ཆོས་འབྱུང་བསྟན་པའི་སྒྲོན་མེ་རྩོད་བཟློག་སེང་གེའི་ང་རོ།

ཆོས་འབྱུང་བསྟན་པའི་སྒྲོན་མེ་རྩོད་བཟློག་སེང་གེའི་ང་རོ་ཞེས་བྱ་བ་བཞུགས་སོ། །ༀ་སྭ་སྟི་སིདྡྷི། ན་མོ་གུ་རུ་བྷུདྡྷཱ་ཡ། དྷརྨཱཿསཾ་གྷཱ་ཡ། སརྦ་སིདྡྷི་ཧཱུྃ། ཐུབ་དབང་སྟོབས་སོགས་ཡོན་ཏན་ཀུན་གྱི་མཛོད་མངའ་བ། །ཇི་ལྟ་ཇི་སྙེད་མཁྱེན་པའི་ཡེ་ཤེས་མངོན་གྱུར་ཅིང་། །ཡན་ལག་བཅུ་གཉིས་སྲིད་རྩའི་ཉོན་མོངས་རབ་ཞི་ཞིང་། །བདེན་པ་གཉིས་ཀྱི་ཡང་དག་དམ་ཆོས་རིན་ཆེན་དང་། །ཉན་ཐོས་སྡེ་གཉིས་སྟོན་པའི་བསྟན་པ་རབ་འཛིན་ཅིང་། །འཕགས་པའི་དགེ་འདུན་ཚོགས་དང་དེར་སློབ་བཅས་པ་ལ། །བདག་གིས་ཐལ་མོ་སྤྱི་བོར་ཅོད་པན་འཛིན་པས་ནི། །སྐྱབས་མཆོག་དེ་དག་ཞབས་སེན་ཉིན་འབྱེད་ལྟར་དམར་བ། །སྒོ་གསུམ་དད་པས་རྟག་ཏུ་དེ་ལ་འདུད་ཅིང་བསྟོད། །ཆོས་དབྱིངས་རྣམ་དག་དབྱིངས་ཀྱི་རང་བཞིན་མཁའ་ཁྱབ་གཞིར། །ཀུན་འབྱུང་རིག་པའི་ས་འཛིན་ལྷུན་གྲུབ་ཕྱོགས་ལྷུང་བྲལ། །འོད་གསལ་སྙིང་པོའི་རྟ་བདུན་ཐུགས་རྗེའི་ཚ་ཟེར་འཕྲོ། །སྐལ་བཟང་འགྲོ་བའི་པདྨོའི་རྣམ་དཀར་འབྲས་བུའི་ཚལ། །དགའ་བའི་དྲི་བསུང་སྐུ་བཞིའི་རྣམ་པར་རབ་ཏུ་འབྱེད། །བློ་གྲོས་མཁྱེན་པའི་རྐང་དྲུག་འདོད་པའི་ནོར་བུས་ཚིམ། །སྐྱབས་གསུམ་འདོད་པའི་དོན་གྲུབ་ཆུ་འཛིན་ཁྱབ་ཆེ་ཞིང་། །གདུལ་བྱའི་ཚལ་དུ་བརྩེ་ཆེན་ཐུགས་རྗེའི་ཆར་གྱིས་འགེངས། །ཤེས་དང་ཤེས་བྱའི་ཀུ་མུད་མུན་པའི་གྲྭ་ཟླུམ་ཀྱང་། །འདི་རྟོག་རི་ཝོང་འཛིན་རྒྱལ་ཀུན་ནས་རྣམ་མཁྱེན་པས། །མ་རིག་མུན་པའི་ཀུ་མུད་ཤེས་གསལ་རབ་ཏུ་ཕྱེད། །བདག་བློའི་སེམས་བསྐྱེད་ཆུ་འཛིན་ཁྲིའི་གནས་ཆེན་དེ། །ཕན་བདེའི་རླུང་གིས་བརླབས་ཆེན་གཡོ་བའི་རང་བཞིན་ཉིད། །རྗེས་འཇུག་རྣམས་ལ་ཡིད་བཞིན་ནོར་བུས་ཀུན་ཏུ་རྒྱལ། །རྟོགས་དང་མ་རྟོགས་ལོག་རྟོག་ཕྱོགས་འཛིན་གྱིས། །ཐམས་ཅད་མཁྱེན་པར་མ་གྱུར་དེ་བར་དུ། །ཇི་སྲིད་འཇུག་པའི་འདུ་ཤེས་ཡོད་ཀྱི་བར། །དེ་སྲིད་འདོད་པའི་ཆོས་ནི་མི་འཛད་ཅིང་། །ལུང་དང་རིག་པས་སོ་སོར་འཐེན་པ་ན། །གང་ལྟར་འདོད་འཛིན་དེ་ལྟར་བཏུབ་ན་ཡང་། །རྒྱལ་བས་གསུངས་པའི་ཚད་བཟུང་ནམ་མཁའི་མཐའ། །འཕགས་པས་ཀྱང་ནི་དེ་ཡི་རྡུལ་ཆ་ཙམ། །རྟོགས་ཤིང་འདི་ཞེས་དཔྱོད་པར་མི་ནུས་ན། །རང་རྒྱུད་སོ་སོའི་སྐྱེ་བོས་ལྟ་ཅི་སྨོས། །ལོ་ཙཱ་ལ་སོགས་བོད་ཀྱི་མཁས་པ་རུ། །བཞེད་པ་རྣམས་ཀྱང་སོ་སོའི་སྐྱེ་བོའི་བློས། །རང་ཆེ་འདོད་ཅིང་གཞན་ཕྱོགས་འགེག་པ་དང་། །ཁེ་དང་གྲགས་པའི་རྙེད་འདོད་ཕྱོགས་སྔ་ཡིས། །གསར་རྙིང་གྲགས་ཤིང་དག་དང་མ་དག་གིས། །ཕྱོགས་སྔའི་འདོད་འཛིན་དུ་མ་བྱས་པ་མཐོང་། །དེ་ཕྱིར་བདག་བློ་གཟུ་བོ་གཞིར་བཞག་སྟེ། །ལོག་ལྟའི་རྩོད་བཟློག་སེངྒེའི་ང་རོ་ཡིས། །ཕྱོགས་རིས་རྟོགས་གེའི་གཅན་གཟན་སྐྲག་བྱའི་ཕྱིར། །བཀའ་རྒྱུད་ལུང་དང་གང་ཟག་དམ་པ་ཡི། །གསུང་རྣམས་ཕྱོགས་གཅིག་ཐོས་པས་རྒྱ་བསྐྱེད་ནས། །མ་ནོར་རྗེས་འཇུག་ལམ་འདིར་འཇུག་རྣམས་ཀྱི། །དོན་དུ་ཡང་དག་བདག་གིས་བརྩམ་པར་བྱ། །འདིར་དམ་ཆོས་བསྟན་པ་སྤྱིའི་བབས་སོ། །ཆོས་འབྱུང་ངེས་པའི་ལོ་རྒྱུས། ལོག་ལྟ་ཅན་གྱིས་རྩོད་པ་བཟློག་པ་སེང་གེའི་ང་རོ་ཞེས་བྱ་བ་འདི་ལ་དོན་ལྔ་སྟེ། དེ་ལ་བསྐལ་པ་བཟང་པོ་འདི་ལ་བདག་ཅག་གི་སྟོན་པ་རྡོ་རྗེ་ཐུབ་པའི་དབང་པོ་འདི་ཉིད་ཇི་ལྟར་མངོན་པར་རྫོགས་པར་སངས་རྒྱས་པའི་ཚུལ་དང་། དེའི་ཞལ་ནས་ཇི་ལྟར་གསུངས་པའི་ཆོས་དང་། རྗེས་སུ་འཕགས་པ་རྣམས་ཀྱིས་ཇི་ལྟར་བསྡུས་པའི་ཚུལ་དང་། ལྷ་དང་མིའི་ཡུལ་དུ་ཇི་ལྟར་གྲགས་པ་དང་། ཆོས་དེ་རྣམས་ཀྱི་རྣམ་པར་བཞག་པ་བསྟན་པའོ། །དེ་ལ་དང་པོ་སྟོན་པ་ཡང་དག་པར་རྫོགས་པའི་སངས་རྒྱས་པ་ཡང་འདོད་ལུགས་མི་མཐུན་པ་བདུན་བྱུང་སྟེ། ཉན་ཐོས་སྡེ་པ་རྣམ་གཉིས་ཀྱིས་སྟོན་པ་འདི་བསྐལ་པ་གྲངས་མེད་གསུམ་དུ་ཚོགས་བསགས་ཤིང་། སོ་སོ་སྐྱེ་བོ་ཐ་མལ་དུ་གནས་པ་ཞིག །ཁྱིམ་ནས་ཁྱིམ་མེད་པར་རབ་ཏུ་བྱུང་ན། དཀའ་ཐུབ་ལ་ཞུགས་ཏེ། སྟན་ཐོག་དེར་ས་བཅུ་ནོན་པར་མཛད་དེ། རྡོ་རྗེ་གདན་དུ་སངས་རྒྱས་པ་ཡིན་ཟེར། དེ་སྐད་དུ་མངོན་པ་མཛོད་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པ་ཡིན། །ཅེས་གསུངས་པའི་ཕྱིར་རོ། །ཡང་རྒྱུ་མཚན་ཉིད་ཐེག་པ་ཆེན་པོ་པ་རྣམས་ཀྱི་བཞེད་ཀྱིས། སྟོན་པ་འདི་དང་པོར་བྱང་ཆུབ་ཏུ་སེམས་བསྐྱེད། བར་དུ་བསྐལ་པ་གྲངས་མེད་གསུམ་དུ་བསོད་ནམས་དང་ཡེ་ཤེས་ཀྱི་ཚོགས་བསགས། ས་བཅུ་རིམ་གྱིས་བསྒྲོད་ནས་ས་བཅུ་རྒྱུན་གྱི་ཐ་མ་ལ་དམ་པ་ཏོག་དཀར་པོར་སྐྱེ་བ་བཞེས། སྐབས་དེར་ལྷའི་སྟོན་པ་མཛད་པའི་ཚེ། ཕྱོགས་བཅུའི་རྒྱལ་བ་ཐམས་ཅད་ཀྱི། སྔོན་གྱི་ཐུགས་བསྐྱེད་མཐར་ཕྱིན་པར་བསྐུལ་བའི་སྒྲ་ལ་བརྟེན་ནས། མི་ཡུལ་འཛམ་བུའི་གླིང་། དབུས་འགྱུར་རྡོ་རྗེ་གདན་གྱི་བྱང་ཕྱོགས། སེར་སྐྱའི་གནས་སུ་ཡུམ་གྱི་ལྷུམས་སུ་ཞུགས་ཏེ། མཛད་པ་བཅུ་གཉིས་ཀྱི་ཚུལ་གྱིས་སངས་རྒྱས་པར་བཞེད་དེ། རྒྱ་ཆེ་རོལ་པ་དང་། འདུལ་བ་ལུང་། མངོན་པར་འབྱུང་བ་རྣམས་མཐུན་ནོ། །དེ་སྐད་དུ་ཡང་རྒྱུད་བླ་མ་ལས། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་ནས། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདའ་བར་སྟོན་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཅེས་སོ། །ཡང་གསང་སྔགས་ཡོ་ག་བ་རྣམས་ཀྱིས་འདོད་པ་ནི། སྟོན་པ་བྱང་ཆུབ་ཏུ་ཐུགས་བསྐྱེད་པ་ལ་སོགས་པ་རྣམས་ནི་གོང་དང་མཐུན་ལ། ཁྱད་པར་དུ་རྒྱལ་བུ་དོན་གྲུབ་ཀྱིས་ལུས་དཀའ་ཐུབ་ཀྱི་ལུས་ཁོག་པའི་ཚུལ་དུ་མི་ཡུལ་དུ་བཞག་ནས། ཐུགས་འོག་མིན་དུ་རྣམ་པར་སྣང་མཛད་ཆེན་པོར་སངས་རྒྱས་ཏེ་ཕྱོགས་བཅུའི་སངས་རྒྱས་རྣམས་ཀྱིས་བྱང་ཆུབ་རྣམ་པ་ལྔ་བཏབ་ཅིང་། དེ་ནས་རི་རབ་ཀྱི་རྩེ་མོ་ལ་སོགས་ཡོ་ག་གཞུང་དུམ་བུ་བཞི་ལ་སོགས་པ་གསུངས་ནས། སླར་མི་ཡུལ་དུ་བྱོན་ཏེ་དཀའ་ཐུབ་ཀྱི་ཁོག་པར་བཞུགས། ནཱ་ར་ཛ་ནའི་འགྲམ་དུ་ལོ་དྲུག་དཀའ་བ་སྤྱད་ནས་རྡོ་རྗེའི་གདན་དུ་སངས་རྒྱས་པའི་ཚུལ་བསྟན་པར་འདོད་དེ། དེ་སྐད་དུའང་ཡོ་ག་ལས། གཙང་མའི་གནས་དག་རབ་སྤོངས་པའི། །འོག་མིན་གནས་ནི་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་ནི་འདིར་སངས་རྒྱས། །ཅེས་བྱུང་ངོ་། །དེ་ཡང་སྒྱུ་འཕྲུལ་ལམ་རིམ་ལས། །རྣལ་འབྱོར་གཞུང་གི་དོན་འགྲུབ་ཉིད། །ནཱ་ར་ཛ་རའི་འགྲམ་སོགས་སུ། །དཀའ་ཐུབ་དཀའ་བ་སྤྱོད་པའི་ཚེ། །ཕྱོགས་བཅུའི་སྤྲུལ་པ་ལོངས་སྤྱོད་སྐུས། །བྱང་ཆུབ་ལྔ་བཏབ་དབང་བསྐུར་ནས། །འོག་མིན་ཉིད་དུ་དོན་གྲུབ་ཉིད། །སྤྲུལ་པའི་དཀའ་ཐུབ་ཁོག་པ་ལ། །ཡེ་ཤེས་སྣང་མཛད་ཚུལ་དུ་གཤེགས། །རི་རབ་རྩེ་མོར་འཁོར་ལོ་བསྐོར། །དེ་རྟོགས་པ་ནི་གཟུགས་སྐུ་ཡིན། །ཅེས་གསུངས་པ་དང་། ཨ་ནུའི་མདོ་ལུང་དགོངས་པ་འདུས་པ་ནས། རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པ་ལས་འདི་སྤྲུལ་པ་ཉག་གཅིག་ཡིན་པར་ཡང་གསུངས་སོ། །ཡང་མ་ཧཱ་ཡོ་ག་བ་རྣམས་ཀྱི་བཞེད་ལ། ཐུབ་པའི་དབང་པོ་འདི་ཉིད་བསྐལ་པ་དང་པོ་ཤད་དུ་ཐུགས་བསྐྱེད་པ་ནས། གྲངས་མེད་གསུམ་དུ་ཚོགས་བསགས་པ་རྣམ་ནི་དྲང་དོན་དུ་དགོངས་པ་ཡིན་གྱི། ངེས་པའི་དོན་དུ་ན། དཔལ་ཀུན་ཏུ་བཟང་པོ་ཡབ་ཡུམ་གྱི་མཁའ་མཚམས་ནས། རིགས་དྲུག་གི་གནས་སུ་འདུལ་ཞིང་དང་མཐུན་པའི་ཐུབ་པ་དྲུག་ཏུ་སྤྲུལ་ནས་རིགས་དྲུག་གི་དོན་མཛད་པ་ཡིན། ཁྱད་པར་མི་ཡུལ་དུ་སངས་རྒྱས་ཤཱཀྱ་ཐུབ་པར་སྤྲུལ་ནས་སེམས་ཅན་རྣམས་ཀྱི་བློ་ཐར་པར་འདྲེན་པའི་ལམ་གྱི་འཚམ་དང་སྦྱར་ནས། མཛད་པ་བཅུ་གཉིས་ཀྱི་ཚུལ་བསྟན་ནས་སངས་རྒྱས་པར་འདོད་དེ། རྒྱུད་གསང་བ་སྙིང་པོ་ལས། རིག་པའི་སྐྱེས་བུ་ཐུབ་པ་དྲུག་ཅེས་བྱ་བ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཐོན་ཏོ། །ཅེས་པ་དང་། དེའི་འགྲེལ་པ་སྤར་ཁབ་ཅན་ལས། དྲང་དོན་དུ་དགའ་ལྡན་ལས་བབས་ཟེར་བ་ཡང་བདེན་མོད་ཀྱི། བྱང་ཆུབ་སེམས་དཔའ་དབང་ཐོབ་པ་ལས་འགལ་བ་མེད་མོད། ངེས་པར་ཀུན་ཏུ་བཟང་པོའི་སྤྲུལ་པའོ། །ཞེས་བཤད་དོ། །ཡང་སློབ་དཔོན་ཟླ་བ་གྲགས་པ་དང་སྐལ་ལྡན་གྲགས་པའི་བཞེད་ཀྱིས། སྟོན་པ་ཉིད་བསྐལ་པ་དཔག་ཏུ་མེད་པའི་སྔོན་རོལ་དུ་སངས་རྒྱས་ཟིན་ནས། བསྐལ་པ་བཟང་པོ་འདི་ལ་ཡང་ཤཱཀྱ་ཐུབ་པ་ཞེས་བྱ་བར་གདུལ་བྱའི་སྣང་ངོར་སངས་རྒྱས་པའི་ཚུལ་བསྟན་པ་ཡིན། དེ་བཞིན་དུ་དུས་གསུམ་ཀུན་ཏུ་སངས་རྒྱས་པའི་ཚུལ་དང་། མཛད་པ་སྣ་ཚོགས་སྟོན་ཅིང་བཞུགས་པར་འདོད་དེ། མདོ་སྡེ་ལས། བཅོམ་ལྡན་འདས་ནི་བསྐལ་པ་བསམ་གྱིས་མི་ཁྱབ་པའི་སྔོན་རོལ་དུ་སངས་རྒྱས་ནས། འདིར་ཤཱཀྱའི་རིགས་སུ་སྐྱེ་བ་སྟོན་པར་བཞེད་དེ། ཅེས་སོ། །མཐའ་ཐུག་རྫོགས་པ་ཆེན་པོ་རྣམས་ཀྱི་བཞེད་པས། གོང་མ་རྣམས་ལྟར་བསྐལ་པ་དང་པོར་ཐུགས་བསྐྱེད། གྲངས་མེད་གསུམ་དུ་ཚོགས་བསགས། མཛད་པ་བཅུ་གཉིས་ཀྱི་ཚུལ་དུ་སངས་རྒྱས་པར་བསྟན་པ་ཡང་། སེམས་ཅན་རྣམས་ཀྱི་གདུལ་བྱའི་སྣང་ངོ་ལ་འགལ་བ་མེད་ཀྱི། ངེས་པའི་དོན་ཡང་དག་པ་ན། ཆོས་ཐམས་ཅད་བྱེད་པ་པོ་མེད་པར་ཡེ་ནས་སངས་རྒྱས་པའི་བདག་ཉིད་དུ་གནས་པ་ཡིན་པ་ལ། དེ་ལྟར་མ་རྟོགས་པས་འཁྲུལ་པའི་རྩལ་སྣ་ཚོགས་སུ་ཤར་བ་ནི། འདོད་ཁམས་ཀྱི་ལྷ་གཉིད་ལོག་པ་ལྟ་བུའོ། །དེ་ལྟར་འཁྲུལ་ཡང་དོན་ལ་གཡོ་བ་མེད་པའི་ཡོན་ཏན་གྱིས་གདུལ་བྱ་སེམས་ཅན་རྣམས་ཀྱི་དབང་པོའི་རིམ་པ་དང་ཐུན་པར་སྐུ་གསུམ་གྱི་སྣང་བ་ཤར་ནས། བསྟན་པའི་སྣོད་དང་ཐེག་པའི་རྣམ་གྲངས་དུ་མར་བསྟུན་ནས་སེམས་ཅན་གྱི་དོན་བྱེད་པ་ཡིན་ནོ། །ཞེས་བཤད་དོ། །རྫོགས་པ་ཆེན་པོ་རྨད་དུ་བྱུང་བའི་རྒྱུད་ལས། དེ་ཡང་ཡེ་ནས་སངས་རྒྱས་བདག་ཉིད་མངོན་སུམ་དུ་གནས་པ་ལ། གྲིབ་མ་གཟུགས་ཀྱི་དཔེ་བཞིན་དེ་ལས་རྟོགས་པ་བྱུང་། ཅེས་སོ། །འོ་ན་གང་ཟག་རྣམས་ཀྱི་བློ་དང་ལྡན་པ་གཅིག་ལ་སྟོན་པ་ཤཱཀྱ་ཐུབ་པ་ཉིད། སྐུ་ངོ་བོ་གཅིག་ཡིན་པ་ལ། སངས་རྒྱས་པའི་ཚུལ་དང་། འདོད་པ་མི་མཐུན་པ་འདི་ཇི་ལྟར་ཡིན་སྙམ་ནས་བློར་མི་བདེ་བ་དག་འབྱུང་བ་ཡང་སྲིད་དེ། དེ་དག་གི་ཚུལ་འཐད་ཕྱོགས་གང་དུ་ཡིན་ནོ་ཞེ་ན། གང་ཟག་དབང་པོ་རབ་འབྲིང་ཐ་མའི་ཁྱད་དང་། གདུལ་བྱའི་བློ་མཐུན་རང་རང་གི་གོ་སྐབས་དང་འཚམ་པར་བསྟན་པ་ཡིན་ཅིང་། སངས་རྒྱས་ཀྱི་སྐུ་གསུང་ཐུགས་གསང་བ་བསམ་གྱིས་མི་ཁྱབ་པ་མི་བཟད་པ་རྒྱན་གྱི་འཁོར་ལོ་ལ། ཐུགས་རྗེ་དང་མཛད་པའི་རྣམ་འཕྲུལ་བསམ་གྱིས་མི་ཁྱབ་པ་རྒྱན་གྱི་འཁོར་ལོ་གདུལ་བྱ་རབ་འབྲིང་ཐ་མ་གསུམ། སེམས་ཅན་རྣམས་ཀྱི་རང་རང་གི་ལས་དང་སྐལ་བར་འཚམ་པ། དབང་པོའི་གོ་རིམ་བཞིན་དུ་གང་ལ་གང་འདུལ་དུ་བསྟན་པས། དེ་རྣམས་གང་ལ་ཡང་ཐེག་པའི་རིམ་པ་ནི་བདེན་པས་འགལ་བ་མེད་དེ། ནམ་མཁའི་ཆོ་འཕྲུལ་ལྟར་ཤེས་པར་བྱའོ། །དེ་ལ་གང་ཟག་བློ་ཆུང་ཕྱོགས་འཛིན་དང་རང་འཐད་ཀྱི་ཕྱོགས་རྟག་བརྟན་ཐེར་ཟུག་ཏུ་བགྲང་ཞིང་དོན་གྱི་དགོངས་པ་མ་ལོན་པ་རྣམས་ཀྱིས་ནི་རྒྱ་མཚོའི་རུ་སྦལ་དང་ཁྲོན་པའི་རུ་སྦལ་ལྟར་ཤེས་པར་བྱའོ། ༈ །དོན་གཉིས་པ་སྟོན་པས་ཇི་ལྟར་གསུང་པ་དམ་པའི་ཆོས་ལ་ཡང་གཉིས་ཏེ། རྒྱུ་མཚན་ཉིད་ཀྱི་ཐེག་པ་ཇི་ལྟར་གསུངས་པའི་ཚུལ་དང་། འབྲས་བུ་གསང་སྔགས་ཀྱི་ཐེག་པ་ཇི་ལྟར་གསུང་པའི་ཚུལ་ལོ། །དང་པོ་རྒྱུ་མཚན་ཉིད་ཀྱི་ཐེག་པ་ཇི་ལྟར་གསུངས་པ་ནི། མཛད་པ་བཅུ་གཉིས་ལས་ཇི་ལྟར་བྱུང་བ་རྣམས་ནི་འདིར་ཡི་གེ་འཇིགས་པས། རྒྱ་ཆེ་རོལ་པ། མངོན་པར་འབྱུང་བ། འདུལ་བ་ལུང་ལས་ཅི་ལྟར་འབྱུང་བ་ལྟར་གོ་སླ་བས་ཤེས་པར་བྱའོ། །བྱེ་བྲག་ཏུ་ཆོས་ཀྱི་འཁོར་ལོ་བསྐོར་བར་མཛད་པ་ནི། ཐུབ་པའི་དབང་པོ་དེ་ཉིད་དགུང་ལོ་ཉེར་དགུ་ལ་ཕོ་བྲང་ནས་ཕྱུང་སྟེ་རབ་ཏུ་བྱུང་། དགུང་ལོ་སོ་ལྔ་དཔྱིད་ཟླ་འབྲིང་པོའི་ཚེས་བརྒྱད་ལ་མངོན་པར་རྫོགས་པར་སངས་རྒྱས་ནས། དབྱར་ཟླ་ར་བའི་ཚེས་བརྒྱད་ཀྱི་ནུབ་མོ་ཚུན་ཆོད་ལ་ཞག་བདུན་ཕྲག་བདུན་ཆོས་མ་གསུངས་ཏེ། མི་གསུངས་པའི་རྒྱུ་མཚན་གང་ཡིན་ན། བདུན་ཕྲག་དང་པོ་ལ་ཆོས་ཀྱི་སྐུ་གཉིས་སུ་མེད་པ་བརྙེས་པས་དེའི་ངང་ལ་མཉམ་པར་བཞག་གོ། །གཉིས་པ་ལ་བྱང་ཆུབ་ཀྱིས་ཤིང་དྲུང་དུ་བཞུགས་ཏེ། ས་བཅུའི་བྱང་ཆུབ་སེམས་དཔའི་དུས་ནས་རྡོ་རྗེའི་གདན་ལ་སངས་རྒྱས་པའི་བར་ལ་ཐུགས་མཉམ་པར་བཞག་གོ། །གསུམ་པ་སེངྒེའི་ཁྲི་རྩྭ་ཡི་གདན་ལས་བཞེངས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་མཐར་ཞབས་ཀྱིས་བཅགས་ཏེ། རང་གི་གདུལ་བྱ་དང་ཞིང་ཁམས་གྲུབ་པར་མཛད། བཞི་པ་ལ་ཕྱོགས་བཞིའི་མཐར་རྒྱ་མཚོའི་བར་དུ་འཆག་པར་མཛད་དོ། །ལྔ་པ་ལ་ཀླུའི་རྒྱལ་པོ་བཏང་བཟུང་གི་གནས་སུ་བྱོན་པར་མཛད་དེ། ཀླུ་ཡུལ་དུ་འཚུབས་མ་ཆེན་པོ་ལངས་པ་ལས། ཀླུ་རྣམས་སྦྲུལ་གྱི་གཟུགས་ཀྱིས་སངས་རྒྱས་ཀྱི་སྐུ་དཀྲིས་ཏེ། སྐུ་ལ་འཚུབས་མ་དང་རྡུལ་སྐྱོབ་པར་བྱས་པ་ལ། གདུག་པ་ཅན་དེ་དག་གིས་ཀྱང་སྔར་མ་མྱོང་བའི་བདེ་བ་ཁྱད་པར་ཅན་ལུས་ཀྱིས་མྱོང་བར་བྱས་སོ། །དྲུག་པ་ལ་ཤིང་ནྱ་གྲོ་ཏ་དང་། རབ་འབྱམས་ལ་སོགས་པའི་མདུན་དུ་ཆོས་ཐམས་ཅད་མཉམ་པ་ཉིད་ཀྱི་ཏིང་ངེ་འཛིན་ལ་བཞུགས་སོ། །བདུན་ཕྲག་བདུན་པ་ལ་ཤིང་སྒྲོལ་རྒྱུ་ཞེས་བྱ་བའི་དྲུང་ཚལ་དུ། ཆོས་ཐམས་ཅད་དུས་གསུམ་དུ་རྣམ་པར་གྲོལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ། །དེའི་དུས་སུ་ཚོང་དཔོན་ག་གོན་བཟང་པོ་དང་། ནོར་བུ་བཟང་པོ་ཞེས་བྱ་བ་རྣམས་རྟ་ཅང་ཤེས་པ་དང་། གླང་པོ་རིག་ཤེས་དེད་ནས། ཕྱིའི་རྒྱ་མཚོ་ནས་ནོར་བུ་རིན་པོ་ཆེ་བླངས་ནས་ལོག་པ་དང་། རྟ་དང་གླང་པོ་ཆེ་རྣམས་ཤིང་སྒྲོལ་རྒྱུའི་ཚལ་ལ་སྐོར་བ་བྱེད་ཅིང་འདུག་ནས། ཚལ་དེར་ཞུགས་པ་ལས། སྟོན་པ་སངས་རྒྱས་ནས་རིང་པོར་མ་ལོན་པ་དང་མཇལ་ལོ། །དེར་ཆོས་ཞུས་པས་མ་གནང་སྟེ་འདི་སྐད་དུ་གསུངས་སོ། །ངས་ནི་གང་ཚེ་བཟོད་པ་ཐོབ་པའི་ཚེ། །སངས་རྒྱས་མར་མེ་མཛད་ཀྱིས་བདག་ལུང་བསྟན། །འཇིག་རྟེན་མཐའ་ཡས་ཀུན་ལ་སྙིང་རྗེ་ཡང་། །གཞན་གྱི་གསོལ་བ་བཏབ་ཀྱང་ངས་མི་འཆད། །ཅེས་སོ། །ཡང་ནན་དུ་ཞུས་ཏེ་ཐ་མ་ཡང་བདག་ཅག་རྣམས་ཡུལ་དུ་མ་སླེབ་བར་དུ་བར་ཆད་མེད་ཅིང་བཀྲ་ཤིས་པའི་ཆོས་ཤིག་ཞུ་ཞེས་ཞུས་པས་ཞལ་ནས་གསུངས་པ་ལ་སྔ་བ་ཤིས་པ་བརྗོད་པའི་མདོ་གསུངས་སོ། །ཚོང་དཔོན་དེ་ཡང་མ་འོངས་པ་ན་སྦྲང་རྩི་འབྱུང་བ་ཞེས་བྱ་བའི་སངས་རྒྱས་སུ་ལུང་བསྟན་ཏོ། །དེ་ནས་བདག་གིས་རྟོགས་པའི་ཆོས་འདི་ལྟ་བུ་གཞན་ལ་བསྟན་ཀྱང་། གོ་ཞིང་ཕན་པར་མི་འགྱུར་བས། རེང་བྱེད་ཀྱི་བུ་ལྷག་སྤྱོད་དང་། སྒྱུ་རྩལ་ཤེས་ཀྱི་བུ་རེང་འཕུར་གཉིས་ལ་བསྟན་དགོངས་ནས། དེ་གཉིས་བཙལ་བས་གཅིག་གུམས་ནས་ཞག་བདུན་སོང་། གཅིག་གུམས་ནས་ཞག་གསུམ་སོང་ནས་ཐུགས་མུག་པ་ལྟ་བུ་ཡང་མཛད་དེ། དེ་ནི་མ་ལེགས་ཏེ་འདི་སྐད་ཅེས་གསུངས་སོ། །དེ་གཉིས་ནི་བདག་གི་བསྟན་པའི་དོན་གོ་བས་གདུལ་བྱའི་སྣོད་དུ་གྱུར་ཏེ་གུམས་པ་དེ་ནི་དེ་གཉིས་ཀྱིས་སྡེ་དཔོན་མ་རེ་སྟེ་དེ་ནི་ཤིན་ཏུ་སྟེ་བོར་མ་སྟེས་སོ། །ཅེས་གསུངས་སོ། །ཡང་མདོ་མངོན་པར་འབྱུང་བ་ནས། དེ་གཉིས་མ་གུམས་པར་ཐུབ་པ་དང་བགྲོ་གླེང་མཛད་དེ། དོན་སྟོན་པའི་སྟོན་པ་ལྟ་བུར་གྱུར་པ་ཡང་བཤད་དོ། །དེ་ནས་དགོངས་པ་ལ། བདག་ལ་དྲིན་ཆེ་བ་ཤཱཀྱ་རྣམས་ཡིན་ཏེ། དེ་རྣམས་ལ་བསྟན་སྙམས་ནས་བྱོན་པས་ཤཱཀྱ་རྣམས་འདུལ་དུས་ལ་ཅུང་མ་བབས་པས། འདི་སྐད་དུ། དོན་འགྲུབ་འདི་ནི་སངས་རྒྱས་པ་མི་བདེན་ཏེ། ནཱ་ར་ཛ་རར་དཀའ་ཐུབ་ཀྱི་མ་ཤི་བ་ཡ་མཚན། ད་སྐྱེང་ནས་ཕོ་བྲང་དུ་འོང་འདོད་དེ། བ་ཡི་འོ་མ་འཐུངས་པས་རིགས་བསླེད་མི་རུང་ན། ཆོས་ཞུ་བ་དང་། བསྙེན་ཅིང་བཀུར་བར་མི་བྱའོ། །ཞེས་ཁྲིམས་བཅས་སོ། །དེར་སྟོན་པའི་དགོངས་པ་ལ། ཤཱཀྱ་རྣམས་ལ་སྙིང་བརྩེ་བ་དང་། ཐུགས་མུག་པའི་ཚུལ་གྱིས་སླར་ལོག་ནས་བྱང་ཆུབ་ཤིང་དྲུང་གི་རྩར་ལུས་གནད་བཅས་ཏེ། ཡེ་ཤེས་རོལ་པ་ཆེན་པོ་སེངྒེ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་བཞུགས་སོ། །སྐབས་དེར་དགོངས་པ་ལ། བདག་གིས་རྟོགས་པའི་དོན་འདི་ཤིན་ཏུ་ཟབ་ཅིང་ཕྲ་ལ་འཛངས་པས། སུ་ལ་བསྟན་ཀྱང་གོ་བར་མི་འགྱུར་བས་བདག་རང་གཅིག་པུ་ནགས་སུ་གནས་པ་ལ། ལན་གཅིག་འདས་པའི་དུས་སུ་རིང་བསྲེལ་གྱིས་སེམས་ཅན་རྣམས་ལ་ཕན་གདག་ཤིང་བསོད་ནམས་བསགས་པའི་རྟེན་དུ་བྱའོ་དགོངས་ནས་ཚིགས་སུ་བཅད་པ་འདི་གསུངས་སོ། །ཟབ་ཅིང་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཞིག་བདག་གི་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་གཅིག་པུར་ནགས་སུ་བསྒོམ་པར་བྱ། །ཞེས་གསུངས་པས། སྒྲ་དེ་ཚངས་པའི་འཇིག་རྟེན་དུ་གྲགས་སོ། །གསུང་དེ་སྐད་གྲགས་པས་ཚངས་པ་འདུན་པ་སྐྱེས་ཏེ། བདག་ནི་བསྐལ་པ་བཟང་པོའི་སངས་རྒྱས་སྟོང་རྩ་གཉིས་ཀྱིས་ཆོས་ཀྱི་འཁོར་ལོ་བསྐོར་བར་སེམས་བསྐྱེད་པ་ཡིན་གྱི། ཨེ་མ་ཧོ་སྟོན་པ་འཇིག་རྟེན་དུ་བྱོན་པ་ནི་ངོ་མཚར་ཆེ་སྙམ་ནས། བཅོམ་ལྡན་འདས་ཀྱི་དྲུང་དུ་སོང་སྟེ་འདི་སྐད་ཅེས་གསོལ་བ་བཏབ་བོ། །ཀྱེ་མ་ཧོ། ཡེ་ཤེས་ཆེན་པོའི་དཀྱིལ་འཁོར་རབ་བསྒྲུབ་ནས། ཕྱོགས་བཅུ་དག་ཏུ་འོད་ཟེར་རབ་བཀྱེས་པས། །ཡེ་ཤེས་ཟེར་གྱིས་བློ་ཡི་ཁ་འབྱེད་དོ། །སྨྲ་བའི་སེངྒེ་དེ་རིང་བཏང་སྙོམས་བཞུགས། །ཅེས་གསོལ་བས་མ་གནང་སྟེ་ཅང་མི་གསུངས། ཡང་འདི་སྐད་ཅེས་ཞུས་སོ། །མ་ག་ཏ་ཡི་ཡུལ་འདིར་སྔོན་ཆད་ཆོས། །མ་དག་དྲི་མའི་རྫས་སུ་འབྲེལ་པ་བྱུང་། །བདུད་རྩིའི་སྒོ་མོ་ཁྱོད་ཀྱིས་དབྱེ་བར་མཛོད། །གདུལ་བྱ་རྣམས་ལ་དྲི་མེད་བཤད་དུ་གསོལ། །ཞེས་ཞུས་པས། བཅོམ་ལྡན་འདས་ཀྱིས་བཀའ་སྩལ་པ། །ཚངས་པ་ང་ཡི་ཐ་མ་ཀུན། །བཅོམ་ནས་ཚེགས་མེད་གང་རྟོགས་བུའི། །ཆོས་འདི་སྲིད་པའི་འདོད་ཆགས་ཀྱིས། །བསྒྲིབས་པས་བདེ་བླག་རྟོགས་པ་མིན། །གྱེན་ཕྱོགས་ལས་ནི་བཟློག་པའི་ལས། །ཟབ་ལ་ཤིན་ཏུ་བརྟགས་དཀའ་སྟེ། །འདོད་ཆགས་ཀྱིས་བསྒྲིབས་མུན་པ་ཡི། །ཕུང་པོ་བསྒྲིབས་པས་མི་མཐོང་ངོ་། །ཅེས་གསུང་སྟེ་མ་གནང་ངོ་། །དེ་ནས་ལྷའི་དབང་པོ་བརྒྱ་བྱིན་ཀྱང་ལྷགས་ནས་ཞབས་ལ་གཏུགས་ཏེ་ཞུས་པ། ཟླ་བ་ཉ་བ་གཟའ་ལས་ཐར་བ་ལྟར། །ཁྱོད་ཀྱི་ཐུགས་ནི་རྣམ་པར་གྲོལ་བ་ལས། །གཡུལ་ལས་རྣམ་པར་རྒྱལ་བ་བཞེས་སུ་གསོལ། །འཇིག་རྟེན་མུན་པར་ཤེས་རབ་འོད་འབྱུང་མཛོད། །ཀུན་ཏུ་འཚལ་བར་གྱུར་པ་མཆིས་ལགས་ཀྱང་། །ཐུགས་རྗེ་ཆེན་པོས་ཆོས་ནི་བཤད་དུ་གསོལ། །ཞེས་ཞུས་པས་ཀྱང་མ་གནང་སྟེ། སླར་ཚངས་པ་ལ་བཀའ་སྩལ་པ། སྐྱེ་བོ་རྣམས་ནི་ཚངས་ལ་དད་པ་སྟེ། །དེ་ཡི་གསོལ་བ་བཏབ་ན་ཆོས་འཁོར་བསྐོར། །རྣམ་པ་མང་པོ་འཚལ་འགྱུར་སེམས་དཔའི་ཆོས། །གྱ་ནོམ་རྡུལ་བྲལ་ཆོས་བཤད་གསོལ་བ་ཐོབ། །ཅེས་གསུང་པས། ཚངས་པས་གསོལ་བ། བཅོམ་ལྡན་འདས་འཇིག་རྟེན་ན་དབང་པོ་རྟུལ་པོ་ཡང་མང་མཆིས། འབྲིང་པོ་ཡང་མང་མཆིས། རབ་ཏུ་གྱུར་པ་ཡང་མཆིས་ན། དེ་དག་གི་དོན་དུ་བཀའི་འཁོར་ལོ་ཡང་ལན་གསུམ་དུ་བསྐོར་དུ་གསོལ། ཞེས་ཞུས་པས། དེའི་ཚེ་ཤར་ཕྱོགས་ཀྱི་འཇིག་རྟེན་གྱི་ཁམས་ནས། ཆོས་ཀྱི་འཁོར་ལོ་བསྐོར་བར་བསྐུལ་བའི་ཕྱིར། བྱང་ཆུབ་སེམས་དཔའ་ཆོས་ཀྱི་འཁོར་ལོ་ཞེས་བྱ་བ་བྱུང་སྟེ། གསེར་གྱི་འཁོར་ལོ་རྩིབས་སྟོང་དང་ལྡན་པ་ཞིག་ཚངས་པ་ལ་གཏད་དེ་ཕུལ་ནས་གཉིས་ཀས་ཞུས། དེའི་ཚེ་ཅི་ཡང་མི་གསུང་བར་སྣང་ངོ་། །དེ་ལྟར་ཞུ་བ་གཉིས་བྱུང་བའི་ཚུལ་གྱི་མིང་གི་བྱེ་བྲག །ཡང་ན་ནི་གཉིས་པོ་དེ་ཚངས་པ་ནི་སངས་རྒྱས་སྟོང་གི་ཞུ་བ་པོ་ཡིན་ལ། གཅིག་ནི་ཕྱོགས་བཅུ་དུས་གསུམ་གྱི་སངས་རྒྱས་ཀྱི་ཆོས་ཀྱི་འཁོར་ལོ་བསྐོར་བར་བསྐུལ་བ་ཡིན་ཏེ། ཆོས་ཀྱི་འཁོར་ལོ་བསྐོར་བར་ཞལ་གྱིས་བཞེས་སོ། །དེའི་ཚེ་ཐོག་མར་བདག་གིས་གང་འདུལ་བར་བྱ་སྙམ་ནས་དགོངས་པ་ལ་མཉམ་པར་བཞག་པས། ཐོག་མར་ལྔ་སྡེ་བཟང་པོ་འདུལ་བར་མཁྱེན་ནས། ཝཱ་རཱ་ན་སིའི་ཕུར་ལྔ་སྡེ་བཟང་པོའི་ཕྱོགས་སུ་ལྷོ་ཕྱོགས་ནས་བྱང་ཕྱོགས་སུ་གཤེགས་སོ། །དེའི་ཤུལ་ཀར་ཀུན་ཏུ་རྒྱུ་ཕྱི་རོལ་པ་འཁོར་ལྔ་བརྒྱ་དང་བཅས་པ། ལྷོ་ཕྱོགས་ན་གཡས་སུ་འགྲོ་བ་དང་འཕྲད་པའི་ཚེ། དེ་རྣམས་ཀྱི་བསམ་པ་ལ་ཀ་ཏ་མ་ནི་སློབ་དཔོན་མེད་པར་སངས་རྒྱས་ཐོབ་པོ་ཞེས་པ་ནི་མི་རིགས་སོ་སྙམ་ནས་སྨྲས་པ། ཁྱོད་ཀྱི་སློབ་དཔོན་སུ་ཡིན་ཞེས་སྨྲས་པ་དང་། ལན་གསུངས་པ། ང་ལ་སློབ་དཔོན་སུ་ཡང་མེད། །ང་ནི་གཅིག་པུ་རྫོགས་སངས་རྒྱས། །ང་དང་འདྲ་བ་གཞན་མེད་དེ། །བསིལ་རྒྱུར་ཟག་པ་ཟད་པ་ཡིན། །ཞེས་གསུངས་པ་དང་། ཟག་པ་ཟད་པ་ཡིན་ཅེས་པས། དགྲ་བཅོམ་པ་ཡིན་ཟེར་བ་གོ་ནས་ཡང་སྨྲས་པ། འོ་ན་ཁྱོད་དགྲ་བཅོམ་པ་ཡིན་ནམ་ཞེས་ཟེར་བ་དང་། ཡང་ལན་གསུངས་པ། ང་ནི་འཇིག་རྟེན་དགྲ་བཅོམ་པ། །ང་ནི་སྟོན་པ་བླ་ན་མེད། །ལྷ་དང་མི་དང་ལྷ་མིན་ཡང་། །ང་དང་འདྲ་བ་ཡོད་མ་ཡིན། །ཞེས་གསུངས་པས། འོ་ན་ཁྱོད་སངས་རྒྱས་ཡིན་པར་ཞལ་གྱིས་བཞེས་སམ་ཟེར་བ་དང་། ཡང་གསུངས་པ། གང་ཟག་ཟག་པ་ཟད་རྙེད་པ། །ང་འདྲ་རྒྱལ་བར་ཤེས་པར་བྱ། །སྡིག་པའི་ཆོས་ལས་ང་རྒྱལ་བ། །ཉེར་འགྲོ་དེ་གཞན་ང་རྒྱལ་བའོ། །ཅེས་གསུངས་པས། སངས་རྒྱས་ཡིན་པར་ཡིད་ཆེས་སོ། །ཡང་དེ་དག་གིས། འོ་ན་ཁྱོད་གང་དུ་འགྲོ་ཞེས་ཞུས་པས། ལན་གསུངས་པ། ང་ནི་ཝཱ་རཱ་ན་སཱིར་འགྲོ། །གྲོང་ཁྱེར་བསིལ་ལྡན་དེར་སོང་ནས། །མུན་པ་ལྟ་བུའི་སེམས་ཅན་ལ། །ཆོས་ཀྱི་སྒྲོན་མེ་འདེགས་སུ་འགྲོ། །ཅེས་པ་ལ་སོགས་པའི་ཚིགས་སུ་བཅད་པ་འགའ་གསུངས་པས། དེ་རྣམས་ན་རེ། ཝཱ་རཱ་ན་སཱིར་ནི་ཤིང་གྲིབ་ཀྱང་ཆུང་། སེམས་ཅན་ལ་ཕན་པ་ཡང་ཆུང་། གྲོང་ཁྱེར་གཞན་ཞིག་ཏུ་གཤེགས་ལ་ཆོས་གསུང་བར་ཞུ་ཟེར་བ་ལ། ལན་གསུངས་པ། ཡུལ་ཝཱ་རཱ་ན་སཱི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བའི་གནས་ཡིན་པས། ཐོག་མར་དེ་མ་ཡིན་པར་བསྐོར་དུ་མི་རུང་ངོ་ཞེས་གསུང་ནས་བཞུད་དོ། །དེའི་ཚེ་ཝཱ་རཱ་ན་སཱིའི་ཕུ་ན་མུ་སྟེགས་ལྔ་སྡེ་བཟང་པོ་ཡོད་པ་སངས་རྒྱས་འབྱོན་པར་ཐོས་ནས། ལྡང་བར་མི་བྱ་བ་དང་། ཕྱག་མི་འཚལ་བ་དང་། བསྙེན་ཅིང་བསྐུར་བར་མི་བྱ་ཞིང་། འགྲན་གཟུགས་ཏེ་ཐེ་ཚོམ་དྲི་བར་དམ་བཅས་ཏེ་འདི་སྐད་ཅེས། དགེ་སྦྱོང་ཀ་ཏ་མ་དེ་ལ་འཕགས་པའི་ཤེས་རབ་ཀྱང་མེད་དེ། མི་ཆོས་ཀྱི་བླ་མ་མཁན་ཞིག་ཡིན་ནོ། །ཞེས་གོང་དུ་དམ་བཅས་པ་དང་། སྟོན་པ་བྱོན་པའི་ཚེ། དེའི་ཐུགས་རྗེ་དང་གཟི་བརྗིད་མ་བཟོད་དེ། གཅིག་གིས་དྲིས་པ་ཚེ་དང་ལྡན་པ་ཁྱོད་མི་ཆོས་ཀྱི་བླ་མ་མཁན་ཞིག་ཡིན་སྙམས་ན། འོད་དང་གཟི་བརྗིད་དེ་ཙམ་ཆེ་ན་ཁྱོད་འཕགས་པའི་རིགས་གཅིག་ཅང་ཡིན་ནམ། ཅེས་སྨྲས་པ་དང་། གསུངས་པ། ང་ལ་ཚེ་དང་ལྡན་པ་མ་ཟེར་ཅིག །ང་ནི་ཁམས་གསུམ་ལས་འདས་པའོ། །སྡུག་བསྔལ་སེལ་བའི་ལྗོན་ཤིང་། ནད་སེལ་བའི་སྨན་པའོ། །ཞེས་གསུང་པ་ལ། དེ་རྣམས་རང་དབང་མེད་པར་འདུས་ཏེ། འཁོར་གྱི་ཐོག་མར་འབྱུང་ངོ་། །དེ་ནས་ཆོས་གསུང་བར་བཞེད་ནས། གང་དག་འཁོར་བསྡུ་བའི་གཎྜི་བརྡུངས་པའི་སྒྲ་ལས། བདེ་གཤེགས་སློབ་མར་གྱུར་པའི་སེམས་ཅན་གང་སུ་དག །འཇིག་རྟེན་ཁམས་འདིར་གནས་པ་ཀུན་ཉོན་ཅིག །དེང་འདིར་སྟོན་པས་ཆོས་ཀྱི་ཆར་འབེབས་ཀྱི། གང་དག་ཉན་པར་འདོད་རྣམས་འདིར་འདུས་ཤིག །ཟབ་མོ་རྒྱལ་བའི་བཀའ་ལ་ཀུན་ཉོན་ཅིག །ཅེས་པའི་ཚིག་ཀྱང་བྱུང་བས། དེ་ནས་ཆོས་ཀྱི་འཁོར་ལོ་རིམ་པ་གསུམ་བསྐོར་བ་ལས། དོན་རྣམ་པ་ལྔ་ལྔས་སྟོན་ཏེ། ཡུལ་དང་། ཡོན་བདག་དང་། དུས་དང་། འཁོར་དང་། བརྗོད་བྱའོ། །དེ་ཡང་འཁོར་ལོ་དང་པོ་འདི་ཡི་སྐབས་ཀྱི་ཡུལ་ནི་ཝཱ་རཱ་ན་སཱི། ཡོན་བདག་ནི་རྒྱལ་པོ་གཟུགས་ཅན་སྙིང་པོས་མཛད། དུས་དཔྱིད་ཟླ་འབྲིང་པོའི་ཚེས་བརྒྱད་ལ་སངས་རྒྱས་ནས་གསུངས་ཏེ། འཁོར་ལྔ་སྡེ་བཟང་པོ་ལ་སོགས་པ་ལ་བཀའ་འཁོར་ལོ་དང་པོའི་ཚད་ནི་ལོ་བདུན་ལ་ཟླ་བ་གཉིས་ཀྱི་མ་ལོང་པར་གསུངས། སྤྱིར་བཀའ་ལ་གསུང་ལུགས་ཀྱང་གཉིས་སུ་འདོད་དེ། ཚད་མེད་པར་གསུངས་པ། ཚད་ཅན་དུ་གསུངས་པའོ། །ཚད་མེད་པར་གསུངས་པ་ནི། མདོ་ལང་ཀར་གཤེགས་པ་ལས། །ཇི་སྲིད་འདུ་ཤེས་ཡོད་ཀྱི་བར། །ཐེག་པའི་མཐའ་ལ་ཐུག་པ་མེད། །ཅེས་གསུངས་པས། འཁོར་བ་མ་སྟོངས་ཀྱི་བར་དུ་ཆོས་གསུང་བར་འདོད་དེ་ཚད་མེད་དོ། །ཚད་ཅན་དུ་གསུངས་པ་ནི། གདུལ་བྱའི་དབང་པོ་དང་། མོས་པའི་བྱེ་བྲག་གི་དོན་ལ་དགོངས་ནས་གསུངས་པ་ལ་གསུམ་སྟེ། གཉན་པོ་ལ་དགོངས་པ་བརྒྱད་ཁྲི་བཞི་སྟོང་། དབྱེ་བའི་དོན་ལ་དགོངས་པ་ལ་གསུང་རབས་ཡན་ལག་བཅུ་གཉིས། བསྡུ་བའི་དོན་ལ་དགོངས་པ་ལ་སྡེ་སྣོད་རྣམ་པ་གསུམ། དེ་ལ་དབང་པོ་དང་མོས་པའི་བྱེ་བྲག་ལ་དགོངས་པ་ནི་འཁོར་ལྔ་སྡེ་བཟང་པོ་ལ་སོགས་པ་དབང་པོ་ཐ་མའི་དོན་དུ་བདེན་པ་བཞི། འབྲིང་པོ་ལ་མཚན་ཉིད་ངེས་པའི་དོན་གཉིས། རབ་ལ་གསང་སྔགས་ཀྱི་ཐེག་པ་གསུངས་པ། འོ་ན་འགའ་ཞིག་སྙམ་ན། སྔར་གསུངས་པའི་ཤིས་པ་བརྗོད་པའི་མདོ་དང་། གྲངས་ཁར་གསུངས་པའི་མྱ་ངན་ལས་འདས་པ་གཉིས། གར་བསྡུ་ཞེ་ན། སློབ་དཔོན་འཕགས་པའི་བཞེད་ཀྱིས། དེ་གཉིས་ནི་བཀའ་ཡིན་ཀྱང་འཁོར་ལོ་གསུམ་དུ་མི་འདུ་སྟེ། ཚངས་པས་མ་ཞུས་པའི་ཕྱིར་རོ། །གསུངས་སོ། །དེ་གཉིས་བསྣན་པས་འཁོར་ལོ་ལྔ་ཡིན་ཏེ། ངེས་པའི་དོན་ལ། མདོ་ལས། བདེ་བར་གཤེགས་པ་རྣམས་ཀྱིས་ནི། །ཆོས་ཀྱི་འཁོར་ལོ་ལྔ་བསྐོར་ཏེ། །ཅེས་གསུངས་སོ། །འོ་ན་དང་པོའི་འཁོར་ལོ་ཅིག་དབང་པོ་ཐ་མ་ལ་ཇི་ལྟར་གསུང་ན། འདི་ནི་སྡུག་བསྔལ་བའོ། །འདི་ནི་ཀུན་འབྱུང་བའོ། །འདི་ནི་འགོག་པའོ། །འདི་ནི་ལམ་མོ། །ཅེས་གསུངས་པས། དེ་དག་ལ་མཐོང་བའི་ལམ་སྐྱེས་ཏེ་ཡེ་ཤེས་སྐད་ཅིག་མ་བཅུ་དྲུག་སྐྱེས་སོ། །དེ་ལ་ལམ་གོང་མ་སྐྱེས་ཏེ། སྡུག་བསྔལ་ནི་ཤེས་པར་བྱ། ཀུན་འབྱུང་ནི་སྤང་བར་བྱའོ། །འགོག་པ་ནི་མངོན་དུ་བྱའོ། །ལམ་བསྒོམ་པར་བྱའོ། །ཅེས་གསུངས་པས། སྒོམ་ལམ་སྐྱེས་ཏེ། དེ་ནས་ཡང་གོང་མ་མ་སྐྱེས་པ་ལ། སྡུག་བསྔལ་བ་ཤེས་པར་བྱ་སྟེ་ཤེས་ཟིན་ཤེས་སུ་མེད། ཀུན་འབྱུང་ནི་སྤང་བར་བྱ་སྟེ་སྤང་ཟིན་སྤང་དུ་མེད། འགོག་པ་ནི་མངོན་དུ་བྱ་སྟེ་བྱས་ཟིན་བྱ་རུ་མེད། ལམ་བསྒོམ་པར་བྱ་སྟེ་སྒོམ་ཟིན་བསྒོམ་དུ་མེད། ཅེས་བསྟན་པས་ལྔ་སྡེ་བཟང་པོ་ཐུལ་ཏེ་བདེན་པ་ཐོབ་པར་གྱུར་ཏོ། །དེའི་འོག་ཏུ་འོད་སྲུངས་རལ་པ་ཅན་གྱིས་སྡེ་སྟོང་བཏུལ་ལོ། །དེའི་རྗེས་ལ་ཉེ་རྒྱལ་དང་པང་ན་སྐྱེས་བཏུལ་ལོ། །དེའི་རྗེས་སུ་རྒྱལ་པོ་ཟས་གཙང་མ་ལ་སོགས་ཤཱཀྱའི་རིགས་རྣམས་བཏུལ་ཏེ་ཤཱཀྱའི་གཞོན་ནུ་ལྔ་བརྒྱ་རབ་ཏུ་བྱུང་ངོ་། །དེ་རྣམས་ནི་ཐེག་པ་ཆུང་ངུའི་མདོ་སྡེ་རུ་རྟོགས་པར་བཞེད་དོ། །ཡང་རྒྱ་གར་གྱི་སློབ་དཔོན་ཁ་ཅིག་གི་བཞེད་པས་ནི། མངོན་པ་ཡང་དང་པོའི་བཀར་འདུ་བར་བཞེད། ཡང་འགའ་ཞིག་གིས་ནི། མངོན་པ་སྡེ་བདུན་དགྲ་བཅོམ་པས་ཕྱིས་གསུངས་པས་བཀར་ཅང་འགྲོའམ་སྙམ་ན། དེ་ནི་ཅིག་ཏུ་མ་ངེས་ཏེ། སངས་རྒྱས་ཉིད་ཀྱིས་དང་པོའི་དུས་སུ་དུམ་བུ་དང་སིལ་པུར་གསུངས་པ་རྣམས་ཕྱིས་ནས་དགྲ་བཅོམ་པ་རྣམས་ཀྱིས་བསྡུས་ཤིང་། ཆེད་དུ་བརྗོད་པའི་ཚིག་རྣམས་སོ། །བརྗོད་བྱ་ནི། དེ་ལྟར་གསུངས་པའི་ཆོས་རྣམས་ཀྱང་། ཉན་ཐོས་སྡེ་པ་རྣམས་གཉིས་དང་བསྟུན་ནས། གང་ཟག་གི་བདག་མེད་ལ། ཆོས་ཀྱི་བདག་བཟུང་བ་ནི། དོན་དམ་པར་ཡོད་པར་ཞལ་གྱིས་བཞེས་ནས་བདེན་པ་བཞི་ལ་ལན་བཅུ་གཉིས་སུ་གསུངས་པ་ཡིན་ནོ། །དོན་གཉིས་པ་བཀའ་འཁོར་ལོ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ་ནི། ཡུལ་རྒྱལ་པོའི་ཁབ་བྱ་རྒོད་ཕུང་པོའི་རི་ལ་སོགས་པར། རྒྱལ་པོ་མཆོད་སྦྱིན་གྱིས་སྦྱིན་བདག་བྱས་ནས་འཁོར་འདུས་པ་གསུམ་ལ་གསུངས་པ་ཡིན་ཏེ། དུས་ལོ་བཞི་བཅུ་ཞེ་གཉིས་ནས། ལྔ་བཅུ་རྩ་བཞིའི་བར་དུ་ལོ་བཅུ་གཉིས་སུ་གསུངས་པ་ནི། མདོ་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་རྟོགས་པའི་མདོ་རྒྱས་འབྲིང་བསྡུས་གསུམ། སྙིང་པོའི་མདོ་ཤེས་རབ་སྙིང་པོ་ལ་སོགས་པ་གཞུང་ཆུང་བཅུ་གསུམ་གསུངས། དེ་ཡང་སྤྱིར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུང་ཚུང་ཡང་། འདོད་ཆགས་ལས་གྱུར་པའི་ཉོན་མོངས་པ་ཉི་ཁྲི་ཆིག་སྟོང་གི་གཉན་པོར་འདུལ་བའི་སྡེ་སྣོད་མི་བསྡུག་པ་བསྒོམ་པ་ལ་སོགས་ཉི་ཁྲི་ཆིག་སྟོང་། ཉོན་མོངས་པ་ཞེ་སྡང་ལས་གྱུར་པ་ཉི་ཁྲི་ཆིག་སྟོང་གི་གཉན་པོར་མདོ་སྡེའི་སྡེ་སྣོད་བྱམས་པ་བསྒོམ་པ་ལ་སོགས་པ་ཉི་ཁྲི་ཆིག་སྟོང་། ཉོན་མོངས་པ་གཏི་མུག་ལས་གྱུར་པ་ཉི་ཁྲི་གཅིག་སྟོང་གི་གཉན་པོར་མངོན་པའི་སྡེ་སྣོད་བྱམས་པ་བསྒོམ་པ་ལ་སོགས་པ་ཉི་ཁྲི་ཆིག་སྟོང་། ཉོན་མོངས་པ་དུག་གསུམ་ཆ་མཉམ་པ་ལས་གྱུར་པ་ན་མི་མཐུན་པ་ཉི་ཁྲི་ཆིག་སྟོང་གི་གཉན་པོར་སྡེ་སྣོད་གསུམ་སྤྱིར་རིགས་ཅིག་པ་ལ། གཉན་པོ་དང་ཁམས་ཀྱིས་རབ་ཏུ་ཕྱེ་བའི་ཉི་ཁྲི་ཆིག་སྟོང་གསུངས་ཏེ། དེ་ལྟར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ངོ་། །དེ་ལྟར་ཡང་ལྷའི་དབང་པོས་ཞུས་པའི་མདོ་ལས། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་གྲངས་རྙེད་ཀྱི། ཅེས་པ་ལ་སོགས་པ་གསུངས་ཏེ། ཕུང་པོ་ཞེས་པའི་ཚད་ནི། བརྗོད་བྱ་ཕུང་པོའི་ཁམས་ལ་སོགས་པ་མི་འདྲ་བ་རེ་རེ་བཞག་པའམ། ཕུང་པོ་རེ་རེ་ལའང་ཤོ་ལོ་ཀ་སྟོང་སྟོང་དུ་བཞག་པའམ། ཡང་ན་གླང་པོ་ཆེ་ས་སྲུང་གི་རྒྱབ་ཁལ་རེ་ལ་ཕུང་པོ་རེ་རུ་བཞག །ཅེས་གསུངས་སོ། །དབྱེ་བའི་དོན་དུ་མདོ་སྡེ་ཡན་ལག་བཅུ་གཉིས་སུ་བཞག་པ་ནི། མདོའི་སྡེ་དང་། དབྱངས་ཀྱི་བསྙད་པའི་སྡེ་དང་། ལུང་དུ་བསྟན་པའི་སྡེ། ཚིགས་སུ་བཅད་པའི་སྡེ། ཆེད་དུ་བརྗོད་པའི་སྡེ། ལྟུང་བ་དང་བཅས་པའི་སྡེ། རྟོགས་པ་བརྗོད་པའི་སྡེ། དེ་ལྟ་བུའི་སྡེ། སྐྱེས་པ་རབས་ཀྱི་སྡེ། ཤིན་ཏུ་རྒྱས་པའི་སྡེ། རྨད་དུ་བྱུང་བའི་སྡེ། གཏན་ལ་ཕབ་པའི་སྡེ་དང་བཅུ་གཉིས་སུ་གསུངས་པ་ལས། དེ་དག་གི་དགོངས་དོན་རྣམ་གྲངས་དོན་དུ་བསྡུ་ནའང་འདི་ལྟར་ཤེས་པར་བྱའོ། །ཐོག་མར་འདི་སྐད་བདག་གིས་ཐོས་པའི་དུས་ཅིག་ཅེས་པ་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཅེས་པའི་བར་ཏེ་དེ་ཡང་མདོའི་སྡེ་ཞེས་པ་ལ་ཡང་། དགོངས་པའི་དོན་འདུས་པའི་ཕྱིར་མདོ་དང་། དོན་སྡེར་ལངས་པ་ལས་ཚིག་མདོར་བསྡུས་པའམ། ཚིག་སྡེར་ལངས་པ་ལས་དོན་མདོར་བསྡུས་པ་སྟེ། དཔེར་ན་ས་ལུ་ལྗོངས་པའི་མདོ་ལྟ་བུའོ། །ཡང་ན་ཚིག་མ་རྫོགས་ཀྱང་དོན་རྫོགས་པ་སངས་རྒྱས་ཀྱིས་ཤཱ་རིའི་བུ་ལ་གསུངས་པ་ལྟ་བུ་སྟེ། རྟེན་ཅིང་འབྲེལ་པ་མཐོང་ན་ཆོས་མཐོང་ངོ་། །མདོའི་དགོངས་པ་ལས་ངེས་པར་འགྲེལ་པ་ལ་སོགས་པ་གསུངས་ཏེ། སུས་ཆོས་མཐོང་བ་དེ་ལ་སངས་རྒྱས་མཐོང་ངོ་། །ཞེས་པ་དེས་ཀྱང་སྡེར་ལངས་པ་ལྟ་བུའོ། །གཉིས་པ་དབྱངས་ཀྱི་བསྙད་པའི་སྡེ་ནི། མདོ་དེ་ཉིད་དབུ་དང་བར་དང་ཐ་མར་ཚིགས་སུ་བཅད་ན་དབྱངས་ཀྱི་བསྙད་པའི་སྡེ་སྟེ། དཔེར་ན་བུ་མོ་བློ་གྲོས་བཟང་མོས་ཞུས་པ་ལྟ་བུའོ། །གསུམ་པ་ལུང་དུ་བསྟན་པའི་སྡེ་ནི། ངེས་པའི་དོན་གྱི་མདོ་ལ་སོགས་པ་མ་འོངས་པར་སངས་རྒྱས་རྣམས་འབྱུང་བར་ལུང་གིས་བསྟན་པ་དང་། བསྐལ་པ་དང་། དུས་འདི་ཞེས་བྱ་བར་ཁྱོད་སངས་རྒྱས་འདི་ཞེས་བྱ་བར་འགྱུར་རོ། །དཔེར་ན་དགེ་སློང་ལྔ་བརྒྱ་པོ་ལུང་བསྟན་པ་ལྟ་བུའམ། སྲིང་མོ་གང་གཱའི་ལྷ་མོ་ལྟ་བུའོ། །བཞི་པ་ཚིགས་སུ་བཅད་པའི་སྡེ་ནི། སྡུད་པའམ། མཚན་བརྗོད་དམ། བཟང་པོ་སྤྱོད་པ་ལ་སོགས་པ་རྣམས་སོ། །ལྔ་པ་ཆེད་དུ་བརྗོད་པའི་སྡེ་ནི། གང་ལ་སྟོན་པ་ཡི་རངས་པའི་ཚུལ་མཛད་པ་ལྟ་བུ་རྣམས་ཏེ། རིགས་ཀྱི་བུ་ལེགས་སོ། །ལེགས་སོ། །དེ་དེ་བཞིན་ནོ། །དེ་དེ་བཞིན་ཏེ། ཞེས་པ་ལྟ་བུའམ། དགེ་སློང་དག་ཁྱེད་རྣམས་ཕ་རོལ་ཏུ་གཞན་གྱི་ཕྱིར་རྙེད་པ་མི་ཚོལ་བ་ལེགས་སོ། །འདོད་པ་ཆུང་བ་ནི་ལེགས་སོ། །ཆོག་ཤེས་པ་ནི་ལེགས་སོ། །ཅེས་པ་རྣམས་སོ། །དྲུག་པ་ལྟུང་བ་དང་བཅས་པའི་སྡེ་ནི། ལྟུང་བ་དང་བཅས་པའི་བསླབ་པ་གསུངས་པ་ནི། ཉེས་པའི་རྒྱུ་བསྟན་པ་ཡིན་ཏེ། སྔོན་ཡུལ་མཉན་ཡོད་ན། སྐྱེས་བུ་གཅིག་གིས་ཅིག་བཟུང་ནས་ཆུ་དང་འབྲས་སྙེད་དེ་སླར་ཕྱིར་བཏང་ངོ་། །དེ་ལ་སངས་རྒྱས་ཀྱིས་ཉེས་ལྟུང་བསྟན་པ། །སྡིག་པ་ཕྲ་ཞིང་ཆུང་བ་ཡང་། །མི་གནོད་སྙམ་ནས་བརྙས་མི་བྱ། །ཆུ་ཡི་ཐིགས་པ་ཆུང་བས་ཀྱང་། །སྣོད་ཆེན་པོ་ཡང་གང་བར་འགྱུར། །ཅེས་གསུངས་པ་ལ་སོགས་པ་ལྟ་བུའོ། །བདུན་པ་རྟོགས་པ་བརྗོད་པའི་སྡེ་ནི། དཔེ་དང་བཅས་ནས་གསུངས་པའམ། བདེ་གཤེགས་རིགས་ལྔ་རྟོགས་བརྗོད་ཕུལ་བ་ལྟ་བུའོ། །བརྒྱད་པ་དེ་ལྟ་བུའི་སྡེ་རྣམས་ནི། གང་སྔོན་གྱི་སྦྱོར་བ་དང་ལྡན་པས་ཏེ། དགེ་སློང་དག་འཇིག་རྟེན་དུ་འབྱུང་གནས་བཤད་པ་ནི་ཁམས་ཀྱི་མདོ་སྡེའོ་ཞེས་བྱ་བ་དང་། ཡང་སངས་རྒྱས་བསོད་ནམས་སྐྱབས་ཀྱིས་གསུངས་པ་ནི་བདུད་རྩི་ལྔ་ཞེས་བྱའོ། །རྣམ་པར་གཟིགས་ཀྱིས་གསུངས་པ་ནི་ཆོས་ཀྱི་མེ་ལོང་ཞེས་བྱའོ། །འོད་སྲུངས་ཀྱིས་གསུངས་པ་ནི་སྙིང་པོ་རྣམས་རྣམ་པར་འབྱེད་པར་བྱའོ། །ཅེས་གསུངས་པ་རྣམས་སོ། །དགུ་པ་སྐྱེས་པ་རབས་ཀྱི་སྡེ་ནི། སྔོན་ཐུབ་པ་བྱང་ཆུབ་སེམས་དཔའི་སྤྱོད་པ་ལ་ཞུགས་པའི་ཚུལ་ཏེ། དྲིན་ལན་བསབས་པའི་མདོ་དང་། དང་པོའི་སྐྱེས་རབས་ལ་སོགས་པ་ལྟ་བུ་རྣམས་སོ། །བཅུ་པ་ཤིན་ཏུ་རྒྱས་པའི་སྡེ་ནི། ཐེག་པ་ཆེན་པོའི་དོན་རྒྱ་ཆེ་བ། དཔེ་དང་དོན་དུ་མཐུན་པ། ནམ་མཁའི་ཁམས་ལྟ་བུའི་མདོ་ཤེས་རབ་ཀྱི་ཕ་རོལ་དུ་ཕྱིན་པའི་མདོ་དང་། སངས་རྒྱས་ཕལ་པོ་ཆེ་ལྟ་བུའོ། །བཅུ་གཅིག་པ་རྨད་དུ་བྱུང་བའི་སྡེ་ནི། ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་རྣམས་ཀྱི་རྟེན་ཅིང་འབྲེལ་པར་འབྱུང་བ་དང་། རྨད་དུ་བྱུང་བའི་ཆོས་གསུངས་པ་རྣམས་ནི། རྒྱལ་བ་བཙས་མ་ཐག་ཏུ། ཕྱོགས་བཞིར་གོམ་པ་བདུན་བོར་ནས། སྐྱེ་རྒས་ན་འཆི་ཐམས་ཅད་ཀྱི་ཐ་མའོ། །ཅེས་གསུངས་པ་དང་། བྱང་ཆུབ་སེམས་དཔའ་ལ་སྤྲེལ་འུས་ཤིང་ཐོག་སྦྲང་རྩི་ཕུལ་བ་ལ་ལུང་བསྟན་པ་དང་། ཕྱིས་ཆོས་ཉན་པ་ལ་ཞེ་སྡང་རང་དག་ལ་སོང་བ་དང་། བདུད་ཀྱི་བར་དུ་གཅོད་པ་ལ་སོགས་རྣམས་རྣམ་གྲངས་ཀྱི་སྡེར་ལོངས་པ་རྣམས་སོ། །བཅུ་གཉིས་པ་གཏན་ལ་ཕབ་པའི་སྡེ་ནི། སྤྱིར་སྡེ་སྣོད་གསུམ་དུ་མ་འདུས་པ་མེད་པ་དང་། དེ་ཡང་མདོ་ཡི་སྡེ་ནས་རྨད་དུ་བྱུང་བའི་བར་གྱི་བདུན་ནི་མདོའི་སྡེ། གླིང་བཞི་ལ་སོགས་པ་བཞི་ནི་འདུལ་བ། གཏན་ལ་ཕབ་པ་ནི་མངོན་པའི་སྡེ་སྣོད་དོ། །དེ་ལྟར་བཅུ་གཉིས་པོ་དེ་དག་ཀྱང་སྡེ་སྣོད་གསུམ་དུ་ཅིས་འདུ་ཞེས་ན། རྩ་བའི་ཉོན་མོངས་པ་ཙམ་གྱི་དོན་དུ་མདོ་སྡེ། ཉེ་བའི་ཉོན་མོངས་པའི་གཉན་པོར་འདུལ་བ། རང་གིས་ལྟ་བ་ལ་མཆོག་ཏུ་འཛིན་པའི་གཉན་པོར་མངོན་པའི་སྡེ་སྣོད་གསུངས་པར་བསྟན་པ་ཡིན་ནོ། །དེ་དག་ཀྱང་མདོར་བསྡུ་ན་བསླབ་པ་གསུམ་དུ་འདུས་པ་སྟེ། ལྷག་པ་ཏིང་ངེ་འཛིན་གྱི་བསླབ་པ་བསྟན་པའི་ཕྱིར་མདོ་སྡེ། ལྷག་པ་ཚུལ་ཁྲིམས་ཀྱི་བསླབ་པ་བསྟན་པའི་ཕྱིར་འདུལ་བ། ལྷག་པ་ཤེས་རབ་ཀྱི་བསླབ་པ་བསྟན་པའི་ཕྱིར་མངོན་པའི་སྡེ་སྣོད་བསྟན་པ་ཡིན་ནོ། ༈ །བཀའ་འཁོར་ལོ་གསུམ་པ་ནི། དོན་རྣམས་ངེས་པའི་ཆོས་ཀྱི་འཁོར་ལོ་ལས། ཡུལ་ཡངས་པ་ཅན་དང་རྒྱལ་བུ་རྒྱལ་བྱེད་ཀྱི་ཚལ་ལ་སོགས་སུ་ཁྱིན་བདག་མགོན་མེད་ཟས་སྦྱིན་གྱིས་ཡོན་བདག་བྱས་ནས། འཁོར་ཐེག་པ་སྣ་ཚོགས་པ་ལ་མོས་པ་བྱང་ཆུབ་སེམས་དཔའ་ནས་སོ་སོ་སྐྱེ་བོའི་བར་རྣམས་ལ་གང་ལ་གང་འདུལ་དུ་གསུངས་པ་ཡང་། ཁྱད་པར་དུ་ཐེག་པ་ཆེན་པོའི་རིགས་ཅན་རྣམས་ཀྱི་གོ་བ་ཡིན་ཏེ། ཐེག་པ་ཆེན་པོའི་ཆོས་དང་། མདོའི་དགོངས་པ་ལ་ངེས་པར་འགྲེལ་པ་ལ་སོགས་པ་རྣམས་གསུངས་ཏེ། དགུང་ལོ་ལྔ་བཅུ་ང་བཞི་ནས་བརྒྱད་ཅུ་གྱ་གཉིས་ཀྱི་བར་ཏེ། ལོ་ཉི་ཤུ་རྩ་བརྒྱད་དུ་གསུངས། དེ་ཡང་གསང་སྔགས་རྡོ་རྗེ་ཐེག་པའི་ཆོས་འདི་བཀའ་འཁོར་ལོ་གསུམ་པའི་ཁོངས་སུ་འདུ་བར་བཤད་དོ། །དེ་ཡང་འགའ་ཞིག་ནི། གསང་སྔགས་གསུངས་པའི་སྟོན་པ་ཉིད་ཀྱང་། གནས་དང་དུས་དང་འཁོར་ལ་སོགས་པ་མ་ངེས་པ། ཐེག་པ་གསུམ་དུ་མི་འདུ་སྟེ། བླ་མེད་དོན་གྱི་ཐེག་པ་ཞེས་བྱ་བ་རང་སོ་ཡིན་ནོ་ཞེས་ཟེར་ན་ཡང་ཐེག་པ་བཀའ་ཐ་མའི་ཐེག་པར་འདུ་བ་ཡིན་ཏེ། གསང་སྔགས་ཀྱི་བབས་སོ་ཆེན་མོ་ནས། སྟོན་པས་ཨོ་རྒྱན་ཟ་ཧོར་གྱི་ཡུལ་དུ། ལོངས་སྤྱོད་རྫོགས་པའི་ཆ་ལུགས་ཀྱིས་རྒྱལ་པོ་ཛ་ཨིནྡྲ་བྷུ་དྷི་བཙུན་མོ་ལྔ་བརྒྱ་དང་བཅས་པ་བདེ་ཆེན་མཁའ་སྤྱོད་ལ་དབང་བར་བྱས་པ་དང་། ཡངས་པ་ཅན་གྱི་གནས་སུ་འཁོར་འདུས་པ་བཞི་དང་བྱང་ཆུབ་སེམས་དཔའི་ཚོགས་རྣམས་ལ་ཕ་རོལ་ཏུ་ཕྱིན་པ་དང་དོན་དམ་པའི་ངེས་པའི་ཆོས་གསུངས་པ་དང་། རྒྱ་མཚོའི་འགྲམ་དང་ཉེ་བ་ལང་ཀའི་གནས་སུ་སྡེ་བརྒྱད་ལ་སོགས་པ་དག་དང་མ་དག་གི་འཁོར་རྣམས་ལ་རྒྱུ་ལམ་འབྲས་བུ་གསུམ་དུ་ཕྱེས་ནས། རྟེན་ཅིང་འབྲེལ་པའི་ཆོས་རྣམས་རྒྱ་ཆེར་གསུངས་པ་ལ་སོགས་པ་རྣམས། གནས་དང་འཁོར་རྣམས་སུ་སྟོན་པས་དུས་ཅིག་ལ་སྤྲུལ་པ་མཛད་ནས་གསུངས་པ་རྣམས་ལ་ཡང་། དེ་དག་གི་རང་རང་གི་གནས་ན་སྟོན་པས་ནི་བདག་ཅག་ལ་ཆོས་འདི་ལྟ་བུ་གསུངས་ཏེ། སྟོན་པ་ནི་གཞན་དུ་མ་བྱོན་པས། ངེད་རྣམས་ཀྱི་གནས་སུ་གསང་སྔགས་བླ་མེད་ཆོས་ཀྱི་འཁོར་ལོ་བསྐོར་ངེད་ཀྱི་གནས་སུ་ཆོས་འདི་གསུངས་ཟེར་བ་རྣམས་རྫུན་ནོ། །ཅེས་སྨྲས་པ་ལྟ་བུ་སྟེ། བཀའ་ཐེག་པ་ཐ་མའི་ཁོངས་སུ་ཤིན་ཏུ་འདུ་བ་ངེས་པ་ཡིན་ནོ། །ཡང་ཁ་ཅིག་གི་འདོད་པས། ཨིནྡྲ་བྷཱུ་དྷི་སྟོན་པའི་དུས་མིན། ཕྱིས་འབྱུང་བར་ལུང་བསྟན་ཕྱག་ན་རྡོ་རྗེས་འདུལ་བའོ་ཞེས་འབྱུང་བ་ཡོད་དེ། ཨིནྡྲ་བྷཱུ་དྷི་གསུམ་དུ་བྱུང་བའི་ཛ་ཆེན་པོ་དེ་ནི་སྟོན་པའི་སྦྱིན་བདག་དང་དངོས་སློབ་ཡིན་ནོ། །ཚེའི་རིག་འཛིན་བརྙེས་པས་ཕྱག་ན་རྡོ་རྗེས་རི་མ་ལ་ཡ་གནམ་ལྕགས་འབར་བའི་རྩེ་མོར་པོ་ཏི་གླེགས་བམ་གྱི་ཆར་པ་བབས་པ་ཡང་བདེན་ནོ། །གསང་སྔགས་ནི་བཀའ་གསུམ་ཀར་འདུ་བར་སློབ་དཔོན་འཕགས་པ་ཡབ་སྲས་ཀྱང་བཞེད་དེ། ཨཱརྱ་དྷེ་ཝའི་སྤྱོད་པ་བསྡུས་པའི་སྒྲོན་མར་ཡང་གསལ་ལོ། །བརྗོད་བྱ་ནི་ཐེག་པ་ཆེན་པོ་མཚན་ཉིད་མེད་པའི་དོན། སྨྲ་བསམ་བརྗོད་དུ་མེད་པ། རང་བཞིན་གྱི་འོད་གསལ་བ་དང་། དབུ་མའི་དོན་བསྟན་ཅིང་། བླ་མེད་གསང་སྔགས་ཀྱི་ཐེག་པར་འཇུག་པར་དབང་བཞི་ཡང་གཞི་ལམ་འབྲས་བུ། བསྐྱེད་རྫོགས་ཟུང་འཇུག་མཐའ་ཐུག་སྐུ་བཞིའི་ངང་དུ་བསྟན་པ་ཡིན་ནོ། །དེ་ལྟར་བཀའ་འཁོར་ལོ་རིམ་པ་གསུམ་པོ་དེ་དག་ཀྱང་། གང་ཟག་དབང་པོའི་གོ་རིམས་ཀྱི་གསུངས་པ། ཐེ་ཚོམ་གྱིས་གནས་ཀྱང་བྱུང་སྟེ། བཀའ་འཁོར་ལོ་དང་པོ་ནི། སེམས་ཅན་ཐམས་ཅད་དངོས་པོ་ལ་ཞེན་པ་རགས་པའི་དོན་དུ། གཟུང་འཛིན་དོན་དམ་པར་ཡོད་པར་ཞལ་གྱིས་བཞེས་པ་དེ་ལ་ཐེག་པ་ཆེན་པོ་རྣམས་ཡིད་མ་ཆེས་ཏེ་རྩོད་པའི་གནས་སུ་གྱུར་ཏོ། །བཀའ་འཁོར་ལོ་གཉིས་པ་ནི། ཆོས་ཐམས་ཅད་རང་བཞིན་མེད་པར་གསུངས་པས་ཉན་ཐོས་པ་རྣམས་ཐེ་ཚོམ་ཟ་ཞིང་དེ་ལ་ཡང་རྩོད་པའི་གནས་སུ་གྱུར་ཏོ། །བཀའ་འཁོར་ལོ་གསུམ་པ་ལ་ཡོད་པ་དང་། མེད་པར་འདོད་པ་ཐམས་ཅད་ཀྱི་མཚན་ཉིད་གཏན་ལ་ཕབ་སྟེ། དགོས་དོན་དང་། གཅིག་དང་དུ་མ། ངོ་བོ་དབྱེར་མེད་མཉམ་པ་ཉིད་དུ་བསྟན་པའམ། ཆོས་ཐམས་ཅད་སེམས་ཀྱི་འཆར་ལུགས་སམ་སེམས་ལས་མ་འདས་པར་གསུངས་པས་ཀུན་ཡིད་ཆེས་ཏེ། རྩོད་པ་དང་བྲལ་བ་ཡིན་ནོ། །དེ་ཡང་མདོ་དགོངས་པ་ངེས་པར་འགྲེལ་པ་ལས། བཅོམ་ལྡན་འདས་ཀྱིས་དང་པོར་ཡུལ་ཝཱ་རཱ་ན་སཱིར་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ། འཕགས་པའི་བདེན་པ་བཞིས་རྣམ་པར་བསྟན་པས་སུས་ཀྱང་མ་བསྐོར་བའི་འཁོར་ལོ་བསྐོར་བས། འཁོར་ལོ་དེ་བླ་ན་མ་མཆིས་པས་དྲང་བའི་དོན་རྩོད་པའི་གནས་སུ་གྱུར་པ་ལགས། བཅོམ་ལྡན་འདས་ཀྱིས་ཆོས་ཐམས་ཅད་ངོ་བོ་ཉིད་མེད་པ་ནས་བརྩམས་ཏེ། ཐོག་མར་ཡོད་པར་ཡང་གསུངས་ལ། རྗེས་སུ་གཉིས་ཀའི་མཐའ་དང་བྲལ་བ། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་ལེགས་པར་ཕྱེས་ནས་གསུངས་པས། ཤིན་ཏུ་ངོ་མཚར་བ་དང་ལྡན་པའི་ཆོས་ཀྱི་འཁོར་ལོ་གསུམ་པ་བསྐོར་ཏེ། ཆོས་ཀྱི་འཁོར་ལོ་ནི་བླ་ན་མ་མཆིས་པ་ངེས་པའི་དོན། རྩོད་པའི་གནས་སུ་གྱུར་པ་ཡང་མ་ལགས་སོ། །ཅེས་གསུངས་སོ། །དེ་ལྟར་བཀའི་འཁོར་ལོ་རིམ་པ་གསུམ་བསྐོར་བ་དེ་ལ་ཡང་། ཁ་ཅིག་གིས་བཞེད་པས། བཀའི་འཁོར་ལོ་རིམ་པ་གསུམ་པོ་དེ་རྣམས་སངས་རྒྱས་ཀྱིས་གསུང་ཅིག་གདུལ་བྱ་དབང་པོའི་རིམ་པར་རང་རང་དང་མཐུན་པར། སོ་སོར་ཐོས་པ་ཡིན་ཟེར་ལ། འབུམ་ལས། ངས་ནི་གཟུགས་ཀྱི་དེ་བཞིན་ཉིད་ཅིག་པུ་ལས་མ་གསུང་ན་ལ་ལས་གཟུགས་སྟོང་ཞེས་བྱ་བར་མཐོང་། ལ་ལས་ནི་གཟུགས་མི་སྟོང་ཞེས་བྱ་བར་ཐོས་ཁ་གཅིག་སོ། །ཅེས་གསུང་པ་དང་། གསང་སྙིང་ལས་དཔེར་ན་དེ་བཞིན་སྦྲིད་སངས་བཞིན། གསུང་གཅིག་སྒྲ་ཡིས་སོ་སོར་གོ་ཟེར་བ་ཡང་ཡོད་དེ། དེ་དག་ལ་ཡང་འགལ་བ་མེད་དེ། ཡང་དག་པར་ན་གཟུགས་དང་སྒྲར་སྣང་བ་མེད་དེ། གདུལ་བྱ་དག་པའི་སྣང་བ་ཡིན་པས་གང་ཡང་འཐད་ཅིང་། དྲང་དོན་དང་ངེས་པའི་དོན་དང་། དབང་པོའི་རིམ་པ་དགོངས་པའི་ཚུལ་དུ་རྟོགས་པར་བྱའོ། །དེ་དག་གི་རྒྱུ་མཚན་ཉིད་ཀྱི་ཐེག་པ་ཇི་ལྟར་གསུངས་པའི་ཚུལ་རྣམས་རྒྱས་པར་བཤད་ཅིང་། གསང་སྔགས་ཀྱང་ཐེག་པའི་ཁོངས་སུ་འདུ་བར་ཞོར་གྱིས་བཤད་པ་ཡིན་ནོ། ༈ །གཉིས་པ་ནི་འབྲས་བུ་གསང་སྔགས་ཀྱི་ཐེག་པ་གསུངས་པའི་ཚུལ་ལ་བཞི་སྟེ། འོག་མིན་ཆེན་པོའི་གནས་དང་། ལྷའི་གནས་དང་། མིའི་གནས་དང་། མི་མ་ཡིན་པའི་གནས་སོ། །འོག་མིན་ཆེན་པོའི་གནས་དེ་གང་ཡིན་ཞེ་ན། སྒྱུ་འཕྲུལ་རྡོ་རྗེ་ལས། གཙང་མའི་གནས་དག་རབ་སྤངས་པའི། །འོག་མིན་ཆེན་པོའི་གནས་མཆོག་ནས། །ཞེས་སོ། །གནས་དེའི་ཚད་ནི། ཡང་གོང་མ་ལས། འཇིག་རྟེན་གནས་ཀྱི་འོག་མིན་ལས། །གཉིས་འགྱུར་ཤིན་ཏུ་དཔག་པ་ཡིས། །ཞེས་སོ། །གནས་དེའི་མཚན་ཉིད་ཡང་། དེ་ཉིད་ལས། ངོ་བོ་མཐའ་གཉིས་ལས་འདས་པ། །མ་སྤངས་རྒྱན་རྫོགས་གཞལ་ཡས་ཁང་། །ཡོན་ཏན་ལྔ་ཡི་བདག་ཉིད་དེ། །གྲུ་བཞིའི་སྤྱི་བོ་འཁྱིལ་སྣང་བའོ། །ཅེས་སོ། །དེ་ཉིད་ལས། གནས་དེའི་དོན་ལ་མཚན་དུ་སྨོས་པ་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་། རང་བཞིན་ལྷུན་གྲུབ་ཀྱི་གཞལ་ཡས། གསང་ཆེན་ཡུམ་གྱི་མཁའ་ཀློང་། དག་པ་དབྱིངས་ཀྱི་གཞལ་ཡས་ཁང་། རྣམ་དག་སྟུག་པོ་བཀོད་པ། རང་སྣང་ཡེ་ཤེས་ཀྱི་གཞལ་ཡས་ཁང་། ཅེས་པ་ལ་སོགས་པ་རྣམ་གྲངས་སོ་སོ་ལ། དོན་ངོ་བོ་གཅིག་ཏུ་མཐུན་པའི་གནས་དེ་ཉིད་དུ། སྟོན་པ་རང་ཤེས་རིག་པའི་རྒྱལ་པོ། ཀུན་ཏུ་བཟང་པོའམ། རྡོ་རྗེ་འཆང་ཆེན་པོ་དེ་ཉིད། ཆོས་སྐུ་སྐྱེ་བ་མེད་པའི་ངང་ལས་སྐུ་ཞལ་ཕྱག་གི་རྣམ་པར་བཞེངས་ཏེ། ངེས་པ་ལྔ་ལྡན་གྱི་ཚུལ་གྱིས་འཁོར་ཉིད་ལས་མི་ཞན་པ་དང་། ལས་དག་པ་བྱང་ཆུབ་སེམས་དཔའི་འཁོར་དང་། རིག་པ་འཛིན་པ་མཆོག་གི་འཁོར་རྣམས་ལ་རུང་གི་སྐལ་བར་འཚམ་པའི་ལས་དང་། སྔགས་ཕ་རྒྱུད་དང་། མ་རྒྱུད་དང་། གཉིས་སུ་མེད་པའི་རྒྱུད་དང་། རྩ་བའི་རྒྱུད་དང་། བཤད་པའི་རྒྱུད་དང་། མན་ངག་གི་རྒྱུད་དང་། ཕྲིན་ལས་ཀྱི་རྒྱུད་དང་། ཕྱི་མའི་རྒྱུད་དང་། ཕྱི་མའི་ཕྱི་མ་ངེས་པར་བསྟན་པའི་རྒྱུད་དང་། ནུས་པ་བསྟན་པ་སྔགས་ཀྱི་རྒྱུད་དང་། འབྱེད་པར་བྱེད་པ་ལྡེ་མིག་གི་རྒྱུད་དང་། མ་ཚང་བ་ཁ་བསྐོང་བའི་རྒྱུད་ལ་སོགས་ཏེ་དཔག་ཏུ་མེད་པ་གསུངས་སོ། །གཉིས་པ་ལྷའི་གནས་སུ་གསུངས་པ་ནི། འོག་མིན་གྱི་གནས་དེར་བགྲོད་མི་ནུས་པའི་ལྷ་དང་མིའི་བྱང་ཆུབ་སེམས་དཔའ་སྐལ་བ་དང་ལྡན་པ་རྣམས་ལ་འོག་མིན་གཙང་མ་རིས་ཀྱི་གནས་དང་། དབང་བསྒྱུར་གྱི་ཁང་བཟངས་དང་། རི་རབ་ཀྱི་ཅོག་དང་། རྣམ་པར་རྒྱལ་བའི་ཁང་བཟང་དང་། འཚོ་བྱེད་གཞོན་ནུའི་འདུ་ཁང་དམ་པ། ལྕང་ལོ་ཅན་གྱི་ཕོ་བྲང་རྣམས་སུ། གསང་སྔགས་ཀྱི་རྒྱུད་སྡེ་རྣམས་གང་ལ་གང་འདུལ་གྱི་ཚུལ་དུ་དཔག་ཏུ་མེད་པ་གསུངས་སོ། །གསུམ་པ་མིའི་གནས་སུ་གསུངས་པ་ནི། གོང་ལྟར་འོག་མིན་དང་། ལྷ་གནས་གསུམ་ལ་སོགས་པར་བསྒྲོད་མི་ནུས་པའི་གང་ཟག་སྐལ་བ་ཅན་རྣམས་ལ། སྟོན་པ་སྤྲུལ་པའི་སྐུ་དང་། རྡོ་རྗེ་སེམས་དཔའ་ལ་སོགས་པའི་ཆ་ལུགས་སུ་བསྟན་ཏེ་དུས་ཀྱི་འཁོར་ལོ་དང་། སྒྱུ་འཕྲུལ་དྲྭ་བ་ཁྲི་དྲུག་སྟོང་དང་། རྣལ་འབྱོར་སྡོམ་པའི་རྒྱུད་དང་། རིམ་པ་གཉིས་པའི་རྒྱུད་དང་བཅས་པ་མང་དུ་གསུངས། བསིལ་བ་ཚལ་ལ་སོགས་པར་ཀྲྀ་ཡའི་རྒྱུད་མང་དུ་གསུངས། རྒྱལ་པོ་ཨིཎྜ་བྷཱུ་དྷིའི་ཕོ་བྲང་དུ། འོག་མིན་དུ་གསུངས་པའི་སངས་རྒྱས་མཉམ་སྦྱོར་འདབ་པའི་ཚུལ་དུ་གསུངས་པ་དང་། གཞན་ཡང་གསང་སྔགས་ཀྱི་རྒྱུད་སྡེ་ནི་དཔག་ཏུ་མེད་པ་གསུངས། བཞི་པ་མི་མ་ཡིན་པའི་གནས་སུ་གསུངས་པ་ལ། གནོད་སྦྱིན་གྱི་གནས་སུ་གསུངས་པ་ནི། ཕྱག་ན་རྡོ་རྗེའི་རྒྱུད་ཕལ་ཆེར་དང་། རྡོ་རྗེ་ཕུར་པའི་རྒྱུད་འབུམ་སྡེ་ལ་སོགས་པ་གསུངས། གཤིན་རྗེའི་གནས་སུ་གཤིན་རྗེ་དགྲ་ནག་དང་། འཇིག་བྱེད་དང་། ཚེ་བདག །དམར་ནག་དང་། ཁྲག་མཚོ་དང་། སྲོག་བདག་དང་། འཆི་བདག་མེ་འབར་དང་། ཟང་མཚོ་གསལ་ཤིང་། ལས་གཤིན་རྒྱ་མཚོའི་སྐོར་ལ་སོགས་པ་དཔག་ཏུ་མེད་པ་གསུངས་སོ། །སྲིན་པོའི་གྲོང་ཁྱེར་དགའ་བ་ཅན་དུ། དཔལ་འབྱུང་དང་པོ་དང་། དཔལ་དམ་པ་དང་། གློག་གི་ཕྲེང་བ་དང་། ཡ་མ་སྙིང་གཟེར་ལ་སོགས་པ་དཔག་ཏུ་མེད་པ་གསུངས། ཀླུའི་གནས་སུ་རྟོགས་པ་རྒྱལ་པོའི་རྒྱུད་དང་། འཆི་བདག་གན་ལོག་གི་རྒྱུད་དང་། ཀླུ་བདུད་མགོ་དགུ། གཏད་རྒྱུད་རྒྱ་མཚོ། ནཱ་ག་སྙིང་གཟེར། དུག་མཚོ་ཁོལ་མ། གཙུག་ན་མེ་འབར་གྱི་རྒྱུད་ལ་སོགས་པ་དཔག་ཏུ་མེད་པ་གསུངས་སོ། །དེ་ལྟར་སྟོན་པས་ཇི་ལྟར་གསུངས་པའི་ཚུལ་རྣམས་རྒྱས་པར་བཤད་ནས། ༈ སྤྱི་དོན་གསུམ་པ་ཇི་ལྟར་གསུངས་པའི་བཀའ་དེ་དག་བསྡུས་པའི་ཚུལ་ལ་གསུམ་སྟེ། གང་ཟག་གང་གིས་ཇི་ལྟར་བསྡུས་པ་དང་། དུས་ནམ་བསྡུས་པ་དང་། ཚུལ་ཇི་ལྟར་བསྡུས་པའོ། །དེ་ལ་དང་པོར་གང་ཟག་གང་གིས་ཇི་ལྟར་བསྡུས་པ་ནི། ཡང་དག་པར་རྫོགས་པའི་སངས་རྒྱས་དེ་དགུང་ལོ་བརྒྱད་ཅུ་ལ་མྱ་ངན་ལས་འདས་པ་ལས། བྲམ་ཟེ་འདུན་ན་འདོན་དང་ཙུནྡྷས་གསོལ་བ་བཏབ་པས་ལོ་གཉིས་བཞུགས་ཏེ། བརྒྱད་ཅུ་རྩ་གཉིས་ལ་རྩྭ་མཆོག་དྲུང་དུ་ཤིང་སཱ་ལ་ཟུང་བཞིའི་བར་སེང་གེའི་ཁྲི་སྟེང་སུ་གཞོགས་གཡས་ཕབ་སྟེ། སེང་གེའི་ཉལ་སྟབས་ཀྱིས་གཟིམས་སྟེ་བསྙུན་པའི་ཚུལ་བསྟན། མྱ་ངན་ལས་འདས་པའི་བཀའ་ཐ་མ་གསུངས་པའི་རྗེས་སུ། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ལ་སོགས་ཏེ་འཁོར་འདུས་པ་ཐམས་ཅད་ཀྱི་དབུས་སུ། སྟོན་པ་ཉིད་རྟག་པ་རྡོ་རྗེའི་སྐུ་ལ་བགྲེས་རྒུད་འདས་གྲོངས་ལ་སོགས་པ་མི་མངའ་ཡང་། ཀུན་རྫོབ་རྟག་པར་ལྟ་བ་རྣམས་སུན་ཕྱུངས་པ་དང་། ལེ་ལོ་ཅན་རྣམས་ཆོས་ལ་བསྐུལ་བའི་བརྡར། དགོངས་པ་མྱ་ངན་ལས་འདས་པའི་ཚུལ་བསྟན་ཏེ། གདུང་ཞུགས་ལ་ཕུལ་ནས། རིང་བསྲེལ་མ་ག་ཏའི་ཁལ་བྲེ་བཅོ་བརྒྱད་ཡང་ཟེར་བརྒྱད་མ་འོངས་པའི་སེམས་ཅན་བསོད་ནམས་བསགས་པའི་རྟེན་དུ་བཞག །ཚེམས་གཡས་ཀྱི་མཆེ་བ་གཡས་པ་ནི། སུམ་ཅུ་རྩ་གསུམ་དུ་ལྷའི་དབང་པོས་ལྷ་རྣམས་ཀྱིས་མཆོད་པའི་རྟེན་དུ་གདན་དྲངས། དབུ་ཐོད་དཔྲལ་བའི་ཕྱོགས་ནི། ཀ་མ་ལའི་རྒྱལ་པོས་ཕོ་བྲང་དུ་གདན་དྲངས་པ་ལ་སོགས་མཛད་པ་ནི་མྱ་ངན་ལས་འདས་པ་ལས་ཇི་ལྟར་གསུངས་པ་ལྟར་རོ། །དེ་ནས་དགྲ་བཅོམ་པ་རྣམས་ཀྱིས་བཀའི་བསྡུ་བ་བྱེད་པར་འདོད་པ་ན། སངས་རྒྱས་མ་འདས་པའི་གོང་དུ་མོའུ་མགལ་གྱི་བུ་དང་། ཤཱ་རིའི་བུ་ལ་སོགས་པ་དགྲ་བཅོམ་པ་མང་པོ་ཞིག་སྟོན་པ་མྱ་ངན་ལས་འདའ་བ་སེམས་ཀྱིས་མི་བཟོད་ཅིང་། མྱ་ངན་གྱི་དབང་དུ་འཆི་བས་དེ་བས་ད་ལྟ་རུང་། ཞེས་མེའི་ཏིང་ངེ་འཛིན་ལ་བཞུགས་ཤིང་མྱ་ངན་ལས་འདས་སོ། །ཡང་ཁ་ཅིག་གིས་བཞེད་པས། མོའུ་འགལ་གྱི་བུ་ནི་བས་མཐའ་ཞིག་ཏུ་མུ་སྟེགས་པས་བགྲོངས་པའི་བརྗོད་བྱ་ཡང་སྣང་ངོ་། །སྟོན་པ་མྱ་ངན་ལས་འདས་པའི་དུས་སུ་ཡང་། སྐྱོ་བ་སྐྱེས་པའི་ཚུལ་གྱིས། དགྲ་བཅོམ་པ་གྲངས་མེད་པ་མྱ་ངན་ལས་འདས་པས། འཕགས་པ་འོད་སྲུང་གིས་དགྲ་བཅོམ་པ་རྣམས་ལ་སྨྲས་པ། དགྲ་བཅོམ་པ་ཐམས་ཅད་འདི་ལྟར་ཡོངས་སུ་མྱ་ངན་ལས་འདས་པ་ན་ནི། སངས་རྒྱས་ཀྱི་བསྟན་པ་དུས་ཅིག་ལ་ནུབ་སྟེ། བཀའི་བསྡུ་བ་ཡང་སུས་བྱེད། བཀའི་བསྡུ་བ་མ་བྱས་པར་ནི། འཇིག་རྟེན་གྱི་ཁམས་ཐམས་ཅད་མུན་པ་དང་འདྲ་བར་གྱུར་པས། དགྲ་བཅོམ་པ་རྣམས་མྱ་ངན་ལས་མི་འདའ་བའི་ཁྲིམས་བྱའོ། །ཞེས་གསུངས་པས། དེར་དགྲ་བཅོམ་པ་ལྔ་བརྒྱར་ཅིག་གིས་མ་ལངས་པ་ལས། ཀུན་དགའ་བོ་ནི་བསླབ་པ་ལ་རྒྱུན་དུ་ཞུགས་པ་ལས། དགྲ་བཅོམ་པ་མ་ཐོབ་པས། ལྔ་བརྒྱ་ལ་ཅིག་གིས་མ་ལངས་ནས། དེའི་ཚེ་ལྷོ་ཕྱོགས་ཀྱི་བས་མཐའ་ཞིག་ན། འཕགས་པ་བ་ལང་བདག་ཅེས་པའི་དགྲ་བཅོམ་པ་གཅིག་ཡོད་པ་ལ། ཀུན་དགའ་བོ་འབོད་དུ་བཏང་བས། དགྲ་བཅོམ་པ་དེའི་དྲུང་དུ་ཕྱིན་ནས། འཕགས་པ་འོད་སྲུངས་ལ་སོགས་པ་དགྲ་བཅོམ་པ་རྣམས་ཀྱི་མཚན་ཉིད་ནས། རྩ་མཆོག་གྲོང་ཁྱེར་དུ་བྱོན་ཞེས་སྨྲས་པས། བ་ལང་བདག་གིས་སྨྲས་པ། ཅེས་སངས་རྒྱས་ཀྱི་ཞལ་ནས་མི་གསུངས་ཤིང་། དགྲ་བཅོམ་པས་དེ་སྐད་ཟེར་བ་འགྲོ་བའི་མགོན་པོ་དེ་གཞན་དུ་མ་གཤེགས་སམ། སྡུག་བསྔལ་གྱི་རྒྱ་མཚོ་ལས་སྒྲོལ་བའི་མཉན་པ་གྲུ་དང་བཅས་པ་གང་དུ་གཤེགས། ལྷ་སྦྱིན་གྱིས་ཞུ་བའི་དབང་དུ་མ་གྱུར་ཏམ། ཞེས་དྲིས་སོ། །ཀུན་དགའ་བོ་མིག་མཆི་མས་གང་སྟེ་སྨྲ་བར་མ་ནུས་སོ། །དེར་བ་གླང་བདག་གིས་སངས་རྒྱས་འདས་པར་ཤེས་ནས། འགྲོ་བར་བྱ་བའི་བློ་ཡོད་པས། བགྲོད་པར་མི་ནུས་ཏེ། དགྲ་བཅོམ་པ་གྲངས་ཀྱིས་ཐེམས་པར་བྱ་བའི་ཕྱིར། ཆོས་གོས་དང་ལྷུང་བཟེད་བསྐུར་ཏེ། དེ་ཉིད་དུ་མེའི་ཏིང་ངེ་འཛིན་ལ་བཞུགས་ཤིང་འདས་སོ། །དེ་ནས་ཀུན་དགའ་བོ་སླར་ལོག་སྟེ། ཆོས་གོས་དང་ལྷུང་བཟེད་གཏད་དེ་བ་ལང་བདག་གིས་ཇི་ལྟར་གྱུར་པ་རྣམས་སྨྲས་པ་དང་། འཕགས་པ་འོད་སྲུངས་འདི་སྙམ་དུ། མདོ་སྡེ་རྣམས་ཀུན་དགའ་བོས་བསྡུ་དགོངས་པས། དགྲ་བཅོམ་པ་མ་ཐོབ་པས། ཉིད་ཀྱིས་འདུལ་དགོས་པར་གཟིགས་སོ། །ཡང་ཞི་དྲག་གང་གིས་འདུལ་མཉམ་པར་བཞག་པས་ཡང་། དྲག་པོས་འདུལ་བར་དགོངས་སོ། །དེ་ནས་འོད་སྲུངས་ཀྱིས་ཀུན་དགའ་བོ་ལ་སྐྱོ་བ་རྣམ་པ་བརྒྱད་ཀྱིས་ཚར་བཅད་དེ། སངས་རྒྱས་འདས་པ་ཁྱོད་ཀྱི་ལན་ཞེས་སྨྲས། ངས་ཅི་ལན་ཞེས་སྨྲས་པས། བདུད་ལྷ་སྦྱིན་གྱིས་གསོལ་བ་བཏབ་པའི་ཚེ། ཁྱོད་ཀྱིས་མི་འདའ་བར་གསོལ་བ་མ་བཏབ་པས་ལན་ནོ། །ཞེས་སྨྲས་པས། ལན་འདེབས་པར་མ་གྱུར་ཏོ། །ཡང་སྨྲས་པ། འདས་པ་ཁྱོད་ཀྱིས་ལན་ཏེ། སངས་རྒྱས་ལ་ཆུ་རྙོག་མ་ཅན་དྲངས་པས་ལན་ཞེས་རྒོལ། ཀུན་དགའ་བོས། དེའི་ཚེ་བདུད་ཀྱིས་ཆུ་ཐམས་ཅད་མེད་པར་བྱས་པས། ངས་ཕྱོགས་ཀུན་ཏུ་བཙལ་བས་ཆུ་དེ་ལས་མ་རྙེད་ཅེས་སྨྲས་སོ། །ཡང་འོད་སྲུངས་ཀྱིས། དེའི་ཚེ་སངས་རྒྱས་ཀྱི་ལྷུང་བཟེད་ནམ་མཁའ་ཟེད་ན་ལྷས་བདུད་རྩིའི་ཆུས་འགེངས་སོ། །ཞེས་སྨྲས་པས་ལན་མེད་དོ། །ཡང་འོད་སྲུངས་ཀྱིས་སྟོན་པ་འདས་པ་ཁྱོད་ཀྱིས་ལན། སངས་རྒྱས་ཀྱི་ཆོས་གོས་འཚེམས་པའི་ཚེ། ཁྱོད་ཀྱིས་རྡོག་པས་མནན་པས་ལན་ཞེས་སོ། །ཀུན་དགའ་བོས་དེའི་ཚེ་འཐེན་མི་མེད་ཟེར་རོ། །འོད་སྲུངས་ཀྱིས་ནམ་མཁའ་ལ་གཏད་ན་ལྷའི་བུས་འཐེན་ནོ། །ཞེས་སྨྲས་པས་ལན་མེད་དོ། །འོད་སྲུངས་ཀྱིས་སངས་རྒྱས་འདས་པ་ཁྱོད་ཀྱིས་ལན་ཏེ། ཚེ་ལོ་བརྒྱའི་དུས་ན་སྐྱེ་དགུའི་བདག་མོ་རབ་ཏུ་བྱུང་བའི་ཞུ་ངོ་ཁྱོད་ཀྱིས་བྱས་པས། སྐུ་ཚེ་ཉི་ཤུ་བསྟུངས་ཏེ་ལན་ནོ་ཞེས་རྒོལ་བས། ཀུན་དགའ་བོས་འདི་དང་པོ་ཡུམ་འདས་པའི་དུས་སུ་མ་མ་བྱས་པས་དྲིན་ཆེའོ་ཞེས་པ་ལས་སྨྲ་རྒྱུ་མ་བྱུང་ངོ་། །གཞན་ཡང་བསྟན་དུ་མི་རུང་བ་ལ་སངས་རྒྱས་ཀྱི་མཚན་དཔེ་བསྟན་པ་ལ་སོགས་པ་སྐྱོན་ཡོད་པའི་སྤྱོད་པ་དྲག་པོ་བྱས་པས། ཀུན་དགའ་བོ་མིག་མཆི་མས་གང་བཞིན་དུ་དགྲ་བཅོམ་པ་དེ་དག་གི་ནང་ནས་ཕྱུང་ནས། ཕྱོགས་གཞན་ཞིག་ཏུ་སོང་སྟེ། འོད་སྲུངས་ལ་སོགས་པ་དགྲ་བཅོམ་པ་རྣམས་ཀྱིས་བདག་ཕྱུང་ངོ་། །ཞེས་སྨྲས་སོ། །དེའི་དུས་སུ་ཀུན་དགའ་བོས། འཕགས་པ་འབྲི་རྫི་བུ་ཞེས་བྱ་བ་ཅིག་ལ། སྟོན་པའི་བཀའ་མཚན་ཉིད་མེད་པའི་ཆོས་ཞིག་བསྟན་པས། དེས་ཚུལ་བཞིན་ཡིད་ལ་བྱས་པས། ལམ་དྲི་མ་མེད་པའི་དགྲ་བཅོམ་པ་ཐོབ་བོ། །དེ་ནས་འཕགས་པ་འབྲི་རྫིའི་བུས་ཀུན་དགའ་བོ་ལ་ལུང་བསྟན་ཏེ། ཉེ་གནས་ཆེན་པོ་ཀུན་དགའ་བོ། རྩེ་ཅིག་ཏུ་བསྒོམ་ན་སྐད་ཅིག་ལ་དགྲ་བཅོམ་པ་འཐོབ་པར་འགྱུར་རོ། །ཞེས་སྨྲས་པས། དེར་ཀུན་དགའ་བོས་རྩེ་ཅིག་ཏུ་བསྒོམས་པས་སྐད་ཅིག་མ་དེ་ལ་དགྲ་བཅོམ་པ་ཐོབ་བོ། །དེར་དགྲ་བཅོམ་པ་རྣམས་ཀྱིས་ཀུན་གྱི་ཚོགས་སུ་སྤྱན་དྲངས་ཏེ། བསྙེན་ཅིང་བསྐུར་ཏེ་བཀའ་བསྡུ་བར་བྱས་སོ། །བཀའ་བསྡུ་བ་ལ་ཡང་ཐེག་པ་ཆེ་ཆུང་གི་བཞེད་པས། གཉིས་སུ་འདོད་དེ། ཐེག་པ་ཆུང་བའི་བཞེད་པས། འདུལ་བ་གནས་བརྟན་ཉེ་བར་འཁོར་གྱིས་བསྡུས། མདོ་སྡེ་ཀུན་དགའ་བོས་བསྡུས། མངོན་པ་འོད་སྲུངས་ཀྱིས་བསྡུས་པར་འདོད་དེ། ཐེག་པ་ཆེན་པོའི་བཞེད་ཀྱིས། མདོ་སྡེ་འཇམ་དཔལ། འདུལ་བ་ཕྱག་ན་རྡོ་རྗེ། མངོན་པ་བྱམས་པས་བསྡུས་པར་འདོད་དེ། འདི་ནི་གོང་འོག་གཉིས་ཀ་ལ་འགལ་བ་མེད་དེ། མདོར་བསྡུས་པ་དང་། ཞིབ་ཏུ་བསྡུས་པའི་རྣམ་པར་འབྱེད་པས་སོ་སོར་བྱས་པ་ཡིན་ཏེ། དང་པོ་གསུམ་གྱིས་སྡེ་སྣོད་གསུམ་ཆོས་ཀྱི་ཕུང་པོ་བསྡུས། འོག་མ་གསུམ་གྱིས་ཆོས་ཀྱི་མཛོད་ཆེན་པོ་འབུམ་ཕྲག་བཅུར་བསྡུས་པ་སྟེ། གཞན་ཡང་རང་རང་གིས་ཐོས་པ་ཡང་ཡོད་པས་མི་འགལ་བ་ཡིན་ནོ། །དོན་གཉིས་པ་དུས་ཇི་ཙམ་ནས་བསྡུས་པ་ནི། སྟོན་པ་འདས་པའི་ཕྱི་དེའི་ལོ་དབྱར་དུ་འགྱངས་པ་ནི། ཀུན་དགའ་བོས་དགྲ་བཅོམ་པ་མ་ཐོབ་པས་འགྱངས་པ་ཡིན་ནོ། །དེ་ནས་དགྲ་བཅོམ་པ་ལྔ་བརྒྱ་འདུས་ཏེ། རྒྱལ་པོ་མ་སྐྱེས་དགྲས་ཡོན་བདག་བྱས་ནས། ཨ་སུ་རའི་བྲག་ཕུག་ཏུ་སྣམ་ཕྲན་ལྔ་བརྒྱ་གདན་དུ་བཏིང་བ་ལ། སྔ་དྲོ་འཕགས་པ་ཉེ་བར་འཁོར་བཞུགས་ནས་འདུལ་བའི་མདོ་སྡེ་གསུངས། གུང་ལ་འཕགས་པ་ཀུན་དགའ་བོ་བཞུགས་ནས་མདོ་ཡི་སྡེ་སྣོད་གསུངས། ཕྱི་དྲོ་འཕགས་པ་འོད་སྲུངས་ཀྱིས་མངོན་པའི་སྡེ་སྣོད་གསུངས་སོ། །དེའི་ཚེ་ཡང་དག་ཏུ་གསུངས་ཤིང་མི་བརྗེད་པའི་གཟུངས་སུ་བཅངས་པ་ལས་ཡི་གེར་མ་བཏབ་བོ། །དུས་དེར་དགྲ་བཅོམ་པ་རྣམས་ཀྱིས་ཆོས་ཀྱི་འཁོར་ལོ་དང་པོའི་བཤད་པ་བསྟན་བཅོས་བྱེ་བྲག་ཏུ་བཤད་མཛོད་ཆེན་མོ་ཞེས་བྱ་བ་ཤྭ་ལོ་ཀ་འབུམ་ཡོད་པ་གཅིག་བརྩམ། དེའི་རྗེས་སུ་དགྲ་བཅོམ་པ་བདུན་གྱིས་མངོན་པའི་བསྟན་བཅོས་བདུན་མཛད་དེ། ཡེ་ཤེས་འཇུག་པ། རབ་ཏུ་འབྱེད་པའི་གཞི། རྣམ་པར་ཤེས་པའི་ཚོགས་ཆོས་ཀྱི་ཕུང་པོ། གདགས་པའི་བསྟན་བཅོས། ཁམས་ཀྱི་ཚོགས། འགྲོ་བའི་རྣམ་གྲངས་དང་བདུན་མཛད་ཅེས་གྲགས་སོ། །བཀའི་བསྡུ་བ་གཉིས་པ་ནི། སྟོན་པ་འདས་ནས་ལོ་གཉིས་བརྒྱ་ནས། རྒྱལ་པོ་དྷརྨཱཿ ཨ་ཤྭ་ཀ་ཞེས་བྱ་བ་བྱོན་ནས་སྦྱིན་བདག་མཛད་དེ། རྒྱ་གར་ཀུན་དགའ་ར་བར་དགྲ་བཅོམ་པ་ལྔ་བརྒྱ་འདུས་ཏེ། དེའི་ཚེ་ཡང་དག་ཏུ་ཞིབ་ཚགས་སུ་བསྡུས་པ་ལས་ཡི་གེར་ནི་མ་བཏབ་བོ། །འདིའི་དུས་སོ་སོ་སྐྱེ་བོ་རྣམས་ཀྱི་འགའ་རེ་བརྗེད། འཕགས་པ་རྣམས་ཀྱིས་མ་བརྗེད་དོ། །བཀའ་བསྡུ་བ་གསུམ་པ་ནི། སྟོན་པ་འདས་ནས་ལོ་གསུམ་བརྒྱ་ནས། རྒྱལ་པོ་ཀ་ནི་ཀ་ཞེས་བྱ་བ་བྱོན་པའི་སྐུ་རིང་ལ། སྦྱིན་བདག་མཛད་དེ། ཁ་ཆེའི་ཡུལ་ཀུན་དགའ་ར་བ་ཞེས་བྱ་བའི་དགོན་པ་ཛ་ལ་ནྡྷ་ར་ཞེས་བྱ་བ་རུ། དགྲ་བཅོམ་པ་ལྔ་བརྒྱ་དང་། བ་སུ་མི་ཏྲ་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་དང་། སོ་སོའི་སྐྱེ་བོ་སྒྲ་དོན་ལ་མཁས་པ་གཉིས་བརྒྱ་ལྔ་བཅུས་བསྡུས་པ་སྟེ། འདིའི་དུས་སུ་སོ་སོ་སྐྱེ་བོ་དེ་རྣམས་ཀྱིས་ཕལ་ཆེར་བརྗེད། འཕགས་པ་རྣམས་ཀྱིས་ནི་མི་རྗེད་པའི་གཟུངས་ཐོབ་སྟེ། སོ་སོ་སྐྱེ་བོ་མི་རྗེད་པའི་གཟུངས་མ་ཐོབ་པ་རྣམས་དང་། སངས་རྒྱས་ཀྱི་བསྟན་པ་མཐའ་བརྩན་པར་བྱ་བ་དང་། མ་འོངས་འགྲོ་བ་རྣམས་ཀྱི་རྟེན་དུ། གྲོ་ག་དང་། ཏ་ལའི་ལོ་མ་དང་། ཨ་གྲོ་ཀའི་ཤུན་པ་རྣམས་ལ་ལེགས་པར་གཏན་ལ་ཕབ་སྟེ། ཡི་གེ་ལ་དུས་དེར་བཏབ་བོ། །བླ་ན་མེད་པ་སྔགས་ཀྱི་རྒྱུད་སྡེ་རྣམས་ནི། ཕལ་ཆེར་ནི་གསང་བའི་བདག་པོ་ལག་ན་རྡོ་རྗེས་གསུངས་པ་ཡིན་ཏེ། ཡེ་ཤེས་ཐིག་ལེའི་རྒྱུད་ལས། དགོངས་པ་ལུང་བསྟན་ཏེ། མ་འོངས་པའི་དུས་སུ་ཡང་དག་པའི་རྒྱུད་གསུངས་པ་རྣམས། སྐལ་བ་དང་ལྡན་པའི་སེམས་ཅན་རྣམས་ལ་སུས་བཤད་པར་འགྱུར། ཞེས་ཞུས་པ་དང་། བཀའ་སྩལ་པ། ཕྱག་ན་རྡོ་རྗེ་མགོན་པོས་བཤད་པ་དབྱེར་མེད་པར་འགྱུར་རོ། །ཞེས་བཀའ་སྩལ་ཏེ། རྫོགས་པ་ཆེན་པོ་ལ་སོགས་པ་རྙིང་མར་གྲགས་པ་འགའ་ཞིག་ནི། སྤྲུལ་པ་པོ་དགའ་རབ་རྡོ་རྗེ་དང་། རིག་འཛིན་ཐོད་པ་རྩལ། ལྷ་ཡི་རིག་འཛིན་ཀུན་དགའ་སྙིང་པོ། སྤྲུལ་པ་ཐུབ་པ་དྲུག་དང་། པུརྣ་ཉེ་བར་ཞི་བ་ལ་སོགས་པའི་མཁའ་འགྲོ་མ་དཔག་ཏུ་མེད་པ་རྣམས་ཀྱིས་བསྡུས་པར་རྒྱུད་རང་རང་གི་སྐབས་ན་གསལ་ལོ། །དེ་དག་ནི་རྒྱུད་ཀྱི་བསྡུ་བ་མདོ་ཙམ་རྣམ་པར་བཞག་པ་སྟེ། རྒྱས་པར་ཡི་གེས་འཇིགས་པས་བཀའི་འཁོར་ལོ་གསུམ་པའི་སྐབས་སུ་འདུ་བས་ཤེས་པར་བྱའོ། །དོན་གསུམ་པ་ཇི་ལྟར་བསྡུས་པ་ནི། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཇི་རྙེད་ཅིག་བཀའ་སྩལ་པ་རྣམས་དོན་བཞིར་བསྡུས་ཏེ། གཉན་པོ་ལ་དགོངས་ཏེ་རྒྱས་པར་བཀའ་སྩལ་པ་དང་། དབྱེ་བ་ལ་དགོངས་ཏེ་འབྲིང་དུ་བཀའ་སྩལ་པ་དང་། བསྡུས་པ་ལ་དགོངས་ཏེ་བསྡུས་ནས་བཀའ་སྩལ་པ་དང་། གང་ཟག་གི་དབང་པོ་ལ་དགོངས་ཏེ་ཐེག་པ་རིམ་པར་བཀའ་སྩལ་པའོ། །དང་པོ་གཉན་པོ་ལ་དགོངས་ཏེ་བཀའ་སྩལ་པ་ཡང་། འདོད་ཆགས་ཀྱི་གཉན་པོར་འདུལ་བ་ཉི་ཁྲི་ཆིག་སྟོང་། ཞེ་སྡང་གི་གཉན་པོར་མདོ་སྡེ་ཉི་ཁྲི་ཆིག་སྟོང་། གཏི་མུག་གི་གཉན་པོར་མངོན་པ་ཉི་ཁྲི་ཆིག་སྟོང་། དུག་གསུམ་ཆ་མཉམ་གྱི་གཉན་པོར་གསང་སྔགས་ཉི་ཁྲི་ཆིག་སྟོང་སྟེ། ལར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དུ་གསུངས་སོ། །གཉིས་པ་དབྱེ་བའི་དོན་ལ་དགོངས་ཏེ། འབྲིང་དུ་བཀའ་སྩལ་པ་ཡང་། བསྟན་པ་མཐའ་དག་གསུང་རབས་ཡན་ལག་བཅུ་གཉིས་སུ་ཕྱེ་སྟེ། མདོའི་སྡེ་དང་། དབྱངས་སུ་བསྙད་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། ལུང་དུ་བསྟན་པའི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་སྡེ་དང་། གླིང་བཞིའི་སྡེ་དང་། རྟོགས་པ་བརྗོད་པའི་སྡེ་དང་། ད་ལྟར་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། གཏན་ལ་ཕབ་པའི་སྡེ་དང་བཅུ་གཉིས་སོ། །གསུམ་པ་བསྡུས་པའི་དོན་ལ་དགོངས་ཏེ་བསྡུས་པར་བཀའ་སྩལ་པ་ནི། བཀའ་ཐམས་ཅད་སྡེ་སྣོད་གསུམ་དུ་བསྟན་པ་འམ། ཐེག་པ་ཆེ་ཆུང་གཉིས་སུ་བསྡུས་པའམ། ཡང་ན་སྔགས་མཚན་ཉིད་གཉིས་སུ་བསྡུས་པའོ། །བཞི་པ་གང་ཟག་གི་བསམ་པ་ལ་དགོངས་ཏེ་ཐེག་པའི་རིམ་པར་བཀའ་སྩལ་པ་ནི། ཡང་དག་པར་ན་ཐེག་པ་ལ་རིམས་པ་མེད་ཀྱང་། གང་ཟག་དབང་པོའི་རིམ་པས་ཐེག་པར་ཕྱེས་ཏེ། ཐེག་པའི་ངོ་བོ་དང་། ངེས་ཚིག་དང་། དབྱེ་བ་དང་གསུམ་མོ། །ཐེག་པའི་ངོ་བོ་དང་། ལམ་འབྲས་བུ་དང་བཅས་པའི། ཡང་ན་ཤེས་རབ་ཀྱི་སྙིང་པོ་ཇི་ལྟར་ཞེ་ན། ལང་ཀར་གཤེགས་པ་ལས། ཐེག་པའི་རང་བཞིན་ཤེས་རབ་སྙིང་པོ་སྟེ། །ཅེས་སོ། །ངེས་ཚིག་ནི་ཐེག་པ་ཆེ་བ་དང་། འདེགས་པར་བྱེད་པས་ན་ཐེག་པ་སྟེ། དཔེར་ན་རྟའམ། གླང་པོའམ། གྲུ་དང་གཟིངས་ལྟ་བུའོ། །དབྱེ་ན་ཅིག་དང་དུ་མ་དང་ཅིག་དང་དུ་མ་མེད་པ་གང་རུང་ཡང་རིགས་ཏེ། མཚན་བརྗོད་ལས། ཐེགས་པ་གསུམ་གྱི་ངེས་འབྱུང་ལ། །ཐེག་པ་ཅིག་གི་འབྲས་བུར་གནས། །ཞེས་དང་། དགོངས་པ་འདུས་པ་ལས། གསང་བའི་སྙིང་པོ་ངེས་པས་ན། །ཐེག་པའི་སྒོ་ཡང་ཅིག་ལས་མེད། །ཅེས་སོ། །དུ་མར་ཡང་ངེས་ཏེ། དགོངས་འདུས་ལས། ཆེ་ཆུང་རིམས་པའི་བློ་ཡོད་ཕྱིར། །ཐེག་པའི་རིམ་པ་ཇི་བཞིན་ཏེ། །བསྡུས་པས་ཆེ་ཆུང་གཉིས་ཀྱིས་སོ། །ཞེས་པ་དང་། རྩ་རྒྱུད་ལས། གདུལ་བྱའི་དབང་གིས་ལྷ་མིའི་ཐེག་པ་དང་། །ཉན་ཐོས་རང་རྒྱལ་ཐེག་པ་དང་། །བྱང་ཆུབ་སེམས་དཔའི་ཐེག་པ་དང་། །བླ་ན་མེད་པའི་ཐེག་པ་དང་། །ཅེས་སོ། །གཅིག་དང་དུ་མ་གང་དུ་ཡང་ངེས་པ་ནི། ཐིག་ལེ་ཀུན་གསལ་ལས། ཐེག་པའི་སྒོ་ནི་སྲོག་མེད་དེ། །ཅིག་དང་དུ་མ་ཆ་ཤས་དང་། །སྤྱོད་པ་ཀུན་ལས་བྲལ་བའོ། །ཅེས་སོ། །དེ་དག་གི་ནི་ཇི་ལྟར་བསྡུས་པ་དང་། བསྡུས་པའི་དོན་རྣམས་ཀྱང་རྒྱ་ཆེར་གཏན་ལ་ཕབ་པ་ཡིན་ནོ། ༈ །སྤྱི་དོན་བཞི་པ་ལྷ་དང་མིའི་ཡུལ་དུ་ཇི་ལྟར་གྲགས་པའི་ཚུལ་ནི་གཉིས་ཏེ། རྒྱུ་མཚན་ཉིད་དང་། འབྲས་བུ་སྔགས་སོ། །མཚན་ཉིད་ཀྱི་བཀའ་རྣམས་ནི། བསྡུ་བ་བྱས་ནས་དགེ་འདུན་གྱི་བསྲོ་ཁང་དུ་ཕྱོགས་ཅིག་ཏུ་བཞུགས་པའམ། ཐེག་པའི་འདོད་པ་ལྟར་བགོ་བཤའ་བྱ་བར་འདོད་ནའང་། དེ་དག་གིས་ལོང་མེད་པར་མི་དང་མི་མ་ཡིན་པ་རྣམས་ཀྱིས་ཐོབ་ཤ་བྱས་ནས་ཁྱེར་རོ། །དུས་ཕྱིས་མི་ཡི་གནས་ན་བཞུགས་པ་རྣམས། འཕགས་པ་དང་གྲུབ་ཐོབ་རྣམས་ཀྱིས་རིམ་པར་བསྡུས་ནས་དར་བ་ཡིན་ཅིང་། མདོ་རྣམས་ཐོ་གར་ཡུལ་དུ་འཐོར་བ་དང་། ཉི་ཁྲི་སྡེ་བརྒྱད་ཡུལ་དུ་འཐོར་བ་དང་། འབུམ་ཀླུའི་ཡུལ་དུ་བཞུགས་པ་ལ་སོགས་པ་དུ་མ་ཞིག་སློབ་དཔོན་འཕགས་པ་ལ་སོགས་པ་རྣམས་ཀྱིས་གདན་དྲངས་པ། ཤས་ཆེར་རྒྱུས་ཡོད་ཕྱིར་མང་དུ་མ་སྨྲོས་སོ། །གསང་སྔགས་ལ་གཉིས་ཏེ། རྒྱ་གར་ན་གསར་རྙིང་དུ་གྲགས་པ་དོན་གྱི་མེད་ནའང་། བོད་དུ་འགྱུར་སྔ་ཕྱི་དང་། འགྱུར་བའི་ཁུངས་ཀྱི་གསར་རྙིང་དུ་གྲགས་པ་ལས། རྙིང་མ་རུ་གྲགས་པའི་དབང་དུ་བྱས་ན། འོག་མིན་དང་། ལྷ་གནས་གསུམ་དང་། རང་སྣང་སྟུག་པོ་བཀོད་པའི་གནས་དང་། ལྷ་བད་དང་། འཚོ་བྱེད་ཀྱི་གནས་སུ་གསུངས་པ་རྣམས། གསང་བའི་བདག་པོ་ལག་ན་རྡོ་རྗེའམ། རྡོ་རྗེ་ཆོས་སམ་རྡོ་རྗེ་སྙིང་པོའམ། རྡོ་རྗེ་ཐོད་པ་རྩལ་དུ་གསོལ་བ་དེ་ཉིད་ཀྱིས། གསེར་གྱིས་གླེགས་བམ་ལ་བཻཌཱུརྱ་ཞུན་མས་བྲིས་ཏེ། རིན་ཆེན་སྣ་ལྔའི་སྒྲོམ་དང་། རིན་པོ་ཆེ་སྣ་དགུའི་སྒྲོམ་ལ་སོགས་པར་རྒྱ་རང་ནན་དུ་བཏབ་སྟེ། མཆོད་རྟེན་ཆེན་པོ་བདེ་བྱེད་བརྩེགས་དང་། ལྷ་གནས་གསུམ་དང་། དུར་ཁྲོད་བརྒྱད་ཀྱི་མཆོད་རྟེན་དང་། ཨོ་ཏ་ན་གྷོནྡྷ་ལ་ཨོ་རྒྱན་གྱི་གཙུག་ལག་གསུམ་དང་། རྡོ་རྗེའི་གདན་དང་། དགོངས་པའི་རྩལ་གྱིས་མདུན་གྱི་ནམ་མཁའ་ལ་སྦས་པ་ལ་སོགས་པ་དཔག་ཏུ་མེད་པ་སྦས་པ་རྣམས། གྲུབ་ཐོབ་རྣལ་འབྱོར་གྱི་དབང་ཕྱུག་ཆེན་པོ་རྣམས་ཀྱིས་དངོས་གྲུབ་སོ་སོར་བརྙེད་ནས། ལྷ་གནས་གསུམ་དང་། རྡོ་རྗེ་གདན་དང་། བྱང་ཆུབ་ཤིང་དྲུང་དུ་སྦས་པ་དུ་མ་ཞིག །རིག་འཛིན་ཆེན་པོ་དགའ་རབ་རྡོ་རྗེས་དངོས་གྲུབ་དུ་བརྙེས་པ་དང་། མཆོད་རྟེན་བདེ་བྱེད་བརྩེགས་སུ་བཞུགས་པ་རྣམས། རྒྱ་གར་གྱི་རིག་འཛིན་ཆེན་པོ་བརྒྱད་ཀྱིས་དངོས་གྲུབ་བརྙེས་པ་ལ་སོགས་པ་དཔག་ཏུ་མེད་པའི་རྣམ་གྲངས་འདུག་ནའང་། ཡི་གེ་འཇིགས་པས་དོན་དུ་དྲིལ་བས་ཤེས་པར་བྱའོ། །ཁྱད་པར་དགོངས་པའི་རྩལ་གྱིས་ནམ་མཁའ་ལ་སྦས་ཞེས་པ་རྣམས་ནི། ཡུལ་དང་། ཆོས་དང་། གདུལ་བྱ་དང་། འདུལ་སྟོན་གྱི་དགོངས་པས། རྒྱལ་པོ་ཨིནྡྲ་བྷོ་དྷི་ལ། ལག་ན་རྡོ་རྗེས་རི་མ་ལ་ཡ་གནས་ལྕགས་འབར་བའི་རྩེར་བཀའ་པོ་ཏི་གླེགས་བམ་ཆར་དུ་ཕབ་པ་ཡིན་ཏེ། དེ་ཡང་ཡུལ་དང་། ཆོས་གདུལ་བྱའི་དགོངས་པ་ལ་བརྟེན་ནས། གང་དུ་བབས་ཞེ་ན། ཀྲི་ཡ་ཝཱ་རཱ་ན་སཱིིར་བབས་ཏེ། དེ་ན་ཀྲི་ཡའི་རྫས། བ་དམར་པོའི་འོ་མ་ཡོད་པའོ། །ཡོ་ག་རྣམས་མེ་རི་འབར་བ་ལ་ཕབ་པ་སྟེ། རི་དེ་ལྷུན་ཅིང་བརྗིད་ཆེ་བས་ཡོ་གའི་ལྷ་དང་མཐུན་པའོ། །མ་ཧཱ་ཡོ་ག་རྣམས་རྒྱལ་པོ་ཛའི་ཁང་ཐོག་ཏུ་བབས་ཏེ། དེ་ན་ལོངས་སྤྱོད་ཆེ་བས་མ་ཧཱ་ཡོ་གའི་ཚོགས་གྲུབ་སླ་བ་ལ་དགོངས་པའོ། །ཨ་ནུ་ཡོ་ག་རྣམས་གནམ་ལྕགས་ཡོད་པའི་རྩེ་ལ་བབས་ཏེ། དེ་ན་དྲག་པོའི་རྫས་གནམ་ལྕགས་ཡོད་པའོ། །ཨ་ཏི་ཡོ་ག་རྣམས་ཨོ་རྒྱན་དྷ་ན་ཀོ་ཤའི་གླིང་དུ་བབས་ཏེ། གླིང་དེ་ནི་ས་ཁོད་སྙོམས་ཤིང་མཁའ་འགྲོ་རྟག་ཏུ་འདུ་བའི་གནས་ཡིན་པས་རྫོགས་པ་ཆེན་པོའི་རྣལ་འབྱོར་པ་སྤྱོད་པ་སྐྱོང་བ་ལ་དགོངས་པའོ། །གཞན་ཡང་སྣ་ཚོགས་པ་རྒྱུད་སྡེའི་རྒྱུད་སྡེ་བརྒྱད་ཀྱི་གནས་ན་ཡོད་པ་རྣམས་ནི། གནོད་སྦྱིན་གྱི་གནས་ནས་ཕྱག་ན་རྡོ་རྗེས་གདན་དྲངས་པ་རྣམས་དང་། གཤིན་རྗེའི་གནས་ནས་སློབ་དཔོན་འཇམ་དཔལ་བཤེས་གཉེན་གྱིས་གདན་དྲངས་པ་རྣམས་དང་། སྲིན་པོའི་གནས་ན་ཡོད་པ་སློབ་དཔོན་པད་མས་གདན་དྲངས་པ་རྣམས་དང་། གཞན་ཡང་མཁའ་འགྲོའི་གསང་མཛོད་ན་ཡོད་པ་རྣམས། གྲུབ་ཐོབ་རྣམས་ཀྱིས་མང་དུ་གདན་དྲངས་ཏེ་འདིར་ཡི་གེ་འཇིགས་ཤིང་རྒྱུད་ཀྱི་རྣམ་གྲངས་དང་། སྦས་ཚུལ་དང་། བཏོན་ལུགས། དར་ཚུལ་དང་བཅས་པ་རྣམས། རྒྱས་པར་ནི་ཁོ་བོའི་གཏེར་འབྱུང་ཆེན་པོར་ཤེས་པར་བྱའོ། །རྒྱུད་གཞན་འགའ་ཞིག་ནི་ད་དུང་མཁའ་འགྲོའི་གསང་མཛོད་ན་མང་དུ་བཞུགས་པ་དང་། འགའ་ཞིག་ནི་སྔོན་སྡུད་པ་པོ་རྣམས་ཀྱིས་བསྡུ་བར་མ་ནུས་ཏེ། སྒྲ་རང་ཡལ་ལ་སོང་བ་ཡང་ཡོད་ཅེས་གྲགས་སོ། །སྔོན་གསུངས་པ་ལ་དོན་མེད་སྙམ་ན། ཤིན་ཏུ་ཡོད་དེ་སྔོན་བྱུང་གི་འཁོར་གཏོགས་པ་ཆེན་པོ་ལ་གནས་པ་རྣམས་ཀྱི་སྒྲོ་འདོགས་བཅད་པ་ཡིན་ནོ། །དེ་ཡང་རྒྱུད་རྣམས་འགའ་ཞིག་ནི་ཤིན་ཏུ་དར་རྒྱས་ཆེ། འགའ་ཞིག་ནི་འགྲོ་དོན་བག་རེ་བྱས་ནས་ནུབ། འགའ་ཞིག་ནི་མཁའ་འགྲོའི་གསང་མཛོད་ན་ད་དུང་འབྱོན་ཏེ་དར་རྒྱས་སུ་འགྱུར་བར་ལུང་གི་བསྟན་པ་ཁོ་ན་ལྟར་ཡིན་ནོ། །ཡང་དེང་སང་གི་རྟོག་གེ་བ་ལ་སོགས་བོད་ཀྱི་སློབ་དཔོན་ཁ་གཅིག །དེ་ལྟ་བུའི་བབས་དོང་གཏན་ཚིག་ལ་ངེས་པ་མེད་དོ་ཟེར་ན། ལོ་ཙཱ་བ་ཟུར་ག་རྡོར་གྱིས་དཔལ་ན་ལེན་ཤྲི་ལེནྡྲའི་གཙུག་ལག་ཁང་ན་པོ་ཏིའི་ཆར་བབས་པའི་རྒྱུས་རྣམས་གྱང་རིས་ལྷ་ཁང་ལ་རི་མོ་བྲིས་པ་མཐོང་བ་དང་། སྔོན་བྱུང་བསྟན་པ་གྲྭ་མ་ཉམས་པའི་དུས་སུ། ས་ལ་གནས་པའི་པཎྜི་ཏ་དང་། སྤྲུལ་པའི་ལོ་ཙཱ་བ། བྱང་ཆུབ་སེམས་དཔའི་ཡོན་བདག་རྣམས་བཞུགས་པའི་དུས་སུ་གཏན་ལ་ཕབ་པའི་གནའ་གཏམ་ལོ་རྒྱུས་ཡིན་པས་ཤིན་ཏུ་ཡིད་ཆེས་པར་ཤེས་པར་བྱའོ། །ཡང་གསང་སྔགས་གསར་མའི་དབང་དུ་བྱས་ན། འདི་ལ་མི་མཐུན་པའི་འདོད་འགའ་རེ་སྣང་སྟེ། ཁ་ཅིག་ན་རེ། བཅོམ་ལྡན་འདས་གྲོང་ཁྱེར་མཉན་ཡོད་ན་བཞུགས་པའི་དུས། དེ་ནས་ནུབ་ཕྱོགས་སུ་དཔག་ཚད་སུམ་བརྒྱ་ན་ཨོ་རྒྱན་གྱི་ཡུལ་ཡོད་དེ། དེ་ན་རྒྱལ་པོ་ཨིནྡྲ་བྷོ་དྷེ་བཞུགས་པ་ལ། སྔ་དྲོའི་དུས་ཅིག་གི་ཚེ་དགེ་སློང་གི་གཟུགས་གཅིག་ནམ་མཁའ་ལ་འགྲོ་བ་མཐོང་ནས། དེ་དག་ཅི་ཡིན་ཞེས་དྲིས་པ་ལ། འདི་ནས་ཤར་ཕྱོགས་སུ་དཔག་ཚད་སུམ་བརྒྱ་ན་མཉན་ཡོད་ཅེས་བྱ་བའི་གྲོང་ཁྱེར་ན། རྒྱལ་པོ་ཟས་གཙང་གི་སྲས་སངས་རྒྱས་ཤཱཀྱ་ཐུབ་པ་ཞེས་བྱ་བའི་སློབ་མ་ཡིན་ནོ། །ཞེས་ཟེར། དེ་སྐད་ཐོས་པས་རྒྱལ་པོ་རབ་ཏུ་དད་དེ། རྒྱལ་པོས་དེ་ཕྱོགས་སུ་ཕྱག་འཚལ་ཐལ་མོ་སྦྱར་བས། མཉན་ཡོད་ན་བཅོམ་ལྡན་འདས་དགེ་འདུན་གྱི་འཁོར་སྟོང་གཉིས་བརྒྱ་ལྔ་བཅུ་དང་། བྱང་ཆུབ་སེམས་དཔའི་འཁོར་དཔག་ཏུ་མེད་པ་དང་བཅས་པ་བཞུགས་པ་མཐོང་ངོ་། །དེར་མོས་པ་ཆེན་པོའི་དབང་གིས། བཅོམ་ལྡན་འདས་ཐམས་ཅད་མཁྱེན་པ། ཐུགས་རྗེ་དང་རྫུ་འཕྲུལ་གྱི་ཞབས་མངའ་བ། སང་བདག་ཉིད་གདུགས་ཚོད་ལ་བབ་པས་གཤེགས་པར་ཞུ། ཞེས་གསོལ་བ་བཏབ་པས། སང་གདུགས་ཚོད་ལ་བཅོམ་ལྡན་འདས་འཁོར་དཔག་ཏུ་མེད་པ་དང་བཅས་པ། བྱའི་རྒྱལ་པོ་འདབ་བཟང་ལྟར་ནམ་མཁའ་ལ་བྱོན་ཏེ། ཕོ་བྲང་གི་ཡང་ཐོག་ཏུ་བབས་ཏེ་གདན་བཤམས་པ་ལ་བཞུགས་ནས། གདུགས་ཚོད་གསོལ་བའི་རྗེས་སུ། རྒྱལ་པོས་ཕྱག་འཚལ་གུས་པ་ཆེན་པོས་ཐལ་མོ་སྦྱར་ཏེ་མདུན་དུ་འདུག་ནས། སྟོན་པ་ཐབས་མཁས་ཐུགས་རྗེ་དང་ལྡན་པས་བདག་ཅག་སྲིད་པའི་སྡུག་བསྔལ་ལས་ཐར་བར་མཛད་དུ་གསོལ། ཞེས་ཞུས་པས། བཀའ་སྩལ་པ། ཀྱཻ་རྒྱལ་པོ་ཆེན་པོ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ཐབས་ཡོད་དོ། །ཅེས་གསུངས་པ་དང་། རྒྱལ་པོས་གསོལ་པ། བདག་ཅག་ནི་འདོད་དོན་གྱི་གདུངས་པ་ཆེ་ཞིང་། འཇིག་རྟེན་གྱི་ལོངས་སྤྱོད་ལ་ཤིན་ཏུ་སྲེད་པས། འདི་མ་སྤངས་པར་འཁོར་བ་ལས་སྒྲོལ་བའི་ཐབས་ཅིག་ཞུ་ཞེས་ཞུས་པས། དུས་ལ་བབ་པ་དང་། གསང་སྔགས་ཀྱི་སྣོད་དུ་གཟིགས་ནས། དེའི་ཚེ་སྐྱེ་བོ་ཆགས་པ་ཅན་རྗེས་སུ་བཟུང་བའི་ཕྱིར་རྡོ་རྗེ་འཆང་དུ་བཞེངས་ནས། རྡོ་རྗེ་བཙུན་མོའི་བ་ག་ལ་བཞུགས་ཏེ། རྒྱལ་པོ་བཙུན་མོ་ལྔ་བརྒྱ་དང་བཅས་པའི་འཁོར་རྣམས་ལ་དབང་བསྐུར། སྨིན་ཅིང་གྲོལ་བར་མཛད་ནས། གསང་སྔགས་ཀྱི་རྒྱུད་སྡེ་དཔག་ཏུ་མེད་པ་གསུངས་པ་ཕྱག་ན་རྡོ་རྗེས་བསྡུས་ཏེ་མཁའ་འགྲོ་མ་ལ་གཏད། འགའ་ཞིག་ནི་དབུས་འགྱུར་ཚལ་འོད་མའི་གཙུག་ལག་ཁང་དུ་ཡང་སྦས་ཏེ། དུས་ཕྱིས་གྲུ་ཐོབ་རྣམས་ཀྱིས་རིམས་པར་བླངས་ནས་དར་བར་བྱས་པ་ཡིན་ནོ། །ཞེས་ཀྱང་ཟེར་རོ། །ཡང་འགའ་ཞིག་ན་རེ། བཅོམ་ལྡན་འདས་ཀྱིས་རྒྱལ་པོ་ལ་མིན། ལག་ན་རྡོ་རྗེས་རྒྱལ་པོ་སྨིན་པར་ལུང་བསྟན་ཏེ། མྱ་ངན་ལས་འདའ་ཁར་འཇམ་དཔལ་གྱིས་ཞུས་པ་ལས། ང་ནི་མྱ་ངན་འདས་འོག་ཏུ། །ལོ་ནི་བརྒྱ་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །མི་ལ་སྐལ་ལྡན་མཆོག་གྱུར་པ། །རྒྱལ་པོ་ཛ་ཞེས་བྱ་བ་ལ། །ཐུགས་རྗེ་ལྡན་པའི་བྱིན་རླབས་ཀྱིས། །ལག་ན་རྡོ་རྗེས་སྟོན་པར་འགྱུར། །ཞེས་གསུངས་པས། ཕྱག་ན་རྡོ་རྗེས་རྒྱལ་པོ་འཁོར་དང་བཅས་པ་ལ་གཏད། དེ་དག་གིས་བསྒྲུབས་པས་དངོས་གྲུབ་རིམ་པར་ཐོབ་པར་གྱུར་ཏེ། དེར་རྒྱལ་པོ་སྲས་བཙུན་མོ་མངའ་རིས་འཁོར་དང་བཅས་པ་ཐམས་ཅད། ལུས་མ་སྤང་ནས་ལྷག་མེད་དུ་གཤེགས་ནས། དུས་དེའི་སྐབས་སུ་ནུབ་ཕྱོགས་ཨོ་རྒྱན་གྱི་ཡུལ་མཐའ་ཞིག་སྟོངས་པར་གྱུར་སྐད། དེ་ཀླུའི་བདག་བྱས་ཏེ་མཚོ་ཆེན་པོ་ཞིག་ཏུ་གྱུར། དེར་གསང་བའི་བདག་པོས་རྒྱུད་རྣམས་ཀླུ་རྣམས་ལ་བྱིན་ཅིང་ལམ་དུ་བཅུག་པས། ཀླུ་རྣམས་ཀྱང་རིམས་ཀྱི་མིར་གྱུར་ནས། མཚོ་དེ་ཡང་རིམ་གྱི་སའི་གླིང་ཆེན་པོར་གྱུར་ཏེ། དེ་ལ་གྲོང་འཆས་ནས་མི་རྣམས་ཀྱིས་ཉམས་སུ་བླངས་པས་ཕལ་ཆེར་གྱིས་ནི་གྲུབ་པ་ཐོབ། མ་ཐོབ་པ་རྣམས་ཀྱང་ཕོ་ཐམས་ཅད་དཔའ་བོ། མོ་ཐམས་ཅད་དཔའ་མོར་གྱུར་ནས། ཨོ་རྒྱན་མཁའ་འགྲོའི་གླིང་ཞེས་སུ་གྲགས་ཟེར་བའི་འདོད་པ་ཡང་ཡོད་དོ། །མདོར་ན་རྒྱུད་རྣམས་ནས་གསུངས་པའི་གནས་ནི་མ་ངེས་སོ་སོར་གསུངས་ཀྱང་རྒྱུད་རྣམས་ཀྱི་བདག་པོ་མཁའ་འགྲོ་མས་བྱེད་པས། ཨོ་རྒྱན་མཁའ་འགྲོ་མའི་གླིང་ཡིན་པའི་ཕྱིར། རྒྱུད་ཐམས་ཅད་ནི་ཕལ་ཆེར་ཨོ་རྒྱན་མཁའ་འགྲོ་མའི་གསང་མཛོད་ན་ཡོད་པས། གྲུབ་ཐོབ་རྣམས་ཀྱིས་ཐབས་དུ་མའི་སྒོ་ནས་གདན་དྲངས་པ་ཡོད་དོ། །རྒྱལ་པོ་བ་སུ་སྐལ་པས་གསང་བ་འདུས་པ་དང་། དད་པའི་འདུས་པ་གདན་དྲངས། ཀླུ་སྒྲུབ་ཀྱིས་གླན་པར་བརྫུས་ནས་ཀྱཻ་རྡོར་གདན་དྲངས། ཀུ་ཀུ་རི་པས་མ་ཧཱ་མ་ཡ་གདན་དྲངས། མ་ཏི་བཛྲ་གྱིས་འཇིགས་བྱེད་ལ་སོགས་པ་གདན་དྲངས་པའི་ལོ་རྒྱུས་དུ་མ་ཡོད་དོ། །འོ་ན་དེ་ལྟར་ལོ་རྒྱུས་མི་མཐུན་པ་གཉིས་སུ་བྱུང་བ་ཅི་ཡིན་སྙམ་ན། སྤྱིར་གང་ཟག་གིས་ཐོས་དུས་དང་། གནས་སྐབས་ཀྱི་དུས་སྔ་ཕྱིས་ཀྱང་བྱུང་བ་ཡིན་ལ། མཁས་པ་ཆེན་པོ་རོག་གི་བནྡེ་ཤེས་རབ་འོད་ཀྱིས་ལུང་བཞེད་པས། དུས་ཕྱིས་རྒྱ་གར་ཡུལ་དུ་བསྟན་པའི་གྲྭ་ཉམས་ཤིང་། རྒྱུད་སྡེ་ཆེན་པོ་རྣམས་རིམ་གྱིས་ནུབ་རྒྱ་དཔེ་རྣམས་ཀྱང་གཉེར་ཆིས་ཅི་ལྟ་བ་བཞིན་མ་བྱུང་བ་དང་། རྒྱ་གར་རླན་དང་ཚ་རླན་ཆེ་བས་མང་པོ་རུལ། གྲུབ་ཐོབ་ཁ་ཡར་གྱིས་ཀྱང་། མཁའ་འགྲོ་མའི་གསང་མཛོད་ནས་བླངས་ཤིང་བཤད་པས། བྱུང་ཚུལ་ཇི་ལྟ་བ་ཁོང་དུ་མ་ཆུད་པ་ཡིན། དུས་ཕྱིས་བོད་ཀྱི་བསྟན་པ་ཕྱི་དར་དུ་གྲགས་པའི་ཚེ། རྒྱ་གར་པཎྜི་ཏ་གསེར་འདོད་ཅན་རྣམས་ཀྱིས་བོད་ན་ཆོས་གང་ལ་རྩིས་ཆེ་དྲིས་ནས་བཅོས་མ་མང་པོ་བྱེད། ལོ་ཙཱ་བ་མཁས་འདོད་ཅན་རྣམས་ཀྱིས་དབྱར་མོན་ཡུལ་དུ་སྡོད། དགུན་བལ་ཡུལ་དུ་འཁྱམས། སྔོན་གྱི་ལོ་ཕན་སྤྲུལ་པའི་སྐུ་བྱང་ཆུབ་སེམས་དཔའ་རྣམས་ཀྱིས་བསྒྱུར་བའི་ཆོས་ལ་རང་བཟོའི་འགྱུར་སྣ་ཚོགས་སུ་བཅོས། རྩ་རླུང་ཐིག་ལེ་ལ་སོགས་པ་ཕྱི་རོལ་དང་ཐུན་མོང་གི་ཆོས་ལ་ངོ་མཚར་བའི་གནས་སུ་བྱས་ནས་རྒྱ་གར་གྱི་ཁུངས་བཟང་པོ་དྲངས། བདག་རྐྱེན་བཟང་པོས་གསེར་ཆོས་བྱས་པས་བསྟན་པ་ཉམས་སྨད་པ་ཡིན་ནོ། །ཞེས་གསུངས་པ་འདི་ཡང་ཤིན་ཏུ་ནས་དག་པས་ཕྱོགས་རིས་མེད་པའི་མཁས་པ་རྣམས་ཀྱིས་ལེགས་པར་དགོངས་པ་ཐོང་ཞིག་ཐོང་ཞིག ༈ །ད་ནི་བཀའ་འཁོར་ལོ་དེ་དག་གི་རྗེས་སུ་འཇུག་ཅིང་བསྟན་པ་རྒྱས་པར་བྱེད་པ་བསྟན་བཅོས་ཡིན་པས། དེ་དག་གི་བརྗོད་པ་ཅུང་ཞིག་བསྙད་པར་བྱ་སྟེ། དེ་ལ་དོན་དྲུག་སྟེ། ངོ་བོ་དང་། ངེས་ཚིག་དང་། དབྱེ་བ་དང་། བསྡུ་བ་དང་། གསུང་སྔ་བ་དང་། ཆོས་དེ་ངོས་བཟུང་བའོ། །དང་པོ་ངོ་བོ་ནི་སེམས་ཅན་གྱི་ཉོན་མོངས་པ་སྤང་ཤིང་ངན་འགྲོ་ལས་སྐྱོབ་པ་སྟེ། སློབ་དཔོན་བློ་བརྟན་གྱིས། ཉོན་མོངས་དགྲ་རྣམས་མ་ལུས་འཇོམས་པ་དང་། །ངན་འགྲོ་སྲིད་ལ་སྐྱོབ་པ་གང་ཡིན་པ། །ཆོས་སྤྱོད་ཡོན་ཏན་ཆེ་ན་བསྟན་བཅོས་ཏེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་སོ། །ངེས་ཚིག་ནི། བཀའི་དོན་ནི་སངས་རྒྱས་ཀྱི་བསྟན་པ་མི་གསལ་བ་རྣམས་གསལ་བར་བྱེད་པའོ། །དབྱེ་བ་ལ་གསུམ་སྟེ། དོན་མེད་པ་དང་། དོན་ལོག་པ་དང་། དོན་དང་ལྡན་པའོ། །དོན་མེད་པ་ནི་བྱ་རོག་གི་བསྟན་བཅོས་ལྟ་བུའོ། །དོན་ལོག་པ་ནི་མུ་སྟེགས་པའི་བསྟན་བཅོས་རྣམས་སོ། །དོན་དང་ལྡན་པ་ནི་ནང་པའི་བསྟན་བཅོས་ཏེ། དེ་ལ་ཡང་རྩོད་པ་ལྷུར་ལེན་པ་དང་། བསྒྲུབ་པ་ལྷུར་ལེན་པའོ། །དང་པོའི་བརྗོད་བྱ་ནི། ངག་གི་འགྲེལ་པ་སྒྲའི་བསྟན་བཅོས་དང་། བརྗོད་བྱེད་ཚིག་གི་འགྲེལ་པ་ཚད་མའི་བསྟན་བཅོས་སོ། །བསྒྲུབ་པ་ལྷུར་ལེན་པ་ལ་ཡང་གཉིས་ཏེ། ལུང་བསྡུས་པའི་བསྟན་བཅོས་དང་། ལུང་འགྲེལ་པའི་བསྟོད་བཅོས་སོ། །ལུང་བསྡུ་བ་ནི། སངས་རྒྱས་ཀྱི་བཀའ་རྒྱ་ཆེ། ལུང་གྲངས་མང་བས། དེ་དག་སེམས་ཅན་གྱི་སོ་སོར་བསྡུ་མི་ནུས་པས། དེའི་དོན་འཕགས་པ་རྣམས་ཀྱིས་བསྟན་བཅོས་མང་དུ་མཛད་དེ། དེ་མ་རྟོགས་པ་རྟོགས་པར་བྱེད་པ་དང་། བསྒྲིབས་པ་གསལ་བར་བྱེད་པ་དང་། ཟབ་མོའི་དགོངས་པ་གཏན་ལ་འབེབས་པར་བྱེད་པའི་དགོས་པ་ཡོད་ཅིང་། མངོན་རྟོགས་རྒྱན་ལྟ་བུའོ། །ལུང་འགྲེལ་པའི་བསྟན་བཅོས་ནི། སངས་རྒྱས་ཀྱི་བཀའ་རྡོ་རྗེའི་ཚིགས་སུ་གནས་པས། སྐྱེ་བོ་ཕལ་པས་དེའི་དོན་རྟོགས་པའི་གནས་མེད་པས། འཕགས་པ་དང་གང་ཟག་དམ་པ་རྣམས་ཀྱིས་བཀའི་བཤད་འགྲེལ་ཆེན་མོ་རྣམས་མཛད་པ་ཡིན་ནོ། །དོན་བསྡུ་བ་ནི། བཀའ་ཐམས་ཅད་སྡེ་སྣོད་གསུམ་དུ་འདུས་པས་བསྟན་བཅོས་ཀྱང་སྡེ་སྣོད་གསུམ་དུ་འདུ་བའོ། །དང་པོ་བསྟན་བཅོས་ལ་སྔ་བ་ནི། མངོན་པ་སྡེ་བདུན་ཡིན་ཏེ། ཁ་ཅིག་ཐུབ་པ་མ་འདས་པའི་གོང་དུ་བརྩམས་པར་ཡང་འདོད་ལ། ཁ་ཅིག་ན་རེ། བྱེ་བྲག་བཤད་མཛོད་ཆེན་མོ་སྔ་སྟེ། བཀའ་བསྡུ་བ་མཛད་པའི་ཐོག་མ་ལ་མཛད་པ་ཡིན་ནོ། །ཆོས་ཀྱི་འཁོར་ལོ་རིམས་པ་གསུམ་དང་བསྟུན་ནས་བསྟན་བཅོས་ཀྱང་གསུམ་དུ་འབྱུང་བ་ལས། ཆོས་སྡེ་ངོས་བཟུང་བ། བཀའི་འཁོར་ལོ་དང་པོའི་དགོངས་འགྲེལ་བྱེ་བྲག་བཤད་མཛོད་ཆེན་མོ་ཤོ་ལོ་ཀ་འབུམ་ཡོད་པ་མཛད། མངོན་པ་སྡེ་བདུན་འདུལ་བ་མདོ་རྩ་ལ་སོགས་པའོ། །བཀའ་འཁོར་ལོ་བར་པ་གྲོལ་བར་བྱེད་པ་ལ། དོན་གྱིས་འགྲེལ་པ་དབུ་མ་རིག་པའི་ཚོགས་དྲུག་དང་ཤེར་གསུམ་མཛོད། རིག་པའི་ཚོགས་དྲུག་ནི། རྩ་བ་ཤེས་རབ། རིག་པ་དྲུག་ཅུ་པ་སྟོང་ཉིད་བདུན་བཅུ་པ། རྩོད་པ་བཟློག་པ། ཞིབ་མོ་རྣམ་པར་འཐགས་པ། གང་ལ་འཇིགས་མེད་ལ་སོགས་པ་རྣམས་སོ། །རྗེས་དཔག་གི་རྒྱན་གཉིས་ལས། བཤེས་པའི་ཕྲེང་ཡིག་དང་། རིན་པོ་ཆེའི་ཕྲེང་བའོ། །དེ་རྣམས་ལ་ཡང་གསལ་བྱེད་ཀྱི་འགྲེལ་པ། རྩ་ཤེའི་འགྲེལ་པ་སངས་རྒྱས་དབྱངས་ཀྱིས་མཛད། དེའི་འགྲེལ་པ་བྷ་བྱི་པས་མཛད། དེའི་འགྲེལ་པ་སྤྱན་རས་གཟིགས་ཀྱིས་བརྟུལ་ཞུགས་པས་མཛད། ༈ །བཀའ་འཁོར་ལོ་གསུམ་པའི་བསྟན་བཅོས་བྱམས་པ་མགོན་པོའི་གཞུང་ལུགས་ཏེ་ཆོས་ལྔ་མཛད་པ་ལས། མདོ་སྡེ་སྤྱིའི་འགྲེལ་པ་མདོ་སྡེ་རྒྱན་བྱེ་བྲག་ཏུ་ཕྱེ་བ་ཕ་རོལ་ཏུ་ཕྱིན་པའི་འགྲེལ་པ་མངོན་རྟོགས་རྒྱན། གཟུངས་ཀྱི་དབང་ཕྱུག་གི་འགྲེལ་པའི་རྒྱུད་བླ་མ། དབུས་མཐའ་ཆོས་དང་ཆོས་མིན་རྣམ་པར་འབྱེད་པ་དང་། སྡོམ་གཉིས་དང་། རྣལ་འབྱོར་སྤྱོད་པའི་ས་སྡེ་ལྔ་དང་། པྲ་ཀཱ་ར་སྡེ་བརྒྱད། དོན་གསལ་བ་ལ་སོགས་པ་ཡིན་ཅིང་། དེ་གཉིས་ཀའི་ཐུན་མོང་རྒྱུད་བླ་མ་ལ་སོགས་པའོ། །མདོར་ན་རེ་རེ་ལའང་ཐེག་པ་ཆེ་ཆུང་གཉིས་གཉིས་ཚང་བ་དང་། གསུམ་གསུམ་དུ་དོན་གཏན་ལ་འབེབས་པར་བྱེད་པའོ། །ད་ནི་སྔགས་ཀྱི་དོན་གཏན་ལ་འབེབས་པ་ལ་ལྔ་སྟེ། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། རྣམ་གྲངས་སོ། །ངོ་བོ་ནི། ཡིད་སྐྱེ་བའོ། །ཤེས་པ་སྐྱོབ་པར་བྱེད་པའོ། །ཡང་ན་ནི་ངོ་བོའི་རང་བཞིན་ཉིད་དེ། གསང་འདུས་ལས། ད་ནི་ཡིད་ཅེས་བྱ་བ་སྟེ། ར་ནི་སྐྱོབ་པར་བྱེད་པའོ། །ཅེས་སོ། །འོ་ན་ཕ་རོལ་ཏུ་ཕྱིན་པས་ཀྱང་ཡིད་ཆེས་སྐྱོབ་ན། སྔགས་དང་ཁྱད་པར་ཅི་ཡོད་ཞེ་ན། བདེ་བར་སྐྱོབ་པ་དང་། མྱུར་བར་སྐྱོབ་པས་ཁྱད་པར་ཆེ་སྟེ། རྔམས་ཀློག་ལས། དཀའ་ཐུབ་དཀའ་སྤྱད་འདིར་མི་བྱ། །ཁྲིམས་དང་སྡོམ་པ་འདིར་མི་དགོས། །ཞེས་སོ། །དོན་ཟབ་པས་དབང་པོ་རབ་ཚེ་འདིར་སངས་རྒྱས། འབྲིང་ཆོས་ཉིད་བར་དོ། ཐ་མ་སྲིད་པ་བར་དོ། ཡང་ཐ་ཡང་སྐྱེ་བ་བདུན་ཚུན་ལ་སངས་རྒྱས་ཏེ། གསང་འདུས་ལས། འདི་ཡིས་བཅོམ་ལྡན་བདག་ཉིད་ཞེས། །སྐུ་གསུམ་མི་ཕྱེད་ལས་བྱུང་བའི། །ཡེ་ཤེས་རྒྱ་མཚོས་རྣམ་པར་བརྒྱན། །ཚེ་འདི་ཉིད་ལ་ཐོབ་པར་འགྱུར། །ཅེས་སོ། །དོན་དུ་དྲིལ་བས་སྔགས་ཀྱི་ངོ་བོ་ནི། སྟོང་ཉིད་སྙིང་རྗེའི་བདག་ཉིད་ལ་བྱ་སྟེ། གློག་གི་ཕྲེང་བ་ལས། སྟོང་པ་ཉིད་དང་སྙིང་རྗེ་ནི། །གཉིས་སུ་མེད་པའི་ཚུལ་གྱིས་ནི། །གསང་སྔགས་ཞེས་ནི་དེ་ལ་བྱ། །ཅེས་སོ། །ངེས་ཚིག་ནི། སྣོད་མིན་ལ་གསང་ཞིང་། སྣོད་ལྡན་ལ་བསྔགས་པས་ན་གསང་སྔགས་ཏེ། སྒྱུ་འཕྲུལ་རྒྱ་མཚོའི་རྒྱུད་ལས། གསང་སྔགས་གསང་ཞེས་བྱ་བ་ནི། །ཆོས་ལ་སྐྱོན་ཡོད་མ་ཡིན་ཏེ། །སྣོད་མིན་སེམས་ཅན་བློ་ཆུང་ལ། །ཐུགས་རྗེའི་ཐབས་ཀྱི་རབ་ཏུ་གསང་། །ཅེས་སོ། །དབྱེ་བ་ལ་གསུམ་སྟེ། གསང་སྔགས་རིག་སྔགས་གཟུངས་སྔགས་སོ། །དེའི་ཁྱད་པར་ནི། མཁའ་འགྲོ་གསང་རྒྱུད་ལས། མ་རིག་རྣམས་ལ་གསང་བའི་ཕྱིར། །གསང་སྔགས་ཞེས་སུ་གྲགས་པ་ཡིན། །དེ་དོན་ཕྱིན་ཅི་མ་ལོག་པས། །རིག་སྔགས་ཞེས་སུ་བཏགས་པ་ཡིན། །སྟོང་པའི་ངང་ལས་མ་གཡོས་པས། །གཟུངས་སྔགས་ཞེས་སུ་བཏགས་པ་ཡིན། །ཞེས་གསུངས་སོ། །ཡང་འགའ་ཞིག་གིས་བཞེད་པས། ལྷ་ཡབ་ཡུམ་ཟུང་འབྲེལ་དུ་ཡོད་པ་གསང་སྔགས། ཕོ་ཤས་ཆེ་བ་རིག་སྔགས། མོ་ཤས་ཆེ་བ་གཟུངས་སྔགས་སོ་ཟེར། ཡང་འགའ་ཞིག་ན་རེ། ཨཱོཾ་ལས་དྲངས་པ་གསང་སྔགས། ཏདྱ་ཐཱ་ལས་དྲངས་པ་རིག་སྔགས། ན་མོ་རཏྣ་ཏྲ་ཡཱ་ཡ་ལས་དྲངས་པ་གཟུངས་སྔགས་སོ་ཞེས་ཟེར་ཏེ། རེ་རེ་ལའང་ཀུན་ཡོད་དེ་ཕྱོགས་ཅིག་གིས་ངེས་པ་མེད་པ་འདྲ་སྙམ་མོ། །མཚན་ཉིད་ནི། མི་འགྱུར་བ་སངས་རྒྱས་ཀྱི་ཐུགས་ཀྱི་ངོ་བོ་ཉིད་དེ། སྒྱུ་འཕྲུལ་ལས། ཆོས་ཀྱི་སྙིང་པོ་སྒྲུབ་བྱེད་ཅིང་། །ཆོས་ཀྱི་དབྱིངས་དང་ཡང་དག་ལྡན། །གསང་སྔགས་མཚན་ཉིད་ཡིན་པར་གསུངས། །ཞེས་གསུངས་སོ། །རྣམ་གྲངས་ལ་འདོད་བཞེད་མང་སྟེ། ཨོ་རྒྱན་ཆེན་པོའི་བཞེད་ཀྱིས། སྤྱིར་ནི་མཐའ་དང་མ་ལུས་བགྲང་བར་མི་ནུས་ཤིང་། ཡང་དག་པར་ན། ཐབས་དང་ཤེས་རབ། ལམ་དང་། འབྲས་བུ་བཞི་རུ་འདུ་བར་བཞེད། བཱི་མ་ལས། གྲངས་ནི་མཐའ་དང་མུ་མེད་དེ། །ཐབས་དང་ཤེས་རབ་ཟུང་དུ་འཇུག །བརྗོད་པའི་ཚིག་རྣམས་མཐའ་ཟད་པས། །ཡང་དག་དོན་གྱི་སྙིང་པོར་འདུ། །ཅེས་གསུངས། ཨཱརྱ་དྷེ་ཝས། གང་ལ་གཉིས་མེད་ཡེ་ཤེས་སྣང་བར་འདུ་བ་ཡིན། གསུངས། ཀུན་དགའ་སྙིང་པོའི་བཞེད་ཀྱིས། རྒྱུད་ཀྱི་ངོ་བོ་ནི། སྟོན་པའི་སྐུ་གསུང་ཐུགས་ཀྱི་ངོ་བོའི་འཁོར་ལོ་ཡིན་ལ། རྗོད་བྱེད་ཀྱི་སྒྲ་སྤྱིའི་རྣམ་པ་ཡི་གེར་སྣང་བ་ཡིན་ནོ། །གསུངས། དེ་དང་མདོར་དྲིལ་ན། རྒྱུད་ཀྱི་ངོ་བོ་ཐབས་ཤེས་གཉིས་མེད་ཡིན་པས། ཀྱཻ་རྡོར་ལས། ཐབས་དང་ཤེས་རབ་བདག་ཉིད་རྒྱུད། །འདི་ནི་བདག་གིས་བཤད་ཀྱི་ཉོན། །ཅེས་སོ། །རྒྱུད་ཀྱི་ངེས་ཚིག་ནི། རིན་ཆེན་ཕྲེང་བ་ལས། ངེས་པའི་ཚིག་ནི་དྲུག་ཡིན་ཏེ། །ཕུན་སུམ་ཚོགས་ལྔས་ནི་ཆེ་ཕྱིར་དང་། །འབྲེལ་དང་མ་ཚངས་མེད་ཕྱིར་དང་། །དཀྲུགས་པའི་ཕྱིར་ན་རག་ལས་ཕྱིར། །གསང་སྔགས་བཟླས་པ་སྟོན་ཕྱིར་རོ། །ཅེས་སོ། །དབྱེ་བ་ནི། སྒྱུ་འཕྲུལ་ལས། རྒྱུད་ཀྱི་དབྱེ་བ་གཉིས་ཡིན་ཏེ། །བརྗོད་བྱ་དོན་གྱི་རྒྱུད་དང་ནི། །རྗོད་བྱེད་ཚིག་གི་རྒྱུད་གཉིས་སོ། །ཅེས་སོ། །རྒྱུད་ཀྱི་མཚན་ཉིད་ནི། བྱང་ཆུབ་སེམས་དཔའི་ལུང་ལས། སྐུ་ལྔ་ཡེ་ཤེས་ལྔ་ཡི་བདག །ལམ་གྱི་རྒྱུད་ལ་ཉེར་སྦྱོར་ཞིང་། །འཁྲུལ་པ་མེད་པ་རྡོ་རྗེའི་ཚིག །འབྲས་བུ་ཡང་དག་ལམ་དུ་ནི། །གཏན་ལ་འབེབས་པར་བྱེད་པའོ། །ཅེས་སོ། །རྣམ་གྲངས་ནི། མཉམ་སྦྱོར་གསང་རྒྱུད་ལས། རྩ་བ་བཤད་དང་མན་ངག་དང་། །ཕྱི་མ་དང་ནི་སྙིང་པོའི་རྒྱུད། །ཁ་བསྐང་དང་ནི་སྔགས་ཀྱི་རྒྱུད། །འབྱེད་པར་བྱེད་པ་ལྡེ་མིག་ཏུ། །མཐའ་དྲུག་ཚུལ་བཞི་རྣམ་པར་ཕྱེ། །ཅེས་སོ། །དེ་ལྟར་ལྷ་དང་མིའི་ཡུལ་དུ་གྲགས་ཚུལ། བཀའ་དང་བསྟན་བཅོས་ཀྱི་རྣམ་དབྱེ། ངོ་བོ་དང་ངེས་ཚིག་ལ་སོགས་པ་མཚན་ཉིད་དང་རྣམ་གྲངས་བཅས་པ་རྒྱས་པར་བཤད་པའོ། ༈ །ད་ནི་སྤྱི་དོན་ལྔ་པའི་ཐ་མ་ཆོས་འདི་དག་ཐམས་ཅད་དགོངས་དོན། རྒྱ་བོད་ཀྱི་འབྲེལ་ཚུལ་ལ་བརྟེན་ནས་རང་གི་འདོད་ཕྱོགས་དང་། རྣམ་པར་བཞག་པ་སྟོན་པ་ལ་བདུན་ཏེ། རྙིང་མའི་འགྱུར་ཚུལ་དང་། གསར་མའི་འགྱུར་ཚུལ་དང་། གསར་རྙིང་དུ་གྲགས་པའི་རྒྱུ་མཚན་དང་། དེ་གཉིས་ཀྱི་ཁྱད་པར་དང་། ཐ་སྙད་མཁན་གྱིས་རྩོད་པ་བཟློག་པ་དང་། ཆོས་སྤྱིའི་རྣམ་བཞག་མདོར་བསྡུས་ཏེ་བསྟན་པ་དང་། ཇི་ལྟར་བརྩམས་པས་བསྟན་པའི་རྣམ་གཞག་སྨོན་ལམ་བཀྲ་ཤིས་དང་བཅས་པའོ། །དེ་ལ་དང་པོ་རྙིང་མའི་རྒྱུད་རྣམས་རྒྱ་གར་དུ་ཇི་ལྟར་བབས་པའི་ཚུལ་ནི། རྒྱས་པར་ནི་གོང་དུ་བཤད་པ་ཡིན་ཅིང་། ཁྱད་པར་དུ་འདིར་ཡང་ཡིད་ཆེས་པའི་དོན་དུ་སྟོན་ཏེ། དེ་ཡང་གསར་རྙིང་གཉིས་ནི། རྒྱ་གར་རང་དུ་སྔ་ཕྱི་ནི་ཁྱད་པར་ཆེ་སྟེ། རྙིང་མའི་གྲུ་ཐོབ་རྣམས་ནི་སྟོན་པ་འདས་ནས་རིང་པོར་མ་ལོན་པར་བྱུང་ཞིང་། གསར་མའི་རྒྱུད་ལ་དབང་བའི་སློབ་དཔོན་རྣམས་ནི་དུས་ཕྱི་མ་ལས་མ་བྱུང་། དེ་ཡང་རྙིང་མའི་སློབ་དཔོན་རྣམས་ནི་རྒྱུད་དང་དབང་གིས་ཆུ་ཀླུང་ཆེན་པོ་བཞི་བབས་པས་ན་བཀའ་ཤིན་ཏུ་དམ་པ་དང་། བཀའ་རྒྱུད་ཀྱང་ཉུང་བར་བྱོན་ནོ། །གསར་མའི་སློབ་དཔོན་རྣམས་ནི་རྒྱུད་གང་རྙེད་ནས་བརྩམ་གྲངས་མང་ཞིང་བཀའ་རྒྱུད་མང་བ་ཡིན་ནོ། །དེ་ཡང་རྙིང་མ་རྣམས་དང་པོ་ཇི་ལྟར་སྔ་ན། ཨོ་རྒྱན་ཆེན་པོ་དེ་ནི་སྟོན་པ་མྱ་ངན་ལས་འདས་ནས། ལོ་བཅུ་གཉིས་ནས་བྱོན་པ་ཡིན་ཏེ། དབུས་འགྱུར་ཚལ་ལུང་བསྟན་པའི་མདོ་ལས། རྟག་ལྟ་སུན་འབྱིན་ང་ནི་མྱ་ངན་འདའ། །ཆད་ལྟ་བསལ་ཕྱིར་བཞི་གསུམ་བཅུ་གཉིས་ན། །ཀོ་ཤའི་མཚོ་གླིང་དྲི་མེད་པདྨ་ལས། །རྒྱལ་པོའི་ཐུག་དགྱེས་སྲས་ཀྱི་དམ་པར་འགྱུར། །བླ་མེད་སྙིང་པོ་དོན་གྱི་འཁོར་ལོ་བསྐོར། །ཅེས་གསུངས་པ་ཡིན་ནོ། །རྣམ་ཐར་ཆེན་མོ་ནས་སྟོན་པའི་ཉེ་གནས་ཀུན་དགའ་བོ་ལས་རབ་ཏུ་བྱུང་བར་བཤད་དོ། །དེ་ནས་དགའ་རབ་རྡོ་རྗེ་དང་། འཇམ་དཔལ་བཤེས་གཉེན། ཤྲི་སིཾ་ཧ། བཱི་མ་ལ་རྣམས་ཀྱང་། སྟོན་པ་འདས་ནས་སུམ་བརྒྱ་ཚུན་ཆོད་ལ་ཐམས་ཅད་བྱོན་པ་ཡིན་ཏེ། འདི་རྣམས་ཀྱང་ཤས་ཆེར་ཁ་ཆེ་དང་། ཨོ་རྒྱན་དང་། དབུས་འགྱུར་ཚལ་ཕན་དུ་བྱོན་པ་ཤས་ཆེ་བ་ཁོ་ན་ཡིན་ནོ། །དེའི་ཚེ་དབང་གི་ཆོས་རྣམས་ཀྱང་། རྡོ་རྗེ་སེམས་དཔའ་དངོས་དང་། གསང་བའི་བདག་པོ་དང་། མཁའ་འགྲོ་མ་ལས་ཀྱི་དབང་མོ་ཆེ་དང་། དེ་རྣམས་ཀྱི་མངོན་སུམ་དུ་མཁའ་འགྲོ་མའི་གསང་མཛོད་རིན་པོ་ཆེའི་གའུ་རྣམས་ཕྱེས་ནས་དབང་བསྐུར་ལུང་བསྟན། རྒྱུད་སྨིན་ཅིང་གྲོལ་བར་བྱས་པ་ཡིན་ཏེ། རྒྱ་གར་གྱི་པཎྜི་ཏ་གཞན་རྣམས་དང་མི་མཉམ་པ་ཡིན་ནོ། །དེ་ཡང་ཨོ་རྒྱན་ཆེན་པོ་ལ་ནི། ཁུངས་མེད་པའི་སྡེ་བརྒྱད་ཀྱི་གནས་ལ་སོགས་པའི་རྒྱུད་སྡེ་མཐའ་མེད་པ་རྣམས་ཀྱང་། མཁའ་འགྲོ་མ་རྣམས་ཀྱིས་མངོན་སུམ་དུ་གཏད་ནས། ཕྱིས་བསམ་ཡས་སུ་རྒྱ་དཔེ་ཐམས་ཅད་ཀྱང་སླེབས་པ་ཡིན་ཏེ། དུས་ཕྱིས་ཇོ་བོ་ཨ་ཏི་ཤ་བོད་དུ་བསམ་ཡས་སུ་བྱོན་པའི་དུས་སུ། ཁྲི་སྙན་གྱི་པགས་པ་གདན་བཏིང་ནས་མར་མེ་བཤམས་ཏེ་རྒྱ་དཔེ་རྣམས་ཉིན་མཚན་དུ་གཟིགས་པ་མཛད། དེའི་དུས་སུ་ཇོ་བོས་གསུངས་ནས། སློབ་དཔོན་ཆེན་པོ་པདྨ་འབྱུང་གནས་དེ་ནི་མཁའ་འགྲོ་མ་རྣམས་བྲན་དུ་ཁོལ། སྣང་སྲིད་ལ་དབང་ཐོབ་པས་སྡེ་བརྒྱད་ལ་སོགས་མཁའ་འགྲོའི་གནས་ན་ཡོད་པ་རྣམས་ཀྱང་གདན་དྲངས་པ་ཡིན་པར་སྣང་། ལན་ཅིག་བདག་ལ་ཡང་རྒྱ་གར་མཁའ་འགྲོ་མ་རྣམས་ཀྱིས་རྒྱུད་ཀྱི་གསང་མཛོད་ཕྱེས་ནས་བསྟན་པ་ཡིན་ཏེ། རྒྱ་གར་ན་མེད་པའི་རྒྱུད་ཀྱང་འདི་ན་མང་དུ་བཞུགས་འདུག་པ་ངོ་མཚར་རོ། །ཅེས་པའི་ཐུགས་དགྱེས་ཆེན་པོ་མཛད་པ་ཡང་ཇོ་བོའི་རྣམ་ཐར་ཆེན་པོ་ལྟ་བར་གསལ་ལོ། །ཁྱད་པར་རྫོགས་པ་ཆེན་པོ་འོད་གསལ་རྡོ་རྗེ་སྙིང་པོའི་རྒྱུད་གདམས་པ་དང་བཅས་པ་ནི། དགའ་རབ་རྡོ་རྗེ་ནས་བདག་ཅག་གི་བླ་མ་ཨོ་རྒྱན་ཆེན་པོ་དང་བཱི་མ་ལའི་བར་དུ་ཅིག་རྒྱུད་ཡིན་ཅིང་། བླ་མ་གོང་མ་དེ་དག་ཀྱང་ཕུང་པོ་ལྷག་མེད་དུ་འགྲུབ་པ་ཤ་སྟག་ཡིན་ནོ། །དེས་ན་གུ་རུ་དང་བཱི་མ་ལ་གཉིས་བོད་དུ་བྱོན་དུས་ཅིག་རྒྱུད་ཡིན་པས། རྒྱ་དཔེ་རྣམས་མ་ལུས་པ་བོད་དུ་གདན་དྲངས་པ་དང་། རྒྱ་གར་དུ་བཀའ་དམ་པས་མ་དར་བས་མ་སྤེལ་བའི་དོན་གྱིས། དུས་ཕྱིས་རྙེད་པའི་ཡུལ་མེད་པ་དང་། དང་པོ་ལག་ན་རྡོ་རྗེས་གསུངས་པའི་རྒྱུད། གསེར་གྱི་ཤོག་གུ་ལ་བཻཌཱུརྱ་ཞུན་མས་བྲིས་པའི་རང་བྱུང་གི་རྒྱུད་རྣམས་དང་། བསྟན་པའི་བཙས་སུ་བཞག་པ་སྐུ་གསུང་ཐུགས་ཀྱི་རྟེན་རྣམས། རྡོ་རྗེ་གདན་གྱི་སྟེང་གི་ནམ་མཁའ་ལ་རིན་པོ་ཆེའི་འོད་ཀྱི་གཞལ་ཡས་ཁང་ན་བཞུགས་ཏེ། མཁའ་འགྲོ་མ་རྣམས་ཀྱིས་རྟག་ཏུ་མཆོད་པ་འབུལ་བ་ཡིན་ཏེ། ནམ་ཞིག་ན་སྟོན་པ་རེ་འཇིག་རྟེན་དུ་བྱོན་པའི་དུས། རང་བཞིན་གྱི་བབས་པ་མ་གཏོགས་པ། གང་ཟག་སུ་གང་གིས་སྤྱོད་ཡུལ་དུ་མ་གྱུར་པ་ཡིན་ནོ། །འདི་དག་ཀྱང་བཀའི་བབ་ཆེན་མོ་ལས་བཤད་པ་ཡིན་ནོ། །དེ་མ་ཡིན་པའི་བཀའ་བརྒྱད་སྤྱི་ཡི་རྒྱུད་དང་། བྱེ་བྲག་གི་སོ་སོའི་རྒྱུད་གདམས་པ་དང་བཅས་པ་རྣམས་ནི། གུ་རུ་དང་བཱི་མ་ལ་གཉིས་ལ། རྒྱ་གར་དུ་རིག་འཛིན་བརྒྱད་ཀྱིས་རྒྱུད་གདམས་པ་དང་བཅས་པ་མ་ལུས་པར་ཕུལ་ནས་ཐམས་ཅད་བོད་དུ་གདན་དྲངས་པ་ཡིན་ཏེ། སྤེལ་བར་འོས་པ་རྣམས་ཀ་མ་ལ་རུ་སྤེལ། མ་འོངས་པའི་དོན་དུ་གཏེར་དུ་བརྩལ། དེའི་ཕྱིར་ལོ་ཙཱ་བ་རྣམས་ཀྱིས་ཁུངས་ཆོད་པའི་དོན་མེད་པ་ཡིན་ནོ། །གཞན་སེམས་སྨད་བཅོ་བརྒྱད་དང་། ཀློང་སྡེའི་སྐོར་ལ་བརྒྱ་དང་བརྒྱད། རྒྱུད་བུ་ཆུང་སུམ་ཅུ་རྩ་གཉིས། ལུང་ཡེ་ཤེས་མར་མེའི་རྒྱུད་དང་། མན་ངག་སྙིང་དགོངས་ལ་སོགས་པ། རང་རྒྱུད་སོ་སོའི་སྐོར་ལ་ལྔ་བརྒྱ་དང་དྲུག་བཅུ། འདི་དག་ནི་ལོ་ཙཱ་བ་རྣམས་ཀྱིས་སྒྲས་བསྒྱུར་ཏེ། རྒྱ་དཔེ་རྣམས་ཀྱང་ཕལ་ཆེར་བསམ་ཡས་རང་ན་བཞུགས་པ་ཡིན་ནོ། །དེ་ནས་ཆོས་འཁོར་ཆེན་པོ་བསྟན་པ་སྔ་དར་བའི་དུས། སྤྲུལ་པའི་རྒྱལ་བློན་རྣམས་ཀྱིས་སྦྱིན་བདག་མཛད་ནས། སྤྲུལ་པའི་ལོ་ཙཱ་བ་རྣམས་ཀྱིས་བསྒྱུར་བས་སྔ་འགྱུར་ཡིན་པས་རྙིང་མར་གྲགས་པ་ཡིན་ཅིང་། གཞན་ཡང་རྙིང་མའི་རྒྱུད་སྡེ་རྣམས་ཀྱི་བབས་སོ་འགའ་ཞིག་ནི། རྡོ་རྗེ་གདན་གྱི་ཤར་ལྷོ་མཚམས་ཟ་ཧོར་གྱི་ཡུལ་ཡིན་པས། དེ་དུས་པཎྜི་ཏ་རྣམས་ཀྱང་ཟ་ཧོར་དུ་རིག་པ་སྦྱངས་པའི། བོད་དུ་སྤྱན་དྲངས་པའི་པཎྜི་ཏ། དབུས་འགྱུར་ཚལ་པ་དང་། རྒྱ་གར་ཤར་ཕྱོགས་པའི་པཎྜི་ཏ་དྷ་ན་ཤཱི་ལ་དང་། ཛི་ན་མི་ཏྲ་དང་། སུ་རན་ཏྲ་པ་ལ་སོགས་པ་རྣམས་ཀྱི། གོང་གི་རྒྱུད་རྣམས་ཟ་ཧོར་གྱི་ཡི་གེར་ཡོད་པས། ཡུལ་དབུས་ཀྱི་པཎྜི་ཏ་རྣམས་ཀྱིས་མི་ཀློག་པ་ཡིན་ནོ། །གཞན་ཡང་ཟ་ཧོར་གྱི་ཡུལ་དུ། མཐའ་ཡི་རྒྱལ་པོས་དམག་དྲངས་ནས་ཆོས་བསྣུབས། དུས་ཕྱིས་ཁུངས་མེད་དུའང་འགའ་སོང་ཟེར་བའང་ཡོད་དེ། ཡང་རྡོ་རྗེ་གདན་གྱི། ཀ་བ་བུམ་པ་ཅན་གྱི་འོག་ན། རྫོགས་པ་ཆེན་པོའི་རྒྱུད་མང་དུ་བཞུགས་པ་རྣམས། གོང་དུ་ཤྲྀ་སིང་ཧ་དང་། འཇམ་དཔལ་བཤེས་གཉེན་གྱིས། གུ་རུ་དང་བཱི་མ་ལ་ལ་གཏད་དེ། ད་རུང་ལྷག་མ་མང་དུ་ཡོད་པ་རྣམས་ནི། ལོ་ཙཱ་བ་ཀ་ཅོག་རྨ་གསུམ་གྱིས་མཁས་པ་བཱི་མ་ལ་སྤྱན་དྲངས་པའི་ཚེ། རྒྱ་གར་གྱི་པཎྜི་ཏས་ཕྲག་དོག་བྱས་ནས། ཕྲ་མའི་དབང་གིས་བཱཻ་རོ་ཙ་ན་ཚ་བ་རོང་དུ་སྤྱུགས་པའི་སྙིང་ནད་དང་། བཱི་མ་ལ་མཁས་གྲགས་པས། རྒྱལ་པོ་མི་ལ་ཀུ་ཏྲ་དང་། བར་དུ་བཅུག་བྱས་ཏེ། བསམ་ཡས་རྒྱལ་པོའི་བཀའ་མ་ཆོག་པ་སྐད་ཟེར་ཡང་། པཎྜི་ཏ་རྣམས་ཀྱིས་བོད་དུ་སོང་ན་དགའ་བྱས་པས་དེའི་ཞེ་ནད་དུ། བཱི་མ་ལ་དཔོན་གཡོག་གི་རྒྱལ་པོ་དང་། པཎྜི་ཏ་ལ་ཞུ་བ་ཕུལ་བ། བདག་བོད་དུ་མཆིས་ན། སྔོན་ཆད་མ་གྲགས་པའི་ཆོས་རྫོང་དགོས་པར་ཞུས་པས། པཎྜི་ཏ་རྣམས་ན་རེ་རྡོ་རྗེ་གདན་གྱི་འོག་ན་རྫོགས་པ་ཆེན་པོའི་ཆོས་དཔག་ཏུ་མེད་པ་ཡོད་དེ། འོ་སྐོལ་རྒྱ་གར་བ་ལ་དུས་ལ་མ་བབ་བར་དུ་བཤད་པ་དབང་མེད་ཀྱང་། ཁྱོད་བོད་དུ་འགྲོ་བ་ཡུས་ཆེ་བ་ཡིན་པས། ཅི་ཙམ་རིག་པ་ཐོན་ལ་ཁྱེར་ཅིག་ཟེར་བ་དང་། བཱི་མ་ལ་དཔོན་གཡོག་གིས་ཞེ་ནད་ཡོད་པ་དང་། བཱི་མ་ལ་ཡང་དུས་ཕྱིས་རྒྱ་གར་དུ་མི་ལྡོག་པར་དགོངས་ནས། རྫོགས་པ་ཆེན་པོའི་ཆོས་རྣམས་མ་ལུས་པར་གདན་དྲངས་ནས་རྒྱ་དཔེ་ཐམས་ཅད་རྩད་བཅད་པ་ཡིན་ནོ། །དེ་ལ་དུས་ཕྱིས་བོད་ཀྱི་ལོ་ཙཱ་བ་ཁ་ཅིག་ན་རེ། རྙིང་མ་མི་དག །རྒྱ་གར་ན་རྒྱ་དཔེ་མི་འདུག་ཟེར་བའི་བརྗོད་བྱ་འདུག་སྟེ། བློ་གཟུ་བོར་བཞག་ནས་བདེན་རྫུན་གྱི་ཁུངས་བཙུན་པར་བྱེད་ན་ནི། གོང་གི་དེ་རྣམས་ལ་ཡིད་ཆེས་པར་བྱ་ཞིང་། དེ་ལྟར་མ་ཡིན་ན་ནི་སུ་དང་སུའི་ཆོས་ལ་ཡང་ངེས་ཏིག་གི་གནས་མེད་དོ། །དེ་མ་ཡིན་པ་ཡང་སྔོན་གྱི་ལོ་ཙཱ་བ་རྣམས་སྤྲུལ་པའི་ལོ་ཙཱ་བ་ཡིན་པས། རྒྱ་གར་གྱི་སྐེ་ཚངས་བཅུ་གསུམ་དུ། དགའ་རབ་རྡོ་རྗེ་ལ་སོགས་པ་མཁས་པ་ཉི་ཤུ་རྩ་ལྔ་དང་མཇལ་ནུས་པ་དང་། ནུབ་ཕྱོགས་ཨོ་རྒྱན་གྱི་ཡུལ་ཐམས་ཅད་ཆུ་བཞིན་རྒྱུག་ནུས་པ་དང་། རྐང་མགྱོགས་ཀྱི་རྫུ་འཕྲུལ་ཐོབ་པས་རྒྱ་གར་དབུས་འགྱུར་ཚལ་ནས་ཉིན་ཅིག་ལ་བོད་དུ་བསྒྲོད་ནུས་པ་ལ་སོགས་པ་བཱཻ་རོ་ཙ་ནའི་རྣམ་ཐར་ན་གསལ་ཞིང་། དུས་ཕྱིས་རྣམས་ནི་སོ་སོའི་སྐྱེ་བོའི་ལོ་ཙཱ་བ་ཡིན་པས། མཁའ་འགྲོའི་གསང་མཛོད་ནི་འབྱེད་པའི་སྐབས་མེད། ནུབ་ཕྱོགས་ཨོ་རྒྱན་དུ་ནི་མི་རྡོལ། རྒྱ་གར་ཤར་ཕྱོགས་དང་བལ་པོའི་ཡུལ་ལ་སྐྱོག་བདར་བྱས་པའི་ལོ་རྒྱུས་རྣམས་འོག་ནས་བསྟན་ནོ། །དེ་ཡང་ལོ་པཎ་ཆེན་པོ་སྔ་དར་བའི་དུས་སུ། བཀའ་དང་བསྟན་བཅོས་ཅི་ཙམ་འགྱུར་བ་ནི། ཞིབ་ཏུ་ནི་དཔག་པར་མི་ལང་ཞིང་། ཆེ་ལོང་ཙམ་ཞིག་འདིར་ཡང་བཀོད་པར་བྱ་སྟེ། ཕྱི་མདོ་དང་ནང་སྔགས་གཉིས་ལས། དང་པོ་ཕྱི་མདོའི་སྡེ་ལ། མདོ་སྡེ་ལེགས་ཉེས་བསྟན་པ། ལས་བརྒྱ་པ། རྣམ་པར་འབྱེད་པ། ལས་རྣམ་པར་འཐགས་པ། མདོ་རྣམ་པར་གདོན་པ། གང་པོས་རྟོགས་པ་བརྗོད་པའི་མདོ། བསྐལ་པ་བཟང་པོ། རྒྱ་ཆེ་རོལ་པ། ཡེ་ཤེས་རྒྱས་པ། བྲམ་ཟེ་ཚོམས་ཀྱི་མདོ། དྲིན་ལེན་བསབ་པའི་མདོ། ཏིང་ངེ་འཛིན་རྒྱལ་པོའི་མདོ་བཅུ་གཉིས། འཛངས་བླུན་གྱི་མདོ་བཅོ་བརྒྱད། དྲན་པ་ཉེར་བཞག་བཞི། ཚུལ་ཁྲིམས་ངན་པ་ཚར་གཅོད། དེ་དག་དྲང་དོན་སྤྱིའི་མདོ་བཅུའོ། །འདུལ་བ་ལུང་མ་ཚང་བ་མེད་པ། དཀོན་མཆོག་བརྩེགས་པ་མ་ཚང་བ་མེད་པ། སངས་རྒྱས་ཕལ་པོ་ཆེ། བྱང་ཆུབ་སེམས་དཔའི་མདོ་བཅུ། རྒྱས་འབྲིང་རྣམ་གསུམ་ལ་སོགས་ངེས་དོན་བསྟན་པའི་མདོ་བཅུ་བདུན། དྲང་ངེས་གཉིས་ཀ་བསྟན་པའི་མདོ། སྤྲིན་ཆེན་སྙིང་པོའི་མདོ། སྡོང་པོ་རྒྱན་གྱི་མདོ། འཇམ་དཔལ་ཞིང་གི་ཡོན་ཏན་གྱི་མདོ། འཁོར་ལོ་བཅུ་པའི་མདོ། ཏིང་ངེ་འཛིན་རྒྱལ་པོའི་མདོ། རིན་ཆེན་སྣ་ཚོགས་མདོ། ནམ་མཁའི་སྙིང་པོའི་མདོ། གཙུག་ན་རིན་ཆེན་མདོ། འདུལ་བ་རྣམ་དག་གི་མདོ། དགེ་འདུན་སྐྱོང་བའི་མདོ། རྣམ་དག་དྲི་མེད་ཀྱི་མདོ། ལས་སྒྲིབ་རྒྱུན་གཅོད་མདོ། བསམ་གྱི་མི་ཁྱབ་པའི་མདོ། ལས་བསྟན་པའི་མདོ། གཙུག་གཏོར་དྲི་མེད་ལྷའི་བུས་ཞུས་པའི་མདོ། དགེ་སློང་ལྔ་བརྒྱ་ལུང་བསྟན་གྱི་མདོ། དོན་ཞགས་ཀྱི་མདོ། གསེར་འོད་དམ་པའི་མདོ། ལེའུ་ལུང་སྟོན། ཡོན་ཏན་ལུང་སྟོན། ཀུན་ཐུབ་རྒྱལ་པོ། ས་ལུ་ལྗོངས་པ། མངོན་པར་འབྱུང་བ། བདེ་གཤེགས་བདུན་གྱི་སྨོན་ལམ། གཟུངས་སྡེ་གོང་འོག་གཉིས། གྲྭ་ལྔ་ལ་སོགས་པ་དེ་དག་ནི་རང་གཞུང་ཚུགས་པའི་མདོ་ཆེ་ལང་དུ་སྨོས་པ་ཡིན་ཅིང་། དེ་ལ་མདོ་ཞིབ་ཏུ་ནི་བྲི་བར་མི་ལང་སྟེ། བསམ་གྱིས་མི་ཁྱབ་སྟེ་བསམ་ཡས་རྒྱལ་པོ་རང་གི་བཀའ་ཆེམ་ལས་ཀྱང་རྒྱ་གར་ན་མ་ལུས་པ་ཙམ་ཅིག་བསྒྱུར་ཞེས་པ་ཡང་བཀའ་ཆེམ་ཆེན་མོར་ཤེས་པར་བྱའོ། །བཀའ་དེ་དག་དང་མཐུན་པའི་བསྟན་བཅོས་བསྒྱུར་ཚུལ་ཡང་། ཐོག་མར་སྔ་བ་ནི་བསྟན་བཅོས་མངོན་པ་སྡེ་བདུན། པྲ་ཀ་ར་སྡེ་བརྒྱད་བསྒྱུར་ཏེ། མངོན་པ་སྡེ་བདུན་སྟོན་པ་ཞལ་བཞུགས་དུས་འཁོར་རྣམས་ཀྱིས་བརྩམས་པ་དང་། དུས་ཕྱིས་བཀའ་བསྡུ་བ་མཛད་པའི་དུས་བརྩམས་པ་ལ་ནི་གང་ཟག་ཅུང་མི་མཐུན་ནའང་། གོང་དུ་རྒྱས་པར་བསྟན་མཛོད་ཅིང་། སྟོན་པ་བཞུགས་དུས་ཀྱི་དབང་དུ་བྱས་ན། གཞུང་ལས། ཆོས་ཀྱི་ཕུང་པོ་ཤཱ་རིའི་བུས། །གདགས་པའི་བསྟན་བཅོས་མོ་འགལ་བུས། །ཁམས་ཀྱི་ཚོགས་ནི་གང་པོ་སྟེ། །རྣམ་པར་ཤེས་པ་ལྷ་སྐྱབས་ཀྱིས། །གྲོལ་བའི་རྣམ་གྲངས་གསུས་པོ་ཆེས། །ཡེ་ཤེས་འཇུག་པ་ཀ་ཏ་ཡས། །ཞེས་པས་དོན་གསལ་ཞིང་། གཞན་ཡང་ཕུང་པོ་ལྔའི་རབ་ཏུ་འབྱེད་པ། ཉི་ཤུ་པའི་རབ་ཏུ་འབྱེད་པ། སུམ་ཅུ་པའི་རབ་ཏུ་འབྱེད་པ། ལས་རྣམས་བསྒྲུབ་པའི་རིག་པ། རབ་ཏུ་རྣམ་པར་འབྱེད་པའི་རིག་པ་ལྔ་པོ་འདི་ནི་རང་རྒྱུད། སེམས་ཙམ་གྱི་ཕྱོགས་སུ་འགྲོ་བ་ཡིན་ཅིང་། མཐའ་དབུས་མེད་པའི་འགྲེལ་པ། མདོ་སྡེ་རྒྱན། མཐའ་དབུས་མེད་པ། རྟེན་འབྲེལ་ཆེན་མོའི་འགྲེལ་པ་དང་གསུམ་པོ་འདི་ནི་ཀུན་གྱི་གཞུང་འགྲེལ་དུ་འགྲོ་བའོ། །པྲ་ཀ་ར་སྡེ་བརྒྱད། མངོན་གནས་བརྒྱད། འཇིག་རྟེན་བསྟན་བཞག །མཉམ་ཉིད་བྱེ་བྲག་གི་བསྟན་བཅོས་ལ་སོགས་པ་གཞན་པར་པའི་འགྲེལ་པར་བསྒྱུར་རོ། །ཐེག་པ་ཆེན་པོ་དང་མཐུན་པའི་བསྟན་བཅོས་ལ། སློབ་དཔོན་འཕགས་པའི་དབུ་མ་རིག་པའི་ཚོགས་དྲུག །ཟླ་བ་གྲགས་པའི་འཇུག་པ། ཨཱརྱ་དྷེ་བའི་དབུ་མ་བཞི་བརྒྱ་པ། སློབ་དཔོན་བྷ་བྱའི་དབུ་མ་སྙིང་པོ། མཁན་པོ་ཞི་བ་འཚོའི་དབུ་མ་རྒྱན། ཀ་མ་ལ་ཤི་ལའི་དབུ་མ་སྣང་བ། རྟ་དབྱངས་ཀྱིས་སྐྱེས་རབས་སྙན་ངག །ཕྱོགས་གླང་གིས་རབ་བྱེད་བརྒྱ་རྩ། ཆོས་གྲགས་ཀྱིས་སྡེ་བདུན། དབང་པོ་སྡེའི་རབ་བྱེད་གཏན་ཚིག །ཞི་བ་ལྷའི་སྤྱོད་འཇུག་དང་བསླ་བཏུས། བྱམས་ཆོས་སྡེ་ལྔ། དབྱིག་གཉེན་སྐུ་མཆེད་ཀྱིས་སྡེ་ལྔ་དང་སྡོམ་གཉིས། ཕ་རོལ་ཏུ་ཕྱིན་པ་སེང་གེ་བཟང་པོའི་འགྲེལ་པ། སྡུད་པའི་འགྲེལ་པ། འབུམ་ཏིག་གི་འགྲེལ་པ། དེ་དག་ལ་སོགས་པ་བཀའ་དང་བསྟན་བཅོས་ཀྱི་འགྲེལ་པ་རྣམས་ནི། རྒྱ་གར་གྱི་པཎྜི་ཏ་སློབ་དཔོན་པདྨ། བཱི་མ་ལ་མི་ཏྲ། ཁ་ཆེ་ཛྙཱ་ན་སུ་ཏྲ། ཛི་ན་མི་ཏྲ། དྷ་ན་ཤྲི་ལ་སྔོན་མ། སུ་རནྡྲ་བོ། བྷི་ན་ཀ་ར། དེ་རྣམས་ཀྱི་ཞལ་སྔ་ནས། ཆོས་འདི་འདིས་བསྒྱུར་གྱི་ལོ་ཙཱ་བ་ཐམས་ཅད་ཡི་གེ་འཇིགས་པས། བཱཻ་རོ་ཙ་ན། ཀ་ཅོག་རྣམ་གཉིས། གཉགས་ཛྙཱ་ན། ཞང་བན་དེ་ཡེ་ཤེས་སྡེ་ལ་སོགས་པ་རྣམས་ཀྱིས་བསྒྱུར་རོ། །དེ་ཡང་སྡེ་སྣོད་གསུམ་པོའི་ཆོས་འདི་དག་ཕལ་ཆེར། ལོ་ཙཱ་བ་ཆེ་གསུམ། རྒྱ་གར་གྱི་པཎྜི་ཏ་མཁས་པ་དང་མཉམ་པས། འཕྲལ་གྱི་ཕྲིན་བསྒྱུར་མ་མཛད་པར། རྩ་བའི་ཞུ་དག་མཛད་པ་ཡིན་ནོ། །འབྲིང་གསུམ་ནི། གཉགས་ཛྙཱ་ན་ཀུ་མ་ར། རྨ་རིན་ཆེན་མཆོག །མཁོན་ཀླུའི་དབང་པོ། འདི་གསུམ་གྱིས་འགྱུར་གྱི་རྩ་བདག་མཛད། ལོ་ཙཱ་བ་ཆུང་བ་གསུམ་གྱིས་རྒྱབ་བརྟེན་མཛད་པ་ལྟ་བུ་ཡིན་ནོ། །ཆུང་བ་གསུམ་ནི། དཀའ་བ་དཔལ་བརྩེགས། ཅོག་རོ་ཀླུའི་རྒྱལ་མཚན། ཞང་བན་དེ་ཡེ་ཤེས་སྡེ་དང་གསུམ་གྱིས་པཎྜི་ཏ་རྣམས་ཀྱིས་འཕྲལ་བསྒྱུར་མཛད་པ་ཡིན་ཏེ། བཀའ་བསྟན་བཅོས་རྣམས་ཀྱི་གཤམ་དུ་ཡང་ལོ་ཙཱ་བ་འདི་རྣམས་ཀྱི་མིང་བཅུག་པ་ཡིན་ནོ། །དུས་ཕྱིས་བོད་ཀྱི་སློབ་དཔོན་ཁ་ཅིག་གིས་བཞེད་པས། ལོ་ཙཱ་བ་ཆུང་བ་གསུམ་གྱི་འགྱུར་རང་དུ་བརྩི་སྟེ། ཅུང་མ་དགོངས་པ་ཡིན་གྱི། བཱི་མ་ལའི་གསེར་ཕྲེང་ལས། ལོ་ཙཱ་བ་ནི་བརྒྱ་རྩ་བརྒྱད་རང་རང་འགྱུར་ལ། རྔོ་ཐོགས་ཀྱི་ཆེ་བ་གསུམ་གྱིས་དཔང་པོ་མཛད། འབྲིང་པོ་གསུམ་གྱིས་རྒྱབ་སྐྱོར་ཏེ། ཆུང་བ་གསུམ་གྱིས་མཇུག་མ་སྦྱར། ཅེས་པས། རྒྱུད་ལ་སོགས་ཤིན་ཏུ་འགྱུར་བ་རྟོགས་པར་དཀའ་བ་རྣམས་སུ་གོང་མ་རྣམས་ཀྱི་འགྱུར་བྱང་ཡོད་ལ། གཞན་མ་རྣམས་སུ་ལོ་ཙཱ་བ་ཆུང་བ་རྣམས་གཙོ་བོར་བྱས་པ་སྣང་ནའང་། གཙོ་བོ་རྣམས་ནི་གོང་མ་རྣམས་ཤེས་པར་བྱའོ། ༈ །གཉིས་པ་ནང་གསང་སྔགས་ཀྱི་འགྱུར་ཚུལ་མདོ་ཙམ་བསྟན་པ་ནི་སྔགས་ཀྱི་ཆེར་འཐུན་པ་གཟུངས་ཀྱི་སྐོར་ལ། ཟ་མ་ཏོག་བཀོད་པ་ཆེ་ཆུང་གི་སྐོར་སུམ་ཅུ་དང་། ཚིག་དྷ་མ་ནི་རྟོག་བྲལ་ལྔ་པ་དང་། གཟུངས་བརྒྱ་དྲུག་ཅུ་པ་ལ་སོགས་པ་བསྒྱུར། ཐེག་པ་གོང་འོག་གི་སྐོར། ཀྲི་ཡའི་སྐོར་ལ། སྐུ་གཙུག་ཏོར་གྱི་རྒྱུད། གསུང་ཨ་མོ་གྷ་པཱ་ཤིའི་རྒྱུད། ཐུགས་རིག་པ་མཆོག་གི་རྒྱུད། མདོར་བསྡུས་པ་ཀྲི་ཡ་དཔུང་བཟང་གི་རྒྱུད། སུ་ཏི་ཀ་རའི་རྒྱུད། མི་གཡོ་བའི་རྒྱུད། ཀྲི་ཡ་རྩ་བའི་རྒྱུད་སྡེ་དྲུག་བསྒྱུར། སྤྱི་རྒྱུད་འཇམ་དཔལ་རྩ་རྒྱུད། བྱེ་བྲག་ཆོ་ག་ཞིབ་མོའི་རྒྱུད། ཕྱག་ན་རྡོ་རྗེའི་རྒྱུད་ལ། སྐུའི་རྒྱུད་གཟུངས་རིང་བསམ་གཏན། གསུང་གི་རྒྱུད་འོད་ཟེར་འཕྲོ་བ། ཐུགས་ཀྱི་རྒྱུད་རིག་པ་མཆོག །ཕྱི་མ་ལེགས་གྲུབ་ཀྱི་རྒྱུད། བཤད་རྒྱུད་དཔུང་བཟང་ཆེན་པོ། རྡོ་རྗེ་རྣམ་འཇོམས་ཀྱི་རྒྱུད་གསུམ། ཡན་ལག་གསང་བ་དཀྱིལ་འཁོར་གྱི་རྒྱུད། དབང་བསྐུར་བ་རྟོགས་པ་རྒྱལ་པོའི་རྒྱུད་རྣམས་བསྒྱུར། འཇམ་དཔལ་གྱི་རྒྱུད་ལ། སྐུ་འཇམ་དཔལ་རྩ་བའི་རྒྱུད། གསུང་འཇམ་དཔལ་གསང་བའི་རྒྱུད། ཐུགས་འཇམ་དཔལ་ལེའུ་དྲུག་གིས་རྒྱུད། ཕྱི་མ་འཇམ་དཔལ་གསང་བའི་རྒྱུད། བཤད་པའི་རྒྱུད་རྡོ་རྗེ་བཀོད་པ་ལས་རྒྱ་མཚོའི་རྒྱུད། བསྐལ་པ་འགྲོ་དྲུག་གི་རྒྱུད་རྣམས་བསྒྱུར། སྤྱན་རས་གཟིགས་ཀྱི་རྒྱུད་ལ། སྐུ་རིག་འཛིན་སྡེ་སྣོད་ཀྱི་རྒྱུད། གསུང་དོན་ཡོད་ཞགས་པ། ཐུགས་སྤྲུལ་པ་འཁོར་ལོ། ཕྱི་མ་སྒྲོལ་མ་འབྱུང་བ། བཤད་རྒྱུད་དོན་ཡོད་འཁོར་ལོ། སྒྲོལ་མ་རྣམ་བསྒྱུར། ཀྲི་ཡའི་སྤྱི་རྒྱུད་བཞི་ལ། གཟི་ལྡན་སྒྲོལ་མ་འབར་བའི་རྒྱུད། རྡོ་རྗེ་ས་འོག་གི་རྒྱུད། ཙནྡྷ་ལི་ཡི་རྒྱུད། གཤིན་རྗེ་ནག་མོའི་རྒྱུད། ༈ །དེ་དག་དང་འཐུན་པའི་བསྟན་བཅོས་ལ། སློབ་པ་བཤེས་སྤྲིན། རྡོ་རྗེ་རྣམ་འཇོམས་བསྒྲུབ་པ། ཙནྟྲ་ཀོ་མའི་རིགས་གསུམ་བསྒྲུབ་པ། གོས་སྔོན་ཅན་གྱི་སྒྲུབ་ཐབས། རྡོ་རྗེ་གཏུམ་པོའི་སྒྲུབ་ཐབས། མཚན་བརྗོད་ཀྱི་འགྲེལ་པ་རིན་ཆེན་ཕྲེང་བ་དང་བཅས་པ་རྣམས་བསྒྱུར་རོ། །ཡོ་གའི་སྐོར་ལ། རྣལ་འབྱོར་ཡོ་གའི་ཆོས་ལྔ་ལ། རྩ་རྒྱུད་ཏ་ཐ་སྃ་ཀྲ། བཤད་རྒྱུད་རྡོ་རྗེ་རྩེ་མོ། བྱིན་རླབས་ཀྱི་རྒྱུད་ངན་སོང་སྦྱོང་བ། ཁ་བསྐང་བ་དཔལ་མཆོག་དང་པོ། སྒོས་རྒྱུད་འབྱུང་པོ་འདུལ་བྱེད། ཁྲོ་བོ་ཁམས་གསུམ་རྣམ་པར་རྒྱལ་བ། ལྷ་མོ་འོད་ཟེར་ཅན། ཀུན་འདུས་པ་སངས་རྒྱས་མཉམ་སྦྱོར་དང་བཅས་པ་རྣམས་བསྒྱུར། ཨུ་པའི་སྐོར་ལ། རྩ་བ་རྣམ་སྣང་མངོན་པར་བྱང་ཆུབ་པའི་རྒྱུད། བཤད་རྒྱུད་ཉི་མ་གཟི་བརྗིད། རིག་པ་ཀུནྡ་སྡེ་སྣོད། རྒྱུད་ཕྱི་མ་ཁམས་གསུམ་རྣམ་རྒྱལ། མཚན་བརྗོད་ལེའུ་ཁྲི་དྲུག་སྟོང་པ། མེ་དཔུང་འབར་བའི་རྒྱུད། ཕྱག་ན་རྡོ་རྗེ་དབང་བསྐུར་བའི་རྒྱུད། རྣམ་པར་མི་རྟོག་པའི་རྒྱུད། དེ་རྣམས་སྒྲུབ་ཐབས་འགྲེལ་པ་དང་བཅས་པ་བསྒྱུར་རོ། །བསྐྱེད་པ་མ་ཧཱ་ཡོ་གའི་རྒྱུད་ཀྱི་སྐོར་ལ། ཏནྡྲ་སྡེ་བཅོ་བརྒྱད་དེ། སྐུའི་རྒྱུད་སངས་རྒྱས་མཉམ་སྦྱོར། གསུང་གི་རྒྱུད་ཟླ་གསང་ཐིག་ལེ། ཐུགས་ཀྱི་རྒྱུད་གསང་བ་འདུས་པ། ཡོན་ཏན་གྱི་རྒྱུད་དཔལ་མཆོག་དང་པོ། ཕྲིན་ལས་ཀྱི་རྒྱུད་པད་ཕྲེང་དཀར་པོ་དང་ལྔའོ། །སྒྲུབས་པ་ལག་ལེན་གྱི་རྒྱུད་ལ། སྐུའི་རྒྱུད་ལ་ཧེ་རུ་ཀ་གལ་པོ། གསུང་གི་རྒྱུད་རྟ་མཆོག་རོལ་པ། ཐུགས་ཀྱི་རྒྱུད་ཧེ་རུ་ཀ་གལ་པོ། ཡོན་ཏན་གྱི་རྒྱུད་བདུད་རྩི་རོལ་པ་བམ་པོ་བརྒྱད། ཕྲིན་ལས་ཀྱི་རྒྱུད་བྱི་ཏོ་ཏ་མ་ལ། ཀི་ལ་ཡ་བཅུ་གཉིས་ཀྱི་རྒྱུད་དང་ལྔའོ། །ཡན་ལག་གི་རྒྱུད་ལ། གཞི་དམ་ཚིག་གི་གཟུང་བ། དམ་ཚིག་བཀོད་པ་རྒྱལ་པོའི་རྒྱུད། གོ་འཕང་དབང་གིས་བསྒྲོད་པ། དབང་བསྐུར་རྒྱལ་པོའི་རྒྱུད། ཕུ་ཐག་ལྟ་བས་བཅད་པ། གླང་ཆེན་རབ་འབོག་གི་རྒྱུད། ཉམས་སུ་ཏིང་ངེ་འཛིན་གྱིས་བླངས་པ། རྩེ་ཅིག་བསྡུས་པའི་རྒྱུད། ལ་སྤྱོད་པས་དོར་བ། རྔམ་པ་གློག་གི་རྒྱུད་དང་ལྔའོ། །རྒྱུད་ཕྱི་མ་གཉིས་ནི། དངོས་གྲུབ་འབྱུང་བའི་ཆོ་ག་ཐབས་ཀྱི་རྒྱུད། ཐབས་ཀྱི་ཞགས་པ་པདྨ་ཕྲེང་བ་དཀྱིལ་འཁོར་ཐམས་ཅད་ལ་འཇུག་པའི་རྒྱུད། སྒྱུ་འཕྲུལ་དྲྭ་བའི་རྒྱུད། དོན་ཐམས་ཅད་འདུས་པའི་རྒྱུད། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟོང་ཕྲག་བརྒྱ་དང་བཅོ་བརྒྱད་དོ། །དེ་དག་ཐམས་ཅད་བསྒྱུར་བའི་ལོ་ཙཱ་བ་ཡང་། བཱཻ་རོ་ཙ་ན། ཀ་ཅོག་རྣམ་གཉིས་དང་གསུམ་མོ། །དེ་དག་གི་རྗེས་སུ་འགྲོ་བའི་བསྟན་བཅོས་ལ། རྟ་དབྱངས་ཀྱི་བླ་མ་ལྔ་བཅུ་པ། རྩ་ལྟུང་བཅུ་བཞི་པ། སྔགས་དོན་རྣམ་བརྒྱད། རྒྱུད་བཅོ་བརྒྱད་པའི་འགྲེལ་པ། ཀུན་རིགས་གསལ་ལྡན། སྒྲུབ་ཐབས་དང་བཅས་པ་བསྒྱུར་རོ། །ཨ་ནུ་ཡོ་གའི་འགྱུར་ལ། ཡེ་ཤེས་ཕྱག་རྒྱ་རོལ་པའི་མདོ། དབང་བསྒྱུར་རྒྱལ་པོའི་མདོ། རིག་འཛིན་དྲུག་གི་མདོ། ཏིང་ངེ་འཛིན་མཆོག་གི་མདོ། གསང་སྒོ་འབྲེལ་པའི་མདོ། རྡོ་རྗེ་མ་ཀོལ་པའི་མདོ། སྒྲོན་མེ་བརྩེགས་པའི་མདོ། དེ་དག་ནི་རྩ་བའི་མདོ་བདུན། སངས་རྒྱས་ཐམས་ཅད་ཀྱི་དགོངས་པ་འདུས་པའི་མདོ། ཀུན་འདུས་རིག་པའི་མདོ། སེམས་ལུང་ཆེན་མོའི་མདོ། རྔམ་པ་གློག་གི་མདོ། དུར་ཁྲོད་ཁུ་བྱུག་རོལ་པའི་མདོ། ཧེ་རུ་ཀ་གལ་པོའི་མདོ། འཇིག་རྟེན་འདས་པའི་མདོ་སྟེ་ལུང་གི་མདོ་བདུན་ནོ། །སྐུའི་རྒྱུད་བསྐལ་པ་མེ་ལྟར་འབར་བ། གསུང་དབང་ཆེན་འདུས་པའི་རྒྱུད། ཐུགས་པུན་དྷ་རི་ཀ །ཡོན་ཏན་ལྷ་མོ་མ་གོས་པ། ཕྲིན་ལས་མ་ཏི་དྲུག་གི་རྒྱུད་རྣམས་བསྒྱུར་རོ། །ཨ་ཏི་ཡོ་གའི་སྐོར་ལ། སྤྱི་རྒྱུད་སྟོང་གིས་བརྒྱན་པའི་རྒྱུད། མ་མོ་སྲིད་པའི་བམ་ཆེན་མོ། ཧེ་རུ་ཀ་འདུས་པའི་རྒྱུད། ཁྲོ་བོ་ཡ་མནྟ་ཀའི་རྒྱུད། བླ་མེད་དོན་རྫོགས་ལ། སྤྱི་རྒྱུད་དང་སྣ་ཚོགས་རྒྱུད། སྒྱུ་འཕྲུལ་བཞི་བཅུ་པ། བརྒྱད་ཅུ་པ། སྒྱུ་འཕྲུལ་ལེ་ལག །སྒྱུ་འཕྲུལ་དྲྭ་བ་ཆེན་པོའི་རྒྱུད། མ་རྒྱུད་ཐབས་ཀྱི་ཞགས་པ། བདུད་རྩི་འདུས་པའི་རྒྱུད། བདུད་རྩི་གསང་བ་འཁོར་ལོ། བདུད་རྩི་སྙིང་པོ་འཁོར་ལོ། བདུད་རྩི་ཡེ་ཤེས་འཁོར་ལོ། བདུད་རྩི་རོལ་པའི་རྒྱུད། དུམ་བུའི་རྒྱུད། བམ་པོ་བརྒྱད་པ། སེམས་སྡེའི་སྐོར་ལ། བཱཻ་རོ་ཙ་ནའི་སྔ་འགྱུར་ལྔ། བཱི་མ་ལ་ཡི་ཕྱི་འགྱུར་བཅུ་གསུམ། ཁ་འཐོར་གྱི་རྒྱུད་བརྒྱ་དང་བརྒྱད་དོ། །ཁྱད་པར་འོད་གསལ་རྡོ་རྗེ་སྙིང་པོའི་སྐོར་ལ། སྙིང་པོའི་གསང་རྒྱུད་བཅུ་བདུན། ཀློང་གསལ་འབར་མ་ཉི་མའི་རྒྱུད་ལ་ཆེ་འབྲིང་ཆུང་གསུམ། སངས་རྒྱས་མཉམ་སྦྱོར་གྱི་རྒྱུད་ལ་རྒྱུད་སྡེ་ལྔ། བདེ་གཤེགས་སྒྲུབ་པ་བཀའ་བརྒྱད་ཀྱི་རྒྱུད་ལ། བདེ་གཤེགས་འདུས་པ་རྩ་བའི་རྒྱུད། ཞི་བ་འདུས་པ་རྩ་བའི་རྒྱུད། ཁྲག་འཐུང་འདུས་པ་རྩ་བའི་རྒྱུད། ཆེ་མཆོག་འདུས་པ་རྩ་བའི་རྒྱུད། གཤིན་རྗེ་འདུས་པ་རྩ་བའི་རྒྱུད། དབང་ཆེན་འདུས་པ་རྩ་བའི་རྒྱུད། ཕུར་བ་འདུས་པ་རྩ་བའི་རྒྱུད། མ་མོ་འདུས་པ་རྩ་བའི་རྒྱུད། རིག་འཛིན་འདུས་པ་རྩ་བའི་རྒྱུད། དྲེགས་པ་འདུས་པ་རྩ་བའི་རྒྱུད། དྲག་སྔགས་འདུས་པ་རྩ་བའི་རྒྱུད། མ་ཚང་བ་ཁ་བསྐངས་པའི་རྒྱུད། འབྱེད་པར་བྱེད་པ་ལྡེ་མིག་རྒྱུད། ཕྱི་མ་ངེས་པར་འབྱུང་བའི་རྒྱུད། ཕྱི་མའི་ཕྱི་མ་སྔགས་ཀྱི་རྒྱུད་རྣམས་བསྒྱུར་རོ། །གཞན་ཡང་བཀའ་བརྒྱད་བྱེ་བྲག་དུམ་བུའི་རྒྱུད། མ་གཤིན་ཕུར་གསུམ། ཡང་དག་ཕུར་པ། རྟ་འགྲིན་ལ་སོགས་པ་མང་པོ་དང་། གཞན་ཡང་ལས་ཚོགས་ཁ་བསྐང་བའི་རྒྱུད། སྲིད་པ་ལྷ་རྒྱུད་དང་འདྲེ་རྒྱུད། ལྷ་འདྲེ་སྟོང་འདྲེའི་རྒྱུད། གཏེར་རྒྱུད་ཆེ་ཆུང་། སྲིད་པ་སྤྱི་བླུགས་ཀྱི་རྒྱུད་ཆེ་འབྲིང་ཆུང་གསུམ། དྲེགས་པའི་སྡེ་དཔོན་སུམ་ཅུ་ལ་སྒོས་རྒྱུད་རེ། དྲེགས་པ་སྡེ་བརྒྱད་ལ་སྤྱི་རྒྱུད་རེ་རེ། ཕོ་མོ་དང་ཀླུ་གསུམ་ལ་སྒོས་རྒྱུད་རེ་རེ། ཐམས་ཅད་འདུས་པ་མ་ནིང་དྲེགས་པའི་སྤྱི་རྒྱུད་མ་ནིང་དྲེགས་པའི་སྲོག་རྒྱུད་ནག་པོ་ལ་སོགས་ཏེ། རེ་རེ་ནས་ནི་བྲིར་ག་ལ་ལང་སྟེ། མདོར་ན་དཔག་ཏུ་མེད་པ་ཅིག་དུས་དེར་འགྱུར་ཏེ། ཆོས་འཁོར་སྤྲུལ་པའི་རྒྱལ་བློན་མངའ་ཐང་རྒྱས། གྲུ་ཐོབ་པཎྜི་ཏ་རྣམས་སྤྲིན་ལྟར་གཏིབས། སྤྲུལ་པའི་ལོ་ཙཱ་བ་རྣམས་གློག་ལྟར་འཁྱུག །མངའ་ཐང་གྲྭ་མ་ཉམས་པའི་དུས་སུ་འགྱུར་བ་ཡིན་ཏེ། དུས་ཕྱིས་ཀྱི་ལོ་ཙཱ་བ་རང་ཆེ་འབྱིན་པ་རྣམས་དང་མི་འདྲ་སྟེ། བསྟན་པའི་དུས་ལ་གཟིགས། སྤྲུལ་པའི་སྦྱིན་བདག་རྒྱལ་བློན་རྣམས་ལ་གཟིགས། རྒྱ་གར་གྱི་གྲུབ་ཐོབ་པཎྜི་ཏ་རྣམས་ལ་གཟིགས། སྤྲུལ་པའི་ལོ་ཙཱ་བ་རྣམས་ལ་གཟིགས། བོད་ཀྱི་གང་ཟག་མཁས་ཤིང་བློ་གཟུ་བོར་གནས་པ་རྣམས་ཀྱིས་ལེགས་པར་བརྟགས་འཚལ་ལོ། །གཞན་ཡང་གསར་རྙིང་གཉིས་ཀྱིས་མཚམས་དང་། གོང་གི་ལོ་རྒྱུས་དེ་དག་ཤེས་ཆེ་བ་ནི། ཁམས་པ་ཡང་མེ་སེངྒེ་ཞེས་གྲགས་པ་དེའི་མདོ་ཁམས་སྨད་ཀྱི་ཆོས་འབྱུང་དང་སྨྲི་ཏི་ཛྙཱ་ན་གྷིརྟི་ལ། རྒྱ་གར་གྱི་དྲི་བ་ཐེ་ཚོམ་བཅད་པའི་ལོ་རྒྱུས་ཆེན་མོ་ལས་ཇི་ལྟར་བརྗོད་པའི་ཚུལ་བརྗོད་པ་སྟེ། འདི་དག་ནི་རྙིང་མ་ལས་ཇི་ལྟར་གྲགས་པའི་འགྱུར་ཚུལ་བསྟན་པའོ། །གཉིས་པ་གསར་མར་ཇི་ལྟར་གྲགས་པའི་འགྱུར་དང་ལོ་རྒྱུས་ནི། བོད་ཀྱི་སློབ་དཔོན་གཞན་གྱིས་བྱས་པའི་ཆོས་འབྱུང་ན་མང་དུ་ཡོད་ཅིང་། འདིར་ཡི་གེ་འཇིགས་པས་མ་སྤྲོས་ལ། ལོ་རྒྱུས་རྣམ་གཞག་མདོ་ཙམ་ཞིག་ནི་བཤད་པར་བྱ་སྟེ། དེ་ཡང་རྒྱུད་སྡེ་གསུམ། ལྔ་དྲུག་ལ་སོགས་པ་ཡོད་ནའང་། དོན་ནི་རྒྱུད་སྡེ་ཆེན་པོ་བཞི་རུ་བསྡུ་བ་ཡིན་ཏེ། བྱ་རྒྱུད། སྤྱོད་རྒྱུད། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་རྒྱུད་དོ། །དེ་དག་གི་གཏན་ཚིག་ནི། གྲངས་ངེས་པར་བསྟན་པ། གོ་རིམས་ངེས་པར་བསྟན་པ་དང་། མིང་གི་དོན་དང་། ཆོས་སྡེའི་རྣམ་གྲངས་སོ། །དང་པོ་གྲངས་རྐྱང་པ་ལ་བཞི་སྟེ། དུས་བཞི་ལ་དགོངས་ཏེ་རྒྱུད་སྡེ་བཞིར་ངེས་ཏེ། དཔལ་ཕྲེང་དམ་པའི་རྒྱུད་ལས། གསང་སྔགས་འབྱུང་ཚུལ་རྣམ་བཞི་སྟེ། བསྐལ་པ་རྫོགས་ལྡན་གསུམ་ལྡན་གཉིས། རྩོད་དུས་རྒྱུད་དང་རིམ་བཞིན་དུ། གདུལ་བྱའི་ངོ་ལ་སྣང་བ་ཡིན། གཉིས་པ་སྐྱེ་གནས་བཞི་ལ་དགོངས་ཏེ། བཞིར་བསྟན་པ་སྟེ། གུར་ལས། སྒོང་སྐྱེས་མངལ་ལས་སྐྱེས་པའམ། །དྲོད་སྐྱེས་ལ་སོགས་བརྫུས་སྐྱེས་སམ། །དེ་ཕྱིར་རྒྱུད་ནི་བཞི་རུ་ངེས། །ཞེས་སོ། །གསུམ་པ་མི་རིགས་བཞི་ལ་དགོངས་པ་ནི། རྡོ་རྗེ་ས་འོག་གི་རྒྱུད་ལས། རྒྱལ་རིགས་རྗེའུ་རིགས་བྲམ་ཟེ་དང་། །རྨོངས་རིགས་གདོལ་པ་འདུལ་དོན་དུ། །རྒྱུད་སྡེ་སོ་སོར་བསྟན་པ་ཡིན། །ཅེས་སོ། །བཞི་པ་འདོད་ཁམས་ཀྱི་ལྷའི་ཆགས་སྤྱོད་ལ་བརྟེན་ནས་ཀྱང་བཞིར་བསྟན། གུར་ལས། གཉིས་གཉིས་འཁྱུད་དང་ལག་བཅངས་དང་། ལྟ་དང་རྒོད་དང་འཁྲིལ་བའོ། །སྲིན་བུ་ཡིས་ནི་ཚུལ་གྱིས་སུ། །རྒྱུད་ནི་རྣམ་པ་བཞི་རུ་གསུངས། །ཞེས་སོ། །གཉིས་པ་གོ་རིམས་ངེས་པ་ནི། སེམས་ཅན་གྱི་དབང་པོའི་རིམ་པ་དང་བསྟུན་ནས་ཀྱང་རྒྱུད་བཞིར་ངེས་ཏེ། བསམ་གཏན་ཕྱི་མ་ལས། སེམས་ཅན་རྣམས་ལ་བྱ་བའི་རྒྱུད། །དེ་ལྷག་རྣམས་ལ་སྤྱོད་པའི་རྒྱུད། །སེམས་ཅན་མཆོག་ལ་རྣལ་འབྱོར་རྒྱུད། །དེ་ལྷག་རྣམས་ལ་བླ་མེད་རྒྱུད། །ཅེས་སོ། །རྒྱུད་སྡེ་བཞི་པོ་དེ་དག་གི་ཆོས་ཀྱི་རྣམ་གྲངས་ཀྱི་ཚད་ནི། ཡེ་ཤེས་རྡོ་རྗེ་ཀུན་ལས་བཏུས་པ་ལས། རྟོགས་པའི་རྒྱུད་ནི་སྟོང་ཕྲག་བཞི། བྱ་བའི་རྒྱུད་ནི་སྟོང་ཕྲག་བཞི། སྤྱོད་པའི་རྒྱུད་ནི་སྟོང་ཕྲག་བརྒྱད། །གཉིས་ཀའི་རྒྱུད་ནི་སྟོང་ཕྲག་དྲུག །རྣལ་འབྱོར་སྟོང་ཕྲག་བཅུ་གཉིས་སོ། །རྒྱས་པར་བཤད་ན་ཚད་མེད་དོ། །ཞེས་ལྔར་ཕྱེས་ནས་ཚད་དུ་བྱས་སོ། །དེ་དག་ལས་བྱ་བ་སྤྱོད་པ་རྣལ་འབྱོར་གསུམ་གྱིས་ངོས་བཟུང་ནས། མིང་གསར་མར་གྲགས་ཀྱང་། བཀའ་རྙིང་འགྱུར་དུས་ཕྱིས་ཀྱི་ཕྱི་ཐུབ་པའི་རྒྱུད་སྡེ་གསུམ་དང་མཐུན་ཏེ། རྙིང་མ་ལ་མ་ལྟོས་པའི་རྒྱུད་མེད་དོ། །རྒྱུད་གསར་རྙིང་དུ་འབྱེད་པ་ནི། གསར་རྙིང་གཉིས་ཀ་བླ་ན་མེད་པའི་རྒྱུད་ལས་ཕྱེ་བ་ཡིན་ནོ། །རྣལ་འབྱོར་བླ་ན་མེད་པའི་རྒྱུད་ལ་གསུམ་སྟེ། ཐབས་ཕའི་རྒྱུད། ཤེས་རབ་མའི་རྒྱུད། གཉིས་སུ་མེད་པ་སྙིང་པོའི་རྒྱུད་དོ། །ཕ་རྒྱུད་མ་རྒྱུད་གཉིས་ཀྱི་ཁྱད་པར་ཡང་གདུལ་བྱའི་ཁྱད་པར་ཏེ། གུར་ལས། སྐྱེས་པ་རྣམས་ནི་འདུལ་བའི་ཕྱིར། །རྣལ་འབྱོར་ཕ་ཡི་རྒྱུད་དུ་བཤད། །བུད་མེད་རྣམས་ནི་འདུལ་བའི་ཕྱིར། །རྣལ་འབྱོར་མ་ཡི་རྒྱུད་དུ་བཤད། །ཅེས་སོ། །ཡང་རྫོགས་རིམ་གྱི་གནས་སྐབས་སུ། རྩ་གཙོ་བོར་སྟོན་པ་མ་རྒྱུད། རླུང་གཙོ་བོར་སྟོན་པ་ཕ་རྒྱུད། སཾ་བྷུ་ཊི་ལས། གནས་དེ་རྣམས་སུ་དཔའ་བོ་ནི། །རླུང་གིས་ཁམས་དང་ཡང་དག་ལྡན། །ཅེས་སོ། །ཡང་བསྐྱེད་རིམ་གྱི་སྐབས་སུ། ལྷ་ཕོ་ཤས་ཆེ་བ་ཕ་རྒྱུད། མོ་ཤས་ཆེ་བ་ནི་མ་རྒྱུད་དོ། །གཉིས་སུ་མེད་པ་སྙིང་པོ་དོན་གྱི་རྒྱུད་ནི། ཐབས་ཤེས་ཆ་སྙོམས་པས་ཀུན་ལས་ཁྱད་པར་བཏོན་པ་ཡིན་ཏེ། མཚན་བརྗོད་ལས། གཉིས་སུ་མེད་དང་གཉིས་མེད་སྟོན། །ཅེས་སོ། །དེ་ལ་རྒྱུད་སྡེ་ངོས་བཟུང་ན། ཕ་རྒྱུད་ནི། དཔལ་གསང་བ་འདུས་པ། མ་རྒྱུད་ནི། ཀྱཻ་རྡོར། བདེ་མཆོག །བདེན་བཞི། མ་ཧཱ་མ་ཡ་ལ་སོགས་པའི་སྐོར་རྣམས་སོ། །གཉིས་སུ་མེད་པ་སྙིང་པོ་དོན་གྱི་རྒྱུད་རྣམས་ནི། རྩ་བའི་རྒྱུད་རབ་ཏུ་མི་གནས་པ། བཤད་པའི་རྒྱུད་བསམ་གྱིས་མི་ཁྱབ་པ། གཉིས་ཀའི་རྒྱུད་རྙོགས་པ་མེད་པ། རྒྱབ་རྟེན་གྱི་རྒྱུད་ཧེ་རུ་བཟང་པོ། ཕན་པར་བྱེད་པའི་རྒྱུད་ཡེ་ཤེས་སྙིང་པོ། ཡིད་བཞིན་ནོར་བུ་ལྟ་བུའི་རྒྱུད་འཇམ་དཔལ་སྒྱུ་འཕྲུལ་དྲ་བ་ཁྲི་དྲུག་སྟོང་ལ་སོགས་པ་སྟེ། དེ་དག་ནི་རྒྱུད་སྤྱིའི་རྣམ་གྲངས་མདོ་ཙམ་བསྟན་པ་ཡིན། རྒྱུད་སྡེ་རེ་རེ་ལའང་འདོད་པའི་བྱེ་བྲག་ཏུ་ཕྱེ་ན། རྒྱུད་རྒྱས་པ་ལ་ཡན་ལག་བདུན་ལྡན་དུ་འདོད་པ་དང་རྩ་རྒྱུད་བཤད་རྒྱུད་གཉིས་སུ་འདོད་པའི་ལུགས་སོ། །ཡན་ལག་བདུན་ལྡན་ནི། རྩ་བའི་རྒྱུད། བཤད་པའི་རྒྱུད། ཕྱི་མའི་རྒྱུད། ཕྱི་མའི་ཕྱི་མ། མ་ཚང་བ་ཁ་བསྐང་བ། བཀའ་མ་ཡོངས་སུ་སྤྱོད་པའི་རྒྱུད། བསྐལ་པ་དུམ་བུའི་རྒྱུད་དོ། །དེ་དག་གི་ཁྱད་པར་ཡང་། ཐོག་མར་སྟོན་པས་གསུངས་པ། བསྐྱེད་པ་མ་ལྟ་བུའི་ཚུལ་ནི་རྩ་བའི་རྒྱུད། དེའི་རྗེས་ལ་གྱེས་པ་ཡལ་ག་ལྟ་བུ་ནི་བཤད་པའི་རྒྱུད། རྩ་རྒྱུད་མངོན་དུ་ཕྱུང་བ་ཕྱི་མའི་རྒྱུད། ཕྱི་མ་རྣམས་མི་གསལ་བ་གསལ་བར་བྱས་པ་ནི། ཕྱི་མའི་ཕྱི་མ། རྩ་བཤད་གཉིས་སུ་མ་ཚང་བ་ལོགས་སུ་གསུངས་པ་ཁ་བསྐངས་བའི་རྒྱུད། རྩ་བའི་བཀའ་ལོགས་སུ་བཀྲོལ་བ་ཡོངས་སུ་སྤྱོད་པའི་རྒྱུད། རྩ་བཤད་ནས་གལ་ཆེ་བ་ལོགས་སུ་བཀྲོལ་བ་བཀོལ་བ་དུམ་བུའི་རྒྱུད་དོ། །རྩ་རྒྱུད་ལ་མཚན་ཉིད་དྲུག་སྟེ། རྩ་བ་བསྐྱེད་པ། གླེང་གཞི་བརྗོད་པ། སྟོན་པ། རྒྱ་ཆེར་སྤྲོ་བ། རྒྱུད་ཀྱི་ལྡང་ཚད་བཤད་པ། མཐུ་དྲུག་གི་དོན་བསྡུ་ཚུལ་བསྟན་པའོ། །བཤད་རྒྱུད་ལ་ཚུལ་དྲུག་སྟེ། མི་གསལ་བ་གསལ་བར་བྱེད་པ། མ་ཚང་བ་ཁ་བསྐང་བ། ཚུལ་མི་འདྲ་བ་སོ་སོར་སྟོན་པ། སྔགས་ཀྱི་དོན་བསྡུ་བ། མི་མཐུན་པ་གཞི་དོན་ཅིག་ཏུ་སྟོན་པ། ཚིག་དང་དོན་རྣམ་པར་ཕྱེ་སྟེ་ཅིག་ཏུ་སྟོན་པའོ། །སྤྱིར་ན་རྒྱུད་ཅེས་བྱ་བ་ལ་ལྡང་ཚད་ནི། རྒྱུད་ཀྱི་དངོས་པོ་བཅུ་ཚང་བར་སྟོན་པའམ། གླེང་གཞི་གླེང་ནས་སླང་། གདམས་གཏད་དང་བཅས་པ་སྟོན་པའོ། །དེ་རྣམས་ཚང་ན་རྒྱུད་ཡོངས་སུ་རྫོགས་པར་བཞེད་དོ། །དེ་རྣམས་མ་ཚང་ན་རྒྱུད་འཐོར་བ་ཞེས་བྱའོ། །དེ་ལྟར་དུ་རྣམ་བཞག་མདོ་ཙམ་བསྟན་ནས། དུས་ཕྱིས་ཀྱི་འགྱུར་གསར་མར་གྲགས་པ་རྣམས། རྒྱ་གར་གྱི་པཎྜི་ཏ་དང་། བོད་ཀྱི་ལོ་ཙཱ་བ་རྣམས་ཀྱིས་འགྱུར་རྣམས་ནི། པཎྜི་ཏ་སྨྲི་ཏི་སྔ་ཤོས་ཡིན་ཅིང་། ལོ་ཙཱ་བ་རིན་ཆེན་བཟང་པོ། འབྲོག་མི། གཉོས་འབྱུང་པོ། མར་པ་ལོ་ཙཱ། འགོས་ཞུང་། ཞང་ལོ་ཙཱ་བ་རྣམས་ཀྱིས་མགོས་བྱས། རྔོག་ཤེས་རབ་བློ་ལྡན་ཡར་བཅད་དོ། །ཕལ་ཆེར་བསྒྱུར་བ་ཡིན་ཅིང་། དེ་ཡང་ལོ་ཙཱ་བ་གོང་མ་རྣམས་ཀྱིས་གཙོ་བོར་བསྒྱུར་བ་ལས། བོད་སོ་སོ་སྐྱེ་བོའི་བློ་ཅན་རྣམས་ལ། འགྱུར་བཟང་ངན་དུ་གྲགས་པའི་ཆོས་དང་། གསར་འགྱུར་འགྱུར་བཅོས། རང་ཕྱོགས་ཀྱི་འདོད་པས་བཅོས་པ་ཁོ་ན་ཡིན་ཅིང་། རྒྱུད་གཞུང་ཆེན་པོའི་འགྱུར་རྣམས་ལས་བཅོས་བྱས་པ་ལས། དུས་ཕྱིས་ལོ་ཙཱ་བ་རྒྱ་བལ་དུ་རྒྱ་ཚོང་པ་ལྟར་མང་དུ་རྒྱུག་པ་བྱུང་སྟེ། ཕྱིས་རང་གཞུང་ཚུགས་པའི་རྒྱུད་ཆེར་འགྱུར་བ་ནི་མེད། རྒྱུད་འཐོར་བུ་འགའ་རེ་དང་། གཟུངས་དང་ལྷའི་སྒྲུབ་ཐབས་ལ་སོགས་པ་རྣམས། དག་མ་དག་གང་ཡང་རུང་བ་མང་པོ་ཞིག་འགྱུར་ཚུལ་འདུག་གོ། །དེ་དག་ནི་གསར་མའི་ཆོས་འབྱུང་འགའ་ཞིག་ཏུ་བསྟན་འདུག་པས། འདིར་རེ་རེ་བཞིན་གྱི་འགྱུར་བྱང་ནི་ཡི་གེས་འཇིགས་ཏེ་བྲིར་མ་ལང་ངོ་། །དེ་དག་གིས་ནི་གཙོ་བོར་གསར་མའི་འགྱུར་ཚུལ་དང་། བྱེ་བྲག་ཏུ་གསར་རྙིང་གཉིས་ཀྱི་རྣམ་གྲངས་དང་། འགྱུར་ཚུལ་མདོར་བསྟན་པ་ཡིན་ནོ། ༈ །གསུམ་པ་གསར་རྙིང་དུ་གྲགས་པའི་རྒྱུད་འཛིན། སྤྱིར་ཁ་ཅིག་ན་རེ། རྒྱ་གར་ན་གསར་རྙིང་མེད། བོད་དུ་གྲགས་པ་ཡིན་ཟེར་ཡང་། རྒྱ་གར་དུ་བསྟན་པའི་བབ་ཚུལ་གྱི་གསར་རྙིང་དང་། བོད་དུ་འགྱུར་སྔ་ཕྱིས་གསར་རྙིང་དུ་གྲགས་པ་ཡིན་ཅིང་། རྒྱ་གར་ན་བཀའ་རྒྱུད་བབ་ཚུལ་གྱི་རིམ་པ་གོང་དུ་ཡང་བསྟན་པ་ཡིན་ལ། དེའང་རྒྱ་གར་ན་བསྟན་པའི་བབས་ཚུལ་རྙིང་མ་ལ་ཁྱད་པར་དུ་འཕགས་པ་ཅི་ཡོད་ཅེ་ན། བསྐལ་པ་ལ་གྲངས་སུ་བཅད་པའི་བསྟན་པ་བཅུ་གཉིས། དེ་དག་མཐུན་པའི་གནས་བཅུ་གཉིས། བསྟན་པའི་བདག་པོ་སྟོན་པ་བཅུ་གཉིས། དེ་དག་གི་གསུངས་པ་བསྟན་པའི་ཆོས་བཅུ་གཉིས། འདི་དག་རིམ་གྱི་བབ་སོ་དང་བཅས་ནས་འབྱུང་བ་ཡིན་ཏེ། དེ་དག་གིས་བབས་སོ་མདོ་ཙམ་བསྟན་པ་ནི། དེ་ཡང་སྐྱེ་དགུ་རྣམས་ཀྱི་ཚེ་ལོ་དཔག་ཏུ་མེད་པ་ཐུབ་པའི་དུས་སུ། བསྐལ་པ་དང་པོ་དགའ་ལྡན་བརྩེགས་པ་ཞེས་བྱ་བར། གནས་ཕུན་སུམ་ཚོགས་པ་འོག་མིན་ལྷའི་གནས་སུ་མེ་ཏོག་པདྨའི་སྡོང་པོ་འདབ་མ་སྟོང་དང་ལྡན་པ་ལ། སྟོན་པ་རྡོ་རྗེ་འཆང་ཉིད་བྱིས་པ་གཞོན་ནུའི་གཟུགས་སུ་འཁྲུངས་པའི་ཚུལ་བསྟན་པའི་གཡས་གཡོན་དུ་ལྷའི་བུ་ཉི་མ་རབ་ཏུ་སྣང་བྱེད་དང་། ཟླ་བ་དྲི་མ་མེད་པ་གཉིས་བརྫུས་ཏེ་སྐྱེས་ཤིང་། འདབ་མ་སྟོང་ལ་བསྐལ་པ་བཟང་པོའི་སངས་རྒྱས་སྟོང་ཁྱེའུ་གཞོན་ནུ་སྤྲུལ་སྐུའི་ཆ་བྱད་དུ་སྤྲུལ་ཏེ་བཞུགས་པ་ནི། བསྐལ་པ་བཟང་པོ་འདི་ལ་སངས་སྟོང་གིས་འདུལ་བ་ལ་དགོངས་པའོ། །དེ་ཡང་བསྟན་པ་འདི་ལ་ལོངས་སྐུའི་བསྟན་པས་གདུལ་བྱ་ཡང་རབ་རྣམས་འདུལ་བ་ལ་དགོངས་ནས། སེང་གེ་དྲང་སྲོང་གླང་པོ་གསུམ་གྱི་བཞུགས་སྟངས་གསུམ་དང་། སྐུ་གསུམ་གྱི་གཟིགས་སྟངས་གསུམ་གྱིས་ཆོས་ཕུན་སུམ་ཚོགས་པ་སྒྲ་ཐལ་འགྱུར་རྩ་བའི་རྒྱུད་ལ་སོགས་པ་མངོན་སུམ་དུ་སྙིང་ཏིག་གི་བསྟན་པ་རྣམས་དུས་ཕུན་སུམ་ཚོགས་པ་བསྐལ་པ་འདིའི་ཐོག་མ་ལ་གསུངས་སོ། །དེ་ནས་སྐྱེ་དགུ་རྣམས་ཀྱི་ཚེ་ལོ་བྱེ་བ་ཐུབ་པ་ན། ཐམས་ཅད་འབྱུང་བཞི་འདུས་པ་འོད་ཀྱི་སྒོ་ང་ལས་སྐྱེས་པ་ཤ་སྟག་སྟེ། དེའི་ཚེ་གནས་ཕུན་སུམ་ཚོགས་པ་མི་མཇེད་འཇིག་རྟེན་གྱི་ཁམས་འོད་གསལ་ལྷའི་ཁང་པར། སྟོན་པ་ཕུན་སུམ་ཚོགས་པ་རྡོ་རྗེ་འཆང་ཆེན་པོ་འོད་ལྔ་འདུས་པའི་སྒོ་ང་ལས་གཞོན་ནུ་ལོ་བཅུ་དྲུག་གི་ཚོད་ཙམ་དུ། ཁྱེའུ་འོད་མི་འཁྲུགས་པ་ཞེས་བྱ་བར་བྱོན་ཏེ། འཁོར་ཕུན་སུམ་ཚོགས་པ་ཡིད་སྙུང་རྡོ་རྗེ་མ་ལ་སོགས་པ་ལ། ཆོས་ཕུན་སུམ་ཚོགས་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ། དུས་ཕུན་སུམ་ཚོགས་པ་ཚེ་ལོ་བྱེ་བ་ཐུབ་པའི་དུས་གསུངས་པོ། །དེ་ནས་ཚེ་ལོ་འབུམ་ཐུབ་པའི་དུས་ན། གནས་ཕུན་སུམ་ཚོགས་པ་དྲོད་གཤེར་འདུས་པ་འོད་ཀྱི་ཕུང་པོ་སྤུངས་པ་ཞེས་བྱ་བར། སྟོན་པ་རྡོ་རྗེ་འཆང་ཉིད་དཔལ་འཇིགས་པ་སྐྱོབ་པ་ཞེས་བྱ་བར་སྤྲུལ་ནས། འཁོར་བྱང་ཆུབ་སེམས་དཔའ་འབུམ་ཕྲག་དྲུག་ལ་ཆོས་ཕུན་སུམ་ཚོགས་པ་འཁོར་བ་དོང་སྤྲུགས་དང་། རྨ་བྱ་འགྱིངས་བསྣོལ་དང་། དཔལ་འབྱུང་བཞི་ཟད་པའི་རྒྱུད་རྣམས། དུས་ཕུན་སུམ་ཚོགས་པའི་ཚེ་ལོ་འབུམ་པའི་དུས་ན་གསུངས་སོ། །དེ་ནས་ཚེ་ལོ་བརྒྱད་ཁྲི་པའི་དུས་ན། གནས་ཆགས་འབྱུང་མངལ་དུ་སྣང་བར། སྟོན་པ་རྡོ་རྗེ་འཆང་ཆེན་པོ་བརྩེ་བས་རྣམ་པར་རོལ་པ་ཞེས་བྱ་བས། འཁོར་གནོད་སྦྱིན་དང་བྲག་སྲིན་སྟོང་ཕྲག་ཅིག་ལ། ཆོས་ཕུན་སུམ་ཚོགས་པ་སེམས་སྡེ་རྩ་བའི་རྒྱུད་ལྔ། ཡང་དག་གི་རྒྱུད་དྲུག་སྟེ་བཅུ་གཅིག །དུས་ཕུན་སུམ་ཚོགས་པ་ཚེ་ལོ་བརྒྱད་ཁྲི་པའི་དུས་ན་གསུངས་སོ། །དེ་ནས་ཚེ་ལོ་བདུན་ཁྲི་པའི་དུས་ན། གནས་ཕུན་སུམ་ཚོགས་པ་སུམ་ཅུ་རྩ་གསུམ་དུ། སྟོན་པ་རྡོ་རྗེ་འཆང་ཉིད་སྤྱིར་འགྲོ་བ་རིགས་དྲུག་ན། ཐུབ་པ་དྲུག་གསང་བ་ཕ་རོལ་ཏུ་ཕྱིན་པ་དྲུག་ལ་གཟིགས་ཏེ། དྲུག་པ་རྡོ་རྗེ་འཆང་ཆེན་པོར་སྤྲུལ་ནས། འཁོར་ཕུན་སུམ་ཚོགས་པ་ཉིད་ཀྱི་རྣམ་པར་རོལ་པ་ལས་བྱུང་བ་སངས་རྒྱས་རབ་བདུན་དང་། ཐུབ་པ་དྲུག་ལ། ཆོས་ཕུན་སུམ་ཚོགས་པ་གདུང་བ་སེལ་བའི་ཆོས་དྲུག་ལ། ལུང་སྦྲགས་མ་བཅྭ་བརྒྱད་དང་། ཕྱག་ན་རྡོ་རྗེས་མེ་ལྕེ་ཕྲེང་བའི་རྒྱུད་ལེའུ་དགུ་པ་དང་། སྤྱན་རས་གཟིགས་སེང་གེ་སྒྲའི་རྒྱུད་ལེའུ་དགུ་པ། འཇམ་དཔལ་ཡེ་ཤེས་རྒྱན་གྱི་ལེའུ་བདུན་པ་དང་། ཐིག་ལེ་མཆོག་གི་རྒྱུད། ཡེ་ཤེས་ཀུན་ཏུ་གསལ་བའི་རྒྱུད་ལེའུ་བཅུ་བདུན་པ་ལ་སོགས་པ། རྫོགས་པ་ཆེན་པོ་བྱ་བ་དང་བྲལ་བའི་རྒྱུད་རྣམས། དུས་ཚེ་ལོ་བདུན་ཁྲི་པའི་དུས་སུ་གསུངས་སོ། །དེ་ནས་ཚེ་ལོ་དྲུག་ཁྲི་པའི་ཚེ། གནས་ཕུན་སུམ་ཚོགས་པ་རི་རབ་ཀྱི་བྱང་ཤར་དུར་ཁྲོད་མེ་རི་འབར་བ་ཞེས་བྱ་བར། སྟོན་པ་རྡོ་རྗེ་འཆང་གཞོན་ནུ་དཔའ་བོ་སྟོབས་ལྡན་ཞེས་བྱ་བར་སྤྲུལ་ནས། འཁོར་ཕུན་སུམ་ཚོགས་པ་གོང་གི་ཐུབ་པ་དྲུག །གནོད་སྦྱིན་གྱི་བུ་ལེགས་སྤྱོད་དང་བདུན་ལ། ཆོས་ཕུན་སུམ་ཚོགས་པ་ཕ་རྒྱུད་བྱེ་བ་དགུ། མ་རྒྱུད་བྱེ་བ་གཉིས། གཉིས་སུ་མེད་པའི་རྒྱུད་རིགས་པ་རང་ཤར་ལེའུ་བརྒྱད་ཅུ་རྩ་དྲུག་པ་ལ་སོགས་པ་འབུམ་ཕྲག་དྲུག་ཅུ་རྩ་བཞི་རྣམས། དུས་ཚེ་ལོ་དྲུག་ཁྲི་པའི་དུས་སུ་གསུངས་སོ། །དེ་ནས་འཛམ་བུ་གླིང་གི་ནུབ་ཕྱོགས་རྒྱ་མཚོའི་གླིང་ཞེས་བྱ་བའི་གནས་སུ། སྟོན་པ་རྡོ་རྗེ་འཆང་དྲང་སྲོང་ཁྲོས་པའི་རྒྱལ་པོ་ཞེས་བྱ་བར་སྤྲུལ་ནས། འཁོར་སྲིན་པོ་བྱེ་བ་ཅིག་ལ། ཆོས་རིག་པ་འདུས་པའི་རྒྱུད་བཅུ་ལ་སོགས་པ་དུས་ཕུན་སུམ་ཚོགས་པ་ཚེ་ལོ་ཉི་ཁྲི་པའི་དུས་སུ་གསུངས་སོ། །དེ་ནས་གནས་ཕུན་སུམ་ཚོགས་པ་བྱ་རྒོད་ཕུང་པོར། སྟོན་པ་རྡོ་རྗེ་འཆང་གསེར་འོད་དམ་པར་སྤྲུལ་ནས། འཁོར་ཉན་ཐོས་རྫུ་འཕྲུལ་དང་ལྡན་པ་དཔག་ཏུ་མེད་པ་ལ། ཆོས་ཕུན་སུམ་ཚོགས་པ་འདུལ་བ་ཁྲི་ཕྲག་ཅིག །དུས་ཕུན་སུམ་ཚོགས་པ་ཚེ་ལོ་ལྔ་སྟོང་པའི་དུས་སུ་གསུངས་སོ། །དེ་ནས་གནས་ཕུན་སུམ་ཚོགས་པ་སོག་པོ་གཡུ་ཡི་སྨིན་མ་ཅན་གྱི་ཡུལ་དུ། དུས་ཕུན་སུམ་ཚོགས་པ་ཚེ་ལོ་སྟོང་གི་ཚེ། སྟོན་པ་རྡོ་རྗེ་འཆང་ཆེན་པོ་བརྩེ་བས་རྣམ་པར་རོལ་པའི་བློ་གྲོས་ཞེས་བྱ་བར་སྤྲུལ་ནས། འཁོར་ཕུན་སུམ་ཚོགས་པ་ས་བརྒྱད་པའི་བྱང་ཆུབ་སེམས་དཔའ་མང་པོ་ལ། ཆོས་ཕུན་སུམ་ཚོགས་པ་ཕྲ་རྒྱུད་བདུན་པ་གསུངས་སོ། །དེ་ནས་གནས་ཕུན་སུམ་ཚོགས་པ་བྱ་རྒོད་ཕུང་པོའི་རི་ལ། དུས་ཕུན་སུམ་ཚོགས་པ་ཚེ་ལོ་ལྔ་བརྒྱ་པའི་དུས་སུ། སྟོན་པ་རྡོ་རྗེ་འཆང་འོད་སྲུངས་བགྲེས་པོ་ཞེས་བྱ་བར་སྤྲུལ་ནས། འཁོར་ཕུན་སུམ་ཚོགས་པ་ཤཱ་རིའི་བུ་སྐར་མ་འོད་བཟང་པོ་ལ་སོགས་པ་དགྲ་བཅོམ་པ་བདུན་དང་། བྱང་ཆུབ་སེམས་དཔའི་འཁོར་གྱིས་བསྐོར་བ་ལ། ཆོས་ཕུན་སུམ་ཚོགས་པ་མདོ་སྡེ་དང་། ཀྲི་ཡ་དང་ཨ་ནུ་ལ་སོགས་པ་གསུངས་སོ། །དེ་ནས་གནས་ཕུན་སུམ་ཚོགས་པ་རྡོ་རྗེ་གདན་བྱང་ཆུབ་ཀྱི་ཤིང་དྲུང་དུ། དུས་ཕུན་སུམ་ཚོགས་པ་ཚེ་ལོ་སུམ་བརྒྱ་པའི་དུས་ཀྱི་ཚེ། སྟོན་པ་རྡོ་རྗེ་འཆང་མངོན་རྫོགས་རྒྱལ་པོ་ཞེས་བྱ་བར་སྤྲུལ་ནས། འཁོར་ཕུན་སུམ་ཚོགས་པ་རིག་གསུམ་མགོན་པོ་ལ། ཆོས་ཕུན་སུམ་ཚོགས་པ་སྙིང་པོ་ངེས་པའི་དོན་གསུངས་སོ། །དེ་ནས་དུས་ཕུན་སུམ་ཚོགས་པ་ཚེ་ལོ་བརྒྱ་པའི་དུས་ན། གནས་ཕུན་སུམ་ཚོགས་པ་ཝཱ་རཱ་ན་སཱི་དང་། བྱ་རྒོད་ཕུང་པོ་དང་། མཉན་དུ་ཡོད་པར། སྟོན་པ་རྡོ་རྗེ་འཆང་ཉིད་ལྷ་དང་མི་རྣམས་ཀྱི་སྟོན་པ་དཔལ་རྒྱལ་བ་ཤཱཀྱ་ཐུབ་པ་ཉིད་དུ་སྤྲུལ་ནས། མཛད་པ་བཅུ་གཉིས་ལ་སོགས་པའི་ཚུལ་གྱིས། འཁོར་ཉན་ཐོས་དང་བྱང་ཆུབ་སེམས་དཔའ་ལྷ་དང་ཀླུ་ལ་སོགས་པ་ལ། ཆོས་ཕུན་སུམ་ཚོགས་པ་ཐེག་པ་གསུམ་གྱི་ཆོས་ཀྱི་འཁོར་ལོ་གདུལ་བྱའི་རིམ་པ་དང་སྦྱར་ནས་གསུངས་སོ། །དེ་ལྟར་སྟོན་པ་བཅུ་གཉིས་པོ་དེ་དག་ཀྱང་། གདུལ་བྱའི་དུས་དང་། གདུལ་བྱེད་ཀྱི་འཁོར་བབས་ལ་བརྟེན་ནས་ཐོག་མའི་སྟོན་པ་ཀུན་ཏུ་བཟང་པོ། གདོད་མའི་རྒྱབ་པ་དེ་ཉིད་མཚན་རྫོགས་རྡོ་རྗེ་འཆང་གི་ཚུལ་དུ་བྱོན་པ་ཡིན་ཅིང་། དེ་ལ་བསྐལ་པ་དང་འཚམ་པའི་གདུལ་བྱ་འདུལ་བྱེད་གཉན་པོ་ལ་དགོངས་ཏེ། སྟོན་པའི་འཁྲུངས་ཚུལ་ཞི་ཁྲོ་ཆ་ལུགས་མི་འདྲ་བ་དུ་མར་སྤྲུལ་ཏེ། གོང་ལྟར་བཀའི་འཁོར་ལོ་རྣམས་རིམ་པར་གསུངས་པ་ཡིན་ཅིང་། བསྟན་པ་འདི་ཉིད་ཀྱི་དབང་དུ་སྟོན་པ་ཐུབ་པའི་དབང་པོ་འདི་ཉིད། ཕྱི་ལྟར་ན་ཤཱཀྱ་ཐུབ་པ། ནང་ལྟར་ཀུན་རིག་རྣམ་པར་སྣང་མཛད། གསང་བ་རྡོ་རྗེ་འཆང་ཆེན། ཡང་གསང་ལྟར་ན་རང་བཞིན་གདོད་མའི་རྒྱལ་བ་ཀུན་ཏུ་བཟང་པོ་ཞེས་དོན་ལ་མཚན་དུ་གསོལ་བ་ཡིན་ཏེ། དེའི་གསུངས་པའི་རྒྱུད་སྡེ་རྣམས་ཀྱང་། སྤྱིར་ནི་འོག་མིན་ལ་སོགས་པ་དག་པའི་གནས་དང་། ལྷ་གནས་དང་། མིའི་ཡུལ། སྡེ་རྒྱད་ལ་སོགས་པ་དུ་མར་གསུང་ནའང་། ཁྱད་པར་རྫོགས་པ་ཆེན་པོ་ལ། རྒྱུད་སྡེ་འབུམ་ཕྲག་དྲུག་ཅུ་རྩ་བཞི་ཡོད་པ་རྣམས་དང་། སྤྱིར་ཡང་རྙིང་མའི་ཆོས་ཀྱི་བབས་སོ་ཐམས་ཅད་ཕལ་ཆེར་ནུབ་ཨོ་རྒྱན་གྱི་ཡུལ་དུ་བྱུང་བ་ཡིན་ཏེ། བོད་དུ་རྒྱལ་བློན་མངའ་ཐང་དར་བའི་དུས་ཚུན་ཆོད་ཀྱི་ལོ་ཙཱ་བ་ནི། དུས་ཕྱིས་ནུབ་ཕྱོགས་ཨོ་རྒྱན་གྱི་ཡུལ་དུ་རྟོལ་བ་མེད། རྟོལ་ཀྱང་སོ་སོ་སྐྱེ་བོའི་ལོ་ཙཱ་བས་མཁའ་འགྲོའི་གསང་མཛོད། རང་བྱུང་གི་མཆོད་རྟེན་རྣམས་འབྱེད་པར་མི་ནུས། གོང་དུ་བསྟན་པ་ལྟར་རྫོགས་པ་ཆེན་པོ་ནི། སྟོན་པས་གསུངས་པའི་ཆོས་ཐེག་པ་རིམ་པ་དགུར་འདུས་པ་ལས། དེ་ཐམས་ཅད་ཀྱི་ཡང་རྩེ་དབང་པོ་ཡང་རབ་ཀྱི་ཆོས་ཡིན་ཏེ། ཀུན་གྱི་ཐུན་མོང་མ་ཡིན་པ། རྒྱ་གར་གྱི་བརྒྱུད་པ་རྣམས་ཀྱང་འོད་གསལ་རྡོ་རྗེ་སྙིང་པོའི་སྐོར། དབང་གི་ཆུ་ཀླུང་བཞི་དང་ལྡན་པའི་དབང་གི་ཚིག་རྒྱུད་དུ་བྱོན་པ་བདུན་ནས། གུ་རུ་པདྨ་དང་། བཱི་མ་ལ་གཉིས་ཀྱིས་བོད་དུ་ལྷག་མ་མ་ལུས་པར་གདན་དྲངས་པས། རྒྱ་གར་དུ་དུས་ཕྱིས་ཁུངས་མེད་པ་ཡིན་ཅིང་། སེམས་སྡེ། ཀློང་སྡེ། བཀའ་བརྒྱད་བྱེ་བྲག་སོ་སོ་ལ་སོགས་པ་རྣམས་ནི་རྒྱ་གར་གྱི་རིག་འཛིན་བརྒྱད་དང་། བོད་ཀྱི་ལོ་ཙཱ་བ་རྣམས་ཀྱིས་རིམ་པར་བསྒྱུར་བ་ཡིན་ཏེ། རྒྱུད་འགའ་རེ་ནི་ད་དུང་ཡང་། ཨོ་རྒྱན་རང་བྱུང་གི་གཙུག་ལག་ཁང་དུ་བཞུགས་པར་བཤད་དོ། །དེ་ལ་གོང་གི་ཆུ་ཀླུང་བཞིའི་བབས་སོ་གང་ཡིན་ན། བླ་མ་བརྒྱུད་པ་ལས་བྱུང་བའི་བྱིན་རླབས་བཀའ་བབ་ཀྱི་དབང་ལུང་། ཡི་དམ་ལྷའི་གནང་བ་ཐོབ་པ་དབང་ལུང་གི་བབས་སོ། །མཁས་པ་པཎྜི་ཏའི་དབང་ལུང་ལས་བྱུང་བ་རང་གྲོལ་གྱི་དབང་ལུང་། བཀའ་པོ་ཏི་གླེགས་བམ་གྱི་དབང་ཐེག་པའི་བབས་སོ། །རིག་པ་ཡེ་ཤེས་ཀྱི་རྩལ་དབང་ཐོབ་པ་འཁོར་འདས་ལ་དབང་བསྒྱུར་བ། གོང་གི་བླ་མ་བརྒྱུད་པ་དེ་རྣམས་ལ་ཡོད་པ་ཡིན་ཅིང་། ཁྱད་པར་དུ་དབང་བཞིའི་ཆུ་ཀླུང་ཡོངས་སུ་རྫོགས་པར་བབས་པ་ནི། རྒྱ་གར་ན་ཡང་གུ་རུ་པད་མ་འབྱུང་གནས་ཙམ་ལས་མེད་ཅེས་གྲགས་སོ། །དེས་ན་འོད་གསལ་རྡོ་རྗེ་སྙིང་པོའི་ཡང་རྩེ་འདི་ནི། རྒྱ་བོད་ཀུན་ཏུ་དཀོན་ཅིང་། བློ་ཆུང་མོས་པར་ཡང་དཀའ་སྟེ། བཱི་མ་ལའི་གསེར་ཕྲེང་ལས། བླ་མེད་ཐེག་པའི་ཡང་རྩེ་འདི་ནི། སྐལ་ལྡན་གྱིས་སྐྱེས་བུ་བསྐལ་པ་དཔག་ཏུ་མེད་པའི་སྔོན་རོལ་ནས་ཚོགས་གཉིས་བསགས་པ། སངས་རྒྱས་མང་པོ་ལ་བསྙེན་ཅིང་བཀུར་བ། ལས་ཀྱི་སྒྲིབ་པ་མཐར་ཟད་པ། སྲིད་པ་ཐ་མའི་བྱང་ཆུབ་སེམས་དཔའ་འགའ་དང་འགའི་སྤྱོད་ཡུལ་ཡིན་ཅིང་། གང་རུང་རུང་གི་སྤྱོད་ཡུལ་ནི་མ་ཡིན་ཏེ། ཐེག་པ་དམན་པ། བསོད་ནམས་དམན་པ། ཤེས་རབ་དམན་པ། ཡུལ་དུས་ས་དང་ལམ་ལ་ལྟོས་པའི་གང་ཟག་རྣམས་དང་ནི་ཕྲད་པར་མི་འགྱུར། ཕྲད་ཀྱང་མོས་པར་མི་འགྱུར། ཅེས་གསུངས་པ་ལྟར། ཆོས་འདི་ནི་རྒྱ་གར་ན་ཡང་དཀོན་པའི་གནས་སུ་གྱུར་པ་སྟེ། གང་རུང་རུང་གི་སྤྱོད་ཡུལ་ནི་མ་ཡིན་ཏེ། ཞེས་པ་དོན་གོ་སླ་བ་ཡིན་ནོ། །དེས་ད་རྒྱ་གར་ན་ཡང་ཆོས་ཀྱི་ངོ་བོ་ལ་གསར་རྙིང་མེད་ཀྱང་། བཀའ་རྒྱུད་བབས་སོའི་གསར་རྙིང་གི་གུ་རུ་དང་བཱི་མ་ལ་ཕན་གྱི་དགའ་རབ་རྡོ་རྗེ། འཇམ་དཔལ་བཤེས་གཉེན། ཤྲྀ་སིང་ཧ། ཛྙཱ་ན་སུ་ཏྲ་དང་བཅས་པ་འོད་གསལ་རྡོ་རྗེ་སྙིང་པོའི་རྒྱུད་དང་། ཧཱུྃ་ཀ་ར་དང་། འཇམ་དཔལ་བཤེས་གཉེན། ཀླུ་སྒྲུབ་སྙིང་པོ། པྲ་ཧ་སྟི། དྷ་ན་སྃ་སྐྲྀ་ཏ། རྃ་བྷུ་གྷུ་ཡ། ཤནྟིང་གྷརྦྷ། ཨིནྟྲ་བྷོ་དྷེ། ལེག་སྨི་ཀ་ར། གོ་མ་དེ་བྱི་དང་བཅས་པ་འདི་རྣམས་ཕན་ཆད་ནི། རྙིང་མའི་བཀའ་རྒྱུད་བབས་སོ། །ཡང་རྒྱ་གར་གྱི་སྐེ་ཚང་གསུམ་ན་བཞུགས་པའི་མཁས་པ་ཉི་ཤུ་རྩ་ཅིག་ཏུ་གསལ་བའི་བཱཻ་རོ་ཙ་ནའི་བླ་མར་གྲགས་པ་འདི་རྣམས་ཐམས་ཅད་ནི། དུས་སྔ་བས་རྒྱ་གར་དུ་ཡང་རྙིང་མའི་བཀའ་རྒྱུད་ཀྱི་བབས་སོ། །འདི་དག་ལ་བརྒྱུད་པའི་ཆོས་རྣམས་བོད་དུ་འགྱུར་བ་ཡིན་ཏེ། མངའ་བདག་ཁྲི་སྲོང་ལྡེའུ་བཙན། བསྟན་པ་སྔ་དར་བའི་དུས་སུ་ལོ་ཙཱ་བ་ཆེ་གསུམ། འབྲིང་གསུམ། ཆུང་གསུམ། མཁས་པར་གྲགས་པ་བཞི་བཅུ་རྩ་བཞི། ཡོངས་གྲགས་ཀྱི་ལོ་ཙཱ་བ་བརྒྱ་རྩ་བརྒྱད་ལ་སོགས་པ་རྣམས་ཀྱིས་རྒྱ་གར་མཁས་པའི་ཡུལ་དུ་ལྷག་མ་མ་ལུས་པར་བསྒྱུར་རོ། །ཅེས་པ་ནི་རྒྱལ་པོའི་བཀའ་ཆེམས་རྩིས་ཀྱི་ཡི་གེ་ཆེན་མོ་རྣམས་ལས་ཇི་ལྟར་བྱུང་བ་ཡིན་ཏེ། འདི་རྣམས་ནི་རྒྱལ་བློན་སྔ་དར་བའི་དུས་ཀྱི་འགྱུར་ཚུལ་ཏེ་རྙིང་མའི་འགྱུར་ཞེས་བྱའོ། །དེ་ཡང་མངའ་བདག་ཁྲི་སྲོང་ལྡེའུ་བཙན་ལ་སྲས་གསུམ་ཡོད་པ་ལ། ཆེ་བ་མུ་ནེ་བཙད་པོ། འབྲིང་བ་མུ་ཏིག་བཙད་པོ། ཆུང་བ་མུ་རུབ་བཙད་པོ་དང་གསུམ་ལས། ཆེ་བ་མུ་ནེ་བཙད་པོས་ཡུམ་དང་བློན་པོའི་ཕྱོགས་ལ་བརྟེན་ནས་དུག་གིས་བགྲོངས། མུ་རུག་བཙན་པོ་ལ་འདོད་ལུགས་གསུམ་དུ་གླེང་། ཕག་ཏུ་བློན་པོས་བགྲོངས་པ། མཐར་སྤྱུགས་པར་ཡང་བཞེད་དེ། ཆིབས་ཀྱིས་བརྡབས་ནས་གཤེགས་ཟེར་བའང་ཡོད། སྙུང་རིམས་བྱུང་བར་འདོད་དེ། གང་ལྟར་ནའང་ལྷ་ལུང་དཔལ་གྱི་རྡོ་རྗེ་སྐྱེ་བ་འཕོས་པ་ཡིན་ནོ། །མུ་ཏིག་བཙད་པོའི་སྲས། རྒྱལ་བས་སད་ན་ལེགས། དེ་ལ་མེས་ཨག་ཚོམ་ཡང་ཟེར། དེ་ལ་སྲས་གསུམ་སྟེ། ཁྲི་རལ་པ་ཅན། ཁྲི་དར་མ། ཁྲི་གཙང་མ་དང་གསུམ་བྱུང་བ་ལས། མངའ་བདག་ཁྲི་རལ་པ་ཅན་གྱི་རིང་ལ། འོད་འཇངས་རྡོའི་གཙུག་ལག་ཁང་ལ་བྱ་འདབ་དགུ་བརྩེགས་སུ་ཡོད་པ་བཞེངས། རྒྱ་གར་གྱི་པཎྜི་ཏ། མཁས་པ་ཛི་ན་མི་ཏྲ་ཕྱི་མ། སུ་རན་ཏྲའོ། །བྷི་ན་ཀ་ར། པྲ་ཏ་ཀ་ར། སུ་རན་ཏྲ་མི་ཏྲ། སངས་རྒྱས་གསང་བའི་སློབ་མ་ཁ་ཆེ་རད་ན་མི་ཏྲ་ལ་སོགས་པ། རྒྱ་གར་གྱི་པཎྜི་ཏ་མཁས་པ་ལྔ་བཅུ་རྩ་ལྔ་གདན་དྲངས། བོད་ཀྱི་ལོ་ཙཱ་བ་མངའ་བདག་ཁྲི་སྲོང་གི་དུས་ཀྱི་ལོ་ཙཱ་འགའ་ཞིག་བཞུགས་པ་ཡིན་ཏེ། ཅི་སྟེ་ཡིན་ཞེ་ན། ཨོ་རྒྱན་ཆེན་པོའི་དངོས་སློབ་ཚེའི་རིག་འཛིན་བརྙེས་པས། དགུང་ལོ་གཉིས་བརྒྱའམ་ཕྱེད་དང་གཉིས་བརྒྱ་ཙམ་ཤས་ཆེ་བ་བཞུགས་པ་ཡིན། ཅིའི་ཕྱིར་ཞེ་ན། གླང་དར་མས་བསྟན་པ་བསྣུབས་པའི་དུས་ནའང་། གུ་རུའི་དངོས་སློབ་གནུབས་ནམ་མཁའི་སྙིང་པོ། བཙུན་པ་རྒྱལ་བ་མཆོག་དབྱངས། གླང་དཔལ་གྱི་སེང་གེ། གནུབས་སངས་རྒྱས་ཡེ་ཤེས། ལྷ་ལུང་དཔལ་གྱི་རྡོ་རྗེ། རྨ་རིན་ཆེན་མཆོག །ལ་སུམ་རྒྱལ་བ་བྱང་ཆུབ། ལོ་ཙཱ་བ་ཀ་ཅོག་རྣམ་གཉིས་ལ་སོགས་པ་འདི་རྣམས་ལ་གསོད་པའི་མི་ཐུང་བ་བཏང་པས། རྫུ་འཕྲུལ་གྱིས་ནམ་མཁའ་ལ་བྱོན་ཏེ། རྟ་སྐད་མཚེར་བ། ཧཱུྃ་དང་རུ་ལུའི་སྒྲ་སྒྲོགས་པ། གླང་དར་མ་བཅོམ་ནས་བསྡུས་པ་ལ་སོགས་པ་མཛད་པའི་བར་དུ་རྩོད་པ་མ་ནུས་པའི་གཏམ་རྒྱུད་ནི། བོད་ཀྱི་སློབ་དཔོན་རྣམས་ཀྱིས་མཛད་པའི་ཆོས་འབྱུང་མང་པོར་བལྟས་པས་ཤེས་པར་བྱའོ། །ཡང་རྙིང་མ་རང་གི་ཆོས་ཀྱི་འགྱུར་ལུགས་ནའང་། རྨ་རིན་ཆེན་མཆོག་འདས་ནས་མེད་ཟེར་བ་དང་། ཤུད་པུ་དཔལ་གྱི་སེང་གེ་རྒྱ་བོད་ཀྱི་མཚམས་སུ་ཀླུ་བདུད་ཀྱིས་བར་དུ་བཅད་ཟེར་བའང་འདུག་སྟེ། ཁོ་བོའི་འདོད་ཀྱི་དེ་ཀུན་ཡང་མི་དག་སྟེ། མཆིམས་ཕུ་དང་དབུ་རྩེ་རིམ་གསུམ་དུ། ཨོ་རྒྱན་ཆེན་པོས་རྗེ་འབངས་ཉི་ཤུ་རྩ་ལྔ་ལ། བདེ་གཤེགས་འདུས་པ་གསང་བ་ཡོངས་རྫོགས་རྡོ་རྗེ་དབྱིངས་ལ་སོགས་པའི་དབང་ཆེན་མོ་རྣམས་བསྐུར་བའི་དུས་ནའང་། འདི་རྣམས་གཙོ་བོར་བཞུགས་པ་ལས། བར་ཆད་དུ་མ་སོང་སྟེ་ཤིནྟུ་བཞུགས་པ་ཡིན་ནོ། །དེ་ལྟར་མངའ་བདག་ཁྲི་རལ་པ་ཅན་གྱིས་ཡབ་མེས་ཀྱི་རིང་ལ་བསྒྱུར་བའི་ཆོས་རྣམས་དག་པར་བྱ་བ་དང་། མ་དག་པ་ཞུ་དག་བྱས་པའི་ཚུལ་དང་། དུས་ཕྱིས་བོད་བློ་མང་གིས་འགྱུར་ལ་བཅོས་མི་བྱ་བའི་ཕྱིར་དང་། རྒྱ་བོད་ཀྱི་ལོ་པཎ་རྣམས་གུང་མཉམ་པར་འཛོམ་པ་ཡིད་ཆེས་པར་བྱ་བའི་ཕྱིར། སྤྲུལ་པའི་རྒྱལ་པོ་ཉིད་ཀྱི་བཀའ་བཙན་པར་གཏན་ལ་ཕབ་པའི་ཕྱིར། སྐད་གསར་བཅད་ཀྱིས་བཅོམ་ནས་གཏན་ལ་ཕབ་པའོ། །ཅེས་བཀའི་རྩིས་ཆེན་མོ་ལས་འདིར་ཕབ་པའོ། །གཞན་ཡང་ལྷ་མོ་དྲི་མ་མེད་པའི་མདོ་དང་། གདོང་ཆར་ཅན་ལུང་བསྟན་པའི་མདོ་དང་། བྲམ་ཟེ་གཟུངས་ཀྱིས་སྙེ་མ། སྨན་གྱི་འགྱུར་མང་པོ་ཞིག །ཀྲི་ཡའི་གཟུངས་མང་པོ། ཀྲི་ཡའི་སྒྲུབ་ཐབས་མང་པོ་ཞིག་ཀྱང་འདིའི་དུས་སུ་བསྒྱུར་ཏེ། རྒྱལ་པོ་འདི་ནི་གསང་བའི་བདག་པོའི་སྤྲུལ་པ་ཡིན་ཏེ། སྐུ་ཚེ་ལ་བར་ཆད་དུ་འགྱུར་ཀྱང་ཐུག་དགོངས་མཐར་རྫོགས་པར་བཞེད་དོ། །འགའ་ཞིག་ན་རེ། ཕྱག་ན་རྡོ་རྗེའི་སྤྲུལ་པ་མིན། དེ་ཡིན་ན་ཅུང་པོ་གླང་དར་མས་བར་ཆད་བརྩམ་པར་མི་རིག་ཟེར་ནའང་། དེ་ཡང་དུས་ལ་མ་བབ་པའི་བར་ཆད་ནི་མ་ངེས་ཏེ། སྟོན་པ་ཞལ་བཞུགས་པའི་དུས་ནའང་། ལྷ་སྦྱིན་གྱིས་ཀྱང་བར་ཆད་མང་པོ་བརྩམ་པར་ཡིན་ཅིང་། ལོག་པའི་བདུད་ཀྱིས་སྨོན་ལམ་ལོག་པར་བཏབ་ན། བར་དུ་གཅོད་ནུས་ཏེ། གླང་དར་མ་ཡང་ལོག་པའི་སྨོན་ལམ་གྱིས་ནུས་པ་བྱུང་བའོ། །རྒྱལ་པོ་དེ་ཉིད་ཕྱག་ན་རྡོ་རྗེའི་སྤྲུལ་པ་ཡིན་པར་ཡིད་ཆེས་པའི་ལོ་རྒྱུས་ནི། རྒྱལ་པོས་ཁྲིམས་བར་པ་བཅས་པའི་དུས་སུ། རྒྱ་གྲུ་གུའི་ཡུལ་ལ་དམག་མཛད་ནས། ལྷོ་ཕྱོགས་ཀྱི་རྒྱལ་པོ་འཕགས་སྐྱེས་པོ་ལ་སྤྲེང་ཡིག་མཛད་ནས། ང་ནི་དམག་རོག་ལ་ཤོག་ཅིག་གསུངས་པ་ལ། རྒྱ་ནག་པོའི་བྱང་ཕྱོགས་སྨིན་མ་ཅན་གྱི་ཡུལ་དུ་རྒྱལ་པོའི་དམག་སླེབ་པའི་དུས། ལུང་པ་དེ་ཐམས་ཅད་མིའི་ལུས་ལ་བྱི་ལའི་མགོ་བོ་ཅན་གྱིས་རྟ་པ་ཤ་སྟག་གིས་གང་འདུག་སྟེ། དེར་རྒྱལ་པོའི་ཐུགས་དགོངས་ལ་ཡང་། ཨ་བ་ཕ་ཀི་ཅི་ཡིན་བསམ་ནས་ཐུགས་འཚབ་པ་ལ། དེ་དག་ཐམས་ཅད་རྟ་ལས་བབས་ཕྱག་འཚལ་རྒྱལ་པོ་ལ་གུས་པ་ལས། རྒྱལ་པོས་ཁྱེད་ཅག་སུ་ཡིན་ཞེས་དྲིས་པས། དེ་རྣམས་ན་རེ། ངེད་ཅག་ནི་རྒྱལ་པོ་ཁྱོད་ཀྱིས་བཀའ་ལུང་བས། ལྷོ་ཕྱོགས་ཀྱི་རྒྱལ་པོ་འཕགས་སྐྱེས་པའི་གྲུབ་བུམ་གྱི་དམག་ཡིན་ནོ། །ཞེས་ཟེར། དེའི་དུས་ན་རྒྱལ་པོ་ཕྱག་ན་རྡོ་རྗེའི་སྤྲུལ་པར་ཐག་བཅད། དེ་ནས་གཡུའི་སྨིན་མ་ཅན་གྱི་ཡུལ་དུ་རྒྱལ་པོ་ཕྱག་ཐེག་དུས། གྲུ་གུའི་ཡུལ་ན་བགས་ཀྱིས་སླེབ་སྟེ། གཡུའི་ཐུབ་པ་འཇིག་རྟེན་སྒྲོན་མ་ཞེས་བྱ་བས་མགོས་བྱས། གསེར་བྲེ་ཁལ་ཅིག་ཕྱག་རྟེན་དུ་བཏང་ཞེས་གྲགས་སོ། །རྟེན་དེ་ནི་ད་ལྟ་བསམ་ཡས་བཞུགས་པ་དེ་ཡིན་ནོ། །རྒྱལ་པོས་ཁྲིམས་གསུམ་པ་བཅས་པའི་དུས། ཧོར་དང་ཧོར་སེར་གཉིས་བཀའི་འབངས་སུ་བཅད། སྨད་ཧོར་ལ་དམག་མཛད་པའི་དུས་སུ། ཁམས་ཀྱི་དབྱར་མོ་ཐང་དུ་སླེབ། དགུན་གྱི་ཟླ་བ་གསུམ་ལ་ཧོར་ཡུལ་དུ་ཐོག་ལན་བཅོ་བརྒྱད་ཕབ། དེའི་དུས་སུ་ཧོར་བབ་མིས་སླེབ། རྫུ་འཕྲུལ་ལ་དབང་ཐོབ་པས་རྒྱལ་པོ་ཕྱག་ན་རྡོ་རྗེའི་སྤྲུལ་པར་སྟང་བཅད། གསེར་སྐུ་ཆུ་རིས་ཅན་དང་། སྡུད་པ་བ་སོ་ཅན་དང་། དངུལ་སྐྱོགས་ཤ་བ་ཅན་དང་གསུམ། ཕྱག་རྟེན་གྱི་སྣར་ཕུལ། དེ་ནས་ཁམས་གསུམ་པའི་ཡུལ་དུ་ཕེབས་དུས། བྱང་ཕྱོགས་ནས་རྒྱལ་པོ་རྣམ་ཐོས་སྲས་ནམ་མཁའ་ལ་བྱོན་ཏེ། མངའ་བདག་ལ་ཕྱག་འཚལ་ཞབས་ལ་གཏུགས་ཏེ། ཡུལ་འདི་ནི་ལས་སྒོའི་ལོངས་སྤྱོད་བཅོ་བརྒྱད་དང་ལྡན་པས་ངའི་ཡུལ་ཡིན་པས། འདི་ལ་བཀའ་བཀྱོན་མི་གནང་བའི་ཞུ་བ་ཕུལ་བས། ཁམས་གསུམ་པའི་ཡུལ་ཞེས་སུ་གྲགས། འདིའི་དུས་ན། རྒྱལ་པོ་ཕྱག་ན་རྡོ་རྗེའི་སྤྲུལ་པར་གྲགས་སོ། །རྒྱལ་པོ་འདིའི་སྐུ་དྲིན་ལ་བོད་དུ་སངས་རྒྱས་ཀྱི་བསྟན་པ་དབུ་བཙན། དགེ་བའི་བཤེས་གཉེན་དགེ་འདུན་པའི་བསྟན་པ་མཐའ་བཙན་པའི་ཕྱག་ལེན་མཛད་དེ། རྒྱལ་པོ་དེའི་དབུ་སྐྲ་ལ། དར་ཡུག་བཏགས་ནས། ཀུན་དགའ་ར་བའི་ཐེམ་པ་ལ་བཏད་དེ་ཐམས་ཅད་སྤྱི་བོར་ཁུར་བ་དང་། ཞབས་འོག་གི་རྡེའུ་བླངས་ཏེ་དབུ་ཡི་གཙུག་ཏུ་བཞག་སྟེ་བླ་ན། གཉེན་པར་ཁུར་བ་ལ་སོགས་ཏེ། སངས་རྒྱས་ཀྱི་བསྟན་པ་ལ་ཞབས་ཏོག་སུ་གང་གི་ཆེ་བའི་ཐུགས་ཁུར་ཁོ་ན་མཛད་པ་སྟེ། འདིའི་དུས་སུ་གང་འགྱུར་བ་དང་། བཀའ་རྣམས་གཏན་ལ་ཕབ་པ་སྟེ། བསྟན་པ་བར་དར་དུ་བཞེད་ཅིང་། ཡང་བོད་ཀྱི་སློབ་དཔོན་ཁ་ཅིག་གིས་ཆོས་འབྱུང་དང་བཞེད་པས། ཁྲི་རལ་པ་ཅན་མཆེད་གསུམ་པོ་འདི། རྒྱལ་པོ་ཁྲི་སྲོང་གི་ཚ་བོ་ཡིན་པར་ཡང་བཞེད་པའང་འདུག་སྟེ། དེ་ནི་མ་ཡིན་ཏེ། ཁྲི་སྲོང་གི་སྲས་མུ་ཏིག་བཙད་པོ། དེའི་སྲས་རྒྱལ་པོ་སད་ན་ལེགས། དེའི་སྲས་རྒྱལ་པོ་རལ་པ་ཅན་མཆེད་གསུམ་སྟེ། ཅི་སྟེ་ན། ཨོ་རྒྱན་ཆེན་པོའི་བཀའ་མ་འོངས་ལུང་བསྟན་ཆེན་མོ་ལས། ཁྲི་སྲོང་ཉིད་ལ་ལུང་བསྟན་མང་པོ་ན། །རྒྱལ་པོ་ཁྱོད་ཀྱི་ཡང་དབོན་དུས། །རྒྱལ་པོ་བདུད་ཀྱི་སྤྲུལ་པ་འབྱུང་། །ཞེས་གསུངས་པས་ཁུངས་བཙུན་པ་ཡིན་ནོ། །རྒྱལ་པོ་ཆེ་བ་མངའ་བདག་ཁྲི་རལ་འབྲིང་པོ་གླང་དར་མ་ཆུང་བ་ཁྲི་གཙང་མ་གསུམ་ལས། ཁྲི་རལ་པ་ཅན་བདུད་ཀྱིས་བགྲོངས། ཆུང་བ་ཁྲི་གཙང་མ་མོན་པ་གྲོར་སྤྱུགས་ཏེ། ཆོས་ཀྱི་ཁ་བཟུངས་བས་སྐྱོན་ཕབ་པ་ཡིན་ནོ། །གླང་དར་མ་རང་ཡང་ཆོས་ཀྱིས་དབུ་ཡོག་གིས་ལྷ་ལུང་དཔལ་གྱི་རྡོ་རྗེས་བགྲོངས། འདི་དག་གིས་སྐབས་སུ་གླེང་བརྗོད་མང་པོ་ཅིག་ཡོད་ནའང་། ཡིག་དྲོན་ཆེ་བས་མ་བྲིས་ཏེ་གཞན་དུ་ཤེས་པར་བྱའོ། །གནས་སྐབས་འདིའི་དུས་སུ་བསྟན་པ་བར་དར་ཞེས་བྱའོ། ༈ །ད་ནི་བསྟན་པ་ཕྱི་དར་དུ་གྲགས་པའི་ལོ་རྒྱུས་རྣམས་མདོ་ཙམ་ཞིག་བསྟན་པར་བྱ་སྟེ། དེ་ཡང་རྒྱལ་པོའི་བཀའ་ཆེམས་ལས། རྙིང་མའི་འགྱུར་མཇུག་ཙནྡྲ་ཀིརྟིས་བཅད། །གསར་མའི་འགྱུར་མགོ་ཇོ་བོ་སྨྲི་ཏིས་བཙུགས། །ཞེས་པས། ཙནྟྲ་ཀིརྟི་ནི་སློབ་དཔོན་ཧཱུྃ་མཛད་རྡོ་རྗེའི་སློབ་མ་ཡིན་ཏེ། ལོ་ཙཱ་བ་འབྲོག་མིའི་ཡང་དག་གི་ལས་ཚོགས། དབང་ཕྱུག་མའི་ཟོར་མདོས་བསྒྱུར་བ་ཕན་ནི་རྙིང་མའི་འགྱུར་ཕྱི་ཤོས་ཡིན་ནོ། །དེ་མན་ཆད་དུ་སྨྲི་ཏི་ཛྙཱ་ན་དང་། ལོ་ཙཱ་བ་རིན་ཆེན་བཟང་པོས་མགོས་བྱས། ལྷ་བླ་མ་བྱང་ཆུབ་འོད་ཡན་ཆད་དུ་བསྒྱུར་བ་མང་ཞིག་དང་། བཙད་པོ་ལྷ་བླ་མ་ཡེ་ཤེས་འོད་ཀྱི་དགོངས་པ་མ་གྲུབ་པའི་ལོ་རྒྱུས་དང་། ཅུང་པོ་བྱང་ཆུབ་འོད་ཀྱི་རིང་ལ་ལོ་ཙཱ་བ་མང་པོ་བརྫོངས་པ་དང་། ནག་ཚོ་བརྫངས་ནས་ཇོ་བོ་དི་པྃ་ཀ་ར་གདན་དྲངས་ཏེ་ཀ་གདམས་ཀྱི་སྡེ་བཙུགས་པ་དང་། དུས་ཕྱིས་གྲགས་ཆེ་བ་རྔོག་བློ་ལྡན་ཤེས་རབ་ཡར་བཅད་དུ། སྔར་མ་འགྱུར་བའི་རྒྱུད་གཞུང་ལུགས་རྒྱ་ཆེར་འགྱུར་བ་མེད་ནའང་། རྒྱུད་སྒྲུབ་ཐབས་མན་ངག་དང་བཅས་པ་བོད་གོ་སླ་བའི་ཕྱིར། སྐད་ལ་འགྱུར་བཅོས་བྱས་པ་དང་། ཚིག་ལ་བསྣན་པ་དང་། སྐྱར་ནས་བསྒྱུར་བ་དང་། འདོད་བློའི་འགྱུར་དང་། བཅོས་དང་། དག་ཕྱོགས་སུ་དྲངས་མང་ངོ་གཞན་ཡང་ལོ་ཙཱ་བར་གྲགས་པ་དུ་མ་ཞིག་གིས། རང་རང་གི་གཞུང་ལ་རྒྱ་གར་གྱི་ཁུངས་ང་བཟང་། འགྱུར་ང་བཙུན་ཟེར་བ་དང་། རང་ཕྱོགས་དུ་མའི་ཆེ་བ་དང་། སྙན་བརྗོད་བརྗོད་པ་མང་པོ་ཞིག་བྱུང་བ་འདི་རྣམས་ལ་གསར་འགྱུར་དུ་གྲགས་པ་ཡིན་ནོ། །བཞི་པ་དེ་གཉིས་ཀྱི་ཁྱད་པར་བསྟན་པ་ལ་གཉིས་ཏེ། རྙིང་མ་ལ་ཆེ་བའི་ཡོན་ཏན་དུ་མ་དང་ལྡན་ཞིང་། མི་མཉམ་པའི་དོན་དང་ཁུངས་བཙུན་པར་བསྟན་པ་དང་། གསར་མ་ལ་ལོ་ཙཱ་བ་རང་ཆེ་འདོད་པའི་སྐྱོན་གྱིས་བཅོས་བསླད་རང་བཟོ་མང་པོ་ཡོད་པའི་སྐྱོན་བསྟན་པའོ། །དེ་ཡང་མཁས་པ་ཆེན་པོ་རོག་གི་བན་དྷེ་ཤེས་རབ་འོད་ན་རེ། སྔོན་དང་པོའི་རྒྱལ་བློན་སྔ་དར་བའི་དུས་ཀྱི་ལོ་ཙཱ་བ་རྣམས་རང་རྒྱུད་པ་མ་ཡིན་ཏེ། སྤྲུལ་པའི་ལོ་ཙཱ་བ་ཁོ་ན་ཡིན་ཏེ། འགྱུར་རྣམས་ཅིག་ཐོག་ཏུ་ཅིག་ཡོང་བས་འདྲ་མིན་ཡེ་མི་འབྱུང་བ་ཡིན་ཏེ། སླར་རྒྱ་གར་དུ་བསྒྱུར་དང་ཞུ་དག་བཏུབ་པ་ཡིན། གསར་མའི་འགྱུར་རྣམས་དུས་ཕྱིས་ཀྱི་ལོ་ཙཱ་བ་རྣམས་ནི་སོ་སོ་སྐྱེ་བོའི་འགྱུར་ཡིན་པས། རང་གི་འདོད་པ་དང་བསྟུན་ནས་དེ་གོ་བར་བྱ་བའི་ཕྱིར་འགྱུར་མི་འདྲ་བ་མང་དུ་ཡོད་པ་ཡིན་གསུངས་སོ། །རྙིང་མ་ལ་མི་མཉམ་པའི་ཆེ་བ་གང་ཡིན་ཞེ་ན། རོང་ཟོམ་ཆོས་ཀྱི་བཟང་པོ་ཞེས་བྱ་བ་དེ། སྐྱེ་བ་བདུན་དུ་པཎ་ཌི་ཏའི་ལུས་བརྩེགས་མར་བཞེས་པ། འཆད་རྩོད་རྩོམ་གསུམ། སྒྲ་དང་བསྟན་བཅོས་ལ་མཁས་པ། བསྟན་པ་ཕྱི་དར་གྱི་མེ་རོ་བསློང་བ་ལ་དྲིན་དུ་ཆེ་བ། མདོ་སྔགས་གཉིས་ཀའི་པཎྜི་ཏ་ཆེན་པོ་དེའི་ཞལ་ནས། སྔགས་རྙིང་མ། གསར་མ་ལས་ཁྱད་པར་དུ་འཕགས་པའི་ཆེ་བ་དྲུག་ཡོད་གསུངས་སོ། །ཉི་འོག་བོད་ཀྱི་རྒྱལ་ཁམས་ན། འགྲན་ཟླ་དང་བྲལ་བའི་ཆོས་འཁོར་གཙུག་ལག་རྣམ་ལྔ་དང་། སྤྲུལ་པའི་ལོ་པཎ་རྣམས་གདན་འདྲེན་པའི་ཡོན་བདག་གི་ཁྱད་པར་ནི། རྙིང་མའི་ཡོན་བདག་རྣམས་མངའ་བདག་མེས་དབོན་རྣམ་གསུམ་འཕགས་པ་རིགས་གསུམ་མགོན་པོའི་སྤྲུལ་པ་རྣམས་ཀྱིས་གདན་དྲངས་པ་ཡིན་ལ། ད་ལྟར་གང་ཟག་སྡེ་ཆུང་དང་དགོན་ཆུང་གི་ཡོན་བདག་སྐྱེ་བོ་རེ་རེས་བྱས་པའི་ཆོས་དང་མི་འདྲ་གསུང་། ཕྱག་བཞེས་གཙུག་ལག་ཁང་གི་ཁྱད་པར་ནི། སྔོན་དཔལ་གྱི་བསམ་ཡས་དང་། ཆོས་འཁོར་སྟོད་སྨད་དུ་གདན་ཕབ་ནས་གསུངས་པ་ཡིན་ལ། ད་ལྟའི་སྡེ་གནས་དང་དགོན་ཆུང་ཅག་ཅོག་དང་མི་འདྲ་གསུང་། འགྱུར་བྱེད་ལོ་ཙཱ་བའི་ཁྱད་པར་ནི། སྔོན་བ་གོར་བཱཻ་རོ་ཙ་ན་རྨ་རིན་ཆེན་མཆོག །གཉག་ཛྙཱ་ན་ཡེ་ཤེས་གཞོན་ནུ་ཀུ་མ་ར། ཀ་ཅོག་རྣམ་གཉིས་ལ་སོགས་སྤྲུལ་པའི་ལོ་ཙཱ་བས་བསྒྱུར་བའི་ཆོས་ཡིན། ད་ལྟ་ལོ་ཙཱ་བ་དགུན་བལ་ཡུལ་དུ་བསྡད། དབྱར་ཚད་པས་འཇིགས་བྲེད་ནས་མང་ཡུལ་དུ་ཐོན། སྔོན་གྱི་མཁས་པའི་འགྱུར་ལ་རང་བཟོ་བཅོས་མ་བྱས་པ་དང་མི་འདྲ་གསུང་། མཁས་པ་དང་པཎྜི་ཏའི་ཁྱད་པར་ནི། སྔོན་གྱིས་པཎྜི་ཏ། པདྨ་འབྱུང་གནས། བཱི་མ་ལ་མི་ཏྲ། བྷོ་དྷི་ས་ཏྭ། སངས་རྒྱས་གསང་བ་ལ་སོགས་པའི་རིག་འཛིན་ས་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་གདན་དྲངས་པའི་ཆོས་ཡིན་ལ། ད་ལྟའི་པཎྜི་ཏ་ལྟོ་མ་ཕྱིད་བོད་དུ་གསེར་འཚོལ་དུ་ཡོང་བའི་བཟང་སྤྲང་བ་ཁ་ཅིག་མི་འདྲ་གསུང་། ཞུ་རྟེན་མེ་ཏོག་གི་ཁྱད་པར་ཡང་། སྔོན་གསེར་ཕྱེ་བྲེ་ལ་འཇལ་ནས་ཕུལ། གཡུ་ཤ་བའི་སླུད་པུ་བཀང་ནས་ཕུལ། གསེར་གྱི་ཏོང་རྩེ་བདུན་བརྩེགས་སུ་བརྩེགས་ནས་ཕུལ། གསེར་དངུལ་དང་དར་ཟབ་རྟ་ཁལ་དང་དྲིལ་དུ་བཀལ་ནས་ཕུལ་བའི་ཆོས་ཡིན་ལ། ད་ལྟ་གསེར་ཞོ་རེ་རེ་གཉིས་གཉིས་མཆན་ནས་ཉུག་ཉུག་བྱས་ནས་ཞུས་པ་དང་མི་འདྲ་གསུང་། བརྗོད་བྱ་ཆོས་ཀྱི་ཁྱད་པར་ཡང་། སྔོན་སངས་རྒྱས་ཀྱི་བསྟན་པ་གྲྭ་མ་ཉམས་པའི་དུས་སུ། སྤྲུལ་པའི་ལོ་ཙཱ་བས་བཀའ་མ་འགྱུར་བ་མེད་པར་གཏན་ལ་ཕབ་ནས། ཤེས་བྱའི་དངོས་པོ་འདུག་ཚུལ་གཏན་ལ་འབེབས་ཤིང་། དེ་རྟོགས་པར་བྱེད་པའི་ཐབས་དུ་མས་བརྒྱན་པའི་ཆོས་དང་། དུས་ད་ལྟའི་ལོ་ཙཱ་བ་རྫུན་པོ་ཆེས་སྔོན་གྱི་འགྱུར་ལ་བཅོས་མ་སྣ་ཚོགས་བྱས་ནས། འགྱུར་ང་བཟང་ཁུངས་ང་བཙུན་ཟེར་ཞིང་། སངས་རྒྱས་ཀྱི་བཀའ་དང་བླ་མའི་གསུང་ལ་ར་ཆོད་བྱས་ནས། མི་རེས་ཆོས་རེ་བཅོས། གཅིག་སྐྱོན་ཅིག་ལ་འགེལ། མ་དེབ་ལ་བུ་སྟོན་མི་བཏུབ་པའི་ཆོས་དང་མི་འདྲ་སྟེ། ཁྱད་པར་ཤིན་ཏུ་ཆེ་གསུང་སྐད། མདོར་ན་བོད་དུ་དམ་པའི་ཆོས་ཀྱི་དབུ་བརྙེས་སྲོལ་བཏོད། དར་ཞིང་རྒྱས་པར་མཛད་ཀྱང་ཨོ་རྒྱན་ཆེན་པོ་ཁོ་ནའི་རྣམ་པར་འཕྲུལ་པ་ཡིན་ཏེ། གུ་རུ་ཆོས་ཀྱི་དབང་ཕྱུག་གི་གནམ་སྐས་ཅན་གྱི་ཐེམ་བྱང་ཆེན་མོ་ནས༔ སངས་རྒྱས་ཀུན་འགྲུབ་རྡོ་རྗེ་འཆང་དང་བགྲོས༔ གསང་བདག་དངོས་དང་མཁའ་འགྲོས་གཏད་རྒྱ་བཀྲོལ༔ རྒྱུད་ལུང་མན་ངག་ཀུན་གྱི་དངས་མ་བསྡུས༔ རྡོ་རྗེ་གདན་དུ་མཉམ་པར་བཞག་པའི་ཚེ༔ སྤྱན་རས་གཟིགས་ཀྱིས་རབ་བསྐུལ་བོད་མཆིས་ཀྱང༔ བོན་གྱིས་དབང་བསྒྱུར་དམ་ཆོས་དུས་མ་བབ༔ ལྷ་བཤེན་ཐོ་ཀར་ཞེས་བྱར་སྐུ་སྤྲུལ་ནས༔ བོད་རྒྱལ་ཐོ་ཐོ་རི་ལ་བཀའ་རྟགས་བཙལ༔ སླར་ལོག་རི་བོ་ཏ་ལར་ཡོང་ནས་ནི༔ མ་ར་ཀི་ཏར་ཏནྟྲ་བཅོ་བརྒྱད་ཀྱི༔ དོན་བཀྲོལ་དེ་ཚེ་སྤྲུལ་པ་བརྒྱད་བཀྱེས་ན༔ ཨོ་རྒྱན་རྒྱ་གར་ཤར་ནུབ་དར་རྒྱས་བྱས༔ དེ་ཚེ་བོད་རྣམས་རྒྱུ་འབྲས་ཆོས་གོ་ཙམ༔ གདུལ་བྱར་གཟིགས་ནས་སྲོང་བཙན་སྤྲུལ་པར་བཀྱེས༔ དགེ་བཅུའི་ཁྲིམས་བཅས་དམ་ཆོས་སྲོལ་ཆེན་བཏོད༔ མཐའ་དབུས་གཙུག་ལག་བརྒྱ་དང་རྩ་བརྒྱད་བཞེངས༔ དེ་ནས་གདུང་ལྔ་སོང་ཚེ་ཆོས་སྐྱོང་རྒྱལ༔ ཁྲི་སྲོང་ལྡེ་བཙན་ཉིད་འཁྲུངས་ལས་སད་ནས༔ ཨོ་རྒྱན་བདག་སྤྲུལ་བོད་ཁམས་དཀར་པོར་བཏང༔ ཞེས་སོ། །དེས་ན་རྙིང་མའི་སློབ་དཔོན་ལོ་ཙཱ་བ་རྒྱལ་བློན་དང་བཅས་པ་འདི་རྣམས་ནི་འཕགས་པ་སྤྱན་རས་གཟིགས་ཀྱི་རྣམ་པར་འཕྲུལ་པ་ཁོ་ན་ཤ་སྟག་ཡིན་ཏེ། བོད་གངས་ཅན་གྱི་རྒྱལ་ཁམས་འདི་ཉིད་སྟོན་པའི་ཞབས་ཀྱིས་མ་བཅག་ཀྱང་སྟོན་པའི་དམ་ཆོས་བོད་དུ་དར་བ་ལ་དགོངས་ནས། བོད་དུ་བསྟན་པ་འཛིན་སྐྱོང་བསྲུང་ཞིང་དར་བར་བྱ་བའི་ཕྱིར། བསམ་ཞིང་འགྲོ་བའི་དོན་དུ་རྒྱལ་བློན་ལོ་པཎ་རྣམས་ཀྱི་ཚུལ་དུ་བྱོན་པ་ཡིན་ཏེ། དུས་ཕྱིས་ཀྱི་རྒྱལ་བློན་ལོ་པཎ་དུ་གྲགས་པ་རྣམས་ཀྱི་བ་སྤུ་ཅིག་གིས་ཆར་ཡང་མི་ཉེ་བ་ཡིན་ཏེ། དེ་ལ་བོད་ཀྱི་སློབ་དཔོན་ཁ་ཅིག་གིས། རྙིང་མ་ལ་མི་འགྲོ་བའི་རྩོད་གནས་མི་བྱ་སྟེ་བློ་གཟུ་བོར་བཞག་པར་བྱའོ། །ཁུངས་བཙུན་པའི་རྒྱུ་མཚན་ནི། གོང་དུ་བཤད་པ་རྣམས་ཀྱང་ཤེས་པར་བྱ་ཞིང་། དེ་ཡང་སྦྱིན་བདག་ཆོས་རྒྱལ་ཆེན་པོ་དེ་ཉིད་འཁོར་ལོས་སྒྱུར་བའི་རྒྱལ་པོ་དང་མཚུངས་པ་ཡིན་པས། སྔོན་དུས་ལོ་ཙཱ་བ་རྣམས་ལ་གསེར་ཕྱེ་དཔག་ཏུ་མེད་པ་བསྐུར་ནས་རྒྱ་གར་དུ་བརྫོངས་པ་དང་། རྗེས་ལ་ཨོ་རྒྱན་རྒྱ་གར་ཤར་ནུབ་ཁ་ཆེ་བལ་པོ་ལ་སོགས་ཀྱི་པཎྜི་ཏ་མཁས་པ་ཐམས་ཅད་བོད་དུ་སྤྱན་དྲངས། གསེར་ཁྲི་དང་གཡུ་ཁྲི་དངུལ་ཁྲི་གསུམ་ལ། པོ་པཎ་དང་རྒྱལ་པོ་ཉིད་བཞུགས་ཏེ། ཅིག་དཔང་ཅིག་གིས་མཛད་དེ། བསྒྱུར་པ་བསམ་ཡས་སུ་བྱས་པ་དང་། དུས་ཕྱིས་ཀྱི་ལོ་ཙཱ་བ་གར་ཕྱིན་དང་སུ་ཕྲད་ཀྱི་ཁུངས་མེད་ལ། བལ་པོར་ཁྱི་བཞིན་འཁྱམས་ནས་རང་བཟོ་དང་བཅོས་མའི་ཆོས་ལ། འུར་རྒྱང་འདོན་པ་དང་མི་འདྲ་བ་ཡིན་ནོ། །གཉིས་པ་གསར་མ་ལ་མ་དག་པ་ཅི་ལྟར་ཡོད་ཅེས་པ་ནི། དེ་ཡང་གསར་མ་ཐམས་ཅད་ལ་མ་དག་པའི་སྐྱོན་ཡོད་ཅེས་སྨྲ་བ་ནི་མ་ཡིན་ཏེ། རིན་ཆེན་བཟང་པོའི་དུས་དང་། འབྲོག་མི་དང་། གཉོས་དང་། རྗེ་མར་པ་ལོ་ཙཱ་ལ་སོགས་པའི་འགྱུར་དག་པ་ཡང་མང་པོ་ཡོད་ཅིང་། དུས་ཕྱིས་ཅིག་ནས་ད་ལྟ་ཁམས་པ་བོད་དུ་ཁ་ལུད་པ་ལྟར། བོད་རྣམས་རྒྱ་བལ་དུ་ཐག་བྲན་པ་ལྟར་དུ་བྱུང་བས། དེའི་དུས་སུ་ལོ་ཙཱ་བ་རྣམས་ཀྱང་ཁྱུང་འགྲོལ་ནས། རང་རང་གིས་ཆེ་བ་ནི་འདོད། རྒྱ་གར་ཤར་ནུབ་ཀྱི་ཆོས་རྣམས་ནི་ལོ་ཙཱ་བ་སྔ་མ་རྣམས་ཀྱིས་བསྒྱུར་ཟིན། ནུབ་ཕྱོགས་ཨོ་རྒྱན་དུ་ནི་མ་སླེབས། མཁའ་འགྲོའི་གསང་མཛོད་འབྱེད་པའི་སྐལ་བ་ནི་མེད། དེར་རང་བཟོ་དང་འདོད་བཅོས་མང་པོ་བྱས་པས། འཕྲལ་ཁུངས་བཙུན་ནན་ཟབ་ཟབ་འདྲ་ཡང་། གཏིང་མ་དག་པའི་བཤད་སྐྱོན་ཆེན་པོ་ཡོད་དེ། ཨོ་རྒྱན་ཆེན་པོའི་ཞལ་གདམས་གསལ་བའི་སྒྲོན་མེ་ལས༔ དེ་ཡང་མངའ་བདག་ཁྲི་སྲོང་གི་གདུང་རྒྱུད་དྲུག་བདུན་ནས་མར་ལ་སོང་དུས༔ བོད་རྣམས་ལོ་ཙཱ་བར་གྲགས་ཏེ༔ མི་ཕྱེད་རྒྱ་གར་དུ་ཐག་འབྲེན༔ ཐམས་ཅད་རང་རང་གིས་ཆེ་བ་ནི་འདོད༔ ཆགས་སྡང་དང་འགྲན་སེམས་ནི་རླུང་ལྟར་འཚུབས༔ རྒྱ་གར་གྱི་པཎྜི་ཏ་གསེར་འདོད་རྣམས་ཀྱང༔ བོད་ལ་གང་དར་བའི་ཆོས་ལ་འདོད་བཅོས་འཆོས༔ དེ་ཡང་རྒྱ་གར་གྱི་སྡེ་སྣོད་གསུམ་ལ་སོགས་པ་སྔགས་མཚན་ཉིད་དུ་གྲགས་པ་ཐམས་ཅད་ནི་ད་ལྟར་འགྱུར་ཟིན༔ རྒྱུད་དང་མན་ངག་མ་གྲགས་པ་རྣམས་ནི་ཨོ་རྒྱན་ལ་སོགས་མཁའ་འགྲོའི་གསང་མཛོད་རྣམས་ན་ཡོད་དེ༔ རྣལ་འབྱོར་གྱི་དབང་ཕྱུག་གྲུ་ཐོབ་མིན་པས་མི་ཐོན༔ དེ་དུས་ཀྱི་བོད་རྣམས་ཨོ་རྒྱན་གྱི་ཡུལ་དུ་ནི་མི་རྡོལ༔ དབུས་འགྱུར་རྡོ་རྗེ་གདན་དུ་ནི་ཚད་པས་ཡུད་དེ་ལས་མ་ཚུགས༔ རྒྱ་གར་ཤར་ཕྱོགས་ཁ་ཆེ་བལ་ཡུལ་རྣམས་ལ་ཆུ་ལྟར་རྒྱུག༔ ལོ་ཙཱར་གྲགས་པ་རྣམས་རང་ཆེ་དང་མཁས་འདོད་པས༔ གཅིག་སྐྱོན་ལ་ཅིག་འགེལ༔ སྔར་འགྱུར་ཟིན་པ་རྣམས་ལ་རྒྱུད་ཁུངས་དང་བཅོས་ཆུང་རེ་བྱས་ནས་ངའི་འགྱུར་བཟང་པོ་ཟེར༔ ད་ལྟའི་སྤྲུལ་པའི་ལོ་པཎ་རྣམས་མི་བཟང་ན༔ མ་འོངས་བོད་ཕྲུག་སོ་སོ་སྐྱེ་བོ་བྱིས་པ་རྣམས་མི་མཁས་གསུང༔ དེར་བོད་ཕྲུག་ལོ་ཙཱར་གྲགས་པ་རྣམས་རུ་འཁྲོལ་ནས་མན་ངག་ཅུང་ཟད་རེ་ལ་བཅོས་ཅུང་དང་གབ་སྦས་དང་འདྲ་མིན་མང་པོ་འཆོས༔ རྒྱ་གར་གྱི་ཁུངས་དང་བརྒྱུད་པ་གང་ལེགས་ནས་འདྲེན༔ བོད་རྣམས་གསར་ངས་ནི་ཆེ༔ རྒྱུད་འཛིན་མ་རིག་པར། རང་རང་ལོ་ཙཱ་བའི་ཁ་འཛིན༔ ཆོས་སྲིད་དང་ཕྱོགས་དྲེད་བྱེད༔ ལོ་ཙཱ་བ་ཁ་ཅིག་སྔར་མ་གྲགས་པའི་ཆོས་ནི་མ་རྙེད༔ དེར་སྔགས་ལ་སྒྲ་བཅོས་བྱེད༔ ལྷ་དཔའ་བོ་ཅིག་པ་ལ་ཡུམ་འཆོས༔ ཞལ་ཕྱག་མང་པོ་ལ་ལྷན་སྐྱེས་འཆོས༔ ལྷན་སྐྱེས་ལ་ཞག་ཕྱག་མང་པོ་འཆོས༔ སྐུ་མདོག་ལ་རིགས་ལྔ་མང་པོ་བྱེད༔ དཀྱིལ་འཁོར་ལ་འདོད་བཞེད་ཀྱིས་དཀྲུགས༔ མདོར་ན་གཞན་དང་མི་འདྲ་བ་ཞིག་ལ་གཙོ་བོར་འདོན༔ མཁས་པ་དེ་འདྲའི་རིགས་འོང་བར་ངེས་གསུངས་ནས་བཞད་དོ༔ ཅེས་གསུངས་པ་ལྟར་ཡིན་ཅིང༔ རྙིང་མའི་ཆོས་ཟབ་པ་མན་ངག་བཀོལ་དུ་བཏུབ་པ་རྣམས་ལ་རྙིང་མ་རྩོད་པ་ཅན་གྱི་ཆོས་སུ་བཞག་ནས། དེ་དག་ལ་བརྟེན་ནས་བཟོ་བཅོས་དང་། མིང་དང་རྒྱ་གར་གྱི་ཁུངས་དྲང་ནས་རང་གི་ཆེ་བ་གཅིག་འདོད་ནས་མ་ཚུགས་པ་ཡིན་ཡིན་འདྲ་བ་ཁ་ཅིག་བྱས་ནས་མེད་པ་ཙུག་སྟོན་པ་ཙུག་བྱས་ནས། གཞན་ལས་ཁྱད་པར་ལྷག་ལྷག་པོ་ཆེ་བ་འདོད་པ་དང་། རྗེས་སུ་འཇུག་པའི་བོད་ཀྱི་མཁན་སློབ་སུ་གྲགས་པ་རྣམས། གཞན་ཡང་བན་དེའི་རིགས་གྱུར་རྣམས་ཀྱི་ནི་མངོན་ཤེས་ནི་མེད། སྒྲ་ནི་མི་ཤེས། ཁ་བདག་བཟང་པོའི་རྗེས་སུ་འབྲངས་ནས་རང་གི་ལོ་ཙཱ་བའི་ཕྱོགས་སུ་བཞེངས་རུས་དྲངས་ནས། ཐེག་པའི་རིགས་མང་པོ་ཞིག་ཡོད་པར་མངོན་ནོ། །དེ་ཡང་སྔ་དར་གྱི་དུས་ཀྱི་ལོ་ཙཱ་བ་ཆེན་པོ་བཱཻ་རོ་ཙ་ན་ལ་སོགས་པ་རྣམས་ཀྱིས་ནི། སྒྲ་འཇུག་པའི་སྒོ་ཀཱ་ལ་པ་དང་། སྒྱུར་བྱེད་ཀྱིས་དག་ཡིག་ཏུ་ཙནྟྲ་པ་དང་། རྗེས་སུ་འཇུག་པ་འབྱུང་བའི་སྒྲ་དང་། འགྱུར་བྱ་སེམས་ཅན་གྱི་སྐད་བསྒྱུར་བའི་སྒྲ་དང་། དོན་བསྒྱུར་བ་མཐུན་སྦྱོར་གྱི་སྒྲ་དང་། འབྱེད་པ་དག་བྱེད་སྔགས་ཀྱི་སྒྲ་དང་། ཀ་ལི་འཇུག་པ་ཐབས་ཀྱི་སྒྲ་དང་། ཨ་ལྀ་བསྒྱུར་བ་ཤེས་རབ་ཀྱི་སྒྲ་དང་། སྒྲ་དག་བྱེད་དགོས་དོན་གྱི་སྒྲ་དང་། རང་བཞིན་གོ་བ་ཤ་སྟག་ལ་བརྟེན་པའི་སྒྲ་ལ་སོགས་ཏེ། འགྱུར་བའི་རྩ་བ་ཡང་སྃ་སྐྲྀ་ཏ་ལ་བརྟེན་ནས་ཡུལ་གྱི་སྒྲ་ལ་སོགས་ཏེ་སྒྲ་སྐད་ཉི་ཤུ་རྩ་ལྔ་དང་སྒྲ་སྐད་བརྒྱ་རྩ་བརྒྱད་བཱཻ་རོ་ཙ་ནས་ཤེས་ལ། རྒྱ་འགྱུར་དང་བོད་འགྱུར་ཕན་ཚུན་ཟུང་འཇུག་མཉམ་དུ་བསྒྱུར་ཡང་། རང་འགྱུར་དུ་བསྒྱུར་བ་ཡིན་ཡང་། རྒྱ་གར་བ་ལ་ལྟོས་མི་དགོས་ཏེ་པཎྜི་ཏ་ཕལ་པ་ལས་མཁས་པ་ཡིན་ནོ། །བཱི་མ་ལ་བོད་དུ་བྱོན་པའི་དུས་ལྟ་བུའི་པཎྜི་ཏ་དང་། བཱཻ་རོ་ཙ་ན་ལྟ་བུའི་ལོ་ཙཱ་བ་ཡོད་པ། མདོ་སྔགས་གཉིས་ཀའི་བསྟན་པ་བོད་དུ་ཉི་མ་ཤར་བ་འདྲ་བ་བྱེད་གསུངས། བཱཻ་རོ་ཙ་ན་ཚ་བ་རོང་དུ་སྤྱུགས་ཞུས་པས། འོ་ན་ཁོ་བོ་བོད་དུ་ཡོང་ནས་ཅི་བྱེད། བཱཻ་རོ་ཙ་ན་ལྟ་བུ་བོད་ཀྱི་ལོ་ཙཱ་བ་མིན། རྒྱ་གར་གྱི་པཎྜི་ཏ་ལས་ཀྱང་མཁས་གསུང་། རྔོག་བློ་ལྡན་ཤེས་རབ་ནི། བོད་ཀྱི་ལོ་ཙཱ་བ་དུས་ཕྱིས་ཀྱི་མཁས་ཤོས་སུ་གྲགས་པ་ཡིན་ནའང་། ཁོང་རང་ན་རེ། བཱཻ་རོ་ཙ་ན་ནམ་མཁའི་མཐའ་དང་མཉམ། ཀ་ཅོག་རྣམ་གཉིས་ཉི་ཟླ་ཟུང་ཅིག་འདྲ། །རིན་ཆེན་བཟང་པོ་ཐོ་རང་སྐར་ཆེན་ཙམ། །ཁོ་བོ་དག་ནི་སྲིན་བུ་མེ་ཁྱེར་ཙམ། །ཞེས་པས་གསར་རྙིང་གཉིས་ལ་འགྱུར་དང་ཁུངས་ཀྱི་ཁྱད་པར་ནི་དེ་ལྟ་བུ་ཡོད་པ་ཀུན་གྱི་མཐུན་སྣང་དུ་གྲུབ་པ་ཡིན་ནོ། །གཞན་ཡང་རྙིང་འགྱུར་གྱི་ཆོས་ལ་གསར་མའི་བདག་རྐྱེན་བྱས་པ་ཡང་མང་དུ་ཡོད་དེ། རྡོར་དབྱིངས་ཡང་སྔ་འགྱུར་རྙིང་མའི་ཆོས་སྐོར་ཡིན། ཡོ་ག་རྣམས་ཀྱང་རྙིང་མའི་ཆོས་སྐོར་ཡིན། ཀུན་རིག་ཀྱང་རྙིང་མའི་ཆོས་སྐོར་ཡིན། གཏེར་ཆོས་ལ་ཡང་། གུ་རུ་ཆོས་དབང་གི་བཞེད་པས་རྒྱ་དུམ་པ་ཞང་ཁྲོཾ་ཀྱིས། གཤིན་རྗེའི་སྐོར་ཤོག་སེར་རྫ་ཟོམ་གང་བྱུང་བ་རྣམས་ལ། ཁོང་རང་གི་ཚེ་བདག་སྙིང་འབྱིན་སྐོར་ལ་སོགས་པ་ཕྱེད་ཙམ་ལས་མ་བཤུས་པས། གཞན་འཇིགས་བྱེད་ལ་སོགས་གཤིན་རྗེའི་སྐོར་མང་པོ་གཅིག་ར་ལོ་ཙཱ་བའི་ཕྱག་ཏུ་བབས་པ་ལས་རྒྱ་གར་གྱི་ཁུངས་དང་འགྱུར་བཅོས་པ་ལ། ར་ལུགས་རྣམས་གཏེར་མ་ཡིན་གསུང་། གཞན་ཡང་མོན་བུམ་ཐང་གཏེར་ཤོག་མང་པོ་ཅིག་ར་ལོ་ཙཱ་ལ་བབས་ཏེ། མཐུ་གཏད། སེར་གསུམ། རྣམ་སྲས། ཛམ་ལྷ། ཚོགས་བདག་ལ་སོགས་པ་མང་པོ་ཞིག་ཀྱང་གཏེར་མ་ལ་གསར་མ་བཅོས་པ་ཡིན་གསུངས། དེ་རྣམས་ཀྱི་དོན་ཡང་རྙིང་མ་ལ་རྩོད་པ་ཅན་གྱིས་ཆོས་སུ་བྱས། མ་དག་པ་ལ་དག་པར་བརྫུས་པའི་རིག་པ་མང་པོ་ཞིག་ཡོད་ཅེས། རི་ཁྲོད་ཀྱི་མཁས་པ་བརྩོན་སེང་དང་། སྨན་ལུང་བ་མི་སྤྱོད་རྡོ་རྗེ་ལ་སོགས་པ་རྣམས་ཀྱིས་ཡང་གསུང་སྒྲོས་བརྗོད་བྱ་མང་པོ་ཞིག་སྣང་ངོ་། །དེས་ནི་གསར་རྙིང་གི་ཁྱད་པར་དང་། གསར་མ་ལ་ཡང་དེང་སང་གི་སློབ་དཔོན་རྣམས་ཀྱི་བདག་རྐྱེན་ཇི་ལྟར་བཟང་ཡང་། ལེགས་པར་བརྟགས་ཤིང་དཔྱད་ན། མ་དག་པའི་སྐྱོན་འགྱུར་ཡོད་པར་བསྟན་པ་འདི་ཡང་། རང་འདོད་འགྲན་སེམས་ཞེ་སྡང་གིས་ཀུན་ནས་བསླང་བའི་གཏམ་མ་ཡིན་གྱི། མཁས་པ་གོང་མ་རྣམས་ཀྱིས་གསུང་དང་གཏན་ཚིག་དང་། ལོ་རྒྱུས་ལས་ཇི་ལྟར་བྱུང་བ་རྣམས་བློ་གཟུ་བོར་བཞག་སྟེ། ལེགས་པར་བལྟས་པའི་གཏན་ཚིག་ཡིན་ནོ། ༈ །དོན་ལྔ་པ་ཐ་སྙད་མཁན་གྱིས་རྩོད་པ་བཟློག་པ་ནི། དུས་ཕྱིས་ཀྱི་ལོ་ཙཱ་བ་དང་། བོད་ཀྱི་སློབ་དཔོན་རྟོག་གེ་བ་ཐ་སྙད་མཁན་ལ་སོགས་འགའ་ཞིག་ན་རེ། རྙིང་མ་མི་དག་ལྟ་ལོག་ཡིན་ཟེར་བ་དང་། ཧྭ་ཤང་གི་ལྟ་བ་ཡོད་པས། ཆད་ལྟ་ཡིན་ཟེར་ཏེ། དེ་རྣམས་ནི་ཤིན་ཏུ་མ་གོ་བའི་གནས་ཏེ། ཧྭ་ཤང་གི་ཆོས་ཀྱིས་བསྲེ་བསླད་ནི། རྫོགས་པ་ཆེན་པོ་སྔ་འགྱུར་ཕྱི་འགྱུར་བཀའ་གཏེར་གང་ལའང་ཡོད་པའི་དོན་མེད་དེ། བོད་དུ་བྱོན་པའི་པཎྜི་ཏ། སློབ་དཔོན་པདྨ། བཱི་མ་ལ་མི་ཏྲ་གཉིས་ཀྱིས་སློབ་དཔོན་ཧྭ་ཤང་མིན། ཧྭ་ཤང་ནི་རྒྱ་ནག་རྩིས་ལ་མཁས་པས། མངའ་བདག་རྒྱལ་པོས་བསམ་ཡས་ཀྱི་རྩིས་ལ་བོས་པ་ཡིན་ཅིང་། རྩིས་ཀྱི་འགྱུར་ནི་མང་པོ་འགྱུར་བར་སྣང་། རྫོགས་པ་ཆེན་པོའི་ཆོས་བཀའ་གཏེར་གང་ན་ཡང་། ཧྭ་ཤང་ལ་ཞུས་ཧྭ་ཤང་གིས་གནང་བྱ་བའི་ཆོས་ཡི་གེ་ནི་ཅིག་ཀྱང་མེད། ལོ་ཙཱ་བ་བཱཻ་རོ། ཀ་ཅོག་ལ་སོགས་པ་རྣམས་ཀྱིས་ཀྱང་། ཆོས་རྒྱ་གར་དུ་ཕྱིན་ནས་བསྒྱུར་ཟེར་བ་ལ། ཧྭ་ཤང་ལ་ཞུས་སོ་བྱ་བ་ཚིག་ཅིག་ཀྱང་མཐོང་མ་མྱོང་། རྫོགས་ཆེན་གྱི་རྒྱུད་རེ་རེ་ཙམ་ནས། དག་བྱེད་ཀྱི་ཚིག་གཏན་ལ་འབེབས་པ་ལ་སོ་སོའི་སྒྲ་ནི་འདི་སྐད་དེ། རང་རང་གིས་སྒྲ་དོན་གཏན་ལ་འབེབས་པ་ལ་འདིའོ་ཞེས་སྟོན་པའི་ཕྱིར་རྒྱ་གར་གྱི་སྐད་དུ། ཨོ་རྒྱན་གྱི་སྐད་དུ། དྷ་ན་ཀོ་ཤ་གླིང་པའི་སྐད་དུ། སྤྲིན་ཛུ་ཚེའི་སྐད་དུ། བྲུ་ཤའི་སྐད་དུ། ཧ་ཤང་འབར་ནའི་སྐད་དུ། ཁ་ཆེའི་སྐད་དུ། ཐོ་གར་ཡུལ་གྱི་སྐད་དུ། ཟ་ཧོར་གྱི་སྐད་དུ་འདི་སྐད་ཅེས་བྱའོ། །ཅེས་རྒྱུད་ཀྱི་སྤྱི་བཞག་བཤད་ནས། ཁུངས་བཙུན་པ་རང་ཕྱོགས་སུ་བསྟན་པ་ལས། ཚིག་དེ་རྣམས་ཀྱི་མཐར། རྒྱ་གར་སམ་སྐྲྀ་ཏའི་སྐད་དུ། འདི་ཞེས་བྱ། བོད་སྐད་དུ་འདི་ཞེས་བྱའོ། །ཅེས་གསུངས་པས། རྒྱུད་གཉིས་ཙམ་ན་འདུག་པ་ལ་རྩོད་པའི་ཁུངས་དྲངས་པ་ཡིན་གྱི། དེ་མ་ཡིན་པར་ཧ་ཤང་གིས་འདི་གསུང་། བོད་ཀྱི་ལོ་ཙཱ་བས་འདིར་བསྒྱུར་དབང་བསྐུར་རྒྱུད་ལུང་མན་ངག་དང་བཅས་པ་འདི་གསུངས་སོ། །ཞེས་བྱ་བའི་རྒྱུས་དང་། ཁུངས་སུ་ལའང་ཡོད་མི་སྲིད་དེ། དེང་སང་ཁ་ཅིག་གིས་སྨྲ་བ་ནི་ལུག་ཆུ་འབོག་གམ། ཁྱི་ཕྱོགས་ཟའི་གཏན་ཚིགས་སུ་ཤེས་པར་བྱའོ། །ཡང་རྫོགས་པ་ཆེན་པོ་ལ་ལྟ་བ་ལ་སྐྱོན་ཡོད་དེ་ཞེས་ཟེར་ན། ལྟ་བ་ལ་སྐྱོན་ཇི་ལྟར་ཡོད། ངེད་རྫོགས་པ་ཆེན་པོ་ལ། སྔ་འགྱུར་ཕྱི་འགྱུར། སེམས་སྡེ་ཀློང་སྡེ། བཀའ་གཏེར་ཐམས་ཅད་ལ། ཐེག་པ་རིམ་པ་དང་ཕྱེ་བའི་ལྟ་སྒོམ་ལམ་གྱི་རིམ་པ་ནི་ཡོད་མོད་ཀྱི། ཡང་དགར། རྫོགས་པ་ཆེན་པོའི་ལྟ་བ་གང་ཡིན་ན། གཞི་དངོས་པོའི་འདུག་ཚུལ། རང་བྱུང་ཡེ་ཤེས་ཀྱི་སྙིང་པོ། ཁམས་བདེ་བར་གཤེགས་པའི་སྙིང་པོ། གནས་ལུགས་གཉུག་མའི་དོན་འདི་ཉིད་མུ་བཞིའི་མཐར་མ་ལྷུང་བར། རྟག་ཆད་གཉིས་ཀྱི་མཐའ་ལས་གྲོལ་བ། སྣང་སྟོང་ཟུང་འཇུག །རང་བྱུང་ལྷུན་གྲུབ་ཡེ་གདོད་མ་ནས་རང་བཞིན་རྣམ་དག་ཏུ་རྫོགས་པས། འདུས་མ་བྱས་ཆོས་ཉིད་ཀྱི་རང་བཞིན་ངོ་བོ་སྟོང་པ། རང་བཞིན་གསལ་བ། ཐུགས་རྗེ་འཆར་བའི་སྒོ་མ་འགག་པ། སྨྲ་བསམ་བརྗོད་ལས་འདས་པ། འདི་ཞེས་མཚོན་པའི་ཚིག་རྟག་བརྟན་ཐེར་ཟུག་མ་ཡིན་པ། ཁ་ལེན་གདགས་བྱ་དང་བྲལ་བ་ཅིག་འདོད་པ་ཡིན་གྱི། དེ་ལ་རྫོགས་པ་ཆེན་པོ་སྨད་པ་རྣམས་ལ། ལྟ་བ་དེ་ལས་ལྷག་པ་ཞིག་ཚིག་བརྗོད་བྱ་དང་། དོན་གོ་བས་ཉམས་སུ་ལེན་པ་ནི། སྟོན་པ་ཤཱཀྱ་ཐུབ་པའི་བསྟན་པ་འདི་ལ་ནི་མེད། ལྟ་བ་འདི་མ་ཡིན་པ་ཞིག་འདོད་ན་ནི། ཕྱི་ལྟར་དུ་ཤཱཀྱ་ཐུབ་པ་དང་། ནང་ལྟར་དུ་རྡོ་རྗེ་འཆང་གིས་གསུངས་པའི་ཆོས་ཐམས་ཅད་མ་ཡིན་པར་ཐལ་ལོ། །ཡང་གསར་རྙིང་གཉིས་ཀྱི་མི་མཐུན་ནོ་ཟེར་ན། ཤིན་ཏུ་འཐུན་ཏེ། རྙིང་མས་ཀྱང་གཞི་མི་འགྱུར་བ། གནས་ལུགས་ཀྱི་དོན་མ་ནོར་བ་ཞིག་གིས་གཞི་འཛིན། ལམ་མ་ནོར་བ་ལྟ་སྒོམ་སྤྱོད་གསུམ། ཚོགས་གཉིས་ཟུང་འཇུག །རྟེན་ཅིང་འབྲེལ་པ་འབྱུང་བ་ལས་མ་འགལ་བ་ཞིག་ཉམས་སུ་ལེན། འབྲས་བུ་སྐུ་ལྔ་ཡེ་ཤེས་ལྔའི་བདག་ཉིད་སྤངས་ཐོབ་མེད་པའི་ངང་དུ་ཡེ་རྫོགས་ལྷུན་གྲུབ་ཏུ་འདོད། ལྟ་བ་སྟོང་ཉིད་མཐའ་བྲལ། སྒོམ་པ་གསལ་སྟོང་འཛིན་མེད། སྤྱོད་པ་ཐེག་པའི་རིམ་པ་དང་བསྟུན་པའི་འཇུག་སྒོ་མ་ནོར་བ། ཐོག་མར་སྐྱབས་འགྲོ་སེམས་བསྐྱེད། ཚོགས་གཉིས་བསྐྱེད་རིམ་བཟླས་བརྗོད། སྟོང་ཉིད་སྙིང་རྗེ་ཟུང་འབྲེལ། སྟོང་ཉིད་ལྟ་བ་རྣམ་དག །རྫོགས་རིམ་གསལ་སྟོང་ཟུང་འཇུག །རྗེས་སུ་བསྔོ་བ་སྨོན་ལམ། མདོར་བསྡུས་པ་ལམ་འཇུག་པའི་སྒོ་འདིར་འདུས་པ་ཅིག །འདི་ལས་གཞན་པའི་ཆོས་ཀྱི་འཇུག་སྒོ་ནི་གསར་མ་བ་རྣམས་ལ་ཡང་མེད་ལས་ཆེ། གཞན་ཡང་གསར་རྙིང་གཉིས་བསྐྱེད་རྫོགས་ལག་ལེན་གྱི་སྐོར་ལ་ཡང་། མིང་མི་མཐུན་ཡང་དོན་མཐུན་པ་ཡིན་ཏེ། དང་པོ་དབང་བཞི་ཡང་། བུམ་དབང་ལ་བརྟེན་ནས་རྒྱུད་སྨིན་པར་བྱ་བའི་ལྷའི་དབང་དང་། གསང་དབང་ལ་བརྟེན་ནས་ངག་སྨིན་པར་བྱ་བ་བྱང་སེམས་ཐིག་ལེའི་དབང་དང་། ཤེས་རབ་ཡེ་ཤེས་ལ་བརྟེན་ནས་བདེ་བ་ལམ་དུ་བྱེད་པ་ཡུལ་ཕྱག་རྒྱ་ལ་བརྟེན་ཏེ་དགའ་བཞིའི་འགྲོས་ཉམས་སུ་ལེན་པ་ཤེས་རབ་ཡེ་ཤེས་ཀྱི་དབང་དང་། རང་རིག་ཡེ་ཤེས་ཀྱི་རྩལ་དབང་རང་ཐོག་ཏུ་ངོ་སྤྲད་ནས་སེམས་ཉིད་ཆོས་སྐུར་ངོ་སྤྲོད་བྱེད་པ་ཡིན་ཏེ། གསར་རྙིང་གཉིས་འཐུན་ནོ། །རྙིང་མའི་མཚམས་གཅོད་དང་། གསར་མའི་བསྲུང་འཁོར་བསྒོམ་པ་ཅིག །རྙིང་མའི་བཤགས་པ་དང་། གསར་མའི་བདུན་རྣམ་དག་གཅིག །རྙིང་མའི་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་དང་། གསར་མའི་ཡེ་ཤེས་ཀྱི་ཚོགས་སྟོང་ཉིད་དུ་བསྒོམ་པ་གཅིག །རྙིང་མའི་ཀུན་ཏུ་སྣང་གི་ཏིང་ངེ་འཛིན་བསྒོམ་པ་དང་། གསར་མའི་ཚད་མེད་པ་བསྒོམ་པ་ཅིག་རྙིང་མའི་གཞལ་ཡས་ཁང་བསྐྱེད་པ་དང་། གསར་མའི་དཀྱིལ་འཁོར་བསྒོམ་པ་ཅིག །ལྷ་བསྒོམ་པ་ལ་ཆོ་ག་དྲུག་གིས་བསྐྱེད་པ། སྐད་ཅིག་དྲན་རྫོགས་སུ་བསྐྱེད་པ། མངོན་བྱང་ལྔས་བསྐྱེད་པ། ཆོ་ག་གསུམ་གྱི་བསྐྱེད་པ་རྣམས་ནི་གཉིས་ཀ་ལ་ཡོད་དེ་མཐུན། སྤྱན་འདྲེན་བཞུགས་གསོལ། མཆོད་འབུལ་རྣམས་ཀྱང་ཅིག །རྙིང་མའི་སྨན་མཆོད་དོན་རྣམས་བསྒོ་བ་དང་། གསར་མའི་བསྐྱེད་རིམ་བདུད་རྩི་མྱོང་བ་ཅིག །བསྟོད་པ། བཟླས་པ། ཚོགས། ལྷག་མ། ཕྲིན་ལས་རྣམ་པ་བཞིའི་མཐའ་རྒྱས་དང་བཅས་པ་མིང་དུ་མི་ཅིག་ནའང་། དོན་དུ་ཅིག་པ་ཡིན་ནོ། །ཡང་ལོ་ཙཱ་བ་འགའ་ཞིག་ན་རེ། རྒྱ་གར་ན་རྙིང་མ་མི་འདུག་ཟེར་ནའང་། དེའི་གནས་ལུགས་རྣམས་གོང་དུ་རྒྱས་པར་བཤད་ཡོད་ཅིང་། གྲུབ་ཆེན་ཨོ་རྒྱན་པའི་གསུངས་ནས། བོད་ཀྱི་ལོ་ཙཱ་བ་ཁ་ཅིག་རྒྱ་གར་ན་རྙིང་མ་སྒྱུར་རྒྱུ་མི་འདུག་ཟེར། དེ་ལ་ཆགས་ལོ་ཙཱ་བ་བདག་རང་གིས་དབང་ཞུས་ཀྱི་བླ་མ་ཡིན་ཡང་། རྒྱ་གར་ན་རྙིང་མ་བསྒྱུར་རྒྱུ་མི་འདུག་ཟེར། དེ་འདྲ་ཁོང་རང་གིས་བློ་ཆུང་གི་གཏམ་ཡིན། ལོ་ཙཱ་བ་རྒྱ་གར་ཤར་ཕྱོགས་སུ་ཡུག་རེ་ལས་མ་ཕྱིན་པས་རྒྱ་གར་ན་གང་ཡོད་ཀྱི་ཆ་ཅི་ཡོད། དེས་ན་བོད་ལ་གང་ཡོད་ཀྱི་མཐའ་ཡང་མི་ཆོད། སྤྱིར་ཡང་རྒྱ་གར་ཚད་ཆུ་ཆེ་བས་རྒྱ་གར་གྱིས་དཔེ་རྣམས་རུལ་བ་མང་། སངས་རྒྱས་ཀྱི་བཀའ་ལ་ཚད་བཟུང་མེད་པ་ལ། བོད་ཀྱི་ལོ་ཙཱ་བ་རྐྱང་རེས་ཁུངས་མི་ཆོད། ང་ནུབ་ཕྱོགས་ཨོ་རྒྱན་གྱི་ཡུལ་དུ་ཕྱིན་པ་ཡིན་ཀྱང་མུ་དང་མཐའ་མ་ཆོད། དེ་ཡང་དང་པོའི་རྒྱ་དཔེ་རྣམས་དུས་ཕྱིས་བལ་པོ་ན་མང་བ་ཡིན། དེ་བས་བལ་པོ་བྷེ་ཧ་རའི་གཙུག་ལག་ཁང་ཅིག་ན། རྙིང་མའི་རྒྱུད་ཀྱི་རྣམ་གྲངས་རང་ཡང་བསམ་གྱིས་མི་ཁྱབ་པ་བཞུགས་འདུག །ངས་བོད་ཀྱི་རྙིང་མ་བ་རྣམས་ལ་ངས་རྙིང་མའི་རྒྱ་དཔེ་དང་། པཎྜི་ཏ་ཚུར་འགུགས་ཁྱེད་རང་རྣམས་མང་ཡུལ་གྱི་གྲོང་དུ་འགྲོ་ན་ངས་ལོ་ཙཱ་བྱས་ཏེ་བསྒྱུར་ཟེར་བ་བྱས་པས་མ་གྲུབ། དེ་འགྱུར་ན་རྙིང་མའི་འགྱུར་ད་རུང་བྱ་རྒྱུ་ཡོད་པ་ལ་གསུངས། ཡང་བོད་ཀྱི་ཤེས་པར་འདོད་པ་འགའ་ཞིག་ན་རེ། རྙིང་མའི་དགོངས་པ་འདུས་པ། བོད་ཀྱི་སྔགས་རྒན་ཚོས་བཅོས་པ་ཡིན་མི་དག་ཟེར། དེ་འདྲ་ཡང་འོས་སུ་མི་འགྲོ་བའི་གཏམ་ཡིན་ཏེ། ཤེས་ན་དེ་འདྲ་བའི་ཆོས་རང་རེ་ཚོས་ཀྱང་ཆོས་དང་། དེ་ལས་ལེགས་རྒྱུ་ནི་སངས་རྒྱས་ཀྱི་བཀའ་ལ་ཡང་མེད་གསུངས་སོ། །ཡང་དུས་འཕྱིས་ཀྱི་བོད་ཀྱི་སློབ་དཔོན་རྣམས་ཀྱིས། མངའ་རིས་ཀྱི་ལྷ་བྱང་ཆུབ་འོད་དང་། མངའ་བདག་ཞི་བ་འོད་ཀྱིས་མཛད་པའི་སྔགས་ལོག་སུན་འབྱིན་དུ་གྲགས་པ་དང་། ལོ་ཙཱ་བ་འགོས་ལྷ་བཙས་ཀྱིས་བཅོས་ཟེར་བའི་སྔགས་ལོག་སུན་འབྱིན་ཡིན་ཟེར་བ་འདུག་སྟེ། བཙད་པོ་ལྷ་གཉིས་ཀྱིས་མཛད་པ་ནི་ཤིན་ཏུ་མི་དག་སྟེ། བོད་ཀྱི་ལོ་ཙཱ་ཱབ། སློབ་དཔོན་ཁ་ཅིག་གི། བཙད་པོ་ཞལ་བདག་བཟང་བ་ལ་སྐད་ཁ་གཡར་བ་ཡིན་མོད། དེའི་རྩ་བ་གང་ལ་སྐྱོན་བཟུང་ན། སྦྱོར་སྒྲོལ་གཉིས་ལ་འཐབ་པ་ཡིན་ཏེ། སྦྱོར་བ་ལ་བརྟེན་ནས་ཁྲིམས་ཀྱི་སྡོམ་པ་ཞིག །ཆོས་སྡེ་བྱི་ཕྲུག་གིས་བཀངས་ཟེར་ཏེ། འོ་ན་དབང་གསུམ་པའི་སྐབས་ལ་བརྟེན་ནས། ལམ་རྩ་ཐིག་རླུང་གསུམ། དགའ་བཞིའི་ལམ་ལ་བརྟེན་ནས་བདེ་སྟོང་ཟུང་དུ་འཇུག་པ། ལམ་མཐའ་ཐུག་པའི་ཟབ་མོ་གསར་མ་རྣམས་ཀྱང་མི་འདོད་དམ། རྙིང་མ་རྣམས་ཀྱང་གསང་སྔགས་ལམ་དུ་འགྲོ་ཞིང་ལམ་དུ་སློངས་པ་ཞིག་སྒོམ་ཕྱག་ལེན་ཡིན་ཅིང་། ཕོ་མོ་སྤྱད་ཚད་སངས་རྒྱའོ་ཞེས་ནི་མ་བཤད། གསར་མ་བ་ཡིན་པ་ཙམ་གྱི་ལམ་དུ་སླངས་པའི་ཁྱབ་བྱེད་གང་ན་ཡོད། ལམ་དུ་མ་བསླངས་ན་ནི་གསར་མའི་བྱས་པའི་བྱི་ཕྲུག་བཅོས་པ་མང་། དེ་ཅིའི་ཕྱིར་ཞེ་ན། སྔགས་སྡེ་གཉིས་ཀའི་ཁྲོད་ན་གསར་མ་བ་དཔུང་ཆེ་བས་སོ། །འོ་ན་བློ་གཟུ་བོར་ཇི་ལྟར་འཇོག་ཅེ་ན། ལམ་ཉམས་སུ་བླང་ན་ནི། རྙིང་མ་སངས་རྒྱས་པའི་ལམ་ཡིན་ལ། ལམ་ཉམས་སུ་བླངས་ན་ནི་གསར་མ་ཡང་ལྟུང་བའི་གནས་སུ་མི་འགྱུར་རམ། ཡང་རྙིང་མ་བ་ལ་སྒྲོལ་བ་བྱ་བ་ཡོད། སྲོག་ཆགས་དངོས་སུ་བསྒྲལ་བས་ལས་ཀྱི་དམྱལ་བར་སྐྱེ། བམ་བསྒྲུབས་པས་དུར་ཁྲོད་ཀྱི་རོ་ཆད། སྨན་བསྒྲུབས་པས། ནད་པའི་གསོ་རྐྱེན་ཟད། བྱ་བ་ལ་སོགས་པ་མ་རབས་ཡ་པོའི་གཏམ་འདྲ་བ་འགའ་འདུག་ནའང་། རྒྱུད་ཀྱི་དགོངས་པ་ཡིན་གྱི། ཇི་ལྟར་སྒྲོལ་ན། ཕུར་པ་བི་ཏོའི་རྒྱུད་ལས༔ བསད་པ་ཉིད་ཀྱིས་བསད་པའི་མཆོག༔ བདག་ཉིད་རྟོགས་པ་མངོན་གྱུར་ནས༔ ཐུགས་རྗེའི་ཐབས་ཀྱིས་སྒྲོལ་བ་རྣམས༔ དམིགས་མེད་ཆོས་ཀྱི་དབྱིངས་སུ་བསྒྲལ༔ ཅེས་པ་དང་། དྲེགས་པའི་སྤྱི་རྒྱུད་ལས༔ དང་པོ་རྟོགས་པས་བདག་ཉིད་བསྒྲལ༔ དེ་ནས་གཉིས་མེད་བློ་ཡིས་ནི༔ བློ་ངན་སེམས་ཅན་སྙིང་རྗེ་བས༔ ཐུགས་རྗེའི་ཐབས་ཀྱིས་བསྒྲལ་བར༔ ཅེས་དང་། ཕུར་པ་རྩ་ཐུང་གི་རྒྱུད་ལས༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་གནན་པ་མ་ཡིན་ཏེ༔ ཕུང་པོ་རྡོ་རྗེར་གཏམ་བྱས་ནས༔ རྣམ་པར་ཤེས་པ་རྡོ་རྗེར་བསྒོམ། ཅེས་པ་དང་། ཧེ་རུ་ཀ་གལ་པོའི་རྒྱུད་ལས། །ཐབས་དང་ལྡན་པའི་རྣལ་འབྱོར་ནི། །བདག་ཉིད་ཆོས་ཀྱི་དབྱིངས་སུ་བསྒྲལ། །ཐབས་ལ་མཁས་པའི་སྙིང་རྗེ་ཡིས། །མ་དག་རུ་ཏྲ་བསྒྲལ་བར་བྱ། །རྣམ་ཤེས་ཆོས་ཀྱི་དབྱིངས་སུ་སྤར། །ཅེས་དང་། གསང་བ་འདུས་པའི་རྒྱུད་ལས༔ ཡང་དག་དོན་རྟོགས་བློ་ཡིས་ནི། །མ་རྟོགས་སེམས་ཅན་གནས་སུ་བསྒྲལ། །དུས་གསུམ་བདེ་གཤེགས་དེ་ལ་མཉེས། །མཆོག་གི་མཆོད་པ་ཆེན་པོར་བཞེས། །ཞེས་པ་ལ་སོགས་པ་དགོངས་དོན་མང་པོ་ཅིག་གསུངས་པས། རྟོགས་དགོངས་དང་ལྡན་པའི་ཚེ་ལུང་ཁྲུས་ལུང་གི་དགོངས་པ་ཕུལ་དུ་ཕྱིན་པ། ཡུལ་སྙིང་རྗེ་བའི་རྣམ་པར་ཤེས་པ་བདེ་བར་སྤར་ལ་དགོངས་པ་ཡིན་ཏེ། དཔེར་ན་བླ་མ་ཞང་གིས་དབྱར་གྱི་དུས་སུ་སེམས་ཅན་མང་པོ་ལ་རྡོ་དང་ཤིང་དྲུད་ནས་མཐོང་ཚོད་གསོད། ལས་ངན་ཚོ་བསད་པ་དུམ་པ་ཉུང་ངུ་འགྲོ་ཡོང་གསུངས་པ་དང་མཐུན་ནོ། །གཞན་ཡང་ཞི་རྒྱས་དབང་དྲག་གི་ལས་བཞི་ནི། གསར་མ་ནའང་ཁྱད་མེད་དུ་ཡོད་དེ་ལ་སྒོས་སུ་རྙིང་མ་ལ་སྐྱོན་འགེལ་བས་མི་འོང་སྟེ། སྔོན་ནས་ད་ལྟའི་བར་དུ་རྙིང་མའི་བླ་མ་ཚད་ལྡན་གྱིས། སངས་རྒྱས་བསྒྲུབ་པའི་ལམ་མ་ནོར་བ་ཡིན་ཟེར་ནས། ག་ན་སུ་གསོད་པ་མཐོང་། ལས་ངན་ལོག་པའི་བློ་ཅན་གྱིས་སྤྱོད་པ་ངན་པ་སྣ་ཚོགས་ཅིག་བྱེད་པ་ནི། རྙིང་མ་ལས་མི་ཉུང་བ་ཅིག་གསར་མ་ལ་ཡང་འདྲ། ཡང་བམ་བསྒྲུབ་ཅེས་པ་ནི། མཁའ་འགྲོ་དགྱེས་པར་བྱེད་པའི་དམ་རྫས་ཡིན་པས། ཤི་བའི་རོ་དེ་ཡང་གསོན་དུས་ནད་གཅོང་མེད་པ། ནད་ངན་དང་དུག་མཚོན་ལ་སོགས་གློ་བུར་རྐྱེན་ངན་གྱིས་མ་ཤི་བ། རང་བཞིན་གྱི་ནད་ཀྱིས་ཤི་བའི་རོ་ན་གཞོན་གཙང་མ་ཞིག་དགོས་པར་བཤད་དེ། རྙིང་མ་ན་མི་བཙན་ཐབས་སུ་བསད་ལ། བམ་བསྒྲུབ་ཞེས་བྱ་བར་དཔེར་མི་སྲིད་པའི་ཆོས་ཉིད་ཡིན་ནོ། །སྤྱིར་ཡང་རྒྱུད་དངོས་གྲུབ་འབྱུང་བའི་དགོངས་པར་བཤད་པ་ལས། རྙིང་མ་བས་རོའམ་བམ་བསྒྲུབ་བྱེད་ཅིང་འདུག་ཟེར་བ། ཐོས་མཐོང་སུ་ལའང་མེད་པས། སྒྲོ་སྐུར་དུ་འགྲོ་བའི་སྐབས་མེད་དོ། ༈ །སྨན་སྒྲུབ་པ་ནི་ད་ལྟའི་བར་དུའང་ཕྱག་ལེན་ཤིན་ཏུ་ཡོད་དེ། རྒྱུད་ལུང་མན་ངག་ལ་སོགས་པ། མཁས་པ་ཆེན་པོ་བྱེ་མ་ལའི་གཞུང་ལུགས་ཤིན་ཏུ་མང་བ་དང་། ཨོ་རྒྱན་ཆེན་པོའི་ཕྱག་བཞེས་ལུང་ཡང་བཀའ་གཏེར་གཉིས་ཀ་ན་མང་བ་ཡིན་ཏེ། འཁོར་འདས་ཀུན་གྱི་སྲོག །སྙིང་པོ་དོན་གྱི་བཅུད། རྒྱལ་བ་མཉེས་པའི་དམ་རྫས། རིག་འཛིན་འདུ་བའི་རྟེན། མཁའ་འགྲོ་འདུ་བའི་བླ་རྡོ། མཆོད་རྫས་ཐམས་ཅད་ཀྱི་ནང་ནས་མཆོག་ཏུ་གྱུར་པ་ཡིན་པས། ཤིན་ཏུ་གསང་བའི་དམ་རྫས་ཞེས་ཀྱང་བྱ། ཨ་མྲྀ་ཏ་ཞེས་ཀྱང་བྱ། ར་ས་ཡ་ན་ཞེས་ཀྱང་བྱ་སྟེ། རྙིང་མ་བ་ལ་ཕྱག་ལེན་ཀྱང་མ་ཆད་པར་ཡོད། སྔོན་གུ་རུ་དང་། བཱི་མ་ལས་བསྒྲུབས་པའི་ཕབ་ཀྱང་གཏེར་ནས་བྱོན། སྨན་དཔྱད་ནས་ཀྱང་ཆོས་སྨན་ཟེར། འདིའི་སྒྲུབ་ཐབས་དང་ཡོན་ཏན་ནི། གསར་མ་ནས་ཀྱང་འཐོར་བུ་བ་འགའ་ཡོད་པ་ཡིན་ནོ། །ཁོ་བོ་རཏྣ་གླིང་པས་ཀྱང་ལོ་སུམ་ཅུ་རྩ་གཉིས་ནས་ལྔ་ཅུ་རྩ་དྲུག་གི་བར་དུ། ཕྱོགས་བཞི་མཐའ་དབུས་ཐམས་ཅད་དུ་སྨན་སྒྲུབ་ལན་ཉི་ཤུ་རྩ་ཅིག་སོང་སྟེ། བཀྲ་ཤིས་པའི་སྒོ་དུ་མ་ནས་བསྟན་པ་ལ་ཕན་བཏགས་པར་འདོད་པ་ཡིན་ནོ། །འགོས་ལྷས་བཙས་ཀྱིས་སྔགས་ལོག་སུན་འབྱིན་ན་ནི། མི་རིམས་ན་བའི་ཁ་འཆལ་དང་འདྲ་བ་འདི་འདྲ་འདུག་སྟེ། རྫོགས་པ་ཆེན་པོ་སྔ་འགྱུར་ལྔ་བྱ་བ་དང་། ཕྱི་འགྱུར་བཅུ་གསུམ་བྱ་བ་འདི་རྣམས་ནི་ཆོས་ལོག་དྲི་མ་ཅན་ཡིན་ནོ། །ཡང་ཕུར་པ་བི་ཏོའི་རྒྱུད་དང་། ཕུར་པ་རྩ་ཐུང་གི་རྒྱུད་དང་། ཕུར་པ་མན་ངག་གི་རྒྱུད་བྱ་བ་ལ་སོགས་པའི་ལོ་ཙཱ་བ་བཱཻ་རོ་དང་། ནམ་མཁའི་སྙིང་པོས་བསྒྱུར་ཟེར་བ་འདི་རྣམས་ཆོས་ལོག་དྲི་མ་ཅན་ཡིན་ནོ། །ཡང་བདུད་རྩི་འབྱུང་རྒྱུད་དང་བདུད་རྩི་ཡེ་ཤེས་འཁོར་ལོ་དང་། བདུད་རྩི་ཡེ་ཤེས་བླ་མ་དང་། བདུད་རྩི་ལུང་བལ་པོ་བརྒྱད་བཱི་མ་ལ་དང་གཉགས་ཛྙཱ་ནས་བསྒྱུར་ཟེར་བ་འདི་རྣམས་ཆོས་ལོག་དྲི་མ་ཅན་ཡིན་ནོ། །གཞན་ཡང་རྟ་མཆོག་རོལ་པའི་རྒྱུད། དབང་ཆེན་ཁྲོས་པའི་རྒྱུད། རྟ་མགྲིན་ཡང་གསང་གི་རྒྱུད། དྲག་པོ་ལྷ་བཞིའི་རྒྱུད་ལ་སོགས་པ་རྣམས་ནི་ཆོས་ལོག་གོ། །གཞན་ཡང་གསང་བ་སྙིང་པོའི་རྒྱུད། དགོངས་པ་འདུས་པའི་རྒྱུད། ཡང་དག་གལ་པོའི་རྒྱུད་ལ་སོགས་པ་གཉགས་ཛྙཱ་ནས་བསྒྱུར་ཟེར་བ་དང་། གནུབས་ནམ་མཁའི་སྙིང་པོས་བསྒྱུར་ཟེར་བ་དང་། ཀ་ཅོག་གིས་བསྒྱུར་ཟེར་བ་འདི་རྣམས་ནི་ཆོས་ལོག་དྲི་མ་ཅན་ཡིན་ནོ། །གཞན་ཡང་འཇམ་དཔལ་གཤིན་རྗེའི་སྐོར་དང་། ཕུར་པའི་སྐོར་དང་། མ་མོ་སྲིད་པའི་བེམ་ཆེན་མོ་ལ་སོགས་པ་གནུབས་སངས་རྒྱས་ཡེ་ཤེས་ཀྱིས་བསྒྱུར་ཟེར་བ་འདི་རྣམས་ལོག་ཆོས་དྲི་མ་ཡིན་ནོ། །ཞེས་ཟེར་བའི་འདི་འདྲ་བའི་གྲངས་བགྲངས་ཀྱི་མི་ལང་སྟེ། བོད་ཀྱི་ཡུལ་དུ་རྙིང་མའི་ཆོས་སུ་གཏོགས་སོ་ཅོག །དེ་དང་འཐུན་པའི་ལོ་ཙཱ་བ། མདོར་ན་ཁོང་རང་གིས་རྣ་བས་ཐོས་ཚད་ཆོས་ལོག་དྲི་མ་ཅན་ཡིན་ནོ། །ཟེར་བའི་ཕྱོགས་འཐེན་གླེན་གཏམ་ཁོ་ན་འབའ་ཞིག་སྟེ། བདེན་པའི་གནས་ནི་གང་ཡང་མེད་དེ། ཁོས་རྒྱ་གར་གྱི་ཁུངས་འཚོལ་ནས། བསྟན་པ་སྔར་དར་བའི་དུས་སུ་བསྒྱུར་བ་ལ་ཁོས་ཅིའི་ཕྱིར་ཁུངས་ཆོད། འོ་ན་ཁོ་དུས་ཕྱིས་གྲུབ་ཐོབ་ཅིག་ཡིན་ན། རྒྱ་གར་གྱི་དུར་ཁྲོད་དང་མཁའ་འགྲོའི་གསང་མཛོད་གར་སླེབས། དེ་ཙམ་སྐྱོན་འགེལ་ན། ཁོ་བསྟན་པ་སྔ་ཕྱི་བར་གསུམ་དུ་རྒྱུས་ཡོད་པའི་ཚེའི་རིག་འཛིན་ཐོབ་པ་ཅིག་ཡིན་ནམ། ཡང་ན་ཇི་ལྟ་བ་ཇི་སྙེད་པ་མཁྱེན་པའི་སངས་རྒྱས་ཡིན་ནམ། ཡང་ན་དུས་གསུམ་མ་བསྒྲིབ་པར་གསལ་བའི་མངོན་ཤེས་མངའ་འམ། ཡང་ན་ནུབ་ཕྱོགས་ཨོ་རྒྱན་ནས་བལ་པོ་ཕན་ཆད་ན་ཁོ་ལ་རྒྱུས་མེད་པའི་སངས་རྒྱས་ཀྱི་བཀའ་མེད་དམ། འོ་ན་རྙིང་མ་ལ་ཆོས་མིན་པའི་རྒྱུ་མཚན་ཐུབ་པའི་བསྟན་པ་ལ་རྒྱ་གར་དུ་བྱུང་བ་ནི་མེད། རྒྱལ་བློན་སྔར་དར་བའི་དུས་སུ་བོད་དུ་ཆོས་བསྒྱུར་བ་ཡང་མེད། ལྟ་བའི་ས་ན་ལོག་པ་འདི་ཡོད། སྒོམ་པ་སྤྱོད་པའི་ས་ན་ལམ་ནོར་པ་འདི་ཡོད། གཞི་ལམ་འབྲས་བུའི་སྐབས་ན་བཀའ་ལུང་མི་མཐུན་པ་འདི་ཡོད། ཆོས་ཐམས་ཅད་ཀྱི་སྔོན་འགྲོའི་སྐབས་ན་འགལ་བ་འདི་ཡོད། དངོས་གཞིའི་སྐབས་ན་འདི་ཡོད། རྗེས་ཀྱི་སྐབས་ན་འགལ་བ་འདི་ཡོད། ལོ་ཙཱ་བ་ཚད་མས་མ་བསྒྱུར་བའི་སྒྲ་མ་དག་པ་འདི་ཡོད། ཅེས་པའི་གཏན་ཚིག་ཁུངས་དང་བཅས་པའམ། བརྗོད་བྱ་ཚིག་ཅིག་མེད་པར་ལུག་ཆུ་འབོག་གི་ཡོད་ཟམ། རྙིང་མའི་ཆོས་ཐོས་ཚད་དྲི་མ་ཅན་ཡིན་ནོ། །ཟེར་བ་འདི་གཏན་ཚིག་དང་བརྗོད་བྱ་སྲིད་པ་ལམ་དུ་འགྲོ་བ་ཨེ་ཡོད། དཔེར་ན་རྙིང་མའི་བླ་མ་ཅིག་གིས། ལོ་ཙཱ་བ་རིན་ཆེན་བཟང་པོ་དང་། མར་པ་ལོ་ཙཱས་བསྒྱུར་ཟེར་བའི། ཕ་རྒྱུད་གསང་བ་འདུས་པ། མ་རྒྱུད་འཁོར་ལོ་བདེ་མཆོག །མ་ཧཱ་མ་ཡ། རྡོ་རྗེ་གདན་བཞི་ལ་སོགས་པ་འདི་རྣམས་ཆོས་ལོག་དྲི་མ་ཅན་ཡིན་ནོ། །གུར་རྟག་གཉིས་ལ་སོགས་པ་རིན་ཆེན་བཟང་པོས་བསྒྱུར་ཟེར་བ་འདི་དག་ཀྱང་ཆོས་ལོག་དྲི་མ་ཅན་ཡིན་ནོ། །ཡང་རས་ཆུང་བས་བསྒྱུར་ཟེར་བའི་རྡོ་ཧའི་སྐོར་རྣམས་ཀྱང་ཆོས་ལོག་དྲི་མ་ཅན་ཡིན་ནོ། །ལོ་ཙཱ་བ་འབྲོག་མིས་བསྒྱུར་ཟེར་བའི་ལམ་འབྲས་བུ་དང་བཅས་པ་འདི་དག་ཀྱང་ཆོས་ལོག་དྲི་མ་ཅན་ཡིན་ནོ། །ཟེར་བ་ལྟ་བུ། དཔེར་ན་གསར་མའི་འགྱུར་དུ་གྲགས་སོ་ཅོག །དེའི་འགྱུར་བྱེད་ཀྱི་ལོ་ཙཱ་བ་དང་བཅས་ལ། འདི་ཆོས་ལོག་དྲི་མ་ཅན་ཡིན་ནོ། །ཟེར་བ་ཁོ་ནའི་རྣམ་གྲངས་སུ་ཕྱེས་ན་མཁས་པའི་རྣམ་བཞག་སུ་ཨེ་འགྲོ། ལུང་གི་གྲུབ་བམ། རིག་པས་འཐད་དམ། འདི་འདྲ་བའི་བརྗོད་བྱས་རྙིང་མའི་ཆོས་འདི་བསྣུབ་པ་ཞིག་བྱུང་ན་བསམ་པའི་ལས་མཐའ་ལོག་པའི་དབང་གིས་ཞེ་སྡང་གིས་ཀུན་ནས་བསླང་བའི་ཚིག་ལ། བློ་གཟུ་བོར་བཞག་ནས། གསར་རྙིང་གཉིས་ཀའི་དགེ་བའི་བཤེས་གཉེན་པ་སུ་གང་གིས་བརྟག་ཀྱང་། བདེན་པ་དང་འོས་ཤིང་འཐད་པའི་གནས་སུ་འགྲོ་བ་ནི་མ་སྲིད་དེ། འགོས་ལྷས་བཙས་ཁོ་རང་ཡང་། སྨྱོ་བའམ་རྣམ་ཤེས་གདོན་གྱིས་བསྒྱུར་བ་ཡིན་ན་ནི་མ་ངེས་ཀྱི། དྲན་ཤེས་བཞིན་དུ་བྱས་པ་ཡིན་ན་ནི། རྡོ་རྗེ་འཆང་གིས་གསུང་པའི་རྒྱུ་འབྲས་དང་། རྟེན་འབྲེལ་དང་། གནང་བཀག་དང་། ཆོས་སྤང་གི་ལས་དང་། ལྕི་བ་བཞི། ལོག་པ་བརྒྱད་ལ་སོགས་པའི་ཆོས་སྤངས་འདི་རྣམས་བདེན་ནི། ཁོ་དམྱལ་བའི་གནས་སུ་ཡོད་པར་ངེས་ལ། མི་བདེན་ན་ནི་ཆོས་གང་ལའང་ངེས་འཇོག་གི་གནས་མེད་པར་འགྱུར་བས། གང་ཟག་དམ་པ་རྣམས་ཀྱིས་ལེགས་པར་དགོངས་ཤིང་དཔྱད་པར་བྱའོ། །ཞེས་པ་འདི་ཡང་ཕྱོགས་སྔ་དང་ཞེ་སྡང་གིས་ཀུན་ནས་བསླངས་པའི་ཚིག་ཡིན་གྱི། ལུང་རིགས་རྟོགས་དཔྱོད་དྲང་པོར་གཏོང་བའི་རྒྱུ་མཚན་ཨེ་ཡིན་གང་ཟག་དམ་པ་རྣམས་ཀྱིས་གཟིགས་པར་འཚལ་ལོ། །ཡང་ཁྱུང་པོ་རྣལ་འབྱོར་གྱིས་ཀྱང་། རྫོགས་པ་ཆེན་པོ་འདི་ལ་ལྟ་བ་རྣམ་དག་ཅིག་འདུག་སྟེ། སྤྱོད་པ་གཏི་མུག་པ་ཅིག་འདུག་ཟེར་བ་སྣང་སྟེ། ཁྱུང་པོ་ནི་གང་ཟག་རྩོད་མེད་ཡིན་མོད་ཀྱི། གསུང་དེ་ནི་རིག་ཤིང་འོས་པ་མ་ཡིན་ཏེ། ཐམས་ཅད་ཀྱིས་ཟབ་པའི་ཁྱད་པར་གང་གིས་འབྱེད་པ་ཡིན་ན། ལྟ་བ་རྣམ་དག་གིས་འབྱེད་པ་ཡིན་གྱི། ཉན་ཐོས་ནས་ཨ་ཏིའི་བར་དུ་ཐེག་པ་རིམ་པ་དགུ་པོ་འདི་དག་ཀྱང་། ལྟ་བ་ཁོ་ནས་ཁྱད་པར་ཕྱེ་བ་ཡིན་མོད། དཔེར་ན་ཁྲོན་པ་དང་། རྒྱ་མཚོའི་རུ་སྦལ། ནམ་འཕང་གཅོད་པ་ལ་ཁྱུང་དང་བྱེའུ་ཁྱད་པར་གྱིས་དཔེ་དང་མཚུངས་ཏེ། ཉན་ཐོས་འོག་མའི་ཐེག་པ་རྣམས་ལ་ལྟ་བ་སྒོམ་པ་སྤྱོད་པའི་ས་ན། རིམ་སྐྱེས་དང་དམན་པ་དང་བློ་ཆུང་བའི་ལམ་ལས་མེད་པ་ཁོ་ནས་བསྐལ་པར་སངས་རྒྱས་མ་ཐོབ་པ་ཡིན། དགའ་རབ་རྡོ་རྗེས། རྫོགས་པ་ཆེན་པོ་ལྟ་བའི་རྫོང་། །ས་ལམ་སྐད་ཅིག་གཅོད་པ་ཡིན། །ཐེག་དམན་འོག་མའི་དོ་ཟླ་མིན། །ཅེས་གསུངས་པ་ཡིན་ཅིང་། ཁྱུང་པོ་ཁོ་རང་ཡང་། ལྟ་བ་རྣམ་དག་དེ་ལ་ལམ་དུ་མཛད་པས་ཆོག་མོད། ལྟ་བ་རྣམ་དག་དེ་ཉམས་སུ་ལེན་པ་ལ་སྤྱོད་པ་གཏི་མུག་གང་མིན་ཅིས་ཀྱང་བྱེད་དགོས་ཟེར་བའི་བཤད་པ་ནི་མེད་དོ། །ཡང་བུ་སྟོན་ན་རེ། རྙིང་མ་ལ་བདག་ཅག་གིས་བླ་མ་སྐད་གཉིས་སྨྲ་བའི་བླ་མ་ཉི་མ་རྒྱལ་མཚན་གྱིས་གསུངས་ནས་རྙིང་མ་ནི་བལ་པོ་ན་ཡང་རྒྱ་དཔེ་འདུག་པ་དང་། བསམ་ཡས་ན་ཡང་ཕུར་པ་རྩ་ཐུང་གི་རྒྱ་དཔེ་འདུག་པ་དང་། ཡང་དགོས་གསུངས། བདག་གི་ནི་ཆོས་ལ་སྨད་པ་དང་། ཆོས་སྤངས་ཀྱི་ལས་ལྕི་བས་གཏང་སྙོམས་སུ་བཞག་གོ། །ཅེས་པའི་ཚིག་བཅད་བཞི་པ་ཞིག་བྱས་འདུག་སྟེ། འདི་ཡང་གང་ཟག་མཁས་པའི་གསུང་ཚུལ་མ་ཡིན། འོ་ན་ཁྱོད་ཀྱི་བླ་མ་ལོ་ཙཱ་བ་དེ་ཚད་མ་མ་ཡིན་པར་ཐལ། བླ་མའི་ཆོས་བཏུབ་རུང་ཁྱོད་ཀྱིས་དག་པ་མ་བྱིན་པས་སོ། །གཉིས་པ་བལ་པོ་ན་ཡང་ལོ་ཙཱ་བས་མཐོང་བའི་རྒྱུད་འདུག །བསམ་ཡས་ན་ཡང་རྒྱ་དཔེ་བཞུགས་འདུག་བཞིན་དུ་དག་པ་མི་སྟེར་བར་བཏང་སྙོམས་སུ་བཞག་ཟེར་ན། བོད་དུ་འགྱུར་བའི་གསར་རྙིང་གི་ཆོས་ཐམས་ཅད་ལ་ཡིད་ཆེས་པའི་ཁུངས་དང་། གཏད་སོའི་གནས་མེད་པས། གང་ཡང་མིན་པའི་བཏང་སྙོམས་སུ་ཐམས་ཅད་བཞག་གོ། །བོད་ན་ཁུངས་བཙུན་པའི་ཆོས་མེད་པ་ཐག་ཆོད་པ་ཡིན་ནོ། །ཡང་བོད་ཀྱི་སློབ་དཔོན་ཁ་ཅིག་གིས། རང་གིས་བྱས་པའི་བསྟན་བཅོས་འགའ་ཞིག་ནས། ཞི་རྫོགས་བོན་གསུམ་ལྟ་བ་ངན་པས་བསླད་པ་ཡིན་ཟེར་བས། བོན་ལ་འདི་སྨྲ་དོན་མེད་ཀྱི། ཞི་བྱེད་དང་རྫོགས་ཆེན་ཆོས་མིན་པར་ཁས་བླངས་དེ་ལྟར་ཡིན་ན། དེང་སང་བོད་གངས་ཅན་གྱི་རྒྱལ་ཁམས་ན་གྲུབ་ཐོབ་དང་། རྟོགས་ལྡན། སྒྲུབས་ཚུག །ཞི་རྫོགས་ཀྱི་བརྒྱུད་པ་ཅི་ཙམ་འདུག །ཆོས་ཆོས་སུ་མ་སོང་། ལས་སུ་སོང་བའི་གཏམ་ཡིན་གྱི། དགེ་སློང་ལེགས་པའི་སྐར་མ་དང་འདྲ་བས། འདི་སྐད་སྨྲ་མི་དེ་དག་ཀྱང་། དེང་སང་འོ་བརྒྱལ་བའི་གནས་ན་ལམ་མ་ལོག་པ་ཅིག་འདུག་ཟེར་བ་ཡང་རྣ་བས་མ་ཐོས་ཏེ། རྒྱུ་མཚན་ཐམས་ཅད་ལ་ཡོད་པར་མངོན། ཡང་བོད་ཀྱི་སློབ་དཔོན་འགའ་ཞིག་ན་རེ། རྙིང་མའི་ལྷུན་གྲུབ་འོད་གསལ་གྱི་སྣང་བ་འདི། རྟག་ལྟ་ཡིན་ནོ་ཟེར་བ་ཡང་ཡོད་དོ། །དེ་ནི་ཆོས་དེའི་གནས་ལུགས་རང་གིས་སྤུ་ཙམ་ཡང་མ་གོ་ཆ་དང་རྒྱུས་མེད་པར། མུན་ནང་ལ་མདའ་འཕེན་ཡིན་གྱི། འདི་ནི་རང་རིག་ཡེ་ཤེས་ཀྱི་སྣང་བ། སྐུ་གསུམ་ཡེ་ཤེས་ལྔའི་བདག་ཉིད། འདུས་མ་བྱས་རང་བྱུང་ལྷུན་གྲུབ། སྟོང་པའི་རང་རྩལ། སྟོང་པའི་ཡུལ་དུ་སྟོང་པའི་མདངས་ཤར་བ་ཡིན་གྱི། རྟག་ལྟ་ཡིན་ན་ནི་རིག་པ་གཞི་དངོས་པོའི་འདུག་ཚུལ་དང་དབྱེར་མེད་དེ། གང་ནས་ཀྱང་མ་འོངས། གང་དུའང་མི་གནས། གར་ཡང་མི་འགྲོ། རྒྱུས་མ་བསྐྱེད། རྐྱེན་གྱིས་མི་འགྱུར། སུས་ཀྱང་མ་བྱས། རང་བྱུང་རང་ཤར། ལྷན་ཅིག་སྐྱེས་པའི་ཡེ་ཤེས། སྐྱེ་འགག་གནས་གསུམ་དང་བྲལ་བ་ཞིག་ཡིན་ཏེ། རྫོགས་པ་ཆེན་པོའི་རྒྱུད་དུ་མ་ཞིག་ནས་འདིའི་དགོངས་པ་བཤད་པ་བསམ་གྱིས་མི་ཁྱབ་སྟེ། ཐུན་མོང་གིས་བཀའ་ཕ་རོལ་ཏུ་ཕྱིན་པ་བརྒྱད་སྟོང་པ་ལས་ཀྱང་། སེམས་ནི་སེམས་མ་མཆིས་ཏེ། སེམས་ཀྱི་རང་བཞིན་ནི་འོད་གསལ་བའོ། །ཅེས་པ་དང་། མཚན་བརྗོད་ལས། ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །ཅེས་པ་དང་། སྡུད་པ་ལས། ནམ་མཁའ་ཇི་ལྟར་མཐོང་ཞེས་དོན་དེ་བརྟག་པར་གྱིས། །ཞེས་པ་དང་། དཀོན་མཆོག་བརྩེགས་པ་ལས། རང་རིག་ཡེ་ཤེས་སྙིང་པོ་ཅན། །ནམ་མཁའ་དག་ཏུ་རྣམ་པར་གསལ། །ཅེས་དང་། སངས་རྒྱས་ཕལ་པོ་ཆེ་ལས། ཀྱཻ་རྒྱལ་བའི་སྲས་དག །ཡེ་ཤེས་ལྔ་ནི་དབྱིངས་ཀྱི་རྒྱན་དུ་ཆེའོ། །སྟོང་པ་ཉིད་ནི་སྟོང་པ་ཉིད་ཀྱི་ངང་དུ་འོད་གསལ་ལོ། །ཅེས་པ་ལ་སོགས་པ་དོན་གྱིས་དགོངས་པ་ལེན་ཤེས་ན་ནི། ཐེག་པ་ཆེན་པོའི་བཀའ་མང་པོ་ནས་གསུངས་པ་ཡིན་ཅིང་། དེའང་གཞི་སྣང་ཡེ་ཤེས་ཀྱི་སྙིང་པོ་ཅན་ཞེས་བྱ་སྟེ། རིག་པ་ངོ་བོ་རང་གསལ་དྲི་མ་མེད་པ་ལས། ཆོས་ཀྱི་དབྱིངས་ལ་སོགས་པ་སྟེ། ཡེ་ཤེས་ལྔའི་རང་རྩལ། གསེར་ས་འོག་ན་ཡོད་པའི་འོད་གདང་ནམ་མཁའ་ལ་གསལ་བའམ། ཉི་མ་ཤར་བའི་མདངས་ནུབ་རིར་གསལ་བ་ལྟར་ཡིན་གྱི། རྒྱུ་རྐྱེན་ལས་གྲུབ་པ་དང་། སུས་བྱས་པ་དང་། མཚན་མ་བཟུང་ཡུལ་དུ་མ་གྲུབ་པས་རྟག་ལྟ་ཞེས་ཅིའི་ཕྱིར་དུ་འདོག །རང་སྣང་ཡེ་ཤེས་ཀྱི་རང་མདངས་སྟོང་པ་གོ་མ་འགག་པའི་འཆར་སྒོ་འདི་ལ་རྟག་ལྟར་འགྲོ་ན་ནི། སེམས་ཟེར་བའི་གཞིའི་འདུག་ཚུལ་འདི་ཡང་རྟག་ལྟར་འགྲོ་དགོས། དེ་ཅིའི་ཕྱིར་ཞེ་ན། འདུག་ཚུལ་གྱི་དཔེ་དོན་རྟགས་གསུམ་ནི་གོང་དུ་རྒྱས་པར་བཤད་ཟིན་ཏོ། །ཡང་རྫོགས་པ་ཆེན་པོ་ལ་གང་ཟག་སྔ་ཕྱི་བར་གསུམ་དྲན་ཅིང་རྒྱུས་ཡོད་པའི་ལུང་གང་ལ་བྱེད་ན། བོད་གངས་ཅན་དུ་བླ་མ་དགེ་བའི་བཤེས་གཉེན་བཀའ་རབ་འབྱམས་ཤེས། དཀྱིལ་འཁོར་བརྒྱ་ཞལ་ཕྱེ་ཤེས་ཟེར་བ། རྟོགས་ལྡན་གྲུབ་ཐོབ་ཟེར་བ་མང་བར་བྱུང་སྟེ། སྐྱེ་བ་སྔ་ཕྱི་ལ་འཁྲུལ་པས་བར་དུ་མི་ཆོད་པར། རང་སེམས་ལ་དབང་ཐོབ་པ་སྟེ། བསམ་ཤིང་འགྲོ་བའི་དོན་དུ་སྤྲུལ་པ་མཛད་པ་ཀརྨཱ་པ་འ དི་ཉིད་ཡིན་ཏེ། ཀརྨཱ་པག་ཤིས་གསུང་ནས། རྡོ་རྗེ་སེམས་དཔའི་རྣམ་འཕྲུལ་དགའ་རབ་རྡོ་རྗེ་ལ། རྫོགས་པ་ཆེན་པོ་ཀློང་ཆེན་རབ་འབྱམས་ལ་སོགས་པ་ཉན་པའི་ཚེ། རང་བྱུང་རྡོ་རྗེ་བདག་ཀྱང་རྟོག་རྩེ་རྣལ་འབྱོར་དབང་ཕྱུག་ཞེས་བྱ་བར་གྱུར་ཅིང་། རྫོགས་པ་ཆེན་པོའི་སྒྲ་དོན་ཐམས་ཅད་རྟོགས་པ་ཡིན་གསུངས། ཡང་ཀརྨཱ་པའི་གསུང་ནས། རྒྱལ་པོ་ཛའི་རྗེས་སློབ་དཔོན་པདྨ་བོད་དུ་མ་བྱོན་པའི་སྔ་རོལ་ཙམ་ན། རྒྱ་གར་ན་བདག་ཀྱང་གསང་སྔགས་རྙིང་མ་སྟོན་ཤེས་པའི་གསང་སྔགས་ཀྱི་རྣལ་འབྱོར་པ་ཞིག་ཏུ་གྱུར་ནས་མཚན་ཡང་རྡོ་རྗེ་ཡེ་ཤེས་འབར་ཞེས་བྱ་བ་ཡིན་གསུངས། ཡང་བོད་དུ་གནུབས་སངས་རྒྱས་ཡེ་ཤེས་ཀྱི་སློབ་མ། རྡོ་རྗེ་དབང་ཕྱུག་ཅེས་བྱ་བ་བསྐྱེད་རྫོགས་ལ་དབང་ཐོབ་པ་རྫོགས་པ་ཆེན་པོ་འབའ་ཞིག་བསྒོམ་པའི་ཅོག་རོ་སྒོམ་པ་ཞེས་བྱ་བ་དེ་ཁོ་བོ་ཡིན། དེའི་དོན་གྱིས་ད་ལྟ་ཡང་རྫོགས་ཆེན་གྱི་ཆོས་ཐམས་ཅད་ཕྱོགས་མེད་དུ་རྟོགས་པ་དང་ཤེས་པར་འདུག་གོ་གསུངས། ཡང་ཀརྨཱཿཔ་མཐོང་བ་དོན་ལྡན་ལ་བདེ་ཆེན་བླ་མ་བྱ་བས། རྫོགས་པ་ཆེན་པོ་ལ་རྩོད་པ་མང་པོ་འདུག །ཆོས་ཅི་འདྲ་ཡིན་ཞུས་པས། ཀ་དག་ཆེན་པོའི་གནས་ལུགས་འདི། །ཡང་དག་དོན་གྱི་ལྟ་བ་ཡིན། །རྫོགས་པ་ཆེན་པོ་ཆོས་ཀྱི་མཆོག །ཐོག་མའི་མགོན་པོ་དེ་ལ་འདུད། །ཅེས་གསུངས་སོ། །འདི་དག་ཀྱང་གང་ཟག་ཚིག་ཤེས་པས་རྒྱུད་མ་གྲོལ་བར་ཁེངས་པས་ཁོང་སྦོས་པ་དང་མི་འདྲ་སྟེ། ས་ལ་གནས་པའི་བྱང་ཆུབ་སེམས་དཔའ་ཆེན་པོ་ཡིན་ནོ། །ཡང་བོད་ཀྱི་སློབ་དཔོན་འགའ་ཞིག་ན་རེ། གཏེར་མ་རྣམས་མི་དག་ཞེས་ཟེར་ན། སངས་རྒྱས་བཀའ་བསྟན་བཅོས་ལུང་མན་ངག་རྣམས། རྒྱ་བོད་གཉིས་ཀར་གཏེར་མ་གཏོགས་མེད་པས། དེའི་ཁུངས་དང་ལོ་རྒྱུས་ཐམས་ཅད་འདིར་ཡི་གེ་འཇིགས་པས། ཁོ་བོའི་གཏེར་འབྱུང་ཆེན་པོར་བལྟ་བར་བྱའོ། །ཡང་འགའ་ཞིག་ན་རེ། གཏེར་མ་ལ་དབང་བཀའ་དང་སྙན་རྒྱུད་མེད། སློབ་དཔོན་པད་མས་སྔོན་དུ་གཏེར་སྦ་ཐོན་པས་བཀའ་ལུང་ཆད་ཟེར་ན། ཤིན་ཏུ་ཡོད་དེ། གུ་རུ་ཆེན་པོ་ཉིད་ཀྱི་དབང་ལུང་ལས། མ་འོངས་རྟོག་གེ་བ་རྣམས་ཀྱི་གཏེར་མ་ལ་བཀའ་ལུང་མེད་ཟེར་ན། ཤིན་ཏུ་ཡོད་དེ། སྟོན་པ་སངས་རྒྱས་ཀྱི་བཀའ་ལ་ཡང་། ཞལ་ནས་གསུངས་པའི་བཀའ། ལུང་དུ་བསྟན་པའི་བཀའ། རྗེས་སུ་གནང་བའི་བཀའ། བྱིན་གྱིས་རླབས་པའི་བཀའ་དང་བཞི་རུ་འདུ་སྟེ། དེ་བཞིན་དུ་ངའི་གཏེར་ལའང་དེ་བཞི་ཚང་བ་ཡིན་ཏེ། མ་འོངས་གཏེར་ལ་སྤྱོད་པའི་སྐྱེས་བུ་རྣམས། ད་ལྟ་ངའི་འཁོར་དུ་ཡོད་པས། ད་ལྟར་ང་ཡི་དགོངས་པ་གཏད་ཅིང་བྱིན་གྱིས་རླབས་པའི་བཀའ་ཡང་ཡིན་ནོ། །ཡང་མ་འོངས་པ་ན་ཡུལ་དང་ས་ཕྱོགས་འདིར། ཕ་དང་མ་འདི། ལུས་ཀྱི་མཚན་རྟགས་ཡན་ཆད་བསྟན་ཏེ། མ་འོངས་ཆོས་འདི་དང་འཕྲད་པར་འགྱུར་རོ་ཞེས་པས་ན་ལུང་དུ་བསྟན་པའི་བཀའ་ཡང་ཡིན། མ་འོངས་པ་ན་ལས་ཅན་ཅིག་དང་འཕྲད་པར་ཤོག་ཅེས་པ་དང་། རང་ཉིད་ཉམས་སུ་འདི་ལྟར་ལོང་ལ་གཞན་ལ་འདི་ལྟར་སྟོན་ཅེས་པ་དང་། རང་གཞན་གྱི་དོན་འདི་ལྟར་འབྱུང་ཞེས་པ་ལུང་དུ་བསྟན་པ་དང་། རྗེས་སུ་གནང་བ་དང་། སྨོན་ལམ་གྱི་བརྒྱུད་པ་ཡང་ཚང་བ་ཡིན་ནོ། །ཡང་ཚད་དང་ལྡན་པའི་གཏེར་སྟོན་དེ་ལ་ཨོ་རྒྱན་བདག་གིས་རབ་དངོས། འབྲིང་ཉམས། ཐ་མ་རྨི་ལམ་དུ་དབང་བསྐུར། བཀའ་ལུང་མཛད། སྒྲུབ་ཕྲིན་ཕྱག་བཞེས་དང་བཅས་པ་སྟོན་ཅིང་། རྡོ་རྗེ་རྒྱལ་པོ་བཀའ་རབ་འབྱམས་ཀྱིས་བཀའ་གཏད་བྱེད་པས། ཞལ་ནས་གསུངས་པའི་བཀའ་ཡང་ཤིན་ཏུ་དག་པ་ཡིན་ནོ། །དེ་ལ་མ་འོངས་རྟོགས་གེ་བ་ལ་སོགས་ཁ་ཅིག་གིས། དབང་དང་བཀའ་ལུང་མེད་དོ་ཅེས་ཅི་ནས་ཀྱང་རི་དྭགས་ཀླུང་དུ་བབས་པ་ལྟར་ཀུས་འདེབས་མི་དགོས། སྐལ་ལྡན་གྱི་སྐྱེས་བུ་རྣམས་ཀྱིས་སྒྲུབ་རྟགས་དང་། བྱིན་རླབས་ཁྱད་པར་གང་མྱུར་ལེགས་པར་ཉམས་སུ་བླངས་པས་གསལ་བ་ཡིན་ནོ། །ཞེས་གསུངས་པ་ཡིན་པས། འདི་ཡང་བཀའ་ལུང་རིག་པ་གསུམ་གྱིས་གྲུབ་ཅིང་། དེ་ལྟར་མིན་ན་རྒྱ་བོད་ཀྱི་གང་ཟག་དམ་པ་རྣམས་ལ། ཉམས་དང་རྨི་ལམ་ལ་སོགས་ཏེ་དག་པའི་སྣང་བར། ཡི་དམ་ལྷས་བཀའ་ལུང་མན་ངག་གདམས་པའི་རིགས་རྣམས་གསུངས་ཤིང་བསྟན་པ་ཡང་། ཚད་མར་མི་འགྲོ་ཞིང་མི་དག་པར་འགྱུར་བ་ཡིན་ནོ། །དོན་འདི་དག་མཁས་པ་གཟུ་བོར་གནས་པ་རྣམས་ཀྱིས་བརྟགས་ཤིང་དཔྱད་ན་མོས་པའི་གནས་སུ་འགྲོ་བ་ཡིན་ནོ། །ཡང་གང་ཟག་འཇུག་པའི་སྒོས་རྙིང་མ་བའི་བླ་མ་རྣམས་ནི་རང་ཉམས་སུ་གང་ལོན་བྱེད་ཅིང་། ཐམས་ཅད་ལའང་དག་སྣང་བྱེད་པ་འབའ་ཞིག་ཤས་ཆེ་སྟེ། རྟོག་གེ་བ་རྩོད་པ་དང་། གཞན་འགེག་པ་ཁོ་ན་ལ་མ་ཞུགས་པ་ཡིན་ཏེ། འོ་ན་མཁས་པའི་རིག་པས་ལེགས་པར་བརྟགས་ཏེ། བཀའ་གཏེར་གཉིས་ཀ་ལ་སྐྱོན་གང་ལ་ཡོད་པ་དང་། གང་ཟབ་ཞེ་ན། བཀའ་མ་ལས་གཏེར་མ་ཟབ་ཅིང་ཁྱད་པར་ཆེ་སྟེ། ཇི་ལྟར་ཞེ་ན། བཀའ་མ་རྣམས་ནི་ཚོང་དུས་ཀྱི་འོ་མ་དང་འདྲ་སྟེ་བསླད། འོ་མ་དེ་ཡང་དོངས་བ་བདག་གིས་བཞོས་མ་ཐག་ལྷད་མ་ཞུགས་པས། མནན་ན་ཞོ་འཆག་དཀྲོག་ན་མར་འོང་། འཐུང་ན་བཅུད་ཡོད་པ་ཡིན་ནོ། །དེ་ཡང་ཚོང་འདུས་སུ་རིམ་པར་བརྒྱུད་པས། ཅིག་གིས་འོ་མ་ཅུང་ཟད་ཅིག་ཕྲིས། ཆུ་དུམ་རེ་བླུགས། ཡང་དེ་འདྲ་བ་རིམ་པར་བྱས་པས། མཐར་འོ་མའི་མིང་དང་ཆོ་མ་འགྱུར་ཡང་། དགོས་པའི་བྱེད་ལས་མི་འགྲུབ་སྟེ། མནན་ན་ཞོ་མི་འཆག །དཀྲོགས་ན་མར་མི་འོང་། བཏུང་ན་བཅུད་མི་འོང་། དཔེ་དེ་བཞིན་ཏེ། བཀའ་མ་རྣམས་ལ་ཡང་དང་པོ་སྟོན་པའི་བཀའ་དང་རྒྱ་གར་མཁས་པའི་མན་ངག །ལོ་ཙཱ་ཱབས་བཅོས་བསླད་མེད་པར་བསྒྱུར་བའི་དུས་བཟང་པོའི་བཀའ་རྒྱུད་གོང་མའི་དུས་སུ་གདམས་པ་ལ་བཅོས་སླད་མེད་ཅིང་། བྱིན་རླབས་ཀྱི་དྲོད་ཡོད་པས། བསྒྲུབ་ན་རྟགས་འབྱོན། བསྒོམ་ན་རྟོགས་པ་འཆར། བྱིན་བརླབས་ཐོབ་པའི་གསུང་འབྱུང་། ཕ་རྗེས་བུས་སྙོགས། བཀའ་བརྒྱུད་རྣམས་ཅིག་བས་ཅིག་བཟང་འབྱོན། ཕྲིན་ལས་རྣམས་པ་བཞི་ལ་མངའ་བརྙེས་པ་བྱུང་བ་ཡིན་ཏེ། དེ་ནས་བོད་ཀྱི་བླ་མ་རྣམས་ཀྱིས་རང་བཟོས། སངས་རྒྱས་ཀྱི་བཀའ་ཚད་མ་རྣམས་བསླད། ལ་ལས་མང་ནས་འཕྲིས། ལ་ལས་ཉུང་ནས་བསྣན། མཆན་དང་འགྲེལ་པ་མང་པོའི་བཅོས་བསླད་བྱས། རང་དང་གཞན་ཁྱད་འདོད་ཀྱིས། དེ་ཡང་རང་གི་སྒྲུབ་ཐབས་མངོན་དཀྱིལ་རྣམས་ལ། རྒྱ་གར་གྱི་བཀའ་དྲི་མ་མེད་པ་རྣམས་བསླད་ནས། སྟོད་ན་ཡོད་པ་སྨད་ན་སྐྱེལ། སྨན་ན་ཡོད་པ་སྟོད་ན་སྐྱེལ། ཐམས་ཅད་ཐག་དཀྲུགས། སུལ་ཤེས་ཀྱིས་དགོངས་པ་བྱས་ནས་བཅོས་པ་བསླད་མང་བས། ནས་གསེབ་ཏུ་ཕུལ་མ་བཏབ། ཆོས་སྡེ་རྣམས་དང་རི་དགོན་ཐམས་ཅད་འཁྲུགས་པའི་ལས་བྱས་པས། དེར་ཐམས་ཅད་དམ་ཚིག་ལ་ཁྲག་ཤ་བཀོ་བོ་བྱས་པས། དེར་གོང་གི་འོ་མ་བསླད་པ་ལྟར། བྱིན་རླབས་ཀྱི་བབས་སོ་ཆད། བསྒྲུབ་ན་རྟགས་མི་འབྱིན། བསྒོམ་ན་རྟོགས་པ་མི་འཆར། རྒྱུད་ལ་ཡོན་ཏན་མ་སྐྱེས་པས་རྒྱུད་དྲེད་པོར་སོང་། འདོད་པ་རང་གཞན་གྱི་དོན་འགྲུབ་པ་ཅིག་འདོད་ནའང་། བསོད་ནམས་ཀྱི་ལྟོ་གོས་མ་ཕྱིད། ཆོས་སྐྱོང་རྒྱབ་གྱེས་པས་མཐུ་མེད་ཀྱི་ཁར་ཁས་ཉན་འབབས། དེ་ལ་སོགས་ཀྱི་སྐྱོན་དུ་མ་ཡོད་དོ། །ཡང་བཀའ་ལ་ཚད་མའི་གང་ཟག་མེད་དམ་ཅེས་ན། གང་ཟག་ཡོན་ཏན་རྟོགས་སྒོམ་ཁྱད་པར་ཅན་ཡང་འགའ་ཞིག་ཡོད་མོད། འོ་ན་བརྗོད་བྱའི་ཆོས་བསླད་ཚུལ་དང་། ཡུན་དུ་རྙིང་པའི་ན་བབ་ཁྱད་པར་གྱི་ཡོད་ཚུལ་གྱིས་བཤད་པ་ཡིན་ནོ། །གཞན་ཡང་བོད་གསར་འགྲོགས་ཆེ་བ་དང་། བློ་སྣ་མང་བའི་སྐྱོན་གཞན་ཡང་ཡོད་དེ། ཇི་ལྟར་ཡོད་ན། བོད་ཀྱི་སློབ་དཔོན་རྣམས་རྒྱ་གཞུང་བཟང་བ་ལ་ཉམས་ལེན་དང་ཕྱག་ལེན་བྱེད་མཁན་མེད་དེ། སློབ་དཔོན་རེས་མངོན་དཀྱིལ་སྒྲུབ་ཐབས། རང་རང་གི་བཅོས་མ་རེ་ཁོ་ན་མ་བྱས་པའི་ཆོས་བོད་ན་མེད། བཀའ་རྒྱུད་པ་ལ་སོགས་རྫོགས་རིམ་ལ་འཁྲིད་པ་རྣམས་ལ་ཡང་། རྒྱ་གཞུང་སོར་བཞག་མེད་དེ། བླ་མ་རེས་ཁྲིད་གཞུང་རེ། རང་བཅོས་དུ་མ་ཞིག་ཡོད་པས། དེ་རྣམས་ཀྱིས་བརྩམས་པ་ཚད་མར་མ་ལྡན་པ་རྩམས་པས་རྟེན་འབྲེལ་གྱིས་གནད་འཆུགས་ཏེ་གྲུབ་པ་ཐོབ་པ་ཉུང་བ་ཡིན་ནོ། །འོ་ན་རྩོམ་པ་ཐམས་ཅད་ལ་མི་བཏུབ་བམ་ཞེ་ན་བརྩམ་པ་པོ་ཚད་དང་ལྡན་པས་རྩོམ་པ་བཏུབ་སྟེ། ཚད་ལྡན་གང་ཡིན་ཞེ་ན། སློབ་དཔོན་ཀླུ་སྒྲུབ་ཀྱིས། ལུང་ལ་འདྲིས་ཤིང་ཚད་ལ་མཁས། །རང་གི་ཉམས་མྱོང་མན་ངག་ལྡན། །ཡོངས་སུ་ཤེས་བྱའི་དངོས་པོ་ལ། །ཚད་དུ་ཕྱིན་པས་མན་ངག་བཙམ། །ཞེས་གསུངས་པས། དེ་ལྟར་ལྡན་ན་རུང་བ་ཡིན་མོད་ཀྱི། ཚད་དེ་རྣམས་དང་མི་ལྡན་པའི་བོད་ཀྱི་སློབ་དཔོན་རྣམས་རང་རང་གིས་ཆེ་བ་ཞིག་ཁོ་ན་འདོད་པ་དང་། གཞན་དང་ཁྱད་དྲག་ཅིག་འདོད་པ་དང་། ཁོ་མཁས་གདུལ་བྱ་ཁོ་ཆེ། བསོད་ནམས་ཁོ་ཆེ། སྙན་གྲགས་ཁོ་ཆེ། ཟེར་བ་ཞིག་ཁོ་ན་འདོད་པས། ཚད་དང་ལྡན་རུང་མི་ལྡན་རུང་། གཞན་དང་མི་འདྲ་བ་ཁོ་ན་ཞིག་ཁྱད་འདོན་གྱིས་བཅོས་བསླད་དུ་མ་ཞིག་བྱས་པ་འདི་དག་གི་སྐྱོན་ཡོད་པ་ཡིན་ཏེ། རྒྱ་གར་མཁས་པའི་སྐྱེས་མཆོག་རྣམས་མི་མཁས་ན། བོད་ཀྱི་བློ་ཆུང་རྣམས་མི་མཁས་སོ། །འོ་ན་གཏེར་མ་ལ་ཟབ་པའི་ཁྱད་པར་ཅི་ཡོད་ཅེ་ན། ཨོ་རྒྱན་ཆེན་པོ་ནི་སངས་རྒྱས་གཉིས་པ་ཡིན་པར་ལུང་དུ་མ་ནས་ལུང་དུ་བསྟན་པ་དང་། གུ་རུ་ཉིད་ཀྱིས་ཀྱང་། རྡོ་རྗེ་འཆང་དང་དགོངས་པ་མཉམ་པར་ཞལ་གྱིས་བཞེས་པ་ཡིན་ཏེ། གསང་བ་འདུས་པའི་སྤྱི་ཆིངས་ལས། བདག་ཉིད་པདྨ་འབྱུང་གནས་ཀྱང་། །ཐོས་དང་ཤེས་ཆུང་མ་ཡིན་ཏེ། །རྡོ་རྗེ་འཆང་དང་དགོངས་པ་མཉམ། །ཅེས་གསུངས་པས་དེ་ལྟ་བུའི་སློབ་དཔོན་གྱི་མཛད་པ་ཡིན་པས་ན། སངས་རྒྱས་ཀྱི་བཀའ་ཚད་མ། རྡོ་རྗེའི་ཚིག །རྒྱ་འགྱུར་ཟངས་མ་ལ། བློ་མང་གིས་མ་བསླད་པ། བྱིན་བརླབས་ཀྱི་རྟགས་ཚན་དང་ལྡན་ཞིང་། མཁའ་འགྲོའི་ཁ་རླངས་ཐུ་ལེ་བ། གཏེར་སྲུང་དྲེགས་པ་ཅན་ལ་གཏད་པས་ཆོས་བདག་མ་ཡིན་པ་གཞན་གྱིས་སྤྱོད་པའི་གནས་སུ་མི་འགྱུར་བ། ལས་ཅན་གྱི་སྐྱེས་བུ་མ་ཡིན་པ་ལ་སྤྱོད་པའི་དབང་མེད་དེ་སྨོན་ལམ་གྱིས་འཚམས་སྦྱར། གོང་གི་ཚོང་འདུས་ཀྱི་འོ་མ་མ་བསླད་པ་ལྟར། བསྒྲུབ་ན་རྟགས་མྱུར། བསྒོམ་ན་རྟོགས་པ་འཆར། ཕྲིན་ལས་རྣམ་པ་བཞི་ལག་ལེན་ལ་ཁེལ། རིག་འཛིན་སྤྲིན་བཞིན་དུ་གཏིབས། མཁའ་འགྲོ་གྲིབ་བཞིན་དུ་འགྲོགས། ཆོས་སྐྱོང་བྲན་བཞིན་དུ་ཉན། གདུལ་བྱ་མི་འདོད་ཀྱང་འུར། ལོངས་སྤྱོད་མི་འདོད་ཀྱང་འདུ། སྣང་བ་དབང་དུ་འདུ། མཐུ་མ་བསྒྲུབ་ཀྱང་འོང་། དེ་ལྟ་བུའི་ཁྱད་པར་ཡོད་དེ། སྒྲ་དགེ་བཤེས་ཆེ་ཡང་ནུས་པ་སྔགས་པས་ཐོན། ང་རྒྱལ་རྟོག་གེ་པ་ཆེ་ཡང་། གྲུབ་རྟགས་སྒོམ་ཆེན་པས་ཐོན། འདས་དུས་གདུང་འཇའ་འོད་རིང་བསྲེལ་དུ་འགྲོ། ཡ་གི་སངས་རྒྱས་བསྒྲུབ་པ་ནས། བསྟན་པའི་ཆེད་དུ་མཐུ་གཏད་སེར་གསུམ་རྣམས་ལ་ལག་ལེན་དུ་ཁེལ་ཞིང་ནུས་པ་ཐོན་པ། གསར་མ་རྣམས་དང་། ངེད་གུ་རུ་པདྨའི་གཏེར་ཆོས་ལ་སྤྱོད་པ་རྣམས་གང་ཟག་ནུས་པ་གང་གིས་ཐོན་ཀྱང་། གསར་རྙིང་གཉིས་ཀ་ལ་མོས་པའི་གང་ཟག་དྲང་པོར་གནས་པ་རྣམས་ཀྱིས་གཟིགས་པས་གསལ་བ་ཡིན་ནོ། །ཡང་གསར་མ་ཁས་ལེན་པའི་མཚན་ཉིད་པ་ལ་སོགས་ཕྱོགས་དྲེགས་ཅན་རྣམས་ན་རེ། རྙིང་མ་བ་ཟེར་བའི་སྒོམ་ཆེན་པ་འདི་ཚོགས་སྡེ་སྣོད་ཀྱི་བཤད་པ་མི་ཤེས། གྲུབ་མཐའི་གཤག་རལ་མི་ཕྱེད། ཅི་ཡང་མི་ཤེས་པའི་རྨོངས་པ་གཏི་མུག་པ་ཅིག་ཡིན་ནོ། །ཞེས་ཟེར་བ་ཡང་མི་རིགས་ཏེ། གང་ཟག་དམ་པ་སངས་རྒྱས་བསྒྲུབ་པའི་ཐབས་ལ་ཉམས་སུ་བླངས་པས་ཉམས་སུ་གྲོལ་བ་ཞིག་ཡིན་མོད། བསྒོམ་པས་འཁྲུལ་པ་མ་ཞིག་ན། ཚིག་དང་གོ་བས་སངས་མི་རྒྱ་སྟེ། ཏེ་ལོ་པའི་ཞལ་ནས། བ་གླང་མིག་རྗེས་ཆུ་དང་རྒྱ་མཚོ་བཞིན། །ཡུན་རིང་བྱས་དཀའ་མེད་པར་གང་བསྒྲུབ་པ། །དེ་ནི་ངེས་པར་དཔལ་ཆེན་བཅོམ་ལྡན་འདས། །དེ་ཡིིའི་ཡང་སྤྲུལ་འདི་ནས་ཟས་གཙང་སྲས། །སྨན་པ་བྱ་ཀའི་ཡུལ་དུ་མངོན་པར་སྟོན། །ཕྱོགས་བཅུའི་ཞིང་གི་རྡུལ་རྙེད་དགེ་སློང་མཆོག །གྲངས་མེད་བསྐལ་པར་རབ་ཏུ་མཆོད་པ་བས། །སྔགས་མོས་ཅིག་ཙམ་རབ་ཏུ་མཆོད་བྱས་པ། །ཕུལ་བྱུང་རྡོ་རྗེ་ཐེག་པ་ངེས་པ་ཉིད། །ཅེས་དང་། མཁའ་འགྲོ་མ་བདག་མེད་པས། ཚིགས་གིས་ཁེངས་པ་ཀླུའི་གདེངས་ཀ་བཞིན། །འཆད་དང་ཉན་པ་པོ་དག་མི་གྲོལ་ཏེ། །སླར་ཡང་ང་རྒྱལ་དག་གིས་རབ་གཟིར་ཞིང་། །ངེས་པར་ངུ་འབོད་གནས་སུ་ཕྱིན་པ་ཉིད། །ཟབ་མོའི་དོན་གང་ཚིག་གིས་མི་རྟོགས་ཏེ། །རྟོགས་སུ་རུང་ན་མཁས་པ་ཁྱོད་ཇི་ལྟར། །ཚིག་བྲལ་དོན་ནི་རྟོགས་ཞེས་གང་སྨྲ་བ། །དེ་དག་རྟོག་གེ་མཐར་ཞེན་ཡུན་རིང་འཁོར། །ཞེས་གསུངས་སོ། །དམ་པ་སངས་རྒྱས་ཀྱིས། ཐེག་པའི་བྱེ་བྲག་ཤེས་ན་ཤེས་པ་ཙམ་མོ་བུ། །དུ་མ་རོ་གཅིག་ཤེས་ན་མཁས་པ་ཡིན་ནོ་བུ། །ཅེས་དང་། ཆོས་ལ་ཕྱོགས་རིས་བྱས་ན་ཉན་ཐོས་ལམ་མོ་བུ། །ཅེས་དང་། ས་ར་ཧས། བཤད་པའི་ཚིག་རྣམས་ནམ་མཁའི་མཐའ་དང་འདྲ། །བཤད་པའི་དོན་ལ་ཕྱོགས་མཐར་ཐུག་པ་མེད། །འདུ་ཤེས་མ་ཟད་རྟོག་པའི་ཡོ་ལངས་ཡིན། །ཤེས་པའི་ང་རྒྱལ་འཁྲུལ་པ་མི་འཇིགས་ཤིང་། །དེ་བས་གནས་ལུགས་ནང་དུ་གང་འཇོག་པ། །འདི་ནི་སྐྱེས་ཆེན་ཐར་པའི་ལམ་དུ་འཇུག །ཅེས་དང་། གུ་རུ་པདྨས། ཤེས་པའི་ཚིག་དང་རྟོགས་དཔྱོད་བློས། །ཀུན་རྫོབ་ལུས་ཀྱི་དེ་ཉིད་མིན། །སྟོང་པའི་སེམས་ནི་ཇི་ལྟར་རྟོགས། །ཞེས་གསུངས་པ་རྣམས་ཀྱི་དགོངས་པ་ལྟར། གཅིག་ཤེས་ཀུན་གྲོལ་དང་། ཀུན་ཤེས་ཅིག་རྡུག་གི་རིགས་འོང་བས། དཔེ་ཆ་ཐོག་ཅིག་བློར་ཚུད། ཚིག་གིས་འགལ་འབྲེལ། ཡིད་དཔྱོད་ཀྱི་བློ་ལས། གཟུང་འཛིན་གྱི་འཁྲུལ་པ་མ་དག་ན་བློ་འདས་ཀྱི་རྟོགས་པ་རྒྱུད་ལ་མི་སྐྱེ་བས། དེ་ཙམ་གྱིས་རང་མཐོང་དང་སྦོས་པ་མི་འཚལ། སྔོན་སྦྱངས་གྱི་ལས་སད་པའི་སྐྱེས་བུ། རྟོགས་ལྡན་གྱི་རྣལ་འབྱོར་པ། ཕྱིའི་མཛད་སྤྱོད་མ་ངེས། ནང་གི་དགོངས་པ་མི་རྟོགས། ཟས་ཁྱི་ཕག་གི་ལྟོ་ལྟར་ཟ། གོས་ཁྱི་ཐུལ་དུག་པོ་གྱོན། མཛད་སྤྱོད་སྨྱོན་པ་ལྟར་བྱས་ནས། ནམ་ཞིག་ལུས་སེམས་བྲལ་བའི་ཚེ། གདུང་རིང་བསྲེལ་དཔུང་ངེ་། འཇའ་དང་འོད་དུ་ན་རེ་བྱུང་བ་ལ་གྲངས་མེད། ཡང་ཕྱི་ཚུལ་གཟུགས་ཀྱི་དགེ་བཤེས། ཕྱི་དར་གྱིས་བཏུམ། ནང་ཤ་མར་དང་ཇས་བརྒྱད། ཕྱི་ཚུལ་བག་མ་བས་མཁས་པ། ཁས་ཐམས་ཅད་མཁྱེན་པར་ཁས་བླངས་ནས། ནམ་ཞིག་བེམས་རིག་བྲལ་དུས་དྲོད་རྟགས་འབྱིན་རེ་བ་མང་པོ་ཡོད། འོ་ན་གང་འཐད་ཅེ་ན། ཅིག་གིས་ཅིག་སྨད་པའི་ཆོས་སྤང་གིས་ལས་དང་། ཆགས་སྡང་ཕྱོགས་དྲེད་རང་རྒྱུད་ངན་པའི་མངོན་རྟགས་འདི་མི་འཐད་པས། རང་རང་གི་སྔོན་གྱི་ལས་ཀྱི་འཕྲོ་དང་། བག་ཆགས་ཀྱིས་མཚམས་སྦྱོར་བས། གསར་རྙིང་སྔགས་མཚན་ཉིད། རང་གང་མོས་ཀྱི་ཆོས་དེ་ཚུལ་བཞིན་དུ་ཉམས་སུ་བླངས། དག་སྣང་ཕྱོགས་མེད་མི་སྦྱོང་ན་ཡང་ཆོས་སྤང་དང་ལོག་ལྟ་མི་བྱ། ཐར་པ་བསྒྲུབ་པའི་རང་གཞུང་སོ་སོ་ན་ཟབ། ཕོ་རྒོད་པོ་ཡོད་ན་ཚེ་འདིར་བསྟན་པ་དང་སེམས་ཅན་ལ་ཕན་ཐོགས། ཕྱི་མ་ཐར་པའི་ལམ་འཐོབ་པ་ཞིག་བགྱིད་འཚལ། རྙིང་མ་ཆོས་མིན་ཀྱང་གསར་མ་བས་མི་ཁེགས། གསར་མ་ཆོས་མིན་ཀྱང་རྙིང་མ་བས་མི་ཁེགས་ཀྱི། གཞན་གྱི་ཆོས་ལ་མ་དག་པ་བྱེད་པ་བས། རང་གིས་དག་པར་བསྒོམ་པ་ལ་འབྲས་བུ་ཐོབ་པ་རེ་བགྱིད་འཚལ། འོ་ན་ཡང་སློབ་དཔོན་ཁ་ཅིག་གི་ཡིད་ལ། གཏེར་སྟོན་རཏྣ་གླིང་པ་དེ། གསར་མ་དང་མཚན་ཉིད་པ་ལ་བརྣག་པ་ཞིག་ཡིན་ནམ་ཟེར་ན། དེ་ལྟར་མིན་གྱི། གསར་མ་ལ་ཡང་། དྭགས་པོ། ཤངས་པ་གཉིས། ས་སྐྱ་པ། སྦྱོར་དྲུག །བསྙེན་བསྒྲུབ། ཞི་བྱེད། གཅོད་ཡུལ་ལ་སོགས། བོད་ཀྱི་ཁྲོད་ན་རྫོགས་རིམ་ཕལ་ཆེ་བ་ཞིག་ཁོ་བོས་མ་ཞུས་པ་ཡང་མེད་དེ། ཐད་ཀའི་ཡོན་ཏན་ཀྱང་རྒྱུད་ལ་སྐྱེས་པ་ཡོད། མཚན་ཉིད་ཀྱི་ཆོས་འདི་དག་ཀྱང་། སྟོན་པའི་བཀའ་ལ་བརྟེན་ནས། བསྟན་བཅོས་སངས་རྒྱས་ཀྱི་བསྟན་པ་འཛིན་སྐྱོང་། བསྟན་པ་ཡུན་དུ་གནས་པར་བྱ་བའི་ཕྱིར། རྒྱ་བོད་ཀྱི་གང་ཟག་དམ་པ་རྣམས་ཀྱིས་མཛད་པ་ཡིན་པ་ཤིན་ཏུ་ཡང་དགོས་ལ། ཕྱི་ཐོས་པ་སྒྲོ་འདོག་གཅོད་པ། ནང་བསྒོམ་པས་རང་རྒྱུད་གྲོལ་བ། རང་གཞན་དང་བསྟན་པ་ལ་ཕན་པའི་རྒྱུར་གྱུར་པ་ཞིག་ལ། ཁོ་བོ་ཡང་ཤིན་ཏུ་མོས་ཤིང་དད་ལ། དག་སྣང་དང་ངེས་པའི་ཤེས་པ་དང་བཅས་པ་ཡོད་དོ། །དེ་ལྟར་རྒྱས་པར་བཤད་ནས། རྩོད་པ་བཟློག་པ་མདོར་བསྡུ་ན། རྙིང་མ་ལ་མ་དག་ཞེས་པའི་ཁས་ལེན་མི་བཏུབ་པའི་གནད་ཆེན་པོ་ཡོད་དེ། ཅིའི་ཕྱིར་ན། རྒྱལ་བློན་སྔ་དར་བའི་དུས་སུ་སྤྲུལ་པའི་ལོ་ཙཱ་བ་བཱཻ་རོ་ཙ་ན་དང་། ཀ་ཅོག་ལ་སོགས་པ་རྣམས་ཀྱིས་སྡེ་སྣོད་གསུམ་ལ་སོགས་པའི་བཀའ་བསྟན་བཅོས་དུ་མ་ཅིག་བསྒྱུར་བ་ཡིན་ཅིང་། དེ་དག་ལ་རྒྱ་གར་ན་ཁུངས་མེད། བསམ་ཡས་སུ་བསྒྱུར་བ་མི་དག་ཟེར་བའི་རྩོད་པ་ནི་མེད། དེས་ན་སྔགས་རྙིང་མའི་རྒྱུད་མན་ངག་རྣམས་ཀྱང་དུས་དེར་བསྒྱུར་བ་ཡིན་པས། དེས་ན་སྡེ་སྣོད་གསུམ་ལ་སོགས་པ་འདི་དག་རྣམས་དག་ན་ནི། རྙིང་མ་རྣམས་ཀྱང་དག་དགོས་ལ། རྙིང་མ་མི་དག་ན་ནི་སྡེ་སྣོད་གསུམ་ལ་སོགས་པ་འདི་རྣམས་ཀྱང་མི་དག་པར་ཐལ། ཅིའི་ཕྱིར་ན། བཱཻ་རོ་ཙ་ན་དང་། ཀ་ཅོག་རྣམ་གཉིས། ཞང་བནྡེ་ཡེ་ཤེས་སྡེ་ལ་སོགས་པའི་བསྒྱུར་མཁན་གྱིས་ལོ་ཙཱ་བ་རྣམས་གཅིག་པའི་ཕྱིར། ཡང་བཱཻ་རོ་ཙ་ན་ལ་སོགས་པ་སྤྲུལ་པའི་ལོ་ཙཱ་བ་རྣམས་ཀྱི་སྡེ་སྣོད་གསུམ་ལ་སོགས་པ་རྣམས་དག་པར་ཤེས་ལ། རྙིང་མའི་རྒྱུད་རྣམ་མ་དག་ངོ་མ་ཤེས་ཟེར་བའི་ལུང་རིགས་པ་ཡང་མི་འཐད་ལས་ཆེ། མཁས་པ་རྣམས་ཀྱིས་ནི་དགོངས་པ་འདིས་ཀྱང་ལེན་པར་འོས་སོ། །ལར་ཡང་གསར་མ་བ་དང་རྙིང་མ་བ་གཉིས་ཁ་བདག་བཟང་ངན་གྱི་ཁྱད་པར་དང་། ཆགས་སྡང་ལ་རུས་འདོན་མི་འདོན་དང་། གྲངས་དཔུང་མང་ཉུང་གིས་ཀྱང་ཁྱད་པར་འབྱེད་འདྲ་བར་སོང་བ་ཡིན། ཇི་ལྟར་ཡིན་ན། གསར་རྙིང་གཉིས་འགྱུར་སྔ་ཕྱི་གོ་ལོག་ནས། རྙིང་མ་བ་ལ་མ་དག་པའི་འབྲེལ་མཐར་འཛིན་རང་བྱེད་པའི་ཚོད་དུ་ཡང་སྣང་། དེ་གང་ཡིན་ན་རྙིང་མ་འདི་མ་དག་ཅེས་པ་དང་། སློབ་དཔོན་རྣམས་ཀྱིས་བཅོས་པ་ཡིན་ནོ་ཟེར་བ་དག་ཡོད་དེ། རྙིང་མ་རྣམས་རྒྱལ་བློན་སྔ་དར། བསྟན་པ་གྲྭ་མ་ཉམས་པའི་དུས་སུ། དཔག་བསམ་གྱི་ཤིང་སྡོང་རྩ་བ་བརྟན་ཟུག །ཡལ་ག་སྦོམ་རག །ལོ་འདབ་གྲྭ་རྒྱས། འབྲས་བུ་དུས་སུ་སྨིན་པ་ཡིན་ཅིང་། གསར་མའི་བརྗོད་བྱས་བོད་དུ་གཏམ་མ་གྲགས་པའི་དུས་སུ། རིག་འཛིན་གྲུ་ཐོབ་ནམ་མཁའི་སྐར་མ་ཙམ་བྱོན་ཏེ། ཡེར་པའི་གྲུབ་ཐོབ་འོད་ལུས་གྲུབ་པ་བརྒྱད་ཅུ། མཆིམ་ཕུའི་གྲུབ་ཆེན་ཉེར་ལྔ། བཀའ་བབས་ཀྱི་རྗེ་འབངས་ཉི་ཤུ་རྩ་ལྔ། ཐུགས་སྲས་སྙིང་གི་བུ་དགུ། ས་ཐོབ་པའི་སྔགས་པ་ཕྲེང་ཐོག་བརྒྱ། སྨོན་ལམ་བཏབ་པའི་ཕྱིར་མི་ལྡོག་གི་སྦྱིན་བདག་བརྒྱ་ལ་སོགས་པ་རྒྱལ་པོ་བཀའི་ཚོམ་ཆེན་མོ་ལས་བྱུང་བ་ལྟར། གུ་རུ་པད་མ་དང་། བཱི་མ་ལ་མི་ཏྲ་དང་། བཱཻ་རོ་ཙ་ན་དང་། སངས་རྒྱས་གསང་བ་ལ་སོགས་པ་རྣམས་ཀྱི་མངོན་སློབ་ཁོ་ན་ལ་ཡང་གྲུབ་ཐོབ་དེ་ཙམ་ཞིག་བྱོན་ཅིང་། གཞན་ཡང་གྲངས་སུ་མ་སྨོས་པའི་གང་ཟག་དམ་པ་ནམ་མཁའི་སྐར་མ་ཙམ་ཞིག་བྱོན་ཏེ། ཆོས་ཀྱི་ཟབ་རྒྱ་གཏན་ལ་ཕབ། ཉམས་ལེན་གྱི་གྲུབ་རྟགས་མཐའ་རུ་ཕྱིན། གྲུབ་ཐོབ་ཚ་ཚ་བཏབ་པ་བཞིན་བྱུང་བ་ལགས་ཏེ། བསྒྱུར་ས་ན་བསྒྱུར། སྙན་ས་ན་སྙན། དགོངས་དོན་ཅིག་ཏུ་གྲུབ། ཕྱིན་སར་ཕྱིན། ཐོས་སར་ཐོབ་པའི་བཀའ་རྒྱུད་དག་ལགས་པས། འདི་ལ་བཀག་པར་འདོད་པའི་གནས་སུ་ཅི་བྱས་ཀྱང་། རྩེ་མོ་བས་རྩ་བ་སྔ་བ་དང་། བུ་ལས་ཕ་རྒན་པའི་དཔེ་ལྟར་དུ། རང་ཕྱོགས་ཆེ་འདོད་ཅིང་། དྲེགས་པས་ཀུན་ནས་བསླངས་པའི་གླན་གཏམ་དང་ཕྱོགས་བཟོས་འགྲོ་བའི་སྐབས་མེད་ཅིང་། འདི་ལ་ཡང་གཏན་ཚིག་འདི་བདེན་པའི་གནས་ཡིན་ནམ་མ་ཡིན་མཁས་པས་བརྟགས་པར་བྱའོ། །གལ་ཏེ་འདི་གཉིས་གོ་ལོག་སྟེ། གསར་མ་སྔོན་དུ་འགྱུར་བ་ཞིག་ཡིན་ན་ནི། གསར་མ་རྣམས་ཀྱིས་ནི་ངེད་གསར་མའི་ཆོས་ལ་བརྩམས་གདན་བྱས་ནས། བོད་ཀྱི་སྔགས་སྒོམ་རྣམས་ཀྱིས་རང་བཟོ་དང་སྒྲ་བཅོས་བྱས་པ་ཡིན། ངེད་ཀྱིས་གསར་མ་ཚོ་འགྱུར་དུས་ན་སྦྱིན་བདག་ཆོས་རྒྱལ་མེས་དབོན་རྣམ་གསུམ། ལོ་ཙཱ་བ་བཱཻ་རོ་དང་ཀ་ཅོག་གསུམ། རྒྱ་གར་གྱི་སློབ་དཔོན་པདྨ་དང་། བཱི་མ་ལ། ཤྲཱྀ་སིཾ་ཧ། སངས་རྒྱས་གསང་བ། རྒྱ་གར་གྱི་རིག་འཛིན་བརྒྱད་ལྟ་བུའི་ཞལ་ནས་བསྒྱུར། ཕྱག་རྟེན་གསེར་ཕྱེ་བྲེ་ལ་འཇལ་ཏེ། བསྟན་པ་སྔ་དར་བའི་རིང་ལ་བསྒྱུར་བ་ཡིན། ཞེས་ཟེར་བའི་ལབ་ནི་ཁོང་ཚོ་ལ་གཏོང་རྒྱུ་མེད། གསར་མའི་ལོ་ཙཱ་བ་བྱ་བ་རྒྱ་གར་ཤར་ཕྱོགས་སུ་ཕྱིན་པ་ཡང་མེད། བལ་པོར་ཡུག་རེ་ཕྱིན་ནས། ངེད་གསར་མའི་ཆོས་ལ་རང་བཟོ་དང་འདྲ་ཆོས་བྱས་པ་ཡིན་ནོ་ཞེས་ཁ་བདག་བཟང་པོས་འགེག་པར་ཐག་གཅོད་ངེས་པར་འདུག་སྟེ། སྨྲ་རྒྱུ་མ་རྙེད་པའི་བརྗོད་བྱས། ལྕེ་མ་ཟད་ན་ཤག་མི་འཛད་ཅེས་ཟེར་བའི་དཔེ་དང་མཚུངས་པར། རྙིང་མ་ལ་སྐྱོན་ཚོལ་བའི་ཐབས་མ་བྱུང་བ་ཡིན་ནོ། །དེ་བས་ན་མ་དག་པས་དག་པ་སུན་འབྱིན་པ་དང་། ཕ་ཝོང་གིས་རི་ཕུལ་པའི་དཔེ་ལྟར། ཕྱོགས་སྔ་དང་ཆོས་སྤང་གི་གང་མ་ལ་ཡང་མི་འཐད་དེ། རང་གཞན་ལ་ཕན་པའི་རྒྱུད་དང་། བསྟན་པའི་ཞབས་ཏོག་ཏུ་མི་འགྱུར་བས་ཀུན་ལ་དག་སྣང་བྱ། གང་མོས་ལ་ཉམས་ལེན་རྩེ་གཅིག་ཏུ་དྲིལ། སངས་རྒྱས་ཀྱི་བསྟན་པ་གྲུ་བཞི་རུ་བཏེགས། ཆོས་ཤེས་ན་རང་རྒྱུད་ཐུལ། མི་ལུས་ལན་གཅིག་པོ་འདི་སྐྱེས་པ་དོན་དང་ལྡན་པར་བྱའོ། ༈ །སྤྱི་དོན་དྲུག་པ་ཆོས་སྤྱིའི་རྣམ་བཞག་མདོར་བསྡུས་ཏེ་བསྟན་པ་ནི། དེ་ཡང་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་ཆོས་ཐམས་ཅད་བཞིར་འདུ་སྟེ། ཞལ་ནས་གསུངས་པ། རྗེས་སུ་གནང་བ། བྱིན་གྱིས་བརླབས་པ། ལུང་དུ་བསྟན་པའོ། །ཞལ་ནས་གསུངས་པ་ལ་གསུམ་སྟེ། སྟོན་པས་རང་ཤུགས་སུ་གསུངས་པ་དང་། འཁོར་རྣམས་ཀྱིས་ཞུས་ཏེ་གསུངས་པ་དང་། སྐབས་ལ་གླེང་བསླངས་པའོ། །སྟོན་པས་རང་ཤུགས་སུ་གསུངས་པ་ནི། འཕགས་པ་སྡུད་པ་ལྟ་བུ་སྟེ། དེ་ནས་བཅོམ་ལྡན་འདས་ཀྱིས་འཁོར་བཞི་པོ་དེ་དག་ཡང་དག་པར་རབ་ཏུ་དགའ་བར་མཛད་པའི་ཕྱིར། ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྟོན་ཅིང་། དེའི་ཚེ་ཚིགས་བཅད་པ་འདི་དག་བཀའ་སྩལ་ཏོ། །ཞེས་པ་ལྟ་བུའོ། །འཁོར་གྱིས་ཞུས་ཏེ་གསུངས་པ་ནི། མཚན་བརྗོད་ལྟ་བུ་སྟེ། གླུར་བླངས་གང་ལགས་བཤད་དུ་གསོལ། །ཅེས་པའོ། །སྐབས་ལ་གླེང་བསླངས་པ་ནི། ཁྱེའུ་ཚངས་པའི་དཔལ་ལུང་བསྟན་པ་ལྟ་བུ་སྟེ། རྩེད་མོ་བྱས་ཏེ་ས་ལ་རི་མོ་བྲིས་པའི་ཁང་པ་བཅོན་ལྡན་འདས་ལ་ཕུལ་ཏེ། བདག་གིས་འདི་ཚོགས་རྫོགས་པར་མཛད་དུ་གསོལ་ཞེས་ཞུས་པ་ལ། སྟོན་པས་སྔོན་གྱི་གླིང་བསླངས་ཏེ། ཁྱེའུའི་སྐྱེས་རབས་མཐའ་རྒྱས་སུ་ལུང་བསྟན་པ་ལྟ་བུའོ། །བྱིན་གྱིས་རླབས་པའི་བཀའ་ལའང་གསུམ་སྟེ། སྐུས་བྱིན་གྱིས་བརླབས་པ་ནི། བཅོམ་ལྡན་འདས་ཀྱིས་དཔལ་རྡོ་རྗེ་སྙིང་པོའི་སྤྱི་བོར་ཕྱག་གླང་པོ་ཆེའི་སྣ་ལྟ་བུ་བཞག་ནས་བྱིན་གྱིས་རླབས་ཏེ་ཆོས་གསུངས་པ་ལྟ་བུའོ། །གསུང་གིས་བྱིན་གྱིས་རླབས་པའི་བཀའ་ནི། ཡུམ་ལས། རབ་འབྱོར་ཁྱོད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤོབས་པར་བྱོས་ཤིག །ཅེས་གསུངས་པ་ལྟ་བུའོ། །ཐུགས་ཀྱིས་བྱིན་གྱིས་རླབས་པ་ནི། བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ལ་བཞུགས་ནས་སྤྱན་རས་གཟིགས་ཀྱི་གསུངས་པ་ལྟ་བུའོ། །གང་བྱིན་གྱིས་རླབས་ན་དོན་གཉིས་ཏེ། སེམས་ཀྱི་རྒྱུད་དང་མ་འབྲེལ་བར་བྱིན་གྱིས་རླབས་པ་དང་། སེམས་ཀྱི་རྒྱུད་དང་འབྲེལ་པར་བྱིན་གྱིས་རླབས་པའོ། །དང་པོ་ནི་ཐུབ་པ་བཞུགས་པའི་དུས་སུ། སྟོན་པའི་བྱིན་རླབས་ཀྱིས་བེམས་པོ་ལ་ཡང་ཆོས་ཀྱི་སྒྲ་འབྱུང་སྟེ། རྔ་སྒྲ་ལས། ཁམས་དང་གཟུག་ནི་དངས་པ་དང་། །ནམ་མཁའ་ལ་ཡང་ཆོས་ཀྱི་སྒྲ། །རྒྱུན་མི་འཆད་པར་འབྱུང་བར་འགྱུར། །ཞེས་དང་། སྟོན་པ་དགའ་ལྡན་གནས་སུ་ནི། རི་དང་ཤིང་བུ་རྡེའུ་དང་། རྔ་བོ་ཆེ་དང་པདྨ་ལས། སྒྲ་བྱུང་བ་ནི་བཀའ་ཞེས་བརྗོད། །ཅེས་དང་། སེམས་ཀྱི་རྒྱུད་དང་འབྲེལ་པར་བྱིན་གྱིས་རླབས་པ་ལའང་གཉིས་ཏེ། སེམས་ཅན་གྱི་སེམས་དང་འབྲེལ་པར་བྱིན་གྱིས་རླབས་པ་དང་། འཕགས་པའི་ཐུགས་དང་འབྲེལ་པར་བྱིན་གྱིས་རླབས་པའོ། །དང་པོ་ནི་ཐུབ་པ་ཞལ་བཞུགས་པའི་དུས་སུ་ནི་དུད་འགྲོ་ལ་སོགས་སེམས་ཅན་ཕལ་པས་ཀྱང་ཆོས་འཆད་ནུས་ཏེ། ཟ་མ་ཏོག་བཀོད་པའི་མདོ་ལས། ཐུབ་པ་ཁྱོད་ཀྱི་བྱིན་རླབས་ལས། སེམས་ཅན་རྣམས་ཀྱིས་ཆོས་སྒྲ་སྒྲོག །ཅེས་སོ། །འཕགས་པའི་ཐུགས་དང་འབྲེལ་པར་བྱིན་གྱིས་རླབས་པ་ནི། སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། །འཆད་དང་རིག་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡིའི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་དང་། སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། །ཞེས་པ་ལྟ་བུའོ། །རྗེས་སུ་གནང་བའི་བཀའ་ལ་གཉིས་ཏེ། གསུང་གཅིག་པ་རྗེས་སུ་གནང་བ་དང་། བསྡུས་གཅིག་པར་རྗེས་སུ་གནང་བའོ། །དང་པོ་ནི་ཐུབ་པས་འཁོར་རྣམས་ལ་ཤོད་ཅིག་ཅེས་པ་དང་། མོའུ་མགལ་གྱི་བུས་ཤཱཀྱའི་གདུང་རབས་བཤད་པ་ལྟ་བུ་དང་། ཇི་ལྟར་ཁྱོད་ཀྱི་བསྟན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་ལ་བསླབ་པར་བྱའོ། །ཞེས་པ་ལྟ་བུའོ། །བསྡུ་བ་པར་རྗེས་སུ་གནང་བ་ནི། འདི་སྐད་བདག་གིས་ཐོས་པའི་དུས་གཅིག་ན། ཞེས་པ་ཆོས་ཐམས་ཅད་ཀྱི་དབུ་རུ་བྱུང་། གསུང་པ་ལ་མངོན་པར་བསྟོད་དོ། །ཅེས་པ་ཆོས་ཐམས་ཅད་ཀྱི་ཞབས་སུ་གྱིས་ཤིག་ཅེས་པ་ལྟ་བུའོ། །ལུང་དུ་བསྟན་པའི་བཀའ་ལ་གཉིས་ཏེ། གནས་སྐབས་སུ་བསྟན་པ་དང་། མཐའ་ཐུག་ཏུ་བསྟན་པའོ། །གནས་སྐབས་སུ་ལུང་བསྟན་པ་ནི། བཅོམ་ལྡན་འདས་ཀྱིས་འདི་ནས་ཤར་ཕྱོགས་ན་སངས་ཀྱི་ཞིང་མེ་ཏོག་བཀྲམ་པ་ཞེས་བྱ་བ་ན། བྱང་ཆུབ་སེམས་དཔའ་འདི་དང་འདི་ཞེས་བྱ་བ་ལ། བཅོམ་ལྡན་འདས་རྡོ་རྗེ་སྙིང་པོ་ཞེས་བྱ་བས་ཆོས་སྟོན་ཏོ། །དེའི་འཁོར་དེ་དག་ཀྱང་མྱུར་དུ་འདིར་འོང་བར་འགྱུར་རོ། །ཞེས་དང་། འགྲོ་བ་འདི་དང་འདི་གནས་འཕོས་ཏེ་ཞིང་འདིར་སྐྱེ་བར་འགྱུར་རོ། །ཞེས་པ་ལ་སོགས་པ་ལྟ་བུའོ། །མཐའ་ཐུག་ཏུ་བསྟན་པ་ལ་ཉེ་བར་ལུང་བསྟན་པ་དང་། དུས་རིང་པོར་ལུང་དུ་བསྟན་པའོ། །ཉེ་བར་ལུང་བསྟན་པ་ནི། དགེ་སློང་དག་སྟོན་པའི་དམ་ཆོས་ནི་བྱང་ཕྱོགས་ནས་བྱང་ཕྱོགས་སུ་རྒྱས་པར་འགྱུར་རོ། །ཞེས་པ་དང་། ང་ནི་མྱ་ངན་འདས་འོག་ཏུ། འཕགས་པའི་རིགས་ཅན་དཔག་མེད་ཀྱིས། །སྟོན་པའི་བསྟན་པ་རྒྱས་པར་བྱེད། །ཅེས་པ་ལྟ་བུ་དང་། ང་ནི་མྱ་ངན་འདས་འོག་ཏུ། ལོ་ནི་བཞི་བརྒྱ་ལོན་པ་ན། ཅེས་སློབ་དཔོན་འཕགས་པ་ལུང་བསྟན་པ་ལྟ་བུའོ། །དུས་རིང་དུ་ལུང་བསྟན་པ་ནི། སྲིང་མོ་གང་གཱའི་ལྷ་མོ་འདི་མ་འོངས་པ་ན་སངས་རྒྱས་འདི་ཞེས་བྱ་བར་འགྱུར་རོ། །ཞེས་གསུངས་པ་ལྟ་བུའོ། །དེ་ལྟར་སྟོན་པའི་བཀའ་རྣམས་བསྡུ་ན་བཀའ་བཞི་པོ་དེར་འདུ་བ་ཡིན་ཏེ། དེའང་བཀའ་དང་བསྟན་བཅོས་རྣམས་ཀྱི་རྣམ་པར་བཞག་པ་གང་ལ་བྱ་ན། འགའ་ཞིག་གིས་འདོད་པས། སྟོན་པ་མྱ་ངན་ལས་མ་འདས་ཕན་དུ་གསུངས་པ་ཐམས་ཅད་ནི་བཀའ། མྱ་ངན་ལས་འདས་ཚུན་ཆད་ནི་བསྟན་བཅོས་ཡིན་ཟེར། ཡང་འགའ་ཞིག་གིས། སྟོན་པས་གསུངས་པ་ཐམས་ཅད་བཀའ། གང་ཟག་གིས་གསུངས་པ་ཐམས་ཅད་བསྟན་བཅོས་ཟེར་བའང་ཡོད། དེ་དག་ཀྱང་བཀའ་ལ་བརྟེན་ནས་བསྟན་བཅོས་བྱུང་བས་འགལ་བ་མེད་ཅིང་། དེ་བས་ཀྱང་ཁོ་བོ་ནི་འདི་ལྟར་འདོད་དོ། །ཡང་དག་པར་རྫོགས་པའི་སངས་རྒྱས་སྐུ་གསུམ་གྱི་ཞལ་ནས་གསུངས་པ་དང་། རྗེས་སུ་གནང་བ་དང་། བྱིན་གྱིས་རླབས་པ་དང་། རྗེས་སུ་གནང་བའི་ཆོས་སྒྲར་སྣང་བ། སྒྲ་སྒྲོག་པ། སྒྲ་དོན་གྱི་འབྲེལ་པའི་བརྗོད་བྱ་ཐམས་ཅད་ལ་བཀའ་ཞེས་བྱ། བཀའི་དོན་ལ་བརྟེན་ཀྱང་རུང་། མ་བརྟེན་ཀྱང་རུང་། བཀའི་རྗེས་ཐོག་ལ། འཕགས་པ་དང་གང་ཟག་གིས་མཛད་པ་སྒྲར་སྣང་བ། སྒྲར་གྲགས་པ། སྒྲ་དོན་གྱི་འབྲེལ་པའི་བརྗོད་བྱ་ཐམས་ཅད་ལ་བསྟན་བཅོས་ཞེས་བྱའོ། །དེ་སྐད་དུའང་། བཱཻ་རོ་ཙ་ནས། བཀའ་དང་བསྟན་བཅོས་ལུང་རིགས་རྣམས་སྒྲ་གྲགས་སྒྲའི་དོན་གྱི་འབྲེལ་པ་གསུམ་ཚང་བ་བཀའ་དང་བསྟན་བཅོས་ཡིན། ཞེས་གསུངས་སོ། །དེ་ཡང་བསྟན་པའི་ཆོས་ལ་སྡེ་སྣོད་གཉིས་སུ་བཤད་དེ། སློབ་དཔོན་རྟ་དབྱངས་ཀྱིས། མ་ནོར་བའི་ལམ་ཉིད་དང་། ལམ་ལ་སློབ་པ་དེ་ཉིད་དེ། ལྟ་བ་ཕྱི་ནང་གཉིས་ཡིན་ནོ། །ཞེས་པས། ཕྱི་པ་མུ་སྟེགས་པ་དང་། ནང་པ་སངས་རྒྱས་པ་གཉིས་ཏེ། ཕྱི་པ་མུ་སྟེགས་པའི་ཆོས་ལ་ལྟ་ལོག་སུམ་བརྒྱ་དྲུག་ཅུ་ལ་སོགས་འཇིགས་ཚོགས་ཀྱི་ཆོས་དབྱེ་ན་མང་དུ་ཡོད་དེ་འདིར་མ་སྤྲོས། ནང་པ་སངས་རྒྱས་པའི་ཆོས་ལ་ཉེ་བར་བསྡུ་ན་གཉིས་སུ་འདུ་བ་ཡིན་ཏེ། ཐེག་པ་ཆུང་ངུ་དང་། ཆེན་པོའོ། །ཆུང་ངུ་ལ་གཉིས་ཏེ། ཉན་ཐོས་དང་། རང་སངས་རྒྱས་སོ། །ཉན་ཐོས་ལ་བཞི་སྟེ། ངོ་བོ། ངེས་ཚིག །དབྱེ་བ། བསྡུ་དོན་ནོ། །ངོ་བོ་ནི་ཆོས་ཀྱི་བདག་ཏུ་ལྟ་བའི་སྒོ་ནས་རང་གིས་ཞི་དུལ་བསྒྲུབ་པའོ། །ངེས་ཚིག་ནི། མཛོད་ཀྱི་ཏི་ཀ་ལས། ཉན་ཉན་ཐོས་ཤིང་ཐོས་ཐོས་གྲོལ། །ཅེས་སོ། །དབྱེ་ན་བཞི་སྟེ། ཉན་ཐོས་སྤྲུལ་པ་བ་དང་། རང་རྒྱུད་པ་དང་། ཞི་བར་བསྒྲོད་པ་དང་། གྲུབ་པ་མཐར་འཛིན་ནོ། །སྤྲུལ་པ་ནི་ཤཱ་རིའི་བུ་དང་། མོའུ་མགལ་གྱི་བུ། རབ་འབྱོར་ལ་སོགས་པ་མཆོག་བརྒྱད་པོ་ལྟ་བུའོ། །འདི་དག་ནི་དངོས་སུ་ཐེག་པ་ཆེན་པོ་ལ་གནས་ཀྱང་། ཉན་ཐོས་ཀྱིས་ཚུལ་བཟུང་ནས་ཉན་ཐོས་ཀྱི་དོན་བྱེད་པའོ། །རང་རྒྱུད་པ་ནི། ཐེག་པ་ཆེན་པོ་ལ་དངས་ཞིང་སྐུར་པ་འདེབས་པ། རྩ་བའི་སྡེ་པ་བཞི། དེ་ལས་གྱེས་པའི་སྡེ་པ་བཅོ་བརྒྱད་པ་རྣམས་སོ། །རྩ་བའི་སྡེ་བཞི་ནི། དགེ་འདུན་ཕལ་ཆེན་སྡེ་དང་། ཐམས་ཅད་ཡོད་སྨྲའི་སྡེ་དང་། གནས་བརྟན་པའི་སྡེ་དང་། མང་པོས་བསྐུར་བའི་སྡེ་དང་བཞིའོ། །དེ་ལས་གྱེས་པའི་སྡེ་ནི། ཤར་གྱི་རི་བོའི་སྡེ་དང་། ནུབ་ཀྱི་རི་བོའི་སྡེ་དང་། གངས་རི་པའི་སྡེ་དང་། འཇིག་རྟེན་ལས་འདས་པའི་སྨྲ་བའི་སྡེ་དང་། རྟག་པར་སྨྲ་བའི་སྡེ་དང་ལྔར་གྱེས་སོ། །ཡོད་པར་སྨྲ་བའི་སྡེ་ལའང་། གཞི་ཐམས་ཅད་ཡོད་པར་སྨྲ་བའི་སྡེ་དང་། དེ་བཞིན་དུ་འོད་སྲུངས་སྡེ་དང་། ས་སྟོན་སྡེ་དང་། ཆོས་སྲུང་སྡེ་དང་། མང་དུ་ཐོས་པའི་སྡེ་དང་། གོས་དམར་པོའི་སྡེ་དང་། རྣམ་པར་ཕྱེ་སྟེ་སྨྲ་བའི་སྡེ་དང་བདུན་ནོ། །གསུམ་པ་གནས་བརྟན་པའི་སྡེ་ལ་ཡང་། རྒྱལ་བྱེད་ཚལ་གནས་ཀྱི་སྡེ་དང་། འཇིགས་མེད་རིགས་གནས་སྡེ་དང་། གཙུག་ལང་ཁང་ཆེན་སྡེ་དང་གསུམ་དུ་གྱེས་སོ། །བཞི་པ་ནི་མང་པོས་བཀུར་བའི་སྡེ་ལ་ཡང་། ས་གྲོ་རིག་པའི་སྡེ་དང་། སྲུང་བའི་སྡེ་དང་། གནས་མ་བུའི་སྡེ་དང་གསུམ་དུ་གྱེས་སོ། །ཞི་བར་བསྒྲོད་པ་ནི། འགོག་པ་ལ་སྙོམས་པར་ཞུགས་པའོ། །རྟེན་གྱི་གང་ཟག་འཕགས་པའི་དགག་བྱ་ནི། རྣམ་ཤེས་ཚོགས་བདུན་འཁོར་བཅས་དགག་པའོ། །རང་སངས་རྒྱས་ལ་ཡང་། རྟེན་འབྲེལ་བཅུ་གཉིས་ལུགས་འབྱུང་དང་ལུགས་བཟློག་ཏུ་ཤེས་པས་རང་གིས་དེ་ཉིད་ཐོབ་པ་ལ་སོགས་པ། དེ་དག་ལའང་། ལྟ་བ་སྒོམ་པ་སྤྱོད་པ་འབྲས་བུ་ལ་སོགས་པ་རང་རང་གི་འཇུག་པའི་སྒོ། རྟོགས་པའི་ལྟ་བ་སྒོམ་པའི་ཉམས། མཐར་འདོད་པའི་འབྲས་བུ་ལ་སོགས་པ་རིམ་པར་ཕྱེ་ན་མང་དུ་ཡོད་དེ། ཡི་གེ་འཇིགས་པས་དོན་མདོར་བསྡུས་པ་ཡིན་ནོ། །དེ་ཡང་དཀའ་བས་ལམ་དུ་འཇུག་པ་ལ། ཕྱི་པ་དང་ནང་པའི་ཁྱད་པར་གང་ཞེ་ན། རྡོ་རྗེ་སྙིང་པོའི་རྒྱུད་ལས། བསྟན་པ་གཉིས་ཀྱི་ཁྱད་པར་ནི། མུ་སྟེགས་རྟག་དང་ཆད་པ་དང་། རྒྱང་འཕེན་དང་ནི་མུར་ཐུག་གོ། །སྟོང་དང་སྙིང་རྗེ་མི་ཕྱེད་དང་། ཟུང་འཇུག་ཕྱོགས་ལྷུང་མེད་པའོ། །ཞེས་གསུངས་པ་ལྟ་བུའོ། །མུ་སྟེགས་ཀྱི་སྟོན་པ་ལ་མཚན་དང་དཔེ་བྱད་རྣམས་ཀྱང་མེད། ནང་པའི་སྟོན་པ་ལ་མཚན་དང་དཔེ་བྱད་བརྒྱད་ཅུ་ལ་སོགས་པས་བརྒྱན་པའོ། །ཕྱི་རོལ་པའི་ལྟ་ལོག་སུམ་བརྒྱ་དྲུག་ཅུ་ཡང་ཟུང་འཇུག་མེད་དེ། རྟག་པ་དང་ཆད་པ་ཕྱོགས་རེ་བ་ཁོ་ནའོ། །ནང་པ་ནི་བདག་མེད་པ་གཉིས་དང་། རྟག་ཆད་ཕྱོགས་ལྷུང་བྲལ་བའོ། །ཕྱི་རོལ་པའི་སྤྱོད་པ་ཡང་མེ་ལྔ་པ་དང་། དབུགས་གསུམ་ལ་སོགས་པ་བྱེད་ཅིང་། ནང་པ་ནི་ཕ་རོལ་ཏུ་ཕྱིན་པ་བཅུ་དང་། དགེ་བའི་རྩ་བ་བཅུ་སྤྱོད་པ་དང་། རིག་ནི་སྡོམ་པ་རྣམས་ལ་སྤྱོད་པའོ། །ཡང་ཏྲི་སིན་དུ་ཨ་པ་ཏ་རའི་རྒྱུད་ལས། བསྟན་དང་སྟོན་པ་རྟོགས་དཔྱོད་ཚུལ་བལྟས་དང་། །ཆོས་རྟག་བཞི་དང་བཤད་པ་ཁྱད་པར་ཆེ། །ཅེས་གསུངས་པས། ཕྱི་པ་ནི་སྟོན་པ་གསུམ་དང་། ཕྱྭ་དང་དབང་ཕྱུག་ལ་བསྟེན་ཅིང་། ནང་པ་ནི་སྐྱབས་དཀོན་མཆོག་གསུམ་ལ་བརྟེན་པའོ། །སྟོན་པ་ཡང་མུ་སྟེགས་རང་རྟོག་དྲུག་ཏུ་འདོད་ཅིང་། ནང་པ་ནི་སངས་རྒྱས་ཉག་གཅིག་པར་འདོད་དོ། །ལྟ་བའི་ཁྱད་པར་ནི། མུ་སྟེགས་པས་རྟག་པ་དང་། ཆད་པ་གཉིས་རང་རྒྱུད་སོ་སོར་འདོད་ལ། སངས་རྒྱས་པ་ནི་རང་བཞིན་དུ་བདག་མེད་པར་འདོད་པས་ཁྱད་པར་ཆེ་སྟེ། ཕྱོགས་སུ་མ་ལྷུང་བ། མཐའ་ལས་མ་འདས་པ་དང་། ཟུང་དུ་འཇུག་པ་ལ་སོགས་པའི་ཁྱད་པར་དུ་ཆེ་བའོ། །སྤྱོད་པ་ལ་ཡང་། ཕྱི་པ་ནི་བྱ་ཁྱིའི་དཀའ་ཐུབ་བམ། མི་དགེ་བ་བཅུ་ལ་སྤྱོད། ནང་པས་བྱམས་སྙིང་རྗེ་དང་ཚོགས་གཉིས་དགེ་བ་བཅུ་ལ་སྤྱོད་དེ། ཆོས་རྟག་བཞི་ནི། མུ་སྟེགས་པས། སྐྱེ་འཇིག་ཐ་དད་དང་བྲལ་བ་རྟག །གནོད་པ་ཐམས་ཅད་དང་བྲལ་བས་བདེ། ཐམས་ཅད་རང་ལ་གྲུབ་པས་བདག །གློ་བུར་དྲི་མས་མ་གོས་གཙང་། ཟེར་རོ ། ནང་པ་ནི། མི་རྟག་སྡུག་བསྔལ་ཉོན་མོངས་བཅས། །དེ་ཉིད་ངོ་ཤེས་ཟུང་དུ་བྲལ། །ཞེས་སོ། །འབྲས་བུའི་ཁྱད་པར་ནི། ཕྱི་པ་ནི་ཕྱྭ་དང་དབང་ཕྱུག་ལྷ་མིའི་དབང་པོ་འདོད་ཅེས། ནང་པ་ནི་མྱ་ངན་ལས་འདས་པ་སྐུ་གསུམ་ཡེ་ཤེས་ལྔའི་བདག་ཉིད་འདོད་དེ། དེ་དག་ནི་ཕྱི་ནང་གི་རྣམ་བཞག་མདོ་ཙམ་བསྟན་པ་ཡིན། དེ་ལ་ཁྱད་པར་ཆེ་བ་ནང་པ་རང་ལའང་ཆེ་ཆུང་གཉིས་དེ། ཐེག་པ་ཆེན་པོ་ནི། ཤེས་རབ་དང་སྙིང་རྗེ་ཆེ་བས་ཐེག་པ་ཆེན་པོ་ལ། དེ་ཉིད་ཆུང་བས་ན་ཐེག་པ་ཆུང་ངུའོ། །དེ་ཡང་སྙིང་རྗེ་སེམས་བསྐྱེད་ཆེན་པོར་དམིགས་ཤིང་། ཤེས་རབ་ཆོས་ཀྱི་དབྱིངས་སུ་ཁྱབ་པས་ཆེན་པོའོ། །རང་དོན་གཙོ་བོར་གོལ་ཞིང་ཆོས་ཀྱི་དེ་ཉིད་མ་རྟོགས་པས་ཆུང་ངུའོ། །ཡང་ཐེག་ཆུང་ཤེས་རབ་ཆུང་བས་གང་ཟག་གི་བདག་ལས་ཆོས་ཀྱིས་བདག་མ་རྟོགས། སྙིང་རྗེ་ཆུང་སྟེ་སེམས་ཅན་ལ་བདག་ལས་གཅེས་པའི་སེམས་བསྐྱེད་མ་སློང་། ཐེག་ཆེན་ནི་ཤེས་རབ་ཆེ་སྟེ་གང་ཟག་གི་སྟེང་དུ་ཆོས་ཀྱི་བདག་མེད་རྟོགས། སྙིང་རྗེ་ཆེ་སྟེ་ཆོས་ལ་དམིགས་པའི་སྙིང་རྗེ་དང་། དམིགས་པ་མེད་པའི་སྙིང་རྗེ་དང་ལྡན་ནོ། །ཁྱད་པར་བསྡུ་ན་ཐེག་པ་ཆེན་པོ་ནི། ཐེག་ཆུང་ལས་དཔག་པ་བདུན་གྱི་ཆེ་སྟེ། མི་རྟོགས་པའི་དོན་ལ་དམིགས་པ་མ་ཡིན་ཏེ། ཟབ་ཅིང་རྒྱ་ཆེ་བར་དམིགས། བསྒྲུབ་པ་ཆེ་བ་ནི། རང་དོན་ལས་གཞན་དོན་བསྒྲུབ། གང་ཟག་གིས་བདག་མེད་པས། ཆོས་ཀྱི་བདག་མེད་མངོན་དུ་གྱུར། ཐབས་ཆེ་བ་མྱ་ངན་ལས་འདས་པའི་སར་ཕྱིན། བརྩོན་འགྲུས་ཆེ་བ་ནི་སྡུག་བསྔལ་གྱིས་སྤྱོད་ནས། རང་དོན་མི་བསྒྲུབ་བར་གཞན་གྱི་སྡུག་བསྔལ་མཐོང་བས་བརྩོན་འགྲུས་ཀྱིས་དང་དུ་ལེན། ལས་ཆེ་བ་ནི་རང་དོན་ཞི་བདེ་མི་བསྒྲུབ་སྟེ། སངས་རྒྱས་ཀྱི་མཛད་པ་མཐར་འདོན། ཡང་དག་པའི་བསྒྲུབ་པས་ཆེ་བ་ནི་འཕགས་པ་དང་དགྲ་བཅོམ་པ་འདོད་པ་མ་ཡིན་ཏེ། སངས་རྒྱས་ཀྱིས་སྟོབས་དང་མི་འཇིགས་པ་དང་། གཟུངས་དང་ཏིང་ངེ་འཛིན་ལ་སོགས་པ་ཐམས་ཅད་མཁྱེན་པ་བསྒྲུབ་པའོ། །གཞན་ཡང་། སྡུད་པ་ལས། གཏོང་བ་ཆེ་དང་བློ་ཆེ་བ་དང་མཐུ་ཆེ་དང་། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང་། །གོ་ཆ་ཆེན་པོ་བགོས་ཤིང་བདུད་ཀྱི་སྒྱུ་འདུལ་བ། །དེ་ཡི་ཕྱིར་ན་ཐེག་པ་ཆེ་ཞེས་རབ་ཏུ་བརྗོད། །ཅེས་པ་དང་། ཅི་ཕྱིར་འདི་ནི་བྱང་ཆུབ་ཐེག་ཆེན་བྱ་ཞེ་ན། དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །ཅེས་གསུངས་པ་ལྟར་རོ། །དེ་དག་གི་ནི་ཐེག་པའི་ཁྱད་པར་དང་། ཐུན་མོང་གི་རྣམ་བཞག་ཀྱང་མདོར་བསྟན་པ་ཡིན་ནོ། ༈ །སྤྱི་དོན་བདུན་གྱི་ཐ་མ་བསྟན་བཅོས་འདི་ཉིད་ཇི་ལྟར་བརྩམ་ཞིང་དོན་དུ་འགྱུར་བ་དང་། བསྟན་པ་སྤྱིའི་རྣམ་པར་བཞག་པ་ཡིན་པས་ཀུན་གྱིས་ཚད་མར་རིག་པ་དང་། མཇུག་དགེ་རྩ་སྨོན་ལམ་བཀྲ་ཤིས་པའི་མཐའ་རྒྱས་དང་བཅས་པ་བསྟན་པ་དང་གང་ཟག་ལ་ཕན་པའི་རྒྱུར་བསྔོ་བའོ། །དང་པོ་ཇི་ལྟར་བརྩམ་པ་ནི། གཙོ་བོར་རྒྱལ་བའི་བཀའ་དང་། མཁས་པའི་ལུང་རིགས། རྒྱ་བོད་ཀྱི་འབྲེལ་ཚུལ་དང་། རང་གིས་ཐོས་པའི་རྒྱ་བསྐྱེད་དེ། ལུང་རིགས་ཀྱི་འཇུག་པ་རྣམས་ཀྱིས་གཏན་ལ་ཕབ་པས་ཏེ། བསྟན་བཅོས་སྟོད་སྨད་བར་གསུམ་དུ་མི་འགལ་བའི་དབང་པོ་མི་འགྱུར་བའི་གཟེར། མཁས་པའི་ལུང་རིགས་ཀྱིས་ལེགས་པར་གྲུབ་པ་རྣམས་ཡིན་ནོ། །དོན་དུ་ཇི་ལྟར་འགྱུར་ཞེ་ན། གང་ཟག་རྟོག་གེ་བའི་རིགས་ལ་སོགས་ཏེ། ཕྱོགས་འཛིན་རང་འགེག་བྱེད་པ་དང་། ཡང་ལུང་མ་བསྟན་གཏམ་འཆོལ་ཕྱོགས་འཆས་སུ་སྨྲ་བ་མང་པོ་ཡོད་དེ། དེ་དག་ནི་དཔེར་ན་ཁྱི་རྒན་གཅིག་གིས་ཐོ་ལ་མིར་བཟུང་ནས་འཁང་པས། གང་ཡིན་མེད་པར་ཁྱི་ཐམས་ཅད་ཕྱོགས་སུ་ཟུགས་པ་དང་། བོང་བུ་གཡང་ལ་ཕུལ་ན་མདོ་རུ་འགྲོ་བ་དང་། ལུག་ཆུ་འབོག་གི་དཔེ། ལུག་སྔོན་མ་གཅིག་གིས་མཆོང་ན། འཆི་ངོ་ཤེས་པའི་ཆུ་དོང་དུ་ཀུན་མཆོང་བ་ལྟར། རྫོགས་ཆེན་གྱི་ཆོས་བྱང་བུ་བཅུར་འབྲེལ་གཅིག་བལྟས་པ་དང་རྟོགས་དཔྱོད་བྱེད་མ་མྱོང་བའི་བན་དྷེ་ཁ་ཅིག་གིས་ཀྱང་། ཕྱོགས་གཏམ་ཁོལ་འདོད་དུ་སྨྲ་ཞིང་། རྙིང་མ་ཆོས་མ་དག་གོ་ཞེས་སྨྲ་བས། དེ་དག་གིས་མཐོང་ན་ཡང་། བློ་གཟུ་བོར་འཇོག་ན་ནི། མོས་པ་མི་སྟེར་ཀྱང་རྒྱུ་མཚན་ཤེས་ཤིང་གཏིང་ཡིད་ཆེས་པའི་རྒྱུར་འགྱུར་ལ། གང་གི་ཀྱང་དག་པ་མི་སྟེར་ན་ནི། གོང་གི་དཔེ་རྣམས་དང་མཚུངས་པས། སངས་རྒྱས་ལ་ཡང་ལེགས་པའི་སྐར་མས་དག་པ་མ་བྱིན་པ་དང་འདྲའོ། །ཡང་རྫོགས་པ་ཆེན་པོ་རྙིང་མ་ལ་མོས་པའི་གང་ཟག་རྣམས་ཀྱིས་མཐོང་ན་ནི། ངེས་པའི་ཤེས་པ་ཁྱད་པར་ཅན་དང་། ས་ཐོབ་པའི་དགའ་བ་ལྟ་བུ་སྒོམ་པར་རིགས་སོ། །གཉིས་པ་ཀུན་གྱིས་ཚད་མར་རིགས་ཤིང་། རང་འདོད་ཕྱོགས་གཅིག་གི་ཆོས་འདིའི་ཆེ་བ་ཁོལ་ཕྱུང་སུ་བཤད་པ་མ་ཡིན་ཏེ། སྟོན་པ་ཡང་དག་པར་རྫོགས་པའི་སངས་རྒྱས་དེ་ཉིད། ཕྱི་དང་ནང་གསང་བ་གསུམ་གྱི་ལྷ་མིའི་སྟོན་པར་ཇི་ལྟར་བྱོན་པའི་ཚུལ་གྱིས་ཁོག་ཕུབ། བཀའ་བསྟན་བཅོས་ཀྱི་རྣམ་བཞག །རྒྱ་བོད་ཀྱི་འབྲེལ་ཚུལ་ཆོས་རང་རང་གི་སྤྱི་དང་རང་རང་གི་མཚན་ཉིད། རྒྱལ་བའི་བཀའ་དང་ལུང་གིས་འགལ་མེད་དུ་བསྒྲུབ་ནས་བསྟན་པ་ཡིན་ཏེ། ལེགས་པར་བརྟགས་ཤིང་དཔྱད་ན། མ་དག་པར་འཛིན་པ་རྣམས་དག་ཕྱོགས་སུ་ཡིད་འདྲེན་པ་དང་། མོས་པར་གནས་པ་རྣམས་མི་ཕྱེད་པའི་དད་པ་ཐོབ་པས། ཀུན་གྱིས་སྤྱི་མཐུན་དུ་བསྟན་པའི་རྣམ་དབྱེ། ཤིང་རྟ་ཆེན་པོའི་སྲོལ་དུ་འགྲོ་བ་ཀུན་གྱི་ཨེ་མ་ཧོ། ཨ་ལ་ལ་ཧོ་ཞེས་སྨྲ་བ་བརྗོད་པར་རིགས་སོ། །གསུམ་པ་འཇུག་དགེ་རྩ་སྨོན་ལམ་གྱིས་ཇི་ལྟར་བསྔོ་བ་ནི། གནས་སྐབས་དང་མཐར་ཐུག་གཉིས་ཏེ། གནས་སྐབས་སུ་སངས་རྒྱས་ཀྱི་བསྟན་པ། མདོ་སྔགས་གསར་རྙིང་བཀའ་གཏེར་ཐམས་ཅད་ལ་ཕན་པའི་རྒྱུར་གྱུར་པ་དང་། གང་ཟག་མ་རྟོགས་པ་མ་རིག་པའི་དབང་དུ་བསྒྲིབས་པ་རྣམས་གསལ་བ་དང་། རྟོགས་པ་ཅན་རྣམས་ཡིད་ཆེས་ཤིང་ཁུངས་བཙུན་པར་བྱ་བ་དང་། སངས་རྒྱས་ཀྱི་བསྟན་པ་མཉམ་ཡངས་སྒོར་མོར་གནས་པ་ལ། ཕྱོགས་འཛིན་གྱི་འདོད་པས་ཟླ་ཁམས་སུ་མི་བྱེད་ཅིང་། ཐམས་ཅད་ལ་སྒོ་དུ་མ་ནས་ཕན་པའི་རྒྱུར་བསྔོ་བ་ཡིན་ཅིང་། མཐའ་ཐུག་ཏུ། སྤྱིར་སྙིང་པོ་ཅན་གྱིས་བསྡུས་པའི་འགྲོ་བ་མཐའ་དག་དང་། ཁྱད་པར་དུ་ཕ་མས་གཙོར་བྱས་དྲིན་གྱིས་བསྐྱངས་པ་དང་། གདུལ་བྱར་གྱུར་པ་རྣམས་སངས་རྒྱས་ཀྱི་བསྟན་པ་འཛིན་སྐྱོང་སྲུང་བ་ལ་སོགས་ཁུར་དུ་ཆེ་ཞིང་། གོལ་འཆུགས་མེད་པའི་ལམ་མཆོག །འོད་གསལ་རྡོ་རྗེ་སྙིང་པོའི་ཐེག་པར་ཞུགས་ཏེ། རྣམ་པ་ཐམས་ཅད་མཁྱེན་པའི་བདག་ཉིད་ཆེན་པོ་སྐུ་གསུམ་ཡེ་ཤེས་ལྔའི་བདག་ཉིད་ཐོབ་པར་བསྔོ་བའོ། །འདི་ནི་བསྟན་པའི་སྲོག་ཤིང་། ཐུན་མོང་གི་ཆོས་འབྱུང་དོན་སྤྱི་དང་རང་རང་གི་མཚན་ཉིད་རྣམས་མ་འདྲེས་སོ་སོར་བསྟན་ན། ངོ་བོ་དབྱེར་མེད་གཅིག་ཏུ་དོན་བསྡུས་པ་ཡིན་པས། དགོས་འདོད་ཀུན་འབྱུང་ཡིད་བཞིན་ནོར་བུ་ལྟ་བུ་བསྟན་པའི་སྐབས་ཐ་མ་སྟེ་བདུན་པའོ། ༈ །བློ་གྲོས་མཐའ་ཡས་དབང་པོའི་གཞུ་ཡི་རབ་བརྒྱན་ཅིང་། །ཤེས་བྱའི་གནས་ལ་མ་རྨོངས་པ་ཡིས་ཤེས་རབ་མདའ། །བློ་གྲོས་བློ་གསལ་སྐྱེས་བུའི་ཡིད་ལ་རབ་ཏུ་འཕེན། །ཡིད་ཀྱི་དགའ་སྟོན་གཞོན་ནུའི་བརྩེ་བའི་རྒྱན་དུ་འགྱུར། །སྤྲིན་བྲལ་མཁའ་ལ་ཉི་ཤར་ཇི་བཞིན་འོད་སྟོང་ནི། །འགྲོ་བའི་འདུལ་ཞིང་གླིང་བཞི་ཀུན་ཏུ་ཁྱབ་ཆེ་བར། །མ་རིག་མུན་སེལ་ཤེས་བྱའི་སྣང་བ་རྒྱས་པར་གྱུར། །རིག་པའི་གཞོན་ནུ་བསྟན་པའི་རྒྱལ་མཚན་ཕྱོགས་བཅུར་འཕྱར། །ཤེས་བྱའི་མཁའ་ལ་འདོད་དགུའི་ཆུ་འཛིན་འཁྲིགས། །དགའ་བའི་ཆར་གྱིས་གདུལ་བྱའི་ལོ་ཏོག་རྣམས། །དགེ་ལེགས་རྒྱ་མཚོའི་འབྲས་བུ་རབ་སྨིན་ཅིང་། །སྐལ་བཟང་རྒྱ་མཚོ་དཔལ་དང་འབྱོར་པ་ཡི། །ཤེས་བྱའི་གཏེར་ལ་མི་འཛད་ལོངས་སྤྱོད་ཅིང་། །དོན་གཉིས་རིན་ཆེན་བང་མཛོད་བརྙེས་པར་འགྱུར། །ཆོས་ཚུལ་འདི་ནི་རིན་ཆེན་དཔལ་བཟང་ཞེས་གྲགས་པ། །བཀའ་གཏེར་ཕལ་མོའི་དོན་རྣམས་མ་ལུས་ཁོང་དུ་ཆུད། །རྒྱ་བོད་མཁས་པའི་གྲུབ་མཐའ་ཀུན་ཀྱང་ལྐོག་གྱུར་མིན། །ཁོ་བོའི་ཡིད་མཁར་ཤེས་བྱའི་སྐར་ཚོགས་རབ་ཏུ་བཀྲ། །མ་དག་ལོག་པའི་སྐྱེ་བོ་རྣམས་ཀྱིས་རབ་རྩོད་ཀྱང་། །གདུལ་བྱའི་སྣང་ངོར་ནམ་མཁའི་འབྲུག་སྒྲས་ཟིལ་གྱིས་མནན། །དུས་མཐའི་གཏེར་སྟོན་ཨོ་རྒྱན་ཆེན་པོའི་གསུང་འཛིན་ཞེས། །ཐེག་པའི་ཡང་རྩེ་འོད་གསལ་རྡོ་རྗེ་སྙིང་པོའི་མཆོག །དེང་སང་དུས་ན་ཁོ་བོའི་སྙིང་ལ་ཡང་དག་ཤར། །ལས་ཅན་མང་པོའི་བློ་ཡི་མུན་པ་རབ་བསལ་ནས། །དྲི་བྲལ་ཡེ་ཤེས་ཐར་པའི་གླིང་དུ་མང་ཞིག་བསྐྱལ། །ཁོ་བོ་མ་སྨད་མ་འོངས་དུས་ན་དཀོན་པར་འགྱུར། །བཀའ་ལུང་རྟོགས་པའི་ཤེས་རབ་རལ་གྲི་མཁའ་ལ་འཕྱར། །མི་ཤེས་མུན་པའི་གཏི་མུག་དྲ་བ་རབ་བཅད་ནས། །ཤེས་བྱ་ཀུན་གསལ་བསྟན་པའི་ཉི་མ་རྒྱལ་གྱུར་གཅིག །བཤེས་གཉེན་དམ་པས་ལུང་རིགས་ཕུག་ལ་ལེགས་བརྟགས་ན། །འདོད་དགུའི་འབྱུང་གནས་རྒྱལ་པོའི་བང་མཛོད་ཅི་བཞིན་འགྱུར། །དེང་སང་དུས་ན་གཏེར་གྱིས་བསྟན་སྐྱོང་རཏ་ན་གླིང་། །ཨོ་རྒྱན་ཞེས་གྲགས་ཕ་དེའི་རྗེས་བཟུང་བུ་ཡིན་ནོ། །མ་རྟོག་ལོག་རྟོག་ཕྱོགས་འཛིན་དྲ་བ་རབ་བཅད་ནས། །ཁེ་དང་དྲེགས་པ་རྙེད་དང་འདོད་པའི་བློ་ཡིས་ནི། །ཚད་མར་མ་བཞག་རང་གི་འདོད་བློ་ཁོ་ན་ཡིས། །དེང་སང་བོད་ཀྱི་སློབ་དཔོན་རྣམས་ནི་རང་ཆེ་འདོད། །གཟུ་བོར་མ་བཞག་འཕགས་པའི་བཀའ་དང་འགལ་བས་ན། །མཁས་པར་འདོད་ཀྱིས་དེ་ཉིད་ཡང་དག་ཕྱོགས་དང་འགལ། །དེ་ཕྱིར་ཁོ་བོའི་བློ་ནི་གཟུ་བོར་བཞག་བྱས་ཏེ། །རྒྱལ་དགོངས་ཐེག་པ་མ་ལུས་ཀུན་ལ་ལེགས་པར་བརྟགས། །ཐོས་དང་མཐོང་བའི་བང་མཛོད་ཀུན་གྱིས་ཕྱུག་བྱས་ཏེ། །ལུང་རིགས་ཀུན་གྱིས་ཕྱུག་པའི་བློ་གྲོས་རིན་ཆེན་གྱིས། །ཕྱོགས་དུས་ཀུན་ནས་བདེ་ལེགས་རྒྱ་མཚོའི་དགའ་སྟོན་འགྱེད། །བསྟན་པ་རིན་ཆེན་ཉིན་མོའི་སྣང་བ་རྒྱས་པར་ཤོག །བདག་ནི་སྔོན་ནས་ཕར་ཕྱིན་དྲུག་སོགས་ཀྱི། །བསག་པའི་དགེ་བ་ཇི་རྙེད་ཡོད་པ་དང་། །སངས་རྒྱས་བསྟན་ལ་དགའ་བ་གང་ཐོབ་པའི། །དགེ་བ་འདི་ནི་ཕ་མས་གཙོ་བྱས་པའི། །ལུས་ཅན་འགྲོ་བ་མ་ལུས་ཐམས་ཅད་ཀུན། །ཤེས་བྱ་མ་རྨོངས་ཐམས་ཅད་མཁྱེན་པར་ཤོག །ཆོས་ཚུལ་འདི་ཡང་ནམ་མཁས་གར་ཁྱབ་པར། །སྐལ་བར་ལྡན་རྣམས་འདོད་དགུའི་དགའ་སྟོན་འགྱེད། །དགེ་ལེགས་རྒྱ་མཚོའི་དཔལ་ལ་ལོངས་སྤྱོད་ཅིང་། །སངས་རྒྱས་བསྟན་ལ་ཕན་པའི་འོད་ཟེར་གྱིས། །ཕྱོགས་དུས་ཀུན་དུ་མ་རིག་མུན་བསལ་ནས། །ཤེས་བྱའི་སྣང་བ་རབ་འབྱམས་རྒྱས་པར་ཤོག །འདི་ལས་བྱུང་བའི་དགེ་ཚོགས་རྒྱ་མཚོ་དེས། །བདག་ཀྱང་དེང་ནས་སངས་རྒྱས་མ་ཐོབ་བར། །བཀའ་དང་ལུང་རིགས་བསྟན་བཅོས་ལ་སོགས་ཏེ། །ཤེས་བྱ་ཀུན་ལ་མ་རྨོངས་བློ་གྲོས་རྒྱས། །མཐའ་ཐུག་རིན་ཆེན་འོད་གསལ་སྙིང་པོའི་ལམ། །མཐའ་རུ་ཕྱིན་ནས་ཀུན་བཟང་མཆོག་ཐོབ་ཤོག །བཀྲ་ཤིས་དགེ་ལེགས་ཉིན་མོར་བྱེད་པའི་དཔལ་བཟང་གིས། །ལུས་ཅན་ཀུན་ལ་རྟག་ཏུ་བདེ་བའི་དཔལ་འབྱིན་ཅིང་། །འདོད་དགུའི་རེ་བ་སྐལ་བཟང་དུ་མས་བརྒྱན་པ་ཡི། །དུས་གསུམ་ཀུན་ཏུ་རྣམ་དག་དགེ་བའི་བཀྲ་ཤིས་ཤོག །ཟབ་ཡངས་རྒྱ་ཆེ་ཀུན་གྱི་འབྱུང་གནས་རྒྱ་མཚོ་ནས། །འདོད་དགུའི་རིན་ཆེན་ནོར་བུ་མཆོག་ནི་ལེགས་བླངས་ཏེ། །སྐྱེས་དགུ་ཀུན་གྱི་རྣམ་པར་མཐོ་བའི་རྒྱ་མཚན་རྩེར། །འདོད་དགུའི་རིན་ཆེན་གཏེར་ལ་སྤྱོད་པའི་བཀྲ་ཤིས་ཤོག །ལྷ་དང་མི་དང་ལྷ་མ་ཡིན་དུ་བཅས་པའི་གནས། །འགྲོ་བ་ཀུན་གྱིས་འདི་ལ་རབ་ཏུ་བསྔགས་པ་ཡི། །སངས་རྒྱས་བསྟན་པ་རབ་ཏུ་སྣང་བའི་ཉིན་བྱེད་ཀྱིས། །དུས་གསུམ་ཀུན་ཏུ་མ་རིག་སེལ་བའི་བཀྲ་ཤིས་ཤོག །ཆོས་འབྱུང་བསྟན་པའི་སྒྲོན་མེ་རྩོད་བཟློག་སེང་གེའི་ང་རོ་ཞེས་བྱ་བ་འདི་ནི། ཤཱཀྱའི་དགེ་ཚུལ། གསང་སྔགས་རྡོ་རྗེ་འཛིན་པའི་རྣལ་འབྱོར་པ། དུས་མཐའི་གཏེར་སྟོན། ཨོ་རྒྱན་ཆེན་པོའི་གསུང་འཛིན། རིན་ཆེན་དཔལ་བཟང་པོས། ས་ཕོ་སྟག་གི་ལོ། སྟོན་ཟླ་འབྲིང་པོའི་ཚེས་བཅུ་ནས་དབུ་བཙུགས་ཏེ། ཁྲིད་ཀྱི་ཐུན་བར་ལ་ཉེ་བར་སྦྱར་ཏེ། ཁྱི་ཟླ་བའི་ཡར་ཚེས་ལ། ལྷོ་ཕྱོགས་མོན་བོད་ཀྱི་མཚམས། གཡུ་མཚོ་སྔོན་མོའི་མགུལ་བདེ་ཆེན་གླིང་གི་གཙུག་ལག་ཁང་དུ་ལེགས་པར་སྦྱར་བའི་ཡི་གེ་པ་ནི། ཡར་འབྲོག་གི་སློབ་དཔོན་ཤེས་རབ་བཟང་པོས་བགྱིས་སོ། །དགེ་བ་འདིས་སངས་རྒྱས་ཀྱི་བསྟན་པ་ཉི་མ་ལྟར་ཁྱབ་པར་གྱུར་ཅིག །དགེའོ།། །།