 ཀུན་མཁྱེན་པདྨ་དཀར་པོའི་གསུང་འབུམ།གླེགས་བམ། ཛ༽ཀུན་མཁྱེན་པདྨ་དཀར་པོ།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། དཔལ་ལྡན་དུད་སོལ་ལྷ་མོའི་གཏོར་ཆོག་མདོར་བསྡུས།དཔལ་ལྡན་དུད་སོལ་ལྷ་མོའི་གཏོར་ཆོག་མདོར་བསྡུས་བཞུགས་སོ། །གང་ཞིག་དྲན་པ་ཙམ་གྱིས་ཀྱང་། །བདུད་ཀྱི་གཡུལ་ལས་རྒྱལ་བ་དང་། །ཕུན་སུམ་ཚོགས་རྣམས་ཡིད་བཞིན་དུ། །སྟེར་མཛད་དཔལ་ལྡན་ལྷ་མོར་འདུད། །འདིར་ཡེ་ཤེས་ཀྱི་མཁའ་འགྲོ་མ་དུད་པའི་སོལ་བ་ཞེས་བྱ་བ། རྒྱ་བོད་ཐམས་ཅད་ན་འགྲན་ཟླ་དང་བྲལ་བ། དཀར་ཕྱོགས་སྐྱོང་བ་ཐམས་ཅད་ཀྱི་གཙོ་བོ། །རྒྱུད་སྡེ་གཉན་པོ་ཐམས་ཅད་ཀྱི་བཀའ་སྲུང་དེ་ཉིད་ཀྱི་གཏོར་ཆོག་རྒྱས་པ་ནི་ཁོ་བོས་གཞན་དུ་བཤད་ཟིན་ལ། །འདིར་ཐུན་གཏེར་དུ་བྱ་བའི་རིམ་པ་རྡོ་རྗེ་འཆང་མར་རྔོག་ཡབ་སྲས་ཀྱི་གསུང་ཇི་ལྟ་བ་བཞིན་འགོད་པར་བྱ་བ་ནི། རང་ཉིད་དགྱེས་རྡོར་གདན་བཞི་ལ་སོགས་པ་ལྷའི་རྣལ་འབྱོར་སྔོན་དུ་འགྲོ་བས་མདུན་དུ་སྐད་ཅིག་གིས་དུད་སོལ་མའི་སྙིང་ཀར་པདྨ་འདབ་མ་བརྒྱད་པ་ལྟེ་བ་དང་བཅས་པ། དེའི་སྟེང་དུ་ཨཾ་འོད་ཟེར་དང་བཅས་པ། དེའི་སྟེང་དུ་རཾ་འོད་ཟེར་དང་བཅས་པ། རཾ་ལས་མེ་འབར་བས་དུད་སོལ་གྱི་ལུས་དེ་དུད་པར་འཐུལ་གྱི་བསྲེགས་པས་ཐལ་བར་གྱུར། ཨཾ་གི་སྟེང་དུ་བཾ་དེ་ཡོངས་སུ་གྱུར་པ་ལས་བུམ་པ་དཀར་པོ་བདུད་རྩིས་གང་བ་ལས་བདུད་རྩིའི་རྒྱུན་དཀར་པོ་ལྷུག་ལྷུག་བབས་པས། ཨཾ་དེ་འོད་དཀར་ལྷག་ལྷག་གཅིག་ཏུ་གྱུར། ཨོཾ་ཨཾ་མཧཱ་ཀཱ་ལི་དེ་ཝི་ཀཱ་རཱ་ལི་བི་ཀྲནྟ་ཀཱ་ལ་རཱ་ཏྲི་ཙཎྜྻ་རཱུ་པི་ནི་ཧཱུཾ་ཕཊ། ཨཾ་དེ་ཡོངས་སུ་གྱུར་པ་ལས་དུད་པའི་སོལ་བ་མ་སྐུ་མདོག་ནག་མོ་སྤྲིན་དང་བུང་བ་ལྟར་གནག་པ་ཤིན་ཏུ་སྦེག་པ་ཀེང་རུས་ཀྱི་ལུས་ཅན་ཞལ་གཅིག་ཕྱག་བཞི། ཞབས་གཉིས་མ། གཡས་ཀྱི་དང་པོ་ན་རལ་གྲི་མེ་འབར་བ། འོག་མན་བྷཉྫྱ་དམར་གྱིས་བསྐྱིལ་པ་སྐྲ་གྲོལ་བ། གཡོན་གྱི་དང་པོ་ན་ཤཀྟི། འོག་མ་ན་ཏྲི་ཤུ་ལ་དར་དཔྱངས་འཕྱར་བ་ཐོགས་པ། མི་རོ་རེངས་པ་ཁར་བཅུག་ནས་ཞལ་མཆེ་བ་ཞིག་གཅིགས་པ། སྤྱན་གསུམ་དམར་པོ་ལྷན་ནེར་བ་ལྟ་བ། དབུ་སྐྲ་རལ་པ་གྱེན་དུ་བརྫེས་ཤིང་གཡོན་དུ་འཁྱིལ་བ། དེ་ལ་སྦྲུལ་དང་ཐོད་འཕྲེང་གི་བརྒྱན་པ། རྨ་བྱའི་རྒྱལ་མཚན་གཙུག་ན་འཕྱར་བ། སྙན་ཆ་གཡས་ན་སྦྲུལ་གྱི་མགུལ་ནས་དྲིལ་བུ་གསིལ་པ། གཡོན་ན་སེང་གེ་རལ་པ་དམར་བ། རོ་ཉེའི་རྣ་ཆ་ཟུང་གིས་སྒེག་པ། རྣ་ལྟག་གཉིས་ནས་མེ་ཏོག་དང་དར་ནག་གི་ཅོན་པན་འཕུར་བ། ལྷ་མ་ཡིན་ལ་སོགས་པའི་ཐོད་པའི་དོ་ཤལ་བྱས་པ། གླང་པོ་ཆེའི་ཀོ་བས་སྟོད་གཡོགས་པ། བ་གླང་གི་ཀོ་རློན་ཆེན་པོ་དྲས་པ་ལ་རེ་ལྡེ་སེར་པོའི་ཤམ་བུ་བཏགས་པས་སྨད་དཀྲིས་པ། ཁྲག་དང་ཞག་གི་ཐིག་ལེས་ཚོམ་བུར་བྲིས་པ། ༼༢ན༣༽ཀླུའི་རྒྱལ་པོ་གཤིབས་པས་སྐ་རགས་བྱས་པ། ཞབས་གཉིས་ལྕགས་སྒྲོག་གིས་བརྒྱན་པ། བོང་བུ་དམར་གའི་སྟེང་ན་ཙན་སྐྱིལ་གྱིས་བཞུགས་པ། དུར་ཁྲོད་བརྒྱད་དུ་རྒྱུ་ཞིང་ཧཱུཾ་དང་བྷྱོའི་སྒྲ་དུང་དང་འབྲུག་ལྟར་སྒྲོག་པ། མ་མོ་མཁའ་འགྲོ་དང་ཤ་ཟ་འབུམ་སྡེ་དབང་དུ་སྡུད་པའི་སྐུར་གྱུར། དེའི་ཐུགས་སྒོ་ངའི་དབྱིབས་སོར་བཞི་པ་མར་མེ་ལྟ་བུ། འོད་དེའི་དབུས་སུ་ཧཱུཾ། ཧཱུཾ་དེ་ལས་འོད་འཕྲོད་ཚུར་འདུས་འོད་ཀྱི་ཐིག་ལེའི་ནང་དུ་ཧཱུཾ་གི་མཐའ་སྐོར་དུ། ཨོཾ་ཧཱུཾ་ཤྲཱི་ཡ་དེ་ཝི་ཀཱ་ལི་ཀཱ་ལི་མཧཱ་ཀཱ་ལི་ཧཱུཾ་བྷྱོཿཞེས་པས་བསྐོར་བར་གྱུར། དེའི་ཐུགས་ཀའི་ཧཱུཾ་ལས་ཧཱུཾ་གཅིག་བྱུང་སྟེ་བྷ་གར་ཐིམ་པར་གྱུར། ཨོཾ་བཛྭ་ལཱ་ཀྵྼ་ར་ག་ཡཱ་མི་ཧཱུཾ། རང་གི་ཐུགས་ཀའི་ས་བོན་གྱི་འོད་ཟེར་གྱིས་ནག་པོ་དྲག་པོ་དྲག་པོ་ཆེན་པོའི་དུར་ཁྲོད་དང་། བྱང་པུཥྤ་ཧ་རི། མར་རྔོག་གི་གདན་ས་ནས་དུད་པའི་སོལ་བ་མ་འཁོར་ནག་མོ་འབུམ་སྡེ་དང་བཅས་པ་བཛྭ་ས་མཱ་ཛཿརྦོད་རྔ་དང་རྔེའུ་ཆུང་དྲིལ་བུ་ལ་སོགས་པ་རོལ་མོའི་སྒྲ་དབྱངས་སྙན་པས། ཧཱུཾ་རང་བཞིན་རྣམ་དག་ཡེ་ཤེས་སྒྱུ་མའི་ཀློང་། བདེ་ཆེན་འདུ་འབྲལ་མེད་པའི་དཀྱིལ་འཁོར་དུ། །དུས་གསུམ་་་་་་བའི་འཕྲིན་ལས་གཅིག་བསྡུས་པ། །དཔལ་འབར་མཁའ་འགྲོའི་གཙོ་མོ་དབྱིངས་ནས་བཞེངས། དུར་ཁྲོད་མྱུལ་ཞིང་རྣལ་འབྱོར་ལས་ལ་འབྲེངས། མི་བཟད་རྣམ་པར་འཕྲུལ་བའི་ཞིང་ཁམས་དང་། པུཥྤ་ཧ་རི་མར་རྔོག་གདན་ས་དང་། མཁའ་འགྲོ་འདུ་བའི་གནས་ནས་འདིར་གཤེགས་ཤིག །ཨོཾ་ཧཱུཾ་ཤྲཱི་ཡ་དེ་ཝི་ཀཱ་ལི་ཀཱ་ལི་ཧཱུཾ་བྷྱོཿདྲྀ་ཥྱ་ཛཿཧཱུཾ་བཾ་ཧོཿས་མ་ཡ་ཧྶཾ། ས་མ་ཡ་ཧོཿཡེ་ཤེས་སེམས་དཔའི་གཙོ་མོ་དམ་ཚིག་པ་ལ་ཐིམ། འཁོར་གཅེར་བུ་རལ་པ་ཅན། །གཡས་ན་མིའི་སྙིང་དམར་པོ་དམར་རྩེར་ཐོགས་པ། གཡོན་ན་ཐོད་པ་སྐྲ་ཅན་ཁྲག་གིས་བཀང་བ་འཁོར་འདུ་མ་སྡེའི་ཚོགས་ཀྱིས་བསྐོར་ནས་འདུག་པར་གྱུར། འཁོར་དང་བཅས་པའི་ལྗགས་སྟེངས་སུ་བདུད་རྩི་བྱིན་པར་མོས་པས་གཏོར་ཏེ། དུད་པའི་སོལ་བ་མ་ཁྱོད་ཀྱི་སྐུ་མྱུར་དུ་སྟོན་ཅིག །སྐུ་མི་སྟོན་ན་བདག་གི་ཡིད་ལ་འདོད་པའི་ལས་ཐམས་ཅད་མྱུར་དུ་སྒྲུབས་ཤིག །ཨོཾ་ཧཱུཾ་ཤྲཱྀ་ཡ་སོགས་དང་། ཨེ་ཨཱ་ར་ལི་སྲི་ང་ཛཿའདི་ནི་ཁྱོད་ཀྱི་དམྱལ་བའི་ཆུ། དམ་ཚིག་འདས་ན་སྲེག་པར་བྱེད། དམ་ཚིག་བསྲུངས་ན་དངོས་གྲུབ་སྟེར། རྡོ་རྗེ་བདུད་རྩིའི་ཆུ་འདི་འཐུང་། ཨོཾ་བཛྭ་ཧ་ན་ཧ་ན་བཛྭ་ས་མ་ཡ་མ་ཏི་ཀྲ་མ་ལ་ཧཱུཾ་ཕཊ། ཅེས་དམ་ལ་༼༢བ༤༽བཞག །ཨོཾ་ཨཱཿཧཱུཾ་ཤྲཱི་ཡ་དེ་ཝི་ཡ་སོགས་དང་། བཛྭ་པུཥྤེ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། དེ་བཞིན་དུ་དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱཱ། ཤཔྟ་རྣམས་ཀྱིས་མཆོད། །གཏོར་མར་བདུད་རྩི་བྲན་ལ། གཏོར་སྣོད་བྷཉྫྱ་ཡངས་ཤིང་རྒྱ་ཆེ་བའི་ནང་དུ་གཏོར་རྫས་རྣམས་ཧ་ཧོཿསྲིཿཧ་སེར་པོས་གཏོར་མའི་ཁ་དོག་ངན་པ་བཅོམ། གཏོར་མ་ཁ་དོག་ཕུན་སུམ་ཚོགས་པ་གསེར་ཞུན་མ་ལྟར་གྱུར། ཧོཿདཀར་པོས་དྲི་ངན་པ་བཅོམ་ནས་དྲི་ཕུན་སུམ་ཚོགས་པར་གྱུར། སྲིཿསྔོན་པོས་རོ་ངན་པ་བཅོམ་ནས་རོ་ཕུན་སུམ་ཚོགས་པར་གྱུར། ཨོཾ་ཧ་ཧོ་སྲཱིཿསྭཱཧཱ། གསུམ་གྱིས་བྱིན་གྱིས་བརླབ། གཏོར་མ་ལག་པས་བཏེག་ལ། ཨོཾ་ཧཱུཾ་ཤྲཱི་ཡ་དེ་ཝི་སོགས་དང་། ཨོཾ་མཧཱ་མཱཾ་ས་ཁཱ་ཧི། མཧཱ་ཙིཏྟ་ཁཱ་ཧི། མཧཱ་རཀྟ་ཁཱ་ཧི། མཧཱ་གོ་རོ་ཙ་ན་ཁཱ་ཧི། མཧཱ་བ་སུ་ཏ་ཁཱ་ཧི། ཨོཾ་ཨི་དཾ་བ་ལི་གྲྀ་གྲྀ་ས་མ་ཡ་ཧཱུཾ་ཕཊཿསྭཱཧཱ། གསུམ་མམ་བདུན་གྱིས་ཕུལ། དུད་སོལ་མ་འཁོར་འབུམ་སྡེ་དང་བཅས་པས་གཏོར་མ་ཧབ་དི་རི་རི་གསོལ་བར་བསམ། རོལ་མོ་དང་བཅས་པས། བྷྱོཿཏིལ་མར་གྱིས་བསྐུས་ལན་བུ་གཅིག་འཕྱུར་རོ་ཉེའི་རྣ་ཆས་སྒེག་ཅིང་རྒྱན་རྣམས་མ་ལུས་འཆང་། ཞེས་སོགས་གཟུངས་ནས་ཕྱུངས་པའི་བསྟོད་པས་བསྟོད། ཨོཾ་རུ་རུ་རོ་རུ་ཏིཥྛ་པ་དྷ་སི་ཧཱུཾ་བྷྱོ་ཀརྨ་ལ་རཀྵ་སི་ཧཱུཾ་བྷྱོཿདགྲ་བགེགས་མཱ་ར་ཡ་ཧཱུཾ་ཕཊ། གཏོར་མ་ལ་བདུད་རྩིས་བྲན། རང་གི་ཐུགས་ཀ་ནས་འོད་ཟེར་འཕྲོས། ལྷ་མོ་གཙོ་འཁོར་གྱི་ཐུགས་ཀར་ཕོག །ཐུགས་རྒྱུད་བསྐུལ་སྡོམ་དམ་བཅས་པ་དྲན་ནས་ཐུགས་ཀ་ནས་འོད་ཟེར་འཕྲོས། གདུག་པ་ཐམས་ཅད་ཚར་བཅད། དྲེགས་པ་ཐམས་ཅད་ཀྱི་ནུས་མཐུ་བསྡུས་ལྷ་མོའི་ཐུགས་ཀར་ཐིམ། །དེ་ནས་འོད་ཟེར་གྱི་རྣམ་པར་ཞལ་ནས་འཐོན་ནས་བདག་ཉིད་ཀྱི་ཐུགས་ཀར་ཐིམ་པས། ནུས་མཐུ་ཕུན་སུམ་ཚོགས་པར་གྱུར་པར་བསམས་ཏེ། ཨོཾ་ཧཱུཾ་ཤྲཱི་ཡ་དེ་ཝི་ཀཱ་ལི་སོགས་བརྒྱ་འམ་ཉེར་གཅིག་ལས་མི་ཉུང་བར་བཟླས་སོ། །སླར་ཡང་གཏོར་མ་ལ་ཆང་ཕུད་བྲན་ལ། ཨོཾ་ཀུརུ་ཀུ་རུ་ཝརྟྟ་ལི་མཧཱ་བརྟྟ་ལི་བྷྱོཿབྷྱོཿདུར་ཁྲོད་བདག་མོ་དངོས་གྲུབ་ཞལ། གཏུམ་མོ་གཅིགས་བྱེད་ཡི་དགས་གདོང་། དམ་ཚིག་བསྲུང་མ་ཁྲག་དགའ་མ། ཀི་ལིའི་སྒྲ་སྒྲོག་སྦྱོར་ཟིན་མ། དུར་ཁྲོད་རོ་ཡི་ཚལ་དབུས་ན། །གཏུམ་ཆེན་དུད་པའི་སིལ་བ་མོ། །ཚོགས་དང་ཕོ་ཉར་བཅས་པ་ཡི། །རྩེ་གཅིག་༼༣ན༥༽ལྷ་མོ་དུད་སོལ་མ། །གསོལ་ཞིང་བཞེས་ཤིག་དམ་ཚིག་ལྷ། །གནས་ནས་གནས་པར་མཛད་དུ་གསོལ། །བདག་གི་སེམས་ལ་ཅི་འདོད་པའི། །ལས་འདི་མྱུར་དུ་གྲུབ་པར་མཛོད། །བདག་གི་ལས་འདི་ཅི་བྱེད་ཀྱང་། །བདེ་ལེགས་ཀུན་གྱི་གྲོགས་མཛོད་ཅིག །ཟོ་ཞིག་འཐུང་ཞིང་ཚིམ་པ་ཡིས། །རང་གི་གནས་ལ་གནས་ཀྱི་ཧཱུཾ། །གདུག་པ་ཅན་རྣམས་ཐམས་ཅད་བཟུང་། །ཟ་ཞིང་འཐུང་ལ་ལོངས་སྤྱོད་ཅིག །ཕུ་ཕེཾ་ཕེཾ་ཕིཾ་ཕཊ་སྭཱཧཱ། ཞེས་པ་དང་། འཕྲིན་ལས་བཅོལ་བ་ནི། མཁའ་འགྲོ་མ་དུད་སོལ་མ་འཁོར་འབུམ་སྡེ་དང་བཅས་པ་ཁྱོད་ཀྱིས། མཆོད་སྦྱིན་གྱི་གཏོར་མ་ཁ་དོག་དམ་པ་དྲི་དམ་པ། རོ་དམ་པ། རེག་བྱ་དམ་པ་དང་ལྡན་པ་འདི་བཞེས་ལ་རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ནད་ཀྱི་རིགས་སུ་གྱུར་པ། རླུང་མཁྲིས་བད་ཀན་འདུས་པ་ལས་གྱུར་པའི་ནད་རིགས་ཐམས་ཅད་ཞི་ཞིང་བཟློག་པར་མཛད་དུ་གསོལ། གདོན་གྱི་རིགས་སུ་གྱུར་པ་ལྷ་དང་། ཀླུ་དང་། གནོད་སྦྱིན་དང་། རྒྱལ་པོའི་གནོད་པ་ལ་སོགས་པ་ཐམས་ཅད་ཞི་ཞིང་བཟློག་པར་མཛད་དུ་གསོལ། རྨི་ལམ་ངན་པ་དང་། མཚན་མ་ངན་པ་ལ་སོགས་པ་སྤང་བྱ་མི་མཐུན་པའི་ཕྱོགས་ཐམས་ཅད་བཟློག་ཅིང་ཞི་བར་མཛད་དུ་གསོལ། གཞན་ཡང་རྣལ་འབྱོར་པ་བདག་་་་་འཁོར་དང་བཅས་པ་ཐམས་ཅད་ཀྱི་གྲོགས་གྱིས། མཐུ་གྱིས། དཔུང་གྱིས། སྡུན་ནས་བསུས། ཕྱི་ནས་སྐྱོལ། །བསམ་པ་སྒྲུབས། །རེ་བསྐོངས། །ཇི་ལྟར་འདོད་པའི་དོན་ཐམས་ཅད་ཕྱིན་པའི་འཕྲིན་ལས་མཛོད་ཅིག །ཅེས་གསོལ་བས་དེ་ལྟར་བགྱིའོ་ཞེས་ཁས་བླངས་པར་གྱུར་པར་བསམ། ཤྲཱི་མན་དེ་ཝི་དྷཱུ་མཾ་ག་རི་ས་པ་རི་ཝཱ་རེ་ཨ་རྒྷཾ། པཱ་དྱཾ། པུཥྤེ། དྷཱུ་པཾ། དཱི་པཾ། གནྡྷེ། ནཻ་ཝི་དྱཾ། ཤཔྟ་པྲ་ཏིཙྪ་ཧཱུཾ་སྭཱཧཱ། སྔོན་ཚེ་དཔག་བསམ་བྱང་ཆུབ་ཤིང་དྲུང་དུ། རྒྱལ་བ་ཐུབ་པ་ཆེན་པོའི་སྤྱན་སྔ་རུ། བསྟན་པ་གཉན་པོ་བསྲུང་བར་དམ་བཅས་པའི། །ཁྲག་འཐུང་དུད་སོལ་སྐུ་ལ་ཕྱག་འཚལ་ལོ། །ཅེས་བསྟོད་མ་འབྱོར་བ་དང་ཉམས་པ་དང་། གང་ཡང་བདག་རྨོངས་བློ་ཡིས་ནི། །བགྱིད་པ་དང་ནི་བགྱིད་སྩལ་བ། །དེ་ཀུན་ལྷ་མོས་བཟོད་པར་གསོལ། །བཛྭ་ལཱ་ཀྵྼ། རཱ་ག་ཡཱ་མི་ཧཱུཾ། དམ་ཚིག་པ་དང་ཡེ་ཤེས་ཀྱི་ལྷ་མོ་དབྱེར་མེད་པ་འཁོར་བཅས་སྐུ་གཟུགས་སམ། རང་གི་སྙིང་ཀར་བསྡུ། སེམས་ཅན་ཐམས་ཅད་༼༣བ༦༽ནད་མེད་ཅིང་། །སེམས་ཅན་ཐམས་ཅད་བདེ་གྱུར་ཅིག །གང་གི་ལམ་ནས་གྲོལ་བ་ཡི། །སངས་རྒྱས་ཉིད་དང་ཕྲད་པར་ཤོག །མ་བསྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་གྲོལ་བ་དང་། །ད་ལྟ་ཉིད་དུ་རྗེས་སྩོལ་བའི། །ལམ་དེ་ཉིད་ལ་གནས་པར་ཤོག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བྱེད་ཅིང་། །སེམས་ཅན་སྡུག་བསྔལ་ཚོགས་ཀྱིས་བཟིར་ལས་སྒྲོལ། །ཟབ་མོ་རྒྱུད་ཀྱི་སྲུང་མ་མ་མོ་ནི། །ཞལ་གཅིག་ཕྱག་བཞི་འཕྲིན་ལས་རྣམ་བཞི་སྒྲུབ། །རྫུ་འཕྲུལ་མཐུ་ལྡན་དགྲ་བགེགས་ཚར་གཅོད་པའི། །དཔལ་ལྡན་དུད་སོལ་ལྷ་མོའི་བཀྲ་ཤིས་ཤོག །ཅེས་ཤིས་པ་བརྗོད་པར་བྱའོ། །དེ་ལྟར་མར་རྔོག་གི་གསུང་ལྷད་མ་ཞུགས་པ་འདི། །ས་གསུམ་ན་འགྲན་ཟླ་མེད་པའི་མིའི་དབང་པོ་གོང་མ་ཆེན་པོ་ངག་གི་དབང་ཕྱུག་བཀྲ་ཤིས་གྲགས་པ་རྒྱལ་མཚན་དཔལ་བཟང་པོའི་ཐུགས་དམ་དུ་ཤཱཀྱའི་དགེ་སློང་མི་ཕམ་པདྨ་དཀར་པོས་སྦྱར་བས་དཔལ་ལྡན་ཕག་མོ་གྲུབ་པའི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་གྱུར་ཅིག །ཤུ་བྷ་མ་སྟུ་སརྦ་ཛ་ག་ཏཾ།། །།མངྒ་ལཾ། ཆོས་སྦྱིན་རྒྱ་ཆེར་སྤེལ་བའི་ཆེད། །པར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱེད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །། དཔལ་ཡེ་ཤེས་ཀྱི་ལྷ་མོ་དུད་སོལ་མའི་གསང་སྒྲུབ་ཕྲིན་ལས་ཀྱི་འདོད་འཇོ།དཔལ་ཡེ་ཤེས་ཀྱི་ལྷ་མོ་དུད་སོལ་མའི་གསང་སྒྲུབ་ཕྲིན་ལས་ཀྱི་འདོད་འཇོ་ཞེས་བྱ་བ་བཞུགས་སོ། །དཔལ་ཡེ་ཤེས་ཀྱི་ལྷ་མོ་དུད་སོལ་མའི་གསང་བའི་སྒྲུབ་པ་ཕྲིན་ལས་ཀྱི་འདོད་འཇོ་ཞེས་བྱ་བ། བླ་མ་དང་ལྷག་པའི་ལྷ་དབྱེར་མེད་པ་ལ་ཕྱག་འཚལ་ལོ། །རྒྱལ་བ་དགྱེས་མཛད་ཁྱོད་ནི་དངོས་དང་དངོས་བྲལ་སྔོན་དང་ཕྱི་མའི་མཐའ་རྣམས་སྤངས་པ་ཤེས་རབ་ཕ་རོལ་ཕྱིན་པའི་ཡེ་ཤེས་མཆོག་སྟེ་ཐུབ་དབང་སྲས་བཅས་སྐྱེད་པའི་ཡུམ། །དཔེ་མེད་དེ་ལས་ཐུགས་རྗེའི་ཉམས་ཀྱིས་འགྲོ་བ་འདི་རྣམས་འཁོར་བའི་འཇིགས་ལས་ཡང་དག་སྒྲོལ་དང་བསྟན་པ་རིན་ཆེན་སྲུང་བར་བྱེད་ཕྱིར་རྨད་བྱུང་འཇིགས་མེད་གཟུགས་བརྙན་གྱིས། །བདུད་དང་བདུད་ཀྱི་ཕྱོགས་རྣམས་འཇོམས་པར་མཛད་ཅིང་ཧ་ཧ་ཧཱུྃ་བྷྱོ་ཕཊ྄་ཀྱི་ང་རོས་ནམ་མཁའ་ཀུན་འགེངས་ལྷ་དང་ལྷ་མིན་དུ་མ་སྐྲག་བྱེད་མཁའ་འགྲོ་ཀུན་གྱི་གཙོ། །འཇིག་རྟེན་གསུམ་པོ་སྐད་ཅིག་གིས་བསྐོར་སྒྲུབ་པོ་རྣམས་ལ་ཕུན་སུམ་ཚོགས་པ་ཐམས་ཅད་སྟེར་བྱེད་ཡིད་ཅན་ཀུན་གྱིས་མཆོད་པ་དུད་སོལ་ཞེས་བྱ་བཅོམ་ལྡན་འདས་མར་འདུད། །གང་དེ་མཆོད་ཅིང་དགྱེས་པར་བྱས་ན་ཕུན་ཚོགས་དགེ་ལེགས་བྱེ་བ་སྙེད། །རང་རང་ཡིད་བཞིན་མངོན་སུམ་ཉིད་དུ་ཐོབ་པར་འགྱུར་བ་དེ་ཕྱིར་འདིར། །གྲུབ་དབང་བི་རུ་པཀྵ་ནག་པོ་ཏིལླི་ནཱ་རོ་མར་རྔོག་ཞབས། །གང་གསུང་ཇི་བཞིན་གསང་བའི་སྒྲུབ་པ་ཉིད་ལས་གནང་བ་ཐོབ་ཕྱིར་བྲི། འདིར་དཔལ་ཡེ་ཤེས་ཀྱི་ལྷ་མོ་དུད་སོལ་མའི་གསང་བའི་སྒྲུབ་པ་ལ་གསུམ་སྟེ། བསྙེན་པ་དང་། སྒྲུབ་པ་དང་། ལས་སྦྱོར་རོ། །དང་པོ་བསྙེན་པ་ལ་ལྔ་སྟེ། དཀྱིལ་འཁོར་རྟེན་གཏོར་རྟེན་རྫས་བཅའ་བ། མཚམས་བཅད་སྲུང་འཁོར་ལྷག་པའི་ལྷ་བསྒོམ་པ། རྟེན་དང་བརྟེན་པ་བསྐྱེད་ནས་བྱིན་རླབས་དགུག་གཞུག་བྱ་བ། དམ་བསྒྲགས་མཆོད་གཏོར་འབུལ་ཞིང་བསྟོད་དེ་བཟླས་པ། བསྐང་བཤགས་གཉེར་གཏད་རྗེས་ཀྱི་བྱ་བའོ། །དང་པོ་དཀྱིལ་འཁོར་རྟེན་གཏོར་རྟེན་རྫས་བཅའ་བ་ནི། གྲུབ་པའི་སློབ་དཔོན་ནཱ་རོ་པའི་ཞབས་ཀྱིས། དམ་ཚིག་ལྡན་པའི་སྒྲུབ་པ་པོས། །ཡིད་འོང་དབེན་པའི་གནས་དག་ཏུ། །གཟའ་སྐར་དུས་ཚེས་བཟང་པོ་ལ། །ཞེས་གསུངས་པས། འདི་ཉིད་ཀྱི་རྗེས་སུ་གནང་བ་ཐོབ་པའམ་དབང་བཞི་རྫོགས་པར་ཐོབ་པའི་གང་ཟག་གིས། བླ་མ་གོང་མའི་གདན་སའམ། དུར་ཁྲོད་ལ་སོགས་པའི་གནས་ཁྱད་པར་ཅན་རྣམས་སུ་ཚེས་བརྒྱད་དམ་བཅོ་ལྔའམ། ཉི་ཤུ་གཉིས་དང་དགུའམ་གནམ་གང་སྟེ། མཁའ་འགྲོ་འདུ་བའི་དུས་བཟང་པོ་གཟའ་དང་སྐར་མ་སྦྱོར་བ་ཕུན་སུམ་ཚོགས་པ་དང་ལྡན་པ་ལ། ནང་གཏོར་ཕྱི་གཏོར་བཏང་ནས་ནི། །གསོལ་བ་གདབ་ཅིང་བདེན་པ་བདར། །ཞེས་པས་སྔོན་འགྲོ་གཏོར་མ་གཉིས་ཆབ་ཀྱིས་བྲན་ལ། བསངས་སྦྱངས། སྟོང་པའི་ངང་ལས། བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཁཾ་ལས་གཏོར་མ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨ་ཀཱ་རོ་ལན་གསུམ་གྱིས་བྱིན་གྱིས་བརླབས་ལ། བདེན་པ་བདར་ཞིང་ནག་ཕྱོགས་ལ་དགའ་བའི་འབྱུང་པོ་རྣམས་ལ་བསྔོས་ནས་ཕྱི་རོལ་དུ་བསྐྲད་པ་ཕྱི་གཏོར་དང་། ནང་གཏོར་དཀར་ཕྱོགས་དང་དེར་གནས་ཀྱི་གཞི་བདག་རྣམས་ལ་བསྔོ་ཞིང་མཐུན་རྐྱེན་སྒྲུབ་པའི་ཕྲིན་ལས་བཅོལ་བའོ། །དེ་ལྟར་བྱས་ནས་དཀྱིལ་འཁོར་བཅའ་བ་ནི། སྟེགས་བུ་གྲུ་བཞི་མདའ་གང་བ། དཔངས་སུ་ཆག་གང་བ། དུག་དང་ཁྲག་དུར་ཁྲོད་ཀྱི་སོལ་བས་བྱུགས་པ་ལ། རྡུལ་ཚོན་གྱིས་དཀྱིལ་འཁོར་མཚན་ཉིད་དང་ལྡན་པ་བྲིས་པའམ། རས་བྲིས་སམ། འབྲུ་དང་མེ་ཏོག་ནག་པོས་ལྷ་མཚན་གྲངས་དང་མཉམ་པ་དགོད་པར་བྱའོ། །དེ་ནས་རྟེན་གཏོར་ནི་རིན་པོ་ཆེ་ལ་སོགས་པའི་སྣོད་གཙང་མའི་ནང་དུ་བཤོས་བུ་ཟུར་གསུམ་ཁྲུ་གང་པ་ངོས་གསུམ་དུ་དེ་བས་ཆུང་བ་གསུམ། དེའི་རྒྱབ་ཏུ་བཤོས་ཕྲན་བཞི། དེའི་རྒྱབ་ཏུ་བརྒྱད། དེའི་རྒྱབ་ཏུ་བཞི། དེའི་རྒྱབ་ཏུ་མཐེབ་ཀྱུས་བསྐོར་བ་བཤམས་ནས། རྟེན་རྫས་བཅའ་བ། ཕྱི་ནང་གསང་གསུམ་རྟེན་རྣམས་བཅའ། །ཞེས་པས། ཕྱིའི་རྟེན་སྔགས་པ་ལ་དགོས་པའི་ཆས་གོས་ནག་པོ། མ་རལ་དང་། བོང་བུ་བྱ་ནག་ལུག་ནག་ལ་སོགས་པའོ། །ནང་རྟེན་རྨ་བྱ་ནལ་བུའི་རྒྱལ་མཚན་བྷཉྫྱ་ལ་སོགས་པའོ། །གསང་བའི་རྟེན་གྲི་སྙིང་དང་ནལ་བུ་དགྲའི་སྙིང་ལ་སོགས་པའོ། །མཆོད་རྫས་ཀྱང་། མེ་ཏོག་ལ་སོགས་པ་རྣམ་ལྔ་རོལ་མོའི་ཚོགས་དང་། ཤ་སྣ་ཚོགས། ཁྲག་སྣ་ཚོགས། སྙིང་སྣ་ཚོགས། ཆང་སྣ་ཚོགས། བདུད་རྩི་ལྔ། ཚོགས་ཀྱི་ཡོ་བྱད་ལ་སོགས་མཆོད་པའི་རྫས་ཀྱི་བྱེ་བྲག་ཇི་སྙེད་པ་བཤམ་པར་བྱའོ། །རྒྱུན་གཏོར་རམ་མཆོད་གཏོར་ནི། དཔལ་གཏོར་འཁོར་གསུམ་གོང་དང་འདྲ་བ་ཤ་ཁྲག་ལ་སོགས་པས་བརྒྱན་པའོ། །གཉིས་པ་མཚམས་བཅད་སྲུང་འཁོར་ལྷག་པའི་ལྷ་བསྒོམ་པ་ནི། བདེ་དགྱེས་གདན་བཞི་ལ་སོགས་པ་ཧེ་རུ་ཀའི་རྣལ་འབྱོར་གང་བསྒོམ་པའི་རང་གཞུང་གིས་བྱའོ། །རྒྱ་གཞུང་གཉིས་སུ་ལྷ་མོ་ཉིད་ཀྱི་བདག་བསྐྱེད་བཤད་པ་ནང་སྒྲུབ་གཙོ་ཆེ་བའི་དབང་དུ་བྱས་པའོ། །གསུམ་པ་རྟེན་དང་བརྟེན་པ་བསྐྱེད་ནས་བྱིན་རླབས་དགུག་གཞུག་བྱ་བ་ནི། མདུན་གྱི་དཀྱིལ་འཁོར་དང་རྟེན་གཏོར་བསངས་སྦྱངས། སྟོང་པའི་ངང་ལས་ཨེ་ལས་ཆོས་ཀྱི་འབྱུང་གནས་ཡངས་ཤིང་རྒྱ་ཆེ་བའི་ནང་དུ། ཡཾ་རཾ་ཝཾ་ལཾ་སུཾ་ལས་བྱུང་བའི་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་ཧཱུྃ་ལས་སྐྱེས་པའི་སྣ་ཚོགས་རྡོ་རྗེའི་ལྟེ་བར་བྷྲཱུྃ་འོད་ཟེར་ཁ་དོག་ལྔ་འཕྲོ་བ་ཞུ་བ་ལས་བྱུང་བའི་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་ལྡན་པ། ཕྱི་བསྭེའི་ཁང་པ་ལྟར་དམར་ལྷག་གེ་བར་འདུག་པ། ནང་རིན་པོ་ཆེ་སྣ་ལྔ་ལས་གྲུབ་ཅིང་ཀ་བ་བརྒྱད་གདུང་བཞི་བྲེས་པའི་ཐོག་ཕུབ་པའི་དབུས་འཕྱུར་བུ་ཏོག་དང་བཅས་པ་དུར་ཁྲོད་བརྒྱད་ལ་སོགས་པས་བསྐོར་བའི་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཐིང་ཁ་དེའི་ནང་དུ་བཅུད་ཀྱི་གཞལ་ཡས་ཁང་ཐོད་མཁར་ཚར་གསུམ་གྱི་ཕྱི་སྐམ་པོ། བར་རྙིད་པ། ནང་རློན་པ། རྐང་དང་ཤ་ཁྲག་དག་གིས་སྤྱིན་བྱས་པའི་མཁར་ཟུར་གསུམ་པ། ལོགས་གསུམ་ལ་སྒོ་ཡོད་པ། ཕྱི་ནང་ཐམས་ཅད་མེ་རླུང་འཚུབ་པ། ཁྲག་མཚོ་ཁོལ་ཞིང་འཕྱོ་བའི་གནས་སུ་གྲུ་གསུམ་པའི་རིན་པོ་ཆེའི་ས་གཞིའི་དབུས་སུ། སྐད་ཅིག་ཙམ་གྱིས་ཏི་ལས་རླུང་གི་བོང་བུ་དམར་གྭ་ལ་ཞིང་ཆེན་གྱི་སྟན་དང་སྲིན་པོའི་ཐོད་པའི་ཡ་མགལ་གྱིས་སྔ་རུ་མ་མགལ་གྱིས་ཕྱི་རུ་བྱས་པ། སྦྲུལ་དང་རྒྱུ་མས་གོང་སྨེད་དང་མཐུར། ཞིང་ཆུང་གིས་སྒ་གཡོགས་བྱས་པའི་སྟེང་དུ་ཉི་མ་ལ་གནས་པའི་ཧཱུྃ་མཐིང་ནག་དེ་ལས་འོད་འཕྲོས། གདུག་པ་ཅན་ཐམས་ཅད་ཚར་བཅད། མ་མོ་དང་མཁའ་འགྲོ་མ་ཐམས་ཅད་ཀྱི་ནུས་མཐུ་གཅིག་ཏུ་བསྡུས། །ཡོངས་སུ་གྱུར་པ་ལས་དཔལ་ལྡན་ལྷ་མོ་དུད་པའི་སོལ་བ་མ་སྐུ་མདོག་ནག་མོ། ནག་པོའི་སྤྲིན་དང་བུང་བ་ལྟར་གནག་པ། ཤིན་ཏུ་སྦེག་པ་ཀེང་རུས་ཀྱི་ལུས་ཅན་ཞལ་གཅིག ག་བཞི། ཞབས་གཉིས། སྤྱན་གསུམ་པ། གཡས་ཀྱི་དང་པོ་ན་རལ་གྲི་མེ་འབར་བ། འོག་མ་ན་བྷཉྫྱ་དམར་གྱིས་བསྐྱིལ་བ་སྐྲ་གྲོལ་བ། གཡོན་གྱི་དང་པོ་ན་ཤཱཀྟིའི་མཚོན་ཆ། འོག་མ་ན་ཏྲི་ཤཱུ་ལའི་མགུལ་ནས་དར་དཔྱངས་འཕྱར་བ། མི་རོ་རེངས་པ་ཞལ་དུ་བཅུག་ཅིང་མཆེ་བ་བཞི་གཙིགས་པ། སྤྱན་གསུམ་དམར་པོ་ལྡོག་ནས་བལྟ་བ། དབུ་སྐྲ་རལ་པ་གྱེན་དུ་བརྫེས་ཤིང་ལན་བུ་གཡོན་དུ་འཁྱིལ་བ། དེ་ལ་སྦྲུལ་དང་ཐོད་ཕྲེང་གིས་བརྒྱན་པ། རྨ་བྱའི་རྒྱལ་མཚན་གཙུག་ན་འཕྱར་བ། སྙན་ཆ་གཡས་ན་སྦྲུལ་གྱི་མགུལ་ནས་དྲིལ་བུ་གསིལ་བ། སྙན་ཆ་གཡོན་ན་སེངྒེ་རལ་དམར་ཅན་འཕྱོ་བ། རྣ་ལྟག་གཉིས་ན་མེ་ཏོག་དང་དར་ནག་པོའི་ཅོད་པན་འཕུར་བ། ལྷ་མ་ཡིན་ལ་སོགས་པའི་མགོ་བོས་དོ་ཤལ་དུ་བྱས་པ། གླང་པོ་ཆེའི་ཀོ་རློན་གྱིས་སྟོད་གཡོགས་སུ་བྱས་པ། བ་གླང་གི་ཀོ་རློན་ཚལ་པར་དྲས་པ་ལ་རེ་ལྡེ་སེར་པོའི་ཤམ་བུ་བཏགས་པས་སྐུ་སྨད་དཀྲིས་པ། ཁྲག་དང་ཞག་གི་ཐིག་ལེས་ཚོམ་བུར་བྲིས་པ། རུས་པའི་ཕྱག་རྒྱ་ལྔས་བརྒྱན་པ། ཀླུ་ཆེན་བརྒྱད་ཀྱིས་སྐ་རགས་བྱས་པ། ཞབས་གཉིས་ལྕགས་སྒྲོག་གིས་བརྒྱན་པ། བོང་བུ་གྭ་དམར་གྱི་སྟེང་ན་ཙན་འཁྱིལ་གྱིས་བཞུགས་པར་གྱུར། ཐོད་མཁར་གྱི་ཟུར་གསུམ་དུ་བྷྱོ་ནག་པོ་གསུམ་ལས། ནག་མོ་གཅེར་བུ་རལ་པ་ཅན་གསུམ་ཕྱག་གཡས་མི་སྙིང་རློན་པ་གཙོ་མོའི་ཞལ་དུ་སྟོབ་ཅིང་། གཡོན་བྷཉྫྱ་ཁྲག་གིས་བཀང་བ་འཛིན་པ། ཐོད་ཕྲེང་སེ་རལ་ཁར་ཁུར་བ་ཞིང་ཆེན་དང་རེ་ལྡེ། རུས་པའི་རྒྱན་ལ་སོགས་པ་དུར་ཁྲོད་ཀྱི་ཆས་ཀྱིས་བརྒྱན་པ། རླུང་གི་བོང་བུ་གྭ་དམར་ལ་ཆིབས་པ། ཐོད་མཁར་གྱི་ཕྱིའི་ཕྱོགས་བཞིར་བྷྱོ་བཞི་ལས་རིགས་བཞིའི་ལྷ་མོ་དཀར་མོ་དང་། སེར་མོ། དམར་མོ། ལྗང་ནག་བཞིའི་ཕྱག་གཡས་པར་རྡོ་རྗེ་རིན་པོ་ཆེ་པདྨ་རྒྱ་གྲམ་གྱིས་ཡུ་བ་བྱས་པའི་གྲི་གུག་དང་གཡོན་ཐོད་པ་ཁྲག་གིས་གང་བ་འཛིན་པ། དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང་བོང་བུ་ལ་ཆིབས་པ། དེའི་རྒྱབ་ཀྱི་ཤར་དུ་བྷྱོ་ལས་སེངྒེའི་གདོང་ཅན། ལྷོར་བྷྱོ་ལས་སྟག་གི་གདོང་ཅན། ནུབ་ཏུ་བྷྱོ་ལས་སྤྱང་ཀིའི་གདོང་ཅན། བྱང་དུ་བྷྱོ་ལས་ཕག་གི་གདོང་ཅན། བྱང་ཤར་དུ་བྷྱོ་ལས་བྱ་རྒོད་ཀྱི་གདོང་ཅན། ཤར་ལྷོར་བྷྱོ་ལས་སྐྱུང་ཀའི་གདོང་ཅན། ལྷོ་ནུབ་ཏུ་བྷྱོ་ལས་དུར་བྱའི་གདོང་ཅན། ནུབ་བྱང་དུ་བྷྱོ་ལས་བྱ་རོག་གི་གདོང་ཅན། ཐམས་ཅད་ཀྱང་ནག་མོ་ཕྱག་གཉིས་གྲི་གུག་དང་ཐོད་པ་འཛིན་པ། དུར་ཁྲོད་ཀྱི་ཆས་བརྒྱད་ཀྱིས་སྤྲས་ཤིང་དྲེལ་ནག་རྐང་གསུམ་ལ་ཆིབས་པའོ། །ཤར་སྒོར་བྷྱོ་ལས་སྟག་ལ་ཞོན་པ་ཀཾ་ཀའི་གདོང་ཅན། ལྷོ་སྒོར་བྷྱོ་ལས་སྤྱང་ཀི་ལ་ཞོན་པ་ཀཾ་ཀའི་གདོང་ཅན། ནུབ་སྒོར་བྷྱོ་ལས་སྤྲེའུ་ལ་ཞོན་པ་ཀཾ་ཀའི་གདོང་ཅན། བྱང་སྒོར་བྷྱོ་ལས་དྲེད་ནག་ལ་ཞོན་པ་ཀཾ་ཀའི་གདོང་ཅན། བཞི་ཀའང་ནག་མོ་ཕྱག་བཞིའི་དང་པོ་གསུམ་གྱི་གཡས་ན་རིམ་པ་བཞིན། མདའ་གཞུ་སྤུ་གྲི་སྦྲུལ་གྱི་ཞགས་པ་དང་། གཡོན་རྣམས་བྷཉྫྱ་ཁྲག་གིས་བཀང་བ་འཛིན་པ། བཞི་པའི་གཡས་ན་རྒྱུ་ཞགས་དང་གཡོན་ནད་ཀྱི་རྐྱལ་པ་བསྣམས་པ། ཞིང་ཆེན་གྱི་སྐེད་དཀྲིས་རེ་ལྡེ་སེར་པོས་ཤམ་བུར་བྱས་པ། ཐོད་ཕྲེང་གིས་བརྒྱན་པ། དེའི་ཕྱི་རོལ་དུ་སྤྲུལ་པའི་ལས་མཁན་བྱེ་བ་འབུམ་སྡེ། ཐུགས་ཀྱི་སྤྲུལ་པ་ནག་མོ་བྱེ་བ་འབུམ་སྡེ། དཀར་སེར་དམར་ལྗང་གི་སྤྲུལ་པ་མ་མོ་བྱེ་བ་འབུམ་སྡེའི་ཚོགས་དང་། གཞན་ཡང་ཤ་ཟ་ནམ་གྲུ་སྲིན་མོ་གནོད་སྦྱིན་མོ་ལ་སོགས་པ་དམོད་པའི་མཚོན་ཆ་ཅན་རྣམས་དང་། ཡེ་ཤེས་དང་ལས་ཀྱི་མཁའ་འགྲོ་ལ་སོགས་པ་ཐམས་ཅད་ཀྱང་ནག་མོ་གཅེར་བུ་སྐྲ་བཤལ་བ་འཇིགས་སུ་རུང་བའི་རྒྱན་དང་། སྣ་ཚོགས་པའི་མཚོན་ཆ་ཐོགས་པར་གྱུར། གཙོ་འཁོར་དེ་རྣམས་ཀྱི་སྤྱི་བོར་ཟླ་བའི་དཀྱིལ་འཁོར་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་ཀར་ཉི་མ་ལ་ཧཱུྃ་ནག་པོ། འཁོར་རྣམས་ཀྱི་ཐུགས་ཀར་ཟླ་བ་ལ་བྷྱོས་མཚན་པ་གསལ་བར་གྱུར་པའི་རང་དང་། མདུན་གྱི་གཙོ་འཁོར་རྣམས་ཀྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས། ནག་པོ་དྲག་པོ། དྲག་པོ་ཆེན་པོའི་དུར་ཁྲོད། བྱང་པུཥྤ་ཧ་རི། མར་རྔོག་གི་གདན་ས་སོགས་ནས་དཔལ་ལྡན་ལྷ་མོ་དུད་པའི་སོལ་བ་མ་འཁོར་ནག་མོ་འབུམ་སྡེའི་ཚོགས་ཀྱིས་བསྐོར་བ་བཛྭ་ས་མ་ཛཿ ཧཱུྃ་བྷྱོཿ རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེའི་དེང་གི་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནང་། །གྲུ་གསུམ་འབར་བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །སྐུ་མདོག་ནག་མོ་འཇིགས་པའི་གཟུགས། །ཞལ་གཅིག་ཕྱག་བཞི་བོང་བུ་ཆིབས། །འཁོར་ཡང་མ་མོ་འབུམ་སྡེས་བསྐོར། །གནས་འདི་ཉིད་དུ་གཤེགས་སུ་གསོལ། །ད་ལྟ་སྙིགས་མའི་དུས་འདི་རུ། །དམ་ཅན་བཞུགས་པར་མི་འོས་ཀྱང་། །སྔོན་ཚེ་བྱང་ཆུབ་ཤིང་དྲུང་དུ། །ཐུབ་པ་ཆེན་པོའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་ལྟར། །སངས་རྒྱས་བསྟན་པ་སྲུང་བ་དང་། །འགྲོ་ཀུན་བདེ་ལ་འགོད་པའི་ཕྱིར། །དཔལ་ལྡན་ལྷ་མོ་གཤེགས་སུ་གསོལ། །གསང་སྔགས་སྲུང་མ་དམ་ཚིག་ཅན། །འཁོར་བཅས་གཤེགས་ཤིང་བཞུགས་སུ་གསོལ།། ཞེས་པ་དང་། བྷྱོཿ རང་བཞིན་རྣམ་དག་ཡེ་ཤེས་སྒྱུ་མའི་ཀློང་། །བདེ་ཆེན་འདུ་འབྲལ་མེད་པའི་དཀྱིལ་འཁོར་ནས། །དུས་གསུམ་རྒྱལ་བའི་ཕྲིན་ལས་གཅིག་བསྡུས་པ། །དཔལ་འབར་མཁའ་འགྲོའི་གཙོ་མོ་དབྱིངས་ནས་བཞེངས། །དུར་ཁྲོད་རྒྱུ་ཞིང་རྣལ་འབྱོར་ལས་ལ་འབྲེང་། །མི་བཟད་རྣམ་པར་སྤྲུལ་པའི་ཞིང་རྣམས་དང་། །པུཥྤ་ཧ་རི་མར་རྔོག་གདན་ས་སོགས། །མཁའ་འགྲོ་འདུ་བའི་གནས་ནས་འདིར་གཤེགས་ཤིག། ཅེས་སྤྱན་དྲངས་ནས་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བའི་སྔགས་འདི་བྱའོ།། དྲྀཥྱ་ཛཿཧཱུྃ་བཾ་ཧོཿས་མ་ཡ་ཧོཿ ཞེས་བརྗོད་པས་ཡེ་ཤེས་པ་དང་དམ་ཚིག་པ་དབྱེར་མེད་དུ་གྱུར། བཞི་པ་དམ་བསྒྲགས་མཆོད་གཏོར་འབུལ་ཞིང་བསྟོད་དེ་བཟླས་པ་ནི། དེ་ནས་གཟུགས་དངོས་སུ་སྟོན་པར་བསྒོམ། དེ་ལྟར་མི་སྟོན་ན། ཨོཾ་ཧཱུྃ་བྷྱོ་ཨཱ་ར་ལི་སྲིཾ་ཛཿ ཞེས་བརྗོད་ཅིང་གཟིར། དུད་པའི་སོལ་བ་མ་ཁྱོད་ཀྱིས་བདག་གི་སེམས་ལ་ཅི་འདོད་པའི་དོན་ཐམས་ཅད་འགྲུབ་པར་གྱིས་ཤིག ཅེས་མངོན་སུམ་དུ་བྱུང་ན་བརྗོད་པར་བྱའོ། །དེ་ཡང་ལས་ལ་སྦྱར་བའི་ཚེ། རིགས་ཀྱི་དམ་ཚིག་སྦྱིན་ཏེ། དམ་ཚིག་ཀྱང་གུར་གུམ་གྱི་ཆུ་ལ་སྔགས་འདི་བཏབ་ལ་སྦྱིན་ནོ། །ཞེས་རྒྱ་གཞུང་དུ་འབྱུང་ཡང་། རྡོ་རྗེ་འཆང་ཆེན་པོ་རྗེ་བཙུན་མར་རྔོག་གི་ཕྱག་བཞེས་ལ་ནང་མཆོད་གཏོར་ནས། ཨོཾ་བཛྭ་ཧ་ན་ཧ་ན་བཛྭ་ས་མ་ཡ་མ་ཏི་ཀྲ་མ་ཧཱུྃ་ཕཊ྄། ཅེས་དམ་ཚིག་གི་ཆུ་སྦྱིན་ནས་བསྒོ་བར་བྱའོ།། ལྷ་མོ་ཁྱོད་དམ་ཚིག་འདི་ལས་འདས་ནས་བསྒོ་བ་བཞིན་དུ་མ་བྱས་ན་གཟིར་བ་ཆེན་པོ་བྱེད་པ་དང་། དམ་ཚིག་གི་ཆུ་འདིའང་དུག་ཧ་ལ་ཧ་ལ་ཆེན་པོར་འགྱུར་ཏེ། འཐུང་པས་ཁྲག་ཏུ་སྐྱུག་པ་དང་། རྡོ་རྗེ་ཟ་བྱེད་ཆེན་པོས་སྙིང་དྲལ་ཏེ་དུས་མ་ཡིན་པར་འཆི་བར་འགྱུར་བ་དང་། གནོད་སྦྱིན་གྱིས་གསོད་པར་འགྱུར་བ་དང་། སྙིང་འགས་པ་དང་། ཁྲོ་བོ་ཟ་བྱེད་ཆེན་པོ་དང་འཇིགས་བྱེད་ཆེན་པོར་འགྱུར་ཏེ། མེ་དབལ་རྡོ་རྗེ་འབར་བས་ཚིག་ནས་ལུས་ཐལ་བར་འགྱུར་ཏེ་སོ་སོ་རང་རང་གིས་མནའ་བོར་བ་བཞིན་དུ་དམྱལ་བ་དང་འབོད་སྒྲོག་ཏུ་སྐྱེ་བར་འགྱུར་རོ།། ཞེས་དམ་ཚིག་བོར་རོ། །དེ་ནས་མཆོད་རྫས་རྣམས་བསངས་སྦྱངས་མི་དམིགས་པ་ལས། ཐོད་པའི་སྣོད་ཡངས་ཤིང་རྒྱ་ཆེ་བའི་ནང་དུ་ངོ་བོ་ཟག་མེད་ཀྱི་བདུད་རྩི། རྣམ་པ་མཆོད་རྫས་བཟང་ཞིང་རྒྱ་ཆེ་བ་རྒྱལ་སྲས་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ཆེན་པོ་ལྟ་བུས་ནམ་མཁའི་དབྱིངས་ཁྱབ་པར་གྱུར། ཨོཾ་ཨཱཿཧཱུྃ་ཧ་ཧོ་སྲཱིཿསྭཱ་ཧཱ། ལན་གསུམ་གྱིས་བྱིན་གྱིས་བརླབས་ཤིང་འབུལ་བ་ནི། ཧཱུྃ་བྷྱོཿ ལྷ་མིན་རྣམས་དང་དགྲ་བགེགས་བསྒྲལ་བ་ཡི། །སྙིང་ཁྲག་དང་འདྲེས་དུག་ཆུ་ཁོལ་མའི་རྒྱུན། །རྒྱ་མཚོར་བསྐྱིལ་བའི་མི་ཟད་ཨརྒྷཾ་འདི། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །ཤྲཱི་མཱན་དེ་ཝི་དྷཱུ་མཾ་གཱ་རི་ས་པ་རི་ཝཱ་རེ་བྷྱཿཨརྒྷཾ་པཱུ་ཛ་མེ་གྷ་ས་མུ་དྲ་ཀྵྨྱ་ར་ཎ་ས་མ་ཡེ་ཧཱུྃ་ཕཊ྄། དྲི་མེད་ཡིད་འོང་ལྷ་རྫས་བཟང་པོ་དང་། །དྲག་པོའི་ཆུ་དང་རྡོ་རྗེ་དྲི་ཆུར་བཅས། །གདུག་པའི་དྲི་ལྡན་ཞབས་བཀྲུ་འདི་དག་ཀྱང་། །མཁའ་འགྲོའི་དབང་ཕྱུགྎ སྔགས་ཐོག་མ་དང་ཐ་མ་འདྲ་བ་ལས་ཨརྒྷཾ་གྱི་གནས་སུ་བཛྭ་པཱ་དྱཾ་དང་། ཉམས་པ་བསྒྲལ་བའི་དབང་པོ་རྣམ་ལྔ་ནི། །རི་ལྟར་སྤུངས་ཤིང་ཨུཏྤལ་ཆེར་འཛིངས་དུག །མཐུན་པའི་མེ་ཏོག་ཕྲེང་བ་ལྟར་སྤེལ་བ། །མཁའ་འགྲོའི་དབང་ཕྱུགྎ པུཥྤེྎ སྣ་ཚོགས་སྤོས་མཆོག་བསྲེགས་དང་གསུར་ཆེན་གྱི། །དུད་སྤྲིན་མཁའ་ལ་འཁྲིགས་པའི་དྲི་ཞིམ་ངད། །ཕྱོགས་བཅུའི་མཐར་འགྲོ་རྡོ་རྗེ་བདུག་སྤོས་ཀྱང་། །མཁའ་འགྲོའི་དབང་ཕྱུགྎ དྷུ་པེྎ ཙནྡན་ག་པུར་ཟིལ་དངར་སྙིང་པོ་དང་། །ཤ་ཁྲག་རུས་པ་དགྲ་བོའི་མཁྲིས་ཞག་དུག །བྱུག་པར་སྦྱར་བའི་མི་བཟད་དྲི་ལྡང་ཆབ། །མཁའ་འགྲོའི་དབང་ཕྱུགྎ གནྡྷེྎ བགྲང་ཡས་རོ་དང་བཅུད་ལྡན་ཞལ་ཟས་མཆོག །བཟང་ཞིང་འཚལ་བ་མ་ཚངས་མེད་པ་རྣམས། །སྲིད་པའི་འདོད་དགུའི་གཏོས་དང་མཉམ་སྤེལ་བ། །མཁའ་འགྲོའི་དབང་ཕྱུགྎ ནཻ་ཝི་དྱྎ ལྷ་མིའི་སིལ་སྙན་རྔ་དང་མི་རྐང་དུང་། །དཀྲོལ་འབུད་བརྡུང་དང་གླུ་དབྱངས་རྒྱ་མཚོའི་སྒྲས། །ཞིང་རྣམས་ཤིག་ཤིག་གཡོ་བྱེད་འདི་དག་ཀྱང་། །མཁའ་འགྲོའི་དབང་ཕྱུགྎ ཤཔྟྎ འབྲུ་ཚིལ་གཡུལ་དུ་བསད་པའི་ཞུན་ཆེན་ནི། །རོ་རས་ཀྱིས་སྦགས་སྣང་བྱེད་སྦར་བའི་མེས། །མ་ལུས་མཆོག་ཏུ་གསལ་བའི་སྒྲོན་མེ་འདི། །མཁའ་འགྲོའི་དབང་ཕྱུགྎ ཨཱ་ལོ་ཀེྎ ལྷ་མིའི་ལོངས་སྤྱོད་མཆོག་ཏུ་གྱུར་པ་ཡི། །ཉེར་སྤྱད་འོས་པ་མཛེས་ཤིང་ཆེར་མཛེས་སྡུག །ཞིང་རྡུལ་གྲངས་མཚུངས་མཁོ་དགུ་ཇི་སྙེད་པ། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །རཱུ་པྎ བསམ་ཡས་སྙན་པའི་སྒྲ་དབྱངས་གང་དག་གིས། །ཕྱོགས་བཅུའི་ནམ་མཁའི་ཁམས་ཀུན་རྣམ་འགེངས་པ། །ལྷ་རྫས་བཟང་པོའི་རོལ་མོ་འདི་དག་ཀྱང་། །མཁའ་འགྲོའི་དབང་ཕྱུགྎ ཤཔྟྎ ལེགས་པར་སྦྱར་བའི་དྲི་མཆོག་དམ་པ་ཡིས། །སྲིད་པའི་གདུང་བ་མ་ལུས་ཞི་བྱེད་པ། །རབ་འབྱམས་དྲི་ཞིམ་ཆར་བཞིན་འབབ་པའི་ཆབ། །མཁའ་འགྲོའི་དབང་ཕྱུགྎ གནྡྷེྎ རོ་དང་བདུད་རྩིའི་བཅུད་ལྡན་བཟའ་བ་དང་། །བཏུང་དང་བལྡག་གཞིབ་འཛིན་མའི་ཁྱོན་འདི་ཉིད། །ཀུན་བཟང་མཆོད་པའི་ཕུང་པོ་ལྟར་བཀང་བ། །མཁའ་འགྲོའི་དབང་ཕྱུགྎ རཱ་ཀྵྼྎ མཐའ་ཀླས་ནམ་མཁའི་གཏོས་དང་མཉམ་གྱུར་པའི། །དབང་པོའི་ཚོན་ལྟར་རྣམ་བཀྲའི་ན་བཟའ་ནི། །རེག་པའི་བདེ་བས་དབང་པོ་ཚིམ་བྱེད་པ། །མཁའ་འགྲོའི་དབང་ཕྱུག་འཁོརྎ སྤརྴེྎ དགྲ་བོའི་ཤ་ཆེན་ཤ་སྣ་རི་ལྟར་སྤུངས། །ཉམས་པའི་སྙིང་ཆེན་སྙིང་སྣས་སྲིད་གསུམ་གཏམས། །གདུག་པའི་དམར་ཆེན་དམར་སྣ་མཚོ་ལྟར་བསྐྱིལ། །ཞིང་བཅུའི་ཀླད་ཆེན་ཀླད་སྣས་སྟོང་གསུམ་བཀང་། །རྒྱུད་ཆེན་ཕྲེང་བ་དཀྲིགས་པ་ནམ་མཁའི་མཐར། །འདོད་དགུའི་ཡོན་ཏན་རྣམས་ནི་སྤྲིན་ལྟར་གཏིབས། །བ་ལིང་གཏོར་མའི་ཚོགས་ནི་སྐར་ལྟར་བཀྲམ། །མཁའ་འགྲོའི་དབང་ཕྱུགྎ ཨོཾ་མ་ཧཱ་མཱཾ་ས་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། མ་ཧཱ་བ་སུ་ཏ་ཁཱ་ཧི། ཨོཾ་ཨི་དཾ་བ་ལིངྟ་གྲྀ་གྲྀ་ས་མ་ཡ་ཧཱུྃ་ཕཊ྄་སྭཱ་ཧཱ། ནམ་མཁའ་ལྟར་ཡངས་ཐོད་པ་རྡོ་རྗེའི་སྣོད། །ཤ་ལྔ་བདུད་རྩི་ལྔ་སྦྱར་རྡོ་རྗེའི་རྫས། །མཆོག་གི་རྒྱལ་བ་རྡོ་རྗེས་བྱིན་བརླབས་པ། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། ཤྲཱི་མཱན་དེ་ཝི་དྷཱུ་མཾ་གཱ་རི་ས་པ་རི་ཝཱ་རེ་བྷྱཿསརྦ་པཉྩྨ་ཨ་མྲྀ་ཏ་པཱུ་ཛ་ཁཱ་ཧི། དེ་ནས་གཏོར་མ་བདུད་རྩིས་བྲན་ལ། གཏོར་སྣོད་བྷཉྫྱ་ཡངས་ཤིང་རྒྱ་ཆེ་བའི་ནང་དུ་གཏོར་རྫས་རྣམས་ཧ་ཧོ་སྲཱིཿ ཧ་སེར་པོས་གཏོར་མའི་ཁ་དོག་ངན་པ་བཅོམ་ནས་ཁ་དོག་ཕུན་སུམ་ཚོགས་པ་གསེར་ཞུན་མ་ལྟ་བུར་གྱུར། ཧོཿདཀར་པོས་གཏོར་མའི་དྲི་ངན་པ་བཅོམ་ནས་དྲི་ཕུན་སུམ་ཚོགས་པ་དང་ལྡན་པར་གྱུར། སྲཱིཿསྔོན་པོས་གཏོར་མའི་རོ་ངན་པ་བཅོམ་ནས་རོ་ཕུན་སུམ་ཚོགས་པ་དང་ལྡན་པར་གྱུར། ཨོཾ་ཨཱཿཧཱུྃ་ཧ་ཧོ་སྲཱིཿསྭཱ་ཧཱ། ལན་གསུམ་གྱིས་བྱིན་གྱིས་བརླབས་ལ། ཤྲཱི་མཱན་དེ་ཝི་དྷཱུ་མཾ་གཱ་རི་ས་པ་རི་ཝཱ་རེ་བྷྱཿ ཨི་དཾ་བ་ལིང་གྲྀ་གྲྀ་ས་མ་ཡ་ཧཱུྃ་ཕཊ྄། གསུང་རྒྱུན་ལྟར་ན་ས་པ་རི་ཝཱ་ར་ཨི་ད་བ་ལིངྟ་ཁ་ཁ་ཁཱ་ཧི་ཁཱ་ཧི། སྙིང་པོ། ཨོཾ་ཧཱུྃ་ཤྲཱི་ཡ་དེ་ཝི་ཀ་ལི་ཀ་ལི་མ་ཧཱ་ཀ་ལི་ཧཱུྃ་བྷྱོ་ཧཱུྃ། གསུང་རྒྱུན་དུ་ས་པ་རི་ཝཱ་ར་སོགས་སོ་སོར་ལན་གསུམ་མམ་ལྔ་དང་བདུན་ཉེར་གཅིག་ལ་སོགས་པས་ཕུལ་བས། དཔལ་ལྡན་ལྷ་མོ་འཁོར་བཅས་རྣམས་ཀྱིས་ཧབ་དིར་གྱིས་གསོལ་བར་བསམས་ལ་ཕྲིན་ལས་བཅོལ་བ་ནི། མཁའ་འགྲོའི་དབང་ཕྱུག་དུད་པའི་སོལ་བ་མ་འཁོར་དང་བཅས་པ་ཁྱེད་རྣམས་ཀྱིས་མཆོད་སྦྱིན་གྱི་གཏོར་མ་ཁ་དོག་དམ་པ། དྲི་དམ་པ། རོ་དམ་པ། རེག་བྱ་དམ་པ་འདི་བཞེས་ལ། རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ནད་ཀྱི་རིགས་སུ་གྱུར་པ་རླུང་མཁྲིས་བད་ཀན་འདུས་པ་ལས་གྱུར་པའི་ནད་ཐམས་ཅད་ཞི་ཞིང་བཟློག་པར་མཛད་དུ་གསོལ། གདོན་གྱི་རིགས་སུ་གྱུར་པ་ལྷ་དང་ཀླུ་དང་གནོད་སྦྱིན་དང་། རྒྱལ་པོའི་གདོན་པ་ལ་སོགས་པ་ཐམས་ཅད་ཞི་ཞིང་བཟློག་པར་མཛད་དུ་གསོལ། རྨི་ལམ་ངན་པ་དང་མཚན་མ་ངན་པ་ལ་སོགས་པ་སྤང་བྱ་མི་མཐུན་པའི་ཕྱོགས་ཐམས་ཅད་བཟློག་ཅིང་ཞི་བར་མཛད་དུ་གསོལ། གཞན་ཡང་རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ཐམས་ཅད་ཀྱི་གྲོགས་གྱིས། མཐུན་གྱིས། དཔུང་གྱིས། སྔུན་ནས་བསུས། ཕྱི་ནས་སྐྱོར། བསམ་པ་སྒྲུབས། རེ་བ་སྐོངས། ཇི་ལྟར་འདོད་པའི་དོན་ཐམས་ཅད་མཐར་ཕྱིན་པའི་ཕྲིན་ལས་མཛོད་ཅིག ཅེས་གསོལ་བས་དེ་ལྟར་བགྱིའོ་ཞེས་ཁས་བླངས་པར་བསམ་མོ། །དེ་ལྟར་མཆོད་པ་རྫོགས་པར་ཕུལ་ནས་བསྟོད་དེ། རྒྱུད་ལས། དེ་ལྟར་བསྟོད་པ་བྱེད་པའི་རྣལ་འབྱོར་པས། །ཆོས་ཀྱི་སྲོག་ཤིང་ཆོས་ཀྱི་རྒྱལ་མཚན་བསྒྲེངས། །ཆོས་ཀྱི་དུང་འབུད་ཆོས་ཀྱི་སྒྲོན་མེ་སྦར། །དགེ་ལ་མོས་ཤིང་དད་པས་ལྷ་མོ་ལ། །བོས་ཤིང་བསྟོད་པ་མཆོག་ནི་དུས་དྲུག་གམ། །ཡང་ན་མཚན་མོ་རེ་ལ་རྟག་པར་ནི། །གང་གིས་བསྟོད་པ་རྔ་གླིང་དབྱངས་དང་བཅས། །བསྟོད་པ་ཙམ་གྱིས་ལྷ་མོས་རྟག་ཏུ་སྲུང་། །མཉེས་ནས་བསྟོད་པ་པོ་ཡི་གྲིབ་བཞིན་འབྲེང་། །བསམ་པའི་དགོས་པ་ཐམས་ཅད་ཡོངས་སུ་འགྲུབ། །ཅེས་གསུངས་པས། རྔ་དང་སིལ་སྙན་ལ་སོགས་པའི་རོལ་མོ་དང་དབྱངས་སྙན་པོས་བསྟོད་པར་བྱ་བ་ཡིན་ལ། དེ་ལ་ཐོག་མར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་བསྟོད་པ་ནི། བྷྱོཿ དཔལ་ལྡན་ལྷ་མོ་མི་ཕམ་སྲིད་གསུམ་བདག །རང་དོན་སྒྲུབ་ཕྱིར་རྣམ་ཐར་གསུམ་གཞོལ་ཡང་། །སྙིང་རྗེའི་དབང་གིས་རྗེས་ལ་ཐོབ་པ་ཡི། །ཤེས་རབ་སྣ་ཚོགས་ཐབས་ཀྱིས་འགྲོ་དོན་མཛད། །ལྷ་མོ་ནག་མོ་སྐུ་མདོག་ཆར་སྤྲིན་མདོག །མཚན་མོ་ནག་མོ་ཤིན་ཏུ་གཏུམ་པའི་གཟུགས། །ཤིན་ཏུ་སྦེག་ཅིང་ཀེང་རུས་གཟུགས་འཆང་མ། །ཞལ་གཅིག་ཕྱག་བཞི་ཞབས་གཉིས་བརྗིད་པའི་སྐུ། །རལ་པ་གྱེན་བརྫེས་ལན་བུ་གཡོན་དུ་འཁྱིལ། །སྐྲ་སེར་སྦྲུལ་དང་ཐོད་པའི་ཕྲེང་བས་བརྒྱན། །རྣ་ལྟག་མེ་ཏོག་དར་ནག་ཅོད་པན་ཅན། །ཁྲག་དང་ཆང་གིས་ར་རོ་སྤྱན་རྩ་དམར། །མི་རོ་རེངས་པ་ཁར་བཅུག་མཆེ་བ་བཞི། །རྣམ་པར་གཙིགས་ནས་ཁྲག་ལ་ཤིན་ཏུ་དགྱེས། །སྙན་གཡས་སྦྲུལ་གྱི་མགུལ་ནས་དྲིལ་བུ་གསིལ། །གདུག་པ་བཏུལ་ནས་ཚངས་པའི་སྒྲ་སྒྲོག་མ། །སྙན་ཆ་གཡོན་ན་སེངྒེའི་རལ་དམར་འཕྱོ། །དཔའ་མོ་ཁམས་གསུམ་སེངྒེའི་སྒྲ་སྒྲོག་མ། །བྷྱོཿ ཕྱག་བཞིའི་གཡས་ཀྱི་དང་པོ་རལ་གྲི་འཕྱར། །འོག་མ་བྷཉྫྱ་རཀྟ་དམར་བསྐྱིལ་འཛིན། །གཡོན་གྱི་དང་པོ་ཤཱཀྟིའི་མཚོན་ཆ་བསྣམས། །འོག་མ་ཏྲི་ཤཱུའི་མགུལ་ནས་དར་དཔྱང་འཕྱར། །ཤཱཀྟི་རལ་གྲི་མཚོན་གྱིས་བཅད་པ་ཡི། །ལྷ་མ་ཡིན་སོགས་མགོ་བོས་དོ་ཤལ་བྱས། །གླང་པོ་ཆེ་ཡི་ཀོ་རློན་སྟོད་གཡོགས་ཅན། །སྨད་ནི་བ་གླང་ཀོ་རློན་དྲས་པ་ལ། །ཕྱི་ནས་རེ་ལྡེ་སེར་པོའི་ཤམ་བུར་དཀྲིས། །ཀླུ་ཡི་དབང་པོ་གཤིབས་པའི་སྐེད་བཅིངས་ཅན། །ཞབས་གཉིས་ལྕགས་སྒྲོག་དག་གིས་མཛེས་པར་བརྒྱན། །ཁྲག་ཞག་མང་པོས་ཐིག་ལེ་ཚོམ་བུར་བྲིས། །བྷྱོཿ བོང་བུ་གྭ་ཞོན་མཚན་མོ་དུར་ཁྲོད་རྒྱུ། །བོང་བུའི་རྨིག་པ་རླུང་གི་ཤུགས་འཆང་མ། །ཁམས་གསུམ་སྐད་ཅིག་ཙམ་ལ་བསྐོར་བར་བྱེད། །སྐད་ནི་དུང་དང་འབྲུག་གི་སྒྲ་ལྟ་བུས། །མ་མོ་མཁའ་འགྲོ་ཤ་ཟ་དབང་དུ་སྡུད། །ལྷོ་ཕྱོགས་གཤིན་རྗེའི་ཕོ་བྲང་རྟག་ཏུ་གནས། །དམ་པའི་ངང་ནས་གཟུགས་སྐུ་གཉིས་གཟིགས་མ། །ཏིང་འཛིན་དབང་ཐོབ་གཟུགས་ཁམས་གནས་སུ་བྱོན། །ཚངས་པའི་རྒྱལ་པོ་ལ་སོགས་ཕྱག་བྱས་མ། །གཞན་ལ་དབང་སྒྱུར་འདོད་ཁམས་མཐར་ཡང་ཕྱིན། །དབང་ཕྱུག་ཆེན་པོའི་སྐུ་ལ་དགྱེས་འཁྲིལ་མ། །སུམ་ཅུ་རྩ་གསུམ་ཚལ་དུ་བྱོན་པའི་ཚེ། །ལྷ་རྣམས་དབུགས་ཕྱུང་བརྒྱ་བྱིན་ཕྱག་བྱས་མ། །ལྷ་མ་ཡིན་རྣམས་ཕུང་བར་བྱས་པའི་ཚེ། །ལྷ་མིན་དབང་པོ་ཀུན་གྱིས་ཕྱག་བྱས་མ། །སྐུ་མཆོག་རི་རབ་ཆེ་དང་འགྲན་པའི་ཚེ། །ལྟེ་བའི་ཐད་ཀྱི་ཕྱོགས་ནས་ཉི་ཟླ་ཤར། །རྒྱལ་ཆེན་བཞི་ལ་སོགས་པས་ཕྱག་བྱས་མ། །རྒྱ་མཚོའི་གཏིང་ནས་མེ་འབར་མཚོ་སྐེམས་ནུས། །ས་འོག་ཀླུ་དབང་ཀུན་གྱིས་ཕྱག་བྱས་མ། །ལྷ་མོ་ཁྱོད་ཀྱིས་ཆོ་འཕྲུལ་འདི་བསྟན་པས། །བདུད་དང་གཤིན་རྗེའི་རྒྱལ་པོ་འདར་ཞིང་འདུད། །མ་མོ་སྲིན་མོའི་ཚོགས་རྣམས་འདར་ཞིང་དངངས། །བྷྱོཿ ཙིཏྟ་རིན་ཆེན་གུར་ཕུབ་གཞལ་ཡས་ནས། །ཉི་ཟླའི་དཀྱིལ་འཁོར་བརྩེགས་པའི་འོད་ཟེར་འབར། །ཕྱོགས་བཅུའི་འཇིག་རྟེན་དུག་གི་བཅུད་བསྡུས་ནས། །ཉི་མའི་དཀྱིལ་འཁོར་དག་ལ་ཐིམ་པར་མཛད། །དུག་གི་རླངས་པས་ནག་པོའི་ཕྱོགས་རྣམས་ཀྱི། །བཞི་བརྒྱ་རྩ་བཞིའི་ནད་རྣམས་ལྷོང་མཛད་མ། །དེ་ཕྱིར་ནད་ཀྱི་བདག་མོ་དམ་ལ་འདུད། །ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ནས། །ཟླ་བའི་དཀྱིལ་འཁོར་དག་ལ་ཐིམ་པར་མཛད། །བདུད་རྩིའི་རླངས་པས་དཀར་པོའི་ཕྱོགས་རྣམས་ཀྱི། །བཞི་བརྒྱ་རྩ་བཞིའི་ནད་རྣམས་རྩད་གཅོད་མ། །བདུད་རྩི་སྨན་གྱི་རྒྱལ་མོ་དམ་ལ་འདུད། །གང་ཞིག་ཁྱོད་ལ་དད་ན་མ་བས་བྱམས། །དེ་ཕྱིར་མ་གཅིག་ནད་བདག་སྨན་གྱི་གཙོ། །ལྷ་མོ་ཁྱོད་ལ་བདག་གིས་རྟག་ཏུ་བསྟོད། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད།། ཅེས་དྲང་སྲོང་སེངྒེའི་ང་རོས་བསྟོད་པ་དངོས་གྲུབ་འབྱུང་བའི་རྒྱུད་ལས་གསུངས་སོ། །ལྷ་མོའི་རྟགས་ཀྱི་བསྟོད་པ་ནི། མ་བྷྱོཿ བསྐལ་པ་མེ་ལྟར་འབར་བའི་ཀློང་དཀྱིལ་ན། །རླུག་ནག་འཚུབ་ཆེན་རབ་ཏུ་འཁྱིལ་བའི་དབུས། །འཕྲུལ་གྱི་གཞལ་ཡས་ཐོད་པའི་སྐུ་མཁར་ན། །འདོད་ཁམས་དབང་ཕྱུག་ལྷ་མོ་དུད་སོལ་མ། །ནག་མོ་ཆེན་མོ་རྔམ་པའི་མཆེ་བ་ཅན། །གཅེར་བུ་རལ་པའི་གསེབ་ནས་མེ་སྟག་འཕྲོ། །ལྷ་མོ་སྐུ་མདོག་ནག་མོར་བཞུགས་པ་ནི། །དོན་དམ་དབྱིངས་ལས་བསྐྱོད་པ་མེད་པའི་རྟགས། །དབུ་སྐྲ་ཁམ་སེར་སྦྲུལ་གྱིས་བཅིངས་པ་ནི། །ཞེ་སྡང་གདུག་པའི་བགེགས་དཔུང་འཇོམས་པའི་རྟགས། །རལ་པ་གཡས་ནས་གཡོན་དུ་འཁྱིལ་བ་ནི། །ཡུམ་གྱི་མཁའ་ལ་སྤྲུལ་པ་འགྱེད་པའི་རྟགས། །རལ་པ་སྤྱི་གཙུག་གཅིག་ཏུ་འཁྱིལ་བ་ནི། །སྐྱེ་མེད་དོན་དམ་གཅིག་ཏུ་དགོངས་པའི་རྟགས། །རྨ་བྱའི་རྒྱལ་མཚན་གཙུག་ཏུ་འཕྱར་བ་ནི། །ཉོན་མོངས་དུག་གསུམ་རྩད་ནས་གཅོད་པའི་རྟགས། །ཐོད་སྐམ་ལྔ་ཡིས་དབུ་ལ་བརྒྱན་པ་ནི། །བདེ་གཤེགས་རིགས་ལྔ་རྣམ་པར་དག་པའི་རྟགས། །སྙན་གཡས་སྦྲུལ་ནག་གདེང་ཀ་འཕྱོ་བ་ནི། །ཞེ་སྡང་མ་སྤངས་གནས་སུ་དག་པའི་རྟགས། །སྙན་གཡོན་སེངྒེ་རལ་དམར་འཕྱོ་བ་ནི། །གསུང་གི་ང་རོས་ཁམས་གསུམ་གཡོ་བའི་རྟགས། །སྙན་ཆ་གསེར་གྱི་དྲིལ་བུ་འཁྲོལ་བ་ནི། །སངས་རྒྱས་ཀུན་གྱི་བསྟན་གཉེར་མཛད་པའི་རྟགས། །རྣ་ལྟག་མེ་ཏོག་དར་ནག་གཡོ་བ་ནི། །ལྷ་རྣམས་གཡུལ་ལས་རྒྱལ་བར་མཛད་པའི་རྟགས། །སྤྱན་རྩ་དམར་ལ་སྤྱན་གསུམ་བསྒྲད་པ་ནི། །སྒྲུབ་པ་པོ་ལ་བུ་བཞིན་གཟིགས་པའི་རྟགས། །ཤངས་ནས་ཁྲག་དང་ཞག་གི་དྲི་སྣོམ་པ། །གནོད་བྱེད་གདུག་པ་ཅན་རྣམས་མྱུལ་བའི་རྟགས། །ཞལ་དུ་མི་རོ་རེངས་པ་བཅུག་པ་ནི། །དམ་ཉམས་དགྲ་བོ་ཞལ་དུ་གསོལ་བའི་རྟགས། །རྣོ་གདུག་མཆེ་བ་ཟུར་གསུམ་གཙིགས་པ་ནི། །དགྲ་བགེགས་ཤ་ལ་ཆེམ་ཆེམ་རོལ་པའི་རྟགས། །ཕྱག་གཡས་གཅོད་པའི་རལ་གྲི་འཕྱར་བ་ནི། །དམ་ཉམས་དགྲ་བོའི་སྲོག་རྩ་གཅོད་པའི་རྟགས། །འོག་མ་ཐོད་རློན་དམར་བསྐྱིལ་འཛིན་པ་ནི། །སྲིད་གསུམ་ཤ་ཁྲག་ཞལ་དུ་གསོལ་བའི་རྟགས། །ཕྱག་གཡོན་ཤཀྟིའི་མཚོན་ཆ་འཛིན་པ་ནི། །ལྷ་མ་ཡིན་གྱི་དམག་དཔུང་སྒྲོལ་བའི་རྟགས། །འོག་མ་ཏྲི་ཤཱུ་དར་དཔྱངས་འཕྱར་བ་ནི། །བདུད་དཔུང་རྣམས་ཀྱི་རྒྱལ་མཚན་སྙོལ་བའི་རྟགས། །རུས་པའི་རྒྱན་ཆ་ལྔ་ཡིས་མཛེས་པ་ནི། །ཐུགས་རྗེ་སྤྲུལ་སྐུས་འགྲོ་དོན་མཛད་པའི་རྟགས། །ཐལ་ཆེན་ཚོམ་བུས་སྐུ་ལ་བྱུགས་པ་ནི། །སྟོང་ཉིད་ཆོས་སྐུའི་དོན་དང་ལྡན་པའི་རྟགས། །ཁྲག་ཞག་ཐིག་ལེས་སྐུ་ལ་བརྒྱན་པ་ནི། །ཐུགས་རྗེའི་དོན་དམ་བཅུད་ལ་མངའ་བའི་རྟགས། །གླང་པོ་ཆེ་ཡི་ཀོ་རློན་གསོལ་བ་ནི། །ཐེག་པ་མཆོག་གི་དོན་དང་ལྡན་པའི་རྟགས། །རེ་ལྡེ་སེར་པོའི་ཤམ་བུ་བཏགས་པ་ནི། །འཇིག་རྟེན་འདི་ན་ཆེ་བཙན་ལྡན་པའི་རྟགས། །ཀླུ་ཆེན་བརྒྱད་ཀྱིས་སྐ་རགས་བྱས་པ་ནི། །ཀླུ་རིགས་ཐམས་ཅད་དབང་དུ་སྡུད་པའི་རྟགས། །ཐོད་རློན་ལྔ་བཅུས་དོ་ཤལ་བྱས་པ་ནི། །ལྷ་མིན་ཚོགས་རྣམས་སྐྲག་པར་བྱེད་པའི་རྟགས། །ལྟེ་བའི་ཐད་ནས་ཉི་ཟླ་འཆར་བ་ནི། །ཉོན་མོངས་མ་རིག་མུན་པ་སེལ་བའི་རྟགས། །རིན་ཆེན་ལྕགས་སྒྲོག་ཞབས་ལ་འཁྲིལ་བ་ནི། །འདོད་ཁམས་འདུལ་བའི་དབང་དང་ལྡན་པའི་རྟགས། །བོང་བུ་གྭ་པ་ཆིབས་སུ་ཆིབས་པ་ནི། །གཏི་མུག་དོན་དམ་ཆོས་ཉིད་བསྲེ་བའི་རྟགས། །དཔྱི་སྟེང་མིག་གིས་ཕྱོགས་བཅུར་བལྟ་བ་ནི། །གནོད་བྱེད་གང་ན་འདུག་ཀྱང་འགུགས་པའི་རྟགས། །ཞིང་ཆུང་ལྤགས་པས་སྒ་གཡོགས་བྱས་པ་ནི། །སངས་རྒྱས་བསྟན་པ་བསྲུང་བར་མཛད་པའི་རྟགས། །སྲིན་པོའི་ཐོད་པས་སྒ་རུ་བྱས་པ་ནི། །བདུད་དང་སྲིན་པོ་ཟིལ་གྱིས་གནོན་པའི་རྟགས། །སྦྲུལ་ནག་སྟོང་གིས་གོང་སྨེད་བྱས་པ་ནི། །ཉམས་པ་ཅན་ལ་མཛེ་ནད་གཏོང་བའི་རྟགས། །སྲིན་པོའི་ཐོད་པ་གོང་ལ་བཏགས་པ་ནི། །མ་མོ་སྲིན་མོ་ལས་ལ་འགྱེད་པའི་རྟགས། །ནད་ཀྱི་རྐྱལ་པ་སྨད་ལ་བཅིངས་པ་ནི། །དགྲ་བོའི་ཡུལ་དུ་ནད་རིམས་འགྱེད་པའི་རྟགས། །མེ་དཔུང་འབར་བའི་དབུས་ན་བཞུགས་པ་ནི། །ཡེ་ཤེས་ཆེན་པོས་རྣམ་རྟོག་བསྲེག་པའི་རྟགས། །རླུང་ནག་འཚུབ་མ་ཕྱོགས་བཅུར་འཁྱིལ་བ་ནི། །ལྷ་སྲིན་སྡེ་བརྒྱད་དམ་ལ་འདུ་བའི་རྟགས། །ནག་མོ་འབུམ་ཕྲག་བྲན་དུ་འཁོལ་བ་ནི། །དགྲ་བགེགས་གང་ཡིན་ཆམས་ལ་འབེབས་པའི་རྟགས། །བྷྱོཿ འཇིགས་གཟུགས་ཁྲག་འཐུང་ལྷ་མོ་དུད་སོལ་མ། །ནག་མོ་འབུམ་སྡེའི་ཚོགས་དང་བཅས་པ་ལ། །མཱཾ་ས་རཀྟ་ཙིཏྟས་བརྒྱན་པ་ཡི། །དམར་གྱི་གཏོར་མས་ཁྱོད་ཀྱི་ཐུགས་དམ་བསྐང་། །བ་ལིང་མཆོད་པར་བཞེས་ཤིག་དམ་ཚིག་ཅན། །གསོལ་ཞིག་བཞེས་ཤིག་ཆོས་སྐྱོང་སྲུང་མའི་གཙོ། །འཁོར་གྱི་ཚོགས་རྣམས་ཕོ་ཉར་ད་ཐོངས་ལ། །བསྟན་པ་འཇིག་པའི་དགྲ་བགེགས་རྡུལ་དུ་རློག །མ་གཅིག་རྒྱབ་ནས་མེ་འབར་རྒྱ་མཚོ་སྐེམ། །ཕྱག་ནས་འཇིགས་པའི་མཚོན་ཆས་རི་རབ་བསྙིལ། །དབུ་སྐྲ་རལ་པ་འཐིབས་པས་སྟོང་གསུམ་འགེངས། །ཞལ་དུ་མི་ཤ་རློན་པ་རྟག་ཏུ་གསོལ། །ལྗགས་ལ་ཁྲག་དང་ཞག་གི་རྒྱ་མཚོ་འཁྱིལ། །གསུང་ནི་འབྲུག་གི་སྒྲ་ལྟར་ཕྱོགས་བཅུར་སྒྲོག །བདག་གིས་ཁྱོད་ལ་བསྟོད་པ་འབུལ་ལགས་ན། །བསྟན་པ་བསྲུང་བའི་ལས་འདི་མྱུར་དུ་སྒྲུབས།། ཞེས་བྲམ་ཟེ་ཆེན་པོ་མཆོག་སྲེད་ཀྱིས་མཛད་པའོ། །གཞན་ཡང་། བྷྱོཿ སྔོན་ཚེ་དཔག་བསམ་བྱང་ཆུབ་ཤིང་གི་དྲུང་། །རྒྱལ་བ་ཐུབ་པ་ཆེན་པོའི་སྤྱན་སྔ་རུ། །བསྟན་པ་གཉན་པོ་བསྲུང་བར་དམ་བཅས་པའི། །ཁྲག་འཐུང་དུད་སོལ་སྐུ་ལ་ཕྱག་འཚལ་བསྟོད། །ཁྱོད་ཀྱི་ཡོན་ཏན་སྟོབས་དང་གཟི་བརྗིད་ལས། །མ་མོ་མཁའ་འགྲོ་བྱེ་བས་བསྐོར་བའི་དབུས། །གཏུམ་ཞིང་འགྱིང་བག་རྔམས་པའི་ཚུལ་དུ་བཞུགས། །སྲིད་གསུམ་ཟིལ་གྱིས་གནོན་ལ་ཕྱག་འཚལ་བསྟོད། །དོན་དམ་མི་གཡོ་སྐུ་མདོག་ཤིན་ཏུ་གནག །ཀླུ་རྣམས་འདུལ་ཕྱིར་དབུ་སྐྲ་སྦྲུལ་གྱིས་བཅིངས། །རིགས་ལྔ་རྣམ་དག་ཐོད་སྐམ་ལྔ་ཡིས་བརྒྱན། །ཐུགས་རྗེས་འགྲོ་དོན་མཛད་ལ་ཕྱག་འཚལ་བསྟོད། །ཡང་དག་དོན་རྟོགས་ཐལ་ཆེན་ཚོམ་བུས་བརྒྱན། །དུག་གསུམ་སྤོང་ཕྱིར་རྨ་བྱའི་རྒྱལ་མཚན་བཙུགས། །དགྲ་བགེགས་སྒྲོལ་ཕྱིར་ཁྲག་ཞག་ཐིག་ལེར་བྲིས། །རྫུ་འཕྲུལ་མཐུ་སྟོབས་ལྡན་ལ་ཕྱག་འཚལ་བསྟོད། །ཞེ་སྡང་དག་ཕྱིར་སྙན་གཡས་སྦྲུལ་ནག་འཕྱོ། །ཁམས་གསུམ་སྒྲ་སྒྲོག་སྙན་གཡོན་སེངྒེས་བརྒྱན། །སྙན་པ་སྒྲོག་ཕྱིར་གསེར་གྱི་དྲིལ་བུ་འཆང་། །ཁམས་གསུམ་སྐད་ཅིག་ཁྱབ་ལ་ཕྱག་འཚལ་བསྟོད། །དགྲ་བགེགས་སྒྲོལ་ཕྱིར་སྤྱན་གསུམ་ཕྱོགས་བཅུར་གཟིགས། །ཤ་ཆེན་གསོལ་ཕྱིར་མི་རོ་ཞལ་དུ་བཅུག །བདུད་བཞི་འཇོམས་ཕྱིར་རྣོ་གདུག་མཆེ་བ་གཙིགས། །མ་རུངས་རྡུལ་དུ་རློག་ལ་ཕྱག་འཚལ་བསྟོད། །ཆོས་ཉིད་དོན་ལྡན་ཞིང་ཆེན་ལྤགས་པ་གསོལ། །ཐེག་མཆོག་གསུམ་ལྡན་གླང་ཆེན་ཀོ་རློན་བརྒྱན། །སྟོང་གསུམ་གྲགས་ལྡན་རེ་ལྡེའི་ཤམ་བུས་དཀྲིས། །སྨོན་ལམ་རྣམ་དག་ཁྱོད་ལ་ཕྱག་འཚལ་བསྟོད། །དགྲ་སྲོག་གཅོད་ཕྱིར་ཕྱག་གཡས་རལ་གྲི་འཕྱར། །བདུད་ཁྲག་གསོལ་ཕྱིར་འོག་མ་ཐོད་རློན་འཛིན། །སྲིད་གསུམ་སྒྲོལ་ཕྱིར་གཡོན་པ་ཤཱཀྟི་བསྣམས། །གཡུལ་ངོ་བཟློག་ཕྱིར་འོག་མ་ཏྲི་ཤཱུལ་འཛིན། །ཆོས་ཉིད་དོན་རྟོགས་རུས་པའི་རྒྱན་གྱིས་སྤྲས། །ལྷ་མིན་འདུལ་ཕྱིར་ཐོད་རློན་དོ་ཤལ་བྱས། །རྫུ་འཕྲུལ་སྟོན་ཕྱིར་ལྕགས་སྒྲོག་འབར་བས་བརྒྱན། །བདུད་དཔུང་སྐྲག་པར་མཛད་ལ་ཕྱག་འཚལ་བསྟོད། །སྲིན་པོ་འདུལ་ཕྱིར་སྤྲུལ་པའི་བོང་བུ་ཆིབས། །སྟོང་གསུམ་ཁྱབ་ཕྱིར་འཚུབ་མའི་ནང་དུ་བཞུགས། །དུར་ཁྲོད་གནས་ཕྱིར་ཤ་ཟ་མང་པོས་བསྐོར། །སྣང་སྲིད་དབང་སྡུད་གསུང་ནི་འབྲུག་ལྟར་སྒྲོག །རྣམ་རྟོག་སྲེག་མཛད་མེ་དཔུང་དབུས་ན་བཞུགས། །སྟོབས་ཆེན་དམ་ཚིག་ཅན་ལ་ཕྱག་འཚལ་བསྟོད། །བྷྱོཿ ཁྱོད་ཀྱི་གཡས་ནས་སྤྲུལ་པའི་ལས་མཁན་ནི། །དམར་མོ་སྤྱན་གསུམ་ལྕགས་ཀྱི་རལ་པ་ཅན། །ཕྱག་གཡས་ལྕགས་ཀྱུས་དགྲ་བགེགས་སྙིང་ནས་འགུགས། །དམ་ཉམས་འཆིང་བྱེད་ཞགས་པ་གཡོན་ན་ཐོགས། །སྟོང་ཁམས་རྒྱུ་ཕྱིར་ཆིབས་སུ་བོང་བུ་ཆིབས། །དྲག་མོ་འགུགས་བྱེད་གསུམ་ལ་ཕྱག་འཚལ་བསྟོད། །ཁྱོད་ཀྱི་གཡོན་ནས་སྤྲུལ་པའི་ལས་མཁན་ནི། །ནག་མོ་སྤྱན་གསུམ་ཁྲག་གི་རལ་པ་ཅན། །མ་རུངས་གསོད་བྱེད་ཕྱག་གཡས་རལ་གྲི་འཕྱར། །གཙོ་ལ་སྟོབ་ཕྱིར་ཙིཏྟ་གཡོན་ན་ཐོགས། །དུར་ཁྲོད་ཆས་བརྒྱན་ཆིབས་སུ་བོང་བུ་ཆིབས། །དགྲ་བགེགས་གསོད་བྱེད་གསུམ་ལྎ ཁྱོད་ཀྱི་མདུན་ནས་སྤྲུལ་པའི་ལས་མཁན་ནི། །གཅེར་བུ་སྤྱན་གསུམ་དུང་གི་མཆེ་བ་ཅན། །གནོད་བྱེད་སུན་འབྱིན་ཕྱག་གཡས་དགྲ་སྙིང་ཐོགས། །གདུག་པ་སྐྲག་མཛད་གཡོན་ན་ཐོད་ཁྲག་འཛིན། །མཁའ་ལ་རྒྱུ་ཕྱིར་རླུང་གི་བོང་བུ་ཆིབས། །དམར་མོ་ཙ་མུཎྜྻི་ལ་ཕྱགྎ ཁྱོད་ཀྱི་རྒྱབ་ནས་ལས་བྱེད་ཕོ་ཉ་ནི། །དམར་ནག་ཕུར་པའི་ལྷ་མོ་རེ་མ་ཏི། །སྤྱན་གསུམ་མཆེ་གཙིགས་གཏུམ་སྦེག་དྲེ་འུ་ཞོན། །ཕྱག་གཡས་རལ་གྲིས་དམ་ཉམས་སྲོག་རྩ་གཅོད། །གཡོན་པ་ལྕགས་ཀྱུས་དགྲ་བོའི་སྙིང་ནས་འདྲེན། །ནག་མོ་ཐུན་ཁྲག་འབེབས་ལ་ཕྱགྎ ཁྱོད་ཀྱི་ཐུགས་ལས་སྤྲུལ་པའི་མཁའ་འགྲོ་ནི། །སྐུ་མདོག་དཀར་སེར་དམར་ལྗང་བོང་བུ་ཆིབས། །ཕྱག་གཉིས་གྲི་གུག་བྷཉྫྱ་ཁྲག་བཀང་བསྣམས། །ཕྲིན་ལས་སྒྲུབ་མཛད་བཞི་ལ་ཕྱགྎ ཁྲག་འཐུང་ནག་མོའི་སྤྱན་སྔར་ཁས་བླངས་པའི། །ཤར་ནས་སྤྲུལ་པའི་ལས་མཁན་ཕོ་ཉ་ནི། །དཀར་མོ་ཞལ་གཅིག་ཕྱག་གཉིས་སེངྒེའི་གདོང་། །དུར་ཁྲོད་ཆས་བརྒྱན་གྲི་དང་ཐོད་པ་འཛིན། །དྲེལ་ནག་རྐང་གསུམ་ཆིབས་ནས་ཕྱོགས་བཅུར་རྒྱུག །འགྱིང་ཞིང་དགྲ་བགེགས་རོལ་ལ་ཕྱག་འཚལ་བསྟོད། །ལྷོ་ནས་དམར་ནག་ཞལ་གཅིག་སྟག་གི་གདོང་། །དུར་ཁྲོད་ཆས་བརྒྱན་གྲི་དང་ཐོད་པ་འཛིན། །དྲེལ་ནག་རྐང་གསུམ་ཆིབས་ནས་གནོད་བྱེད་ཀྱི། །ཁྲོ་ཞིང་ཤ་ལ་རོལ་ལྎ ནུབ་ནས་སྔོ་ནག་ཞལ་གཅིག་སྤྱང་ཀིའི་གདོང་། །དུར་ཁྲོད་ཆས་བརྒྱནྎ དྲེལ་ནག་རྐང་གསུམ་ཆིབས་ནས་བགེགས་རྣམས་འཇོམས། །རྒྱུག་ཅིང་དགྲ་ཤ་རོལ་ལྎ བྱང་ནས་མཐིང་ནག་ཞལ་གཅིག་ཕག་གི་གདོང་། །དུར་ཁྲོད་ཆས་བརྒྱནྎ དྲེལ་ནག་རྐང་གསུམ་ཆིབས་ནས་འབྱུང་པོའི་ཤ །འདུར་ཞིང་ཞལ་དུ་སྟོབ་ལ་ཕྱགྎ བྱང་ཤར་མཚམས་ནས་སྨུག་ནག་བྱ་རྒོད་གདོང་། །དུར་ཁྲོད་ཆས་བརྒྱནྎ དྲེལ་ནག་ཞོན་ནས་དགྲ་བགེགས་ཤ་ཁྲག་རྣམས། །རྔམ་ཞིང་རྔམ་ཞིང་རོལ་ལྎ ཤར་ལྷོ་མཚམས་ནས་མུན་མདོག་སྐྱུང་ཀའི་གདོང་། །དུར་ཁྲོད་ཆས་བརྒྱནྎ དྲེལ་ནག་ཞོན་ནས་དགྲ་བགེགས་མ་ལུས་པ། །མཆོང་ཞིང་མཆོང་ཞིང་གསོལ་ལྎ ལྷོ་ནུབ་མཚམས་ནས་ཁྲག་མདོག་དུར་བྱའི་གདོང་། །དུར་ཁྲོད་ཆས་བརྒྱནྎ དྲེལ་ནག་ཞོན་ནས་ཉམས་པ་སྲོག་དང་འབྲལ། །རྒོད་ཅིང་རྒོད་ཅིག་འཇོམས་ལྎ ནུབ་བྱང་མཚམས་ནས་དུད་མདོག་བྱ་རོག་གདོང་། །དུར་ཁྲོད་ཆས་བརྒྱནྎ དྲེལ་ནག་ཞོན་ནས་དགྲ་བགེགས་སྙིང་ནས་འདྲེན། །ལྡིང་ཞིང་ལྡིང་ཞིང་རོལ་ལྎ ལས་མཁན་ཕོ་ཉ་ནག་མོ་ཀངྐའི་གདོང་། །ཀུན་ཀྱང་མདའ་གཞུ་སྤུ་གྲི་བྷཉྫྱ་དང་། །སྦྲུལ་ཞགས་བྷཉྫྱ་རྒྱུ་ཞགས་ནད་རྐྱལ་བསྣམས། །མ་རུངས་འཆིང་བྱེད་རྣམས་ལྎ ཞིང་ཆེན་སྟོད་གཡོགས་རེ་ལྡེའི་ཤམ་བུས་དཀྲིས། །ཐོད་རློན་དོ་ཤལ་ཆིབས་སུ་སྟག་སྤྱང་དང་། །སྤྲེའུ་དྲེད་ནག་ཞོན་ནས་ཕོ་ཉ་འགྱེད། །དགྲ་བགེགས་སྒྲོལ་བྱེད་བཞི་ལྎ གཞན་ཡང་ལས་མཁན་བྱེ་བ་འབུམ་སྡེ་དང་། །མ་མོ་མཁའ་འགྲོ་བདུད་མོ་བྱེ་བའི་ཚོགས། །ནག་མོ་གཅེར་བུ་འཇིགས་ཤིང་སྐྲ་བཤལ་བ། །ཞལ་གཅིག་ཕྱག་གཉིས་གྲི་དང་ཐོད་པ་འཛིན། །སྟོང་ཁམས་མ་ལུས་སྤྲིན་གྱི་ཚོགས་ལྟར་འཐིབས། །སྲིད་གསུམ་གཡོ་བར་མཛད་ལ་ཕྱག་འཚལ་བསྟོད། །དེ་ལྟར་བསྟོད་ཅིང་ཁྱོད་ལ་ཞུ་བ་ནི། །སྔོན་གྱི་ཐུགས་དམ་གཉན་པོ་བརྩེར་དགོངས་ལ། །བདག་ཅག་རྣལ་འབྱོར་དམ་ཚིག་ལྡན་པ་དང་། །བསྟན་ལ་རབ་དད་དཀར་པོའི་ཕྱོགས་རྣམས་ལ། །བདུད་རྩིའི་རྒྱུན་ཕོབ་ནད་རྣམས་ཞི་བ་དང་། །ལོངས་སྤྱོད་ཚེ་དང་འབྲུ་སོགས་འཕེལ་བར་མཛོད། །མ་རུངས་སེམས་འཛིན་ནག་པོའི་ཕྱོགས་རྣམས་ལ། །དུག་གི་རླུང་བུས་ནད་ཀྱིས་གཟིར་ཞིང་སློང་། །ཁོང་ཁྲག་སྐྱུག་ཅིང་ཆོ་ངེས་གནམ་དུ་འདེབས། །སྨྱོ་འབོག་ཐོངས་ལ་བདུན་རྒྱུད་རྩད་ནས་ཆོད། །བདུད་དང་དགྲ་བགེགས་འབྱུང་པོ་རྡུལ་དུ་རློག །བསྟན་པ་སྲུང་མཛད་ལས་འདི་མྱུར་དུ་སྒྲུབས།། ཞེས་རྣལ་འབྱོར་གྱི་དབང་ཕྱུག་རྡོ་རྗེ་བི་རུ་པ་དཔལ་ལྡན་ཆོས་སྐྱོང་ཞབས་ཀྱིས་ཞལ་གཟིགས་དུས་སུ་མཛད་པའོ། །གཟུངས་ལས་ཕྱུང་བའི་བསྟོད་པ་ནི། བྷྱོཿ ཏིལ་མར་གྱིས་བསྐུས་ལན་བུ་གཅིག་འཕྱང་རོ་ཉེའི་རྣ་ཆས་སྒེག་ཅིང་ཆ་ལུགས་མ་ལུས་འཆང་། །རྒྱན་དུ་རྐང་སྒྲོག་ལྕགས་ལས་བྱས་པ་གཅིག་གིས་རང་གི་རྐང་པ་མཛེས་པར་བྱས་པ་སྟེ། །གཅེར་བུ་བོང་བུ་ཞོན་ནས་འགྲོ་བ་འདི་ན་རྒྱུ་བ་འདི་ནི་ལྷ་མོ་ཁྱོད་ཉིད་ཀྱིས། །བདག་ཉིད་མཛེས་པར་ཤེས་ཀྱིས་གཞན་ལྟས་ཁྱོད་ཀྱི་སྤྱོད་པ་མཚོ་ཆེན་དོན་དག་སུ་ཡིས་ཤེས། །འཁོར་བ་འཇིག་པའི་ཚེ་ན་མི་ལུས་དག་ལ་ཁྲག་དང་ཞག་འཛག་དུད་པ་འཐུལ་བ་ན། །ལྷ་མོ་མཆེ་བ་གཙིགས་པ་ཁྱོད་ཀྱི་ཞལ་དུ་འགྲོ་ཀུན་སྐད་ཅིག་ཙམ་གྱིས་ཞུགས་པར་གྱུར། །ནག་མོ་མི་ཐོད་ཐོགས་པ་ཁྱོད་ནི་རྣལ་འབྱོར་གྲུབ་པའི་སྤྱོད་ཡུལ་ཅན་དེ་དུར་ཁྲོད་དགྱེས། །ཁྱོད་ནི་གཡོན་ཅན་མནན་ཅིང་ནད་དང་འཆི་བའི་འཇིགས་པ་སེལ་ཞིང་མི་ཟད་དྲིལ་ཡང་སྒྲོག །ཁྱོད་ནི་དཔའ་བོ་དག་གི་མགོ་བོའི་ཅོད་པན་ལེགས་སྤྲས་གཡུལ་དུ་མཚོན་གྱིས་བཅད་པ་ཡི། །ཕྲེང་བ་ཐོགས་ཤིང་གར་བྱེད་ལག་པ་མཉེན་བརྐྱང་རྐུབ་ཚོས་ཆེ་ལ་ཀླུ་དབང་གཤིབས་པ་ཡི། །སྐ་རགས་འཆང་ཞིང་ལག་ཏུ་མདུང་དང་རལ་གྲི་ཐོགས་པ་ཁྲག་དང་ཆང་གིས་མྱོས་གྱུར་པས། །མིག་རྩ་དམར་པོར་གྱུར་ཅིང་མཚན་མོ་དུར་ཁྲོད་རྒྱུ་བ་འབྱུང་པོ་ཕལ་ཆེར་རྣམས་ཀྱིས་མཐོང་། །ཀོ་རློན་ཆེན་པོ་དྲལ་ཏེ་བརྒྱངས་པའི་གོས་ཀྱིས་སྟོད་གཡོགས་སྨད་ནི་རེ་ལྡེ་སེར་པོས་དཀྲིས། །མི་ཡི་རྒྱུ་མ་གསར་པའི་སྦུབས་ཀྱིས་ཞལ་གྱི་ཟླ་བ་བརྒྱན་ཅིང་དྲིལ་བུ་འགྲམ་པར་འཁྲོལ། །ལུས་ནི་སྣུམ་གྱིས་གསར་དུ་བྱུགས་ཤིང་ཁྲག་དང་ཞག་མང་འཛག་པའི་ཐིག་ལེས་ཚོམ་བུར་བྲིས། །མི་ཡི་ཤ་ལ་སོ་ཡིས་ཆེམ་ཆེམ་གཅོད་བྱེད་ཐོད་པ་ཅན་གྱིས་བདག་ལ་སྐྱོང་གྱུར་ཅིག །དྲག་པོ་དྲག་མོ་མི་བཟད་མི་ཤ་ཁ་ན་ཐོགས་པ་སྔོན་ཆད་མ་བྱུང་ཁྱོད་མཐོང་ན། །མ་མོ་རྣམས་ཀྱང་སྐྲག་ཅིང་རྟབ་ལ་རྔམ་པ་འདོན་ཅིང་མིག་རྩ་རིག་རིག་ཁྱོད་ལ་འདུད། །ནག་མོ་བཟང་མོ་ལུས་མདོག་གནག་ཅིང་བཟོད་པར་དཀའ་བ་ཁྱོད་ལ་བརྒྱ་བྱིན་ལ་སོགས་ཀྱང་། །ཞབས་ལ་ཉིན་རེ་བཞིན་དུ་བསྟོད་པར་བྱེད་ཅིང་གཤིན་རྗེའི་རྒྱལ་པོ་ཉིད་ཀྱང་རྟག་ཏུ་འདར་ཞིང་འདུད། །མི་རྣམས་དང་ནི་འགྲོ་བ་མ་ལུས་མཇུག་བརཏལ་ནས་ནི་ཁྱོད་ཀྱི་རྣ་བ་ཡ་གཅིག་ལ། །བྲང་གིས་འགྲོ་བའི་གདེངས་ཀ་སྟོང་དང་ལྡན་པ་གཅིག་གིས་རྒྱབ་ནས་ཁྱོད་ལ་རྒྱན་དུ་བྱས། །ཡ་གཅིག་ལ་ནི་སེངྒེ་མཚུངས་མེད་ཐོགས་ཤིང་རྒྱ་མཚོའི་མཐའ་བསྐོར་ས་གཞི་མ་ལུས་གནོན། །སྟེང་ནས་རྒྱུ་བའི་ཉི་མ་འོད་ཟེར་སྟོང་ལྡན་དེ་ནི་ཁྱོད་ཀྱི་ལྟེ་བའི་ཕྱོགས་སུ་ཤར། །བྷྱོཿ རྒྱ་མཚོའི་ཀློང་ནས་མེ་འབར་ཁྱོད། །མཚོ་རྣམས་སྐེམ་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱེད་དུ་བཞུགས། །རྫོང་དང་དཀའ་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་མིང་ཤེས། །དེ་ལ་འཇིགས་པ་མེད་པར་འགྱུར། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་པ་ཁམས་ཀྱི་དབང་ཕྱུག་མ། །ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་སྲུང་བ་ཡི། །དཔལ་ལྡན་ལྷ་མོ་ཁྱོད་ལ་འདུད། །དཔལ་ལྡན་གསང་ཆེན་མེ་འབར་དུད་སོལ་མ། །མི་ཕམ་ཁམས་གསུམ་ཟིལ་གནོན་འདོད་དབང་མ། །ཕྱི་ནང་གསང་བའི་གདོན་བགེགས་རིམས་ལ་སོགས། །དྲན་པ་ཙམ་གྱིས་སྐྱོབ་ཅིང་རབ་ཞི་བའི། །གཡར་དམ་གཉན་པོ་དེང་འདིར་བརྩེར་དགོངས་ཤིག། དོན་གྱི་སྒོ་ནས་བསྟོད་པ་ནི། བྷྱོཿ གཡུ་མཚོ་མེར་བའི་འགྲམ་ཤེད་ན། །རླུང་འཚུབ་དམར་ནག་འཁྱིལ་བའི་དབུས། །སྲིན་པོའི་བོང་བུ་གྭ་དམར་ལ། །ཞིང་ཆེན་རྒྱུ་མའི་མཐུར་དུ་བྱས། །སྲིན་པོའི་ཡ་མགལ་སྔ་རུ་ལ། །མ་མགལ་དག་གིས་ཕྱི་རུ་བྱས། །ཞིང་ཆེན་སྒ་སྟན་ཞིང་ཆུང་གི །སྒ་གཡོགས་སྦྲུལ་ནག་གོང་སྨེད་བྱས། །རུ་ཏྲ་ཕྲུ་གུའི་སྒ་གཡོགས་ཅན། །དེ་སྟེང་ལྷ་མོ་དུད་སོལ་མ། །སྐུ་མདོག་ནག་མོ་འཇིགས་པའི་གཟུགས། །ཞལ་གཅིག་ཕྱག་བཞི་སྤྱན་གསུམ་ཁྲོས། །ཞབས་གཉིས་ཙན་འཁྱིལ་བརྐྱང་བསྐུམ་བཞུགས། །རལ་པའི་ཐོར་ཚུགས་གཡོན་དུ་འཁྱིལ། །ལས་སུ་ཁམས་གསུམ་དབང་དུ་སྡུད། །སྙན་གཡས་སྦྲུལ་ནག་གདེངས་ཀ་འཕྱོ། །ཐོད་སྐམ་ལྔ་ཡིས་དབུ་ལ་བརྒྱན། །གཙུག་ན་རྨ་བྱའི་རྒྱལ་མཚན་བཙུགས། །ཐལ་ཆེན་ཚོམ་བུ་སྐུ་ལ་བྱུགས། །ཁྲག་ཞག་ཐིག་ལེས་ཟོ་རིས་བཏབ། །སྙན་གཡོན་སེངྒེ་རལ་དམར་འཕྱོ། །སྙན་གཉིས་གསེར་གྱི་དྲིལ་བུ་འཁྲོལ། །རྣ་ལྟག་མེ་ཏོག་ཆུན་པོས་བརྒྱན། །སྐུ་སྟོད་གླང་ཆེན་ཞིང་ལྤགས་གསོལ། །སྐུ་སྨད་རེ་ལྡེ་སེར་པོ་དང་། །སྟག་གཟིག་ལྤགས་པའི་ཤམ་ཐབས་གསོལ། །རིན་ཆེན་རུས་རྒྱན་སྦྲུལ་གྱིས་སྤྲས། །མཆེ་བ་ཟུར་གསུམ་ཅུང་ཟད་གཙིགས། །ཁྲོ་གཉེར་ཐོད་ཕྲེང་སེ་རལ་འཆང་། །ཕྱག་གཡས་རལ་གྲི་མེ་འོད་འཕྱར། །འོག་མ་ཐོད་རློན་ཁྲག་བཀང་གསོལ། །ཕྱག་གཡོན་ཤཱཀྟི་རྨ་བྱ་ཅན། །འོག་མ་ཏྲི་ཤཱུལ་རྩེ་གསུམ་ཐོགས། །དཔྲལ་བའི་དཀྱིལ་ནས་ཟླ་གསལ་ཞིང་། །ལྟེ་བའི་དབུས་ནས་ཉི་མ་འཆར། །དབང་གི་ལྕགས་སྒྲོག་ཞབས་ལ་འཁྲིལ། །བོང་བུའི་སྟེང་ནས་ཕྱོགས་བཅུར་གཟིགས། །མེ་དཔུང་ནང་ན་འགྱིང་བག་བཞུགས། །ཤིན་ཏུ་སྦེག་པའི་ཆ་བྱད་ཅན། །སྲིད་པའི་མ་མོ་ཁྲི་ཕྲག་དང་། །ལས་ཀྱི་མ་མོ་ཁྲི་ཕྲག་ནི། །དྲུག་ཅུ་རྩ་བཞིས་རབ་ཏུ་བསྐོར། །དཔལ་ལྡན་ལྷ་མོ་ཁྱོད་ལ་བསྟོད།། ཅེས་སྲིན་པོའི་རྒྱལ་པོ་ལངྐ་མགྲིན་བཅུས་བསྟོད་པའོ། །རྒྱན་བསྟོད་ནི། བྷྱོཿ བྱང་ཤར་ཐོད་པ་འཕྲུལ་གྱི་གཞལ་ཡས་ནས། །ལྷ་མོ་ནག་མོ་མཐུ་དང་རྫུ་འཕྲུལ་ཅན། །དབང་ཕྱུག་སྲིད་པ་གསུམ་གྱི་བདག་མོ་སྟེ། །ཁྱོད་ནི་ཁམས་གསུམ་ཀུན་གྱིས་མཆོད་ཅིང་བསྐུར། །ཚངས་པའི་རྒྱལ་པོས་རྨ་བྱའི་རྒྱལ་མཚན་ཕུལ། །ཁྱབ་འཇུག་ཆེན་པོས་ཉི་ཟླ་རྒྱན་དུ་ཕུལ། །རྣམ་ཐོས་སྲས་ཀྱིས་སེངྒེའི་རྣ་རྒྱན་ཕུལ། །ནམ་མཁའི་ལྷ་བྲན་གསེར་གྱི་དྲིལ་བུ་ཕུལ། །ཀླུ་ཡི་རྒྱལ་པོས་སྦྲུལ་གྱི་གདེངས་ཀ་ཕུལ། །ལྷ་དབང་བརྒྱ་བྱིན་གླང་ཆེན་ཀོ་རློན་ཕུལ། །ལྷ་མ་ཡིན་གྱིས་དར་ནག་ཅོད་པན་ཕུལ། །མ་མོ་རྣམས་ཀྱིས་རེ་ལྡེའི་ཤམ་བུ་ཕུལ། །ཤ་ཟ་རྣམས་ཀྱིས་ཁྲག་ཞག་ཐིག་ལེ་ཕུལ། །མཁའ་འགྲོ་རྣམས་ཀྱིས་རུས་པའི་རྒྱན་ཆ་ཕུལ། །གཤིན་རྗེའི་རྒྱལ་པོས་ཐོད་པའི་རྒྱན་ཕྲེང་ཕུལ། །སྲིན་པོའི་རྒྱལ་པོས་ལྕགས་སྒྲོག་སྔོན་པོ་ཕུལ། །འཁོར་ལོས་སྒྱུར་རྒྱལ་ལྷ་མིའི་རྒྱལ་སྲིད་ཕུལ། །དེ་ལྟར་རྒྱན་གྱི་རྣམ་པ་དུ་མ་ཡིས། །དཔལ་ལྡན་ལྷ་མོ་ཁྱོད་ལ་བསྟོད་འབུལ་ན། །རྣལ་འབྱོར་བདག་ཅག་འཁོར་དང་བཅས་པ་ཡི། །ཚེ་དང་བསོད་ནམས་ལ་སོགས་རྒྱས་པ་དང་། །མཆོག་དང་ཐུན་མོང་དངོས་གྲུབ་མ་ལུས་སྩོལ། །བདག་ལ་རྟག་ཏུ་སྡང་བའི་སེམས་ལྡན་པའི། །དམ་ཉམས་དགྲ་བོའི་སྲོག་རྩ་མྱུར་དུ་ཆོད།། ཅེས་པ་དེ་ལྟར་བསྟོད་པ་རྣམས་ཀྱི་རྗེས་སུ། ཨོཾ་རུ་རུ་རོ་རུ་བི་དྷིཥྛ་བ་དྷྭ་སི་ཀ་མ་ལ་རཀྵ་སི་ཧཱུྃ་བྷྱོ། ཆེ་གེ་མོ་མཱ་ར་ཡ་ཕཊ྄། ཅེས་པ་བཟླ་ཞིང་དམར་བརླབ་གཏོར་མ་བསྒྲེང་། བརྒྱ་རྩ་བརྒྱད་དམ་ཡང་ན་ཉི་ཤུ་རྩ་གཅིག་བཟླ་ཞེས་རྒྱ་གཞུང་དུ་འབྱུང་། བཟླས་པ་བྱ་བ་ནི། ལྷ་མོ་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ། དེའི་མཐའ་མར་ཨོཾ་ཧཱུྃ་ཤྲཱི་ཡ་དེ་ཝཱི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ཞེས་པའི་སྔགས་ཀྱི་ཕྲེང་བ་ནག་པོས་བསྐོར་བར་བསམ། རང་གི་ཐུགས་ཀ་ནས་འོད་ཟེར་སྤྲོས་ལྷ་མོའི་ཐུགས་ཀར་ཕོག །ཐུགས་དམ་གྱི་རྒྱུད་བསྐུལ་ཏེ་སྔོན་དམ་བཅས་པ་དྲན་པས་ལྷ་མོའི་ཐུགས་ཀ་ནས་འོད་ཟེར་འཕྲོས། འཁོར་དང་དྲེགས་པ་ཅན་ཐམས་ཅད་ཀྱི་སྙིང་ཀར་ཕོག །དེ་དག་གི་རྒྱུད་བསྐུལ། མཐུ་དང་ནུས་པ་ཐམས་ཅད་གཙོ་མོའི་ཐུགས་ཀར་བསྡུས། སྐུ་གསུང་ཐུགས་ཀྱི་དངོས་གྲུབ་འོད་ཟེར་སྣ་ལྔའི་ཚུལ་དུ་བྱུང་བ་བདག་ཉིད་ཀྱི་ཐུགས་ཀར་ཐིམ་པར་བསམ་པས། །སྙིང་པོ་ཡི་ནི་གསང་སྔགས་འདི། །རྟག་པར་བཟླས་པ་བྱ་བ་སྟེ། །མྱུར་བ་ཡང་ནི་མ་ཡིན་པ། །ཐོགས་པ་ཡང་ནི་མ་ཡིན་པ། །མི་གསལ་བ་ཡང་མ་ཡིན་པ། །གུག་ཀྱེད་ཉམས་པ་མ་ཡིན་པ། །གཡེང་བའི་རྟོག་པ་སྤངས་ལ་བཟླ། ཞེས་གསུངས་པ་ལྟར་བཟླས་ལ། བསྙེན་པའི་མན་ངག་ཟབ་པའི་ཁྱད་པར་འགའ་བླ་མའི་ཞལ་ལས་ཇི་ལྟར་འབྱུང་བ་བཞིན་བྱའོ། །དེ་ལྟ་བུས་དུས་རྟགས་གྲངས་ཀྱི་བསྙེན་པ་བྱ་བ་སྟེ། རྒྱ་གཞུང་ལས། དེ་ལྟར་བྱས་པས་བདུན་ནམ་བཅུ་བཞི་ན། །ལྷ་མོ་གཙོ་འཁོར་ཞལ་མཐོང་གསུང་ཡང་ཐོས། །འབྲིང་གིས་ཉམས་དང་ཐ་མས་རྨི་ལམ་སྟེ། །ལུས་དང་གྲིབ་མ་ལྟར་འཁོར་ཅི་བསམ་འགྲུབ། །ཅེས་གསུངས་པ་བཞིན་ནོ། །དེའང་སྔགས་ཁྲི་ཕྲག་རེ་རེ་བཟླས་ནས་གཏོར་མ་འོར་རེ་བཏང་ངོ་། །ཁུ་ཚུར་གཉིས་བཅིངས་མཛུབ་མོ་བསྒྲེང་སྟེ་ཁ་འགྲམ་གཡས་གཡོན་དུ་མཆེ་བ་ལྟར་བྱས་ལ། ཨོཾ་བྷྱོ་བརྟ་ལི་བརྟ་ལི་ཚེ། ཞེས་ལན་གསུམ་མམ་བདུན་བཟླས་ནས་འདི་སྐད་དུ། ཧཱུྃ་བྷྱོཿ དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དྭགས་ཁ། །དམ་ཚིག་སྲུང་མ་ཁྲག་དགའ་མོ། །ཀི་ལིའི་སྒྲ་སྒྲོག་སྦྱོར་ཟིན་མ། །དུར་ཁྲོད་རོ་ཡི་ཚལ་དབུས་ན། །ཚོགས་དང་ཕོ་ཉར་བཅས་པ་རུ། །གཙིགས་བྱེད་གཏུམ་མོ་དུད་སོལ་མ། །གསོལ་ཞིག་བཞེས་ཤིག་དམ་ཚིག་ལྷ། །གནས་ནས་གནས་པར་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱོད་ཀྱིས་འགྲུབ་པར་མཛོད། །བདག་གི་ལས་ནི་ཅི་བྱེད་ཀྱང་། །དེ་དག་ཀུན་གྱི་གྲོགས་གྱིས་ཤིག །གསོལ་བས་དགྱེས་ནས་ཞལ་དུ་ཐིམ་པར་མཛོད། །ཨོཾ་གྲྀ་གྲྀ་སརྦ་དུཥྚཾ་ཧ་ན་ཧ་ན་བྷཀྵ་བྷཀྵ་ཕྲཾ་ཕྲོཾ་ཕྲེཾ་ཕེཾ་ཕཊ྄་སྭཱ་ཧཱ། ཞེས་བརྗོད་དེ་སེ་གོལ་ལན་གསུམ་བརྡབས་ཏེ་གཏོང་བ་ཛཔ་྄མ་རྫོགས་ཀྱི་བར་དུ་རྒྱུན་དུ་དེ་ལྟར་ཤེས་པར་བྱའོ། །ཞེས་གྲུབ་པའི་སློབ་དཔོན་ནཱ་རོ་པས་གསུངས་སོ། །ལྔ་པ་བསྐང་བཤགས་གཉེར་གཏད་རྗེས་ཀྱི་བྱ་བ་ནི། རྒྱ་གཞུང་དུ། ཇི་སྲིད་སྐྱོ་བར་གྱུར་པ་དང་། དེ་སྲིད་ཀྱི་བར་དུ་བཟླས་པ་ལ་སྐྱོ་བར་གྱུར་ན་བསྟོད་པ་བྱས་ལ་མཆོད་པ་ཕུལ། ཕྱག་བྱས་ཏེ་ལྷ་མོ་གཤེགས་སུ་གསོལ་ལོ། །ཞེས་གསུངས་པ་ལྟར་རྗེ་བཙུན་གོང་མ་མར་པ་ཡབ་སྲས་ཀྱི་ཕྱག་བཞེས་ལ་འདི་ལྟ་སྟེ། ཚོགས་ཀྱི་འཁོར་ལོ་ཡི་དམ་རང་གཞུང་ལྟར་བྱིན་གྱིས་བརླབས་ནས་བསྐང་བ་བྱ་བ་དངོས་གྲུབ་ཀྱི་སྙེ་མ་ནི། བྷྱོཿ དགའ་བ་ཚལ་གྱི་དུར་ཁྲོད་ནས། །འདས་དང་མ་བྱོན་ད་ལྟར་གྱི། །བསྟན་པ་སྲུང་བར་མངའ་གསོལ་བའི། །ཆོས་སྐྱོང་སྲུང་མ་དུད་སོལ་མ། །ཁྱོད་ཀྱི་ཐུགས་དམ་གཉན་པོ་དེ། །རིག་འཛིན་རྣལ་འབྱོར་བདག་གིས་བསྐང་། །དམ་ཅན་སྲུང་མ་འདིར་སྤྱོན་ཅིག །རྣལ་འབྱོར་དགྲ་ལྷ་འདིར་བྱོན་ཞིག །འབོད་པའི་རྟེན་རྫས་ཡིན་པའི་ཕྱིར། །གཡབ་དར་ནག་པོས་ཐུགས་དམ་བསྐང་། །སྒྲུབ་པའི་དམ་རྫས་ཡིན་པའི་ཕྱིར། །གཏའ་གཏོར་ཆེན་པོས་ཐུགས་དམ་བསྐང་། །མ་དང་མི་འབྲལ་འགྲོགས་པའི་ཕྱིར། །རྒྱུན་གྱི་གཏོར་མས་ཐུགསྎ དམ་ཚིག་གཉན་པོ་བསྲེ་བའི་ཕྱིར། །བདུད་རྩི་སྨན་གྱིས་ཐུགསྎ བསྟེན་པའི་དམ་རྫས་ཡིན་པའི་ཕྱིར། །དགྲ་བགེགས་ཤ་དང་ནལ་བུའི་ཤ། །མཱཾ་སའི་བྱེ་བྲག་དཔག་མེད་ཀྱིས། །བསྐང་ངོ་ཁྱོད་ཀྱི་ཐུགས་དམ་བསྐང་། །དགྱེས་པའི་དམ་རྫས་ཡིན་པའི་ཕྱིར། །ར་ནག་ཁྲག་དང་བྱ་ནག་ཁྲག །དགྲ་བགེགས་ཁྲག་ལ་སོགས་པ་ཡི། །རཀྟའི་རྒྱ་མཚོསྎ དགྲ་བགེགས་གསུར་ལ་རྔམས་པའི་ཕྱིར། །ཚིལ་ཆེན་དུད་པསྎ ཆུ་དང་ཚལ་སྐྱེས་མེ་ཏོག་དང་། །ཙནྡན་ཨ་ཀ་རུ་སྤོས་དང་། །དྲི་བཟང་སྦྱར་བའི་ཡོན་ཆབ་ཀྱིས། །བསྐང་ངོ་ཁྱོད་ཀྱིྎ གྲོ་ནས་འབྲས་ཀྱི་བཤོས་གཙང་དང་། །འབྲུ་ཚིལ་ཞུན་ཆེན་སྣང་གསལ་དང་། །ཕྱི་ཡི་མཆོད་པ་རྣམ་ལྔ་ཡིས། །བསྐང་ངོ་ཁྱོད་ཀྱིྎ གཟུགས་སྡུག་སྒྲ་སྙན་དྲི་ཞིམ་དང་། །རོ་མངར་རེག་བྱ་འཇམ་པ་དང་། །འདོད་པའི་ཡོན་ཏན་ལྔ་རྣམས་ཀྱིས། །བསྐང་ངོ་ཁྱོད་ཀྱིྎ མི་རྟ་གླང་སོགས་ཤ་ལྔ་དང་། །བྱང་སེམས་རཀྟ་རྒྱུངས་པ་དང་། །བདུད་རྩི་ལྔ་ལ་སོགས་པ་ཡི། །གསང་བའི་མཆོད་པསྎ བཟའ་བའི་དམ་ཚིག་ཡིན་པའི་ཕྱིར། །བཤོས་གཙང་མར་གྱིས་བརྒྱན་པ་དང་། །ཤ་ཆང་ཁུར་བ་སྒོག་བཙོང་སོགས། །ཚོགས་ཀྱི་མཆོད་པསྎ ཕྱི་ཡི་རྟེན་རྫས་ཡིན་པའི་ཕྱིར། །བོང་བུ་གྭ་དམར་ལུག་ནག་དང་། །དར་ནག་བ་དན་མ་རལ་གྱིས། །བསྐང་ངོ་ཁྱོད་ཀྱི་ཐུགསྎ ནང་གི་རྟེན་རྫས་ཡིན་པའི་ཕྱིར། །རྨ་བྱ་ནོར་བུའི་རྒྱལ་མཚན་དང་། །ནལ་བུའི་རྒྱལ་མཚན་བྷཉྫྱ་ཡིས། །བསྐང་ངོ་ཁྱོད་ཀྱིྎ གསང་བའི་རྟེན་རྫས་ཡིན་པའི་ཕྱིར། །ཨ་མྲྀ་ཏ་དང་མྱོས་བྱེད་བཅུད། །གྲི་སྙིང་དགྲ་བགེགས་ནལ་བུའི་སྙིང་། །ཙིཏྟ་སྙིང་གིསྎ སྐུ་ཡི་རྟེན་རྫས་ཡིན་པའི་ཕྱིར། །ལུགས་སྐུ་བཏགས་སྐུ་བྲིས་སྐུ་དང་། །དར་སྐུ་སྐུ་འབག་ལ་སོགས་ཀྱིས། །བསྐང་ངོ་ཁྱོད་ཀྱིྎ གསུང་གི་རྟེན་རྫས་ཡིན་པའི་ཕྱིར། །རྔ་དང་ཐོད་རྔ་རྔ་ཆེན་དང་། །འཁར་རྔ་དུང་དང་སིལ་ཆོལ་སོགས། །གདུང་བའི་དབྱངས་ཀྱིསྎ དམ་ཚིག་གཉན་པོ་བསྐུལ་བའི་ཕྱིར། །དམ་ཚིག་དྲིལ་བུསྎ ཕྲིན་ལས་གཉན་པོ་བསྐུལ་བའི་ཕྱིར། །ཅང་ཏེའུ་སྒྲ་ཡིསྎ འཇིག་རྟེན་དབང་དུ་སྡུད་པའི་ཕྱིར། །གསང་བའི་རྔེའུ་ཆུངྎ ཐུགས་དམ་གནད་ནས་བསྐུལ་བའི་ཕྱིར། །ཕྱག་རྒྱ་སྔགས་དང་ཏིང་འཛིན་དང་། །སྙིང་པོ་ཛཔ་྄ཀྱི་བཟླས་པ་ཡིས། །བསྐང་ངོ་ཁྱོད་ཀྱི་ཐུགས་དམ་བསྐང་། །བྷྱོཿ གཞན་ཡང་ཐུགས་དམ་བསྐང་བ་ནི། །ཤ་ཁྲག་དམར་གྱི་གཏོར་མ་འདིས། །འགུགས་བྱེད་མ་དང་གསོད་བྱེད་མ། །ལས་མཁན་རྣམས་ཀྱི་ཐུགས་དམ་བསྐང་། །ཕྲིན་ལས་རྣམ་བཞི་སྒྲུབ་བྱེད་པའི། །མཁའ་འགྲོ་བཞི་ཡིྎ དགྲ་བགེགས་མ་ལུས་སྒྲོལ་བྱེད་པའི། །གདོང་ཅན་བརྒྱད་ཀྱིྎ ཉམས་པའི་ཤ་ཁྲག་ཟ་བྱེད་པའི། །སྒོ་མ་བཞི་ཡིྎ དྲག་པོའི་ལས་ལ་འགྱེད་པའི་ཕྱིར། །ནག་མོ་འབུམ་སྡེའིྎ གཞན་ཡང་སྤྲུལ་པའི་ཕོ་ཉ་ནི། །དཀར་མོ་སེར་མོ་དམར་མོ་དང་། །ལྗང་ནག་ལ་སོགས་འབུམ་སྡེའི་ཚོགས། །བསྐང་ངོ་ཁྱོད་ཀྱིྎ བདུད་ཀྱི་དམག་དཔུང་བཟློག་པའི་ཕྱིར། །ཡང་སྤྲུལ་བྱེ་བའིྎ མཉེས་པའི་རྟེན་རྫས་མ་ཉམས་ཕུད། །ཚོགས་དང་གཏོར་མ་རྒྱ་ཆེན་འདིས། །འདོད་ཁམས་མ་མོ་ཀུན་གྱི་གཙོ། །འཁོར་བཅས་ཐུགས་དམ་སྐོང་གྱུར་ཅིག །དེ་ལྟར་མ་མོ་འཁོར་བཅས་ཀྱི། །ཐུགས་དམ་བསྐང་བའི་བྱིན་རླབས་ཀྱིས། །རིག་འཛིན་རྣལ་འབྱོར་བདག་ཅག་ལ། །མཁའ་འགྲོའི་ཉམས་ཆག་བྱུང་བ་སྐོང་། །འཇིག་རྟེན་མཁའ་འགྲོའི་གནོད་པ་ཟློག །མ་མོའི་ཡམས་ནད་བྱུང་བ་ཟློག །གཤིན་རྗེའི་ཁྲམ་ལ་བཏབ་པ་ཟློག །བདུད་ཀྱི་ཞགས་པ་ནག་པོ་ཆོད། །བནྡྷེའི་བྱད་ཁ་སླར་ལ་སྒྱུར། །སྡེ་བརྒྱད་གནོད་པ་ཐམས་ཅད་ཟློག །གཞན་གྱིས་རྦད་འདྲེ་ཕུར་ཁ་ཟློག །རྨི་ལྟས་མཚན་མ་ངན་པ་སྒྱུར། །ལོ་སྐེག་ཟླ་སྐེག་ཞག་སྐེག་སྒྱུར། །སྡང་བའི་དགྲ་དང་གནོད་པའི་བགེགས། །བདུད་དང་བར་དུ་གཅོད་པའི་ཚོགས། །ཐམས་ཅད་ཐལ་བའི་རྡུལ་དུ་རློག །བདག་ཅག་རྣལ་འབྱོར་འཁོར་བཅས་ཀྱི། །དམ་ཚིག་ཉམས་པ་སྐོང་གྱུར་ཅིག །མཆོག་དང་ཐུན་མོང་ལ་སོགས་པའི། །དངོས་གྲུབ་མ་ལུས་སྩལ་དུ་གསོལ། །ཚེ་དང་དབང་ཕྱུག་སྤེལ་དུ་གསོལ། །དཔལ་དང་གྲགས་པ་བསྒྲུབ་ཏུ་གསོལ། །འཁོར་དང་བསྟན་པ་བསྲུང་དུ་གསོལ། །ལེགས་དང་སྤྲོད་ལ་ཉེས་དང་བསྣོལ། །བསམ་པ་སྒྲུབ་ལ་རེ་བ་སྐོངས། །མཐུ་སྟོབས་སྐྱེད་ལ་དཔུང་གཉེན་མཛོད། །ལུས་དང་གྲིབ་མ་བཞིན་དུ་འགྲོགས། །ཉིན་དང་མཚན་མོ་བྱ་ར་མཛོད། །གཞན་ཡང་ཡིད་ལ་གང་འདོད་པ། །དེ་ནི་ཁྱོད་ཀྱིས་སྒྲུབ་པར་མཛོད།། ཅེས་བརྗོད་ནས་བཤགས་པ་བྱ་བ་ནི། ཧཱུྃ། འགྲོ་བའི་དོན་དུ་སྐུ་མཆོག་འཇིགས་པ་ལས། །འཇིག་རྟེན་མ་ལུས་ཁྱབ་པར་གསལ་མཛད་ཅིང་། །ང་རྒྱལ་དྲེགས་པ་ཅན་རྣམས་འཇོམས་མཛད་པའི། །ཡོན་ཏན་རྫོགས་པའི་སྐུ་ལ་ཕྱག་འཚལ་ལོ། །འདའ་དཀའ་རྡོ་རྗེའི་དམ་ཚིག་གཉེར་གཏད་པས། །སྲུང་བར་དམ་བཅས་སྐུ་ཡི་དམ་ཚིག་ལ། །སྐུ་ཡི་སྤྱོད་པ་ཚུལ་བཞིན་མ་རྟོགས་ཏེ། །ཁམས་གསུམ་མ་ལུས་ཁྱབ་ལ་བཟོད་པར་གསོལ། །རྣལ་འབྱོར་གདུང་གསོབ་བདག་ཅག་འདིར་འདུས་རྣམས། །སྤྱི་དང་ཁྱད་པར་དམ་ཚིག་མི་སྟོང་ཡང་། །ཀློང་དུ་གྱུར་པའི་གོམས་ཤེས་རྩལ་ཆུང་བ། །མ་གཅིག་ལྷ་མོའི་སྐུ་ལ་བཟོད་པར་གསོལ། །ཐུགས་རྗེས་ངེས་པར་གཟིགས་པའི་ལྷ་མོ་ལ། །དམ་རྫས་གཙང་མའི་མཆོད་པ་མ་བཤམས་ཏེ། །ཕོངས་སེམས་དབང་གིས་མཆོད་པ་རྒྱུ་ཆུང་བ། །རྫོང་མོ་དཀའ་ཟློག་སྐུ་ལྎ མ་གཅིག་སྐུ་མདོག་ཕྱག་མཚན་ཕྱག་རྒྱ་ལས། །དོན་དང་མཐུན་པ་ཚུལ་བཞིན་མ་བྲིས་ཏེ། །འཕགས་མའི་ཐུགས་རྗེ་གཡེལ་བར་གྱུར་པ་རྣམས། །བདུད་ལས་རྒྱལ་བའི་སྐུ་ལྎ བུ་ཡི་ཚུལ་གྱིས་རྒྱུ་ཡི་དམ་ཚིག་ལ། །ལེ་ལོ་གཉིད་དབང་གཡེང་བྲེལ་གཏམ་ལ་སོགས། །ཐུགས་དང་འགལ་བར་གྱུར་པ་ཅི་མཆིས་པ། །ཐུགས་རྗེས་ཚངས་པར་རབ་ཏུ་བཤགས་སུ་གསོལ།། ཞེས་དངོས་གྲུབ་འབྱུང་བའི་རྒྱུད་ལས་གསུངས་སོ། །གཞན་ཡང་། བྷྱོཿ ཐོད་པ་དགུ་བརྩེགས་སྲིད་པའི་གཞལ་ཡས་ནས། །དཔལ་ལྡན་ལྷ་མོ་གསན་ཅིང་དགོངས་སུ་གསོལ། །རང་ལ་རིག་པའི་ཡེ་ཤེས་རྒྱུན་ལྡན་ཡང་། །འཕྲལ་བྱུང་རྣམ་རྟོག་ཤིན་ཏུ་དབང་ཆེ་བས། །ལོག་རྟོག་མཚན་མ་གཉིས་ཀྱི་དབང་གྱུར་ནས། །ཏིང་འཛིན་ཡི་དམ་རྩེ་གཅིག་མི་གསལ་ཞིང་། །དཔལ་ལྡན་ལྷ་མོའི་བཀའ་ལས་འདས་གྱུར་པ། །བཟོད་པར་གསོལ་ལོ་ཚངས་པར་སྩལ་དུ་གསོལ། །འབད་པ་རྩལ་ཆུང་བཟླས་བརྗོད་བསྙེན་པ་ཆག །མན་ངག་གཞུང་དང་འགལ་བ་བཟོད་པར་གསོལ། །འཆལ་ལ་གཡེང་བས་གསང་བའི་ཚིག་མ་ཐུབ། །ཟབ་མོའི་དོན་དང་འགལ་བྎ ཐལ་མོ་རྔ་གླིང་དུས་སུ་མ་ཚོགས་ཏེ། །བརྡ་ཡི་མཆོད་པ་ཆག་པྎ བདུད་ཡུམ་ཡེ་ནས་གནག་པའི་ཚུལ་སྟོན་ཀྱང་། །བློ་ཞན་དོན་མ་རྟོགས་པྎ སྦྱོར་བ་ཡེ་ནས་ལྷ་མོའི་ཆོས་སྤྱོད་ཀྱང་། །སྦྱོར་བའི་མཆོད་པ་ཆག་པྎ བོང་བུ་ཡེ་ནས་ལྷ་མོའི་ཆིབས་ཡིན་ཀྱང་། །མ་བརྟེན་བརྡེག་པར་གྱུར་པྎ གཤིན་རྗེ་ཡེ་ནས་ལྷ་མོའི་ཁྱོ་ཡིན་ཀྱང་། །ངན་སེམས་སྤང་སེམས་སྐྱེས་པྎ རླུང་ནག་ཡེ་ནས་ལྷ་མོའི་སྤྲུལ་ཡིན་ཀྱང་། །ངན་པའི་སེམས་ཀྱིས་སྨད་པྎ ལེ་ལོ་སྙོམས་ལས་དབང་གྱུརྎ མཆོད་པ་ལོ་ཟླར་འདས་པྎ ཞག་ནས་ཞག་ཏུ་ཆག་པྎ ཉ་ཤི་དུས་དྲུག་ཆག་པྎ སྔོན་ནས་རང་གི་བག་ཆགས་མ་སྦྱངས་པས། །དམ་རྫས་བརཏལ་ཞུགས་ཆུང་བྎ སྔོན་ནས་སེར་སྣའི་དབང་དུ་གྱུར་ལགས་པས། །ཚོགས་ལ་གཡོ་སྒྱུ་བྱས་པ་བཟོད་པརྎ སྔོན་ནས་ཤིན་ཏུ་གསང་དབང་མ་ཐོབ་པས། །འདོད་ཆགས་ཆོས་ལ་སྤྱད་པྎ བརཏལ་ཞུགས་ལྟ་བ་ཟབ་མོ་མ་རྟོགས་པས། །རྣམ་སྨིན་མཐོང་ནས་མ་བསྒྲལྎ ཏིང་འཛིན་ལྟ་བ་ཀློང་དུ་མ་གྱུར་པས། །ཕུད་དང་ལྷག་མ་མ་ཕྱེདྎ ཞེ་སྡང་དབང་ལ་ང་རྒྱལ་འདྲེས་གྱུར་པས། །རྡོ་རྗེ་ནང་དམེ་བྱས་པྎ ང་རྒྱལ་དབང་ལ་ཕྲག་དོག་འདྲེས་གྱུར་པས། །སློབ་དཔོན་སྐུ་ལ་བརྡོས་པྎ སྔོན་ནས་རང་སེམས་ལྟ་བ་དཔངས་དམས་པས། །རྣལ་འབྱོར་ཉེ་ཕྱོགས་བྱས་པྎ ལྟ་སྤྱོད་ཟབ་མོའི་མན་ངག་མ་རྟོགས་པས། །བློ་ལ་ཁུ་འཕྲིག་ཞུགས་པྎ ལྟ་བ་དྲོད་ཀྱི་མན་ངག་མ་རྟོགས་པས། །ཉམས་ཀྱི་དྲོད་མ་སྐྱེས་པ་བཟོད་པར་གསོལ། །ཨོཾ། ཡེ་ཤེས་ལྷ་དང་ལྷ་མོ་མི་ཕམ་བདག །དང་པོ་སྒྲུབ་དང་བསྒྲུབ་པར་བྱས་ནས་ནི། །མཐུན་པའི་དམ་རྫས་གཞུང་བཞིན་མ་ཚོགས་པས། །དཔལ་ལྡན་ལྷ་མོའི་ཐུགས་དང་འགལ་གྱུར་པས། །བཀའ་ཡི་ཆད་པའི་གནས་སུ་གྱུར་ལགས་ན། །ཡེ་ཤེས་ཐུགས་རྗེ་ཅན་ལ་བཟོད་པར་གསོལ། །ཐུགས་དང་འགལ་བར་གྱུར་པ་མཐོལ་ལོ་བཤགས། །དམ་ཚིག་ཉམས་པར་གྱུར་པ་སྐོང་གྱུར་ཅིག། དེ་ལྟར་བཤགས་ནས་ཚོགས་མཆོད་ཕུལ། །ལོངས་སྤྱོད་པའི་ལྷག་མ་རྣམས་ཁ་ཆུས་བྲན་ལ་འབྱུང་པོ་ལ་སྟེར་རོ། །དེ་ནས་ལས་ཀྱི་གཉེར་གཏད་པ་ནི། ལྷ་མོ་འཁོར་དང་བཅས་པ་ལ་རྩེ་གཅིག་པའི་མིག་དང་ཡིད་ཀྱིས་བསྙེན་ཅིང་ལྟ་བས་ཐལ་མོ་སྦྱར་ལ་སྨྲེང་གསོལ་བ་འདི་སྐད་དུ་བརྗོད་ད།ོ། བྷྱོཿ མཁའ་འགྲོ་ནག་མོ་དུད་པའི་སོལ་བ་མ། མ་ལྟར་མཉེན་གཤིན། རྒྱ་མཚོ་ལྟར་དཀྱེལ་ཆེ། རི་བོ་ལྟར་ལྷུན་ཆགས། ཉི་ཟླ་ལྟར་འོད་གསལ། ནོར་བུ་ལྟར་རེ་བ་སྐོང་བ། ཅི་བགྱིའི་དབང་ཕྱུག་མ་འཁོར་དང་བཅས་པ་ལ་རྣལ་འབྱོར་པ་བདག་གིས་གཏད་གཉེར་དུ་བྱ་བའི་འོས། དངོས་གྲུབ་རྣམ་པ་གཉིས། བཀའ་དང་བསྟན་པ། ཆོས་དང་དམ་ཚིག །ཚེ་དང་བསོད་ནམས། ནད་མེད་པ་དང་བདེ་བ་དམ་པ། བསྐུལ་ཞིང་བཅོལ་བའི་ལས། སློབ་མ་དང་འཁོར། སྦྱིན་པོ་དང་འབངས། དཀོར་དང་ལོངས་སྤྱོད། མངའ་རིས་དང་དབང་ཕྱུག །སྡེ་དང་སྲིད། མཆོད་རྟེན་དང་གཙུག་ལག་ཁང་། དགོན་གནས་དང་ཡུལ་འཁོར་དུ་བཅས་པ་ཐམས་ཅད་གཏད་ཀྱིས། མཐུན་ཞིང་དགྱེས་པའི་རྟེན་རྫས་དམ་ཚིག་གི་གཟུགས་སུ་གྱུར་པ་འདི་རྣམས་ལ་བརྟན་པར་བཞུགས་ཏེ། གནས་ལུས་ལོངས་སྤྱོད་མཐུ་སྟོབས་རྫུ་འཕྲུལ་བསམ་གྱིས་མི་ཁྱབ་པར་གྱུར་པ། ལས་བཅོལ་ཞིང་གཏད་པ་འདི་མཐའ་དག་གི་གཉེར་ཁ་གྱིས་ལ། མི་མཐུན་པའི་ཕྱོགས་མཐའ་དག་ལས་སྲུངས། མཐུན་རྐྱེན་ཐམས་ཅད་སྒྲུབས། གོང་ནས་གོང་དུ་སྤེལ། སྙིང་ལ་གཅེས་པ་དང་ཡིད་ལ་བརྣག་པ་མ་དོར་བར་བྱང་ཆུབ་ཀྱི་བར་དུ་བརྟན་པར་སྐྱོངས་ལ་ཡིད་བཞིན་དུ་འདོད་པ་འཇོ་བར་བྱོས་ཤིག ཅེས་གཏད་གཉེར་རྩེ་གཅིག་ཏུ་བྱའོ། །སྐབས་འགའ་ཞིག་ཏུ་དྲག་པོའི་གཏོར་མ་འཕང་བར་འདོད་ན་འོག་ནས་བཤད་པ་བཞིན་འདིར་བྱའོ། །རྗེས་ཀྱི་བྱ་བ་ནི། རྣམ་ལྔ་ལ་སོགས་པས་མཆོད་ལ་འདིས་བསྟོད་པ་བྱ་སྟེ། བྷྱོཿ ལྷ་མོ་ནག་མོ་མཐུ་མོ་ཆེ། །འཕགས་མ་ཁྱོད་ལ་ཕྱག་འཚལ་ལོ། །འཇིག་རྟེན་འདི་ན་མཐུ་རྩལ་ཆེ། །བདག་གིས་གུས་ཤིང་བསྟོད་ལགས་ན། །བཀྲ་ཤིས་མཆོག་གྲུབ་གཏེར་གནས་མ། །ཡིད་མྱུར་རྫུ་འཕྲུལ་མཐུ་སྟོབས་ཅན། །མ་མོར་བྱེད་ཅིང་འཇིག་རྟེན་སྐྱོང་། །དཔའ་བརྟན་རྟགས་སྤྱོད་བརྩོན་འགྲུས་ཆེ། །འཐབ་མོའི་གཡུལ་ལས་ཤིན་ཏུ་རྒྱལ། །གཤིན་རྗེའི་སྲིང་མོ་ཡིན་པའི་རྟགས། །གོས་སུ་ཞིང་ཆེན་རེ་ལྡེ་གསོལ། །སྤྱན་རྩ་དམར་ལ་སྡང་མིག་ཅན། །སྤྱན་རྩ་མཐོང་ན་ཀུན་ཀྱང་འདར། །དད་ཅིང་ཕྱོགས་རྣམས་ཀུན་སྡུད་ཅིང་། །དྲང་སྲོང་བདེན་པའི་ཚིག་གིས་ནི། །ལྷ་མོ་ཁྱོད་ལ་བདག་གིས་བསྟོད། །རྨ་བྱའི་སྒྲོས་ནི་རྒྱན་ཆ་བྱས། །རྟག་ཏུ་འཇིག་རྟེན་སྡུད་པར་བྱེད། །སེངྒེ་སྟག་དང་སྤྱང་ཀི་དང་། །དོམ་དྲེད་ཝ་སྤྱང་འཕར་བ་སོགས། །རྟག་ཏུ་ཀུན་གྱིས་བསྐོར་བར་བྱེད། །རྡོ་རྗེ་དྲིལ་ཆེན་དཀྲོལ་བར་བྱེད། །ཁྱོད་ལ་བསྟོད་དེ་ཕྱག་འཚལ་བསྟོད།། ཅེས་རྒྱུད་ལས་གསུངས་སོ། །དེ་ནས། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་ལྷ་མོས་བཟོད་པར་གསོལ། །བཛྭ་ལཱ་ཀྵྼ་རཱ་ག་ཡ་མི་ཧཱུྃ། ཞེས་མེ་ཏོག་དང་བཅས་པས་དམ་ཚིག་གི་ལྷ་མོ་དང་ཡེ་ཤེས་ཀྱི་ལྷ་མོ་འཁོར་བཅས་རྟེན་རྫས་དང་སྐུ་གཟུགས་སམ་རང་གི་སྙིང་ཀར་བསྡུ་བའམ། བཛྭ་མུཿ ཞེས་སེ་གོལ་དང་བཅས་པས་སྒྲུབ་པ་པོ་ཁྱོད་ཀྱིས་ཇི་ལྟར་བསྒོ་བ་བཞིན་བྱའོ་ཞེས་ཁས་བླངས་ཏེ་འཁོར་དང་བཅས་པ་ཤྭ་དིར་གྱིས་གྱེས་པར་བསམ་མོ། །མཆོད་གཏོར་དང་བསྐང་གཏོར་ས་གཙང་མར་མཚན་མོ་ཡིན་ན་ཏལ་འབར་བཙུགས་ཏེ་དུར་ཁྲོད་བདག་མོས་གཤེགས་པར་བྱའོ། །དེ་ནས་སྨོན་ལམ་གདབ་པ་ནི། སེམས་ཅན་ཐམས་ཅད་ནད་མེད་ཅིང་། །སེམས་ཅན་ཐམས་ཅད་བདེ་གྱུར་ཅིག །གང་གི་ལམ་གནས་གྲོལ་བ་ཡི། །སངས་རྒྱས་ཉིད་དང་ཕྲད་པར་ཤོག །མ་བསྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་དགྲོལ་བ་དང་། །ད་ལྟ་ཉིད་དུ་རྗེས་སྩོལ་བའི། །ལམ་དེ་ཉིད་ལ་གནས་པར་ཤོག། ཅེས་པ་གདན་བཞིའི་རྒྱུད་ལས་གསུངས་སོ། །དེ་ནས་བསྔོ་བ་བྱ་བ་སྟེ། བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་ཀྱང་སྟོན་བྱེད་ཅིང་། །སེམས་ཅན་སྡུག་བསྔལ་ཚོགས་ཀྱིས་གཟིར་ལས་སྒྲོལ།། ཞེས་པའོ། །བཀྲ་ཤིས་བྱ་བ་ནི། རྡོ་རྗེ་འཆང་ཆེན་ཏིལླི་ནཱ་རོ་དང་། །མར་པ་ཆོས་རྡོར་མདོ་སྡེ་ཀུན་དགའ་དང་། །གཟི་བརྗིད་གྲགས་པ་རིན་བཟང་ཆོས་ཀྱི་མཚན། །དོན་གྲུབ་བྱང་ཆུབ་རིན་ཆེན་དཔལ་བཟང་སོགས། །བརྒྱུད་པའི་བླ་མ་རྣམས་ཀྱི་བཀྲ་ཤིས་ཤོག །ཟབ་མོ་རྒྱུད་ཀྱི་སྲུང་མ་མ་མོ་ནི། །ཞལ་གཅིག་ཕྱག་བཞི་ཕྲིན་ལས་རྣམ་བཞི་སྒྲུབ། །རྫུ་འཕྲུལ་མཐུ་ལྡན་དགྲ་བགེགས་ཚར་གཅོད་པའི། །ཁྲག་འཐུང་དུད་སོལ་ལྷ་མོའི་བཀྲ་ཤིས་ཤོག །དེ་ཡི་སྐུ་གསུང་ཐུགས་སྤྲུལ་ཕོ་ཉ་ནི། །འགུགས་བྱེད་གསོད་བྱེད་གསུམ་དང་མཁའ་འགྲོ་བཞི། །གདོང་ཅན་བརྒྱད་དང་སྒོ་མ་བཞི་ལ་སོགས། །ལས་བྱེད་མཁའ་འགྲོ་རྣམས་ཀྱི་བཀྲ་ཤིས་ཤོག། ཅེས་སྐབས་དང་བསྟུན་པའི་ཤིས་པ་བརྗོད་པ་ཅི་རིགས་པར་བྱའོ། །དེ་ལྟར་བསྙེན་པ་བྱས་ནས། གཉིས་པ་སྒྲུབ་པ། གསུམ་པ་ལས་སྦྱོར་རྣམས་བླ་མའི་མན་ངག་ལས་ཤེས་པར་བྱ་ལ། འདིར་ལས་སྦྱོར་ལས་དྲག་པོའི་གཏོར་མ་འཕང་བར་བཤད་པ་ནི། ལྕགས་ལ་སོགས་པའི་སྣོད་དུ་བཤོས་བུ་ཟུར་གསུམ་འཁོར་གསུམ་གྱིས་བསྐོར་བ་བསད་པའི་ཤ་དང་ཁྲག་དང་སྙིང་གིས་བརྒྱན་པ་ནད་དང་མཚོན་ཆར་བྱིན་གྱིས་བརླབས་ཏེ་སྲུང་མ་བསྐུལ་བ་ནི། བྷྱོཿ མ་གཡེལ་མ་གཡེལ་དམ་ཅན་ཚོགས། །བོས་པའི་དུས་ན་སྙན་མ་སྲ། །གཡབ་པའི་དུས་ན་རྒྱང་མ་རིང་། །བསྒྲུབ་པའི་དུས་ན་གོང་མ་གཡེལ། །རྦད་པའི་ཚེ་ན་མཐུ་མ་ཆུང་། །ཤ་ཁྲག་གཟན་དུ་བོར་ནས་ཁྱོད་བསྒྲུབ་བོ། །ལུས་སྲོག་འབེན་དུ་བཙུགས་ནས་ཁྱོད་བསྒྲུབ་བོ། །དམ་རྫས་རྟེན་དུ་བཙུགས་ནས་ཁྱོད་བསྒྲུབ་བོ། །ཕུག་པ་ཞྭ་ལྟར་གྱོན་ནས་ཁྱོད་བསྒྲུབ་བོ། །རྣལ་འབྱོར་བདག་ནི་གཙང་ཤས་ཉ་བཞིན་མྱུལ། །དམ་ཉམས་དགྲ་ནི་གངས་ཁོངས་སེང་ལྟར་རྒྱུ། །ས་སྟེང་འདི་ན་བདག་ལ་མགོན་མེད་པས། །མ་གཅིག་དམ་ཅན་ཐུགས་རྗེས་མི་དགོངས་སམ། །འཁོར་གྱི་ཚོགས་ལ་བཀའ་ནན་མི་མཛད་དམ། །དམ་ཉམས་དགྲ་ལ་ཕྲིན་ལས་མི་མཛད་དམ། །ལྷ་མོ་མི་ཕམ་ཡི་དམ་སྲོག་གི་ལྷ། །རྣལ་འབྱོར་ཀུན་གྱི་དགྲ་ལྷ་མོ། །ནག་མོ་ཆེན་མོ་ཆར་སྤྲིན་མདོག །དཔལ་ལྡན་ལྷ་མོ་ཐུགས་དམ་ཅན། །རྡོ་རྗེ་ལྕམ་གཅིག་ལས་མཁན་མ། །སྲོག་གཅོད་ནད་གཏོང་བོང་བུ་ཞོན། །རྣལ་འབྱོར་བདག་གི་སྟོང་གྲོགས་མཛོད། །དམ་ཉམས་ཀུན་གྱི་བདུད་གཅོད་མ། །དམ་ཚིག་ཅན་གྱི་ཚེ་འཛིན་མ། །ལེགས་ཉེས་ཀུན་གྱི་སྟངས་གཅོད་མ། །འཁོར་རྣམས་ཕོ་ཉར་ད་ཐོངས་ལ། །བསྟན་པ་འཇིག་པའི་དམ་ཉམས་ཀྱི། །བདུན་རྒྱུད་རྩད་ནས་ཆོད་ལ་ཤོག །ལོ་དང་ཟླ་བར་མ་བཞག་པར། །ཞག་དང་ཟ་མ་ཉིད་དུ་སྒྲོལ། །རྒྱན་གྱི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །བྷྱོཿ སངས་རྒྱས་ཤཱཀྱ་ཐུབ་པའི་སྤྱན་སྔ་རུ། །ཁྱོད་ཀྱིས་དེང་ནས་འཁོར་བ་ཇི་སྲིད་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་ཀུན། །ཞི་བར་བྱ་ཕྱིར་ཚེ་དང་བསོད་ནམས་སྤེལ། །ནག་པོའི་ཕྱོགས་ནི་འགུགས་འཆིང་དབང་དུ་སྡུད། །སྨྱོ་འབོག་བསད་ལ་སོགས་པའི་ལས་འདི་དག །བསྟན་པ་བསྲུང་ཕྱིར་ལས་འདི་བསྒྲུབ་པར་བགྱི། །འདི་ལས་འདས་ན་རྒྱལ་བའི་བཀའ་བསླུས་པས། །དུས་གསུམ་རྒྱལ་བའི་རྡོ་རྗེས་མགོ་འགེམས་ཤོག །དེ་སྐད་རྒྱལ་བའི་སྤྱན་སྔར་ཁས་བླངས་ཤིང་། །དམ་བཅས་བཞིན་དུ་ཕྲིན་ལས་སྒྲུབ་པར་མཛོད། །རྣལ་འབྱོར་བདག་དང་བདག་གི་འཁོར་བཅས་ལ། །ཞལ་ནས་བདུད་རྩིའི་ཆར་གྱི་རྒྱུན་ཕོབ་ལ། །ནད་སོགས་སྡུག་བསྔལ་ཚོགས་རྣམས་ཞི་བར་མཛོད། །ཚེ་དང་དབང་ཐང་ལོངས་སྤྱོད་རྒྱས་པར་མཛོད། །ཟང་ཟིང་ལོ་ཏོག་འབྲུ་ཡི་ཕུང་པོ་དང་། །རིན་ཆེན་རྐང་འགྲོ་ཕྱུགས་རྣམས་འཕེལ་བར་མཛོད། །ད་ཡང་ཁྱོད་ལ་ཕྲིན་ལས་བཅོལ་བ་ནི། །བླ་མ་ལ་སྨོད་དཀོན་མཆོག་དབུ་འཕང་སྨད། །བདག་གི་དགེ་བའི་བར་ཆད་བྱེད་པའི་དགྲ། །དམ་ཉམས་དགྲ་བོ་ཞེས་བྱ་བའི་ལས་ངན་འདི། །ཁྱོད་ཀྱི་ཤངས་ནས་དུག་གི་རླུང་བུས་ལ། །འདུ་བ་རྣམ་བཞིའི་ནད་རྣམས་ཁོངས་ནས་སློང་། །པགས་བཞི་ས་ལ་ལྷུང་ནས་རྡེབ་ཏུ་ཆུག །དོན་སྙིང་རྣམ་ལྔའི་ཁོང་ཁྲག་སྐྱུག་ཏུ་ཆུག །ལས་ངན་འཁོར་བཅས་བྲང་ཆེན་རྡུང་དུ་ཆུག །སྨྲེ་སྔགས་ཆོ་ངེས་གནམ་དུ་འབོད་དུ་ཆུག །འཆི་བའི་དུས་མཐར་སྨྱོ་འབོག་ནད་ལ་སོགས། །གཅན་གཟན་མཁའ་ལྡིང་ལ་སོགས་ལྟས་ངན་ཕོབ། །བསྟན་པ་སྲུང་བའི་ལས་རྣམས་སྒྲུབ་པར་མཛོད།། དེ་ནས་གཏོར་མ་དགྲ་ཕྱོགས་སུ་འཕངས་བས་དགྲ་བོ་འཁོར་བཅས་བརླག་པར་འགྱུར་རོ། །འདིར་དྲག་པོའི་གཏོར་མ་ནི་སྒྲུབ་པ་དང་མ་འབྲེལ་བར་འཕངས་བས་ཀྱང་རུང་བའི་ཕྱིར་བསྟན་པ་ཡིན་གྱི། གཞན་ལས་སྦྱོར་རྣམས་རྗེ་གོང་མ་རྣམས་ཀྱི་ཕྱག་བཞེས་ལས་འབྱུང་བ་བཞིན་ལས་འདིར་རྒྱས་པར་མ་བཤད། འདིར་ཡང་གོང་དུ་མི་སྟོན་པ་ལས་སྦྱོར་གྱི་ཆ་ལག་ཡིན་པས་སྐབས་འདིར་བཤད་པ་ཡིན་ནོ། །ཞེས་དཔལ་ལྡན་ལྷ་མོའི་ཆོ་ག་ཕྲིན་ལས་ཀྱི་འདོད་པ་འཇོ་བར་བྱེད་པ་འདི་ཉིད། ལྷོ་ཕྱོགས་ནོར་འཛིན་གྱི་སྐྱེ་བོ་མ་ལུས་པ་བདེ་བར་སྐྱོང་ཞིང་། ལུགས་གཉིས་ཅིག་ཅར་གྱི་གཟིགས་པ་མི་དམན་པ་མིའི་དབང་པོ་མཚོ་སྐྱེས་རྡོ་རྗེས་བསྐུལ་བའི་ངོར། སྐྱེ་བ་ནས་སྐྱེ་བར་ཡེ་ཤེས་ཀྱི་ལྷ་མོས་རྗེས་སུ་བཟུང་བ། ཤཱཀྱའི་དགེ་སློང་མི་ཕམ་པདྨ་དཀར་པོ་ཕྱོགས་ལས་རྣམ་པར་རྒྱལ་བའི་སྡེའམ། མིང་གཞན་མིའི་མཆོག་གིས། རྒྱ་གཞུང་གཉིས་གཞིར་བྱས། རྗེ་མར་རྔོག་ཡབ་སྲས་ཀྱི་བཞེད་པས་ཁ་བཀང་སྟེ། རྒྱལ་སྲིད་ཆོས་བཞིན་དུ་སྐྱོང་བའི་མདུན་ས་ལ་ཉེ་བར་འཁོད་པ་པོ་ཊ་ལར། ཁྲོ་མོ་ཞེས་པ་ཤིང་ཕོ་འབྲུག་གི་ལོ། ཧོར་གྱི་ཟླ་བ་བདུན་པའི་ཡར་ཚེས་བཟང་པོ་ལ་སྦྱར་བའི་ཡི་གེ་པ་ནི་བླ་མ་རྒྱ་མཚོའོ། །དགེ་ལེགས་འོད་སྟོང་འཕྲོ་བ་ཇི་སྙེད་དེས། །ཐུབ་བསྟན་འདབ་སྟོང་ཚོགས་རྣམས་རྒོད་པ་དང་། །བདུད་བགེགས་མུན་པའི་སྨག་རུམ་མཐར་བརླག་ནས། །རིས་མེད་བསྟན་པའི་རྩ་ལག་ཉིད་གྱུར་ཅིག །སརྦ་མངྒ་ལཾ།། ༈ འདིའི་བརྒྱུད་པ་ནི། རྡོ་རྗེ་འཆང་ཆེན་དུད་སོལ་བིརྦ་པ། །ཙརྻ་རྣམ་རྒྱལ་ཞབས་དང་ཏིལླི་པ། །ཤྲཱི་ཛྙྱཱ་ན་སིདྡྷི་མར་པའི་ཞབས། །རྔོག་སྟོན་ཆོས་རྡོར་མདོ་སྡེ་ཀུན་དགའ་དང་། །གཟི་བརྗིད་གྲགས་པ་རིན་ཆེན་བཟང་པོ་དང་། །ཆོས་ཀྱི་རྒྱལ་མཚན་དོན་གྲུབ་དཔལ་བ་དང་། །རྡོ་རྗེ་འཆང་དངོས་བྱང་ཆུབ་དཔལ་བའི་ཞབས། །རྒྱལ་བའི་དབང་པོ་རིན་ཆེན་དཔལ་བཟང་གཉིས། །དགེ་སློང་རིན་རྣམ་བྱང་ཆུབ་དཔལ་གྲུབ་གཉིས། །ཆོས་ཀྱི་གྲགས་པ་དྲུང་གནས་ནམ་ལྷུན་པ། །མཐུ་སྟོབས་ལྡན་པ་ཡོན་ཏན་ཡེ་ཤེས་དང་། །རྒྱལ་དབང་པད་དཀར་བསྟན་པའི་ཉི་མ་དང་། །རྔོག་འབྲུག་བསྟན་འཛིན་ངོ་མཚར་རྡོ་རྗེའི་མཚན། །སྙིགས་དུས་འགྲོ་སྐྱོང་གདུང་འཛིན་སྤྲུལ་པའི་སྐུ། །བསྟན་སྲུང་མོ་རྒྱུད་གཙོ་མོ་དུད་སོལ་མའི། །དབང་བརྒྱུད་མན་ངག་ཀུན་འདུས་བླ་མར་འདུད། །ཅི་བསམ་དངོས་གྲུབ་བསྟན་སྲུང་ཕྲིན་ལས་ཀུན། །མཆོག་དང་ཐུན་མོང་ཚེ་འདིར་འབད་མེད་སྩོལ།། །།ཤུ་བྷམསྟུ་སརྦ་ཛ་ག་ཏཱཾ།། །། དཔལ་ལྡན་ལྷ་མོའི་དྲག་པོའི་འཕྲིན་ལས་བསྐུལ་བ།དཔལ་ལྡན་ལྷ་མོའི་དྲག་པོའི་འཕྲིན་ལས་བསྐུལ་བ་བཞུགས་སོ། །འདིར་དཔལ་ལྷ་མོའི་ལས་སྦྱོར་ལས་དྲག་པོའི་གཏོར་མ་འཕང་བར་བཤད་པ་ནི། ལྕགས་ལ་སོགས་པའི་སྣོད་དུ་བཤོས་བུ་ཟུར་གསུམ་འཁོར་གསུམ་གྱིས་བསྐོར་བ་བསད་པའི་ཤ་དང་ཁྲག་དང་སྙིང་གིས་བརྒྱན་པ་ནད་དང་མཚོན་ཆར་བྱིན་གྱིས་བརླབས་ཏེ་སྲུང་མ་བསྐུལ་བ་ནི། བྷྱོཿམ་གཡེལ་མ་གཡེལ་དམ་ཅན་ཚོགས། །བོས་པའི་དུས་ན་སྙན་མ་སྲ། །གཡབས་པའི་དུས་ན་རྒྱང་མ་རིང་། །བསྒྲུབ་པའི་དུས་ན་གོང་མ་གཡེལ། །རྦད་པའི་ཚེ་ན་མཐུ་མ་ཆུང་། །ཤ་ཁྲག་གཟན་དུ་བོར་ནས་ཁྱོད་སྒྲུབས་སོ། །ལུས་སྲོག་འབེན་དུ་བཙུགས་ནས་ཁྱོད་སྒྲུབས་སོ། །དམ་རྫས་རྟེན་དུ་བཙུགས་ནས་ཁྱོད་སྒྲུབས་སོ། །ཕུག་པ་ཞྭ་ལྟར་གྱོན་ནས་ཁྱོད་སྒྲུབས་སོ། །རྣལ་འབྱོར་པ་ནི་གཙང་ཤས་ཉ་བཞིན་མྱུལ། །དམ་ཉམས་དགྲ་ནི་གངས་ཁོང་སེང་ལྟར་རྒྱུ། །ས་སྟེང་འདི་ན་བདག་ལ་མགོན་མེད་པས། །མ་ཅིག་དམ་ཅན་ཐུགས་རྗེས་མི་དགོངས་སམ། །འཁོར་གྱི་ཚོགས་ལ་བཀའ་ནན་མི་མཛད་དམ། །དམ་ཉམས་དགྲ་ལ་འཕྲིན་ལས་མི་མཛད་དམ། །ལྷ་མོ་མི་ཕམ་ཡི་དམ་སྲོག་གི་ལྷ། །རྣལ་འབྱོར་ཀུན་གྱི་དགྲ་ལྷ་མོ། །ནག་མོ་ཆེན་མོ་ཆར་སྤྲིན་མདོག །དཔལ་ལྡན་ལྷ་མོ་ཐུགས་དམ་ཅན། །རྡོ་རྗེ་ལྕམ་ཅིག་ལས་མཁན་མ། །སྲོག་གཅོད་ནད་གཏོང་བོང་བུ་བཞོན། །རྣལ་འབྱོར་བདག་གི་སྟོངས་གྲོགས་མཛོད། །དམ་ཉམས་ཀུན་གྱི་བདུད་གཅོད་མ། །༼༢ན༣༽དམ་ཚིག་ཅན་གྱི་ཚེ་འཛིན་མ། །ལེགས་ཉེས་ཀུན་གྱི་སྟངས་གཅོད་མ། །འཁོར་རྣམས་ཕོ་ཉར་ད་ཐོང་ལ། །བསྟན་པ་འཇིག་པའི་དམ་ཉམས་ཀྱི། །བདུན་རྒྱུད་རྩད་ནས་ཆོད་ལ་ཤོག །ལོ་དང་ཟླ་བར་མ་བཞག་པར། །ཞག་དང་ཟ་མ་ཉིད་དུ་སྒྲོལ། །རྒྱན་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་སྒྲུབ་པར་མཛོད། །བྷྱོཿསངས་རྒྱས་ཤཱཀྱ་ཐུབ་པའི་སྤྱན་སྔ་རུ། །ཁྱོད་ཀྱིས་དེང་ནས་འཁོར་བ་ཇི་སྲིད་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་ཀུན། །ཞི་བར་བྱ་ཕྱིར་ཚེ་དང་བསོད་ནམས་སྤེལ། །ནག་པོའི་ཕྱོགས་ནི་དགུག་ཅིང་དབང་དུ་བསྡུས། །སྨྱོ་འབོག་བསད་ལ་སོགས་པའི་ལས་འདི་དག །བསྟན་པ་བསྲུང་ཕྱིར་ལས་འདི་བསྒྲུབ་པར་བགྱིས། །འདི་ལས་འདས་ན་རྒྱལ་བའི་བཀའ་བསླུས་པས། །དུས་གསུམ་རྒྱལ་བའི་རྡོ་རྗེས་མགོ་འགེམས་ཤོག །དེ་སྐད་རྒྱལ་བའི་སྤྱན་སྔར་ཁས་བླངས་ཤིང་། །དམ་བཅས་བཞིན་དུ་འཕྲིན་ལས་བསྒྲུབ་པར་མཛོད། །རྣལ་འབྱོར་བདག་དང་བདག་གི་འཁོར་བཅས་ལ། །ཞལ་ནས་བདུད་རྩིའི་ཆར་བའི་རྒྱུན་ཕོབ་ལ། །ནད་སོགས་སྡུག་བསྔལ་ཚོགས་རྣམས་ཞི་བར་མཛོད། །ཚེ་དང་དབང་ཐང་ལོངས་སྤྱོད་རྒྱས་པར་མཛོད། །ཟང་ཟིང་ལོ་ཏོག་འབྲུ་ཡི་ཕུང་པོ་དང་། །རིན་ཆེན་རྐང་འགྲོ་ཕྱུགས་རྣམས་འཕེལ་བར་མཛོད། །༼༢བ༤༽གཞན་ཡང་ཁྱོད་ལ་འཕྲིན་ལས་བཅོལ་བ་ནི། །བླ་མ་ལ་སྨོད་དཀོན་མཆོག་དབུ་འཕང་སྨོད། །བདག་གི་དགེ་བའི་བར་ཆད་བྱེད་པའི་དགྲ། །དམ་ཉམས་དགྲ་བོ་ལས་ངན་སྡིག་ཅན་འདི། །ཁྱོད་ཀྱི་ཁོང་ནས་དུག་གི་རླུང་བུས་ལ། །འདུ་བ་རྣམ་བཞིའི་ནད་རྣམས་ཁོང་ནས་སློང་། །བག་བཞི་ས་ལ་ལྷུངས་ནས་རྡེབ་ཏུ་ཆུག །དོན་སྙིང་རྣམ་ལྔའི་ཁོང་ཁྲག་སྐྱུག་ཏུ་ཆུག །ལས་ངན་འཁོར་བཅས་བྲང་ཆེན་བརྡུང་དུ་ཆུག །སྨྲེ་སྔགས་ཆོ་ངེས་གནམ་དུ་འབོད་དུ་ཆུག །འཆི་བའི་དུས་མཐར་སྨྱོ་འབོག་ནད་ལ་སོགས། གཅན་གཟན་མཁའ་ལྡིང་ལ་སོགས་ལྟས་ངན་ཕོབ། བསྟན་པ་བསྲུང་བའི་ལས་རྣམས་བསྒྲུབ་པར་མཛོད། དེ་ནས་གཏོར་མ་དགྲ་ཕྱོགས་སུ་འཕངས་པས་དགྲ་བོ་འཁོར་བཅས་བརླག་པར་འགྱུར་རོ།། །།འདིར་དྲག་པོའི་གཏོར་མ་ནི་སྒྲུབ་པ་དང་མ་འབྲེལ་བར་འཕངས་པས་ཀྱང་རུང་པའི་ཕྱིར་བསྟན་པ་ཡིན་གྱི། གཞན་ལས་སྦྱོར་རྣམས་རྗེ་གོང་མ་རྣམས་ཀྱི་ཕྱག་བཞེས་ལས་འབྱུང་བ་བཞིན་ལས་འདིར་རྒྱས་པར་མ་བཤད། འདིར་ཡང་གོང་དུ་མི་སྟོན་པ་ལས་སྦྱོར་གྱི་ཆ་ལག་ཡིན་པས་སྐབས་འདིར་བཤད་པ་ཡིན་ནོ།། །།མངྒ་ལཾ།། དཔལ་ལྡན་ལྷ་མོའི་ཞལ་ཧོམ་གྱི་ལས།དཔལ་ལྡན་ལྷ་མོའི་ཞལ་ཧོམ་གྱི་ལས་བཞུགས་སོ། །རྣམ་ཐར་སྒོར་གཞོལ་རྒྱལ་བའི་ཡུམ། །ཚད་མེད་བཞིས་བསྐུལ་ལས་ཀྱི་མ། །དུད་སོལ་ཞེས་བྱ་ས་གསུམ་ན། །དབང་མོ་ཆེ་ལ་ཕྱག་འཚལ་ལོ།། མེ་ལྕེ་འཕྲེང་བ་ལས་གསུངས་པའི་དཔལ་ལྷ་མོ་ནག་མོའི་ཞལ་ཧོམ་བཅས་ཏེ་དགྲ་བགེགས་སྒྲོལ་བར་འདོད་པས། དུས་གཟའ་དྲག་པོ་རྒྱུ་བ། ཕུང་གསུམ་བདུད་ཀྱི་ཉི་མ་ལ། ས་མེ་ཐུབ་བཟང་པོ་ལ་ལྕགས་ཕྱེ། དུར་ཁྲོད་ཀྱི་ས་རྡོ། ངམ་གྲོགམཚོ། གཡུལ་སྤྲད་པའི་ས་ལ་ཀླུ་གདོལ་པ་གནས་པའི་ཆུ་མིག་གི་ཆུས་སྦྲུས་ལ་ལས་ཀྱི་མ་མོ་གཤིན་རྗེ་མོའི་གཟུགས་ཤིན་ཏུ་ཁྲོས་པ། ལྗགས་བརྐྱང་བ། རྒྱན་མེད་རལ་པ་སྤྱི་བོར་བཅིང་པ། ལག་གཡས་ཉི་མ། གཡོན་ཟླ་བ་རྡེབ་ལ་ཁད་པའི་ཕྱར་སྟབས། གྲུ་གསུམ་གྱི་ནང་ནས་ལྟོ་བ་ཡན་འཕགས་པ། ནང་ཁོང་སེང་ཞལ་སྤྱན་ཀུན་ནས་མེ་ལྷབ་ལྷབ་ཡོང་བ་ལ། མགར་གྱི་སོལ་བ་དང་དུག་ཁྲག་རོ་སོལ་གྱིས་ནག་པོར་བྱུག དུག་ཤིང་གི་ལོ་མ་ལ་དུག་ཁྲག་གིས་དགྲ་ལིང་། ཐ་མ་ལ་བསད་སྔགས་ཀྱིས་བསྐོར་བ་བརྒྱ་རྩ་བརྒྱད་རང་གི་དྲི་མ་མ་ཤོར་བ་བྲི། བོང་བུ་ནག་པོའི་ཆུ་ལ་དགྲའི་ཟག་རྫས་ཇི་སྙེད་པ་སྦངས་ཏེ་བྱུགས་ཞུན་ཆེན་ནག་གི་མར་ཁུ་ཅུང་ཟད་དང་། གྲུ་གསུམ་དུ་སེང་ལྡེང་། མེད་ན་གླ་བ། ཚེར་ནག་སྐྱེར་བ་གསུམ་གྱི་ཤིང་བུ་བརྩིགས་ལ་གཤན་པའམ་མགར་བའི་ཁྱིམ་ནས་མེ་བླངས་ལ་དེས་སྦར། ལས་སྦྱོར་གྱི་སྔོན་དུ་ལིདྒ་རྟགས་ཐོན་བསྒྲུབས་ཡོད་ན་བཟང་། མེད་ན་བདག་ཉིད་གཤིན་རྗེ་གཤེད་ལྕགས་ཀྱུ་དང་ཞགས་པ་འཛིན་པ་ཤིན་ཏུ་ཁྲོ་བ་དམིགས། ཐུགས་ཀ་ནས་ཕོ་ཉ་བཞི་སྤྲོས། དེ་རྣམས་ཀྱིས་དམིགས་པའི་དགྲ་དངོས་དང་དེའི་སྲུང་ཟློག་མཁན་རྣམས་ཀྱི་སྙིང་ཕུག་ཞགས་པས་བཅིངས་ཏེ་ཁུར་ནས་མདུན་གྱི་ཉའུ་རྣམས་ལ་བསྟིམ། བདེན་བདར་ཚར་གསུམ་བྱ། དེ་ནས་དགུག་པའི་སྔགས་འདི་བཟླས་སོ།། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། མ་མ་ཏྲག་རཀྵ་རུ་ལུ་རུ་ལུ་བྷྱོ་ཛ་ཛ་ཁུག ཨཱ་ཀཀྵ་ཡ་ཛ་བཟླས། དེ་ནས་གུ་གུལ་གྱི་དུད་པ་ལ་ལིང་ག་བདུག བྱ་རོག་འུག་པའི་སྒྲོས་བརྡེག་ཅིང་། མ་མ་ཏྲག་རཀྵ་རུ་ལུ་རུ་ལུ་ཧཱུྃ་བྷྱོ་ཛ་དགྲ་བོ་མཱ་ར་ཡ་ཕྱེ་ཕྱེ། མ་མ་རུ་ཏི་ནི་ཨ་ཕྱེ་ཞེས་པས་དེ་ལྷ་དང་བྲལ་བར་བསམ། དེ་ནས་ལྕགས་ཕྱེ་ཟངས་ཕྱེ་རྡོ་ཕྱེ་ཡུངས་ཀར་ནག་སོགས་ཀྱི་ཐུན་མཚོན་ཆར་དམིགས་ནས། མ་བྷྱོ་མ་མ་རུ་ལ་རུ་ལུ་ཏྲག་རཀྵ་བྷྱོ་རེ་མ་ཏི་དགྲ་བོ་མཱ་ར་ཡ་ཛ་ཧཱུྃ་བྷྱོ་བཛྭ་ཕཊ྄་ཅེས་བྲབས་པས་གནོད་བྱེད་བརྒྱལ་འབོགས་པར་བསམ། དེ་ནས་སྐུ་གཟུགས་ཀྱི་མཐའ་ལ་དྲག་པོའི་མཆོད་པ་བདུན་བཀོད། རང་ཉིད་བདུད་ཆས་སུ་ཞུགས། སྐད་ཅིག་གིས་གཤིན་རྗེ་གཤེད་མཐིང་ནག་གཡས་ཐོ་བ་འཕྱར་ཞིང་གཡོན་སྐམ་པ་བཟུང་བ་རྒྱན་མེད་གཅེར་བུ་ཤིན་ཏུ་འཇིགས་པའི་སྐུར་གྱུར། དེ་ནས་མདུན་དུ་སྐུ་གཟུགས་དེ་སྭ་བྷཱ་ཝས་སྟོང་པ་ཉིད་དུ་གྱུར། དེའི་ངང་ལས་དུག་ཁྲག་གི་རྒྱ་མཚོ་དམར་ནག་ཏུ་འཁྱིལ་བའི་ནང་ན་མི་རོ་རྟ་རོ་ལང་ལོང་དུ་ཡོད་པ། ལས་ཀྱི་རླུང་དམར་གྱིས་བསྒུལ་བ། ཁྲག་ཞལ་གི་ཝུ་བ་རི་ཙམ་དུ་འཕྱོ་བ། འུར་སྒྲ་དང་ཐུག་ཆོམ་སྟོང་གསུམ་དུ་གྲགས་པ། ནད་ཀྱི་རླངས་པས་ནམ་མཁའ་གང་བ། མཚོན་ཆའི་ཟིལ་པ་སེར་དྲག་ཏུ་འབབ་པ། ཀེང་རུས་ཀྱི་གྲམ་པས་མཐའ་བསྐོར་བ་དེའི་ནང་དུ་ལས་ཀྱི་མ་མོ་མཐིང་ནག་སྐུ་རི་རབ་ཀྱི་བོངས་ཙམ་རལ་པ་སྤྱི་བོར་བཅིངས་ཤིང་ཕྱེད་གྲོལ་བ། ལག་པ་གཉིས་ཀྱིས་ཉི་ཟླའི་ཆ་ལང་རྡེབ་པས་བྱད་མ་དགྲ་བགེགས་ཐམས་ཅད་ནུར་ནུར་བཅུར་བ་ཞལ་གདངས་ཤིང་ལྗགས་བརྐྱང་བའི་ནང་ནས་བསྐལ་པའི་མེ་ལྕེ་ལྷབ་ལྷབ་འབར་བ། མིག་གསུམ་ཁྲོ་ཆུ་ཁོལ་མ་ལྟར་ཁོལ་བ། བ་སྤུའི་གསེབ་ནས་ནད་ཀྱི་ཁྲོ་ཆུའི་ཚ་ཚ་དམར་སིལ་ལི་ལི་ཁོལ་བ། སྐར་ཆེན་ཐོག་གི་བུ་ཡུག་ཚུབ་པ། སྣ་ནས་རིམས་ཀྱིས་དུད་པ་འཐུལ་བ། ལྟེ་བ་དཀར་པོ་ལྷའི་དམག་གི་རྫོང་། སྲིད་པའི་ཁྱམས་ཁང་སྟེ། དེ་ན་དཔལ་མགོན་ལྕམ་དྲལ་ལས་བྱེད་སྡེ་བརྒྱད་ཀྱི་ཚོགས་ཐམས་ཅད་འཇིགས་པ་གཤིན་རྗེའི་གཟུགས་མཐོང་ན་སྐྱི་བུང་བ། ཤ་ལ་རྔམ་ཤིང་ཁྲག་ལ་དུང་བ་ཐམས་ཅད་ཚོགས་པ། ལྟེ་བ་མན་དུག་ཁྲག་གི་རྒྱ་མཚོར་བྱིང་བ་སྐུ་སྟོད་མེ་དང་དུ་བ་འཁྲུག་པའི་ཀློང་ན་བཞུགས་པར་གྱུར། ཧཱུྃ ཕྱོགས་ཕྱོགས་དེ་ནི་ཕ་གི་ན། །ཉི་མ་བྱང་ཤར་ཕ་གི་ན། །བྲག་དང་ཆུ་འཐབ་མཚམས་ཤེད་ན། །སྟོང་གསུམ་སྟོང་གི་རྒྱ་མཉམ་པའི། །དུག་མཚོ་མུ་ལེ་དིང་ཆེན་པོ། །ཁྲག་གི་རྦ་ཀློང་འཁྲུག་པ་ནས། །སྐུ་ཕྱེད་ཐོན་པ་མུན་པའི་མདོག །ལས་ཀྱི་མ་མོ་མ་རུངས་པ། །དམར་ནག་ཁྲག་གི་རལ་པ་ཅན། །ལྟེ་བ་སྲིད་པའི་ཁྱམས་ཁང་སྟེ། །དཀར་པོ་ལྷ་ཡི་དམག་དཔུང་ཚོགས། །ཞལ་གདངས་ལྗགས་བརྐྱང་མཆེ་བ་གཙིགས། །ཞལ་ནས་བསྐལ་པའི་མེ་ལྕེ་འབར། །ལུས་ལས་ནད་ཀྱི་ཚ་ཚ་འཕྲོ། །སྣ་ནས་རིམས་ཀྱི་དུད་པ་འཐུལ། །ཕྱག་གཉིས་ཉི་ཟླའི་ཆ་ལང་རྡེབ། །ཕ་རོལ་རིག་སྔགས་བཟློག་བསྒྱུར་མཛད། །ཁྱོད་ཀྱི་ཐུགས་དམ་དུས་ལ་བབ། །ད་ཚུར་བྱོན་ལ་དགྲ་བགེགས་སྒྲོལ། །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མཧཱ་ཀཱ་ལི་ཧཱུྃ་བྷྱོ་ཨེ་ཨར་ལི་སྲིཾ་ཛ་ཛཿཧཱུྃ་བཾ་ཧོཿབཛྭ་ཌཱ་ཀ྄ི་ནི་ས་མ་ཡ་ཧྶཾ་དྲྀ་ཥྱ་ཧོཾ། དེ་བྱོན་ནས་བསྐྱེད་པ་དང་གཉིས་སུ་མེད་པར་གྱུར་པ་ལ། ཁྲག་ཆེན་གྱི་ཨརྒྷཾ། དུག་ཆུའི་ཞབས་བཀྲུ། དབང་པོའི་མེ་ཏོག གསུར་ཆེན་གྱི་བདུད་སྤོས། ཀླད་ཆེན་གྱི་བྱུག་པ། རྐང་གླིང་གི་རོལ་མོ། ཞུན་ཆེན་གྱི་མར་མེ་ཕུལ། ལྕགས་སམ་ཟངས་སམ་ཐོད་སྣོད་དུ་གཏོར་མ་སྙིང་སྣས་བརྒྱན་པ་དང་། ཁྲག་སྣ་ཛ་གད་བཤམས་ནས་བསྔོ། དེ་ནས་ཏིལ་མར་མས་བསྟོད་ཅིང་བསྐུལ་འདི་བཏང་། ཧཱུྃ ནག་མོ་ཁྲག་འཐུང་ཀུན་གྱི་རྗེ། །ཁམས་གསུམ་དབང་སྡུད་གདུག་པ་ཅན། །ཁྱོད་ཀྱི་ཐུགས་དམ་ངས་བསྐུལ་གྱི། །དགྱེས་པའི་མཆོད་པ་འདི་བཞེས་ནས། །ཆད་པའི་ཡས་འགམ་ད་དངོས་ལ། །བཅོལ་བའི་ལས་འདི་སྒྲུབ་པར་མཛོད། །མ་རུང་དགྲ་བགེགས་མི་བསྒྲལ་ན། །མ་མོ་ཁྱོད་ཀྱི་ཐུགས་དམ་གཡེལ། །རྫོགས་པའི་སངས་རྒྱས་བཀའ་ཡང་བཅག །རྣལ་འབྱོར་བདག་གི་རེ་བ་ཆད། །ཁྱོད་ཀྱང་ཉམས་པའི་མེ་ཡིས་སྲེག །དེ་ན་དམ་ལས་མི་འདའ་ཞིང་། །སྙོམས་གཡེལ་ལེ་ལོ་མི་མཛད་པར། །དོ་ནུབ་སང་ནུབ་ཚུན་ཆད་ལ། །དམིགས་པའི་དགྲ་འདི་བསྒྲལ་དུ་གསོལ། །འདིས་ནི་དཀོན་མཆོག་གསུམ་པོ་སྨད། །ཆོས་སྐྱོང་སྲུང་མ་གཉན་ལ་བསྡོས། །སེམས་ཅན་ཡོངས་ཀྱི་བདེ་སྐྱིད་བཅོམ། །རྣལ་འབྱོར་བདག་ལ་མཐུ་མེད་ཟེར། །ཤི་སྲོག་དམར་པོ་འབེན་དུ་བཙུགས། །ང་ཡི་མགོན་སྐྱབས་ཁྱེད་ལགས་ཀྱི། །ཁྱོད་ཀྱིས་མཐུ་དང་རྩལ་ཕྱུང་ལ། །སྡིག་ཅན་འཁོར་བཅས་བསྒྲལ་དུ་གསོལ། །སྲིད་པ་གསུམ་གྱི་དབང་པོ་ཆེ། །མཐུ་དང་རྩལ་གྱིས་དྲེགས་པ་ཀུན། །མ་མོ་ཁྱོད་ཀྱི་བཀའ་མི་འགོང་། །དེ་དག་དང་བཅས་དེར་བྱོན་ལ། །དེ་ཡི་སྲོག་རྔུབས་རྔམ་ཟས་ཀྱིས། །ཤ་ཟོ་ཁྲག་འཐུང་རུས་པ་མུར། །གཉེན་འདུན་ནོར་རྫས་བརླག་ཏུ་ཆུག །ཡུལ་འཁར་ལོ་ཏོག་འཇོམས་སུ་གསོལ།། དེ་ནས་མེ་སྦར་མེ་ལྕེ་ཁ་ནས་ལྷབ་བྱུང་བ་དང་། ལིདྒ་སྐམ་པས་བླངས་ཐོ་བས་བརྡུངས་ཏེ། དུག་སྣུམ་ལ་སྦངས་ཏེ་ཞལ་དུ། མ་བྷྱོ་མ་མ་རུ་ལུ་ཏྲག་རཀྵ་བྷྱོ་རེ་མ་ཏི་དགྲ་བོ་སརྦ་ཤ་ཏྲཱུྃ་མཱ་ར་ཡ་ཛ་ཧཱུྃ་བྷྱོ་བཛྭ་ཕཊ྄་ཅེས་ལིང་ག་རེ་དང་སྔགས་རེ་བསྟུན་ལ་བརྒྱ་རྩ་བརྒྱད་ཕུལ། དེའི་དབུས་སུ་ལྷ་མོའི་ཞལ་དུ་གསོལ་བས་ལྟོ་བའི་ནང་དུ་སླེབ་པ་དང་། ནང་གི་དམག་ཚོགས་ཀྱི་ཧབ་ཐོབ་ཏུ་རུབ་སྟེ་ཟོས་པར་བསམ། སྔགས་རེ་ལ་ཐལ་མོ་རྡེབ། ལས་ཀྱི་མ་མོ་ཁྱེད་ལ་དགྲ་བགེགས་ཆེ་གེ་མོ་འདི་ཟས་སྐལ་དུ་གཏད་པས་འདིའི་སྲོག་རྩ་ཆོད། དབང་པོ་གཏུབས། སྙིང་ལོངས། དབུགས་འགོམས། ཤ་ཟོ། ཁྲག་འཐུང་། ཀླད་པ་འཇིབས། དྭངས་མ་རྔུབས། རུས་པ་མུར། ལྤགས་པ་བགོས། རང་ཤེད་རང་ལ་ཕོབ་ཅིག རང་བདུད་རང་ལ་ཕོབ། མི་ཚེ་རིང་པོ་ལ་དུས་མ་འདེབས། ནམ་མཁའ་སྟོང་པ་ལ་ཚད་མ་འཛུགས། སྐྱེ་ཤི་ལ་ཁུངས་མ་ཕྱུང་། ལས་དང་ལས་ཀྱི་རྣམ་པར་སྨིན་པ་ལ་སྙད་མ་འདོགས། ད་ལྟ་ཉིད་དུ་རྟགས་ཕྱུང་མཚན་མ་སྟོན། གཟུགས་ཕུང་བཤིག ཡིད་དཔུང་འཇོམས་པའི་ཕྲིན་ལས་མཛད་དུ་གསོལ་ཟེར་ཞིང་རྫོགས་པར་ཕུལ། ཟིན་པ་དང་བསད་སྔགས་ཉེར་གཅིག་བཟླས། སངས་རྒྱས་ཆོས་དགེ་འདུན། དཔལ་ལྡན་ལྷ་མོ་ནག་མོ་དུད་པའི་སོལ་བ་མ་འཁོར་བཅས་ཀྱི་བདེན་པ་དང་། ལས་ཀྱི་སྦྱོར་བ་འདིའི་སྟོབས་ཀྱིས་རྣལ་འབྱོར་བདག་ཅག་འཁོར་བཅས་ལ་ཕ་རོལ་གྱི་བསམ་སྦྱོར་ངན་པ་སྡང་བའི་སེམས་དང་ལྡན་པ། གདུག་པའི་བསམ་ངན་བཅངས་པ། དྲག་ཤུལ་གྱི་སྦྱོར་བ་རྩུབ་པར་སྟོན་པ་ཐམས་ཅད་ཁོ་རང་ལ་སྒྱུར་ཅིག ཟློག་ཅིང་། རླག་པར་གྱུར་ཅིག ཞག་བདུན་ནམ་ལྔར་ཉི་མ་དམར་ཐག་ཆོད་པ་ཙམ་ལ་བྱ། བསྐུལ་བཏང་། ཐལ་བ་དང་གཏོར་མ་བཞེས་པ་ཕུལ། དེ་ནས་མ་མོའི་ལྟེ་བའི་དམག་ཚོགས་ཐོན་ནས་འཁོར་བཅས་དགྲ་ཡུལ་དུ་སོང་ནས་ཁོ་འཁོར་བཅས་ཐལ་བ་རྡུལ་དུ་རློག་པར་བསམ། ཟོར་དུ་འཕང་། ཐལ་མོ་རྡེབ། ལས་སྔགས་སྨེང་། ནང་དུ་ལོག་བསྲུང་འཁོར་བསྒོམ། སྐུ་འགོལ་སར་སྦ། ལས་ཀྱི་རྗེས་མི་མངོན་པར་བྱའོ། །སརྦ་མདྒ་ལཾ།། །། དཔལ་ཆེན་མོའི་མདོས་ཆོགདཔལ་ཆེན་མོའི་མདོས་ཆོག་བཞུགས་སོ། །རང་བཞིན་གནས་དང་ཡེ་ཤེས་དང་། །འཇིག་རྟེན་ལས་གྲུབ་མ་མོ་ནི། །དཔལ་ལྡན་དུད་སོལ་ལྷ་ཚོགས་ལ། །ཕྱག་བྱས་དེ་བསྐང་མདོས་ཆོག་བྲི།། འབྲུ་སྣའི་ངར་ཕྱེ་རི་རབ་ནི། །བང་རིམ་གསུམ་པ་གླིང་ལྕགས་རི། །ཐོད་རིལ་གསུམ་བཞག་རྩེར་བུམ་པ། །ཡེ་ཤེས་རྗེ་སྨན་བསྟན་མར་བཅས། །རྒྱན་གླང་རྔོན་ཆ་སྤྱན་གཟིགས་བཀོད། །འཁོར་ལོ་ཏོག་དང་བཅས་པས་བརྒྱན། །ཞིབ་པ་མགོན་པོའི་མདོས་བཤད་བཞིན། །ལྷ་གྲངས་ཁོར་ཡུག་རིགས་བསྡུས་པ། །དེ་ནས་ལྷ་ཡི་ང་རྒྱལ་གྱིས། །སྤྱན་འདྲེན་འདི་སྐད་བྱ་བ་ཡིན།། ཧཱུྃ ཡེ་རྫོགས་ཆེན་པོ་གདངས་ཀྱི་མདངས། །རྣམ་པ་ཀུན་ལྡན་སྟོང་པའི་མཁའ། ཡེ་གྲོལ་ཆེན་པོ་གཤིས་ཀྱི་གཤིས། །མཆོག་ཏུ་འགྱུར་མེད་བདེ་བའི་གསང་། །མཁའ་གསང་མཉམ་པར་སྦྱར་བ་ནས། །རང་བཞིན་མ་མོ་སྤྱན་འདྲེན་གྱིས། །ཟུང་འཇུག་ཆེན་པོས་གཤེགས་སུ་གསོལ། །བྱང་ཆུབ་ཕྱོགས་ཀྱི་རང་བཞིན་ནི། །སུམ་ཅུ་རྩ་བདུན་གཞལ་མེད་ཁང་། །རྣམ་ཐར་སྒོ་གསུམ་མཛེས་པ་ནས། །ཡེ་ཤེས་མ་མོ་སྤྱན་འདྲེན་གྱིས། །སྒྱུ་འཕྲུལ་ཆེན་པོ་འགྲོ་བའི་མ། །ཀུན་འགྲོ་ཚུལ་གྱིས་གཤེགས་སུ་གསོལ། །སྐྱེ་དགུའི་ལས་ཀྱི་སྣང་བ་ཡི། །སྟོང་གསུམ་ཆེན་པོ་མི་མཇེད་ཞིང་། །བསྐལ་བཟང་སྒྲོན་མ་འབར་བ་ནས། །དད་པ་དང་ནི་དམ་ཚིག་གིས། །ཚུར་གཤེགས་མ་ཧཱ་ཀཱ་ལི་མ། །སྲིད་པའི་བདག་མོ་ཆེན་མོ་ཁྱོད། །གསང་བའི་མཚན་ནས་བོས་ལགས་ན། །འདོད་ཁམས་དབང་ཕྱུག་དུད་སོལ་མ། །འཁོར་དུ་རྗེ་མོ་སྨན་མོའི་ཚོགས། །སངས་རྒྱས་ཐུགས་རྗེ་སྤྲུལ་པའི་སྐུ། །གདུག་པ་འདུལ་བའི་མཐུ་རྩལ་ཅན། །གཤེགས་ཤིག་བུ་ཡི་གནས་འདིར་གཤེགས། །གསུར་ཆེན་སྤོས་ཀྱིས་བཤུལ་མཚོན་ཅིང་། །དར་ནག་ལྡན་པའི་ཧསྟ་གཡབས། །སྙན་པའི་དབྱངས་དང་རོལ་མོས་སྦྲན། །གདུང་ཤུགས་དྲག་པོས་གསོལ་བཏབ་ཀྱིས། །མྱུར་བ་ཉིད་དུ་གཤེགས་སུ་གསོལ། །ཧཱུྃ དཀྱིལ་འཁོར་ཆེན་པོའི་གནས་འདི་རུ། །གདུག་པ་མ་ལུས་ཚར་གཅོད་པའི། །དམག་དཔོན་ཆེན་པོ་བཞུགས་ནས་ཀྱང་། །མདོས་དང་གླུད་འདི་བཞེས་སུ་གསོལ།། མཚང་འདྲུ་དམ་ལ་བཞག་པ་ནི། ཧཱུྃ ང་ནི་དཔལ་ཆེན་ཧེ་རུ་ཀ །ང་ནི་ཟ་བྱེད་ཆེན་པོ་སྟེ། །ཕྱག་ན་རྡོ་རྗེ་ཧཱུྃ་ཀ་ར། །འཇིགས་བྱེད་རྡོ་རྗེ་འཇིགས་བྱེད་དོ། །ང་མ་གཏོགས་པའི་སངས་རྒྱས་མེད། །ཐམས་ཅད་ང་ཡི་དམ་ལ་གནས། །སྲིད་པའི་མ་མོ་མཁའ་འགྲོ་མ། །ཀུན་གྱི་སྙིང་ཁྲག་ང་ལ་ཡོད། །ང་ཡིས་ལས་བཅོལ་ཁྱོད་ཀྱིས་སྒྲུབས། །གལ་ཏེ་གཡེལ་ནས་ལས་འགྱངས་ན། །བཀའ་ལོག་དམ་འགོད་དམྱལ་བར་སྲེག །ཨོཾ་བཛྭ་ས་མ་ཡ་ཧ་ན་ཧ་ན་ཧཱུྃ་ཕཊ྄། སྔགས་དྲུག་ཕྱག་ཏིང་འཛིན་གྱིས། །སོ་སོའི་ཡིད་བཞིན་གྱིན་གྱིས་བརླབ། །རང་རང་དགའ་བ་དེ་ངོར་བཀོད།། ཀྱེ སྲིད་པའི་བདག་མོ་འཁོར་བཅས་ལ། །རིན་ཆེན་གསེར་སྐྱེམས་འདི་འབུལ་གྱིས། །རྩ་བརྒྱད་ཡན་ལག་སྟོང་ལྡན་པའི། །བདུད་རྩི་སྨན་གྱི་ཛ་གད་བཞེས།། མདོས་སྣ་གླུད་ཀྱིས་འདྲེན་པ་ནི། ཧཱུྃ རིན་ཆེན་ངར་གྱི་མི་བོ་ཆེ། །ཟེར་སྤུ་ཡིད་འོང་མགོ་བོའི་སྐྲ། །ལུང་ཐང་མིག་ལ་འགྲོན་བུའི་སོ། །བྱི་རུའི་ལྕེ་ལ་མཚལ་གྱི་ཁྲག །ཞོ་ཤའི་སྙིང་ལ་དུང་གི་རུས། །ཙན་དན་དྲི་ལ་འབྲུ་ཡི་ཤ །རྐང་གཡས་ལྕགས་ལ་གཡོན་པ་ཟངས། །སྐེ་ལ་ནོར་བུ་གོས་བཟང་གྱོན། །རྒྱབ་ཏུ་གཏན་གྱི་དཀོར་ནོར་ཁུར། །མདུན་དུ་ལོ་བརྒྱགས་བཟང་པོ་ཁྱོངས། །འབྱུང་བ་རྣམས་བཞིའི་དྭངས་མས་བསྒྲུབས། །ཕུང་ཁམས་སྐྱེ་མཆེད་གཙང་ལ་དོད། །བདག་ཅག་ཁྱེད་ལ་འབུལ་ལོ་ཟེར། །དགའ་བའི་འཛུམ་ཆེན་མུ་ལུ་ལུ། །དེ་འདྲའི་གླུད་ཆེན་དམ་པ་འབུལ། །མདོས་བདག་ཆེན་པོ་མདོས་བཞེས་ཤིག །གླུད་བདག་ཆེན་པོ་གླུད་བཞེས་ཤིག། དེ་ནས་མདོས་བསྔོ་འདི་ཡིན་ཏེ། ཀྱེ སྲིད་པའི་མ་མོ་འདུལ་བ་ལ། །ཁྲག་འཐུང་ཆེན་མོ་བཞེངས་པའི་སྐུ། །དང་པོར་དུང་སྐྱོང་ཨུ་མའི་སྲས། །ཕྱིས་ནས་སྲིན་གཟུགས་གཤིན་རྗེའི་ལྕམ། །མ་མོ་ཆེན་མོ་མི་གཟན་མ། །དབུ་ལ་ཁྲག་གི་རལ་པ་འཐིབས། །རལ་པ་བསིགས་པའི་སྐྲ་གསེབ་ནས། །ཁྲག་གི་མ་སྟོང་ཤ་ར་ར། །ནད་ཀྱི་ན་བུན་ཐུ་ལུ་ལུ། །རྡོ་རྗེའི་ཐོག་སེར་ཉི་ལི་ལི། །ཁྲོས་པའི་ཁ་རླངས་སྟོང་གསུམ་གང་། །ཚ་བའི་མེ་ཕུང་འུ་རུ་རུ། །རྣོ་བའི་མཚོན་མ་ཟིང་ངེ་ངེ་། །ཞལ་དུ་ཁྲག་གི་རྒྱ་མཚོ་འཁྱིལ། །གདུག་པའི་རོ་ཚོགས་ལོང་ལོང་པོ། །སྤྱན་གསུམ་གཟིར་བའི་གཟི་བརྗིད་ངར། །ཉི་མ་འབུམ་ཕྲག་ཤར་བ་བཞིན། །དགྲ་བགེགས་གཞོབ་ལྟར་འཐུལ་ལུ་ལུ། །ཕྱག་གཡས་རལ་གྲི་གླད་ལ་སྐོར། །མ་རུངས་གདུག་པའི་བརྒྱུད་གཅོད་མ། །འོག་མ་བྷཉྫྱ་ཁྲག་རྒྱུན་ཅན། །ལྷ་མིན་སྙིང་རྩ་ནས་འཐུང་མ། །གཡོན་པ་ཤཀྟི་རྩེ་གསུམ་གྱིས། །བདུད་བསད་མགོ་བོ་ག་ཤར་འཕྱང་། །སྨུག་ནག་ནུ་མ་རྟིང་པར་དྲུད། །དུར་ཁྲོད་ཆས་བརྒྱད་འཆང་བ་མོ། །ཧེ་རུ་ཀ་ཡི་གཟུང་མ་ཆེ། །ཁྱོད་ཀྱིས་མི་ཐུབ་སུ་ཡང་མེད། །སྟེང་གི་ལྷ་ཆེན་དབང་ཕྱུག་ཀྱང་། །འདོད་ཆགས་ཆེན་པོས་ཁྱོད་དབང་གྱུར། །དགུ་ཁྲི་དགུ་སྟོང་རྒྱལ་པོ་སྟེ། །ཨུ་མ་དེ་ཝི་ཉིད་ཀ་ལགས། །དེ་ཕྱིར་ཁྱོད་མིང་བཀའ་བཟློག་མ། །བར་གྱི་ཚངས་པས་ཕྱག་བྱས་པས། །ཁྱོད་ལ་སྲིད་པའི་རྒྱལ་མོར་གསོལ། །དགའ་རབ་དབང་ཕྱུག་དང་མཛའ་བས། །བདུད་ཡུམ་འདོད་པའི་དབང་མོར་ཐོགས། །དབང་པོ་ཉེ་དབང་ལྷ་ཡི་དམག །ཕམ་དུས་ཁྱོད་ཀྱི་ལྟོ་བར་བཅུག །ལྷ་མིན་བཏུལ་བས་རྫོང་མོར་གྲགས། །རི་རབ་ཆེ་དང་སྐུ་བསྡུར་བས། །ཉི་ཟླ་ལྟེ་བའི་དབུས་ནས་ཤར། །རྒྱལ་ཆེན་སྡེ་བཞིས་ཕྱག་བྱས་པ། །ལྷ་མོ་ཆེན་མོ་དཔལ་ལྡན་མ། །རྒྱ་མཚོའི་ཀློང་དུ་མེ་འབར་བས། །ཀླུ་དབང་ཐམས་ཅད་ཁྱོད་གསུང་ཉན། །ས་འོག་རིམ་དགུར་ཁྱོད་གཤེགས་ནས། །ཆོས་ཀྱི་རྒྱལ་པོའི་ལྕམ་དུ་བྱས། །ཆིབས་སུ་བོང་བུ་གྭ་དམར་བཅིབས། །བང་ནི་ཡིད་དང་གློག་བས་མགྱོགས། །སྐད་ཅིག་ཉིད་ལ་ཁམས་གསུམ་འཁོར། །ཟས་སུ་མི་ཤ་མི་ཁྲག་སྐོམ། །ནད་ཀྱི་བདག་ལ་བདུད་རྩིའི་བདག །མདོས་བདག་ཆེན་མོ་མདོས་བཞེས་ཤིག །གླུད་བདག་ཆེན་མོ་གླུད་ལོང་ཞིག །ཉི་ཟླ་སྟོང་གི་ཐོད་འཕྲེང་ཅན། །ཆགས་བྱེད་ཆ་སྙོམ་གཅེར་བུ་གསུམ། །ཕུང་བྱེད་སྦས་པའི་མ་མོ་བཞི། །རེ་ཏི་མཆེད་བཞིར་འཇིག་རྟེན་གྲགས། །རིགས་ཀྱི་མཁའ་འགྲོ་མ་བཞིའོ། །ཁྲོས་པའི་མ་མོ་བཞི་དང་ནི། །གསང་བ་རྒྱན་གྱི་རྒྱལ་མོ་བཞི། །ཕྲ་མེད་གདོང་ཅན་བརྒྱད་པོ་སྟེ། །སྲིད་པའི་མ་མོ་ཁྱེད་རྣམས་ཀྱང་། །མདོས་བདག་ལགས་ཀྱིས་མདོས་བཞེས་ཤིག །གླུད་བདག་ལགས་ཀྱིས་གླུད་བཞེས་ཤིག །སྲིད་པའི་སྨན་མོ་ཆེན་པོ་བརྒྱད། །དམག་གི་རྒྱལ་མོ་ཆེན་མོ་བཞི། །གྲུ་འདེགས་དཔལ་གྱི་མ་མོ་བཞི། །ལས་ཀྱི་མ་མོ་ཆེན་མོ་བཞི། །ཟ་བར་བྱེད་པའི་སྲིན་མོ་བདུན། །ཡང་གབ་མ་མོ་ཆེན་མོ་བཞི། །དབང་བྱེད་ལས་ཀྱི་མ་མོ་བཞི། །གཟའ་བདུད་མར་གྱུར་གདོང་མོ་བཞི། །དུར་ཁྲོད་རུ་ཁ་མ་མོ་གསུམ། །སྲིད་གསུམ་ཕུང་བྱེད་མ་མོ་གསུམ། །གསང་བའི་མ་དང་ཕོ་ཉ་གསུམ། །མ་མོ་ཀུན་གྱི་གཡོག་མོ་གསུམ། །ཕོ་ཉ་བཞི་དང་སྤྲུལ་པ་བཞི། །བླ་འགུགས་བཞི་དང་ཚེ་འཕྲོག་བཞི། །གཟེར་འདེབས་བཞི་དང་མ་མོའི་ཚོགས། །ལྷ་ཆེན་ཆུང་མ་ཉི་ཤུ་བརྒྱད། །གདུག་པའི་ཚོགས་འཇོམས་མཁའ་འགྲོ་མ། །སུམ་ཅུ་རྩ་གཉིས་བཅས་པ་དང་། །ལས་ཀྱི་ཤུགས་འགྲོ་བཅུ་གཉིས་དང་། །སྦས་པའི་བུ་མོ་ཐལ་མདོག་མ། །གནོད་པའི་སྙིང་འདྲེན་འབར་མ་བརྒྱད། །ས་ཡི་བདག་མོ་སུམ་ཅུ་གཉིས། །ཕོ་ཉ་ཆེན་མོ་དྲུག་ཅུ་བཞི། །འབུམ་ཕྲག་ཡངས་པའི་མཁའ་འགྲོ་མ། །ལདྒ་མ་ནི་བཅུ་དྲུག་དང་། །ནམ་གྲུ་ཆེན་མོ་དགུ་དང་ནི། །དཀར་མོ་གློག་གི་ཤམ་བུ་ཅན། །སེར་མོ་ཉི་མའི་སྣང་བ་ཅན། ཁྲ་མོ་ཐོག་གི་བུ་ཡུག་ཅན། །ནག་མོ་མུན་པའི་རལ་པ་ཅན། །དམར་མོ་ཟངས་ཀྱི་མཆེ་བ་ཅན། །སྨུག་མོ་ལྕགས་ཀྱི་སྦར་བ་ཅན། །སྔོན་མོ་བསེ་ཡི་ལན་ཕྲན་ཅན། །ལྗང་ནག་གཡུ་ཡི་གོ་ཟུ་ཅན། །རེ་རེའང་འབུམ་ཕྲག་སྡེར་ཆད་པ། །ཡང་སྤྲུལ་ལས་བྱེད་གཤན་པ་མོ། །དབུགས་ལ་འཇབ་པའི་དབང་མོ་ཆེ། །བླ་སྲོག་འཕྲོག་པའི་མཐུ་མོ་ཆེ། །ལས་ཀྱི་ཚེ་འཕྲོག་ཆུ་སྲིན་མགོ །གཏི་མུག་ཁྲོས་པའི་རུ་སྦལ་མགོ །སྣ་ཚོགས་གདོང་དང་ལག་མང་པོ། །ལས་ཀྱི་སོ་མྱུལ་རྫུ་འཕྲུལ་ཅན། །གླིང་བཞི་བསྐོར་ཞིང་སེམས་ཅན་གསོད། །འཇའ་ཚོན་སླག་པ་སྐུ་ལ་གསོལ། །གཡང་གཞི་སྣ་ཚོགས་ཕྲག་པར་བཀལ། །ནད་ཀྱི་བདག་ལ་རིམས་ཀྱི་རྐྱེན། །སྣང་སྲིད་མ་མོ་འཁོར་བཅས་རྣམས། །མདོས་བདག་ལགས་ཀྱིས་མདོས་བཞེས་ཤིག །གླུད་བདག་ལགས་ཀྱིས་གླུད་བཞེས་ཤིག །འཛམ་བུ་གླིང་གི་འཇིག་རྟེན་ལ། །དབང་བསྒྱུར་མ་མོ་ཆེན་མོ་ནི། །མི་བཟད་དུར་བྱ་ཀངྐའི་གདོང་། །ལས་བྱེད་སྒོ་མ་ཆེན་མོ་བཞི། །རྒྱ་མཚོའི་གཏིང་དུ་ཞབས་བརྐྱང་པས། །རི་རབ་པང་དུ་འདེགས་བྱེད་མ། །བར་སྣང་ཁམས་སུ་ཕྱག་བརྐྱང་ནས། །ཉི་ཟླ་གཟའ་སྐར་འཁྲུག་བྱེད་མ། །དབུ་སྐྲ་སྤྲིན་ནག་གཏིབས་པ་བཞིན། །སྤྱན་གསུམ་གློག་འོད་མེ་རི་འབར། །ཁྱེད་ཀྱི་བཀའ་ཉན་སྲིང་གི་ཚོགས། །ཕུང་སྲི་ནག་མོ་མགོ་དགུ་མ། །ཉལ་ན་ལུང་གསུམ་མདོ་འགགས་མ། །ལངས་ན་རི་གསུམ་རྩེ་ཁྱབ་མ། །ནག་མོ་རལ་རིང་བྱ་གདོང་ཅན། །སྲོག་བདག་ནག་མོ་ཁྲག་མདོག་མ། །བྲག་སྲིན་ཕོ་མོའི་འཁོར་དང་བཅས། །དུར་སྲིན་ཕག་ཐོད་གོས་སླག་ཅན། །ཕག་ཞོན་ཕུང་སྲི་དུར་སྲིས་བསྐོར། །ཐབ་ཕུང་གཡག་ཐུལ་གཡག་ལ་ཞོན། །ཐབ་སྲིན་གཞོབ་སྲིན་འཁོར་གྱིས་བསྐོར། །ཆུ་མིག་ལོ་མ་སྔོ་བདག་མོ། །མཛོ་མོ་ལ་ཞོན་མེན་སྲིའི་གོས། །སྦྲུལ་དང་སྦལ་པའི་ཆ་ག་ཅན། །ཆུང་སྲི་ཕོ་མོའི་འཁོར་གྱིས་བསྐོར། །བྲག་ཕུག་བདག་མོ་ཉ་ལྕིབས་གོས། །རྟོལ་ཞོན་ས་སྲིན་ཆུ་སྲིན་འཁོར། །ཤིང་ཕུག་སྟོང་པའི་མངའ་བདག་མོ། །རལ་པའི་གསེབ་ནས་མེ་འབར་མ། །ཕག་པ་མགོ་གསུམ་རྟ་རུ་ཞོན། །རྣལ་འབྱོར་ཀུན་གྱི་དམ་སྲི་མོ། །བྲག་ཕུག་དབེན་གནས་རྙིང་པའི་བདག །མི་ལྤགས་གོས་གྱོན་ཐོད་པའི་ཐོད། །བོང་བུ་གྭ་དམར་རྟ་རུ་ཞོན། །ཕུང་སྲི་ནག་མོ་འཁོར་དང་བཅས། །དུར་སྲི་ནག་མོའི་ཕུང་སྲི་མོ། །བྱི་ལ་ཁྲ་བོའི་རྟ་ཞོན་མ། །བན་བོན་ཀུན་གྱི་ལྟོ་འཇིག་མ། །དེ་ལྟར་སྒོ་མ་འཁོར་བཅས་ཀྱང་། །མདོས་བདག་ལགས་ཀྱིས་མདོས་བཞེས་ཤིག །གླུད་བདག་ལགས་ཀྱིས་གླུད་བཞེས་ཤིག །རོ་ལངས་མ་དང་ཤ་ཟ་མོ། །སྨྱོ་བྱེད་མ་དང་གྲིབ་གནོན་མ། །ཕུང་བྱེད་མ་དང་དྲང་སྲོང་མ། །སྲིན་མོ་གཤིན་རྗེ་ཆུ་ལྷ་མོ། །རླུང་ལྷ་མོ་དང་གནོད་སྦྱིན་མོ། །དབང་ལྡན་མོ་དང་དྲི་ཟ་མོ། །གྲུལ་བུམ་མོ་དང་ལྷ་མིན་མོ། །ལྷ་མོ་མཁའ་ལྡིང་མིའམ་ཅི། །བསྟན་མ་སྲིད་པ་སྨན་མོའི་ཚོགས། །མདོས་བདག་ལགས་ཀྱིས་མདོས་བཞེས་ཤིག །གླུད་བདག་ལགས་ཀྱིས་གླུད་ལོང་ཅིག །ཧཱུྃ འཇིག་རྟེན་ཁམས་ལ་དབང་སྒྱུར་མ། །དར་དཀར་ཤེལ་དཀར་པདྨ་དང་། །མཐིང་གའི་གུར་གྱི་བདག་མོ་བཞི། །དུས་བཞིར་འཆར་བའི་མ་མོ་སྟེ། །བགྱིས་ན་ལོ་ལེགས་སྐྱ་རྒྱལ་ཞིང་། །ཡུལ་ཁམས་བདེ་འཇམ་ནད་མེད་པ། །ཁྲོས་ན་བཙའ་ཐན་སད་སེར་གྱིས། །ལོ་འཇོམས་དུས་འཁྲུགས་ནད་བཤིག་གཏོང་། །མདོས་བདག་ལགས་ཀྱིས་མདོས་བཞེས་ཤིག །གླུད་བདག་ལགས་ཀྱིས་གླུད་ལོང་ཅིག །མ་ཁྱེད་ཁྲོ་བའི་རྒྱུ་བཤགས་ཀྱིས། །གནོད་པའི་དུག་དབལ་མ་སྤྲོ་ཞིག །ཡུལ་འདིར་བདེ་སྐྱིད་ལོ་ལེགས་ཐོང་། །གླང་ལྤགས་བྱེ་རུ་གཡུ་དང་ནི། །ཞིང་ཆེན་གུར་གྱི་བདག་མོ་བཞི། །ནད་ཀྱི་བདག་མོ་ཆེན་མོ་སྟེ། །མཉེས་ན་རླུང་རྟ་དབང་ཐང་དང་། །འབྱུང་བ་ཆ་སྙོམས་དཔལ་བསྐྱེད་ལ། །ཁྲོས་ན་བཞི་བརྒྱ་རྩ་བཞིའི་ནད། །གོད་ལྷོག་ཕྱུགས་ནད་ཀུན་གཏོང་ལ། །མདོས་བདག་ལགས་ཀྱིས་མདོས་བཞེས་ཤིག །གླུད་བདག་ལགས་ཀྱིས་གླུད་ལོང་ཅིག །མ་ཁྱེད་ཁྲོ་བའི་རྒྱུ་བཤགས་ཀྱིས། །གནོད་པའི་དུག་དབལ་མ་སྤྲོ་ཞིག །ཡུལ་འདིའི་མི་ཕྱུགས་ནད་སོལ་ཞིག །གསེར་དང་བསེ་དང་རེ་ལྡེ་དང་། །ལྗང་ནག་གུར་གྱི་བདག་མོ་བཞི། །འཇིག་རྟེན་ཕུང་བྱེད་མ་མོ་སྟེ། །མཉེས་ན་ལོངས་སྤྱོད་དབང་ཐང་དང་། །སྟོབས་དང་ཚེ་ལ་དབང་བྱེད་པ། །ཁྲོས་ན་གདོན་རིས་ལྟས་ངན་པ། །བགེགས་ཀུན་འགྱེད་ཅིང་ཁྲམ་ལ་འདེབས། །མདོས་བདག་ལགས་ཀྱིས་མདོས་བཞེས་ཤིག །གླུད་བདག་ལགས་ཀྱིས་གླུད་ལོང་ཅིག །མ་ཁྱེད་ཁྲོ་བའི་རྒྱུ་བཤགས་ཀྱིས། །གནོད་པའི་དུག་དབལ་མ་སྤྲོ་ཞིག །ཡུལ་འདིར་བར་ཆད་མེད་པར་སྐྱོངས། །དབུས་གླིང་འོད་ཀྱི་གུར་བདག་མོ། །སྲིད་པའི་རི་རབ་ཁང་བརྩེགས་ལ། །དཔག་བསམ་ཤིང་གི་ལྡིང་ཁང་བཏབ། །ཤེལ་རིགས་མང་པོའི་རྒྱན་དང་ལྡན། །དེ་ན་སྲིད་པའི་བདེ་འགྲོ་མ། །མ་མོ་དེ་བཞིན་གཤེགས་པ་སྟེ། །ཕྱག་ན་བདུད་རྩིའི་བུམ་པ་འཆང་། །འགྲོ་བ་ཀུན་གྱི་ནད་སེལ་མ། །བྷ་གར་འབྱུང་བ་ལྔ་འཆར་མ། །འབྲུ་བཅུད་དུས་སུ་སྨིན་པར་མཛད། །དེ་ཕྱིར་རྟག་པའི་མ་གཅིག་པུ། །མདོས་བདག་ཆེན་མོ་མདོས་བཞེས་ཤིག །གླུད་བདག་ཆེན་མོ་གླུད་ལོང་ཅིག །ཀུན་ལ་བྱམས་རྩེའི་གཉེན་གཅིག་པུ། །ཐམས་ཅད་ཁྱོད་ཀྱི་མཁའ་ལས་ཕྱུང་། །རང་རང་ལས་ཀྱི་བཀའ་བསྒོ་ནས། །མི་བཟད་དུཿཁ་དག་གིས་མནར། །དེ་ལ་མ་ཁྱོད་གཟིགས་པར་འཚལ། །གནོད་པའི་སྐྱོན་རྣམས་ད་སོལ་ཅིག །ཉེས་པའི་རྩ་བ་ཀུན་ཕྱུང་ཞིག །བདེ་སྐྱིད་ས་བོན་ཀུན་ཐོབ་ཅིག །བསམ་པ་འགྲུབ་པའི་དམོད་བོར་ཅིག། སྣང་སྲིད་གསིལ་བུའི་གྱེར་བསྡུས་པ། ཧཱུྃ རླུང་དང་མེ་དང་ཆུ་དང་ས། །ལྷུན་པོ་རིན་ཆེན་བཞིའི་རང་བཞིན། །སྣ་ཚོགས་རི་གླིང་མཚོ་ལྡན་པ། །ས་བླ་ས་འོག་ས་སྟེང་གནས། །མི་མཇེད་ཞིང་ཁམས་ཇི་ལྟ་བ། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །སྟེང་དུ་འཕུར་བའི་འདབ་ཆགས་ཁྲོམ། །ཆར་གྱི་སྤྲིན་པ་ལྟ་བུར་གཏིབས། །བར་ན་ས་ལ་རྒྱུ་བའི་འགྲོ། །དོག་མོའི་ས་གཞི་ཐམས་ཅད་བཀང་། །ཆུར་གནས་སྲོག་ཆགས་ཀུན་གྱི་རིགས། །རྒྱ་མཚོ་ཆེན་པོ་འཕྱུར་གྱིས་གང་། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །ལྷག་པར་དགྱེས་པའི་དམར་ཆེན་ཁྲག །ཤ་རུས་སྙིང་གི་འཕྲེང་བ་དང་། །འབྲུ་སྣ་ཀུན་གྱི་བ་ལིང་ཏ། །དཀར་དམར་རྒྱན་གྱིས་བཀྲ་བ་རྣམས། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །ཤིང་གྲིས་མདའ་འཕང་དག་ལ་ནི། །སོ་སོའི་སྐུ་དང་ཕྱག་མཚན་བཀོད། །ས་བོན་ཡི་གེ་གཟུགས་སུ་བཏབ། །དབང་མཚན་རྡོ་རྗེ་རྣམ་པར་བཀོད། །བལ་ཏི་ཤུག་ཏི་དག་གིས་བརྒྱན། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །སྲིད་པ་སྤྱི་བྲིས་ཡུལ་གྱི་གླུད། །ཕོ་གདོང་མོ་གདོང་དར་མ་དང་། །རྒྱང་བུ་བྱིས་པའི་གླུད་རྫས་ཏེ། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །མི་འགྱུར་དབྱིངས་ཀྱི་ནམ་མཁའ་ལ། །ཡེ་ཤེས་ལྔ་རྫོགས་མདངས་སུ་ཆགས། །མཐུན་རྫས་བྱ་སྤུ་དར་ཤོག་དཔྱངས། །ཡུངས་མོའི་རྒྱན་མཛེས་འཆང་བ་འདི། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །འབྲུ་སྣ་བཅུ་གསུམ་དག་དང་ནི། །རིན་ཆེན་རྣམ་ལྔ་སྨན་གྱི་སྡེ། །དར་ཟབ་པགས་བུ་མར་མེ་དང་། །སྤོས་སོགས་འཇིག་རྟེན་ཁམས་ཀྱི་ནོར། །བཞེད་པ་ཐམས་ཅད་འདིར་བསགས་པ། །དངོས་འབྱོར་ཡིད་ཀྱིས་སྤྲུལ་ནས་ཀྱང་། །འདོད་པའི་ཡོན་ཏན་ལྔ་ལྡན་དང་། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །དུང་དང་རྔ་ཆེན་ཆ་ལང་དང་། །རྔེའུ་ཆུང་དྲིལ་བུ་ཅང་ཏེའུ། །བྷཉྫྱའི་ཆ་ལང་ལྟག་སྤྲོད་རྔ། །རྐང་ཆེན་གླིང་བུ་དབྱངས་ཀྱི་སྡེ། །སྣང་སྲིད་མ་མོའི་ཚོགས་ཀུན་གྱི། །ཐུགས་དམ་བསྐང་བའི་རྫས་སུ་འབུལ། །ཧཱུྃ ད་ནི་མདོས་ལ་རྫོངས་ཤིག་འདེབས། །ཡེ་ཤེས་མ་མོ་མཁའ་འགྲོ་ལ། །བདུད་རྩི་སྣ་ལྔའི་རྫོངས་ཤིག་འདེབས། །འཇིག་རྟེན་མ་མོ་མཁའ་འགྲོ་ལ། །ཤ་ཁྲག་རུས་པའི་རྫོངས་ཤིག་འདེབས། །ལས་ཀྱི་མ་མོ་མཁའ་འགྲོ་ལ། །དམ་ཉམས་སྲོག་དབུགས་རྫོངས་ཤིག་འདེབས། །འཁོར་ཚོགས་འབུམ་ཕྲག་ཡངས་པ་ལ། །སྒ་གཡེར་བཙོང་དང་ཞུན་ལ་སོགས། །ལྷོ་རྫས་རྣམས་ཀྱི་རྫོངས་ཤིག་འདེབས། །རམ་བུ་རུག་པ་རི་སྒོག་སོགས། །རི་རྫས་རྣམས་ཀྱི་རྫོངས་ཤིག་འདེབས། །བྲ་བོ་སྣེའུ་ལོ་མ་སོགས། །ཀླུངས་རྫས་རྣམས་ཀྱི་རྫོངས་ཤིག་འདེབས། །གཙོད་དང་ལན་ཚྭ་ལ་སོགས་པ། །བྱང་རྫས་རྣམས་ཀྱི་རྫོགས་ཤིག་འདེབས། །བ་ཚྭ་བུལ་ཏོག་ལ་སོགས་པ། །གཡོག་མོའི་ཚོགས་ལ་རྫོངས་སུ་འདེབས། །ཧཱུྃ དང་པོ་ཨོ་རྒྱན་མཁའ་འགྲོའི་གླིང་། །སྲིད་པའི་རྒྱལ་མོ་ཁྱོད་གཡོས་ནས། །སྣང་ཞིང་སྲིད་པའི་ལྷ་འདྲེ་འཁྲུགས། །རྒྱལ་པོ་ཨིནྡྲ་བྷཱུ་ཏི་བསྙུང་། །ཡུལ་ཁམས་ལྟས་ངན་ཆོ་འཕྲུལ་དང་། །ཁྲག་འཁྲུགས་ནད་རིམས་ཕྱུགས་ནད་དང་། །མུ་གེས་སྐྱེ་དགུ་ཕལ་ཆེར་ཤི །དེ་ཚེ་དགའ་རབ་རྡོ་རྗེ་ཡིས། །སྣང་སྲིད་ཡས་དང་ཐགས་སུ་བགྱིས། །སྲིད་པའི་ལྷ་འདྲེ་རྣམས་ལ་ཕུལ། །སྲིད་པའི་རྒྱལ་མོའི་ཐུགས་དམ་སྐོངས། །མ་མོའི་འཁོར་ཚོགས་ཐམས་ཅད་མཉེས། །མདོས་དང་གླུད་བླངས་སོ་སོར་བཞུད། །གནོད་པར་གྱུར་པ་ཐམས་ཅད་ཞི། །དེ་བཞིན་བདག་གིས་མ་རྣམས་བསྐང་། །སྣང་ཞིང་སྲིད་པའི་ལྷ་འདྲེ་མཆོད། །དེ་བས་ཡུལ་འདིར་གནོད་མ་མཛད། །ཡས་ཐགས་འདི་སྣོམས་གནས་སུ་བཞུད། །དགྱེས་པའི་དངོས་གྲུབ་སྩལ་དུ་གསོལ། །དེ་ནས་བར་དུ་གདོང་དམར་བོད། །རྨོངས་པའི་འགྲོ་ལ་ཐུགས་རྗེ་ནས། །ཆོས་ཀྱི་རྒྱལ་པོ་རིམ་པར་འོངས། །ལྷག་པར་ཁྲི་སྲོང་ལྡེ་བཙན་གྱིས། །དམ་པ་ཆོས་ཀྱི་སྲོལ་རྒྱས་ཕྱིར། །གཙུག་ལག་ཁང་ཆེན་ཕྱག་བྲིས་མཛད། །མཁས་པའི་པཎ་ལོ་ཅི་ཡང་བཤམས། །དམ་པ་ཆོས་རྣམས་བསྒྱུར་ཞུགས་ཚེ། །ནག་ཕྱོགས་ལྷ་འདྲེ་གཡོ་ཐབས་ཀྱིས། །རྒྱལ་པོ་བསྙུང་ཞིང་རྒྱལ་ཁམས་མནར། །སྡིག་བློན་ཐམས་ཅད་ངོ་མཐོའི་དུས། །སློབ་དཔོན་པདྨ་བཛྭ་གྱིས། །རྒྱལ་པོའི་དཀོར་ནོར་ཁ་ཟས་ལ། །ཡས་ཐགས་བགྱིས་ཏེ་དེ་ལ་བསྔོས། །རང་རང་ཡིད་ཐོབ་མགུ་ཞིང་ཚིམ། །གནོད་པ་ལྟ་ཅི་ཕན་པའི་ཐབས། །སྒྲུབ་པའི་མངག་གཞུག་ཉིད་དུ་ཞུགས། །དེ་བཞིན་ད་ལྟ་རྣལ་འབྱོར་ངས། །རྒྱུ་སྦྱོར་ཡོན་རྣམས་མདོས་སུ་བྱས། །སྦྱིན་བདག་ཀུན་གྱི་གླུད་དུ་སྦྱར། །སྔགས་རྒྱ་ཏིང་འཛིན་སྟོབས་ཀྱིས་བསྔོས། །དཔལ་གྱི་ལྷ་མོ་ཆེན་མོ་ནས། །སྲིད་པ་སྨན་མོའི་བར་རྣམས་ཀྱི། །འཇིགས་བྱེད་མ་མོའི་ཚོགས་ལ་ཕུལ། །ཕོ་བརྒྱུད་རྣམས་ཀྱང་དེས་སྐོངས་སོ།། མདོས་གཞུག་གཉིས་ལས་སྐབས་བཞིན་སྤྱད། ཧཱུྃ ད་ནི་མདོས་འགྲོ་ཤར་ར་ར། །ད་ནི་གླུད་འགྲོ་ཅུ་རུ་རུ། །ད་ནི་མ་མོའི་ཁྲོམ་སྒྱུར་རོ། །ལྷ་འདྲེའི་ཟ་ཁ་ད་སྒྱུར་རོ། །ཟློག་སྒྱུར་བྱེད་པའི་མཐུ་མོ་ཆེ། །དགྲ་དཔུང་འཇོམས་པའི་རྩལ་མོ་ཆེ། །ནད་དལ་གཅོད་པའི་དབང་མོ་ཆེ། །ལྷ་སྲིན་ལས་འཁོར་ཤེད་མོ་ཆེ། །ཁྲོམ་དང་ཟ་ཁ་དགྲ་ལ་སྒྱུར། །དགྲ་མོ་ཁྱེད་ཀྱི་ཟས་སྐལ་གཏད། །གང་ལ་བྱ་བ་མ་སྨོས་མཁྱེན། །ལེ་ལོར་མ་བཞག་ཡན་མ་གཏང་། །ཞག་དང་ཟ་མ་ཉིད་དུ་སྒྲོལ། །ལྟས་ངན་བརྒྱད་ཅུ་རྩ་གཅིག་ཐོང་། །ཡེ་འདྲོག་སུམ་བརྒྱ་དྲུག་ཅུ་སྦྱོར། །གདོན་ཆེན་ཐམས་ཅད་དེ་རུ་རྫོངས། །སྟོང་ཕྲག་བརྒྱད་ཅུ་རྩ་བཞི་པའི། །བགེགས་ཀྱི་དམག་སྒར་དེ་རུ་ཐོབ། །དམ་སྲི་སྤུན་དགུ་དེ་རུ་རྒྱུག །ནད་ཀྱི་རྐྱལ་བ་དེ་རུ་ཕྱེ། །མཚོན་གྱི་དྲུ་གུ་དེ་རུ་རྐྱོངས། །བཙན་བྱང་བྲིས་ལ་བདུད་ཁྲམ་ཐོབ། །ནག་པོའི་རྡེའུ་དེ་རུ་ཐོར། །རྒྱན་གཞི་ཐིང་ཞིག་མ་མོའི་ཚོགས།། བསྐུལ་སོགས་གཏོར་མ་བཞིན་དུ་བྱ། །གཉིས་པ་སླུ་བ་རྐྱང་པ་སོགས། ཧཱུྃ ད་ནི་མདོས་གཏོང་མདོས་བདག་བཞུད། །ཡེ་ཤེས་མ་མོ་དབྱིངས་སུ་གཤེགས། །སྐྱེ་འགག་མེད་པའི་དོན་ལ་སྤྱོད། །ལས་ཀྱི་མ་མོ་བྱང་ཤར་བཞུད། །ལེགས་ཉེས་ཀུན་གྱི་བྱ་ར་མཛོད། །མ་ཡུལ་བྱང་ཤར་ཕ་གི་ན། །མྱ་ངན་སྣམ་བུའི་ཕ་རོལ་ན། །གཡུ་མཚོ་མུ་ལེའི་ནང་ཤེད་ན། །བསེ་མཁར་སྨུག་པོ་ལྡེམ་སེ་ལྡེམ། །བསེ་མཁར་དེ་ཡི་ནང་ཤེད་ན། །ཐང་ཤིང་སྔོན་པོའི་གུར་ཕུབ་པ། །མ་མོ་ཉིད་ཀྱི་བཞུགས་གནས་ཡིན། །མི་ཡུལ་སྐྱིན་ལྡིང་གཏན་ཡུལ་མིན། །མ་ཅིག་དེ་རུ་སྐུ་བསྐྱོད་འཚལ། །ནད་བདག་ཐམས་ཅད་དེ་རུ་བཞུད། །གཞན་རྣམས་རང་རང་ཡུལ་ལ་གཤེགས། །བདག་ཅག་རྒྱུ་སྦྱོར་འཁོར་བཅས་ལ། །ནད་ཀྱི་རྐྱལ་པ་ཁ་ཆིངས་ཤིག །མཚོན་གྱི་དྲུ་གུ་མཐའ་ནས་ཐུལ། །ཁྲམ་བྱང་ཕྱིས་ལ་ཤོ་ཁ་དོར། །རྡེའུ་རྒྱན་གཞི་གཉིས་ཀ་སྐུམས། །ལྟས་ངན་ཆོ་འཕྲུལ་གཡང་དུ་ཁུག །གདོན་བགེགས་ལོག་འདྲེན་སྲངས་མར་སྒྱུར། །ཡེ་འདྲོག་ཤིས་པའི་རྟགས་སུ་བཟོས། །འཇིག་རྟེན་བདེ་ཞིང་ལོ་ལེགས་དང་། །རྣལ་འབྱོར་བསམ་པའི་ལས་ཀུན་སྒྲུབས།། ཞེས་བརྗོད་མཉམ་ཉིད་ངང་དུ་བཞག །འདི་ཡང་པདྨ་དཀར་པོ་ཡིས། །བྱམས་པ་ཆེན་པོའི་ཆོས་གླིང་སྦྱར། །མ་རྣམས་དགྱེས་པའི་འཛུམ་ཞལ་བཅས། །རྟག་ཏུ་བདག་ཅག་སྐྱོང་གྱུར་ཅིག། །།སརྦ་སྭ་ཏི་བྷ་ཝནྟུ།། །། དཔལ་ལྷ་མོའི་ལས་མཐའ་རིམས་ནད་བཟློག་པའི་ཆོ་གདཔལ་ལྷ་མོའི་ལས་མཐའ་རིམས་ནད་བཟློག་པའི་ཆོ་ག་བཞུགས་སོ། །བཅོམ་ལྡན་འདས་མ་དུད་སོལ་མར། །ཕྱག་བྱས་ནད་ཡམས་ཟློག་པ་བཤད།། ངར་གྱི་ནད་བདག་དྲེད་པའི་གཟུགས། །རི་རབ་ཟོམ་ལ་སྟེགས་བཅས་ནས། །བཟློག་པའི་ཕྱག་རྒྱ་བྱས་པ་ཅིག །བང་རིམ་འོག་མར་རྩང་དམར་དྲུག་ཅུ་བཞི་སྲིན་མོ་འགྲོས་སུ་བཙུགས །མཐའ་མར་མཐེབ་ཀྱུ་མང་པོས་བསྐོར།། འགོ་བའི་ལྷ་བདུད་གནོད་བྱེད་ཤྭ་རྡེལ་སྤུང་བ་དང་། །རང་ངམ་ཡོན་བདག་གླུད་ཆེན་ཅིག །གཏོར་མ་དྲུག་ཅུ་རྩ་ལྔ་དང་། །གླུད་ཆང་སྲོག་ཆགས་གཟུགས་སྲིད་དགུ། །ཇི་སྙེད་བཀོད་ཅིང་འབྲུ་སྨན་དར། །རིན་ཆེན་བཟའ་བཏུང་ཚོགས་ཚད་གཞུག །ཁྲམ་ཤིང་གཟེར་ཞིང་སྐྱེས་པ་ལ་ཕོ་ཤིང་བུད་མེད་ལ་མོ་ཤིང་གཡས་གཡོན་དུ་གཟེར་མདའ་འཕང་བཤམ། །མར་མེ་གསུམ་དང་ཤ་ཁྲག་ཞག །རུས་པ་དུག་དང་གསུར་གྱི་དུད། །དྲི་ཆུ་ཕག་བྱ་སྦྲུལ་གླང་མིའི། །སྙིང་གི་མཆོད་རྫས་འཕྲེང་བར་སྤེལ། །འཇིགས་ཤིང་སྐྱི་གཡའི་རོལ་མོ་བརྡུང་།། བདག་ཉིད་ལྷར་གསལ་མདུན་གྱི་གཟུགས། །དུད་སོལ་ཁྲོས་པ་རྩང་དམར་རྣམས། །ཞིང་སྐྱོང་ཕོ་ཉ་དྲུག་ཅུ་བཞི། །མཐེབ་ཀྱུ་ནད་ཀྱི་བདག་མོའི་ཁྲོམ། །མི་སྡུག་གཟུགས་ཅན་ནད་རྐྱལ་འབྱེད༑ །སྟོང་གསུམ་ཁྱབ་པ་ཙམ་དུ་བལྟ། །སྙིང་གའི་འོད་ཀྱིས་ནད་བདག་རྣམས། །བཀུག་ནས་དེ་ལ་ཐིམ་པར་བསམ། །ཧཱུྃ ཀུན་བཟང་དབྱིངས་ནས་ཁྱོད་བཞེངས་ནས། །ཁྲག་འཐུང་ཆེན་པོའི་ཚོགས་དང་རོལ། །དུས་གསུམ་རྒྱལ་བའི་ཡུམ་གཅིག་མ། །ཆེ་ཞེ་ཆེན་མོ་དུད་སོལ་མ། །ལན་ཆགས་ཤ་འཁོན་གཉེར་མཛད་མ། །དོ་ནུབ་བསྐང་ཞིང་གཤགས་པའི་ཕྱིར། །འབོད་ཀྱིས་འཁོར་དང་བཅས་པ་རྣམས། །མཐུན་རྫས་ཚོགས་པའི་གནས་འདིར་སྤྱོན། །འདོད་པའི་ལྕགས་ཀྱུ་མི་བཟད་པ༑ །དབང་ཕྱུག་ཆེན་པོའི་སྙིང་གར་བཏབ། །ལུས་ཕྱེད་དབང་དུ་བསྡུས་མཛད་པའི། །དཀའ་བཟློག་ཆེན་མོ་རི་ཡི་སྲས། །ལན་ཆགས་ཤ་འཁོན་གཉེར་མཛད་མ། །དོ་ནུབྎ འབོད་ཀྱིསྎ མཐུན་རྫསྎ ཚངས་པ་བདུད་དང་བརྒྱ་བྱིན་དང་། །རྒྱལ་པོ་སྡེ་བཞི་ལྷ་མིན་ཀླུ། །གཤིན་རྗེ་མི་དབང་ཐམས་ཅད་ཀྱིས། །མཆོད་ཅིང་བསྟོད་པའི་སྲིད་རྒྱལ་མ། །ལན་ཆགས་ཤ་འཁོན་གཉེར་མཛད་མ། །དོ་ནུབྎ འབོད་ཀྱིསྎ མཐུན་རྫསྎ དཀར་པོ་ལྷ་ཡི་དམག་ཚོགས་ཀྱིས། །ཁྱོད་ཀྱི་ལྟེ་བར་རྫོངས་བཅས་ནས། །ནག་པོ་ལྷ་མིན་ཐལ་བར་བཏགས༑ །རྫོངས་མོ་ཆེན་མོ་འདོད་དབང་མ། །ལན་ཆགས་ཤ་འཁོན་གཉེར་མཛད་མ། །དོ་ནུབྎ འབོད་ཀྱིསྎ མཐུན་རྫསྎ རྒྱ་མཚོའི་གཏིང་ནས་སྐུ་བསྐྱོད་ཅིང་། །རི་རབ་ཟོམ་ལ་སྟེགས་བཅས་ནས། །བར་སྣང་ཁམས་སུ་ཐལ་མོ་རྡེབ། །སྲིད་པའི་ནད་བདག་ཆེན་མོ་མ། །ལན་ཆགས་ཤ་འཁོན་གཉེར་མཛད་མ། །དོ་ནུབྎ འབོདྎ མཐུན་རྫསྎ དུར་ཁྲོད་ཆེན་པོ་བརྒྱད་དང་ནི། །ཉི་ཤུ་རྩ་བཞིའི་ཡུལ་སྐྱོང་བའི། །ཕོ་ཉ་དྲུག་ཅུ་རྩ་བཞིས་བསྐོར། །ཡང་བྲན་ནད་ཀྱི་བདག་མོའི་ཚོགས། །ལན་ཆགས་ཤ་འཁོན་གཉེར་མཛད་མ། །དོ་ནུབྎ འབོད་ཀྱིསྎ མཐུན་རྫསྎ འཁོར་བཅས་ཁྱོད་རྣམས་རྒྱབ་ནས་མེ། །སྲེག་པའི་བསྐལ་པ་བས་ཀྱང་འཚེར། །མདུན་ནི་མི་བཟད་ཁྲོས་པའི་གཟུགས༑ །མཐོང་ཚད་སྙིང་ཁྲག་ཁ་ནས་འབོ། །ལན་ཆགསྎ དོ་ནུབྎ འབོད་ཀྱིསྎ མཐུན་རྫསྎ རལ་པ་མཚན་མོའི་མུན་ལྟར་གཏིབས། །ཞལ་གདངས་མཆེ་བ་རི་ལྟར་གཉེར༑ །ནད་ཀྱི་ཁ་རླངས་སྤྲིན་ལྟར་འཚུབས། །ཧཱུྃ་སྒྲ་འབྲུག་གི་སྐད་ལྟར་ལྡིར། །ལན་ཆགསྎ དོ་ནུབྎ འབོད་ཀྱིསྎ མཐུན་རྫསྎ སྲིད་གསུམ་ཤ་ཡིས་མ་འགྲངས་པར༑ །འགྲམ་པ་གཉིས་ནི་གདུབ་ལྟར་འཁྲོལ། །ཁམས་གསུམ་ཁྲག་གིས་མ་ངོམས་པར། །ལྗགས་ནི་ཞགས་པ་ལྟ་བུར་བསྐྱོད། །ལན་ཆགསྎ དོ་ནུབྎ འབོད་ཀྱིསྎ མཐུན་རྫསྎ སྤྱན་ནི་དམར་པོ་གློག་ལྟར་འཁྱོམ། །ཤངས་ཀྱི་ཁྲོ་གཉེར་གྲོགས་མཁར་འདྲ། །སྙན་ཆ་སྦྲུལ་དང་རོ་ཉེས་བརྗིད། །སྨིན་མ་མེ་ཕུང་འུ་རུ་རུ། །ལན་ཆགསྎ དོ་ནུབྎ འབོད་ཀྱིསྎ མཐུནྎ ནུ་མ་གཡས་པ་ཕྲག་ལ་གཟར། །གཡོན་པ་རྟིང་པའི་ཕྱོགས་སུ་དྲུད། །བ་སྤུ་དུག་གི་ཚེར་མ་སྟེ། །ཁོང་ནས་སྤུ་གྲིའི་ཆར་ཆེན་འབེབས། །ལན་ཆགསྎ དོ་ནུབྎ འབོད་ཀྱིསྎ མཐུན་རྫསྎ ཞབས་བརྡེབས་གནམ་ས་གཡོ་ཞིང་འཕར། །འུར་འུར་ཆེམ་ཆེམ་ལྡེག་ཅིང་ཁོལ། །སྡེ་བརྒྱད་ཐམས་ཅད་དམག་ཏུ་བསྡུ། །འཇིག་རྟེན་ཕུང་བྱེད་དྲག་ཤུལ་ཅན། །ལན་ཆགས་ཤ་འཁོན་གཉེར་མཛད་མ། །དོ་ནུབ་བསྐང་ཞིང་གཤགས་པའི་ཕྱིར། །འབོད་ཀྱིས་འཁོར་དང་བཅས་པ་རྣམས། །མཐུན་རྫས་ཚོགས་པའི་གནས་འདིར་སྤྱོན།། རྫས་རྣམས་ཆོས་ཉིད་སྔགས་རྒྱས་སྦྱངས། །འདོད་དགུ་ནམ་མཁའི་མཛོད་དུ་སྤེལ། །ཁ་འབར་མ་ཡི་སྔགས་ཀྱི་མཐར། །བདེ་གཤེགས་བཞི་མཚན་བརྗོད་པས་བསྔོ།།ཆེ་བའི་གླུད་གཏོར་ཆང་བུ་རེ་རེ། གཙོ་མོ། འཁོར་དྲུག་ཅུ་རྩ་བཞི་ལ་རེ་རེ་ནས་བསྔོ། ཕོ་ཉ་མ་འཁོར་བཅས་ལ་བསྔོ། གླུད་རྫས་གཞན་རྣམས་ཐུན་མོང་དུ་བསྔོ། །འཁོར་རང་བཅས་པ་ཚིམ་པར་བསམ། །བྷྱོ དེ་རིང་སྲིད་པའི་རྒྱལ་མོ་གསོན། །འདོད་པ་ཁམས་ཀྱི་མ་མོའི་གཙོ༑ །ནད་བདག་ཆེན་མོའི་འཁོར་གྱིས་བསྐོར། །སྡེ་བརྒྱད་ཐམས་ཅད་ཕོ་ཉར་འགྱེད། །ཁྱོད་ལ་རྒྱུ་སྦྱོར་འཁོར་བཅས་ཀྱི། །ལན་ཆགས་ཐམས་ཅད་བསྐང་བའི་ཕྱིར། །གླུད་གཏོར་འདོད་དགུ་མཆོད་པ་འབུལ། །ཤ་འཁོན་ཉེས་པ་མཐོལ་ཞིང་བཤགས། །ཧཱུྃ གླུད་ཆེན་ངར་གྱི་མི་བོ་ཆེ། །རྒྱུ་ནི་རིན་ཆེན་བརྒྱད་ལ་བྱས། །ཞོ་ཤའི་སྙིང་ལ་ལུང་ཐང་མིག །མགྲོན་བུའི་སོ་ལ་མུ་ཏིག་ཀླད། །ཟེར་མོའི་སྒྲོ་ཡི་ཕོན་བཟང་སྐྲ། །རྐང་པ་གཡས་པ་ཐབས་ཆེན་ལྕགས། །རྐང་གཡོན་ཤེས་རབ་ཟངས་ལས་བྱས། །རྣམ་ཤེས་ལྔ་ལ་འབྲུ་སྣ་ལྔ། །སྐུ་གསུང་ཐུགས་ལ་མར་མེ་གསུམ། །སྔགས་དང་ཕྱག་རྒྱས་བྱིན་བརླབས་པས། །འབྲས་བུ་སྐུ་གསུང་ཐུགས་དང་ལྡན། །རྟེན་འབྲེལ་རྣམ་ཤེས་ལྔ་པོ་འཛོམ། །དབང་པོ་ལྔ་པོ་འདི་ལ་ཚང་། །སྐྱེ་མཆེད་བཅུ་གཉིས་དོད་པར་ཡོད། །ཕུང་པོ་ལྔས་ནི་ཤིན་ཏུ་བརྗིད། །ཁམས་ཆེན་བཅོ་བརྒྱད་མཛེས་པར་བདར། །ཡོན་ཏན་ཐམས་ཅད་འདུས་པ་འདིའི༑ །ལག་པ་གཡས་སུ་གསེར་ཁུར་ཏེ། །གསེར་འོད་རྟག་ཏུ་ལམས་སེ་ལམ། །ལག་པ་གཡོན་དུ་གཡུ་ཁུར་ཏེ། །གཡུ་འོད་རྟག་ཏུ་ཁྲོ་ལོ་ལོ། །ཡོན་བདག་ལུས་ལས་གོས་ཕུད་དེ༑ །གོས་དེ་ངར་གྱི་མི་ལ་བསྐོན། །གོས་བཟང་པོ་ཅིག་ལྷུབས་སེ་ལྷུབ། །ཡོན་བདག་སྐེ་ནས་རྒྱན་བཀྲོལ་ཏེ། །རྒྱན་དེ་ངར་གྱི་སྐེ་ལ་བཏགས། །རྒྱན་བཟང་པོ་ཅིག་བཀྲག་ཅིང་མཚར༑ །སྨྲ་མཁས་པོ་ཅིག་ངག་རེ་འཇམ། །ཚངས་པ་ཡི་ནི་གསུང་དང་ལྡན། །འགྲོ་མཁས་པོ་ཅིག་ཁྱུང་ཆེན་འགྲོས། །གླང་ཆེན་སྟབས་སུ་ལྡེགས་སེ་ལྡེག །མི་ཡི་གླུད་དུ་ང་བཟང་ཟེར༑ །ཁ་ནས་སུ་འདོད་ང་ལོངས་ཟེར། །མི་བས་གླུད་བཟང་ཡ་ལ་ལ། །རྫ་བས་ཁ་བྲོ་ཆི་ལི་ལི། །གླུད་འདི་མ་མོ་འཁོར་བཅས་བཞེས། །སྣང་སྲིད་ལྷ་འདྲེའི་ཚོགས་ལ་བགོས། །བདུད་མདའ་དེ་ནི་མཐིང་ནག་ལ། །སྒྲོ་བཟང་མདེའུས་རབ་བརྒྱན་ཏེ། །ཡས་བཞུད་ནག་པོ་དགུང་སྔོན་ནས། །མདའ་ནག་གི་ནི་ལྟོང་ལ་བརྒྱན། །ཕོ་བདུད་རྒྱལ་པོ་འཁོར་བཅས་ཀྱི། །གནས་སུ་འབུལ་ལོ་དཀོར་དུ་བསྔོ། །སྐྱེས་པ་ཕོ་ཡི་གླུད་དུ་འབུལ། །གཡུ་ཡི་དེ་ནི་མོ་འཕང་ལ། །གསེར་གྱི་མེ་ལོང་འོད་དུ་གསལ། །སྣ་ཚོགས་ཚོན་དང་རྒྱན་གྱིས་བཀྲག །མོ་བདུད་རྒྱལ་མོ་འཁོར་བཅས་ལ། །གནས་སུ་འབུལ་ལོ་དཀོར་དུ་བསྔོ། །ཟ་མ་མོ་ཡི་གླུད་དུ་འབུལ། །གཞན་ཡང་འབྲུ་ལ་ཁྲག་གིས་སྦྲུས། །འབྲང་རྒྱས་ཟུར་གསུམ་རུ་ཏྲའི་སྙིང་། །རོ་བཅུད་ཕུན་སུམ་ཚོགས་པར་ལྡན། །རི་རབ་ཆེན་པོའི་དཔངས་དང་ལྡན། །གཟུགས་མཛེས་མེ་ཏོག་སྤོས་ཆེན་དུད། །དྲི་བཟང་སྨན་དང་འབྲུ་སྣ་དང་། །ལ་རྫས་ཀླུང་རྫས་རིན་ཆེན་ནོར། །སྟག་གཟིག་ལྤགས་པ་གོས་དར་དང་། །གནམ་ལ་འཕུར་དགུ་ས་ལ་རྒྱུ། །ཆུ་ལ་འཕྱོ་བའི་སྲོག་ཆགས་རྣམས། །ནམ་མཁའི་མཛོད་ལས་ཆར་དུ་ཕབ། །བདག་དང་རྒྱུ་སྦྱོར་ཡོན་བདག་གི །བླ་ཚེ་སྲོག་དབུགས་གླུད་དུ་འབུལ། །མཐུན་པ་ཡི་ནི་གླུད་བཞེས་ཤིག །འཁོར་འདིར་ད་ནས་གནོད་མ་མཛད།། དེ་ནས་རྒྱན་གཞི་བཏིང་ལྷ་བདུད་གཉིས། །ཤྭ་བརྒྱབ་ལྷ་རྒྱལ་ལག་ཏུ་དར་འཕྱར་བསམ་ནས་སུ།བདུད་གཟུགས་མ་མོའི་མདུན་དུ་བཞག །ཤྭ་རྡེ་ནག་པོ་གཏོར། དཀར་པོ་སྤུངས་ཏེ་ལྷ་གཟུགས་རང་གི་ཁང་སྟེངས་སུའོ། ཀྱེ སྣང་ཞིང་སྲིད་པའི་ཁམས་འདི་ན། །ཅི་ལས་དབང་ཆེ་མ་མོའི་རྒྱལ༑ །དེ་རིང་རྣལ་འབྱོར་བདག་ལ་གསོན། །བདག་གིས་ཉེས་ན་ཤྭ་འདི་ཕམ། །མ་ཉེས་རྒྱལ་བ་འདི་གཟིགས་ནས། །རྒྱན་གཞི་བཏིང་བ་སླར་ལ་བསྡུས། །ཁྲམ་ཁ་བཏབ་པའི་རི་མོ་སུབས༑ །ནག་པོའི་རྡེའུ་སྤུངས་གནམ་ལ་འཐོར། །བཟུང་བ་ཐོང་ལ་ཆད་པ་འཐུད། །བཅིངས་པ་ཁྲོལ་ལ་མནན་པ་ཐེག །ཡོ་བ་སྲོངས་ལ་བུབ་པ་སློངས། །ཀྱེ ལྷ་ཆེན་དབང་ཕྱུག་མན་ཆད་ནས། །ལག་ན་གཞོང་ཐོགས་ཡན་ཆད་ཀྱི། །སྟེང་གི་ལྷ་ཚོགས་ཐམས་ཅད་ཀྱིས། །བསྐོར་ཞིང་བསྐོར་ཞིང་ཕྱག་བྱས་ཀྱང་། །ལྷ་མོས་དེ་ལ་སྤྱན་མི་གཟིགས། །ཕྱག་ལན་མི་སྟེར་ཁྲོ་ཚུལ་སྟོན། །སྟེང་གདོན་ལག་ནས་བླ་ཁུག་ཅིག །བདག་ཅག་རྣམས་ལ་གནོད་བྱེད་དེ། །ནམ་མཁའི་དབྱིངས་སུ་ཅི་བྲོས་ཀྱང་། །ཁྱོད་ཀྱི་ཕྱག་གིས་སྙབས་ཐེབས་གཅིག །ཀྱེ ས་བདག་ལྷོ་འཕྱེ་མན་ཆད་ནས། །ཐེ་རང་ཚེ་ལ་བརྐུ་ཡན་གྱི། །བར་གྱི་འདྲེ་སྲིན་ཐམས་ཅད་ཀྱིས། །བསྐོར་ཞིང་བསྐོར་ཞིང་ཕྱག་བྱས་ཀྱང་། །ལྷ་མོས་དེ་ལ་སྤྱན་མི་གཟིགས། །ཕྱག་ལན་མི་སྟེར་ཁྲོ་ཚུལ་སྟོན། །བར་གདོན་ལག་ནས་བླ་ཁུག་ཅིག །བདག་ཅག་རྣམས་ལ་གནོད་བྱེད་དེ། །བར་སྣང་སྟོང་པར་ཅི་བྲོས་ཀྱང་། །ཁྱོད་ཀྱི་ཕྱག་གིས་སྙབས་ཐེབས་གཅིག །ཀྱཻ༑ གཤིན་རྗེའི་རྒྱལ་པོ་མན་ཆད་ནས། །དམྱལ་སྲུང་བཤན་པ་གཏུམ་པོ་ཡན། །འོག་གི་འཆི་བདག་ཐམས་ཅད་ཀྱིས། །བསྐོར་ཞིང་བསྐོར་ཞིང་ཕྱག་བྱས་ཀྱང་། །ལྷ་མོས་དེ་ལ་སྤྱན་མི་གཟིགས༑ །ཕྱག་ལན་མི་སྟེར་ཁྲོ་ཚུལ་སྟོན། །འོག་གདོན་ལག་ནས་བླ་ཁུག་ཅིག །བདག་ཅག་རྣམས་ལ་གནོད་བྱེད་དེ། །ས་འོག་རིམ་དགུར་ཅི་བྲོས་ཀྱང་། །ཁྱོད་ཀྱི་ཕྱག་གིས་སྙབས་ཐེབས་གཅིག །བདག་ཅག་དཔོན་སློབ་འཁོར་བཅས་ལ། །སྔོན་གྱི་ལས་ཀྱི་རྣམ་སྨིན་གྱིས། །དུས་ལ་བབ་ནས་ཚེ་ཟད་ཀྱང་། །ལོ་བརྒྱའི་བར་དུ་བཤོལ་ཐོབ་ལ། །ཚེ་རིང་བར་ཆད་མེད་པ་དང་། །སྟོབས་དང་མངའ་ཐང་རྒྱས་པར་མཛོད། །ས་ཕྱོགས་འདི་ཡི་ནད་སོལ་ལ། །ནད་བདག་ཁྲོམ་ཁ་དགྲ་ལ་བསྒྱུར། །རིམས་ནད་གནོད་པ་དེ་རུ་ཐོང་།། དེ་ནས་མ་མོའི་ཁྲོམ་དེ་དག ཞལ་བསྒྱུར་སྡང་དགྲའི་ཡུལ་སོང་བསམ། །ངར་གྱི་བུད་མེད་ཁ་བསྒྱུར་ལ། །ཐུན་གྱིས་བྲབ་ཅིང་འདི་སྐད་བརྗོད། ཧཱུྃ ལྔ་བརྒྱ་དུས་ཀྱི་སྙིགས་མ་ལ། །གསང་སྔགས་དར་ཀྱང་དམ་ལས་གཡེལ། །ཕལ་ཆེར་ནག་པོའི་ལས་ལ་སྤྱོད། །དེ་ལ་སྲིད་པའི་རྒྱལ་མོ་འཁྲུགས། །མ་མོ་ཁྲོས་པའི་རྟགས་བསྟན་པ། །ཁ་རླངས་དཀར་པོ་བཏང་བ་ཡིས། །མཁའ་ལ་ནད་སྤྲིན་དཀར་པོ་ཆགས། །བུད་མེད་དཀར་མོས་སྟོང་གསུམ་ཁེངས། །དེ་ཚེ་ནད་ཀྱི་རྐྱལ་པ་ཕྱེ། །འདོད་ཆགས་ཀྱིས་བསྐྱེད་ནད་རིགས་ནི། །ཉི་ཁྲི་ཆིག་སྟོང་དེ་ནས་བྱུང་། །ནད་ཀྱང་ལྷ་མོ་ཁྱོད་ཀྱི་འཕྲུལ། །དལ་ཀྱང་མ་མོ་ཁྱོད་ཀྱི་རྫུ། །དེ་རིང་རྣལ་འབྱོར་བདག་ཅག་གི །རིམས་ཁ་ཆོད་ལ་དལ་ཁ་སྒྱུར། །མི་མཐུན་གནོད་པའི་རྐྱེན་རྣམས་དང་། །རླུང་ནད་ཉི་ཁྲི་ཆིག་སྟོང་བཟློག །ཀྱེ ལྔ་བརྒྱ་དུས་ཀྱི་སྙིགས་མ་ལ། །གསང་སྔགས་དར་ཀྱང་དམ་ལས་གཡེལ། །ཕལ་ཆེར་ནག་པོའི་ལས་ལ་སྤྱོད། །དེ་ལ་སྲིད་པའི་རྒྱལ་མོ་འཁྲུགས། །མ་མོ་ཁྲོས་པའི་རྟགས་བསྟན་པ། །ཁ་རླངས་དམར་སེར་བཏང་བ་ཡིས། །མཁའ་ལ་ནད་སྤྲིན་དམར་སེར་ཆགས། །བུད་མེད་དམར་སེར་སྟོང་གསུམ་ཁེངས། །དེ་ཚེ་ནད་ཀྱི་རྐྱལ་པ་ཕྱེ། །ཞེ་སྡང་གིས་བསྐྱེད་ནད་རིགས་ནི། །ཉི་ཁྲི་ཆིག་སྟོང་དེ་ནས་བྱུང་། །ནད་ཀྱང་ལྷ་མོ་ཁྱོད་ཀྱི་འཕྲུལ། །དལ་ཀྱང་མ་མོ་ཁྱོད་ཀྱི་རྫུ། །དེ་རིང་རྣལ་འབྱོར་བདག་ཅག་གི །རིམས་ཁ་ཆོད་ལ་དལ་ཁ་བསྒྱུར༑ །མི་མཐུན་གནོད་པའི་རྐྱེན་རྣམས་དང་། །ཚད་ནད་ཉི་ཁྲི་ཆིག་སྟོང་བཟློག །ཀྱེ ལྔ་བརྒྱ་དུས་ཀྱི་སྙིགས་མ་ལ། །གསང་སྔགས་དར་ཀྱང་དམ་ལས་གཡེལ། །ཕལ་ཆེར་ནག་པོའི་ལས་ལ་སྤྱོད། །དེ་ལ་སྲིད་པའི་རྒྱལ་མོ་འཁྲུགས། །མ་མོ་ཁྲོས་པའི་རྟགས་བསྟན་པ། །ཁ་རླངས་སྔོན་པོ་བཏང་བ་ཡིས། །མཁའ་ལ་ནད་སྤྲིན་སྔོན་པོ་ཆགས། །བུད་མེད་སྔོན་མོས་སྟོང་གསུམ་ཁེངས། །དེ་ཚེ་ནད་ཀྱི་རྐྱལ་པ་ཕྱེ། །གཏི་མུག་གིས་བསྐྱེད་ནད་རིགས་ནི། །ཉི་ཁྲི་ཆིག་སྟོང་དེ་ནས་བྱུང་། །ནད་ཀྱང་ལྷ་མོ་ཁྱོད་ཀྱི་འཕྲུལ། །དལ་ཀྱང་མ་མོ་ཁྱོད་ཀྱི་རྫུ། །དེ་རིང་རྣལ་འབྱོར་བདག་ཅག་གི །རིམས་ཁ་ཆོད་ལ་དལ་ཁ་བསྒྱུར། །མི་མཐུན་གནོད་པའི་རྐྱེན་རྣམས་དང་། །བད་ཀན་ཉི་ཁྲི་ཆིག་སྟོང་བཟློག །ཀྱེ ལྔ་བརྒྱ་དུས་ཀྱི་སྙིགས་མ་ལ། །གསང་སྔགས་དར་ཀྱང་དམ་ལས་གཡེལ། །ཕལ་ཆེར་ནག་པོའི་ལས་ལ་སྤྱོད། །དེ་ལ་སྲིད་པའི་རྒྱལ་མོ་འཁྲུགས། །མ་མོ་ཁྲོས་པའི་རྟགས་བསྟན་པ༑ །ཁ་རླངས་རྣམ་ལྔ་བཏང་བ་ཡིས། །མཁའ་ལ་ནད་སྤྲིན་འཇའ་ལྟར་ཆགས། །བུད་མེད་ཁྲ་མོས་སྟོང་གསུམ་ཁེངས། །དེ་ཚེ་ནད་ཀྱི་རྐྱལ་པ་ཕྱེ། །དུག་གསུམ་ཆ་མཉམ་གྱིས་བསྐྱེད་ནད༑ །ཉི་ཁྲི་ཆིག་སྟོང་དེ་ནས་བྱུང་། །ནད་ཀྱང་ལྷ་མོ་ཁྱོད་ཀྱི་འཕྲུལ། །དལ་ཀྱང་མ་མོ་ཁྱོད་ཀྱི་རྫུ། །དེ་རིང་རྣལ་འབྱོར་བདག་ཅག་གི །རིམས་ཁ་ཆོད་ལ་དལ་ཁ་བསྒྱུར། །མི་མཐུན་གནོད་པའི་རྐྱེན་རྣམས་དང་། །འདུས་ནད་ཉི་ཁྲི་ཆིག་སྟོང་བཟློག །མ་མོའི་གནོད་པ་ཐམས་ཅད་བཟློག །དྲེགས་པ་བཅོ་བརྒྱད་གནོད་པ་བཟློག །ཁྱད་པར་འགོང་པོའི་གནོད་པ་རྣམས། །སྡང་བ་དགྲ་ཡི་སྟེང་དུ་བསྒྱུར། །མི་མཐུན་རྐྱེན་རྣམས་ཐམས་ཅད་བསྒྱུར།། བུད་མེད་ནག་མོ་བཞི་ཡིས་བཏེག །སྡང་བ་དགྲ་ཡི་ཡུལ་ཕྱོགས་བསྐྱལ། །དེ་ནི་པད་དཀར་ཞེས་བྱ་བའི། །རིགས་སྔགས་འཆང་གིས་སྦྱར་བ་ཡིན༑ །གཅེས་པ་སྙིང་དང་འདྲ་བར་བྱོས།། །།མདྒལཾ།། །། དུད་སོལ་རིགས་བཞིའི་སྒོ་ནས་འཕྲིན་ལས་བཞི་སྒྲུབ་དཔག་བསམ་གྱི་འཁྲི་ཤིང་།དུད་སོལ་རིགས་བཞིའི་སྒོ་ནས་འཕྲིན་ལས་བཞི་སྒྲུབ་དཔག་བསམ་གྱི་འཁྲི་ཤིང་བཞུགས་སོ། །ཡོན་ཏན་རེ་རེའི་ཚད་ཀྱང་མཁའ་མཉམ་པའི། །ཡེ་ཤེས་གོ་ས་ཆེན་པོར་གཤེགས་པའི་རྗེ། །མཚུངས་མེད་མཐུ་སྟོབས་ཞབས་མཐིལ་ལས་ཟགས་པའི། །དམར་བའི་ལི་ཁྲིས་སྤྱི་བོར་བདེ་ལེགས་མཛོད། །ཞི་རྒྱས་དབང་དང་མངོན་སྤྱོད་ཕྲིན་ལས་སོགས། །རང་འདོད་སྦྱིན་ལ་ཡིད་བཞིན་ནོར་བུ་དང་། །ཡོངས་འདུའི་ཤིང་གིས་མི་འགྲན་བཅོམ་ལྡན་མ། །དུད་སོལ་ལྷ་མོའི་གཙོ་དེས་བྱིན་གྱིས་རློབས། །འདི་ན་ཕལ་ཆེར་ཅལ་བརྒྱུགས་ཡོས་གུམ་ཕྱིར། །ངེས་གསང་རོ་བརྒྱའི་ཁ་ཟས་རྦབ་ཏུ་གྲིལ། །དེ་དག་བསམ་གྱིན་རི་དྭགས་མིག་ཅན་མ། །ཟབ་མོའི་མན་ངག་ལ་འདུན་སྔོན་བསགས་མཐུ། །དྲེགས་པར་བསྔགས་ཤིང་གྲགས་ལྡན་སྲུང་མའི་ཚོགས། །བོང་བ་ཇི་བཞིན་གངས་རིའི་ཁྲོད་འདིར་མོད། །སྙིང་ནས་རྟོགས་དང་མཐུ་རྩལ་འབྱིན་པ་ལ། །ཁམས་གསུམ་བདག་མོ་འདི་མཉམ་ག་ན་ཡོད། །དེ་ཕྱིར་དྭངས་བའི་རིན་ཆེན་བུམ་བཟང་དུ། །སྙིང་གི་ཐིག་ལེ་ཞུ་བའི་བདུད་རྩི་འདི། །བསྐྱིལ་ནས་ར་ས་ཡ་ནར་གང་གིས་སྤྱད། མི་དེ་དངོས་གྲུབ་མ་ལུས་གེགས་མེད་འགྲུབ།། འཕྲིན་ལས་བཞི་བསྒྲུབ་པ་ལ་དབང་ཕྱུག་ཆེན་པོའི་གནས་ཐོབ་པར་འདོད་ན། བཅོམ་ལྡན་འདས་དུད་སོལ་རིགས་བཞིའི་བསྒྲུབ་པ་ལ་འཇུག་པར་བྱ་སྟེ། དཀར་མོ་ལ་བརྟེན་ནས་ནད་གདོན་ཞི་བའི་ཚེ་སྒྲུབ། སེར་མོ་ལ་བརྟེན་ནས་འཛད་པ་མེད་པའི་ནོར་སྒྲུབ། དམར་མོ་ལ་བརྟེན་ནས་དབང་དུ་སྡུད་པ་སྒྲུབ། ནག་མོ་ལ་བརྟེན་ནས་དྲག་པོའི་ལས་སྒྲུབ་པ་དང་བཞི་ལས། དང་པོ་ནི། མཆོད་རྫས་གཏོར་མ་དང་བཅས་པ་བཤམས། བདེ་བའི་སྟན་ལ་འདུག་སྟེ། རང་ཉིད་ཀྱི་གསང་གནས་ཀྱི་འཁོར་ལོའི་ཐབ་ཁུང་དུ་ཨ་ཤད་ལས་མ་མོའི་ཚོགས་ཀྱི་དབང་ཕྱུག་མ་ཞི་བའི་སྐུ་ཅན་དཀར་པོ་ཞལ་གྱེན་དུ་གདངས་པ་འབར་བའི་མེའི་རང་བཞིན། སྤྱི་བོར་ཧཾ་ལས་བདུད་རྩི་གོང་བུ་འཁྱུགས་པ། སྙིང་ནང་དུ་སྡིག་སྒྲིབ་ཀྱི་ས་བོན་ཀཾ་ལས་ཕུང་པོ་ཉོན་མོངས་ལྷ་དང་འཆི་བདག་གི་བདུད་བཞི་མི་སྡུག་པའི་གཟུགས་ཅན་ཁྲོ་ཞིང་གཏུམ་པ། བརྐྱང་མའི་བླུགས་གཟར་གྱིས་བླངས། རོ་མའི་དགང་གཟར་དུ་བླུག བཅོམ་ལྡན་འདས་མའི་ཞལ་དུ་ཕུལ་བས་བཞེས། མེའི་དྲོད་ཀྱིས་སྤྱི་བོའི་བདུད་རྩི་བཞུ་བའི་རྒྱུན་གྱིས་ནད་ཐམས་ཅད་རྣག་ཁྲག་གི་རྣམ་པར་རྐང་པའི་མཐེ་བོང་ཚུན་དུ་དེད་པས། དེ་ནས་ཕྱིར་འཐོན་ལུས་དྲི་མ་མེད་པར་གྱུར་པའི་བདུད་རྩི་ལྷ་མོས་གསོལ་བས་མཉེས་ཏེ་བདེ་སྟོང་གཉིས་སུ་མེད་པའི་ཡེ་ཤེས་ཀྱི་མེར་འབར་བས་རྣམ་སྨིན་གྱི་ལུས་ཐལ་བ་ཙམ་དུ་ཡང་མ་ལུས་པར་བསྲེགས། ཨོཾ་བཾ་སྭཱ་ཧཱ་ཞེས་བརྗོད་པས་པདྨའི་གདན་ལ་རང་ཉིད་ཟླ་བ་ཆུ་ཤེལ་གྱི་བུམ་པ་བཟང་པོ་དཔག་བསམ་གྱི་མེ་ཏོག་དང་འདབ་མས་བརྒྱན་པ། ནང་དུ་ཟླ་བ་ལ་བཾ་བདུད་རྩི་འཛག་པས་བུམ་པ་མས་རིམ་གྱིས་འགེངས་པ། མདུན་གྱི་ནམ་མཁར་མ་མོའི་ཚོགས་ཀྱི་དབང་ཕྱུག་མ་དཀར་མོ་འོད་ཟེར་གྱི་སྣང་བ་མཆོག་ཏུ་འབར་བ་བཅུ་གཉིས་ལོན་པའི་ལང་ཚོ་ཅན། ནུ་འབུར་རྒྱས་ཤིང་སྐད་པ་ཕྲ་བ། མཛེས་སྡུག་མཚུངས་པ་མེད་པ་རིན་པོ་ཆེ་དང་མེ་ཏོག་དཀར་པོས་སྤྲས་པ། རྩ་བའི་ཕྱག་གཉིས་ལྷན་ཅིག་པས་ཆུ་ཤེལ་གྱི་བུམ་པ་ལྷའི་བདུད་རྩིས་གང་བ་བསྣམས་ཤིང་། །འོག་མ་སྐྱབས་དང་མཆོག་སྦྱིན་པའི་ཕྱག་རྒྱ་ཅན་སེམས་དཔའི་སྐྱིལ་ཀྲུང་གིས་བཞུགས་པ། ཨོཾ་བ་དཱ་ར་དྷཱུ་པདྒཱ་རི་ཨཱརྒྷཾ། པཱ་དྱཾ། པུཥྤེ། དྷུ་པེ། ཨཱ་ལོ་ཀེ གནྡྷེ། ནཻ་ཝི་དྱ། ཤཔྟ་པྲ་ཏཱིཙྪ་ཧཱུྃ། ཟླ་བ་ཆུ་ཤེལ་གཟུགས་ཅན་བཅོམ་ལྡན་མ། །བདུད་རྩི་འོད་ཀྱི་རྦ་རླབས་ཅི་ཡང་གིས། །སྡིག་སྒྲིབ་བདུད་གདོན་ནད་རྣམས་ཞི་བྱེད་པ། །ཁྱོད་ཀྱི་ཐུགས་རྗེས་བདག་ལ་བདེ་ལེགས་མཛོད། །ཅེས་བསྟོད། དེའི་ཐུགས་ཀ་ནས་འོད་འཕྲོས་འཇིག་རྟེན་ཁམས་ཀྱི་ཚེ་ཤེས་རབ་བསོད་ནམས་ཐམས་ཅད་བསྡུས། ཕྱག་གི་བུམ་པར་ཐིམ། དེ་ལུས་དམ་ཚིག་གི་བུམ་པར་གསལ་བའི་ནང་དུ་ལྷག་མ་མེད་པར་བྱོ་བས་དམ་ཚིག་དང་ཡེ་ཤེས་འདྲེས་པ་འཆི་བ་མེད་པའི་བདུད་རྩིར་གྱུར་པ་ཆི་ལི་ལི་ལུད་པ་འགྲོ་བ་ཐམས་ཅད་ཀྱིས་འཐུངས་ཤིང་བཀྲུས་པས་སྡུག་བསྔལ་དང་མྱ་ངན་ཡིད་མི་བདེ་བ་ཐམས་ཅད་དག་ཅིང་འཆི་བ་མེད་པའི་ཚེ་གྲུབ་པར་བསམ་སྟེ། བཾ་ཨ་མཱ་ར་ཎི་ཛཱི་ཝནྟཱི་ཡེ་སྭཱ་ཧཱ། ཞེས་འབུལ་ཕྲག་བཞིར་བཟླས། མཐར་གཏོར་སྣོད་བྷཉྫྱ་ཡངས་ཤིང་རྒྱ་ཆེ་བའི་ནང་དུ་གཏོར་རྫས་ཧ་ཧོཿསྲཱིཿཧས་གཏོར་མའི་ཁ་དོག་གསེར་ཞུན་མ་ལྟ་བུ། ཧོཿས་དྲི་ངན་པ་བཅོམ་ནས་དྲི་བཟང་པོ་སི་ལྟ་བུ། སྲཱིཿས་རོ་ངན་པ་བཅོམ་ནས་རོ་ཕུན་སུམ་ཚོགས་པ་ལྷའི་བདུད་རྩིར་གྱུར་པར་བསམས་ལ། ཨོཾ་བ་དྭ་ར་དྷཱུ་མདྒཱ་རི་བྷ་ལིང་ཏ་ཁ་ཁ་ཁཱ་ཧི་ཁཱ་ཧི་ལན་གསུམ་གྱིས་ཕུལ། ཏིལ་མར་མའི་བསྟོད་པ་བརྒྱ་རྩ་གཅིག་ཙམ་བརྗོད་པར་བྱའོ། །མཐར་བཅོམ་ལྡན་འདས་མ་མདུན་གྱི་བུམ་པར་ཐིམ། དེ་ཉིད་འཆི་བ་མེད་པའི་གཟུགས་བཾ་ཡིག་ཏུ་བརྟགས་ཏེ། དམིགས་པ་མེད་པའི་ཤེས་རབ་མའི་ཞལ་བལྟའོ། །རྗེས་མཐར་ཐུག་གི་ཚེ་འགྲུབ་པའི་རྒྱུར་དགེ་བ་བསྔོའོ། །གཉིས་པ་ནི། རིན་པོ་ཆེ་དང་སྨན་འབྲུ་དར་ཟབ་གཟུངས་སུ་བྱས་པའི་རྟེན་གཏོར། མཆོད་གཏོར། མཆོད་རྫས་དང་བཅས་པ་བཤམ། སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཐམས་ཅད་དང་མི་འབྲལ་བར་འདོད་པའི་དགའ་བའི་སེམས་ཀྱིས་དེ་ཐམས་ཅད་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་རྒྱས་པའི་ལས་བསྒྲུབ་པར་བྱའོ་སྙམ་པས། བདག་ཉིད་ལྷག་པའི་ལྷར་སྐད་ཅིག་གིས་གསལ་བཏབ། །མདུན་དུ་རྟེན་གཏོར། ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨྨུཿསྭ་བྷཱ་ཝ་ཤུདྡྷཱོ་ཧཾ། སྟོང་པའི་ངང་ལས། དགོས་འདོད་ཐམས་ཅད་འབྱུང་བ་ཡིད་བཞིན་གྱི་ནོར་བུའི་ས་གཞིར་རིན་པོ་ཆེའི་དཔག་བསམ་གྱི་ཤིང་ལ་རྒྱབ་བརྟེན་པ། ཨཾ་ལས་མ་མོའི་ཚོགས་ཀྱི་དབང་ཕྱུག་མ་གསེར་བཙོ་མའི་མདོག་ལྟ་བུ། ཞལ་བཞད་པའི་ཉམས། སྤྱན་གསུམ་ཅུང་ཟད་ཟླུམ་པ། ཕྱག་གཡས་པ་གཉིས་ཡིད་བཞིན་གྱི་ནོར་བུ་བསམ་འཕེལ་དང་དཔག་བསམ་གྱི་ཤིང་། གཡོན་བུམ་པ་བཟང་པོ་དང་འདོད་འཇོའི་བ། ཨུཏྤལ་དང་རིན་པོ་ཆེས་བརྒྱན་པ། གཅེར་བུ་ཆགས་པ་རྒྱས་པའི་ཉམས་ཅན། །ཞབས་བགྲད་པའི་མཐིལ་ཨ་པ་ར་ཙི་ཏ་ཁྱོ་ཤུག་ནོར་བུ་སྐྱུག་པའི་ནེའུ་ལེའི་གཟུགས་ཀྱི་སྤྱི་བོ་དང་ལག་པས་པདྨ་བརྟེན་པ། མདུན་དུ་ཀླུའི་རྒྱལ་པོ་རྒྱ་མཚོ་ཡིད་བཞིན་གྱི་ནོར་བུས་སྤྲས་པའི་གདེང་ཀ་བདུན་གྱིས་བརྗིད་ཅིང་ལག་ན་རིན་པོ་ཆེའི་གཞོང་པ་འཛིན་པ། བཅོམ་ལྡན་འདས་མའི་བཀའ་སྒྲུབ་པ་པོ་འདི་འདོད་པའི་རིན་པོ་ཆེ་ཐམས་ཅད་སྦྱིན་ཞིག ཅེས་བསྒོ་བ་ཐོད་དུ་བཀུར་ཞིང་ནོར་བུའི་ཁྲོན་པ་ནས་ལུས་ཕྱེད་སྣང་བ་གསལ་བཏབ་ནས། ཨོཾ་པཱ་རི་དྷཱུ་མདྒཱ་རི་ཨཱརྒྷཾ་པཱ་དྱཾ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཤཔྟ་པྲ་ཏིཙྪ་ཧཱུྃ། སྐྱེ་བོ་གཏེར་དང་རིན་ཆེན་ཁ་ཟས་ཀྱི། །ཟད་མེད་ཚིམ་བྱེད་ནམ་མཁའི་མཛོད་མངའ་བའི། །མ་མོའི་ཚོགས་རྗེ་སྲིད་གསུམ་ཚོགས་ཀྱི་བདག །ལྷ་མོ་མཆོག་གི་ཞབས་ལ་ཕྱག་འཚལ་ལོ། །དེའི་ཐུགས་ཀར་རིན་པོ་ཆེ་ཆ་དགུ་པའི་ཁོངས་སུ་ཨཾ་དེ་ལས་འོད་ཟེར་སེར་པོ་འཕྲོས་པས་རིན་པོ་ཆེའི་རིགས། གོས་མལ་ཆ། དར་ཟབ། ཇ། བཟའ་བཏུང་། སྨན། འབྲུ། མདོར་ན་ཕུན་སུམ་ཚོགས་པའི་འབྱོར་པ་ཐམས་ཅད་བསྡུས། ཞལ་ནས་ཞུགས། ཐུགས་ཀར་བྱང་ཆུབ་ཀྱི་སེམས་རིན་པོ་ཆེ་སྦྱར་བ་བྷ་ག་ནམ་མཁའི་ཁམས་ནས་བདག་ཅི་འདོད་པའི་ལོངས་སྤྱོད་མོད་ལ་ཆར་བཞིན་དུ་འབེབས་པས་རང་གི་ཁང་ཁྱིམ་ཡུལ་འཁོར་ཐམས་ཅད་གང་བར་གྱུར་པར་བསམ་སྟེ། །ཨོཾ་མ་མ་ཏི་རོ་ལུ་རོ་ལུ་ག་ག་ན་གཉྫྱ་སིདྡྷི་མེ་པྲ་ཡཙྪནྟུ། ཞེས་བཟླས་པས་ནམ་མཁའི་མཛོད་ཀྱི་དངོས་གྲུབ་ཐོབ་པར་འགྱུར་རོ། །མཐར་གཏོར་མ་བྱིན་གྱིས་བརླབས། ཨོཾ་པཱི་ར་དྷཱུ་མངྒཱ་རི་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧིས་ཕུལ། ཏིལ་མར་མས་བརྒྱ་ཙ་ཙམ་བསྟོད། མཐར་དམིགས་པ་མེད་པའི་ཤེས་རབ་ཀྱི་ངང་ལ་བཞག་དགེ་བ་མི་ཟད་པའི་ལོངས་སྤྱོད་སེམས་ཅན་ལ་སྤེལ་བའི་ཆེད་དུ་བསྔོའོ། །གསུམ་པ་ནི། སེམས་ཅན་ཐམས་ཅད་ལ་བྱམས་པའི་སེམས་ཀྱིས་རྗེས་སུ་ཆགས་པས་དེ་དག་བླ་ན་མེད་པའི་བྱང་ཆུབ་ལ་འགོད་པའི་ཕྱིར་དབང་གི་ལས་བསྒྲུབ་པར་བྱའོ་སྙམ་པས། ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨཿསྭ་བྷཱ་ཝ་ཤུ་དྡྷཱོ་ཧཾ། རང་ཉིད་ཨཾ་ཡིག་ལས་མ་མོའི་ཚོགས་ཀྱི་དབང་ཕྱུག་མ་འཆར་ཀའི་འོད་ཀྱིས་འཁྱུད་པའི་བྱུ་རུའི་རི་བོ་ལྟ་བུའི་སྐུ། བརྒྱད་གཉིས་ལོན་པ། རྣམ་པར་སྒེག་ཅིག་ཞལ་མཆེ་བ་གཙིགས་པ་ལྗགས་འདྲིལ་བ། སྤྱན་གསུམ་དམར་ཟླུམ་ཁྲོ་ཞིང་གཏུམ་པ། ཕྱག་རྒྱ་ལྔ་དང་ཐོད་པ་སྐམ་པོའི་ཅོད་པན། རློན་པའི་དོ་ཤལ། སྟག་ཤམ་ཅན། ཕྱག་གཡས་གཉིས་ལྕགས་ཀྱུ་ལྕགས་སྒྲོག གཡོན་གཉིས་རྡོ་རྗེའི་ཞགས་པ་དང་དྲིལ་བུ་འཛིན་པ་སྐྱིལ་ཀྲུང་ཕྱེད་པའི་གར་གྱིས་རོའི་སྙིང་གར་ཉི་མ་ལ་རོལ་པ། གནས་གསུམ་དུ་ཨོཾ་ཨཱཿཧཱུྃ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རང་བཞིན་གྱིས་མཚན་པ། ཙིཏྟའི་དབུས་ན་ཨཾ་སྔགས་ཀྱི་འཕྲེང་བས་བསྐོར་བས། ཐུགས་ཀ་ནས་འོད་འཕྲོས། བསྒོམས་པ་དང་འདྲ་བའི་བཅོམ་ལྡན་འདས་མ་མདུན་གྱི་ནམ་མཁར་སྤྱན་དྲངས། ཨོཾ་ལོ་ཧི་ཏ་དྷཱུ་མདྒཱ་རི་ཨརྒྷཾ་ནས་ཤཱུའི་བར་གྱིས་མཆོད། །དབང་ཕྱུག་ཚངས་པ་ཡིད་སྲུབས་ནོར་ལྷ་སྐྱོང་བ་བཞི་དང་ལྷ་མིན་དང་། །འཁོར་ལོ་བསྒྱུར་རྒྱལ་གདེངས་ཅན་དབང་དང་གཤིན་རྗེའི་བདག་པོ་སྡེར་བཅས་པ། །དབང་དུ་སྡུད་མཛད་ཉི་མ་འཆར་ཀའི་དབུས་སུ་བྱུ་རུའི་རི་ཞུགས་ལྟར། །ལྷག་པར་བརྗིད་པའི་གཟི་ཆགས་ཁྱོད་ཀྱི་བདག་ལ་རྗེས་བརྩེར་མཛད་དུ་གསོལ། །ཞེས་བསྟོད། ཛཿཧཱུྃ་བཾ་ཧོཿསླར་ཡང་ཐུགས་ཀའི་འོད་ཀྱིས་རིགས་ལྔ་བསྐུལ་བས་འདུད་རྩིས་གང་བའི་བུམ་པ་བསྣམས་ཏེ་སྤྱི་བོར་དབང་བསྐུར་ལུས་གང་། དྲི་མ་དག་ཆུ་རྒྱུན་སྤྱི་བོར་འཁྱིལ་བ་མི་བསྐྱོད་འོད་དཔག་མེད་ཀྱིས་དབུ་བརྒྱན་པར་གྱུར། དེ་ནས་གང་དབང་དུ་བྱ་འདོད་པ་དེ་བཅོམ་ལྡན་འདས་མའི་ཕྱག་གི་ལྕགས་ཀྱུས་སྐྱེས་པའི་སྙིང་དང་། བུད་མེད་ཀྱི་བྷ་གར་བཏབ། །རྡོ་རྗེའི་ཞགས་པས་བཅིངས། ལྕགས་སྒྲོག་གིས་བསྡམས། དྲིལ་བུས་མཉེད་ཅིང་རླུང་ལ་བསྐྱོན། མེས་གདུངས་ཏེ་མདུན་དུ་བདག་ལ་ཆགས་པས་རང་དབང་མེད་པར་འདར་ཡཾ་ཡཾ་འདུད་པ་གན་རྐྱལ་མགོ་བོ་རང་གི་རྐང་པ་ལ་ཕྱོགས་པའོ། །སླར་ཡང་ཐུགས་ཀ་ནས་བདེ་བའི་འོད་ཀྱིས་དེ་སྐྱོབ་པའི་ལྷ། བསྲུང་བའི་རིམ་གྲོ་བ་ཐམས་ཅད་བདེ་བས་བརྒྱལ་བས་དེ་སྐྱབས་དང་བྲལ། དེ་ནས་ཤངས་གཡས་ནས་རླུང་ལྕགས་ཀྱུ་ལྟ་བུ་གང་ལ་རེག་པ་ཐམས་ཅད་དབང་དུ་སྡུད་ནུས་པ་སྤྲོས། བསྒྲུབ་བྱ་དེའི་སྣ་གཡས་པར་སོང་། སྙིང་ག་ནས་དེའི་སྲོག་གཟུགས་ཁ་རྗེ་དབང་ཐང་མཐུ་སྟོབས་ཀྱི་སྙིང་པོ་ལྷྭནྲི་དྲངས་ཏེ་སྣ་གཡོན་ནས་རང་གི་ཤངས་གཡོན་བརྒྱུད་སྙིང་གའི་ཨཾ་གི་གདན་དུ་ཁབ་ལེན་དང་ཕྲད་པའི་ལྕགས་བཞིན་རང་དབང་མེད་པར་ཁྲི་ལི་ལི་འདུག་པར་བསམས་ནས། ཨོཾ་ཨཾ་ཆེ་གེ་མོ་བ་ཤཾ་ཀུ་རུ་སྭཱ་ཧཱ། འབུམ་ཕྲག་གཅིག་གིས་གང་འདོད་པ་དབང་དུ་བྱེད་དོ། །ཡང་ན་སྔགས་འཕྲེང་ལས་འོད་ཟེར་གྱི་ཚོགས་ཀྱི་འཇིག་རྟེན་གྱི་ཁམས་ཐམས་ཅད་སྣང་བར་མཛད་ནས་སེམས་ཅན་ཐམས་ཅད་ཀྱི་སྙིང་ལ་ཞུགས་ཏེ། དེའི་སྲོག་ཡང་དག་པར་བཀུག་ནས་རང་གི་ལྟེ་བ་ནས་ཞུགས་ཏེ་སྙིང་གའི་ས་བོན་གྱི་གདན་དུ་སྔར་བཞིན་དུ་བལྟའོ། །མཐར་ཤེས་རབ་ཀྱི་ཡུམ་དྲན་པར་བྱ། དེ་ནས་གཏོར་མགྲོན་གྱི་བཅོམ་ལྡན་འདས་མ་ཕེཾ་གྱིས་སྤྱན་དྲངས། གཏོར་མ་བྱིན་གྱིས་བརླབས་ནས། ཨོཾ་ལོ་ཧི་ཏ་དྷཱུ་མདྒཱ་རི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཞེས་པས་ཕུལ། འདོད་དོན་གསོལ་ཏེ་རང་ལ་བསྡུའོ། །ཚེས་བརྒྱད་དང་བཅུ་དང་བཅུ་བཞི་ཉེར་ལྔ་ཉེར་དགུ་མཁའ་འགྲོ་འདུ་བའི་དུས་སུ་མེ་ལོང་གཙང་མའི་ཁར་ཐང་ཁྲོམ་གྱི་ཆུ་ལ་བུ་རམ་ཅུང་ཟད་སྦྱར་སྐྱེས་པ་དབང་དུ་བྱེད་འདོད་ན་པདྨ་རཀྟ། བུད་མེད་ལ་སྐྱེས་པའི་བྱང་སེམས་སྦྱངས་པས་གཤེར་བའི་ཁར་ལི་ཁྲིས་ཟླ་གམ་གྱི་དཀྱིལ་འཁོར་བྱ། དེའི་དབུས་སུ་བཅོམ་ལྡན་འདས་མའི་ས་བོན་ཨཾ་བྲིས། མཐའ་མ་གཏོར་མ་མེ་ཏོག་དང་དར་དམར་པོ་དང་ཙན་དན་དམར་པོའི་ཆུ་བདུག་སྤོས་སོགས་ལས་དང་རྗེས་སུ་མཐུན་པའི་མཆོད་པ་བཤམ། དེ་ནས་དཀྱིལ་འཁོར་སྭ་བྷཱ་ཝས་སྦྱངས། སྟོང་པའི་ངང་ལས་མ་མོའི་ཚོགས་ཀྱི་དབང་ཕྱུག་མ། ཞེས་ནས་དབུ་བརྒྱན་པར་གྱུར་ཅེས་པའི་བར་བདག་བསྐྱེད་བཞིན་ལ། ཆུ་གཉིས་སྔོན་དུ་འགྲོ་བའི་རྣམ་ལྔ་རོལ་མོ་དང་བཅས་པས་མཆོད། སྔར་གྱི་བསྟོད་པའི་སྟེང་དུ་ཏིལ་མར་མ་ཅི་ཙམ་ནུས་ཀྱི་བར་དུ་འདོན། མཐར་འདོད་དོན་གསོལ་ཏེ་གཏོར་མ་ཕུལ། འོད་དུ་ཞུ་བ་སིནྡྷུ་ར་ལ་བསྟིམ། དེས་རང་གི་དཔྲལ་བར་ཐིག་ལེ་བྱའོ། །དེ་ནས་བདག་བསྐྱེད་བསྒོམས་ཏེ་དགེ་བ་བསྔོ་བའི་བར་སྔར་བཞིན་ནོ། །བཞི་པ་ནི། གདུག་པ་ཅན་ཐམས་ཅད་ལ་སྙིང་རྗེའི་ཤུགས་ཀྱིས་ཆེར་ཁྲོས་པས་དེ་ཐམས་ཅད་བསྒྲལ་ཏེ་བླ་ན་མེད་པའི་བྱང་ཆུབ་ཏུ་འདྲེན་པའི་ཕྱིར་དྲག་པོའི་ལས་བསྒྲུབ་པར་བྱའོ་སྙམ་དུ་བསམ་པར་བྱའོ། །དེ་ནས་ཨོཾ་སྭ་བྷཱ་ཝ་སོགས་བརྗོད། སྟོང་པའི་ངང་ལས་བཅོམ་ལྡན་འདས་མ་དུད་པའི་སོལ་བ། ནག་པོའི་སྤྲིན་དང་བུང་བ་ལྟར་གནག་པ། ཞེས་ནས་མ་མོ་མཁའ་འགྲོ་ཐམས་ཅད་དབང་དུ་བསྡུ་བའི་སྐུར་གྱུར་ཏེ་ཉི་མའི་གཞལ་ཡས་ཁང་འབར་རབ་ཏུ་འབར་བས་ཕས་ཀྱི་སྔགས་ཀྱི་ནུས་པ་ཐམས་ཅད་གཞོབ་ཏུ་སྲེགས་པའི་ནང་དུ་བཞུགས་པ། དེའི་ཐུགས་འོད་ཀྱི་སྒོ་ངའི་དབྱིབས་ཅན། དེའི་ནང་དུ་རང་ཉིད་དང་གང་ཙམ་བསྲུང་བར་འདོད་པའི་ཡུལ་འཁོར་ཚུད་པར་བསམས་ཏེ་ཡེ་ཤེས་ཀྱི་ལྷ་མོ་སྤྱན་དྲངས། ཛཿཧཱུྃ་བཾ་ཧོཿགཉིས་སུ་མེད་པར་བསྟིམ། དེ་ནས་བཅོམ་ལྡན་འདས་མའི་སྐུ་ལས་ལས་བྱེད་ཀྱི་ཕོ་ཉ་མོ་ཁྲོ་ཞིང་གཏུམ་པ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཐོགས་པ་དཔག་ཏུ་མེད་པ་སྤྲོས། འཇིག་རྟེན་གྱི་ཁམས་ཀྱི་བསྟན་པ་དང་སེམས་མན་ཅན་ལ་གནོད་པར་བྱེད་པ། དམ་ཚིག་གཉན་པོ་འདྲལ་བ། མཚམས་མེད་པའི་ལས་བགྱིད་པ། དངོས་གྲུབ་རྣམ་གཉིས་ལ་བར་དུ་གཅོད་པའི་བདུད་བགེགས་ལོག་འདྲེན་གདོན་ལྟས་ངན་པ་གཏོང་བའི་བདག་པོ་ཐམས་ཅད་རང་ལ་བྱད་བྱེད་པའི་དམིགས་བྱ་དེ་ལ་བསྡུས། དེའི་སྙིང་ལ་ལྕགས་ཀྱུས་བཏབ། ཞགས་པས་རྐེ་བཅིངས། ལྕགས་སྒྲོག་གིས་ཡན་ལག་བསྡམས། དྲིལ་བུས་ལུས་བརྡུང་བཞིན་དུ་མདུན་དུ་འབྲུབ་ཁུང་གཤིན་རྗེའི་བཙོན་དོང་འཇིགས་སུ་རུང་བའི་ལྕགས་ཁང་ཟུར་གསུམ་ནང་དུ་བཅུག གན་རྐྱལ་དུ་འགྱེལ་ཏེ་བཞག་པ་ལ། སླར་ཐུགས་ཀ་ནས་རྨོངས་བྱེད་རེངས་བྱེད་མྱོས་བྱེད་ཀྱི་དུག་རླངས་སྤྲོས་པ་ཁོའི་ལུས་ལ་ཞུགས། ལུས་ཐམས་ཅད་ཁྱབ་པས་ཁོའི་སྙིང་གའི་ལྷྭནྲི་ལས་སྲོག་ལྷ། ཕྲག་པ་གཡས་ཀྱི་ཨ་ལས་ཕོ་ལྷ། གཡོན་གྱི་སྙེ་ལས་ཞང་ལྷ། མཆན་གཡས་ཀྱི་ཤེ་ལས་དགྲ་ལྷ། གཡོན་གྱི་ཨུ་ལས་ཡུལ་ལྷ་ཐམས་ཅད་རྨོངས་རེངས་མྱོས་ཏེ་ཁོ་ལ་ཁྲོས་འཁྲུགས་ཆེར་འཁྲུགས་པས་དུག་གི་སྡིག་པ་ནག་པོ་འཇིགས་སུ་རུང་བ་ལྔར་གྱུར་ཏེ། སྙིང་གི་སྲོག་ལྷྭནྲི་ལ་རུབ་སྟེ་ཟོས། དེ་ནས་དོན་ལྔ་སྣོད་དང་ཤ་རུས་ཟོས་ཁྲག་འཐུངས་ཏེ་ལྷག་མ་མེད་པར་བཏང་། དེའི་མཐར་ཁོ་རང་ཚོ་གཅིག་ལ་གཅིག་འཇུས་ཏེ་འཛིང་ཞིང་བཟས་པས་ཐམས་ཅད་དངོས་མེད་དུ་སོང་བར་བསམས་ལ། ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་མ་མ་ཏྲི་རུ་ལུ་རུ་ལུ་བྷྱོ། ཧཱུྃ་བཛྭ་སརྦ་དུ་སྟན། རྦད་ནན། ཨེ་ཧུར་ཐུམ་ཛ། ཤ་ཏྲཱུན་མཱ་ར་ཡ་རྦད། ཨེ་ས་མ་ཡ་དགྲ་བོ་ལ་བྷྱོ་བྷྱོ། བྱད་མ་ཨ་མུ་ཀཾ། དགྲ་བོ་ཆེ་གེ་མོ། ཤ་ཏྲཱུན་ཏིག་ནན། ཙིཏྟ་རྦད་ནན། ལྷྭནྲི་ཧུར་ཐུམ་ཛཿམཱ་ར་ཡ་རྦད། སོད་ནན། ཁཾ་ཤག་རོ་མྱགས་མུག་ཏི་རྦད་ཡ། དགྲ་བོ་ཆེ་གེ་མོའི་སྲོག་རྩ་དམར་པོ་མཱ་ར་ཡ། ལྷྭནྲི་རྦད་ཙ་ཏིག་སྲོག་ཏིག་སྙིང་ཏིག་ལ་ཕོབ་ཡ། ཞེས་བཟླའོ། །དམིགས་རྟེན་འབེན་དུ་བཅའ་ན་དམར་གྱི་གཏོར་ཆེན། དེའི་མདུན་དུ་འབྲུབ་ཁུང་། དེའི་ནང་དུ་ལིདྒ་ལ་སྔགས་ཀྱིས་བསྐོར་བ་བཅུག སྔར་གྱི་བསམ་གཏན་དང་བཟླས་པའི་མཐར་ལིདྒ་དུམ་བུར་གཏུབས་ལ་དྲག་པོའི་གཏོར་ཟོར་དང་ལྷན་ཅིག་འཕང་བར་བྱའོ། །ཀུན་ཏུ་དགའ་བས་བླ་མ་ལྷ་ཡི་ཞབས། །དཔལ་གྱི་སྒྲོན་མ་འབར་འདྲ་ཟུར་ཕུད་རྩེར། །འཛིན་པའི་ས་སྐྱོང་མ་བཞེད་སྐོང་བའི་རྒྱུར། །མན་ངག་དཔག་བསམ་འཁྲི་ཤིང་འདི་ན་འཁྲུངས། །པདྨའི་ཟབ་རྒྱས་དྲི་བཟང་རྫོགས་པ་དང་། །རྣམ་དཀར་ཡོན་ཏན་མེ་ཏོག་འབྱུང་ཁུངས་འདིས། །སློང་བ་པོ་ལ་རྒྱལ་མཚན་རྩེ་མོ་ཡི། །ཡིད་བཞིན་ནོར་བུར་སྡུད་བཞིན་མཁོ་བ་སྦྱར། །གང་གི་དགེ་ལེགས་ཡར་གྱི་ཟླ་ཤེལ་ནི། །འཕེལ་བས་ས་འདི་དཀར་ཕྱོགས་འབའ་ཞིག་ཏུ། །གྱུར་ཅེས་སྨོན་པའི་བློ་ལྡན་དེའི་རེ་བ། །གེགས་མེད་གྲུབ་པ་དུད་སོལ་ལྷ་མོས་མཛོད།། །།མདྒ་ལཾ།། །། དུད་པའི་སོལ་བ་མའི་རྫོགས་རིམ་དེ་ཁོ་ན་ཉིད་བཞིའི་སྒྲུབ་པ།དུད་པའི་སོལ་བ་མའི་རྫོགས་རིམ་དེ་ཁོ་ན་ཉིད་བཞིའི་སྒྲུབ་པ་ཞེས་བྱ་བ་བཞུགས་སོ། །བླ་མ་དམ་པའི་ཞབས་ལ་ཕྱག་འཚལ་ལོ། །བཅོམ་ལྡན་འདས་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །སྣ་ཚོགས་འདུལ་བྱ་འདུལ་ལ་ཐབས་གཅིག་གིས། །མ་ཆོག་མཐའ་ཡས་རིགས་ཀྱི་རྣམ་རོལ་བའི། །སྟོང་ཉིད་སྙིང་རྗེ་གཅིག་པའི་སྐུ་མངའ་བ། །རྡོ་རྗེ་མཁའ་འགྲོ་མ་ལ་ཕྱག་བགྱིའོ། །འགྲོ་ལ་མཛའ་བའི་ལག་གིས་བསྐུལ་བ་དང་། །བླ་མའི་བཀའ་དྲིན་དབྱུག་གུས་བསྣུན་མྱོང་བས། །བདག་ཡིད་ཉི་མའི་སྤུན་འདི་ས་སྟེང་ན། །དམ་ཆོས་སྒྲ་ཆེན་སྒྲོག་ལ་དཔའ་བར་གྱུར། །གང་ཟག་པ་མེད་པའི་སྙིང་རྗེ་ཆེན་པོ་དང་། གཏིང་དཔག་དཀའ་བའི་ཤེས་རབ་ཀྱི་ཕུང་པོ་ཡོངས་སུ་རྫོགས་པས་འཁྲུལ་པའི་དྲི་མ་ཐམས་ཅད་རྣམ་པར་ཞིག རྫོགས་པའི་ས་ཆེན་པོ་ལ་ཚེ་གཅིག་གིས་བཞུགས་པར་འདོད་པ་དག་གིས། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་ཀྱི་བཞུགས་གནས་ཡོངས་སུ་དག་པ་དཀྱིལ་འཁོར་གྱི་འཁོར་ལོ། ཐམས་ཅད་ཀྱི་འབྱུང་གནས་རྡོ་རྗེ་བཙུན་མོའི་བྷ་ག་ཞེས་བྱ་བའི་གནས་ཀྱི་བདག་མོ་རྡོ་རྗེ་མཁའ་འགྲོ་མ་བསྒྲུབ་པ་བརྩམ་པར་བྱའོ། །དེ་ལ། ཕྱི་ལྟར་དུ་སྒྲུབ་པ་དེ་ཁོ་ན་ཉིད། ནང་ལྟར་དུ་སྒྲུབ་པ་སྔགས་ཀྱི་དེ་ཁོ་ན་ཉིད། གསང་བ་ལྟར་དུ་སྒྲུབ་པ་ལྷའི་དེ་ཁོ་ན་ཉིད། དེ་ཁོ་ན་ཉིད་དུ་སྒྲུབ་པ་ཡེ་ཤེས་ཀྱི་དེ་ཁོ་ན་ཉིད་བཞི་ལས། དང་པོ་ལ་ལུས་ལྷར་སྒྲུབ་པ། ངག་སྔགས་སུ་སྒྲུབ་པ། ཡིད་བདེ་ཆེན་དུ་སྒྲུབ་པ་གསུམ་ལས། དང་པོ་ནི། མངོན་པར་བསྔགས་པའི་གནས་སུ་སེམས་ཅན་གྱི་ཆེད་དུ་རྫོགས་པའི་སངས་རྒྱས་བསྒྲུབ་པར་བྱའོ་སྙམ་པའི་ལྷག་པའི་བསམ་པས། ཨོཾ་སྭ་བྷཱ་ཞེས་བྱ་བའི་སྔགས་ཀྱི་དོན་ལ་ཕྱོགས་པས། སྐད་ཅིག་གིས་རི་རབ་ཀྱི་སྟེང་དུ་ཟར་མའི་མེ་ཏོག་ཁ་བྱེ་མ་ཐག་ལྟར་སྔོ་བའི་བཅོམ་ལྡན་འདས་རྡོ་རྗེ་མཁའ་འགྲོ་ཞབས་གཡས་བརྐྱང་ཞིང་གཡོན་བསྐུམ་པས་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་འཇིགས་བྱེད་དང་དུས་མཚན་མནན་པ། སྟག་གི་པགས་པའི་ཤམ་ཐབས་ཅན། ཞལ་གཅིག་ཅུང་ཟད་ཁྲོ་ཞིང་འཛུམ་པ། གར་གྱི་རོ་དགུ་དང་ལྡན་པ་རལ་པ་ནག་པོའི་ཐོར་གཙུག་བརྫེས་པའི་སྟེང་དུ་ནོར་བུ་དང་སྣ་ཚོགས་རྡོ་རྗེ་འཆང་བ། དེའི་འོག་ཕྱོགས་ཀྱི་གཡོན་དུ་ཟླ་ཚེས་ཀྱི་རི་མོ་དང་། སྣ་ཚོགས་རྡོ་རྗེ་གདན་ལ་ཐུབ་པ་མི་བསྐྱོད་པས་མཛེས་པ། དཔྲལ་བའི་ངོས་ལ་ཐོད་པ་ལྔས་བརྒྱན་པ། ཕྱག་རྒྱ་དྲུག་དང་ལྡན་པ། མི་མགོ་རློན་པ་ཤིན་ཏུ་འཛུམ་པ་བརྒྱའི་ཕྱེད་ཀྱི་དོ་ཤལ་ཅན། རྡོ་རྗེ་དང་དྲིལ་བུ་འཛིན་པའི་ཕྱག་དག་གིས་འཁྱུད་པའི་ཡུམ་རྡོ་རྗེ་མཁའ་འགྲོ་མ་དུད་པའི་སོལ་བ་ནག་མོ་ཤིན་ཏུ་སྒེག་པ་བརྒྱད་གཉིས་ཀྱི་ལང་ཚོ་ཅན། བདེ་བའི་འདུ་བྱེད་ལ་ཤིན་ཏུ་ཆགས་པ། གཏུམ་པའི་ཞལ་གཅིག་སྤྱན་གསུམ། ཕྱག་བཞི་པའི་གཡས་དང་པོ་རལ་གྲི་འཕྱར་ཞིང་། གཉིས་པས་དམར་གྱི་ཐོད་པ་སྟོབ་པ། གཡོན་དང་པོས་ཡབ་ལ་འཁྱུད་ཅིང་ཤཀྟི་དང་། གཉིས་པ་ཏྲི་ཤུ་ལ་འཛིན་པ། གཅེར་མོ་སྐུ་གྲོལ་ཞིང་ཕྱག་རྒྱ་ལྔ་ལ་སོགས་པའི་རྒྱན་ཐམས་ཅད་རབ་ཏུ་འབར་བ། བྱིན་པ་གཉིས་བཅོམ་ལྡན་འདས་ལ་མཉམ་པར་འཁྱུད་ཅིང་འབར་བའི་འཕྲེང་བ་འཁྲིགས་པའི་དབུས་ན་བརྗིད་པར་བཞུགས་པ་ལ་དམིགས་ཏེ་ཡུན་རིང་དུ་བསམ་གཏན་བྱའོ། །གཉིས་པ་ནི། ཨོཾ་ཧཱུྃ་ཤྲཱི་ཡ་དེ་ཝཱི་ཀཱ་ལི་ཀཱ་ལི་ཀཱ་མ་ཧཱ་ཀཱ་ལི་ཧཱུྃ་བྷྱོ་ལ་སོགས་པ་སྲོག་གི་སྔགས་མཐིང་ཤུན་ལྟར་མཐོན་མཐིང་སྤུ་ཤད་ཀྱིས་བྲིས་པ་ལྟ་བུར་ཕྲ་བའི་ཕྲེང་བ། རང་གི་ཁའི་ནང་ནས་ཞུགས། ཨ་ཝ་དྡྷཱུ་ཏཱིའི་མར་སྣ་རྡོ་རྗེའི་ལམ་ལས་ཕྱིར་སོང་། པདྨའི་ནང་ནས་ལྷ་མོའི་གར་ཞུགས་ཏེ། དེའི་ཞལ་ནས་རང་གི་ཁར་ཞུགས་པ་ས་བོན་གྱི་ཡི་གེ་ལྷོང་པར་འཁོར་བའོ། །མཚན་མ་རྙེད་པར་དཀའ་ན། རང་གི་ཁ་ནས་ལྷ་མོའི་ཞལ་དུ་ཞུགས། དེ་ནས་ཡང་པདྨའི་ལམ་ནས་དེའི་དྭངས་མའི་ངོ་བོར་རྡོ་རྗེའི་ལམ་དུ་ཞུགས་ནས་རང་གི་ཁ་ནས་ལྷ་མོའི་ཞལ་དུ་འཁོར་བ་ས་བོན་གྱི་ཡི་གེ་དྲག་ཅིང་རྩུབ་པར་རོ། །གསུམ་པ་ནི། ཡབ་ཡུམ་སྙོམས་པར་ཞུགས་པ་རྗེས་སུ་ཆགས་པའི་མེས། ཡབ་ཞུ་བ་ལས་ནོར་བུའི་རྩེ་མོར་ཐིག་ལེ་དཀར་པོ་ཡུངས་ཀར་ཙམ། ཡུམ་ཞུ་བ་ལས་པདྨའི་སྙིང་པོར་ཐིག་ལེ་དམར་པོ་ཡུངས་ཀར་ཙམ། དེ་ནས་ཐིག་ལེ་དཀར་དམར་གཉིས་སྙོམས་པར་འཇོག་ཅིང་འདྲེས་པ་ལ་དམིགས་ཏེ་འོག་རླུང་ཅུང་ཟད་བསྐུམ། སྟེང་རླུང་མནན་ལ་བསྒོམ་མོ། །དེས་བདེ་བ་སྐྱེས་ནས་ལུས་ཐམས་ཅད་བརྟས་པར་འགྱུར་རོ། །ཚུལ་དེ་དངོས་གྲུབ་འབྱུང་བའི་རྒྱུད་དུ། བདག་ནི་ཐབས་ཀྱི་ངོ་བོ་ཧེ་རུ་ཀ །མ་ནི་ཤེས་རབ་ངོ་བོར་གསལ་བར་བསྒོམ། །མ་ཡི་སྙིང་པོ་ཡི་གེའི་འཕྲེང་བ་རྣམས། །མགལ་མེ་འཁོར་བའི་ཚུལ་དུ་བཟླས་པར་བྱ། །ཞེས་གསུངས་པ་ཡིན་ནོ། །ཐིག་ལེ་ལས་ལྷ་ཡབ་ཡུམ་དུ་ལྡང་བ་ཐུན་གཅིག་ལ་གསུམ་དུ་བྱ་ཞིང་། དེ་ལྟ་བུ་ཐུན་བཞིར་གོམས་པར་བྱས་ལ་དགེ་བའི་རྩ་བ་བྱང་ཆུབ་ཏུ་བསྔོ་བར་བྱའོ། །གཉིས་པ་ནང་ལྟར་དུ་སྒྲུབ་པ་སྔགས་ཀྱི་དེ་ཁོ་ན་ཉིད་ལ། ལྟེ་འོག་སུམ་མདོར་ཉི་ཟླ་གཟས་འཛིན་པར་བྱེད་པའི་གནད་བཅིང་བ། དེས་ནང་གི་ལྷ་ཡབ་ཡུམ་མཉེས་ནས་སྙོམས་འཇུག་གི་དགའ་བ་སྦྱིན་པ། དེས་དྷཱུ་ཏཱིའི་ལམ་འབྱོངས་པའི་མཚན་མ་ཇི་ལྟར་རྙེད་པའི་ཚུལ་བཤད་པ་གསུམ་ལས་དང་པོ་ནི། ལུས་རྣམ་སྣང་གི་ཆོས་བདུན་དང་ལྡན་པས། རང་ཉིད་མེ་ལོང་ནང་གི་གཟུགས་བརྙན་ལྟ་བུར་བསམ་པའི་ནང་གི་དབུས་སུ། ཨ་ཝ་དྷཱུ་ཏི་དམར་པོ་ཚངས་བུག་ནས་ལྟེ་བའི་འོག་ཏུ་ཟུག་པ། གཡོན་དུ་ལཱ་ལ་ན་མགྲིན་པ་ནས་བརྩམས་ཏེ་ལྟེ་བའི་དབུས་སུ་ངལ་བསོས་ནས་འོག་ཏུ་ཁ་བལྟས་པའི་ཐིག་ལེ་འབབ་པ་དེ་ལ། དབྱངས་ཡིག་བཅུ་གཉིས་ཁ་སྟེང་དུ་བལྟས་ཏེ་གནས་པ། གཙོ་བོར་རླུང་ནང་དུ་སྡུད་པར་བྱེད་དོ། །ར་སཱ་ན་གཡས་སུ་ལྟེ་བ་ནས་བརྩམས་ཏེ་མགྲིན་པའི་བར་དུ་ངལ་བསོ་ཞིང་ཁ་སྟེང་དུ་བལྟས་ནས་ཁྲག་བབས་པ་ལ། གསལ་བྱེད་སོ་གསུམ་ཁ་འོག་ཏུ་བསྟན་ཏེ་གནས་པ། གཙོ་བོར་རླུང་ཕྱིར་རྒྱུ་བར་བྱེད་དོ། །དེ་ཉིད་ལོག་ཀུན་འདར་མའི་གནས་སུ་འཛོམས་པར་རྣམ་པར་ཤེས་པའི་རང་བཞིན། རྒོད་མ་ཁའི་ཡི་ཨཾ་འབར་བར་བྱེད་པ་རྡོ་རྗེ་མཁའ་འགྲོ་མ་ཀྵས་འོག་གི་ཆར་ཡང་དཀྲིས་ཤིང་བསྲུང་བ་དང་། སྙིང་གི་ནང་དུ་རྩ་འདབ་མ་བརྒྱུད་པ་སྙིང་པོ་དང་བཅས་པ་ནང་དུ་སོན་པའི་ཆུ་ཤིང་གི་མེ་ཏོག་ལྟར་ཁ་འོག་ཏུ་ཕྱོགས་པའི་ནང་དུ་མི་ཤིགས་པའི་ས་བོན། ཧཱུྃ་ཡུངས་ཀར་གྱི་སྦོམ་ཕྲ་ཙམ་པ་ཁ་བ་ལྟ་བུ་འཛག་ལ་ཁད་པ་དཔལ་ཧེ་རུ་ཀ་ཡེ་ཤེས་ཀྱི་རང་བཞིན་སྟེ་སྲོག་འོག་ཐུར་སེལ་གྱི་རླུང་སྒྲ་གཅན་དུ་དུས་མེའི་རང་བཞིན་ཅན་ཁ་སྦྱོར་དུ་སུམ་མདོར་བཅིངས་པ་བླ་མའི་མན་ངག་བཞིན་དུ་བྱའོ། །གཉིས་པ་ནི། ཀྵ་ལས་སྦར་བས། འབྱུང་བ་ལྔའི་རླུང་ཀྵའི་ནང་ནས་ཞུགས་ཏེ་རྡོ་རྗེ་མཁའ་འགྲོ་མ་བསྐུལ་བས་དེའི་རྗེས་སུ་ཆགས་པ་རྒྱས་པའི་གདུང་བས། དཔའ་བོ་ཧེ་རུ་ཀ་དགྱེས་པའི་བྱང་ཆུབ་ཀྱི་སེམས་འཛག་པས་ཆེར་གདུངས་པའི་ལྷ་མོ་དང་སྙོམས་པར་འཇུག་པ་ལ་བསམ་པ། གཞན་གྱིས་བར་མ་ཆོད་པར་བྱའོ། །གསུམ་པ་ནི། དེས་ཕྱི་རུ་ལུས་འཕར་ཞིང་གཡོ་བའི་དྲོད་ཆེན་པོ་སྐྱེ་ལ། ནང་དུ་རྟགས་ལྔས་རླུང་ཞུགས་པས་དུ་བར་འཐུལ་ཞིང་། ཆུ་ལས་སྨིག་རྒྱུ། མེ་ལས་མེ་ཁྱེར། རླུང་ལས་མར་མེ། ནམ་མཁའ་ལས་སྤྲིན་མེད་པའི་ནམ་མཁའ་གསལ་བར་འབྱུང་ཞིང་། གཞན་ཡང་། སྒྲུབ་པའི་མཚན་མ་ཅི་ཡང་འབྱུང་བ་ཡིན། དེ་ནི་དངོས་འབྱུང་ལས། ནག་མོ་ཞེས་བྱ་ལོགས་ན་མེད། །ལྷ་མོ་ཞེས་བྱ་རང་གི་སེམས། །སེམས་ལས་བྱུང་བ་རང་བྱུང་ཡིན། །འདི་ལྟར་སྣང་གྲགས་ཆོས་རྣམས་ཀུན། །རང་སེམས་སྒྱུ་མའི་ཆོ་འཕྲུལ་ཏེ། །མ་དང་རང་སེམས་གཉིས་མེད་དོ། །ལྷ་མོ་ནི། རང་གི་བྱང་ཆུབ་ཀྱི་སེམས་ལས་བྱུང་བའི་རོ་རྐྱང་ཨ་ཝ་དྷཱུ་ཏཱི་གསུམ་དང་། གཏུམ་མོའི་མེ་ཡིན་པས་རང་བྱུང་ངོ་། །དེས་རྟེན་ལུས་ཀྱི་དཀྱིལ་འཁོར་དང་བརྟེན་པ་རྩའི་དཀྱིལ་འཁོར་པ་ཐམས་ཅད་བྱས་པས་ཐམས་ཅད་རང་གི་སེམས་ཀྱི་ཆོ་འཕྲུལ་ལོ་ཞེས་བརྗོད་པ་སྤྱིའི་དོན་དུ་གཟུང་ངོ་། །རྡོ་རྗེ་མཁའ་འགྲོ་ལས། རྩ་ཡི་སྒྲ་ཡི་གཟུགས་ཉིད་ནི། །ལྷ་མོ་དེ་ལྟར་བཤད་པ་ཡིན། །ཞེས་དང་། སྒྲའི་ཚུལ་ཤེས་པ་སྒྲས་ཐིག་ལེ། ཚུལ་གྱི་དཔྱིད་དེ་དེ་བས་དཔྱིད་ཀྱི་ཐིག་ལེ་ཁོ་ན་སྔགས་ཀྱི་དེ་ཁོ་ན་ཉིད་དེ། སམ་པུ་ཊ་ལས། སྒྲ་ནི་སྔགས་ཞེས་སྨྲ་བ་སྟེ། །ལུས་ཅན་རྣམས་ནི་ཐམས་ཅད་ཀྱི། །སྣ་ཚོགས་མདུད་པ་གནས་ཆེན་ལས། ཆོས་ཀྱི་ར་ལི་རྣམ་པར་བྱུང་། །ཞེས་གསུངས་པས་སོ། །གསུམ་པ་གསང་བ་ལྟར་དུ་སྒྲུབ་པ་ལྷའི་དེ་ཁོ་ན་ཉིད་ལ། རིག་ལྡན་མའི་དབྱེ་བ། ཇི་ལྟར་མཆོད་པ་འབྲས་བུ་དང་བཅས་བཤད་པ་གཉིས་ལས། དང་པོ་ནི། ལྷན་སྐྱེས་རབ། ཞིང་སྐྱེས་འབྲིང་། སྔགས་སྐྱེས་ཐ་མ། བཅུད་ལེན་གྱི་དོན་དུ་བཅུ་གཅིག་མ། དམ་ཚིག་གི་དོན་དུ་བཅུ་གཉིས་མ། མེ་ཏོག་དང་ལྡན་པའི་བཅུ་དྲུག་མ་དངོས་གྲུབ་ཀྱི་དོན་དུ། མཁའ་སྤྱོད་སྒྲུབ་པ་ལ་ཉི་ཤུ་མ། དབང་བསྐུར་བའི་དོན་དུ་ཉེར་ལྔ་མ། རིགས་ལྔ་ལས་རྡོ་རྗེའི་རིགས་མཆོག་བཙལ་བར་བྱའོ། །གཉིས་པ་ནི། བདག་ཉིད་རྣལ་འབྱོར་མའི་དབང་ཕྱུག་ཐམས་ཅད་ཀྱི་རྣལ་འབྱོར་པར་གྱུར་པས། རིག་ལྡན་མ་དེ་དག་ལེགས་པར་སྦྱངས་ལ་དབེན་ཞིང་ཡིད་དུ་འོང་བའི་ཕྱོགས་སུ་གཅེར་བུར་བྱས་ཏེ། དཔལ་ལྡན་ལྷ་མོ་ནག་མོའི་གཟུགས་སུ་བསམས་ལ། ཉི་མ་ནུབ་པ་ནས་གཟུང་སྟེ། མཆོད་རྫས་ཀུན་གྱི་མཆོད་པར་བྱས་ནས། མཁུར་བ་དང་། ནུ་མ་དང་། མཚན་ཁུང་དང་། བརླ་དང་། བྱིན་པ་དང་། པདྨའི་དཀྱིལ་འཁོར་ལ་བལྟ་ཞིང་། དབང་པོ་གཞན་ཐམས་ཅད་ཀྱི་བདེ་བའི་རོ་མྱངས་ནས། ཤེས་རབ་དང་ལྷན་ཅིག་མཉམ་པར་སྦྱར་བའི་འདོད་པའི་ལྕགས་ཀྱུས་རྩ་ཐམས་ཅད་ལས་བྱང་ཆུབ་ཀྱི་སེམས་ཀྱི་ཁུ་བ་བཅོམ་ལྡན་འདས་ཧེ་རུ་ཀའི་བདག་ཉིད་ནོར་བུའི་རྩེ་མོར་བཀུག་པ་བརྟན་པར་བྱས་པས་རྣམ་པར་རྟོག་པ་ཐམས་ཅད་ནུབ་པའི་བདེ་བ་ལྷ་མོའི་རང་བཞིན་ཅན་ལ་ཉིན་མཚན་མེད་པར་དེར་ཚུད་པའི་ཡིད་དང་ལྡན་ནས་གོམས་པར་གྱུར་ན། ཕྱག་རྒྱ་ཆེན་པོ་འགྲུབ་པའི་མཚན་མ་སྐྱེ་སྟེ། དངོས་གྲུབ་ལ་མངོན་དུ་ཕྱོགས་པའི་དཔའ་བོའི་གཟུགས་དང་གསང་བའི་མཚན་མ་ནི། འདི་དག་སྟེ། གཟུགས་ཕྲ་བ་དང་། རེག་པ་ཡང་པ་དང་། ཁྱབ་པ་དང་། ཡང་དག་པར་ཐོབ་པ་དང་། རབ་ཏུ་སྣང་བ་དང་། བརྟན་པ་དང་། དབང་དུ་གྱུར་པ་དང་། འདོད་དགུར་བསྒྱུར་བ་སྟེ་བརྒྱད་དོ། །དེ་ཡང་བྱང་ཆུབ་ཀྱི་སེམས་ཀྱི་རང་བཞིན་ལོངས་སྐུའི་གོང་བུ་ཆ་ཕྲ་བས་ཐིག་ལེའི་གཟུགས་ནི་ས་བཅུའི་དབང་ཕྱུག་ཧེ་རུ་ཀ་དང་། དེ་ལྟ་བུའི་ཤིན་ཏུ་རྣམ་པར་དག་པའི་ཡེ་ཤེས་ནི་ལྷ་མོ་ཡིན་ཏེ། དགྱེས་རྡོར་ལས། ཁུ་བའི་རྣམ་པ་བཅོམ་ལྡན་འདས། དེ་ཡི་བདེ་བ་འདོད་མར་བརྗོད། ནག་མོ་ཞེས་བྱ་ལོགས་ན་མེད། །ལྷ་ཞེས་སོགས་ཀྱི་གཞུང་འདོད་ཆགས་ཀྱི་ཆོས་སུ་སྦས་པ་བཤད་པའོ། །དེ་ལྟ་བུའི་ལྷ་ཡབ་ཡུམ་གྱིས་གསུམ་པོ་ཐམས་ཅད་བདག་ཉིད་གཅིག་ཏུ་བསྒྲུབས་པས་ལྷའི་དེ་ཁོ་ན་ཉིད་དེ། ས་ར་ཧས། ཁམས་གསུམ་མ་ལུས་འདི་དག་ཐམས་ཅད་ནི། །འདོད་ཆགས་ཆེན་པོ་གཅིག་ཏུ་ཁ་དོག་བསྒྱུར་ཞིག་དང་། །ཞེས་གསུངས་པས་སོ། །བཞི་པ་དེ་ཁོ་ན་ཉིད་དུ། སྒྲུབ་པ་ཡེ་ཤེས་ཀྱི་དེ་ཁོ་ན་ཉིད་ནི། གདོད་ནས་གྲུབ་པའི་དཔའ་བོ་དང་། རྣལ་འབྱོར་མ་ཐམས་ཅད་རོ་གཅིག་ཏུ་གྱུར་པའི་ཨཾ་སྣ་བུག་གཡོན་ནས་ཞུགས། ལྟེ་འོག་གི་ཆོས་འབྱུང་གྲུ་གསུམ་པའི་དབུས་སུ་ཕྱིན། ཨཾ་ཡིག་ཡོངས་སུ་གྱུར་པ་ལས་དཔལ་ལྷ་མོ་ཇི་ལྟ་བ་བསྐྱེད། གཅེར་བུ་རལ་པ་ཅན་ལ་སོགས་པའི་འཁོར་རྣམས་བསྐོར་བ་བསྐོར་བའི་ཚུལ། གཙོ་མོ་ཙ་ན་ཀའི་འབྲུ་ཙམ་དང་། འཁོར་རྣམས་ཡུངས་འབྲུ་ལྟ་བུར་ཕྲ་བ་ལ་སེམས་གཟུང་ནས། སླར་གཙོ་མོའི་ཐུགས་ཀར་ཧཱུྃ་ཡིག་བལྟས་ནས་དེ་ལས་འོད་འཕྲོས། ཁམས་གསུམ་པའི་འཁོར་ལོ་ཐམས་ཅད་རང་ལ་བསྟིམ། དེ་བཅོམ་ལྡན་འདས་མ་འཁོར་བཅས་ལ་འཁོར་གཙོ་མོའི་ཞལ་དུ་བསྟིམ། དེ་ཐུགས་ཀའི་ཧཱུྃ་ལ། དེའི་ཨུ་ཧཱ་ལ། ཧ་མགོ་བོ། མགོ་བོ་ཟླ་ཚེས། ཟླ་ཚེས་ཐིག་ལེ་ལ། དེ་ནཱ་ད་ལ། ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཆ་ཡི་ཚད་དུ་བསྒོམ་པ་ནི་གཟུགས་ལས་འདས་པའོ། །དེ་ཡང་དངོས་པོ་མེད་པའི་སེམས་རྣམ་པར་ཤེས་པ་གསུམ་དང་བྲལ་བ། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད། ལུས་དང་ངག་དང་སེམས་མེད་པ། ལས་དང་སྐྱེ་བ་ལས་གྲོལ་བ། ཟླ་བ་དང་ཉི་མ་དང་མེ་དང་ནོར་བུའི་འོད་ལྟར་ཤིན་ཏུ་གསལ་བ། རྟག་ཏུ་སྣང་བའི་མཚན་ཉིད་ཅན། ཐམས་ཅད་སྟོང་པའི་འོད་གསལ་བསམ་གྱིས་མི་ཁྱབ་པ་ཉིད་དུ་བཅུག་ནས། སླར་འོད་གསལ་བའི་ངང་ནས་ལུགས་བཟློག་གི་སྣང་བ་གསུམ་རླུང་དང་བཅས་པ་ལས། སྒྱུ་མ་ལྟ་བུའི་སྐུའི་གཟུངས་ཐོབ་པར་འགྱུར་རོ། །དེ་ཡང་རྗེ་བཙུན་ནཱ་རོ་པས། གཙོ་འཁོར་འོད་ཞུ་ཨེ་ཡི་གནས་སུ་བསྟིམ། ཨེ་ཡིག་ཆོས་འབྱུང་དེ་དབུས་ལྷ་མོ་བསྒོམ། །འཁོར་རྣམས་སྐོར་བ་བསྐོར་བའི་ཚུལ་ཉིད་དུ། །འོད་ཀྱི་སྤྲོ་བསྡུ་དམིགས་པ་དག་ལ་འབད། །ཅེས་གསུངས་སོ། །དེ་ཡང་། འདོད་པ་དང་གཟུགས་དང་གཟུགས་མེད་པའི་མཚན་ཉིད་བརྟན་པ་དང་གཡོ་བའི་དངོས་པོ་དང་དངོས་པོ་མེད་པའི་རང་བཞིན། རྣམ་པ་ཐམས་ཅད་པའི་མཆོག་དང་ལྡན་པའི་སྟོང་ཉིད། མཆོག་ཏུ་མི་འགྱུར་བ། དམིགས་པ་མེད་པའི་སྙིང་རྗེ་ཡང་ཡིན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དཔལ་ལྷ་མོར་བརྗོད་དོ། །དེ་བས་ན་དེ་ནི་རང་གི་སེམས་ལས་གཞན་མིན་པ་དང་། རྒྱུ་རྐྱེན་ལས་མ་བྱུང་བའི་ཕྱིར་རང་བྱུང་དང་། ཐབས་ཀྱི་རང་བཞིན་ཡིན་པས། སྣང་གྲགས་དེའི་ཆོ་འཕྲུལ་དུ་བཤད་པ་མཐར་ཐུག་པའི་དོན་ནོ། གལ་ཏེ་དྲོད་རྙེད་ཀྱང་ལམ་བགྲོད་པ་ཅུང་འགྱངས་ན་སྤྱོད་པ་བརྩམ་པར་བྱ་སྟེ། དུར་ཁྲོད་ལ་སོགས་པའི་གནས་ཐམས་ཅད་དུ། ལུས་ལ་བདག་ཏུ་འཛིན་པས་གཅེས་པར་ལྟ་བ་སྤངས་ཏེ། ས་རྡོ་ལྟ་བུར་བྱས་ནས། བསམ་གྱིས་མི་ཁྱབ་པའི་ཏིང་ངེ་འཛིན་ལ་རྩལ་སྦྱངས་པས་མྱུར་བ་ཉིད་དུ་མཆོག་གི་དངོས་གྲུབ་ཐོབ་པར་འགྱུར་བ་ཡིན་ཏེ། སྤྱོད་པ་དག་ནི་བྱ་བར་བཤད། །སྤྱོད་པས་ཕ་རོལ་ཕྱིན་མཆོག་ཉིད། །ཅེས་གསུངས་པས་སོ། །ནཱ་རོའི་ལེགས་བཤད་འོད་ཟེར་ཅི་ཡང་གིས། །གངས་ཅན་སྙིང་མུན་སེལ་ལ་ཟླ་མེད་པའི། །གྲུབ་རིགས་རྒྱ་མཚོའི་ཉི་མ་མར་པ་དེའི། །བཀའ་དྲིན་ཐོབ་པ་ས་ལ་པད་དཀར་ཙམ། །རྡོ་རྗེ་མཁའ་འགྲོའི་ཞལ་སྐྱིན་ཟླ་བའི་གདོང་། །སྐལ་བཟང་ཀུན་དའི་རེ་བ་རྫོགས་བྱེད་དུ། །རྣམ་སྤྱོད་ཕྲག་པར་ལེན་ལ་མ་སུན་པར། །ངག་གི་དབང་ཕྱུག་དགྱེས་པའི་ཤར་རི་ཡིན། །དཔལ་རྡོ་རྗེ་མཁའ་འགྲོ་མ་དུད་པའི་སོལ་བ་ཅན་སྒྲུབ་པའི་ཐབས་རྗེ་ནཱ་རོ་ཡབ་སྲས་ཀྱི་མན་ངག་དྲི་མ་མེད་པ། འཕྲུལ་གྱི་གཙུག་ལག་ཁང་བཀྲ་ཤིས་མཐོང་སྨོན་དུ། ཡུལ་ཤར་ཕྱོགས་ཀྱི་རྒྱུད་དུ་བྱུང་བའི་རིག་པ་འཛིན་པ་མི་ཕམ་པདྨ་དཀར་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེའམ། ངག་གི་དབང་ཕྱུག་དགྱེས་པས་སུག་ལས་སུ་བྱས་པའོ།། །།སརྦ་མངྒ་ལཾ།། །། དུད་པའི་སོལ་བ་མའི་རྫོགས་རིམ་དེ་ཁོ་ན་ཉིད་བཞིའི་སྒྲུབ་པ།དུད་པའི་སོལ་བ་མའི་རྫོགས་རིམ་དེ་ཁོ་ན་ཉིད་བཞིའི་སྒྲུབ་པ་ཞེས་བྱ་བ་བཞུགས་སོ། །བླ་མ་དམ་པའི་ཞབས་ལ་ཕྱག་འཚལ་ལོ། །བཅོམ་ལྡན་འདས་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །སྣ་ཚོགས་འདུལ་བྱ་འདུལ་ལ་ཐབས་གཅིག་གིས། །མ་ཆོག་མཐའ་ཡས་རིགས་ཀྱི་རྣམ་རོལ་བའི། །སྟོང་ཉིད་སྙིང་རྗེ་གཅིག་པའི་སྐུ་མངའ་བ། །རྡོ་རྗེ་མཁའ་འགྲོ་མ་ལ་ཕྱག་བགྱིའོ། །འགྲོ་ལ་མཛའ་བའི་ལག་གིས་བསྐུལ་བ་དང་། །བླ་མའི་བཀའ་དྲིན་དབྱུག་གུས་བསྣུན་མྱོང་བས། །བདག་ཡིད་ཉི་མའི་སྤུན་འདི་ས་སྟེང་ན། །དམ་ཆོས་སྒྲ་ཆེན་སྒྲོག་ལ་དཔའ་བར་གྱུར། །གང་ཟག་པ་མེད་པའི་སྙིང་རྗེ་ཆེན་པོ་དང་། གཏིང་དཔག་དཀའ་བའི་ཤེས་རབ་ཀྱི་ཕུང་པོ་ཡོངས་སུ་རྫོགས་པས་འཁྲུལ་པའི་དྲི་མ་ཐམས་ཅད་རྣམ་པར་ཞིག རྫོགས་པའི་ས་ཆེན་པོ་ལ་ཚེ་གཅིག་གིས་བཞུགས་པར་འདོད་པ་དག་གིས། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་ཀྱི་བཞུགས་གནས་ཡོངས་སུ་དག་པ་དཀྱིལ་འཁོར་གྱི་འཁོར་ལོ། ཐམས་ཅད་ཀྱི་འབྱུང་གནས་རྡོ་རྗེ་བཙུན་མོའི་བྷ་ག་ཞེས་བྱ་བའི་གནས་ཀྱི་བདག་མོ་རྡོ་རྗེ་མཁའ་འགྲོ་མ་བསྒྲུབ་པ་བརྩམ་པར་བྱའོ། །དེ་ལ། ཕྱི་ལྟར་དུ་སྒྲུབ་པ་དེ་ཁོ་ན་ཉིད། ནང་ལྟར་དུ་སྒྲུབ་པ་སྔགས་ཀྱི་དེ་ཁོ་ན་ཉིད། གསང་བ་ལྟར་དུ་སྒྲུབ་པ་ལྷའི་དེ་ཁོ་ན་ཉིད། དེ་ཁོ་ན་ཉིད་དུ་སྒྲུབ་པ་ཡེ་ཤེས་ཀྱི་དེ་ཁོ་ན་ཉིད་བཞི་ལས། དང་པོ་ལ་ལུས་ལྷར་སྒྲུབ་པ། ངག་སྔགས་སུ་སྒྲུབ་པ། ཡིད་བདེ་ཆེན་དུ་སྒྲུབ་པ་གསུམ་ལས། དང་པོ་ནི། མངོན་པར་བསྔགས་པའི་གནས་སུ་སེམས་ཅན་གྱི་ཆེད་དུ་རྫོགས་པའི་སངས་རྒྱས་བསྒྲུབ་པར་བྱའོ་སྙམ་པའི་ལྷག་པའི་བསམ་པས། ཨོཾ་སྭ་བྷཱ་ཞེས་བྱ་བའི་སྔགས་ཀྱི་དོན་ལ་ཕྱོགས་པས། སྐད་ཅིག་གིས་རི་རབ་ཀྱི་སྟེང་དུ་ཟར་མའི་མེ་ཏོག་ཁ་བྱེ་མ་ཐག་ལྟར་སྔོ་བའི་བཅོམ་ལྡན་འདས་རྡོ་རྗེ་མཁའ་འགྲོ་ཞབས་གཡས་བརྐྱང་ཞིང་གཡོན་བསྐུམ་པས་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་འཇིགས་བྱེད་དང་དུས་མཚན་མནན་པ། སྟག་གི་པགས་པའི་ཤམ་ཐབས་ཅན། ཞལ་གཅིག་ཅུང་ཟད་ཁྲོ་ཞིང་འཛུམ་པ། གར་གྱི་རོ་དགུ་དང་ལྡན་པ་རལ་པ་ནག་པོའི་ཐོར་གཙུག་བརྫེས་པའི་སྟེང་དུ་ནོར་བུ་དང་སྣ་ཚོགས་རྡོ་རྗེ་འཆང་བ། དེའི་འོག་ཕྱོགས་ཀྱི་གཡོན་དུ་ཟླ་ཚེས་ཀྱི་རི་མོ་དང་། སྣ་ཚོགས་རྡོ་རྗེ་གདན་ལ་ཐུབ་པ་མི་བསྐྱོད་པས་མཛེས་པ། དཔྲལ་བའི་ངོས་ལ་ཐོད་པ་ལྔས་བརྒྱན་པ། ཕྱག་རྒྱ་དྲུག་དང་ལྡན་པ། མི་མགོ་རློན་པ་ཤིན་ཏུ་འཛུམ་པ་བརྒྱའི་ཕྱེད་ཀྱི་དོ་ཤལ་ཅན། རྡོ་རྗེ་དང་དྲིལ་བུ་འཛིན་པའི་ཕྱག་དག་གིས་འཁྱུད་པའི་ཡུམ་རྡོ་རྗེ་མཁའ་འགྲོ་མ་དུད་པའི་སོལ་བ་ནག་མོ་ཤིན་ཏུ་སྒེག་པ་བརྒྱད་གཉིས་ཀྱི་ལང་ཚོ་ཅན། བདེ་བའི་འདུ་བྱེད་ལ་ཤིན་ཏུ་ཆགས་པ། གཏུམ་པའི་ཞལ་གཅིག་སྤྱན་གསུམ། ཕྱག་བཞི་པའི་གཡས་དང་པོ་རལ་གྲི་འཕྱར་ཞིང་། གཉིས་པས་དམར་གྱི་ཐོད་པ་སྟོབ་པ། གཡོན་དང་པོས་ཡབ་ལ་འཁྱུད་ཅིང་ཤཀྟི་དང་། གཉིས་པ་ཏྲི་ཤུ་ལ་འཛིན་པ། གཅེར་མོ་སྐུ་གྲོལ་ཞིང་ཕྱག་རྒྱ་ལྔ་ལ་སོགས་པའི་རྒྱན་ཐམས་ཅད་རབ་ཏུ་འབར་བ། བྱིན་པ་གཉིས་བཅོམ་ལྡན་འདས་ལ་མཉམ་པར་འཁྱུད་ཅིང་འབར་བའི་འཕྲེང་བ་འཁྲིགས་པའི་དབུས་ན་བརྗིད་པར་བཞུགས་པ་ལ་དམིགས་ཏེ་ཡུན་རིང་དུ་བསམ་གཏན་བྱའོ། །གཉིས་པ་ནི། ཨོཾ་ཧཱུྃ་ཤྲཱི་ཡ་དེ་ཝཱི་ཀཱ་ལི་ཀཱ་ལི་ཀཱ་མ་ཧཱ་ཀཱ་ལི་ཧཱུྃ་བྷྱོ་ལ་སོགས་པ་སྲོག་གི་སྔགས་མཐིང་ཤུན་ལྟར་མཐོན་མཐིང་སྤུ་ཤད་ཀྱིས་བྲིས་པ་ལྟ་བུར་ཕྲ་བའི་ཕྲེང་བ། རང་གི་ཁའི་ནང་ནས་ཞུགས། ཨ་ཝ་དྡྷཱུ་ཏཱིའི་མར་སྣ་རྡོ་རྗེའི་ལམ་ལས་ཕྱིར་སོང་། པདྨའི་ནང་ནས་ལྷ་མོའི་གར་ཞུགས་ཏེ། དེའི་ཞལ་ནས་རང་གི་ཁར་ཞུགས་པ་ས་བོན་གྱི་ཡི་གེ་ལྷོང་པར་འཁོར་བའོ། །མཚན་མ་རྙེད་པར་དཀའ་ན། རང་གི་ཁ་ནས་ལྷ་མོའི་ཞལ་དུ་ཞུགས། དེ་ནས་ཡང་པདྨའི་ལམ་ནས་དེའི་དྭངས་མའི་ངོ་བོར་རྡོ་རྗེའི་ལམ་དུ་ཞུགས་ནས་རང་གི་ཁ་ནས་ལྷ་མོའི་ཞལ་དུ་འཁོར་བ་ས་བོན་གྱི་ཡི་གེ་དྲག་ཅིང་རྩུབ་པར་རོ། །གསུམ་པ་ནི། ཡབ་ཡུམ་སྙོམས་པར་ཞུགས་པ་རྗེས་སུ་ཆགས་པའི་མེས། ཡབ་ཞུ་བ་ལས་ནོར་བུའི་རྩེ་མོར་ཐིག་ལེ་དཀར་པོ་ཡུངས་ཀར་ཙམ། ཡུམ་ཞུ་བ་ལས་པདྨའི་སྙིང་པོར་ཐིག་ལེ་དམར་པོ་ཡུངས་ཀར་ཙམ། དེ་ནས་ཐིག་ལེ་དཀར་དམར་གཉིས་སྙོམས་པར་འཇོག་ཅིང་འདྲེས་པ་ལ་དམིགས་ཏེ་འོག་རླུང་ཅུང་ཟད་བསྐུམ། སྟེང་རླུང་མནན་ལ་བསྒོམ་མོ། །དེས་བདེ་བ་སྐྱེས་ནས་ལུས་ཐམས་ཅད་བརྟས་པར་འགྱུར་རོ། །ཚུལ་དེ་དངོས་གྲུབ་འབྱུང་བའི་རྒྱུད་དུ། བདག་ནི་ཐབས་ཀྱི་ངོ་བོ་ཧེ་རུ་ཀ །མ་ནི་ཤེས་རབ་ངོ་བོར་གསལ་བར་བསྒོམ། །མ་ཡི་སྙིང་པོ་ཡི་གེའི་འཕྲེང་བ་རྣམས། །མགལ་མེ་འཁོར་བའི་ཚུལ་དུ་བཟླས་པར་བྱ། །ཞེས་གསུངས་པ་ཡིན་ནོ། །ཐིག་ལེ་ལས་ལྷ་ཡབ་ཡུམ་དུ་ལྡང་བ་ཐུན་གཅིག་ལ་གསུམ་དུ་བྱ་ཞིང་། དེ་ལྟ་བུ་ཐུན་བཞིར་གོམས་པར་བྱས་ལ་དགེ་བའི་རྩ་བ་བྱང་ཆུབ་ཏུ་བསྔོ་བར་བྱའོ། །གཉིས་པ་ནང་ལྟར་དུ་སྒྲུབ་པ་སྔགས་ཀྱི་དེ་ཁོ་ན་ཉིད་ལ། ལྟེ་འོག་སུམ་མདོར་ཉི་ཟླ་གཟས་འཛིན་པར་བྱེད་པའི་གནད་བཅིང་བ། དེས་ནང་གི་ལྷ་ཡབ་ཡུམ་མཉེས་ནས་སྙོམས་འཇུག་གི་དགའ་བ་སྦྱིན་པ། དེས་དྷཱུ་ཏཱིའི་ལམ་འབྱོངས་པའི་མཚན་མ་ཇི་ལྟར་རྙེད་པའི་ཚུལ་བཤད་པ་གསུམ་ལས་དང་པོ་ནི། ལུས་རྣམ་སྣང་གི་ཆོས་བདུན་དང་ལྡན་པས། རང་ཉིད་མེ་ལོང་ནང་གི་གཟུགས་བརྙན་ལྟ་བུར་བསམ་པའི་ནང་གི་དབུས་སུ། ཨ་ཝ་དྷཱུ་ཏི་དམར་པོ་ཚངས་བུག་ནས་ལྟེ་བའི་འོག་ཏུ་ཟུག་པ། གཡོན་དུ་ལཱ་ལ་ན་མགྲིན་པ་ནས་བརྩམས་ཏེ་ལྟེ་བའི་དབུས་སུ་ངལ་བསོས་ནས་འོག་ཏུ་ཁ་བལྟས་པའི་ཐིག་ལེ་འབབ་པ་དེ་ལ། དབྱངས་ཡིག་བཅུ་གཉིས་ཁ་སྟེང་དུ་བལྟས་ཏེ་གནས་པ། གཙོ་བོར་རླུང་ནང་དུ་སྡུད་པར་བྱེད་དོ། །ར་སཱ་ན་གཡས་སུ་ལྟེ་བ་ནས་བརྩམས་ཏེ་མགྲིན་པའི་བར་དུ་ངལ་བསོ་ཞིང་ཁ་སྟེང་དུ་བལྟས་ནས་ཁྲག་བབས་པ་ལ། གསལ་བྱེད་སོ་གསུམ་ཁ་འོག་ཏུ་བསྟན་ཏེ་གནས་པ། གཙོ་བོར་རླུང་ཕྱིར་རྒྱུ་བར་བྱེད་དོ། །དེ་ཉིད་ལོག་ཀུན་འདར་མའི་གནས་སུ་འཛོམས་པར་རྣམ་པར་ཤེས་པའི་རང་བཞིན། རྒོད་མ་ཁའི་ཡི་ཨཾ་འབར་བར་བྱེད་པ་རྡོ་རྗེ་མཁའ་འགྲོ་མ་ཀྵས་འོག་གི་ཆར་ཡང་དཀྲིས་ཤིང་བསྲུང་བ་དང་། སྙིང་གི་ནང་དུ་རྩ་འདབ་མ་བརྒྱུད་པ་སྙིང་པོ་དང་བཅས་པ་ནང་དུ་སོན་པའི་ཆུ་ཤིང་གི་མེ་ཏོག་ལྟར་ཁ་འོག་ཏུ་ཕྱོགས་པའི་ནང་དུ་མི་ཤིགས་པའི་ས་བོན། ཧཱུྃ་ཡུངས་ཀར་གྱི་སྦོམ་ཕྲ་ཙམ་པ་ཁ་བ་ལྟ་བུ་འཛག་ལ་ཁད་པ་དཔལ་ཧེ་རུ་ཀ་ཡེ་ཤེས་ཀྱི་རང་བཞིན་སྟེ་སྲོག་འོག་ཐུར་སེལ་གྱི་རླུང་སྒྲ་གཅན་དུ་དུས་མེའི་རང་བཞིན་ཅན་ཁ་སྦྱོར་དུ་སུམ་མདོར་བཅིངས་པ་བླ་མའི་མན་ངག་བཞིན་དུ་བྱའོ། །གཉིས་པ་ནི། ཀྵ་ལས་སྦར་བས། འབྱུང་བ་ལྔའི་རླུང་ཀྵའི་ནང་ནས་ཞུགས་ཏེ་རྡོ་རྗེ་མཁའ་འགྲོ་མ་བསྐུལ་བས་དེའི་རྗེས་སུ་ཆགས་པ་རྒྱས་པའི་གདུང་བས། དཔའ་བོ་ཧེ་རུ་ཀ་དགྱེས་པའི་བྱང་ཆུབ་ཀྱི་སེམས་འཛག་པས་ཆེར་གདུངས་པའི་ལྷ་མོ་དང་སྙོམས་པར་འཇུག་པ་ལ་བསམ་པ། གཞན་གྱིས་བར་མ་ཆོད་པར་བྱའོ། །གསུམ་པ་ནི། དེས་ཕྱི་རུ་ལུས་འཕར་ཞིང་གཡོ་བའི་དྲོད་ཆེན་པོ་སྐྱེ་ལ། ནང་དུ་རྟགས་ལྔས་རླུང་ཞུགས་པས་དུ་བར་འཐུལ་ཞིང་། ཆུ་ལས་སྨིག་རྒྱུ། མེ་ལས་མེ་ཁྱེར། རླུང་ལས་མར་མེ། ནམ་མཁའ་ལས་སྤྲིན་མེད་པའི་ནམ་མཁའ་གསལ་བར་འབྱུང་ཞིང་། གཞན་ཡང་། སྒྲུབ་པའི་མཚན་མ་ཅི་ཡང་འབྱུང་བ་ཡིན། དེ་ནི་དངོས་འབྱུང་ལས། ནག་མོ་ཞེས་བྱ་ལོགས་ན་མེད། །ལྷ་མོ་ཞེས་བྱ་རང་གི་སེམས། །སེམས་ལས་བྱུང་བ་རང་བྱུང་ཡིན། །འདི་ལྟར་སྣང་གྲགས་ཆོས་རྣམས་ཀུན། །རང་སེམས་སྒྱུ་མའི་ཆོ་འཕྲུལ་ཏེ། །མ་དང་རང་སེམས་གཉིས་མེད་དོ། །ལྷ་མོ་ནི། རང་གི་བྱང་ཆུབ་ཀྱི་སེམས་ལས་བྱུང་བའི་རོ་རྐྱང་ཨ་ཝ་དྷཱུ་ཏཱི་གསུམ་དང་། གཏུམ་མོའི་མེ་ཡིན་པས་རང་བྱུང་ངོ་། །དེས་རྟེན་ལུས་ཀྱི་དཀྱིལ་འཁོར་དང་བརྟེན་པ་རྩའི་དཀྱིལ་འཁོར་པ་ཐམས་ཅད་བྱས་པས་ཐམས་ཅད་རང་གི་སེམས་ཀྱི་ཆོ་འཕྲུལ་ལོ་ཞེས་བརྗོད་པ་སྤྱིའི་དོན་དུ་གཟུང་ངོ་། །རྡོ་རྗེ་མཁའ་འགྲོ་ལས། རྩ་ཡི་སྒྲ་ཡི་གཟུགས་ཉིད་ནི། །ལྷ་མོ་དེ་ལྟར་བཤད་པ་ཡིན། །ཞེས་དང་། སྒྲའི་ཚུལ་ཤེས་པ་སྒྲས་ཐིག་ལེ། ཚུལ་གྱི་དཔྱིད་དེ་དེ་བས་དཔྱིད་ཀྱི་ཐིག་ལེ་ཁོ་ན་སྔགས་ཀྱི་དེ་ཁོ་ན་ཉིད་དེ། སམ་པུ་ཊ་ལས། སྒྲ་ནི་སྔགས་ཞེས་སྨྲ་བ་སྟེ། །ལུས་ཅན་རྣམས་ནི་ཐམས་ཅད་ཀྱི། །སྣ་ཚོགས་མདུད་པ་གནས་ཆེན་ལས། ཆོས་ཀྱི་ར་ལི་རྣམ་པར་བྱུང་། །ཞེས་གསུངས་པས་སོ། །གསུམ་པ་གསང་བ་ལྟར་དུ་སྒྲུབ་པ་ལྷའི་དེ་ཁོ་ན་ཉིད་ལ། རིག་ལྡན་མའི་དབྱེ་བ། ཇི་ལྟར་མཆོད་པ་འབྲས་བུ་དང་བཅས་བཤད་པ་གཉིས་ལས། དང་པོ་ནི། ལྷན་སྐྱེས་རབ། ཞིང་སྐྱེས་འབྲིང་། སྔགས་སྐྱེས་ཐ་མ། བཅུད་ལེན་གྱི་དོན་དུ་བཅུ་གཅིག་མ། དམ་ཚིག་གི་དོན་དུ་བཅུ་གཉིས་མ། མེ་ཏོག་དང་ལྡན་པའི་བཅུ་དྲུག་མ་དངོས་གྲུབ་ཀྱི་དོན་དུ། མཁའ་སྤྱོད་སྒྲུབ་པ་ལ་ཉི་ཤུ་མ། དབང་བསྐུར་བའི་དོན་དུ་ཉེར་ལྔ་མ། རིགས་ལྔ་ལས་རྡོ་རྗེའི་རིགས་མཆོག་བཙལ་བར་བྱའོ། །གཉིས་པ་ནི། བདག་ཉིད་རྣལ་འབྱོར་མའི་དབང་ཕྱུག་ཐམས་ཅད་ཀྱི་རྣལ་འབྱོར་པར་གྱུར་པས། རིག་ལྡན་མ་དེ་དག་ལེགས་པར་སྦྱངས་ལ་དབེན་ཞིང་ཡིད་དུ་འོང་བའི་ཕྱོགས་སུ་གཅེར་བུར་བྱས་ཏེ། དཔལ་ལྡན་ལྷ་མོ་ནག་མོའི་གཟུགས་སུ་བསམས་ལ། ཉི་མ་ནུབ་པ་ནས་གཟུང་སྟེ། མཆོད་རྫས་ཀུན་གྱི་མཆོད་པར་བྱས་ནས། མཁུར་བ་དང་། ནུ་མ་དང་། མཚན་ཁུང་དང་། བརླ་དང་། བྱིན་པ་དང་། པདྨའི་དཀྱིལ་འཁོར་ལ་བལྟ་ཞིང་། དབང་པོ་གཞན་ཐམས་ཅད་ཀྱི་བདེ་བའི་རོ་མྱངས་ནས། ཤེས་རབ་དང་ལྷན་ཅིག་མཉམ་པར་སྦྱར་བའི་འདོད་པའི་ལྕགས་ཀྱུས་རྩ་ཐམས་ཅད་ལས་བྱང་ཆུབ་ཀྱི་སེམས་ཀྱི་ཁུ་བ་བཅོམ་ལྡན་འདས་ཧེ་རུ་ཀའི་བདག་ཉིད་ནོར་བུའི་རྩེ་མོར་བཀུག་པ་བརྟན་པར་བྱས་པས་རྣམ་པར་རྟོག་པ་ཐམས་ཅད་ནུབ་པའི་བདེ་བ་ལྷ་མོའི་རང་བཞིན་ཅན་ལ་ཉིན་མཚན་མེད་པར་དེར་ཚུད་པའི་ཡིད་དང་ལྡན་ནས་གོམས་པར་གྱུར་ན། ཕྱག་རྒྱ་ཆེན་པོ་འགྲུབ་པའི་མཚན་མ་སྐྱེ་སྟེ། དངོས་གྲུབ་ལ་མངོན་དུ་ཕྱོགས་པའི་དཔའ་བོའི་གཟུགས་དང་གསང་བའི་མཚན་མ་ནི། འདི་དག་སྟེ། གཟུགས་ཕྲ་བ་དང་། རེག་པ་ཡང་པ་དང་། ཁྱབ་པ་དང་། ཡང་དག་པར་ཐོབ་པ་དང་། རབ་ཏུ་སྣང་བ་དང་། བརྟན་པ་དང་། དབང་དུ་གྱུར་པ་དང་། འདོད་དགུར་བསྒྱུར་བ་སྟེ་བརྒྱད་དོ། །དེ་ཡང་བྱང་ཆུབ་ཀྱི་སེམས་ཀྱི་རང་བཞིན་ལོངས་སྐུའི་གོང་བུ་ཆ་ཕྲ་བས་ཐིག་ལེའི་གཟུགས་ནི་ས་བཅུའི་དབང་ཕྱུག་ཧེ་རུ་ཀ་དང་། དེ་ལྟ་བུའི་ཤིན་ཏུ་རྣམ་པར་དག་པའི་ཡེ་ཤེས་ནི་ལྷ་མོ་ཡིན་ཏེ། དགྱེས་རྡོར་ལས། ཁུ་བའི་རྣམ་པ་བཅོམ་ལྡན་འདས། དེ་ཡི་བདེ་བ་འདོད་མར་བརྗོད། ནག་མོ་ཞེས་བྱ་ལོགས་ན་མེད། །ལྷ་ཞེས་སོགས་ཀྱི་གཞུང་འདོད་ཆགས་ཀྱི་ཆོས་སུ་སྦས་པ་བཤད་པའོ། །དེ་ལྟ་བུའི་ལྷ་ཡབ་ཡུམ་གྱིས་གསུམ་པོ་ཐམས་ཅད་བདག་ཉིད་གཅིག་ཏུ་བསྒྲུབས་པས་ལྷའི་དེ་ཁོ་ན་ཉིད་དེ། ས་ར་ཧས། ཁམས་གསུམ་མ་ལུས་འདི་དག་ཐམས་ཅད་ནི། །འདོད་ཆགས་ཆེན་པོ་གཅིག་ཏུ་ཁ་དོག་བསྒྱུར་ཞིག་དང་། །ཞེས་གསུངས་པས་སོ། །བཞི་པ་དེ་ཁོ་ན་ཉིད་དུ། སྒྲུབ་པ་ཡེ་ཤེས་ཀྱི་དེ་ཁོ་ན་ཉིད་ནི། གདོད་ནས་གྲུབ་པའི་དཔའ་བོ་དང་། རྣལ་འབྱོར་མ་ཐམས་ཅད་རོ་གཅིག་ཏུ་གྱུར་པའི་ཨཾ་སྣ་བུག་གཡོན་ནས་ཞུགས། ལྟེ་འོག་གི་ཆོས་འབྱུང་གྲུ་གསུམ་པའི་དབུས་སུ་ཕྱིན། ཨཾ་ཡིག་ཡོངས་སུ་གྱུར་པ་ལས་དཔལ་ལྷ་མོ་ཇི་ལྟ་བ་བསྐྱེད། གཅེར་བུ་རལ་པ་ཅན་ལ་སོགས་པའི་འཁོར་རྣམས་བསྐོར་བ་བསྐོར་བའི་ཚུལ། གཙོ་མོ་ཙ་ན་ཀའི་འབྲུ་ཙམ་དང་། འཁོར་རྣམས་ཡུངས་འབྲུ་ལྟ་བུར་ཕྲ་བ་ལ་སེམས་གཟུང་ནས། སླར་གཙོ་མོའི་ཐུགས་ཀར་ཧཱུྃ་ཡིག་བལྟས་ནས་དེ་ལས་འོད་འཕྲོས། ཁམས་གསུམ་པའི་འཁོར་ལོ་ཐམས་ཅད་རང་ལ་བསྟིམ། དེ་བཅོམ་ལྡན་འདས་མ་འཁོར་བཅས་ལ་འཁོར་གཙོ་མོའི་ཞལ་དུ་བསྟིམ། དེ་ཐུགས་ཀའི་ཧཱུྃ་ལ། དེའི་ཨུ་ཧཱ་ལ། ཧ་མགོ་བོ། མགོ་བོ་ཟླ་ཚེས། ཟླ་ཚེས་ཐིག་ལེ་ལ། དེ་ནཱ་ད་ལ། ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཆ་ཡི་ཚད་དུ་བསྒོམ་པ་ནི་གཟུགས་ལས་འདས་པའོ། །དེ་ཡང་དངོས་པོ་མེད་པའི་སེམས་རྣམ་པར་ཤེས་པ་གསུམ་དང་བྲལ་བ། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད། ལུས་དང་ངག་དང་སེམས་མེད་པ། ལས་དང་སྐྱེ་བ་ལས་གྲོལ་བ། ཟླ་བ་དང་ཉི་མ་དང་མེ་དང་ནོར་བུའི་འོད་ལྟར་ཤིན་ཏུ་གསལ་བ། རྟག་ཏུ་སྣང་བའི་མཚན་ཉིད་ཅན། ཐམས་ཅད་སྟོང་པའི་འོད་གསལ་བསམ་གྱིས་མི་ཁྱབ་པ་ཉིད་དུ་བཅུག་ནས། སླར་འོད་གསལ་བའི་ངང་ནས་ལུགས་བཟློག་གི་སྣང་བ་གསུམ་རླུང་དང་བཅས་པ་ལས། སྒྱུ་མ་ལྟ་བུའི་སྐུའི་གཟུངས་ཐོབ་པར་འགྱུར་རོ། །དེ་ཡང་རྗེ་བཙུན་ནཱ་རོ་པས། གཙོ་འཁོར་འོད་ཞུ་ཨེ་ཡི་གནས་སུ་བསྟིམ། ཨེ་ཡིག་ཆོས་འབྱུང་དེ་དབུས་ལྷ་མོ་བསྒོམ། །འཁོར་རྣམས་སྐོར་བ་བསྐོར་བའི་ཚུལ་ཉིད་དུ། །འོད་ཀྱི་སྤྲོ་བསྡུ་དམིགས་པ་དག་ལ་འབད། །ཅེས་གསུངས་སོ། །དེ་ཡང་། འདོད་པ་དང་གཟུགས་དང་གཟུགས་མེད་པའི་མཚན་ཉིད་བརྟན་པ་དང་གཡོ་བའི་དངོས་པོ་དང་དངོས་པོ་མེད་པའི་རང་བཞིན། རྣམ་པ་ཐམས་ཅད་པའི་མཆོག་དང་ལྡན་པའི་སྟོང་ཉིད། མཆོག་ཏུ་མི་འགྱུར་བ། དམིགས་པ་མེད་པའི་སྙིང་རྗེ་ཡང་ཡིན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དཔལ་ལྷ་མོར་བརྗོད་དོ། །དེ་བས་ན་དེ་ནི་རང་གི་སེམས་ལས་གཞན་མིན་པ་དང་། རྒྱུ་རྐྱེན་ལས་མ་བྱུང་བའི་ཕྱིར་རང་བྱུང་དང་། ཐབས་ཀྱི་རང་བཞིན་ཡིན་པས། སྣང་གྲགས་དེའི་ཆོ་འཕྲུལ་དུ་བཤད་པ་མཐར་ཐུག་པའི་དོན་ནོ། གལ་ཏེ་དྲོད་རྙེད་ཀྱང་ལམ་བགྲོད་པ་ཅུང་འགྱངས་ན་སྤྱོད་པ་བརྩམ་པར་བྱ་སྟེ། དུར་ཁྲོད་ལ་སོགས་པའི་གནས་ཐམས་ཅད་དུ། ལུས་ལ་བདག་ཏུ་འཛིན་པས་གཅེས་པར་ལྟ་བ་སྤངས་ཏེ། ས་རྡོ་ལྟ་བུར་བྱས་ནས། བསམ་གྱིས་མི་ཁྱབ་པའི་ཏིང་ངེ་འཛིན་ལ་རྩལ་སྦྱངས་པས་མྱུར་བ་ཉིད་དུ་མཆོག་གི་དངོས་གྲུབ་ཐོབ་པར་འགྱུར་བ་ཡིན་ཏེ། སྤྱོད་པ་དག་ནི་བྱ་བར་བཤད། །སྤྱོད་པས་ཕ་རོལ་ཕྱིན་མཆོག་ཉིད། །ཅེས་གསུངས་པས་སོ། །ནཱ་རོའི་ལེགས་བཤད་འོད་ཟེར་ཅི་ཡང་གིས། །གངས་ཅན་སྙིང་མུན་སེལ་ལ་ཟླ་མེད་པའི། །གྲུབ་རིགས་རྒྱ་མཚོའི་ཉི་མ་མར་པ་དེའི། །བཀའ་དྲིན་ཐོབ་པ་ས་ལ་པད་དཀར་ཙམ། །རྡོ་རྗེ་མཁའ་འགྲོའི་ཞལ་སྐྱིན་ཟླ་བའི་གདོང་། །སྐལ་བཟང་ཀུན་དའི་རེ་བ་རྫོགས་བྱེད་དུ། །རྣམ་སྤྱོད་ཕྲག་པར་ལེན་ལ་མ་སུན་པར། །ངག་གི་དབང་ཕྱུག་དགྱེས་པའི་ཤར་རི་ཡིན། །དཔལ་རྡོ་རྗེ་མཁའ་འགྲོ་མ་དུད་པའི་སོལ་བ་ཅན་སྒྲུབ་པའི་ཐབས་རྗེ་ནཱ་རོ་ཡབ་སྲས་ཀྱི་མན་ངག་དྲི་མ་མེད་པ། འཕྲུལ་གྱི་གཙུག་ལག་ཁང་བཀྲ་ཤིས་མཐོང་སྨོན་དུ། ཡུལ་ཤར་ཕྱོགས་ཀྱི་རྒྱུད་དུ་བྱུང་བའི་རིག་པ་འཛིན་པ་མི་ཕམ་པདྨ་དཀར་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེའམ། ངག་གི་དབང་ཕྱུག་དགྱེས་པས་སུག་ལས་སུ་བྱས་པའོ།། །།སརྦ་མངྒ་ལཾ།། །། དཔལ་ལྡན་དུད་སོལ་ལྷ་མོའི་གཏོར་ཆོག་མདོར་བསྡུས།དཔལ་ལྡན་དུད་སོལ་ལྷ་མོའི་གཏོར་ཆོག་མདོར་བསྡུས་བཞུགས་སོ། །གང་ཞིག་དྲན་པ་ཙམ་གྱིས་ཀྱང་། །བདུད་ཀྱི་གཡུལ་ལས་རྒྱལ་བ་དང་། །ཕུན་སུམ་ཚོགས་རྣམས་ཡིད་བཞིན་དུ། །སྟེར་མཛད་དཔལ་ལྡན་ལྷ་མོར་འདུད།། འདིར་ཡེ་ཤེས་ཀྱི་མཁའ་འགྲོ་མ་དུད་པའི་སོལ་བམ་ཞེས་བྱ་བ། རྒྱ་བོད་ཐམས་ཅད་ན་འགྲན་ཟླ་དང་བྲལ་བ། དཀར་ཕྱོགས་སྐྱོང་བ་ཐམས་ཅད་ཀྱི་གཙོ་བོ། རྒྱུད་སྡེ་གཉན་པོ་ཐམས་ཅད་ཀྱི་བཀའ་སྲུང་དེ་ཉིད་ཀྱི་གཏོར་ཆོག་རྒྱས་པ་ནི་ཁོ་བོས་གཞན་དུ་བཤད་ཟིན་ལ། འདིར་ཐུན་གཏོར་དུ་བྱ་བའི་རིམ་པ་རྡོ་རྗེ་འཆང་མར་རྔོག་ཡབ་སྲས་ཀྱི་གསུང་ཇི་ལྟ་བ་བཞིན་འགོད་པར་བྱ་བ་ནི། རང་ཉིད་དགྱེས་རྡོར་གདན་བཞི་ལ་སོགས་པ་ལྷའི་རྣལ་འབྱོར་སྔོན་དུ་འགྲོ་བས། མདུན་དུ་སྐད་ཅིག་གིས་དུད་སོལ་མའི་སྙིང་ཀར་པདྨ་འདབ་མ་བརྒྱད་པ་ལྟེ་བ་དང་བཅས་པ། དེའི་སྟེང་དུ་ཨཾ་འོད་ཟེར་དང་བཅས་པ། དེའི་སྟེང་དུ་རཾ་འོད་ཟེར་དང་བཅས་པ། རཾ་ལས་མེ་འབར་བས་དུད་སོལ་གྱི་ལུས་དེ་དུད་པར་འཐུལ་གྱི་བསྲེགས་པས་ཐལ་བར་གྱུར། ཨཾ་གྱི་སྟེང་དུ་བཾ་དེ་ཡོངས་སུ་གྱུར་པ་ལས་བུམ་པ་དཀར་པོ་བདུད་རྩིས་གང་བ་ལས་བདུད་རྩིའི་རྒྱུན་དཀར་པོ་ལྷུག་ལྷུག་བབས་པས། ཨཾ་དེ་འོད་དཀར་ལྷག་ལྷག་པ་ཅིག་ཏུ་གྱུར། ཨོཾ་ཨཾ་མ་ཧཱ་ཀཱ་ལི་དེ་ཝི་ཀཱ་རཱ་ལི་བི་ཀྲནྟ་ཀཱ་ལ་རཱ་ཏྲི་ཙཎྜྻ་རཱུ་པི་ཧཱུྃ་ཕཊ྄། ཨཾ་དེ་ཡོངས་སུ་གྱུར་པ་ལས་དུད་པའི་སོལ་བ་མ་སྐུ་མདོག་ནག་མོ་སྤྲིན་དང་བུང་བ་ལྟར་གནག་པ་ཤིན་ཏུ་སྦེག་པ་ཀེང་རུས་ཀྱི་ལུས་ཅན་ཞལ་གཅིག་ཕྱག་བཞི། ཞབས་གཉིས་མ། གཡས་ཀྱི་དང་པོ་ན་རལ་གྲི་མེ་འབར་བ། འོག་མ་བྷཉྫྱ་དམར་གྱིས་བསྐྱིལ་བ་སྐྲ་གྲོལ་བ། གཡོན་གྱི་དང་པོ་ན་ཤཀྟི། འོག་མ་ན་ཏྲི་ཤུ་ལ་དར་དཔྱངས་འཕྱང་བ་ཐོགས་པ། མི་རོ་རེངས་པ་ཁར་བཅུག་ནས་ཞལ་མཆེ་བ་བཞི་གཙིགས་པ། སྤྱན་གསུམ་དམར་པོ་ལྷན་ནེར་བལྟ་བ། དབུ་སྐྲ་རལ་པ་གྱེན་དུ་བརྫེས་ཤིང་གཡོན་དུ་འཁྱིལ་བ། དེ་ལ་སྦྲུལ་དང་ཐོད་འཕྲེང་གིས་བརྒྱན་པ། རྨ་བྱའི་རྒྱལ་མཚན་གཙུག་ན་འཕྱར་བ། སྙན་ཆ་གཡས་ན་སྦྲུལ་གྱི་མགུལ་ནས་དྲིལ་བུ་གསིལ་བ། གཡོན་ན་སེང་གེ་རལ་པ་དམར་བ། རོ་ཉེའི་རྣ་ཆ་ཟུང་གིས་སྒེག་པ། རྣ་ལྟག་གཉིས་ནས་མེ་ཏོག་དང་དར་ནག་གི་ཅོད་པན་འཕུར་བ། ལྷ་མ་ཡིན་ལ་སོགས་པའི་ཐོད་པའི་དོ་ཤལ་བྱས་པ། གླང་པོ་ཆེའི་ཀོ་བས་སྟོད་གཡོགས་པ། བ་གླང་གི་ཀོ་རློན་ཆེན་པོ་དྲས་པ་ལ་རེ་སྡེ་སེར་པོའི་ཤམ་བུ་བཏགས་པས་སྨད་དཀྲིས་པ། ཁྲག་དང་ཞག་གི་ཐིག་ལེས་ཚོམ་བུར་བྲིས་པ། ཀླུའི་རྒྱལ་པོ་གཤིབས་པས་སྐ་རགས་བྱས་པ། ཞབས་གཉིས་ལྕགས་སྒྲོག་གིས་བརྒྱན་པ། བོང་བུ་དམར་གའི་སྟེང་ན་ཙན་སྐྱིལ་གྱི་བཞུགས་པ། དུར་ཁྲོད་བརྒྱད་དུ་རྒྱུ་ཞིང་ཧཱུྃ་དང་བྷྱོའི་སྒྲ་དུང་དང་འབྲུག་ལྟར་སྒྲོག་པ། མ་མོ་མཁའ་འགྲོ་དང་ཤ་ཟ་འབུམ་སྡེ་དབང་དུ་སྡུད་པའི་སྐུར་གྱུར། དེའི་ཐུགས་སྒོ་ངའི་དབྱིབས་སོར་བཞི་པ་མར་མེ་ལྟ་བུ། འོད་དེའི་དབུས་སུ་ཧཱུྃ། ཧཱུྃ་དེ་ལས་འོད་འཕྲོས་ཚུར་འདུས་འོད་ཀྱི་ཐིག་ལེའི་ནང་དུ་ཧཱུྃ་གི་མཐའ་སྐོར་དུ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མཧཱ་ཀཱ་ལི་ཧཱུྃ་བྷྱོཿཞེས་པས་བསྐོར་བར་གྱུར། དེའི་ཐུགས་ཀའི་ཧཱུྃ་ལས་ཧཱུྃ་གཅིག་བྱུང་སྟེ་བྷ་གར་ཐིམ་པར་གྱུར། ཨོཾ་བཛྭ་ལཱ་ཀྵྼ་ར་ག་ཡཱ་མི་ཧཱུྃ། རང་གི་ཐུགས་ཀའི་ས་བོན་གྱི་འོད་ཟེར་གྱིས་ནག་པོ་དྲག་པོ་དྲག་པོ་ཆེན་པོའི་དུར་ཁྲོད་དང་། བྱང་པུཥྤ་ཧ་རི། མར་རྔོག་གི་གདན་ས་ནས་དུད་པའི་སོལ་བ་མ་འཁོར་ནག་མོ་འབུམ་སྡེ་དང་བཅས་པ་བཛྭ་ས་མཱ་ཛཿཐོད་རྔ་དང་རྔེའུ་ཆུང་དྲིལ་བུ་ལ་སོགས་པ་རོལ་མོའི་སྒྲ་དབྱངས་སྙན་པོས། ཧཱུྃ། རང་བཞིན་རྣམ་དག་ཡེ་ཤེས་སྒྱུ་མའི་ཀློང་། །བདེ་ཆེན་འདུ་འབྲལ་མེད་པའི་དཀྱིལ་འཁོར་དུ། །དུས་གསུམ་རྒྱལ་བའི་འཕྲིན་ལས་གཅིག་བསྡུས་པ། །དཔལ་འབར་མཁའ་འགྲོའི་གཙོ་མོ་དབྱིངས་ནས་བཞེངས། །དུར་ཁྲོད་མྱུལ་ཞིང་རྣལ་འབྱོར་ལས་ལ་འགྲེངས། །མི་བཟད་རྣམ་པར་འཕྲུལ་པའི་ཞིང་ཁམས་དང་། །པུཥྤ་ཧ་རི་མར་རྔོག་གདན་ས་དང་། །མཁའ་འགྲོ་འདུ་བའི་གནས་ནས་འདིར་གཤེགས་ཤིག །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿདྲིཥྱ་ཛཿཧཱུྃ་བཾ་ཧོཿས་མ་ཡ་ཧྶཾ། ས་མ་ཡ་ཧོཿཡེ་ཤེས་སེམས་མའི་གཙོ་མོ་དམ་ཚིག་པ་ལ་ཐིམ། འཁོར་གཅེར་བུ་རལ་པ་ཅན། གཡས་ན་མིའི་སྙིང་དམར་པོ་དམར་རྩེར་ཐོགས། གཡོན་ན་ཐོད་པ་སྐྲ་ཅན་ཁྲག་གིས་བཀང་བ་འཁོར་འབུམ་སྡེའི་ཚོགས་ཀྱིས་བསྐོར་ནས་འདུག་པར་གྱུར། འཁོར་དང་བཅས་པའི་ལྗགས་སྟེང་དུ་བདུད་རྩི་བྱིན་པར་མོས་པས་གཏོར་ཏེ། དུད་པའི་སོལ་བ་མ་ཁྱོད་ཀྱི་སྐུ་མྱུར་དུ་སྟོན་ཅིག སྐུ་མི་སྟོན་ན་བདག་གི་ཡིད་ལ་འདོད་པའི་ལས་ཐམས་ཅད་མྱུར་དུ་སྒྲུབས་ཤིག ཨོཾ་ཧཱུྃ་ཤྲཱི་ཡ་སོགས་དང་། ཨེ་ཨཱ་ར་ལི་སྲིང་ཛཿའདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འདི་འཐུང་། །ཨོཾ་བཛྭ་ཧ་ན་ཧ་ན་བཛྭ་ས་མ་ཡ་མ་ཏི་ཀྲ་མ་ཡ་ཧཱུྃ་ཕཊ྄། ཅེས་དམ་ལ་བཞག ཨོཾ་ཨཱཿཧཱུྃ་ཤྲཱི་ཡ་དེ་ཝི་ཡ་སོགས་དང་། བཛྭ་པུཥྤེ་པཱུ་ཛ་མེགྷ་ས་མུ་དྲ་ཀྵྨྱར་ཎ་ས་མ་ཡེ་ཧཱུྃ། དེ་བཞིན་དུ་དྷཱུ་པེ། ཨཱ་ལེ་ཀེ གནྡྷེ། ནཻ་ཝི་དྱ། ཤཔྟ་རྣམས་ཀྱིས་མཆོད། གཏོར་མ་ལ་བདུད་རྩི་བྲན་ལ། གཏོར་སྣོད་བྷཉྫྱ་ཡངས་ཤིང་རྒྱ་ཆེ་བའི་ནང་དུ་གཏོར་རྫས་རྣམས་ཧ་ཧོཿསྲིཿཧ་སེར་པོས་གཏོར་མའི་ཁ་དོག་ངན་པ་བཅོམ། གཏོར་མ་ཁ་དོག་ཕུན་སུམ་ཚོགས་པ་གསེར་ཞུན་མ་ལྟར་གྱུར། ཧོཿདཀར་པོས་དྲི་ངན་པ་བཅོམ་ནས་དྲི་ཕུན་སུམ་ཚོགས་པར་གྱུར། སྲིཿསྔོན་པོས་རོ་ངན་པ་བཅོམ་ནས་རོ་ཕུན་སུམ་ཚོགས་པར་གྱུར། ཨོཾ་ཧ་ཧོ་སྲཱིཿསྭཱ་ཧཱ། གསུམ་གྱིས་བྱིན་གྱིས་བརླབ། གཏོར་མ་ལག་པས་བཏེག་ལ། ཨོཾ་ཧཱུྃ་ཤྲཱི་ཡ་དེ་ཝི་སོགས་དང་། ཨོཾ་མ་ཧཱ་མཱཾ་ས་ཁཱ་ཧི། མཧཱ་ཙིཏྟ་ཁཱ་ཧི། མཧཱ་རཀྟ་ཁཱ་ཧི། མཧཱ་གོ་རོ་ཙ་ན་ཁཱ་ཧི། མཧཱ་བ་སུ་ཏ་ཁཱ་ཧི། ཨོཾ་ཨི་དཾ་བཾ་ལིཾ་གྲཱི་གྲཱི་ས་མ་ཡ་ཧཱུྃ་ཕཊ྄་སྭཱ་ཧཱ། གསུམ་མམ་བདུན་གྱིས་ཕུལ། དུད་སོལ་མ་འཁོར་འབུམ་སྡེ་དང་བཅས་པས་གཏོར་མ་ཧབ་དི་རི་རི་གསོལ་བར་བསམ། རོལ་མོ་དང་བཅས་པས། བྷྱོཿཏིལ་མར་གྱིས་བསྐུས་ལན་བུ་གཅིག་འཕྱར་རོ་ཉེའི་རྣ་ཆས་སྒེག་ཅིང་རྒྱན་རྣམས་མ་ལུས་འཆང་། ཞེས་སོགས་གཟུངས་ནས་ཕྱུངས་བའི་བསྟོད་པས་བསྟོད། ཨོཾ་རུ་རུ་རོ་རུ་ཏིཥྛ་བ་དྷྭ་སི་ཧཱུྃ་བྷྱོ་ཀ་མ་ལ་རཀྵ་སི་ཧཱུྃ་བྷྱོཿ དགྲ་བགེགས་མཱ་ར་ཡ་ཧཱུྃ་ཕཊ྄། གཏོར་མ་ལ་བདུད་རྩི་བྲན། རང་གི་ཐུགས་ཀ་ནས་འོད་ཟེར་འཕྲོས། ལྷ་མོ་གཙོ་འཁོར་གྱི་ཐུགས་ཀར་ཕོག ཐུགས་རྒྱུད་བསྐུལ་སྔོན་དམ་བཅས་པ་དྲན་ནས་ཐུགས་ཀ་ནས་འོད་ཟེར་འཕྲོས། གདུག་པ་ཐམས་ཅད་ཚར་བཅད། དྲེགས་པ་ཐམས་ཅད་ཀྱི་ནུས་མཐུ་བསྡུས་ལྷ་མོའི་ཐུགས་ཀར་ཐིམ། དེ་ནས་འོད་ཟེར་གྱི་རྣམ་པར་ཞལ་ནས་འཐོན་ནས་བདག་ཉིད་ཀྱི་ཐུགས་ཀར་ཐིམ་པས། ནུས་མཐུ་ཕུན་སུམ་ཚོགས་པར་གྱུར་པར་བསམས་ཏེ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་སོགས་བརྒྱ་འམ་ཉེར་གཅིག་ལས་མི་ཉུང་བར་བཟླས་སོ། །སླར་ཡང་གཏོར་མ་ལ་ཆང་ཕུད་བྲན་ལ། ཨོཾ་ཀུ་རུ་ཀུ་རུ་ཝཏྟ་ཏ་ལི་མ་ཧཱ་བཏྟ་ཏ་ལི་བྷྱོཿ བྷྱོཿདུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དྭགས་གདོང་། །དམ་ཚིག་བསྲུང་མ་ཁྲག་དགའ་མོ། །ཀི་ལིའི་སྒྲ་སྒྲོག་སྦྱོར་ཟིན་མ། །དུར་ཁྲོད་རོ་ཡི་ཚལ་དབུས་ན། །གཏུམ་ཆེན་དུད་པའི་སོལ་བ་མོ། །ཚོགས་དང་ཕོ་ཉར་བཅས་པ་ཡི། །རྩེ་གཅིག་ལྷ་མོ་དུད་སོལ་མ། །གསོལ་ཞིང་བཞེས་ཤིག་དམ་ཚིག་ལྷ། །གནས་ནས་གནས་པར་མཛད་དུ་གསོལ། །བདག་གི་སེམས་ལ་ཅི་འདོད་པའི། །ལས་འདི་མྱུར་དུ་གྲུབ་པར་མཛོད། །བདག་གི་ལས་ནི་ཅི་བྱེད་ཀྱང་། །བདེ་ལེགས་ཀུན་གྱི་གྲོགས་མཛོད་ཅིག །ཟོ་ཞིག་འཐུང་ཞིང་ཚིམ་པ་ཡིས། །རང་གི་གནས་ལ་གནས་ཀྱི་ཧཱུྃ། གདུག་པ་ཅན་རྣམས་ཐམས་ཅད་བཟུང་། །ཟ་ཞིང་འཐུང་ལ་ལོངས་སྤྱོད་ཅིག །ཕུཾ་ཕེཾ་ཕེཾ་ཕེཾ་ཕཊ྄་སྭཱ་ཧཱ། ཞེས་པ་དང་། འཕྲིན་ལས་བཅོལ་བ་ནི། མཁའ་འགྲོ་མ་དུད་སོལ་མ་འཁོར་འབུམ་སྡེ་དང་བཅས་པ་ཁྱོད་ཀྱིས། མཆོད་སྦྱིན་གྱི་གཏོར་མ་ཁ་དོག་དམ་པ་དྲི་དམ་པ། རོ་དམ་པ། རེག་བྱ་དམ་པ་དང་ལྡན་པ་འདི་བཞེས་ལ་རྣལ་འབྱོར་བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ནད་ཀྱི་རིགས་སུ་གྱུར་པ། རླུང་མཁྲིས་བད་ཀན་འདུས་པ་ལས་གྱུར་པའི་ནད་རིགས་ཐམས་ཅད་ཞི་ཞིང་བཟློག་པར་མཛད་དུ་གསོལ། གདོན་གྱི་རིགས་སུ་གྱུར་པ། ལྷ་དང་། ཀླུ་དང་། གནོད་སྦྱིན་དང་། རྒྱལ་པོའི་གནོད་པ་ལ་སོགས་པ་ཐམས་ཅད་ཞི་ཞིང་བཟློག་པར་མཛད་དུ་གསོལ། །རྨི་ལམ་ངན་པ་དང་། མཚན་མ་ངན་པ་ལ་སོགས་པ་སྤང་བྱ་མི་མཐུན་པའི་ཕྱོགས་ཐམས་ཅད་བཟློག་ཅིང་ཞི་བར་མཛད་དུ་གསོལ། གཞན་ཡང་རྣལ་འབྱོར་པ་བདག་འཁོར་དང་བཅས་པ་ཐམས་ཅད་ཀྱི་གྲོགས་ཀྱིས། མཐུ་གྱིས། དཔུང་གྱིས། སྔུན་ནས་བསུས། ཕྱི་ནས་སྐྱོལ། བསམ་པ་བསྒྲུབས། རེ་བ་བསྐོངས། ཇི་ལྟར་འདོད་པའི་དོན་ཐམས་ཅད་མཐར་ཕྱིན་པའི་འཕྲིན་ལས་མཛོད་ཅིག ཅེས་གསོལ་བས་དེ་ལྟར་བགྱིའོ་ཞེས་ཁས་བླངས་པར་གྱུར་པར་བསམ། ཤྲཱི་མན་དེ་ཝི་དྷཱུ་མཾ་ག་རི་ས་པ་རི་ཝཱ་རེ་ཨརྒྷཾ། པཱ་དྱཾ། པུཥྤེ། དྷཱུ་པཾ། དཱི་བཾ། གནྡྷེ། ནཻཝིདྱཾ། ཤཔྟ་པྲ་ཏཱི་ཙྪ་ཧཱུྃ་སྭཱ་ཧཱ། སྔོན་ཚེ་དཔག་བསམ་བྱང་ཆུབ་ཤིང་དྲུང་དུ། །རྒྱལ་བ་ཐུབ་པ་ཆེན་པོའི་སྤྱན་སྔ་རུ། །བསྟན་པ་གཉན་པོ་བསྲུང་བར་དམ་བཅས་པའི། །ཁྲག་འཐུང་དུད་སོལ་སྐུ་ལ་ཕྱག་འཚལ་བསྟོད།། ཅེས་བསྟོད། མ་འབྱོར་བ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིད་པ་དང་ནི་བགྱིད་སྩལ་བ། །དེ་ཀུན་ལྷ་མོས་བཟོད་པར་གསོལ། །བཛྭ་ལཱ་ཀྵྼ། རཱ་ག་ཡཱ་མི་ཧཱུྃ། དམ་ཚིག་པ་དང་ཡེ་ཤེས་ཀྱི་ལྷ་མོ་དབྱེར་མེད་པ་འཁོར་བཅས་སྐུ་གཟུགས་སམ། རང་གི་སྙིང་ཀར་བསྡུ། སེམས་ཅན་ཐམས་ཅད་ནད་མེད་ཅིང་། །སེམས་ཅན་ཐམས་ཅད་བདེ་གྱུར་ཅིག །གང་གི་ལམ་ནས་གྲོལ་བ་ཡི། །སངས་རྒྱས་ཉིད་དང་ཕྲད་པར་ཤོག །མ་བསྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་གྲོལ་བ་དང་། །ད་ལྟ་ཉིད་དུ་རྗེས་སྩོལ་བའི། །ལམ་དེ་ཉིད་ལ་གནས་པར་ཤོག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བྱེད་ཅིང་། །སེམས་ཅན་སྡུག་བསྔལ་ཚོགས་ཀྱིས་གཟིར་ལས་སྒྲོལ། །ཟབ་མོ་རྒྱུད་ཀྱི་སྲུང་མ་མ་མོ་ནི། །ཞལ་གཅིག་ཕྱག་བཞི་འཕྲིན་ལས་རྣམ་བཞི་སྒྲུབ། །རྫུ་འཕྲུལ་མཐུ་ལྡན་དགྲ་བགེགས་ཚར་གཅོད་པའི། །དཔལ་ལྡན་དུད་སོལ་ལྷ་མོའི་བཀྲ་ཤིས་ཤོག། ཅེས་ཤིས་པ་བརྗོད་པར་བྱའོ། །དེ་ལྟར་མར་རྔོག་གི་གསུང་ལྷད་མ་ཞུགས་པ་འདི། ས་གསུམ་ན་འགྲན་ཟླ་མེད་པའི་མིའི་དབང་པོ་གོང་མ་ཆེན་པོ་ངག་གི་དབང་ཕྱུག་བཀྲ་ཤིས་གྲགས་པ་རྒྱལ་མཚན་དཔལ་བཟང་པོའི་ཐུགས་དམ་དུ་ཤཱཀྱའི་དགེ་སློང་མི་ཕམ་པདྨ་དཀར་པོས་སྦྱར་བས་དཔལ་ལྡན་ཕག་མོ་གྲུབ་པའི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་གྱུར་ཅིག །ཤུ་བྷམ་སྟུ་སརྦ་ཛ་གཏཾ།། །།མདྒལཾ།། །། གཡུ་སྒྲོན་མའི་སྒྲུབ་ཐབས་དངོས་གྲུབ་ཀྱི་འདོད་འཇོ།གཡུ་སྒྲོན་མའི་སྒྲུབ་ཐབས་དངོས་གྲུབ་ཀྱི་འདོད་འཇོ་ཞེས་བྱ་བ་བཞུགས་སོ། །བཅོམ་ལྡན་འདས་མ་རྡོ་རྗེ་གཡུ་སྒྲོན་མ་ལ་ཕྱག་འཚལ་ལོ། །བཅད་བརྡར་བསྲེགས་ཀྱང་གཞན་གྱི་གདུང་འཇོམས་ལ། །མི་འཕྲོགས་ཡོན་ཏན་ག་བུར་དོག་པ་ཡིས། །འཁྱུད་པ་ལྷན་ཅིག་སྐྱེས་མ་གོརྴ་ཥིའི། །ལྗོན་ཤིང་དབང་པོ་གང་དེ་རྒྱལ་གྱུར་ཅིག། དེ་ཡང་། བདེ་མཆོག་རྡོ་རྗེ་མཁའ་འགྲོའི་རྒྱུད་ལས། བོད་ཡུལ་ལྷན་ཅིག་སྐྱེས་མ་ཞེས་བྱ་བ་ཞིང་སྐྱོང་བའི་དབང་མོར་གསུངས་ཤིང་། གཞན་ལས་ཙ་རི་ཏྲ་རང་བྱུང་གི་གནས་ཀྱི་བདག་མོར་ཡང་དང་ཡང་དུ་བསྔགས་པ་རྡོ་རྗེ་གཡུའི་སྒྲོན་མ་ཞེས་བྱ་བའི་སྒྲུབ་ཐབས་བཤད་པར་བྱ་སྟེ། དེ་ལ་ཕྱི་བསྲུང་མར་སྒྲུབ་པ། ནང་གྲོགས་སུ་བསྟེན་པ། གསང་བ་དབང་གི་སྒྲུབ་པ་དང་གསུམ་ལས། དང་པོ་ནི། ཡིད་དང་མཐུན་པའི་གནས་དབེན་ཞིང་ཉམས་དགའ་བ། བཀྲ་ཤིས་པའི་མཚན་མས་མཛེས་པའི་ཁང་བུར་མཎྜྻལ་པདྨ་འདབ་མ་བཞི་པ་མུ་ཁྱུད་མཛེས་ཚོན་དང་བཅས་པའི་དབུས་སུ་གཡུ་སྒྲོན་མའི་གཟུགས་གདན་དུ་མེ་ལོང་མིག་མེད་ལ་ཁྱེའུ་དང་བུ་མོ་གཙང་མའི་ཐིག་ལེས་བྲིས་པའི་འཁོར་ལོ་རྩིབས་བཞི་པ་ལྟེ་བ་ལ་སྲཱིཿདང་ཕྱོགས་བཞིར་ཧ་རི་ནི་ས། མུ་ཁྱུད་ལ་དབྱངས་གསལ་དང་རྟེན་འབྲེལ་སྙིང་པོ་བྲིས་པ་དར་སྣ་ལྔས་དྲིལ་བ་དང་། གཡུ་མིག་མེད། ཤེལ། རིན་པོ་ཆེ་སྣ་ལྔའི་སྒྲོམ་བུ་སྟེ། རྟེན་རྫས་སྨན་དང་ཟས་སྣ་གཏོར་མ་སོགས་མཆོད་པའི་ཚོགས་ཇི་སྙེད་པས་མཐའ་བསྐོར་ཏེ། དང་པོ་རེ་ཞིག་བདེ་བའི་སྟན་ལ་དཔལ་ཧེ་རུ་ཀའམ། འཇིག་རྟེན་དབང་ཕྱུག་ཏུ་བདག་ཉིད་བསྐྱེད་ནས། རྣམ་པར་རྟོག་པ་ཙམ་གྱི་ཁམས་གསུམ་པོ་ཀུན་ནས་བརྟག་པར་བྱའོ། །དེ་ནས་སྭ་བྷཱ་ཝའི་སྔགས་བརྗོད་བཞིན་པས། དཀྱིལ་འཁོར་སྟོང་པར་མོས་པའི་སྐད་ཅིག་གིས་ལྷའི་སྐྱེད་མོས་ཚལ་རིན་པོ་ཆེའི་ཤིང་དང་མེ་ཏོག་བྱ་དང་རི་དྭགས་འབབ་ཆུ་དང་ཁྲུས་ཀྱི་རྫིང་ལ་སོགས་པ་ཕུན་སུམ་ཚོགས་པ་ཐམས་ཅད་ཀྱིས་ཡིད་དུ་མཆིས་པར་བྱས་པའི་དབུས་སུ་པདྨ་འདབ་མ་བཞི་པའི་ལྟེ་བར་ཟླ་བ་གདན་དུ་བཏིང་བའི་སྲཱིཿཡིག་དཀར་པོ་ཡོངས་སུ་གྱུར་པ་ལས་ཀུ་མུད་དའི་ཕུང་པོ་ལྟ་བུར་ཡོངས་སུ་དཀར་བའི་རྡོ་རྗེ་གཡུ་སྒྲོན་མ་ལྷའི་བུ་མོ་ལོ་བཅུ་དྲུག་ལོན་པའི་ལང་ཚོ་ཅན་བལྟ་བས་ཆོག་མི་ཤེས་པར་མཛེས་པ། རིན་པོ་ཆེའི་རྒྱན་ཐམས་ཅད་ཀྱིས་ཡིད་བཞིན་དུ་བརྒྱན་ཅིང་དཔག་བསམ་གྱི་ཤིང་ལས་བྱུང་བའི་གོས་དབང་པོའི་གཞུ་ལྟར་བཀྲ་བ་ཉིས་བརྩེགས་སུ་གྱོན་པའི་ཕྱག་གཡས་ཤེལ་གྱི་རྔ་། གཡོན་གསེར་གྱི་འུ་ལུ་བསྣམས་པས། དེ་བརྡུང་བའི་ཚུལ་དུ་མཛད་པ་ཤིན་ཏུ་སྒེག་ཅིང་འགྱིང་བས་བཞུགས་པའི་མདུན་གྱི་འདབ་མ་ལ། ཧ་ཡིག་ལས་རྡོ་རྗེ་མཁའ་འགྲོ་སྔོན་མོ། ལྷོར་རི་ཡིག་ལས་རིན་ཆེན་མཁའ་འགྲོ་སེར་མོ། ནུབ་ཏུ་ནི་ཡིག་ལས་པདྨ་མཁའ་འགྲོ་དམར་མོ། བྱང་དུ་ས་ཡིག་ལས་ལས་ཀྱི་མཁའ་འགྲོ་ལྗང་ཁ། ཐམས་ཅད་ཀྱང་ལྷའི་ན་ཆུང་ཡིད་འཕྲོག་པ། གཡས་རིན་པོ་ཆེ་དང་། གཡོན་དངུལ་དཀར་གྱི་མེ་ལོང་འཛིན་ཅིང་རྒྱན་ཐམས་ཅད་ཀྱིས་བརྒྱན་ནས་གཙོ་མོ་ལ་འདུད་པའི་ཚུལ་གྱིས་བཞུགས་པ། ཕྱི་རོལ་གྱི་སྐྱེད་ཚལ་དུ་ཞིང་སྐྱོང་གི་མཁའ་འགྲོ་འབུམ་རྩེད་འཇོ་སྣ་ཚོགས་ཀྱིས་རོལ་བར་བསམ་ནས་རང་གི་ས་བོན་གྱི་ལྕགས་ཀྱུས་ཙ་རི་ཏྲ་ནས་ཞིང་སྐྱོང་གི་དབང་མོ་འཁོར་དང་བཅས་པ་སྤྱན་དྲངས་པར་བསམས་ནས་དབྱངས་སྙན་པོས་སྤོས་དཀར་དང་སི་བསྲེག་ཅིང་། དད་པ་དང་ནི་དམ་ཚིག་གིས།། ཞེས་སོགས་མཆོད་པའི་བར་གཞུང་བཞིན་བྱས་ལ་ལྷ་མོའི་སྙིང་གར་ཟླ་བའི་ཐིག་ལེ་རིལ་མ་ཙམ་གྱི་དབུས་སུ་སྲཱིཿཡིག་གི་མཐའ་མ་ན་ཕར། ཨོཾ་བཛྭ་པྲ་མོ་ཧ་སྲཱིཾ་སྲཱིཾ་སྭཱ་ཧཱ། ཞེས་པས་བསྐོར་བ་གཡོན་སྐོར་དུ་འཁོར་བ་དམིགས་ཏེ་ངག་ཏུ་བཟླ་བར་བྱའོ། །སྐབས་སུ་བདག་གི་ཐུགས་ཀ་ནས་འོད་ཟེར་འཕྲོས། གཙོ་འཁོར་རྣམས་ལ་ཕོག སྐུ་གསུང་ཐུགས་དགྱེས་པས་ཚིམ། བདག་ལ་ཅི་འདོད་པའི་དངོས་གྲུབ་སྩོལ་བར་བསམ་རྗེས་དཀར་གསུམ་མངར་གསུམ་གྱི་གཏོར་། ཨོཾ་ཨཱཿཧཱུྃ་གིས་རིན་པོ་ཆེའི་སྣོད་ནམ་མཁའ་ལྟར་ཡངས་པ་ལྷའི་བདུད་རྩིས་མེར་གྱི་གང་བར་བསམ་ནས་སྙིང་པོའི་མཐར་བ་ལི་ཏ་ཁ་ཁ་ཁཱ་ཧི་ཁཱ་ཧི་བཏགས་པས་ཕུལ། རྩེ་གཅིག་བརྟན་མ་ཞེས་སོགས་ཀྱིས་བསྟོད། སྔོན་ཚེ་ཆོས་རྗེ་གཙང་པ་རྒྱ་རས་ལ། །ཇི་ལྟར་ཞལ་བཞེས་ཐུགས་དམ་དྲན་མཛོད་ལ། །རྣལ་འབྱོར་བདག་ལ་དགྱེས་པའི་ཞལ་བཟང་སྟོན། །བཅོལ་བའི་འཕྲིན་ལས་མྱུར་དུ་སྒྲུབས་པར་མཛོད།། ཅེས་བརྗོད། དེ་ལྟར་ཞག་བདུན་ནམ། བཅུ་བཞི། ཉེར་གཅིག་བསྒྲུབས་ན་ཅི་དང་ཅི་འདོད་པ་མངོན་སུམ་དུ་བྱོན་ནས་འགྱུར་རོ། །ཕྱི་སྒྲུབ་བོ། །གཉིས་པ་ནི། རང་ཧེ་རུ་ཀ་སྔོན་པོ་ཡབ་རྐྱང་དུ་གསལ་བའི་མདུན་གཙོ་འཁོར་བསྐྱེད་པ་ནས་བཟླས་པའི་བར་སྔར་བཞིན་ལ། བཟླས་པའི་དུས་རང་གི་ཐུགས་ཀ་ནས་སྔགས་ཀྱི་འཕྲེང་བ་ནུས་པའི་བུང་བ་འཁྲིགས་པ་རླུང་ལ་ཞོན་ཏེ་སྣའི་བུ་ག་ནས་འཐོན། གཙོ་མོའི་ཤངས་ནས་ཞུགས། ལུས་དང་ངག་དང་ཡིད་ཀྱི་རང་བཞིན་གྱི་ཆུ་སྐྱེས་ཀྱི་གནས་རྣམས་སུ་སོན། དེའི་སྙིང་གའི་པདྨ་སྐུའི་རང་བཞིན་གྱིས་གེ་སར་ཕྲོགས། གསུང་གི་རང་བཞིན་གྱིས་སྦྲང་རྩི་འཐུང་། ཐུགས་ཀྱི་རང་བཞིན་གྱིས་ཆུ་སྐྱེས་བཟས་ཏེ་རང་གི་རླུང་གིས་བཀུག་པས་གཙོ་མོའི་ཤངས་ནས་འཐོན། བདག་གི་སྣ་ནས་སྙིང་གའི་ཨུཏྤལ་ཆེན་པོའི་ཟེའུ་འབྲུ་ལ་ཞུགས་ཏེ་འདར་ཞིང་ལྷུང་བས་སྐུའི་རང་བཞིན་གྱི་ཟེའུ་འབྲུས་སྤངས་ཏེ་གསུང་གི་རང་བཞིན་གྱིས་སྦྲང་རྩི་ཐུགས་ཀྱིས་རང་བཞིན་གྱིས་པདྨ་ནས་སྐྱུག་པ། ཡང་ནས་ཡང་དུ་བསམ་པ་རྗེས་སུ་ཆགས་པར་མ་གྱུར་གྱི་བར་དུ་བསམ་ཞིང་ངག་ཏུ། ཨོཾ་བཛྭ་ལ་ལ་ལི་ལི་ཧཱུྃ་ཕཊ྄། ཅེས་བཟླའོ། །དེས་དབང་དུ་མ་གྱུར་ན་རང་ཧེ་རུ་ཀ་རྒྱན་དང་བྲལ་བ་ནམ་མཁའི་གོས་ཅན་རྟགས་གྱེན་དུ་བསྒྲེང་བ་དེའི་ཐུགས་ཀ་ནས་མེའི་འཁོར་ལོ། ལྷ་མོའི་བྷ་གར་འཕྲོས། དེས་ཨ་ཝ་དྷུ་ཏིའི་སྣ་མོ་བསྲུབས། ཆགས་པའི་མེ་རྒྱས་ནས་བྷནྡྷཱུ་ཛི་ཝ་ཀ་ལྟ་བུའི་ཁྲག་གི་རྒྱུན་ཟགས། ལྷག་པར་ཆགས་པས་བདག་ལ་གདུང་གདུང་ཤམ་ཤམ་བྱེད་པར་མོས་ནས་སྔགས་ལི་ལིའི་གཤམ་དུ། ཨེ་ཨ་ར་ལི་སྲིཾ་ཛཿ བཏགས་པས་དབང་དུ་བྱེད་པར་ཐེ་ཚོམ་མེད་དོ། །ནང་སྒྲུབ་བོ། །གསུམ་པ་ནི། རང་གི་ལུས་སྒྱུ་མ་ལྟ་བུར་བསམས་པའི་ལྟེ་འོག་སོར་བཞིའི་ཐད་ཀྱི་ཆོས་འབྱུང་གྲུ་གསུམ་པའི་ནང་དུ་ཙ་རི་ཏྲའི་རི་ལས་བཅོམ་ལྡན་འདས་མ་ལྷན་ཅིག་སྐྱེས་མའི་སྲོག་སྲཱིཿཡིག་གི་རྣམ་པ་སྤྱན་དྲངས། སྣ་ནས་ཆོས་འབྱུང་གི་ནང་དུ་སོན་པ་ཡོངས་སུ་གྱུར་པ་ལས་ལྷན་ཅིག་སྐྱེས་མ་སྐུ་མདོག་དམར་མོ་རིན་པོ་ཆེ་དང་། ཨུཏྤལ་ལ་དམར་པོས་བརྒྱན་ཅིང་འོད་དཔག་ཏུ་མེད་པ་དབུ་ལ་བཞུགས་པ། རྩ་བའི་ཕྱག་དག་གིས་ཨུཏྤལ་ལ་དམར་པོའི་མདེའུ་རྣམ་པར་མཛེས་པའི་མདའ་དང་བཅས་པའི་མེ་ཏོག་གི་གཞུ་རྣ་བའི་རྩར་འགེངས་པ། ལྷག་མ་གཉིས་ལྕགས་ཀྱུ་དང་ཨུཏྤལའི་ཞགས་པ་བསྣམས་པ། གཅེར་མོ་ཤིན་ཏུ་ཆགས་པ་སྐྱེད་པའི་ལང་ཚོས་སྒེག་ཅིང་གར་གྱིས་རོལ་པའི་ཐུགས་ཀ་ནས་འཕྲོས་པའི་འོད་ཀྱིས་ཙ་རི་ཏྲ་ནས་སྤྱན་དྲངས་པའི་ལྷ་མོ་དང་། གཉིས་སུ་མེད་པར་གྱུར་པར་བསམས་ནས་མེ་ཏོག་གི་མདའ་འཕངས་པས་འཇིག་རྟེན་གསུམ་པོ་ཐམས་ཅད་ཀྱི་སྙིང་གར་ཕུག་སྟེ་ཆགས་པ་ཆེན་པོས་བརྒྱལ། གཞུ་རྒྱུད་ཀྱིས་སྐེད་ལ་བཅིངས། ཨུཏྤལ་གྱི་ཞགས་པས་རྐེ་བསྡམས། ཕོའི་སྙིང་དང་མོའི་བྷ་གར་ལྕགས་ཀྱུས་ཕུག་སྟེ་རང་གི་དྲུང་དུ་སྐྱེལ་བས་ཅི་བསྒོ་བ་ཉན་པར་བསམ་མོ།། ངག་དུ་ཨོཾ་བཛྭ་ལ་ལ་ལི་ལི་ཆེ་གེ་མོ་ཨཱ་ཀརྵ་ཡཾ་སྲཱིཿསྭཱ་ཧཱ། ཞེས་བཟླས་ཤིང་དམིགས་ཀྱིས་བསལ་ན་བསྒྲུབ་བྱའི་མིང་དང་ཡུལ་འཁོར་དབང་དུ་བྱེད་ན་སརྦ་ལོ་ཀ་ཞེས་བརྗོད་ཅིང་འབུམ་ཕྲག་གཅིག་གིས་འགྲུབ་པར་ཐེ་ཚོམ་མེད་དོ། །གྲུབ་པའི་མཚན་མ་བརྙེས་ནས། བྱིས་པ་སོ་མ་སྐྱེས་པའི་ཁ་ཆུ་བླངས། ལྷ་མོའི་གཟུངས་སྟོང་ཕྲག་གཅིག་ཏུ་བསྔགས་ཏེ། བྷྲྀང་གི་ར་ཛ་དང་འགིའུ་ཝང་ལྷན་ཅིག་ཏུ་བཏགས་ལ་དཔྲལ་བར་ཐིག་ལེ་བྱས་ན་གང་ལ་བལྟས་པ་དེ་དབང་དུ་འགྱུར་རོ། །ཡེ་ཤེས་ཀྱི་ལྷ་མོ་མི་གཤེགས་པར་དེ་ཉིད་དུ་བསྒོམ་པ་ནི་དམ་ཚིག་གོ །གང་ཡིད་ལྷར་བཅས་འཇིག་རྟེན་མངག་གཞུག་དང་། །བཅུད་ཀྱིས་ལེན་དང་ས་འོག་ས་སྟེང་དང་། །ས་བླའི་རིག་པ་འཛིན་པར་འདོད་རྣམས་ལ། །མན་ངག་འདི་འདྲ་སྔོན་མེད་བདུད་རྩི་ཡིན། །རྡོ་རྗེ་འཛིན་པ་ཆོས་ཀྱི་མགོན་པོས་ཇི་ལྟར་བསྐུལ་བ་བཞིན། པདྨ་དཀར་པོས་གཉལ་ཡངས་པ་ཅན་གྱི་ལྟེ་བར་སྦྱར་བ་དགེ་ལེགས་སུ་གྱུར་ཅིག། །།མངྒ་ལཾ།། །། དཔལ་ཡེ་ཤེས་མགོན་པོའི་གཏོར་བསྔོས་བསྡུས་པ་སྒེར་གསོལ་རྣམས་ཀྱི་གསོལ་ཁ་ཉུང་ངུར་དྲིལ་བ་ཕྲིན་ལས་འདོད་འཇོ།དཔལ་ཡེ་ཤེས་མགོན་པོའི་གཏོར་བསྔོས་བསྡུས་པ་སྒེར་གསོལ་རྣམས་ཀྱི་གསོལ་ཁ་ཉུང་ངུར་དྲིལ་བ་ཕྲིན་ལས་འདོད་འཇོ་ཞེས་བྱ་བ་བཞུགས་སོ། །བླ་མ་ལྷ་ལ་ཕྱག་འཚལ་ནས། །གཏོར་མ་བསྔོ་བའི་རིམ་པ་བསྟན། །བསྙེན་པའི་ཡིག་ཆ་ཇི་བཞིན་གྱི། །མགོན་པོ་འཁོར་བཅས་སྤྱན་འདྲེན་སོགས། །སྒེར་བསྐང་བཅས་པ་བགྱིས་པའམ། །གལ་ཏེ་ལང་སྐབས་དབུལ་བ་ན། །བསྡུས་པ་བྱ་འདོད་འདིས་ཀྱང་ཁྱབ། །ལྷག་པའི་ལྷར་སྦྱར་སྔོན་འགྲོ་བ།། གཏོར་མ་སྦྱངས་རྟོགས་སྦར་བས་བདུད་རྩིར་གྱུར། །ཨོཾ་ཨཱཿཧཱུྃ་ཧ་ཧོ་སྲཱིཿ ལན་གསུམ། རང་གི་སྤྱི་བོར་མགོན་པོའི་རྒྱུད་ལུང་གིས། །བླ་མ་ཀུན་བཞུགས་སྙིང་ནས་གསོལ་བ་འདེབས༑ །བསྟན་སྲུང་མཐུ་དང་དངོས་གྲུབ་རྣམ་གཉིས་སྩོལ། །བླ་མ་རྣམས་ལ་གསོལ་བ་བཏབ་པ་ཡིས། །འོད་དུ་ཞུ་ནས་སྤྱི་བོར་ཐིམ་པར་གྱུར། །རང་ཉིད་འཁོར་ལོ་སྡོམ་པ་ཡབ་ཡུམ་དུ། །གསལ་བའི་མོད་ལ་བགེགས་ཚོགས་རིང་བར་བསྐྲད། །བདག་ལུས་རིགས་བརྒྱའི་སྣང་བསྙེན་འདི། །ཀུན་འདུས་དཔལ་ལྡན་འཁོར་ལོ་སྡོམ། །རྡོ་རྗེ་ཡན་ལག་མ་དང་སྦྱོར། །ཟུང་འཇུག་ཧེ་རུ་ཀ་ཆས་རྫོགས། །གར་དགུའི་ལང་ཚོ་འབར་བར་གསལ། །ཐུགས་སྲོག་སྔགས་འཁོར་དོན་རྣམས་བྱས། །ཧཱུྃ། དུར་ཁྲོད་ཆེན་པོའི་ས་གཞི་ནི། །འཇིགས་སུ་རུང་དང་བསྐལ་པ་ཡི། །མེ་ལྟར་འབར་བའི་ཀློང་དཀྱིལ་ནས། །པདྨ་ཉི་ཟླ་བམ་ཆེན་སྟེང་། །འཇིགས་བྱེད་རྡོ་རྗེ་སྲིན་པོ་ཆེ། །དྲག་ཤུལ་མི་བཟད་ཁྲོ་བོའི་བྱིན། །ཞལ་གཅིག་ཕྱག་བཞི་བཻ་ཏ་དང་། །ཐོད་ཁྲག་རལ་གྲི་ཁ་ཊྶྃ་མཚན། །རྒྱལ་པོ་ཆེན་པོ་རོལ་པས་བཞུགས། །དེ་ཡི་རྣམ་པར་ཐར་པ་ཡི། །རང་གཟུགས་ཡུམ་ཆེན་གསུམ་དང་ཡང་༑ །ཚད་མེད་བཞི་ཡི་ལྷ་མོ་བཞི། །སྲས་བཞི་མཁའ་འགྲོ་བདུན་སོགས་དང་། །བྱ་གདོང་སྡེ་གསུམ་བཀའ་སྡོད་ཚོགས། །མ་ཧཱ་ཀཱ་ལི་ཆེན་མོ་བརྒྱད། །རྡོ་རྗེ་ཕོ་ཉ་དྲུག་ཅུ་བཞི། །ཀྵེ་ཊ་པ་ལ་སུམ་ཅུ་གཉིས། །སྲིད་རྒྱལ་རྡོ་རྗེ་མི་འགྱུར་མ། །ལྷན་ཅིག་སྐྱེས་མ་དུར་ཁྲོད་བདག །ཡབ་སྲས་སྤྲུལ་འཁོར་རང་རང་སྡེ། །ལྷ་བདུད་གཤིན་རྗེ་གཟའ་ཀླུ་བཙན། །གནོད་སྦྱིན་ལི་བྱིན་ཧའི་འཁོར་བཅས། །འཇིག་རྟེན་སྐྱོང་བ་བཅུ་བཞི་དང་། །ནག་པོ་ཤ་ཟ་འབུམ་དང་ཡང་། །སྣང་སྲིད་ལྷ་མ་སྲིན་ཐམས་ཅད། །གང་གི་འཁོར་དུ་བསྡུས་ནས་འཁོད། །དེ་རྣམས་གནས་བཞིར་ཨོཾ་ཨཱ༔ཧཱུྃ། །ཧོཿཡི་བྱིན་རླབས་འོད་ཟེར་འཕྲོས། །ཧཱུྃ། འོག་མིན་ཆོས་དབྱིངས་ཕོ་བྲང་ཆེ། །འགྱུར་མེད་བདེ་ཆེན་རྟག་པའི་གནས། །སངས་རྒྱས་ཞིང་ཁམས་ཐམས་ཅད་དང་༑ །འཛམ་གླིང་གནས་མཆོག་མ་ལུས་ནས། །དཔལ་ལྡན་མགོན་པོ་ཆེན་པོ་ནི། །འཁོར་དང་བཅས་པ་སྤྱན་འདྲེན་ན། །སྔོན་གྱི་ཐུགས་དམ་རྗེས་དགོངས་ལ། །མ་ཐོགས་མྱུར་དུ་གཤེགས་སུ་གསོལ།། ཞེས་པས་སྤྱན་དྲངས། ཛཿཧཱུྃ་བྃ་ཧོཿབསྟིམ། མཆོད་པ་འདི་ལྟར་འབུལ་བར་བྱ། ཧཱུྃ། དགྲ་བོ་བསྒྲལ་བའི་སྙིང་ཁྲག་རྒྱུན། །རྒྱ་མཚོར་བསྐྱིལ་བའི་རྦ་རླབས་ཀྱི། །འཇིགས་ཤུགས་གནམ་ལ་རྒོལ་ལྟ་བའི། །ཨརྒྷཾ་དམར་པོ་རྒྱས་པར་སྦྲེང་། །ནག་པོ་དུག་གི་ཞུན་མ་ཡི། །དཔལ་གྱི་རླངས་པ་འཇའ་རླུང་དུ། །འཚུབ་མས་གསོད་ཅིང་སྨྱོར་འཇུག་པའི། །ཞབས་བསིལ་གདུག་ཅན་མཚོ་རུ་བཀོད། །མགོ་དང་ཡན་ལག་དབང་པོའི་དོན། །སྣོད་སོང་རུ་མའི་ཞགས་པ་ཡིས། །ཕོན་སོར་བཅིངས་པའི་མེ་ཏོག་ནི། །སྤྱན་རས་འབར་བའི་རྟེན་དུ་བཀྲམ། །གུ་གུལ་སོགས་དང་ཚིལ་ཆེན་གྱིས། །ཞུན་ཐིག་ངར་གྱི་ཚྭ་ཚྭ་སྟོང་། །འཁྲུག་ཅིང་ཕྱོགས་བཅུར་འཕྲོ་བྱེད་པའི། །གསུར་ཆེན་སྤྲིན་གྱི་མཁའ་ཀློང་གཏིབས༑ །མཁྲིས་ཞག་ཁུ་བས་སྦག་པ་ཡིས། །རོ་རས་དཀྲིས་པའི་ཚེར་ཤིང་གི །མི་ཡི་ཕུང་པོ་ཆེན་པོ་དག །ཕྱོགས་ཀྱི་མུན་པའི་གཤེད་དུ་ཕབ། །སྦྲུལ་སྙིང་གླ་རྩི་གི་ཝཾ་དང་། །དྲི་ཞིམ་ངད་ལྡན་ཆུ་བོ་ཆེ། །བསིལ་དང་སིམ་པ་བསྐྱེད་པའི་ཕྱིར། །བྱུག་པའི་རྫས་སུ་རྫིང་བུར་གཏམས། །བདུད་དང་དགྲ་སོགས་གཡུལ་ངོར་ཆེར། །བསད་པའི་ཤ་ཁྲག་བླ་སྲོག་དབུགས༑ །ཚེ་དཔལ་བསོད་ནམས་གཟི་བྱིན་སོགས། །དྲག་པོའི་ཞལ་ཟས་ཕུང་པོར་སྤུངས། །རྐང་གླིང་ཐོད་རྔ་རྔ་སྒྲ་དང་། །ནག་པོའི་ཕྱོགས་ཀྱི་ངུ་འབོད་སྒྲ། །ཆོས་ཀྱི་དུང་ཆེན་དུ་སྦྱར་བ། །སྙན་གྱི་དཔྱིད་དུ་ཅི་ཡང་འཇོ། །གཞན་ཡང་ལྷ་ཀླུ་དེ་བཞིན་མིའི། །དཔལ་འབྱོར་མི་ཟད་ནམ་མཁའི་མཛོད། །མཆོད་པའི་སྤྲིན་དུ་འབུལ་ལགས་ཀྱིས། །རྣལ་འབྱོར་བཅོལ་བའི་ཕྲིན་ལས་སྒྲུབས།། སྒེར་གསོལ་རྣམས་ཀྱི་སྤྱན་འདྲེན་བྱ་བ་ནི། ཧཱུྃ། དཔལ་ལྡན་སྒྲུབ་བརྒྱུད་རིན་པོ་ཆེའི། །རིང་ལུགས་འཛིན་པ་ཐམས་ཅད་ལ། ཁ་འཛིན་ཕྲིན་ལས་གཉེར་གཏད་པའི། །སྲུང་མ་གཉན་པོ་སྤྱན་འདྲེན་གཤེགས། །རི་རབ་ཆེན་པོའི་བྱང་ཤར་ནས། །དཔལ་ལྡན་ལྷ་མོ་འཁོར་དང་བཅས། །ཏི་སི་པོ་ཏ་ཧ་ཧ་རྒོད། །ལྷ་ཆེན་ཞལ་བཞི་འཁོར་དང་བཅས། །དུར་ཁྲོད་རབ་འཇིགས་གཞལ་ཡས་ནས། །དཔལ་མགོན་མ་ནིང་འཁོར་དང་བཅས། །ལྕང་ལོ་ཅན་གྱི་གནས་མཆོག་ནས། །རྒྱལ་ཆེན་རྣམ་སྲས་འཁོར་དང་བཅས། །ནམ་མཁའ་ཡངས་པའི་དཀྱིལ་འཁོར་ནས། །ལྷ་ཆེན་གཟའ་བདུད་འཁོར་དང་བཅས། །ཕོ་བྲང་མཁའ་སྤྱོད་ཙ་རི་ནས། །དཔལ་ལྡན་ཞིང་སྐྱོང་འཁོར་དང་བཅས། །ཆུ་བར་སྤྲུལ་པའི་ཞིང་ཁམས་ནས། །ལྷ་སྨན་མཆེད་ལྔ་འཁོར་དང་བཅས། །བོད་ཡུལ་གངས་བྲག་སྒྲུབ་གནས་ནས། །བརྟན་མ་བཅུ་གཉིས་འཁོར་དང་བཅས། །དབུ་རི་བྱང་ཕྱོགས་གནས་རྣམས་ནས། །སྤྲག་གི་བཙན་རྒོད་འཁོར་དང་བཅས། །དག་པ་འཕྲུལ་གྱི་གཞལ་ཡས་ནས། །རྡོ་རྗེ་གཡུ་སྒྲོན་འཁོར་དང་བཅས། །དེའུ་བྲག་དམར་གཞལ་ཡས་ནས། །ཅིག་ཆར་དམར་པོ་འཁོར་དང་བཅས༑ །ཞིང་སྐྱོང་མ་མོའི་གནས་མཆོག་ནས། །དགེ་བསྙེན་སྨྱོ་ཁ་འཁོར་དང་བཅས། །ཐིམ་ཡུལ་བདེ་ཆེན་གནས་རྣམས་ནས། །ཇག་པ་མེ་ལེན་འཁོར་དང་བཅས། །ཆོས་འཁོར་གཉན་པོའི་གཙུག་ལག་ནས། །རྒྱལ་ཆེན་སྐུ་ལྔ་འཁོར་དང་བཅས། །བཙན་ཡུལ་ཟངས་ཐང་དམར་པོ་ནས། །གནོད་སྦྱིན་དམར་པོ་འཁོར་དང་བཅས། །འུ་ཡུལ་ཤང་གི་གནས་མཆོག་ནས། །སྐྱེས་བུ་རྡོར་ལེགས་འཁོར་དང་བཅས། །དུར་ཁྲོད་མ་མོའི་གནས་མཆོག་ནས། །ཕོ་ཉ་འདྲེ་མོ་འཁོར་དང་བཅས། །རོ་ལྡན་གནས་མཆོག་གཞལ་ཡས་ནས། །མཐུ་སྟོབས་དབང་ཕྱུག་འཁོར་དང་བཅས། །གདོད་དག་བྱིན་རླབས་གནས་མཆོག་ནས། །དམ་ཅན་རྒྱ་མཚོ་ཁྱེད་ཐམས་ཅད། །དད་པ་དང་ནི་དམ་ཚིག་གིས། །སྒྲུབ་པའི་གནས་འདིར་སྤྱན་འདྲེན་ན། །མ་ཐོགས་མྱུར་དུ་གཤེགས་སུ་གསོལ།། དམ་བཞག་ནི། ཀྱཻ། སྔོན་བྱོན་དེ་བཞིན་གཤེགས་པ་དང་། །བདུད་འདུལ་རིག་འཛིན་པདྨ་འབྱུང་། །རྒྱལ་སྲས་རིག་འཛིན་བརྒྱུད་བཅས་ཀྱིས། །སྤྱན་སྔར་ཁས་བླངས་དམ་བཅས་པའི། །རྡོ་རྗེའི་ཐ་ཚིག་མ་གཡེལ་བར། །ད་ལྟ་རྣལ་འབྱོར་སྒྲུབ་པའི་གྲོགས། །སྟོབས་རྩལ་བསྐྱེད་པའི་སྐབས་ཡིན་པས། །ཇི་ལྟར་བཀའ་བསྒོ་ལེགས་བསྒྲུབ་མཛོད།། མཆོད་པ་ནི། སྲིཿ མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་ཚོགས། །སྣ་ཚོགས་རོལ་དབྱངས་སྙན་པའི་སྒྲས། །དམ་ཅན་རྒྱ་མཚོ་འཁོར་བཅས་མཆོད། །བདག་སོགས་ནད་གདོན་འགལ་རྐྱེན་དང་། །སྡིག་སྒྲིབ་སྡུག་བསྔལ་ཞི་བར་མཛོད། །རི་གླིང་ཁང་བཟང་དཔག་བསམ་འབྲས། །ལྷ་མི་སྐྱེ་འགྲོ་སྣ་ཚོགས་གཟུགས༑ །བཟའ་བཏུང་ལོངས་སྤྱོད་ནོར་མཛོད་ཀྱིས། །བསྟན་སྲུང་ལྷ་ཚོགས་འཁོར་བཅས་མཆོད། །བདག་སོགས་ཚེ་བསོད་དཔལ་འབྱོར་ནོར། །ཆོས་རྒྱུད་འཁོར་འབངས་རྒྱས་པར་མཛོད༑ །འཆི་མེད་བདུད་རྩི་ཨ་མྲྀ་ཏ། །རང་རང་སྲོག་འཁོར་བླ་རྡོའི་མཁར། །བདེ་ཆེན་རིག་མ་མཆོད་ཚོགས་ཀྱི། །བསྲུང་མ་གཉེན་པོ་འཁོར་བཅས་མཆོད། ཁམས་གསུམ་ཟས་ནོར་འབྲུ་གོས་ཚོགས། །ཐམས་ཅད་དབང་དུ་བསྡུ་བར་མཛོད། །སྲ་བཙན་གོ་དང་རྣོ་ངར་མཚོན། །དཔའ་བརྗིད་རུ་མཚོན་གཡབ་པའི་དར། །ཉམས་པ་བསྒྲལ་བའི་དབང་པོ་ཡི། །ཆོས་སྐྱོང་སྲུང་མ་འཁོར་བཅས་མཆོད། །བསྟན་འགྲོར་འཚེ་བྱེད་སྡིག་ཅན་དགྲ །དམིགས་མེད་དབྱིངས་སུ་བསྒྲལ་བར་མཛོད། །གཞན་ཡང་སྨན་རག་གཏོར་མ་དང་། །ཕྱི་ནང་གསང་བའི་མཆོད་བསྐང་རྟེན། །ཡོངས་རྫོགས་མི་ཟད་རྒྱ་མཚོའི་འཇིངས། །སྔགས་རྒྱའི་ཏིང་འཛིན་སྟོབས་ཀྱིས་འབུལ། །འགལ་རྐྱེན་སོལ་ལ་མཐུན་རྐྱེན་སྒྲུབས། །བསྟན་འགྲོ་བདག་གཞན་དོན་མཛོད་ཅིག། གཏོར་མ་འབུལ་བ་ནི། ཨོཾ་ཨཱཿཧཱུྃ་ཧ་ཧོ་སྲིཿལན་གསུམ། གཏོར་མ་གཟུགས་ཞུད་དྲག་པོའི་སྒྲ། །བམ་རུལ་མྱག་དྲི་ཚ་སྐྱུར་རོ། །རེག་རྩུབ་འདོད་པ་ལྔ་ལྡན་པ༑ །བདུད་རྩི་ཆེན་པོར་དགྱེས་ཏེ་རོལ། །ཨོཾ་མ་ཧཱ་ཀཱ་ལ་ཡ་ཤཱ་ས་ན་ཨུ་པ་ཧཱ་རི་ཎི་ཨེ་ཥ་ཨ་པཉྩྨི་མ་ཀཱ་ལོ་ཨ་ཡཾ། ཨི་དམ་རཏྣ་ཏྲ་ཡཱ་ཡ་ཨ་པ་ཀཱ་རི་ཎཾ། ཡ་དེ་པྲ་ཏི་ཛྙྱཱ་སྨ་ར་སི་ཏ་དཱ་ཨི་དམ་དུཎྛཾ་སཏྭ་ན། ཁ་ཁ་ཁཱ་ཧི་ཁཱ་ཧི། མ་ར་མ་ར། གྲྀ་གྲྀ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀི་ན་ཧཱུྃ་ཕཊ྄་ཧཱུྃ། ཐུགས་དཀྱིལ་ལ་ཕུལ། ཨོཾ་ཀ་ཀ་ཀ་དྷྱ་ན༑ བ་བ་བནྡྷ་ན། ཁ་ཁ་ཁ་ད་ན། སརྦ་དུཥྚ་ནཾ་ཧ་ན་ཧ་ན། གྷཱ་ཏ་ཡ་གྷཱ་ཏ་ཡ། གནོད་བྱེད་དགྲ་བགེགས་ཤིནྟཾ་ཀུ་རུ་ཧཱུྃ་ཧཱུྃ་ཧཱུྃ་ཕཊ྄་ཕཊ྄་ཕཊ྄་ཛཿསྭཱ་ཧཱ། གསུང་དཀྱིལ་ལ་ཕུལ། ཨོཾ་ཨ་ཀཱ་རོྎ སྐུའི་དཀྱིལ་ལ་ཕུལ། ཨོཾ་ཤྲི་མན་དེ་ཝཱི་དྷཱུ་མཾ་ག་རི་ས་པ་རི་ཝཱ་ར་བྷྱཿ ཨི་དཾ་བ་ལིང་གྲི་གྲྀ་ས་མ་ཡ་ཧཱུྃ་ཕཊ྄། མ་ཧཱ་ཀཱ་ལ་ཀ་ལ་བི་ཀཱ་ལ་ཌོམྦྷི་ནི་ས་པ་རི སོགས། མ་ཧཱ་ཀཱ་ལ་ག་ན་གུ་་ས་པཱ་རི། སོགས། བཻ་ཤྲ་མ་ཎཱྎ ཛམྦྷ་ལ་ཛ་ལེནྟྲྎ བིཥྞཀྵྭ་རཱ་ཧུ་ལྎ ཀྵེ་ཊ་པཱ་ལྎ མཾ་ལཾ་ཨཾ་ཙཾ་ཏཾ་སཉྩྨ་ཌ་ཀི་ནཱིྎ མ་མ་ཁ་ཁ་ལ་ལ་ལི་ལི་ཏཱ་ཏཱ་ཏི་ཏིྎ རྡོ་རྗེ་འབར་བ་ཨ་ཛི་ལིྎ བཛྭ་མ་མ་ལ་ལ་ལི་ལི། སོགས། སྲིཥྚི་ཝི་ཊིྎ ཏི་པ་རཱ་ཙྎ སརྦ་སུཾ་ཏྲི་རི་ཏྲི་ནི་ཁ་རེ་བྷྲུྃྎ དྷརྨ་པཱ་ལ་རཱ་ཛྎ མ་ཧཱ་ཡཀྵྎ བཛྭ་སཱ་དྷུ་ས་མ་ཛཿ རཱ་ལི་པྲ་མ་ཡ་ཛྎ དུ་ཏྲི་པ་ཤ་མེ་ཀི་ན་ས་པ་རིྎ ཁ་ཧི། ཨོཾ་ཨཱ་ཀ་རོ་ལན་གསུམ་གྱིས་ཕུལ། དམ་ཅན་རྒྱ་མཚོ་འཁོར་དང་བཅས་པ་ཁྱེད་རྣམས་ལ་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་འབུལ་ལོ། ཚིམ་ཞིང་དགྱེས་པར་བཞེས་ལ་སངས་རྒྱས་ཀྱི་བསྟན་པ་སྲུང་། དཀོན་མཆོག་གི་དབུ་འཕང་བསྟོད། དགེ་འདུན་གྱི་སྡེ་སྐྱོང་ཁྱད་པར་བདག་ཅག་ཡོན་མཆོད་འཁོར་དང་བཅས་པ་ལ། ཉིན་གྱི་བྱ་ར། མཚན་གྱི་མེལ་ཚེ་མཛོད། འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་ཞི་ཞིང་། མཐུན་རྐྱེན་ཚེ་དབང་བསོད་ནམས་དཔལ་འབྱོར་སྙན་གྲགས་ལེགས་པའི་ཡོན་ཏན་འཕེལ་ཞིང་། ཇི་ལྟར་འདོད་པའི་དོན་མ་ལུས་པར་མྱུར་དུ་འགྲུབ་པར་མཛད་དུ་གསོལ། ཞེས་འདོད་དོན་གསོལ། བདག་སོགས་སྒྲུབ་པ་པོ་རྣམས་ཀྱི། །དགྲ་བགེགས་ནག་པོའི་ཕྱོགས་འཇོམས་ཤིང་། །ཞི་སོགས་ཕྲིན་ལས་ཐམས་ཅད་ཀྱི། །དངོས་གྲུབ་མ་ལུས་སྩལ་དུ་གསོལ།། ཞེས་འདོད་དོན་གསོལ་མགོན་པོའི་བསྟོད་པ་ཉུང་ངུ་ནི། ཧཱུྃ། ཆོས་ཀྱི་དབྱིངས་ནས་སྐུར་བཞེངས་ཚེ༑ ཁམས་གསུམ་བསྲེག་པའི་མེ་ཆེན་ནང་། །རྟེན་འབྲེལ་རྣམ་དག་ཕྱག་རྒྱ་ཆེ། །འཁོར་ལོས་བསྒྱུར་བ་ཁྱོད་ལ་བསྟོད། །རྡོ་རྗེའི་གར་བརྒྱ་མཛད་པའི་ཚེ། །སྐུ་མདོག་མཐིང་ནག་ཁྲོ་བོའི་བྱིན༑ །གདུག་པའི་མཚོན་ཆ་སྣ་ཚོགས་འཛིན། ཟ་བྱེད་ཆེན་པོ་ཁྱེད་ལ་བསྟོད། །རྣལ་འབྱོར་དགྲ་ལྷ་མཛད་པའི་ཚེ། །ཞི་སོགས་ལས་ཀྱི་དབང་འཛིན་པའི། །དངོས་གྲུབ་ཐོགས་མེད་ཅི་ཡང་སྩོལ། །དབང་ཕྱུག་ཆེན་པོ་ཁྱེད་ལ་བསྟོད། །གདུག་པ་མ་རུངས་འདུལ་བའི་ཚེ། །སྣ་ཚོགས་རྫུ་འཕྲུལ་ཆེན་པོ་ཡིས། །སྟོང་གསུམ་གདུག་པའི་དམག་གིས་འགེངས། །དཔའ་བོ་ཆེན་པོ་ཁྱོད་ལ་བསྟོད། །སངས་རྒྱས་སྤྱན་སྔར་ཞལ་བཞེས་པའི། །ཐུགས་དམ་གཉེན་པོ་བརྩེར་དགོངས་ལ། །རྣལ་འབྱོར་བདག་ཅག་དཔོན་སློབ་ཀྱི། །བཞེད་དགུ་ལྷུན་གྱིས་གྲུབ་པར་མཛོད།། སྒེར་གསོལ་བསྟོད་པ་ནི། ཧཱུྃ་བྷྱོཿ རང་བཞིན་གནས་ཞིང་ཐམས་ཅད་ནས། །དཔལ་ལྡན་ཡེ་ཤེས་ལྷ་མོ་མཆོག །མཁའ་འགྲོ་ནག་མོ་དུད་སོལ་མ། །འཁོར་དང་བཅས་ལ་བདག་བསྟོད་དོ། །པད་ཉི་རོ་གདན་གཡས་བསྐུམ་ཚུལ། །གཡོན་བརྐྱང་ནག་པོ་དབུ་སྐྲ་ཁམས། །ལྷ་མཆོག་ཞལ་བཞི་ཞིང་སྐྱོང་དང་། །བྲམ་གཟུགས་ཡུམ་བཞི་འཁོར་བཅས་བསྟོད། །འོག་མིན་ལྷུན་གྲུབ་དུར་ཁྲོད་འཇིགས། །དཔལ་མགོན་མཐིང་ནག་ཞལ་གཅིག་པ། །སྐུ་གསུམ་སྤྱན་གསུམ་བྱིན་མཐུ་གཟིགས། །མ་ནིང་མཆེད་གསུམ་སྐུ་ལ་བསྟོད། །རྫོགས་པའི་སངས་རྒྱས་རིན་ཆེན་མང་། །འགྲོ་ལ་ཐུགས་བསྐྱེད་རྒྱལ་ཆེན་ཚུལ། །ས་གསུམ་དབུལ་སེལ་ཡིད་བཞིན་ནོར། །ཡུམ་བློན་འཁོར་ཚོགས་བཅས་ལ་བསྟོད། །བཅོམ་ལྡན་མཐུ་སྟོབས་རྡོ་རྗེའི་འཛིན། །རྒྱལ་བསྟན་བསྲུང་ཕྱིར་སྲིན་མགོན་ཚུལ། །གཟའ་བདུད་ཆེན་པོ་རཱ་ཧུ་ལ། །ཡབ་ཡུམ་འཁོར་དང་བཅས་ལ་བསྟོད། །ཧེ་རུ་ཀ་དཔལ་ཆེ་བའི་མཆོག །མ་རུངས་འཇོམས་ཕྱིར་བདུད་མགོན་ཚུལ། །ཤ་ཟ་ནག་པོ་སེང་གེའི་གདོང་། །ཡུམ་སྤྲུལ་སྡེ་འཁོར་བཅས་ལ་བསྟོད། །རིགས་ཀྱི་ཡེ་ཤེས་ཌ་ཀྐི་ནི། །གང་འདུལ་བོད་ཁམས་སྐྱོང་མའི་ཚུལ། །ལྷ་སྨན་བཀྲ་ཤིས་ཚེ་རིང་མ། །མཆེད་ལྔ་འཁོར་དང་བཅས་ལ་བསྟོད། །ཆོས་དབྱིངས་སྐྱེ་བ་མེད་པ་ལས། །ཐུགས་རྗེའི་གཟུགས་ཀྱི་སྐུ་སྤྲུལ་པ། །བརྟན་མ་ཆེན་མོ་བཅུ་གཉིས་ནི། །བཀའ་སྡོད་བྲན་གཡོག་བཅས་ལ་བསྟོད། །མི་བསྐྱོད་རྡོ་རྗེ་བཅོམ་ལྡན་འདས། །བསྟན་པ་བསྲུང་ཕྱིར་སེམས་དཔའི་ཚུལ། །སྟོན་མཛད་དགེ་བསྙེན་སྤྲག་གི་བཙན། །ཡུམ་སྲས་བློན་འབངས་བཅས་ལ་བསྟོད། །རྒྱལ་ཡུམ་ཡེ་ཤེས་མཁའ་འགྲོ་མ། །བར་ཆད་སེལ་ཕྱིར་སྨན་བཙུན་ཚུལ། །རྡོ་རྗེ་གཡུ་སྒྲོན་དམ་ཚིག་ཅན། །རང་རང་རིགས་སྡེ་བཅས་ལ་བསྟོད། །བཅོམ་ལྡན་པདྨ་ཧེ་རུ་ཀཿ ཕྲིན་ལས་མཛད་ཕྱིར་བཙན་རྒོད་ཚུལ། །ཅིག་ཆར་དམར་པོ་མཐུ་སྟོབས་ཅན། །འཁོར་ཚོགས་སྡེ་དཔུང་བཅས་ལ་བསྟོད། །འཕགས་མཆོག་སྙིང་རྗེའི་བདག་ཉིད་ཅན༑ །ལས་རྣམས་བསྒྲུབ་ཕྱིར་ཀླུ་ཡི་མགོན། །སྨྱོན་ཁའི་རྗེ་བཙུན་མཐུ་བོ་ཆེ། །ཡུམ་འཁོར་སྡེ་ཚོགས་བཅས་ལ་བསྟོད། །བཅོམ་ལྡན་འཇམ་དབྱངས་མགོན་པོ་མཆོག །རྣལ་འབྱོར་སྐྱོང་ཕྱིར་གནས་སྲུང་ཚུལ། །དགེ་བསྙེན་རྡོ་རྗེའི་དགྲ་འདུལ་ཆེ། །མཆེད་གསུམ་ཡུམ་འཁོར་བཅས་ལ་བསྟོད། །འཁོར་ལོ་དྲྭ་བ་སྡོམ་པ་ཆེ། །བསྟན་འགྲོ་སྐྱོང་ཕྱིར་སྲིད་པའི་བདག །ཆོས་ཀྱི་རྒྱལ་པོ་སྐུ་ལྔ་དང་། །ཡུམ་སྤྲུལ་འཁོར་དང་བཅས་ལ་བསྟོད། །དབང་གི་རྒྱལ་པོ་རྟ་མཆོག་དཔལ། །ལས་རྣམས་སྒྲུབ་མཛད་གནོད་སྦྱིན་ཚུལ། །འཇིག་རྟེན་ལྷ་སྲིན་ཡོངས་ཀྱི་རྗེ། །ཡ་བ་རྐྱ་བདུན་བཅས་ལ་བསྟོད། །རྣམ་པར་སྣང་མཛད་བཅོམ་ལྡན་འདས། །རྣལ་འབྱོར་སྐྱོང་ཕྱིར་གཏེར་བདག་ཚུལ། །དམ་ཅན་སྐྱེས་བུ་རྡོ་རྗེ་ལེགས། །མཆེད་འཁོར་བཅས་ལ་བདག་བསྟོད་དོ། །དབྱིངས་ཀྱི་ཡུམ་ཆེན་ཝ་ར་ཧི། །དུར་ཁྲོད་མ་མོ་རྣམས་སྤྲུལ་པའི། །བདག་ཅག་འཁོར་བཅས་བསྲུང་བ་ཡི། །དཀོར་སྲུང་ཆེན་མོའི་འཁོར་བཅས་བསྟོད། །དྲེགས་པ་ཕྲིན་ལས་ཚོགས་ཀྱི་སྡེ། །བསྟན་སྲུང་དཔའ་ཞིང་ཁྲོས་པའི་གཟུགས། །མཐིང་ནག་བེར་སྤྲུལ་ཐོད་རློན་བརྒྱན། །བསྟན་དགྲ་འཇོམས་མཛད་བཅས་ལ་བསྟོད། ཁྱེད་རྣམས་སྲུང་མ་དམ་ཚིག་ཅན༑ །བདག་ནི་བརྒྱུད་འཛིན་སྒྲུབ་པ་པོ། །ལས་དམ་གཉེན་པོ་གཅིག་པས་ན། །ཞི་རྒྱས་དབང་དྲག་ཕྲིན་ལས་སྒྲུབས། འཇིག་རྟེན་བདེ་ཞིང་ཆོས་ལ་སྤྱོད། །རྒྱལ་བསྟན་སྤྱི་དང་བྱེ་བྲག་རྒྱས། །བསྟན་འཛིན་ཞབས་བརྟན་ཕྲིན་ལས་སྤེལ། །དགེ་འདུན་བཤད་སྒྲུབ་དར་བར་མཛོད། །དམ་ཆོས་བསྒྲུབ་པའི་རྐྱེན་སོལ་ལ། །ཉམས་རྟོགས་གཞན་ཕན་རྒྱས་པར་མཛོད། །མདོར་ན་བདག་ཅག་བསམ་པའི་དོན། །མ་ལུས་ལྷུན་གྲུབ་ཉིད་དུ་མཛོད། །མདུན་བསྐྱེད་དམ་ཚིག་རྟེན་ལ་ཐིམ། །ཡེ་ཤེས་པ་རྣམས་རང་ལ་བསྡུས། །བདག་ལྷ་རིམ་བསྡུ་མི་དམིགས་ངང་། །སྟོང་ཉིད་སླར་ཡང་ལས་ལྷར་གྱུར། །དགེ་བ་འདི་ཡིས་མྱུར་དུ་སོགས་དགེ་བསྔོ་སྨོན་ལམ་ཤིས་བརྗོད་བྱའོ། །རིགས་འདུས་མགོན་པོའི་དཀྱིལ་འཁོར་ཚོགས། །པུ་སྟ་ཀ་ཡི་ཚད་ལང་པའི༑ །དོན་ཀུན་ཉུང་ངུ་འདིར་འདུས་པའི། །སྙིང་པོ་ཁྱེར་བདེ་ངོ་མཚར་རྨད། །མནོ་སེམས་གཞིག་ཅིང་ཡང་ཡང་བཅོས། །འདི་ཡིས་དཀའ་ཚིག་དགོས་པ་ཅི། །གང་དྲན་བཀོད་མེད་མྱུར་བྲིས་པ། །འགྲོ་གདོང་དུས་ཐུག་ག་ལ་འོང་། །ཅེས་པའང་མཁྱེན་མཆོག་གི་བདག་ཉིད་རིག་པ་འཛིན་པའི་སྡེ་རིན་ཆེན་བཀྲ་ཤིས་རྣམ་རྒྱལ་གྱིས་གསུང་ངོར། སྙོམ་ལས་པ་ངག་དབང་ཀུན་དགའ་བསྟན་འཛིན་གྱིས་ལམ་ཐོག་ཏུ་སྤེལ་བ་ཕྲིན་ལས་འགྲུབ་པའི་རྒྱུར་གྱུར་ཅིག། །།སརྦ་མངྒ་ལམ།། །། ཆོས་སྐྱོང་གི་བསྐང་བ་བསྡུས་པ་ཕྱོགས་ལས་རྣམ་པར་རྒྱལ་བ།ཆོས་སྐྱོང་གི་བསྐང་བ་བསྡུས་པ་ཕྱོགས་ལས་རྣམ་པར་རྒྱལ་བ་ཞེས་བྱ་བ་བཞུགས་སོ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་མ་ཐོབ་བར་དུ་བདག་ནི་སྐྱབས་སུ་མཆི། །བདག་གིས་བསྙེན་བསྒྲུབ་བགྱིས་པའི་བསོད་ནམས་འདི་དག་གིས། །འགྲོ་ཕན་ཕྱིར་སངས་རྒྱས་རྒྱས་མྱུར་དུ་ཐོབ་པར་ཤོག །ལན་གསུམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག བདེ་སྡུག་གི་རྒྱུ་ཆགས་སྡང་ཉེ་རིང་དང་བྲལ་བའི་བཏང་སྙོམས་ཆེན་པོ་ལ་གནས་པར་གྱུར་ཅིག ཅེས་བརྗོད་སྙིང་ཐག་པས་བསྒོམ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུ་དྡྷཱོ་ཧཾ། སྟོང་པའི་ངང་ལས། རང་ཉིད་སྐད་ཅིག་གིས་བཅོམ་ལྡན་འདས་དཔལ་འཁོར་ལོ་སྡོམ་པ་ལྷན་ཅིག་སྐྱེས་པའི་སྐུར་གྱུར་པའི་མདུན་གྱི་དབུས་སུ། དཔལ་ཡེ་ཤེས་ཀྱི་མགོན་པོ་ཕྱག་བཞི་པའི་རྟེན་དང་བརྟེན་པའི་དཀྱིལ་འཁོར། གཡས་སུ་མགོན་པོ་བདུད་ཀྱི་སྤུ་གྲི་རྗེ་བློན། གཟའ་བདུད་དུག་གི་སྤུ་གྲི། གཟའ་དང་གདོང་མོ། ལྷ་མ་སྲིན་སྡེ་བརྒྱད་ཀྱི་བཀའ་སྡོད་པ་དང་། ཞིང་སྐྱོང་སེ་གེའི་གདོང་པ་ཅན་ཡབ་ཡུམ་ལས་མཛད་འཁོད་པས་གྲལ་རིམ་པ་བཞིན་འདོད་ཆགས་ཀྱི་མགོན་པོ་ཅིག་ཅར་དམར་པོ་དྲེགས་པའི་ཚོགས་དང་། དགེ་བསྙེན་སྙོ་ཁའི་ཀླུ་བཙན་དུར་ཁྲོད་ཀྱི་བདག་མོ་ལ་སོགས་པའི་འབངས་ཀྱིས་འཁོར་ཡུག་ཏུ་བྱས་པ། གཡོན་ཕྱོགས་སུ་རིམ་པ་ལྟར་འདོད་པ་ཁམས་ཀྱི་དབང་ཕྱུག་དུད་པའི་སོལ་བ་མ། འཁོར་ནག་མོ་འབུམ་སྡེས་བསྐོར་བ་དང་། བཀྲ་ཤིས་ཚེ་རིང་མཆེད་ལྔ་བསྟན་མ་ལ་སོགས་པའི་བྲན་གཡོག་མང་པོ་ཅན་དང་། བོད་ཡུལ་ལྷན་ཅིག་སྐྱེས་མ་རྡོ་རྗེ་གཡུའི་སྒྲོན་མ། ཞིང་སྐྱོང་གི་མཁའ་འགྲོ་མ་འབུམ་གྱིས་བསྐོར་ཞིང་ཤནྟི་རོ་གཟན་མ་གནས་པའི་དམ་ཚིག་གི་འཁོར་ལོ་རྣམས་ཀྱི་མི་ཤིགས་པའི་སྲོག་གི་ས་བོན་ལས་འཕྲོས་པའི་འོད་ཟེར་གྱི་ལྕགས་ཀྱུས། བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལ་བཛྭ་ས་མཱ་ཛཿ སྤོས་སྣ་ཚོགས་ཤ་ཆེན་དང་བསྲེས་པ་བསྲེག རྔ་སིལ་དང་། དབྱངས་ཀྱི་སྒྲས་འདི་ལྟར་གྱེར་རོ། །ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་མ་ཧཱ་ཀཱ་ལ་ཆེ། །དཀྱིལ་འཁོར་གནས་འདིར་གཤེགས་སུ་གསོལ། །ཁྱོད་ལ་གསང་བའི་མཚན་གསོལ་བ། །ནག་པོ་རོ་ལངས་དུར་ཁྲོད་བདག །མཚན་ནས་འབོད་དོ་ད་ཚུར་བྱོན། །བསིལ་བའི་ཚལ་དུ་མཚན་གསོལ་བ། །ནག་པོ་མནའ་གཟན་ཀུན་གྱི་གཤེད། །མཚན་ནས་འབོད་དོ་ད་ཚུར་བྱོན། །སྒྲུབ་པ་པོ་ཡི་གནས་མཆོག་ན། །དམ་རྫས་བདུད་རྩིའི་ཚོགས་ནི་སི་ལི་ལི། །ཤ་ཆེན་སྤོས་ཀྱི་དུད་སྤྲིན་ཁྱིལ་ལི་ལི། །བྷནྡྷ་རུས་པའི་ཚོགས་ནི་ཁྲ་ལ་ལ། །ཨ་ཀར་དུད་སོགས་སྤོས་ངད་ཐུལ་ལུ་ལུ། །མཐུན་པའི་དམ་རྫས་ཚོགས་སོ་ད་ཚུར་བྱོན། །བྷྱོ། དཔལ་ལྡན་ལྷ་མོ་མི་ཕམ་དུད་སོལ་མ། །ལེགས་ལྡན་ནག་པོ་རྗེ་བློན་འབངས་གསུམ་དང་། །ཁྱབ་འཇུག་དུག་གི་སྤུ་གྲི་ར་ཧུ་ལ། །ཞིང་སྐྱོང་ཆེན་པོ་སེང་གེའི་གདོང་པ་ཅན། །བཀྲ་ཤིས་ཚེ་རིང་མཆེད་ལྔ་བསྟན་མར་བཅས། །བོད་སྐྱོང་དབང་མོ་རྡོ་རྗེའི་གཡུ་སྒྲོན་མ། །དཔལ་གྱི་ལྷ་མོ་ཤནྟི་རོ་གཟན་དང་། །ཀུན་གྱི་བཀའ་སྡོད་དྲེགས་པ་ཅིག་ཅར་དམར། །ཆོས་སྲུངས་སྙོ་ཁའི་ཀླུ་བཙན་སྣ་ཡོན་མ། །རྣལ་འབྱོར་བདག་གི་སྲུང་མ་འཇིགས་བྱེད་ཚོགས། །ཕོ་བརྒྱུད་མོ་བརྒྱུད་འཁོར་བཅས་གཤེགས་སུ་གསོལ། །ཛཿཧཱུྃ་བཾ་ཧོཿཡེ་ཤེས་པ་རྣམས་དམ་ཚིག་པ་དང་གཉིས་སུ་མེད་པར་གྱུར་པས། མངོན་སུམ་དུ་མཐོང་བ་ལྟ་བུར་བསྒོམ་ལ། ས་མ་ཡ་ཧ་ན་ཧ་ན་ཧཱུྃ་ཕཊ྄། ཅེས་བདུད་རྩི་གཏོར་བས་དམ་བཅས་པ་དྲན་ཏེ་ཕྲིན་ལས་ཅི་བསྒོ་བ་བསྒྲུབ་པར་བསམ་མོ། །དེ་ནས། མཆོད་རྫས་ཧཱུྃ་ལས་ཆོས་སྐྱོང་བསྲུང་མ་ཐམས་ཅད་དགྱེས་པ་བསྐྱེད་པའི་མཆོད་པའི་སྤྲིན་མ་ཚང་བ་མེད་པ་རེ་རེས་ཀྱང་ནམ་མཁའི་ཁམས་ཐམས་ཅད་ཁྱབ་པ་ཟག་པ་མེད་པའི་ཡེ་ཤེས་ཀྱི་རང་བཞིན་དུ་གྱུར། རྔ་སིལ་དབྱངས་དང་བཅས་པས། ཧཱུྃ། རཀྟ་སྐོམ་དུ་འཐུང་བའི་ཕྱིར། །ཁྲག་སྣ་སྟོང་གི་ཡོན་ཆབ་འདི། །མགོན་པོ་འཁོར་དང་བཅས་ལ་འབུལ། །བཞེས་ནས་བསྟན་པ་རྒྱས་པར་མཛོད། །ཨོཾ་བཛྭ་མ་ཧཱ་ཀཱ་ལ་ཨརྒྷཾ་པྲ་ཏཱིཙྪ་ཧཱུྃ་སྭཱ་ཧཱ། སྤྱན་གཟིགས་ཤ་ལ་མཛད་པའི་ཕྱིར། །ཤ་སྣ་སྟོང་གི་མེ་ཏོག་འདི། །མགོན་པོ་འཁོར་དང་བཅས་ལ་འབུལ། །བཞེས་ནས་བསྟན་པ་རྒྱས་པར་མཛོད། །ཨོཾ་བཛྭ་མཧཱ་ཀཱ་ལ་པུཥྤེ་པྲ་ཏཱིཙྪ་ཧཱུྃ་སྭཱ་ཧཱ། ཚིལ་ཆེན་དྲི་ལ་སྣོམ་པའི་ཕྱིར། །གསུར་ཆེན་སྤོས་ཀྱི་དུད་སྤྲིན་འདི། །མགོན་པོ་འཁོར་དང་བཅས་ལ་འབུལ། །བཞེས་ནས་བསྟན་པ་རྒྱས་པར་མཛོད། །ཨོཾ་བཛྭ་མཧཱ་ཀཱ་ལ་དྷཱུ་པེ་པྲ་ཏཱིཙྪ་ཧཱུྃ་སྭཱ་ཧཱ། སྲིན་པོའི་གདུག་པ་འཇོམས་པའི་ཕྱིར། །ཞུན་ཆེན་གསལ་བའི་མར་མེ་འདི། །མགོན་པོ་འཁོར་དང་བཅས་ལ་འབུལ། །བཞེས་ནས་བསྟན་པ་རྒྱས་པར་མཛོད། །ཨོཾ་བཛྭ་མཧཱ་ཀཱ་ལ་ཨཱ་ལོ་ཀེ་པྲ་ཏཱིཙྪ་ཧཱུྃ་སྭཱ་ཧཱ། ནུས་པ་མཆོག་དང་རབ་ལྡན་ཕྱིར། །བདུད་རྩི་ལྔ་ཡི་དྲི་ཆབ་འདི། །མགོན་པོ་འཁོར་དང་བཅས་ལ་འབུལ། །བཞེས་ནས་བསྟན་པ་རྒྱས་པར་མཛོད། །ཨོཾ་བཛྭ་མཧཱ་ཀཱ་ལ་གནྡྷེ་པྲ་ཏཱིཙྪ་ཧཱུྃ་སྭཱ་ཧཱ། ལྗགས་ཀྱི་དབང་པོ་ཚིམ་བྱའི་ཕྱིར། །སྙིང་སྣ་སྟོང་གི་ཞལ་ཟས་འདི། །མགོན་པོ་འཁོར་དང་བཅས་ལ་འབུལ། །བཞེས་ནས་བསྟན་པ་རྒྱས་པར་མཛོད། །ཨོཾ་བཛྭ་མཧཱ་ཀཱ་ལ་ནཻ་ཝི་དྱེ་པྲ་ཏཱིཙྪ་ཧཱུྃ་སྭཱ་ཧཱ། སྙན་གྱི་དབང་པོ་ཚིམ་བྱའི་ཕྱིར། །རྐང་གླིང་ཐོད་རྔ་ཅང་ཏེའུ་སོགས། །མགོན་པོ་འཁོར་དང་བཅས་ལ་འབུལ། །བཞེས་ནས་བསྟན་པ་རྒྱས་པར་མཛོད། །ཨོཾ་བཛྭ་མཧཱ་ཀཱ་ལ་ཤཔྟ་པྲ་ཏཱི་ཙྪ་ཧཱུྃ་སྭཱ་ཧཱ། གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །བཀའ་སྡོད་ཡེ་ཤེས་མགོན་པོའི་ལྷ་ཚོགས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཨོཾ་བཛྭ་མཧཱ་ཀཱ་ལ་ས་པ་རི་ཝཱ་ར་པཉྩྨ་ཨ་མྲྀ་ཏ་པཱུ་ཛ་ཁཱ་ཧི། མགོན་པོ་ལ་ཕུལ། བྷྱོ། ལྷ་མིན་རྣམས་དང་དགྲ་བགེགས་བསྒྲལ་བ་ཡི། །སྙིང་ཁྲག་དང་འདྲེས་དུག་ཆུ་ཁོལ་མའི་རྒྱུན། །རྒྱ་མཚོར་བསྐྱིལ་བའི་མི་བཟད་ཨརྒྷཾ་འདི། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །དྲི་མེད་ཡིད་འོང་ལྷ་རྫས་བཟང་པོ་དང་། །དྲག་པོའི་ཆུ་དང་རྡོ་རྗེ་དྲི་ཆུར་བཅས། །གདུག་པའི་དྲི་ལྡང་ཞབས་བཀྲུ་འདི་དག་ཀྱང་། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །ཉམས་པ་བསྒྲལ་བའི་དབང་པོ་རྣམ་ལྔ་ནི། །རི་ལྟར་སྤུངས་ཤིང་ཨུཏྤལ་ཆེར་འཛིངས་དུག །མཐུན་པའི་མེ་ཏོག་འཕྲེང་བ་ལྟར་སྤེལ་བ། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །སྣ་ཚོགས་སྤོས་མཆོག་བསྲེགས་དང་གསུར་ཆེན་གྱི། །དུད་སྤྲིན་མཁའ་ལ་འཁྲིགས་པ་དྲི་ཞིམ་ངད། །ཕྱོགས་བཅུའི་མཐར་འགྲོ་རྡོ་རྗེ་བདུག་སྤོས་ཀྱང་། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །ཙན་དན་ག་བུར་བསིལ་མངར་སྙིང་པོ་དང་། །ཤ་ཁྲག་རུས་པ་དགྲ་བོའི་མཁྲིས་ཞག་དུག །བྱུགས་པར་སྦྱར་བའི་མི་བཟད་དྲི་ལྡང་ཆབ། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །བགྲང་ཡས་རོ་དང་བཅུད་ལྡན་ཞལ་ཟས་མཆོག །བཟང་ཞིང་འཚལ་བ་མ་ཚང་མེད་པ་རྣམས། །སྲིད་པའི་འདོད་དགུའི་གཏོས་དང་མཉམ་སྤེལ་བ། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །ལྷ་མིའི་སིལ་སྙན་རྔ་དང་མི་རྐང་དུང་། །དཀྲོལ་འབུད་བརྡུང་དང་གླུ་དབྱངས་རྒྱ་མཚོའི་སྒྲས། །ཞིང་རྣམས་ཤིག་ཤིག་གཡོ་བྱེད་འདི་དག་ཀྱང་། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །འབྲུ་ཚིག་གཡུལ་དུ་བསད་པའི་ཞུན་ཆེན་ནི། །རོ་རས་གྱིས་སྦར་སྣང་བྱེད་འབར་བའི་མེ། །མ་ལུས་མཆོག་ཏུ་གསལ་བའི་སྒྲོན་མེ་འདི། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །དགྲ་བོའི་ཤ་ཆེན་ཤ་སྣ་རི་ལྟར་སྤུངས། །ཉམས་པའི་སྙིང་ཆེན་སྙིང་སྣ་སྲིད་གསུམ་གཏམས། །གདུག་པའི་དམར་ཆེན་དམར་སྣ་རྒྱ་མཚོར་བསྐྱིལ། །ཞིང་བཅུའི་ཀླད་ཆེན་ཀླད་སྣ་སྟོང་གསུམ་བཀང་། །རྒྱུ་ཆེན་འཕྲེང་བར་བརྩེགས་པས་མཁའ་ཁྱབ་ཅིང་། །འདོད་དགུའི་ཡོན་ཏན་རྣམས་ནི་སྤྲིན་བཞིན་གཏིབས། །བ་ལིཾ་གཏོར་མའི་ཚོགས་ནི་སྐར་ལྟར་བཀྲ། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །ནམ་མཁའ་ལྟར་ཡངས་ཐོད་པ་རྡོ་རྗེའི་སྣོད། །ཤ་ལྔ་བདུད་རྩི་ལྔ་སྦྱར་རྡོ་རྗེའི་རྫས། །མཆོག་གི་རྒྱལ་བ་རྡོ་རྗེས་བྱིན་བརླབས་པ། །མཁའ་འགྲོའི་དབང་ཕྱུག་འཁོར་དང་བཅས་ལ་འབུལ། །ལྷ་མོ་ལ་ཕུལ། མེ་ཏོག་གདུག་པ་མར་མེ་དྲི་ཆབ་དང་། །ཞལ་ཟས་རོལ་མོ་རེ་རེའང་ཀུན་བཟང་ཀྱི། །རྣམ་ཐར་ལས་ཐོན་མཆོད་པའི་འཕྲེང་བ་འདི། །ལེགས་ལྡན་རྗེ་བློན་འཁོར་དང་བཅས་ལ་འབུལ། །མགོན་པོ་བདུད་ཀྱི་སྤུ་གྲི་ལ་ཕུལ། ཛ་ཡ། དམ་ཉམས་དགྲ་བོ་ལས་ངན་སྡིག་ཅན་འདིའི། །ཕྱི་ཡི་དབང་པོ་རྣམ་ལྔ་མཆོད་པར་འབུལ་གྱི་བཞེས། །ནང་གི་དོན་སྙིང་རྣམ་ལྔ་མཆོད་པར་འབུལ་གྱི་བཞེས། །གསང་བའི་བླ་ཚེ་སྲོག་གསུམ་མཆོད་པར་འབུལ་གྱི་བཞེས། །ཤ་ཁྲག་དམར་དང་ཚིལ་ཆེན་མཆོད་པར་འབུལ་གྱི་བཞེས། །ཀླད་རུས་རྐང་མར་མཆོད་པར་འབུལ་གྱི་བཞེས། །དམ་ཉམས་དགྲ་བོའི་བླ་ཚེ་སྲོག་དབུགས་འདི། །གཟའ་བདུད་ཆེན་པོ་འཁོར་བཅས་ཞལ་དུ་བསྟབ། །བཞེས་ཤིག་རོལ་ཞིག་དགོངས་ཤིག་ཁཱ་རཾ་ཁཱ་ཧི། ཁྱབ་འཇུག་རཱ་ཧུ་ལ་ལ་ཕུལ། ཁྱེད་ལ་མཆོད་པར་འབུལ་བ་ནི། །བསད་པའི་ཤ་དང་མྱོས་པའི་ཆང་། །བསྲེགས་པའི་གསུར་དང་བཙོས་པའི་ཞག །ཁུར་བ་ཁྲག་དང་ལྷ་བ་རྐང་། །ནང་ཁྲོལ་གློ་སྙིང་མཁལ་མར་བཅས། །མགོན་པོ་སེང་གདོང་ཐུགས་དམ་བསྐང་། །ཞིང་སྐྱོང་ལ་ཕུལ། བྷྱོ། སྔགས་དང་ཏིང་ངེ་འཛིན་དང་ཕྱག་རྒྱ་ཡིས། །ཡེ་ཤེས་ལྷ་ཡི་བདུད་རྩིར་བྱིན་བརླབས་པ། །ཁ་དོག་དྲི་རོ་ཕུན་ཚོགས་གསེར་སྐྱེམས་འདི། །ལྷ་སྨན་རྒྱལ་མོ་འཁོར་དང་བཅས་ལ་འབུལ། །རབ་འབྱམས་ནམ་མཁའི་ཁྱོན་རྣམས་ཇི་སྙེད་པ། །རྣམ་བཀྲ་ཆེན་རིན་མེ་ཏོག་ཆར་གྱིས་བཀང་། །དྲི་ཞིམ་བདུག་པའི་སྤོས་ཀྱི་སྤྲིན་ཕུང་འཁྲིགས། །ཉི་ཟླའི་སྣང་བ་འཛིན་པའི་སྒྲོན་མས་གཏམས། །དྲི་བཟང་ཆབ་ཀྱི་རྒྱ་མཚོ་རྣམ་པར་འཁྱིལ། །ལྷ་ཡི་བཟའ་བའི་ཚོགས་ནི་རི་ལྟར་སྤུངས། །སྙན་པའི་རོལ་མོ་གནམ་ས་འབིར་བྱེད་ཅིང་། །སེར་གཡུ་མུ་ཏིག་ཕུང་པོ་གཅལ་དུ་བཀྲམ། །ལྷ་མིའི་དཀོར་ནོར་ཇི་སྙེད་ཕྱོགས་བཅུར་བཀོད། །གཙང་མའི་མཆོད་རྫས་མ་ཚང་མེད་པ་འདི། །ལྷ་སྨན་རྒྱལ་མོ་བཀྲ་ཤིས་ཚེ་རིང་མ། །མཆེད་ལྔ་འཁོར་དང་བཅས་ལ་མཆོད་པར་འབུལ། །ཚེ་རིང་མ་ལ་ཕུལ། དམ་ཚིག་གཙང་མར་སྦྱར་བའི་མཆོད་པ་འདི། །རྡོ་རྗེ་གཡུ་སྒྲོན་མ་ལ་མཆོད་པར་འབུལ། །ཐུགས་རྗེས་བརྩེར་དགོངས་རྒྱན་གྱི་མཆོད་པ་བཞེས། །མཆོད་པར་བཞེས་ཤིག་ཨ་ལ་ལ་ཧོ། གཡུ་སྒྲོན་མར་ཕུལ། ཁྱེད་དང་མཐུན་པའི་དམ་རྫས་ནི། །གདེངས་ཅན་གཤོས་བུ་ཟུར་གསུམ་ལ། །གསེར་སྐྱེམས་བདུད་རྩི་ཕུད་ཀྱིས་བྲན། །ལེ་བརྒན་རུ་མཚོན་མཁའ་ལ་འཕྱར། །གླང་ཆེན་དམར་པོ་རོལ་དུ་འདུར། །བསྟན་པ་བསྲུང་ཕྱིར་བཞེས་སུ་གསོལ། །ཅིག་ཅར་དམར་པོར་ཕུལ། རོལ་མོ་དང་བཅས་པས་བསྟོད་པ་ནི། ཧཱུྃ། ཧཱུྃ་ལས་སྐྱེས་པའི་ནག་པོ་ཆེ། །པདྨའི་ཉི་མའི་གདན་ལ་བཞུགས། །གདུག་པ་ཚར་གཅོད་མེད་དཔུང་ནང་། །མཐུ་ཆེན་ཁྱོད་ལ་བདག་བསྟོད་དོ། །ཧཱུྃ། བྱ་རོག་མིང་ཆེན་ནག་པོ་ཆེ། །ཞལ་གཅིག་ཕྱག་བཞི་ཁྲོ་བོའི་གཟུགས། །ཞབས་གཉིས་གྱད་ཀྱི་སྟང་སྟབས་བཞུགས། །སྟོབས་ཆེན་ཁྱོད་ལ་བདག་བསྟོད་དོ། །ཧཱུྃ། ཆ་ལུགས་འཆང་བའི་ནག་པོ་ཆེ། །སྦྲུལ་དང་རིན་ཆེན་ཐོད་པས་བརྒྱན། །སྟག་ལྤགས་ཤམ་ཐབས་སྐུ་ལ་གསོལ། །དཔའ་བོ་ཁྱོད་ལ་བདག་བསྟོད་དོ། །ཧཱུྃ། འཕྲིན་ལས་མཛད་པའི་ནག་པོ་ཆེ། །འབྲས་བུ་ཐོད་ཁྲག་ཞལ་དུ་གསོལ། །གདུག་པའི་མཚོན་ཆ་ཕྱག་ན་བསྣམས། །གསོད་བྱེད་ཁྱོད་ལ་བདག་བསྟོད་དོ། །ཧཱུྃ། གཟི་མདངས་ལྡན་པའི་ནག་པོ་ཆེ། །དབུ་སྐྲ་སེར་པོ་གྱེན་དུ་བརྫེས། །ཨག་ཚོམ་སྨིན་མ་མེ་ལྟར་འབར། །བརྗིད་པ་ཁྱོད་ལ་བདག་བསྟོད་དོ། །ཧཱུྃ། སྙིང་རྗེ་ཁྲོས་པའི་ནག་པོ་ཆེ། །སྤྱན་གསུམ་སྡང་མིག་མེ་ལྟར་འབར། །རབ་ཏུ་འཁྲུག་པའི་ཁྲོ་གཉེར་ཅན། །གཏུམ་ཆེན་ཁྱོད་ལ་བདག་བསྟོད་དོ། །ཧཱུྃ། འཇིགས་པའི་གཟུགས་ཅན་ནག་པོ་ཆེ། །ཞལ་གདངས་དྲག་པོའི་མཆེ་བ་གཙིགས། །ལྗགས་འདྲིལ་ང་རོ་ཧཱུྃ་སྒྲ་སྒྲོག །ཟ་བྱེད་ཁྱོད་ལ་བདག་བསྟོད་དོ། །ཧཱུྃ། བྱང་ཆུབ་སེམས་ལྡན་ནག་པོ་ཆེ། །སངས་རྒྱས་སྤྱན་སྔར་ཁས་བླངས་པ། །བསྟན་པ་བསྲུང་བར་ཞལ་གྱིས་བཞེས། །དམ་ཅན་ཁྱོད་ལ་བདག་བསྟོད་དོ། །ཧཱུྃ། དམ་ལས་མ་འདའ་ནག་པོ་ཆེ། །བསྟན་པ་སྲུངས་ཤིག་ནག་པོ་ཆེ། །རྣལ་འབྱོར་སྐྱོངས་ཤིག་ནག་པོ་ཆེ། །བཀའ་བཞིན་སྒྲུབས་ཤིག་ནག་པོ་ཆེ། །གལ་ཏེ་དམ་ལས་འདས་གྱུར་ན། །དུས་གསུམ་སངས་རྒྱས་ཐུགས་ཁྲོས་ཏེ། །ཁྱོད་ཉིད་ཉམས་པར་འགྱུར་ཏ་རེ། །རང་ཉིད་རླག་པར་གྱུར་ཏ་རེ། །ཨོཾ་བཛྭ་མ་ཧཱ་ཀཱ་ལ་ཡ་ཧཱུྃ་ཕཊ྄། ཨོཾ་བཛྭ་མ་ཧཱ་ཀཱ་ལ་ས་མ་ཡ་ཧཱུྃ་ཕཊ྄། བྷྱོ། རྒྱ་མཚོའི་ཀློང་ནས་མེ་འབར་ཁྱོད། །མཚོ་རྣམས་སྐེམ་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱེད་དུ་བཞུགས། །རྫོང་དང་བཀའ་ཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་མིང་ཤེས། །དེ་ལ་འཇིགས་པ་མེད་པར་འགྱུར། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་པ་ཁམས་ཀྱི་དབང་ཕྱུག་མ། །ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་བསྲུང་བ་ཡི། །དཔལ་ལྡན་ལྷ་མོ་ཁྱོད་ལ་བསྟོད། །ཅེས་དུད་སོལ་མ་ལ་བསྟོད། །ཧཱུྃ། ལྷ་མིན་དམག་གི་གཡུལ་བཟློག་ཅིང་། །ལྷ་དམག་དཀར་པོའི་དབུགས་འབྱིན་པ། །རྡོ་རྗེ་དུར་ཁྲོད་འཁོར་བཅས་ལ། །དང་བའི་སེམས་ཀྱིས་ཕྱག་འཚལ་བསྟོད། །ཅེས་བདུད་ཀྱི་སྤུ་གྲི་ལ་བསྟོད། ཧཱུྃ། ཁྱབ་འཇུག་ཆེན་པོ་ཀུན་ཏུ་རྒྱུ། །འཇིགས་བྱེད་རོག་ཏི་སྤྲུལ་པའི་སྐུ། །ཕ་ནི་སྲིན་ལ་མ་ནི་ཀླུ། །ཀླུ་སྲིན་བསྡོངས་པའི་མཐུ་བོ་ཆེ། །ལུས་པོ་གཅིག་ལ་མགོ་བོ་དགུ། །མགོ་ལུས་ཐམས་ཅད་མིག་གིས་གང་། །སྐུ་མདོག་འཇིགས་པའི་དུད་ཁ་བོ། །གཡས་ན་ཆུ་སྲིན་ཞགས་པ་བསྣམས། །གཡོན་ན་རྭའི་མདའ་གཞུ་བསྣམས། །སྐུ་སྟོད་སྲིན་ལ་སྐུ་སྨད་སྦྲུལ། །སྐུ་སྟོད་ནམ་མཁའི་མཐོངས་ན་བཞུགས། །སྐུ་སྨད་རྒྱ་མཚོའི་གཏིང་ན་བཞུགས། །གཟའ་བདུད་ཆེན་པོའི་དུས་ལ་བབ། །ལྷོ་ནུབ་མཚམས་ནས་སྐུ་བཞེངས་ལ། །ཟླ་བའི་རྗེས་གཅོད་ཤར་དུ་རྒྱུ། །བྱང་ཤར་མཚམས་ནས་སྐུ་བཞེངས་ལ། །ཉི་མའི་རྗེས་གཅོད་ནུབ་ཏུ་རྒྱུ། །ཉིན་མོ་རྒྱུ་བ་མཚམས་བཞི་འཇོམས། །མཚན་མོ་རྒྱུ་བ་ཕྱོགས་བཞི་འཇོམས། །བར་སྣང་ཁམས་སུ་རྒྱུ་ཙ་ན། །འཇིག་རྟེན་ཁམས་ཀུན་འཁྲུག་ཅིང་བསྲེག །ལོ་ཉེས་འཁྲུག་པ་རིམས་ནད་གཏོང་། །ཐོག་དང་སེར་བ་ས་གཡོས་འབེབས། །ཉི་མ་ཟླ་བ་ལྟོ་རུ་ཟ། །སྔོན་དུ་སུ་ཕྲད་ཁྱུར་མིད་བྱེད། །འཇིགས་བྱེད་ཆེན་པོ་མི་བསྲུན་པ། །མིག་མང་པོ་ལ་ཁ་གདངས་པོ། །དུས་ཚོད་ཚེས་གྲངས་ཀུན་གྱི་བདག །ལྷ་འདྲེ་ཀུན་གྱི་ནད་དཔྱད་མཁན། །འབྱུང་བ་ལྔ་ཡི་བདུད་པོ་ཆེ། །ལྷ་སྲིན་སྡེ་བརྒྱད་དམག་དཔོན་བྱེད། །སྟེང་འོག་ཕྱོགས་མཚམས་ཀུན་ཏུ་རྒྱུ། །ཀི་ཀཾ་སྣ་ཚོགས་འབེབས་པའི་བདག །འཇིག་རྟེན་འདི་ན་མཐུ་ཆེ་བ། །དྲག་རྩལ་ཁྱོད་ལས་ཆེ་བ་མེད། །སངས་རྒྱས་སྔ་རབས་བསྟན་པ་ལ། །འཇིག་རྟེན་ཕུང་བྱེད་དྲག་ཤུལ་ཅན། །ཕྱག་ན་རྡོ་རྗེའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །ཤ་རུལ་ཁྲག་རུལ་མཆོད་པར་བཞེས། །བཅོལ་བའི་ཕྲིན་ལས་གྲུབ་པར་མཛོད། །སྲཱིཿ ཕྱོགས་བཞི་ནམ་མཁའ་ཡངས་པའི་དཀྱིལ་འཁོར་ནས། །སྦས་ཤིང་གབ་པའི་གདོང་མོ་བཞི་རྣམས་ནི། །ཤར་ནས་སྟག་སྲིན་ཟོར་བའི་གདོང་། །ནམ་མཁའི་དཀྱིལ་ནས་འབྲུག་གི་སྒྲ་སྒྲོག་མ། །ལྷོ་ནས་བཾ་སྲིན་དྲེད་མོའི་གདོང་། །བར་སྣང་ཁམས་ནས་དྲག་པོའི་གློག་འགྱུ་མ། །ནུབ་ནས་ཀོང་སྲིན་བ་ལང་གདོང་། །རི་རབ་རྩེ་ནས་གནམ་ལྕགས་ཐོག་འབེབས་མ། །བྱང་ནས་འབྲོག་སྲིན་ཆུ་སྲིན་གདོང་། །རྒྱ་མཚོའི་གཏིང་ནས་ཁྲག་གི་སེར་འབེབས་མ། །སྲིང་མོ་གདོང་མོ་བཞི་ཡི་ཐུགས་དམ་དུས་ལ་བབ། །རྣལ་འབྱོར་རྒྱུད་བསྐུལ་བཅོལ་བའི་འཕྲིན་ལས་མཛོད། །ཅེས་གཟའ་ལ་བསྟོད། ཧཱུྃ། གཞན་གྱིས་མི་ཐུབ་དཔའ་བོ་ཆེ། །རྫུ་འཕྲུལ་ཆེ་ཞིང་མཐུ་དང་ལྡན། །བཟློག་པར་དཀའ་བའི་དྲག་ཤུལ་ཅན། །རྡོ་རྗེ་འཛིན་པའི་བཀའ་སྡོད་ཁྱོད་ལ་བསྟོད། །ཅེས་ཞིང་སྐྱོང་ལ་བསྟོད། ནུ་ལྡན་ཀུན་གྱི་གཙོ་མོ་བཅོམ་ལྡན་མ། །ཕྱི་ལྟར་དུར་ཁྲོད་འཇིག་རྟེན་ཌཱ་ཀ྄ིའི་ཚུལ། །ནང་ལྟར་རིགས་ལྔའི་མཁའ་འགྲོ་དམ་ཚིག་ཅན། །གསང་བར་རྒྱལ་བ་དགྱེས་མཛད་ཡུམ་ཆེན་ལྔས། །བདག་ལ་འཆི་མེད་ཚེ་ཡི་རིག་འཛིན་དང་། །རིགས་རྒྱུད་དར་ཞིང་རྒྱས་པའི་མཆོག་སྦྱིན་མ། །སྣང་སྲིད་གསལ་བ་འཕྲུལ་གྱི་མངོན་ཤེས་དང་། །ཟས་ནོར་ཕྱུགས་ཀྱི་འགྲོ་བ་ཆེར་འཕེལ་བའི། །དངོས་གྲུབ་སྩལ་ནས་གསང་ཆེན་ལམ་བགྲོད་པའི། །ཉམས་རྟོགས་ཆེས་ཆེར་འཕེལ་བའི་གྲོགས་མཛད་དེ། །རྡོ་རྗེ་འཆང་དབང་ཐོབ་པར་བྱིན་གྱིས་རློབས། །རྣམ་པ་ཀུན་ཏུ་འགལ་རྐྱེན་ཐམས་ཅད་ལས། །ལེགས་པར་བསྲུང་ཞིང་སྐྱོབ་པའི་འཕྲིན་ལས་མཛོད། །ཅེས་ཚེ་རིང་མཆེད་ལྔའི་བསྟོད། རྒྱལ་བའི་ཡུམ་མཆོག་རྡོ་རྗེ་གཡུ་སྒྲོན་མ། །ཆོས་སྐུའི་དབྱིངས་ལ་སྤྲོས་པ་མི་མངའ་ཡང་། །ལོངས་སྐུ་རིགས་ལྔ་མ་དང་མཁའ་འགྲོར་སྟོན། །སྤྲུལ་སྐུ་སྨན་མོས་འགྲོ་དོན་མཛད་ལ་བསྟོད། །ཅེས་གཡུ་སྒྲོན་མ་ལ་བསྟོད། །དྲེགས་པ་སྡེ་བརྒྱད་ཀུན་གྱི་མགོན། །དཔལ་ལྡན་ཞིང་སྐྱོང་དབང་པོ་ཡི། །མཆེད་ཅིག་གནས་ཆེན་བདག་པོ་ནི། །ཅིག་ཅར་དམར་པོ་ཁྱོད་ལ་བསྟོད། །སྤྲོ་ན་མན་ངག་བཞིན་དུ་བཟླས། །དེ་ནས། ཚོགས་ཀྱི་ཡོ་བྱད་བཤམས། ཆང་གིས་བྲན་ནས། ཨོཾ་སྭ་བྷཱ་ཝ་ཤུདྡྷཿ སརྦ་དྷརྨཱཿསྭ་བྷཱ་ཝ་ཤུདྡྷཱོ་ཧཾ། ཨོཾ་ལས་ནམ་མཁའི་དབྱིངས་དང་མཉམ་པའི་ཐོད་པའི་སྣོད་དུ། ཨཱཿལས་ཤ་ལྔ་བདུད་རྩི་ལྔ་ལ་སོགས་པའི་དམ་ཚིག་གི་རྫས་ཞུ་ཞིང་ཁོལ་བ། ཧཱུྃ་ཡིག་གི་འོད་ཀྱིས་ཡེ་ཤེས་ལྔའི་རང་བཞིན་གྱི་བདུད་རྩི་བཀུག་པ་དང་རོ་གཅིག་ཏུ་བསྲེས། ཨོཾ་ཨཱཿཧཱུྃ་ལན་གསུམ་བརྗོད། དེ་ནས་སྒྲ་བརྙན་དབྱངས་སྙན་པོ་དང་ལྡན་པས་བསྐང་བ་འདི་ལྟ་བུར་གྱེར་རོ། །ཧཱུྃ། ལྷ་མིའི་འདོད་ཡོན་མ་ལུས་ཚོགས་པའི་སྤྲིན། །སོ་སོའི་ཐུགས་ལ་དགྱེས་དགུའི་ཆར་འབེབས་པ། །ནམ་མཁའི་ཁམས་རྣམས་ཀུན་ནས་ཁྱབ་པ་འདིས། །དམ་ཅན་སྲུང་མ་རྒྱ་མཚོའི་ཐུགས་དམ་བསྐང་། །གཡག་ལུག་རྟ་ཁྱི་གཅན་གཟན་གཏུམ་པོའི་ཚོགས། །བྱ་ནག་རྟེན་གཏོར་གཡང་གཞི་དཔའ་བོའི་སྙིང་། །སྲོག་གི་འཁོར་ལོས་བསྟེམས་སོགས་རང་རང་གི །རྟེན་རྫས་རྒྱ་ཆེར་སྤེལ་བས་ཐུགས་དམ་བསྐང་། །སྐུ་བརྙན་རྔ་དང་ཅང་ཏེའུ་སིལ་སྙན་དུང་། །བོང་བུ་གྭ་དམར་ནལ་བུའི་རྒྱལ་མཚན་སྙིང་། །མདོང་མཐའ་ཅན་གྱི་གར་དང་འདོད་ཡོན་ལྔ། །དམར་གྱི་ཨརྒྷཾ་སྦྲེང་བས་ཐུགས་དམ་བསྐང་། །རིན་ཆེན་གོ་ཆ་རྣོ་བའི་དགྲ་ཆ་དང་། །འཕྱར་བའི་དར་དང་བསྲ་བའི་ལག་ཆ་དང་། །བལྟ་བས་མི་ངོམས་སྤྱན་གཟིགས་དཀོར་ཆ་དབྱིག །གངྒཱའི་ཞིང་རྡུལ་གྲངས་ཆས་ཐུགས་དམ་བསྐང་། །དྲི་རོ་བཅུད་མདངས་ཕུད་ཀྱི་བཟའ་བཏུང་ནི། །སྲིད་ན་ཅི་མཆིས་དེ་སྙེད་སྤུངས་པ་གང་། །སྔགས་རྒྱས་དམ་ཚིག་རྫས་སུ་ལེགས་བསྙེན་པའི། །ཚོགས་དང་གཏོར་མ་རྒྱ་མཚོས་ཐུགས་དམ་བསྐང་། །དགྱེས་བཞིན་འཁོར་བར་འགལ་རྐྱེན་སེལ་བ་དང་། །གནད་དུ་བསྐུལ་བས་འཕྲིན་ལས་བསྒྲུབ་པའི་རྒྱུ། །མཆོད་དང་ཉེ་བ་བསྒྲུབ་པའི་སྒོམ་བཟླས་སོགས། །མཐུན་པའི་དམ་ཚིག་ཡོངས་ཀྱི་ཐུགས་དམ་བསྐང་། །ལྕམ་དྲལ་ཁྱེད་དང་དམ་ཅན་མ་ལུས་པར། །མཆོག་ཏུ་གདུང་ཤུགས་ལྡན་ཀྱང་མི་མཁས་པས། །ཚུལ་བཞིན་བསྒྲུབ་པའི་དམ་ཚིག་ལས་ཉམས་པ། །དོ་ནུབ་བསྐང་ངོ་བཤགས་སོ་ཐུགས་དམ་ཅན། །དེ་ལྟར་བསྐང་ཞིང་བཤགས་ནས་འདོད་པའི་དོན། །མ་ལུས་བསྒྲུབ་ཅིང་ལྷག་པར་བདག་ཅག་ལ། །ཕ་རོལ་བསམ་སྦྱོར་ངན་པའི་ལས་བརྩམས་པ། །གང་མཆིས་དགྲ་བགེགས་ཉིད་ལ་བཟློག་པར་མཛོད། །དེ་ནས། ཚོགས་ཕུད་གཏོར་མ་ལ་གྲངས་བཞིན་བྲན་ནས། ཆ་ལྔ་ལ། ཧཱུྃ། ཚོགས་ཀྱི་མཆོད་པ་རྒྱ་ཆེན་འདི། །རྩ་བ་བརྒྱུད་པའི་བླ་མ་དང་། །ཡི་དམ་དཀྱིལ་འཁོར་ལྷ་ཚོགས་དང་། །མ་ཧཱ་ཀཱ་ལ་འཁོར་བཅས་དང་། །དཔལ་ལྡན་དུད་སོལ་འཁོར་དང་བཅས། །མགོན་པོ་རྗེ་བློན་འབངས་གསུམ་དང་། །ཁྱབ་འཇུག་ཆེན་པོ་འཁོར་བཅས་དང་། །ཞིང་སྐྱོང་སེང་གདོང་ཡབ་ཡུམ་དང་། །ཚེ་རིང་མཆེད་ལྔ་བསྟན་མར་བཅས། །རྡོ་རྗེ་གཡུ་སྒྲོན་དཔལ་ལྷ་དང་། །གཞི་བདག་དགེ་བསྙེན་མཆེད་གཉིས་སོགས། །དམ་ཅན་རྒྱ་མཚོའི་ཚོགས་ལ་འབུལ། །ག་ཎ་ཙཀྲ་པཱུ་ཛ་ཁཱ་ཧི། ཞེས་བསྔོས་ནས་ནམ་མཁར་དོར། དེ་ནས་གཏོར་མ་རྣམས་ཆང་གིས་བྲན་ནས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷཱོ་ཧཾ། ཨོཾ་ལས་ནམ་མཁའི་དབྱིངས་དང་མཉམ་པའི་ཐོད་པའི་སྣོད་དུ། ཨཱཿལས་ཤ་ལྔ་བདུད་རྩི་ལྔ་ལ་སོགས་པའི་དམ་ཚིག་གི་རྫས་ཞུ་ཞིང་ཁོལ་བ། ཧཱུྃ་ཡིག་གི་འོད་ཀྱིས་ཡེ་ཤེས་ལྔའི་རང་བཞིན་གྱི་བདུད་རྩི་བཀུག་པ་དང་རོ་གཅིག་ཏུ་བསྲེས། ཨོཾ་ཨཱཿཧཱུྃ་ལན་གསུམ་བརྗོད། དེ་ནས། རྡོ་རྗེ་ཐལ་མོ་ཁ་གྱེན་དུ་ཕྱེ་བའི་ཕྱག་རྒྱ་བཅས། ཨོཾ་བཛྭ་ཀ་ཝུ་ཝ་མ་ཧཱ་ཀཱ་ལ་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། གསུམ་མམ་བདུན་གྱིས་མགོན་པོ་ལ་འབུལ། ཨོཾ་ཧཱུྃ་ཤྲཱི་ཡ་དེ་ཝཱི་ཀཱ་ལི་ཀཱ་ལི་ཧཱུྃ་བྷྱོ་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ལྷ་མོ་ལ་འབུལ། གཞན་རྣམས་ལ། ཨོཾ་མ་ཧཱ་ཀཱ་ལ་གུ་ཎ་སྲཱྀ་ད་བིཥྞཀྵྭ་རཱ་ཧུ་ལཀྵེ་ཊ་པཱ་ལ། མཾ་ལཾ་ཨཾ་ཙཾ་ཏཾ་པཉྩྨ་ཌཱ་ཀ྄ི་བཛྭ་ལ་ལ་ལི་ལི། ཏྲཀ་ཤད་སིདྡྷི་ཡ་མ་དུ་ཛ། ནག་པོ་ཏི་པ་རཱ་ཛ། རཱ་ཊིཊ་མ་ཡ་ཛ་ཛཿ ཤིནྟི་ཨ་ཀ་ཊ་བྷཀྵི་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་མམ། ཡང་ན་ཨོཾ་ཨཱ་ཀ་རོ་མུ་ཁཾ་སརྦ་དྷརྨྨ་ཎཱཾ་ཨ་དྱཱ་ནུཏྤནྣ་ཏོཏ་ཨོཾ་ཨཱཿཧཱུྃ་སྭཱ་ཧཱ། ཞེས་བདུན་གྱིས་ཐམས་ཅད་ལ་བསྔོའོ། །དེ་ནས། དཔལ་ཡེ་ཤེས་ཀྱི་མགོན་པོ་ཕྱག་བཞི་པ་ལྕམ་དྲལ། ལས་ཀྱི་མགོན་པོ་བྱ་རོག་གི་གདོང་པ་ཅན་ལ་སོགས་པ་འཁོར་དང་བཅས་པ་རྣམས་དང་། དུད་པའི་སོལ་བ་མ། མགོན་པོ་བདུད་ཀྱི་སྤུ་གྲི། ཁྱབ་འཇུག་གཟའི་སྤུ་གྲི། ཞིང་སྐྱོང་ཚེ་རིང་མཆེད་ལྔ། རྡོ་རྗེ་གཡུ་སྒྲོན། བསྟན་མ་བཅུ་གཉིས། ཅིག་ཅར་དམར་པོ། སྨྱོ་ཁའི་ཀླུ་བཙན་རྡོ་རྗེ་སྣ་ཡོན་མ་ལ་སོགས་པའི། དཔལ་ལྡན་འབྲུག་པའི་བཀའ་དང་དམ་ལ་བཏགས་པའི་དམ་ཅན་རྒྱ་མཚོ། གནས་བདག་གཞི་བདག་དང་བཅས་པ་རྣམས་ལ། མཆོད་སྦྱིན་གྱི་གཏོར་མ་ཕུལ་བས། དགྱེས་རབ་ཀྱི་མཆོག མཉེས་རབ་ཀྱི་ཕུལ་དུ་གྱུར་ཅིག དེང་འདིར་བདག་ལ་མི་མཐུན་པའི་ཕྱོགས་ཐམས་ཅད་ལས་བསྲུང་བ་དང་། མཐུན་པའི་རྐྱེན་ཐམས་ཅད་ཡིད་བཞིན་འགྲུབ་པའི་མཆོག་སྩོལ་བར་མཛད་དུ་གསོལ་ལོ། །ཞེས་བརྗོད། གཏོར་མ་ཧབ་དིར་གྱིས་གསོལ་བར་བསམ་མོ། །ཚོགས་ལ་ལོངས་སྤྱོད་དེ་ནས་ལྷག་བསྡུས་ཁ་ཕྲུ་བཏབ། ཨོཾ་ཨུ་ཙིཥྞཀྵྭ་བྷ་ལིངྟ་བྷཀྵཿསྭཱ་ཧཱས་བསྔོས་ཕྱིར་དོར། །དེ་ནས་དམ་ཚིག་ཡེ་ཤེས་དབྱེར་མེད་པ་བཛྭ་མུས་རྟེན་ལ་བསྡུ། སེ་གོལ་གཏོགས། དགེ་བ་འདི་ཡིས་མྱུར་དུ་བདག །ཆོས་སྐྱོང་སྲུང་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །དུས་གསུམ་སངས་རྒྱས་ཀུན་གྱི་བསྟན་བསྲུང་ཕྱིར། །འཇིགས་བྱེད་མི་བཟད་དྲག་པོའི་ལུས་དང་ལྡན། །རྔམ་པའི་སྟོབས་ཀྱིས་བདུད་བཞི་ཚར་གཅོད་པའི། །མགོན་པོ་བྱ་རོག་མཚན་གྱི་བཀྲ་ཤིས་ཤོག །ཟབ་མོ་རྒྱུད་ཀྱི་སྲུང་མ་མ་མོ་ནི། །ཞལ་གཅིག་ཕྱག་བཞི་འཕྲིན་ལས་རྣམ་བཞི་བསྒྲུབ། རྫུ་འཕྲུལ་མཐུ་ལྡན་དགྲ་བགེགས་ཚར་གཅོད་པའི། །ཁྲག་འཐུང་དུད་སོལ་ལྷ་མོའི་བཀྲ་ཤིས་ཤོག །བཅོམ་ལྡན་འདས་ཀྱི་སྤྱན་སྔ་རུ། །སྒྲུབ་པ་བྱེད་པའི་གང་ཟག་རྣམས། །བུ་བཞིན་སྐྱོང་བར་ཞལ་བཞེས་པའི། །ཆོས་སྐྱོང་བསྲུང་མ་རྣམས་ཀྱི་བཀྲ་ཤིས་ཤོག །ས་སྐྱོང་ཚེ་དབང་བསོད་ནམས་དཔལ་འཕེལ་ཞེས། །རྒྱལ་བའི་བསྟན་སྲུང་སྐྱེ་བར་མཆོད་དེ་ཡི། །དྲན་པའི་གསོས་སུ་པདྨ་དཀར་པོ་རུ། །གྲགས་པའི་བ་དན་སྐྱོང་བ་དེས་སྦྱར་རོ། །འདིས་ཀྱང་བསྟན་པ་དར་བར་གྱུར་ཅིག། །།མངྒ་ལཾ།། །། དམ་ཅན་རྒྱ་མཚོའི་མཆོད་བསྟོད་ཀྱི་རིམ་པ་ཉི་ཚེ་བ་ནོར་བུ་འོད་ཀྱི་ཕྲེང་བ།དམ་ཅན་རྒྱ་མཚོའི་མཆོད་བསྟོད་ཀྱི་རིམ་པ་ཉི་ཚེ་བ་ནོར་བུ་འོད་ཀྱི་ཕྲེང་བ་ཞེས་བྱ་བ་བཞུགས་སོ། །མངོན་རྟོགས་ཧཱུྃ ཀ་ཡིག་གང་དུའང་མི་གནས་ཆོས་དབྱིངས་མདངས། །སྣོད་བཅུད་དཀྱིལ་འཁོར་ཆེན་པོར་གྲུབ་པའི་དབུས། །ཧཱུྃ་དང་གྲི་གུག་ཟེར་གྱིས་གདུག་པ་བསད། །སངས་རྒྱས་མཐུ་སྟོབས་གཅིག་ཏུ་བསྡུས་ལས་སྐུ། །ཁ་དོག་མི་བཟད་མུན་པ་ཆེར་གནག་པ། །འབར་བའི་འཕྲེང་བ་འཁྲུག་པའི་དུ་བས་དཀྲིས། །དྲག་ཤུལ་ཆེར་ཁྲོས་ཞལ་གཅིག་སྤྱན་གསུམ་དམར། །དཔའ་སྒེག་འཇིགས་སོགས་ཉམས་དང་འགྱུར་བའི་གཏེར། །ག་ཤལ་འཛག་པའི་མགོ་བོ་ལྔ་བཅུ་འཕྱང་། །གུག་ཀྱེད་ཅོད་པན་ཕྱག་རྒྱ་དྲུག་གིས་བརྒྱན། །གདུག་པའི་སྦྲུལ་འཁྲིལ་མི་དང་གླང་ཆེན་དང་། །སྟག་གིས་པགས་པ་རློན་པ་གོས་སུ་གྱོན། །ང་རོ་ཧཱུྃ་གིས་བདུད་བཞི་དཔའ་འཁུམས་པའི། །སྟེང་དུ་དཔའ་བོའི་རོལ་པ་ཆེན་པོས་འགྱིང་། །ཕྱག་བཞི་བེ་ཏ་རོ་ལངས་ལྕེའི་རལ་གྲི། །ཐོད་ཁྲག་ཁ་ཊྶཱཾ་དར་དཔྱངས་ལྡན་པ་བསྣམས། །ཅ་རེ་སྐུ་དང་སྐད་ཅིག་མི་འབྲལ་བར། །ཀུན་ཏུ་སྣ་ཚོགས་གཟུགས་སྟོན་ཙཎྜྻིཀ །སྐེམ་ཞིང་སྦེག་པ་མཐིང་ནག་གཏུམ་པའི་བཞིན། །ཕྱག་ན་རལ་གྲི་མདའ་གཞུ་དགྲ་མགོ་འཛིན། །ཆ་བྱད་མིའུ་ཐུང་ཁྲོས་པའི་ཁྲོ་བོ་སྟེ། །སྒྲོལ་བྱེད་གསོད་བྱེད་རྔམ་བྱེད་བདུད་མོ་རྣམས། །དགྲ་ལ་རྔམ་པའི་རྐན་རྡེབ་བྱ་རོག་གདོང་། །ཞབས་བརྡབས་ཁམས་གསུམ་སྲིད་པ་གཡོ་ཞིང་བསྒུལ། །ཇི་ལྟར་སྲེད་སྐྱེད་དུག་གསུམ་ཉོན་མོངས་སྦལ། །གནོད་སྦྱིན་ལྗང་ནག་ཁྲག་གི་རལ་པ་ཅན། །འཇིག་རྟེན་ཕུང་བར་བྱེད་པའི་རཱ་ཧུ་ལ། །ཤ་ཟ་མཐུ་བོ་སེང་གེའི་གདོང་པ་ཅན། །ཉ་ལྟར་གཅེར་མོ་གར་འཁྱུག་སྒོ་མཚམས་མ། །རོ་ལངས་བརྒྱ་དང་ནག་སྟོང་ཤ་ཟ་འབུམ། །མ་མོ་ས་ཡ་གནོད་སྤྱིན་ཁྲི་དང་ནི། །དཔལ་མགོན་བདུན་ཅུ་རྩ་ལྔར་བཅས་པས་བསྐོར།། སྤྱན་འདྲེན་ཧཱུྃ ཏ་ཐཱ་ག་ཏ་རྣམས་ཀྱི་སྐལ་བཟང་ཞིང་། །ཆོས་བཞིན་སྐྱོང་བའི་མགོན་པོ་ཁྱོད་ཡིན་པས། །སྙིགས་མ་ལྔ་བདོ་འཕྲིན་ལས་མཛད་པ་ཡི། །དུས་ལགས་བཏང་སྙོམས་མི་འཚལ་འདིར་གཤེགས་ཤིག །ཐ་མའི་སྲིད་པར་བྱང་ཆུབ་ཤིང་དྲུང་དུ། །མེ་ཏོག་གཞུ་ཅན་གཡུལ་དུ་རླག་བྱེད་པའི། །དཔའ་བོ་རྣམས་ཀྱི་དམག་གི་དཔོན་པོ་ཁྱོད། །ཉམས་པ་བསྒྲལ་ཕྱིར་གནས་འདིར་སྤྱན་འདྲེན་ནོ། །ད་ལྟ་སྲིད་གསུམ་ཁམས་ཀྱི་དྲེགས་པ་ཅན། །ཅི་མཆིས་ཁྱོད་ཀྱི་བྲན་ཚོགས་མདུན་དུ་བདར། །བྱ་གཅན་ཀླད་དང་བཤུལ་དུ་རྗེས་འབྲང་ཅན། །དད་པས་སྤྱན་འདྲེན་མཆོད་ཀྱིས་གཤེགས་སུ་གསོལ།། བཞུགས་གསོལ་ན་རཱ་ཡ་དང་བིཥྞཀྵྭ་ལ་སོགས་པ། །དབང་པོ་སྡེར་བཅས་མཐུན་མནན་ཁྲིར་བཞུགས་ནས།། དམ་བཞག་སྔོན་གྱི་ཞལ་བཞེས་རྗེས་སུ་དགོངས་མཛོད་ཅེས།། ཕྱག་འཚལ་བསྟན་པ་བསྲུང་ཕྱིར་གུས་པས་ཕྱག་འཚལ་ལོ།། དབང་བསྐུར་པ་ར་མི་ཏཱའི་སྲས་མཆོག་རིགས་ལྔ་ཡིས། །བདུད་རྩི་ལྔ་ཡི་བུམ་པས་དབང་བསྐུར་ཏེ། །མཐུ་སྟོབས་ནུས་པ་ཀུན་ལ་མངའ་བསྒྱུར་ཕྱིར།། རྒྱས་གདབ་གཉིས་མེད་བདེ་བ་ཆེན་པོར་རྒྱས་བཏབ་པོ།། མཆོད་པ་ཧཱུྃ ཕ་རོལ་མོ་བརྒྱུད་སྲིད་པའི་རྩ་བཅད་པའི། །དམར་ཆེན་ཁྲག་གི་རྒྱ་མཚོའི་ཨརྒྷཾ་སྒྲེང་། །ཕོ་རྒྱུད་དུང་ཅན་གཏུབ་པའི་ཟླ་བའི་རྒྱུན། །ཞལ་དང་ཞབས་བསིལ་རྐྱེན་དུ་ལེགས་པར་སྦྱར།། ཕྱི་བ་མོས་མ་རེག་མེ་ཏོག་གསུར་ཆེན་སྤོས། །སྣང་གསལ་དྲི་ཆབ་ཞལ་ཟས་རེ་རེ་ཡང་། །འདོད་པའི་ཡོན་ཏན་ཀུན་དང་ལྡན་བཞིན་དུ། །གང་དགྱེས་དེ་དེར་རྫུ་བ་མཆོད་པར་འབུལ།། ནང་མ་རབས་དཀར་བྱང་དུ་བྲིས་དམར་བྱང་བཏབ། །ཏིང་འཛིན་སྔགས་རྒྱ་ཐུན་གྱིས་བསད་བྱས་པའི། །ཤ་རུས་རིར་སྤུངས་ཁྲག་ནི་མཚོར་བསྐྱིལ་བའི། །བ་ལིཾ་མཆོད་པར་འབུལ་ལོ་ཁ་རཾ་ཁ་ཧི།། གསང་བ་ཙ་རུའི་བཟར་འོས་མྱོས་བྱེད་རྣམ་པ་བརྒྱད། །ཤ་ལྔ་བདུད་རྩིའི་རང་བཞིན་ལྔ་ཡི་ཚོགས། །ཨོཾ་གྱིས་རབ་སྦྱངས་ཨཱཿསྦར་ཧཱུྃ་གིས་སྤེལ། །ཧོཿཡིས་བདུད་རྩིར་བཞུ་བའི་ཕུད་འབུལ་ལོ།། དེ་ཁོ་ན་ཚ་བ་ལྟེ་བའི་གཏུམ་མོའི་ཡེ་ཤེས་མེས། །བདེ་བ་ཆེན་པོའི་ཧེ་རུ་ཀ་བསྐུལ་ཏེ། །སྙོམས་ཞུགས་སྦྱོར་བའི་མཚམས་འོང་དགའ་བའི་ཆ། །གཙུག་ཏོར་ནམ་མཁར་གང་བས་མཆོད་པར་བགྱི།། འཛབ་མཆོད་ཛཿཡིས་དཀྱིལ་འཁོར་བཞི་ཡི་ནང་དུ་བཀུག །ཧཱུྃ་གིས་སྨིན་བྱེད་དབང་བཞིའི་ཞགས་པས་བཅིངས། །བཾ་གྱིས་རིམ་གཉིས་ལམ་དུ་ལེགས་བསྡམས་ཏེ། །ཧོཿཡིས་ཐམས་ཅད་རྡོ་རྗེའི་ས་ལ་མཉེད། །ཨོཾ་བཛྭ་ཀཱ་ཝུ་ཝ་ཝ་པ་ཤཱ་ཡ། མ་ཧཱ་ཀཱ་ལ་ཧཱུྃ་ཧཱུྃ་ཕཊ྄། བསྐང་བཤགས་ཝ་ལེར་ལྷ་གསལ་འཛབ་ཟློས་ཕྱག་རྒྱ་བསྟན། །རྟེན་གསུམ་ཚོགས་ཞིང་མཐུན་པའི་མཆོད་རྫས་མོད། །རྩ་ལྟུང་ཡན་ལག་བཅས་པས་མ་གོས་པས། །ཁྱོད་ཐུགས་བསྐང་ཞིང་ཉམས་པ་མཐོལ་ལོ་བཤགས།། ཕྱི་སྐུའི་བསྟོད་པ་ཧཱུྃ ཞྭ་ལྟར་འཇིག་རྟེན་ཡས་མཐར་མགོན་པོའི་ཚོགས། །ཧ་ཅང་དྲེགས་ནས་གདུལ་དཀའ་འདུལ་བ་ལ། །སངས་རྒྱས་ཀུན་གྱི་ནུས་པས་ཁྱོད་བསྒྲུབས་ཚེ། །དེ་དག་བརྒལ་འབོག་སངས་ནས་བྲན་དུ་གྱུར།། ནང་གསང་བསྟོད་ཟ་པོ་རྟག་སོགས་ཕྱིན་ཅི་ལོག་བཀག་ནས། །རྟེན་ཅིང་འབྲེལ་འབྱུང་དབུ་མའི་བཤུལ་སྟོན་པར། །སྙིང་པོ་གསང་སྔགས་རིག་པ་གཟུངས་ཀྱི་ཚོགས། །ཡན་ལག་དྲུག་ཅུས་ཉེ་བར་ལོངས་སྤྱོད་མཛད།། གསང་བ་ཐུགས་བསྟོད་འ་ལེ་ཙམ་དུ་ཟག་མེད་ཆོས་ཀྱི་སྡེ། །ཇི་སྙེད་ཁྱོད་ཐུགས་རྣམ་པ་ཐམས་ཅད་པས། །ཞིབ་མོར་དཔྱད་པ་སངས་རྒྱས་ཁོ་ནའི་ཡུལ། །འོན་ཀྱང་ཆོས་རྣམས་ཀུན་དང་རོ་མཉམ་མོ།། དེ་ཁོ་ཉིད་རོ་མཉམ་ལ་བསྟོད་པ་ཡ་མཚན་སྤྲོས་མིན་སྤྲོས་པ་ཀུན་ཏུ་སྣང་། །ཞི་མིན་ཞི་དང་འཁོར་མིན་འཁོར་བ་དང་། །ལམ་མིན་ལམ་སོགས་འགལ་བ་གཅིག་འདུ་བས། །བསམ་མི་ཁྱབ་ལ་བདག་ནི་ཕྱག་འཚལ་བསྟོད།། གཟུ་དཔང་རྭ་ལྟར་བསྟོད་ཀྱང་ཚེར་ལྟར་འོག་ཏུ་ཟུག །ཕན་བཏགས་ལན་དུ་བསམ་སྦྱོར་གནོད་ཁོ་ན། །འདི་འདྲ་བདག་གིས་བཟོད་ཀྱང་སྲུངས་མར་བརྙས། །བསྒྲལ་བའི་དུས་ལ་བབ་བོ་མ་གཡེལ་ཞིག། ཆད་རྡོ་ལ་བ་དཀར་འདྲ་ཆོས་བཟང་འདུན་ས་རུ། །དཀར་པོའི་ལྷ་དང་དེ་ཡི་ཕྱོགས་རྣམས་ཀྱིས། །བསྟོད་ཚེ་ཇི་ལྟར་ཁས་བླངས་ད་བསྐུལ་གྱིས། །བཀའ་སྡོད་དམ་ཅན་རྒྱ་མཚོ་ལས་ལ་འཆོས།། བསྐུལ་ཤ་ཟ་གཏུམ་པོ་ཐམས་ཅད་ཤུལ་དུ་འབྲངས། །ལྷ་སྲིན་སྡེ་བརྒྱད་ཐམས་ཅད་གསོ་སྒྲ་ལྡིར། །སྤྲུལ་པ་ཅི་ཡང་རྫུ་བས་གནམ་ས་ཁྱབ། །དེ་འདྲའི་མགོན་པོའི་དམག་ཚོགས་དགྲ་ལ་བྷྱོ།། བཟློག་པ་ས་ལ་མནན་དང་ཆུར་གཏད་མེ་ལ་བསྲེག །རླུང་ལ་འཁོར་ལོར་བསྐོར་དང་འབྱུང་བ་བཞིའི། །རྐྱེན་གྱིས་བྱད་དུ་སྟེམས་པ་ཅི་མཆིས་པ། །བྱད་མཁན་ནག་པོ་རང་ལ་བཟློག་ཅིག་བསྒྱུར།། གཏོར་མནན་ཧ་ཧ་བགེགས་སུ་བདུད་རྩི་མཉམ་པ་ཉིད། །སྣང་ཚད་མགོན་པོའི་སྐུ་ལ་གྲགས་པ་གསུང་། དྲན་ཚད་ཡེ་ཤེས་ཆེན་པོའི་རོལ་པ་ཡིན། །དེ་ཕྱིར་རྡོ་རྗེའི་གླུ་ལེན་བྲོ་བརྡུང་ངོ་།། མངའ་གསོལ་ཨ་ལ་ལ་ཞེས་སངས་རྒྱས་ཐམས་ཅད་ཀྱིས། །བསྟོད་ཅིང་བཀུར་དང་བསྔགས་པ་ཅི་ཡང་མཛད། །སྲིད་གསུམ་འགྲོ་བ་ཡོངས་ཀྱི་དད་ཤུགས་ལ། །འཕྲིན་ལས་རྣམ་བཞི་འཇུག་པའི་མངའ་ཡང་གསོལ།། རྗེས་ཆོག་འདི་ལྟར་མཆོད་ལ་ལྷག་ཆད་བྱུང་བ་བསྐོང་། །དུས་འདི་ནས་གཟུང་བྱང་ཆུབ་བར་དུ་སྐྱོབས། །དེང་ནས་བདག་དང་འགྲོ་བ་ཐམས་ཅད་ལ། །མགོན་པོ་འཁོར་བཅས་གཉིས་མེད་ཐིམ་གྱུར་ཅིག། བློ་བཟང་དགའ་བོས་བསྐུལ་བ་ལྟར་དུ། པདྨ་དཀར་པོས་བགྱིས་པའོ།། ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨྨུཿསྭ་བྷཱ་ཝ་ཤུདྡྷཱོ་ཧཾ། ཧཱུྃ དུར་ཁྲོད་ཆེན་པོ་བརྒྱད་ཀྱིས་བརྒྱན་པའི་གཞིར། །ཁྲག་ཞག་ཀླད་མཚོ་རྦ་རླབས་གཡོ་བའི་ཀློང་། །གནམ་ལྕགས་ཞུན་སྦྱར་ཀེང་རུས་ལྷུན་པོའི་སྤོར། །སྣ་ཚོགས་རྡོ་རྗེ་ལས་འཕྲོས་རྭ་གུར་དབུས། །གྲུ་བཞི་སྒོ་བཞི་རྟ་བབས་བཞི་ལྡན་ཞིང་། །འདོད་སྣམ་རྩིག་པ་ཕ་གུ་དྲ་བ་དང་། །ཤར་བུ་བྱ་འདབ་པུ་ཤུས་དབུས་འཕྱུར་བུ། །ཏོག་བཅས་རིན་ཆེན་ལས་གྲུབ་དེའི་ནང་དུ། །ཐོད་པ་སྐམ་རློན་ཁྲག་ཞག་གིས་བརྩིགས་པ། །གྲུ་བཞི་སྒོ་དང་ལྟ་བབས་དུར་ཁྲོད་བརྒྱད། །ཆོས་འབྱུང་འདབ་བཞིའི་ལྟེ་བར་ཉི་བདན་ལ། ཧཱུྃ་ལས་རྡོ་རྗེ་སྲིན་པོ་ཁྲོས་པའི་གཟུགས། །སྦོམ་ཐུང་གསུས་འཕྱང་ཡན་ལག་གེལ་ལ་རགས། །མཆེ་གཙིགས་ལྗགས་འདྲིལ་ཧཱུྃ་སྒྲོག་སྤྱན་གསུམ་དམར། །སྨིན་མ་ཨག་ཚོམ་སྐྲ་སེར་ཐོད་པས་བརྒྱན། །ཕྱག་བཞི་གཡས་ན་བེ་འབྲས་རལ་གྲི་དང་། །གཡོན་པ་ཐོད་ཁྲག་ཁ་ཊྶཱཾ་སྦྲུལ་གྱིས་སྤྲས། །མི་མགོའི་དོ་ཤལ་གླང་ལྤགས་སྟོད་དུ་གསོལ། །སྟག་ཤམ་ཕྱག་རྒྱ་དྲུག་ལྡན་སྒེག་པའི་ཉམས། །རོ་སྟེང་དཔའ་བོའི་འདུག་སྟངས་མེ་རིར་བཅས། །གཡོན་དུ་ཙཎྜྻི་ཀ་ནི་ཕྱག་བཞི་མ། །རལ་གྲི་དགྲ་མགོ་མདའ་གཞུ་མདུང་བཟུང་ནས། །བཙན་འཁྱིལ་འདབ་བཞིར་རྐན་རྡེབ་བྱ་རོག་གདོང་། །མིའུ་ཐུང་ཁྲོས་གཟུགས་གྲི་གུག་ཐོད་ཁྲག་འཛིན། །རྐང་གཡས་རྡེབ་ཅིང་མདུན་ཟུར་མདོག་ལྗང་བའི། །གནོད་སྦྱིན་བྱ་གདོང་གྲི་ཐོད་ནོར་བུས་བཀང་། གཡོན་པའི་བྲང་དང་པུས་བཙུགས་རཱ་ཧུ་ལ། །དུད་ཁ་མགོ་བཅུ་ཆུ་སྲིན་ཞགས་པ་དང་། །མདའ་གཞུ་སྐུ་སྨད་སྦྲུལ་མཇུག་འཁྱིལ་བ་གཡས། །གཡོན་དུ་གྲི་ཐོད་འཛིན་པ་ཤ་ཟའི་གཙོ། །སེང་གེའི་གདོང་ཅན་མཐིང་ནག་གར་གྱིས་རོལ། །བྱ་རྒོད་ཁྱུང་དང་ཁྭ་ཏ་འུག་གདོང་སྒོ། །མཚམས་སུ་ཕག་ཁྱི་སྤྱང་ཀི་སྟག་མགོ་མ། །གྲི་གུག་ཐོད་འཛིན་མཐིང་ནག་ཐམས་ཅད་ཀྱང་། །མི་མགོ་ག་ཤལ་ཞིང་གོས་སྟག་ཤམ་ཅན། །ཕྱོགས་མཚམས་རྒྱུག་པའི་རོ་ལངས་བརྒྱ་པོ་དང་། །ཕྱི་སྣམ་ནག་པོ་སྟོང་དང་ཤ་ཟ་འབུམ། །མ་མོ་བྱེ་བ་གནོད་སྦྱིན་ཁྲི་དང་སྒོར། །རྒྱལ་པོ་སྡེ་བཞི་བཙན་པའི་གོ་གྱོན་ཞིང་། །ཕྱི་རོལ་ཁོར་ཡུག་ཕྱོགས་སྐྱོང་ལྷ་ཆེན་དང་། །ཀླུ་དང་གནོད་སྦྱིན་གཟའ་དང་རྒྱུ་སྐར་དང་། །འཇིགས་བྱེད་མ་བདུན་སྲིང་བཞི་འབར་མ་བརྒྱད། །ཐམས་ཅད་ཁྲོས་པ་མཚོན་ཆ་སྣ་ཚོགས་འཛིན། །ཀུན་གྱི་གནས་གསུམ་ཨོཾ་ཨཱཿཧཱུྃ་གིས་མཚན། །ཧཱུྃ བཅོམ་ལྡན་འཁོར་ལོ་སྡོམ་པ་ཆེར་ཁྲོས་པ། །འཇིགས་བྱེད་ཆེན་པོ་མ་ཧཱ་ཀཱ་ལ་ཁྱོད། །སྤྲུལ་པའི་ཞིང་དུ་བསྟན་བསྲུང་ཀུན་གྱི་གཙོར། །ཕྱོགས་བཅུའི་རྒྱལ་བ་ཀུན་གྱིས་མངའ་གསོལ་བས། །བསྟན་པ་བསྲུང་ཕྱིར་དེང་འདིར་སྤྱན་འདྲེན་ན། །དྲེགས་པའི་བཀའ་སྡོད་འཁོར་བཅས་སྐུ་བསྐྱོད་ལ། །བསིལ་བའི་ཚལ་ནས་མྱུར་བར་འདིར་གཤེགས་ཞེས། །མཚན་ནས་བོས་སོ་ནག་པོ་བྱ་རོག་མིང་། །ཛཿཧཱུྃ་བཾ་ཧོཿཨོཾ་བཛྭ་མ་ཧཱ་ཀཱ་ལ་ས་མ་ཡ་ཧ་ན་ཧ་ན་ཧཱུྃ་ཕཊ྄། ཨོཾ་བཛྭ་ཨ་བྷི་ཥིཉྩྨ་མཱཾ། སྡོམ་གསུམ་གཙང་མའི་མཆོད་ཡོན་ཀུན་ནས་འཁྱིལ། །མང་ཐོས་མེ་ཏོག་རྣམ་དཔྱོད་གེ་སར་ཅན། །བརྟག་དཔྱད་མཁར་རྒྱུ་བསམ་པ་སྤོས་ཀྱི་སྤྲིན། །སྒོམ་བྱུང་ཤེས་རབ་མཆོག་གི་སྒྲོན་མེ་སྦར། །དྲན་པའི་གཟུངས་གཟུང་ཚིག་དོན་སྤོས་ཀྱི་ཆབ། །མ་སྨད་ཏིང་ངེ་འཛིན་གྱི་ཁ་ཟས་སྦྱར། །མདོ་སྡེ་འདུལ་བའི་དོན་རྣམས་ཆོས་མངོན་ལ། །བདར་བའི་སྒྲ་དབྱངས་སྲིད་པའི་མཐར་གྲགས་ཤིང་། །སྙན་ངག་གདངས་བཟང་སྡེབ་སྦྱོར་རྒྱུན་གྱིས་སྦྲེལ། །མངོན་བརྗོད་སྣ་ཚོགས་དར་གྱི་ཕང་ཕུང་ཅན། །བརྡ་སྤྲོད་ཡ་ལད་ཟློས་གར་ཕུབ་ལྡན་ཞིང་། །ཡིད་ཆེས་གྲགས་དང་དངོས་སྟོབས་ལས་གྲུབ་པའི། །བསྒྲུབ་དང་སུན་འབྱིན་རྣོ་བའི་མཚོན་ཆ་དང་། །ཐུབ་དབང་བཞེད་དོན་ཚིག་རྒྱན་དུ་སྤེལ་བའི། །རྩོམ་པའི་སྤྱན་གཟིགས་རྒྱ་མཚོས་དམ་ཅན་རྣམས། །མཆོད་པས་ཐུགས་དམ་གཉན་པོ་སྐོངས་གྱུར་ཅིག །ཨོཾ་ལས་ནམ་མཁའ་དང་མཉམ་ཐོད་པའི་སྣོད། །ཨཱཿལས་གཏོར་རྫས་ཤ་ལྔ་བདུད་རྩི་ལྔ། །རི་རབ་དང་མཉམ་ཞུ་བ་རྒྱ་མཚོ་ཙམ། །ཧཱུྃ་ལས་བབས་པས་ཡེ་ཤེས་བདུད་རྩིར་གྱུར། །ཨོཾ་བཛྭ་ཀཱ་ཝུ་ཝ་ཝ་པ་ཤཱ་ཡ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ྄། ཨོཾ་མ་ཧཱ་ཀཱ་ལཱ་ཡ་ཤཱ་ས་ན་ཨུ་པ་ཧཱ་རི་ཎི་ཨེ་ཥ་ཨ་པཤྩི་མ་ཀཱ་ལོ་ཨ་ཡཾ། ཨི་དཾ་རཏྣ་ཏྲ་ཡཱ་ཡ་ཨ་པ་ཀཱ་རི་ནཾ། ཡ་དི་པྲ་དཱི་ཛྙྱཱ་སྨ་ར་སིཏ་དཱ་ཨི་དཾ་དུཥྚ་ན་ཁ་ཁ་ཁཱ་ཧི་ཁཱ་ཧི། མ་ར་མ་ར། གྲཱི་གྲཱི། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་ཧཱུྃ་ཕཊ྄་ཧཱུྃ། ཧཱུྃ ཧེ་རུ་ཀ་ཁྱོད་ཟླ་བ་བདུད་རྩིར་བསྙེན། །གཞོམ་དཀའི་འཆི་བདག་གཡུལ་ལས་རྣམ་པར་རྒྱལ། །གསེར་སྦྱངས་འདྲར་དྲན་བློ་གྲོས་གཏེར་ཀུན་འབྱེད། །བནྡྷུ་ཛི་ཝ་ཀ་ལྟར་ཡང་དག་བསྒྲུབས། །ཁམས་གསུམ་དབང་པོར་བཅས་པ་བྲན་དུ་འདུ། །འཁྲུགས་པའི་ཆར་སྤྲིན་འདྲར་ཤེས་ཕས་རྒོལ་སྒྲོལ། །ཡང་ན་བདུད་བཞིའི་གཤེད་མ་ཉིད་དུ་འགྱུར། །དེ་ལྟར་བསྟོད་པས་བདག་གི་འགལ་རྐྱེན་སོལ། །ལེགས་བཤད་གྲྭ་འདིར་བློས་གསལ་རྒྱ་མཚོའི་ཚོགས། །གཉིས་འཐུང་ཆེ་ལ་བུང་བ་ལྟར་འདུས་ནས། །རྒྱལ་བའི་གཞུང་ལུགས་ཀུན་ལ་མཁས་སྦྱངས་པས། །དཔལ་ལྡན་འབྲུག་པའི་བསྟན་པར་རྒྱས་པར་མཛོད།། དཔལ་བཀྲ་ཤིས་མཐོང་སྨོན་གྱི་མཚན་ཉིད་གྲྭ་ཚང་པའི་ངག་འདོན་དུ་པདྨ་དཀར་པོས་སྦྱར་བའོ།། ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨཱཿསྭ་བྷཱ་ཝ་ཤུདྡྷཱོ་ཧཾ། སྟོང་པའི་ངང་ལས་ཨེ་ཡཾ་ཝཾ་རཾ་ལཾ། སུཾ་བྷྲཱུཾ་ཞུ་བས་ཆོས་འབྱུང་འབྱུང་ཞིའི་དལ། །རི་རབ་རྭ་གུར་རིན་ཆེན་གཞལ་མེད་ཁང་། །མཚན་ཉིད་རྫོགས་པའི་ནང་དུ་ཐོད་པའི་མཁར། །གྲུ་གསུམ་མེ་རླུང་འཁྲུག་པའི་ཁྲག་མཚོའི་དབུས། །མཐིང་ནག་ཧཱུྃ་ལས་བཅོམ་ལྡན་དུད་སོལ་མ། །ནག་པོ་སྤྲིན་འདྲ་ཁྲོ་གཏུམ་སྦེག་པའི་གཟུགས། །མཆེ་གཙིགས་ལྗགས་འདྲིལ་མི་རོ་རེངས་པ་གསོལ། །དམར་བའི་སྤྱན་གསུམ་བཟློག་གཟིགས་ཟུར་ཕུད་ཅན། །ལན་བུ་གཡོན་འཁྱིལ་ཐོད་པ་སྦྲུལ་གྱིས་བརྒྱན། །སྙན་གོང་དར་ནག་ཨུཏྤལ་རོ་ཉེ་དང་། །སྦྲུལ་དང་སེང་གེའི་རྣ་རྒྱན་གླང་ལྤགས་གསོལ། །ཕྱག་བཞི་གཡས་གཉིས་རལ་གྲི་ཐོད་ཁྲག་གཡོན། །ཤཀྟི་ཏྲི་ཤུ་བཟུང་ཞིང་ཕྱག་རྒྱ་དྲུག །ཁྲག་ཞག་ལྷ་མིན་མགོ་ཡི་དོ་ཤལ་ཅན། །བ་ལང་ཀོ་རློན་རེ་ལྡེས་སྨད་དཀྲིས་ནས། །ཀླུ་དབང་སྐ་རགས་ཙན་འཁྱིལ་ལྕགས་སྒྲོག་འཆང་། །གྭ་དམར་བོང་བུའི་སྟེང་དུ་འགྱིང་ཞིང་སྒེག །ཟུར་གསུམ་གཅེར་བུ་རལ་ཅན་སྙིང་ཁྲག་འཛིན། །ཕྱི་སྣམ་ནང་ཕྱོགས་དཀར་སེར་དམར་ལྗང་བཞི། །གྲི་ཐོད་འཛིན་མ་བདུན་ཡང་བོང་བུ་ཞོན། །ཕྱོགས་བཞིར་སེང་གེ་སྟག་སྤྱང་ཕག་དང་མཚམས། །བྱ་རྒོད་སྐྱུང་ཀ་དུར་བྱ་བྱ་གདོང་མ། །དྲེའུ་བཅིབས་ཤིང་གྲི་ཐོད་འཛིན་དང་སྒོར། །ཀཾ་ཀའི་གདོང་ཅན་མདའ་གཞུ་སྤུ་གྲིའི་སྦྲུལ། །ནད་རྐྱལ་གཡོན་པ་ཐོད་ཁྲག་སྟག་སྤྱང་སྤྲེའུ། །དྲེད་ཞོན་ཁོར་ཡུག་མ་མོ་འབུམ་གྱི་སྡེ། །དུར་ཁྲོད་ཆས་བརྒྱན་ཨོཾ་ཨཱཿཧཱུྃ་གིས་མཚན། །ཧཱུྃ སུམ་ཅུ་རྩ་བདུན་གནས་ཀྱིས་ཕོ་ཉ་མོའི། །ཚོགས་ཀྱི་དབང་ཕྱུག་རིགས་ལྡན་དུད་སོལ་མ། །དད་དང་གདུང་བས་སྤྱན་འདྲེན་འདིར་གཤེགས་ལ། །དྲག་ཤུལ་ཆེན་པོའི་དགྲ་བགེགས་འཇོམས་པར་མཛོད། །དྲྀ་ཥྱ་ཛཿཧཱུྃ་བཾ་ཧོ། ཨོཾ་བཛྭ་ས་མ་ཡ་ཧ་ན་ཧ་ན་ཧཱུྃ་ཕཊ྄། སྨིན་བྱེད་དབང་གི་ཆུ་བོའི་ཨརྒྷཾ་སྦྲེང་། །དམ་ཚིག་མེ་ཏོག་བསྐྱེད་རིམ་སྤོས་ཀྱི་དུད། །རྫོགས་པའི་མར་མེ་སྤྱོད་པའི་དྲི་ཆབ་དང་། །འབྲས་བུའི་ཞལ་ཟས་མཆོག་གིས་མཆོད་པར་བགྱི། །ཧ་ལས་ཐོད་པའི་གཏོར་མ་གསེར་ཞུན་ལྟར། །ཧོཿལས་དྲི་བཟང་ཀུན་གྱི་འབྱུང་ཁུང་དང་། །སྲཱིཿལས་རོ་བཅུད་ལྷ་རྫས་ལས་འདས་པའི། །ཡེ་ཤེས་བདུད་རྩི་རྒྱ་མཚོ་ཆེན་པོར་གྱུར། །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་ཨི་དཾ་བ་ལིཾ་ཏ་གྲཱི་གྲཱི་ས་མ་ཡ་ཧཱུྃ་ཕཊ྄། ཧཱུྃ དྷུ་ཡིག་གིས་བརྗོད་བདག་ཉིད་ཐབས་ཀྱི་ལྷས། །ཤེས་རབ་ཡུམ་ལ་རྗེས་སུ་ཆགས་བཞིན་པས། །བསྙེན་པའི་ཚུལ་ཤེས་ཞི་སོགས་གང་འདོད་དེར། །མོད་ལ་བརྗོད་འདི་འོལ་ཕྱིར་མི་སྤོབས་མཐུ། །མཾ་ཡིག་ནཱ་ཌིར་ཉི་མའི་སྡེ་འཆིངས་པས། །ནང་གི་ལྷ་མོ་ཁྱོད་གཉིས་ཉམས་བརྒྱའི་གར། །ནཱ་དའི་དབྱངས་སྦྱར་ཁམས་གསུམ་དུ་བསྒྱུར་ཚེ། །ཕུང་ཁམས་འཇའ་ཚོན་སྟོན་པའང་སྒྱུ་མའི་ཟོལ། །གཱ་ཡིག་ཉི་ཟླ་སྦྱར་བ་སྒྲ་གཅན་ཁར། །ཟོས་དུས་གསང་བའི་མ་མོ་ཁྱོད་ཞབས་དྲན། །སྒོ་གསུམ་དྷུ་ཏཱིའི་དབྱིངས་སུ་ཐིམ་གྱུར་པའི། །མངོན་པར་བྱང་ཆུབ་ཡུད་ཀྱིས་དེ་ལ་ཤར། རྀ་ཡིག་སྒྱུ་མའི་ཁམས་བཞིའི་ལྷ་མོའི་གླུས། །སྟོང་བཞིའི་མཐའ་ལས་སད་པའི་ཡེ་ཤེས་ལུས། །སླད་ནས་ཡང་དག་མཐའ་དང་ནམ་གཞར་ཡང་། །མི་ཕྱེད་འདོད་པའི་དངོས་གྲུབ་སྦྱིན་ཁྱོད་ཀྱིས། །བཤད་པ་པདྨོའི་འབྱུང་གནས་འདི་ཉིད་དུ། །མཁས་པ་ངང་པའི་དེད་དཔོན་ཀུན་བསྡུས་ནས། །པད་དཀར་བཞེད་པའི་དྲི་བསུང་གིས་སིམ་པའི། །དམ་ཆོས་མགྲིན་རྔ་བརྡུང་བས་རྟག་འགེངས་མཛོད།། འདི་ཡང་གྲྭ་ཚང་བའི་ཁ་ཏོན་དུའོ།། །། དགེ་བསྙེན་ཆེན་པོ་སྨྱོ་ཁ་མཆོད་པར་འདོད་པས། ཀྱཻ། གདོང་དམར་ཡུལ་གྱི་ཕ་རོལ་ན། །ཁ་ཁྲ་མོན་གྱི་ཚུ་རོལ་ན། །མནྟྲ་གཉྫྱ་ལྷ་མོའི་མཁར། །ཞིང་སྐྱོང་མ་མོའི་གནས་མཆོག་ནས། །འཇིག་རྟེན་ཕུང་བྱེད་རཱ་ཧུ་ལ། །ལྷག་པ་ཁྲོས་པའི་མཐུ་རྩལ་ཅན། །འཆི་བདག་བདུད་པོ་མངོན་སུམ་པ། །ནག་པོ་ཏི་པ་ར་ཙ་སྟེ། །སྨྱོ་ཁའི་རྗེ་བཙན་ཁྱེད་ལ་བདག །གསང་བའི་མཚན་ནས་འབོད་ལགས་ན། །བཀའ་ཉན་ལྷ་འདྲེ་གཉན་པོ་ཚོས། །མདུན་བདར་མཆོད་པའི་གནས་འདིར་གཤེགས། །ནག་པོ་ཏི་རཱ་ཙ་ཨཱ་ཀརྵ་ཡ་ཛཿ ཀྱཻ། དང་པོ་ཀུན་བཟང་ཧེ་རུ་ཀ །དྲེགས་མཛད་ཕྱག་ན་རྡོ་རྗེས་ཁྱོད། །ངན་སྤྱོད་སྡིག་ལས་བཟློག་བྱས་ཏེ། །སངས་རྒྱས་བསྟན་པ་བསྲུང་བར་བསྐོས། །བར་དུ་པདྨ་ནམ་སྙིང་དང་། །རས་ཆུང་རིག་འཛིན་གཉན་གྱི་བཀས། །དམ་པའི་ཟབ་རྒྱས་གཉེར་གཏད་ནས། །ཆོས་བདག་ཆེན་པོར་དབང་ཡང་བསྐུར། །ཐ་མར་མཚུངས་མེད་འབྲུག་པ་རྗེ། །སློབ་མར་བཅས་པས་དམ་ཚིག་ཆུ། །བྱིན་ནས་རྣལ་འབྱོར་དཔོན་སློབ་ཀྱི། །དགྲ་ལྷ་གཉན་པོ་མངའ་ཡང་གསོལ། །ད་ལྟ་སྔགས་འཆང་སྒྲུབ་པ་པོ། །འཁོར་དང་བཅས་པའི་མཆོད་བཤམས་ནས། །བཅོལ་བའི་ལས་རྣམས་སྒྲུབ་བྱེད་པའི། །ཕོ་ཉར་མངའ་གསོལ་ས་མ་ཡ་ཛཿ ཀྱཻ། མི་གཙང་ཐབ་སོགས་རྐྱེན་གང་གིས། །ཁྱེད་ཀྱི་སྐུ་གསུང་ཐུགས་རྙོག་པའི། །གྲིབ་སེལ་དམ་པའི་བསང་འདི་འབུལ། །ཕྱིན་ཆད་འཁོར་འདིར་གནོད་མ་མཛད། །དགྲ་མགོ་དབང་པོ་དོན་དང་སྣོད། །ལྷབ་ལྷུབ་ལྡ་ལྡིའི་མཆོག་ཏུ་སྦྲེལ། །གསུར་ཆེན་དུད་པ་གདུགས་སུ་ཕུབ། །ཞུན་ཆེན་སྒྲོན་མེའི་རྒྱལ་མཚན་བསྒྲེང་། །ཁོང་ཁྲག་དམར་པོའི་བ་དན་འཕྱར། །སྲོག་དབུགས་བླ་ཚེའི་ཟས་ཀྱིས་བདར། །མཛང་མས་མཛོད་དུ་སོགས་པའི་ནོར། །དཔའ་བོ་གཡུལ་ངོར་ཆས་པའི་རྒྱན། །སྟག་ཤར་དགྲ་ལ་འཕེན་པའི་མཚོན། །སྔགས་ནག་བསྔོ་བའི་གཏོར་མ་གླུད། །བོན་པོ་ཡས་གྱེར་གླུ་མ་དབྱངས། །སྐྱེས་བྲན་ན་ཆུང་རྩེ་བའི་དཔྱིད། །ས་དང་གནམ་ལ་སྤྱོད་དགུའི་འགྲོ། །དངུལ་སྐྱོགས་མཛེས་པའི་གསེར་གྱི་སྐྱེམས། །འཕྱར་བའི་དར་ཀུན་རྔན་དུ་འབུལ།། གཏོར་མ་བསངས་སྦྱངས་ཏེ་དགྲ་བོའི་ཤ་ཁྲག་ཏུ་དམིགས་ནས། ཨོཾ་ནག་པོ་ཏི་པ་ར་ཙ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་བསྔོས། བདག་དང་སྦྱིན་བདག་གི་འགལ་རྐྱེན་སེལ་བ་དང་། མཐུན་རྐྱེན་སྒྲུབ་པའི་གྲོགས་བཅོལ་ལོ། །ཀྱཻ། མེ་དཔུང་ནང་ནས་ཁྱོད་བཞེངས་ཚེ། །ཁྲོ་བོ་སྡིག་པའི་རྭ་རུ་ཅན། །ངམས་གནག་ལུས་པོ་མིག་གིས་ཁེངས། །ཟེར་གྱིས་ཕོག་ཤི་མོད་ལ་འགྱེལ། །གནམ་ལྕགས་ཐོག་འཕང་སེར་བ་འབེབས། །གསེར་གྱི་འཁོར་ལོ་དུག་སྦྲུལ་བསྣམས། །བདུད་རྟ་བཅིབས་ནས་འཛམ་གླིང་མྱུལ། །སྐྱེ་དགུའི་སྲོག་ལ་རྔམ་ཟས་བྱེད། །མཐུ་རྩལ་ཆེན་པོ་ཁྱོད་ཀྱི་དཔུང་། །དྲེགས་པའི་ལྷ་སྲིན་བཅོ་བརྒྱད་ལགས། །དོ་ནུབ་སྡང་བའི་དགྲ་ལ་རྦད། །དོ་ནུབ་གནོད་པའི་བགེགས་ལ་བྷྱོ། །དུག་མཚོའི་རྦ་ནས་ལོངས་པའི་དུས། །སྟོད་ནི་སྲིན་པོ་སྨད་ལྟོ་འཕྱེ། །སྦྲུལ་ནག་དགུ་ཡི་གདེངས་ཀ་གཡོ། །ཁ་རླངས་དུག་གི་སྤྲིན་དུ་གཏིབས། །མཛེ་རིགས་བཅོ་བརྒྱད་དགྲ་ལ་འགྱེད། །འཁོར་ཡང་ཀླུ་གདོལ་ནག་པའི་ཚོགས། །དོ་ནུབ་སྡང་བའི་དགྲ་ལ་རྦད། །དོ་ནུབ་གནོད་པའི་བགེགས་ལ་བྷྱོ། །རི་ནག་དབུས་ནས་བསྐྱོད་ཙ་ན། །སྦལ་མགོ་ཁྲག་གི་མིག་དགུ་ཅན། །སྡོམ་སྡིག་སྦལ་སྦྲུལ་རྟ་ཟེར་འཕྲོ། །མེ་དང་དུག་གི་སྨེ་བས་བརྒྱན། །དགྲ་བོ་འཛིན་ཤེས་གཏོང་མི་ཤེས། །གཉན་དང་ས་བདག་ཁྱོད་ཀྱི་བྲན། །དོ་ནུབ་སྡང་བའི་དགྲ་ལ་རྦད། །དོ་ནུབ་གནོད་པའི་བགེགས་ལ་བྷྱོ།། ཞེས་བརྗོད་ནས། གཙྪས་རང་གནས་སུ་གཤེགས་པར་གསོལ་ལོ།། ཀྱཻ། དུར་ཁྲོད་མ་མོའི་ཚོགས་དབུས་ནས། །ཕོ་ཉ་འདྲེ་མོ་ངན་ནེ་མོ། །རྡོ་རྗེ་སྣ་ཡོན་དཔལ་གྱི་ཡུམ། །མཆེད་འཁོར་བཅས་པ་ཚུར་གཤེགས་ཤིག །ཛ་གད་ཕུད་དང་དམར་གྱི་ཆོལ། །ཤ་རུས་ནང་ཁྲོལ་གཏོར་ཚོགས་དང་། །དགྱེས་པའི་མཐུན་རྫས་ཐམས་ཅད་ཀྱིས། །གསོལ་ལོ་མཆོད་དོ་བཅོལ་བ་སྒྲུབས། །སྲིན་མོ་ཁྲོས་གཟུགས་རི་རབ་དང་། །དམར་བ་སྲིད་གསུམ་ཟ་བའི་མེ། །མཆེ་གཙིགས་རྔམ་པ་གངས་རིའི་བྱིན། །སྤྱན་གསུམ་གཟིར་བ་ཉི་མ་མཚུངས། །ཕྱག་མཚན་མ་ངེས་སྣ་ཚོགས་འཛིན། །སྒྲོ་ཐུལ་དར་དང་གཡང་གཞི་གྱོན། །ལུས་ཅན་སྒྲོལ་བའི་གིང་གཅིག་མ། །ཆེ་ཞེ་ཆེན་མོ་དགྲ་ལ་བྷྱོ། །ཀྱཻ། སྲིད་པའི་བདག་པོ་ཆེན་པོ་པ། །སྐུ་ལྔ་ཆོ་འཕྲུལ་ཆེར་སྟོན་པས། །གདུག་པའི་ལྷ་འདྲེ་ཚོགས་པའི་རྗེ། །པེ་དཀར་འདིར་གཤེགས་གཏོར་མ་བཞེས། །ཞིམ་དགུའི་ཆང་ཕུད་རྒྱ་མཚོར་བསྐྱིལ། །བདའ་དགུའི་ཟས་ཀྱི་རི་རབ་བརྩིགས། །མཁོ་དགུའི་གསེར་གྱི་རི་བོས་བསྐོར། །ཡོད་དགུའི་འཇིག་རྟེན་ཁམས་སུ་འབུལ། །ལི་ཡུལ་ལྕང་ར་སྨུག་པོར་ཁྱོད། །བྷ་ཏ་ཧོར་གྱི་དགྲ་ལྷར་བཀུར། །དེ་ནས་བྲག་དམར་ཟན་གཡང་དུ། །ཆོས་སྐྱོང་ཆེན་པོར་མངའ་ཡང་གསོལ། གཙུག་ལག་ཁང་རྣམས་ཁྱོད་ལ་གཏད། །ཆོས་མཛད་ཡོངས་ཀྱི་འབངས་སུ་བྱས། །བསྟན་པ་སྤེལ་བའི་ཕོ་ཉར་མངགས། །དམ་ཉམས་སྒྲོལ་བའི་གཤན་པར་བསྐོས། །རྣལ་འབྱོར་དཔོན་སློབ་ཐམས་ཅད་དང་། །སྦྱིན་པའི་བདག་པོའི་རེ་བ་སྐོངས། །བསམ་པ་བསྒྲུབ་ལ་བཅོལ་བ་མཛོད། །བར་གཅོད་དགྲ་བགེགས་སྟེང་དུ་ཟློག། ཅེས་བརྗོད་ཅིང་གཙྪས་གཤེགས་པར་བྱའོ། །དེ་ལྟར་གཞི་བདག་གསུམ་གྱི་ཆོ་ག་ཡང་པདྨ་དཀར་པོས་སྦྱར་བའོ།། །། ཆོས་སྐྱོང་དགྱེས་པ་སྐྱེད་པའི་མཆོད་སྤྲིན་བཞུགས་སོ།།སློབ་དཔོན་པདྨ་འབྱུང་གནས་ལ་ཕྱག་འཚལ་ལོ།། ཀྱཻ། ཀ་དག་དབྱིངས་ནས་སྐུ་བསྐྱོད་ནས། །དུར་ཁྲོད་མ་མོའི་ཚོགས་རྗེ་མཛད། །དཀར་པོ་ལྷ་ཡི་དམག་དྲངས་ནས། །གྲོང་ཁྱེར་སུམ་བརྩེགས་ཐལ་བར་བཏགས། །ཁ་ཤ་ལི་ཡི་རྒྱལ་ཁམས་བྱོན། །སྐུ་ལྔ་ཆོ་འཕྲུལ་དཔག་མེད་བསྟན། །བྷ་ཏ་ཧོར་གྱི་དགྲ་ལྷར་ཞུས། །ལྕང་ར་སྨུག་པོའི་སྒོམ་གྲྭར་མཆོད། །ག་ལའང་མཐུ་རྩལ་འདོན་གཟིགས་ནས། །མི་རྗེ་སྲོང་ལྡེ་བཙན་གྱིས། །སྤྲུལ་པའི་དམག་གིས་ཟན་གཡང་བཀུག །བོད་ཁམས་གནམ་ས་ཁྱོད་ལ་གཏད། །ང་རྒྱལ་དྲེགས་པ་ཁྱོད་ཀྱི་འཕྲུལ། །རྒྱལ་སྲས་པདྨས་ཟིལ་མནན་ཏེ། །གཞན་ལ་གནོད་འགྱུར་གདུག་རྩུབ་བཀག །ཆོས་སྐྱོང་རྒྱལ་པོར་དབང་བསྐུར་ནས། །ཅ་ཅོས་སྲིད་པ་བསྒུལ་ནུས་པའི། །གནོད་སྦྱིན་ཆེན་པོ་རྩེ་མ་ར། །སྣ་ཚོགས་ལས་མཁན་བློན་པོར་བསྐོས། །ལྷ་སྲིན་ཐམས་ཅད་འབངས་སུ་བཞག །ཆ་བྱད་ཅིར་ཡང་བརྫུས་ནས་སུ། །དམ་པའི་གཙུག་ལག་ཁང་སྐྱོང་ཞིང་། །བཙུན་པ་བསྲུང་སླད་རྗེས་འབྲངས་ནས། །དད་པས་འབོད་ཀྱིས་འདིར་གཤེགས་ཤིག །ཧཱུྃ ཇ་འདི་ཡོངས་འདུའི་དཔག་བསམ་དབང་། །དགྱེས་དགུ་མཆོད་པར་འོང་འདོད་ནས། །དྲི་ལེན་དང་འགྲོགས་ཟིལ་དངར་བཅུད། ཁྱོད་མདུན་དང་པོའི་ཕོ་ཉར་བརྫངས། །ཉ་གང་ཟླ་བའི་དཀྱིལ་འཁོར་ནས། །གསར་དུ་འཛག་པའི་བདུད་རྩི་བཞིན། །རྩ་བརྒྱད་སྟོང་སྦྱར་ཆང་གི་ཕུད། །གསེར་ཕྱེས་ཁེབས་པ་སྐྱེམས་སུ་འབུལ། ཏ་ལེར་དགྲ་སྙིང་ནས་འོང་དང་། །ལིང་ག་འབྱུང་བ་ཆེན་པོའི་རྩི། །ཁྲག་མཚོ་རྦ་རླབས་འཁྲུགས་པའི་རྔམས། །འཇིགས་པའི་ལྦུ་འཕྲེང་འཛིན་པ་བཤམས། །ཐ་དད་མདོག་གི་རྣམ་བཀྲ་བའི། །མེ་ཏོག་སྤོས་ཀྱི་དུད་པ་དང་། །མར་མེའི་བླ་རེ་ཇི་སྙེད་པ། །ལོགས་ལ་འོད་མཛེས་དྲ་བ་རྩོམ། །ད་ལྟ་ཚངས་པས་དག་བྱེད་ཆུ། །ག་པུར་ཉག་མ་འཐོར་བ་གང་། །འཆི་མེད་རི་བོ་ནས་ཕབ་སྟེ། །ཁྱེད་ཐུགས་བསིལ་བྱེད་རྐྱེན་དུ་སྦྱར། །ན་བ་གསོ་ཞིང་འཆི་བ་སློང་། །ཆད་པ་སྦྱོར་བ་ལྷ་ཡི་བཤོས། །འདོད་ཡོན་ལྔ་ལྡན་རི་རབ་ནི། །དཀར་དམར་ཉི་ཟླའི་རྣ་ཆ་གཡོ། །པ་ཏྲ་མེ་ཏོག་སྤྲིན་རིས་དང་། །ཅིར་ཡང་སྣང་བའི་ཟ་འོག་དང་། །རིན་ཆེན་འདོད་དགུའི་ཆར་ཅི་ཡང་། །ཀུན་བཟང་མཆོད་པའི་སྤྲིན་ལས་ཕབ། །ཕ་རོལ་སྲོག་གི་གཤེད་མ་གྲི། །མདུང་དང་དགྲ་སྟ་མདའ་བོ་ཆེ། །རྣོ་བའི་མཚོན་ཆ་ཞུགས་ཀྱི་རིགས། །ཅི་དགའ་དབྱར་དུས་སྤྲིན་བཞིན་བསྙེར། །བ་ལང་ཐལ་དཀར་མཆེ་བ་དྲུག །འགྱིང་བའི་སྟབས་ཀྱིས་འགྲོ་རྣམས་དང་། །རྨ་བྱའི་མགྲིན་ལྟར་འཚེར་བའི་རྟ། །སྤྲིན་གྱི་ཤུགས་ལྡན་ཀུན་གྱིས་མཆོད། །མ་རུངས་དུག་གི་མཆེ་བ་ཅན། །སེང་གེ་སྟག་གཟིགས་ཅེ་སྤྱང་དང་། །གནམ་ལྕགས་མཆུ་སྡེར་འབར་བའི་བྱ། །མཁའ་ལ་ལྡིང་ཞིང་གཞུངས་རྣམས་འབུལ། །ཧཱུྃ ཙ་ཀོ་ར་ནི་ནགས་ནང་ན། །ཟླ་འོད་བདུད་རྩི་འཐུང་བར་འདོད། །དེ་བཞིན་བདག་ཀྱང་ཁྱོད་མཐུ་ལས། །བསམ་པ་བསྒྲུབ་ལ་བསྒུག་ཅིང་སྡོད། །ཚ་བའི་མེ་ལྟར་ཁྲོས་པའི་སྤྱན། །དམར་པོ་དགྲ་ལ་གཟིགས་མཛད་ན། །དེ་ཡུལ་ཁང་ནོར་ལུས་དང་སྲོག །ཐ་མའི་དུས་བཞིན་རྗེས་མེད་སྲེག །ཛཿཞེས་འབོད་པ་བྱེ་བ་སྙེད། །མོད་ལ་གསན་ནས་མདུན་ཉིལ་བས། །སྤྲུལ་པའི་ཆོ་འཕྲུལ་མི་བཟད་པའི། །ངོ་མཚར་ཤེས་ནས་བདག་གིས་བསྟོད། །ཝ་ལེར་བསམས་པའི་སྐད་ཅིག་རེར། །ཁྱོད་སྐུས་ཞིང་ཁམས་ཀུན་བཀང་ནས། །རྒྱལ་བ་མཉེས་པའི་མཆོད་སྤྲིན་འགོད། །སེམས་དཔའ་ཆེན་པོར་དེ་ཡིས་ངེས། །ཧཱུྃ ཞྭ་ནི་ཐིབ་ཞུ་དོམ་སླག་གསོལ། །ཞགས་པ་སྤུ་གྲི་ཕྱག་ན་འཛིན། །མོན་བུས་སྣ་ཁྲིད་གླང་ཆེན་བཅིབས། །ཐོག་སེར་གློག་འགྱེད་བརྒྱ་བྱིན་ལགས། །ཟ་བྱེད་ཤཱནྟི་རོ་གཟན་ཡུམ། །དགེ་བསྙེན་ཤེལ་འཕྲེང་སྤྲུལ་པར་སྟོན། །སྲོག་བདག་བཀའ་ཡི་བྱ་ར་བ། །གཡར་དམ་སྐངས་སོ་འཕྲིན་ལས་སྒྲུབས། །འ་ཞྭ་ཡུལ་གྱི་བེར་ཞྭ་གྱོན། །རྡོ་རྗེ་གསོར་ཞིང་གསེག་ཤང་ཐོགས། །སྟག་གཟིག་དོམ་དྲེད་རོལ་དུ་འདུར། །མདོག་ནག་སེང་ཞོན་པུ་ཏྲ་ཆེ། །ཡ་མ་རོ་ལངས་མ་དང་རོལ། །དགེ་སློང་དགྲ་བཅོམ་སྤྲུལ་པར་སྟོན། །གཤན་པ་བྱ་ཁྲིད་བཀའ་སྡོད་དེ། །གཡར་དམ་སྐོངས་སོ་འཕྲིན་ལས་སྒྲུབས། །རཀྵའི་གཡང་གཞི་སྟག་ཤམ་གྱོན། །སྦྲུལ་རྒྱན་དགྲ་སྟ་ཞགས་པ་ཁྱེར། །ནག་པོ་ཁྱུང་མགོ་གཡུ་འབྲུག་ཁྲིད། །སྤྲ་སྤྲེ་སྤྲོ་བའི་ཤིང་བྱ་ཅན། །ལ་ལར་གསེར་གྱི་སྤུ་གྲིས་འཁྱུད། །སྔོ་སྐྱ་འབར་བ་སྤྲུལ་པར་སྟོན། །མཐིང་ནག་རྡོ་རྗེ་ལེགས་པ་བློན། །གཡར་དམ་སྐོངས་སོ་འཕྲིན་ལས་སྒྲུབས། །ཤ་གོས་བེར་ནག་སྨྱུག་ཞུ་ཅན། །སྦ་མཁར་ཙན་དན་བེང་ཆེན་བསྒྲེང་། །སྤྱང་ཀི་ཁྲས་བསྐོར་དྲེའུ་ཞོན། །དམར་པོ་དགྲ་ལྷ་སྐྱེས་གཅིག་པུ། །ས་ལ་པདྨ་སྐྱེས་དང་དགྱེས། །མཐིང་ནག་རལ་བརྫེས་སྤྲུལ་པར་སྟོན། །རྡོ་རྗེ་གྲགས་ལྡན་ཁ་ལོ་པ། །གཡར་དམ་སྐོངས་སོ་འཕྲིན་ལས་སྒྲུབས། །ཧ་རི་ལ་ཞོན་ཞལ་གསུམ་པ། །ཕྱག་དྲུག་མཚོན་བསྣམས་ཐོད་སྟེང་ཞྭ། །དར་དཀར་ཞིང་ལྤགས་སྟག་ཆས་ཅན། །ཚུབ་མ་ཁྲིད་པ་པེ་དཀར་ཏེ། །ཨ་ཕྱི་བདུད་གཟའ་སྨིན་དཀར་ཡུམ། །ནག་པོ་ལྤགས་གྱོན་སྤྲུལ་པར་སྟོན། །བློན་པོ་པུ་ཏྲ་ནག་པོ་སྟེ། །གཡར་དམ་སྐོངས་སོ་འཕྲིན་ལས་སྒྲུབས། །འཕྲིན་ལས་མཛད་པའི་རུ་འདྲེན་དང་། །དུས་གསུམ་གདུག་པའི་ལྷ་མ་སྲིན། །དེ་དག་ཀུན་ཀྱང་མཆོད་ལགས་ཀྱིས། །དགོས་པའི་དོན་འདིར་མྱུར་དུ་སྒྲུབས།། ཞེས་པ་ཡི་གེའི་ཕྱི་མོ་ཤླཽ་ཀ་དང་པོར་བྱས་ནས། ཆོས་སྐྱོང་འཁོར་བཅས་མཆོད་པའི་ཆོ་ག་འདི་ཡང་། དཔལ་འབྲུག་པ་པདྨ་དཀར་པོས། ཟན་ཡངས་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་དང་། ཉེ་བའི་ཕོ་བྲང་དུ་སྦྱར་བའོ།། །། འཇིག་རྟེན་ཀླུ་དབང་གཙུག་ན་ནོར་བུའི་མཆོག །བསམ་པའི་རེ་བ་ཐམས་ཅད་སྐོང་མཛད་པ། །མཚུངས་མེད་བླ་མ་མཆོག་གསུམ་ཡི་དམ་ལྷ། །ཆོས་སྐྱོང་རྗེ་བློན་འཁོར་བཅས་འདིར་གཤེགས་ཤིག །ཕུན་ཚོགས་བསོད་ནམས་སྟོབས་ལས་གྲུབ་པའི་བཅུད། །རྒྱ་ཇ་དྲི་བཟང་མདོག་མཛེས་རོ་བརྒྱ་པ། །མོས་བློས་མཁའ་ཁྱབ་བདུད་རྩིའི་མཚོར་དམིགས་ནས། །མཆོད་དོ་གྲུབ་པ་བརྒྱད་ཀྱི་དངོས་གྲུབ་སྩོལ། །རྩ་ཚོགས་དྷཱུ་ཏཱིར་དག་པའི་བདེ་སྐྱོང་མར། །ནཱ་དའི་སྔགས་རྒྱས་ཕུང་ཁམས་སྐྱེ་མཆེད་ཆོས། །དྭངས་མའི་ཁམས་བཞུ་ཟག་མེད་བདུད་རྩིར་འབུལ། །མཆོག་གི་གོ་འཕང་ཐོབ་པའི་དགེ་ལེགས་སྩོལ། །སྒྱུ་འཕྲུལ་སྣང་བས་མཛེས་པའི་སྟོང་ཉིད་ལ། །མི་འགྱུར་སྙིང་རྗེའི་གང་བ་ཆགས་པའི་རོ། །ཟུང་འཇུག་ཡེ་ཤེས་བདུད་རྩིའི་ལོངས་སྤྱོད་ཀྱིས། །མཆོད་བྱ་མཆོད་བྱེད་མཉམ་པ་ཉིད་དུ་མཆོད།། ཆོས་སྐྱོང་ཆེན་པོའི་བཀས་བསྐུལ་ནས་བཙུན་པ་པདྨ་དཀར་པོས་སྦྱར་བའོ།། །། དུར་ཁྲོད་བདག་མོ་སྒྲུབ་པར་འདོད་པས། ཧཱུྃ ཀུན་བཟང་དགའ་བ་བསྐྱེད་པའི་ཡུམ། །ཁྲོས་མ་ནག་མོའི་རྫུ་འཕྲུལ་མཐུ། །ལས་ཀྱི་མ་མོར་ཤར་བ་གང་། །མཚན་དུ་འདྲེ་མོ་ངན་ནེ་མ། །དུར་ཁྲོད་ཀུན་གྱི་བདག་མོ་སྟེ། །རྡོ་རྗེའི་ཕོ་ཉ་སྣ་ཡོན་མ། །ཆོས་འཁོར་སྐྱོང་བའི་གཞི་བ་སྟེ། །དགེ་འདུན་འདུ་བའི་དཀོར་གཉེར་མ། །བར་ཆད་བཟློག་པའི་མཐུ་མོ་ཆེ། །འཕྲིན་ལས་སྒྲུབ་པའི་ཤུགས་རྩལ་ཅན། །སྡེ་བརྒྱད་འཁོལ་བའི་དབང་ཕྱུག་མ། །འཁོར་བཅས་གནས་འདིར་གཤེགས་སུ་གསོལ། །ཨོ་ཨ་ར་ལི་ཊ་མ་ཡ་ཛཿཛཿཧཱུྃ་བཾ་ཧོཿ དང་པོར་རྒྱལ་བ་སྲས་བཅས་ཀྱིས། །དབང་བསྐུར་དུས་ཀྱི་དམ་ཚིག་སྒྲོན། །བར་དུ་བརྒྱུད་པ་བཞི་ལྡན་གྱི། །བླ་མས་བཀའ་ལ་བཏགས་པ་དགོངས། །ཐ་མར་ངེད་ཅག་རྣལ་འབྱོར་པས། །མཆོད་བསྟོད་བསྐུལ་བའི་འཕྲིན་ལས་མཛོད། །ཨོཾ་མཧཱ་པདྨ་ཧུ་རུ་ཧུ་རུ་ཀྲོ་དྷ་ནི་ཧུར། ཀྱཻ། མི་ཤ་ཁྲག་གི་དྲི་ཚོར་ཚེ། །རྐན་རྡེབ་བཟོད་པའི་གླགས་མེད་མ། །གསར་དུ་བསད་པའི་ཁྲག་གི་མཚོ། །ལྦུ་བའི་འཕྲེང་བ་འཆང་བ་འབུལ། །དོན་ལྔ་སྣོད་དྲུག་ཤ་དང་རུས། །ཚིལ་བུ་མདངས་བཀྲག་དབུགས་སྲོག་ཟས། །དབང་པོ་ལྔ་པོ་བརྗིད་པའི་བརྒྱན། །པགས་རློན་ན་བཟའ་རྐང་གི་གླིང་། །ཡིད་འོང་དཀོར་ནོར་གསེར་སྐྱེམས་དང་། །གཡུ་སྐྱེམས་ཡ་ལད་མཚོན་ཆ་དང་། །གཞོན་པ་མདོས་གླུད་ཡས་བཏགས་དང་། །དམར་ཆེན་གཏོར་མ་འབུལ་གྱིས་བཞེས། །ཨོཾ་ར་ལི་ཊ་མ་ཡ་ཛ་ས་པ་རི་ཝ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཧཱུྃ ཡབ་ནི་འོད་ཟེར་འོད་པོ་ཆེ། །གཟའ་བདུད་ཀུན་གྱི་རྒྱལ་པོ་སྟེ། །དགྲ་བོ་འཕོག་འགྱེལ་མོད་ལ་གསོད། །ཡུམ་ནི་ལྷ་ས་བ་མོ་ལྕམ། །ཀླུ་མོ་ཀུན་གྱི་བདག་མོ་ཡིན། །ཉམས་པ་མཛེ་ཤུ་ཞ་བར་བྱེད། །མིང་པོ་གནོད་སྦྱིན་བསེ་མདུང་དམར། །བདུད་ནག་ཟོ་ར་ར་སྐྱེས་དང་། །གཤན་པ་ར་མགོ་མི་སྲེང་དམར། །ཕོ་རྒྱུད་ཀུན་གྱི་སྡེ་དཔོན་ཏེ། །གདུག་པ་འཆིང་གཟེར་མྱོ་འབོག་གཏོང་། །ལྷ་མོ་ངན་ནེ་ཀླུ་མོ་བདུད། །མཆེད་ཟླ་ལགས་ཏེ་མ་མོའི་དཔོན། །ནད་རིགས་བཞི་བརྒྱ་རྩ་བཞི་འགྱེད། །ཆུང་བ་ཁྱོད་ཉིད་ཉི་མའི་མདོག །རྩ་ཞལ་ཁྲོ་ལ་སྤྱན་གསུམ་དམར། །སྟེང་མ་བྱ་ནག་སྐྱུང་ཀའི་མདོག །མཐོང་ན་བྲེད་ལ་ཕྲད་ན་འཇིགས། །གནོད་ན་བླུ་བའི་ཐབས་གཞན་མེད། །ནལ་བུའི་རྒྱལ་མཚན་མེ་ལོང་དང་། །རེས་འགའ་མ་ངེས་ཅི་ཡང་འཛིན། །རལ་གུ་ཞིང་ཆེན་སྒྲོ་ཐུལ་གྱོན། །གར་འོངས་མེ་རླུང་དུ་བར་འཚུབས། །འུར་འུར་ཆེམ་ཆེམ་ས་གཞི་གཡོ། །རི་བོ་བསྙིལ་ཞིང་སྐར་མདའ་ལྟུང་། །གནམ་ལྕགས་སེར་བ་ཅི་ཡང་འབབ། །ཅེ་སྤྱང་གཏུམ་པོ་ངུར་སྒྲ་འབྱིན། །བྱ་གཅན་ཀླད་ལ་ལྡིང་ཞིང་འབྲང་། །ལྷ་སྲིན་སྡེ་བརྒྱད་ཕོ་ཉར་འགྱེད། །དེ་རིང་བསྐུལ་ལོ་དམ་ཚིག་ཅན། །བཅོལ་བའི་འཕྲིན་ལས་ཐམས་ཅད་སྒྲུབས། །དོ་ནུབ་རྦད་དོ་གདུག་པ་ཅན། །གནོད་པའི་བསམ་སྦྱོར་བྱེད་ཀུན་སྒྲོལ།། པདྨ་དཀར་པོས་སྦྱར་བའོ།། ཧཱུྃ མཐོ་བ་སྲིད་པའི་ཡས་སྟེང་གི །རྩུབ་འགྱུར་ཚལ་དུ་རུ་མཚོན་ཅན། །དཀར་པོ་ལྷ་ཡི་དབང་ཕྱུག་གི །དམག་དཔོན་ཆེན་པོ་གཤེགས་སུ་གསོལ། །ཧཱུྃ དམའ་བ་ས་འོག་རིམ་པ་དགུའི། །གྲོང་ཁྱེར་མཆོག་ན་སྲོག་བདག་དམར། །ཆོས་ཀྱི་རྒྱལ་པོ་གཤིན་རྗེ་ཡི། །ལས་མཁན་ཆེན་པོ་གཤེགས་སུ་གསོལ། །ཧཱུྃ བར་གྱི་བདུད་ཡུལ་ཁ་རག་གླིང་། །གདོང་དམར་ཡུལ་ནས་ཨབ་བསེ་རྒྱལ། །ཞང་ཞུང་བོན་གྱི་སྐྱོང་བ་ཆེ། །དགྲ་ལྷའི་རྒྱལ་པོ་གཤེགས་སུ་གསོལ། །ཧཱུྃ ལྷག་པ་མོན་ཁམས་ཐིངས་པོ་ཡི། །བདེ་ཆེན་གནས་ནས་བཙན་རྒོད་བརྒྱད། །རིག་འཛིན་བླ་མའི་བཀའ་ཉན་མཆོག །ཇག་པ་མེ་ལེན་གཤེགས་སུ་གསོལ།། མཆོད་པ། ཧཱུྃ བསད་པའི་དམར་ཆོལ་ལྦུ་གསར་ཅན། །དགྲ་བོའི་སྙིང་རྩ་ནས་བབས་དང་། །སྣ་ཚོགས་འབྲུ་ཡི་ཛ་གད་ནི། །གསེར་ག་གཡུ་གས་བརྒྱན་ཏེ་འབུལ། །ཧཱུྃ དགྲ་མགོ་བྲེགས་པའི་འཕྲེང་བ་གཏིབས། །ཤ་དྲི་གསར་པའི་ན་བུན་འཐུལ། །རྒྱལ་བའི་རུ་མཚོན་སྣང་བ་སྦར། །དཔའ་བའི་འབྲུག་སྒྲ་ལྡིར་བ་འབུལ། །ཧཱུྃ ཡི་གར་འོང་བ་བསྒྲུབ་པའི་རྒྱན། །སྡང་བ་དགྲ་བོ་འཇོམས་པའི་ཆས། །མནའ་འོས་འཁྱིལ་གྱི་གནངས་ཆེན་ནོར། །ཕྱུགས་ཀྱི་འགྲོ་བ་ཀུན་ཀྱང་འབུལ། །ཧཱུྃ རྟ་དམར་གླང་དམར་ར་དག་གི །ཤ་ནི་ངར་བཅས་བ་ལིང་ཏ། །སྙིང་དང་ནང་ཁྲོལ་སྣ་ཚོགས་ཀྱིས། །རྒྱལ་མཚོ་ཆེན་པོར་བྱས་པ་འབུལ།། བསྟོད་པ་ནི། ཧཱུྃ གདུག་པ་ཁྱོད་ཀྱི་གཟུགས་ཀྱི་བྱིན། །མ་རུངས་ཇག་པའི་ཚ་ངད་ཀྱིས། །བར་ཆད་བགེགས་ཀྱི་ཕྱེ་མ་ལེབ། །ཐམས་ཅད་གཞོབ་ཀྱང་མེད་པར་སྲེག །ཧཱུྃ གཟིར་བའི་སྤྱན་གྱིས་མ་ནོན་བགེགས། །ཁྲོས་པའི་ཞལ་གྱི་མཆེ་བའི་རྩེར། །མེ་ལེན་དམ་ཚིག་ཉམས་པའི་སྲོག །འཇིག་རྟེན་ཁམས་ན་ཅང་མེད་དོ། །ཧཱུྃ རྡོ་རྗེའི་རྨོག་ཞུ་ཁྲབ་ཆེན་ཕུབ། །མདུང་དམར་ཞགས་བཟུང་མདོ་དྲུག་ཆས། །ཞུད་ཅན་རྟར་ཞོན་དཔའ་སྐྱེན་གདོང་། །སུས་ཀྱང་ཚུགས་པར་མི་ནུས་སོ། །ཧཱུྃ སྲིན་བྱ་ཁུས་འདེབས་འཕར་ཁྱི་ངར། །བཙན་དམག་ཅོ་སྒྲས་ཁོལ་བ་རྣམས། །མེ་རུ་འབར་ཞིང་རླུང་དུ་འཚུབས། །དགྲ་བོའི་སྲོག་ལ་དུག་ཏུ་འགྱུར།། བསྐུལ་ནི། ཧཱུྃ སྲིད་གསུམ་འཇོམས་པའི་ཇག་པ་ནི། །ཞེ་སྡང་མེ་ལྟར་འབར་བ་རྣམས། །དགྲ་བོའི་སྲོག་རྩ་ལེན་ལ་སོང་། །སྲོག་དང་དབུགས་ལ་རྔམ་ཟས་ཀྱིས། །ཧཱུྃ མི་སྡུག་གཟུགས་དགུའི་རྫུ་འཕྲུལ་ཇག །དགྲ་དང་བགེགས་ཀྱི་སྟེང་དུ་སྒྱུར། །མི་སྙན་ངག་གི་དམོད་པའི་མེ། །ལེན་མཁན་དགྲ་འདི་ཡིན་པས་སྒྱུར། །ཧཱུྃ ལྷ་སྲིན་དྲེགས་པའི་ཇག་དཔོན་ཁྱོད། །ཐུབ་པའི་ལྷ་འདྲེ་གར་ཡང་མེད། །མི་བོ་ཟས་སྐལ་ཡིན་པའི་ཕྱིར། །དགྲ་བོས་མེ་འདྲ་སྲོག་ལེན་མཛོད། །ཧཱུྃ ཇག་དམར་རལ་གུ་བརྡབས་ནས་ཁྱོད་རྦད་དོ། །དམ་བསྐུལ་མེ་དཔུང་སྦར་ནས་ཁྱོད་རྦད་དོ། །ལེན་རྩའི་རྩ་བ་བཤད་ནས་ཁྱོད་རྦད་དོ། །དགྲ་བོ་ཚར་གཅོད་ལས་འདི་མྱུར་དུ་སྒྲུབས།། དམ་ཅན་ཇག་པ་མེ་ལེན་ཞེས། །གྲུབ་པའི་བཀའ་ཉན་དེ་མཆོད་པའི། །ཆོ་ག་ཧཱུྃ་སྒྲ་བཅུ་དྲུག་པ། །པདྨ་དཀར་པོ་བདག་གིས་སྦྱར།། །། གདན་ས་ར་ལུང་གི་གཞིའི་བདག་པོའི་གསོལ་ཁ་བཞུགས། །དཔལ་ངག་དབང་ཆོས་ཀྱི་རྒྱལ་པོ་ལ་ཕྱག་འཚལ་ལོ། །ཤིན་ཏུ་གཙང་བའི་བཤོས་བུ་ཇི་ལྟར་དགྱེས་པ་བཤམས་ནས། སི་ལ་སོགས་པའི་སྤོས་བསྲེགས་ཏེ། འདི་སྐད་གྱེར་པར་བྱའོ།། །། ཧཱུྃ འཛམ་གླིང་བྱང་ཕྱོགས་གདོང་དམར་ཅན་གྱི་ཡུལ། །བཀྲ་ཤིས་གཡང་ཆགས་དབུས་གཙང་གཉིས་ཀྱི་མདུད། །གྲུབ་པའི་མཆོད་སྡོང་དཔལ་ལྡན་ར་ལུང་ཐིལ། །ལེགས་པར་སྐྱོང་ཞིང་མི་མཐུན་ལས་བསྲུང་བ། །དཔལ་བརྗིད་ལྷུན་ཆགས་གངས་རིའི་ལྷུན་པོ་ནས། །དཔལ་གྱི་དབང་ཕྱུག་ཀུན་ལ་དབང་བསྒྱུར་བ། །སྲིད་པའི་ལྷ་ཆེན་གནོད་སྦྱིན་དབང་པོ་ནི། །གང་བ་བཟང་པོ་འཁོར་བཅས་གནས་འདིར་སྤྱོན། །གྲུབ་པའི་རི་བོ་སྤོས་ངད་ལྡན་པ་ནས། །ཕུན་ཚོགས་འབྱོར་པ་མང་པོས་ཀུན་ཕྱུག་པ། །སྟོབས་ལྡན་དགེ་བསྙེན་བཙན་རྒོད་ཆེན་པོ་ནི། །མི་སྔོན་རྟ་སྔོན་འཁོར་བཅས་གནས་འདིར་སྤྱོན། །འཇིགས་ཤིང་རྔམ་པའི་ལུང་པ་སྒོ་མོ་ནས། །དགྲ་བགེགས་ཀུན་གྱི་གཤེད་མ་མཐུ་རྩལ་ཅན། །དྲེགས་པའི་མི་བསྲུན་ཡོངས་ཀྱི་རྗེ་བོ་ནི། །གཟའ་བདུད་མིང་སྲིང་འཁོར་བཅས་གནས་འདིར་སྤྱོན། །གཞན་ཡང་གཙུག་ལག་ཁང་དང་ཡུལ་འཁོར་དང་། །ས་དང་རི་བོ་ཀུན་ལ་གནས་པ་ཡི། །ལྷ་སྲིན་སྡེ་བརྒྱད་དྲེགས་པའི་ཚོགས་ཐམས་ཅད། །རང་རང་འཁོར་དང་བཅས་པ་གནས་འདིར་སྤྱོན།། ཏིང་ངེ་འཛིན་དང་ཕྱག་རྒྱས། ཨོཾ་བཛྭ་ཨངྐུ་ཤ་ཛཿགཞིའི་བདག་པོ་མ་ལུས་པ་འཁོར་བཅས་ཁྲ་ཕུང་གིས་བྱོན་པར་བསམ། བསངས་ཤིང་ཅི་ཚོགས་པ་སྦར་ཏེ། འདི་སྐད་གྱེར་བར་བྱའོ།། ཧཱུྃ ཧ་རི་ཙན་དན་ཕུང་པོ་སྤྲིན་ལྟར་ཕུབ། །ཨ་ཀར་ནག་པོའི་དོག་པའི་ར་བས་བསྐོར། །སི་ན་ཁཱི་སྦྱར་བའི་ཀ་བ་སྒྲེང་། །དུ་རུ་ཀ་ཡི་འཕྲེང་བས་བརྒྱན་པའི་ཁང་། །ལོ་མ་ལྗང་སྣུམ་རྒྱས་པའི་ལྗོན་པ་དང་། །མེ་ཏོག་བསུང་ཞིམ་སྡོང་པོ་ངད་བཟང་བ། །རྩ་བ་དྲི་མཆོག་ལྡན་རྣམས་ཁོར་ཡུག་ཏུ། །བསྐོར་བས་གཙང་མའི་མེ་ལྕེས་ལེགས་སྦར་བའི། །སྔོ་བསངས་དུད་སྤྲིན་གཞོན་ནུས་ནམ་མཁའ་ཡང་། །ཁེབས་པར་བྱས་ཤིང་སྤོས་ངད་ཀུན་ཁྱབ་པས། །བསངས་སོ་བསངས་སོ་གཞི་ཡི་བདག་པོ་རྣམས། །སྦྱིན་བདག་ནད་དང་གྲིབ་ལས་ཐར་བར་མཛོད།། དེ་ནས་དངོས་འབྱོར་ཡིད་ཀྱིས་སྤྲུལ་པའི་རྫས་ཇི་སྙེད་འབུལ་བར་བྱ་སྟེ། ཐོག་མར་གཙང་མའི་ཆང་ཕུད་འབྲུ་དང་སྦྱར་བ་རིན་པོ་ཆེའི་སྣོད་ཀྱིས་གཏོར་ཞིང་འདི་སྐད་དོ།། ཧཱུྃ མཐོང་བས་ཡིད་འཕྲོག་ཁ་དོག་བཟང་པོ་ལྡན། །ཚོར་བས་སྐོམ་སེལ་དྲི་ངད་ཞིམ་པོ་ལྡན། །མྱངས་ན་ལུས་སེམས་ཚིམ་བྱེད་ཛ་གད་ཕུད། །གཙང་མའི་འབྲུ་དང་སྦྱར་བ་འདིས་མཆོད་དོ། །མཛེས་སྡུག་དྲི་བཟང་ཡིད་འོང་ལྷ་རྫས་སུ། །བྱིན་གྱིས་བརླབས་པ་མེ་ཏོག་བདུག་པའི་སྤོས། །སྣང་གསལ་དྲི་ཆབ་རོ་བརྒྱ་ལྡན་པའི་ཟས། །དཀར་གསུམ་མངར་གསུམ་སྒྲ་སྙན་དཀོར་ཆ་དབྱིག །འདོད་དགུའི་ཚོགས་རྣམས་གཙང་མ་ལ་དགྱེས་པའི། །དགེ་བསྙེན་ལྷ་ཀླུ་སྨན་སོགས་དགྱེས་པར་རོལ། །དགྲ་བོའི་སྣ་ལྔ་མེ་ཏོག་གསུར་ཆེན་སྤོས། །སྣང་གསལ་མར་མེ་ཁྲག་སྣའི་ཡོན་ཆབ་དང་། །སྙིང་སྣའི་ཞལ་ཟས་རྐང་གླིང་དྲག་པོའི་རྫས། །མ་ཚང་མེད་པར་ཏིང་འཛིན་གྱིས་སྤྲུལ་པར། །གདུག་པའི་སྡེ་བརྒྱད་ཐམས་ཅད་དགྱེས་པར་རོལ།། གཏོར་མ་ཐམས་ཅད་སྭ་བྷཱ་ཝས་སྟོང་པར་སྦྱངས། ལག་པ་གཡས་པ་རྡོ་རྗེ་རྩེ་ལྔ་པའི་ཕྱག་རྒྱ་སྙིང་གར་བཟུང་། གཡོན་མཆོག་སྦྱིན་རྡེབ་པ་ལྟར་བྱས་ལ། ཨོཾ་ན་མ་སརྦ་ཏ་ཐཱ་ག་ཏ། ཨ་ཝ་ལོ་ཀི་ཏེ། ཨོཾ་སམྦྷ་ར་སམྦྷ་ར་ཧཱུྃ། ལན་གསུམ་གྱིས་གཏོར་རྫས་རང་རང་གི་ཡིད་དང་མཐུན་པས་ནམ་མཁའ་གང་བར་བསམས་ནས། དེ་བཞིན་གཤེགས་པ་བཞིའི་མཚན་བརྗོད་ནས། གནོད་སྦྱིན་གྱི་སྡེ་དཔོན་གང་བ་བཟང་པོ། ནོར་བུ་བཟང་པོ། བཙན་རྒོད་དགེ་བསྙེན་ཆེན་པོ་མི་སྔོན་རྟ་སྔོན། དྲེགས་པ་ཅན་སྒོ་མོའི་གཟའ་བདུད་མིང་སྲིང་ལ་སོགས་པ་གདན་ས་རིན་པོ་ཆེ་ར་ལུང་གི་ཆབ་འོག་གནས་པའི་ལྷ་སྲིན་སྡེ་བརྒྱད་ཀྱི་རིགས་སུ་གཏོགས་པ་ལ་གཏོར་མ་རྒྱ་ཆེན་པོ་འདི་འབུལ་ལོ། །གསོལ་ལོ། །མཆོད་དོ། །བསྔོའོ། །འདྲེན་ནོ། །སྦྱིན་ནོ། །ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། སོ་སོའི་ཡིད་དང་མཐུན་པའི་དམ་ཚིག་གི་རྫས་ཀྱིས་ངོམས་ཤིང་ཚིམ་པར་བསམས་ལ་བསྟོད་པ་བྱ་སྟེ། ཧཱུྃ འདོད་དགུའི་ཆར་གྱིས་དབུལ་འཕོངས་ཉེར་སེལ་ཞིང་། །འཇིག་རྟེན་བཀྲ་ཤིས་བདེ་ལེགས་རྒྱས་བྱེད་པ། །གནོད་སྦྱིན་སྡེ་དཔོན་ཆེན་པོ་གང་བ་བཟང་། །སངས་རྒྱས་བསྟན་སྐྱོང་འཁོར་བཅས་བསྔགས་པར་བགྱི། །སྐྱེ་འགྲོ་ཀུན་གྱི་མགོན་སྐྱབས་ལེགས་བྱེད་ཅིང་། །ཆོས་དང་མཐུན་པའི་རྐྱེན་རྣམས་དབང་མེད་སྒྲུབ། །རྟག་ཏུ་མི་ནོར་དབང་དུ་སྡུད་པ་ཡི། །བཙན་རྒོད་ཆེན་པོ་འཁོར་བཅས་བསྔགས་པར་བགྱི། །ཉམས་པའི་སྲོག་དབུགས་སྐད་ཅིག་ཁོ་ནར་ལེན། །དམ་ཅན་ཀུན་གྱི་བསམ་པའི་རེ་བ་སྐོངས། །སྡེ་བརྒྱད་ཀུན་གྱི་རྗེ་བོ་དྲག་རྩལ་ཅན། །གཟའ་བདུད་མིང་སྲིང་འཁོར་བཅས་བསྔགས་པར་བགྱི། །མི་སྡུག་གཟུགས་འཆང་ཁྲོ་གཏུམ་རྔམ་པའི་ཚོགས། །རང་རང་དཔུང་དང་མཐུ་ཡི་རྩལ་བཏོན་ནས། །དབེན་གནས་གཉན་པོ་སྐྱོང་བའི་མི་མ་ཡིན། །ལྷ་སྲིན་འཇིགས་བྱེད་ཐམས་ཅད་བསྔགས་པར་བགྱི། །དེ་ལྟར་བསྟོད་ནས་འདོད་པའི་དོན་གསོལ་བ། །སློབ་དཔོན་ཆེན་པོ་པདྨ་ཀཱ་ར་དང་། །གྲུབ་པའི་གཙུག་རྒྱན་ཆོས་རྗེ་ཁུ་དབོན་ཞབས། །སློབ་མར་བཅས་པའི་སྤྱན་སྔར་ཁས་བླངས་བཞིན། །གདན་ས་ཆེན་པོ་དར་ཞིང་རྒྱས་པ་དང་། །ཆོས་ལྡན་སྒྲུབ་པ་པོ་ཡི་བསམ་དོན་སྒྲུབ། །ཡུལ་འཁོར་བཀྲ་ཤིས་འབྱོར་པས་གང་བར་གྱིས། །མི་མཐུན་གནོད་ཅིང་འཚེ་བ་ཚར་ཆོད་ལ། །སངས་རྒྱས་བསྟན་པ་གཉན་པོ་བསྲུང་བར་མཛོད།། བསྐུལ་བར་འདོད་ན་གཏོར་མ་ཁོ་རང་སོ་སོར་མོས་ཤིང་ཐིམ་པར་བསམ་ལ་འདི་སྐད་དོ།། ཧཱུྃ བསྟན་པ་བསྲུང་བ་ལྷ་སྲིན་དྲག་པོའི་དཔུང་། །ཁ་ཅིག་མདོག་ནག་གོ་མཚོན་ནག་པོ་ཅན། །ལྷུན་པོ་པང་དུ་བཏེག་ནས་དགྲ་ལ་འཕེན། །ལ་ལ་ཁྲག་གི་ཕུང་པོ་ལྟར་དམར་བས། །ཉམས་པའི་མགོ་བཅད་ཁྲག་འཐུང་ནང་ཁྲོལ་འཇིབ། །འགའ་ཞིག་དུས་མཐའི་སྤྲིན་བཞིན་ཆེར་གནག་པ། །གནམ་ལྕགས་མེ་དང་རྡོ་རྗེ་སེར་བ་འབེབས། །ལྗང་དང་སེར་བའི་གཟུགས་ལྡན་འཇིགས་བྱེད་དགའ། །རྐང་པ་ས་ལ་བརྡབ་པས་དབང་ཆེན་ཡང་། །རྡུལ་དུ་འཐག་ཅིང་ཉམས་པ་ཞེ་ལ་གནོན། །སྨན་བཙུན་མཛེས་མའི་གཟུགས་ཀྱིས་བློ་འཁྲིད་ཅིང་། །ཁྲམ་ཤིང་འདེབས་དང་ཤོ་རྡེ་དཀར་ནག་སྤུང་། །གསོ་སྒྲས་གནམ་ས་འདར་ཞིང་ཁོལ་བྱེད་དམག །མང་པོའི་སྡེ་དཔོན་གང་བཟང་ནོར་བུ་བཟང་། །མི་སྔོན་གཟའ་བདུད་སེང་གེ་སྟག་དང་རྟ། །ཕག་རྒོད་ཞོན་ནས་འཛམ་གླིང་མྱུལ་བ་རྣམས། །གསོན་ཅིག་སྡང་བའི་དགྲ་བོ་ཆེ་གེ་མོས། །བསྟན་པ་བཤིག་ཅིང་བླ་མའི་སྐུ་ལ་བསྡོ། །བདག་གི་དམ་པའི་ཆོས་ལ་བར་ཆད་བྱས། །དཀོན་མཆོག་དབུ་འཕངས་སྨོད་འདི་ཁྱེད་རྣམས་ཀྱིས། །བྲང་ཞོལ་ཕྲོལ་ལ་སྲོག་བརྔུབས་ཞལ་དུ་ཐོབ། །ཡུལ་མཁར་ཁྱིམ་བཤིག་ནོར་རྫས་བརླགས་པ་དང་། །བདུན་བརྒྱུད་རྩད་ནས་ཆོད་ཅིག་དམ་ཅན་ཚོགས།། ཞེས་བསྐུལ་ནས་གཏོར་མ་འཕངས་པས་དགྲ་བོ་རྨེག་མེད་བཅོམ་པར་བསམ་མོ། །དགེ་སློང་པདྨ་དཀར་པོས་སྤོས་སྐྱའི་ཡང་དབེན་དུ་སྦྱར་བའོ།། །། དུད་སོལ་མའི་གསོལ་བསྡུས། ཨ་ཡིག་རྣམ་འགྱུར་ཁང་བརྩེགས་མཛེས་པའི་མཁའ། །ཧ་ཧར་རྒོད་དབུས་ཐོད་མཁར་བརྩིགས་པའི་ཀློང་། །ས་གསུམ་གོམ་རེས་འགེངས་པའི་བོང་བུའི་སྟེང་། །ཤ་ཟ་ཆེན་མོ་དུད་སོལ་དགྲ་བགེགས་རྣམས། །ལ་འུར་རལ་གྲིས་བསད་ཁྲག་བྷཉྫྱར་འཐུངས། །རྭ་ལྟར་ཤཀྟི་གཏོད་ཅིང་རྩེ་གསུམ་འཕྱར། །ཡ་མཚན་བཅས་སུ་འདོད་དབང་ཀུན་གྱིས་བཅུག །འ་འུར་གསོད་འཆིངས་འགུགས་བྱེད་རིགས་བཞི་མ། །ཟ་བྱེད་ཕྲ་མེན་བརྒྱད་དང་སྒོ་མ་བཞི། །ཞྭ་ལྟར་ཀླད་ལྡིང་རོལ་འདུར་ཤུལ་འབྲང་རྣམས། །ཝ་ལེར་དྲན་པའི་དད་དང་དམ་ཚིག་གིས། །ཛཿཞེས་ག་ན་བཞུགས་ཀྱང་སྤྱན་འདྲེན་ནོ། །ཚ་བའི་ངད་ཀྱིས་དགྲ་བོ་ཕྱེ་མ་ལེབ། །ཙ་ར་མཛད་དུ་འདིར་གཤེགས་འཁོར་བཅས་རྣམས། །མ་ཅིག་དབང་བསྐུར་དམ་སྦྱིན་སྦྲན་པ་བདག །བ་ནི་འདོད་འཇོར་བསྔགས་པ་བཞིན་གྱིས་སྐྱོངས། །ཕ་མཐའ་མེད་པའི་ནམ་མཁའ་སྲིད་གསུམ་གྱི། །པ་ཏི་འབྱོར་པའི་སྤྲིན་གྱིས་བཀབ་པ་དང་། །ན་རག་དམྱལ་སྲུངས་མགུ་བའི་རཀྟ་དང་། །ད་དགྲ་དངོས་བྱེད་བསད་པའི་སྙིང་ཁྲག་རྦ། །ཐ་མར་སྦྱངས་རྟོགས་འབར་བཞུའི་བ་ལིཾ་ཏ། །ཏ་ན་བསྒྲལ་དང་ག་ན་སྦྱོར་བའི་ཆས། །ཉ་རྒྱས་ཟླ་ལྟར་འཇིག་རྟེན་གང་བས་མཆོད། །ཇ་ལྟར་མ་ལུས་དགའ་བ་ཁྱོད་ཀྱི་གཟུགས། །ཆ་ཤས་རེ་རེར་འགྱུར་བ་རྟེན་བཞིན་དུ། ཅ་རེ་ཆོས་ཉིད་ཀློང་ལས་མི་འདའ་བ། །ང་མེད་དོན་རྟོགས་སྤྱོད་ཡུལ་ལགས་ཞེས་བསྟོད། །ག་ནའང་ཁྱོད་བསྒོམ་སྙིང་པོ་བཟླས་པ་དང་། །ཁ་ཙམ་མིན་པར་དམ་རྫས་ཀྱིས་བསྐངས་ཞིང་། །ཀ་དག་དབྱིངས་སུ་སྡིག་ཀུན་མཐོལ་བཤགས་སོ། །གཉིས་སུ་མེད་ལས་གཉིས་སུ་བྱེ་ནས་སུ། །མཐུ་རྩལ་ཆེན་པོས་དགྲ་བགེགས་བདུད་ཀྱི་སྡེ། །རེ་རེ་ཙམ་མིན་མ་ལུས་སྐད་ཅིག་ལ། །སོད་ཅིག་ཐུལ་ཅིག་བཅོམ་ལྡན་དུད་སོལ་མ།། གཡུ་སྒྲོན་མའི། ཀྱཻ། ཁྲག་འཐུང་ཆེན་པོའི་གྲོང་ཁྱེར་ཙ་རི་ཏྲའི། །ཙིཏྟིའི་དབྱིབས་འཆང་རྡོ་བའི་ཕུག་ནང་ནས། །ཞིང་སྐྱོང་མ་མོའི་གཙོ་མོ་གཡུ་སྒྲོན་མ། །འཁོར་བཅས་དད་པས་སྤྱན་འདྲེན་གཤེགས་སུ་གསོལ། །ཀྱཻ། དམ་ཚིག་གཙང་མའི་རྒྱུ་རྐྱེན་ལས་གྲུབ་པའི། །སྨན་ཕུད་རྒྱ་ཇ་སྐོལ་དང་བ་ལིཾ་རྣམས། །ཁ་དོག་དྲི་བཟང་རོ་བརྒྱ་ལྡན་པའི་བཅུད། །འཆི་མེད་བདུད་རྩིར་བཞུ་བས་དགྱེས་པར་འཚལ། །ཀྱཻ། འཇིགས་བྱེད་ཆེན་མོའི་གཟུགས་འཆང་ཝཱ་རཱ་ཧཱི། །བཀའ་ཉན་ཆེན་མོ་ཞི་ཚེ་ལྷ་མོའི་གཟུགས། །བོད་ཁམས་བསྟན་མ་ཀུན་གྱི་རྗེ་མོ་མཛད། །ཞིང་སྐྱོང་ལྷན་ཅིག་སྐྱེས་མ་གསང་བའི་མཚན། །ལྷག་པར་ཁྲོས་པ་མགོ་དགུ་སྲིན་མོའི་བྱིན། །ལྷ་སྲིན་སྡེ་བརྒྱད་དབུས་ཀྱི་གཙོ་མོ་སྟེ། །ཟ་བྱེད་མཁའ་འགྲོ་ཞེས་པ་གསང་བའི་མཚན། །ཁྱོད་ལ་བསྟོད་ཅིང་ཕྱག་འཚལ་བདག་ཅག་གི །ཡིད་ཀྱི་རེ་བ་ཐམས་ཅད་གྲུབ་པར་མཛོད།། ཅིག་ཅར་དམར་པོའི། ཀྱཻ། ལྷོ་ཕྱོགས་ཙ་རི་ཏྲ་དང་ས་འོག་དགུའི། །ཐོད་པ་ལྕགས་ཀྱི་གྲོང་ཁྱེར་ཆེན་པོ་ནས། །ལས་ཀྱིས་གཤིན་རྗེ་འཁོར་བཅས་སྤྱན་འདྲེན་གྱིས། །དམ་ཅན་ཆོས་ཀྱི་རྒྱལ་པོ་གཤེགས་སུ་གསོལ། །ཀྱཻ། བསད་པའི་དམར་ཆོལ་ཛ་གད་ཕུད་ཀྱི་སྐོམ། །ཤ་རུས་སྙིང་གི་གཏོར་མ་ཆེན་པོ་གང་། །དགྲ་བགེགས་བླ་ཚེ་སྲོག་དབུགས་ཁ་རྗེ་དང་། །དབང་ཐང་རླུང་རྟར་བཅས་པ་ཟས་སུ་འབུལ། །ཀྱཻ། འཇིག་རྟེན་ལྷོ་ཡི་ཕྱོགས་སྐྱོང་བ། །སྡེ་བརྒྱད་ཀུན་གྱི་དམག་དཔོན་མཛད། །སྲིད་པའི་དགེ་སྡིག་ཤན་ཐང་འབྱེད། །ཆོས་ཀྱི་རྗེ་ནས་ད་ལྟའི་བར། །བསྟན་པ་བསྲུང་བའི་གཙོ་བོར་བཀུར། རྣལ་འབྱོར་ཡོངས་ཀྱི་དགྲ་ལྷ་ཆེ། །དོ་ནུབ་བདག་གིས་བསྟོད་ལགས་ཀྱིས། །བཅོལ་བའི་འཕྲིན་ལས་མཛད་དུ་གསོལ། །སྲཱིཿ རྡོ་རྗེ་བཙུན་མོའི་སྙིང་རྗེའི་པདྨའི་སྦུབས། །བརྡོལ་དེར་བཅུ་དྲུག་ལང་ཚོའི་གཡུ་སྒྲོན་མ། །མཛེས་སྡུག་ཡིད་རིས་རྫོགས་པས་མཚར་དེ་མིག །ཀུན་ལ་རྔམ་བརྗིད་འོས་པའི་བདུད་རྩིར་འཁྲུངས། །དེ་ཚེ་ཆགས་བྲལ་འཁོར་ལོའི་མགོན་པོ་ཡང་། །དེ་ཡི་ཕྱོགས་ལྷུང་ངེས་ནས་ཙ་རི་ཏྲའི། །ཌཱ་ཀ྄ི་མ་རྣམས་གཙུག་གི་ནོར་བུའི་ཆུས། །ཞབས་མཐིལ་བཀྲུ་ལ་ཧབ་བཤར་བྱེད་པ་དེའི། །མཐིང་སྔོན་སྐྲ་ཡི་ཟུར་ཕུད་རི་བོའི་རྩེར། །འཛེགས་པ་ནོར་བུའི་བྱིན་ལ་ཉི་མ་ཡིས། །ཤར་གྱི་ཐོར་ཅོག་འཆར་ཀའི་འོད་ཟེར་གྱིས། །པ་ཏྲས་བཅིངས་པ་སྟོང་གི་འོལ་ཕྱིར་མིན། །ཚངས་སྐུད་རྩེ་ཕྲན་རིན་ཆེན་ལྔའི་རང་བཞིན། །སྙན་གོང་ཨུཏྤལ་དར་དཔྱངས་དང་བཅས་བཟོ། །འདྲེན་བྱེད་རྣམས་འཆིང་བསོད་ནམས་ལས་རང་གར། །གྲུབ་པས་བི་ཤྭའི་འདུ་བྱེད་བྱིས་པའི་རྩལ། །རབ་དཀར་བཞིན་གྱི་ཤངས་རྒྱུད་རི་བོའི་འདབ། །སེམས་འཆིངས་མིག་ཟུར་བསྐྱོད་པའི་བསིར་བུ་དེས། །སྨིན་མའི་འཁྲི་ཤིང་གར་གྱིས་རོལ་བ་དང་། །རེག་བྱས་ཆགས་ལྡན་གདོང་ལ་རྒྱ་སྐྱེགས་བྱུགས། །སླར་ཡང་མཁུར་ཚོས་དཀར་དམར་མདངས་བཀྲག་པོས། །ཁོར་ཡུག་སྣང་བས་མཛེས་པ་བརྒྱ་བྱིན་གཞུར། །བགྱིས་ལ་འགྲན་འདོད་མཆུ་ཡི་པདྨའི་འཛུམ། །སོ་ཡི་གེ་སར་བྱེ་དེས་མུན་པའང་བཅོམ། །འགྲམ་པར་འོད་ཀྱི་རྦ་རླབས་ཆེར་སྤྲོ་བའི། །རྣ་ཆ་དེ་གཉིས་ཉི་ཟླར་རབ་འཁྲུལ་ནས། །གོ་ལ་རྒྱུ་སྐར་ཕྲ་ཚོམས་ཅན་དེ་ཡང་། །མགུལ་གྱི་ཕྱོགས་དེར་ལྷུན་པོ་ལ་བཞིན་འཁོར། ལྷ་རྫས་དར་དཀར་ཡུག་དེའི་ལྷུབ་གོན་དང་། །ལྷན་ཅིག་གཡུ་ཡི་དོ་ཤལ་འཛིན་པ་གང་། །སྤྲིན་གྱི་གོས་ཅན་སྔོ་བསངས་ཁྱོད་ལ་སེམས། །ཤོར་བའི་གྱུ་ཡིན་སྲིད་པའི་ཁོང་པ་མནོ། །སྐེད་པའི་འཁྲི་ཞིང་ཧ་ཅང་ཕྲ་བས་ན། །ནུ་འབུར་འབྲས་རྒྱས་གཡུར་ཟ་མི་ཐེག་ཅེས། །འཛམ་བུའི་གསེར་སྐེད་དྲ་བ་ཅན་འདར་ནས། །སྨད་དུ་ཟ་འོག་དིང་ཕོན་འཇའ་ཚོན་བྲན། །གདུ་བུའི་སིལ་སྙན་འཁྲོལ་བ་འཇམ་པའི་ཕྱག །གྲགས་པའི་རྔ་བོ་དལ་བུར་བསྐུལ་བ་དེས། །དྲི་ཟའི་དགའ་མ་རྣམས་ལ་རྒྱུད་མངས་ཀྱི། །སྙན་ཆ་ཤོར་བར་གྱུར་སྙམ་སེམས་ལས་སྐྱེས། །བརླ་རྒྱས་མཁྲང་བར་ཕྱེད་ཀྱི་སྐྱིལ་མོ་ཀྲུང་། །བཅས་ནས་འགྱིང་བའི་བག་དེ་མེ་ན་ཀ །རྩེད་འཇོས་དྲན་བསླང་འདོད་པ་སྤྱད་པའི་ཆེད། །འདུག་བསམ་ལྷ་ཡི་དབང་པོ་འཁྱུད་ལ་ཁད། །གནས་གསུམ་པདྨོའི་ཚལ་གྱི་ངང་མོའི་གཙོ། །ལྷན་ཅིག་སྐྱེས་མར་གྲགས་པའི་ཡོན་ཏན་གྱི། །དར་ཟབ་སྙན་ཚིག་མེ་ཏོག་གིས་བརྒྱན་ནས། །བསྟོད་པའི་ལྡ་ལྡིར་བྱས་ལྷག་སྤྱན་གཟིགས་ཅི། །ཀུན་རྟོག་རྐང་འཐུང་ཡལ་འདབ་མ་ལུས་པ། སོ་སོ་རང་རིག་ཞུགས་སུ་ཞེན་པའི་རྟགས། སྟོང་ཉིད་མཁའ་ལ་འཁྱུད་པའི་དུད་པའི་སྤྲིན། །གཉིས་སྣང་སངས་འདི་སྒྱུ་འཕྲུལ་བདུག་པའི་སྤོས། །ཡོན་པོའི་ལམ་བཀག་གཏུམ་མོས་སྦར་བ་ལས། །བསིལ་བའི་འོད་དཀར་བྱེ་བ་འཛག་པའི་གཟི། །འཕོ་མེད་མཁའ་ལ་བཅུག་པའི་སྣང་བྱེད་རྫུ། །སྙིགས་མའི་ཁམས་རྣམས་འཁྲུད་པའི་ཆབ་ཏུའང་སྤྲུལ། །སྲིད་གསུམ་སྒྱུ་མ་ཙམ་གྱི་ཁ་ཟས་ལ། །མགྲོན་གཉེར་ནཱ་དའི་རོལ་མོས་བསྐུལ་བའི་རྗེས། །ཆོས་ཕུང་བརྒྱད་ཁྲི་བཞི་སྟོང་འདོད་ཡོན་ལ། །སྐད་རྣམས་ཀུན་གྱིས་རོལ་པའི་བརྡ་ཡང་སྤྲད། །དུང་ཅན་གཡུང་མོ་སྦྱར་བའི་བདེ་སྐྱོང་དུ། །ཉི་ཟླའི་བདུད་རྩི་ཡེ་ཤེས་སྒྲ་གཅན་གྱིས། །བཟུང་ནས་དྷཱུ་ཏཱིའི་འདབ་མའི་རྩེར་སྤེལ་བའི། །ཚོགས་འདི་མ་མོ་དགྱེས་པའི་དཔྱིད་ཅིས་མིན། །རྩ་འཁོར་ལྟོ་འཕྱེའི་བདག་པོ་བགྲང་ཡས་ཀྱི། །གདེངས་ཀས་དྲངས་པ་འོད་ལྔ་ནོར་བུའི་དཔྱས། །གཙུག་ཏོར་བང་མཛོད་གང་མཐུས་དངོས་ནོར་རྣམས། །ཆོས་ཉིད་རང་ཁྱིམ་བསྡུ་འདི་ཁྱོད་ཀྱི་ཁང་། །རྩེ་གཅིག་རྭ་ཅོས་རྟོག་དགྲའི་སྙིང་ཕུག་ཅིང་། །འཁྲུལ་པས་ནགས་མིན་ཆོས་ཀྱི་དབྱིངས་གང་དུ། །དཔའ་བར་འཇུག་ལ་རྡོ་རྗེའི་ཤུགས་ལྡན་པའི། །སྤྲིན་དུམ་ཆད་འདྲ་ཏིང་འཛིན་གཡག་རྒོད་སྡེ། །ཟུང་འཇུག་ལུས་གྲིམས་གཞན་དོན་རྔོག་མ་ནི། །སྤྲུགས་ཀྱང་མི་གཡོ་གནམ་མཁའི་གདངས་གང་ལ། །བསྙེངས་པའི་རྡུལ་མེད་ཅང་ཤེས་མཆོག་གི་ཁྱུ། །མྱང་འདས་ནོར་འཛིན་གཞི་ལ་འཁྱམས་རྣམས་དང་། །ཕུང་ཁམས་སྐྱེ་མཆེད་ཅི་དགའི་གཏོར་མང་གི །རྣམ་པར་བསྒྱུར་ཡང་མཁའ་ཁྱབ་མཁའ་ཡི་རོ། །ངོ་བོ་མི་གཏོང་གཅིག་ཏུ་བསྡོམས་བྱས་པའི། །བདུད་རྩིའི་ཉིང་ཁུས་ཐུགས་དམ་སྐོང་གྱུར་ཅིག །བསྐངས་ནས་འཁོར་བར་བསླུ་བའི་བག་ལ་ཞ། །དུག་གསུམ་གཡུལ་ངོར་བཅས་ལས་རྒྱལ་བའི་སར། །ཚེ་འདིས་ཕོ་ཉ་ལྟ་བུར་བགྲོད་པའི་རྟེན། །གཞན་ན་མ་མཆིས་ཁྱོད་ཉིད་ཁོ་ནར་རག། བཅོམ་ལྡན་འདས་མ་ལྷན་ཅིག་སྐྱེས་མའི་བསྐང་བ་པདྨ་དཀར་པོས་སྦྱར་བའོ།། །། ཧཱུྃ འཇིགས་བྱེད་ཆེ་རྣམས་ལྷག་པར་ཁྲོས་པའི་ཤུགས། །སྲིད་གསུམ་སྲོག་གི་ཟས་ཅན་གཤིན་རྗེ་ཡི། །ཕོ་ཉའི་གཙུག་དེར་བཀའ་བཏགས་མི་མགོའི་འཕྲེང་། །འཆིང་བར་སྤྲུལ་པ་ཅིག་ཅར་དམར་པོའི་སྐུ། །ཉི་མ་འཆར་ཀའི་ལང་ཚོར་ཞུགས་པའི་ཚེ། །རྒྱ་མཚོ་མ་ལུས་འཐུང་བ་རྟ་གདོང་མེ། །ཆགས་ཏེ་འཁྲིལ་བས་ཕས་ཀྱི་བྱད་མའི་མཐུ། །ཕྱེ་མ་ལེབ་བཞིན་གཞོབ་ཀྱང་མེད་པར་སྲེག །དཀར་ཞིང་དབྱིབས་ཟླུམ་མཐོ་བའི་གངས་ཅན་རི། །ཡུངས་འབྲུ་ལྟ་བུར་བསྒྱུར་བའི་མཆེ་བ་བཞིས། །བསྣུན་པའི་ཁྲག་གིས་སྦངས་བའི་སྨ་ར་ཡི། །ཚོམ་བུ་དེ་ཡང་དྲེགས་པ་རྣམས་ལ་ངོམ། །སྤྱན་གཉིས་བསྐྱོད་པས་ཉི་མ་ཟླ་བའི་བྱིན། །མ་ལུས་ཕྲོགས་ནས་སྨིན་མ་འཁྱོག་པའི་ཕུག །ངལ་བསོ་རྟེན་དེར་གསེར་གྱི་རི་བོ་རྣམས། །པ་ཏྲའི་ཟོལ་གྱིས་སྟེང་ནས་འགེབས་པར་རྩོམ། །ཁྲོ་གཉེར་གྱིས་བཅིངས་ཤངས་ཀྱི་བུ་ག་ནས། །ལྷུན་པོ་ཐལ་བར་འཐོར་བའི་རླུང་སྤྲོས་ཏེ། །རྒོལ་བའི་ཚོགས་རྣམས་ཤིང་གི་ལོ་མ་བཞིན། །རྒྱ་མཚོའི་ཕ་རོལ་བསྐྲད་ཀྱང་བསྙེངས་མ་མཆིས། །བདུད་དང་དགྲ་བོ་བསྒྲལ་བའི་རྒྱུ་མའི་འཕྲེང་། །ཁྲག་གིས་བཀང་ཏེ་རལ་པར་བྱས་ནས་སུ། །སྤྲུགས་པའི་ཁྲོད་དེར་གདུག་པའི་སྦྲུལ་མང་གི །ཁ་རླངས་དུད་ལས་ཕྱོགས་བཅུར་མུན་པ་སྦྱིན། །ཏ་ཧུན་ཟ་འོག་བེར་གྱིས་བསྒྲིབས་བྱས་ཀྱང་། །དབྱིག་གི་རྣ་ཤལ་མགུལ་རྒྱན་གདུ་བུའི་གཟི། །བལྟ་བར་མི་བཟོད་ལྷག་པར་ལྟོ་འགྲོའི་རྒྱན། །སྒྲ་གཅན་འདུད་པར་བྱས་པ་ལྟ་བུས་འཇིགས། ཕྱག་གཉིས་ལྕགས་གཞུ་བདུངས་ནས་མི་བཟད་མདའ། །འཕངས་ཚེ་གནམ་ལྕགས་བྱེ་བ་བབས་སོ་ཞེས། །ཉམས་པ་ཡུལ་འཁོར་བརླག་པའི་ཆོ་ངེས་སྒྲ། །འབུམ་ཕྲག་འབྲུག་སྒྲ་ཅིག་ཅར་ལྡིར་ཞིང་གྲགས། །རྨིག་པའི་འདེགས་འཇོག་རེ་ལ་གླིང་བཞིའི་མཐའ། །གནོན་པའི་ཆུ་གླང་དམར་པོ་ལ་བཅིབས་ནས། །སྲིད་གསུམ་མྱུལ་བའི་མགྱོགས་པའི་ཁྱད་པར་ལ། །དུས་མཐའི་རླུང་ཤུགས་དེ་ཡང་དག་པ་སྟེར། །རྣོ་བས་དགུང་དབྲལ་རུ་དར་གྱིས་བཀབ་ནས། །མཚོན་ཆས་དྲུབས་པའི་གནམ་སའི་ཚོགས་བུ་པ། །གཤིན་རྗེ་གཤམ་པ་སྟོང་དང་དྲུག་བརྒྱ་སོགས། །སྡེ་བརྒྱད་འཁོར་ཚོགས་བསྟོད་པས་ཐུགས་དམ་བསྐང་། །འབྲུ་ཡི་ཆང་གི་ཆུ་ཀླུང་སྟོང་འབབ་ཅིང་། །སྦྱར་བའི་རོ་ཡི་གཏེར་གྱུར་དྲི་མདངས་ཀྱི། །རྦ་ཀློང་ཅི་ཡང་འཁྲུག་པའི་གསེར་གྱི་སྐྱེམས། །རྒྱ་མཚོ་ཆེན་པོའི་ཕུད་ཀྱིས་ཐུགས་དམ་བསྐང་། །དག་བྱེད་བསངས་ཀྱི་དུད་སྤྲིན་འཐིབས་པའི་རུམ། །ལེ་བརྒན་དར་འཕྱར་བསྐྱོད་པའི་གློག་འགྱུར་ཞིང་། །རྔ་སིལ་དུང་དབྱངས་དབྱར་སྐྱེས་སྒྲ་ལྡན་པའི། །མཆོད་བསྟོད་མི་ཟད་ཆར་གྱིས་ཐུགས་དམ་བསྐང་། །སྣ་ཚོགས་དར་དཔྱངས་མདའ་རྣོན་ལྷབ་ལྷུབ་ཀྱི། །ལྡ་ལྡིར་བྱས་པ་ནམ་མཁའི་དུར་ཁྲོད་རྣམས། །དབང་པོའི་མཚོན་ཆ་བསད་བའི་རོ་ཚོགས་ཀྱིས། །གང་བ་བྱས་པ་ལྟ་བུས་ཐུགས་དམ་བསྐང་། །བསད་པའི་ཁྲག་གིས་གཤེར་བའི་དགྲ་བོའི་སྙིང་། །དོན་དང་ནང་ཁྲོལ་སྦྲེང་བ་གསར་པའི་དྲིར། །ལས་བྱེད་ཕོ་ཉའི་མཁའ་ལྡིང་མ་ལུས་པ། །རྔམ་རྔམ་ཐིབ་ཐིབ་བགྱིད་པས་ཐུགས་དམ་བསྐང་། །མ་རུངས་སྲིན་པོའི་ཐོད་པ་ཡ་ཚལ་ནང་། །བསད་པའི་ཁྲག་ལ་སྦྲུས་པའི་བཤོས་བུ་འདི། །ལྷ་ཆེན་བསྒྲལ་བའི་སྙིང་དང་དྲི་རོ་ནུས། །མཚུངས་པར་བྱིན་གྱིས་བརླབས་པས་ཐུགས་དམ་བསྐང་། །སྦྱངས་རྟོགས་འབར་བས་སྒྲོན་མ་ལྔ་ཡི་གནམ། །ཞུ་བར་དོགས་ནས་ཡེ་ཤེས་ཟླ་ཉི་ཡིས། །ནུས་པའི་བདུད་རྩི་དེ་ལ་བསྟིམ་བྱས་པའི། །ཚོགས་ཀྱི་མཆོད་པ་ཆེན་པོས་ཐུགས་དམ་བསྐང་། །རྭ་དང་རྨིག་པ་སྔོ་བསངས་མིག་དམར་ཞིང་། །ཁམ་པའི་སྤུ་སྟུག་རི་ལྟར་བརྗིད་པའི་གཡག །གླང་དམར་སྨྱོན་པ་སྤྲིན་གྱི་ཤུགས་ལྡན་རྟ། །སྟོབས་ཀྱི་ངར་སྐད་འབྱིན་པས་ཐུགས་དམ་བསྐང་། །མི་ཡི་ཚིལ་ཞག་གིས་བགོས་མདའ་དང་མདུང་། །རྣོ་བའི་རལ་གྲི་དགྲ་སྟ་ཐོ་བ་དང་། །བེ་ཅོན་འཁོར་ལོ་ལ་སོགས་འཆི་བདག་གི །མཆེ་བ་སྒྲིགས་པ་འདྲ་བས་ཐུགས་དམ་བསྐང་། །རྒོད་ཐུལ་དར་ཚོན་གྱིས་སྤུད་རིན་ཆེན་རྨོག །སྲ་མཁྲེགས་ནོར་བུའི་ཁྲབ་དང་རྔ་མ་ཡིས། །དབང་པོའི་གཞུ་རིས་འདྲར་བགྱིས་ཕུབ་ཆེན་དང་། །པིར་ཕུབ་ཡ་ལད་ཀུན་གྱིས་ཐུགས་དམ་བསྐང་། །མཐུན་པའི་དམ་ཚིག་གཙང་ཞིང་ཆད་བཞིན་དུ། །བསྒྲུབས་པའི་ཡུས་ལྡན་ཚུལ་དུ་བསྙེན་པ་ལ། །མི་གཡེལ་ཉམས་ཆག་མེད་པའི་ལྷག་བསམ་གྱིས། །རལ་པ་ཚར་དགུ་ཁྱོད་ཐུགས་སྐོངས་གྱུར་ཅིག །ལུས་སྲོག་འབེན་དུ་བཙུགས་ནས་བདག་ཅག་ལ། །བསྡོ་བའི་དགྲ་བོའི་སྲོག་དབུགས་བཞེས་མཛོད་ལ། །ཡུལ་མཁར་ཁྱིམ་ཡང་མིང་ཙམ་ལྷག་མ་རུ། །བཞག་པའི་འཕྲིན་ལས་འཚལ་ལོ་མ་གཡེལ་ཅིག། ཅིག་ཅར་དམར་པོའི་བསྐང་བ་པདྨ་དཀར་པོས་སྦྱར་བའོ།། །། ཧཱུྃ སྨུག་ནག་བྷྱོ་ལས་རྡོ་རྗེ་རབ་བརྟན་མ། །ཁྲོ་གཏུམ་སྒེག་ལ་འབར་བའི་རལ་གྲི་འཕྱར། །དམར་ཆེན་ཐོད་པར་འཐུང་ཞིང་ནེའུ་ལེ་བསྣམས། །སྐད་ཅིག་དྲེའུ་ཞོན་ནས་འཛམ་གླིང་མྱུལ། །ཀླུ་དར་བདུད་ཀྱི་བཀའ་ཉན་མ་མོའི་ཚོགས། །མཐུན་པའི་རྫས་ལ་སྤྱན་འདྲེན་འདིར་གཤེགས་ཤིག །ཨོཾ་ལས་ཐོད་པ་འབར་བ་སྟོང་གསུམ་ཙམ། །ཨཱཿལས་དགྲ་བོའི་དོན་ལྔ་སྣོད་དང་ཁྲག །ཧཱུྃ་ལས་འཆི་མེད་བདུད་རྩི་ལྔར་སྦྱངས་པ། །ལྷ་མོ་འཁོར་བཅས་ཞལ་དུ་ཁ་རཾ་ཁའི། །ཁྱོད་ཐུགས་དགྱེས་པ་སྐྱེད་པའི་མཆོད་པའི་སྤྲིན། །རེ་རེའང་འདོད་པའི་ཡོན་ཏན་ལྔ་ཚང་བ། །རབ་འབྱམས་ནམ་མཁའ་ཁྱབ་པར་བློས་སྤྲུལ་ནས། །ཐུགས་དམ་གཉན་པོ་བསྐང་ངོ་དམ་ཅན་ལ། །སྲིད་པ་གསུམ་ན་དབང་མོ་ཆེ། །དགྲ་བགེགས་སྒྲོལ་བའི་མཐུ་མོ་ཆེ། །བསྟན་པ་བསྲུང་བའི་རྩལ་མོ་ཆེ། །བསམ་པ་སྒྲུབ་པའི་སྟོབས་མོ་ཆེ། །བདག་དང་སྦྱིན་པའི་བདག་པོ་ཡི། །གནོད་པའི་རྐྱེན་ངན་བཟློག་ཏུ་གསོལ།། གད་སེར་གྱི་སྒྲུབ་པ་བ་རྣམས་ཀྱི་ཁ་ཏོན་དུ་སྦྱར་བའོ།། །། དགེ་བསྙེན་ཇོ་དམག་མཆོད་པའི་ཆོ་ག་བཞུགས། དཔལ་འབྲུག་པ་ཡབ་སྲས་ལ་ཕྱག་འཚལ་ལོ། །ཇོ་བོ་དམག་དཔོན་ནམ་རོང་ལྷ་རྒྱལ་མཚན་མཆོད་པར་འདོད་པས། དགྱེས་པའི་མཆོད་རྫས་དམར་གྱི་གཏོར་མ། མཁོ་དགུའི་སྤྱན་གཟིགས་ཇི་སྙེད་པ་བཀྲམ་སྟེ། སྙན་པའི་དབྱངས་ཀྱིས་འདི་སྐད་གྱེར་བར་བྱའོ།། ཧཱུྃ བདུད་དང་སྲིན་པོ་གནོད་སྦྱིན་དང་། །འཇིགས་བྱེད་མ་མོ་ལ་སོགས་པ། །མ་རུངས་སྡེ་བརྒྱད་འདུ་བའི་གླིང་། །ལྕགས་མཁར་རྩེ་དགུའི་ཕོ་བྲང་ནས། །འཇིགས་སུ་རུང་བའི་དྲེགས་པ་ཅན། །སངས་རྒྱས་བསྟན་བསྲུང་ཁྱེད་འབོད་དོ། །ཚུར་གཤེགས་བཀའ་ཡི་ཕོ་ཉ་ཆེ། །ཇོ་བོ་དམག་དཔོན་འདིར་སྤྱོན་ཅིག །ས་མ་ཡ་ཛཿཛཿ ཧཱུྃ ཕྱོགས་རྣམས་བསུང་ཞིམ་ངད་པས་རྣམ་འགེངས་པའི། །སྤོས་དང་འཁན་ཤུག་ཤིང་སྣ་ཇི་སྙེད་པའི། །དུང་སྤྲིན་ཡིད་འོང་མཁའ་ལ་འཁྲིགས་པ་འདིས། །དམག་དཔོན་ཆེན་པོ་འཁོར་དང་བཅས་པ་བསངས། །མཐོང་ཚད་སེམས་འཆོར་ཚོར་ཚད་ཡིད་སིམ་ཞིང་། །མྱངས་ཚད་ངོམས་པ་མེད་པའི་དགའ་སྟོན་མཆོག །ལྷ་ཡི་བདུད་རྩིའི་རྒྱ་མཚོར་བྱིན་བརླབས་པའི། །གསེར་སྐྱེམས་ཛ་གད་ཕུད་ཀྱི་མཆོད་པ་འབུལ། །ཡིད་ལྟར་མགྱོགས་པའི་རྟ་ནག་རྟིང་དཀར་དང་། །རྔམ་པའི་གཡག་རོག་ལུག་ནག་སྤྱི་དཀར་དང་། །ཁྱི་ནག་དོམ་བུ་སྙིང་དཀར་ལ་སོགས་པ། །གནམ་ལ་འཕུར་དང་ས་ལ་འཛུལ་དགུས་མཆོད། །རིན་ཐང་ཅན་གྱི་རིན་ཆེན་རི་བོར་སྤུངས། །དཔའ་བརྗིད་རྣོ་བའི་གོ་མཚོན་མདུན་དུ་བདར། །དར་ཟབ་ཡིད་འོང་སྤྲིན་བཞིན་མཁའ་ལ་འཁྲིགས། །དགྱེས་པའི་མཆོད་རྫས་ཐམས་ཅད་ཁྱོད་ལ་འབུལ། །བསད་ཤ་དོན་སྙིང་ནང་ཁྲོལ་ཇི་སྙེད་དང་། །མཆོད་རྫས་མི་རྐང་གླིང་བུའི་སྒྲ་སྙན་དང་། །གསུམ་གྱི་དྲི་དང་ཁྲག་གི་རྒྱ་མཚོ་དང་། །དམར་ཆེན་གཏོར་མས་མཆོད་དོ་ལས་འདི་སྒྲུབ།། གཏོར་མ་སྔགས་དྲུག་ཕྱག་རྒྱ་དྲུག་གིས་བསྔོས་ལ། ལྷ་མ་སྲིན་དྲེགས་པའི་སྡེ་དཔོན། མཐུ་དང་རྩལ་གྱི་མངའ་བདག དགྲ་དང་བགེགས་ཀྱི་གཤེད་མ། ཇོ་བོ་དམག་དཔོན་འཁོར་དང་བཅས་པ་ལ། མཆོད་སྦྱིན་གྱི་གཏོར་མ་འདི་འབུལ་ལོ། །གསོལ་ལོ། །མཆོད་དོ། །དགྱེས་རབ་ཀྱི་མཆོག མཉེས་རབ་ཀྱི་ཕུལ་དུ་ཕྱིན་པར་གྱུར་ཅིག དེ་ནས་བསྟོད་པར་བྱ་སྟེ། ཧཱུྃ མི་བཟད་གློག་གི་འོད་ཀྱིས་རབ་བརྗིད་པའི། ཆར་སྤྲིན་ནག་པོའི་མདོག་མཚུངས་གདངས་བའི་ཞལ། །གངས་རི་ལྟ་བུའི་མཚེ་གཙིགས་ལྗགས་འདྲིལ་ཞིང་། །ཉིན་བྱེད་འོད་སྟོང་འཁྲུགས་འདྲ་ཁྲོས་པའི་སྤྱན། །དུ་བའི་ཀློང་ལྟར་དབུ་སྐྲ་གྱེན་དུ་འཁྱིལ། །སྙན་དང་ཕྱག་ཞབས་སྦྲུལ་གྱི་འཕྲེང་བས་མཛེས། །རྡོ་རྗེ་སྲིན་པོ་ཁྲོས་པའི་གཟུགས་འཛིན་པའི། །ཕྱག་གཡས་མདུང་དམར་བ་དན་མཁའ་ལ་འཕྱར། །གཡོན་པ་དམར་གྱི་གཏོར་མ་ཐུགས་ཀར་བཟུང་། །དར་ནག་བེར་ཆེན་བརྩེགས་མ་སྐུ་ལ་གསོལ། །ཁྲག་འཛག་མི་མགོའི་དོ་ཤལ་མགུལ་དུ་བཅངས། །སྟག་རལ་གཡས་དང་གཟིག་ཤུབས་གཡོན་ན་བཏགས། །རླུང་ལྟར་མགྱོགས་པའི་རྟ་ནག་རྟིང་དཀར་བཅིབས། །སྟོང་གསུམ་སྐད་ཅིག་རེ་རེས་མྱུལ་མཛད་ཁྱོད། །ཡིད་འོང་ལྷ་དམག་འབུམ་ནི་ཕོ་ཉར་འགྱེད། །མ་རུངས་བདུད་ནག་འབུམ་སྡེ་བྲན་དུ་འཁོལ། །ཁྲག་འཐུང་མ་མོ་འབུམ་དང་རྟག་པར་རྩེ། །མི་བསྲུན་གཤན་པ་བྱེ་བ་ལས་ལ་འགྱེད། །སངས་རྒྱས་བསྟན་པ་བསྲུང་བའི་དགེ་བསྙེན་ཁྱོད། །འཁོར་དང་བཅས་པ་བཅོལ་བའི་ལས་འདི་སྒྲུབ།། འཕྲིན་ལས་ཀྱི་བྱ་བ་ཇི་ལྟར་བསྒྲུབ་དགོས་པ་བྱུང་ན་བསྐུལ་འདི་བྱའོ།། དང་པོར་སློབ་དཔོན་གཉན་གྱི་བཀའ། །བར་དུ་ཆོས་མཛད་དམ་པའི་གསུང་། །ཐ་མར་རྣལ་འབྱོར་བདག་གི་ཚིག །ཇི་སྲིད་སྒྲུབ་པར་མ་ཆད་དམ། །ད་ལྟ་རྣལ་འབྱོར་བརྗེད་བསྐུལ་གྱིས། །ལྷ་སྲིན་དྲེགས་པའི་དཔུང་སྐྱོད་ལ། །གནམ་ལྕགས་ཐོག་དང་སེར་བ་ཕོབ། །ཡུལ་འཁོར་ལོ་ཏོག་རླག་པར་གྱིས། །གདུག་པའི་དགྲ་བོ་འདི་ཞེས་པའི། །བླ་ཚེ་སྲོག་དབུགས་ཞལ་དུ་ཐོབ། །ཤ་ཁྲག་སྡེ་བརྒྱད་ཡོངས་ལ་ཁྱེ། །རྦད་པའི་དུས་འདིར་མཐུ་མ་ཆུང་། །མངགས་པའི་དུས་འདིར་ལས་མ་འགྱངས། །བསྒོ་བའི་དུས་འདིར་བཀའ་མ་བཅག །ཞག་དང་ཟ་མའི་ལོང་མེད་པས། །ད་ལྟ་ཉིད་དུ་རྟགས་ཕྱུང་ཞིག། ཅེས་བཅོལ་བས་གང་བཅོལ་སྒྲུབ་པར་ངེས་སོ། །ཁོ་བོའི་དགེ་བསྙེན་དམ་ཚིགས་ལྡན་པ་དེའི། །མཆོད་སྤྲིན་ཉུང་ངུར་བསྡུས་པ་འདི་ན་ཡོད། །བཀའ་འབངས་རྣམས་ལ་ལས་བྱེད་དགོས་སྲིད་ན། །རིམས་ནས་མཆོད་དང་དགོས་འདོད་འགྲུབ་ངེས་ཡིན། །པདྨ་དཀར་པོས་སྦྱར་བའོ།། །། རྗེ་བཙུན་སྒྲོལ་མ་ལ་ཕྱག་འཚལ་ལོ།། ཀྱཻ། མདུན་དུ་རིན་ཆེན་སྐྱེད་མོས་ཚལ། །ནོར་བུའི་མེ་ཏོག་མདངས་བཀྲ་བར། །གཡུ་ཡི་བུང་བ་ལྡིང་ཞིང་འབབ། །ཙན་དན་སྤོས་ཀྱི་ནགས་གསེབ་ན། །མཛེས་པའི་བྱ་ཚོགས་སྐད་སྙན་བསྒྱུར། །བདུད་རྩི་ཆུ་ཡི་ཀླུང་ངོགས་ན། །ཡིད་འོང་རི་དྭགས་བག་ཕེབས་རྩེ། །པདྨོས་ཁྱབ་པ་དབབ་པའི་མཚོར། །ཆུ་བྱ་གཞོན་ནུ་མགྲིན་རྔ་འཁྲོལ། གསེར་གྱི་བྱེ་མ་བརྡལ་བའི་འགྲམ། །མཐོན་ཀའི་ནེའུ་གསིང་ཡིད་འོང་ལ། །ཕྲ་མཛེས་གཡུ་ཡི་གུར་ཁང་ཕུབ། །གསེར་ཁྲི་ཟླ་ཤེལ་འབོལ་གདན་དང་། །ལྷ་རྫས་ཡོལ་བ་བླ་རེ་བྲེས། །དེ་ན་སྲིད་པའི་སྨན་ཆེན་མོ། །རྡོ་རྗེ་ཀུན་བཟང་ཀུན་གྲགས་མ། །ཡ་མ་སྐྱོང་དང་བགེགས་ཀྱི་གཙོ། །སྤྱན་གཅིག་ཀླུ་མོ་དཔལ་གྱི་ཡུམ། །གྲགས་མོ་རྒྱལ་དང་བོད་ཁམས་སྐྱོང་། །སྨན་གཅིག་ཟུ་ལེ་གཡར་མོ་བསིལ། སྒེག་ཅིང་འགྱིང་བག་ལྡན་པར་བཞུགས། །དིང་ཕོན་རལ་གུ་ལྷབ་ལྷུབ་གྱོན། །མཛེས་པའི་རྒྱན་ཆ་སིལ་སིལ་བཏགས། །འབུམ་ཕྲག་འཁོར་གྱིས་མདུན་དུ་བདར། །ཀྱཻ། ཕྱི་ལྟར་བརྟན་མ་བཅུ་གཉིས་ཏེ། །གནམ་གྱི་མོ་བཙུན་སྨན་མོ་འཕྲུལ། །གནས་ནི་བོད་ཁམས་ཁ་བའི་ཡུལ། །མུ་སྟེགས་བཟློག་ཅིང་དམ་ཆོས་སྐྱོང་། །ནང་ལྟར་འཕགས་མ་སྒྲོལ་མའི་རྫུ། །སྤྱན་རས་གཟིགས་ཀྱི་འབངས་མོ་མཛད། །འདུག་པའི་ཕོ་བྲང་གཡུ་ལོ་བཀོད། །སེམས་ཅན་འདུལ་ཞིང་རྒྱལ་བ་མཆོད། །གསང་བར་དེ་ཉིད་མཁའ་འགྲོ་མ། །རྡོ་རྗེ་ཕག་མོའི་རིགས་ལས་བྱུང་། །ཧེ་རུ་ཀ་དང་གཉིས་མེད་འཁྱུད། །གསང་བ་སྔགས་ཀྱི་དཀྱིལ་འཁོར་བཞུགས། །དེ་རིང་ཁྱེད་རྣམས་སྤྱན་འདྲེན་པའི། །ཚིག་སྙན་དབྱངས་རྟ་ཀྱུ་རུ་རུ། །མོས་ཤིང་གུས་པས་ཆེར་གདུངས་པའི། །མཆི་མའི་རྒྱུན་ནི་ཤ་ར་ར། །དགྱེས་པ་སྐྱེད་པའི་དམ་ཚིག་ཏུ། །རྔ་སིལ་གླིང་བུ་ཀྱུ་རུ་རུ། །གྲིབ་སེལ་དྲི་བཟང་མི་དམན་པའི། །སྤོས་དཀར་དུད་པ་ཐུ་ལུ་ལུ། །དར་ཟབ་རྣམ་པ་ལྔ་དབྱངས་པའི། །སྒྲོ་ལྡན་གཡབ་མོའི་ལིང་སེ་ལིངས། །ཡིད་ལྟར་མགྱོགས་པའི་རྫུ་འཕྲུལ་གྱིས། །མ་ཐོགས་གནས་འདིར་གཤེགས་སུ་གསོལ། །ཀྱཻ། པོ་ཊ་ལ་ཡི་ཕོ་བྲང་དུ། །འཇིག་རྟེན་མགོན་པོས་དབང་བསྐུར་ནས། །ནག་པོའི་ཕྱོགས་ཀྱི་གཤེད་མར་བསྐོས། །དཀར་པོའི་ཕྱོགས་ཀྱི་རྗེ་མོར་བསྔགས། །དེ་ནས་རྡོ་རྗེ་ཐོད་འཕྲེང་གིས། །བལ་ཡུལ་ཡང་ལེ་ཤོད་སོགས་སུ། །གནད་ལ་གཟིར་ནས་བོད་ཁམས་ཀྱི། །སངས་རྒྱས་བསྟན་པའི་གཉེར་ཁ་གཏད། །སྒྲ་བསྒྱུར་མར་པ་ཡབ་སྲས་ཀྱིས། །སྒྲུབ་པ་པོ་ཡི་ལྷ་རུ་བསྐོས། །བཀའ་རྒྱུད་བསྟན་པ་སྤེལ་བར་མངགས། །ད་ལྟ་བསྐུལ་གྱིས་དམ་མ་འདའ། །ཀྱཻ། ནས་དང་འབྲས་དང་རྒུན་ཆང་གི །གསེར་སྐྱེམས་རྦ་རླབས་མཁའ་ལ་སྙོག །ཡར་མོ་ཀླུང་གི་ལྷ་མིན་ཁྲག །གཡུ་སྐྱེམས་ལགས་ཏེ་འཚོ་བཞིན་འཁྱིལ། །པདྨ་ཨུཏྤལ་ཀུ་མུ་ཏའི། །མེ་ཏོག་གཞལ་མེད་ཁང་དུ་ཆགས། །སྤོས་དཀར་ཤིང་སྣ་ཆེར་ཚོགས་ཀྱིས། །དུད་པ་གདུགས་དང་བླ་རེར་བྲེས། །སྣང་གསལ་མར་མེའི་འོད་དམར་གྱི། །ཡོལ་བས་ཕྱོགས་རྣམས་མཛེས་པར་སྦྲེལ། །དྲི་བཟང་ཆབ་ཀྱི་བ་དན་ནི། །བར་སྣང་ཡིད་འོང་ཁྱབ་པར་བཀྲམ། །དཔག་བསམ་ཤིང་ལས་འོངས་གྱུར་པའི། །ལྷ་རྫས་བཟའ་བཏུང་མཆོད་པར་བཤམས། །འཆི་མེད་རོལ་མོ་ཡན་ལག་འབུམ། །རྔ་སིལ་གླིང་བུ་དབྱངས་ཀྱིས་བསྒྲག །པཉྩྨ་ལི་ཀའི་གོས་སོགས་དང་། །རིན་ཆེན་འདོད་དགུའི་ཆར་རྣམས་ཀྱིས། །བཅོམ་ལྡན་མ་ཀུན་མཆོད་ལགས་ཀྱིས། །བདག་གི་བསམ་པའི་རེ་བ་སྒྲུབས།། གཏོར་མ་སྭ་བྷཱ་ཝས་སྦྱངས། ཨོཾ་ལས་གཏོར་སྣོད་ཨཱཿལས་འདོད་ཡོན་ལྔ་དང་ལྡན་པའི་བདུད་རྩིའི་རང་བཞིན། ཧཱུྃ་གིས་ཟག་པ་མེད་པའི་ཡེ་ཤེས་སུ་དམིགས་ཏེ། མ་མ། ཁ་ཁ། ལེ་ལེ། ཏ་ཏ། ཏེ་ཏེ། ཨེ་ཨ། ཨོཾ་ཨ་ཀཱ་རོ་མུ་ཁཾ་ཞེས་སོགས་ཀྱིས་བསྔོས། ཀྱཻ། དཔལ་མོ་བཅུ་དྲུག་ལང་ཚོ་ཅན། །ཤིན་ཏུ་ཞི་བ་ཆུ་ཤེལ་མདོག །མཚར་སྡུག་ལྡན་ཏེ་བྲིས་པ་འདྲ། །རིན་ཆེན་དཔག་བསམ་རྒྱན་གོས་འཆང་། །ཕྱག་ན་བདུད་རྩིའི་བུམ་པ་ཐོགས། །བཞི་བརྒྱ་རྩ་བཞིའི་ནད་སེལ་མ། །འཁོར་ཡང་ཡིད་འོང་ལྷ་མོ་ལགས། །ཐུགས་དམ་བསྐངས་སོ་བསམ་དོན་སྒྲུབས། །རྒྱས་པའི་ལས་མཛད་གསེར་གྱི་འོད། །དཔའ་ཞིང་སྒེག་པ་གཏེར་གྱི་བདག །གནོད་སྦྱིན་སྲས་མོ་བརྗིད་པའི་བྱིན། །ཨུཏྤལ་འཕྲེང་བ་གོས་སེར་མནབས། །ཡིད་བཞིན་ནོར་བུ་ལག་ན་ཁྱེར། །ཚེ་དང་བསོད་ནམས་དཔལ་སྐྱེད་མ། །བྲན་གཡོག་ནོར་སྦྱིན་བུ་མོའི་སྡེ། །ཐུགས་དམ་བསྐངས་སོ་བསམ་དོན་སྒྲུབས། །དགུག་ཅིང་དབང་གི་ལས་མཛད་ཚེ། །རིན་ཆེན་བྱི་རུའི་མདོག་ཏུ་སྟོན། །ཞི་མ་ཁྲོ་ལ་སྤྱན་གསུམ་མངའ། །འགྲོ་ལ་རབ་ཆགས་སྒེག་མོའི་འགྱིང་། །འགུགས་བྱེད་ལྕགས་ཀྱུ་ཞགས་པ་བསྣམས། །ཁམས་གསུམ་སྲིད་པའི་ཡིད་བསྒུལ་མ། །འབངས་ཀྱང་ཞིང་སྐྱོང་མཁའ་འགྲོའི་ཚོགས། །ཐུགས་དམ་བསྐངས་སོ་བསམ་དོན་སྒྲུབ། །མངོན་སྤྱོད་དྲག་པོའི་ལས་མཛད་ཚེ། །མཐིང་ནག་སྲིན་མོ་ཁྲོས་པའི་གཟི། །རྡོ་རྗེའི་མཆེ་བ་རྣོན་པོ་གཙིགས། །མི་བཟད་རྔམ་པའི་ཤུགས་གླུ་ལེན། །རལ་པ་ཁམ་ནག་ས་ལ་འདྲུད། །ནུ་མ་སྨུག་ནག་ཕྲག་པར་བཀལ། །ཕྱག་སོར་བསྒྲད་ནས་མགྱོགས་པའི་བང་། །དམ་ཉམས་དགྲ་བོའི་སྟེང་དུ་རྒྱུག །བླ་ཚེ་སྲོག་དབུགས་ཞལ་དུ་འགམ། །ཤ་རྒྱུས་རུས་པ་ཆེམ་ཆེམ་ཟ། །ཁྲག་རྒྱུན་དམར་པོའི་རྦ་ལ་འཇིབ། །བསད་དབྱེ་བསྐྲད་པའི་མཐུ་རྩལ་མ། །བཀའ་སྡོད་སྡེ་དཔོན་སུམ་ཅུས་མཛད། །ཐུགས་དམ་བསྐངས་སོ་བསམ་དོན་སྒྲུབས།། བརྟན་མ་བཅུ་གཉིས་ཀྱི་གསོལ་ཁ་འདི་ཡང་དཔལ་གྱི་ཟན་ཡང་དུ་དཔལ་འབྲུག་པ་པདྨ་དཀར་པོས་སྦྱར་བའོ།། །། ཧཱུྃ དྲག་པོ་ཨེ་ཡི་གཞལ་མེད་ཁང་། །གྲུ་གསུམ་མུན་པ་ཆེན་པོའི་དཀྱིལ། །མི་བཟད་མཚོན་ཆ་འབར་བའི་ཀློང་། །སྲེགས་པའི་མེ་དུད་འཁྲུགས་པའི་ནང་། །དཔལ་མགོན་བསྐལ་བཟང་སངས་རྒྱས་ཀྱིས། །བསྟན་པ་རིས་མེད་བསྲུང་མཛད་པ། །བྱ་རོག་མིང་ཅན་ཁྲོ་བོའི་རྒྱལ། །རྡོ་རྗེ་འཇིགས་བྱེད་ནག་པོ་ཆེ། །ཡུམ་ཆེན་སྲས་དང་བཀའ་སྡོད་དང་། །ལས་མཛད་སྡེ་བརྒྱད་དྲེགས་པའི་སྡེ། །ཕྱོགས་བཅུ་འཇིག་རྟེན་སྐྱོང་བ་ཀུན། །སྙིང་རྗེས་ཁྲོས་ཤིང་གཏུམ་པའི་ཤུགས། །རང་གི་ཤ་ལ་ཟ་བ་ཙམ། །མི་བཟད་དྲག་ཤུལ་འཆང་བའི་ལུས། །མཐོང་བའི་མོད་ལ་ཁྲག་སྐྱུག་པ། །སྣ་ཚོགས་བཞིན་དང་སྐད་ཀྱི་བྱིན། །དྲེད་སྡིགས་སྡངས་པ་ཀུན་ཕུང་བ། །རཏལ་ཕོད་ལས་ལ་རྔམ་རྒོད་ལ། །སྟོང་གསུམ་མྱུལ་ཞིང་གླིང་བཞི་འཇིག །སྲིད་པ་གསུམ་པོའི་དབང་པོ་ཀུན། །རང་སྡེར་བཅས་པ་བྲན་དུ་ཁོལ། །སུས་ཀྱང་མི་ཐུབ་རྡོ་རྗེར་མཚུངས། །སྟོབས་ཀྱིས་ང་རྒྱལ་དྲེགས་པ་རྣམས། །ཐམས་ཅད་བདག་ལ་སྙན་གསོན་ཅིག །སྔོན་བྱོན་རྒྱལ་བ་ཐམས་ཅད་ལ། །བསྟན་པ་བསྲུང་བའི་ཆད་མཛད་དོ། །རྣལ་འབྱོར་སྐྱོང་བར་དམ་བཅས་སོ། །ཐུགས་དམ་གཉན་པོའི་དུས་ལ་བབ། །དོ་ནུབ་སྡང་བའི་དགྲ་གསོད་ཅིག །དོ་ནུབ་གནོད་པའི་བགེགས་ཆོམས་ཤིག །སྡིག་ཅན་དགྲ་བོ་འདི་ཞེས་པ། །བྱམས་པའི་གཉེན་གྱིས་རྒྱང་དུ་བྲིམས། ཉམ་ཐག་ངལ་བ་ཀུན་བྱུང་བ། །དེ་དུས་སྐྱོབ་མཁན་བདག་མིན་སུ། །བདེན་པ་ཁྱད་བསད་བདག་ལ་འཚེ། གནོད་པའི་དུག་སྦལ་ཐམས་ཅད་འགྱེད། །འདི་ལ་མངོན་སྤྱོད་མི་མཛད་ན། །དམ་ཅན་སྲུངས་མས་ཅི་ཞིག་བྱ། །བསྟེན་བསྟེན་མཆོད་མཆོད་དོན་རེ་ཆུང་། །རིག་འཛིན་རྣལ་འབྱོར་ཡི་ཡང་ཆད། །བཞེངས་ཤིག་ཆོས་ཀྱི་དབྱིངས་ནས་བཞེངས། །མཐུ་རྩལ་འབྱིན་པའི་དམག་དཔུང་འཆོས། །གཤེགས་ཤིག་དགྲ་བོ་གནས་པའི་སར། །ཡུལ་མཁར་ཁྱིམ་བཤིག་ཕོ་བརྒྱུད་ཆོད། །མོ་བརྒྱུད་མངལ་སྒོ་སྐེམ་པར་གྱིས། །དགྲ་བོ་འཁོར་བཅས་ཐམས་ཅད་ལ། །ངུ་འབོད་དམྱལ་བ་མ་ལུས་སྦྱིན། །འདི་ཡི་ཆོས་ཀྱི་དམ་ཚིག་རལ། །བླ་མ་དཀོན་མཆོག་གསུམ་ལ་གནོད། །ཆོས་གཞི་ཕྲོགས་ཤིང་དཀོར་ལ་ཟ། །དམ་པའི་གཙུག་ལག་ཁང་འཇིག་རྩོམ། །སེམས་ཅན་ཡོངས་ཀྱི་བདེ་སྐྱིད་འཕྲོག །ནག་པོའི་ལས་ལ་ཧབ་བཤར་བྱེད། །བཞག་ཀྱང་མི་ཚེ་བདུད་ལས་སྤྱོད། །དགེ་བ་སུ་སྤྱོད་སུན་འབྱིན་པ། །འདི་འདྲ་བསྒྲལ་བའི་འོས་ལགས་སོ། །རྣམ་ཤེས་གཤིན་རྗེའི་འདུན་སར་བོར། །ཤ་རུས་སྙིང་ལ་རྔམ་ཟས་ཀྱིས། །ཁྲག་གསར་རྦ་ཀློང་ཞལ་དུ་འཇིབས། ལོ་དང་ཟླ་བར་བཞག་མི་འཚལ། །ཞག་དང་ཟ་མ་ཉིད་དུ་སྒྲོལ། །བསྐུལ་བའི་དུས་སུ་མཐུ་མ་ཆུང་། །རྦད་པའི་ཚེ་ན་རྩལ་མ་ཞན། །བཅོལ་བའི་ལས་གཡེལ་མ་མཛད་དང་། །མྱུར་དུ་གསོད་ཅིག་ཐུལ་ཅིག་ཡ།། ཅིག་ཅར་དམར་པོའི། གཏུམ་པོ་གཤིན་རྗེའི་སྡེ་དཔོན་ཁྱོད། །ཁྲོས་པའི་མེ་ཆེན་ད་སྤོར་ལ། །དམ་ཉམས་འཁོར་བཅས་བསོད་ནམས་ཀྱི། །བུད་ཤིང་ཐམས་ཅད་མེད་པར་མཛོད། །རལ་པ་གསིགས་པའི་ཁྲོད་དེ་ཡི། །སྦྲུལ་གྱི་ཁ་རླངས་དུག་གི་མཐུས། །བརྒྱལ་ཞིང་འབོག་པས་རང་བྱས་རྣམས། །རང་ལ་བསྐོར་བའི་འཕྲིན་ལས་རན། །ཤངས་ཀྱི་དུས་མཐའི་རླུང་གི་ཤུགས། །སྤོས་ནས་དམག་སྡེ་ནང་དབྱེ་ཞིང་། །གཏོར་ནས་གཞན་ནས་སྐྲོད་པར་མཛོད། །ལྕགས་ཀྱི་གནམ་རུ་བདུངས་པ་ཡིས། །འབྲུག་སྒྲ་བསྒྲགས་ནས་གནམ་ལྕགས་མདས། །འཁོར་བཅས་བསད་པའི་ཤ་ཁྲག་གི །དམར་དྲིས་ལུང་པ་གང་བར་མཛོད། །གླང་དམར་སྨྱོན་པའི་རྨིག་པ་ཡིས། །ཁང་ཁྱིམ་བརྫིས་ལ་རྣོ་བའི་རྭས། །ས་ཞིང་རོལ་སུལ་ལྟ་བུར་གྱིས། །རྟ་གདོང་མེ་ལྕེ་ལྟར་རྔམ་པའི། །གཤིན་རྗེའི་གཤན་པ་སྟོང་དྲུག་བརྒྱ། །བརྗིད་པའི་གོ་མཚོན་ཅན་རྣམས་ཀྱི། །སྒར་ཆེན་དགྲ་བོའི་ཡུལ་དུ་ཕོབ། །མ་མོའི་ནང་སྤྲིན་དེ་རུ་གཏིབས། །བདུད་སྡེའི་ཁྲམ་ཁ་དེ་ལ་ཐོབ། །བཙན་གྱི་ཤོ་རྡེ་དེ་རུ་རྩེས། །ཀླུ་ཡི་ནད་ཀྱིས་དེ་དག་གཟུང་། །རྒྱལ་པོའི་སྨྱོ་འབོག་དེ་ལ་སྦྱོར། །གཟའ་ཡི་ཕོག་འགྱེལ་དེ་ལ་རན། །སྲིན་པོའི་རྔམ་ཟས་དུས་ལ་བབ། །བསྐུལ་ལོ་དམ་ཚིག་ཅན་ཁྱོད་བསྐུལ། །རྦད་དོ་དམིགས་པའི་ས་དེར་རྦད། །བཅོལ་ལོ་དགྲ་བོ་འཇོམས་པ་བཅོལ། །བརྫངས་སོ་ལོ་ཟླ་ལོང་མེད་སོང་།། ཀོང་བཙུན་དེ་མོའི་བསྟོད་པ། སྨན་བཙུན་མོ་རྡོ་རྗེ་དེ་མོའི་མཚན། །ལྗོངས་ཁ་བ་ཅན་པའི་ཡུལ་བདག་མོ། །ཤར་ཀོང་པོའི་ཡུལ་གྱི་ལྷ་སྲུངས་ཆེ། །བཀའ་བསྟན་པ་སྤྱི་ཡི་བྱ་ར་བ། །ཁྱེད་དགྱེས་པའི་དོང་ཁྱིམ་ཟླ་བ་ལ། །མཁུར་དཀར་ལ་དམར་བའི་རྟགས་བྲིས་ནས། །ཞལ་འཛུམ་པའི་འོད་བརྒྱ་བཀྱེ་བ་འདི། །མིག་བལྟ་བའི་བཞིན་ལ་མཚར་ཤོས་ཡིན། །སྐུ་ཤ་བདོ་ཁྲག་རྒྱས་སྐེམ་སྦེག་རན། །ཁྲོམ་ལྷ་མི་དགའ་བའི་རྒྱན་གྱིས་ཀླུབས། །གདན་འབོལ་བའི་ཟབ་ལ་འགྱིང་བཅས་པ། །དཔལ་ནོར་རྒྱུན་མ་ཡི་གཟི་བྱིན་དཔེ། །ཟིལ་ཆེན་པོ་ཁྱོད་མདུན་མི་འདར་གང་། །ཅི་བསྒོ་བ་མི་བྱེད་ལྷ་སྲིན་གར། །ལས་མཛད་པ་སྐྱེས་བུའི་གྲོགས་མིན་ཅི། །མཐུ་མཚུངས་པ་མེད་པས་འགྲོན་རོགས་སུ། །ཁོང་མ་རུངས་པ་ལ་རྡོ་རྗེའི་སྤྲིན། །ལས་དབྱེ་དགུག་བཅིང་བ་གློག་བརྒྱའི་མཐར། །དོན་མངོན་སྤྱོད་ཐོག་གི་ཆར་འབེབས་པས། །རི་མ་ལ་ཡ་རྩེའི་དཔལ་འཕྲོགས་སོ། །ཁྱོད་དགྱེས་དགུ་འབྱོར་པའི་སྐྱེད་ཚལ་འདིར། །རོ་བརྒྱ་ལྡན་རྒྱ་ཇའི་སྐྱེམས་ཀྱིས་མཆོད། །དཔའ་ཛ་གད་ཆང་དང་དམར་ཆོལ་བཅས། །ཟས་ཞིམ་པའི་བ་ལིང་མགྲོན་དུ་སྟབས། །ཐུགས་དགྱེས་པའི་མདངས་དང་ལྡན་གྱུར་པས། །སྤྱིར་བོད་ཡུལ་ཁྱད་པར་ཀོང་པོའི་ལྗོངས། །ལོ་ལེགས་ཤིང་སྐྱ་རྒྱལ་དུས་འཁྲུགས་ཞི། །ཆོས་དཀར་པོ་སྤྱོད་པས་ཁེངས་པར་མཛོད། །མི་བདག་གི་འདོད་པའི་སྨྲེང་གསོལ་བ། །འདི་ཆོས་དང་ལྡན་པས་སྒྲུབ་པར་ཞུ། །དུས་དེ་རིང་མཆོད་པའི་རྒྱུ་སྦྱོར་ལ། །དཔལ་ཕྱྭ་གཡང་འགུགས་པའི་འཕྲིན་ལས་འཚལ།། །། སྒོ་སྲུངས་སྒོ་བདུད་ནག་པོའི་གསོལ་ཁ་ཧཱུྃ་ཡིག་བཅུ་གཉིས་མ་ཞེས་བྱ་བ་བཞུགས་སོ། །ཆོས་ཀྱི་རྗེ་གཙང་པ་རྒྱ་རས་ལ་ཕྱག་འཚལ་ལོ།། ཧཱུྃ རྡོ་རྗེ་ལྷུན་པོའི་ཟོམ་ཆེན་པོར། །གཟའ་རྒོད་ནག་པོའི་མཚན་ཡང་འཛིན། །ཕྱག་བརྙན་ལྷ་མིན་ཚོགས་ཆེན་པོས། །བསྐོར་ནས་འདིར་གཤེགས་ཀི་ཀང་ཁྱོད། །ཧཱུྃ ལྕགས་མཁར་སྒོ་མེད་བཅུ་དྲུག་ན། །འཆི་བདུད་ནག་པོའི་མཚན་ཡང་འཛིན། །བཀའ་ཉན་དམྱལ་སྲུང་གཏུམ་པོའི་སྡེས། །བསྐོར་ནས་འདིར་གཤེགས་ལས་གཤིན་ཁྱོད། །ཧཱུྃ སྤྲུལ་པའི་ཞིང་གི་ལྷོ་ཕྱོགས་སུ། །སྒོ་བདུད་ནག་པོའི་མཚན་ཡང་འཛིན། །ལས་མཛད་སྡེ་བརྒྱད་གཤན་པའི་ཚོགས། །བསྐོར་ནས་འདིར་གཤེགས་གནས་སྲུངས་ཁྱོད།། སྤྱན་འདྲེན་ནོ།། ཧཱུྃ དཔའ་བོའི་ཆང་ཕུད་རྒྱ་མཚོར་བསྐྱིལ། །དམར་ཆེམ་ཁྲག་སྣའི་ཨརྒྷཾ་སྦྲེང་། །མཐུན་རྫས་བཤོས་བུའི་རི་དབང་རྩེར། །དཀར་དམར་ཟླ་ཉིས་མཛེས་པ་འབུལ། །ཧཱུྃ དམིགས་པའི་དགྲ་བོ་འདི་ཞེས་པའི། །སྲོག་དང་དབུགས་དང་བླ་དང་ཚེ། །ཤ་ཁྲག་རུས་པའི་བ་ལིཾ་ཏ། །དམར་གྱི་ངད་དྲི་ཆིལ་བས་མཆོད། །ཧཱུྃ ནག་པོ་དར་ལ་བདུད་ཀྱི་མཁར། །དགྱེས་དགུ་ཡས་དང་ཐགས་ལ་བསྒྲུབས། །མི་ཟད་ནམ་མཁའི་མཛོད་ངོ་མར། །བྱིན་གྱིས་བརླབས་པས་ཐུགས་དམ་བསྐང་།། མཆོད་པའོ།། ཧཱུྃ མཐོང་བའི་དུག་རླངས་སྤྲིན་ནག་གིས། །མུན་པར་འཐིབས་གཟུགས་ལྟ་བྱེད་གློག །སྟོང་ཕྲག་གཡོ་ལས་ཁྲག་རལ་ཆར། །ཅི་ཡང་འབེབས་ལ་ཕྱག་འཚལ་བསྟོད། །ཧཱུྃ ཟ་བར་བྱེད་པའི་ཁ་བོ་ཆེ། །མཚོན་ཆའི་ངར་ཀུན་དྲིལ་བའི་སོས། །དགྲ་སྲོག་གཏུབས་པའི་རཀྟའི་རྒྱུན། །མ་ཕམ་འགྲམ་པར་འཛག་ལ་བསྟོད། །ཧཱུྃ རྒྱལ་བའི་དམ་ཚིག་ཆང་འཐུངས་པ། །མྱོས་པའི་གད་རྒྱངས་མི་བཟད་པའི། །རྣམ་པར་རོལ་པ་བརྒྱ་ཕྲག་གིས། །མ་རུངས་འཇོམས་ལ་ཕྱག་འཚལ་བསྟོད།། བསྟོད་པའོ།། ཧཱུྃ སྔོན་གྱི་བསྐལ་པའི་དང་པོ་ལ། །གྲུབ་ཐོབ་རྣམས་ལ་དམ་བཅས་པ། །ད་ལྟ་རྣལ་འབྱོར་ང་བསྐུལ་གྱིས། ནག་པོ་འཛུམ་མེད་ལས་ལ་བྷྱོ། །ཧཱུྃ་ཧཱུྃ་དྲག་ཤུལ་ཆེན་པོའི་ཤུགས། །ཕཊ྄་ཕཊ྄་དགྲ་བོའི་མགོ་བཀས་ནས། །ཧ་ཧ་ག་ཤ་ཆེར་སྒྲོགས་པའི། །ཧི་ཧི་ངོ་མཚར་མྱུར་དུ་སྟོན། །ཧཱུྃ འུར་འུར་ཆེམ་ཆེམ་དམག་གི་དཔུང་། །ཧབ་ཧབ་རྔམ་རྔམ་དགྲ་ཡུལ་རྣམས། །ཆམ་ཆམ་ཆོམ་ཆོམ་ཟོས་ནས་འདིར། །དུང་དུང་ཤམ་ཤམ་གཏང་རག་ལོང་།། བསྐུལ་ལོ། །ཞེས་དབོན་རིན་པོ་ཆེས་བཀའ་ཕེབས་ནས་གནས་སྲུངས་སྒོ་བདུད་ནག་པོའི་གསོལ་ཁ་ཧཱུྃ་ཡིག་བཅུ་གཉིས་མ་འདི་ཡང་། གཉལ་ཡངས་པ་ཅན་གྱི་རྒྱལ་པོའི་ཁབ་ཏུ་པདྨ་དཀར་པོས་སྦྱར་བའོ།། །།རྡོ་རྗེ་ལེགས་པའི་གསོལ་ཁ་བཞུགས་སོ།། སྤྱན་འདྲེན་ནི། ཀྱཻ། དབང་ཕྱུག་ཆེན་པོའི་ཞིང་ཁམས་ནས། །རྡོ་རྗེ་འཆང་དབང་སྲས་ཀྱི་གཙོ། །སྐྱེས་བུ་ཆེན་པོ་རྡོ་རྗེ་ལེགས། །དོ་ནུབ་བདག་གི་གནས་འདིར་བྱོན། །འཇིག་རཏེན་ལས་ཀྱི་སྣང་བ་ནས། །གནམ་ཐེ་དགྲ་ལྷའི་རྒྱལ་པོ་སྟེ། །བདུད་རྗེ་མགར་བ་ནག་པོ་ཁྱོད། །དམ་ཅན་ཆེན་པོ་གནས་འདིར་བྱོན།། མཆོད་པ་ནི། ཀྱཻ། དམ་ཚིག་གཙང་ཞིང་ཡིད་འོང་བའི། །ཛ་གད་ཕུད་ཀྱི་གསེར་སྐྱེམས་དང་། །མཐུན་པའི་མཆོད་པ་བཞོན་པའི་ར། །བརྗིད་ཆགས་རྟེན་རྫས་ཐམས་ཅད་འབུལ། །ལྷག་པར་མ་རུངས་དགྲ་བསྒྲལ་བའི། །དམར་ཆོལ་ཤ་གསར་ནང་ཁྲོལ་དང་། །གློ་སྙིང་འབྲུ་ནག་བ་ལིང་ཏ། །འཇིག་རྟེན་ཁམས་ཀུན་བཀང་སྟེ་འབུལ།། བསྟོད་པ་ནི། ཀྱཻ། ཞི་བ་དཀར་པོའི་ཆོས་སྐྱོང་ཆེ། །ལྷ་ཆེན་རྣམས་ཀྱི་གཙོ་བོ་མཛད། །ཁམས་གསུམ་སྲིད་པའི་ཡིད་བསྒུལ་ནས། །རྣལ་འབྱོར་སྒྲུབ་པའི་རེ་བ་སྐོངས། །ཤིན་ཏུ་ཁྲོས་གཟུགས་བེར་ནག་གྱོན། །གནམ་ལྕགས་ཐོ་བ་འཕྱར་ཞིང་བརྡེག །སྦུད་པ་ནག་པོ་དྲག་བུས་ནས། །དགྲ་བོ་ཚར་གཅོད་ཁྱོད་ལ་བསྟོད།། ཐང་པེ་ཧ་རའི་གསོལ་ཁ་བཞུགས་སོ།། ཀྱཻ། རིག་འཛིན་པདྨའི་དམ་ཚིག་ཅན། །དྲག་ཤུལ་མི་བཟད་ཉམས་པའི་གཤེད། །ཆོས་མཛད་སྐྱོང་བའི་བསྟན་བསྲུང་ཆེ། །རྣལ་འབྱོར་དགྲ་ལྷ་གཤེགས་སུ་གསོལ།། མཆོད་པ་ནི། ཀྱཻ། རོ་བརྒྱ་ལྡན་པའི་རྒྱ་ཇ་དང་། །མདངས་རོ་བཅུད་ལྡན་ལྷའི་བདུད་རྩིར། །ས་ཡི་སྙིང་པོར་སྦྱར་བའི་སྐྱེམས། །ཁྲག་གི་རྒྱ་མཚོ་ཆེན་པོས་མཆོད། །ཡིད་ལ་བརྣགས་པའི་སྤྱན་གཟིགས་དང་། །རི་ལྟར་སྤུངས་པའི་བ་ལིང་ཏ། །མཆོད་རྫས་རྟེན་རྫས་མཐུན་པའི་རྫས། །མ་ཚང་མེད་པ་བརྔན་དུ་འབུལ། །བདག་ཅག་འཁོར་དང་བཅས་པ་ཡི། །ཉེར་འཚེའི་རྒུད་པར་རྒྱང་བསྲིངས་ནས། །ཡིད་ལ་རེ་བའི་དོན་ཐམས་ཅད། །མྱུར་དུ་འགྲུབ་པའི་འཕྲིན་ལས་མཛོད།། བསྟོད་པ་ནི། ཀྱཻ། འཆར་ཀའི་མདོག་མཚུངས་དམར་བའི་བཞིན། །ཁྲོ་གཉེར་བརྗིད་ཆགས་རྔམས་པའི་ཞལ། །མི་བཟད་མཆེ་གཙིགས་ལྗགས་འདྲིལ་རྩེར། །དགྲ་བོའི་ཙིཏྟ་བཞེས་དེར་བསྟོད། །བསེ་ཡི་ཡ་ལད་རབ་བསྒོས་ཤིང་། །རུ་མཚོན་མདུང་དང་ཞགས་དམར་བཟུང་། །མྱུར་མགྱོགས་རྟ་རྒོད་ལ་ཆིབས་ནས། །སྲིད་གསུམ་སྐད་ཅིག་རྒྱུད་དེར་བསྟོད། །ཆོས་ཀྱི་རྒྱལ་པོའི་མངག་གཞུག་ཆེ། །དྲེགས་པའི་སྡེ་དཔོན་ཡོངས་ཀྱི་དཔོན། །མཐུ་རྩལ་གཞན་གྱིས་བཟོད་དཀའ་བའི། །དཔའ་བོ་ལས་མཁན་བཅས་དེར་བསྟོད། །རྣལ་འབྱོར་བདག་གི་སྐྱོབ་པའི་ལྷ། །དཔུང་དང་བཅས་པར་བསྟོད་བགྱིད་ན། །བསྟན་དགྲ་སྒྲོལ་བའི་གར་རྩེས་ལ། །བཅོལ་བའི་འཕྲིན་ལས་གྲུབ་པར་མཛོད།། གྲུ་ལུང་བྲག་བཙན་གྱི་གསོལ་ཁ་བཞུགས་སོ།། ཀྱཻ། ཉི་འོད་འབུམ་ཕྲག་གཅིག་ཏུ་འཁྱིལ་འདྲའི་སྐུ། །གྱད་ཆེན་གཡུལ་ངོར་འཇུག་འདྲའི་ཆས་ཞུགས་ནས། །སྡང་བའི་དགྲ་ལ་ཐོག་ལྟར་འབེབས་མཛད་པའི། །བཙན་རྒོད་ཆེན་པོ་གནས་འདིར་གཤེགས་སུ་གསོལ།། མཆོད་པ་ནི། ཀྱཻ། ཁྱོད་དགྱེས་སྲིན་མོ་ཆང་གི་ཕུད་མང་བཤམས། །ལྷག་པར་བསད་པའི་སྙིང་ཁྲག་ལྦུ་འཕྲེང་ཅན། །ཤ་རུས་འབྲུ་སྣ་ལས་བྱས་གཏོར་མ་དང་། །སྤྱན་གཟིགས་རྒྱ་མཚོ་ཁྱོད་ལ་མཆོད་པར་འབུལ། །བདག་གི་འགོ་བའི་དགྲ་ལྷ་གཉན་པོ་དང་། །འཕྱར་བའི་དར་གྱིས་དཔའ་བའི་དཔུང་གྲོགས་དང་། །མི་ཟད་གཏེར་མཛོད་སྐྱོང་བའི་གཉེར་ལ་སོགས། །གང་བཅོལ་འཕྲིན་ལས་ཐོགས་མེད་འགྲུབ་པར་མཛོད། །ཀྱཻ། ཡབ་ནི་ཇོ་བོ་གསལ་རྗེ་སྟེ། །ཡུམ་ནི་དམུ་རྒྱལ་ཤེལ་དཀར་ལྕམ། །དེ་གཉིས་བཤོས་པའི་ལྕམ་སྲིང་གཉིས། །མཐུ་རྩལ་དྲེགས་པ་སྡེ་བརྒྱད་ཀྱིས། །དམག་དཔོན་ཆེན་པོར་ཁྱོད་གྱུར་པས། །ཁྱོད་མདུན་བརྡོ་བར་སྡོད་ཚུགས་པ། །འཇིག་རྟེན་ཁམས་ན་ཅང་མ་མཆིས། །དེ་བས་བདག་གིས་ཁྱོད་ལ་བསྟོད། །འཁོར་འབངས་ཐམས་ཅད་རྒྱས་པ་དང་། །བཅོལ་བའི་འཕྲིན་ལས་འགྲུབ་པར་མཛོད། །ཤུབྷཾ།། །། ཡེ་ཤེས་ཀྱི་མགོན་པོ་ཕྱག་བཞི་པའི་གཏོར་བསྔོ་བསྡུས་པ་པདྨ་དཀར་པོས་མཛད་པ།ཡེ་ཤེས་ཀྱི་མགོན་པོ་ཕྱག་བཞི་པའི་གཏོར་བསྔོ་བསྡུས་པ་པདྨ་དཀར་པོས་མཛད་པའོ། །དཔལ་འཁོར་ལོ་སྡོམ་པ་དང་རྡོ་རྗེ་ནག་པོ་ཆེན་པོ་ལ་ཕྱག་འཚལ་ལོ། །དམ་ཚིག་དང་ལྡན་པའི་སྒྲུབ་པ་པོས། །ཕྱོགས་བཅུར་བཞུགས་པའི་བླ་མ་དང་། །ཞེས་པའི་སྐྱབས་སུ་འགྲོ་བ་དང་། །ཇི་ལྟར་དུས་གསུམ་མགོན་པོ་རྣམས་ཞེས་པའི་སེམས་བསྐྱེད་པ་གཉིས་སྔོན་དུ་འགྲོ་བས། སེམས་ཅན་ཐམས་ཅད་བདེ་བ་དང་ལྡན་ན་ཅི་མ་རུང་སྙམ་པའི་བྱམས་པ་དང་། སེམས་ཅན་ཐམས་ཅད་སྡུག་བསྔལ་དང་བྲལ་ན་ཅི་མ་རུང་སྙམ་པའི་སྙིང་རྗེ་དང་། སེམས་ཅན་ཐམས་ཅད་བདེ་བ་དེའང་རྒྱུད་བརྟན་ད་ཅི་མ་རུང་སྙམ་པའི་དགའ་བ་དང་། སེམས་ཅན་ཐམས་ཅད་ཡང་དག་པའི་ལམ་ལ་གནས་ན་ཅི་མ་རུང་སྙམ་པའི་བཏང་སྙོམས་གནས་པར་བྱའོ། །ཞེས་ཚར་མེད་པ་བཞི་བསྒོམས་ནས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷ་ཝ་ཤུདྡྷོ་ད་ཧཱུཾ། བདག་དང་དངོས་པོའི་ཆོས་ཐམས་ཅད་རང་བཞིན་གྱིས་སྟོང་པ་ཉིད་དུ་གྱུར། སྟོང་པའི་ངང་ལས་རི་རབ་ཀྱི་སྟེང་དུ་སྣ་ཚོགས་པདྨ་དང་ཉི་མའི་དཀྱིལ་འཁོར་གྱི་གདན་ལ། རང་ཉིད་སྐད་ཅིག་གིས་དཔལ་འཁོར་ལོ་སྡོམ་པ་ལྷན་ཅིག་སྐྱེས་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། ཞབས་གཡས་བརྐྱང་པས་དུས་མཚན་མ་དམར་མོའི་སྙིང་ག་མནན་པ། གཡོན་ཅུང་ཟད་བསྐུམ་པས་འཇིགས་བྱེད་སྔོན་པོའི་དཔྲལ་བ་མནན་པ། ཕྱག་གཡས་རྡོ་རྗེ་དང་གཡོན་དྲིལ་བུ་འཛིན་པས་ཡུམ་ལ་འཁྱུད་པ། མཆེ་བ་ཅུང་ཟད་གཙིགས་ཤིང་སྤྱན་གསུམ་དང་ལྡན་པ། ནོར་བུ་དང་། སྣ་ཚོགས་རྡོ་རྗེ་དང་། ཟླ་བ་ཕྱེད་པས་མཚན་པའི་རལ་པའི་ཐོང་ཅོག་ཅན། མི་མགོ་སྐམ་པོ་ལྔས་དབུ་བརྒྱན་ཅིང་། རློན་པ་ལྔ་བཅུའི་དོ་ཤལ་བྱས་པ། རུས་པའི་ཕྱག་རྒྱ་དྲུག་གིས་བརྒྱན་ཅིང་། སྟག་གི་པགས་པའི་ཤམ་ཐབས་ཅན། གར་གྱི་ཉམས་དགུ་དང་ལྡན་པའོ། །དེའི་པང་ན་ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ། ཞལ་གཅིག་ཕྱག་གཉིས་སྤྱན་གསུམ་པ། གཅེར་བུ་སྐྲ་གྲོལ་ཞིང་། ཐོད་པ་སྐམ་པོ་ལྔའི་དབུ་རྒྱན་དང་ཐོད་སྐམ་ལྔ་བཅུའི་དོ་ཤལ་ཅན། ༼༢ན༣༽རུས་པའི་ཕྱག་རྒྱ་ལྔས་བརྒྱན་པ། ཁ་ཊྶཱཾ་ག་དང་ཐོད་པས་མཚན་པའི་ཕྱག་གཡོན་པས་ཡབ་ཀྱི་མགུལ་ནས་འཁྱུད་ཅིང་གཡས་རྡོ་རྗེ་དང་བཅས་པའི་སྡིགས་མཛུབ་སྟེང་གི་ནམ་མཁར་འཕྱར་བ། ཞབས་གཡས་པ་ཡབ་ལ་འཁྱུད་ཅིང་། གཡོན་ཡབ་དང་ལྷན་ཅིག་ཏུ་བརྐྱང་བ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར་པའི་སྤྱི་བོར་པད་ཟླའི་གདན་ལ་བླ་མ་མི་བསྐྱོད་པའི་གཟུགས་ཅན་གྱིས་དབུ་བརྒྱན་ཅིང་། ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་སྔོན་པོས་མཚན་པར་གྱུར། ཐུགས་ཀའི་ཧཱུཾ་ལས་འོད་འཕྲོས། འགྲོ་བ་མ་ལུས་པའི་དོན་བྱས། ཚུར་འདུས། ཧཱུཾ་ལ་ཐིམ་པས། ཧཱུཾ་ལ་སྔགས་ཀྱིས་བསྐོར་བར་གྱུར། དེ་ལྟ་བུའི་འཁོར་ལོ་སྡོམ་པའི་སྐུ་ལ་དམིགས་ཏེ་རྒྱུན་ཅི་རིང་གི་བར་བསྒོམ། དེ་ལས་སྐྱོན་ས་བོན་གྱི་མཐར། ཨོཾ་སྲཱིཿཧ་ཧ་ཧཱུཾ་ཧཱུཾ་ཕཊཿ ཅེས་པའི་སྔགས་ཀྱིས་བསྐོར་བར་དམིགས་ནས་བྷཱུ་ཏཱིའི་བཟླས་པ་ལ་འབད། དེ་ལས་སྐྱོ་ན་སྣོད་བཅུད་ཀྱི་དངོས་པོ་ཐམས་ཅད་བཅོམ་ལྡན་འདས་ལ་ཐིམ། དེ་བདག་ལ། དེ་སྙིང་གའི་ཉི་མ་སྔགས་འཕྲེང་དང་བཅས་པ་ལ། དེ་ས་བོན་ལ། དེའང་རིམ་པས་ཐིག་ལེ་ལ། དེ་ནཱ་ད་ལ་ཐིམ། དེ་ཅི་ཡང་མི་དམིགས་པ་འོད་གསལ་བའི་ངང་དུ་གཞག་གོ། །དེ་ལས་སྐྱོན་སྐད་ཅིག་གིས་འཁོར་ལོ་སྡོམ་པ་ལྷན་ཅིག་སྐྱེས་པའི་སྐུར་ལངས་པར་བྱའོ། །དེའི་མདུན་དུ། དུར་ཁྲོད་ཀྱི་ས་གཞི་འཇིགས་སུ་རུང་བའི་དབུས་སུ། པདྨ་དང་ཉི་མ་རོ་སྐམ་རློན་གྱི་གདན་ལ་སྐད་ཅིག་གིས། དཔལ་རྡོ་རྗེ་ནག་པོ་ཡེ་ཤེས་ཀྱི་མགོན་པོ་ཞལ་གཅིག་ཕྱག་བཞི་པ། སྐུ་མདོག་མཐིང་ནག་རྔམ་ཞིང་འཚོར་བ། བ་སྤུའི་བུ་ག་ནས་རྡོ་རྗེའི་རྡུལ་ཕྲ་མོ་དང་སྤྲུལ་པའི་ཁྲོ་ཆུང་མཚོན་ཆ་སྣ་ཚོགས་ཐོགས་པ་འཕྲོ་བ། ཁྲོས་པའི་སྤྱན་གསུམ་མེ་སྟག་གི་ཕུང་པོ་ལྟར་དམར་བ། ཞལ་གདངས་ཤིང་ཧ་ཧཱ་དང་། ཧཱུཾ་ཧཱུཾ་དང་། ཕཊ་ཕཊ་ལ་སོགས་པའི་སྒྲ་སྒྲོག་པ། མཆེ་བ་ཟླ་ཚེས་ལྟ་བུ་རྣམ་པར་གཙིགས་ཤིང་། ལྗགས་རབ་ཏུ་༼༢བ༤༽འདྲིལ་བ། དབུ་སྐྲ་དང་སྨིན་མད་མར་སེར་གྱེན་དུ་འཁྱིལ་བ། ཕྱག་གཡས་ཀྱི་དང་པོ་ན་བཻ་ཙའི་འབྲས་བུ་མདོག་དབྱིབས་སྙིང་འདྲ་བ་འཛིན་ཅིང་། འོག་མན་རོ་ལངས་ཀྱི་ལྕེ་ལས་གྲུབ་པའི་རལ་གྲི་འབར་བ་གདེངས་ནས་འཛིན་པ། གཡོན་གྱི་དང་པོ་ན་ལྷ་མ་སྲིན་གྱི་ཐོད་པ་བདུད་བཞིའི་ཁྲག་གིས་བཀང་ནས་ཐུགས་ཀར་འཛིན་ཅིང་། འོག་མ་ཁ་ཊྶཱཾ་རྩེ་གསུམ་དར་དབྱངས་ཌ་མ་རུ་དང་ལྡན་པ་འཕྱར་སྟབས་སུ་འཛིན་པ། སྟག་ལྤགས་རློན་པའི་ཤམ་ཐབས་ཀྱིས་སྨད་དཀྲིས་ཤིང་། བདུད་བཏུལ་བའི་རུས་པའི་རྒྱན་དྲུག་གིས་མཛེས་པར་བརྒྱན་པ། མི་མགོ་སྐམ་པོ་ལྔས་དབུ་བརྒྱན་ཅིང་། རློན་པ་ཁྲག་འཛེག་པ་ལྔ་བཅུའི་དོ་ཤལ་འཕྱང་བ། སྤྲུལ་དཀར་པོས་དབུ་བརྒྱན། དམར་པོས་སྙན་བརྒྱན། སེར་ཁྲས་མགུལ་བརྒྱན། ནག་པོས་ཞབས་གདུལ། ལྗང་ཁྲས་ཕྱག་གདུག་སྔོ་ཁྲས་མེ་རལ་ཁ། སྨུག་ནག་གིས་སྐ་རགས། ཐལ་སྐྱས་ལྷུ་ཚིགས་བརྒྱན་པ། དར་དཔྱངས་ཀྱི་ཅོད་པན་འཚང་ཞིང་། ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ་ལ་སོགས་པས་སྤྲས་པ། ཞབས་གཡས་ཅུང་ཟད་བསྐུམ་པས་པད་ཉི་དང་རོ་སྐམ་རློན་གྱི་སྟེང་དུ་འགྱིང་བག་དང་བཅས་ཏེ་བཞུགས་ཤིང་གཟི་བརྗིད་དང་ལྡན་པ། དེའི་གཡས་སུ། ལས་མགོན་བྱ་རོག་གི་གདོང་ཅན། སྐུ་མདོག་ནག་པོ་རབ་ཏུ་རྔམ་པའི་གཟུགས་ཅན། ཞལ་གཅིག་ཕྱག་གཉིས་སྤྱན་གསུམ་པ། ཁྲོས་ཤིང་རྒན་སྒྲ་དང་བཅས་པའི་ཞབས་བརྡབས་པས་སྲིད་གསུམ་གཡོ་བ། གཡས་གྲི་གུག་དང་། གཡོན་ཐོད་པ་དགྲ་བགེགས་ཀྱི་སྙིང་གིས་གང་བ་འཛིན་པ། མི་མགོའི་འཕྲེང་བ་དང་སྦྲུལ་གྱིས་བརྒྱན་པ། སྟག་ལྤགས་རློན་པའི་ཤམ་ཐབ་ཅན། འཇིགས་སུ་རུང་བའི་ཞབས་གཡས་བསྐུམ་གཡོན་བརྐྱང་བས་རོའི་གདན་བཞུགས་པ། གཡོན་དུ་དཔལ་ལྡན་ལྷ་མོ་ནག་མོ་ཞལ་གཅིག་ཕྱག་བཞི། མཆེ་བ་གཙིགས་ཤིང་སྤྱན་གསུམ་དམར་ལ་ཟླུམ་པ། ཁྲོ་གཉེར་དཔྲལ་བར་བསྡུས་ཤིང་ལན་བུ་གྱེན་དུ་༼༣ན༥༽འཁྱིལ་ནས་ས་ལ་འདྲུད་པ། ཐོད་སྐམ་ལྔས་དབུ་ལ་བརྒྱན་ཅིང་། ཐོད་རློན་གྱི་དོ་ཤལ་འཕྱང་བ། ཕྱག་གཡས་རལ་གྲི་དང་ཏྲི་ཤུ་ལ། གཡོན་མདའ་གཞུ་དང་དགྲ་མགོ་འཛིན་པ། སྟག་ལྤགས་ཀྱིས་སྨད་དཀྲིས་ཤིང་། ཞབས་གཉིས་ཕྱེད་སྐྱིལ་གྱིས་དྲེའུའི་སྟེངས་ན་བཞུགས་པ། མཁའ་འགྲོ་བརྒྱད། ཤ་ཟ་སྲིན་པོ་ལ་སོགས་པའི་ལས་མཁན། རོ་ལངས་བརྒྱ། ནག་པོ་སྟོང་། ཤ་ཟ་འབུམ། མ་མོ་བྱེ་བ། གནོད་སྦྱིན་ཁྲི་ལ་སོགས་པས་བསྐོར་བའི་གཙོ་འཁོར་ཐམས་ཅད་ཀྱི་སྲི་བོར་ཨོཾ། མགྲིན་པར་ཨཱཿཐུགས་ཀར་ཧཱུཾ། དེ་ལས་འོད་ཟེར་འཕྲོས། བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿཡེ་ཤེས་པ་དང་དམ་ཚིག་པ་དབྱེར་མེད་དུ་བསྲེས་ནས། ཨོཾ་ཤྲཱི་བཛྭ་མཧཱ་ཀཱ་ལས་རི་ཝཱ་ར་བྷྱ་ཨརྒྷཾ་པྲ་ཏཱིཙྪི་སྭཱཧཱ། དེ་བཞིན་དུ། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྟ། རཱུ་པ། ཝི་ནི། རཱ་ཀྵྼ། སྤ་རྴེ། པཉྩྨ་ཨ་མྲྀ་ཏ་པཱུ་ཛ་ཁཱ་ཧི། དེ་ནས་གཏོར་མ་སྭ་བྷ་ཝས་སྦྱངས། སྟོང་པའི་ངང་ལམ། ཀཾ་ལས་མི་མགོའི་སྒྱེད་བུ་གསུམ་གྱི་སྟེང་དུ་ཨ་ཡིག་དཀར་པོ་ལས་བྱུང་བའི་ཐོད་པའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་རྫས་རྣམས་ཤ་ལྔ་བདུད་རྩི་ལྔའི་རང་བཞིན་ཨོཾ་ཨཱཿཧཱུཾ་ཧ་ཧོ་སྲཱིཿཟག་པ་མེད་པའི་བདུད་རྩིའི་རྒྱ་མཚོར་བྱིན་གྱིས་བརླབས་ནས། ཨོཾ་བཛྭ་ཀ་ཝུ་ཝ་པ་མཧཱ་ཀཱ་ལཱ་ཡ་ཧཱུཾ་ཕཊ། ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཤྲཱི་ཡ་དེ་ཝི་ཀཱ་ལི་མཧཱ་ཀཱ་ལི་ཧཱུཾ་བྷྱོ་ཨི་དཾ་་་་་་་་། ཨོཾ་ཀརྨྨ་མཧཱ་ཀཱ་ལ་གུ་ཎ་སྲི་ད་ཨི་དཾ་་་་་་་་་་། ཨོཾ་མཧཱ་ཀཱ་ལ། ཤཱ་ས་ནོ་པ་ཀ་རི་ཎེ། པཤྩི་མ་ཀ་ལོ་ཡ་ཨི་དཾ་རཏྣ་ཏྲ་ཡཱ་པ་ཀཱ་རེ་ཎཾ། ཡ་ཏི་པྲ་ཏཱི་ཛྙྱཱཾ། སྨ་ར་སི་ཏ་དཱ། ཨི་དཾ་བ་ལིཾ་ཁ་ཁ། ཁཱ་ཧི་ཁཱ་ཧི། སརྦ་དུཥྚ་ས་ཏྭ་ན། །མ་ར་མ་ར། གྲྀ་་གྲྀ་། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་མཱ་ར་ཡ་ཧཱུཾ་ཕཊ་ཧཱུཾ། ལན་བདུན་༼༣བ༦༽ནམ། ཉེར་གཅིག་གིས་འབུལ་ལོ། །འདོད་པའི་དོན་ལ་གསོལ་བ་གདབ། རྐང་པ་བརྒྱད་པས་བསྟོད། མན་ངག་ལྟར་བཟླས་ནས། མཆོད་བསྟོད་བསྡུས་པ་ཙམ་བྱས་ནས། མདུན་བསྐྱེད་ཀྱི་གཙོ་འཁོར་རྣམས་དམ་ཚིག་པ་དང་ཡེ་ཤེས་པ་དབྱེར་མེད་དུ་གྱུར་པ། རང་གི་ཐུགས་ཀར་བསྟིམ་ལ། དེ་ཁོ་ན་ཉིད་ཀྱི་དོན་ལ་མཉམ་པར་བཞག །དེ་ལས་སྐྱོ་ན། དགེ་བ་འདི་ཡིས་མྱུར་དུ་བདག །ཡེ་ཤེས་མགོན་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །ཁྱེད་ཀྱིས་ལ་འདོད་པར་ཤོག །ཅེས་སོགས་ཀྱི་བསྔོ་བ་དང་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད།། །།ཆོས་སྦྱིན་རྒྱ་ཆེར་སྤེལ་བའི་ཆེད། པར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱེད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །། དམ་ཅན་མཉེས་པའི་མཆོད་སྤྲིན།དམ་ཅན་མཉེས་པའི་མཆོད་སྤྲིན་བཞུགས་སོ། །དཔལ་འབྲུག་པ་རིན་པོ་ཆེ་ལ་ཕྱག་འཚལ་ལོ། །དམ་པའི་ལུགས་ཡང་དོགས་འགག་འཐུག་པོའི་རི། །ནག་པོ་ཆེན་པོ་སྤྲིན་དྲག་གནག་པ་ཡིས། །མངོན་སྤྱོད་གནམ་ལྕགས་ཕབ་ནས་རྡུལ་བཏགས་པས། །ཕྱིན་ཆད་གོང་བུའི་ང་རྒྱལ་སུས་འཆའ་ནུས། །དེ་ཕྱིར་དེ་གཉིས་བྱེད་པའི་པདྨོའི་སྡེ། །ལེགས་བཤད་ཉི་མའི་འོད་ཀྱིས་རྒྱས་བྱེད་འདི། །ས་སྤྱོད་དཔལ་བཟང་དད་པའི་སྐྱེད་ཚལ་གྱི། །རྒྱན་དུ་འོས་ཞེས་འབྲུག་པའི་དཔྱིད་ཀྱིས་བརྩམས། །དམ་ཅན་མཉེས་པའི་མཆོད་སྤྲིན་གེ་སར་ནས། །མདུན་གྱི་ནམ་མཁར་དཔལ་ཡེ་ཤེས་ཀྱིས་མགོན་པོ། སྙིང་རྗེས་བདུད་ལ་ཁྲོ་བ། མུན་པ་མུན་ནག་ཏུ་འཐིབས་པ། བསྐལ་པའི་མེ་ལྟར་དུ་འབར་བ། དཔལ་གྱི་ཆས་སུ་ཞུགས་པ། ཕྱག་བཞིས་བེ་ཏ་ཐོད་ཁྲག རལ་གྲི་ཁ་ཊྶཱཾ་བསྣམས་པ། ཧ་ཧ་ཧི་ཧིས་གནམ་འགེངས་པ། སྐུའི་ལྷུན་གྱིས་བར་སྣང་ཁྱབ་པ། དཔའ་བོའི་སྟབས་ཀྱིས་ས་གཞི་གནོན་པ། བམ་བརྩེགས་པའི་ཁྲི་ལ་འགྱིང་བ། ཡུམ་ཙ་ཎྜྻི་ཀ་དང་སྦྱོར་བ། ལྷ་མོ་བརྒྱད་ཀྱིས་སྐྱོ་བ་བསངས་པ། ལེགས་ལྡན་བྱར་གདོང་བློན་པོར་བཞུགས་པ། རོ་ལངས་བརྒྱ་འབོད་སྐད་སྒྲོག་པ། ནག་པོ་སྟོང་ལས་ལ་ཞུགས་པ། ཤ་ཟ་འབུམ་ཀླད་བཤུལ་འབྲང་བ། མ་མོ་ས་ཡས་གར་བསྒྱུར་བ། གནོད་སྦྱིན་ཁྲི་མངག་གཞུག་ལ་ཆས་པ། ཞིང་སྐྱོང་མཁའ་འགྲོ་ཕོ་ཉར་འགྱེད་པ། དཔལ་མགོན་བདུན་ཅུས་མདུན་བདར་བ། དྲེགས་པ་ཅན་ཐམས་ཅད་འཁོར་དུ་སྤུང་པ། དཔལ་ལྷ་མོ་ཆེན་མོ། ཆར་གྱི་སྤྲིན་ལྟར་ནག་ལ། རི་རབ་ལྟར་བོངས་ཆེ་བ། སྤྱན་གསུམ་དམར་པོ་འཁྱུག་པ། ཁྲག་གི་རྒྱ་མཚོ་ཧུབ་ཀྱིས་འདེབས་པ། མི་རོ་རེངས་པ་ཁྱུར་མིད་དུ་ཟ་བ། རྒྱན་དང་གོས་སྲིད་པའི་བདག་པོ་དང་མ་མོ་རྣམས་ཀྱིས་བསྟབས་པ། ས་གསུམ་གྱི་དབང་པོ་ཐམས་ཅད་ཕྱག་འཚལ་བ། རལ་གྲི་བྷཉྫྱ། ཤཀྟི་རྩེ་གསུམ་འཛིན་པ། ལངྐའི་བདག་པོའི་དུང་མཁན་ལ་ཞོན་པ། འཕྲིན་ལས་ཐམས་ཅད་ཐོགས་མེད་དུ་སྒྲུབ་པ། ནད་དང་གདོན་གྱི་བདག་མོ། གཅེར་བུ་རལ་པ་ཅན་གསུམ་ནང་མིར་སྣང་བ། རིགས་བཞིའི་མཁའ་འགྲོས་བློན་མོར་མཛད་པ། ཕྲ་མེན་བརྒྱད་དང་སྒོ་མ་བཞི་ལས་ལ་འགྱེད་པ། སྲིད་པ་མོ་རྒྱུད་ཐམས་ཅད་བྲན་མོར་ཧབ་ཤ་བ། གནོད་སྦྱིན་ཆེན་པོ་རྣམ་ཐོས་སྲས། གསེར་ལྟར་སེར་བ། ཟླ་ལྟར་རྒྱས་པ། ཉི་ལྟར་འབར་བ། རི་ལྟར་བརྗིད་པ། རྡོ་རྗེའི་གོ་སྤྲས་པ། འཕྲོག་བྱེད་སྔོན་པོ་ལ་འགྱིང་བ། རྒྱལ་མཚན་འཕྱར་ཞིང་ནེའུ་ལེ་འཛིན་པ། འཛམ་བུ་གླིང་པ་ལ་ཉིན་བཞིན་འདོད་དགུའི་ཆར་ཐེངས་གསུམ་དུ་འབེབས་པ། རྟ་བདག་ཆེན་པོ་བརྒྱད་དཔའ་ཞིང་རཏལ་ཕོད་པ། བདུད་དང་དགྲ་ལ་སྡང་བ། དམ་ཚིག་ཅན་ལ་དུང་བས་བཀའ་ཉན་པ། ཡན་ལག་བཞི་པའི་སྡེ་དཔུང་ཆེན་པོ་བཅས་པ། སུས་ཀྱང་མི་ཐུབ་པའི་སྙེམས་འཆང་བ། གྱད་ཆེན་པོའི་རྩལ་ངོམ་པ། རྒྱལ་བའི་ཡས་གམ་ལ་གནས་པ། བསྟན་པ་སྤྱིའི་བྱ་ར་བགྱིད་པ། ཁྱབ་འཇུག་ཆེན་པོ་རཱ་ཧུ་ལ། དུད་པའི་ཁུ་བ་ལྟ་བུ། སྟོད་སྲིན་པོའི་གཟུགས་ཀྱིས་བར་སྣང་ཁྱབ་པ། སྨད་སྦྲུལ་མཇུག་འཁྱིལ་བས་རྒྱ་མཚོ་གང་བ། ལུས་ཐམས་ཅད་མིག་གིས་གཏམས་པ། ཞལ་དགུས་དགྲ་སྲོག་ཧུར་ཐུམས་སུ་ཟ་བ། ཞགས་པ་དང་མདའ་འཕང་བ། སྲིང་མོ་བཞི་དང་རོལ་བ། གཟའ་ཆེན་བརྒྱད་དུ་སྤྲུལ་པ། དུས་དང་ཚོད་ལ་དབང་བྱེད་པ། ལྷ་སྲིན་སྡེ་བརྒྱད་བསྡོངས་ཟླར་བསྐུལ་ཞིང་འདེད་པ། སྔོན་གྱི་སྣ་ཐོག་སེར་གློག་གིས་འདྲེན་པ། རྗེས་ཀྱི་ཤུལ་མེ་དཔུང་དུད་པས་མཚོན་པ། དུག་གི་རླངས་པ་འཐུལ་བ། ཕོག་འགྱེལ་དུ་གསོད་པ། ཞིང་སྐྱོང་ཆེན་པོ་མིའི་ལུས་ལ་སེང་གེའི་དབུ། རལ་པ་གསིག་པས་སེང་ཆུང་སྐར་ལྟར་རྒྱུག་པ། ཟ་འོག་བེར་གྱོན་ཅིང་སྟག་ཆས་གྱིས་སྐེད་བཅིངས་པ། མདུང་དང་ཐོད་པ་འཛིན་པ། ཡིད་ལྟར་མགྱོགས་པའི་བདུད་ཀྱི་རྟ་ལ་ཞོན་པ། ཁ་རག་གླིང་དགུའི་བདག་མཛད་པ། སེང་གདོང་དམར་མོ་གཟུངས་མར་བསྟེན་པ། འཇིགས་བྱེད་དུས་མཚན་ཕོ་ཉར་བཀོལ་བ། སྡེ་བརྒྱད་ཐམས་ཅད་འཁོར་དུ་ཁྲིད་པ། དགྲ་ལ་ཆས་ནས་བཟློག་པར་དཀའ་བ། རྫུ་འཕྲུལ་གྱི་རྩལ་ཆེ་བ། དྲག་ཤུལ་གྱི་རྔམས་མི་བཟད་པ། གཞན་གྱིས་མི་ཐུབ་པས་ཐུབ་དཀའི་མཚན་འཛིན་པ། ཇོ་མོ་བཀྲ་ཤིས་ཚེ་རིང་མ། མཛེས་པ་དང་རྒྱན་གོས་བདེ་སོགས་བརྒྱ་བྱིན་གྱི་མཆོད་པར་གསར་པ་དང་མི་ཕྱེད་པ། རྡོ་རྗེ་དང་ཚེ་བུམ་ཕྱག་ཏུ་བསྲེལ་བ་སེང་གེ་དཀར་མོ་སྲབ་མེད་དུ་འཕྱོ་བ་ལ་ཞོན་པ། སྲིང་མོ་བཞི་ཞབས་འབྲིང་བགྱིད་པ། སྡེ་བརྒྱད་ཀྱི་བུ་མོ་རང་རང་གི་ཟློས་གར་འབུལ་བའི་དགུང་ན་བཞུགས་པ། བོད་སྐྱོང་རྡོ་རྗེ་གཡུའི་སྒྲོན་མ། གསང་བའི་མཚན་ལྷན་ཅིག་སྐྱེས་མ། ཞི་ཞིང་ཞི་བ། དཀར་ཞིང་དཀར་བ། མཛེས་ཤིང་མཛེས་པ། རྒྱན་གྱིས་བརྒྱན་པ། ལྟ་བའི་མིག་སྦྲིད་པ། སྙན་གྲགས་ཀྱི་རྔ་བོ་ཆེ་ཕྱག་གིས་བསྐུལ་བ། རང་དང་ཕན་ཚུན་ཕྱེད་དཀའ་བའི་འབངས་མོ་འབུམ་གྱིས་བསྐོར་བ། གཤིན་རྗེ་ཁྲག་མདོག་ཡབ་ཡུམ། སྲིན་གླང་སྨྱོན་པ་ལ་ཞོན་པ། དྲག་པོའི་འཕོང་ལ་བྱང་བ། མ་ར་ཁྲག་སྐྱུག་གི་དམག་ཚོགས་བསགས་པ། གསོད་པར་རིངས་པ། ཟ་བའི་ཁ་གདངས་པ། ཉམས་པའི་གཤེད་དུ་འབབ་པ། དམ་ཚིག་ཅན་གྱི་སྟངས་འཛིན་པ། ལས་ཀྱི་གཤན་པ་དམར་པོ། གོ་ཆ་བགོས་པ། ཞུབ་ཅན་གྱི་རྟ་ལ་དཔའ་སྐྱེན་གྱི་རྩལ། གློག་ལྟར་འཁྱུག་པ་རླུང་ལྟར་འཕྱོ་བ། ཐོག་ལྟར་འབབ་པ། ཁྲ་ལྟར་གཞུང་བ། སྲོག་གཅོད་ཀྱི་གཤན་པ་ཐམས་ཅད་འཁོར་དུ་སྡུད་པ། རང་གི་ཐུགས་ཀའི་ཧཱུྃ་ལས་འོད་འཕྲོས་རང་རང་གནས་པའི་ས་ནས་བཛྭ་ས་མཱ་ཛཿཧཱུྃ། དག་པའི་ཞིང་ཁམས་ཆེན་པོ་ན། །ཞི་བ་ཉག་གཅིག་མིན་མི་སྣང་། །མི་མཇེད་ལ་སོགས་འཇིག་རྟེན་ན། །ཞི་ཆགས་ཁྲོ་དང་ཆེར་ཁྲོས་ཀུན། །དེ་བས་དད་དང་གདུང་ཤུགས་ཀྱིས། །བར་གཅོད་བདུད་དགྲ་བགེགས་བྱེད་དང་། །ལོག་པར་འདྲེན་རྣམས་ཚར་གཅོད་པའི། །དམག་དཔུང་ཆེན་པོར་སྤྱན་འདྲེན་ནོ། །མཐུ་རྩལ་ཆེན་པོའི་ནུས་སྟོབས་ཀྱིས། །ཕུན་སུམ་ཚོགས་པ་མ་ལུས་པ། །བདག་ཅག་རྣམས་ཀྱི་ལག་པའི་རྩེར། །འགུགས་པའི་ལྕགས་ཀྱུར་གཤེགས་སུ་གསོལ། །ཛཿཧཱུྃ་བཾ་ཧོཿདམ་ཚིག་པ་དང་གཉིས་སུ་མེད་པར་གྱུར། དམ་ཅན་རྣམས་ཀྱི་དཀྱིལ་འཁོར་དུ་མཆོད་པའི་སྤྲིན་རབ་འབྱམས་རྣམས་བདག་གི་སྨོན་ལམ་དང་བསོད་ནམས་ཀྱི་སྟོབས་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས་ཀྱིས་འབྱུང་བར་གྱུར་ཅིག ན་མཿསརྦ་བུདྡྷ་བོ་དྷི་སཧྶུ་ནཱཾ། སརྦ་ཐཱ་ཁཾ་ཨཱུུ་ཏེ་ཀྵྨྱ་ར་ཎ་ཧི་མཾ་ག་ག་ན་ཁཾ་ས་མནྟ་སྭཱ་ཧཱ། འཇིག་རྟེན་ཕན་པར་བཞེད་པ་ཡིས། །འཇིག་རྟེན་ཚུལ་གཟུང་ཁྱོད་རྣམས་ལ། །འཇིག་རྟེན་འཇིག་རྟེན་འདས་པའི་ཕྱིར། །འཇིག་རྟེན་གསུམ་བཏུད་ཕྱག་བགྱིའོ། །ལྷ་དབང་རྣམས་ཀྱང་ཕྱག་འགུལ་ཞིང་། །མཐོང་བ་ཐམས་ཅད་ཧ་འགལ་བའི། །སྤྱན་གཟིགས་རྒྱ་མཚོའི་རྦ་རླབས་ནི། །གྱེན་དུ་འཕྱུར་བས་ཁྱེད་དྲུང་བཀང་། །འཆིང་སྣོམ་གཟིགས་སྐུད་མྱང་བའི་ཆེད། །ལྷ་རྫས་མེ་ཏོག་སྤོས་དང་ནི། །མར་མེ་བྱུག་པ་ཞལ་ཟས་ཀྱི། །འཕྲེང་བ་ཁོར་ཡུག་བཞིན་དུ་བསྐོར། །གསེར་སྐྱོགས་གསེར་གྱི་རི་བོའི་ཁོངས། །མདངས་དྲི་རོ་བཅུད་བསམ་ཡས་པའི། །དཔའ་བོའི་སྨན་ཕུད་རོལ་པའི་མཚོ། །གསེར་ཁ་གཡུ་ཡིས་བརྒྱན་པས་མཆོད། །གཡུལ་ངོར་མཚོན་ཕོག་འཆིར་གཏུགས་པའི། །ལུས་ལ་ལང་ལོང་སྐྱེས་ནས་སུ། །འབབ་སར་ལྦུ་བ་གསོབ་ཆགས་ཀླུང་། །དམར་གྱི་ཨརྒྷཾ་ཆེན་པོར་སྦྲེང་། །ཞིམ་ཞིམ་ལྷ་ཀླུ་མི་ཡི་ཟས། །བདའ་བདའ་བལྡག་གཞིབ་བཅའ་བའི་སྡེས། །བརྒྱན་བརྒྱན་བྱིན་རླབས་བ་ལིང་ཏ། །ཁ་ཁ་ཁཱ་ཧི་དམ་ཅན་ཚོགས། །ཨོཾ་བཛྭ་ཀ་ཝུ་བ་མ་ཧཱ་ཀཱ་ལ་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མཧཱ་ཀཱ་ལི་ཨི་དཾ་སོགས། ཨོཾ་བཻ་ཤྲ་ཝ་ཎ་ཨི། ཨོཾ་རཱ་ཧུ་ལ་པཀྵ་མེ་ཀེ་ན་ཨི། ཨོཾ་མཧཱ་ཀཱ་ལ་སིདྷ་མུ་ཁ་ཨི། ཨོཾ་པཉྩྨ་ཌཱ་ཀ྄ི་ནཱི་ཨི་དཾ། ཨོཾ་བཛྭ་ལ་ལ་ལི་ལི་ཨི། ཨོཾ་ཡ་མ་རཀྟ་ཨི། ཨོཾ་ཌོཾ་བྷི་རཀྟ་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཨོཾ་ཨ་ཀཱ་རོ་མུ་ཁཾས་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭ་ཏ་ཨོཾ་ཨཱཿཧཱུྃ་སོགས་བདུན་བདུན་གྱིས་འབུལ། རྒྱས་པར་སྤྲོ་ན་མངོན་རྟོགས་རེའི་མཐར། ཁྱེད་ལ་གསེར་ཀྱི་སྐྱེམས། དམར་གྱི་ཆོལ། བ་ལིང་གཏོར་མ་འབུལ་ལོ། །གསོལ་ལོ། །མཆོད་དོ། །བདག་གིས་བཅོལ་བའི་འཕྲིན་ལས་སྒྲུབ་པར་མཛད་དུ་གསོལ། ཅེས་བཏགས་པས་མཆོད། །ཧཱུྃ། དྲག་པོ་ཇི་བཞིན་ཚེ་ཡི་རིག་འཛིན་དང་། །གདོང་བཞི་ཇི་བཞིན་ལེགས་ཕྱོགས་དྲན་སྐྱེན་པ། །འདོད་ལྷ་ཇི་བཞིན་ཐམས་ཅད་ལས་རྒྱལ་དང་། །ཁྱབ་འཇུག་ཇི་བཞིན་སྐྱུ་འཕྲུལ་རྩལ་ཆེ་བ། །བརྒྱ་བྱིན་ཇི་བཞིན་ཅི་འདོད་མོད་ལ་འགྲུབ། །རྣམ་སྲས་ཇི་བཞིན་བང་མཛོད་ཕྱུག་པ་དང་། །མི་དབང་ཇི་བཞིན་ས་གཞི་བདག་བྱེད་པའི། །ཕུན་སུམ་ཚོགས་པ་ཐམས་ཅད་བདག་ལ་སྩོལ། །ཅེས་དངོས་གྲུབ་བླངས་ཏེ། དམ་ཅན་རྒྱ་མཚོ་རྣམས་ལ། ཡོན་ཏན་བསྔགས་པ་རྒྱ་མཚོ་སྒྲོག་པའི་དབྱངས་རབ་འབྱམས་སེམས་ཅན་གྱི་ཁམས་ཐམས་ཅད་དང་། ཆོས་ཀྱི་དབྱིངས་སུ་གྲགས་པ་འཇུག་པར་གྱུར་ཅིག ན་མཿསརྦ་བུདྡྷ་བོ་དྷི་སཧྶུ་ནཱཾ། སརྦ་ཏཱ་སཾ་ཀུ་སུ་མི་ཏ། ཨ་དྷི་ཛྙྱཱ་ར་ཤི་ར་ནི། ན་མོ་སྟུ་ཏེ་སྭཱ་ཧཱ། རྐང་པ་བརྒྱད་པ་དང་། ཏིལ་མར་མ་འདོན། དེ་ནས། ཧཱུྃ། སངས་རྒྱས་ཀུན་གྱི་འཁོར་ལོ་གསུམ། །བདེ་དངོས་གཅིག་པུར་སྡོམ་མཛད་པ། །ཧེ་རུ་ཀ་དཔལ་ཐུགས་རྗེའི་གར། །ཡེ་ཤེས་མགོན་པོ་ཁྱོད་ལ་བསྟོད། །སྐུ་མཐོང་ཁྲོ་རྒྱལ་རྣམས་བྲེད་པས། །འདུལ་འོས་བདུད་དགྲ་བགེགས་ཐམས་ཅད། །སྙིང་ནི་ཤུབས་སོན་ལྐོག་མར་འཚངས། །སྔགས་པའི་མོད་གསོད་ཁྱོད་ལ་བསྟོད། །གསུང་ངག་གསང་སྔགས་ཡིད་སྐྱོབ་པ། །མ་རུངས་སེམས་ལ་རང་ལས་ཀྱིས། །ཤུབ་བུར་བཟླས་པའང་དམོད་པའི་མཚོན། །རྣོན་པོར་ལྷུང་བ་ཁྱོད་ལ་བསྟོད། །སྙིང་རྗེའི་རོལ་མོ་སྒྱུ་སྟབས་ལ། །སྦྱོར་དང་སྒྲོལ་བའི་སྟངས་ཀ་འབུལ། །ཕ་རོལ་འཇོམས་ལ་གཏུམ་ཆེ་བའི། །ཟློས་གར་མཛད་པ་ཁྱོད་ལ་བསྟོད། །བྷྱོ། གསང་བའི་གནས་ཀྱི་ཨེ་གྲུ་གསུམ། །འབྱུང་ལྔ་བསྐྱེད་དང་སྡུད་པའི་གཞིས། །དང་པོའི་མར་ཤེས་ལྷ་དབང་རྣམས། །ཕྱག་འཚལ་མཆོད་པ་ཁྱོད་ལ་བསྟོད། །ཁྱོད་ཚུལ་གཏིང་ཟབ་རྒྱ་མཚོ་ཐུགས། །ཁྱོད་བརྟན་བརླིང་ལ་རི་རབ་གཡོ། །ཁྱོད་མཐུ་ཀུན་སྟེར་ནོར་བུ་འཛངས། །དེ་བས་རྟག་ཏུ་ཁྱོད་ལ་བསྟོད། །འཁོར་གསུམ་རྟོག་པའི་ཕ་རོལ་གྱི། །ཤེས་རབ་གཟུགས་འཛིན་མངལ་གང་དུ། །རྣམ་པར་ཐར་པའི་སྒོ་གསུམ་ནས། །འཇུག་པའི་རེ་བས་ཁྱོད་ལ་བསྟོད། །མི་བསུན་བདུད་ཕྱོགས་གཡག་རྒོད་སྡེ། །འཕོང་གིས་རོར་སྒྱུར་རྔན་ཆས་པ། །གྱིམ་ཤཾ་ཧོར་གྱི་གྱད་ལྟ་བུའི། །རྟ་བརྒྱད་ཀྱིས་བསྐོར་ཁྱོད་ལ་བསྟོད། །མཆེ་བའི་མདུན་ན་ཉི་ཟླའི་དབུགས། །ཐིམ་བཞིན་ཕས་རྒོལ་དགྲ་བོ་ཡི། །སྲོག་དབུགས་ཧུར་ཐུམ་རྦད་གཏོང་བའི། དྲེགས་པའི་དཔོན་པོ་ཁྱོད་ལ་བསྟོད། །སེང་གེའི་སྒྲ་ཡིས་གནམ་འཕྲོགས་ཞིང་། །བདུད་རྟ་བརྒྱུགས་པས་ས་གཡོ་བ། །ཕྱག་གིས་མཚོན་བསྣུན་སྲོག་བཅད་རོས། །མདུན་འཇིག་སྐྱི་བུང་ཁྱོད་ལ་བསྟོད། །མཛེས་མ་ཟླ་བའི་མེ་ལོང་ལ། །སྒྲིབ་བྱེད་ལྷ་རྫས་རྟགས་ཀྱིས་ཅི། །འདོད་དབང་སོང་དོགས་གྲུབ་པ་ཡི། །བརྒྱ་བྱིན་གྱིས་བསྒྲིབས་ཁྱོད་ལ་བསྟོད། །ལྷན་ཅིག་སྐྱེས་ཞལ་པདྨའི་དཔལ། །སྤྱན་འབྲས་མཐིང་ཁའི་ཨུཏྤལ་ལ། །ཆགས་པའི་ཞགས་པས་སྲིད་པ་གསུམ། །དམ་པོར་འཆིང་བ་ཁྱོད་ལ་བསྟོད། །ལངྐའི་མགྲིན་པ་གཅིག་གཏུབས་པས། །རཱ་མ་ཎ་ཁེངས་གནམ་ལྕགས་མདས། །ཉམས་པའི་མགྲིན་པ་ཀུན་བཅད་ཀྱང་། ཁེངས་པ་མེད་པ་ཁྱོད་ལ་བསྟོད། །ཞུབ་ཅན་གཤན་པའི་སྡེ་དཔུང་རྣམས། །བསྟན་ལ་གནོད་པ་གར་འདུག་པར། །ཇག་པར་ཆས་ཏེ་སྲོག་དབུགས་ནི། །མེ་ལྟར་ལེན་པ་ཁྱོད་ལ་བསྟོད། །དུས་བཟང་པོ་ལ་ཙཱ་རུའི་སྟོན་མོས་ཀྱང་མཆོད་པར་བྱའོ།། །།སརྦ་མདྒ་ལཾ།། །། བསང་དཔེ་བཀྲ་ཤིས་རེ་སྐོང་།བསང་དཔེ་བཀྲ་ཤིས་རེ་སྐོང་བཞུགས་སོ། །བླ་མ་དམ་པའི་ཞབས་ལ་ཕྱག་འཚལ་ལོ། །བཀྲ་ཤིས་ཟླ་བ་ཡར་གྱི་ངོ་། །གཟའ་སྐར་དགེ་བའི་ནམ་སེང་ལ། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྡེ་བརྒྱད་ཇི་སྙེད་པའི། །གཏོར་མ་དང་ནི་གསེར་སྐྱེམས་བཤམས། །ཕྱེ་མར་ཆུ་གཙང་ཉེར་སྤྱོད་ལྔ། །དཀར་སྣ་མངར་སྣ་ཁྲག་སྣ་དང་། །ལིངྒ་མཆོད་པའི་རྫས་སུ་བཀོད། །སྤོས་སྨན་ཤིང་སྣའི་བསངས་སྦྱར་ཞིང། །མདའ་དང་འཕན་མཛེས་མཁའ་ལ་འཕྱར། །གནམ་ལ་འཕུར་དང་ས་ལ་རྒྱུའི། །སྲོག་ཆགས་གཟུགས་དང་རིན་ཆེན་བདུན། །བཀྲ་ཤིས་རྫས་སོགས་ཙཀྐ་ལི། །གཏོར་མའི་ཐད་ཀྱི་བར་སྣང་བསྒྲེངས། །བདག་ཉིད་བདེ་བའི་སྟན་ལ་འདུག །ནམ་མཁའ་མཛོད་ཀྱི་ཕྱག་རྒྱས་ནི།། ཨོཾ་སརྦ་བིད་པུ་ར་པུ་ར། སུ་ར་སུ་ར། ཨ་ཝརྟ་ཡ་ཝརྟ་ཡ་ཧོ་བཛྭ་སརྦ་ཀྵྨྱ་ར་ཎ་ཁཾ་སྭཱ་ཧཱ། ཞེས་བརྗོད་མགྲོན་རྣམས་ཐམས་ཅད་ཀྱི། །ཡིད་དགའི་མཆོད་རྫས་མཁའ་ཁྱབ་བསམ། །རྔ་སིལ་གླིང་བུ་དུང་སོགས་དང་། །སྙན་པའི་དབྱངས་ཀྱིས་འདི་སྐད་གྱེར། ། ཀྱཻ། ཀ་དག་ངོས་གཟུང་བྲལ་བའི་དབྱིངས། །ལྷུན་གྲུབ་མ་འགགས་འཆར་སྒོའི་དཔྱིད། །མཉམ་ཉིད་ཐུགས་རྗེའི་ཀློང་ལས་སུ། །བདག་ཉིད་པདྨ་འབྱུང་གནས་སྐུ། །ཅུང་ཟད་ཁྲོ་བའི་ཉམས་ལྡན་པར། །དབུ་ལ་པད་ཞྭ་རྒོད་ལྡེམ་གསོལ། །ཟ་འོག་བེར་དང་ཆོས་གོས་བཞེས། །རྡོ་རྗེ་བདུད་རྩིའི་ཐོད་པ་བསྣམས། །ཁ་ཊྶཱཾ་ག་ནི་ཕྲག་གཡོན་བཀལ། །རྒྱལ་པོ་ཆེན་པོའི་རོལ་པས་བཞུགས། །གཡས་སུ་ལྷ་ལྕམ་མནྡྷ་ར། །སྔོ་སངས་གྲུབ་པའི་རྣལ་འབྱོར་མ། །གཡོན་དུ་མཁར་ཆེན་མཚོ་རྒྱལ་བཟའ། །དཀར་མོ་གཉིས་ཀའང་བདུད་རྩི་འབུལ། །སྐུ་གསུང་ཐུགས་ལ་ཨོཾ་ཨཱཿཧཱུྃ། །དེ་ལས་སྤྱན་འདྲེན་འོད་ཟེར་འཕྲོས། །ཀྱཻ། འདི་ནས་ཉི་མ་ལྷོ་ནུབ་མཚམས། །རྔ་ཡབ་གླིང་གི་ཡུལ་གྱི་དབུས། །ཟངས་མདོག་དཔལ་གྱི་རི་བོའི་རྩེའི། །པདྨ་འོད་ཀྱི་གཞལ་ཡས་ནས། །སྲིན་པོ་ཁྲིམས་ལ་འགོད་པའི་རྒྱལ། །པདྨ་ཐོད་ཕྲེང་རྩལ་ཡབ་ཡུམ། །འཁོར་དུ་དཔལ་བོ་མཁའ་འགྲོས་བསྐོར། །འཇའ་དང་འོད་དུ་པུ་རུ་རུ། །དད་པས་སྤྱན་འདྲེན་ཚུར་གཤེགས་ལ། །གནས་མཆོག་འདི་རུ་བྱིན་ཅིག་ཕོབ། །སྒྲུབ་མཆོག་བདག་ལ་དབང་ཞིག་བསྐུར། །མཐུན་རྫས་རྣམས་ལ་ནུས་པ་བསྐྱེད། །ཀྱཻ། རིག་འཛིན་བླ་མའི་ཚོགས་ཀྱི་རྗེ། །དཀྱིལ་འཁོར་འཁོར་ལོའི་དབུས་ཀྱི་མགོན། །མ་མོ་མཁའ་འགྲོ་རོལ་པའི་ཡབ། །པདྨ་འབྱུང་གནས་ཁྱོད་ལ་བསྟོད། །ཕྱི་ནང་གསང་བ་དེ་ཁོ་ནའི། །མཆོད་རྫས་ཅི་མཆིས་ཀུན་ཏུ་བཟང་། །མཆོད་པའི་སྤྲིན་ལས་གང་སྤྲུལ་པ། །དེ་བཞིན་བདག་གིས་འབུལ་གྱིས་བཞེས། །ཐོག་མ་མེད་ནས་ད་ལྟའི་བར། །བཅས་རང་ཁ་ན་མ་ཐོའི་སྡིག །བགྱིས་དང་འགྱིད་རྩལ་ཡི་རངས་བ། །ཐམས་ཅད་ཁྱོད་ཀྱི་སྤྱན་སྔར་བཤགས། །དགེ་བ་བྱེད་ལ་རྗེས་ཡི་རངས། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །དགེ་བ་བྱང་ཆུབ་ཐོབ་ཕྱིར་བསྔོ། །འཁོར་བཅས་བདག་དང་གཉིས་མེད་གྱུར། །ཛཿཛཿའགུགས་བྱེད་ལྕགས་ཀྱུ་འཕྲོས། །ཀྱཻ། ཀུན་བཟང་ཐུགས་རྗེར་རོལ་པའི་ཚེ། །ཀུན་ཁྱབ་བླ་མ་རིན་པོ་ཆེ། །བརྟན་གཡོའི་རྣམ་འཕྲུལ་མི་ཟད་པས། །བྱིན་རླབས་ཡ་མཚན་འགྱེད་པར་མཛད། །ཁམས་དྲུག་དག་པའི་སྣང་བརྙན་ལ། །ཞི་བ་དང་ནི་ཁྲོ་ཆགས་ཀྱི། །རྒྱལ་བའི་དཀྱིལ་འཁོར་ཀུན་ཤར་ནས། །མཆོག་དང་ཐུན་མོང་དངོས་གྲུབ་སྩོལ། །འབྱུང་ལྔའི་ཟད་པ་གཞོམ་མེད་སྒྲ། །གསང་སྔགས་རིག་སྔགས་གཟུངས་སྔགས་དང་། །སྙིང་པོའི་ཆོས་ཕུང་སྐལ་བ་བཞིན། །རང་རང་སོ་སོའི་སྐད་དུ་གྲགས། །ནཱ་ཌི་དབུ་མར་རེངས་པའི་གཟུགས། །ས་གསུམ་རོལ་པའི་ཚོགས་ཀྱི་མཆོག །མཁའ་གྲོ་མ་ཡི་དྲྭ་བ་སྡོམ། །ཕྱི་ནང་གསང་བའི་བར་ཆད་སེལ། །སྐྱབས་ཀྱི་དམ་པ་ཁྱེད་རྣམས་ལ། །གཉིས་སུ་མེད་པར་སུ་སྐྱབས་པ། །དེ་ནི་སྟོབས་ཆེན་བདུད་བཞིའི་གཡུལ། །མཉམ་ཉིད་རིག་པའི་ངང་དུ་འཇོམས། །དེ་ཕྱིར་དེང་ནས་ཁྱེད་རྣམས་ལ། །མི་ཕྱེད་བློ་ཡིས་བདག་སྐྱབ་ཀྱིས། །བདེན་མིན་རྫུན་མིན་ཆུ་ཟླའི་དཔེས། །མཚོན་པའི་རོལ་པས་འདིར་གཤེགས་ཤིག །ཀྱཻ། དཀོན་མཆོག་གསུམ་པོ་འདུས་པའི་དཔྱིད། །རྡོ་རྗེ་སྲིན་པོ་ཁྲོ་བོའི་རྒྱལ། །མཧཱ་ཀཱ་ལ་ཕྱག་བཞི་པ། །སྤྲུལ་པའི་ཞིང་སྐྱོང་ཆེན་པོར་སྣང་། །ཁྲག་འཐུང་ཆེན་པོའི་ཚོགས་ཀྱི་རྗེ། །འཇིགས་བྱེད་ཁྲོ་བོ་སྤྲོ་བའི་གཞི། །སྦྱོར་བའི་ཡུམ་ནི་ཙནྜི་ཀ །སྔགས་བདག་ཆེན་མོ་རལ་གཅིག་མ། །འདོད་པ་ཁམས་ལ་དབང་སྒྱུར་ཚེ། །དཔལ་ལྡན་དུད་སོལ་ལྷ་མོར་གྲགས། །དུང་སྐྱོང་རེ་ཏི་མཆེད་བཞི་དང་། །དམག་ཟོར་རང་བྱུང་རྒྱལ་མོ་སོགས། །དབྱིངས་གྱི་མ་མོ་ཅིར་ཡང་རྫུ། །འགུགས་བྱེད་གསོད་བྱེད་སྒྲོལ་བྱེད་དང་། །རྡོ་རྗེ་རིན་ཆེན་པདྨ་དང་། །ལས་དང་ཕྲ་མེན་སྒོ་སྐྱོང་བཞི། །སྲིད་པའི་མ་མོ་ཡོངས་ཀྱིས་བསྐོར། །འཁྲིལ་བའི་ཡུམ་ནི་མཁའ་འགྲོ་དྲུག །གདོང་ཅན་བརྒྱད་པོ་དག་ཀྱང་འཕྲུལ། །ཡིད་ལ་འདོད་པ་རྣམས་སྟེར་ལ། །བཀྲ་ཤིས་ཚེ་རིང་མཆེད་ལྔར་སྣང་། །དམ་ཚིག་ཅན་གྱི་མགོན་སྐྱབས་ལ། །བོད་ཡུལ་ལྷན་ཅིག་སྐྱེས་མ་སྟེ། །རྡོ་རྗེ་གཡུ་སྒྲོན་མར་ཡང་གྲགས། །བོད་ཁམས་དཀར་པོ་སྐྱོང་བ་ལ། །བསྟན་མ་བཅུ་གཉིས་དག་ཏུ་ཤར། །དཔལ་གྱི་ལྷ་མོ་རོ་ཟན་མ། །རྡོ་རྗེ་སྣང་ཡོན་རབ་བརྟན་དང་། །འཇིག་རྟེན་ཁམས་ཀྱི་མོ་རྒྱུད་ཀུན། །དེ་ཡི་བཀའ་སྡོད་ཕོ་ཉ་མོ། །དཔལ་ལྡན་མགོན་པོའི་བློན་པོ་ནི། །ལེགས་ལྡན་ནག་པོ་ཆེན་པོ་སྟེ། །བྱ་རོག་གདོང་ཅན་འཇིག་པར་སྟོན། །མཆེད་ནི་གསུམ་བཅས་གསང་བའི་བུ། །དེ་ནི་ལྷ་དམག་དབུགས་འབྱིན་ལ། །གྲི་གུག་རྗེ་བློན་འབངས་སུ་མཛད། །ཕས་ཀྱི་དམག་དཔུང་འཇོམས་པ་ལ། །བིང་ཆེན་ཐོགས་པ་སྤྲུལ་པ་ཡིན། །མུ་སྟེགས་སྔགས་བཟློག་མཁན་གྱི་གཤེད། །མ་ནིང་ནག་པོ་ཆེར་ཡང་སྣང་། །གཞན་ཡང་གུར་གྱི་མགོན་པོ་དང་། །ཕྱག་དྲུག་པ་དང་ཨ་གྷོ་ར། །རྗེ་བཙན་སེང་གེ་སྟག་ཞོན་དང་། །སྲོག་ཏིག་ཏྲཀྴད་བེར་ནག་གྱོན། །སྐུ་དང་གསུང་དང་ཐུགས་དང་ནི། །ཡོན་ཏན་ཕྲིན་ལས་མགོན་པོའི་རིགས། །སྐུ་མདོག་ཕྱག་མཚན་མ་ངེས་པ། །ཅིར་ཡང་རྫུ་འཕྲུལ་སྟོབས་ལས་འགྱེད། །ལས་མཛད་མགོན་པོ་ཞལ་བཞི་པ། །ཞིང་སྐྱོང་སེང་གེའི་གདོང་པར་བསྟན། །མ་ཧེ་ཁྲོས་པའི་མགོ་ཡང་འགར། །སིང་ན་ར་མ་དང་ནི་རོལ། །དུས་མཚན་སྲིན་པོ་ཕོ་ཉར་བསྐུལ། །སྡེ་བརྒྱད་དམ་ཚོགས་དགྲ་ལ་སྤྲོ། །ཁྱབ་འཇུག་ཆེན་པོ་རཱ་ཧུ་ལ། །འཇིགས་བྱེད་དྲེགས་པའི་དཔོན་དུ་བསྐོས། །ཀླུ་སྲིན་གདོང་མོ་གཟའ་ཆེན་བརྒྱད། །སྐར་མའི་ལྷ་ནི་དེ་ཡི་བྲན་། །དགྲ་བོའི་སྲོག་ལ་རྔམ་ཟས་བྱེད། །རྒྱལ་པོ་ཆེན་པོ་རྣམ་ཐོས་སྲས། །ཁྲོས་པ་གནོད་སྦྱིན་ཁྲག་རལ་ཅན། །ནོར་རྒྱུན་མ་དང་རྟག་ཏུ་སྦྱོར། །རྟ་བདག་ཡུམ་བཅས་བརྒྱད་ལ་སོགས། །གོས་སྔོན་ཅན་ནི་ཐམས་ཅད་འཁོར། །སེར་ཆགས་ཡོངས་ཀྱི་དགྲ་ལྷ་སྟེ། །ལྷོ་ཕྱོགས་དུར་ཁྲོད་ཙཱ་རི་ཏྲའི། །གཤིན་རྗེའི་རྒྱལ་པོ་ཡུམ་དང་ནི། །གཤེད་བཞི་གཤིན་རྗེའི་ཕོ་ཉ་རྣམས། །དམ་ཉམས་གསོད་པའི་གཤན་པར་བསྔགས། །ཀྱཻ། རྒྱལ་པོ་སྐུ་ལྔ་ཡུམ་ཆེན་ལྔ་། །བློ་པོ་ལྔ་དང་སྤྲུལ་པ་ལྔ། །ལས་མཁན་གནོད་སྦྱིན་རྩེ་མར། །འཁོར་གྱི་རུ་འདྲེན་སྡེ་བཞིར་བཅས། །སྒྲོལ་གིང་ཆེན་པོར་བྱིན་གྱིས་བརླབས། །དྲེགས་པའི་སྡེ་དཔོན་སུམ་ཅུ་དང་། །དྲེགས་པ་བཅོ་བརྒྱད་བཀའ་ལ་ཉན། །རོ་ལངས་བརྒྱ་དང་ནག་པོ་སྟོང་། །ཤ་ཟ་འབུམ་དང་མ་མོའི་སྡེ། །ས་ཡ་གནོད་སྦྱིན་ཁྲི་དང་ནི། །གཙང་རིགས་མགོན་པོ་བདུན་ཅུ་ལྔ། །ཕོ་ཉ་དྲུག་ཅུ་རྩ་བཞི་དང་། །འཇིགས་བྱེད་དགུ་དང་སྲིང་མོ་བཞི། །མ་མོ་ཆེན་མོ་བདུན་རྣམས་དང་། །འབར་མ་བརྒྱད་རྣམས་བཀའ་སྡོད་ལགས། །བསེ་མཁར་གནས་པའི་མ་རུ་རྩེ། །བེག་རྩེ་མིང་སྲིང་གཤན་པས་བསྐོར། །ཤཱན་ཏ་པུ་རིར་གནས་པ་ཡི། །ཚོགས་བདག་གླང་པོའི་གདོང་པ་ཅན། །སྐྱེས་བུ་ཆེན་པོ་རྡོ་རྗེ་ལེགས། །མཆེད་འཁོར་སུམ་བརྒྱ་དྲུག་ཅུའི་གཙོ། །དེ་ཝི་ཀོ་ཊི་ལ་དགའ་བའི། །སྙོན་ཁའི་རྗེ་བཙན་བཙན་རྒོད་ཆེ། །ཇག་པ་མེ་ལེན་ལ་སོགས་པ། །ཕྱི་ནང་གསང་བ་སྦས་པ་དང་། །བསྟན་སྲུང་དྲག་པོ་སྔགས་དང་ནི། །རྟགས་ཤིང་ཆགས་དང་ལས་བྱེད་པའི། །ལྷ་སྲིན་སྡེ་བརྒྱད་ཐམས་ཅད་འཁོར། །དེ་ལྟའི་ཆོས་སྐྱོང་ཆེན་པོ་ཁྱོད། །སྤྲུལ་པ་ཡང་སྤྲུལ་ལས་མཁན་བཅས། །རྡོ་རྗེའི་གདན་དུ་རྟག་པར་གནས། །བསིལ་བའི་ཚལ་དུ་ཕོ་བྲང་བཏབ། །དུར་ཁྲོད་ཆེན་པོ་བརྒྱད་དུ་རོལ། །ཉི་ཤུ་རྩ་བཞིའི་ཞིང་ན་དགྱེས། །འཇིག་རྟེན་ཁམས་རྣམས་མཚན་མོ་ཉུལ། །ནང་པ་རྣམས་ཀྱི་དགྲ་ལྷ་སྟེ། །ཕྱི་པ་རྣམས་ཀྱི་གཤེད་མ་ཡིན། །དམ་པའི་གཙུག་ལག་མ་ལུས་སྐྱོང་། །དམ་ཚིག་ཅན་གྱི་སླད་བཞིན་འབྲང་། །མནའ་ཟན་ཀུན་གྱི་སྲོག་དབུགས་འགམས། །ཞིང་བཅུ་ཚང་བའི་སྙིང་ཁྲག་འཇིབ། །ནག་པོའི་ཕྱོགས་རྣམས་རླག་པར་བྱེད། །ཕས་ཀྱི་བརྩམས་པའི་ལས་རྣམས་འཇོམས། །དམ་ཅན་རྒྱ་མཚོ་ཁྱེད་ཐམས་ཅད། །དད་པ་དང་ནི་དམ་ཚིག་གིས། །མཐུན་པའི་རྫས་ལ་སྤྱན་འདྲེན་གྱིས། །མ་ཐོགས་མྱུར་དུ་གཤེགས་སུ་གསོལ། །ཀྱཻ། མཐོ་བ་སྲིད་པའི་རྩེ་མོ་ནས། །དམའ་བ་མནར་མེད་ལྕགས་ཀྱི་གཞིའི། །བར་དུ་གནས་པ་འབྱོན་འོས་ཤིང་། །ཁོམ་པ་མིང་དུ་མ་འཚལ་བ། །ཐམས་ཅད་ཀྱང་ནི་འབོད་ལགས་སོ། །ས་བདག་རྗེ་བློན་བཅུ་བཞི་དང་། །ལོ་ཟླ་ཞག་ཚེས་དུས་དག་ལ། །ཕན་གནོད་དབང་བྱེད་ཐམས་ཅད་དང་། །པུ་རྒྱལ་བོད་ཀྱི་རྒྱལ་ཁམས་ཀྱི། །སྲིད་པའི་ལྷ་རབས་མཆེད་དགུ་དང་། །རྗེ་ཡི་མགུར་ལྷ་བཅུ་གསུམ་དང་། །འབངས་ཀྱི་སྲོག་ལྷ་བཅུ་གཉིས་སོགས། །ལྷ་སྲིན་གཉན་པོ་ཐམས་ཅད་དང་། །དཔལ་གྱི་ལྷ་ས་བསམ་ཡས་སོགས། །ཆོས་གཞི་ཇི་སྙེད་སྐྱོང་རྣམས་དང་། །ཁྱད་པར་གང་བ་བཟང་པོ་དང་། །མི་སྔོན་རྟ་སྟོན་སྒོ་བདུད་པ། །ཇོ་བོ་རྩེ་བོ་རགས་མའི་བཙན། །དེ་དག་ལ་སོགས་དཀར་རྒྱུད་ཀྱི། །གདན་ས་དབེན་གནས་སྲུང་རྣམས་དང་། །ཁྱད་པར་ཡུལ་ཁམས་འདི་ཉིད་ཀྱི། །ཡུལ་ལྷ་གཞི་བདག་ཐམས་ཅད་སོགས། །ཕོ་ལྷ་དགྲ་ལྷ་ཞང་ལྷ་དང་། །མོ་ལྷ་ཡུལ་ལྷ་ལ་སོགས་པའི། །མགོན་སྐྱབས་སྟོངས་གྲོགས་བྱེད་པའི་ལྷ། །ཐམས་ཅད་མ་ལུས་འདིར་གཤེགས་ཤིག །ཀྱཻ། པདྨ་རཱ་གའི་སྣམ་བུའི་སྟེང་། །རིན་ཆེན་རྣམ་པ་ལྔ་བརྩིགས་པ། །ཕྱི་ནང་ཐམས་ཅད་ས་ལེ་བ། །འཛམ་བུ་གསེར་གྱི་བ་གམ་བསྐོར། །གཡུ་ཡི་གདུང་ནས་མུ་ཏིག་གི །དྲ་བ་དྲ་ཕྱེད་མཛེས་པར་སྦྲེལ། །ཕྱི་རོལ་འཕྱར་བའི་མར་གད་ཀྱི། །བྱ་འདབ་དངུལ་གྱི་ཤར་བུས་བརྒྱན། །སྟེང་དུ་ཟླ་ཤེལ་པུ་ཤུ་ལ། །གདུགས་དང་རྒྱལ་མཚན་བ་དན་སོགས། །མཛེས་པའི་རྒྱན་ཆ་ཀུན་གྱིས་སྤྲས། །རྒྱ་ཕུབས་འཕར་མ་བདུན་བརྩེགས་ལ། །ཕྲ་མ་ཁོད་སྙོམས་བར་དུ་སྣང་། །ཕྱི་ནང་ལོགས་ནི་དབང་པོའི་གཞུས། །ཅི་དགུ་རི་མོའི་གཟུགས་སུ་བྲིས། །མཐིལ་ནི་གསེར་གྱི་མིག་མངས་རིས། །བཻ་ཌཱུརྻ་ཡི་མཐིང་ཞལ་ཅན། །ནོར་བུའི་བླ་བྲེ་ཕུབ་པའི་འོག །རིན་ཆེན་ཁྲི་གདན་ཡིད་འོང་ལ། །དཀོན་མཆོག་སྲིད་ཞུ་མགྲོན་རྣམས་དང་། །ཞི་བའི་ལས་ལ་དགྱེས་རྣམས་བཞུགས། །ཀྱཻ། གྲུ་གསུམ་མཐིང་ནག་འབར་བའི་ཀློང་། །མ་ཏྲཾ་རུ་ཏྲ་བསྒྲལ་བའི་གཞིར། །གནམ་ལྕགས་ཞུན་དང་ཁྲག་ཞག་གིས། །ཐོད་པ་སྐམ་རློན་བརྩེགས་པའི་མཁར། །སྟེང་དུ་ཞིང་གི་ཐོག་ཕུབ་པ། །ལོགས་སུ་རྒྱུ་རློན་མཁལ་མ་སྙིང་། །ནང་ཁྲོལ་མགོ་བོའི་འཕྲེང་བས་བརྒྱན། །ཁྲག་ཞལ་ཀླད་པ་འཁྲུག་པའི་མཚོའི། །བམ་ཆེན་ཀེང་རུས་བརྩིགས་པའི་ཁྲིར། །མགོན་པོ་ཡོན་ཏན་མགྲོན་ལ་སོགས། །མངོན་སྤྱོད་ལས་ལ་དགྱེས་རྣམས་བཞུགས། །ཀྱཻ། བྱིན་རླབས་རྩ་བའི་བླ་མ་དང་། །དངོས་གྲུབ་འབྱུང་བའི་ཡི་དམ་ལྷ། །འཕྲིན་ལས་མཛད་པའི་མཁའ་འགྲོ་དང་། །བར་ཆད་སྲུང་བའི་དམ་ཅན་དང་། །མགོན་སྐྱབས་སྟོངས་གྲོགས་བྱེད་པའི་ལྷ། །བསྟོད་འོས་ཀུན་ལ་ཕྱག་བགྱིའོ། །ཀྱཻ། འཇིག་རྟེན་པ་དང་མཐུན་འཇུག་ཕྱིར། །བྱིན་གྱིས་བརླབས་པ་སྤོས་ཀྱི་ཆུ། །དཀར་སྣ་འོ་མ་དམར་སྣའི་ཁྲག །སྐུ་གསུང་ཐུགས་ལ་ཁྲུས་སུ་འབུལ། །ཀྱཻ། དབྱིབས་མཛེས་མདངས་མཚར་མནྡ་ར། །དབུ་ལ་བཅིང་པའི་ཐོད་དུ་བཤམས། །ཙན་དན་སྤོས་དཀར་ཨ་ཀ་རུ། །ནག་པོ་བསྲེགས་པ་སྣོམ་པར་སྦྱར། །བརྒྱ་བྱིན་ཐོགས་པའི་ནོར་བུའི་བྱིན། །མུན་སེལ་མར་མེ་གཟིགས་མོར་ཆེ། །བསམ་གཏན་ལྷ་ཡི་དག་བྱེད་ཆབ། །ཐུགས་ལ་སིམ་པ་སྐྱེད་པའི་སྐྱེམས། །རོ་བརྒྱ་ལྡན་པ་མཐོ་རིས་ཟས། །ལྗགས་ཀྱིས་མྱང་བའི་དཔལ་དུ་ལྷགས། །རྔ་སིལ་གླིང་བུ་པི་ཝང་གི །སྒྲ་སྙན་གླུ་བཅས་སྙན་ལ་འཇེབས། །གཟུགས་སྒྲ་དྲི་རོ་རེག་བྱ་མའི། །ལྷ་མོ་བཞིན་མཛེས་གར་གྱིས་རོལ། །འཁོར་ལོ་ནོར་བུ་རྟ་གླང་བློན། །བཙུན་མོ་དམག་དཔོན་མདུན་དུ་འགྱིང་། །བཀྲ་ཤིས་རྫས་ཐོགས་བུ་མོ་བརྒྱད། །སྒེག་ཅིང་སྙེམས་པས་ལང་ཚོ་ངོམ། །རྒྱལ་མཚན་བ་དན་གདུགས་ལྷབ་ལྷུབ། །འཕྱར་དར་རླུང་གཡོབ་ཕྱེ་ཕུར་རྣམས། །མཆོད་པའི་སྤྲིན་དུ་དེ་རིང་འབུལ། །བདག་གི་བསམ་དོན་འགྲུབ་པར་ཤོག །ཀྱཻ། སྒྱུ་འཕྲུལ་སྣ་ཚོགས་གཟུགས་བརྙན་ལ། །སྐུ་ཡི་རྡོ་རྗེ་ཞེས་སུ་བཏགས། །གཞོམ་མེད་སྐད་ནི་ཐམས་ཅད་པ། །གསུང་གི་རྡོ་རྗེ་ཉིད་དུ་གཞག །ལྷན་སྐྱེས་རྣམ་པ་མ་ལུས་པ། །ཐུགས་ཀྱི་རྡོ་རྗེར་འཚལ་བའི་ཕྱིར། །དེ་ནི་འགྲོ་བའི་ཁམས་རྗེས་འབྲང་། །ནམ་མཁའི་ཕ་མཐས་མཚོན་པ་ཙམ། །གཞན་པས་གསང་བ་བསྙད་མི་བཟོད། །དེ་ཕྱིར་བསམ་མི་ཁྱབ་པ་ཉིད། །མི་ཟད་རྒྱན་གྱི་འཁོར་ལོའི་མཛོད། །ཆོས་རྣམས་ཀུན་གྱི་རང་བཞིན་ཏེ། །རང་གི་སེམས་དང་གཉིས་མིན་པར། །བཞུགས་ཀྱང་དམན་པས་མ་རྙེད་པར། །བླ་མ་དཀོན་མཆོག་ཡི་དམ་དང་། །མཁའ་འགྲོ་མ་དང་ཆོས་སྐྱོང་ཆེ། །འཇིག་རྟེན་པ་ཞེས་རིགས་སུ་འབྱེད། །བློ་གྲོས་ཆེན་པོ་དེ་དག་ནི། །གཅིག་དང་ཐ་དད་གར་མི་འཛིན། །བསྟོད་བྱ་སྟོད་བྱེད་བསྟོད་པ་རྣམས། །ཇི་ལྟར་ཆུ་ལ་ཆུ་བཞག་ལྟར། །རང་གི་རིག་པའི་ཡེ་ཤེས་ལས། །བསྟོད་པའི་དམ་པ་གང་ན་མཆིས། །འོན་ཀྱང་མ་བརྟགས་ཉམས་དགའ་བའི། །ཀུན་རྫོབ་ཙམ་དུ་བདག་གིས་ནི། །མི་མཐུན་རྐྱེན་རྣམས་འཇོམས་པ་དང་། །ནས་སེལ་གདོན་རླག་སྡིག་པ་ཞི། །སྒྲིབ་སྦྱོང་བྱེད་ལ་མཐུ་སྟོབས་ནི། །འཆི་མེད་བདུད་རྩིའི་ཕུང་པོ་འདྲ། །གང་གི་ཚེ་དཔལ་བསོད་ནམས་དང་། །སྟོབས་དང་མངའ་ཐང་ཇི་སྙེད་པ། །ཆེས་ཆེར་རྒྱས་པར་མཛད་པ་ལ། །ཡིད་བཞིན་ནོར་བུའི་རྒྱལ་པོ་ཡིན། །སྲིད་པའི་ཁམས་ཀྱི་དབང་པོ་ཆེ། །སྐྱེས་པ་བུད་མེད་ལོངས་སྤྱོད་དང་། །ཁ་ཟས་ཡིད་འོང་ཐམས་ཅད་ནི། །འགུགས་པའི་ལྕགས་ཀྱུ་བྱེད་པར་མཐོང་། །བསྟན་པ་འཇིག་བྱེད་དགྲ་བགེགས་རྣམས། །བསད་དབྱེ་བསྐྲད་མནན་བཅིང་དང་རེངས། །མངོན་སྤྱོད་དྲག་པོའི་ལས་རྣམས་ལ། །རྣོ་བའི་རལ་གྲི་ལག་པར་འཁུམས། །དེ་དག་ཆ་ཤས་ཙམ་ཞིག་སྟེ། །གཞན་དུ་ཡོན་ཏན་ཀུན་བརྗོད་ན། །སྲིད་པ་ཉིད་དུའང་མི་ཟད་པས། །ཟབ་དང་ཤིན་ཏུ་རྒྱ་ཆེའོ། །ཀྱཻ། སངས་རྒྱས་རྐང་གཉིས་གཙོ་བོ་བདེན་པའི་མཆོག །དམ་ཆོས་འདོད་ཆགས་བྲལ་བ་བདེན་པའི་མཆོག །དགེ་འདུན་ཚོགས་ཀྱི་ཞིང་སྟེ་བདེན་པའི་མཆོག །བདེན་པའི་མཆོག་ནི་རྣམ་གསུམ་ནུས་མཐུ་ཡིས། །དག་བྱེད་བསང་དང་གསེར་སྐྱེམས་གཏོར་མ་དང་། །དགྱེས་པའི་བརྔན་ནི་མགྲོན་རྣམས་ཐམས་ཅད་ལ། །རང་རང་འདོད་པ་བཞིན་དུ་འབྱུང་གྱུར་ཅིག །ཀྱཻ། དཀྱིལ་འཁོར་བཞི་ཡི་ནང་བཞུགས་ནས། །གནས་སྐབས་བཞི་ཡི་སྒྲིབ་གཏོར་བྱེད། །དགའ་བཞིའི་ཡེ་ཤེས་བླུགས་པ་ལས། །ལྷག་པའི་དག་བྱེད་ག་ལ་དགོས། །འོན་ཀྱང་ནམ་མཁའ་དབྱིངས་ཕྱུག་མ། །ས་ཁམས་སངས་རྒྱས་སྤྱན་མ་སྟེ། །ཆུ་ཁམས་རྡོ་རྗེ་མ་མ་ཀི །མེ་ཁམས་རྡོ་རྗེ་གོས་དཀར་མོ། །རླུང་ཁམས་དམ་ཚིག་སྒྲོལ་མ་སྟེ། །ཡུམ་ལྔ་འདུས་ནས་བྱིན་བརླབས་པས། །ཡུལ་ཞིག་ཆགས་པ་སྨན་གྱི་ཡུལ། །གྲོང་ཞིག་ཆགས་པ་བལྟ་ན་སྡུག །རི་ཞིག་ཆགས་པ་སྨན་གྱི་རི། །འཆི་མེད་བདུད་རྩིའི་སྙིང་པོ་འཁྲུངས། །དེ་དག་གྲིབ་སེལ་བསངས་སུ་བྱས། །དྲི་ཞིམ་ངད་པས་ནད་ཀྱི་རིགས། །སྟོང་ཕྲག་བརྒྱད་ཅུ་རྩ་བཞི་སེལ། །མེ་ལྕེ་འོད་དུ་འབར་བ་ཡིས། །ཉོན་མོངས་བརྒྱད་ཁྲི་བཞི་སྟོང་འཇོམས། །དུད་པ་མཁའ་ལ་ཆགས་པ་ཡིས། །ཆོས་ཕུང་བརྒྱད་ཁྲི་བཞི་སྟོང་མཚོན། །ཀྱཻ། སྔོན་གྱི་བསྐལ་པའི་དང་པོ་ལ། །སྲིད་པའི་མེས་པོ་ཚངས་པ་དེས། །དག་བྱེད་འབར་བའི་མེ་ལ་བྱས། །འདོད་དགུ་ཐམས་ཅད་དེ་ལས་བྱུང་། །དེ་ནས་བར་གྱི་བསྐལ་པ་ལ། །དཔལ་གྱི་བསམ་ཡས་བཞེངས་པའི་ཚེ། །ལྷ་སྲིན་གཉན་པོ་རྒྱུད་འཁྲུགས་ནས། །ཉིན་མོ་བརྩིགས་པ་ནུབ་མོ་བཤིག །དགེ་བའི་ལས་བརྩམས་མཐར་མ་ཕྱིན། །དེ་དུས་གདུག་པ་འདུལ་སླད་དུ། །རྗེ་བློན་འབངས་རྣམས་གྲོས་བྱས་ནས། །རྒྱལ་སྲས་པདྨ་སྤྱན་དྲངས་བྱོན། །སློབ་དཔོན་ཆེན་པོ་ཐབས་མཁས་པས། །བསངས་དང་གསེར་སྐྱེམས་གཏོར་མ་དང་། །དགྱེས་པའི་བརྔན་ནི་ཅི་ཡང་མཛད། །ཕལ་ཆེར་དེ་ཡིས་གནོད་སེམས་ཞི། །ཧ་ཅང་མི་བསྲུན་ནུས་པས་བཏུལ། །ཀྱཻ། ད་ལྟ་བསྐལ་པའི་མཐའ་མ་ལ། །ལྷ་འདྲེ་མི་གསུམ་ཐམས་ཅད་ཀྱི། །འཁོན་འཛིན་ཕྲག་དོག་སེལ་བའི་ཐབས། །གཙང་བཙོག་ངན་པ་སེལ་བའི་ཐབས། །རྐྱེན་ངན་བར་ཆད་སེལ་བའི་ཐབས། །སྲུང་མ་ལས་ལ་བསྐུལ་བའི་ཐབས། །ཁང་ཁྱིམ་མི་གཙང་སེལ་བའི་ཐབས། །ཚེ་སྲོག་སྲ་ཞིང་བརྟན་པའི་ཐབས། །གཟའ་སྐར་ངན་པ་སེལ་བའི་ཐབས། །གཞི་དང་གནས་ལ་སྡོད་པའི་ཚེ། །མཐུན་རྐྱེན་འབྱོར་པ་སྤེལ་བའི་ཐབས། །ཐག་རིང་བྱེས་སུ་འགྲོ་བའི་ཚེ། །དོན་རྣམས་ཐམས་ཅད་འགྲུབ་པའི་ཐབས། །དེ་རིང་བསངས་ཀྱི་མཆོད་པ་འབུལ། །ཀྱཻ། བདུད་རྩི་ཅན་ཤིང་དུད་པས་བསངས། །གསེར་ལོ་འབར་བའི་སྟག་པས་བསངས། །གཡུ་ལོ་འབར་བའི་སྨྱུག་མས་བསངས། །དུང་ལོ་འབར་བའི་བ་ལུས་བསངས། །འཆོང་ལོ་འབར་བའི་སུ་ལུས་བསངས། །ཨ་ཤུ་ཤུག་པའི་དུད་པས་བསངས། །དྲི་བཟང་སྤོས་དཀར་དུད་པས་བསངས། །ཨ་རུ་ར་ཡི་དུད་པས་བསངས། །མ་ནུ་རུ་རྟའི་དུད་པས་བསངས། །སྤོས་མེ་དྲི་ཞིམ་དུད་པས་བསངས། །ནམ་མཁའི་སྙིང་པོ་གཡུ་ཡིས་བསངས། །རི་རབ་སྙིང་པོ་མཆོང་གིས་བསངས། །རྒྱ་མཚོའི་སྙིང་པོ་དུང་གིས་བསངས། །ས་ཡི་སྙིང་པོ་གསེར་གྱིས་བསངས། །ཤིང་ཐོག་སྙིང་པོ་མངར་གྱིས་བསངས། །འབྲུ་ཡི་སྙིང་པོ་ཆང་གིས་བསངས། །ཕུར་མོ་གླ་རྩི་ཚེར་ཤིང་དང་། །ཕྱེ་མར་འོ་སྐོམ་དྲི་བཟང་དང་། །སྤོས་དང་ཤ་ཆང་ཕུད་ཀྱིས་བསངས། །ཀྱཻ། དྲིན་ཅན་རྩ་བའི་བླ་མ་ནས། །རྡོ་རྗེ་འཆང་ལ་ཐུག་གི་བར། །བདེ་གཤེགས་སྤྲུལ་པ་འབའ་ཞིག་པའི། །བརྒྱུད་པ་བཞིན་ལྡན་བླ་མ་བསངས། །བདེ་དགྱེས་དུས་འཁོར་གསང་འདུས་སོགས། །བླ་མེད་རྣལ་འབྱོར་སྤྱོད་པ་དང་། །བྱ་བའི་རྒྱུད་ལས་གསུངས་པ་ཡི། །ཡི་དམ་ལྷ་ཚོགས་ཐམས་ཅད་བསངས། །འཇམ་དཔལ་པདྨ་ཡང་དག་དང་། །བདུད་རྩི་ཕུར་པ་མ་མོ་དང་། །འཇིག་རྟེན་དམོད་པ་དྲག་སྔགས་ཏེ། །བསྒྲུབ་པ་ཆེན་པོ་བཀའ་བརྒྱད་བསངས། །ཞི་བ་བཞི་བཅུ་རྩ་གཉིས་དང་། །ཁྲག་འཐུང་ལྔ་བཅུ་རྩ་བརྒྱད་སོགས། །ཐེག་པ་རིམ་དགུར་བཤད་པ་ཡི། །གསང་སྔགས་རྙིང་མའི་ལྷ་ཀུན་བསངས། །ཕྱི་ནང་གསང་བ་དེ་ཁོ་ནའི། །གནས་གསུམ་སྤྱོད་པའི་ཌཱ་ཀ྄ི་མ། །ཚོགས་ཀྱི་མཆོག་རྣམས་ཐམས་ཅད་བསངས། །བྱ་རོག་མིང་ཅན་ཡབ་ཡུམ་དང་། །གསང་བའི་བུ་བཞི་ལས་མཛད་གསུམ། །གདོང་ཅན་བརྒྱད་དང་རོ་ལངས་བརྒྱ། །ནག་པོ་སྟོང་དང་ཤ་ཟ་འབུམ། །མ་མོས་ཡ་གནོད་སྦྱིན་ཁྲི། །རྒྱལ་པོ་བཞི་དང་ཕྱོགས་སྐྱོང་བཅུ། །ལྷ་ཆེན་བརྒྱད་དང་ཀླུ་ཆེན་བརྒྱད། །གནོད་སྦྱིན་བརྒྱད་དང་གཟའ་ཆེན་བརྒྱད། །རྒྱུ་སྐར་ཉེར་བརྒྱད་འཇིགས་བྱེད་དགུ །མ་བདུན་སྲིང་བཞི་འབར་མ་བརྒྱད། །ཕོ་ཉ་དྲུག་ཅུ་རྩ་བཞི་བསངས། །དཔལ་ལྡན་ལྷ་མོ་དུད་སོལ་མ། །འགུགས་བྱེད་གསོད་བྱེད་སྒྲོལ་བྱེད་དང་། །མཁའ་འགྲོ་བཞི་དང་ཕྲ་མེན་བརྒྱད། །མཁའ་འགྲོ་དྲུག་སོགས་སྲིད་པ་ཡི། །འཇིག་བྱེད་མ་མོའི་ཚོགས་རྣམས་བསངས། །ལེགས་ལྡན་གྲི་གུག་ཏྲག་ཤད་དང་། བེང་དང་མ་ནིང་གུར་ཞལ་དང་། །ཕྱག་དྲུག་རྟ་མེད་རྗེ་བཙན་དང་། །སེང་གེ་སྟག་ཞོན་བེར་ནག་གྱོན། །སྲོག་ཏིག་མགོན་པོ་རིགས་ལྔ་བསངས། །སེང་གདོང་ཡབ་ཡུམ་བམ་རོ་གཉིས། །སྡེ་བརྒྱད་བདུད་དམག་སྟོང་སྡེ་བསངས། །ཁྱབ་འཇུག་ཀླུ་སྲིན་གདོང་མོ་བཞི། །ཕྱི་ནང་གསང་བའི་གཟའ་སྐར་བསངས། །དཔལ་ལྡན་རྒྱལ་པོ་ངལ་བསོས་བུ། །ནོར་རྒྱུན་མ་དང་རྟ་བདག་བརྒྱད། །ཡུམ་བཅས་གོས་སྔོན་ཅན་རྣམས་བསངས། །དམ་ཅན་གཤིན་རྗེའི་རྒྱལ་པོ་དང་། །ཙ་མུནྜི་དང་གཤེད་པོ་བཞི། །འཆི་བདག་བདུད་ཀྱི་ཕོ་ཉ་བསངས། །ཆོས་ཀྱི་རྒྱལ་པོ་སྐུ་ལྔ་དང་། །ཡུམ་བློན་སྤྲུལ་ལྔ་རྩེ་མ་ར། །རུ་འདྲེན་བཅས་པ་ཐམས་ཅད་བསངས། །གཞན་ཡང་སྡེ་དཔོན་སུམ་ཅུ་དང་། །དྲེགས་པ་བཅོ་བརྒྱད་བེག་ཙེ་དང་། །ཚོགས་བདག་རྡོ་ལེགས་སྙོན་ཁ་དང་། །ཇག་པ་མེ་ལེན་ལ་སོགས་པའི། །ཕོ་རྒྱུད་ཆོས་སྐྱོང་སྲུང་མ་བསངས། །དུང་སྐྱོང་རེ་ཏི་མཆེད་བཞི་དང་། །དམག་ཟོར་མ་དང་རང་བྱུང་རྒྱལ། །ཇོ་མོ་བཀྲ་ཤེས་ཚེ་རིང་མཆེད། །རྡོ་རྗེ་གཡུ་སྒྲོན་དཔལ་ལྷ་དང་། །དུར་ཁྲོད་བདག་མོ་དཔལ་ལྡན་མ། །བོད་སྐྱོང་བསྟན་མ་བཅུ་གཉིས་སོགས། །སྲུང་མ་མོ་བརྒྱུད་ཐམས་ཅད་བསངས། །ཕྱིན་ནང་གསང་སྦས་བསྟན་སྲུང་དང་། །དྲག་པོ་སྔགས་ཆགས་ལས་བྱེད་པའི། །ལྷ་སྲིན་གཉན་པོ་ཐམས་ཅད་བསངས། །མིང་དུ་མ་འཚལ་མགྲོན་ཀུན་དང་། །ཕན་གནོད་དབང་བྱེད་ས་བདག་དང་། །སྲིད་ལྷ་མགུར་ལྷ་སྲོག་ལྷ་སོགས། །བོད་ཀྱི་གཞི་བདག་ཐམས་ཅད་བསངས། །གང་བཟང་མི་སྔོན་རྟ་སྔོན་དང་། །རྒོ་བདུད་ཇོ་བོ་རྩེ་བོ་སོགས། །ཆོས་གཞི་དབེན་གནས་སྲུང་རྣམས་བསངས། །ཀྱཻ། རྣལ་འབྱོར་དཔོན་སློབ་འཁོར་བཅས་ལ། །འགོ་ཞིང་སྟོང་གྲོགས་བྱེད་པ་ཡི། །དགྲ་ལྷ་གཉན་པོ་ཐམས་ཅད་བསངས། །མི་ལ་འགོ་བའི་དགྲ་ལྷ་བསངས། །ཝེར་མ་གེར་མ་ཚོགས་འཁོར་བཅས། །ལྷ་གཉེན་རྨ་ཆེན་སྤོམ་ར་བསངས། །སྲིད་པའི་ལྷ་བདུད་དཀར་པོ་བསངས། །སྲིད་པའི་རྫི་ལུང་འཕྱོ་བ་བསངས། །འོད་ཟེར་མེ་སྟག་འཕྲོ་བ་བསངས། །སྲིད་པ་ཆགས་པའི་དགྲ་ལྷ་བསངས། །སྨོན་པ་འགྲུབ་པའི་དགྲ་ལྷ་བསངས། །གླེང་གཞི་འགྲུབ་པའི་དགྲ་ལྷ་བསངས། །དཔའ་སྙིང་ཆེ་བའི་དགྲ་ལྷ་བསངས། །མྱུར་ཞིང་མགྱོགས་པའི་དགྲ་ལྷ་བསངས། །འགོ་བའི་དགྲ་ལྷ་སྤུན་གསུམ་བསངས། །མི་ཐུབ་དགྲ་ལྷ་སྤུན་གསུམ་བསངས། །ལྟ་བ་མིག་རྣོ་དགྲ་ལྷ་བསངས། །ཉན་པ་རྣ་གསང་དགྲ་ལྷ་བསངས། །སྣོམ་པ་སྣ་ཡི་དགྲ་ལྷ་བསངས། །སྨྲ་བ་ལྕེ་མགྱོགས་དགྲ་ལྷ་བསངས། །དཔའ་རྩལ་ཆེ་བའི་དགྲ་ལྷ་བསངས། །མགྱོགས་པ་རྟ་ཡི་དགྲ་ལྷ་བསངས། །སྲ་བ་བེར་གྱི་དགྲ་ལྷ་བསངས། །བཙན་པོ་ཁྲབ་ཀྱི་དགྲ་ལྷ་བསངས། །རྣོ་བ་མཚོན་གྱི་དགྲ་ལྷ་བསངས། །སྟག་གདོང་ཁྲ་བའི་ནང་ཤེད་ན། །སྒྲོ་སྨྱུག་འཛོམ་པའི་དགྲ་ལྷ་བསངས། །གཟིགས་ཤུབས་ཐིག་ལེའི་ནང་གནས་པའི། །རྭ་ཤིང་འཛོམ་པའི་དགྲ་ལྷ་བསངས། །ཁ་འཛིན་ཤགས་འདེབས་དགྲ་ལྷ་བསངས། །འགོ་བའི་ལྷ་ལྔ་ཐམས་ཅད་བསངས། །སྐྱོབ་པའི་ལྷ་དགུ་ཐམས་ཅད་བསངས། །བར་ལྷ་རི་བོ་གཉན་པོ་བསངས། །ཁྱིམ་གྱི་ཁྱིམ་ལྷ་གེལ་ཐུང་བསངས། །ནོར་བདག་འཛམ་ལྷ་འཁོར་བཅས་བསངས། །མཁར་གྱི་རྩེ་ལྷ་གཉན་པོ་བསངས། །ཐབས་ལྷ་དེ་ནི་ཡུ་མོ་བསངས། །ཐབ་སྨན་དེ་ནི་དཀར་མོ་བསངས། །ཞིང་ལྷ་དེ་ནི་གཉན་མཆོད་བསངས། །ཕྱུགས་ཀྱི་ནོར་ལྷ་གཉན་པོ་བསངས། །སྒོ་ཡི་སྒོ་ལྷ་སྟག་གཡག་བསངས། །ལམ་ལྷ་དེ་ནི་འགྲོན་བུ་བསངས། །ལམ་དང་བྱེས་ཀྱི་ལྷ་གཉན་བསངས། །འགྲོ་ཡང་ཅང་ཤེས་གཉན་པོ་བསངས། །ཚོང་ལྷ་འཕྲུལ་དགུ་ཐམས་ཅད་བསངས། །ཕྱི་རབས་རྒྱུད་ཀྱི་དགྲ་ལྷ་བསངས། །དམུ་རབས་རྒྱུད་ཀྱི་སྲུང་མ་བསངས། །གཙུག་རབས་རྒྱུད་ཀྱི་སྲུང་མ་བསངས། །སྟེང་གི་དགྲ་ལྷ་དམུ་ཁྲི་བསངས། །ས་ཡི་དགྲ་ལྷ་མཚན་རྟག་བསངས། །ཁ་ཟས་སྤྲོད་པའི་དགྲ་ལྷ་བསངས། །ལམ་ནོར་སྤྲོད་པའི་དགྲ་ལྷ་བསངས། །ཕ་ཚན་ཡབ་ལྷ་གདལ་དྲུག་བསངས། །མ་ཚན་རྒྱལ་མོ་ཐིང་གེ་བསངས། །གྲི་ཚན་ལྟག་ཚ་འལ་འོལ་བསངས། །བསངས་ཀྱིས་མི་བསངས་གང་ཡང་མེད། །མ་བསངས་པ་རྣམས་ཐམས་ཅད་བསངས། །མ་དག་པ་རྣམས་ཐམས་ཅད་དག །བསམ་པ་སྒྲུབ་ལ་རེ་བ་སྐོངས། །འདོད་དགུའི་ལོངས་སྤྱོད་རྒྱས་པར་མཛོད། །ཀྱཻ། འབྲུ་སྣ་ཀུན་ལ་གྲུབ་པའི་ཆང་། །རྩ་བརྒྱད་སྟོང་དང་གསེར་ཕྱེ་སྦྱར། །མཐོ་རིས་བདུད་རྩི་ལས་ལྷག་པའི། །ཟག་པ་མེད་པའི་སྐྱེམས་སུ་འབུལ། །བླ་མ་ཡི་དམ་མཁའ་འགྲོ་དང་། །དཀོན་མཆོག་སྲིད་ཞུའི་མགྲོན་རྣམས་ལ། །རིན་ཆེན་གསེར་སྐྱེམས་འདི་འབུལ་ལོ། །བཞེས་ནས་འདོད་པའི་དངོས་གྲུབ་སྩོལ། །མཧཱ་ཀཱ་ལ་མན་ཆད་ནས། །བདུད་མགོན་ཏྲག་ཤད་ཡན་ཆད་ཀྱི། །ཕ་གཅིག་མགོན་པོ་ཐམས་ཅད་ལ། །རིན་ཆེན་གསེར་སྐྱེམས་འདི་འབུལ་ལོ། །བཞེས་ནས་དངོས་གྲུབ་རྣམ་གཉིས་སྩོལ། །སྲིད་གསུམ་བདག་མོ་མན་ཆད་ནས། །ནམ་གྲུ་མ་ནིང་ཡན་ཆད་ཀྱི། །མ་གཅིག་ལྷ་མོ་ཐམས་ཅད་ལ། །རིན་ཆེན་གསེར་སྐྱེམས་འདི་འབུལ་ལོ། །བཞེས་ནས་འཕྲིན་ལས་སྒྲུབ་ཏུ་གསོལ། །བྱ་རོག་གདོང་ཅན་མན་ཆད་ནས། །ལས་བྱེད་ལྷ་སྲིན་སྡེ་བརྒྱད་བར། །དམ་ཅན་ཆོས་སྐྱོང་ཐམས་ཅད་ལ། །རིན་ཆེན་གསེར་སྐྱེམས་འདི་འབུལ་ལོ། །བཞེས་ནས་འགལ་རྐྱེན་བར་ཆད་སོལ། །ཞིང་སྐྱོང་ཕོ་ཉ་མན་ཆད་ནས། །ཡུལ་ཕྱོགས་འདི་ཡི་ལྷ་ཡན་གྱི། །གནས་བདག་གཞི་བདག་ཐམས་ཅད་ལ། །རིན་ཆེན་གསེར་སྐྱེམས་འདི་འབུལ་ལོ། །བཞེས་ནས་རུ་ང་མ་མཛད་ཅིག །སྲིད་པའི་རྩེ་མོ་མན་ཆད་ནས། །མནར་མེད་ལྕགས་ཁང་ཡན་ཆད་ཀྱི། །འགྲོ་དྲུག་སྙིང་རྗེའི་མགྲོན་རྣམས་ལ། །རིན་ཆེན་གསེར་སྐྱེམས་འདི་འབུལ་ལོ། །བཞེས་ནས་གནོད་སེམས་མ་མཛད་ཅིག །བགེགས་དང་ལོག་འདྲེན་མན་ཆད་ནས། །བློ་བུར་ཡེ་འབྲོག་ཡན་ཆད་ཀྱི། །ལན་ཆགས་བདག་པོ་ཐམས་ཅད་ལ། །རིན་ཆེན་གསེར་སྐྱེམས་འདི་འབུལ་ལོ། །བཞེས་ནས་ཕྱིན་ཆད་གནོད་མ་བྱེད། །ཀྱཻ། ནམ་མཁའ་ལས་ནི་དཔངས་མཐོ་ཞིང་། །ས་གཞིའི་ཁྱོན་ལས་རྒྱ་ཆེ་ལ། །རྒྱ་མཚོའི་ཀློང་ལས་གཏིང་ཟབ་སྟེ། །ཉི་ཟླ་གཉིས་ལས་ཆེར་གསལ་བ། །གཟུགས་སྒྲ་དྲི་རོ་རེག་བྱ་ཡི། །འདོད་པའི་ཡོན་ཏན་ལྔ་ལྡན་པ། །སོ་སོའི་གཏོར་མ་འདི་འབུལ་གྱིས། །རང་རང་ཡིད་བཞིན་ཐོབ་གྱུར་ཅིག །ཨོཾ་ཨ་ཀཱ་རོ་མུ་ཁཾ་སརྦྦ་དྷརྨཱ་ཎཾ་ཨཱདྱ་ནུཏྤནྣ་ཏྭ་ཏ་ཨོཾ་ཨཱཿཧཱུྃ་ཕཊ྄་སྭཱ་ཧཱ། ཞིང་བཅུ་ཚང་བའི་དགྲ་བགེགས་ཀྱི། །སྙིང་ལ་ལྕགས་ཀྱུ་ཅན་གྱིས་བཏབ། །སྐེ་ནས་ཞགས་པ་ཅན་གྱིས་བཅིངས། །ཡན་ལག་ལྕགས་སྒྲོག་ཅན་གྱིས་བསྡམས། །རྒྱབ་ནས་དྲིལ་བུ་ཅན་གྱིས་མཉེད། །གཤིན་རྗེའི་མཚོན་ཁང་འབར་བ་བསྒྱེལ། །མགོན་སྐྱབས་བྱེད་པའི་ལྷ་དང་ཕྲོལ། །ཡུངས་ཀར་རྒྱལ་པོའི་ཐུན་གྱིས་བྲབས། །རྡོ་རྗེ་ཕུར་པ་སྙིང་ལ་བཏབ། །རྣོ་ངར་འཛོམ་པའི་རལ་གྲིས་གཏུབས། །ཐོ་བས་ཀླད་ནས་ཆམ་ཆེམ་བཟོས། །གཏུན་ཤིང་བསྣུན་པས་རུས་པ་གཉགས། །ཤ་ཁྲག་རུས་པ་ཐམས་ཅད་ནི། །མཆོག་དང་དམན་པར་རྣམ་ལྔར་ཕྱེ། །མཆོག་ནི་སྲིད་ཞུའི་མགྲོན་རྣམས་ཀྱི། །ཞལ་དུ་བཏབ་པོ་ཁ་རཾ་ཁཱ་ཧི། །བར་མ་ཕོ་བརྒྱུད་མོ་བརྒྱུད་ཀྱི། །ཞལ་དུ་བཏབ་བོ་ཁ་རཾ་ཁཱ་ཧི། །དེ་འོག་ལས་བྱེད་ཕོ་ཉ་ཆེའི། །ཞལ་དུ་བཏབ་བོ་ཁ་རཾ་ཁཱ་ཧི། །གཞན་ནི་སྙིང་རྗེའི་མགྲོན་རྣམས་ཀྱི། །ཞལ་དུ་བཏབ་བོ་ཁ་རཾ་ཁཱ་ཧི། །ལྷག་མ་ལན་ཆགས་མགྲོན་རྣམས་ཀྱི། །ཞལ་དུ་བཏབ་བོ་ཁ་རཾ་ཁཱ་ཧི། །ཀྱཻ། སྣང་ཚད་སྐུ་ལ་གྲགས་ཚད་གསུང་། །དྲན་ཚད་ཐུགས་སུ་རང་རིག་པའི། །ཁྱབ་གདལ་མོས་གུས་ཆེན་པོ་འདིས། །རྩ་བརྒྱུད་བླ་མ་ཐམས་ཅད་བརྔན། །རྩ་ནི་ཡོན་པོ་རླུང་གིས་བསངས། །རླུང་ནི་ལོག་པ་མལ་དུ་སད། །དྭངས་མས་དབུ་མའི་མས་བསྐྱང་པས། །དཀོན་མཆོག་རིན་ཆེན་རྣམ་གསུམ་བརྔན། །ཚུལ་ཁྲིམས་ཤིན་ཏུ་དག་པར་བསྲུངས། །དམ་པའི་ཆོས་ལ་ཐོས་བསམ་བྱས། །མ་ནོར་ཐར་པའི་ལམ་བསྒོམས་པས། །ཡེ་ཤེས་མགོན་པོ་ལྕམ་དྲལ་བརྔན། །གཡག་ལུག་དོམ་དྲེད་སྟག་གཟིག་སྤྱང་། །དཔའ་བོ་བསྒྲལ་བའི་ཙིཏྟའི་ནང་། །སྲོག་འཁོར་སྟེམ་དང་བླ་རྡོའི་མཁར། །ལས་མཛད་མགོན་པོ་གསང་བའི་བརྔན། །འབྲུ་སྣ་ནག་པོ་ཁྲག་ལ་སྦྲུས། །ཟུར་གསུམ་དཀར་དམར་རྒྱན་གྱིས་སྤྲས། །འབྲས་བུ་རིན་ཆེན་རྣམས་ཀྱིས་ཀླུབས། །ལྷུན་ཆགས་གཏོར་མ་ནང་གིས་བརྔན། །རྭ་རྣོ་རྨིག་པ་རྡོ་རྗེ་གཟི། །ཁ་རླངས་མེ་ཡི་ཚ་ཚ་འཕྲོ། །སྤུ་གཞོལ་ཆར་སྤྲིན་གཉེར་འདྲ་བའི། །གཡལ་ལུག་ནག་པོ་ཕྱི་ཡི་བརྔན། །སེང་གེ་སྟག་གཟིག་དོམ་དྲེད་དང་། །ཕག་རྒོད་ཅེ་སྤྱང་འཕར་བ་དང་། །ཁྱི་ནག་དུག་གི་མཆེ་བ་ཅན། །རོལ་དུ་ཁྲིད་པར་བྱེད་པའི་བརྔན། །གནམ་ལྕགས་འབར་བའི་མཆུ་སྡེར་ལ། །མཚོན་ཆ་ངར་མའི་གཤོག་པ་ཅན། །ཁྱུང་ནག་བྱ་རོག་ཀངྐ་སོགས། །བྱ་ཁྱི་ཀླད་ལ་ལྡིང་བའི་བརྔན། །སྣ་ཚོགས་མདངས་ཀྱིས་ཡིད་འོང་བའི། །རྨ་བྱ་ནོར་བུའི་མདོངས་སྒྲོ་ཅན། །འདབ་ཆགས་བྱ་ཡི་གར་མཁན་ཀུན། །སྤྱན་གྱི་གཟིགས་མོ་སྐྱོད་པའི་བརྔན། །གདུང་བའི་མཆི་མས་མིག་གང་ཞིང་། །འབད་པའི་དབྱངས་བརྡ་ལྷང་ལྷང་གྲགས། །མཐུན་རྫས་མ་ཚང་མེད་བདར་བ། །མོ་བརྒྱུད་སྲུང་མ་རྣམས་ཀྱི་བརྔན། །ཤ་སྣ་སྙིང་སྣ་ཁྲག་སྣ་དང་། །ཀླད་ཞག་གསུར་ཆེན་ཞུན་གྱི་སྒྲོན། །རྐང་གླིང་ཐོད་རྔ་རྔེའུ་ཆུང་སྒྲ་། །ལྷ་སྲིན་དྲག་པོ་དགྱེས་པའི་བརྔན། །དཀར་གསུམ་མངར་གསུམ་སྨན་སྣ་དང། །འབྲུ་ཚོགས་རིན་ཆེན་ཤིང་གི་འབྲས། །དར་ཟབ་མཁོ་དགུའི་ཡོ་བྱད་ནི། །ས་བདག་ལྷ་ཀླུ་སྨན་སོགས་བརྔན། །དཔའ་བོ་ཞུབ་ཅན་སྟག་ཆས་བཏགས། །རལ་གྲི་འཕྱར་ཞིང་རུ་མཚོན་བསྒྲེངས། །གཏུམ་པའི་ངར་སྐད་གླུ་རུ་ལེན། །འདི་ནི་དགྲ་ལྷའི་རྒྱལ་པོའི་བརྔན། །འཐབ་ཤེས་གླང་ཆེན་མགྱོགས་པའི་རྟ། །དྲེའུ་དང་བོང་བུ་རྔ་མོང་དང་། །ཆུ་གླང་མ་ཧེ་ལ་སོགས་པའི། །དགྲ་ལ་རྒྱུག་བྱེད་བཞོན་པའི་བརྔན། །ཀྱཻ། ཡུལ་གྱི་མིང་ནི་གདོང་དམར་བོད། །དཀར་པོ་སྐྱོང་བའི་བསྟན་མ་ནི། །རྡོ་རྗེ་ཀུན་བཟང་ཀུན་གྲགས་མ། །ཡ་མ་སྐྱོང་དང་བགེགས་ཀྱི་གཙོ། །སྤྱན་གཅིག་ཀླུ་མོ་དཔལ་གྱི་ཡུམ། །གྲགས་མོ་རྒྱལ་དང་བོད་ཁམས་སྐྱོང་། །སྨན་གཅིག་ཟུ་ལེ་གཡར་མོ་བསིལ། །རེ་རེའང་འཁོར་ནི་སྨན་བཙུན་འབུམ། །ཡུལ་ལྷ་ཅི་ཡང་མདུན་དུ་བདར། །གཏོར་མ་གསེར་སྐྱེམས་རིན་ཆེན་ལྔ། །དར་ཟབ་མཁོ་དགུ་ཀུན་གྱི་བརྔན། །ཀྱཻ། མི་གཙང་ཟས་སུ་ཟོས་པ་བསངས། །མི་གཙང་གོས་སུ་གྱོན་པ་བསངས། །དམ་གྲིབ་བཙོག་གྲིབ་གཤན་གྲིབ་བསངས། །བག་གྲིབ་ཡུགས་གྲིབ་མཛེ་གྲིབ་བསངས། །ཐབ་ཤོར་གཞོབ་ཤོར་བསྣོལ་ཤོར་བསངས། །ཉམས་གྲིབ་སྐྱོན་རྣམས་ཐམས་ཅད་བསངས། །ལྷ་དང་མི་ལ་གྲིབ་ཕོག་ཅིང་། །སྐུ་གསུང་ཐུགས་དང་འགལ་བ་རྣམས། །བསངས་ཀྱི་མཆོད་པ་དམ་པ་འདིས། །ཐམས་ཅད་བྱང་ཞིང་དག་གྱུར་ཅིག །ཀྱཻ། ད་ནི་འདོད་པའི་དོན་གསོལ་བ། །དེང་ནས་བདག་གི་ཁ་འཛིན་མཛོད། །མཐོ་བའི་ས་ནས་བྱ་ར་མཛོད། །དམའ་བའི་ས་ནས་མེལ་ཚེ་མཛོད། །མུན་པའི་ནང་དུ་སྒྲོན་མེ་སྤོར། །དགྲ་དཔུང་ཤིགས་ལ་བདུད་དཔུང་ཆོམ། །བསམ་པ་སྒྲུབ་ལ་རེ་བ་སྐོང་། །ཚེ་དབང་ལོངས་སྤྱོད་རྒྱས་པ་དང་། །བཀྲ་ཤིས་ཕུན་སུམ་ཚོགས་པར་མཛོད། །ཀྱཻ། ཕན་ཚུན་ཅིག་གིས་གཅིག་བསྟོད་ན། །ཧ་བོ་ཡི་ནི་གངས་བས་དཀར། །ཕན་ཚུན་གཅིག་གིས་གཅིག་སྨད་ན། །རོང་པོ་ཡི་ནི་རྫ་བས་ནག །དེ་བས་གཅིག་གིས་གཅིག་བསྟོད་འཚལ། །དེ་བས་ཆེ་བའི་ཆེ་བརྗོད་འཚལ། །དེ་བས་གཉན་པའི་བསྙེན་བཀུར་འཚལ། །བདག་ཅག་རྣལ་འབྱོར་འཁོར་བཅས་ལ། །ཀུ་རེ་ཀྱལ་ཁ་མས་མཛད་ཅིག །རུ་ང་ཕྲག་དོག་མ་མཛད་ཅིག །ས་ལ་ང་ཡིན་མ་ཟེར་ཅིག །ཡུལ་ལ་ང་ཡིན་མ་ཟེར་ཅིག །སྤྱན་གྱི་གཟེར་མིག་མ་ལྡོག་ཅིག །ཤང་གི་དུང་སྣ་མ་བུད་ཅིག །ཞི་གྱུར་བྱང་སེམས་ལྡན་གྱུར་ཅིག །ཀྱཻ། གཤེགས་སོ་གཤེགས་སོ་རྟེན་ལ་གཤེགས། །སྲིད་ཞུ་མགྲོན་རྣམས་སངས་རྒྱས་ཡུལ། །སྐུ་དང་ཡེ་ཤེས་ངང་དུ་གཤེགས། །མགོན་པོ་ཡོན་ཏན་མགྲོན་རྣམས་ནི། །མཆོག་གི་སྤྲུལ་སྐུའི་ཞིང་དུ་གཤེགས། །འགྲོ་དྲུག་སྙིང་རྗེའི་མགྲོན་རྣམས་ནི། །སྲིད་པ་གསུམ་གྱི་གནས་སུ་བྱོན། །ལན་ཆགས་ཤ་འཁོན་གཉེར་བའི་མགྲོན། །རང་རང་སོ་སོའི་གནས་སུ་གཤེགས།། །།བསངས་དཔེ་བཀྲ་ཤིས་རེ་སྐོང་འདི་ཡང་རྒྱལ་བྱེད་ཚལ་དུ་སྔགས་འཆང་པདྨ་དཀར་པོས་སྦྱར་བའོ།། །།སརྦ་མངྒ་ལཾ།། །། བདེ་མཆོག་རྩ་བའི་རྒྱུད་ཀྱི་འཕྲུལ་འཁོར་གྱི་བརྗེད་བྱང།བདེ་མཆོག་རྩ་བའི་རྒྱུད་ཀྱི་འཕྲུལ་འཁོར་གྱི་བརྗེད་བྱང་བཞུགས་སོ། །ཀུན་ཏུ་བཟང་བ་སྟོན་པའི་ངག །གླེགས་བམ་དུ་བཀོད་གསང་དབང་འདིས། །སྐལ་བཟང་ཆོས་ཀྱི་བློ་གྲོས་ཀྱིས། །རྒྱས་པར་མཛད་ཕྱིར་ཕྱག་འཚལ་ལོ། །རྒྱུད་རྒྱལ་ཨུ་དུམ་ཝ་རའི་ནགས་ཚལ་གྱི། །བརྗོད་དོན་མེ་ཏོག་འབར་མཐོང་བདག་གི་བ། །ཆོས་རྗེ་བླ་མས་ཡོངས་གཟུང་མཐུར་ཐོས་པས། །ཁེངས་བྲལ་རབ་བཟང་དད་པས་དེ་ཞབས་བཏུད། །རྒྱལ་ཚབ་འདྲི་བའི་གྲྭར་འཁོར་ཚེ། །སྲེད་པས་སྔོན་གྱི་ཡི་གེ་རྣམས། །བྱོན་པ་རྒན་པོས་མ་བཟོད་དེ། །འདུས་བྱས་མཚན་ཉིད་དག་ལ་འཁུ། །འདིར་རྩ་བའི་རྒྱུ་ལས། ས་སྟེང་ན་ནི་རིན་ཆེན་བཞི། །ཞེས་སྙིང་པོ་ཉེ་སྙིང་གོ་ཆ་འཕྲེང་ནཱ་རོ་རྐང་བརྒྱད་རྐང་པ་ཉེར་བཞི་བསྡོམས་པ། སྔགས་སུ་བཞེད་པས། བཞི་དང་། ཁམས་གསུམ་རྣམ་རྒྱལ་གྱི་སྔགས་ཏེ་ལྔ་གསུངས་པ་དེ་དག་འཕྲུལ་དུ་བསྐོར་བས་སྔགས་བསྒྲུབས་པ་རྣམས་ལས་རབ་འབྱམས་ལ་རྨོངས་པ་མེད་པ། གསང་སྔགས་ནི་ཐེ་ཚོམ་མེད་པས་འགྲུབ་པའི་ཕྱིར་མདོ་དང་སྦྱར་རོ། །དེ་ལ་ཡབ་ཀྱི་སྙིང་པོའི་འཕྲུལ་འཁོར་ནི། རྡོ་རྗེ་མཁའ་འགྲོར། དེ་ནས་ཡང་དག་བཤད་པར་བྱ། ལས་ཀྱི་ཆོ་ག་མཐོང་བ་ཡིས།སྟེ་བ་དེའི་ཕྱིར་པད་འདབ་བརྒྱད། དེའི་ཕྱིར་བཅུ་དྲུག །དེའི་ཕྱི་རྡོ་རྗེ་རྭ། འོད་ཀྱི་འཕྲེང་བ། ལྟེ་བ་ལ་སྭཱ། མིང་སྤེལ་ལི་ཚག་ཧཱ། བརྒྱད་པའི་ཕྱོགས་ལ་རཾ་ཧཱུཾ་ཧཱུཾ་ཕཊ། མཚམས་བཞིར་བུམ་པ་ལ་ཐོད་པ་གནས་པ་བྲི། བཅུ་དྲུག་ལ་ཤར་ནས་གཡོན་སྐོར་དུ། །སེམས་ཅན་ཀུན་གྱི་དོན་བྱེད་པའོ། །ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་ལྟ་བུ་ཡི། །འཁོར་ལོ་དཀྱིལ་འཁོར་ལྟ་བུར་བསམ། །དེ་དབུས་པདྨ་བྲི་བར་བྱ། །བཅུ་དྲུག་འདབ་མས་རྣམ་པར་བརྒྱན། །དེ་དབུས་པད་ཆེན་འདབ་བརྒྱད་པ། རྡོ་རྗེ་རྩེ་ལྔ་པ་ཡི་མཆོག །ཨོཾ་ཤྲཱི་བཛྭ་ཧེ་ཧེ་རུ་ཀཾ་ཌཱ་ཀི་ནཱི་ཛྷ་ལ་སམྦ་བཀོད། འོད་ཟེར་དཀར་པོས་ཤིན་ཏུ་མཛེས། །སྒྲུབ་པོས་འཁོར་ལོའི་ཕྱི་རོལ་བྲི། །པདྨའི་ལྟེ་བར་སྭཱཧཱ་བྲི། དངོས་གྲུབ་ཐམས་ཅད་སྟེར་བའོ། །དང་། འོག་ཏུ། ཆོ་གའི་བྱ་བ་འདི་ཡིས་ནི། ཡི་གེ་ཉི་ཤུ་གཉིས་འགོད་ཅེས། ཞེས་གསུངས། དེའི་སྒྲུབ་པ། མ་མོའི་ཁྱིམ་ནི་ཉམས་༼༢ན༣༽དགའ་བར། ཙན་དན་བཟང་པོས་བྱུགས་ནས་ནི། འབོལ་ཞིང་ཤིན་ཏུ་འཇམ་པ་ཡི། །སྟན་ལ་འདུག་ནས་ཕྱག་རྒྱ་རྡོ་རྗེ་བསྡམས་པ་བྱས་ནས་གུང་མོ་གཉིས་ཀྱི་ཁས་མཐེ་བོང་གཉིས་ཀྱི་ཁ་ལ་སྦྱར་ནས་སྡིགས་མཛུབ་གཉིས་བསྒྲེང་སྟེ་ཕན་ཚུན་རྩེ་མོ་སྦྱར་ཏེ་སྐྱེ་གནས་ཀྱི་ཕྱག་རྒྱའོ། བཅིངས། །སྔགས་པས་བསྒྲུབ་བྱ་མངོན་ཕྱོགས་ཏེ། །བརྒྱ་རྩ་བརྒྱད་དུ་བཟླས་པར་བྱ།བསྙེན་པ། །ཡན་ལག་རུས་པས་བརྒྱན་བསམ་ཞིང་། འདྲི་མཁན།་་་་་།གཅེར་བུར་གྱུར་པས་རང་གིས་བྲི། །ཡི་དགས་བྲི་གཞི། གོས་སམ་རོ་ཡི་ནི། །བུམ་པ་སྐམ་པོ་དག་ལ་ཡང་། །ཡི་དགས་སེན་རྩི་སྣག་ཚ། ཁྲག་དང་ནི། །དེ་བཞིན་ཙན་དན་དམར་པོས་བྲི། །འཁོར་སྒྲུབ་ཚུལ། ལོ་དེ་ཡི་ལྟོར་བསྒྲུབ་བྱའི་གཟུགས་བརྙན་བྱས་དེའི་ལྟོ་བར་རབ་ཏུ་གནས་ཟིན་པའི་འཁོར་ལོ་དེ་བཅུག །དེའི་སྐུད་པའི་སྣ་མོ་གཅིག་སྐྱེ་གནས་ནས་མར་བཏོན། གཅིག་སྣ་བུག་ཕྱོགས་ནས་བཏོན་ལ་དེ་ནས་སྦྱོར་བའི་ཕྱག་རྒྱ་དང་ལྡན་པས་མཐེ་ཆུང་གཉིས་ཀྱིས་སྐུད་པའི་སྣ་མོ་གཉིས་བཟུང་སྔགས་ཀྱི་མཐུན་མཚམས་གསུམ་དུ་བསྐུལ། སྐུད་པས་སྙིང་བསྐུལ་ལས་སྦྱོར་མི་རུས་ལས་བྱས་པའི་ཕུར་པ་སོར་བརྒྱད་པ་ལ་སྔགས་བཏབ་སྟེ་གཟུགས་བརྙན་དེའི་ལྐོག་མར་བཏབ་ན་ཚིག་འཕྲོག །མིག་ཏུ་བཏབ་ན་ལོང་། རྣ་བ་ལ་འོན། སྣ་ལ་ཞོམ། ལྕེ་ལ་ལྐུགས་པར་འགྱུར་རོ། །གནས་ཏེ། །ཇི་སྲིད་འདོད་བཞིན་ཐུན་གསུམ་དུ། བློ་ལྡན་མཐེའུ་བསྐྱོད་ནས་ནི། །ཚངས་བ་གསོད་པའང་ཉིན་བདུན་འགྲུབ། །ཙན་དན་དམར་པོའི་རྡུལ་ལས་ནི། བྱེད་ཁྱེར་སྔ་མ་འདྲ།་་་་་།བསྒྲུབ་པར་བྱ་བའི་གཟུགས་བྱས་ལ། །ཚ་བ་གསུམ་གྱིས་ལུས་བྱུག་ནས། །སྤྲ་ཚིལ་གྱིས་ཀྱང་བྱུག་པར་བྱ། །ཟངས་མའི་ཁབ་ཀྱིས་སྐྱེ་གནས་དབུག །སེང་ལྡེང་འདག་མེ་དུ་མེད་ལ། །བློ་དང་ལྡན་པས་ཉིན་བདུན་བསྲོ། །སྒྲུབ་པ་པོ་ཡིས་བརྒྱ་བཟླས་ན། །རྒྱལ་པོ་བློན་པོ་འདུན་ན་འདོན། །བཙུན་མོ་འཁོར་དང་བཅས་པ་ནི། །མྱུར་དུ་འགུགས་པར་བྱེད་པ་ཡིན། །དང་། གྲོ་ག་ཡི་ནི་འདབ་མ་ལ། །རོ་ཡི་སེན་རྩི་རོ་ཙ་ནས། །མི་ཡི་བདག་པོ་འཁོར་བཅས་ལ། །མིང་དང་སྤེལ་ཏེ་བྲི་བར་བྱ། །མངོན་པར་ཕྱོགས་ཏེ་ཟློས་བཞིན་དུ། །སེང་ལྡེང་༼༢བ༤༽དང་ནི་དུར་ཁྲོད་མེར། །ཇི་སྲིད་སྤྲ་ཚིལ་མ་ཞུ་བ། །མེ་ཡི་སྟེང་དུ་གདུང་བར་བྱ། །བསྒྲུབ་བྱ་མངོན་པར་གདུངས་ཙམ་གྱིས། །ལྷ་དང་ལྷ་མིན་འོང་འགྱུར་ན། །ས་སྟེང་སྐྱེ་བོ་སྨོས་ཅི་དགོས། །དང་། ཡི་དགས་སེན་རྩི་སྐྱེས་པ་ཡི། །ཁྲག་དང་གི་ཝང་བཅས་པ་ཡིས། །བསྒྲུབ་གྲོ་ག་ལ། རྒྱལ་པོ་ལ་སོགས་རོའི་སེན་རྩི་དང་གི་ཝང་གིས་མིང་སྤེལ་ཚིག་དང་བཅས་པ་བྲི། བསྒྲུབ་བྱའི་རྐང་རྗེས་ཀྱི་ས་དང་། ཙན་དན་དམར་པོའི་རྡུལ་དང་། དུར་ཁྲོད་ཀྱི་ཐལ་བ་རྣམས་གཅིག་ཏུ་བྱས་ཏེ་ལག་མཐིལ་གཉིས་སུ་བཞག་སྔགས་བཟླས་ཏེ་ཕུར་པ་སེང་ལྡིང་གི་མེ་དུ་བ་མེད་པ་ལ་སྦྱིན་སྲེག་བྱ། དེའི་ཐལ་བ་བླངས་ལ་བསྒྲུབ་བྱའི་གཟུགས་བརྙན་པ། སྙིང་གར་འཁོར་ལོ་བཅུག་ལ། སྤྲ་ཚིལ་གཡོགས་ཏེ་ཟློས་བཞིན་དུ་ཐིགས་རེ་ཞུ་བ་ཙམ་དུ་བསྲོ། །དབུགས་ཕྱིར་མཐོན་པར་སྤས་ན། རྨོངས་ཏེ་བདག་གི་དྲུང་དུ་རླུང་གི་ཤུགས་ཀྱིས་འོང་བར་འགྱུར་རོ། །བྱའི་མིང་སྤེལ་གྲོ་གར་བྲི། །མཉེས་ནས་སྦྱིན་སྲེག་བྱས་པ་ཡི། །ཐལ་བ་དེ་ཉིད་བཟུང་ནས་སུ། །བསྒྲུབ་པར་བྱ་བའི་གཟུགས་བྱས་ཏེ། །སྙིང་ཁར་འཕྲུལ་འཁོར་བྱས་ནས་ནི། །ཟློས་བཞིན་དུ་ནི་མེར་གདུངས་ན། །བརྒྱལ་ཞིང་སེམས་དང་བྲལ་འགྱུར་ལ། །རྨོངས་ཤིང་རབ་ཏུ་མྱོས་ནས་ནི། །རླུང་གི་ཤུགས་ཀྱིས་འོང་བར་འགྱུར། །འདི་རྩ་རྒྱུད་ལེའུ་ཞེ་ལྔ་པར། །དེ་ནས་སྐྱེ་གནས་རྒྱ་བཅིངས་ལ། །བརྒྱ་རྩ་བརྒྱད་དུ་བཟླས་ནས་ནི། །སོགས་ཀྱིས་གསུངས་ལ་རྡོ་རྗེ་མཁའ་འགྲོར་རྒྱས་པས་དེ་བཤད་དོ། །ཉེ་སྙིང་གི་འཕྲུལ་འཁོར། རྩ་རྒྱུད་ལས། ཡི་གེ་བདུན་པའི་ཆོ་ག་ཡིས། །རྣལ་འབྱོར་མ་དྲུག་རྣམ་པར་འགོད། །འཁོར་ལོ་ལེགས་པར་གནས་པ་དྲུག །རྣམ་པ་དེ་ལྟའི་ཆོ་ག་ཡིས། །གཡོན་པ་ཉིད་དུ་བསྐུལ་དང་བཅས། སོགས་གསུངས་ལ། དེ་རྒྱས་པར་རྡོ་རྗེ་མཁའ་འགྲོ་ལས། དེ་༼༣ན༥༽ནས་བཅོམ་ལྡན་ཀུན་མཁྱེན་པས། །ཡེ་ཤེས་མངོན་པར་ཤེས་པ་ཡིས། །འཁོར་ལོ་ཞེས་བྱ་བཀའ་སྩལ་བ། །གེ་སར་ལྟེ་བར་ལྡན་པ་ཡི། །པདྨ་འདབ་མ་དྲུག་པ་བྲི། །ཟླ་བ་བཟང་པོས་ཉེ་བར་བརྒྱན། །རྡོ་རྗེ་འཕྲེང་བས་རྣམ་པར་ཀླུབས། །དེ་ནི་ཕྱི་ལྟེ་བ། དེའི་ཕྱིར་རྩིབས་དྲུག །དེའི་ཕྱིར་པད་འདབ་དྲུག །རྡོར་ར་འོད། རོལ་འཁོར་ལོ་སྟེ། སྟོན་ཀའི་ཟླ་ལྟར་དྲི་མ་མེད། །ཡི་གེའི་མཆོག་ནི་རྣམ་པར་དྲུག །ལྷ་མོ་ཆེན་པོ་ཕྲན་པ་གཅིག །ཧཱུཾ། བདུད་ཐམས་ཅད་ཀྱི་ལས་འཇོམས་པར་བྱེད་པ། འཁོར་ལོའི་རྒྱལ་པོ་ཞེས་བྱ་བའོ། །ཙན་དན་དཀར་ཧཱུཾ་དང་རོ་ཅན། གྲོ་ག་ལ་ནི་བྲིས་ནས་ནི། །འཁོར་ལོ་ལག་པ་གཡོན་པར་བཅངས། །འཁོར་ལོ་འདི་ནི་ལྷ་མོ་ཆེ། །ལས་ཀྱི་འོད་ཀྱིས་བརྒྱན་པ་ཡིན། །དེ་ནས་བསྒྲུབ་བྱ་ཉིད་དབུས་སུ། །བསམས་ཏེ་སྟོང་དུ་བཟླས་ན་ནི། གང་ལ་ལག་པ་དེ་བསྟན། །དེ་ནི་ངེས་པར་འགུགས་པར་འགྱུར། །ཡི་གེ་ཤེལ་གྱི་རྣམ་པ་ལྟར། །བསམས་ཏེ་ནད་ཀྱིས་གདུངས་ལ་བསྟན། །མཐོང་བ་ཙམ་གྱི་མོད་ལ་ནི། །ནད་རྣམས་ཀུན་ལས་རྣམ་གྲོལ་བར། །འགྱུར་བ་ཉིད་དུ་ཐེ་ཚོམ་མེད། །ལག་པ་གཡོན་པར་འཁོར་ལོ་འདི། །ཟླ་བའི་དབུས་སུ་རྣམ་བཀོད་ན། །སྟོན་ཀ་ཡི་ནི་ཟླ་ལྟར་འགྱུར། །འཁོར་ལོ་འདི་ནི་ལྷ་མོ་ཆེ། །ལས་ཀྱི་འོད་ཀྱིས་རབ་བརྒྱན་ན། །ལས་ཀྱི་ཆོ་ག་མཐོང་བ་ཡིས། །བྱ་བ་ཐམས་ཅད་བྱེད་པར་འགྱུར། །དུར་ཁྲོད་རས་སམ་ཐོད་པའམ། །ཨརྒྷ་ཡི་ནི་འདབ་མ་ལ། །སྔར་བསྟན་པ་ཡི་སོལ་བ་དང་། །སྐྱེས་པའི་ཁྲག་གི་སྣག་ཚས་ནི། །སྒྲུབ་པོས་མིང་རུས་སྨྱུ་གུས་བྲི། །ཉི་མའི་དབུས་ཀྱང་ཁྲོ་སེམས་ཀྱིས། །གཟུགས་བརྙན་བྱས་ལ་བསྒྲུབ་བྱ་ཡི། །དབུས་སུ་དེ་ནི་བཅུག་ནས་སུ། །སྐྱེ་ཚེ་ཡིས་ནི་བྱུག་ནས་ནི། །ཡང་དང་ཡང་དུ་བསྲོ་བར་བྱ། །སྔགས་ཀྱི་རྒྱལ་པོ་བསྐུལ་བ་ཡིས། །བྱ་བ་ཐམས་ཅད་བྱེད་པར་འགྱུར། །འདི་ཡིས་ནད་རྣམས་ཐམས་ཅད་ནི། །འཕེལ་དར་དེ་བཞིན་སྐྱེད་བྱེད་པའོ། །རིམས་ལ་ཡི་དགས་སྙིང་ཁར་ནི། །འགའ་རེ་ཡི་༼༣བ༦༽དགས་ཀླད་པ་སྟེ། །བརྗེད་བྱེད་རླུང་དང་སྤྲིན་ལ་བྲི། །གཟེར་བར་བྱ་བ་གདུང་ལས་ཏེ། །དུག་དང་མཛེ་ནད་ལྟོ་འཕྱེ་ལ། །གདོན་ལ་གདོན་གྱི་མཚན་མར་བྲི། །མདོར་བསྡུས་ནས་ནི་འཁོར་ལོ་འགོད། །ཤེལ་དང་ཟླ་བའི་མདོག་འདྲ་བའི། །ཡི་གེ་བདུད་རྩིའི་རྒྱུན་འབབ་པ། །སྟོན་ཀའི་ཟླ་ཟེར་ལྟ་བུར་ནི། །བསམ་གཏན་བསམས་པ་ཙམ་གྱིས་ནི། །འཆི་བའང་ངེས་པར་སློང་བར་བྱེད། །སྦྲུལ་ཆེན་རྒྱ་ཡིས་ཟིན་ནས་ནི། །འཆི་བའང་མྱུར་དུ་སློང་བར་བྱེད། །དུག་གིས་བརྒྱལ་བར་གྱུར་པ་དག །བསྟན་པ་ཙམ་གྱིས་སློང་བར་འགྱུར། །རིམས་དང་གདོན་དང་རྗེད་བྱེད་དང་། །ལག་པ་མཐོང་བས་རླག་པར་བྱེད། །གྲིབ་མ་ལའང་མི་འགོད་ན། །དེ་ཡི་ལུས་ལྟ་སྨོས་ཅི་དགོས། །ཟངས་མི་ཡིན་འདབ་མ་ལའམ། ལག་པ་གཡོན་པར་འཁོར་ལོ་འདི། །བ་བླང་དང་ནི་ཡུང་བས་བྲིས། །དེ་ནས་ཆུ་ཡི་ནང་བཞག་ལ། །ཇི་ལྟར་འབྱུང་བཞིན་འབད་དེ་མཆོད། །མཚམས་ཀྱི་དུས་སུ་མཉམ་གཞག་པས། །དེ་བཞིན་དུ་ནི་སྔགས་བཟླ་བྱ། །ཆུ་ཡི་ནང་ནས་བཏོན་ནས་སུ། །འོ་མས་བཀྲུས་ལ་རྒྱ་མཚོར་གཞུག །གཡུལ་དུ་ཁུ་ཚུར་བཅིངས་ནས་ནི། །རྒྱན་རྣམས་ཀུན་གྱིས་རྣམ་པར་བརྒྱན། །ཡིད་ལ་རྟག་ཏུ་ཟློས་བྱེད་ན། །དེ་སྲིད་ཁུ་ཚུར་མ་བཀྲོལ་བ། །མྱུར་དུ་ཐམས་ཅད་རེངས་འགྱུར་ཏེ། །དགྲ་བོ་གལ་ཏེ་ལག་ན་ནི། །མཚོན་ཆ་ཕྱར་ཏེ་ཐོགས་པ་ཡང་། །ཇི་སྲིད་ཁུ་ཚུར་མ་བཀྲོལ་བར། །མཚོན་ཆ་གཏོང་བར་མི་ནུས་སོ། །ཡི་གེ་གཞན་དང་རྣལ་འབྱོར་མ། །དྲུག་གི་ཡི་གེ་འདི་དག་ནི། །འཁོར་ལོ་དྲུག་ལ་གནས་པར་ནི། །ལག་པའི་དབུས་སུ་བཀོད་ནས་སུ། །ཆོ་ག་རིག་པས་བཅང་བར་བྱ། །ཁ་ནས་གསང་སྔགས་རྒྱལ་པོ་ཟློས། །དེ་ཡི་གཟུགས་བསྒྱུར་བཟུང་ནས་ནི། །དེ་ནི་འགུགས་འགྱུར་ཐེ་ཚོམ་མེད། །ཙན་དན་དམར་པོའི་རྡུལ་དང་ནི། །ལན་ཚྭ་སྐེ་ཚེ་དེ་བཞིན་དེ། །བསྒྲུབ་བྱའི་རྐང་རྗེས་རྡུལ་དང་ནི། །གཅིག་ཏུ་བྱས་ནས་བཏགས་པར་བྱ། །ལན་བརྒྱར་བྱས་ཏེ་རབ་བསྒོམས་ན། །ས་བདག་སྐྱེ་བོ་༼༤ན༧༽ནོར་དང་ནི། །བཅས་ཏེ་དབང་དུ་གྱུར་པའམ། །དེ་ནི་འགུགས་པར་ཐེ་ཚོམ་མེད། །སྦྱོར་བ་འདི་ནི་གྲུབ་པ་སྟེ། །གཞན་དག་ཏུ་ནི་ང་མི་སྨྲ། །རྡུལ་དེ་ཉིད་ནི་བཟུང་ནས་སུ། །ལྕགས་ཕྱེ་དང་ནི་བསྲེ་བར་བྱ། །དུར་ཁྲོད་རས་ལ་གཏུམས་ནས་སུ། །ལན་བདུན་དུ་ནི་བཟླས་པར་བྱ། །ལམ་གྱི་བཞི་མདོར་སོར་བརྒྱད་ཙམ། །བརྐོས་ཏེ་དགྲ་ཡི་མིང་ནས་ནི། །གཟུང་ནས་ས་ཡིས་དགབ་པར་བྱ། །གང་གི་མིང་གཟུང་དེ་བཅིངས་འགྱུར། །ཕྱི་མ་དེ་ཉིད་བཟུང་ནས་ནི། །འོ་མ་ཡིས་ནི་འབད་དེ་བཀྲུ། །སླར་ཡང་གྲོལ་འགྱུར་ཐེ་ཚོམ་མེད། །ཕྱི་མ་དེ་ཉིད་བཟུང་ནས་སུ། །སྨྱོ་བྱེད་ལྔ་རྩ་བ་སྡོང་པོ། འདབ་མ། མེ་ཏོག །འབྲས་བུའོ། དང་ལྡན་པར་བྱ། །རོ་ཡི་གོས་ལ་བསྒྲུབ་བྱ་ཡི། །མིང་བྲིས་ནས་ནི་གཏུམ་པར་བྱ། །ལན་བརྒྱ་བཟླས་ཏེ་དུར་ཁྲོད་དུ། །སྦས་ན་སྐྱེས་བུ་འཕྲལ་དུ་ནི། །སྨྱོ་འགྱུར་འདི་ལ་ཐེ་ཚོམ་མེད། །ཕྱུང་ནས་བ་ཡི་འོ་མ་ཡིས། །འབད་དེ་སླར་ཡང་བཀྲུས་ནས་ནི། །གྲོལ་འགྱུར་འདི་ལ་ཐེ་ཚོམ་མེད། །ཅེས་གསུངས་ལ། སྡོམ་འབྱུང་ལས། འཁོར་ལོ་རྩིབས་དྲུག་བྲིས་ནས་ནི། །ཡི་གེ་བདུན་པའི་སྔགས་སྦྱར་ཞིང་། །ཕྱི་རོལ་རྡོ་རྗེའི་འཕྲེང་བས་བསྐོར། །དབུས་སུ་མིང་ནི་རྣམ་སྤེལ་བའོ། །ཞེས་ཕྱིའི་པདྨ་མེད་པ་གཅིག་གསུངས་པ་རྒྱས་བསྡུས་སུ་བཞེད། འདི་ཀས་ལས་ཐམས་ཅད་བསྒྲུབ་པ་དང་ཞི་རྒྱས་དབང་ངམ་དྲག་པོའི་ཏིང་ངེ་འཛིན་སོགས་བཤད་པས་དེ་ནི་སྤྱི་ལ་འཇུག་པས་འོག་ཏུ་སྟོན་ནོ། །ཡུམ་གྱི་སྙིང་པོའི་འཕྲུལ་འཁོར་ནི། །རྡོ་རྗེ་མཁའ་འགྲོ་ལས། མཁའ་འགྲོ་མ་ཡི་སྙིང་པོའི་སྔགས། དེ་ནས་བཅོམ་ལྡན་འདས་ཀྱིས་གསུངས། ནམ་མཁའི་དབྱིངས་གྱུར་ས་བོན་ནི། ཀུན་ཏུ་འོད་ཟེར་རབ་འཕྲོ་བ། །སྟོན་ཀའི་ཟླ་གསལ་དྲི་མེད་པའི། །འཁོར་ལོ་རྩིབས་ནི་བཅུ་གཉིས་ལྟེ་བ། རྩིབས་བཅུ་གཉིས་འོད་འཕྲེང་། བྱ། །རྩིབས་དེ་རྣམས་ལ་ས་བོན་གྱི། །ཡི་གེ་མཆོག་ཏུ་ཕན་པ་དགོད། །དེ་ཡི་ལྟེ་བར་འགོད་བྱ་བ། །རིག་ཨོཾ་སརྦ་བུདྡྷ་སོགས་སྙིང་པོ། པ་ཆེན་མོའི་ཡི་གེ་ཆེ། །༼༤བ༨༽བསྲུང་བ་རྡོ་རྗེའི་མཆོག་རིག་པས། །མཁའ་འགྲོ་མ་ཀུན་གོ་ཆ་བྱ། །སྔགས་ཀྱི་རྒྱལ་པོ་བསྐུལ་བ་ཡི། །དབུས་སུ་བསྒྲུབ་བྱའི་མིང་བྲི་བྱ། །རྣམ་པའི་མཆོག་ཀུན་ལྡན་པ་རུ། །སྤྲོ་བའི་བདག་ཉིད་ཅན་གྱིས་སྤྲོ། །གུར་གུམ་དང་ནི་རོ་ཙ་ནས། །གྲོ་ག་དང་ནི་ངས་དཀར་ལ། །སྙིང་སྟོབས་ཅན་གྱིས་བྲི་བར་བྱ། །ལས་ཀྱི་ཆོ་ག་མཐོང་བ་ཡི། །སྒྲུབ་པ་པོ་ཡིས་སྔར་བསྟན་བཞིན། །གདུག་པ་རྣམས་ན་ཚིར་གཅོད་བྱེད། །ཉེ་སྙིང་གི་འཕྲུལ་འཁོར་ནི། །མཁའ་དབྱིངས་དབུས་གྱུར་བསམས་པ་ནི། །ཟླ་བའི་ལྟེ་བར་པད་འདབ་བརྒྱད། རྡོ་རྗེ་ཁ་དྲུག་འོད་འཕྲེང་། གོ་ཆའི་ལྷ་མོ། དཀྱིལ་འཁོར་དམ་པ་སྟེ། རྡོ་རྗེ་རྩེ་གསུམ་ཁ་དྲུག་པ། །དེར་ནི་དེ་ནས་བྲི་བར་བྱ། །དེ་དབུས་པདྨ་འདབ་བརྒྱད་པ། །ཤིན་ཏུ་མཛེས་པ་བྲིས་ནས་སུ། །བཻ་རོ་ཙ་ནའི་རིག་པ་ཆེ། །སེམས་ཅན་ཀུན་སྐྱེད་སྡུད་པ་ལྟེ་བར་མིང་སྤལ། མོ། །ཞེས་སོ། །དཔའ་བོའི་གོ་ཆ་འཕྲུལ་འཁོར་ནི། །དེ་ནས་བཅོམ་ལྡན་དེ་བཞིན་གཤེགས། རྡོ་རྗེ་དཔའ་བོའི་འཁོར་ལོར་གསུངས། །ཟླ་བའི་དབུས་གྱུར་རྡོ་རྗེ་ནི། །རྩེ་གསུམ་དེ་བཞིན་ཁ་དྲུག་པ། ཨོཾ། ན་མཿབྷ། བཽཥ་ཊ། ཕཊ་ཧཾ། སླར་ཡང་ལྟ་བ་འདབ་དྲུག །མུ་ཁྱུད། རྡོ་རྗེ་ཁ་དྲུག་འོད་འཕྲེང་དང་བཅས། ཟླ་བར་པདྨ་ནི། འདབ་དྲུག་ལེགས་པར་གནས་པར་བྲི། །དེ་ཡི་དབུས་སུ་ས་བོན་ནི། །འདོད་དོན་ཐམས་ཅད་སྒྲུབ་བྱེད་པ། །སྔགས་པས་ལྟེ་བར་བྲི་བྱ་བ། །བསྒྲུབ་བྱའི་མིང་དང་སྤེལ་བར་བྱ། །རྡོ་རྗེ་སེམས་སོགས་ལྷ་རྣམས་ནི། །ཐམས་ཅད་སྣ་ཚོགས་བླ་ན་མེད། །སངས་རྒྱས་ཀུན་གྱི་གོ་ཆ་སྟེ། །མཛེས་མའི་གདོང་ཅན་ཁྱོད་ལ་བཤད། །དེ་ནས་ལྔ་པའི་ཧོ་ཧོ་ཧོ་ཧེ་ཧ། གསང་སྔགས་བྲི། །པདྨ་འདབ་མར་དེ་བཞིན་གཞན། །རིང་པོ་དྲུག་ནི་ཡོངས་ཧ་ཧི་ཧུ་ཧེ་ཧོ་ཧཾ། སྤོངས་དང་། །རྡོ་རྗེ་ཡི་ནི་ལྟེ་བར་བྲི། །གུར་ཀུམ་སེན་རྩིར། ཁྲག་དང་། རོ་ཙ་ན་ཡིས་གྲོ་ག་ལ། །ཆོ་ག་བཞིན་དུ་བྲིས་ནས་ནི། དུས་གསུམ་དུ་ནི་བཟླས་བྱས་ལ། །མཆོད་རྟེན་བྱས་ནས་བཟུང་བར་བྱ། །ལན་བདུན་དུ་ནི་མངོན་བཟླས་ཏེ། །གོས་ཀྱི་ཐ་མར་བཅིང་བར་བྱ། །ལམ་དུ་འགྲོ་ན་༼༥ན༩༽ཆོམ་རྐུན་དང་། །སྟག་སོགས་འཇིགས་པར་མི་འགྱུར་རོ། །ཐམས་ཅད་དུ་ནི་བསྲུང་འགྱུར་བ། །འགྲུབ་འགྱུར་འདི་ལ་ཐེ་ཚོམ་མེད། །ལྟེ་བ་དེར་ནི་ཐིག་ལེ་ཡིས། །བསྐོར་བའི་ཐིག་ལེ་དག་ཀྱང་བྱ། །ཨ་རི་ཙ་ཏ་ཀ་བཅུད་དེ། །ཡུང་བ་དག་གིས་ཁྱད་པར་དུ། །ཨ་ཤོ་ཀ་ཡི་མྱུ་གུ་ཡིས། །དཔའ་བོ་ཡི་ནི་རས་མར་བྲི། །བསྒྲུབ་བྱའི་མིང་དང་སྤེལ་བ་ཡི། །སྔགས་ནི་སྟོང་དུ་དེ་ནས་བཟླས། །བསྒྲུབ་བྱའི་རྐང་རྗེས་ས་དང་ནི། །གླང་པོ་ཆེ་ཡི་རྐང་རྗེས་རྡུལ། །དུར་ཁྲོད་ཐལ་བར་བཅས་པ་ལས། །སྒྲུབ་པོས་གཟུགས་བརྙན་བྱས་ནས་སུ། །བཅིང་བས་བཅིངས་ནས་དེ་ཡི་ནི། །སྙིང་ག་རུ་ནི་གཞུག་པར་བྱ། །མེ་ཏོག་སེར་པོས་མཆོད་ནས་སུ། །གསང་བའི་གནས་སུ་སྦས་གྱུར་ན། །དགྲ་རྣམས་ཐམས་ཅད་འཆིར་འགྱུར་ཞིང་། །རླག་པར་བྱེད་པ་མི་བཟད་པར། །དཔའ་མོའི་གོ་ཆའི་འཕྲུལ་འཁོར་ནི། །དེ་ནས་ཡང་དག་བཤད་བྱ་བ། །ཟླ་བའི་དབུས་སུ་རྡོ་རྗེ་སྟེ། །དེ་བཞིན་གཞན་ཡང་པདྨའོ། །ཀུན་ནས་རྣམ་པར་སྤོ་བ་ཡི། །མཁའ་འགྲོ་མ་ཡི་ས་བོན་བཀོད། །དབུས་སུ་རྡོ་རྗེ་ཕག་མོ་ནི། །ཨོཾ། ཤིན་ཏུ་དྲག་ཅིང་གསལ་བའི་གཟུགས། །ཡི་གེ་དགོད་པས་དགོད་པར་བྱ། །རིམ་པ་དེ་ལྟར་བརྗོད་པ་ལས། །ཡུམ་གྱི་སྙིང་པོ་དང་ཉེ་སྙིང་གོ་ཆ་གསུམ་ག་ལ་བསྙེག །ཞི་ལ་ཞི་བའི་ཡིད་ཀྱིས་སུ། །རོ་ཙ་ན་ཡིས་གྲོ་གར་བྲི། །མ་མོའི་གནས་དང་དུར་ཁྲོད་དུ། །གོས་ཆེན་དེ་བཞིན་ཁྲོ་དང་བཅས། །ཆགས་པ་ལ་ནི་དམར་པོའི་གོས། །རྒྱས་ལ་གོས་སེར་དེ་བཞིན་ཏེ། །དེ་དང་དེར་ནི་བསྒོམས་བྱས་ན། །ཅི་རིགས་པར་ནི་སྤྲུལ་པར་བྱ། །བུ་མོ་གཞོན་ནུའི་རོ་ཡི་ནི། །གོས་ནི་འབད་དེ་བླངས་ནས་སུ། །ཚེས་བརྒྱད་དང་ནི་བཅུ་བཞི་ལ། །དེ་ཉིད་ལས་བྱུང་སོལ་བ་ཡིས། །སྣ་ཚོགས་རྡོ་རྗེ་ཁ་བཞི་ལ། །སྔགས་དང་སྤེལ་བར་བྲིས་ནས་ནི། །ལན་བདུན་དུ་ནི་བཟླས་ནས་སུ། །གང་གི་ཁྱིམ་དུ་སྦས་གྱུར་ན། །དེ་ནི་གཤིན་རྗེའི་༼༥བ༡༠༽གྲོང་ཁྱེར་དུ། ཉི་མ་བདུན་གྱིས་འགྲོ་བར་འགྱུར། དེ་ཡི་རྐང་པའི་རྐང་སྤུབས་དང་། །བུམ་པ་ལ་སོགས་དག་ཀྱང་རུང་། །རུས་པའི་ཕུར་པའི་སྦུ་གུར་ནི། །འཕྲུལ་འཁོར་འདི་ནི་བཅུག་སྟེ་སྦ། །ཆོ་གའི་སྦྱོར་བ་འདི་ཡིས་ནི། །འཆི་འགྱུར་འདི་ནི་གདོན་མི་ཟ། །ལས་རྣམས་ཀུན་ལ་སྒྲུབ་པ་པོས། །ཆོ་ག་དང་ནི་ལྡན་པར་བྱ། །རང་གར་གཟུང་བའི་སྔགས་ཀྱིས་ནི། །བསྐལ་པ་བྱ་བ་བརྒྱས་མི་འགྲུབ། །དང་། ཡང་། གང་དང་གང་གི་བསམ་གཏན་གྱིས། །སྒྲུབ་པོས་བཟླས་པ་བརྩམ་པར་བྱ། །སྦྱོར་བ་དེ་དང་དེ་དག་གིས། །འདོད་པའི་འབྲས་བུ་ཐོབ་པར་འགྱུར། །ཇི་ལྟར་ནོར་བུ་དག་ལ་ནི། །རྫས་གང་ལ་བརྟན་གཟུགས་འཛིན་པ། །དེ་བཞིན་རྡོ་རྗེ་མཁའ་འགྲོ་ཡང་། །ཡང་དག་མཆོག་འཛིན་བསམ་གཏན་འགྱུར། །བསམ་པ་གང་དང་གང་གིས་ནི། །མི་རྣམས་ཡིད་ན་ཡང་དག་སྦྱོར། །དེ་དང་དེ་ཡི་དངོས་འགྱུར་ཏོ། །སྣ་ཚོགས་གཟུགས་བརྙན་ནོར་བུ་བཞིན། །ཞེས་གསུངས། རྩ་བའི་སྔགས་ཀྱི་འཕྲུལ་འཁོར་ནི། །ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་དམ་པ་སྟེ། །འོད་ཟེར་ཚོགས་ནི་གསལ་བའི་གདངས། །འཁོར་ལོའི་འཕྲེང་བས་རྣམ་པར་ཀླུབས། །དེ་དབུས་འཁོར་ལོ་རྩིབས་བརྒྱད་དང་། །པདྨའི་འཕྲོད་པས་ཤིན་ཏུ་མཛེས། །སླར་ཡང་འཁོར་ལོ་བྲི་བར་བྱ། །རྡོ་རྗེའི་འཕྲེང་བ་རྣམ་པར་འཕྲོ། །སྐུ་གསུང་ཐུགས་ཀྱི་རྡོ་རྗེ་ཡི། །འཁོར་ལོ་དཀྱིལ་ནང་དུ་པད་འདབ་བརྒྱད་གྲི་གུག་འཕྲེང་། ཕྱིར་གྲུ་བཞི་སྒོ་འདི་མོད་པས་། འཁོར་ལྟ་བུ་ཡིན། །ནམ་མཁའ་ཐམས་ཅད་གཡོག་བྱེད་པ། །རང་གི་ལུས་ལས་སྤྲོ་བར་བྱ། །དཀར་དང་དམར་དང་སྔོན་པོ་སྟེ། །ཁ་དོག་མཆོག་གི་བྱེ་བྲག་བྱ། །བྱ་བའི་ཆོ་ག་འདི་ཡིས་ནི། །དཔའ་བོའི་དབང་ཕྱུག་དེ་བཞིན་བྲི། །དབུས་སུ་བསྒྲུབ་པར་བྱ་བའི་མིང་། །ཇི་ལྟར་འདོད་བཞིན་སྦྱར་བར་བྱ། །ཕྱི་རོལ་རྡོ་རྗེའི་འཕྲེང་མིན། །འོད་ཟེར་འབར་བའི་འཕྲེང་འཁྲུག་བྲི། །འདི་ནི་བསྲུང་བ་ཆེན་པོ་སྟེ། །ཐམས་ཅད་བསྲུང་པ་བླ་ན་མེད། །རིམས་དང་ནད་དང་དུག་དང་ནི། །མཁའ་འགྲོ་མ་ཡིས་འཚེ་བ་༼༦ན༡༡༽དང་། གདོན་དང་བདུད་དང་ལོག་འདྲེན་དང་། །གང་ཡང་ལུས་སྲུལ་ལ་སོགས་པས། །གྲིབ་མ་ཡང་ནི་མི་འགོང་ན། །དེ་ཡི་ལུས་ལྟ་སྨོས་ཅི་དགོས། །ཟླ་གཟུགས་ལྟ་བུའི་ཡི་གེ་ལྟ། །ཕྱོགས་བཅུར་རྣམ་པར་བཀྱེ་བར་བྱེད། །དཀར་པོ་ཡིས་ནི་ཞི་འགྱུར་ཏེ། ནག་པོས་སྐད་ཅིག་དག་གིས་གསོད། །དམར་པོ་ཡིས་ནི་དབང་བྱེད་དོ། །དེ་ཉིད་ཀྱིས་ནི་ངེས་པར་འགུགས། །སེར་པོས་ངེས་པར་འཆིང་འགྱུར་ཏེ། །དམག་གི་དཔུང་ནི་འཆིང་བར་འགྱུར། །ཞེས་བཅོམ་ལྡན་འདས་ཀྱིས་གསུངས་ཏེ་ལས་ཐམས་ཅད་འབྱུང་བ་ཞེས་བྱ་བའི་བསྲུང་བའི་འཁོར་ལོའོ། །ཡང་། རིག་པའི་རྒྱལ་པོ་སྒྲུབ་པའི་ཐབས། འཁོར་ལོ་ཆེན་པོ་རྨད་བྱུང་བ། གདེངས་ཀའི་དབང་ཕྱུག་ཅེས་བྱ་བ། །ཐོས་པ་ཙམ་གྱིས་སྲེག་བྱེད་ན། །མིང་དང་ལྡན་པ་བྲིས་པ་ཡིས། །གདེངས་ཀ་ཐམས་ཅད་སྨོས་ཅི་དགོས། །དབང་ལྡན་ནས་ནི་བརྩམས་ནས་སུ། །ཀླུ་ཆེན་བརྒྱད་གཟུགས། སྙིང་གར་རྐང་པ་བརྒྱད་པ་ཕྲལ་བ་བྲི། རྣམས་ས་བོན་ལས་བྱུང་བ། །རིན་ཆེན་དང་ལྡན་གདེངས་གསུམ་མཐོ། །གཞན་ཡང་ཕྱོགས་བསམ་ཅན། ནི་ཀུན་ཏུ་བསམ། །དེ་ནས་འགྱུར་ནི་འདི་བཞེས་ཏེ། །ཤར་དུ་ཾ་བར་དུ་བྲི། །ནུབ་ཏུ་ཧི་སྟེ་བྱང་དུ་ཧཾ། གཤིན་རྗེར་ཧཱུཾ་ཞེས་བྱ་བ་བྲི། །ཀི་ལི་ཀི་ལི་ཡི་དགས་སུ། །སྲིན་པོར་ཅི་ལི་ཇི་སྙེད་པ། །རླུང་དུ་མི་ལི་མི་རྩིབས་ཀླུ་གཟུགས། །ལི་པྲི། མེ་ཡི་ཕྱོགས་སུ་དྷི་ལི་ཉིད། དང་པོར་རབ་གཏུམ་མ་ནས་ནི། །བརྩོན་ཆེན་མ་ཡི་མཐར་ཐུག་པས། །སྔགས་འདི་དག་ནི་བྱིན་གྱིས་བརླབས། །འཁོར་ལོ་འདི་ནི་སྐལ་ཆེན་ལྡན། །དགྲ་རྣམས་ཀྱི་ནི་གནད་གཅོད་པ། །ཧཱུཾ་ཕཊ་ཅེས་བྱ་སྤེལ་བ་ཡི། །བསྒྲུབ་བདེ་ཡི་དབུས་སུ་བྲི། །ལན་གཅིག་བཟླས་པས་གུ་གུལ་གྱིས། །བདུག་པ་ཉིད་དུ་སྦྱར་བྱས་ལ། །ཀླུ་རྣམས་ཐམས་ཅད་འབེབས་པར་འགྱུར། །ལག་པ་གཡོན་པ་ལ་འཁོར་ལོ་འདི་དངོས་སུའམ་ཡིད་ཀྱིས་བྲིས་ལ། སྔགས་ལན་གཅིག་བཟླས་པས་བྱས་པ་ན། འཆི་བས་དུས་སུ་ཟིན་པ་༼༦བ༡༢༽སློང་བར་བྱེད་དོ། །ཀ་ར་བི་རའི་འདབ་མུའི་ཁུ་བས་ཀ་ར་བི་རའི་སྨྱུ་གུས་བྲིས་ལ། ལན་ཅིག་བཟླས་པས་རེག་ན་མངལ་གང་དུ་འདོད་པ་དེར་འཕོ་བར་འགྱུར་རོ། །དུག་དང་ལན་ཚྭ་དང་། སྐེ་ཚེས་བྲིས་ཏེ་ཁྲོས་ན་གསོད་པར་འགྱུར་རོ། །རོ་བསྲེགས་པའི་མགལ་པས་དྷ་དྷུ་རའི་ཁུ་བས་མེ་བསད་དེ་འབྱུང་པོའི་ཉི་མ་དེ་ཉིད་ཀྱི་འཁོར་ལོར་བྲིས་ཏེ་ལན་གཅིག་བཟླས་པ་དེ་གང་ལ་བསྣུན་ན་དེ་ལྟུང་བར་འགྱུར། པད་ཀོ་ཏའི་སྨྱུ་གུས་སྔགས་ཆོ་ག་སྔ་མ་བཞིན་བྲིས་ལ་ཐལ་བ་ལ་མངོན་པར་བསྔགས་ཏེ། གང་ལ་བསྣུན་པ་དེ་ཤ་ཟས་བཟུང་བར་འགྱུར་རོ། །དུར་ཁྲོད་ཀྱི་སོལ་བས་ཤིང་ལེབ་བམ་རྩིག་ལོགས་ངོས་ལ་འབྱུང་པོའི་མཚན་མོ་གང་གི་སྙིང་གར་མིང་བྲིས་པ་དེ། གདོན་ཆེན་པོས་བཟུང་བར་འགྱུར་རོ། །བསྒྲུབ་བྱའི་གཟུགས་བྱས་ལ་དེའི་སྙིང་གར་འཕྲུལ་འཁོར་བཅུག་སྟེ་ཞག་བདུན་གྱི་བར་དུ་དྲི་ཆུའི་ནང་དུ་བཞག་ནས་ཨ་ཏི་མུག་ཏའི་ལྕུགས་མ་ལ་ལན་བདུན་བསྔགས་ཏེ། དེ་ལ་བསྣུན་ན་ཞག་བདུན་གྱི་མཐར་རླུང་གི་ཤུགས་ཀྱིས་འོང་བར་འགྱུར་རོ། །འཁོར་ལོ་དེ་ཉིད་བྱེ་བྲག་ཏུ་དུར་ཁྲོད་ཀྱི་རས་ལ་ཕོ་ཉའི་ཁ་དོག་གིས་བྱེ་བྲག་ཏུ་གྱུར་པ་བྲིས་ལ། །ལས་ཀྱི་ཕོ་ཉ་དང་ལྷན་ཅིག་ཏུ་བསྒྲུབ་པར་བྱའོ། །་་་རིབ་རའི་ལྕགས་མ་ཁྲུ་ཕྱེད་དང་གཉིས་ཀྱི་ཚད་དང་ལྡན་པ་ལ། གང་ལ་མངོན་པར་ཕྱོགས་པས་བྲིས་ཏེ་སྔགས་ཁྲི་བཟླས་ནས། རོ་བསྲེགས་པའི་མེ་འབར་བ་ལ་དོར་ཏེ་ཇི་སྲིད་མ་ཚིག་པ་དང་མྱུར་དུ་བླངས་ལ། རིག་པའི་རྒྱལ་པོ་ལན་བདུན་བཟླས་ནས། གང་ཞིག་དྲན་ཏེ་ཀླད་ལ་ཀོར་ན། དེ་དེའི་མོད་ལ་རླུང་གི་ཤུགས་ཀྱིས་འོང་བར་འགྱུར་རོ། །སྐྱེས་པའི་རོའམ་ཁམ་ཕོར་ལ་བ་བླ་དང་ཡུང་བའི་ཁུ་བས་གང་གི་མིང་བྲིས་པ་དེ་དེའི་མོད་ལ་བཅིངས་པར་འགྱུར་རོ། །དུར་ཁྲོད་ཀྱི་རས་སམ། ཟླ་མཚན་གྱི་ར་ས་ལ་ཤིང་ཨ་ཤོ་ཀའི་སྨྱུ་གུས་ཀླུ་རྣམས་སྤངས་པའི་འཁོར་ལོ་འདི་བྲིས་ལ། དེའི་དབུས་སུ་སྔགས་པས་ཆོ་ག་བཞིན། ༼༧ན༡༣༽དུ་ཡི་གེ་ཨེ་དང་སྤེལ་བ་བྲིས་ལ་ཁྲོ་བོའི་ཁྱད་པར་ཐམས་ཅད་དང་ལུས་སྲུལ་པོ་ཐམས་ཅད་བཅིངས་པར་འགྱུར་རོ། །ཐོད་པ་ལ་སྐྱེས་པའི་ཁྲག་གིས་གང་མིང་བྲིས་ལ་སྔགས་པས་ཁྲོ་བ་དང་བཅས་པས་སྔགས་བཟླས་ན་དེའི་ཁྲག་འགུགས་པར་བྱེད་ལ། ཡིད་ཞི་བ་དང་ལྡན་པས་ཞི་བའི་སྔགས་བཟླས་ན་སླར་གཏོང་བར་འགྱུར་རོ། །འཁོར་ལོ་དེ་ཉིད་ཟླ་བས་བརྒྱན་ཅིང་གསལ་བ་གོ་རོ་ཙ་ན་གྲོ་ག་སྐར་མ་རྒྱལ་གྱི་ཉིན་པར་བྲིས་ཏེ་བུད་མེད་གང་གིས་རྟག་ཏུ་བཅིངས་ན་རིག་པའི་རྒྱལ་པོ་དེ་ཉིད་དེའི་ལྟུམས་སུ་འཇུག་པར་འགྱུར་རོ། །འདིར་མཁའ་འགྲོ་མའི་སྔགས་ལ། དེ་ཉིད་ཀྱི་གོང་དུ། མཁའ་འགྲོ་མ་ནི་ཉི་ཤུ་བཞི། དེ་དག་སྔོན་གྱི་གྲུབ་པ་ཡིན། །རང་མིང་བརྗོད་པའི་སྔགས་ལ་ནི། །མཐར་ནི་ཧཱུཾ་ཧཱུཾ་ཕཊ་དང་སྦྱར། ཨོཾ་ནི་ཐམས་ཅད་གསལ་བྱེད་དེ། གྲུབ་སྩོལ་འདོད་པ་ཐམས་ཅད་པ། །ཞེས་གསུངས་པས། མདོ་སྔགས་ཁོ་ན་རིགས་པ་ཡིན་ལ་གྲུབ་ན་ཀ་ར་ཀ་ར་ལ་དེ་སྦྱར་རོ། །ཁམས་གསུམ་རྣམ་རྒྱལ་གྱི་སྔགས་ཀྱི་འཕྲུལ་འཁོར་ལ་རྒྱས་པ་མཁའ་འགྲོ་རྒྱ་མཚོར་བཅུ་གཉིས་གསུངས་པ་ནི། ལྷ་མིན་འཕྲུལ་འཁོར་དྲི་བྱ་སྟེ། གཅིག་དམོན་ལྔ་བཅུའི་དུམ་བུ་ལ། །ཇི་ལྟར་ལྷ་ལྔ་ལ་ལྷ་མོ་ལྔ། རྣམས་ཀྱི་ནི་སྔགས། བསྒྲུབ་བྱའི་མིང་ནང་བཅུག་པ་ཡི། །ཕག་མོ་ཡི་ནི་སྙིང་པོ་ཡང་། །དུམ་བུ་སོ་སོ་ལ་བྲིའོ། །ཕྱི་རོལ་དུ་ནི་སྔགས་ཐུགས་དམ་བསྐུལ། ཀུན་གྱིས། འདི་ནི་རྟག་ཏུ་བསྐོར་བར་བྱ། །གཡུལ་ངོ་ཡི་ནི་རྫས་ཀུན་གྱིས། །དེ་ནི་ལེགས་པར་ཡོངས་བྲིས་ལ། །འཕྲུལ་འཁོར་ལས་ནི་ཐམས་ཅད་པ། །ལྷ་མ་ཕག་མོ། ཡིན་གྱི་ཁར་སྦྱིན་བྱ་དང་། །ཚར་བཅད་རྗེས་གཟུང་ཐམས་ཅད་ནི། །ཆོས་བྱ་ཆོས་ཅན་ཐམས་ཅད་བྱེད། །སྒྲོལ་སོགས་རྣལ་འབྱོར་མ་མཆོག་རྣམས། །རང་དག་གཟུགས་ཅན་ཤེས་བྱ་ཉིད། །འདི་རྣམས་ཀུན་བསྡུས་གཟུགས་ཉིད་པས། །༼༧བ༡༤༽འཁོར་ལོས་བསྒྱུར་མ་སྒོམ་པར་གྱིས། །སྣ་ཚོགས་པ་ཡི་གཟུགས་འཛིན་ཏེ། །དེ་རྣམས་ཀྱིས་ནི་འཁོར་སྒྱུར་མ། །ཨོཾ་ཏཱ་རེ་ཏུཏཱ་རེ་ཏུ་རེ་སྭཱཧཱ། ཨོཾ་ཙུནྡེ་སྭཱཧཱ། ཨོཾ་མ་རི་ཙྱཻ་སྭཱཧཱ། ཨོཾ་བྷྀ་ཀུ་ཊི་སྭཱཧཱ། ཨོཾ་པརྞ་ཤ་ཝ་རི་སྭཱཧཱ། དེ་ལྟར་ཀུན་གྱི་འཕྲུལ་འཁོར་ཀྱང་། །སྔགས་ཀྱི་ཡི་གེ་རྣམས་ཀྱིས་བྱ། །དང་པོའོ། །གྲུ་བཞི་ཟླུམ་པོ་སྒོ་བཞི། དང་སུམ་རིལ། བཅས་པའི། །བྱང་ཆུབ་འཕྲུལ་འཁོར་རྟག་བྲི་སྟེ། །བཞི་བཅུ་རྩ་དགུ་ལ། །གསང་སྔགས་བཞི་པོ་ཡང་དག་པར། །དུམ་བུ་རེ་རེར་བྲི་བར་བྱ། །དུམ་བུ་ལྔ་རུ་བསྒྲུབ་བྱ་སྟེ། །གྷ་ཕུར་སྔགས། གྷ་ལ་སོགས་ནང་བཅུག་པ། །བྱང་ཆུབ་སེམས་དཔའི་སྤྱན་རས་གཟིགས། ཕྱི་རོལ། །ཕྱག་ཏུ་ནི། གྷིང་འམ་ནི་ཡང་ན་ནི། གི་ཧཾ་ཆེན་པོས་བྲི་བར་བྱ། གྲོ་གར་འཕྲུལ་འཁོར་ཐམས་ཅད་ནི། ལས་ཀྱི་ཁྱད་པར་གྱིས་བྲིས་ཏེ། །གཡུལ་ངོ་ཆེན་པོའི་རས་ལ་ནི། །ལས་ཐམས་ཅད་པ་ནི་བྱ་བ་ཡིན། །གཉིས་པའོ། །རྡོ་རྗེའི་འཕྲུལ་འཁོར་རབ་བྱ་སྟེ། །དེ་ནས་གཅིག་གིས་དམན་ལྔ་བཅུ། །རེ་མིག་ས་ལ་བཞག་པར་བྱ། །སྔགས་པས་གནོད་མཛེས་རྒྱལ་བའི་སྔགས། །དེ་ལ་ཐོག་མར་སྣང་མཛད་ནས། །བཞི་བཅུ་གཉིས་པར་ཧཱུཾ་སྦྱིན་བྱ། །རྡོ་རྗེའི་འཕྲུལ་འཁོར་བསྡུས་པའོ། །དུམ་བུ་བཅུ་གཉིས་རྣམས་ལ་ནི། །བསྒྲུབ་པར་བྱ་བའི་མིང་གཞུག་བྱ། །ཧཱུཾ་ཡིག་དུམ་བུ་ཐམས་ཅད་ཀྱིས། །བསྒྲུབ་བྱ་རྣམས་ནི་དབུས་སུ་སྦྱིན། །རྩ་བའི་སྔགས་ཀྱིས་ཡོངས་སུ་བསྐོར། །རྡོ་རྗེ་ཡི་ནི་འཕྲེང་བ་བྱ། །འཁོར་ལོ་ཟུད་ནི་བྲི་བྱ་སྟེ། །དབང་ལ་ཁམ་ཕོར་ས་སྟོང་པའི། །མཐིལ་ལ། འཕྲུལ་འཁོར་རྡོ་རྗེ་ལས་བྱུང་བ། །དབང་གི་རྫས་མིང་གི་སྔོན་མཐར། །ཀྱིས་ཡང་དག་བྲི། སངས་རྒྱས་རྡོ་རྗེ་འཆང་བ་ཡང་། །ཕྱི་རོལ། །དེ་ཚེ་མྱུར་དུ་འབྱོན་པར་འགྱུར། །བདུད་རྩི་ལྔ་རྣམས་ཕབ་པ་ལས། །དམ་ཚིག་དེ་ནི་བྱ་བ་ཡིན། །གསུམ་པའོ། །འཕྲུལ་འཁོར་རྟའི་འགྲོས་དེ་བཞིན། །རབ་ཏུ་དགའ་བའི་སྦྱོར་བས་ཞུགས། །དང་། འཁོར་ལོ་སྔོན་མའི་གཟུགས་ཅ་ནི། །བྱས་ནས་གསང་སྔགས་འདི་བཀོད་བྱ། །ནས། བཞི་༼༨ན༡༥༽བཅུ་རྩ་དགུ་པ་ལའོ། །ལྷག་མ་ལ་ནི་སྔགས་བྲི། སྟོང་གྲྭའི། པ་བཞི་རུ་བསྒྲུབ་བྱའོ། །ཀུན་ནས་ཡོངས་སུ་འཁོར་བར་ནི། །སྔགས་མཐའ་སྐོར་དུ། པས་རྟ་མགྲིན་བྲི་བར་བྱ། །གཉིས་པ་གཡོན་དུ་བསྐོར་བ་སྟེང་། །འཕྲུལ་འཁོར་ཁ་སྦྱར་འཕྲུལ་འཁོར་བྱ། །དང་། ཀླུ་དགུག་པ་དང་དབང་དང་ནི། །ལྷ་ལ་སོགས་པ་བསད་པ་ཡིན། །བཞི་པའོ། །སུམ་ཅུ་རྩ་བདུན་བདག་ཉིད་དགུག །གསོད་པའི་ལས་ལ་བརྩོན་པར་བྱ། །གང་གང་གསོད་པའི་ལས་རྣམས་ཀྱིས། །བླ་མ་གསོད་པར་བྱེད་པར་འགྱུར། །བསྟན་པ་ལ་ནི་གནོད་བྱེད་པ། །དེ་བཞིན་མཚམས་མེད་ལྔ་བྱེད་ལ། །དུག་དང་ཀེ་ཚེ་ལན་ཚ་དང་། དུ་ར་དུར་ཁྲོད་སློལ་བ་དང་། །རང་གི་སྡིགས་མཛུབ་ཁྲག་གིས་ནི། །འཁོར་ལོ་འབད་པས་བྲི་བར་བྱ། །གཤིན་རྗེའི་འཕྲུལ་འཁོར་རྟག་ཏུ་དེའི། བྱེད་འགྱུར་གཞན་གྱི་མ་ཡིན་ནོ། །སྔོན་བཤད་རེ་མིག་ཤེས་བྱ་ལ། །ནས། བཞི་བཅུ་རྩ་དགུ་པ་ལའོ། །ལྷག་མ་རྣམས་ལ་གོ་ཆའི་སྔགས། བསྒྲུབ་བྱའི་མིང་ནི་ནང་བཅུག་ལ། །གཤིན་རྗེའི་གདོན་ནི་སྟེང་གདོང་། གྲ་ཀུན་ཏུ། །ལག་པ་རྐང་པ་ཕྱོགས་སུ་བཀོད། །སྙིང་ག་གཤིན་རྗེའི་ས་གཞི་ཡིན། །དེ་ཡི་དབུས་སུ་བསྒོམ་དུར་ཁྲོད་དུ་སྦ། པར་བྱ། །ལྔ་པའོ། །ཇི་ལྟ་བ་ནི་སྔོན་གྱི་བཞིན། འཕྲུལ་འཁོར་འཁོར་ལོ་བཤད་པར་བྱ། །ཡི་དགས་འཁོར་ལོ་རྟག་ཏུ་ནི། །སྔགས་ཀྱི་འཕྲེང་བ་འདི་འགོད་བྱ། །ནས། བཞི་བཅུ་རྩ་དགུ་པ་ལ་ཕཊ། སྟོང་པར་སྙིང་ཡབ་ཀྱི། པོ་ཡི་ནི་སྔགས། བསྒྲུབ་བྱའི་མིང་ནང་བཅུག་པའོ། །ཁ་ཡི་འཕྲུལ་འཁོར་ལ་འཛིན་པའི། །ཐམས་ཅད་དུ་ནི་ཡི་དགས་བྲི། །དུར་ཁྲོད་ཀྱི་རས་ལའོ། །ཁ་སྦྱར་རྣམ་པར་སྦྱར་བ་ཡིན། །དྲུག་པའོ། །ཡུང་བ་རྒྱ་སྐྱེགས་བསྲེས་པ་ཡི། །འཁོར་ལོ་ཐོད་པ་ལ་བྲི་བྱ། །དང་། གཅིག་གིས་དམན་པའི་ལྔ་བཅུའི་བདག །ནས། གཅིག་དམན་ལྔ་བཅུ་པར་། དེ་ལྟར་འཕྲུལ་འཁོར་འཁོར་ལོ་ནི། མགྲིན་དབུས་སུ་ཉེ་སྙིང་མིང་སྤེལ། པ་ལས་སྐྱེས་རྟག་འགོད་བྱ།རི་རྩ་ར་སྦ། ༼༨བ༡༦༽རེངས་པ་ཐམས་ཅད་ལུས་ཆེན་ལས། སྲོག་ནི་རྡོ་རྗེའི་རང་བཞིན་ཚེ། །སྦྱོར་བ་བྱས་པས་གང་དེ་ལྟར། །སེམས་ཅན་གནོད་བྱེད་རེངས་པའོ། །བདུན་པའོ། །བསྐྲད་པའི་ལས་ནི་བསྒྲུབ་པར་བྱ། །དང་། འཕྲུལ་འཁོར་སྔོན་བདག་ཉིད་དངོས་ནས། མྦྷ་ཡིག་བཞི་བཅུ་དགུ་པར་ཏེ། འཕྲུལ་འཁོར་སྟག་གམ། རོ་ལངས་སུ་གཞུག་བྱ། །ལི་ཚེ་ལྔ་རུ་བསྒྲུབ་བྱའི་སྤེལ་དང་བཅས་པ། མིང་། །རྣལ་འབྱོར་མ་དྲུག་གོ་ཆེའི་མཁར། ཆར་བཅས།བྱ་རོག་ག་ཚིང་དུ་སྦ་བའམ་ཆུ་བོ་ལ་བསྐྱུར། །བརྒྱད་པའོ། །སྡང་བྱེད་འཕྲུལ་འཁོར་དེ་བཞིན་དུ། །དང་། དུར་ཁྲོད་གསོལ་བའི་སྣག་ཚ་ཡིས། །མི་ཡི་རུས་པས་བྲི་བར་བྱ། །ནས། འཕྲུལ་འཁོར་ཆེན་པོའི་ཆེན་པོའོ། །དབུས་ཀྱི་དུམ་བུ་ལྔ་རྣམས་དང་། དེ་བཞིན་དུ་ནི་སྒོ་བཞི་རུ། །བསྒྲུབ་བྱའི་མིང་ནང་བཅུག་པ་ཡི། །རྐང་པ་བརྒྱད་པའི་སྔགས་བཅས་པས། །རོ་ལངས་འཐབ་པར་འགྱུར་བ་ནི། །མཁས་པ་ཡིས་ནི་གཟུང་བྱ་སྟེ། །དེ་དག་ལྟོ་བར་འཕྲུལ་འཁོར་ཏེ། །འགྲུབ་འགྱུར་འདི་ལ་ཐེ་ཚོམ་མེད། །དགུ་པའོ། །སྲིན་པོའི་རྣམ་པའི་འཕྲུལ་འཁོར་ཏེ། །དང་། ལྐུགས་པའི་རྣམ་ཤེས་བསྒྲུབ་པར་བྱ། །སྔོན་གྱི་འཕྲུལ་འཁོར་བྲིས་ནས་ནི། །ནས། ཐམས་ཅད་ཇི་ལྟའི་རིམ་པའོ། །དུམ་བུ་དབུས་མར་བསྒྲུབ་བྱའི་མིང་། །ཀ་ར་ཀ་ར་སོགས་ནང་བཅུག །ཐམས་ཅད་བསྡུས་ནས་ཤེས་བྱས་ལ། །ལྐུགས་པར་བཅིངས་པར་བྱ་བ་ནི། །བྱི་བའི་སྟེང་དུ་འགྲོ་བས་བསྐོར། །འཁོར་ལོ་གླང་རྨིག་བཅས་པར་སྦ། །བཅུ་པའོ། །ལྷ་ཡི་འཁོར་ལོ་རྫུ་འཕྲུལ་ཆེར། །དང་། དུམ་བུ་བཞི་བཅུ་རྩ་དགུ་རུ། །སྔགས་ཀྱི་འཕྲེང་བ་འདི་འགོད་བྱ། །དུམ་དབུས་ཕྱི་རོལ་བརྒྱད་རྣམས་སུ། །ཕྱོགས་མཚམས་ཇི་ལྟའི་རིམ་པ་ཡིས། །རྣམ་པར་སྣང་མཛད་ས་བོན་བཞི། །ཧཱུཾ་གི་ཡི་གེ་བཞི་རྣམས་སོ། །དེ་ཕྱིར་དུམ་བུ་བཅུ་དྲུག་ཏུ། །ཕྱོགས་མཚམས་རིམ་པ་ཇི་ལྟ་བས། །ཧཱུཾ་ཡིག་བརྒྱད་ནི་འགོད་བྱ་ཞིང་། །དེ་ནས་༼༩ན༡༧༽གྲྀ་གྲྀའི་ཚིག །ནས། ཕཊ་ཡིག་དེ་ནས་བྲི་བར་བྱ། དབུས་མའི་དུམ་བུར་བསྒྲུབ་བྱ་ནི། གནོད་མིང་། མཛེས་སྔགས་ཀྱི་ནང་བཅུག་པ། ལྷ་ཡི་གཟུགས་ཀྱི་ཁར་གུར་ཀུམ་གི་ཝ་ང་ཙན་དན་ཁུ་བས། བྲི་བྱ། །དེ་ལྟར་ལྷ་ཡི་འཁོར་ལོ་ནི། ལིང་གའི་གནས་སུ་བཞག་པར་བྱ། །བཅུ་གཅིག་པའོ། །འཕྲུལ་འཁོར་འཁོར་ལོ་ལི་ཚེ་ནི། རེ་མིག་དམན་པ་ལྔ་བཅུ་སྟེ། ཁ་ཆེས་ཡང་དག་བྲི་བྱས་ནས། །གསང་སྔགས་འདྲེང་བ་འདི་འགོད་བྱ། །ལུགས་ལས་བཟློག་པའི་གནོད་མཛེས་སྔགས། །ཇི་ལྟའི་རིམ་པས་དགོད་པར་བྱ། །དེ་ཕྱི་མེ་ཡི་གཟུགས་བྱས་ནས། སླར་ཡང་ཟླུམ་པོ་སྦྱིན་པར་བྱ། །དེ་ལ་རྩ་བའི་སྔགས་བྲིས་ནས། །བསྒྲུབ་བྱའི་མིང་ནི་ནང་བཅུག་པ། །དབུས་ཀྱི་དུམ་བུར་བསྒྲུབ་བྱ་ནི། །དེ་ཡི་སྔགས་ཀྱི་ནང་བཅུག་པ། །གྲོ་ག་སོགས་སུ་སྔགས་པས་བྲི། །བཅུ་གཉིས་པའོ། །འབྲིང་པོ་རྡོ་རྗེ་མཁའ་འགྲོ་ལས་སྔགས་འགོད་ལུགས་བཞིར་བསྡུས་མིང་སྤེལ་ཚིག་བསྒྱུར་བས་ལས་བཅུ་གཉིས་བཤད་དེ། རིགས་ལྡན་དང་ནི་རྟ་ཡི་འགྲོས། །གཤིན་རྗེ་ཡི་དགས་དེ་བཞིན་དུ། །གཞན་ཡང་རོ་ལངས་ཟུང་དང་ནི། །སྲིན་པོ་ཡི་ནི་ཁྱད་པར་གྱིས། །དེ་ནས་རིམ་དང་ཕྱི་རོལ་རིམ། །ངེས་འཇོམས་སྒོ་དང་སྟོད་པ་དང་། །གྲྭ་ཡི་མཐར་ནི་རྡོ་རྗེ་ལྡན། །འཕྲུལ་འཁོར་ཆེན་པོ་བཅུ་གཉིས་ནི། །སྔགས་ཀྱི་འཕྲེང་བས་ཁྱད་པར་བྱས། །རིམ་པ་འདི་བཞིན་བརྗེད་པ་ཡིན། །གྲུ་བཞི་ཤིན་ཏུ་ཚད་ལྡན་ཞིང་། །རེ་མིག་བཞི་བཅུ་དགུང་ལྡན་པ། །སྔགས་པས་མཉམ་པར་གཞག་སྟེ་བྱ། །ཞེས་སོ། །དེ་ཡང་། སྔགས་ཀྱི་རྒྱལ་པོ་དེ་ནས་འགོད། །འགུགས་པ་རྨི་ལམ་ཟླ་ཕྱེད་ལྡན། །ནས། ལྷོ་ཡི་མཐའ་ཡི་སྟན་བཞུགས་པ། བཞི་བཅུ་རྩ་དགུ་པ་ལ་འགོད། དགྲ་རྣམས་ཐམས་ཅད་བཅིངས་པ་དང་། ཁྱད་པར་གྱིས་ཞེས་བྷ་བ་བྷ་དྲ་ཞི་བ་སོགས་ཀྱང་འགྲུབ་པར་དང་། ནཱ་རོ་ཏ་པ་དགུག་དབང་དབྱེ་གསུམ་ཡང་། ནི་རྨོངས་པ་དང་། །སྒྲོལ་བའི་ཆོ་གའི་སྦྱོར་བ་འདི། །བཞིན་མཛེས་མ་ནི་ཁྱོད་ལ་བཤད། །དང་པོའོ། །སླར་ཡང་རེ་མིག་དང་པོ་ལ། །འབུགས་པ་རྨི་ལམ་ཟླ་བ་ཡིས། །ནས། བཞི་བཅུ་དགུ་ལ་གནས་པར་ཡང་། །འབུགས་པ་རྨི་ལམ་ཟླ་བས་བརྒྱན། །༼༩བ༡༨༽འདི་ནི་རྣལ་འབྱོར་ལྡན་པ་ཡིས། །རྨུགས་ནཱ་རོ་པ་རེངས་འོན་ལོང་འགྲུབ་གསུངས། དང་དེ་བཞིན་ལྟུང་བ་དག །སྔགས་ཀྱི་རྒྱལ་པོས་བསྐུལ་བ་ན། །ལས་རྣམས་ཐམས་ཅད་བྱེད་པར་འགྱུར། །རྨུགས་པར་བྱེད་དང་གནོད་པ་དག །ལྷ་མོ་ཁྱོད་ལ་བཤད་པ་སྟེ། །མ་ཀ་རར་ནི་དྲི་མ་མོད། །རྨི་ལམ་ཟླ་བར་ཡང་དག་ལྡན། །རྡོ་རྗེ་ཡི་ནི་སྟེང་ན་གནས། །འབར་བའི་ཕྲེང་བས་བརྒྱན་པ་སྟེ། །ཕྱོགས་ཀུན་ཏུ་ནི་རྣམ་འཕྲོ་བར། །བསྒོམས་ནས་དེ་ཡི་དབུས་སུ་ནི། །ཇི་ལྟར་འབྱུང་བཞིན་བསྒྲུབ་བྱའི་མིང་། །སྔགས་པས་དེ་ནི་སྤངས་ནས་སུ། །ཕཊ་ཀྱི་གནས་སུ་སྦྱར་བར་བྱ། །རེ་མིག་དེ་དག་དབུས་སུ་ནི། །མྱོས་པར་འགྱུར་བའི་བསྒྲུབ་བྱ་སྟེ། །བསྒྲུབ་པ་པོ་ཡིས་འདི་རུ་བཞག །ཡེ་ཤེས་རྡོ་རྗེས་གཞོམ་པར་བྱ། །གྲིབ་མའམ་ནི་བརླག་པར་བསམ། དཔའ་བོས་འཕྲལ་གྱི་བུམ་པའམ། །བྲམ་ཟེའི་བུམ་པ་སྐམ་པོར་ནི། །འཁོར་ལོ་གཉིས་ནི་བཅུག་ནས་སུ། །ཆོ་ག་བཞིན་དུ་བྲི་བྱ་སྟེ། །འབྱུང་པོ་ཀུན་ལ་གཏོར་མ་སྦྱིན། །སྒྲུབ་པོས་དེ་ལྟར་བྱས་ནས་ནི། །ཕྱི་ནས་ལས་འདི་བརྩམས་བྱས་ན། །རྡོ་རྗེ་ཐུགས་ཀྱི་བཀའ་བཞིན་དུ། །ལས་རྣམས་ཐམས་ཅད་བྱེད་པར་འགྱུར། །གཉིས་པའོ། །སླར་ཡང་རེ་མིག་དང་པོ་ལ། །འབུགས་པ་རྨི་ལམ་ཟླ་བས་བརྒྱན། །ནས། མཛེས་པ་མཆོག་ཏུ་གནས་པར་འགོད། །ལྷ་མོ་འདི་ནི་སྡང་གྱུར་ནས། །ཁྱད་པར་དུ་ནི་གཡུལ་འགྱེད་བྱེད། །རྟ་དང་མ་ཧེ་བུམ་པར་ནི། །ཆོ་ག་འཁོར་ལོ་གཉིས་དགེ་སློང་བྲམ་ཟེའི་གོས་ལ་བྱ་རོག་དང་འུག་པའི་ཁྲག་གིས་བྲི། ཇི་བཞིན་བཞག་པར་བྱ། །གསུམ་པའོ། །འབུགས་པ་རྨི་ལམ་བཟླས་བརྒྱན་བཞིན། །ནས། རེ་མིག་བཞི་བཅུ་དགུ་པ་ལ། །བརྒྱན་པ་མཆོག་ཏུ་ཕན་པ་ཡིན། །འཁོར་ལོ་འདི་ནི་ལྷ་མོ་ཚེ། །མཆོག་ཏུ་རྣོ་དེ་རླག་པར་བྱེད། །ཅེས་བཞི་པའོ། །རྣམ་པར་འགྱུར་བ། འོག་ཏུ། རྟ་དང་མ་ཧེའི་ཁྲག་བྱུག །གཅིག་རྟ། ཅིག་ཤོས་མ་ཧེའི་ལུས་ལ། རེ་མིག་སྟོང་པར་ཆེ་གེ་མོས་ཆེ་གེ་མོ་ལ་སྡང་བར་གྱིས་ཤིག །བྱ་རོག་འུག་སྒྲོ་དང་ལྷན་ཅིག་བསྡམས། །དགེ་སློང་དང་བྲམ་ཟེའི་སྐྲ་ལས་བྱས་པའི་སྲད་བུས་དཀྲིས་རྟ་དང་མ་ཧེའི་ཐོད་པར་བཅུག་བཞི་མདོ་འམ་དུར་ཁྲོད་དུ་༼༡༠ན༡༩༽སྦས། བསམ་གཏན་བསྒྲུབ་བྱ་ཕན་ཚུན་འཐབས་པ་རླུང་ཆེན་པོས་བསྐོར་བ་དང་རོ་ལངས་ཀྱིས་མགོ་བོ་ནས་གཟིར་བས་བདེན་བྲལ་ཕྱོགས་སུ་འགྲོ་བར་བསམ་མོ། །ནཱ་རོ་པ་འདིས་བསད་བསྐྲད་ཀྱང་འགྲུབ་པར་བཞེད། །དེ་ལྟར་ན། རོ་རས་སམ། ཤིང་ལོ་རླུང་ཁྱེར་ལ་བྱ་རོག་གི་སྒྲོའི་སྨྱུ་གུས་བསྒྲུབ་བྱ་རྔ་མོ་ལ་ཞོན་པའི་སྙིང་ཁར་མི་ཨུཙྪ་ཊ་ཡ་ཕཊ། མཐའ་རླུང་རིས་ཀྱིས་བསྐོར། དེའི་ཕྱིར་རྔ་མོ་བྲི་ཐོད་པ་ཁ་སྦྱར་དུ་བཞག །རོ་སྲེག་པའི་སར་སྦའོ། །བསད་ལ་གཤིན་རྗེའི་རྒྱལ་པོ་སྟེ། ཡི་དགས་ལ་ནི་ཡིད་དགས་གཟུགས། །རོ་ལངས་ལ་ནི་རོ་ལངས་དང་། སྲིན་པོ་སྲིན་པོས་གནོན་པར་བྱ། སྟོང་ལ་སྟོང་པའི་པདྨ་སྟེ། ངེས་པར་འཇོམས་པའི་གྲྭ་འདིར་རོ་རས་ལ་དུག་ཁྲག་དང་གཏུམ་པའི་ས་བོན་བསྲེས་པའམ། རུ་ནི། ཡང་ན། སྐེ་ཚེ་དང་ལན་ཚྭ་དང་། མར་ཁུ་དང་ནིམ་པའི་ལོ་མ་དང་། དུག་དང་དྷ་རུ་ར་དང་སོལ་དང་། རང་གི་སྡིགས་མཛུབ་ཀྱི་ཁྲག་རྣམས་པ་སྲེས་པ་ཐོད་པའི་ནང་དུ་བཞག་ལ། མི་རུས་ཀྱི་སྨྱུ་གུས་བྲིས། རེ་མིག་སྟོང་པར་ཆེ་གོ་མོ་མཱ་ར་ཡ་ཕཊ། བྲི། འཕྲུལ་འཁོར་གཤིན་རྗེའི་ལྟོ་བར་ཆུག་པ་བྱས་ཁ་སྦྱར་ཏེ་རོ་སྐྲའི་སྲད་བུས་དཀྲིས་ལ་དཔའ་བོ་གྲིར་ཤི་བའི་ཐོད་པར་བཅུག་དུར་ཁྲོད་དུ་སྦ། སྔགས་འཕྲེང་དེ་བཞིན་འཕྲེང་བ་ཡི། །རིམ་པ་དེ་ལྟར་བརྗོད་པ་ཡིན། །འདི་ནི་ཁམས་གསུམ་རྒྱལ་ཞེས་པ། །སྔགས་ཚིག་བཞི་ཡིས་རྣམ་བརྒྱན་པ། །རིག་རྒྱལ་འཁོར་ལོས་བསྒྱུར་བའི་སྔགས། །མ་བྱུང་འབྱུང་བར་མི་འགྱུར་རོ། །འཕྲུལ་འཁོར་ཆེན་པོ་བཅུ་གཉིས་ནི། །དེ་བཞིན་མཛེས་མ་ཁྱོད་ལ་བཤད། །བསྡུས་པ་སྡོམ་འབྱུང་ལས། །སྔགས་འགོད་ཚུལ་གཅིག་ལ། །ལྟེ་བ་མིང་སྤེལ་བསྒྱུར་བས་ལས་ཐམས་ཅད་བྱ་བར་གསུངས་ཏེ། དེ་ནས་གཞན་ཡང་མནན་པ་ཡི། ཆོ་ག་བླ་མེད་བཤད་པར་བྱ། །རི་མོ་བརྒྱད་མཉམ་སྦྱར་བས། རེ་མིག་བཞི་བཅུ་རྩ་དགུ་སྟེ། མཁས་པས་དེ་ཡི་བར་གྱི་ནི། རེ་མིག་བཅུ་གསུམ་སྟོང་པར་བྱ། །ཟུར་དང་ཟུར་དུ་རེ་མིག་དགུ། །གྲ་བཞི་ལ་ནི་ཡང་དག་གནས། །གྲ་བཞི་ཀུན་གྱི་དབུས་ཀྱི་ནི། རེ་མིག་སྟོང་པ་༼༡༠བ༢༠༽ཉིད་བྱས་ལ། དུར་ཁྲོད་རས་ལ་ཞལ་བཞི་པའི། །སྔགས་ནི་ཡང་དག་སྦྱར་ཏེ་བྲི། །ཞེས་སྤྱིར་བཤད། དགྲ་མནན་པ་ལ། ཡུང་བ་ལྡོང་རོས་བསྲེས་པའི་ཆུས། འཁོར་ལོ་གཉིས་ལ་བསྒྲུབ་བྱའི་མིང་། ཡི་གེ་ལཾ་དང་སྤེལ་ཏེ་བྲི། །རི་རབ་ཟུར་བརྒྱད་གནས་བྲིས་པའི། །ཁམ་ཐོར་ཁ་སྦྱར་ཉིད་དུ་བྱ། རི་རབ་སྟེང་དུ་དབང་ཆེན་གྱི། །དཀྱིལ་འཁོར་དབུས་སུ་ལམ་གྱིས་ནི། མཚན་ཅིང་སྣ་ཚོགས་རྡོ་རྗེ་ཡིས། །དེ་ཡི་སྟེང་ནས་མནན་པར་བསྒོམ། །སྲད་བུ་སེར་པོས་རྣམ་པར་དཀྲི། །ཆོ་ག །ཧེ་རུ་ཀ་ནི་ཕྱག་གཉིས་པའི། །རྣམ་པར་བདག་ལུས་ཡང་དག་བསྒོམ། །རྣལ་འབྱོར་པས་ནི་ལྷོར་བལྟས་ཏེ། ཁ་དོག་དམར་སེར་རི་དབུས་གནས། །རི་རབ་ཀྱིས་ནི་མནན་པར་བསྒོམ། །དེ་སྟེང་སྣ་ཚོགས་རྡོ་རྗེ་ཡིས། །ཡོངས་སུ་མནན་པར་རྣམ་པར་བསྒོམ། །རང་གི་གནས་སུ་དེ་བྱས་ན། །དགྲ་ཡི་ཁ་ནི་གནོན་པ་དང་། །དཔུང་རྣམས་ཀུན་ཀྱང་གནོན་པར་བྱེད། །དགྲ་ཡི་སྙིང་ཡང་གནོན་པའོ། །ཨོཾ་སུཾ་སོགས་ལམ་སྤེལ་ཚིག །ལྷས་བྱིན་སཱམ་བྷ་ཡ། ཨོཾ་གྲི་སོགས་་་་་་་། ལམ་ལྷ་སྦྱིན་་་་་་་་་། ཨོཾ་གི་སོགས་་་་་་་་་་། ཨོཾ་ཨཱ་སོགས་་་་་། ལམ་བྷ་་་་་་་་་་་་། ངག་གནོན་ན། སྔར་བཤད་རིམ་བཞིན་འཁོར་ལོ་ནི། དེ་ཉིད་ཀྱིས་ནི་ངེས་པར་བྲི། །མེ་ཏོག་སེར་པོས་མཆོད་བྱ་སྟེ། །ངག་གནོན་པ་ཡི་མིང་མཆོག་ཡིན་ནོ། །རྟག་ཏུ་དུར་ཁྲོད་རས་ལ་ནི། །འཁོར་ལོ་གཉིས་ནི་མངོན་བྲིས་ཏེ། །ཡི་གེ་བཾ་ནི་བསྒྲུབ་བྱ་ཡི། །མིང་དང་སྤེལ་བས་ཁ་བཅིངས་པ། །དབང་ཆེན་དཀྱིལ་འཁོར་དབུས་སུ་ནི། །གའུ་ཁ་སྦྱར་བྱས་པ་ཡི། །ལུག་གི་སྙིང་གར་བསྒྲུབ་བྱ་ནི། །རབ་ཏུ་ཞུགས་པ་རྣམ་པར་བསམ། །སྔགས་ནི་རྒྱུན་མི་འཆད་པར་བཟླ། །ངེས་པར་ལྐུགས་པ་ཉིད་དུ་འགྱུར། །བསད་ན། ལན་ཚྭ་སྐེ་ཚེ་ཚ་བའི་མར། །ནིམ་པའི་ལོ་མ་དེ་བཞིན་དུག །དུར་ཁྲོད་སོལ་བ་དྷ་དུ་ར། །རང་གི་སྡིག་མཛུབ་ཁྲག་གིས་ཀྱང་། །རྫས་འདི་དག་གི་སྣག་ཚར་བྱ། །ཁྭ་ཡི་གཤོག་པའི་སྨྱུ་གུ་ཡིས། །བསྒྲུབ་བྱ་དེ་ཡི་མིང་༼༡༡ན༢༡༽བཟུང་སྟེ། །ཡི་གེ་ཧཱུཾ་དང་རྣམ་སྤེལ་བའི། །འཁོར་ལོ་གཉིས་ནི་ཡང་དག་བྲི། །ཁྲོ་ཞིང་དྲག་པོའི་ང་རོ་དང་། །དབྱེ་བ། དེ་ནས་ཡི་གེ་ཕཊ་སྤེལ་བའི། །འཁོར་ལོ་གཉིས་ནི་བྲིས་བྱས་ཏེ། །བསྒྲུབ་བྱའི་མིང་ནི་ཡང་དག་བླང་། །སྔགས་ཀྱི་སྦྱར་ཏེ་བྲི་བར་བྱ། །རྟ་དང་མ་ཧེ་མཉམ་ཞོན་པའི། །བསྒྲུབ་བྱ་བལྟས་ཏེ་ཡང་དག་བྲིས། །ཐོད་པ་ཁ་སྦྱར་ནང་བཞག་སྟེ། །སྲད་བུ་སྔོན་པོས་དཀྲི་བར་བྱ། །ཁྲོ་བའི་སེམས་ཀྱིས་ཉིན་ཕྱེད་དམ། །མཚན་མོ་དེ་ཡི་ཁྱད་པར་ལ། །རབ་ཏུ་གཏུམ་པའི་བཞི་མདོའམ། །དུར་ཁྲོད་འཇིགས་པའི་དབུས་སུ་ནི། །གསངས་ནས་བརྐོས་ཏ་གཞུག་པར་བྱ། །སྔར་བཤད་ཆོ་ག་བཞིན་དུ་མཆོད། །རྟ་དང་མ་ཧེ་སྟག་འཐབས་པས། །དེ་ཡི་མོད་ལ་འབྱེད་པར་བྱེད། གཉིས་ཀ་ཁྲོ་ཞིར་ཁྲོ་བས་འཇིགས། །གཡུལ་འགྱེད་པ་ཡི་བདག་ཉིད་ཆེ། །ཕན་ཚུན་རྩོད་པ་བྱེད་པས་ནི། །རྣམ་པར་སྡང་འགྱུར་གཞན་དུ་མིན། །སྐྲོད་པ། ཡི་གེ་ཧཱུཾ་ཕཊ་རྣམ་སྤེལ་བའི། །ཆོ་ག་འདི་ཉིད་ཀྱིས་འདིར་བྲི། །སྔགས་དང་བསྒྲུབ་བྱ་མཉམ་ལྡན་པས། །དུར་ཁྲོད་རས་ལ་བྲིས་ནས་ནི། །ཐོད་པ་ཁ་སྦྱར་ནང་བཞག་སྟེ། །སྲད་བུ་ནག་པོས་དཀྲིས་ནས་ནི། །ཧེ་རུ་ཀ་ར་ནི་བསྒོམས་ནས་སུ། །རོ་བསྲེགས་ས་བརྒོས་སྦ་བར་བྱ། །མདུན་དུ་ཡཾ་ལས་བསྟན་བྱུང་བའི་རླུང་། །གཞུ་ཡི་དབྱིབས་ཅན་དབུས་གནས་ཤིང་། །ཁ་དོག་སྔོན་པོ་རྔ་མོང་ཞོན། །ལྷོ་ཕྱོགས་སུ་ནི་བསྐྱོད་པ་དང་། །ཁྲོ་བོའི་ཚོགས་ཀྱིས་ཁྲིས་པས་ན། །ས་སྟེང་སྨྱོན་པ་བཞིན་དུ་བྱེད། །ཡི་གེ་ཧཱུཾ་ཕཊ་སྦྱར་བ་ཡི། །སྔགས་ནི་རྒྱུན་མི་འཆད་པར་བཟླས། །གང་གི་ཆོ་ག་ཅི་བྱས་པ། །དེ་ཡི་མདོ་ལ་སྐྲོད་པར་འགྱུར། །སྒྲུབ་པོ་ལྷོར་བལྟས་ཁྲོས་པ་ཡིས། །ར་ཁྲག་དུར་ཁྲོད་ཐལ་བ་དང་། །དུག་དང་ལན་ཚ་འབྲུ་མར་ཚ། །མྱོས་བྱེད་འདབ་མའི་ཁུ་བ་ནི། །སྐེ་ཚེ་མཉམ་པར་ཡང་དག་སྦྱར། །དུར་ཁྲོད་རས་ལ་དེ་བཞིན་དུ། །འཁོར་ལོ་གཉིས་པོ་ཉིད་རིམ་བཞིན། །ཆོ་ག་རྫོགས་པར་བྲི་བར་བྱ། །བསད་པ་གཤིན་རྗེའི་ལུས་ལ་གནས། །༼༡༡བ༢༢༽དབྱེ་བ་རྟ་དང་མ་དེ་ལ། །བསྐྲད་པ་རྔ་མོང་ལ་གནས་པ། །ཞི་བ་ཟླ་བའི་དཀྱིལ་འཁོར་ལ། །མི་མོ་རྣམས་ཀྱི་སྙིང་ཁར་དབང་། །རྒྱས་པ་གླང་ཆེན་རྒྱབ་ཏུའོ། །ལྐུགས་པ་ལུག་གི་ལུས་ལ་གནས། །མནན་པ་རི་རབ་དབུས་སུ་བཞུག །ཤ་ར་བྷ་ཡིས་སེང་གེར་གནས། །འདི་ལྟར་ལས་ནི་བརྟག་པར་བྱ། །ལས་འདི་དག་དང་བྲལ་བའི་ལས། །བསྒྲུབས་ཀྱང་དེས་ནི་མི་འགྲུབ་སྟེ། །སྟོང་པ་བཞིན་དུ་འབྲས་མེད་འགྱུར། །ཞེས་གསུངས་སོ། །སོ་སོའི་དབང་དུ་བྱས་ནས་གསུངས་པ་དེ་དག་ཡིན་ལ། །ཐམས་ཅད་ཀྱིས་ཀྱང་ཐམས་ཅད་འགྲུབ་ལ། དེ་ཡང་། ཞི་རྒྱས་དབང་དྲག་པོ་བཞིར་བསྡུས་ཏེ། སྡོམ་འབྱུང་ལས། ཞི་ལ་སོགས་པས་རབ་སྦྱོར་བ། མན་ངག་རབ་ཏུ་བཤད་པར་བྱ། ཞི་བ་ལ་རྒྱུ། གུར་ཀུམ་ཙན་དན་བསྲེས་པས་གང་། །དུས། ཡར་ངོ་ཡི་ནི་ཚེས་ལ་བྲི། །གཞི། དར་རམ་རས་ནི་གཙང་མའམ། །ཡང་ན་ཁམ་ཕོར་ཁ་སྦྱར་ལ། །གསང་སྟེ་ལས་ནི་བྲིས་ནས་ཀྱང་། །སྲད་བུ་དཀར་པོས་དཀྲི་བར་བྱ། །ཁ་དོག་དཀར་པོ་ཤར་བལྟས་ཏེ། །མེ་ཏོག་དཀར་པོས་མཆོད་པར་བྱ། །བསམ་གཏན། མདུན་དུ་ཟླ་བའི་དཀྱིལ་འཁོར་གྱི། །སྟེང་དུ་བསྒྲུབ་བྱ་གནས་བལྟས་ལ། །བུམ་པ་དཀར་པོས་ཟླ་བའི་བདུད་རྩིའི་ཆུས་གང་བས་དབང་བསྐུར་བར་བྱའོ། །ཐེ་ཚོམ་མེད་པས་ཐུན་གསུམ་དུ། །ཡི་གེ་བདུན་པའི་སྔགས་བཟླས་ན། །དེ་མ་ཐག་ཏུ་ཞི་བ་དང་། །བདེ་ལེགས་སྐྱིད་དང་ཚེ་རིང་འགྱུར། །ཡང་། རིམས་ནད་དུག་དང་འཚེ་བ་ལ། །ལག་པ་གཡོན་པར་བསྒོམ་བྱ་སྟེ། །འཁོར་ལོ་བརྩེ་ལྡན་གྱིས་བྲིས་ལ། །མེ་ཏོག་བདུག་བདུག་པས་མཆོད་པར་བྱ། །བསྒྲུབ་བྱ་ཤར་དུ་ཁ་བསྟན་ཏེ། །མཁས་པ་ཡིས་ནི་སྦྱར་བྱ་བ། །གཏོར་མ་ཆུང་དང་དེ་བཞིན་མེ། །དེ་ཡི་དབུས་སུ་དཱུ་རྦ་འམ། །རྨ་བྱའི་སྒྲོ་འམ་ཀུ་ཤའི་ཆུས། །ཁྱད་པར་དུ་ནི་དེ་ལ་བྱ་བ། །གསང་སྔགས་འདི་ནི་གཙོ་བོ་མཆོག །ཞི་སོགས་ཆོ་ག་རིམ་བཞིན་བྱེད། །གུར་ཀུམ་དྲི་བཟང་བསྲེས་པ་ཡིས། །༼༡༢ན༢༣༽རྒྱས་པའི་འཁོར་ལོ་བྲི་བྱ་སྟེ། །སྭཱཧཱའི་ཡི་གེ་དང་སྤེལ་བ། །འཁོར་ལོ་གཉིས་ལ་བྲིས་ནས་ནི། །སྲད་བུ་སེར་པོས་དཀྲིས་བྱས་ལ། །མར་དང་སྦྲང་རྩིའི་ནང་དུ་གཞུག །བྱང་དུ་ཁ་བལྟས་ཐུན་གསུམ་དུ། །ཁ་དོག་སེར་པོ་བསྒོམ་བྱས་ལ། །ཟླ་བའི་དཀྱིལ་འཁོར་སེར་པོ་ལ། །བསྒྲུབ་བྱ་གནས་པར་མཁས་པས་བསམ། །བདུད་རྩི་སེར་པོས་དབང་བསྐུར་ཞིང་། །མེ་ཏོག་སེར་པོས་མཆོད་པར་བྱ། །རྣམ་པར་མི་རྟོག་སེམས་ཀྱིས་ནི། །རྒྱས་པའི་བསམ་པས་བཟླ་བྱ་སྟེ། །ཆེ་གེ་མོ་པུཥྚིཾ་སཾ་ཀུ་རུ་སྭཱཧཱ། བཽ་ཥ་ཊ་སྔགས་ཀྱིས་སྤེལ་བར་བྱ། །ནོར་དང་འབྲུ་རྣམས་འཕེལ་བ་དང་། །དཔལ་དང་བཀྲ་ཤིས་མཉམ་པར་འཇུག །ལས་ཀྱི་སྦྱོར་བ་འདི་ཡིས་ནི། །རྒྱས་པར་འགྱུར་གྱི་གཞན་དུ་མིན། །ཙན་དན་དམར་དང་སོན་རྩི་དང་། །མིང་མེད་ཀྱི་ནི་ཁྲག་བསྲེས་ཏེ། །རས་སམ་གྲོག་འདབ་མའམ། །ཁམ་ཕོར་སོ་ནི་མ་བཏང་བཟུང་། །ཡི་གེ་ཧོ་དང་སྤེལ་བ་ཡི། །འཁོར་ལོ་གཉིས་ནི་མཉམ་པར་བྲི། །སྲད་བུ་དམར་པོས་བཅིངས་ནས་ནི། །མེ་ཏོག་དམར་པོས་མཆོད་པར་བྱ། །མར་དང་སྤྲ་རྩིའི་དབུས་བཞག་ལ། །ནུབ་ཀྱི་ཕྱོགས་སུ་ཁ་བལྟས་ཏེ། །ཁ་དོག་དམར་པོ་བསྒོམས་བྱས་ལ། །དཀྱིལ་འཁོར་དམར་པོ་ལ་གནས་པའི། །བསྒྲུབ་བྱ་ཆགས་པ་རྣམ་པར་བསམ། །རྟག་ཏུ་ཡིག་བདུན་འབྱུང་བ་ནི། །རྒྱུན་མི་ཆད་པར་བཟླ་བྱ་སྟེ། །མྱོས་པར་འགྱུར་བས་ཞབས་དྲུང་ལྷུང་། །དེ་ནི་གྲུབ་པ་རྣམ་པར་བསམ། །གལ་ཏེ་དབང་དུ་འོང་བར་མ་གྱུར་ན་མར་དང་སྦྲང་རྩི་དང་བྲལ་བའི་འཕྲུལ་འཁོར་སེང་ལྡེང་གི་མེ་མདག་ལ་གདུང་བར་བྱས་ན། གང་སུ་ཡང་སྐལ་བ་ངན་པའང་སྐལ་བ་བཟང་པོར་འགྱུར་ཏེ་གཞན་དུ་མ་ཡིན་ནོ། །དུར་ཁྲོད་ཀྱི་རས་སམ། ཟླ་མཚན་འཛག་པའི་རས་ལ་རྒྱ་སྐྱེགས་ཀྱི་ཁུ་བ་དང་ལྡན་པས་ཡི་གེ་ཛཿསྲཱི་དང་སྤེལ་བའི་འཕྲུལ་འཁོར་བྲི་བའམ། ཁམ་ཕོར་རམ་བུད་མེད་ཀྱི་ཐོད་པ་ལ་གྲུབ་པའི་༼༡༢བ༢༤༽འཁོར་ལོ་བྲིས་ལ། སྲད་བུ་དམར་པོས་དཀྲིས་ཏེ་མེ་ཏོག་གིས་མཆོད་ལ། བསྒྲུབ་བྱའི་སྙིང་ག་ནས་ལྕགས་ཀྱུས་བཀུག་ཅིང་། །མགྲིན་པ་ནས་ཞགས་པས་བཅིང་བར་བྱའོ། །གང་གིས་དེ་ལྟར་བསམས་ཀྱང་། །བསྒྲུབ་བྱ་དེ་ཡང་འོང་བར་མ་གྱུར་ན། སེང་ལྡེང་གི་ཤིང་ལ་མེ་སྤར་བ་བསྲོས་པས་འཕྲུལ་འཁོར་ཚར་བཅད་པར་བྱ་ཞིང་། ཆེ་གེ་མོ་ཨཱ་ཀ་རྴ་ཡ་སྲཱིཿཛཿཞེས་བྱ་བ་དེས་བསྒྲུབ་བྱ་སྐད་ཅིག་དེ་ཉིད་ལ་འགུགས་པར་བྱེད་དེ། རྐང་པས་དགུག་པ་བླ་ན་མེད་པའོ། །དྲག་པོ་སྤྱིལ་འཇུག་པ། རྡོ་རྗེས་མཁའ་འགྲོར། མར་ངོ་ཡི་ནི་ཚེས་བཅུ་དང་། །དེ་བཞིན་ཡར་ངོ་དེ་ཉིད་དམ། །ཡང་ན་འབྱུང་པོའི་མཚན་མོ་ལ། །ཐོད་པའི་སྟན་ལ་གནས་ནས་སུ། །ལྷོ་ཕྱོགས་སུ་ནི་ཁ་བལྟས་ལ། །དུག་དང་ཁྲག་དང་གཏུམ་པ་ཡི། །ས་བོན་གྱིས་ནི་སྣག་ཚ་བྱ། །བར་སྣང་ལ་ནི་ཐོད་པར་བླུག །མི་ཡི་རུས་པའི་སྨྱུ་གུ་ཡིས། །འཇིགས་བྱེད་འཇིག་པའི་སྔགས་རྣམས་བཏུ། །དང་པོ་ཤ་ཆེན་གཏོར་སྦྱིན་ཏེ། །དེ་ནས་ལས་ནི་རྩོམ་པར་བྱ། །དམར་པོ་ཡི་ནི་སྔོན་པོ་ཡི། །གོས་ནི་ཁྱད་པར་དག་ཏུ་བགོ། །མཆོད་པ་རྡོ་རྗེ་ཆོ་ག་དང་། །དེ་བཞིན་བསམ་གཏན་བཟླས་པ་དག །ཇི་ལྟར་སུས་ཀྱང་མི་རྟོགས་པ། །དེ་ལྟར་སྔགས་པས་རྟག་ཏུ་བྱ། །དང་། སྡོམ་འབྱུང་ལས། ཁྲོ་ཞིང་དྲག་པོའི་ང་རོ་དང་། །གཡོན་བརྐྱང་བ་ཡི་ཞབས་ཀྱིས་ནི། ཉི་མའི་དཀྱིལ་འཁོར་དབུས་གནས་པ། །བསྐལ་པའི་མེ་འདྲ་ཞལ་རྣམས་འགྱུར། །སྔོ་ཞིང་མི་བཟང་ཧཱུཾ་གི་སྒྲས། །མགུར་ནི་གང་བར་རྣམ་པར་བསྒོམ། །གྱོ་མོ་ཁྲོད་ཀྱི་སར་བསམ་པའམ། །དུར་ཁྲོད་སོལ་བ་ཡི་ནི་དབུས། །འདི་ལ་སོགས་པའི་ས་ཕྱོགས་སུ། །བསྒྲུབ་བྱ་གནས་པར་མཁས་པས་བསམ། །རིང་ཅིང་དྲི་མ་དང་བཅས་པ། །གོས་སྲུལ་གྱོན་པར་རྣམ་བསམས་ཏེ། །ཡན་ལག་ཀུན་དང་མགོ་བོ་དང་། །སྙིང་ག་དང་ནི་དཔུང་པར་ཡང་། །སྔགས་ཀྱིས་ཕུག་པ་བསམ་པར་བྱ། །བསྒྲུབ་བྱའི་ལུས་ལ་གནས་པའི་ལྷ། །རང་གི་ལུས་ལ་རབ་ཏུ་༼༡༣ན༢༥༽གཞུག །ཁྱིམ་སྟོང་ལྟ་བུར་བལྟས་ནས་ནི། །ལག་ན་སྣ་ཚོགས་མཚོན་ཆ་ཅན། །ཁྲོ་བོའི་ཚོགས་ནི་སྤྲོས་བྱས་ལ། །མཚོན་ཆས་གསོད་པ་རྣམ་བསམས་ཏེ། །དུམ་བུ་དྲུག་ཏུ་གཏུབས་ནས་ནི། །ཚིལ་དང་རྐང་དང་ཞག་དང་ཤ། །ཟ་དང་འཐུང་བར་བྱེད་པ་དང་། །དེ་བཞིན་དུ་ནི་ཁྲག་ཀྱང་འཐུང་། །རལ་གྲི་དབང་ཕྱུག་ཐོ་གཏུན་ཤིང་དང་། །དགྲ་སྟ་འཁོར་ལོ་ཐོ་བ་ཡིས། །བསྒྲུབ་བྱ་ལ་ནི་བརྡེག་ཅིང་གཏུབ། །དུམ་བུ་བརྒྱར་ནི་གཤོག་པར་བྱེད། །ཁྭ་དང་འུག་པ་བྱ་རྒོད་དང་། །ཅེ་སྤྱང་སྲིན་པོ་མཁའ་འགྲོ་མ། །དེ་རྣམས་ཁྲོས་པའི་ཡིད་ཀྱིས་ནི། །ཟ་བ་དང་ནི་འཐུང་བར་བྱེད། །ཡི་གེ་ཧཱུཾ་ཕཊ་སྤེལ་བ་ཡི། །སྔགས་ཀྱང་དེ་ཡིས་བཟླ་བྱ་སྟེ། །དཀོན་མཆོག་གསུམ་ལ་གནོད་བྱེད་པའི། །དགྲ་བོའི་ཚོགས་རྣམས་བསད་པར་བྱ། །འདིའི་དམིགས་བྱ་དགུག་པ་དེ་ཉིད་དུ། །རླུང་གི་དཀྱིལ་འཁོར་ལ་གནས་པའི། །བསྒྲུབ་བྱ་རྔ་མོའི་སྟེང་དུ་བསྐྱོན། །གཅེར་བུ་མར་ཁུས་བྱུགས་པ་དང་། །སྐྲ་གྲོལ་ཁ་ནི་ལྷོ་རུ་བལྟས། །སྐྱབས་མེད་དུ་ཞིང་བརྒྱལ་བར་བསམ། །མགྲིན་པ་ཞགས་པས་བཅིངས་ནས་སུ། །རྒྱབ་ནས་ཁྲོ་བས་རྡེག་བྱེད་ཅིང་། །ཁམས་གསུམ་གནོན་པའི་བསམ་པ་ཡིས། །མེ་ཡི་མཚམས་སུ་གདོང་བལྟས་ཏེ། །སྔགས་ཀྱི་མཐར་ནི་ཛ་བཟླས་ན། །ཇི་ལྟར་འདོད་བཞིན་འགྲུབ་པར་འགྱུར། །ཞེས་གསུངས། དེ་ལྟར་ལས་སོ་སོ་གནས་ཁ་ལྟ་ཕྱོགས་སོགས་སྦྱིན་སྲེག་གི་ཐུན་མོང་མ་ཡིན་པ་བཞག་གཞན་ཁྱད་པར་མེད། འཁོར་ལོ་ཁ་སྦྱར་བ་རྣམས་སྟེང་འཁོར་ཡིག་མགོན་དུ་བསྟན་ནང་ནས་ཕྱིར་རིམ་པས་གཡོན་སྐོར། །འོག་འཁོར་དཔེའུ་རིས་ལྟར་ཕྱི་ནས་ནང་དུ་གཡས་སྐོར། དེའི་ཡི་གེ་རྣམས་བྱིན་རླབས་ཀྱི་དུས་འཁོར་ལོ་ལ་བསྐོར་བའི་ཡི་གེ་རྣམས་མཁའ་འགྲོ་རྒྱ་མཚོ་ལས། ཡི་གེ་ཐམས་ཅད་ཀྱི་ནི་ཚད། སྡོམ་པ་སོགས་སུ་མཚོན་པར་བྱ། །དང་། མིང་རྣམས། ཡི་གེ་ཡི་ནི་མིང་དང་གཟུགས། ༼༡༣བ༢༦༽དེ་ནི་སེམས་ཅན་གཟུགས་སུ་འདོད། །གསང་སྔགས་དེ་ནི་ཟློས་བཞིན་པ། །དེ་ཉིད་དུ་ནི་རབ་གཞག་བྱ། །ཞེས་པས། དྲག་པོ་ལ་རེ་མིག་བཙོན་ཁང་། སྔགས་ལྷ་བཙོན་བསྲུངས། །བསྒྲུབ་བྱ་བཙོན་ལྟ་བུར་ཤེས་པར་བྱ་དགོས། ཞི་སོགས་ལ། རེ་མིག་གད་ན་སྔགས་ལྷ་དབང་བསྐུར་མཁན། མིང་རིང་ངམ་གང་ལ་བྱ་བའི་བསྒྲུབ་བྱར་ངེས་པས་ཐམས་ཅད་ཀྱི་དབྱེ་བ་ཕྱེད་པར་བྱའོ། །བུ་ཆུ་འབྲུག་ཆོས་སྡིངས་སུ་པདྨ་དཀར་པོས་བརྗེད་དཔྱང་དུ་བཏབ་པ་ཡིན་ནོ།། །།ཆོས་སྦྱིན་རྒྱ་ཆེར་སྤེལ་བའི་ཆེད། པར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱེད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །།མངྒ་ལཾ། ། ལུས་མེད་མཁའ་འགྲོའི་ཆོས་སྐོར་ལས་རྒྱ་གཞུང་རྡོ་རྗེའི་ཚིག་རྐང་།ལུས་མེད་མཁའ་འགྲོའི་ཆོས་སྐོར་ལས་རྒྱ་གཞུང་རྡོ་རྗེའི་ཚིག་རྐང་བཞུགས་སོ། །རྒྱ་གར་སྐད་དུ། ཤྲཱི་བཛྭ་ཌཱ་ཀི་ནི་ཀཱ་ཡ་ནི་དྷརྨ་ནཱ་མ། བོད་སྐད་དུ། །དཔལ་རྡོ་རྗེ་མཁའ་འགྲོ་མ་ལུས་མེད་པའི་ཆོས་ཞེས་བྱ་བ། ཡེ་ཤེས་ཀྱི་མཁའ་འགྲོ་མ་ལ་ཕྱག་འཚལ་ལོ། །གང་ཞིག་འཇིགས་རུང་དུར་ཁྲོད་ཆེན་པོར་ཕཊ྄་ཕཊ྄་རྔམ་པའི་སྒྲ་སྒྲོགས་ཤིང་། །མཁའ་འགྲོ་ཟ་བྱེད་མུན་པའི་ནང་ན་ཟླ་ཤར་ལྟ་བུར་རབ་ཏུ་འབར། ཧཱུྃ་ཧཱུྃ་ཞེས་བརྗོད་ཤ་ཟ་རོ་ལངས་མ་མོའི་ཚོགས་རྣམས་སྐྲག་མཛད་པ། །གསང་སྔགས་གསང་མཛད་མངའ་བདག་བདེ་ཆེན་རྒྱལ་བའི་ཡུམ་གྱི་སྐུ་ལ་འདུད། །ཨེ་མ་ཧོ། །པདྨ་རིན་ཆེན་ཆུ་བོའི་གཞུང་། །སེང་གེ་གླང་ཆེན་རི་དྭགས་ལྟར། །ཉི་མ་མེ་དང་ཤེལ་དང་མཚུངས། །ཨེ་མ་ཧོ། །སྐལ་ལྡན་རྣམས་ཀྱིས་རྟོགས་པར་གྱིས། །རང་བཞིན་ཆོས་དབྱིངས་རྣམ་དག་དབྱེར་མེད་བདེ་བ་ཆེན་པོའི་ཀློང་། །དག་པའི་གཞལ་ཡས་ཆོས་ཀྱི་འབྱུང་གནས་རྡོ་རྗེའི་བཙུན་མོ་སྟེ། །ཨེ་མ་ཧོཿ ཤ་ཟ་སྨྱོན་པ་ཅེ་སྤྱང་བཞིན། །སྤྲིན་དང་ནམ་མཁའ་གློག་བཞིན་དུ། །རོ་ལངས་ས་ར་ས་བུ་ཆུང་། །ཨེ་མ་ཧོཿ སྐལ་ལྡན་རྣམས་ཀྱི་ཉམས་སུ་ལོང་། །རྒྱལ་བ་རྣམས་ཀྱིས་རྟག་ཏུ་མཉམ་བཞག་འོད་གསལ་ཆེན་པོ་དང་། །དུས་གསུམ་རྟག་ཏུ་རྒྱུན་མི་ཆད་པས་སངས་རྒྱས་སྐུ་གསུམ་དེ་རང་བཞིན། །བདག་གཞན་དབྱེར་མེད་ངོ་བོ་ཉིད་དཔལ་ལྷུན་གྲུབ་དབྱེར་མེད་སྤྲོས་དང་བྲལ། །ཨེ་མ་ཧོཿ རྒྱལ་པོ་བློན་པོ་འབངས་དང་ནི། །བཙུན་མོ་སྣ་བསྒྱུར་ཟེར་བའང་འདུག །བྲན་དང་རྟ་མཆོག་དང་། །གཅེར་བུ་གླིང་བ་ལམ་ཆེན་ཏེ། །སྐལ་ལྡན་རྣམས་ཀྱིས་ཐོབ་པར་གྱིས། །དམ་པ་བདེ་ཆེན་མགོན་པོ་སྐྱེ་མེད་རང་བྱུང་སངས་རྒྱས་ཡིན། །ཨེ་མ་ཧོཿ སྨིན་གྲོལ་སེམས་ཀྱི་རྒྱ་མདུད་གཞིག །ཕྱི་ནང་གསང་བ་མཐར་ཐུག་པའི། །དབང་གི་རྣམ་པར་རྟོག་པའི་རྒྱ། །མདུད་པ་སེམས་ཉིད་རང་གྲོལ་དུ། །རྟོག་པའི་དྲྭ་བ་བཤིག་པར་བྱ། །རང་བཞིན་མེད་པའི་ངང་ལ་བཞག །དམ་ཚིག་རང་སེམས་མེ་ལོང་ལྟོས། །ཨ་ཧཾ་སྲོག་རྩོལ་སཾ་བུ་ཊ། །སེམས་ཉིད་རང་གསལ་མེ་ལོང་ལ། །དབང་གི་འབྲས་བུ་མཐར་ཕྱིན་པས། །ལོག་རྟོག་འཁོར་བའི་དྲི་མ་ཕྱིས། །གདོད་ནས་དག་པ་སྐུ་བཞིའི་རྒྱུད། །དྲི་མའི་རིགས་ལ་དག་པ་ལས། །སྣང་མེད་རིག་ཙམ་རྒྱུན་དུ་བལྟོས། །དམ་རྫས་རྟོགས་པའི་ཉི་མ་ལྡེ། །བདེ་ཆེན་རང་སེམས་སྤྲོས་དང་བྲལ། །རྩ་རླུང་བྱང་སེམས་མི་འགྱུར་བས། །གཉིས་མེད་རྡོ་རྗེ་གང་གིས་རྟོགས། །དེ་ནི་རྫས་ཀྱི་དམ་པའི་མཆོག །ཕྱི་ལྟར་སྣང་བ་སྣ་ཚོགས་པ། །རྟོགས་པའི་ཉི་མ་གཅིག་ལ་ལྡེ། །དེ་ལ་གསལ་གྲིབ་མེད་པ་ཡིན། །སྤྱོད་པ་རལ་གྲི་ཆུ་ལ་རྒྱོབ། །གང་དང་གང་སྣང་དེ་དག་ལ། །སྤྱད་དུ་མེད་པའི་ངང་ཉིད་ལ། །སྤྱད་པར་གྱིས་ཤིག་རྣལ་འབྱོར་པ། །ཆུ་ལ་རལ་གྲི་གང་བཏབ་པ། །རྨེག་མེད་དག་ཏུ་འགྲོ་བ་བཞིན། །ཉམ་ང་མེད་པར་རལ་གྲི་ཡི། །སྦས་དང་བརཏལ་ཞུགས་ཀུ་སུ་ལུ། །མཉམ་རྗེས་མེད་པར་སྤྱོད་པར་བྱ། །རིག་པ་སེམས་ཀྱིས་དཔྱད་པར་གྱིས། །རང་གྲོལ་ཕྱག་རྒྱ་ཆེན་པོ་ལྟོས། །རང་སེམས་གཉིས་མེད་ཕྱག་རྒྱ་ཆེ། །གྲོལ་བ་སེམས་ཀྱི་ངང་དུ་གྲོལ། །ཕྱག་ནི་སྟོང་པའི་ཡེ་ཤེས་ཡིན། །རྒྱ་ནི་འཁོར་བའི་རྒྱུ་དང་བྲལ། །ཆེན་པོ་ཟུང་དུ་འཇུག་པ་ཡིན། །ངོ་བོ་རང་བཞིན་མཚན་ཉིད་དེ། །བདེ་ཆེན་དྲི་བྲལ་ངང་དུ་ལྟོས། །ཨེ་མ་ཧོཿ དཔལ་ཆེན་རྡོ་རྗེ་མཁའ་འགྲོ་ལས། །ནམ་མཁའ་སྟོང་པའི་ངང་ལས་ནི། །བརྡའ་སྐད་བྲག་ཆ་ཇི་བཞིན་དུ། །སྟོང་པའི་ངང་ལ་སྙིང་རྗེའི་སྒྲ། །དབྱེར་མེད་བདེ་ཆེན་ངང་དུ་སྒྲ། །སྐལ་ལྡན་བློ་ཡི་པདྨོ་དེ། །ཡེ་ཤེས་ཉི་མ་ཤར་བ་ཡིས། །རང་གྲོལ་ཤུགས་འབྱུང་ཁ་འཛུམ་བྱེད། །བློ་ལྡན་དྲི་མེད་གཟི་བརྗིད་ཁྱོད། །པུ་ལ་ཧ་རིའི་དགོན་པ་རུ། །བྷུ་ཏཱིའི་མ་རིག་མུན་སེལ་ལ། །ཡེ་ཤེས་སྣང་བས་ཁྱབ་པར་གྱིས། །དེ་སྐད་ཏཻ་ལོ་པས་ནཱ་རོ་པ་ལ་གསུངས་སོ།། །།དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །རྩ་རླུང་དྲྭ་མིག་འཁོར་ལོ་བསྐོར། རྩ་ནི་ལུས་ལ་གནས་པ་སྟེ། །ཨ་ཝ་དྷུ་ཏཱི་ལ་ལ་ནཱ། །ར་སཱ་ན་ཏེ་དབྱེ་བ་ཡང་། །འཁོར་ལོ་བཞི་རུ་གནས་པའོ། །དྲྭ་བ་ཞེས་བྱ་འབྲེལ་བ་སྟེ། །རླུང་ནི་ལས་ཀུན་བྱེད་པ་ཅན། །ལྔ་ཡི་བདག་ཉིད་བཅུ་མིང་སྟེ། །རླུང་སེམས་གཉིས་སུ་མེད་པར་ནི། །མི་རྟོག་འཁོར་ལོ་བསྐོར་བར་བྱ། །རིག་པ་ཡེ་ཤེས་སྒྲོན་མེ་གཏམས། །རིག་པ་སེམས་ཀྱི་རྒྱལ་པོ་དེ། །ལྷུན་གྲུབ་ངང་དུ་ཡེ་ཤེས་ཀྱི། །སྒྲོན་མེ་གཉིས་སུ་མེད་པར་འབར། །མ་རིག་པ་ཡི་མུན་བསལ་ནས། །ཡེ་ཤེས་དྲི་བྲལ་སྣང་བས་ཁྱབ། །རོ་སྙོམས་ཕྱིའི་མེ་ལོང་ལྟོས། འབྱུང་བ་ཕྱི་ཡི་རོ་སྙོམས་དང་། །ཤེས་པ་ནང་གི་ཏིང་འཛིན་ཏེ། །ཉམས་ནི་བདེ་སྡུག་རྣམ་པ་བཞི། །སྐྱེ་བ་མེད་པས་མེ་ལོང་ལ། །དྲན་པའི་རྡུལ་གྱིས་བཀབ་པ་སྟེ། །དྲན་མེད་རིགས་པའི་ཉམས་ཀྱིས་ཕྱིས། །སེམས་ཀྱི་མེ་ལོང་དག་པ་ལས། །སྣང་བ་གཉིས་མེད་ལྟ་བ་ལ། །རྣམ་རྟོག་ཤུགས་འབྱུང་དྲི་མ་ཕྱིས། །རང་གསལ་དྲི་མེད་མེ་ལོང་ལྟོས། །བདེ་ཆེན་གསུང་གི་རིན་ཆེན་ཆོངས། །བདེ་བ་རང་རིག་གསལ་བ་སྟེ། །ཆེན་པོ་བླ་མ་དམ་པ་གསུངས། །ཟག་བཅས་ལུས་ཀྱི་བདེ་བ་ལ། །ཟག་མེད་སེམས་ཀྱི་བདེ་བ་འཆར། །བདེ་སྟོང་རོ་སྙོམས་དབྱེར་མེད་པས། །བདུད་རྩི་ཞལ་བརྙེས་སྙིང་པོ་འདི། །རིན་ཆེན་ལྟ་བུར་རང་གཞན་དོན། །འབྱུང་བས་སྐལ་ལྡན་དམ་པས་ཆོངས། །རྣལ་འབྱོར་དབང་ཕྱུག་ཏཻ་ལོ་ཆེན་པོ་ཡིས། །རྒྱལ་གྱི་རི་ཞེས་གྲགས་པར་བདག་ལ་གནང་། གསང་སྔགས་སྙིང་པོ་ལུས་མེད་མཁའ་འགྲོ་ཡིས། །ཆོས་འཁོར་མ་ལུས་དེ་རུ་རྫོགས་པར་གནས། །ནམ་མཁའི་ཁམས་ནས་སྐུ་ལུས་མི་སྣང་བར། །མཁའ་ལ་རང་སྒྲ་བཞིན་དུ་རྡོ་རྗེའི་ཚིག །ཟབ་ཆོས་མན་ངག་ནཱ་རོ་བདག་ལ་གནང་། །ལྔ་བརྒྱའི་མཐའ་མར་གྱུར་ཚེ་ས་སྟེངས་སུ། །སྣོད་ལྡན་རྣམས་ཀྱི་པདྨ་དམ་པ་དེ། །ཁ་བ་ཅན་ལྗོངས་ཁྱོད་ཀྱི་སློབ་མ་ཡིས། །འདུལ་བར་འགྱུར་ཞེས་བླ་མའི་གསུང་ལས་ཐོས། །འགྲོ་རྣམས་བདེ་མཆོག་འབྲས་བུ་རྒྱལ་གྱུར་ཅིག །དཔལ་རྡོ་རྗེ་མཁའ་འགྲོ་མ་ལུས་མེད་པའི་ཆོས་ཞེས་བྱ་བ་ཱ།། །། ན་རྒྱུད་ཡིད་བཞིན་ནོར་བུའི་ཁྲིད་ཡིག་རྡོ་རྗེ་འཆང་གི་དགོངས་པ་གསལ་བར་བྱེད་པ་ཟུང་འཇུག་མཆོག་གི་གསེང་ལམ།ན་རྒྱུད་ཡིད་བཞིན་ནོར་བུའི་ཁྲིད་ཡིག་རྡོ་རྗེ་འཆང་གི་དགོངས་པ་གསལ་བར་བྱེད་པ་ཟུང་འཇུག་མཆོག་གི་གསེང་ལམ་ཞེས་བྱ་བ་བཞུགས་སོ། །ན་མ་ཤྲི་བཛྭ་དྷ་རཱ་ཡ། ཟབ་ཞིང་སྤྲོས་པའི་རྡུལ་ཕྲེང་ཡོངས་བྲལ་འདུས་མ་བྱས་པ་ཆོས་དབྱིངས་ལྷ་ལམ་ཡངས་པར་གནས། །ལོངས་སྤྱོད་ཡོངས་རྫོགས་ཆ་ཤས་རབ་གང་ལྡན་སྐྱེས་བདེ་ཆེན་རི་དྭགས་གཟུགས་བསྙན་རྣམ་པར་བཀྲ། །སྣ་ཚོགས་སྤྲུལ་པའི་འོད་དཀར་སྣང་བས་སྒྲིབ་པའི་མུན་བཅོམ་ནང་གི་ཟླ་བ་རྡུལ་བྲལ་ཉིད། ཁྱབ་བདག་བླ་མ་རྡོ་རྗེ་སེམས་དཔས་སྙིང་གི་ཀུ་མུད་བདེ་ཆེན་སྦྲང་རྩིས་ལྕི་བར་མཛོད། །གཞོམ་དུ་མེད་པའི་ཐིག་ལེ་དི་ནི་ཨེ་ཝྃ་ལ་སོགས་ཟུང་དུ་འཇུག་པའི་བདག་ཉིད་ཁོ་ན་སྟེ། ཁུ་བ་རྡུལ་དང་མུན་པ་རྣམས་ནི་རྡོ་རྗེ་གསུམ་དུ་རྣམ་པར་དག་པས་སྐུ་གསུམ་རང་བཞིན་ཅན། །གནས་སྐབས་བཞི་ཡི་འཁྲུལ་པ་མཐའ་དག་ཕྱག་རྒྱ་རྣམ་བཞིས་ངེས་པར་བཅིང་ལས་བཅོམ་ལྡན་སྐུ་བཞི་ཉིད། །ཕུང་ལྔ་དག་པས་ཡེ་ཤེས་ལྔ་ལྡན་སྐུ་ལྔའི་བདག་ཉིད་ཤྲི་ཧེ་རུ་ཀ་ལ་ཕྱག་འཚལ་ལོ། ཆོས་ཀྱི་དབྱིངས་ཞེས་གཅིག་སྡུ་ཉིད་ནི་དུ་མའི་གར་བསྒྱུར་སྣང་སྲིད་ཀུན་གྱི་ཁྱབ་བདག་སྒྱུ་མའི་དངོས། །དབུ་མའི་རང་བཞིན་གཉུག་མའི་ཡིད་ནི་ལྷན་ཅིག་སྐྱེས་པའི་བདེ་བ་ཆེན་པོ་གཅིག་པུའི་རང་བཞིན་ཉིད། །རྡོ་རྗེ་ལྟ་བུའི་ཏིང་ངེ་འཛིན་མཐར་མངོན་དུ་སྐྱེས་པའི་རྣམ་པ་ཀུན་མཁྱེན་དཔེ་ཡིས་མཚོན་པ་གང་། ཤེས་རབ་ཕར་ཕྱིན་རྣལ་འབྱོར་མ་ཞེས་ལྷ་མོའི་མིང་གི་བོད་པ་དེ་ལ་གུས་པས་ཕྱག་འཚལ་ལོ། །གདུལ་བྱ་སྣ་ཚོགས་འདུལ་བ་མཐའ་ཡས་པའི། །སྐད་ཀྱིས་དམ་ཆོས་རྒྱུན་མི་ཆད་སྟོན་པ། །ཁྱབ་བདག་རྗེ་བཙུན་བླ་མའི་གསུང་རྡོ་རྗེ། །གསང་བ་བསམ་མི་ཁྱབ་དེར་ཕྱག་འཚལ་ལོ། །དེ་ཡི་བཀའ་དྲིན་ཉི་མའི་འོད་ཟེར་གྱིས། །ལེགས་བསྐྱང་བདག་བློ་པུཎྜྻ་རི་ཀའི་ཚལ། །ལེགས་བཤད་ཟིལ་དངར་འཐུལ་འདི་མཐོང་བ་ན། །སྐལ་བཟང་རྐང་དྲུག་དགའ་བའི་གླུ་ལེན་སྙམ། །ཚེ་འདིས་རྡོ་རྗེ་འཆང་བ་ནི། །འགྲུབ་པར་བྱེད་པ་སྙན་རྒྱུད་ཀྱི། །གདམས་པ་ཟབ་མོ་དབྱེ་བ་ལས། །དབྱིངས་ཀྱི་མཁའ་འགྲོས་གནང་བ་མཛོད། །དེ་ཡང་། མདོ་རྒྱུད་ཐམས་ཅད་ཀྱི་སྙིང་པོ་ལས་ཀྱང་ཆེས་སྙིང་པོར་གྱུར་པ་དཔལ་འཁོར་ལོ་སྡོམ་པའི་རྒྱུད་ཆེན་པོ་རྣམས་སུ་སྦས་པའི་ཚུལ་གྱིས་བསྟན་ཅིང་། དཔལ་རྡོ་རྗེ་འཆང་ཆེན་པོས་ལེགས་པར་བཤད་པ། གྲུབ་ཐོབ་ཆེན་པོ་རྣམས་ཀྱིས་གསལ་བར་མཛད་པ། སྐལ་བ་བཟང་པོ་དང་ལྡན་པ་རྣམས་ཀྱིས་ཐོབ་པའི་རྒྱལ་མཚན་གྱི་རྩེ་མོར་ཕྱར་བ་ཙམ་གྱིས་མཆོག་གི་དངོས་གྲུབ་ཆར་དུ་བསྙིལ་བ་ཡིད་བཞིན་ནོར་བུ་རྣམ་གསུམ། སྙན་རྒྱུད་རྡོ་རྗེ་རྣལ་འབྱོར་མ་ཞེས་བྱ་བའི་ཁྲིད་རིམ་འཆད་པ་ལ། ཕྱི་སྒྲོ་འདོགས་གཅོད་པར་བྱེད་པ་སྤྲུལ་སྐུའི་གདམ་པ་བརྒྱུད་པ་ཡིད་བཞིན་ནོར་བུ། ནང་ཉམས་ལེན་ལོངས་སྤྱོད་རྫོགས་སྐུའི་གདམ་པ་སྨིན་ལམ་ཡིད་བཞིན་ནོར་བུ། གསང་བ་ངོ་སྤྲོད་ཆོས་སྐུའི་གདམ་པ་གྲོལ་ལམ་ཡིད་བཞིན་ནོར་བུ་དང་གསུམ་ལས། དང་པོ། ཕྱི་སྒྲོ་འདོགས་གཅོད་པར་བྱེད་པ་སྤྲུལ་སྐུའི་གདམས་པ་བརྒྱུད་པ་ཡིད་བཞིན་ནོར་བུ་ནི། ཨེ་མ་ཧོ། སངས་རྒྱས་ཀུན་གྱི་ཡང་དག་གསང་བ་མཆོག །ནས། མཁའ་འགྲོས་ཉོན། ཞེས་པའི་བར་གྱིས་བསྟན་པ་ལྟར། འོག་མིན་གྱི་གནས་སུ་དཔལ་རྡོ་རྗེ་འཆང་གིས་རྡོ་རྗེ་རྣལ་འབྱོར་མ་ལ་བཤད། དེས་ཏིལླི་པ་ལ་བཤད། དེ་ནས་རིམ་བཞིན་ནཱ་རོ་པ། མར་པ། མི་ལ་རས་ཆུང་པ། ཁྱུང་ཚང་པ། ཀོང་ཇོ། ཞང་ལོ། རྡ་ར་ཤྲི། བསོད་ནམས་རྒྱལ་མཚན། སྲས་མོ་ཀུན་ལྡན་རས་མ། བདེ་ལེགས་རིན་ཆེན། ཆོས་རྗེ་ཀུན་དགའ་དཔལ་ཏེ་བརྒྱུད་པ་བཅུ་གསུམ་གྱི་བར་དུ་ཆིག་བརྒྱུད་དུ་གནང་ཞིང་། དེ་ནས་རྒྱལ་དབང་རྗེ། ངག་དབང་ཆོས་རྒྱལ། པདྨ་དཀར་པོ་ནས་རིམ་བཞིན་བརྒྱུད་དེ། བདག་ཅག་གི་རྩ་བའི་བླ་མ་བཀའ་འདྲིན་འཁོར་མེད་ངག་དབང་མི་ཕམ་བསྟན་པའི་ཉི་མ་ལས་ལེགས་པར་ཐོབ་པའི་སྐལ་བཟང་དུ་གྱུར་པའོ། །གཉིས་པ་ནང་ཉམས་ལེན་ལོངས་སྤྱོད་རྫོགས་སྐུའི་གདམས་པ་སྨིན་ལམ་ཡིད་བཞིན་ནོར་བུ་བཤད་པ་ལ། སྟོན་བྱེད་སློབ་དཔོན་གྱི་མཚན་ཉིད་ནི། བསླབ་གསུམ་བརྒྱུད་ལྡན་ཉམས་མྱོང་བླ་མའི་མཆོག །ཅེས་གསུངས་པའི་མཚན་ཉིད་དང་ལྡན་པའོ། །བསྟན་བྱ་སློབ་མའི་མཚན་ཉིད་ནི། དད་བཙོན་ཤེས་རབ་སྙིང་རྗེའི་སློབ་མ་ནི། ཞེས་པའི་མཚན་ཉིད་རྣམས་ཚང་བ་དགོས་སོ། ཉེས་དམིགས་དྲན་པས་ཚེ་འདིའི་བྱ་བ་བཏངས། ཞེས་པ་ནི། གོང་དུ་བསྟན་པའི་ཡོན་ཏན་དང་ལྡན་པའི་བླ་མས་མཚན་ཉིད་དང་ལྡན་པའི་སློབ་མ་ལ། དལ་འབྱོར་རྙེད་དཀའ་སོགས་བློ་ལྡོག་རྣམ་པ་བཞིའི་ཁྲིད་རིམ་ལེགས་པར་བཤད་དེ་སློབ་མས་ཀྱང་དོན་ཡིད་ལ་བསམ་ནས་རྒྱུད་དང་འདྲེས་ངེས་སུ་བསྒོམས་ནས་ཚེ་འདིའི་བྱ་བ་ཐམས་ཅད་ལིང་གིས་བཏང་བར་བྱའོ། །ཐོག་མར་འཁོར་ལོ་སྡོམ་པ་ལ་བསྟེན་ནས། ཞེས་པ་ནས། སྨིན་པར་བྱས་ནས། ཞེས་པ་ཡབ་བཀའ་རྒྱས་པ་འཁོར་ལོ་སྡོམ་པ་ལྷ་དྲུག་ཅུ་རྩ་གཉིས་དང་། འབྲིང་པོ་ལྷ་བཅུ་གསུམ་མ། རིགས་འདུས་ལུས་དཀྱིལ། བསྡུས་པ་ལྷན་སྐྱེས་ཏེ་བཞི་དང་། ཡུམ་བཀའ་རྒྱས་པ་ལྷ་མོ་བཅོ་ལྔ། འབྲིང་པོ་ལྷ་བདུན་མ། བསྡུས་པ་ལྷན་ཅིག་སྐྱེས་མ་དང་གསུམ་སྟེ་བདུན། ཡབ་བཀའ་ལྷན་སྐྱེས་ལ་དབང་མེད་པས། གཞན་དྲུག་པོ་ཡོངས་སུ་རྫོགས་པ་བསྐུར་ནས་རྒྱུད་སྨིན་ངེས་སུ་བྱའོ། །གསུམ་པ་གསང་བ་ངོ་སྤྲོད་ཆོས་སྐུའི་གདམས་པ་གྲོལ་ལམ་ཡིད་བཞིན་ནོར་བུ་ལ་གསུམ་ལས། དང་པོ་བུམ་དབང་དང་འབྲེལ་བ་བསྒོམ་བྱ་གཙོ་བོར་སྟོན་པ་ཐུན་མོང་ཡིད་བཞིན་ནོར་བུ་ནི། ཐབས་ཤེས་ཟུང་དུ་སྒྲོལ། ཞེས་པ་སྟེ། ཐབས་ཡབ་ཀྱི་བསྐྱེད་རིམ་དང་། ཤེས་རབ་ཡུམ་གྱི་བསྐྱེད་རིམ་གཉིས་ཟུང་འཇུག་ཏུ་ཉམས་སུ་ལེན་དགོས་ཚུལ་སྤྱིར་བཤད་ནས། རྒྱལ་པོ་བློན་དམངས་རྣལ་འབྱོར་བདུན་ལ་འབད། ཅེས་པས་སོ་སོར་བཤད་པ་སྟེ། དང་པོ་རྒྱལ་པོ་ཆོས་ཉིད་མི་འགྱུར་བ་བསྐྱེད་རིམ་ལ། ཡབ་བཀའ་རྒྱས་པ་དྲུག་ཅུ་རྩ་གཉིས་པ་དང་། འབྲིང་པོ་བཅུ་གསུམ་མ། རིགས་འདུས་ལུས་དཀྱིལ། ཡུམ་བཀའ་རྒྱས་པ་ལྷ་མོ་བཅོ་ལྔ་མ། འབྲིང་པོ་ལྷ་བདུན་མ། བསྡུས་པ་ལྷན་ཅིག་སྐྱེས་མ་དང་གསུམ་ལས། ཡབ་ཡུམ་གྱི་བསྐྱེད་རིམ་རྒྱས་པ་བསྒོམ་ན་ལེགས་མོད། བརྒྱུད་པ་འདི་ཡི་བླ་མ་གོང་མ་རྣམས་ཀྱིས་ཡབ་བཀའ་ལྷ་བཅུ་གསུམ་མ་བསྒོམ་པ་ཟབ་པར་གསུངས་པས་དེ་དང་། ཡུམ་བཀའ་ལྷན་ཅིག་སྐྱེས་མའི་བསྐྱེད་རིམ་བསྒོམ་པ་གཙོ་བོར་བྱའོ། །བློན་པོ་རིགས་གསུམ་ལས་བྱེད་ལ། བླ་མ་མཆོད་པ། རྡོར་སེམས་བསྒོམ་བཟླས། དབང་ལེན་པ་གསུམ་ནི་ཡར་རྒྱལ་པོའི་བྱ་བ་སྒྲུབ་པ་ལྟ་བུ། ཚོགས་ཀྱི་འཁོར་ལོ་དང་། དཔའ་བོ་དཔའ་མོའི་སྟོན་མོ་དང་། རྣལ་འབྱོར་མ་མཆོད་པ་ནི་བར་བློན་པོ་རང་གི་བྱ་བ་ལྟ་བུ། སྦྱིན་བསྲེག་ནི་མར་འབངས་ཀྱི་བྱ་བ་བྱེད་པ་ལྟ་བུ་དེ་རྣམས་ལ་བརྩོན་པའོ། །དམངས་ཕལ་པ་ཕྲིན་ལས་མཐུན་སྦྱོར་ནི། རྣལ་འབྱོར་བདུན་ལ་འབད། ཅེས་པ་སྟེ་ཁྲུས་མཎྜྻལ། ཟབ་གོས། འགྲོ་འདུག གཉིད་དེ་ཐུན་མཚམས་ཀྱི་རྣལ་འབྱོར་བདུན་ལ་འབད་པའོ། །བསྲེ་བ་རོ་སྙོམས། ཞེས་པ་མདོར་དྲིལ་ན། བསྐྱེད་རིམ་གསལ་བ་བུམ་དབང་གི་ཉམས་ལེན། གསལ་བའི་ངོ་བོ་སྟོང་པ་གསང་དབང་། གསལ་སྟོང་གཉིས་མེད་ཀྱི་བདེ་བ་ཤེར་དབང་། གསལ་སྟོང་དབྱེར་མེད་ཀྱི་བདེ་བ་སྐྱེ་འགག་གནས་གསུམ་དང་བྲལ་བ་ཚིག་དབང་གི་ཉམས་ལེན་ཡིན་པས་བསྲེ་བ། །བསྐྱེད་རིམ་རང་ལའང་དབང་བཞིའི་ཉམས་ལེན་རྫོགས་པ་ནི་རོ་སྙོམས་པ་སྟེ་སྨིན་ལམ་དབང་དང་བསྲེ་བའོ། །བསྐྱེད་རིམ་གསལ་བ་བུམ་དབང་གི་དམ་ཚིག གསལ་བའི་ངོ་བོ་སྟོང་པ་གསང་དབང་། གསལ་སྟོང་དབྱེར་མེད་ཀྱི་བདེ་བ་ཤེར་དབང་། གསལ་སྟོང་བདེ་བ་ཟུང་དུ་འཇུག་པ་དབང་བཞི་པའི་དམ་ཚིག་ཡིན་པས་བསྲེ་བ། བསྐྱེད་རིམ་པས་དམ་ཚིག་ཤུགས་ཀྱིས་བསྲུང་བ་ནི་རོ་སྙོམས་ཏེ་དམ་ཚིག་དང་བསྲེ་བའོ། །ཞལ་ཕྱག་གི་རྣམ་པ་ཅན་ལྷ་སྔགས་སུ་གསལ་བ་བསྐྱེད་རིམ་གྱི་ལམ། གསལ་བའི་ངོ་བོ་སྟོང་པ་རྫོགས་རིམ་གསལ་སྟོང་དབྱེར་མེད་ཉམས་མྱོང་གི་བདེ་བ་ཟུང་འཇུག །གསལ་སྟོང་དབྱེར་མེད་ཀྱི་བདེ་བ་སྐྱེ་འགག་གནས་གསུམ་དང་བྲལ་བ་ནི་ཕྱག་རྒྱ་ཆེན་པོའི་ལམ་ཡིན་པས་བསྲེ་བ། བསྐྱེད་རིམ་ལ་ལམ་བཞི་རྫོགས་པ་ནི་རོ་སྙོམས་ཏེ་གྲོལ་བྱེད་ལམ་དང་བསྲེ་བའོ། །བསྐྱེད་རིམ་རྣམ་པ་གསལ་བ་གཟུགས་སྐུ། ངོ་བོ་སྟོང་པ་ཆོས་སྐུ། ཉམས་མྱོང་བདེ་བ་ལོངས་སྐུ། འོད་གསལ་འགྲོ་འོང་མེད་པ་ངོ་བོ་ཉིད་སྐུའམ་ལྷན་ཅིག་སྐྱེས་པའི་སྐུ་ཡིན་པས་བསྲེ་བ། བསྐྱེད་རིམ་བསྒོམ་པས་སྐུ་བཞི་རང་ཤུགས་ཀྱིས་ཐོབ་པ་རོ་སྙོམས་ཏེ་འབྲས་བུ་དང་བསྲེ་བའོ། །གཉིས་པ་སྤྱི་དང་འབྲེལ་བ་བསྲུང་བྱ་གཙོ་བོར་སྟོན་པ་དམ་ཚིག་ཡིད་བཞིན་ནོར་བུ་ནི། དམ་ཚིག་གསུམ་ལ་སྦྱར། ཞེས་པ། བདེ་མཆོག་རྩ་རྒྱུད་ལས་གསུངས་པའི། གྲོལ་བ་ཟབ་པའི་དམ་ཚིག དད་པ་འཕེལ་བར་བྱེད་པ་རྒྱ་ཆེ་བའི་དམ་ཚིག །དངོས་གྲུབ་ཀྱི་རྒྱུ་ཟུང་འཇུག་གི་དམ་ཚིག་གསུམ་སྟེ། ཏིལླི་པའི་གཞུང་ཆུང་གི་འགྲེལ་པར་གསལ་བར་བཤད་པ་ལྟར་མི་འདའ་བར་སྲུང་བའོ། གསུམ་པ་མཆོག་དབང་དང་འབྲེལ་བ་དེ་ཁོ་ན་ཉིད་གཙོ་བོར་སྟོན་པ་གནས་ལུགས་ཡིད་བཞིན་ནོར་བུ་ལ། གསང་དབང་དང་འབྲེལ་བ་རྩ་རླུང་གི་གནད་སྟེང་སྒོ་རྣམ་པར་གྲོལ་བ། ཤེས་རབ་ཡེ་ཤེས་ཀྱི་དབང་དང་འབྲེལ་བ་མཁའ་འགྲོའི་གསང་སྒྲོགས་འོག་སྒོ་བདེ་བ་ཆེན་པོ་ཚིགས་དབང་དང་འབྲེལ་བ་ཕྱག་རྒྱ་ཆེན་པོ་ཡེ་ཤེས་གསལ་བྱེད། ལམ་བློ་ནས་ཆོད་པ་བར་དོ་ལམ་ཁྱེར། ཅིག་ཆར་བས་བྱ་སྤྱོད་ཚོགས་སུ་བསྒྱུར་བའི་གདམ་ངག་དང་ལྔ་ལས། དང་པོ་གསང་དབང་དང་འབྲེལ་བའི་རྫོགས་རིམ་རྩ་རླུང་གི་གནད་སྟེང་སྒོ་རྣམ་པར་གྲོལ་བ་ལ། གཏུམ་མོ་བདེ་དྲོད་རང་འབར། སྒྱུ་ལུས་ཆོས་བརྒྱད་རང་གྲོལ། རྨི་ལམ་འཁྲུལ་པ་རང་སངས། འོད་གསལ་མ་རིག་མུན་བྲལ། འཕོ་བ་གསེར་འགྱུར་གྱི་རྩི། གྲོང་འཇུག་སྦྲུལ་ལྤགས་འདོར་ལེན་དང་དྲུག་ཡོད་ལ། དང་པོ་གཏུམ་མོ་ལའང་། སྟེང་རང་བྱུང་ཡེ་ཤེས་སུ་སྦར་ནས་སྟེང་རླུང་གི་ལས་འདོན། འོག་ཟག་མེད་བདེ་ཆེན་དུ་སྤར་ནས་འོག་སྒོའི་བཅུད་འདོན། བར་འཁོར་འདས་རྒྱུན་གཅོད་དུ་སྤར་ནས་རྩ་རླུང་གི་ཆིང་སྟོན་པ་གསུམ་ལས། དང་པོ་སྟེང་རང་བྱུང་ཡེ་ཤེས་སུ་སྦར་ནས་སྟེང་རླུང་གི་ལས་སྟོན་པ་གཏུམ་མོ་བསྒོམ་པ་ལ། ཐོག་མར་ཟུར་གསལ་ལྟར། སྐྱབས་སེམས་ནས་བཟུང་ཕྱི་ནང་གསང་བའི་བླ་མའི་རྣལ་འབྱོར་རྫོགས་ཀྱི་བར་སྔོན་འགྲོ་རྣམས་རྒྱས་པར་བཏང་བའམ། བསྡུ་ན་སྐྱབས་སེམས་ཀྱི་མཐར་གསང་བའི་བླ་མའི་རྣལ་འབྱོར་བསྒོམ་པ་ཙམ་བྱའོ། །གཏུམ་མོ་བདེ་དྲོད་རང་འབར་ལམ་གྱི་གཞུང་། ཞེས་གསུངས་པ་གཟུང་འཛིན་གྱི་དངོས་པོར་འཛིན་པ་ཐམས་ཅད་ཟ་བས་ན་གཏུམ་ཞིང་། ལྷན་ཅིག་སྐྱེས་པའི་ཡེ་ཤེས་སྐྱེད་པས་ན་མོ་སྟེ་གཏུམ་མོ་ཞེས་བྱའོ། །ཕྱིའི་རྐྱེན་ལ་མ་ལྟོས་པར་ནང་གི་ཨ་ཤད་ཀྱི་མེས་བདེ་དྲོད་རང་འབར་འབྱུང་བ་ལམ་གྱི་གཞུང་ཤིང་ལྟ་བུ་སྟེ། དེ་ལའང་ཕྱིའི་གཏུམ་མོ་ལུས་ཀྱི་གནད་ནང་གི་གཏུམ་མོ་དམིགས་པའི་གནད། གསང་བའི་གཏུམ་མོ་རླུང་གི་གནད། དེ་ཁོ་ན་ཉིད་ཀྱི་གཏུམ་མོ་དཔྱིད་ཐིག་གི་གནད་དང་བཞི་ལས། དང་པོ་ཕྱིའི་གཏུམ་མོ་ནི། ལུས་གནད་བདུན་ལྡན། ཞེས་གསུངས་པ་འདི་ལ་བཞེད་སྲོལ་མང་ཡང་ཕྱག་ལེན་དངོས་ནི། རྐང་པ་རྡོ་རྗེ་སྐྱིལ་ཀྲུང་གིས་གསང་རྩ་བཅར་བས་ཐུར་སེལ་གྱི་རླུང་ཟིན་པ་དང་། ལག་པའི་མཐེ་བོང་གཉིས་ཀྱིས་སྲིན་མཛུབ་ཀྱི་རྩ་མནན་ཞིང་། ལག་རྒྱབ་ཀྱིས་བརླ་རྩ་མནན་པའི་མཉམ་བཞག་གིས་མེ་མཉམ་གྱི་རླུང་དང་། གྲུ་མོ་དང་རྒལ་ཚིགས་བསྲང་བས་ཁྱབ་བྱེད་ཀྱི་རླུང་དང་། དཔུང་མགོ་རྒྱབ་ཏུ་འཕུལ་ནས་མཐོང་ཁ་ཡངས་པར་བྱས་པས་སྲོག་འཛིན་གྱི་རླུང་དང་། ཨོལ་ཀོས་གྲེ་མདུད་གནོན་ཞིང་ཡིད་ཙམ་གུག་པ་དང་། ལྕེ་ཡ་རྐན་དུ་སྦྱར་ཞིང་སོ་མཆུ་བར་ཅུང་ཟད་ཡོད་པར་བྱས་པས་གྱེན་རྒྱུའི་རླུང་དང་། མིག་སྣ་རྩེའི་བར་སྣང་ལ་བལྟས་པས་ཡན་ལག་གི་རླུང་ལྔ་ཟིན་པའི་དགོས་པ་ཡོད་ལ། རྣམ་སྣང་གངས་ཅན་མཚོའི་བཞུགས་སྟངས་དང་མཐུན་པས་སམ། གཟུགས་སྦྱངས་ནས་རྣམ་པར་སྣང་མཛད་དུ་ཕྱེད་པའི་ཕྱིར་རྣམ་སྣང་གི་ཆོས་བདུན་ཞེས་བྱའོ། །གཉིས་པ་ནང་གི་གཏུམ་མོ་དམིགས་པའི་གནད་ནི། ལྷ་སྐུ་སྟོང་རའི་ནང་། ཞེས་པ། དཀར་ཆ་དག་པ་ཡབ་འཁོར་ལོ་སྡོམ་པ་དང་། དམར་ཆ་དག་པ་ཡུམ་རྡོ་རྗེ་ཕག་མོ་གཉིས་རེས་མོས་སུ་བསྒོམས་ཏེ་ཐབས་ཤེས་ཟུང་སྦྲེལ་སུ་བྱ་དགོས་པས། གཟུང་འཛིན་གཉིས་བསྡུས་ཀྱི་ཆོས་ཐམས་ཅད་སྟོང་པའི་ངང་ལས་ཆོས་འབྱུང་གྲུ་གསུམ་ཕྱི་དཀར་ལ་ནང་དམར་བ་རྩ་བ་ཕྲ་བ་ཐུར་ཟུག་ཅིང་གདེངས་ཀ་ཆེ་བ་གྱེན་དུ་བསྟན་པ་ཡངས་ཤིང་རྒྱ་ཆེ་བའི་ནང་དུ་འབྱུང་བ་རིམ་བརྩེགས་རི་རབ་ཀྱི་སྟེང་དུ་པདྨ་དང་ཉི་མ་འཇིག་བྱེད་དུས་མཚན་གྱི་གདན་ལ་རང་ཉིད་འཁོར་ལོ་སྡོམ་པ་ལྷན་སྐྱེས་ཡབ་ཡུམ་རྒྱན་ཆ་ལུགས་ཡོངས་སུ་རྫོགས་པ་ཡེ་ཤེས་ཀྱི་མེ་དབུས་ན་བཞུགས་པའི་ལུས་ཀྱི་ནང་དབུས་དྲང་པོར། ཆོས་ཉིད་ཀྱི་རྩ་དབུ་མ་དྲང་ཞིང་འགྲེངས་པ་ཆུ་ཤིང་གི་སྡོང་པོ་ལྟ་བུ། དམར་ཞིང་སྣུམ་པ་རྒྱ་སྐྱེགས་ཀྱི་ཁུ་བ་ལྟ་བུ། འཇམ་ཞིང་སྲབ་པ་པདྨའི་འདབ་མ་ལྟ་བུ། གསལ་ཞིང་དྭངས་པ་ཏིལ་མར་གྱི་མར་མེ་ལྟ་བུ་སྟེ་མཚན་ཉིད་བཞི་ལྡན། ཡར་སྣེ་སྤྱི་བོའི་ཚངས་བུག་ལ་ཟུག་པ། མར་སྣེ་གསང་གནས་དང་འབྲེལ་བ་ཁོང་སྟོང་ཁ་བྱེ་བའི་རྣམ་པ་ཅན་དུ་སྒོམ། དེའང་འདེར་སོ་ལྟ་བུའི་བེམ་གཟུགས་གདོས་བཅས་ཤ་ཁྲག་ལས་གྲུབ་པ་ལྟ་བུ་མ་ཡིན་པ་ངོ་བོ་སྟོང་པར་སྒོམ། སྟོང་པའི་རང་རྩལ་སྣང་བ། སྣང་བའི་ངོ་བོ་སྟོང་པ་སྟེ། སྣང་སྟོང་དབྱེར་མེད་འཇའ་ཚོན་ལྟ་བུའི་རང་བཞིན་དབྱེར་མེད་དུ་སྒོམ། བདེ་བའི་ཡེ་ཤེས་ཆེས་ཆེར་རྒྱས་པས་ཉམས་བདེ་བ་ཆེན་པོར་བསྒོམ་མོ། །ཡང་ན་ཆོས་འབྱུང་པད་ཉི་བམ་རོའི་གདན་ལ། རང་ཉིད་རྡོ་རྗེ་རྣལ་འབྱོར་མ་མཆན་གཡོན་དུ་ཡབ་མཚོན་པའི་རྡོ་རྗེའི་ཁཊྶཱཾ་ག་དང་བཅས་པ་རྒྱན་ཆ་ལུགས་ཡོངས་སུ་རྫོགས་པ་ཡེ་ཤེས་ཀྱི་མེ་དབུས་ན་བཞུགས་པའི་ལུས་ནང་རྩ་དབུ་མ་གོང་ལྟར་སྒོམ་ཞིང་ངོ་བོ་སྟོང་པ་སོགས་ཀྱང་འདྲའོ། །གང་ལྟར་ཡང་དམིགས་པའི་རྩལ་སྦྱོང་བའི་ཕྱིར་སྤྲོ་བསྡུའི་རྣལ་འབྱོར་ནི། རང་ལུས་ལྷ་ཡི་སྟོང་ར་ལུས་ཚད་ཙམ་གསལ་བ་དང་དབུ་མ་སྦ་ལྕག་ཙམ་སྒོམ། དེ་འབྱོངས་ནས་རང་ཁང་པ་དང་། དབུ་མ་ཀ་བ་ཙམ་པ་ཟོ་བ་ཞབས་མེད་ལྟ་བུར་ཡར་ཟང་མར་ཟང་སྟོང་སང་ངེ་བ་ཕྱི་གསལ་ནང་གསལ་ནས། རིམ་པར་རི་དང་རི་རབ་ཡུལ་ཁམས། སྟོང་ཁམས། མཐའ་ཡས་པའི་བར་དུ་རྒྱ་བསྐྱེད་ལ། དབུ་མའང་དེ་མཚུངས་ཇེ་ཆེར་བསྐྱོད་པ་དང་། སྟོང་ར་ཇི་ཙམ་སྒོམ་པའི་ལུས་སྲིལ་པོ་དབུ་མས་ཁྱབ་པར་སྒོམ་པ་ནི་སྤྲོ་བའི་རྣལ་འབྱོར་དང་། དེ་ནས་ནམ་མཁའི་མཐར་ཁྱབ་པ་ཚུར་ལུས་ནས་སྟོང་ཁམས་ཙམ་ནས་རིམ་པར་ཡུལ་ཁམས། རི་རབ། རི་དང་། ཁང་པ། རང་ལུས། ཁྲུ་གང་། མཐོ་གང་ཙམ་ནས་མཐར་སྟོང་ར་ཡུངས་འབྲུ་ཙམ་དང་། དབུ་མ་སྤུ་ཉག་ཙམ་དུ་སྒོམ་པ་ནི་བསྡུ་བའི་རྣལ་འབྱོར་ཏེ་དམིགས་པའི་བོགས་འདོན་དང་། སྔ་མས་བྱིང་བ་དང་ཕྱི་མས་རྒོད་པ་སེལ་བྱེད་དུའང་འགྱུར་རོ། །དྷཱུ་ཏི་ལ་ལ་ར་སཱ་འཁོར་ལོ་བཞི། ཞེས་པ་གང་ལ་གནད་དུ་བསྣུན་པར་བྱ་བའི་ཡུལ་ལམ་རྟེན་ནི་རྩ་ཡིན་ཏེ། སྟོང་ར་འཁོར་ལོ་སྡོམ་པའམ། རྡོ་རྗེ་རྣལ་འབྱོར་མ་སྔར་ལྟར་བསྒོམས་པའི་ལུས་དབུས་སུ་དྷཱུ་ཏི་སྟེ་དབུ་མ་མཚན་ཉིད་བཞི་ལྡན་ཡར་སྣ་སྤྱི་གཙུག་དང་། མར་སྣ་ལྟེ་འོག་སོར་བཞིར་ཆོས་འབྱུང་དམར་པོ་ཁ་གྱེན་དུ་བསྟན་པའི་ནང་ན་ཟུག་པ། དེའི་གཡས་སུ་ར་སཱ་ན་སྟེ་རོ་མ་དམར་ལ་དཀར་བའི་མདངས་ཅན་གཡོན་དུ་ལ་ལ་ན་སྟེ་རྐྱང་མ་དཀར་ལ་དམར་བའི་མདངས་ཅན། དེ་ལྟར་རྩ་དབུ་མ་མདའ་སྨྱུག་ཙམ་ཡེ་ཤེས་ཀྱི་རང་བཞིན་ཤིན་ཏུ་རྒྱས་ཤིང་འོད་འབར་བ། རོ་རྐྱང་གཉིས་སོག་སྦུབ་ཙམ་པ་གཟུང་འཛིན་སྨ་དབབ་པའི་ཕྱིར་དུ་ལུག་རྗུད་ཀྱི་རྒྱུ་མ་ལྟར་རྙིད་པའི་རྣམ་པ་ཅན། རོ་རྐྱང་གཉིས་ཀྱི་ཡར་སྣ་གླད་རྒྱའི་སྟེང་ནས་ཐུར་དུ་གུག་སྟེ་སྣ་བུག་གཉིས་སུ་ཟུག་པ། མར་སྣ་དབུ་མའི་ནང་དུ་ཆུད་པ། ཡི་གེ་གཟབ་མའི་ཆའི་འཕང་ལྟ་བུ་སྤྱི་མགྲིན་སྙིང་ག་ལྟེ་བའི་གནས་བཞིར་དབུ་མ་དང་རོ་རྐྱང་གཅིག་ཏུ་འབྲེལ་ནས་སྦུབ་གཅིག་ཏུ་གྱུར་པ། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་ཏེ། དབུ་མའི་མདུན་རྒྱབ་གཡས་གཡོན་ནས་རེ་རེ་གྱེས་པས་བཞི། བཞི་ལས་རེ་རེ་གྱེས་པས་བརྒྱད། བརྒྱད་ལས་རེ་རེ་གྱེས་པས་བཅུ་དྲུག བཅུ་དྲུག་ལ་རེ་རེ་གྱེས་པས་སོ་གཉིས་སོ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་སྟེ། དབུ་མའི་མདུན་རྒྱབ་གཡས་གཡོན་ལས་གོང་ལྟར་གྱེས་པས་བཞི། དེ་ལས་རེ་རེ་གྱེས་པས་བརྒྱད། དེ་ལས་རེ་རེ་གྱེས་པས་བཅུ་དྲུག་གོ །སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་དེ། དབུ་མ་ལས་གྱེས་པ་བཞི། དེ་ལས་རེ་རེ་གྱེས་བརྒྱད་དོ། །ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་སྟེ། དབུ་མ་ལས་གྱེས་པའི་རྩ་བ་བཞི། དེ་ལས་རེ་རེ་གྱེས་པ་བརྒྱད། དེ་ལས་རེ་རེ་གྱེས་པ་བཅུ་དྲུག །དེ་ལས་རེ་རེ་གྱེས་པས་སོ་གཉིས། དེ་ལས་ཀྱང་རེ་རེ་གྱེས་པས་དྲུག་ཅུ་རྩ་བཞིའོ། འཁོར་ལོ་བཞིའི་རྩ་འདབ་སྡོམ་པས་གྲངས་བརྒྱད་དང་ཉི་ཤུ་ཡོད་ལ། དེ་ལས་ཀྱང་གྱེས་པའི་རྩ་འདབ་བསམ་གྱིས་མི་ཁྱབ་པ་ལུས་ཀྱི་ཆ་ཤས་ཐམས་ཅད་ལ་ཁྱབ་པ་འོད་རྒྱུད་སྦུབ་ཅན་འཛིང་ཐབས་སུ་སོང་བ་འདྲ་བའི་སྣེ་མོ་རྣམས་བ་སྤུའི་སྒོར་ཟུག་པ་ཁ་དང་ངེ་བར་ཡོད་པའམ་འཇའ་འོད་ཀྱིས་གང་བར་སྒོམ། སྤྱི་བོ་དང་སྙིང་གའི་འཁོར་ལོ་ཝྃ་ཡིག་བདེ་བའི་རྣམ་པ་ཁ་མར་སྦུབ་པའི་རྣམ་པ། མགྲིན་པ་དང་ལྟེ་བའི་འཁོར་ལོ་ཨེ་ཡིག་ཤེས་རབ་སྟོང་པའི་རྣམ་པ་ཁ་ཡར་བཟེད་པ་འཁོར་ལོ་བཞི་ཀ་ལ་བསྒོམ་པའི་དུས་ཁ་དོག་སེར་པོ། སྒོམ་པའི་དུས་དྲོད་གཙོ་བོར་འདོན་པའི་ཕྱིར་ཁ་དོག་དམར་པོར་སྒོམ། རྩ་གསུམ་གྱིས་དུག་གསུམ་དག་ནས་སྐུ་གསུམ་ཐོབ་པ་དང་། འཁོར་ལོ་བཞིས་གནས་སྐབས་བཞི་དག་ནས་སྐུ་བཞི་ཐོབ་པར་བྱེད་དོ། །གསུམ་པ་གསང་བའི་གཏུམ་མོ་རླུང་གི་གནད་ལ། ཐོག་མར་འཇམ་རླུང་འབུད་པ་དགུ་ཕྲུག་ནི། ལུས་གནད་སེམས་སྐྱིལ། དམིགས་གནད་སྟོང་ར་རྩ་འཁོར་དང་བཅས་གསལ་བཞིན་པས་ལག་གཡས་ཁུ་ཚུར་བརླ་སྟེང་དུ་ཁ་སྦུབ་ལ། ལག་གཡོན་རྡོ་རྗེའི་ཁུ་ཚུར་བཅས་པའི་མཛུབ་མོས་སྣ་གཤོག་གཡོན་པ་མནན་ཏེ། རླུང་གནད་སྣ་བུག་གཡས་ནས་རླུང་འཇམ་པོ་མིས་མི་ཚོར་ཙམ་དུ་དལ་བུས་རྔུབས་ལ་ལྟེ་འོག་ཏུ་མནན། གཡས་པའི་མཛུབ་མོས་སྣ་གཤོག་གཡས་པ་མནན་ཏེ་སྣ་བུག་གཡོན་ནས་དལ་བུས་ཕྱིར་བཏང་། དེ་བཞིན་དུ་སྣ་བུག་གཡོན་ནས་རྔུབས་ཏེ་མནན་ལ། ལག་གཡོན་པའི་མཛུབ་མོས་སྣ་གཤོག་གཡོན་པ་མནན་ཏེ་སྣ་བུག་གཡས་ནས་བཏང་། ལག་གཉིས་ཁུ་ཚུར་པུས་སྟེང་སྦུབ་ལ་སྣ་བུག་གཉིས་ནས་གོང་བཞིན་ཆ་མཉམ་དུ་རྔུབས་ལ་ཆ་མཉམ་དུ་ཕྱིར་འབུད་པ་ནི་མོ་རླུང་ངོ་། །དེ་ནས་ལག་གཡས་བརླ་དཀྱིལ་དུ་སྦུབ་པ་སོགས་ཀྱིས་མོ་རླུང་ལས་ཅུང་ཟད་དྲག་པ་མིས་ཚོར་ཙམ་གྱིས་ལན་གསུམ་འབུད་པ་མ་ནིང་གི་རླུང་ངོ་། །དེ་ནས་ཁུ་ཚུར་བརླ་རྩར་སྦུབ་ལ་གཡོན་པའི་མཛུབ་མོས་སྣ་གཤོག་གཡོན་པ་མནན་ཏེ་གཡས་ནས་དྲག་པོར་རྔུབ་པ་དང་མཉམ་དུ་ལུས་གནད་མ་ཤོར་བར་གཡས་ཀྱི་དཔུང་པ་མདུན་དུ་བསྐོར་ལ་ལག་གཡས་ཀྱི་མཛུབ་མོས་སྣ་གཤོག་གཡས་པ་མནན་ཏེ་མགྲིན་པ་མ་ཡོ་བར་གདོང་གཡོན་དུ་ཕྱོགས་ནས་གཡོན་གྱི་དཔུང་མགོ་རྒྱབ་ཏུ་བསྐོར་ལ་སྣ་གཡོན་ནས་སིང་སྒྲ་དང་བཅས་ཕྱིར་འབུད། གཡོན་ནས་རྔུབ་པ་དང་མཉམ་དུ་གདོང་ཡང་མདུན་དུ་ཕྱོགས་གཡོན་པའི་དཔུང་མགོ་ནང་དུ་བསྐོར་ལ་ལག་གཡོན་གྱི་མཛུབ་མོས་སྣ་གཤོག་གཡོན་པ་མནན་ཏེ་གདོང་གཡས་སུ་ཕྱོགས་ལ་གཡས་ཀྱི་དཔུང་མགོ་ཕྱིར་བསྐོར་ཏེ་གཡས་ནས་སིང་སྒྲ་དང་བཅས་ཕྱིར་འབུད། ལག་གཉིས་ཁུ་ཚུར་བརླ་རྩར་སྦུབ་ལ་ལུས་གནད་མ་ཤོར་བར་དཔུང་མགོ་གཉིས་མདུན་དུ་བསྐོར་བ་དང་ལྷན་ཅིག་སྣ་བུག་གཉིས་ནས་ཆ་མཉམ་དུ་རྔུབ་དཔུང་མགོ་གཉིས་རྒྱབ་ཏུ་བསྐོར་བར་བསྟུན་སྣ་བུག་གཉིས་ནས་སེང་སྒྲ་དང་བཅས་ཕྱིར་འབུད་པ་ནི་ཕོ་རླུང་ངོ་། དེ་དག་གི་དམིགས་པ་ནི། གཡས་ནས་རྔུབ་གཡོན་ནས་འབུད་སྐབས་རོ་མའི་ནང་ཐམས་ཅད་རླུང་གིས་ཁེངས་ནས་སྡིག་སྒྲིབ་ནད་གདོན་རྩ་དུག་རླུང་དུག་ཐིག་ལེའི་ཉེས་སྐྱོན་ཐམས་ཅད་དུ་བ་རླུང་གིས་དེད་པ་ལྟར་རྐྱང་མའི་ནང་བརྒྱུད་དེ་སྣ་བུག་གཡོན་ནས་ཕྱིར་ཐོན་པར་བསམ། གཡོན་ནས་རྔུབས་ཤིང་གཡས་ནས་འབུད་སྐབས་རྐྱང་མ་རླུང་གིས་ཁེངས་ནས་སྡིག་སྒྲིབ་ནད་གདོན་སོགས་དེད་ནས་རོ་མའི་ནང་བརྒྱུད་དེ་སྣ་བུག་གཡས་ནས་ཕྱིར་ཐོན་པར་བསམ། གཉིས་ཀ་ནས་རྔུབས་ཤིང་གཉིས་ཀ་ནས་འབུད་སྐབས་རོ་རྐྱང་གཉིས་རླུང་གིས་ཁེངས་ནས་རོ་མའི་རླུང་རྐྱང་མ་དང་། རྐྱང་མའི་རླུང་རོ་མར་བསྣོལ་རྒྱག་ཏུ་སོང་ནས་སྡིག་སྒྲིབ་ནད་གདོན་དེད་ནས་ཕྱིར་ཐོབ་པར་བསམ་མོ། །སྲུང་འཁོར་སྒོམ་པ་ནི། རང་ཉིད་དཔལ་འཁོར་ལོ་སྡོམ་པ་ཡུམ་རྡོ་རྗེ་རྣལ་འབྱོར་མ་དང་བཅས་པར་གསལ་བའི་ལུས་ནང་རྩ་གསུམ་འཁོར་ལོ་བཞི་ཨ་ཤད་མེ་ཡི་རང་བཞིན་དང་བཅས་པ་གསལ་བཏབ་ལ། རླུང་ཕྱིར་དབྱུང་བ་མཉམ་དུ་ཨ་གཏུམ་རྒྱལ་བ་རབ་འབྱམས་ཀྱི་ནུས་མཐུའི་བདག་ཉིད་ལས་འཕྲོས་པའི་འོད་ཀྱིས། རྒྱལ་བ་སྲས་བཅས་ཡི་དམ་དཔའ་བོ་མཁའ་འགྲོ་ཐམས་ཅད་ཀྱི་ནུས་བྱིན་ཐམས་ཅད་མེ་དཔུང་གི་རྣམ་པར་བསྡུས། ཚུར་རྔུབ་པ་དང་མཉམ་དུ་སྣ་བུག་ནས་ཞུགས་ཏེ་ཨ་གཏུམ་ལ་ཐིམ་པ་དང་ལྷན་ཅིག་ཡེ་ཤེས་ཀྱི་མེ་ཆེར་འབར་བས་སྡིག་སྒྲིབ་བག་ཆགས་ནད་གདོན་སོགས་ནང་གི་མི་མཐུན་ཕྱོགས་ཐམས་ཅད་ཡོངས་སུ་བསྲེག་པའི་དུད་པ་དང་མཉམ་དུ་མེ་ལྕེ་བ་སྤུའི་ཁུང་བུ་ཀུན་ནས་འཕྲོས་པས་ཕྱི་རོལ་གྱི་ཡུལ་སྣང་ཐམས་ཅད་གང་བར་བསམ། ཡང་རླུང་དབྱུང་རྔུབ་མནན་སྐབས་སྤྲོ་བསྡུ་གོང་ལྟར་བྱ་བ་ལན་གཉིས་ཏེ་སྔ་ཕྱི་སྡོམ་པའི་རླུང་ཁུག་གསུམ་མཐར་རླུང་སྤྲུག་ཅིང་ཧ་སྒྲས་རླུང་འབྱིན་པ་ནས་དབང་པོའི་སྒོ་དང་བ་སྤུའི་བུ་ག་ནས་འཕྲོས་པའི་མེས་སྟོང་གསུམ་གང་བ་ལས་མཚོན་ཆ་དང་ཁྲོ་ཚོགས་སྐར་ལྟར་འཕྲོ་ཞིང་སེར་ལྟར་འདྲིལ་ནས་ཡུལ་སྣང་ཕྱིར་ཆད་ཀྱི་བདུད་བགེགས་བར་ཆད་ཐམས་ཅད་དུམ་བུར་གཏུབ་ཅིང་གཞོབ་ཏུ་བསྲེག་ནས་རྡུལ་ཕྲན་ཙམ་ཡང་མི་དམིགས་པར་གྱུར་པ་དང་། ཁྲོ་ཚོགས་མེ་དཔུང་ཚུར་འདུས་ནས་སྟེང་འོག་ཕྱོགས་མཚམས་ཐམས་ཅད་མེ་དཔུང་མཚོན་ཆ་ཁྲོ་ཚོགས་ཀྱི་གུར་ཁང་གཞོམ་གཞིག་བྲལ་བས་གཏམ་པར་བསམ་པ་དང་། བསྲུང་བྱ་སྲུང་བྱེད་ངོ་བོ་མ་གྲུབ་པ་སྒྱུ་མ་ལྟ་བུའི་ངང་དུ་མཉམ་པར་བཞག་པས་གཉིས་འཛིན་དག་པའི་ཕྱིར་དོན་གྱི་སྲུང་འཁོར་རོ། རིམ་པ་དེ་དག་སྒོ་གསུམ་རྡོ་རྗེ་གསུམ་དུ་སྒྲུབ་པའི་མི་མཐུན་ཕྱོགས་རྣམས་གཞོམ་ཞིང་བསྲུང་བའི་རྟེན་འབྲེལ་ཡིན་ནོ། དེ་ནས་རླུང་གི་གནད་དངོས་ལ་གསུམ་ལས། དང་པོ་རྡོ་རྗེའི་བཟླས་པ་ནི། རྡོ་རྗེའི་བཟླས་པ། ཞེས་པ་རྡོ་རྗེའི་བཟླས་པ་ལ་དབྱེ་བ་མང་ཡང་འདིར་རྫོགས་རིམ་གྱི་རྡོར་བཟླས་བཤད་དེ། རང་ཉིད་དཔལ་འཁོར་ལོ་སྡོམ་པ་ཡབ་ཡུམ་མམ། རྡོ་རྗེ་རྣལ་འབྱོར་མར་གསལ་བའི་ལུས་ནང་རྩ་གསུམ་འཁོར་ལོ་བཞི་དང་བཅས་པའི་སྙིང་གའི་འཁོར་ལོའི་དབུས་དྷུ་ཏིའི་ནང་དུ་མི་ཤིཊ་པའི་ཐིག་ལེ་དཀར་ལ་དམར་བའི་མདངས་དང་ལྡན་པ་ཞིག་བསྒོམ། སྣ་བུག་ནས་རླུང་ནང་དུ་འཇུག་པ་ཨོཾ་གྱིས་གདངས་ཀྱིས་དབུ་མ་ནས་བྱུང་སྟེ་སྤྱི་བོ། སྤྱི་བོ་ནས་མགྲིན་པ། མགྲིན་པ་ནས་སྙིང་ཁའི་བར་དུ་བྱུང་བར་བསམ། གནས་པའི་དུས་ཨཱའི་གདངས་ཀྱིས་སྙིང་ཁའི་མི་ཤིགས་པའི་ཐིག་ལེ་ལ་གནས་པར་བསམ་ཕྱིར་འགྲོ་བའི་དུས་ཧཱུྃ་གི་གདངས་ཀྱིས་སྙིང་ག་ནས་མགྲིན་པ། མགྲིན་པ་ནས་སྤྱི་བོ། སྤྱི་བོ་ནས་སྣ་བུག་གི་ཕྱིར་ཐོན་པར་བསམ། དེ་ལྟར་རྒྱུན་དུ་རླུང་རང་བཞིན་གྱི་འཇུག་གནས་ལྡང་གསུམ་ལ་བརྟེན་པ་དང་། སྐབས་ཅི་རིགས་པར་འཇམ་རླུང་ཆེད་དུ་བཟུང་བ་ལ་རྡོར་བཟླས་བྱའོ། རྡོ་རྗེའི་བཟླས་པ་འདི་ནི་བཤད་རྒྱུད་རྡོ་རྗེ་ཕྲེང་བ་དང་། བཤད་རྒྱུད་ལྷ་མོ་བཞིས་ཞུས། འཕགས་པ་ཀླུ་སྒྲུབ་ཀྱིས་མཛད་པའི་གསང་འདུས་རིམ་ལྔ་སོགས་ལས་རྒྱ་ཆེར་བཤད་ཅིང་བསྔགས་པ་ཤིན་ཏུ་ཆེ་སྟེ་རླུང་གི་རྣལ་འབྱོར་ཐམས་ཅད་ཀྱི་མཆོག་ཡིན་པས་ཡུན་བསྲིངས་ཏེ་བསྒོམ་པར་བྱའོ། གཉིས་པ་རྩ་བའི་རླུང་ལྔ་བསྒོམ་པ་ནི། རྩ་བའི་རླུང་ལྔ་བསྒོམ། ཞེས་པ་སྟེ། རྩ་བའི་རླུང་ལྔ་ནི་ཕྱི་འབྱུང་བ་ལྔ་དང་སྦྱར་ན། ས་ཆུ་མེ་རླུང་ནམ་མཁའ་རླུང་དང་ལྔ། ནང་ལུས་ལ་སྦྱར་ན། མེ་མཉམ། སྲོག་འཛིན། གྱེན་རྒྱུ། ཁྱབ་བྱེད། ཐུར་སེལ་རླུང་དང་ལྔ་སྟེ། མེ་མཉམ་པའི་རླུང་ལྟེ་བ་ན་གནས། སྲོག་འཛིན་ཆུའི་རླུང་སྙིང་ག་ན་གནས། གྱེན་རྒྱུ་མེའི་རླུང་མགྲིན་པ་ན་གནས། ཁྱབ་བྱེད་རླུང་གི་རླུང་སྤྱི་བོ་ན་གནས། ཐུར་སེལ་ནམ་མཁའ་རླུང་གསང་གནས་ན་གནས་པས་དེ་ལྟར་རྩ་བའི་རླུང་ལྔ་དབང་དུ་འདུས་ན་ཡན་ལག་གི་རླུང་ཤུགས་ཀྱིས་ཟིན་པར་འགྱུར་བས་རྩ་བའི་རླུང་ལྔ་བསྒོམ་པར་བྱ་སྟེ། རང་ཉིད་འཁོར་ལོ་སྡོམ་པ་ཡབ་ཡུམ་མམ། རྡོ་རྗེ་རྣལ་འབྱོར་མ་ལུས་ནང་རྩ་གསུམ་འཁོར་ལོ་ལྔ་དང་བཅས་པར་གསལ་བའི་རྩ་འཁོར་གྱི་དབུས་སུ་མི་ཤིགས་པའི་ཐིག་ལེ་སེར་པོ་ཨེ་ཡིག་གིས་མཚན་པ་སྲ་ཞིང་བརྟན་པ་གསལ་གདབ། སོར་བཅུ་གཉིས་ཙམ་ནས་ས་རླུང་སེར་པོ་དལ་བུས་རྔུབ་པ་རོ་རྐྱང་གི་ལམ་བརྒྱུད་དེ་དབུ་མའི་ནང་དུ་ཞུགས་པས་ལྟེ་བའི་རྩ་འཁོར་གང་སྟེ་ཐིག་ལེ་ཨེ་ཡིག་དང་བཅས་པ་ལ་ལྷག་མ་མ་ལུས་པ་ཐིམ་པར་བསམ། དེ་བཞིན་དུ་སྙིང་གའི་འཁོར་ལོའི་དབུས་སུ་ཆུ་ཡི་དྭངས་མ་ཐིག་ལེ་དཀར་པོ་ཝྃ་ཡིག་གིས་མཚན་པ། བསིལ་ཞིང་སྣུམ་པ། མགྲིན་པར་མེའི་དྭངས་མ་ཐིག་ལེ་དམར་པོ་མ་ཡིག་གིས་མཚན་པ་དྲོ་ཞིང་བདེ་བ། སྤྱི་བོར་རླུང་གི་དྭངས་མ་ཐིག་ལེ་ལྗང་གུ་ཡ་ཡིག་གིས་མཚན་པ་ཡངས་ཤིང་གཡོ་བ། གསང་བར་ནམ་མཁའི་དྭངས་མ་ཐིག་ལེ་སྔོན་པོ་ཨ་ཡིག་གིས་མཚན་པ་དྭངས་ཤིང་ཐོགས་པ་མེད་པ་རྣམས་གསལ་བཏབ་ལ། སོར་བཅུ་གསུམ་ནས་ཆུ་རླུང་དཀར་པོ། བཅུ་བཞི་ནས་མེ་རླུང་དམར་པོ། བཅོ་ལྔ་ནས་རླུང་གི་རླུང་ལྗང་གུ བཅུ་དྲུག་ནས་ནམ་མཁའི་རླུང་སྔོན་པོ་རྣམས་བཟུང་བ་སོགས་གོང་ལྟར་བསྒོམ་མོ་འདི་རྣམས་རླུང་ཁུག་གི་གྲངས་ཀ་མེད་པས་ཇི་ལྟར་ནུས་ནུས་སུ་བསྒོམ་མོ། གསུམ་པ་བུམ་པ་ཅན་བསྒོམ་པ་ནི། སྲོག་རྩོལ་ཐུར་སེལ་གཅུན། ཞེས་པ་སྟེ། དེའང་འགྲིམ་འགྲུལ་མང་བའི་ས་དང་། རྡུལ་དང་དུད་པ་འཚུབ་པའི་གནས་དང་། འགྲངས་ཆེས་པ་དང་། ལྟོག་ཆེས་པའི་དུས་དང་། ནམ་ཕྱེད་ཉིན་གུང་རླུང་སྣ་བུག་གཡས་ནས་རྒྱུ་བའི་སྐབས་རྣམས་སུ་བཟུང་ན་གེགས་ཡོང་བས་དེ་ལས་ལྡོག་པའི་གནས་དང་དུས་སྐབས་རྣམས་སུ་བཟུང་འདི་ནི་གཙོ་ཆེར་བུམ་པ་ཅན་བསྒོམ་པའི་དུས་གནད་ཡིན་ཀྱང་རླུང་གི་རྣལ་འབྱོར་གཞན་ལའང་འདྲའོ། རང་འཁོར་ལོ་སྡོམ་པ་ཡབ་ཡུམ་མམ་རྡོ་རྗེ་རྣལ་འབྱོར་མ་རྩ་གསུམ་འཁོར་ལོ་བཞི་དང་བཅས་པ་གསལ་བཏབ། ཕྱིའི་སོར་བཅུ་དྲུག་ཙམ་ནས་དྲངས་པའི་མོས་པས་རླུང་སྒྲ་མེད་འཇམ་པོར་སྣ་བུག་གཉིས་ནས་རྔུབས་ལ་ལྟེ་འོག་ཏུ་ཆིལ་གྱིས་མནན། འོག་རླུང་ཡིད་ཙམ་དྲངས་ལ་ཁ་སྦྱོར་དུ་དགང་། ལས་དང་པོ་པས་རན་ཚོད་ཙམ་དུ་བཟུང་ལ་མི་ཐུབ་ཙ་ན་ཅུང་ཟད་མནན་ནས་རྔུབས་ཆུང་བྱས་ཏེ་གཡས་བཅག་གཡོན་བཅག་དབུས་བཅག་ནས་གཞིལ་མཐར་ཅུང་ཟད་སྟོད་དགྱེ་བ་དང་མཉམ་དུ་སྣ་བུག་གཉིས་ནས་དང་པོ་དང་མཇུག་ཏུ་ཤེད་ཆུང་ཞིང་བར་དུ་ཤུགས་ཆེ་བར་སིང་སྒྲ་དང་བཅས་ཏེ་ལྷག་མ་མ་ལུས་པར་ཕྱིར་དབྱུང་། རླུང་བཏང་ཚར་དུས་ཇི་ཙམ་གནས་ཀྱི་བར་ཕྱི་འཛིན་བྱས་ལ་སླར་ཡང་རྔུབ་པ་སོགས་གོང་ལྟར་རོ། དེའང་ལྕགས་ཀྱུས་དགུག་པ་ལྟར་རླུང་འཇམ་པོར་རྔུབས་ཤིང་དྲངས་བ་དང་། བུམ་པ་གསུམ་གཉིས་ཆུ་ཡིས་བཀང་བ་ལྟར། ལྟེ་བའི་ནང་སུམ་གཉིས་རླུང་གིས་བཀང་བ། རྒྱ་མདུད་ལྟར་གཞིལ་ཞིང་ལྟེ་འོག་ཏུ་སྡོམ་པ། ཐོགས་པ་མེད་པར་མདའ་ལྟར་འཕང་བ་སྟེ་སྦྱོར་བ་བཞི་དང་ལྡན་པས། སྟེང་རླུང་ཆ་གཉིས། འོག་རླུང་ཆ་གཅིག་ཁ་སྦྱར་བྱས་ནས་བཟུང་ཞིང་གཡས་གཡོན་མདུན་རྒྱབ་ཕྱོགས་གཅིག་ཏུ་མ་ཡོ་བར་མནན་དགོས་སོ། དེ་ལྟར་སྦྱོར་བ་བཞི་ལྡན་གྱི་དུས་སུ་དམིགས་པ་ནི། རྔུབ་པའི་དུས་སུ་ཕྱོགས་བཅུའི་རྒྱལ་བ་སྲས་དང་བཅས་པ་དང་། རྩ་བརྒྱུད་ཀྱི་བླ་མ་འཁོར་ལོ་སྡོམ་པའི་དཀྱིལ་འཁོར་སོགས་ཡི་དམ། དཔའ་བོ་མཁའ་འགྲོ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ཐམས་ཅད་འོད་ཟེར་སྣ་ལྔའི་རྣམ་པ་དང་། སྣ་བུག་གི་སོར་བཅུ་དྲུག་མཚམས་ནས་ནམ་མཁའི་རླུང་སྔོན་པོ་བཅོ་ལྔ་ནས་རླུང་གི་རླུང་ལྗང་གུ། བཅུ་བཞི་ནས་མེ་རླུང་དམར་པོ། བཅུ་གསུམ་ནས་ཆུ་རླུང་དཀར་པོ། བཅུ་གཉིས་ནས་ས་རླུང་སེར་པོ་རྣམས་སྣ་བུག་ནས་ཞུགས། རོ་རྐྱང་གཉིས་ནས་རྒྱུ་མར་ཕུས་བཏབ་པ་ལྟར་ཐ་ལ་ལ་སོང་ནས་རྩ་གསུམ་འདུས་མདོར་དགང་། གཞིལ་བའི་སྐབས་སུ་རོ་རྐྱང་གི་རླུང་རྣམས་དབུ་མར་པུར་གྱིས་ཞུགས་ནས་ཡེ་ཤེས་ཀྱི་རླུང་ཡུག་གཅིག་ཏུ་གྱུར། ཕྱིར་འཕང་བའི་དུས་སུ་རླུང་རྣམས་དབུ་མའི་ནང་དུ་ལྷག་མེད་དུ་ཐིམ་པར་བསམ་མོ། དེ་ལྟར་ལས་དང་པོ་པས་རླུང་ཁུག་བདུན་རེ་མཚམས་སུ་ཡུད་ཙམ་ངལ་བསོ། རིམ་གྱིས་གོམས་པ་ན། ཉེར་ལྔ། ལྔ་བཅུ། བརྒྱ་སོགས་ཇེ་མངས་སུ་བཏང་། གང་ལྟར་ཡང་མཐར་ཁུ་ཚུར་པུས་སྟེང་དུ་བཞག་ལ་ཕོ་བ་གཡས་བསྐོར་གསུམ་དང་གཡོན་བསྐོར་གསུམ་ཕོ་རྡེབ་གསུམ་བྱས་ལ་རྡོར་སྐྱེལ་བཤིགས་ནས་ལག་པ་སྦུབ་སྟེ་ཧ་སྤྲུག་གིས་ལུས་ཆ་མཉམ་པར་སི་ལི་ལི་སྤྲུག་གོ །འདི་ལྟར་འཇམ་རླུང་སྦྱོར་བ་བཞི་ལྡན་འདི་ཉིད་ལ་གོམས་པའི་ཕན་ཡོན་ནི། དགྱེས་རྡོར་དང་། ཤིན་ཏུ་རྨད་བྱུང་གི་རྒྱུད་ལས་གསུངས་པའི་སྙིང་པོ་ཙམ་ནི། ཁྲོས་པའི་ཉམས་ཀྱིས་མིག་འབྲས་གཉིས་དཔྲལ་བར་གཏད་ནས་རླུང་དབྱུང་བས་ཤིང་འབྲས་སོགས་ལྷུང་བ་དང་། མིག་གཉིས་གཡོན་དུ་བལྟས་ནས་དགང་བས་རྒྱལ་པོ་སོགས་དབང་དུ་བྱེད་པ། མིག་གཉིས་དཔྲལ་བའི་གཡས་ལོགས་སུ་བལྟས་ནས་རྔུབས་པས་རི་དྭགས་སོགས་དགུག་པ་དང་། མིག་གཉིས་ཐད་ཀར་བལྟས་ནས་གཞིལ་བས་དམག་སོགས་རེངས་བ་ཕྱི་དང་། གཏུམ་མོ་རང་བྱུང་དུ་འབར་བས་བྱང་སེམས་བཞུ་བ་ལྟུང་བ། བདེ་བ་དབང་དུ་བྱེད་པ། ཐིག་ལེ་གསང་གནས་སུ་དགུག་པ། ཐིག་ལེ་མི་འཕོ་བར་བྱེད་པ་ནང་དང་། གནས་སྐབས་བཞིའི་སྒྲིབ་པ་བྲལ་བར་བྱེད་པས་ལྟུང་བ། རྩ་རླུང་ཐིག་གསུམ་མི་ཤིགས་དྭངས་མར་དབང་དུ་བྱེད་པ། བྱང་སེམས་གྱེན་དུ་གཤེགས་པས་ཟག་པ་མེད་པའི་ཡོན་ཏན་གྱི་ཚོགས་དགུག་པ། རྩ་ཚོགས་ཆོས་ཉིད་ཀྱི་དབུ་མར་རེང་པ་གཞན་ཏེ། དེའང་ཚོགས་ཀྱི་ས་ནས་ཕྱི། མོས་སྤྱོད་ཀྱི་ས་ནས་ནང་། འཕགས་པ་ནས་གཞན་འགྲུབ་པར་གསུངས་སོ། བཞི་པ་དེ་ཁོ་ན་ཉིད་ཀྱི་གཏུམ་མོ་དཔྱིད་ཐིག་གི་གནད་ནི། ཨ་ཧཾ་འབར་འཛག ཅེས་གསུངས་ཏེ་དེ་ལ་གཉིས་ལས། དང་པོ་འབར་སྲོད་ཀྱི་རྣལ་འབྱོར་ནི། རང་ཉིད་འཁོར་ལོ་སྡོམ་པ་ལྷན་སྐྱེས་ ཡབ་ཡུམ་མམ། རྡོ་རྗེ་རྣལ་འབྱོར་མ་རྩ་གསུམ་འཁོར་ལོ་བཞི་དང་བཅས་པ་སྔར་བཞིན་གསལ་བའི་ལྟེ་འོག་སོར་བཞིའི་ཐད་དུ། རོ་རྐྱང་གཉིས་དབུ་མའི་ནང་དུ་འདུས་པའི་སུམ་མདོར་རྡོ་རྗེ་ཉི་མ་སྣང་བ་ཆེན་པོ་ཨ་ཤད་པ་ལུ་ཏ་སུམ་འཁྱོག་རྩེ་མོ་གྱེན་དུ་བསྟན་པ་ཕྲ་སྦོམ་མོ་ཁབ་ཙམ་རིང་ཐུང་སོར་ཕྱེད་པ། སྤུ་ཉག་རླུང་གིས་བསྐྱོད་པ་ལྟར་ལྷབ་ལྷབ་ཏུ་བསྐྱེད་པའི་སྒྲ་ཕེཾ་ཕེཾ་དུ་སྒྲོག་པ། ཉི་མའི་ཆོས་ཉིད་རྣམ་པར་དག་པས་ཁ་དོག་དམར་བ། རླུང་མེའི་དྲོད་ཅན་གྱི་ངོ་བོར་གྲུབ་པས་རེག་བྱ་ཚ་བ། བྱང་ཆུབ་ཀྱི་སེམས་ཡེ་ཤེས་ཀྱི་བདུད་རྩི་དམ་པའི་ཕྱིར་ཉམས་མྱོང་བདེ་བ། ཆོས་ཀྱི་དབྱིངས་ཤེས་རབ་ཀྱི་ཕ་རོལ་ཏུ་ཕྱིན་མའི་ངོ་བོ་ཉིད་ཀྱི་ཕྱིར་རང་བཞིན་སྟོང་པ་ཉིད་དེ་མཚན་ཉིད་བཞི་དང་ལྡན་པ་གསལ་གདབ། ཡང་གཅིག་ཏུ་ན། ངོ་བོ་རྡོ་རྗེ་རྣལ་འབྱོར་མ། རང་བཞིན་ཐིག་ལེ་དམར་པོ། རྣམ་པ་མེ་སུམ་འཁྱོག་ཏུ་འབར་བ། རེག་བྱ་ཚ་བས་རྩ་འཁོར་ལུས་དང་བཅས་པ་དྲོ་བར་ནུས་པ། བྱེད་ལས་དྲོད་དེས་ཚ་བའི་ཟུག་རྔུ་བྱེད་པ་མ་ཡིན་པར་བདེ་བ་སྐྱེད་པའོ། དེ་ཡང་ཨ་ཤད་ཀྱི་རྩུབ་པ་ས། སྣུམ་པ་ཆུ། ཚ་བ་མེ། བསྐྱོད་ཅིང་གཡོ་བ་རླུང་། སྟོང་པ་ནམ་མཁའ་སྟེ་ཁམས་ལྔ་འདུས་ཡིན་པས། ས་ཁམས་དག་པ་སྤྱན་མ་ཆུ་ཁམས་དག་པ་མ་མཱ་ཀི། མེ་ཁམས་དག་པ་གོས་དཀར་མོ། རླུང་ཁམས་དག་པ་སྒྲོལ་མ། ནམ་མཁའི་ཁམས་དག་པ་དབྱིངས་ཕྱུག་མ་སྟེ་ཡུམ་ལྔ་འདུས་པ་དང་། ཡེ་ཤེས་ཀྱི་ཁམས་རྣམ་པར་དག་པ་རྡོ་རྗེ་ཕག་མོའི་བདག་ཉིད་དེ་སྙོམས་པའི་དག་པ་དྲན་ཅིང་ངེས་པ་བྱེད་པ་གལ་ཆེའོ། དེ་ནས་འབྱུང་ལྔའི་རླུང་ཁ་དོག་སོ་སོར་གསལ་བ་སྣ་བུག་གཉིས་ནས་འཇམ་པོ་རྔུབ་པ་རོ་རྐྱང་གཉིས་ནས་ཐ་ལ་ལ་སོང་སྟེ་ཨ་ཤད་ལ་ཕོག་པས་སོལ་མེ་ལ་རླུང་ཕོག་པ་ལྟར་དམར་ལྷང་གིས་སོང་བར་བསམ་ལ་མནན་པའི་ཚེ་དེ་ཁོ་ན་ལ་སེམས་གཏད། ཕྱིར་དབྱུང་དུས་ཨ་ཤད་ལས་འོད་ཟེར་དམར་པོ་འཕྲོས་པས་ལུས་ཀྱི་ནང་གང་། བ་སྤུའི་བུ་ག་ཐམས་ཅད་ནས་ཕྱིར་ཐོན། འོད་ཟེར་རེ་རེའི་རྩེ་མོར་མཆོད་པའི་ལྷ་མོ་ལག་ན་མཆོད་རྫས་སྣ་ཚོགས་ཐོགས་པ་དཔག་ཏུ་མེད་པ་འཕྲོས། ཕྱོགས་བཅུའི་ཞིང་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་བླ་མ་ཡི་དམ་དཔའ་བོ་མཁའ་འགྲོའི་ཚོགས་དང་བཅས་པ་ལ་ཕྱི་ནང་གསང་བའི་མཆོད་པ་ཕུལ་བས་ཐུགས་རྒྱུད་མཉེས་པར་བསམ། ནང་དུ་རྔུབ་དུས་གསང་གསུམ་གྱི་བྱིན་རླབས་ཐམས་ཅད་འོད་ཟེར་དམར་པོའི་རྣམ་པར་བསྡུས་ཏེ་འབྱུང་ལྔའི་རླུང་དང་ལྷན་ཅིག་ཏུ་སྣ་བུག་གཉིས་ནས་ཞུགས། རོ་རྐྱང་གི་ལམ་བརྒྱུད་དེ་ཨ་ཤད་ལ་ཐིམ་པས་ནུས་རྩལ་བཀྲག་མདངས་ཆེས་ཆེས་རྒྱས་པར་བསམ་ལ་མནན་ཡང་རླུང་ཕྱིར་དབྱུང་དུས་ཨ་ཤད་ལས་འོད་ཟེར་དམར་པོ་འཕྲོས་པས་ལུས་གང་། བ་སྤུའི་བུ་ག་ཐམས་ཅད་ནས་ཕྱིར་ཐོན་ཏེ་ཕྱི་སྣོད་ཀྱི་འཇིག་རྟེན་ལ་ཕོག་པས་མ་དག་པ་ཐམས་ཅད་བསྲེགས་ནས་ཐུགས་གསུང་སྐུའི་ཞིང་ཁམས་སུ་བསྒྱུར། ཚུར་རྔུབ་དུས་འབྱུང་བ་ལྔའི་བཅུད། ཁྱད་པར་དུ་ཉི་མ་དང་རྟ་གདོང་གི་མེའི་ནུས་བཅུད་ཐམས་ཅད་འོད་ཟེར་དམར་པོའི་རྣམ་པར་བསྡུས་ཏེ་འབྱུང་ལྔའི་རླུང་དང་ལྷན་ཅིག་ཏུ་སྣ་བུག་གཉིས་ནས་ཞུགས། རོ་རྐྱང་གི་ལམ་བརྒྱུད་དེ་ཨ་ཤད་ལ་ཐིམ་པས་སྔ་མ་ལས་ནུས་རྩལ་རྒྱས་པར་བསམ་ལ་མནན། ཡང་རླུང་ཕྱིར་དབྱུང་དུས་འོད་ཟེར་སྔར་ལྟར་འཕྲོས་ལྷ་མི་ཀླུ་སོགས་འགྲོ་བ་ཀུན་ལ་ཕོག་པས་སྡིག་སྒྲིབ་བག་ཆགས་ཐམས་ཅད་བསྲེགས་ནས་འཁོར་ལོ་གསུམ་གྱི་ལྷའི་རང་བཞིན་དུ་བསྒྱུར། ཚུར་རྔུབས་དུས་སེམས་ཅན་ཐམས་ཅད་ཀྱི་ཚེ་བསོད་དཔལ་འབྱོར་གཟི་བརྗིད་སོགས་ཡོན་ཏན་ཐམས་ཅད་བསྡུས་ཏེ་འབྱུང་ལྔའི་རླུང་དང་མཉམ་དུ་སྣ་བུག་གཉིས་ནས་ཞུགས་པ་རོ་རྐྱང་གི་ལམ་བརྒྱུད་དེ་ཨ་ཤད་ལ་ཐིམ་པས་སྔ་མ་ལས་ཀྱང་ནུས་རྩལ་བཀྲག་མདངས་གཟི་བརྗིད་ནུས་སྟོབས་རྒྱས་པར་བསམ་ལ་མནན། རླུང་ཕྱིར་བཏང་དུས་ཨ་ཤད་ཀྱི་འོད་དང་ཚ་ངད་བདེ་བའི་ཤུགས་ཀྱིས་རྩ་འཁོར་ལུས་ནང་ཐམས་ཅད་ཁྱབ་པར་བསམ། དེ་ནས་སྦྱོར་བ་བཞི་ལྡན་གྱི་རླུང་གིས་ཨ་ཤད་ལས་གཏུམ་མོ་ཡེ་ཤེས་ཀྱི་མེ་ཚ་བའིཤུགས་བདེ་བའི་ཟིལ་དང་ལྡན་པ་གློག་འཁྱུགས་པ་ལྟར་ཁྲ་ཁྱུག་ཁྱུག་དམར་ཆེམ་ཆེམ་དུ་སྦར་ལ་སྦྱོར་བ་བཞི་ལྡན་རླུང་ཁུག་རེ་རེས་མེ་ལྕེ་ཇེ་སྦོམས་སུ་རིམ་བཞིན་གྱེན་དུ་སྦར་ལ་ལྟེ་བའི་རྩ་འཁོར་དང་། རྐང་མཐིལ་ཡན་ཆད་མེས་ཁེངས་པར་བསམ། དེ་ནས་རིམ་བཞིན་སྦར་ལ་སྙིང་གའི་འཁོར་ལོ། མགྲིན་པའི་འཁོར་ལོ་ལག་པའི་སོར་མོའི་རྩེ་ཚུན་ཆད་དང་། སྤྱི་བོའི་འཁོར་ལོ་བཅས་མེས་གང་བར་བསམ། མཐར་རྩ་ཕྲན་གྲངས་མེད་པ་སོགས་ལུས་ཀྱི་ནང་ཐམས་ཅད་མེ་དམར་ཞིང་འབར་ལ་ཚ་ངད་དང་བདེ་བ་མི་བཟོད་པས་གང་སྟེ་བ་སྤུའི་བུ་ག་ནས་མེ་ལྕེས་དམར་ཉུག་ཉུག་ཏུ་ཐོན་ཏེ་ཕྱིར་འཕྲོས་པས་འཇིག་རྟེན་གྱི་ཁམས་ཐམས་ཅད་མེ་དྲག་ཏུ་འབར་ཞིང་འཁྲུགས་པར་གྱུར་ནས་རང་ལུས་ཕྱི་ནང་མེད་པ་མེའི་རང་བཞིན་གྱུར་པར་བསམ། དེ་ཡང་ཐོག་མར་གཏུམ་མོའི་མེས་ལྟེ་བའི་རྩ་འཁོར་མན་ཆད་བཀང་བ་ཁོ་ན་ལ་དམིགས་ཕུག་སྟེ་བསྒོམ། དེ་ལྟར་བསྒོམས་པས་ལྟེ་འོག་མན་ཆད་ལ་དྲོད་སྐྱེས་པ་ན་རིམ་བཞིན་སྙིང་ག་སོགས་སུ་གཏུམ་མོའི་མེ་སྦར་བ་ལ་དམིགས་པ་གཏད་དེ་བསྒོམ་པས་དྲོད་སྐྱེ་བ་མྱུར་ཞིང་སྐྱེས་པ་བརྟན་པར་གསུངས་སོ། མཐར་རླུང་ནང་དུ་རྔུབ་པའི་ཚེ་ལག་གཉིས་རྡོ་རྗེའི་ཁུ་ཚུར་སྙིང་གར་བསྣོལ། མནན་པའི་དུས་ཁུ་ཚུར་པུས་ཁར་བཞག་པ་དང་རྡོར་བསྐྱིལ་བཤིག་ཅིང་རྡེབ་ཆུང་བྱེད་པ་རྣམས་དུས་མཉམ་བྱ། དེ་ནས་རླུང་མནན་བཞིན་པར་གཡས་གཅུ་གཡོན་གཅུ་བྱས་ལ། དེ་སྐབས་དམིགས་པ་ནི། གཏུམ་མོ་གང་དུ་བསྒོམ་པའི་རྩ་འཁོར་རྣམས་ལ་མེ་ཁོད་སྙོམས་པར་འབར་བས་རྩ་ཞར་བ་དང་སྐམ་པ་རྣམས་སོས་པ་དང་རྩ་མདུད་ཐམས་ཅད་གྲོལ་བར་བསམ། མཐར་རླུང་བཏང་བ་དང་མཉམ་དུ་ཧ་ཧ་ཞེས་ལུས་བྱིངས་སི་ལི་ལི་དྲག་ཏུ་སྤྲུག་གོ དེ་ནས་རླུང་ནང་དུ་རྔུབ་དུས་གཏུམ་མོ་གང་དུ་སྦར་བའི་སྟེང་གིི་མེ་ཐམས་ཅད་ཨ་ཤད་ལ་བསྡུ། ཕྱིར་བཏང་དུས་སྨད་ཀྱི་མེ་ཐམས་ཅད་ཨ་ཤད་ལ་བསྡུ། ཨ་ཤད་ཉིད་ཏིལ་མར་གྱི་མར་མེ་ལྟར་འབར་ཞིང་གསལ་བའི་འོད་ཀྱིས་རྩ་འཁོར་ལུས་ནང་ཐམས་ཅད་གསལ་བར་བསམ་པ་ལ་དམིགས་པ་གཏད་དོ། གཉིས་པ་འབར་འཛག་ཟུང་འཇུག་གི་རྣལ་འབྱོར་ནི། སྟོང་ར་རྩ་གསུམ་འཁོར་ལོ་བཞི་ཨ་ཤད་དང་བཅས་པ་སྔར་གསལ་བའི་སྤྱི་བོའི་དབུ་མའི་ཡས་སྣེ་ནང་དུ་རྡོ་རྗེ་ཟླ་བ་དྲི་མ་མེད་པའི་འོད་ཧཾཾ་ཡིག་དཀར་པོ་མགོ་མཐུར་བསྟན་བདུད་རྩི་འཛག་ལ་ཁད་པ། ཟླ་བའི་ཁམས་ཀྱི་ཆ་ཡིན་པའི་ཕྱིར་དཀར་བ། ཐབས་ཀྱི་རང་བཞིན་ཤེས་རབ་དང་འབྲེལ་བའི་ཕྱིར་མུ་ཏིག་གི་རྡོག་པོ་ལྟར་འཚེར་བ། བྱང་ཆུབ་ཀྱི་སེམས་བདུད་རྩིའི་བཅུད་དང་ལྡན་པའི་ཕྱིར་སྣུམ་པ། རྩ་ཡི་གནས་གང་དང་གང་ཡང་རུང་བར་སྤྱན་འདྲེན་བདེ་བའི་ཕྱིར་ཀུན་ནས་ཀུན་ཏུ་ཟླུམ་པས་འདྲིལ་བ་སྟེ་མཚན་ཉིད་བཞི་དང་ལྡན་པ་གསལ་བཏབ། ཡང་ན། ངོ་བོ་དཔལ་ཧེ་རུ་ཀ་འཁོར་ལོ་སྡོམ་པ། རང་བཞིན་ཐིག་ལེ་དཀར་པོ། རྣམ་པ་ཧཾཾ་ཡིག་དཀར་པོ། རེག་བྱ་བསིལ་བ་རྩ་གནས་དང་ལུས་ཐམས་ཅད་བསིལ་བར་ནུས་པ། བྱེད་ལས་བདེ་བ་ཆེན་པོ་སྐྱེད་པར་བྱེད་པའོ། དེ་ཡང་ཧཾཾཾ་ཡིག་གི་འཇམ་པ། སྣུམ་པ་ཆུ། འོད་འཚེར་བ་མེ། གཡོ་བ་རླུང་། སྟོང་པ་ནམ་མཁའི་རང་བཞིན་ཏེ་ཁམས་ལྔ་ལྡན་ཡིན་པས། ས་ཁམས་དག་པ་རྣམ་སྣང་། ཆུ་ཁམས་དག་པ་རིན་འབྱུང་། མེ་ཁམས་དག་པ་སྣང་མཐའ། རླུང་ཁམས་དག་པ་དོན་གྲུབ་ནམ་མཁའི་ཁམས་དག་པ་མི་བསྐྱོད་པ་སྟེ་ཡབ་ལྔ་འདུས་པ་དང་། ཡེ་ཤེས་ཀྱི་ཁམས་རྣམ་པར་དག་པ་རྡོ་རྗེ་འཆང་གི་བདག་ཉིད་དོ་སྙམ་པའི་དག་པ་དྲན་ཞིང་ངེས་པ་སྐྱེད་པར་བྱ་དགོས་སོ། །དེ་ནས་འབྱུང་ལྔའི་རླུང་སྣ་བུག་གཉིས་ནས་འཇམ་པོར་རྔུབ། རོ་རྐྱང་གཉིས་ནས་སོང་སྟེ་དབུ་མར་ཞུགས་པ་ཨ་ཤད་ལ་ཕོག་པས་མེ་ལྕེ་དམར་པོ་ཕྲ་བ་རྟ་རྔ་ཙམ་པ་དམར་ཁྱུག་གིས་འབར་ཏེ་དབུ་མའི་ནང་ནས་གྱེན་དུ་སོང་བ་ཧཾ་ལ་ཕོག་པར་བསམ་ལ་མནན་པའི་ཚེ་དེ་ཁོ་ན་ལ་སེམས་གཏད། ཕྱིར་དབྱུང་དུས་ཧཾ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས་པས་ལུས་ཀྱི་ནང་གང་སྤྱི་བོ་དང་སྨིན་མཚམས་སོགས་བ་སྤུའི་བུ་ག་ནས་ཕྱིར་ཐོན། འོད་ཟེར་གྱི་རྩེ་ལས་མཆོད་པའི་ལྷ་མོ་བརྗོད་དུ་མེད་པ་འཕྲོས་པས། ཕྱོགས་བཅུའི་སངས་རྒྱས་བྱང་སེམས་བླ་མ་ཡི་དམ་དཔའ་བོ་མཁའ་འགྲོ་ཐམས་ཅད་ལ་ཕྱི་ནང་གསང་བའི་མཆོད་པ་བླ་ན་མེད་པ་ཕུལ་བས་མཉེས་པར་བསམ། ནང་དུ་རྔུབ་དུས་དེ་དག་གི་གསང་བ་གསུམ་གྱི་བྱིན་རླབས་ཐམས་ཅད་འོད་ཟེར་དཀར་པོ་བདུད་རྩིའི་རང་བཞིན་ཅན་གྱི་རྣམ་པར་བསྡུས་ཏེ་འབྱུང་ལྔའི་རླུང་དང་ལྷན་ཅིག་ཏུ་སྣ་བུག་ནས་ཞུགས་པ་རོ་རྐྱང་གི་ལམ་བརྒྱུད་དེ་ཧཾ་ལ་ཐིམ་པས་ནུས་བསིལ་བདེ་རྩལ་གཟི་མདངས་རྣམས་ཆེས་ཆེར་རྒྱས་པར་བསམ་ལ་མནན། ཡང་རླུང་ཕྱིར་དབྱུང་དུས་འོད་ཟེར་སྔར་ལྟར་འཕྲོས་པ་སྣོད་ཀྱི་འཇིག་རྟེན་ལ་ཕོག་པས་མ་དག་པ་ཐམས་ཅད་སྦྱངས་ནས་དག་པའི་ཞིང་ཁམས་སུ་བསྒྱུར། ཚུར་རྔུབ་དུས་འབྱུང་ལྔའི་བཅུད་དང་ལྷག་པར་ཟླ་བ་དང་ལྷའི་བདུད་རྩིའི་ནུས་བཅུད་ཐམས་ཅད་གོང་ལྟར་བསྡུས་ནས་ཧཾ་ཡིག་ལ་ཐིམ་པས་སྔ་མ་ནས་ཀྱང་ནུས་བསིལ་བདེ་རྩལ་གཟི་མདངས་རྒྱས་པར་བསམ་ལ་མནན། ཡང་རླུང་ཕྱིར་དབྱུང་དུས་འོད་ཟེར་སྔར་ལྟར་འཕྲོས་ཏེ་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་བག་ཆགས་ཐམས་ཅད་སྦྱངས་ནས་འཁོར་ལོ་གསུམ་གྱི་ལྷའི་རང་བཞིན་དུ་བསྒྱུར། ཚུར་རྔུབ་དུས་སེམས་ཅན་ཐམས་ཅད་ཀྱི་ཚེ་བསོད་དཔལ་འབྱོར་གཟི་མདངས་སོགས་ཡོན་ཏན་ཐམས་ཅད་བསྡུས་ཏེ་ཧཾ་ལ་ཐིམ་པས་སྔ་མ་ལས་ཀྱང་ནུས་བསིལ་སོགས་རྒྱས་པར་བསམ་ལ་མནན། རླུང་ཕྱིར་བཏང་དུས་ཧཾ་གི་འོད་དང་བསིལ་ངད་བདེ་བའི་ཤུགས་ཀྱིས་རྩ་འཁོར་འདུས་ནང་ཐམས་ཅད་ཁྱབ་པར་བསམ། དེ་ནས་སྦྱོར་བ་བཞི་ལྡན་གྱི་རླུང་གིས་ཨ་ཤད་ལས་གཏུམ་མོའི་མེ་ཚ་བའི་ངད་བདེ་བའི་ཤུགས་དང་ལྡན་པ་རིམ་གྱིས་ཇེ་ཆེར་སྦར་བའི་དྲོད་ཀྱིས་བསྐུལ་བས་ཧཾ་དངོས་ཞུ་བ་མ་ཡིན་པར་ཆུ་ཤེལ་ལ་ཟླ་ཟིལ་ཕོག་པས་ཆུ་ཐིགས་པ་ལྟར་དུ་ཧཾ་ལས་བྱང་སེམས་བདུད་རྩིའི་རྒྱུན་དཀར་པོ་བསིལ་ཞིང་བདེ་བའི་རང་བཞིན་ཅན་དཀར་ན་ར་ར་བབས་པ་ཨ་ཤད་ཀྱི་མེ་དང་འདྲེས་པས་བདེ་དྲོད་ཟུང་འཇུག་ཏུ་རྒྱས་ཤིང་ལྟེ་བའི་ཆོས་འབྱུང་ཡོངས་དུ་གང་བས་སྡོང་རྩ་མར་ཁུས་གསོས་པ་ལྟར་གཏུམ་མོའི་མེ་ཆེར་འབར་བ་དབུ་མའི་ནང་ནས་གྱེན་དུ་སོང་སྟེ་ཧཾ་ལ་ཕོག ཧཾ་ལས་བྱང་སེམས་དཀར་པོའི་རྒྱུན་ཆེར་བབ་ནས་སྤྱི་བོའི་རྩ་འཁོར་ཡོངས་སུ་གང་བས་དགའ་བ་སྐྱེས་པར་བསམ། ཡང་བྱང་སེམས་དབུ་མའི་ནང་ནས་དཀར་ནར་ནར་བབ་སྟེ་མགྲིན་པའི་རྩ་འཁོར་ལག་པའི་སོར་མོའི་རྩེ་ཚུན་ཆད་གང་བས་མཆོག་དགའ་སྐྱེས་པར་བསམ། དེ་བཞིན་དུ་བབ་སྟེ་སྙིང་ཁའི་རྩ་འཁོར་གང་བར་ཁྱད་དགའ་སྐྱེས་པར་བསམ། ལྟེ་བའི་རྩ་འཁོར་དང་རྐང་མཐིལ་ཡན་ཆད་གང་བས་ལྷན་སྐྱེས་ཀྱི་དགའ་བ་སྐྱེས་པར་བསམ། ལས་དང་པོ་པའི་སྐབས་སུ་དགའ་བཞི་སྐྱེ་བར་མོས་པའི་སྐབས་དང་། རིམ་བཞིན་གོམས་ནས་དགའ་བཞི་ཅུང་ཟད་དེ་དངོས་སུ་སྐྱེ་བ་སོགས་ཀྱི་སྐབས་ཐམས་ཅད་དུ་དགའ་བའི་ངོ་བོ་ལ་བལྟས་ནས་སྟོང་པར་ངེས་པའི་བདེ་སྟོང་དབྱེར་མེད་ཀྱི་ཉམས་བསྐྱང་། འཁོར་ལོ་རེར་རླུང་ཁུག་གསུམ་ལྔ་བདུན་བཅུ་སོགས་ཅི་ནུས་བྱ། མཐར་རླུང་ནང་དུ་རྔུབ་པའི་ཚེ་ལག་གཉིས་ཁུ་ཚུར་སྙིང་ཁར་བསྣོལ། མནན་པ་དང་མཉམ་དུ་ཁུ་ཚུར་པུས་བཞག་དང་རྡོར་སྐྱིལ་བཤིག རྡེབ་ཆུང་བྱ། རླུང་མནན་བཞིན་པར། ཕོ་བསྐོར་གཡས་གཡོན་དང་། གཡས་གཅུགཡོན་གཅུ་བྱས་ལ་དེ་སྐབས་དམིགས་པ་ནི། ལུས་ནང་རྩ་གསུམ་འཁོར་ལོ་བཞི་རྩ་ཕྲན་དང་བཅས་པའི་ནང་ཐམས་ཅད་བྱང་སེམས་དཀར་པོས་ཁོད་སྙོམས་པར་ཁྱབ་པས་རྩ་ཞར་བ་དང་སྐམ་པ་རྣམས་སོས་པ་དང་། རྩ་མདུད་ཐམས་ཅད་ཤིག་ཤིག་ཏུ་གྲོལ་བར་བསམ། མཐར་རླུང་བཏང་བ་མཉམ་དུ་ཧ་ཧ་ཞེས་ལུས་སི་ལི་ལི་དྲག་ཏུ་སྤྲུག་གོ །དེ་རྗེས་རླུང་ནང་དུ་རྔུབ་པ་དང་མཉམ་དུ་དབུ་མའི་ནང་གི་མེ་ཐམས་ཅད་ཨ་ཤད་ལ་བསྡུ། ཕྱིར་བཏང་བ་དང་མཉམ་དུ་ལུས་གཅུན། སྐུ་ཞབས་གྱེན་དུ་དྲངས། ལྕེ་ཡ་རྐན་ལ་སྦྱར། མིག་གྱེན་ལ་བལྟ་བ་སོགས་སྦྱོར་བ་དྲུག་ལྡན་འཇམ་པོས་རྐང་པའི་སོར་རྩེ་ཡན་གྱི་ཁམས་དཀར་ཆ་ཐམས་ཅད་དཀར་ཀྱི་ལི་ལི་དབུ་མའི་ནང་ནས་གྱེན་དུ་དྲངས་ཏེ་སྤྱི་བོའི་ཧཾ་ལ་བསྟིམ་པ་ནི་འདྲེན་ཡིན་ལ། སླར་རླུང་ནང་དུ་རྔུབས་པ་དང་མཉམ་དུ་ཧཾ་ལས་བྱང་སེམས་ཆར་ལྟར་བབས་ནས་རྩ་གསུམ་འཁོར་ལོ་བཞི་རྩ་ཕྲན་དང་བཅས་པའི་ལུས་ནང་ཐམས་ཅད་སྙོམས་པར་གང་ཞིང་བྱེ་མ་ལ་ཆུ་བཏབ་པ་ལྟར་ཁྱབ་པར་བསམ། མནན་པའི་ཚེ་གཡས་གཅུ་གཡོན་གཅུ་སྔར་ལྟར་དང་འཕུར་སྲུབ་དྲག་ཏུ་བྱས་ལ་ཧ་སྤྲུགས་བྱ་བ་ནི་བཀྲམ་པའོ། དེ་ནས་འཁོར་ལོ་བཞི་དང་རོ་རྐྱང་དབུ་མ་ལ་བསྡུ། དབུ་མའི་ནང་ཐམས་ཅད་བྱང་སེམས་དཀར་དམར་གྱིས་གང་བར་བསམ་ལ་བདེ་སྟོང་དབྱེར་མེད་ཀྱི་ངང་དུ་མཉམ་པར་བཞག་གོ །བོགས་འདོན་ལ་གཉིས་ལས་དང་པོ་དྲོད་ཀྱི་བོགས་འདོན་ནི། ལུས་གནད་རྣམ་སྣང་གི་ཆོས་བདུན་ནམ་མེ་ཐབ་དྲུག་ཆིང་གིས་འཁོད་ལ། རང་ཉིད་དཔལ་འཁོར་ལོ་སྡོམ་པ་ཡབ་ཡུམ་མམ། རྡོ་རྗེ་རྣལ་འབྱོར་མ་སྔར་བཤད་པ་ལྟར་བསྒོམ་པའི་འོག་དང་མདུན་རྒྱབ་གཡས་གཡོན་རྣམས་སུ་ཉི་མའི་དཀྱིལ་འཁོར་རབ་ཏུ་ཚ་ཞིང་འོད་འབར་བ་རེ་རེ་སྟེ་ལྔ་སྒྲམ་གྱི་ཚུལ་དང་། ལུས་ནང་རྩ་གསུམ་འཁོར་ལོ་བཞི་ཨ་ཤད་དང་བཅས་པ། ཨ་ཤད་ཀྱི་འོག་ཏུ་རཾ་ཡིག་དམར་པོ་མགར་གྱི་ལྕགས་སྲེག་ལྟར་དམར་ཞིང་ཚྭ་ཚྭ་འཐུལ་བ། སྤྱི་བོར་པད་ཉིའི་སྟེང་དུ་རྩ་བའི་བླ་མ་ལ། རྣམ་པ་དཔལ་ཧེ་རུ་ཀ་སྐུ་མདོག་དམར་པོ་ཁྲོ་འཛུམ་ཆགས་པའི་ཉམས་ཅན། གཡས་ཟངས་ཀྱི་གྲི་གུག་མེ་འབར་བ་དང་། གཡོན་ཀ་པཱ་ལ་བདུད་རྩི་དམར་པོ་ཞུན་མར་ལྟ་བུ་ཁོལ་ཞིང་འབར་བས་གང་བ་ཐུགས་ཀར་སྟེང་འོག་ཏུ་འཛིན་པ། དབུ་སྐྲ་ཐོར་ཚུགས་ལ་ཐོད་སྐམ་རྡོག་གཅིག་རིན་པོ་ཆེའི་རྩེ་ཕྲན་ཅན་གྱི་དབུ་རྒྱན་བྱས་པ་རུས་པའི་རྒྱན་དྲུག་དང་སྟག་ཤམ་སོགས་ཧེ་རུ་ཀའི་རྒྱན་གྱིས་བརྒྱན་ཅིང་ཞབས་གཉིས་ཕྱེད་སྐྱིལ་གྱིས་མེ་དཔུང་འབར་བའི་དབུས་སུ་བཞུགས་པ། ཉི་མ་སྟོང་གི་གཟི་བརྗིད་འབར་བ་མཆོག་གསུམ་རྩ་གསུམ་ཀུན་འདུས་ཀྱི་ངོ་བོར་བསྒོམས་ལ་རང་གི་སྙིང་གའི་འོད་སྤྲིན། ལས་སྤྲོས་པའི་མཆོད་པའི་ལྷ་མོའི་ཚོགས་ཀྱིས། ཕྱི་མཆོད་སྣང་སྲིད་སྣོད་བཅུད་ལོངས་སྤྱོད་ཐམས་ཅད་དང་། མེ་དང་ཉི་མ་གྲངས་མེད་པ། ནང་མཆོད་འདོད་ཡོན་གྱི་ལྷ་མོ་ལྔ་དྲོད་ཀྱི་རང་བཞིན་དང་། གསང་མཆོད་མེའི་ལྷ་མོ་གོས་དཀར་མོས་སྙོམས་འཇུག་གི་བདེ་བ། དེ་ཁོ་ན་ཉིད་མཆོད་ཡུལ་མཆོད་བྱ་མཆོད་མཁན་དམིགས་སུ་མེད་པ་བློ་འདས་ཀྱི་ངང་དུ་མཆོད་ལ། ཁྱབ་བདག་དཔལ་ལྡན་བླ་མ་དམ་པ་ལ་གསོལ་བ་འདེབས་སོ། གཏུམ་མོ་བདེ་དྲོད་ཀྱི་ཡེ་ཤེས་ཁྱད་པར་ཅན་བདག་གི་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། དེ་ནས་དྲག་རླུང་གནད་ལྔ་མ་ནི། རླུང་ལོག་མི་འབྱུང་བ་འབུད་པའི་གནད། རང་གནས་སུ་གཟུད་པ་རྔུབ་པའི་གནད། དབང་དུ་བསྡུ་བ་དགང་བའི་གནད། རྩ་མིག་ཏུ་གདབ་པ་གཞིལ་བའི་གནད། ཕྱི་ནང་བསྲེ་བ་འཕང་བའི་གནད་དེ་ལྔ་ལས། དང་པོ་ནི། འབུད་པ་དགུ་ཕྲུག་གི་ཕྱི་མ་ཉིད་དྲག་ཏུ་བཏང་བ་དང་། ཕྱི་མ་བཞི་ནི་འཇམ་རླུང་སྦྱོར་བ་བཞི་ལྡན་རྩོལ་བ་དྲག་པོར་བྱས་པ་ཡིན་ནོ། །དེ་ལྟར་དྲག་རླུང་དང་སྦྲག་ཏེ་སྣ་བུག་གཉིས་ནས་རླུང་དྲག་ཏུ་རྔུབ་པ་རྒྱུ་མར་ཕུས་བཏབ་པ་ལྟར་རོ་རྐྱང་གཉིས་ནས་ལྡི་རི་རི་སོང་བ་དང་། འོག་རླུང་དྲག་ཏུ་འཐེན་པ་དབུ་མའི་ནང་ནས་གྱེན་དུ་བྱུང་བ་གཉིས་རྩ་གསུམ་འདུས་མདོར་ཁ་སྦྱོར་དུ་དགང་ལ། སྟེང་འོག་གི་རླུང་རཾ་ལ་ཕོག་པས་རཾ་ལས་མེ་འབར་ཏེ་ཨ་ཤད་ལ་ཕོག་པ་དང་། ཨ་ཤད་ལས་ཀྱང་གཏུམ་མོའི་མེ་ཆེར་འབར་བར་བསམ། ཅུང་ཟད་མནན་སྦྱོར་བྱས་ཏེ་རྔུབ་ཆུང་བརྩེགས་ནས་རླུང་མར་གཡས་གཡོན་དབུས་གསུམ་དྲག་ཏུ་བསྡིག་ལ། གཏུམ་མོའི་མེ་དབུ་མའི་ནང་ནས་གྱེན་དུ་དམར་ཁྱུག་ཁྱུག་སོང་བ་དབུ་མའི་ཡས་སྣ་ནས་ཐོན་ཏེ་བླ་མའི་སྐུ་ལ་ཕོག་པས་བདེ་དྲོད་ཀྱི་ཡེ་ཤེས་ཀྱིས་བླ་མ་ཤིན་ཏུ་རྒྱས་པར་བསམ། ཕྱིར་འཕང་བ་དང་མཉམ་དུ་སྤྱི་བོའི་བླ་མའི་ཐུགས་ཀ་ནས་འོད་ཟེར་འཕྲོས་པས་རྒྱལ་བ་སྲས་བཅས་རྩ་བ་གསུམ་གྱི་བྱིན་རླབས། སྣོད་ཀྱི་འཇིག་རྟེན་གྱི་བཅུད་དང་དྭངས་མ་བཅུད་ཀྱི་སེམས་ཅན་གྱི་ཚེ་བསོད་བཀྲག་མདངས་གཟི་བརྗིད་ཐམས་ཅད་བདུད་རྩི་མེ་ཡི་རྣམ་པ་ཅན་དུ་བསྡུས་པ་བླ་མའི་ཕྱག་གི་ཐོད་པའི་བདུད་རྩིར་ཐིམ། རྔུབ་པའི་དུས་སུ་ཐོད་པའི་བདུད་རྩི་ཤིན་ཏུ་ཚ་ཞིང་ཁོལ་བ་ཡེ་ཤེས་ཀྱི་མེའི་རང་བཞིན་ཅན་དེ་རང་གི་སྤྱི་གཙུག་ཏུ་བླུགས་པ་ཚངས་བུག་ནས་ཞུགས། དབུ་མའི་ལམ་བརྒྱུད་དེ་ཨ་ཤད་མེ་འབར་བ་ལ་ཕོག མེ་འབར་བའི་ནང་དུ་མར་ཁུ་བླུགས་པ་ལྟར་འུར་སྒྲ་དང་བཅས་གཏུམ་མོའི་མེ་ཚ་བའི་ངད་དང་། བདེ་བའི་ཤུགས་མི་བཟོད་པ་ཆེས་ཆེར་འབར་བས་རྩ་གསུམ་འཁོར་ལོ་བཞི་རྩ་ཕྲན་གྲངས་མེད་ལུས་ནང་ཐམས་ཅད་གང་བས་དྲོད་དང་བདེ་བའི་ཚོར་བ་བསམ་གྱིས་མི་ཁྱབ་ཅིང་བཟོད་དུ་མེད་པ་ཙམ་སྐྱེས་པར་བསམ་ལ་ཕོ་སྐོར་རྩུབ་རྡེབ་བྱ། དགང་སྤྲུག་གི་སྐབས་སུ་མེ་ལུས་ནང་དུ་མ་ཤོངས་བར་མེ་ལྕེ་བ་སྤུའི་བུ་ག་རྣམས་ནས་ཕྱིར་འཕྲོས་པ་ཉི་མ་ལྔར་ཕོག ཉི་མ་ལྔ་ལས་ཀྱང་མེ་ཆེར་འབར་བ་ཚུར་འཕྲོས་པ་རང་གི་ལུས་ལ་ཕོག་པས། རང་ལུས་མེ་དཔུང་གི་གཡོགས། ཕྱིར་འཕྲོས་པས་འཇིག་རྟེན་ཐམས་ཅད་མེ་དཔུང་ཚ་དབལ་མི་བཟོད་པས་གང་ཞིང་སྣོད་བཅུད་ཐམས་ཅད་རྣམ་པ་མ་ཉམས་པ་ལ་མེའི་རང་བཞིན་དུ་འབར་ཞིང་འཁྲུགས་པར་བསམས་ལ་རླུང་ཕྱིར་འཕང་། ཐུན་གཅིག་ལ་གནད་ལྔ་དང་ལྡན་པའི་རླུང་ཁུག་ཉེར་གཅིག་ཙམ་བྱས་མཐར་ཧ་སྤྲུག་གཡས་གཡོན་དབུས་གསུམ་བྱ། མཐར་བླ་མ་འོད་དུ་ཞུ་བ་བདུད་རྩི་མེའི་རྣམ་པ་ཅན་དུ་གྱུར་ཏེ་སྤྱི་བོ་ནས་རྩ་གནས་ལུས་ཐམས་ཅད་ཁྱབ་པར་ཐིམ་པར་བསམ་མོ། དེ་ལྟར་གནད་མ་འཕྱུག་པར་ཉམས་སུ་བླངས་ན་ཞག་གསུམ་ནས་དྲོད་འབར་ཞིང་ཞག་བདུན་ནས་རས་རྐྱང་ཐུབ་པ་གདོན་མི་ཟ་བར་གསུངས་སོ། །གཉིས་པ་བདེ་བའི་བོགས་འདོན་ནི། ལུས་གནད་ཆོས་བདུན་དང་། དམིགས་གནད་སྟོང་ར་འཁོར་ལོ་སྡོམ་པ་ཡབ་ཡུམ་མམ། རྡོ་རྗེ་རྣལ་འབྱོར་མར་གསལ་བའི་ལུས་ནང་རྩ་གསུམ་འཁོར་ལོ་ལྔ་དང་ཨ་ཤད་ཧཾ་ཡིག་གཉིས་ཀྱང་སོ་སོའི་གནས་སུ་དག་དྲན་དང་བཅས་ཏེ་སྔར་བཞིན་གསལ་བཏབ། རླུང་ཕྱིར་བཏང་བ་དང་མཉམ་དུ་སྤྱི་བོའི་ཧཾ་ལས་འོད་ཟེར་འཕྲོས་པས་སངས་རྒྱས་བྱང་སེམས་ཡི་དམ་ཞི་ཁྲོ་དཔའ་བོ་མཁའ་འགྲོ་ཐམས་ཅད་དང་། བརྒྱུད་པའི་བླ་མ་རྩ་བའི་བླ་མ་དང་བཅས་པ་དཔལ་འཁོར་ལོ་སྡོམ་པ་དྲུག་ཅུ་རྩ་གཉིས་ཀྱི་དཀྱིལ་འཁོར་གྱི་རྣམ་པར་སྤྱན་དྲངས་པ་མདུན་གྱི་ནམ་མཁར་བཞུགས་པར་བསམ། རང་གི་སྙིང་གའི་འོད་སྤྲིན་ལས་སྤྲོས་པའི་རྡོ་རྗེའི་ལྷ་མོ་བཅུ་དྲུག་སོགས་ཕྱི་ནང་གསང་བའི་མཆོད་པས་མཆོད། དཔལ་ལྡན་བླ་མ་དམ་པ་འཁོར་ལོ་སྡོམ་པའི་དཀྱིལ་འཁོར་གྱི་ལྷ་ཚོགས་ལ་གསོལ་བ་འདེབས་སོ། བདེ་སྟོང་ཡེ་ཤེས་ཁྱད་པར་ཅན་བདག་གི་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། རླུང་རྔུབ་པ་དང་མཉམ་དུ་འཁོར་ལོ་སྡོམ་པའི་དཀྱིལ་འཁོར་ཐམས་ཅད་ཡབ་ཡུམ་སྙོམས་པར་ཞུགས་པས་བྱང་ཆུབ་ཀྱི་སེམས་དཀར་དམར་འདྲེས་པའི་རྒྱུན་ཆེན་པོ་བབས་པ་ཧཾ་ཡིག་ལ་ཐིམ་པར་བསམ། དགང་ཞིང་གཞིལ་བའི་དུས་འཁོར་ལོ་སྡོམ་པ་ཡབ་ཡུམ་རྣམས་རྗེས་ཆགས་ཀྱི་བདེ་བས་འོད་དུ་ཞུ་ནས་ཧཾ་ཡིག་ལ་ཐིམ་པས་ནུས་སྟོབས་གཟི་མདངས་སོགས་ཤིན་ཏུ་རྒྱས་པར་བསམ་མཐར་ཕྱིར་དབྱུང་། དེ་ནས་འཇམ་རླུང་སྦྱོར་བ་བཞི་ལྡན་དང་སྒྲག་སྟེ་ཧཾ་ལས་བྱང་ཆུབ་ཀྱི་སེམས་བདུད་རྩི་དཀར་པོ་བདེ་བ་ཆེན་པོའི་རང་བཞིན་ཅན་དཀར་ན་ར་ར་བབས་ནས་སྤྱི་བོའི་འཁོར་ལོ་རྩ་ཕྲན་བཅས་པ་དང་། མགྲིན་པའི་འཁོར་ལོ་ལག་སོར་གྱི་རྩེ་ཚུན་ཆད་དཀར་ལྟེམ་གྱིས་གང་བས་དགའ་བའི་ཡེ་ཤེས་རྒྱུད་ལ་སྐྱེས་པར་བསམ། དེ་ནས་རིམ་གྱིས་དབབ་ཏེ་སྙིང་གའི་འཁོར་ལོ་གང་བས་མཆོག་དགའ། ལྟེ་བའི་འཁོར་ལོ་གང་བས་ཁྱད་དགའ། གསང་གནས་ཀྱི་འཁོར་ལོ་རྐང་སོར་ཡན་གང་བས་ལྷན་ཅིག་སྐྱེས་པའི་དགའ་བའི་ཡེ་ཤེས་སྐྱེས་པར་བསམ། དེ་ལྟར་དཀར་ཆ་བབས་ནས་དམར་ཆས་དབབ་པ་ནི། ཨ་ཤད་ལས་བྱང་ཆུབ་ཀྱི་སེམས་བདུད་རྩི་དམར་པོ་དྲོད་དང་བདེ་བའི་རང་བཞིན་ཅན་གྱི་རྒྱུན་བབས་པས་ལྟེ་བའི་འཁོར་ལོ་དང་གསང་བའི་འཁོར་ལོ་དང་རྐང་མཐིལ་ཡན་ཆད་གང་བས་དགའ་བའི་ཡེ་ཤེས་རྒྱུད་ལ་སྐྱེ་བར་བསམ། དེ་ནས་རིམ་བཞིན་གྱེན་དུ་ཕྱུར་ཏེ་སྙིང་གའི་འཁོར་ལོ་གང་བས་མཆོག་དགའ། མགྲིན་པའི་འཁོར་ལོ་ལག་སོར་གྱི་རྩེ་ཚུན་གང་བས་ཁྱད་དགའ། སྤྱི་བོའི་འཁོར་ལོ་གང་བས་ལྷན་ཅིག་སྐྱེས་པའི་དགའ་བའི་ཡེ་ཤེས་རྒྱུད་ལ་སྐྱེས་པ་དང་། རྩ་ཕྲན་ཐམས་ཅད་དང་བ་སྤུའི་ཁུང་བུ་ཚུན་གྱི་ལུས་ནང་ཐམས་ཅད་ཁྱབ་ཅིང་གང་ནས་དཀར་དམར་འདྲེས་པ་བདེ་སྟོང་ཟུང་འཇུག་གི་ཡེ་ཤེས་སྐྱེས་པར་བསམ། བདེ་བ་དངོས་སུ་སྐྱེ་བའི་ཚེ་ངོས་བཟུང་། དེའི་ཚེ་ཐིག་ལེ་དཀར་དམར་འདྲེས་པའི་གཟུགས་བརྙན་གྱི་དམིགས་པ་ཙམ་མ་ཡིན་པར་ཧཾ་དང་ཨ་ཤད་དཔལ་འཁོར་ལོ་སྡོམ་པ་དང་རྡོ་རྗེ་ཕག་མོ་ཡབ་ཡུམ། ཐབས་དང་ཤེས་རབ། བདེ་བ་དང་དྲོད། དབྱིངས་དང་ཡེ་ཤེས་རྣམས་ཁ་སྦྱོར་རམ། ཟུང་འཇུག་གི་བདེ་བ། བདེ་བའི་ངོ་བོ་སྟོང་པ་སྟེ། བདེ་སྟོང་དབྱེར་མེད་ཀྱི་ངང་དུ་བཞག མཐར་རླུང་ཕྱིར་བཏང་བ་དང་མཉམ་དུ་སྦྱོར་བ་དྲུག་ལྡན་གྱིས་འདྲེན་བྱས་ལ་བྱང་སེམས་དཀར་དམར་ཐམས་ཅད་ཡར་ལོག་ནས་ཧཾ་ཡིག་ལ་ཐིམ་པར་བསམ་པ་ནི་འདྲེན་པའོ། །སླར་ཡང་ཧཾ་ལས་བྱང་སེམས་དཀར་དམར་ཆར་ལྟར་བབས་པའི་རྒྱུན་གྱིས་རྩ་འཁོར་ལུས་དང་བཅས་པ་གང་ཞིང་ཁྱབ་པར་བསམ་པ་ནི་བཀྲམ་པའོ། །གེགས་སེལ་ལ་གཉིས་ལས། དང་པོ་ཚ་བའི་གེགས་སེལ་ནི། ཚད་ཤས་ཆེ་བའི་རིགས་འབར་དམིགས་དང་། དྲོད་ཀྱི་བོགས་འདོན་གནད་དུ་བསྣུན་དྲག་པས་ཚད་པ་ལྷོང་བ་སོགས་བྱུང་ན་བྱ་སྟེ། སྟོང་ར་རྩ་འཁོར་ཧཾ་ཡིག་དང་བཅས་པ་བསིལ་བའི་ཉམས་ཅན་དུ་གསལ་བཏབ་པའི་སྤྱི་བོ་པད་ཟླ་ལ་རྩ་བའི་བླ་མ་རྡོ་རྗེ་འཆང་དཀར་པོ་ཟླ་བ་ཆུ་ཤེལ་གྱི་རང་བཞིན་དང་འོད་ཟེར་ཅན། ཕྱག་ན་ཆུ་ཤེལ་གྱི་བུམ་པ་བདུད་རྩི་བསིལ་བའི་རང་བཞིན་ཅན་གྱིས་གང་བ་འཛིན་པ། ཕྱག་རྒྱ་དྲུག་སོགས་རྒྱན་གྱིས་སྤྲས་པ། མཆོག་གསུམ་རྩ་གསུམ་ཀུན་འདུས་ཀྱི་ངོ་བོར་བསྒོམ་ལ། ཁྱབ་བདག་དཔལ་ལྡན་བླ་མ་དམ་པ་ལ་གསོལ་བ་འདེབས་སོ། །ཚ་བའི་ནད་དང་ཚ་བའི་གེགས་ཐམས་ཅད་ཞི་བར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། ཆུ་རླུང་གྲང་མོ་སོ་བར་ནས་བཞར་ཏེ་འཇམ་པོར་མནན་ལ། བླ་མའི་ཐུགས་ཀའི་འོད་ཟེར་གྱི་རྒྱལ་བའི་བྱིན་རླབས་སྣོད་བཅུད་ཀྱི་དྭངས་མ་ཐམས་ཅད་བདུད་རྩི་བསིལ་བའི་རང་བཞིན་དུ་བསྡུས་ནས་བླ་མའི་ཕྱག་གི་བུམ་པར་ཐིམ་པས་དེ་ལས་བདུད་རྩིའི་རྒྱུན་ལུད་པ་ཚངས་བུག་ནས་ཞུགས་པ་དང་། ཧཾ་ལས་ཀྱང་བདུད་རྩི་ཟླ་བ་ཞུན་མ་ལྟ་བུ་ཆུ་རྒྱུན་ལྟར་བསིལ་བ་གྲང་སིི་ལི་ལི་བབས་པས་རྩ་འཁོར་ལུས་དང་བཅས་པ་ཐམས་ཅད་ཡོངས་སུ་གང་ནས་ཆུ་ཤེལ་གྱི་བུམ་པ་འོ་མས་གང་བ་ལྟར་གྱུར་པ་བསིལ་བའི་ཟེར་གྱིས་སྣོད་བཅུད་ཐམས་ཅད་ཁྱབ་པར་བསམ་ལ་གོང་བཤད་ལྟར་ཆུ་རླུང་བཟུང་མཐར་བླ་མ་ཧཾ་ལ་བསྟིམ་ནས་མཉམ་པར་བཞག་གོ །གཉིས་པ་གྲང་བའི་གེགས་སེལ་ནི། གྲང་ཤས་ཆེ་བའི་རིགས་འཛག་དམིགས་དང་བདེ་བའི་བོགས་འདོན་སྒོམ་དྲག་པས་གྲང་བ་བསླང་བ་སོགས་བྱུང་ན་བྱ་སྟེ། ཡི་དམ་གྱི་སྐུ་རྩ་འཁོར་ཨ་ཤད་དང་བཅས་པ་གསལ་བའི་སྤྱི་བོར་པད་ཉི་ལ་བླ་མ་རྡོ་རྗེ་འཆང་ཉི་མ་མེ་ཤེལ་གྱི་རང་བཞིན་དང་འོད་ཟེར་ཅན། ཕྱག་ན་མེ་ཤེལ་གྱི་བུམ་པ་བདུད་རྩི་དམར་པོ་སེར་ལྷོག་ལྷོག་ཏུ་ཁོལ་བས་གང་བ་འཛིན་པ། རྒྱན་ཆས་ཡོངས་སུ་རྫོགས་པར་བསྒོམས་ལ། ཁྱབ་བདག་དཔལ་ལྡན་བླ་མ་དམ་པ་ལ་གསོལ་བ་འདེབས་སོ། །གྲང་བའི་ནད་དང་གྲང་བའི་གེགས་ཐམས་ཅད་ཞི་བར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། མེ་རླུང་དྲག་ལ་ཐུང་བར་རྔུབ་ཅིང་བཟུང་ལ་བླ་མའི་ཐུགས་ཀ་ནས་འཕྲོས་པའི་འོད་ཀྱིས་རྒྱལ་བའི་བྱིན་རླབས་སྣོད་བཅུད་ཀྱི་དྭངས་མ་ཐམས་ཅད་མེའི་རང་བཞིན་དུ་བསྡུས་ནས་ཕྱག་གི་བུམ་པར་ཐིམ་པ་དེ་ལས་བདུད་རྩི་མེའི་རྣམ་པ་ཅན་བབས་པ་ཨ་ཤད་ལ་ཐིམ་པས་ཤེས་རབ་ཡེ་ཤེས་ཀྱི་མེ་བོ་ཆེ་དེ་སྟོབས་རྒྱས་ནས་མེའི་དགའ་འཁྱིལ་ལམ་མེའི་འཁོར་ལོའི་རྣམ་པར་གྱུར་ཏེ་འུར་སྒྲ་དང་བཅས་གཡོན་དུ་འཁོར་བ་ལས། རཾ་ཡིག་གི་ཚྭ་ཚྭ་དམར་ཐ་ར་ར་འཕྲོས་པ་ལས་དྲོ་བའི་ངད་དང་ཚ་བའི་དབལ་མི་བཟོད་པའི་མེ་ཆེས་ཆེར་འབར་བས་རྩ་འཁོར་ལུས་དང་བཅས་པའམ་སྙིང་ཁ་མན་ཆད་གང་བར་བསམ་ལ་མེ་རླུང་བཟུང་མཐར་བླ་མ་ཨ་ཤད་ལ་བསྟིམ་ནས་མཉམ་པར་བཞག་གོ །དེ་ལྟར་གོང་འོག་གཉིས་ཀྱིས་ཚ་གྲང་གི་གེགས་ཐམས་ཅད་ངེས་པར་ཞི་བ་ཐེ་ཚོམ་མེ་དོ། །གཉིས་པ་འོག་ཟག་མེད་བདེ་ཆེན་དུ་སྤར་ནས་འོག་སྒོའི་བཅུད་འདོན་པ་ནི། ཟིན་དང་བརྟན་པས་ཤེས་རབ་སྙོམས་པར་ཞུགས། ཞེས་པ་ནས། མི་རྟོག་པས། ཞེས་པའི་བར་གྱིས་བསྟན་ཏེ། རྡོ་རྗེའི་བཟླས་པ་རླུང་ལྔ་དབང་དུ་བྱེད་པ། བུམ་པ་ཅན་རྣམས་ལ་རིང་དུ་འབད་ཅིང་གཏུམ་མོ་འབར་འཛག་གི་རྣལ་འབྱོར་རྩེ་གཅིག་ཏུ་བསྒོམས་པས། རྒྱུ་བ། རིང་ཐུང་། ཤུགས། ཁ་དོག སྟོབས་རྣམས་རིམ་གྱིས་ཟིན་ནས། རླུང་ལྔ་རང་མལ་དུ་ཟིན་པའི་རྟགས་དངོས་ཉམས་རྨི་ལམ་དུ་འབྱུང་སྟེ། ས་རླུང་ཟིན་པས་དུ་བ། ཆུ་རླུང་ཟིན་པས་སྨིག་རྒྱུ། མེ་རླུང་ཟིན་པས་མེ་ཁྱེར། རླུང་གི་རླུང་ཟིན་པས་སྐྱ་རེང་། ནམ་མཁའ་རླུང་ཟིན་པས་སྤྲིན་མེད་པའི་ནམ་མཁའ་ལྟ་བུ་འབྱུང་། དབུ་མའི་མས་སྣ་བྱེ་ནས་འོག་ཐུར་སེལ་གྱི་རླུང་དབུ་མར་ཚུད། ཡས་སྣ་བྱེ་ནས་སྲོག་གི་རླུང་དབུ་མར་ཚུད་དེ་ལྟེ་འོག་དབུ་མའི་ནང་དུ་སྲོག་ཐུར་གོང་བུ་གཅིག་ཏུ་འདྲེས། དེས་དབུ་མའི་ནང་གི་གཏུམ་མོ་དངོས་འབད་རྩོལ་ལ་མ་ལྟོས་པར་རང་ཤུག་གིས་འབར་བ་རྒྱུན་མི་འཆད་ཅིང་གཏུམ་མོའི་རྦ་རླབས་བརྟན་པས་བདེ་བའི་རང་བཞིན་ཅན་གྱི་དྲོད་མཐུག་པོས་ལུས་ཐམས་ཅད་ཁྱབ། དེས་དབུ་མའི་ནང་གི་ཧཾ་ཡིག་དངོས་ལས་བྱང་ཆུབ་ཀྱི་སེམས་འབབས་པ་རྒྱུན་མི་འཆད་པས། མཉམ་རྗེས་ཐམས་ཅད་དུ་བདེ་བ་ཆེན་པོ་རྣམ་པར་མི་རྟོག་པའི་རང་བཞིན་ཅན་རྒྱུན་མི་འཆད་པ་འབྱུང་། དེ་ཡི་ཚེ་རླུང་སེམས་དབུ་མར་ཚུད་ཅིང་ཐིག་ལེ་གསང་གནས་སུ་སླེབ་པ་ན་བརྟན་པའི་ཕྱིར་ལྟེ་བ། སྙིང་ག མགྲིན་པ། སྤྱི་བོ། གསང་གནས་རྣམས་སུ་བུམ་པ་ཅན་བཅིངས་པས་ཐིག་ལེ་གསང་བ་ལྟེ་བ་སྙིང་ག་མགྲིན་པ། སྤྱི་བོ་གང་བ་འཛིན་ནུས་པས་མས་བརྟན་གྱི་དགའ་བཞི་བརྟན། དེའི་ཚེ་རླུང་སེམས་ཐིག་ལེ་རོ་གཅིག་ཏུ་འདྲེས་ནས་གནས་པ་རྩ་ལྔའི་མདུད་པ་ཐམས་ཅད་ཞིག་སྟེ་རྩ་ཐམས་ཅད་དྷུ་ཏི་དང་། རླུང་ཐམས་ཅད་ཡེ་ཤེས་ཀྱི་རླུང་དུ་གྱུར་ནས་ཁྱད་པར་རྟགས་ནི། ལྟེ་བར་ས་རླུང་བརྟན་པས་འདུག་ཚུགས་ཤིང་ས་གཞི་གསེར་དང་། ཟླ་ཟེར་དང་། ཐང་ཆེན་པོ་མཐོང་། སྙིང་ཁར་ཆུ་རླུང་བརྟན་པས་ལུས་དངུལ་དུ་སྣང་ཞིང་སྣང་བ་ཆུ་དང་ཉི་ཟེར་དང་འོད་དམར་པོ་མཐོང་། མགྲིན་པར་མེ་རླུང་བརྟན་པས་དྲོད་རྒྱས་ཏེ་གོས་མི་དགོས། མེ་ཆེན་པོ་དང་གློག་གི་ཟེར་མ་ལྟ་བུ་མཐོང་། སྤྱི་བོར་རླུང་གི་རླུང་བརྟན་པས་སྟོབས་ཆེ་ཞིང་འགྲོ་མགྱོགས། རླུང་དང་འཇའ་ཚོན་མཐོང་། གསང་གནས་སུ་ནམ་མཁའི་རླུང་བརྟན་པས་ལུས་བདེ་ཞིང་མདངས་དང་ལྡན། ཉི་ཟླ་འདྲེས་པའི་ཐིག་ལེ་སྔོ་དྭངས་མཐོང་བ་དང་། རླུང་སེམས་དབུ་མར་ཞུགས་པས་བ་སྤུའི་ཁུང་ཐམས་ཅད་ནས་འོད་ཟེར་ལྔ་འཕྲོ་ཞིང་ལུས་འཇའ་ཚོན་སྣ་ལྔས་བསྐོར་བ་དང་། སའི་ཡོན་ཏན་སྲེད་མེད་ཀྱི་བུའི་སྟོབས་ཐོབ། ཆུའི་ཡོན་ཏན་མེས་བསྲེགས་ཀྱང་མི་ཚིགས། མེས་ཕྱི་རོལ་གྱི་དངོས་པོ་འབྱིན་སྡུད་ནུས་ཤིང་ཆུར་མི་བྱིང་། རླུང་གིས་ལུས་ཤིང་བལ་ལྟར་ཡངས་ཤིང་རྐང་མགྱོགས་འགྲུབ། ནམ་མཁར་འཕུར་བ་དང་རི་བྲག་ལ་ཐོགས་པ་མེད། ཟླ་བའི་རླུང་གིས་ཁམས་དྭངས་མར་འགྱུར་ནས་གྲིབ་མ་མི་འབྱུང་ཞིང་ཆུ་བོ་གྱེན་དུ་ལྡོག་ནུས། ཉི་མའི་རླུང་གིས་སྙིགས་མ་དག་ནས་ལུས་གཞན་གྱིས་མི་མཐོང་ཞིང་ཉི་མ་སྟོད་ལ་གནོན། ཐམས་ཅད་ཀུན་ཏུ་སོན་པའི་ཡོན་ཏན་སྐུུའི་ཡོན་ཏན་བུ་ག་དགུའི་རླུང་འཕོ་བ་དང་། གསུང་གི་སྒོ་འབྱུང་བ་བཞི་ཐ་དད་པའི་ལུས་བྱེད་པ་འགགས་ཏེ། ཐུགས་ཀྱི་སྒོ་སྨིན་མཚམས་དང་སྙིང་གའི་གནད་ཀྱིས་སྒོ་གཉིས་བྱེ་ནས་སྔར་མི་ཤེས་པའི་ཆོས་ཐམས་ཅད་ཤེས་ཤིང་ཚིག་དོན་མི་བརྗེད་པའི་གཟུངས་ཐོབ། ཕྲ་བ་ལ་སོགས་པའི་དབང་ཕྱུག་གི་ཡོན་ཏན་བརྒྱད་དང་ལྡན་པའི་གཟུགས་ཀྱི་མཁའ་སྤྱོད་འགྲུབ་པར་འགྱུར་རོ། །གསུམ་པ་འཁོར་འདས་རྒྱུན་གཅོད་སྦར་ནས་རྩ་རླུང་གི་ཆིང་སྟོན་པ་ནི། ཉོན་མོངས་རང་ཞི་བདེ་གསལ་རྒྱུན་མི་འཆད། ངོ་བོ་མཐོང་ནས་ཆོས་སྐུའི་ངང་དུ་གྲོལ། ཞེས་པར། གཡོན་ཕུང་པོ་ལྔའི་རླུང་དེ་བཞིན་གཤེགས་པ་དང་། གཡས་ཁམས་ལྔའི་རླུང་དེ་བཞིན་གཤེགས་མའི་རང་བཞིན་དབུ་མའི་ནང་དུ་ཐིམ་པས། ཉོན་མོངས་པ་དུག་ལྔ་མ་སྤངས་རང་སར་དག་ཅིང་། རྣམ་སྨིན་གྱི་རྩ་ཡེ་ཤེས་ཀྱི་རྩ་ལ་ཐིམ་པས་གསལ་བ་རྒྱུན་གྱི་རྟག་པ། རྣམ་སྨིན་གྱི་རླུང་ཡེ་ཤེས་ཀྱི་རླུང་ལ་ཐིམ་པས་མི་རྟོག་པ་རྒྱུན་གྱི་རྟག་པ། རྣམ་སྨིན་གྱི་ཐིག་ལེ་དྭངས་མ་ཡེ་ཤེས་ཀྱི་ཐིག་ལེ་ལ་ཐིམ་པས་བདེ་བ་རྒྱུན་གྱི་རྟག་པ། དེས་རྩ་གསལ་སྟོང་། རླུང་རིག་སྟོང་། ཐིག་ལེ་བདེ་སྟོང་རང་བཞིན་ལྷན་ཅིག་སྐྱེས་པའི་ཡེ་ཤེས་སུ་སྦྱོར་བས། ཆོས་སུ་གཉུག་མའི་ཙཎྜྻཱ་ལི་ཡེ་ནས་གནས་པ་དེའི་ངོ་བོ་མངོན་སུམ་དུ་མཐོང་བར་འགྱུར་རོ། །དེ་ལྟར་གཏུམ་མོ་བསྒོམ་པའི་སྐབས་སུ་དྲོད་ཀྱི་དམ་ཚིག་འབར་བའི་རྣལ་འབྱོར་ལ་མ་ཆགས་པར་འབད་པ་དང་། འཁྱགས་པ་ཡིད་ལ་མི་བྱེད། གྲང་བ་བྱུང་རུང་མི་ཞུམ་པར་བོགས་འདོན་སྒོམ། པགས་རིགས་དང་གོས་མང་བརྩེགས་དང་ཕུ་དུང་ཅན་མི་གྱོན། སྐོམ་གྲང་མི་འཐུང་མེ་དང་ཉི་མ་སྤངས། བདེ་བའི་དམ་ཚིག་འཛག་པའི་རྣལ་འབྱོར་མ་ཆགས་པར་བསྒོམ། བདེ་བའི་ཉམས་མི་བརྗེད་པར་སྐྱོང་། ཆགས་སྲེད་ཀྱི་རྟོག་པ་རང་གར་མི་བཏང་བར་བདེ་སྟོང་གི་རྩིས་འཛིན་ལ་བོགས་འདོན་སྒོམ། གན་རྐྱལ་དུ་མི་ཉལ་ས་རློན་ལ་མི་འདུག རྟ་དྲག་ཏུ་མི་རྒྱུག སྒ་གཡེར། ཟ་སྒོག ཉ་ཤ། ཤ་རུལ། ཆང་སྐྱུར། ཚྭ་ཆེས་པ་རྣམས་སྤངས། ཐུན་མོང་གི་དམ་ཚིག་ཏུ་ཟས་བཅུད་ཅན་བརྟེན། སྤྱོད་ལམ་གཟབ་ཅིང་གྲིབ་ཀྱི་རིགས་ལ་འཛེམ། གཏུམ་མོའི་འཁྲུལ་འཁོར་རྣམས་མ་ཆགས་པར་བྱ་ཞིང་ལྷག་པར་འགྲོ་བ་དང་ཉལ་བའི་སྐབས་འགྲོ་བའི་འཁྲུལ་འཁོར་དང་། ཉལ་བའི་འཁྲུལ་འཁོར་རྟག་པར་མ་བརྗེད་པར་བྱའོ། །གཉིས་པ་སྒྱུ་ལུས་ཆོས་བརྒྱད་རང་གྲོལ་ན།ི བོགས་འདོན་སྒྱུ་ལུས་ཆོས་བརྒྱད་རང་གྲོལ་ལ། ཞེས་པ། ཡུལ་ཅན་བདེ་བ་ཆེན་པོ་ཉིད་ཡུལ་སྒྱུ་མ་ལྟར་འཆར་བའི་བོགས་འདོན་པར་བྱེད་པས་ན་སྒྱུ་ལུས་ཏེ། དེའི་སྒྲ་དོན་ཡང་། རྣམ་པ་མེད་ཀྱང་རྣམ་པ་སྣ་ཚོགས་འཛིན་པའམ་སྣང་ཡང་རང་བཞིན་མ་གྲུབ་པའི་ཕྱིར་སྒྱུ་མའི་ལུས་ཞེས་བྱའོ། །དེ་ལ་བཞི། མ་དག་པའི་སྒྱུ་ལུས། དག་པའི་སྒྱུ་ལུས། རྣམ་དག་སྒྱུ་ལུས། འབྲས་བུ་ཐོབ་ཚུལ་ལོ། །དང་པོ་ནི། འཁོར་འདས་ཐམས་ཅད་སྒྱུ་མར་ཤེས་བྱ་སྟེ། ཞེས་པ་སྟེ། ཁམས་གསུམ་བརྟན་གཡོ་མཐོང་རེག་གི་དངོས་པོ་མ་དག་པའི་སྣང་བ་འདི་ཐམས་ཅད་སྣང་ཡང་བདེན་པར་མ་གྲུབ་པས་ན་མ་དག་སྒྱུ་མ་དང་། དེ་ལྟར་མ་རྟོགས་ཏེ་བདེན་དངོས་སུ་ཞེན་པའི་མཚན་འཛིན་སྤོང་བྱེད་ཀྱི་ཐབས་ལ་དེའི་མན་ངག་ཏུ་བརྗོད་པ་སྟེ། དེ་ལ་སྤྱིར་སྦྱང་པ་ནི། ཁམས་གསུམ་སྣོད་བཅུད་ཀྱིས་བསྡུས་པའི་ཕྱི་ནང་གི་དངོས་པོ་འཁོར་འདས་ཀྱི་སྣང་བ་འདི་ཐམས་ཅད་སྣང་བཞིན་དུ་བདེན་པར་མ་གྲུབ་པ་རྨི་ལམ་དང་སྒྱུ་མ་དང་འཇའ་ཚོན་དང་ཆུ་ཟླ་ལ་སོགས་པ་ལྟ་བུའོ། །སྙམ་དུ་དཔེས་གཏན་ལ་འབེབས་ཤིང་བསྒོམ་མོ། །འདི་ལྟར་སྣང་བའི་དངོས་པོའི་ཆོས་རྣམས་ནི། ཞེས་པ་ནས། གྲུབ་པ་མེད། ཅེས་པའི་བར་གྱིས་བསྟན་ཏེ། སྣོད་བཅུད་ཀྱིས་བསྡུས་པའི་ཕྱི་ནང་གི་དངོས་པོ་འཁོར་འདས་ཀྱི་སྣང་བ་ཐམས་ཅད་བདེན་ཞིང་རྟག་གོ་སྙམ་པ་བྱུང་ན་དེའི་ཚེ་འདི་ལྟར་བསམ་ཏེ། འཁོར་འདས་ཀྱི་སྣང་བ་འདི་ཐམས་ཅད་བདེན་ཞིང་རྟག་པ་ཞིག་ཡོད་ན་གཞན་དུ་འགྱུར་མི་རིགས་ཀྱང་དེ་ལྟར་མིན་པ་གློ་བུར་གྱིས་འགྱུར་ཞིང་། མི་རྟག་པའི་རང་བཞིན་ཅན་དུ་འདུག་པ་དང་། མ་རིག་བག་ཆགས་ཀྱི་འཁྲུལ་སྣང་ལས་ཤར་བ་ཡིན་པས་དོན་ལ། གྲུབ་པ་གང་ཡང་མེད་དེ། གཟུགས་ལ་སོགས་པ་འདི་རྣམས་སེམས་འཁྲུལ་པ་ལ་སྣང་བ་ཕྱི་རོལ་ན་མེད་པ་རྨི་ལམ་དང་རྒྱུ་མ་ལྟ་བུ། རྐྱེན་ལས་བྱུང་བ་བྲག་ཆ་དང་གཟུགས་བརྙན་ལྟ་བུ། མི་རྟག་པ་ཟིལ་པ་དང་ཆུ་བུར་ལྟ་བུ། སྣང་ལ་རང་བཞིན་མེད་པ་སྨིག་རྒྱུ་དང་འཇའ་ཚོན་ལྟ་བུ་སྟེ། སྒྱུ་མའི་དཔེ་བརྒྱད་དང་མཚུངས་པར་བསྒོམ་མོ། །བྱེ་བྲག་ཏུ་སྦྱང་པ་ནི། གཟུགས་རྣམས་སྣང་སྟོང་སྒྲ་རྣམས་བྲག་ཆར་ལྟོས། ཞེས་པ་ནས། ཞེན་མེད་སྤྱོད། ཅེས་པའི་བར་གྱིས་བསྟན་པའི་དོན། དང་པོ་ལུས་མེ་ལོང་གི་གཟུགས་བརྙན་ལྟར་སྒྱུ་མར་སྦྱང་པ་ནི། དེ་ཡང་མེ་ལོང་དྭངས་པ་ལ། རང་གི་བཞིན། བར་ན་སྒྲིབ་གཡོགས་མེད་པ་གསུམ་ཚོགས་པས་གཟུགས་བརྙན་འཆར་ཡང་དོན་ལ་མེད་པ་བཞིན་དུ། རང་གི་ལུས་ཀྱང་ཕ་མའི་རྒྱུ་རྐྱེན་དང་། མ་རིག་འཁྲུལ་པའི་རྣམ་ཤེས་གསུམ་ཚོགས་པའི་དབང་གིས་ལུས་སུ་གྲུབ་ཀྱང་དོན་ལ་མེད་དེ་གཟུགས་བརྙན་དང་མཚུངས་པའོ་སྙམ་པ་དང་། གཉིས་པ་ངག་བྲག་ཅ་ལྟར་སྒྱུ་མར་སྦྱོང་བ་ནི། ལུང་ཁུག་དོག་པོའི་བྲག་དང་། མིས་འབོད་པའི་སྐད་གཉིས་ཚོགས་པ་ལས་བྲག་ཅའི་སྒྲ་འབྱུང་ཡང་དོན་ལ་མེད་པ་བཞིན་དུ། ལུས་སེམས་བརྗོད་འདོད་ཚོགས་པ་ལས་ངག་གི་སྒྲ་སྐད་འབྱུང་ཡང་དོན་མེད་དེ་བྲག་ཆ་ལྟ་བུའོ་སྙམ་པ་དང་། གསུམ་པ་སེམས་འཇའ་ཚོན་ལྟར་སྒྱུ་མར་སྦྱོང་བ་ནི། འཇའ་ཚོན་ཁ་དོག་གསལ་ཡང་སྟོང་པའི་རང་བཞིན་ལས་མ་འདས་པ་ལྟར་སེམས་ཀྱི་རྩལ་སྣང་སྣ་ཚོགས་སུ་སྣང་ཡང་བདེན་མེད་སྟོང་གསལ་གྱི་རང་བཞིན་ནོ་སྙམ་པས་ལུས་ངག་ཡིད་གསུམ་སྒྱུ་མར་སྦྱོང་། སྐབས་སུ་མེ་ལོང་དྲི་མ་མེད་པ་མདུན་དུ་བཞག་པ་ལ་རང་གི་གཟུགས་འཆར་དུ་བཅུག་ནས། དེ་ལ་བསྟོད་སྨད། བདེ་མི་བདེ། སྙན་མི་སྙན། སྦྱིན་འཕྲོག་སྟེ་འཇིག་རྟེན་ཆོས་བརྒྱད་དང་འབྲེལ་བའི་གཏམ་བྱས་པས་དགའ་མི་དགའ་འམ་ཆགས་སྡང་ཨེ་འདུག་བལྟས་པས་ཇི་ལྟར་བརྗོད་ཀྱང་མེ་ལོང་གི་གཟུགས་བརྙན་ལ་དགའ་མི་དགའ་དང་ཆགས་སྡང་མེད་པ་བཞིན་དུ་རང་ལའང་སྦྱར་ཏེ། དེའང་རང་གི་ལུས་འདི་སྣང་ཡང་བདེན་པར་མ་གྲུབ་པ་གཟུགས་བརྙན་དང་ཆོས་མཚུངས་པས། བསྟོད་སྨད། བདེ་མི་བདེ། སྙན་མི་སྙན། སྦྱིན་འཕྲོག་གང་ལའང་དགའ་མི་དགའ་དང་། ཆགས་སྡང་བྱ་དོན་མི་འདུག་སྙམ་པས་གཞན་གྱིས་བསྟོད་ར་གཏོང་བ་ལ་དགའ་བ་དང་། སྨད་ར་གཏོང་བ་ལ་ཞེ་མི་སྡང་ཞིང་། དེ་བཞིན་དུ་ཆོས་བརྒྱད་རོ་སྙོམས། གལ་ཏེ་རོ་མི་སྙོམ་པར་འདུག་ན། ཡོན་ཏན་དེ་དག་ཡོད་ནས་བསྟོད་ན་བརྗེད་པས་ལྷག་ཏུ་མི་འགྲོ་བས་དགའ་བར་མི་རིགས། མེད་ནས་བསྟོད་ན་ཚིག་སྟོང་གི་ཕྱེ་གཏོར་གྱིས་གང་ཡང་མི་ཕན་པས་དགའ་དོན་མེད། སྐྱོན་དེ་ཡོད་ནས་སྨད་ན་རང་ལ་དེ་ལྟར་ཡོད་པ་གཞན་གྱིས་དྲངས་པོར་བརྗོད་པ་ཙམ་ལ་ཞེ་སྡང་དོན་ཅི་ཡང་མེད། མེད་ནས་སྨད་ན་དེས་གང་ཡང་མི་གནོད་པས་ཞེ་སྡང་མིེ་དགོས་སྙམ་དུ་བསྒོམ། སྙན་མི་སྙན་ལའང་དེ་དང་འདྲ་བར་སྒོམ། བདེ་སྐྱིད་ལ་དགའ་བ་ལ་ལུས་བེམ་པོའི་རོ་དང་། ངག་བྲག་ཆ་དང་། སེམས་ནམ་མཁའ་སྟོང་པ་དང་འདྲ་བས་བདེ་རྒྱུ་དང་སྐྱིད་རྒྱུ་གང་ཡང་མེད། མེད་པ་ལ་ཡོད་པར་འཛིན་པའི་འཁྲུལ་སྣང་གིས་མགོ་འཁོར་བར་འདུག་བསམ་པ་དང་། སྡུག་བསྔལ་ལའང་དེ་བཞིན་དུ་ཤེས་པར་བྱ། རྙེད་པ་ལ་དགའ་ན་ནོར་རྫས་འདི་དགྲ་འདྲེའི་གཡབ་མོ་བསྲུང་བརྐྱང་སོགས་སྡུག་བསྔལ་གྱི་གཞི་མ། ལན་གཅིག་འབྱོར་ཀྱང་ཐ་མར་རྒུད་པ་མི་རྟག་པའི་རང་བཞིན་ཡིན་པས་འཁྲུལ་པའི་མགོ་བསྐོར་དུ་འདུག་བསམ་པ་དང་མ་རྙེད་ན་མི་དགའ་བ་མི་དགོས་ཏེ་ནོར་མེད་ན་དགྲ་དང་བྲལ་ཞིང་བསྲུང་གསོག་མི་དགོས་པས་དལ་ལ་སྔར་བསགས་ཀྱི་བསོད་ནམས་མི་འཛད་པས་ཨ་རེ་དགའ་བསམ། དེ་རྣམས་ཀྱི་བོགས་འདོན་དུ་འཆི་བ་སྙིང་ལ་ཟུག་པ་ཞིག་བསྒོམས་པས་ཞེན་པ་དབང་མེད་དུ་ལྡོག་ཅིང་སྙོམས་ལས་ལེ་ལོར་མི་སྡོད། ཆགས་སྡང་ངང་གིས་གྲོལ་བ་ཞིག་ཡོང་ངོ་། །གཉིས་པ་དག་པའི་སྒྱུ་ལུས་ནི། སྣོད་བཅུད་མ་དག་པའི་སྣང་བ་རྣམ་པར་དག་པ་ལྷའི་དཀྱིལ་འཁོར་དུ་བསྒྱུར་ནས་ཉམས་སུ་བླངས་བའི་དོན་གྱིས་ན་དག་པའི་སྒྱུ་ལུས་ཞེས་བྱ་ལ། དེའང་ཕུང་ཁམས་སྐྱེ་མཆེད་ཐམས་ཅད་གདོད་ནས་ལྷའི་རང་བཞིན་དུ་གྲུབ་པ་དེ་ཉིད་མ་རྟོགས་པ་རྟོགས་ཕྱིར་ཡིན་ལུགས་གཏན་ལ་ཕབ་སྟེ་བསྒོམ་པས་སྒྱུ་འཕྲུལ་གྱི་ཏིང་ངེ་འཛིན་ཁྱད་པར་ཅན་འཆར་ཏེ་སྣོད་བཅུད་ལྟར་གསལ་བས་ཐ་མལ་གྱི་སྣང་ཞེན་སྦྱངས་ཤིང་ལྷ་ཡང་སྣང་སྟོང་སྒྱུ་མ་ལྟ་བུར་གཏན་ལ་ཕབ་པས་གྱ་ནོམས་ལྷར་ཞེན་གྱི་རྟོག་པ་སྦྱང་བར་བྱེད་པའི་རིམ་པ་སྟེ། རང་ཉིད་དཔལ་འཁོར་ལོ་སྡོམ་པ་ཡུམ་དང་བཅས་པའི་བསྐྱེད་རིམ་རྒྱུ་མ་ལྟ་བུ་བསྒོམ་ལ་རྣམ་པ་གསལ་ཞིང་རྣམ་དག་དྲན་པ། ང་རྒྱལ་བརྟན་པ། ངོ་བོ་སྟོང་པ་རང་བཞིན་དབྱེར་མེད་ཉམས་བདེ་བ་ཆེན་པོ་རྣམས་ཀྱིས་རྒྱས་བཏབ། སྐབས་སུ་འཁོར་ལོ་སྡོམ་པ་ཡབ་ཡུམ་མམ་རྡོ་རྗེ་རྣལ་འབྱོར་མའི་སྐུ་འགྱིང་ལོག་ཏུ་བྲིས་པ་མེ་ལོང་ནང་དུ་འཆར་བཅུག་ནས་དེ་ལ་མིག་ཤེས་རྩེ་གཅིག་ཏུ་བཟུང་། ཡིད་ཡུལ་དུ་འཆར་བདེར་གྱུར་པ་ན་མེ་ལོང་དང་རང་གི་བར་དུ་དེ་འདྲ་བ་ཡིད་ཀྱིས་བསྒོམ། དེ་ལ་གོམས་པ་དང་། རང་དེ་འདྲ་བ་བསྒོམ་ལ། མཐར་སྣང་ཚད་ཀྱང་དེ་བཞིན་དུ་སྒོམ། དེ་ཐམས་ཅད་ཀྱང་རང་གི་བློས་བཏག་པ་ཙམ་མ་གཏོགས་བདེན་པར་མ་གྲུབ་པ་སྒྱུ་མ་ལྟ་བུ་དང་། ཆུ་ཟླ་དང་། མིག་ཡོར་དང་། སྨིག་རྒྱུ་དང་། རྨི་ལམ་དང་། བྲག་ཆ་དང་། དྲི་ཟའི་གྲོང་ཁྱེར་དང་། མིག་འཕྲུལ་དང་། འཇའ་ཚོན་དང་། གློག་དང་། ཆུ་བུར་དང་། མེ་ལོང་གི་གཟུགས་བརྙན་ལྟ་བུ་སྟེ་སྒྱུ་མའི་དཔེ་བཅུ་གཉིས་དང་མཚུངས་པར་བསྒོམ་པ་ལ་བསླབ་བོ། །གསུམ་པ་རྣམ་དག་སྒྱུ་ལུས་སམ་རྫོགས་རིམ་སྒྱུ་ལུས་ནི། དག་པའི་སྒྱུ་ལུས་ཐ་མལ་གྱི་སྣང་བ་བསལ་ཏེ་ལྷར་བསྒོམ་པ་ཙམ་གྱིས་དག་པར་བཞག་ཀྱང་། ངོ་བོ་རྟོག་པས་བཏག་པའི་བསྒོམ་པ་ཡིན་ཕྱིར་ཤིན་ཏུ་རྣམ་དག་མིན་ལ། འདི་རླུང་སེམས་ཀྱི་དྭངས་མ་ལས་གྲུབ་པའི་ལུས། རྟོག་པས་མ་བཏགས་པར་པྲ་ཕབས་པ་ལྟར་སྣང་བ་ཡིན་པས་རྣམ་དག་སྒྱུ་ལུས་སམ་རྫོགས་རིམ་སྒྱུ་ལུས་ཞེས་བརྗོད་པ་སྟེ། སྔགས་བླ་མེད་ཐུན་མོང་མ་ཡིན་པའི་སྦས་དོན་གྱི་སྒྱུ་ལུས་རླུང་སེམས་བདག་བྱིན་གྱིས་བརླབ་པའི་ལམ་གྱི་རིམ་པ་དངོས་ཡིན་ཞིང་། དེའང་ཙཎྜྻཱ་ལིའི་འབར་སྣང་མཐར་ཕྱིན་པ་ལས་ཡེ་ཤེས་ཀྱི་རླུང་མཆོག་གི་ཨ་ཝ་དྷུ་ཏིར་ཐིམ་པའི་འབར་འཛག་གི་ཞུ་བདེ་རྒྱུན་མི་འཆད་པ་ལས་མཆོག་གི་དགའ་བ་བཞི་སྐྱེ། དེ་ལས་སེམས་དབེན་ཁྱད་པར་ཅན་སྐྱེ་བ་ལས་ཁྱད་པར་ལྔ་ལྡན་གྱི་སྒྱུ་ལུས་ཙམ་པོ་བ་འགྲུབ། དེ་དོན་གྱི་འོད་གསལ་གྱིས་དྲི་བྲལ་དུ་བྱས་པའི་མཐར་སྒྱུ་ལུས་ཁྱད་པར་ཅན་འགྲུབ་པ་དེ་ཉིད་ཟུང་འཇུག་གི་སྐུ་ཞེས་བརྗོད་དོ། །དེ་ལྟར་ལམ་དུ་བྱ་བ་ལ་གཉིས། མཉམ་བཞག་སྒྱུ་ལུས་དང་རྗེས་ཐོབ་སྒྱུ་ལུས་སོ། །དང་པོ་མཉམ་བཞག་སྒྱུ་ལུས་ལ་གཉིས་ལས། དང་པོ་མཚན་མེད་སྒྱུ་ལུས་ནི། ལུས་དབེན་རྣམ་སྣང་གི་ཆོས་བདུན་གྱིས་འཁོད་ལ། རང་ཉིད་འཁོར་ལོ་སྡོམ་པ་ཞལ་བཞི་ཕྱག་བཅུ་གཉིས་པ་ཡུམ་རྡོ་རྗེ་རྣལ་འབྱོར་མས་འཁྱུད་པ་འཁོར་དང་བཅས་པར་བསྒོམ་ན་ལེགས་ཤིང་མི་ནུས་ན་ལྷན་སྐྱེས་ཡབ་ཡུམ་དུ་གསལ་བའི་ལུས་ནང་རྩ་གསུམ་འཁོར་ལོ་བཞི་ཨ་ཧཾ་དང་བཅས་པ་གསལ་བའི་སྙིང་གའི་རྩ་འཁོར་གྱི་དབུས་སུ་ཧཱུྃ་མཐིང་ཀ་འོད་ལྔ་འཕྲོ་བ་བསྒོམ། སྤྱི་བོར་པདྨ་ཉི་ཟླ་སྒྲ་གཅན་བདུད་བཞི་བརྩེགས་པའི་གདན་ལ་ཕུང་པོ་ཁམས་སྐྱེ་མཆེད་ལས་དབང་བྱ་བ་དང་བཅས་གདན་གསུམ་ལྷར་གདོད་ནས་གྲུབ་པ། རིགས་ཐམས་ཅད་ཀྱི་ཁྱབ་བདག དཀྱིལ་འཁོར་ཐམས་ཅད་ཀྱི་འཆར་གཞི། སྐྱབས་གསུམ་འདུས་པ། དཔལ་ལྡན་བླ་མ་རྡོ་རྗེ་སེམས་དཔའ་ཧེ་རུ་ཀཿནམ་མཁའ་མདོག་ཅན་སྤྱན་གསུམ་པ་ཡིད་ཙམ་ཁྲོས་པའི་ཉམས་ཅན་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་རྡོ་རྗེ་ཕག་མོ་དམར་མོ་གྲི་ཐོད་བསྣམས་པ་ལ་འཁྱུད་པ། རུས་པའི་རྒྱན་དྲུག་གིས་བརྒྱན་ཞིང་སྟག་གི་ལྤགས་པའི་ཤམ་ཐབས་ཅན་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། སྣང་སྟོང་འཇའ་ཚོན་གྱི་སྐུ་ཅན་འོད་ཟེར་གྱི་ཕུང་པོ་འབར་བར་བཞུགས་པར་བསམ། ཁོང་སྟོང་ཁྱོད་ཀྱི་སྐུ་ལ་མེད། སོགས་ཀྱིས་ཕྱག་འཚལ། རང་རིག་བླ་མར་རྟོགས་པས་ཕྱག་འཚལ་ལོ། །སོགས་ཀྱིས་ཡན་ལག་བདུན་པ་འབུལ། ཁྱབ་བདག་དཔལ་ལྡན་བླ་མ་དམ་པ་ལ་གསོལ་བ་འདེབས་སོ། །དག་པའི་སྒྱུ་ལུས་ཟུང་འཇུག་འཇའ་ལུས་རྡོ་རྗེའི་སྐུ་མྱུར་དུ་འགྲུབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། བླ་མ་ཡབ་ཡུམ་གྱི་སྦྱོར་མཚམས་ནས་བྱང་ཆུབ་སེམས་དཀར་དམར་གྱི་རྒྱུན་ཆེན་པོ་བབས། རང་གི་སྤྱི་གཙུག་ནས་ཞུགས། རྩ་གསུམ་འཁོར་ལོ་བཞི་སོགས་ལུས་ཀྱི་ནང་ཐམས་ཅད་གང་། དག་པའི་སྒྱུ་ལུས་འཇའ་ལུས་རྡོ་རྗེའི་སྐུ་འགྲུབ་པར་བྱིན་གྱིས་བརླབ་པར་བསམ། མཐར་བླ་མ་འོད་དུ་ཞུ་ནས་རང་ལ་ཐིམ་པར་བསམ། ངག་དབེན་རྡོ་རྗེའི་བཟླས་པའི་བུམ་པ་ཅན་བྱ། སེམས་དབེན་དམིགས་པ་ཧཱུྃ་ལ་གཏད་དེ་རླུང་དབུ་མར་དྲིལ་བའི་འབར་འཛག་གི་སྦྱོར་བས་མཆོག་གི་དགའ་བཞི་བསྐྱེད་པས་ཉམས་སྣང་སྐྱེད་དེ། ས་ཆུར་ཐིམ་པས་དུ་བ། ཆུ་མེར་ཐིམ་པས་སྨིག་རྒྱུ། མེ་རླུང་ལ་ཐིམ་པས་མེ་ཁྱེར། རླུང་སེམས་ལ་ཐིམ་པས་མར་མེ། སེམས་སེམས་བྱུང་ལ་ཐིམ་པས་ཟླ་སྣང་། སེམས་བྱུང་མ་རིག་པར་ཐིམ་པས་ཉི་སྣང་། མ་རིག་པ་ཐམས་ཅད་སྟོང་པར་ཐིམ་པས་སྒྲ་གཅན་གྱི་སྣང་བ། དེ་ནས་ཐམས་ཅད་སྟོང་པ་སྤྲིན་མེད་ནམ་མཁའ་ལྟ་བུ་འཆར་སླར་སྣང་གསུམ་ལུག་ལྡོག་ཏུ་འཆར་ཏེ་ཐམས་ཅད་སྟོང་པ་ལས་མ་རིག་པ། དེ་ལས་སེམས་བྱུང་། དེ་ལས་སེམས། སེམས་རླུང་དང་བཅས་པ་ལས་དཔེ་བཅུ་གཉིས་ཀྱིས་མཚོན་པའི་སྒྱུ་མའི་སྐུ་འཁོར་ལོ་སྡོམ་པ་ཡབ་ཡུམ་ཞལ་ཕྱག་ཡོངས་རྫོགས་དཀྱིལ་འཁོར་གྱི་འཁོར་ལོ་དང་བཅས་པ་སོ་སོ་རང་རིག་གི་ཡེ་ཤེས་ཀྱི་ངོར་མངོན་སུམ་དུ་འཆར་ལ། དེར་མ་ཟད་དུས་གསུམ་གྱི་སྣོད་བཅུད་དག་མ་དག་ཐམས་ཅད་སྒྲིབ་བྲལ་དུ་མཐོང་བ་སྙམ་བྱེད་དེ། བློའི་བྱེ་བྲག་གིས་རིམ་དང་ཐོད་རྒལ་ཅིག་ཅར་ཅི་རིགས་སུ་འཆར་བ་ཡོད་དོ། །གཉིས་པ་མཚན་བཅས་སྒྱུ་ལུས་ནི། གོང་སྨོས་ཙཎྜྻ་ལཱིའི་རྣལ་འབྱོར་ལས་སྐྱེས་པའི་གཞི་དབེན་གསུམ་ཁྱད་པར་བ་ལེགས་པར་གྲུབ་ནས་རིག་མ་མཚན་ལྡན་ལས་ཀྱི་ཕྱག་རྒྱ་དང་། ཏིང་ངེ་འཛིན་གྱི་སྤྲུལ་པ་ཡིད་ཀྱི་ཕྱག་རྒྱ་ལ་སྙོམས་པར་ཞུགས་པའི་རྐྱེན་གྱིས་ཟག་མེད་ལུས་ཀྱི་རྒྱུ་རིགས་གདོད་ནས་གནས་པ་ཉིད་སྣང་གསུམ་ལུག་འབྱུང་དང་། ལུག་ལྡོག་འོད་གསལ་བཅས་པ་རྡོ་རྗེ་གསུམ་དུ་ཤར་བས་སྒྲིབ་བྲལ་དུ་བྱས་ཏེ། རྡུལ་ཕྲ་རབ་ཀྱི་ཆོས་ཉིད་ལས་འདས་ཤིང་། རླུང་སེམས་ཀྱི་དྭངས་མ་ལས་གྲུབ་པའི་སྐུ་བལྟ་བས་ཆོག་མི་ཤེས་པའི་མཚན་དཔེས་སྤྲས་པ་མེ་ལོང་གི་གཟུགས་བསྙན་ལྟ་བུ་སྣང་ལ་རང་བཞིན་མེད་པ། དངོས་དངོས་མེད། གཉིས་ཀ གཉིས་མིན་གྱི་མུ་བཞི་ལས་གྲོལ་བ། ཕུང་ཁམས་སྐྱེ་མཆེད་ཀྱི་མཚན་མས་མ་གོས་པ། ཡིད་ཀྱི་རང་བཞིན་ཡེ་ཤེས་ཀྱི་སྐུ་ཙམ་དུ་སྣང་བ། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་གཟུགས་དྭངས་གསལ་ཐོགས་པ་མེད་པ་འཇའ་ཚོན་ལྟ་བུ་འགྲུབ་པར་འགྱུར་རོ། འདི་ནི་གསང་འདུས་ཀྱི་རིམ་པ་ལྔའི་གསུམ་པ་བདག་བྱིན་རླབས་དང་། རྡོ་རྗེ་རྣལ་འབྱོར་གྱི་སོར་བསམ་ལས་བྱུང་བའི་སྟོང་གཟུགས་ཕྱག་རྒྱ་ཆེན་མོ་རྣམ་ཀུན་མཆོག་ལྡན་རྣམས་དང་དོན་གཅིག་སྟེ། སློབ་བཤད་ལས་བྱུང་བའི་སྦས་དོན་ཤིན་ཏུ་ཟབ་པ་སྙན་རྒྱུད་ཀྱི་གདམས་ངག་ཡིན་པའི་ཕྱིར་ཁྲིད་ཡིག་རྣམས་ཀྱིས་དཀྱུས་སུ་མ་བརྟན་པར་གུད་དུ་སྦས་པས་མཁས་པ་གླེགས་བམ་གྱིས་ཁེངས་པ་རྣམས་ཀྱིས་ཀྱང་ཇི་བཞིན་མ་རྟོགས་ཏེ་རྣམ་པར་འཁྱམས་སོ། གསུམ་པ་རྗེས་ཐོབ་སྒྱུ་ལུས་ནི། དེ་ལྟར་མཉམ་བཞག་ཏུ་སྒྱུ་མའི་སྐུ་ལ་གསལ་སྣང་ཕྱིན་ནས་རྗེས་ཐོབ་ཏུ་ཐ་མལ་གྱི་སྣང་བ་ཐམས་ཅད་སྒྱུ་མ་ལྟ་བུའི་ཏིང་ངེ་འཛིན་གྱིས་ལམ་དུ་ཁྱེར་བར་བྱའོ། །སྦས་དོན་གྱི་སྒྱུ་ལུས་འདི་རྩ་བའི་ཚིག་ཟིན་ལ་དངོས་སུ་མེད་ཀྱང་འབྲས་བུ་ཐོབ་ཚུལ་གྱི་ཚིག་རྐང་གཅིག་པོ་དེའི་ཤུགས་ལས་བསྟན་པ་ཡིན་ནོ། །བཞི་པ་འབྲས་བུ་ཐོབ་ཚུལ་ནི། འཇའ་ལུས་ཆོས་ཀྱི་སྐུ་ནི་ཐོབ་པར་འགྱུར། ཞེས་པ་དེ་ལྟར་རྣམ་དག་སྒྱུ་ལུས་འདི་བསྒོམས་པས་རྒྱལ་པོ་ཨིནྡྲ་བྷུ་ཏི་དང་འདྲ་བར་སྙིགས་མའི་ལུས་སྦྲུལ་གྱི་ལྤགས་པ་བཞིན་དུ་བརྗེས་ཏེ་འཇའ་ཚོན་གྱི་ལུས་ཡོན་ཏན་བརྒྱད་དང་ལྡན་པར་གྱུར་ནས་མཐར་ཐུག་མི་སློབ་པའི་ཟུང་འཇུག་ཤིན་ཏུ་རྣམ་པར་དག་པའི་གོ་འཕང་མཆོག་ལ་དབུགས་འབྱིན་ཐོབ་པར་འགྱུར་རོ། །གསུམ་པ་ལམ་གྱི་ཚོད་འཛིན་རྨི་ལམ་འཁྲུལ་པ་རང་སངས་ནི། མཚན་དུས་རྨི་ལམ་འཕྲུལ་པ་རང་སངས་ནི། ཞེས་པ་ལམ་རྣམས་ཀྱི་དྲོད་ཚད་རྨི་ལམ་དུ་མྱོང་བ་བརྟན་མི་བརྟན་གྱིས་ཚོད་འཛིན་པར་བྱེད་པས་ལམ་གྱི་ཚོད་འཛིན་རྨི་ལམ་གྱི་རྣལ་འབྱོར་ཏེ། བག་ཆགས་ཀྱི་རང་གཟུགས་འཆར་བས་སམ་ཡུལ་གྱི་སྲོག་གཟུགས་འཛིན་པའི་ཕྱིར་རྨི་ལམ་ཞེས་བྱའོ། །དེ་ཡང་རྩ་གནས་སུ་རླུང་སེམས་འདུ་ཚུལ་གྱི་ཁྱད་པར་གྱིས་རྨི་ལམ་འབྱུང་ལ། དེའི་ལུས་ནི་རང་ལུས་འདི་ལས་བྱེ་མ་བྱེ་གཉིས་འབྱུང་ཡང་། ངོ་བོ་རླུང་སེམས་ཀྱི་ལུས་ཏེ། དེའང་ད་ལྟའི་ལུས་ཀྱི་བག་ཆགས་ཀྱི་རྗེས་སུ་འབྲང་བས་བག་ཆགས་ཀྱི་ལུས་ཞེས་ཀྱང་བྱ་ཞིང་། དུས་དེར་ད་ལྟའི་ཀུན་རྫོབ་ཀྱི་སྣང་བ་འཁྲུལ་པ་འདིའི་བག་ཆགས་ཀྱི་དབང་གིས་ཀུན་རྫོབ་ཏུའང་མ་གྲུབ་པའི་སྣང་བ་སྣ་ཚོགས་འཆར་བས་ཉིང་འཁྲུལ་ཏེ། དེ་ལམ་དུ་ཁྱེར་བ་རྨི་ལམ་གྱི་གདམས་པ་ལ་གསུམ། རྨི་ལམ་བཟུང་བ། སྦྱང་བ། འབྲས་བུའོ། །དང་པོ་བཟུང་བ་ལ། བཟུང་བ་དངོས་དང་། གེགས་སེལ་གཉིས་ལས། དང་པོ་ནི། སྒོ་གསུམ་འབད་པས་དྲན་པའི་ལྕགས་དཀྱུས་བཟུངས། ཞེས་པ། ཉིན་པར་གྱི་དུས་སུ། ལུས་གནད་རྣམ་སྣང་གི་ཆོས་བདུན་བཅས་ནས། རང་ཉིད་འཁོར་ལོ་སྡོམ་པ་ཡབ་ཡུམ་མམ་རྡོ་རྗེ་རྣལ་འབྱོར་མའི་སྐུ་རྩ་གསུམ་འཁོར་ལོ་བཞི་ལྡན་དུ་གསལ་བའི་མགྲིན་པའི་རྩ་འཁོར་གྱི་དབུས་དབུ་མའི་ནང་དུ་པད་ཉིའི་གདན་ལ་རྩ་བའི་བླ་མ་དེ་ཉིད་རྒྱལ་བ་ཐམས་ཅད་ཀྱི་གསུང་རྡོ་རྗེའི་བདག་ཉིད་འོད་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་ཀྱི་གཡས་པདྨ་དམར་པོ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པས་ཡུམ་གོས་དཀར་མོ་དམར་མོ་པདྨ་དང་ཐོད་པ་འཛིན་པ་ལ་འཁྱུད་པ། ལོངས་སྤྱོད་རྫོགས་པའི་ཆས་ཀྱིས་བརྒྱན་ཞིང་པདྨའི་སྐྱིལ་ཀྲུང་གིས་བཞུགས་པ། དེའི་སྤྱི་གཙུག་དབུ་མའི་ནང་ནས་ཡས་སྣའི་བར་དུ་བརྒྱུད་པའི་བླ་མ་ཐོ་བརྩེགས་སུ་བཞུགས་པ་ཕྲ་ལ་དྭངས་ཤིང་གསལ་བར་བསྒོམས་ལ། ཁྱབ་བདག་རྡོ་རྗེ་འཆང་ཆེན་ལ་གསོལ་བ་འདེབས། རྡོ་རྗེ་རྣལ་འབྱོར་མ་ལ་གསོལ་བ་འདེབས། གྲུབ་ཆེན་ཏེ་ལོ་པ་ལྎ མཁས་པ་ནཱ་རོ་པཎ་ཆེནྎ མར་པ་ཆོས་ཀྱི་བློ་གྲོསྎ མི་ལ་བཞད་པ་རྡོ་རྗེྎ རས་ཆུང་རྡོ་རྗེ་གྲགས་པྎ སྙན་རྒྱུད་རྒྱུད་པའི་བླ་མྎ དྲིན་ཅན་རྩ་བའི་བླ་མ་ལ་གསོལ་བ་འདེབས། །རྨི་ལམ་གེགས་ནད་སེལ་བར་བྱིན་གྱིས་རློབས། །རྨི་ལམ་སྒྱུ་མར་འབྱོངས་བར་བྱིན་གྱིས་རློབས། །ཞེས་གསོལ་བ་བཏབ་མཐར་བརྒྱུད་པའིབླ་མ་རྣམས་རིམ་བཞིན་འོད་དུ་ཞུ་ནས་རྩ་བའི་བླ་མ་ལ་ཐིམ་པར་བསམ། ཁྱབ་བདག་དཔལ་ལྡན་བླ་མ་ལ་གསོལ་བ་འདེབས་སོ། རྨི་ལམ་གེགས་ནད་སེལ་བརྎ རྨི་ལམ་སྒྱུ་མར་འབྱོངས་བརྎ ཞེས་གསོལ་བ་མང་དུ་གདབ། བླ་མའི་ཐུགས་ཀའི་སྲཱིཿལས་འོད་ཟེར་དམར་པོ་འཕྲོས་པས་ཕྱི་སྣོད་ཀྱི་འཇིག་རྟེན་འོད་ཟེར་དམར་པོའི་གཞལ་ཡས་ཁང་དང་། ནང་བཅུད་ཀྱི་སེམས་ཅན་ཐམས་ཅད་བླ་མ་གསུང་རྡོ་རྗེ་སྣང་བ་མཐའ་ཡས་ཀྱི་རང་བཞིན་དུ་ལམ་གྱིས་གྱུར་པར་བསམ། བླ་མ་ཡབ་ཡུམ་སྙོམས་པར་ཞུགས་པའི་བདེ་བའི་སྒྲ་དང་འོད་ཟེར་གྱིས། སྣོད་བཅུ་དག་པའི་རང་བཞིན་དེ་ཚུར་འདུས་ཏེ་མགྲིན་པའི་བླ་མ་ལ་ཐིམ་པར་བསམ། རླུང་རོ་ལན་གསུམ་བསལ་ནས། རྔུབ་པ་ན་འབྱུང་ལྔའི་རླུང་རོ་རྐྱང་བརྒྱུད་དེ་དབུ་མར་ཞུགས་པས་ཡེ་ཤེས་ཀྱི་རླུང་དང་འདྲེས་ཏེ་ནོར་བུའི་བུ་ག་ནས་མགྲིན་པའི་བར་ཡེ་ཤེས་ཀྱི་རླུང་དམར་ལ་དྭངས་པས་ཡོངས་སུ་གང་བར་བསམ། དགང་བ་དང་གཞིལ་བའི་ཚེ་དམིགས་པ་དེ་ཁ་དང་། མགྲིན་པར་གཏད་ཅིང་རླུང་སེམས་མགྲིན་པར་གཅུན། བཏང་བའི་དུས་བླ་མའི་སྐུ་ལས་འཕྲོས་པའི་འོད་སྣ་སྒོ་བརྒྱུད་དེ་སོང་བས་རྒྱལ་བ་ཞི་ཁྲོ་འཁོར་བཅས་མཆོད། དེ་རྣམས་ཀྱི་གསུང་རྡོ་རྗེའི་བྱིན་རླབས་ཐམས་ཅད་འོད་ཟེར་དམར་པོའི་རྣམ་པར་བསྡུས། རྔུབ་པ་ན་འབྱུང་ལྔའི་རླུང་བཅས་རོ་རྐྱང་བརྒྱུད་དེ་དབུ་མ་གང་བས་རྨི་ལམ་གྱི་གནས་སྐབས་འཁྲུལ་པའི་དྲི་མ་ཐམས་ཅད་དག་པར་མོས། དེ་ལྟ་བུའི་སྤྲོ་བསྡུ་དང་བཅས་རླུང་ཁུག་པ་བརྒྱ་རྩ་སོགས་བྱའོ། །དེ་ནས་སྣང་གྲགས་དྲན་པའི་ལྕགས་ཀྱུས་བཟུང་བ་ནི། འདི་ལྟར་སྣང་བ་ཐམས་ཅད་རྨི་ལམ་གྱི་རང་བཞིན་ཁོ་ནར་འདུག་སྙམ་པ་ལས་མ་གཡོས་པར་བྱ། དེ་ནས་གཉིད་ཁར་སྟོང་ར་དང་བླ་མ་བསྒོམ་པ་སྤྲོ་བསྡུ་དང་། རླུང་བཟུང་བ་བཅས་སྔར་ལྟར་བྱས་ལ། གཉིད་མཐུག་ན་ཙོག་པུ་དང་། སྲབ་ན་གཞོག་གཡས་པ་ས་ལ་ཕབ། ལག་གཡས་པའི་མཐེའུ་ཆུང་གིས་སྣ་བུག་གཡས་བཀག་ལ། མཐེ་བོང་གིས་སྐེ་ཡི་འཕར་རྩ་སྡོམ་ནས་སེང་གེའི་ཉལ་སྟབས་ཀྱིས་ཉལ་ལ། བླ་མར་རྨི་ལམ་ཟིན་པའི་གསོལ་བ་དྲག་ཏུ་གདབ། རྨི་ལམ་རྨི་བར་བྱ་ཞིང་རྨི་བ་དེའང་ངོས་ཟིན་པར་བྱ་སྙམ་པའི་འདུན་པ་དྲག་ཏུ་བྱའོ། །མགྲིན་པའི་བླ་མ་དང་། གཉིད་འཐུག་ན་སྙིང་གར་སྒྲོན་མེ་ཤིན་ཏུ་གསལ་བ་དེ་ཡི་འོད་ཀྱིས་ལུས་ཕྱི་ནང་སྣང་སྲིད་ཐམས་ཅད་གསལ་བ་ལ་སེམས་བཟུང་། སྲབ་ན་ཐིག་ལེ་ནག་པོ་ལ་སེམས་བཟུང་ནས་མ་ཡེངས་པར་གཉིད་ལོག་ལ་རྨི་ལམ་བཟུང་ངོ་། །གཉིས་པ་གེགས་སེལ་ནི། གཉིད་ཙམ་ནས་སད་པའམ་ཟིན་འཕྲོ་ལ་སད་ན་ནི་སད་འབྱམས་ཏེ། དམ་ཚིག་ཉམས་ཆགས་བཤགས་ཤིང་རྡོར་སེམས་སྒོམ་བཟླས་དང་། དབང་བཞི་ལེན་པ། ཚོགས་འཁོར་ལ་འབད། ཟས་དྲོད་བཅུད་ལྡན་པ་བརྟེན། དམིགས་པ་ནི། གཞན་རྣམས་གོང་ལྟར་ལ། སྙིང་གར་ཐིག་ལེ་ནག་པོ་རིལ་མ་ཙམ་གཅིག་ཡོད་པ་དེ་མཆོད་ནས་རང་ལུས་དེའི་ནང་དུ་ཚུད་པར་བསམ། གཉིད་མ་ཕེབས་པའམ་ཕེབ་ཀྱང་རྨི་ལམ་མི་འབྱུང་བ་ནི་སྟོང་འབྱམས་ཏེ། འདུན་པ་ཅུང་ཀློད་ཅིང་སྙིང་གར་མུཾ་ནག་པོ། དེའི་འོད་ཀྱིས་ཕྱི་རོལ་ཐམས་ཅད་མུན་ནག་ཐིབས་སེ་སོང་བར་བསམ་ལ་ཉལ་རྨི་ལམ་མི་གསལ་བས་མི་ཟིན་པའམ་ཡད་ཡུད་རེ་ཟིན་ཡང་ཤུགས་མི་ཐོན་པ་ནི་བརྗེད་འབྱམས་ཏེ། གྲིབ་སེལ་གྱི་ཆོ་ག་བྱ་ཞིང་། ཟས་འགྲངས་ཆེས་པ་དང་། གོས་མཐུག་པོ་མི་གྱོན། ཙོག་གཉིད་བྱེད་ཅིང་། སྨིན་མཚམས་སུ་ཐིག་ལེ་དམར་པོ་འོད་འཚེར་བུ་ལ་སེམས་གཏད་དེ་ཉལ། ལན་རེ་ཙམ་ཟིན་ཡང་སླར་རྨི་ལམ་གྱི་རྒྱུན་ལ་འཁྲུལ་པ་ནི་འཁྲུལ་འབྱམས་ཏེ། སྒྲིབ་སྦྱང་དང་ཚོགས་བསགས་ལ་འབད་དགོས་པས། སྒྲིབ་སྦྱོང་ཁྱད་པར་བ་ནི། ཨ་ཐུང་རྡོ་རྗེ་སྙེམས་མའི་རང་བཞིན་ལས་སྤྲོས་པའི་མེས་ཕུང་ཁམས་སྐྱེ་མཆེད་ཀྱི་མ་དག་པའི་སྒྲིབ་ཚོགས་བསྲེགས་པ་དང་། རྡོ་རྗེ་སེམས་དཔའི་བདག་ཉིད་ཧཾ་ཡིག་གི་བདུད་རྩིས་བཀྲུས་ཤིང་སྦྱངས་པར་མོས་པའི་གཏུམ་མོའི་རྣལ་འབྱོར་སྒོམ། ཚོགས་བསགས་ཁྱད་པར་བ་ནི། རང་གི་རྣམ་ཤེས་རྡོ་རྗེ་རྣལ་འབྱོར་མའི་རང་བཞིན་དུ་སྤྱི་བོ་ནས་འཕོས་པ་ནམ་མཁར་གནས་པར་བསམ་ལ། གསུང་རྡོ་རྗེས་རྨི་ལམ་འཁྲུལ་པའི་གནས་སྐབས་གཞོམ་པའི་མཚོན་བྱེད་པདྨ་དམར་པོའི་ཡུ་བ་ཅན་གྱི་གྲི་གུག་མགྲིན་པར་གནས་པ་དེ་དྲག་ཏུ་འཁོར་བས་ཐ་མལ་གྱི་ལུས་སིལ་བུར་གཏུབ་པ་རང་བྱུང་གི་ཀ་པཱ་ལའི་སྣོད་དུ་གནས་པའི་འོག་ནས་ཐོད་སྒྱེད་ཀྱིས་བཏེགས་པ། མེ་འབར་ཏེ་ཐོད་པ་དྲོས་པས་ཤ་ཁྲག་ཞུ་བའི་ཁར་འབྲུ་གསུམ་གནས་པའི་འོད་ཀྱིས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་བདུད་རྩིའི་རྣམ་པར་བསྡུས་ཏེ་ཐིམས་པས་ཡེ་ཤེས་བདུད་རྩིའི་རྒྱ་མཚོར་གྱུར་པར་བསམ། རང་སེམས་རྣལ་འབྱོར་མའི་རྣམ་པར་ནམ་མཁར་གནས་པའི་ཐུགས་ཀའི་འོད་ཀྱིས་མགྲོན་བཞི་འཁོར་ལོ་གསུམ་གྱི་ལྷའི་ངོ་བོར་སྤྱན་དྲངས་པ་ལ། རང་སེམས་རྣལ་འབྱོར་མའི་ཐུགས་ཀ་ནས་མཆོད་པའི་ལྷ་མོ་སྤྲོས་པའི་ལག་ཐོད་ཀྱིས་བདུད་རྩི་དྲང་བས་དགྱེས་པར་བསམ། མཐར་འཁོར་གསུམ་ཡོངས་དག་གི་ངང་དུ་མཉམ་པར་བཞག །གེགས་སེལ་དངོས་ནི། རང་སྟོང་ར་རྩ་འཁོར་དང་བཅས་པར་གསལ་བའི་སྤྱི་བོར་རྩ་བའི་བླ་མ་སྣང་བ་མཐའ་ཡས་ཡབ་ཡུམ་གྱི་རྣམ་པར་བཞུགས་པ་ལ་གསོལ་བ་གདབ། བླ་མ་ཚངས་བུག་ནས་བྱོན་ཏེ་དཔྲལ་བར་འོད་ཟེར་དམར་པོའི་ཀློང་དུ་བཞུགས་པར་བསམ་པ་དང་། མགྲིན་པའི་རྩ་འཁོར་གྱི་དབུས་སུ་པདྨ་དམར་པོ་འདབ་མ་བཞི་པའི་ལྟེ་བར་ཧཱུྃ་དམར་པོ། འདབ་མ་བཞི་ལ་ཨ་ནུ་ཏ་ར་ཞེས་པའི་ཡིག་འབྲུ་རེ་རེ་གཡོན་བསྐོར་ཏུ་བཀོད་པ་གཡས་སུ་འཁོར་བར་བསམ་ལ། ཨ་ནུ་ཏ་ར་ཧཱུྃ་ཞེས་བཟླ། མཐར་ཨ་ནུ་ཏ་ར་དབུས་ཀྱི་ཧཱུྃ་ལ་བསྡུས་ཏེ་དམིགས་པ་ཧཱུྃ་ལ་གཏད་དེ་ཉལ་བས་ཟིན་ནོ། །དེས་ཀྱང་མ་ཟིན་ན་སྤོག་པ་ནི། སྲོད་ལ་སྔར་ལྟར་བསྒོམས་ནས་ཐོ་རང་ཐིག་ལེ་དཀར་པོ་གོས་སུ་བགོ་སྟེ། དཔྲལ་ཤར་ཐིག་ལེ་དཀར་པོ་གསལ་ཞིང་འཚེར་བ་བསྒོམ་ནས། དེའི་འོད་ཀྱིས་ལུས་སྟོད་ཕྱི་ནང་རིལ་པོར་ཁྱབ་པར་བསམ་ལ། རླུང་ཁུག་དང་རྨི་ལམ་འཛིན་པའི་འདུན་པ་ཐེངས་བཅུ་གཅིག་བྱས་ཏེ་གཉིད། ད་དུང་ཡང་ཟིན་དཀའ་ན། སྲོད་ལ་ཉམས་ལེན་བཤད་མ་ཐག་པ་ལྟར་དང་། ཐོ་རངས་ཐིག་ལེ་ནག་པོ་གདན་དུ་འདིངས་ཏེ། གསང་གནས་སུ་ཐིག་ལེ་ནག་པོ་ནག་ལ་འཚེར་བ་ཞིག་བསྒོམ་ནས། དེའི་འོད་ཀྱིས་ལུས་སྨད་ཕྱི་ནང་རིལ་པོ་ཁྱབ་པར་བསམ་ལ། རླུང་ཁུག་དང་འདུན་པ་ཐེངས་ཉེར་གཅིག་བྱས་ལ་ཉལ་བས་ངེས་པར་ཟིན་ནོ། །དེ་ཡང་སྐབས་རེར་རྨི་ལམ་རྨི་ལམ་དུ་ཤེས་པ་ཙམ། གདམས་པ་མེད་པ་དང་། འཛིན་པའི་རྩོལ་བ་མ་བྱས་པ་ལའང་འབྱུང་བས་བརྟག་མི་ཐུབ་ལ། འདིར་ནི་འཛིན་པའི་རྩོལ་བས་ཟིན་པ་དང་། ཟིན་པ་དེའང་ཡུན་རིང་དུ་བརྟན་པ་ཞིག་དགོས་སོ། །གཉིས་པ་སྦྱང་བ་ལ་གསུམ་ལས་དང་པོ་རྩལ་སྦྱང་བ་ནི། ཟིན་སྦྱང་སྤེལ་བསྒྱུར་སྤྲུལ་ཞིང་གེགས་རྣམས་བསལ། ཞེས་པ། རྨི་ལམ་ཟིན་ནས་སྦྱང་དགོས་ཏེ། སྤེལ་བ་ནི། རྨི་ལམ་དུ་གང་སྣང་བ་དེ་ཉིད་གཅིག་ལས་གཉིས། གཉིས་ལས། བཞི་སོགས་བརྒྱ་སྟོང་མང་པོར་སྤེལ། བསྒྱུར་བ་ནི། ཡུལ་གང་སྣང་དེ་གཞན་དུ་བསྒྱུར་ཏེ། དུར་འགྲོ་རྨིས་པ་མིར་བསྒྱུར་བ་དང་། མི་ལྟ་བུ་རྟ་དང་ཁང་ཁྱིམ་གཞལ་ཡས་ཁང་དང་། ས་ཆུར་བསྒྱུར་བ་དང་། ཆུ་མེར་བསྒྱུར་བ་དང་། གཅིག་མང་པོར་བསྒྱུར་བ་དང་། མང་པོ་གཅིག་ཏུ་བསྒྱུར་བ། ཡོད་པ་མི་སྣང་བར་བྱ་བ་དང་། མེད་པ་ཡོད་པར་བསྒྱུར་བ་སོགས་བྱའོ། །རྨི་ལམ་ཟིན་པ་ན་རང་རྒྱལ་པོ་དང་བྲམ་ཟེ་ལ་སོགས་པ་མི་རིགས་དང་། སེང་གེ་དང་སྟག་དང་ཁྱུང་ལ་སོགས་པ་དང་། རི་དང་ཁང་པ་ལྗོན་ཤིང་འབྱུང་བཞི་སོགས་སུ་སྤྲུལ་པ་དང་། འཇིགས་སྐྲག་སོགས་བྱུང་ན་དེའི་གཉེན་པོར་སྤྲུལ་པ་དང་། སྣོད་བཅུད་མི་སྣང་བར་བྱ་བ་ལ་སོགས་པའི་རྫུ་འཕྲུལ་ལ་བསླབ་བོ། །དེ་དག་གི་དུས་མོས་གུས་ཆུང་བ། དམ་ཚིག་ཉམས་པ། དངོས་ཞེན་ཆེ་བ། གྲིབ་ཀྱིས་ཕོག་པ་སོགས་གེགས་ཐམས་ཅད་མི་འབྱུང་བར་བྱ་ལ། བྱུང་ན་གོང་དུ་བཤད་པ་ལ་སོགས་པའི་སེལ་ཐབས་ལ་འབད་དོ། །གཉིས་པ་སྒྱུ་མར་བྱིན་གྱིས་བརླབ་པ་ནི། ཉི་ཟླ་ཞོན་དང་ཞིང་ཁམས་མཐའ་དག་བསྒྲོད། ཅེས་པ་སྟེ། རྨི་ལམ་རྨི་དུས་རང་ལྷ་སྐུར་བསྒོམ་པའམ་སེམས་ཉིད་ཧཱུྃ་སྔོན་པོའི་རྣམ་པར་སྤྱི་བོ་ནས་འཕོས་ལ། ཡི་དམ་གྱི་སྐུར་བསྒྱུར་བ་ཉི་ཟླའི་སྟེང་དུ་གནས་པ་དང་། མངོན་པར་དགའ་བ་ལ་སོགས་པའི་སངས་རྒྱས་ཀྱི་ཞིང་གང་འདོད་པ་དེར་སོང་ནས་སངས་རྒྱས་མཆོད་ཅིང་ཆོས་ཉན་པ་དང་། སེམས་ཅན་གྱི་དོན་བྱེད་པ་སོགས་ལ་བསླབ་བོ། །གཞན་ཡང་ཉིན་པར་རང་གི་མགྲིན་པར་འོད་ཀྱི་ཐིག་ལེ་དམར་པོ་དེའི་ནང་དུ་གང་འདོད་པའི་ཞིང་ཁམས་མིག་འབྲས་ལ་གཟུགས་བརྙན་འཆར་བ་ལྟར་བསྒོམས་ནས་དམིགས་པ་རྩེ་གཅིག་ཏུ་གཏད་ལ་རླུང་བཟུང་། ཉལ་ཁར་དེ་བཞིན་བསྒོམས་ནས་འདུན་པ་དང་བཅས་ཏེ་གཉིད་ལོག་པས་རྨི་ལམ་དུ་ཞིང་ཁམས་དེར་བསྒྲོད་པ་ཚེགས་མེད་པར་ནུས་སོ། ཁྱད་པར་ལྷ་སྐུ་སྒྱུ་མ་ལྟ་བུ་ལ་བསླབ་དགོས་པས་རྨི་ལམ་ཟིན་མ་ཐག་ཏུ་དག་པའི་སྒྱུ་ལུས་སྒོམ་པ་དང་། ལྷག་པར་རྣམ་དག་སྒྱུ་ལུས་རྩེ་གཅིག་ཏུ་སྒོམ་པ་ནི་རྨི་ལམ་གྱི་རྣལ་འབྱོར་གྱི་མཐིལ་སོ་ཡིན་ནོ། གསུམ་པ་རྨི་ལམ་གྱི་དེ་ཁོ་ན་ཉིད་ལ་བསླབ་པ་ནི། བཟང་ངན་སྒྱུ་མ་ཅིར་སྣང་རང་གྲོལ་ལྟོས། །ཞེས་པ་རྨི་ལམ་གྱི་སྣང་བ་རྨི་ལམ་དུ་ཤེས་པ་དང་། རྨི་ལམ་བདེན་པར་མ་གྲུབ་པར་ངེས་པ་ཙམ་གྱིས་གང་ཡང་མི་ཕན་པས་དེ་ཁོ་ན་ཉིད་ཀྱིས་རྩིས་ཟིན་པར་བྱ་དགོས་ཏེ། རྨི་ལམ་གྱི་སྣང་བ་བཟང་ངན་མེད་པ་སེམས་ཀྱི་རྣམ་འཕྲུལ། སེམས་ཉིད་གདོད་མ་ནས་སྐྱེ་འགགས་གནས་གསུམ་དང་བྲལ་བ་རང་ཤར་རང་གྲོལ་ཤེས་པར་བྱ་ཞིང་། རང་རིག་གི་ངོ་བོ་རྣམ་པར་མི་རྟོག་པའི་ཡེ་ཤེས་ཉིད་ལ་མཉམ་པར་བཞག་པར་བྱའོ། །གསུམ་པ་འབྲས་བུ་ནི། མཐར་ཕྱིན་ས་བཅུ་ནོན་ནས་བདེ་ཆེན་ཐོབ། ཅེས་པ་དེ་ལྟར་བསྒོམས་པས་འཁོར་བ་གཞི་མེད་དུ་གྲོལ་ནས་རང་སེམས་ཆོས་སྐུར་རྩལ་འབྱོངས་པས་རྨི་ལམ་ལྟ་བུར་ས་བཅུ་ནོན་ནས་འཚང་རྒྱའོ། །བཞི་པ་ལམ་གྱི་སྙིང་པོ་འོད་གསལ་མ་རིག་མུན་བྲལ་ནི། ཁྱད་པར་འོད་གསལ་མ་རིག་མུན་བྲལ་ནི། ཞེས་པ་ཆོས་ཐམས་ཅད་ཀྱི་གནས་ལུགས་རང་བཞིན་གྱིས་འོད་གསལ་བར་རྟོགས་པ་ཉིད་ཉམས་ལེན་གྱི་རྩ་བ་ཡིན་པས་ལམ་གྱི་སྙིང་པོར་གྱུར་པ་འོད་གསལ་གྱི་རྣལ་འབྱོར་ཏེ། དེའི་སྒྲ་དོན་ནི། གནས་ལུགས་འགགས་མེད་དུ་གསལ་བའམ། རང་བཞིན་མེད་ཀྱང་ལྷུན་གྲུབ་ཏུ་སྣང་བའི་ཕྱིར་འོད་གསལ་ཞེས་བྱ་བ་ཡིན་ནོ། །དེ་ལམ་དུ་བྱ་བ་ལ་གསུམ། ཉིན་མོ་ལམ་དང་རང་བཞིན་གཅིག་ཏུ་བསྲེ་བ། མཚན་མོ་ལམ་དང་རང་བཞིན་གཅིག་ཏུ་བསྲེ་བ། མཐར་ཕྱིན་འབྲས་བུ་བསྟན་པའོ། །དང་པོ་ནི། རང་ཉིད་འཁོར་ལོ་སྡོམ་པ་ཡབ་ཡུམ་ལུས་ནང་རྩ་གསུམ་འཁོར་ལོ་བཞི་དང་བཅས་པར་གསལ་བའི་སྙིང་ག་ཆོས་ཀྱི་འཁོར་ལོའི་དབུས་དབུ་མའི་ནང་དུ་པདྨ་ཟླ་ཉི་སྒྲ་གཅན་བརྩེགས་པའི་གདན་ལ་རྩ་བའི་བླ་མ་རྡོ་རྗེ་འཆང་ཧེ་རུ་ཀ་སྐུ་མདོག་སྔོན་པོ་སྤྱན་གསུམ་ཞི་མ་ཁྲོ་སྟག་ཤམ་ཅན། རུས་པ་དང་རིན་པོ་ཆེས་བརྒྱན་པ་ཕྱག་གཉིས་རྡོ་རྗེ་དང་དྲིལ་བུ་འཛིན་པས། ཡུམ་ཕག་མོ་དམར་མོ་གྲི་ཐོད་འཛིན་པ་ལ་འཁྱུད་པ། ཞབས་རྡོར་སྐྱིལ་གྱིས་བཞུགས་པའི་སྐུ་དྭངས་གསལ་འོད་དུ་འབར་བའི་དབུ་གཙུག་ནས་ཡར་དབུ་མའི་ཡས་སྣེའི་བུག་པ་ལ་རེག་གི་བར་བརྒྱུད་པའི་བླ་མ་རྡོ་རྗེ་འཆང་ལ་ཐུག་གི་བར་ཐོ་བརྩེགས་སུ་བཞུགས་པ་འོད་ཟེར་སྔོན་པོ་ཤས་ཆེར་འཕྲོ་བའི་སྐུ་ཅན་དུ་གསལ་བ་ལ། སྙིང་རྗེ་ཆེན་པོ་སེམས་ཆེན་པོ། སོགས་ཀྱིས་ཕྱག་འཚལ། རང་སེམས་བླ་མར་རྟོགས་པས་སོགས་ཡན་ལག་བདུན་པ་བྱ། ཁྱབ་བདག་རྡོ་རྗེ་འཆང་ཆེན་ལ་གསོལ་བ་འདེབས། རྡོ་རྗེའི་རྣལ་འབྱོར་མ་ལ་གསོལ་བ་འདེབས། གྲུབ་ཆེན་ཏེ་ལོ་པ་ལྎ མཁས་པ་ནཱ་རོ་པཎ་ཆེནྎ མར་པ་ཆོས་ཀྱི་བློ་གྲོསྎ མི་ལ་བཞད་པ་རྡོ་རྗེྎ རས་ཆུང་རྡོ་རྗེ་གྲགས་པ་ལྎ སྙན་རྒྱུད་བརྒྱུད་པའི་བླ་མ་ལྎ དྲིན་ཅན་རྩ་བའི་བླ་མ་ལ་གསོལ་བ་འདེབས། །དཔེ་ཡི་འོད་གསལ་རྟོགས་པར་བྱིན་གྱིས་རློབས། །དོན་གྱི་འོད་གསལ་མངོན་འགྱུར་བྱིན་གྱི་རློབས། །སྒྱུ་འཕྲུལ་རྡོ་རྗེའི་སྐུ་འགྲུབ་བྱིན་གྱིས་རློབས། །ཟུང་འཇུག་གོ་འཕང་འགྲུབ་པར་བྱིན་གྱིས་རློབས། །ཞེས་གསོལ་བ་བཏབ་མཐར་བརྒྱུད་པའི་བླ་མ་རྣམས་རྩ་བའི་བླ་མ་ལ་ཐིམ་པར་བསམ་ལ། དྲིན་ཅན་རྩ་བའི་བླ་མ་ལ་གསོལ་བ་འདེབས། དཔེ་ཡི་འོད་གསལྎ སོགས་གོང་སྨོས་ཀྱི་གསོལ་འདེབས་གྲངས་བསགས་མཐར་བླ་མ་དང་རང་སེམས་དབྱེར་མེད་ངང་དུ་མཉམ་པར་བཞག །དེ་ནས་སྙིང་གའི་འཁོར་ལོའི་དབུས་ཆོས་ཉིད་ཀྱི་དབུ་མའི་ནང་དུ་པདྨ་འདབ་བཞི་སྔོན་པོའི་ཟེའུ་འབྲུར། བླ་མའི་ཐུགས་རྡོ་རྗེ་མི་བསྐྱོད་པའི་བདག་ཉིད་ཧཱུྃ་སྔོན་པོ། མདུན་ནས་གཡས་བསྐོར་གྱིས་རྣམ་སྣང་རིན་འབྱུང་འོད་དཔག་མེད་དོན་གྲུབ་གསུམ་གྱི་རང་བཞིན་ཨ་ནུ་ཏ་ར་དཀར་སེར་དམར་ལྗང་འོད་འཕྲོ་བ་བསྒོམས་ལ། རླུང་རོ་ལན་གསུམ་བསལ་ནས་སྙིང་གའི་བུམ་པ་ཅན་བྱེད་པ་ཐོབ་ཐང་ཡིན་ཡང་། མ་བྱང་བས་དེར་དམིགས་ལ་དངོས་སུ་ལྟེ་བར་བསྡོམ་པ་གེགས་ཆུང་ཞིང་། ལན་འགའ་ཙམ་གྱི་ནི་འགལ་བ་མེད་པས་ཁུག་པ་བདུན་དུ་འཛིན་པའི་གཉིས་གསུམ་ཙམ་སྙིང་གའི་དང་། གཞན་རྣམས་ལྟེ་བའི་བུམ་ཅན་བྱེད་པ་ལྟ་བུའོ། །དང་པོར་རྔུབ་དུས་སྣ་སྒོའི་རླུང་ཁ་དོག་ལྔ་ལྡན་རོ་རྐྱང་ནས་བརྒྱུད་སྙིང་གའི་བུག་པ་འདྲིལ་མཚམས་ནས་དབུ་མར་ཞུགས་པ་ཡིག་འབྲུ་རྣམས་ལ་ཐིམ། དབྱུང་དུས་ཡིག་འབྲུ་ལྔ་ལས་འོད་ཟེར་རང་མདོག་འཕྲོས་རོ་རྐྱང་བརྒྱུད་དེ་སོང་བའི་རྩེ་ལས་མཆོད་པའི་ལྷ་མོའི་ཚོགས་དཔག་ཏུ་མེད་པ་སྤྲོས་པས། ཕྱོགས་བཅུའི་ཞིང་རབ་འབྱམས་ན་བཞུགས་པའི་རྒྱལ་བ་སྲས་བཅས་ཧེ་རུ་ཀ་རིགས་ལྔ་ཡབ་ཡུམ་གྱི་དཀྱིལ་འཁོར་གྱི་རྣམ་པ་འབའ་ཞིག་ཏུ་བཞུགས་པ་རྣམས་མཆོད། རྔུབ་དུས་དེ་ཀུན་ལས་ཧེ་རུ་ཀ་རིགས་ལྔའི་དཀྱིལ་འཁོར་མར་མེ་གཅིག་ལས་གཉིས་མཆེད་ཀྱི་ཚུལ་དུ་སྤྱན་དྲངས་པ་སྣ་བུག་ནས་རོ་རྐྱང་བརྒྱུད་དེ་སྙིང་གའི་བུ་ག་ནས་དབུ་མར་ཞུགས། བསྡོམ་དུས་དེ་རྣམས་ཡི་གེ་ལྔ་སོ་སོར་ཐིམ་པས་ལྷག་པར་འབར་བའི་འོད་ཀྱིས་དུག་ལྔ་ཁམས་ལྔ་ཕུང་ཁམས་ལྔ་སོགས་སྦྱང་བྱ་རྣམས་སྦྱོང་ནས་སྐུ་ལྔ་ཡེ་ཤེས་ལྔ་འགྲུབ་ནུས་སུ་བྱས་པར་བསམ། ཡང་དབྱུང་དུས་འབྲུ་ལྔ་ལས་འོད་ཟེར་རང་མདོག་འཕྲོས་རོ་རྐྱང་བརྒྱུད་དེ་སྣ་བུག་ནས་ཐོན་ཏེ་སྣོད་བཅུད་ཐམས་ཅད་ལ་ཁྱབ་པས་མ་དག་པ་ཐམས་ཅད་སྦྱངས་ནས་སྣོད་གཞལ་ཡས་ཁང་དང་། བཅུད་ཧེ་རུ་ཀའི་འཁོར་ལོར་བསྒྱུར། རྔུབ་དུས་དེ་དག་གི་བྱིན་བཅུད་རྣམས་ཚུར་བསྡུས་པ་སྣ་བུག་ནས་རོ་རྐྱང་བརྒྱུད་དེ་སྙིང་གའི་བུག་པ་ནས་དབུ་མར་ཞུགས། བསྡོམ་དུས་ཡིག་འབྲུ་རྣམས་ལ་ཐིམ་པར་བསམ། དེ་ལྟ་བུའི་སྤྲོ་བསྡུའི་དམིགས་པ་དང་བཅས་རླུང་ཁུག་བདུན་སོགས་མང་ཙམ་ལ་བསླབ། མཇུག་ཏུ་བཏང་དུས་འབྲུ་ལྔའི་འོད་ཟེར་རོ་རྐྱང་བརྒྱུད་དེ་སྣ་བུག་ནས་སོང་བ་སྣོད་བཅུད་ལྷའི་རྟེན་དང་བརྟེན་པར་གསལ་བ་ལ་ཕོག །རྔུབ་དུས་དེ་རྣམས་རང་དང་། རང་ལྷར་གསལ་བ་རྩ་འཁོར་དང་བཅས་ཏེ་ཡས་མས་ནས་ཞུ་བ་པདྨ་འདབ་བཞིར་ཐིམ། བསྡོམ་དུས་པདྨ་ཡི་གེ་བཞི་ལ། དེ་དག་ཀྱང་གཡས་བསྐོར་གྱིས་ཧཱུྃ་ལ། དེ་ཡང་ཞབས་ཀྱུ་ནས་ནཱ་དའི་བར་རིམ་པས་ཡལ་བར་བསམ་སྟེ་སྟོང་ཉིད་འོད་གསལ་གྱི་ངང་ལ་མཉམ་པར་བཞག་པ་ནི་རྗེས་གཞིག་གི་བསམ་གཏན་ནོ། ཡང་ཕྱིར་བཏང་བར་ཕྱོགས་པ་ན་ནཱ་ད་དང་། དེ་ནས་ཧཱུྃ་དང་། ཡིག་འབྲུ་བཞི་པདྨའི་བར། དབྱུང་དུས་རྩ་འཁོར་ལྷ་སྐུ། སྣོད་བཅུད་ལྷའི་འཁོར་ལོ་དང་བཅས་པ་སྒྱུ་མ་ལྟ་བུར་གསལ་བཏབ། ཡང་རྔུབ་དུས་སྡུད་རིམ་སྔ་མ་བཞིན་བྱའོ། །ཕྱི་རོལ་གྱི་སྣང་བ་ཆེད་དུ་མི་བསྡུ་བར་མེ་ལོང་ལ་ཧས་བཏབ་པ་ལྟར་རང་ལུས་ཡས་མས་ནས་ཞུ་བ་པདྨ་ལ། དེ་ཡིག་འབྲུ་བཞི་དང་བཅས་པ་ཧཱུྃ་ལ། དེ་ནཱ་ད་ལ། ནཱ་དའང་རྗེས་མེད་དུ་ཡལ་བར་བསམ་ལ་སྟོང་ཉིད་འོད་གསལ་གྱི་ངང་དུ་མཉམ་པར་བཞག་པ་ནི་རིལ་འཛིན་གྱི་བསམ་གཏན་ནོ། །ཡང་འོད་གསལ་དེའི་ངང་ལས་ནཱ་ད་ཧཱུྃ་ཡིག་ཡིག་འབྲུ་པདྨ་རྩ་འཁོར་ལྷ་སྐུ་དང་བཅས་པ་སྒྱུ་མ་ལྟ་བུར་སྐད་ཅིག་གིས་ལྡང་བར་བསམ། དེ་ལྟ་བུའི་བསྡུ་ལྡང་ལ་ཡང་ནས་ཡང་དུ་བསླབ་པ་ནི་ཡང་དག་པའི་མཐའ་མངོན་དུ་བྱེད་པའི་ཐབས་བླ་ན་མེད་པ་ཡིན་ལ། བཤད་རྒྱུད་རྡོ་རྗེ་ཕྲེང་བ་སོགས་ལས་འོད་གསལ་མངོན་དུ་བྱེད་པའི་ལམ་ནི་རྡོ་རྗེའི་བཟླས་པ་ཡིན་པར་གསུངས་སོ། །དེ་ལྟར་བསྒོམས་པས་རླུང་དབུ་མར་ཞུགས་གནས་ཐིམ་གསུམ་འབྱུང་ཞིང་དེ་ལས་སྟོང་པ་བཞི་མངོན་དུ་བྱེད་པར་འགྱུར་རོ། །གཉིས་པ་མཚན་མོ་ལམ་དང་རང་བཞིན་གཅིག་ཏུ་བསྲེ་བ་ལ་བཞི་ལས། དང་པོ་སྔོན་འགྲོ་ནི་ཤིན་ཏུ་དབེན་པར་མཚམས་དམ་དུ་བཅད་ནས་ཁྲུས་དང་དཀུ་མཉེ་བྱས་ལ་གོས་གསར་པའམ་ཆུས་ལེགས་པར་བཀྲུས་པ་གྱོན། ཟས་བཅུད་ཅན་བསྟེན་ཞིང་བྱང་སེམས་མི་ཉམས་པར་བསྲུང་། རྡོར་སེམས་སྒོམ་བཟླས་དང་། ཕྱི་ནང་གསང་བའི་བླ་མའི་རྣལ་འབྱོར་བསྒོམས་ལ་རྩེ་གཅིག་ཏུ་གསོལ་བ་གདབ། ཡི་དམ་དང་མཁའ་འགྲོ་ཚོགས་ཀྱི་འཁོར་ལོས་མཆོད། ཤ་ཆེན་གྱིས་བརྒྱན་པའི་གཏོར་མ་དང་། ཞུན་ཆེན་གྱི་མར་མེ་ཕུལ་ལ། འོད་གསལ་ཟིན་པའི་གསོལ་བ་གདབ། ཆོས་སྐྱོང་ལ་གཏོར་མ་ཕུལ་ཏེ་ཕྲིན་ལས་བཅོལ་བ་རྣམས་བྱའོ། །གཉིས་པ་འོད་གསལ་འཛིན་པ་དངོས་ནི། ལུས་གནད་ཐབས་ལྡན་ཏིང་འཛིན་བཞི་ལ་སྦྱར། ཞེས་པ་ནས། བར་ནས་བཟུངས། ཞེས་གསུངས་ཏེ། སད་པའི་སྐབས་སུ་རླུང་དབུ་མར་ཞུགས་གནས་ཐིམ་པར་དྷུ་ཏིར་མཆོག་གི་གཏུམ་མོ་འབར་སྟོབས་ཀྱིས་དགའ་བཞི་དངོས་སུ་སྐྱེས་པའི་ལྷན་སྐྱེས་ལ་མཉམ་པར་འཇོག་ནུས་ནི་དེ་ཉིད་ལ་མཉམ་པར་འཇོག་པའམ། གོང་སྨོས་འོད་གསལ་གྱི་རྣལ་འབྱོར་བསྒོམས་པས་རླུང་དབུ་མར་ཞུགས་གནས་ཐིམ་པའི་སྟོང་བཞི་བསྐྱེད་ནུས་པས་ནི་གཉིད་དུ་འགྲོ་བར་རྩོམ་པའི་ཚེ་སྙིང་ཁའི་ཧཱུྃ་ཁོ་ན་ལ་རིག་པ་གཏད་དེ་སྙིང་ཁའི་བུམ་ཅན་བཟུང་བའམ་རྡོར་བཟླས་བྱས་ནས་གཉིད་པས། གཉིད་ཀྱི་སྟོང་པ་བཞི་རིམ་གྱིས་འཆར་བ་ངོས་ཟིན་ནས་འོད་གསལ་ཟིན་པར་འགྱུར་ལ། དེ་ལྟར་མི་ནུས་པས་ནི་ཐབས་དུ་མས་འཛིན་དགོས་པས། ལུས་གནད་ནི། སྔས་མཐོ་བ་ལ་སེངྒེའི་ཉལ་སྟབས་སམ་ཙོག་གཉིད་བྱ། དུས་གནད་ནི། སྲོད་ལ་སོགས་པར་གཉིད་མཐུག་པའི་དུས་ཐོག་མར་ཟིན་དཀའ་བས་ཐོ་རངས་སོགས་གཉིད་ཅུང་ཟད་སྲབ་པའི་དུས་སུ་བཟུང་། དམིགས་པའི་གནད་ནི། རང་ཉིད་འཁོར་ལོ་སྡོམ་པ་ཡབ་ཡུམ་རྩ་འཁོར་དང་བཅས་པ་སྒྱུ་མ་ལྟ་བུར་གསལ་བའི་སྙིང་ཁའི་རྩ་འཁོར་གྱི་དབུས་དྷུ་ཏིའི་ནང་དུ་པདྨ་ཡི་གེ་ལྔ་དང་བཅས་པ་སྔར་ལྟར་བསྒོམ་པ་ལ་དམིགས་པ་གཏད་ནས་བུམ་ཅན་ལན་ཁ་ཤས་བཟུང་བའམ། རྡོ་རྗེའི་བཟླས་པ་བྱ། འདུན་པའི་གནད་ནི། གཉིད་ཀྱི་སྣང་མཆེད་ཐོབ་གསུམ་རྫོགས་ནས་རྨི་ལམ་མ་རྨིས་པའི་བར་དོར་འོད་གསལ་ཅི་ནས་ཀྱང་ཟིན་པར་བྱའོ་སྙམ་པའི་འདུན་པ་དྲག་པོ་ཡང་ཡང་བྱ་བ་སྟེ་གནད་བཞི་དང་ལྡན་པར་བྱས་ལ། གཉིད་མི་འགྲོ་བའི་ཐ་མལ་གྱི་དུས་སྙིང་ཁའི་པད་འདབ་ཀྱི་ཡི་གེ་ཨ་ལ་སེམས་གཏད། དེའི་ཚེ་སྙིང་ཁར་རླུང་ཅུང་ཟད་འདུས་ཏེ་དུ་བ་དང་སྨིག་རྒྱུ་སོགས་འབྱུང་བཞི་རིམ་གྱིས་ཐིམ་པའི་རྟགས་ཕྲ་མོ་རེ་འཆར། གཉིད་དུ་འགྲོ་བར་རྩོམ་པའི་ཚེ་ནུ་ལ་སེམས་གཏད། དེའི་ཚེ་རླུང་ཆེར་འདུས་ཏེ་རྣམ་པར་ཤེས་པ་སྣང་བ་ལ་ཐིམ་པས་ཡུལ་རགས་པའི་རྟོག་པ་འགགས་ནས་སྟོང་པའམ་སྣང་བ་ཞེས་པ་ནམ་མཁའ་གཡའ་དག་པ་ཟླ་འོད་ཤར་བ་ལྟ་བུའི་རྣམ་པ་འཆར། གཉིད་འཐུམ་པའི་དུས་ཏ་ལ་སེམས་གཏད། དེའི་ཚེ་རླུང་ཆེར་འདུས་ཏེ་སྣང་བ་མཆེད་པ་ལ་ཐིམ་པས་ཡུལ་རགས་པའི་རྟོག་པ་མཐའ་དག་འགགས་ནས་ཤིན་ཏུ་སྟོང་པའམ་མཆེད་པ་ཞེས་པ། ནམ་མཁའ་གཡའ་དག་པ་ལ་ཉི་འོད་འཆར་བ་ལྟ་བུའི་རྣམ་པ་འཆར། གཉིད་ཆེར་འཐུམ་པའི་དུས་ར་ལ་སེམས་གཏད། དེའི་ཚེ་རླུང་ཐམས་ཅད་འདུས་ནས་མཆེད་པ་ཉེར་ཐོབ་ལ་ཐིམ་པས་རྟོག་པ་ཕྲ་བ་ཕལ་ཆེར་འགགས་ནས་སྟོང་པ་ཆེན་པོའམ་ཉེར་ཐོབ་ཅེས་པ་ནམ་མཁའ་གཡའ་དག་པ་ལ་མཚམས་ཀྱི་སྨག་གིས་ཁྱབ་པ་ལྟ་བུའི་རྣམ་པ་འཆར། དེ་ནས་གཉིད་དུ་ཐུམ་གྱིས་འགྲོ་བའི་ཚེ་ཧཱུྃ་ལ་སེམས་གཏད་དེའི་ཚེ་རླུང་ཐམས་ཅད་ཐིམ་ཏེ་ཉེར་ཐོབ་འོད་གསལ་ལ་ཐིམ་པས་རྟོག་པ་ཐམས་ཅད་འགགས་ནས་ཐམས་ཅད་སྟོང་པའམ་འོད་གསལ་ཞེས་པ་ཆོས་ཀྱི་སྐུ་བདེ་སྟོང་གཉིས་སུ་མེད་པའི་ཡེ་ཤེས་དག་ཅིང་འོད་གསལ་བ་ཟླ་འོད་ནུབ་ཅིང་ཉི་འོད་མ་ཤར་ལ་མཚམས་ཀྱི་མུན་པ་ལས་ཀྱང་འདས་པའི་ཐོ་རངས་ཀྱི་ནམ་མཁའ་ཤིན་ཏུ་དྭངས་པ་ལྟ་བུའི་རྣམ་པ་འཆར་ཏེ། དེ་དག་གི་ཚེ་གཉིད་ཀྱི་སྟོང་པ་འདིའོ་སྙམ་དུ་ངེས་པར་བྱས་ཏེ་ཁྱད་པར་འོད་གསལ་དེ་ཉིད་ཀྱི་ངང་མ་ཤོར་བ་གལ་ཆེའོ། །དེའང་དང་པོ་གཉིས་སུ་འགྲོ་བར་རྩོམ་པ་དང་གཉིད་འཐུམ་པའི་སྐབས་ཙམ་ལས་ཕྱི་མ་གཉིས་མི་ངེས་ཤིང་གཉིད་དུ་ཐུམ་གྱིས་སོང་བ་དང་དྲན་མེད་དུ་འགྲོ་ཡང་། སྦྱང་སྟོབས་ཀྱིས་ཕྱི་མ་གཉིས་རིམ་གྱིས་ངེས་ནས་གཉིད་ཀྱི་དྲན་མེད་སངས་ཏེ་རྨི་ལམ་མ་རྨིས་པའི་བར་དེར་གོང་བཤད་ལྟར་འོད་གསལ་འཆར་རོ། །དེ་ནས་འོད་གསལ་ལས་ཉེར་ཐོབ་སོགས་སྟོང་པ་ལུགས་ལྡོག་ཏུ་འཆར་ཡང་། ལུགས་འབྱུང་མ་བྱང་བར་ངོས་ཟིན་པ་ཤིན་ཏུ་དཀའ་ཞིང་། ལུགས་འབྱུང་བྱང་ནས་ལུག་ལྡོག་ངོས་འཛིན་པའི་འཕེན་པ་བཏང་སྟེ་སྦྱང་ན་རིམ་གྱིས་ཟིན་པར་བཤད་དོ། །དེ་ནས་རླུང་གཡོས་ཏེ་འོད་གསལ་ལས་ལྡང་བར་རྩོམ་པ་ན་སྙིང་ཁའི་ས་བོན་ལ་རིག་པ་རྩེ་གཅིག་ཏུ་གཏད་དེ་བརྟན་པར་བྱ་ལ་ཅི་ནས་ཀྱང་ལྡང་ན་རྨི་ལམ་གྱི་ལུས་འཁོར་ལོ་སྡོམ་པ་ཡབ་ཡུམ་གྱི་སྐུར་ལྡང་སྟེ་བསམ་གཏན་གཉིས་ཀྱིས་འོད་གསལ་དུ་བཅུག་ལ་མཉམ་པར་བཞག །དེ་ལས་རྨི་ལམ་གྱི་ལུས་ལྷ་སྐུར་ལྡང་བའི་འཇུག་ལྡང་ཡང་དང་ཡང་དུ་བྱ། ལར་སད་དུས་རླུང་དབུ་མར་ཐིམ་པའི་དགའ་བཞིའམ་སྟོང་བཞི་བསྐྱེད་ནུས་པ་དང་། དེའི་ལྷན་སྐྱེས་སམ་འོད་གསལ་ལ་མཉམ་པར་འཇོག་ནུས་པ་ལ་ནི་སྟོང་བཞི་མཚན་ཉིད་རྫོགས་པར་འཆར་ཞིང་ཡུན་རིང་བས་ཇི་བཞིན་ངེས་ནུས་ལ། དེ་ལས་གཞན་པ་ལ་སྟོང་པ་བཞི་ཆ་མཐུན་ཙམ་འཆར་ཡང་ཡུན་ཐུང་བས་སྦྱང་པ་ཆེར་མ་གོམ་བར་དུ་ངེས་དཀའ་འོ། །དེ་ལྟར་གཉིད་མཐུག་གི་འོད་གསལ་སྒོམ་པར་མ་ནུས་ན་རེ་ཞིག་སྲབ་མོའི་འོད་གསལ་བཟུང་བར་བྱ་སྟེ། ཉིན་མོའི་ཉམས་ལེན་གོང་ལྟར་ལ། གཉིད་ཀར་རང་བདེ་མཆོག་ཡབ་ཡུམ་རྩ་གསུམ་འཁོར་ལོ་བཞི་དང་བཅས་པར་གསལ་བའི་སྙིང་ཁའི་རྩ་འཁོར་གྱི་དབུས་སུ་འཁོར་ལོ་སྡོམ་པ་དཀར་པོ་ཡུམ་རྡོ་རྗེ་རྣལ་འབྱོར་མ་དམར་མོས་འཁྱུད་པ་ཚོན་གང་བ་ཤིན་ཏུ་གསལ་ཞིང་འཚེར་བ་དེའི་འོད་ཀྱིས་ལུས་ཕྱི་ནང་ཐམས་ཅད་གསལ་སིང་ངེ་ཡོད་པར་བསམ་པ་ལ་དམིགས་པ་གཏད་དེ་གཉིད་པས་གཉིད་ཀྱི་སྟོང་པ་བཞི་ཐམས་ཅད་མི་ངེས་ཀྱང་ཅི་རིགས་ངེས་ཤིང་གཉིད་མཐུག་པོ་སངས་ནས་རྨི་ལམ་ལ་རྨིས་པའི་བར་དེར་ཡུལ་ཕྲ་རགས་ཀྱི་སྣང་བ་མ་འགག་པའི་སེམས་གསལ་སྟོང་སིང་ངེ་བ་གཉིད་དུ་མ་སོང་བའི་རྣམ་པ་ལྟ་བུ་ཞིག་འབྱུང་བ་ནི་སྲབ་མོའི་འོད་གསལ་ཏེ། རེས་དེ་རྨི་ལམ་དང་འདྲེས་ནས་འབྱུང་བས། དེའི་ཚེ་སྙིང་གའི་ཡི་དམ་གྱི་སྐུ་ལ་སེམས་གཏད་ནས་རིག་པའི་ངོ་བོ་རྩེ་གཅིག་ཏུ་བསྐྱང་བས་འོད་གསལ་དེ་བརྟན་པོར་འཆར་ལ། གལ་ཏེ་རེས་གཉིད་མཐུག་པོ་བསྐྱེད་ནས་སྣང་སེམས་མི་གསལ་བར་གྱུར་ནའང་སྐྱོན་དུ་མི་བཟུང་བར་རིག་པའི་ངར་བསྐྱེད་དེ་བསྐྱངས་པས་ཅི་ཞིག་ན་མཐུག་པོའི་འོད་གསལ་ཅུང་ཟད་རེ་ཟིན་པར་འགྱུར་རོ། །རླུང་གི་གཡོ་བས་རྨི་ལམ་འཆར་ན་རྨི་ལམ་གྱི་ལུས་སྒྱུ་མ་ལྟ་བུའི་ལྷ་སྐུར་ལྡང་ལ་རིམ་པས་བསྡུས་ཏེ་རྟོག་མེད་ཀྱི་འོད་གསལ་ལ་ཅི་གནས་སུ་བཞག་ཡང་རྨི་ལམ་འཆར་བར་རྩོམ་པ་ན་སྔར་བཞིན་འཇུག་ལྡང་ཡང་ཡང་བྱའོ། སྟོང་བཞིའི་མཐར་གྱི་འོད་གསལ་དངོས་ལ་ཡུལ་ཕྲ་རགས་ཀྱི་སྣང་བ་དང་རྟོག་པ་ཐམས་ཅད་ཐིམ་པའི་སྣང་མེད་གཅིག་དགོས་པ་ལ། སྲབ་མོའི་འོད་གསལ་འདིར་སྣང་མེད་སངས་ནས་ཡུལ་ཕྲ་རགས་ཀྱི་སྣང་བ་མ་འགགས་པར་གསལ་བས་སྟོང་བཞིའི་འོད་གསལ་དངོས་མིན་ཡང་གཉིད་ཀྱི་འོད་གསལ་ནི་ཡིན་ནོ། །དེ་ལྟར་གཉིད་མཐུག་སྲབ་ཀྱི་འོད་གསལ་སྒོམ་མ་ནུས་ན་རེ་ཞིག་ཉམས་ཀྱི་འོད་གསལ་བསྒོམ་ཏེ་རང་འཁོར་ལོ་སྡོམ་པ་ཡབ་ཡུམ་དུ་གསལ་བའི་ལུས་ཀྱི་དབུས་སུ་དབུ་མ་ཤེལ་དཀར་གྱི་ཀ་བ་བཙུག་པ་ལྟ་བུ་ཤིན་ཏུ་དྭངས་ཤིང་གསལ་བའི་ནང་གི་སྙིང་ཁར་པདྨའི་དབུས་སུ་ཧཱུྃ་དཀར་པོ་ཤིན་ཏུ་གསལ་ཞིང་འཚེར་བ། དེའི་འོད་ཀྱིས་ལུས་ཀྱི་ནང་དང་ཡུལ་ཁམས་ཐམས་ཅད་ཟླ་འོད་ཀྱིས་གསལ་བ་ལྟ་བུ་དཀར་སངས་ངེར་སོང་བར་བསམ་པ་ལ་སེམས་བཟུང་ཏེ་ཉལ། སད་རེས་ཐམས་ཅད་ལ་དེ་ལྟར་གསལ་བཏབ་པས་འོད་ཀྱི་རྣམ་པ་ལྟ་བུའི་གསལ་ཉམས་དང་བཅས་པའི་ས་ལེ་བ་ཞིག་འཆར་ཏེ། དེ་ནི་ཉམས་ཀྱི་འོད་གསལ་ཡིན་ལ། དེ་ཉིད་རིག་པའི་ངར་བསྐྱེད་དེ་བསྐྱངས་པས་མྱུར་དུ་སྲབ་མོའི་འོད་གསལ་འཆར་བ་དང་། དེ་ཉིད་སྦྱང་པས་གཉིད་ཀྱི་འོད་གསལ་དངོས་གཞི་འཆར་བར་འགྱུར་བ་ཡིན་ནོ། །དེང་སང་འོད་གསལ་ཟིན་ཟེར་བ་ཕལ་ཆེར་ནི་གཉིད་དུ་དགེ་སྦྱོར་འཆར་བ་དང་། འོད་གསལ་གྱི་ཉམས་ཤར་བ་ཙམ་དུ་སྣང་ཞིང་། ཟིན་ལུགས་ལེགས་པ་འགའ་ཞིག་ཀྱང་སྲབ་མོའི་འོད་གསལ་ཙམ་ལས། སྟོང་བཞིའི་འོད་གསལ་དངོས་མིན་འདུག་པས་རྣམས་དབྱེ་ཤེས་པ་གལ་ཆེ་བར་སྣང་ངོ་། །གསུམ་པ་བོགས་དབྱུང་བ་ལ། མཐུག་པོའི་འོད་གསལ་ཟིན་དཀའ་ན་བོགས་དབྱུང་བ་ནི། སྟོང་ར་དང་སྙིང་གར་བླ་མ་བསྒོམ་པ་གསོལ་གདབ་འོད་ཞུ་ཡིག་འབྲུ་ལྔ་གསལ་བའི་བར་སྔར་བཤད་པ་ལྟར་བྱས་ལ་ཧཱུྃ་གི་འོད་ཀྱིས་སྣང་བ་ཐམས་ཅད་བླ་མ་མི་བསྐྱོད་པའི་དཀྱིལ་འཁོར་དུ་གྱུར་པ་ལ་རང་གི་ཐུགས་ཀའི་འོད་ལས་སྤྲོས་པའི་མཆོད་སྤྲིན་མཐའ་ཡས་པས་མཆོད། མཆོད་ཡུལ་རྣམས་འོད་དུ་ཞུ་བ་སྙིང་གའི་ཧཱུྃ་ལ་ཐིམ་པས་གནས་གྱུར་པ་བླ་མ་རྡོ་རྗེ་འཆང་མི་བསྐྱོད་པའི་རྣམ་པར་གྱུར་པ་ལ་འོད་གསལ་ཟིན་པའི་གསོལ་བ་དྲག་ཏུ་གདབ། བླ་མའི་ཐུགས་ཀར་ཟླ་གདན་ལ། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་རང་བཞིན་ཐིག་ལེ་ནག་པོ་ཤིན་ཏུ་གནག་ཅིང་འཚེར་བ་ཞིག་བསྒོམས་ལ། རྟོག་པ་གང་འཕྲོ་བ་ཐམས་ཅད་འོད་ལྔའི་ཚུལ་དུ་ཐིག་ལེ་ནག་པོ་དེ་ལ་སིབ་སིབ་ཏུ་ཐིམ་པར་བསམ་ལ་སེམས་གཏད་ནས་མ་ཡེངས་པར་གཉིད་པས་ཟིན་ནོ། །སྲབ་མོའི་འོད་གསལ་ཟིན་དཀའ་ན། སྙིང་གའི་རྩ་འཁོར་གྱི་དབུས་སུ་ཟླ་བའི་གདན་དང་། ཟླ་བའི་གུར་ཁང་ལ་བླ་མ་རྡོ་རྗེ་སེམས་དཔའི་ཧེ་རུ་ཀ་རྡོར་དྲིལ་འཛིན་པ་ཡུམ་དང་བཅས་པ་དཀར་གསལ་འོད་ཀྱི་རང་བཞིན་ཅན་གྱི་ཐུགས་ཀར་ཧཱུྃ་དཀར་པོ། དེའི་འོད་ཀྱིས་ལུས་ཕྱི་ནང་ཐམས་ཅད་གསལ་བ་ལ་སེམས་གཏད་པས་ཟིན་ནོ། །ཉམས་ཀྱི་འོད་གསལ་ཟིན་དཀའ་ན། དབུ་མ་འོད་དཀར་གྱི་སྦུ་གུ་ཡངས་ཤིང་གསལ་བའི་སྙིང་ཁར་ཆོས་འབྱུང་གི་ནང་དུ་འོད་ཀྱི་གོང་བུ་བྱ་མོའི་སྒོང་ང་ཙམ་པ་ཤེལ་གོང་ལྟར་གསལ་ཞིང་འོད་འབར་བ། ཕྱི་ནང་གི་གཟུགས་བརྙན་ཐམས་ཅད་གསལ་བར་འཆར་བ། དེའི་འོད་ཀྱིས་ལུས་ཕྱི་ནང་དང་། ཡུལ་ཁམས་ཐམས་ཅད་གསལ་བར་སྒོམ་པ་ལ་སེམས་གཏད་པས་ཟིན་ནོ། །བཞི་པ་ཡུན་དུ་ཉམས་མྱོང་བསྐྱང་ཚུལ་ནི། རིམ་པ་བཞི་དང་ཉིན་མཚན་བསྲེ་ཞིང་བསྒོམ། ཞེས་པ་ནས། ཕྱག་རྒྱ་ཆེན་པོར་བལྟ། ཞེས་གསུངས་ཏེ། མཐུག་པོའི་འོད་གསལ་འཛིན་ནུས་པས་ནི། སད་པའི་སྐབས་རླུང་དབུ་མར་ཐིམ་པས་དབུ་མའི་ནང་གི་གཏུམ་མོ་དངོས་འབར་སྟོབས་ཀྱིས་དགའ་བཞི་དངོས་སུ་སྐྱེས་པའི་ལྷན་སྐྱེས་ལ་མཉམ་པར་འཇོག་པའམ། འོད་གསལ་གྱི་དམིགས་པ་ཁྱད་པར་བ་བསྒོམ་པས་རླུང་དབུ་མར་ཐིམ་པའི་སྟོང་བཞི་བསྐྱེད་ནས་མཉམ་པར་འཇོག་ཅིང་། དེ་ལས་སྐད་ཅིག་གིས་སྒྱུ་མའི་སྐུར་ལྡང་བ་ལ་སྦྱང་ཞིང་། གཉིད་ཀྱི་སྐབས་སྟོང་པ་རིམ་ཅན་དུ་འཆར་བའི་འོད་གསལ་ཅི་ནུས་སུ་བསྐྱང་ལ་རྨི་ལམ་འཆར་བར་རྩོམ་པ་ན་ལྷ་སྐུར་ལྡང་འཇུག་བྱ། དེ་ལྟར་མི་ནུས་པས་ནི་སད་དུས་རླུང་སྦྱོར་དང་བཅས་པས་ལྷ་སྐུར་ལྡང་ལ་བསྡུས་ནས་རྟོག་མེད་འོད་གསལ་ལ་ཅི་ནུས་སུ་བཞག་སྟེ་སླར་ཡང་ལྡང་འཇུག་བྱ་བ་ལ་བསླབ། གཉིད་དུས་སྣང་མཆེད་ཐོབ་གསུམ་ཅི་རིགས་ངེས་པའི་འོད་གསལ་སྲབ་མཐུག་གང་ཟིན་རྩེ་གཅིག་ཏུ་བསྐྱངས་ལ་རྨི་ལམ་འཆར་བར་རྩོམ་པ་ན་ལྷ་སྐུར་ལྡང་འཇུག་བྱ་བ་ལ་བསླབ་བོ། །གདམ་པ་འདིའི་དགོས་པའི་གཙོ་བོ་ནི། མཐར་ཐུག་གི་འོད་གསལ་མངོན་དུ་བྱེད་པའི་ཆེད་དུ་ཡིན་པས་དེ་ལྟར་ཉིན་མཚན་བསྲེས་ཤིང་བསྒོམས་པས་གསལ་སྟོང་འཛིན་བྲལ་ལྷན་ཅིག་སྐྱེས་པའི་ཡེ་ཤེས་ཀྱི་རང་བཞིན་བརྗོད་དུ་མེད་པའི་འོད་གསལ་རྒྱུན་དུ་འཆར་བར་འགྱུར་རོ། །འོད་གསལ་སྟོང་པ་ཉིད་དོན་སྤྱིའི་ཚུལ་དུ་རྟོགས་པ་ནི་དཔེའི་འོད་གསལ་དང་། སྟོང་ཉིད་མངོན་སུམ་དུ་རྟོགས་ནས་མཐོང་སྤང་རྣམས་སྤངས་ཤིང་། མཐོང་ལམ་མངོན་དུ་ཐོབ་པ་ནི་དོན་གྱི་འོད་གསལ་ཡིན་ནོ། །གསུམ་པ་འབྲས་བུ་ནི། དེ་ལྟར་དཔེ་དོན་གྱི་འོད་གསལ་མངོན་དུ་རྟོགས་པ་དེས། དེའི་རྒྱུན་བསྐྱངས་ནས་ཡུན་དུ་བསྒོམ་པས་སྒྲིབ་གཉིས་ས་བོན་དང་བཅས་པ་སྤངས་ནས་མ་དག་པ་དང་། དག་པའི་སྒྱུ་ལུས་ཀྱི་སྐུར་བཞེངས་ཏེ་ཟུང་འཇུག་གི་གོ་འཕང་མངོན་དུ་བྱེད་པར་འགྱུར་རོ། །ལྔ་པ་ལམ་གྱི་སྐྱེལ་མ་འཕོ་བ་གསེར་འགྱུར་གྱི་རྩི་ནི། འཕོ་བ་གསེར་འགྱུར་མ་བསྒོམ་སངས་རྒྱས་ནི། ཞེས་པ། དབང་པོ་རབ་འབྲིང་ཐ་མའི་ལམ་གྱི་ལས་འཕྲོ་བསྒྲུབ་པའི་རྟེན་བཟུང་བའི་གེགས་ལས་གྲོལ་བས་ལམ་གྱི་སྐྱེལ་མར་འགྱུར་བ་དང་། གོ་འཕང་གཞན་དུ་བསྒྲོད་པས་སམ་རང་བཞིན་མེད་ཀྱང་ཀུན་ཏུ་འཇུག་པའི་ཕྱིར་འཕོ་བ་ཞེས་བྱ་སྟེ། དེ་ལ་བཞི། རྣམ་ཤེས་བླ་མར་འཕོ་བ། སྤྲོས་བཅས་གཟུགས་སྐུར་འཕོ་བ། སྤྲོས་མེད་ཆོས་སྐུར་འཕོ་བ། འཕོ་བའི་འབྲས་བུ་བཤད་པའོ། །དང་པོ་རྣམ་ཤེས་བླ་མར་འཕོ་བ་ལ་གཉིས་ལས། དང་པོ་སྦྱང་པ་ནི། རང་ཉིད་རྡོ་རྗེ་རྣལ་འབྱོར་མའི་སྐུ་སྒྱུ་མ་ལྟ་བུར་གསལ་བའི་ལུས་དབུས་རྩ་དབུ་མ་དམར་པོ་མར་སྣ་ལྟེ་འོག་སོར་བཞིར་ཕུག་རྡུགས་དང་ཡར་སྣ་སྤྱི་བོར་བཅད་ཁ་ཧ་རེ་ཡོད་པ་ཀཱ་ཡིག་དམར་ནག་གིས་བཀག་པ། ནང་སྙིང་ཁའི་ཐད་དུ་རང་སེམས་ཀྱི་ངོ་བོ་ཧཱུྃ་ཡིག་དམར་པོ་འབར་ལ་ཁད་པ། ལྟེ་བའི་ཐད་དུ་ཨ་ཡིག་དམར་པོ་དེ་གཉིས་འོད་ཀྱི་བ་ཐག་གིས་སྦྲེལ་བ་སྤྱི་བོར་པད་ཟླའི་གདན་ལ་རྩ་བའི་བླ་མ་རྡོ་རྗེ་འཆང་སྐུ་མདོག་སྔོན་པོ་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། ལོངས་སྤྱོད་རྫོགས་པའི་ཆས་ཀྱིས་བརྒྱན་ཞིང་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ་སྣང་ལ་རང་བཞིན་མེད་པའི་སྐུ་ཅན་དུ་གསལ་བའི་ཐུགས་རྡོ་རྗེའི་རང་བཞིན་ཧཱུྃ་སྔོན་པོ་འོད་ཟེར་འབར་བར་བསྒོམ། དེའི་དབུ་གཙུག་ནས་ཡར་རྡོ་རྗེ་འཆང་ལ་ཐུག་གི་བར་གྱི་བརྒྱུད་པའི་བླ་མ་ཐོ་བརྩེགས་སུ་བཞུགས་པར་བསྒོམས་ལ། རང་སེམས་བླ་མར་རྟོགས་པས་གུས་ཕྱག་འཚལ། སོགས་ཡན་ལག་བདུན་པ་བྱ། ཁྱབ་བདག་རྡོ་རྗེ་འཆང་ཆེན་ལ་གསོལ་བ་འདེབས། རྡོ་རྗེ་རྣལ་འབྱོར་མ་ལྎ གྲུབ་ཆེན་ཏེ་ལོ་པ་ལྎ པཎ་ཆེན་ནཱ་རོ་ཏ་པ་ལྎ མར་པ་ཆོས་ཀྱི་བློ་གྲོསྎ མི་ལ་བཞད་པ་རྡོ་རྗེ་ལྎ རས་ཆུང་རྡོ་རྗེ་གྲགས་པ་ལྎ སྙན་རྒྱུད་བརྒྱུད་པའི་བླ་མ་ལྎ དྲིན་ཅན་རྩ་བའི་བླ་མ་ལྎ ཟབ་ལམ་འཕོ་བ་འབྱོངས་པར་བྱིན་གྱིས་རློབས། །མཁའ་སྤྱོད་ཞིང་དུ་བསྒྲོད་པར་བྱིན་གྱིས་རློབས། །སྐུ་གསུམ་གོ་འཕང་ཐོབ་པར་བྱིན་གྱིས་རློབས། །ཞེས་གསོལ་བ་ལན་གསུམ་བཏབ་མཐར་བརྒྱུད་པའི་བླ་མ་རྣམས་འོད་དུ་ཞུ་ནས་རྩ་བའི་བླ་མ་ལ་ཐིམ་པར་བསམ། དྲིན་ཅན་རྩ་བའི་བླ་མ་སོགས་ཀྱིས་གསོལ་བ་ལན་མང་དུ་བཏབ། རླུང་རོ་ལན་གསུམ་བསལ་ཏེ། སྟེང་རླུང་འཇམ་པོར་རྔུབ་པ་ལྟེ་འོག་ཏུ་མནན། འོག་རླུང་ཡིད་ཙམ་འཐེན་ལ་ཁ་སྦྱོར་བའི་བུམ་པ་ཅན་བཟུང་ནས་དམིགས་པ་སྙིང་ཁའི་ཧཱུྃ་དེ་ཐུར་དུ་སོང་ནས་ཨ་དང་འདྲེས་པར་བསམ། རླུང་དེ་ཕྱིར་དབྱུང་བ་དང་མཉམ་དུ་ཧིཀྐ་ཅེས་བརྗོད་ལ་ཧཱུྃ་དེ་སྐར་མདའ་ཆད་པ་ལྟར་དབུ་མའི་ནང་ནས་གྱེན་དུ་སོང་བས་ཀྵ་ཡིག་བསལ་ཏེ་བླ་མའི་ཐུགས་ཀའི་ཧཱུྃ་ལ་ཐིམ་པར་བསམ། སླར་ནང་དུ་རྔུབ་དུས་ཀ་ཞེས་བརྗོད་ལ་བླ་མའི་ཐུགས་ཀའི་ཧཱུྃ་ལས་རང་སེམས་ཀྱི་ཧཱུྃ་ཕྱིར་བྱེ་ནས་སྙིང་ཁར་སྔར་ལྟར་གནས་པ་ལས་ཨ་ཡིག་ཀྱང་ཕྱིར་ཆད་དེ་རང་གནས་སུ་གནས་པར་བསམ། སླར་ཡང་རླུང་བྱིན་རྔུབས་དང་བསྟུན་སྔར་ལྟར་བསྒོམས་ལ་རླུང་ཁུག་ལྔ་བཅུ་སོང་བ་ན་ངལ་གསོ་ཞིང་བླ་མ་ལ་གསོལ་བ་གདབ། ཡང་སྔར་བཞིན་སྦྱང་ལ་རླུང་ཁུག་ལྔ་བཅུ་བཟུང་། མཐར་སྤྱི་བོའི་བླ་མ་ཚེ་དཔག་མེད་དམར་པོ་ཚེ་བུམ་བསྣམས་པ་ལོངས་སྤྱོད་རྫོགས་པའི་ཆས་ཅན་ཡུམ་གོས་དཀར་མོ་དང་བཅས་པ་རྡོ་རྗེའི་སྐྱིལ་ཀྲུང་གིས་བཞུགས་པར་གནས་བསྒྱུར་བའི་ཐུགས་ཀར་པད་ཟླའི་སྟེང་དུ་སྲཱིཿཡིག་དམར་པོའི་མཐར་སྔགས་ཀྱིས་བསྐོར་བ། དེ་ལས་འོད་ཟེར་དམར་པོ་དཔག་ཏུ་མེད་པ་འཕྲོས་པས་རྒྱལ་བ་མཆོད་ནས་བྱིན་རླབས་ཐམས་ཅད་བདུད་རྩིའི་རྣམ་པར་ཐུགས་ཀའི་སྲཱིཿདང་ཕྱག་གི་བུམ་པར་ཐིམ། ཡང་འོད་འཕྲོས་ཏེ་ཕྱི་སྣོད་ཀྱི་འཇིག་རྟེན་གཞལ་ཡས་ཁང་དང་། ནང་བཅུད་ཀྱི་སེམས་ཅན་ཐམས་ཅད་ཚེ་དཔག་ཏུ་མེད་པར་བསྒྱུར་ནས། དེ་དག་གི་ཚེ་བཅུད་ཐམས་ཅད་བསྡུས་ཏེ་སྲཱིཿདང་བུམ་པར་ཐིམ་པས་ཐུགས་ཀའི་སྲཱིཿདང་ཕྱག་གིས་བུམ་པ་ལས་བདུད་རྩིའི་རྒྱུན་བབས་པ་ཚངས་བུག་ནས་ཞུགས། དབུ་མའི་ནང་དང་ལུས་ཀྱི་ནང་ཐམས་ཅད་གང་། དྭངས་མ་སྙིང་ཁའི་ཧཱུྃ་ལ་ཐིམ་པས་དུས་མ་ཡིན་པའི་འཆི་བའི་འཇིགས་པ་ཞི་ནས་འཆི་མེད་ཚེ་ཡི་དངོས་གྲུབ་ཐོབ་པར་བསམ་ལ་ཚེ་གཟུང་དང་། ཚེ་སྙིང་བཟླ། མཐར་བླ་མ་ཚེ་དཔག་མེད་འོད་དུ་ཞུ་ནས་སྙིང་གའི་ཧཱུྃ་དང་། ཡུམ་འོད་དུ་ཞུ་བ་ལྟེ་བའི་ཨ་ལ་ཐིམ་ཞིང་དབུ་མའི་ཡས་སྣ་སྣ་ཚོགས་རྡོ་རྗེ་དང་ཀྵ་ཡིག་དམར་ནག་གིས་བཀག་པར་བསམ་ལ་མཉམ་པར་བཞག་གོ་ཐུན་རེ་ལ་རླུང་ཁུག་བརྒྱ་རེར་བྱས་པའི་ཐུན་གསུམ་ཙམ་ཉིན་རེ་བསྒོམ་པས་ཞག་གསུམ་མམ་བདུན་གྱིས་འབྱོངས་ཏེ་རྟགས་ནི་སྤྱི་བོ་གཡའ་བ་དང་། ཚ་ཚག་བྱེད་པ། སྐྲངས་པ། ཁྲག་དང་ཆུ་སེར་འབབ་པ་སོགས་བྱུང་ན་བྱང་བ་ཡིན་པས་དེ་ཕྱིན་རྒྱུན་དུ་མ་བརྗེད་ཙམ་བྱས་པས་ཆོག ཧ་ཅང་བྱང་ཆེ་ནས་འཕོ་བའི་གེགས་འབྱུང་བར་དོགས་ན་རང་ལུས་མཆོད་རྟེན་ནག་པོ་མགོ་མཐུར་དུ་བརྟན་པའི་རྩེ་མོའི་ནང་དུ་རང་སེམས་ཀྱི་ངོ་བོ་ཐིག་ལེ་དམར་པོ་ཞིག་བསྒོམ་ལ་སེམས་གཏད་པས་ཞི་བར་འགྱུར་རོ། །གཉིས་པ་ལས་ལ་སྦྱར་བ་ནི། འཆི་ལྟས་ཤར་ཚེ་དགའ་ཞིང་ཞེན་པ་བཏང་། ཞེས་པ་ནས། ལམ་ནས་འཕངས། ཞེས་པའི་བར་གྱིས་བསྟན་ལ། ནད་དྲག་པོས་བཏབ་པ་སོགས་ཕྱི་དང་རླུང་གཡས་གཡོན་གང་རུང་གཅིག་ནས་ཞག་ལྔར་རྒྱུ་ན་ལོ་གསུམ། བཅུར་རྒྱུ་ན་ལོ་གཉིས། ཉི་ཤུས་ལོ་གཅིག ཉེར་ལྔས་ཟླ་བ་དྲུག ཉེར་དགུས་ཟླ་བ་གཅིག་ནས་འཆི་བར་བཤད་པ་སོགས་ནང་གི་འཆི་ལྟས་ཏེ། ནད་སོགས་ཕྱིའི་འཆི་ལྟས་བཟློག་པའི་ཐབས་སྨན་རིམ་དང་། ཁྱད་པར་ཚད་པའི་ནད་ལ་མགྲིན་པའི་འཁོར་ལོར་ངོ་བོ་བླ་མ་ལ་རྣམ་པ་ཆུ་ཤེལ་གྱི་མཆོད་རྟེན། དེ་བཞིན་གྲང་བ་ལ་སྙིང་གར་བླ་མ་མེ་ཤེལ་གྱི་མཆོད་རྟེན། བད་ཀན་ལ་ལྟེ་བར་གསེར་གྱི་མཆོད་རྟེན། འདུས་པ་ལ་སྤྱི་བོར་རླུང་གི་མཆོད་རྟེན་དུ་བསྒོམ་ལ། རླུང་སྦྱོར་དང་བཅས་ནད་ཀྱི་གཉེན་པོར་གྱུར་པའི་བདུད་རྩི་འབེབས་པ་སོགས་དང་། སྙིང་ག་ཆུའི་གནས་སུ་པདྨ་ཧེ་རུ་ཀ་དང་དུམ་ཅན་མ་མེའི་རང་བཞིན། མགྲིན་པ་མེ་ཡི་གནས་སུ་བཛྭ་ཧེ་རུ་ཀ་དང་ལཱ་མ་ཆུའི་རང་བཞིན། སྤྱི་བོ་རླུང་གི་གནས་སུ་རནྟ་ཧེ་རུ་ཀ་དང་གཟུགས་ཅན་མ་སེར་མོ་སའི་རང་བཞིན། ལྟེ་བ་སའི་གནས་སུ་བུདྷ་ཧེ་རུ་ཀ་མཁའ་འགྲོ་མ་དང་བཅས་པ་རླུང་གི་རང་བཞིན་རྣམ་པ་དང་དགོས་པ་དེ་བསྒོམ་ལ་འབྱུང་བ་རང་རང་གྱི་གཉེན་པོར་གྱུར་པའི་བདུད་རྩི་རླུང་སྦྱོར་དང་བཅས་པས་ཕབ་པས་ལུས་བཀང་བ་དང་། ཚ་གྲང་གི་ནད་གང་ཡིན་ཀྱང་གཏུམ་མོའི་གེགས་སེལ་ལྟར་བསྒོམ་པ་སོགས་བྱ་བ་དང་། ནང་དང་གསང་བའི་འཆི་ལྟས་བཟློག་ཐབས་ནི་སྡོམ་འབྱུང་སོགས་གཞན་ལས་བཤད་པ་ལྟར་བྱའོ། །དེ་ལྟ་བུས་ཀྱང་མ་ལྡོག་པར་ངེས་པར་འཆི་བ་འདུག་ན། དག་པ་མཁའ་སྤྱོད་ཀྱི་ཞིང་དུ་འགྲོ་སྙམ་པའི་དགའ་བ་དང་། ཚེ་འདིའི་ཞེན་འཁྲིས་རྦད་ཀྱིས་བཅད་ལ་སེམས་བསྐྱེད་རྒྱ་ཆེར་བྱ་ཞིང་སྨོན་ལམ་གདབ། ལུས་གནད་བདུན་དང་བཅས་པའམ། མ་ནུས་ན་སེངྒེའི་ཉལ་སྟབས་བྱས་ཏེ་དག་པའི་ཞིང་ཁམས་སམ་རིག་འཛིན་གྱི་གནས་ཡིད་ལ་བྱ་ཞིང་དེར་སྐྱེ་བའི་འཕན་པ་དྲག་པོ་བཏང་། དེ་ནས་སྟོང་ར་དབུས་མ་ཧཱུྃ་དང་ཨ་དང་སྤྱི་བོར་བླ་མ་རྣམས་སྔར་ལྟར་བསྒོམས་ལ་གསོལ་བ་བཏབ་ནས་རླུང་སེམས་ངོ་བོ་ཧཱུྃ་ཨ་དང་བསྲེ། ཧཱུྃ་ཡིག་མདའ་འཕང་བ་ལྟར་གྱེན་དུ་སོང་ནས་ཀཱ་ཡིག་བསལ་ཏེ་བླ་མའི་ཐུགས་ཀའི་ཧཱུྃ་ལ་བསྟིམ་པ་ཡང་ཡང་བྱས་ལ། བླ་མའི་ཐུགས་དང་རང་སེམས་དབྱེར་མེད་དུ་འདྲེས་ནས་སྲོག་གི་རྒྱུན་བ་ཐག་ལྟ་བུ་དེ་རྦད་ཀྱིས་ཆད་པར་བསམ་པ་དང་། བླ་མ་ཡང་དག་པའི་ཞིང་ངམ། རིག་འཛིན་གྱི་གནས་གང་འདོད་པ་དེར་དཔག་ཆེན་གྱི་མདའ་འཕང་བ་ལྟར་གཤེགས་པར་བསམ་མོ། །གཉིས་པ་སྤྲོས་བཅས་གཟུགས་སྐུར་འཕོ་བ་ནི། ལུས་ཐ་མལ་དུ་ཞེན་པའི་གཉེན་པོར་ཡི་དམ་གྱི་ལྷ་བསྒོམ། ངག་ཐ་མལ་དུ་ཞེན་པའི་གཉེན་པོར་ཡི་དམ་གྱི་སྔགས་བཟླ། སེམས་ཐ་མལ་དུ་ཞེན་པའི་གཉེན་པོར་གཟུགས་སུ་སྣང་བ་ཐམས་ཅད་སྣང་སྟོང་། སྒྲ་ཐམས་ཅད་གྲགས་སྟོང་། སེམས་ཀྱི་རྟོག་པ་ཐམས་ཅད་གསལ་སྟོང་འཁོར་འདས་ཀྱིས་བསྡུས་པའི་ཆོས་ཐམས་ཅད་སྒྱུ་མ་ཙམ་དུ་ཤེས་པར་བྱས་ལ། རླུང་ནང་དུ་རྔུབ་པ་དང་མཉམ་དུ་ལྷའི་སྣང་བ་བསྡུ། ཕྱིར་དབྱུང་བ་དང་མཉམ་དུ་སེམས་ཧཱུྃ་དུ་གནས་པ་དེ་འཁོར་ལོ་སྡོམ་པའི་རྡོ་རྗེ་རྣལ་འབྱོར་མར་གྱུར་ནས་གང་འདོད་པ་དེར་གཤེགས་པར་བསམ་མོ། །གསུམ་པ་སྤྲོས་མེད་ཆོས་སྐུར་འཕོ་བ་ནི། འཆི་བ་ལ་མངོན་དུ་ཕྱོགས་ཏེ་འབྱུང་བ་ཐིམ་སྡུད་ཀྱི་རྟགས་རྣམས་ཤར་བའི་ཚེ་འཕོ་བྱ་འཕོ་བྱེད་སོགས་ཀྱི་འཁོར་གསུམ་མི་དམིགས་པ་དེ་ཁོ་ན་ཉིད་ཀྱི་ལྟ་བ་འཁྲུལ་མེད་ཀྱི་སྟེང་དུ་བཞག་བྱ་འཇོག་བྱེད་མེད་པར་བཞག་པའོ། །བཞི་པ་འཕོ་བའི་འབྲས་བུ་ནི། ཆོས་སྐུ་བླ་མ་རྒྱལ་བའི་ཞིང་དུ་འཕོ། ཞེས་པ། ཆོས་སྐུ་ནི་འོད་གསལ་དུ་འཕོ་བ་དང་། བླ་མ་ནི་དག་པའི་སྒྱུ་ལུས་སུ་འཕོ་བ་དང་། རྒྱལ་བའི་ཞིང་ཁམས་ནི་སྤྲུལ་སྐུའི་འཕོ་བ་སྟེ། དེ་བས་ན་འཕོ་བ་གཅིག་ལའང་འབྲས་བུ་དེ་དག་ཡོད་པ་ནི་སྦྱང་བའི་དབང་གིས་ཡིན་ནོ། །དྲུག་པ་གྲོང་འཇུག་སྦྲུལ་ལྤགས་འདོར་ལེན་ནི། ལྷག་པར་གྲོང་འཇུག་སྦྲུལ་ལྤགས་འདོར་ལེན་ནི། ཞེས་སོགས་གསུངས་ཏེ། རྣམ་ཤེས་རང་ལུས་ཀྱི་གྲོང་ལས་འཕོས་ནས་གཞན་ཤི་བའི་ལུས་མ་ཉམས་པའི་གྲོང་དུ་འཇུག་པས་གྲོང་འཇུག་སྟེ། སྦྲུལ་ལྤགས་འདོར་ལེན་དང་འདྲ་བས་དེ་ལྟར་གསུངས་པ་ཡིན་ལ། འདིའི་ལག་ལེན་དང་། བསྒོམ་ཚུལ་ཁྲིད་ཡིག་རྙིང་པ་རྣམས་སུ་ཡོད་ཀྱང་། དེང་སང་མྱང་བ་ཐོན་མཁན་མེད་པ་དང་། ཐུན་མོང་གིས་དངོས་གྲུབ་ཆེན་པོའི་ཕྱོགས་སུ་གཏོགས་པས་དེང་སྐབས་དུས་དབང་གིས་འགྲུབ་དཀའ་བར་བཤད་པས་འདིར་མ་བཤད་ལ། ཤེས་པར་འདོད་ན་ཁྲིད་ཡིག་རྙིང་པ་རྣམས་སུ་རྟོགས་པར་བྱའོ། །རྩ་བའི་གཉིས་པ་ཤེས་རབ་ཡེ་ཤེས་ཀྱི་དབང་དང་འབྲེལ་བ་མཁའ་འགྲོའི་གསང་སྒྲོགས་འོག་སྒོ་བདེ་བ་ཆེན་པོའི་ཁྲིད་ནི་འདིར་དཀྱུས་སུ་ཁྲིད་པའི་སྲོལ་མེད་པས་མ་བཤད་ལ། ཤེས་པར་འདོད་ན་ཀུན་མཁྱེན་ཆེན་པོས་མཛད་པའི་མཁའ་འགྲོའི་གསང་སྒྲོག་བདེ་བ་ཆེན་པོའི་ཁྲིད་ཡིག་ལ་བལྟ་བར་བྱའོ། །རྩ་བའི་གསུམ་པ་ཚིག་དབང་དང་འབྲེལ་བ་ཕྱག་རྒྱ་ཆེན་པོ་ཡེ་ཤེས་གསལ་བྱེད་ནི། ཕྱག་རྒྱ་ཆེན་པོ་ཡེ་ཤེས་གསལ་བྱེད་ནི། ཞེས་པ་སྟེ། དེའང་ཡེ་ཤེས་ཞེས་པ་གཞི་གདོད་མའི་གནས་ལུགས་སེམས་ཀྱི་ངོ་བོ་གསལ་བ་གཞིའི་ཡེ་ཤེས། དེ་རང་ངོ་ཤེས་པ་ལམ་གྱི་ཡེ་ཤེས། དེ་མངོན་དུ་གྱུར་པ་འབྲས་བུའི་ཡེ་ཤེས་ལ་འཇོག་པའོ། །གསལ་བྱེད་ཅེས་པ་ནི། དེ་ལྟ་བུའི་གཞི་ལམ་འབྲས་གསུམ་དབྱེར་མེད་དུ་ཉམས་སུ་ལེན་པ་ལ་མི་ཤེས་པ་ཤེས་པར་བྱེད་པའམ། མི་གསལ་བ་གསལ་བར་བྱེད་པས་ན་གསལ་བྱེད་ཅེས་པའོ། །ཕྱག་རྒྱ་ཆེན་པོ་དེ་མངོན་དུ་བྱེད་པའི་ཐབས་ལ་གསུམ། སྒོམ་པ་སྤྲུལ་སྐུའི་གནད་ངོས་བཟུང་བ། སྒོམ་བྱེད་ལོངས་སྤྱོད་རྫོགས་པའི་སྐུའི་བྱ་བ་བསྟན་པ། བསྒོམ་བྱ་ཆོས་སྐུ་ཕྱག་རྒྱ་ཆེན་པོའི་དོན་བཤད་པའོ། །དང་པོ་ནི། སྒོ་གསུམ་གཡོ་མེད་སྒོ་ལྔ་ཧར་གདངས་བཞག །ཅེས་པ་བུམ་དབང་གི་ལམ་གྱིས་ལུས་ཀྱི་ཐིག་ལེ་དག །གསང་དབང་གི་ལམ་གྱིས་ངག་གི་ཐིག་ལེ་དག །གསུམ་པའི་ལམ་གྱིས་ཡིད་ཀྱི་ཐིག་ལེ་དག་པས་སྒོ་གསུམ་གཡོ་མེད་དུ་གྱུར་པས་སྒོ་ལྔ་ཧར་གདངས་ཏེ་དབང་ཤེས་ཀྱི་འཇུག་པ་མེད་པར་བྱེད་ལ། སྒོ་ལྔའི་ཤེས་པ་དེ་ཁ་བཞི་པའི་ཐིག་ལེ་སྐབས་དེར་འོད་གསལ་ལས་སྒྱུ་ལུས་སུ་ལངས་མཁན་དེ་ཡིན་པས་དེ་སྦྱང་པ་ཡིན་ནོ། །དེ་ཡང་ལུས་རྩ་ངག་རླུང་ཡིད་ཐིག་ལེ་སྦྱངས་པས་སེམས་དབེན་པའམ་རྣམ་པར་མི་རྟོག་པར་འགྱུར་ལ། དེ་ལས་འོད་གསལ་རྟག་བཅུར་ལངས་པའི་སྒྱུ་ལུས་དང་། དེ་སྦྱང་བ་ལའང་འདི་བཤད་པས་ལམ་འདི་ནི་ཕྱག་རྒྱ་ཆེན་པོ་མ་རྟོགས་པ་རྟོགས་བྱེད། རྟོགས་ནས་གོམས་བྱེད་གོམས་ནས་འབྲས་བུ་ངོ་མར་འགྲོ་བ་ཡིན་ནོ། དེ་ལྟར་སྒོ་གསུམ་གཡོ་མེད་དུ་མ་གྱུར་ན་རྣམ་སྣང་ཆོས་བདུན་དང་ལྡན་པས་འཁོད། དེའང་ལུས་ཀྱི་བྱ་བ་གཞན་ལྟ་ཅི་གཡོ་འགུལ་ཙམ་ཡང་མི་བྱ་བ་ལུས་དབེན། ངག་རླུང་རོ་དགུ་ཕྲུགས་སུ་བསལ་ནས་སྟེང་འོག་གི་རླུང་རང་པོ་དང་སྨྲ་བ་བཅད་དེ་བཞག་པ་ངག་དབེན། སེམས་ཀྱིས་དུས་གསུམ་གྱི་སྤྲོས་པ་དང་། ཕྱག་རྒྱ་ཆེན་པོ་སྒོམ་སྙམ་པ་དང་། བསྒོམ་པར་བྱ་བ་དང་། ཕྱག་རྒྱ་ཆེན་པོ་སྙམ་པ་སོགས་མཚན་མ་དང་བཅས་པའི་བསྒོམ་པ་ཐམས་ཅད་དོར་ནས་བུ་ཆུང་ལྷག་པར་གནས་པ་བཞིན་དུ་སེམས་ལྷོད་དེ་སལ་ལེ་ཤིག་གེར་བཞག་པ་སེམས་དབེན། དེ་ལྟར་མ་བསྒོམ་པར་བཞག་པས་སེམས་གཡོ་བ་མེད་པར་སྒོ་ལྔའི་དབང་ཤེས་ཀྱི་བྱ་བ་བྲལ་ནས་ཧ་རེ་ལུས་པར་འགྱུར་རོ། །གཉིས་པ་སྒོམ་བྱེད་ལོངས་སྤྱོད་རྫོགས་པའི་སྐུའི་བྱ་བ་བསྟན་པ་ནི། བལྟས་པས་མཐོང་མེད་སེམས་ཀྱི་མཚན་ཉིད་ལྟོས། ཞེས་པ། གོང་ལྟར་བཞག་པས་གནས་མ་ཐུབ་ན་སེམས་འཚོལ་ཏེ། དེ་ཡང་སེམས་དེ་ལ་ཇི་ལྟ་བུ་ཞིག་འདུག དང་པོ་གང་གིས་བསྐྱེད། ཚུལ་ཇི་ལྟར་སྐྱེ། བར་དུ་གང་ན་གནས། ཐ་མ་གང་དུ་འགགས། རྐྱེན་གང་ཞིག་གིས་བྱས་ཞིག་ཏུ་བརྟགས་པས་དང་པོར་སྐྱེ་མ་མྱོང་། ཐ་མར་འགགས་མ་མྱོང་། བལྟ་བྱ་དམིགས་པའི་ཡུལ་མེད་པས། ལྟ་བྱེད་ནམ་མཁའ་མེ་ཏོག་བཞིན་དུ་ཡལ། བལྟ་བྱ་ལྟ་བྱེད་ཟད་པའི་རྗེས་ལ་སེམས་ཞེས་བྱ་བ་འདི་བཏགས་པ་ཙམ་མ་གཏོགས། ངོ་བོ་ངོས་བཟུང་དུ་གྲུབ་པ་མི་འདུག་སྙམ་དུ་ཤེས་པར་འགྱུར། དམིགས་སུ་མེད་པས་མ་བཅོས་རང་སོར་ཞོག །གཞན་དུ་མ་ཚོལ་ངོ་བོ་རྟོགས་པར་གྱིས། ཞེས་པ། སེམས་དེ་དངོས་མེད་མོ་གཤམ་གྱི་བུ་ལྟ་བུར་འདུག་གམ་ཅི་ལྟར་འདུག་བརྟགས་པས། ངོ་བོ་སྟོང་པ་རང་བཞིན་གསལ་བ། མཚན་ཉིད་བདེ་སིང་ངེ་བ། དངོས་པོར་མ་གྲུབ། དངོས་མེད་དུ་མ་གྲུབ་པས་དམིགས་སུ་མེད་པ་ཞིག་ཏུ་རྟོགས་པ་ན། དེ་གར་རང་སོར་བཞག་སྟེ་བྱིང་རྨུགས་ཀྱི་དབང་དུ་མ་ཤོར་བ་བྱ། དེ་ལས་གཞན་དུ་མ་གཡོས་པ་དེ་སྲིད་མ་ཡེངས་པ་ཡིན་ལ། གཡོས་ན་ཡེངས་བ་སྟེ་སླར་མ་ཡེངས་པར་བྱ། མ་ཡེངས་བ་དེ་དྲན་པ་ཡིན་ལ། དེ་ལས་གཡོས་པར་ཤེས་པའི་ཚེ་དེ་ཁ་ཤེས་བཞིན། དེས་ན་དྲན་ཤེས་འཇུག་པ་གཅིག་ཡིན་ནོ། །དེ་ནས་སྣང་བ་དང་བསྲེ་བ། འཛིན་པ་དང་བསྲེ་བ། དབྱིངས་རིག་བསྲེ་བ་གསུམ་ལས། དང་པོ་ནི། རང་སྣང་གང་ཡིན་གཅིག་གི་སྟེང་དུ་དྲན་ཤེས་དེ་བཀོད་ནས་བཞག་པས་སྣང་བ་སྟོང་པ་དང་། སྟོང་པ་སེམས་སུ་མཐོང་། དེ་ཡང་སེམས་ནང་དུ་མ་ལུས་ཤིང་སྣང་བ་ཕྱིར་མ་ལུས། སྣང་སེམས་གཅིག་ཏུ་འདྲེས་ནས་ནམ་མཁའ་ལྟ་བུའི་ཕྱམ་གྱིས་སོང་། འདིས་སྣང་བ་ཐམས་ཅད་ལམ་དུ་ཁྱེར་ནུས་ཏེ། གཅིག་གི་རྟ་ཕོ་གང་ཡིན་པ། དེ་ནི་ཀུན་གྱི་རྟ་ཕོ་ཡིན། ཞེས་གསུངས་པ་ལྟར་རོ། གཉིས་པ་འཛིན་པ་དང་བསྲེ་བ་ནི། ཞེ་སྡང་དྲག་པོ་ཞིག་ལྷང་གིས་སྐྱེས་པའི་དུས་སུ་ཞེ་སྡང་དེའི་ངོ་བོ་ལ་གཅེར་གྱིས་བལྟས་པས། ཞེ་སྡང་གི་ངོ་བོ་སྟོང་སང་གིས་འགྲོ། སྟོང་པ་དེ་ག་ཆོས་སྐུ། ཆོས་སྐུར་རྟོགས་པའི་དུས་ན་ཞེ་སྡང་བྲོས་པའང་མེད། ཞེ་སྡང་སྤང་བའང་མེད། ཞེ་སྡང་དེ་བསྒྱུར་བའང་མིན། ཞེ་སྡང་ཉིད་རང་གྲོལ་དུ་སོང་བ་སྟེ། དེའི་ངོ་བོ་དེ་ཆོས་སྐུ་ཡིན་པས་མཐར་ཐུག་པའོ། །དེ་བཞིན་འདོད་ཆགས་དང་། གཏི་མུག་སོགས་ལའང་འགྲེའོ། །གསུམ་པ་དབྱིངས་རིག་བསྲེ་བ་ནི་དབྱིངས་སྟོང་པར་ཤར་ན་ཤར་དུས་དེར་སྟོང་པ་ལ་བརྟགས་པས་སྟོང་པ་དེ་རིག་པར་འགྲོ། རིག་པ་དེའི་ངོ་བོ་ལ་བལྟས་པས་རིག་བྱ་རིག་བྱེད་དང་བྲལ་ནས་ཕྱོགས་ཐམས་ཅད་དང་བྲལ་བ་ལ་རང་བཞིན་མེད་པ་ཞེས་བཏག་པ་དེ་མཐོང་། དེ་དབྱིངས་དང་རིག་པ་འགྲེས། ཉམས་རྟོགས་ཟུང་དུ་ཆུབ། ཞི་ལྷག་གཉིས་སུ་མེད། ལམ་གང་ཤར་ལ་སྤང་བླང་མི་དགོས། སྲིད་ཞི་རོ་མཉམ་པར་འགྱུར་ཏེ། དེ་སྤྱོད་ལམ་བཞི་དང་བསྲེས་པས་ཕྱག་རྒྱ་ཆེན་པོར་འཆར་རོ། །གསུམ་པ་བསྒོམ་བྱ་ཕྱག་རྒྱ་ཆེན་པོའི་དོན་བཤད་པ་ལ། ལྟ་བ་མ་བཅོས་པའི་ཡེ་ཤེས་ངོས་བཟུང་བ། སྒོམ་པ་དེ་ལ་མ་བཅོས་པར་བཞག་པ། སྤྱོད་པ་སྔ་ཕྱི་གཉིས་མེད་དུ་བསྲེ་བ། འབྲས་བུ་ནམ་མཁའ་ལྟ་བུའི་འཆར་ཚུལ་དང་བཞི་ལས། དང་པོ་ནི། གཞི་ནི་མ་བཅོས་ཡེ་ནས་ལྷུན་གྲུབ་ལ། ཞེས་མདོར་བསྟན། ཕྱག་ནི་གཉིས་མེད་ཡེ་ཤེས་ངོ་ཡིས་ཟིན། ཞེས་པ་ནས། ཆོས་སྐུའོ། ཞེས་པས་རྒྱས་པར་བཤད་པ་སྟེ། གཞི་དེ་ཇི་ལྟ་བུ་ཞེ་ན་ཕྱག་རྒྱ་ཆེན་པོའོ། །དེ་ཡང་སངས་རྒྱས་ཀྱི་ཡེ་ཤེས་ཁོ་ན་ལས་གཞན་དུ་མེད་པས་གཞི་འབྲས་དབྱེར་མེད། དེས་ན་རང་ཅག་གི་བློས་གཤིས་གང་དུ་བཟུང་ཡང་། འཛིན་བྱེད་འཁྲུལ་པར་འགྲོ་བ་སྟེ། ནམ་མཁའ་འདོམ་གྱིས་གཞལ་བ་བཞིན་དོན་དམ་བློའི་སྤྱོད་ཡུལ་དུ་མ་གྱུར། ཞེས་སྨྲ་བཞིན་དུ་བློས་གཞལ་གཞལ་གཅིག་ཀ་བྱས་པའོ། །འོན་ཀྱང་དེ་ལྟར་ཡིན་མོད་ཀྱང་། དོན་དམ་དང་ཀུན་རྫོབ་གཉིས་སུ་སྒྲོ་བཏགས་ནས་གཞན་ལ་མ་བསྟན་ན་མི་གོ །མ་གོ་ན་མི་རྟོགས། མ་རྟོགས་ན་སངས་རྒྱས་མི་ཐོབ་པས་ཐ་སྙད་རྣམ་པར་བཞག་པའི་ཚེ། གཞི་ལམ་འབྲས་བུ་འདིའོ་ཞེས་བཞག་སྟེ། དེ་ལ་གཞི་ཕྱག་རྒྱ་ཆེན་པོ། དངོས་པོ་གཤིས་ཀྱི་གནས་ལུགས། སངས་རྒྱས་ཀྱི་དགོངས་པ། སེམས་ཅན་གྱི་སེམས་ཉིད་ཁ་དོག་དང་དབྱིབས་སུ་མ་གྲུབ། མཐའ་དང་དབུས་བྲལ། རྒྱ་མ་ཆད་ཕྱོགས་མ་ལྷུང་། ཡོད་མ་མྱོང་། མེད་མ་མྱོང་། མ་འཁྲུལ་མ་གྲོལ། རྒྱུ་ཡིས་མ་བསྐྱེད། རྐྱེན་གྱིས་མ་བསྒྱུར། སངས་རྒྱས་དགའ་ཏེ་མ་མཛད། སེམས་ཅན་བསྒྲིམ་སྟེ་མ་བཅོས། རྟོག་ངོར་བཟང་དུ་མ་སོང་། འཁྲུལ་ངོར་ངན་ཏུ་མ་སོང་། ཀུན་ལ་ཁྱབ་པར་གནས་པས་གཞི་ཞེས་བྱའོ། །ལམ་ཕྱག་རྒྱ་ཆེན་པོ་ནི། གཞིའི་སྟེང་དུ་ལམ་དུ་བླང་བྱའི་ཆོས། འཇོག་དུས་དམིགས་མེད་དུ་འཇོག གནས་དུས་ཡེངས་མེད་དུ་གནས། ཁྱེར་དུས་འཛིན་མེད་དུ་ཁྱེར། འཆར་དུས་ཆོས་ཉིད་དུ་འཆར། གྲོལ་དུས་རང་གྲོལ་དུ་འགྲོ་བ་གཅིག་ཉམས་སུ་ལེན་པའོ། །འབྲས་བུ་ཕྱག་རྒྱ་ཆེན་པོ་ནི། གྲོལ་བྱ་གྲོལ་བྱེད་རེ་ཞིང་དོགས་པ་དང་བྲལ་བ། བློ་ཟད་ཆོས་ཟད། འཛིན་ཞེན་གྱི་ལྷད་མ་ཞུགས་པ། བློ་ལས་འདས་ཤིང་སྨྲ་བརྗོད་དང་བྲལ་བ་ཞིག་གོ །གཉིས་པ་སྒོམ་པ་དེ་ལ་མ་བཅོས་པར་བཞག་པ་ནི། ཐ་མ་རང་ལུགས་ཆེན་པོར་བཞག་པ་ནི། ཞེས་པ་ནས་ལུས་ཐོབ་འགྱུར། ཞེས་པ། གཞི་དེ་ལྟ་བས་ལམ་དེ་དང་མཐུན་པར་ཤེས་པ་འབད་རྩོལ་གྱི་འཇུག་པ་ཐམས་ཅད་དང་བྲལ་ནས་ཡིད་ལ་བྱེད་པ་མེད་པ་དེ་ལ་ཤེས་པ་བྱ་བྲལ་ཞེས་བྱ་ཞིང་། དེ་ལྟ་བུ་ལ་ཤེས་བཞིན་ཆེན་པོའི་བྱ་རས་ཟིན་པས་མ་ཡེང་བ་དེ་ལ་བཞག་བྱ་འཇོག་བྱེད་དང་བྲལ་བ་ནམ་མཁའ་ལ་ནམ་མཁའ་སྦྱོར་བའི་ཚུལ་གྱིས་མཉམ་པར་བཞག་པས་ཆོས་སྐུ་རྒྱ་ཆད་ཕྱོགས་ལྷུང་མེད་པར་ཕྱོགས་མེད་དུ་རང་ཤར་ཞིང་། གང་ལྟར་ཤར་ཡང་ཤར་དུས་ནས་ཉམས་མྱོང་བདེ་ལ་ཟག་པ་མེད་པ་ལྐུག་པའམ་གཞོན་ནུ་མའི་བདེ་བ་བཞིན། འདི་འདྲ་ཞིག་འདུག་ཅེས་སུས་ཀྱང་མཚོན་མི་ནུས་ཤིང་ངོ་བོར་གྲུབ་པ་མེད་པ་ཞིག་ཡིན་པས། རྟོག་གེ་བས་མི་ཤེས་ཤིང་མི་རྟོགས་ལ། རང་རིག་པའི་ཡེ་ཤེས་ཁོ་ནས་མངོན་དུ་བྱེད་པ་ཡིན་ནོ། །གསུམ་པ་སྤྱོད་པ་སྔ་ཕྱི་གཉིས་མེད་དུ་བསྲེ་བ་ནི། ཕྱི་རོལ་ཡུལ་སྣང་ཆོས་རྣམས་ཇི་སྙེད་པ། ཞེས་པ་ནས། རང་དག་ལྟོས། དེ་ལྟ་བུའི་མཉམ་བཞག་ལས་ལངས་ནས་རྗེས་ཤེས་ཀྱི་ཤེས་པ། དགའ་མི་དགའ། ལེགས་མི་ལེགས་སོགས་གང་ཤར་ཡང་གསེར་གླིང་དུ་ཕྱིན་ན་རྡོ་བ་མེད་པ་བཞིན། སེམས་དེ་ཉིད་གཞི་མེད་རྩ་བྲལ་ལ། མ་འགགས་པའི་རྩལ་ཅིར་ཡང་འཆར་བས། ཤར་བ་དེ་ཉིད་རང་གྲོལ་དུ་འགྲོ་སྟེ། འདི་ལ་འོད་གསལ་མ་བུ་བསྲེ་བ་ཅེས་གསུངས་ཤིང་། སེམས་ཉིད་ལྷན་ཅིག་སྐྱེས་པའི་ཡེ་ཤེས་དེའི་ངོ་བོ་ལ་རྣམ་རྟོག་གི་མཚན་མས་གོས་པ་མེད་པས་ན་རྒྱུད་ཆད་མ་མྱོང་བ། དེ་ལ་སེམས་ཀྱི་རང་བཞིན་ནམ། འོད་གསལ་བ་ཞེས་བྱ་ལ། གང་ཟག་བརྟན་པ་མ་ཐོབ་པ་དེ་ལས་རྣམ་པར་རྟོག་པ་ལངས་པ་ན། གང་ཤར་གྱི་སྟེང་དུ་འཇོག་པས། སྣང་སྟོང་ངམ། གསལ་སྟོང་ངམ་རིག་སྟོང་ཟུང་འཇུག་ཏུ་འཆར་བ་འོད་གསལ་བུ་སྟེ། དེས་སྣང་བའི་ཚོགས་ཞིག་ནས་འོད་གསལ་མ་ལ་ཐིམ་ནས་གནས་པ་ནི་འོད་གསལ་མ་བུ་བསྲེ་བ་ཞེས་བྱའོ། །བཞི་པ་འབྲས་བུ་ནམ་མཁའ་ལྟ་བུའི་འཆར་རིམ་ནི། སེམས་ཉིད་སྐྱེ་མེད་སྟོང་པ་ཆོས་ཀྱི་སྐུ། ཞེས་པ་ནས། ལོངས་སྤྱོད་རྫོགས། ཞེས་གསུངས་ལ། གཤིས་ཆོས་སྐུ། གདངས་སྤྲུལ་སྐུ། ཟུང་འཇུག་ལོངས་སྐུ་སྟེ། དེ་ཡང་། སྒྲིབ་གཉིས་རང་དག་གཟུང་འཛིན་མཐའ་དང་བྲལ། །འདུ་ཤེས་བློ་དང་འཁོར་འདས་ཆོས་རྣམས་ཟད། །ཅེས་པ་མཚན་མར་འཛིན་པ་ལ་སོགས་པའི་འདུ་ཤེས་དང་གཟུང་འཛིན་བྲལ་བས་བློ་ཟད་ཆོས་ཟད་དུ་གྱུར་ཏེ། ཤེས་སྒྲིབ་དང་ཉོན་སྒྲིབ་གཉིས་རང་སར་དག་པས་སྤང་བ་ཆེན་པོ་དང་། མཁྱེན་བརྩེའི་ཡོན་ཏན་ཇི་སྙེད་རང་ལ་རྫོགས། ཞེས་པ། ཇི་ལྟ་བ་དང་ཇི་སྙེད་པ་མཁྱེན་ཞིང་གཟིགས་པ་དང་། དམིགས་པ་མེད་པའི་བརྩེ་བ་ལ་སོགས་པའི་ཡོན་ཏན་ཐམས་ཅད་དང་ལྡན་པ་ནི་རྟོགས་པ་ཆེན་པོ། དེ་ལྟར་སྤང་བ་ཆེན་པོས་འཁོར་བ་ལ་མི་གནས། རྟོགས་པ་ཆེན་པོས་ཞི་བ་མྱང་འདས་ལ་མི་གནས་པའི་རང་བཞིན་འཚང་རྒྱ་བའོ། །བསམ་བརྗོད་བློ་འདས་སངས་རྒྱས་རང་འཁྲུང་ཡིན། ཞེས་པ། དེ་ལྟ་བུའི་སངས་རྒྱས་དེའང་གཞན་ནས་བྱུང་བ་དང་། གསར་དུ་རྙེད་པ་ལྟ་བུ་མིན་པར་སེམས་ཉིད་དེ་ཀ་གློ་བུར་གྱི་དྲི་མས་བཏང་བས་སངས་རྒྱས་རང་འཁྲུངས་སུ་གྱུར་པ་ཡིན་ནོ། །རྩ་བའི་བཞི་པ་ལམ་བློ་ནས་ཆོད་པ་བར་དོའི་ལམ་ཁྱེར་ནི། བར་དོ་ངོ་སྤྲོད་ཡང་དག་ཟབ་དོན་བསྟན། ཞེས་པ། སྔར་བཤད་པའི་ལམ་གྱིས་བརྩོན་འགྲུས་ཅན་ཚེ་འདི་གར་འཚང་རྒྱ་བ་དང་། བརྩོན་འགྲུས་འབྲིང་པོ་སྲིད་པ་བར་མ་དོར་འཚང་རྒྱ་བ་དང་། ཤིན་ཏུ་ལེ་ལོ་ཅན་སྐྱེ་བ་བརྒྱུད་ནས་འཚང་རྒྱ་བའི་གང་ཟག་དང་གསུམ་ལས། ཕྱི་མ་གཉིས་ལ་གདམས་པ་འདི་བློ་ཆོད་དུ་བྱ་བར་བསྟན་པ་ཡིན་ལ། ཕྱོགས་གཉིས་སུ་མ་ལྷུང་བས་སམ་སྔོན་རྗེས་གཉིས་ཀྱི་བར་ན་གནས་པས་བར་དོ་དང་། དུས་དེར་བློ་ལ་གདམས་ངག་དྲན་པ་ཙམ་བྱུང་ན་རེས་གསལ་ཐོབ་ནས་ལམ་ཆོད་པར་འགྱུར་བས་བློ་ཆོད་ཀྱི་རྣལ་འབྱོར་ཞེས་བྱའོ། །དེ་ལ་གསུམ། ལུས་ལྡན་གཞིའི་བར་དོ། ངེས་ཤེས་རྟགས་ཀྱི་བར་དོ། ངོ་སྤྲོད་འབྲས་བུའི་བར་དོའོ། །དང་པོ་ནི། སྐྱེ་ཤི་རྨི་ལམ་སྲིད་པའི་བར་དོ་གཅོད། ཅེས་པ་བར་དོ་གསུམ་དུ་ཕྱེ་བ་སྟེ། སྐྱེས་ནས་མ་ཤི་བར་ལ་སྐྱེ་གནས་བར་དོ། གཉིད་ལོག་ནས་མ་སད་བར་རྨི་ལམ་བར་དོ། ཤི་ནས་མ་སྐྱེས་བར་སྲིད་པ་བར་དོའོ། བར་དོའི་གདམས་པ་མི་དགོས་པའི་གང་ཟག་བསྟན་པ་ནི། བལྟར་མེད་བལྟས་པས་མཐོང་མེད་མཐོང་བའི་མཆོག །ཅེས་པ་ནས། རང་ཤར་ལྟོས། ཞེས་པའི་བར་གྱིས་བསྟན་ཏེ། གཞི་འབྲས་དབྱེར་མེད་པའི་སེམས་ཉིད་འདི་ཀ་དངོས་དངོས་མེད་ཡོད་དང་མེད་པ་སོགས་གང་དུའང་མ་གྲུབ་པས་བསམ་གྱིས་མི་ཁྱབ་ཅིང་བལྟར་མེད་ལ་བལྟས་པས་མི་མཐོང་བའི་གནས་ལུགས་དེ་ཉིད་མཐོང་བ་མཆོག་ཡིན་ལ། དེ་ལྟ་བུའི་རང་རིག་རྣམ་པ་གསལ་ཡང་། ངོ་བོ་སྟོང་པ་གློ་བུར་གྱི་སྒྲིབ་གཡོགས་ཐམས་ཅད་དང་བྲལ་བས། མཆོག་ཏུ་མི་འགྱུར་བའི་བདེ་བ་ཆེན་པོ་དང་། རྣམ་ཀུན་མཆོག་ལྡན་གྱི་སྟོང་པ་ཉིད་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་རྣམ་པར་དག་པ་ཡེ་ནས་རང་ལ་གནས་བཞིན། དེ་ཉིད་ཐབས་གྲོལ་ལམ་གྱིས་གཅུན་པས་རང་ཤར་རང་གྲོལ་གྱི་ཚུལ་དུ་སྐུ་གསུམ་རང་བཞིན་དབྱེར་མེད་དུ་མངོན་དུ་གྱུར་པ་དག་ནི་བར་དོའི་གདམས་པ་ལ་ལྟོས་མི་དགོས་པ་ཡིན་ནོ། །བར་དོའི་གདམས་ངག་དགོས་པའི་གང་ཟག་ནི། མ་རྟོགས་ལུས་ལྡན་བར་དོ་རྣམ་གསུམ་ལ། ཞེས་པ་དེ་ལྟར་མ་རྟོགས་པ་རྣམས་ལ་བར་དོ་གསུམ་གྱི་གདམས་པ་དགོས་པ་སྤྱིར་བསྟན་ནས། གཉིས་པ་ངོ་ཤེས་རྟགས་ཀྱི་བར་དོ་ནི། བསྐྱེད་རིམ་སྒྱུ་ལུས་འོད་གསལ་ཆོས་སྐུར་བསྲེ། ཞེས་པ། བསྐྱེད་པའི་རིམ་པ་ལ་གོམས་ཤིང་རྫོགས་རིམ་གཏུམ་མོ་དང་སྒྱུ་ལུས་ལ་མྱོང་བ་ཅི་རིགས་ཐོན་ཏེ་ཉིན་མཚན་གྱི་འོད་གསལ་མངོན་དུ་བྱས་ནས་གོམས་པས་ཐོབ་ལ་བར་དོ་དང་པོའི་ལམ་ཁྱེར་དང་། བསྐྱེད་རིམ་དང་གཏུམ་མོ་སྒྱུ་ལུས་ལ་མྱོང་བ་ཅི་རིགས་ཐོན་ཞིང་། རྨི་ལམ་སྒྱུ་མར་འབྱོང་པ་ཙམ་ལ་བར་དོ་གཉིས་པའི་ལམ་ཁྱེར། བསྐྱེད་རིམ་དང་གཏུམ་མོ་སྒྱུ་ལུས་སོགས་སྒོམ་ཞིང་མཚན་མོ་རྨི་ལམ་སྦྱང་སྤེལ་ནུས་པ་ཙམ་ལ་བར་དོ་གསུམ་པའི་ལམ་ཁྱེར་དགོས་པར་བསྟན་པའོ། །དེ་ཡང་སད་པའི་དུས་སུ་བསྐྱེད་རིམ་དང་གཏུམ་མོ་སྒྱུ་ལུས་སོགས་ལ་གནད་དུ་བསྣུན་ཅིང་། གཉིད་པའི་དུས་སུ་རྨི་ལམ་དང་འོད་གསལ་གྱི་གདམས་པ་ལ་གནད་དུ་བསྣུན་པ་དང་། གནས་སྐབས་ཐམས་ཅད་དུ་བདག་གཞན་སྣོད་བཅུད་ལ་སོགས་པའི་སྣང་བ་ཐམས་ཅད་བར་དོའི་སྣང་བ་ཡིན་སྙམ་པ་དང་། ཁྱད་པར་འཇིགས་སྐྲག་དང་མྱ་ངན་སྐྱེ་བ་སོགས་ཀྱི་སྣང་རྐྱེན་ཐོག་ཏུ་བྱུང་བ་ན་བར་དོའི་འཁྲུལ་སྣང་དུ་བསམ་སྟེ་དེ་ཁོ་ན་ཉིད་ཀྱི་ངང་དུ་འཇོག་པའམ་བདེན་མེ་སྒྱུ་མ་ལྟ་བུར་བསམ་པ་དང་། སྒྱུ་མ་ལྟ་བུའི་ལྷ་སྐུའི་ལྡང་འཇུག་བྱ་བ་ལ་བསླབ། འཆི་བ་དང་བར་དོའི་རྣམ་བཞག་རྣམས་ཡིད་ལ་གསལ་ཞིང་བརྟན་ངེས་པར་བྱ་དགོས་སོ། །གསུམ་པ་ངོ་སྤྲོད་འབྲས་བུའི་བར་དོ་ལ་གསུམ་ལས། རབ་ཆོས་སྐུ་ཐུག་ཕྲད་ཀྱི་བར་དོར་འཆི་བ་ལམ་དུ་ཁྱེར་བ། འབྲིང་སྲིད་པ་སྤྱི་ལུགས་ཀྱི་བར་དོར་བློ་ཆོད་དུ་བཏང་བ། ཐ་མ་ཉིང་མཚམས་སྦྱོར་བའི་བར་དོར་སྨོན་ལམ་གྱི་འཕེན་པ་བཞག་པའོ། །དང་པོ་ནི། ས་ཆུ་མེ་རླུང་འབྱུང་བ་རིམ་གྱིས་ཐིམ། ཞེས་པ་ནས། ཡང་རབ་བོ། ཞེས་པའི་བར་གྱིས་བར་དོ་དང་པོ་བསྟན་ཏེ་འཆི་བའི་ཚེ་རགས་པ་ཉི་ཤུ་ཐིམ་ཚུལ་ནི། གཟུགས་ཀྱི་ཕུང་པོ་ཐིམ་པས་ལུས་ཉམས་ཆུང་ཞིང་ནུས་པ་ཟད། མེ་ལོང་ལྟ་བུའི་ཡེ་ཤེས་ཐིམ་པས་སེམས་མི་གསལ་ཞིང་རབ་རིབ་ཏུ་འགྱུར། ས་ཁམས་ཐིམ་པས་ལུས་སྐེམས་ཤིང་རིད། མིག་དབང་ཐིམ་པས་མིག་མི་གསལ། གཟུགས་ཐིམ་པས་ལུས་ཀྱི་མདངས་ཉམས། ཚོར་བའི་ཕུང་པོ་ཐིམ་པས་ལུས་ཀྱི་ཚོར་བ་ཆུང་། མཉམ་ཉིད་ཡེ་ཤེས་ཐིམ་པས་ཚོར་བ་གསུམ་མི་དྲན། ཆུ་ཁམས་ཐིམ་པས་ལུས་ཀྱི་རྔུལ་དང་ཁ་ཆུ་ལ་སོགས་སྐམ། རྣ་བའི་དབང་པོ་ཐིམ་པས་ཕྱི་ནང་གི་སྒྲ་མི་གསལ། སྒྲ་ཐིམ་པས་རང་གི་སྒྲ་མི་གསལ། འདུ་ཤེས་ཀྱི་ཕུང་པོ་ཐིམ་པས་སེམས་ཅན་རྣམས་མི་དྲན། སོར་རྟོགས་ཡེ་ཤེས་ཐིམ་པས་ཉེ་དུ་ལ་སོགས་པའི་མིང་མི་དྲན། མེ་ཁམས་ཐིམ་པས་ཟས་མི་འཇུ། སྣའི་དབང་པོ་ཐིམ་པས་སྟེང་རླུང་དལ་གྱིས་འགྲོ། དྲི་ཐིམ་པས་རང་གི་ལུས་ཀྱི་དྲི་མི་བྲོ། འདུ་བྱེད་ཀྱི་ཕུང་པོ་ཐིམ་པས་འདུས་ཀྱི་བྱ་བ་ཐམས་ཅད་ལ་མི་འཇུག །བྱ་གྲུབ་ཡེ་ཤེས་ཐིམ་པས་བྱ་བ་དང་དགོས་པ་མི་དྲན། རླུང་ཁམས་ཐིམ་པས་རླུང་བཅུ་རང་གི་གནས་ནས་འཕོ། ལྕེ་དབང་ཐིམ་པས་ལྕེ་ཐུང་ཞིང་སྦོམ་པར་འགྱུར། རོ་ཐིམ་པས་རོ་དྲུག་ཉམས་སུ་མི་མྱོང་ཕྲ་བ་ནང་གི་འབྱུང་བ་ཐིམ་ཚུལ་ནི། ས་ཆུ་ལ་ཐིམ་པས་ལུས་ཀྱི་ཟུང་མི་ཐུབ་ཅིང་བག་བཞི་ས་ལ་ལྷུང་། སོ་དྲེག་ཆགས། ཁ་ཆུ་དང་སྣ་ཆུ་འཛག །ཆུ་མེ་ལ་ཐིམ་པས་ཁ་སྣ་སྐམ། ཡན་ལག་སྡུད་མི་ནུས། སྔར་བས་ཚ་ཞིང་རྔུལ། མེ་རླུང་ལ་ཐིམ་པས་ཤ་མདངས་ཤོར་ཞིང་སྣའི་བྱ་གཤོགས་ཆག ལུས་ཀྱི་དྲོད་མཐོ་རིས་སུ་སྐྱེ་ན་ཡར་དང་། ངན་སོང་དུ་འགྲོ་ན་མར་སྡུད། རླུང་རྣམ་པར་ཤེས་པ་ལ་ཐིམ་པས་སྒྲ་ངར་ངར་པོ་འབྱིན་ཞིང་དབུགས་བརྩེགས། མིག་གྱེན་དུ་བཟློག་ནས་སྐྱིག་བུ་འབྱིན། དེ་དུས་སེམས་ཉིད་ནང་ན་གསལ་བ་འབྱུང་། དེ་ལྟར་འབྱུང་བཞི་ཐིམ་པ་དང་དུས་མཚུངས་སུ་ཡུལ་གཟུགས་སྒྲ་ལ་སོགས་པའང་སྡུད་དོ། ཤིན་ཏུ་ཕྲ་བ་ཐིམ་ཚུལ་ནི་རྣམ་པར་ཤེས་པ་སྣང་བ་ལ་ཐིམ་པས་ནང་རྟགས་དུ་བ་དང་། ཕྱི་རྟགས་སྤྲིན་མེད་པའི་ནམ་མཁའ་ལ་ཟླ་འོད་ཤར་བ་ལྟ་བུའི་སྣང་བ་དཀར་ལམ་པ་འབྱུང་། ཞེ་སྡང་ལས་གྱུར་པའི་རྟོགས་པ་སོ་གསུམ་འགགས་པས་དགྲ་མི་ཤའོ་རྩར་བྱུང་ཡང་ཞེ་སྡང་མི་སྐྱེ། སྣང་བ་མཆེད་པ་ལ་ཐིམ་པས་ནང་རྟགས་མེ་ཁྱེར་ལྟ་བུ། ཕྱི་རྟགས་ནམ་མཁའ་གཡའ་དག་པ་ལ་ཉི་འོད་ཕོག་པ་ལྟ་བུའི་སྣང་བ་དམར་ལམ་པ་འབྱུང་། འདོད་ཆགས་ལས་གྱུར་པའི་རྟོག་པ་བཞི་བཅུ་འགགས་པས་ཡིད་འོང་ལྷའི་བུ་མོ་རྩར་བྱུང་ཡང་ཆགས་པ་མི་སྐྱེ། མཆེད་པ་ཉེར་ཐོབ་ལ་ཐིམ་པས་ནང་རྟགས་མར་མེ་ལྟ་བུ་དང་། ཕྱི་རྟགས་ནམ་མཁའ་མཚམས་ཀྱི་སྨག་གིས་ཁྱབ་པ་ལྟ་བུའི་སྣང་བ་ནག་ལམ་པ་འབྱུང་། གཏི་མུག་ལས་གྱུར་པའི་རྟོགས་པ་བདུན་འགགས་པས། མུན་པའི་ཁྲོད་དུ་བཞག་ཀྱང་གཏི་མུག་མི་སྐྱེ། དེ་མ་ཐག་དྲན་པ་ཉམས་ནས་ནག་ཐུམ་གྱིས་འགྲོ། ཐོབ་པ་འོད་གསལ་ཐིམ་པས་ཕྱི་རྟགས་སྐྱ་རེངས་ཤར་བ་ལྟ་བུའམ་ནམ་ལངས་ཀ་ལྟ་བུ། ནང་རྟགས་སྤྲིན་མེད་པའི་ནམ་མཁའ་ལྟ་བུ་འབྱུང་། དྲན་མེད་དེ་སངས་པ་ན་ཟླ་འོད་དང་ཉི་འོད་དང་མུན་པ་སྟེ་སློང་བྱེད་ཀྱི་རྐྱེན་གསུམ་དང་བྲལ་བའི། ཐོ་རེངས་དུས་ཀྱི་ནམ་མཁའ་གཡའ་དག་པ་ལྟ་བུ་སྟོང་པ་མཐའ་དབུས་མེད་པ་ཞིག་འཆར། འདི་དུས་སྣང་བ་རིམ་གྱིས་ཐིམ་ནས་རླུང་རྣམས་སྙིང་གར་འདུས་པ་དང་། སྤྱི་བོར་ཕ་ལས་ཐོབ་པའི་དྭངས་མ་ཧཾ་ཡིག་གི་གཟུགས་སུ་གནས་པ་དེ་སྤྱི་མགྲིན་གྱི་རྩ་མདུད་རལ་བས་མར་འོང་། གསང་གནས་ན་མ་ལས་ཐོབ་པའི་དྭངས་མ་ཨ་ཤད་ཀྱི་རྣམ་པར་གནས་པ་དེ་ལྟེ་གསང་གི་མདུད་པ་རལ་བས་ཡར་ཡོང་ནས་སྙིང་གའི་དབུ་མར་འདུས་པས་རང་བཞིན་སྐྱེ་མེད་གཉུགས་མ་བདེ་སྟོང་ཆོས་ཀྱི་སྐུ་མངོན་དུ་འཆར་བ་ཡིན་ནོ། །དེ་ལྟར་ངེས་པར་བྱས་ནས་འཆི་ཁའི་རྟགས་རྣམས་ཤར་བ་ན་གོང་སྨོས་འཆི་བ་བསླུ་བའི་ཐབས་ལ་ནན་ཏན་དུ་འབད། ཅིས་ཀྱང་ལྡོག་ཏུ་མེད་པར་འཆི་ངེས་པ་བྱུང་ན། ཡོ་བྱད་ཡོད་ན་བླ་མ་དཀོན་མཆོག་ལ་མཆོད་པ་དང་། ཕོང་པ་ལ་སྦྱིན་གཏོང་སོགས་བྱ། ཉེ་དུ་དང་མཛའ་བཤེས་ལུས་ལོངས་སྤྱོད་སོགས་གང་ལའང་མ་ཆགས་པར་བྱ། རྡོ་རྗེ་སེམས་དཔའི་སྒོམ་བཟླས་དང་། སྡོམ་པ་དང་དམ་ཚིག་ཉམས་ཆགས་ཐམས་ཅད་བཤགས་སྡོམ་དྲག་པོ་བྱ། བླ་མ་དང་ཡི་དམ་མཁའ་འགྲོ་མཆོད་ཅིང་འཆི་བ་འོད་གསལ་དང་། བར་དོ་སྒྱུ་ལུས་སུ་ཁྱེར་ནུས་པ་སོགས་ཀྱི་གསོལ་བ་དྲག་ཏུ་གདབ། བཀའ་སྡོད་ལ་གཏོར་མ་ཕུལ་ཏེ་དེ་ལྟ་བུའི་སྡོང་གྲོགས་བཅོལ། འཆི་བའི་སྟོང་པ་བཞི་ངོས་བཟུང་ནས་འོད་གསལ་ལ་མཉམ་པར་འཇོག་ཅིང་ཆོས་སྐུ་མངོན་དུ་བྱས་ནས་དེ་ལས་ལོངས་སྤྱོད་རྫོགས་པའི་སྐུར་ལྡང་སྟེ་སེམས་ཅན་གྱི་དོན་མཐའ་ཡས་པ་བྱའོ་སྙམ་པའི་འཕེན་པ་དྲག་ཏུ་བཏང་། དེ་ནས་འཆི་བའི་དུས་ཤེས་པ་སྔ་མ་འགགས་ཏེ་འདས་པའི་རྗེས་མི་བཅད། ཕྱི་མ་མ་སྐྱེས་པའི་མ་འོངས་པའི་མདུན་མི་བསུ། ཤེས་པ་སྔ་ཕྱིའི་བར་དེར་ད་ལྟར་གྱི་ཤེས་པ་གང་ལའང་མ་བརྟག་པ། བློ་བསམ་དུ་མེད། ཚིག་གིས་བརྗོད་དུ་མེད། དཔེས་མཚོན་དུ་མེད་པ་དེ་གའི་ངང་དུ་མ་ཡེངས་པར་བཞག་པས་ཐིམ་རིམ་ཤར་གྲོལ་དུ་སོང་བ་འོད་གསལ་བུ། དེ་གཞིའི་འོད་གསལ་སྒྲིབ་མེད་དུ་ཤར་བའི་མ་པང་དུ་ཞུགས་ཏེ། དེ་ངོ་ཤེས་པས་ཆོས་ཀྱི་སྐུར་སངས་རྒྱས་ནས་དེ་ལས་ལོངས་སྤྱོད་རྫོགས་པ་དང་སྤྲུལ་སྐུར་ལངས་ནས་སེམས་ཅན་གྱི་དོན་བྱེད་པའོ། །ཡང་ན་གོང་སྨོས་ཐིམ་རིམ་རྣམས་རྫོགས་ནས་ཐམས་ཅད་སྟོང་པ་འོད་གསལ་འཆར་བ་ངོས་ཟིན་པ་དེ་མ། སྔར་སྒོམ་སྟོབས་ལས་བྱུང་བའི་དཔེའི་འོད་གསལ་དེ་བུ། དེ་གཉིས་མ་བུ་འཕྲད་པས་དོན་གྱི་འོད་གསལ་དུ་གནས་གྱུར་པ་དེ་ཆོས་སྐུ་དེས་སྒྲིབ་པ་རྣམས་སྤངས་ནས་དེ་ལས་ལོངས་སྤྱོད་རྫོགས་པའི་སྐུར་ལྡང་ཞིང་། སྤྲུལ་སྐུས་སེམས་ཅན་གྱི་དོན་བྱེད་པ་ནི་འཆི་བ་ཆོས་སྐུར་འཚང་རྒྱ་བའོ། །གཉིས་པ་འབྲིང་སྲིད་པ་སྤྱི་ལུགས་ཀྱི་བར་དོ་བློ་ཆོད་དུ་བཏང་བ་ནི། དེ་མ་ཟིན་ན་རླུང་གསུམ་རྐྱེན་གྱིས་འཆིང་། འབྲིང་པོ་ཆུ་ལས་ཉ་ལྟར་ལོངས་སྐུར་ལྡངས། ཞེས་པ་དེ་ལྟར་བར་དོ་དང་པོའི་འོད་གསལ་དེ་ཉིད་ཁམས་དྲུག་ལྡན་གྱི་སེམས་ཅན་ཐམས་ཅད་ལ་འཆི་བའི་ཚེ་འབྱུང་ཡང་། མན་ངག་གི་གནད་ལ་གོམ་པ་ཆུང་བས་ངོ་མ་ཤེས་པ་དང་། ཤེས་ཀྱང་གནས་མ་ནུས་པའི་རྐྱེན་གྱིས་དྭངས་མ་ལྔ་འདུས་ཀྱི་ཚོགས་པ་སོ་སོར་གྱེས་ཤིང་འོད་གསལ་ལས་རླུང་ཅུང་ཟད་གཡོ་བར་རྩོམ་པ་དང་། ཉེར་ཐོབ་འཆར་ཞིང་འོད་གསལ་འགགས་ལ། དེ་མ་ཐག་མཆེད་པ་དང་སྣང་བ་ཤར་ནས་རྣམ་ཤེས་རླུང་གི་བཞོན་པ་དང་བཅས་པ་སྒོ་དགུ་གང་རུང་ནས་ཐོན་ཏེ་བེམ་རིག་བྲལ་མ་ཐག་བར་དོའི་ཡིད་ལུས་སུ་ཀྲོང་གིས་སྐྱེ་བ་ནི། སྲིད་པ་བར་དོའི་མཚན་གཞི་དངོས་ཡིན་ལ། བར་དོའི་རྟགས་དྲུག་སོགས་འབྱུང་། ཉམས་མི་དགའ་ཞིང་རིག་པ་རྟེན་མེད་པས་སྡོད་མི་ཚུགས། སྣང་མུན་འོད་ཀྱི་བར་དོ་སྐྱ་རེང་ཤར་བའི་སྣང་བ་ཙམ་ཞིག་འབྱུང་ངོ་། །འཆི་ཀའི་བྱ་བ་རྣམས་སྔོན་དང་འདྲ་ལ། བར་དོར་སྒྱུ་མ་ལྟ་བུའི་ལྷ་སྐུར་ལྡང་ནས་ལོངས་སྤྱོད་རྫོགས་སྐུ་མངོན་དུ་བྱའོ་སྙམ་པའི་འདུན་པ་བྱ། འཆི་རིམ་སྣང་གསུམ་དང་བཅས་པ་ངོས་ཟིན་པར་བྱས་ཏེ་འོད་གསལ་ལ་ཅི་གནས་སུ་མཉམ་པར་བཞག་ནས་ལུགས་ལྡོག་གི་སྣང་གསུམ་ཤར་མཐར་བར་དོའི་ལུས་ལྷ་སྐུ་སྒྱུ་མ་ལྟ་བུར་ལྡང་། དེའི་རྒྱུན་ལ་འཇུག་ལྡང་ཡང་ཡང་བྱས་པས་རིམ་གྱིས་དོན་གྱི་འོད་གསལ་མངོན་དུ་གྱུར་ནས་དེ་ལས་དག་པའི་སྒྱུ་ལུས་སུ་ལྡང་བ་ནི་བར་དོ་ལོངས་སྐུར་འཚང་རྒྱ་བའོ། །གསུམ་པ་ཐ་མ་ཉིང་མཚམས་སྦྱོར་བའི་བར་དོར་སྨོན་ལམ་གྱི་འཕེན་པ་བཞག་པ་ནི། རྩལ་ལྔ་ཟེར་ལྔ་དུག་གསུམ་ལས་ཀྱི་དབང་། ཞེས་པ་ནས། སྤྲུལ་སྐུ་ཐོབ། ཅེས་པའི་བར་གྱིས་བསྟན་པས། གོང་དུ་བཤད་པ་ལྟར་བར་སྲིད་ཀྱི་ལུས་དེ་ལ། འཇིགས་པའི་སྒྲ་བཞི་ཡ་ང་བའི་གཡང་ས་གསུམ་སོགས་སྡིག་སེམས་བག་ཆགས་ཀྱི་རང་གཟུགས་འཁྲུལ་སྣང་འཇིགས་སྐྲག་གི་ཉེར་འཚེ་བརྗོད་ཀྱིས་མི་ལངས་ཤིང་། ལས་ཀྱི་དབང་གིས་གླིང་བཞི་ལ་སོགས་པ་རིགས་དྲུག་གི་གནས་ཐམས་ཅད་བསྒྲོད་པས་ཤིན་ཏུ་ངལ་ཞིང་དུབ། ལས་ཀྱི་གཤིན་རྗེ་ལ་སོགས་པ་གཤེད་མས་གར་སོང་ལ་འདེད་དེ་གནོད་ཅིང་འཚེ། ཉོན་མོངས་པ་ལྔའི་རྩལ་གྱིས་རྒྱུད་ལྔའི་ལམ་གྱི་ཉེར་དུ་ཁྲིད། ཚེ་ཚད་ནི་ཞག་བདུན་ཡིན་ཞིང་དེ་ལ་སྐྱེ་སྲིད་ལེན་པར་མ་གྱུར་ན་ཅུང་ཟད་བརྒྱལ་བ་ལྟ་བུའི་འཆི་ཆུང་རེ་ལས་སླར་བར་དོར་སྐྱེས་ནས་ཞག་བདུན་གྱིས་སྐྱེ་སྲིད་འཛིན་ལ། དེར་ཡང་སྐྱེ་བའི་རྒྱུ་རྐྱེན་གྱི་ཚོགས་པ་མ་རྙེད་ན་སྔར་བཞིན་ལས་ཞག་ཞེ་དགུ་ཚུན་ལ་སྐྱེ་བ་ལེན། རླུང་ལྔ་རྒྱུ་ཞིང་དུག་ལྔ་འདུས་པའི་རྟེན་འབྲེལ་ལས། རྣམ་བྱང་འོད་ཀྱི་ལམ་ལྔ་དང་། རིགས་དྲུག་གི །མངལ་བཟང་ངན་དང་། སྐྱེ་གནས་བཞིའི་སྣང་བ་འཆར་ཏེ་སྐྱེ་སྲིད་ལ་འཇུག་པའི་ཚེ་བརྫུས་ཏེ་སྐྱེ་ན་གནས་ལ་སྲེད། དྲོད་གཤེར་ལས་སྐྱེ་ན་དྲི་དང་རོ་ལ་ཆགས། མངལ་དང་སྒོང་ལས་སྐྱེ་ན་ཕ་མ་ཉལ་པོ་བྱེད་པ་ལ་ཆགས། བྱེ་བྲག་ཏུ་ལྷར་སྐྱེ་ན་སྐྱེ་གནས་དེ་རིན་པོ་ཆེའི་གཞལ་མེད་ཁང་དུ་སྣང་ཞིང་ལྷའི་བུ་དང་བུ་མོ་མཐོང་ནས་སྲེད་པ་དང་། ལྷ་མ་ཡིན་ལ་ནགས་ཚལ་ཉམས་དགའ་དང་ལྷ་མིན་ཕོ་མོ། མི་ལས་ལུས་འཕགས་པོར་སྐྱེ་ན་རྟ་ཕོ་མོའི། དེས་བརྒྱན་པའི་མཚོ། འཛམ་བུའི་གླིང་དུ་མི་ཕོ་མོ། བ་ལང་སྤྱོད་ན་བ་ལ་ཕོ་མོས་བརྒྱན་པའི་མཚོའི་བ་ལང་། སྒྲ་མི་སྙན་ན་བྱ་ངང་པ་ཕོ་མོས་བརྒྱན་པའི་མཚོའི་ངང་པ་ཕོ་མོ། ངན་འགྲོར་སྐྱེ་ན་འཇིགས་པའི་འཁྲུལ་སྣང་ཅི་རིགས་ཤར་ཏེ་སྐྱབས་འཚོལ་བ་ལས། དུད་འགྲོ་ལ་ས་ཕུག་དང་བྲག་ཁུང་། ཡི་དྭགས་ལ་སྦྲ་དང་ཕྱར་ལྟིང་། དམྱལ་བ་ལ་ལྕགས་ཀྱི་ཁང་པ་སོགས་མཐོང་ནས་དེར་སྐྱབས་ཕྱིར་བྲོས་པས་སྐྱེ་བ་ལེན་ནོ། །འཆི་ཁ་གཞན་རྣམས་གོང་དང་འདྲ་ཞིང་། དག་པའི་ཞིང་དུ་འགྲོ་བའམ་རིག་འཛིན་ནམ་ཕ་མ་འདི་ལྟ་བུར་སྐྱེ་བ་ལེན་ཏེ་སངས་རྒྱས་ཐོབ་པར་ཤོག་ཅིག་སྙམ་པའི་སྨོན་ལམ་ཡང་ཡང་གདབ། དེ་ནས་བར་དོར་འཁྲུལ་སྣང་འཆར་བའི་ཚེ་ཡི་དམ་གྱི་ལྷའི་དཀྱིལ་འཁོར་དུ་ལྡང་ཞིང་འོད་གསལ་དུ་བསྡུས་ཏེ་མཉམ་པར་འཇོག་པ་དང་། སྐྱེ་གནས་མཐོང་ཞིང་ཆགས་སྡང་སྐྱེ་བའམ་སྐྱབས་ཚོལ་བའི་དུས། དེ་དག་བླ་མ་ཡབ་ཡུམ་མམ་ཡི་དམ་ཡབ་ཡུམ་གྱི་དཀྱིལ་འཁོར་དུ་བསྒོམ་ཏེ་དབང་ཞུ་བ་སོགས་དང་། འོ་སྔར་ཡང་འདི་ལྟར་བྱས་པས་འཁོར་བར་འཁྱམས། ད་ཡང་བྱས་ན་འཁོར་བར་འཁྱམས་པར་འགྱུར་སྙམ་བསམ་ལ་དགག་པར་བྱ་བདུན་ཕྲག་དང་པོ་ལ་ཁེག་ན་ཕྱི་མ་སླའོ། །དེ་ནས་མངོན་པར་དགའ་བ་ལ་སོགས་པའི་ཞིང་ཡིད་ལ་བྱས་ཏེ་དེར་བརྫུས་ཏེ་སྐྱེ་བའི་འཕེན་པ་དྲག་པོ་བཏང་ལ། འཕོ་བའི་མན་ངག་གིས་འཕོས་པས་སྒྱོགས་དང་འཁྲུལ་འཁོར་གྱི་ཚུལ་དུ་ཐེ་ཚོམ་མེད་པར་སྐྱེ་བར་གསུངས་སོ། །སྔགས་ལ་སྤྱོད་ཅིང་སེམས་ཅན་གྱི་དོན་བྱེད་པར་ནུས་པའི་གང་ཟག་ཏུ་སྐྱེ་བར་འདོད་ན་བར་དོའི་ཤེས་པ་ཧཱུྃ་དུ་བསྒྱུར་ཏེ་སྐར་མདའ་འཕང་བ་བཞིན། སྔར་སྨོན་ལམ་བཏབ་པའི་ཕ་མ་ཡི་དམ་ཡབ་ཡུམ་དུ་མོས་པའི་ཁ་ནས་ཞུགས་པར་བསམ་པས་ངེས་པར་སྐྱེ་བ་ལེན་ཅིང་རྟེན་དེ་ལ་ཟབ་མོའི་ཆོས་འདི་ཉིད་དང་འཕྲད་དེ་ཉམས་སུ་བླངས་ནས་འབྲས་བུ་ཐོབ་པར་འགྱུར་རོ། །འདི་ནི་བསམ་བཞིན་སྐྱེ་བ་ལེན་ནས་འབྲས་བུ་ཐོབ་པ་སྤྲུལ་པའི་སྐུར་སངས་རྒྱས་པ་ཞེས་བྱའོ།། རྩ་བའི་ལྔ་པ་གཅིག་ཅར་བས་བྱ་སྤྱོད་ཐམས་ཅད་ཚོགས་སུ་བསྒྱུར་བ་ལ། ལམ་སྤྱིའི་གེགས་སེལ། བྱ་སྤྱོད་ཚོགས་སུ་བསྒྱུར་བ་གཉིས་ལས་དང་པོ་ནི། གདམས་པ་སྤྱི་ལ་གེགས་བསལ་བདུད་ངོས་བཟུངས། ཞེས་པ་གེགས་ནི་ལུས་གནད་བཅའ་བ་མ་ལེགས་པ་དང་། རླུང་བཟུང་མ་ལེགས་པ་དང་། དམིགས་པ་འཛིན་མ་ལེགས་པས་འབྱུང་བ་ཕལ་ཆེ་བས་ཇི་སྐད་བཤད་པའི་གདམས་པ་ཐོས་ལོ་ཙམ་དུ་མི་འཇོག་པར། ཚིག་དང་དོན་ལག་ལེན་ལ་ནན་ཏན་དུ་ཞུ་ཏིག་བྱས་ནས་བསྒོམ་པའི་གནད་ཐམས་ཅད་ཉམས་འོག་ཏུ་ཆུད་པ་ཞིག་དགོས་སོ། །གཞན་ཡང་གེགས་ཀྱི་གཙོ་བོ་དུག་གསུམ་གྱི་དབང་དུ་མི་བཏང་བར་ཉམས་ལེན་གྱི་གོ་ཆ་བགོ་སྟེ། གཏུམ་མོ་སྡུག་བསྔལ་གྱི་དུས་ནི། ལུས་དང་རྩ་མ་བྱང་བས་ན་ཚ་ཟུག་གཟེར་འབྱུང་ལ་ལུས་སྟོབས་འཆོར་ལ་ནད་རོ་ཡོད་ན་ལྡང་། རླུང་མ་བྱང་བས་དུས་སུ་མི་ཁེག་ཐང་ཆད་ཅིང་ངལ། ཐིག་ལེ་གནས་སུ་མི་བསྐྱོད་པས་སེམས་མི་གསལ། དམིགས་པ་མ་ཟིན་པས་སེམས་འཚུབས་པ་སོགས་ལུས་སེམས་སྡུག་བསྔལ་གྱིས་མནར་བས་ཉམས་ལེན་མི་ནུས་པ་ཙམ་དུ་འབྱུང་། དེའི་དུས་འཁོར་བའི་སྡུག་བསྔལ་བསམ་ལ་སྐྱོ་ཤས་དང་། ཐར་པ་ཟུང་འཇུག་རྡོ་རྗེའི་སྐུ་བསྒྲུབ་པ་ལ་དཀའ་སྤྱད་དང་སྙིང་རུས་དགོས་པའི་དཔའ་གདེངས་བསྐྱེད། རྒྱ་བོད་གྲུབ་ཐོབ་ཀྱི་རྣམ་ཐར་བསམ་ལ་འབད་པ་ཆེན་པོ་བྱ། འདོད་ཆགས་ཀྱི་དུས་ནི། དེ་ནས་རྩ་རླུང་བྱང་བས་ལུས་འབོལ། དམར་ཆ་འཕེལ་བས་དྲོད་འབར་ཞིང་། དཀར་ཆ་འཕེལ་བས་ཆགས་པ་དྲག་པོ་སྐྱེ། དངོས་ཉམས་རྨི་ལམ་དུ་བྱང་སེམས་ཟག་པ་འབྱུང་བས། དེའི་དུས་འདྲེན་བཀྲམ་གྱི་འཁྲུལ་འཁོར་ལ་འབད་ཅིང་འདོད་ཆགས་ཀྱི་ངོ་བོར་བལྟས་ཏེ་ཞེན་པ་བཟློག་གོ །ཡོན་ཏན་གྱི་དུས་ནི། རྩ་རླུང་ཐིག་ལེ་ལས་སུ་རུང་བས། བདེ་གསལ་མི་རྟོགས་པའི་ཉམས་མྱོང་བཟང་པོ་དང་། རྟགས་མང་པོ་འཆར་བས་སྤྲོ་བ་སྐྱེ། དེའི་དུས་ཉམས་མྱོང་ལ་ཞེན་པ་དང་གཞན་ལ་བཤད་པ་སོགས་མི་བྱ་བར་རྟགས་རྣམས་འཇའ་ཚོན་དང་འདྲ་བར་བསམ། བླ་མའི་གདམས་པ་ལ་ཡིད་མ་ཆེས་ན་དངོས་གྲུབ་མི་འབྱུང་ཏེ་ཐེ་ཚོམ་གྱི་བདུད། བཙོན་འགྲུས་ཀྱིས་གནད་དུ་མ་བསྣུན་ནས་སོས་དལ་ལ་ལུས་ན་ཡོན་ཏན་མི་སྐྱེ་བས་ཕྱི་བཤོལ་གྱི་བདུད། ང་རྒྱལ་དང་ཁེངས་སེམས་སྐྱེ་ཞིང་གཞན་སྐྱོན་མང་པོ་མཐོང་བ་དང་ཞེ་སྡང་བ་སོགས་སྣང་བ་དགྲར་ལང་གི་བདུད། སྙན་གྲགས་དང་ལོངས་སྤྱོད་ལ་ཡིད་ཆགས་པ་སོགས་ཞེན་པའི་བདུད་དེ། དེ་ལ་སོགས་པའི་གེགས་དང་བདུད་ཐམས་ཅད་ངོས་བཟུང་ལ་སྤངས་ནས་བསྒྲུབ་པའི་རྒྱལ་མཚན་འཛུགས་པར་བྱའོ། །རྩ་བ་དྲུག་ལ་ཡན་ལག་སོ་དགུ་ཡི། །རྡོ་རྗེའི་ལུས་ཀྱི་འཁྲུལ་འཁོར་གནད་དུ་བསྣུན། །ཞེས་གསུངས་པ་ནི་གོ་བར་ཟད་དོ། །གཉིས་པ་བྱ་སྤྱོད་ཚོགས་སུ་བསྒྱུར་བ་ནི། བྱ་སྤྱོད་ཐམས་ཅད་ཚོགས་སུ་བསྒྱུར་བར་བྱ། ཞེས་པ། བོག་འབྱིན་ཞིང་འབྲས་བུ་མྱུར་དུ་ཐོབ་པའི་ཕྱིར་རིག་པ་བརཏལ་ཞུགས་ཀྱི་སྤྱོད་པ་བྱ་བར་བསྟན་པ་ཡིན་པས། དེའང་སྤྲོས་མེད་ཀུན་འདར། ཆ་མཉམ་ཀུན་བཟང་། སྤྲོས་བཅས་ཕྱོགས་ལས་རྣམ་རྒྱལ་གྱི་སྤྱོད་པ་སྟེ། དེ་དག་གི་ངོ་བོ། དགོས་པ། ཇི་ལྟར་སྤྱོད་ཚུལ་རྣམས་གཞན་དུ་ཤེས་པར་བྱའོ། །རྩ་བའི་དྲུག་པ་མཐར་ཐུག་གི་འབྲས་བུ་མཆོག་གི་དངོས་གྲུབ་བཤད་པ་ནི། གོ་རིམ་ཇི་བཞིན་ཉམས་སུ་བླང་གྱུར་ན། ཞེས་པ་ནས། ཐོབ་པར་འགྱུར། ཞེས་པའི་བར་གྱིས་བསྟན་ཏེ། དེ་ལྟར་དབང་བཞིའི་ལམ་གྱི་རིམ་པ་གོ་རིམ་ཇི་བཞིན་དུ་ཉམས་སུ་བླངས་ན། དྭངས་མ་ཡས་བྱོན་གྱི་དགའ་བ་མཐར་སོན་ཞིང་། མས་ནས་གྱེན་དུ་འགྱུར་བ་མེད་པར་བརྟན་པས་འཁོར་ལོ་ལྔའི་རྩ་མདུད་རྣམས་རིམ་པར་གྲོལ་ནས་རྩ་ཐམས་ཅད་དབུ་མ། རླུང་ཉི་ཁྲི་ཆིག་སྟོང་དྲུག་བརྒྱའི་རྒྱུ་བ་ཡེ་ཤེས་ཀྱི་རླུང་། ཉོན་མོངས་པ་རྣམ་པར་ཤེས་པའི་ཐིག་ལེ་མི་ཤིགས་པའི་ཐིག་ལེ་ལ་ཐིམ། ནང་ལུས་གནས་སུ་གནས་པའི་པུལླི་ར་མ་ལ་སོགས་པའི་གནས་དང་ཉེ་གནས། ཞིང་དང་ཉེ་ཞིང་། ཚན་རྡོ་དང་ཉེ་བའི་ཚན་རྡོ། འདུ་བ་དང་ཉེ་བའི་འདུ་བ། དུར་ཁྲོད་དང་ཉེ་བའི་དུར་ཁྲོད། དེ་རྣམས་ཀྱི་རླུང་དང་ཐིག་ལེ་ཐམས་ཅད་དབུ་མར་ཐིམ་པ་ལ་སོགས་པས་ས་ལམ་ཐམས་ཅད་རིམ་གྱིས་བསྒྲོད་ནས་སྤྲུལ་སྐུ་དང་ལོངས་སྐུ་ལ་སོགས་པའི་ཞལ་མཐོང་ཞིང་། མངོན་པར་ཤེས་པ་དང་། ཡོན་ཏན་བརྒྱ་དང་རབ་བཀྲམ་བརྗོད་དུ་མེད་པ་མངོན་དུ་ཐོབ་པ་དང་། བྱང་སེམས་དཀར་པོ་མས་བརྟན་པས་སྦ་བ་སྦུབས་སུ་ནུས་པ་དང་། དམར་པོ་ཡས་བརྟན་པས་གཙུག་ཏོར་བལྟར་མི་མངོན་པ་དང་། བྱང་སེམས་ལུས་ཀྱི་གནས་སོ་སོར་བརྟན་པས་མཚན་དང་དཔེ་བྱད་ལྡན་པ་དང་། ས་ཁམས་རང་སར་དག་པས་སྟོབས་མཐའ་ཡས་པ། ཆུ་ཁམས་རྣམ་པར་དག་པས་སྐྱོན་ནམ་ཡང་མེད་པ། མེ་ཁམས་དག་པས་སངས་རྒྱས་ཀྱི་ཞིང་ཐམས་ཅད་འོད་ལྔས་ཁྱབ་པ། རླུང་ཁམས་དག་པས་རྫུ་འཕྲུལ་ཡིད་ལྟར་མགྱོགས་པ། ནམ་མཁའི་ཁམས་དག་པས་གར་ཡང་ཕྱིན་པ། ཉི་མ་དག་པས་སྤྲུལ་པ་སྣ་ཚོགས་སྟོན་པ། ཟླ་བ་དག་པས་བདེ་བ་ཆེན་པོས་ཐུགས་རྒྱུད་གང་བ། རྣམ་ཤེས་དག་པས་བདེ་སྟོང་གི་ཡེ་ཤེས་ལས་མ་གཡོས་ཤིང་། དུས་གསུམ་དུ་ཆགས་ཐོགས་མེད་པའི་ཡེ་ཤེས་འཇུག་པ་སྟེ་ཡོན་ཏན་བརྒྱད་དང་། སྐུ་དཔག་ཏུ་མེད་པ་གཅིག་ཆར་སྟོན་པ། སེམས་ཅན་ཐམས་ཅད་ཀྱི་སྐད་དུ་ཆོས་གཅིག་ཆར་སྟོན་པ། རྟོག་པ་མེད་བཞིན་དུ་ཤེས་བྱ་ཐམས་ཅད་མཁྱེན་པ་ལྷུན་གྱིས་གྲུབ་པའི་རྫུ་འཕྲུལ་མཐའ་ཡས་པ་སྟོན་པ། ཡུལ་དུས་གནས་སྐབས་ཐམས་ཅད་དུ་ཁྱབ་པ། སྟོབས་སོགས་ཡོན་ཏན་གྱི་གནས་སུ་གྱུར་པ། བཞེད་པ་ཙམ་གྱི་དོན་ཐམས་ཅད་འགྲུབ་པ། གདུལ་བྱ་མུ་མེད་པ་རྣམས་ལ་བྱང་ཆུབ་གསུམ་པོ་རྒྱུད་ལ་སྐྱེ་བར་མཛད་པ་སྟེ། དབང་ཕྱུག་བརྒྱད་དང་ལྡན་པ། མི་གནས་པའི་མྱ་ངན་ལས་འདས་པ་མ་ནིང་གི་གོ་འཕང་རིག་མའི་སྐྱེས་བུ་ཟུང་འཇུག་ཕྱག་རྒྱ་ཆེན་པོ་མཆོག་གི་དངོས་གྲུབ་ཁ་སྦྱོར་གྱི་ཡན་ལག་བདུན་དང་ལྡན་པའི་རྡོ་རྗེ་འཆང་ཆེན་པོའི་གོ་འཕང་མངོན་དུ་ཐོབ་པར་འགྱུར་རོ། །སླར་སྨྲས་པ། འོག་མིན་སྟོན་པ་རྡོ་རྗེ་འཆང་ཆེན་དེ། །རྡོ་རྗེ་རྣལ་འབྱོར་མ་ལ་རྗེས་གདམས་ཤིང་། །གྲུབ་བརྙེས་བྱེ་བའི་གཤེགས་ཤུལ་ཟབ་མོ་འདིར། །སྙན་རྒྱུད་ཡིད་བཞིན་ནོར་བུ་ཞེས་སུ་གྲགས། །བརྒྱུད་ལྡན་གྲུབ་ལྡན་ཞལ་ལས་ལེགས་འོང་བའི། ཁུང་ལྡན་ཟབ་ལྡན་ལག་ལེན་དམར་ཁྲིད་བཅུད། །ཚུལ་ལྡན་ལུང་ལྡན་རིགས་པས་དྲངས་པ་འདི། །དཔྱོད་ལྡན་སྐལ་ལྡན་རྣམས་ཀྱི་ཐར་བདེའི་གསོས། །སྐལ་དམན་རྣམས་ཀྱིས་འདི་འདྲ་ཁྱད་གསོད་མོད། །བློ་ཆེན་ཟབ་མོར་མོས་པས་དེ་ལྟ་མིན། །བླུན་རྨོངས་རྡོ་རྗེའི་སྣ་ཅན་བྱེད་པའི་ལས། །མི་མཆོག་བློ་ལྡན་རྣམས་ཀྱི་ག་ལ་ཞིག །འཁྱོགས་ཁྲིད་ཨེརཎྜྻ་ཡི་སྟོང་བུ་ཕལ། །སྙིང་པོས་མཛེས་ཞེས་ཁྱོད་གྱིས་བརྗོད་འདོད་ཀྱང་། རང་ཉིད་བསླུ་བའི་ཆོས་ཚུལ་ཀ་ཤིའི་འདབ། རྒྱན་དུ་མཛེས་མིན་བརྗོད་ལས་ཐབས་གཞན་ཅི། འདི་ནི་བཟང་འགྲོར་འགྲོ་བ་རྣམས་ཀྱི་བསྒྲོད་གཅིག་ལམ་དང་ལྟ་ལྡན་མཚོ་ལས་སྒྲོལ་བའི་གྲུ་ཆེན་ཡིན། །ལས་དང་ཉོན་མོངས་ཚ་གདུང་བསིལ་བྱེད་ཐུགས་རྗེའི་ཆར་དང་འཛག་བདེའི་འཕྲང་ལས་སྒྲོལ་བའི་སྐྱབས་ཀྱི་མཆོག །རྣམ་གྲོལ་ཡིད་བཞིན་ནོར་བུ་ལེན་པའི་དེད་དཔོན་དང་ནི་སེམས་ཉིད་རང་ཞལ་སྟོན་པའི་མེ་ལོང་སྟེ། །ཟབ་ལམ་ཀུན་གྱི་སྙིང་པོ་འདི་ལ་དད་པས་འཇུག་པའི་ཐར་འདོད་རྣམས་ནི་མཆོག་གི་སྐལ་ལྡན་ནོ། །འདི་ལ་མ་རྟོགས་ལོག་པར་རྟོགས་དང་སོམ་ཉིའི་དབང་གྱིས་མ་བཤད་པ་དང་ལོག་པར་བཤད་པ་དང་། །འགལ་ཟློས་འཁྲུགས་དང་སྡེབ་སྦྱོར་དམན་དང་ཌཱ་ཀིའི་གསང་གཏམ་གོ་སླ་ཉིད་དུ་བཤད་པ་ལ་སོགས་པའི། །ཉེས་པ་གང་དེ་བླ་མ་ལྷ་དང་མཁའ་འགྲོར་བཅས་ལ་སྔོན་བསགས་དཀར་མིན་སྡིག་དང་ལྷན་ཅིག་བཤགས། །བཟོད་པར་བཞེས་ལ་ཚངས་པར་རྩལ་ནས་ཐུན་མོང་མཆོག་གི་དངོས་གྲུབ་ཐོབ་པའི་སྐལ་བཟང་སྦྱིན་པར་མཛོད། །འདིར་འབད་ལས་བྱུང་དགེ་བའི་མཐུ་ནི་ཇི་སྙེད་མཆིས་དེས་འགྲོ་ཀུན་འདིར་ཞུགས་རྩ་རླུང་ཐིག་གསུམ་དག །གནས་སྐབས་བཞི་ཡི་སྒྲིབ་ལས་གྲོལ་ནས་སྐུ་གསུམ་སྐུ་བཞིའི་རང་བཞིན་རྡོ་རྗེ་འཆང་དབང་ཐོབ་པ་དང་། །བདག་ཀྱང་ཚེ་རབས་ཀུན་ཏུ་འདི་སོགས་ཐེག་མཆོག་ཟབ་མོའི་ལམ་དང་མི་འབྲལ་རྟོགས་ཤིང་ཆོས་ཆར་འབེབས། །དབུགས་འགགས་ཁུ་རྡུལ་བརྟན་ཅིང་ཟླ་ཉི་སྒྲ་གཅན་སྒྲིབ་བྲལ་ཨེ་ཝཾ་ཟུང་འཇུག་སྐུ་གཉིས་མྱུར་ཐོབ་ཤོག །ཟླ་ཉིའི་བསྒྲོད་པ་རྡུ་ཏིར་རབ་ཐིམ་འཕོ་བའི་སྒྲིབ་བྲལ་ཡེ་ཤེས་ཀྱི། །སྐུ་མཆོག་འགྱུར་མེད་འཆར་ཀའི་མདངས་འཛིན་དྲན་པས་དངོས་གྲུབ་མཆོག་སྟེར་ཞིང་། །གནས་གསུམ་དཔའ་བོ་མཁའ་འགྲོའི་ཚོགས་ཀྱིས་ཞབས་མཐིལ་རྟག་ཏུ་ལེགས་མཆོད་པ། །ཕན་བདེའི་དཔལ་སྦྱིན་རྣལ་འབྱོར་མ་ཡིས་དགེ་ལེགས་ཤིས་པའི་དཔལ་རྩོལ་ཅིག །ཇི་ལྟར་ན། སྙན་རྒྱུད་ཀྱི་ཆོས་སྐོར་འདིར་གསལ་བྱེད་ཀྱི་ཡིག་ཆ་དུ་མ་ཞིག་བྲི་བསམ་པ་སྔར་ན་ཚོད་གཞོན་པའི་དུས་ནས་ཡོད་ཀྱང་། མཐུན་རྐྱེན་མ་འཛོམས་པ་དང་། ལེ་ལོ་སྙོམས་ལས་ཀྱིས་རིམ་ལུས་སུ་གྱུར། ད་ནི་ན་ཚོད་མཐོ་བས་ཡིད་དབང་མི་གསལ་ཞིང་། མིག་དབང་ལྡོང་པས་འབྲི་གཞིའི་དཔེ་ཚོལ་ལྟ་དཀའ་བ་དང་། ལྷག་པར་ཀླ་ཀློས་བསྟན་ཞབས་སྡུད་པའི་དུས་ལ་བབས་པས་ཕན་ཐོག་མི་ཡོང་བ་བཅས་ཀྱིས་བྲི་འདུན་མེད་མོད། སྔར་སྐྱབས་རྗེ་མདོ་ཁམས་པ་ཆེན་པོ་༧བསྐལ་བཟང་དོན་རྒྱུད་ཉི་མས་སྙན་རྒྱུད་ཀྱི་ཁྲིད་ཡིག་ཞིག་བྲིས་ཞེས་བཀའ་རྩལ་ནོར་བུའི་ཅོད་པན་གཙུག་ཏུ་བཅིང་པ་དང་། ཕྱིས་འདིར་སྒྲུབ་སྡེ་གསང་ཆེན་མཐོང་གྲོལ་མཁའ་སྤྱོད་བདེ་ཆེན་གླིང་གི །རྟོགས་ལྡན་ཆོས་ཀྱི་བློ་གྲོས་དང་ངག་དབང་རྒྱ་མཚོ་ཟུང་ནས་འབད་རྩོལ་ཆེན་པོས་བསྐུལ་བའི་རྒྱུ་རྐྱེན་ལ་བརྟེན། བགྲང་ཡས་རིགས་ཀྱི་ཁྱབ་བདག སུམ་ལྡན་རྡོ་རྗེའི་སློབ་དཔོན། གཏེར་འབྱིན་གྲུབ་པའི་དབང་པོ། ཡེ་ཤེས་ཌཱ་ཀི་ནི་རྣམས་ཀྱི་སྙིང་དུ་སྡུག་པ། དམིགས་པ་མེད་པའི་ཐུགས་རྗེའི་བདག་ཉིད། རྗེ་བཙུན་བླ་མ་དམ་པ་མདོ་ཁམས་དྲུག་པ་ཆེན་པོ། ངག་དབང་མི་ཕམ་བསྟན་པའི་ཉི་མ་པདྨ་དགྱེས་པ་ཡེ་ཤེས་རོལ་པ་རྩལ་གྱི་ཞལ་སྔ་ནས་ཆོས་ཚུལ་འདིའི་སྨིན་གྲོལ་རྣམས་ལེགས་པར་ཐོབ་པའི་སྐལ་བ་བཟང་པོ་ཅན། ཀུ་སཱ་ལི་རྒན་པོ་བསོད་ནམས་ཡེ་ཤེས་བསྟན་འཛིན་ཉི་མ་ཕྲིན་ལས་འོད་ཟེར་ཀུན་ཁྱབ་དཔལ་བཟང་པོའམ། ལྷན་སྐྱེས་བདེ་ཆེན་ཡེ་ཤེས་རྡོ་རྗེའི་ངག་ནས་སྨྲས་པ། བསྐུལ་བ་པོ་ཆོས་ཀྱི་བློ་གྲོས་ཀྱིས་ཡི་གེ་པ་བགྱིས་ཏེ། རབ་རྒྱལ་ས་ཕག་ནག་པ་ཟླ་བའི་ཚེས་ ༡༡ ཉིན་དབུ་བཟུང་ནས་ཉེར་གཉིས་ལ་གྲུབ་པར་གསང་ཆེན་ཆོས་འབྱུང་ཕུག་ཏུ་བཀོད་པ་སྟེ། ལམ་འདི་ལས་སྐལ་བ་དང་ལྡན་པ་རྣམས་ཟུང་འཇུག་གི་གོ་འཕང་དུ་བསྒྲོད་པའི་རྒྱུར་གྱུར་ཅིག། །།དགེ་ལེགས་འཕེལ།། སྙན་རྒྱུད་ལས་མཁའ་འགྲོའི་གསང་སྒྲོག་བདེ་བ་ཆེན་པོའི་ཁྲིད་ཡིགསྙན་རྒྱུད་ལས་མཁའ་འགྲོའི་གསང་སྒྲོག་བདེ་བ་ཆེན་པོའི་ཁྲིད་ཡིག་བཞུགས། །གཉིས་པ་ཤེས་རབ་ཡེ་ཤེས་ཀྱི་དབང་དང་འབྲེལ་བ་མཁའ་འགྲོའི་གསང་སྒྲོག་བདེ་བ་ཆེན་པོ་ལ། བསྟེན་བྱ་ཕྱག་རྒྱའི་རྣམ་དབྱེ། བསྟེན་ཚུལ་མཁའ་འགྲོའི་གསང་སྒྲོག བསྟེན་འབྲས་བདེ་ཆེན་གྱི་འཆར་རིམ་བཤད་པ་གསུམ་ལས། དང་པོ་ནི། རྣལ་འབྱོར་པ་རབ་ཀྱིས་རྡོ་རྗེ་སེམས་དཔའི་བུད་མེད་བསྟེན། འབྲིང་གིས་ཡིད་ཀྱི་རིག་མ། མཐའ་མས་ལས་ཀྱི་ཕྱག་རྒྱ་བསྟེན་པའི་ཚུལ་གསུམ། དང་པོ་ནི། རྣམ་པ་ཐམས་ཅད་པའི་མཆོག་དང་ལྡན་པའི་སྟོང་ཉིད་དམིགས་བཅས་དེ་ཁ་ཕྱག་རྒྱ་ཆེན་མོ་ཡིན་པས་དང་། དེ་ཁ་ཤེས་རབ་ཀྱི་ཕ་རོལ་ཏུ་ཕྱིན་མར་ཡང་བཤད་པས་རྡོ་རྗེ་སེམས་དཔའི་བུད་མེད་དོ། །གཉིས་པ་དཀྱིལ་འཁྱོར་གྱི་འཁོར་ལོ་གོམས་པའི་ཚེ། རེག་མཐོང་གི་མཚན་མ་རྙེད། བཅོམ་ལྡན་འདས་ལ་འཁྱུད་པའི་རྡོ་རྗེ་ཕག་མོ་ཇི་ལྟར་བསྒོམས་པ་ལྟར་གསལ་བར་སྣང་བ་དེ་ཁ་ཡེ་ཤེས་ཀྱི་རིག་མའོ། །གསུམ་པ། མཁའ་འགྲོའི་གསང་སྒྲོག་བདེ་བ་ཆེན་པོ་ནི། །བཅུ་གཅིག་ཉེར་ལྔའི་བར་གྱི་རིག་མ་གང་། །ཞེས་ལོ་ཚད་ནི་དམར་ཆ་ལེན་པའི་དབང་དུ་མཛད་སྦྱང་བ་ལ་ངེས་པ་མེད་དོ། །པདྨ་རི་དྭགས་དུང་ཅན་ལ་སོགས་པ། །སོགས་སྒྲས་གླང་པོ་ཅན། གཞན་ཡང་རིགས་མཐའ་ཡས་པས་དེ་དག་གོ །པདྨ་ཅན་བཞིན་ལེགས་ལ་ཟླུམ། རྐང་པའི་རྒྱབ་རུ་སྦལ་འདྲ་མཐིལ་མཉམ། ནུ་འབུར་ཏ་ལའི་འབྲས་བུ་ལྟ་བུ། བྲང་མཛེས། པདྨའི་དྲི་དང་ལྡན་ཞིང་སྐད་སྙན་སྤྱོད་ལམ་དལ་བ། །སྐྱེ་གནས་པདྨ་ལྟ་བུའི་སྟེང་ན་ནང་ཤིན་ཏུ་དོག་པར་འབྱུང་བའི་མཚན་མར་སྟེང་ནས་གཉེར་མ་གསུམ་ཡོད་པའོ། །གླང་ཆེན་མ་ཆང་གི་དྲི་ཅན་བྱིན་པ་དང་ལུས་སྦོམ། སྣ་ཡོ། སྤུ་འཁྱིལ། སྟོབས་ཆེ། འདོད་པས་མྱོས་ཤིང་སྲེད་པ་ཆེ་བའོ། །དུང་ཅན་མ་སྐྲ་དང་སྣ་རྒྱུད་རིང་བ། ལུས་རན། ནུ་མ་ན་རངྐའི་འབྲས་བུ་ལྟ་བུ། ལྕེ་བ་གླང་། སྐད་བྱ་རོག་འདྲ་བ། བོང་བུའི་དྲི་ཅན། དཔའ་མོའི་སྟོན་མོ་ལ་དགའ་བའོ། །སྣ་ཚོགས་ཅན་མ་ལུས་ཆུང་། བྲང་མཛེས། ནུ་མ་དཔལ་འབྲས་ཀྱི་རྣམ་པ་ཅན། མཆུ་འཕྱང་དཔུང་པ་རྒྱས་ཤའི་དྲི། ངོ་ཚ་ཆུང་ཞིང་ཁྲོ་སྐྱེན། སྙན་དངགས་འདོན་པ། གཙང་སྦྲ་ཆེ་བར་སྡོམ་འབྱུང་ལས་གསུངས། ནང་ཉེར་གནས་ཀྱིས་ཕྱེ་བ། རྩ་འཇམ་པ་དང་། རྩུབ་པ་དང་། འཛེར་པ་ཅན་དང་། མཁྲང་པར་རྡོ་རྗེ་མཁའ་འགྲོ་ལས་བཤད། དེ་དག་རིམ་པར་བྷ་གས་རྡོ་རྗེ་འཇིབ་པ་དང་། རྩ་རྡོ་རྗེ་ལ་ཐུག་པ་དང་། བཏང་ཡང་ཁུ་བ་མི་འཆོར་བ་དང་། བདེ་བ་ཆེ་ཞིང་རྟགས་སྦོམ་པར་འགྱུར་བ། །བུ་མོ་དེ་དག་ཁུ་བ་འཆིང་བ་ལ་མཆོག་ཏུ་གྱུར་པའོ། །རྡོ་རྗེ་མཁའ་འགྲོ་ལས། སྤུ་མེད་པ་དང་ཤ་ཆེ་བ་དང་། རུ་སྦལ་གྱི་རྒྱབ་ལྟར་མཐོ་བ་དང་། གླང་པོ་ཆེའི་ཟེ་བ་ལྟར་མཁྲང་བ་དང་། སྐྱེ་གནས་ཡངས་པ་དང་། ཁྲག་དང་ཁུ་བ་རྟག་ཏུ་འཛག་པ་སྟེ་དྲུག་པོ་དེ་ནི་སྐལ་བཟང་མ་སྟེ་སུ་བྷ་ག་ཡིན་པས་དེ་དག་གིས་སྒྲུབ་པ་པོ་ལ་མཆོག་སྟེར་བ་ཡིན་ནོ། །ཞེས་སོ། །དབང་པོ་རབ་ཕྱག་རྒྱ་མ་དེ་ལ་བརྟེན་དགོས་པའང་ཡོད་དེ་དབང་གསུམ་པ་ཞུ་བ་དང་དངོས་གྲུབ་ཆེན་པོའི་ཉེ་རྒྱུར་ངེས་པར་དགོས་པ་ཡོད་པའི་ཕྱིར་རོ། །དེ་ལ་ནི་ཕྱག་རྒྱ་དེ་ཉིད་ནི་ལས་རྒྱ། རྡོ་རྗེ་ཕག་མོར་ལྟ་བུ་ཡེ་རྒྱ། དེ་སྒྱུ་མ་ཙམ་གྱི་ལྷར་མཐོང་བས་ཕྱག་རྒྱ་ཆེན་མོ། དེས་ན་གཅིག་གསུམ་ཀ་དང་ལྡན་པར་འགྲོ་བ་ཡིན་ནོ། །འདི་ནི་རས་ཆུང་ཞབས་ཀྱི་འོག་སྒོའི་ཐོ་ཡིག་ཏུ། གསུམ་ལས་བྱུང་ཞེས་གསུངས། གཉིས་པ་བསྟེན་ཚུལ་མཁའ་འགྲོའི་གསང་སྒྲོག་ལ། རབ་རང་རིག་གི་གནད་ཀྱིས་བདེ་སྟོང་སྦྱོར་བ། འབྲིང་རྩལ་སྦྱོང་གི་གནད་ཀྱིས་བདེ་སྟོང་སྦྱོར་བ། མཐའ་མ་བཙན་ཐབས་ཀྱི་གནད་ཀྱིས་བདེ་སྟོང་སྦྱོར་བ་གསུམ་ལས། དང་པོ་ནི། རྗེ་རས་ཆུང་པས་གསུམ་དང་འདྲེས། ཡོན་ཏན་རྫོགས་ཤིང་མངོན་ཤེས་འཆར། །ཞེས་པའི་དོན་ལ་གཉིས་ལས། སྔ་མ་དམིགས་པ་དང་བཅས་པའི་ཤེས་རབ་མ་དེའི་ཆོས་འབྱུང་དུ། རང་མྱོང་བདེ་བ་ཆེན་པོའི་ཡེ་ཤེས་ཀྱི་རྟགས་བཅུག་ནས་གཉིས་མེད་པར་གཅིག་ཏུ་སྦྱོར་རོ། །འདིས་ནི། ཁམས་གསུམ་གང་བའི་བུ་མོ་ལ་འཁྲིག་པ་སྤྱད་ཀྱང་དེས་འདོད་ཆགས་ཀྱི་ངོ་བོ་ཉིད་ཡོང་སུ་ཤེས་པ་ཡིན་པས་ཆགས་པས་ཆགས་པ་སྦྱོང་བའོ། །དེས་དེ་དུས་ཀྱི་བདེ་བ་དབང་པོ་གཉིས་སྦྱོར་གྱི་བདེ་བར་མ་ལུས་པར་འཁོར་བའི་བདེ་བ་བྱེ་བ་སྙེད་ཀྱིས་མཚོན་དུ་མེད་པའི་ཡེ་ཤེས་སུ་འཆར་རོ། །དེས་ན་ཟག་མེད་རོལ་ཞེས་གསུངས་སོ། །གཉིས་པ་འབྲིང་རྩལ་སྦྱོང་གི་གནད་ཀྱིས་བདེ་སྟོང་སྦྱོར་བ་ནི། རང་སྣང་གི་ཡུམ་དེའི་བྷ་གར་ལིངྒ་བཀོད་དེ་སྲུབ་པ་དང་སྲུབ་པའི་རྗེས་སུ་ཆགས་པས་གཏུམ་མོ་སྦར། འཁོར་ལོ་བཞི་བསྲེགས་མེ་ལྕེ་སྤྱི་བོའི་ཧཾ་ལ་རེག དེ་དང་ལུས་ཐམས་ཅད་ཁྱབ་པའི་ཞུ་བའི་ཐིག་ལེ་ཁ་བའི་མདངས་ལྟ་བུ་ཨ་བ་དྷཱུ་ཏཱི་ནས་མར་ན་ར་ར་བྱུང་ནས་རྡོ་རྗེ་ལྟེམ་གྱིས་གང་ཟག་བཅས་ཀྱི་བདེ་བ་མི་བཟོད་པ་སྐྱེས། དེ་རང་མྱོང་གི་གནད་ཀྱིས་བཟུང་ནས་བྱེད་ཆིངས་ཀྱི་གནད་ཀྱིས་རླུང་སེམས་སྣ་རྩེར་འཕངས། དེར་རྩེ་གཅིག་ཏུ་བཞག་པས་བདེ་བ་དེ་ཁ་ཁམས་གསུམ་པའི་གཟུགས་བརྙན་ཐམས་ཅད་པར་འཆར་བ་ནི་འདིའི་བདེ་སྟོང་སྦྱོར་བའི་ཚུལ་ལོ། །བདེ་བ་བསྐུལ་བར་དཀའ་ན་དེ་དུས་ལག་པ་གཡོན་པའི་རྒན་པོ་དང་སྲིན་ཞབས་མིག་ཏུ་བྱས་པས་རང་གི་རྡོ་རྗེ་གསོར་བར་བྱའོ། །དེ་ལས་ཁམས་བབས་ན་གཟུང་བ་དང་འཛིན་པ་སོགས་འཆད་པར་འགྱུར་བ་བཞིན་འདྲེན་འགྲེམས་གཏུམ་མོ་བཞིན་བྱའོ། །དེ་ནི་ཟག་བཅས་རོལ་ཞེས་པའི་དོན་ནོ། །གསུམ་པ་བཙན་ཐབས་ཀྱི་གནད་ཀྱིས་བདེ་སྟོང་སྦྱོར་བ་ལ། བདེ་འཚོལ་སྐྱེ་མེད་ཀྱི་སྒྲོན་མེ་གཏམས་པ། སྦྱོར་ཆོས་ཀྱིས་རྩ་མདུད་འགྲོལ་བ། དགའ་བཞིའི་དཔེ་དོན་ལ་རྩལ་སྦྱོང་བ་གསུམ་ལས། དང་པོ་ནི། ཕྱག་རྒྱ་མཚན་ལྡན་རྡོ་རྗེ་རྣལ་འབྱོར་མ། །སྐལ་ལྡན་སྐྱེས་བུ་ཧེ་རུ་ཀ་རུ་བལྟ། །གཉིས་མེད་འཁྲིལ་སྦྱོར། ཕྱག་རྒྱ་རྙེད་ནས་དགེ་བསྙེན་སྦྱིན། དེ་ནས་ཐེག་ཆེན་དུ་སེམས་བསྐྱེད་དུ་བཅུག དེ་ནས་ཡབ་བཀའ་འམ་ཡུམ་བཀས་དབང་བསྐུར་བས་རྒྱུད་སྨིན་པ་ནི་བྱིན་གྱིས་བརླབ་པ་མཉམ་པ་ཞེས་བྱ། དེ་ནས་ཡུམ་གྱི་རྣལ་འབྱོར་བསྒོམ་དུ་བཅུག་པ་ལུས་མཉམ་པ་དང་། བསྙེན་པ་བྱེད་འཇུག་པ་ངག་མཉམ་པ་དང་། རྫོགས་པའི་རིམ་པས་སེམས་མཉམ་པར་བསྒྲུབ། དེ་ནས་སེམས་ཅན་ཐམས་ཅད་ཀྱི་དོན་དུ་དཔལ་ཧེ་རུ་ཀ་ཐོབ་པར་བྱ། དེའི་ཆེད་དུ་འོག་སྒོ་བདེ་ཆེན་གྱི་ལམ་ལ་བསླབ་པར་བྱའོ། །སྙམ་པ་ནི་འདོད་པ་མཉམ་པའོ། །ཚུལ་དེ་ལྟར་མ་སྦྱངས་པར་རིག་མ་ལས་བདུད་རྩི་ལེན་པ་ཡན་ལག་གི་ལྟུང་བར་བཤད། དེ་ནས་རྣལ་འབྱོར་ཕོ་མོ་ལྷན་ཅིག་སྐྱེ་བོའི་ཡ་ག་བསྲུང་ཞིང་དམ་ཚིག་ལས་མི་འགོང་བའི་ཕྱིར་ཤིན་ཏུ་གསངས་ཏེ་དབེན་པའི་གནས་སུ་ཟས་དང་རོ་ཙ་བའི་བཅུད་ལེན་བཟང་པོ་ལོངས་སྤྱོད་ཅིང་། བདེ་བའི་སྟན་ལ་ཁ་སྤྲོད་སྐྱིལ་ཀྲུང་སོགས་ལུས་གནད་བདུན་གྱིས་འདུག་ནས། ཕན་ཚུན་གྱི་གཟུགས་མིག་གིས་བལྟས་ནས་སྔར་བཤད་པའི་ཡིད་རིག་གིས་དམིགས་པ་བསྒོམ། དེ་ནས་ཆགས་པའི་གཏམ། དེ་ནས་དྲི་ཞིམ་པོ་རང་བཞིན་གྱིས་ཡོད་པའམ་བྱུགས་པ་སྣོམ། དེ་ནས་ལྕེ་དང་མཆུའི་རོ་གཞིབ། དེ་ནས་རེག་བྱ་ལ་བསླབ་སྟེ། ཕན་ཚུན་འཁྱུད་པ་དང་དབང་པོ་གཉིས་སྤྲད་དེ་རྡོ་རྗེས་ཉེར་གནས་གཙོག་པར་བྱ་ལ་ནང་དུ་མི་གཞུག་གོ །དེ་ལྟར་གཉེན་པོ་ལེགས་པར་རྙེད་ནས། གཉིས་པ་སྦྱོར་ཆོས་ཀྱིས་རྩ་མདུད་འགྲོལ་བ་ལ། དབབ་པ་ལ་མཁས་པ་རུ་སྦལ་གྱི་ནུར་འགྲོས་ལྟ་བུ། འཛིན་པ་ལ་མཁས་པ་རྫིང་གི་འོར་ཁུང་བགག་པ་ལྟ་བུ། འདྲེན་པ་ལ་མཁས་པ་ཁྲོན་པའི་དཔྱང་རྩེ་འདྲེན་པ་ལྟ་བུ། འགྲེམས་པ་ལ་མཁས་པ་མཛངས་མ་ཞིང་ལ་ཆུ་གཏོང་བ་ལྟ་བུ། བདེ་བ་ཕྱག་ཆེན་དུ་སྐྱིལ་བ་ལ་མཁས་པ་སྤྲིན་ནམ་མཁར་ཐིམ་པ་ལྟ་བུ་སྟེ་ལྔ་ལས། དང་པོ་ནི། ཐིག་ལེ་དབབ་ཅེས་པས་བསྟན་ཏེ། དེ་ཡང་བསྐྱེད་རིམ་རྒྱས་པའམ་འབྲིང་ངམ་བསྡུས་པས་བདག་དང་ཕྱག་རྒྱ་མ་གཙོ་བོ་ཡབ་ཡུམ་དུ་བསྒོམ། ཡུམ་གྱི་ཡབ་ཀྱི་གསང་གནས་མི་དམིགས་པ་ལས་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ཕཊ྄་ཀྱིས་ནོར་བུའི་ཐད་ཀྱི་བུ་ག་བཀག་ཅིང་རྩའི་ནང་དུ་ཧཱུྃ་མགོ་ནང་བསྟན། ཡབ་ཀྱིས་ཡུམ་གྱི་མཁའ་མི་དམིགས་པ་ལས་ཨ་ལས་པདྨ་འདབ་བརྒྱད་ཟེ་འབྲུའི་ནང་གི་བུ་ག་ཕཊ྄་ཀྱིས་བཀག་ཅིང་རྩེ་མོར་སྲཱིཿམགོ་ནང་བསྟན། ཐབས་ཀྱི་རྡོ་རྗེ་ཝཾ་དང་། ཡུམ་གྱི་པདྨ་ཨེའི་བདག་ཉིད་ཅན་དུ་བལྟས་ཏེ། སོམ་ཉི་མེད་པར་ཕན་ཚུན་འོ་དང་མཆུ་དང་ལྕེ་གཞིབ་པ་དང་། ལུས་ཀྱི་གཡའ་བའི་གནས་སུ་སེན་མོ་གདབ་པ་དང་། བདེ་བ་འཁུལ་དཀའ་བ་ལ། སོར་མོ་གསུམ་གྱིས་བྷ་ག་དཀྲུག་པར་བྱ་སྟེ་གཉིས་གཉིས་སྤྲད། རྡོ་རྗེས་པདྨ་བཙབས་པ་ཡུན་རིང་པོར་བྱས་པས་མོའི་ཆུ་ངན་འབོད། དེ་ནས་རྡོ་རྗེ་པདྨར་སྩལ་རྡོ་རྗེའི་བུ་གར་ཕྱག་རྒྱའི་རྩ་པདྨའི་རྩ་བ་ལྟར་ཕྲ་བ། ཁབ་ཀྱི་རྩེ་མོ་ལྟར་རྣོ་བ། རལ་གྲིའི་སོ་ལྟར་གཅོད་པ། མེ་ལོང་གི་ངོས་ལྟར་འཇམ་པ་བཅུག་སྟེ་དལ་བུར་མནན་ནས་བསྐྱོད་ལས་དང་པོ་པ་ཡིན་ན་བདེ་བ་འགོ་གཡོ་བ་ཙམ་ནས་གློད་རྡོ་རྗེ་ཕྱིར་འདོན། ཐིག་ལེ་དྲངས། དེ་ནས་སྔ་མ་ལས་བདེ་བ་འདབ་ཙམ་དུ་བསྐྱོད། ཡང་སྔར་བཞིན། དེ་ནས་དེ་གསུམ་འདབ་ཙམ་དུ་བསྐྱོད། དེ་ནས་ཅི་ཙམ་འདོད་པར་སྤྱོད། དེ་ནི་རྗེ་རས་པའི་ཐོ་ཡིག་ཏུ། དལ་བར་རྒྱུ་བའི་ཞེས་གསུངས། གཞན་དུ་སྦྱོར་བ་དྲག་པོས་ཀྱང་རུང་སྟེ། གང་གིས་ཡིན་ཀྱང་འདྲ། ཐབས་ཀྱི་དྭངས་མ་དཀར་པོ་འབབ་དུས་ཕཊ྄་ཀྱིས་ཧཱུྃ་འཕུལ་ཤེས་རབ་ཀྱི་སྣ་རྩེར་ལྷུང་། དེ་ནས་ཕྱག་རྒྱའི་དྭངས་མ་དམར་པོ་ཕཊ྄་ཀྱིས་སྲཱིཿདེད་པས་ཐབས་ཀྱི་རིགས་བདག་གི་ཁར་ལྷུང་ཁ་སྦྱོར་བཞི་ལྡན་དུ་གྱུར་པའོ། །གཉིས་པ་ནི། བཟུང་ཞེས་པས། བཟུངས་ཨ་བ་དྷཱུ་ཏཱིར། འཛིན་ཚུལ་དམིགས་པ་ཀུན་རྫོབ་ཀྱི་སྣའི་རྩེ་མོར་ཐིག་ལེ་དཀར་ཞིང་འཚེར་བ་སྣུམ་ལ་འགྲིལ་བ་སྲན་མ་ཙམ་གཡོ་འགུལ་མེད་པ་ལ་སེམས་གཏད་དེ་སྐད་ཅིག་ཀྱང་མ་ཡེངས་པར་བྱའོ། །རླུང་གནད་ནི། ཕབ་མ་ཐག་ལ་སྲིན་ཞལ་བསྐུམ་འོག་རླུང་སྟོད་དུ་དྲག་པོར་འཐེན་པར་བྱའོ། །འདི་མན་ངག་གི་གནད་ཆེན་པོ་ཡིན་ཏེ་དེ་མ་བྱས་པར་ཟངས་ཚགས་ཅན་གྱིས་ཐིག་ལེ་སྒོར་ལྷུང་བ་འཆོར་བར་འགྱུར་རོ། །དེ་ནས་སྟེང་རླུང་ཆིར་མནན་ཏེ་སྲིན་ཞལ་བསྒྲད། འདི་ལ་རིལ་བ་ཟངས་ཚགས་ཅན་གྱི་རླུང་གནད་ཅེས་ཟེར། འཁྲུལ་འཁོར་ནི་སེང་གེ་རྩེ་བ་དང་སྟག་མོའི་སྐྱུག་གོ །ཟིན་པའི་རྟགས་འོག་སྒོ་གཉིས་སྲ་ཐེམ། རྡོ་རྗེ་སྲ་ཐིང་འགྲོ། ཐོ་ཡིག་ཏུ་རིག་པ་ཡི་ཞེས་པ། འཛིན་གནད་དྲག་ཤོས་ཆགས་པ་རང་མྱོང་གི་སྟེང་དུ་མ་ཡེངས་པའོ། །གསུམ་པ་ནི། བཟློག་ཅེས་པས། ཟིན་མ་ཐོག་བཟློག་དགོས་ཏེ། གཞན་དུ་ཐིག་ལེ་ཁེངས་ནས་འཁར་བར་འགྱུར་བའོ། །དམིགས་གནད། ཐིག་ལེ་དབུ་མའི་ནང་ནས་གྱེན་དུ་མདའ་འཕངས་པ་བཞིན་སོང་བས་ཧཾ་ལ་ཐིམ་པར་བསམ། རླུང་གནད་འོག་རླུང་དྲག་ཏུ་འཐེན་སྟེང་རླུང་དང་བསྲེས་ཏེ་གྱེན་དུ་ཙམ་ཐུབ་གཅུད་པའོ། །འཁྲུལ་འཁོར་ནི་སྔར་བཞིན་འདྲེན་བཞི་དང་། གླང་ཆེན་འགྱིང་དང་། རུ་སྦལ་གྱི་བསྐུམ་མོ། །འཁྲུལ་འཁོར་གཅིག་ལ་འཆུན་འདོན་པའི་ཚེ། ནོར་བུ་ནས་ལྟེ་བར་འཐེན་དུས་ངག་འདྲེན་ཧཱི་ཧཱིཾ། དེ་ནས་སྙིང་གར་ཧཱུྃ་ཧཱུྃ། དེ་ནས་མགྲིན་པར་ཧཱ་ཧག དེ་ནས་སྤྱི་བོར་ཧཱི་ཧིག་ཅེས་ཁོང་འདྲེན་དུ་བྱ། ཕབ་ནས་འཕྲལ་ལ་མི་འཕོ་བས་འདྲེན་འགྲེམས་མི་དགོས་པར་འདུག་སྙམ་ན་ཐིག་ལེ་སྙིགས་མ་གཅིག་བསགས་གཉིས་བསགས་ནས་ད་གཟོད་ཆུ་སོའི་རྩ་བའམ་བརླ་ཁུགས་སུ་རྣག་འབུར་འཆའ། རྩ་ཆུ་བསྡམས་གེགས་ཆེན་པོར་འགྱུར་བས་ལས་ལ་ངན་བྱེད་ཉན་ནོ། །བཟློག་པའི་རྟགས་སྨད་ཡང་ཕྱོད། རྡོ་རྗེ་ངར་ཞི། འཁོར་ལོ་སོ་སོའི་ཐད་དུ་བདེ་བ་མི་བཟོད་པ་འབྱུང་ངོ་། །ཐོ་ཡིག་ཏུ། བྱེ་བྲག་གསུམ་དུ་འདྲེན་པར་བྱེད། །རབ་རང་རིག་ཡེ་ཤེས་འབྲིང་རྗེས་སུ་དྲན་པས། མཐའ་མ་རླུང་སོགས་ཀྱིས་སོ། །བཞི་པ་ནི། དགྲམ་ཞེས་པས། དམིགས་པ་སྤྱི་བོའི་ཧཾ་ལས་ཐིག་ལེ་ཕྱེད་ནས་འཁོར་ལོ་ཐམས་ཅད་གང་བས་རྩ་གཅིག་ལ་གཅིག་བཅར་བས་མདུད་པ་ཐམས་ཅད་ཞིག་རྩ་ཐིག་རླུང་གསུམ་རོ་གཅིག་ཏུ་འདྲེས་ནས་ལུས་ཐམས་ཅད་རྐྱལ་པ་ཞོས་གང་བ་ལྟ་བུར་གྱུར་པར་བསམ་མོ། །རླུང་གནད་ནི། ལུས་ཐམས་ཅད་གང་བའི་ཁ་སྦྱོར་བུམ་པ་ཅན་འཛིན། འཁྲུལ་འཁོར་ནི་སེང་གེ་རྩལ་སྤྲུགས་དང་རྣམ་རོལ་རྨ་བྱའི་འགྱིང་བ་དང་བྱ་རྒོད་འཕུར་བའི་འཁྲུལ་འཁོར་རོ། །ཁྲེམས་པའི་རྟགས་ནི། ལུས་ཐམས་ཅད་བདེ་འབོལ་སོང་བ་དང་། ཡང་བ་དང་། མཉེན་ལྕུག་སོང་བ་སྙམ་བྱེད་པའོ། །ལྔ་པ་ནི་གནས་སུ་སྤེལ། །ཞེས་པས། ཁ་སྦྱོར་གྱི་བུམ་པ་ཅན་སྙིང་གར་བཅིངས། རླུང་དང་བདེ་བ་སེམས་དང་བསྲེས་ནས་སེམས་དེའང་རང་གི་ངང་ཇི་ལྟ་བ་ལ་རྣམ་ཤེས་ཀྱི་འཇུག་པ་བསྐུམ་ཏེ་གཞག་པས་འགྱུར་བའི་བདེ་བ་ཐམས་ཅད་འགྱུར་བ་མེད་པའི་བདེ་བ་ཆོས་ཀྱི་སྐུར་འཆར་བ་ཡིན་ནོ། །དེའི་རྟགས་ནི་རྗེས་ལ། བདེ་ཡང་ཞེན་པ་མེད་པ། གསལ་ཡང་རྟོག་པ་མེད་པ། སྟོང་ཡང་འཆར་སྒོ་མི་འགག་པའོ། །དེ་ལྟར་མཁས་པ་ལྔས་ཉམས་སུ་ལེན་པ་ལ། ཕྱག་རྒྱའི་རྩ་ཞན་ན་སྦྱོར་ཆོས་ཀྱིས་བཙལ་ཏེ། ཕྱིང་པ་ལ་རས་བལ་གྱི་ནང་རྫོངས་བཅུག་པའི་གཤགས་མ་རྡོ་རྗེ་ཙམ་པ་ཞིག་བྱས། མར་དང་ཚིལ་བུ་བྱུག ཕྱག་རྒྱའི་བཤང་ལམ་དུ་བཅུག མཁལ་ཁུང་གཉིས་སུ་དར་རྡོ་ཁུ་ཚུར་ཙམ་རེའི་རྒྱབ་སྒ་ལྟ་བུ་ཤིང་ལེབ་གཞུག་དར་ཡུག་གིས་བསྡམས། དེས་གསང་རྩ་ཕྱིར་རིབ་རིབ་འོང་། རྩ་སྦོམ་ན་པདྨ་དཀར་པོའི་རྩ་བ་དང་སྦྲང་དཀར་ར་དཀར་མོའི་འོ་མ་གསུམ་བྱུགས་པས་ཕྲ་བར་འགྱུར། པདྨ་དཀར་པོའི་རྩ་བ་མ་རྙེད་ན་ཁུག་ཆོས་ཀྱི་རྩ་བ་ལ་བྱའོ། །དེས་སོར་གསུམ་ཙམ་ཕྱིར་འབུར་འོང་། ནོར་བུའི་བུ་གར་དལ་བུས་དྲངས། བཤང་བའི་ཕྱིང་པ་ཕྱིར་རིམ་གྱིས་འཐེན། ཕྱག་རྒྱའི་རྩ་ནང་དུ་འོང་བ་བཞིན་རང་གི་རྩའང་སྐོམ་པ་ཆུ་སྙོག་པ་ལྟར་མར་ལ་ནར་གྱིས་འོང་། རྩ་གཉིས་འབྱོར་བའི་ཚེ་གཉིས་ཀ་ལ་བདེ་བའི་ཟུག་བརྒྱལ་བ་ཙམ་འབྱུང་། ཡང་ན་དངུལ་ཆུ་ཐིགས་པ་གཅིག་ཆང་ངམ་ཨ་རག་བཟང་པོ་ལ་བཏབ་སྟེ་བྷ་གར་བླུགས་ཏེ་ཉི་མ་ལ་བསྲོས་པས་ཀྱང་རྩ་ཕྲ་རིང་བར་འགྱུར་རོ། །ཡང་ན་འདུག་སྟངས་ཀྱིས་བཙལ་བར་བྱ་སྟེ་རིགས་ངེས་ན་རང་རང་ལ་འདུག་སྟངས་བཤད་པ་ལྟར་རམ། ཕལ་ཆེར་རིགས་འདྲེས་མ་མང་བས་འཕོངས་སུ་སྟེགས་བཅུག་སྟོད་དམའ་བར་བྱས་ཏེ་གན་རྐྱལ་དུ་ཉལ་བ་ལ་དང་། གཡས་འོག་ཏུ་ཕབ་པ་དང་། གཡོན་འོག་ཏུ་ཕབ་པ་དང་། གན་རྐྱལ་སྔར་བཞིན་ལས་པུས་མོ་མཆན་ནས་ཕྱིར་བསྒྲད་རྐང་མགོ་ནང་དུ་ཕྱོགས་པ་པདྨའི་བཅིང་བས་དང་། དེ་བཞིན་ལ། དེའི་སྒྱིད་ཁུང་ནས་ཐབས་ཀྱིས་ལག་པ་བཅུག་སྟེ་དེའི་རྐང་པ་ཕྲག་པར་བཀལ་བས་སམ་དེ་རང་གི་དཔུང་པ་ལ་བཀལ་བ་དང་། བུད་མེད་སྟེང་དུ་གནས་པས་དང་། འཛིན་དཀའ་ན་སྐྱིལ་ཀྲུང་བྱས་པང་དུ་བླང་བ་དང་། དེ་ཁ་ལ་བུད་མེད་ཀྱི་བརླ་བསྒྲད་པའི་ཕྱི་ནས་ལག་པ་གཉིས་ཀྱིས་ལུས་དང་ལྷན་ཅིག་བསྡམས་པ་སོགས་ཀྱིས་སོ། །དེ་ཡང་རྗེ་བཙུན་རས་པའི་ཐོ་ཡིག་ཏུ། སྲོལ་གོང་རྡོ་རྗེའི་བུ་ག་རུ། །ངེས་པར་འདྲེན་པ་ལམ་གྱི་མཆོག །ཅེས་གསུངས་སོ། །འདི་དུས་པདྨའི་སྐྱོན་བཞི་འདུག་ན་རྫས་ཀྱིས་བསལ་ལོ། །གསུམ་པ་དགའ་བཞིའི་དཔེ་དོན་ལ་རྩལ་སྦྱང་བ་ནི། དགའ་བ་བཞི་གསུམ་བཅུ་གཉིས་དོན་ལ་ལྟ། །རུ་སྦལ་གྱི་འགྲོས་ལྟ་བུས་ཕབ་པའི་དབང་དུ་བྱས་ན། སྤྱི་བོ་ནས་སྨིན་མཚམས་ཀྱི་བར་དུ་འབབ་པ་དགའ་བ། མགྲིན་པར་མཆོག་དགའ། སྙིང་གར་ཁྱད་དགའ། ལྟེ་བར་ལྷན་སྐྱེས། གཏུམ་མོའི་དུས་འཁོར་ལོ་སོ་སོའི་བུམ་པ་ཅན་འཆིང་ནུས་པ་ཞིག་ན་དེ་ཐམས་ཅད་དུ་གང་བར་འཛིན་ནུས་པ་ཡིན་ལ། གཞན་དུ་རྒྱུ་བ་བགག་པ་ཙམ་མོ། །དེའི་ཕྱིར་ཡས་བརྟན་ཞེས་བྱའོ། །གཞན་བྷ་གའི་རྩེར་འབབ་རིམ་གདམ་ངག་མེད་པ་རྣམས་ལའང་ཡོད་པ་དེ་ནི་ཡས་འབབ་ཡིན་ཀྱང་ཡས་བརྟན་དུ་མི་འདོད་པས་ལམ་དུ་མི་འགྲོ །དེ་ནས་གསང་གནས་ཀྱི་བུམ་པ་ཅན་ལེགས་པར་གོམས་པས་དྲག་པོའི་འགྲོས་ལས་གསང་གནས་སུ་གང་བ་རྡོ་རྗེའི་རྩ་བ། བུམ་པ། རྩེ་མོར་གང་བ་འཛིན་པ་ཡིན་ལ། གསང་བའི་བུམ་ཅན་འཆིང་མི་ནུས་པ་ལ་ནི་འདི་ནམ་མཁའ་ལ་ཉི་མ་ཤར་བ་ཙམ་ལ་འཛིན། དེ་བཞིན་གུང་དང་ཕྱི་དྲོ་སྨྲ་བ་འདྲ་སྟེ་ཁ་སྐད་ཙམ་མོ། །དེ་ལྟ་བུའི་འགྲོས་གཉིས་ཀྱི་ཕྱི་མ་འདི་ལས། གཉིས་ཀའི་གསང་གནས་སུ་ཕུང་པོ་ཁམས་སྐྱེ་མཆེད་ལ་ཏིལ་ལ་མར་ཁུ་ལྟ་བུར་ཁྱབ་པའི་ཁམས་རྩ་སྟོང་ཕྲག་བདུན་ཅུ་རྩ་གཉིས་ནས་འཁོར་ལོ་སོ་སོར་འདུ་ཞིང་གཙོ་བོར་སྤྱི་བོ་ནས་འབབ་པ་གསང་གནས་སུ་འཁྲིལ་བའི་ཚེ་ཡུལ་སྣང་བ་དང་འབྱུང་བཞི་རགས་པ་རིམ་པས་ཐིམ་པས་སྨིག་རྒྱུ་ལྟ་བུ་ལ་འོད་ཟེར་ལྔའི་ཚོགས་དང་ལྡན་པར་མཐོང་། དགའ་བ་སྣ་ཚོགས་པའི་སྐད་ཅིག་མ། དེ་ནས་རགས་པ་རྣམ་ཤེས་ལ་ཐིམ་ཞེ་སྡང་གི་ཀུན་རྟོག་ནུབ། ནམ་མཁའ་དྲི་མེད་ལ་ཁྱབ་པའི་ཟླ་བའི་འོད་ཟེར་ལྟ་བུ། སྣང་བའི་སྐབས་སྟོང་པ་བཞི་ལས་སྟོང་པ། མཆོག་དགའ། རྣམ་སྨིན་གྱི་སྐད་ཅིག་མ། དེ་ནས་རྩ་བར་སླེབ་དུས། ནམ་མཁའ་དྲི་མེད་ལ་ཁྱབ་པའི་ཉི་མའི་འོད་ཟེར་ལྟ་བུ། འདོད་ཆགས་ཀྱི་ཀུན་རྟོག་ནུབ། མཆེད་པ་དང་། ཤིན་ཏུ་སྟོང་པ་དང་། ཁྱད་དགའ་དང་། རྣམ་ཉེད་དེ་ནས་བུམ་པར་སླེབ། ནམ་མཁའ་དྲི་མེད་སྲོད་ཀྱི་མུན་པས་ཁྱབ་པ་ལྟ་བུ། གཏི་མུག་གི་ཀུན་རྟོག་ནུབ། སྟོང་པ་ཆེན་པོ། ཐོབ་པ། ཡས་ཀྱི་ལྷན་ཅིག་སྐྱེས་དགའ། མཚན་བྲལ། དེ་ནས་ནོར་བུའི་རྩེ་ཁ་སྦྱོར་གྱི་ཁར་སླེབ། ནམ་མཁའ་དྲི་མེད་སྣང་མུན་གར་ཡང་མ་ལྷུང་བ་ཐོ་རངས་ཀྱི་ཆ་ལྟ་བུ། ཕྲ་བ་ཐིམ་འོད་གསལ། ཐམས་ཅད་སྟོང་པ། འདི་མས་བརྟན་གྱི་དགའ་བ། འདི་ལ་དབུ་མའི་སྒོ་བྱེ་བས་ཉི་ཟླའི་ཐིག་ལེ་གཉིས་སྒྲ་གཅན་གྱི་རླུང་གིས་བཟུང་། སྐུའི་སྒོ་དང་གསུང་གི་སྒོ་བཙན་ཐབས་སུ་འགགས། གཏུམ་མོའི་དྲོད་ཀྱིས་ཐིག་ལེ་དབང་མེད་དུ་གྱེན་ལ་གཤེགས་པར་འགྱུར་ཏེ། དེ་ཙ་ན་རྩ་རླུང་ཁམས་རིམ་པ་བཞིན་སྙིགས་མ་ལས་ངོ་ལོག་སྟེ་དྭངས་མར་ཐིམ་པར་འགྱུར་བ་ཡིན་ནོ། །དགའ་བ་གསུམ་ཞེས་པ་ནི། ཡས་ཀྱི་ལྷན་སྐྱེས་ཚུན་དགའ་བ་དང་། དེའི་དེ་མ་ཐག་དེར་ཕྱག་རྒྱ་མའི་ཁྲག་འབབ་པ་མཆོག་དགའ། དེའི་མཐར་རང་བཞིན་གྱི་འོད་གསལ་བ་ཐམས་ཅད་ལ་འཆར་བ་དེ་རིག་པས། མཆོག་མཐའ་དགའ་བྲལ་དང་པོར་ནི། །མུན་པ་ལ་ནི་མར་མེ་ལྟར། །དེ་བཞིན་བུས་ཀྱང་ཡིད་ཆེས་ཀྱིས། །ཞེས་བརྟག་གཉིས་ལས་གསུངས། རྡོ་རྗེ་མཁའ་འགྲོར། དེ་བཞིན་གཤེགས་པའི་གཙུག་ཏོར་དཀར། །ཡིད་ནང་ཆུད་པ་དེ་ཡིས་སྤྱད། །མཆོག་ཏུ་དགའ་བ་སྤྲོ་བ་ཡི། །གནས་སྐབས་སུ་ནི་མཉེས་པར་འགྱུར། །ཞེས་བཤད། མས་བརྟན་གྱི་དགའ་བཞི་རིལ་ལྷན་སྐྱེས་སུ་བསྡུས་ནས་གསུམ་པར་བཞག་སྟེ། འདི་ལ་ནི་དགའ་བྲལ་ཡོང་ས་མེད་པས་སོ། །འདི་མ་རིག་ན་བདེ་བའི་རྟེན་ཉམས་འགྲོ་དེ་དགའ་བྲལ་དུ་བཞག དེའི་དབང་གིས་རྒྱུད་སྡེར། ལྷན་སྐྱེས་བཞི་པར་བཤད་པ་དང་གསུམ་པར་མཛད་པའི་འགྲོས་གཉིས་བྱུང་། །དང་པོ་ལ་དགའ་བྲལ་འགྱུར་ཉེས་པ་སྟེ། འདི་དགག་ཚིག་ཏུ་འཁྲུལ་པས་ལན། ཁྱད་པར་དུ་བསྒྱུར་ན་ལེགས་པས་ཁྱད་དགའ་ཞེས་བསྒྱུར་རོ། །དེ་བས་ན་སམ་པུ་ཊ་སོགས་སུ། ཡས་བརྟན་ཐམས་ཅད་ཆགས་པའི་ཕྱོགས་ལོངས་སྐུ། ཕྱིར་འཕོ་བ་སྤྲུལ་སྐུ། ཆགས་པ་དང་ཆགས་བྲལ་རོ་མཉམ་པ་དབུ་མ་ལ་གནས་པ་ཆོས་སྐུའི་ཐིག་ལེར་བཞག་པ་དང་། སློབ་དཔོན་ཀྱེ་ར་ལི་པས། དང་པོ་ལ་ཕྱི་མོ་ཕྱེད་པ། གཉིས་པ་ལ་བརྒྱལ་བ། གསུམ་པ་ལ་ཕྱི་མོར་གསུངས་ཏེ། བརྒྱལ་བས་ཀུན་ནས་ཡེ་ཤེས་མེད། །ཅུང་ཟད་ཤེས་པ་ཕྱི་མོའི་ཕྱེད། །ཡེ་ཤེས་ཕྱི་མོ་ཉིད་དུ་འགྱུར། །ཞེས་པས་སོ། །དོན་བདེ་བ་དེ་ལ་ཞེན་ན་ཆགས་པར་སོང་། འཁྲུལ། ཡེ་ཤེས་ངོས་མ་ཟིན། འཁོར་བའི་རྒྱུར་འགྲོ། བདེ་བ་དེ་ཁ་རང་ངོ་ཤེས་པ་བྱས་ཀྱང་འཁྲུལ་པའི་རྗེས་སུ་མི་འབྲང་བ་ལས་མེད། དེས་ན་བདེ་བར་ངོ་ཤེས་པ་སངས་རྒྱས་ཀྱི་དགོངས་པ་ཡིན་པས། ཡེ་ཤེས་མངོན་འགྱུར་དུ་ཤར། ཟག་བཅས་ལུས་ཀྱི་བདེ་བ་ལ་བརྟེན་ནས་སེམས་ལ་ཟག་མེད་ཀྱི་ཡེ་ཤེས་སྐྱེས་པ་ཟེར་བ་ཡིན། དོན་འཁྲུལ་ན་འདོད་ཆགས། མ་འཁྲུལ་ན་བདེ་ཆེན། དེ་བས་འདོད་ཆགས་སྤོང་མི་དགོས་བདེ་ཆེན་འཚོལ་མི་དགོས་པར་གཞི་གཅིག་པོ་འདི་ཁའི་ཐོག་ཏུ་གཉིས་ཀ་ཀྲོང་ངེར་གདའོ། །དེས་ན་ཡས་བརྟན་ལྷན་སྐྱེས་དཔེ་དང་། མས་འོངས་ཐམས་ཅད་དོན་ནོ། །འོད་གསལ་མངོན་དུ་མ་བྱས་ན། ཕྱག་རྒྱ་རྩར་བཞག་ཅིང་སྔར་གྱི་བདེ་བ་དང་སྣང་གྲགས་རིག་གསུམ་བསྲེ། དེ་ཡལ་བ་དང་ཡང་སྔར་བཞིན་བསྟེན་ནོ། །གསུམ་པ་བསྟན་འབྲས་བདེ་ཆེན་གྱི་འཆར་རིམ་བཤད་པ་ནི། དེ་ལྟར་འོད་གསལ་མངོན་སུམ་དུ་བྱས་པའི་རང་རིག་བདག་པོར་གྱུར་པས་ཐིག་ལེ་འཛག་མེད་དུ་འཆིངས་ནས་གསང་གནས་སུ་སོན། དེར་རྩ་གཉིས་ཀྱི་མདུད་པ་དབྲལ་བའི་དབང་གིས་ས་གཉིས་སོགས་འཁོར་ལོ་དྲུག་ལ་ཕྱེ་བས་བཅུ་གཉིས་ཏེ་རྟེན་འབྲེལ་ཡན་ལག་བཅུ་གཉིས་དག་པའི་འགྲོས་ལས་ཡིན་ནོ། །ལྟེ་བར་སོན་དགའ་བ། བདེ་སྟོང་གི་ཏིང་ངེ་འཛིན་ཀྱིས་བདག་རྒྱུད་ལ་ཁྱབ། སྙིང་གར་སོན། མཆོག་དགའ། སྣང་བའི་དངོས་པོ་བདེ་སྟོང་ཟུང་འཇུག་ཏུ་ཤར། མགྲིན་པར་སོན། ཁྱད་དགའ། མྱ་ངན་ལས་འདས་པའི་ཆོས་ཐམས་ཅད་བདེ་སྟོང་ཟུང་འཇུག་ཏུ་ཤར། སྤྱི་བོར་སོན་ལྷན་སྐྱེས་འཁོར་འདས་ཀྱི་ཆོས་ཐམས་ཅད་ལྷན་ཅིག་སྐྱེས་པའི་ཡེ་ཤེས་སུ་ཤར། དང་པོའི་དུས་ལོ་བཅུ་དྲུག་པའི་ལང་ཚོར་འགྱུར། སྐྲ་དཀར་དང་གཉེར་མ་མེད། མདངས་བཀྲག་མཆོག་ཏུ་འགྱུར། གཉིས་པའི་དུས་ཐལ་གོང་རྒྱས། སྲེད་མེད་ཀྱི་བུའི་སྟོབས་དང་ལྡན། གསུམ་པའི་དུས་ལྕེ་འཕེལ་ཏེ་མཛོད་སྤུར་སླེབ་ལྕེ་ཆུང་གི་བདུད་རྩི་འཛག བཞི་པའི་དུས་འཆི་མེད་ཀྱི་ཚེ་འགྲུབ། མཐའ་ཡས་པའི་རྫུ་འཕྲུལ་ལ་དབང་། གཙུག་ཏོར་བལྟར་མི་མངོན་པ་དང་སྦ་བ་སྦུབས་སུ་ནུབ། ཉི་མ་རྟོད་ལ་གནོན། ཆུ་བོ་གྱེན་ལ་ལོག་པ་ཞེས་བྱའོ། །དེ་ནས་གཙུག་ཏོར་གང་བས་སངས་རྒྱ། དེའི་ཕྱིར་རྒྱུ་མཐུན་གྱི་འབྲས་བུ། རྣམ་སྨིན་གྱི་འབྲས་བུ། སྐྱེས་བུ་བྱེད་པའི། བྲལ་བའི་འབྲས་བུ་བཞི་དང་ཡང་སྦྱར། དགའ་བ་སོགས་རེ་རེའང་ལུས་ངག་ཡིད་ཡེ་ཤེས་ཀྱི་དབྱེ་བས་དགའ་བ་བཅུ་དྲུག་འདིའི་མཐའ་མ་ཁོ་ན་སངས་རྒྱས་སོ། །ཡང་དབང་པོ་རྣོ་ན་དང་པོ་ཉིད་དུ་རྩ་རླུང་ཐིག་ལེ་རྣམ་པར་ཤེས་པའི་ཆོས་ཐམས་ཅད་གཉུག་མར་ཐིམ་པས། ལྷན་སྐྱེས་ཡེ་ཤེས་རང་བཞིན་དབྱེར་མེད་སྟོན། །སྣང་སྲིད་ཐམས་ཅད་ཟག་མེད་བདེ་བར་འཆར། །ཞེས་གསུངས་སོ། །དེས་ན་འདི་ལ་ས་ལམ་གྱི་རྣམ་གཞག་ཅུང་མེད་དེ་སྐད་ཅིག་གིས་སངས་རྒྱས་པའི་ཕྱིར་རོ། །གསང་དབང་ཕྱག་རྒྱ་བདུད་རྩི་རིལ་བུའི་ཕྱིར། །ཐིག་ལེ་བཅུ་དྲུག་ཕྱེད་ཕྱེད་བཞི་ཆ་སྦྱིན། །བཞི་གསུམ་འཁོར་ལོ་དག་ལ་བགྲམ་པར་བྱ། །ཞེས་པ་ནི་འཕོ་བ་ཉེས་མེད་དུ་བཤད་པའི་སྐབས། གཞན་སྲོག་བཞིན་དུ་བསྲུང་། ཕྱག་རྒྱ་ལ་སྲིད་ཀྱི་དགོས་པ་མེད་ན། བཞི་གསུམ་ཞེས་པས་ཐིག་ལེ་དྭངས་སྙིགས་ལན་བཞིར་ཕྱེ་བའི་བཞི་པར་སྙིགས་མ་འབའ་ཞིག་འབབ་པས་དེ་ཙམ་དབྱུང་བར་ཡང་མ་བཤད་དོ། །གཞན། བག་མེད་འདོད་སྲེད་གཞན་དབང་ཆང་གིས་མྱོས། །དོན་ལས་ཉམས་ཤིང་སླར་ཡང་ངན་སོང་ལྷུང་། །ཞེས་པ་ཉེས་པར་འགྲོ་བའི་སྐབས། དེས་ན་རྡོ་རྗེའི་ལུས་ལ་གནད་དུ་བསྣུན། །ཚེ་འདིར་སངས་རྒྱས་སྟེར་བར་ཐེ་ཚོམ་མེད། །ཅེས་པས། རྡོ་རྗེ་མཁའ་འགྲོར། པདྨ་མཆོག་ལ་རེག་བྱེད་པ། །ལོ་གཅིག་བར་དུ་མ་བྱས་ན། །སྒྲུབ་པོས་དམ་ཚིག་སྤངས་འགྱུར་ཏེ། །དང་། ཉིན་རེའམ་ཡང་ན་ཟླ་རེའམ། །ཡང་ན་དེ་བཞིན་ལོ་རེར་ནི། །ཇི་བཞིན་བྱིན་གྱིས་བརླབས་ནས་ནི། །ཕྱག་རྒྱའི་དངོས་གྲུབ་འཇུག་པར་འགྱུར། །ཞེས་གསུངས། རས་ཆུང་པའི་ཐོ་ཡིག་ཏུ། དྭངས་མའི་བདུད་རྩིས་ཤིན་ཏུ་གང་། །ས་ནི་བཅུ་གསུམ་འཐོབ་པ་དང་། བདེ་བའི་དབང་ཕྱུག་ལྟ་བུར་བཞག །ཅེས་དམར་ཆ་ལེན་པའི་དབང་དུ་མཛད་པ་དང་། དཀར་པོ་ཉིད་ཀྱི་བཞུ་བཏུལ་གྱི་དབང་དུ་བྱས་ནས། དྲིལ་ཅན་ཟླ་བའི་ལམ་གྱི་ནི། །ངེས་པའི་ལམ་ཡང་གསལ་བར་འགྱུར། །འཇིག་རྟེན་མཐའ་ཡས་ཐམས་ཅད་དུ། །ཆོས་ཀྱི་འཁོར་ལོ་བསྐོར་བར་འགྱུར། །འདིས་ནང་རྩ་རླུང་ཐིག་ལེ་འབྱོངས་པ་མདོ་ནས་བཤད་པའི་རྫོགས་སྨིན་སྦྱང་གསུམ་བྱས་པར་སོང་བས། བདེ་ཆེན་དྲི་མེད་ལམ་གྱི་མཆོག །དུས་གསུམ་སངས་རྒྱས་ཐམས་ཅད་ཀྱི། །བགྲོད་པ་གཅིག་པ་ཟབ་མོའི་ལམ། །ཚེ་འདིས་དངོས་པོའི་བདུད་འཇོམས་ཤོག །ཅེས་གསུངས་སོ། །འོག་སྒོའི་ཁྲིད་རྗེ་བཙུན་རྣམས་ཀྱི་མན་ངག་ཇི་ལྟ་བར་པདྨ་དཀར་པོས་སྦྱར་ཞིང་བསྲེ་ལྷད་མེད་དེ་སྤྱད་པས་ཆོག་གོ། །།མངྒ་ལཾ།། །། རྗེ་བཙུན་ནཱ་རོ་པའི་ཕྱག་རྒྱ་ལམ་རྫོགས་ཀྱི་ཁྲིད།རྗེ་བཙུན་ནཱ་རོ་པའི་ཕྱག་རྒྱ་ལམ་རྫོགས་ཀྱི་ཁྲིད་བཞུགས་སོ། །བླ་མ་དམ་པའི་ཞབས་ལ་ཕྱག་འཚལ་ལོ། །ཡོན་ཏན་ཀུན་གྱི་གཞིར་གྱུར་པ། །རྡོ་རྗེ་གསུམ་དབྱེར་མེད་པའི་སྐུ། །རྫོགས་པའི་སངས་རྒྱས་མངོན་སུམ་པའི། །ནཱ་རོ་ཡབ་སྲས་ལ་བཏུད་ནས། །རྡོ་རྗེའི་ས་ལ་བགྲོད་འདོད་རྣམས། །ཕོ་ཉ་ལྟ་བུས་དེར་ཕྱིན་པའི། །སྦས་པའི་ལམ་འདི་ཕྱེ་བས་སུ། །མཆོག་གི་འདུན་ས་དོག་པར་བྱ། །འདིར་རྣལ་འབྱོར་གྱི་དབང་ཕྱུག་ནཱ་རོ་པའི་ཕྱག་རྒྱ་ལམ་རྫོགས་ཀྱི་མན་ངག རྒྱུད་ཐམས་ཅད་ཀྱི་སྦས་པའི་དོན་བཤད་པ་བཙན་ཐབས་ཕོ་ཉའི་ལམ། མ་བསྒོམས་པར་འཚང་རྒྱ་བར་བྱེད་པའི་གདམས་པ། འོག་སྒོ་བདེ་བ་ཆེན་པོའི་ཁྲིད་འཆད་པར་བྱེད་པ་ལ། སྔོན་དུ་འགྲོ་བ་རྒྱུད་སྦྱང་བ་དང་། དངོས་གཞི་གནད་ཀྱི་གདམ་ངག་གོ །དང་པོ་ལ། རླུང་སྦྱང་བ། རྡོ་རྗེ་ཆུ་འཐུང་གིས་ཉམས་སད་པ་གཉིས་ལས། དང་པོ་ལ། བུམ་པ་ཅན། བཙན་ཐབས། མདའ་ལྟར་འཕང་བ། འཁོར་ལོ་ལྟར་བསྐོར་བ། རྡོ་རྗེ་ཐོད་སྦྱོར། རླུང་དབུ་འཇུག ཡི་གེ་དབུ་འཇུག རླུང་སྤེལ་བ། རྩ་དབུ་མར་གཞུག་པ་དང་དགུ་ལས། དང་པོ་བུམ་པ་ཅན་གྱི་རླུང་སྦྱོར་ནི། གཞུང་ལས། དེས་ཀྱང་སྒོམ་སྐྱེད་མ་བྱུང་ཞིང་། །ཏིང་འཛིན་བརྟན་པར་མ་གྱུར་ན། །ལས་ཀྱི་ཕྱག་རྒྱ་མཚན་ལྡན་ལས། །ལམ་ལྔ་འབྲས་བུ་ཐོབ་པར་བྱ། །སྦྱོར་ཐབས་མི་ཤེས་རྣལ་འབྱོར་དང་། །སྟན་ཡང་གཅིག་ལ་མི་བསྡད་དེ། །གལ་ཏེ་བརྒྱ་ལ་བསྡད་གྱུར་ན། །ཤི་ནས་མནར་མེད་དམྱལ་བར་སྐྱེ། །འདོད་ཆགས་ལ་སོགས་ཤལ་མ་ལི། །ཡར་ལ་བཤལ་ཅིང་མར་ལ་འདྲུད། །དེ་ཕྱིར་སྦྱོར་ཐབས་མཁས་པས་བསྟེན། །ཅེས་གསུངས་པའི་དོན་ལས། དང་པོར་བདེ་བའི་སྟན་ལ་ལུས་སྐྱིལ་ཀྲུང་བཅས། ལག་པ་མཉམ་བཞག་བསྲང་ནས་སྟོད་གཅུན། དང་ཁ་དགྱེད། ཨོག་སྐོས་མདུད་མནན་ལྕེ་ཡར་ཀན་ལ་གཏད། མིག་སྣ་རྩེར་བལྟས་ལ། སྟེང་རླུང་ནང་དུ་བརྔུབས་པས་ཁོང་པ་ཐམས་ཅད་གང་བར་བསྒོམ། དེ་ཡང་། པུས་མོ་གཉིས་དལ་བུས་བསྐོར་ཞིང་། སེ་གོལ་རེ་བརྡབས་པའི་གྲངས་བརྒྱ་རྩ་བརྒྱད་རབ། བདུན་ཅུ་རྩ་གཉིས་འབྲིང་། སུམ་ཅུ་རྩ་དྲུག་ཐ་མ་སྟེ། དེ་ནས་མ་ཐུབ་པ་གཏོང་བའི་དུས་སུ་ལུས་སྦུད་པ་སྟོང་པ་བཞིན་དུ་སོང་བར་བསམ་མོ། །གཉིས་པ་བཙན་ཐབས་སུ་བགག་པ་ནི། ལུས་གནད་འདྲ་བ་ལ། མགྲིན་པར་པདྨ་དམར་པོ་འདབ་མ་བཞི་པའི་དབུས་སུ་ཐིག་ལེ་དམར་པོ་སྲན་མ་ཙམ་ཞིག་བསམས་ལ། རླུང་ནང་དུ་བརྔུབས་ནས་རྩ་འདབ་མ་ཐེབས་པར་བསྡམས་པའི་མཐར་ཅི་ཡང་མི་དམིགས་པ་སྟོང་པའི་ངང་དུ་གཞག་པས་རླུང་རང་སར་ཉལ་ཞི་རུ་བཅུག ཡང་ན་གཡོན་གྱི་མགྲིན་པ་དང་དཔུང་མགོ་ལ་མ་རེག་པར་དལ་བུས་གཅུས་པའི་ཨོག་སྐོ་དཔུང་པ་གཡས་སུ་བཞག་ལ་སྟེང་རླུང་དྲག་ཏུ་བཟུང་བ་མང་དུ་བྱ། ཡང་ན། དེ་བཞིན་དུ་གཡོན་དུ་བྱ། ཡང་ན། སེང་གེ་རྣམ་རོལ་གྱི་ཕྱག་རྒྱ་བཅིངས་ལ་བགག་པ་སྟེང་རླུང་རྣམ་པར་འགོག་བའི་སྦྱོར་བའོ། །དེ་ནས་འོག་སྒོ་དྲག་ཏུ་འཛུམ་པས་འོག་རླུང་གྱེན་དུ་དྲངས། འོག་སྒོ་དྲག་ཏུ་འབྱེད་པས་སྟེང་རླུང་ཐུར་དུ་མནན། དེས་ལུས་ཐམས་ཅད་རླུང་གིས་ཁེངས་པར་འགྱུར་རོ། །གསུམ་པ་མདའ་ལྟར་འཕང་བ་ནི། རང་ལྷའི་སྟོང་རར་གསལ་བའི་ལུས་ཀྱི་དབུས་སུ་རྩ་དབུ་མ་མདའ་སྨྱུག་ཙམ་ཡར་སྣ་སྤྱི་བོའི་ཧཾ་དང་མར་སྣ་གསང་བའི་རྡོ་རྗེ་ལ་བུག་པ་ཧ་རེ་ཟུག་པའི། སྤྱི་བོའི་ནང་དུ་ཐིག་ལེ་དཀར་པོ་སྲན་མ་ཙམ་ཞིག་བསྒོམས་ནས། རླུང་སྣ་གཉིས་ནས་བརྔུབས་པའི་དུས་ཐིག་ལེ་དྷཱུ་ཏིའི་ནང་ནས་རྩལ་པོ་ཆེས་མདའ་འཕངས་པ་བཞིན་རྡོ་རྗེའི་ཁར་ཐོན། སྟེང་རླུང་དྲག་པོར་མནན་འོག་གློད། མི་ཐུབ་པ་དང་ཧཱུྃ་རིང་དགུས་འོག་རླུང་གྱེན་དུ་དྲག་པོར་འཐེན། ཐིག་ལེ་གྱེན་དུ་མདའ་འཕངས་པ་བཞིན་སོང་བ་ཧཾ་ལ་ཕོག སྟེང་གློད་འོག་བསྡམས་ནས་ཕྱིར་ཙམ་ཐུབ་འཛིན་པར་བྱའོ། །དེ་ནི་ཐུར་སེལ་དབང་དུ་སྡུད་པའི་རླུང་སྦྱོར་རོ། །བཞི་པ་འཁོར་ལོ་ལྟར་བསྐོར་བ་ནི། རླུང་བརྔུབས་པས་ལྟེ་བའི་དཀྱིལ་འཁོར་དུ་པདྨ་འདབ་མ་བཅུ་དྲུག་པའི་ལྟེ་བའི་ཐིག་ལེ་དང་གཅིག་ཏུ་འདྲེས་པའི་འོད་ཟེར་ཁ་དོག་དཀར་པོ་མགྲིན་པའི་བར་དུ་བྲེང་ངེ་སླེབ་ལྟེ་བའི་འཁོར་ལོ་སྒྱེར་རི་རི་འཁོར་བར་བསམས་ནས། ཁ་སྦྱོར་གྱི་རླུང་ཐུབ་ཚད་བསྡམ་པ་རླུང་སེམས་བསྲེ་བའི་རླུང་སྦྱོར་རོ། །ལྔ་པ་རྡོ་རྗེ་ཐོད་སྦྱོར་ནི། ལྟེ་བར་པད་འདབ་བཞི། རླུང་རྡོ་རྗེ་དཀར་པོ་རྩེ་ལྔ་པའི་རྣམ་པར་བརྔུབས་པས་ལྟེ་བར་ཕོག སྟེང་རླུང་དྲག་པོར་མནན། འོག་རླུང་ཤུགས་བསྐྱེད་འཐེན། པདྨ་རྡོ་རྗེ་དང་བཅས་པ་འཁོར་བར་བསམས་ཏེ། ལུས་མི་གཡོ་བར་རླུང་གཡས་གཡོན་དུ་བསྐོར་རོ། །དེ་ལ་སྟེང་འོག་བསྲེ་བའི་རླུང་སྦྱོར་ཞེས་བྱའོ། །དྲུག་པ་རླུང་དབུ་མར་གཞུག་པ་ནི། རྡོ་རྗེ་སྐྱིལ་ཀྲུང་ཁུ་ཚུར་སྙིང་གར་བསྣོལ་གྲུ་མོ་བརྒྱངས། ཁ་ཅུང་ཟད་བྱས། རླུང་ནང་དུ་འཇུག་དུས་སྲོག་པ་རྩའི་ནང་དུ་ཨ་ཝ་དྷཱུ་ཏི་པདྨའི་སྣལ་མ་ལྟ་བུར་ཕྲ་བའི་མར་སྣའི་བུ་ག་ནས་ཞུགས། ཁ་སྦྱོར་དུ་ཐུབ་ཚད་བསྒོམ་ཞིང་། ཕྱིར་གཏོང་བའི་དུས་ཀྱང་དེའི་ནང་ནས་སོང་བར་བསམ་ལ། ཁ་ནས་དལ་བུས་བརྔུབ་པ་དང་གཏང་བར་བྱའོ། །བདུན་པ་ཡི་གེ་དབུ་མར་གཞུག་པ་ནི། གཞན་འདྲ་བ་ལ། ལག་པ་བསྣོལ་བ་པུས་མོར་བཀབ། ལུས་ལི་ཁྲི་བཞིན་དུ་ཆ་ཆ་ནས་བསྒྲིམ་དམིགས་པ་རོ་བརྐྱང་སྣའི་སྒོ་དང་། དབུ་མ་སྤྱི་བོ་ནས་སུམ་མདོར་འདུས་པ་དམར་པོ། སྣ་གཡོན་པའི་སྒོར་ཨེ་སྔོན་པོ་དང་། གཡས་པར་བཾ་དམར་པོ་བསམ་ནས། སྟེང་རླུང་ནང་དུ་དྲག་ཏུ་བཅུག་པས། ཡི་གེ་གཉིས་པོ་དེ་གཡས་གཡོན་གྱི་རྩའི་ནང་ན་མར་ཐལ་ཐལ་སོང་ནས་སུམ་མདོའི་སྣ་རུ་སླེབ། ཧཱུྃ་དགུ་དྲག་ཏུ་བརྗོད་ཅིང་འོག་རླུང་གྱེན་དུ་དྲངས་པས། ཨེ་ཝཾ་དྷཱུ་ཏིར་ཞུགས་པ་སྤྱི་བོའི་བར་དུ་དྲང་ངོ་། །བརྒྱད་པ་རླུང་སྤེལ་བ་ནི། རང་ལུས་ལྷའི་སྟོང་རར་གསལ་བའི་ལྟེ་བའི་ཐད་ཀར་རླུང་གི་དཀྱིལ་འཁོར་རྩིབས་བརྒྱད་པ་ཁ་དོག་སྔོ་སྐྱ་སོར་དྲུག་བསྐོར་བའི་ཚད་ཙམ་པའི་དབུས་སུ། ཨ་ཡིག་བྷནྡྷུ་ཛི་ཝ་ཀ་གྱེན་དུ་ལངས་པ་ལྟ་བུ་ཞིག་དམིགས་ནས། སྟེང་རླུང་མནན་པ་ཨའི་ཐད་དུ་འདུས། འོག་རླུང་དྲངས་པས་རླུང་གཉིས་འཐབས་ཏེ་ལྟེ་བའི་རླུང་གི་དཀྱིལ་འཁོར་ལངས་པ་ཞེས་བྱ་བ་རྒྱ་ཇེ་ཆེ་ཇེ་ཆེར་སོང་བ་ནམ་མཁའ་ཁྱབ་པར་བསྒོམ། སྐབས་སུ་རྫ་མཁན་གྱི་འཁོར་ལོ་འཁོར་བ་ལྟར་དུ་ཡང་བསྒོམ་ཞིང་། རླུང་གཏོང་བའི་ཚེ་འཁོར་ལོ་མདའ་འཕངས་པ་བཞིན་ཚངས་པའི་བུ་ག་ཚུན་རྒྱང་གིས་འཕངས། བརྔུབ་པའི་ཚེ་སླར་ལྟེ་བར་སླེབ་པར་བསམ་མོ། །དགུ་པ་རྩ་དབུ་མར་གཞུག་པ་ནི། རྐང་པ་རྡོར་སྐྱིལ། ལག་པ་རྡོ་རྗེ་བསྡམས་པའི་ཕྱག་རྒྱ་ཁ་སྦུབ་པ་མདུན་དུ་བཙུགས། གྲུ་མོ་དང་ལུས་བསྲངས་ཆ་ཆ་ནས་གཅུན། མིག་གཙུག་ཏོར་འཁོར་ལོ་སྒྱུར་བའི་ལྟ་སྟངས་བཅས་ལ། ལྷའི་སྟོང་ར་དང་རྩ་གསུམ་གོང་བཞིན་དུ་གསལ་བཏབ་པའི་དབུ་མའི་ཡར་སྣར་ཧཾ། གཡས་སུ་ཨེ། གཡོན་དུ་བཾ། སྟེང་རླུང་བརྔུབས་ པས་ཡི་གེ་གསུམ་རྩ་གསུམ་འདུས་མདོར་སླེབ། དེ་ནས་ཧཱུྃ་རིང་དགུས་འོག་རླུང་གྱེན་དུ་དྲངས་པས་ཡི་གེ་གཞན་གཉིས་ཀྱང་དབུ་མར་ཚུད་ནས་སྤྱི་གཙུག་ཏུ་ཐིམ། དེ་ལ་གོམས་ནས་རྩ་གཉིས་ཀྱི་མར་སྣ་ཨེ་ཝཾ་གི་ཡི་གེའི་རྣམ་པར་བསམ་ནས། གོང་བཞིན་འོག་རླུང་གྱེན་དུ་དྲངས་པས་ཡི་གེ་དབུ་མར་ཚུད། དེས་རྩ་གཉིས་ཀྱང་དབུ་མར་ཚུད་དེ་སྤྱི་བོར་སླེབ། ཡང་། སྟེང་རླུང་མནན་པས་གསང་གནས་སུ་སླེབ་པར་བསམ་པ་ཡང་ནས་ཡང་དུ་བསྒོམ་པར་བྱའོ། །སྔ་མ་སྔ་མ་ལ་འཐུལ་མ་ཚུད་པར་ཕྱི་མ་མི་བསྟན་ནོ། །དེ་རྣམས་ཀྱིས་སྟེང་རླུང་འོག་ཏུ་འདྲོངས་པ་དང་། འོག་རླུང་སྟེང་དུ་འདྲོངས་པ་དང་། རྩ་བའི་རླུང་ཡན་ལག་དང་། ཡན་ལག་གི་རླུང་རྩ་བར་འདྲོངས་པར་འགྱུར་རོ། །གལ་ཏེ་རླུང་གི་གེགས་བྱུང་ན་ལམ་རྒྱས་པ་བཞིན་འཆོས་པར་བྱའོ། །གཉིས་པ་རྡོ་རྗེ་ཆུ་འཐུང་གིས་ཉམས་སད་པ་ལ་སྦྱང་བ། སད་པ། སྤོགས་པའི་ཆོ་ག་བསྟན་པ་གསུམ་ལས། དང་པོ་ནི། དབེན་པའི་གནས་སུ་ལུས་ཟུངས་རྒྱས་པར་བྱས་ལ། ལུས་ཐམས་ཅད་དང་རྡོ་རྗེ་ལ་ལོ་མར་བྱུགས། ཡུན་རིང་དུ་མཉེ་ཞིང་ཉི་མ་ལ་བདུག དེ་ལྟར་ཉི་མ་འགའ་བྱས་པའི་རྗེས་ལ་སྟན་བདེ་བ་ལ་སྐྱིལ་ཀྲུང་བཅས་ལག་པ་པུས་མོ་ལ་བསྣོལ་མར་བཀབ། ལུས་བསྲངས་མཁལ་མ་འཐེན་པའི་སྦྱོར་བས་དབུ་མ་བཙུགས་རྒྱབ་གློད་ནས་ཧཱུྃ་རིང་དགུས་འོག་གི་མདུན་རླུང་དྲག་ཏུ་འཐེན། དམིགས་པ་དབུ་མའི་སྤྱི་བོ་ནས་རྡོ་རྗེའི་བུ་ག་ཚུན་ཟུག་པ་མདའ་སྨྱུག་ཙམ་པའི་ནོར་བུའི་ནང་གི་རྩེར་ཐིག་ལེ་དཀར་པོ་སྲན་མ་ཙམ་ཞིག་ཡོད་པ་སྤྱི་བོར་རྒྱང་རྒྱང་འཐོན་པར་བསམས། སྟེང་རླུང་དལ་བུས་མཐུར་དུ་བསྐུལ་དུས་གསང་བར་སླེབ་པར་བསམས་ནས་ཡང་ཡང་སྦྱངས་པས། མཁལ་སྐེད་ན་བ་བྱུང་ན་སྐེད་པ་བསྐོར་ཞིང་གྱེན་དུ་དྲངས། མགོ་བོ་ན་ན་མགོ་བོ་བསྐྱོད། རོ་སྟོད་ན་ན་རོ་སྟོད་གསིག དེ་ནས་ལྕགས་ཟངས་ལ་སོགས་པའམ། སྨྱུག་མའི་ཐུར་མ་སྦོམ་ཕྲ་རན་པ། རིང་ཐུང་མཐོ་གང་སོར་བཞི་ཙམ་པ་རྡོ་རྗེའི་བུ་གར་བཙུགས། བཤང་ལམ་དང་ཆུ་ལམ་གྱི་ཐེར་ཡ་ལ་ཐུག་གི་བར་བཏང་། །སྟེང་རླུང་དྲག་ཏུ་མནན་ཏེ་མདུན་རླུང་སོར་གཞག །རྒྱབ་རླུང་ཐུར་ལ་ཆུ་བཙིར་བ་བཞིན་ཕུལ་བས། དེ་ཕྱིར་རྒྱང་གིས་འཐོན་ན་སྟེང་རླུང་འོག་ཏུ་སྤོ་བ་འབྱོངས་པ་ཡིན་ཞིང་། དེ་ནས་རྡོ་རྗེའི་བུ་གར་སོར་གཅིག་ཙམ་བཅུག མདུན་རླུང་མནན། རྒྱབ་རླུང་གྱེན་དུ་དྲག་ཏུ་འཐེན་པས་སམ། རྒྱབ་རླུང་ཐུར་དུ་མནན། མདུན་རླུང་གྱེན་དུ་དྲངས་པ་དང་རུ་སྦལ་བསྐུམ་པའི་འཁྲུལ་འཁོར་གྱིས་ནུད་ཙམ་ནུད་ཙམ་ནས་མཐར་རྡོ་རྗེའི་རྩ་བར་ལྷན་གྱིས་འདྲོངས་ན་འོག་རླུང་སྟེང་དུ་འདྲོངས་པ་འབྱོངས་པ་ཡིན་ནོ། །དེ་ལྟར་རེས་ཕྱིར་འཕུལ། རེས་ནང་དུ་དྲངས་པ་མང་དུ་བྱ། བར་བར་ཐམས་ཅད་དུ་མཉེ་བ་ཤིན་ཏུ་གལ་ཆེའོ། །གཉིས་པ་སད་པ་ནི། ངང་པའི་སྒོ་ངའམ། ལྒང་བུག་ནང་དུ་རའི་འོ་མ་རང་དྲོད་ཙམ་ལ་བཟང་དྲུག