སྔ་འགྱུར་རྙིང་མའི་གཞུང་ལ་བརྒལ་བའི་ལན་ལུང་དང་རིགས་པའི་སྐྱ་རེངས་དང་པོ།

བ ར སྟྱ་ྉ྄པྲ྅྅྅ ཀ ར་ྉ྄པྲ྅྅྅ ཧྣཱ ནཱཾ ས མ ཡཱ ཉྩོ ཏྱ སྱ པ རི ཧཱ རཱ ག མ ཤྩ བི དྱཱ ཡ དྱཱ རུ ཎ ནཱ མཱ སྟེ། །
སྔ་འགྱུར་རྙིང་མའི་གཞུང་ལ་བརྒལ་བའི་ལན་ལུང་དང་རིགས་པའི་སྐྱ་རེངས་དང་པོ་ཞེས་བྱ་བ་བཞུགས་སོ། །
ན མཿ ཛི ཏྥུ ཥ྄ག྅྅྅ ལ སྱ བུ དྡྷ ཡ། བཱི དྷྲཾ ཛྙཱ པ རི བེ དྱ བ ཤྱི ན། །
རྒྱལ་བ་རྫོགས་པའི་སངས་རྒྱས་ལ་ཕྱག་འཚལ་ལོ། །དྲི་བྲལ་མཁྱེན་པ་ཤེས་བྱ་ཀུན་གཟིགས་ནས། །
བཱ གྨི ནྭི གྲ ཧ མོ ཀྵ ས ཏྤ ཐ། ས མྦི ཏ སྱ སུ ཀྲི ཏ྄ིཧྲ྅྅ བྷྲཱུཾ སྥུ ཊཾ། ཤེ ཥྚི རྨ ས མ ཏ ཏྲ བཻ ན མཿ
ལེགས་འདོམས་གསུང་གིས་ལུས་ཅན་ཐར་ལམ་དུ། །དཀྲི་བའི་མཛད་བཟང་སྲིད་པའི་མཐར་འཕྲོ་བའི། །སྟོན་པ་མཚུངས་མེད་དེ་ལ་ཕྱག་འཚལ་ལོ། །
རྒྱལ་ཀུན་གསུང་གི་དབང་ཕྱུག་ཧེ་རུ་ཀཿ གྲུབ་བརྒྱའི་གཙོ་བོ་འཛམ་གླིང་མཛེས་པའི་རྒྱན། །གངས་ལྗོངས་བསྟན་པའི་ཤིང་རྟ་གཅིག་པུ་པ། །ཨོ་རྒྱན་སངས་རྒྱས་གཉིས་པས་དགེ་ལེགས་སྩོལ། །སྲིད་པའི་འཁྲི་ཤིང་གཅོད་ལ་ཆེས་དཔལ་པའི། །མཁྱེན་རབ་རལ་གྲིའི་གཉེན་གཅིག་ལྷག་པའི་ལྷ། །འཇམ་དཔའི་དབྱངས་དེས་བདག་དང་ཁྱོད་ཀྱི་ཡང་། །ཐེ་ཚོམ་དྲྭ་བ་མཐའ་དག་གཅོད་པར་མཛོད། །བསིལ་ལྡན་གངས་རིའི་ལྗོངས་འདི་རུ། །བཙན་པོ་ལྷ་རི་སྙན་ཤལ་ནས། །མངའ་བདག་ཁྲི་རལ་ཡན་ཆད་ཀྱི། །ཆོས་རྒྱལ་རྣམས་ཀྱི་སྐུ་རིང་ལ། །པཎ་ཆེན་ལྷ་རིག་སེང་གེ་ནས། །སྨྲྀ་ཏི་ཛྙཱ་ནའི་བར་དག་དང་། །ལོ་ཙཱ་ཐུ་མི་སམྦྷོ་ནས། །ཆོས་ཀྱི་བཟང་པོའི་བར་དག་ཏུ། །བྱོན་པའི་ལོ་པཎ་དེ་རྣམས་ཀྱིས། །བསྒྱུར་བའི་མདོ་རྒྱུད་དགོངས་འགྲེལ་བཅས། །ཇི་སྙེད་བཞུགས་པ་ཐམས་ཅད་ལ། །སྔ་འགྱུར་རྙིང་མ་ཞེས་སུ་གྲགས། །དུས་དེའི་ཆོས་རྒྱལ་ལོ་པཎ་ཚོགས། །ཕལ་ཆེར་ས་བཅུའི་དབང་ཕྱུག་ཏུ། །ཚད་མའི་སྐྱེས་བུའི་ལུང་བསྟན་པར། །ཚད་མས་གྲུབ་པ་མ་ཡིན་ནམ། །དེས་ན་ལུང་དོན་རིག་པ་ཡིས། །རྣམ་པར་དཔྱོད་པའི་བློ་ལྡན་ཞིང་། །གཟུ་བོར་གནས་པའི་གང་ཟག་རྣམས། །ལུགས་དེར་ཐེ་ཚོམ་ཟ་མི་སྲིད། །འོན་ཀྱང་བློ་མཐུ་ཞན་པ་དང་། །མི་དགེའི་བཤེས་ཀྱི་ཟིན་པ་དང་། །ཕྱོགས་ལྷུང་གདོན་གྱིས་གཙེས་པ་རྣམས། །ཐེ་ཚོམ་ལོག་ལྟས་བཅིང་བར་སྣང་། །དེ་ལྟ་ན་ཡང་ཁྱེད་ཅག་གིས། །ལྟར་སྣང་སྒྲོ་སྐུར་ཙམ་མིན་པར། །ཡང་དག་ལུང་དང་རིག་པ་ཡིས། །རྙིང་གཞུང་ལོག་པར་སྒྲུབ་མི་ནུས། །ཅི་ཕྱིར་ཞེ་ན་གཞུང་དེ་ཀུན། །གལ་ཏེ་ལོག་པ་ཉིད་ཡིན་ན། །འདུལ་བ་ཤེར་ཕྱིན་དཀོན་བརྩེགས་དང་། །ཕལ་ཆེན་ལ་སོགས་མདོ་ཕྱོགས་དང་། །རྣམ་འཇོམས་དོན་ཞགས་མཚན་བརྗོད་དང་། །རྣམ་སྣང་མངོན་བྱང་རྒྱུད་ལ་སོགས། །སྔགས་ཕྱོགས་དེ་དག་དགོངས་འགྲེལ་བཅས། །བཀའ་དང་བསྟན་བཅོས་ཕལ་ཆེ་བ། །རྙིང་མའི་ལོ་པཎ་གྱིས་བསྒྱུར་ཕྱིར། །ཁྱོད་ལ་ལོག་པའི་ཆོས་སུ་འགྱུར། །དེ་ལྟ་ན་ནི་གངས་ལྗོངས་འདིར། །ཡང་དག་ཆོས་ཀྱི་སྐལ་པ་ཕྲ། །གལ་ཏེ་མདོ་དང་ཕྱི་རྒྱུད་སོགས། །དེ་རྣམས་ལོག་པ་མ་ཡིན་ཀྱང་། །རྙིང་མའི་བླ་མེད་རྒྱུད་སྡེ་རྣམས། །ལོག་པ་ཡིན་ཞེས་སྨྲ་ན་ནི། །མཉམ་སྦྱོར་ཟླ་གསང་ཐིག་ལེ་དང