངས་ཀྱི་ངོ་བོར་གྲོལ་བས་གང་གིས་ཀྱང་ཕན་གནོད་མེད་པའི་ཞེ་གདེང་བཅུ་ལ། རང་བྱུང་གི་ཡེ་ཤེས་སམ་བྱང་ཆུབ་ཀྱི་སེམས་ལ་རྒྱུ་རྐྱེན་མེད་པས་དུས་གསུམ་དུ་འཕོ་འགྱུར་དང་བྲལ་བ། སྲིད་པ་ཆར་ལྟར་བབས་མོད་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལ་དེས་གོས་པ་འམ་གཤེར་བ་མེད། དེ་བཞིན་དུ། ཁམས་གསུམ་དུ་ཆུ་ལྟར་འབྲུབ་མོད། མི་འཁྱེར། རྒྱུད་དྲུག་མེ་ལྟར་འབར་ཡང་མི་འཚིག །སྟོང་གསུམ་རླུང་ལྟར་གཡོས་མོད། མི་བསྐྱོད། དུག་གསུམ་མུན་ལྟར་འཐིབ་མོད། མི་འཐོམས། སྟོང་གསུམ་ཉི་མས་གང་མོད་ཡེ་ཤེས་ལ་གསལ་རྒྱུ་མེད། གླིང་བར་མུན་པར་ཆུད་མོད་མ་རིག་པས་གནག་རྒྱུ་མེད། སྐྱེ་ཤི་རིས་སུ་ཆད་མོད་འཆི་རྒྱུ་མེད། ལས་དབང་བག་ཆགས་འདུག་མོད་ཡེ་ནས་གོས་མ་མྱོང་བས་གསར་དུ་སྤང་རྒྱུ་མེད། སྣང་སྲིད་ཁ་སྦུབས་བྱས་མོད་འཇིག་འབྲལ་མེད་དོ། །ཞེས་པ་སྟེ་གང་གིས་ཀྱང་མི་བརྫིབའི་དགོངས་པ་གདེངས་སུ་གྱུར་པའི་རྡོ་རྗེའི་ཚིག་གོ ༈ །ལེའུ་ང་གཉིས་པ། དཔེ་དོན་འབྲེལ་བའི་སྒོ་ནས་ཆོས་ཉིད་ཀྱི་རྩིས་བཟུང་བའི་གདམས་ངག་ནི། ༧ དཔེ་དོན་འབྲེལ་བ། བདེ་བར་གཤེགས་པའི་སྐུ་ཇི་ལྟར་བལྟས་ཀྱང་མཛེས་པའི་དཔེས་མཚོན་ནས། དོན་རྟོགས་པ་སྐྱེ་མེད་ཀྱིས་རྩིས་ཟིན་ན་ཆགས་སྡང་གི་རང་རྒྱུད་པ་མེད་པས་རྟོགས་ལྡན་གྱི་སྤྱོད་པ་གང་ལྟར་སྤྱོད་ཀྱང་བདེ། ཇི་ལྟར་གནག་པ་དང་འཛུམ་པ་གཉིས་བཞིན་གཅིག་ལས་མི་འདའ་བའི་དཔེས་མཚོན་ནས་དོན་འཁོར་འདས་ཀྱི་རྣམ་སྤྲུལ་ཅིར་སྣང་ཅིར་སྲིད་ཆོས་ཉིད་སྐྱེ་མེད་ལས་མི་འདའ། ལོང་བ་ལ་འཛུབ་མོ་བསྟན་པ་དང་བསྟན་པ་ཁྱད་མེད་པའི་དཔེས་མཚོན་ནས་དོན་སྐྱེ་མེད་ཀྱི་དབྱིངས་ལས་འགག་མེད་དུ་ཤར་བའི་ཆོས་ཀུན་དབྱེར་མེད་རོ་མཉམ་པས་ཆོས་ཉིད་ལ་བླང་དོར་བྱར་མེད། ཆུ་ཤིང་གི་སྡོང་པོ་ལ་སྙིང་པོ་མེད་པའི་དཔེས་མཚོན་ནས་དོན་གཅིག་ཏུ་བྲལ་སོགས་ཀྱི་གཏན་ཚིགས་གིས་བརྟགས་ན་མི་རྙེད་པས་སྣང་སྲིད་ལ་སྙིང་པོ་མེད་དོ་བུ། ༈ །ལེའུ་ང་གསུམ་པ། མཐའ་བཞི་རང་གྲོལ་གྱི་སྒོ་ནས་མ་སྤངས་པར་རང་སྣང་དུ་བསྟན་པའི་གདམས་ངག་ནི། ༧ །མཐའ་གྲོལ་བ་བཞི་ལ། འཁོར་འདས་ཀྱི་ཆོས་ཀུན་ལ་དོན་སྐྱེ་བ་མེད་པས་ཡོད་པའི་ཆོས་ལས་གྲོལ། རྒྱུ་རྐྱེན་རྟེན་འབྲེལ་ཚོགས་པའི་སྣང་ཆ། ཀུན་རྫོབ་བཀག་པ་མེད་པས་མེད་པའི་ཆོས་ལས་གྲོལ། དོན་དམ་པར་བདེན་གཉིས་སམ་སྣང་སྟོང་། ཐ་དད་ཀྱི་ཆོས་མ་གྲུབ་སྟེ་དབྱེ་གཞི་ཟད་པའི་དབྱེར་མེད་དམ་གཉིས་མེད་ཡིན་པས་གཉིས་ཡིན་ལས་གྲོལ། བློས་ཇི་ལྟར་གཟུང་བ་བཞིན། གཉིས་མེད་གཉིས་སུ་འཆར་བས་གཉིས་མེད་ལས་གྲོལ་ལོ་བུ། དེ་ལ་བདེན་གཉིས་གཅིག་པར་འདོད་ན། སོ་སྐྱེ་འདུ་བྱེད་མཐོང་བས་དོན་དམ་མཐོང་བར་ཐལ། དོན་དམ་ཉོན་མོངས་སྐྱེ་བའི་དམིགས་རྐྱེན་དུ་ཐལ། དོན་དམ་ཀུན་རྫོབ་དབྱེ་བ་མེད་པར་ཐལ། དོན་དམ་ཐོས་བསམ་ལ་མི་ལྟོས་པར་ཐལ་བའི་སྐྱོན་བཞི་དང་ཐ་དད་ན། དོན་དམ་རྟོགས་པའི་བློས་ཀུན་རྫོབ་ཀྱི་བདེན་ཞེན་མི་སེལ་བ་དང་། དེའི་ཆོས་ཉིད་མ་ཡིན་པ་དང་། ཀུན་རྫོབ་རང་བཞིན་མེད་པ་ཙམ་དོན་དམ་མ་ཡིན་པ་དང་། དེ་དག་སོ་སོ་གཟིགས་པའི་འཕགས་པ་རྣམས་ལ་བཅིང་གྲོལ་དུས་གཅིག་དུ་ཐལ་བའི་སྐྱོན་བཞི་ཡོད་དོ། །རང་ལུགས་ལ་སྐྱོན་དེ་རྣམས་མེད་དེ་གཅིག་ཐ་དད་གང་དུའང་མི་འདོད་པའི་ཕྱིར་ནའོ། ཡང་རང་གི་བློ་གཅིག་འཁྲུལ་མ་འཁྲུལ་གྱི་དབང་གི་བདེན་གཉིས་སུ་འཇོག་ཚེ། འཁྲུལ་དུས་ཀུན་རྫོབ་འཁྲུལ་པའི་བློ་ལ་དོན་དམ་མི་སྣང་། མ་འཁྲུལ་དོན་དམ་རྟོགས་པའི་བློ་ལ་ཀུན་རྫོབ་འཁྲུལ་པ་མི་སྣང་བས་སྣང་མིན་བཞིན་དུ་གསུངས་ཏེ། སྔ་མ་ནི་ངོ་བོ་གཅིག་ལ་ལྡོག་པ་ཐ་དད་དང་། ཕྱི་མ་ནི་གཅིག་པ་བཀག་པའི་ཐ་དད་དེ་གཉིས་ཀ་རྣམ་བཤད་དུ་གསུངས་སོ། ༈ །ལེའུ་ང་བཞི་པ། མཐར་ཐུག་བཞི་ལྡན་གྱི་སྒོ་ནས་ལམ་ཆོས་ཉིད་དུ་ཐག་ཆོད་པར་བསྟན་པ་ནི། ༧ མཐར་ཐུག་བཞི་ལ། དཔེ་རྨི་ལམ་གྱི་སྣང་བ་བཞིན་དུ་དོན། ཕྱི་ནང་གི་ཆོས་ཐམས་ཅད་རང་སེམས་སུ་ཤེས་ནས་སེམས་སྟོང་གཟུགས་མེད་པར་ཤེས་པ་ལྟ་བ་མཐར་ཐུག་དཔེ་སྒྱུ་མའི་སྐྱེས་བུ་ལྟར་དོན་དབང་པོའི་སྒོ་སྔ་མ་བཀག་ལ་གཟུང་འཛིན་དང་བྲལ་བ་བསྒོམ་པའི་མཐར་ཐུག །དཔེ་སྤྲུལ་པའི་སྐྱེས་བུས་ཚོགས་གཉིས་གསོག་པ་བཞིན། ལྟ་སྤྱོད་ཟུང་དུ་སྤྱོད་ཤེས་པ་སྤྱོད་པའི་མཐར་ཐུག །དཔེ་སྒྱུ་མའི་སྐྱེས་བུས་རྨི་ལམ་གྱི་ནོར་ལ་སྤྱོད་པ་བཞིན། སྣང་སྲིད་ལ་བདེན་འཛིན་མེད་པ་ཉམས་རྟོགས་ཀྱི་མཐར་ཐུག་ཡིན་ནོ། ༈ །ལེའུ་ང་ལྔ་པ། བརྡ་དོན་གྱིས་མཚོན་པའི་སེམས་ཀྱི་ཆོས་སྐུ་ལྔའི་གདམས་ངག་ནི། ༧ སྟོང་གསལ་འགགས་མེད་ཀུན་ཁྱབ་ཀྱི་ཡེ་ཤེས་སམ་ཆོས་ཉིད་དེ། སེམས་ཀྱི་ཆོས་སྐུ་ལྔ་ལ། རྒྱ་མཚོའི་གཏིང་གི་དཔེས་མཚོན་ནས་ཆོས་ཉིད་རིག་སྟོང་རྗེན་པ་ལས་ནམ་ཡང་གཡོ་བ་མེད་པ་ཆོས་ཀྱི་སྐུ། རི་རབ་ཀྱི་དཔེས་མཚོན་ནས་དོན་ཆོས་ཉིད་ལ་འཕོ་འགྱུར་མེད་པ་ཆོས་ཀྱི་སྐུ། ཆུ་བོའི་དཔེས་མཚོན་ནས་འོད་གསལ་ལམ ཆོས་ཉིད་ལ་རྒྱུན་ཆད་མེད་པ་ཆོས་ཀྱི་སྐུ། ཆུ་བོའི་དཔེས་མཚོན་ནས་འོད་གསལ་ཆོས་ཉིད་ལ་རྒྱུན་ཆད་མེད་པ་ཆོས་ཀྱི་སྐུ། ཉི་མའི་དཔེས་མཚོན་ནས་ཡེ་ཤེས་གསལ་འགྲིབ་མེད་པ་ཆོས་ཀྱི་སྐུ། ཆུ་ཟླའི་དཔེས་མཚོན་ནས་རིག་པ་ལ་རྟོག་པ་མེད་པ་ཆོས་ཀྱི་སྐུ་ཡིན་ནོ་བུ། ༈ །ལེའུ་ང་དྲུག་པ། གསང་སྔགས་བརྡའ་དོན་གྱིས་མཚོན་པའི་གདམས་ངག་ནི། ༧ སེམས་ཀྱི་ཡེ་ཤེས་དྲུག་ལ། རྟོགས་དཔྱོད་ཀྱིས་མ་བསླད་པའི་རང་ངོ་སོ་མ་གསུང་གཟུང་འཛིན་གཉིས་མེད་ཐུགས་ཕྲད་ཀྱི་ཡེ་ཤེས། ཤེས་པ་ཡུལ་ལ་མ་སྤྲོས་མ་བསྡུས་སྣང་སེམས་དུ་མ་རོ་གཅིག་གི་ཡེ་ཤེས། འཁོར་འདས་ཀྱི་ཆོས་གང་ལའང་མ་བླང་མ་དོར་རེ་དོགས་མེད་པའི་ཡེ་ཤེས། ཆོས་སྤྱན་སྣ་ཚོགས་པའི་སྣང་བ་ལ་ཆོས་ཉིད་སྐྱེ་མེད་ཀྱི་རྒྱས་ཐེབས་པ་རང་བྱུང་གི་ཡེ་ཤེས། སེམས་ཉིད་མཐའ་གྲོལ། སྣང་སྟོང་རིག་སྟོང་ཟུང་དུ་འཇུག་པའི་ཡེ་ཤེས། ཚོགས་བརྒྱད་ཡུལ་དང་བཅས་པ་གདོད་ནས་སྟོང་པས། ཕྱི་སྟོང་ནང་སྟོང་སྟོང་པའི་ཡེ་ཤེས་སོ་བུ། ༈ །ལེའུ་ང་བདུན་པ། སེམས་ཀྱི་ངོ་སྤྲོད་ནི། ༈ །སེམས་ཀྱི་ངོ་སྤྲོད་བདུན་ལ། ནམ་མཁའ་ཆེ་ལས། རང་བཞིན་གཅིག་ཏུ་མ་ངེས་པས། གང་ལྟར་བལྟས་བལྟས་པ་དེ་ལྟར་སྣང་། ཞེས་རང་སེམས་ཀྱི་དབང་གིས་ཡུལ་གཅིག་ལའང་སྣ་ཚོགས་སུ་སྣང་བའི་ཕྱིར་ཕྱི་དོན་རང་བཞིན་གྱིས་གྲུབ་པ་མེད་པས་ཡུལ་སེམས་སུ་ངོ་སྤྲད། རང་སེམས་ཀྱི་འཆར་ཆ་སྣ་ཚོགས་གཟུགས་བརྙན་བཞིན་མ་འགགས་པར་ཤར་ཡང་རང་བཞིན་སྟོང་ཉིད་ལས་མ་འདས་པས། སེམས་གཟུགས་བརྙན་དུ་ངོ་སྤྲོད། རང་བྱུང་ཡེ་ཤེས་ཀྱི་སྣང་བ་ཕྱོགས་མེད་དུ་ཤར་བས་སྣང་བ་མཐའ་ཡས་སུ་ངོ་སྤྲོད། ནམ་མཁའ་སུམ་ཕྲུག་གི་མན་ངག་གིས་ཤེས་པ་རྟེན་མེད་དུ་ངོ་སྤྲོད། རང་སེམས་ཆོས་ཉིད་དུ་རྟོགས་པས། རིག་པ་ཡུལ་མེད་དུ་ངོ་སྤྲོད། ཚོགས་བརྒྱད་ཀྱི་ཡུལ་སྣང་དོན་ལ་ཡོང་མ་མྱོང་བས། ཡུལ་ཡེ་མེད་ངོ་སྤྲོད། དོན་སྐྱེ་མེད་ལ་སྤྲོས་པའི་མཚན་མ་མེད་པས། སྐྱེ་མེད་སྤྲོས་བྲལ་དུ་ངོ་སྤྲོད་དོ་བུ། ༈ །ལེའུ་ང་བརྒྱད་པ། སྣང་ཤར་ཆོས་ཉིད་དུ་ངོ་སྤྲོད་ལ་རྒྱས་གདབ་པ་ནི། ཐམས་ཅད་ཆོས་ཉིད་དུ་གཅིག་པས་སྤང་བླང་མེད་པའི་དོན་སྣང་ཤར་ཆོས་ཉིད་དུ་ངོ་སྤྲོད་པ་དྲུག་ལ། རང་སེམས་ཆོས་ཉིད་རྩལ་ལས། འགྲོ་དྲུག་གི་མཐོང་སྣང་དྲུག །མུ་སྟེགས་ཀྱི་རྟག་ཆད་གཉིས། ཐེག་པ་རིམ་དགུའི་འདོད་ཚུལ་ཏེ་སྣང་བ་བཅུ་བདུན་ངེས་མེད་དུ་ཤར་བས་གང་ལའང་བདེན་འཛིན་གྱིས་ཡིན་པ་ཡིད་གཅེས་སྤྲས་སུ་མི་བཟུང་། ཐམས་ཅད་ཆོས་ཉིད་ཀྱི་རོལ་པ་ཡིན་པས་བཟང་ངན་དུ་རྟོག་པས་མིན་པ་བློས་མི་འཕང་། ཆོས་ཐམས་ཅད་རྒྱ་ཆད་ཕྱོགས་ལྷུང་མེད་པས་བློས་གསར་དུ་གཉིས་མེད་དུ་མི་བསྡུམ། བཟང་ངན་ཐ་དད་མི་འབྱེད། རྟོག་དཔྱོད་ཀྱི་བློས་ཡིན་མིན་སོགས་གང་ལ་ཡང་མི་བསམ། ཆོས་ཉིད་གཏིང་གསལ་གྱི་དོན་ལས་མ་ཡེངས་པའོ་བུ། ༈ །ལེའུ་ང་དགུ་པ། སྣང་ཤར་ཆོས་སུ་ངོ་སྤྲོད་པ་ནི། ངོ་སྤྲོད་བརྒྱད་ལ། འདུས་མ་བྱས་ཀྱི་རིག་པ་ནམ་མཁའ་ལྟ་བུ་ཡིད་དྭངས་སངས་ཆུ་གཉེར་ཆུར་གྲོལ་བ་ལྟ་བུ་རྣམ་རྟོག་གི་འགྱུ་བ་རང་གྲོལ། རྐྱེན་སྐྱེས་ཀྱི་རྟོག་པ་འབུར་འཇོམས་སུ་རང་གྲོལ་བ་དྲན་པ་འབུར་བཅང་། ཚོགས་བརྒྱད་སེམས་ཀྱི་སྒྲིབ་གཡོག་དང་བྲལ་བས། རིག་པ་རང་དག །འདི་ཞེས་ངེས་བཟུང་མེད་པས། ངོ་བོ་སྣང་མེད། སྣང་བ་རང་བཞིན་མེད་པས་ཡུལ་རང་སྟོང་། ཡོད་ལ་མེད་པ་རྨི་ལམ་ལྟ་བུ། མེད་ལ་ཡོད་པ་ཆུ་ཟླ་ལྟ་བུའོ་བུ། ༈ །ལེའུ་དྲུག་ཅུ་པ། སྣང་ཤར་སྐྱེ་མེད་དུ་ངོ་སྤྲོད་པའི་ངག་དོན་དགུ་ནི། ༧ ཆོས་ཐམས་ཅད་བདེན་པར་མ་སྐྱེས་རྫུན་པར་སྣང་བ་ལ་དངོས་དང་བདེན་ཞེན་མེད་པར། ངོ་སྤྲོད་པ་སྐྱེ་མེད་དགུ་ལ། རྟེན་འབྱུང་གི་ཆོས་ཀུན་ལ་དོན་དཔྱོད་ཀྱིས་བརྟགས་ན་སྐྱེ་བ་རང་བཞིན་མེད་པས། སྐྱེས་པ་སྐྱེ་མེད་སྒྱུ་མའི་རྟ་གླང་ལྟ་བུ། འདུས་མ་བྱས་རྒྱུ་རྐྱེན་གྱིས་མ་སྐྱེས་པ་སྐྱེ་མེད་ནམ་མཁའ་ལྟ་བུ། འདུས་བྱས་རྣམས་ལ་རང་གི་ངོ་བོ་མེད་པས་མི་སྐྱེ་བ་སྐྱེ་མེད་མོ་གཤམ་གྱི་བུ་ལྟ་བུ། གཟུགས་སོགས་རང་བཞིན་གྱིས་་གྲུབ་པ་མེད་པས་སྣང་བ་སྐྱེ་མེད་རྨི་ལམ་ལྟ་བུ། སྟོང་པ་ལ་སྐྱེ་རྒྱུར་མ་གྲུབ་པས། སྟོང་པ་སྐྱེ་མེད་རི་བོང་གི་རྭ་ལྟ་བུ། འདི་ཤེས་ངོས་བཟུང་མེད་པས་རིག་པ་སྐྱེ་མེད་སྒྱུ་མའི་སྐྱེས་བུའི་ཚོགས་བརྒྱད་ལྟ་བུ། སྐྱེ་མེད་དམ་སྟོང་པ་ཕྱོགས་གཅིག་ཏུ་མ་ཆད་པས་ཅིར་ཡང་འཆར་དུ་བཏུབ་པ་སྐྱེ་མེད་སྣང་བ་མིག་འཕྲུལ་ལྟ་བུ། བློས་བརྟགས་ཀྱི་ཡུལ་ལས་འདས་ཤིང་ཡེ་ནས་མ་སྐྱེས་པས་སྐྱེེ་མེད་ཡེ་མེད་ནམ་མཁའ་ལྟར་གློ་བུར་དུ་མི་སྐྱེ་བ་ལྟ་བུ། སྐྱེ་མེད་རང་གི་ངོ་བོ་ལ་ཡོད་མེད་སོགས་མཐའ་བརྒྱད་ཀྱི་སྤྲོས་པས་མ་རེག་པ་དཔེ་ནམ་མཁའ་འདི་ཡིན་མེད་པ་ལྟ་བུ། སྐྱེ་མེད་མཐའ་བྲལ་ཡིན་ནོ་བུ། །ལེའུ་རེ་གཅིག་པ། སྣང་ཤར་ཆོས་ཉིད་དུ་ངོ་སྤྲོད་པ་དཔེ་དོན་བཞིའི་གདམས་ངག་ནི། ༧ དཔེས་མཚོན་བཞི་ལ། དཔེའི་ཕྱི་རོལ་གྱི། དོན་ཆོས་ཉིད་ཀྱི་ངོ་བོ། སེམས་ཉིད་ཀྱི་རྣམ་མཁའ་གསུམ་དབྱེར་མེད་པའི་ངང་ལས་ཆོས་ཐམས་ཅད་བྱུང་ཞིང་དེར་གནས་དེར་ཐིམ་དེ་ལས་མི་གཡོས་པས། ཐམས་ཅད་ཀུན་ཡིན། ཀུན་མིན། བློས་བཏགས་ཀྱི་གྲུབ་མཐའི་ཞེ་འདོད་ཟད་པས། རྐྱེན་གྱིས་མི་བསྐྱོད་པ། རིའི་དཔེས་མཚོན་ནས་ཞེ་འདོད་མེད་པའི་ལྟ་བ་རྒྱུད་ལ་གདབ། བསྒོམ་བྱ་སྒོམ་བྱེད་གཉིས་མེད་པས་འབད་རྩོལ་གྱིས་མི་གཡོ་བ། རྒྱལ་པོ་གདན་ལ་བཞུགས་པའི་དཔེས་མཚོན་ནས་འབད་པ་མེད་པའི་དཔེས་བསྒོམ་པ་རྒྱུད་ལ་གདབ། ཐམས་ཅད་ཆོས་ཉིད་ཀྱི་རོལ་པ་ལ་ཆོས་ཅན་གཞན་གྱི་སེལ་མེད་པས་བླང་དང་དོར་བྱའི་ཆོས་ཀྱིས་དབེན་པ། གསེར་གླིང་དུ་ཕྱིན་པའི་དཔེས་མཚོན་ནས་གཉིས་སྣང་མེད་པའི་སྤྱོད་པ་རྒྱུད་ལ་གདབ། ཆོས་ཉིད་ཟང་ཐལ་རྗེན་པའི་གཤིས་ལུགས་ལ་གྲོལ་མ་གྲོལ་གྱི་གཉེར་མེད་ཅིང་འབྲས་བུ་གཞན་དུ་ཚོལ་རྒྱུ་མེད་པའི་དོན། སྤྲུལ་མདུད་ཀྱི་དཔེས་མཚོན་ནས་རེ་དོགས་མེད་པའི་འབྲས་བུ་གཅིག་རྒྱུད་ལ་གདབ་བོ་བུ། ༈ །ལེའུ་རེ་གཉིས་པ། སྣང་ཤར་ཆོས་ཉིད་ཀྱི་གདམ་ངག་ནི། ༧ གདམས་པ་ལྔ་ནི། ཤེས་བྱ་ཡུལ་ཡུལ་ཅན་ཐམས་ཅད་དོན་པར་། རྒྱུ་རྐྱེན་ལས་སྐྱེས། གཞན་ལ་མ་ལྟོས། བཅོས་མ་མ་ཡིན་པར། ཡེ་ནས་རང་བཞིན་སྐྱེ་བ་མེད་པས། གཟུགས་དང་ཤེས་པ་སྐྱེ་མེད་དུ་ཤེས། ཚོགས་བརྒྱད་ཡུལ། རང་སྣང་ལ་རིག་པ་མ་ཞེན་པར་གནས། བསྟོད་སྨད་སོགས་འཇིག་རྟེན་གྱི་ཆོས་བརྒྱད་ལ་སེམས་མ་འཕྲོས་པར་གནས། ལྟ་བ་རྐྱེན་ཐེག །བསྒོམ་པ་ཡེངས་ཐུབ། འབྲས་བུ་ཡིད་ཆེས་པས། ཤེས་པ་རྐྱེན་ཐོག་ཏུ་མ་ཤོར་བར་གནས། རང་སེམས་སྐྱེ་མེད་དུ་རྟོགས་པས། སེམས་ལ་རྒྱས་ཐེབས་སོ་བུ། ༈ །ལེའུ་རེ་གསུམ་པ། ལྡོག་པ་གཅིག་ཆོས་ཉིད་ཀྱི་སྒོ་ཐ་དད་མེད་པའི་ལྟ་བ་ནི། ༧ ལྟ་སྒོམ་གནད་དུ་སོང་བས། དགོངས་ཉམས་ལྔ་ལ། བསྒོམ་དོན་དྲུག་པ་ལས། རྣམ་པར་རྟོག་པའི་མཚན་མ་ཅི་བྱུང་ཡང་། རྟོག་པ་དེ་ཉིད་ཆོས་ཉིད་ཡིན་ཤེས་ན། ཆོས་ཀྱི་དབྱིངས་ཉིད་གཞན་དུ་བསྒོམ་མི་དགོས། ཞེས་པ་ལྟར། རྣམ་རྟོག་ཆོས་ཉིད་དེ་རྐྱེན་རྟོག་གཉིས་མེད་ཆོས་ཉིད་དུ་གྲོལ་་བའོ། །འཁོར་འདས་གཉིས་ཀྱི་མཚན་མ་ཐམས་ཅད་གཉིས་མེད་མཉམ་པའི་ཀློང་དུ་རང་གྲོལ། སྔར་འདྲིས་ཀྱི་མི་དང་འཕྲད་པ་བཞིན་ཅིར་སྣང་ཆོས་ཉིད་ངོས་ཟིན་པ་ཅེར་མཐོང་ཙིར་ཟིན། དགྲ་གཉེན་སོགས་འཇིག་རྟེན་འཁྲུལ་པའི་ཞེན་པ་རང་ལོག །དག་མ་དག་སོགས་སྣང་བ་དགག་སྒྲུབ་ཀྱི་གཉིས་འཛིན་རང་གདེངས་སོ་བུ། ༈ །ལེའུ་རེ་བཞི་པ། ཆོས་ཉིད་དབྱེར་མེད་ཀྱི་འཆར་ལུགས་མདོར་བསྟན་པ་ནི། ༈ ཆོས་ཉིད་མི་གཉིས་པའི་འཆར་ལུགས་བཞི་ལ། མཉམ་པ་ཉིད་ཀྱི་ལྟ་བ་གཞི་ཆོས་ཉིད་ལ་བཟང་ངན་མེད་པས་ཡེ་ཤེས་ཟང་ཐལ། ཡེ་ཤེས་ཟང་ཐལ་གྱི་སྒོམ་པ། མ་བཙལ་ལྷུན་གྱིས་གནས་པས་སྤྲོས་མེད་ངང་ལ་གནས། ཤུགས་འབྱུང་གི་སྤྱོད་པ། མ་སླད་མ་བཅོས་པས་བཏང་སྙོམས་ཆེན་པོ། ཆོས་ཉིད་མངོན་གྱུར་གྱི་འབྲས་བུ། སེམས་ཆོས་ཉིད་རང་ཤར་བས་ཡེ་ཤེས་ཀློང་རྡོལ་ལོ་བུ། ༈ །ལེའུ་རེ་ལྔ་པ། ཆོས་ཉིད་དབྱེར་མེད་པའི་འཆར་ལུགས་དྲུག་ནི། ༈ །གཉིས་མེད་དོན་གྱི་འཆར་ལུགས་དྲུག་ལ། སེམས་ཉིད་རང་བྱུང་གི་ཡེ་ཤེས་ཉིད་ཡེ་ནས་བཅོས་མེད་དུ་ཤར་བས་སོ་མ། ཆོས་ཐམས་ཅད་སེམས་སུ་རྫོགས་པས་ལྷུན་གྲུབ། དེ་ལ་དགག་སྒྲུབ་མེད་པས་ཡེ་ཤེས་ཆེན་པོ། །འཁོར་འདས་བཟང་ངན་གཉིས་སུ་འབྱེད་པ་མེད་པས་གཉིས་མེད་རྡོ་རྗེ། རྒྱུ་རྐྱེན་ལ་མ་ལྟོས་པར་སེམས་ཉིད་ཡེ་སངས་རྒྱས་རྡོ་རྗེ་རང་འཁྲུངས། རྐྱེན་བཟང་ངན་དགྲ་ཟིན་མེད་པས་མཉམ་པ་པོའོ་བུ། ༈ །ལེའུ་རེ་གཉིས་པ། ཆོས་ཉིད་དབྱེར་མེད་པའི་འཆར་ལུགས་བཞི་ནི། གཉིས་མེད་ཀྱི་འཆར་ལུགས་བཞི་ལ། སེམས་དུས་གསུམ་གྱི་སྤྲོས་པ་བཅད་དེ་རང་བབས་སུ་བཞག་པས། གསལ་ལ་བཅོས་པ་མེད་པ་རང་གསལ་རྟོག་མེད། དཔེ་མན་ཤེལ་དྲི་མེད་ལྟ་བུ། འཛིན་རྟོག་གང་ཡང་མེད་པའི་རིག་པའི་མེ་ལོང་གཡའ་དང་བྲལ་བ་ལྟ་བུ། འོད་གསལ་ཡེ་ཤེས་ཀྱི་དགོངས་པ་རང་རིག་པ་རང་གིས་རྙེད་པ་ཡིད་བཞིན་ནོར་བུ། དགོས་འདོད་ངང་གིས་འབྱུང་བ་ལྟ་བུ། རང་བྱུང་གི་ཡེ་ཤེས་ལ་གཞན་གྱི་སེལ་མེད་པས། ཐམས་ཅད་རང་ཉིད་ཤར་བས་ཡེ་ཤེས་བབ་ཅོལ་ལོ་བུ། ༈ །ལེའུ་རེ་བདུན་པ། ཆོས་ཉིད་དབྱེར་མེད་པའི་ཞལ་གདམས་ནི། ༧ ཞལ་གདམས་བཞི་ལ། ཆོས་ཉིད་ལ་ཕྱོགས་རིས་མེད་པས། ཕྱོགས་བཅུ་གང་ཡང་ཁྱབ་པས་འབྱམས་པ་ཆེན་པོ། །མཐའ་དབུས་སམ་ཕྱི་ནང་སྒོ་ཕུག་མེད་པས་བྱང་སེམས་རིས་མེད། བྱང་ཆུབ་ཀྱི་སེམས་དེ་ལས་ཅིར་ཡང་འབྱུང་བས་ངེས་མེད་ཆེན་པོ་རྐྱེན་གྱི། །གསལ་འགྲིབ་མེད་པས་ཆོས་ཉིད་རྣམ་པར་དག་པའི་སངས་རྒྱས་སོ་བུ། ༈ །ལེའུ་རེ་བརྒྱད་པ། རང་གྲོལ་བརྒྱད་ཀྱི་སྒོ་ནས་ཆོས་ཉིད་སྐྱེ་མེད་དུ་མཐོང་བའི་གདམས་ངག་ནི། ༧ རང་གྲོལ་བརྒྱད་ལ། ཡུལ་སྣང་བདེན་མེད་དུ་ཤེས་པས་བདེན་འཛིན་རང་སར་གྲོལ་བ་སྟེ། མངོན་སུམ་ཆོས་ཉིད་ཀྱི་དོན་ལ་བློ་མ་འཁྲུལ་བར་གནས་པའི་ཚེ། ཚོགས་དྲུག་ཡུལ་དུ་ཤར་ཚད་སྣང་སྟོང་སྒྱུ་མ་རྨི་ལམ་ལྟ་བུར་རྩ་ཆོད་པས། མཛེས་མི་མཛེས་སོགས། མིག་གིས་གཟུགས་མཐོང་མཐོང་སར་གྲོལ། །ཇི་ལྟར་གྲོལ་ན་ཡུལ་ཤེས་གཉིས་ཀ་རང་བཞིན། སྐྱེ་བ་མེད་པའི་དབྱིངས་སུ་གྲོལ། །དེ་བཞིན་དུ། སྙན་མི་སྙན་སོགས། རྣ་བས་སྒྲ་ཐོས་ཐོས་སར་གྲོལ། །སྐྱེ་བ་མེད་པའི་ཀློང་དུ་གྲོལ། །ཞིམ་མི་ཞིམ་སོགས། སྣ་ཡིས་དྲི་ཚོར་ཚོར་སར་གྲོལ། །སྐྱེ་བ་མེད་པའི་དབྱིངས་སུ་གྲོལ། །མངར་སྐྱུར་སོགས་ལྕེ་ཡི་རོ་མྱོང་མྱོང་སར་གྲོལ། །སྐྱེ་བ་མེད་པའི་ཀློང་དུ་གྲོལ། །འཇམ་རྩུབ་སོགས། ལུས་ཀྱི་རེག་པས་རེག་སར་གྲོལ། །སྐྱེ་བ་མེད་པའི་ཀློང་དུ་གྲོལ། སྣང་བ་བཅུ་བདུན་སོགས། སྣང་བ་རྣམས་ཀྱང་རང་སར་གྲོལ། །སྣང་སྟོང་སྐྱེ་བ་མེད་པའི་དབྱིངས་སུ་གྲོལ། །ཆོས་ཆོས་མིན་སོགས་བརྗོད་པའི་མིང་ཡང་རང་སར་གྲོལ། །གྲགས་སྟོང་སྐྱེ་བ་མེད་པའི་ཀློང་དུ་གྲོལ། །དགེ་མི་དགེ་སོགས་ཡིད་ཀྱི། བསམ་པའི་བློ་ཡང་དྲན་སར་གྲོལ། དྲན་པ་རང་དག་སྐྱེ་བ་མེད་པའི་དབྱིངས་སུ་ཐིམ་མོ་བུ། ༈ །ལེའུ་རེ་དགུ་པ། དྲི་མེད་བཞི་ལྡན་གྱི་སྒོ་ནས་ལམ་ལ་འཁྱར་ས་མེད་པའི་ལྟ་བ་ནི། ༧ །དྲི་མེད་བཞི་ལ། སྒྱུ་མའི་དཔེ་བརྒྱད་ཀྱིས་མཚོན་ནས་སྣང་སྲིད་ཅེར་སྣང་ཆོས་ཉིད་སྐྱེ་མེད་དུ་ཤེས་པས་ལྟ་བ་ཤེས་རབ་དྲི་མེད་ཡིན། དུས་ཐམས་ཅད་དུ། སྐྱེ་མེད་དུ་དེ་ཉིད་ལམ་དུ་ཁྱེར་བས་ལམ་བསྒོམ་པ་དྲི་མེད་ཡིན། སྐྱེ་མེད་ཀྱི་སྟེང་ན་རང་བབས་སུ་འཇོག་པའི་ཚེ་དོན་སྨྲ་བསམ་བརྗོད་དུ་མི་བཏུབ་པ་དེ་ཉམས་དྲི་མེད་ཡིན། སྐྱེ་མེད་ཀྱི་དོན་དེ་ལས་བློོ་དུས་གསུམ་དུ། མ་འཁྱར་བ་དེ་འབྲས་བུ་དྲི་མེད་ཡིན་ནོ་བུ། ༈ །ལེའུ་བདུན་ཅུ་པ། ལམ་པའི་མཐོང་ལུགས་གཞན་མ་རྙེད་པར་བསྟན་པ་ནི། ༧ མ་རྙེད་པ་ལྔ་ལ། གཅིག་ཏུ་བྲལ་གྱི་རིག་པས་བརྟགས་ན་ཕྱི་ནས་ཡུལ་མ་རྙེད། དཔེ་རབ་རིབ་ཅན་གྱི་སྐྲ་ཤད་དང་འདྲ། འཚོལ་བྱ་དང་འཚོལ་བྱེད་གཉིས་མེད་པས་ནང་ནས་སེམས་མ་རྙེད། དཔེ་ནམ་མཁས་ནམ་མཁའ་བཙལ་བ་དང་འདྲ། ཡན་ལག་དང་ཉིང་ལག་སོགས་རེ་རེ་ནས་བསིལ་བས་བར་ནས་ལུས་མ་རྙེད། དཔེ་ཆུ་ཆུང་གི་སྙིང་པོ་དང་འདྲ། འཁོར་རྒྱུ་དང་འཁོར་མཁན་གཉིས་སུ་མ་གྲུབ་པས། དོགས་དོགས་པོའི་སེམས་ཅན་མ་རྙེད། དཔེ་རྨི་ལམ་གྱི་འཁྲོམ་ཚོགས་དང་འདྲ། རང་སེམས་སྐྱེ་མེད་ཀྱི་དོན་ལས་སངས་རྒྱས་གཞན་དུ་གྲུབ་པ་མེད་པས། རེ་རེ་བོའི་སངས་རྒྱས་མ་རྙེད་དོ་བུ། ༈ །ལེའུ་དོན་གཅིག་པ། ལམ་པའི་ཆོས་ཉིད་གཞན་ནས་མ་རྙེད་པའི་ཚུལ་ནི། ༧ རྙེད་པ་མེད་པ་ལྔ་ལ། ཕྱི་ནང་གི་ཆོས་ཐམས་ཅད་གདོད་ནས་རང་བཞིན་སྟོང་པ་ཉིད་ལས་མ་འདས་པས། ཕྱི་རོལ་གྱི་ཡུལ་དུ། སྣང་བ་མེད་སྣང་ཡིན་པས། བཙལ་ཡང་དུས་གསུམ་དུ་མི་རྙེད་རྙེད་པ་མེད། ནང་རང་གི་སེམས་ཉིད། རིག་པ་རིག་སྟོང་ཡིན་པས་མི་རྙེད་རྙེད་པ་མེད། ཁམས་དྲུག་ལྡན་གྱི་ལུས་ལ་སྙིང་པོ་མེད་པས་མི་རྙེད་རྙེད་པ་མེད། འཁྲུལ་པས་བསླད་པའི་སེམས་ཅན་རྣམས་ཀྱང་དོན་སྐྱེ་མེད་ཡིན་པས་མི་རྙེད་རྙེད་པ་མེད། མ་འཁྲུལ་པའི་སངས་རྒྱས་ཀྱང་རང་སེམས་ཡིན་པས། གཞན་ནས་མི་རྙེད་རྙེད་པ་མེད་དོ་བུ། ༈ །ལེའུ་དོན་གཉིས་པ། ཆོས་ཉིད་མི་གཉིས་པའི་འཆར་ལུགས་རྒྱས་པར་བཤད་པ་ནི། ༧ །སེམས་མ་བཅོས་པར་རང་ལུགས་སུ་འཇོག་པའི་ལམ་ཁྱེར་ལྔ་ལ། ཆོས་ཉིད་དོན་ལ་དམིགས་གཏད་གང་ཡང་མེད་པས། ཡིད་ཀྱིས་གང་ལའང་མི་བསམ། གཟུགས་སྒྲ་སོགས་ཕྱི་རོལ་གྱི་ཡུལ་གང་ལ་ཡང་མི་སྤྱད། སེམས་ཉིད་ད་ལྟ་ནས་སངས་རྒྱས་ཡིན་པས་ལམ་དང་འབྲས་བུའི་ཡོན་ཏན་ཐོབ་འདོད་སོགས་རེ་བ་གང་ལའང་མི་བཅའ། སྡུག་བསྔལ་བདེ་ཆེན། ཉོན་མོངས་ཡེ་ཤེས་ཅི་སྣང་རང་སེམས་ལས་མ་འདས་པས་སྐྱོན་དུ་གང་ལ་ཡང་མི་ལྟ། སྔོན་བསུ་རྗེས་དཔྱོད་སོགས་དུས་གསུམ་གྱི་རྟོག་པའི་རྗེས་འབྲང་སྤངས་ཏེ། སེམས་རང་ལུས་ལ་མཐུའོ་བུ། སྟེ་བཞག་པའི་དོན་ནོ། ༈ །ལེའུ་དོན་གསུམ་པ། སྟོང་པ་གསུམ་ལྡན་གྱི་ཡིན་ལུགས་རང་ཤར་གྱི་གདམས་ངག་ནི། ༧ ཆོས་ཐམས་ཅད་ཡེ་ནས་སྐྱེ་འགག་གནས་གསུམ་དང་བྲལ་བའི་གཤིས་ལུགས། སྟོང་པ་གསུམ་ལ། གདོད་ནས་རང་བཞིན་གྱིས་སྐྱེ་བ་མེད་པས། ཕྱི་ཡུལ་གྱིས་མ་སྐྱེས་ཏེ་སྟོང་། སེམས་གཞི་རྩ་མེད་པ། ནང་སེམས་ཀྱིས་སྟོང་སྟེ་མ་སྐྱེས། གཟུགས་སྣང་ཝུ་བ། །ཚོར་མྱོང་ཆུ་ཤིང་། འདུ་ཤེས་སྨིག་རྒྱུ། འདུ་བྱེད་ཆུ་ཤིང་། འདུ་ཤེས་སྒྱུ་མ་ལྟ་བུ་སྟེ། བར་ཕུང་པོས་སྟོང་སྟེ་མི་གནས་པའོ་བུ། ༈ །ལེའུ་དོན་བཞི་པ། གཞི་མེད་ལམ་དུ་འཁྱེར་པས་སྣང་སྲིད་ལ་རྒྱས་གདབ་པ་ནི། ༈ ལམ་ཁྱེར་གསུམ་ལ། འཁོར་འདས་ཀྱི་ཆོས་ཀུན་ལ་བརྟེན་པའི་གཞི་དང་སྐྱེ་པའི་རྩ་བ་མེད་པར་ལམ་དུ་ཁྱེར། བདེན་རྫུན་རེ་དོགས་སོགས་བློས་རྩིས་གདབ་མེད་པར་སྡོད། སྣང་སྲིད་ལ་སྐྱེ་མེད་ཀྱི་རྒྱས་ཐོབས་ཤིག་བུ། ལེའུ་དོན་ལྔ་པ། ཕྱི་ནང་བར་གསུམ་གྱི་འབྲེལ་ཐག་བཅད་པ་ནི། གདམས་ངག་ཉམས་སུ་ལེན་པའི་སྔོན་དུ་ཕྱི་ནང་འབྲེལ་མ་ཆོད་ན་ཉམས་ལེན་ངོ་སྲུང་དུ་འཆོར་བས་འབྲས་བཅད་པ་བཞི་ལ། འདུ་འཛི་གཡེངས་རྐྱེན་སོགས་ཕྱིའི་འབྲེལ་ཐག་བཅད་པ་དང་། ཆགས་སྡང་སྐྱེ་བའི་ཡུལ་དགྲ་གཉེན་སོགས་ནང་གི་འབྲེལ་ཐག་བཅད་པ་དང་། ཚེ་འདིའི་སྣང་ཞེན་སོགས་དོན་གྱི་འབྲེལ་ཐག་བཅད་པ་དང་། གཞན་ཡང་། ཕྱི་ཐོས་པའི་ཕུགས་བཅད། ནང་བློའི་ཐེ་ཚོམ་བཅད། དོན་ལྟ་སྒོམ་སྤྱོད་པའི་སྒྲོ་འདོགས་བཅད་ནས། རྟག་པར་དགོན་པ་བསྟེན་པའོ། ༈ །ལེའུ་དོན་དྲུག་པ། སྤྱོད་ལམ་གྱི་ཁྱེར་སོ་བརྒྱད་དང་། བླ་མས་སྒོམ་སྐྱོན་བཅོས་ནས་བྱིན་རླབས་འཇུག་པར་བྱེད་པ་གཉིས་ཀྱི་དང་པོ་ནི། ༧ ལམ་གྱི་ཁྱེར་སོ་བརྒྱད་ལ། སྒྲུབ་པ་འཇུག་པ་སོགས་ཀྱི་སྐབས། ཕྱི་ནང་གསང་བའི་སྲུང་བ་རྣམ་གསུམ་བསྒོམ་ཞིང་བསྒོམ་སྒྲུབ་ཀྱི་ཆ་རྐྱེན་ཡོ་བྱད་རྣམས་ཚགས་བྱ་ཞིང་། བསྙུང་བར་གནས་ཞེས་གཉུག་མར་གནས་པ་སྟེ་སྒོ་གསུམ་རང་ལུགས་སུ་བཞག་ཅིང་བླ་མ་དང་དཀོན་མཆོག་ལ་མཆོད་པ་བྱ། སྔར་བྱས་ཀྱི་ལས་ལ་གཉེན་པོ་སྟོབས་བཞིས་སྡིག་པ་བཤགས་ཤིང་། ཉམས་རྟོགས་རྒྱུད་ལ་སྐྱེ་བར་གསོལ་བ་གདབ། གནས་དབེན་པར་བདེ་བའི་སྟན་ལ་འཁོད་ནས་ལུས་ངག་གི་བྱེད་བཅིང་སོགས་འཁྲུལ་བཅའ། ༈ །གཉིས་པ་ནི། འདི་རྣམ་བཤད་དུ་ལེའུ་དོན་དགུ་པའི་རྗེས་སུ་སྦྱར་སྣང་ནའང་། འདིར་གཞུང་དངོས་ལྟར། ༈ །རྩ་བའི་བླ་མ་ཉིད་རང་གི་སྤྱི་བོར་པད་ཟླའི་གདན་ལ་བཞུགས་པར་བསམ། བྱང་ཆུབ་ཏུ་སེམས་བསྐྱེད་པ་དང་། ཡན་ལག་བདུན་པ་སྔོན་དུ་བཏང་། དེ་ནས་འཁོར་བའི་ཆོས་ལ་བརྟག མི་རྟག་པ་དང་སྡུག་བསྔལ་བ་སོགས་ཀྱི་རང་བཞིན་ལ་བསམས། དེ་ནས་བར་དོ་དྲན་པར་བྱ། བར་དོ་ལ་རྣམ་པ་དྲུག་སྟེ། རང་བཞིན་གནས་ཀྱི་བར་དོ་ཆོས་ཉིད་ངོ་མ་ཤེས་པ་ཤེས་པར་བྱེད་པ་དྭ་ཕྲུག་མ་དང་འཕྲད་པ་ལྟ་བུ། སྐྱེ་ཤིའི་བར་དོར་ལ་ཡེ་ཤེས་ངོས་འཛིན་བ་མུན་ཁང་དུ་སྒྲོན་མེ་བཏེག་པ་ལྟ་བུ། རྨི་ལམ་གྱི་བར་དོ་ལ་ཅིར་སྣང་སེམས་སུ་ཤེས་པ་བྲམ་ཟེའི་གླིང་དུ་གཞན་ཚོལ་ཀྱང་མི་རྙེད་པ་ལྟ་བུ། ཏིང་ངེ་འཛིན་གྱི་བར་དོ་ལ་མི་གསལ་བར་གསལ་བར་བྱེད་པ་སྒེག་མོས་མེ་ལོང་ལ་ལྟ་བ་ལྟ་བུ། སྲིད་པ་བར་དོ་ལ་ལས་ཀྱི་འཕྲོ་མཐུད་པ་ཡུར་བ་རྐང་ཆད་པ་ལ་ཝ་བཙུགས་པ་ལྟ་བུ། འོད་གསལ་ཆོས་ཉིད་ཀྱི་བར་དོར་ཡེ་ཤེས་ཟང་ཐལ་དུ་འཆར་བ་སྐར་མདའ་མཁའ་ལ་རྒྱུག་པ་ལྟ་བུའི་དོན་བླ་མའི་མན་ངག་གི་གནད་དྲིལ་ནས་ཉམས་སུ་བླང་བར་བྱའོ། ༈ །ལེའུ་དོན་བདུན་པ། ཏིང་ངེ་འཛིན་བདུན་གྱི་སྒོ་ནས་བསྒོམ་པ་བསྟན་པ་ནི། ༈ །ལྟ་བསྒོམ་གྱི་དོན་ལས་གཞན་དུ་མི་གཡོ་བ། ཏིང་ངེ་འཛིན་བདུན་ལ། མིག་ནི་མིག་གིས་སྟོང་སོགས་རང་གི་དབང་ཤེས། ནང་སྟོང་པ་ཉིད་ཀྱི་ཏིང་ངེ་འཛིན། གཟུགས་ནི་གཟུགས་ཀྱིས་སྟོང་སོགས་ཡུལ་དྲུག །ཕྱི་སྟོང་པ་ཉིད་ཀྱི་ཏིང་ངེ་འཛིན། འདུས་བྱས་ཀྱི་སྣོད་བཅུད། ཕྱི་ནང་སྟོང་པ་ཉིད་གཉིས་ཀ་ཏིང་ངེ་འཛིན། འདུས་མ་བྱས། དོན་དམ་པ་སྟོང་པ་ཉིད་ཀྱི་ཏིང་ངེ་འཛིན། འཁྲུལ་སྣང་ཟིལ་གྱིས་གནོན་པ། སེང་གེ་རྣམ་པར་བགྱིངས་པའི་ཏིང་ངེ་འཛིན། གཟུང་འཛིན་གཉིས་མེད་ཀྱི་གནས་ལུགས། ཡེ་ཤེས་གསལ་བའི་ཏིང་ངེ་འཛིན་འཇིགས་འབྲལ་མེད་པ་རྡོ་རྗེ་ལྟ་བུའི་ཏིང་ངེ་འཛིན་ལྟ་བུ། ༈ །ལེའུ་དོན་བརྒྱད་པ། རྣལ་འབྱོར་གྱི་དབང་སྦྱོར་བ་ཡན་ལག་དྲུག་ལྡན་སྒྲུབ་པ་ནི། ༧ སྦྱོར་བ་དྲུག་ལ། བསམ་གཏན་གྱི་སྤྱོད་ལམ་དང་མཐུན་པར། བདེ་བའི་སྟན་ལ་འདུག་ནས་ནི། རྟེན་གཞི་ལུས་ཀྱི་རྩ་འཁོར་རྣམས་གསལ་བ་དང་། རྟེན་པ་རླུང་གི་དུག་འདོན་ཞིང་སྟེང་འོག་གི་རླུང་དགང་བ་དང་གེགས་སེལ་ལུས་ཀྱི་འཁྲུལ་འཁོར་འཆའ། ཡིད་ཀྱི་རྙོག་པ་དོན་མེད་པའི་རྟོག་པ་གཞན་སྤངས་ལ། བདེ་གསལ་སྟོང་པ་ཉིད་སོགས། ཏིང་ངེ་འཛིན་སེམས་རྩེ་གཅིག་ཏུ་བསྡུ། ༈ །ལེའུ་དོན་དགུ་པ། རྣལ་འབྱོར་ལམ་པའི་དངོས་གཞི་ཡན་ལག་ལྔ་ལྡན་ནི། ༈ །ལམ་དངོས་སྒོམ་པའི་ཡན་ལག་ཏུ། དངོས་གཞིའི་ཡན་ལག་ལྔ་ལ། ཚོང་སོ་ནམ་ཞིང་ལས་སོགས་ནམ་ཡང་ཟིན་དུས་མེད་པའི་འཇིག་རྟེན་གྱི་བྱ་བའི་ལས་རྣམས་ཕྱི་བཤོལ་ཞོག །དེ་ལྟར་བཞག་པས་དགེ་སྦྱོར་འཕེལ་ཞིང་། ལུས་ངག་སེམས་གསུམ་ཤིན་ཏུ་བདེ། །དེས་ནང་གི་ཏིང་ངེ་འཛིན་འཕེལ་བའི་ཉམས་མྱོང་སྣ་ཚོགས། རིག་པའི་མེ་ལོང་ནང་དུ་གསལ། དེའི་ཚེ་བདེ་བར་གཤེགས་པའི་གཟི་མདངས་སྟེར། སངས་རྒྱས་དང་བྱང་ཆུབ་སེམས་དཔའ་རིག་འཛིན་གྲུབ་པ་རྣམས་ཀྱིས་བྱིན་གྱིས་རློབས་ཤིང་དཀར་ཕྱོགས་སྐྱོང་རྣམས་ཀྱིས་བསྲུང་ཞིང་གཟི་བྱིན་སྒྲུབ་པས་བར་ཆད་དང་གདོན་བགེགས་ཀྱིས་འཚེར་བར་མི་ནུས། ཉོན་མོངས་པ་དུག་ལྔ་དུག་གསུམ་སོགས། མཚན་མའི་རྣམ་རྟོག་ལྡང་མི་ནུས། མདོར་ན་འཇིག་རྟེན་པའི་བྱ་བ་ཐམས་ཅད་བློས་བཏགས་ན་རང་བྱུང་བསླབ་པ་གསུམ་དང་མི་འགལ་བར་ལམ་ཟབ་མོ་ཉམས་སུ་བླང་བས་གནས་སྐབས་དང་མཐར་ཐུག་ཏུ་རང་གཞན་གྱི་དོན་གཉིས་ཡིད་བཞིན་དུ་འགྲུབ་པའི་ཡོན་ཏན་གྱི་ཚོགས་བསམ་མི་ཁྱབ་པ་ལ་དབང་འབྱོར་བར་འགྱུར་རོ། ༈ །དེ་ཡང་ལྷག་པའི་ཤེས་རབ་ཀྱི་བསླབ་པའི་ལེའུ་འདི་རྣམས་རྣམ་བཤད་དུ་གོང་འོག་འཁྲུགས་བསྡེབས་ནས། ལེའུ་ཞེ་གཉིས་པའི་རྗེས་སུ་ཞེ་བརྒྱད་པ་ཡར་དྲངས། དེ་ནས་ལྔ་བཅུ་ནས་ང་བཞིའི་བར་སྦྱར། དེའི་རྗེས་སུ་དྲུག་ཅུ་རེ་གསུམ་དང་རེ་དགུ། དེ་ནས་ཞེ་གསུམ་ནས་ཞེ་བདུན་པའི་བར། དེའི་རྗེས་སུ་དྲུག་ཅུ་རེ་བརྒྱད་དང་། བདུན་ཅུ། དོན་གཅིག །ཞེ་དགུ །དེ་ནས་ང་ལྔ་ནས་ང་དགུའི་བར། དེ་ནས་དྲུག་ཅུ་རེ་གསུམ་གོང་དུ་སོང་བའི་འཕྲོས། དྲུག་ཅུ་ནས་རེ་བདུན་པའི་བར་དང་། དེ་ནས་བདུན་ཅུ་རྩ་བདུན་པ་སེམས་ཀྱི་བསླབ་པའི་སྐབས་སུ་སོང་བའི་འཕྲོས། དོན་གཉིས་ནས། བདུན་ཅུ་རྩ་དགུའི་བར་སྦྱར་ཏེ་བཤད་པར་མཛད་ནའང་། འདིར་ནི་རྩ་བ་རང་གི་དཀྱུས་བཞིན་དུ་བྲིས་པའོ། །མདོར་ན་དེ་རྣམས་ཀྱི་སྒོ་ནས་སེམས་སྨད་རྫོགས་པ་ཆེན་པོ་སེམས་ཕྱོགས་ཀྱི་དགོངས་པ་བླངས་ནས་ཤན་འབྱེད་ལ་བློ་དང་བཅས་ངེས་པའི་དོན་དང་ལྡན་པ་སྤུ་གྲི་སོ་བསྡེབས་པས་ཕ་རོལ་གྱི་གཡུལ་ངོ་འཇོམས་པ་བཞིན། འཁོར་བའི་རྩ་བ་སྐྱེ་མེད་དུ་གཅོད་པའི་ལམ། ཤེས་རབ་ཅན་ལ་མཚམས་པར་བཤད་པའི་སྐབས་ཀྱི་གདམས་ངག་ཐལ་ལོ། ༈ །ཞལ་གྱི་གདམས་པ་བརྒྱད་ཅུ་པ་ལས། ངོ་བོ་ཤེས་རབ་དྲི་མ་མེད་པ་ལ་གདམས་པའི་སྐབས་ཏེ་བཞི་པའོ། ༈ །སྤྱི་དོན་ལྔ་པ་མཇུག་གི་དོན། ལེའུ་བརྒྱད་ཅུ་པ། སྣོད་བརྟག་ཅིང་ཉམས་སུ་ལེན་པར་གདམས་ངག་འཇུག་བསྡུ་བ་ནི། ༈ །རྗེས་ཀྱི་དོན་གསུམ་ལ། གདམས་ངག་མི་སྦྱིན་པའི་གནས་སྣོད་ཀྱི་སྐྱོན། འདི་ལྟ་བུའི་གདམས་ངག་ཟབ་མོས་རྒྱུད་དགྲོལ་བར་བྱ་རྒྱུའི་སློབ་མའི་སྐྱོན་ཤེས་ནས། ངང་ཚུལ་ངན་ཞིང་བྱས་པ་མི་གཟོ་བ་སོགས། སྣོད་ངན་མི་གཞི་མི་ལེགས་པ། བློ་འགྱུར་ལྡོག་ཅན་མི་བརྟན་པ། རང་གི་བླ་མ་དང་ཆོས་དང་གང་ཟག་ལ་སྐྱོན་འདོགས་པ། གདམས་ངག་ཟབ་མོ་ཐོབ་ནས་རང་གིས། ཉམས་སུ་མི་ལེན་པ་རྣམས་ལ་མི་སྦྱིན་བྱིན་ཀྱང་དེ་ལ་ཕན་མི་ཐོག་ཅིང་གསང་བ་འཆལ་བས་སྒྲོ་སྐུར་དང་བཀའ་ཆད་འབྱུང་ངོ་། །གང་ལ་བསྟན་པའི་ཡུལ་སྣོད་ལྡན་ནི། བྱས་པ་ཤེས་ཤིང་དྲིན་དུ་གཟོ་བ་སོགས་ངང་ཚུལ་བཟང་བ། དད་པ་སོགས་འགྱུར་ལྡོག་མེད་པས་རྒྱུད་བརྟན་པ། ཆོས་དང་གང་ཟག་སོགས་ལ་དག་སྣང་ཆེ་བ། ཐོས་དོན་སྒྲུབ་པས་ཉམས་ལེན་ལ་བརྩོན་པ་རྣམས་ལ་སྦྱིན། དེ་རྣམས་ལ་སྦྱིན་པས་ཆོས་བརྒྱད་ཟིན་ཅིང་བསྟན་པ་ལ་ཕན། རང་གཞན་མང་པོའི་དོན་འབྱུང་ངོ་། །དེ་ལྟར་བྱིན་ནས་ཉམས་སུ་ལེན་པའི་ཚུལ། སྣོད་ལྡན་གྱི་སློབ་མ་དེས་ཀྱང་བླ་མ་སངས་རྒྱས་སུ་བལྟ། དེས་བརྒྱུད་པའི་བྱིན་རླབས་འཇུག །གདམས་ངག་སྙིང་ལ་བཅང་། གསང་ཞིང་སྒྲུབ་ནུས་ན་དངོས་གྲུབ་རྣམ་གཉིས་འབད་མེད་དུ་འབྱུང་། འདུ་འཛིའི་དབེན་པའི་དགོན་པ་གྲོགས་ལྟར་བསྟེན་ནས་ཉམས་སུ་བླང་ངོ་། །དེས་ཉམས་མྱོང་རྟོགས་ཚད་རྒྱས་པས་གངས་ཀྱི་སེང་ཕྲུག་ཏུ་འགྱུར་རོ་བུ། ༈ །དེས་སྣོད་ཀྱི་ཁྱད་པར་དང་། རང་གི་ཤེས་རྒྱུད་ལ་ཡོན་ཏན་མ་སྐྱེས་པ་སྐྱེས་པར་བྱེད་པ་གདམས་ངག་རྗེས་སུ་བསྟན་པ་ཐལ་ལོ། ༈ །ཞལ་གྱི་གདམས་པ་བརྒྱད་ཅུ་པ་ལས་སྣོད་དང་རྗེས་སུ་བསྟན་པ་ལ་གདམས་པའི་སྐབས་ཏེ་ལྔ་པའོ། ༈ མཛད་བྱང་། ༈ །རྗེ་ལྟ་དགོངས་ཀྱི་རྩེ་མོ་བདེ་གཤེགས་རྒྱ་བོའི་ཐུགས་བཅུད། སྡེ་སྣོད་གསུམ་གྱི་ཁོག་ཕུབ། མདོ་སྒྱུ་སེམས་གསུམ་གྱི་གཞུང་བསྲངས་ཏེ། དད་བརྩོན་ཤེས་རབ་ཅན་རྩེ་གཅིག་གིས་གྲོལ་པའི་གདམས་ངག །རྗེའི་ཞལ་ནས་ཇི་ལྟར་གསུང་རིམ་བཞིན། ཁྱུང་པོ་གཡའ་དམར་བས་ཡི་གེར་བཀོད་པའི་ཟབ་ཆོས་སྙིང་པོའི་སྙིང་པོ་མཐར་ཐུག་པ་རྫོགས་སོ། །སྨྲས་པ། གང་མཚན་ཐོས་དང་དྲན་པས་ཀྱང་། །རྣམ་གྲོལ་འབྲས་བུ་སྦྱིན་མཛད་པ། །ཧེ་རུ་ཀ་དཔལ་ཟུར་ཆུང་པའི། །ཞལ་གྱི་གདམས་པ་བརྒྱད་ཅུ་ཞེས། །སྔ་འགྱུར་བརྒྱུད་པའི་ཁྱད་ནོར་མཆོག །རྒྱུད་ལུང་མན་ངག་ཟབ་མོའི་གཏེར། །དུས་གསུམ་འབྱོར་དཀའི་ཨུ་དུམྦར། །དེང་དུས་འབད་མེད་བདག་གིས་རྙེད། །དེ་སླད་དགའ་དང་སྤྲོ་ཤུགས་ཀྱིས། །མཆན་འདི་བྲིས་ལ་ཉེས་པའི་ཆ། །གང་མཆིས་བླ་མ་ལྷ་ལ་བཤགས། །དགེ་བས་བྱང་ཆེན་མྱུར་ཐོབ་ཤོག །སྐྱེ་ཀུན་དཔལ་ལྡན་ཟུར་པ་ཡི། །རང་ལུགས་མཆོག་དང་མི་འབྲལ་ཞིང་། །ཚུལ་བཞིན་འཛིན་སྐྱོང་སྤེལ་གསུམ་གྱིས། །རང་གཞན་དོན་གཉིས་འབྱོར་གྱུར་ཅིག །ཅེས་༧རྡོ་རྗེ་འཆང་མཁྱེན་བརྩེའི་དབང་པོའི་ཞལ་སྔ་ནས་རྩལ་བའི་ས་གཞུང་སྤེལ་མ་ཉིད་གཞིར་བཞག་ཐོག་རང་འདྲའི་བློ་དམན་རྣམས་ལ་སྨན་པའི་བསམ་པས་གསལ་བྱེད་ཀྱི་མཆན་བུ་ཉུང་ངུ་འདི་ཡང་འབྲེལ་བཤད་རིན་པོ་ཆེ་གསལ་བའི་སྒྲོན་མེ་དང་བསྟུན་ནས། ཀུ་སཱ་ལི་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས། ཤིང་བྱི་སྨིན་དྲུག་ཟླ་བའི་དུས་ཚེས་དགེ་བར་བདེ་མཆོག་བཀྲ་ཤིས་དགེ་འཕེལ་དུ་བྲིས་པ་སྟེ། འདིས་ཀྱང་ངེས་གསང་སྙིང་པོའི་བསྟན་མཆོག་ཡུན་རིང་དུ་གནས་པའི་རྒྱུར་གྱུར་ཅིག །སརྦ་དཱ་མངྒ་ལཾ་བྷ་ཝན་ཏུ།། །