ཀ་ར། པདྨ་རཀྟ་བཏབ་པས་བཀང་ལ། དེའི་ནང་དུ་གསང་བའི་གནས་ཀྱི་ཐུར་མ་ཚུད་པར་བྱས་ནས་མཐའ་ཐམས་ཅད་བག་ཟན་གྱིས་བསྡམས། དེ་ནས་སྔ་མ་བཞིན་དུ་དྲངས་པས་སུམ་ཆ་དང་སུམ་གཉིས་ཙམ་དང་། རིམ་གྱིས་ཐམས་ཅད་འདྲོངས་པར་འགྱུར་རོ། །དེ་ནས་དུང་ཆོས་དང་། ཁམ་ཕོར་ལ་སོགས་པའི་སྣོད་ནས་ཀྱང་འདྲོངས་པར་འགྱུར་རོ། །དེ་ནས་འོ་མ་དང་ཁྲག་འདྲེས་པ་དང་། ཁྲག་རྐྱང་པ་གོང་བཞིན་དྲངས། དེ་ཐམས་ཅད་ལུས་ལ་མི་བཞག་པར་ཕྱིར་གདོན། དེ་ལྟར་གྱུར་ནས་མགོ་བོ་རྒྱབ་ཏུ་འཕངས། ལུས་གནད་དང་རླུང་སྦྱོར་སྔ་མ་བཞིན་གྱིས་དྲངས། དེ་ནས་སྟེང་རླུང་མནན་མགོ་བོ་མདུན་དུ་བཀུག་པས་སྣ་བུག་གཉིས་སུ་ཐོན་ན་སྲོག་ཐུར་གོང་བུ་གཅིག་ཏུ་གྱུར་པའི་རྟགས་ཡིན་ནོ། །སྣ་བུག་ཏུ་མི་ཡོང་བར་བྱ་ཐབས་ནི། མགོ་བོ་རྒྱབ་ཏུ་མི་འཕང་བར་མདུན་དུ་བཀུག་པ་ཉིད་དོ། །མཐར་ཐུར་མ་མེད་པ་ལ་ཐུབ་ན་འབྱོངས་པའི་ཚད་དོ། །གསུམ་པ་སྤོགས་པའི་ཆོ་ག་ནི། དེ་ལྟར་མ་གྲུབ་ན་ཐུར་མ་བཙུགས། ཕུས་བཏབ་པས་སམ། ལྒང་བུག་རླུང་གིས་བཀང་བ་བཙིར་བས་ལམ་སྦྱངས། རྡོ་རྗེའི་བུམ་པར་དབུགས་བསྐྱིལ་བ་འཕུལ་འཐེན་ལ་བསླབས་པས་ངེས་པར་འགྲུབ་བོ། །ཁྲག་གཅོད་པ་དང་། འཛག་པ་བསྲུང་བ་དང་། གྲང་བ་མགོ་གནོན་པ་ལ་སོགས་པ་ལག་ལེན་མཐོང་བ་ལས་ཤེས་པར་བྱའོ། །ཞར་ལ་རྒྱབ་ཏུ་ཐུར་མ་ལག་ལེན་བཞིན་བཙུགས། དབུ་མ་རྒྱབ་ཏུ་ཕུལ་ནས་འབྱེད་འཛུམ་གྱིས་དྲངས་པས་གང་འདོད་འདྲོངས་པར་འགྱུར་ཞིང་། སྒྲེགས་འདྲེན་ནམ་སྐྱུགས་སྟངས་ཀྱིས་ཁར་ཡང་འབྱིན་པར་བྱའོ། །གཉིས་པ་དངོས་གཞི་གནད་ཀྱི་གདམ་ངག་ལ། རང་ལུས་ཐབས་ལྡན་དང་། གཞན་ལུས་ཤེས་རབ་ཕྱག་རྒྱའི་ཉམས་ལེན་གཉིས་ལས། དང་པོ་རང་ལུས་ཐབས་ལྡན་ལ། ཡིད་རིག་དམིགས་རྟེན་དུ་བྱས་པའི་ཀུན་ཏུ་རུ་དང་། དངོས་རིག་མཚོན་བྱེད་དུ་བྱས་པའི་ཀུན་ཏུ་རུ་གཉིས་ལས། དང་པོ་ཡིད་རིག་དམིགས་རྟེན་དུ་བྱས་པའི་ཀུན་ཏུ་རུ་ནི་གཞུང་ལས། བསྟན་པ་སྨོད་པས་འཇིགས་པ་ན། །རང་སེམས་ཙམ་ལ་མོས་པ་བྱ། །ཞེས་གསུངས་པས། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱའོ་སྙམ་པའི་སྨོན་པ་སྔོན་དུ་བཏང་ནས། དེའི་ཆེད་དུ་རང་ཉིད་བཅོམ་ལྡན་འདས་དཔལ་འཁོར་ལོ་སྡོམ་པ་ཡབ་ཡུམ་དུ་བསྐྱེད། སྐུ་གསུང་ཐུགས་དང་མཁའ་གསང་བྱིན་གྱིས་བརླབས་ནས། སྙོམས་པར་ཞུགས་པའི་མོས་པས་རྗེས་སུ་ཆགས་པ་སྐྱེས་པའི་མེས་བྱང་ཆུབ་ཀྱི་སེམས་བཞུ་བའི་དགའ་བ་དང་། མཆོག་ཏུ་དགའ་བ་དང་། ཁྱད་པར་གྱི་དགའ་བ་དང་། ལྷན་ཅིག་སྐྱེས་པའི་དགའ་བའི་བདེ་བ་ལ་མཉམ་པར་བཞག་པར་བྱའོ། །གཉིས་པ་དངོས་རིག་མཚོན་བྱེད་དུ་བྱས་པའི་ཀུན་ཏུ་རུ་ནི། རང་ཉིད་བཅོམ་ལྡན་འདས་དང་། ལག་པ་གཡོན་པའི་རྒན་པོ་དང་སྲིན་ཞབས་མིག་ཏུ་བྱས་པ་བཅོམ་ལྡན་འདས་མར་བལྟས་ལ། དེས་རྡོ་རྗེ་གསོལ་བ། ཡབ་ཡུམ་སྙོམས་པར་འཇུག་པར་བསྒོམས་ལ། བྱང་སེམས་འདར་བ། འཕར་བ། གཡོ་བ། བརྟན་པའི་མཚན་ཉིད་ཅན་གྱི་དགའ་བ་བཞི་ལ་རིམ་པ་བཞིན་མཉམ་པར་གཞག་ནས། འཛིན་པ་ལ་སོགས་པ་འོག་ཏུ་རྒྱས་པར་འབྱུང་བ་བཞིན་དུ་བྱའོ། །གཉིས་པ་གཞན་ལུས་ཤེས་རབ་ཕྱག་རྒྱའི་ཉམས་ལེན་ལ། སྔོན་དུ་འགྲོ་བ་ཡན་ལག་གི་ཆོས། དངོས་གཞི་གནད་ཀྱི་མན་ངག རྗེས་ལམ་དུ་ཁྱེར་བ་གསུམ་ལས། དང་པོ་སྔོན་དུ་འགྲོ་བ་ཡན་ལག་གི་ཆོས་ལ། བརྟག་པ། དགུག་པ། མི་སྣང་བར་བྱ་བ། སྲིད་བསྲུང་བ་དང་བཞི་ལས། དང་པོ་བརྟག་པ་ནི། གཞུང་ལས། པདྨ་ཅན་དང་དུང་ཅན་མ། །རི་མོ་ཅན་དང་རི་དྭགས་ཅན། །བྲམ་ཟེ་རྒྱལ་རིགས་རྗེ་རིགས་དང་། །དམངས་རིགས་གདོལ་པ་ལ་སོགས་དང་། །མ་དང་སྲིང་མོ་བུ་མོ་ཡང་། །ཁྱད་པར་ཅན་གྱིས་བསྟེན་གྱུར་ན། །ཡོན་ཏན་འབྱུང་གི་སྐྱོན་དུ་མིན། །བཅུ་གཅིག་མ་དང་བཅུ་གཉིས་དང་། །བཅུ་དྲུག་མ་དང་ཉི་ཤུ་མ། །ཉི་ཤུ་བཞི་ལོན་བར་དུ་བསྟེན། །སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་གསུངས་པའི་པདྨ་ཅན་རབ་ནི། བྱད་དཀར་ལ་རྩ་དམར་བ། ལུས་རགས་པ། མིག་རྩ་དམར་བ། སྤྱིར་ལུས་པོ་ཕྲ་ལ་ཁྱད་པར་དུ་སྐེད་པ་ཕྲ་བ། བྱ་ལྟར་རྐང་ལག་དམར་བ། སོ་ལེགས་པ། དེ་ནི་དེ་བཞིན་གཤེགས་པའི་མཚན་ཉིད་དང་ལྡན་པ་སྟེ། རིགས་ཤིན་ཏུ་བཟང་བའོ། །དེ་ལ་སྦྱོར་ན་རྒྱལ་བའི་འབྲས་བུ་ཚེ་འདི་ཉིད་ལ་འཐོབ་བོ། །འབྲིང་ནི་ཤ་རྩི་དཀར་བ། རུས་ཁྱིམ་ཆེ་བ། རུས་པ་རགས་པ། ཁོང་དལ་ཆེ་བ། སྤྱོད་ལམ་རྩིང་བ། བྱད་སྡུག་པ། བློ་འཆོས་དཀའ་བ། སྒྲུབ་པ་པོའི་རྟོག་པ་དང་བསྟུན་པ། བུ་སྐྱེས་ན་ཁྱེའུ་སྐྱེ་བ། འཇིག་རྟེན་གྱི་ལས་དང་བྱ་བ་ལ་མཁས་པ། དེ་དང་ཕྲད་ན་ལོ་རུ་མི་ཐོགས་པར་འབྲས་བུ་འཐོབ་བོ། །ཐ་མ་ནི། དཀར་མོ་མིག་འགྱུར་ཞེས་བྱ་སྟེ། །ཁ་དོག་དཀར་བ། བྱད་ལེགས་ཀྱང་སྙིང་དུ་མི་སྡུག་པ། གསང་མི་ཐུབ་པ། གཟུགས་བྱད་འཆོས་པ། བྱི་དོར་ལ་བརྩོན་པ། རྒོད་ཁ་ཡང་བ། མིག་འབོར་བ། བསླུ་བླ་བ། བསླུ་ཁ་ཡང་པ་སྟེ། དེ་ནི་བསྟེན་པའི་རིགས་མ་ཡིན་ནོ། །དུང་ཅན་མ་རབ་ནི་ཤ་སེར་ལ་རྩ་དམར་བ། སྤྱོད་ཁྱེར་མཁས་པ། འདུག་ཚུགས་ལེགས་པ། ཚིག་བརྟན་པ། མིག་ཟུར་མིག་ཏུ་བལྟ་བ། ཟུར་རྣོ་བ། དོན་གང་ལ་ཡང་བག་ཙམ་གྱིས་གོ་བ། ཤེས་རབ་ཆེ་བ། དེ་ལྟ་བུ་དང་ཕྲད་ན་ཚེ་འདི་ལ་འབྲས་བུ་འཐོབ་བོ། །འབྲིང་ནི། རྒྱབ་ནས་བལྟས་ན་དགྱེ་བ་སྙམ་བྱེད། མདུན་ནས་བལྟས་ན་དགུ་བ་སྙམ་བྱེད་པ། སྤྱིར་ལུས་ལེགས་པ། ཁྱད་པར་དུ་སྨིན་ཕྲག་གི་མཚམས་ལེགས། རྔོན་ཆུང་བ། ཁྲོམ་དུ་ཕྱིན་ན་བྱད་བྱིང་བྱིང་བྱད་ཀྱི་གཟེངས་ཆུང་བ། སྐོས་སྐོ་བྲང་ལས་ཕྱིར་དགྱེ་བ། སྙོམས་འཇུག་བྱས་པ་དང་ཤིན་ཏུ་སྙིང་ཉེ་བ། གདུང་བ་དེ་དང་རྩ་སྦྱོར་ན་ལོ་རུ་མི་ཐོགས་པར་རོ། །ཐ་མ་ནི་ཤ་སེར་བ། མིག་འབོར་ཆེ་བ། བློ་རྣོ་བ། དྲན་པ་གསལ་བ། འདུག་མི་ཚུགས་ཤིང་འགྲོ་འདུག་མང་བ། འཕྲལ་དུ་ལག་པས་ཀྱང་མི་ཚུགས་པ། ཚིག་མི་བརྟན་པ། ཆད་པ་ལ་བློ་གཏད་མེད་པ། ཅི་ལ་ཡང་གཞུང་ངན་པ། སྐྱེས་པ་མིག་ལ་འཚོ་བ། སྙིང་དུ་སྡུག་པའི་མི་ལ་བྱ་ར་ཐེངས་རེ་བྱེད་པ། དེ་མི་བསྟེན་ནོ། །རི་མོ་ཅན་རབ་ནི། ལུས་རྩུབ་པ། སྤུ་དམར་སེར་དུ་འདུག་པ། དྲི་ཞིམ་པ། འགྲོས་དལ་བ། གཟུགས་བྱད་མཛེས་ལ་སྐད་སྦོམ་པ། སྐྱེས་པ་ལྟ་བུའི་བུད་མེད་ལྟེ་བར་རི་མོ་གསུམ་གྱེན་བསྒྲེང་དུ་ཡོད་པ་དེ་དང་ཕྲད་ན་ཐིག་ལེ་འཛག་མེད་དུ་འཆིང་བའི་བསམ་གཏན་བཞི་སྐྱེའོ། །འབྲིང་ནི། ཤ་རྩི་སྔོ་བ། བྱད་དཀྱུས་རིང་བ། མཆུའི་སྐོར་ཆེ་བ། གཉེར་མ་མང་བ། མིག་ལེགས་པ། སྐད་སྙན་པ་ཞི་དེས་ཆེ་བ། སྤྱོད་ལམ་འཇམ་པ། མི་ཆོས་དང་ལྷ་ཆོས་ཀྱི་ཕྱོགས་ནས་འདྲིས་པ་ལ་ཞེན་ཆེ་བ། བཀྲ་ཤིས་པའི་ཡན་ལག་དང་ལྡན་པ། དེ་ཉིད་ལ་ཡང་དངོས་གྲུབ་དང་ཉེ་བ་ཡོ་བྱད་དང་ལྡན་པར་འོང་ངོ་། །ཐ་མ་ནི་ཤ་རྩི་གནག་པ། དཔྲལ་བ་སེར་བ། མིག་ཆུང་བ། མིག་གཏིང་ན་འདུག་པ། འཛུམ་ཁ་ཡང་བ། སྐྱེས་པ་ལ་དད་ཆེ་བ་སྟེ་མི་བསྟེན་ནོ། །རི་དྭགས་ཅན་ནམ། གླང་སྣ་མ་རབ་ནི། སྨིན་མ་རིང་བའི་ཡངས་པ། ལུས་མི་རིང་བ། ཁོང་དལ་བ། སྤྱོད་ལམ་དལ་བ། དམ་དམ་རེག་རེག་མི་ཤེས་ཅི་ལ་ཡང་ལྷོད་དེ་བར་སྡོད་པ། དབང་ཆེ་བར་འོང་ངེས་པ། དེ་དང་འབྱོར་ན། རྩ་མང་བས་བཀྲ་ཤིས་པའི་རྒྱུ་མང་སྟེ་བསྟེན་པར་བྱའོ། །འབྲིང་ནི། ཁོག་ཤེས་ཆེ་བ། བྱད་རྔོན་དང་གཟེངས་ཆེ་བ། གདོང་པ་ཞེང་ཆེ་བ། ལུས་ཁྱིམ་ལེགས་པ། བསླུར་མི་བཏུབ་པ། ནོར་གསོག་མཁས་པ། དོན་མི་འཆོར་ཞིང་མདོ་ཆེ་བ་མི་ཁྲོ་བ། སྤྲོ་རིང་བ། བསྟེན་པར་རུང་ངོ་། ཐ་མ་ནི། ལུས་ཀྱི་སྤྱོད་ལམ་དང་། ཚིག་མཐོ་དམན་མང་པོ་སྨྲ་བ། ཧེ་སྡར་མ་ཞེས་བྱ་སྟེ། སྨྲ་འདོད་པ། བརྫུན་ཆེ་བ། ཁྲོ་སླ་བ། ཚིག་མཐོ་དམན་ཆེ་བ། མགུ་བླ་བ། སྟེར་ལ་མི་དགའ་བ། གཏོང་བ་ཆུང་བ། དེ་ནི་བསྟེན་དུ་མི་རུང་ངོ་། །ཐ་མ་བཞི་མ་གཏོགས་པ་གང་རྙེད་པ་ལ་རྩ་བཙལ་ལོ། །དེ་དག་བྲམ་ཟེ་ལ་སོགས་པའི་རིགས་གང་ལས་བྱུང་ཀྱང་བསྟེན་པར་བྱའོ། །སྤྱིར་བརྟག་པ་ནི། གཟུགས་མཛེས་ལ་ཅུང་ཟད་དགུར་བ། སོ་སྒོ་ཡོད་པ་དྲི་ཞིམ་པ། རྐང་པ་གཡོན་པ་སྔོན་དུ་འདོར་བ། དཔྲལ་བ་དང་། སྙིང་ག སྤུ་ན་གུའི་མཚམས་སུ་གཉེར་མ་གྱེན་འགྲེང་གསུམ་གཤིབས་ཡོད་པ། སྐུ་གསུང་ཐུགས་ཀྱི་སྨེ་བ་ཚང་བ། སྐྱེས་པ་ལ་རྟག་ཏུ་བལྟ་བ། ཁ་སྐམ་པ། ལུས་ཀྱི་བ་སྤུ་ལྡང་བ། ཆགས་བའི་གཏམ་སྨྲ་བ། འགྲོར་མི་སྟེར་བར་ལམ་གནོན་པ། བྱ་བ་གང་ལ་ཡང་ཐུག་ཕྲད་ཙམ་དང་། གྱ་ཙམ་མང་བ་སྟེ་ཕྱིའི་རྟགས། ནང་གི་རྟགས་སུ་ཆོས་ལ་དགའ་བ། སྙིང་རྗེ་ཆེ་བ། གསང་བའི་རྟགས་བླ་མ་ལ་གུས་པ། གསང་སྔགས་ཀྱི་སྤྱོད་པ་ལ་མི་སྐྲག་པ། བྱང་ཆུབ་ཀྱི་སེམས་དང་ལྡན་པའོ། །དེ་ལྟ་བུའི་ཡོན་ཏན་ཚང་བ། བཅུ་གཅིག་མ་དང་སྙོམས་པར་ཞུགས་པའི་བྱང་སེམས་རཀྟ་དང་འདྲེས་པ་ཁ་དོག་སྔོ་བསངས་སྤྱི་བོར་དྲངས་པ་དང་ལྷག་མ་ཉ་ལྕིབས་དང་དུང་ཆོས་སུ་བླུགས་པ། ཟླ་བ་ཡར་ངོ་ལ་སྣ་བུག་ནས་བཏུང་ཞིང་། དུས་བཟང་ལ་མཐེབ་སྲིན་སྦྱར་བས་ཟོས་ན་བཅུད་ལེན་འགྲུབ་པས་ཚེ་ལོ་སྟོང་ཐུབ་པར་འགྱུར་རོ། །བཅུ་གཉིས་མས་དུས་གསུམ་གྱི་མཁའ་འགྲོ་མ་ཐམས་ཅད་བྱིན་གྱིས་རློབ་པས་དམ་ཚིག་གི་མཆོག་འཐོབ་བོ། །བཅུ་དྲུག་མས་འདོད་པའི་དངོས་གྲུབ་ཆེན་པོ་དང་། ཉི་ཤུ་མས་ནམ་མཁའ་ལ་འཕུར་བ་དང་། ཉི་ཤུ་རྩ་བཞི་མས་རང་བྱིན་གྱིས་རློབ་པ་ཐོབ་པར་འགྱུར་རོ། །གཉིས་པ་དགུག་པ་ནི། མེ་ཏོག་རབ་སོང་སྦས་པ་ཡི། །དེ་འོག་རྡུལ་གྱི་སྦྱོར་བས་ནི། །རྒྱལ་པོ་དང་ནི་བློན་པོ་དང་། །གཞོན་ནུ་མ་ཡང་དབང་དུ་འགྱུར། །སེའུ་མ་སྐྱེས་པའི་བར་གྱི་བྱིས་པ་གཞོན་ནུ་ཤི་བའི་རོ་སྦས་པའི་འོག་ནས་བཅུས་པའི་སས་གང་ལ་རེག་པ་དེ་དབང་དུ་འགྱུར་རོ། །གསུམ་པ་མི་སྣང་བར་བྱ་བ་ནི། མི་སྣང་བ་ཡི་ལས་བྱ་སྟེ། །བྱི་ལ་ནག་མོའི་ཤ་མ་ནི། །ཁམ་ཕོར་ཁ་སྦྱར་ནང་དུ་བསྐམ། །བགེགས་བསྐྲད་པ་ཡི་ཆོ་ག་བྱ། །དེ་ལྟར་གྲིབ་སྐམ་བྱས་པའི་རྫས། །ཕྱེ་མར་བཏགས་ཏེ་རང་ཉིད་ཀྱི། མི་བསྐྱོད་པ་དང་རབ་སྦྱར་ནས། །སྲན་མ་ཙམ་གྱི་རིལ་བུ་བྱ། །རིལ་བུ་ལྕགས་གསུམ་གྱིས་དཀྲིས་ནས། །ཁ་ཡི་ནང་དུ་གཞུག་པར་བྱ། །ཞེས་གསུངས་སོ། །བཞི་པ་སྲིད་བསྲུང་བ་ནི། ཀུན་ཏུ་རུ་ཡི་སྐབས་སུ་ནི། །བུས་པའི་སྨན་ཡང་ལག་ཏུ་བཅང་། །འགྲོན་བུ་བུ་ཆེ་མའི་ནང་དུ་དངུལ་ཆུ་ཐིགས་པ་གཅིག་དང་། མཚལ་ད་ཆུ་མ་ཅུང་ཟད་བླུག་ལ། རང་གི་རྐང་མཐིལ་གྱི་དྲེག་པས་ཁ་བཅད་ལ། སྤྲ་ཚིལ་གྱིས་བསྡམ། ལྕེ་འོག་ཏུ་བཅུག་པའམ། ཡང་ན་བཅུ་བཞིའི་ནུབ་མོ་སྦྱར་བའི་བྱང་སེམས་དཀར་དམར་ཐིགས་གཅིག་དངུལ་ཆུའི་སྟེང་དུ་བླུག རྐང་མཐིལ་གྱི་དྲེག་པས་ཁ་བཅད། དེའི་སྟེང་དུ་བྱང་སེམས་བླུག དེ་སྤྲ་ཚིལ་གྱིས་བསྡམ། ལྕེ་འོག་ཏུ་བཅུག་པ་ནི་བུས་པའི་སྨན་ནོ། །སྲེ་མོང་གི་རྒྱུས་པས་གཡོན་པའི་སྲིན་ལག་དམ་དུ་བཅིངས་བས་ཡང་ནའོ། །གཉིས་པ་དངོས་གཞི་ལ། རྩ་བཙལ་བ། དབབ་པ། བཟུང་བ། བཟློག་པ། ལུས་ཐམས་ཅད་ལ་ཁྱབ་པར་བྱ་བ་དང་ལྔ་ལས། དང་པོ་རྩ་བཙལ་བ་ནི། རང་གིས་དབང་བསྐུར་སྙིང་རྗེ་ཅན། །དེ་དང་དབེན་པའི་གནས་ཉིད་དུ། །ཉམ་ང་མེད་པའི་སྤྱོད་པ་བྱ། །ཞེས་གསུངས་པས། མཚན་དང་ལྡན་པའི་ཕྱག་རྒྱ་རྙེད་ནས། ལའུར་སྙོམས་འཇུག་མི་བྱ་བར། དགེ་བསྙེན་དང་། སེམས་བསྐྱེད་བྱིན་ནས་དབང་བསྐུར་ལ། བསྐྱེད་རྫོགས་བསླབས་ཏེ། ལུས་ལྷ་བསྒོམ་པ་དང་། ངག་སྔགས་བཟླ་བ་དང་། འཕྲིན་ལས་བཞི་སྒྲུབ་པ་མཉམ་པ་ནི། ལུས་ངག་མཉམ་པ་དང་། ཡབ་ཀྱིས་ཡུམ་གྱི་པདྨ་སྟོང་པའི་ངང་ལས། ཨ་ལས་པདྨ་འདབ་བརྒྱད་ལྟེ་བ་སྲཱིས་མཚན་པ་དེ་ལས་འོད་འཕྲོས། རིགས་ཀྱི་ཡུམ་ལྔ་སྤྱན་དྲངས་སྲཱིཿལ་ཐིམ་པར་བསམ་པ་དང་། ཡུམ་གྱིས་ཡབ་ཀྱི་རྡོ་རྗེ་སྟོང་པའི་ངང་ལས་ཧཱུྃ་ལས་རྡོ་རྗེ་རྩེ་ལྔ་པ་ཨོཾ་གྱིས་ནོར་བུ་བྱས་པ། དེ་ལས་འོད་འཕྲོས། སངས་རྒྱས་ལྔ་སྤྱན་དྲངས། འོད་དུ་ཞུ་ནས་ཨོཾ་ལ་ཐིམ་པར་བསམ་པ་ནི་བྱིན་རླབས་མཉམ་པའོ། །གཉིས་ཀའང་ཐ་མལ་གྱི་ཆགས་པ་མ་ཡིན་པར། གཞན་དོན་དུ་རྫོགས་པའི་སངས་རྒྱས་ཐོབ་པར་བྱའོ་སྙམ་པའི་སྨོན་པ་དང་། དེའི་ཆེད་དུ་འཇུག་པའི་འཇུག་པ་སེམས་བསྐྱེད་དང་ལྡན་པ་ནི་འདོད་པ་མཉམ་པའོ། །དེ་ནས་གཞུང་ལས། དབབ་པ་བསྒྲུབ་པའི་བྱེ་བྲག་གིས། །ཞེས་གསུངས་པའི་དོན། ཕྱིང་པའི་གཤགས་མ་ལྷ་བཤོས་ལྟ་བུ་བྱས་ལ། རྩེ་མོ་རྣོ་བའི་ཕྱོགས་སོར་བཞི་སྤྲ་ཚིལ་གྱིས་བྱུག ལྷག་མ་མ་བྱུགས་པའི་སོར་གཉིས་ལག་པས་འཛིན་པ་བྱ། མཁལ་མ་གཉིས་སུ་གྲུ་གུ་སྙིམ་པ་ཙམ་རེ་བཞག་ལ། དེའི་སྟེང་དུ་སྒ་ལེབ་ལྟ་བུའི་ཤིང་གིས་མནན་པ་རས་ཀྱི་གཤགས་མས་ལྟེ་བའི་སྟེང་ནས་དམ་པར་བཅིངས། སྲིན་པོའི་ལམ་དུ་སྤྲ་ཚིལ་གྱིས་བྱུགས་པ་དེ་གཞུག ནང་དུ་སོར་བཞི་ལས་མ་ཐལ་བ་བྱ། དེའི་རྐྱེན་གྱིས་པདྨ་ཕྱིར་འབུར་བ་དང་། རའི་འོ་མ་ལ་ཀ་ར་དང་པདྨའི་རྩ་བ་བཏབ་པ་སྲིན་ལག་གཡོན་པའི་སེན་མོ་བྲེགས་པས་བྱུག ཁྱད་པར་དབུ་མའི་མར་རྩེ་རྩ་བཟང་ངན་གྱི་བྱེ་བྲག་གིས། སོར་གཉིས་སམ། གསུམ་མམ། དྲུག་གི་བར་དུ་འདོན་པ་དེ་ལ་བྱུགས་པས་ཕྲ་བར་འགྱུར་རོ། །དེ་ཡང་། པདྨའི་རྩ་བ་ལྟར་ཕྲ་བ། ཁབ་ཀྱི་རྩེ་མོ་ལྟར་རྣོ་བ། རལ་གྲིའི་སོ་ལྟར་གཅོད་པ། མེ་ལོང་གིས་ངོས་ལྟར་འཇམ་པ་མཆོག་གོ །གཉིས་པ་དབབ་པ་ནི། གསང་ལ་སྦྱོར་བའི་དུས་ཙ་ན། །བལྟ་དང་འཛུམ་དང་འཁྱུད་དང་རྒོད། །དེ་ལ་རྩེད་མོ་སྣ་ཚོགས་བྱ། །དེ་ནི་ཚོགས་ཀྱི་ལམ་དུ་འདོད། །ཅེས་པས། རང་དང་ཕྱག་རྒྱ་ལུས་ཟུངས་རྒྱས་པར་བྱས་ནས། །དབེན་པའི་གནས་སུ་ཕྱག་རྒྱ་ཡིད་ཀྱི་ཡུལ་དུ་བྱ་བ་དང་། སྒྲ་ཐོས་པར་གཞག་ལ་ཆགས་པའི་གཏམ་བྱ་བ་དང་། མིག་གིས་མཐོང་བའི་ཡུལ་དུ་བཞག་ནས། བཞིན་དང་། ནུ་མ་དང་། བརླ་དང་། སྐྱེ་གནས་ལ་བལྟ། དྲི་ལ་སྣོམ་པ་དང་། རེག་པ་དང་། འོ་དང་། འཁྱུད་པ་དང་། སོ་དང་སེན་མོ་གདབ་པ་ལ་སོགས་པའི་རྩེད་མོ་ལ་བརྟེན་ནས་བསྒོམས་པས། བྱང་ཆུབ་ཀྱི་སེམས་མི་གཡོ་བར་འཆིང་ནུས་ན་ཚོགས་ཀྱི་ལམ་བགྲོད་པ་ཞེས་བྱའོ། །དེ་ནས། ཨེ་ཝཾ་གཅིག་ཏུ་སྦྱར་བྱས་ནས། །རྣམ་པ་སྣ་ཚོགས་སྦྱོར་བའི་ལམ། །ཞེས་པ། དེ་ལས་ཕྱག་རྒྱ་དང་མཉམ་པར་སྦྱར་ནས། དེའི་དབུ་མའི་མར་སྣ་རྡོ་རྗེའི་བུ་གར་བཅུག་ནས་དལ་བུར་མནན་པས། རྡོ་རྗེ་ནང་དུ་སོང་བ་དང་ཕྱིང་པའི་གཤགས་མ་ཕྱི་རུ་འཐེན། གསང་རྩེ་རྡོ་རྗེའི་ནང་དུ་སོང་བས་སྐོམ་པ་ཆུ་སྙེག་པ་བཞིན་རང་གི་དབུ་མའི་མར་སྣ་ཡང་རྩ་བར་སླེབ་ནས་ཁ་སྦྱོར་དུ་འགྱུར་ཏེ། དལ་བུར་བསྐྱོད་པས་བདེ་བ་མི་བཟོད་ན་འགུལ་འཕྲོ་བཤོལ། ཆུང་ན་དུམ་རེ་བསྐྱོད་པས་བྱང་ཆུབ་ཀྱི་སེམས་སྤྱི་བོར་ནས་མགྲིན་པའི་བར་དུ་བྱོན། ལུས་ཁུལ་བུར་བདེ་བ་སྐྱེ། རྣམ་པར་རྟོག་པ་རགས་རིམ་འགགས་པ་ནི་ཡས་བརྟན་གྱི་དགའ་བ། དེ་ནི་བྱ་བ་སྣ་ཚོགས་ལ་འཇུག་པས་རྣམ་པ་སྣ་ཚོགས་པའི་སྐད་ཅིག་མའོ། །དེ་ནས་སྙིང་གར་བྱོན། ལུས་ཕལ་ཆེར་ལ་བདེ་བ་སྐྱེས། བདག་གི་རྣམ་རྟོག་རགས་རིམ་འགགས་པ་མཆོག་དགའ། དེ་ནི་རྩོལ་བ་ཆུང་བདེ་བ་ཆེ་བས་རྣམ་པར་སྨིན་པའི་སྐད་ཅིག་མའོ། །དེ་ནས་ལྟེ་བར་བྱོན། བདེ་བ་ལུས་ཐམས་ཅད་ལ་ཁྱབ་པར་སྐྱེས། ཕྱག་རྒྱའི་རྣམ་པར་རྟོག་པ་འགགས་པ་དགའ་བྲལ་ལམ་ཁྱད་དགའ། བདེ་བ་མི་རྟོག་པ་དང་ལྡན་པ་དེ་ཉིད་ཕྱག་རྒྱ་ཉེད་པ་ཡིན་པས་རྣམ་པར་ཉེད་པའི་སྐད་ཅིག་མའོ། །གསང་གནས་ཀྱི་རྩེ་མོར་བྱོན། ཤེས་རབ་ཀྱི་རཀྟ་དང་ཕྲད། སྣང་བའི་དངོས་པོ་ཐམས་ཅད་བདེ་བར་ཤར། དགའ་བ་གསུམ་གྱི་རྣམ་པར་རྟོག་པ་འགགས། ཁུ་བ་དང་བདེ་བ་ལྷན་ཅིག་ཏུ་སྐྱེས་པ་ལས་བྱུང་བའི་ཆགས་པ་དང་ཆགས་བྲལ་རོ་མཉམ་པའི་མཚན་ཉིད་ཅན། ལྷན་ཅིག་སྐྱེས་པའི་དགའ་བ་སོ་སོ་རང་གིས་རིག་པས་བདེ་སྟོང་གཉིས་སུ་མེད་པར་རྟོགས་པ། དེ་ཡང་། རྡོ་རྗེ་དང་པདྨ་ཁ་སྦྱོར། རང་དང་ཕྱག་རྒྱའི་དབུ་མའི་མ་སྣ་ཁ་སྦྱོར་ཐིག་ལེ་དཀར་དམར་ཁ་སྦྱོར། དུས་ཀྱི་མེའི་རླུང་གཉིས་ཁ་སྦྱོར་བས་ཁ་སྦྱོར་བཞིའི་གདམ་ངག་ཅེས་བྱ་བ་སྦྱོར་བའི་ལམ་མོ། །དེ་ནས། རྩེ་མོ་ཡུན་རིང་དྲུད་པ་ལས། །རྣམ་པར་སྨིན་པ་མཐོང་བའི་ལམ། །ཞེས་པ། རྩ་གཉིས་ཀྱི་སྣ་རྩེར་ཐིག་ལེ་དཀར་དམར་འཛག་པ་མེད་པར་འཆིང་ནུས་པའི་འཇིག་རྟེན་ཆོས་མཆོག་ཐ་མའི་ཡེ་ཤེས་ལས་སྐྱེས་པའི་མཆོག་ཏུ་མི་འགྱུར་བའི་བདེ་བ་ཆེན་པོ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ཀྱིས་འཁྱུད་པ་མངོན་དུ་བྱས་པ་ནི་མཐོང་བའི་ལམ་སྟེ། སྔར་མ་མཐོང་བའི་དངོས་པོ་གསར་དུ་མཐོང་བས་སོ། །དེ་ཡང་། ཆོས་མཆོག་ཐ་མའི་ཡེ་ཤེས་ནི་གསང་བའི་སྣ་རྩེ་བྱང་ཆུབ་ཀྱི་སེམས་ཀྱིས་གང་མ་ཐག་པ་ལ་བཞག་པས་མ་སྨིན་པ་ཞེས་བྱ་ལ། འདི་ནི་བྱང་ཆུབ་ཀྱི་སེམས་འཛག་པ་མེད་པར་བརྟན་པ་ཉིད་ཀྱི་ཕྱིར་རྣམ་པར་སྨིན་པ་ཞེས་བྱའོ། །དེ་ཡང་། གཉིས་ཤོར་གཉིས་མཉམ་དབུས་དག་ཏུ། །དེ་ལས་མ་ཡེངས་བསྒོམས་པའི་ལམ། །ཞེས་པ། རང་དང་ཕྱག་རྒྱའི་ཐིག་ལེ་དྭངས་མའི་དྭངས་མ་དབུ་མའི་སྣ་རྩེར་ལྷུང་བ་གཉིས་ཤོར་དང་། དེ་གཉིས་གཅིག་ཏུ་འདྲེས་ནས་འཛག་པ་མེད་པ་གཉིས་མཉམ་དང་། ཆགས་པ་དང་། ཆགས་བྲལ་གྱི་མཐའ་ལ་མི་གནས་པས་དབུས་སུ། མཐོང་བའི་ལམ་གྱི་ཡེ་ཤེས་སྐྱེས་པ་དེ་ཉིད་གོམས་པ་བརྟན་པར་བྱེད་པས་བསྒོམ་པའི་ལམ་ཞེས་བྱའོ། །དེའི་ཚུལ་ཡང་། ཇི་ལྟར་ལོ་ཀ་བ་འཁྲིག་པའི་དུས་སུ་བྱང་ཆུབ་ཀྱི་སེམས་སྤྱི་བོ་ནས་གསང་བའི་སྣ་རྩེར་མྱུར་བར་འཛག་པ་བཞིན་དུ། བྱང་ཆུབ་ཀྱི་སེམས་གསང་བའི་རྩེར་འཆིང་བའི་སྐད་ཅིག་དེ་ནས་གྱེན་དུ་རང་བྱུང་གིས་གཤེགས་པ་ཡང་འདྲ་ལ། སྦྲུལ་གདུག་གི་མཆེ་བས་ཟིན་པའི་ཟུག་རྔུ་དྲག་པོའི་སྐད་ཅིག་ལ་ལུས་ཐམས་ཅད་དུག་གིས་ཁྱབ་པར་འགྱུར་བ་བཞིན། འཛག་པ་མེད་པའི་བདེ་བ་ཆེན་པོའི་ཚོར་བ་སྐད་ཅིག་གིས་ལུས་ཐམས་ཅད་དྭངས་མའི་འཇའ་ལུས་སུ་བསྒྱུར་ནུས་པར་ཡང་ཤེས་པར་བྱའོ། །ལྟེ་བར་བྱང་སེམས་བརྟན་པ་མས་བརྟན་པའི་དགའ་བ། དེའི་ཚེ་བདེ་སྟོང་གི་ཏིང་ངེ་འཛིན་གྱིས་བདག་རྒྱུད་ལ་ཁྱབ། ལུས་ཀྱི་ཐིག་ལེ་འཛག་མེད་དུ་འཆིང་། བསམ་གཏན་དང་པོ་ཐོབ། ལུས་བཅུ་དྲུག་པའི་ལང་འཚོར་འགྱུར། སྙིང་གར་སླེབ། སྣང་བ་ཐམས་ཅད་བདེ་སྟོང་ཟུང་འཇུག་ཏུ་ཤར། ངག་གི་ཐིག་ལེ་འཛག་མེད་དུ་འཆིང་། བསམ་གཏན་གཉིས་པ་ཐོབ། ཐལ་གོང་རྒྱས། སྤོས་ཀྱི་གླང་པོ་ཆེ་བཅུའི་སྟོབས། ཚན་པོ་ཆེ་གཅིག་ལ་ཡོད་ལ། དེ་བཅུའི་སྟོབས་རབ་གནོན་གཅིག་ལ་དང་། དེ་བཅུ་ཡན་ལག་མཆོག་གཅིག་ལ་དང་། དེ་བཅུ་སྟོབས་མཆོག་གཅིག་ལ་དང་། དེ་བཅུའི་སྟོབས་ནི་སྲེད་མེད་ཀྱི་བུའི་སྟོབས་ཏེ། སྟོབས་དེ་དང་མཉམ་པ་ཐོབ་པ་ཡིན་ནོ། །མགྲིན་པར་བརྟན་པས་མྱ་ངན་ལས་འདས་པའི་ཆོས་ཐམས་ཅད་བདེ་སྟོང་ཟུང་འཇུག་ཏུ་རྟོགས། ཡིད་ཀྱི་ཐིག་ལེ་འཛག་མེད་དུ་འཆིང་། བསམ་གཏན་གསུམ་པ་ཐོབ། ལྕེ་འཕེལ་ཏེ་མཛོད་སྤུར་སླེབ། ལྕེའུ་ཆུང་གི་བདུད་རྩི་འཛག་པས་འཆི་མེད་ཀྱི་ཚེ་དང་ཚིག་གི་མཆོག་འགྲུབ། སྤྱི་བོར་བརྟན་པས་འཁོར་འདས་ཐམས་ཅད་བདེ་སྟོང་དབྱེར་མེད་དུ་རྟོགས། ཡེ་ཤེས་ཀྱི་ཐིག་ལེ་འཛག་མེད་དུ་འཆིང་། བསམ་གཏན་བཞི་པ་ཐོབ། གཙུག་ཏོར་བལྟར་མི་མངོན་པ་ལ་སོགས་པ་མཚན་དང་དཔེ་བྱད་དུ་ལྡན་ནོ། །དེ་ནས་དགག་སྒྲུབ་མེད་པ་ངོ་འཕྲོད་པ། མཐར་ཐུག་ལམ་དུ་འདོད་པ་ཡིན། གཙུག་ཏོར་གྱི་རྩ་པདྨ་འདབ་མ་བཞིར་བྱང་ཆུབ་ཀྱི་སེམས་བརྟན་པ་བསམ་གཏན་བཞི་པའི་རབ་ཀྱི་ཐ་མར་རྩ་དང་། རླུང་དང་། ཐིག་ལེ་དང་། འཛག་པ་མེད་པའི་འགྲོས་ཐམས་ཅད་དབུ་མར་ཐིམ་པ་སྟེ། ཉེ་བར་ཞི་བའི་ཆོས་ཀྱི་དབྱིངས་ཀྱི་མཐར་ཕྱིན་པས་འཁོར་བ་ལ་མི་གནས་པ་དམར་ཆ་རྣམ་པར་དག་པ་དང་། ཟག་པ་མེད་པའི་སྙིང་རྗེའི་ཕུང་པོ་ཡོངས་སུ་རྫོགས་པས་ཞི་བ་ལ་མི་གནས་པ་དཀར་ཆ་རྣམ་པར་དག་པ་དང་། ཐབས་དང་ཤེས་རབ་གཉིས་སུ་མེད་པའི་ལྷན་ཅིག་སྐྱེས་པ་ངོ་བོ་ཉིད་ཀྱི་སྐུ་མ་ནིང་གི་གོ་འཕང་མུན་ཅན་རྣམ་པར་དག་པས་ཁ་སྦྱོར་ཡན་ལག་བདུན་དང་ལྡན་པའི་རྡོ་རྗེ་འཆང་ཆེན་པོར་མངོན་པར་རྫོགས་པར་སངས་རྒྱས་པ་ཡིན་ནོ། །དེ་ཡང་གཞུང་ལས། བསྒོམས་ནས་འཚང་རྒྱ་ཀུན་ཀྱང་རྒྱ། །མ་བསྒོམས་རྒྱ་ན་རྒྱ་བ་ཡིན། །ཞེས་གསུངས་པས་སོ། །ཕྱག་རྒྱ་ལ་འཁྲིག་པའི་སྔོན་དུ་ཆང་ཅུང་ཟད་ཅིག་སྦྱིན་ཞིང་། དངུལ་ཆུ་དུག་དབྱུང་བ་ཐིགས་པ་གཅིག་བྷ་གའི་ནང་དུ་བླུག་པས་རྩ་ཕྲ་ཞིང་རྣོ་བ་དང་། འབོལ་ལ་རིང་བར་འགྱུར་བ་ཡིན་ནོ། །གལ་ཏེ་གསང་རྩ་ཐུང་ཞིང་ཞན་ན་ཕྱག་རྒྱ་གན་རྐྱལ་དུ་བྱས་པའི་རྟིང་པ་གཉིས་རང་གི་ཕྲག་གོང་དུ་བཀལ་བ་ཁྱུང་ལྡིང་གི་འདུག་སྟངས་སོ། །ཡང་ན། བུད་མེད་སྟེང་གི་ཕྱོགས་སུ་གནས་པས། རང་གི་སྐེད་པ་མདུན་དང་། རྐང་པ་རྒྱབ་ཏུ་བཅིངས་ནས་བསྐྱོད་པ་ནཱ་རི་ཁྱོགས་ཀྱི་འདུག་སྟངས་སོ། །ཡང་ན། འཕྲེད་དུ་ཉལ་བའི་ཕྱག་རྒྱའི་རྐང་པ་གཡས་སྟེང་དུ་བཏོན་པའི་པུས་མོའི་འོག་ཏུ་གཡོན་པའི་གྲུ་མོ་བཅུག ལག་པ་གཡས་པས་དེའི་རྒྱབ་ནས་བཟུང་ནས་བསྐྱོད་པ་དང་། དེ་བཞིན་དུ་གཡོན་དུ་གོ་ལྡོག་པ་ནི་སྟེང་དུ་གནས་པའི་ཀ་ར་ཎའོ། །ཡང་ན། གན་རྐྱལ་དུ་རྐང་པ་གཡས་པ་དང་གཡོན་པའི་མཐིལ་རང་གི་ལག་པའི་མཐིལ་གྱིས་ངང་པའི་གཤོག་པ་ལྟར་བཅིངས་ནས་གཉིས་ཀ་ལུས་རབ་ཏུ་བརྐྱང་ནས་བསྒྲུབ་པར་བྱ་བ་ནི། གན་རྐྱལ་བའི་འདུག་སྟངས་སམ། ཤིན་ཏུ་བརྐྱང་བའི་འདུག་སྟངས་སོ། །གསུམ་པ་བཟུང་བ་ནི། བཟུང་བ་འཁྲུལ་འཁོར་མན་ངག་དང་། །ཟངས་ཚགས་ཅན་དང་ཏིང་འཛིན་ནོ། །དེ་ལ་འཁྲུལ་འཁོར་ནི། འོག་རླུང་དྲག་ཏུ་འཐེན། ཧ་ལ་ཧ་ལ་ཞེས་བརྗོད་ཅིང་། གླིང་བཞི་བསྡུ་བ། རྒྱ་མཚོ་རི་རབ་ལ་སྦྱར་བ། ལྕེ་ཡར་རྐན་ལ་བསྒྲིལ་བ། མཆུ་མིག་གྱེན་ལ་ལྡོག་པ་དང་དྲུག་དུས་གཅིག་ལ་འཛོམ་པས་བཟུང་བར་བྱ་ཞིང་། ལུས་གནད་དེ་ཉིད་ལ་ཧིག་དང་། ཧཱུྃ་བརྗོད་པས་ཀྱང་ངོ་། །ཟངས་ཚགས་ཅན་ནི་སྟེང་རླུང་མནན། འོག་རླུང་བསྡམས་པ་བསྲེས་ནས་མཐུར་དུ་ཆུ་བཙིར་བ་བཞིན་འཕུལ་བའོ། །ཏིང་འཛིན་གྱིས་འཛིན་པ་ནི། སྤྱི་བོའི་ཐིག་ལེ་དཀར་པོ་ལ་སེམས་མ་ཡེངས་པར་གཏད་པའོ། །དེ་ལྟར་ཟིན་པའི་རྟགས། འོག་སྒོ་བེམ་བེམ་པ་དང་། ལྕི་ཡོར་ཡོར་བ་དང་། གཙུབ་གཙུབ་པ་དང་། སྐྲ་སེང་སེང་བ་དང་། བཤང་གཅི་མི་ཐོན་པ་སྙམ་པ་དང་། ངུ་བ་དང་། རྒོད་པ་དང་། ཀུ་ཅོ་འདོན་པ་ལ་སོགས་པ་བྱུང་ན་ཟིན་པའི་རྟགས་སོ། །བཞི་པ་བཟློག་པ་ནི། བཟློག་པ་དུད་འགྲོའི་འགྱུར་བཞི་ལ། །སྦྱོར་བ་དྲུག་དང་བཞི་ལྡན་སྦྱར། །ཞེས་པས། རྡོ་རྗེ་པདྨའི་ཡར་རྐན་ལ་སྦྱར་ནས། རྡོ་རྗེ་ཆུ་འཐུང་གི་ལུས་གནད་དང་། རླུང་གནད་དེ་ཉིད་ལ། མཇིང་པ་གཡས་སུ་གཅུས་པས་འཐེན་པ་གསུམ་དང་། གཡོན་དང་དབུས་སུའང་ངོ་། །དམིགས་པ་ནོར་བུའི་བུ་གར་དཀར་ལ་དམར་བའི་ཕཊ྄་དང་། དབུ་མའི་སྣ་རྩེར་ཧཱུྃ་ཡིག་དཀར་པོ་གསལ་བཏབ་ནས། ཧཱུྃ་ཞེས་བརྗོད་པས། ཧཱུྃ་གིས་བྱང་སེམས་གྱེན་ལ་དྲངས་ཤིང་། ཕཊ྄་ཀྱིས་མས་ཡར་ཕུལ་བས་ཐིག་ལེ་དཀར་དམར་འདྲེས་པ་སྤྱི་བོར་སླེབ་པར་བསམ་མོ། །དེ་ནས་གཅན་གཟན་གྱི་བགད་གདངས་ཀྱི་འདྲེན་ནི། ཕྱག་རྒྱ་དང་བྲལ་བས་སྐྱིལ་ཀྲུང་བཅས། ལག་པ་པུས་མོ་ལ་བསྣོལ་མ་བཀབ་ལ། ཧིང་རིང་དགུས་ཐིག་ལེ་ལྟེ་བར་དྲང་ངོ་། །གཅན་གཟན་གྱི་ངར་སྐད་ཀྱི་འདྲེན་ནི། ཁུ་ཚུར་སྙིང་གར་བསྣོལ་ལ་ཧཱུྃ་རིང་དགུས་སྙིང་གར་དྲང་ངོ་། །འདི་གཉིས་ལ་རླུང་དྲག་ཏུ་འཐེན་པ་ངག་འདྲེན་གླིང་བཞི་བསྡུ་བ། རྒྱུ་ཞབས་འཐེན་ལ་ཀ་བ་གཟུགས་པ། ལྕེ་རྐན་ལ་བསྒྲིལ་བ། མཆུ་མིག་གྱེན་ལ་བཟློག་པ་དང་དྲུག་འཛོམ་པར་བྱའོ། །གཅན་གཟན་གྱི་སྐྱུག་སྟངས་ཀྱི་འདྲེན་ནི། ལག་པ་རྡོ་རྗེ་བསྡམས་པ་བརྐྱང་བའི་ཕྱག་རྒྱ་ས་ལ་བཙུགས། ཧག་དགུས་མགྲིན་པར་དྲངས། གཅན་གཟན་གྱི་སྣོམ་གྱི་འདྲེན་ནི། ལག་པ་རྡོ་རྗེ་ཁུ་ཚུར་སྟེང་གི་བར་སྣང་ལ་བརྐྱང་ནས་ཧིག་དགུས་སྤྱི་བོར་དྲངས། འདི་གཉིས་ལ་གླིང་བཞི་ནང་དུ་བསྡུ་བ་དང་། རྒྱ་མཚོ་རི་རབ་ལ་སྦྱར་བ་དང་། ལྕེ་ཡར་རྐན་ལ་གཏད་པ་དང་། དཔུང་པ་གཉིས་རེ་མོས་ཀྱིས་ཞུམ་པའི་སྦྱོར་བ་བཞི་འཛོམ་པར་བྱའོ། །རླུང་གནད་ཆུ་འཐུང་དང་འདྲའོ། །ལྔ་པ་ལུས་ཐམས་ཅད་ལ་ཁྱབ་པར་བྱ་བ་ནི། འགྲེམས་པ་རྣམ་རོལ་ཕྱག་རྒྱ་དང་། །གཟེར་ཆེན་དག་གི་མན་ངག་གོ །རླུང་བུམ་པ་ཅན་ཐུབ་ཚད་དུ་བཀག་ནས། སེང་གེ་རྣམ་རོལ་ལ་སོགས་པ་ཐིག་ལེ་ཉི་ཤུ་པའི་འཁྲུལ་འཁོར་ལ་འབད། དེ་ཡང་། ནོར་བུར་བདེ་བ་ལ་སེམས་གཏད་པས། ནོར་བུ་འགགས་པ་སྙམ་བྱེད་ཅིང་བདེ་བ་མི་བཟོད་ན་ལྟེ་བར་དྲངས་ནས་སེམས་གཟུང་བས་དེར་མི་བཟོད་པར་བྱུང་བ་དང་སྙིང་གར་གཏད། དེར་མི་བཟོད་པ་དང་། སྤྱི་བོ་དང་། ལུས་ཐམས་ཅད་ལ་གཏད་པས་ལུས་ཐམས་ཅད་བདེ་བས་བརྒྱལ་བ་དང་། དངོས་པོ་གང་ལ་དམིགས་ཤིང་བལྟས་པས་བདེ་བས་མྱོས་པ་སྙམ་བྱེད་ན། སྐྲ་དཀར། གཉེར་མ། སྲིན་བུ། ཆུ་སེར། ཁྲག་ལ་སོགས་པ་མི་འབྱུང་ངོ་། །མཐར་བདེ་བའི་རང་བཞིན་ལ་མ་ཡེངས་པར་མཉམ་པར་བཞག་པས་སྟོང་པ་ཉིད་དང་ཟུང་འཇུག་ཏུ་བསྒྲུབ་པར་བྱའོ། །གསུམ་པ་རྗེས་ལམ་དུ་ཁྱེར་བ་ལ། རྩའི་གནས་སུ་བསྲེ་བ་དང་། རླུང་དང་བསྲེ་བ་གཉིས་ལས། དང་པོ་རྩའི་གནས་སུ་བསྲེ་བ་ནི། དེ་ནས་རྩ་ཡི་ནང་ཉིད་དུ། །གཡོན་པའི་སྲིན་ལག་ས་ལ་ནི། །དྲག་ཏུ་བཙུགས་ནས་ལུས་ལྡིག་ཕབ། །ཡང་ན་ལག་པ་གཉིས་ཀྱང་རུང་། །ཞེས་སོ། །གཉིས་པ་རླུང་དང་བསྲེ་བ་ནི། རླུང་དང་བསྲེ་བའི་མན་ངག་ནི། །སྟེང་རླུང་མནན་ཅིང་འོག་རླུང་བསྡམ། །སྦྱོར་སྐོར་དེ་དག་གི་རྗེས་སུ་རླུང་བུམ་པ་ཅན་ཉི་ཤུ་རྩ་རེ་ལས་མི་ཉུང་བ་བསྒོམ་པར་བྱའོ། །དཔེར་ན་ནོར་བུ་རིན་ཆེན་དག །མ་ཕུག་པས་ནི་སྦྱོར་བྲལ་འགྱུར། །ཕུག་པས་དགའ་བ་སྦྱིན་པའོ། །དེ་ཡང་། བྱང་ཆུབ་ཀྱི་སེམས་འཛག་པ་མེད་པ་མྱ་ངན་ལས་འདས་པའི་རྒྱུའི་གཙོ་བོ་ཡིན་པས། དེ་བསྒྲུབ་པ་ལས་ཀྱི་ཕྱག་རྒྱའི་ལམ་ལས་གཞན་མ་ཡིན་པར་སྟོན་པ་སྟེ། དུས་ཀྱི་འཁོར་ལོར། མེ་དངུལ་ཆུའི་དགྲ་ཡིན་ཀྱང་། དངུལ་ཆུ་འཆིང་བ་མེ་ལ་རག་ལས་པའི་དཔེས་གསུངས་པ་དང་མཐུན་པ་སྟེ། མེ་ནི་དངུལ་ཆུའི་དགྲ་ཉིད་ཡིན་ཏེ་མེ་དང་རྣམ་པར་བྲལ་ན་ནམ་ཡང་དངུལ་ཆུ་འཆིང་བ་མེད། མ་བཅིངས་ན་ནི་གསེར་བྱེད་མེད་དེ་གསེར་དང་བྲལ་བ་སྨྲ་བོ་རྣམས་ལ་ལོངས་སྤྱོད་མེད་པ་ཉིད། དེ་བཞིན་བུད་མེད་སྦྱོར་བ་བྲལ་ན་རྟག་ཏུ་རྣལ་འབྱོར་པ་རྣམ་དག་གི་སེམས་ནི་འཆིང་མི་འགྱུར། བཅིངས་པ་མེད་ན་ལུས་འབིགས་མེད་དེ་མ་ཕུག་ལུས་ཀྱིས་འདིར་ནི་ལྷན་སྐྱེས་བདེ་བ་སྟེར་བ་མིན། །ཞེས་སོ། །ཤེལ་དང་མཚུངས་པའི་སེམས་ལ་ནི། །སྦྱོར་བས་ཡུལ་ལ་འཇུག་པ་སྟེ། །འཁོར་བའི་སྐྱོན་གྱིས་གོས་པ་ཡིན། །སྐྱོན་དང་ཡོན་ཏན་སེམས་ལ་མེད། །འདི་ལ་སྤང་བ་གཉིས་ཡོད་དེ། །ཡོན་ཏན་མེད་ནས་སྤང་བ་དང་། །ཁྱད་པར་འཕགས་ནས་སྤང་བའོ། །ཁྱད་པར་ཡོན་ཏན་ཅན་གྱིས་ཀྱང་། །ཤེས་པ་སྐྱོ་ན་བསྟེན་ཀྱང་རུང་། འགའ་དང་འགའ་ཡི་སྤྱོད་ཡུལ་ལས། །ཀུན་གྱི་སྤྱོད་ཡུལ་འདི་མ་ཡིན། །ཞེས་གསུངས་པ་ནི་གོ་བར་སླའོ། །ཐ་སྙད་མཁན་རྣམས་མགྲིན་པ་ཡི། །ཆུ་གཏེར་ངེས་པར་བསྐམས་ས་འདིར། །ལེགས་བཤད་ཚིག་གི་ཆུ་སྐྱེས་ནི། །དྲི་བཟང་འཛིན་འདི་བདག་གིས་བསྐྲུན། །ལུས་ཅན་གདུང་བ་གཞོམ་ལ་འདི། །ཧ་རི་ཙན་དན་འཁྲི་ཤིང་གི །སྙེ་མའི་ཆུན་པོ་མཱ་ལ་ཡའི། །རླུང་གིས་བསྐྱོད་པས་འགྲན་ནུས་མིན། །རྣམ་དཔྱོད་བསོད་ནམས་ལས་འོངས་པའི། །ལུས་རིགས་རྩིབས་སྟོང་འཁོར་ལོ་ཡིས། །ཐུབ་གཞུང་འཛིན་མར་དབང་བྱེད་པ། །ཆོས་ཀྱི་རྒྱལ་པོ་གཞན་པ་བཞིན། །དེ་ལྟར། རྗེ་བཙུན་ནཱ་རོ་པའི་བཀའ་རྒྱ་གནད་ཀྱི་གདམ་ངག་གི་གཞུང་། དཔལ་ཕག་མོ་གྲུ་པས་རྒྱས་པར་མངོན་རྟོགས་སུ་བཀྲལ་བ། བླ་མ་དམ་པའི་གསུང་གི་རྗེས་སུ་འབྲངས་ནས་སྙིང་པོར་བསྒྲིལ་བའི་ཁྲིད་ཡིག་འདི་ཡང་། རྡོ་རྗེ་འཆང་རྔོག་སྟོན་གྱི་གདན་རབས་བཅུ་གསུམ་པ་དབོན་དཔལ་འབྱོར་དོན་གྲུབ་ཀྱི་ཆེད་དུ། པདྨ་དཀར་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེས། མཁར་ཆུའི་བྲག་ལ་བསྒོམས་པའི་ཚེ་སྦྱར་བའོ།། །།སརྦ་མངྒལཾ།། །། རྗེ་བཙུན་མཻ་ཏྲི་པའི་ལུགས་ཀྱི་བདེ་མཆོག་སྙན་རྒྱུད་ལས་ཕོ་ཁྲིད་སྙིང་གི་ནོར་བུ།རྗེ་བཙུན་མཻ་ཏྲི་པའི་ལུགས་ཀྱི་བདེ་མཆོག་སྙན་རྒྱུད་ལས་ཕོ་ཁྲིད་སྙིང་གི་ནོར་བུ་བཞུགས། །དཔལ་ལྡན་བླ་མ་དམ་པའི་ཞབས་ལ་ཕྱག་འཚལ་ལོ། །ཆུ་གཏེར་ལས་ནི་ཟླ་བ་བཞིན། །བདེ་བའི་མཆོག་ལས་ཝཱ་རཱ་ཧི། །གང་ལ་གཟི་བརྗིད་སྤྲིན་ཕུང་ནི། །བདུད་མཁའ་མུན་པར་བྱེད་པ་འཁྲིགས། །ཧ་རི་ཙན་དན་ལྟར་བསིལ་བའི། །དེ་ཚིག་ཆར་གྱིས་ཤ་ཝ་ར། །དུབ་པའི་རྔུལ་རིས་བཀྲུས་པའི་རྒྱུན། །མཻ་ཏྲི་པ་ཡི་བྱུག་པར་ཆགས། །དྲི་མེད་བཤེས་གཉེན་དེ་ཕངས་ནས། །རས་བཟང་དག་ཏུ་ཆུང་ངུ་ལྟར། །སྦས་པ་ཆོས་གྲགས་ཀྱིས་ཕྱེ་བ། །སྒྱུ་མའི་གར་མཁན་དེ་ཡིས་སྤྱད། །དེ་ཕྱིར་གང་གིས་བསྟོད་འོས་པ། །མ་ལུས་ཚོགས་པའི་གཟུགས་གསར་འདིར། །སྙིམ་པ་སྦྱར་བའི་གཙུག་ཏོར་གྱིས། །པདྨ་དཀར་པོ་ཕྱག་བགྱིའོ། །འདིར་བཅོམ་ལྡན་འདས་དཔལ་འཁོར་ལོ་སྡོམ་པའི་རྩ་བའི་རྒྱུད་ཉུང་ངུ་ལས་གསུངས་པའི་མན་ངག རྡོ་རྗེ་བཙུན་མོའི་ཞལ་སྐྱེམས། ཤ་ཝ་ར་དབང་ཕྱུག་གི་དགོངས་པ། དཔལ་མཻ་ཏྲི་པའི་ཁྱད་ཆོས། ཏི་པུ་གསང་སྔགས་སྡོང་པོའི་གསང་ཚིག རྗེ་བཙུན་རས་ཆུང་ཞབས་ཀྱི་རིན་པོ་ཆེ་རྣམ་ལྔ་ཞེས་གསུངས་པའི་གདམས་ངག ཆོས་ཀྱི་རྒྱལ་པོ་དཔལ་གྲགས་པའི་མཚན་ཅན་གྱིས་རྣམ་པར་ཕྱེ་བའི་སྙན་རྒྱུད། ཨ་བ་དྷཱུ་ཏཱི་པ་བཙུན་མོ་ཅན་གྱི་ཉམས་བཞེས། པདྨ་དཀར་པོའི་ཡིད་ཀྱི་བཅུད་ལེན་དུ་བབས་པ་འདི་བཤད་པ་ལ། ཡིད་ཆེས་ཤིང་ཁུངས་བཙུན་པར་བྱེད་པ་བརྒྱུད་པའི་ལོ་རྒྱུས་དང་། བརྒྱུད་པ་དེ་ལས་བྱུང་བའི་གདམས་པ་གཉིས་ལས། དང་པོ་ལ། བརྒྱུད་པ་རིང་ལུགས་དང་ཉེ་བརྒྱུད་གཉིས་ལས། དང་པོ་ནི། སྨིན་བྱེད་དབང་། རྒྱུད་གྲོལ་བྱེད་དང་པོ་རྣམས་ཀྱི་བརྒྱུད་པ་རིང་ལུགས། བཅོམ་ལྡན་འདས་རྡོ་རྗེ་འཆང་ཆེན་པོ། གསང་བའི་བདག་པོ། བྱང་སེམས་བློ་གྲོས་རིན་ཆེན། གྲུབ་པའི་དབང་པོ་ཤ་བ་རི། མངའ་བདག་མཻ་ཏྲི་པ། ཏི་བུ་རས་ཆུང་པ། ལོ། སུམ། གླིང་། ཆོས་རྗེ། སེང་གེའི་མཚན་དགུ མཁན་ཆེན་རྡོ་རྗེ་རིན་ཆེན། རིགས་གསུམ་མཚན། རྒྱལ་དབང་རྗེ། ཁྱབ་བདག་ངག་གི་དབང་པོ། འཇམ་པའི་དབྱངས་ཆོས་ཀྱི་གྲགས་པ། ཀུན་སྤངས་ཤེས་རབ་རྒྱ་མཚོ། དེས་བདག་གོ གཉིས་པ་ནི། ཐུན་མོང་མ་ཡིན་པའི་བརྒྱུད་པ་འཁོར་ལོ་སྡོམ་པ། དེས་རྡོ་རྗེ་རྣལ་འབྱོར་མ། དེས་རི་ཁྲོད་ཞབས། དེས་རྒྱལ་བ་མཻ་ཏྲི་པ། དེས་ཏི་བུ་གསང་སྔགས་སྡོང་པོ། དེས་རྗེ་བཙུན་རས་ཆུང་པ་ལ་གནང་སྟེ། དེ་ཉིད་ཀྱིས། བརྡ་དོན་གསུམ་དང་རིན་ཆེན་ལྔ། ཞེས་པའི་རིན་ཆེན་ལྔ་འདི་ཡིན་པས་སོ། །དེ་དུས་བོད་དུ་སྟོན་པའི་དུས་ལ་མ་བབ་ཅིང་ཕྱིས་དར་བར་འགྱུར་བ་ནི། དེ་ལ་མི་ལ་དང་གྲུབ་པའི་རྒྱལ་མོས་སྒྲུབ་གནས་ལྔར་གདུལ་བྱ་འདུལ་བར་ལུང་བསྟན་པའི་དང་པོ་ཤམྦྷོའི་གངས་སྒྲུབ་གནས་ཀ་པཱ་ལ་ཁ་སྦུབས་པ་འདྲ་བ་དཔལ་བདེ་མཆོག་འཁོར་ལོའི་ཕོ་བྲང་དུ་བཤད། གཉིས་པ་བྲག་ཕུག་ཉི་ཟླ་ཁ་སྦྱོར་ཞེས་པ། བདེ་བ་ཅན་དང་ཁྱད་པར་མེད་པ་ཚེ་བསྒྲུབ་པའི་གནས་སུ་བསྔགས་པ་གློན་བྱེས་འགོལ། གསུམ་པ་དགེ་བསྙེན་གསལ་རྗེའི་བྱང་འདབ་རྡོ་རྗེ་གཞོན་ནུའི་སྒྲུབ་གནས་སུ་གསུངས་པ་བྱར་ཕུ་ནགས་དགོན། བཞི་པ་རྡོ་བོད་ཀྱི་མཚམས་བྲག་བྱ་ཁྱུང་གཤོག་པ་བརྐྱང་བ་འདྲ་བ་ལྕང་ལོ་ཅན་དང་ཁྱད་པར་མེད་པར་བསྟོད་པ་མོག་པ་ཚེ་ཀོང་སྟེ། སྐུ་མངོན་དུ་རྒྱུས་གདུལ་བྱ་བཏུལ་བ་ནི་དེ་དག་གོ །དེ་ནས་བདེ་ཆེན་གསང་བའི་ཕུག་པ་ཞེས་པར་ཁྱོད་ཀྱི་མཐའ་མའི་གདུལ་བྱ་ཡོད་ཀྱིས། དེའི་དོན་གྱིས་ཤིག་ཅེས་ལུང་བསྟན་པ་ནི། ལོ་རོ་དཀར་ནག་ཁྲ་གསུམ་འདུས་པའི་ས། རི་གླང་པོ་ཆེ་ཉལ་བ་ལྟ་བུ། དཔལ་བཀྲ་ཤིས་མཐོང་སྨོན་ཞེས་བྱ་བ་འདི་སྟེ། སྐུ་དངོས་ཀྱིས་གདུལ་བྱ་བཏུལ་བའི་ཕྱི་ལོགས་སུ་བྱུང་བས་མཐའ་མའི་གདུལ་བྱ་ཞེས་གསུངས་ལ། དེ་ཡང་། གང་ཞེ་ན། འཕགས་པ་འཇིག་རྟེན་དབང་ཕྱུག་གི་གཟིགས་པའི་རྩེ་མོ་ལས་འཐོན་པ། ཇོ་བོ་ནཱ་རོ་ཏ་པ་ཆོས་ཀྱི་སྤྱན་ལྡན་ཆེན་པོ་དེའི་སྤྲུལ་པའི་སྐུ། དཔལ་འབྲུག་པ་ས་གསུམ་གྱི་མཆོད་གནས། བོད་ཡུལ་ལྷོ་ཕྱོགས་ཀྱི་རྒྱལ་ཁམས་ཆེན་པོ་ཆོས་བཞིན་དུ་སྐྱོང་བ་མིའི་དབང་ཕྱུག་གོང་མ་ཆེན་པོར་འོངས་པ་ཆོས་ཀྱི་གྲགས་པ་ཞེས་པ་དེ་ཡིན་ལ། དེའི་དོན་གྱིས་ཤིག་ཅེས་པ་ནི་གདམས་པ་འདི། རས་ཆུང་པ་ཉིད་མངོན་སུམ་དུ་བྱོན་ནས། དེ་ལ་སྩལ་བ་ཡིན་ལ། རྣམ་ཐར་བཀའ་རྒྱ་མར་མནལ་ལམ་དུ་བྱུང་ཚུལ་གསུངས་པ་ནི་ལོག་པར་རྟོག་པའི་ངོར་སྦས་པ་ཡིན་ནོ། །དེའི་སྙན་རྒྱུད་འཛིན་པའི་སློབ་མའི་གཙོ་བོ་ཡང་། མཁའ་འགྲོ་མ་སུ་ཁ་སིདྡྷིས། མི་ཏྲ་ལོ་ཡི་སྤྲུལ་པ་ཡིས། །ཁྱོད་ཀྱི་སྒྲུབ་རྒྱུད་རྒྱས་པར་བྱེད། །ཅེས་པའི་ལུང་བསྟན་སྩལ་བའི་མི་ཏྲ་ཛུ་ཀིའི་སྤྲུལ་པ་ནི་ཁོ་བོའི་རྗེ་བཙུན། མཚན་སྣང་སྲིད་ལྷ་འདྲེས་གསོལ་བ་སྒྱུ་མའི་གར་མཁན། གཞན་ཀུན་སྤངས་ཤེས་རབ་རྒྱ་མཚོ། ལོའི་སྤྲུལ་པ་ནི་ཌཱ་ཀི་རས་ཆེན་ཞེས་གྲགས་པ་དེའོ། །གཉིས་པ་ལ། བདེ་མཆོག་དངོས་གྲུབ་ཀྱི་སྐོར་མཛོད་ཕྱེ་ནས་སྐལ་ལྡན་གྱི་སྐྱེས་བུ་སངས་རྒྱས་ལ་སྦྱོར་བ། ཕག་མོ་བྱིན་རླབས་ཀྱི་སྐོར་མཛོད་ཕྱེ་ནས་མཚན་ལྡན་གྱི་བུད་མེད་ཡེ་ཤེས་ཀྱི་ས་ལ་སྐྱེལ་བ། བྱ་རོག་མ་བསྟན་སྲུངས་ཀྱི་སྐོར་མཛོད་ཕྱེ་ནས་བསྟན་པའི་དགྲ་བོ་རྡུལ་དུ་འཐག་པ་གསུམ་ལས་དང་པོ་ལ། འཇུག་པའི་ཡན་ལག་དང་། མན་ངག་དངོས་བཤད་པ་གཉིས། དང་པོ་ནི། རྒྱ་གར་སྐད་དུ། ཤྲཱི་ཙ་ཀྲ་སམྦ་ར་ཨུ་པ་དེ་ཤ་ནཱ་མ། བོད་སྐད་དུ། དཔལ་འཁོར་ལོ་སྡོམ་པའི་མན་ངག་ཅེས་བྱ་བ། དཔལ་ནི་གཉིས་སུ་མེད་པའི་ཡེ་ཤེས་ཡིན་ལ། འཁོར་ལོ་ནི་རྣམ་ཀུན་མཆོག་ལྡན་གྱི་སྟོང་ཉིད་དེ། སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བའོ། །སྡོམ་པ་ནི། དེ་དག་རང་བཞིན་ལྷན་ཅིག་སྐྱེས་པའི་བདེ་བའི་མཆོག་ཏུ་འདུས་པའི་སྡོམ་པ་སྟེ། སྡོམ་འབྱུང་ལས། སྐུ་དང་གསུང་དང་ཐུགས་ཀྱི་ལས། རྣམ་ཀུན་མཆོག་གི་སྡོམ་པའོ། །ཞེས་དང་། སངས་རྒྱས་ཀུན་གྱི་གསང་བ་ནི། །འདུས་པ་བདེ་བའི་མཆོག་ཡིན་ཏེ། ཞེས་དང་། དེ་ཀ་ལ་བདེ་མཆོག་འཁོར་ཞེས་པའང་བཤད་དེ། རྣམ་ཀུན་གཅིག་པའི་བདེ་མཆོག་ནི། རང་བཞིན་ལྷན་ཅིག་སྐྱེས་ཞེས་བརྗོད། རྣམ་ཀུན་མཆོག་ལྡན་མཚན་ཉིད་ཀྱི། །དེ་ཉིད་དཀྱིལ་འཁོར་ཤེས་པར་བྱ། ཞེས་སོ། །འཁོར་ལོ་སྡོམ་པ་དེ་ཚེགས་ཆུང་ངུས་ཁོང་དུ་ཆུད་པར་བྱེད་པའི་ཐབས་འདི་ལ་དེའི་མན་ངག་ཅེས་བྱའོ། །དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །ཞེས་པ་ནི་ལོ་ཙཱ་བ་དང་བའི་ཕྱག་སྟེ། རྡོ་རྗེ་མཁའ་འགྲོ་ནི་བཅོམ་ལྡན་ཧེ་རུ་ཀའོ། །མན་ངག་དེ་འཆད་པར་བཞེད་ནས། བཅོམ་ལྡན་འདས་རྡོ་རྗེ་ཕག་མོས། གང་ཞིག་ཀུན་ཏུ་བརྟགས་པ། ཞེས་པ་ནི་ལྟ་བར་འཛིན་པ་སྟེ། གོ་བདེ་བར་བྱས་ནས་དམིགས་པ་ཐམས་ཅད་དོ། །ཡོངས་སུ་སྤངས་པའི་ཞེས་པ་དམིགས་པ་ཐམས་ཅད་ཉེ་བར་ཞི་བའམ། སྣང་བ་མེད་པའམ། འགྱུར་བ་ཐམས་ཅད་ཟད་པའི་ཆའོ། །དེ་ཉིད་ཟག་པ་མེད་པའི་ཆོས་ཀྱི་སྡེ་ཚན་ཐམས་ཅད་པར་གྱུར་པས་ཆོས་ཀྱི་ཚོགས་སམ། ཆོས་སྐུ་དང་དཔེ་མེད་བདེ་བ་ཙམ་གྱིས་མཛེས་པ། ཞེས་པ་ནི། གང་ལ་སྡུག་བསྔལ་ཟད་པ་ཉིད་ཀྱི་བདེ་བ་སྟེ་མྱ་ངན་ལས་འདས་པ་འབའ་ཞིག་བདེ་བའོ་ཞེས་པ་བཞིན། བདེ་བ་དེ་ཀའི་གདུལ་བྱའི་རྐྱེན་ཇི་ལྟ་བའི་རྗེས་སུ་འགྲོ་བའི་ཆ་དེ་ལ། ལོངས་སྤྱོད་རྫོགས་སྐུ་དང་། ཞེས་གསུངས། དེ་ཉིད་རྗེས་སུ་སོང་བ་ལས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོར་ལངས་པ་ནི། གང་ཞིག་ས་རྣམས་ཀུན་ཏུ་ཕན་མཛད་སྤྲུལ་པའི་སྐུར་བརྗོད་པ། །ཞེས་བྱ་སྟེ་དེའི་ཕྱིར་དེ་དག་གི་དང་པོ་གཞི་དུས་སུ་ཐིག་ལེར་གནས། ལམ་དུ་ཕོ་ཉས་སྦྱངས་པས། འབྲས་བུ་ཆོས་སྐུར་འཆར་བ་ནི་རྟེན་ཅིང་འབྲེལ་པར་འབྱུང་བ་སྟེ། དམིགས་པ་མེད་པའི་བྱང་ཆུབ་ཀྱི་སེམས་ནི་རྣམ་པར་འགྱུར་པའི་ཚེ་ཐིག་ལེར་བཞག འགྱུར་བ་སྦྱངས་ན་འགྱུར་མེད་ཐུགས་རྡོ་རྗེར་འགྱུར་བའི་ཕྱིར་རོ། །གཉིས་པ་གཞི་དུས་སུ་རླུང་དུ་གནས། ལམ་དུས་སུ་ཆོས་དྲུག་གིས་སྦྱངས་པས། འབྲས་དུས་སུ་ལོངས་སྤྱོད་རྫོགས་པར་འགྱུར་ཏེ། ཐམས་ཅད་དུ་འགྱུར་བ་གཡོ་བ་སྟེ་རླུང་ཡིན་པ་དེ་སྦྱངས་པས་སྒྲ་བརྙན་གསུང་རྡོ་རྗེར་འགྲོ་བའི་ཕྱིར་རོ། །གསུམ་པ་གཞི་དུས་སུ་རྩར་གནས་པ། ལམ་དུས་སུ་བསྐྱེད་པའི་རིམ་པ་ལ་སོགས་པས་སྦྱངས་པས། འབྲས་དུས་སུ་སྤྲུལ་པའི་སྐུར་འགྱུར་ཏེ། རགས་པ་དབྱིབས་ཡིན་པས་དེ་སྦྱངས་པས་སྣ་ཚོགས་གཟུགས་བརྙན་སྐུ་རྡོ་རྗེར་འགྱུར་བའི་ཕྱིར་རོ། །དེ་གསུམ་འདུས་པ་ནི་བཅོམ་ལྡན་འདས་རྡོ་རྗེ་སེམས་དཔའ་སྟེ་ངོ་བོ་ཉིད་ཀྱི་སྐུའམ་ལྷན་ཅིག་སྐྱེས་པའི་སྐུའམ་ཟུང་འཇུག་གི་སྐུ་མ་ནིང་གི་གོ་འཕང་དུ་གྲགས་པ་དེའོ། །འདི་ནི་སངས་རྒྱས་ནང་ཕན་ཚུན་ཁོ་ནའི་ཡུལ་ཡིན་པས་འདུས་མ་བྱས་པ་དང་། གཞན་གསུམ་ནི་གདུལ་བྱའི་རྐྱེན་ལ་བལྟོས་པས་འདུས་བྱས་སུ་བཞག་གོ །དེ་ཡིས་ཁྱེད་ལ་བདེ་ལེགས་ཤོག །ཅེས་པ་ནི་ཤིས་པ་བརྗོད་པའི་ཚིག་དང་། མཆོད་བརྗོད་འདིས་བརྗོད་བྱ་སྐུ་གསུམ་དང་འབྲེལ་བ་ཡང་བསྟན་ནོ། །ཨེ་མ་ཧོ། ཆོས་རྣམས་ཀུན་གྱི་རང་བཞིན་ལ། །འགྱུར་མེད་དེ་ནི་བསྟན་བྱའི་ཕྱིར། །ཞེས་པ་ནི། ཆོས་ཐམས་ཅད་ཀྱི་རང་བཞིན་མི་འགྱུར་བ་དེ་གཞན་ལ་བསྟན་པའི་ཕྱིར་འདི་བརྩམས་པ་དགོས་པ། དེ་དག་ཁོང་དུ་ཆུད་དེ་འཚང་རྒྱ་བ་ནི་ཉིང་དགོས། རྡོ་རྗེ་འཆང་གི་བཀའ་འདི་ཐོས། །ཞེས་པས། དགོས་འབྲེལ་ཕུན་སུམ་ཚོགས་པ་སྟེ། འདི་འཁོར་ལོ་སྡོམ་པའི་ཞལ་སྐྱེམས་དུ་མངོན་ནོ། །གཉིས་པ་མན་ངག་དངོས་བཤད་པ་ལ། རྒྱུའི་རྒྱུད། ཐབས་ཀྱི་རྒྱུད། འབྲས་བུའི་རྒྱུད་གསུམ་ལས། དང་པོ་ལ། རྣམ་པར་འགྱུར་བ་ལུས་སུ་བཞག་པ་དང་། མ་འགྱུར་བ་སེམས་ཀྱི་རྒྱུད་དུ་བཞག་པ་ཡིན་ལ། དང་པོ་ནི། རྡོ་རྗེའི་ལུས་ལ། ཞེས་པ། འདིར་གདུལ་བྱའི་གཙོ་བོ་ཡིན་པས། མངལ་སྐྱེས་པའི་དབང་དུ་མཛད་ལ། དེ་ཡང་མའི་ཆོས་འབྱུང་དུ། ཁུ་རྡུལ་སྒྲ་གཅན་གྱི་ཐིག་ལེ་མི་ཤིགས་པའི་རང་བཞིན་གསུམ་བདེ་བས་བྱིན་གྱིས་བརླབས་པ་ལས་གྲུབ་པས་ལུས་ཆགས་པ་ཡང་སྐུ་གསུམ་དུ་གྲུབ་པ་སྟེ། དམ་པ་དང་པོར། ཐིག་ལེ་ཟླ་བ་ཁུ་བ་སྐུ། །རྣམ་པར་བཅད་པ་ཉི་རྡུལ་གསུང་། །ཨ་ཡིག་མུན་ཅན་ཐུགས་རབ་བརྗོད། །ཅེས་པའོ། །དེ་ཉིད་རྩ་བའི་རྒྱུད་དུ། །དེ་ནས་ཐམས་ཅད་ཆོས་འབྱུང་བར། །སྣ་ཚོགས་ལྟེ་བར་མི་ཤིགས་དགེ །སྔགས་པས་ཆོ་ག་བཞིན་དུ་བྲི། །ཆོས་ཀུན་གཅིག་ཏུ་བསྡུ་བར་བྱ། །ཞེས་པའི་རྐང་པ་གཉིས་ཀྱི་མེར་མེར་པོ་ལ་སོགས་པ་ཞག་བདུན་ན་དེ་ཡོངས་སུ་འགྱུར་བར་བཤད་པ་ཡིན་ནོ། །ཁམས་དྲུག་གི་དབང་ལས་མཛོད་དྲུག་རྙེད་ལ་དེ་ལ་རིགས་སུ་བརྗོད་ཅིང་དེ་ཉིད་ལ་རྡོ་རྗེའི་ལུས་ཞེས་བཏགས་པ་ཡིན་ནོ། །སྒྲ་གཅན་ཞེས་པ། དེ་ཡང་ལྟེ་བ་ན་སྐྱེ་བ་མེད་པ་མཚོན་པའི་མི་ཤིགས་པའི་ཡི་གེ་ཨ་གནས། དེ་ལས་རྩ་ཨ་བ་དྷཱུ་ཏཱི་ཆགས་ཏེ། ཕལ་སྐད་ལ་སྲོག་པའི་རྩའོ། །ཉི་ཟླའི་ལམ། ཞེས་པ། རྡུལ་དམར་ཆ་ལས་སྔ་མ་ལས་སྡོང་པོ་གྱེས་པ་ལྟ་བུ་ཉི་མའི་ལམ་རོ་མ་དང་། ཁུ་བའི་ཆ་ལས་སྔ་མ་ལས་ཟླ་བའི་ལམ་རྐྱང་མ་ཆགས་ཤིང་། དེ་གཉིས་ཀྱིས་སྔ་མའི་རྩ་ལ་གདུ་བུ་ལྟ་བུར་འཁྱུད་ཅིང་བཅེར་བའི་གནས་སུ་དེ་ཉིད་ལས་ཡལ་ག་དུ་མར་གྱེས་པ། བདེ་ཆེན་ལོངས་སྤྱོད་ཆོས་འཁོར་དང་། །སྤྲུལ་པ་བདེ་སྐྱོང་འཁོར་ལོའི་གནས། །ཞེས་པ་དག་དང་། མ་གྱེས་པ་སྨིན་མཚམས་རླུང་གི་འཁོར་ལོའོ། །དེ་བས་རྩ་གསུམ་སྐུ་གསུམ་དང་། རྒྱས་པ་སྟོང་ཕྲག་བདུན་ཅུ་རྩ་གཉིས་སུ་གྱེས་ཤིང་། ལས་བྱེད་པའི་ས་ལ་དེ་དག་གི་གཙོ་བོར་བསྙད་ནས། ཡུལ་ཉེར་བཞི་དུར་ཁྲོད་བརྒྱད་ཀྱི་རྩ་སོ་གཉིས། སྙིང་ཀའི་ལྔ་བསྣན་པས་སོ་བདུན་དུ་བཤད་དོ། །དེ་ཡང་རྩ་རྒྱུད་དུ། སྡེ་ཚན་ལ་ནི་ཡོངས་བསྡོམས་པ། །བཞི་བཞི་རུ་ནི་ཤེས་བྱས་ལ། །ཐུབ་པ་མཆོག་གི་རེ་མིག་ལ། །ཞེས་པའི་ཐུབ་པ་ནི་བདུན་ཏེ། སྔར་གྱི་ཁར་དབུ་མའི་མར་སྣ་རྡོ་རྗེ་ནོར་བུར་ཟུག་པ་ལ་འདབ་མ་བཞི་བཤད་པ་དེ་བགྲང་པ་ཡིན་ནོ། །བཞི་ཞེས་པ་སྔ་མ་ནི་འཁོར་ལོའི་ནང་བསྐོར། བཞི་ཕྱི་མ་སྤྱི་མགྲིན་ལྟེ་གསང་ཡིན་ལ། སྙིང་ག་ལ་ནི་རྩ་ལྔ། ལྷག་མ་རྣམས་ནི་དེ་དག་ལས་གྱེས་སོ། །དེ་ནི་གནས་པའི་རྩ་ཞེས་བྱ་སྟེ། རྣམ་པ་ཆུ་རྒྱུས་སུ་སྣང་བ་དང་། དབུས་ན་དྭངས་མའི་རྩ། ཞེས་པ་སྒྲ་གཅན་དེའི་དབུས་ན་འོད་ཀྱི་བ་ཐག་ལྟ་བུ་ཆོས་ཉིད་ཀྱི་དབུ་མ། དེ་ཡང་ཁམས་དྲུག་གི་དབྱེ་བས། འཁོར་ལོ་དྲུག་གི་ཕུག་ནང་ན། །ཕྲ་མོའི་ལུས་ལྡན་རྩ་ནི་དྲུག །ཅེས་བཤད་དོ། །དེ་ཉིད་ལ་གཉུག་མ་ཨ་བ་དྷཱུ་ཏཱི་གནས་ཏེ། དེ་ནི་མཐའ་བྲལ་དབུ་མའོ། །དེ་དག་ལ། རྩ་རྒྱུད་དུ། འདིར་སྔགས་ཚིག་ནི་འདི་ཡིན་ཏེ། ཨཱ་ལི་ཀཱ་ལི་མཉམ་བྱས་ནས། ཞེས། ཨཱ་ལི་ཀཱ་ལི་གཡོན་གཡས། མཉམ་བྱས་པ་མཉམ་རྒྱུ། དེ་ཡང་། གནས་ལྔའི་དཀྱིལ་དུ། ཞེས་པ། གཙུག་ཏོར་གསང་གནས་གཅིག་ཏུ་བསྡམས་པས་ལྔའི་ལྟེ་བར། དྭངས་མ་ནི། ཡིག་འབྲུའི་ཚུལ་དུ། ཞེས་པ་སྔར་གྱི་རྩ་དྲུག་པོ་དེ་ལ་གཡོ་བའི་ཆ་ནས་རླུང་དུ་བཞག་ནས། དེ་ལ་སྟོང་ཆེན་ཡི་གེ་ལྔར་བཤད་ཅིང་། ཕྱེ་ན་ཐིག་ལེ་སྟོང་པ་ཡི་གེ་དྲུག་ཏུ་ཡང་འགྱུར། ཡི་གེ་ནི་དབྱིབས་ལ་མི་ཟེར། རྣམ་རྟོག་གི་བཞོན་པའི་རླུང་སྒྲ་ཅི་ཙམ་དུ་སྣང་བ་དེ་ཡིན་ནོ། །དྭངས་མ་གནས། ཞེས་པ་ནི། དེ་ལ་བརྟེན་ནས་གཉུག་མ་ཡེ་ཤེས་ཀྱི་རླུང་གནས་ལ། མཉམ་རྒྱུ་ལ་ཡེ་ཤེས་ཀྱི་རླུང་དུ་བཤད་པ་ནི་ལས་རླུང་ཁོ་ནའི་ནང་གསེས་སོ། །ལས་རླུང་དེ་ལའང་། རྒྱུ་བར་བྱེད་པའི་རླུང་དག་ལ། །ཀླུ་དང་རུ་སྦལ་རྩངས་པ་སོགས། །བརྒྱ་བྱིན་གཞུ་རྒྱལ་ཉི་ཁྲི་དང་། ཆིག་སྟོང་དྲུག་བརྒྱ། ཞེས་པ། ཀླུ། རུ་སྦལ། རྩངས་པ། བརྒྱ་བྱིན། གཞུ་རྒྱལ་རྣམས་ནི་གནས་པའི་རྩའི་དབྱིབས་ལ་དེ་སྐད་བཏགས་ལ། ལས་བྱེད་པ་མིག་ལ་སོགས་པ་ཡིན་པས་ན་ཡན་ལག་གི་རླུང་དུ་བཞག་སོགས་ནི། ཕྱིར་རྒྱུ་བ་དེ་དག་ཡང་རྩ་བའི་རླུང་ལྔའི་རང་བཞིན་དུ་སྟོན་པ། ནང་དུ། གནས་ལྔར་ཁྱབ། ཅེས་པ་ཐུར་སེལ་ལྟེ་བ། སྲོག་འཛིན་སྙིང་ག གྱེན་རྒྱུ་མགྲིན་པ། ཁྱབ་བྱེད་ལུས། མེ་མཉམ་སྤྱི་བོར་བཤད་ལ། གསང་གནས་དང་གཙུག་ཏོར་དུ་སྟོང་པ་དང་ཡེ་ཤེས་ཀྱི་རླུང་ངོ་། །འབྱུང་འཇུག་གནས་པ་གསུམ་གཅིག་ཏུ་བྱས་པ་དབུགས། དེ་འདྲ་བ་ཉིན་ཞག་གཅིག་ལ་ཉི་ཁྲི་ཆིག་སྟོང་དྲུག་བརྒྱ་འབབ། དེ་དུས་སྦྱོར་བཅུ་གཉིས་སུ་གསིལ་བས་རེ་རེ་ལ་སྟོང་བརྒྱད་བརྒྱ་པ་རེ། དུས་སྦྱོར་རེའི་རླུང་སྣ་ཕྱོགས་རེ་ལ་རྒྱུ། དེ་ནས་ཅིག་ཤོས་སུ་འཕོ། འཕོ་མཚམས་དེར་མཉམ་རྒྱུ་ང་དྲུག་རྐང་བཅས་རེ་རྒྱུ་ལ། དེ་ཡང་ཤེད་མཉམ་པ་ནི་མ་ཡིན། དང་པོ་གང་ནས་ཡོན་པོར་འཕོ་བའི་ཕྱོགས་ཤེད་ཆེ། འཕོ་རྒྱུ་ཕྱོགས་དེ་ཞན་བར་དུ་མཉམ། རྗེས་ལ་འཕོ་རྒྱུ་ཕྱོགས་ཤེད་ཆེའོ། །འདི་རང་བཞིན་གྱི་མཉམ་རྒྱུའི་དབང་དུ་བྱས་ལ། སྲོག་རྩོལ་ལ་སོགས་པའི་སྟོབས་ཀྱིས་ཡིན་ན་ཤེད་མཉམ་པ་ཁོ་ན་ཡིན་ནོ། །རང་བཞིན་པའི་མཉམ་རྒྱུ་ལ་རགས་བརྩིས་དབུགས་སོ་གཉིས་ལ་སྟེ། དེས་དབྱུག་གུ་རེ་ལ་དྲག་པོ་རྐང་བཅས་སུ་ལོངས་པ་ནི་ཐོབ་སྐལ་བརྩིས་པ་ངོས་སུ་མི་རྒྱུ། དབྱུག་གུ་རེ་ལ་གྲངས་དེ་འབྲི་བ་ཡིན་ནོ། །དེ་ནི་ངག་གོ །དེ་བཞིན། ཞེས་པ། རྩ་རྒྱུད་ལས། དེར་གནས་དཔའ་བོ་བཏུ་བར་བྱ། དཔའ་བོ་ཁམས་ཏེ་སྔར་གྱི་སྟོང་ཆེན་ཡི་གེ་ལྔའམ་ཡིག་འབྲུ་ཉིད་ལ་རྣམ་པར་ཤེས་པ་དྲུག་གི་མིང་བཏགས་པ་དེ་ཁ་ཡིད་ཐིག་ལེ། ཀུན་རྫོབ་བྱང་ཆུབ་སེམས་ངོ་མ། དེ་ལ་དོན་དམ་བྱང་སེམས་བདེ་བའི་རང་བཞིན་བརྟེན་པས། ཀུན་རྫོབ་ཀུན་ད་ལྟ་བུ་ཉིད། །དོན་དམ་བདེ་བའི་གཟུགས་ཅན་ནོ། །ཞེས་གསུངས། དེ་ཡིས་ཉི་མ་དང་། ཟླ་བ། ཞེས་པ། རྩའི་ཐིག་ལེ་དེ་ལས་སྐྱེས་པ་ལ་སྙིང་སྟོབས་ཏེ་ཁམས་དཀར་པོ་བདག་པོར་གྱུར་བས་གསང་གནས་མན་གྱི་དབུ་མ་དེས་གང་། ལུས་ཀྱི་ཆ་གཞན་ཡང་དེས་གཙོ་བོར་ཁྱབ། བུད་མེད་ལ་རྡུལ་ཏེ་ཁྲག །བུད་མེད་ཀྱི་རིགས་ཅན་བཞི་བརྩི་བ་དབུ་མའི་མར་སྣའོ། །མ་ནིང་ལ་མུན་ཅན། སྐར་མ་འཛག་པར་གནས། ཞེས་པའི་སྐར་མ་ནི་སྙིགས་མའི་ཁམས་དཀར་དམར་གྱི་དྭངས་མ་གནས་སའི་མར་སྣ་དང་ཐད་མཉམ་དུ་སྐྱེས་པའི་བརྐྱང་མ་དང་བུད་མེད་ཀྱི་རོ་མའི་སྣ་གཉིས་སུ་གྱེས་པའི་གཅིག་ལ་བསམ་སེའུ་ཞེས་པ་ཁམས་དེ་གཉིས་ཀྱི་སྙིགས་མ་གནས་པ། དབུ་མའི་ཁམས་དེ། སྐྱེ་འཆི་མཉམ་དང་འདོད་ཆགས་ལས། །སྒྲ་གཅན་ས་བོན་འབབ་པར་བཤད། །ཅེས་པ་ལས་གཞན་དུ་མི་འབབ། བུད་མེད་ལ་ཕལ་པའི་ཉི་མ་རོ་མ། སྐྱེས་པ་ལ་ཕལ་པའི་ཟླ་བ་བརྐྱང་མ་ནས་འབབ། རྩ་མི་ཕྱེད་པའི་དྭངས་མ་སྐྱེས་པ་ལ་དཀར་པོ་བུད་མེད་ཀྱི་དམར་པོ་དེར་ལོངས་སྤྱད་ནས་ཐིམ་པའི་དུས་སུ་སོ་སེན་གྱི་རྒྱུར་སོང་བ་ལྟ་བུ་དེས་མཚོན་ནས་ཁམས་སོ་གཉིས་སུ་བཞག་པ་དེ་ནི་ཡིད་དོ། །གཉིས་པ་མི་འགྱུར་བ་སེམས་ཀྱི་རྒྱུད་དུ་བཞག་པ་ནི། དེ་ནི་སྔར་བཤད་པའི་གཉུག་མའི་དབུ་མ། གཉུག་མ་སེམས་ཀྱི་རླུང་། དོན་དམ་བྱང་ཆུབ་སེམས་ཞེས་བཞག་པ་རྣམས་ཏེ། དེ་དག་གཉིས་སུ་མ་བྱེ་བ་ནི་ཐོག་མ་མེད་པའི་གནས་ལུགས་ཡིན་པས། རྒྱུ་རྒྱུད། ཅེས་བྱ་དེ་ཡང་སེམས་ཀྱི་རྒྱུད་དེ། ཀུན་སྤྱོད་ལས། དེས་ན་ཧེ་རུ་ཀ་དཔལ་རྒྱུད། །སེམས་ནི་དྲི་མེད་ཡིན་པར་བཤད། །ཅེས་སོ། །དེ་རྣམ་པར་མི་རྟོག་པ། རྣམ་པ་ཐམས་ཅད་པ། ལྷན་ཅིག་སྐྱེས་པ་སྟེ་མཚན་ཉིད་གསུམ་ལྡན། ཀུན་གཞི། ཞེས་པ། དེ་ཀུན་གཞིར་རུང་བ་ནི། རྩ་བའི་རྒྱུད་ལས། ཐོག་མ་དབུས་མཐའ་ཡང་དག་གནས། ཞེས་པས་ཡིན་ལ། རྣམ་པར་ཤེས་པའི་ཚོགས་ནི་རྒྱུན་མི་བརྟན་པས་མི་རུང་། སེམས་ཅན་ཀུན་ལ་ཁྱབ་པ་པོ། །ཞེས་པ་དེ་ཆོས་ཐམས་ཅད་ཀྱི་དབྱིངས་ཡིན་པས་སོ། །གཉིས་པ་ཐབས་རྒྱུད་ལ། ལམ་ངེས་པའི་མདོར་བསྟན། ཚིག་དོན་རྣམ་པར་ཕྱེ་བའི་རྒྱས་བཤད་གཉིས་ལས། དང་པོ་ནི། ཐབས་ཀྱི་རྒྱུད་ལ་རྣམ་པ་གཉིས། །སྨིན་པར་བྱེད་དང་གྲོལ་བའི་ལམ། །ཞེས་པས། རྡོ་རྗེ་ཐེག་པའི་ལམ་ནི་གཉིས་སུ་འདུས་ཏེ། སྨིན་པར་བྱེད་པའི་དབང་དང་། །གྲོལ་བར་བྱེད་པའི་ལམ་མོ། །དེ་ཡང་། དབང་པོ་རྣོན་པོ་སྨིན་ལམ་ཉིད་དུ་མཆོག་ཐོབ་པ་ལ་གྲོལ་བྱེད་ལོགས་སུ་འཆད་མི་དགོས་ཏེ། གྲོལ་བར་བྱེད་རྒྱུ་ཅི་ཡང་མེད་པས་སོ། །འདི་ལ་ཆོ་ག་ལ་མ་བལྟོས་པ་དང་། ཅུང་ཟད་བལྟོས་པ་གཉིས་ཀྱི་ཕྱི་མའི་དབང་དུ་མཛད་ནས། ཁྱད་པར་དྲོད་ཀྱི་དབང་བསྐུར་ནི། །རྡོ་རྗེ་མཁའ་འགྲོ་རྡོ་རྗེར་བཅས། །ཞེས་པས་བསྒྲུབ་པའི་ཆོ་ག རྡོ་རྗེ་ཕ་ཡི་ཐོད་པ་ནི། །རྡོ་རྗེ་བདུད་རྩིས་བཀང་བྱ་ཞིང་། །ཞེས་པས་བསྐུར་རྫས། རྡོ་རྗེ་བདུད་རྩིའི་དབང་འདི་ཉིད། །རྡོ་རྗེ་སློབ་མའི་སྤྱི་བོ་དང་། །མགྲིན་པ་སྙིང་ག་ལྟེ་བར་བཞག །ཅེས་པ་བྱིན་བརླབ་ཏེ། རྩ་རྒྱུད་ལས། མཚལ་ཆེན་ལན་གསུམ་བཟླས་པ་ཡིས། །དེ་རྣམས་སུ་ནི་བྱུག་པ་བྱ། །ཞེས་པས་བསྟན་ལ། དེ་ཙམ་གྱིས་སྨིན་པའང་ཡོད་པས། འདི་སྨིན་ལམ་དུ་བསྟན་པའང་ཡིན་ནོ། །འབྲིང་ཐོད་བརྒལ་བ་ལ་དབང་ནུབ་གཅིག་ལ་ཚང་བར་བསྐུར་ནས་གྲོལ་བྱེད་ལ་རིམ་པའམ་རིམ་མེད་དུ་བཀྲི་བ་ཡིན་ཏེ། རྡོ་རྗེ་སྐུ་གསུམ་སྐྱེས་པ་དང་། །ཞེས་པ་བུམ་དབང་གི་ལམ། རྡོ་རྗེའི་ཆོས་དྲུག་སྒོམ་པར་གྱིས། །ཀྱིས་གསང་དབང་གི་ལམ། རྡོ་རྗེ་དབྱིངས་ཀྱི། ཞེས་པ། རྡོ་རྗེ་དབྱིངས་ཀྱི་རྩའི་ཟེ་བར་རྡོ་རྗེ་མཆོག་ཅེས་པ་ཐབས་ཀྱི་ལིངྒ་བཀོད་ནས། དེ་བཞིན་གཤེགས་པ་དང་རྡོ་རྗེ་འཆང་ཆེན་ཞེས་པ་དེའི་དབུགས་དབྱུང་བ་བརྩམ་པར་བྱ་བས། རྡོ་རྗེ་རྒྱལ། ཞེས་པ། རྡོ་རྗེ་སློབ་དཔོན་ཆེན་པོ་ཉིད་བསྒྲུབ་པ་ནི་དབང་གསུམ་པའི་ལམ་སྟེ། བྷ་གར་ལིངྒ་རབ་བཞག་ནས། །བྱང་ཆུབ་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་པ། །སངས་རྒྱས་གཟུགས་སུ་སྤྲོ་བར་བྱ། །ཞེས་སོ། །ཇི་ལྟར་རོ་བཅུད་ཀྱིས་ལྕགས་གསེར་དུ་བསྒྱུར་བ་བཞིན། རྡོ་རྗེ། ཞེས་པས་སྟོང་པ་ཉིད། བདུད་རྩིའི། ཞེས་པ་ཞུ་བའི་ཁུ་བའོ། །དབང་བསྐུར་བས། ཞེས་པས་སྟོང་པ་དེས་ཞུ་བ་མི་འཛག་པར་བསྡམས་པས་བདེ་ཆེན་དུ་འགྱུར་བ་སྟེ། ས་ར་ཧས། རླུང་དང་མེ་དང་དབང་ཆེན་འགགས་པ་ན། །བདུད་རྩི་རྒྱུ་བའི་དུས་སུ་རླུང་ནི་སེམས་ལ་འཇུག །ཅེས་སོ། རྡོ་རྗེ་ཐུགས་ཀྱི་དབང་ཐོབ་ཤོག །ཅེས་པ་ནི། དུས་དེར་རླུང་དབུ་མར་ཐིམ་པས་ལྷན་ཅིག་སྐྱེས་པའི་དགའ་བ་ངོ་མ་རྟོགས་པར་གྱིས་ཤིག་པས་དབང་བཞི་པའི་ལམ། གལ་ཏེ་བོགས་འདོན་དགོས་ན། རྡོ་རྗེའི་ལམ་མཆོག ཅེས་སོགས་རྐང་པ་དྲུག་གིས་བསྟན་པ་བཞིན་སྤྱོད་པ་བྱ། ལུང་འདི་འོག་ཏུ་རྒྱས་པར་འཆད་དོ། །དབང་པོ་མཐའ་མ་ལ་རིམ་གྱིས་ཁྲིད་དགོས་ཏེ། དཔེར་ན་འཕོང་སློབ་པ་བཞིན་ནམ་སྐས་ལ་འཛེག་པ་ལྟ་བུ། ད་ལྟ་ཕྱག་བཞེས་ནི་ཕྱི་མའི་དབང་དུ་མཛད་པས། དེ་ལྟར་རྒྱུད་རྣམས་སྨིན་བྱས་ནས། ཞེས་མང་ཚིག་གསུངས་སོ། །གཉིས་པ་རྒྱས་པར་བཤད་པ་ལ། སྔོན་དུ་འགྲོ་བ་ཐུན་མོང་གི་རིམ་པས་རྒྱུད་སྦྱང་བ་དང་། དངོས་གཞི་གསང་བའི་ཉེ་ལམ་ལ་བརྟེན་ནས་ཚེ་གཅིག་ལུས་གཅིག་གིས་རྫོགས་པའི་སངས་རྒྱས་སྒྲུབ་པ་གཉིས། དང་པོ་ལ། བློ་ཆོས་སུ་འགྲོ་བའི་ཕྱིར་འཆི་བ་བསམ་པ། ཆོས་ལམ་དུ་འགྲོ་བའི་ཕྱིར་སྐྱབས་སེམས། ལམ་གྱི་འཁྲུལ་པ་བསལ་བའི་ཕྱིར་རྡོ་རྗེ་སེམས་དཔའི་སྒོམ་བཟླས། འཁྲུལ་པ་ཡེ་ཤེས་སུ་འཆར་བའི་ཕྱིར་བླ་མའི་རྣལ་འབྱོར། རླུང་གི་གེགས་མི་ལྡང་བའི་ཕྱིར་རྩ་ལམ་སྦྱང་བ་ལྔ་ལས། དང་པོ་ནི། བདག་ངེས་པར་འཆི། ནམ་འཆི་ཆ་མེད། ཅིས་ཀྱང་མི་སྟོངས་པར་འཆི་བ་བསམ་པ་གསུམ། བདག་ངེས་པར་འཆི་བའི་རྒྱུ་མཚན། སྔར་སྐྱེས་ནས་མ་ཤི་བ་ལུས་པ་མེད་པའི་ཕྱིར་དང་། ལུས་འདུས་བྱས་ཡིན་པའི་ཕྱིར་དང་། ཚེ་སྐད་ཅིག་གིས་འཛད་པའི་ཕྱིར་རོ། །གཉིས་པ་ནམ་འཆི་ཆ་མེད་པའི་རྒྱུ་མཚན། སྒྲ་མི་སྙན་པ་མ་གཏོགས་པའི་ཚེ་ལ་ངེས་པ་མེད་པ་དང་། ལུས་ལ་རྟག་པའི་སྙིང་པོ་མེད་པའི་ཕྱིར་དང་། འཆི་བའི་རྐྱེན་མང་བའི་ཕྱིར་རོ། །ཅིས་ཀྱང་མི་སྟོངས་པར་འཆི་བ་བསམ་པ་ནི། ནོར་རྫས་ཀྱིས་མི་སྟོངས་པའི་ཕྱིར་དང་། གཉེན་བཤེས་ཀྱིས་མི་སྟོངས་པའི་ཕྱིར་དང་། ལུས་རང་གི་ངོས་ནས་མི་སྟོངས་པའི་ཕྱིར་རོ། །ཤི་ཡང་སླར་སྐྱེའོ་སྙམ་ན། སྐྱེ་དང་ལོས་སྐྱེ་སྟེ། སྔར་ཡང་ལུས་ཇི་ཙམ་ཞིག་བླངས་ཏེ། དལ་འབྱོར་གྱི་མི་ལུས་ཐོབ་པ་ད་རེས་ཙམ་ཡིན། འདི་ལ་དུས་གཏན་གྱི་དོན་བསྒྲུབ་པའི་གོ་སྐབས་ཡོད་ལ། གཞན་ལ་མེད་པས་དེའི་རིང་ལ་མ་བསྒྲུབ་ན། ད་དུང་འཁོར་བར་འཁོར་ནི་དགོས། དེ་ལ་དལ་འབྱོར་གྱི་ལུས་ནི་རྙེད་པར་དཀའ་བས་སོ། །ཤི་ནས་སྐྱེ་བ་ཡང་ཚེ་འདིའི་བྱ་གཞག་ལ་རག་ལས་ཏེ། དགེ་བ་སྤྱད་ན་མཐོ་རིས། སྡིག་པ་སྤྱད་ན་ངན་འགྲོར་འགྲོ་ལ། གཉིས་པོ་གར་སྐྱེས་ཀྱང་སྡུག་བསྔལ་ཁོ་ན་མྱོང་བ་ལས་མ་འདས་ཏེ། འཁོར་བ་ཐམས་ཅད་སྡུག་བསྔལ་ཞེས་གསུངས་པའོ། །འཁོར་བ་དེར་འཁོར་བ་མི་འདོད་ན་རང་གིས་རང་མ་བསླུས་པ་ཞིག་བྱ་འཚལ་ཏེ། དེ་ཡང་། དམ་པའི་ཆོས་ལ་འཇུག་པ་ལས་ཐབས་གཞན་ཅི་ཡང་མེད་དོ་ཞེས་བསམ་པའོ། །གཉིས་པ་ནི། མདུན་གྱི་ནམ་མཁར་ལམ་ལས་བཻ་ཌཱུརྻའི་ས་གཞི་གསེར་གྱིས་མིག་མངས་རིས་སུ་བྲིས་པ། བདུད་རྩིའི་རྒྱ་མཚོ་རིན་པོ་ཆེ་པདྨ་སྣ་ཚོགས་ཀྱིས་གང་བ་ལ་སྤྲུལ་པའི་བྱ་སྐད་སྣ་ཚོགས་པར་གྲག་པ། ནོར་བུ་སྣ་ཚོགས་པའི་འབབ་སྟེགས་དང་གསེར་གྱི་བྱེ་མས་བསྐོར་བ། དེའི་དབུས་ན་དཔག་བསམ་གྱི་ཤིང་ཡིད་བཞིན་གྱི་ནོར་བུའི་དབང་ཕྱུག་ཐམས་ཅད་ལས་གྲུབ་པ། སྟེང་གི་དབུས་སུ་གྱད་དང་སེང་གེས་བཏེག་པའི་ཁྲི་དར་གྱིས་ཀླུབས་པ་པདྨ་དང་ཉི་མ་ལ་རྩ་བའི་བླ་མ་དང་སྙན་རྒྱུད་བརྒྱུད་པ་མུ་ཏིག་སྟར་ལ་བརྒྱུས་པ་ལྟ་བུར་མཐོ་བརྩེགས་སུ་བཞུགས་པ་ལ་བླ་མའི་ཚོགས་ཀྱིས་བསྐོར་བ། མདུན་དུ་འཁོར་ལོ་སྡོམ་པ་ལ་སོགས་པའི་ཡི་དམ། གཡས་སུ་སངས་རྒྱས་ཤཱཀྱ་ཐུབ་པ་ལ་སོགས་པ་སངས་རྒྱས། རྒྱབ་ཏུ་ཡུམ་ཆེན་མོ་ཤེར་ཕྱིན་མ་ལ་ཆོས་ཀྱི་གླེགས་བམ། གཡོན་དུ་སྤྱན་རས་གཟིགས་དབང་ཕྱུག་ལ་འཕགས་པའི་དགེ་འདུན་ཏེ་མངོན་དུ་རྒྱུའི་དཀོན་མཆོག་གསུམ། མཐའ་བསྐོར་དུ་དམ་པ་ཆོས་སྐྱོང་བ་ཐམས་ཅད་བཞུགས་པར་མོས་པ། བདག་དེ་དག་གི་འབངས་དང་སངས་རྒྱས་ཉིད་ཐོབ་པར་བྱ་བ་ཁས་བླངས་ནས་སྐྱབས་སུ་འགྲོ་ཞིང་གཞན་གྱི་དོན་དུ་རྫོགས་པའི་བྱང་ཆུབ་ཐོབ་པར་འདོད་པས་བྱང་ཆུབ་སེམས་སྟོང་པ་སྙིང་རྗེའི་སྙིང་པོ་ཅན་བསྐྱེད་པར་བྱ་སྟེ། ཆོ་ག་ནི། ཕྱོགས་བཅུར་བཞུགས་པའི་དང་། ཇི་ལྟར་དུས་གསུམ་མགོན་པོ་ཞེས་པ་འདིས་སོ། །མཐར་སྤྱན་རས་གཟིགས་འོད་དུ་ཞུ་ནས་ཡུམ་ཆེན་མོ། དེ་སངས་རྒྱས། དེ་ཡི་དམ། དེ་བླ་མ་རྣམས། དེ་ཐམས་ཅད་རྩ་བའི་བླ་མ། དེ་རང་ལ་བསྟིམ་མོ། །གསུམ་པ་ནི། རང་གི་སྤྱི་བོར་པཾ་ལས་སོགས་ཀྱིས་ཕྱིའི་རྡོར་སེམས་ཡབ་ཡུམ་བསྐྱེད། ཡེ་ཤེས་པ་བསྟིམ། དེའི་ཐུགས་ཀར་ནང་གི་རྡོར་སེམས་ཟླ་བ་ས་བོན་ཧཱུྃ་ཡིག་བརྒྱའི་སྔགས་འཕྲེང་དཀར་པོས་བསྐོར་བ་བཀོད་དེ་བཟླས། དེ་དུས་གསང་བའི་རྡོར་སེམས་སྐུ་གསུང་ཐུགས་ཀྱི་བྱིན་རླབས་སྔགས་འཕྲེང་དང་སྦྱོར་མཚམས་ནས་བདུད་རྩིར་བབས་རང་གི་གདོན་བགེགས་སྡིག་སྒྲིབ་ཐམས་ཅད་བཀྲུས་ལ་གསོལ་བ་བཏབ་སྟེ་རང་ལ་བསྟིམ་རང་དང་གཉིས་སུ་མེད་པ་དེ་ཁོ་ན་ཉིད་ཀྱི་རྡོར་སེམས་མངོན་དུ་བྱས་ཏེ་མཉམ་པར་གཞག་པར་བྱའོ། །བཞི་པ་ནི། རང་ཉིད་བཅོམ་ལྡན་འདས་འཁོར་ལོ་སྡོམ་པ་སེམས་དཔའ་སུམ་བརྩེགས། མགྲིན་པར་ཕྱག་གཉིས་པ་གསལ་བཏབ། སྔགས་ཀྱི་གནས་གསུམ་ཆོ་ག་གཉིས། སྐྱེ་མཆེད་བྱིན་བརླབ་བྱ། ཡེ་ཤེས་པ་བསྟིམ། དབང་བསྐུར་བའི་ཆུ་རྒྱུན་གྱེན་དུ་རེངས་པ་ལས། སྤྱི་བོར་རྩ་བའི་བླ་མ་མི་བསྐྱོད་རྡོ་རྗེ་འཆང་ཡུམ་ཅན། དབུ་ཐོག་ནས་བརྒྱུད་པའི་བླ་མ་རྣམས་གསལ་བཏབ་ལ། གནས་ལྷུན་གྱིས་གྲུབ་པའི་འོག་མིན་དུ། །ཆོས་ཐེག་མཆོག་བདུད་རྩིའི་རང་བཞིན་གྱི། །རྒྱུ་ཟད་མི་ཤེས་པ་ཆོས་ཀྱི་སྐུ། །རྗེ་རྡོ་རྗེ་འཆང་ལ་གསོལ་བ་འདེབས། །སེམས་ཆོས་སྐུར་རྟོགས་པར་བྱིན་གྱིས་རློབས། །གནས་ཨུ་རྒྱན་དག་པའི་ཞིང་ཁམས་སུ། །ཆོས་ཟག་མེད་བདེ་བའི་དཔལ་སྤྱོད་པའི། །གདངས་རིགས་བཞིར་རྣམ་རོལ་ལོངས་སྤྱོད་རྫོགས། །རྗེ་རྣལ་འབྱོར་མ་ལྎ ངག་ནཱ་དའི་དབྱངས་སུྎ གནས་ལྷོ་ཕྱོགས་དཔལ་གྱི་རི་བོ་རུ། །ཆོས་ལྷན་སྐྱེས་གཉུག་མའི་བརྡ་སྦྱོར་མཁན། །གར་སྨིན་གྲོལ་སྒྱུ་མ་སྤྲུལ་པའི་སྐུ། །རྗེ་ཤ་བ་རི་ལྎ ལུས་འཇའ་ལུས་འགྲུབ་པརྎ གནས་དངོས་གྲུབ་ཅན་གྱི་དགོན་པ་རུ། །ཆོས་སྙིང་པོའི་དོན་རྟོགས་རིན་པོ་ཆེ། །མཚན་ཡོངས་སུ་གྲགས་པའི་མཻ་ཏྲི་པ། །རྗེ་མངའ་བདག་ཆེན་པོརྎ གཅིག་རྟོགས་པས་ཀུན་ཤེསྎ གནས་ཤིང་སྤངས་གསེར་གྱི་མཎྜྻལ་དུ། །ཆོས་རྒྱུད་སྡེ་བཞི་ཡི་འཆད་ཉན་གྱིས། །ཁོང་སྐལ་ལྡན་འགྲོ་བའི་དོན་མཛད་པའི། །རྗེ་ཏི་པུའི་ཞབས་ལྎ མཆོག་འདོད་དོན་འགྲུབ་པརྎ གནས་དག་སྣང་འོད་ཀྱི་དཀྱིལ་འཁོར་དུ། །ཆོས་ཟབ་ལམ་གདམས་པའི་གཏེར་མཛོད་མཁན། །འཁོར་ཌཱ་ཀི་རྒྱ་མཚོའི་ཚོགས་དབུས་ཀྱི། །རྗེ་རས་ཆུང་པ་ལྎ ཁམས་ཞུ་བདེ་རྒྱས་པརྎ གནས་མོག་པ་མཁའ་སྤྱོད་ཚེ་སྐོང་དུ། །ཆོས་མཁྱེན་པ་གཉིས་ཀྱི་ཉི་མ་ཤར། །དུས་སྙིགས་མའི་དཔལ་མགོན་འགྲན་ཟླ་བྲལ། །རྗེ་སངས་རྒྱས་དངོས་ལྎ ཡབ་ཁྱེད་རང་ལྟ་བུརྎ གནས་གར་བཞུགས་དག་པའི་ཕོ་བྲང་དུ། །ཆོས་རང་རིག་བདེ་བའི་གླུ་དབྱངས་མཁན། །ཉམས་ཞེན་མེད་ཆུ་ཟླའི་རྣལ་འབྱོར་པ། །རྗེ་ཤེས་རབ་རྒྱ་མཚོརྎ དུས་འདུ་འབྲལ་མེད་པརྎ གནས་ཁམས་གསུམ་འཁོར་བ་མི་ཟད་པར། །ཆོས་སྙིང་རྗེའི་དབང་པོ་སྤྱན་རས་གཟིགས། །ལྷ་གང་ལ་གང་འདུལ་དེར་འཆར་བའི། །རྗེ་པདྨ་དཀར་པོརྎ ཚེ་འདི་ཕྱི་ཀུན་ཏུྎ ཡབ་བདེ་ཆེན་ཐབས་ཀྱི་ཡི་དམ་ལྷ། །ཡུམ་སྟོང་ཆེན་ཤེས་རབ་མཁའ་འགྲོའི་སྡེ། །རྐྱེན་བར་ཆད་སེལ་མཛད་ཆོས་སྐྱོང་ལ། །བདག་རྒྱུན་ཆད་མེད་པརྎ ལམ་སྒྲུབ་པ་མཐར་ཕྱིནྎ ཐབས་རྡོ་རྗེ་ཐེག་པའི་རྟེན་འབྲེལ་གྱིས། །རྐྱེན་ཕྲ་རགས་རྩའི་མདུད་པ་ཞིག །ངག་ལས་རླུང་རྒྱུ་བ་རིམ་གྱིས་སྦྱངས། ཁམས་འཛག་བདེའི་རྒྱུད་ལམ་དག་པར་ཤོག །རྩ་དྭངས་མ་སྣང་སྟོང་ལྷ་སྐུ་ལ། །རླུང་དྭངས་མ་འཕོ་མེད་ནཱ་དའི་དབྱངས། །ཁམས་དྭངས་མ་འོད་གསལ་བདེ་བའི་ཐུགས། །དོན་གཅིག་འདྲེས་ལྷན་སྐྱེས་འགྲུབ་པར་ཤོག །གཤིས་ཀུན་ཁྱབ་ཆོས་སྐུའི་ནམ་མཁའ་ལ། །གདངས་ཅིར་ཡང་འཆར་བའི་གཟུགས་སྐུ་གཉིས། །རྩལ་མཁྱེན་པའི་འཕྲིན་ལས་མི་ཟད་པས། །མ་འགྲོ་ཀུན་བདེ་ལ་འགོད་པར་ཤོག །ཅེས་གསོལ་འདེབས་བྱས། དཀོན་མཆོག་གསུམ་ཡི་དམ་དེ་བརྒྱུད་པའི་བླ་མ་ལ། དེ་རྣམས་རྩ་བའི་བླ་མ་ལ་བསྟིམ། དེ་ཡང་ཡབ་ཡུམ་སྙོམས་པར་ཞུགས་པས་བདེ་བ་ཆེན་པོས་བདུད་རྩིར་ཞུ་བའི་རྒྱུན་རང་གི་སྤྱི་བོ་ནས་ཞུགས། ལུས་ཐམས་ཅད་གང་བས་ཟག་པ་མེད་པའི་སྐུ་གསུང་ཐུགས་ཀྱིས་གཉིས་སུ་མེད་པར་བྱིན་གྱིས་བརླབས་པར་བསམ་མོ། །ལྔ་པ་ནི། རང་ཉིད་ལྷར་གསལ་བའི་ལུས་ཀྱི་དབུས་གཡས་གཡོན་དུ་རོ་རྐྱང་ཀླད་རྒྱ་བརྒྱུད་སྣ་སྒོར་ཟུག་པ། འོག་ཏུ་རྐྱང་མ་གསང་རྩེ་དང་རོ་མ་གཅི་ལམ་དུ་ཟུག་པ་སྒོ་ཧ་རེ་དམར་པོ། གཡས་ཀྱི་ནང་དུ་ཀཱ་ལི་སོ་བཞི། གཡོན་དུ་ཨཱ་ལི་བཅུ་དྲུག་བརྩེགས་མ་པདྨའི་སྐུད་པ་ལྟ་བུར་ཕྲ་བ། རླུང་ཕྱིར་འབུད་པའི་ཚེ་སྣ་སྒོར་འཐོན། ནང་དུ་བརྔུབ་པའི་ཚེ་འོག་སྒོ་ནས་ཞུགས། ཕྱི་ནང་དུ་འཛིན་པའི་རིང་སྣ་ནས་འོག་དང་། ནང་དུ་བཤང་གཅི་གཉིས་ནས་སྣ་སྒོའི་བར་གྱི་རྩ་ཁྲིག་གང་བར་བསམ་པའོ། །གཉིས་པ་དངོས་གཞི་གསང་བའི་ཉེ་ལམ་ལ་བརྟེན་ནས་ཚེ་གཅིག་ལུས་གཅིག་གིས་རྫོགས་པའི་སངས་རྒྱས་བསྒྲུབ་པ་ལ། ཐ་མལ་གྱི་རྣམ་རྟོག་དཀྱིལ་འཁོར་གྱི་འཁོར་ལོར་བསྒྱུར་ནས་སྤྲུལ་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་བུམ་དབང་གི་ལམ། མཚན་མའི་སྣང་བ་ཡེ་ཤེས་སུ་ཁྱེར་ནས་ལོངས་སྤྱོད་རྫོགས་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་གསང་དབང་གི་ལམ། ཞུ་བའི་བདེ་བ་རྣམ་བཅས་སུ་བསླངས་ནས་ཆོས་ཀྱི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་དབང་གསུམ་པའི་ལམ། དམིགས་བཅས་ཐམས་ཅད་དམིགས་མེད་དུ་རོ་མཉམ་སྟེ་ལྷན་ཅིག་སྐྱེས་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་དབང་བཞི་པའི་ལམ། བྱ་སྤྱོད་ཐམས་ཅད་ཧེ་རུ་ཀའི་རོལ་མོར་བཏང་ནས་བཙན་ཐབས་སུ་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་སྤྱོད་པ་འཇིགས་བྲལ་རྡོ་རྗེའི་མཚོན་བྱ་དང་ལྔ་ལས། དང་པོ་ལ། ལུས་སྐུ་རྡོ་རྗེར་མ་སྨིན་པ་སྨིན་པར་བྱེད་པའི་དབང་། སྨིན་ནས་གྲོལ་བར་བྱེད་པའི་བསྐྱེད་རིམ་གཉིས་ལས། དང་པོ་ནི། སྨིན་བྱེད་དབང་གི་རིམ་པ་ནི། རི་སྟེང་སྣ་ཚོགས་པདྨ་ཡི། །ལྟེ་བར་ཨཱ་ལི་ཀཱ་ལི་སྐྱེས། །ཞེས་པ་སྒོང་སྐྱེས་ཀྱི་བསྐྱེད་ཆོག་དང་། །དཀར་མོའི་བདག་པོ་རྣམ་གནོན་ཅིང་། །ཞེས་པས་གཙོ་བོ་ཡབ་ཡུམ་དང་། ཉི་ཤུ་རྩ་བཞིའི་ཕྱེད་ལྡན་པ། །ཞེས་པས་འཁོར་ཏེ། འཁོར་ལོ་སྡོམ་པ་ལ་བརྟེན་ནས། །ཞེས་པས་དེའི་སྒོ་ནས་དབང་བསྐུར་བ་བཤད་ལ། དེ་ཡང་འདིར། བུམ་པ། ཞེས་པས་ཕྱི་བུམ་པའི་བྱ་བ་གཙོ་བོར་གྱུར་པས་དབང་བསྐུར་བ་སྟེ། དེ་ལ། གསོལ་བ་གདབ་དང་བསྙེན་པ་དང་། །ས་དང་སྟ་གོན་ཐིག་དང་ཚོན། །དཀྱིལ་འཁོར་བསྒྲུབ་དང་མཆོད་པ་དང་། །སློབ་མ་གཞུག་དང་དབང་བསྐུར་དང་། །ཡོན་འབུལ་བ་དང་བཅུ་གཅིག་ཏུ། །རྣལ་འབྱོར་དབང་ཕྱུག་ཆེན་པོས་གསུངས། །འདི་ལས་འཕྲོས་ནས་ལྷ་རབ་ཏུ་གནས་པ་བྱིན་རླབས་དཔལ་འབར། དེ་ལས་འཕྲོས་པ་རིང་བསྲེལ་གཞུག་པ་གནོད་སྦྱིན་འཁོར་ལོ་དང་བཅས་པའི་རྣམ་གཞག་ཡེ་ཤེས་སྙིང་པོ་བདུད་རྩི་རིལ་སྒྲུབ་བོ། །གཉིས་པ་ལ། སྔོན་དུ་འགྲོ་བ་དང་། དངོས་གཞི་དང་རྗེས་གསུམ། དང་པོ་ནི། གྲོལ་བྱེད་ལམ་ལ་རྣམ་པ་བཞི། །བུམ་པའི་དབང་གི་ཉམས་ལེན་ནི། །སྔོན་འགྲོ་ཚོགས་གཉིས་བསག་པ་དང་། །ཞེས་པའི་རྐང་པ་ཕྱི་མས་བསྟན། །མཎྜྻལ་བཀོད་ཅིང་མཆོད་པ་བཤམ། །ཁོན་གཅུགས་སྦྱང་ཞིང་གསོལ་བ་བཏབ། །སྐྱབས་སུ་འགྲོ་ཞིང་སེམས་བསྐྱེད་པ། །རྡོ་རྗེ་སེམས་དཔའི་སྒོམ་བཟླས་སོ། །ཞེས་སྔ་རབས་པ་རྣམས་འཆད་ལ། འདིར་ནི་ཐུན་མཚམས་ཀྱི་ལྷ་བསྐྱེད་པ། བླ་མའི་རྣལ་འབྱོར། རྩ་ལམ་སྦྱང་བ། དམ་རྫས་བྱིན་གྱིས་བརླབ་ནས་ལག་མཆོད་བྱ་བའི་བར་རོ། །གཉིས་པ་ནི། དངོས་གཞི་འབྲས་བུ་སྐུ་གསུམ་བསྒོམ། །ཞེས་པ། དང་པོ་བསྲུང་བའི་འཁོར་ལོ་བསྒོམ། །གཉིས་པ་མཆོད་སོགས་བྱིན་གྱིས་བརླབ། །འདི་ཡན་སྤྲུལ་སྐུའི་རྣལ་འབྱོར་རོ། །གསུམ་པ་ཕྱི་རོལ་འཁོར་ལོ་བསྐྱེད། །བཞི་པ་མཆོད་སོགས་རྫོགས་པར་འབུལ། །ལྔ་པ་སྡིག་པ་བཤགས་སོགས་བྱ། །ལོངས་སྐུའི་རྣལ་འབྱོར། དྲུག་པ་བདག་དང་རྣལ་འབྱོར་མཆོད། །ཅེས་པ་ཆོས་སྐུའི་རྣལ་འབྱོར། བདུན་པ་ཚོགས་འབུལ་ལོངས་སྤྱོད་བྱ། །བརྒྱད་པ་གླུ་དང་གར་གྱིས་མཆོད། །དགུ་པ་གཏོར་མ་བཏང་བྱ་ཞིང་། །བཅུ་པ་བཀྲ་ཤིས་སྨོན་ལམ་བྱ། །ཞེས་པའི་བར་ཞར་བསྟན། མདོར་བསྡུས་ན། ནང་གི་རྣལ་འབྱོར་ཉིད་ལ། །གནས་དང་ལྡང་བ་ཉིད་དང་ནི། །འཇུག་དང་ཡོངས་སུ་རྫོགས་པ་དང་། །ཞེས་པའི་སྔ་མ་སྔོན་འགྲོ། ལྷག་མ་གསུམ་སྤྲུལ་སྐུ། བྱིན་གྱིས་བརླབ་དང་དབང་བསྐུར་དང་། །མཆོད་དང་ཞེས་པ་ལོངས་སྐུ། ཏིང་འཛིན་ཉེ་བར་བསྡུ། ཆོས་སྐུའོ། །འདིས་བསྙེན་པ་ལ་སྦྱིན་སྲེག དེ་ལས་འཕྲོས་པ་གཤིན་པོ་རྗེས་འཛིན། གསུམ་པ་རྗེས་ནི། རྗེས་ནི་ཐུན་མཚམས་རྣལ་འབྱོར་རོ། །ཞེས་པ། ཚུལ་ཁྲིམས་ཙན་དན་ཡན་ལག་བྱུག །སོགས་རྗེས་སྤྱོད་རྣམས་སོ། །གཉིས་པ་མཚན་མའི་སྣང་བ་ཡེ་ཤེས་སུ་ཁྱེར་ནས་ལོངས་སྤྱོད་རྫོགས་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམ་ངག་གསང་དབང་གི་ལམ་ལ། ངག་གསུང་རྡོ་རྗེར་མ་སྨིན་པ་སྨིན་པར་བྱེད་པའི་དབང་། སྨིན་ནས་གྲོལ་བར་བྱེད་པ་ཆོས་དྲུག་གཉིས་ལས། དང་པོ་ནི། གསང་དབང་། ཞེས་པས་ནང་གསང་གནས་ཀྱི་རྫས་གཙོ་བོར་བཏོན་པས་དབང་བསྐུར་བ་དང་། གཉིས་པ་ལ། མཚན་འཛིན་ཡེ་ཤེས་ཀྱི་མེར་སྦར་བ་གཏུམ་མོ། །མཚན་འཛིན་སྒྱུ་མའི་འཕྲུལ་འཁོར་དུ་ངོ་སྤྲོད་པ་སྒྱུ་ལུས་མཚན་འཛིན་དག་སྣང་རབ་འབྱམས་སུ་ཁྱེར་བ་འོད་གསལ། མཚན་འཛིན་ཏིང་ངེ་འཛིན་གྱི་རྩལ་སྦྱོང་དུ་བྱེད་པ་རྨི་ལམ། མཚན་འཛིན་ཟུང་འཇུག་གི་བཅུད་དུ་ལེན་པ་བར་དོ། མཚན་འཛིན་ཡེ་ཤེས་ཀྱི་དབྱིངས་སུ་བཏང་བ་འཕོ་བ་དང་དྲུག་ལས། དང་པོ་ལ། བྱིན་རླབས་བླ་མའི་གཏུམ་མོ། བསྙེན་སྒྲུབ་ཡི་དམ་གྱི་གཏུམ་མོ། འཕྲིན་ལས་མཁའ་འགྲོའི་གཏུམ་མོ། མཐར་ཕྱིན་མཆོག་གི་གཏུམ་མོ་དང་བཞི། དང་པོ་ལ། ལུས་གནད། རླུང་གནད། དམིགས་པའི་གནད་གསུམ་ལས། དང་པོ་ནི། གསང་བའི་དབང་གི་ཉམས་ལེན་ནི། །གཏུམ་མོ་རྣམ་པ་བཞིས་བསྟན་ཏེ། །བྱིན་རླབས་བླ་མའི་གཏུམ་མོ་དང་། །བསྙེན་སྒྲུབ་ཡི་དམ་གཏུམ་མོ་དང་། །འཕྲིན་ལས་མཁའ་འགྲོའི་གཏུམ་མོ་དང་། །མཐར་ཕྱིན་མཆོག་གི་གཏུམ་མོའོ། །ཞེས་བསྟན་པ་ནི་ས་བཅད་ཀྱིས་རྟོགས་ལ། བྱིན་རླབས་བླ་མའི་གཏུམ་མོ་ལ། །ལུས་ཀྱི་གནད་ཐབས། ཞེས་པ། རྐང་པ་བསྣོལ་བའི་ཙོག་པུ་ལག་པ་བསྣོལ་བ་པུས་མོ་གཉིས་སུ་འཇུས་པའོ། །གཉིས་པ་ནི་རླུང་གི་གནད། ཅེས་པ་གཡས་ནས་གཡོན་དུ་བཅུ་བུས་མཐར་བརྔུབས་ཏེ་ཙམ་ཐུབ་འཛིན། དེ་བཞིན་གཡོན་ནས་གཡས་དང་དབུས་ནས་དབུས་སུའང་བྱའོ། །གསུམ་པ་དམིགས་པའི་གནད་ནི། ཞག་དང་པོ། དམིགས་གནད་སྤྱི་བོ་རུ། བླ་མ་མེའི་རང་བཞིན་ལ། གསོལ་བཏབ་བདེ་དྲོད་འཕེལ་བར་བྱེད། ཅེས་པ། འོག་ཏུ་རླུང་གི་དཀྱིལ་འཁོར་ནག་པོ་གཞུའི་དབྱིབས་ཤིན་ཏུ་ཆེ་བ་ཡཾ་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་རཾ་གྱིས་མཚན་པ། རང་ཉིད་རྡོ་རྗེ་རྣལ་འབྱོར་མ་རྒྱན་ཕྱག་མཚན་ཐམས་ཅད་ཡོངས་སུ་རྫོགས་པ་བརླ་མན་མེའི་དཀྱིལ་དུ་རིམ་པ་དེའི་འོག་སྒོར་རཾ་ཤིན་ཏུ་ཚ་བ་དམར་པོ། སྤྱི་བོར་པཾ་ལས་པདྨ་དང་རཾ་ལས་ཉིན་མོར་བྱེད་པའི་སྟེང་དུ་རྩ་བའི་བླ་མ་མེའི་རང་བཞིན་རྡོར་དྲིལ་འཛིན་པ་ཞལ་ཁྲོ་རྔམ་དང་ལྡན་པ། བརྒྱུད་པའི་བླ་མ་རྣམས་རང་རང་གི་སྐུ་མེའི་རང་བཞིན་མཐོ་བརྩེགས་སུ་བཞུགས་པར་བསྒོམས་ཏེ། །གསོལ་བ་འདི་སྐད་གདབ་བོ། །འཁོར་ལོ་སྡོམ་པ་དཔལ་ལྡན་ཤ་བ་ར། །རས་ཆུང་པ་དང་དྲན་མཆོག་ཆོས་ཀྱི་གྲགས། །ཙཎྜྻཱ་ལི་པ་རྩ་བའི་བླ་མའི་ཞབས། །གསོལ་བ་འདེབས་སོ་རྩ་རླུང་བྱིན་གྱིས་རློབས། །ལུས་ལ་བདེ་དྲོད་འབར་བར་བྱིན་གྱིས་རློབས། །ཕུང་པོ་ལྷག་མེད་འགྲུབ་པར་བྱིན་རློབས། །ལན་བཅུ། རླུང་ཕྱིར་འབུད་སུམ་ཅུ་གསོལ་འདེབས་སུམ་ཅུ། ཚུལ་དེ་ཉིན་མཚན་མེད་པར་བསྒོམ་མོ། །ཞག་གཉིས་པ་ལ། ལྟེ་བ་རུ། བླ་མ་མེའི་རང་བཞིན་ལ། །གསོལ་བཏབ་བདེ་དྲོད་འཕེལ་བར་བྱེད། །ཅེས་པ། རླུང་སྔ་མ་བཞིན་ཡང་བརྔུབ་པ་གཅིག་གསོལ་འདེབས་འདྲ། དམིགས་པ་དང་པོའི་སྟེང་དུ། རང་རྣལ་འབྱོར་མར་གསལ་བ་དེའི་སྐུའི་དབུས་ན་དབུ་མ་མེའི་རང་བཞིན་སྒོམ་པ་སྤྱི་བོ་ནས་གསང་གནས་ཀྱི་བར་དུ་ཐལ་ལེ་ཟུག་པའི་ནང་གི་ལྟེ་བའི་ཐད་དུ་རཾ་ལས་བླ་མ་མེའི་རང་བཞིན། རླུང་བཟུང་བའི་སྟོབས་ཀྱིས་དེ་ལས་མེ་འབར་དབུ་མའི་ཡས་སྣ་ནས་འཐོན། སྤྱི་བོ་ནས་མར་ལུས་ཐམས་ཅད་ལ་མེའི་གོས་ཀྱིས་གཡོགས་པར་བསམ། ཞག་གསུམ་པ་ལ། སྤྱི་བོ་ལྟེ་བ་རུ། བླ་མ་མེའི་རང་བཞིན་ལ། །གསོལ་བཏབ་བདེ་དྲོད་འཕེལ་བར་བྱེད་། །ཅེས་པ་གཉིས་ཀའི་བྱེད་ལས་སྔ་མ་བཞིན་ལ། བརྔུབ་ཆུང་ཡང་གཅིག་རྩེག ལན་གསུམ་རྡེབ་ཅིང་སྤྲུག དམིགས་པ་རྩ་དབུ་མ་དེ་ལས་རྩ་ཕྲན་སྟོང་ཕྲག་བདུན་ཅུ་རྩ་གཉིས་ལུས་ཀྱི་སྤྱི་བོ་ནས་རྐང་མཐིལ་གྱི་བར་སྐྲ་དང་བ་སྤུའི་ཁུང་བུ་ཀུན་ལ་ཟུག་པའི་ཁ་དང་དེ་རཾ་གྱིས་མཚན་པ། རླུང་བཟུང་བའི་སྟོབས་ཀྱིས་ཡཾ་ལས་རླུང་གི་དཀྱིལ་འཁོར་གཡོས། མེ་དང་ཕྱི་ནང་གི་རཾ་བླ་མའི་སྐུ་ཐམས་ཅད་ལས་མེ་འབར། མཐོང་བའི་ཆ་ཚུན་ཆད་མེའི་ཕུང་པོ་གཅིག་ཏུ་གྱུར་པར་བསམ། མཐར་མེ་སྒོམ་མཁན་གྱི་ཤེས་པ་ངོས་གཟུང་། །མཉམ་པར་གཞག རྒྱབ་ནས་གྲོགས་གཅིག་གིས་ཕཊ྄་ཅེས་དྲག་པོ་བརྗོད་པས་སེམས་ཡེད་ཀྱིས་འབྱུང་། དེས་རྣམ་རྟོག་སྔ་མ་འགགས་ལ་ཕྱི་མ་མ་སྐྱེས་པའི་བར་དེ་ཀ་རིག་པ་དྲི་མ་མེད་པའི་གནས་ལུགས་ཡིན་ནོ་ཞེས་ངོ་སྤྲད། དེ་ངོས་ཟིན་པ་བཞིན་སྐྱོང་དུ་འཇུག་གོ །དྲོད་སྤྱི་བོ་ཚིགས་རྣམས་སུ་སྐྱེ་ན་མི་བརྟན་པས་དྲོད་འབེབས་པའི་འཁྲུལ་འཁོར་འདི་བྱའོ། །ལུས་རླུང་སྔ་མ་བཞིན་ལ་སྨད་ཀྱི་གཡས་གཡོན་དབུས་གསུམ་དུ་འཆུན་འདོན། དེ་ནས་སྟོད་དུ་འཐེན། དེ་བཞིན་ཐད་ཀར་བརྒྱངས་ལ་འཐེན། དེ་ནས་དགྱེད་དགུར་ལན་གསུམ་བྱས་སྤྲུག་ཅིང་ལན་གསུམ་རྡེབ། དེ་ལྟ་བུ་ཙམ་འཁྱོངས་སོ། །མི་འཁྱོངས་ལ་ཁད་ན། ཡང་བརྔུབ་ཆུང་བྱས་ཏེ་ལན་གསུམ་གཞིལ། ཡང་ཙམ་འཁྱོངས། མི་འཁྱོངས་པ་འདྲ་ན་རླུང་ཕྱིར་འབུད་དོ། །རྒྱུན་དུ་དེ་ལྟར་བསྒོམས་ན་ཡོན་ཏན་དྲོད་སྐྱེ། ནད་མེད། ལུས་སྟོབས་གླང་པོ་ཆེ། མདངས་པདྨ། རྩལ་སེང་གེ་ཡང་རྩལ་ཁྱུང་། བཀྲག་ཉི་ཟླ་ལས་ཀྱང་ཆེ་བར་འགྱུར་རོ། །རས་ཕུད་གཏོང་རྒྱུ་ཡིན་ན་མེ་དབང་བསྐུར། བླ་མའི་ཐུགས་ཀ་ནས་མེ་དཔག་ཏུ་མེད་པ་བྱུང་སྟེ་རས་པ་སོ་སོའི་སྙིང་ཀར་ཐིམ་པས་ལུས་ལ་བདེ་དྲོད་བསམ་གྱིས་མི་ཁྱབ་པ་སྐྱེས་པར་བསམ་མོ། །གཏོང་དུས་ཕོ་བ་ན་བ་དང་སྲིན་ནད་བྱུང་ན་ཙོག་པུ་སྒོམ་ཐག་གིས་བཅིངས་ལ་ལག་པ་སོར་མོ་བསྣོལ་བ་ཕོ་བར་བཀབ། གཞོགས་གཡས་ཕབ་སྟེ་ཉལ། དྲོད་ཆུང་ན་གཞན་དེ་འདྲ་ལ། ལག་པ་སོར་མོ་བསྣོལ་སྒྱིད་ཁུང་ནས་འཁྱུད་དེ་ཉལ། རྒྱུན་དུ་གཞན་འདྲ་ལ་ལག་པ་མཆན་ཁུང་གཡས་གཡོན་དུ་བཅུག་སྟེ་ཉལ་ལོ། །རྫས་ཀྱི་གཏུམ་མོ་ནི་ཐ་མལ་པའི་དབང་དུ་མཛད་པས་འདིར་མ་སྤྲོས་སོ། །འདི་ཡང་རྩ་རྒྱུད་ལས། བླ་མ་བརྒྱུད་པའི་རིམ་ཐོབ་པའི། །དབང་བསྐུར་བས་ནི་སྔགས་ལེགས་ལྡན། །ཕོ་ཉ་རྣམས་སུ་ཡང་དག་བཤད། །ཕྱག་རྒྱར་ལེགས་འབྱོར་ངང་ཚུལ་ཅན། །ལེགས་རྫོགས་ཡེ་ཤེས་རྒྱུ་སྐྱེས་པ། །ཞེས་པས་བཤད་དོ། །གཉིས་པ་བསྙེན་སྒྲུབ་ཡི་དམ་གྱི་གཏུམ་མ་ོལ། སྔོན་དུ་འགྲོ་བ་བསྲུང་འཁོར། དངོས་གཞི་ཉམས་ལེན་གྱི་རིམ་པ། རྗེས་ཡོན་ཏན་འབྱུང་ཚུལ་བསྟན་པ་དང་གསུམ་ལས། དང་པོ་ནི། སྐྱིལ་ཀྲུང་ཕྱེད་པའི་སྟང་སྟབས་ཀྱིས་རླུང་ཤར་གྱི་ཕྱོགས་སུ་བུས་ཏེ་རྩ་ཞལ་ནས་ཁྭ་གདོང་མ་དཔག་ཏུ་མེད་པ་འཐོན། ཤར་ཕྱོགས་འཇིག་རྟེན་ཐམས་ཅད་གང་། །དེ་བཞིན་གཡོན་ཞལ་ནས་འུག་གདོང་མ་བྱང་། །རྒྱབ་ཞལ་ནས་ཁྱི་གདོང་མ་ནུབ། །གཡས་ཞལ་ནས་ཕག་གདོང་མ་ལྷོ། །ཐུགས་ཀ་ནས་མེར་གཤིན་རྗེ་བརྟན་མ། སྲིན་པོར་གཤིན་རྗེ་ཕོ་ཉ་མོ། །རླུང་དུ་གཤིན་རྗེ་མཆེ་བ་མ། །བྱང་ཤར་དུ་གཤིན་རྗེ་འཇོམས་མ། །སྟེང་དུ་མཁའ་སྤྱོད། འོག་ཏུ་ས་སྤྱོད། །གཉིས་ཀ་ཕག་ཞལ་ཅན། དེ་རྣམས་ཀྱིས་ཕྱོགས་བཅུའི་བགེགས་ཐམས་ཅད་ཀྱི་སྙིང་ག་ནས་ལྕགས་ཀྱུས་ཕུག སྐེ་ཞགས་པས་བཅིངས་བསྒྱེལ་བའི་སྙིང་ཀར་རང་རང་གི་སྐུ་སྨད་ཕུར་བུའི་དབྱིབས་སུ་ཟུག་པས་ཕྱོགས་སོ་སོར་བཞུགས་པར་བསམ་མོ། །དེ་ནས་འོག་རྡོ་རྗེའི་རང་བཞིན་གྱི་ས་གཞི། ར་བ། གུར། བླ་རེ། མདའི་དྲ་བས་བརྒྱན་པ། བར་མཚམས་མེད་པ་ཞུན་བཏང་བ་ལྟ་བུ། མེ་ཁ་དོག་ལྔས་བསྐོར་བའི་ལྟེ་བར་སྣ་ཚོགས་རྡོ་རྗེའི་དབུས་སུ་རང་བསམ་མོ། །གཉིས་པ་ལ། ཕྱིའི་གཏུམ་མོ། ནང་གི་གཏུམ་མོ། གསང་བའི་གཏུམ་མོ་གསུམ། དང་པོ་ལ། སྟོང་ར། རྩ་འཁོར། ལུས་འདུལ་དང་རླུང་གནད། འབར་འཛག་དང་འཁྲུལ་འཁོར། རླུང་གི་ཞལ་གདམས་བསྟན་པ་དང་ལྔ་ལས། དང་པོ་ནི། ཡི་དམ་ལྷ་ཡི་གཏུམ་མོ་ལ། །དག་བྱེད། ཅེས་པས། རང་རྡོ་རྗེ་རྣལ་འབྱོར་མ་སྐུ་མདོག་རྒྱན་ཕྱག་མཚན་སྤྱི་མཐུན་ལ་སོར་མོའི་མཐའ་ཚུན་སྟོང་སང་ངེ་བ་རྒྱུ་མ་ཕུས་བཏབ་པ་ལྟ་བུར་བསྒོམ་མོ། །གཉིས་པ་ནི། དེ་ཡི་སྒྲ་གཅན། ཞེས་པ་དེའི་ལུས་ཀྱི་ནང་གི་དབུས་སུ་རྩ་དབུ་མ་ཁ་དོག་སྔོ་བ་ཤས་ཆེ་བའི་ལྔ་ལྡན་ཡས་སྤྱི་གཙུག མས་ལྟེ་འོག་སོར་བཞི་ཚུན་ཡ་ཡོ་ཁྱག་འཁྱོག་མེད་པ་མདའ་སྨྱུག་ལེགས་པར་བསྲངས་པ་ལྟ་བུ་ནང་སྟོང་པ། གཡས་སུ་རོ་མ་དམར་མདངས། གཡོན་དུ་རྐྱང་མ་དཀར་ཤས་ཆེ་བའི་ཁ་དོག་ལྔ་ལྡན་ཡས་ཀླད་རྒྱ་ནས་སྣ་བུག་ཏུ་ཟུག་པ། མས་གསང་གནས་ཨ་ཤད་ཀྱི་འོག་གི་ཀྵ་གཟུགས་སུ་བུ་ག་འབྲེལ་བ། དེ་གཉིས་ཅུང་ཟད་རྙིད་པའི་རྣམ་པ། སྤྱི་བོར་རྩ་འདབ་སོ་གཉིས། མགྲིན་པར་བཅུ་དྲུག སྙིང་གར་བརྒྱད། ལྟེ་བར་དྲུག་ཅུ་རྩ་བཞི། གསང་གནས་སུ་སུམ་ཅུ་རྩ་གཉིས་རྣམས་འཇའ་ལྟ་བུ་གསུམ་པ་ནི། ནང་། ཞེས་པས་ལུས་གནད་བསྟན་ཏེ། སྒྲ་གཅན་གྱི་ནང་དུ་འཆིང་མཁན་དེས་བྱེད་པ་ཡིན་པས་སོ། །དེ་ཡང་། རྐང་པ་གཡོན་པའི་སྟེང་དུ་འཕོངས་བཞག རྐང་པ་གཡས་པ་དེའི་སྟེང་དུ་བཞག་པ་པུས་མོ་བརྩེགས། རྐང་མགོ་རྒྱབ་ཏུ་སླེབ་པར་བྱས་པའི་ལག་པ་སྤྱི་ཟུར་ནས་གཏང་རྐང་པའི་ཕྲ་མཚམས་བཟུང་བ་གསང་བའི་སྐྱིལ་ཀྲུང་ངོ་། །སྒལ་ཚིགས་གདུ་བུ་བརྩེགས་པ་ལྟ་བུ་དང་། ཐལ་གོང་དགྱེད། མགྲིན་པ་ཡིད་ཙམ་དགུག་པ། ལྕེ་ཡར་རྐན་ལ་སྦྱར་བ། མིག་མི་འཛུམ་པ་ཐད་ཀའི་བར་སྣང་ལ་ཧུར་རེར་བལྟའོ། །དེའི་སྟེང་ནས་རླུང་རོ་ལན་གསུམ་བསལ་ལ་ཡན་ལག་ལྔ་སྦྱོང་བྱའོ། །དེས་ཀླུ་ལ་སོགས་པའི་རླུང་བཅུ་རང་མལ་དུ་འཆིངས་པས་དབུ་མའི་ནང་དུ་གཞོལ་བ་ཡིན་ནོ། །རླུང་གནད་ནི། ཀླུ་དང་རུ་སྦལ་རྩངས་པ་སོགས། ནང་དུ་འཆིང་ཞིང་། ཞེས་པ། ཕྱིའི་སྣང་བ་ཐམས་ཅད་རླུང་གི་རང་བཞིན་ཁ་དོག་ལྗང་ཁུ་སྟེང་སྲོག་ཀཱ་ལིའི་རང་བཞིན་ཅན་རྣམས་ནང་དུ་བརྔུབས་ཏེ་དགང་བ་བསྟན། ཕྱིར་གཏོང་དུས། ཟླ་བ་ཉིད། ཅེས་པས། འོག་ཐུར་སེལ་ཨཱ་ལིའི་རང་བཞིན་ཅན་རྣམས་དྲག་པོར་འཆུན་དང་བཅས་ཏེ་འཐེན་ནས་བུས་པས་ཐམས་ཅད་སྔར་བཞིན་སོང་བར་བསམས་ཕྱིར་འཛིན། བཞི་པ་ནི། སྤྲུལ་པའི་གནས་ནས་འབྱུང་མེ་ཨ། །ཀླུ་སོགས་ཀྱིས་ནི་སྦར་བར་བྱ། །ཆོས་འཁོར་དང་ནི་ལོངས་སྤྱོད་དང་། །བདེ་ཆེན་གནས་སུ། ཞེས་པ། རྩ་གསུམ་འདུས་མདོའི་ཀྵའི་སྟོད་དབུ་མའི་ནང་དུ་ཨ་ཤད་རེག་བྱ་ཚ་བ་ཁ་དོག་དམར་བ། བསྐྱོད་པ་མྱུར་བ། དེ་ལས་མཆེད་པའི་མེ་རྩེ་མོ་རྣོ་བ་གསལ་བཏབ་སྟེ། སྟེང་རླུང་བརྔུབས་པས་རོ་རྐྱང་ལྟར་གྱིས་སོང་ཨ་ཤད་ལ་འཕོག་པས་ཐབ་ཀྱི་མེ་བུས་པ་བཞིན་དེ་འབར། ལྟེ་མགྲིན་སྤྱི་བོའི་འཁོར་ལོ་ཐམས་ཅད་ཁྱབ་ལུས་ཐམས་ཅད་གང་། གནས་པར་བྱ། ཞེས་པ། མེ་འབར་བྱེད་སྨད་ཀྱི་འཁྲུལ་འཁོར་ཏེ། པུས་མོ་བརྩེགས་པའི་སྟེང་དུ་ལག་པ་ཁུ་ཚུར་བརྩེགས་པ་བཞག ཕོངས་འཛུམ་ཞིང་འདེགས་པ་དང་བསྟུན། རླུང་བུམ་པ་ཅན་སྟེང་དུ་འཐེན། བརྔུབས་ནས་གནོན་དུས་འཕོངས་འབྱེད་པ་དང་བསྟུན་རྡེབ་བོ། །རི་བོང་འཛགས་པས་བདེ་བ་སྟེར། །སྟོང་པ་སོགས་དང་བདེ་བ་བཞི། །རེ་རེ་ངོ་ཡིས་ཟིན་པར་བྱ། །ཞེས་པས་སྤྱི་བོར་ཧཾ་དཀར་པོ་བདུད་རྩི་འཛག་ལ་ཁད་པ་དེ་ལ་མེ་ལྕེས་རེག་པས་དེ་ཉིད་ཞུ། མགྲིན་པར་སླེབ་པས་ཡུལ་གྱི་ངོས་ནས་སྟོང་པ། ཡུལ་ཅན་གྱི་ངོས་ནས་དགའ་བ། སྙིང་གར་སླེབ་པས་ཤིན་ཏུ་སྟོང་པ་དང་མཆོག་དགའ། ལྟེ་བར་སླེབ་པས་སྟོང་པ་ཆེན་པོ་དང་ཁྱད་དགའ། གསང་གནས་སུ་སླེབ་པས་ཐམས་ཅད་སྟོང་པ་དང་ལྷན་ཅིག་སྐྱེས་དགའི་ཡེ་ཤེས་ལ་མཉམ་པར་གཞག ཧཾ་ཞུ་བ་སྟོད་ཀྱི་འཁྲུལ་འཁོར་བྱ་སྟེ། ལག་པ་རྡོ་རྗེ་བསྡམས་པ་ལས་གུང་མོ་རྩེ་སྤྲད་པ་གསང་གནས་སུ་བཙུགས། རླུང་བུམ་པ་ཅན་མགོ་བོར་འཐེན། དེར་རང་བཀག་འདར་སི་ལི་ལི་སྤྲུག་པས་སོ། །འབར་འཛག་འཐབ་པ་ནི། འཛག་མེད་གནས་ལྔར་བཙོན་དུ་བཟུང་། །ཞེས་པས་སྟེང་འོག་བསྲེ་བའི་འཁྲུལ་འཁོར་ལག་གཉིས་ཁུ་ཚུར་ནུ་སྟེངས་སུ་བསྣུན་ལ་སྡེར་འཛིངས་བསྲངས་ལ་སྟོད་གཡས་གཡོན་དབུས་འཐེན་མཐར་ལག་གཉིས་སྤྲུག རླུང་རྟིང་མ་ལག་པ་ལྟེ་བར་གཏད་སྨད་ནས་གཡས་གཡོན་དབུས་སུ་འཕུར། རྐང་པ་གཡས་ལན་གསུམ་འཕུར་ཏེ་སྤྲུག གཡོན་ལའང་དེ་བཞིན། གན་རྐྱལ་རྐང་ལག་བརྒྱངས་ཏེ་མགོ་ཞབས་མེད་པ་སྤྲུག འདི་གསུམ་བོགས་འབྱིན་ནོ། །བདེ་བའི་གཡོས་ཀྱིས་ཁམས་འཛག་པར་ཉེ་ན་རྡོ་རྗེའི་ཀུན་རྫོགས་ལ་གནད་དུ་བསྣུན་ནོ་དེ་བཞི་ཡང་། འབེབས་སྟན་སོར་བཞི་ཁུང་ངམ་སྟེགས་དང་བཅས་པ་ལ་ཁྲུ་གང་ཡོད་པར་བྱས། ལུས་ཧར་ལངས་མར་ཤད་འབེབས་བཞི་ཀར་འདྲ། ལག་པ་དང་པོ་ལ་སོར་མོ་གཞན་བསྣོལ་མཛུབ་མོའི་རྩེ་སྤྲད་པ་ལངས་དུས་ནམ་མཁར་ཐད་འཐེན། འབེབས་དུས་སྤྱི་བོར་ལོག་པ། གཉིས་པ་རྡོ་རྗེ་ཁུ་ཚུར་ནུ་སྟེང་ནས་གྱེན་དུ་བསྒྲེང་བ་དང་། ལོག་དུས་དེ་ཁར་དགྱེན་པ། གསུམ་པ་དེ་དང་འདྲ་བ་ལ་དཔུང་མགོར་ལོག་པ། བཞི་པ་སོར་མོ་གཞན་བསྣོལ་གུང་མོ་རྩེ་སྤྲད་པ་མགོ་མ་གུག་པར་སྤྱི་བོ་མནན་པའོ། །དེ་བཞི་ཀ་ལ་འཛིན་འདྲེན་གཙོ་བོར་བྱེད་དུས་རི་བོང་། ཞེས་པ་བཟློག་ས་ཧཾ་ལ་བཟློག་རྒྱུ་སྐར་མ་སྟེ། ཁམས་གསང་བར་བབ་པ་ཐམས་ཅད་དབུ་མའི་ནང་བརྒྱུད་ཡར་ལོག་པ་ཧཾ་ལ་ཐིམ་པར་བསམ། ཟློག་བྱེད། རུ་སྦལ་བཟློག ཅེས་པ་རླུང་ཕྱིར་འབུད་དྲག་པོ་བྱས་ལྟོ་བ་སྒལ་པ་ལ་སྦྱར་བ་རུ་སྦལ་གྱི། བསྐུམ་ཚུལ་ཇི་ལྟར་བཟློག་ན། དེ་བཞིན་མཁའ་ལ་འཛུམ་མེད་བལྟ། །ཞེས་པ། མིག་འབྲས་གྱེན་ལ་བཟློག་སྟེ་ནམ་མཁའ་ལ་མི་འཛུམ་པར་བལྟ་བས་སོ། །དེ་ལྟར་བཟློག་ནས་འགྲེམས་བྱ། དེའི་དུས་སུ། སྤྲུལ་པའི་གནས་སུ་རླུང་གི་རྩལ། །གཞུ་རྒྱལ་སྒྲ་གཅན་དབུས་སུ་འཆིང་། །ཞེས་པ། ལྟེ་བའི་ཐད་ཀྱི་དབུ་མར་སྟེང་འོག་ལུས་ཐམས་ཅད་ཀྱི་རླུང་བསྡུས་པའི་བུམ་པ་ཅན་བཟུང་བ་དང་། དེ་ལྟར་ཁྲེམས་ནས་སྙིགས་མ་འབེབས་དགོས་པས། བྱ་རོག་གདོང་ནང་ཀླུ་སོགས་འཆིང་། །ཞེས་པས་འོག་གློད། སྟེང་རླུང་བརྔུབས་ཏེ་དུང་ཅན་དུ་འཕུལ། དེས་ཐིག་ལེ་བའི་ཁ་ཆུ་ལྟ་བུ་སོགས་ཕྱིར་འབབ་པར་འགྱུར་རོ། །གལ་ཏེ་སྟོད་ན་བ་ལ་སོགས་པའི་གེགས་བྱུང་ན། ལོངས་སྤྱོད་གནས་ནས་ཡི་གེའི་སྒྲ། །དེ་བཞིན་སྒྲོག་པར་བྱ་བ་བསྟན། ཞེས་པ། ཧ་ཞེས་འདོན་པ་དང་མཉམ་དུ་བྱས་པས་དེས་སེལ་བར་འགྱུར་རོ། །དྷཱུ་ཏཱིའི་སེམས་ནི་ཡེངས་མེད་བྱ། །ཞེས་པ། མཐར་སེམས་ཇི་བཞིན་དུ་མཉམ་པར་གཞག་པར་བྱ་སྟེ། བདེ་བ་ཕྱག་རྒྱ་ཆེན་པོས་སྐྱེལ་བའི་ཕྱིར་རོ། །རྗེས་ཡོན་ཏན། ཟླ་བ་སྐར་མ་ཉི་མ་སོགས། །དྭངས་མ་ས་བོན་རབ་འཕེལ་འགྱུར། །ཞེས་པ། དྲོད་ཀྱིས་གནས་པའི་རྩ་རྣམས་ཀྱི་ཁ་ཕྱེ། །དེར་རླུང་ལ་ཐིག་ལེས་ཞོན་ནས་ཕྱིན་པས་ཉམས་སྣ་ཚོགས་སྐྱེ། རྩ་མ་དུལ་བས་ཟུག་རྔུ་ཡང་འབྱུང་བས་སྡུག་བསྔལ་བསྐྱེད། ཕྱིས་དུལ་ནས་བདེ་བར་འཆར། བདེ་བ་སེམས་ཟིན་པས་མི་རྟོག་པ་འཕེལ། དེའི་དབང་གིས་རླུང་ལས་སུ་རུང་། དེ་ལས་ལ་བཀོལ་བས་སྲོག་རྩོལ་གནད་དུ་ཚུད་དེ་ཁམས་དྭངས་མ་དང་ས་བོན་ཞེས་པ་སྙིང་དཀར་ནག་མཚམས་ཀྱི་རོ་ཙ་ན་འཕེལ་བས་ཉི་ཟླ་དང་མཉམ་པའི་བཀྲག་སོགས་འབྱུང་བ་བསྟན་ནོ། །འདི་ལ་སཾ་བུ་ཊར། སྡུག་བསྔལ་དུས་དང་བདེ་བའི་དུས། །བསམ་གྱིས་མི་ཁྱབ་དུས་ཡིན་ནོ། །ཞེས་བཤད། དེ་ནས་ཉི་ཟླའི་རང་བཞིན་འགགས། །སྲོག་ཐུར་འདྲེས། དབུ་མའི་ནང་དུ་ཚུད་ཅིང་དེར་གནས་པས་སྲོག་རྩོལ་མཐར་སོན། ཁྱད་པར་གྱི་ཡོན་ཏན་བརྒྱད་ལ་སོགས་པ་འབྱུང་ངོ་། །ཉི་ཟླའི་རྒྱུ་ལམ་འགགས་པ་ཡང་དེ་ཉིད་ཀྱི་བྱེད་ལས་དག་པས་ཡིན་ལ། དེར་རླུང་མི་རྒྱུ་བ་ནི་མ་ཡིན་ཏེ། དབུ་མའི་རྗེས་སུ་འབྲང་བའི་རྒྱུ་བ་ཡོད་པས། ངོ་ལོག་པ་སླར་ངོ་བལྟས་པ་ལྟ་བུའོ། །སྒྲ་གཅན་དབུས་སུ་ཟླ་བ་བཟློག ཉི་ཟླ་སྒྲ་གཅན་གྱིས་བཟུང་བ་དེའི་ཚེ་བྱང་ཆུབ་ཀྱི་སེམས་གསང་གནས་ནས་ཁ་གྱེན་དུ་བལྟ། བཟློག་པའི་དུས་ན་བདེ་བཞི་འཛིན། །ཞེས་པ། དེ་ལས་མཆོག་མས་བརྟན་གྱི་དགའ་བ་བཞི་རྙེད་དེའི་དུས་རླུང་སེམས་དབུ་མར་རིམ་པ་བཞིན་ཐིམ་པའོ། །ལྔ་པ་ནི། དེ་ཇི་སྐད་བཤད་པ་མ་གྲུབ་ན། སྲོག་འཆིང་བ་འདི་ལ་ནན་ཏན་དུ་བྱ་སྟེ། དེ་ལ་ཕྱི་ནང་བར་གསུམ་དུ། ཞེས་པ། ཕྱི་ནང་གི་གཏུམ་མོ། བར་ནི་གསང་བའི་གཏུམ་མོ། འཛིན་སྟངས་རེ་རེ་བསྟན་པ་སྟེ། །ཞེས་པས། དེ་གསུམ་རླུང་གི་འཛིན་སྟངས་ཐ་དད་པར་བསྟན་ཏེ། ཕྱིའི་གཏུམ་མོ་རླུང་རྒོད་འདུལ་བ་ཡིན་པས་ན། སྟོད་སྨད་འཛིན་དང་། ཕྱིར་འཛིན་གྱི་ཚེ་སྟོད། ནང་འཛིན་གྱི་ཚེ་སྨད། བྱང་ནས། བར་དང་བཅས་པའི་འཛིན་སྟངས་སྦྱར་ཏེ། དེ་དབུ་མར་སྲོག་ཞུགས་བུམ་པ་ཅན་འགྲུབ་པ་ཡིན་ལ། ནང་གི་གཏུམ་མོ་ནི་ཉི་ཟླའི་ལམ་བསྒྱེལ་དབུ་མར་ཚུད་པ་དེ་བསྟན་པར་བྱ་བའི་ཕྱིར་ཏེ་ས་ཆུ་ལ་ཐིམ་པ་སོགས་ཀྱི་ཚུལ་ལས་སྨད་ནས་རིམ་གྱིས་བུམ་ཅན་འཛིན། གསང་བའི་གཏུམ་མོ་ནི་གཏུམ་མོ་སྦར་བས་ཁམས་བཞུ་སྟེ་སྤྱི་བོ་གང་བར་འཛིན་པ་ནས་གསང་བའི་སྣ་རྩེ་ཀུན་གང་བར་འཛིན་པའི་བར་ལ་སློབ་པའི་ཕྱིར་སྟོད་ནས་མཐར་ཆགས་སུ་བསྒོམ་མོ། །དེས་རླུང་གནད་སྤྱི་བཤད་ནས་སྐབས་དོན་ལ། དྲག་པོའོ། །ཞེས་པ་ལ། ལུས་གསང་སྐྱིལ། ལྟ་སྟངས་ཐད་ཀ དྲག་རླུང་ཕྱིར་བུས། དེའི་མཐར་ཕྱིར་ཐུབ་ཚད་འཛིན། མི་ཐུབ་པ་དང་ནང་དུ་བརྔུབས་ཏེ་ལྟེ་བར་ཐུབ་ཚད་འཛིན་པ་དང་། ཞི་འཛིན། ཞེས་པ། རྡོར་སྐྱིལ། ལག་གཉིས་ས་གནོན་ཁོང་ལྷོད་པར་བྱས། ཐད་ཀར་བལྟ། ཡིད་མ་ཡེངས་པར་གཞག རླུང་རང་འགྲོས་ཀྱིས་ཕྱིར་འགྲོ་ཐང་ཤ་བཅད་དེ་ཕྱིར་འཛིན་རང་གནས་ཙམ། དེ་ནས་ནང་དུ་རང་འགྲོས་ཀྱིས་འཇུག་པ་ཅུང་དྲག་ཏུ་སོང་བའི་མཐར་མནན་པ་དང་། ཕྱིར་འཛིན། ཞེས་པ། རྐང་གཡོན་གྱི་རྟིང་པས་གསང་རྩ་ལྟེམ། གཡས་པས་དེའི་སོར་མོ་བརྟེན་པ་སེམས་སྐྱིལ། རྡོ་རྗེ་ཁུ་ཚུར་བརླ་རྩར་བཞག གྱེན་ལ་བལྟ། རླུང་ཕྱིར་དྲག་ཏུ་བུས་ཐང་ཤ་བཅད། ཕྱིར་བཟུང་དུས། རླུང་ཞབས་དེ་སྟོད་དུ་འཐེན་ནས་ཙམ་ཐུབ་བསྡད་མི་ཐུབ་ལ་ཁད་ན་མར་རྒྱུ་ཞབས་སུ་འཕུལ་ལ་འཛིན། ཐུར་དུ་བལྟ། དེ་ནས་ཅུང་ཟད་མནན་ཏེ་ནང་དུ་བརྔུབས་ལ་མནན་ནོ། །སྟེང་དུ་འཛིན་དུས་ཧཾ་ཇེ་ཆེར་སོང་། མགོ་ཁེངས་པ། འོག་ཏུ་འཛིན་དུས་ཨ་ཤད་ཇེ་ཆེར་སོང་ལྟེ་བ་ཁེངས་པའོ། །འཇམ་རླུང་འཛིན། སེམས་སྐྱིལ་ས་གནོན། ཐད་ཀར་བལྟ། འཇུག་པ་ཨོཾ་དཀར། གནས་པ་ཨཱཿདམར། དབྱུང་བ་ཧཱུྃ་སྔོ་བ་ལ་སེམས་ཕྱི་ནང་དུ་ཇི་ཙམ་གནས་པའི་རིང་བུམ་པ་ཅན་སྒྲ་མེད། འཇམ་པོར་འཛིན་པ་སྔར་གྱི་ཞི་འཛིན་ལས་དབྱུང་བརྔུབ་རྩོལ་བས་བྱེད་པ་ཙམ་གྱི་ཁྱད་དོ། །སྟེང་འོག་སྦྱངས་པ་གོམས་ནས། བར་དང་བཅས་པའི་འཛིན་སྟངས་སོ། །ཞེས་པ་འདི་ལ། ངོ་བོ། རང་འགག རྣམ་གྲངས། བོགས་འདོན་བཞི་ལས། བར་རླུང་ཞེས་པ། རྐང་པ་མཐིལ་སྐྲད། པད་སྐྱིལ། ལག་པ་པུས་བཀབ། རླུང་རོ་དགུ་ཕྲུགས་བསལ། སྟེང་འོག་རང་བབས་སུ་བཞག ཕོ་བ་མདུན་དུ་འཕུལ། དེ་ལ་སྨད་མི་བདེ་ན་དེ་ཁའི་ངང་ནས་སྟོད་དུ་འཕུལ་ཞིང་། སྟོད་མི་བདེ་ན་སྨད་དུ་འཕུལ་ལོ། །གཉིས་པ། བར་གནད། ཅེས་པ་དེ་ཀའི་ངང་ནས་ལྟེ་བའི་རྒྱབ་ཉག་པོར་བཏང་བས་སྲོག་རང་འགག དེ་གཉིས་ཀའི་མཐར་བར་རླུང་མ་ཤོར་བར་ཁུན་སྟེང་གི་རྒྱབ་ནས་བཞར་ཏེ་སྣ་ནས་སྟེང་རླུང་དབྱུང་རྔུབ་བྱེད་དོ། །དེའི་བོགས་འདོན་པད་སྐྱིལ་ལ། ལག་པ་སོར་མོ་བསྣོལ་བ་བྲང་ལ་བཀབ་གྲུ་མོ་བརྒྱངས། མདུན་དུ་རྡོ་ནག་ལ་ཨ་དཀར་པོ་ཆགས་པ་ཅིག་བསྒོམ། སྤྱི་བོར་ཕོར་པ་ཆུས་བཀང་སྟེ་བཞག ལྕེ་རྩེ་གང་ལ་ཡང་མ་རེག་པས་ཡི་གེ་བདུན་པ་ཡིད་ཀྱིས་བཟླས་སོ། །གསུམ་པ་རྣམ་གྲངས་ལ། རླུང་གི་གནད། ཅེས་པ། གནད་གསུམ་འོག་ཏུ་འཕུལ་བ་གནད་གསུམ་བར་དུ་འཕུལ་བ། གནད་གསུམ་སྟེང་དུ་འཕུལ་བ། གནད་གསུམ་དེ་གསུམ་ཀར་འཕུལ་བ། གནད་གསུམ་བདེ་རླུང་དུ་འཕུལ་བ། གནད་གསུམ་དྲོད་རླུང་དུ་འཕུལ་བ་དྲུག དང་པོ། འོག་དང་། ཞེས་པ། ཐུར་སེལ་རྒྱབ་ནས་དྲངས་ཏེ་ལྟེ་འོག་ཏུ་མནན། །སྟེང་རླུང་ཤུགས་རྫོགས་པར་བརྔུབས་ཏེ་བར་རླུང་བརྒྱངས་ནས་གསུམ་བསྲེས་ཏེ་རྒྱ་མཚོ་ཕྱིར་འཕུལ་བ་དང་། གཉིས་པ། ཞི་བ། ཞེས་པས། སྟེང་མནན་འོག་འཐེན་དུས་མཉམ་པར་རླུང་བསྲེས་ནས་ལྟེ་བའི་མདུན་དུ་བརྒྱང་བ་དང་། གསུམ་པ། དྲག་པོ་ཅན། ཞེས་པ་སྟེང་མནན། འོག་འཐེན། བར་རླུང་བརྒྱངས་པ་སྟོད་དུ་འཐེན། འདི་ལ་ལྟེ་བ་བཅར་ཏེ་འགྲོ་དགོས་སོ། །བཞི་པ། འཛིན་སྟངས་དགང་བའི། ཞེས་པ། སྟེང་འོག་བར་གསུམ་བསྲེས་ནས་འོག་སྒོ་གཉིས་ཀྱི་འཛོམས་སུ་འཕུལ་བ། ལྔ་པ་དང་དྲུག་པ་གཉིས། རླུང་གནད། ཅེས་པས་བསྟན་ཏེ། དགྱེན་བྱས་སྟེང་འོག་བར་གསུམ་གསང་རྩར་གཏད་པ། དགུར་བྱས་ཏེ་གསུམ་འོག་སྒོར་འཕུལ་བ། འདི་དག་ལ་ཤའི་ཐེམས་བུ་དགོས་སོ། །དེ། དམ་ཚིག་ཅན་སྒྲོན་འདྲེན་སྟངས་ལ། །ཞེས་པ། དེ་དག་ཉི་ཟླའི་ལམ་བཀག་ནས་བསྒོམ་མོ། །བཞི་པ་བོགས་འདོན་ལ། བར་བརྒྱངས། ཞེས་པ། བར་རླུང་རང་འགག་ལྟེ་བའི་ཕྱོགས་བཞི་ཆ་མཉམ་པ་དུས་གཅིག་ལ་འཕུལ་བ། འོག་འཐེན། ཞེས་པ་སྟོད་དུ་འཐེན་པ། མཉམ་དུ་འཐེན། ཞེས་པ་འོག་བསྐུམ་སྟེ་ནུ་མ་དང་མཉམ་པར་འཐེན་པ། བར་འཛིན་ཞེས་པ་ལྟེ་བ་འཕུལ་ཏེ་གཅུད་པ། གཅུད་པ་ནི་གཡས་གཡོན་དུ་འཆུན་འདོན་པ། འོག་ཏུ་འཐེན་པ་དང་། བདེ་རླུང་དུ་འཕུལ་བ་དང་། ཡང་དྲོད་རླུང་དུ་འཕུལ་བའོ། །དེ་གཉིས་ཀར་འཕུལ་བས་བདུན། འདི་རང་འགག་གི་དང་། དེ་བཞིན་ཁ་སྦྱོར་དང་། ཕྱིར་འབུད་ལན་བདུན་བར་གྱི་གནད། ཅེས་པ། ཕྱིར་བཟུང་བའི་རླུང་ཞབས་ཀྱི་བར་རླུང་འཕུལ་བ་ལ་བདུན་ཏེ་ཉེར་གཅིག་གོ །ད་ནི་བར་རླུང་དང་ཐུར་སེལ་བསྡོངས་པའི་དབང་དུ་མཛད་ནས། བར་འཐེན། ཞེས་པ་འདི་ཐམས་ཅད་རང་འགག་སྟེ། རང་འགག་དེའི་ཁར་འོག་རླུང་དྲག་པོར་འཐེན་ནས་ཕོ་སྟོད་དུ་འཛིན་པ། ཞི་འཐེན། ཞེས་པ་དེ་ཀ་དལ་བུའི་སྒོ་ནས། མདུན་ནས་འཐེན། ཞེས་པ་འོག་སྒོ་ལྷོད་བཞག མདུན་གསང་རླུང་འཐེན་པ། གསང་བ་གློད་དང་ཨ་ལོང་འཐེན། ཞེས་པ། གསང་གནས་ལྷོད་བཞག་འོག་སྒོ་འཛུམ་པས་དྲོད་རླུང་འཐེན་པ། སྒོ་གཉིས་བཞག་ལ་བར་དང་ནི། །ཞེས་པ། འོག་གི་སྒོ་གཉིས་རང་སར་བཞག །ལྟེ་བའི་ཕྱོགས་བཞི་ནང་དུ་བསྐུམ་པ། དེར་གནས་དག་ཏུ་དབུས་འཐེན་དང་། ཞེས་པ་སྒོ་གཉིས་དང་ཕོ་བ་ལ་ཐོ་མ་བྱུང་བར་ལྟེ་བའི་མདུན་ནང་དུ་ཉག་པོར་འཐེན་པ། རྒྱ་མཚོ་འཁྱོམ་བརྡབ་བསྐྱུར་བ་དང་། །ཞེས་དང་། ལྟོ་བ་གཡས་གཡོན་བསྐོར། སྟེང་དུ་འཐེན་ནས་འོག་ཏུ་བསྐྱུར་བ། ཤུགས་འབྱུང་བྱེད་དང་ཞེས་པ། རྒྱ་མཚོ་མ་གཡོས་པར་ནང་དུ་བསྐོར་ཞིང་འཁྱོམ་པ། གནས་པར་བྱ། དེ་ཉིད་ཀྱི་རྗེས་སུ་ལུས་འགུལ་བསྐྱོད་མེད་པར་རླུང་སེམས་ལྟེ་བར་འཛིན། ཆུང་ཆུང་ཆེན་པོར་འཐེན་པར་བྱ། །ཞེས་པ། མ་བྱང་རིང་སྦྱོར་བ་དལ་བ། བྱང་ཆུབ་ནས་དྲག་ཏུ་བྱ་བ། དམ་ཚིག་སྒྲོན་མ་ཟབ་པའི་གནད། །ཕྱི་མ་རྣམས་ལ་ཡང་རྡོ་རྗེའི་རྦ་རླབས་སྦྱར་རོ། །ཕྱིའི་གཏུམ་མོ་འདི་རྩ་བའི་རྒྱུད་ལས། དཔའ་བོ་ཀུན་དང་རྣལ་འབྱོར་མ། །པདྨའི་ལྟེ་བར་ངེས་པ་བྱ། །སྨིན་མའི་དབུས་སུ་གཞུག་པར་བྱ། །ཨ་བ་དྷཱུ་ཏཱིའི་གནས་དེ་བཞིན། །དཔའ་བོ་འཆོལ་པར་ཆགས་བྱས་པས། །བཟའ་བ་ཡང་ནི་དེ་ནས་སྲེག །སོགས་ཚིག་རྐང་ལྔས་བསྟན་ནོ། །གཉིས་པ་ནང་གི་གཏུམ་མོ་ལ། གནད་དུ་བསྣུན་པ་ལུས། སྣུན་བྱེད་རླུང་། །བསྣུན་པ་དམིགས་པ་གསུམ་ལས། དང་པོ་ནི། ཨེ་མ་ངོ་མཚར་བ། གང་ལ་ངོ་མཚར་ན། ཀྱེ་ཧོ། ཞེས་བོས་ནས། བདེ་ཆེན་པོ། ཞེས་པ། རྟེན་ལུས་ལ་རླུང་དང་དམིགས་པས་གནད་དུ་བསྣུན་པས་བརྟེན་པ་བདེ་བ་ཆེན་པོའི་ཡེ་ཤེས་རང་དབང་མེད་པ་འཆར་བ་ལའོ། །དེ་ཡང་། རང་ལུས་གསང་བའི་ལུས་གནད་བྱ། །ཞེས་པ། ལུས་གནད་གསང་སྐྱིལ། དེ་ནི་འཇའ་ཚོན་འོད་མདངས་གསལ། །ཞེས་པ་ལྷའི་སྟོང་ར། དབུས་ན་རྩ་གསུམ་འཁོར་ལོ་ལྔ། །དྭངས་མའི་ཚུལ་ཅན་འཇའ་ཚོན་བཞིན། །ཞེས་པ། རྩ་གསུམ་གྱི་མདོག །དབྱིབས་འཁོར་ལོའི་རྩ་འདབ་གཟུགས་རྣམས་ཕྱི་ཇི་བཞིན་ནོ། །ཁྱད་པར། གནས་ལྔ་དག་ཏུ་འོད་འཁོར་བསྒོམ། །ཞེས་པ། གསང་གནས་ལྗང་། ལྟེ་བ་སེར་སྙིང་ག་སྔོ། མགྲིན་པ་དམར། སྤྱི་བོ་དཀར་པོ་ཤས་ཆེ་བའི་འཇའ་ཚོན་གྱི་རྣམ་པར་བསྒོམ་མོ། །གཉིས་པ་ནི། གོང་དུ། སྟོད་སྨད་འཛིན་ཞེས་པའི་སྨད་འཛིན་འདིར་སྟོན་པ་སྟེ། རྐང་པ་བསྣོལ་བའི་ཙོག་བུ་ལྷམ་སྒྲོག་འཆིངས་ནས་ལག་གཉིས་སོར་མོ་བསྣོལ་བས་འཁྱུད། མིག་ཐུར་དུ་བལྟ། གནད་གསུམ་འོག་ཏུ་འཕུལ་བའི་བུམ་ཅན། ལུས་སེམས་སྐྱིལ། ལག་པ་པུས་བཀབ། གནད་གསུམ་བར་དུ་འཕུལ་བའི་བུམ་ཅན། དེ་ནས་རྐང་པ་འདྲ་ལག་པ་བསྣོལ་ཏེ་དཔུང་མགོར་བཀབ། གྱེན་དུ་བལྟ། རླུང་གནད་གསུམ་སྟེང་དུ་འཕུལ་བ། །ལྟེ་བར་ཁ་སྦྱར། དེ་ནས་དེའི་ཁ་སྙིང་ཀར་འུབ་ཀྱིས་འཐེན་ནས་དེར་བསྒོམ། དེ་བཞིན་མགྲིན་པ་དང་སྤྱི་བོར་ཡང་ངོ་། །གསུམ་པ་ནི། དེའི་དབུས་སུ་དྭངས་མ་ནི། །པད་འདབ་བཅུ་དྲུག་བསམ་བྱ་ཞིང་། །དེ་དག་འཇའ་ཡི་རྣམ་པར་གསལ། །ཞེས་པས། གནས་དེ་དག་ཏུ་ལུས་གནད་རླུང་གནད་དང་པོ་དང་བསྟུན་དམིགས་པ་འཁོར་ལོའི་མདོག་དང་མཐུན་པའི་པདྨ་འདབ་བརྒྱད་ཉིས་རིམ། དབུས་སུ་ཉི་མ་ལ་འཇིགས་བྱེད་དུས་མཚན། གཞན་ལྷ་གནས་བཅུ་གཉིས་སུ་ཉི་མ་དང་རོའི་གདན་གསལ་གདབ། གནས་ལྔའི་དབུས་སུ་ས་བོན་ནི། །རབ་ཏུ་གསལ་བར་གནས་པར་བྱ། །ཞེས་པ་གཉིས་པ་དང་བསྟུན་སོ་སོའི་ལྟེ་བར་ཧཱུྃ་དང་། དེའི་མདུན་དུ་བཾ་སོ་སོའི་མདོག་དང་མཐུན་པ། ས་བོན་དེ་ནི་ལྷར་གསལ་ལ། །ལྷ་གནས་དཀར་དང་ལོངས་སྤྱོད་དམར། །ཆོས་འཁོར་སྔོ་ལ་སྤྲུལ་གནས་སེར། །བདེ་སྐྱོང་འཁོར་ལོ་ཁ་དོག་ལྗང་། །རེ་རེའང་དྲུག་ཟུང་འཁོར་གྱིས་བསྐོར། །ཐམས་ཅད་འཇའ་ཡི་ལུས་སུ་བསྟན། །ཞེས་པ། གསུམ་པ་དང་བསྟུན་ས་བོན། དེ་དག་མས་རིམ་གྱིས་བཅོམ་ལྡན་འདས་དཔལ་འཁོར་ལོ་སྡོམ་པ་ཞལ་བཞི་ཕྱག་བཅུ་གཉིས་པ། འདབ་མ་ནང་མའི་ཕྱོགས་ལ་ཕྱོགས་མ་བཞི། མཚམས་སུ་བུམ་པ་ཤ་ལྔས་གང་བ་ལ་ཐོད་པ་བདུད་རྩི་ལྔས་གང་བ་འཁོད་པ། ཕྱི་སྐོར་ལ་སྒོ་མཚམས་མ་བརྒྱད་རྣམས་རྫུས་སྐྱེས་སུ་བསླང་ངོ་། །སེམས་དཔའ་གསུམ་གསལ། ཞེས་པ། གཙོ་བོའི་ཐུགས་ཀར་ཉི་མ་ལ་ཧཱུྃ། ཧཱུྃ་ཡིག་ལས་འོད་འཕྲོས། སྣོད་བཅུད། གདན། དེ་ལྷ། དེ་འཁོར། དེ་ཡུམ། དེ་ཡབ་ལ་ཐིམ་པ་སྐུའི་ངོ་བོར་གནས་པ་སྐུ་རྡོ་རྗེ་འཆང་། སྐུ་ཡང་འོད་དུ་ཞུ་ཉི་ཟླ་ལ། དེ་ཧཱུྃ་ལ་ཐིམ་པ་གསུང་རྡོ་རྗེ་འཆང་། དེའི་ཞབས་ཀྱུ་ཧ། ཧ་མགོ །དེ་ཟླ་ཚེས། དེ་ཐིག་ལེ། དེ་ནཱ་ད། དེ་ཇེ་ཕྲར་བསམ་གྱིས་མི་ཁྱབ་པའི་དབྱིངས་སུ་ཞུགས་པ་ཐུགས་རྡོ་རྗེ་འཆང་ངོ་། །ཡུན་རིང་དུ་མཉམ་པར་གཞག་ནས་སྔགས་འཕྲེང་གི །ཡབ། ཡིད་བཟླས་བྱ། ཞེས་པ་བསམ་གྱིས་མི་ཁྱབ་པ་དེའི་རང་མདངས་ལས་སྔོན་བཞིན་བཞེངས་ཐུགས་ཀར་ཟླ་བ་ལ་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་པ་སྙིང་པོ་ཉེ་སྙིང་གི་སྔགས་འཕྲེང་གིས་བསྐོར་བ་ལས་འོད་ཟེར་དཀར་པོ་བདེ་བའི་རང་བཞིན་ཅན་འཕྲོས་པས་འོག་ཏུ་ཞུགས། རྡོ་རྗེའི་ལམ་ནས་ཡུམ་གྱི་པདྨ་ནས་ཨ་བ་དྷཱུ་ཏཱི་བརྒྱུད་ཞལ་ནས་ཡབ་ཀྱི་ཞལ་དང་ཨ་བ་དྷཱུ་ཏཱིར་འཁོར་བར་བསམ་མོ། །ཡུམ་གཉིས་ཀྱིས་ཡིད་བཟླས་བྱ། ཞེས་པས། དེ་ནས་ཡུམ་གྱི་ཐུགས་ཀར་ཡང་ཉི་མ་ལ་གྲི་གུག་བཾ་གྱིས་མཚན་པའི་ས་བོན་གྱི་མཐའ་ལ་དེའི་སྙིང་པོ་ཉེ་སྙིང་། སྔགས་འཕྲེང་འོད་ཟེར་དམར་པོ་འཕྲོ་བ་དེའི་བྷ་ག་ནས་ཡབ་ཀྱི་ལིངྒར་ཞུགས་ཏེ་ཨ་བ་དྷཱུ་ཏཱི་ནས་ཞལ་ནས་ཞལ་དུ་འཁོར་བར་བསམ་སྟེ་བཟླས་སོ། །ལུས་སྣང་སེམས་གསུམ་ལྷར་གསལ་འགྱུར། །ཞེས་པ་སྔགས་འཕྲེང་ལས་འོད་ཟེར་དཔལ་འཁོར་ལོ་སྡོམ་པའི་ལྷ་ཚོགས་སུ་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། དཔལ་འཁོར་ལོ་སྡོམ་པའི་གོ་འཕང་ལ་བཀོད་པས། ཕྱི་སྣང་བ། ནང་སེམས་ཀྱི་འཆར་སྒོ། བར་ལུས་ཀྱི་ཁམས་ཐམས་ཅད་ལྷའི་རོལ་མོར་བལྟའོ། །དེ་ལྟར་བསྒོམས་པས་དྭངས་མ་འཕེལ་བས་དེ་ལམ་དུ་བྱེད་པའི་ཕྱིར། སྲོག་རྩོལ་གྱི་འཁྲུལ་འཁོར་བྱའོ། །དེས་སྲོག་རྩོལ་གནད་དུ་ཚུད་དེ་རླུང་ཟས་སུ་ཟ་བ་སོགས་ལས་ཚོགས་ཐམས་ཅད་འགྲུབ་པ་རྒྱས་པར་བཤད་པ་བཞིན་ཡིན་པས་འདི་དག་གཞུང་གི་ཞར་ལས་སོ། །དེ་ནི་རྩ་བའི་རྒྱུད་ལས། གསང་བ་མཆོག་གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་མདོར་བསྟན་དང་རྒྱས་བཤད་སྔར་གྱི་འཕྲོས་དེར། ཀུན་ནས་སྒོ་ཡི་འཁོར་ལོ་ཉིད། །དཔའ་བོའི་དབང་པོ་ཞལ་བཞི་པ། །འདབ་མ་ཕོ་ཉ་མོ་བཞིན་ཡིན། །དཔའ་བོ་ཀུན་དང་གཉིས་མེད་བདེ། །ཞེས་པས་བསྟན་ཏེ། དེའི་དོན་བཤད་རྒྱུད་མངོན་བརྗོད་དུ། རྟག་པ་མིན་པ་རྡོ་རྗེ་ཅན། །གཟུགས་མེད་པར་ནི་བྷ་གའི་ནང་། །ལྟེ་བའི་ནང་ན་པདྨ་ཆེ། །བཅུ་དྲུག་ཐིག་ནི་གདབ་པར་བྱ། །ཡི་གེ་དང་ཡང་མཉམ་སྦྱར་བས། །ཁ་སྦྱར་བྱ་བ་བྱས་པ་ཡིན། །དེ་དབུས་རྟག་ཏུ་གསང་བ་ནི། །འབྱིན་དང་སྡུད་པ་བྱེད་པ་པོ། །དེ་ཉིད་རང་ཉིད་རྡོ་རྗེ་ཅན། །གཅིག་པུར་རང་འབྱུང་ཆེ་བའི་ལྷ། །དེ་ནི་སངས་རྒྱས་ཀུན་དངོས་ཞེས། །མཚན་ནི་རབ་ཏུ་བཤད་པ་ཡིན། །གསང་བ་མཆོག་གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཐམས་ཅད་མཁྱེན་པས་འདི་བཤད་པ། །ཞེས་པས་སོ། །གསུམ་པ་གསང་བའི་གཏུམ་མོ་ལ། བཅའ་བ་ལུས་ཀྱི་གནད། དམིགས་པ་ཡུལ་གྱི་གནད། སྲོག་རྩོལ་རླུང་གི་གནད་གསུམ་ལས། དང་པོ་ནི། རྐང་པ་གསང་སྐྱིལ་མགྲིན་པ་ཡན་གྱི་དམིགས་པའི་དུས་མགྲིན་པའི་རྦ་རླབས་ལྟེམ། སྙིང་ཀ་དང་ལྟེ་བའི་དུས་ལག་པ་བསྣོལ་བའི་ཁུ་ཚུར་གྱིས་མཆན་རྩ་བསྡམ། གསང་གནས་ཀྱི་ཚེ་ཁུ་ཚུར་གྱིས་མཁལ་རྩ་མནན། གཉིས་པ་ནི། སླར་ཡང་ལྷ་སྔགས་གསལ་བ་ཡི། །ཞེས་པས་ནང་གི་གཏུམ་མོར་བཤད་པ་བཞིན་སྟོང་ར་རྩ་འཁོར་ལྔའི་ལྷ་ཚོགས་སྔགས་འཕྲེང་དང་བཅས་པ་སྐད་ཅིག་གིས་འཇའ་ཚོན་ལྟ་བུར་གསལ་བཏབ། གསུམ་པ་ནི། སྔར་སྟོད་སྨད་འཛིན་ཞེས་པའི་སྟོད་ནས་མཐར་ཆགས་འཛིན་པ་འདི་ལྟ་སྟེ། རླུང་སྔགས་གཅིག་པའི་རྣལ་འབྱོར་གྱིས། །ཕྱི་ནང་ཡི་གེའི་གཟུགས། ཞེས་པས་རླུང་བུམ་པ་ཅན་སྤྱི་བོར་བཟུང་བའི་ཚེ་བདེ་སྟོང་གི་ལྷ་དང་མི་ཕྱེད་པའི་སྔགས་དབྱིབས་ཀྱི་ཡི་གེ་མེར་འབར་བའི་དབུས་ན་གནས་པས་ལུས་གང་། ཕྱིར་གཏོང་བའི་ཚེ་དེས་འཇིག་རྟེན་གང་བ་སྤྲོ་བསྡུ་ཡས་རིམ་གྱིས་འཁོར་ལོ་ལྔར་བྱའོ། །སྒྲར་བསྒོམ། ཞེས་པ། དེའི་མཐར་ཕྱི་ནང་གང་བའི་དབྱིབས་དེ་རྣམས་ཇེ་དྭངས་ཇེ་དྭངས་སུ་གྱུར་ནས་སྒྲ་ཚུལ་གྱི་ལྷ་ཡབ་ཡུམ་དུ་སོང་བས་ཆོས་ཐམས་ཅད་སྒྲ་བརྙན་ཙམ་དུ་བསམ། དེ་ནས་ཡབ་ཡུམ་ལྷ་སྔགས་རྣམས། །སྟེང་འོག་གནས་སུ་བསྡུས་བྱས་ལ། །ཞེས་པས། སྒྲ་རྡུལ་མེ་རིའི་རི་མོ་རྣམ་པར་ཤེས་པའི་རང་བཞིན། ཚུར་ཐིག་ལེ་ཁུ་བའི་ངོ་བོ་ཧཾ་ཡིག་གི་གཟུགས་ཅན་ཡེ་ཤེས་ཀྱི་རང་བཞིན་ཏེ། ཡེ་ཤེས་ཡང་དག་པར་གྲུབ་པའི་འགྲེལ་པ་དེ་ཁོ་ན་ཉིད་བཤད་པ་ལས་འདི་ལ་ཨཾ་ནི་རྣམ་པའི་གཟུགས་ཀྱི་ལྷ་མོ་དང་། ཨུའི་རྣམ་པའི་དོན་ཡོད་གྲུབ་པའི་གཟུགས་ནི་རླུང་ངོ་། །དེ་གཉིས་ལྷན་ཅིག་འདྲེས་པ་ལས་རྫོགས་པ་ནི་བཾ་གྱི་ཡི་གེའི་གཟུགས་སུ་སྤྲུལ་ནས་ལྟེ་བའི་འཁོར་ལོ་ལའོ། །འདི་ནི་ནན་ཏན་དུ་བྱས་ནས་གཡོ་བ་མེད་པའི་སེམས་ཀྱིས་རླུང་གཉིས་འགོག་པར་བྱས་པས་ཐོབ་པར་བྱེད་པའོ། །ཞེས་པས། སྒྲ་རྡུལ་ལྟེ་བར་བཾ་ཡིག་ཏུ་འགྱུར་རོ། །ཉི་མས་ཟླ་བ་འཛག་པར་བྱེད། །ཅེས་པས། སྟེང་སྲོག་འོག་ཐུར་སེལ་གྱི་རླུང་སྒྲ་གཅན་དང་དུས་མེའི་རང་བཞིན་དེ་རྣམས་ལྟེ་བར་འདུས་པས་གཏུམ་མོའི་མེ་འབར་ཏེ། ཐིག་ལེ་ཞུ་བ། དེ་ནི་འཇའ་དང་འོད་ཁྱིམ་གསལ། །ཞེས་པའི། འཇའ་ནི། རྣལ་འབྱོར་གྱི་ལུས། འོད་ནི་བཅུད། ཁྱིམ་ནི་སྣོད་དེ། གསལ་བ། གཟུང་འཛིན་གྱི་རྣམ་རྟོག་སྤངས་པ་སངས་རྒྱས་ཀྱི་བདེ་བ་ལ་ལོངས་སྤྱོད་པ་སྟེ། སེམས་སྟོང་པ་དང་རོ་མཉམ་པ་ལ་ཡང་དག་པར་གནས་པའོ། །འདི་ཡང་རྩ་རྒྱུད་ཀྱི་ལུང་སྔར་གྱི་འཕྲོས་སུ། འཁོར་ལོའི་དབུས་སུ་བལྟ་བར་བྱ། །འཁོར་ལོ་འདི་དག་གསལ་བར་ནི། །རིམ་པ་ཇི་ལྟ་བ་བཞིན་བྱ། །ཞེས་པས་དང་། མངོན་བརྗོད་ཀྱི་ལུང་འཕྲོ་དེ་ཉིད་དུ། ཡང་ན་མི་ཤིགས་ཀུན་མཁྱེན་པ། །སྐྲ་ཡི་ཉག་མ་བརྒྱ་ཡི་ཆ། །མཆོག་གི་གཟུགས་ཅན་བསམ་པ་སྟེ། །སྟོང་པ་མ་ཡིན་དམིགས་སུ་མེད། །ཡི་གེ་མེད་ཅིང་སྟོང་པ་མིན། །གོས་པ་མེད་ཅིང་ས་བོན་མེད། །གཟུགས་མེད་མཚན་མ་མེད་པ་རྣམས། །རྣམ་ཤེས་རང་གི་ངོ་བོ་ནི། །རྣམ་ཤེས་ཡེ་ཤེས་དག་ཏུ་གཟུང་། །ཞེས་པས་སོ། །གསུམ་པ་རྗེས་ཡོན་ཏན་འབྱུང་ཚུལ་ལ། དངོས་དང་། ཀུན་ཏུ་མཁོ་བའི་ཆོས་གཉིས། དང་པོ་ནི། གནས་ལྔ་དག་གི་མདངས་གཡོས་ནས། །བདེ་སྐྱོང་གནས་སུ་འཛིན་པར་བྱེད། །ཅེས་པ་ནང་གི་གཏུམ་མོས་སྲོག་ཐིག་ལེར་བཅུག་པས་སྲོག་རྩོལ་གྱི་ཡོན་ཏན་ལུས་ལ་འཁོར་ལོ་ལྔའི་རང་མདངས་འོད་ཟེར་ཁ་དོག་ལྔ་གཡོས་པ་སྟེ་འཕྲོ་བར་འགྱུར་རོ། །དེ་ཙ་ན་དབུ་མའི་ཡས་སྣ་བྱེ་བས་འཕོ་བས་རྣལ་འབྱོར་པ་ཚེ་ཐུང་ངུར་འགྱུར་བ་སྲིད་པ་དང་། སྲོག་འཆིངས་ཀྱང་ཐིག་ལེ་འཛག་མེད་དུ་མ་གྱུར་པས་ཐར་པ་མི་འགྲུབ་པས་འཆི་བ་བླུ་བ་དང་འཛག་མེད་བསྒྲུབ་པའི་ཕྱིར་སྟོད་ནས་བུམ་པ་ཅན་རིམ་པས་མར་ཕབ་སྟེ་གསང་གནས་སུ་བཟུང་བས་བྱང་ཆུབ་ཀྱི་སེམས་བབས་པ་གནས་དེ་དག་ཏུ་འཛིན་པའི་མཐུ་འབྱུང་ལ། དེའི་རྒྱུས་རྡོ་རྗེ་ནོར་བུའི་སྣ་རྩེ་ནས། །སྐད་ཅིག་ལ་བཟློག་པར་ནུས་པ་ཡིན་ནོ། །རྟག་ཏུ་གནས་ལྔའི་འཛིན་སྟངས་བཤད། །ཅེས་པ། འཁོར་ལོ་ལྔའི་མདུད་ཀྱི་སྲོག་ཤིང་གི་ནང་དུ་འཛིན་ནོ། །གང་འཛིན་ན། ཟླ་དཀར་ཉི་མ་ཆུ་འཛག་སོགས། ཞེས་པ། ཁམས་ཕལ་པ་དང་ཁུ་རྡུལ། གང་གིས་འཛིན་ན། རླུང་ལྔ་བཟློག་དང་། ཞེས་པ་རྩ་བའི་རླུང་ལྔ་ལོག་པ་ལས་བཟློག་པ་ངེས། གཟའ་རྣམས་ནི། མཁའ་ལ་བརྟན་པར་རབ་འཆིང་ངོས། ཞེས་པ། འདི་ལ་འཕྲལ་དུ་སྐུའི་སྒོ་དགུ། གསུང་གི་སྒོ་བཞི་འགག །གནད་བྱེ་བའི་སྒོ་གཉིས་བྱེ་བས་དྷཱུ་ཏཱི་ཁར་བརྟན་པར་འཆིངས་ཏེ། བུམ་པ་ཅན་ཟླ་བ་དྲུག་བཀག་པས་སྲོག་གི་གཟུགས་གྲུབ་པ་དང་། ལོར་འགག་པས་མཐར་ཕྱིན་ཏེ། གསང་བ་འདུས་པར་རྡོར་བཟླས་ཀྱིས་ས་བརྒྱད་པ་ཐོབ་པར་བཤད་པ་དང་གནད་གཅིག་གོ །གཉིས་པ་ལ། ལུས་འཆི་མེད། ལས་རླུང་དབུ་འཇུག །སྲོག་ཐུར་བསྲེ་བ། འཁྲུལ་འཁོར། ཞར་ཚེ་བསྒྲུབ་དང་གེགས་སེལ་བསྟན་པ་ལྔ་ལས། དང་པོ་ནི། ལུས་འཆི་བ་མེད་པ་དང་རྒས་པ་མེད་པར་བྱེད་པའི་གནད། རྡོ་རྗེ་བརྡབ་པ། ཞེས་པ་གཞན་ཀུན་རྫོགས་བཞིན་ལ་རྐང་པ་བསྣོལ་བ། རྡོ་རྗེ་བསྡམས་པ། རྡོ་རྗེ་བཅངས། ཞེས་པ་རྡོ་རྗེ་བསྡམས་ལ་མཛུབ་མོ་གཉིས་བརྐྱང་བ་རྡོ་རྗེ་རྩེ་མོ་གཅིག་པའི་ཕྱག་རྒྱས། ལངས་དུས་སྙིང་ཀ་ནས་སྤྱི་བོའི་ཐད་དུ་འཐེན། འབེབས་དུས་འཁོར་ལོ་སོ་སོའི་གནས་སུ་རྩ་འདབ་ཀྱི་གྲངས་དང་མཉམ་པར་བསྣུན་ནོ། །དེས་རྩ་གུད་པ་གསོས་ཕྱི་ས་མི་ཉམས་པར་བྱེད་དོ། །བཟློག་པ་རླུང་ནི་ཕྱི་ནང་འཛིན། །ཞེས་པ། ལུས་མི་འགྱུར་བའི་གེགས་སེལ་གྱི་འཁྲུལ་འཁོར་བཞི་བསྟན། ཟླ་བ་འཇའ་ཚོན་རྣམ་པར་གསལ། །ཞེས་པས་འབྲས་བུ་ལུས་དྭངས་མར་གྱུར་པ། སྐུ་དང་རིག་པ་བསྲེས་ལ་བཞག །ཅེས་པ་དེ་ཙ་ན་དབྱིངས་རིག་བསྲེས་པས་ནམ་མཁའི་རྣལ་འབྱོར་དུ་འགྱུར་བའོ། །གཉིས་པ་ལ། འཇམ་རླུང་གིས་གཞུག་པ། དྲག་རླུང་གིས་གཞུག་པ། དབུ་མའི་སྒོ་དབྱེ་བ་དང་གསུམ། དང་པོ་ནི། རླུང་ལྔ། ཞེས་པས་ལས་རླུང་། རྩ་བ། ཞེས་པས་མི་ཤིགས་པའི་རླུང་དུ་སྡུད་པ། དེ་ཡང་གནས་གཞན་དུ་མ་ཡིན་པས། སྒྲ་གཅན་ནང་། ཞེས་སོ། །ལུས་སེམས་སྐྱིལ་པུས་བཀབ། དམིགས་པ་ཐམས་ཅད་ལ་རང་བདེ་མཆོག་ཡབ་ཡུམ་འཇའ་ལུས་སུ་བསྒོམ། རླུང་གནད་འོག་རླུང་ཅུང་ཟད་བཟུང་ཞིང་སྟེང་རླུང་མནན་ཏེ་སྐེད་པ་ཉག་གཏོང་བ་དང་རླུང་མདུན་ལ་འཕུལ་བས་སོ། །དེ་བཞིན་གསང་སྐྱིལ་རྐང་མཐེབ་བཟུང་བ་ལ་དང་། ཙོག་པུ་བརླ་ཟུར་ནས་བཟུང་བས་ཆུད། གཉིས་པ་ནི། དེར་ནི། ཞེས་པ་འཇམ་པོས་མ་ཆུད་ན་དྲག་པོས་འཇུག་པ་སྤོགས་ཆོག་བསྟན་ཏེ། རྐང་པ་པུས་བཙུགས་ལག་པ་བསྣོལ་བས་མཆན་རྩ་བསྡམས། རླུང་བརྒྱང་བ་དང་། རྒྱབ་ཏུ་དགྱེད་པ་མཉམ་དུ་བྱས་པས་ཚུད། ཡང་ན་དྲག་རླུང་འཛིན་ཧར་ལངས་ལག་པ་སྟེང་དུ་བརྐྱང་ཅུང་ཟད་དགྱེད་བྱས་པས་ཚུད། རླུང་མེད་སེམས་སྐྱིལ་པུས་བཀབ། གཡས་ཕྱོགས་ནས་སྟོད་དང་མགོ་བོ་བཀུག་པ་མཚམས་གཡོན་དུ་བསྐོར་ཏེ་མཐར་དགྱེད། གཡས་སུ་དེ་བཞིན་བསྐོར་བས་མི་ཚུད་མི་སྲིད། གསུམ་པ་ནི། འཆིང་བར་ཐེ་ཚོམ་མེད། །ཅེས་པ་བཙན་ཐབས་ཀྱིས་འཇུག་པ་སྟེ། རབ་སྨད་ཀྱི་སྒོ་འབྱེད། འབྲིང་སྟོད། མཐའ་མ་བར་གྱི་སྒོ་དབྱེ་བ་གསུམ། དང་པོ་ནི། དབུ་འཇུག་གི་ལུས་གནད་གང་རུང་གི་སྟེང་ནས་རྡོ་རྗེ་བསྡམ་པ་ལ་རྡོ་རྗེ་གཅིག་པའི་ཕྱག་རྒྱ་དང་བཅས་ནས་དུང་ཅན་མའི་གནས་སུ་ལན་བརྒྱ་ལས་མི་ཉུང་བར་བརྡེག་པ་དང་། གཉིས་པ། ཁ་སྣ་གཉིས་ཀ་ནས་རླུང་ཕྱིར་འབུད་བརྒྱ་ལས་མི་ཉུང་བ་དང་། གསུམ་པ་པུས་བཙུགས་ལུས་དགྱེད་བཏང་། མཐེབ་མཛུབ་ཀྱིས་རྦ་རླབས་ལྟེམས་པ་དམར་ལམ་གྱིས་དུས་རླུང་བརྔུབས་ཏེ་མནན་ནས་དགང་། མགོ་བོ་དགྱེ་མོར་བཏང་བས་སོ། །དེ་བཞིན་སྐུ་དང་དབྱེར་མེད་དོ། །ཞེས་པ། རྦ་རླབས་གར་ལྟེམ་ཀྱང་དང་པོ་སྣང་བ་དཀར་ལམ་གྱིས་སོང་དེ་དུས་ཕྱི་རོལ་གྱི་སྣང་བ་བུན་ལོང་འགྲོ །དེ་ཐོག་ཏུ་རང་ངོ་ཤེས་པས་མ་ཡེངས་པར་བྱ། དེ་ནས་སྣང་བ་དམར་ལམ་གྱིས་སོང་། ཕྱིའི་སྣང་བ་ནུབ། དེ་ནས་སྣང་བ་ནག་ཐུམ་གྱིས་སོང་། ནང་གི་འཆར་སྒོ་མེད་པས་གཉིད་ལོག་པ་ལྟ་བུ། དེ་ནས་སད་པ་ཤེས་པ་གསལ་དྭངས་སྟོན་ཀའི་ཉིན་གུང་ལྟ་བུ་འཆར་བ་ལ་རིམ་པ་བཞིན་སྣང་མཆེད་ཐོབ་པ་འོད་གསལ་ཞེས་བཏགས་ཏེ། ཕྱི་མ་དེ་མངོན་དུ་གྱུར་ན་སྣང་བཞི་རོ་གཅིག་པས་སྒྱུ་ལུས་སུ་ལྡང་། གཞན་ལུགས་བཟློག་ཏུའོ། །མཐར་ནི་ལུས་ངག་འཇའ་ཚོན་གསལ། །ཞེས་པ་གཏུམ་མོའི་རྣལ་འབྱོར་འདིས། །ཁམས་རགས་པ་ཐམས་ཅད་ཟོས་དྭངས་མ་འབའ་ཞིག་འཕེལ་བས་ལུས་འཇའ་ལུས་སུ་གྱུར་པས་སོ། །མཁའ་ལ་སྤྱོད་པ་འགྲུབ་པར་འགྱུར། ཞེས་པ། མཐའ་མས་སྦྱོར་པའི་ལམ་ཐོབ་སྟེ། །ཚེ་འདི་ཁར་འོག་མིན་སོགས་གཟུགས་སམ་འདོད་པའི་རིག་འཛིན་མཁའ་སྤྱོད་ཆུང་ངུར་བཤད་པ་འགྲུབ་ཀྱིས་ལུས་མེད་པར་མ་གྱུར་པས་གཟུགས་མེད་དུ་ནི་མ་ཡིན་ནོ། །འབྲིང་གིས། བདེ་ཆེན་བདེ་བ་ཆེན་པོ་འཐོབ། །ཅེས་པ་བྱང་སེམས་ཀྱི་འཕགས་ས་ལ་མཁའ་སྤྱོད་འབྲིང་དུ་བཤད་པ་དེ་འཐོབ། རབ་ཀྱིས། འཕོ་འགྱུར་མེད་པ་འགྲུབ་པར་འགྱུར། །ཞེས་པ་མཁའ་སྤྱོད་ཆེན་པོ་རྫོགས་པའི་སངས་རྒྱས་ཉིད་ཐོབ་པ་ཞེས་པའི་དོན་ནོ། །དེ་ཡང་རྩ་རྒྱུད་ཀྱི་སྔར་གྱི་འཕྲོར། ཆོ་ག་ཇི་བཞིན་རྣམ་པ་ཡི། །ཁཎྜྻ་རོ་ཧི་ཕྱི་རོལ་ནི། །རང་གི་གཟུགས་སུ་རྣམ་ཞུགས་པ། །ཞེས་པས་བསྟན་ནོ། །གསུམ་པ་ལ། སྔོན་དུ་འགྲོ་བ། དངོས་གཞི། རྗེས་ལས་སྦྱོར་གསུམ། དང་པོ་ནི། ཁ་སྣ་དལ་དྲག་གིས་འཛིན་པ་ལས། དང་པོ། བཅུ་ཕྲག་གསུམ་གྱི་རྩ་བ་ནས། །སྐྱེས་པའི་ཞེས་པ་གསང་གནས་རྩ་འདབ་སོ་གཉིས་པར་སྐྱེས་པའི་འོག་ཐུར་སེལ། ཡན་ལག །ཅེས་པ་སྣ་སྒོར་རྒྱུ་བ་རླུང་སྲོག་རྩོལ་གྱི་མིང་ཅན་བསྲེ་བ་རིལ་གྱིས་བསྟན་ལ། དེ་ལས་འདིར། ལུས་པུས་བཙུགས་ལག་པ་གཡོན་པས་གཡོན་གྱི་རྦ་རླབས་ལྟེམ། གཡས་རྡོ་རྗེ་ཁུ་ཚུར་པུས་སྟེང་དུ་བཟུང་། རླུང་ཁ་སྣ་ནས་ཧ་ཤིན་ཏུ་རིང་བའི་གཞུག་དུ་ཧག་ཅེས་རླུང་གཞུག་འཐེན་དུས་གཡས་པས་གསུས་པ་གཞོགས་ལ་མགྲིན་པ་ཚུན་འཐེན་སྒྲེགས་པ་བཅུ་གཉིས་ནས་རིམ་པ་བརྒྱའི་བར་དུ་འདོན། དེ་བཞིན་ལུས་གོ་བཟློག་པས་ཀྱང་བྱའོ། །དམིགས་པ་འོག་སྒོ་གཉིས་སུ་ཡམ་སྔོན་པོ་རེ་རེ། འཐེན་དུས་དེར་ནར་གྱིས་བྱུང་ཁ་ལས་འཐོན་སྟེང་གི་ནམ་མཁར་ཐིམ་པར་བསམ་མོ། །སྣ་ནས་འཛིན་པ། ལུས་གསང་སྐྱིལ་རྐང་པའི་རྒྱུ་ཁུགས་ནས་བཟུང་། ལུས་སེམས་གློད་པའི་ངང་ནས་རླུང་ཧཱུྃ་རིང་གིས་ཕྱིར་བཟུང་བའི་ཞབས་ཁར་སྒྲེགས་པས་འབྱིན། དལ་འཛིན། ལུས་རྐང་པ་བརྐྱང་བའི་རྒྱུ་མ་ཁུགས་ནས་བཟུང་། རྐང་ལག་མ་གུག་པ་བྱས། རླུང་ཕར་ན་ར་ར་བཏང་ནས་ཁ་རུ་སྒྲེགས་ཆུང་འདོན། དྲག་པོར་འཛིན་པ་ནི། ལུས་པུས་བཙུགས་དེའི་བར་དུ་ཁྲུ་གང་ཙམ་བྱས། ལག་གཉིས་རྦ་རླབས་དྲག་ཏུ་ལྟེམ། མགྲིན་པ་བཀུག །ལུས་སྤྱི་དགུར་གྱིས་འཐེན། རླུང་ཧ་ཧ་ཞེས་རྒྱུ་ཞབས་ཡར་འཐེན་ཞིང་སྒྲེགས་པ་འདོན་ནོ། །གཉིས་པ་ལ། སྤྱོད་ལམ་དང་། དངོས་གཉིས། དང་པོ་ནི། འབོལ་བའི་སྔས་དང་སྟན་མི་འཁྱགས་པའི་བགོ་བ། ཟས་བཙོ་ཟན་ཐུག་པས་ཕུལ་བའམ་ཆང་ཁུ་འཇམ་བསྲོས་པ་ལ་རྩམ་པ་བཏབ་པ་བཏང་ངོ་། །གཉིས་པ་ནི། ནང་གསེས། འོག་རླུང་སྟེང་དུ་འདོན་པ། སྟེང་རླུང་འོག་ཏུ་འདོན་པ། སྟེང་འོག་བར་དུ་བསྲེ་བ། བར་རླུང་འོག་ཏུ་བསྲེ་བ། འོག་རླུང་སྟེང་དུ་བསྲེ་བ། དང་པོ་ནི། རབ་སེམས་སྐྱིལ་ལྷོད་དེ་བའི་ངང་ནས་རྟིང་པས་འོག་སྒོ་དམ་པར་བཀག རྡོ་རྗེ་ཁུ་ཚུར་བསྣོལ་བ་མདུན་དུ་བཙུགས། རླུང་རོ་དགུ་བསལ་སྒྲེགས་འདྲེན་མང་དུ་བྱས། འོག་སྒོ་དང་ལྟེ་བ་དྲག་ཏུ་ཡར་འཐེན། དམིགས་པ་ལྟེ་འོག་ཏུ་ཡཾ་ལས་རླུང་གི་དཀྱིལ་འཁོར་གཞུའི་དབྱིབས་ཅན་ཡཾ་གྱིས་མཚན་པ། འདོན་དུས་ཡཾ་དེ་ཁར་འཐོན་པར་བསམ། སྒྲེགས་པ་འབད་མེད་འཐོན་པ་དང་མཉམ་དུ་ཐུར་སེལ་ཀྱང་འཐོན་པ་འོང་ངོ་། །འབྲིང་ལུས་པུས་བཙུགས། རྡོ་རྗེ་ཁུ་ཚུར་བརླ་སྟེངས་སུ་མནན། ཧ་ཞེས་ཤེད་བསྐྱེད། ཧཱུྃ་གི་ནང་ནས་དྲག་ཏུ་འཐེན་ཏེ་སྔ་མ་བཞིན། མཐའ་མ་པུས་མོ་ས་ལ་བཙུགས། ལག་ངར་བསྣོལ་ཏེ་ས་ལ་ཕབ། ཞིང་ལྤགས་ལ་ཁུག་མ་དཔངས་སུ་ཁྲུ་གང་ཞེང་དུ་རྐང་གང་པ་གཅིག་བྱས། དེའི་དྲི་ལྡན་གྱི་ཁ་གཏད། དེ་ལ་ཟངས་སོགས་ཀྱི་གསང་ལམ་མཛུབ་གང་པ་སྦོམ་ཕྲ་སོར་མོ་ཙམ་སྣ་གཅིག་དེར་བཅུག་རླུང་མི་འཆོར་བར་བྱ། གཅིག་ལྕི་བའི་བུ་གར་བཅུག་ལ། གྲོགས་གཅིག་གིས་དྲི་བཞོན་གྱི་ཁུག་མ་རྡེབ་པ་དང་རང་གིས་སྒྲེགས་འདོན་མཉམ་དུ་བྱས། མགྲིན་པར་སླེབ་པ་དང་གྲོགས་ཀྱིས་དེ་བཤོལ། རང་གིས་སྐྱུགས་སྟངས་སྒྲེགས་འདྲེན་སྤུངས་འཐེན་ཧཱུྃ་འཐེན་ཧཱུབ་འཐེན་པ་སོགས་ཀྱིས་ཁ་ནས་འབྱིན་ནོ། །གཉིས་པ། རྩ་སྦྱངས་ནས་ལུས་ཙོག་པུ། རྡོ་རྗེ་ཁུ་ཚུར་མགོ་སྤྲད་མདུན་དུ་བཙུགས། ཧག་དང་ཧོབ་ཀྱིས་ཕྱི་རླུང་ནང་དུ་དྲངས་སྒྲེགས་པ་བརྔུབས་ཤིང་གསུས་པ་ཁེངས་པ་དང་དྲི་བཞོན་གྱི་གསང་ལྕི་ལམ་དུ་བཙུགས། སྣེ་མོ་ལ་དར་སྲབ་མོ་བཀབ། གྲོགས་ཀྱིས་ཤེད་བསྐྱེད་ལ་འཇིབ་བོ། །དེས་སྟེང་འོག་ཏུ་འཐོན་པར་འགྱུར་རོ། །གསུམ་པ་ནི། སེམས་སྐྱིལ་རྡོ་རྗེ་ཁུ་ཚུར་པུས་མགོར་བསྣོལ། འོག་རླུང་ཡར་འཐེན། སྟེང་རླུང་མར་འཕུལ། འོག་རླུང་ཡར་འཐེན་ནོ། །ཕོ་བར་བསྲེས་ལ་རྒྱ་མཚོ་དགང་གཤོང་གི་སྦྱོར་བ་བཅུ་བྱའོ། །མཐར་རྡོ་རྗེ་བསྡམས་པ་མཛུབ་མོ་བརྐྱང་བའི་སྙིང་གར་འབོལ་རྡོ་བཅུག ལྟེ་བར་ལན་བཅུ་བསྣུན། བར་གྱི་རོ་རྐྱང་གི་རྩ་མནན། རྒྱ་མཚོ་རྡེབ་པ་བཅུ། ཡང་ལྟེ་བར་བཅུ། ལྟེ་འོག་ཏུ་འཕུལ་འཐེན་བཅུ། ཡང་བཟུང་བ་བཅུ། ལྟེ་བ་སྐོར་ཐེབས་བཅུ། ཡང་བརྔུབ་པ་བཅུ་བྱའོ། །བཞི་པ། ལུས་སེམས་སྐྱིལ་ཁུ་ཚུར་པུས་ཟུར་དུ་བཙུགས། རླུང་རྒྱ་མཚོའི་གཏིང་དུ་འཕུལ། སྲིན་པོ་ཅུང་ཟད་འཐེན་ལྟེ་འོག་ཏུ་ཁ་སྦྱར་རྡོ་རྗེ་ཁུ་ཚུར་ས་དང་མ་བྲལ་བར་ཕོངས་རྡེབ་པ་མང་དུ་བྱས། རྒྱ་མཚོའི་འོག་འཕུལ་འཐེན་མང་དུ་བྱའོ། །ལྔ་པ་ནི། སེམས་སྐྱིལ་ལྷོད་དེ་བ་ལ་རྡོ་རྗེ་ཁུ་ཚུར་མདུན་དུ་བསྣོལ་ཏེ་ས་ལ་བཙུགས། ཐུར་སེལ་དྲག་ཏུ་འཐེན་པས་མགྲིན་པར་སླེབ་དུས་རླུང་བརྔུབ་པ་དང་མཉམ་དུ་ཁུ་ཚུར་དེ་གཉིས་ཁ་ནང་དུ་བསྟན་ཏེ་བསྣོལ་བ་སྙིང་གར་བསྡམས། རླུང་སྟོད་དུ་སྟེང་འོག་ཁ་སྦྱར། དེ་ནས་རྒྱུན་ཏུ་སེམས་སྐྱིལ་ས་གནོན་བྱས་སེམས་མ་བཅོས་པར་གཞག་པས་འདུ་བ་རྣམ་བཞིས་ཕྱིན་ཆད་གནོད་པར་མི་བྱེད་ཅིང་སྲོག་རྩོལ་གྱི་ཡོན་ཏན་ཐམས་ཅད་འབྱུང་ངོ་། །གསུམ་པ་ལས་སྦྱོར་ནི། རྐང་པ་སེམས་སྐྱིལ་ཁུ་ཚུར་བསྣོལ་བ་མདུན་ནས་མཐོ་གང་བཅལ་སར་བཙུགས། གསང་ལམ་དེ་ལྕི་བའི་བུ་གར་བཙུད། གོང་གི་ལུས་གནད་ཚོས་འདྲེན་ནོ། །འདི་ཡང་རྩ་རྒྱུད་ཀྱི་སྔར་གྱི་འཕྲོར། ཕོ་ཉ་གཉིས་མེད་སྦྱོར་བའི་བདག །འགྲུབ་འགྱུར་འདི་ལ་ཐེ་ཚོམ་མེད། །ཅེས་པས་སོ། །བཞི་པ་ནི། འཁྲུལ་འཁོར་གྱིས། རྩ་ཁམས་རླུང་གི་གནད་འཆིངས་འགྱུར། །ཞེས་པས་གཞན་དུ་བཤད། ལྔ་པ་ཞར་ལ་བསྟན་པ་ནི། ཚེ་སྒྲུབ་པ། ཀ་པཱ་ལི་མཆོད་པའི་མན་ངག་དང་། གེགས་བྱུང་ན་ནད་བརྒྱ་སྨན་གཅིག་སོགས་བཞིན་གྱིས་སེལ་བར་བྱའོ། །དེ་དག་གཏུམ་མོའི་སྟོད་སྨད་གང་དུ་ཡང་འཇུག་པས་ཀུན་ཏུ་མཁོ་བའི་ཆོས་སུ་བཞག་གོ གསུམ་པ་འཕྲིན་ལས་མཁའ་འགྲོའི་གཏུམ་མོ་ལ། འགྲོ་བ་སྲོག་རྩོལ་གྱི་གཏུམ་མོར་སྦར་བ། འདུག་པ་རྣལ་འབྱོར་གྱི་གཏུམ་མོར་སྦར་བ། ཉལ་བ་ལྷན་སྐྱེས་ཀྱི་གཏུམ་མོར་སྦར་བ་གསུམ་ལས། དང་པོ་ནི། འཕྲིན་ལས་མཁའ་འགྲོའི་གཏུམ་མོ་ནི། རཾ་སྐྱེས་ལྡན་པས་འོད་འབར་བས། །འགྲོ་བ་སྲིན་པོའི་གྱད་འགྲོས་དང་། །ཞེས་པ་ལུས་འགྲོ་བའི་ཚེ་ཁུ་ཚུར་བརླ་ཟུར་དུ་བཅངས། རླུང་རོ་ལན་གསུམ་བསལ། རླུང་གསང་གནས་ཀྱི་སྲིན་པོའི་སྟེང་རྩ་གསུམ་འདུས་མདོར་རཾ་སྐྱེས་ཏེ་ཨ་ཤད་མེའི་རང་བཞིན་ལ་སེམས་བཅིངས་པས་གྱད་ཀྱི་བགྲོད་པ་རྐང་མགྱོགས་སུ་འགྲོ་བ། འདི་ལ་འབུམ་ལྔར། འོག་ཏུ་རྩེ་གསུམ་རྩ་རྣམས་ཀྱིས། །གང་གིས་སྦུབས་སུ་རབ་ཏུ་བརྟན། །སྐྱེ་བ་བདུན་པ་ཕྱུགས་ཉིད་ཀྱི། །མཁའ་ལ་སྤྱོད་པའི་དངོས་གྲུབ་སྟེར། །ཞེས་པའོ། །གཉིས་པ་ནི། སྡོད་པ་རྡོ་རྗེ་སྲ་ཆེན་ཉིད། །ཅེས་པས། རྣམ་སྣང་གི་ཆོས་བདུན་བཅས། རླུང་དང་རྣམ་ཤེས་ཨ་ཤད་ཀྱི་མེ་ལ་བཅུག་སྟེ་རྣམ་པར་ཤེས་པ་ཡུལ་ལ་ཡན་དུ་མི་འཇུག་པ་སེམས་ཇི་ལྟ་བ་བཞིན་དུ་གཞག་གོ རྐྱེན་གྱིས་མི་གཡོ་བས་རྡོ་རྗེ་སྲ་ཆེན་ཞེས་བྱའོ། །གསུམ་པ་ལ། གླང་པོའི་སྟབས་དང་། གྱེན་ཉལ་དང་། གཡོན་ཕབ་གསུམ། དང་པོ་ནི། ཉལ་བ་གླང་པོའི་སྟབས་ཀྱིས་ཉལ། །ཞེས་པ། ལུས་གཡས་འོག་ཏུ་ཕབ། ལག་གཡས་ཀྱིས་འགྲམ་པ་སྐྱོར། གཡོན་ཁུ་ཚུར་མཆན་ཁུང་དུ་བཅུག འཇམ་རླུང་འཛིན། སེམས་མགྲིན་པའི་ཨོཾ་མེར་སྦར་ལ་དེ་ལ་མ་ཡེངས་པར་བྱའོ། །གཉིས་པ་ནི། གྱེན་ཉལ་སྒྲ་གཅན་གདོང་བཟློག་བྱ། །གན་རྐྱལ་དུ་ཉལ་བའི་སྙིང་གར་ཁུ་ཚུར་བསྣོལ། རྐང་པ་ཅུང་ཟད་བསྒྲད་པ་བརྐྱང་། སྒལ་ཚིགས་བདུན་པའི་སྟེང་དུ་གོས་ཀྱི་འབུར་ཙམ་ཡོང་བ་བྱའོ། །གསུམ་པ་ནི། རྡོ་རྗེ་གཡས་གཡོན་བརྗེ་བར་བྱ། །ཞེས་སྔ་མ་དེ་བཟློག་པའོ། །གཡོན་རྐྱང་མར་ཞུགས་ན་དཀར་ཆ་སྟེ་སྣང་ཉམས། གཡས་རོ་མར་དམར་ཆ་སྟོང་ཉམས། དབུ་མར་ཞུགས་པས་མུན་ཅན་ཟུང་འཇུག་གི་ཉམས་ཏེ། ཐོག་མཐའ་གཉིས་ལ་རྐྱང་མ་དང་རོ་མར་ཡིན་ལ། བར་མས་དབུ་མར་འཇུག་པས། སྒྲ་གཅན། ཞེས་བྱ་ལ། དེ་ལ་འདྲེས་མནན་པ་ལྟ་བུ་འབྱུང་བས། དེ་དུས་རོ་མཉམ་དུ་ཤེས་པ་སྦྱངས་ན་ལྷན་ཅིག་སྐྱེས་པའི་ཡེ་ཤེས་འཆར་ལ། གདོང་བཟློག་བྱ། ཞེས་སྦྱར་ཏེ་འདིས་རླུང་སེམས་ཐམས་ཅད་གཉིས་མེད་དུ་བསྒྲུབ་པར་བྱའོ། །མཁའ་འགྲོའི་གཏུམ་མོ་ཡང་རྩ་རྒྱུད་ལས། མཚན་མ་གཉིས་ལ་སྔགས་སྦྱར་ཏེ། །མཁའ་འགྲོ་དཔའ་བོ་གཉིས་མེད་པ། །སྙིང་པོ་རྣམས་ཀྱི་དེ་བཞིན་དུ། །སྔགས་པས་མཁའ་འགྲོ་མ་ལ་སྦྱར། །བློ་ལྡན་མཁའ་འགྲོ་མ་བསྒྲུབ་བྱ། །རགས་པའི་ལུས་ནི་རང་འདོད་པས། །ཞེས་པས་གསུངས། མཚན་མ་གཉིས་ཀྱང་དེ་ཉིད་དུ། །རབ་ཏུ་སྒྲུབ་པའི་སྦྱོར་དོན་ལ། །ཕྱི་རོལ་དེ་བཞིན་ནང་དེ་བཞིན། །ཞེས་འབྱུང་བས་སོ། །བཞི་པ། མཐར་ཕྱིན་མཆོག་གི་གཏུམ་མོ་ནི། མཐར་ཕྱིན་མཆོག་གི་གཏུམ་མོ་ནི། །ཞེས་པ་འདིས་ནི་ཕྱག་རྒྱ་ཆེན་པོའི་གཏུམ་མོ་སྟོན་པ་སྟེ། སེམས་ཀྱི་རྒྱུད་དྲི་མ་མེད་པ་དེ་མ་བསྒྲིབས་པར་མངོན་དུ་གྱུར་པའོ། །གནད་བཞིའི་ཞེས་པ། རྩ་རླུང་ཐིག་ལེ་རྣམ་ཤེས་དབུ་མར་ཐིམ་པས་སད་རྨི་གཉིད་འཐུག་བཞི་པའི་གནས་སྐབས་ཟད་པ། མྱོང་བ་མཐའ་ཡས་པ། ཞེས་པ། དེ་རིག་པ་སྟེ། རྒྱུ་མཐུན་དགའ་བ། རྣམ་སྨིན་མཆོག་དགའ། སྐྱེས་བུ་བྱེད་པ་ཁྱད་དགའ། བྲལ་འབྲས་ལྷན་ཅིག་སྐྱེས་དགར་བཤད་པ་སྟེ། དེ་རེ་ཡང་བཞི་བཞིར་ཕྱེ་བས་དེ་ཉིད་བཅུ་དྲུག་རིག་པས་ས་བཅུ་དྲུག་ཡོད་པའི་ཕྱི་མ་ལ་རྟོགས་པ་དང་། སྤངས་པའི་ཆ་ནས་དུས་སྦྱོར་གྱི་རླུང་རྟེན་འབྲེལ་ཡན་ལག་བཅུ་གཉིས་དག་པས་བདེན་དོན་རྣམ་པ་བཅུ་གཉིས་དེའི་བཅུ་གཉིས་པ་ལ་རྟོགས་པའོ། །མ་ལུས་ལྷན་སྐྱེས་དབྱིངས་སུ་སྡོམ། །ཞེས་པ། དེ་བས་ན་ཆོས་ཅན་ཐམས་ཅད་ཆོས་ཉིད་དུ་སྡོམ་པ་ནི་རྫོགས་པའི་སངས་རྒྱས་ཁོ་ནར་རིག་པར་བྱ་སྟེ་གོང་དུ་བཞག་པའི་བཅུ་དྲུག་པ་དང་བཅུ་གཉིས་པའོ། །འདི་ཡང་རྩ་རྒྱུད་ལས། བསམ་གཏན་གྱིས་སྔགས་ལེགས་པར་སྦྱོར། །གཙོ་མོ་རྣམས་དང་དཔའ་བོ་ནི། །སྦུ་ལྡང་བ་དང་ལྷན་ཅིག་བདེ། །རྡོ་རྗེ་འགོམ་པར་མི་བྱ་བར། །གཡོན་པས་ཡོངས་སུ་བརྟགས་པ་ཡིན། །ཞེས་སོ། །དེ་དག་ཀྱང་རྒྱུ་རྩའི་མདུད་པ་གྲོལ་བ་དང་། རླུང་དབུ་མར་ཐིམ་པས་དང་། ཐིག་ལེ་དྭངས་མ་ཕྱག་རྒྱ་ཆེན་པོར་གྱུར་པས་དང་། རྣམ་པར་ཤེས་པའི་བྱ་བ་གནས་གྱུར་པས་ཡིན་ལ། འདིར་རྩ་མདུད་གྲོལ་བ་ཡང་གནས་པ་རྩའི་མདུད་པ་ནི་སྔར་ནས་གྲོལ་ཟིན་ལ། འཕགས་སར་རྩ་མདུད་གྲོལ་ཚུལ་ཅིག་ནི་བྱུང་ཡང་དེ་ནི་མ་རིག་པ་མདུད་པར་བྱས་ནས་དེ་ཇེ་ཆུང་ཐལ་བ་ལ་བཤད་པ་ཡིན་ཏེ། རྡོ་རྗེ་འཕྲེང་བའི་རྒྱུད་ལས། སྒྲ་དང་ཐིག་ལེའི་མིང་དུ་བྱས། །རླུང་གཉིས་ཀྱིས་ནི་ཕྱི་ནས་ནི། །མ་རིག་མདུད་པ་འབྱེད་པར་བྱེད། །ཅེས་པས་སོ། །སྦྱོར་དྲུག་ལས་ནི་སོར་བསམ་དུ་གནས་པ་རྩ་དག་ནས་ཏིང་ངེ་འཛིན་དུ་རྩ་མདུད་གྲོལ་བར་བཤད་པའི་གནད་དང་། ཕྲ་བ་ཆོས་ཉིད་ཀྱི་དབུ་མ་འོད་སྣང་ཡིན་པས་མདུད་པའི་རྣམ་གཞག་དེ་ལྟ་བུ་མ་གོ་ན་རྣམ་པར་འཁྱམས་པར་འགྱུར་རོ། །གཉིས་པ་མཚན་འཛིན་སྒྱུ་མའི་འཁྲུལ་འཁོར་དུ་ངོ་སྤྲོད་པ་སྒྱུ་ལུས་ལ། གཞག་ཐབས་ལུས་རླུང་སེམས་ཀྱི་གནད། འཆར་བ་ཉམས་ཀྱི་གནད་གཉིས། དང་པོ་ནི། མཐར་གནས་དེ་ནི་སྒྱུ་མ་ལ། །ཞེས་པས། གཏུམ་མོས་ཟུང་འཇུག་གི་ཡེ་ཤེས་གྲུབ་པར་མི་ནུས་པ་མཐར་གྱིས་སམ། རིམ་གྱིས་ཁྲིད་དགོས་པ་དེ་ལ། གཏུམ་མོས་ཉམས་མྱོང་ཅི་རིགས་པ་སྐྱེས་ནས་དེ་ལ་བོགས་འབྱིན་པའི་ཕྱིར་སྒྱུ་ལུས་སྟོན་པ་ཡིན་ནོ། །དེ་ཡང་། རླུང་། སེམས་ནི་སྟེང་འོག་བར་གསུམ་འཆིངས། །ཞེས་པས་བྱེད་ཆིངས་བསྟན་ཏེ། སྟོད་སྨད་བར་གསུམ། སྟོད་ལ་ཉི་མ་ལ་རྒྱབ་ཕྱོགས། སེམས་སྐྱིལ་པུས་བཀབ་ལུས་བྱིན་དྲང་པོ་ལ། མགོ་རྒྱབ་ཏུ་དགྱེད་པས་མིག་འབྲས་ནམ་མཁའི་མཐོངས་སུ་གཏད་པ། རླུང་སེམས་སྟེང་དུ་མ་ཡེངས་པར་བཅིང་བ། སྨད་ནི་གཞན་འདྲ་ལ། མགོ་ཅུང་ཟད་གུག་པ་དང་། མིག་འབྲས་གཉའ་ཤིང་གང་ཙམ་དུ་བལྟ། རླུང་སེམས་ལྟེ་འོག་ཏུ་བཅིང་བ། བར་ནི་ལྟ་སྟངས་ཐད་ཀར་ཧུ་རེ། རླུང་སེམས་སྟེང་འོག་བར་གསུམ་ཁ་སྦྱར་ཕོ་བར་བཅིངས་པའོ། །སྐབས་སུ་རང་གི་མདུན་དུ་མེ་ལོང་བཙུགས། དེ་ལ་སྐུ་གསུང་ཐུགས་རྟེན་གང་རུང་འཆར་དུ་བཅུག་ལ། དེ་ལ་ཅི་ཡང་མ་གྲུབ་ལ། རྐྱེན་གྱིས་ཅིར་ཡང་འཆར་སོང་བ་བཞིན་སྣང་ཞིང་གྲགས་པའི་ཆོས་ཐམས་ཅད་མེ་ལོང་ནང་གི་གཟུགས་བརྙན་ལྟ་བུ། སྣང་ལ་རང་བཞིན་མེད་པ་འཇའ་ཚོན་ལྟ་བུ། མི་བདེན་ཀྱང་ཐམས་ཅད་དུ་ཁྱབ་པ་ཆུ་ཟླ་ལྟ་བུའོ། །ཞེས་ཤེས་པར་བྱས་ནས། རྙེད་མ་རྙེད། གྲགས་མི་གྲགས། བདེ་སྡུག བསྟོད་སྨད། འཇིག་རྟེན་གྱི་ཆོས་བརྒྱད་པོ་ཐམས་ཅད་སྒྱུ་མ་ལྟ་བུར་བལྟ་བར་རོ་མཉམ་མོ། །གཉིས་པ་ནི། གསལ་ལ་འཛིན་མེད། ཅེས་པ། ཆོས་ཐམས་ཅད་སྣང་ཙམ་ལས་རང་བཞིན་མེད་པར་གོ་བས་ན། བདག་མེད་དོན་སྤྱིས་རྟོགས་པའམ་སྤྱི་དོན་གྱི་སྒྱུ་མ་ངོ་འཕྲོད་པ་ཞེས་བྱའོ། །སྐྱོ་ཤས་ཀྱི་ཉམས་འཆར་ན་ཤེས་པ་གློད། སྟོང་ཉམས་སུ་སོང་ན་ཡུལ་སྣ་ཚོགས་བདུད་རྩིར་བསྟེན། སྣང་ཉམས་སུ་སོང་ན་གང་ཤར་གྱི་མཁན་པོ་ངོས་གཟུང་། ཟུང་འཇུག་ཏུ་སོང་ན་དེ་ཁ་ལ་གཞག་པས་གནས་པ་བརྟན་པར་བྱའོ། །འདི་རྩ་རྒྱུད་ལས། དབང་པོ་གང་དང་གང་ལམ་འགྱུར། །དེ་དང་དེ་ཡི་རང་བཞིན་འགྲོ། །ཞེས་པས་བསྟན་ཏེ། འདུས་པ་ལས། རྣལ་འབྱོར་པ་ཡིས་གང་གང་མཐོང་། །དེ་དེ་སྒྱུ་མ་བཞིན་དུ་བརྟག །ཅེས་འབྱུང་བའི་གནད་ཀྱིས་སོ། །གསུམ་པ་མཚན་འཛིན་དག་སྣང་རབ་འབྱམས་སུ་ཁྱེར་བ་འོད་གསལ་ལ། མཚན་མོའི་རྣལ་འབྱོར་དང་། ཉིན་མོའི་རྣལ་འབྱོར་གཉིས། དང་པོ་ལ་མུན་ཁང་བཅའ་བ། བྱེད་ཆིངས། འཆར་བའི་ཉམས་མྱོང་གསུམ་ལས། དང་པོ་ནི། སྒྱུ་མ་ཆེན་པོའི་དེ་བཞིན་གནས། །སྒྱུ་མ་ཆེན་པོ་ནི་རྣམ་ཀུན་མཆོག་ལྡན་གྱི་སྟོང་ཉིད་དམ་ཤེས་རབ་མ་དམིགས་བཅས་སུ་གྲགས་པ་དེ་ཡིན་ལ། དེ་ཡང་དེ་བཞིན་ཉིད་ཀྱི་མིང་ཅན་སེམས་རྣམ་པར་དབེན་པས་རྒྱུད་བྱིན་གྱིས་རློབས་ན་ཐམས་ཅད་དེར་འཆར་བ་དེ་ལ་བདག་བྱིན་གྱིས་བརླབ་ཅེས་བརྗོད། འོད་གསལ་བསྒོམ་པའི་རྣལ་འབྱོར་གྱིས། །དེ་ལ་འོད་གསལ་རྟགས་བཅུ་དང་རྟགས་ཅན་འོད་གསལ་དུ་བཞག་པས་འདི་རྡོ་རྗེ་ཐེག་པའི་ཁྱད་ཆོས་ཡིན་པས་སོ། །ཐབས་མཆོག །ཅེས་དང་། དེ་ཡང་། མུན་པའི་གནས་ཉིད་དུ། ཞེས་པས། ས་རླན་ལ་སོགས་པ་མེད་པའི་ཁང་བུ་འདོམ་གང་གྲུ་བཞི་པ་ཞལ་བས་ནང་དང་བར་བྱས་པ་སྒོ་འཁྱོག་རིམ་པ་གསུམ་གྱིས་མུན་པ་ལེགས་པར་བསྒྲུབ་བོ། །གཉིས་པ་ནི། ཡེ་ཤེས་ནི་འདིར་སྒྱུ་མ་ཆེན་པོ། ལུས་ཉིད་རབ་བསྲངས་ནས་ནི། དེ་ནི་བསྐྱེད་པའི་ཕྱིར། རབ་དཔྲལ་བའི་སྒོ་འབྱེད། འབྲིང་མགྲིན་པའི་སྒོ་འབྱེད། མཐའ་མ་སྙིང་ཀའི་སྒོ་འབྱེད་པ་གསུམ་ལས། དང་པོ་ནི། ལུས་གནད་རྐང་པ་གཡོན་བརྐྱང་བའི་མཐེ་བོས་གཡས་པའི་མཐེ་བོང་མནན་པའི་ཡིན་ཙམ་གྱི་ཙོག་པུ། ལུས་བྱིན་བསྲངས། ལག་པ་འབར་བའི་ཕྱག་རྒྱ་དཔྲལ་བར་བཀོད། གྲུ་མོ་བརྒྱངས་ཀླུ་སོགས་ཀྱིས་ནི། ཞེས་པ། ཡན་ལག་གི་རླུང་ཡུལ་ལ་འཐོར་བ་སྡུད་པའི་ཕྱིར། གཟའ་རྣམས་ལ། ཞེས་པས་མིག་གྱེན་དུ་བཟློག་པ་དང་དབང་པོ་ལྷག་མ་བསྒྲིམས་པས། མཁའ། ཞེས་པས་མུན་པའི་མཁའ་ལ་བལྟ་བར་བྱའོ། །ཚུལ་ཇི་ལྟ་བུའི་བསམ་པ་ཞེ་ན། རིག་པ་གཅིག་ཏུ་མ་ཡེངས་བལྟ། །ཞེས་པས། རང་བདེ་མཆོག་དཔའ་གཅིག་སྟོང་རར་བསྒོམ་པའི་སྐུའི་དབུས་ན་རྩ་དབུ་མའི་ཡར་སྣ་གཙུག་ཏོར་ནས་སྨིན་མཚམས་སུ་ཟུག་པའི་ཡེ་ཤེས་ཀྱི་སྤྱན་ཐམས་ཅད་གཟིགས་མོར་མཛད་པ་དེར་སོང་བར་བསམས་ལ་རྩེ་གཅིག་ཏུ་བལྟ་བར་བྱའོ། །ཡང་ན་སྤྱན་དེའི་ནང་དུ་ཟླ་དཀྱིལ་ལ་ཡས་སྣ་དེར་བཅོམ་ལྡན་འདས་ལྷན་ཅིག་སྐྱེས་པ་ཡབ་ཡུམ། དེའི་མདུན་དུའང་དེ་ལྟ་བུ་བསྒོམས་ཏེ་མཐར་རང་མདུན་གྱི་དེ་ལ་བསྟིམ་མོ། །གཉིས་པ་ནི། གསང་སྐྱིལ་ཁུ་ཚུར་བརླ་ཁུགས་སུ་བཙུགས། ལྟ་སྟངས་ཐད་ཀ དམིགས་པ་རང་དཔའ་གཅིག་སྟོང་རའི་མགྲིན་པར་རྩ་འཁོར་བཅུ་དྲུག་གི་ལྟེ་བར་ཉི་མའི་སྟེང་དུ་ཟླ་བ་བསམ། ཡང་ན་ཉི་ཟླའི་སྟེང་དུ་ལྷན་སྐྱེས་ཡབ་ཡུམ་དེ་གཉིས་ཀྱི་ཐུགས་ཀར་སྔགས་འཕྲེང་དེ་ལས་དེ་ལྟ་བུ་ཞལ་ནས་འཐོན་ཕྱོགས་བཅུའི་འཇིག་རྟེན་གང་བར་བསྒོམ། ཡང་ན་ལུས་ཙོག་པུ་སྨན་ཤས་མིག་གཉིས་རན་ཙམ་མནན་ལ་མགོ་པུས་ཕྲག་ཏུ་བཅུག་པ། སེམས་བསམ་དུ་མེད་པས་ནམ་མཁའ་ཁོ་ནར་བལྟ་བ། གསུམ་པ་པུས་བཙུགས་རྟིང་པའི་ཁར་ཕོངས་བཞག་ལ་ཁུ་ཚུར་བརླ་སྟེངས་སུ་བཙུགས། དམིགས་པ་ལུས་ལྷར་གསལ་བའི་སེམས་རླུང་གིས་ནམ་མཁར་བཅིངས། ཡང་ན་རྣམ་སྣང་ཆོས་བདུན། ཐིག་ལེ་རེ་ཁཱ་ནག་པོ་ཡིད་ཀྱིས་བཀོད་པ་ལ་གཏད་དོ། །ཡང་ན་ལུས་ཙོག་པུ་སྒོམ་ཐག་གིས་བསྡམས་མཉམ་གཞག །རླུང་རོ་བསལ། བུམ་ཅན་འཛིན། མུན་ཁང་གི་ཤར་གྱི་བུ་ག་གསལ། ཟེར་མདུན་དུ་འོང་བར་བྱས། དེར་མེ་ལོང་བཞག མིག་ལ་ཁ་ཆེའི་ཆུས་བརླན་པའི་གདོང་གཡོགས་པ་ལྟ་བུས་དཀྲིས་ཏེ་མེ་ལོང་དེ་ལ་འཛིན་ནོ། །གདུལ་བྱའི་རྩ་རིགས་མ་ངེས་པས་ལུས་གནད་སོགས་མང་པོར་བཤད་ཀྱི་བསྒོམ་པའི་ཚེ་རང་ལ་གང་ཉམས་འཆར་བདེ་བ་དེ་བཟུང་ངོ་། །དེས། ནང་དག་ཏུ། འཆིང་བར་འགྱུར། ཞེས་པས། སྲོག་དབུ་མའི་ནང་དུ་འཆིངས་ནས་རྟགས་འཆར་རོ། །གསུམ་པ་ནི། བལྟས་པས་རྟགས་ནི་མཐོང་བར་འགྱུར། །ཞེས་པས། ས་རླུང་འཆིངས་པས་དུ་བ། ཆུ་རླུང་སྨིག་རྒྱུ། མེ་རླུང་སྲིན་བུ་མེ་ཁྱེར་རམ། མཁའ་སྣང་། རླུང་གི་རླུང་འཆིངས་པས་མར་མེ་ལྟ་བུ་ངེས་པའི་རྟགས། བུམ་པ་དང་སྣམ་བུ་སོགས་མ་ངེས་པའི་རྟགས། མུན་པའི་ནང་དུ་ཉི་མའི་ཐབས། །ཞེས་པས། མུན་ཁང་ཡུན་རིང་བསྟེན་པའམ། སྒོམ་པ་པོ་གནས་པ་བརྟན་པའམ། རྩ་གསལ་ན་ཐིག་ལེ་དང་རེ་ཁཱ་དེར་སྤྲུལ་ལོངས་མཐོང་བའི་བར་ཐམས་ཅད་འབྱུང་ཞིང་མངོན་པར་ཤེས་པ་ལྔ་ལ་སོགས་པ་འཆར། གཟའ་རྣམས་ཀྱིས་ནི་འཆིང་ཞིང་བལྟ། ཞེས་པ། རྟགས་དེ་ལ་ཁ་ཕྱིར་བལྟས་ཀྱི་དབང་སོགས་ཞེན་དུ་བཅུག་ན་ཉམས་གོང་འཕེལ་དུ་འགྲོའོ། །གཉིས་པ་ཉིན་མོའི་རྣལ་འབྱོར་ནི། མུན་པར། ཞེས་པས་མུན་པར་རྟགས་རྫོགས་ནས། །ཉིན་རྟགས་མཐོང་བར་འགྱུར། ཞེས་པས། དེ་ལྟ་བུའི་ཚུལ་ནི་འདི་ལྟར། བྱེད་ཆིངས་སྔར་གྱི་གང་བ་དེས་ནམ་མཁའ་སྔོ་སྟེང་ངེ་བ་ལ་རྩེ་གཅིག་པས་བལྟ། དེ་ཡང་། སྔ་དྲོ་ཁ་ནུབ། ཕྱི་དྲོ་ཤར། ཉིན་གུང་བྱང་སྟེ་མིག་ལ་ཉི་འོད་མི་འཕོག་པ་དགོས་སོ། །འཆར་བའི་ཉམས་ནི། འབར་བ་དང་། ཟླ་བ་དང་། ཉི་མ་དང་། སྒྲ་གཅན་དང་། གློག འདིར་དང་པོ། གློག་གཡོ་བ་ལྟ་བུ་འབྱུང་། དེ་ནས་དེའི་སྣ་གཉིས་འགྲིལ་བ་ལས་ཐིག་ལེར་འགྲོ །དེ་ལ་ཞན་དུ་བཅུག་སྟེ་ཁ་བལྟས་ན་རྒྱ་ཆེས་ཆེ་བ་སྟོང་གསུམ་ཁྱབ། ཞེན་དུ་མ་བཅུག་པར་སྣང་ཙམ་དུ་མི་འགག་པར་ཉམས་སུ་བླངས་ན་ཇེ་ཕྲ་ཇེ་ཕྲར་སོང་ནས་ཡུངས་འབྲུ་ལྟ་བུ་མཐིང་མདངས་ཤིན་ཏུ་དྭངས་པ་ཞིག་འཆར། དེ་ནས་དེ་ཕྱེད་གཤགས་སུ་གས་པ་དེ་ལ་རེ་ཁཱ་ནག་པོ་ཟེར། དེ་མཐོང་ནས་ད་དུང་སྔར་བཞིན་མཉམ་པར་གཞག་ན་དེ་ལས་སྒྲིབ་པ་མེད་པའི་སངས་རྒྱས་ཞི་ཁྲོ་རྐྱང་པ་དང་ཚོམ་བུ་ལ་སོགས་པ་འབྱུང་། དེ་ནས་གཞོམ་དུ་མེད་པའི་སྒྲ་ཐོས་ལ། རྟགས་དེ་དྭངས་པ་ལས་བསམ་གཏན་དུ་འགྱུར། རེ་ཁཱ་མཐོང་ནས་དམིགས་ཡུལ་ལུས་ཀྱི་ཨ་བ་དྷཱུ་ཏཱིར་གཏད་ན་རྩ་འཁོར་མཐོང་། དེ་ནས་དབུ་མ་མཐོང་། དེའི་ནང་དུ་མི་ཤིགས་པའི་ཐིག་ལེ་ལ་སངས་རྒྱས་ཀྱི་སྤྲིན་ཆེན་པོ་སྤྲོ་ནུས་པས། དམིགས་པ་གཏད་པ་དང་དམིགས་པ་གཏོད་ཚུལ་གྱིས་གང་འདོད་པ་འགྲུབ་པ། རྣལ་འབྱོར་འདི་ཡང་རྩ་རྒྱུད་ལས། །མཆོག་ཏུ་མཉམ་གཞག་སྦྱོར་བ་ཡིས། ཐམས་ཅད་སངས་རྒྱས་རང་བཞིན་འགྱུར། །ཞེས་པས་སོ། །མཚན་མོའི་རྣལ་འབྱོར་གྱི་རྟགས་ནི་སྲོག་རང་མལ་དུ་འཆིངས་པས་དབུ་མའི་སྲོག་ཕྱིར་མི་འཕོ་བ་ཉིད་ཀྱིས་ཡིན་ལ། ཉིན་རྟགས་ནི་རྩ་འདབ་ནས་དབུ་མར་འོང་མཁན་ཡོད་པས་དང་། བསམ་གཏན་གྱི་དུས་ནི་ལྟེ་བར་སྲོག་ཐུར་འདུས་དུང་ཅན་མའི་ཁ་བྱེ་དེ་ལས་འདབ་མའི་རླུང་འཆིངས་པས་དབུ་མར་གཞོལ་བས་ཡིན་ཏེ། འདི་དུས་གནས་པའི་རྩ་མདུད་གྲོལ་ཏེ་ཐམས་ཅད་དབུ་མར་སོང་བས་སོ། །འོན་ཀྱང་སྦྱོར་དྲུག་ཏུ་ད་དུང་ཉི་ཟླའི་ལམ་བསྒྱེལ་བར་བཤད་པ་ནི། ཕྱིར་འཕོ་བ་དགག་པའི་ཕྱིར་ཡིན་ནོ། །ཚེ་འདིར་མཆོག་གི་འོད་གསལ་འཐོབ། ཅེས་པ། རྟགས་བཅུ་ལ་འོད་གསལ་དུ་བཞག་པའི་དུས་ཀྱི་རྟགས་ཅན་འོད་གསལ་ཉམས་ཡིན་ཡང་ཀུན་རྫོབ་པའི་ཆོས་ཉིད་ཡིན་པས་ཆོས་ཉིད་མངོན་སུམ་རྟོགས་པའི་ཐ་སྙད་འཐོབ་འདི་རྣམ་པ་ཐམས་ཅད་དམ་སྦུན་སྐོགས་ཐམས་ཅད་རིམ་པས་སྦྱངས་ན་མངོན་པར་བྱང་ཆུབ་པ་མཆོག་གི་འོད་གསལ། དེ་ཀ་བདེ་གཤེགས་སྙིང་པོ་མཐོང་བ་སྒྲིབ་ཆ་ཅི་ཡང་མེད་པར་གྱུར་ན་བདེ་བར་གཤེགས་པ་ཐོབ་པའོ། །བཞི་པ་མཚན་འཛིན་ཏིང་ངེ་འཛིན་གྱི་རྩལ་སྦྱོང་དུ་བྱེད་པ་རྨི་ལམ་ལ། མ་ཟིན་པ་ཟིན་པར་བྱེད་པ། ཟིན་པ་ལམ་དུ་ཁྱེར་བ། མཐར་ཕྱིན་གོམས་པར་བྱ་བ་གསུམ་ལས། དང་པོ་ནི། མཚན་མོ་ཆུ་ཡི་གནས་དག་གི །ཞེས་པ། ཆུ་བོ་ནི་བཞི་ཡིན་པས་འཛིན་པའི་ཚུལ་བཞི་ཡོད་པར་བསྟན་ལ། ཇི་ལྟར་འཛིན་ན། རྨི་ལམ་འཛིན་བྱེད་ཤེས་པ་དང་། །ཆུ་ཡི་དུས་སུ་བསྲེས་ལ་བསྒོམ། །དེ་ཡང་ལུས་གཡས་འོག་ཏུ་ཕབ་ལ། དམིགས་པ་དང་པོར་མཛོད་སྤུར་ཐིག་ལེ་དཀར་པོ། ཡང་ན་ཁམས་དང་བསྟུན་པའི་ཁ་དོག་ཅན་ལ་རླུང་སེམས་དབྱེར་མེད་དུ་བཅིངས། བདག་གིས་རྨི་ལམ་ཟིན་པར་བྱའོ། །ཟིན་ནས་སྦྱངས་ཤིང་རྨི་ལམ་གྱི་རང་བཞིན་སྐྱེ་བ་མེད་པའི་ཆོས་སྐུར་ཤེས་པར་བྱའོ་སྙམ་པའི་འདུན་པ་དྲག་པོ་བཏང་། ཟིན་ན་མ་ཟིན་ན་སྙམ་པའི་དོ་གལ་ཡོད་ན་ངེས་པར་ཟིན་ནོ། །འདི་བཞི་ཀ་ལ་དགོས་སོ། །གཉིས་པ་ལ། མགྲིན་པའི་རྩ་འདབ་ཀྱི་ཐིག་ལེ་ཁ་དོག་ལྔ་ལྡན་གྱི་ལྟེ་བར་ཨོཾ། མཐའ་བསྐོར་དུ། སྲཱིཿཧ་ཧ་ཧཱུྃ་ཧཱུྃ་ཕཊ྄་ཀྱིས་བསྐོར་བ་ལས་འོད་ཟེར་དང་ཡིག་འབྲུའི་གཟུགས་དཔག་ཏུ་མེད་པ་འཕྲོ་འདུ་བྱེད་པ་ལ་དམིགས། གསུམ་པ། སྙིང་ཀའི་རྩ་འདབ་ཀྱི་ལྟེ་བར་རྩ་བའི་བླ་མ་ཧེ་རུ་ཀའི་ཆས་སུ་ཞུགས་པ་ལ་དམིགས། མོས་གུས་བྱ། བཞི་པ་བླ་མ་དེའི་མགྲིན་པར་བླ་མ་རང་གི་གཟུགས་ཇི་ལྟ་བ་བསྒོམས་ཏེ་མོས་གུས་བྱའོ། །གཉིས་པ་ནི། སྒོམ་བྱེད་སྒྲ་གཅན་ནང་ཚུད་ན། །ཞེས་པ། རབ་འོད་གསལ་ཆོས་སྐུར་ཁྱེར་བ་སྟེ། རྨི་ལམ་གྱི་སྣང་བ་ཤར་ཙམ་དེར་རང་ངོ་ཤེས་ནས་རང་གྲོལ་རང་དག་པས་ཉམས་མྱོང་སྤྲིན་བྲལ་གྱི་ནམ་མཁའ་ཉི་འོད་ཀྱིས་ཁྱབ་པ་ལྟ་བུ་འབར་ཏེ་བཅོས་བསླད་མེད་པ་བསྐྱང་ངོ་། །བསྒོམ་བྱ་སྒོམ་བྱེད་མེད་པས་དབུ་མའི་དོན་དུ་ཚུད་པ་ཞེས་བྱའོ། །ཞིང་ཁམས་བགྲོད་པར་འགྱུར། ཞེས་པ། འབྲིང་ཞིང་ཁམས་ལོངས་སྐུར་སྦྱང་བ་བསྟན་ཏེ། རྨི་ལམ་ལ་རྨི་ལམ་དུ་ཤེས་དུས་རྨི་ལམ་འཛིན་པ་མེད་པར་མངོན་པར་དགའ་བ་ལ་སོགས་པའི་ཞིང་ཁམས་བགྲོད་པར་བྱེད་ཅིང་། དེའི་སངས་རྒྱས་ལ་ཆོས་ཉན་པའམ་རང་ཉིད་དེའི་སྟོན་པར་བསྒྱུར་ཏེ་ཆོས་འཆད་པ་སོགས་སོ། །རྨི་ལམ། ཞེས་པ་མཐའ་མ་སྤེལ་སྦྱང་། སྤྲུལ་བསྒྱུར་ལ་བསླབ་པ་བསྟན་ཏེ། རྨི་ལམ་དུ་འཛིན་པ་མ་དག་པས་རྨི་ལམ་དེ་ཉིད་དུ་ཅི་ཤར་བ་ལ་རྨི་ལམ་ཡིན་པས་གང་དགའ་དགར་བྱ་བཏུབ་སྙམ་པས་ཡ་ང་བའི་སྟེང་དུ་ཐོག་བརྫིས། བག་ཚ་བའི་སྟེང་དུ་ལྕེབ་མཆོང་བརྒྱབ། ངན་པ་བཟང་པོར་བསྒྱུར་བ་ལ་སོགས་པས་རྩལ་སྦྱོང་ངོ་། །གསུམ་པ་ནི། གང་ཟག་མཐའ་མ་དེས་འབྲིང་དང་རབ་ལ་རིམ་པ་བཞིན་བསླབ་པར་བྱའོ། །འདི་ཡང་རྩ་རྒྱུད་ལས། ཡི་གེ་བདུན་གྱི་བདག་ཉིད་ཅན། །ཤིང་རྩེར་ཁ་དོག་དམར་བསམ་ནས། །མྱུར་དུ་ལྷུང་བ་མི་ཕྱེད་པར། །ས་རྣམས་ཀྱང་ནི་གཞན་དུ་མིན། །བདག་གི་ལུས་ལ་རྣམ་བཀོད་དེ། །ས་ལ་ཀུ་ཤའི་སྟན་ལ་ཉལ། །ཡི་གེ་བདུན་གྱི་བདག་ཉིད་སྔགས། །བརྒྱ་རྩ་བརྒྱད་ནི་ཉིད་དུ་བཟླས། །རྨི་ལམ་དུ་ནི་བྱ་བ་ཀུན། །ཡིད་ལ་འདོད་པ་སྟོན་པར་འགྱུར། །ཞེས་སོ། །ལྔ་པ་མཚན་འཛིན་ཟུང་འཇུག་གི་བཅུད་དུ་ལེན་པ་བར་དོ་ལ། རབ་ཆོས་སྐུར་གྲོལ་ཚུལ། འབྲིང་ལོངས་སྐུར། མཐའ་མ་སྤྲུལ་སྐུར་གྲོལ་ཚུལ་གསུམ། དང་པོ་ནི། བར་མ་དོ་ལ་གཤིས་ཀྱིས་བལྟ། །ཞེས་པས། ཚེ་འདིར་འོད་གསལ་སྔོན་དུ་བྱས། མཐར་མི་ཕྱིན་པ་དེ་ལ་བར་མ་དོ་ནི་མཆོག་གི་བར་དོ། དེ་ཡང་འཆི་ཀར་ཆགས་སྡང་ཞེན་པའི་འཁྲི་བ་ཀུན་བཅད། བླ་མ་ལ་འོད་གསལ་ཟིན་པའི་གསོལ་བ་བཏབ། ཡན་ལག་གི་རླུང་སྡུད་པས་གཟུགས་སོགས་ཡུལ་སྣང་ནུབ། འབྱུང་བཞིའི་རླུང་ས་ཆུ་ལ་ཐིམ། ལུས་ཀྱི་ཟུངས་ཤོར། ཆུ་མེ་ལ་ཐིམ་པས་སྐོམ་ཞིང་ཁ་སྣ་བསྐམས། མེ་རླུང་ལ་ཐིམ་པས་དྲོད་ཡལ། རླུང་རྣམ་ཤེས་ལ་ཐིམ་པས་ཕྱི་དབུགས་ཆད། ནང་དབུགས་མ་ཆད་པའི་བར་དེར་སྣང་བའི་དུས་སྤྱི་མགྲིན་གྱི་རྩ་འཁོར་ཞིག་ནས་དཀར་ཆ་མར་བབས་དུས་དཀར་ལམ། མཆེད་པའི་དུས། དེ་ནས་གསང་གནས་དང་ལྟེ་བའི་རྩ་འཁོར་ཞིག་པས་དམར་ཆ་ཡར་འོངས་དུས་དམར་ལམ། ཐོབ་པའི་དུས་དེ་གཉིས་སྙིང་གར་འཛོམ་མུན་པ་ལྟ་བུ། འོད་གསལ་མ་འཆར་དུས་སྟོན་ཀའི་གནམ་ཉི་མའི་འོད་ཀྱིས་ཁྱབ་པ་ལྟ་བུར་འབྱུང་ངོ་། །དེ་ལམ་དུ་བྱེད་པ་ནི་ཐིམ་རིམ་གྱི་སྟེང་དུ་སེམས་གློད་པས་སྔ་མ་རང་ངོ་ཤེས་པས་གྲོལ་ཞིང་། ཕྱི་མ་རྣམས་འཇུག་པ་མེད་པས་ཕྱི་དབུགས་འཆད་ཀར་སྣང་རྒྱུ་མེད་དེ། དེ་ཀ་ལ་འོད་གསལ་གྱི་མེས་ཐིམ་རིམ་སྦྱངས་པ་ཟེར། རྒྱུ་དེས་འཆི་དུས་དེར་རང་བཞིན་འོད་གསལ་ལ་སྒྲིབ་མཁན་བག་ཆགས་ལྡང་རྒྱུ་མེད་པས་མ་བུ་འཕྲོད། དེ་ལས་དག་པ་སྒྱུ་ལུས་སུ་ལྡང་ངོ་། །གཉིས་པ་ནི། བར་དོའི་རླུང་སེམས་དྷཱུ་ཏཱིར་འཆིང་། །ཞེས་པ་འདིའི་དྷཱུ་ཏཱི་ནི་ཕྲ་བའི་དབུ་མ་དེར་འཆིང་བ་སྟེ་འདི་ལ་རགས་པའི་རྩ་མེད་པས་སོ། །དེ་ཡང་ཚེ་འདིར་སྒྱུ་ལུས་འབྱོངས་པ་ཞིག་ལ་སྣང་བ་རྐྱེན་གྱི་བར་དོ་འཆར་དེས་ཕྱེད་དང་བཞི་ཚིགས་ལ་བབ་པ་ན་འཆི་བ་ལ་འཆི་བར་ཤེས། དེ་ལམ་དུ་བྱེད་པ་ནི། ད་ལྟ་རྡོ་རྗེ་རྦ་རླབས་ལྟེམ། དེར་སྒྲ་དང་གཟུགས་ཅི་ཤར་ཐམས་ཅད་ལ་འདི་ནི་བར་དོ་ཡིན། ཆོས་ཉིད་ཀྱི་རང་སྒྲ་རང་འོད་ཀྱི་ལྷའོ་སྙམ་པས་ལྷར་བསྒོམ་པ་དང་སེམས་རང་ཐོག་ཏུ་གཞག་གོ །དེ་འབྱོངས་ནས་འཆི་ཀ་མར་ཆགས་སྡང་ཞེན་པའི་འཁྲི་བ་མེད་པར་བྱས། བླ་མ་ལ་བར་དོ་ངོ་སྤྲོད་པའི་གསོལ་བ་གདབ། ཐིམ་རིམ་ངོས་གཟུང་། འཆི་བའི་སྐད་ཅིག་ལས་ཡིད་གཟུགས་སུ་ལངས། འཆི་བ་བར་དོ་ཤེས་པའི་དུས་དེར་བར་དོའི་གདམས་ངག་དྲན་པ་ཁོ་ནས་ལམ་ཆོད་པས་བར་དོ་བློ་ཆོད། གདམས་ངག་ཀྱང་རང་བདེ་མཆོག་ཡབ་ཡུམ། སྒྲ་ཐམས་ཅད་སྔགས། སེམས་འོད་གསལ་སྟོང་ཉིད་དུ་དྲན་པའོ། །དེས་དཔལ་འཁོར་ལོ་སྡོམ་པའི་སྐུའི་སྣང་བརྙན་ཇི་ལྟ་བར་གྱུར་ནས་བདེ་བ་ཅན་ལ་སོགས་པའི་ཞིང་ཁམས་བགྲོད་དེ་རྫོགས་པའི་སངས་རྒྱས་རྣམས་ལ་ཆོས་མཉན་བྱང་ཆུབ་ཀྱི་སྤྱོད་པ་ཡོངས་སུ་སྦྱོང་བས་ལོངས་སྤྱོད་རྫོགས་སྐུར་འཚང་རྒྱ་བའི་ཐ་སྙད་བྱས་སོ། །གསུམ་པ་ནི། ལམ་ཁྱེར་གསུམ་གྱི་གནད་ལྡན་པས། །དེས་ནི་བར་དོ་རང་སངས་རྒྱ། །ཞེས་པས། ད་ལྟ་དབང་གསུམ་པ་ལ་སོགས་པས་ཆགས་སྡང་མིག་སེར་མེད། སྤྱི་དོན་སྒྱུ་མ་འབྱོངས། རྨི་ལམ་ཟིན། སྤེལ་ཙམ་ཐུབ་པ་དེ་ལ་སྲིད་པ་བར་དོ་འཆར་ལ། ཕྱེད་དང་བཞི་ཚུན་བརྒྱལ། དེ་ནས་སད། ལས་སྣང་གི་བར་དོའི་སྣང་བ་སྣ་ཚོགས་འཆར་དེ་དག་ལ་བྲེད་ནས་སྐྱབས་འཚོལ་བའམ་ཕ་མ་མཐོང་ནས་ཆགས་སྡང་གི་བློ་སྐྱེས་ན་དེ་ཉིད་དུ་མངལ་དུ་ཆུད་པར་འགྱུར་ལ། སྲིད་པ་དེ་ཡང་གང་དུ་སྐྱེ་འགྱུར་གྱི་སྲིད་པ་དེའི་ཤ་ཚུགས་ཟས་དྲི་ཟ་བ་ལས་ཀྱི་རྫུ་འཕྲུལ་དང་ལྡན་པ། ལས་མཐུན་པའི་བར་སྲིད་ནང་མཐོང་རེས་ཡོད། ལྷའི་མིག་གི་མངོན་ཤེས་ཐོབ་པས་མཐོང་བ་ནི། འདོད་པའི་ལྷའི་མིག་གིས་རང་སའི་བར་སྲིད་མཐོང་བ་ལྟ་བུ་གདམས་ངག་ནི། འཆི་ཀར་བླ་མ་ལ་གསོལ་བ་གདབ། གང་དུ་སྐྱེ་འདོད་པའི་སྨོན་ལམ་དང་འཕོ་བས་མཚམས་སྦྱར། འཆི་དུས་སུ་ཆགས་ཞེན་སྤངས་པ་གཙོ་བོ་ཡིན། དེ་ནས་ལམ་ཁྱེར་བར་དོ་རང་དུ་ངོ་ཤེས་པས་འཇིགས་སྐྲག་ཐམས་ཅད་ལ་སྒྱུ་མ་ལྟ་བུར་རྒྱས་བཏབ་པས་མངལ་མི་འདོད་པ་བགག་ཤེས་པ། གང་འདོད་ཀྱི་ཕ་མ་ཡི་དམ་དུ་བསྒོམས་ནས་ནང་དབང་ལེན་པ་བསམ་པས་ཕའི་སྤྱི་བོ་ནས་ཞུགས་པའམ། དག་པའི་ཞིང་དུ་འཕོ་ཤེས་པའི་གནད་གསུམ་ལྡན་པའོ། །དེས་བར་དོ་སྤྲུལ་པའི་སྐུར་འགྱུར་རོ། །རྩ་རྒྱུད་ལས། དེ་ནས་འདི་ལས་ཡང་དག་འཐོབ། །གསོལ་བར་གྱུར་ན་གདོན་མི་ཟ། །འཇིགས་པའི་དགྲ་ནི་རྣམ་མང་པོ། །མི་བཟད་མཁའ་འགྲོ་འཇིགས་བྱེད་པ། །དཔའ་བོ་འཇིགས་པར་གྱུར་ན་ནི། །སྐྲག་ཅིང་རྣམ་པར་འབྱེར་བར་བྱེད། །གལ་ཏེ་དཔའ་བོ་མི་འཇིགས་ན། །ལག་པ་གཡོན་པས་བཟུང་ནས་ནི། །རང་གི་གནས་སུ་ཁྱེར་ནས་སུ། །མཁའ་འགྲོ་མ་ནི་དེ་དག་དང་། །རྟག་ཏུ་མངོན་པར་རྩེ་བར་བྱེད། །ཧེ་རུ་ཀ་དཔལ་གུས་འདོད་པས། །མཁའ་ལ་འགྲོ་བའི་གནས་སུ་འཁྱེར། །སྒྲུབ་པ་པོ་ནི་སྔགས་ལུས་ཅན། །འཁོར་བར་འཆི་དང་རྒ་བ་མེད། །ཅེས་གསུངས་སོ། །དྲུག་པ་མཚན་འཛིན་ཡེ་ཤེས་ཀྱི་དབྱིངས་སུ་བཏང་བ་འཕོ་བ་ལ། དམིགས་པ་རྟེན་གྱི་གནད། བྱེད་པ་རླུང་གི་གནད། འཕོ་ས་སྨོན་ལམ་གྱི་གནད་གསུམ་ལས། དང་པོ་ནི། གང་ལས་འཕོ་ན། རྣམ་སྨིན་གཟུགས་ལས། ཞེས་པ། གང་འཕོ་ན། རིག་པ་འཕོ། ཞེས་པ། ཚུལ་ཇི་ལྟར་འཕོ་ན། རྡོ་རྗེ་ལུས་ལ་སྒྲ་གཅན་གཅིག །ཅེས་པ་ལུས་རྣལ་འབྱོར་མ་སྟོང་རའི་དབུས་སུ་དབུ་མ་སྟེང་རྒྱ་མཐོངས་ཕྱེ་བ་ལྟ་བུ་ཚངས་བུག་ཚུན་སླེབ་པ། དེའི་ནང་དུ་ཡི་གེའི་འབྲུ། བསམས་ལ། ཞེས་པ། ལྟེ་བའི་ཐད་ཀྱི་དབུ་མའི་ནང་དུ་སེམས་ཀྱི་ངོ་བོ་ཨ་དཀར་པོ། །དེའི་འོག་ཏུ་ཚེའི་ངོ་བོ་ཧི། དེའི་འོག་ཏུ་སྲོག་གི་ངོ་བོ་ཕཊ྄། བདེ་ཆེན་གནས་དག་ཏུ། རྡོ་རྗེ་འཛིན་པ་བླ་མ་ཉིད། །དེ་ཡི་ཐུགས་སུ་ཡིག་འབྲུ་ནི། །ཞེས་པས། སྤྱི་བོར་བླ་མ་འཁོར་ལོ་སྡོམ་པའི་ལྷ་ཚོགས། དེའི་ཐུགས་ཀར་ཧཱུྃ། ཡང་ན་རྣམ་ཤེས་རྡོ་རྗེ་རྣལ་འབྱོར་མར་བསྒོམ་མོ། །གཉིས་པ་ནི། ཀླུ་སོགས་ཀྱིས་ནི་འཕང་བར་བྱ། །ཞེས་པ། གང་གི་འཕེན་བྱེད་སྟེང་རླུང་བརྔུབས། འོག་རླུང་འཐེན་ཏེ་ཁ་སྦྱོར་བུམ་པ་ཅན་བཀག་པའི་མཐར་འདྲེན་སྟངས་སྦྱོར་བ་དྲུག་ཚང་བས་གྱེན་དུ་འཐེན་པས། ཨ་ཧི་ཕཊ྄་ཀྱིས་བསྐུལ་ཏེ་སྤྱི་བོ་ནས་བརྒྱངས་ཀྱིས་བཏོན་ཡི་དམ་གྱི་ཐུགས་ཀར་འཕང་། བྱང་བ་ལ་ཟུག་པ་དང་སྤྱི་བོ་ཙམ་ནས་སློག འཐེན་དུས་མགོ་མཇུག་ལོག་པར་འོངས་ནས་སྔར་གྱི་སར་མ་ལོག་པར་འདུག་པའོ། །གསུམ་པ་ནི། མཁའ་ལ་སྤྱོད་ཅིང་། ཞེས་པས། མཁའ་སྤྱོད་གསུམ་གང་དུ་སྨོན་པ་དེར་འགྲོའོ། །དེ་ཡང་རབ་འབྲིང་མཐའ་མའི་གདུལ་བྱ་ལ་བལྟོས་པའོ། །སྒྲ་གཅན་ནང་། རླུང་སེམས་ཚུད་པས་འཕོ་བར་བྱེད། །ཅེས་པས། ཚངས་བུག་རང་ནས་གཟུགས་མེད་དང་། །དབུ་མ་སྦྱངས་པ་དེར་ཟུག་པ་ནས་འཕོས་ན་སྐུ་གསུམ་གྱི་ཞིང་གང་འདོད་པ་དེར་འཕེན་ནོ། །དེའི་རྒྱུ་མཚན། དང་པོ་འཆི་དུས་དཀར་དམར་འབབ་འཛེག་གྱེས་པའི་དུས་སུ་དེ་ཡལ་ཞིང་། དབུ་མ་སྦྱངས་པ་ལ། དཀར་དམར་དང་ལྷན་ཅིག་དེ་ཡར་མས་རིམ་གྱིས་ཡལ་བར་བཤད་པས་སོ། །འདི་ཡང་རྩ་བའི་རྒྱུད་ལས། རྣལ་འབྱོར་པ་རྣམས་འཕོ་བའི་ཚེ། །ཁྲག་འཐུང་དཔལ་སོགས་རྣལ་འབྱོར་མ། །ལག་ན་མེ་ཏོག་སྣ་ཚོགས་དང་། །རྒྱལ་མཚན་བ་དན་སྣ་ཚོགས་དང་། །རོལ་མོའི་སྒྲ་ནི་སྣ་ཚོགས་དང་། །སྣ་ཚོགས་གླུ་ཡིས་མཆོད་པ་ཡིས། །འཆི་བ་ཞེས་བྱའི་རྣམ་རྟོག་འདི། །མཁའ་སྤྱོད་གནས་སུ་འཁྲིད་པར་བྱེད། །ཅེས་པས་བསྟན་ནོ། །གསུམ་པ་ཞུ་བའི་བདེ་བ་རྣམ་བཅས་སུ་བསླངས་ནས་ཆོས་ཀྱི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་དབང་གསུམ་པའི་ལམ་ལ། ཡིད་ཐུགས་རྡོ་རྗེར་མ་སྨིན་པ་སྨིན་པར་བྱེད་པ་དབང་དང་། སྨིན་ནས་གྲོལ་བར་བྱེད་པ་བཙན་ཐབས་ཕོ་ཉའི་ལམ་གཉིས་ལས། དང་པོ་ནི། ཤེས་རབ་དང་། ཞེས་པས་བསྟན་ཏེ། གསང་བ་ཤེས་རབ་མའི་ཡེ་ཤེས་གཙོ་བོར་བཏོན་པས་དབང་བསྐུར་བ་དང་། གཉིས་པ་ལ། སྔོན་དུ་འགྲོ་བ་རང་ལུས་བསྒྲུབ་པ་དང་། དངོས་གཞི་གཞན་ལུས་ལས་ལ་སྦྱར་བ་གཉིས། དང་པོ་ལ། རབ་ཡིད་ཀྱི་རིག་མ་ལ་མཉམ་པར་སྦྱོར་བ་དང་། དམན་པ་ལག་པའི་ཕྱག་རྒྱ་དང་བཅས་པས་སྒྲུབ་པ། རྗེས་བྱང་སེམས་མི་ཉམས་པར་བྱ་བའི་གནད་བཤད་པ་གསུམ་ལས། དང་པོ་ནི། ཤེས་རབ་ཡེ་ཤེས་དག་ལ་ནི། །འཕེལ་བྱེད་མདུན་དུ་པད་ཅན་བསམ། །རང་ལུས། ཞེས་པས། རང་འཁོར་ལོའི་བདག་པོར་ངེས་པའི་མདུན་དུ་ཕྱག་རྒྱ་པདྨ་ཅན་གྱི་བུ་མོ་ཡིད་དུ་འོང་བའི་ཕུལ་དུ་ཕྱིན་པ་ཞིག་བསམ། དེ་དང་གདོང་བལྟ་བ་དང་། རྒོད་པ་དང་རྩེ་བ་དང་རེག་པ་དང་འཁྱུད་པ་ཉེར་གནས་ལ་བལྟ་བ་སོགས་ཡིད་ཀྱིས་རིང་དུ་བརྟགས་ལ་ཆགས་པ་སྐྱེ་བ་དང་དངོས་འཛིན་གྱི་མཁན་པོ་རྩད་བཅད་པས་དེ་ལམ་དུ་གཏོང་བ་ཞག་འགའི་བར་དུ་བྱ། དེ་ནས་དེ་བཅོམ་ལྡན་འདས་མར་བསྒྱུར་ཏེ་སྐུ་གསུང་ཐུགས་གོ་ཆ་སྐྱེ་མཆེད་བྱིན་གྱིས་བརླབས། ཡེ་ཤེས་པ་བཅུག དབང་བསྐུར། རྒྱས་བཏབ། གསང་གནས་ཧཱུྃ་ལས་རྡོ་རྗེ་ནོར་བུ་ཨོཾ་གྱིས་མཚན་པ། སྐྱེ་གནས་ཨ་ལས་པདྨ་ཟེ་འབྲུ་སྲཱིཿམཚན་པ་ཕཊ྄་ཀྱིས་བུ་ག་བཀག་པར་བལྟས་ཏེ་འོག་དྲག་པོར་འཐེན་པའི་བུམ་པ་ཅན་དུ་གཟུང་། སྙོམས་པར་ཞུགས་པས་ཁུ་བ་འདར་བ་དགའ་བ། འཕར་བ་མཆོག་དགའ། འཛག་པ་ཁྱད་དགའ། མ་འཕོས་པའི་གང་བས་ལྷན་ཅིག་སྐྱེས་དགའ། གནམ་ལ་གདོང་གཏད་ཀྱི། ཟླ་བ་མི་འཆུགས་འཕེལ་བའི་གནད། །ཅེས་པ། དེའི་ཚེ་མིག་དང་རླུང་སེམས་སྟེང་གི་ནམ་མཁར་བཅིངས་ཏེ་གཞག་པས་བདེ་བ་སྟེ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་འཆར། དེས་བདེ་བ་དེ་ལ་འཁྱུད་པས་ཁུ་བ་མི་འཛག་ལ། རྗེས་སུ་དྲན་པ་ཞེས་པའི་དོན་ཡང་དེའོ་རྩ་རྒྱུད་ལས། ཡིད་ནི་ནང་དུ་ཆུད་པ་ཡིས། །འདོད་པའི་དངོས་གྲུབ་བསྒྲུབ་པར་བྱ། །ཞེས་དང་། རྡོ་རྗེ་མཁའ་འགྲོ་ལས། བདག་གི་དེ་ཉིད་རྡོ་རྗེ་འཛིན། །བདག་གི་དབུས་སུ་ཆུད་བྱས་ནས། །འཁོར་ལོ་ཅན་ཀུན་བསྡུ་བར་བྱ། །ཐམས་ཅད་རྡོ་རྗེའི་རང་བཞིན་དུ། །བྱས་ནས་དེ་ཚེ་རང་བཞིན་སྒོམ། །ཞེས་གསུངས་སོ། །གཉིས་པ་ནི། དེ་འགྲུབ་པར་དཀའ་ན། གཡོན་གྱི་སྦྱོར་བས་རྩ་ལམ་བཀག །ཞེས་པས། ཅུང་ཟད་གན་རྐྱལ། གཡོན་པའི་སྲིན་ལག་གིས་ཟླ་བའི་ལམ་བཀག་པ། གཡས་ཀྱི་སྦྱོར་བས་བྱང་སེམས་འབེབས། །ཞེས་པ། གཡས་བཅོམ་ལྡན་འདས་མར་བསམས་ཏེ་ཡབ་ཡུམ་སྔར་བཞིན་སྙོམས་འཇུག་བྱས་པར་མོས་ཏེ་དལ་བུས་རྡོ་རྗེ་གསོར་རོ། །མྱོང་བ་ངོས་ཟིན་པ་ནི་སྔར་བཞིན་ནོ།། །།གསུམ་པ་ནི། ནང་དབྱེ། འཛིན། འབྱེད། འདྲེན། འགྲེམས། འབེབས། བདེ་བ་ཕྱག་རྒྱ་ཆེན་པོར་སྐྱེལ་བ་དྲུག་གི་དང་པོ། བསྡམ་གློད། ཅེས་པ་ནི་དྲུ་བཞུད་ལྟ་བུའི་རླུང་གནད་དེ། རླུང་རང་འགག་གིས་ཕོ་བ་བརྒྱངས། འོག་སྒོ་གཉིས་རང་སར་བཞག དེ་ཀའི་སྟེང་ནས་རླུང་འཐེན། རྒྱབ་གློད། མི་ཐུབ་ན་བརྔུབ་ཆུང་བྱས། ཡང་དེ་བཞིན། ཡང་མི་ཐུབ་ལ་ཁད་ན་སྔར་བཞིན་བྱ་བ་འཛིན་སྟངས་གཅིག་ལའོ། །དེ་རྗེས་ཕྱིར་འབུད་དྲག་པོ་གསུམ་ལ་འདྲེན་སྟངས་བྱའོ། །མཚམས་སུ་ཐིག་ལེ་བཟུང་། ཞེས་པ། བདེ་བ་རྫོགས་མཚམས་སུ། གཉིས་པ། དྭངས་སྙིགས་འབྱེད། ཅེས་པ་རྒྱ་མཚོ་གཡས་གཡོན་དབུས་གསུམ་དུ་ལན་གསུམ་གསུམ་དུ་བསྐོར་ཞིང་རྡེབ་པ་གསུམ་བྱས། རྡོ་རྗེ་བསྡམས་པ་ལས། རྡོ་རྗེ་རྩེ་གཅིག་གིས་རྒྱུ་ཞབས་སུ་བསྣུན་པས་དྭངས་སྙིགས་ཕྱེའོ། །གསུམ་པ། ལྷ་རྣམས་སྤྲུག་ཅིང་གཟའ་རྣམས་བཟློག །ཅེས་པ་ལ་གཉིས་ཀྱི། མ་བཟུང་རླུང་གི ཞེས་པ་དང་འདྲེན་ནི། རླུང་རང་འགག་ལུས་གཡས་འཐེན། གཡོན། ཆ་མཉམ། མགོ་བོ་གཡས་གཡོན་དབུས། གཡོན་སྐོར་གསུམ། མི་ཐུབ་ལ་ཁད་ན་མཐར་ལུས་སྤྲུག་དབང་པོ་རྣམས་གྱེན་ལ་བཟློག་པས་འདར་ཆུང་སི་ལི་ལི་བྱེད་པའོ། །སྙིགས་འདྲེན་དྭངས་སྙིགས་འབྱེད། རླུང་ཕྱིར་འབུད་ནང་དུ་མི་འཛིན། སེམས་སྐྱིལ་པུས་བཀབ་རླུང་ཕྱིར་འབུད་དྲག་པོས་གཡས་འཐེན་གཡོན་ནས་ལུས་སྤྲུག་པ་ལན་སྔ་མ་བཞིན་ནོ། །དེ་ནས་སྤྲོས་པ་ཆེ་ན་འདྲེན་བཅུ་གཅིག་བྱ་སྟེ། གནས་སུ་མ་འཁྱོལ་ན་ཆུ་དང་བསྡོངས་ཏེ་འཛག་པའོ། །བཞི་པ་འགྲེམས་ལ། རི་རབ་སྟོད་སྨད་བར་གསུམ་རྡེབ། །རི་རབ་སྤྲུག་ཅིང་གླིང་བཞི་བརྐྱང་། །གནམ་ལ་འཕང་ཞིང་། ཞེས་པ། རླུང་བུམ་པ་ཅན་གཟུང་གན་རྐྱལ་གྱི་མགོ་སྤྲུག་ཅིང་རྡེབ། དེ་ལས་སྐྱེད་པ་དང་ཕོངས། དེ་ནས་ཡན་ལག་ཕྱོགས་བཞིར་བརྐྱང་སྤྲུག ཁ་སྦུབ་ཏུ་ཡང་བྱ། མཐར་བག་བཞི་འཁྲབ། རྒྱས་པར་སྟོད་སྨད་བར་གསུམ་གྱི་རྣལ་རོལ་སོགས་ཀྱང་བྱ་སྟེ། ལུས་ལ་མ་ཁྲེམས་ན་བཟློག་ཀྱང་ནང་ཀྱི་རྒྱུར་འགྲོའོ། །ལྔ་པ་སྙིགས་མ་འབོར། ཅེས་པ། དེའི་མཐར་འབེབས་བྱས་ནས་གསང་རྩ་བཞོས། སྙིགས་མ་འབོར། མ་ཕོ་ན་ལུས་ལ་ཤ་ལྷད་འབྱུང་ངོ་། །དྲུག་པ། བཅོས་མིན་ཤེས་པ་གཏན་ལ་འབེབས། །ཞེས་པ་དེའི་མཐར། བུམ་པ་ཅན་འགའ་ཡར་བསྒོམ། སེམས་མ་བཅོས་པ་ལ་མཉམ་པར་གཞག་པས་སྦྱོར་སྐོར་དེ་ལམ་དུ་འགྲོའོ། །རླུང་དང་མ་འདྲེས་ན་ས་དབང་དུ་ཤོར་ནས། མཐར་གཉིད་ཆོག་པ་སོགས་འབྱུང་། ཕྱག་ཆེན་དུ་སྐྱེལ་མ་ཤེས་ན་ཟབ་ཀྱང་འཁོར་བའི་རྒྱུའོ། །གཉིས་པ་དངོས་གཞི་གཞན་ལུས་ལས་ལ་སྦྱར་བ་ལ། ཕུན་སུམ་ཚོགས་པའི་རྟེན་བཙལ། ཉམས་སུ་བླང་བའི་རིམ་པ་བསྟན། གནས་སྐབས་གཉིས་ཀྱི་འབྲས་བུ་བཞག་པ་དང་གསུམ་ལས། དང་པོ་ནི། རིག་མ་དག་དང་། ཞེས་པ། རྩ་བཤད་ཀྱི་རྒྱུད་རྣམས་ལས། རྣལ་འབྱོར་མ་སོ་དྲུག་གི་དབྱེ་བས་ཕྱག་རྒྱ་དཔག་མེད་ཅིག་བཤད་ཀྱང་། རྩ་རིགས་ཀྱིས་བཞག་པ་འདི་དག་མཁོ་སྟེ། རྡོ་རྗེ་མཁའ་འགྲོ་ལས་རྩུབ་ཅེས་བྱ་བ་ནི་བ་ལང་གི་ལྕེ་ལྟར་རྩུབ་པའོ། །འཇམ་པ་ནི་པདྨ་ཅན་ཞེས་བྱའོ། །མཁྲང་བ་ནི་ཁུ་བ་སྲ་བ་སྟེ། གང་གི་ཁུ་བ་འཐས་པར་འགྱུར་བའོ། །འཛེར་པ་ཅན་ནི་དུང་ཅན་མ་སྟེ་པདྨ་ལ་ཤ་འཛེར་ཡོད་པའོ། །བུད་མེད་འདི་དག་གི་བཅུད་འཆིང་བ་ལ་དབང་དུ་གྱུར་བ་ཡིན་ནོ། །ཞེས་དང་པོ་གླང་སྣ་ཅན། གསུམ་པ་རི་མོ་ཅན། ན་ཚོད་ཀྱང་རྒྱུད་དེར། ཆུང་ངུ་ནི་དང་པོ་བཅུ་གཅིག་མའི་པདྨའི་འདབ་མ་དང་རོལ་བས་བཅུད་ཀྱིས་ལེན་བསྒྲུབ་པར་བྱའོ། །གཉིས་པ་ལོ་བཅུ་གཉིས་མ་དང་རོལ་བས་དམ་ཚིག་གི་དོན་དུ་རོལ་བར་བྱའོ། །གསུམ་པ་བཅུ་དྲུག་མ་དང་ལྷན་ཅིག་ཏུ་དགའ་བས་ནི་སྔགས་རྣམས་གོམས་པར་བྱ་བའོ། །བཞི་པར་ལོ་ཉི་ཤུ་མ་དང་ནམ་མཁར་འཕུར་བ་བསྒྲུབ་པར་བྱའོ། །ལྔ་པར་ལོ་ཉི་ཤུ་རྩ་ལྔ་མ་དང་བསྐུར་བའོ། །ཞེས་པས་དམར་ཆ་འདྲེན་པ་མཚན་ཉིད་རྩ་རིགས་གོང་དང་ལྡན་པ། ན་ཚོད་འདི་དག་གི་དབང་དུ་བྱས་པ་དགུག་པ་དང་མི་སྣང་བ་སོགས་རྒྱས་པ་ལས་སོ། །དེ་ལྟར་རྙེད་པ་སོ་སོ་ཐར་པ་དང་བྱང་ཆུབ་ཏུ་སེམས་བསྐྱེད་པ་དང་། དཔལ་འཁོར་ལོ་སྡོམ་པའི་སྒོ་ནས་རྒྱུད་ལེགས་པར་སྦྱང་བར་བྱའོ། །གཉིས་པ་ལ། རྩ་བ་སྙོམས་འཇུག་གི་གནད། སངས་རྒྱ་བ་བཙན་ཐབས་ཀྱི་གནད། རྗེས་ཤེས་སྦྱང་བ་ལམ་ཁྱེར་གྱི་གནད་གསུམ། དང་པོ་ནི། མཉམ་སྦྱོར། ཞེས་པས་རྒྱུད་སྦྱངས་པ་དེ་དང་རྩེད་འཇོ་སྣ་ཚོགས་པས་བདེ་བ་བསྐུལ་ཏེ། སྐྱེས་པ་དང་ངོས་འཛིན་གྱིས་ལམ་དུ་བཏང་། གོམས་ནས་རྩེད་འཇོའི་མཐར་ཕན་ཚུན་ལྷ་བསྐྱེད་པ་ནས་མཁའ་གསང་བྱིན་གྱིས་བརླབ་པའི་བར་སྔར་བཞིན་བྱས་ཏེ་སྙོམས་པར་ཞུགས་པས་བདེ་བ་ཆིལ་སྐྱེས་པ་སོ་སོ་རང་རིག་གི་སྟེང་དུ་བལྟའོ། །དེ་ནས་སྔ་མ་ལས་དྲག་པར་བསྐྱོད་དེ་བདེ་བ་སྔར་ལས་ཆེ་བ་དང་། ཆེས་ཆེ་བ་དང་ལྷན་ཅིག་སྐྱེས་དགར་འཇོག་པའི་བར་ཐམས་ཅད་རིགས་འདྲ་དེ་ཡང་ཡུལ་གྱི་ངོས་ནས་སྟོང་བཞི། དུས་ཀྱི་ངོས་ནས་སྐད་ཅིག་མ་བཞི། ཡུལ་ཅན་རང་ངོས་ནས་དགའ་བ་བཞི་ཡིན་ནོ། །འདིར་ཡང་རྡོ་རྗེ་མཁའ་འགྲོར། མཐའ་མའི་ཆགས་ཆེན་རིམ་པ་ཡིས། །འཁོར་ལོ་ཅན་ཀུན་བསྡུས་ནས་ནི། །བཙུན་མོའི་བྷ་གར་བདེ་ཆེན་སྤྲོ། །དེར་ནི་དཀྱིལ་འཁོར་ཀུན་ཏུ་བྲི། །གཞན་གྱིས་དེ་ཉིད་ཇི་བཞིན་གསུངས། །ཞེས་བཤད་ལ། འདིར་བྷ་གར་སྤྲོ་བའི་ཚུལ་ནི་ཐིག་ལེ་འབྱིན་པ་མ་ཡིན་ལ། བཙུན་མོའི་བྷ་གར་ཡས་བརྟན་གྱི་དགའ་བ་མཐར་ཐུག་པ་བྱས་པས་དེ་རང་ལུས་སུ་བཤད་པ་བཞིན་གྱིས་རྣམ་ཀུན་མཆོག་ལྡན་དུ་བསླང་བ་ལ་བྱེད་དགོས། གཞན་དྲི་མེད་འོད་ལས། ལན་ཅིག་རྟག་ཏུ་ཁུ་བ་ལྟུང་བའི་ཕྱིར། །གཉིས་ཀ་ལ་ཡང་མཆོག་གི་བདེ་བ་མེད། །ཅེས་གསུངས་ལ་བདུད་རྩི་རིལ་བུའི་དོན། གསང་བའི་དབང་བསྐུར་བ་དང་། གེགས་སེལ་བའི་དུས་སུ་ནི་དགོས་པ་ཁྱད་པར་ཅན་ཡིན་པའི་ཕྱིར་འབོར་ལ། ནུས་ལྡན་གྱི་རྩལ་སྦྱོང་གི་དུས་བྷ་གར་སྤྲོས། སླར་ཡང་སྡུད་པའི་ཕྱིར་ཉེས་པར་མི་འགྱུར་རོ། །ཡན་ལག་ཚང་བའི་ཁུ་བ་ཉམས་པ་རྩ་བའི་ལྟུང་བ་ལྔ་པར་བཞག་པས་བསྒྲིམ་པར་བྱའོ། །དེ་བས་བྱང་སེམས་གསང་བའི་སྣར་འཆིང་བའི་གནད་ཀྱི་གཙོ་བོ་ནི་སོ་སོ་རང་རིག་པའི་ཡེ་ཤེས། དེ་ལྟ་བུ་ཡང་དང་ཡང་དུ་ཉམས་སུ་བསྟར་བས་ཅི་ཞིག་ན་མས་བརྟན་གྱི་དགའ་བ་རྙེད་དེ། ས་ར་ཧས་ཟ་ཞིང་འཐུང་ལ་གཉིས་སྤྲོད་ཀྱིས་དགའ་ཞིང་། རྟག་ཏུ་ཡང་དང་ཡང་དུ་འཁོར་ལོ་འགེངས། །ཆོས་འདི་ལྟ་བུས་འཇིག་རྟེན་ཕ་རོལ་འགྲུབ་འགྱུར་ཏེ། །རྨོངས་པའི་འཇིག་རྟེན་མགོ་བོ་རྡོག་པས་མནན་ནས་སོང་། །ཞེས་སོ། །གཉིས་པ་ལ། རྟེན་གྱི་སྟོབས། སྦྱོར་བའི་སྟོབས་གཉིས་སོ། །དང་པོ་ནི། དབང་པོ་རྣམས་ལ་བདེ་བའི་ཉམས། །ཞེས་པས། ཕྱག་རྒྱ་རབ་ཆོས་ཀྱི་དབྱིངས་ཀྱི་དབང་ཕྱུག་མའི་རྩ་སྣ་ཕྱིར་སོ་གསུམ་མམ་གཉིས་སམ་གཅིག་དོན་འོང་། དམན་ཀྱང་བསྐྱོད་དུས་བུ་གར་གྲ་མ་ཟུག་པ་ལྟ་བུ་འབྱུང་བས། དེ་རྡོ་རྗེའི་བུ་གར་བཅུག་པས་རང་གི་དབུ་མ་སྐོམ་པ་ཆུ་སྙེག་པ་ལྟར་འོངས་དེ་གཉིས་པོ་ཁ་སྦྱར་དུ་གྲུབ། དེའི་དབང་གིས་སྙོམས་འཇུག་གི་རླུང་གཉིས་ཁ་སྦྱར། དེ་ནས་དང་པོར་སྐྱེས་པའི་ཞུ་བའི་ཐིག་ལེ་དེའི་ཟེ་བར་ལྷུང་། དེའི་རྐྱེན་གྱིས་ཁམས་དམར་པོ་ཞུ་ཡང་དེར་སླེབ་པས་ཐིག་ལེ་ཁ་སྦྱར། སྔར་གྱི་དབང་པོ་གཉིས་དང་བཅས་པས་ཁ་སྦྱར་བཞི། རང་གི་དབུ་མའི་སྣ་རྩེར་ལྷུང་བ་དེ་ཡན་དགའ་བ། ཤེས་རབ་ཀྱི་དྭངས་མ་དང་ཕྲད་པས་མཆོག་དགའ། དེ་ཡན་ཆགས་པའི་ཕྱོགས། དེ་སྟོང་ཉིད་དུ་ལངས་པས་གཉིས་ཀ་རོ་མཉམ་པ་དང་ཆགས་པ་དང་ཆགས་བྲལ་འདྲེས་པ་དེའི་དུས་སུ་སྔར་གོམས་པར་བྱས་པ་ལ་ལྷན་སྐྱེས་ཀྱི་ཡེ་ཤེས་མཚན་ཉིད་པ་འཆར་ཏེ། དེ་ཡང་དྲི་མེད་འོད་ལས། རྣམ་པར་མི་རྟོག་པ། རྣམ་པ་ཐམས་ཅད་པ། ལྷན་ཅིག་སྐྱེས་པ་ཞེས་མཚན་ཉིད་གསུམ་ལྡན་དུ་གསུངས་པ་བཞིན་དེའི་མཐུས་ཁམས་དེ་གྱེན་དུ་ལོག་ཕྱི་ནང་གི་དངོས་པོ་ཐམས་ཅད་དྭངས་མར་འགྱུར་བ་དེ་མ་རིག་པའི་འགྱུར་བ་ཟད་པས་སོ། །དེ་ཡང་དབང་པོ་རབ་དེ་ཉིད་དུ་འཚང་རྒྱ་བ་ནི། གསེར་འགྱུར་གྱི་རྩི་དུམ་བུ་གཅིག་གིས་རེག་པའི་མོད་ལ་ལྕགས་བསྲེགས་པ་ཁལ་སྟོང་གསེར་དུ་འགྱུར་བ་ལྟ་བུའོ། །གཞན་དེ་དུས་ནས་རླུང་དབུ་མར་ཐིམ་པའི་འགོ་ཚུགས་སྟོང་བརྒྱད་བརྒྱ་ཐིམ་ཚར་ནས་ས་དང་པོའི་ཡེ་ཤེས་རྫོགས་ལ་ལྷག་མ་རྣམས་ཀྱང་ཤེས་པར་བྱའོ། །མཚན་བརྗོད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱ། །ཞེས་དང་། རྗེ་མར་པས། བསྒོམས་ན་འཚང་རྒྱ་ཀུན་ཀྱང་རྒྱ། །མ་བསྒོམས་རྒྱ་ན་རྒྱ་བ་ཡིན། ཞེས་གསུངས་སོ། །གཉིས་པ་ལ། རྡོ་རྗེ་ཉི་མ་དབང་སྡུད་དང་། །སྦ་བ་སྦུབས་འཐེན་གཉིས། དང་པོ་ལ། འདུག་སྟངས་དང་། ཐུར་མ་ལ་བརྟེན་པ་གཉིས། དང་པོ་ནི། གནད་རྣམས་ཀྱིས་ནི། ཞེས་པའི་རྣམས་སྒྲས། རྡོ་རྗེ་མཁའ་འགྲོར། གང་ཞིག་ཆགས་པ་སྲ་བ་རྣམས་ལ་ནི་སོར་མོ་རིང་པོ་གསུམ་སྦྲུལ་གྱི་མགོ་ལྟར་བྱས་ལ་མོ་མཚན་གྱི་བུ་གར་བཅུག་ནས་ས་ཏི་ཅེས་པའི་སྒྲ་བྱུང་བའི་བར་དུ་དྲུད་པས་རྒན་མོ་ལ་སོགས་པ་ཡང་ནི་རྡོ་རྗེ་གསོར་ཞེས་བྱའོ། །གང་ཞིག་གཞོན་ཞིང་མཉེན་པ་རྣམས་ལ་ནི། རང་གི་མཚན་མ་འོད་དང་ལྡན་པའི་བྱང་ཆུབ་སེམས་འབབ་པའི་རྩར་བཙུག་སྟེ་གསིལ་བ་ཙམ་གྱིས་དགའ་བར་བྱས་ཏེ། རྡོ་རྗེ་ལྕེའི་ཐུར་མ་ཞེས་བྱའོ། །ཞེས་དང་། ཇི་སྙེད་བསྟན་ཆོས་ཐམས་ཅད་ལས་བྱུང་བའི་ཀ་ར་ཎ་བསྙེན་པར་བྱས་ཏེ་དེ་ཐམས་ཅད་ཀྱང་རྡོ་རྗེ་སེམས་དཔའི་ཕྱག་རྒྱར་བརྗོད་དོ། །ཞེས་པས། ཕྱག་རྒྱ་གན་རྐྱལ་དུ་འགྱེལ་བའི་ཚངས་རར་སྟེགས་བཅུག་རྐང་པ་བསྐུམ་པའི་པུས་མོ་ཕན་ཚུན་དུ་མནན། མཆན་ཁུང་གཉིས་སུ་འབོལ་རྡོ་ཁུ་ཚུར། ཉིས་སྦྱར་ཙམ་རེ་བཅུག དེ་གོང་ནེམ་ཙམ་གྱིས་བསྡམས་པའི་མདུད་པ་མདུན་དུ་བྱེད། ལྕེ་ཅུང་ཟད་བརྐྱང་དུ་བཅུག འགྲུབ་པར་འགྱུར། ཞེས། ཚུལ་དེ་ལྟ་བུ་ལ་བསྣུན་པས་རྩ་ལ་ཐུག དེ་བུ་གར་འཇུག་ཐུབ་མ་བྱུང་ན། ཕྱག་རྒྱའི་རྐང་པ་གཉིས་རང་གི་གདོང་ཕྱོགས་སུ་དྲག་ཏུ་འཐེན་དུ་བཅུག་ནས་དལ་བུས་བཙལ་བས་འགྲུབ། རྒྱས་པར་སྤྲོ་ན། གཡས་བརྐྱང་ཡུམ་འོག་ཏུ་བཞག་པའི་བརླ་བར་དུ་གཡོན་པུས་མོ་བཙུགས་རྟིང་པ་གཡོན་པས་གསང་རྩ་མནན་པས་བསྐྱོད། གཡོན་བརྐྱང་དེ་བཟློག་པ། མཉམ་པ་ཕྱག་རྒྱ་དང་གཉིས་ཀའི་པུས་མོ་ཕྱིར་དགྱེད་པ། ལག་པར་དཔྱི་ནས་བཏང་། མི་མཉམ་པ་དེའི་གཡས་བསྐུམ། ཡང་གཡོན་བསྐུམ། གཉིས་ཅར་ཤད་བརྐྱང་བས་དབུས་སུ་བསྐྱོད་པས་སོ། །རྡོ་རྗེ་གོམས་པ་ལ་གཉིས། རང་སྐྱིལ་ཀྲུང་ལྷོད་དེ་བ་བྱས་པའི་པང་དུ་བླངས་ནས་རང་རྐང་པ་འཁྲིལ་ནས་ལངས་པ། ཡུམ་ཡང་ལངས་པས། ས་ག་རང་གན་རྒྱལ་བའི་སྟེང་དུ་ཡུམ་བཞག་པ། ཟླུམ་པོ་རང་སྐེད་པ་བསྲངས་ལ་མདུན་དུ་བརྐྱང་། ཡུམ་ཡང་དེ་བཞིན། རུ་སྦལ་ནི་ཡུམ་གྱི་སྟེང་དུ་ཡབ་རྐང་པ་བསྐུམ་པའི་ནུར་འགྲོས། བུང་བ་ཡབ་སྟེང་ནས་རྐང་པ་དྲག་ཏུ་བཀུག་པ། རྒྱ་མཚོའི་རླབས། ཡབ་གན་རྐྱལ་གྱི་ལག་པས་བརླ་བཟུང་བའི་སྟེང་དུ་ཡུམ་བཞག་པས། རི་བོ་འདེགས། རང་གན་རྐྱལ་རྐང་བརྐྱང་གི་ཁར་ཕྱག་རྒྱ་བཞག་སྟེ་སྙོམས་འཇུག་གོང་འོག་གཉིས་ཀའི་མཐར་འཛིན་སོགས་རང་ལུས་བཞིན་ནོ། །གཉིས་པ་ལ། སྦྱང་སད། ལས་སྦྱར་ལས། དང་པོ་ནི། འདི་ཡང་། གནད་རྣམས་ཀྱིས་ནི། ཞེས་པའི་རྣམས་སྒྲས་བསྟན་ཏེ། ལུས་པུས་བཙུགས་བར་ལ་མཐོ་གསུམ་ཙམ་ཡོང་བ་ལུས་སྟེང་དུ་ལག་པ་རྡོ་རྗེ་ཁུ་ཚུར་བཞག་ནས་རླུང་བཟུང་། ཕོ་སྐོར་གཡས་གཡོན་གཉིས་ཀར་གསུམ་གསུམ། རླུང་དེ་སྟོད་ལ་ཤེད་བསྐྱེད་ལ་འཐེན། ལག་པ་གཡོན་མ་གུག་པར་བརླ་ཤ་གཡོན་གྱི་ཁ་ནས་ཡར་ནུད་ཙམ་སྤོ་རུང་འོང་། བརླ་ཁུགས་སུ་སླེབ་པ་དང་། གཡོན་ཕྱོགས་ཀྱི་སྟོད་ཤེད་བསྐྱེད་ལ་འཐེན། ཡང་རླུང་དེ་ཕྱིར་ཤེད་བསྐྱེད་ནས་འབུད་པ་དང་ལག་མགོ་པུས་མགོར་སྐྱེལ་བ་སྒྲག ཡང་གཡོན་ཕྱོགས་ཀྱི་སྟོད་འཐེན། དེ་བཞིན་གཡས་ལའང་བྱའོ། །དབུས་ནས་མདུན་རྒྱབ་ཀྱི་རླུང་འཐེན། མདུན་རླུང་ཕོ་བ་བཀང་གསང་གནས་སུ་རྡེབ་པ་ལན་གསུམ། དེ་ནས་བསྐོར་བ་སྟོད་འཐེན་ཕྱིར་འབུད་རྣམས་སྔ་མ་བཞིན་ནོ། །འདི་ཐུན་དྲུག་ཏུ་ཉམས་སུ་ལེན་ཅིང་ཞག་བཅུའི་བར་དུ་སྦྱངས། རྡོ་རྗེ་ལ་མར་བྱུགས་ནས་ཞག་གསུམ་གྱི་གོང་ནས་ཡང་ཡང་མཉེ། དེ་ནས་ལྕགས་ཟངས་སམ་སྨྱུག་མའི་ཐུར་མ་སྦུབས་ཡངས་པོ་ཡོད་པ་མཐོ་གང་སོར་བཞི་ཡོད་པ་ཤིན་ཏུ་འཇམ་པ་བུ་ག་ནས་འོག་ཏུ་ཞར་གྱིས་ཐལ་ཏེ་བཏང་། རླུང་གྱེན་འདྲེན་གྱིས་སྟེང་དུ་འདོན་པ་ནི། རང་འགག་གི་རླུང་ཕོ་གར་ཤེད་བསྐྱེད་ལ་བརྒྱངས། མི་ཐུབ་པ་ན་དེ་ནས་ཤེད་བསྐྱེད་ལ་འབུད། ཧ་ཞེས་སྟོད་དུ་དྲག་པོར་འཐེན། འདྲེན་བཞི་ལ་རྟགས་འདོན་བྱ། རླུང་ཐུར་བསྡིགས་ཀྱིས་འོག་ཏུ་འདོན་པ་ནི། ལག་སོར་བཅུ་དྲུག་མདོར་བཙུགས། སྟོད་ཅུང་ཟད་དགྱེ་བྱས། མདུན་རླུང་ཐུར་དུ་དྲག་ཏུ་འཕུལ་བ་དང་འཕོ་བ་ནས་འོག་ཏུ་རྡེབ་པ་ཐུར། བརྒྱངས་ཀྱིས་འཐོན། སད་པ་ནི་ཐུར་མ་བཙུགས་ནས་གྱེན་འདྲེན་གྱིས་རང་དྲོད་ཙམ་གྱི་ཆུ་དྲངས། ཁ་སྣར་མཐོན་རིང་སྦྱངས། ཐུར་བསྡིགས་ཀྱིས་ལུས་ལ་མི་བཞག་པར་ཕྱིར་འབོད་དོ། །དེས་འོ་མ་དང་ཁྲག་འདྲེན་ནུས་པ་རེད་ནས་ཐུར་མ་མེད་པ་ལ་བསླབ། ལས་སྦྱོར་ནི་འགྲུབ་པར་འགྱུར། ཞེས་པ། ཐུར་མ་མེད་པ་ལ་གོམས་ནས་སྔར་བཞིན་གྱིས་སམ། ཐུར་མ་དགོས་ན་བུད་མེད་ཀྱི་དྭངས་མ་འབབ་ཆེན་འབབ་ཆུང་གི་དུས་སམ་མཉམ་པར་ཕྱག་རྒྱ་སུ་བྷ་ག་དང་མཉམ་པར་སྦྱར་ཏེ་ཐིག་ལེ་དུམ་བུ་གཅིག་བཏང་བས་དེའི་དྭངས་མ་འབབ། དེ་དུས་ཐུར་མ་བཙུགས་ཏེ་དྲང་ངོ་། །འདི་དྲངས་ནས་དཀར་ཆ་ལས་སུམ་འགྱུར་གྱི་འདྲེན་སོགས་གནད་དུ་བསྣུན་དགོས་སོ། །དེ་ཡང་རང་གི་དཀར་དམར་དང་འདྲེས་ཏེ། སྟོབས་རྒྱས། མདངས་ལེགས། བཀྲག་མཚར། སྐྱེ་དགུའི་ཡི་གར་ཡོང་། རྒས་པའི་འཇིགས་པ་མེད། དྲོད་ལྷག་པར་འཕེལ་བས་ནད་མེད། འཇའ་ལུས་སུ་དྭངས། ཚེ་ཉི་ཟླ་དང་མཉམ་པར་འགྱུར་རོ། །རྡོ་རྗེ་ཁོང་རྒྱོངས་དང་། སྲོ་མ་གྱེན་བསྒྲེང་དང་། བྷ་ག་ཆུ་སྦེད་ལ་སོགས་པའི་རྫས་ཀྱང་། རྡོ་རྗེ་མཁའ་འགྲོར། ལིང་གས་བུད་མེད་བསྒྲུབ་བྱ་ཞིང་། །བྷ་གས་སྐྱེས་པ་བསྒྲུབ་པར་བྱ། །ཞེས་སྨན་ལ་སོགས་པས་རྒྱས་པར་བཤད་དོ། །འདི་རྩ་རྒྱུད་ལས། དབུག་ལ་འདས་ནི་སྦྱར་བྱས་ཏེ། །དུས་མིན་འཆི་བ་བླུ་བ་ལ། །ཡན་ལག་ཁ་ཊྶཱཾ་དག་དང་སྦྱར། །ཞེས་པས་སོ། །གཉིས་པ་ལ། འོག་ཏུ་རྡོ་རྗེ་སྦུབས་འཐེན་གྱིས་སྟོད་དུ་གཙུག་ཏོར་བསྒྲུབ་པ་དང་། དྲི་ཆེན་སོགས་ཀྱིས་དྭངས་མ་སྦྱངས་ནས་འཇའ་ལུས་སུ་བྱེད་པ་གཉིས་ཀྱི། དང་པོ་ལ། བྱིན་རླབས་བླ་མའི་རྣལ་འབྱོར་གྱིས་དྲང་བ། བསྙེན་སྒྲུབ་ལྷའི་རྣལ་འབྱོར་གྱིས། མཁའ་འགྲོ་ལས་ཀྱི་འགུགས་བྱེད་ཀྱིས། མཐར་ཐུག་ཡེ་རླུང་མཉམ་གནས་ཀྱིས་དྲང་བ་བཞི། དང་པོ་ལ། ལུས་རླུང་དམིགས་པའི་གནད་གསུམ་གྱི་དང་པོ་ནི། འདི་རིལ་པོ་ཡང་། གནད་རྣམས་ཀྱིས་ནི། ཞེས་པའི་རྣམས་སྒྲས་བསྟན་ལ། གཡོན་པའི་རྟིང་པས་གསང་རྩ་མནན། རྡོ་རྗེ་འབྲས་བུ་དང་བཅས་པ་སྟེང་དུ་འཐོན་པ་བྱས། གཡས་པ་དེའི་ཐད་ཀྱི་རྒྱབ་ཏུ་བསྟེན་པའི་ཚུལ་དུ་བཙུགས། གཉིས་པ། འོག་སྒོ་གཉིས་དྲག་ཏུ་འཐེན་ཏེ་ཕྱིར་ཤི་ཤི་གལ་གལ་འབུད། མཐར་བུམ་ཅན། གསུམ་པ། རང་བདེ་མཆོག་ཡབ་ཡུམ་དུ་བསྒོམས་པའི་རྡོ་རྗེའི་ནོར་བུ་ནས་མགོ་བོའི་ཚངས་བུག་གི་བར་དུ་དབུ་མ་སྦ་ལྕག་ཙམ་ཐལ་ལེ་ཟུག་པའི་ཡས་སྣར་བླ་མ་ཧེ་རུ་ཀའི་ཆས་ཅན་དུག་སྦྲུལ་གྱིས་ཐོད་བཅིངས་པ། རྒྱལ་པོ་རོལ་པས་བཞུགས་པའི་གཡས་གསེར་གྱི་ཉག་ཐག་གི་རྩ་བ་དེའི་མགོ་གཡོན་དངུལ་གྱི་ལྕགས་ཀྱུ་འཁྱུད་གང་ཙམ་ཡོད་པ་བསྣམས་པ། རང་གི་མས་སྣར་བཏང་བས་རྡོ་རྗེ་ཕྱིར་རྒྱངས་འཐོན། ལྕགས་ཀྱུས་རྡོ་རྗེའི་མགོ་ནས་རྒྱབ་ལུ་གུ་རྒྱུད་ཕྱག་གཉིས་ཀྱིས་ཤུགས་བསྐྱེད་དེ་འཐེན་པས། བུམ་ཅ་རེ་ལ་ལྟེ་བ་སོགས་གནས་ལྔར་སླེབ། བླ་མའི་ཐུགས་ཀར་རྒྱངས་བྱུང་། རྒྱུ་མ་ཕྱིར་འོག་བྱས་པ་ལྟ་བུ་དགྱེ་རེ་ཡོད་པར་བསམ། རླུང་དབྱུང་དུས་ལུ་གུ་རྒྱུད་ལྷོད་བཏང་བས་སྔར་མལ་དུ་གནས་པར་བསམ་མོ། །འགྲུབ་པར་འགྱུར། ཞེས་པས་ལུས་གནད་བཅས་རླུང་མནན་པ་ཙམ་གྱིས་སྦུབས་སུ་ནུབ་པར་འགྱུར། གལ་ཏེ་དེས་མ་ཐུབ་ན། གཉིས་པ་ལ། ཐུར་སེལ་གྱེན་རྒྱུ་དང་བསྲེ་བ། གྱེན་རྒྱུ་ཐུར་སེལ་དང་བསྲེ་བ། དྲུ་བ་ཞུད་ཀྱིས་འདྲེན་པ་གསུམ་གྱི་དང་པོ། ལུས་སྐྱིལ་ཀྲུང་ལག་བསྣོལ་པུས་བཀབ། སྒོ་གཉིས་དྲག་པོར་འཐེན། རླུང་སྟོད་དུ་ཤི་ཤི་གལ་གལ་སྦྱོར་བ་དྲུག་ལྡན་གྱིས་འབུད་པའི་མཐར་ཕྱིར་འཛིན། དེ་འདྲ་གསུམ་གཉིས་པ་རླུང་བརྔུབས་ཏེ་དྲག་པོར་འོག་ཏུ་འཕུལ། རླུང་ཙམ་ཐུབ་འཛིན། མི་ཐུབ་པ་དང་དལ་བུར་བཏང་འཕྲལ་ལ་བརྔུབས་ཏེ་མནན། ཡང་དེ་བཞིན་བྱ་བ་གསུམ་སྤེལ་གྱིན་འཁོར་མར་སྦྱང་། དམིགས་པ་སྔ་མ་ལ་སྣོད་བཅུད་ཐམས་ཅད་འོད་དུ་ཞུ། རྡོ་རྗེའི་བུ་ག་ནས་ཡར་འགྲོ་བས་སྤྱི་བོར་འཐོན་པ་དང་། ཕྱི་མ་ལ་དེ་གོ་བཟློག་ཏུ་བྱའོ། །གསུམ་པ་ལ། གཞན་འདྲ། དབུ་མའི་མར་སྣར་རྡོ་རྗེ་ལྤགས་པ་དང་དབྱེར་མེད་དུ་བསམ། སྦྲུལ་སྦུབས་སུ་ནུབ་པ་ལྟ་བུ་དབུ་མའི་ནང་དུ་སྲིལ་ལི་ལི་བྱུང་ནས་སྤྱི་བོར་འབུར་བྱུང་བར་བསམ། རྒྱབ་གློད་གསང་རླུང་སྤྱི་བོའི་བར་དུ་འདྲེན། དེ་བཞིན་མདུན་གློད་རྒྱབ་རླུང་དེའི་བར་དུ་འཐེན་ནོ། །འདིས་སྦ་བ་སྦུབས་སུ་ནུབ་ཅིང་སྟེང་དུ་གཙུག་ཏོར་འགྲུབ། འོན་ཀྱང་རྡོ་རྗེ་དེ་ཉིད་གཙུག་ཏོར་དུ་འགྱུར་བ་ནི་མ་ཡིན་ཏེ་ནུས་པ་དུས་མཉམ་པ་ལ་དགོངས་སོ། །གཞན་སྤྲུལ་པའི་སྐུ་ལ་བཙུན་མོའི་འཁོར་དོན་མེད་པར་འགྱུར་བས་སོ། །གསུམ་པ་ནི། རྡོ་རྗེ་ལ་ལྕགས་ཕྱེ། སྤྱི་བོར་ཁབ་ལེན་བྱུག གཞན་འདྲ། བཞི་པ་ནི། རྩའི་དྭངས་མ་དབུ་མ་འཇའ་ཚོན་ལྟ་བུ་འོག་ནས་སྤྱི་བོར་ཟུག རླུང་གི་དྭངས་མ་དེ་དང་མི་ཕྱེད་པ། ཐིག་ལེའི་དྭངས་མ་རང་རིག་པའི་ཡེ་ཤེས་ཀྱིས་སྤྱི་བོར་བསྟིམ་མོ། །འདི་རྩ་རྒྱུད་སྔར་གྱི་འཕྲོར། ཐོད་པའི་མཆོད་ཡོན་སྣོད་དུ་ནི། །ཞལ་དུ་མཚོན་ཆ་ངེས་པར་སྦྱར། །ཞེས་པས་སོ། །གཉིས་པ་དྲི་ཆེན་སོགས་ཀྱིས་དྭངས་མ་སྦྱངས་ནས་འཇའ་ལུས་སུ་བྱེད་པའི་ཚུལ་ནི། གནད་རྣམས་ཀྱིས་ནི། ཞེས་པའི་རྣམས་སྒྲས་བསྟན་ནོ། །ལུས་གནད་གོང་མ་བཞིན། དམིགས་པ་རང་ལྷ་ཡབ་རྐྱང་གི་སྤྱི་གཙུག་ནས་བཤང་ལམ་རྡོ་རྗེ་གཉིས་ཀྱི་བར་ལ་ཟུག་པ། རྩ་ཟངས་ཀྱི་གཟེར་བུ་བཏབ་པ་ལྟ་བུའི་སྒོ་ལུས་ཀྱི་གནས་ལྔའི་ཐད་ན་འཕྲེད་ལ་ཟུག་པ་ལུས་ཀྱི་ཕྱི་དྲ་མིག་ལྟ་བུ། རྩ་སྣོད་རེ་རེར་ཐིག་ལེ་དཀར་དམར་འཐིགས་ལ་ཁད་པ་རེ་རེ། ལྟེ་འོག་ཏུ་ཨ་ཤད། སྒོ་གཉིས་ཀྱི་ཐིག་ལེ་ཆེར་དྭངས་པ་དཀར་པོར་ཡོད་པ། རླུང་སྟེང་ནས་བསྡིགས་བསྐྱུར་དུ་བརྫངས་པས་ཨ་ཤད་ལས་མེ་བཤང་ལམ་དང་རྡོ་རྗེ་གཉིས་སུ་བྱུང་། ཐིག་ལེ་གཉིས་པོ་འོད་དུ་ཞུ། འོག་རླུང་འཐེན་བདས་བདས་པས་ཨ་ཤད་ཀྱི་སར་བྲོས། རྩའི་གཟེར་བུ་ཚོ་ནས་ཡར་འོངས་ཐིག་ལེ་རྣམས་བཞུ། རྩ་ཐམས་ཅད་མེར་གང་བར་བསྒོམས་ཏེ་འཁྲུལ་འཁོར་ལ་འབད། འཇུ་བྱེད་ཀྱི་སྨན་བསྟེན་པས། འགྲུབ་པར་འགྱུར། ཞེས། སྙིགས་མ་མེད་པར་འགྱུར་རོ། །གསུམ་པ་རྗེས་ཤེས་སྦྱང་བ་ལམ་ཁྱེར་གྱི་གནད་ནི། རྗེས་ཀྱི་ཤེས་པ་བཙོན་དུ་ཟུང་། །ཞེས་པས། སོ་སོ་རང་རིག་པའི་ཡེ་ཤེས་ཀྱིས་འཛག་མེད་དུ་འཆིང་བའི་སྟོབས་མེད་པས་ཐ་མལ་པ་དེ་ལ་རྗེས་ཀྱི་ཤེས་པར་བརྗོད་ནས། གང་ཟག་དེས་དབབ་པ་ཡང་དྲག་པོར་མི་རུང་སྟེ། གྲུབ་ཐོབ་ཨོ་རྒྱན་པས། མ་ཟིན་དབབ་དྲགས་མདའ་འཕངས་འདྲ། །ཞེས་གསུངས། འོ་ན་ཇི་ལྟར་ཞེ་ན། རྗེ་ནཱ་རོ་པ་ཡབ་སྲས་ཀྱིས། འབེབས་པ་ལ་མཁས་པ་རུ་སྦལ་གྱི་འགྲོས། །ཞེས་པ་ལྟ་བུ། བདེ་བ་འགོ་སྐྱེ་བ་ཙམ་ལ་འཛིན། དེ་ནས་བཟློག་པ་སོགས་བྱ། ཡང་བསྐྱོད་པའོ། །དེ་བས་འཛིན་པ་ལ། རླུང་གི་ཐེམས་བུ། འཁྲུལ་འཁོར་གྱི་ཐེམས་བུ། རྫས་ཀྱི་ཐེམས་བུ་གསུམ་ལས། དང་པོ་ལ། རང་སར་འཛིན། ནང་འཛིན། ཕྱི་འཛིན། མ་ནིང་གི་ཐེམས་བུ་བཞི། དང་པོ་ལུས་གང་གིས་སྦྱོར་བའི་འདུག་སྟངས། རླུང་འོག་གློད་རང་འགག་གིས་སྤྱི་བོ་སོགས་གནས་ལྔ་གར་ཕབ་པ་དེ་ཁར་འཆུན་འདོན་པས་འཁོར་ལོ་ལྔའི་དབྱེ་བས་ལྔ། དང་པོ་ཡས་རིམ། གོམས་ནས་མས་རིམ་གྱིས་བསྡོམས་པས་བཅུའོ། །ནང་འཛིན་ལ་ཡང་ལུས་འདྲ་ལ། སྟེང་བརྔུབས། འོག་གློད་ནས་གནས་ལྔ་སོ་སོར་འཆུན་འདོན་པའོ། །ཕྱིར་འཛིན་རླུང་ཕྱིར་འབུད་དང་དུས་མཉམ་དུ་གནས་སོ་སོར་འཆུན་འདོན། འབུད་རྒྱུ་རྡུགས་པ་དང་འོག་གློད་དེ་ཕྱིར་འཛིན་མ་ནིང་ནི། རླུང་ཕྱིར་ན་ར་ར་རང་ཤུགས་སུ་འགྲོ་བའི་མཇུག་པད་བཅད་ནས་རྒྱབ་འཐེན་རྒྱུ་ཞབས་བརྒྱངས། དེ་བཞིན་ལྟེ་བ་སོགས་སུ་དང་། ཡང་ནང་དུ་ན་ར་ར་འོངས་པའི་གཞུག་བཅད་། བར་རླུང་མགོ་བོར་འཐེན་འཆུན་འདོན། དེ་བཞིན་མགྲིན་པ་སོགས་ལ་ཡང་ངོ་། །་དེ་ནས་དབྱེ་བ་ལྔ་ཅུ་དེ་དག་ལ་བྱང་ནས་རླུང་གཅིག་ལ་རྫོགས་པར་བྱེད་རྫས་ནི། མཁའ་འགྲོ་རྒྱ་མཚོར། བསྲུང་བའི་དུས་སུ་བློ་ལྡན་གྱིས། །རང་གི་ལག་པས་རྡོ་རྗེ་བཟུང་། །ཞེས་པ། ཐིག་ལེ་རྒྱུ་བའི་ལམ་རྟིང་པས་གནོན་པའམ། རང་ངམ་ཤེས་རབ་ཀྱི་ལག་མཐེབ་ཀྱིས་གསང་རྩ་མནན་པ། དེ་ནས་རྡོ་རྗེའི་བུམ་པ། མགོ་མནན་པས་སོ། །དེ་ལྟར་བཟུང་ནས་ཟིན་མ་ཐག་འོག་སྒོ་གཉིས་ལ་འགུལ་སྐྱོད་མེད་པར་བར་རླུང་དྲག་པོར་འཐེན། ཕྱིར་འབུད་ལན་བཅུ་གཉིས་བྱ། ཧ་ཞེས་དྲག་ཏུ་འཐེན་ཅིང་ཕྱིར་འཛིན། དེ་ནས་ནང་དུ་བརྔུབས། བར་རླུང་ཐུར་དུ་འཕུལ། འོག་སྒོ་གཉིས་ཀྱང་ཕྱིར་དྲག་ཏུ་འཕུལ། ཙམ་ཐུབ་བགག མི་ཐུབ་ན་ལྟེ་བ་ན་བར་རླུང་རྡེབ་བསྐྱུར་མང་དུ་བྱའོ། །དེ་ལྟ་བུ་ཧ་དང་ཧོ་དང་ཧ་ཧག་ཅེས་པ་ལ་བདུན་བདུན་ནོ། །དེས་མ་འདྲོངས་ན། ཕྱག་རྒྱ་དང་བྲལ་བས་རང་ལུས་ཀྱི་འདྲེན་ཀྱང་བྱའོ། །དེ་ལྟར་བཟློག་ཐུབ་ན་རྡོ་རྗེ་རང་ཞི་བ་དང་སྨད་ཡང་གི་འགྲོ། འཆུན་གར་བཏོན་སར་བདེ་ཆས་བསྐྱེད། དེ་ནས་སྔར་བཞིན་དྭངས་སྙིགས་ཕྱེ་ནས་དེ་ནས་འགྲེམས་ཏེ། དྭངས་འགྲེམས་གཡས་ས་ལ་ཕབ། དེའི་འཕར་རྩ་བསྡམས། རླུང་རང་འགྲོས་ཀྱི་གཞུག་པད་བཅད་དེ་འདར་ཕྲིག་པ་བདེ་ཟུག་དང་བཅས་པ། དེ་དུས་རླུང་དགང་སྟེ་བུམ་པ་ཅན་འཛིན། གཡོན་ལའང་དེ་བཞིན། སྐྱིལ་ཀྲུང་གིས་བཀག་སྟེ་ཕོ་བར་མནན། དབུགས་མ་བདེ་བ་ཤུགས་རིང་ན་རེ་བ་འོང་། དེ་དུས་རླུང་གཞུག་ནང་དང་ཕྱིར་བཟུང་བས་བདེ་བ་སྐྱེ། གཡས་སུའང་དེ་བཞིན། སྙིགས་འགྲེམས་རང་ལུས་བཞིན་ནོ། །མཐར་འབེབས་དང་རང་ལུས་བཞིན་གྱི་སྙིགས་མ་འབོད། དེ་ནས་བུམ་པ་ཅན་མང་དུ་འཛིན། བདེ་བ་གང་སྐྱེས་དེ་དང་ཕྱིའི་སྣང་བ་བསྲེས་པས་ཐམས་ཅད་བདེ་ཆེན་དུ་འཆར་བར་འགྱུར་རོ། །དེ་ལྟ་བུས་ཕྱག་རྒྱ་མ་བསྟེན་པའི་སྐྱོན། རྡོ་རྗེ་མཁའ་འགྲོར། སྐྱེ་བོ་ཐབས་དང་བྲལ་བ་ན། །ཚུལ་ངན་དམན་པ་དཀའ་བས་སྒྲུབ། །བདག་ཉིད་སྒྲུབ་པ་དང་བྲལ་བས། །སྐལ་མེད་ངལ་བ་དོན་མེད་ཅིང་། །དེ་ལ་དངོས་གྲུབ་ཞེས་མི་བརྗོད། །ཅེས་དང་། བསྟེན་དུས་དེ་ཉིད་དུ། ཉི་མ་རེ་རེ་ཞིང་ངོ་། །ཡང་ན་ཟླ་བས་སོ། །ཡང་ལོ་རེ་བཞིན་ཏེ། ཞེས་འབྱུང་། གང་ཟག་ཁྱད་པར་འཕགས་པར་ཡང་། །བསྟན་པ་སྨོད་པས་འཇིགས་པ་ན། །རང་སེམས་ཙམ་ལ་མོས་པ་བྱ། །ཞེས་སམ་བུ་ཊར་གསུངས་པ་བཞིན་བྱའོ། །གནད་མི་ཤེས་པར་བསྟེན་ན། ཧེ་རུ་ཀ་སྔོན་འབྱུང་ལས། རྣལ་འབྱོར་མེད་པར་རྣལ་འབྱོར་ཆོས། །ཕྱག་རྒྱ་ལ་ནི་བགྲོད་གྱུར་དང་། །ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བར་ཐེ་ཚོམ་མེད། །ཞེས་སོ། །བསྟེན་པའི་ཕན་ཡོན། རྡོ་རྗེ་མཁའ་འགྲོར། གང་གི་བླུན་པོ་འཆིང་གྱུར་བ། །འདིར་དེས་མཁས་རྣམས་རྣམ་གྲོལ་ཞེས། །ཕྱག་རྒྱའི་སྦྱོར་བ་འདི་ཡིས་ནི། །ས་གསུམ་མ་ལུས་བཟའ་བར་བྱ། །གཞན་དུ་གལ་ཏེ་སྦྱོར་བ་ནི། །མ་ཚང་མར་མེ་ལྟ་བུ་འདའ། །ཞེས་པ་སྟེ། དེ་ཕྱིར་རྩ་རྒྱུད་ལས། ཕོ་ཉ་རལ་གྲིའི་སོ་དང་འདྲ། །ཞེས་གསུངས། ལམ་འདི་ཡང་རྩ་རྒྱུད་ལས། ཁ་དོག་ཕོ་ཉ་སོགས་སྔགས་གང་། །མདའ་ཡི་ཤུགས་ཀྱིས་ཡོངས་སུ་བསྐོར། །ཕན་ཚུན་འདུད་རྒྱུད་དཔའ་བོ་ནི། །ཡུལ་ཉིད་ཀྱིས་ནི་ཕྱེ་བའོ། །ས་བོན་འཕྲེང་བ་དེ་ནས་བཟུང་། །ཧཱུྃ་གི་མཐའ་རུ་གནས་པ་ཡིན། །བསྒྲུབ་བྱ་འགོག་པར་གྱུར་པ་ནི། །གོམས་པ་གཅིག་ཀྱང་མི་འགྲོའོ། །ཁ་སྦྱར་སྦྱར་བར་གྱུར་པ་དང་། །རྡོ་རྗེ་ལུ་གུ་རྒྱུད་བཅིངས་པས། །རྡོ་རྗེ་དབྱེ་བ་ཉིད་དང་ནི། །དེ་བཞིན་བུང་བ་ལྟར་འཁོར་བྱ། །ལྕགས་ཀྱུ་ཉིད་ཀྱིས་དགུག་པ་དང་། །གཏུན་ཤིང་གིས་བསྐྱོད་དེ་བཞིན་ཏེ། །རྡོ་རྗེ་ཉིད་ཀྱིས་འདེབས་པར་བཤད། །ཅེས་པས་སོ། །བཞི་པ་གནས་སྐབས་གཉིས་ཀྱི་འབྲས་བུ་བཞག་པ་ནི། འཕྲལ་ནི། མཐའ་མ་འདུ་བ་རྣམ་གསུམ་འགྱུར། །ཞེས་པ། འདུ་བ་རྣམ་གསུམ་ཡང་གསང་བར་རྩ་གནས་སུ་སྲོག་དང་ཐིག་ལེ་འདུ། ནང་དུ་དཔའ་བོ་དང་མཁའ་འགྲོ་འདུ། ཕྱིར་སྐྱེ་བོ་ཕོ་མོ་དང་ཟས་ནོར་ལོངས་སྤྱོད་འདུའོ། །འབྲིང་ནི་དྭངས་མའི་ལུས་སུ་འགྱུར། དེ་ཕྱིར་ལས་རྒྱའི་འབྲས་བུ་འདོད་པའི་རིག་འཛིན་དུ་དུས་འཁོར་ལས་བཤད་པ་རྐྱང་པའི་དབང་དུ་མཛད་ལ། འདིར་ཕྱག་རྒྱ་གཉིས་གཞི་གཅིག་ལ་འདུ་བས་འོག་མིན་པའི་བར་སྒྲུབ་པ་ཡིན་ནོ། །མཐར་ཐུག་ནི། རབ་ཀྱི་ཚེ་འདིར་འཇའ་ལུས་འཐོབ། འདིར་འཇའ་ལུས་ནི་རྫོགས་པའི་སངས་རྒྱས་ཏེ སྤྱོད་རྒྱུད་དུ། འཇའ་ཚོན་ལྟ་བུའི་ལུས་དག་ནི། །དེ་ཉིད་བསྒོམས་པས་ཐོབ་པར་འགྱུར། །ཞེས་བཤད་དོ། །བཞི་པ་དམིགས་བཅས་ཐམས་ཅད་དམིགས་མེད་དུ་རོ་མཉམ་སྟེ་ལྷན་ཅིག་སྐྱེས་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་དབང་བཞི་པའི་ལམ་ལ། རྣམ་ཤེས་ཡེ་ཤེས་སུ་མ་སྨིན་པ་སྨིན་པར་བྱེད་པའི་དབང་། སྨིན་ཟིན་གྲོལ་བར་བྱེད་པ་ཕྱག་རྒྱ་ཆེན་པོའི་གདམས་ངག་གཉིས་ལས། དང་པོ་ནི། བཞི་པའི་རིམ་པས་སྨིན་པར་བྱེད། །ཅེས་པས་ཚིག་དབང་དང་། གཉིས་པ་ལ། ངོ་སྤྲོད་ལྟ་བའི་སྐོར། མཉམ་གཞག་སྒོམ་པའི་སྐོར། ལམ་ཁྱེར་སྤྱོད་པའི་སྐོར། མཐར་ཕྱིན་འབྲས་བུའི་སྐོར་དང་བཞི་ལས། དང་པོ་ནི། བརྗོད་དུ་མེད་ཅིང་། ཞེས་པས། ལུས་སེམས་རྣལ་དུ་ཕབ་ནས་རྟོག་པའི་རྒྱུན་སྦད་དེ་བཅད་པའི་དུས་དེར་བསམ་དུ་མེད་པ་བརྗོད་པས་གཏན་ལ་མི་ཕེབས་པའི་རང་ལུགས་ཅིག་འདུག་པ་དེ་ཀ་མ་སྐྱེས་པ་གཞིའི་གནས་ལུགས་སངས་རྒྱས་ཀྱི་ཡེ་ཤེས་དང་ཐ་མི་དད་པའོ། །ཡུལ་ལས་འདས། ཞེས་པ། ཡུལ་ལས་འདས་ནས་གཞན་དུ་འགྲོ་བ་སྟེ། དེ་རྐྱེན་བུམ་པ་ལྟ་བུ་དང་ཕྲད་ན། བུམ་འཛིན་རྟོག་པར་འཆར། དེ་སྔར་མེད་པ་ལ་གསར་དུ་བྱུང་བས་ཅི་སྐྱེས་ཐམས་ཅད་རྟོག་པ། རྐྱེན་གཉིས་པ་ཀ་བ་ལྟ་བུ་ཞིག་དང་ཕྲད་ན་སྔ་མའི་བུམ་འཛིན་ནུབ་ནས་ཕྱི་མའི་ཀ་འཛིན་ལངས་པས་རྟོག་པ་དེ་ཚུགས་མི་ཐུབ་པས་གློ་བུར་བ། སྤྲོས་བྲལ་ཞེས་པ། རྟོག་པ་དེ་ཀ་སྣང་དུས་སུ་ཡང་དེ་ཉིད་དུ་མ་གྲུབ་པས་སྐྱེས་པ་དང་མ་སྐྱེས་པ་དེ་གཉིས་གཉིས་སུ་མེད་པས་སྤྲོས་བྲལ་ཏེ། དོན་བུ་རམ་ལ་གཟུགས་དུ་མ་བྱས་པས། སྣང་བྱའི་ངོས་ནས་དུ་མ། རོའི་ངོས་ནས་མངར་མོར་གཅིག་པ་བཞིན་དུ། གདངས་ཀྱི་ངོས་ནས་དུ་མ། གཤིས་ཀྱི་ངོས་ནས་གཅིག་པས་འཁོར་འདས་དབྱེར་མེད་དུ་བཤད་དོ། །ས་ར་ཧས། མ་སྐྱེས་པ་ལས་རྟོག་པ་གློ་བུར་བ། །རྟོག་པ་དེ་ཉིད་དབྱིངས་ཀྱི་ངོ་བོ་ཡིན། །ཞེས་པས་སོ། །ནམ་མཁའི། ཞེས་པ་དེ་ཡང་། མཐའ་ཐམས་ཅད་དང་བྲལ་ཞིང་དབུས་མི་དམིགས་པས་ནམ་མཁའི་དབྱིངས་ལྟ་བུའོ་ཞེས་རྟག་ཆད་ལས་འདས་པར་བསྟན། ངོ་བོ་ཉིད། ཅེས་པ། གཞི་དེ་རྟོགས་པ་ན་སྡུག་བསྔལ་ཐམས་ཅད་ཟད་པས་དེ་ཉིད་ལ་གནས་ལུགས་བདེ་བ་ཆེན་པོ་ཞེས་བཏགས་སོ། །གཉིས་པ་ནི། ཤེས་རབ་ཡེ་ཤེས་ཆེན་པོ་ནི། ཞེས་པ། རབ་བླ་མ་དམ་པའི་བྱིན་རླབས་ཀྱིས་ལྟ་སྒོམ་སྤྱོད་པ་རོ་མཉམ་དུ་རྟོགས་ཏེ་བསྒོམ་བྱ་སྒོམ་བྱེད་མེད་པས་འབད་མེད་དུ་གྲོལ་བས་ཤེས་རབ་ཆེན་པོ་དབང་བཞི་པའི་ཡེ་ཤེས་སོ། །འབྲིང་། བལྟ་ན་རང་གི་སེམས་ལ་ལྟོས། །ཞེས་པ། ལྟ་ཐོག་ནས་སྒོམ་པ་འཚོལ་བ་ཞེས་བྱ་སྟེ། ལྟ་བས་གཏན་ལ་ཕབ་པ་དེ་ཀ་ལ་ཡིད་ལ་མི་བྱེད་པས་མཉམ་པར་གཞག་གོ །ཡིད་ལ་མི་བྱེད་པ་ཡང་སེམས་ཇི་བཞིན་དུ་གཞག་པ་ལས་གཞན་གཉེན་པོས་བཅོས་མི་གདབ་པའོ། །དེ་ཡང་། མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་བ་དེ་དེ་ཉིད། །དེ་རིང་མགོན་པོ་ང་ལྟར་འཁྲུལ་པ་ཆད། །ད་ནི་སུ་ལའང་འདྲི་བར་མི་བྱའོ། །ཞེས་པས་སོ། །མཐའ་མ་ལ། སེམས་ཀྱི་རང་ལུགས་དང་མཐུན་པར་སྒོམ་ཏེ། ལུས་རང་བབས་སུ་གཞག དུས་གསུམ་གྱི་སྤྲོས་པ་བཅད། བྲམ་ཟེ་སྐུད་པ་འཁལ་བ་བཞིན་དུ་གྲིམས་ལྷོད་སྙོམས་པར་བྱའོ། །དེ་ཡང་། བསམ་དང་བསམ་བྱ་ཐམས་ཅད་ཡོངས་སུ་དོར་ནས་སུ། །ཇི་ལྟར་བུ་ཆུང་ལྷུག་པར་གནས་པ་བཞིན། །བླ་མའི་ལུང་ལ་བསྒྲིམས་ཏེ་གུས་འབད་ན། །ལྷན་ཅིག་སྐྱེས་པ་འབྱུང་བར་ཐེ་ཚོམ་མེད། །ཅེས་སོ། །གསུམ་པ་ནི། བཞི་པ་བསྐུར་བའི་རྣལ་འབྱོར་པས། །ཞེས་པ། དབང་བཞི་པ་ཐོབ་ནས་ཆོས་ཅན་ཐམས་ཅད་ཆོས་ཉིད་རྣལ་མ་ལ་འབྱོར་བས་ཏེ། མཉམ་ཉིད་ཁོང་དུ་ཆུད་པས་སོ། །བཞི་པ་ནི། དེ་ལྟར་རྟོགས་ན་འབྲས་བུ་འཐོབ། །ཅེས་པ། སེམས་ཀྱི་གནས་ལུགས་མཐོང་བས་ས་ལམ་མ་ལུས་པ་རྟོགས་པ་གཅིག་གིས་བགྲོད་པའོ། །དེ་ཡང་། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་པས་སོ། །འདི་རྩ་རྒྱུད་ལས། སངས་རྒྱས་རྣམས་ནི་བྱུང་གྱུར་ཏམ། །མ་བྱུང་ན་ཡང་རྣམ་ཀུན་ཏུ། །བསམ་མི་ཁྱབ་པའི་ཆོས་ཉིད་ནི། །འཕེལ་འགྲིབ་སྤངས་པས་གནས་པ་ཡིན། །དེ་ལྟར་རྣམ་པར་གཞག་ནས་ཀྱང་། །འཇིག་རྟེན་པ་ཀུན་ཡོངས་མི་སྨད། །དེ་ཡི་བགྲོད་པ་བསམ་ཡས་ཤིང་། །སངས་རྒྱས་རོལ་པ་བསམ་མི་ཁྱབ། །ཅེས་པས་བསྟན་ནོ། །ལྔ་པ་བྱ་སྤྱོད་ཐམས་ཅད་ཧེ་རུ་ཀའི་རོལ་མོར་བཏང་ནས་བཙན་ཐབས་སུ་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་སྤྱོད་པ་འཇིགས་བྲལ་རྡོ་རྗེའི་མཚོན་ཆ་ལ། འབྱོར་པ་ཅན་གཙང་སྦྲ་རྣམ་པ་གསུམ་གྱི་སྒོ་ནས་ཀུན་བཟང་གི་སྤྱོད་པ་མཐར་ཕྱུང་བ། ཀུ་ས་ལི་སྤྱོད་ཡུལ་བཞིའི་སྒོ་ནས་གསང་སྤྱོད་ལམ་དུ་སློང་བ། ནུས་ལྡན་གྱི་གང་ཟག་རིག་པའི་བརཏལ་ཞུགས་ལ་བརྟེན་ནས་ཧེ་རུ་ཀའི་རོལ་པས་འདའ་བ། འཚང་རྒྱ་ཁ་མ་དངོས་གྲུབ་ཀྱི་ཉེ་རྒྱུར་ཕྱོགས་ལས་རྣམ་རྒྱལ་གྱི་སྤྱོད་པ་བརྩམ་པ་བཞི་ལས། དང་པོ་ལ། ཕོ་ཉའི་གཙང་སྦྲ། ཞི་བའི་གཙང་སྦྲ། སྣོད་གཅིག་ཏུ་ཟ་བའི་གཙང་སྦྲ་སྟེ་གསུམ། དང་པོ་ནི། མདོར་བསྟན་དུ། རྡོ་རྗེ་ལམ་མཆོག་ཅེས་པས། སྤྲོས་བཅས་ལ་རང་རང་ཕྱག་རྒྱ་བཅུ་གསུམ་དང་བཅས་ཏེ་བརྡ་དང་བརྡའི་ལན་གྱི་འདུས་ཏེ། ཐ་མལ་པའི་འཇུག་པ་བགགས་པས་ཕྱི་རོལ་མཆོད་པའི་ཆོ་ག་ཇི་ལྟ་བས་འདོད་པའི་ཡོན་ཏན་ལྔ་ལ་ཚོགས་ཀྱི་འཁོར་ལོ་བསྐོར་བ་སྟེ། འདི་ཡང་། རྩ་རྒྱུད་ལས། ནང་པར་སྔར་ལངས་སེམས་བདག་ཉིད། །ལུས་ལ་ཐམས་ཅད་བྱས་ནས་ནི། །ཡན་ལག་ལས་འདས་མཚོན་ཆ་རྣམས། །ལུས་ལ་གནས་པས་ཀུན་ཏུ་སྤྱད། །ལུས་ནི་དག་བྱེད་བྱས་ནས་སུ། །རྟག་ཏུ་སྔགས་ནི་བརྗོད་ནས་ནི། །རྣལ་འབྱོར་གནས་རྣམས་ངེས་བསྟན་ཅིང་། །མཚོན་ཆ་རྣམས་ནི་བསྒོམ་མི་བྱ། །དམ་ཚིག་ཅན་ལ་ཁྲོ་མི་བྱ། །མངོན་པར་བརྩོན་ལས་འདའ་མི་བྱ། །དེ་དང་ལྷན་ཅིག་བདེ་བར་བྱ། །གྲོལ་བའི་དོན་དང་བདེ་དོན་དུ། །དམ་ཚིག་སྤྱོད་པ་ཉིད་དུ་བྱ། །ཞེས་སོགས་པས་སོ། །སྤྲོས་མེད་ནི་ཕྱག་རྒྱ་དྲུག་དང་། །ལོ་ལ་རེའམ་དགུན་ཟླ་འབྲིང་པོ་རིལ་པོ་ལའོ། །ཤིན་ཏུ་སྤྲོས་མེད་ནི། རང་གི་ཁྱིམ་དུ་ཕྱག་རྒྱ་གཅིག་དང་ལྷན་ཅིག་ལས་ཏེ། ཟླ་བ་བྱུང་ངོ་ཅོག་གི་ཡར་མར་གྱི་ཚེས་བཅུ་ལ་བརྩམ་མོ། །དེས་སེམས་ཞི་གནས་སྟོང་པར་དབེན་པར་འགྱུར་ཏེ། ལྷ་སྔགས་ཕྱག་རྒྱའི་རོལ་མོར་གྱུར་པས་སོ། །གཉིས་པ་ནི། དེ་ཉིད་པ་ནི་དེ་ཉིད་ཀྱིས། །ཞེས་པ། རྩ་རྒྱུད་ལས། རྣམ་འཕྲུལ་སེམས་པ་ལས་གྲོལ་ཞིང་། །ཞེས། དེ་ལ་གོམས་པར་བྱས་ན་ཞི་བའི་གཙང་སྦྲར་འགྱུར་ཏེ། དེ་ཡང་དངོས་པོར་འཛིན་པས་དབེན་པས་ན་ལྷ་སྔགས་ཕྱག་རྒྱ་དེ་དག་སྒྱུ་མ་ལྟ་བུར་རྟོགས་པའོ། །གསུམ་པ་ནི། རྡོ་རྗེའི་ལུས། ཞེས་པ། སྣང་གྲགས་ཐམས་ཅད་སྦྱངས་ཤིང་ལུས་དྭངས་མ་འཇའ་ལུས་སུ་བསྒྱུར་ནས་སངས་རྒྱས་ཀྱི་ཞིང་ཁམས་མྱུལ་བ་རྒྱལ་པོ་ཨིནྡྲ་བྷཱུ་ཏི་ལྟ་བུ་སྟེ། དེའི་ཚེ་སྣོད་གཅིག་ཏུ་ཟ་བའི་གཙང་སྦྲ་སྟེ། སྟོང་པའི་ཡེ་ཤེས་སྣང་བས་དབེན་པས་སོ། །རྩ་རྒྱུད་ལས། ཕོ་ཉ་གཙང་སྦྲ་དང་པོ་ཡིན། །གཉིས་པ་ཞི་བ་ཡིན་པར་འདོད། །སྣོད་གཅིག་ཏུ་ནི་ཟ་བ་དག །གཙང་སྦྲ་གསུམ་པ་ཡིན་པར་བཤད། །ཅེས་སོ། །དེ་བས་ན། དང་པོ་བུམ་དབང་། གཉིས་པ་གསང་དབང་། གསུམ་པ་དབང་གོང་མ་གཉིས་དང་འབྲེལ་བའི་སྤྱོད་པར་འགྱུར་རོ། །གཉིས་པ་ལ། ཕྱི་གཅོད་གཟུང་བའི་ཡུལ་ལ་བྱ་བ། ནང་གཅོད་འཛིན་པ་སེམས་ལ་བྱ་བ། བར་གཅོད་སྒྱུ་མའི་གཟུགས་ལ་བྱ་བ། གསང་གཅོད་ལྷ་འདྲེ་སྟོང་པའི་གཟུགས་བརྙན་ལ་བྱ་བ་བཞི་ལས། དང་པོ་ནི། གནད་ཅེས་པ་གཅོད་ཡུལ་གྱི་གནད་དོ། །འདི་ཞེས་པ་སྣང་ཞིང་གྲགས་པ་ཐམས་ཅད་ལའོ། །དེ་ཡང་། ཕྱི་སྣང་བ་འདི་ཐམས་ཅད་ཇི་ལྟར་སྣང་། ཇི་ལྟར་གྲགས་ཀྱང་། མ་རྟོགས་པའི་དུས་ན་དེ་དང་དེ་དག་ཏུ་གཟུང་བས་ཕྱི་ཡུལ་གྱི་སྣང་བ་དེ་ནས་བདེན་བདེན་མོར་སོང་སྟེ། དེས་ལུས་ཅན་ཐམས་ཅད་འཆིང་བར་བྱས་པ། དཔེར་བགྱིས་ན་རྫུན་སྨྲ་མཁས་པའི་རྫུན་ཚིག་བཞིན། །དེ་ཕྱིར་འདི་དག་སྣང་ན་འཁྲུལ་སྣང་ངོ་། །དེ་རྟོགས་པ་རྣམས་ལ་མི་འཆིང་བའི་ཁར་གྲོལ་བའི་རྐྱེན་ནམ་གྲོགས་སུ་འགྲོ་སྟེ། དངོས་པོར་མ་གྲུབ་པས་སྒྱུ་མ་ལྟ་བུར་སྣང་ལ། སྒྱུ་མ་ལྟ་བུ་ལ་སྒྱུ་མ་ལྟ་བུས་རྩལ་སྦྱངས་པས། མཐར་ཐུག་པ་ན་སྣང་མ་མྱོང་བ་རྟོགས་ཏེ་རྫུན་གྱི་ཕུགས་རྡིབ་པ་ལྟ་བུའོ། །དེ་ལྟར་ཤེས་པས་འཇིག་རྟེན་ཆོས་བརྒྱད་ལ་སྒྱུ་མ་ལྟ་བུར་བལྟ་ཞིང་ཐོག་བརྫིས་སུ་བྱས་པས་དེར་འཛིན་གྱི་མཁན་པོ་ཟད་ནས་སྣང་བ་སྐྱེ་མེད་དུ་འདག་གོ །མཻ་ཏྲི་པ་ཡབ་སྲས་ཀྱི་དགོངས་པ་རྗེ་བཙུན་གྱིས། སྐྱེས་མཆོག་མར་པར་འདི་སྐད་གསུང་། ཕྱི་སྣང་བ་ཇི་ལྟར་སྣང་ལགས་ཀྱང་། །མ་རྟོགས་དུས་ན་འཁྲུལ་པ་སྟེ། །ཕྱི་ཡུལ་གྱི་སྣང་བས་འཆིང་བར་བྱེད། །རྟོགས་པ་རྣམས་ལ་སྒྱུ་མར་སྣང་། །ཡུལ་སྣང་སེམས་ཀྱི་གྲོགས་སུ་འཆར། །མཐར་ཐུག་དོན་ལ་སྣང་མ་མྱོང་། །སྐྱེ་མེད་ཆོས་སྐུར་དག་གོ་གསུང་། །ཞེས་སོ། །གཉིས་པ་ནི། གནད། ཉིད། ཅེས་པ། སྣང་བ་ཕྱིར་འཕུལ་མཁན་གཞན་ན་མེད། ནང་འགྱུ་བ་ཡིད་ཀྱི་རྣམ་པར་ཤེས་པའམ་འཛིན་པ་འདི་ཉིད་ཡིན་ནོ། །དེ་ཡང་། མ་རྟོགས་པས་མ་རིག་པ་ཞེས་བཞག་སྟེ་ལུས་ཐམས་ཅད་ཉོན་མོངས་པར་བྱེད་པའི་གཞིའམ་རྩ་བར་འགྱུར་རོ། །མ་རིག་པ་སྣང་དུས་དེ་ཁར་མ་གྲུབ་པར་རྟོགས་པ་ལ་རང་རིག་པའི་ཡེ་ཤེས་ཟེར། གཞན་གྱི་རྐྱེན་འཇུག་པ་མེད་པས་སོ། །དེ་ཙ་ན་ཐར་པ་དང་གོམས་པས་ཐམས་ཅད་མཁྱེན་པའི་ཡེ་ཤེས་རྫོགས་པར་འགྱུར་ཏེ། མ་རིག་པའི་འགྱུར་བ་ཟད་པ་ཉིད་བདེ་བ་ཆེན་པོའི་ཡེ་ཤེས་ཡིན་ལ། ཐར་པའི་གནས་སྐབས་ཐམས་ཅད་ནི་དེ་ངོ་མ་འགྱུར་བའི་ལྡོག་པས་དབྱེ་བ་ཙམ་དུ་ཟད་ལ། མཐར་ཐུག་པ་ན་རང་གི་རིག་རྒྱུ་དེ་ཁོ་ན་ཉིད་མེད་པས་ཡེ་ཤེས་ཀྱང་མེད་པས་ན་ཆོས་ཐམས་ཅད་ཟད་སར་སུས་འཁྱོལ་བ་དེ་ལ་སངས་རྒྱས་སུ་བཏགས་པར་འདུག་གོ་སྙམ་ངེས་པས། འགྱུ་བ་སྐད་ཅིག་གཉིས་སུ་ཡན་མི་འཇུག་པར་རང་ངོ་རང་ཤེས་ཀྱིས་ཐོག་བརྫིས་སུ་བྱའོ། །དེ་ཡང་རྫེ་བཙུན་གྱིས། ནང་འགྱུ་བ་ཡིད་ཀྱི་རྣམ་ཤེས་འདི། །མ་རྟོགས་དུས་ན་མ་རིག་པ། །ལས་ཉོན་མོངས་ཀུན་གྱི་གཞི་རྩ་བྱེད། །རྟོགས་ན་རང་གི་ཡེ་ཤེས་དེ། །དཀར་པོའི་ཡོན་ཏན་རྫོགས་པར་འབྱུང་། །མཐར་ཐུག་དོན་ལ་ཡེ་ཤེས་མེད། །ཆོས་རྣམས་ཟད་སར་སྐྱོལ་ལོ་གསུངས། །གསུམ་པ་ནི། གནད། ལས། ཞེས་པ། གཟུང་འཛིན་གཉིས་སུ་སྦྱོར་མཁན་ཡང་ཉེ་བར་ལེན་པ་གཟུགས་ཕུང་འདི་ཡིན་ལ། མ་རིག་པའི་གཡོ་བ་ལས་འབྱུང་བ་བཞིར་གྲུབ་པས་ལས་སྣ་ཚོགས་སྤྱད། དེའི་འབྲས་བུ་འཁོར་བར་འཁོར། རིགས་དྲུག་ཏུ་འཁྱམས། ཆགས་སྡང་སྣ་ཚོགས་ཀྱིས་གཟིར་བས། ན་ཚ་སྡུག་བསྔལ་ཐམས་ཅད་བྱུང་ལ། རྟོགས་ན་ལྷའི་སྐུ་སྟེ། གདོད་ནས་གྲུབ་པའི་དཀྱིལ་འཁོར། རྣམ་པའི་བསྒྱུར་བསྒོམ་ལ་མ་བལྟོས་པའམ་བལྟོས་ཀྱང་འདྲ། ཐ་མལ་གྱི་ཞེན་པ་ཟློག་པར་བྱེད་པ། མཐར་ཐུག་ན་ལུས་སུ་གྲུབ་པ་མེད་དེ། སྤྲོས་པ་དང་བྲལ་བ་དེའི་གནས་ལུགས་ཡིན་པས་སོ། །ཞེས་ཤེས་པར་བྱས་ལ་ན་ཚ་སྡུག་བསྔལ་ཉོན་མོངས་ཐམས་ཅད་ལ་སྤང་བློ་མ་སྐྱེས་པར་དེ་ཐོག་ཏུ་ཐོག་བརྫིས་བྱ། དེ་ཡང་། ཉེར་ལེན་གཟུགས་ཀྱི་ཕུང་པོ་འདི། །མ་རྟོགས་དུས་ན་འབྱུང་བཞིའི་ལུས། །ན་ཚ་སྡུག་བསྔལ་དེ་ལས་བྱུང་། །རྟོགས་ན་ལྷ་སྐུ་ཟུང་འཇུག་སྟེ། །ཐ་མལ་ཞེན་པ་ཟློག་པར་བྱེད། །མཐར་ཐུག་དོན་ལ་ལུས་མེད་དེ། །སྤྲིན་བྲལ་ལྟར་མཁའ་དག་གོ་གསུངས། །ཞེས་སོ། །བཞི་པ་ལ། རྡོ་རྗེའི་ཚིག་རྐང་གི་དོན་བཤད། སྙིང་པོ་ལག་ཁྲིད་དུ་བསྟན་པ་གཉིས་ལས། དང་པོ་ནི། རྡོ་རྗེ། ཞེས་པས་སྟོང་པ་ཉིད་དེ། སྟོང་ཉིད་ཡེ་ཤེས་རྡོ་རྗེའོ་ཞེས་འབྱུང་བས་སོ། །དེ་ཡང་། སྒྱུ་མ་ལྟ་བུའི་ལྷའི་ངེས་པས་སྣང་བ་ཐམས་ཅད་སྒྲིབ་བྲལ་དུ་བཟའ་བའོ། །གསང་བ། ཞེས་པ་སྤྱོད་པ་དེ་སྦས་ནས་བྱ་བའི་ཕྱིར་དང་། མཆོག་ཐོབ་ནས། ཞེས་པ་དེས་ཐུན་མོང་གི་བར་པ་ཐོབ་ཅིང་སྒྱུ་མ་ཙམ་གྱི་སྣང་བའི་བར་སེང་འགའ་རེ་ལ་སྣང་བ་མེད་པའི་ཡེ་ཤེས་དམ་པ་ལ་གནས་པའང་བསྟན་ནོ། །གཉིས་པ་ལ། སྔོན་འགྲོ་འདུན་པའི་སྟོབས། དངོས་གཞི་སྒྱུ་མའི་གསེབ་ལམ། རྗེས་སྙིང་རྗེའི་རྩལ་འདོན་པ་དང་གསུམ་ལས། དང་པོ་ནི། གཉན་ས་འགྲིམ་པ་དང་། དགོན་གནས་གཉན་པོར་འདུག་པ་ཐམས་ཅད་ཀྱི་དུས་ལྷ་འདྲེའི་གདུག་རྩུབ། ལུས་སེམས་ཀྱི་བར་ཆད། འཇིག་རྟེན་གྱིས་སྨོད་པའི་མེ་དབལ་ཐམས་ཅད་བྱུང་ན་དགའ་བའི་འདུན་པ་དྲག་པོ་བཏང་བས་དོགས་པའི་མདུན་བསུ། ཡོན་ཏན་སྙན་གྲགས་སྐྱིད་པ་སོགས་མ་བྱུང་ན་དགའ་བས་རེ་བའི་འཕྲང་ཐམས་ཅད་བཀག་པས་དངོས་གཞི་ལམ་ཁྱེར་གྱི་གྲོགས་སུ་འགྲོ་བ་ནི། གཅིག་བྱུང་དོགས་ཅིག་ཤོས་ཡོང་རེ་བའི་འདུན་པའི་ཁྱད་ཞུགས་པས་ཇག་པ་ཉུང་ངུས་ཚོང་རྡལ་ཆེན་པོ་འཇོམས་ནུས་པ་ལྟ་བུའོ། །གཉིས་པ་ལ། རབ་བཅར་ཉལ་འཕྲིག་མེད་ཀྱི་གནད་ཀྱིས་གདོན་ཆོས་སྐུར་བལྟ་བ། འབྲིང་ཕུང་པོ་གཟན་བསྐྱུར་གྱི་གནད་ཀྱིས་གདོན་ལོངས་སྐུར་བལྟ་བ། མཐའ་མ་ཕུང་པོ་ཚོགས་འཁོར་གྱི་གནད་ཀྱིས་གདོན་སྤྲུལ་སྐུར་བལྟ་བ་གསུམ་ལས། དང་པོ་ནི། སྤྱིར་སྣང་ཞིང་སྲིད་པའི་ཆོས་ཐམས་ཅད་ཀྱང་རང་སེམས་ཀྱི་ཆོ་འཕྲུལ་མ་གཏོགས་དོན་ལོགས་ཞིག་ན་གྲུབ་པ་ཅང་མེད། སེམས་ཀྱི་རང་བཞིན་འོད་གསལ་ཞིང་སྤྲོས་པའི་མཐའ་ཐམས་ཅད་དང་བྲལ་བར་བླ་མ་དམ་པས་ངོ་སྤྲད་པ་འདི་རང་ཡིན། སེམས་ཀྱི་རང་བཞིན་སྐྱེ་འགག་མེད་པ་འདི་ལ་གཤིན་རྗེའི་སྐྱེས་བུ་བྱེ་བ་དུང་འཕྱུར་གྱི་དམག་གིས་མཐའ་བསྐོར་ནས་མཚོན་ཆ་སྣ་ཚོགས་ཀྱི་ཆར་ཕབ་ཀྱང་བསད་ཅིང་བཅད་པ་དང་ངན་པར་བསྒྱུར་དུ་མེད་ལ། ཕྱོགས་བཅུའི་དུས་གསུམ་སངས་རྒྱས་རྣམས་ཀྱི་འོད་ཟེར་འབུམ་ཕྲག་དུ་མ་འདུས་ཤིང་ཡོན་ཏན་གྱི་མཐུ་བསྡོམས་ཀྱང་བཟང་པོར་བཅོས་སུ་མེད་དེ་གཤིས་མ་བཅོས་པ་འདི་རང་ཡིན་ནོ། །ཞེས་ཐག་བཅད་དེ་དེ་ལ་བཅར་ཉལ་འཕྲིག་མེད་དུ་གཞག་གོ །གཉིས་པ་ནི། ད་ལྟར་གྱི་ལུས་གཟུང་འཛིན་དང་ཞེན་པ་ལས་གྲུབ་པ། འབྱུང་བཞི་གདོས་བཅས་ཀྱི་བདག་ཉིད་འདི་སྐྱེས་པའི་མཐའ་མ་འཆི་བས་ཁྱེད་ཅག་ལྷ་འདྲེ་རྣམས་ལ་དགོས་ན་བྱིན་པས་ཆོག ལར་དངོས་པོ་ཐམས་ཅད་མི་རྟག་པ་འགྱུར་བའི་ཆོས་ཅན་ཡིན་པས་དུས་ད་རེས་རང་དབང་ཡོད་བཞིན་དུ་སེམས་ཀྱི་སྦྱིན་པ་བཏང་ན་དོན་ཆེན་པོ་ལུས་ཀྱི་སྦྱིན་པར་འགྱུར་སྙམ་པས་ཕང་སེམས་ཏིལ་གྱི་ཤུན་པ་ཙམ་ཡང་མེད་པར་སྦྱིན། དེ་ནས་གཟུང་འཛིན་རྟོག་པའི་འཁྲུལ་པ་ལ་ལྷ་འདྲེའི་གཟུགས་བརྙན་མཐོང་ཞིང་གནོད་བྱ་གནོད་བྱེད་དུ་སྣང་བ་འདི་རྣམས་རབ་རིབ་ཀྱི་མིག་ལ་སྐྲ་ཤད་འཛག་པ་ལྟར་འཁོར་བ་ཐོག་མ་མེད་པ་ནས་རྒྱུ་མ་རིག་པའི་དབང་གིས་བག་ཆགས་ངན་པའི་རྒྱུན་གོམས་པ་ལས་བྱུང་བའི་སྒྲིབ་པའི་སྒྲིབ་གཡོགས་གློ་བུར་གྱི་རྣམ་པར་རྟོག་པ་སྤྲིན་དང་ན་བུན་ལྟ་བུ་ཡིན་གྱིས། དེ་ལ་འཇིགས་ཤིང་སྐྲག་པའམ་ཡ་ང་བ་ཅི་དགོས་སྙམ་དུ་བསམས་ཏེ་གཞི་གནས་ལུགས་སྟོང་པ་ཉིད་ཀྱི་ངང་དེར་གཞག་གོ །གསུམ་པ་ལ། ཉམས་ལེན། མ་སློངས་ན་སློང་ཆོག ལྷོངས་ནས་ལམ་གཏོང་གི་གནད་གསུམ། དང་པོ་ནི། རང་ལུས་ཐ་མལ་དུ་གནས་པའི་རྣམ་ཤེས་ཕཊ྄་དྲག་པོས་སྤྱི་བོར་བཏོན། དེ་རྡོ་རྗེ་རྣལ་འབྱོར་མའི་སྐུ་ཤིན་ཏུ་ཆེ་བར་གྱུར་པའི་གྲི་གུག་གིས་ཐོད་པ་བྲེགས། རང་བྱུང་གི་ཐོད་པའི་སྒྱེད་བུ་གསུམ་བྱུང་དེའི་ཁར་བཞག་པས་སྟོང་གསུམ་ཙམ་དུ་སོང་། ཕཊ་དེའི་ནང་དུ་ལུས་བཅུག་ཤ་ཁྲག་ཐམས་ཅད་ཨོཾ་གྱིས་སྦྱངས། ཨཱཿརྟོགས་པར་བྱས། ཧཱུྃ་གིས་སྦར་བས་ཚོགས་ཀྱི་ལོངས་སྤྱོད་ཟད་མི་ཤེས་པར་གྱུར། ཕཊ྄་ཀྱིས་རྣལ་འབྱོར་མའི་ཐུགས་ཀའི་འོད་ཟེར་ལྕགས་ཀྱུ་ལྟ་བུས། བླ་མ་ཡི་དམ་མཁའ་འགྲོ་ཆོས་སྐྱོང་ཡུལ་དེར་གནས་པ་སོགས་ཀྱི་ལྷ་འདྲེ་ཐམས་ཅད་བཀུག ཐམས་ཅད་ཡི་དམ་འཁོར་ལོ་སྡོམ་པའི་ལྷ་ཚོགས་སུ་བསམས་ཏེ་ཚོགས་ཀྱི་འཁོར་ལོར་ལོངས་སྤྱད་པའི་མཐར། ཕཊ྄་ཅེས་བརྗོད་པས་རྡོ་རྗེ་རྣལ་འབྱོར་མ་ནམ་མཁར་ཡལ་བར་བསམས་ཏེ་བདག་འཛིན་བློས་བཏང་ལ་འདུག་གོ །གཉིས་པ་ནི། དེས་ལྷ་འདྲེ་ལ་སོགས་པའི་ཆོ་འཕྲུལ་བྱུང་ན། རང་ཉིད་འཁོར་ལོ་སྡོམ་པ་ཡབ་ཡུམ་གང་རུང་ངམ་ཁ་སྦྱོར་དུ་མོས་པའི་སྐུས་སྲིད་པ་གསུམ་ནི་བཀང་། ཧ་ཧ་ཧེ་ཧེ་ལ་སོགས་པ་བརྒྱད་ཀྱི་གད་མོ་དང་བཅས་པའི་གར། ཕྱག་རྒྱ་སྟེ་འཇིགས་པའི་མཚོན་ཆ་ཐམས་ཅད་ཀྱིས་ནི་བསྣུན། བ་སྤུའི་ཁུང་བུ་ལས་ཁྲོ་བོ་ཕོ་མོ་དང་མཚོན་ཆ་དང་མེ་དཔུང་ནི་འཕྲོས། དེས་ལྷ་འདྲེ་བརྡུངས། གཏགས། བསད་བཅད་བསྲེགས་བྱས་པར་བསམས་ཏེ་སྤྲོས་བཅས་དྲག་པོ་བྱ། ལྷོངས་མ་བྱུང་ངམ་གདུག་རྩུབ་ཆེ་ན། ཡང་བམ་རོ་རི་རབ་ཙམ་དུ་གྱུར་པའི་ལུས་ལས་བབས་པའི་ཁྲག་གི་རྒྱ་མཚོར་ལྷ་འདྲེ་རྣམས་དངངས་ཤིང་འཚུབས་པར་བསམ། ཡང་ན་གནམ་ས་མགོ་ཞབས་ལོག་དེའི་བར་ན་ཉི་ཟླ་ཆ་ལང་བཞིན་བརྡབས་པའི་བར་དུ་ལྷ་འདྲེ་རྣམས་གཞོབ་ཏུ་ཐུལ་སོང་བར་བསམ། དེས་མ་ལྷོངས་ན་ཕག་མོས་ལུས་ཀྱི་པགས་པ་བཤུ། ཤ་ལིངྒ་དེ་ལ་ལྷ་འདྲེ་ཐམས་ཅད་བསྟིམ། པགས་པས་གཏུམས། རྒྱུ་མས་བཀྱིགས། འོག་ཏུ་གཤིན་རྗེའི་བཙོན་ཁང་འབྲུབ་ཁུང་གྲུ་གསུམ་མེར་འབར་ཞིང་རླུང་ནག་འཁྲུག་པ་དེའི་ནང་དུ་ཧཱུྃ་གིས་ནམ་མཁར་ཕྱར། ཕཊ྄་ཀྱིས་མེ་དོང་དུ་བསྐྱུར་ནས་དེ་རྡོ་རྗེ་རྒྱ་གྲམ་གྱིས་ཁ་བཅད། དེའི་སྟེང་དུ་ཕག་མོ་ཉིད་གསེར་གྱི་མཆོད་རྟེན་དུ་གྱུར་པས་མནན་པར་བསམ་མོ། །ཀླུ་གདོན་ལ་བྱ་ཁྱུང་འཇིགས་སུ་རུང་བས་དེའི་གཉའ་བ་ནས་བཟུང་སྟེ་མཁའ་ལ་ཁྱེར་རི་རབ་ལ་བསྐོར་ཏེ་སྡེར་མོས་སྙིང་བཏོན་ཟ་བར་བསམ། གསུམ་པ་ནི། ཆོ་འཕྲུལ་བྱུང་ན་ལྟས་དང་ཆོ་འཕྲུལ་ཅི་བྱུང་ཀྱང་དེ་གཉིས་བཀའ་དྲིན་ཅན་ནམ་འདོད་ཐོག་ཏུ་ཁྱེར་ཏེ་ལས་དང་པོའི་གང་ཟག་ལེ་ལོ་ཅན་རྣམས་ལ་བརྩོན་འགྲུས་ཀྱི་ལྕགས་འདེབས། གཉེན་པོ་གློ་བུར་དུ་སྐྱེ་ཞིང་རིག་པའི་ངར་འདོན། འདི་གཉིས་ཀྱིས་ལུས་ངག་དགེ་སྦྱོར་ལ་བསྐུལ་བས་བསམ་གཏན་མྱུར་དུ་སྐྱེ་བའི་རྒྱུ་བྱེད་པས་སོ། །ལམ་ཅུང་ཟད་གོམས་པ་ལ་དྲན་པ་ཡེ་ཤེས་ཀྱི་གསོས་འདེབས། བརྟན་པ་ཐོབ་པ་ལ་རིག་པ་འོད་གསལ་གྱི་གདངས་འདོན་ཅིང་ནང་ཏིང་ངེ་འཛིན་གྱི་རྩལ་སྦྱོང་། དེ་ལ་བརྟེན་ནས་བྱང་ཆུབ་ཀྱི་སེམས་ཁྱད་པར་ཅན་རྒྱུད་ལ་སྐྱེ་བས་ལམ་གྱི་བོགས་འདོན་དུ་འགྱུར་བའོ། །གསུམ་པ་ནི། དུས་དེ་ཐམས་ཅད་དུ་ལྷ་འདྲེ་དེ་དག་ལ་སོགས་པ་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་དྲག་པོ་ཤ་ལ་བབ་པ་ཙམ་དུ་སྒོམ། དེ་ཐམས་ཅད་ཀྱི་དོན་དུ་རྫོགས་པའི་སངས་རྒྱས་སྒྲུབ་པ་ལ་བརྩོན་པ་དང་རཏལ་བ་བརྟན་པར་བྱའོ། །དེས་བདུད་རིགས་ཆོས་སྐྱོང་དུ་ཞལ་མཐོང་ཞིང་། ཆོས་སྐྱོང་སྤྲུལ་སྐུར་མཐོང་བས་རྐྱེན་དངོས་གྲུབ་ཏུ་བབས། བར་ཆད་ལམ་དུ་ལོངས། རྣམ་རྟོག་ཆོས་སྐུར་ཤར། སྐྱོན་ཡོན་ཏན་དུ་གྲོལ་བས་ཐུན་མོང་ལམ་གྱི་མཐུན་རྐྱེན་ཐམས་ཅད་དེ་དག་གིས་སྒྲུབ། མཐར་ཐུག་ཤེས་བྱའི་གཤིས་ལ་ལྷ་འདྲེ་གཉིས་ཀ་མ་གྲུབ། རེ་དོགས་སྤོང་ལེན་གྱི་མཚན་མ་རང་སར་གྲོལ་བས་འཁྲུལ་པ་གཞི་མེད་དུ་རྟོགས་ཤིང་འཁོར་བ་ཕྱག་རྒྱ་ཆེན་པོར་ཤར་བ་དེ་ལ་གློ་བུར་གྱི་རྟོག་པ་དབྱིངས་སུ་ཐིམ་པའི་ཆོས་སྐུ་འདུ་འབྲལ་མེད་པ་ཞེས་མིང་གིས་བཏགས་སོ། །དེ་ཡང་། གདོན་གནོད་སྦྱིན་ཕོ་མོར་སྣང་བ་འདི། །མ་རྟོགས་དུས་ན་བདུད་ཡིན་ཏེ། །ཐོ་འཚམ་བར་དུ་གཅོད་པར་བྱེད། །རྟོགས་ན་བགེགས་རྣམས་ཆོས་སྐྱོང་སྟེ། །སྣ་ཚོགས་དངོས་གྲུབ་དེ་ལས་འབྱུང་། །མཐར་ཐུག་དོན་ལ་ལྷ་འདྲེ་མེད། །རྣམ་རྟོག་ཟད་སར་ཕྱིན་ནོ་གསུང་། །ཞེས་པས་སོ། །དེ་དག་རྩ་རྒྱུད་ལས། མཚན་མོ་རྟག་པར་གཅེར་བུ་སྟེ། །གནག་དང་དམར་བར་རྟག་ཏུ་འགྱུར། །སྲོག་ཆགས་ཡན་ལག་ན་བཟར་གྱོན། །བདེ་བ་འདོད་པའི་བདེ་བསྐྱོད་བྱ། །མཆོད་ཕྱིར་ཐོགས་ནི་ཡོངས་སྤངས་ལ། །ཞེས་དང་། རྒྱས་པར། འབབ་ཆུའི་འགྲམ་དང་རྒྱ་མཚོ་དང་། །རི་བོ་དང་ནི་བཞི་མདོ་དང་། །ལྟེང་ཀ་ཁྲོན་པ་མཚེའུ་དང་། །ཁང་སྟོང་དང་ནི་ལམ་སྲང་དག །ཐམས་ཅད་དུ་ནི་མཁའ་འགྲོ་མ། །ཀུན་ཏུ་ཞེན་པར་བལྟ་ལ་གནས། །འཇིགས་པ་ཆེན་པོ་དུར་ཁྲོད་དུ། །སོགས་ཀྱིས། གསུམ་པ་ནི། རྡོ་རྗེའི་སྣོད་དུ་པདྨ་མཆོག །ཁ་སྦྱར་གྱིས་ཞུ་བ་པདྨ་ལས་ལོག་ནས། རྡོ་རྗེ་དགའ་བཞི་ཡང་དག་བརྩོན། །ཞེས་པ། མས་བརྟན་གྱི་དགའ་བ་བཞི་མངོན་དུ་བྱེད་པས་ཐབས་ཤེས་གཉིས་མེད་པས་སྣང་བ་ཐམས་ཅད་ཧེ་རུ་ཀར་སྦྱོར་བ་སྟེ། འདི་རྩ་རྒྱུད་ལས། གཙང་སྦྲ་ཤྲཱི་ཧེ་རུ་ཀར་གནས། །ཕྱག་རྒྱ་ལྔ་དང་ཡང་དག་ལྡན། །སྒྲུབ་པ་པོ་ཡི་དངོས་གྲུབ་བརྩོན། །ཞེས་པས་བཤད་དེ་བོད་དུ་མཁོ་བ་མ་ཡིན་ལ། རྒྱས་པར་གཞན་དུ་བཤད་ཟིན་ཏོ། །བཞི་པ་ནི། རྡོ་རྗེའི་ཐུགས་མཆོག་ཐོབ་པར་བགྱི། །ཞེས་པ་ནི་བརཏལ་ཞུགས་ཀྱི་སྤྱོད་པ་རྫོགས་ནས་ཕྱག་རྒྱ་དང་། ལྷན་ཅིག་ཞག་གཅིག་གམ་བདུན་གྱི་མཐར་ཐུག་པས་མངོན་པར་བྱང་ཆུབ་པ་ལྔས་འཚང་རྒྱ་བའོ། །འདི་ཡང་རྩ་རྒྱུད་ལས། རིགས་དང་རིགས་མིན་ངོར་མི་ལྟ། །སྤྱི་གཙུག་ལ་སོགས་བཅིང་པ་སྤངས། །ཞེས་པས་བསྟན་ནོ། །གསུམ་པ་འབྲས་བུའི་རྒྱུད་ནི། དུས་གཏན་བྱ་རོག་གདོང་ནང་དུ། །ཀླུ་དང་རུ་སྦལ་རྩངས་པ་དང་། །བརྒྱ་བྱིན་གཞུ་རྒྱལ་གཏན་དུ་བཅིངས། །ཞེས་པ་གསང་གནས་ཀྱི་འཁོར་ལོའི་ཕྱེད་དུ་རླུང་སྟོང་བརྒྱ་པ་རེ་དབུ་མར་ཐིམ་པས་བྱང་ཆུབ་སེམས་ཀྱིས་དེའི་ཕྱེད་གང་། ས་དང་པོ་འཐོབ། དེ་ལྟ་བུའི་འགྲོས་ཀྱིས་གཙུག་ཏོར་གྱི་རྩ་འདབ་ཀྱི་ཕྱེད་མན་གང་བས་ས་བཅུ་གཅིག་པ། ས་དེ་ཡང་རྩ་རྒྱུད་ལས། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་འདི་འོད་བྱེད་ཤེས་པར་བྱ། །ཉེ་བའི་ཞིང་འདི་འོད་འཕྲོ་བ། །ཚན་དོ་ཧ་ནི་མངོན་གྱུར་ཅིང་། །ཉེ་བའི་ཚན་དོ་སྦྱང་དཀའ་བ། །འདུས་པ་རིང་དུ་སོང་བ་ཡིན། །ཉེ་བའི་འདུས་པ་མི་གཡོ་བ། །དུར་ཁྲོད་ལེགས་པའི་བློ་གྲོས་ཉིད། །ཉེ་བའི་དུར་ཁྲོད་ཆོས་ཀྱི་སྤྲིན། །ཞེས་པ་ལས་མ་གསུངས་ལ། མངོན་བརྗོད་དུ། དཔེ་མེད་པ་དང་ཡེ་ཤེས་ལྡན། །ཞེས་པས་འཐུང་གཅོད་དང་ཉེ་བའི་འཐུང་གཅོད་རིམ་པ་བཞིན་སྦྱར་ལ། ཕ་རོལ་ཕྱིན་བཅུའི་ས་རྣམས་ནི། །ཞེས་རྒྱུའི་ཐེག་པའི་ཕར་ཕྱིན་བཅུ། དེའི་སྟེང་དུ་རྡོ་རྗེའི་ལས་ཀྱི་ཕར་ཕྱིན་དང་། རིན་པོ་ཆེ་པདྨའི་ཕར་ཕྱིན་གཉིས་བསྣན་ནས་སློབ་ས་བཅུ་གཅིག་གོ །ཚེ་འདིར་ལྷག་བཅས་ཡོད་མིན་ལ། །ལྷག་མེད་ཆེན་པོ་འགྲུབ་པར་འགྱུར། །ཞེས་པ་ཇི་ལྟར་རྒྱུའི་ཐེག་པ་ལ་གྲགས་པའི་ལྷག་བཅས་མྱང་འདས་དང་ལྷག་མེད་མྱང་འདས་ལྟ་བུ་མ་ཡིན་གྱི། དྲི་མེད་འོད་ལས། འདིར་ཉན་ཐོས་དང་རང་སངས་རྒྱས་རྣམས་ནི་ལྷག་མ་དང་བཅས་པའི་མྱ་ངན་ལས་འདས་པ་ལ་གནས་པའི་ཕྱིར་དང་། ཡང་དག་པར་རྫོགས་པའི་སངས་རྒྱས་ལྷག་མ་ཐམས་ཅད་ལས་རྣམ་པར་གྲོལ་བའི་ཕྱིར། ཞེས་དང་། མཚན་བརྗོད་ལས། ལྷག་མ་ཀུན་ལས་རྣམ་གྲོལ་ཞིང་། །ནམ་མཁའི་ལམ་ལ་རབ་གནས་པ། །ཞེས་པ་དེ་ཡིན། ནམ་མཁའ་རྡོ་རྗེའི་གྲོང་དུ་ཞུགས་པ་འདི་ལ་མའི་རྒྱུད་སྡེ་ལས་རིག་མའི་སྐྱེས་བུ་དང་ཕའི་རྒྱུད་སྡེ་ལས་རིག་པའི་སྐྱེས་བུར་བཤད་ཀྱང་དོན་ཟུང་འཇུག་མ་ནིང་གི་གོ་འཕང་སྟེ། མཚན་ཉིད་ཁ་སྦྱོར་ཡན་ལག་བདུན་ནམ་འབྲས་བུའི་དབང་ཕྱུག་བརྒྱད་དང་ལྡན་པའོ། །རྗེས་ཀྱི་བྱ་བ་ནི། རྡོ་རྗེ་འཆང་གི་གསུང་ལས་ཐོས། །རྡོ་རྗེ་རྣལ་འབྱོར་མས་རྡོ་རྗེ་འཆང་ལས་ཐོས་པ། ཨེ་མ་རྡོ་རྗེའི་སློབ་མ་ལ། །གསང་བའི་གནས་སུ་འདི་བཤད་དོ། །རླུང་སེམས་མ་ལུས་སྒྲ་གཅན་ནང་། །བརྟན་དུ་འཆིང་བར་བསྟན་ནོ་ཁྱེད། །ཞེས་པས་གཞན་ལ་སྤེལ་བར་གདམས་པའོ། །འཁོར་ལོ་སྡོམ་པའི་སྒྲུབ་ཐབས་བྱས་པ་ལས། དགེ་བ་གང་ཞིག་སེལ་མེད་མཉམ་བསྒྲུབས་པས། །དེ་ཡིས་འཇིག་རྟེན་རྟོག་པའི་དྲི་མ་ཡི། །སྒྲིབ་པ་བསལ་ནས་ཡུན་རིང་ཞི་བར་ཤོག །ཡོངས་སུ་བསྔོ་བའོ། །དཔལ་འཁོར་ལོ་སྡོམ་པའི་མན་ངག་རྗེ་བཙུན་རྡོ་རྗེ་རྣལ་འབྱོར་མས་མཛད་པ་རྫོགས་སོ།། །།དེ་ལྟར་ལྷོ་ཕྱོགས་ཀྱི་རིགས་ལྡན་ཆེན་པོ་གྲགས་པས་གཞན་ལ་བགོ་བཤར་བྱས་པའི་རྡོ་རྗེའི་ཚིག་མང་པོ་དུས་ཀྱིས་འཆུན་པ་དཀའ་བས་ཟིན་བྲིས་ཀྱི་ཡི་གེ་ཉུང་ངུ་སྙིང་གི་ནོར་བུ་ཞེས་བྱ་བ་བདག་གི་སྐལ་བར་བཞག་པ་ལྟར། བླ་མ་ཆེན་པོ་ཨ་བ་དྷཱུ་ཏཱི་པ་བཙུན་མོ་ཅན་ལས་བཀའ་དྲིན་ཐོབ་པ། གངས་རིའི་པཎྜྻི་ཏ་པདྨ་དཀར་པོས་རྗེ་དམ་པ་དེའི་རིགས་དབོན་རྣམ་དཔྱོད་ལྡན་པ་ཆོས་རྒྱལ་བསྟན་པའི་རྒྱལ་མཚན་དང་། གསལ་རྗེ་བླ་མ་སྐལ་བཟང་དབང་པོས་ཀྱང་བསྐུལ་བ་ལྟར། དགེ་བསྙེན་ཆེན་པོ་གསལ་རྗེའི་ལྷ་ཞོལ་ཡར་འདྲེན་བྱང་ཆུབ་སྨན་གྱི་ལྗོངས་ཞེས་བྱ་བའི་ཤུག་གསེབ་ཏུ་སྦྱར་བའི་ཡི་གེ་པ་རིན་ཆེན་བསྟན་པ་རྒྱལ་མཚན་ནོ། །ཐམས་ཅད་འདིར་ཞུགས་ནས་འཁོར་ལོ་སྡོམ་པའི་གོ་འཕང་ཐོབ་པར་གྱུར་ཅིག །ཚེ་འདིར་སྦྱང་ཡུན་མངལ་གྱིས་མ་དུབ་པར། །ལེགས་བཤད་ཀུན་ཤེས་བུ་ཡིས་ཕང་མཛེས་པ། །འདི་ཅི་བློ་གསལ་རྒྱ་མཚོ་ཡིད་དགའ་བའི། །སྙིང་གི་གྲོགས་མོ་མིན་ན་གཞན་པ་སུ། །འདི་ན་བསྔགས་འོས་རིན་ཆེན་ལྔ་པའི་དུང་། །ཀུན་ཤེས་ཁྱབ་འཇུག་ཞལ་སྒོར་ཆགས་པ་དེས། །རྒྱུད་སྡེར་དོན་བཟང་ཅི་འོད་དྲིལ་བསྒྲགས་པས། །མཆོག་གཉེར་སྐྱེ་དགུའི་ཚོགས་རྣམས་ཅིས་མི་དགའ། །ཚིགས་བཅད་ལག་པ་བརྐྱང་བ་རེ་རེའི་ཁར། །བླ་མ་ལས་ཀྱང་བླ་མར་བྱེད་ཀུན་གྱིས། །ཡིད་བཞིན་ནོར་བུ་སྟེར་འདི་མཚོན་ནུས་པ། །ཟས་གཙང་བུ་ཡི་སེང་གེའི་ཁྲི་ཁོ་ན།། །།སརྦ་མངྒ་ལཾ།། མོ་ཁྲིད་མཁའ་འགྲོའི་མྱུར་ལམ།མོ་ཁྲིད་མཁའ་འགྲོའི་མྱུར་ལམ་བཞུགས་སོ། །རྗེ་བཙུན་ཨ་བ་དྷཱུ་ཏཱི་པ་བཙུན་མོ་ཅན་ལ་ཕྱག་འཚལ་ལོ། །བདེ་བའི་གར་མཁན་གྱིས་སྦྱར་ཡིད་ཀྱི་དཔྱིད། །བདེ་རྒྱས་ཀུན་ཏུ་གཟུགས་ཀྱི་བཅོམ་ལྡན་མ། །བདེ་ཆེན་འདོད་པའི་སྙིང་ལ་དགའ་ཆར་བཞིན། །བདེ་ལེགས་རྟག་ཏུ་མཛད་དེར་ཕྱག་འཚལ་ལོ། །འདོད་རྒྱས་བསླབ་པས་གདམས་པའི་རི་དྭགས་མིག །འདོད་རྒྱུ་གནས་སྐབས་བཞི་ཡི་སྒྲིབ་བཅོམ་ནས། །འདོད་དགོངས་སྙིང་པོའི་བསམ་གཏན་ལ་གཞོལ་བས། །འདོད་དོན་བླ་མ་གྲུབ་པ་འདི་ན་ཀོ །གཉིས་པ་ཕག་མོ་བྱིན་རླབས་ཀྱི་དཀོར་མཛོད་ཁ་ཕྱེ་ནས་མཚན་ལྡན་གྱི་བུད་མེད་ཡེ་ཤེས་ཀྱི་ས་ལ་སྐྱེལ་བ་ལ། ལམ་གྱི་ཆིངས་དང་། ལམ་དངོས་གཉིས། དང་པོ་ནི། ཅིག་ཅར་ཐོད་བརྒལ་རིམ་གྱིས་བཀྲི་བའི་ལམ་གསུམ་གྱི། ཅིག་ཅར་བ་ནི་བླ་མ་རྟོགས་པ་དང་ལྡན་པ་དང་སློབ་མ་མོས་གུས་ཅན་ཕྲད་པའི་མོད་ལ་ཚེ་གཅིག་གིས་སངས་རྒྱས་འགྲུབ་པ་དཔལ་ཤ་བ་ར་དང་། རྒྱལ་པོ་ས་ཀར་སིདྡྷི་ལྟ་བུའོ། །འབྲིང་བྱིན་རླབས་འཕོ་བའི་དབང་གིས་རྒྱུད་གྲོལ་ཏེ་བསྐྱེད་རྫོགས་ལ་བསླབ་པར་བྱ་བས་སྲིད་པ་བར་མ་དོར་མཆོག་གྲུབ་པ་རྗེ་བཙུན་མཻ་ཏྲི་པ་ལྟ་བུ། འདིའི་དབང་དུ་མཛད་ནས་སིནྡྷུ་རའི་བྱིན་བརླབས་སྔར་བསྟན་ནས་ཕྱིས་ལམ་གྱི་རིམ་པ་བསྟན་ལ། གསུམ་པ་དབང་པོ་ཐ་མ་དབང་རིམ་གྱིས་བསྐུར་ཏེ་སོ་སོའི་ལམ་ལ་བསླབ་པ་བདག་ཅག་ལྟ་བུ། འདིར་ཕྱི་མའོ། །གཉིས་པ་ལ། སྔོན་དུ་འགྲོ་བ་ཐུན་མོང་གིས་རྒྱུད་སྦྱང་བ། དངོས་གཞི་གསང་བའི་ཉེ་ལམ་ལ་བརྟེན་ནས་ཚེ་གཅིག་ལུས་གཅིག་གིས་རྫོགས་པའི་སངས་རྒྱས་བསྒྲུབ་པ་གཉིས། དང་པོ། སྙིང་གི་ནོར་བུ་བཞིན་ནོ། །གཉིས་པ་ལ། ཐ་མལ་གྱི་རྣམ་རྟོག་དཀྱིལ་འཁོར་གྱི་འཁོར་ལོར་བསྒྱུར་ནས་སྤྲུལ་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་བུམ་དབང་གི་ལམ། མཚན་མའི་སྣང་བ་ཡེ་ཤེས་སུ་ཁྱེར་ནས་ལོངས་སྤྱོད་རྫོགས་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་གསང་དབང་གི་ལམ། ཞུ་བའི་བདེ་བ་རྣམ་བཅས་སུ་བསླང་ནས་ཆོས་ཀྱི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམ་ངག་དབང་གསུམ་པའི་ལམ། དམིགས་བཅས་ཐམས་ཅད་དམིགས་མེད་དུ་རོ་མཉམ་སྟེ་ལྷན་ཅིག་སྐྱེས་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་དབང་བཞི་པའི་ལམ། བྱ་སྤྱོད་ཐམས་ཅད་ཧེ་རུ་ཀའི་རོལ་མོར་བཏང་ནས་བཙན་ཐབས་སུ་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་སྤྱོད་པ་འཇིགས་བྲལ་རྡོ་རྗེའི་མཚོན་ཆ་ལྔ་ལས། དང་པོ་ལ་ལུས་སྐུ་རྡོ་རྗེར་མ་སྨིན་པ་སྨིན་པར་བྱེད་པ་དབང་། སྨིན་ནས་གྲོལ་བར་བྱེད་པ་བསྐྱེད་རིམ་གཉིས། ཕྱི་མ་ལ། རྩ་རྒྱུད་ལས། ཧེ་རུ་ཀ་དཔལ་རྣལ་འབྱོར་མཆོག །སློབ་དཔོན་རྣལ་འབྱོར་མ་ཉིད་ཡིན། །རྒྱུད་འདི་རུ་ནི་རྣལ་འབྱོར་པ། །ལེགས་པར་འགྱུར་བ་ཉིད་ཡིན་ཏེ། །ཞེས་ཧེ་རུ་ཀའི་གཙོ་བོ་འཕོས་པས་ཡུམ་བཀའི་མཻ་ཏྲི་ཞབས་བཞེད་པ་ལྟར། སྤྲོས་པ་ཅན་བཅུ་གསུམ་གྱི་འཁོར་ལོ་དང་། ཀུ་སཱ་ལི་མ་བདེན་གཉིས་ཞལ་གྱི་རྣལ་འབྱོར་བསྒོམ་པ་གཉིས། གཉིས་པ་མཚན་མའི་སྣང་བ་ཡེ་ཤེས་སུ་ཁྱེར་ནས་ལོངས་སྤྱོད་རྫོགས་པའི་སྐུར་འཚང་རྒྱ་བར་བྱེད་པ་རིན་པོ་ཆེ་ལྟ་བུའི་གདམས་ངག་གསང་དབང་གི་ལམ་ལ། ངག་གསུང་རྡོ་རྗེ་མ་སྨིན་པར་བྱེད་པ་གསང་དབང་། སྨིན་པ་གྲོལ་བར་བྱེད་པ་ཆོས་དྲུག་གཉིས་ལས། ཕྱི་མ་ལ་མཚན་འཛིན་ཡེ་ཤེས་ཀྱི་མེར་སྤར་བ་གཏུམ་མོ། །མཚན་འཛིན་སྒྱུ་མའི་འཁྲུལ་འཁོར་དུ་ངོ་སྤྲོད་པ་སྒྱུ་ལུས། མཚན་འཛིན་དག་སྣང་རབ་འབྱམས་སུ་ཁྱེར་བ་འོད་གསལ། མཚན་འཛིན་ཏིང་ངེ་འཛིན་གྱི་རྩལ་སྦྱོང་དུ་བྱེད་པ་རྨི་ལམ། མཚན་འཛིན་ཟུང་འཇུག་གི་བཅུད་དུ་ལེན་པ་བར་དོ། །མཚན་འཛིན་ཡེ་ཤེས་ཀྱི་དབྱིངས་སུ་བཏང་བ་འཕོ་བ་དང་དྲུག གཞན་སྙིང་གི་ནོར་བུ་བཞིན་ལ། བསྙེན་སྒྲུབ་ཡི་དམ་གྱི་གཏུམ་མོའི་ལྷ་ཕག་མོ་གཙོ་བོ་དང་། བཅོམ་ལྡན་འདས་དེ་ལ་འཁྱུད་བྱ་དེ་བཞིན་སྔགས་བཟླ་བ་ལ་ཐོག་མར་ཡུམ་དང་། དེ་ནས་ཡབ་གོ་བརྗེ་བ་འདྲེན་འགྲེམས་ཀྱི་འཁྲུལ་འཁོར་མེད་པ་ཙམ་མོ། །གསུམ་པ་ཞུ་བའི་བདེ་བ་རྣམ་བཅས་སུ་བསླང་ནས་ཆོས་ཀྱི་སྐུར་འཚང་རྒྱ་བར་བྱེད་པའི་དབང་གསུམ་པའི་ལམ་ལ། ཡིད་ཐུགས་རྡོ་རྗེར་མ་སྨིན་པ་སྨིན་པར་བྱེད་པ་ཤེས་རབ་ཡེ་ཤེས་ཀྱི་དབང་དང་། སྨིན་པ་གྲོལ་བར་བྱེད་པ་བཙན་ཐབས་ཕོ་ཉའི་ལམ་གཉིས་ལས། ཕྱི་མ་ལ། རླུང་སྦྱང་བ་བསྙེན་པ། རང་ལུས་སྒྲུབ་པ། གཞན་ལུས་སྒྲུབ་ཆེན་བཤད་པ་གསུམ་ལས། དང་པོ་ལ། ནུས་པ་དང་ལྡན་པས་ཕོ་ལུས་སུ་བསྒྱུར་བ། མི་ལྡན་པས་པདྨ་ཆུ་འཐུང་ལ་བསླབ་པ་གཉིས་ལས། དང་པོ་ལ། སྔོན་འགྲོ་དངོས་གཞི་རྗེས་གསུམ་སྔོན་འགྲོ་ནི། ཕོངས་སར་བཞག་རྐང་མཐིལ་སྤྲད་པ་པད་སྐྱིལ་ཏེ་གདན་ལ་བཅར་ཕབ། ལག་པ་གཉིས་ཀྱི་ཁུ་ཚུར་ནུ་མ་གཡས་པའི་ཟུར་ནས་བཞར་ཏེ་སྟེང་གི་ནམ་མཁར་བརྒྱངས་ཀྱིས་འཐེན་པ་དང་རླུང་ཕྱིར་འབུད་བསྟུན་པ་གསུམ་བྱེད། དེ་བཞིན་གཡོན། ཆ་མཉམ་དུ། དེ་ནས་རླུང་སྨད་དུ་སྡིག་པ་དང་ལྷན་དུ་ཁུ་ཚུར་ནུ་མ་གཡས་པའི་ཟུར་གཉིས་ནས་མར་བཞར་ཏེ་གསང་གནས་སུ་འདེད། དམིགས་པ་ནུ་མའི་ཏོག་ནང་དུ་ལོག་ནས་གསང་གནས་སུ་རྡོ་རྗེར་སོང་བར་བསམ་པ་གསུམ། དེ་བཞིན་གཡོན་དང་དབུས་སུའང་བྱ། མཐར་རླུང་ཁ་སྦྱར་རྡོ་རྗེ་རྩེ་གཅིག་པའི་ཕྱག་རྒྱས་ནུ་མའི་མཐའ་བསྐོར་ཞིང་བརྡུང་། གཡས་ནས་གསང་གནས་སུ་འདེད། དེ་བཞིན་གཡོན་དང་དབུས་སུ། དངོས་གཞི་ནི། འབེབས་གདན་ཁྲུ་གང་གི་སྟེགས་བུར། རླུང་རོ་བསལ། རྩེ་གཅིག་པའི་ཕྱག་རྒྱས་ནུ་མ་གཡས་པ་བཞར་ཏེ་སྤྱི་བོར་འཐེན་དུས་ལངས་ནམ་མཁར་བསྒྲེངས། ནུ་མ་དེ་སྤྱི་བོར་བརྒྱངས་ཀྱིས་འཐོན་པར་བསམ། ཕྱིར་ཙམ་ཐུབ་འཛིན། འབེབས་དུས་ཕྱག་རྒྱ་དེས་ནུ་མ་གཡས་ཟུར་དུ་ཤེད་དང་ལྡན་པས་དྲག་པོར་འདེད། ནུ་མའི་ཏོག་ནང་དུ་ལོག་ནས་གསང་བར་རྡོ་རྗེར་སོང་བར་བསམ་ལ་ཕོངས་རྡེབ། དེ་བཞིན་གཡོན་དང་དབུས་སུ་དེ་ཡང་ཡང་སྦྱོང་། རྗེས་ནི་པད་སྐྱིལ་གྱི་སྟེང་ནས་རྩེ་གཅིག་པའི་ཕྱག་རྒྱས་ནུ་མ་སྟོད་ནས་རིམ་གྱིས་ཐུར་དུ་འདེད་དོ། །དེས་ནུ་མ་རང་དག་ཏུ་སོང་བས་པདྨའི་ཟེའུ་འབྲུ་ཇེ་ཆེར་སོང་སྟེ་རྡོ་རྗེར་འགྱུར། འགྲམ་གཉིས་ཇེ་སྲིལ་ལ་སོང་སྟེ་འབྲས་བུར་འགྱུར་རོ། །བརྟག་གཉིས་ལས། ནུ་མ་སྤངས་པ་བོ་ལར་འགྱུར། །ཀཀྐོ་ལ་དབུས་ཡང་དག་ལྡན། །འགྲམ་གཉིས་དྲིལ་བུ་ཉིད་དུ་འགྱུར། །ཟེའུ་འབྲུ་བོ་ལ་ཅན་དུ་འགྱུར། །ལྷག་མ་བདག་ཉིད་ཆེན་པོ་ཉིད། །ཅེས་སོ། །གཉིས་པ་ལ། རླུང་སྦྱང་བ། འབྱོངས་ནས་ཆུ་འཐུང་ལ་བསླབ་པ། ཆ་ལག་བསྟན་པ་གསུམ་ལས། དང་པོ་ནི། པདྨ་སྐད་འདོན་གྱི་འཁྲུལ་འཁོར་ཏེ། གྱད་ཀྱི་བགྲད། སེང་གེའི་རྡེབ། སྟག་མོའི་འཛུམ་འདོན་ནོ། །དང་པོ་པད་སྐྱིལ་ལ་རྐང་མགོ་པདྨ་ནས་མཐོ་གང་ཙམ་པར་བཞག དེ་ལག་པ་གཉིས་ཀྱིས་བཟུང་རླུང་རང་འགག་བྱས་ཏེ་རྒྱ་མཚོ་གཡས་ནས་གཡོན་དུ་བདུན་བསྐོར། རླུང་ཞབས་མ་ལུས་པར་ཕྱིར་ཤེད་བསྐྱེད་ལ་འབུད། དེ་དུས་མཁལ་མ་གཉིས་ཀྱི་རླུང་སྟོད་དུ་འཐེན་པས་ཀ་བ་བཙུགས། མི་ཐུབ་པ་དང་ཀ་བ་མི་འགྱུར་བར་བྱས་བརྔུབས་ནས་མདུན་རླུང་དྲག་ཏུ་འཕུལ། ཡང་སྟོད་ལ་མཁལ་འཐེན་གྱིས་འཕུལ། ཡང་མདུན་དུ་བརྡབ་པ་ལན་གསུམ་རྗེས་སུ་རྐང་མགོ་བཟུང་བ་བགྲད་ལ་བཏེག་པ་དང་། ཕོངས་ས་ནས་འཕག་མཉམ་དུ་ཤེད་བསྐྱེད་ལ་བརྡབ་བོ། །དེ་བཞིན་གཡས། ཆ་མཉམ་དུ་གཉིས་པ་ཕོངས་སར་བཞག རྐང་པ་གཉིས་ཀྱི་བར་ལ་མཐོ་གང་ཙམ་ལ་པུས་མོ་ཙོག་པུར་བྱས་ལ་པུས་སྟེང་དུ་ཁུ་ཚུར་བཞག རང་འགག་གི་ངང་ནས་གསུས་པ་གཡས་ནས་གཡོན་དུ་ལན་བདུན་བསྐོར། ཁ་ནས་ཧེ་ཞེས་ཕྱིར་ཙམ་ཐུབ་ཙམ་ཅིག་བཟུང་། མི་ཐུབ་པ་དང་བརྔུབས་ལ་གཞན་འདྲ། པུས་མོ་དང་ཁུ་ཚུར་མ་བྲལ་བར་ཧར་ལངས་པུས་མོ་མ་གུག་པར་ཐང་གིས་བརྒྱངས་པའི་ངང་ནས་རྐང་པ་མདུན་དུ་ཤད་བརྐྱང་བ་དང་ཕོངས་བསྟན་ལ་ཤེད་བསྐྱེད་ལ་འབེབས་སོ། །གསུམ་པ་ཕོངས་ས་ལ་བཞག རྐང་པ་མདུན་དུ་གཤིབས། པུས་མོ་ཙོག་བྱས། ཕྱི་ནས་སོར་མོ་བསྣོལ་བས་འཁྱུད། རླུང་རང་འགག་གིས་གཡས་གཡོན་དུ་བསྐོར་བ་སོགས་དང་པོ་འདྲ། ཕོངས་བཏེག་ས་ལ་རྡེབ་པ་དང་མཉམ་དུ་པུས་མོ་གཉིས་ཀྱང་ཕྲད་བྱས་རླུང་མདུན་དུ་ཤེད་བསྐྱེད་ལ་འཕུལ་ལོ། །དེས་ཟླ་ཕྱེད་སྦྱངས་པས་ཕྱིའི་རྟགས་པདྨའི་སྟེང་གི་གསུས་ཆུང་ལ་རྩ་སྔོན་པོ་སྨྱུག་མ་ཙམ་གཅིག་གམ་གཉིས་གསུམ་གང་རིགས་འབྱུང་། དེ་ནས་གང་གི་འཁྲུལ་འཁོར་ལ་བསྐོར་རྡེབ་བཞག་ནས་ལུས་གནད་གང་གི་སྟེང་ནས་ཡིན་ཀྱང་ཕྱིར་འབུད་དྲག་པོ་དེ་དུས་མདུན་འཐེན། མི་ཐུབ་པ་དང་ནང་དུ་བརྔུབས་ལ་མདུན་རླུང་ཤེད་བསྐྱེད་ལ་ཐུར་དུ་འཕུལ་བ་ཞག་བདུན་སྦྱང་། ནང་རྟགས་སུ་རླུང་སྣ་ནས་བརྔུབས་པ་པདྨར་སྐད་དང་བཅས་འཐོན་པའོ། །གསང་རྟགས་སྲོག་ཐུར་འདྲེས་པས་ནད་ཀུན་ལས་ཐར་རོ། །གལ་ཏེ་འབྱོངས་དཀའ་ན་ལུས་སྐྱིལ་ཀྲུང་ལྷོད་དེ་བ། རླུང་བཟུང་ལྟོ་བ་གཡས་གཡོན་དུ་ལན་བདུན་བརྡབས། རླུང་ཕྱིར་འབུད་ཀྱིས་ཁ་ནས་སྒྲེགས་པས་འདོན་ནོ། །དེ་བཞིན་གཡོན་གཡས། དབུས་ལའང་བྱས་པ། རླུང་ཡར་སང་མར་སང་དུ་འགྲོའོ། །འབྱོངས་ནས་ཆུ་འཐུང་ལ་བསླབ་པ་ནི། ཆུ་བཟང་བྲེ་གང་ཙམ་གདུལ་ནས་ཕུལ་གང་དུ་སོང་བ་དེ་རྫའི་སྣོད་གཙང་མར་བླུག་ལ་དྲོད་ཡོད་ཙམ་གྱིས་བྷ་གའི་འོག་ཏུ་བཞག ལུས་གནད་སེམས་སྐྱིལ་ལག་པ་པུས་མོར་བཀབ་ནས་འདྲེན་པ། རུ་སྦལ་བསྐུམ་པའི་པུས་མོ་བགྲད་པས། པད་སྐྱིལ་གྱི་རྒྱུ་མ་ཁུགས་ནས་ལག་པས་འཛིན་པས། རྐང་བརྐྱང་གི་རྒྱུ་མ་ཁུགས་ནས་ལག་པས་འཛིན་པ། པུས་བཙུགས་ལག་པ་བརླ་སྟེང་དུ་བཞག་པས་འདྲེན་པ་ལྔ་གང་བདེ། རླུང་གནད་ཕྱིར་འབུད་ཀྱིས་འདྲེན་པ་ལ། སྔ་སོར་སྟེང་རླུང་འོག་ཏུ་མནན། དེ་ནས་རླུང་ཕྱིར་འབུད་དྲག་པོ་དང་བསྟུན་ལྟོ་བ་ཡར་འཐེན་པས་སོ། །རིགས་གཅིག་ལ་ཁ་ནས་ཕྱིར་འབུད་དང་བསྟུན་པས་འདྲོངས། རླུང་བྱང་བ་མདུན་རླུང་འཐེན་རྒྱབ་རླུང་མནན་པས་སོ། །འདྲོངས་ནས་ལྟོ་བ་བསྐོར་ཞིང་བརྡབས་ལ། སྟེང་རླུང་ཐུར་དུ་བསྡིགས་པས་འབོད། དེ་ནས་འོ་མ་ལ་བསླབ། དེ་ཁ་སྣ་གཉིས་ནས་འོང་བར་བྱ་བ། པདྨའི་ཐད་དུ་ལག་པ་རྡོ་རྗེ་ཁུ་ཚུར་གྱི་རྒྱབ་སྤྲད་དེ་བཙུགས། དྭངས་སྙིགས་འབྱེད་པའི་ཕོ་བསྐོར་ཕོ་རྡེབ་བྱས། རླུང་རང་བཀག་སྟེ་སྨད་དུ་བརྒྱངས་དེ་ནས་ཕོ་ཁར་བརྒྱངས། ཡང་སྨད་དུ། ཡང་ཕོ་ཁ། དེ་ལྟར་ལན་གསུམ་བྱས་པའི་རྗེས་ལ་ཕྱིར་འབུད་དྲག་པོ་དང་རྡོ་རྗེ་ཁུ་ཚུར་གཉིས་འཆུན་བསྐྱེད་ལ་སྤྱི་བོར་བརྐྱང་། མར་ལོག་སྣའི་ཐད་ཙམ་དུ་སླེབ་པ་དང་རླུང་བརྔུབས་མདུན་ནས་མར་སྔར་བཞིན་བཙུགས། དེའི་ངང་ནས་རླུང་དེ་སྟོད་ལ་ཤེད་བསྐྱེད་ལ་ཕུལ་བས་ཁ་སྣ་གཉིས་ཀར་འོང་། སྣ་བུག་སོ་སོར་འཐོན་པར་བྱེད་ན། རླུང་གཡས་རྒྱུ་དང་བསྟུན་པུས་མོ་ལག་ངར་ས་ལ་བཙུགས་ནས། པུས་མོ་གཉིས་ཀྱི་བར་ལ་བསྐུམ་ཁྲུ་གང་བཞག་པའི་པུས་མོ་གཡས་ཅུང་ཟད་མདུན་དུ་རིང་བར་བྱས། དེའི་འོག་ནས་ལག་སོར་བསྣོལ་བས་འཁྱུད། དྭངས་སྙིགས་འབྱེད་པའི་དུས་སུ་རླུང་རང་འགག དེ་སྟེང་དུ་ཐང་གིས་འཐེན། བར་དུ་བརྒྱངས། གཡས་ནས་གཡོན་དུ་ལན་གསུམ་བསྐོར། གཡོན་དུ་ལན་གཅིག་བསྐོར་བ་རླུང་སྣ་ནས་ཤེད་བསྐྱེད་ལ་གཡས་ཕྱོགས་སུ་འབུད་དོ། །དེ་སྣ་གཡས་ནས་འཐོན་འོང་། དེ་བཞིན་བཟློག་པས་གཡོན་དུའང་། དབུས་ནས་གཉིས་ཀར་ཡང་བྱའོ། །འདི་དག་གི་འཐེན་དུས་རླུང་གནད་འབའ་ཞིག་གིས་འཐེན་མ་ཐུབ་ན་ཐུར་མ་བཙུགས་རྒྱབ་ཐུར་ཀྱང་རླུང་གནད་འདི་རྣམས་ཀྱིས་ཐེ་མི་ཚོམ། །གསུམ་པ་ཆ་ལག་བསྟན་པ་ནི། སྐྱེས་པའི་གནོད་པ་བསྲུང་བའི་པདྨ་ཁ་སྡོམ་ལ་རྒྱུན་དུ་གསང་བའི་སྐྱིལ་ཀྲུང་བྱས། ལག་པ་རྡོ་རྗེ་ཁུ་ཚུར་བརྩེགས་པ་པུས་མོར། རླུང་ལྟེ་བར་མནན། པདྨའི་རླུང་ཡར་འཐེན་པའོ། །རྩ་རིགས་ངེས་ན་སོ་སོར་རྒྱས་པ་བཞིན་ནོ། །ཁུག་ཆོས་ཁ་མ་བྱེ་བ། སྤང་རྒྱན་ཁ་མ་བྱེ་བ། དྲིལ་ཤང་དཀར་པོ་ཁ་མ་བྱེ་བ་མེ་ཏོག་འབུས་ཙམ། བྱ་ཕོའི་ཨོག་ཞོལ། རྨ་བྱའི་མདོངས་རྣམས་ཞིབ་པར་བཏགས། ཕྱེད་མར་དང་སྦྱར་ཏེ་ཐུན་གསུམ་དུ་པདྨ་ལ་བྱུག ཕྱེད་རྩ་སྟོང་ལ་ཆང་དང་སྦྱར་ཏེ་ལྟོར་བཏང་ངོ་། །པདྨ་ཐེར་འབུད་ནི། འོག་སྒོ་གློད། མདུན་རླུང་མདུན་རང་ལ་བརྒྱངས་ནས་འཕུལ། ཡང་རླུང་བཟུང་ལ་མདུན་དུ་ཤེད་བསྐྱེད་ལ་འཕུལ། སྐྱེས་པའི་གནོད་པ་བྱུང་དུས་རྡོ་རྗེས་གླགས་མི་རྙེད་པའམ། ཆུད་ཀྱང་ནང་དུ་མི་འཆགས་སོ། །གཉིས་པ་རང་ལུས་བསྒྲུབ་པ་ལ། སྔོན་འགྲོ་ལག་པའི་སྦྱོར་བ། དངོས་གཞི་བོ་ལའི་སྦྱོར་བ། རྗེས་འདྲེན་འགྲེམས་འཁྲུལ་འཁོར་གྱི་གནད་གསུམ་ལས། དང་པོ་ནི། རྐང་པ་སེམས་སྐྱིལ་ལྷོད་བྱས། རང་རྡོ་རྗེ་རྣལ་འབྱོར་མར་བསྐྱེད་པའི་གནས་གསུམ་བྱིན་བརླབ་གོ་བགོ ཨ་ལས་པདྨ་ཟེའུ་འབྲུ་སྲཱིཿམཚན་པ་ཕཊ྄་ཀྱིས་བུ་ག་བཀག་པ། མཐེབ་སྲིན་འཁོར་ལོ་སྡོམ་པ་སྐུ་མདོག་སྔོན་པོ་ཞལ་གཅིག་རྡོར་དྲིལ་ཐུགས་ཀར་བསྣོལ་བ་ཕྱག་རྒྱ་དྲུག་གིས་བརྒྱན་པ། སྟག་ཤམ་གྱི་མདུན་ནས་ཅུང་ཟད་གྲོལ་བས་འཁྱུད་པ་དེའི་གསང་གནས་ཧཱུྃ་ལས་རྡོ་རྗེ་ཨོཾ་གྱིས་ནོར་བུ་མཚན་པ་ཕཊ྄་ཀྱིས་བུ་ག་བཀག་པ་སྙོམས་པར་ཞུགས་པར་བསྒོམས་ཏེ། དེས་པདྨ་མཉེས། ཁམས་གཡོས། བདེ་བའི་སྟེང་དུ་དྲན་ཤེས་མ་ཡེངས་པར་བྱས་པས་ལམ་དུ་བཏང་ངོ་། །གཉིས་པ་ནི། ཤིང་ཕོ་ཤིང་རང་གི་བྷ་ག་ལ་རན་པ་སྦོམ་ཕྲ་མཛུབ་མོ་ཙམ་པ་ཕྱི་ཐུམས་ཕྱིང་པ་རྡོ་རྗེའི་དབྱིབས་བྱས། དེར་ཚིལ་བཞུས་པའི་སྟེང་དུ། སྙིང་ཞོ་ཤ སྤ་མའི་ཁནྡ། གླ་རྩི། རུསྟ། ཁ་ཆེ། མེ་ཏོག་གླང་སྣ་དམར་པོ། རི་སྒོག་རྩ་དཀར་གྱི་རྩ་བ་ཡོད་ཙམ། སྒོག་གཅིག་ཕྱེད། རུསྟ། རྒྱ་ཚྭ། གོ་བོའི་བྲུན། དུང་སྲིན་མེད། གཡེར་མ་མཚོན་ཅིག་བཏབ་པ་བཏགས། ཕྱིང་པ་དེ་གཙོ། ཞལ་བ་ལྟ་བུར་བྱས་པ། དབྱར་ཡིན་ན་ལྡུམ་རའི་རྒྱ་ཤོ་རློན་པ་ཆར་གྱིས་ཚིམ་པའི་རྩ་བ་དང་རྐང་གི་བར་ན་དཀར་དམར་འདྲེས་པའི་འཇག་འཇོག་ཡོད་པ་དེའི་ནང་ལ་མཁྲང་བྱེད་དུ་སྨྱུག་མ་བརྫངས་པ་བྷ་ག་ལ་རན་པས་ཡབ་དང་ཡུམ་སྔར་བཞིན་རང་ངམ་གྲོགས་རིགས་མཐུན་གྱིས་སྐྱེས་པ་བཞིན་དུ་བསྐྱོད། བདེ་བ་ཆེར་སྐྱེས་པ་དྲན་ཤེས་ཀྱིས་མ་ཡེངས་པར་བྱའོ། །གསུམ་པ་ནི། འཛིན་ལྔ་སྦྱོར་བའི་འདུག་སྟངས་གང་ཡིན་གྱི་སྟེང་ནས་རླུང་སྤྱི་བོའི་བར་གང་བས་འཛིན། ཡང་སྟོད་དུ་བརྒྱངས་ལ་བཙན་ཐབས་བརྒྱབ་ལ་འཛིན། ཡང་རྡོ་རྗེ་ཁུ་ཚུར་སྙིང་གར་བསྣོལ་ལ་དེར་ཁ་སྦྱར་གྱིས་འཛིན། ཡང་ལག་པ་གང་བདེ། རླུང་སྟེང་འོག་བར་གསུམ་ཁ་སྦྱར་ཕོ་བར་བཟུང་ལྟོ་བ་མདུན་དུ་ཕུལ་བས་འཛིན། ཡང་མདུན་རླུང་འཐེན་སྟེང་རླུང་བརྔུབ་པ་རྒྱབ་ཏུ་འཕུལ་བས་འཛིན། འདི་དག་འཁོར་ལོ་སོ་སོར་ཕབ་པ་རང་ས་ནས་བཟློག་པ་ལ་བྱ། གཞན་དུ་ཕྱི་མ་ཉིད་དོ། །དེ་ནས་འབྱེད་པ་ནི། རླུང་ཕོ་བར་བཟུང་སྟེ་ལུས་གཡས་གཡོན་དུ་བཅག ཕོ་བ་བཙུབས་ནས་རླུང་འཇམ་པོ་སུམ་བསྟུད་དུ་འབུད། མཐར་རླུང་བརྔུབས་ལ་ལྟོ་བ་བསྐོར་ཞིང་རྡེབ་གཙུབ་གང་ཐུབ་ཀྱིས་གཙུབ་པ། དེ་ནས་འདྲེན་བྱ་བ་ལ་རླུང་ཁ་སྦྱར་སྟོད་ལ་འཐེན་པ་དང་། ཕྱིར་འབུད་འཇམ་པོས་འདྲེན་པ་དང་། ཡང་ཕྱིར་འབུད་དྲག་པོས་འདྲེན་པའོ། །དེ་ནས་པདྨ་སྐད་འདོན་གྱི་འཁྲུལ་འཁོར་རྣམས་བྱའོ། །དེ་ནས་སྙིགས་མ་འབོད་པར་བྱེད་པའི་འཁྲུལ་འཁོར་བཞི་སྟེ། འབོད་ཆུང་། རུ་སྦལ་གན་རྐྱལ། རུ་སྦལ་ཁ་སྦུབ། འབོད་ཆེན་པོ། དང་པོ། ཙོག་པུ་པུས་མོ་ཕྱིར་བསྐྱེད་པའི་ཁར་ཁུ་ཚུར་བཞག འོག་གློད། སྟེང་རླུང་ཐུར་ལ་སྡིག ཕོངས་རྟིང་པ་ལ་འཆུན་ཆེ་བར་རྡེབ་པའོ། །གཉིས་པ་གན་རྐྱལ་དུ་ཡན་ལག་བསྐུམ་བྱས་སྟེ་རླུང་མནན་ཏེ་ཐུར་སྡིག གསུམ་པ་པུས་བཙུགས་ཀྱི་སྟེང་དུ་ཁུ་ཚུར་བཞག་ལ་སྟེང་རླུང་ཐུར་དུ་སྡིག དེ་དུས་པུས་མོ་ཕྲད་བྱེད་པའོ། །བཞི་པ་ནི། འབེབས་སྟན་གྱི་སྟེང་དུ་ཕོངས་བཞག་ལ་ལངས་དུས་ལག་པ་མཐེ་བོང་སྤྲེལ་བ་སྤྱི་བོར་འཐེན་པ་དང་རླུང་ཁ་སྦྱར་འཐེན་པ་མཉམ་དུ་བྱས། ལག་པ་རྒྱུ་ཞབས་གཡས་སུ་བསྣུན་པ། རླུང་སྡིག་པ། ཕོངས་རྡེབ་པ། རྐང་པ་བགྲད་པ་བཞི་མཉམ་དུ་བྱའོ། །དེ་བཞིན་གཡོན་དབུས་སུ། དེ་ནས་འགྲེམས་པ་ལ་དྭངས་འགྲེམས་སྙིགས་འགྲེམས། དྭངས་འགྲེམས་ལ་སྟོང་པར་གཉིས། དང་པོ། ལུས་སྐྱིལ་ཀྲུང་རླུང་རང་སོར་བཞག་པ་ཕྱིར་འགྲོ་བའི་ཚེ་པད་ཀྱིས་བཅད་ལ་གང་ཐུབ་ཀྱི་རིང་བཞག་པ་སྨད་རང་འདར་སིལ་གྱིས་འོང་། དེ་དུས་ལུས་སིལ་ལི་ལི་སྤྲུག བར་འགྲེམས། རླུང་ནང་དུ་གནས་པའི་མཚམས་བཅད་ལ་བཞག་པས་ལུས་འདར་སིལ་ལི་ལི་འོང་། དེ་དུས་ལུས་བྱིན་སྤྲུག་པའོ། །སྙིགས་མ་འགྲེམས་པ་ལ་སྟོད་སྨད་བར་གྱི་རྣམ་རོལ་གསུམ་རྐང་པ་སྐྱིལ་ཀྲུང་ལག་པའི་སོར་མོས་སྣ། མིག་རྣ་བ་ཁ་མཐེ་བོང་གིས་མགྲིན་པའི་རྦ་རླབས་ལྟེམ། རླུང་ཁ་སྦྱར་མགོ་ལ་འཐེན་ཞིང་བཟུང་ནས་མདུན་དུ་ཁུགས་ཚད་བཀུག ཡང་རྒྱབ་ཏུ་དགྱེད། རླུང་མི་ཐུབ་པའི་དུས་མགོ་དང་ལག་པ་མདུན་དུ་སྤྲུག རྗེས་སུ་རླུང་གང་འབུད་ཐུབ་པ་གསུམ་སྟོད་ཀྱི་རྣམ་རོལ། སྐྱིལ་ཀྲུང་ལག་གཉིས་བསྣོལ་བས་མཆན་རྩ་བསྡམ། སྐེད་པ་གཡས་གཡོན་དུ་བསྐོར། མཐར་ལུས་སི་ལི་སྤྲུག་པ་བར་གྱི་རྣམ་རོལ། སྐྱིལ་ཀྲུང་ལག་གཉིས་མཁལ་རྩ་མནན་ནས་སྐྱིལ་ཀྲུང་དང་ཕོངས་རེ་མོས་རྡེབ། མཐར་རྡེབ་པ་སྨད་ཀྱི་རྣམ་རོལ། དེའི་མཐར་རླུང་བུམ་པ་ཅན་ཁ་རེ་སྒོམ་ཤེས་པ་ཕྱག་ཆེན་གྱི་རྩིས་གཟུང་སྟེ་མཉམ་གཞག་རྒྱུན་ཅི་རིང་བསྐྱང་ངོ་། །གསུམ་པ་གཞན་ལུས་བསྒྲུབ་ཆེན་བཤད་པ་ལ། སྔོན་འགྲོ་དཔའ་བོ་བརྟག་དགུག དངོས་གཞི་མཉམ་པར་སྦྱོར་བ། རྗེས་ལམ་དུ་འཁྱེར་བའི་གནད་བཤད་པ་གསུམ། དང་པོ་ནི། རང་ཉིད་ཀྱི་རིགས་ངེས་པས་རིགས་ཀྱི་རྗེས་སུ་འགྲོ་བའི་དཔའ་བོ་མ་རྙེད་ན་ལང་ཚོ་ལ་གནས་པ་སུ་ཡང་རུང་ངོ་། །དགུག་པ་ནི། རྫས་སྔགས་ཏིང་འཛིན་བསྙེན་བཀུར་སོགས་ཀྱིས་སོ། །གཉིས་པ་ནི། དེ་དང་ཆགས་པའི་སྤྱོད་པ་སྣ་ཚོགས་ཀྱིས་བདེ་བ་བསྐུལ། འཁོར་ལོ་སྡོམ་པ་དང་རང་རྣལ་འབྱོར་མར་བསྐྱེད་མཁའ་གསང་བྱིན་གྱིས་བརླབ་པར་བྱ། རང་རྩ་བཟང་ན་དེའི་རྡོ་རྗེའི་བུ་གར་བཅུག་དལ་བུར་བསྣུན་པས་བདེ་བ་མི་བཟོད་པ་སྐྱེ། གལ་ཏེ་རྩ་ངན་ན་དེའི་ནོར་བུས་འགྲམ་ཡུན་རིང་དུ་མཉེས་ཏེ་ནང་དུ་གཞུག དེ་ནས་དལ་བུར་བསྐྱོད་དུ་བཅུག་པ་རླུང་ནུས་ཞན་ན་བདེ་བ་སྤྱི་བོར་སོགས་ནས་བཟློག་སྟེ་རིམ་པས་ཇེ་མར་ཕབ། མགྲིན་འཁོར་དུ་དགའ་བ། སྙིང་གར་མཆོག་དགའ་ལྟེ་བར་ཁྱད་དགའ། གསང་བར་ལྷན་སྐྱེས། དུས་ཀྱི་སྐད་ཅིག་མ་བཞི། ཡུལ་གྱི་སྟོང་བཞི་རྟོགས་པར་བྱའོ། །ནུས་པ་དང་རྩ་རིགས་བཟང་ན་གསང་རྩེ་ཕྲད་སར་ཕབ། དེ་དུས་སྟོང་པ་ཉིད་ལ་གཞག་པས་བདེ་བ་དེ་རྣམ་བཅས་སུ་ལྡང་། དེ་དཔེའི་ཡེ་ཤེས། དེ་ཀས་རང་འཆིང་། མེད་ན་རྩོལ་བའི་འཛིན་སོགས་བྱ། དེ་ནས་དེ་དུས་ཀྱི་བདེ་བ་མཚོན་བྱེད་དུ་བྱས་ན་ཕྱག་རྒྱ་དང་བྲལ་བའི་སྐབས་ཐམས་ཅད་དུ་དེ་བསྒོམ་ཞིང་དེས་སྣང་བ་གང་ཤར་དེའི་རོལ་པར་ཁྱེར་རོ། །དེ་ཡང་ཡང་སྦྱངས་པ་ཇི་ཞིག་ན་རྣམ་མེད་ཀྱི་བདེ་བ་ཆེན་པོ་རྟོགས་ཏེ་རླུང་སེམས་དབུ་མར་ཐིམ་མོ། །དབང་པོ་རྣོ་ན་སྐད་ཅིག་མ་དེར་འཚང་རྒྱ་ལ་འབྲིང་ན་སྟན་ཐོག་གཅིག་ཏུ་ས་ལམ་རྫོགས་ཤིང་། རཏལ་ནས་དང་པོ་ནས་རིམ་གྱིས་སོ། །གསུམ་པ་ལ། འདུག་སྟངས་དང་། རྗེས་ཤེས་ལམ་དུ་ཁྱེར་བ་གཉིས། དང་པོ་ནི། སྦྱོར་དུས་ཀྱི་འདུག་སྟངས་དྲུག་སྟེ། ཉི་མ་དག་བྱེད་ནི། རང་གན་རྐྱལ་ལག་པ་བརླའི་ནང་ནས་མར་བཏང་ཕྱིར་འཁྱུད་ལ་རྐང་པའི་མཐེབ་ཆེན་འཛིན་པའི་སྟེང་དུ་ཡབ་བཞག་པས་སོ། །རཀྟ་གྱེན་འདྲེན་ནི། རང་གན་རྐྱལ་གྱི་སྟེང་དུ་ཡབ། རང་གི་རྐང་པ་དེའི་རྒྱབ་ཏུ་བསྣོལ་བའི་མཐེ་བོང་ནས་ལག་པས་བཟུང་། རུ་སྦལ་ཁ་སྦུབ་ནི། རང་སྟེང་དུ་གནས་པའི་པུས་མོ་བཙུགས། ལག་པའི་གྲུ་མོ་གཉིས་ཡབ་ཀྱི་བྲང་ཁར་བཅར་གྱིས་ཕབ་པའོ། །རུ་སྦལ་གན་རྐྱལ་ནི། དེ་བཟློག་པའོ། །བགྲད་པའི་སྦྱོར་བ་ནི། རང་དང་དེའི་གསང་གནས་སྤྲད་པའི་རྐང་པ་བརྐྱང་པས་སོ་སོར་དགྱེད་པས་ལུས་ཀུ་རུ་ཁར་སོང་བ། བརྐྱང་བའི་སྦྱོར་བ་ནི། རང་གི་རྐང་པ་བརྐྱང་བའི་ཁར་ཡབ་ཀྱི་ཕོངས་བཞག་ལ་རྐང་པ་བརྐྱང་སྟེ་བསྐྱོད་པའོ། །གཉིས་པ་ནི། འཛིན་དང་པོ་ཉི་མ་དག་བྱེད་བཞིན་ལ། འཇམ་རླུང་ཕྱིར་ཙམ་ཐུབ་འཛིན། དབང་སོགས་གྱེན་དུ་བཟློག་གོ །མི་ཐུབ་པ་དང་ནང་དུ་བརྔུབས་ལ་བསྡིགས་བསྐྱུར་བྱས། མདུན་དུ་ཕུལ་ཙམ་བྱས་པའི་ངང་ནས་འཇམ་རླུང་ཕྱིར་ཙམ་ཐུབ་འཛིན་པ། ཡང་ན་ཕྲ་མཚམས་ནས་པུས་མོའི་ཕྱི་ཟུར་གཉིས་ནས་བཏང་བས་བཟུང་། ཁ་ནས་ཧ་ཞེས། གཞན་སྔ་མ་བཞིན། ཡང་ཡབ་ཀྱི་དཔྱི་མགོའི་སྟེང་དུ་རང་གི་ལག་པ་བསྣོལ། རྐང་མགོ་གཉིས་བཟུང་། རླུང་ཕྱིར་ཤེད་བསྐྱེད་ལ་ཕུལ། མི་ཐུབ་པ་དང་ཧབ་ཀྱིས་ཁ་ནས་བརྔུབ་སྙིང་ག་ཡན་དུ་གཟུང་། སྨད་ཀྱི་རླུང་ཞབས་དེ་སྟོད་དུ་ཐང་གིས་འཐེན། སྟོད་ཀྱི་རླུང་སྣ་གཉིས་ནས་ཕྱིར་ཤེད་བསྐྱེད་ལ་འཕུལ་ཕྱིར་ཙམ་ཐུབ་འཛིན། དབང་སོགས་གྱེན་དུ་བཟློག འབྱེད་འདྲེན་འབོད་པ་རང་ལུས་ལས་བྱུང་བ་བཞིན་བྱས་པའི་མཐར། སྲིད་སྲུང་ལ་སྔོན་འགྲོ་དངོས་གཞི་རྗེས་གསུམ། དང་པོ་འབེབས་སྟན་ཀུན་རྫོགས་བཞིན་ལ་རྐང་པ་གཉིས་ཀྱི་བར་དུ་ཁྲུ་གང་ཡོད་པ་བྱས། རླུང་བཟུང་ཡར་ཧར་གྱིས་ལངས་རླུང་ཤེད་བསྐྱེད་ལ་འབུད། ལག་པ་རྡོ་རྗེ་ཁུ་ཚུར་གན་རྐྱལ་གྱིས་རོ་བརྐྱང་བཤུད་དེ་སྤྱི་བོར་བརྐྱང་གཡས་གཡོན་དུ་གཅུས་ཏེ་རླུང་སེམས་བསྲེས། མི་ཐུབ་པ་དང་བརྔུབས། འོག་སྒོ་གཉིས་སུ་ཤེད་བསྐྱེད་ལ་འཕུལ། ལག་པ་རྡོ་རྗེ་ཁུ་ཚུར་ཁ་སྦུབ་པས་རོ་བརྐྱང་མར་བཤུད། མདུན་དུ་འབེབས་པ་དང་ཕོངས་རྡེབ་པ་བསྟུན། འདི་ཕྱི་དྲོ་ནས་བསྟན། དེའི་དགོང་བརྒྱ། སང་ཞོགས་ཉིས་བརྒྱ། དེ་དགོང་བཞི་བརྒྱ། དེའི་སང་བརྒྱད་བརྒྱ། དེའི་དགོང་སྟོང་ར་ཅན་ནོ། །འབེབས་པ་དེའི་སང་ཞོགས་རྩེག་དུས་བཞིན་ཚུར་ཉུང་བས་འབེབས་སོ། །གཉིས་པ་ནི་ལུས་གནད་གོང་བཞིན་ལ། ཆུ་རྡོ་ཁྱུད་གང་སྒོར་མོར་ཡོད་པ་གཉིས་ཆུ་ལ་སྦངས་མཁལ་ཁུང་གཉིས་སུ་བཅུག་སྐ་རགས་ཀྱིས་བསྡམས། འབེབས་ཞག་བདུན་གྱི་བར་ཞོགས་བརྒྱ་དགོང་བརྒྱ་བྱེད་པའོ། །གསུམ་པ་ནི། ལས་ལ་སྦྱར་བའི་ཚེ། སྐྱེས་པ་དང་མ་བྲལ་རིང་ལུས་གནད་གང་བདེ་ལ་རླུང་ཕྱིར་འབུད་ཙམ་ཐུབ་འཛིན། མི་ཐུབ་པ་དང་སྟོད་དུ་བརྔུབས། ཡང་ཕྱིར་ཕུ་ཕྱིར་འཛིན་དམིགས་པ་པདྨའི་ནང་དུ་རལ་གྲི་མེ་འབར་བ་བསྒོམ། ཕོ་རོག་ཉུང་མའི་ལོ་མའི་གྲང་ཐང་བཏང་། འགྲེམས་རླུང་དང་བསྲེ་བ། མཐར་ཕྱག་རྒྱ་ཆེན་པོ་ལ་མཉམ་པར་གཞག་པས་སྦྱོར། བུད་མེད་ལ་དམར་ཆ་ཤས་ཆེ་བས་འདྲེན་མི་དྲག འབོད་འབྱེད་འབེབས་གསུམ་གཙོ་བོར་བྱའོ། །དབང་བཞི་པ་དང་སྤྱོད་པ་ཕོ་ཁྲིད་ཇི་བཞིན་ནོ། །དེ་ལྟར་མཚན་ལྡན་གྱི་བུད་མེད་རྡོ་རྗེ་ཕག་མོར་བཙན་ཐབས་སུ་སྦྱོར་བའི་ཞལ་གདམས་མཁའ་འགྲོའི་མྱུར་ལམ་འདི་ཡང་ཡར་འདྲེན་བྱང་ཆུབ་སྨན་ལྗོངས་ཞེས་བྱ་བའི་དབེན་གནས་ཉམས་བདེ་བར། ཀུན་སྤངས་རྗེའི་རིགས་དབོན་ཆོས་དཔོན་མ་ཆོས་ཀྱི་དཔལ་འདྲེན་གྱིས་བསྐུལ་བ་ལྟར་པདྨ་དཀར་པོས་སྦྱར་བའོ། །འདིར་ཞུགས་པ་ཐམས་ཅད་ཀྱང་རྡོ་རྗེ་ཕག་མོའི་གོ་འཕང་དམ་པ་ཚེ་འདི་ཉིད་ལ་ཐོབ་པར་གྱུར་ཅིག། །།སརྦ་མངྒལཾ།། |