ཤར་ཀཿཐོག་པ་བསོད་ནམས་རྒྱལ་མཚན་གྱི་རྣམ་པར་ཐར།

ཤར་ཀཿཐོག་པ་བསོད་ནམས་རྒྱལ་མཚན་གྱི་རྣམ་པར་ཐར་པ་བཞུགས་སོ། །ན་མོ་གུ་རུ། གདོད་ནས་དག་པའི་ཆོས་སྐུ་ནམ་མཁའ་ཡངས་པ་ལས། ལྷུན་གྲུབ་འགག་མེད་ཆུ་འཛིན་རབ་འཁྲིགས་ཤིང་། །སྣ་ཚོགས་སྤྲུལ་པ་འགྲོ་ལ་ཆུ་རྒྱུན་འབེབས། །རྩ་བརྒྱུད་བླ་མ་རྣམས་ལ་གུས་ཕྱག་འཚལ། །སྐུ་གསུམ་རྒྱལ་བ་ཀུན་གྱི་རྣམ་འཕྲུལ་ལས། །ཐེག་གསུམ་ཆོས་ཀྱི་དཔལ་འབྱོར་ཡོངས་ཀྱིས་ཕྱུག །ཁམས་གསུམ་འགྲོ་བའི་དབུལ་འཕོངས་སེལ་མཛད་པའི། །བཀའ་དྲིན་འཁོར་མེད་རྗེ་ལ་གུས་ཕྱག་འཚལ། །འདིར་མཚུངས་མེད་ཆོས་ཀྱི་རྗེ། ས་གསུམ་ན་འདྲན་ཟླ་དང་བྲལ་བ། དུས་གསུམ་རྒྱལ་བ་ཀུན་གྱི་ཐུགས་སྲས། ཐོས་བསམ་སྒོམ་པའི་གཙུག་རྒྱན། མདོ་རྒྱུད་བསྟན་པའི་མངའ་བདག །ཁྱད་པར་ཨོ་རྒྱན་ཆེན་པོས་ལུང་བསྟན་ཞིང་། སྙིགས་མའི་དུས་འདིར། པདྨ་འབྱུང་གནས་ཀྱི་རྒྱལ་ཚབ་དུ་བྱོན་པ། འགྲོ་བའི་དེད་དཔོན་ཆེན་པོ། མ་རིག་མུན་སེལ་ཐུགས་རྗེའི་བདག་ཉིད། མཚན་ཉི་ཟླ་ལྟར་ཡོངས་སུ་གྲགས་པ། ཀཿཐོག་རིན་པོ་ཆེ་བསོད་ནམས་རྒྱལ་མཚན་དཔལ་བཟང་པོ་ཞེས། སྨོན་ལམ་གྱི་དབང་གིས་བོད་ཀྱི་ཡུལ་མདོ་ཁམས་སུ་སྐུ་འཁྲུངས་ཀྱང་། གདུལ་བྱའི་ཞིང་དབུས་གཙང་ལྷོ་བོད་དུ་བྱོན་ཏེ། བསྟན་པའི་འཛིན་སྐྱོང་སྤེལ་གསུམ་རྣམས་དར་རྒྱས་སུ་མཛད་དོ། །སྐྱེས་བུ་དམ་པ་དེ་ནི་ཆུང་ནས་རབ་ཏུ་བྱུང་ཞིང་ཐོས་བསམ་གྱིས་ཆོས་ལ་སྦྱངས་ཚུལ། བར་དུ་མཁས་གྲུབ་མང་དུ་བསྟེན་ནས་གདམས་པའི་བཅུད་མ་ལུས་པ་གསན་ཞིང་། དཀའ་སྤྱད་སྡུག་སྒུར་མཛད་ནས་བསྒོམས་བསྒྲུབ་བསྐྱེད་རྫོགས་ཀྱི་དོན་ལ་སྦྱངས་ཚུལ། མཐར་གཞན་ཕན་ཐུགས་བསྐྱེད་ཀྱིས་འགྲོ་དོན། འཆད་རྩོད་བརྩོམ་གསུམ་ལ་མ་རྨོངས་པས། གདུལ་བྱ་རྣམས་ཀྱི་རེ་བ་སོ་སོར་བསྐོངས་ཏེ། དབང་བསྐུར་རབ་གནས་ཀྱི་དུས་སུ་བྱིན་རླབས་ཀྱི་རྟགས་མཚན། འཕྲིན་ལས་འགྲོ་བ་འདུལ་དོན་ངོ་མཚར་རྨད་དུ་བྱུང་བ་གཞན་ཡིད་ཆེས་པ་སྟོན་པ་སོགས། རྣམ་ཐར་བསྡུས་པ་ཙམ་ཞལ་རྒྱུན་ཇི་ལྟ་བ་བཞིན། དྲི་མེད་ཡིད་བཞིན་གྱི་ནོར་བུའི་ཕྲེང་བའི་ནང་དུ་སྟོན་ཏེ། ཞིབ་ཏུ་གསང་བའི་རྣམ་ཐར་བླ་མ་ཡི་དམ་མཁའ་འགྲོ་རྣམས་ཀྱི་ཞལ་གཟིགས་རྣམས་དང་། བསྙེན་བསྒྲུབ་མཛད་པའི་སྐབས་སུ། དངོས་ཉམས་ཀྱི་རྟགས་ཁྱད་པར་ཅན་དང་། ལུང་བསྟན་ལ་སོགས་མང་དུ་ཡོད་གསུང་སྣང་སྟེ། ནན་གྱིས་ཞུས་ཀྱང་བཀའ་མ་གྲོལ་བས་ཡི་གེར་མ་བཀོད། འདིར་མྱ་ངན་ལས་འདས་པའི་མཛད་པ། གདུལ་བྱ་ཞིང་ཁམས་གཞན་དུ་གཤེགས་པའི་ཚུལ་མདོ་ཙམ་ཅིག་ཁོ་བོ་རྣམ་གྲོལ་མིང་ཅན་གྱིས་འབྲི་བར་བྱ་སྟེ། རྩ་བ་གསུམ་གྱིས་རྗེས་སུ་གནང་དུ་གསོལ། རྗེ་རིན་པོ་ཆེ་འདི་ཉིད་ནི་སྤྲུལ་པ་ཡར་འགྱེད་ཀྱི་སངས་རྒྱས་གང་ལ་གང་འདུལ་དུ་བྱོན་པ། བསམ་བཞིན་དུ་སྐྱེ་བ་བཞེས་པ་སྟེ། སྡུད་པ་ལས། ཉོན་མོངས་ཟད་པར་གྱུར་ཀྱང་སྐྱེ་བ་སྟོན་པར་བྱེད། རྒས་དང་ན་དང་འཆི་བ་མེད་ཀྱང་འཆི་འཕོ་སྟོན། ཅེས་བྱ་སྟེ། སྤྲུལ་པ་སྣ་ཚོགས་སུ་འགྱེད་ནུས་ཤིང་འབྱིན་འཇུག་གནས་གསུམ་ལ་རང་དབང་ཐོབ་པའི་སྐྱེས་ཆེན་དུ་མཆིས་ནའང་། གདུལ་བྱ་རྟགས་འཛིན་ཅན་རྣམས་སུན་འབྱིན་པ་དང་། ལེ་ལོ་ཅན་རྣམས་ལ་བསྐུལ་མ་འདེབས་ཕྱིར་དང་། འདུས་བྱས་ཀྱི་ཆོས་ཐམས་ཅད་མི་རྟག་པའི་བརྡའ་སྤྲོད་པའི་ཕྱིར་དུ་མྱ་ངན་ལས་འདའ་བའི་ཚུལ་བསྟན་ཏེ། རྒྱུད་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །བྱུང་ནས་མྱ་ངན་འདའ་བར་སྟོན་ཅེས་གསུངས་ཏེ། དོན་གྱི་ངོ་བོར་ནི་གཤེགས་བཞུགས་མི་མངའ་འོ། །དེ་ཡང་བསྙེན་བསྒྲུབ་ཀྱི་སྐབས་སུ། དགུང་ལོ་བདུན་བཅུ་དོན་གཉིས་ཐུབ་པ་མཁའ་འགྲོས་ལུང་བསྟན་བྱུང་བ་ལས། དམ་པ་དེ་ཉིད་ནི་བྱ་དཀའ་བ་ཁྱད་དུ་བསད་ཅིང་། སྡུག་བསྔལ་ལ་ཇི་མི་སྙམ་གྱིས་བཟོད་པའི་གོ་ཆ་བགོས་ཏེ། བསྟན་པ་དང་སེམས་ཅན་གྱི་དོན་དུ་འགྱུར་ན་རང་གི་སྐུ་སྲོག་ལའང་མི་འཕངས་པའི། བྱང་ཆུབ་སེམས་དཔའ་ཆེན་པོའི་རླབས་པོ་ཆེ་ལ་ལྷོད་པ་མེད་པར་རྒྱུན་དུ་གནས་ཤིང་། སྐུ་ཚེའི་སྟོད་རྣམས་སུ་དཀའ་སྤྱད་སྡུག་སྒུར་སྦས་ཡུལ་འབྱེད་པའི་ཐུགས་རྩོལ་སོགས། ལྟར་སྣང་ཤིན་ཏུ་འོ་བརྒྱལ་བའི་རྣམ་པ་ལ་བརྟེན་ནས། སྐུ་ཚེའི་སྨད་ལ་སྐུ་གྲང་གི་རྣམ་པས་སྐུ་གྲིབ་ལ་བརྟེན་པའི་ཡང་ཡང་དུ་བསྙེལ་འདུག་པ། ཕྱིས་སྟག་ཚང་ཨོ་རྒྱན་རྩེ་མོ་ནང་དུ་སྐུ་མཚམས་ལ་བཞུགས་ཤིང་། ཕྱོགས་ནས་མཇལ་མཁན་གལ་ཆེ་བ་བྱུང་དུས་ཞལ་མཇལ་ཅུང་ཟད་དང་། དེ་མཚོན་རྣམས་ལ་ཡོལ་བ་ཕྱི་ནང་གི་གསུང་མཇལ་སོགས་སྐབས་དང་སྦྱར་ནས་གནང་བ་ཡོད་དུས། ཐང་གཅིག་རྗེའི་ཞལ་ནས། གནས་སྐབས་སུ་ལུས་རྟེན་གཅིག་བླངས་གཞིར་བཞག་ལ། འབྱུང་བ་ལས་གྲུབ་པ་ཡིན་པས། ན་ཚ་ལ་སོགས་ལོས་ཡོང་། ང་མ་ཚད་རྙིང་མ་ཕྱོགས་བསྒྲུབ་བརྒྱུད་ཀྱི་བླ་མ། ས་སྐྱ་པ་ཕྱོགས་ཀྱི་བཤད་བརྒྱུད། བཀའ་བརྒྱུད་ཕྱོགས་ཀྱི་སྒོམ་བརྒྱུད་ཀྱི་བླ་མ་གོང་མ་མཁས་གྲུབ་རྣམས་ལའང་སྙུང་བ་དང་འདས་ཚུལ་སྟོན་པ་བྱུང་འདུག་པ་ལ། ང་རང་བཟོད་པ་འདུག་གསུང་། དེ་ལ་བདག་གིས་འདི་ལྟ་ཞུས་སྟེ། བླ་མ་དགེ་བའི་བཤེས་གཉེན་ཐུགས་སངས་རྒྱས་ཀྱི་དགོངས་པ་དང་ཁྱད་མེད་པ་ལ། སྐུ་ཚེའི་རིང་ཐུང་། མཛད་པ་རྒྱ་ཆེ་ཆུང་། སྐུ་གཟུགས་བཟང་ངན་སོགས་མི་འདྲ་བ་མང་དུ་འབྱུང་བར་འདུག་ཅིང་། ངེད་རང་གི་རྗེ་རིན་པོ་ཆེ་ནི་དུས་ཕྱིས་སྐུ་ཁམས་བརྙེལ་བ་ཁོ་ན་ཡོང་འདུག་པ་འདི་གང་ལགས་ཞུས་པས། འོ་དེ་ཤིན་ཏུ་འོང་བར་འདུག །འདི་དག་ཐམས་ཅད་ཚེ་སྔན་མའི་འཕེན་པ་བཟང་ངན་ཀྱང་ཡིན། སྨོན་ལམ་གྱི་སྟོབས་ཀྱང་ཡིན། རྒྱུ་འབྲས་སླུ་བ་མེད་པ་ནི། སྔོན་ཐུབ་པ་རིན་པོ་ཆེ་ལའང་བདུད་མི་ནག་མདུང་ཐུགས་ཅན་བསད་པའི་རྣམ་སྨིན་ལས། ཞབས་ལ་ཙནྡན་གྱི་ཚལ་པ་ཟུག་ཅེས་གསུངས་པས། ང་ཡང་རང་རྒྱུད་པ་རང་ཅུང་མིན་ཏེ། གནས་སྐབས་ཀྱི་ན་ཚ་འདི་ཤིན་ཏུ་ཡོད་པར་འདུག །ཚེ་འདི་མི་དགེ་སྡིག་པའི་ལས་བྱས་པ་གཅིག་མ་དྲན་ཏེ། གསལ་བཀྲ་ལས། གལ་ཏེ་ཉམས་ལ་རྟགས་མེད་ན། །ལེགས་པར་སྣང་བ་མི་རུང་སྟེ། །བདེ་བ་ཟད་བྱས་གཏན་དུ་སྡུག །གལ་ཏེ་ཉམས་ལ་རྟགས་བྱུང་ན། །སྔོན་གྱི་རྣམ་སྨིན་ཟད་འགྱུར་བས། །བསྐང་གསོའི་ལས་ལ་བརྩོན་པར་བྱ། །ཞེས་གསུངས་འདུག་པས། རྣམ་སྨིན་ལས་ཀྱི་ལྷག་རོ་རྣམས་དག་འགྲོ་བ་ཡིན་ལས་ཆེ། འོན་ཀྱང་ན་ཚ་རྣམས་དགེ་སྦྱོར་གྱི་གྲོགས་སུ་འགྲོ་ཙམ་འདུག །ལས་རྒྱུ་འབྲས་སླུ་བ་མེད་པ་རྗེ་ཐམས་ཅད་མཁྱེན་པའི་ཁྱད་ཆོས་ཡིན་གསུང་། དེ་ལྟར་དགུང་ལོ་བདུན་བཅུ་དོན་གཉིས་ཡན་ཆོད་དུ་སྙུང་བ་ལས། ན་ཚ་ཡང་ཡང་དུ་ཡོང་བ་འདུག་ཏེ། ང་རང་གི་ཚེ་ཚད་ལ་ནི་ཅུང་མ་སླེབ་གསུང་། དེ་ནས་ཁྱི་ལོ་ཤར་ཏེ་བདུན་བཅུ་དོན་གསུམ་དགུང་སྙིང་གི་སྟེངས་སུ་ཕེབས་པའི་ཚེ། སྐུ་ཁམས་སྙེལ་པོ་བྱུང་སྟེ་བདག་རྣམས་ཀྱང་བོད་ཕྱོགས་སུ་ཡོད་དུས་གཅིག་ལ། མགྱོགས་མྱུར་ཤོག་གསུང་པའི་བཀའ་ཤོག་ཡང་ཡང་ཕེབས་ཏེ། ཞབས་དྲུང་དུ་མཇལ་ཚེ ། སྐུ་ཁམས་ཀྱང་ཡར་སོས་སུ་བྱུང་འདུག །དེ་དུས་མངའ་རིས་པ་ཆོས་རྗེ་ཀུན་རྣམ་པ་ཞེས་པ་དཔོན་སློབ་ཀྱང་གསུང་ཆོས་ཞུར་བྱུང་སྟེ། དབང་ལུང་དབོན་པོས་གྱིས། ངེས་སྐྱི་ཁྲིད་བྱེད་གསུང་ནས། དགོངས་པ་ཟང་ཐལ་གྱི་ཁྲིད་གནང་ངོ་། །གཞན་ཡང་ཕྱོགས་ནས་དགེ་བའི་བཤེས་གཉེན་མང་པོ་མཇལ་བྱོན་པ་རྣམས་དང་རང་གི་གྲྭ་སློབ་སོགས་ལ། སོ་སོར་ཆོས་ཀྱིས་ཚིམ་པར་མཛད་དོ། །དེ་ནས་ཕག་ལོ་ཤར་བའི་ཚེ། བོད་ཕྱོགས་ནས་རང་རེའི་བུ་ཆེན་ཆོས་རྗེ་འཇམ་དཔལ་བ་སོགས། འབྲིང་མཚམས་མགོ་ཡུལ་ཕྱོགས་ཀྱི་གྲྭ་བུ་སློབ་ཐམས་ཅད་འདུས་ཏེ། འབུལ་བའི་བྱེ་བྲག་ཀྱང་དཔག་མེད་ཕུལ། གསོལ་འདེབས་གདན་བཞུགས་ཁོ་ན་ལ་གཙོ་བོར་འབད་པ་སྟོན། བདག་དཔོན་སློབ་རྣམས་ནི་ཤར་ཕྱོགས་སུ་འགྲོ་དགོས་པ་བྱུང་། རྗེ་གོང་ནས་དགུན་སྟོད་ཕྱོགས་ནས་འདུས་པ། གསུང་ཆོས་ཁྲིད་རྒྱས་པར་གནང་ཞིང་། གཙོ་བོར་བཀའ་ཕེབས་ལ། ཁྱེད་རང་ཚོ་འདིར་སྡོད་གང་ཁོམ་གྱིས་ལ་སྡོད། ང་ཡང་ཡུན་རིང་བསྡད་པའི་ངེས་པ་མེད། ཐེ་ཚོམ་གྱི་དྲི་བ་དགོས་པ་རྣམས་ཀྱང་དྲིས་ཤིག །སང་ཉམས་ལེན་བྱེད་པའི་དུས། གཉིས་འཛིན་ཐེ་ཚོམ་གྱི་དྲ་བར་ཚུད་ན་མི་བཏུབ་ཅིང་། སྒྲོ་འདོགས་གཅོད་དགོས་པ་རྣམས་ཆོད། ཕྱིས་ནས་ང་དྲན་པོ་ཡོང་གསུང་། དེར་འཚོགས་པ་ཐམས་ཅད་ཀྱིས་རང་རང་གི་ཐེ་ཚོམ་ཞུས། རྗེ་ཡིས་དགོངས་དོན་ཐམས་ཅད་བཀྲོལ་ནས་གནད་འདུག་གོ། །ཡང་དགུན་སྨད་ཕྱོགས་སུ་ཤིན་ཏུ་སྐུ་ཁམས་དུབ་པར་གྱུར་ཏེ། བདག་ཤར་དུ་ཡོད་དུས་ཤོག་གསུང་ནས་མྱུར་བར་འོངས་ཏེ་གནས་ཆེན་དུ། ཞབས་དྲུང་འཇལ་ཚེ་ཤིན་ཏུ་བསྙེལ་བའི་ཚུལ་དུ་འདུག་དུས༴ སྐུ་རིམ་དོས་དྲག་ཅིང་སྟོབས་ཆེ་བ། བཀའ་བརྒྱད། གཤིན་རྗེ། མཁའ་འགྲོའི་སུན་བཟློག །སྦྱིན་བསྲེག་བསྐང་བཤགས་གྲིབ་སེལ། གསུང་སྒྲོག་སོགས་བསྒྲུབ་པས་ཞིང་དུ་མ་གཤེགས་ཙམ་བྱུང་། དེ་དང་མཚུངས་པར་ཆོས་སྡིང་ནས་ཆོས་རྗེ་བསྒྲུབ་ཆེན་པ་དཔོན་སློབ་རྣམས་མཇལ་བར་ཕེབས་པས་འབུལ་བ་དཔག་མེད་ཀྱང་ཕུལ། དམ་ཚིག་གཙང་ཞིང་ལྷག་བསམ་རྣམ་པར་དག་པའི་མོས་གུས་གདུང་བ་དྲག་པོས་གསོལ་བ་ཕུར་ཚུགས་སུ་བཏབ་པས་ཀྱང་། ལེགས་ཚོགས་ཀྱི་རྟེན་འབྲེལ་དུ་མ་ནས་འགྲིག་ཏེ། སྐུ་ཁམས་ཀྱང་ཡར་སོས་བྱུང་། དེར་རྗེས་ཆོས་རྗེ་རྡོ་རྗེ་བ་སོགས་ལ་སྟོད་ཕྱོགས་ཀྱི་བུ་སློབ་དབུ་མཛད་རྡོ་རྗེ་དབང་ཕྱུག །དབུ་མཛད་དགེ་འདུན་རྒྱ་མཚོ་སོགས་བོད་ཀྱི་གྲ་སློབ་རྣམས་ཀྱང་འདུས་ཏེ། རང་རང་གི་དངོས་པོ་ཅི་ཡོད་རྣམས་ཀྱང་ཕུལ། གདན་བཞུགས་གསོལ་བ་བཏབ། གདམ་པའི་ལྷག་ལུས་རྣམས་ཀྱང་ཞུས་སོ། །བླ་མ་བསོད་ནམས་བཟང་གིས་ཀྱང་རོང་ཕྱོགས་ཀྱི་འབུལ་བསྡུད་འཁོར་ཏེ། ཇ་སིག་གོས་དར་སོགས་བརྗོད་ཀྱི་མི་ལང་བ་ཕུལ་སྟེ་ཕྱག་ཕྱི་བསྒྲུབ་པའི་མཐིལ་མཛད། ལྷོ་ཕྱོགས་ཀྱི་ཡང་བླ་མ་བུ་ཆེན་རྣམས་དང་། དགོན་པ་འཛིན་པའི་བླ་མ་བསྐོས་པ་དང་གསར་དགོན་པ། བསམ་གཏན་སྒང་། ཡུལ་གསར་དགོན་པ། འབྲས་དཔུངས་བླ་མ་ལུང་། རྡོ་ཁྲ་ལྕག་ཟམ་ཐོག་ཁ། དོར་པོ་ཨོ་རྒྱན་གླིང་། ར་རྒོད་བྲག་སོགས་ཀྱི་གདན་ས་རང་རང་གི་འཁོར་འབངས་རྣམས་དང་བཅས། འབུལ་བའི་བྱེ་བྲག་དཔག་མེད་ཐོགས་ནས་མཇལ་བར་འདུས་ཏེ། རང་རང་བློས་ཀྱི་ཞུ་བ་རྣམས་ཀྱང་ཞུས། སོ་སོར་ཞལ་མཇལ། གདམས་པ་ངོ་སྤྲོད་སོགས་ཀྱང་ཐུགས་མཛོད་བརྟོལ་སྟེ་གནང་ངོ་། །དེའི་ཚེ་སྐབས་གཅིག་ཞལ་ནས། ད་ལན་ཁྱེད་ཚོས་རྐྱེན་བཟློག་རིམས་འགྲོ་སོགས་ཀྱང་བརྩོན་པར་བྱུང་པས། མདང་ངའི་རྨི་ལམ་དུ། ཡ་མའི་ནོར་ལོངས་སྤྱོད་རྣམས་སྦྱིན་གཏོང་བྱས་པ་རྨིས། ད་ལོ་རང་དགའ་མོ་ཡོང་བ་འདྲ་གསུང་། དགེ་བསྙེན་ཉི་ཤུ་རྩ་གཅིག་བྱུང་ནས་ང་དང་ལྡན་གཅིག་ཏུ་ཉལ་སོང་། ནད་ཡུན་རིང་ཙམ་ལེ་ཡོང་ཡིན། དེ་དུས་གཟིགས་སྣང་དཔག་ཏུ་མེད་པ་བྱུང་འདུག་སྟེ། ཞུ་མ་སྤོབས། དེ་ནས་སྐུ་ཁམས་ཀྱང་མུས་ཀྱིས་དངས་ཏེ་དེའི་སྟོན་སྐུ་ཁམས་ཀྱང་བཟང་པོ་བྱུང་། སྟག་ཚང་བསྒྲུབ་མཆོད་ཚུགས་ཏེ། མཇལ་མཁན་ཡང་ཤིན་ཏུ་མང་བ་བྱུང་། བསྒྲུབ་དབང་གི་སྐབས་གཅིག་ཏུ། བདག་སྐུ་མདུན་དུ་ཕྱིན་ཏེ་འདི་ལྟར་ཞུས་སོ། །དེང་སང་མཇལ་མཁན་མང་བ་དང་། སྐུ་གྲིབ་བཞིན་གྱིས་སྐུ་ཁམས་ཉོག་པ་མ་བྱུང་ལགས་སམ་ཞེས་སྙུང་གསོས་སོགས་ཞུས་པས། རྗེའི་ཞལ་ནས་མི་མང་བའི་སྟོབས་ཀྱིས་ཁམས་ཅུང་ཟད་ཉོག་པ་འདུག་སྟེ། འོན་ཀྱང་དུས་ཕྱིས་ཁྱོད་ཡོད་པ་དེས་དབང་དང་བྱིན་རླབས་བྱེད་མ་དགོས་པས། ཁྱད་ཆེན་པོ་བྱུང་གསུང་ནས་དགྱེས་པའི་ཚུལ་མཛད། བསྒྲུབ་ཆེན་གྱི་དུས་སུ་འཕོ་བའི་ཞལ་གདམ་ཐོར་བུའང་འགའ་རེ་གནང་། གསང་སྔགས་ལག་ལེན་གྱི་ཆེ་བ་ཡིན་གསུང་། དེ་སང་གཟིགས་སྣང་རྣལ་ལམ་བཞིན་ཅི་ལྟར་བྱུང་ཞུས་པས། རྨི་ལམ་རྟག་ཐུབ་རང་མ་བྱུང་སྟེ། ཞག་གཉིས་གསུམ་གྱི་གོང་ཐོ་རང་ཁ་གཅིག་ལ། འདི་ལྟར་ང་ཉིད་དཔལ་འབྲས་མོ་བཤོངས་ཡིན་ཟེར་བའི། སྔར་སླེབ་པའི་ས་དང་ཡང་མི་འདྲ་བ། ས་གཞི་ཉམས་དགའ་ཞིང་ལྷུན་ཆགས་པ། ཕོ་བྲང་འོད་དུ་འབར་བ། མཐའ་སྐོར་རྩི་ཤིང་ནགས་ཚལ་མེ་ཏོག །མ་སྨོས་པའི་ལོ་ཏོག་རྣམས་ཀྱང་བཀྲ་བ་ཡིད་དུ་འོང་བའི་གནས་གཅིག་ཏུ་སླེབ་འདུག་པས། མཁའ་འགྲོ་མ་ཡིན་ཟེར་བ་མང་པོས་ཚོགས་ཀྱི་འཁོར་ལོ་བསྐོར་བ་དང་། མི་མ་ཡིན་གཞི་བདག་ཡིན་ཟེར་བ་རྣམས་ཀྱིས་ཀྱང་གུས་འདུད་བྱེད་པ་ཞིག་བྱུང་། འོན་ཀྱང་སྔ་ཐོག་གི་བག་ཆགས་ཡིན་ལས་ཆེ་གསུང་། ད་དུང་བསམས་ན་ཞིང་ཁམས་སུ་གཤེགས་པའི་མཁའ་འགྲོ་སུས་མར་འདུག །ཁྱེད་རང་ཚོ་ཡང་གནས་དེ་ཕྱོགས་སུ་འཛིན་སྤྲས་ཤེད་གང་ཆུག་དགོས་རྒྱུ་ཡིན། དེང་སང་ང་འདྲས་ཕེར་བ་ཡིན་ན་ཕ་ཁྱིམ་དུ་བུ་འགྲོ་བ་ལྟ་བུ་གཅིག་ཡོད་དེ། ལས་འཕྲོ་སྨོན་ལམ་གྱི་དབང་གིས་འདི་ཕྱོགས་སུ་ལུས་ལ་གཅིག་བྱུང་། ཞེས་གསུངས་ཏེ། འབྲས་མོ་བཤོངས་ལ་འགྲོ་བའི་ཞལ་གདམ་དང་། ནུབ་སྒོ་ནས་འཇུག་པའི་ཞལ་གདམས་ཀྱི་ཤོག་བཀྲ་གཅིག་ཀྱང་གནང་བྱུང་། ངའི་རྗེས་འཇུག་རྣམས་འབྲས་མོ་བཤོངས་དང་སྟག་ཚང་གཉིས་སུ་རྟེན་ཆོས་ཤིག་གསུང་། དེར་རྗེས་ནུབ་གཅིག་སྐུ་མདུན་དུ་ཤོག་ལ་སྡོད་གསུང་སྟེ་བསྡད་པས། ནུབ་ཟངས་ཏེ་ཁྱོད་ཀྱང་ཕར་ཚུར་འགྲོ་དགོས་མང་། ངའང་ནམ་འཆི་ཆ་མེད། ལོ་རྒྱུས་འདི་རྣམས་སེམས་ལ་ཞོག་གསུངས། སྤྱིར་འདས་མ་འོངས་ད་ལྟར་དུས་གསུམ་ཀྱི་ཞལ་བཀོད་གནང་ཞིང་། ཀཿ ཐོག་གི་དམ་པ་བདེ་གཤེགས་ནས་མན། ཡེ་ཤེས་རྒྱལ་མཚན་ཡན་ཆད་ཀྱི་རྣམ་ཐར་དང་། ལྷག་པར་ཡེ་ཤེས་འབུམ་པ་ཞིང་དུ་གཤེགས་པ་ནས་དགོངས་རྫོགས་བསྒྲུབ་ཚུལ་རྣམས་རྒྱས་པར་གནང་། བར་སྐབས་གཅིག་ཏུ་དགེ་རྩ་གང་ལས་ཀྱང་། མ་ཎི་དུང་ཕྱུར་ཚུལ་ལྡན་བྱུང་ན་དེ་རང་ཕན་ཡོན་ཆེ་གསུང་སྟེ། དུས་དང་བསྟུན་པས་ཉེར་ཅག་མི་དགོས་པ། དགེ་བའི་རྩ་བ་ཡང་དག་པ་སྟེ། ད་ལོ་དེ་ར ང་དུང་ཕྱུར་གཅིག་མི་འགྲུབ་གསུང་། བདག་གིས་ད་ལོ་རང་ཅུང་མི་འགྲུབ་ལགས་སམ། གྲགས་ཡུལ་སྟ་གོན་ཀྱང་ཅི་ཡང་མེད་ལགས་ཞུས་པས། ཅང་མི་གསུང་། བདག་གི་བསམ་པ་ལ། ཇི་ལྟར་གསུངས་པ་ཐམས་ཅད་ཞལ་ཆེམས་ཀྱི་རྣམ་ཡང་འདྲ་སྟེ། སེམས་ཅན་བསོད་ནམས་དམན་པས་ཞིང་འདི་ནས་གཤེགས་པ་ནི་ངེས་པར་འབྱུང་། དེའི་ཚེ་དགོངས་པ་མ་ཎི་རང་རྫོགས་པ་འདྲ་སྙམ་པ་བྱུང་། ཡང་བདག་གིས་རྗེ་ཉིད་གཤེགས་པ་ལྟ་བུ་བྱུང་ན། བདག་བུ་སློབ་རྣམས་ཀྱིས་བློ་གཏད་སུ་ལ་རེ་ཇི་ལྟར་བགྱི་ཞུས་པས། ཀྱེ་མ་འཆི་བ་བྱས་ཀྱང་རྣམ་རྟོག་ཡིན། །དོན་ལ་འཆི་བྱེད་སྤྲོས་དང་བྲལ། །གནས་སྐབས་མཁའ་འགྲོའི་ཚོགས་རྣམས་ཀྱིས། །རིག་འཛིན་གྲལ་དུ་འཁྲིད་པར་ངེས། །ཆོས་སྐུ་རྣམ་པར་དག་པ་ལ། །ཆོས་སྐུ་ལ་ནི་ཆོས་སྐུ་ཐིམ། །དེ་ལ་འཆི་བའི་ཐ་བསྙད་མེད། །དཔེར་ན་ཆུ་ལ་ཆུ་ཐིམ་ལྟར། །འཇའ་ཚོན་རི་མོ་ཡལ་བ་ལ། །དེ་ལ་འཆི་རྒྱུ་ག་ལ་ཡོད། །སེམས་ལ་སྐྱེ་འཆི་མེད་མོད་སྟེ། །འབྱུང་གཞི་རྣམ་པར་དག་པ་དང་། །སྒྱུ་མའི་གྲོང་ཁྱེར་ཞིག་ཚུལ་སྟོན། །རྟེན་འབྲེལ་འཚོགས་པ་གྱེས་པ་ལ། །དེ་ལ་འཆི་ཞེས་ཐ་སྙད་འདོགས། །རང་སེམས་སྐྱེ་བ་མེད་པ་འདི། །དག་པའི་ཞིང་དུ་འགྲོ་བ་ལ། །དེ་ལ་འཆི་རྒྱུ་མེད་པའོ། །དོན་ལ་འཆི་རྒྱུ་མེད་མོད་ཀྱང་། །ང་ཉིད་སོང་ཞེས་སྒྲོག་པའི་ཚེ། །ངའི་རྗེས་འཇུག་བུ་སློབ་རྣམས། །སྡུག་བསྔལ་མྱ་ངན་མ་བྱེད་པར། །ནང་དུ་རང་གི་སེམས་ལ་བལྟོས། །མ་བཅོས་རང་ཞལ་འཇལ་བའི་ཚེ། །ང་དང་འབྲལ་བ་མེད་པ་སྟེ། །རང་གི་དོན་གྱི་བླ་མ་མཐོང་། །རྫོགས་ཆེན་གནས་ལུགས་བྷཻ་པ་ཡང་། །ང་དང་འབྲལ་བ་མེད་པ་ཡིན། །བསྐྱེད་རིམས་བསྒོམ་བཟླས་བྱས་གྱུར་ན། །ང་དང་འབྲལ་མེད་ངོ་བོ་གཅིག །ཐུན་བཞིར་བླ་མའི་རྣལ་འབྱོར་བསྒོམ། །དབང་བཞི་ལེན་ཞིང་མཉམ་པར་བཞག །ང་དང་འབྲལ་བ་མེད་པའོ། །དངོས་པོ་བསོག་འཛིན་མ་བྱེད་པར། །ཅི་ཡོད་འཕྲལ་དུ་དགེ་བར་ཐོང་། །གང་བྱེད་ཆོས་དང་མཐུན་པ་ན། །དེ་ཡང་ང་དང་མཇལ་བ་ཡིན། །ཞེས་གསུངས་སོ། །དེ་ནས་ལྕགས་ཕོ་བྱི་བའི་ལོ་ཤར་བའི་ཚེ། བདག་གི་བསམ་པར་ད་ལོ་ནི་གར་ཡང་མི་འགྲོ། རྗེ་དྲུང་སྐུ་ཁམས་བསྙེལ་བ་བྱུང་ནའང་སྐུ་རིམ་ཕྱག་ཕྱི་བྱེད། ཞིང་དུ་གཤེགས་པ་བྱུང་ན་མི་མཇལ་བ་འདུག་སྙམ་ནའང་། ཡང་ཤར་ཕྱོགས་ནས་འབོད་མཁན་དོས་དྲག་བྱུང་བས་མི་འགྲོ་དབང་མེད་ལ་གཏད། འགྲོ་དུས་བྱིན་རླབས་ཞུས་ཏེ་སྨོན་བཏབ། སྐུ་ཚེའི་རྒྱལ་མཚན་བརྟན་པ་དང་། ཐུགས་དམ་གྱི་སྐྱབས་འོག་ཏུ་འཇུག་པར་ཞུ་ཞུས། ད་ལོ་མཇལ་མཁན་མང་བས་ཐུགས་སོ་བསོད་པོ་ཡང་མ་བྱུང་། དགུན་སྟོད་ཅིས་ཀྱང་སྐུ་མཚམས་དམ་པ་ཅིག་ཅེས་ཀྱང་ཞུ་ཞུས་པས། ཞལ་ནས་དེ་ཀ་བྱེད་ཁྱེད་རང་ཚོ་ཡང་མྱུར་དུ་ཡོང་བ་གལ་ཆེ་གསུང་། དེ་ལྟར་གསུངས་ཀྱང་ཕྱོགས་ནས་གྲྭ་བཙུན་འདུས་པ་རྣམས་ཆོས་འདོད་ཀྱིས་གདུངས་པ་དང་། རྗེ་གོང་ནས་ནི་གཞན་ཕན་གྱི་མཛད་པ་ཁོ་ན་ཐུགས་སུ་དགོངས་པ་ལས། མགོ་ཡུལ་ཆོས་རྗེ་དྲུང་སྐྱབ་པ་སོགས་ལ་སེམས་ཁྲིད་སངས་རྒྱས་ལག་བཅངས་རྣམས་གནང་འདུག །ཆོས་རྗེ་མདོའ་ཁྲ་བ་སོགས་སྐོར་གཅིག་ལ་མ་གཅིག་བཀའ་རྒྱ་མའི་ཁྲིད་བསྐོར་གནང་གདའ། དེར་ཡང་མ་ཚད་བྱིན་པོ་རྣམས་ལ། བླ་མ་དགོངས་པ་འདུས་པ་ལས། མན་ངག་སྙིང་པོ་གསེར་གྱི་ཡང་ཞུན་གྱི་ཁྲིད་གནང་འདུག་པའི་ཚེ། ཆོ་འཕྲུལ་ཆེན་པོ་ལྟའི་ཟླ་བ་ཧོར་ཟླ་དང་པོ་ཤར་བའི་ཚེ། སྐུ་གྲིབ་ལ་བརྟེན་པའི་གསོལ་ཐང་མི་བདེ་བར་མགུལ་མཛེར་བ་ཙམ་བྱུང་འདུག་པའི་ཚེ་ཁྲིད་གཞན་རྣམས་ནི་གྲོལ། སྙིང་པོ་ཡང་ཞུན་མ་གྲོལ་བས་གནང་པའི་འཁྱུད་དུ་ཡོད་པ་ལ། ཟླ་བ་དེའི་ཚེས་བཅུ་དྲུག་གི་དུས་རྗེ་ཡེ་ཤེས་འབུམ་པའི་དུས་མཆོད་ཡིན་པས་བཟབ་མ་མཛད། རྒྱལ་བ་རྣམས་ལ་མཆོད་པ་ཕུལ་བ་བས། བླ་མ་ལན་རེ་ཙམ་མཉེས་པ་ཕན་ཡོན་ཆེ། རིམ་ལྔ་ལས། མཆོད་པ་ཐམས་ཅད་ཡོངས་སྤངས་ནས། བླ་མའི་མཆོད་པ་ཡང་དག་བརྩམས། ཞེས་གསུང་པས་ཏེ། དེ་ལས་ཀྱང་བླ་མའི་དུས་མཆོད་འདི་རང་ཕན་ཡོན་ཆེ་གསུང་། དེའི་ཉིན་ཁྲིད་དམིགས་པ་སྤོ་རྒྱུ་ཡང་ཡིན་པས། སྤོ་གསུང་བ་ལ། ཁོང་རྣམས་ཀྱིས། སྐུ་ཁམས་ཀྱང་དངས་སྐྱེད་མ་བྱུང་བའི་སྟེང་དུ། ཅུང་ཟད་ལོད་དུ་སོང་འདུག་པས་འཐེན་པ་ཟབ་པ་འདྲ་ཞུས། དེ་ནས་སྐུ་ཁམས་ཀྱིས་མ་ལྕོགས་པས་ཁྲིད་བྱུང་གནས་འགྲོ་གསུམ་རྩད་གཅོད་པའི་སྐབས་སུ་ལུས། དེའི་དུས་གཙོ་བོར་ཕྱག་ཕྱི་ལ། ཆོས་རྗེ་མདོ་ཁྲ་བ། བླ་མ་བསོད་ནམས་བཟང་། བོན་པོ་ཆོས་སེང་གེ། གསོལ་དཔོན། གཟིམ་དཔོན་རྣམས་སྐུ་མཚམས་ཀྱི་འོག་ཏུ། ཆུག་པར་ཡོད་ཏེ། སྐུ་རིམ་ཀྱང་ཅི་མང་དུ་བྱས། མཚོ་བྱེད་ཇོ་མོ་བ་གདན་འདྲེན་བྱས། གསོལ་སྨན་གང་འཕྲོད་ཕུལ་ཀྱང་། གདང་བསྐྱེད་ནི་ཅི་ཡང་མ་བྱུང་། ཞལ་ནས་སྨན་དཔྱད་འདི་སྔར་ནས་ཀྱང་འཇུག་པ་ཆེར་མེད། རིམ་འགྲོ་འདི་དྲག་པ་ཡིན་ཏེ། ད་ལན་རིམ་འགྲོ་ཡང་ངོ་ཆེར་མི་འདུག་གསུང་། རང་རྒྱུད་པ་བཞིན་གྱི་སྙུང་བ་དོས་གྲག་རང་མི་འདུག་ནའང་། ཤུགས་ཀྱིས་སྐུ་དུབ་པ་སྐུ་ཤེད་ཀྱང་ཆུང་དུ་སོང་ནས། ཚེས་ཉི་ཤུའི་ནུབ་ཁོང་རྣམས་ཀྱིས་ཞུས་ཏེ། ཕྱག་ཕྱིར་ཉལ་དགོས་པ་འདྲ་ཞུས། ད་ལྟ་རང་མི་དགོས་ཞག་ལྔ་ཙམ་ནས་དགོས་པ་ཡོད་གསུང་། དེ་ནས་ཞག་གཉིས་སོང་ཚེ་ཁོང་གྲོགས་མཆེད་རྣམས་ཀྱིས་སྐུ་ཁམས་དགའ་མོ་མི་ཡོང་བ་འདྲ། ཁོང་དཔོན་སློབ་རྣམས་ལ་མི་གཅིག་གནང་ན་མི་ཟབ་བམ་ཞུས་པས། ཞལ་ནས་དགའ་མོ་ཡོད་ལས་ཆེ། མི་གཏོང་མི་དགོས། མ་བྱུང་ཡང་ང་མ་ཚད་ཐམས་ཅད་མི་རྟག་པའི་མཚན་ཉིད་ཡིན། ཁྱེད་རང་རྣམས་ཀྱང་འཆི་བ་མི་རྟག་པ་སྒོམས། འཁོར་བའི་ཆོས་ལ་ཞེན་པ་ལོག་པར་གྱིས། གནས་ཆེན་དང་རི་ཁྲོད་དབེན་པ་བསྟེན། ངས་ཕོག་པའི་གདམས་པ་རྣམས་རྩེ་གཅིག་ཏུ་ཉམས་སུ་ལོང་། མི་ལུས་ཆུས་མ་བསན་པར་ཚེ་གཅིག་ལ་སངས་རྒྱས་ཐོབ་པར་གྱིས་གསུང་། དེའི་ནང་པར་དེ་དབུ་མའི་རྣམ་པ་འཕྲལ་མར་ལྡང་བ་འདུག་པས། འོ་བརྒྱལ་ཡོད་པ་འདྲ་ཞུས་པས། སྔར་གྱི་ཡ་མ་དང་མི་འདྲ་བ་འདུག །ཡ་མའི་ཚུལ་བྱུང་དུས་ང་ལ་མཐོང་སྣང་དཔག་ཏུ་མེད་པ་ཡོང་པ་འདུག །ཁྱེད་ཚོས་མ་མཐོང་ངོམ་གསུང་། མ་མཐོང་ལགས། གཟིགས་སྣང་ཅི་འདྲ་བྱུང་ཞུས་པས། སྐབས་སུ་ཞིང་ཁམས་ཐམས་ཅད་མཐིང་ཁར་ཤར་ཏེ། འོད་ཁྱིམ་ཀྱང་མཐིང་ཁ། མེ་ཏོག་ཀྱང་མཐིང་ཁ་ཆེ་བ་སྦྲ་ཕུབ་ཙམ་ཆུང་བ་གཏིང་ཕོར་ཙམ་གྱིས་ཁེངས་འདུག་ཅིང་། དེ་དབུས་ལྷ་ཡང་མི་བསྐྱོད་པ་སྐུ་མདོག་མཐིང་ཁར་བཞུགས་པའི་སྣང་བ་ཤར་ཏེ་ང་རང་ཡང་འོད་ཁྱིམ་དེར་མཆོངས་ན་བསམ་པ་ཡོང་བ་འདུག་གསུང་། རེས་འགའ་ཞིང་ཁམས་མེ་ཏོག་འོད་ཁྱིམ་ཐམས་ཅད་དཀར་པོ། དེ་དབུས་རྣམ་སྣང་དཀར་པོ། དེ་བཞིན་དུ་ཞིང་ཁམས་ཐམས་ཅད་སེར་པོ། དམར་པོ། ལྗང་ཁུ་ལ་སོགས་ཤར་ཞིང་། ལྷ་ཡང་རིན་འབྱུང་སྣང་མཐའ། དོན་ཡོད་གྲུས་པ་རྣམས་གཟིགས་པ་དང་། ཞིང་ཁམས་དེ་རྣམས་སུ་ཕྱིན་ན་བསམ་པའི་སྣང་བ་ཤར་ཡོང་བ་འདུག་གསུང་། དེ་ཙམ་མ་གཏོགས་ཁོང་གྲོགས་མཆེད་རྣམས་ཀྱིས་ཀྱང་ཞུ་མ་སྤོབས་པ་འདྲ་སྟེ་འདའ་ཁ་ཞལ་ཆེམས་ལ་སོགས་ནི་ཅི་ཡང་མ་གནང་འདུག །གཟིགས་སྣང་མཁའ་འགྲོའི་བསུ་བ་ལ་སོགས་ཀྱི་ལྟས་དཔག་མེད་བྱུང་ཚོད་འདུག་གོ། །དེའི་སང་ཉི་ཤུ་ལྔའི་ཉིན་མཚོ་བྱེད་ཀྱིས་ཕྱག་རྩ་ཕུལ་དུས། བདེ་མོ་མི་འདུག་པར་རིག་སྟེ་སྡུག་བསྔལ་གྱིས་ནོན། སྔ་དྲོ་གསོལ་བ་གསོལ་ཇ་གསོལ་རག་ཡང་ཅུང་ཟད་རེ་མཆོད། ཁོང་རྣམས་ལ་དགྱེས་པའི་གསུང་ཡང་འགའ་རེ་གནང་འདུག །དེ་ནས་ཁྱེད་རང་ཚོ་ཡང་འདིར་འཚོགས་ནས་བསྡད་མི་དགོས་གསུང་། ཕྱག་གཡོན་པས་ཐུགས་དམ་འདྲེན་ཞིང་། བསྐྱེད་རིམས་ཀྱི་བསྒོམ་བཟླས་ཡུན་རིང་དུ་མཛད་དོ། །དེ་ནས་འདའ་བར་དགོངས་ཏེ། སྣང་སྲིད་སྣོད་བཅུད་ཞིང་ཁམས་ཐམས་ཅད་སྦྲ་གུར་གྱི་ཆོན་ཐག་སྡུད་པ་ལྟར། སྐུའི་བཀོད་པར་བསྡུས་ཤིང་། ཡུམ་ཉིད་ཡབ་ལ་བསྡུས། གཙོ་བོ་སྔགས་འཁོར་ལ། སྔགས་འཁོར་ཐུགས་སྲོག་ལ། ཐུགས་སྲོག་ཡིག་འབྲུ་མི་དམིགས་པས་རྒྱས་འདེབས་གནང་བ་དང་བསྟུན། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྐྱེ་འགག་གནས་གསུམ་འགྲོ་འོང་གི་མཐའ་ཐམས་ཅད་དང་བྲལ་བ་འུབ་ཆུབ་བློ་འདས་ཆེན་པོའི་ངང་དུ་བསྡུས་པའི་རྟགས་སུ་ཕྱག་གཡས་པས་སེ་གོལ་ལན་གསུམ་ཏོག་པ་གནང་། དེ་ནས་འཁོར་འདས་ཀྱི་ཆོས་ཐམས་ཅད་དབྱེར་མེད་ཟུང་འཇུག་ཆེན་པོའི་བརྡར་ཕྱག་གཉིས་ཐུགས་ཁར་བསྣོལ་ཏེ། དགོངས་པ་ཆོས་དབྱིངས་སུ་ཐིམ་མོ། ༈ །ཚད་མེད་ཐུགས་རྗེ་ཡངས་པའི་དཀྱིལ་འཁོར་རྒྱས། སྨིན་གྲོལ་བཀའ་དྲིན་གསོལ་བའི་འོད་འཕྲོས་པས། མུན་བསལ་བློ་ཡི་པད་མོ་ཁ་ཕྱེ་ནས། གདུལ་བྱའི་རི་ལ་ཉེ་བར་ནུབ་ཚུལ་བསྟན། ཤེས་རབ་མཁའ་ལ་ཐབ་ཚོགས་ཆུ་འཛིན་འཁྲིགས། སྤོབས་པའི་གློག་འགྱུ་ཟབ་བརྗིད་འབྲུག་སྒྲ་སྒྲོག །གདུལ་བྱའི་ལོ་ཐོག་རྒྱས་མཛད་ཐུགས་རྗེའི་སྤྲིན། ཆོས་སྐུའི་མཁར་དེངས་མྱ་ངན་འདས་ཚུལ་བསྟན། ཅེས་པས། དེ་ལྟར་སྐུ་གཤེགས་ནས། ཁོང་རྣམས་ཀྱིས་མཆོད་ཡོན་རྒྱུན་མི་འཆད་ཕུལ། བདག་མ་སླེབ་ཀྱི་བར་དུ། གསང་སྒྲོག་དམ་པར་བྱས་ཏེ། རྐང་མགྱོགས་པ་བཏང་བྱུང་ནའང་། བདག་སྦྱིན་བདག་གིས་གོར་ཐེབས་པས་དུས་ལ་མ་ཐོན་བྱུང་བས། དེའི་ཚེ་རྟགས་ཀྱང་། ནམ་མཁའ་ལ་གཡའ་དག་པ་དང་། འཇའ་འོད་ཀྱི་གུར། སྒྲ་དང་ཐུག་ཆོམ་བར་བིར་དུ་བྱུང་། ཁྱད་པར་ཞག་བཞི་སོང་དུས་ཐུགས་དམ་གྲོལ་པའི་རྟགས་དབུ་གཙུག་ཏུ་ཟིལ་པ་ཕྲོམ་ཡེ་བྱུང་འདུག་དུས། ཁོང་རྣམས་ཀྱིས་བཞུགས་ཁྲི་སྟོད་དེ། ཉེར་དགུའི་ཉིན་གདན་འདྲེན་ཞུས་པས། ས་ཆེན་པོ་ཡང་རབ་ཏུ་གཡོས། ཀུན་ཏུ་གཡོས། དེ་ནས་སྐུ་ལ་དར་ཟབ་ལོངས་སྤྱོད་རྫོགས་པའི་རྒྱན་གྱིས་མངའ་གསོལ། ཕྱག་གཉིས་ཐུགས་ཁར་རྡོ་རྗེ་དྲིལ་བུ་འཛིན་པར་མཛད་དེ་བཞུགས་སུ་གསོལ། དུས་བཟང་རྣམས་སུ་གདུང་ལ་དྲི་བཟང་འཐུལ་བ་དང་། གསོལ་བ་བཏབ་པས་རྟོགས་པ་ཁྱད་པར་ཅན་རྒྱུད་ལ་སྐྱེས་ཟེར་རོ། །གཤེགས་ནས་ཞག་ཉེར་གཅིག་ཧོར་ཟླ་གཉིས་པའི་ཉའི་ནུབ་དགོངས་བདག་སྐུ་གདུང་དང་མཇལ། དེ་ནས་ཞག་གཉིས་སོང་བའི་ཚེས་བཅུ་བདུན་གསང་བརྟོལ། གྲ་བཙུན་ཡོན་བདག་རྣམས་ལ་ཡུར་མཇལ་བཏང་བས། ཐམས་ཅད་སྡུག་བསྔལ་གྱི་གཙོན་རར་ཚུད། མྱ་ངན་གྱིས།་འདམ་དུ་བྱིང་། གདུང་ཤུགས་ཀྱི་སྨྲེ་སྔགས་འདོན་ཞིང་མཆི་མ་རླག་གོ། །ཀྱེ་མ་ཀྱེ་ཧུད། པདྨ་འབྱུང་གནས་རྒྱལ་ཚབ་ཉི་མ་སྟེ། །དུས་ཀྱི་རྒྱལ་པོ་བྱི་ལོ་ཤར་བའི་ཚེ། །ཆོ་འཕྲུལ་ཆེན་པོའི་ཟླ་བ་ཉེར་ལྔ་ལ། །སངས་རྒྱས་ཉི་མ་གདུལ་བྱའི་སྣང་ངོར་ནུབ། །ནམ་མཁའ་གཡའ་དག་འཇའ་འོད་གུར་དུ་ཕུབ། །སྒྲ་དང་ཐུབ་ཆོམ་ས་རྣམས་རབ་ཏུ་གཡོས། །འགྲོ་བའི་ཉི་མ་སྟག་ཚང་དག་ཏུ་ནུབ། །དགོས་འདོད་ནོར་བུ་ཆོས་དབྱིངས་རྒྱ་མཚོར་སྟོར། །ཤེས་རབ་སྒྲོན་མེ་དུས་ཀྱི་རླུང་གིས་བསྐྱོད། །སའི་སྐྲག་ཉམས་ཐར་པའི་གྲོང་ཁྱེར་ཞིག །འདི་འདྲའི་བཤེས་གཉེན་རྙེད་པར་ག་ལ་འགྱུར། མི་རེའི་ཁོང་ནས་སྙིང་རེ་བུད་དོ་རྗེ། །འོད་གསལ་ཉི་མ་ནུབ་པར་གྱུར་པ་ལ། །ལྟ་ངན་མུན་པ་སུ་ཡིས་སེལ་ནུས་སམ། །གྲུ་ཆེན་རྒྱ་མཚོར་ཞིག་པར་གྱུར་པ་ལ། །ཆུ་བོ་བཞི་ལས་གང་གིས་སྒྲོལ་བར་ནུས། །བདག་སོགས་རྗེས་འཇུག་བླ་སློབ་གདུལ་བྱ་ཡི། །འཕྲིན་ལས་ཆུ་རྒྱུན་རབ་ཏུ་ཆད་པ་ལ། །གདུལ་བྱའི་མྱུག་གུ་གང་ནས་སྐྱེ་བར་འགྱུར། །ཀྱེ་ཧུད་སྐྱེ་མཆོག་ཆེན་པོ་གང་དུ་གཤེགས། །བདག་སོགས་རྗེས་འཇུག་བུ་སློབ་ཐམས་ཅད་ལ། །རྗེས་སུ་བཟུང་ཞིང་བྱིན་གྱི་བརླབ་ཏུ་གསོལ། །དེ་ནས་རང་གི་བུ་སློབ་རྣམས་ཀྱིས། སྐུ་གདུང་གཞུའམ་བཞུགས་བསྡུར་བས། སྟག་ཚང་བླ་མ། གྲྭ་སྒྲེས་བསོད་དབང་ཕྱུག་སོགས་ལྷོའི་བུ་ཆེན་རྣམས་ནི། གདུང་བཞུགས་ན་གདན་སའི་གཞི་ཡིན་པས། རྗེས་འཇུག་མོས་པའི་རྟེན་དང་། ས་ཕྱོགས་དང་ཡུལ་རིས་སུ་བཀྲ་ཤིས་པ་དང་བྱིན་རླབས་འབྱུང་ཟེར་བ་འདུག་ཀྱང་། བདག་རང་གི་བསམ་ཚོད་ཕྱིས་ཞབས་ཏོག་བསྒྲུབ་མཁན་ཀྱང་ཅི་འདྲ་ཡོང་ཡིན། རང་བྱ་བྲལ་གྱི་ཚུལ་མཐའ་གཅིག་ཏུ་མ་ངེས་པས་བཞུས་པ་ལེགས་བསམ་ཏེ། ཐག་བཅད་དེ་ནུབ་རང་ནས་གཟིམ་ཁང་སྟེང་དུ་དཀྱིལ་འཁོར་སྤུར་ཁང་བཞེངས། སྦྱིན་བསྲེག་མཆོད་པའི་ཡོ་བྱད་རྣམས་བསགས་ནས་བཞུས་པ་དང་། ནམ་མཁའ་གཡའ་དག་པ་དང་། ཤར་ཕྱོགས་ནས་འཇའ་དཀར་རྣམ་བུ་བརྐྱང་པ་ལྟ་བུ་ཟུག་བྱུང་། ཡུར་སྟོན་ཀྱང་རྒྱས་པར་བྱས། དེ་ནས་ཞག་ཉེར་གཅིག་གི་བར་དུ་གཙུག་ལག་ཁང་དུ་དགེ་འདུན་ཆོག་ཤེས་རྣམས་བསྡུས་ཏེ། ཆོ་ག་མཆོད་འབུལ་གསོལ་འདེབས་ཀྱི་ཐུགས་དམ་བཙུགས། བདག་ཅག་ཉུང་འདུས་ཀྱིས་ཀྱང་གདུང་ཁང་གི་སྐུ་མདུན་དུ་མཆོད་འབུལ་མ་ཆག་པར་བྱས། དེ་དུས་ཀྱི་ཐོ་རངས་ཁ་གཅིག་ལ་བདག་གིས་བླ་མའི་རྣལ་འབྱོར་དབང་བཞི་བླངས་རྗེས། གཉིད་དུ་དུམ་ཙམ་སོང་བའི་རྨི་ལམ་དུ། རྗེ་ཉིད་བཞུགས་ཁྲི་སྟེང་དུ་བཞུགས་པ་གཅིག་མཐོང་སྟེ་བསམ་པ་ལ་རྗེ་ཞིང་དུ་གཤེགས་ནས་གདུང་ཀྱང་གཞུས་གྲུབ་པ་ལ། ད་ལན་མཇལ་བྱུང་བ་རྨི་ལམ་ཡིན་པ་འདྲ་སྙམ་སྟེ། རྨི་ལམ་འཛིན་པའི་འདུན་པ་ཡང་ཅུང་ཟད་བྱུང་དུས། ཞལ་ནས་སོག་ཅུས་ཀྱི་དར་ཡོལ་དེ་ཉར་ཅག་གྱིས་གསུངས་པའི་བརྡའ་ཆོས་ཅིག་གནང་བྱུང་། དེར་རྗེས་སྐུ་སྐྱེ་བཞེས་པར་ཨེ་གནང་ཞུས་པས། གསུང་བའི་གྲབས་གཅིག་ལ་གཞན་རྐྱེན་གཅིག་གིས་གཉིད་སད་པར་གྱུར། དེ་ནས་ཆོ་ག་གྲོལ་ཏེ་ཧོར་ཟླ་གསུམ་པའི་ཚེས་བརྒྱད་ལ། ལྷོ་བོད་ཀྱི་གྲྭ་སློབ་བུ་ཆེན་ཐམས་ཅད་ཞུས་འབུལ་ལ་དེ་གོང་དུ་འདུས་ཏེ། དབྱིངས་ཆེ་བ་རྣམས་ལ། རྟེན་མཆོད་ཀྱི་ཐོག་དྲངས་འབུལ་བ་ལྔ་ཚན་སུམ་ཚན་སོགས་བྱས། བྱིན་པོ་གྲྭ་བཙུན་བཞི་བརྒྱ་ཙམ་འཚོགས་པ་ལ། དངོས་པོ་རྟ། ཟངས། གསེར། དངུལ། ལྕགས་ཆ། རས་ཆ། རྣམ་ཕྲུག །དར་རས་སོགས་ལ་སྤྱད་པའི་སྟག་ཚང་གི་ཁལ་རེའི་རྩིས་ཐོབ་པར་བྱས་སོ། །དེ་ནས་གདུང་ཁང་བཀྲོལ་ཏེ། ཆོས་ཀྱི་སྐུར་ཐིམ་པ་ལ། ནམ་མཁའ་གཡའ་དག་པ་ཙམ་མ་གཏོགས་རྟེན་ལྷག་པར་འབྱོན་པར་མ་བཤད་ནའང་། འོན་ཀྱང་གདུལ་བྱ་རྣམས་མོས་པ་བསྐྱེད་ཕྱིར་དུ་རྟེན་ལ། གདོད་ནས་དག་པའི་སྐུ་འགྱུར་མེད་ཐོབ་པའི་རྟགས་སུ། ཕྱག་ངར་ནས་ཀན་ཏུ་བཟང་པོའི་སྐུ་གཅིག །སྐྱེ་བ་མེད་པ་འགགས་མེད་གསུང་མཆོག་ཐོབ་པའི་རྟགས་སུ། དབུ་ཐོད་ལས་ཡི་གེ་ཨ་གཅིག །རྒྱལ་བ་ཀུན་དང་ཐུགས་གཉིས་སུ་མེད་པའི་རྟགས་སུ། གདུང་ཆེ་བ་སྲན་མ་ཙམ་གཅིག་དང་། གཞན་ཡང་རིང་སྲེལ་དཔག་ཏུ་མེད་པ་བྱོན་ནོ། །དེ་ནས་ཟླ་བ་བཞི་པའི་ནང་དུ། དཔོན་མོ་ཆེ་དབང་རྒྱལ་གདན་དྲངས་ཏེ། གཟིར་མལ་གྱི་སྐུ་ལི་མ་ཁྲུ་གང་བ་གཅིག་དང་། གཙུག་ལག་ཁང་གི་སྟེང་དུ་སྤུར་ཁང་གི་ས་དང་གདུང་སོལ་རྣམས་ལས་གྲུབ་པའི་རྣམ་རྒྱལ་མཆོད་རྟེན་ཐོག་ཚད་མ་གཅིག་བཞེངས་ཏེ། དེ་གཉིས་ཀྱི་ནང་དུ་སྐུ་གདུང་རིང་སྲེལ་ཡང་དཔག་མེད་བཞུགས། དཔོན་ཡང་ཡོན་གྱིས་མཉེས་པར་བྱས། དེ་ནས་ཧོར་ཟླ་ལྔ་པའི་ནང་དུ་བོད་དུ་ཡོངས་ཏེ། ཕྱི་རྟེན་བྱང་ཆུབ་མཆོད་རྟེན་ཐོག་སོ་གསུམ་པ་གཅིག་བཞེངས་ཏེ་བྱིན་བརླབས་ཀྱི་རྟེན་ཡང་ཡང་དག་བཞུགས། ངོ་མཚར་གྱི་ལྟས་གདུགས་ཕུབ་ཚེ་གཟོ་བོའི་ཉམས་ལ་རྗེ་རང་གི་ཕྱག་གི་སྙབས་ཏེ་ཕུབ་པའི་ཉམས་སྣང་བྱུང་བ་དང་། འཇའ་ཚོན་གྱི་གུར་ཕུབ་མེ་ཏོག་གི་ཆར་བབ་བོ། །རྗེའི་ཟླ་མཆོད་ཀྱི་སྟེང་དུ་འབྲིང་འཚམས་ལྷོ་བྱང་གི་གྲྭ་སློབ་རྣམས་ལ་འགྱེད་སྐལ་དང་། གྲྭ་ཚང་དགོན་པ་དབུ་རྩེ་རྣམས་སུའང་ཚོགས་མང་ཇ་འགྱེད་ཆས་ཕུལ་ལོ། །དེ་ནས་ཧོར་ཟླ་དྲུག་པའི་ནང་དུ་ནི། སྤྱན་རས་གཟིགས་དབང་བོད་ཡུལ་མིར་སྤྲུལ་སྐྱེ་བ་ཡང་ཡང་དུ་བཞེས་པ། སྐུ་སྐྱེ་བ་བརྒྱད་པ་མི་བསྐྱོད་རྡོ་རྗེའི་དྲུང་དུ། རང་ལ་གང་ཡོད་རྣམས་ཁྱེར་ཏེ་ཕྱིན་པས་གཞིས་ཁ་རིན་དཔུངས་སུ་མཇལ། སྐུ་གསུང་ཐུགས་རྟེན་ཕྱག་དྲིལ་དུང་དཀར་ཆ། ཡོལ་བ་བླ་བྲེས་ཏིང་ཁེབས། མཎྜལ་ཏིང་བདུན་ཚར་སོགས་མཆོད་ཆ་ཚང་མ། གསོལ་དཀར་ཁྲོ་ཟངས་ལ་སོགས་ཐབ་ཆས་ཚང་མ། འཆིབས་པ་ནོར་བུ་རྒྱལ་གྱིས་གཙོ་བྱས་རྟ་ཕོ་བརྒྱད། གཡུ་ཆེན་བཟང་བ་གཅིག་གིས་གཙོ་བྱས་གཡུ་ལྔ། གསེར་ཞོ་གསུམ། འབྲས་ཏང་ཉེར་ལྔ། སྤེན་འདོག་བུབས་ཉི་ཤུ་ལ་སོགས་དར་རས་ཡུག་མང་བ། གྲྭ་བཙུན་དཔོན་སློབ་ཉིས་བརྒྱ་ཙམ་ཡོད་དེ། རང་གི་རས་ལྕགས་ཤུ་གུ། རྣམ་ཕྲུག་སོགས་ཆེ་ཡོད་ཆུང་ཡོད་སྡོམས་ནས་ཕུལ་བས། རྗེ་ཆོས་ཀྱི་དབྱིངས་སུ་ཐིམ་པ་ལ་མཐོ་དམན་མེད་མོད་ཀྱང་། སྤྱིར་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། སེམས་ཅན་རྣམས་ལ་བདེ་སྐྱིད་འབྱུང་བ་དང་། ཁྱད་པར་རྗེ་གོང་ནས་ནི་དགོངས་པ་ཟག་མེད་གོང་ནས་གོང་དུ་རྫོགས་ཕྱིར། རྒྱལ་བའི་དབང་པོ་ཀརྨ་པས་དབུ་ཞྭ་འཛམ་གླིང་གཡས་བཞག་བཞེས་ཏེ་བསྔོ་བ་ཡང་དག་གནང་། རྗེ་ཐམས་ཅད་མཁྱེན་པ་གཙང་ཕྱོགས་སུ་ཕེབས་ནས་འབུལ་བ་བཟང་ཤོས་སུ་བྱུང་ཟེར་བའི་སྙན་པ་ཕྱོགས་བཅུར་ཁྱབ་པར་གྱུར་རོ། །དེ་ནས་ངུར་སྨིག་སྒྲོན་མ་ལ་དཀར་མེ་བརྒྱ་ཕྲག་ཙམ་ཕུལ། ཡར་མར་གྱི་ལམ་དུ་ཆོས་རྗེ་བསོད་ནམས་མཆོག་གྲུབ་པ་སོགས་ཉང་སྟོད་རོང་ཕྱོགས་མགོ་ཡུལ་ཕྱོགས་སོགས་ཀྱི་བུ་ཆེན་ལྷོར་མ་བྱོན་པ་རྣམ་ལ་རང་རང་གི་བྱིན་རླབས་འབུལ་འགྱེད་ཀྱི་སྐུ་སྐལ་སོ་སོར་ཕུལ། གནས་སྙིང་ཆོས་སྡེར་འབྲས་ཚ་དང་། མཁན་པོའི་དྲུང་དུ་སྐུ་གསུང་ཐུགས་རྟེན། སྟག་གཟིག་གུང་གསུམ་གྱི་འབུལ་བ་བྱས། དེ་ནས་ཟླ་བ་བདུན་པའི་ནང་དུ་ལ་སྟོད་བར་འགྲོག་ཏུ་ཕྱིན་ནས་ཁོང་རྣམས་ལ་ཚོགས་དང་འགྱེད་སྐལ་རྣམས་བྱས། ནང་རྟེན་གྱི་ཟངས་རྒྱུ་རྣམས་ཀྱང་བརྩོན་བསྒྲུབ་འབད་པ་སྟོན། ཟླ་བ་བརྒྱད་པའི་ནང་དུ་ཟར་སྟག་ནས་ཡོངས་ཏེ། བྱང་ཕུག་ཇོ་བོ་ལ་གསེར་ཆབ་གསོལ། སྙན་དར་དཀར་མེ་ཕུལ། གསེར་སྟོན་བཟབ་མ་བྱས། ཧོར་ཟླ་དགུ་པའི་ནང་དུ་འབྲིང་མཚམས་མགོ་ཡུལ་ཕྱོགས་བརྒྱུད་ནས་ལྷོར་སླེབ། བོད་ཕྱོགས་ནས་དད་འབུལ་རྟེན་བཞེངས་ལ་ཕན་པའི་དད་འབུལ་ཀྱང་ཡང་དག་བྱུང་། དེ་དང་མཚུངས་པར་བཟོ་རིག་པའི་གནས་ལ་མཁས་པ་བལ་པོ་ལོ་སྐུ་གླུ་སོགས་བཞི་གདན་དྲངས་ཏེ། ཟླ་བ་བཅུ་པའི་ཚེས་གཅིག་ལ་གཟོ་ཚུགས། ལྷོ་ཕྱོགས་ནས་གྲྭ་བཙུན་ཡོན་བདག་རྣམས་ཀྱིས་གསེར་སོགས་ཀྱི་འབུལ་བ་བློས་མི་འཁྱུད་པ་བྱུང་སྟེ། དཔོན་སློབ་གྲོས་སུ་བསྟུན་ནས། ཨོ་རྒྱན་གྱི་མཁན་པོ་པདྨ་འབྱུང་གནས་ཀྱི་སྐུ་ཁམས་གསུམ་ཟིལ་མནོན་དུ་གྲགས་པ་བརྒྱ་མཐོ་བཅུ་གཅིག་པ་གཅིག་དང་། གསེར་འབུམ་མཐོང་བ་དོན་ལྡན་བརྒྱ་མཐོ་དྲུག་པ་གཅིག །སྐུ་འདྲ་འགྲོ་དོན་མ་གཟོ་ཕུད་མ་གཅིག་རྣམས་གསེར་ཟངས་ལས་གྲུབ་པ། བལ་པོའི་བཟོ་ཁྱད་ཀྱིས་མངོན་པར་མཐོ་བ། གླང་ལོ་ཟླ་བ་དང་པོའི་ཁོངས་སུ་སྐུ་ཆེ་བ་གྲུབ་ཅིང་། དུས་མཆོད་ཆེན་མོ་ཡང་ཤིན་ཏུ་བཟབ་པར་བྱས། ཡོངས་སུ་དྲིལ་བའི་རབ་གནས་དངོས་གཞི། ཟླ་བ་གཉིས་པའི་ཚེས་ཉི་ཤུ་ལ་གཙུགས་ཏེ། དགའ་སྟོན་བཀྲ་ཤིས་རྣམས་ཉེར་ལྔ་ཚུན་ལ་གྲུབ་པར་བགྱིས་སོ། །བལ་པོ་རྣམས་ཡོན་རྫོངས་ཀྱིས་མཉེས་པར་བྱས། ཞིབ་ཏུ་དཀར་ཆག་ཀྱི་ནང་དུ་གསལ། དེ་ནས་གསེར་ལྷག་རྟ་དང་དངུལ་སྤྱད་ལྕགས་དང་དར་རས་སོགས་གང་ཡོད་རྣམས། བོན་པོ་བསོད་ནམས་ཡེ་ཤེས་གྲོགས་མཆེད་ལ་བསྐུར་ཏེ། ལྷ་ས་ཇོ་ཤཱཀ་དྲུང་དུ་གསེར་ཆབ་དཀར་མེ་སྙན་དར་འབུལ་བ་སོགས་གསེར་སྟོན་རྒྱས་པ་བྱས་འདུག །དཔལ་གྱི་བསམ་ཡས་སུ་དཀར་མེ་རྒྱུ་སྣུམ་ནག་གཙོ་ཆེ་བ་མར་ཁལ་བརྒྱའི་རྩིས་ཕུལ་ཞིང་སྙན་དར་སྒྲོན། དགེ་བའི་སྟོབས་ཤིན་ཏུ་རྒྱ་ཆེ་བ་འགྲུབ་བོ། །དཀར་པོ་བ་རབ་འབྱམས་པ་ལའང་རྟ་ཕོ་བཟང་བ་གཅིག་གིས་གཙོས་པའི་ལྔ་ཚན་ཙམ་ཕུལ། དེ་བར་བདག་རྣམས་ཀྱིས་རྒྱུ་དངོས་གང་འདུག་རྣམས་ལྷག་ལུས་མེད་པར་བྱེད་སྙམ་སྟེ། གསུང་རྟེན་ཚབ་ཏུ། མ་ཎི་དུང་ཕྱུར་གཅིག་རེ་ཞིག་བཏང་དགོས་བསམ་ཞིང་། རྗེ་ཞལ་བཞུགས་པའི་དུས་ཀྱང་དགོངས་པ་མ་ཎི་ལ་མཉེས་པ་ཡོད་པས། དགེ་འདུན་བརྒྱ་ཙམ་ལ་དུང་ཕྱུར་བཏང་སྟེ། ཞབས་ཏོག་འབུལ་བ་གྱ་ནོམ་པ་བྱས་ཀུན་མཉེས་པར་གྱུར་ཏོ། །དེ་ནས་བོད་དུ་ཡོངས་ཏེ། ཆོས་རྗེ་གྲུབ་ཆེན་པ། ཆོས་རྗེ་མདོ་ཁྲ་བ། དབུ་མཛད་དགེ་འདུན་རྒྱ་མཚོ། ཆོས་མཛད་ཆོས་རྒྱལ་བ་སོགས་ཀྱིས། ལ་སྟོད་མན་འབྲིང་མཚམས་ཡན་གྱི་གྲྭ་སློབ་རྣམས་ཀྱིས། གུ་རུ་མཚོ་སྐྱེས་རྡོ་རྗེའི་སྐུ་རྒྱ་མཐོ་དྲུག་པ་གཅིག་དང་། སྐུ་འདྲ་རྣམས་གསེར་ཟངས་ལ་གྲུབ་པ། སྤྲུལ་སྐུ་སྟག་རྩེ་བ་གདན་དྲངས་ཏེ་བཞེངས་སུ་གསོལ། བདག་རྣམས་ཀྱིས་ཀྱང་ཆོས་རྗེ་རི་ལུང་སྦུག་པ་དང་། སྤྲུལ་སྐུ་ཏིང་ཁེབ་པ་རྣམས་སྤྱན་དྲངས་ཏེ། ཆོས་སྡིངས་མཆོད་ཁང་དུ་ཞིང་ཁམས་བཅྭོ་ལྔ་ཙམ་བཞེངས། རབ་གནས་དུས་མཚུངས་སུ་ཟླ་བ་བདུན་པའི་ཉེར་བདུན་ལ་བྱས་ཏེ། གནམ་གང་ཚུན་དགའ་སྟོན་དང་བཅས་པ་གྲུབ་བོ། །རྒྱས་པར་དཀར་ཆག་ནས་མཚོན་ནོ། །སྤྲུལ་སྐུ་རྣམས་སོར་སོར་ཡོན་གྱིས་མཉེས་པར་བྱས། དེ་ཡན་ཟླ་མཆོད་ཀྱང་གཞི་བྱེས་གང་དུའང་མ་ཆག་གོ། །ད་དུང་ཀྱང་རང་གི་ཅི་ཡོད་ཐམས་ཅད་བླ་མའི་དགོངས་པ་རྫོགས་ཐབས། རང་གི་ཚོགས་བསག་སྒྲིབ་སྦྱངས་ཁོ་ན་བགྱིད་བསམ་པའི་འདུན་པ་དྲག་པོ་འཆིས་སོ། །རྗེའི་དགོངས་རྫོགས་རྣམས་ཀྱང་རེ་ཞིག་མཐར་ཐོན་ནོ། །ཀྱེ་མ་བྱི་ལོ་ཧོར་ཟླ་དང་པོའི་ཉེར་ལྔ་ལ། །འདྲེན་མཆོག་དམ་པ་ཆོས་ཀྱི་དབྱིངས་སུ་ཐིམ། །དེ་ནས་བཟུང་སྟེ་གླང་ལོ་ཟླ་བ་ནི། །བདུན་པ་མན་དུ་བདག་སོགས་རྗེས་འཇུག་གིས། །དགོངས་རྫོགས་ཟླ་མཆོད་འབུལ་བགྱིས་རྟེན་བཞེངས་གྲུབ། །ལེགས་པ་བགྱིས་པའི་དགེ་བའི་རྩ་བ་འདིས། །དཔལ་ལྡན་བླ་མའི་དགོངས་པ་རྫོགས་པ་དང་། །རྗེས་འཇུག་རྣམས་ཀྱིས་ཚོགས་བསགས་སྒྲིབ་བྱང་ནས། །ཀུན་ཀྱང་དཀྱིལ་འཁོར་གཅིག་ཏུ་འགྲུབ་པ་ཤོག །ཨེ་མ་གདོད་ནས་རྣམ་དག་རྒྱ་མཚོ་ཆེན་པོ་ལ། །སྐུ་གསུམ་ཡོན་ཏན་ཕྲིན་ལས་གཏིང་མཐའ་ཟབ། །བདག་བློ་རྨོངས་པས་རྟོགས་པར་ག་ལ་འགྱུར། །འོན་ཀྱང་དད་མོས་གདུང་ཤུགས་དྲག་པོ་ཡིས། །མྱ་ངན་འདས་པའི་རྣམ་ཐར་ཆུ་ཐིག་ཙམ། །བླང་བའི་དགེ་བས་མཁའ་མཉམ་འགྲོ་བ་ཀུན། །ཀུན་བཟང་བླ་མའི་གོ་འཕངས་མྱུར་ཐོབ་ཤོག །ཞེས་པ་འདི་ཉིད་ཁོ་བོ་རྣམ་གྲོལ་ཡེ་ཤེས་བཟང་པོས། དཔལ་འབྲས་མོ་བཤོངས་ཀྱི་ནུབ་སྒོ་གངས་ཆེན་མཛོད་ལྔ་སྟག་རྩེའི་ཞོལ། དགེ་རྒྱས་འཇག་མ་ལུང་གི་ཕུ། དགེ་ལེགས་སྨན་བཟང་གི་མདུན་དུ་སྦྱར་བ་འདི་དགེ་ལེགས་སུ་གྱུར་ཅིག །བཀྲ་ཤིས་པར་བྱོན་ནོ།། །།