དྷརྨ་ཤྲཱི་རང་ཉིད་ཀྱི་ཆོས་དང་རྗེས་སུ་འབྲེལ་བའི་སྤྱོད་པ་ལས་བརྩམས་པའི་ལོ་རྒྱུས་བདེན་གཏམ་རྣ་བའི་བདུད་རྩི།
དྷརྨ་ཤྲཱི་རང་ཉིད་ཀྱི་ཆོས་དང་རྗེས་སུ་འབྲེལ་བའི་སྤྱོད་པ་ལས་བརྩམས་པའི་ལོ་རྒྱུས་བདེན་གཏམ་རྣ་བའི་བདུད་རྩི་ཞེས་བྱ་བ་བཞུགས་སོ། །ༀ་སྭ་སྟི། རང་ཉིད་ཀྱི་ཆོས་དང་རྗེས་སུ་འབྲེལ་བའི་སྤྱོད་པ་ལས་བརྩམས་པའི་ལོ་རྒྱུས་བདེན་གཏམ་རྣ་བའི་བདུད་རྩི་ཞེས་བྱ་བ། སྐྱབས་ཀུན་འདུས་པའི་ངོ་བོ་རྗེ་བཙུན་བླ་མ་དམ་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །རབ་འབྱམས་རྒྱལ་བ་ཀུན་གྱི་ཡེ་ཤེས་དང་། །ཐ་དད་མ་དམིགས་གཅིག་ཆོག་ཆོས་ཀྱི་རྗེ། །གཏེར་ཆེན་བླ་མ་འགྱུར་མེད་རྡོ་རྗེའི་ཞབས། །དད་བརྒྱའི་གཙུག་གི་པདྨོས་རྟག་ཏུ་མཆོད། །གང་ཐུགས་འགྱུར་མེད་ཀུན་ཁྱབ་རྡོ་རྗེའི་ཁམས། །མཐའ་དག་དངོས་ཀུན་རྗེས་ཞུགས་ཆོས་ཀྱི་སྐུའི། །རྣམ་ཐར་རང་རིག་ངོ་བོར་དབྱེར་མེད་པའི། །བདེ་ཆེན་མཉམ་ཉིད་རྟོགས་པའི་བཀའ་དྲིན་སྩོལ། །ཚུར་མཐོང་བདག་འདྲའི་བླུན་རྨོངས་སྤྱོད་ཚུལ་རྣམས། །ཀུན་གྱི་གཏན་ལ་ཕེབས་མོད་བཟང་པོའི་གཏམ། །མེད་ལ་སྒྲོ་བཏགས་བརྗོད་པའང་དགོས་མེད་ཕྱིར། །འདི་བརྗོད་དུས་དང་བློ་གྲོས་གྲོན་པའི་རྒྱུ། །འོན་ཀྱང་གདོད་མའི་གཤིས་ལུགས་རང་རིག་དབྱིངས། །རྣམ་འགྱུར་དུ་མའི་འཆར་སྒོ་མ་འགགས་ཀྱང་། །དེ་དོན་རྟོགས་པའི་བློ་ངོར་མཁའ་ལམ་ངོས། །ཆུ་འཛིན་དེངས་བཞིན་གཉིས་འཛིན་གཟེབ་ལས་སྒྲོལ། །དེ་ཕྱིར་རང་གསལ་གཏད་མེད་འགྱུ་བའི་སེམས། །བློ་ཆུང་རེ་དོགས་གོ་རར་མ་བཅུག་པར། །རང་ཚུལ་བདེན་གཏམ་དམ་པའི་གསུང་གི་ངོར། །འཛེམ་མེད་སྨྲའོ་རྣ་བའི་བདུད་རྩིར་ལོངས། །དེ་ལ་འདིར་རང་གི་རྣམ་ཐར་རང་རྒྱུས་ཀྱི་སྒོ་ནས་ཅུང་ཟད་གླེང་བ་ལ་རིགས་ཀྱི་ནུས་པ་ཉིད་དཀར་པོའི་ལས་ཀྱིས་སད་ཚུལ། དེ་ལྟར་སད་པ་ལས་ལུས་རྟེན་འདི་བཙས་ནས་ན་ཚོད་འཕེལ་ཚུལ། བསྟན་པ་ལ་ཞུགས་ནས་ཐོས་སམ་གྱིས་རྒྱུད་སྦྱངས་ཚུལ། ཇི་ལྟར་ཐོས་པའི་དོན་ཉམས་སུ་བླངས་ཚུལ། རང་ནུས་དང་སྦྱར་བའི་གཞན་དོན་ཆ་ཙམ་བསྒྲུབ་ཚུལ། ལྷག་པའི་བསམ་པས་དོན་གཉིས་འགྲུབ་འགྱུར་ལ་སྨོན་ལམ་ཇི་ལྟར་བཏབ་ཚུལ་དང་དྲུག་ལས། དང་པོ་ནི་རང་གི་སེམས་ཉིད་གདོད་མའི་གཤིས་ལུགས་རང་བཞིན་གྱིས་རྣམ་པར་དག་པ་གསེར་བཟང་པོའི་ཁམས་ལྟ་བུ། དེའི་སྟེང་དུ་ཐེག་པ་གསུམ་གྱི་རིགས་ནུས་ཡོད་པ་ལས། ཐེག་པ་ཆེན་པོའི་རིགས་ཀྱི་ནུས་པ་དེ། ཚེ་རབས་སྔ་མའི་རྣམ་དཀར་གྱི་ལས་ཅུང་ཟད་སྦྱངས་ཤིང་སྨོན་ལམ་གྱི་སེམས་པ་ཅུང་ཟད་ཡོད་པས་སད་དེ་སྐྱེ་སྲིད་འདིར་ཡེ་ཤེས་ཀྱི་སྐུ་ཅན་རྗེ་བཙུན་བླ་མ་བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྒྱལ་པོ་དང་། སྡོམ་བཙུན་མཁས་པ་ཆེན་པོ་རྒྱལ་བའི་སྲས་པོ་སྟེ། བླ་མ་དམ་པ་སྐུ་མཆེད་ཀྱི་གཅུང་དུ་སྐྱེས་པས་ཆུང་ངུ་ནས་དམ་པའི་ཆོས་དང་མཇལ་བའི་སྐལ་བ་ཐོབ། དེ་ཡང་རྗེ་བླ་མའི་གཏེར་ལུང་ལས། གཡུ་སྒྲའི་སྤྲུལ་པ་བློ་ལྡན་དྷརྨའི་མིངཿ ཞེས་དང་། རྒྱལ་མོ་གཡུ་སྒྲའི་སྤྲུལ་པ་ནིཿ མེ་ཁམས་ཤྲཱི་ལས་ཀྱི་མིང༔ ཞེས་འབྱུང་བ་ལྟར་དྷརྨ་ཤྲཱིའི་མིང་དང་། སྨྱོས་ཀྱི་རུས་ཁམས་ཇི་མེ་ཡིན་པར་མ་ཟད། ལོ་སྙིང་རྟའི་སྲོག་ཁམས་ཀྱང་མེ་ཡིན་་པས་སྦྱར་རུང་བ་ལྟར། གཏེར་འབྱུང་ལོ་རྒྱུས་སུ་རྗེ་བླ་མ་ཉིད་ཀྱིས་ངོས་འཛིན་པར་མཛད་པའི་སྐལ་བཟང་ཐོབ་པ་ནི། སྤྲུལ་པ་དངོས་ཡིན་པར་དཀའ་ཡང་། རྒྱུད་བྱིན་གྱིས་བརླབས་པ་ཙམ་ལ་དགོངས་པར་མངོན་ཞིང་། དེ་ལྟར་བརླབས་པའི་ཡུལ་ཡང་དཀར་པོའི་རིགས་སད་པ་ཞིག་དགོས་པ་ལས། དེའི་རྟགས་སྔ་མའི་བག་ཆགས་བཟང་བར་མཚོན་པ་ནི། རང་ལོ་གཉིས་གསུམ་ཙམ་གྱི་ཚེ་ལུས་གནད་ལྟ་སྟངས་བྱེད་པ་སོགས་བསམ་གཏན་གྱི་བག་ཆགས་འདྲ་བ་ཡོད་ཟེར་ཀྱང་རང་གིས་མ་དྲན། བྱིས་པའི་དུས་དྲན་པ་རྙེད་པ་ཙམ་ནས་བཟུང་སྤྱིར་སྐྱེས་བུ་དམ་པའི་རིགས་དང་བྱེ་བྲག་ཀརྨ་པ་ཡབ་སྲས་ལ་བཅོས་མིན་གྱི་དད་པ་རང་ཤུགས་སུ་འཆར་བ་དང་། ཕྱིས་རྩ་རྒྱུད་གསང་སྙིང་ལ་ཐོས་བསམ་བྱེད་དུས་རོག་པའི་ཡིག་ཆ་འདྲ་མཐོང་བ་ལས་གོ་བའི་རྣེ་རྙེད་པ་ཞིག་བྱུང་བ་ལ་དཔག་ན། དེ་དག་གི་སློབ་རིགས་ཆོས་ལ་བག་ཆགས་ཅུང་ཟད་བཞག་པ་ཞིག་ཨེ་ཡིན་སྙམ། གང་ལྟར་ཡང་ཆོས་རིགས་སུ་སྐྱེས་པར་བརྟེན་བྱིས་པའི་དུས་ནས་ཀྱང་དད་པ་དང་སྙིང་རྗེ་དང་ངེས་འབྱུང་སོགས་ཆེ་རབ་ཡོད་ཅིང་། འཇིག་རྟེན་གྱི་བྱ་བ་ལ་བློ་མི་འཇུག་པས་ཚེ་འདི་བལྟས་ཀྱི་དངོས་ཞེན་རང་བཞིན་གྱིས་སྲབ་པ་འདི་ནི་དཀར་པོའི་ལས་ཀྱིས་རིགས་སད་པའི་རྟགས་སུ་མཚོན་ནུས་པ་ཡིན་ནོ། །གཉིས་པ་ལུས་རྟེན་འདི་བཙས་ནས་ན་ཚོད་འཕེལ་ཚུལ་ནི། ཁོ་བོ་ཅག་གི་རུས་ནི་སྔགས་རུས་ཏེ། མཐིང་མ་སྨྱོས་ཞིག་ཆེན་པོའི་རིགས་རྒྱུད་ཡིན། ལུས་འདི་བསྐྱེད་པའི་ཕ་མ་ནི། གནུབས་ཆེན་གྱི་ཡང་སྲིད་ཡབ་རྗེ་སྨྱོས་སྟོན་གསང་བདག་ཆེན་པོ་ཕྲིན་ལས་ལྷུན་གྲུབ་དང་། ཤེས་དཀར་རྡོ་རྗེ་མཚོའི་སྤྲུལ་པ་མ་བཙུན་རྗེ་རིགས་ལྷ་འཛིན་དབྱངས་ཅན་སྒྲོལ་མ་སྟེ། ཡབ་ཡུམ་དེ་གཉིས་ལས་རྗེ་བླ་མ་དམ་པ་སྐུ་མཆེད་ཀྱི་གཙོས་པའི་སྲས་ལྔ་དང་། སྲས་མོ་གཉིས་ཏེ་སྲས་ལྕམ་སྲིང་བདུན་འཁྲུངས་པ་ལས་བདག་ལྔ་པ་ཡིན། དེ་ཡང་ཤིང་ཕོ་རྟའི་ལོ་ལ་ཡུལ་གཡོར་པོ་གྲྭ་ནང་གི་ལུང་པའི་ས་ཚིགས་སྔགས་ཀྱི་སྡེ་དགོན་དར་རྒྱས་ཆོས་གླིང་ཞེས་བྱ་བར་སྐྱེས། མིང་རྒྱུ་སྐར་གྱི་རྟེན་འབྲེལ་ལས་ལེགས་པ་དོན་འགྲུབ་ཏུ་བཏགས། ལོ་ངོ་གསུམ་ཙམ་ལ་སླེབ་དུས་བུ་རྫིའི་གདོལ་སྤྱོད་ཀྱིས་གྲིབ་ཕོབ་སྟེ་ལྕེ་མི་བདེ་བ་འདི་བྱུང་། ལྕགས་ཕོ་བྱི་བར་ཕལ་ཆེར་རང་གི་གཞིས་དགོན་པ་དང་། རེས་ཞང་པོའི་ཁྱིམ་ཟླུམ་པོ་གཉིས་སུ་བསྡད། སྐབས་ཤིག་མ་རིན་པོ་ཆེའི་ཨ་ནེའི་རྩར་ཁྲབ་མོར་ཀྱང་ཕྱིན། ལོ་བརྒྱད་པ་ལ་གཅེན་རྒྱལ་བའི་སྲས་པོའི་ཞབས་ཕྱིར་དཀྲིས་ཏེ་དགུན་དཔྱིད་གཉིས་འཕྱོང་རྒྱལ་དཔལ་རི་དང་། དབྱར་དབུས་རིའི་གནས་ཆེན་མཆིམས་ཕུར་བསྡད། དེ་དུས་མ་རིན་པོ་ཆེ་བསམ་ཡས་སུ་ཕེབས་པ་དང་ལྷན་ཅིག་བསམ་ཡས་རི་མཐིལ་གྱི་གནས་རྟེན་ངོ་མཚར་བ་རྣམས་མཇལ་ཞིང་སྨོན་ལམ་བཏབ། མ་ཕྱིར་ཐེག་རྗེས་གཅེན་དང་དགེ་སློང་ལེགས་པ་གཉིས་ཀྱི་རྩར་ཀློག་སྦྱང་ལ་སྦྱང་ལོ་བྱས། གཞིས་ནས་ཀེག་སེལ་གྱི་རིམ་གྲོར་མིང་བསྒྱུར་དགོས་པའི་བཀའ་ཕྲིན་བྱུང་བར་ལྟ། སྤྲུལ་སྐུ་ཕྲིན་ལས་རྣམ་རྒྱལ་གཅེན་གྱི་ཞབས་བསྙུང་བསྐོར་དུ་ཕེབས་དུས། ཀ་བཅུ་ཚེ་ཆོག་གིས། ད་རིས་རྟེན་འབྲེལ་འགྲིག །མིང་སྤྲུལ་སྐུ་རིན་པོ་ཆེ་ལ་ཞུས་པས་འཐད་ཅེས་བསྐུལ་བ་ལྟར་མིང་ཞུས་པས་པདྨ་ཕྲིན་ལས་རྒྱལ་མཚན་ཞེས་སྩལ། གཅེན་འཕྱོང་རྒྱས་སུ་ཕྱིར་ཕེབས་ཀྱི་ཞབས་ཕྱིར་བསམ་ཡས་མཐིལ་གྱི་བར་འོང་ནས། རྟ་མགྲིན་གླིང་དུ་གསུང་སྤྲུལ་རིན་པོ་ཆེ་ཡབ་སྲས་མཇལ། དེ་ནས་ངེད་ཀྱིས་ཟུར་མཁར་གྱི་ཀོ་བར་ཐོན། རྟ་བསུ་མ་སླེབ་པས་གྲྭ་ཕྱི་ཚོགས་འདུས་སུ་ཞག་གཉིས་བསྡད་དེ་གཞིས་སུ་འབྱོར། དེ་དུས་རྗེ་བླ་མ་དམ་པའང་གཙང་རོང་བོན་ལུང་ནས་ཕྱིར་ཕེབས་གྲུབ་འདུག །ཨ་མ་ཡབ་སྲས་ལྷན་ཅིག་ཏུ་བཞུགས་པ་མཇལ་ཞིང་། གསུང་སྦྲུལ་རིན་པོ་ཆེ་ཕྱིར་ལམ་གྲྭ་རྒྱུད་ཁྲབ་མོ་ཞོལ་ཁྲོད་དུ་བཞུགས་འདུག་པའི་སར། གཙུག་ཕུད་ཕུལ་ཏེ། མིང་ཨོ་རྒྱན་གྲགས་པ་བཟང་པོ་ཞེས་སྩལ། ཆབ་ཟེ་གཤེགས་སར་ཕྱིན་ནས་དད་པ་ཆེན་པོས་ཙན་ནེར་གསང་ཆབ་ཞུས་ཏེ་མང་དུ་འཐུང་། རང་ལོ་དགུར་སླེབ་པ་ཆུ་སྟག་དབོ་ཟླའི་ཉེར་གཉིས་ལ་ཡབ་རྗེ་གསང་བདག་ཆེན་པོ་ཡེ་ཤེས་གོ་འཕོའི་རྟགས་ངོ་མཚར་བ་དང་བཅས་ཏེ་དག་པའི་ཞིང་དུ་གཤེགས་པའི་གདུང་མཆོད་ཀྱི་ཚེ་སྐུ་གདུང་རིན་པོ་ཆེའི་དྲུང་དུ་ཡང་ཡང་ཕྱིན་ཏེ། ཕྱག་མང་པོ་བཙལ་ཞིང་གསོལ་བ་བཏབ་པས་བྱིན་རླབས་ཞུགས་པ་ཡིན་འདྲ། ནུབ་གཅིག་ཡབ་རྗེ་བར་སྣང་ལ་ཡེར་གྱི་གཤེགས་པའི་སྐུའི་འཐུ་བ་ལ་འཇུས་པས་རང་ཡང་བར་སྣང་ལ་ཧད་ཀྱིས་བཏེགས་པ་དང་ལྷན་ཅིག་གཉིད་སད་པ་ཞིག་བྱུང་། དེ་ལྟར་ཡབ་རྗེ་རིག་འཛིན་ཆེན་པོ་དང་འགྲོགས་ཡུན་ལོ་དགུའི་ངོ་མཐོང་ཙམ་ལས་མ་བྱུང་བས་སྐུ་གཤེགས་རྗེས་ནས། གཅེན་རིག་འཛིན་གཏེར་སྟོན་ཆེན་པོས་འཇིག་རྟེན་ཕྱོགས་ནས་ཕའི་དོད་དང་། ཆོས་ཕྱོགས་ནས་བཀའ་དྲིན་གསུམ་ལྡན་གྱི་བླ་མ་མཛད་ནས་བརྩེ་བ་ཆེན་པོའི་སྤྱན་རས་ཀྱིས་བཙའ་བས་རྗེས་སུ་བཟུང་སྟེ་ལེགས་པར་བསྐྱངས། གཅེན་རྒྱལ་བའི་སྲས་པོ་དང་། མ་རིན་པོ་ཆེ་ནས་ཀྱང་ཆུང་དུས་ནས་བློ་ངན་ལམ་དུ་མ་བཏང་བར་ཆོས་སྒོར་འདྲེན་པའི་མཐུན་རྐྱེན་སྦྱར་བས། མགྲིན་པ་ཐེག་པ་ནས་ཆོས་ལ་མོས་པ་ཐོབ་ཅིང་། བསམ་པ་རྙེད་པ་ནས་བཟུང་སྟེ་དམ་པའི་ཆོས་ལ་ངང་གིས་འཇུག་ཏུ་ཡོད་པའི་སྐལ་བ་ཐོབ་པས་འཚེངས་པ་ཡིན་ནོ། །གསུམ་པ་བསྟན་པ་ལ་ཞུགས་ནས་ཐོས་བསམ་གྱིས་རྒྱུད་སྦྱངས་ཚུལ་ནི། རང་ལོ་བཅུ་གསུམ་པ་ལ་ལུས་བསྒྱུར་ཞིང་རྗེ་གཏེར་ཆེན་བླ་མ་ལ་གཙུག་ཕུད་ཕུལ་ཏེ། མིང་བསྟན་འཛིན་འཇམ་དབྱངས་དབང་པོ་ཞེས་སྩལ། སྐྱབས་གསུམ་འཛིན་པའི་དགེ་བསྙེན་གྱི་སྡོམ་པའང་ཐོབ། བཅོ་ལྔ་པ་ལ་གཅེན་རྒྱལ་བའི་སྲས་པོ་རིན་པོ་ཆེ་དང་མཉམ་དུ་རྐང་འགྲོས་ཀྱི་ཆུ་བོར་བརྒྱུད་ཕོ་བྲང་ཆེན་པོར་ཕྱིན། དེ་དུས་རྗེ་བླ་མ་ཉིད་གོང་ས་ཐམས་ཅད་མཁྱེན་པ་ལྔ་པ་ཆེན་པོས་ཏི་ཤྲཱི་བཞེས་ནས་ཆོས་བཀའ་འབུལ་བའི་སྐབས་ན་འདུག་པ་ཞབས་ཕྱིར་བསྡད་ཅིང་། རྗེ་ཐམས་ཅད་མཁྱེན་པ་ལྔ་པ་ཆེན་པོ་ལས་རབ་ཏུ་བྱུང་སྟེ། མིང་ངག་དབང་ཆོས་དཔལ་ཞེས་སྩལ་ཞིང་དགེ་ཚུལ་གྱི་སྡོམ་པ་དང་། རང་ལོ་ཉི་ཤུ་པ་ཆུ་གླང་ལོར་སླར་ཡང་ཕོ་བྲང་ཆེན་པོར་ཕྱིན་ཏེ་བསྙེན་རྫོགས་ཞུས། ཕྱིས་གོང་སའི་ལུང་གིས་སྔ་འགྱུར་གྱི་བསྟན་པའི་འབྲེལ་དང་བཅས་སྨད་འདུལ་བའི་སྡོམ་རྒྱུན་རྣམ་པར་དག་པ་ཁ་རག་ཞལ་སྔ་ནས་ལ་བཞུགས་ཤིང་ཁོང་འདུལ་བའི་ངང་ཚུགས་ཀྱང་བཟང་བས་དེར་བསྐྱར་བསྒྲུབ་གྱིས་ཞེས་བསྐུལ་བ་ལྟར་རང་ལོ་ཉེར་བདུན་པ་ལྕགས་སྤྲེལ་ལོ་ནག་ཟླའི་ཚེས་བཅུ་གསུམ་གྱི་ཉི་མ་བརྒྱད་ཆ་ལུས་པ་གྲིབ་ཚོད་སྐྱེས་བུ་གཅིག་དང་རྐང་པ་གཉིས་ཀྱི་དུས་སུ་རྗེ་བླ་མ་ཐམས་ཅད་མཁྱེན་པའི་མཚན་དཔེའི་སྣང་བས་ཁྱབ་པའི་གནས་དབུ་རུ་གྲུ་འཛིན་གྱི་ཕོ་བྲང་ཆེན་པོར་དོན་གྱི་སླད་དུ་མཚན་ནས་སྨོན་ན་མཁན་ཆེན་དཀོན་མཆོག་བསྟན་འཛིན་ལས་དད་པའི་དགེ་འདུན་གྲངས་ཚང་བའི་དབུས་སུ་ཚིགས་གསུམ་བར་མ་ཆད་པའི་ཆོ་གའི་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས། མེ་ཡོས་ནག་ཟླའི་ནང་དུ་རྗེ་གཏེར་ཆེན་བླ་མ་ལས་བྱང་སྡོམ་བཀའ་སྲོལ་གསུམ་གྱི་སྨོན་འཇུག་སེམས་བསྐྱེད་དང་། རང་ལོ་བཅུ་གཉིས་པ་ཤིང་སྦྲུལ་ཟླ་བ་བདུན་པའི་ཉེར་ལྔ་ལ་རྡུལ་ཚོན་གྱི་དཀྱིལ་འཁོར་དུ་རིག་འཛིན་ཐུགས་ཐིག་གི་དབང་ནོད་པས་རྒྱུད་སྨིན་པར་བྱས་ཏེ། རྗེས་སུ་ཐོབ་པའི་སོ་བྱང་གི་སྡོམ་པ་གཉིས་པོ་དེ་ཡང་སྔགས་སྡོམ་ལས་ཕྱེ་བའི་དང་དེའི་སྡོམ་པའི་ངོ་བོར་སྐྱེས་པས་སྡོམ་པ་གསུམ་གྱི་རང་རྒྱུད་བསྡམ་པ་ཡིན་ལ། དེ་ཡང་རང་ཉིད་མའི་པང་དུ་འཚོ་བའི་དུས་ནས་ཡབ་རྗེས་བཀའ་དགོངས་པད་གླིང་གི་དབང་ཕལ་མོ་ཆེ་སོགས་དབང་བཀའ་མང་དུ་ཐོབ་པར་མཛད་འདུག་ཀྱང་བླ་མ་དམ་པའི་སྔགས་རྒྱ་ཏིང་ངེ་འཛིན་གྱི་ནུས་པས་བྱིན་གྱི་བརླབས་པའི་རྟེན་འབྲེལ་རང་རྒྱུད་ལ་སྒྲིགས་ནའང་། རང་ན་གཞོན་ཞིང་འདུན་པ་ཞན་པས་དབང་གི་བརྡ་དོན་འཕྲོད་དཀའ་བས་ན་ལུས་རྟེན་འདི་ལ་བརྡ་དོན་ཕྲོད་པའི་དབང་གིས་རྒྱུད་སྨིན་པར་བྱས་པ་ནི་ཐུགས་ཐིག་གི་དབང་འདི་ཉིད་ཡིན་པས་འདི་ལྟར་སྨོས་པ་སྟེ། དེ་དུས་བུམ་ནང་དུ་མེ་ཏོག་ལྷུང་བ་མྱུ་གུ་སྡོང་པོ་སྙེ་མའི་བར་དུ་སྨིན་པ་དང་མེ་ཏོག་གི་ཆར་འབེབས་ཤིང་སྙན་པའི་སྒྲ་ལྡིར་བ་སོགས་ངོ་མཚར་བའི་རྟགས་ཀྱང་མངོན་དུ་སྣང་བར་མཛད། དེ་ནུབ་རང་གི་རྨི་ལམ་དུའང་གོས་དཀར་གྱོན་ཏེ་བུ་མོ་རྒྱན་ཅན་མང་པོ་དང་འགྲོགས་ནས་རི་བོ་ཆེན་པོའི་ངོས་ལ་འཛེགས་ཤིང་ཉི་མའི་དཀྱིལ་འཁོར་ཤར་བ་རྨིས་སོ། །དེ་ལྟར་བསྟན་པའི་སྒོར་ཞུགས་ཏེ། སྡོམ་པ་གསུམ་གྱིས་རྒྱུད་ལེགས་པར་བསྡམས་ནས། དེ་རྣམས་ཀྱི་སྔ་ཕྱི་ཅི་རིགས་པར་ཐོས་བསམ་གྱིས་རྒྱུད་སྦྱངས་ཚུལ་ནི། ཡབ་རྗེ་སྐུ་གཤེགས་རྟིང་ལོ་གསུམ་ཙམ་གྱི་བར་གཅེན་བླ་མ་དམ་པ་སྐུ་མཆེད་དང་མ་རིན་པོ་ཆེ་རྣམས་ཕལ་ཆེར་ཕྱོགས་ཐེག་འབའ་ཞིག་གིས་གཞིས་སུ་བཞུགས་མ་ཁོམས་པས། དེ་བར་མ་ཡི་ཞལ་ཏ་མ་བསམ་འགྲུབ་ཆོས་འཛོམ་གྱིས་བསྐུལ་ཏེ། ངག་བསླབ་ཀྱིས་གསོལ་འདེབས་ལེའུ་བདུན་མ་སོགས་དགོན་བའི་འདོན་ཆོས་ཀྱི་སྐོར་དང་། གསོལ་དཔོན་མཆོག་གྱུར་ལས་ཡི་གེ་འབྲི་ཀློག །དབུ་མཛད་བསྟན་འཛིན་ཐོས་བསམ་གྱིས་ནམ་ཁོམས་དཔེ་རྒྱུགས་སྡེབ་ལེན་གྱིས་རང་ལུགས་ཀྱི་ཆོག་ཁྲིགས་རྣམས་བློ་ལ་ཆུབ་པར་བྱས། དགོན་པའི་དགུན་གྱི་མཚམ་སྒྲིགས་གཅིག་གི་ཐོག །རང་གི་བལྟ་དཔེར་པད་གླིང་བླ་མའི་ལས་བྱང་མ་བུ་དང་། མཁས་མཆོག་གི་དཔེར་མགོན་པོ་སྡེ་བརྒྱད་ཀྱི་བསྐང་གསོ་ཆེན་མོ་སོགས་དཔེ་ཆ་ཁ་ཤས་དང་། གསོལ་དཔོན་མཆོག་གྱུར་གྱི་དབང་ཕྱུག་ཉེར་བརྒྱད་ཀྱི་ཙཀླི་རྣམས་བྲིས། དེ་ཡང་ཆུང་དུས་ནས་ཤེས་རིག་མི་བཀྲ་ཞིང་ངག་མི་བདེ་བ་འདི་ཡོད་པས་ཡོན་ཏན་མཁན་ཡོང་བའི་རེ་ཆེན་པོ་ཞིག་མེད་ཀྱང་སྔོན་གྱི་ལས་འཕྲོས་མཚམས་སྦྱར་ནས་སྟེས་འགྲིགས་པ་ལྟ་བུས། རང་ལོ་བཅུ་གཉིས་པ་ལ་མེས་ནོར་བུ་དར་རྒྱས་ཀྱིས་མཚམས་སྦྱར་ཏེ། མངའ་རིས་གུང་ཐང་གི་མཁས་པ་ཆེན་པོ་བཤེས་གཉེན་རྣམ་རྒྱལ་དགོན་པར་ཕེབས་ནས། གཅེན་བླ་མ་དམ་པ་སྐུ་མཆེད་ཀྱིས་སྒྲ་རིག་སྙན་ངག་སོགས་གཞུང་ལུགས་མང་པོ་གསན་པར་མཛད་པའི་དུས་སུ་བདག་གིས་ཀྱང་ཀ་ལཱ་པའི་མཚམས་སྦྱོར་ལྔའི་རི་མོ་ཙམ་དང་། བོད་ཡིག་བསྐྱར་སློབ་བྱས་པ་གཅེན་རྒྱལ་སྲས་རིན་པོ་ཆེས་ཕྲལ་ཕྲལ་གྱི་ཞལ་ཏ་དང་ཕྱག་འབེབ་སོགས་བསྐུལ་ལྕག་གནང་བས་ཡི་གེ་ཚུག་མ་དང་གཤར་བྲིས་གཉིས་ཀ་བྱང་བར་ཤེས། དེའི་ཕྱི་ལོ་གུང་ཐང་པཎ་ཆེན་སླར་ཡང་ཕེབས་པ་ཀ་ལཱ་པའི་བཤད་པ་དང་ས་རིས་ཞུས་ནས། ཡོངས་རྫོགས་ཀྱི་རི་མོའི་རྒྱུག་བློ་ཐོག་ནས་གཙང་དག་སྡེབ་འབུལ་བྱས་པ་ཚར་བའི་ཉིན། དེ་རིང་ཉི་ཤུ་དྲུག་ཡིན་པས་ས་པཎ་བལྟམས་པའི་དུས་ཆེན་དང་མ་སྒྲིགས་འགྲིགས་པའི་རྟེན་འབྲེལ་ཀྱང་བཟང་། ད་དུས་ཀྱི་སྒྲ་པ་མིང་ཆེ་ཆེ་མོ་འདི་བ་ཚོའི་སྒྲ་ཡོངས་རྫོགས་ལས་འུ་ཅག་གི་མཚམས་སྦྱོར་ཀྱང་དགའ་བར་ཡོད་པས་ད་མཇུག་བསྐྱངས་ཏེ་མ་བརྗེད་པར་མཛོད་ཅིག་གསུངས་དགྱེས་དགྱེས་མཛད། དེ་རྗེས་སྡེབས་སྦྱོར་གྱི་བཤད་པ་དང་། ཞྭ་ལུ་ལོ་ཆེན་གྱི་ཀ་ལཱ་པའི་སྤྱི་ཊཱིཀ་གཉིས་ཀྱི་ལུང་། ལཉྩ་དང་ཝ་རྟུ་ལའི་ཡི་གེ་སོགས་ཡིག་སྣ་འགའ་རེའི་ཕྱག་ཁྲིད། རྟིང་སོར་བཟང་ཡུལ་གྲོང་གསར་དུ་སུམ་རྟགས་ཀྱི་བཤད་པའང་ཞུས་ཏེ་བརྡ་སྤྲོད་ཡན་ལག་དང་བཅས་པ་ལ་བྱང་བར་སྦྱངས། བཅུ་དགུ་པ་ལ་ཟླུམ་པོར་མེས་རྩིས་རིགས་པ་ཆེན་པོ་དོན་འགྲུབ་དབང་རྒྱལ་གྱི་དྲུང་དུ་ཟླ་བ་བཞི་བསྡད་དེ། དགུ་མཐའི་བསྒྱུར་འགོད་ནས་བརྩམས་ཞལ་ལུང་མ་བུ་ཚང་བའི་དཀར་རྩིས་རྣམས་ཉིན་དང་པོར་ས་རིས། མཚན་ལ་དྲི་བའི་ཕྲ་གཅོད་དང་། ཞུན་མར་ལ་བརྟེན་ནས་དཔེ་འབྲི་བ་སོགས་སྣང་མུན་འཁོར་ཡུག་ཏུ་འབད་པར་བྱས། སློབ་དཔོན་སྤྱན་འགྲིབ་པས་ཐོག་མར་ས་རིས་ཀྱི་བསྒྱུར་འགོད་རྣམས་དཀའ་ཚེགས་ཆེ་བར་བྱུང་ནའང་། སློབ་དཔོན་འཆད་མཁས་པ་དང་། རང་གི་འདུན་བརྩོན་དྲག་པོ་ལྟ་བུས་དཀར་རྩིས་ལ་བློ་ལེགས་པར་འབྱོངས། དེ་ཞོར་དབྱངས་འཆར་གྱི་བཤད་པ་རགས་ཙམ་དང་འཁོར་ལོའི་ངོ་སྤྲོད་འབྱུང་རྩིས་ཀྱི་རྡེའུ་དགྲམ་པ་རྣམས་བསླབས་ཤིང་། གཅེན་རྒྱལ་སྲས་རིན་པོ་ཆེ་ལས་ཀྱང་རྩིས་ཀྱི་གོ་བའི་ཕྲ་གཅོད་དག །རྒྱ་སྟོན་ཀརྨ་ཀུན་མཁྱེན་ལ་དུས་འཁོར་འཇིག་རྟེན་བསྟན་ལེ་ལས་རག་ཙམ་དང་རྩིས་ཀྱང་བསྡུས་པའི་བཤད་པ། སྡེབ་སྦྱོར་གྱི་ངོ་མཚར་བའི་སྦྱོར་བ་རྣམས་ཞུས། ཕྱིས་གྲྭ་ཕྱིར་སྟག་ལུང་པ་གྲུབ་ཆེན་ངག་དབང་གཟུངས་ཆོག་ལ་དབྱངས་ཅན་བྱཱ་ཀ་ར་ཎའི་ས་རིས། ཙནྡྲ་པའི་ཡི་གེའི་བསྡུ་བ་དང་། ཏིང་མཐའ་སོགས་ལ་ཞི བ་བཤད་དང་། གཞུང་སྤྱི་ལ་ཡང་བཤད་པ་ཡམ་ཙམ་ཞིག །སྡེ བ་སྦྱོར་གྱི་ཡང་བའི་བྱ་བ་རྣམས་ཉན། རྗེ་གཏེར་ཆེན་བླ་མའི་དྲུང་དུ་སྙན་ངག་མེ་ལོང་གི་བཤད་པ་ཞུས་ཤིང་། ལེའུ་གསུམ་ཀའི་རྩོམ་རྒྱུགས་ཀྱང་ཕུལ། ༈ །དེ་ལ་སྤྱིར་རང་ལོ་བཅུ་བཞི་ཡན་ནས་དར་གླིང་དུ་བན་གཙང་བ་བརྒྱད་གྲྭ་ཞིག་དང་། དེ་སྟེང་བཅུ་བདུན་པའི་ཐོག་འོག་མིན་ཨོ་རྒྱན་སྨིན་གྲོལ་གླིང་པའི་གྲྭ་གཙང་གསར་དུ་ཚུགས་སྐབས་གྲྭ་ཁྱུར་ཞུགས་ཏེ་གྲྭ་པའི་འདོན་ཆོས་སྐོར་གྱི་དཔེ་འཛིན་དང་། གར་ཐིག་དབྱངས་གསུམ་གྱི་ཕྱག་བཞེས་རྣམས་བྱང་བར་སྦྱངས་ཤིང་། དེ་དག་གི་དུས་སྐབས་ཅི་རིགས་པར་སྤོས་ཁང་པ་རིན་ཆེན་རྒྱལ་མཚན་གྱིས་མཛད་པའི་ཤེར་ཕྱིན་གྱི་འགྲེལ་རྐང་དང་དོན་བདུན་ཅུའི་བཤད་པ། ས་པཎ་གྱི་སྡོམ་གསུམ་རབ་དབྱེ། བླ་མ་རྒྱལ་བའི་དགེ་སློང་གི་བསླབ་བྱ་རྣམས་བློ་ལ་ཟིན་ཅིང་། གཅེན་རྒྱལ་བའི་སྲས་པོ་ལས་འདུལ་བའི་ལག་ལེན་དང་བརྡ་ཆད་རྣམས་བསྒྲིམ་པའི་བློས་མཉན་ནས་ཆུབ་པར་བྱས། རང་ལོ་ཉི་ཤུ་བ་ལ་གྲྭ་ཚང་གི་དགེ་བསྐོས་ལས་སྣེ་དང་། ཉེར་གཅིག་པ་ཤིང་སྟག་གི་ལོར་རྒྱལ་སྲས་རིན་པོ་ཆེ་སྐུ་གཤེགས་པས། དེ་ཕྱིན་ནས་གྲྭ་ཚང་གི་རྒྱུན་ཚོགས་དང་སྐུ་རིམ་སོགས་ཀྱི་སློབ་དཔོན་བྱེད་དགོས་བྱུང་བས། སྔ་དགོང་དང་ནུབ་མོའི་ཆོས་གྲྭ་འགྲིམ་པ་དང་། ཚོགས་འདུ་སོགས་དགེ་འདུན་རྣམས་དང་ལྷན་ཅིག་དབང་པོ་འདུལ་བའི་སྤྱོད་ལམ་བསྟུམ་པ་ཙམ་ལས་བསླབ་གཉེར་རུས་འཐོན་པ་མ་བྱུང་བར་ཡུན་རིང་འདས། རང་ལོ་ཉེར་བདུན་པའི་ཐོག་རྗེ་བླ་མ་ཤ་འུག་གི་གཏེར་སྒྲུབ་ལ་བཞུགས་པ་ལས། ནང་མཚམས་གྲོལ་བའི་བག་སེང་གི་ཁོག་ཏུ་གྲྭ་ཚང་གི་རྒན་འགོ་རྣམས་བོས་ནས་ཞལ་ཏ་ཕེབས་པར། འདོན་ཆོས་དང་སྔགས་ཀྱི་ལག་ལེན་བྱང་འགྲོངས་པ་ཙམ་གྱིས་ཆོག་ཤེས་པར་བྱས་ནས་གར་ཡང་མི་ཕྱིན་པས་མདོ་སྔགས་ཀྱི་གཞུང་ལུགས་རྣམས་རང་བློའི་ཐེག་ཚད་དང་སྦྱར་བའི་ཐོས་བསམ་རེ་དགོས་ཞེས་བཀའ་སྩལ་བ་ལ་བརྟེན་སེམས་ཉིད་ངལ་བསོའི་གཞུང་བློ་ལ་ཟིན་ཏེ་འགྲེལ་པ་ལ་བལྟ་རྟོག་ཞིབ་མོར་བཅུག་ཅིང་། འདུལ་བའི་སྤྱི་དོན་ལུང་རིགས་གཏེར་མཛོད་ལས། ཐོབ་བྱ་སོ་ཐར། མ་ཐོབ་བར་ཐོབ་པར་བྱེད་པའི་གཞི་དང་། སྡེ་ལྔའི་བསླབ་བྱ། གཞི་གསུམ་གྱི་བཤད་པ་རྣམས་ཧར་བཏོན་གྱི་བློ་ལ་ཟིན་ནས་བསམ་པས་བསྐྱངས་པས་གོ་བ་ཐལ་ཐོལ་སྐྱེས་ཤིང་དཔེར་བློ་སྤྲོ་བར་གྱུར་པས་ད་ནི་རང་གི་འདུན་བྱུང་ཐམས་ཅད་ཐོས་བསམ་སྒོམ་གསུམ་ལ་འདྲིལ་བ་མ་གཏོགས་གཞན་གནས་སྐབས་ཀྱི་འདུ་འཛིའི་བྱ་བ་གང་ལའང་སྙིང་པོ་མི་འདུག་སྙམ་པའི་དད་འདུན་ཅུང་ཟད་སྐྱེས་ཏེ། རྗེ་བླ་མ་དམ་པ་ཕོ་བྲང་ཆེན་པོར་བཞུགས་པ་ལ་སྙན་ངག་གི་ཞུ་ཡིག་ཚིགས་བཅད་དང་བཅད་པས་ཀློག་པའི་གྲྭ་སར་འགྲོ་བ་དང་། གཞིས་རང་དུ་ཐོས་བསམ་བྱེད་པ་གང་དུ་རུང་ངམ། ཡང་ན་སྒོམ་ཆིག་སྒྲིལ་བྱེད་པ་སྟེ། དོན་ཚན་གསུམ་པོ་གང་ལ་འབད་ན་ཕན་རླབས་ཆེ་ཞེས་ལུང་བསྟན་ཞུས་པའི་ལན་དུ་འདི་སྐད་ཅེས་སྩལ་ཏེ། ངག་ལ་དབང་བ་སྐད་གཉིས་སྨྲ་བའི་སྡེ། ཆོས་ཚུལ་རྒྱ་མཚོའི་དཔལ་ལ་ལོངས་སྤྱོད་པའི། །སྐལ་བཟང་དེ་ཡི་དྲི་ལན་གསང་པོའི་གཏམ། །བརྗོད་པ་གང་འདི་ཐུགས་ཀྱི་བུམ་པར་བསྟིམ། །དེང་དུས་སྐྱེ་བོ་ཕལ་ཆེར་འདོད་ཡོན་ལ། །སྲེད་པས་ཐོས་བསམ་སྒོམ་པ་རིང་དོར་ནས། །ལོག་འཚོའི་འདམ་བུར་དགའ་བས་རོལ་ན་ཡང་། །མཁས་ཁྱོད་འདམ་སྐྱེས་པདྨོ་ཇི་བཞིན་ངེས། །རྒྱལ་བས་གསུངས་པའི་ཆོས་ཚུལ་ཇི་སྙེད་དོན། །རང་བློོས་ཐེག་ན་སྟོབས་སུ་མ་གྱུར་པ། །མེད་མོད་འོན་ཀྱང་ཐེ་ཚོམ་དྲྭ་བའི་གཟེབ། །དམ་པོར་ཡིད་གཉིས་ནེ་ཚོ་ཆུད་པ་བཞིན། །དེང་དུས་སྔ་འགྱུར་བསྟན་པའི་བྱིན་རླབས་རྒྱུན། །ཉམས་པ་མེད་ཀྱང་བཤད་པའི་དགའ་སྟོན་ལ། །སྤྱོད་ནུས་ཐུན་མཚམས་ཉིད་བྱེད་ལྟར་གྱུར་པ། །སྙིང་སྟོབས་ཟླ་བའི་འོད་ཀྱི་གསལ་བྱའི་དུས། །དེ་ཕྱིར་བསླུ་མེད་དཀོན་མཆོག་རྣམ་གསུམ་ལ། །བརྟགས་པ་ཕུལ་བར་སྙིང་སྟོབས་བསྐྱེད་པའི་དོན། །གེགས་མེད་འགྲུབ་པའི་མཚན་མ་བཟང་མཐོང་བས། །སྨོན་པའི་གནས་རྣམས་སྒྲུབ་ལ་བརྩོན་པར་མཛོད། །སྔ་འགྱུར་ལམ་གྱི་བསྐྱེད་བཟླས་རིམ་པ་རྣམས། །ཆག་མེད་བར་ཆད་ཞི་ཕྱིར་འབད་པ་གང་། །ད་ལྟ་ཉིད་བཞིན་གཡེལ་བ་མེད་པ་ནས། །རིམ་གྲོའི་རྣམ་པ་ཕྱིས་གསལ་བཞིན་དུ་སྒྲུབས། །ཐོས་པའི་རྩ་བ་ཆོས་མངོན་མཛོད་ཉིད་དང་། །སྒྱུ་འཕྲུལ་རྩ་རྒྱུད་གསང་བ་སྙིང་པོ་ལ། །རྩ་པོད་བྱས་ནས་ཤེས་བྱ་གཞན་ལ་ཡང་། །འབད་པས་བསྒྲུབ་ན་མཁས་པའི་གནས་ཐོབ་འགྱུར། །དེ་མཐུས་སྔ་འགྱུར་བསྟན་པའི་བཤད་སྒྲུབ་ཉིད། །རབ་འབྱམས་ཕན་བདེའི་མཁའ་ལ་རྟག་འཆར་བའི། །རྣམ་དཔྱོད་ཤིང་རྟ་ཆེན་པོ་ཁྱོད་ལས་གཞན། །རེ་བ་མེད་པས་ཐེ་ཚོམ་མི་བྱའོ། །རིམ་གྲོར་དཀོན་མཆོག་མཆོད་ཅིང་སྐོངས་བཤགས་དང་། །ཆོས་སྲུང་རྣམས་ལ་གསོལ་མཆོད་གུ་རུ་ཡི། །གསོལ་འདེབས་བསམ་པ་ལྷུན་གྲུབ་སྟོང་ཚོ་བསགས། །དེ་ཡིས་བཀྲ་ཤིས་བསམ་དོན་ཐམས་ཅད་འགྲུབ། །ཅེས་གནང་བའི་རིམ་གྲོ་རྣམས་ཚེས་བཅོ་ལྔའི་དུས་ཚོད་ཐོག་གྲྭ་ཚང་ལ་མང་ཇ་སྤོང་དག་བཅས་བསྒྲུབས་ཤིང་རང་ཉིད་ཀྱིས་ཀྱང་བདུན་ཕྲག་གཉིས་ཀྱི་བར་དུ་མཚམས་དམ་པར་བཅད་ནས་བསགས་རྟིང་། རྗེ་གཏེར་ཆེན་ཆོས་ཀྱི་རྒྱལ་པོའི་དྲུང་དུ་སྙིང་པོའི་འགྲེལ་པ་པར་བཀབ་དང་། གཡུང་ཊཱིཀ་སྦྱར་བའི་སྟེང་ནས་གསུང་བཤད་ཞུས་ཏེ། གཡུང་ཊཱིཀ་བློ་འཛིན་དང་བསྟུན་བྱ་བ་གཞན་ཁྱད་དུ་བསད་དེ། གལ་ཆེ་ཤོས་བསམ་པའི་ཤེས་རབ་ལ་བྱས་ནས་ལེགས་པར་བརྟགས་པས་རང་ཤེས་རབ་ཀྱི་རྩལ་ཆུང་ཞིང་རིག་པ་རྟུལ་ཡང་། བླ་མ་དམ་པའི་བྱིན་རླབས་ཀྱི་འཕོ་བ་དང་ལེགས་བཤད་ཀྱི་གསུང་གིས་རང་རྒྱུད་མི་ཤེས་པའི་མདུད་པ་དཀྲོལ་ཏེ་རིང་པོར་མ་ཐོགས་པར་རྒྱུད་ཀྱི་དངོས་སྦས་ཀྱི་དོན་ཐམས་ཅད་ཨི་ཐི་བ་ལོངས་པའི་གོ་བ་རྙེད་ཅིང་། ཆོས་མངོན་པ་མཛོད་ཀྱི་བཤད་པ་ནི་གཞུང་ལུགས་རབ་འབྱམས་སྨྲ་བ་སངས་རྒྱས་ཆོས་དར་ལ་གཞུང་བརྒྱ་པའི་ཊཱི་ཀའི་ཐོག་ནས་ཚར་གཅིག་ཉན་ནའང་། བྱེ་མདོའི་ཆོས་སྐད་འདི་ཀློག་པའི་གྲྭ་ས་རྣམས་སུའང་ཧ་ཅང་དར་ཆུང་བས་འབེལ་གཏམ་སྨྲ་བ་ཉུང་བ་བཅས་རྩ་པོད་ཀྱི་བློ་ལ་སིམས་ཐིམ་པ་ཞིག་མ་བྱུང་ཡང་བག་ཆགས་འཇོག་བྱེད་ཙམ་དང་། དེ་བཞིན་དུ་སྔ་ཕྱི་ཅི་རིགས་པར་ལུང་རིག་གཏེར་མཛོད་དང་རྒྱ་མཚོའི་སྟེང་ནས་འདུལ་བ་དང་ཕར་ཕྱིན་གྱི་བཤད་པའང་ཡམ་ཙམ་ཞིག་ཉན་ཏེ་བསམ་པའི་རྟོག་དཔྱོད་ཀྱིས་ལེགས་པར་བསྐྱངས་པས་གོ་བའི་ཕྱོགས་འགོ་ཐིངས་པ་ཙམ་བྱས། དེའི་