གསང་ཆེན་སྔགས་ཀྱི་སྨོན་ལམ་རྡོ་རྗེའི་རྒྱ་མདུད་ཀྱི་རྣམ་པར་བཤད་པ་ཟབ་གསང་བདུད་རྩིའི་རོལ་མཚོ། ཀུན་དགའ་རྒྱལ་མཚན།

གསང་ཆེན་སྔགས་ཀྱི་སྨོན་ལམ་རྡོ་རྗེའི་རྒྱ་མདུད་ཀྱི་རྣམ་པར་བཤད་པ་ཟབ་གསང་བདུད་རྩིའི་རོལ་མཚོ་ཞེས་བྱ་བ་བཞུགས་སོ། །ན་མོ་རཏྣ་མཱུ་ལ་ཏྲ་ཡཱ་ཡ། གང་གི་ཆོས་ཉིད་སྒྲིབ་བྲལ་མཁའ་དབྱིངས་སུ། །ལྷན་སྐྱེས་སྐུ་བཞིའི་སྣང་བ་འབུམ་བརྡལ་བའི། །དཀོན་མཆོག་རྩ་གསུམ་རྒྱ་མཚོའི་ཐུགས་རྗེའི་ཟེར། །དད་བརྒྱའི་གེ་སར་བཞད་པས་ཅིར་ཡང་ལེན། །མི་འགྱུར་མཆོག་གི་འོད་གསལ་བདེ་བའི་དངོས། །འཕོ་མེད་ཟུང་འཇུག་རྡོ་རྗེའི་ཕྱག་རྒྱ་རུ། །ཡོངས་ཤར་གསང་འཛིན་དཔའ་བོ་གཏེར་ཆེན་རྗེའི། །ཞབས་ལ་དངོས་པོ་ཀུན་གྱི་ཕྱག་གིས་བཏུད། །འཁོར་འདས་ཤེས་བྱ་ཀུན་གྱི་ཆོས་ཅན་དང་། །ཆོས་ཉིད་རྗེས་ཞུགས་བློ་གྲོས་མི་ཟད་པའི། །འཇིགས་བྲལ་སྨྲ་བའི་སེང་གེ་ཆོས་ཀྱི་མཛོད། །འཁོར་ལོའི་དབང་ཕྱུག་གདོད་མའི་མགོན་པོས་སྐྱོང་། །མཆོག་གི་ཞལ་ལུང་དྲི་མེད་བདུད་རྩིའི་ཆར། །སྙིང་དབུས་དད་པའི་རོལ་མཚོར་སིམ་པ་ལས། །ཟབ་དོན་གསང་བའི་སྒྲ་ལྡན་ལེགས་བཤད་རླབས། །རབ་དཀར་ཟླ་བའི་ཕྲེང་བཞིན་འདི་ན་སྤེལ། །ཞེས་ཁྱད་པར་གྱི་དགོས་པ་དང་འབྲེལ་བའི་ཕྱིར་མཆོད་བརྗོད་དང་དམ་བཅའི་ཚིག་གིས་མཚམས་སྦྱར་ཏེ། གང་བཤད་པར་བྱ་བའི་ཆོས་ནི་གསང་ཆེན་བླ་ན་མེད་པའི་སྨོན་ལམ། རྡོ་རྗེའི་ཚིག་གི་རྒྱ་མདུད་ཅན་ཞེས་བྱ་བ་ཆོས་རྒྱལ་གཏེར་བདག་གླིང་པས་མཛད་པ་འདི་ཉིད་ཡིན་ལ། དེ་ཇི་ལྟར་འཆད་པ་ལ་གསུམ། བསྔོ་བའི་དཔང་པོ་གསོལ་བ། བསྔོ་རྒྱུའི་དགེ་རྩ་བསྟན་པ། བསྔོ་བ་དངོས་ཀྱི་ཚུལ་ལོ། །དང་པོ་ནི། བླ་མ་ཡི་དམ་ལྷ་ཚོགས་དགོངས་སུ་གསོལ། །ཞེས་པ་སྟེ། གུ་རུའི་སྒྲ་ལས་དྲངས་ན། བླ་མ་ཞེས་པ་ལུང་རྟོགས་ཡོན་ཏན་གྱི་ཁུར་ལྕི་ཞིང་། སྐྱབས་གནས་ཇི་སྙེད་པའི་སྤྱི་གཟུགས་སམ། ངོ་བོ་ཉིད་ཀྱི་ན་བླ་ན་མ་མཆིས་པའི་དོན་ཏེ། དེ་ཡང་དབང་བསྐུར། རྒྱུད་དོན་འགྲོལ། དེ་ཁོ་ན་ཉིད་མན་ངག་སྟོན་པའི་སྒོ་ནས་རང་རྒྱུད་སྨིན་གྲོལ་དུ་བྱེད་པའི་བཀའ་དྲིན་གང་ལས་ཐོབ་པ་དེ་ནི་རྩ་བའི་བླ་མ་ཡིན་ལ། དེ་དང་ངོ་བོ་དབྱེར་མེད་པ་དགོངས་རིག་རྣ་བར་བརྒྱུད་པའི་སྐུ་གསུམ་རིག་འཛིན་གྱི་ཚོགས་གྲངས་མེད་པ་དང་བཅས་པ་རྣམས་སོ། །ཡི་དམ་ནི། རང་གི་སྒོ་གསུམ་དང་ལྷའི་གསང་གསུམ་དབྱེར་མེད་དུ་ཤེས་པའི་ཡིད་ཀྱི་ལམ་ཁྱེར་ལས་མི་འདའ་བའི་དམ་ཚིག་གིས་བསྒྲུབ་པར་བྱ་བའི་ཡེ་ཤེས་པ་སྟེ། དེའི་མཚན་ཉིད། ལྷན་སྐྱེས་བདེ་བ་ཆེན་པོ་རྟོགས་པའི་ཡེ་ཤེས་མཐར་ཕྱིན་པ་དང་། རྣམ་པ་ཀུན་ལྡན་གྱི་སྟོང་གཟུགས་དཀྱིལ་འཁོར་རབ་འབྱམས་སུ་ཤར་བ་གཉིས། རོ་གཅིག་ཏུ་གྱུར་པའི་ཟུང་འཇུག་ཡེ་ཤེས་ཀྱི་སྐུ་ཡིན་ལ། དེ་ཡང་རྒྱུད་སྡེ་བཞི་དང་འབྲེལ་བའི་ཞི་ཁྲོའི་ལྷ་ཚོགས་དཔག་ཏུ་མེད་པར་སྣང་ཡང་། གདུལ་བྱའི་མོས་ངོར་ཐ་དད་པ་ཙམ་ལས། དོན་དུ་ན་བདག་ཅག་གི་སྟོན་པ་གདོད་མའི་སངས་རྒྱས་ཉིད་ཀྱི་ཡེ་ཤེས་སྒྱུ་མའི་སྣང་བརྙན་འབའ་ཞིག་ཏུ་ཤེས་པར་བྱའོ། །གཞན་ཡང་ཡི་དམ་གྱི་ལྷ་དང་སྤྱོད་ཡུལ་མཐུན་པར་འཇུག་ནུས་པའི་ཡེ་ཤེས་ལ་ཆེས་དབང་བ་གནས་གསུམ་གྱི་དཔའ་བོ་དང་རྣལ་འབྱོར་མ་དམ་ཅན་ཆོས་སྐྱོང་དང་བཅས་པ་སྟེ། དེ་ལྟ་བུའི་རྩ་བ་གསུམ་གྱི་ལྷ་ཚོགས་རྣམས། རང་བཞིན་ཆོས་ཀྱི་དབྱིངས་ལས་རྣམ་འགྱུར་གཟུགས་སྐུའི་རོལ་མོ་མཁའ་ཁྱབ་ཏུ་སད་དེ། དགེ་རྩ་རྫོགས་བྱང་དུ་བསྔོ་བའི་བདེན་དཔང་དང་། སྨོན་ལམ་འགྲུབ་པའི་མཐུན་འགྱུར་གྱི་སླད་དུ། ཐུགས་བརྩེ་བ་ཆེན་པོས་གཟིགས་ཤིང་དགོངས་སུ་གསོལ་ཞེས་མཁྱེན་པ་གསོལ་བའོ། །གཉིས་པ་བསྔོ་རྒྱུའི་དགེ་རྩ་བསྟན་པ་ནི། །དེང་འདིར་བརྩོན་པས་བསྒྲུབས་པའི་དགེ་བ་དང་། །དུས་གསུམ་བསགས་དང་ཡོད་པའི་དགེ་བ་རྣམས། །བསྡོམ་སྟེ་ཞེས་པས་བསྟན་ཏེ། དེང་འདིར་ཚོམ་བུ་ཚོགས་སྒྲུབ་སོགས་ཡུལ་དགེ་བ་ལ་སྤྲོ་བའི་སེམས་ཀྱིས་དྲངས་ཏེ་སྒོ་གསུམ་ཆིག་དྲིལ་དུ་བརྩོན་པས་བསྒྲུབས་པའི་དགེ་བ་འདི་དང་། དེས་མཚོན་ཏེ། ཕལ་པོ་ཆེ་ལས། འགྲོ་ཀུན་དགེ་བ་ཇི་སྙེད་ཡོད་པ་དང་། །བྱས་དང་བྱེད་འགྱུར་དེ་བཞིན་བྱེད་པ་གང་། །ཞེས་གསུངས་པ་ལྟར་རང་གཞན་སྐྱེ་འགྲོ་ཡོངས་ཀྱིས་དུས་གསུམ་དུ་བྱས་པའི་བསགས་པའི་དགེ་བ་དང་། རང་བཞིན་གྱིས་ཡོད་པའི་དགེ་ཚོགས་ཆོས་ཉིད་བདེ་གཤེགས་སྙིང་པོའི་ཁམས་དགེ་བ་དང་བཅས་པ་རྣམས་བློས་གཅིག་ཏུ་བསྡོམ་སྟེ་བསྔོ་བ་ཡིན་ལ། འདིར་སྡོམ་གསུམ་རབ་དབྱེར། དྭགས་བརྒྱུད་པ་ཁ་ཅིག་གི་འདོད་པ་འགོག་པའི་སླད་དུ། ཡོད་པའི་དགེ་བ་སེམས་ཉིད་བདེ་གཤེགས་སྙིང་པོ་ཞེས། ཆོས་ཉིད་ལ་མཚན་མར་བཟུང་ནས་བསྔོ་བར་འདོད་པ་འདི་གྲངས་ཅན་གྱིས་ཤེས་རིག་གི་སྐྱེས་བུར་སྒྲོ་བཏགས་པའི་ལོག་རྟོག་དང་མཚུངས་པར་བཀོད་ནས་དགག་སྒྲུབ་མཛད་པ་ནི། གསོར་མི་རུང་བའི་ལྟ་ངན་གྱི་ཚང་ཚིང་ལྷག་མེད་དུ་སྲེག་པ་ལ་དུས་མཐའི་ཞུགས་ཆེན་དང་འདྲ་བའི་ལུང་རིགས་ཚད་མར་ངེས་ཏེ། ཕྱོགས་སྔ་མར་གནད་ཐོག་ཏུ་མེ་བཙར་སོང་བའི་ཕྱིར། དེ་ཡང་མདོ་ལས། འོད་སྲུང་གང་ཟག་ཏུ་ལྟ་བ་རི་རབ་ཙམ་བསྐྱེད་པ་ནི་སླའི། སྟོང་པ་ཉིད་ལ་ལྟ་བ་ནི་དེ་ལྟར་མ་ཡིན་ནོ། །ཞེས་དང་། དབུ་མའི་རྩ་བར། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་སོགས་གསུངས་པ་ལྟར་རོ། །དེ་ལྟ་ནའང་། སྤྱི་ཙམ་དུ་ཆོས་ཉིད་ལ་རང་བཞིན་གྱིས་ཡོད་པ་ཞེས་པ་དང་། དེ་ཉིད་དགེ་བ་ཡིན་པར་བཤད་པ་དང་། དེ་ལ་བསྔོ་བའི་བརྡའ་སྦྱོར་ཙམ་འགོད་པ་ལ་ནི་འགལ་བར་མི་བསམ་སྟེ། དང་པོ་ལྟར་ན། མདོ་སྡེ་ལས། ཐོག་མ་མེད་དུས་ཅན་གྱི་དབྱིངས། །སེམས་ཅན་ཀུན་གྱི་གནས་ཡིན་ཏེ། །འདི་ཡོད་པས་ན་འཁོར་བ་དང་། །མྱ་ངན་འདས་པ་བྱུང་བར་འགྱུར། །ཞེས་དང་། ཆོས་དབྱིངས་བསྟོད་པ་ལས། གང་ཞིག་ཀུན་ཏུ་མ་ཤེས་ན། །སྲིད་པ་གསུམ་དུ་རྣམ་འཁོར་བ། །སེམས་ཅན་ཀུན་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་འདུད། །ཞེས་དང་། ཏིང་འཛིན་རྒྱལ་པོར་ཡང་། བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་ཆོས་ཉིད་བདེ་གཤེགས་སྙིང་པོ་ལ་རང་བཞིན་འགྱུར་བ་མེད་པ་ཙམ་གྱི་ངོས་ནས་ཡོད་པའི་སྒྲས་བསྙད་པ་མང་དུ་འབྱུང་བའི་ཕྱིར་དང་། དེ་ཉིད་དགེ་བར་བཤད་པའང་། སྤྱིར་དགེ་བ་ལ། ངོ་བོ་ཉིད་དང་། མཚུངས་པར་ལྡན་པ་དང་། དོན་དམ་པའི་དགེ་བ་གསུམ་ལས། ཕྱི་མ་འདི་དེ་བཞིན་ཉིད་ལ་བཤད་པས། དེ་དང་ཆོས་དབྱིངས་བདེ་གཤེགས་སྙིང་པོ་གཅིག་པར་མ་ཟད། རྒྱན་སྟུག་པོ་བཀོད་པའི་མདོ་ལས་ཀྱང་། ཀུན་གཞི་རང་ལུགས་དགེ་བ་ནི། །རྒྱལ་སྲས་རྣམས་ཀྱིས་མཐོང་ཐོས་ཏེ། །ཀུན་གཞི་མཆོག་ཏུ་དགེ་བ་ནི། །ཞེས་དང་། ལང་ཀར་གཤེགས་པ་ལས། སེམས་ཀྱི་རང་བཞིན་འོད་གསལ་ཏེ། །དེ་བཞིན་གཤེགས་པའི་སྙིང་པོ་དགེ། །ཞེས་སོགས་གསུངས་པའི་ཕྱིར་རོ། །འོ་ན་སེམས་ཙམ་པ་ལྟར་ཀུན་གཞིའི་རྣམ་ཤེས་ལ་བདེ་གཤེགས་སྙིང་པོ་བདེན་གྲུབ་འདོད་པ་དང་མཚུངས་སམ་སྙམ་ན། མི་མཚུངས་ཏེ། བདེན་གྲུབ་འདོད་པ་གྲུབ་མཐའི་བློ་སྐྱོན་ཡིན་གྱི། འདིར་སྟོང་གསལ་འགག་མེད་ཀུན་ཁྱབ་ཀྱི་རང་བཞིན་མཐའ་དང་བྲལ་བའི་ཆོས་ཉིད་ལ་བདེར་གཤེགས་སྙིང་པོར་བཞེད་པའི་ཕྱིར་རོ། །དེ་ཉིད་ལ་བསྔོ་བའི་ཐ་སྙད་ཀྱང་གསུངས་ཏེ། རྒྱན་སྟུག་པོ་བཀོད་པར། ཉི་མའི་འོད་ཟེར་ཕོག་པ་ན། །དེ་དག་སོ་སོའི་ཡོན་ཏན་འབྱིན། །དེ་བཞིན་ཀུན་གཞིའི་རྣམ་ཤེས་འདི། །བདེ་གཤེགས་སྙིང་པོའི་ཁམས་དགེ་བ། །བསྔོས་པར་གྱུར་ན་འབྲས་བུ་འབྱིན། །ཞེས་གསུངས་པས་མཚོན་ནོ། །དེ་ཇི་ལྟར་བསྔོ་བའི་ཚུལ་ནི། ཆོས་ཉིད་སེམས་ཀྱི་གནས་ལུགས་རང་བཞིན་གྱིས་དག་པའི་དགེ་བ་ཉིད། གློ་བུར་གྱི་དྲི་མ་ལས་གྲོལ་ཏེ་རང་གནས་ཆོས་སྐུའི་ཡོན་ཏན་མངོན་དུ་གསལ་བར་འདོད་པའི་སྒོ་ནས། ཁམས་བྱང་ཆུབ་ཏུ་འགྱུར་བར་སྨོན་པའམ་བསྔོ་བ་ཡིན་ལ། ཚུལ་དེ་ལྟར་བྱས་ན་གཞི་འབྲས་དབྱེར་མེད་ཀྱི་དོན་ལའང་ངེས་ཤེས་དྲངས་པའི་ཕྱིར། འདི་སྔོན་དུ་བཏང་ནས་དགེ་རྩ་གཞན་ཐམས་ཅད་ཀྱང་གཞི་འབྲས་མཚམས་སྦྱོར་གྱི་རྒྱུ་ཁོ་ནར་བསྔོ་ཤེས་པ་བྱུང་ཚེ་ཐེག་ཆེན་སྔགས་ལུགས་ཀྱི་བསྔོ་ཚུལ་ཡང་དག་པའོ། །དོན་དམ་པ་ནི་ཆོས་ཉིད་ཙམ་དུ་མ་ཟད་དགེ་རྩ་གཞན་ལའང་མཚན་འཛིན་མ་སྤངས་ན་བསྔོ་བར་མི་ཚུད་ཅིང་། སྤངས་ན་བསྔོ་བ་མཚན་ཉིད་པ་ཡིན་པའི་ཚུལ། སྡུད་པ་ལས། གལ་ཏེ་མཚན་མར་བྱེད་ན་བྱང་ཆུབ་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཅེས་སོགས་གསུངས་པ་ལྟར། འཁོར་གསུམ་མི་རྟོག་པའི་ཤེས་རབ་ཁྱད་པར་ཅན་དང་ནམ་ཡང་འབྲལ་མི་རུང་ལ། དེས་ན་དུག་མེད་ཀྱི་བསྔོ་བ་ཇི་ལྟ་བ་བཞིན་འཕགས་པའི་ས་མ་གཏོགས་མེད་ཀྱང་སོ་སྐྱེའི་སར། རྒྱལ་བ་སྲས་བཅས་ཀྱིས་ཇི་ལྟར་བསྔོས་པའི་རྗེས་སུ་སློབ་ཅིང་། དེ་བཞིན་དུ་བསྔོས་ན