་། །གསང་འདུས་ཕུར་པ་རྩ་དུམ་སོགས། །ཚད་མའི་རྒྱུད་སྡེ་དེ་རྣམས་ཀྱང་། །རྣམ་དག་མིན་པར་ཐལ་བར་འགྱུར། །དེ་ཀུན་སྔ་འགྱུར་ཡིན་པའི་ཕྱིར། །འདོད་ན་གསང་སྔགས་གསར་མ་ཡང་། །ཡང་དག་མིན་པར་ཐལ་འགྱུར་ཏེ། །གསར་མ་ལ་ཡང་དེ་ཡོད་ཕྱིར། །གལ་ཏེ་སྔ་འགྱུར་རྙིང་མ་ཡི། །མདོ་ཕྱོགས་ཀུན་དང་གསང་སྔགས་ཀྱིས། །ཕྱི་ནང་རྒྱུད་སྡེ་ཕལ་ཆེ་བ། །ཡང་དག་ཉིད་དུ་ཁས་ལེན་ཅིང་། །སྒྱུ་འཕྲུལ་དྲྭ་བ་འདུས་མདོ་དང་། །སེམས་ཀློང་མན་ངག་སྡེ་སོགས་ཀྱི། །རྒྱུད་སྡེ་ཁ་ཅིག་ཆོས་ལོག་ཏུ། །འདོད་ཅེས་ཁྱེད་ཅག་སྨྲ་ན་ནི། །སྒྱུར་བྱེད་ལོ་པཎ་གཅིག་ཉིད་ཀྱིས། །བསྒྱུར་བའི་མདོ་རྒྱུད་ལ་ལ་ཞིག །དག་ཅིང་ལ་ལ་མ་དག་པའི། །གཏམ་འདི་སྡང་ཞུགས་ཙམ་ཞིག་ལས། །རིག་པས་འཐད་པ་མ་གྲུབ་ཀྱང་། །ཅི་སྟེ་གལ་གྱིས་འཆུ་བྱེད་ན། །འདི་ལ་མཁས་པས་དཔྱད་འོས་པའི། །རྣམ་དག་གཏན་ཚིགས་ཅི་ཞིག་ཡོད། །འདི་ལྟར་སྡེབ་སྦྱོར་ཉམས་པ་དང་། །ལེགས་སྦྱར་སྐད་དང་མི་མཐུན་ཅིང་། །གྲོང་གི་སྐད་དང་འདྲེས་སོགས་ཀྱིས། །རྣམ་དག་མིན་པར་འདོད་ཅེ་ན། །ཕྱོགས་ལྔའི་རྒྱུད་སྡེ་ཕལ་ཆེར་ལ། །རྟགས་འདི་མ་གྲུབ་ཁ་ཅིག་ལ། །གྲུབ་ཀྱང་དེ་ཡིས་ཆོས་མིན་པར། །ཐལ་བའི་ཁྱབ་པ་སྒྲུབ་མི་ནུས། །དེ་ཡིས་རྒྱུ་མཚན་དུས་འཁོར་དང་། །ཕྱག་ཆེན་ཐིག་ལེའི་རྒྱུད་སོགས་ནས། །གསལ་བར་བཤད་པ་མ་མཐོང་ངམ། །དུས་ཕྱིས་རྒྱ་གར་ཡུལ་གྲུ་འགའ། །ཡོངས་སུ་གྲགས་པ་མེད་པ་དང་། །གསར་མའི་ལོ་ཙཱ་བ་རྣམས་ཀྱིས། །མཐོང་ཐོས་མེད་པའི་ཕྱིར་ཞེ་ན། །དེ་ལ་ཁྱབ་བ་མ་གྲུབ་སྟེ། །སངས་རྒྱས་འདས་ནས་ལོ་གྲངས་ནི། །བརྒྱ་ལྷག་ཙམ་དུ་ཐེག་ཆེན་གཞུང་། །ཡོངས་སུ་གྲགས་པར་མ་གྱུར་དང་། །དེང་སང་ཙམ་ནའང་འཕགས་ཡུལ་ན། །སྡེ་སྣོད་གསུམ་སོགས་རྒྱལ་བའི་བཀའ། །ཡོད་པའི་ངེས་པ་མ་མཆིས་ཀྱང་། །མེད་པ་ཙམ་གྱིས་མ་དག་པར། །སྒྲུབ་པ་མཁས་པའི་གཞུང་ལུགས་བཞིན། །ལོ་ཙཱ་འགའ་ཡིས་མ་མཐོང་བ། །གཏན་ཚིགས་ཉིད་དུ་མི་ཆེ་སྟེ། །བྷཾ་ག་ལ་ཡི་རྒྱལ་པོའི་སྲས། །ཡོངས་སུ་རྫོགས་པའི་པཎྜི་ཏ། །གྲུབ་པའི་ས་མཐོར་གཤེགས་གྱུར་པ། །ལྷ་གཅིག་དཱི་པཾ་ཀ་ར་སྟེ། །དེས་ཀྱང་སྔོན་ཆད་མ་གཟིགས་པའི། །རྒྱུད་སྡེ་དུ་མ་བསམ་ཡས་ཀྱི། །རྒྱ་དཔེའི་ཁྲོད་ནས་གཟིགས་སོ་ཞེས། །ཇོ་བོའི་རྣམ་ཐར་ཉིད་དུ་གསལ། །མ་མཐོང་མེད་པ་མ་ཡིན་ཞེས། །གསུངས་པ་དེང་འདིར་དྲན་པར་བྱོས། །སྔ་འགྱུར་གཞུང་འདི་ཕྱིས་བྱོན་པའི། །མཁས་པ་མང་བའི་རྩོད་བཅས་སུ། །མཛད་ཕྱིར་རྣམ་དག་མིན་ཅེ་ན། །དེར་ཡང་ཁྱབ་པ་མ་གྲུབ་སྟེ། །སངས་རྒྱས་པ་ལ་མུ་སྟེགས་རྩོད། །ཐེག་ཆེན་གཞུང་ལ་ཉན་ཐོས་རྩོད། །བྱེ་མདོ་སེམས་ཙམ་དབུ་མ་སོགས། །གྲུབ་མཐའ་ཕན་ཚུན་མ་རྩོད་མེད། །གསར་མ་པའང་ནང་ཚན་གྱིས། །ཕན་ཚུན་ཐམས་ཅད་རྩོད་བཅས་ཕྱིར། །ཀུན་ཀྱང་ལོག་པ་ཡིན་ནམ་ཅི། །དཔལ་ལྡན་དུས་ཀྱི་འཁོར་ལོ་དང་། །ལམ་འབྲས་ཞི་བྱེད་གཅོད་ལ་སོགས། །རྒྱུད་དང་མན་ངག་སྙན་རྒྱུད་ཆོས། །ཕལ་ཆེར་རྩོད་བཅས་ཁོ་ནའི་ཕྱིར། །དེ་ཀུན་དོར་བྱར་གྱུར་པ་ན། །ཧ་ཅང་ཉིད་དུ་མ་ཐལ་ལམ། །ཁྱོད་ཀྱིས་འགྱུར་བྱང་མ་འཁོད་དང་། །རྒྱ་འགྲེལ་ཟུར་ཙམ་མེད་དོ་ལོའི། །གཏན་ཚིགས་ལྟར་སྣང་ཙམ་བཀོད་ཀྱང་། །དེ་ནི་མ་ངེས་རྟག་ཡིན་པས། །ཚུལ་དེས་འགོག་པར་ག་ལ་ནུས། །འགྱུར་བྱང་འགྲེལ་པ་ཡོད་མེད་ཀྱིས། །ཆོས་དང་ཆོས་མིན་དབྱེ་བ་ནི། །བློ་གྲོས་ཕུར་ཁུང་ཐུག་པའི་གཏམ། །དེ་ལྟར་ནའང་རྙིང་རྒྱུད་ཕལ། །འགྱུར་བྱང་ཡོད་པ་ཤ་སྟག་སྟེ། །སེམས་སྡེ་སྔ་འགྱུར་བཻ་རོ་དང་། །ཕྱི་འབྱུང་བི་མ་ལ་ཡིས་བསྒྱུར། །ཀློང་སྡེའི་སྐོར་རྣམས་ཤྲཱི་སེང་དང་། །བཻ་རོ་གཡུ་སྒྲ་སོགས་ཀྱིས་བསྒྱུར། །མན་ངག་སྡེ་ཡི་རྒྱུད་བཅུ་བདུན། །བི་མ་སྐ་ཅོག་ཉང་སོགས་ཀྱིས། །བསྒྱུར་ཞིང་གཞན་ཡང་མདོ་སྒྱུ་སོགས། །འགྱུར་བྱང་རང་རང་གཤམ་ན་གསལ། །ཁ་ཅིག་འགྱུར་བྱང་མ་འཁོད་པས། །མ་དག་ཉིད་དུ་འདོད་མི་ནུས། །དཀོན་མཆོག་རྗེས་དྲན་མདོ་དང་ནི། །སཱ་ལུ་ལྗང་བའི་མདོ་ལ་སོགས། །འགྱུར་བྱང་མེད་པ་འགའ་ཡོད་ཀྱང་། །དེ་དག་རྣམ་དག་མིན་པར་ནི། །དཔྱོད་ལྡན་སུམ་ཀྱང་སྨྲ་མི་སྤོབས། །དེ་ཕྱིར་བག་ཡོད་མཛད་ན་ལེགས། །འགྲེལ་པ་མེད་པའང་རྟགས་མ་གྲུབ། །རྒྱུད་རྒྱལ་གསང་བ་སྙིང་པོ་ལ། །རྒྱ་འགྲེལ་རིམ་གཉིས་སྤར་ཁབ་དང་། །ལམ་རིམ་ཉི་འོད་སེངྒེ་ཡི། །རྒྱ་ཆེར་འགྲེལ་སོགས་དུ་མ་དང་། །དགའ་རབ་བཱི་མ་ལ་གཉིས་ཀྱི། །མཚན་བརྗོད་རྫོགས་པ་ཆེན་པོ་རུ། །བཀྲལ་བའི་འགྲེལ་པ་རྣམ་གཉིས་དང་། །སློབ་དཔོན་འཇམ་དཔལ་བཤེས་གཉེན་གྱི། །འགྲེལ་པ་རྡོ་ལ་གསེར་ཞུན་དང་། །སློབ་དཔོན་པདྨ་སཾ་བྷཱ་ཝའི། །མན་ངག་ལྟ་བའི་ཕྲེང་བ་སོགས། །བཀའ་གཏེར་འགྲེལ་པ་མཐའ་ཡས་པ། །དེང་སང་དུས་ནའང་བཞུགས་པ་མང་། །གཞན་ཡང་བཅུ་གདུན་རྒྱུད་སོགས་ལ། །གནའ་དུས་འགྲེལ་པ་འགའ་མཆིས་ཀྱང་། །དེང་སང་དཔེ་རྒྱུན་དཀོན་པ་ཙམ། །མཚན་རྣམས་རྙིང་མའི་གཞུང་ན་ཡོད། །འགྲེལ་པ་མེད་པས་མ་དག་པར། །འཇོག་ན་དཀོན་བརྩེགས་ཕལ་ཆེན་སོགས། །མདོ་རྒྱུད་མང་ཞིག་ཅིར་འགྱུར་ཨཾ། །དེ་རྣམས་ཕྱིས་པའི་དགག་ཚུལ་དངོས། །ཡིན་མིན་དཔྱོད་ལྡན་རྣམས་ཀྱིས་ལྟོས། །འགྱུར་ཚུལ་བྲིས་ཀྱང་དེ་དག་ལ། །བསྒྱུར་བའི་དཔང་པོ་མེད་ཅེ་ན། །ལུང་ཟིན་སྤྲུལ་པའི་ཆོས་རྒྱལ་གྱི། །བཞུགས་གནས་ཆོས་འཁོར་རྣམ་པ་གསུམ། །ལུགས་གཉིས་ཁྲིམས་ཀྱི་བཀའ་བཙན་ཞིང་། །མཁས་པའི་སྐྱེ་བོས་གང་བའི་ཡུལ། །བསྒྱུར་གཞི་གནས་ཀྱི་དཔང་པོ་ཡིན། །མདོ་དང་རྒྱུད་སྡེ་དུ་མ་ནས། །རྒྱལ་བའི་ལུང་གིས་བསྔགས་མཛད་ཅིང་། །མི་རབས་དུ་མར་བཞུགས་པ་དང་། །དངོས་སྣང་སྒྱུ་མར་སྟོན་ནུས་པའི། །པད་འབྱུང་ཞི་འཚོ་བི་མ་སོགས། །འཕགས་ཡུལ་པཎ་ཆེན་བརྒྱ་རྩ་དང་། །སྐད་རིགས་སུམ་བརྒྱ་དྲུག་ཅུ་ལ། །མཁས་ཤིང་གནས་ཡུལ་བསྒྲོད་ནུས་པའི། །གྲུབ་བརྙེས་ལོ་ཙཱ་བརྒྱ་རྩ་སོགས། །སྒྱུར་བྱེད་གང་ཟག་དཔང་པོ་ཡིན། །དེ་རྣམས་དཔང་དུ་མི་ཆེ་ན། །རྒྱལ་རིགས་རྒྱལ་ས་མ་ཟིན་པར། །མཐའ་ལ་འཁྱར་པའི་སྦྱིན་བདག་དང་། །མཐའ་འཁོབ་ཡམ་བུའི་གྲོང་ཁྱེར་སོགས། །བླུན་པོས་བསྟེན་པའི་ཡུལ་རྣམས་དང་། །གསེར་འདོད་ཨ་ཙར་རྐང་འཁྱམས་དང་། །གྲགས་འདོད་འཕྲལ་སྐད་ཤེས་ཙམ་གྱིས། །ལོ་ཙཱའི་མིང་བཏགས་ཕལ་ཆེར་ཞིག །དཔང་པོ་ཉིད་དུ་ཇི་ལྟར་འོས། །མཛུབ་མོ་བྲང་ལ་ཚུགས་ལ་སོམས། །དཔལ་འཛིན་དམྱལ་བར་སོང་བ་ཡང་། །ཚད་མའི་སྒྲུབ་བྱེད་མིན་ནོ་སྐད། །རྫོགས་སངས་རྒྱས་ལ་སྡང་བ་ཡིས། །ལྷས་བྱིན་དམྱལ་བར་སོང་བ་དང་། །ཐེག་ཆེན་ཆོས་ལ་སྐུར་བཏབ་པས། །ཉན་ཐོས་ལྔ་བརྒྱ་གནས་ངན་དུ། །ལྷུང་བར་མདོ་ལས་བཤད་པ་རྣམས། །སངས་རྒྱས་དང་ནི་ཐེག་ཆེན་གཞུང་། །གཉེན་པོའི་ཡུལ་དུ་གྲུབ་པ་ཡི། །ཆེ་བ་བསྟན་ཕྱིར་མ་ཡིན་ནམ། །དེ་བཞིན་འདིར་ཡང་དཔལ་འཛིན་གྱིས། །སྔ་འགྱུར་གཞུག་ལ་སྐུར་བཏབ་ནས། །རྡོ་རྗེའི་དམྱལ་བར་གཤེགས་པ་དེས། །གཞུང་འདི་རྫོགས་པའི་སངས་རྒྱས་དང་། །མཚུངས་པ་ཉིད་དུ་ཡང་དག་གྲུབ། །དེ་ཕྱིར་སྒྲུབ་བྱེད་ཚད་མ་ཡིན། །དཔལ་འཛིན་ཉིད་ཀྱིས་སྦྱར་བ་ཡིན། །གཞུང་དེ་ད་དུང་འདུག་གོ་ལོ། །གཞུང་དེའི་བརྗོད་བྱ་ལུང་རིག་གིས། །ཚར་གཅད་ཟིན་པ་དེས་གས་ཆོག །གཞུང་ཉིད་མེད་འགྲོ་ག་ལ་དགོས། །གཞན་དུ་མུ་སྟེགས་པས་སྦྱར་བའི། །དབང་ཕྱུག་ནག་པོའི་རྒྱུད་དང་ནི། །དབྱུ་གུ་གསུམ་པའི་གཞུང་ལ་སོགས། །ད་དུང་ཡོད་ཅིང་དེ་དག་ལ། །ཚད་མར་བྱེད་པའི་མུ་སྟེགས་པ། །རབ་ཏུ་མང་པའང་ཡོད་པའི་ཕྱིར། །ཕྱོགས་གླང་ཆོས་ཀྱི་གྲགས་པ་སོགས། །རིག་པའི་དབང་ཕྱུག་དེ་རྣམས་ཀྱིས། །ཚར་མ་ཆོད་ཅེས་སྨྲའམ་ཅི། །དེས་ན་དེ་འདྲའི་གཞུང་ལུགས་དང་། །ཡོད་ཀྱང་ལོག་པར་རྟོག་པའི་སྲོག །རིག་པའི་མཚོན་གྱིས་བཅད་ཟིན་པས། །གཞུང་ལུགས་ཤི་བའི་རོ་ཡིན་ནོ། །མདོར་ན་དེ་དང་དེ་འདྲ་བའི། །རྙིང་གཞུང་འགོག་པའི་རིམ་པ་རྣམས། །འགལ་དང་མ་ཁྱབ་ཁྱབ་ཆེས་པའི། །སྐྱོན་གྱི་ཕུང་པོར་གྱུར་བ་མང་། །ངེས་པར་ཆོས་དང་ཆོས་མིན་གྱི། །རྣམ་དབྱེ་ལེགས་པར་ཕྱེ་འདོད་ན། །རྒྱལ་བ་ཉིད་ཀྱིས་རྗེས་གནང་ཞིང་། །རྒྱ་བོད་མཁས་པས་བཞེད་པ་ཡི། །བརྟགས་པ་གསུམ་དང་རྟོན་པ་བཞི། །བཀའ་རྟགས་ཕྱག་རྒྱ་རྣམ་བཞི་དང་། །དངོས་སམ་བརྒྱུད་ནས་དུག་གསུམ་གྱི། །གཉེན་པོར་འགྱུར་དང་མི་འགྱུར་སོགས། །ཚུལ་གསུམ་ལྡན་པའི་ཚད་མ་ཡི། །རིག་པས་ཞིབ་ཏུ་བརྟག་དགོས་སོ། །དེ་ལྟར་ལེགས་པར་བརྟགས་པ་ན། །རྙིང་མའི་གཞུང་ལུགས་འཁྲུལ་མེད་རྣམས། །བསྲེག་བཅད་བརྡར་བའི་གསེར་ཞུན་བཞིན། །ལྷག་པར་མཛེས་ཀྱིས་གཞན་དུ་མིན། །དེ་ཡི་ཐད་ནས་ཕྱིས་གྱུར་པའི། །གཞུང་ལུགས་ཕལ་ཆེར་སྣག་ཆའི་ཡུག །བཞག་པ་ཇི་བཞིན་གཟོད་མཐོང་འགྱུར། །འདིར་ནི་གསར་དུ་སྒྲུབ་མི་དགོས། །སྔོན་བྱོན་མཁས་པའི་མཁས་པ་མཆོག །རོང་ཟོམ་ཆོས་ཀྱི་བཟང་པོ་དང་། །རོག་སྟོན་ཤེས་རབ་འོད་ཟེར་དང་། །མཁས་པ་ཐང་སྟོན་ལོ་ཙཱ་བ། །ཀུན་མཁྱེན་བསམ་ཡས་པ་སོགས་ཀྱིས། །སྔ་འགྱུར་བཀར་སྒྲུབ་མཛད་པ་ཡོད། །གཞན་ཡང་རོང་ཟོམ་ཆེན་པོ་ཡིས། །མཛད་པའི་བསྟན་བཅོས་དུ་མ་དང་། །ཀུན་མཁྱེན་དྲི་མེད་འོད་ཟེར་གྱི། །མཛོད་ཆེན་བདུན་སོགས་རྩ་འགྲེལ་དང་། །ཁམས་དབུས་གཙང་གསུམ་ལ་སོགས་པར། །རྙིང་མའི་རྒྱུད་འབུམ་མང་བཞེངས་པའི། །དཀར་ཆག་དཔེ་ཐེར་སོ་སོ་དང་། །རྒྱལ་དབང་ལྔ་པ་ཆེན་པོ་ཡི། །གསུང་འབུམ་ཕར་ཆེན་རྣམས་སུ་ཡང་། །ལུང་དང་རིག་པ་གཏིང་ཟབ་པས། །དཔྱིས་ཕྱིས་ཉིད་དུ་སྒྲུབ་པ་ཡོད། །སྔོན་དུས་སྔ་འགྱུར་གཞུང་ཉིད་ལ། །ལོག་པར་རྟོག་ནས་རྒལ་བ་སོགས། །འབྲི་གུང་དགེ་སློང་དཔལ་འཛིན་དང་། །མ་རྟོག་ཐེ་ཚོམ་གྱིས་དྲི་བ། །ཀརྨ་མི་བསྐྱོད་རྡོ་རྗེ་དང་། །དགོངས་གཞི་དང་ནི་དགོས་པ་ལ། །ལྟོས་ནས་གསར་རྙིང་ཐུན་མོང་དུ། །ཡེ་ཤེས་འོད་དང་ཞི་བ་འོད། །ཁུ་དབོན་གཉིས་ཀྱི་འབྱམས་ཡིག་དང་། །མཁོན་འཛིན་སྙིང་ནད་འབའ་ཞིག་གིས། །བྲིས་པ་འགོས་ལོའི་འབྱམས་ཡིག་དང་། །གཞན་ཡང་ས་པཎ་བུ་སྟོན་དང་། །པཎ་ཆེན་ཤཱཀ་མཆོག་ལ་སོགས་པས། །བརྟག་དཔྱད་གཞིར་མཛད་དགག་སྒྲུབ་བཅས། །མང་ཞིག་མཛད་པ་དེ་དག་གི། །ལན་དང་དགོངས་པའི་གསལ་བྱེད་སོགས། །རིམ་པར་སྤྲོས་པ་རྒྱ་ར་བ། །ནམ་མཁའ་ཆོས་ཀྱི་རྒྱ་མཚོ་ཡི། །རྩོད་བཟློག་རྡོ་རྗེ་ཕ་ལམ་ཡོད། །སོག་བཟློག་བློ་གྲོས་རྒྱ་མཚོ་ཡིས། །དཔལ་འཛིན་ཉིད་ཀྱི་སྒེར་ལན་དུ། །རྩོད་བཟློག་ངེས་དོན་འབྲུག་སྒྲ་དང་། །མི་བསྐྱོད་རྡོ་རྗེའི་ཆབ་ཤོག་ལན། །དྲིས་ལན་ལུང་རིག་འབྲུག་སྒྲ་ཡོད། །འབྱམས་ཡིག་གསུམ་གྱི་ལན་དང་ནི། །ས་པཎ་བུ་སྟོན་ཤཱཀ་མཆོག་གི། །དགག་སྒྲུབ་དབྱེ་གསལ་བྱས་པའང་ཡོད། །ཤཱཀ་མཆོག་ལེགས་བཤད་གསེར་ཐུར་ལ། །བྱ་བ་ཆོས་རྗེ་སྐལ་བཟང་པས། །བརྒལ་ལན་ལུང་རིག་སྒོ་འབྱེད་སྤྲིངས། །དེའི་ལན་པཎ་ཆེན་རང་ཉིད་ཀྱིས། །ངེས་དོན་རབ་གསལ་ཅེས་བྱ་བར། །རྙིང་མ་དགག་པ་མིན་ཚུལ་གྱི། །དག་ཞུས་ཞིབ་ཏུ་ཕུལ་བའང་ཡོད། །སྨིན་གླིང་རབ་འབྱམས་ཆོས་གྲགས་ཀྱིས། །སྔ་ཕྱིའི་རྩོད་པ་ཐམས་ཅད་ཀྱི། །ལན་གྱི་ཕྲེང་བ་རྒྱས་པ་ཡོད། །རིག་འཛིན་འཇིགས་མེད་གླིང་པ་ཡིས། །རྒྱ་ར་བ་ཡི་རྩོད་བཟློག་ལ། །རྣོ་བརྟགས་རྒྱས་པར་སྤྲོས་པ་དང་། །གྲུབ་མཐའ་རབ་ཏུ་དབྱེ་བའི་གཏམ། །རྟོག་གེའི་གཉེན་པོ་ཞེས་བྱ་དང་། །ཏནྟྲའི་ཕྱོགས་འཛིན་བཟློག་པའི་གཏམ། །དོན་གྱི་མདོ་འགག་ཅེས་བྱ་དང་། །ཤིན་ཏུ་རྣལ་འབྱོར་གྲུབ་མཐའ་བཞིར། །སྟོན་པ་རྡོ་རྗེ་ཟེག་མ་དང་། །རྫོགས་ཆེན་ལྟ་བ་ཧ་ཤང་གི། །མཚུངས་ཟླར་འཁྲུལ་པའི་ཤན་འབྱེད་དུ། །མཛད་པ་ཀུན་མཁྱེན་ཞལ་ལུང་སོགས། །ཚད་ལྡན་བསྟན་བཅོས་དུ་མ་ཡོད། །མཁས་པའི་དབང་པོ་ཀཿཐོག་པ། །འགྱུར་མེད་ཚེ་དབང་མཆོག་གྲུབ་ཀྱིས། །སྡོམ་གསུམ་རབ་དབྱེའི་གསལ་བྱེད་དུ། །འདུ་མ་བྱས་པའི་གན་མཛོད་དང་། །བྲག་ཀར་དགེ་བཤེས་རྩོད་ལན་དུ། །སྤེལ་བ་ལུང་གི་རྔ་ཆེན་སོགས། །རྩོད་བཟློག་བསྟན་བཅོས་མང་ཞིག་ཡོད། །བརྒལ་ལན་རྩོད་བཟློག་དེ་རྣམས་སུ། །བརྟགས་པ་གསུམ་སོགས་ཚད་ལྡན་གྱི། །ལུང་རིག་དུ་མས་རྣམ་དག་ཏུ། །བསྒྲུབས་ཟིན་པས་ན་དེར་ལྟོས་ཤིག །དེ་ལྟར་ལུང་དང་རིག་པ་ཡིས། །རྙིང་མའི་གཞུང་ལུགས་མཐའ་དག་ཀུན། །བཀའ་དང་བསྟན་བཅོས་རྣམ་དག་ཏུ། །ལེགས་པར་གྲུབ་པར་གྱུར་པ་ན། །དེ་རྗེས་ཆུ་བརྒྱ་ཟོམ་འོག་དང་། །ལམ་བརྒྱ་འགག་འཕྲང་གཅིག་གི་དཔེས། །གཞུང་བརྒྱ་རིག་པ་གཅིག་ཉིད་ཀྱིས། །གསལ་བར་གྲུབ་པ་མ་ཡིན་ནམ། །དེས་ན་རིགས་དྲུག་གནས་འདྲེན་དང་། །རིགས་བརྒྱའི་ཙཀ་གདུབ་རབ་བྱུང་གི། །རྣམ་པའི་ལྷ་ཡིས་མཚོན་ཐོགས་སོགས། །ལམ་གྱི་གནད་དུ་མི་ཆེ་ཡང་། །གཞན་དོན་ཕྲིིན་ལས་ཕྲན་ཚེག་དང་། །ཕྱག་བཞེས་མཚོན་བྱེད་དྲང་དོན་བརྡའ། །ཅུང་ཟད་མི་འདྲའི་ཁྱད་པར་དག །རྙིང་མའི་གཞུང་ལས་བཤད་པ་མེད། །དེ་ཡང་རྒྱལ་བའི་བཀའ་ཡིན་པར། །རིག་པ་སྔ་མས་བསྒྲུབས་ཟིན་ཏོ། །རྙིང་མའི་གཞུང་ལ་གྲགས་ནའང་། །གསར་མའི་རྒྱུད་དུ་མ་བཤད་པས། །དེ་དག་འཐད་པ་མིན་ཅེ་ན། །རྟགས་ཁྱབ་གཉིས་ཀ་མ་གྲུབ་སྟེ། །ངན་སོང་སྦྱོང་བའི་རྒྱུད་སོགས་ནས། །གནས་ནས་དྲང་བ་བཤད་ཕྱིར་དང་། །རས་བྲིས་སྐུ་གཟུགས་བཤད་ཕྱིར་དང་། །མི་འཁྲུགས་ཆག་བྲལ་སྤྲུལ་སྐུ་ཡིས། །མཚོན་ཆ་རྡོ་རྗེ་ཐོགས་ཕྱིར་དོ། །གཞུང་ལུགས་གཅིག་ལ་གྲགས་པ་དེ། །གཅིག་དང་མཐུན་པའི་ངེས་པ་མེད། །ཉན་ཐོས་པ་ཡི་བདེན་པ་བཞི། །མུ་སྟེགས་པ་ཡི་ལུགས་ལ་མེད། །ཐེག་ཆེན་པ་ཡི་ཁྱད་ཆོས་རྣམས། །ཉན་ཐོས་པ་ལ་མ་གྲགས་ཤིང་། །རྡོ་རྗེ་ཐེག་པའི་རིམ་པ་གཉིས། །ཕར་ཕྱིན་གཞུང་དུ་བཤད་པ་མེད། །ཐབས་ཤེས་རྒྱུད་ཀྱི་སྦྱོར་སྒྲོལ་སོགས། །ཕྱི་རྒྱུད་རྣམས་སུ་མ་བཤད་ཀྱང་། །དེས་དེ་ལོག་པར་ག་ལ་གྲུབ། །དེ་དང་འདི་དག་མཚུངས་པས་སོ། །ཙཀ་གདུབ་དཀྱིལ་འཁོར་དོད་ཡིན་པར། །སེམས་པའང་ཁྱོད་རང་འཁྲུལ་པར་ཟད། །ཆོས་རྗེ་ས་སྐྱ་པཎྜི་ཏས། །རབ་དབྱེ་ཐེག་དགུར་དཔྱད་སྐབས་ཀྱི། །ཚིག་དེ་དེང་སང་ས་སྐྱ་པ། །མཁས་བླུན་ཀུན་གྱིས་ཅལ་སྒྲོགས་སུ། །བྱེད་མོད་དེ་ཡི་གོ་བའི་གནད། །ཤེས་པ་ཁྱེད་ཀྱི་ཁྲོད་ན་དཀོན། །དེའི་དོན་རྫོགས་པ་ཆེན་པོ་ལ། །རྟོགས་བྱའི་དོན་དང་རྟོགས་བྱེད་ཐབས། །རྣམ་པ་གཉིས་སུ་དབྱེ་བ་ལ། །རྟོགས་བྱ་དོན་གྱི་རྫོགས་ཆེན་ནི། །ལྷན་ཅིག་སྐྱེས་པའི་ཡེ་ཤེས་ཏེ། །དམིགས་མེད་བརྗོད་པ་དང་བྲལ་བ། །དེ་ཡི་ངོ་བོའི་རང་ལྡོག་ནས། །མིང་ཚིག་ཡི་གེ་དང་བྲལ་ཕྱིར། །བརྗོད་བྱེད་ཚིག་གི་ཐེག་པ་རུ། །བཞག་པ་མཁས་པ་མིན་ཞེས་གསུངས། །དེ་རྟོགས་པ་ཡི་ཐབས་ལ་ནི། །ཐེག་པའི་རིམ་པ་ཡོད་པ་ཡིན། །ཅེས་པས་རྟོག་བྱེད་ཐབས་ཀྱི་ནི། །ཐེག་རིམ་དགུ་པོ་ཤུགས་ཀྱིས་བསྟན། །འོན་ཀྱང་གསང་སྔགས་གསར་མ་ལ། །རྣལ་འབྱོར་ཆེན་པོའི་ལྟག་ན་ནི། །དེ་བས་མཐོ་བའི་རྒྱུད་སྡེ་མེད། །སྒོམ་པའི་དམིགས་པ་ཉིད་ཀྱང་ནི། །རྣལ་འབྱོར་ཆེན་པོའི་ལྟག་ན་མེད། །ཅེས་པས་ཐེག་རིམ་གོང་མ་གཉིས། །གསར་མ་པ་ལ་མེད་པ་ཡི། །རྣམ་བཅད་དངོས་སུ་བསྟན་པ་ཡིས། །དེ་གཉིས་རྙིང་མའི་ཁྱད་ཆོས་སུ། །ཡོད་པའི་ཡོངས་གཅོད་ཤུགས་ལས་བསྟན། །རྙིང་མའི་ལུགས་ལ་ཐེག་པ་དགུ། །ཡོད་པའི་ཞལ་བཞེས་གཞུང་འདི་དང་། །ཐུབ་དགོངས་སོགས་སུ་ཡང་ཡང་མཛད། །དེ་ལྟར་རྣམ་དབྱེ་ལེགས་ཕྱེས་ནས། །སྨྲས་ན་དམ་པའི་དགོངས་པ་བསལ། །གཞན་དུ་ཨ་ཏི་ཡོ་ག་ཉིད། །ཡེ་ཤེས་ཡིན་པར་བཞེད་པ་ལ། །ཐེག་པ་ཡིན་པར་སྤྱིར་བཀག་ཅེས། །ཁྱེད་ཅག་དེ་ལྟར་སྨྲ་ན་ནི། །རྒྱན་དང་ཐེག་པ་སྡུད་པ་ལ་སོགས་པའི། །གཞུང་ལུགས་ཀུན་དང་དགའ་བའི་ཕྱིར། །ཙནྡན་སོལ་བར་བྱས་པ་བཞིན། །མཁས་པའི་ལེགས་བཤད་བློ་སྐྱོན་གྱིས། །དྲི་མ་ཅན་དུ་མ་བྱས་སམ། །འདི་དང་འདི་འདྲའི་རྒལ་ལན་ནི། །རྒྱུད་ལུང་མན་ངག་གསུམ་སྦྱར་ཞིང་། །རིག་པས་འཐད་པར་བསྒྲུབ་པ་ཡིས། །ཡིད་ཆེས་ངེས་ཤེས་འདྲེན་ནུས་པའི། །ཤེས་བྱེད་དམ་པའི་ཞལ་གྱི་ལུང་། །མཆིས་མོད་དེ་དག་ཤེས་འདོད་ན། །རྒྱུད་སྡེའི་ཟབ་གནད་འཆད་དགོས་པས། །རྒྱུད་ནས་བཤད་པའི་འཆད་ཉན་གྱི། །ཚུལ་རྣམས་ཇི་བཞིན་སྒྲུབ་དགོས་ཀྱི། །ཅོ་འདྲི་རྩེད་མོའི་རྩོད་ལེན་དུ། །ཟབ་དོན་གསང་བ་སུ་ཞིག་སྒྲོགས། །སྤྱིར་ནི་སྔ་འགྱུར་འཁྲུལ་མེད་རྣམས། །གསར་མའི་དུས་སུ་བྱོན་པ་ཡི། །ལྷ་ཅིག་ཇོ་བོ་ཆེན་པོ་དང་། །ཁ་ཆེ་ཤཱཀྱ་ཤྲཱི་དང་། །དམ་པ་སངས་རྒྱས་ལ་སོགས་པའི། །རྒྱ་གར་གྲུབ་ཐོབ་མང་པོ་དང་། །འགོས་ལོ་གཞོན་ནུ་དཔལ་བ་དང་། །ཐར་ལོ་ཉི་མ་རྒྱལ་མཚན་དང་། །འབྲི་གུང་རིན་ཆེན་དཔལ་བཟང་པོ། །རིག་རལ་ཇོ་ནང་ཀུན་མཁྱེན་པ། །གྲུབ་ཐོབ་ཨོ་རྒྱན་པ་དང་ནི། །ཀུན་མཁྱེན་ཙོང་ཁ་པ་སོགས་ཀྱི། །མཆོག་གཟིགས་དུ་མས་རྣམ་དག་ཏུ། །ཞལ་ཞེས་བསྔགས་བརྗོད་མཛད་པ་མང་། །སོ་སྐྱེ་ཤེས་རབ་འཆལ་བ་འགས། །སྨོད་པར་བྱེད་པ་སྙིང་རྗེའི་གནས། །དེ་ཙམ་དུ་ཡང་མ་ཟད་དེ། །གྲུབ་པ་ཐོབ་པའི་ལག་རྗེས་སུ། །སྔོན་བྱོན་རྗེ་འབངས་ཉེར་ལྔ་དང་། །བར་དུ་སོ་ཟུར་གནུབས་དང་གཉགས། །སློབ་རྒྱུད་ནམ་མཁའི་སྐར་ཚོགས་ཙམ། །ཕྱིས་བྱོན་ཉང་རལ་ཆོས་དབང་དང་། །གླིང་པ་བརྒྱད་སོགས་གཏེར་སྟོན་དང་། །ཀཿདཔལ་རྫོགས་ཆེན་གྲུབ་ཐོབ་རྣམས། །ཕུང་པོ་འོད་སྐུར་ཡལ་བ་དང་། །ཟུང་འཇུག་མཁར་སྤྱོད་འགྲུབ་པ་དང་། །གདུང་དང་རིང་བསྲེལ་བཞག་ནས་ཀྱང་། །སྒྲ་འོད་མེ་ཏོག་ཆར་དང་བཅས། །རང་བཞིན་སྤྲུལ་པའི་ཞིང་རྣམས་སུ། །ཕེབས་པའི་གང་ཟག་བགྲང་ལས་འདས། །གྲོལ་རྟགས་དེ་འདྲ་མངོན་སུམ་དུ། །འབྱུང་བའི་རྒྱུ་མཚན་ཉམས་ལེན་ཆོས། །སྔ་འགྱུར་ཡོ་ག་སྡེ་གསུམ་པོ། །རྒྱལ་བ་རྡོ་རྗེ་འཆང་ཆེན་གྱི། །ཉེ་ལམ་ཟབ་མོ་ཡིན་ཕྱིར་དང་། །དེ་ལ་དམ་ཉམས་བཀའ་རྐུན་གྱིས། །རང་བཟོས་བསླད་པ་མ་ཞུགས་དང་། །རྡོ་རྗེ་འཆང་ནས་ད་ལྟའི་པར། །བྱིན་རླབས་བརྒྱུད་པ་མ་ཆད་པའི། །རྟགས་སུ་མངོན་སུམ་ཚད་མའོ། །དེ་ཕྱིར་ཚད་མ་དུ་མ་ཡིས། །ཚད་མར་གྲུབ་པའི་ལམ་དེ་ལ། །ཚད་མ་ཉིད་དུ་བཟུང་བྱས་ན། །གང་ཟག་ཉིད་ཀྱང་ཚད་མར་འགྲོ། །ལན་ནི་འདི་དང་འདི་འདྲ་བའི། །རྩོད་ཡིག་དྲི་ཚིག་སྤེལ་བའི་རྒྱུ། །ཀུན་སློང་འདྲ་མིན་མང་ཡོད་ཀྱང་། །བརྟགས་ན་རྣམ་པ་གསུམ་དུ་ངེས། །བློ་ཆུང་གྲགས་པ་དོན་གཉེར་དང་། །སྙིང་ནས་ཆོས་ལ་སྡང་བ་དང་། །རྣམ་དག་ཆོས་ལ་སྒྲོ་སྐུར་གྱི། །ཐེ་ཚོམ་གཅོད་པར་འདོད་པའོ། །གལ་ཏེ་གྲངས་པ་དོན་གཉེར་ན། །གྲགས་སྐམ་སྙིང་པོ་མ་མཆིས་ཀྱང་། །དམ་པའི་རྣམ་ཐར་གཞན་དག་གིས། །སྒྲུབ་དང་འཕྲལ་ཕུག་ཀུན་ཏུ་དགེ། །ཆོས་དང་ཆོས་མིན་འབྱེད་དོ་ལོའི། །ཆོས་སྤོངས་ལས་ཀྱི་སྒྲིབ་པ་འདིས། །གྲགས་པ་སྒྲུབ་པ་ཡ་ངའི་གནས། །ཁེ་ལས་ཉེ་ཆེ་སྤངས་ན་ལེགས། །ཞེས་ནས་ཆོས་ལ་སྡང་ཡིན་ན། །ཆོས་ལ་སྡང་བའི་གང་ཟག་ལ། །ཐར་ལམ་མེད་པར་ཐུབ་པས་གསུང་། །དེས་ན་ཡང་དག་ལུང་རིག་གི། །ཐུགས་རྗེའི་དབྱངས་ཐག་ལ་བརྟེན་ནས། །ཐར་བའི་ལམ་དུ་ཞུགས་ན་ལེགས། །ཅིས་ཀྱང་མི་ལྡོག་སྨོད་ན་ནི། །སྨྱོན་པའི་རྗེས་སུ་ལོང་བ་བཞིན། །ལྷ་སྦྱིན་དང་ནི་དཔལ་འཛིན་གྱི། །རྗེས་ལ་ཚམ་ཚོམ་མེད་པ་རུ། །མཆོང་བ་སྔོན་གྱི་ལས་ཡིན་པས། །རྒྱལ་བའི་ཕྱག་གིས་མི་ཁོག་ན། །བདག་དང་བདག་འདྲས་ཅི་ཞིག་བྱ། །ཁྱོད་ལ་སྡིག་པར་མ་གྱུར་ཅེས། །ལྷག་པའི་བསམ་པའི་སྨོན་ལམ་འདེབས། །ཐེ་ཚོམ་གཅོད་པར་འདོད་ན་ནི། །གོང་དུ་བཤད་པའི་རྩོད་ལན་ནི། །ཡིག་ཆ་དེ་དག་རྣམས་དང་ནི། །རྙིང་མའི་གཞུང་ལུགས་མཐའ་དག་ལ། །ཤེས་རབ་གསུམ་གྱི་མིག་སྒྲུབས་དང་། །སོམ་ཉིའི་གནས་ཀུན་ལྡོག་པ་ཡོད། །གལ་ཏེ་དེ་ལྟར་བརྟག་པ་ན། །རྒྱལ་བའི་བཀའ་ལུང་དང་འགལ་ཞིང་། །གཏན་ཚིགས་རྒྱ་ཡིས་མ་ཐེབས་པས། །འགྲེལ་པ་བསྟན་བཅོས་ཇི་སྙེད་དུ། །དགག་བཞག་སྤང་གསུམ་མ་ནུས་ཤིང་། །རྩོད་ལན་རྣམས་སུ་ལུང་རིག་གིས། །ལེགས་པར་གྲུབ་པར་མ་གྱུར་པས། །ཡང་དག་ལམ་དུ་ཐེ་ཚོམ་པའི། །གནས་ཤིག་ཁྱོད་ལ་མངོན་གྱུར་ན། །དེ་ཚེ་འགལ་འདུའི་རང་བཞིན་གྱི། །གྲོང་ཚིག་ཁ་ཤས་ཙམ་མིན་པར། །སྤྱིར་བཏང་དམིགས་གསལ་རྫས་ལྡོག་དང་། །སེལ་དང་སྒྲུབ་པ་སྐབས་ཕྱེད་པའི། །བརྒལ་བརྟགས་མཁས་པས་དཔྱད་འོས་པར། །སྒྲུབ་པར་གྱིས་དང་དེའི་དུས་སུ། །དཔལ་ལྡན་ཆོས་ཀྱི་གྲགས་པ་ཡི། །གཞུང་དང་མཐུན་པའི་ལུང་རིག་གི། །སྒོ་འཕར་འབྱེད་པར་སྐབས་ཕྱེའོ། །དེ་ལས་གཞན་དུ་སྔ་འགྱུར་གྱི། །གཞུང་ལུགས་རྣམ་དག་མ་མཐོང་བཞིན། །བློ་གྲོས་རྩིང་པོ་དཔྱད་པའི་གཏམ། །ཧོལ་རྒྱུག་བྱེད་པ་དཔྱད་འོས་མིན། །འབེན་མ་མཐོང་པའི་མདའ་འཕེན་དང་། །དཀྱུས་ས་མ་བརྟན་རྟ་རྒྱུག་དང་། །ཕྱོགས་སྔ་མ་ངེས་རྩོད་པ་གསུམ། །དཔྱོད་ལྡན་རྣམས་ཀྱི་ཁྲེལ་བའི་གནས། །ཀྱེ་མ་དེང་སང་སྙིགས་མའི་གནས་སྐབས་འདིར། །རྟོག་གེ་ཟོལ་མས་ཐུབ་བསྟན་དཀྲུགས་པས་སྐྱོ། །འབྱུང་བྱ་མུན་པའི་སྨག་ལ་དགོད་མོད་ཀྱི། །ཉིན་མོ་ཧཱུཾ་སྒྲ་སྒྲོགས་ན་ལྟས་ངན་ཡིན། །དཔང་གྱུར་མཁས་པའི་སྐྱེ་བོ་ཟད་པ་ན། །བླུན་པོས་བབ་ཅོལ་སྒྲོགས་པ་ཆོས་ཉིད་ཀྱང་། །བསྟན་འཛིན་ཉི་ཟླའི་དཀྱིལ་འཁོར་བཀྲག་འབར་ཞིང་། །བཤད་སྒྲུབ་འོད་ཀྱིས་ཕྱོགས་ཀུན་ཁྱབ་དུས་འདིར། །འགལ་འདུའི་རང་བཞིན་གནག་རྫིའི་གཏམ་ཟངས་མ། །འཛེམ་མེད་གཅེར་རྒྱུག་བྱེད་པ་ཨེ་མ་མཚར། །དེང་འདིར་ལོག་རྟོག་མུན་པ་སུན་འབྱིན་པའི། །བརྒལ་ལན་སྐྱ་རེངས་དང་པོ་སྤྲོས་ཟིན་གྱིས། །མ་བརྟགས་མུ་ཅོར་སྨྲ་རྣམས་བག་ཡོད་མཛོད། །ཕྱིས་ནས་ལུང་རིག་ཉིན་བྱེད་འཆར་ཏ་རེ། །དེ་སྐད་ཡོངས་རྫོགས་བསྟན་པའི་མངའ་བདག་ཆེ། །མདོ་ཁམས་གྲུབ་པའི་དབང་ཕྱུག་རྫོགས་ཆེན་པའི། །བཀའ་འབབས་ཡོངས་ཀྱི་ཐ་ཤལ་སྙོམས་ལས་པ། །སྐྱེས་ཐོབ་སྦྱངས་པའི་བློ་གྲོས་ན་ཕྲ་ཡང་། །རང་གཞན་གྲུབ་མཐའ་རྒྱ་མཚོའི་མཐའ་སོན་པའི། །སྨྲ་བའི་ཉི་མ་རྒྱལ་སྲས་ཆོས་རྗེ་དང་། །གཙུག་ལག་སྒོ་བརྒྱ་འབྱེད་ལ་ཟླ་བྲལ་བའི། །གཞོན་ནུ་འཇིགས་མེད་ཆོས་ཀྱི་དབང་པོ་སོགས། །ཡོངས་འཛིན་མཁས་དབང་དུ་མའི་ཞབས་ཀྱི་རྡུལ། །སྤྱི་བོར་སོན་པའི་མཐུ་ལས་ལེགས་བཤད་གཏམ། །ཅུང་ཟད་སྨ་ལ་དབང་པའི་ཀློག་པ་བ། །པདྨ་བཛྲ་ཞེས་བྱར་འབོད་པ་དེས། །དོན་གཉེར་ཅན་འགས་ནན་གྱིས་བསྐུལ་བའི་ངོར། །རུ་དམ་དཔལ་གྱི་གཙུག་ལག་ཁང་ཆེན་པོའི། །ཉེ་གམ་བསམ་གཏན་སྒོམ་པའི་ཁང་བུ་ནས། །ཐུན་མཚམས་གསུམ་དུ་ཤར་མར་བྲིས་ནས་སྤྲིངས། །དེ་ལས་བྱུང་བའི་དགེ་ཚོགས་གངས་རིའི་ཏོག །སྟོན་ཟླའི་འོད་ཟེར་འཁྱུད་ལྟར་དཀར་བ་དེས། །རང་གཞན་ཐེ་ཚོམ་མུན་པ་ཀུན་བསལ་ནས། །ཆོས་རབ་རྣམ་འབྱེད་བློ་གྲོས་འཕེལ་གྱུར་ཅིག །ཅེས་པའང་བགྲོ་གླེང་པ་བསོད་ནམས་བསྟན་པས་བྲིས་པའི་ཡི་གེའི་ལན་དུ་ས་སྤྲེལ་ཟླ་༡༢པའི་ཚེས་༡༣ལའོ།། །།