གོང་དུ་གོང་ཐང་པཎ་ཆེན་ལས་དབུ་མའི་སྟོང་ཐུན་དང་། འདུལ་བ་སུམ་བརྒྱ་པའི་བཤད་པ། མཁས་གྲུབ་ཆོས་སྐྱོང་རྒྱལ་མཚན་ལ་རང་འགྲེལ་གྱི་སྟེང་ནས་ཟབ་མོ་ནང་དོན་གྱི་བཤད་པ་རྣམས་ཐོས། ཁྱད་པར་རྗེ་བླ་མ་དམ་པའི་དྲུང་དུ་ཀུན་མཁྱེན་དྲི་མེད་འོད་ཟེར། ཟུར་པ་ཡབ་སྲས། རོང་ཟོམ་ཆེན་པོ་ལ་སོགས་པའི་གསུང་རབ་རྣམས་རེ་རེ་ནས་བཤད་པ་ཐུན་དུ་བཅུག་སྟེ་ཉན་པ་མ་བྱུང་ཡང་། དཀའ་གནས་རྣམས་ལ་དྲི་བའི་ཕྲ་གཅོད་དང་། རྒྱུན་དུ་རང་བཞིན་གྱི་གསུང་འཕྲོས་ཙམ་ཡང་གདམས་པར་འབེབས་པའི་གནད་ཀྱིས་འབེལ་གཏམ་མང་དུ་ཐོས་པས་རྒྱུད་གྲོལ་ཏེ། ཐོས་བསམ་གང་བྱས་ཁ་ཕྱིར་བལྟས་སུ་མ་སོང་བར་རྒྱུད་ཐོག་ཏུ་བསྒྲིལ་ཐུབ་པའི་བཀའ་དྲིན་ཐོབ་པ་ཡིན་ནོ། །ད་ནི་རྒྱལ་བའི་བཀའ་དང་དགོངས་འགྲེལ་གྱི་བསྟན་བཅོས་སྨིན་གྲོལ་གྱི་ལམ་སྟོན་པའི་མན་ངག་དུ་མའི་བཀའ་ལུང་ཇི་ལྟར་ཐོབ་པའི་ཚུལ་ནི། གཙོ་བོར་བཀའ་དྲིན་འགྲན་ཟླ་དང་བྲལ་བ་རྗེ་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་ཞབས་པད་རྟག་ཏུ་སྤྱི་བོར་བསྙེན་ཏེ་ལེགས་པར་ཐོབ་པ་ལ། སྔ་འགྱུར་བཀའ་མ་མདོ་སྒྱུ་སེམས་གསུམ། སེམས་ཕྱོགས་ལའང་སེམས་ཀློང་མན་ངག་གི་སྡེ་གསུམ། དེ་དག་དང་རྗེས་འབྲེལ་དོང་སྤྲུག་སོགས་རྒྱུད་སྡེའི་སྐོར་གྱི་དབང་བཀའ་བཤད་ལུང་མན་ངག་གི་བཀའ་བརྒྱུད་ལུགས་ཐ་དད་པ་དུ་མ་དང་བཅས་པ་རྒྱུན་བཞུགས་སོ་ཅོག་ལྟ་བུ་དང་། སྒྲུབ་སྡེ་ལ་སྤྱི་བཀའ་དང་། སྒོས་བཀའ་ཡང་ཕུར་གཤིན་རྗེ་གཤེད་ཀྱི་སྐོར་སོ་སོ་ལའང་ནང་གསེས་ཀྱི་ཁྱད་པར་དུ་མ་དང་བཅས་པ། གཏེར་མའི་སྐོར་ལ། རྗེ་ཉིད་ཀྱི་གཏེར་གསར་ཡོངས་རྫོགས། གཞན་མ་གྲུབ་ཐོབ་དངོས་གྲུབ། ལྡང་མ། ལྕེ་བཙུན། ཞང་ཁྲོམ། གནུབས་ཆུང་། ཉང་། ཆོས་དབང་། ལས་འབྲེལ་རྩལ། གླིང་པ་བཅུ་གཉིས། དྲི་མེད་གསུམ། བྱང་གཏེར་སྔ་ཕྱི་སོགས་གྲགས་ཆེ་བའི་གཏེར་སྟོན་མང་པོ་ཞིག་གི་གཏེར་ཆོས་བླ་རྫོགས་ཐུགས་གསུམ། བཀའ་བརྒྱད་སྤྱི་སྒོས་ཀྱི་སྐོར་མཐའ་ཡས་པ་དང་། ཀུན་མཁྱེན་ལྔ་པ་ཆེན་པོའི་རྒྱ་ཅན་གྱི་མཚོན་ཟབ་མོ་དག་སྣང་མའི་སྐོར་སོགས་སྔ་འགྱུར་གསང་སྔགས་རྙིང་མའི་ལུགས་ཀྱི་དབང་ལུང་མང་པོ་དང་། མན་ངག་གི་བཀའ་ཅི་རིགས་པ་བཅས་པ། དེ་ཐམས་ཅད་ཀྱི་རྩ་བར་གྱུར་པ་རྙིང་མ་རྒྱུད་འབུམ་གྱི་ལུང་ཡོངས་རྫོགས། གསར་མའི་སྐོར་དགྱེས་རྡོར། ཀུན་རིག །མི་འཁྲུགས་པ་སོགས་ཀྱི་དབང་རྗེས་གནང་མང་པོ་དང་། ནཱ་རོ་མཁའ་སྤྱོད་ཀྱི་མཚོན་པའི་དབང་ལུང་མན་ངག་ཚང་བ་མང་པོ་ཞིག་དང་། མདོའི་སྐོར་ལའང་སྲོལ་གཉིས་ཀྱི་སེམས་བསྐྱེད་གདམས་ངག་དང་བཅས་པ་དང་། བྱང་སའི་ལུང་ལ་སོགས་པ་དང་། མདོ་སྔགས་སྤྱི་ཡི་བཤད་ཆོས་ཀུན་མཁྱེན་ཀློང་ཆེན་པའི་བསྟན་བཅོས་སོགས་རྒྱ་བོད་ཀྱི་གཞུང་མན་ངག་མང་པོའི་བཀའ་ལུང་ཡང་བཀའ་དྲིན་དུ་ཐོབ་ཅིང་། གཞན་ཡང་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུར་དུས་འཁོར་ཡོངས་རྫོགས་ཀྱི་དབང་དང་། སྒྱུ་འཕྲུལ་ཞི་ཁྲོའི་དབང་། བླ་མ་གསང་འདུས་ཀྱི་རྩལ་དབང་དང་གཟའ་དབང་སོགས། དཔལ་ས་སྐྱ་བ་བདག་ཆེན་ཀུན་དགའ་བཀྲ་ཤིས་ལའང་ཡང་དག་འཁོན་ལུགས་ཀྱི་དབང་དང་། སྡོམ་རིག་གི་ལུང་། རྒྱལ་སྲས་པདྨ་འགྱུར་མེད་རྒྱ་མཚོར་མཉམ་སྦྱོར་རིགས་བསྡུས་ཀྱི་དབང་དང་། བྱང་ཆུབ་ལམ་རིམ་གྱི་ཁྲིད། དེང་རི་ཀུན་སྤངས་བློ་གྲོས་བརྟན་པ་ལ་ཞི་བྱེད་སྔ་ཕྱི་བར་གསུམ་ཁ་ཐོར་དང་བཅས་པའི་དབང་ལུང་ཁྲིད་གསུམ་ཡོངས་རྫོགས་དང་། བོ་དོང་བའི་སྦས་དོན། མཁས་གྲུབ་ཆོས་སྐྱོང་རྒྱལ་མཚན་ལ་ཤངས་ལུགས་ཀྱི་དབང་མན་ངག་ཚང་མ་དང་། གསར་མ་བླ་མེད་རྒྱུད་འབུམ། རཏྣ་བྷ་དྲ་ནས་བརྒྱུད་པའི་དུས་འཁོར་གྱི་དབང་གོང་མ་དང་སྦྱོར་དྲུག་གི་ཤར་ཁྲིད། ཤེས་རབ་ཀྱི་ལྷ་དྲུག་གི་རྗེས་གནང་། སྤྱན་རས་གཟིགས་དཔལ་མོ་ལུགས་དང་། ཡི་གེ་དྲུག་མ། གཅོད་ཡུལ། བཀའ་ཚོམ། ཡང་ཚོམ། ཉིང་ཚོམ། ལེ་ལག་ཟབ་དོན་སྐོར་སོགས། མུས་ཐང་གོང་མ་གྲུབ་པའི་དབང་ཕྱུག་བློ་གྲོས་རྒྱ་མཚོ་ལ་དུས་འཁོར་གྱི་དབང་ཡོངས་རྫོགས་དང་། སྦྱོར་དྲུག་སོར་བསམ། སྨིན་ཁྲིད་སྦྱོར་དྲུག་དང་། ཤངས་ལུགས་ཀྱི་ཁྲིད་ཡིག་གི་སྐོར། ཇོ་ལུགས་འཇིགས་བྱེད་ཀྱི་དབང་སོགས་དབང་རྗེས་གནང་ལུང་མང་པོ། མཁས་བཙུན་ངག་དབང་བསྟན་འཛིན་ལ་རྡོ་རྗེ་ཕྲེང་བའི་དབང་སོགས། རྡོ་རྗེ་འཛིན་པ་ཀུན་དགའ་བསྟན་པ་དར་རྒྱས་ལ་གསང་བདེ་འཇིགས་གསུམ། རྔོགས་ལུགས་ཀྱི་གུར་རིགས་བསྡུས་གདན་བཞི་མ་ཧཱ་མ་ཡ་རྣམས་དང་། གཟུངས་གྲྭ་ལྔ། གཟའ་ཡུམ་རྣམས་ཀྱི་དབང་། དམར་པོ་སྐོར་གསུམ་དང་། གུར་ཞལ་གྱི་རྗེས་གནང་། བཤེས་གཉེན་བྱམས་པ་ཕུན་ཚོགས་རྣམས་རྒྱལ་ལ་སྤྱན་རས་གཟིགས་སེདྒེའི་སྒྲ། ཕྱག་རྡོར་ཨུ་ཙརྱ་དང་། བསྲུང་བའི་མཁར་གཏུམ་ཆུང་ཁྲ་ཐོགས། གྲྭ་པའི་གཏུམ་ཆུང་དམར་པོ། འགྲོ་བཟང་ལུགས་རྣམ་སྲས་དཀར་པོ་ཚེ་འཛིན། སྤྱན་རས་གཟིགས་དཔལ་མོ་ལུགས། གུར་ཞལ་རྣམས་ཀྱི་རྗེས་གནང་། སྡོམ་བརྩོན་ཀུན་དགའ་དར་རྒྱས་ལ་འདུལ་བ་མེ་ཏོག་ཕྲེང་རྒྱུད། སུམ་བརྒྱ་པ་རྩ་འགྲེལ། དབུ་མའི་རིག་ཚོགས་སྐོར། སྡོམ་པ་ཉི་ཤུ་པ། བླ་མ་ལྔ་བཅུ་པ། ཇོ་བོའི་ཆོས་ཆུང་བརྒྱ་རྩ་རྣམས་ཀྱི་ལུང་། ལུང་དང་རིག་པའི་དབང་ཕྱུག་སངས་རྒྱས་ཆོས་དར་ལ་དབུ་མ་རྩ་འཇུག །གཞི་གསུམ་རྣམ་འགྲེལ། འདུལ་བ་མདོ་རྩ། མངོན་པ་མཛོད། འགྲེལ་ཆུང་དོན་གསལ། ས་པཎ་གྱི་ཐུབ་པ་དགོངས་གསལ། ལུང་རིགས་གཏེར་མཛོད་རྣམས་ཀྱི་ལུང་། སྐྱི་ཀུན་དགའ་བསྟན་གསལ་ལ་སྒྱུ་འཕྲུལ་ཕྲ་མོའི་སྐོར་མང་པོ་དང་ཟུར་ཚོ་སྟོད་ལུགས་པའི་སྒྱུ་འཕྲུལ་གྱི་ཡིག་ཆ་འགའ་ཡི་ལུང་། གྲུབ་ཆེན་ཀུན་བཟང་ཆོས་རྒྱལ་ལ་རོག་པའི་མཚན་དཔེ། གྲུབ་པའི་དབང་ཕྱུག་དམ་པ་ཀློང་ཡངས་འོད་གསལ་ལ་རོག་ཕུར་སོགས། འབྲས་བུ་གླིང་པ་ངག་དབང་ཨོ་རྒྱན་ལ་མཉམ་སྦྱོར་རིགས་བསྡུས་ཀྱི་དབང་། ཞྭ་ལུ་བྱང་མ་པ་རིན་པོ་ཆེ་བཟང་པོར་དྲི་མེད་རྣམ་གཉིས་ཀྱི་དབང་ལུང་། ཐུགས་སྲས་སྤྲུལ་པའི་སྐུར་ཚེ་ཁྲིད་རྡོར་ཕྲེང་གི་དབང་རྒྱས་དང་། གུར་དྲག །རྟ་མགྲིན་ཡང་གསང་བླ་མེད་ཀྱི་དབང་། བཀའ་འགྱུར་བ་གྲུབ་པ་རྡོ་རྗེ་ལ་འདུལ་བ་ལུང་། བསྐལ་བཟང་། བརྒྱད་སྟོང་པ། ངེས་དོན་གྱི་མཛོད་ཕྲན་སོགས་དང་། བྱམས་ཆོས་སྡེ་ལྔ། སྤྱོད་འཇུག་ལ་སོགས་པ་ཉེར་མཁོ་མང་པོའི་ལུང་། འབྲི་གུང་སྤྲུལ་པའི་སྐུར་སྒྲ་མི་སྙན་པའི་ཚེ་དབང་། ཀྲེ་བོ་སྤྲུལ་པའི་སྐུ་ཆོས་ཀྱི་དབང་པོར་ཀར་ལུགས་ཀྱི་ཕྱག་ཆེན་ལྷན་ཅིག་སྐྱེས་སྦྱོར་གྱི་ཁྲིད་དང་། དབང་ཕྱུག་རྡོ་རྗེས་མཛད་པའི་ཁྲིད་ཡིག་རྒྱས་པ་དང་། པེ་ཧར་གྱི་སྒྲུབ་ཐབས་སྤྲིན་ནག་འཁྲིགས་པའི་ལུང་། དཔའ་བོ་སྤྲུལ་པའི་སྐུར་ཕྱག་ཆེན་ཡི་གེ་བཞི་པའི་དོན་ཚིགས་བཅད་མའི་ལུང་རྣམས་ཞུས་ཤིང་། དེ་དག་ཀྱང་དུས་གང་གི་ཚེ་བཤེས་གཉེན་གང་ལས་ཆོས་བཀའ་གང་དང་གང་ཐོབ་པའི་ཐོ་བྱང་གི་ཡི་གེ་ལོགས་སུ་ཡོད་པས་འདིར་རྒྱས་པ་མ་སྤྲོས་སོ། །བཞི་པ་ཇི་ལྟར་ཐོབ་པའི་དོན་ཉམས་སུ་ཅུང་ཟད་བླང་ཚུལ་ནི། སྤྱིར་ཐོས་བསམ་གྱི་སྒྲོ་འདོགས་བཅད་པའི་དོན་རྣམས་བླང་དོར་གྱི་སྒོ་ནས་སྒྲུབ་ཅིང་ཉམས་སུ་ལེན་པ་ཡིན་པ་ལྟར། འཁོར་བའི་ཉེས་དམིགས་བསམ་ཞིང་མི་རྟག་འཆི་བ་དྲན་པའི་སྐྱོ་ཤས་ཀྱིས་བསྐུལ་ཏེ་དཀོན་མཆོག་ཀུན་འདུས་བླ་མ་དམ་པ་ལ་སེམས་རྙོག་པ་མེད་པར་དང་བའི་དད་པ་དང་། ལས་འབྲས་མི་བསླུ་བར་ཡིད་ཆེས་ཀྱི་དད་པ་དང་། གཞན་དོན་བླ་མེད་བྱང་ཆུབ་ཐོབ་འདོད་སྐོམ་པ་ཆུ་ལ་གདུང་བ་ལྟ་བུ་འདོད་པའི་དད་པ་སྟེ། དེ་ལྟར་དད་པ་གསུམ་གྱིས་ཡིད་དམ་པའི་ཆོས་ལ་འདུན་པའི་སྒོ་ནས། བསམ་པའི་གོ་གྱོན་ཞིང་སྦྱོར་བས་དགེ་བ་སྒྲུབ་པར་འཇུག་པའི་བརྩོན་འགྲུས་དང་། དགེ་བའི་སེམས་ཀྱི་དམིགས་ཡུལ་དང་བླང་དོར་མི་བརྗེད་པའི་དྲན་པ་དང་། དམིགས་ཡུལ་ལས་གཞན་དུ་མི་གཡེངས་པའི་ཏིང་འཛིན་དང་། ཆོས་ཐམས་ཅད་སྒྱུ་མ་ལྟ་བུར་ཤེས་པའི་ཤེས་རབ་རྣམས་ཅི་ཚང་གིས་ཉམས་སུ་ལེན་པ་ལ་སྤྲོ་བ་བརྟས་པར་བགྱིས་ཤིང་། ཁྱད་པར་རང་ལོ་ཉེར་བདུན་པ་ལྕགས་སྤྲེའི་ལོ་ལ་ཀྲེ་བོ་སྤྲུལ་པའི་སྐུ་དང་མཉམ་དུ་རྗེ་བླ་མ་དམ་པ་ལ་རིག་འཛིན་ཐུགས་ཏིག་གི་བཀའ་ཁྲིད་ཞུས་ཏེ་ལེགས་པར་བསྒོམས་པས། རྣམ་རྟོག་རི་གཟར་གྱི་འབའ་ཆུ་ལྟ་བུས་སྒོམ་རང་མི་སྐྱེ་བ་འདྲ་སྙམ་མའི་གུ་དོག་གི་བློ་ཙ བ་ཙུབ་ཅི་དྲག་ལངས་པར་གྱུར་པ་ཕྱིས་བལྟས་ན་རྣམ་རྟོག་ངོ་ཤེས་ཀྱི་ཉམས་ཀྱི་སྣེ་ཟིན་པ་འདྲའང་། ངོ་སྤྲད་ཀྱི་ཞལ་ཏ་ཞུ་ནུས་པ་མ་བྱུང་། དེ་སྟེང་ཤིང་ཕོ་བྱི་བའི་ལོ་བྱ་རྒོད་པ་ཆོས་སྐྱོང་རྒྱལ་མཚན་ལ་ནི་གུ་ཆོས་དྲུག་གི་ཁྲིད་དང་། དིང་རི་བ་བློ་གྲོས་བརྟན་པར་ཞི་བྱེད་བཀའ་བབས་གསུམ་གྱི་ཁྲིད་ཚང་མ་དང་། ཁྱད་པར་སོ་ཁྲིད་དང་ལམ་ལྔའི་ནང་ནས་ཚོགས་ལམ་གྱི་ཁྲིད་ཉམས་སུ་བསྐྱངས་ལོ་བྱས། མེ་སྟག་ལོར་ཆོས་སྐྱོང་རྒྱལ་མཚན་སླར་ཡང་དགོན་པར་ཕེབས་པར་ཕྱག་རྒྱ་ཆེན་པོ་གའུ་མའི་ཁྲིད་ཞུས་ནས་འབད་པ་ཆེན་པོས་མཚམས་བཅད་དེ་བསྒོམས་པས་ཞི་གནས་ཀྱི་ཉམས་ཅུང་ཟད་སྐྱེས། ལོ་དེ་ཁའི་མཇུག་ཏུ་ཆོས་སྐྱོང་རྒྱལ་མཚན་དང་མཉམ་དུ་རྗེ་བླ་མ་དམ་པའི་དྲུང་དུ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཁྲིད་མ་བུ་ཚང་མ་ཞུས་ཤིང་། ཁྱད་པར་རྩ་ཁྲིད་ལ་སྙིང་རུས་བསྐྱེད་ནས་བསྒོམས་པས་རྫོགས་རིམ་རྡོ་རྗེའི་ལུས་ལ་གནད་དུ་བསྣུན་པའི་བྱེད་བཅིངས་ཀྱིས་རྩ་རླུང་ཐིག་ལེ་དབུ་མར་དྭངས་པའི་ལག་རྗེས་སྟོང་གཟུགས་ཀྱི་རྣམ་པ་བདེ་སྟོང་གི་རོལ་མོར་འཆར་བར་བཤད་པ་ལྟར་མི་གཡོ་གསུམ་ལྡན་གྱིས་བཙན་ཐབས་ཀྱི་གནད་ལ་བརྟེན་ནས་ཅི་རིགས་ཤར་ཅིང་། རྣམ་ཀུན་མཆོག་ལྡན་གྱི་སྟོང་གཟུགས་རང་རིག་དང་དབྱེར་མེད་དུ་རྟོགས་པའི་ཉམས་མྱོང་ལ་སིམ་པ་ཐོབ་པ་ཞིག་མ་མཆིས་རུང་། རྫོགས་རིམ་གྱི་གནད་རང་རིག་ཀ་དག་གི་གཤིས་ལུགས་འགྱུར་མེད་སྤྲོས་བྲལ་དང་། དེའི་རྩལ་སྣང་ཆོས་ཀུན་རིས་མེད་སྒྱུ་མ་ལྟ་བུའི་རོལ་པ་མ་འགག་པས་དོན་ལ་སྣང་རིག་ངོས་བཟུང་དང་བྲལ་བ་ལ་གོ་བའི་ངེས་ཤེས་བརྟན་པོ་རྙེད་དེ་སྣང་བ་རང་ག་མའི་བདེན་ཞེན་གྱི་འཁྲི་བ་དམ་སྒྲིམ་མེ་བ་ལ་ནན་བཙིར་བྱེད་དགོས་པ་རང་མ་མཆིས་ཙམ་དང་། སྒྱུ་འདྲའི་འཁོར་བ་སྒྱུ་མ་ལྟ་བུའི་སྡུག་བསྔལ་ལ་སྤྱོད་པའི་སེམས་ཅན་རྣམས་ལ་དེས་དྲངས་པའི་དམིགས་མེད་ཀྱི་སྙིང་རྗེའི་འཆར་སྒོ་ཡང་རྐྱེན་ལ་བརྟེན་ནས་སད་སུད་འཆར་འཆར་འདྲ་བ་སོགས་སྣང་ཡང་གོ་བ་ཙམ་ལས་ཉམས་མྱོང་དང་རྟོགས་པས་ཕུ་ཐག་ཆོད་པ་ཞིག་དཀའ་བར་མཆིས་ཀྱང་ལྟ་སྒོམ་སྤྱོད་གསུམ་འབྲས་བུ་བླ་ན་མེད་པའི་བྱང་ཆུབ་ཀྱི་རྒྱུར་འགོར་མི་འགྲོའི་གནད་ཀྱིས་བླང་དོར་གྱི་ཚུལ་ཅུང་ཟད་ངེས་སོ། །ཕྱིས་སུའང་རྗེ་བླ་མ་དམ་པ་ལས་སྙིང་ཐིག་རྣམ་གཉིས་དང་། ཀུན་བཟང་དགོངས་འདུས། ཨ་ཏི་ཟབ་དོན་སྙིང་པོ། རྡོར་སེམས་ཀྱི་ཁྲིད་མ་བུ། ཀློང་སྡེ་རྡོ་རྗེ་ཟམ་པ། མདོ་སྒྱུ་དོང་སྤྲུགས། ཁྲོས་ནག་གཅོད་ཁྲིད་སོགས་བཀའ་གཏེར་གྱི་ཟབ་ཁྲིད་མང་དུ་ནོད་ཅིང་། རེ་རེ་ནས་ཉམས་ལེན་ལ་བརྩོན་པ་བྱེད་བློ་བྱས་བས་རང་བློ་དང་འཚམས་པར་བོགས་ཅུང་ཟད་ན་འཕར་ཞིག་སྐྱེས་ལ། དེ་ལས་གཞན་དུ་གྲུབ་པའི་དབང་ཕྱུག་བློ་གྲོས་རྒྱལ་མཚན་ལ་སྦྱོར་དྲུག་གི་སོར་སྡུད་ཉིན་མཚན་གྱི་རྣལ་འབྱོར་ཙམ་ཞིག་ཉམས་ཁྲིད་དུ་ཐོབ་ཅིང་། དམ་པོ་འདེབས་པའང་ལག་ལེན་དུ་བཏབ་མོད། འཆར་སྒོ་རང་གི་རྩལ་ཧ་ཅང་ཆེ་བ་བྱུང་། གང་ལྟ་ཡང་རང་སྙིང་རུས་ཆུང་བས། སྒོམ་དང་གང་ཟག་ཡ་བྲལ་དུ་སོང་བ་མ་གཏོགས་བླ་མ་དམ་པ་རྣམས་ཀྱི་བཀའ་དྲིན་གྱིས་ཟབ་ལམ་གྱི་གནད་རྣམས་ཉམས་འོག་ཏུ་ཆུབ་པའི་ངེས་ཤེས་ཅུང་ཟད་ཐོབ་པ་ཡིན་ནོ། །དེ་བཞིན་དུ་རྒྱལ་བས་གསུངས་པའི་ཆོ་ག་བཞིན་དུ་རང་འབྲས་ཀྱི་ཁྱད་པར་སྔགས་མཐུའི་ནུས་པ་དང་། ངོ་བོ་ཞུ་བདེའི་བདེ་སྟོང་གི་རང་བཞིན། བྱེད་ལས་དག་རྫོགས་སྨིན་གསུམ་ཚང་བ་སྟེ། ཁྱད་པར་བཞི་ལྡན་གྱི་བསྐྱེད་རིམ་གྱི་གནད་ལའང་། གོ་བ་ཙམ་སྐྱེས་པ་ལྟར་མོས་སྒོམ་གྱིས་སློབ་ལམ་བགྱིས་ཤིང་། དེའི་ཐུན་མཚམས་ཀྱི་རྣལ་འབྱོར་དང་འབྲེལ་བའི་བཟླས་བརྗོད་ཀྱང་། ཤིང་ཕོ་ཁྱིའི་ལོར་མཁའ་སྤྱོད་བདེ་ཆེན་གླིང་དུ་མཚམས་ཟླ་བ་ལྔ་ལྷག་ཙམ་ཞིག་བཅད་བདེ་གཤེགས་ཀུན་འདུས་ཀྱི་ཕྱི་ནང་གསང་གསུམ་གྱི་བསྙེན་སྒྲུབ་སྨིན་པར་བྱས་ཤིང་དེ་ནས་བཟུང་སྟེ་ཕྱི་སྒྲུབ་ཀྱི་རྒྱུན་བཟླས་ཀྱང་སྟོང་ཕྲག་རེ་མ་ཆག་པར་བགྱིས་པས་ཁྱོན་བསྡོམས་ཀྱི་གྲངས་སྔོན་འགྲོའི་སྐྱབས་འགྲོ་བདུན་ཁྲི། སེམས་བསྐྱེད་དྲུག་ཁྲི་དགུ་སྟོང་། ཡིག་བརྒྱ་འབུམ་དྲུག་སྟོང་ལྔ་བརྒྱ། མཎྜལ་བདུན་ཁྲི་དགུ་བརྒྱ། ཡན་ལག་བདུན་པ་དང་གསོལ་འདེབས་དྲུག་ཁྲི་བཞི་སྟོང་དགུ་བརྒྱ་རྣམས་དང་། ཡིག་བཅུའི་ངག་བཟླས་བྱེ་བ་བརྒྱད་ས་ཡ་དྲུག་འབུ མ་ཚོ་བརྒྱད་ཁ་ལོངས་བ་དང་བཅས་པ། ཡིད་བཟླས་ལྔ་ཁྲི་སུམ་སྟོང་བརྒལ་ཙམ། རྟ་ཡུམ་གཉིས་རེ་རེར་བརྒྱད་འབུམ་ཆིག་ཁྲི། འཁོར་སྔགས་ཉིས་འབུམ་ཉིས་ཁྲི། བྱིན་བསྡུ་དྲུག་ཁྲི་དགུ་སྟོང་། ཕྱི་སྒྲུབ་དང་སྦྱར་བའི་རྡོར་བཟླས་ཉིས་འབུམ་བརྒྱད་ཁྲི་བདུན་སྟོང་རྣམས་བཟླས། དེ་བཞིན་དུ་ཐུགས་ཐིག་གི་སྔོན་འགྲོའི་ཡིག་བརྒྱ་དྲུག་ཁྲི་ལྔ་བརྒྱ་ལྷག་ཙམ་དང་། ཕྱི་སྒྲུབ་ཀྱི་བཟླས་པ་ས་ཡ་གཅིག་བཞི་འབུམ་དྲུག་ཁྲི་དགུ་སྟོང་། སྒྱུ་འཕྲུལ་ཞི་བ་ཕྱག་རྒྱ་གཅིག་པའི་ཡབ་ཡུམ་གྱི་སྔགས་སོ་སོར་དྲུག་ཁྲི་ཉིས་སྟོང་དང་། སྤྱི་སྔགས་དྲུག་ཁྲི་ལྔ་སྟོང་། འདུས་པ་མདོའི་སྤྱི་སྔགས་ཆིག་འབུམ་དྲུག་ཁྲི། མ་ཏི་ལུགས་ཀྱི་འཇམ་དཀར་ལ་ལྔ་འབུམ་བཞི་ཁྲི། རྟ་ནག་ལྕགས་རལ་ཅན་ལ་འབུམ་ཕྲག་བཅུ་གསུམ་ལྷག་བཅས། ཉང་གི་ཁྲོས་ནག་ལ་འབུམ་ཕྲག་གསུམ། ཕག་དཀར་ཤེས་རབ་གསལ་བྱེད་ལ་འབུམ་ཚོ་ལྔ། དབྱངས་ཅན་མ་དཀར་མོ་སུམ་འབུམ། ན་རག་དོང་སྤྲུགས་ཀྱི་ཡིག་བརྒྱ་ཆིག་ཁྲི། བཀའ་བརྒྱད་གཙོ་དགུ་དང་ཤངས་ལུགས་རྒྱུད་སྡེ་ལྔ་ལ་འང་འབྲེལ་པ་ཙམ་རེ་བཟླས་ཏེ། དེ་རྣམས་ཤིང་བྱ་ཡན་ཆད་ལས་ཀྱི་རྣམ་གཡེང་གིས་ཆག་ཅིང་། ད་ལྟའི་ཆུ་སྤྲུལ་ཟླ་བ་དྲུག་པའི་ཚེས་བཅུ་ཡན་ཆད་ལ་ཆག་མེད་བཟླས་པའི་གྲངས་ཐུགས་རྗེ་ཆེན་པོ་སྔར་སོང་བ་ལྟར་དང་། གཞན་ཡང་གར་དབང་ཚེ་དཔག་མེད་ཀྱི་ཕྱི་སྒྱུབ་ཀྱི་བཟླས་པ་སུམ་འབུམ་སུམ་ཁྲི། ཚེ་དཔག་མེད་ཡང་སྙིང་ཀུན་འདུས་ཀྱི་བཟླས་པ་ས་ཡ་གཅིག་དང་བཞི་ཁྲི། བླ་མ་དྲག་པོར་སུམ་འབུམ་ཁ་ལོངས་བཅས། རྡོར་སེམས་ཀྱི་ཡིག་དྲུག་སུམ་འབུམ་དང་། ཡིག་བརྒྱ་དྲུག་ཁྲི། ཞི་བྱེད་ཚོགས་ལམ་བཟླས་པ་ས་ཡ་གཅིག་ཆིག་འབུམ། དཀའ་ཐུབ་ཉིས་འབུམ། རྗེས་དང་རོ་སྙོམས་གཉིས་ལ་ཆིག་འབུམ་རེ། བྱད་གྲོལ་ལ་བརྒྱད་ཁྲི་ཙམ་ཞིག་དང་། གཤིན་རྗེ་འཇོམས་བྱེད་ཀྱི་སྔགས་ཚན་བཞི་ཡང་འབྲེལ་བ་ཙམ་ཞིག་བཟླས་པ་སོགས་ཉུང་སྦྲེལ་གྱི་མཚམས་དང་རྒྱུན་བཟླས་ཆག་མེད་སྲོལ་དུ་བཅུག་སྟེ་དཀར་པོའི་ལས་ཀྱི་བག་ཆགས་ཀུན་གཞི་ལ་ཅུང་ཟད་བཞག །གཞན་ཡང་ཡོས་ལོའི་ནང་དུ་རླུང་འཐེམས་པའི་འཆི་ལྟས་གསལ་བར་རྡོར་བཟླས་འབུམ་ཁྲི་གསུམ་བཟླས་པས་སོར་ཆུད་བར་གྱུར་ཅིང་། ཤིང་བྱ་ལོར་བདེ་གཤེགས་ཀུན་འདུས་ཀྱི་ཁྲིད་མཚམས་དང་སྦྱར་བས་རྡོར་བཟླས་ཆིག་འབུམ་བདུན་ཁྲི་དགུ་སྟོང་བཟླས་པ་ལའང་རྟགས་མཚན་ལེགས་པར་གཏོགས་པ་ཙམ་བྱུང་སོང་བས། ཉིན་ཞག་ཕྲུགས་རེར་ཐུན་དྲུག་གསོལ་འདེབས། ཞོག་པ་ཆུ་སྦྱིན་ཛམ་ལྷ་དཀར་ཆ་བཞི། བརྒྱ་རྩ། འབྱུང་བཞི། ཆ་གསུམ། གཞི་བདག་དང་བརྟན་གཏོར་ཁ་འབར་མ་དཀར་མོའི་གཏོར་མ་རྣམས་དང་། དེ་རྗེས་དབུ་མ་ལུགས་ཀྱི་སེམས་བསྐྱེད་དང་སྔགས་སྡོམ་བཟུང་ཞིང་། རྣམ་འཇོམས་ལྟུང་བཤགས་སོགས་ཁ་ཏོན་ཅི་རིགས་དང་། རེས་ཚེ་མདོ་སྒྲོག །གསུར་བསྔོ་བྱས་རྗེས། ཉིན་པར་བལྟ་རྟོག་རྩོམ་པ། འཆད་ཉན་སོགས་ཆོས་སྤྱོད་ཅི་འགྲུབ། སྔ་གུང་ཆག་མེད་ཀྱི་རྒྱུན་བཟླས་རྣམ་དང་། རླུང་སྦྱོར་སོགས་དུས་གནད་དམིགས་སུ་གང་འགྲོའི་དགེ་སྦྱོར། མཚན་མོ་དམ་ཅན་སྤྱི་གཏོར་རྗེས་འབྲང་དང་བཅས་པའི་སྟེང་སྒོས་སུ་དྲག་པོ་སྡེ་ལྔ། སྔགས་སྲུང་མ། ལྷ་ཆེན། དུར་ཁྲོད་མ་མོ་རྣམས་ཀྱི་གཏོར་ཆོག །གཞན་ཡང་ཕྱག་དྲུག་པ། ཨ་གྷོ་ར། ཤ་ཟ་ཁ་མོ་ཆེ། བརྟན་མ། མཁའ་འགྲོ་སྤྱི་གཏོར་བཅས་གཏོར་བསྔོས་རིམ་པ་དང་། དཀར་འགྱེད་དང་འཆི་བསླུའི་དམིགས་པ་སྟེ། ནང་ནུབ་ཉལ་ལྡང་གི་རྣལ་འབྱོར་མཚན་བཅས་མཚན་མེད་གང་བདེ་རེ་ལ་སྒྲིགས་སུ་ཆུབ་པར་བགྱིས་སོ། །མདོར་ན་མཉམ་བཞག་རྣམ་པར་མི་རྟོག་པའི་ཡེ་ཤེས་རང་བཞིན་བབས་ཀྱི་བསམ་གཏན་གྱི་ངང་ལ་འཇོག་ལོ་ཙམ་དང་། དེ་ལྟར་མ་རྟོགས་པ་ལ་དམིགས་མེད་ཀྱི་སྙིང་རྗེ་ཆེན་པོའི་རྩལ་སྣང་ལྷར་སྐུར་ལངས་ཏེ་རེས་འགའ་དེའི་ངང་ལ་འཇོག་པ་རྣམས་ཅི་རིགས་སུ་སྒོམ་ཞིང་། རྗེས་ཤེས་ཀྱི་གནས་སྐབས་ཀུན་ཏུ་ཤེས་བཞིན་གྱི་དྲན་པས་ཅི་སླེབ་ཀྱི་གཙོ་བོར་སྐྱབས་ཀུན་འདུས་ཀྱི་ངོ་བོ་བླ་མ་དམ་པར་རེ་ལྟོས་བཅས་ནས་ཐུགས་ཅི་ཟིན་དང་ཅི་མཉེས་ལྷུར་ལེན་པས་བཀའ་ལུང་ལས་ནམ་དུའང་མི་འགོང་བའི་ཞེ་དམ་དང་། བསམ་བྱུང་གི་ཡོན་ཏན་སྔར་ཤེས་རྣམས་གོང་དུ་འགྱུར་ཅི་ཐོན་གྱི་འབད་རྩོལ་ནན་ཆག་པ་དང་། སྔར་འདྲིས་ཀྱི་མི་ལ་གཞུང་བཟང་གིས་མི་བྱོལ་ཞིང་ཕྱིས་ནས་གསར་འགྲོགས་ཀྱི་ངོ་ཤེས་མང་པོ་མི་འཚོལ་བ་དང་། རང་གཞན་གྲུབ་མཐའ་དང་བཤེས་གཉེན་ཀུན་ལ་དག་སྣང་སྦྱོང་ཅི་ཐུབ་ལས་ཕྱོགས་རིས་ཀྱི་ཆགས་སྡང་མི་བྱ་བ་དང་། ཚེ་འདིར་ལྟོས་ཀྱི་སྣང་བ་ལ་ཧ་ཅང་དངོས་ཞེན་ཆེ་བ་མི་བྱེད་པའི་ཞེ་དམ་གྱིས་དུས་རྟག་པར་བཟོ་གྲྭ་མི་ཆག་པ་སོགས་མཐུན་རྐྱེན་འཇོམ་ཡང་། རི་མོ་ཙཀླི་རེ་ཙམ་ཡང་འབྲིར་བསྐུལ་བ་སོགས་ཉེར་མཁོའི་བཟོ་ཕྲན་མི་འཆོར་བར་གང་བྱུང་ཙམ་གྱི་ཆོག་ཚོ་ཟིན་པ་བྱ་བ་དང་། གྲྭ་རིགས་ཡོན་བདག་ཀུན་ལ་ཉེ་འགྱང་གི་ཕྱོགས་རིས་སྤང་སྟེ་དབུ་མའི་ལམ་ལ་གནས་པ་དང་། སྒེར་ལྟོས་ཀྱི་གང་ཟག་ཉི་ཚེའི་དོན་ལ་རུ་གལ་གྱི་བཤགས་དང་བསྙེན་རྫོགས་བཤད་པ་བྱེད་པའི་ཞུ་སྣེ་སྦྱོར་བ་སོགས་བྱ་བྱེད་མང་པོ་ལ་མི་འཇུག་པ་དང་། དགེ་འདུན་སྤྱི་དང་འབྲེལ་བའི་སློབ་གྲྭ་སྒྲིགས་གནོན་སོགས་ལ་རང་ནུས་པ་ཞན་པས་ཤོགས་ཐོན་པ་དཀའ་ཡང་ལྷག་བསམ་བཟང་པོས་ཁ་བཅོས་འགྲོ་བ་ཐམས་ཅད་ལ་བསྐུལ་ནས་རང་ནུས་གང་ཐོན་བྱེད་པ་དང་། གཞིས་བྱེད་ཀྱི་བསྔོ་རྟེན་དང་འབུལ་བ་སོགས་གཉེན་ཕྱག་གང་དུ་འགྲོ་བའི་དམིགས་གང་ཡིན་དེར་བློས་གཙང་གིས་སྟོབས་སྟེ། རང་ལེ་ལོ་ཅན་ལ་བུ་ལོན་དུ་འགྱུར་བའི་ཉེར་ལེན་ལས་བསྲུང་བར་བྱས་ཤིང་། དེ་ལྟར་བྱས་པས་ཤིང་ཁྱིའི་ལོ་ཙམ་ནས་བཟུང་ཞོར་བྱུང་གི་ཡོ་བྱད་ཀྱང་འབད་མེད་དུ་འདུ་བ་བྱུང་སྟེ། ལྷའི་བུའི་བདུད་ཀྱིས་མགོ་བསྐོོར་མ་ཡིན་པར་མཆོག་གསུམ་གྱི་ཐུགས་རྗེ་ལས་བྱུང་བ་ཡིན་ན་འཚེངས་པར་སྣང་ངོ་། །ལྔ་པ་རང་ནུས་དང་སྦྱར་བའི་གཞན་དོན་ཆ་ཙམ་བསྒྲུལ་ཚུལ་ནི། བསྟན་པ་སྤྱི་དང་བྱེ་བྲག་སྔ་འགྱུར་རྡོ་རྗེ་ཐེག་པ། ཡང་སྒོས་རྗེ་གཏེར་ཆེན་བླ་མའི་བཤད་སྒྲུབ་ཀྱི་བསྟན་པ་རིན་པོ་ཆེ་འདི་ཉིད་སྒོ་ཐམས་ཅད་ནས་ཕྱོགས་ཀུན་ཏུ་དར་ཞིང་རྒྱས་བར་འགྱུར་ན་ཅི་མ་རུང་སྙམ་པའི་ལྷག་བསམ་གྱི་སྙིང་སྟོབས་ཕྲག་པར་ཁྱེར་ཏེ། འཆད་ཉན་གྱི་གཟུགས་བརྙན་རང་ནུས་གང་ཐོན་གྱི་བྱེད་བློ་བགྱིས་པར་སྒྲ་ཀ་ལཱ་པའི་མེ་ཡན་གྱི་ས་རིས་དང་པོར་དགེ་སློང་ཐར་པ་གླིང་པ་དང་། དེ་རྗེས་བཤེས་གཉེན་ཆགས་པ་ཆོས་འཕེལ་དང་། དགེ་སློང་ཨོ་རྒྱན་དཔལ་འབྱོར་ལ་བཤད་ཅིང་། ཕྱིས་ས་རིས་ཡོངས་རྫོགས་དང་། སྙན་ངག་སྡེབ་སྦྱོར་གྱི་བཤད་པ་རྣམས་ཞབས་དྲུང་རིན་པོ་ཆེ་ལ་ཕུལ་བ་ལས་ཀྱང་མང་དུ་མཆེད་པས། དབྱངས་ཅན་བྱཱ་ཀ་ར་ཎ་ནི་ཞབས་དྲུང་སྐུ་མཆེད་སོགས་ཀྱིས་དབུས་ཚར་ལྔ་ཙམ་བཤད། རྩིས་ཀྱི་སཾ་རིས་ཐུན་དུ་བཅུག་ནས་རང་གི་དངོས་སུ་བསླབ་པ་མེད་ཀྱང་། སྔར་ཤེས་ཟིན་ལ་འཕྲལ་གྱི་འབེལ་གཏམ་མཐའ་དཔྱོད་ཀྱི་བློ་ཁ་ཕྱེ་སྟེ་བརྒྱུད་ནས་ཕན་པར་བྱུང་བས་ཐ་སྙད་ཀྱི་རིགས་གནས་རྣམས་ལའང་གཞན་དོན་གྱི་འབྲེལ་བ་ཙམ་བཞག་ཅིང་གཙོ་བོར་མཁན་པོའི་གཡར་ཁྲལ་བླངས་པས་སྡོམ་པ་བགྱིས་པའི་སྡོམ་ཕྲུག་གི་གྲངས་དགེ་སློང་བཞི་བརྒྱ་དང་ཞེ་བདུན། དགེ་ཚུལ་ཆིག་སྟོང་ཉིས་བརྒྱ་གོ་བརྒྱད་དུ་ལོངས་པ་དང་། གྲྭ་གཙང་གི་དབྱར་དགུན་གྱི་ཆོས་ཐོབ་གཉིས་ལ་ལྕགས་སྦྲུལ་ནས་བརྩམས་ཏེ་ཞབས་དྲུང་སྐུ་མཆེད་དང་ཕྱོགས་ཀྱི་བླ་ཁག་མང་པོ་གྲྭ་གཙང་གི་གྲྭ་པ་དོན་གཉེར་ཅན་འདུས་པ་དྲུག་ཅུ་སྐོར་ཏེ་སྙིང་པོའི་རྒྱུད་ཀྱི་བཤད་པ་ཆག་མེད་ཀྱི་བློ་གསར་རྣམས་ལ་ཐོས་བྱུང་གི་ཤེས་རབ་བསྐྱེད་པར་བྱས་ཤིང་གཞན་ཡང་སོ་སོའི་བློ་དང་འཚམས་པའི་སྡོམ་གསུམ་རྣམ་ངེས། ཕར་ཕྱིན། འདུལ་བ་སོགས་གཞུང་སོ་སོའི་བཤད་པ་ཐོ་རེ་བ་དང་། སྔ་ཕྱིར་གསུང་སྤྲུལ་རིམ་པོ་ཆེ་ངག་དབང་ཀུན་བཟང་རྡོ་རྗེ། དཔལ་རི་སྤྲུལ་པའི་སྐུ་ཐང་འབྲོག་སྤྲུལ་པའི་སྐུ། ཟང་ལ་མཁར་སྤྲུལ་པའི་སྐུ། བོན་ལུང་སྤྲུལ་པའི་སྐུ། རོང་པ་རྫོགས་ཆེན་སྤྲུལ་པའི་སྐུ་རྣམས་དང་། རྣ་བོ་གདུང་བརྒྱུད་སོགས་ཀྱི་མཚོན་གཞི་བྱེས་ཀྱི་དོན་གཉེར་ཅན་མང་པོ་ལ་སྒྱུ་འཕྲུལ་ཞི་ཁྲོའི་དབང་ཚར་བརྒྱད། མདོར་དབང་ཚར་གསུམ། བདེ་འདུས་ཀྱི་དབང་ཆེན་ཚར་གཅིག་དང་། རྣལ་འབྱོར་རྒྱུན་དབང་ཚར་བཞི། གསང་རྫོགས་ཚར་གསུམ། ཨ་དོན་ཚར་བཞི། དོང་སྤྲུགས་ཚར་ལྔ། རྡོར་གླིང་རཏྣ་གླིང་པ་པད་གླིང་གི་གཏེར་ཆོས་སོགས་བཀའ་གཏེར་གྱི་དབང་རྗེས་གནང་མང་པོ་དང་། བཀླག་ལུང་མན་ངག་གི་ཁྲིད་འབོགས་པ་སོགས་གང་ལ་གང་འཚམས་ཀྱི་ཆོས་འཆད་པ་དང་། གསར་མ་ལས་ཀྱང་། དུས་འཁོར་གི་དབང་ཡོངས་རྫོགས། ཤངས་ལུགས་རྒྱུད་སྡེ་ལྔ་སོགས་དབང་བཀའ་ཆེ་ཆུང་དང་། ཁྲིད་ཆེན་ལྔ་སོགས་དབང་རྗེས་གནང་ཟབ་ཁྲིད་ལུང་དང་བཅས་པ་མང་དུ་བྱས་ཤིང་། ཕྱིས་སུའང་ཁྱི་ལོ་གྲམ་པ་དཔལ་གྱི་ས་སྐྱར་ཕྱིན་ཏེ། བདག་ཆེན་འཇམ་དཔལ་དབྱངས་ངག་དབང་ཀུན་དགའ་བཀྲ་ཤིས་ཀྱི་ཞབས་དྲུང་དུ་གཏེར་གསར་ཡོངས་རྫོགས་ཀྱི་དབང་ལུང་དང་། ཐུགས་རྗེ་ཆེན་པོའི་སྨིན་ཁྲིད། ཕུར་པ་སྤུ་གྲིའི་དབང་། གཡུ་ཐོག་སྙིང་ཐིག་དབང་ལུང་དང་ཐུགས་སྒྱུབ་ཀྱི་དབང་། ཚེ་དབང་ལུང་ལུགས། ལོ་ཀྟྲི་རྗེས་གནང་གནོད་སྦྱིན་གྱི་སྲོག་གཏད་སོགས་ཆོས་སྐྱེས་མང་པོ་དང་བྱད་འགྲེལ་རྣམས་ཕུལ་ཞིང་དེ་དུས་ཡར་ལམ་ཡར་འབྲོག་གླིང་དུ་ཞབས་དྲུང་ཡབ་སྲས་ལ་ཚེ་གུར་རྟ་མགྲིན་ལོཀྟྲི་རྣམས་ཀྱི་དབང་དང་། མར་ལམ་རུ་ལག་རྒྱང་དུ་བླ་མ་ཟ་ལུང་བ། ཆུ་མིག་སྐྱི་སྟོན་པ། བསམ་གཏན་འབྲས་ཁུད་པ་རྣམས་ལ་གཏེར་གསར་བླ་མ་ཞི་དྲག །རྡོར་སེམས་ཨ་དོན་རྣམས་ཀྱི་དབང་། ཕུན་ཚོགས་གླིང་དུ་དགེ་སློང་འབྱུང་གནས་ལ་ཕྱག་དྲུག་པ་དང་། དམག་ཟོར་མའི་རྗེས་གནང་། གཞིས་ཁ་རྩེར་སྨོན་གྲུབ་ནས་ལ་ཚེ་གུར་རྟ་མགྲིན་རྣམས་ཀྱི་དབང་དང་བྱད་འགྲོལ། གསང་སྔགས་གླིང་གདུང་རྒྱུད་མཆེད་ལ་དོང་སྤྲུགས་པདྨ་བརྒྱ་ལྡན་གྱི་དབང་དང་། དཔོན་སློབ་ཐུན་མོང་ལ་ཚེ་དབང་། འོ་ཡུག་ཏུ་བསམ་དར་ནས་ལ་ཚེ་གུར་དང་ཞང་བློན་གྱི་རྗེས་གནང་ཡུལ་པར་ཁྲོམ་དབང་། སྟག་སྣར་ཀྲེ་བོ་སྤྲུལ་པའི་སྐུ་ལ་སྒྱུ་འཕྲུལ་ཞི་ཁྲོ་དང་། སེམས་སྡེ་ཨ་དོན་གྱི་དབང་། ལྷ་ཆེན་གྱི་སྲོག་གཏད། ཐུགས་རྗེ་ཆེན་པོའི་ཁྲིད་ཡིག་གི་ལུང་དང་ཤར་ཁྲིད་བཅས་ཕུལ། གཞན་ཡང་སྔ་ཕྱིར་ལྷོ་བྲག་བན་པ་བསམ་འགྲུབ་དགོན་དུ་དོང་སྤྲུགས་ཀྱི་དབང་དང་། ཚེ་གུར་རྟ་ནག་ལྕགས་རལ་ཅན་རྣམས་ཀྱི་དབང་། དགེ་ཡེར་ཁྲོམ་དབང་དང་ཚེ་གུར། མདོ་མཁར་དུ་ཚེ་གུར་རྟ་མགྲིན། དྭགས་པོ་རྩེ་ལེར་གུར་དྲག །དྲེགས་འདུལ། ཚེ་རྟ་རྣམས་ཀྱི་རྗེས་གནང་དང་། བྱད་འགྲོལ། གདོན་འགྲོལ། འཆི་བསླུ་སོགས་མང་པོ། ཟང་རི་ཨོ་རྒྱན་གླིང་གྲྭ་ཚང་གི་ཚོགས་སུ་ན་རག་དོང་སྤྲུགས། བཀའ་བརྒྱད་གསང་རྫོགས། ཕུར་པ་སྤུ་གྲི། དྲེགས་འདུལ་རྣམས་ཀྱི་དབང་། རྣམ་སྲས། དུར་ཁྲོད་བདག་མོ། རྒྱལ་པོ་རྣམས་ཀྱི་སྲོག་གཏད། པད་གླིང་གཏེར་ཆོས་ཚང་མའི་ལུང་དང་། བླ་མའི་ལས་བྱང་ལྷ་ཁྲིད་ཀྱི་ལྷ་ཁྲིད། ཁྲོ་ཆར་འཇོམས་བྱེད་ཀྱི་དབང་། ཕྱྭ་འཕྲིན་མདོས་བཅུ་སོགས་ཆོག་ཕྲན་མང་པོའི་ལུང་རྣམས་བྱས། གཞིས་སུ་རང་གི་མ་རིན་པོ་ཆེ་ལ་རྗེ་བླ་མའི་བཀའ་བཞིན་ཕྱག་ཆེན་གྭའུ་མའི་ཉམས་ཁྲིད་ཤིན་ཏུ་སྨིན་པ་དང་། ཐུགས་རྗེ་ཆེན་པོ་ཡི་གེ་དྲུག་མའི་ལྷ་ཁྲིད་རྣམས་ཕུལ་ཞིང་། སྐུ་གཤེགས་རྟིང་གདུང་མཆོད་དུ་བསྡད་ནས་སྒྲིབ་སྦྱོངས་ཀྱི་ཆོ་ག་གནད་དུ་གང་འགྲོ་ཞུས། ན་ནིང་ཆུ་འབྲུག་གི་ལོ་ལ་མདོ་ཁམས་ཀྱི་སའི་ཐིག་ལེ་ཆབ་མདོ་བྱམ་པ་གླིང་དུ་ཕྱིན་ཏེ། འཇིག་རྟེན་དབང་ཕྱུག་འཕགས་པ་རྒྱལ་བ་རྒྱ་མཚོའི་ཞལ་སྔ་ནས་དང་ཞབས་ཕྱིར་སྤྲུལ་སྐུ་རྣམས་གཉིས་བཅས་པར་གཏེར་གསར་ཐུགས་རྗེ་ཆེན་པོའི་རྩལ་དབང་དང་ཚེ་དབང་ཐུགས་ཐིག་གི་རྩ་དབང་། འཆི་མེད་ཡང་སྙིང་ཀུན་འདུས་ཀྱི་ཚེ་དབང་བརྒྱ་རྩ། རྡོར་སེམས་གུར་དྲག་འཇོམས་བྱེད་རྣམས་ཀྱི་དབང་། གཏེར་རྙིང་ལས་གསང་འདུས་ཟླུམ་པོ་བཞི་དབང་། ཉང་གི་དྲག་དམར་ཆེ་བ་ཕྱག་རྡོར་དྲེགས་འདུལ་གྱི་དབང་ཆེ་ཆུང་། ཕྱག་རྡོར་གསང་སྒྲུབ། ཁང་བརྩེགས་རྟ་མགྲིན་གསང་སྒྲུབ། ལོཀྟྲི། ནཱ་ག་རཀྴ། ན་རག་དོང་སྤྲུགས་ཞི་ཁྲོ་ཁྲོམ་སྤྲུགས་ལུགས་ཀྱི་དབང་རྗེས་གནང་། མཁའ་འགྲོ་བསུན་བཟློག །གྲིབ་སེལ། བྱད་འགྲོལ། གཟའ་ཀླུའི་གདོན་འགྲོལ། ཐུགས་རྗེ་ཆེན་པོ་དང་ཡང་ཐིག་གི་འཆི་བསླུ་སོགས་སྐུ་རིམ་ཡང་མང་དུ་བསྒྲུབ། ཐུགས་ཀྱི་སྲས་ངག་དབང་མཆོག་གི་སྤྲུལ་པའི་སྐུ་ལའང་གཏེར་གསར་སྐོར་གྱི་དབང་ལུང་ཁྲིད་དང་བཅས་པ་ཡོངས་རྫོགས་དང་། རཏྣ་གླིང་པའི་ཕུར་པ་དང་ཟབ་ལམ་གསང་འདུས་མ་གཏོགས་ཆོས་སྐོར་ཆ་ཚང་། འཇིགས་བྱེད་ལྷ་བཅུ་གསུམ་མའི་དབང་དང་བདུན་གྱི་ལུང་། ནཱ་རོ་མཁའ་སྤྱོད་མའི་བྱིན་རླབས་རྣལ་འབྱོར་བཅུ་གཅིག་དང་རྩ་དབུ་མའི་ཁྲིད། ཆོས་སྐོར་ཚང་མའི་ལུང་། ཐུགས་རྗེ་ཆེན་པོ་རྒྱལ་པོ་ལུགས་ཀྱི་དབང་ཁྲིད། དཔལ་མོ་ལུགས་ཀྱི་རྗེས་གནང་དང་། སྨྱུང་གནས་ལག་ལེན། བླ་མ་གསང་འདུས་ཀྱི་རྩ་དབང་དང་། ཕུར་བ་སྤུ་གྲི། གཡུ་ཐོག་སྙིང་ཐིག་གི་དབང་ལེ་ཚན་རྣམས་ཕུལ་ཞིང་། ཕྱག་མཛོད་རྗེ་དཔོན་རིན་པོ་ཆེར་ཡང་ཐུགས་རྗེ་ཆེན་པོ། བླ་མ་ཞི་དྲག །ཚེ་རྟ། ལོཀྟྲི་རྣམས་ཀྱི་དབང་རྗེས་གནང་དང་། བྱད་འགྲོལ་འཆི་བསླུ། དབོན་པོ་རྣམ་གཉིས་སོགས་ཞབས་རིམ་ནང་མ་མང་པོར་ཐུགས་ཐིག་གི་དབང་ལུང་ཁྲིད་དང་བཅས་པ་ཚེ་གུར་ཕྱག་རྡོར། གླིང་པ་དང་ནང་མའི་གྲྭ་རིགས་མང་པོར་བླ་མ་ཞི་དྲག །ཚེ་རྟ། ཕྱག་རྡོར། ཚེ་དབང་མདའ་འཕེལ་མ་རྣམས་ཀྱི་དབང་དང་། སེམས་བསྐྱེད། སྨན་བླའི་རྗེས་གནང་། ཚེ་དཔག་མེད་དྭངས་མ་བཅུད་འདྲེན་གྱི་དབང་། འཁོར་བ་དབྱིངས་སྒྲོལ་དང་སྦྱོར་དྲུག་གི་ཁྲིད་སོགས། བདེ་དགེའི་བླ་མ་རབ་འབྱམས་པ། གོ་འཇོ་རྩེད་རོང་སོགས་ནས་ལྷག་པའི་དོན་གཉེན་ཅན་གྱི་དཔོན་སློབ་མང་པོར། གཏེར་གསར་ཐུགས་ཐིག །ཐུགས་རྗེ་ཆེན་པོའི་རྩ་དབང་། རྡོར་སེམས། ཚེ་གུར་སོགས་ཀྱི་དབང་དང་། དགེ་ཚུལ་སློང་གི་སྡོམ་པ། ཐུགས་ཐིག་གི་ཁྲིད་ལ་སོགས་ཏེ་མཆོད་སྦྱིན་རྒྱ་ཆེར་བྱས་པས་རང་ལུགས་ཀྱི་བསྟན་པ་ཤར་ཕྱོགས་སུ་དར་བའི་ལུང་བསྟན་གྱི་དོན་བཞིན་མངོན་དུ་གྱུར་པས་བསྟན་པ་ལ་བྱ་བ་ཅུང་ཟད་བྱས་སོ་སྙམ་དུ་ཡིད་རང་བར་གྱུར་ལ། ཕྱིས་རྒྱལ་བ་འཕགས་པ་ལྷའི་དགོངས་པའི་གཏན་མཚམས་ལྟར་ངག་དབང་མཆོག་གི་སྤྲུལ་པའི་སྐུ་དང་། ཕྱག་མཛོད་རྗེ་དབོན་རིན་པོ་ཆེས་བདག་རྐྱེན་མཛད་ནས་ཕྱོགས་དེར་རང་བསྟན་འཕེལ་རྒྱས་ཀྱི་བཀའ་ལུང་བཟང་པོར་བྱུང་བ་ཡང་རྡོའི་རི་མོ་བཞིན་འགྱུར་བ་མེད་པར་གོར་མ་ཆག་གོ། །དེ་དུས་ཡས་མར་གྱི་ལམ་ཞོང་དུ་ལ་མོར། མར་ལམ་ཆོས་རྗེ་སྐུ་རྟེན་པ་ནང་འཁོར་ཞབས་ཕྱི་བཅས་པར་དཀོན་མཆོག་སྤྱི་འདུས་ཀྱི་དབང་དང་། ཞལ་ངོ་རྣམས་ལ་ཚེ་དབང་། ཡར་ལམ་ཞལ་ངོ་ཡབ་ཡུམ་སྲས་བཅས་ལ་ཚེ་གུར་གྱི་དབང་། མར་ལམ་ལྷ་སར་བླ་མ་བྱ་བྲལ་བ་རིན་པོ་ཆེ་ལ་ཚེ་དབང་། སྐུ་ཞབས་གྲྭ་གཙང་གི་གྲྭ་པ་ངག་དབང་དོན་གྲུབ་ལ་དགེ་སློང་གི་སྡོམ་པ། ཡར་རེ་སྟག་ཤག་གི་ཞལ་ངོ་ཕུན་ཚན་རྣམས་ལ་ཐུགས་རྗེ་ཆེན་པོའི་རྩ་དབང་དང་བྱད་འགྲོལ་སོགས་བགྱིས་སོ། །ཡང་བསྟན་པ་ཡུན་རིང་དུ་གནས་པར་འདོད་པའི་ལྷག་བསམ་གྱི་རྩོམ་པ་ཐན་ཐུན་བགྱིས་པའང་། སྒྱུ་འཕྲུལ་རྩ་རྒྱུད་གསང་སྙིང་ལ་འགྲེལ་པ་གསང་བདག་དགོངས་རྒྱན། སྤྱི་དོན་གསང་བདག་ཞལ་ལུང་། དཀྱིལ་འཁོར་བློས་བསླངས་ཀྱི་རྣམ་བཞག་གསལ་སྒྲོན་རྩ་འགྲེལ། མདོ་དབང་སྐོར་ལ་རྣམ་བཤད་རྒྱུད་ལུང་མན་ངག་གི་གནད་གསལ་བྱེད་སྒྲོན་མེ། ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ། རྒྱུད་དང་མན་ངག་གི་ལུགས་གཅིག་ཏུ་དྲིལ་བའི་དབང་ཆོག་རྡོ་རྗེའི་ཐེམ་སྐས། སྒྲུབ་ཁོག་རིན་པོ་ཆེ་འོད་ཀྱི་སྣང་བ། ཟུར་འདེབས་དཔག་བསམ་སྙེ་མ། ཙཀླིའི་ཐོ་ཡིག་གསལ་བའི་མེ་ལོང་། རྒྱུད་ལུང་ལ་བརྟེན་པའི་ལས་བཞིའི་སྦྱིན་སྲེག་ངག་འདོན་འདོད་སྟེར་དབང་རྒྱལ། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྒྲུབ་ཐབས་རྣམ་བཤད་དེ་ཁོ་ན་དེ་ཉིད་སྣང་བའི་འོད། རྫོགས་རིམ་སྤྱིའི་རྣམ་བཤད་རི་ཆོས་ཡང་ཡོད། སྡོམ་གསུམ་རྣམ་ངེས་ཀྱི་འགྲེལ་པ་ལེགས་བཤད་ངོ་མཚར་དཔག་བསམ་སྙེ་མ། ཕྱག་རྡོར་བདུད་སྡེ་ཕྱེར་འཐག་གི་ལས་བྱང་རྣམ་ངེས་ཚིག་ཉུང་དོན་རྒྱས། དྲི་མེད་རྣམ་གཉིས་ཀྱི་མཆོད་རྟེན་བཞེངས་ཆོག་བཀླགས་པས་འགྲུབ་པ། བཟང་སྤྱོད་སྨོན་ལམ་གྱི་འགྲེལ་པ། སྡེབ་སྦྱོར་འགྲེལ་པ་དོན་གསལ་མེ་ལོང་། སྐར་རྩིས་ཉིན་བྱེད་སྣང་བ་སྔ་བརྩམས་དང་། ཕྱི་བརྩམས་རྩ་བར་འཕྲི་བསྣན་གྱི་རྩམ་སྐྱོར་དང་། དཀའ་འགྲེལ་གཞུང་དོན་སྙིང་པོ་ལེགས་པར་འདྲེན་པའི་རྟ་བདུན། ལག་ལེན་ལྷན་ཐབས་ངོ་མཚར་ཕྲེང་བ། སྤྱི་དོན་ལེགས་བཤད་ཡོངས་འདུའི་སྙེ་མ། དབྱངས་འཆར་མཆན་འགྲེལ་རྒྱུ་སྐར་ཕྲེང་བ། གཏེར་ཆེན་ཆོས་ཀྱི་རྒྱལ་པོའི་ཕྱིའི་རྣམ་ཐར་དད་པའི་ཤིང་རྟ་གླེགས་བམ་དང་པོ་དང་གཉིས་པ། ནང་གི་རྣམ་ཐར་ཡོན་ཏན་མཐའ་ཡས་རྣམ་པར་བཀོད་པའི་རོལ་མོ། བྱ་རྒོད་མཁས་གྲུབ་དང་། དིང་རི་པའི་རྣམ་ཐར། སོ་ཐར་སྡོམ་རྒྱུན་གྱི་རྣམ་ཐར་ཉུང་གསལ་སྒྲོན་མེ། འདུལ་བའི་ལས་ཆོག་རིན་ཆེན་ཐེམ་སྐས། གཞི་གསུམ་གྱི་ཆོ་ག་ཐར་གླིང་བགྲོད་པའི་གྲུ་ཆེན། སྐུ་འབུམ་མཐོང་གྲོལ་ཆེན་པོའི་དཀར་ཆག་ཡིད་ཆེས་ཀྱི་ངེས་པ་སྟེར་བྱེད། ཐུགས་རྗེ་ཆེན་པོའི་བློས་བསླངས་དཀར་ཆག་ངོ་མཚར་ཡོངས་འདུའི་འཁྲི་ཤིང་། འཆད་ཉན་བྱེད་ཚུལ་གྱི་ཡི་གེ་མདོར་བསྡུས། འབེལ་གཏམ་ལེ་ཚན། གཏོར་བསྔོ་དང་རབ་གནས་སྟོང་ཐུན། ཆོ་ག་དང་མན་ངག་གི་ཡི་གེའི་སྐོར་ལ་ཕྱིའི་ཆོས་སྤྱོད་ཐར་ལམ་རབ་གསལ། ནང་གི་ཆོས་སྤྱོད་བྱང་ཆེན་སྤྱོད་པའི་སྒྲོན་མེ། ཉང་གཏེར་ཁྲོས་ནག་གི་ལས་བྱང་མཁའ་སྤྱོད་དུ་བགྲོད་པའི་བདེ་ལམ། བཀའ་བརྒྱད་བདེ་འདུས་ཀྱི་བསྙེན་ཡིག་རིན་པོ་ཆེའི་སྒྲོན་མེ། ཕུར་པ་སྤུ་གྲིའི་བསྙེན་ཡིག་རིན་པོ་ཆེའི་སྙེ་མ། རཏྣའི་དྲག་དམར་གྱི་བསྙེན་ཡིག་ཉུང་གསལ་སྒྲོན་མེ། བི་མ་སྙིང་ཐིག་གི་ཁྲིད་དམིགས་བརྗེད་བྱང་བདུད་རྩིའི་ཐིག་པ། གཅོད་ཀྱི་ཁྲིད་ཡིག་ཟབ་དོན་སྙིང་པོར་དྲིལ་བ། ཐུགས་རྗེ་ཆེན་པོ་རྒྱལ་པོ་ལུགས་ཀྱི་སྐུ་གསུམ་སྙིང་པོའི་དོན་ཁྲིད་ཀྱི་ཁྲིད་ཡིག །ཉང་གཏེར་ཁྲོས་ནག་གི་ཁྲིད་ཡིག་ཟབ་དོན་གསལ་བ། ཐུགས་ཐིག་ཀ་དག་གི་ཁྲིད་ཡིག་དྲི་མེད་སྣང་བ། ངོ་སྤྲོད་ཀྱི་རྩ་ཐོ་དྲི་མེད་རབ་གསལ། དབང་གི་མཚམས་སྦྱོར་དྲི་མེད་འོད། ཚེ་དབང་གི་མཚམས་སྦྱོར་ངག་འདོན་གསལ་བདེར་སྤེལ་བ། རྡོར་སེམས་ཀྱི་ཁྲིད་ཡིག་རབ་གསལ་སྣང་བ། ཁྱད་པར་གྱི་རྫོགས་རིམ་སྣང་བཞིའི་མན་ངག་གི་ཁྲིད་ཡིག་མངོན་སུམ་འོད་གསལ་འཁོར་ལོ། རྨི་ལམ་གྱི་ཁྲིད་ཡིག་ཉིང་འཁྲུལ་རང་གྲོལ། གཅོད་ཀྱི་ཁྲིད་ཡིག་འཁྲུལ་རྟོག་དབྱིངས་གྲོལ། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྤྲོས་བཅས་བུམ་དབང་གི་མཚམས་སྦྱོར་སྐལ་ལྡན་ཀུན་དགའ། གནས་ལུང་གི་ཆོ་གའི་ངག་འདོན། བསྙེན་ཡིག་གི་ཟུར་འདེབས་བསྐྱུར་བྱང་། རྩ་ཁྲིད་ཀྱི་ཁྲིད་ཡིག་སྒོམ་དོན་གསལ་བའི་མེ་ལོང་། གཏུམ་མོའི་ཁྲིད་ཡིག་ཟབ་གནད་གསལ་སྒྲོན། འཁྲུལ་འཁོར་གྱི་རྩ་ཁྲིད་འཆི་མེད་བཅུད་སྟེར། ཨ་ཏིའི་ལམ་རིམ་སྙིང་པོའི་འགྲེལ་པ། ཕག་མོ་ཟབ་རྒྱའི་འཁྲུལ་འཁོར་གྱི་རྩ་འགྲེལ། ཞི་བྱེད་བཀའ་བབས་གསུམ་གྱི་དབང་ཆོག་དང་ཁྲིད་ཡིག་ཆ་ཚང་། གསར་རྙིང་སྤྱི་འགྲོའི་དབང་བཤད་རྣམས་སོ། །ལག་ལེན་གྱི་སྐོར་ལ་ཁྲག་འཐུང་ཁྲོ་བོའི་རྩ་འཆམས་ཀྱི་བརྗེད་བྱང་ཀུན་བཟང་རྣམ་པར་རྩེན་པའི་རོལ་མོ། མཆོད་གར་གྱི་བརྗེད་བྱང་མཆོད་སྤྲིན་རྣམ་པར་སྤྲོ་བའི་རོལ་མོ་དང་། གླུ་ཡིག་རབ་གསལ་སྣང་བ། གཞན་ཡང་བཀའ་བརྒྱད། ཕུར་པ། འཇོམས་བྱེད། བླ་མ་གསང་འདུས་ཀྱི་དབྱངས་ཡིག་བྱང་བུ་སོགས་ཉེར་མཁོའི་ཟིན་བྲིས་ཕྲན་བུ་མང་པོ་ཡོད་ཀྱང་འདིར་མ་སྨོས་ལ། བཀའ་བརྒྱད་བདེ་འདུས་དང་། སྒྱུ་འཕྲུལ་ལམ་རིམ་གཉིས་ལ་སྤྱི་ཊཱིཀ་རེ་བརྩམས་པའི་དམ་བཅའ་རི་མོ་ཡིད་ལ་བཅགས་རུང་ད་དུང་མི་འགྲུབ་པ་འདྲའོ། །དྲུག་པ་ལྷག་པའི་བསམ་པས་དོན་གཉིས་འགྲུབ་འགྱུར་ལ་སྨོན་ལམ་ཇི་ལྟར་བཏབ་ཚུལ་ནི། དེ་ལྟར་རང་ནུས་དང་སྦྱར་བའི་འཆད་རྩོམ་གྱིས་གཞན་ཕན་རྣམ་དཀར་གྱི་བྱ་བ་ཆ་ཙམ་འགྲུབ་པ་ལྟར། སླད་མའི་ཆར་ཡང་ཚེ་མཇུག་འདི་དང་ཕྱི་མའི་སྐྱེས་རབས་ཀྱི་ཕྲེང་བར་དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་གཏེར་ཆེན་ཆོས་ཀྱི་རྒྱལ་པོ་རིགས་བདག་ཏུ་མི་འབྲལ་ཞིང་ཟབ་དོན་མན་ངག་གི་བདུད་རྩི་ངོམ་པ་མེད་པར་འཐུངས་པས་རང་རྒྱུད་གྲོལ་ཏེ། གཞན་དོན་ཕྲིན་ལས་རྒྱ་ཆེ་རྒྱུན་མི་ཆད་པ་དཔག་བསམ་གྱི་ཤིང་དང་། བུམ་པ་བཟང་པོ་དང་། ཡིད་བཞིན་གྱི་ནོར་བུ་རིན་པོ་ཆེ་ལྟར་འབད་རྩོལ་མེད་པར་ལྷུན་གྱིས་གྲུབ་པས། ཐུབ་བསྟན་སྤྱི་དང་བྱེ་བྲག་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་འགྲོ་བའི་མཆོད་སྡོང་དུ་མི་ནུབ་པའི་ཉི་མ་དང་། མི་འགྲིབ་པའི་ཟླ་བ་ལྟར་འཛིན་སྐྱོང་སྤེལ་གསུམ་གྱི་བྱ་བ་རླབས་པོ་ཆེས་སྲིད་མཐའི་བར་དུ་དར་ཞིང་རྒྱས་པར་བྱེད་ནུས་པའི་སྐྱེས་བུ་མཐུ་ལྡན་དུ་སྨོན་པ། དེ་ཁོ་ན་བཞིན་དུ་འགྲུབ་པར་བྱིན་གྱིས་རློབ་ཏུ་གསོལ་ལོ། །ཞེས་སྨོན་ལམ་བཏབ་པ་ལྟར་ཆོས་ཐམས་ཅད་སྨོན་ལམ་གྱི་མཐའ་བསྒྱུར་བའི་ཕྱི་གདོན་མི་ཟ་བར་འགྲུབ་པ་སྟེ། འཇམ་དཔལ་གྱི་ཞིང་གི་ཡོན་ཏན་བཀོད་པ་ལས། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་ནི་དེ་བཞིན་ཉིད་དུ་འགྲུབ། །ཅེས་གསུངས་ཤིང་། པུཎྜ་རི་ཀའི་རྒྱུད་ལས། གང་དང་གང་དུ་དམ་ཆོས་འཇིག་པ་དེར། མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཟུང་། །ཞེས་པ་ལྟ་བུའི་སྙིང་སྟོབས་ཀྱིས་དམ་ཆོས་མ་ལུས་པ་ཡོངས་སུ་འཛིན་པར་བསྔོས་པར་གྱུར་ན་ནི། སྨོན་ལམ་ཐམས་ཅད་ཀྱང་རྒྱ་མཚོ་ཆེན་པོར་ཆུ་ཀླུང་ཇི་སྙེད་འཇུག་པ་ལྟར་འདུ་བ་བཞེད་དེ། བཟང་པོ་སྤྱོད་པའི་མདོ་ལས། རྒྱལ་བ་ཀུན་གྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྦྱོང་བ་ཡང་། །མ་འོངས་བསྐལ་པ་ཀུན་ཏུ་སྤྱོད་པར་ཤོག །ཅེས་གསུངས་པ་བཞིན་ནོ། །ངག་ཚིག་བདེན་པའི་གཏམ་གྱི་འབབ་སྟེགས་ལས། །རྣ་བའི་དབང་པོར་སྙན་འཇེབས་བདུད་རྩིའི་ཀླུང་། །ཆོས་གྲོགས་ན་ཚོད་མཐུན་དབང་བློ་མཚོ་ལ། །བབས་པས་ཡིད་ཆེས་དགའ་བའི་དཔལ་ཐོབ་ཤོག ༡ །གང་འདིར་མཁས་རྣམས་སྤྱན་རས་མི་གཡོ་ཞིང་། །བླུན་རྣམས་བྲག་ཆ་བཞིན་ལས་རྟོག་དཔྱོད་བྲལ། །གཟུར་གནས་རྒྱུས་ཡོད་བློ་ངོར་བདེན་གཏམ་སྟེ། །ཕྱོགས་ཞེན་རྒྱུས་ཅན་རྣ་བའི་བདུད་རྩིར་མྱོང་། ༢ །མཁས་རྨོངས་ཀུན་གྱི་སྙིང་ལ་ཐུན་མོང་དུ། །བབས་པའི་གཏམ་གྱི་སྦྱོར་བ་སུས་འཆད་ནུས། །དེ་ཕྱིར་རེ་དོགས་འཆིང་བ་ལས་གྲོལ་བས། །དམ་པའི་གསུང་ངོར་མ་བཅོས་ལྷུག་པར་སྨྲས། ༣ །དག་སྣང་ཅན་ལ་ཁྱི་སོར་རིང་བསྲེལ་བཞིན། །འདི་ལས་རྣམ་དཀར་དགེ་འབྲས་འབྱུང་སྲིན་ན། །མཐའ་ཡས་ལུས་ཅན་ཡོངས་ལ་ཁྱབ་པར་བསྔོ། །ཀུན་ཀྱང་བྱང་ཆེན་སྤྱོད་མཆོག་མཐའ་ཕྱིན་ཤོག ༤ །ཅེས་པ་འདི་ཡང་མཉམ་པ་མེད་པའི་བཀའ་དྲིན་ཅན་རྗེ་བླ་མ་མཆོག་གི་བཀའ་ལུང་སྤྱི་བོར་ཕེབས་པར་ལྟར། དགེ་སློང་བློ་གསལ་རྒྱ་མཚོས་དར་དཀར་སྲིད་དུ་རིང་བ་དང་བཅས་གསུང་ལ་ཞབས་མཐུན་གྱིས་བསྐུལ་བ་དང་། ཉེ་བར་གནས་པ་དགེ་སློང་ཀུན་བློོས་ཀྱང་ཡང་ཡང་གསོས་བཏབ་ཅིང་། ཁྱད་པར་རྒྱལ་བ་འཕགས་པ་ལྷའི་ཐུགས་ཀྱི་སྲས་ངག་དབང་མཆོག་གི་སྤྲུལ་པའི་སྐུའི་ཞལ་སྔ་ནས་དངུལ་སྲང་གསུམ་དང་བྱམས་པ་ཁ་བཏགས་ཀྱི་གནང་སྦྱིན་དང་བཅས་ཏེ་གསུང་གིས་བསྐུལ་བའི་ངོར་མདོ་ཁམས་ཀྱི་སའི་ཐིག་ལེ་ཆབ་མདོ་བྱམས་པ་གླིང་དུ་དབུ་བཙུགས་པ་ལས་འཕྲོ་ཅུང་ཟད་ལུས་པ་ཕྱིས་རྗེ་བླ་མ་དམ་པས་ཀྱང་གསར་བརྩམས་མདོ་དབང་རྣམ་བཤད་ཀྱི་དཔེ་རྡོ་རྗེ་བྲག་རིག་འཛིན་སྤྲུལ་པའི་སྐུའི་སྤྱན་སྔར་འབུལ་བར་མཛད་པ་ལ་ཤིན་ཏུ་དགྱེས་པའི་གཟིགས་པ་རྣམ་པར་དག་པས་རང་ཉིད་ཀྱི་རྣམ་ཐར་ཞིག་ཀྱང་རྩོམ་པར་རིགས་ཞེས་བཀའ་ལམ་དུ་སྩལ་འདུག་པ་ལྟར་རང་ལོ་དྲུག་ཅུ་པ་ཆུ་སྦྲུལ་ཧོར་ཟླ་དྲུག་པའི་ཚེས་བཅུ་གཅིག་ལྷག་པ་ལྷ་མཚམས་ཀྱི་འགྲུབ་སྦྱོར་འཛོམ་པའི་ཉིན་གྱི་ཉི་ཤར་ཕྱི་ཆ་བདུད་རྩི་ཐུན་མཚམས་ཀྱི་སྦྱོར་བའི་ཐོག །དགེ་སློང་རྨོངས་པ་དྷརྨ་ཤྲཱིས་རང་གནས་འཆི་མེད་འོད་སྣང་དུ་གྲུབ་པར་སྦྱར་བའི་ཡི་གེ་པ་ནི་ལེགས་གླིང་ཆོས་མཛད་དགེ་སློང་འགྱུར་མེད་མཆོག་གྲུབ་ཀྱིས་བགྱིས་པ་དགེ་ལེགས་འཕེལ།། སརྦ་མདྒ་ལཾ།། །།