་འཁོར་གསུམ་ཡང་དག་གི་བསྔོ་བ་རྗེས་མཐུན་པར་འགྱུར་ལ། དེས་བསྔོ་བ་མཚན་ཉིད་པའི་གོ་ཡང་ཆོད་པར་གསུངས་ཏེ། དཔེར་ན་ཚོང་མི་ཤེས་པས་རང་གི་ནོར་རྫས་ཚོང་པ་མཁས་པ་གཞན་ལ་བཅོལ་ན་དེ་དང་ཁྱད་མེད་པའི་ཁེ་སྐྱེད་ཐོབ་པ་བཞིན་ནོ་སྙམ་དུ་དགོངས་སོ། །སྤྱི་དོན་གསུམ་པ་བསྔོ་བ་དངོས་ལ། རང་དོན་འབྲས་བུ་དང་ལམ་གྱི་ཆེད་དུ་བསྔོ་བ་དང་། གཞན་དོན་བསྟན་པ་དང་འགྲོ་བའི་དོན་དུ་བསྔོ་བ་གཉིས། དང་པོ་ལའང་། མཐར་ཐུག་འབྲས་བུའི་ཆེད་དུ་བསྔོ་བ་དང་། གནས་སྐབས་ལམ་གྱི་ཆེད་དུ་བསྔོ་བ་གཉིས་ལས། དང་པོ་ནི། བླ་མེད་བྱང་ཆུབ་ཆེན་པོར་བསྔོ། །ཞེས་པ་སྟེ། ཆེད་དུ་བྱ་བ་གཞན་དོན་དུ། བྱང་ཆུབ་གསུམ་གྱི་ནང་ནས་བླ་ན་མེད་པའི་བྱང་ཆུབ་མི་གནས་པའི་མྱང་འདས་ཆེན་པོ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུར་བསྔོ་བ་སྟེ། གཞན་དོན་དུ་དགེ་རྩ་རྫོགས་བྱང་དུ་སྟོབ་པ་ཐེག་ཆེན་བསྔོ་བའི་མཚན་ཉིད་ཡིན་པའི་ཕྱིར་རོ། །དེ་ཡང་། ཐོབ་བྱ་སངས་རྒྱས་ལ་སྤངས་རྟོགས་ཀྱི་ཡོན་ཏན་ཁྱད་པར་ཅན་མངའ་བ་ལ་དམིགས་ནས་དེ་ཉིད་ཐོབ་པའི་ཆེད་དུ་བསྔོ་བ་མ་ཡིན་གྱི། ཅི་སྟེ་ན་བྱང་སེམས་ཀྱི་དོན་དུ་ཉེར་བྱ་ནི་གཞན་དོན་འབའ་ཞིག་ཡིན་པའི་ཕྱིར། ཇི་སྐད་དུ། གཞན་དོན་ཕུན་ཚོགས་སངས་རྒྱས་ཀྱི། །འབྲས་བུ་གཙོ་བོ་ཡིན་པར་བརྗོད། །ཅེས་པ་ལྟར། སངས་རྒྱས་ལ་ནི་ནམ་མཁའ་ཇི་སྲིད་བར་གཞན་དོན་ཉམས་པ་མེད་པའི་ཕྲིན་ལས་ཕུན་སུམ་ཚོགས་པ་ཡོད་ཅིང་། བདག་གིས་ཀྱང་དེ་ཐོབ་ན་དེ་འདྲ་བར་འགྱུར་རོ་སྙམ་དུ་རྟག་ཁྱབ་ལྷུན་གྲུབ་ཀྱི་ཕྲིན་ལས་ཁོ་ནའི་རྒྱུར་བསྔོ་དགོས་ཏེ། བཟང་པོ་སྤྱོད་པ་ལས། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་གསུངས་པ་བཞིན་ནོ། །གཉིས་པ་ལམ་གྱི་ཆེད་དུ་བསྔོ་བ་ལ། ལམ་གྱི་རྟེན་ཕུན་སུམ་ཚོགས་པར་བསྔོ་བ་དང་། ལམ་དངོས་ཉམས་སུ་ལེན་པར་བསྔོ་བ། ལམ་གྱི་བྱེད་ལས་འགྲུབ་པར་བསྔོ་བ། ལམ་གྱི་མཐུན་རྐྱེན་ཚང་བར་བསྔོ་བ་དང་བཞི་ལས། དང་པོ་ལམ་གྱི་རྟེན་ནི། དེང་ནས་བྱང་ཆུབ་སྙིང་པོར་མཆིས་ཀྱི་བར། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་ལྡན། །དཔལ་ལྡན་རྡོ་རྗེའི་ཐེག་ལ་ངེས་གནས་ཤོག །ཅེས་པ་སྟེ། དེང་གི་སྐྱེ་སྲིད་འདི་ནས་བརྩམས་ཏེ། ཕྱིའི་བྱང་ཆུབ་སྙིང་པོ་རྡོ་རྗེའི་གདན་གྱི་ཤིང་དྲུང་དུ་མཆིས་ཤིང་། ནང་ལྟར་ན་སེམས་ཉིད་བདེ་གཤེགས་སྙིང་པོའི་ཁམས་སྒྲིབ་བྲལ་དུ་གྱུར་ཏེ་མངོན་པར་རྫོགས་པའི་བྱང་ཆུབ་ཀྱི་བར་དེ་སྲིད་དུ། སྤྱིར་མཐོ་རིས་ཀྱི་ཡོན་ཏན་བདུན་གྱིས་མཛེས་པའི་དལ་འབྱོར་གྱི་རྟེན་དང་། ཁྱད་པར་དེ་བཞིན་གཤེགས་པའི་རིགས་ཐེག་ཆེན་གསང་སྔགས་ཀྱི་ལམ་ལ་ཐོག་མ་ཉིད་ནས་འཇུག་སྒོའི་རྟེན་འབྲེལ་འགྲིགས་པའི་སྐལ་བཟང་ཅན་དུ་སྐྱེ་བ་དང་། སྐྱེས་ཐོབ་ཀྱི་ཤེས་རབ་དང་། སྦྱོར་བྱུང་གི་བློ་གྲོས་མཆོག་ཏུ་གསལ་བས་ཤེས་བྱ་བདེན་གཉིས་ཀྱི་ཚུལ་ལ་ཐོགས་མེད་དུ་འཇུག་ནུས་ཤིང་། རང་གི་ཡོན་ཏན་ལ་རློམས་པ་དང་། ཕ་རོལ་ཁྱད་དུ་གསོད་པའི་ང་རྒྱལ་མེད་ཅིང་དག་སྣང་ངང་གིས་ཆེ་བ་དང་། ཆོས་ཀྱི་རྩ་བ་བྱང་ཆུབ་ཀྱི་སེམས་སྙིང་རྗེ་ཆེན་པོའི་རིགས་སད་ཅིང་རྒྱས་པ་དང་། མཚན་ཉིད་ཀུན་ལྡན་གྱི་བླ་མ་ལ་རྒྱུ་མཚན་ཤེས་ནས་དད་པ་ཐོབ་པའི་མོས་གུས་འགྱུར་མེད་དང་ལྡན་པ། ཇི་ལྟར་ཁས་བླངས་པའི་སྤང་བླང་དམ་ཚིག་གི་གནས་ལ་སྲོག་ལྟར་གཅེས་པ་སྟེ། དོན་འདི་དག་དཔལ་བདེ་མཆོག་གི་རྒྱུད་ལས། རིགས་སུ་སྐྱེས་དད་དམ་ཚིག་ཅན། །སྐྱོ་མེད་ཀྱེ་ཡིི་རྡོ་རྗེ་སྟོན། །བླ་མ་ལ་གུས་སྙིང་རྗེར་ལྡན། །སྐྱེ་ཤིང་སྐྱེ་བར་འགྱུར་བར་ཤོག །ཅེས་དང་། ལག་པས་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང་། །བཙུན་མོའི་ཤུ་ཀྲ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བར་ཤོག །ཅེས་གསུངས་པ་ལྟར་རོ། །རྟེན་ཁྱད་པར་ཅན་དེ་ལྟ་བུ་ལ་བརྟེན་ནས། རྒྱལ་ཀུན་བགྲོད་པ་གཅིག་པའི་ལམ་ཡོན་ཏན་ཐམས་ཅད་ཀྱི་འབྱུང་གནས་སུ་གྱུར་པའི་དཔལ་དང་ལྡན་པ། གཞི་ལྟ་བ་བདེན་གཉིས་དབྱེར་མེད་ཀྱི་དོན། ལམ་སྒོམ་པ་བསྐྱེད་རྫོགས་དབྱེར་མེད་དུ་བསྒོམས་པས། འབྲས་བུ་མཐར་ཕྱིན་སྐུ་བཞི་དབྱེར་མེད་ཀྱི་གོ་འཕང་ལ་བདེ་མྱུར་དུ་འདེགས་པས་ན་རྡོ་རྗེའི་ཐེག་པ་སྟེ། ཟབ་མོའི་ལམ་དེ་ལ་ཐེ་ཚོམ་བྲལ་བའི་ངེས་ཤེས་ཐོབ་ནས་ཚུལ་བཞིན་དུ་སྤྱོད་ཅིང་གནས་པར་ཤོག་ཅིག་པའོ། །དེ་ཡང་དགེ་རྩ་འདིས་དེ་དང་དེ་ལྟ་བུར་གྱུར་ཅིག་ཅེས་བསྔོ་སྨོན་གཞི་མཐུན་དུ་བྱ་བའི་དོན་ཚིག་མཐའ་གཞན་ཀུན་ལའང་དྲན་དགོས་སོ། །གཉིས་པ་ལམ་དངོས་ཉམས་སུ་ལེན་པར་བསྔོ་བ་ལ། ལམ་སྤྱིའི་ཆེད་དུ་བསྔོ་བ་དང་། ལམ་བྱེ་བྲག་གི་ཆེད་དུ་སྨོན་པ་གཉིས་ལས། དང་པོ་ནི། དབང་གིས་སྨིན་ཅིང་དམ་ཚིག་སྡོམ་པར་ལྡན། །རིམ་གཉིས་ལམ་ལ་བསྙེན་སྒྲུབ་མཐར་ཕྱིན་ནས། །དཀའ་བ་མེད་པར་རིག་འཛིན་གོ་འཕང་བགྲོད། །དངོས་གྲུབ་རྣམ་གཉིས་བདེ་བླག་འགྲུབ་གྱུར་ཅིག །ཅེས་པ་སྟེ། གསང་སྔགས་ལ་འཇུག་པའི་སྒོ་ནི་དབང་གིས་ཕྱེད་དགོས་ཤིང་། དེ་མེད་ན། གསང་སྔགས་རང་ཉིད་ཀྱིས་ལེན་པའི་ཉེས་དམིགས་ཐོབ་པ་དང་། ལམ་ལ་འབད་པ་དོན་མེད་དུ་འགྱུར་བའི་ཕྱིར་ཐོག་མར་ཁོ་ནར་དབང་ལེན་དགོས། དབང་དེ་ཡང་། གདོད་ནས་གྲུབ་པའི་རྩ་རླུང་ཐིག་ལེ་དྲི་བཅས་ཡེ་ཤེས་ཀྱི་ཁམས་ཏེ། འབྲས་བུ་སྐུ་བཞིའི་ས་བོན་ནམ། བསྒྲུབ་གཞི་རང་ལ་གནས་པ་ནི་ཉེར་ལེན་གྱི་རྒྱུ་དང་། དེ་ཉིད་གསོས་འདེབས་པའམ། རང་གནས་ཀྱི་ཡེ་ཤེས་སད་པར་བྱེད་པའི་ལྷན་ཅིག་བྱེད་རྐྱེན་ནི་ཐོག་མའི་སྨིན་བྱེད་ཉིིད་ཡིན་ལ། དེ་ཡང་རྒྱུ་རྟེན་གྱི་དཀྱིལ་འཁོར་སོ་སོ་ལ་བརྟེན་ནས། དཀྱིལ་འཁོར་གྱི་གཙོ་བོ་དང་དབྱེར་མེད་པའི་བླ་མ་སྐུ་བཞིའི་བདག་ཉིད་ཅན་ལས་དབང་བཞི་རྫོགས་པར་ལེན་ཅིང་རྒྱུད་སྨིན་ངེས་སུ་བསྒྲུབ་དགོས། སྨིན་པའི་ཚད་ཀྱང་རབ་དུས་དེར་དབང་དོན་གྱི་ཡེ་ཤེས་སྒྲ་ཇི་བཞིན་པ་སྐྱེ་བ་སྟེ། སྣང་སྲིད་དག་མཉམ་དུ་ཤར་བའི་ལྷར་སྣང་། ལས་རླུང་དྷུ་ཏིར་ཐིམ་པའི་གསལ་སྟོང་། ཁམས་ཀྱི་ཞུ་བདེས་དྲངས་པའི་བདེ་སྟོང་། ཉམས་ཀྱི་སྦུབས་ལས་གྲོལ་བའི་འོད་གསལ་རྣམས་རིམ་པ་ལྟར་མངོན་དུ་གྱུར་ནས་གྲོལ་བ་དང་། དེ་ལྟར་མིན་ཀྱང་དབང་དོན་གྱི་ཡེ་ཤེས་དེ་དང་དེ་རྒྱུད་ལ་སྐྱེ་ངེས་ཀྱི་ནུས་པ་ཐོབ་ཅིང་རྒྱུར་འགྱུར་བའི་ཁྱད་པར་ཡང་དབང་གིས་སྨིན་པར་བརྩི་དགོས་ཏེ། ཇི་སྐད་དུ། རྣོ་ལ་ངར་བཏགས་ཇི་བཞིན་དུ། །ནུས་པ་སྐྱེས་པ་ཐོབ་པའི་ཚད། །ཅེས་པ་ལྟར་རོ། །དེ་ལྟར་དབང་ཐོབ་ནས་དབང་དུས་སུ་ཁས་བླངས་པའི་དམ་ཚིག་དང་སྡོམ་པ་ལ་གནས་དགོས་ཤིང་། དེ་དང་མི་ལྡན་ན་རྒྱུད་ཆུད་ཟོས་སུ་འགྱུར་བ་དང་། ལྡན་ན་ལམ་སྒྲུབ་པ་དོན་ཡོད་དུ་འགྱུར་བའི་ཕྱིར། གསང་སྙིང་ལས། སྔགས་འཆང་རྣམས་དོན་ཡོད་པར་བྱ་བའི་ཕྱིར་དམ་ཚིག་ཆེན་པོ་འདི་ཆེད་དུ་བརྗོད་དོ། །ཞེས་གསུངས་སོ། །དེས་གང་བསྲུང་བྱའི་དམ་ཚིག་ཀྱང་སྤྱི་དང་ཁྱད་པར་ལྷག་པས་བསྡུས་པའི་རྩ་བ་དང་ཡན་ལག་གི་རིགས་སུ་གནས་པ་རྣམས་ཏེ། དེ་ལས་མི་འདའ་བའི་ཆ་ནས་དམ་ཚིག་དང་། དམ་བཅས་ཟིན་པའི་ཆ་ནས་སྡོམ་པའང་ཡིན་པས་ན་སྔགས་སྡོམ་དང་དམ་ཚིག་ལྡོག་པས་དབྱེ་བ་ཙམ་ལས་ངོ་བོ་གཅིག་གོ། །ཇི་ལྟར་སྲུང་ཚུལ་ཡང་ཐབས་ཤེས་ཁྱད་པར་ཅན་གྱིས་འོག་མའི་མཚན་རྟོག་འགོག་ནུས་ན། སོ་བྱང་གི་སྡོམ་པའང་སྔགས་ཀྱི་དམ་སྡོམ་དུ་གནས་འགྱུར་ཟིན་པས་དེ་ཉིད་ལྟར་བསྲུང་བ་དང་། གལ་ཏེ་གནས་འགྱུར་མ་ཐུབ་ན་དགག་དགོས་ཀྱི་གནད་བརྩིས་ཏེ་སྡོམ་གསུམ་འགལ་མེད་དུ་སྲུང་བའི་སྒོ་ནས་དམ་ཚིག་དང་སྡོམ་པ་རྒྱུད་ལ་ལྡན་པས་གཞི་བཟུང་ངོ་། །དེ་ནས་བསྐྱེད་རྫོགས་རིམ་པ་གཉིས་ཀྱི་ལམ་དངོས་ལ་བསྙེན་སྒྲུབ་ཡན་ལག་བཞི་ལྡན་གྱིས་འཇུག་སྟེ། དེ་ལའང་། བསྐྱེད་རིམ་རྐྱང་པ་དང་། བསྐྱེད་རྫོགས་ཟུང་འཇུག་གི་ལམ་གཉིས་ལས། དང་པོ་ལྟར་ན། སྟོང་པ་ཆེན་པོའི་ཏིང་ངེ་འཛིན་ལས། ཀུན་སྣང་སྙིང་རྗེའི་འཕེན་པས་གཙོ་བོར་བསྐྱེད་རིམ་ལྷའི་གསལ་སྣང་ལ་རྩེ་གཅིག་པའི་བསམ་གཏན་ཁོ་ནས་ཚོགས་སྦྱོར་གྱི་ལམ་བགྲོད་ཅིང་། བོགས་འདོན་ཚོགས་སྒྲུབ་ཀྱི་སྤྱོད་པ་ལས་རྒྱ་དང་ཡེ་རྒྱ་ལ་བརྟེན་པའི་ཁྱད་པར་གྱིས། འདོད་གཟུགས་ཀྱི་ལྷ་དང་སྐལ་བ་མཉམ་པའི་རིག་འཛིན་གྲུབ་ནས་རྟེན་དེར་རྫོགས་རིམ་ལམ་གྱིས་ཟག་མེད་ལ་སྦྱོར་བ་ཡིན་ལ། དེའི་འཇུག་ཚུལ་ཡང་། སྦྱོར་བ་ཆོ་གའི་ཡན་ལག་རྣམས་རྫོགས་ནས་དེ་བཞིན་ཉིད་སྒོམ་པ་ཡན་བསྙེན་པ། སྙིང་རྗེ་སྒྱུ་མའི་ཏིང་འཛིན་ལ་གོམས་པ་ཉེ་བསྙེན། ཕྱག་རྒྱ་གཅིག་སྤྲོས་ལ་བརྟན་པ་ཐོབ་ནས་ཚོགས་ལམ་གྱི་ཡོན་ཏན་རྫོགས་པ་ནི་སྒྲུབ་པ། བསྐྱེད་རིམ་གྱད་དུ་གྱུར་ཏེ་སྦྱོར་ལམ་དུ་སྤྱོད་པས་བོགས་དབྱུང་བའིི་སྒྲུབ་ཆེན་དང་བཞིའི་རིམ་པས་རང་ལམ་གྱི་འབྲས་བུ་ཐུན་མོང་གི་རིག་འཛིན་ལ་སྦྱོར་བའོ། །གཉིས་པ་བསྐྱེད་རྫོགས་ཟུང་འཇུག་གི་ལམ་ནི་ཐབས་ལམ་དང་། གྲོལ་ལམ་གཉིས་ཡིན་ལ། དེ་ཡང་གསང་སྔགས་བླ་མེད་ཀྱི་ལམ་ཐམས་ཅད་དབང་བཞིའི་ལམ་གྱི་ངོ་བོ་གྱུར་པའི་བསྐྱེད་རྫོགས་གཉིས་སམ། ཐབས་གྲོལ་གཉིས་ཀྱིས་མ་བསྡུས་པ་མེད་ཅིང་། སྤྱིར་ཐབས་ཤེས་དང་བྲལ་བའི་ལམ་གྱིས་སྲིད་པ་ལས་མི་གྲོལ་བས་ཐབས་གྲོལ་ཙམ་ཞིག་ནི་ཉན་ཐོས་ཐེག་པ་ནས་མཐར་ཐུག་ཨ་ཏི་ཡོ་གའི་བར་ཀུན་ལ་ཡོད་དགོས་ཀྱང་། འདིར་ནི་ཐབས་གྲོལ་ཁྱད་པར་ཅན་གྱི་དབང་དུ་བྱས་ནས་བཞག་གོ། །དེ་ལ་གྲོལ་ལམ་གྱི་ངོ་བོའམ་མཚན་གཞི་དངོས་ནི་ལྷག་པའི་བདེན་པ་དབྱེར་མེད་ཀྱི་ལྟ་བ་ཡུལ་མེད་རང་གསལ་དུ་མཐོང་བ་ཉིད་དང་། དེའི་རྒྱུ་ཐོས་བསམ་གྱི་ཤེས་རབ་དང་གྲོགས་ཏིང་ངེ་འཛིན་དང་བཅས་པ་ཡིན་ལ། ཐབས་ལམ་གྱི་མཚན་གཞི་དངོས་ནི། ལྟ་བ་དེ་རྟོགས་བྱེད་ཀྱི་ཐབས་ཁྱད་པར་ཅན། རྡོ་རྗེའི་ལུས་ལ་གནད་དུ་བསྣུན་པའི་དབང་གོང་མ་གསང་ཤེར་གྱི་ལམ་དང་། དེའི་གྲོགས་ཐ་མལ་སྣང་ཞེན་འགོག་པའི་བསྐྱེད་རིམ། ཞི་མཐའ་གནོན་བྱེད་ཀྱི་སྙིང་རྗེ་ཆེན་པོ་དང་བཅས་པ་རྣམས་ཡིན་ནོ། །དེ་གཉིས་ཀྱང་གང་རུང་རེ་རེས་ནི་འབྲས་བུ་ལ་སྦྱོར་མི་ནུས་པས་ཟུང་དུ་འཇུག་དགོས་ནའང་། རྟེན་གྱི་གང་ཟག་དབང་པོ་རྣོན་པོའི་འཇུག་ཡུལ་གཙོ་བོར་གྲོལ་ལམ་དང་། རྟུལ་པོའི་འཇུག་ཡུལ་ཐབས་ལམ་གཙོ་ཆེ་བ་ལ་དགོངས་ཏེ་སོ་སོར་གསུངས་སོ། །དེ་ལ་དང་པོ་གྲོལ་ལམ་ལའང་། རིམ་གྱིས་པ་དང་། ཅིག་ཆར་བ་གཉིས། དང་པོ་ལ་དབང་དུས་སུ་རྟོགས་གྲོལ་ཆིག་ཆོད་དུ་སོང་བ་ཅིག་ཆར་བའི་ཅིག་ཆར་དང་། གཏན་ཚིགས་ལ་བརྟེན་ནས་རྟོགས་གོམས་ཆིག་ཆོད་དུ་སྐྱེས་པ་ཅིག་ཆར་བའི་རིམ་གྱིས་པ་སྟེ། དེ་གཉིས་ཀྱང་རྟོགས་པ་སྐྱེ་མྱུར་བུལ་ཙམ་ལས་ལྟ་བ་རྟོགས་པ་དང་རྟོགས་གྲོལ་དུས་མཉམ་དུ་གྱུར། བསྐྱེད་རྫོགས་ཆིག་ཆོད་དུ་སོང་། དབང་བཞིའི་ལམ་ཅིག་ཆར་དུ་བགྲོད། བསྙེན་སྒྲུབ་བཞི་དུས་གཅིག་ཏུ་རྫོགས་ནས་འཕགས་ལམ་ཟུང་འཇུག་གི་ངོ་བོར་སོན་པ་ལ་ཁྱད་པར་མེད་དོ། །རིམ་གྱིས་པ་ལའང་། ཐབས་དང་གདམས་ངག་ལ་བརྟེན་ནས་ལྟ་བ་མངོན་སུམ་རང་ངོ་འཕྲོད་ཀྱང་། གཉེན་པོ་རྐྱེན་ཐུབ་ཏུ་མ་སྐྱེས་པས་ཡེངས་འཁྲུལ་དུ་ཤོར་བ་དག་གིས་ཡང་ཡང་བསྒོམས་པས། ཚེགས་ཆུང་ངུའི་དཔེའི་ཡེ་ཤེས་སྐྱེད་ནུས་པ་ནི་རིམ་གྱིས་པའི་ཅིག་ཆར་དང་། ངོ་སྤྲད་ཀྱང་རེ་ཞིག་མངོན་སུམ་རྟོགས་པའི་སྐལ་པ་མེད་པ་དག་སྔོན་དུ་བསགས་སྦྱོང་ལ་འབད་ཅིང་། ཡུན་རིང་དུ་བསྒོམས་པས་ཚེགས་ཆེན་པོས་ལྟ་དོན་ལ་སྦྱོར་དགོས་པ་ནི་རིམ་གྱིས་པའི་རིམ་གྱིས་པ་སྟེ། དེ་གཉིས་ཀྱང་རྟོགས་དཀའ་སླ་ཙམ་ལས། ལྟ་ཐོག་ཏུ་ཕྱིན་ཕན་ཆད་ལམ་བགྲོད་ཚུལ་གཅིག་ཡིན་ནོ། །འོ་ན་རིམ་གྱིས་པའི་ལམ་བགྲོད་ཚུལ་ཇི་ལྟར་ཞེ་ན། ལྟ་བ་སྟོང་ཆེན་དེ་བཞིན་ཉིད་ལ་ཉིན་པར་གྱི་ཉམས་ལེན་དང་། མཚན་མོ་གཉིད་ཀྱི་འོད་གསལ་སྦྲེལ་བའི་མཉམ་བཞག་ལ་རྒྱུན་བསྲིངས་ཏེ་གོམས་པས། རླུང་སེམས་དབུ་མར་འདུས་པའི་སྟོང་གཟུགས་ཀྱི་རྟགས་སྣང་རྫོགས་ནས་དཔེའི་ཡེ་ཤེས་སྒྲ་ཇི་བཞིན་པ་རྒྱུད་ལ་སྐྱེས་པའི་ཚེ། ཀུན་སྣང་སྙིང་རྗེའི་འཕེན་པ་ལས་བསྐྱེད་རྫོགས་ཟུང་འཇུག་སྣང་སྟོང་ཆུ་ཟླ་ལྟ་བུའི་ཕྱག་རྒྱ་གཅིག་སྤྲོས་ཀྱི་ལྷའི་འཁོར་ལོར་ལྡང་བ་དང་། དེ་ཉིད་སླར་ཡང་འོད་གསལ་དུ་བསྡུས་ནས་རླུང་སེམས་ཙམ་ལས་གྲུབ་པའི་སྒྱུ་ལུས་ཀྱི་ལྷ་སྐུར་བཞེངས་ཤིང་ཚོགས་སྒྲུབ་ཀྱི་སྤྱོད་པས་བོགས་བྱུང་སྟེ་ཟག་མེད་ལ་སྦྱོར་བའོ། །དེ་ཡང་ལྟ་བ་སྟོང་ཆེན་རྟོགས་པ་ཡན་བསྙེན་པ། སྟོང་ཉིད་སྙིང་རྗེ་དབྱེར་མེད་དུ་ཤར་བ་ཉེ་བསྙེན། དེ་ཉིད་ཀྱི་རང་གདངས་བསྐྱེད་རྫོགས་ཟུང་འཇུག་གི་ལྷ་སྐུར་ལྡང་བ་སྒྲུབ་པ། ཚོགས་སྒྲུབ་ཀྱི་ཉེ་རྒྱུ་ལ་བརྟེན་པ་སྒྲུབ་ཆེན་ཏེ་ཡན་ལག་བཞིའི་རིམ་པས་མཐར་ཕྱིན་ཏོ། །ལམ་འདི་ལ་ངེས་རྫོགས་ཁྱད་པར་ཅན་དང་། སྔར་བཤད་པའི་བསྐྱེད་རིམ་རྐྱང་པའི་ལམ་དེར་ངེས་རྫོགས་ཙམ་པོ་ཟེར། ངེས་རྫོགས་མཐར་ཕྱིན་པའི་གང་ཟག་གིས་བཤད་མ་ཐག་པའི་ལམ་ཡང་རྫོགས་ཅིག་ཆར་དུ་སྐྱེད་པ་ལ་མོས་སྒོམ་ཁྱད་པར་ཅན་དང་། མོས་པ་ལམ་བྱེད་ཙམ་གྱི་སྒོ་ནས་བཤར་སྒོམ་བྱེད་པ་ལ་མོས་སྒོམ་ཙམ་པོ་བར་གྲགས་ཤིང་། དེ་གཉིས་ལ་སློབ་ཚུལ་གྱི་སྒོ་ནས་སྨིན་སློབ་དང་མོས་སློབ་ཞེས་ཀྱང་བཤད་དེ་ཞར་ལ་འཕྲོས་པའོ། །གཉིས་པ་ཐབས་ལམ་ནི། སྤྱིར་གསང་སྔགས་བླ་མེད་ཀྱི་གདུལ་བྱ་ཡིན་པར་འདྲ་ཡང་གྲོལ་ལམ་པ་ལྟར་ཐབས་དང་གདམས་ངག་གིས་ངོ་སྤྲད་ཀྱང་དོན་སྤྱི་ཙམ་ལས་མངོན་སུམ་རྟོགས་མི་ནུས་པའི་དབང་པོ་རྟུལ་པོ་རྣམས་ཀྱིས་ནི་ཇི་ཙམ་བསྒོམ་ཀྱང་ཚེ་འདིར་དཔེའི་ཡེ་ཤེས་སྐྱེད་མི་ཐུབ་པས། དེ་དག་གིས་དབང་བཞིའི་ལམ་རིམ་ཅན་དུ་བགྲོད་པའི་ཐབས་ལམ་ལ་གཙོ་བོར་བརྟེན་དགོས་ཤིང་དེ་ཡང་བུམ་དབང་གི་ལམ། བསམ་གཏན་གསུམ་གྱི་མན་ངག་དང་ལྡན་པས་སྦྱོང་གཞི་སྦྱོང་བྱེད་ཚང་བའི་བསྐྱེད་རིམ་ཕྱག་རྒྱ་སྤྲོས་བཅས་མན་ཆད་ལ་བརྟན་པ་ཐོབ་ནས། སྐབས་དེར་གསང་དབང་གི་ལམ་སྟེང་སྒོ་ལ་གཅིག་ཏུ་བརྩོན་པས། རྩ་རླུང་སེམས་གསུམ་གནད་དུ་སོང་ནས་དབུ་མའི་དབྱིངས་སུ་སྲོག་ཐུར་འདྲེས་པ་ལས་སྟོང་བཞིས་དྲངས་པའི་འོད་གསལ་འཆར་ཞིང་། དེ་ལས་སྒྱུ་མ་ལྟ་བུའི་ལྷ་སྐུར་ལྡང་བ་ན་བསྐྱེད་རྫོགས་ཟུང་འཇུག་ཏུ་གྱུར། དེ་ནས་དབང་གསུམ་པའི་ལམ་གྱིས་བོགས་དབྱུང་ནས་བཞི་པའི་དོན་གྱི་འོད་གསལ་ལ་སྦྱོར་བ་ནི་ཐབས་ལམ་རིམ་གྱིས་པ་སྟེ། འདི་ཡང་། རྟེན་བསྐྱེད་རིམ་བསྟན་པ་ཡན་བསྙེན་པ། འཁྲུལ་འཁོར་དང་བཅས་པའི་རླུང་སྦྱོར་ལ་འདྲིས་པ་ཉེ་བསྙེན། དཔྱིད་ཐིག་འབར་འཛག་གི་ལམ་ལས་སྣང་གསུམ་གྱི་ཡེ་ཤེས་སྐྱེད་པ་སྒྲུབ་པ། གསང་བའི་སྤྱོད་པས་བོགས་དབྱུང་བ་སྒྲུབ་ཆེན་ཏེ་བཞིའི་སྒོ་ནས་ཟག་མེད་ལ་སྦྱོར་རོ། །ཡང་བསྐྱེད་རིམ་དང་རྩ་རླུང་ལ་ངེས་པ་ཐོབ་པའི་གང་ཟག་གིས། གཙོ་བོར་འོག་སྒོ་ཁམས་གསུམ་རོལ་པའི་མན་ངག་ལ་བརྟེན་ནས། དགའ་བཞི་ལུགས་འབྱུང་གི་མཐར་དངོས་པོ་ལྷན་ཅིག་སྐྱེས་པའི་ཡེ་ཤེས་དང་། ལུགས་ལྡོག་གི་མཐར་བདེ་བའི་ཉམས་ཞེན་དང་བྲལ་བའི་རང་བཞིན་ལྷན་སྐྱེས་ཀྱི་ཡེ་ཤེས་བསྐྱེད་ནས། བོགས་འདོན་གཞན་ལ་ལྟོས་མི་དགོས་པར་དེ་ཉིད་དུ་ཟག་མེད་ལ་སྦྱོང་བ་ནི་ཐབས་ལམ་ཅིག་ཆར་བ་སྟེ། འདི་ཡང་། དབང་སྔ་མ་གཉིས་ཀྱི་ལམ་དང་། ཕྱག་རྒྱ་བཙལ་ནས་རྒྱུད་སྦྱོང་བ་སོགས་བསྙེན་པ། སྦྱོར་བའི་བརྡས་བསྐུལ་ཏེ་འདུ་ཤེས་གསུམ་ལྡན་གྱིིས་སྙོམས་པར་འཇུག་པ་ཉེ་བསྙེན། དེ་ལས་ཡས་འབབ་ཀྱི་དགའ་བཞི་བསྐྱེད་པ་སྒྲུབ་པ། མས་བརྟན་གྱི་དགའ་བཞི་བསྐྱེད་པ་སྒྲུབ་ཆེན་ཏེ་ཡན་ལག་བཞིའི་ཚུལ་གྱིས་མཆོག་འགྲུབ་བོ། །འདི་དག་ཀྱང་རྩ་རྒྱུད་སྒྱུ་དྲྭ་ལས། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོས། །ཞེས་གསུངས་པའི་དོན་ཡིན་ལ། སྤྱིར་ཐབས་གྲོལ་གྱི་ལམ་བགྲོད་ཚུལ་འདི་རྣལ་འབྱོར་ལྔ་དང་བསྙེན་སྒྲུབ་བཞི་གང་གི་ཆིངས་ལྟར་བཤད་ཀྱང་འདྲ་ཞིང་། བསྙེན་སྒྲུབ་བཞི་པོ་འདི་ཡང་། ནང་གསེས་སུ་དེ་ཏིང་སྒོམ་ཚུལ་ལྟ་བུ་རེ་རེ་ལའང་བཞི་བཞིར་དབྱེ་བ་དང་། གཞན་ཡང་ཆོ་ག་ཐུན་གཅིག་དང་། སྒྲུབ་པའི་ཞག་གྲངས་དང་། སྦྱོར་ལམ་ཚོགས་སྒྲུབ་མན་ཆད་དང་། ཚོགས་ལམ་ནས་མཐར་ལམ་གྱི་བར་དང་། ཐབས་ལམ་སྟེང་འོག་གི་སྒོ་དང་སྦྱར་བ་སོགས་མང་བས། དེས་ན་གསང་སྔགས་ནང་པར་གཏོགས་པའི་ལམ་གང་དང་གང་བསྒོམ་པ་ཀུན་ལ་སྦྱོར་དུ་རུང་བའི་ཕྱིར་གང་ལྟར་བཤད་ཀྱང་མི་འགལ་བར་མ་ཟད་འདིར་བཤད་པ་རྣམས་ནི། སློབ་དཔོན་སངས་རྒྱས་གཉིས་པའི་དགོངས་པའང་ཡིན་ནོ། །དེ་ལྟར་རིམ་པ་གཉིས་ཀྱི་ལམ་ལ་བསྙེན་སྒྲུབ་ཡན་ལག་བཞིས་བགྲོད་པ་མཐར་ཕྱིན་པར་བྱས་ནས། ལམ་གྱུར་གྱི་འབྲས་བུ་ལ་སྦྱོར་ཚུལ་ཡང་། སྤྱིར་གསང་སྔགས་དང་མཚན་ཉིད་གཉིས་པོའི་ལམ་མྱུར་བུལ་གྱི་ཁྱད་པར་འདི་གཙོ་བོར་མོས་སྤྱོད་ཀྱི་ས་ནས་འབྱེད་དགོས་པ་ཡིན་གྱི་འཕགས་ལམ་ཐོབ་ནས་ཐེག་ཆེན་ཡིན་ཕྱིན་ཆད་འདྲ་བ་ལྟ་བུར་གསུངས་པའི་ཕྱིར། དེས་ན་དུས་ཀྱང་བསྐལ་པ་གྲངས་མེད་ལ་མི་ལྟོས་པར། ཟླ་དྲུག་སྤོགས་ཆོག་དང་བཅས་པས་ཟག་མེད་ལ་སྦྱོར་བ་དང་། བྱ་དཀའ་བའི་བརྟུལ་ཞུགས་ལ་མི་ལྟོས་པར་ཐབས་ཤེས་ཟབ་མོའི་ཁྱད་པར་གྱིས། ཉོན་མོངས་ལམ་དུ་བྱེད། འདོད་ཡོན་རྒྱན་དུ་ཁྱེར་བའི་འཇུག་ངོགས་བདེ་བ་དང་། ཐེག་པ་བདེ་བ་ལ་བརྟེན་ནས་དཀའ་བ་མེད་པར་གནས་སྐབས་རིག་འཛིན་བཞི་དང་། མཐར་ཐུག་མི་སློབ་ཟུང་འཇུག་གི་གོ་འཕང་ལ་མིག་འཕྲུལ་བཞིན་དུ་བགྲོད་པ་སྟེ། དེ་ཡང་། ཀུན་མཁྱེན་ཆེན་པོས་རྒྱུའི་ལམ་ལྔ་སྔགས་ཀྱི་རིག་འཛིན་བཞིས་བགྲོད་པར་བཞེད་ནས་རྣམ་སྨིན་རིག་འཛིན་ཚོགས་སྦྱོར་དུ་བཞག་པའང་། དེ་ཉིད་དངོས་ནི་སྦྱོར་ལམ་ཆོས་མཆོག་ཆེན་པོར་གནས་པ་ཡིན་ཀྱང་ལམ་སྔ་མ་རྣམས་དེའི་རྒྱུར་དགོངས་ཏེ་དེ་སྐད་གསུངས་ལ། ཚེ་དབང་མཐོང་ལམ། ཕྱག་ཆེན་སྒོམ་ལམ། ལྷུན་གྲུབ་མཐར་ལམ་དུ་མཛད་དོ། །ཟུར་ལུགས་ལྟར་ན། ནུས་པ་ཐོབ་དང་མ་ཐོབ་པས་མཐོང་ལམ་གཉིས་སུ་ཕྱེ་བ་སྟེ། སེམས་ཉིད་ཕྱག་རྒྱ་ཆེན་པོའི་ལྷ་སྐུར་སྨིན་ཀྱང་འབྱུང་བའི་ལྷག་ལུས་དྭངས་མ་འོད་གསལ་གྱི་སྐུར་ཚེ་འདིར་སྦྱངས་མ་ནུས་ཤིང་བར་དོར་ཕྱག་རྒྱ་ཆེན་དུ་བཞེངས་པ་རྣམ་སྨིན་རིག་འཛིན། ལུས་ཁམས་སྐྱེ་གནས་ཀྱི་ཟག་པ་གསུམ་བཅོམ་ནས་འོད་གསལ་རྡོ་རྗེ་སྐུ་འགྲུབ་ཅིང་སྐྱེ་འཇིག་མེད་པར་སྲིད་པ་ཇི་སྲིད་དུ་འགྲོ་དོན་མཛད་པ་ལམ་མཆོག་ཡོངས་སུ་རྫོགས་པའི་ཚེ་དབང་དང་། ཆོས་ཉིད་མངོན་སུམ་རྟོགས་པའི་བདེ་ཆེན་དང་སྟོང་གཟུགས་ཀྱི་དཀྱིལ་འཁོར་རོ་གཅིག་ཏུ་འདྲེས་པའི་ཡེ་ཤེས་ཀྱི་སྐུ་སློབ་པའི་ཟུང་འཇུག་ཏུ་བཞེངས་པ་ནི་ཕྱག་ཆེན་ཏེ། འདིས་སྒོམ་ལམ་དགུ་བགྲོད་ཅིང་ནང་གསེས་སུ་རིགས་ལྔར་ཡང་དབྱེའོ། །བསམ་ཡས་ལྷུན་གྲུབ་ཀྱི་དཀྱིལ་འཁོར་དུ་སྐད་ཅིག་གིས་བཞེས་ཤིང་དྲུག་པ་རྡོ་རྗེ་འཆང་གི་རྒྱལ་ཚབ་མཛད་པ་རྗེས་ཐོབ་ཕྲིན་ལས་སངས་རྒྱས་དང་མཉམ་པས་ནམ་མཁས་གར་ཁྱབ་ཀྱི་དོན་ཡང་ཅི་རིགས་སྒྲུབ་ནུས་པ་ནི་མཐར་ལམ་ལྷུན་གྲུབ་རིག་འཛིན་ཞེས། ཕར་ཕྱིན་ཐེག་པའི་ཀུན་ཏུ་འོད་དང་། སྔགས་ཕྱི་པའི་རང་ལམ་གྱི་འབྲས་བུ་བཤད་པ་རྣམས་འདི་དང་དོན་གཅིག་པར་གསུངས་སོ། །དེ་ནས་མཐར་ཐུག་ཉི་ཟླ་ཟ་བའི་དབང་བསྐུར་མཆོག་གི་ལམ་ལ་བརྟེན་ནས། ཤིན་ཏུ་ཕྲ་བའི་ཁུ་རྡུལ་རླུང་སེམས་ཀྱི་ངོ་བོར་གནས་པ་མ་རིག་བག་ཆགས་ཀྱི་ས་པའི་ཡིད་ལུས་ཀྱང་། འབྲས་བུའི་མངོན་བྱང་འོད་གསལ་ཆེན་པོར་བསྡུས་པ་དང་མཉམ་དུ་འཕོ་བའི་སྒྲིབ་པའང་དབྱིངས་སུ་ཡལ་ནས། སྐུ་གསུང་ཐུགས་རྡོ་རྗེ་དབྱེར་མི་ཕྱེད་པའི་བདེ་བ་ཆེན་པོའི་སྐུར་བཞེངས་པ་ནི་མི་སློབ་པའི་ཟུང་འཇུག་སྟེ། འདི་ལ་ལྡོག་ཆའི་སྒོ་ནས་ཁ་སྦྱོར་ཡན་ལག་བདུན་དང་འབྲས་ཆོས་ཉེར་ལྔར་དབྱེ་བའང་ཡོད་དོ། །དེ་ལྟར་གནས་སྐབས་དང་མཐར་ཐུག་གི་འབྲས་བུ་དེ་དག་ནི་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱང་ཡིན་ལ། མཆོག་སྒྲུབ་པའི་ཞར་ལ་ཐུན་མོང་གི་དངོས་གྲུབ་དབང་ཕྱུག་བརྒྱད་དམ། ཕྲ་ཡང་གི་ཡོན་ཏན་དང་ལྡན་པའི་གྲུབ་པ་ཆེན་པོ་དང་། རལ་གྲི་དང་མཁའ་སྤྱོད་སོགས་གྲུབ་པ་འབྲིང་པོ་དང་། དབང་དང་མངོན་སྤྱོད་སོགས་གྲུབ་པ་ཆུང་ངུ་དང་། གཞན་ཡང་རྫས་དང་རིག་སྔགས་ལ་བརྟེན་པའི་ཚེ་དབང་གྲུབ་པ་སོགས་མང་དུ་གསུངས་པ་རྣམས་ཀྱང་། ཚོགས་སྦྱོར་ལ་གནས་པའི་གང་ཟག་དྲོད་ཐོབ་པ་དག་གིས་ཚུལ་བཞིན་བརྙེས་ནས་གཞན་དོན་རྒྱ་ཆེར་འབྱུང་ལ། དེ་ལྟ་བུའི་དངོས་གྲུབ་རྣམ་པ་གཉིས་པོ་བདེ་བླག་སྟེ་བདེ་ཞིང་མྱུར་བར་འགྲུབ་ནས་དོན་གཉིས་མཐར་ཕྱིན་པར་གྱུར་ཅིག་ཅེས་སྨོན་པའོ། །གཉིས་པ་ལམ་བྱེ་བྲག་གི་ཆེད་དུ་སྨོན་པ་ལའང་། རྒྱུད་སྒྱུ་འཕྲུལ་དྲྭ་བའི་ཉམས་ལེན་ལ་སྨོན་པ། ལུང་ན་རཀ་དོང་སྤྲུགས་ཀྱི་ཉམས་ལེན་ལ་སྨོན་པ། མན་ངག་རྫོགས་པ་ཆེན་པོའི་ཉམས་ལེན་ལ་སྨོན་པ་དང་གསུམ། དང་པོ་ལའང་བཞི་ལས་སྣང་བ་སྐུའི་དཀྱིལ་འཁོར་ལ་སྨོན་པ་ནི། ཅིར་སྣང་སྒྱུར་འཕྲུལ་དྲྭ་བའི་འཁོར་ལོ་རྫོགས། །ཞེས་པ་སྟེ། ཀུན་འབྱུང་དང་སྡུག་བསྔལ་བདེན་པ་ཐུན་མོང་གི་མཚན་གཞིར་གྱུར་པའི་ཕུང་པོ་ལྔའམ། འཁོར་བ་སྣོད་བཅུད་ཀྱིས་བསྡུས་པའི་དངོས་པོ་ཅི་དང་ཅིར་སྣང་ཚད་འདི་རྣམས། ཐ་སྙད་དུ་རྒྱུ་རྐྱེན་ཚོགས་པའི་དབང་གིས་མེད་བཞིན་དུ་སྒྱུ་མ་ལྟར་སྣང་ཞིང་། དེ་དག་ཀྱང་ཕན་ཚུན་རྒྱུ་འབྲས་སུ་འབྲེལ་བ་ནི་རྟོག་ཚོགས་སྒྱུ་འཕྲུལ་དྲྭ་བ་དང་། དེ་ལྟར་ཕུང་ཁམས་སྐྱེ་མཆེད་ཀྱི་རྟོག་ཚོགས་སུ་སྣང་བ་དེ་དག་ཀྱང་། སྣང་དུས་ཉིད་ནས་འགོག་ལམ་གྱི་བདེན་པའི་རང་བཞིན་ཅན་གྱི་གདན་གསུམ་ཚང་བའི་དཀྱིལ་འཁོར་རམ། སྐུ་དང་ཡེ་ཤེས་སུ་ཡེ་ནས་རྣམ་པར་དག་པ་ནི། ལྷ་རྟོག་དབྱེར་མེད་ཀྱི་སྒྱུ་འཕྲུལ་དྲྭ་བ་སྟེ། དབྱེར་མེད་ཡིན་པའི་རྒྱུ་མཚན་ཡང་། སྣང་བ་འདི་དག་ནི་སེམས་སྣང་འབའ་ཞིག་ཡིན་ལ། སེམས་ཀྱི་ཆོས་ཉིད་ནི་རིག་སྟོང་ཆོས་སྐུའི་ཡེ་ཤེས་ཡིན་པས། དེ་ཉིད་ཀྱི་རང་སྣང་སྐུ་དང་ཡེ་ཤེས་ལས་འདའ་མི་སྲིད་ཅིང་། དཔེར་ན་མིག་སེར་ཅན་ལ་དུང་སེར་པོ་སྣང་ཡང་། སྣང་དུས་ནས་དུང་གི་ཁ་དོག་དཀར་པོ་ལས་གཞན་མིན་པ་ལྟར། འཁྲུལ་ཤེས་ཀྱི་ངོར་སྣང་བ་འདི་ཀུན་མ་དག་པ་ལྟར་སྣང་ཡང་། སྣང་ཙམ་ཉིད་ནས་རྣམ་པར་དག་པ་སྣང་སྲིད་གཞིར་བཞེངས་ཀྱི་དཀྱིལ་འཁོར་དུ་གྲུབ་སྟེ། མཐར་ཐུག་རྒྱུད་དག་པའི་གང་ཟག་རྣམས་ཀྱི་གཟིགས་ངོར་ཡང་མངོན་སུམ་ཉིད་དུ་འགྱུར་བའི་ཕྱིར། དེ་ལྟར་ཡང་སྒྱུ་འཕྲུལ་ལས། སྲིད་གསུམ་ཡེ་ནས་སངས་རྒྱས་ཤིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་གསུངས་པ་བཞིན་ནོ། །ཡང་། དབྱིངས་སྟོང་པ་ཉིད་དང་རིག་པའི་ཡེ་ཤེས་དབྱེར་མེད་པའི་ཆོས་ཉིད་ཀྱིས། ཆོས་ཅན་འཁོར་འདས་སུ་སྣང་བ་ཀུན་ལ་ཁྱབ་ཅིང་མཉམ་པ་ཉིད་དུ་གནས་པ་དང་། དབྱིངས་རིག་ཟུང་འཇུག་གི་རོལ་པར་ཤར་བའི་ཀུན་རྫོབ་ཏུ་སྣང་བ་ཐམས་ཅད་ཀྱང་གཟོད་མ་ནས་སྐུ་དང་ཡེ་ཤེས་སུ་དག་པ་སྟེ། དེས་ན་ཆོས་ཐམས་ཅད་ཡེ་ནས་དག་མཉམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོའི་འཁོར་ལོར་ལྷུན་གྱིས་གྲུབ་ཅིང་ཡོངས་སུ་རྫོགས་པ་ནི། ངེས་དོན་སྒྱུ་འཕྲུལ་དྲྭ་བ་ཡིན་ལ། དེ་ལྟ་བུའི་གནས་ལུགས་མཐར་ཐུག་གི་དོན་དེ་ཉིད། བློ་ཡི་སྤྱོད་ཡུལ་དང་བྲལ་བའི་ཡུལ་མེད་རང་གསལ་ལམ། སོ་སོ་རང་གི་རིག་པས་མངོན་སུམ་དུ་རྟོགས་པར་གྱུར་ཅིག་ཅེས་སྨོན་ནོ། །གཉིས་པ་སྒྲ་གྲགས་གསུང་གི་དཀྱིལ་འཁོར་ལ་སྨོན་པ་ནི། གྲགས་པ་ཐམས་ཅད་བརྗོད་བྲལ་སྔགས་ཀྱི་སྒྲ། །ཞེས་པ་སྟེ། དེ་ཡང་སྔགས་ཐམས་ཅད་གང་ལས་བཏུ་བའི་གཞི་མ་འབྱུང་ཁུངས་ནི་ཐབས་ཤེས་ཀྱི་ཡི་གེ་དབྱངས་དང་གསལ་བྱེད་གཉིས་ཡིན་ལ། འདི་ལྟར་སེམས་ཅན་དང་སེམས་མེད་ཀྱི་བསྡུས་པའི་སྒྲ་སྐད་ཐམས་ཅད་ནི། དབྱངས་གསལ་གྱི་ཡི་གེའི་གདངས་ལས་འཕོས་པའི་རྣམ་འགྱུར་ཅན་ཤ་སྟག་ཏུ་ངེས་ཏེ། ཐ་ན་ལོག་འགྲོ་ཁྱིའི་སྐད་ལྟ་བུ་ལ་བརྟགས་ནའང་ཡི་གེ་ༀ་དང་ཧཱུཾ་སོགས་གསལ་བར་རྟོགས་པའི་ཕྱིར་དང་། གཞན་ཡང་ངག་རླུང་གི་རང་བཞིན་ཡིན་པ་དང་། རླུང་སྔགས་དབྱེར་མེད་ཡིན་པའི་གནད་ཀྱིས་ཀྱང་གྲགས་པ་ཐམས་ཅད་རང་བྱུང་གི་བཟླས་པ་ཡིན་ཞིང་། དེས་ན་ཐ་སྙད་དུའང་སྒྲ་རང་མཚན་པ་ཐམས་ཅད་གསུང་ཡི་གེར་གནས་པས་སྔགས་ཡིན་པར་གྲུབ་ལ། གནས་ལུགས་ཇི་བཞིན་པའི་དབང་དུ་བྱས་ན་གྲགས་པ་སྒྲ་ཚིག་ཏུ་སྣང་བ་ཐམས་ཅད་བརྗོད་བྲལ་བསམ་གྱིས་མི་ཁྱབ་པའི་ཆོས་ཉིད་དབྱིངས་རིག་ཟུང་འཇུག་གི་ཡེ་ཤེས་འདུས་མ་བྱས་པ་ཉིད་བརྗོད་པ་སྒྲ་སྣང་ལྟར་རང་ཤར་བས་ན། སྒྲ་སྐད་དུ་མྱོང་དུས་ནས་གྲགས་སྟོང་དབྱེར་མེད་རང་རིག་ཡེ་ཤེས་ཀྱི་རོལ་པ་ལས་མི་འདའ་བ་དང་། དེ་ལྟ་བུའི་དག་མཉམ་དབྱེར་མེད་ཀྱི་གནས་ལུགས་དེ་ནི་སངས་རྒྱས་ཐམས་ཅད་ཀྱི་དགོངས་པའི་མཐིལ་ཡིན་ཞིང་། དེ་ཉིད་གྲགས་པ་སྒྲ་གཟུགས་སུ་སྣང་བས་ན་སྒྲ་ཉིད་ཡེ་ཤེས་ཀྱི་སྐུ་ཡང་ཡིན་ལ། དེས་ན་སྒྲར་སྣང་ངོ་ཅོག་ཆོས་ཉིད་ཀྱི་རང་སྒྲ་དང་། ཡེ་ཤེས་དང་། སྟོང་གཟུགས་ལྷའི་འཁོར་ལོ་འབའ་ཞིག་ལས་གཞན་མིན་པས་ན་རྡོ་རྗེ་སྔགས་ཀྱི་སྒྲ་ཚིག་བླ་ན་མེད་པར་གྲུབ་བོ། །དེ་ལྟར་ན་འཁོར་བའི་སྒྲ་སྐད་ལའང་། སངས་རྒྱས་ཀྱིས་གསུངས་པའི་རིག་སྔགས་བཞིན་ནུས་པ་མི་འབྱུང་བ་ཅི་ཞིག་སྙམ་ན། སྒྲ་གྲགས་སྔགས་སུ་རྟོགས་པའི་གདིང་ཚད་དང་ལྡན་པ་དག་ལ་ནི། སྒྲ་ཐ་མལ་པས་ཀྱང་སྔགས་ཀྱི་ནུས་པ་མཐར་ཐུག་པ་སྐྱེད་དེ་ཡིད་སྐྱོབ་སྔགས་ཀྱི་ངོ་བོ་ཡིན་པ་གང་ཞིག །བརྗོད་པ་བཟང་ངན་གྱི་རྗེས་སུ་འབྲངས་ནས་དགག་སྒྲུབ་ཆགས་སྡང་དུ་ཤར་བའི་ཡིད་ཀྱི་ཤེས་པ་ཉིད་བརྗོད་བྲལ་གསུང་རྡོ་རྗེའི་འཁོར་ལོ་སྐྱོབ་པར་བྱེད་པའི་ཕྱིར་རོ། །ཕལ་པ་དག་གིས་ནི་སྒྲ་ལ་སྒྲ་རང་མཚན་པར་ཞེན་ནས་སྔགས་སུ་མི་ཤེས་ཤིང་དེར་མོས་པའང་མི་སྐྱེ་བས་ནུས་པ་མི་འབྱུང་ལ། སྔགས་དངོས་ལ་ནི་སངས་རྒྱས་ཀྱི་གསུང་དུ་འདུ་ཤེས་ཤིང་བྱིན་རླབས་འབྱུང་དུ་རེ་བའི་མོས་གུས་ཀྱིས་འཇུག་པས་ན་འབྲས་བུ་འབྱུང་བ་ཡིན་ཞིང་། དེས་ན་དེ་གཉིས་ཀྱི་ཁྱད་པར་ཡུལ་ཅན་བློ་ངོས་ནས་འབྱེད་དགོས་ཀྱི་ཡུལ་རང་གི་ངོས་ནས་རྡོ་རྗེའི་སྔགས་སྒྲ་ཡིན་པ་ལ་ཁྱད་པར་ཅུང་ཟད་ཀྱང་མེད་དོ། །དེ་དག་ཀྱང་རྒྱུད་ལས། གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཐེག་པ་མཐོ་དམན་ཐམས་ཅད་དང་། །ལོག་འགྲོ་མ་ལུས་ཐམས་ཅད་སྐད། །བྱང་ཆུབ་རྡོ་རྗེ་གསུང་དུ་བསྡུས། །ཞེས་གསུངས་སོ། །དེ་ལྟར་འཁོར་འདས་ལམ་གསུམ་གྱིས་བསྡུས་པའི་སྒྲ་སྐད་ཐམས་ཅད་ཡེ་ནས་མཉམ་ཉིད་གསུང་རྡོ་རྗེའི་བདག་ཉིད་ཡིན་པ་ལྟར་མངོན་སུམ་དུ་གྱུར་ཅིག་ཅེས་པའོ། །གསུམ་པ་དྲན་རྟོག་ཐུགས་ཀྱི་དཀྱིལ་འཁོར་ལ་སྨོན་པ་ནི། སེམས་ཀྱི་འགྱུ་བ་རང་རིག་འདུས་མ་བྱས། །ཞེས་པ་སྟེ། དེ་ཡང་དཔེར་ན། རླུང་གིས་དཀྲུགས་པའི་ཆུ་ཉིད་རྦ་རླབས་ལྟར་སྣང་ཡང་། སྣང་ཙམ་ནས་ཆུའི་མཚན་ཉིད་ལས་གཞན་མ་ཡིན་པ་ལྟར། སེམས་ཉིད་ཀྱི་རྩལ་ལས་རླུང་གིས་བསྐྱོད་པ་ན་གཟུང་འཛིན་འཁྲུལ་རྟོག་གི་འགྱུ་བ་སྣ་ཚོགས་སུ་ཤར་ཡང་ཤར་དུས་ཉིད་ནས་སྐྱེ་འགག་གནས་གསུམ་དང་བྲལ་བའི་རང་བྱུང་གི་རིག་པ་འོད་གསལ་འདུས་མ་བྱས་པའི་ཆོས་ཉིད་ལས་གཞན་མ་ཡིན་ཏེ། དེའི་རྒྱུ་མཚན་རྣམ་རྟོག་གང་ཤར་གྱི་འགྱུ་བ་ཐམས་ཅད་མ་བཅོས་རང་སར་བཞག་པ་ན། བློ་འདས་ཆོས་སྐུའི་ཡེ་ཤེས་སུ་རྗེན་པར་འཆར་བའི་ཕྱིར། རང་བཞིན་གཟིགས་པ་དག་ལ་མྱོང་བས་གྲུབ་པའོ། །དེ་ལྟར་རྟོག་ཚོགས་ཡེ་ནས་རིག་སྟོང་ཐུགས་ཀྱི་འཁོར་ལོར་གནས་པའི་དོན་ཇི་བཞིན་ཉིད་དུ་རྟོགས་པར་སྨོན་པའོ། །བཞི་པ་ཐམས་ཅད་བདེ་ཆེན་གྱི་རོལ་པར་སྨོན་པ་ནི། བདེ་ཆེན་འདུ་འབྲལ་མེད་པར་མངོན་གྱུར་ཤོག །ཅེས་པ་སྟེ། གཞིའི་གནས་ལུགས་དབྱིངས་རིག་ཟུང་དུ་འཇུག་པའི་ཡེ་ཤེས་རང་རྩལ་ལྷའི་འཁོར་ལོར་མ་འགགས་པར་གནས་པའི་དག་མཉམ་བདེན་པ་དབྱེར་མེད་ནི་བདེ་བ་ཆེན་པོ་ཡིན་ལ། གནས་ལུགས་དེས་ཀུན་ལ་ཁྱབ་ཅིང་ཀུན་ཀྱང་དེ་ཉིད་ཀྱི་ངོ་བོར་རོ་གཅིག་པའམ། ཐ་དད་མེད་པར་གནས་པ་ནི་འདུ་འབྲལ་མེད་པའི་དོན་ཏེ། དེས་ན་སྔར་ཇི་སྐད་བཤད་པའི་སྣང་གྲགས་རྟོག་གསུམ་དང་ལྷ་སྔགས་ཡེ་ཤེས་ཀྱིས་བསྡུས་པའི་འཁོར་འདས་ཀྱི་ཆོས་ཐམས་ཅད་མཉམ་ཉིད་བདེ་ཆེན་གཅིག་གི་རོལ་པར་འཆར་ཤིང་དེའི་ངང་དུ་རྫོགས་པའི་ཕྱིར། ཇི་སྐད་དུ། གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུའི་ཚུལ་གྱིས་དུ་མའི་གར་མཛད་དོ། །ཞེས་གསུངས་པ་ལྟར་རོ། །དེ་ལྟ་བུའི་གཞི་རྒྱུད་བདེན་གཉིས་དབྱེར་མེད་ཀྱི་དོན་ཉིད་ལྟ་བས་གཏན་ལ་ཕེབས་ཤིང་། སྒོམ་པས་ངང་འཁྱོལ་བའི་ཚུལ་གྱིས་མངོན་དུ་གྱུར་ནས་དོན་གཉིས་ལྷུན་གྱིས་གྲུབ་པར་ཤོག་ཅིག་ཅེས་པའོ། །དོན་གཉིས་པ་ལུང་ན་རཀ་དོང་སྤྲུགས་ཀྱི་ཉམས་ལེན་ལ་སྨོན་པ་ལའང་བཞི་ལས་དང་པོ་སྒྲིབ་པ་ཡེ་དག་གི་བཤགས་པའི་ཚུལ་ལ་སྨོན་པ་ནི། ཉམས་ཆག་རྟོག་སྒྲིབ་མ་སྤངས་གནས་སུ་དག །ཅེས་པ་སྟེ། སྡོམ་པ་དང་དམ་ཚིག་གི་འགལ་ཟླར་གྱུར་པའི་ཉེས་ལྟུང་ལ་ཞུགས་པས། རྒྱུད་ལ་སྔར་ཡོད་ཀྱི་སྡོམ་པའི་ཡོན་ཏན་ལས་ཉམས་ཤིང་། དེ་ཉམས་པས་ཕྱིས་འབྱུང་གི་ཡོན་ཏན་སྐྱེ་བ་དང་འཕེལ་བའི་གེགས་བྱེད་ཅིང་དགེ་བའི་རྒྱུན་འགོག་པས་ན་ཆག་པ་སྟེ། དཔེར་ན་བྱ་བ་ཆག་པ་ལྟ་བུའམ། ཡང་ན། སྣོད་ཀྱི་ཆག་གྲུམ་ལྟར་རྒྱུད་ལ་ཉེས་སྐྱོན་གྱི་སེལ་ཞུགས་པས་ཀྱང་དེ་སྐད་ཅེས་བྱའོ། །ཉམས་ཆག་དེའི་ངོ་བོ་ནི། འཁོར་གསུམ་བདེན་ཞེན་གྱི་རྟོག་པ་དང་། ཆགས་སོགས་ཉོན་མོངས་པའི་རྟོག་པ་གཉིས་ཡིན་ཏེ། དེ་ཡང་། བདེན་འཛིན་གྱི་རྣམ་རྟོག་ལས་ཚུལ་མིན་ཡིད་བྱེད་སྐྱེ་ལ། དེ་ལས་ཉོན་མོངས་སྐྱེ་ཞིང་། དེས་མི་དགེ་བའི་འདུ་བྱེད་ལ་སྦྱོར་བའི་ཕྱིར་རོ། །རྟོག་པ་དེ་གཉིས་ནི་ཐར་པ་དང་རྣམ་མཁྱེན་ལ་སྒྲིབ་པའི་དྲི་མ་ཡིན་ལ། དེ་དག་ཀྱང་རྟེན་འབྲེལ་གྱི་དབང་གིས་གློ་བུར་དུ་སྒྱུ་མ་ལྟར་སྣང་ཙམ་ལས། དོན་དམ་དཔྱོད་པའི་རིགས་ངོར་སྤང་བྱའི་གཞི་མ་གྲུབ་པས་ཅི་ཞིག་སྤང་། དེས་ན། མ་སྤངས་མ་བསྒྱུར་བ་རང་སོར་གློད་པ་ན་དྲི་མ་ཉིད་ཡེ་ཤེས་སུ་རང་གསལ་བའི་ཕྱིར་སེམས་ཉིད་སྐྱེ་མེད་ཀྱི་གནས་སུ་དྲི་མ་གདོད་ནས་ཡོད་མ་མྱོང་བས་རང་བཞིན་ཡེ་དག་ཆེན་པོར་གནས་སོ། །ཚུལ་དེ་ལྟར་རྟོགས་ན་བག་ཆགས་ཀྱི་གཞི་སྟོང་པས་རྣམ་སྨིན་ལས་གྲོལ་བའི་ཕྱིར་བཤགས་པ་ཐམས་ཅད་ཀྱི་རྒྱལ་པོར་གསུངས་ཏེ། ཐར་པ་ཆེན་པོ་ལས། གང་ཞིག་འགྱོད་ཚངས་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་ནོ། །ཞེས་པ་ལྟར་རོ། །གཞན་དུ་ན། སྟོང་ཉིད་ཀྱི་གོ་ཡུལ་ཙམ་ལ་གདེངས་བཅས་ནས། གང་ལྟར་སྤྱོད་ཀྱང་བདེན་པར་མ་གྲུབ་པས་ཉེས་པ་མེད་ཅེས་ཆད་ལྟས་རྒྱས་འདེབས་བྱེད་པ་ནི། ཐ་སྙད་ཀྱི་བདེན་པ་ཉམས་པར་བྱེད་པ་འཇིག་རྟེན་རྒྱངས་འཕེན་པའི་གསང་ཚིག་སྟེ། རང་ཉིད་ལེགས་སུ་འདོད་པ་དག་གིས་མཉན་པ་ཙམ་ཡང་སྤང་ངོ་། །དེས་ན་ཇི་སྲིད་བདག་འཛིན་དབྱིངས་སུ་མ་ནུབ་པ་དེ་སྲིད་དུ། རྟེན་བྱུང་གི་དངོས་པོས་བསླུ་བར་མི་སྲིད་པའི་ཕྱིར་སྟོབས་བཞིའི་བཤགས་པ་ལ་ནན་ཏན་དུ་བྱ་བ་དང་། སྒྲིབ་པ་ཡེ་དག་གི་དོན་ལ་ངེས་ཤེས་ཐོན་ནས་བདེན་ཞེན་དབྱིངས་སུ་འགོག་པའི་ཉམས་ལེན་ལ་བརྩོན་པ་གཉིས་སྦྲེལ་ཏེ། བདེན་གཉིས་ཟུང་འཇུག་གི་བཤགས་པས་རྒྱུད་དག་པར་བྱ་བ་ནི་གནད་ཀྱི་དོན་ནོ། །དེ་ལྟར་ཆགས་ཉམས་རྟོག་པའི་དྲི་མ་གཤིས་ལ་མི་གནས་པའི་དོན་མངོན་དུ་གྱུར་ནས། བདེན་འཛིན་གཉིས་སྣང་གི་འཆིང་བ་ཐམས་ཅད་མཉམ་ཉིད་བདེ་ཆེན་གྱི་ཀློང་དུ་གྲོལ་བར་སྨོན་པའོ། །གཉིས་པ་ཡོན་ཏན་ཡེ་ལྡན་གྱི་བསྐང་བའི་དོན་ལ་སྨོན་པ་ནི། ཕྱི་ནང་གསང་བ་དབྱེར་མེད་རྟོགས་པས་བསྐང་། །ཞེས་པ་སྟེ། ཕྱི་འཁོར་འདས་གཉིས་སུ་སྣང་བའི་གཟུང་ཡུལ་དང་། ནང་དེ་ལ་མཚན་མར་འཛིན་པའི་རྟོག་ཚོགས་དང་། གསང་བ་དེ་དག་གི་འདུག་ཚུལ་ཕྱིན་ཅི་མ་ལོག་པའི་གནས་ལུགས་ཏེ། དེ་གསུམ་ཡང་ཡེ་ནས་དབྱེར་མེད་དུ་གནས་པ་ཡིན་ལ། ཚུལ་ཇི་ལྟར་ན། དབྱིངས་ཡེ་ཇི་བཞིན་པའི་དཀྱིལ་འཁོར། ཡེ་ཤེས་ལྷུན་གྱིས་གྲུབ་པའི་དཀྱིལ་འཁོར། གཉིས་སུ་མེད་པ་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་ཞེས་གཤིས་ལུགས་དཀྱིལ་འཁོར་རྣམ་གསུམ་འདུ་འབྲལ་མེད་པའི་དོན་དེ་ཉིད། སྣང་ཚུལ་ལ་འཁོར་འདས་ཤེས་བྱའི་དངོས་པོ་ཡོད་རྒུ་ལྟར་མ་འདྲེས་པ་འཆར་ཡང་། གནས་ཚུལ་ལ་ཕྱི་ནང་གི་ཆོས་ཐམས་ཅད་གསང་བ་དབྱིངས་དང་ཡེ་ཤེས་ཟུང་དུ་འཇུག་པའི་བྱང་ཆུབ་ཀྱི་དཀྱིལ་འཁོར་དུ་ཡོངས་སུ་རྫོགས་ཤིང་དབྱེར་མེད་པས་ན། ཁམས་གསུམ་བདེ་བ་ཆེན་པོར་ཡེ་གྲོལ་དུ་གནས་པ་སྟེ། རྒྱུད་ལས། ཕྱོགས་བཅུའི་སྟོང་ཁམས་ཡེ་ནས་དབེན། །སྲིད་པ་གསུམ་ནི་དག་པའི་ཞིང་། །སྙིགས་མ་ལྔ་ནི་བདེ་ལྡན་གནས། །ཕུང་པོ་ལྔ་ནི་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་བས། །གཞན་དུ་རྒྱལ་བས་ཆོས་མི་བཙལ། །ཞེས་གསུངས་པ་བཞིན་ནོ། །དེ་ལས་གཞན་དུ། ཀུན་འདུས་རིག་པ་ལས། ཕྱི་ནང་གསང་བ་བཀོད་པའི་དཀྱིལ་འཁོར་འདིར། །ཞེས་དང་། འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །ཞེས་པ་ལྟར་བདེ་བ་ཆེན་པོའི་རྩལ་སྣང་འཁོར་བ་ལྟར་སྣང་དུས་ནས། ཕྱི་འབྱུང་བ་ལྔ་ཡུམ། ནང་ཕུང་ལྔ་ཡབ། གསང་བ་ཡབ་ཡུམ་ཟུང་དུ་འཇུག་པའི་ལྷ་དང་ཡེ་ཤེས་ཀྱི་དཀྱིལ་འཁོར་དུ་བཀོད་པས་འཁོར་འདས་དབྱེད་མེད་པའོ། །ཞེས་བཤད་པ་ནི། མ་ཧཱ་ཡོ་གའི་ལུགས་ཏེ། སྔ་མ་དང་དོན་གནད་གཅིག་ཏུ་བབས་སོ། །དེ་ལྟར་ཕྱི་ནང་གསང་བ་དབྱེར་མེད་ཀྱི་དོན་མངོན་སུམ་དུ་རྟོགས་པས་ནི། སྔར་གནས་ལུགས་ཀྱི་དོན་ལས་གོལ་ཞིང་མཚན་འཛིན་གྱི་འཁྲུལ་བར་ལྟུང་ནས་ཡོན་ཏན་ལས་ཉམས་པའི་གནས་སྐབས་དེ་ཉིད། སླར་ཡང་མཉམ་ཉིད་བྱང་ཆུབ་སེམས་ཀྱི་དཀྱིལ་འཁོར་དུ་སོར་ཆུད་ཅིང་ཉམས་པ་ཁ་བསྐང་བས་ན་ཆོས་ཉིད་དོན་གྱི་བསྐང་བ་ཞེས་ཀྱང་བྱ་ལ། དེ་ལྟ་བུའི་དོན་གྱི་ཉམས་ལེན་ལ་རང་དབང་འབྱོར་པར་སྨོན་པའོ། །ཞར་བྱུང་སྤྲོས་བཅས་ཀྱི་སྐོང་བ་ནི། ཕྱི་ཡོ་བྱད་རྫས་ཀྱི་བསྐང་བ། ནང་ཕུང་པོ་རྟེན་གྱི་བསྐང་བ། གསང་བ་བྱང་ཆུབ་སེམས་ཀྱི་བསྐང་བ་སྟེ། དོང་སྤྲུགས་ཀྱི་སྐོང་ཆེན་གསུམ་དུ་གྲགས་ཤིང་། དེ་རེ་རེ་ལའང་། སྨན་གཏོར་རཀྟ་མར་མེ་བཞི་བཞིར་ཚང་བའི་སྐོང་རྫས་ཀྱི་དག་པ་དྲན་པར་བྱས་ནས་འཕྲུལ་དགའི་ལོངས་སྤྱོད་བཞིན་ཕུལ་པས། རང་སྣང་ཡེ་ཤེས་ཀྱི་འཁོར་ལོ་དགྱེས་པ་སྐྱེད་ཅིང་། རྒྱུ་དེས་ཚོགས་གཉིས་རྫོགས་པའི་མཐུ་ལས་ཉམས་ཆག་སོར་ཆུད་པའམ་ཁ་སྐོང་བར་བྱེད་པའི་དོན་ནོ། །གསུམ་པ་རྒྱུད་ཉོན་མོངས་རང་གྲོལ་གྱི་ཉམས་ལེན་ལ་སྨོན་པ་ནི། གང་ཤར་རང་གྲོལ་ཀུན་བཟང་ཀློང་ཡངས་སུ། །ཞེས་པ་སྟེ། དགེ་མི་དགེ་ལུང་མ་བསྟན་གྱིས་བསྡུས་པའི་རྟོག་པ་གང་ཤར་ཡང་། ཤར་དུས་ཉིད་ནས་འགྲོལ་བྱེད་ཀྱི་གཉེན་པོ་གཞན་ལ་ལྟོས་མི་དགོས་པར། དེ་ཉིད་རིག་སྟོང་འོད་གསལ་གྱི་འཁོར་ལོ་རང་གྲོལ་མངོན་སུམ་དུ་འཆར་ལ། དེ་ཉིད་ཀྱི་ངང་དུ་རྩོལ་མེད་རང་སར་བཞག་པས། ཆུའི་རི་མོ་ལྟར་ཤར་གྲོལ་ལ་རྒྱུན་ཆད་མེད་ཅིང་། རེ་དོགས་ཀྱི་ཞེན་འཁྲིས་སྟོར་ཏེ་ལྟ་བསྒོམ་སྤྱོད་འབྲས་ཆིག་ཆོད་དུ་གནས་པའི་སེམས་ཉིད་མ་བཅོས་པ་འདི་ཉིད་ནི། མཚན་རྟོག་གི་སྐྱོན་ལས་གྲོལ་ཞིང་། རང་བཞིན་ལ་འགྱུར་བ་མེད་པས་ཀུན་ཏུ་བཟང་པོ་སྟེ། དེ་ཡང་། གཤིས་གང་དུའང་མ་གྲུབ་པ། གདངས་བདེ་ཆེན་དུ་མ་འགགས་པ། རྩལ་སྣ་ཚོགས་སུ་ཤར་བ། བསྒོམ་བྱ་སྒོམ་བྱེད་ཐམས་ཅད་ལས་འདས་པའི་གསལ་རིག་རྗེན་ནེ་བ། སྤྲོས་པ་དང་བྲལ་བ་ཡེ་ཤེས་ལྔའི་རང་བཞིན་དུ་གནས་པ་ནི་དོན་ཀུན་ཏུ་བཟང་པོ་དང་། རྗེས་ཤེས་སྐྱེ་འགག་གནས་གསུམ་གང་ཤར་གྱི་རང་ངོ་ལ་བལྟས་པས་རང་གྲོལ་གྱི་ཡེ་ཤེས་གསལ་ལ་མི་རྟོག་པ་ནི་ཉམས་ཀུན་ཏུ་བཟང་པོ་ཡིན་ལ། གནས་ལུགས་དེ་ཉིད་རྟོགས་མ་རྟོགས་ཀྱི་བྱེད་པས། འཁོར་འདས་གཉིས་ཀའི་འཆར་གཞིའམ་འབྱུང་ཁུངས་སུ་གྱུར་བས་ཀློང་ངམ། དབྱིངས་ཞེས་བྱ་སྟེ། བཀོལ་རྒྱུད་ལས། ཀློང་ཆེན་པོ་ཆོས་ཀྱི་དབྱིངས་ན་བཞུགས་པ། ཞེས་གསུངས་པའི་ཕྱིར། དབྱིངས་དེའི་མཚན་ཉིད་ནི་ཡངས་པ་ཞེས། གཟུང་འཛིན་གང་དུའང་རྒྱ་མ་ཆད་ཅིང་། སྣང་སྟོང་གང་དུའང་ཕྱོགས་སུ་མ་ལྷུང་བའི། བློ་བྲལ་བསམ་གྱིས་མི་ཁྱབ་པའི་གནས་ལུགས་ཕྱལ་བ་ཆེན་པོ་སྟེ། ཚུལ་དེ་ལྟ་བུའི་དབྱིངས་སུ་ཡུལ་དང་ཡུལ་ཅན་རོ་གཅིག་ཏུ་འདྲེས་པའི་ཉམས་ལེན་ཚད་དུ་ཕྱིན་ནས་ཉོན་མོངས་རང་གྲོལ་དུ་སྨོན་པའོ། །བཞི་པ་འབྲས་བུ་ངན་སོང་དོང་སྤྲུགས་ཀྱི་ཚུལ་ལ་སྨོན་པ་ནི། ངན་སོང་དོང་སྤྲུགས་སྲིད་ཞི་མཉམ་གྱུར་ཅིག །ཞེས་པ་སྟེ། དེ་ལྟར་རང་གྲོལ་ཆོས་ཉིད་ཀྱི་ཀློང་དུ་གཉིས་སྣང་ནུབ་པའི་ཚེ། སྲེད་ལེན་གྱི་འཆིང་བ་ཆད་པས་བག་ཆགས་ཀྱི་ནུས་པ་ཡལ། འདུ་བྱེད་ཀྱི་ལས་རྒྱུན་འགོགས་བས་ཕྱིས་འབྱུང་གི་རྣམ་སྨིན་སྟོང་སྟེ་སྡུག་བསྔལ་མངོན་གྱུར་གྱི་ས་པ་ངན་སོང་གསུམ་གྱིས་མཚོན། འགྲོ་བ་དྲུག་གི་ལས་སྣང་སྡུག་བསྔལ་བག་ཆགས་བཅས་པའི་རྩལ་སྣང་ཐམས་ཅད། གདོད་མའི་གཞི་ཀློང་དུ་ཐིམ་ནས་འཁོར་བ་མྱང་འདས་སུ་གྲོལ་བ་ལ་དོང་ནས་སྤྲུགས་ཞེས་བྱ་སྟེ། དེ་ཡང་། དོང་ནས་སམ་རྩ་བ་རྨིང་ནས་ཕྱུངས་ཤིང་། སྣོད་སྤྲུགས་རྡེབ་ཚར་བ་ལྟར་རང་རྒྱུད་ཀྱིས་བསྡུས་པའི་སྡུག་བསྔལ་ཕྲ་རགས་ཐམས་ཅད་ལྷག་མེད་དུ་ཟད་པའི་དོན་ཡིན་ལ། དེའི་ཚེ་ན། དབུ་མ་ལས། མྱ་ངན་འདས་མཐའ་གང་ཡིན་པ། །དེ་ཉིད་འཁོར་བའི་མཐའ་ཡིན་ཏེ། །དེ་གཉིས་ཁྱད་པར་ཅུང་ཟད་ནི། །ཤིན་ཏུ་ཕྲ་བའང་ཡོད་མ་ཡིན། །ཞེས་པ་ལྟར། ཡེ་ནས་སྲིད་པ་འཁོར་བ་དང་། ཞི་བ་མྱང་འདས་གཉིས་ཆོས་ཉིད་འོད་གསལ་གྱི་ཀློང་ན་རོ་གཅིག་པའམ། འཕོ་འགྱུར་མེད་པར་མཉམ་པ་ཉིད་ཡིན་པ་ལ། ཡིན་པ་ལྟར་མངོན་དུ་གྱུར་པ་མཐར་ཐུག་ཅིང་། དེ་དང་ལྷན་ཅིག་ཏུ་གཞན་སྣང་གི་འཁོར་བ་དོང་ནས་སྤྲུགས་པའི་ཕྲིན་ལས་རྩོལ་མེད་དུ་འབྱུང་བའང་ཆོས་ཉིད་དེ། མཉམ་ཉིད་བདེ་བ་ཆེན་པོའི་ཡེ་ཤེས་དེ་ཉིད་དམིགས་པ་མེད་པའི་སྙིང་རྗེ་ཆེན་པོའི་ངོ་བོ་ཉིད་ཡིན་པའི་ཕྱིར། དེས་ན། དེ་ལྟ་བུའི་གནས་ལ་མངའ་དབང་རྫོགས་པར་གྱུར་ཅིག་ཅེས་སྨོན་པའོ། །སྤྱི་དོན་གསུམ་པ་མན་ངག་རྫོགས་པ་ཆེན་པོའི་ཉམས་ལེན་ལ་སྨོན་པ་ལ་བཞི་ལས། དང་པོ་ཐིག་ལེ་རང་གནས་ཀྱི་ལྟ་བ་ལ་སྨོན་པ་ནི། ཐིག་ལེ་ཆེན་པོ་སྐུ་དང་ཞིང་ཁམས་རྫོགས། །ཞེས་པ་སྟེ། དེ་ཡང་སེམས་ཉིད་མ་བཅོས་པའི་གནས་ལུགས་འདུས་མ་བྱས་པ་རིག་སྟོང་ཀ་དག་གི་ལྟ་བ་ནི། ཡིད་དཔྱོད་མཚན་འཛིན་གྱི་སྤྲོས་པའི་གྲྭ་ཟུར་སྤངས་ཤིང་། ཆོས་སྐུའི་དགོངས་པ་མཐར་ཐུག་པའམ། ངེས་པའི་དོན་གྱི་སྙིང་པོར་གྱུར་པའི་ཕྱིར་ཐིག་ལེ་ཆེན་པོ་སྟེ། དེའི་ངང་དུ་ལྷུན་གྲུབ་འོད་གསལ་གྱི་འཆར་གཞི་གོ་མ་འགགས་པར་གཏིང་གསལ་གྱི་ཚུལ་དུ་གནས་ཤིང་། དེ་ལྟ་བུའི་ཀ་དག་ལྷུན་གྲུབ་ཟུང་དུ་འཇུག་པའི་གདོད་མའི་ཡེ་གཞི་དེ་ཉིད་ངོ་བོ་རང་བཞིན་ཐུགས་རྗེའི་བདག་ཉིད་ཅན་གྱི་གཞིར་གནས་ཀྱི་སྐུ་གསུམ་དང་། གཞི་དབྱིངས་འོད་གསལ་གྱི་ཞིང་ཁམས་ཀྱང་ཡིན་ལ་དེས་ན་རིག་སྟོང་ཐིག་ལེ་ཉག་གཅིག་གི་ཀློང་དུ་དབྱིངས་ནང་གསལ་གྱི་སྐུ་དང་ཞིང་ཁམས་ཐམས་ཅད་རང་བཞིན་བབས་ལས་གྲུབ་པས་ན་གཞོན་ནུ་བུམ་སྐུའི་དཀྱིལ་འཁོར་ཞེས་ཀྱང་བྱའོ། །དེའི་ངང་ལས་མ་གཡོས་བཞིན་དུ། ཡེ་ཤེས་ལྔའི་རང་བཞིན་རླུང་ལྔའི་གདངས་གཡོས་པས་ལྷུན་གྲུབ་ཀྱི་ཕྱི་རྒྱ་རལ་ཏེ། དག་པ་མྱང་འདས་ཀྱི་སྒོ་ཀ་དག་སྟོང་པའི་དབྱིངས་སུ་མྱ་ངན་ལས་འདས་པའི་སྐུ་དང་ཞིང་སྣང་ཐམས་ཅད་རང་བྱུང་དུ་བཀོད་ཅིང་། མ་དག་འཁོར་བའི་སྒོ་དམིགས་པ་མེད་པའི་སྙིང་རྗེའི་རང་གདངས་འགྲོ་བ་དྲུག་གི་གདུལ་ཞིང་འདུལ་བྱེད་དང་བཅས་པའང་རང་སྣང་དུ་འཆར་བས། ཐུགས་རྗེ་ཕྱིར་གསལ་གྱི་སྐུ་དང་ཞིང་ཁམས་ཐམས་ཅད་ཀྱང་རིག་པའི་ཐིག་ལེར་རྫོགས་པ་ཡིན་ལ། ཚུལ་དེ་ལྟར་ངེས་པར་བྱས་ནས། གཞི་རྫོགས་པ་ཆེན་པོའི་ལྟ་བ་རང་གནས་ཀྱི་དོན་དེ་ཉིད་མངོན་སུམ་འོད་གསལ་གྱི་ཚུལ་དུ་རྟོགས་པར་སྨོན་པའོ། །གཉིས་པ་བསྲུང་དུ་མེད་པའི་དམ་ཚིག་ལ་སྨོན་པ་ནི། དམ་ཚིག་ཆེན་པོ་སྤང་བླང་མཚན་མ་དག །ཅེས་པོ་སྟེ། རྔམ་གློག་ལས། དེ་བས་དམ་ཚིག་ཅེས་བྱ་བ། །རང་གི་ལྟ་བ་དམ་ཚིག་ཡིན། །ཞེས་གསུངས་པ་ལྟར། གཞི་སེམས་ཀྱི་གནས་ལུགས་རིག་སྟོང་མཐའ་བྲལ་དུ་རྟོགས་པའི་གཤིས་དེར། གཉིས་སུ་སྣང་བ་དང་། གཉིས་སུ་འཛིན་པའི་སྤྲོས་པ་གང་ཡང་མ་གྲུབ་པས། དམ་བཅའ་ལས་འདའ་བ་དང་། ཡོན་ཏན་ལས་ཉམས་པའང་མི་སྲིད་ཅིང་། དེ་ལྟ་བུའི་དོན་ལས་མི་འདའ་བ་ནི་དམ་ཚིག་ཆེན་པོ་ཡིན་ཏེ། དེ་བཞིན་གཤེགས་པའི་སྤྱོད་ཡུལ་དངོས་ལ་ཞུགས་ཤིང་འདུས་མ་བྱས་ཀྱི་ཚུལ་ཁྲིམས་དང་ཟག་མེད་ཀྱི་སྡོམ་པ་མཐར་ཐུག་པ་ལ་གནས་པའི་ཕྱིར་རོ། །དེའི་ཚེ་ཀུན་ནས་ཉོན་མོངས་པ་དང་། རྣམ་པར་བྱང་བའི་ཕྱོགས་ཀྱི་ཆོས་ཐམས་ཅད་བརྗོད་བྲལ་གྱི་རིག་པ་ཉག་གཅིག་ཏུ་རྟོགས་ནས། སྤང་བླང་དང་། རེ་དོགས། དགག་སྒྲུབ་སོགས་གཉིས་ཆོས་ཀྱི་མཚན་མ་ཐམས་ཅད་གཉིས་མེད་ལྟ་བའི་ཀློང་དུ་དག་ཅིང་། སྡོམ་པ་གསུམ་གྱི་བཅས་མཚམས་ཇི་སྙེད་པའང་དེར་འདུས་ཤིང་རྣམ་པར་དག་གོ། །འདི་ལ་ལྡོག་ཆས་དབྱེ་ན་བཞི་སྟེ། སེམས་ཉིད་ཀ་དག་གི་ཀློང་ན་སྤང་གཉེན་གང་ཡང་མ་གྲུབ་པར་རྟོགས་ནས་བསྲུང་མཚམས་ཀྱི་མཚན་འཛིན་མེད་པ་ལྟ་བའི་དོན་དང་། རྒྱ་མཚོ་ལས་གཟའ་སྐར་ལྟར། གཟུགས་ཡུལ་ལ་དེར་འཛིན་མེད་ཅིང་སྒོ་ལྔ་རང་ཡན་ཕྱལ་བ་གུ་ཡངས་སུ་གནས་པ་སྒོམ་པའི་དོན་ཏེ། གཙོ་བོ་ཀ་དག་གི་དམ་ཚིག་གཉིས་དང་། ཡང་། འཁོར་འདས་སུ་སྣང་བ་ཐམས་ཅད་སེམས་ཉིད་གཅིག་པའི་རང་བཞིན་དུ་རྟོགས་པའི་ལྟ་བ་དང་། སྤྲོས་མེད་ཀ་དག་གི་ཀློང་དུ་འགགས་མེད་ལྷུན་གྲུབ་ཀྱི་འཆར་སྒོ་ལྷག་མེད་དུ་རྫོགས་པར་རྟོགས་ནས་སྣང་བ་བཞིའི་ཉམས་ལེན་དང་མི་འབྲལ་བ་སྒོམ་པ་སྟེ། གཙོ་བོ་ལྷུན་གྲུབ་ཀྱི་དམ་ཚིག་གཉིས་བསྟན་ཏོ། །དེ་དག་ཀྱང་། གླང་ཆེན་རབ་འབོག་ལས། བསྲུང་མཚམས་མེད་པ་མེད་པའི་དམ་ཚིག་དང་། །གཟུང་དང་འཛིན་པ་མེད་པས་ཕྱལ་པ་ཡིན། །ཐམས་ཅད་སེམས་སུ་འདུས་པས་གཅིག་པུ་ཉིད། །ལྷག་མ་མེད་པར་རྫོགས་པས་ལྷུན་གྱིས་གྲུབ། །ཅེས་གསུངས་པ་བཞིན་ནོ། །དེ་ལྟར་བསྲུང་དུ་མེད་པ་ཡེ་བསྲུང་ཆེན་པོའི་དམ་ཚིག་གི་དོན་རྟོགས་ནས་སྤངས་བླང་མཚན་འཛིན་གྱི་དྲི་མ་ཐམས་ཅད་རིག་སྟོང་ཟང་ཐལ་གྱི་དབྱིངས་སུ་དག་པར་སྨོན་པའོ། །གསུམ་པ་འདུ་འབྲལ་མེད་པའི་ཉམས་ལེན་ལ་སྨོན་པ་ནི། ཁྱབ་བརྡལ་ཆེན་པོ་རེ་དོགས་མདུད་པ་གྲོལ། །ཞེས་པ་སྟེ། དེ་ལྟར་ལྟ་བ་ཀློང་དུ་གྱུར་ཅིང་རིག་པ་ཡུལ་མེད་དུ་སོང་བའི་ཚེ། བལྟ་བྱ་ལྟ་བྱེད་དང་བཅས་པའི་བཟུང་དྲན་གྱི་འཆིང་བ་དབྱིངས་སུ་ཆད་དེ། རྩལ་སྣང་ཆོས་ཅན་དུ་སྣང་བ་ཀུན་ལ། རང་སྣང་རིས་མེད་དུ་རྟོགས་པའི་ཆོས་ཉིད་ཀྱིས་ཁྱབ་ཅིང་། གང་སྣང་གང་ཤར་ཐམས་ཅད་རིག་སྟོང་ཆོས་སྐུའི་ཡོ་ལངས་སུ་བརྡལ་བ་ནི། དཔེར་ན་ནམ་མཁའི་དབྱིངས་ལྟར་གཏད་མེད་རྒྱ་ཡན། བར་མེད་བློ་འདས། མངོན་སུམ་འོད་གསལ་ཆེན་པོའི་འཁོར་ཡུག་ཏུ་གྱུར་ནས། རང་བཞག་ཆུ་བོ་རྒྱུན་གྱི་ཏིང་ངེ་འཛིན་ལ་གནས་ཤིང་། དེའི་དུས་སུ། སྒོམ་པ་ཚད་དུ་ཕྱིན། འཁོར་འདས་ཆོས་སྐུར་རྫོགས་ཏེ། གཉེན་པོ་ལ་མཆོག་ཏུ་འཛིན་པ་དང་། སྤང་བྱ་ལ་སྐྱོན་དུ་ལྟ་བ་སོགས། རེ་དོགས་གཉིས་འཛིན་གྱི་མདུད་པ་ཐམས་ཅད་བརྗོད་བྲལ་མཉམ་ཉིད་ཀྱི་ཀློང་དུ་གྲོལ་ནས། གྱི་ལིང་སྒྲོག་ལས་ཐར་བ་ལྟར་ཕྱོགས་བྲལ་གུ་ཡངས་སུ་གྱུར། ཡེངས་ཡུལ་ཆོས་ཉིད་དུ་དག །དྲན་མེད་འོད་གསལ་ལ་གནས་པ་སྟེ། ཇི་སྐད་དུ། དྲན་སྣང་རང་གྲོལ་ཆོས་ཉིད་ངང་། །ཁྱབ་བརྡལ་ནམ་མཁའི་འཁོར་ཡུག་ལ། །དྲན་པས་གཟུང་དང་མ་གཟུང་མེད། །དྲན་པས་སྒྲོག་བཅིངས་མཐོལ་ལོ་བཤགས། །ཞེས་གསུངས་སོ། །དེ་ལྟར་ན། ཚུལ་དེ་ལྟ་བུའི་འདུ་འབྲལ་མེད་པའི་ཉམས་ལེན་གྱི་སྒོམ་པ་སྒྲ་ཇི་བཞིན་པ་ལ་རང་བྱན་ཚུད་པར་སྨོན་ནོ། །བཞི་པ་སྤང་ཐོབ་མེད་པའི་འབྲས་བུ་ལ་སྨོན་པ་ནི། རྫོགས་པ་ཆེན་པོ་ཆོས་སྐུ་མངོན་གྱུར་ཤོག །ཅེས་པ་སྟེ། ད་ལྟར་གྱི་སེམས་ཉིད་མ་བཅོས་པ་འདི་ཉིད་དྲི་མས་གཤིས་ལ་མ་གོས་པས་སྐྱོན་ཡེ་དག །ཡེ་ཤེས་རང་བྱུང་དུ་གསལ་བས་ཡོན་ཏན་ཡེ་རྫོགས་ཏེ་སྤང་ཐོབ་མེད་པའི་འབྲས་བུ་རང་ཆས་སུ་ཞུགས་ཤིང་། འདི་ལས་གུད་ན་སངས་རྒྱས་གཞན་མེད་པས་གཞི་འབྲས་དབྱེར་མེད་ཡིན་ལ། དེའི་དོན་ཚུལ་བཞིན་རྟོགས་པ་ན། ཐེག་པ་འོག་མ་ལྟར་རིམ་རྩོལ་ལ་ལྟོས་མི་དགོས་པར་རྩོལ་བྲལ་རང་བབས། བྱར་མེད་བློ་འདས་ཀྱི་ངང་དུ་ས་ལམ་ཆིག་ཆོད་དུ་རྫོགས། རླུང་སེམས་གཞི་དབྱིངས་སུ་ཐིམ་ནས། ད་ལྟ་ཉིད་དུ་ཡེ་ཤེས་བླ་མའི་ས་ལ་གནས་པ་མཐར་ཕྱིན་ཅིང་། དེའི་ཀློང་ན་ལམ་དང་འབྲས་བུའི་ཡོན་ཏན་ཐམས་ཅད་རྫོགས་པ་དང་། ཐོབ་བྱ་མཐར་ཐུག་ཏུ་གྱུར་པས་ན་འབྲས་བུ་རྫོགས་པ་ཆེན་པོ་ཞེས་བྱ་སྟེ། དེ་ནི་སྤངས་རྟོགས་ཀྱི་ཆོས་ཚད་མེད་པའི་ངོ་བོའམ། རྟེན་གཞིར་གྱུར་པའི་ཕྱིར་ཆོས་ཀྱི་སྐུའི་བདག་ཉིད་དོ། །འདི་ལ་ལྡོག་ཆས་དབྱེ་ན་དབྱིངས་ནང་གསལ་གྱི་སྐུ་གསུམ་ཞེས། རང་བཞིན་ཡེ་དག་ལ་གློ་བུར་འཕྲལ་དག་གིས་ཁྱད་པར་དུ་བྱས་པའི་དབྱིངས་འགྱུར་བ་མེད་པའི་ཆ་ནི་མི་འགྱུར་རྡོ་རྗེའི་སྐུ་དང་ཕྲ་བའི་ཡེ་ཤེས་ཐིམ་ལམ་རྨུགས་པ་མཁྱེན་ཆ་འགག་མེད་དུ་གསལ་བའི་ཆ་ནས་ཞི་བ་ཆོས་སྐུ་དང་། དབྱིངས་རིག་འདུ་འབྲལ་མེད་པའི་ཡེ་ཤེས་དེ་ཉིད་སྟོབས་སོགས་ཡོན་ཏན་རྒྱ་མཚོའི་ངོ་བོར་བཞུགས་པའི་ཆ་ནས་མངོན་པར་བྱང་ཆུབ་པའི་སྐུ་སྟེ་སྐུ་གསུམ་ཡིན་ལ། དེ་ལྟ་བུའི་ཆོས་སྐུ་དེ་ཉིད་ཇི་ལྟར་མངོན་དུ་གྱུར་པའི་ཚུལ་ནི། ཇི་སྐད་དུ། ཤེས་རབ་ཆེན་པོ་སྐད་ཅིག་ལ། །ཆོས་ཀུན་ཁོང་དུ་ཆུད་པ་འཆང་། །ཞེས་པ་ལྟར། གཞི་སྣང་གི་དངོས་པོ་རང་ངོར་སྣང་ཙམ་ནས། རིག་པ་ཉག་གཅིག་ཏུ་བྱེ་བྲག་ཕྱེད་ཅིང་། ཕྱེད་ཐོག་དེར་ཆོས་ཀྱི་སྐུར་གྲོལ་ནས། སྤྱི་གཞི་ལས་གྲོལ་གཞིར་འཕགས་ཏེ། གཞན་ལས་མ་བྱུང་བའི་འབྲས་བུ། ཐོག་མའི་གཞི་ཐོག་ཏུ་རང་སར་གནས་པ་སྟེ་ཀུན་ཏུ་བཟང་པོའི་ཁྱད་ཆོས་དྲུག་གི་སྒོ་ནས་སྐད་ཅིག་གིས་གྲོལ་བའི་ཀ་དག་ཆེན་པོར་སངས་རྒྱས་ཤིང་། དེའི་ཚེ་དམིགས་མེད་ཐུགས་རྗེའི་འཇུག་པ་ཕྱིར་གསལ་དུ་ཤར་ཏེ་སྐུ་གསུང་ཐུགས་རྣམ་པ་ཐམས་ཅད་པའི་ངོ་བོ་གྱུར་པའི་ཕྲིན་ལས་མི་ཟད་རྒྱན་གྱི་འཁོར་ལོས། ནམ་མཁའ་ཇི་སྲིད་དུ་སྲིད་ཞིའི་གདུང་བ་སེལ་བའི་ཡོན་ཏན་ཕུན་སུམ་ཚོགས་པ་རྩོལ་མེད་དུ་འབྱུང་ངོ་། །དེ་ལྟར་ལྷུན་གྲུབ་རང་གནས་ཀྱི་འབྲས་བུ་སྤང་ཐོབ་བྲལ་བའི་དོན་ལ་མྱུར་དུ་རེག་པར་ཤོག་ཅིག་ཅེས་པའོ། །མན་ངག་རྫོགས་ཆེན་ལྟར་སྨོན་པའི་ཤོ་ལོ་ཀ་འདིས་ནི། རྐང་པ་དང་པོས་ཀ་དག་ལྷུན་གྲུབ་ཟུང་འཇུག་གི་ལྟ་བ་བསྟན་པས་གཞི་རྫོགས་པ་ཆེན་པོ་དང་། བར་པ་གཉིས་ཀྱིས་རང་གྲོལ་གྱི་སྤྱོད་པ་དང་། རང་བཞག་གི་སྒོམ་པ་གཉིས་ཀ་ཐུན་མོང་དུ་བསྟན་པས་ལམ་རྫོགས་པ་ཆེན་པོ་དང་། རྐང་པ་ཐ་མས་བསལ་བཞག་དང་བྲལ་བའི་ཆོས་སྐུ་བསྟན་པས་འབྲས་བུ་རྫོགས་པ་ཆེན་པོ་སྟེ། ཐེག་མཆོག་འོད་གསལ་སྙིང་པོའི་བརྗོད་དོན་ཐམས་ཅད་ལྷག་མེད་དུ་བསྡུས་སོ། །དེ་ཡན་གྱིས་ལམ་དངོས་ལ་སྨོན་པ་སོང་ནས། སྤྱི་དོན་གསུམ་པ་ལམ་གྱི་བྱེད་ལས་འགྲུབ་པར་བསྔོ་བ་ནི། བརྒྱུད་པ་གསུམ་གྱི་བྱིན་རླབས་སྙིང་ལ་ཞུགས། །སྒྱུ་འཕྲུལ་དྲྭ་བའི་ལམ་གསང་སེམས་ལ་རྫོགས། །ཕྲིན་ལས་རྣམ་བཞི་ལྷུན་གྱིས་གྲུབ་པ་ཡིས། །མུ་མཐའ་མེད་པའི་འགྲོ་བ་སྒྲོལ་བར་ཤོག །ཅེས་པ་སྟེ། དེ་ཡང་རང་སྣང་གི་འོག་མིན་ན། སྟོན་འཁོར་ཐམས་ཅད་ཡེ་ཤེས་འོད་གསལ་བའི་ངང་དུ་དགོངས་ཀློང་རོ་གཅིག་པར་བཞུགས་པ་ནི་རྒྱལ་བ་དགོངས་བརྒྱུད་དེ། དེ་ནི་བསྟན་པ་དང་། ཐེག་པ་ཐམས་ཅད་ཀྱི་འཕྲོ་གཞིའམ་བརྗོད་བྱར་གྱུར་པས་ན་བརྒྱུད་པ་ཀུན་གྱི་འབྱུང་ཁུངས་ཡིན་ལ། དེ་ནས་གཞན་སྣང་ལོངས་སྐུའི་སྟོན་པས་རིག་པ་བྱིན་རླབས་ཀྱི་གསུང་ངམ། སྐུའི་བརྡ་ཐབས་ལ་བརྟེན་ནས། འཕགས་པའི་སར་བཞུགས་པའི་རིག་འཛིན་རྣམས་ཀྱི་རྒྱུད་ལ་རྒྱལ་བའི་དགོངས་པ་རིམ་གྱིས་སྐྱེད་པ་ནི་རིག་འཛིན་བརྡ་བརྒྱུད་དང་། དེ་རྣམས་ཀྱིས་ལྷ་ཀླུ་མིའི་གདུལ་བྱ་སོ་སོ་ལ་རྗོད་བྱེད་རྒྱུད་སྡེ་དང་། བརྗོད་བྱ་སྨིན་གྲོལ་གྱི་གདམས་པ་སྩལ་བ་ཞལ་ནས་སྙན་དང་ཐུགས་ནས་ཐུགས་སུ་བརྒྱུད་ཅིང་དེང་སང་བར་དུ་འོང་བ་ལ་གང་ཟག་སྙན་བརྒྱུད་ཅེས་གྲགས་ཤིང་། ཡང་སྔ་མ་གཉིས་གཅིག་ཏུ་བགྲངས་པ་ལ་རྒྱལ་བ་དགོངས་བརྡའི་བརྒྱུད་པ་དང་། དེ་ནས་འཁོར་ཚོམ་བུ་དང་བཅས་པ་ཟག་མེད་རིག་འཛིན་གྱི་སར་གཤེགས་པ་ཇི་སྙེད་ཅིག་བྱུང་བ་ལ་རིག་འཛིན་རིག་པའི་བརྒྱུད་པ་དང་། འཁོར་དང་བཅས་ཏེ་གཤེགས་མི་ནུས་པའི་མཚམས་མན་ཆད་ལ་རྣལ་འབྱོར་རྣ་བར་བརྒྱུད་པ་ཞེས་བཞེད་དེ། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་བ། །དགོངས་པ་རིག་པ་རྣ་བར་བརྒྱུད། །ཅེས་པའི་དོན་ནོ། །དེ་ལྟར་འཆད་ཚུལ་གཉིས་པོ་དེ་ཡང་དབྱེ་བསྡུའི་ཁྱད་པར་ཙམ་ལས་དོན་གནད་གཅིག་པའི་ཕྱིར་གང་ལྟར་བཤད་ཀྱང་མི་འགལ་ཞིང་། དེ་ལྟ་བུའི་བརྒྱུད་པ་དེ་དག་གི་ཐུགས་རྗེ་དང་ཡེ་ཤེས་མ་ལུས་པ་ནི། རྩ་བའི་བླ་མ་ལ་རྫོགས་ཏེ། ཇི་ལྟར་ན། སེམས་ཉིད་ཡེ་སངས་རྒྱས་པའི་དོན་མངོན་དུ་བྱས་ནས་རྒྱལ་བ་ཀུན་དང་ཐུགས་ཡིད་འདྲེས་པས་དགོངས་བརྒྱུད་རྫོགས་ཤིང་། དགོངས་པ་དེ་ཡང་མོས་གུས་ཀྱི་ཉེར་ལེན་དང་། བརྒྱུད་པ་གོང་མའི་བྱིན་རླབས་ཀྱི་བརྡ་ཐབས་ལ་བརྟེན་ནས་ཐུགས་རྒྱུད་དུ་འཕོས་པས་བརྡ་བརྒྱུད་རྫོགས་པ་དང་། སྔོན་ནས་ད་ལྟའི་བར་དུ་ཟམ་མ་ཆད་པར་བྱུང་བའི་རྒྱུད་ལུང་མན་ངག་གི་གདམས་པ་ཐམས་ཅད་མངའ་བས་སྙན་བརྒྱུད་ཀྱང་རྫོགས་པའི་ཕྱིར། དེས་ན་བླ་མ་ནི། སྐྱབས་ཀུན་འདུས་ཞལ། དཀྱིལ་འཁོར་ཀུན་བདག །སངས་རྒྱས་དངོས་བྱོན་ཡིན་པར་མ་ཟད། རང་ངོར་བཀའ་དྲིན་སངས་རྒྱས་ལས་ཀྱང་ལྷག་པར་ཤེས་པའི་མོས་གུས་ཀྱིས་ཐུགས་ཡིད་དབྱེར་མེད་དུ་བསྲེ་བའི་བླ་མའི་རྣལ་འབྱོར་ཉིད་ལམ་གྱི་སྲོག་ཏུ་བཟུང་ནས། བསྐྱེད་རྫོགས་ཀྱི་ལམ་གང་སྒོམ་ཡང་བསྒྲུབ་བྱ་བླ་མའི་ཡེ་ཤེས་ཀྱི་སྐུ་དང་། འོད་གསལ་གྱི་ཐུགས་འབའ་ཞིག་རང་རྒྱུད་དུ་སྒྲུབ་པ་ཡིན་པར་ཤེས་དགོས་ཤིང་། མདོར་ན་ཉམས་ལེན་ཀུན་ལ་དེས་ཁྱབ་པར་བྱེད་པ་ནི་གནད་ཀྱི་སྙིང་པོར་ངེས་ཏེ། དེ་དང་བྲལ་བ་ལ་དངོས་གྲུབ་མི་འབྱུང་བའི་ཕྱིར། བྷ་བི་ལྷས། གང་ཕྱིར་རྡོ་རྗེ་འཛིན་པ་ཡིས། །དངོས་གྲུབ་སློབ་དཔོན་རྗེས་འབྲང་གསུངས། །ཞེས་པ་ལྟར་རོ། །དེ་ལྟར་བླ་མའི་མོས་གུས་བསྒོམས་པའི་བྱེད་ལས་སམ། ལག་རྗེས་ནི། བརྒྱུད་པ་གསུམ་གྱི་བྱིན་རླབས་ཐམས་ཅད་ཝ་ཁ་ནས་ཆུ་འདྲེན་པ་ལྟར་བླ་མའི་ཐུགས་རྗེ་ལ་བརྟེན་ནས་རང་གི་སྙིང་ལ་ཅིག་ཆར་དུ་ཞུགས་ཤིང་དོན་བརྒྱུད་ཀྱི་དགོངས་པ་ལོན། ཅིར་སྣང་བླ་མར་ཤར། དོན་གཉིས་ལྷུན་གྱིས་གྲུབ་པ་སོགས་འབྱུང་བའོ། །དེ་ནས་གཞི་ལྟ་བ་དག་མཉམ་བདེན་པ་དབྱེར་མེད་ཀྱི་དོན་གཏན་ལ་ཕབ་ནས། ལམ་སྒོམ་པ་བསྐྱེད་རྫོགས་ཟུང་འཇུག་གི་ཏིང་ངེ་འཛིན་ཉམས་སུ་བླང་བ་ནི་བླ་ན་མེད་པའི་ལམ་ཡིན་ལ། དེ་ཡང་ཕུང་ཁམས་སྐྱེ་མཆེད་ཀྱི་རྟོག་ཚོགས་སྒྱུ་མ་ལྟར་སྣང་བ་ཉིད་ལྷ་དང་ཡེ་ཤེས་ཀྱི་རང་བཞིན་དུ་འཕྲུལ་ཅིང་། དེ་གཉིས་ཡེ་ནས་ངོ་བོ་བདག་གཅིག་ཏུ་འབྲེལ་བས་ན་ལྷར་རྟོག་དབྱེར་མེད་ཀྱི་སྒྱུ་འཕྲུལ་དྲྭ་བ་སྟེ། དེའི་དོན་གཞུང་བཞིན་བསྒོམ་པ་ནི་ཟབ་གསལ་གཉིས་མེད་ཀྱི་བསྐྱེད་རིམ་དང་། སྟོང་ཉིད་སྒྱུ་མའི་རང་གདངས་རིག་པ་ཡེ་ཤེས་སུ་འཕྲུལ་པའི་དབྱེར་མེད་བདེ་བ་ཆེན་པོ་ནི། ངེས་དོན་སྒྱུ་འཕྲུལ་དྲྭ་བ་སྟེ། དེའི་དོན་མཚན་བཅས་ཀྱི་ཐབས་ལ་བརྟེན་ནས་མཚན་མེད་འོད་གསལ་ལ་སྦྱོར་བའི་ཚུལ་དུ་སྒོམ་པ་ནི་རྫོགས་རིམ་ཡིན་ཅིང་། དེ་གཉིས་ཟུང་དུ་འཇུག་པ་ལ་སྒྱུ་འཕྲུལ་དྲྭ་བའི་ལམ་གསང་ཞེས་བྱ་སྟེ་ཐུན་མོང་མ་ཡིན་པའི་ཟབ་དོན་དབང་རབ་ཀྱི་འཇུག་ངོགས་ཡིན་པའི་ཕྱིར་རོ། །ལམ་དེ་བསྒོམས་པའི་བྱེད་ལས་ནི། བརྩོན་པའི་ལག་རྗེས་སེམས་ལ་ཤར་ཏེ་རང་སེམས་ཡེ་ནས་ཟུང་འཇུག་ཡེ་ཤེས་ཀྱི་ལྷ་སྐུར་རྫོགས་པའི་དོན་མངོན་དུ་གྱུར་པ་ཡིན་ལ། དེ་ཡང་སྦྱོར་ལམ་དུ་རླུང་སེམས་ཙམ་གྱི་ལྷ་སྐུ། མཐོང་ལམ་དུ་ཡེ་ཤེས་འོད་གསལ་རྐྱང་པའི་ལྷ་སྐུ། སྒོམ་ལམ་དུ་ཟུང་འཇུག་གི་ལྷ་སྐུ། མི་སློབ་ལམ་དུ་དབྱེར་མེད་བདེ་ཆེན་གྱི་ལྷ་སྐུ་རྣམས་རིམ་པ་བཞིན་མངོན་དུ་གྱུར་པ་སྟེ། ལམ་རིམ་ལས། རང་སེམས་ཕྱག་རྒྱ་ཆེན་པོ་ཉིད། །བསྒོམས་པ་མངོན་དུ་གྱུར་པའི་ལྷ། །ཞེས་གསུངས་པའི་ཕྱིར། དེ་ལྟར་ཚིག་རྐང་གཉིས་པོ་དེས་གཙོ་བོར་རང་དོན་གྱི་བྱེད་ལས་བསྟན་ཅིང་། དེ་ལྟ་བུའི་ལམ་གྱུར་གྱི་འབྲས་བུར་དབང་འབྱོར་བའི་ཚེ། གནས་སྐབས་དང་མཐར་ཐུག་ཀུན་ཏུ་གང་འདུལ་གྱི་ཕྲིན་ལས་རྣམ་པ་བཞི་དང་། ཆོ་འཕྲུལ་རྣམ་པ་བཞི་དང་། གདུལ་བ་རྣམ་པ་བཞིའི་ཕྲིན་ལས་སོགས་རྟག་ཁྱབ་ལྷུན་གྱིས་གྲུབ་པ་ཡི་སྒོ་ནས། ཕྱོགས་མཚམས་ཀྱི་མུ་དང་། གྲངས་དུས་ཀྱི་མཐའ་ལ་གཏུགས་པ་མེད་པའི་འགྲོ་བ་རྒྱུད་ལྔའི་ཡིད་ཅན་རྣམས། མི་གནས་པའི་མྱང་འདས་སུ་སྒྲོལ་བར་མཛད་པ་ནི་གཙོ་བོར་གཞན་དོན་གྱི་བྱེད་ལས་ཏེ། རྐང་པ་ཕྱི་མ་གཉིས་ཀྱིས་བསྟན་ནས། དེ་ལྟར་ལམ་གྱི་བྱེད་ལས་དོན་གཉིས་ཕུན་སུམ་ཚོགས་པའི་ཡོན་ཏན་ལ་མངའ་བརྙེས་པར་ཤོག་ཅིག་ཅེས་སྨོན་ནོ། །བཞི་པ་ལམ་གྱི་མཐུན་རྐྱེན་ཚང་བར་སྨོན་པ་ནི། ཞི་ཁྲོ་སྤྲུལ་པའི་འཁོར་ལོས་ལུང་བསྟན་ཅིང་། །མཁའ་འགྲོ་རྣམས་ཀྱིས་བུ་བཞིན་སྐྱོང་བ་དང་། །ཆོས་སྐྱོང་སྲུང་མས་བར་ཆད་ཀུན་བསལ་ནས། །ཡིད་ལ་སྨོན་པ་མཐའ་དག་འགྲུབ་གྱུར་ཅིག །ཅེས་པ་སྟེ། དེ་ཡང་ལུང་སྟོན་མཁན་གྱི་ལྷ་རང་རྒྱུད་པ་ཞིག་གཞན་ག་ཤེད་ན་མེད་ཀྱི། རང་གི་སེམས་ཉིད་ལྷ་དང་བླ་མའི་ངོ་བོར་ཡེ་ནས་དག་པར་ཤེས་པའི་ངེས་ཤེས་ཀྱི་ལྟ་བ་དང་། མོས་གུས་དང་། སྒོམ་པ་གོམས་པའི་གསལ་སྣང་གྱད་དུ་གྱུར་པའི་རྣམ་པར་ཤར་ཏེ། དངོས་ཉམས་རྨི་ལམ་ཅི་རིགས་པར་ཡི་དམ་གྱི་ལྷ་ཞི་ཁྲོ་སྤྲུལ་པའི་དཀྱིལ་འཁོར་གྱི་འཁོར་ལོས་ཞལ་དངོས་སུ་བསྟན་ནས། མཐར་ཐུག་བྱང་ཆུབ་ཆེན་པོར་དང་། གནས་སྐབས་ལམ་དུས་སུ་ལེགས་ཉེས་ཐམས་ཅད་ལུང་སྟོན་པར་མཛད་ཅིང་། དེས་ཇི་སྐད་བསྟན་པ་བཞིན་དུ་ཉེས་ཕྱོགས་སྤང་ཞིང་ལེགས་ཕྱོགས་ལ་ཞུགས་པས་ལམ་མྱུར་དུ་མཐར་ཕྱིན་པའི་རྐྱེན་དུ་འགྱུར་བས་ན་མཐུན་རྐྱེན་ཡིན་ནོ། །འདིར་གསར་མའི་ལུགས་ལྟར་ན་ཞི་བ་ལ་ལོངས་སྤྲུལ་གཉིས་ཆར་ཡོད་པ་སྨོས་མ་དགོས་ཀྱང་ཁྲོ་བོ་ནི་སྐུ་གསུམ་གྱི་ཟླས་ཕྱེ་བའི་སྤྲུལ་སྐུ་ཁོ་ན་བཞེད་ཅིང་། སྔ་འགྱུར་གྱི་རྒྱུད་སྡེར་ནི་ཁྲོ་བོ་ལའང་གཉིས་ཀར་གསུངས་པ། དེས་ན་ཆོས་སྐུའི་ཀློང་ལས་གཟུགས་སྐུར་ཤར་བའམ་སྤྲུལ་པའི་དོན་ཡིན་ཏེ། བརྗོད་མེད་ལས། ཞི་ཁྲོ་སྤྲུལ་པའི་སྐུ་ལ་ཕྱག་འཚལ་འདུད། །ཅེས་པའང་དེ་ལྟར་རོ། །གཞན་ཡང་། སྟོང་པ་ཉིད་ཀྱི་མཁའ་ལ་ཐུགས་རྗེ་རིག་པའི་རྩལ་ཤུགས་ཀྱིས་འགྲོ་བའི་འཕགས་པ་ཆེན་པོ་རྣམས་ཀྱིས་ཀྱང་རྟག་ཏུ་དགོངས་ཏེ། གསང་སྙིང་ལས། དམ་པའི་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །ཅེས་པ་ལྟར་དང་། དཔལ་ཆེན་པོའི་ཐ་ཚིག་ལ་གནས་ཤིང་གནས་ཡུལ་དུར་ཁྲོད་ན་སྤྱོད་པའི་ཞིང་སྔགས་ལྷན་སྐྱེས་ཀྱི་མཁའ་འགྲོ་མ་གསང་བའི་གཉེར་འཛིན་རྣམས་ཀྱིས་ཀྱང་བུ་བཞིན་དུ་སྐྱོང་བའི་ཚུལ། སྔ་མ་ལས། ཚོགས་ཀྱི་དཀྱིལ་འཁོར་ཆེན་པོ་འདིའི། །མིང་ཙམ་འཛིན་པར་བྱེད་པ་ཡང་། །གཙུག་གི་ནོར་བུ་འབར་བ་ལྟར། །གཡོ་སྒྱུ་མེད་ཅིང་གུས་ལྡན་ཅིང་། །སེམས་ཀྱི་བླང་ནས་སྤྱི་བོ་ཡི། །གཙུག་ཏུ་བཞག་སྟེ་བཀུར་བར་བགྱི། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་བསྒྲུབ། །ཅེས་སོགས་གསུངས་པ་ལྟར་རོ། །ཡང་། དམ་ཚིག་ཅན་གྱི་རིག་སྔགས་འཆང་བ་ནི་ཆོས་སྐྱོང་དམ་ཅན་གྱི་བླ་རྡོ་ཡིན་པས། ཕོ་མོ་མ་ནིང་གི་སྡེར་གཏོགས་པའི་རྒྱུད་གསུམ་དྲེགས་པའི་ཚུལ་ཅན་སྲུང་མ་རྣམས་ཀྱང་། ཤ་རུལ་ལ་སྦྲང་མ་བཞིན་མ་བསྒྲུབ་རང་འཁོར་དུ་འདུས་ནས། སྒྲུབ་པ་པོའི་འབྱུང་བཞི་ཕྱིའི་བར་ཆད། རྩ་རླུང་ནང་གི་བར་ཆད། གཟུང་འཛིན་གསང་བའི་བར་ཆད་སོགས། བྱང་ཆེན་ལ་བར་དུ་གཅོད་པའི་ཚོགས་ཀུན་ཕྱིར་བསལ་ནས་མཐུན་པའི་སྟོང་གྲོགས་བགྱིད་པ་ཡིན་ལ། དེ་ལྟ་བུའི་ལམ་གྱི་མཐུན་རྐྱེན་ཚང་བ་ལ་བརྟེན་ནས། རྣམ་པར་བྱང་བའི་ཕྱོགས་དང་མཐུན་པའི་འདོད་དོན་ཡིད་ལ་ཇི་ལྟར་རེ་ཞིང་སྨོན་པ་མཐའ་དག་བདེ་མྱུར་དུ་འགྲུབ་སྟེ་དོན་གཉིས་མཐར་ཕྱིན་པར་གྱུར་ཅིག་ཅེས་པའོ།། །།ད་ནི་རྩ་བའི་སྤྱི་དོན་གཉིས་པ། གཞན་དོན་བསྟན་པ་དང་འགྲོ་བའི་ཆེད་དུ་བསྔོ་བ་ནི། རྒྱལ་བའི་བསྟན་པ་དར་ཞིང་རྒྱས་པ་དང་། །བསྟན་འཛིན་རྣམས་ཀྱི་བཞེད་པའི་དོན་ཀུན་འགྲུབ། །མ་ལུས་སྐྱེ་རྒུའི་འགལ་རྐྱེན་ཀུན་ཞི་ནས། །ཕུན་ཚོགས་མཐའ་དག་ཡིད་བཞིན་འབྱོར་གྱུར་ཅིག །ཅེས་པ་སྟེ། དེ་ཡང་། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་ཡིན། །ཅེས་པ་ལྟར། ལུང་སྡེ་སྣོད་གསུམ་དང་། མངོན་རྟོགས་བསླབ་པ་གསུམ་གྱིས་བསྡུས་པའི་རྒྱལ་བའི་བསྟན་པ་རིན་པོ་ཆེ་ཕྱོགས་ཐམས་ཅད་དུ། སྒོ་ཐམས་ཅད་ནས་དར་ཞིང་རྒྱས་ལ། ཡུན་རིང་དུ་གནས་པ་དང་། བསྟན་པ་དེ་ཡང་བསྟན་འཛིན་གང་ཟག་གི་རྒྱུད་དང་འབྲེལ་བ་སྟེ། སྔ་མ་ལས། དེ་འཛིན་བྱེད་པ་སྨྲ་བྱེད་དང་། །སྒྲུབ་པ་བྱེད་པ་ཁོ་ནའོ། །ཞེས་གསུངས་པ་བཞིན། ལུང་གི་བསྟན་པ་ཐོས་བསམ་འཆད་ཉན་གྱི་སྒོ་ནས་འཛིན་པ་དང་། རྟོགས་པའི་བསྟན་པ་སྒྲུབ་པ་ཉམས་ལེན་གྱི་སྒོ་ནས་འཛིན་དགོས་པའི་ཕྱིར་རོ། །དེས་ན་བསྟན་འཛིན་དགེ་བའི་བཤེས་གཉེན་དེ་རྣམས་ཀྱིས་ཀྱང་ལྷག་པའི་ཐུགས་བསྐྱེད་ཀྱིས་ཀུན་ནས་བསླང་སྟེ་བསྟན་པ་ལ་བྱ་བ་བྱེད་པ་དང་། སེམས་ཅན་ལ་ཕན་བདེ་སྦྱིན་འདོད་པས་མཚོན། ཐུགས་ལ་ཇི་ལྟར་བཞེད་པའི་ཆོས་མཐུན་གྱི་དོན་ཀུན་གེགས་མེད་ཡིད་བཞིན་དུ་འགྲུབ་པ་དང་། དེ་ལ་བརྟེན་ནས་མ་ལུས་མི་ལུས་ལུས་པ་མེད་པའི་སྐྱེ་རྒུ་ཡོངས་ཀྱི་མི་འདོད་པའི་དངོས་པོ། མངོན་མཐོ་ངེས་ལེགས་ཀྱི་འབྱོར་པས་ཕོངས་ཤིང་། འཁྲུལ་སྣང་སྲིད་པའི་སྡུག་བསྔལ་བརྣག་པར་དཀའ་བའི་ཚོགས་དང་། དེའི་རྒྱུ་ཆོས་དང་གང་ཟག་གི་བདེན་འཛིན་དང་། དེས་བསྐྱེད་པའི་ལས་ཉོན་གྱི་འདུ་བྱེད་མཚམས་སྦྱོར་དང་བཅས་པའི་འགལ་རྐྱེན་ཀུན་ཞི་ནས། མཐུན་ཕྱོགས་སུ་གྱུར་པ་རང་རང་གི་དབང་པོའི་རིམ་པ་ལྟར། གནས་སྐབས་སུ་ཐེག་པ་གསུམ་ལ་ཞུགས་པའི་ལམ་གྱི་རྟེན་དང་། ལམ་དངོས་དང་། ལམ་གྱི་འབྲས་བུ་ལ་སྤྱོད་ཅིང་། མཐར་ཐུག་ཀྱང་སངས་རྒྱས་ཀྱི་ཐེག་པ་ཁོ་ནར་བརྟེན་ནས་བླ་ན་མེད་པའི་བྱང་ཆུབ་ཀྱི་གོ་འཕང་། སྤངས་རྟོགས་ཀྱི་ཡོན་ཏན་ཟད་མི་ཤེས་པའི་དཔལ་ལ་དབང་བསྒྱུར་བ་སོགས། འཕྲལ་དང་ཡུན་གྱི་ཕུན་སུམ་ཚོགས་པའི་ལེགས་ཚོགས་མཐའ་དག་ཡིད་ལ་ཇི་ལྟར་འདོད་ཅིང་སྨོན་པ་བཞིན་དུ་འབད་རྩོལ་མེད་པར་རྒྱུད་ལ་འབྱོར་བར་གྱུར་ཅིག་ཅེས་སྨོན་པ་དང་། དགེ་ཚོགས་འདི་ལ་བརྟེན་ནས་དེ་དང་དེ་ལྟ་བུར་གྱུར་ཅིག་སྙམ་པ་ནི་བསྔོ་བའང་ཡིན་ནོ། །དེ་ལྟར་ན་གཞུང་དབུ་ཞབས་ཀྱི་དོན་མཐའ་དག་རྫོགས་པར་བཀྲལ་བ་རེ་ཞིག་གྲུབ་བོ། །འདིར་སྨྲས་པ། འཁོར་འདས་ཆོས་རྣམས་ཀུན་གྱི་དེ་བཞིན་ཉིད། །རྣམ་མེད་འོད་གསལ་འཕོ་འགྱུར་མེད་པའི་དབྱིངས། །རྣམ་བཅས་སྤྲོ་བསྡུའི་བྱེད་པོར་ཡོངས་བཞེངས་པའི། །ཡེ་ཤེས་སྒྱུ་མ་གསང་འཛིན་རྡོ་རྗེ་ཆོས། ༡ །གང་དང་མི་གཉིས་རབ་འབྱམས་རྒྱལ་ཀུན་གྱི། །གསང་བ་བསམ་མི་ཁྱབ་པའི་ངོ་མཚར་ལ། །དབང་བསྒྱུར་གྲུབ་པ་མཆོག་གི་ཞལ་ལུང་འདི། །དགོངས་པའི་རྩལ་ཆེན་བདུན་གྱི་རྒྱ་ཡིས་བཏབ། ༢ །རྒྱུད་ལུང་མན་ངག་རྒྱ་མཚོའི་རྡོ་རྗེའི་གནས། །ཉུང་ངུའི་ཚིག་གི་སྒྲོམ་དུ་སྩལ་བ་ན། །ཟབ་བརླིང་ཕྱག་རྒྱའི་མདུད་པ་འགྲོལ་བཟོད་པའི། །རྣམ་དཔྱོད་དེ་ཡང་རྡོ་རྗེའི་སོར་མོ་བཞིན། ༣ །དེ་ཕྱིར་འདི་དོན་ཇི་བཞིན་སྟོན་ནུས་པ། །ཟབ་གསལ་མྱུར་བའི་བློ་གྲོས་ནམ་མཁའི་ལྟོར། །ཤེས་བྱ་ཀུན་གྱི་ཚིག་དོན་རབ་བསྐྱིལ་བའི། །འཇིགས་བྲལ་སློབ་དཔོན་ཆོས་ཀྱི་དབང་པོ་ཙམ། ༤ །ཡོངས་འཛིན་མཆོག་དེའི་གསུང་གསང་མནྡྷཱ་རས། །ཡིད་ཀྱི་ཆུ་མཚོ་ཡང་ཡང་བསྲུབས་བྱས་ཀྱང་། །སྙིང་པོའི་གདམས་བཅུད་མ་ལོན་སྐལ་དམན་བདག །འདི་འདྲའི་ཚིག་དོན་སྨྲ་ལ་ཇི་ལྟར་དབང་། ༥ །བློ་གསལ་དོན་གཉེར་རྣམ་འགྱུར་དབྱུག་གུའི་ལྕེས། །བསྐུལ་བའི་རྐྱེན་གྱིས་ཕོ་ཚོད་འུར་སྒྲ་ཆེར། །བསྒྲགས་ཀྱང་རྣ་བ་གཙེར་བའི་ཚེར་མ་ལས། །དགོས་དོན་ཁོག་པ་སྟོང་པའི་རྔ་གོག་བཞིན། ༦ །དེ་ལྟ་ན་ཡང་སྤྱི་དོན་རྡོ་རྗེའི་ཚིག །རྩ་བར་བཟུང་ནས་དྲི་མེད་གསུང་གི་རྒྱུན། །རང་བློར་ཅུང་ཟད་ངེས་དང་རྩལ་བཤད་ཀྱིས། །མི་འགལ་དོན་དང་བསྟུན་ཏེ་བསྡེབས་པར་བྱས། ༧ །མ་རྟོགས་ལོག་པར་རྟོག་དང་ཐེ་ཚོམ་དྲིས། །དགོངས་པའི་དོན་བཟང་བསྣུབས་དང་གསང་སྒྲོགས་སུ། །གྱུར་པའི་ཉེས་ཚོགས་ཆོས་ཀྱི་སྤྱན་ལྡན་དང་། །ཆོས་བདག་མིག་ཡངས་ཚོགས་ཀུན་བཟོད་མཛོད་ཅིག ༨ །ལད་མོར་དགའ་བ་བྱིས་པའི་རྩེ་འཇོ་བཞིན། །རྩོམ་པའི་གཟུགས་བརྙན་མཁས་པའི་རྗེས་ཕྱོགས་ཏེ། །ཆོས་དང་མཐུན་པའི་ཁ་གཡར་འབོད་པ་ཙམ། །འདི་ལས་དགེ་ཚོགས་ཐོབ་སྙམ་ཆེར་མི་བསམ། ༩ །འོན་ཀྱང་རང་གི་བློ་གྲོས་གོམས་པ་དང་། །སྐལ་མཉམ་གཞན་ལའང་ཕན་པ་ཅུང་ཟད་སླད། །བསམ་པ་དགེ་བས་བཀོད་པའི་ལེགས་བྱས་ཀྱིས། །འགྲོ་ཀུན་སྐུ་བཞིའི་རྒྱལ་ཐབས་བརྙེས་གྱུར་ཅིག ༡༠ །ཅེས་པ་འདིའང་སྔོན་དུས་སུ་མཁན་ཆེན་རྡོ་རྗེ་འཆང་པདྨ་བཛྲ་གྱི་ཞལ་སྔ་ནས་ཁྱོད་ཀྱིས་འདི་ལ་རྣམ་བཤད་བློས་གང་དཔོགས་ཤིག་བྲིས་ཞེས་ལན་མང་དུ་གསུངས་པ་ཡིད་ལ་བཅག་ཀྱང་། རེ་ཞིག་སྒྱིད་ལུག་གི་ངང་དུ་ལུས་ཤིང་ཉེ་ཆར་སྤྲུལ་པའི་སྐུ་མཆོག་འཇིགས་མེད་ཀུན་དགའ་དང་། སེམས་དཔའ་ཆེན་པོ་འོད་ཟེར་རྡོ་རྗེ་ཟུང་ནས་བཀའ་ནན་གྱིས་བསྐུལ་བས་མཚམས་སྦྱར་ཏེ། རང་ཉིད་གོམས་པ་སྐྱེ་བ་དང་། བློ་གྲོས་གསར་བུ་དག་ལའང་ཕན་པའིི་བློས། རྨོངས་བཙུན་འདུ་ཤེས་གསུམ་པ་ཀུན་དགའ་རྒྱལ་མཚན་དུ་འབོད་པས་ཡང་ཡང་དཔྱད་དེ་སྦྱར་བ། འདིས་ཀྱང་བསྟན་པའི་སྙིང་པོ་ཡུན་རིང་དུ་གནས་པ་དང་། མཁའ་ཁྱབ་སྐྱེ་རྒུ་ཐམས་ཅད་ཟུང་འཇུག་བླ་ན་མེད་པའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །སརྦ་མངྒ་ལཾ་བྷ་ཝནྟུ།། །།