 ཀུན་མཁྱེན་པདྨ་དཀར་པོའི་གསུང་འབུམ།གླེགས་བམ། ཝ༽ཀུན་མཁྱེན་པདྨ་དཀར་པོ།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ལུས་མེད་མཁའ་འགྲོའི་ཆོས་སྡེའི་རྣམ་པར་བཤད་པ་ཆོས་ཀྱི་ཉིང་ཁུ།ལུས་མེད་མཁའ་འགྲོའི་ཆོས་སྡེའི་རྣམ་པར་བཤད་པ་ཆོས་ཀྱི་ཉིང་ཁུ་ཞེས་བྱ་བ་བཞུགས་སོ། །བླ་མ་དམ་པའི་ཞབས་ལ་ཕྱག་འཚལ་ལོ། །མཁའ་ལ་སྤྱོད་པ་ཀུན་གྱི་ཐིག་ལེ་རྡོ་རྗེའི་ལམ་དུ་མེ་བོ་ཆེ། །རྣམ་པར་སྣང་བའི་དངོས་པོ་ཐམས་ཅད་མཛད་པའི་རྦ་རླབས་འབྱམས་ཀླས་པ། །རྣལ་འབྱོར་རྣམས་ཀྱི་གཟིགས་པའི་ཕྱི་མོ་རྟག་ཏུ་སད་པ་རྣམས་ཀྱི་གཉེན། །ཤེས་རབ་ཕ་རོལ་ཕྱིན་མར་འདུད་དོ་མ་ལུས་ལེགས་པའི་བཀའ་དྲིན་སྩོལ། །ཨོ་རྒྱན་དྷ་ན་ཀོ་ཤའི་མཚོའི། །ལེགས་བཤད་པདྨོའི་རྩེར་འཐོན་པ། །འདིས་མཐུ་མཚུངས་པ་མེད་པ་ནི། །རྒྱ་བོད་ཀུན་ན་གང་ཡང་ངོམས། །དེ་བསྙེན་ཆོ་གས་ཁ་སྦྱོར་སྐུ། །བདེ་བར་ལོན་ཤེས་དགའ་བ་ཡི། །ཉི་འོད་ཀྱིས་གཟི་པུཎྜྻ་རཱི། །ལྷ་གནས་མནྡ་ར་བར་སོང་། །འདིར་གང་བཤད་པར་བྱ་ན། ལྷ་མོ་བཅོ་ལྔ་དབང་བཞི་བརྡ་ཡིས་མཚོན། གང་གིས་འཆད་ན་ལུས་མེད་མཁའ་འགྲོའི་ཆོས་སྡེས། ཚུལ་ཇི་ལྟར་བཤད་ན། འཁོར་ལོ་སྡོམ་པའི་རྩ་རྒྱུད་ཉུང་ངུ་བཤད་རྒྱུད་རྡོ་རྗེ་མཁའ་འགྲོ་དང་བཅས་པ་ནས་བཤད་པ་བཞིན་དུའོ། །དེ་འདིར་བཤད་པའི་རྒྱུ་མཚན། བཤད་པ་དངོས་གཉིས་ལས། དང་པོ་ནི། རྗེ་བཙུན་མར་མི་རས་དྭགས་བཞིས། རྒྱུད་དང་འབྲེལ་བ་ཐབས་ལམ་གྱི་གདམས་ངག་དང་། བྱིན་རླབས་དང་འབྲེལ་བ་སྙན་རྒྱུད་ཀྱི་གདམས་ངག་ཞེས་གསུངས་པའི་དང་པོ་བསྲེ་འཕོ་གནད་ཀྱི་མཚམས་སྦྱོར་ཞེས་བྱ་བ་བཀའ་བརྒྱུད་གོང་མ་རྣམས་སངས་རྒྱས་ཀྱི་གོ་འཕང་དུ་བྱོན་པའི་གཞུང་ལམ་ཆེན་པོ་དེ་ཡིན། དེ་ནི་རྒྱུད་ནས་བཤད་པའི་ལམ་ཐམས་ཅད་གཏན་ལ་ཕབ་པ་ཡིན་པས་རྒྱུད་དང་འབྲེལ་བ་སྟེ། དཔེར་ན་སྨན་པས་རྒྱུད་ནས་བཤད་པའི་སྨན་ཐམས་ཅད་བསགས་པ་དང་འདྲ། གཉིས་པ་སྙན་རྒྱུད་ནོར་བུ་སྐོར་གསུམ་ཞེས་པ་འཁོར་ལོ་སྡོམ་པའི་རྣལ་འབྱོར་པ་དེར་བགྲོད་པའི་གསེབ་ལམ་སྟེ། གང་ཟག་གཅིག་སངས་རྒྱ་བའི་ཆ་རྐྱེན་ཚང་ལ་མ་ནོར་བ་བསྟན་ནས་དེས་དེ་བྱིན་གྱིས་རློབ་ནུས་པས་བྱིན་རླབས་དང་འབྲེལ་བ་སྟེ། ནད་ལ་སྨན་སྦྱོར་སྡེ་བྱས་ནས་གཏོང་བ་ལྟ་བུ་དེའི་གནད་མ་གོ་བར་སྡོམ་གསུམ་རབ་དབྱེའི་སྤྱི་ཊིག་བྱེད་པ་དག་ཐང་ཆད་དོ། །སྙན་རྒྱུད་དེ་ཉིད་ལའང་ཡི་གེ་ལ་དགའ་བ་འགས་རྙོག་པ་བླང་སྟེ་ལྷ་མོ་བཅོ་ལྔ་ཞེས་པའི་གཙོ་མོ་ཞལ་བཞི་ཕྱག་བཅུ་གཉིས་མ་ལ་བྱས་པ་རྗེས་བཙུན་གོང་མ་རྣམས་དང་མ་མཐུན་པས་དེ་དར་བ་དགག་པར་འདོད་པ་དང་། རྗེ་བཙུན་རྣམས་ལུས་མེད་མཁའ་འགྲོ་མའི་སྒྲུབ་ཐབས་དེའི་རྩ་བར་མཛད་པ་དར་བའི་ཆེད་དུའོ། །དེ་བས་ན་སྒྲུབ་ཐབས་འདི་ཡུམ་བཀའ་རྒྱས་པ་དང་། ལྷ་བདུན་མའི་གཞུང་འབྲིང་པོ་དང་། ཇོ་བོ་ནཱ་རོ་པའི་ཞལ་གྱི་གདམས་པའི་བརྒྱུད་པའི་རྗེས་སུ་གནང་བ་ཞེས་པ་བསྡུས་པ་ལྷན་ཅིག་སྐྱེས་མའི་སྒྲུབ་ཐབས་ཏེ། དང་པོ་ཉེ་སྙིང་། གཉིས་པ་གོ་ཆ། གསུམ་པ་སྙིང་པོའི་སྔགས་ཀྱིས་སྒྲུབ་པར་རྩ་རྒྱུད་ལས་གསུངས་སོ། །ཕག་ནག་ནི་འདི་དང་འབྲེལ་མེད། ཡོད་ན་སྙན་རྒྱུད་གཞུང་ཆུང་ལས་ཡུམ་བཀའ་གསུམ་དུ་བསྡུས་ནས་གསུངས་པ་དང་འགལ་ལོ། །ནཱ་རོ་མཁའ་སྤྱོད་མ་ཞེས་གྲགས་པའི་གཞུང་ཡང་འདི་ཁ་ཡིན་ཏེ། འདི་ལས་གཞན་ལྷ་མོ་དེའི་ཞལ་ཕྱག་བཞུགས་སྟངས་ཇི་ལྟ་བར་བཤད་པའི་གཞུང་བོད་ཙམ་ལ་མེད། ས་ལུགས་པ་ལ་རྩ་བ་མེད་པ་འདི་ཡང་ཕམ་ཐིང་པ་ལསམཆེད་ནས་འོངས་སོ། །གཞན་བདེན་གཉིས་ཞལ་གྱི་གཞུང་འདི་གསང་བ་འདུས་པ་སངས་རྒྱས་དངོས་ལ་ཞུ་མཁན་གྱི་ཨིནྡྲ་བྷཱུ་ཏིས་མཛད། དེ་ལས་ཞལ་གཉིས་མ་ཆེ་བ་དང་། དོན་གྲུབ་མ་ཆེ་ཆུང་གྱེས། དབུ་བཅད་ཆེ་ཆུང་བསྣན་ནས་གཞུང་དྲུག་བྱེད་པ། རིགས་ལྡན་ཁྱབ་འཇུག་སྦས་པས་མཛད་པ་སོགས་གཞུང་མང་ཡང་འདིའི་ལུགས་མིན་ནོ། །འདིའི་ལྷ་བདུན་གྱི་གཞུང་དམར་ཆུང་མའི་རྩ་བ་གཉིས་པར་བཀོད་པ་རིགས་པ་མ་ཡིན་ཏེ། དམར་ཆུང་མ་ནི་ཏྲི་ས་ར་ཧས་བྱས། དེས་ཀོང་ནི་རུ་བ། དེའི་སློབ་མ་ཞིག་གིས་བོད་དུ་སྤྱན་དྲངས་པ་ཡིན་ལ། བརྒྱུད་པ་འདིའི་ལུགས་མིན། དེ་ལ་བརྡ་བཞི་སྟོན་པ་མེད་དེས་ན་དགའ་སྡོང་པའི་སྡོམ་གསུམ་འགྲེལ་ཆེན་དུ། དྭགས་པོ་རིན་པོ་ཆེ་དཔོན་སློབ་ལ་དབང་གནང་རྒྱུ་མ་བྱུང་། དེས་སློབ་མ་གཞན་ལ་ཤོར། དེའི་ཚེ་སློབ་མའི་གྲངས་སུ་ཀོང་ནི་རུ་བ་ཡོད་པས་ཁོང་གིས་ང་ལ་འདི་ལྟ་བུ་ཡོད་བྱས་ནས་དེ་བྱས་པས་བརྡ་བཞིའི་དབང་འདི་བྱུང་ངོ་ཞེས་སྦྱར་བ་ནི། ཀོང་ནི་རུ་བ་རྩད་མ་ཆོད་པ་དང་། དེ་ལྟ་བུའི་གཏམ་ཁོང་ལས་སུས་ཀྱང་མ་ཐོས་པ་དང་། དྭགས་པོ་ལ་དེ་ལྟ་བུ་སྨྲས་ཆོག་སྟེ་རས་ཆུང་པ་སོགས་མི་ལའི་སློབ་མ་གཞན་ལའང་གནང་བས་རང་གི་རྫུན་ཕུག་སྡིབ་པ་སོགས་ཀྱིས་རྒད་པོ་རང་གི་རླུང་ཉམས་སུ་ཤེས་ལ། ས་ཆེན་གྱི་གསང་སྔགས་ཐམས་ཅད་འཛིན་པར་དེ་ཉིད་ཀྱི་བཤད་པ་ཕག་མོ་གྲུ་པའང་བཞུགས་པ་དེས་ཀྱང་མ་ཤེས་པས་ས་ཆེན་ཀྱང་སྨད་དོ། །རྣམ་བཤད་འདི་ལ་སྡེ་སྣོད་དང་འགལ་བ་མང་བས་བྱེད་པ་པོ་མཁས་པར་ཡང་མ་གཏོགས་སོ། །ལུས་མེད་མཁའ་འགྲོ་ཞེས་བྱ་བ་ལུས་མེད་པའི་སྒྲ་ལྷང་ལྷང་ཞིག་གོ་སྙམ་པའང་བཞད་གད་ཀྱི་གནས་ཡིན། ལུས་མེད་ཀྱི་སྒྲ་ཏིང་ངེ་འཛིན་རྒྱལ་པོའི་མདོ་ལས། ཆོས་གང་ལུས་གཟུགས་མེད་པ་ནི། །དེ་ནི་སངས་རྒྱས་སྐུ་ལུས་སོ། །སུ་དག་ཆོས་ཀྱི་སྐུ་མཐོང་བ། །དེ་དག་གིས་ནི་འདྲེན་པ་མཐོང་། །ཞེས་གསུངས་པས་ལུས་མེད་ཆོས་སྐུ་ཡིན་པས་ལུས་མེད་མཁའ་འགྲོ་མ་བྱས་པ་དང་ཆོས་སྐུ་ཡེ་ཤེས་ཀྱི་མཁའ་འགྲོ་མ་བྱས་པ་དོན་གཅིག་གོ །དེ་སྒྲུབ་པའི་ཐབས་ཀྱི་གཞུང་དེ་ལས་འཕྲོས་པའི་ཆོས་སྡེ་འདི་དག་ནི་འཆད་པ་པོ་ཡང་དེ་ཡིན་ལ། དེ་དུས་ཀྱི་ཉན་པ་པོ་སློབ་དཔོན་ཆེན་པོ་ཏིལླི་པ་ཡིན། འཕྲོས་པའི་ཆོས་ལས་རྩ་རླུང་དྲ་མིག་འཁོར་ལོ། བདེ་ཆེན་གསུང་གི་རིན་ཆེན། རིག་པ་ཡེ་ཤེས་སྒྲོན་མ། རོ་སྙོམས་ཕྱིའི་མེ་ལོང་དང་བཞི་རས་ཆུང་པས་སྤྱན་དྲངས་པས་བརྒྱུད་པ་ལ་མར་པ་དང་ཏི་ཕུ་གཉིས་ཀ་བྱུང་བ་ཡིན། རས་ཆུང་པས་ཏི་བུ་པ་ལས་ལུས་མེད་མཁའ་འགྲོའི་ཆོས་སྡེ་ཚང་བར་གསན་ནོ། །གཉིས་པ་བཤད་པ་དངོས་ལ། མཚོན་བྱ་འབྲས་བུའི་རྡོ་རྗེ་རྣལ་འབྱོར་མ་དང་། མཚོན་བྱེད་ལམ་གྱི་རྡོ་རྗེ་རྣལ་འབྱོར་མ་བཤད་པ་གཉིས་ལས། དང་པོ་ནི། རྗེ་བཙུན་གོང་མ་རྣམས་ཀྱི་དུས་ན་ཆོས་ཚན་གསུམ་མཛད་པས་གཞུང་འཁྲུགས་སྟབས་སུ་བཞུགས་ལ། འདིར་འཁྲུགས་སྡེབས་ཏེ་མངོན་རྟོགས་སུ་བཤད་ན་འཆད་སླ་སློབ་མས་གཟུང་བདེ་བ་ཡིན་ནོ་སྙམ་དེ་ལྟར་བཤད་དོ། །དེ་ཡང་། གང་ཞིག་འཇིགས་རུང་དུར་ཁྲོད་ཆེན་པོར་ཕཊ྄་ཕཊ྄་རྔམ་པའི་སྒྲ་སྒྲོག་ཅིང་། །མཁའ་འགྲོ་ཟ་བྱེད་མུན་པའི་ནང་ན་ཟླ་ཤར་ལྟ་བུར་རབ་ཏུ་འབར། །ཧཱུྃ་ཧཱུྃ་ཞེས་བརྗོད་ཤ་ཟ་རོ་ལངས་མ་མོའི་ཚོགས་རྣམས་སྐྲག་མཛད་པ། །གསང་སྔགས་གསང་མཛོད་མངའ་བདག་བདེ་ཆེན་རྒྱལ་བའི་ཡུམ་གྱི་སྐུ་ལ་འདུད། །ཅེས་མཆོད་པར་བརྗོད་ནས། རང་བཞིན་ཆོས་དབྱིངས་རྣམ་དག་དབྱེར་མེད་བདེ་བ་ཆེན་པོའི་ཀློང་། དག་པ་ཆོས་ཀྱི་འབྱུང་གནས་རྡོ་རྗེའི་བཙུན་མོ་སྟེ། རང་བཞིན་གྱི་རྒྱུད་ནི་ཆོས་ཀྱི་དབྱིངས་རང་བཞིན་ཀྱིས་དག་པ་ཆོས་ཐམས་ཅད་ལ་ལོགས་སུ་དབྱེ་རྒྱུ་མེད་པ་སྒྲོན་མེ་དང་འོད་ཟེར་ལྟ་བུའོ། །དེ་ཡང་འགྱུར་བ་མེད་པས་ཐབས་བདེ་བ་ཆེན་པོ། དེ་ལ་གཞན་གྱིས་སྒྲིབ་པ་དང་། དེས་གཞན་ལ་སྒྲིབ་ཡེ་མ་མྱོང་བའི་དག་པའི་ཆ་དེ་ཁ་ཆོས་ཐམས་ཅད་འབྱུང་བའི་གནས་ཡིན་པས་ཤེས་རབ་བམ་རྡོ་རྗེའི་བཙུན་མོ། དེས་གསང་སྔགས་ཀྱི་རྒྱུད་སྡེར་དངོས་སམ་ཡིད་ཀྱི་རིག་མ་དག་ཀྱང་རང་འོད་ཀྱི་རིག་མར་བཞག་གོ །ཐབས་ཤེས་དེ་གཉིས་ཁ་སྦྱར་བས་རྣལ་འབྱོར། གང་ལས་ཆོས་ཐམས་ཅད་འབྱུང་བས་མ་ཞེས་དེའི་ཕྱིར་རྡོ་རྗེ་རྣལ་འབྱོར་མའོ། །དེ་ཡང་ཀུན་སྤྱོད་ལས། དེས་ན་ཧེ་རུ་ཀ་དཔལ་རྒྱུད། །སེམས་རྒྱུད་དྲི་མེད་ཡིན་པར་བཤད། །དག་པའི་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པ་ཡིན། །ཐབས་དང་ཤེས་རབ་སྦྱོར་བ་ལས། །དེ་ཉིད་དང་ནི་ཐམས་ཅད་བྱུང་། །ཞེས་སོ། །དེ་རང་གི་རྣལ་འབྱོར་གྱིས་མངོན་སུམ་དུ་མ་གྱུར་པ་དེ་ཚུན་ནི་གཞིའི་མིང་བཏགས་མངོན་སུམ་དུ་བྱས་ནས་འབྲས་བུའི་མིང་བཏགས་པར་ཟད་ཀྱི། དོན་ལ་ཐ་དད་པ་མེད་པས་གཞི་འབྲས་དབྱེར་མེད་དོ། །འབྲས་བུའི་ཚེ་གློ་བུར་གྱི་དྲི་མ་དག་ལ། སྔ་མའི་གནས་སྐབས་ན་མ་དག་པས་ཐ་དད་པར་ཅིས་མ་སོང་སྙམ་ན། གློ་བུར་གྱི་དྲི་མ་ནི་ཡོད་མ་མྱོང་བས་མེད་བཞིན་དུ་སྣང་བ་ཞེས་བྱ། དེ་དང་ནམ་ཡང་འགྲོགས་མ་མྱོང་བས་དེ་ཀ་དག་པ་ཡིན་པས། རང་བཞིན་རྣམ་དག་སྟེ། ཡེ་དག་ཡེ་གྲོལ་ཞེས་བྱ་བའི་དོན་ནོ། །འབྲས་བུའི་གནས་སྐབས་དེ་ཡང་རྒྱལ་བ་རྣམས་ཀྱི་རྟག་ཏུ་མཉམ་གཞག་འོད་གསལ་ཆེན་པོས་དང་། དུས་གསུམ་རྟག་ཏུ་རྒྱུན་མི་ཆད་པས་སངས་རྒྱས་སྐུ་གསུམ། རྣམ་པ་མེད་པའི་འོད་གསལ་གཟིགས་པ་ལས་རྒྱུན་མི་ཆད་པས། དེ་ལ་མངོན་པར་བྱང་ཆུབ་པ་ཞེས་བྱ། དེས་གཞན་དོན་རྒྱུན་ཆད་མི་སྲིད་པ་དང་། གཞན་ལ་ཕན་པའི་སྐབས་ཐམས་ཅད་འབྱེད་པའི་ཕྱིར་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རྣམ་པའི་གཟུགས་ཅན་དུ་རྫོགས་པས་ན་མི་སློབ་པའི་ཟུང་འཇུག །མདོ་ལས། རང་དོན་ཆོས་སྐུ་ལས་གཞན་དོན་གཟུགས་ཀྱི་སྐུ་གཉིས་འཆར་བ་ཞེས་བྱའོ། །དེ་ཁ་རིག་མའི་སྐྱེས་བུ་ཞེས་བྱ་བ་རྣལ་འབྱོར་མའི་རྒྱུད་ཐམས་ཅད་ཀྱི་ཐོབ་བྱ་མཐར་ཐུག་ཡིན་ནོ། །དེ་རྣལ་འབྱོར་གྱི་མངོན་སུམ་དུ་འགྱུར་བ་ཡང་དེ་ཉིད་ལས་གཞན་དུ་མ་གཡོས་པ་དེ་ལ་མ་ཡེངས་པ་ཞེས་བྱ་དེ་ལམ་གྱི་བདེན་པའི་ངོ་ཏི་རང་ཡིན་པས། དེས་རྡོ་རྗེ་ཐེག་པ་ལ་འབྲས་བུ་ལམ་བྱེད་དམ་རྒྱུ་འབྲས་ལྷུན་གྲུབ་ཏུ་སྤྱོད་པ་ཞེས་བྱའོ། །དེས་ན་ཡེ་ཉོན་མོངས་མ་མྱོང་བས་ཉོན་མོངས་ལྟར་སྣང་བ་མི་སྤོང་། དེ་ཇི་བཞིན་དུ་བཞག་པས་རང་གྲོལ་དུ་མི་འགྲོ་ཁ་མེད། དེས་དེ་ལ་རང་བཞིན་ཡོངས་ཤེས་ཞེས་ཀྱང་བཏགས་སོ། །དེས་ལམ་མདོར་བསྟན། རྒྱས་པར་བཤད་པ་ལ། དེ་རང་བཞིན། བདག་གཞན་དབྱེར་མེད་ངོ་བོ་ཉིད་དཔལ་ལྷུན་གྲུབ་དབྱེར་མེད་སྤྲོས་དང་བྲལ། །ཞེས་གསུངས་ཏེ། དེ་ནི་བཤད་ཟིན་གྱི་སྐུ་གསུམ་ཡིན་པས་དེའི་རང་བཞིན་དུ་བྱེད་པ་སྨིན་གྲོལ་སེམས་ཀྱི་རྒྱ་མདུད་བཤིག་པ་དང་། དམ་ཚིག་རང་སེམས་མེ་ལོང་གཉིས། བདག་གཞན་དབྱེར་མེད་ཀྱི་བསྐྱེད་རིམ་སྟེ། དེ་དག་གཞན་རྣལ་འབྱོར་གྱི་དེ་ཉིད་གསུམ་དུ་བཤད་པས་དང་། ངོ་བོ་ཉིད་རྩ་རླུང་ཐིག་ལེ་རྣམ་ཤེས་ཡིན། དཔལ་ནི་ཤྲཱི་གཉིས་མེད་ཀྱི་དོན་ཡིན་པས་དངོས་པོར་གནས་པ་ལམ་དུ་བྱེད་པ་རྩ་རླུང་དྲ་མིག་འཁོར་ལོ། བདེ་ཆེན་གསུང་གི་རིན་ཆེན། རང་གྲོལ་ཕྱག་རྒྱ་ཆེན་པོ་གསུམ་ལྷུན་གྲུབ་ཐོད་བརྒལ་གྱི་ཉམས། དབྱེར་མེད་འོད་གསལ་དུ་བཅུག་ལ། སྤྲོས་དང་བྲལ། དེ་ནས་ཟུང་འཇུག་ཏུ་ལོངས་པ་སྟེ། དེ་ལའང་སློབ་མི་སློབ་གཉིས་ཡོད་པས་སྤྱོད་པ་ཆུ་ལ་རལ་གྲི །རིག་པ་ཡེ་ཤེས་སྒྲོན་མ། དམ་རྫས་རྟོགས་པའི་ཉི་མ། རོ་སྙོམས་ཕྱིའི་མེ་ལོང་རྣམས་བསྟན་པ་ཡིན་ནོ།། །།གཉིས་པ་མཚོན་བྱེད་ལམ་གྱི་རྡོ་རྗེ་རྣལ་འབྱོར་མ་ལ། སྨིན་གྲོལ་སེམས་ཀྱི་རྒྱ་མདུད་བཤིག་པ། དམ་ཚིག་རང་སེམས་མེ་ལོང་ལྟ་བ། རིམ་གཉིས་མཉམ་པར་གཞག་པའི་དོན་བསྟན་པ་གསུམ་ལས། དང་པོ་ལ། དཔོན་སློབ་ཀྱི་འབྲེལ། དབང་བཞི་བརྡས་མཚོན་པ། དེ་ལ་རྩོད་པ་སྤང་བ་དང་གསུམ་ལས། དང་པོ་ནི། འབད་དེ་ནུས་པ་སྐྱེས་པ་དང་། སློབ་མ་རྗེས་སུ་འཛིན་འདོད་པས། རྗེ་བཙུན་གྱིས། སོ་ནམ་རང་དོན་མ་གྲུབ་པའི། །གཞན་དོན་འགྲུབ་པ་དཀའ་མོ་ཡིན། །ཞེས་གསུངས་པས་ན་སློབ་དཔོན་ནུས་པ་དང་ལྡན་པ་ཞིག་དགོས། དེ་ཡང་རབ་རྟོགས་པས་བདག་རྒྱུད་གྲོལ་བ་སྟེ། དེས་ཐུགས་རྗེས་གཞན་རྒྱུད་གྲོལ་ཚུལ། དེའི་རྟེན་འབྲེལ་ལས་བྱས་ཚད་ཐབས་མཁས་སུ་འགྲོ །དེས་འབྲེལ་ཚད་དོན་ལྡན་དུ་འགྱུར་བ་ཡིན། འབྲིང་བདག་བྱིན་གྱིས་རློབས་པ། ཐ་མ་སྔགས་ཀྱི་ནུས་པ་རྙེད་པའོ། །དེ་ཡང་སངས་རྒྱས་རྣམས་ཀྱི་སྔོན་སློབ་ལམ་དུ་རྫོགས་སྨིན་སྦྱང་གསུམ་མཛད་པའི་ནུས་པས་ཕྱིས་སངས་རྒྱས་པའི་དུས་ན་གདུལ་བྱ་རྣམས་བདེ་བླག་ཏུ་གྲོལ་བ་ལྟ་བུའོ། །དེ་སམྦུ་ཊ་ལས། སློབ་དཔོན་སྨིན་པའི་ལས་ཀྱིས་ནི། །སློབ་མ་ཡོངས་སུ་སྨིན་པར་བྱ། །ཞེས་གསུངས་སོ། །སློབ་མ་རྒྱུད་ནས་དག་མ་དག་འདྲེས་མ་གསུམ་གསུངས་པའི་དང་པོ་དེ་ལའང་། སྤྲོས་པ་ལ་དགའ་བ་དང་། སྤྲོས་པ་མེད་པ་ལ་དགའ་བ་གཉིས་ཀྱི་དང་པོ་སྙན་རྒྱུད་གཞུང་གི་གདུལ་བྱ། འདིར་ཕྱི་མའོ། གཉིས་པ་ལ། གང་དང་འབྲེལ་བའི་དཀྱིལ་འཁོར་སྒྲུབ་པ། དེར་བྱིན་གྱིས་བརླབ་པ། བརྡ་དོན་གཏན་ལ་དབབ་པ་དང་གསུམ། དང་པོ་ནི། བློ་ལྡན་དོན་ལ་ཡང་ཡང་གསོལ། །སློབ་མས་རྗེས་སུ་འཛིན་པར་གསོལ་བ་བཏབ། །འདོད་པའི་ཚེ་ལ་རྣལ་འབྱོར་པས། །སྔར་བཤད་འཁོར་ལོའི་བདག་ཉིད་ལ། །མཆོད་ཅིང་བཟླས་པ་བྱས་གྱུར་ནས། །འདོད་པའི་གནས་སྐབས་བཅུས་ཚེས་བཅུ། དེ་ཡང་ཕྱོགས་གཉིས་ཀྱི་དབྱེ་བས་གཉིས་ཏེ། རྩ་རྒྱུད་ལས། མར་གྱི་ངོ་ཡི་ཚེས་བཅུ་དང་། །ཟླ་བ་ཡར་ངོའི་གང་གྱུར་ལ། །མྱུར་དུ་འབད་པས་མཆོད་བྱ་སྟེ། །རྡོ་རྗེ་ཕག་མོ་མྱོས་བྱེད་ཤ་རྣམས་ཀྱི། །སྐྱེ་བོ་གུས་པས་དེ་རྣམས་མཆོད་བྱས་ནས། །ཧེ་རུ་ཀ་དཔལ་མངོན་དགར་འགྱུར་བ་ལ། །མགུ་བའི་ཐུགས་ཀྱི་མཆོག་ནི་སྩོལ་གྱུར་ཏེ། །ཞེས་གསུངས་སོ། །སྔར་བཤད་ནི་སྒྲུབ་ཐབས་ཀྱི་སྔོན་དུ་བཤད་པ། འཁོར་ལོ་ནི་སིནྡྷུ་རའི་དཀྱིལ་འཁོར་བྲིས་ལྷར་བསྒྱུར་དེ་ལ་མཆོད་བསྟོད་བྱ་བའི་བར་གཞན་གྱི་དེ་ཉིད། བདག་ཉིད་ལ་འགོད་པ་བདག་གི་དེ་ཉིད། མཆོད་ནས་ཞེས་པ་རྣལ་འབྱོར་གྱི་དེ་ཉིད། དེ་ཚོགས་ཀྱི་འཁོར་ལོའི་འདུས་པ་དང་གཞོན་ནུ་མ་མཆོད་པ། །དེ་ནས་བཟླས་པ་རྣམས་སོ། །གཉིས་པ་ནི། སྨིན་གྲོལ་སེམས་ཀྱི་རྒྱ་མདུད་བཤིག །གང་གིས་བཤིག་པ། ཕྱི་ནང་གསང་བ་མཐར་ཐུག་པའི། དབང་གིས། ཕྱི་བུམ་དབང་། ནང་གསང་དབང་། གསང་བ་ཤེས་རབ་ཡེ་ཤེས། མཐར་ཐུག་དབང་བཞི་པའོ། །གང་བཤིག་པ། རྣམ་པར་རྟོག་པའི་རྒྱ། མདུད་པ། ལུས་ངག་ཡིད་ཡེ་ཤེས་ཚུལ་མིན་དུ་རྟོག་པས་སད་རྨི་གཉིད་འཐུག་བཞི་པའི་གནས་སྐབས་བཞི་བསྐྱེད་པ་དེས་འཁོར་བར་དམ་པོར་འཆིང་བས་རྒྱ་མདུད་ལྟ་བུའོ། །ཚུལ་ཇི་ལྟ་བུར་བཤིག་པ་ནི། སེམས་ཉིད་རང་གྲོལ་དུ། ཞེས་པས། ཚུལ་བཞིན་དུ་བརྡ་འཕྲོད་ན་ཚུལ་མིན་ཡིད་བྱེད་འཇིག་སྟེ། བདེན་པོ་ཤེས་པས་རྫུན་ཞིག་པ་ལྟ་བུའོ། །དེ་ཀ་ཨ་བྷི་ཥིཉྩྨའམ་ཨ་བྷི་ཥེ་ཀ་གཏོར་བ་དང་བླུགས་པས་དབང་ངོ་། །རྟོག་པའི་དྲ་བ་བཤིག་པར་བྱ་བ་ནི་གཏོར་བའི་སྒྲ་དོན། རང་བཞིན་མེད་པའི་ངང་ལ་གཞག་ནི་བླུགས་པའི་སྒྲ་དོན། དེ་བས་ན་འདི་ཁོ་ནས་གྲོལ་བ་ནི་མ་རིག་པ་ལས་ཟློག་སྟེ་རིག་པའི་ཡེ་ཤེས་ཤར་བ་ཡིན་ཏེ། དེ་ལ་བདེན་པ་མཐོང་བ་ཞེས་བྱ། གཞན་དུ་སྨིན་པ་ཙམ་སྟེ། སྨིན་པའང་འབྲས་སྨིན་པ་རྡོལ་སླ་བ་ལྟ་བུ། རིམ་གཉིས་ལ་ཅུང་ཟད་ལྟོས་པ་ད་ལྟ་སྦྱོར་ལམ། རྣག་རྡོལ་བ་ལྟ་བུར་གྲོལ་བ་མཐོང་ལམ། རྨ་གསོ་བ་ལྟ་བུ་སྒོམ་ལམ། གསོས་ཟིན་པ་ལྟ་བུར་སངས་རྒྱས་པ་རྟོགས་པར་བྱའོ། །མོད་ལ་གྲོལ་བ་དང་རིམ་པ་ལ་ཅུང་ཟད་བལྟོས་པའང་། དཔེར་ན་མི་དོན་དུ་གཉེར་བ་ལ། གཉེར་མཁན་མཚན་མ་ལ་མཁས་པ་དང་མི་མཁས་པས། གཉེར་བ་དེ་དང་བཅར་ཕྲད་ན་སྔ་མས་བདེ་བླག་ཏུ་ཤེས་ལ། ཕྱི་མས་ཤེས་པ་ལ་ད་དུང་རྐྱེན་གཞན་གྱིས་བརྡ་འཕྲོད་པ་ཞིག་དགོས་པ་ལྟ་བུ། ཆོ་ག་རྒྱས་བསྡུས་དགོས་པ། དོན་དུ་གཉེར་བྱ་དང་བཅར་ཕྲད་པ་དང་། གྲོང་ཁྱེར་ལྟ་བུར་ཚོལ་དགོས་པའི་ཁྱད་བཞིན་སྒྲིབ་བྱེད་ཀྱི་རྐྱེན་ཉུང་བ་དང་མང་བའི་ཁྱད་པར་རོ། །སྣོད་རུང་ཙམ་རྡོ་རྗེ་ཐེག་པའི་སྒོར་འཇུག་པ་ལ་སྤྲོ་བ་ཆེ་བ། སྨིན་པ་ཙམ་རྡོ་རྗེ་ཐེག་པའི་སྒོར་ཡེ་ཤེས་མཐོང་བའི་རྒྱུ་ཚོགས་གྲངས་ཚང་བའི་ཁྱད་ཡིན། སྨིན་པ་མཚན་ཉིད་པ་མཐོང་ལམ་ལ་གཞག་པ་ནི་སངས་རྒྱས་ཀྱི་རྒྱུ་གྲུང་པོ་དེ་ནས་རྙེད་པ་ལ་དགོངས་ཏེ་འདི་རྒྱུ། སྒོམ་ལམ་ལམ། སངས་རྒྱས་འབྲས་བུར་བྱས་ནས་རྒྱུ་དབང་ལམ་དབང་འབྲས་བུའི་དབང་ཞེས་བཞག །མདོར་ན་ཐབས་གང་གིས་དབང་དོན་གྱི་ཡེ་ཤེས་རྙེད་པའི་ཐབས་དེ་ཁ་ལ་དབང་ཟེར་ཏེ་སྔར་མི་དབང་བ་ལ་དབང་བས་དབུལ་པོའི་སྒྱེད་བུ་གསེར་དུ་ངོ་ཤེས་པ་ལྟ་བུའོ། །འོ་ན་ཕ་རོལ་ཏུ་ཕྱིན་པར་ཡང་། དབང་ཡོད་པ་དང་མདོ་སྔགས་ཁྱད་མེད་པར་འགྱུར་རོ་སྙམ་ན། དོན་ལ་ཕར་ཕྱིན་དུ་དབང་ཡོད་ཀྱང་དེའི་མིང་གསལ་བར་མ་མཛད། ལངྐར་གཤེགས་པའི་མདོར་ས་དང་པོར་བྱིན་གྱིས་བརླབ་པའི་དབང་དང་། ས་བཅུ་པར་འོད་ཟེར་ཆེན་པོའི་དབང་བསྐུར་བཤད་པའི་སྒྲོས་གཉིས་བྱུང་། མདོ་སྔགས་ཀྱང་ལམ་ཐག་རིང་པོ་བསྐོར་བ་དང་གསེབ་ལམ་དུ་འགྲོ་བའི་ཁྱད་ཙམ་ནི་དངོས་ཟིན་ལ་འཐད་པ་ཡིན། གཞན་མདོ་མདོར་བསྟན། སྔགས་རྒྱས་བཤད་ཡིན་པས་དོན་ལ་ཁྱད་པར་མི་འདོད། དེས་ན་དབང་བསྐུར་བ་ཟེར། ས་ཚོན་ཞིག་བྲིས། དབང་ཆོག་གི་ཚིག་འགའ་ཞིག་གྱེར་རྫས་འགའི་གཏོང་ལེན་བྱེད་པར་བཟུང་བ་དེ་ལྟ་བུ་མུ་སྟེགས་ལ་ཡང་ཡོད་དེ། དོ་ཧར། དབང་རྣམས་བསྐུར་ཞིང་སློབ་མའི་ཡོན་རྣམས་ལེན་ཞེས་གསུངས། དེས་ན་དབང་དོན་གར་སོང་མ་བལྟས་པར་དབང་ཐོབ་བོ་ཞེས་མ་མཛེར་ཞིག་གོ །འདིར་ཆོ་གའི་བྱ་བ་ཉུང་ངུས་དབང་བཞི་པོ་བསྐུར་བ་ཡིན། དེ་ཡང་། སྡོམ་པའི་བྱ་བ་སྔོན་འགྲོ་བས། སྡོོམ་པ་བྱིན། སྟེར་རྒྱུའི་སྡོམ་པ་མོས་པའི་དུས་བདེན་པ་གཉིས་ལ་དམིགས། རྣམ་པའི་དུས་ན་སེམས་ཟླ་བ་དང་རྡོ་རྗེར་བསྐྱེད། བྱིན་རླབས་ཀྱི་དུས་དེ་གཉིས་མངོན་སུམ་དུ་བྱེད་ལ་དེས་ཆོས་ཐམས་ཅད་རབ་ཏུ་མི་གནས་པའི་ཟུང་འཇུག་ཏུ་སོང་བ་སྟེ། སྡོམ་འབྱུང་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །སྐུ་དང་གསུང་དང་ཐུགས་ཀྱིས་ལས། །རྣམ་ཀུན་མཆོག་ཏུ་སྡོམ་པའོ། །སྡོམ་པ་བྱང་ཆུབ་བདེ་མཆོག་སྟེ། །བལྟར་མེད་བརྗོད་དུ་མེད་པའོ། །ཞེས་པས་སོ། །སློབ་མས་ཡོན་ཕུལ་མགོན་ལ་བཏུད། །མཎྜྻལ་འཇུག་ཡོན་གསོལ་བ་བཏབ། །དེ་ལ་བླ་མས་བལྟས་ནས་ནི། །བླ་མ་སློབ་མ་གཉིས་ཀ་ལྷར་ལྟ་བ། བདེ་གནས་ནི་སྤྱི་བོ། འཁོར་ལོ་ནི་སྐུ་རྡོ་རྗེ་ཡིན་ལ། དེ་འདིར་ཨོཾ་ཡིག་གི་རྣམ་པར་ཞུགས་པ། འབར་བ་སྤྲོ་ནི། དེའི་འོད་ཟེར་སྤྲོ་བསྡུས་སྐུ་རྡོ་རྗེ་ཉེ་བར་གནས་པའི་ལུས་ལ་བསམ། སློབ་མའི་ལུས་ལ་ཞུགས་པར་བསམ་པས་ལུས་ལ་ཕེབས་ནས་ལུས་ཐ་མལ་པའི་གནས་སྐབས་ལས་བཟློག་ནས་སྐུའི་བྱ་བ་བྱེད་པར་འགྱུར་རོ། །དེ་ལ་སྔགས་དང་། དེ་བཞིན་སློབ་མ་ལ་མགྲིན་པར་གནས་པའི་གསུང་རྡོ་རྗེ་ཨཱཿཡིག་གི་སྤྲོ་བསྡུས་གསུང་རྡོ་རྗེ་ངག་ལ་ཞུགས་པས་ངག་ལ་ཕེབས་ནས་ངག་ཐ་མལ་པའི་གནས་སྐབས་ལས་བཟློག་ནས་གསུང་གི་བྱ་བ་བྱེད་པར་འགྱུར་རོ། །རྡོར་འཛིན་བྱིན། སྙིང་གར་གནས་པའི་ཐུགས་རྡོ་རྗེ་ཧཱུྃ་ཡིག་གི་སྤྲོ་བསྡུས་ཐུགས་རྡོ་རྗེ་ཡིད་ལ་ཞུགས་པས་ཡིད་ལ་ཕེབས་ནས་ཡིད་ཐ་མལ་པའི་གནས་སྐབས་ལས་བཟློག་ནས་ཐུགས་ཀྱི་བྱ་བ་བྱེད་པར་འགྱུར་རོ། །མཆོད་པའི། ཀ་པཱ་ལའི་བདུད་རྩིས་ཡེ་ཤེས་རྡོ་རྗེ་ལུས་ངག་ཡིད་གསུམ་ལ་ཁྱབ་བྱེད་དུ་ཞུགས་པས་རྡོ་རྗེ་སེམས་དཔའ་ཕེབས་ནས་སྒོ་གསུམ་མ་རིག་པ་ལས་ཤིན་ཏུ་ལོག་ནས་ཡང་དག་པར་རྫོགས་པའི་སངས་རྒྱས་སུ་འགྱུར་བ་ཡིན་ནོ། །འཁོར་ལོ། སིནྡྷུ་རའི་དཀྱིལ་འཁོར་བསྟན་ནས་སྙིང་གར་བྱུག་དེ་ཞུ་བའི་ཐིག་ལེ་གནས་གསུམ་དུ་བྱ་སྟེ་བྱིན་གྱིས་རློབས་པ་མཚོན་པའི་ཕྱིར་དུའོ། །ཡེ་ཤེས་པ་ཕེབས་མ་ཕེབས་མཚན་མས་བརྟག་དགོས་པས་མཚན་མ་ནི། ཐར་གྱིས་བབས་ན་བ་སྤུ་ལྡང་། །མཆི་མ་འབྱུང་སོགས་ཡེ་ཤེས་སྐྱེ། །ཞེས་པའོ། །དེ་ལྟར་བྱིན་གྱིས་རློབས། །དཀྱིལ་འཁོར་མཐོང་བ་དེ་ལ། །རྗེས་སུ་གནང་བ་བྱིན་ནས་ནི། །མཆོག་གི་སྣོད་དུ་བྱིན་གྱིས་རློབས། །དེ་ནས་བརྡས་དབང་བཞི་མཚོན་པར་བྱ་བས་འདི་ལ་ཕག་མོ་བརྡ་བཞིའི་དབང་ཞེས་བྱའོ། །དེ་ཡང་ཅུང་ཟད་ཆོ་གའི་སྤྲོས་པ་ཡོད་པ་སྟེ། གཞན་ལྷ་བདུན་ལྷན་ཅིག་སྐྱེས་མ་ལ། བྱིན་གྱིས་བརླབ་པ་བཞི་ཁོ་ན་ལས་མི་མཛད་དོ། །རྣལ་འབྱོར་རྒྱུད་མན་གྱི་དཀྱིལ་ཆོག་ཐམས་ཅད་ཀྱི་དབང་བསྐུར་གྱི་མགོར་བྱིན་འབེབས་པ་འདི་བཤད་པ་ནི་མདོར་བསྟན་ནམ་དབང་གི་ལུས་རྣམ་གཞག་ལྟ་བུ་ཡིན་གསུང་ངོ་། །གསུམ་པ་ནི། དེ་ལྟ་བུའི་དབང་བསྐུར་རྩ་བའི་རྒྱུད་ལས། མཚལ་ཆེན་ལན་གསུམ་བཟླས་པ་ཡི། །དེ་རྣམས་སུ་ནི་ཐིག་ལེ་བྱ། །སློབ་མ་ཡི་ནི་གདོང་ཕྱེ་ལ། །དེ་ནས་དཀྱིལ་འཁོར་བསྟན་པར་བྱ། །ལྷ་གང་གི་ནི་གནས་གང་ཡིན། །དེ་དེར་ཡང་དག་བསྟན་པར་བྱ། །ཞེས་པ། དེ་ཉིད་རྡོ་རྗེ་མཁའ་འགྲོར། རྡོ་རྗེ་དབང་བསྐུར་བ་བརྡའི་རིམ་པར་ཕྱེ་བ་སོ་བཞི་པ་དང་བརྡའི་རོལ་པ་དང་དམ་ཚིག་དང་སྡོམ་པའི་ཆོ་གའི་རིམ་པར་ཕྱེ་བ་སོ་དྲུག་པ་དང་། རྡོ་རྗེ་སེམས་དཔའི་དབུགས་དབྱུང་བ་དང་རང་བཞིན་ངེས་པར་བསྟན་པའི་རིམ་པར་ཕྱེ་བ་ལྔ་བཅུ་པ་རྣམས་ཀྱིས་རྒྱས་པར་བཤད་པ་ནི། དང་པོར། གང་གི་རྟག་ཏུ་སྔགས་སྦྱིན་པ། །གང་གི་ཆོ་ག་དེ་བཞིན་བྱ། །ཐོད་པ་འཕྲེང་བ་དབུ་རྒྱན་དང་། །དེ་བཞིན་སངས་རྒྱས་གཙུག་ནོར་བུ། །པདྨ་དཔལ་གྱི་ནགས་རྩ་བ། །བརྡ་ཡི་སངས་རྒྱས་ཕྱག་རྒྱ་ཡིན། །དབང་པོ་གང་དང་གང་ལམ་གྱུར། །དེ་དང་དེ་ཡི་རང་བཞིན་འགྲོ །མཆོག་ཏུ་མཉམ་གཞག་སྦྱོར་བ་ཡིས། །ཐམས་ཅད་སངས་རྒྱས་རང་བཞིན་འགྱུར། །ཞེས་གསུངས་པའི་རྐང་པ་དང་པོ་གཉིས་རྩ་རྒྱུད་ལས་ཀྱང་བྱུང་ཞིང་སྔགས་སྦྱིན་པའི་དོན་སྔགས་ཀྱི་ཐིག་ལེའི་སྤྲོ་བསྡུ་བསྟིམ་པ་ཡིན་པས་སྐུ་གསུང་ཐུགས་བྱིན་རླབས་བསྟན། ཐོད་པའི་བདུད་རྩིས་དབང་བསྐུར་ལ། སོ་དྲུག་པར། སྒྲུབ་པ་པོ་ཡི་ལག་གཡོན་གྱིས། །པདྨའི་སྣོད་ནི་བཟུང་ནས་སུ། །ལག་པ་གཡས་པ་བ་དན་ནི། །གསུམ་པར་བྱས་ཏེ་བསྒོམ་པར་བྱ། །ཁམས་ཀྱི་རང་བཞིན་ཐམས་ཅད་དང་། །དེ་བཞིན་སྲོག་དང་རྩ་ལས་བྱུང་། །མངོན་པར་འདུས་བྱས་ལེགས་བྲིས་པ། །སློབ་དཔོན་ཀུན་ལ་སྦྱིན་པར་བྱ། །ཞེས་པས་བསྟན། སྟོན་རྒྱུའི་བརྡ། ཐོད་པ་དང་ཕྲེང་བའམ་མདའ་གཞུ་དབུ་རྒྱན་ནི་རྡོ་རྗེ་རྒྱ་གྲམ། སངས་རྒྱས་ནི་བཅོམ་ལྡན་འདས་མའི་དོན་དམ་པའི་ཞལ་ཏེ་ཕག་གདོང་། གཙུག་གི་ནོར་བུའོ། །ཡང་ཐོད་པ་ལ་པདྨ། དཔལ་རྒྱ་གྲམ། འཕྲེང་བ་ལ་ནགས། ནོར་བུ་ལ་རྩ་བ་ཞེས་ཀྱང་གསུངས་སོ། །སྐུ་ཕེབས་ན་བུམ་དབང་གི་བརྡར་གོ །དེ་ཡང་། དབང་པོ་ཀུན་ལས་བྱུང་བ་ཡི། །དམ་ཚིག་ཐོད་པ་ཞེས་བྱར་བརྗོད། །མཛེས་མ་འཕྲེང་བ་ཞེས་བཤད་དེ། །དེ་ཁོ་ན་ཉིད་དབུ་རྒྱན་མིང་། །གཙུག་གི་ནོར་བུ་དབང་བསྐུར་ཏེ། །སངས་རྒྱས་ཞེས་བྱ་རྗེས་གནང་ཡིན། །ཧེ་རུ་ཀ་ཡི་དབང་བསྐུར་བའོ། །འདི་ལ་དྲང་ངེས་གཉིས་ཀྱི་དམ་ཚིག་གསུམ་སོགས་ལ་སྦྱར་བ་ནི་དྲང་དོན། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་དབང་དུ་རབ་ཏུ་བརྗོད། །དང་། སློབ་མ་ཆེར་གྱུར་ཤེས་ནས་ནི། །སྟོན་པས་དེ་ལ་གནང་བ་སྦྱིན། །ཞེས་པ་ལྟར་གོ་བ་ངེས་དོན། དང་པོ་རྣལ་འབྱོར་རྒྱུད་ལའང་གྲགས་པས་དང་། ཕྱི་མ་རྣལ་འབྱོར་མའི་རྒྱུད་ཁོ་ན་ལས་སོ། །གསུང་ཕེབས་ན་གསང་དབང་དུ་གོ་སྟེ། ཐོད་པ་ལུས་ཞེས་བྱ་བ་སྟེ། །འཕྲེང་བ་རྐང་པའི་མིང་ཅན་ཡིན། །དབུ་རྒྱན་བྷ་ག་ཞེས་བྱར་བརྗོད། །སངས་རྒྱས་ཁུ་བ་ཞེས་བརྗོད་དེ། །གཙུག་གི་ནོར་བུ་བདེ་བར་བཤད། །རྡོ་རྗེ་པདྨའི་དབང་བསྐུར་བའོ། །འདིར་རྐང་པ་ནི་ལིང་གར་ཤེས་སོ། །ཐུགས་ཕེབས་ན་ཤེས་རབ་ཡེ་ཤེས་སུ་གོ་སྟེ། ཐོད་པ་དབང་གཉིས་དམ་ཚིག་སྟེ། །འཕྲེང་བ་སྔགས་ཀྱི་བདག་པོར་བརྗོད། །བཅུ་དྲུག་ཐིག་གིས་ཐིག་བཏབ་པའི། །སྟོང་པ་དབུ་རྒྱན་ཞེས་བྱར་བཤད། །ཨ་ལ་སོགས་པའི་མ་མོ་རྣམས། །སངས་རྒྱས་ཞེས་བྱའི་སྒྲ་རུ་འགྱུར། །དེ་རྣམས་དབུས་ཀྱི་བདེ་བ་གང་། །དེ་ནི་གཙུག་གི་ནོར་བུར་བརྗོད། །རིགས་རྣམས་ཀུན་གྱི་ཐམས་ཅད་དུ། །རྟག་ཏུ་དབང་བསྐུར་དེ་ལྟ་བུ། །ཞེས་སོ། །ཡེ་ཤེས་ཕེབས་ན་དབང་བཞི་པར་གོ་སྟེ། །དཔལ་ཞེས་བྱ་བ་དགའ་བ་སྟེ། །བདེ་བ་སངས་རྒྱས་སུ་ནི་བརྗོད། །པདྨ་པདྨ་ཉིད་ཡིན་ལ། །ནགས་ནི་སྐྱ་རེངས་ཞེས་བྱར་གྲགས། །རྩ་བ་བྱང་ཆུབ་སེམས་ཡིན་ནོ། །ཞེས་པས་ཕྱིའི་མངོན་བྱང་མཚོན་བྱེད་ནང་གི་མངོན་བྱང་མཚོན་བྱར་བྱས་ཏེ་བསྟན་པ་དང་། པདྨ་ལྟེ་བའི་འཁོར་ལོ་སྟེ། །ནགས་སོགས་ཨ་ནི་མ་མོ་ཡིན། །རྩ་བ་ཐར་པ་སྟེར་བྱེད་པ། །བརྡ་ཡི་སངས་རྒྱས་ཕྱག་རྒྱ་ཡིན། །དབང་བཞི་པའི་ཡེ་ཤེས་ངོ་མ་བསྟན། །ལྟེ་བ་མཚོ་སྐྱེས་ཞེས་བྱ་སྟེ། །ནགས་ཞེས་བྱ་བ་ངག་ཡིད་ལ། །རྩ་བ་ལུས་ཀྱི་བླ་དྭགས་ཡིན། །སངས་རྒྱས་སེམས་ཀྱི་བརྡ་ཡིན་ཏེ། །གཅིག་པུ་ངེས་པའི་རྣལ་འབྱོར་ཡིན། །དབེན་པ་རྟོག་པ་སྤངས་པ་སྟེ། །སྦས་པ་གསལ་བར་བྱས་པའོ། །ཞེས་པས་ངོ་མ་དེ་ཡང་མས་བརྟེན་གྱི་དེ་ཉིད་བཅུ་དྲུག་རིག་པར་ཕྱེ་སྟེ་བཤད་པ་ཡིན་ནོ། །དེ་དག་དབང་རྣོན་ཉིད་ལ་བློའི་ཁྱད་པར་ཡོད་པས་གོ་ལུགས་དེ་ལྟར་གྲུབ་པ། དཔེར་ན་མི་ཞིག་གིས་གཞན་ལ་ལག་པའམ་ཁའམ་མིག་འགྲོས་ཀྱིས་བྱ་བ་བསྟན་ན། ཕ་རོལ་པོ་ཤེས་པ་དང་ལྡན་ན་དེ་རིག་སྟེ་དོན་འགྲུབ། རྨོངས་ན་མ་ཡིན་པ་བཞིན། འདིར་ཡང་སྐལ་བ་དང་ལྡན་ན་རིག །མི་ལྡན་ན་མ་ཡིན། རིག་པ་དེ་ཁ་དབང་དོན་གྱི་ཡེ་ཤེས་མངོན་སུམ་དུ་བྱས་པ་ཡིན་པས་དེ་ལས་ལོགས་སུ་དབང་བསྐུར་རྒྱུ་མེད་པས། དེ་ཉིད་དུ། གང་དང་གང་གི་ལྷ་ཡི་མཆོག །དེ་དང་དེ་ནི་སློབ་དཔོན་འགྲོ །གང་དང་གང་ལ་ལྷག་མོས་པ། །དེ་དང་དེ་ཡི་དབང་བསྐུར་བྱ། །དབང་ནི་རྣམ་པ་བཞི་དག་ཏུ། །ཡང་དང་ཡང་དུ་སོ་སོར་བཤད། །གང་ཞིག་སྔར་ནི་བཤད་པ་རྣམས། །དེ་དག་ཀུན་གྱི་བརྗོད་པ་ཡིན། །རྣལ་མའི་སྦྱོར་བ་རྟོགས་བྱའི་ཕྱིར། །བཅོས་མ་ཡིས་ནི་སྒོམ་པ་དང་། །བཅོས་མ་ཡིས་ནི་བཟླས་པ་བྱ། །རྣལ་མའི་སྦྱོར་བ་རྟོགས་གྱུར་ན། །བཅོས་མའི་སྦྱོར་བ་ཕྱི་རོལ་པས། །རྣལ་མའི་སྦྱོར་བ་རྟོགས་གྱུར་ན། །བཅོས་མ་དག་ནི་མི་བྱའོ། །དཔེར་ན་གཟིངས་ལ་འཇུས་ནས་ནི། །ཆུ་ཡི་ཕ་རོལ་འགྲོ་བར་བྱེད། །ཕ་རོལ་ཕྱིན་ནས་འདོར་བ་ལྟར། །བཅོས་མ་དག་ཀྱང་དེ་བཞིན་ནོ། །དཀྱིལ་འཁོར་ལ་སོགས་ལས་གང་ནི། །བཅོས་མའི་སེམས་ཀྱིས་གང་བྱེད་པ། །ཕྱི་རོལ་ལས་རྣམས་གསལ་བྱེད་པས། །དང་པོའི་ལས་ཅན་རྣམས་ལ་བསྔགས། །དངོས་གྲུབ་དེ་ཀུན་འདིར་གནས་པས། །རྒྱལ་བའི་དངོས་ཉིད་རིག་ལ་མིན། །གང་ཡང་སྒྲ་ཤེས་བསྟན་བཅོས་རྣམས། །དྲང་སྲོང་རྣམས་ཀྱིས་བྱས་པ་ལྟར། །རང་གི་སེམས་ནི་འཇུག་བྱེད་པའི། །སྐྱེས་བུ་བཅོས་མའི་བྱ་བ་རྣམས། །རྒྱུན་གྱི་རྗེས་སུ་འབྲངས་ནས་ནི། །འབད་པས་སྡུག་བསྔལ་སློང་བར་བྱེད། །དེ་ཕྱིར་དཀྱིལ་འཁོར་ལ་སོགས་པ། །བྱ་བའི་ཆོ་ག་ལ་འབད་པ། །ཐར་པ་དང་བྲལ་ཕྱི་རོལ་ཏེ། །སྐྱེས་བུ་ཉོན་མོངས་འབའ་ཞིག་བྱེད། །ཅེས་གསུངས། ཐམས་ཅད་དུ་ལས་རིམ་རྒྱས་པ་ཁོ་ན་དགོས་པ་མ་ཡིན་པ་འདིས་བཤད། བསྡུས་པ་ཁོ་ནས་ཀྱང་མ་ཡིན་ཏེ་གོང་དུ་གསུངས་པས་གདུལ་བྱའི་ཁམས་དང་མོས་པ་དང་བག་ལ་ཉལ་ཤེས་པས་སྟོན་པར་བྱའོ། །དེ་ལྟ་བུའི་དབང་རྣོན་དང་པོ་ཁོ་ན་གོ་ལ་གཞན་མ་གོ་ན་དེ་ལ་མཐར་གྱིས་སློབ་དགོས་པས་བཅོས་མ་དང་བཅས་པ་ནས་འཁྲིད་དོ། །གཉིས་པ་གོ་ན་རས་ཆུང་པས་བསྣམས་པ་རྣམས་ཏེ། རྩ་རླུང་དྲ་མིག་འཁོར་ལོས་རྩ་རླུང་ཐིག་ལེ་མི་ཤིགས་པའི་ཐིག་ལེར་སྦྱངས། དེ་འོད་གསལ་དུ་གཞུག་པའི་ཕྱིར་རིག་པ་ཡེ་ཤེས་སྒྲོན་མ་བསྟན། དེ་ལས་ཟུང་འཇུག་ཏུ་གྱུར་པའི་སློབ་པའི་དུས་རོ་སྙོམས་ཕྱིའི་མེ་ལོང་དེ་ནས་དངོས་གྲུབ་ཆེན་པོའི་ཉེར་རྒྱུར་བདེ་ཆེན་གསུང་གི་རིན་ཆེན་བཤད་པས་གང་ཟག་དེ་སངས་རྒྱས་སུ་འགྱུར་བ་ཡིན་པས་འཁྲིད་ལུགས་གཉིས། གསུམ་པ་གོ་ན། དམ་རྫས་རྟོགས་པའི་ཉི་མས་ཞུ་བདེ་དང་ཡུལ་རབ་འབྲིང་གསུམ་བསྲེས། དེ་ནས་སྤྱོད་པ་ཆུ་ལ་རལ་གྲིས་བོགས་དབྱུང་། རང་གྲོལ་ཕྱག་རྒྱ་ཆེན་པོས། སྐད་ཅིག་གཅིག་གིས་བྱེ་བྲག་བྱེད། །སྐད་ཅིག་གཅིག་གིས་རྫོགས་སངས་རྒྱ། །ཞེས་པ་ལྟར། དང་པོར་ཆོས་ཐམས་ཅད་མངོན་པར་བྱང་ཆུབ་པ་དང་། དེ་ནས་ཐམས་ཅད་མཁྱེན་པའི་ཡེ་ཤེས་རྫོགས་པར་བྱ་བས་ཁྲིད་ལུགས་གསུམ། བཞི་པ་གོ་ན། དེས་ཆོས་ཐམས་ཅད་ཀྱི་ངོ་བོ་ཉིད་ཤེས་པས་དམ་ཚིག་རང་སེམས་མེ་ལོང་བསྟན། དེ་དེའི་དངོས་གྲུབ་ཆེན་པོའི་ཉེར་རྒྱུར་འགྲོ་བ་ཡིན། འདིས་འཁྲིད་ལུགས་བཞིའོ། །གསུམ་པ་དེ་ལ་རྩོད་པ་སྤང་བ་ནི། རབ་དབྱེ་མཛད་པས། རྡོ་རྗེ་ཕག་མོའི་བྱིན་རླབས་འདི། །མར་པ་ལྷོ་བྲག་པ་ལ་མེད། །ཅེས་སྦྱོར། དེ་ལ་མེད་དམ་སྙམ་དགོངས་པ་དེ་ལ་རྒྱུ་མཚན་རི་བོང་རྭའི་རྣོ་བརཏལ་དང་མཚུངས་སོ། །དོགས་པ་འཁྲུངས་པ་ཡང་བརྡའི་དབང་བཞི་འདི་འདྲ་མི་རིགས་སོ་སྙམ་དུ་ཟད་པས་འཁོར་ལོ་སྡོམ་པ་རྩ་བཤད་ཀྱི་ཕྱོགས་ལ་རྒྱུ་མ་གསལ་བར་མཛད་པའོ། །དེ་ལ་རྡོ་རྗེ་ཕག་མོ་ཅི་འཆད་ཀྱང་རྩོད་སྤོང་བྱེད་པ་ནི་མ་ཤེས་པ་སྟེ། རྩོད་པ་འདིའི་ཕྱོགས་སྔ་མར་གང་བླངས་མ་ཐིངས་པ་ཡིན། དེས་ན་བརྡ་བཞིའི་དབང་འདིས་ཕྱོགས་སྔ་མར་བྱས་པ་ཡིན་ཏེ། དེ་ཉིད་ཀྱིས། འདི་ལ་ཕག་མགོ་ལ་སོགས་པའི། །དབང་བསྐུར་བྱ་བ་ཡོད་ཅེས་ཟེར། །ཅེས་བཤད་པས་སོ། །དེ་ཡང་རྒྱུད་དང་མཐུན་ན་བླང་དུ་རུང་ཞེས་པས། མི་མཐུན་ཞེས་དང་མཐུན་ཞེས་ཁ་ཚོན་གཅོད་མ་ནུས་པས་དགག་པ་པོ་རང་ཚར་བཅད་ཀྱི་གནས་སུ་ལྷུང་ངོ་། །རྩོད་པ་གཉིས་པ། སྡོམ་པ་གསུམ་ལྡན་བྱར་མི་རུང་ཞེས་དང་། སྐུ་བཞིའི་ས་བོན་ཐེབས་མི་ནུས། དང་། ཕྱི་དང་ནང་གི་རྟེན་འབྲེལ་གྱི། །སྟོབས་ཀྱི་དཀྱིལ་འཁོར་འབྱུང་བ་ཡིན། །འདི་ལ་རྟེན་འབྲེལ་སྒྲིག་མི་ནུས། །དེས་ན་སངས་རྒྱས་རྣམས་ཀྱིས་བཀག །ཅེས་སྒྲུབ་བྱེད་དུ་བྱས་ནས། དེ་ཕྱིར་འདི་ནི་བྱིན་རླབས་ཙམ། །ཡིན་གྱི་སྨིན་པར་བྱེད་པ་མིན། །ཞེས་པས་འདི་སྨིན་བྱེད་དབང་དུ་འདོད་པ་བཀག་པ་ཡིན། རྗེས་གནང་ལའང་དེའི་དབུར། དཀོན་མཆོག་གསུམ་ལ་བདག་སྐྱབས་མཆི་སོགས་བྱུང་བས་སྡོམ་པ་གསུམ་ལྡན་ནུས། །འདིར་མི་ནུས་པའི་རྒྱུ་མཚན་མེད་པ་དང་། རྡོ་རྗེ་མཁའ་འགྲོར་འདི་ཀ་དབང་བཞིར་བསྒྲུབས་ཤིང་། ཨིནྡྲ་བྷཱུ་ཏིས། ཡེ་ཤེས་གྲུབ་པར་འདིས་དབང་གོ་མི་ཆོད་སྙམ་པ་དགག་པ་དང་། ད་ེཉིད་འདུས་པ་ཡན་ཆོད་ཀུན་ཏུ། རྡོ་རྗེ་ཡེ་ཤེས་བླ་མེད་པ། །ད་ལྟ་ཉིད་དུ་འབབ་པར་ཤོག །ཅེས་བྱིན་དབབ་རྒྱུ་དེ་ཀ་ལ་རྡོ་རྗེ་སེམས་དཔའ་དབབ་པར་བཤད་པ་དང་། སྐུ་གསུང་ཐུགས་ཡེ་ཤེས་རྡོ་རྗེ་མངོན་གྱུར་དུ་ཕེབས་ནུས་པས་ས་བོན་ཐེབས་མི་ཐེབས་རྩད་མ་དགོས་པ་དང་། ཐམས་ཅད་དུ་འདི་ཁ་དཀྱིལ་འཁོར་ཆེན་པོ་ན་གསང་བའི་འཇུག་པ་ཡིན་པར་བཤད་པས་འདི་ལ་དཀྱིལ་འཁོར་ཐམས་ཅད་འབྱུང་བ་དང་། སངས་རྒྱས་ཀྱི་བྱིན་རླབས་དབང་དུ་མ་བཀག་པའི་ཁར་གནང་བ་ཁོ་ནར་ཟད་པས་ཞར་བའི་ལྟ་ཁྱེར་རོ། །སྐུ་བཞི་མངོན་གྱུར་དུ་ཕེབས་པར་དྲི་མ་མེད་པའི་འོད་ལས། འདིར་སྐུ་ཕེབས་པ་ནི། རྣལ་འབྱོར་དང་ལྡན་པ་ཞེས་པ་ལྷའི་སྐུ་རྡོ་རྗེས་བྱིན་གྱིས་བརླབས་པར་གྱུར་ན་རང་བཞིན་ཡོན་ཏན་དབང་གིས་ཞེས་པ་དྲག་པོ་དང་ཞི་བའི་རང་བཞིན་གྱིས་སློབ་མ་སྐུའི་བྱ་བ་བྱེད་པ་སྟེ། ཇི་ལྟར་ཁྲོ་བོ་དང་། བྱང་ཆུབ་སེམས་དཔའ་ནམ་མཁའ་ལ་འགྲོ་བ་དང་། ས་འོག་ཏུ་འགྲོ་བར་མཛད་པ་དེ་བཞིན་དུ་སློབ་མས་བྱེད་ཅིང་། དཀྱིལ་འཁོར་ལ་སོགས་པ་མ་མཐོང་བ་སྐྱེད་པར་བྱེད་དེ། མཆོག་གི་ལྷའི་སྐུ་རྡོ་རྗེས་བྱིན་གྱིས་བརླབ་པར་གྱུར་པས་རི་བོ་འབྱིན་པ་ལ་སོགས་སྐུའི་བྱ་བ་བྱེད་དོ། །དེ་བཞིན་དུ་གསུང་ཕེབས་པས་ནི་སྲིད་གསུམ་དང་ཀླུ་དང་ལྷ་མིན་རྣམས་ལས་རྣམ་པར་རྒྱལ་བའི་སྨྲ་བ་པོ་རུ་འགྱུར་ཏེ། ལྷའི་གསུང་རྡོ་རྗེས་བྱིན་གྱིས་བརླབས་པའི་སློབ་མ་རྨོངས་པ་ཡང་འཇམ་དཔལ་ཇི་ལྟ་བ་དེ་བཞིན་དུ་འགྱུར་རོ་ཞེས་པ་ངེས་པའོ། །དེ་བཞིན་དུ་མཆོག་གི་ལྷའི་ཐུགས་ཕེབས་པས་ནི་གཞན་གྱི་སྙིང་ལ་གནས་པ་ཐམས་ཅད་དང་། འདས་པ་དང་མ་འོངས་པ་དང་། ད་ལྟར་བྱུང་བ་མ་མཐོང་བ་ཐམས་ཅད་སློབ་མས་ཤེས་པར་འགྱུར་ཞེས་པ་ཐུགས་ཕེབས་པའི་ངེས་པས་སོ། །ཅི་སྟེ་སྐྱེ་བ་སྔ་མའི་བག་ཆགས་ཀྱི་སྟོབས་ཀྱིས་ཁ་ཅིག་ལ་ཡེ་ཤེས་ཕེབས་པར་འགྱུར་ཏེ། དེའི་ཚེ་དཀྱིལ་འཁོར་ལས་གྲུབ་པར་འགྱུར་ཞིང་སངས་རྒྱས་སུ་འགྱུར་རོ། །བླ་མ་ཡི་ཡང་བླ་མ་ཞེས་པ་མངོན་པར་ཤེས་པ་ལྔ་ཐོབ་པ་དང་ས་བཅུའི་དབང་ཕྱུག་ཏུ་འགྱུར་རོ། །སངས་རྒྱས་ཞེས་པ་ནི་ཉེ་བར་བཏགས་པའི་ཚིག་སྟེ་རྫུ་འཕྲུལ་ལྡན་པའི་སྟོན་པ་གཅིག་པུ་ཞེས་པ་ཡང་དེ་ཡིན་ནོ། །སྐུ་དང་གསུང་དང་ཐུགས་དང་ཡེ་ཤེས་ཀྱི་བྱིན་གྱིས་བརླབས་ཀྱི་མཚན་ཉིད་ངེས་པའོ། །ཞེས་གསུངས་པས་སོ། །རྩོད་པ་གསུམ་པ། དབང་བསྐུར་མེད་པར་བྱིན་རླབས་བཀག །དང་། དབང་བསྐུར་མེད་པར་བྱིན་བརླབ་ན། །དམ་ཚིག་ཉམས་པར་ཐུབ་པས་གསུངས། །ཞེས་སྦྱར་བ་འདི་གསང་སྔགས་ཀྱི་དཀྱིལ་ཆོག་ཀུན་ན་དབང་བསྐུར་གྱི་སྔོན་འཇུག་པའི་དུས་སུ་བྱིན་འབེབས་བྱེད་པ་དང་འགལ་ལ། རང་ཉིད་ཀྱང་རྒྱུའི་དབང་ལ་སོགས་པ་ཅི་བསྐུར་ཀྱང་དེ་ལྟར་མཛད་པས་ཧ་ཅང་ཐལ་བའི་ཚིག་འདི་བསེར་མ་གཡོས་པའི་རྟགས་སུ་སྣང་ངོ་། །དེ་དག་དམ་ཚིག་ཉམས་ན་ནི་གསང་སྔགས་སྟོན་པ་ཐམས་ཅད་ཨ་རྫི་རྫི་དམྱལ་བར་ཕེབས་ཡོད་ཅི་དྲག་ན་འདྲིའོ། །རྡོ་རྗེ་ཕག་མོ་ཉིད་ལས་ཀྱང་། །དབང་བསྐུར་ཐོབ་ཅིང་དམ་ཚིག་ལྡན། །དེ་ལ་བྱིན་བརླབ་བྱ་བར་གསུངས། །ཞེས་པའང་འདིའི་གཞུང་ལ་མེད། གཞན་གྱི་གཞུང་དྲངས་ནས་དམ་ཚིག་དང་འགལ་བར་སྨྲ་མི་འཚལ། དབང་བསྐུར་མེད་པར་ལམ་ཟབ་མོ། །བསྒོམས་པས་སངས་རྒྱས་ཐོབ་སྙམ་ན། །དབང་བསྐུར་མེད་པར་ལམ་ཟབ་མོ། །སྒོམ་པ་ངན་འགྲོའི་རྒྱུ་རུ་གསུངས། །མདོ་ལུགས་ལ་ཟབ་མོ་སྟོང་པ་ཉིད་ཉམས་བ་ཞེས་མཛད་པ་པོ་ཐམས་ཅད་ངན་སོང་གསུམ་པོ་གར་སོང་ཡོང་། མ་སོང་ནི་ཅིས་གསུངས། སྔགས་ལུགས་ལའོ་སྙམ་ན་བྱང་ཆུབ་ཕྱོགས་སོ་བདུན་སོགས་ཐུན་མོང་བའི་སྒོམ་པ་ལ་གོམས་པར་བྱེད་པ་ཐམས་ཅད་ལའང་མཚུངས་སོ། །དེས་ན་གྲུབ་ཐོབ་ཐམས་ཅད་ཀྱང་། །ཕྱོགས་རེའི་སྟོབས་ཀྱིས་གྲོལ་བ་མིན། །དབང་དང་རིམ་གཉིས་ལས་བྱུང་བའི། །ཡེ་ཤེས་སྐྱེས་པས་གྲོལ་བ་ཡིན། །འདི་ཡང་རང་ཚིག །དེས་ན་གང་ཟག་དབང་པོ་རབ། །དབང་བསྐུར་ཉིད་ཀྱིས་གྲོལ་བར་གསུངས། །ཟེར་བ་དང་། ས་ཆེན་གྱི་ལམ་ཟབ་བླ་མར། བླ་མས་ཚིག་གཅིག་མ་བསྟན། སློབ་མས་ཚིག་གཅིག་མ་ཉན་པར་དཔོན་སློབ་ཀྱི་རྟེན་འབྲེལ་འགྲིག་པས་གྲོལ་བར་བཤད་པ་སོགས་དང་འགལ་བས་གཞུར་བ་མེད་བཞིན་པར་འདི་སྐད་ཕེབས་པའང་ཅི་ཡིན་སྙམ་མོ།། །།གཉིས་པ་དམ་ཚིག་རང་སེམས་མེ་ལོང་བལྟ་བ་ལ་གསུམ་སྟེ། ཕོ་ཉའི་གཙང་སྦྲ། ཟླ་བའི་གཙང་སྦྲ། སྣོད་གཅིག་ཏུ་ཟ་བའི་གཙང་སྦྲ་ལས། དང་པོ་ནི། བྱ་དང་བྱ་མིན་ཡོངས་ཤེས་པས། །རྡོ་རྗེ་མཁའ་འགྲོའི་རིམ་པར་ཕྱེ་བ་སོ་དྲུག་པར། ཉིན་རེའམ་ཡང་ན་ཟླ་རེའམ། །ཡང་ན་དེ་བཞིན་ལོ་རེར་ནི། །ཇི་བཞིན་བྱིན་གྱིས་བརླབས་ནས་ནི། །ཕྱག་རྒྱའི་དངོས་གྲུབ་འཇུག་པར་འགྱུར། །ཞེས་པ། མི་བྱ་བ་ནི། པདྨ་མཆོག་ལ་རེག་བྱེད་པ། །ལོ་ཅིག་བར་དུའང་མ་བྱས་ན། །སྒྲུབ་པོས་དམ་ཚིག་སྤངས་འགྱུར་ཏེ། །དེས་ན་དམ་ཚིག་སྤངས་ནས་སུ། །སླར་ཡང་མི་བྱའི་སྡོམ་པ་བླང་། །གཞན་དུ་སྔགས་དང་ཕྱག་རྒྱ་ནི། །རིམ་པ་འབྲས་བུ་མེད་པར་འགྱུར། །ཞེས་པ་སྟེ། སྔ་མ་དེ་ལས་མི་འདའ་བ་དམ་ཚིག །ཕྱི་མ་མི་བྱ་བར་སྡོམ་པས་སྡོམ་པ་སྟེ། དེས་རིམ་པར་ཕྱེ་བ་འདི་ལ་དམ་ཚིག་དང་སྡོམ་པའི་ཆོ་གའི་རིམ་པར་ཕྱེ་བ་ཞེས་བཞག་གོ །དམ་ཚིག་རང་སེམས་མེ་ལོང་ལྟ། དེ་ལ་གསུམ་གྱི་དང་པོ་གང་ལ་ལྟ་ན། སེམས་ཉིད་རང་གསལ་མེ་ལོང་ལ། ཅིའི་ཕྱིར་ལྟ་ན། །དབང་གི་འབྲས་བུ་མཐར་ཕྱིན་པར་བྱ་བའི་ཆེད་དུ། ཚུལ་ཇི་ལྟར་ལྟ། ལོག་རྟོག་འཁོར་བའི་དྲི་མ། རྡོ་རྗེ་མཁའ་འགྲོར། ལག་པས་འཕེན་པ་ཞེས་བྱ་བ་ནི། རང་གི་ལྷར་དམིགས་ཏེ་དམ་ཚིག་དབང་དུ་བྱ་བའི་ཕྱིར་འགྲོ་བ་དང་འོང་བར་བྱེད་པའོ། །རླུང་གནད་དེར། ལག་པ་གཡོན་པ་ནི་སྣ་སྒོ་གཡོན་པ་སྟེ་བསྡུ་བའོ། །ཞེས་པས་རྩ་གསུམ་གྱི་སྣ་གསང་བའི་རྡོ་རྗེ་ནོར་བུ་བྷ་གར་གཏོད་པ་ལ་གཡོན་བརྐྱང་མའི་རླུང་གིས་དགའ་བྲལ་གྱི་བདེ་བ་ཉམས་ནས་ཁམས་གསུམ་འཁོར་བའི་རྣམ་རྟོག་སྐྱེད་པ་ཡིན་ནོ། །གཉིས་པ་ཕྱིས་ཞེས་པ་དེ། རྣམ་པར་རྟོག་པའི་རྡུལ་དེ་ཕྱི་བར་བྱ་བའོ། །ཚུལ་གང་གིས་ཕྱི་ན། དེར། འཕངས་ནས་སླར་ནི་གཟུང་བ་དང་། །ཞེས་བྱ་བ་ནི་ཕྱག་རྒྱར་བཅུག་སྟེ་བསླད་ནས་ཐལ་བར་བྱས་ལ་སླར་ཡང་གཟུང་བ་ཞེས་བྱ་བ་ལ་སོགས་པའི་ཡི་གེས་རང་ཉིད་བཀུག་ནས་བསླང་སྟེ་རྡོ་རྗེ་ལྕགས་ཀྱུ་ལ་སོགས་པས་ནམ་མཁའི་ངོས་ཐམས་ཅད་ཡོངས་སུ་ཁྱབ་པའི་དུ་བ་ལྟ་བུའི་ཡེ་ཤེས་དེར་བཀུག་ཅིང་གསོས་ཏེ་དམ་བཅའོ་ཞེས་སོ། །རླུང་གནད་དེར། ལག་པ་གཡས་པ་ཞེས་བྱ་བ་ནི་སྣ་སྒོ་གཡས་པ་སྟེ། དེ་ནས་སྤྲོ་བར་བྱའོ། །ཞེས་སོ། །དེ་ནི་གཡས་པ་ར་སཱ་ནའི་རླུང་གིས་གྱེན་དུ་ཟློག་པའི་ཚེ་བྱང་སེམས་རོ་མར་བཅུག་པས་འདོད་པའི་དབང་ཕྱུག་ཀ་མ་ཏྭ་ཏྟར་འགྱུར་རོ། གསུམ་པ། ཨ་ཧཾ་སྲོག་རྩོལ་སམྦུ་ཊར། །ཞེས་པས། ཁྲོ་བོའི་གཟུགས་སུ་བསྒོམས་ནས་སུ། །ལྷ་ཡི་དབང་པོ་གཞུར་བྱས་ནས། །ཀླུ་དབང་བཱ་སུ་ཏ་ཡི་རྒྱུད། །གློག་ནི་མདའ་རུ་བསམ་བྱ་སྟེ། །མེ་ལྕེ་འབར་བ་མདེའུར་བྱ། །སྒྲོ་ནི་རླུང་ཞེས་བྱ་བ་སྟེ། །རྣམ་པ་ལྔར་ནི་འགུགས་པ་ཡིན། །ཞེས་པའི་རྐང་པ་དང་པོ་གསུམ་ལུས་གནད་ཏེ་རྡོ་རྗེ་བསྡམས་པའི་ཕྱག་རྒྱ་བཅས། གྲུ་མོ་བརྒྱང་ཉྭ་བཞི་སྒྲིམ། ཚངས་དབྱུག་སྲང་། རྒྱུ་མ་ཕོ་བར་དྲང་། བཞིན་རས་ཁྲོ་བོ་ལྟ་བུ། ཨོག་ལྐོས་མདུད་དྲག་པོར་མནན་པའོ། །རླུང་གནད་དེར་མི་ཕེན་པ་ཞེས་བྱ་བ་ནི། རང་གི་སྙིང་གའི་ཡིག་འབྲུ་ལ་སྣ་སྒོའི་ལམ་ནས་བྱུང་སྟེ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བའོ། །ཞེས་སོ། །དམིགས་པ་གློག་ནི། ལྟེ་བའི་དུས་ཀྱི་མེའི་སྤྲོ་བསྡུ་བྱ་བ། །དེ་ནི་སྟེང་འོག་གཅིག་ཏུ་སྦྱར་བས་ཡོན་པོ་བསྲངས་པས་ཚེ་འཕེལ་བ་བེ་ཤ་ཏྭ་ཏྟར་འགྱུར་རོ། །གཉིས་པ་ནི། གདོད་ནས་དག་པ་སྐུ་བཞིའི་རྒྱུད། དེ་ཡང་དབུས་མ་ཨ་ཝ་དྷཱུ་ཏཱི་རླུང་གིས་བྱང་སེམས་སྐུ་བཞིའི་ས་བོན་དེ་ཉིད་དུ་ཚུད་པའི་ཚེ་མི་ཟད་པ་བསམ་གཏན་གྱི་བདེ་བ་ནཻ་རཉྫྱ་ན་ཏྭ་ཏྟ་ཞེས་བྱ་བ་བཞིར་འགྱུར་རོ། །གསུམ་པ་ནི། དྲི་མེད་རིག་གསལ་དག་པ་ལས། །སྣང་མེད་རིག་ཙམ་རྒྱུན་དུ་ལྟོས། །དེ་ལ་སྟོང་པ་ཉིད་ཀྱི་རྒྱས་བཏབ་པས་ཟག་པ་མེད་པའི་རཱ་མ་ཏྭ་ཏྟར་འགྱུར་ཏེ། དེས་ལུས་ངག་ཡིད་ཡེ་ཤེས་ཀྱི་ཐིག་ལེ་བཞི་བཞི་སྒྲིབ་བྲལ་དུ་འཛིན་པས་དེ་ཉིད་བཅུ་དྲུག་རིག་སྟེ་སངས་རྒྱའོ། །དེའི་ཕྱིར་དམ་ཚིག་འདི་དངོས་གྲུབ་ཀྱི་རྒྱུར་བསྐྱང་བར་བྱ་བ་སྟེ། རྩ་རྒྱུད་ལས། གཙང་སྦྲ་གསུམ་དུ་ཤེས་བྱ་ཞིང་། །རང་གི་རྒྱུད་བཞིན་རྣལ་འབྱོར་གནས། །རིགས་དང་རིགས་མིན་ངོར་མི་ལྟ། །སྤྱི་གཙུག་ལ་སོགས་བཅིང་བ་སྤངས། །ཕོ་ཉའི་གཙང་སྦྲ་དང་པོ་ཡིན། །གཉིས་པ་ཞི་བ་ཡིན་པར་བརྗོད། །སྣོད་གཅིག་ཏུ་ནི་ཟ་བ་ནི། །གཙང་སྦྲ་གསུམ་པ་ཡིན་པར་བཤད། །རྣལ་འབྱོར་པ་ཡིས་རྟག་པ་རུ། །གཙང་སྦྲ་འདི་དག་རྟག་ཏུ་བསྐྱང་། །གཙང་མ་དག་པའི་རིམ་ཐོབ་ན། །དངོས་གྲུབ་གང་ལ་འབྱུང་བར་འགྱུར། ཞེས་སོ།། །།གསུམ་པ་རིམ་གཉིས་མཉམ་པར་བཞག་པ་ལ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ། གཞན་གྱི་དེ་ཉིད་སྒྲུབ་པ། བདག་གི་དེ་ཉིད་ཉེ་བར་སྒྲུབ་པ། རྣལ་འབྱོར་གྱི་དེ་ཉིད་སྒྲུབ་པ་ཆེན་པོ་གསུམ་ལས། དང་པོ་ནི། སྒྲུབ་ཐབས་ལས། སྒྲུབ་པ་ལུས་ཀྱི་སྤྲུལ་པར་བཞུགས། །རབ་ཏུ་འབར་བས་ཕྱོགས་ཀུན་གསལ། །སངས་རྒྱས་རྣམས་ནི་བསྐུལ་བར་མཛད། །ཅིར་ཡང་མི་རྟོག་གསལ་གྱུར་ཅིག །རང་བཞིན་དབྱིངས་ལས་མ་གཡོས་པར། །རྣམ་པ་ཀུན་གྱི་མཆོག་དང་ལྡན། །རྒྱལ་བ་ཀུན་གྱི་སྙིང་པོ་མཆོག །དེ་ལ་ཕྱག་འཚལ་ཕྱག་འཚལ་འདུད། །ལུས་མེད་ལུས་ཏེ་ལུས་ཀྱི་མཆོག །ལུས་མེད་ཆོས་ཀྱི་ལུས་ཡིན་ཕྱིར། །རྣམ་མེད་རྣམ་པའི་གཟུགས་ཅན་མ། །དེ་ཡི་སྒྲུབ་ཐབས་གསལ་བར་བརྗོད། །ཅེས་པས་ཤིས་པར་བརྗོད་པ་དང་། མཆོད་པར་བརྗོད་པ་དང་། རྩོམ་པར་དམ་བཅའ་བ་ཚིགས་སུ་བཅད་པ་རེས་གསུངས་ནས། སྔོན་དུ་བྱ་བའི་རིམ་པ། ཡིད་དང་མཐུན་པས་སེམས་ཁྲིད་ནས། །བློ་གྲོས་ཆེན་པོས་བདེ་ལ་འཇུག །བྱ་འོས་རང་གི་མགོན་ལ་བཏུད། །དེ་ཁོ་ན་ཡང་མངོན་དུ་བྱ། །རྒྱུད་ནས་བསྔགས་པའི་གནས་སུ་མཐུན་པའི་གྲོགས་དང་བཅས་ཏེ་རྣལ་འབྱོར་གྱི་ཡོ་བྱད་ཚང་བར་བསགས་ནས་གཞན་གྱི་དོན་འབའ་ཞིག་བསམས་ཏེ་བདེ་བའི་སྟན་ལ་འདུག་པས་སྐྱབས་སུ་འགྲོ་བ་དང་སེམས་བསྐྱེད། བླ་མ་རྡོ་རྗེ་སེམས་དཔར་ངེས་པ་བརྟན་པོས་རྣལ་འབྱོར་བྱ་བ་ནི། ངོ་བོ་བླ་མ་རྣམ་པ་རྡོ་རྗེ་སེམས་དཔའ་དེ་བཞིན་ངོ་བོ་གསོལ་འདེབས་རྣམ་པ་ཡིག་བརྒྱ། ངོ་བོ་བྱིན་རླབས་རྣམ་པ་བདུད་རྩི་ཕྱི་མའང་རྡོ་རྗེ་མཁའ་འགྲོར། ཡང་ན་ཉན་ཐོས་ལ་སོགས་པའི་གནས་ཐམས་ཅད་སྲེགས་པས་ན་ནམ་མཁའ་སྟེ། ནམ་མཁའ་དེར་བདུད་རྩིའི་རང་བཞིན་གྱི་རྒྱུ་ཞིང་ལོངས་སྤྱོད་པས་ན། ནམ་མཁར་ཀུན་ཏུ་རྒྱུ་གྲུབ་པས། །མཁའ་འགྲོ་མ་ཞེས་རབ་ཏུ་གྲགས། །ཞེས་གསུངས། དེས་ན་འདིར་ངོ་བོའི་སྒོ་ནས་བླ་མ། རྣམ་པའི་སྒོ་ནས་ཡི་དམ། བྱེད་ལས་ཀྱི་སྒོ་ནས་མཁའ་འགྲོ་ཡིན་ལ། བྱིན་རླབས་དངོས་གྲུབ་འཕྲིན་ལས་ཀྱི་རྩ་བ་གསུམ་གཅིག་ཏུ་འགྲུབ་པའོ། །དེ་ནས་དམ་ཚིག་གི་རིལ་བུ་བཏབ་པའི་ཆང་བྱིན་གྱིས་བརླབ་པའི་ཕྱིར་ལག་མཆོད་བྱ་སྟེ། དཔའ་བོ་ཡི་གེ་དྲུག་གིས་སྦར། །ཤེས་རབ་རིམ་པ་ལྔ་ཡི་མཐིལ། །སྐྱོན་བྲལ་ཡེ་ཤེས་ལྔ་ནི་དངོས། །དབུས་ནས་བརྩམས་ནས་བསྲུང་བ་དྲུག །འཁོར་ལོ་སྡོམ་པའི་རིམ་བཞིན་གསལ། །རྩ་རྒྱུད་ཀྱི་ལེའུ་སོ་གཅིག་པར་ལག་མཆོད་བསྟན་ལ་ལྷ་དང་ཡི་གེ་འདམ་ངར་བསྟན་པ་དེ་བཞིན་དུ་བྱ་བ་ཡིན་ནོ། །དེ་ནས་རྒན་པོ་མིང་མེད་ཀྱི། །ཐབས་དང་ཤེས་རབ་གྲིམས་པ་ལས། །གཙང་སྦྲ་རྣམས་ཀྱི་ཐོག་མའོ། །རྒན་པོ་དང་མིང་མེད་ཐབས་ཤེས་སྦྱར་བའི་བརྡ་ཡིན། དེ་ལ་མཆོད་ཅིང་དེ་དག་ཞུ་བའི་ཁུ་བ་ཀ་པཱ་ལར་བླུག་བདུད་རྩིར་བྱས། དེ་ནས་ཅུང་ཟད་མྱང་བས་ཁ་དག་པར་བྱ་བའོ། །འཁོར་བའི་སོགས་དགུས་སིནྡྷུ་རའི་དཀྱིལ་འཁོར་བྲི་བ་བསྟན་ལ། དེའི་དང་པོ། འཁོར་བའི་རང་བཞིན་ཡོངས་ཤེས་པས། །སྣ་ཚོགས་གཟུགས་བརྙན་འཆར་བ་ལ། །གཉིས་ཀྱི་བྲི་གཞི་མེ་ལོང་། །བདེ་གཤེགས་དྲུག་པས་གཟེར་བཏབ་སྟེ། །ཞེས་པ་རིགས་དྲུག་མཚོན་པ་ཆོས་འབྱུང་ཟུར་དྲུག །ཆགས་པའི་ཉམས་ཀྱིས་ཀུན་ཏུ་བརྡལ། །མངོན་བརྗོད་ལས། རྗེས་སུ་ཆགས་པ་དམར་པོའི་མདོག །ཅེས་གསུངས་པས་སིནྡྷུ་ར་བརྡལ་བ་ཡིན། ཤེས་རབ་ཆང་སྟེ་བྲི་རྫས། ཛམ་བུ་ཆུ་བོ་ཅན། བྲི་བྱེད་གསེར་གྱི་སྨྱུ་གུ །རང་བཞིན་རིགས་ཀྱི་རྣམ་པར་བཀོད་ནས་མི་ཤིགས་པ་སྔགས་ཀྱི་ཐིག་ལེ་བྃ་བཀོད་པ་ཡིན་ལ། འགྱུར་མེད་གསུམ་དང་རང་གཟུགས་སྔགས། །ཞེས་པས་ལྷག་མ་བཅུ་གསུམ་ཡང་། ཟླ་ཚེས་ཐིག་ལེས་སྤྲས་པར་བཀོད་དེ་སྐུ་གསུང་ཐུགས་མཚོན་པའོ། །ཇི་དགོད་པ། གསལ་བའི་འབྲུ་ཚོགས་རིམ་པ་ནི། །སྡེ་ཚན་བརྒྱད་ཀྱི་དང་པོ་རྣམས། །འདིར་དབྱངས་སྡེ་ཚན་གཅིག་ཏུ་བྱས་པས་སྡེ་བརྒྱད། སྤྲུལ་པའི་འཁོར་ལོར་བཀོད་ནས་ནི། །སྤྲུལ་པ་ནི་དབྱིབས་དེའི་འཁོར་ལོ་ལ་བཀོད་པར་བྱའོ། །དེ་ཡང་དཀྱིལ་འཁོར་དེ་བདག་གི་མདུན་ངོས་སྟེགས་བུ་གཙང་མ་ལ་མཉྫྱི། དེའི་ཁར་ཀ་པཱ་ལ་བདུད་རྩིས་གང་བ། དེའི་སྟེང་དུ་བཞག་ནས་དར་དམར་པོའི་གུར་ཕུབ། མཐའ་མ་རྣམས་མཆོད་པ་ལྷ་གྲངས་ཀྱིས་བསྐོར་རོ། །དེ་རྩ་རྒྱུད་ལས། དེ་ནས་ཐམས་ཅད་ཆོས་འབྱུང་བར། །སྣ་ཚོགས་ལྟེ་བར་མི་ཤིགས་དགེ །སྔགས་པས་ཆོ་ག་བཞིན་དུ་བྲི། །ཆོས་ཀུན་གཅིག་ཏུ་བསྡུ་བར་བྱ། །འདིར་སྔགས་ཚིག་ནི་འདི་ཡིན་ཏེ། །ཨཱ་ལི་ཀཱ་ལི་མཉམ་བྱས་ནས། །སྡེ་ཚན་ལ་ནི་ཡོངས་སྡོམས་པ། །བཞི་བཞི་རུ་ནི་ཤེས་བྱ་ལ། །ཐུབ་པ་མཆོག་གི་རེ་མིག་ལ། །དེར་གནས་དཔའ་བོ་བཏུ་བར་བྱ། །འདོད་པའི་དོན་ཀུན་སྒྲུབ་བྱེད་པའོ། །འགོད་བྱ་ལ་ཡི་གེ་བརྒྱད་ལས་མེད་དམ་སྙམ་སྐྱེ་སྲིད་པས། འདིར། ཨཱ་ལི་ཀཱ་ལིི་མཉམ་བྱས་ནས། །ཞེས་གསུངས་པས། མ་ནིང་སྤངས་པའི་ཨཱ་ལི་ལ་ཚན་པ་བདུན། ཀ་སོགས་ལ་ཚན་པ་བདུན་ཡོད་པས་མཉམ་པ་སྟེ། རྡོ་རྗེ་མཁའ་འགྲོའི་རིམ་པར་ཕྱེ་བ་ལྔ་བཅུ་པར། ཨཱ་ལི་ཀཱ་ལི་མཉམ་བྱས་ནས། །ཞེས་བྱ་བ་ནི། ཨཾ་ཨིཾ་ཨུཾ་ཨེཾ་ཨོཾ་ཨཾ་ཨཿཀ་ཙ་ཊ་ཏ་པ་ཡ་ཤ་རྣམས་ཏེ་ཞེས་གསུངས་སོ། །བཞི་བཞི་ཞེས་པ་འདིར་ཕྱོགས་བཞི་མཚམས་ཀྱི་བཞི་ཞེས་བྱས་ནས་ཆོས་འབྱུང་གི་ནང་དུ་པདྨ་འདབ་མ་བརྒྱད་པ་བཤད། ཐུབ་པ་མཆོག་གི་རེ་མིག་ནི་བདུན་ཏེ། འདབ་མ་དྲུག་པ་ལྟེ་བ་དང་བཅས་པ་གཅིག་འགོད་པའམ། ཡང་ན་རྡོ་རྗེ་མཁའ་འགྲོ་ལས་དེ་མ་བཤད་པས། པདྨ་ཕྱི་བརྒྱད་པ་དང་ནང་བཞི་པ་རང་དུ་བྱས་ནས་སྟེང་འོག་གཙོ་མོའི་སྟེང་འོག་ཏུ་སྦྱར་ཀྱང་རུང་། དེ་ལ་གུག་བྱེད་ཅན་བཞི་ནང་མར་ལུགས་འབྱུང་དེ་གཡོན་སྐོར། སྡེ་བརྒྱད་ཀྱི་དང་པོ་ཕྱོགས་དང་། མཚམས་གཡས་སྐོར་དུ་རིམ་པ་བཞིན་འགོད། ཐ་མ་གཉིས་དཀར་དམར་གྱི་གང་བ་ཡིན་པས་དང་པོ་སྟེང་། ཕྱི་མ་འོག །ཕྱི་མ་འདི་ལ་ཚེག་དྲག་ཡོད་པས་ཐིག་ལེ་མི་སྦྱར། འདབ་མ་དྲུག་པར་བྱེད་པའི་ཚེ་སྟེང་མ་ནུབ་ཀྱི་གཡོན། འོག་མ་ཤར་མའི་གཡས། རྔོག་པ་སྟེང་འོག་ཕྱི་མའི་ཤར་ནུབ་ཀྱི་པདྨའི་ཕྱི་མཐའ་ལ་འགོད་དེ་གསུམ་གདམ་པའོ། །རྣལ་འབྱོར་ལ་ཞུགས་ནས་དེ་དག་ལྷར་བསྒྱུར་བ་རྡོ་རྗེ་མཁའ་འགྲོའི་ལུང་དྲངས་པའི་དེ་མ་ཐག་ཏུ། རབ་ཏུ་སྦྱོར་བ་རྒྱས་པ་ནི། །སྒྲུབ་པ་སྒྲུབ་པོ་རྣམས་ལ་བཤད། །པདྨ་གར་དབང་བསྒྱུར་ནས་སུ། །བུ་མོའི་གནས་ལ་འདུག་པར་བསམ། །ཨེ་ཞེས་བྱ་དང་བམ་ཞེས་པ། །ལ་ཞེས་བྱ་བ་གསུམ་པ་དེ། །ཞེས་གསུངས་པའི་ཨེ་གཞན་ཝཾ་གི་བདག་ལ་རྣལ་འབྱོར་གྱི་དེ་ཉིད་བཤད་པ་ཡིན་ནོ། །ལྷ་ནི། ལུགས་ལས་བྱུང་བའི་རིམ་པས་ནི། །གཙོ་བོ་གཉིས་དང་ཕྱོགས་ནི་བཀོད། །མཚམས་ནས་ལུགས་ལས་བཟློག་པ་ཡིས། །དཀྱིལ་འཁོར་ཀུན་གྱི་བདག་པོར་འགྱུར། །བརྟན་པའི་སེམས་ཀྱི་མངག་གཞུག་བཞིས། །རྡོ་རྗེ་ལྷ་མོ་བཀུག་ལ་བསྟིམ། །གླུ་གར་རོལ་མོ་བསྟོད་པས་བརྒྱན། །བྱ་བ་གཞན་སོགས་ཤེས་པར་བྱ། །དེ་ཡང་རྩ་རྒྱུད་ལེའུ་རྩ་དྲུག་པར། །ལུགས་འབྱུང་ལུགས་ལས་ཟློག་པ་ཡི། །ཕོ་ཉ་མོ་ཀུན་ཡང་དག་གནས། །འོག་དང་སྟེང་གི་དངོས་གྲུབ་སྟེར། །བདག་གི་ཕོ་ཉ་མོ་ཀུན་འགྲོ །ཕོ་ཉ་མོ་དེས་དོན་ཀུན་སྟེར། །ཞེས་གསུངས། བདག་གི་ཕོ་ཉ་མོ་ཞེས་པ་རྣལ་འབྱོར་མ་བཅུ་གཉིས་རྡོ་རྗེ་ཕག་མོ་རིགས་ལྡན་མའི་དབྱེ་བ་ཡིན་པས། ཕག་མོ་ཡི་ནི་རིགས་ལས་བྱུང་། །རྣལ་འབྱོར་མ་ནི་བཅུ་གཉིས་དང་། །ཞེས་གསུངས་པ་དང་། སློབ་དཔོན་རྣལ་འབྱོར་མ་ཉིད་ཡིན། །དང་། ཀཱ་ཀའི་གདོང་སོགས་བརྒྱད་པོ་ནི། །གྲོལ་དང་དད་པ་འཕེལ་བྱེད་པ། །ཞེས་གསུངས་སོ། །གཉིས་པ་བདག་གི་དེ་ཉིད་ཉེ་བར་སྒྲུབ་པ་ནི། ཐམས་ཅད་ནམ་མཁའི་མཚན་ཉིད་ཏེ་སོགས་ཚིགས་བཅད་ཀྱིས་སྭ་བྷཱ་ཝའི་སྔགས་དོན་རྣམ་པར་ཐར་པའི་སྒོ་བཞི་བཤད་པ་ཡིན་ལ། རྐང་པ་དང་པོས་མཚན་མ་མེད་པའི་རྣམ་པར་ཐར་པ། ནམ་མཁའ་ལ་ཡང་མཚན་ཉིད་མེད། སྨོན་མེད། ནམ་མཁའ་དང་ནི་མཉམ་སྦྱོར་བས། སྟོང་ཉིད། ཀུན་ཀྱང་མཉམ་པ་ཉིད་དུ་གསལ་གྱིས་འདུས་མ་བྱས་པའི་རྣམ་པར་ཐར་པ་བསྟན་ནོ། །དེར་རྗེས་གྲུབ་པ་ལུས་ཀྱི་དཀྱིལ་འཁོར་དུ། །རང་གནས་བརྡལ་བ་དབུགས་བྲལ་སྙིང་ག་དེར། །ཚ་ཟེར་སྟེང་དུ་ཞེས་ཆོས་འབྱུང་གདན་དང་བཅས་པ་ལྔ་པའི་གསུམ་པ་ལ། ནམ་མཁའ་བསིལ་ཟེར་རབ་རྒྱན་སྤྲོས་པ་ལས། །འཁོར་འདས་སྙིང་པོ་བདེ་བའི་རང་གཟུགས་ཅན། །རྩེ་གཅིག་ཞལ་གྱིས་ཕྱོགས་བཅུར་གཟིགས་པར་མཛད། །དུས་གསུམ་མཉམ་ཉིད་འབར་བའི་སྤྱན་དང་ལྡན། །བརྐྱང་བསྐུམ་གར་མཛད་ཕྱག་རྒྱ་ལྔ་ཡིས་སྤྲས། །ཞེ་སྡང་རབ་ཏུ་རྒྱས་པ་ཡིས། །འབར་བའི་མཚོན་ཆ་འོག་ཏུ་གདེངས། །འདོད་ཆགས་ཆེན་པོའི་མེ་འབར་བས། །ཆོས་ཀྱི་རྒྱལ་མཚན་ཕྲག་པར་བཀལ། །གཏི་མུག་ཆེ་ལ་གནས་པ་ཡིས། །པད་སྣོད་དཀར་པོས་ནམ་མཁའ་འཇོ། །ཉམས་དགུ་གར་གྱི་རོལ་པ་ཡིས། །བདེ་གཤེགས་མ་ལུས་དགྱེས་པར་མཛད། །ཆེ་བའི་ང་རྒྱལ་དྲེགས་པ་ཡིས། །མགུལ་པར་མགོ་བོ་ཚར་དུ་དངར། །ཕྲག་དོག་ཆེ་ལ་གནས་པ་ཡིས། །སངས་རྒྱས་སྤྲིན་ནི་རབ་ཏུ་འཕྲོ། །བནྡྷུ་རཱི་ཀཱའི་མདོག་འདྲ་བས། །འབར་བའི་འཕྲེང་བ་ཀུན་ཏུ་འཁྲིགས། །ཕྱོགས་གོས་བརྒྱད་གཉིས་ལོ་ཡི་ཚད། གཙོ་མོ། མངག་གཞུག་འཁོར་ལོ་ལ་སོགས་སྔ་མ་ལྟར། སྟོང་ཉིད་དེའི་གདངས་ལ་རང་བཞིན་གྱིས་རྟེན་གཞལ་ཡས་ཁང་དུ་གྲུབ་པའི་ལུས་ཀྱི་ལྟེ་བར་ཆོས་འབྱུང་གི་དཀྱིལ་འཁོར་བསམས་ནས་ལྷར་བསླང་ནས་མཆོད་པ་རྫོགས་པའི་བར་ནི་ཚིགས་བཅད་དྲུག་པོས་བསྟན་ནོ། །སྒོམ་པའི་དུས་ལ། ས་འོག་གི་ལྷ་མོ་དབུ་མཐུར་བསྟན་མི་མཛད་པར་འོག་གི་གདོན་གྱི་ཚོགས་སྡིགས་པའི་ཕྱིར་ཞལ་མཐུར་དུ་ལྟ་བ་ཡིན། དེ་དག་སྟོང་པ་ཉིད་ཀྱི་རང་གདངས་འཇའ་ཚོན་ཙམ་དུ་ལྟ་ཡི། ཐ་མལ་པའི་ལྷ་ལྟ་བུར་ནི་མ་ཡིན་ནོ། །དེས་སྣང་བའི་ངོས་ནས་ལྷ་དེ་ལ་སེམས་རྩེ་གཅིག་པ་ནི་དོན་མཚན་བཅས་ཀྱི་ཞི་གནས་ཡིན། དེའི་སྟེང་དུ་ཚུལ་བཞིན་ཡིད་ལ་བྱེད་པ་ཞིག་བྱུང་ན་དེ་ཤེས་བཞིན་ནོ། །དེས་ཐ་མལ་གྱི་ཆ་སྦྱངས། དེ་རྣམ་པ་ཀུན་གྱི་མཆོག་དང་ལྡན་པར་མཐོང་བས་སྣང་བའི་ཆ་སྦྱངས། དེ་ཡང་སྣང་བའི་ངོ་ན་ཡོད། །ཞེན་རྒྱུའི་ངོ་ན་མེད་པས་འཇའ་ཚོན་ལྟ་བུས་ཞེན་པ་སྦྱངས་ནས་བསྐྱེད་རྫོགས་ཟུང་འཇུག་ཏུ་སོང་། དེ་ཀ་ལ་བསྐྱེད་རིམ་སྒྱུ་མ་ཞེས་གསུངས་སོ། །ལྡང་བར་འདོད་ན་མགོན་ལ་བཏུད། །མུཿཞེས་དགེ་བ་བསྔོ་བར་བྱ། །འདི་མཐར་བཤད་པ་ནི་རིམ་གཉིས་གདན་ཐོག་གཅིག་ལ་སྒོམ་པའི་དབང་དུ་ཡིན་ལ་གཞན་འདིར་རོ། །གསུམ་པ་ནི། སྤྲོ་དང་བསྡུ་བར་བྱེད་པ་ཡིས། །རྣམ་པ་ཀུན་གྱི་མཆོག་དང་ལྡན། །མཁས་པས་ཇི་ལྟར་རིགས་པ་ཡིས། །དངོས་གྲུབ་ཅེས་གསུངས་པ་ནི། །ལྷའི་འཁོར་ལོ་ལ་སེམས་ཟིན་ཚུལ་དེ་ལྟ་བུ་ཞིག་བྱུང་ནས་ཚོགས་ཀྱི་དཀྱིལ་འཁོར་བརྩམས་ཏེ་འཕྲིན་ལས་རྣམ་པ་བཞིས་ཇི་ལྟར་འོས་པ་དང་དངོས་གྲུབ་རྣམ་པ་བརྒྱད་ལས་གང་འདོད་པ་བསྒྲུབ་པར་བྱའོ། །དེ་ཡང་རྩ་རྒྱུད་ཀྱི་སོ་དྲུག་པའི་ལུང་འཕྲོར། མཐོང་དང་དེ་བཞིན་རེག་པ་དང་། །ཙུམྦྷ་ན་དང་རྟག་པར་འཁྱུད། །སྦྱོར་བའི་གནས་ཀྱི་ཁྱད་པར་ཉིད། །ཇི་སྙེད་རྣལ་འབྱོར་ཚོགས་རྣམས་ནི། །ཐམས་ཅད་དངོས་གྲུབ་བྱེད་པར་བཤད། །ཅེས་པས་གསུངས། མཚན་མའི་རིམ་བཞིན་བསམ་ཞེས་པས། གཞོན་ནུ་མ་མཆོད་པ་སྟེ་དེ་ལས་མཚན་མ་རྟགས་དགེ་མི་དགེ་ཤེས་པར་བྱ་བའོ། །འདིའི་མཚན་མ་སྡོམ་འབྱུང་ལས་རྒྱས་པར་གསུངས། །དེ་ཡང་རྩ་རྒྱུད་ཀྱི་ལུང་འཕྲོས་དེ་ཉིད་དུ། བདེན་པ་ཐམས་ཅད་སྦྱིན་བྱ་སྟེ། །གཞན་དུ་ཡང་ནི་མ་ཡིན་ནོ། །མ་དང་སྲིང་མོ་བུ་མོ་དང་། །ཆུང་མ་ཕོ་ཉ་མོར་གནས་ལ། །ཞེས་པས་སོ། །དེའི་དེ་མ་ཐག་ཏུ། གང་གིས་རྟག་ཏུ་སྔགས་སྦྱིན་པ། །གང་གིས་ཆོ་ག་དེ་བཞིན་བྱ། །ཞེས་གསུངས། དེ་དག་རྩ་རྒྱུད་ལས་མཐར་ཆགས་སུ་མ་བཤད་པས་སྦས་པར་སོང་། བཤད་རྒྱུད་རྡོ་རྗེ་མཁའ་འགྲོར་གསལ་བར་ཕྱུང་སྟེ། དེའི་རིམ་པར་ཕྱེ་བ་སོ་བཞི་པར། དེ་ནས་ཡང་དག་བཤད་བྱ་བ། །རྒྱུད་དུ་སྦས་པ་ངེས་པར་བྱ། །དེ་ནས་ཐམས་ཅད་ཆོས་འབྱུང་བར། །སྣ་ཚོགས་ལྟེ་བར་མི་ཤིགས་དགེ །བྲིས་ནས་ཆོ་ག་བཞིན་དུ་སྔགས། །ཆོས་ཀུན་གཅིག་ཏུ་བསྡུ་བར་བྱ། །ཨཱ་ལི་ཀཱ་ལི་མཉམ་བྱས་ནས། །སྡེ་ཚན་ལ་ནི་ཐིམ་པར་བྱ། །དེར་གནས་པ་ལས་དཔའ་བོ་ནི། །འདོད་པའི་དོན་ཀུན་སྒྲུབ་བྱེད་བཏུ། །ཡེ་ཤེས་ལོངས་སྤྱོད་རྫོགས་པ་དང་། །སྤྲུལ་པ་ཐོབ་འགྱུར་གདོན་མི་ཟ། །འོག་དང་སྟེང་གྲུབ་རྟག་ཏུ་སྟེར། །བདག་གི་ཕོ་ཉ་མོ་ཀུན་འགྲོ །ཕོ་ཉ་མོ་དེས་གྲུབ་ཀུན་སྟེར། །མཐོང་དང་དེ་བཞིན་རེག་པ་དང་། །ཙུམྦྷ་ན་དང་རྟག་པར་འཁྱུད། །སྦྱོར་བའི་གནས་ཀྱི་ཁྱད་པར་ཉིད། །ཇི་སྙེད་རྣལ་འབྱོར་ཚོགས་རྣམས་ནི། །ཐམས་ཅད་དངོས་གྲུབ་བྱེད་པར་བཤད། །བདེན་པ་ཐམས་ཅད་སྦྱིན་བྱ་སྟེ། །གཞན་དུ་ནམ་ཡང་མ་ཡིན་ནོ། །མ་དང་སྲིང་མོ་བུ་མོ་དང་། །ཆུང་མ་ཕོ་ཉ་མོར་གནས་ལ། །གང་ཞིག་རྟག་ཏུ་སྔགས་སྦྱིན་པ། །རང་གི་ཆོ་ག་ཇི་བཞིན་བྱ། །ཐོད་པ་འཕྲེང་བ་དབུ་རྒྱན་དང་སོགས་གསུངས་སོ། །དེ་ཉིད་གསུམ་དུ་བཤད་པ་ནི་རྩ་རྒྱུད་ཀྱི། དབུགས་མ་མཆོག་གི་དབུགས་དབྱུང་བ། །དྲི་ཡི་ཆུ་དང་བཅས་པ་ཡིས། །རྟག་ཏུ་རིགས་ལྡན་མ་མཆོད་བྱ། །ཞེས་པའི་དོན་རྡོ་རྗེ་མཁའ་འགྲོའི་ཞེ་གཉིས་པར། བྱང་ཆུབ་ཀྱི་སེམས་བསྐྱེད་པའི་རིམ་པ་སྒོམ་པ་པོས་དུས་བཞིར་མཁའ་འགྲོ་མ་ལ་སོགས་པའི་ལྷ་མོ་དང་། རྣམ་པར་ཐར་པ་སྒོ་བཞིའི་བདག་ཉིད་ཅན་ཇི་སྲིད་སྟོང་པ་ཉིད་ཀྱི་ང་རྒྱལ་ནས་གཟུང་སྟེ་གཟུགས་ཡོངས་སུ་རྫོགས་པའི་བར་དུ་ངེས་པར་བྱས་པས་མཆོད་པར་བྱ་བའོ། །དཔའ་བོ་དང་ནི་སྙོམས་འཇུག་པ། །ཞེས་བྱ་བ་ནི། གཞན་ཡོངས་སུ་རྫོགས་པའི་རིམ་པ་ལ་གནས་པའི་སྒོམ་པ་པོ་སྟེ། དུས་ཀྱི་ངེས་པ་མེད་ཅིང་ཐོག་མ་དང་ཐ་མ་མེད་པའི་ང་རྒྱལ་གྱིས་རྟག་ཏུ་གནས་པ་རྣམས་ཀྱིས་ཅི་ཞིག་བྱ་ཞེ་ན། ཡིད་ནི་ནང་དུ་ཆུད་པའི་སྟེ། དེ་བཞིན་གཤེགས་པ་ཐམས་ཅད་ཀྱི་བསྐྱེད་པ་མོའི་ཤེས་རབ་དང་ཇི་ལྟ་བ་བཞིན་དུ་མཉམ་པར་སྦྱོར་བ་དང་ལྡན་པས་མཆོག་ཏུ་དགའ་བ་རྣམ་པར་སྤྲོ་སྟེ། གནས་པས་ཚིམ་པར་བྱ་བའི་བར་དུའོ། །དེ་ལྟར་མཆོད་པས་མཐའ་མ་མཆོག་དང་བར་མ་སྟེ། ཐ་མ་ནི་ཆགས་པ་ཆེན་པོའི་ཚུལ་ལོ། །དེ་ཡང་རྡོ་རྗེ་ཅན་གྱིས་ཐམས་ཅད་བསྡུས་ནས་བཙུན་མོའི་བྷ་ག་བདེ་བ་ཅན་དུ་སྤྲོས་ལ། དེར་དཀྱིལ་འཁོར་བྲི་བར་བྱ་བ་དང་སྦྱར་བ་སྟེ། གཞན་གྱི་དེ་ཁོ་ན་ཉིད་ཇི་ལྟ་བ་བཞིན་དུ་བསྟན་པའོ། །བར་མ་ནི་བདག་གི་དེ་ཁོ་ན་ཉིད་དེ་རྡོ་རྗེ་འཛིན་པས་འཁོར་ལོ་ཐམས་ཅད་རང་གི་དབུས་སུ་བསྡུས་ལ། རྡོ་རྗེ་ཀུན་གྱི་རང་བཞིན་དུ་བྱས་པ་ཆོ་ག་དེས་སྒོམ་པ་ནི་མཆོག་གོ་ཞེས་གསུངས་པའི་དེ་ཉིད་གསུམ་ལ་བསྐྱེད་རིམ་གྱི་ཕྱོགས་དང་། རྫོགས་རིམ་གྱི་ཕྱོགས་གཉིས་སུ་བསྟན་པས་རྫོགས་རིམ་ཀྱང་དེའི་ཆིངས་དང་ལྡན་པར་བཤད་དོ། །གཉིས་པ་ལ། གཞན་གྱི་དེ་ཉིད་ཆོས་སྐུ། བདག་གི་དེ་ཉིད་ལོངས་སྤྱོད་རྫོགས་པ། རྣལ་འབྱོར་གྱི་དེ་ཉིད་སྤྲུལ་པའི་སྐུའི་ལམ་དུ་བཤད་པ་གསུམ་ལས། དང་པོ་ལ། རྩ་རླུང་དྲ་མིག་འཁོར་ལོས་དྲོད་སྐྱེད། བདེ་ཆེན་གསུང་གི་རིན་ཆེན་གྱིས་རྩེ་མོར་བགྲོད། རང་གྲོལ་ཕྱག་རྒྱ་ཆེན་པོས་བཟོད་པ་བསྒྲུབ། སྤྱོད་པ་ཆུ་ལ་རལ་གྲིས་ཆོས་ཀྱི་མཆོག་ཐོབ་པར་བྱ་བ་བཞི་ལས། དང་པོ་ལ། ལམ་གྱི་དྲོད་ཚད་བསྟན། དེར་བགྲོད་པའི་ཐབས་བཤད་པ་གཉིས་ལས། དང་པོ་ནི། ཆོས་ཀྱི་ཚོགས་ནི་ཆོས་ཀྱི་ལུས། །ཞེས་པ་དང་བཅས་ནས་ཆོས་ཀྱི་སྐུར་བསྒྱུར་བས་དམིགས་པའི་ཚོགས་དང་བཅས་པས་གཞན་སྣང་ལམ་དུ་བྱེད་པས་ཆོས་ཀྱི་སྐུའི་ལམ་གཞན་གྱི་དེ་ཉིད་དུ་བཞག་སྟེ། རྩ་རྒྱུད་ལས། མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་ཆོས་སྐུ་ལས་ལོངས་སྤྱོད་རྫོགས་པ་འབྱུང་བའི་གོ་རིམ་གྱིས་འདི་སྔར་བཤད་པས། རྡོ་རྗེ་མཁའ་འགྲོར། ཡེ་ཤེས་ལོངས་སྤྱོད་རྫོགས་པ་དང་། །སྤྲུལ་པ་ཐོབ་འགྱུར་གདོན་མི་ཟ། །ཞེས་གསུངས་སོ། །དེ་ཡང་། སྲིན་པོའི་ཞལ་ནས་བསྐྱོད་པ་ཡི། །རང་བྱུང་གསལ་བས་དངོས་པོ་བསྲེགས། །བདེ་བ་དཔག་མེད་བསྒྱུར་འཕྲོ་བས། །དེའི་རྐང་པ་དང་པོ་ནི་དམ་ཚིག་བརྐྱངས་པས་རྩ་དུལ་བའི་དབང་གིས་སྲོག་ཐུར་འདྲེས། དེས་ཐུར་སེལ་གནས་པ་ནས་རླུང་དབུ་མར་འཇུག །དེས་གཏུམ་མོ་རང་བྱུང་གི་མེ་འབར། དེས་རྩ་ཐམས་ཅད་བསྲེགས་དྲོད་སྐྱེས་ནས། ཁམས་རྣམས་བཞུ་བའི་བདེ་བ་མཐའ་ཡས་རྙེད་པ་ནི་སྦྱོར་བའི་ལམ་དྲོད་ཅེས་བྱའོ། །གཉིས་པ་ལ། ཡོན་པོ་བསྲངས་སུ་འཇུག་པ། ལོག་པ་མལ་དུ་བསད་པ། བུ་མ་དང་སྤྲད་པ་གསུམ་ལས། དང་པོ་ནི། རང་བྱུང་གིས་དེ་ལྟ་བུར་མ་གྱུར་ན་སྦྱོར་བའི་སྟོབས་ཀྱིས་བསྒྲུབ་དགོས་ལ། དེའི་སྦྱོར་བ་ནི། རྩ་རླུང་དྲ་མིག་འཁོར་ལོ་བསྐོར། །ཞེས་པ་འདི་ཡིན། འདི་ལ་རྩ་ནི་ལུས་ལ་གནས་པ་སྟེ། །སྤྱིར་ལུས་ལ་རགས་ཕྲ་ཤིན་ཏུ་ཕྲ་བའི་རྩ་ཡོད་པ་ལས། འདིར་རགས་པའི་དབང་དུ་བྱས་ནས། ཨ་ཝ་དྷཱུ་ཏཱི་ལ་ལ་ནཱ། །ར་སཱ་ན་སྟེ་དབྱེ་བ་ཡང་། །འཁོར་ལོ་བཞི་རུ་གནས་པའོ། །ཞེས་གསུངས་ཏེ། རྡོ་རྗེ་མཁའ་འགྲོའི། གྲུ་བཞི་པ་དང་རྣོན་པོ་དང་། །དེ་བཞིན་ཀུན་ནས་ཟླུམ་པོ་སྟེ། །ཞེས་དང་། ལྔ་བཅུ་པར། བརྡ་ཡིས་བཤད་པ་བརྗོད་པར་བྱ། །གྲུ་བཞི་ལ་སོགས་ཞེས་བྱ་ལ། །གྲུ་བཞི་པ་ནི་ཟུར་བཞི་སྟེ། །ལ་ཡིག་དབང་ཆེན་དཀྱིལ་འཁོར་རོ། །འདབ་མ་ཅན་ནི་གྲུ་གསུམ་སྟེ། །མེ་ཡི་དཀྱིལ་འཁོར་རམ་ལས་བྱུང་། །དེ་བཞིན་ཀུན་ནས་ཟླུམ་པོ་ནི། །བ་དང་ཡ་ཞེས་བྱ་བར་བཤད། །བསྒྲུབ་པར་བྱ་ལ་དཀྱིལ་འཁོར་དག །ཡི་གེ་དང་བཅས་བསམས་ཏེ་བསྒྲུབས། །ཞེས་པ་བཞིན། རྣམ་སྣང་གི་ཆོས་བདུན་བཅས། ལུས་བཅོམ་ལྡན་འདས་མ་སྟོང་རར་བྱས་པའི་དབུས་ན་རྩ་གསུམ་སྲོག་ཤིང་འཁོར་ལོ་གདུགས་རྩིབས་ལྟ་བུའི་དབུས་ན་གནས་པའི་མི་ཤིགས་པའི་ཐིག་ལེ་བཞི་དང་བཅས་པ་བསམ། གཉིས་པ་ནི། དྲ་བ་ཞེས་བྱ་འབྲེལ་བ་སྟེ། །རླུང་ནི་ལས་ཀུན་བྱེད་པ་ཅན། །ཞེས་པ་རྡོ་རྗེ་མཁའ་འགྲོའི་ལུང་སྔ་མའི་འཕྲོར། གཡས་ཕྱོགས་ནས་ནི་བསྐོར་ནས་སུ། །སྟེང་དང་དེ་བཞིན་འོག་ཏུ་ནི། །རིམ་གྱིས་སྣོན་ཅིང་དྲག་ཏུ་སྣོན། །ལྔ་བཅུ་པར། ཐམས་ཅད་དངོས་པོ་གསུམ་ཡིན་ཏེ། །ཡན་ལག་མི་གསལ་འོད་ལྡན་གང་། །དེ་ནི་ཡན་ལག་གསལ་ཞིང་འབར། །སྙིང་གི་ཐམས་ཅད་འཛིན་པ་གང་། །དེ་ནི་ཡན་ལག་སྒྲུབ་པར་བརྗོད། །ཅེས་པ་འབྱུང་འཇུག་གནས་པ་གསུམ། སྔ་མའི་གཡས་ནི་འདིར་སྟེང་སྒོ་སྟེང་དང་རིམ་གྱིས་སྣོན་ཅིང་ཞེས་སྦྱར་ནས་བཤད་དེ། སྟེང་ནས་བརྔུབས་ཏེ་འོག་རླུང་ཅུང་ཟད་ཐེན་ནས་ཁ་སྦྱར་འོག་ལྟེ་བར་ཙམ་ཐུབ་འཛིན་ཅིང་དམིགས་པ་ལྟེ་བའི་མི་ཤིགས་པའི་འཁོར་ལོ་ལའོ། །དེ་ནས་འོག་ནས་རིམ་པ་བཞིན་ས་ཆུ་ལ་ཐིམ་པ་ལ་སོགས་པའི་རིམ་པས་མཐར་དཔྲལ་བའི་འཁོར་ལོར་དགག་པར་བྱའོ། །དེ་ཡང་ལྔ་བཅུ་པའི་འཕྲོས་དེར། སྙིང་ནི་པདྨ་ཞེས་བཤད་དེ། །པདྨ་དེ་ནི་ཀུན་གྱིས་མཆོད། །ཐམས་ཅད་འཛིན་པ་མགོ་བོ་ཡིན། །ཀླད་པ་ནས་ནི་ཀུན་ཏུ་རྒྱུ། །ཞེས་སོ། ལྔ་ཡི་བདག་ཉིད་བཅུ་མིང་སྟེ། །རླུང་སེམས་གཉིས་སུ་མེད་པར་ནི། །ཞེས་པས། སྔར་གྱི་དྲག་ཏུ་སྣོན་ཞེས་པའི་འཕྲོར། འབིགས་པ་བཅུ་ཡི་རྒྱལ་མཆོག་གིས། །ཁམས་གསུམ་རྒྱལ་སྲིད་ཆེན་པོ་ལ། །རྣམ་པར་རྒྱལ་ཞིང་ལོངས་སྤྱོད་འགྱུར། །འདིར་འབིགས་པ་བཅུ་ཞེས་པ་ནི། རྩ་བའི་རླུང་ལྔ་ཡན་ལག་གི་རླུང་ལྔ་འགགས་པ་ཡིན་ཏེ། ཀུན་ཏུ་རྒྱུ་ཞེས་པའི་འཕྲོར། གང་གི་སྟོབས་ནི་གང་ཡིན་པ། །དེ་ནི་དེ་ཚེ་སྦྱར་བར་བྱ། །གནས་ནི་རྣམ་པ་དུ་མར་བཤད། །ཤ་དང་པུ་སྐར་བུང་བ་སོགས། །འདིར་ཡང་རིམ་པ་དེ་ཉིད་ཀྱི། །སེམས་ནི་འབུགས་པ་སྔོན་འགྲོ་བའི། །བདག་གི་གདན་ལ་སོགས་པ་ཡིན། །རང་ཉིད་ཀྱིས་ནི་རྟོགས་པར་སླ། །དང་། གསང་བའི་གནས་ཀྱི་ངེས་པ་ནི། །ཤ་ནི་འབུགས་པར་ངས་བཤད་དེ། །ལྟེ་བའི་འབུགས་ནི་པུས་ཀཱ་ར། །སྙིང་ག་བུང་བ་ཞེས་བྱ་སྟེ། །གེ་སར་འབུགས་པ་དཔྲལ་བ་ཡིན། །མིག་སོགས་གཡོ་བ་ཞེས་བྱ་སྟེ། །དབང་པོའི་ཚོགས་ནི་གཡུལ་འགྱེད་པ། །མི་ཡི་བདག་པོ་བསད་པར་བྱ། །དེ་དག་ཀུན་གྱི་མན་ངག་ནི། །བླ་མའི་ཁ་ལས་ངེས་པར་བྱ། །ཞེས་གསང་གནས་ནས་ལྟེ་བ་སོགས་སུ་སྲོག་འགགས་པས་མཐར་རླུང་སེམས་དཔྲལ་བའི་ཐིག་ལེར་ཆུད་པས་རྣམ་པར་ཤེས་པ་ཡུལ་ལ་མི་འཇུག་སྟེ། རྣལ་འབྱོར་གྱི་སྟོབས་ཀྱིས་འགོགས་པར་གྱུར་པའི་ཕྱིར་རོ། །གསུམ་པ་ནི། མི་རྟོག་འཁོར་ལོ་བསྐོར་བར་བྱ། །ཞེས་པས། དེ་དུས་གསང་གནས་ནས་རང་བྱུང་གི་གཏུམ་མོ་འབར། དེས་སྤྱི་བོའི་ཐེག་ལེ་བཞུ་ལ། སྔར་གྱི་འོག་ཏུ་ནི། དྲག་ཏུ་སྣོན་ཞེས་སྦྱར་ནས་རླུང་སེམས་གསང་བའི་འཁོར་ལོར་བཅིང་། དེས་ཕལ་པའི་ཁམས་ཐམས་ཅད་ལྕགས་ཀྱི་ཁམས་ལ་གསེར་འགྱུར་གྱི་རྩིས་རེག་པ་ལྟ་བུར་དངས་མར་བསྒྱུར་བ་ཡིན་པས་རྡོ་རྗེ་མཁའ་འགྲོར། སྒྲུབ་པོས་འདིར་ནི་ཡི་གེ་བསམ། མེ་མར་གྱི་ནི་རྩེ་ལྟར་བྱ། རྩེ་མོ་ལྟ་བུ་ཞེས་བྱ་བ་ལ། ཤི་རཿནི་མགོ་བོ་སྟེ་ཀླད་པའི་གོང་བུའོ། རྩེ་མོ་ནི་མེའི་རྩེ་མོ་སྟེ་དེས་མར་གསར་བུམ་པར་བཅོས་པ་ལྟར་ཐམས་ཅད་དུ་བཞུ་བར་བྱའོ། །སྔགས་ཀྱི་མར་མེ་འདི་ཡིས་ནི། །སྐད་ཅིག་གིས་ནི་འདར་བར་འགྱུར། །ཞེས་པའི་འདར་བ་ནི། སྟོང་ཕྲག་བདུན་ཅུ་རྩ་གཉིས་ཀྱི་རྩ་ཐམས་ཅད་བསྐུལ་བས་ཕུང་པོ་ཁམས་སྐྱེ་མཆེད་ཀྱི་ཆོས་ཐམས་ཅད་ལ་ཏིལ་ལ་མར་ཁུ་ལྟ་བུར་ཁྱབ་པའི་སེམས་ཀྱིས་ཐིག་ལེ་ཞུ་བར་གྱུར་ནས་གསང་བར་འབབ་པའོ། །དེ་བརྟན་པར་བྱ་བའི་ཕྱིར་རྡོ་རྗེ་མཁའ་འགྲོར། ལྟ་བ་འཆང་བ་ལ་གཏད་དེ། །མྱུར་དུ་འཕངས་ན་གྲུབ་པའི་མཆོག །མདའ་གཞུས་རྣམ་པར་རྒྱལ་བའི་ཕྱག་རྒྱའོ། །ཞེས་དང་། འཆང་བས་འབེམ་ནི་བསྒྲིབས་ནས་སུ། །ཞེས་བྱ་བ་ནི་དབང་དུ་བྱ་བའི་དོན་ནོ། །འགྱེད་པ་ཞེས་བྱ་བ་ནི་དགུག་པའོ། །དེ་ལ་འཆང་བ་ཞེས་བྱ་བ་ནི་རྣམ་པར་ཤེས་པ་དང་རླུང་ངོ་། །མིག་སྡངས་པ་ནི་བཞིན་འཛུམ་པ་དང་བཅས་པའོ། །ལྟ་བ་འཆང་བ་ལ་གཏད་ཅེས་བྱ་བ་ནི་ཤི་བ་རྣམས་ཀྱང་འཚོ་བར་བྱེད་པ་ཡིན་ནོ། །ཚུལ་དེས་ཡིད་ནང་དུ་བཅུག་པས་བྱང་སེམས་འཆིང་བར་འགྱུར་བའམ་མ་གྱུར་ན་རྣལ་འབྱོར་འོག་མ་འདི་ལ་བསླབ་པར་བྱའོ། །གཉིས་པ་བདེ་ཆེན་གསུང་གི་རིན་ཆེན་གྱིས་རྩེ་མོར་བགྲོད་པ་ལ། ལམ་གྱི་དྲོད་ཚད་ངོས་བཟུང་། དེར་བགྲོད་པའི་ཐབས་བཤད་པ་གཉིས་ལས། དང་པོ་ནི། ནམ་མཁའ་བདེ་བའི་ཕོ་བྲང་དུ་ནི་སྤྱི་བོ། མེ་ལས་ནི་དེར་གཏུམ་མོ་རང་བྱུང་གི་མེས་བསྲེགས་པ། རང་སྔགས་འགྱུར་མེད་གསུམ་ནི་ཞུ་བ་ལུས་ངག་ཡིད་ཀྱི་ཐིག་ལེ་གསང་བའི་འཁོར་ལོར་འབབ་པའི་བདེ་བ་ལ་རིམ་པ་བཞིན། དགའ་བ་མཆོག་དགའ་ཁྱད་དགའ། དུས་རྣམ་པ་སྣ་ཚོགས་པའི་སྐད་ཅིག་མ་དང་། རྣམ་པར་སྨིན་པའི། རྣམ་པར་ཉེད་པ་སྐད་ཅིག་མ་ཆགས་པའི་ཕྱོགས་རིག་ལ། བཞི་པ་ལྷན་སྐྱེས་མ་རིག་པའི་སྐབས། དེ་རིག་པར་བྱ་བའི་ཕྱིར། རྫ་མཁན་འཁོར་ལོ་ལྟ་བུར་བསམ། ཡང་དབབ་ཅིང་ཡང་ཟློག་པས་སོ། །ཚུལ་གང་གིས་ཞེ་ན། གཉིས་པ་ལ། དབྱིབས་ཀྱི་ཕྱག་རྒྱ། ལུས་ཀྱི་ཕྱག་རྒྱ། འཛིན་པའི་ཕྱག་རྒྱ། འགུགས་པའི་ཕྱག་རྒྱ། འགེངས་པའི་ཕྱག་རྒྱ་སྟེ་ལྔ་ལས། དང་པོ་ནི། བདེ་ཆེན་གསུང་གི་རིན་ཆེན་ཆོངས། །ཟག་བཅས་ལུས་ཀྱི་བདེ་བ་ལ། །ཞེས་པ་གཞན་ལུས། རང་ལུས་གཉིས་བཤད་པའི་གཞན་གྱི་ལུས་ཀྱི་ཕྱག་རྒྱ་ལ་རྡོ་རྗེ་མཁའ་འགྲོར། དབྱིབས་ཀྱི་ཕྱག་རྒྱ་ཞེས་གསུངས་ཏེ། ལྟོང་རྒྱུད་སྦྱོར་བ་ལ་སོགས་པ། །མེ་ཏོག་དག་ནི་བསྡུས་པ་འདྲ། །ཞེས་དང་། །ད་ནི་ཕྱག་རྒྱ་བརྗོད་པར་བྱ། །ས་ནི་ཕྱག་རྒྱས་གདབ་པར་བྱ། །མཉམ་པ་རྐང་གཉིས་བཤིབས་པ་སྟེ། །ཡངས་པ་རྒྱ་ཆེར་སྐྱེད་པ་ཡིན། །ཟླུམ་པོ་དཀྱིལ་འཁོར་ལྟ་བུར་བྱ། །གཡོན་པ་ཅུང་ཟད་བསྐུམ་པ་ནི། །གཡས་པ་བརྐྱང་ཞེས་བྱ་བ་སྟེ། །གཡོན་བརྐྱང་གཡོན་པ་བསྲངས་ནས་ནི། །གཡས་པ་ཅུང་ཟད་བསྐུམ་པའོ། །མདའ་གཞུའི་རིག་བྱེད་ཆོ་ག་ཡི། །མཚོན་ཆ་ཐམས་ཅད་འཕངས་པར་བྱ། །འདི་ནི་དབྱིབས་ཀྱི་ཕྱག་རྒྱ་ཡིན། དང་། སླར་ཡང་ཨེ་ནི་གཞུར་བྱས་ཏེ། །བམ་ཞེས་བྱ་བ་མདའ་ཡིན་ནོ། །མདའ་གཞུའི་རིག་བྱེད་སྦྱོར་བ་ཡིས། །སྔར་བཤད་ཇི་བཞིན་གནས་པར་བྱ། དང་། རོལ་པ་འགྲོས་ནི་དལ་བ་སྟེ། །ཞེས་ཕྱག་རྒྱ་དང་སྦྱར་བ་འདུག་སྟངས་ཀྱི་ཆོ་ག་དབབ་ཚུལ་བཤད་དོ། །གཉིས་པ་ནི། རང་ལུས་ཏེ། གྲིམས་པ་ཉིད་དང་སྲན་འཛུགས་དང་། །མཉེས་ཤིང་ཡན་ལག་བརྟན་པ་དང་། །རྒྱ་ཆེར་འགེངས་ཤིང་རྣམ་པར་དག །ལུས་ཀྱི་ཕྱག་རྒྱ་བདེ་བླག་ཅན། །འདི་ཡིས་ལུས་ལ་བརྒྱན་ནས་ནི། །རིམས་དང་དུག་དང་དབྱིག་དུག་དང་། །མཁའ་འགྲོས་གཙེས་དང་གདོན་རྣམས་ཀྱིས། །ནམ་ཡང་ཚུགས་པར་མི་འགྱུར་རོ། དང་། ད་ནི་ལུས་ཀྱི་མཚན་ཉིད་རྣམས། །ཕྱག་རྒྱ་རབ་ཏུ་བཤད་པར་བྱ། །གྲིམས་པ་ནི་ལྷོད་པ་སྟེ་སྙིང་སྟོབས་དང་ལྡན་པའོ། །སྲན་འཛུགས་པ་ནི་བརྟན་ཞིང་བརྩོན་འགྲུས་དང་ལྡན་པའོ། །མཉེས་པ་ཞེས་བྱ་བ་ནི་མཛེས་ཤིང་སྙན་པར་སྨྲ་བའོ། །ཡན་ལག་བརྟན་ཞེས་བྱ་བ་ནི་ཕྱག་རྒྱས་རྨ་སྲོལ་ཆེར་དོད་པའི་ངང་ཚུལ་ཅན་ནོ། །རྒྱ་ཆེར་འགེངས་ཤིང་རྣམ་པར་དག་ཅེས་བྱ་བ་ལ་འགེངས་པ་ནི་ཡོངས་སུ་རྫོགས་པ་སྟེ་ཚད་དང་ལྡན་ཞིང་ཡིད་དུ་འོང་བའི་ལུས་འཛུམ་པ་དང་བཅས་ཤིང་མཐུན་པར་འཇུག་པའོ། །ལུས་ཀྱི་ཕྱག་རྒྱ་བདེ་བླག་ཅན་ཞེས་བྱ་བ་ནི་རབ་ཏུ་རྫོགས་པའི་ངང་ཚུལ་ཅན་ནོ། །རིམས་དང་དུག་དང་དབྱིག་དུག་དང་། །བསམ་གཏན་སྦྱོར་བས་དགུག་པར་བྱ། །ཞེས་གསུངས། །ཉོན་མོངས་པ་གསུམ་མམ་ལྔ། བསམ་གཏན་ལ་སྦྱར་བས་དུག་མེད་པར་བྱེད་པ་སྟེ། གང་གི་ཞེ་ན། བདེ་བ་རང་རིག་གསལ་བ་སྟེ། །ཞེས་པས་རྡོ་རྗེ་མཁའ་འགྲོར། མདའ་གཞུས་རྣམ་པར་རྒྱལ་བ་ཡི། །འབུགས་པའི་མཚན་ཉིད་བཤད་པར་བྱ། །སྨིན་མའི་དཀྱུས་ནི་གཞུ་ཡིན་ཏེ། །བཟློག་སྟེ་ལྟ་བ་མདའ་ཡིན་ནོ། །འགུགས་པ་རང་གི་སེམས་ཀྱིས་ནི། །གཞན་སེམས་དོན་ལ་གཏད་པ་ཡིན། །ཞེས་པས་རང་རིག་གི་གནད་ཀྱི་བདེ་བ་དེ་དུས་ལྟ་སྟངས་གཏོད་དེ་ལ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་འཆར་དེས་རྒྱས་ཐེབས། དེས་དེ་ལྷན་སྐྱེས་སུ་གཞག་གོ །ཚུལ་འདིས་མོད་ལ་བྱང་ཆུབ་ཀྱི་སེམས་ལུས་ཀྱི་གནས་ཐམས་ཅད་དུ་གང་བར་འཛིན་ནུས་པར་འགྱུར་ལ། མ་རིག་པའི་ཁ་བདག་དག་ན་གྱེན་དུ་རེངས་པས་མས་བརྟན་གྱི་དགའ་བ་སོགས་སུ་འགྱུར་བས་ན། ཟག་མེད་སེམས་ཀྱི་བདེ་བ་འཆར། །བདེ་སྟོང་དབྱེར་མེད་རོ་སྙོམས་པས། །ཆེན་པོ་བླ་མ་དམ་པར་གསུངས། །དེ་ནི་ཁམས་གསུམ་གྱི་བླ་མ་ལས་བླ་མར་གྱུར་པས་བླ་མ་དམ་པར་གསུངས་ཏེ། ལྷ་དང་མི་ཡི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་སམ། བླ་མ་ལས་ཀྱང་བླ་མ་སྟེ་ཞེས་པའོ། །རྡོ་རྗེ་མཁའ་འགྲོར། རང་གི་སྙིང་གར་གཞུ་བདུངས་ནས། །གཡས་སུ་རབ་ཏུ་སྐོར་བྱེད་ཅིང་། །མདའ་འཕངས་ན་ནི་འགྲུབ་པར་འགྱུར། །ཞེས་གསུངས་སོ། །དེ་ལྟར་བདེ་བ་ལ་རང་རིག་གིས་ཁ་བདག་པ་ལ་ཡང་རང་རིག་དེ་ཉིད་འཇིག་རྟེན་པའི་དྲན་ཤེས་སུ་བས་ན། དེའི་ཚེ་ལྷན་སྐྱེས་དེ་ཡས་བརྟན་པའི་ལྷན་སྐྱེས་ཞེས་བྱ། དེ་མངོན་དུ་བྱས་པས་ཐིག་ལེ་གང་དགའ་བར་འདྲེན་ནུས་པ་དང་སྤྱི་བོ་ནས་རྡོ་རྗེ་ཁ་ཚུན་གང་བར་འཛིན་ནུས་སོ། །དེ་ལ་དངས་མ་ནི་དེས་བཟློག་ལ་རྫས་ཀྱི་ཐིག་ལེ་རགས་པ་མ་ཡིན་པས་སྦྱོར་བ་ལྷག་མ་རྣམས་དགོས་པ་ཡིན་ནོ། །གཞན་དུ་ནི་ཡས་འོངས་ཙམ་དུ་ཟད་པས་འཛིན་པ་ལ་སོགས་པ་ཐམས་ཅད་སྦྱོར་བའི་སྟོབས་སོ། །བདུད་རྩི་ཞལ་མཉེས་སྙིང་པོ། འདི་ཡང་རྟེན་གྱི་སྟོབས་ཀྱིས་ཏེ། དེའི་རྩ་བྱ་གདོང་མའི་བདུད་རྩི་རྡོ་རྗེའི་ཞལ་དུ་གསོལ་ན། གསོལ་ཚུལ་རྩ་གཉིས་ཕྲད་པས་རླུང་གཉིས་ཁ་སྦྱར། དེས་ཐིག་ལེ་གཉིས་འཛོམ་སྟེ་དུང་ཅན་མའི་སྒོ་རང་བྱེ་བ་དེ་ཉིད་ནས་ཞུགས་པས་རྡོ་རྗེ་ཉི་མའི་བཅུད་ལེན་དུ་གྱུར་ཏེ་སྙིགས་མ་ཐམས་ཅད་མོད་དམ་ལན་འགས་སྙིགས་མ་མཛད་པས་འཇའ་ལུས་ཐོབ་པར་བྱེད་པའི་ཕྱིར་ན། རིན་ཆེན་ལྟ་བུར་རང་གཞན་དོན། །འབྱུང་བ་སྐལ་ལྡན་དམ་པས་ཆོངས། །སྒོ་འདིས་ཕྱག་རྒྱ་དེ་ཡང་རྣལ་འབྱོར་པ་ཇི་ལྟ་བ་བཞིན་འགྱུར་བ་ཡིན་ནོ། །འདི་ཡང་རྡོ་རྗེ་མཁའ་འགྲོར། སྒྲུབ་པ་པོ་ཡི་ལག་གཡོན་སོགས་ཀྱིས་བཤད། བྱིན་རླབས་བཞི་པའི་བརྡ་དོན་དུ་སོང་ངོ་། །གསུམ་པ་ནི། རྡོ་རྗེ་མཁའ་འགྲོར། སྣ་དྲུང་བར་དུ་ཟླུམ་པོར་ནི། །ཅི་རིགས་པར་ནི་ལེགས་པར་གཟུང་། །ཡི་གེ་ཨོཾ་གྱི་ཁར་དྲངས་ཏེ། །ཇི་སྲིད་ཡི་གེ་ཨཱཿབརྗོད་པ། །དེ་སྲིད་བར་དུ་བཟུང་བར་བྱ། །བུམ་པ་ཅན་དང་རྡོ་རྗེའི་བཟླས་པས་འཛིན་པའོ། །བཞི་པ་ནི། ཤར་ཕྱོགས་ལེགས་པར་བསྲངས་ནས་ནི། །ནུབ་ཕྱོགས་ཅུང་ཟད་བཀུག་ནས་སུ། །གཞུ་རྒྱུད་དལ་བུས་དྲངས་ན་ནི། །འགྲོ་བ་ཐམས་ཅད་འགུགས་པར་འགྱུར། །ཐམས་ཅད་འགུགས་པའི་ཕྱག་རྒྱའོ། །ཤར་ནུབ་མདུན་རྒྱབ་བོ། །ལྔ་པ་ནི། ཅི་རིགས་པར་ནི་དྲངས་ནས་ནི། །ཆོ་ག་བཞིན་དུ་གཟུང་ནས་སུ། །དེས་ནི་ཅུང་ཟད་དབྱེ་བར་བྱ། །འགེངས་པ་ཐམས་ཅད་འགྲུབ་པར་འགྱུར། །འགེངས་པའི་ཕྱག་རྒྱའོ། །དེའི་ཕྱིར་འདི་ལ་མཚོན་ཆ་ལྔའི་ཕྱག་རྒྱ་ཞེས་གསུངས་སོ། །གསུམ་པ་རང་གྲོལ་ཕྱག་རྒྱ་ཆེན་པོས་བཟོད་པ་བསྒྲུབ་པ་ལ། ལམ་གྱི་དྲོད་ཚད་ངོས་གཟུང་། དེར་བགྲོད་པའི་ཐབས་བཤད་པ་གཉིས་ལས། དང་པོ་ནི། དངོས་མེད་དངོས་པོའི་རང་བཞིན་ཅན། ཆོས་འདི་ལྟར་གནས་པ་ཐམས་ཅད་ནི་སེམས་ལས་གཞན་མེད་དེ་ཞེས་གཏན་ལ་འབེབས་པས་དངོས་མེད། མིང་ཙམ་དུ་ཟད་དོ་སྙམ་པ་དངོས་པོའི་རང་བཞིན་གཏན་ལ་འབེབས། དེའི་ཕྱིར་སེམས་ལས་གཞན་མེད་པར་བློས་རིག་ནས་སེམས་ཙམ་ལ་གནས་པས། བདག་ལྟའི་བུད་ཤིང་བསྲེགས་ནས་ནི། །བདག་ཏུ་ལྟ་བ་དང་བྲལ་ཏེ། །དེ་ནི་རྟག་པར་ལྟ་བ་ཡིན་ལ། འདི་ནི་རྟེན་ཅིང་འབྲེལ་པར་འབྱུང་བ་ཙམ་དུ་བྱེད་པ་ལ་གནས་པ་ཡིན་པས་སོ། །དེ་བས་ན་བདག་ཏུ་ལྟ་བ་དང་མེད་པར་ལྟ་བ་དག་ཟློག་པའི་གཙོ་བོ་ནི་རྟེན་ཅིང་འབྲེལ་བར་འབྱུང་བར་ཤེས་པའོ། །དམིགས་པ་མེད་པར་བྱ་བའི་ཕྱིར། །དེས་ནས་གཟུང་བ་ཕྱི་རོལ་གྱི་དོན་འདི་མེད་པར་གཏན་ལ་ཕེབས་པ་ནི། འདི་སྒྲུབ་པའི་ཐབས་སོ། །གཉིས་པ་ལ། རྩ་བའི་ཁྱིམ་བསྟན། དེར་བཙོན་བུ་ལྕགས་སུ་བཅུག །དེ་གཉིས་མེད་ཀྱི་ཁྲིམས་ལ་སྦྱར་བ་ལས། དང་པོ་ནི། རང་གྲོལ་ཕྱག་རྒྱ་ཆེན་པོ་ལྟོས། །རང་སེམས་གཉིས་མེད་ཕྱག་རྒྱ་དེ། །ཇི་ལྟར་སྤྲེའུ་ཁང་སྟོང་སྐར་ཁུང་མང་པོ་ཅན་དུ་བཅུག་ན། དེས་སྡོད་མི་ཚུགས་པར་ཐམས་ཅད་དུ་ཉུག་ཉུག་བྱས་པ་ཕྱི་རོལ་ནས་བལྟས་ན་སྤྲེའུ་མང་པོ་ཡོད་པ་འདྲའོ། །དེ་བཞིན་དུ་དྷཱུ་ཏིའི་ཁྱིམ་ནས་རྣམ་པར་ཤེས་པ་རང་གི་བཞོན་པ་ལ་ཞོན་ནས་དབང་པོའི་ལམ་དུ་འཐོན་པས་གཟུགས་སྒྲ་ལ་སོགས་པ་ཕྱི་རོལ་ལྟར་མཆེད་པའི་དོན་ཐམས་ཅད་བྱུང་སྟེ། བྱུང་བ་དེ་ཐམས་ཅད་སེམས་ཁོ་ན་དེར་སྣང་བ་ཉིད་ཡིན་པས་གཉིས་སུ་མེད་དོ། །གང་གཉིས་སུ་དབྱེ་བ་མེད་པ་དེ་ནི་ཕྱག་རྒྱ་སྟེ། ཕྱག་རྒྱ་དེས་ཐེབས་པ་ཐམས་ཅད་ནི་ཆེན་པོ་སྟེ་གོང་ན་གཞན་མེད་པས་སོ། །དེ་ཡང་རྡོ་རྗེ་མཁའ་འགྲོར། སྔགས་ནི་བླ་མས་བསྟན་པ་སྟེ། །ཕྱག་རྒྱ་དེ་ནི་བསྟན་པ་ཡིན། །དེ་ཉིད་རྟག་ཏུ་སྦྱོར་བ་ཡི། །ཆོས་ཀྱི་འཁོར་ལོ་བསྐོར་བར་འགྱུར། །ཞེས་སོ། །གཉིས་པ་ནི། ཇི་ལྟར་སྤྲེའུ་དེ་ལྕགས་སུ་བཅུག་ན་ཕྱི་རོལ་དུ་མི་སྣང་བ་ལྟར། རྣམ་ཤེས་དེ་སྙིང་ཁའི་ཁང་བུར་ཆོས་ལ་སེམས་པའི་དྲན་པས་བཅིངས་ཤིང་ཤེས་བཞིན་གྱིས་གཞུར་ན་གཉིས་སུ་སྣང་བ་ལས་ལྡོག་གོ །ཇི་ལྟ་བུས་དྲན་པའི་ཐག་པས་བཅིང་ན། གྲོལ་བ་སེམས་ཉིད་ངང་དུ་གྲོལ། །ཞེས་པའང་ལུང་སྔ་མའི་འཕྲོར། འདི་དག་ཐམས་ཅད་མི་རྟོག་ལ། །མི་རྟོག་པ་ཡང་མ་ཡིན་ཏེ། །རྟོག་པ་མེད་པའི་རང་བཞིན་གྱིས། །མི་རྟོག་པ་ནི་བརྟགས་པ་ཡིན། །ཞེས་པ་དེ་རྟོག་པ་ལ་སོགས་པའི་རྐྱེན་གྱི་བཅོས་བསླད་མེད་པར་བཞག་པ་ཡིན། དེས་སེམས་ཡུལ་ལ་མི་འཆོར། སེམས་ཡུལ་ལ་མ་ཡིན་ན་རང་བཞིན་སྣ་ཚོགས་པ་འདི་སྣང་བའི་གཞི་མེད། དེ་དག་མི་སྣང་བར་ཉོན་མོངས་པ་དང་བྲལ་བར་འགྱུར་བས་སེམས་དེ་རྣམ་པར་དབེན་པའམ་སྟོང་པའི་ཡེ་ཤེས་སུ་མཐོང་བ་ཡིན་ནོ། །གསུམ་པ་ནི། ཕྱག་ནི་སྟོང་པའི་ཡེ་ཤེས་ཡིན། །རྒྱ་ནི་འཁོར་བའི་རྒྱུ་དང་བྲལ། །ཐལ་བྱུང་གི་སྟོང་གཞི་ཡེ་ཤེས་མཐོང་བ་དེ་ཉིད་ཕྱག་གི་དོན། དེས་ན་དེ་ལ་གཟུང་བའི་རྣམ་པ་དང་འཛིན་པའི་རྣམ་པ་གང་ཡང་མི་དམིགས་པས་འཁོར་རྒྱུ་བྲལ་བའི་དོན། དེ་ལྟར་གཟུང་འཛིན་གཉིས་མེད་པ་འདི་གཞན་གྱིས་གཏན་ལ་མི་ཕེབས། རང་གི་རིག་པ་རང་གསལ་བ། །ཆེན་པོ་ཟུང་དུ་འཇུག་པ་ཡིན་གྱི། དོན་དེ་ལྟ་བུའི་རང་མྱོང་དང་སོ་སོ་སྐྱེ་བོ་ཐ་མལ་པའི་དབང་སོགས་ཀྱི་རྟོག་མེད་དུ་གཟུགས་སོགས་གཟུང་བའི་རང་རིག་གི་མྱོང་བ་འདྲའམ་སྙམ་ན་མི་འདྲ་སྟེ། ཚུལ་མིན་གྱིས་བསླད་པ་ཡོད་མེད་ཀྱི་ཁྱད་ཡོད་དེ། དཔེར་ན་སྔར་འདྲིས་པ་དང་། འདྲིས་ཡེ་མེད་པའི་མངོན་སུམ་ལ་མི་གཅིག་ཅིག་ཆར་སྣང་བ་ལྟ་བུའོ། །དེས་ན་དེ་འདྲའི་ཉམས་མྱོང་སོ་སྐྱེ་ཀུན་ལ་ཡོད་སྙམ། སྒོམ་གྱི་ཉམས་མྱོང་སྨོད་པའང་རང་གི་མཚང་སྟོན་པའོ། །དེ་ལྟ་བུ་གཏན་ལ་ཕེབས་ནས། ངོ་བོ་རང་བཞིན་མཚན་ཉིད་དེ། ངོ་བོ་གཉིས་སུ་མེད་པ། རང་བཞིན་སྐྱེ་བ་མེད་པ། མཚན་ཉིད་འགག་པ་མེད་པས། བདེ་ཆེན་སྒྲིབ་བྲལ་ངང་དུ་བལྟོས་ཏེ། བདེ་བ་འཆར་བའི་དུས་སུ་སྔར་གྱི་མྱོང་བ་དེ་ལས་མ་གཡོས་པར་བྱ་བ་སྟེ། དེས་ཉོན་མོངས་པ་ཐམས་ཅད་ཀྱི་ངོ་བོ་ཉིད་ཀྱང་ཤེས་པར་ནུས་ཤིང་དེ་ལ་སྤང་ཐོབ་མེད་པས་སྲིད་ཞི་མཉམ་པ་ཉིད་དུ་སོང་བ་ཡིན་ནོ། །ཕྱག་རྒྱ་ཆེན་པོ་འདི་ཁའི་ངོ་ཏི་ཆོས་ཀྱི་ཕྱག་རྒྱ་ཡིན། གོ་ཚུལ་གྱི་དབང་ལས་ཕྱག་ཆེན་མཚན་ཉིད་པར་འགྱུར་བའང་ཡོད་དོ། །གཞི་པ་སྤྱོད་པ་ཆུ་ལ་རལ་གྲིས་ཆོས་ཀྱི་མཆོག་ཐོབ་པར་བྱ་བ་ལ། ལམ་ཀྱི་དྲོད་ཚད་ངོས་བཟུང་། དེར་བགྲོད་པའི་ཐབས་བཤད་པ་གཉིས་ལས། དང་པོ་ནི། འབད་མེད་རྣམ་པ་ངང་གིས་གསལ། སྔར་གྱི་རང་གསལ་བ་དེས་རྩ་རླུང་དྭངས་པས་རྟགས་དང་ལྡན་པས་རྟགས་ཅན་འོད་གསལ་དུ་གྱུར་པ། དེས་ཡུལ་སྣང་འདི་ལ་རྒྱས་ཐེབས་པས། སྒྲ་སོགས་རྐྱེན་གྱིས་མི་འཕྲོག་པ། དེ་ལ་རྐྱེན་གྱིས་གཡོ་མི་ནུས་པར་གྱུར་ན་འཇིག་རྟེན་པའི་ཆོས་ཀྱི་མཆོག་ཡིན་པ། འདིས་ཕྱག་རྒྱ་དང་སྦྱར་བའི་དུས་སུ་བདེ་བ་མྱོང་དུས་དེ་ཉིད་དུ་འོད་གསལ་རྣམ་པ་ཐམས་ཅད་པའི་མཆོག་དང་ལྡན་པར་བསྒྱུར་ནུས་པས། དུ་བ་ལ་སོགས་རིམ་ཤེས་ནས། །ཞེས་སོ། །གཉིས་པ་དེར་བགྲོད་པའི་ཚུལ་ལ། སྦྱང་བྱ་ཆུ། སྤྱོད་པ་རལ་གྲི །ཇི་ལྟར་འདེབས་པ་བཤད་པ་གསུམ་ལས། དང་པོ་ནི། སྤྱོད་པ་ཆུ་ལ་རལ་གྲི་རྒྱོབ། །གང་དང་གང་སྣང་དེ་དག་ལ། །ཞེས་པས། འགྲོ་འཆག་ཉལ་བ་ལ་སོགས་པའི་སྤྱོད་པ་དང་། རྒྱུ་མི་རྒྱུ་ལ་སོགས་པའི་དམིགས་པ་དང་། དུག་ལྔ་དུག་གསུམ་ལ་སོགས་པའི་ཉོན་མོངས་པ་ཐམས་ཅད་ཀྱི་སྟེང་དུ་སྤྱོད་པ་ཡིན་ཏེ། རྡོ་རྗེ་མཁའ་འགྲོར། དབང་པོ་གང་དང་གང་ལམ་ནས། །དེ་དང་དེ་ཡི་རང་བཞིན་འགྲོ །ཞེས་པས་སོ། །གཉིས་པ་ནི། འདུས་པར། རྣལ་འབྱོར་པ་ཡིས་གང་གང་དམིགས། །དེ་དེ་སྒྱུ་མ་བཞིན་དུ་བརྟག །ཅེས་པ་བཞིན། སྤྱད་དུ་མེད་པའི་ངང་ཉིད་ལ། །སྤྱད་པར་གྱིས་ཤིག་རྣལ་འབྱོར་པ། །ལྟ་ལྟངས་བཅུན་ན། སེམས་རང་གསལ་བ་དེ་རྟགས་ཀྱི་ཁྱད་པར་དུ་བྱས་པ་ཞིག་ཏུ་མཐོང་དེ་ལ་སྒྱུ་ལུས། སྒྱུ་མ་ལྟ་བུའི་ལུས་དེ་དང་ཅི་དམིགས་པ་བསྲེས་ནས་མཉམ་པར་གཞག་པས། སྣང་བ་ཚུགས་མི་ཐུབ་པར་ཁམས་གསུམ་པ་ཐམས་ཅད་སྒྱུ་མ་ཙམ་དུ་འཆར་རོ། །དེས་འཇིག་རྟེན་གྱི་གཟུགས་ཕྲ་རགས་ཐམས་ཅད་ཤེས་པ་བཞིན་རྣ་བ་སྣ་ལྕེ་ལུས་ཐམས་ཅད་ཀྱི་སྒོར་བཅིངས་པས་སྒྲ་རྣམ་པ་སྣ་ཚོགས་པ་དྲི་རོ་རེག་བྱའི་ཁྱད་པར་ཅི་ཡོད་པ་ཤེས་ཏེ། ཤེས་པ་དེའི་བློ་ངོ་ན་ཨ་འཐས་སུ་མེད་ཀྱི་སྣང་ཙམ་དུ་ཟད་པས། བུད་ཤིང་མང་པོའི་མེ་བཞིན་ཉོན་མོངས་པ་སོགས་ཤུགས་ཆེ་བ་ལྟར་སྒྱུ་མ་ལྟ་བུ་རྒྱ་ཆེ་བས་ཐམས་ཅད་ལ་མ་ཆགས་པ། མི་ཆགས་པ་ཆགས་པ་མེད་པ། ཆགས་པ་ཉིད་ཀྱང་མ་ཡིན་པའི་ཆགས་ཆེན་གྱི་སྤྱོད་པར་འགྱུར་བས། སྤྱད་དུ་མེད་པ་སྤྱད་པའི་མཆོག་སྟེ། སྣང་བ་ཐུག་ཕྲད་རང་གྲོལ་དུ་ཤེས་པས་སོ། །གསུམ་པ་ནི། ཆུ་ལ་རལ་གྲི་གང་བཏབ་པ། །རྨིག་མེད་དག་ཏུ་འགྲོ་བ་བཞིན། །ཉམ་ང་མེད་པའི་རལ་གྲི་ཡིས། །སྦས་དང་བརཏལ་ཞུགས་ཀུ་སུ་ལུ། །མཉམ་རྗེས་མེད་པར་སྤྱོད་པར་བྱ། །སྦས་དང་ཞེས་པ་ཀུན་བཟང་དེ་ཡང་རྡོ་རྗེ་མཁའ་འགྲོར། ལྷ་ཡི་རྒྱན་དང་ཡང་དག་ལྡན། །ཕྱག་རྒྱའི་མཚན་མས་རྣམ་པར་ཀླུབས། །སངས་རྒྱས་རྣལ་འབྱོར་སྡོམ་སྐྱེས་པས། །སྐལ་བ་བཟང་པོའི་གར་ཆེན་བྱ། །ཞེས་པས་ཚོགས་ཀྱི་དཀྱིལ་འཁོར་དུ་བསྒྲུབ་པ་ཆེན་པོས་རྒྱལ་པོ་ཨིནྡྲ་བྷཱུ་དྷི་ལྟ་བུའམ། རྒྱལ་པོ་ཛ་ལྟ་བུར་སྤྱོད་པ་སྟེ། སྤྲོས་པ་དང་བཅས་པའི་སྤྱོད་པ་ཆེན་པོའོ། །ཀུ་སུ་ལུ་ཞེས་པ་ནི། དེ་ཉིད་དུ། གལ་ཏེ་དེ་དག་མ་འབྱོར་ན་ཇི་བཞིན་བྱིན་གྱིས་བརླབས་ནས་ཞེས་བྱ་བ་བདག་ཉིད་གཅིག་པུས་བདེ་བའི་སྦྱོར་བས་དམ་ཚིག་བསྐྱང་བར་བྱ་ཞེས་བྱ་བའི་དོན་ནོ། །བརཏལ་ཞུགས་ནི། སྤྱོད་པ་དེ་ཚོགས་སུ་དབྱུང་བ་སྟེ། ནག་པོ་སྤྱོད་པའམ་དཔལ་ནཱ་རོ་པ་ལྟ་བུ་སྟེ། གསང་བ་གྲུབ་པར། ཚོགས་ཀྱི་དབང་ཕྱུག་གཟུགས་བྱས་ནས། །མཐར་སྐྱེས་ནང་དུ་འཇུག་པར་བྱ། །ཞེས་པ་དེའོ། །མཉམ་རྗེས་མེད་པར་སྤྱོད་པ་ནི་ཕྱོགས་ལས་རྣམ་རྒྱལ་དངོས་གྲུབ་ཆེན་པོའི་ཉེར་རྒྱུར་ཏེ། འོན་ཀྱང་དེ་དག་གི་ཚུལ་རྒྱས་པ་ནི་ནཱ་རོ་པའི་སྤྱོད་པ་ཆོས་ཀྱི་གླུར་བཤད་པ་ལྟར་རོ། །དེ་ལྟར་སྤྱོད་པ་བཞིའི་རིམ་པ་ལ་མི་སྤྲོ་ན། རིག་པ་སེམས་ཀྱི་སྤྱད་པར་གྱིས་ཏེ། ཟ་འཆག་བཤད་གསུམ་མིན་པ་ཐ་མལ་བའི་སྐབས་ཡེ་མེད་པར་མཉམ་གཞག་ལ་སྤྱོད་པས་སྒྱུ་མའི་སྣང་བ་ཟད་དེ་ཡང་དག་པའི་མཐའ་མ་འོད་གསལ་དུ་འཇུག་པ་ཡིན་ནོ།། །།གཉིས་པ་བདག་གི་དེ་ཉིད་ལོངས་སྤྱོད་རྫོགས་པ་ལ། ལམ་གྱི་དྲོད་ཚད་བསྟན། དེར་རིག་པ་ཡེ་ཤེས་ཀྱི་སྒྲོན་མ་བལྟམས་ནས་འཇུག་པ་གཉིས་ལས། དང་པོ་ནི། གཞན་གྱིས་བརྗོད་མིན་ལྷན་ཅིག་སྐྱེས། །བླ་མའི་བྱིན་རླབས་ལམ་ཡིན་ཕྱིར། །དངོས་པོའི་སྟོབས་ཀྱིས་ཞུགས་པ་ན། །རང་བཞིན་ལྷན་ཅིག་སྐྱེས་པའི་ཡེ་ཤེས། བླ་མེད་བྱིན་རླབས་ཀྱིས་དབང་དུས་སོགས་ཀྱི་མངོན་སུམ་དུ་རྟོགས་པ་ནི་མཐོང་བའི་ལམ་ཡིན་ནོ། །གཉིས་པ་ལ་རིག་པའི་ཁྱིམ་དུ། ཡེ་ཤེས་ཀྱི་སྒྲོན་མ་བལྟམས་ཏེ། ཟུང་འཇུག་གི་ལྷ་མཆོད་པར་བྱ་བ་གསུམ་ལས། དང་པོ་ནི། རིག་པ་སེམས་ཀྱི་རྒྱལ་པོ་སྟེ། ལྷུན་གྲུབ་ངང་དུ་འདིར་རྣམ་མེད་འོད་གསལ་དང་རྣམ་བཅས་སྒྱུ་ལུས་ཁ་སྦྱོར་བས་ལོངས་སྤྱོད་རྫོགས་པའི་ལམ་དུ་བཞག་པ་བཞིན། རྩ་རྒྱུད་ལས། སྒྲ་ཡི་ཚུལ་ལས་ངེས་འབྱུང་རྣམས། །དམ་ཚིག་སྤྱོད་པའི་སྤྱོད་ཡུལ་བ་ཞེས། དེ་ཡང་སེམས་རང་བཞིན་གྱི་འོད་གསལ་བ་ནི་རྒྱུན་ཆད་མེད་ཀྱང་ཚུལ་བཞིན་མ་ཡིན་པ་དག་གི་བསླད་པ་ཅན་ལ། སྤྲིན་བར་གྱི་ཉི་མ་བཞིན་རང་བཞིན་སྣ་ཚོགས་པ་འདི་དག་འཆར་ནུབ་ཀྱི་བར་ན་ཅུང་ཟད་རེ་འཆར། དེ་ལ་འོད་གསལ་མ་ཞེས་བྱ། དེ་དང་ཕྲད་ཀྱང་དེ་ཉིད་དུ་མ་རིག་པ་ནི་ཚུལ་བཞིན་མ་ཡིན་པ་དེའི་བློ་ངོར་ཡིན་དེ་ཐལ་བྱུང་གི་སྟོང་པར་ཡོད་དོ། །དེས་ན་འདི་ལའང་ཐ་མལ་གྱི་ཤེས་པ་ཞེས་བྱ་དེ་ལ་ཡེ་ཇི་བཞིན་པ་དང་། ཇི་བཞིན་པ་མ་ཡིན་པ་གཉིས་བྱུང་བ་ཡིན་ནོ། །ཐལ་བྱུང་གི་སྟོང་པ་དེ་ཡང་རིག་པར་དཀའ་བས་ཕལ་མོ་ཆེ་ལ་དེ་རྟོག་མེད་ཀྱི་ཤེས་པ་ཧད་པོ་ལུང་དུ་མ་བསྟན་པའི་ངོ་བོར་ཡོད། ཐལ་བྱུང་ཙམ་རིག་པ་སེམས་རྣམ་པར་དབེན་པ་སྒྱུ་ལུས་ཀྱི་འཆར་གཞི་དེ་ཡིན། དེ་ལས་སྒྱུ་ལུས་སུ་འཆར་བ་དེ་འོད་གསལ་བར་འཇུག་ཁར་དེ་རྣམས་གཅིག་ཏུ་འདྲེས་ནས། འོད་ཟེར་ལྔའི་ཚོགས་སུ་སྣང་ལ། དེ་ནས་དཀར་དམར་ནག་གསུམ་དུ་གྱུར་ནས། ཐ་མ་ན་གཉིད་ཀྱིས་ལོག་པ་ལྟ་བུ་དེའང་སྣང་བ་སེམས་སེམས་བྱུང་མ་རིག་པ་ལ་ཐིམ་ཚུལ། དེ་ལས་གཉིད་ལོག་པ་སད་པ་ལྟ་བུ་ཐུག་ཕྲད་པ་དེ་ངོས་ཟིན་ན་འོད་གསལ་རྟོགས་སོ་ཞེས་བྱའོ། །གཉིས་པ་ནི། ཡེ་ཤེས་ཀྱི། སྒྲོན་མེ་གཉིས་སུ་མེད་པར་སྦར། །མ་རིག་པ་ཡི་མུན་བསལ་ནས། །དེ་ངོ་ཤེས་ན་དེ་ཉིད་ལས་གཞན་མེད་པས་ཆོས་ཐམས་ཅད་མཉམ་པ་ཉིད་དུ་རྟོགས་པ་ཞེས་བྱ། དེ་དག་ཐམས་ཅད་རོ་གཅིག་ཏུ་འགྱུར་བ་ཡང་། བླ་མ་དམ་པའི་ཞལ་སྔ་ནས་བྱིན་གྱིས་བརླབས་ཤིང་ལམ་གནང་བར་མཛད་པ་དེ་ལ་གོམས་པར་བྱས་པ་ལས་འབྱུང་བས་བུ་ཡིན་ནོ། །ལམ་དེ་ཡང་རྡོ་རྗེ་མཁའ་འགྲོར། མི་རྟོག་པས་ནི་འཚང་མི་རྒྱ། །རྟོག་དང་བཅས་པས་ཀྱང་དེ་བཞིན། །ཤིན་ཏུ་རྣམ་དག་ཡོངས་ཤེས་ན། །ཡིད་འདོད་རྣམས་ཀྱི་དེ་ཉིད་འགྱུར། །རྒྱུ་དང་འབྲས་བུའི་རང་བཞིན་ནི། །དམ་པ་ཉིད་དུ་ཡོད་མིན་ཅིང་། །རང་བཞིན་གསལ་བ་ཉིད་ཀྱི་ཕྱིར། །སྟོང་པ་ཉིད་ཀྱང་མ་ཡིན་ནོ། །རང་བཞིན་དབྱེ་བ་ཐམས་ཅད་ཀྱི། །རྣམ་པ་དག་ནི་རྣམ་གནས་པ། །རྒྱ་མཚོ་ལ་ནི་རིན་ཆེན་བཞིན། །ཐོག་མ་མེད་པའི་ཚུལ་ཅན་ཡིན། །འཇིག་རྟེན་དག་ཏུ་ཐ་སྙད་སྤྱོད། །འཇིག་རྟེན་ལས་འདས་དེ་དང་འགལ། །ཡོད་དང་མེད་ཅེས་བྱ་བ་ནི། །རང་བཞིན་ཉིད་དུ་ཤེས་པ་མིན། །འདི་ཡི་ཚུལ་གྱི་རབ་རྟོགས་པ། །རྫོགས་དང་བྲལ་བས་གྲོལ་བ་མིན། །ཞེས་སོ། །དེ་ཡང་། སྒྱུ་མར་འཆར་བ་ལ་མི་ལྟ་བར་དེ་སྣང་མཁན་གྱི་སེམས་ཀྱི་ངང་ལ་སྤང་གཉེན་གྱི་ལྷད་མ་བཅུག་པ། ཇི་བཞིན་པ་དེ་བཞིན་དུ་གཞོག་པ་སྟེ། དེས་སྒྱུ་མ་འོད་གསལ་དུ་ཐིམ་པར་འགྱུར་རོ། །གསུམ་པ་ནི། ཡེ་ཤེས་དྲི་བྲལ་སྣང་བས་ཁྱབ། །ཅེས་པས་འོད་གསལ་དེ་ལ་རེ་ཞིག་གནས་ནས་སླར་ལུགས་ཟློག་གི་སྣང་བ་གསུམ་གྱིས་ལངས་ནས་དག་པའི་སྒྱུ་ལུས་སུ་གྲུབ་བོ། །དེ་ཡང་འོད་གསལ་འཆར་བའི་ཚེ་སྙིང་གའི་འཁོར་ལོའི་སྲོག་ཤིང་དུ་རླུང་སེམས་ཐམས་ཅད་འདུ། ལྡང་བའི་ཚེ་དེ་ལས་དབང་སོགས་སུ་ལྡང་བ་ཉིད་དང་། དེའི་ཚེ་རྣལ་འབྱོར་པའི་ལུས་ཀྱི་ཁམས་ཐམས་ཅད་མི་ཤིགས་པའི་ཐིག་ལེར་འབྱོངས་པའི་ཕྱིར་རྣམ་པ་ཀུན་གྱི་མཆོག་དང་ལྡན་པའི་ལྷའི་སྐུར་གྱུར་པས་སྔར་གྱི་ལུས་རྙིང་པ་དོར་བ་དཔེར་ན་སྦྲུལ་པགས་པ་བརྗེས་པ་ལྟ་བུའི་ཐ་སྙད་གཞག་ཅིང་གཞན་སྙིང་དབུས་དེ་ནས་ལུས་གསར་པ་ཞིག་འཐོན་པ་འབུའི་ཁོག་ནས་སྦྲང་བུ་ལྟ་བུར་འདོད་པ་དག་ནི་རྒོད་སྤྲོའོ།། །།གསུམ་པ་རྣལ་འབྱོར་གྱི་དེ་ཉིད་སྤྲུལ་པ་སྐུའི་ལམ་དུ་བཤད་པ་ལ། དམ་རྫས་རྟོགས་པའི་ཉི་མ་ལྡེ་བ། རོ་སྙོམས་ཕྱིའི་མེ་ལོང་ལྟ་བ་གཉིས་ལས། དང་པོ་ལ། ལམ་གྱི་དྲོད་ཚད། དེར་བགྲོད་པའི་ཐབས་གཉིས་ལས། དང་པོ་ནི། འཁོར་འདས་ངོ་བོ་གཉིས་མེད་ལ། །རང་གཟུགས་གཞན་དུ་སྣང་བས་ན། །དེ་ཉིད་རིག་པས་གྲོལ་བའི་ཕྱིར། །འཁོར་བ་དང་མྱ་ངན་ལས་འདས་པ་གཉིས་སུ་མེད་པས། རྣམ་མེད་རྣམ་པ་ཀུན་ལྡན་ཡང་གཉིས་སུ་མེད་ཅིང་གཉིས་སུ་བྱར་མེད་པས་འོད་གསལ་དེ་རང་ཤེས་བཞིན་དུ་ལངས་པའི་སྒྱུ་ལུས་གཉིས་ཟུང་དུ་འཇུག །དེ་ཡང་འོད་གསལ་ཉིད་རང་གཟུགས་གཞན་དུ་སྣང་བ་སྟེ། དཔེར་ན་ཆུ་ཁྱག་པར་སོང་བ་ལྟ་བུའོ། །དེས་ན་དེ་ཁོ་ན་ཉིད་འོད་གསལ་བ་ལ་གནས་པ་གོམས་ན་གཟུགས་དེ་ཤས་ཇེ་ཆུང་དུ་འགྲོ་སྟེ་ནམ་ཟླ་དྲོད་རིམ་གྱིས་ཁྱག་པ་ཆུང་དུ་འགྲོ་བ་ལྟ་བུ། དེའི་ཕྱིར་སློབ་པའི་ཟུང་འཇུག་གམ་སྒོམ་པའི་ལམ་ལ་སའི་རིམ་པ་དུ་མར་གཞག་ལ། གཞག་ཀྱང་ངོ་བོ་ཁྱད་མེད་པ་ཡིན་ནོ། །སོ་སོ་ལ་ངོ་སྐལ་གྱི་སྤང་བྱ་སྤང་ཚུལ་རེ་ཡོད། དེས་རྟོགས་པ་ན་ཕར་འགྲོ་བས། ངོ་བོ་ལ་ཁྱད་པར་མེད་པ་འདི་མི་འགྲུབ་བོ་སྙམ་ན། དོགས་པར་མི་བྱ་སྟེ། དཔེར་ན་ཉི་མའི་འོད་ཀྱིས་མུན་པ་སེལ། ཉི་འོད་སླེབ་ཆེ་ཆུང་སྐྱ་རེང་གསུམ་ནས་ཉི་ཤར་གྱི་བར་ལ་མུན་པ་དེངས་ཚུལ་ཐ་དད་ཀྱང་། ཉི་མའི་འོད་ལ་ཁྱད་མེད་དེ་ཅུང་ཟད་ཤར་བ་དང་ཇེ་ཆེར་ཤར་བའི་ངོས་ནས་དེ་སྐད་བཞག་ཆོག་པ་ལྟ་བུའོ། །གཉིས་པ་ལ་དམ་རྫས་མར། རྟོགས་པའི་ཉི་མས། ཡང་དག་པའི་མཐར་བཞུ་བ་གསུམ་ལས། དང་པོ་ནི། འདི་ཡང་རྩ་རྒྱུད་ལས། འདི་ནི་རང་བྱུང་བཅོམ་ལྡན་འདས། །མཁའ་འགྲོ་དྲ་བའི་སྡོམ་པ་ཡིན། །ཞེས་པས་ཟུང་འཇུག་སྤྲུལ་པ་སྐུའི་ལམ་དུ་གཞག་གོ །དམ་རྫས་རྟོགས་པའི་ཉི་མ་ལྡེ། །བདེ་ཆེན་རང་སེམས་སྤྲོས་དང་བྲལ། །རྩ་རླུང་བྱང་སེམས་མི་འགྱུར་བས། །གཉིས་མེད་རྡོ་རྗེ་གང་གིས་རྟོགས། །དེ་ནི་རྫས་ཀྱི་དམ་པའི་མཆོག །དེ་ལྟར་ཟུང་འཇུག་ཏུ་གྲུབ་པའི་དུས་ཀྱི་སྒྱུ་མ་ཙམ་གྱི་སྣང་ཆ་ནི་ལས་དང་ཉོན་མོངས་པའི་རྒྱུ་རྐྱེན་གྱིས་འདུས་བྱས་པ་མ་ཡིན། འོ་ན་གང་གིས་འདུས་བྱས་ནས་སྣང་ཞེ་ན། །རྩ་རླུང་ཐིག་ལེ་མི་ཤིགས་པའི་ཐིག་ལེར་སྦྱང་རིམ་གྱིས་སོ། །དེས་དེ་དག་གི་སྣང་བ་ལའང་དམན་པར་མཆོག་གི་འགྲོས་བྱུང་ངོ་། །དེ་ནི་རྡོ་རྗེ་མཁའ་འགྲོར། གང་གི་དབང་པོ་རྫས་ཡིན་ཏེ། །ཤིན་ཏུ་མཉམ་པར་གཞག་སྟེ་སྒྲུབ། དབང་པོ་མིག་ལ་སོགས་པ་ཡིན། །ཞེས་གསུངས་སོ། །གཉིས་པ་ནི། ཕྱི་ལྟར་སྣང་བ་སྣ་ཚོགས་པ། །རྟོགས་པའི་ཉི་མ་ཞེས་གསུངས་ཏེ། རྡོ་རྗེ་མཁའ་འགྲོར། མཆོག་ཏུ་མཉམ་བཞག་སྦྱོར་བ་ཡིས། །ཐམས་ཅད་སངས་རྒྱསརང་བཞིན་འགྱུར། །ཞེས་གསུངས་ནས་དེའི་དོན་དེ་ཉིད་དུ། རིགས་པའི་སྦྱོར་བ་ལམ་ཡིན་ཏེ། །གང་དང་གང་གི་རང་བཞིན་དེས། །དེ་དང་དེ་ཡི་དངོས་པོ་ཡི། །བདེ་བ་ཉིད་དུ་བསྒྲུབ་པར་བྱ། །བདེ་བ་སེམས་ཞེས་བྱ་བ་སྟེ། །དེ་ཉིད་དུ་ནི་དགའ་བདེ་སོགས། །སྡུག་བསྔལ་གྱིས་ནི་འགྲུབ་མི་འགྱུར། །བདེ་བ་ཡིས་ནི་འགྲུབ་པར་བཤད། །ཤིན་ཏུ་བདེ་བའི་སྒྲུབ་ཐབས་ནི། །ཐོས་དང་བསམ་གཏན་སོགས་སྦྱངས་པས། །དམན་པ་དག་ནི་གང་གིས་ཀྱང་། །སྒྲུབ་པར་ནུས་པ་མ་ཡིན་ཏེ། །སྐྱེ་བོ་ཐབས་དང་བྲལ་བས་ན། །ཚུལ་ངན་དམན་པ་དཀའ་བས་བསྒྲུབ། །བདག་ཉིད་བསྒྲུབ་པ་དང་བྲལ་བས། །སྐལ་མེད་ངལ་བ་དོན་མེད་ཅིང་། །དེ་ལ་དངོས་གྲུབ་ཅེས་མི་བརྗོད། །ཨ་ས་མ་ཞེས་བྱ་བ་ནི། །དཔེ་དང་ཟླ་མེད་པའོ། །ཨ་དྷི་ཏ་ཞེས་བྱ་བ་ནི་རྣལ་འབྱོར་པ་རྣམས་ཀྱི་སྦྱོར་བའོ། །ཐམས་ཅད་སངས་རྒྱས་རང་ཉིད་འགྱུར། །ཞེས་བྱ་བ་ནི། །དངོས་པོ་ཐམས་ཅད་གཉིས་སུ་མེད་པའི་ཡེ་ཤེས་སུ་མཚོན་ཞིང་འཇུག་པའོ། །སྣང་བ་གང་ཤར་ཀྱི་སྟེང་དུ་ཡང་དག་པའི་དྲན་པ་དང་། ཡང་དག་པའི་རྟོག་པས་མེ་ལོང་ལ་ཧས་བཏབ་པ་འདུ་བ་ལྟ་བུར་སྣང་བ་ཐིམ་པའི་འོད་གསལ་ཉིད་ལ་ཡང་དང་ཡང་དུ་འཇུག་པ་དེ་ཡིན་ནོ། །གསུམ་པ་ནི། གཅིག་ལ་ལྡེ། དེ་ལ་གསལ་འགྲིབ་མེད་པ་ཡིན། དེས་ཐམས་ཅད་ཡང་དག་མཐའ་ལ་བཅུག་པས་སྣང་བའི་ཚོགས་ཟད་པར་འགྱུར་ཏེ། མི་ཟད་དུ་དེ་དག་གཏི་མུག་གིས་བསྒྲིབས་པའི་སྣང་བ་ཡིན། འདིས་ནི་གཏི་མུག་བཅོམ་པ་ཡིན་པའི་ཕྱིར་རོ། །གཉིས་པ་རོ་སྙོམས་ཕྱིའི་མེ་ལོང་ལ་མདོར་བསྟན། རྒྱས་བཤད་གཉིས་ལས། དང་པོ་ནི། ཨེ་མ་ཧོ། པདྨ་རིན་ཆེན་ཆུ་བོའི་གཞུང་། །ཉི་མ་མེ་དང་ཤེལ་དང་མཚུངས། །སེང་གེ་གླང་ཆེན་རི་དྭགས་ལྟར། །ཨེ་མ་ཧོ། སྐལ་ལྡན་རྣམས་ཀྱིས་རྟོགས་པར་གྱིས། །ཨེ་མ་ཧོ། ཤ་ཟ་སྨྱོན་པ་ཅེ་སྤྱང་བཞིན། །ནམ་མཁའ་སྤྲིན་དང་གློག་བཞིན་དུ། །རོ་ལངས་ས་ར་ས་བུ་ཆུང་། །ཨེ་མ་ཧོ། སྐལ་ལྡན་རྣམས་ཀྱིས་ཉམས་སུ་ལོང་། །ཨེ་མ་ཧོ། རྒྱལ་པོ་བློན་པོ་འབངས་དང་ནི། །བཙུན་མོ་བྲན་དང་རྟ་མཆོག་དང་། །གཅེར་བུ་བརླིང་བ་ལམ་ཆེན་ཏེ། །སྐལ་ལྡན་རྣམས་ཀྱིས་ཐོབ་པར་གྱིས། །ཞེས་བསྟན་ཏོ། །གཉིས་པ་ལ། དགྲ་བོ་གཡུལ་ངོར་འཇོམས་པ། ཁྱབ་གདལ་གྱི་རྒྱལ་སྲིད་བཅད་པ། མཐར་ཐུག་གི་གོ་སར་བཀོད་ནས་དབང་སྒྱུར་བ་གསུམ་ལས། དང་པོ་ནི། སྒོ་གསུམ་རབ་ཏུ་བཅིངས་པ་ཡི། །ཆོས་ཐམས་ཅད་སྒོ་གསུམ་ལྟ་སྒོམ་སྤྱོད་པ་གསུམ་ལས་ནི་འདའ། དེ་ལ་པདྨ་རིན་ཆེན་ཆུ་བོ་གསུམ་ལྟ་བའི་བརྡ་སྟེ། པདྨ་འདམ་གྱིས་མ་གོས་པ་ལྟར་སེམས་ཉིད་ལ་འཁོར་བའི་དྲི་མས་མ་གོས་པའོ། །ནོར་བུ་རིན་ཆེན་ནི་གང་འདོད་པ་ཐམས་ཅད་ལྷུན་གྲུབ་ཏུ་འབྱུང་བ་ལྟར་དུ་སྐུ་གསུམ་གཞན་དོན་དུ་འབྱུང་ངོ་། །ཆུ་བོ་ལ་རྒྱུན་ཆད་མེད་པ་བཞིན། རང་སེམས་ཆོས་ཉིད་ཀྱི་དབྱིངས་ལ་རྒྱུན་ཆད་མེད་པར་གནས་པའོ། །ཉི་མ་མེ་དང་ཤེལ་དང་གསུམ་སྒོམ་པའི་བརྡ་སྟེ། ཉི་མ་ལ་དྲོ་མི་དྲོ་མེད་པ་བཞིན་ཕྱི་ནང་མེད་ལ་འཕོ་འགྱུར་མེད་པའོ། །མེས་རྟེན་འབྲེལ་ཚོགས་པས་རྩི་ཤིང་ནགས་ཚལ་རྣམས་སྲེག་པ་ལྟར་དུ། རང་གི་རིག་པའི་ཡེ་ཤེས་ཀྱི་མེ་སྦར་བས་རྣམ་རྟོག་ཐམས་ཅད་སྲེག་པར་བྱེད་པའོ། །ཤེལ་ལ་ཕྱི་ནང་གསལ་འགྲིབ་མེད་པ་བཞིན་དུ། རང་གི་སེམས་ལ་ཕྱི་ནང་གསལ་འགྲིབ་མེད་པའོ། །སེང་གེ་གླང་ཆེན་རི་དྭགས་སྤྱོད་པའི་བརྡ་སྟེ། སེང་གེ་ལ་ཉམ་ང་མེད་པ་བཞིན་རྩལ་གསུམ་སེམས་ལ་རྫོགས་པ། གླང་པོ་ཆེ་ལ་དོགས་པ་མེད་པ་ལྟར་ཉོན་མོངས་རྣམ་རྟོག་ལ་ཐོག་བརྫིས་བྱེད་པའོ། །རི་དྭགས་ནགས་ན་རྒྱུ་བ་ལྟར། གནས་ངེས་མེད་བྱ་རྟེན་མི་བཅའ་བའོ། །དེས་རྣམ་པར་ཤེས་པ་ཐམས་ཅད་ཟད་པར་བྱེད་པས། རྒྱལ་པོའི་གྲོང་ཁྱེར་རབ་ཏུ་དཀྲུགས་ཞེས་སྦྱར་རོ། །གཉིས་པ་ནི། རོ་སྙོམས་ཕྱིའི་མེ་ལོང་ལྟ། འབྱུང་བ་ཕྱིའི་རོ་སྙོམས་དང་། ཤ་ཟ་སྨྱོན་པ་ཅེ་སྤྱང་གསུམ་ནི་ཕྱི་ལུས་ཀྱི་རོ་སྙོམས་ཀྱི་བརྡ་སྟེ། ཤ་ཟ་གང་བདེར་འཕྱོ་བ་བཞིན། བདེ་སྡུག་གཉིས་པོ་རོ་སྙོམས་པར་བྱའོ། །སྨྱོན་པ་དྲན་མེད་དུ་གནས་པ་བཞིན་དུ། རྟོག་མེད་དུ་རིག་པའི་ཉམས་སྐྱོང་བའོ། །ཅེ་སྤྱང་གི་མིག་གིས་ཕྱི་ནང་མེད་པར་མཐོང་བ་བཞིན་དུ་སེམས་ཀྱིས་སེམས་བྱ་ར་བྱའོ། །ནམ་མཁའ་སྤྲིན་དང་གློག་དང་གསུམ། ནང་ཏིང་ངེ་འཛིན་གྱི་བརྡར་བསྟན་ཏེ། ནམ་མཁའ་དུས་གསུམ་དུས་མེད་དུ་གནས་པ་ལྟར་དུ་རང་སེམས་ནམ་མཁའ་ལྟ་བུར་གོ་བར་བྱའོ། །སྤྲིན་ནི་དབྱིངས་སུ་ཡལ་བ་ལྟར་དུ་རྣམ་རྟོག་ཐམས་ཅད་རང་ཡལ་དུ་བྱའོ། །གློག་གི་སྐད་ཅིག་གིས་འཁྱུག་པ་ལྟར་རིག་པ་སྐད་ཅིག་མའི་ཉམས་མྱོང་སྐྱོང་བར་བྱའོ། །ཉམས་ནི་བདེ་སྡུག་རྣམ་པ་བཞི། རོ་ལངས་ས་ར་ས་བུ་ཆུང་གསུམ་གསང་བ་བརཏལ་ཞུགས་ཀྱིས་རོ་སྙོམས་པའི་བརྡ་སྟེ། རོ་ལ་རྟོག་པ་མེད་པ་ལྟར་དུ་རྟོག་པས་ཀྱང་རྟོག་མེད་དུ་སྤྱོད་པའོ། །ས་ར་ས་གཏད་རྩ་མེད་པ་བཞིན་དུ་རྟོག་པས་ཕྱོགས་མེད་པར་སྤྱོད་པའོ། །བུ་ཆུང་གདོལ་བའི་སྤྱོད་པ་བཞིན་དུ་ལུས་འདི་ཉིད་ངོ་ཚ་དང་བྲལ་བར་སྤྱོད་པའོ། །དེ་ལྟར་གསུམ་ནི། སྐྱེ་བ་མེད་པས་མེ་ལོང་ལ། །དྲན་པའི་རྡུལ་གྱིས་བཀབ་པ་དེ། །དྲན་མེད་རིག་པའི་ཉམས་ཀྱིས་ཕྱིས། །ཞེས་པའི་དོན་ནོ། །གསུམ་པ་མཐར་ཐུག་གི་གོ་སར་བཀོད་ནས་དབང་བསྒྱུར་བ་ནི། སེམས་ཀྱི་མེ་ལོང་དག་པ་ལས། །སྣང་བ་གཉིས་མེད་ལྟ་བ་ལ། །རྒྱལ་པོ་བློན་འབངས་གསུམ་གྱིས་ཟུང་འཇུག་གི་བརྡ་བསྟན་ཏེ། དཔེར་ན་རྒྱལ་པོ་ནི་མཆོག་ཏུ་གྱུར་པས་གཞན་དབང་དུ་འདུ་བར་འགྱུར་བ་དང་འདྲ་བར་རྣལ་འབྱོར་པས་རང་སེམས་ཆོས་ཀྱི་སྐུ་དང་། རིག་པ་གཉིས་སུ་མེད་པར་ལྷུན་གྲུབ་རྒྱལ་པོ་ལྟར་རྟོགས་པའོ། །བློན་པོ་དེ་རྒྱལ་པོ་དང་མི་འབྲལ་བར་གནས་པ་ལྟར། རང་གི་རིག་པའི་ཡེ་ཤེས་དེ་སྣང་སྟོང་གཉིས་ཀ་གཅིག་གི་གཅིག་མི་སྟོང་མ་ཡེངས་ལྷུན་གྱིས་གྲུབ་པ་ཡིན། འབངས་ཀྱིས་རྒྱལ་པོའི་བྱ་བ་བྱེད་པ་ལྟར་དུ། བྱམས་པ་དང་སྙིང་རྗེ་བྱང་ཆུབ་སེམས་ཀྱིས་གཞན་དོན་བྱེད་པའོ། །རྣམ་རྟོག་ཤུགས་འབྱུང་དྲི་མ་ཕྱིས། བཙུན་མོ་བྲན་དང་རྟ་མཆོག་གསུམ་ཤེས་རབ་གྱི་བརྡར་བསྟན་པ་སྟེ། བཙུན་མོ་ནི། རྒྱལ་པོ་དེ་བཙུན་མོ་ལ་བརྩེ་བ་ལྟར། རིག་པ་དང་སྣང་བ་མི་འབྲལ་བར། གཅིག་ལ་གཅིག་ཐིམ་པའི་བརྡ་དང་བཅས་ནས་གྲོལ་བའོ། བྲན་ནི་ཤེས་རབ་སྟོང་པ་ཉིད། ཐབས་བདེ་བ་ཆེན་པོ་དང་དབྱེར་མེད་པ་ལམ་དུ་ཁྱེར་བའོ། །རྟ་མཆོག་གི་དཔེ་ནི་རྣལ་འབྱོར་པས་མ་བཅོས་པའི་དོན་ལ་བྱ་རྩོལ་མེད་པ་རྩིས་གདབ་དང་བྲལ་བ་བྱ་བའོ། །རང་གསལ་དྲི་མེད་མེ་ལོང་ལྟོས། གཅེར་བུ་བརླིང་བ་ལམ་ཆེན་གསུམ་སྐུ་གསུང་ཐུགས་ཀྱི་བརྡར་བསྟན་པ། གཅེར་བུ་ནི་གོས་མེད་པ་ལྟར་དུ་རྣལ་འབྱོར་པས་ཀྱང་དྲི་མ་དང་བྲལ་བར་བྱའོ། །བརླིང་བ་ནི་མ་བཅོས་པའི་ཤེས་པ་གང་གིས་ཀྱང་མ་བསྐྱོད་པའོ། །ལམ་ཆེན་པོ་ནི། ལམ་དུ་ཞུགས་ནས་རྡོ་རྗེ་གདན་དུ་ཕྱིན་པ་དང་འདྲ་བར་རེ་དོགས་བྲལ་བའི་དབྱིངས་དང་ཡེ་ཤེས་དབྱེར་མེད་པ་ཟུང་འཇུག་གི་དོན་ནོ། །དེ་ཡང་རང་བཞིན་ཆོས་ཉིད་ཀྱི་དབྱིངས་ནས་ཉིད་གནས་པ། སྣང་བ་དག་པར་འཆར་བ། སེམས་འོད་གསལ་དུ་སོང་བ། སྐུ་གསུམ་ལྷུན་གྱིས་གྲུབ་པ། ངོ་བོ་སྤྲོས་པ་དང་བྲལ་བ། སྐྱེ་མེད་ཡིན་པས་བཙལ་དུ་མེད་པའོ། །དེ་དག་རྡོ་རྗེ་མཁའ་འགྲོར། དུས་དྲུག་ཏུ་ནི་བསྟན་པ་དག །རྟག་ཏུ་རྣམ་པར་མི་རྟོག་གནས། །རྡོ་རྗེ་སེམས་སོགས་རྒྱལ་བ་རུ། །དེ་ཡི་རང་བཞིན་ཡོངས་ཤེས་བྱ། དང་། རང་བཞིན་དེ་དག་རྫོགས་པར་ནི། །གང་ཞིག་གྱུར་པའི་རྣལ་འབྱོར་པས། །སྒྲུབ་པོ་རྣམས་ཀྱི་ལས་རྣམས་ནི། །ཐམས་ཅད་བྱེད་འགྱུར་གདོན་མི་ཟ། དང་། དུས་ཀུན་སེམས་ལ་གནས་པ་སྟེ། དང་། རྣལ་མའི་ལམ་ལ་བརྟེན་ན་ནི། །ཐམས་ཅད་བྱས་ཀྱང་རྣམ་པར་གྲོལ། །སྐྱོན་དང་ཡོན་ཏན་འཕེལ་བྱེད་པའི། །འཁོར་བ་དང་ནི་མྱ་ངན་འདས། །བདེ་བ་དང་ནི་སྡུག་བསྔལ་དངོས། །ལྷན་ཅིག་སྐྱེས་པར་ཡང་དག་གནས། །ཞེས་པས་གསུངས་ཏེ། ལྷན་ཅིག་སྐྱེས་པ་ནི་རིག་མའི་སྐྱེས་བུ་ཞེས་སྔར་བཤད་པ་དེའོ། །དེ་ལྟར་སྒྲུབ་པའི་ཐབས་འདི་ནི་རྡོ་རྗེ་རྣལ་འབྱོར་མས་དངོས་སུ་གསུངས་པས་དེ་ཉིད་དུ། ཨོ་རྒྱན་ལས་འོངས་རིམ་པ་འདི། །གཞན་དུ་བརྗོད་པར་མི་བྱའོ། །སྐུ་གསུམ་དབྱེར་མེད་མཆོག་གི་དོན། །སྐྱེས་པས་འགྲོ་བ་ཁྱབ་བྱེད་དོ། །སྡོམ་པ་རྒྱ་མཚོའི་རྗེས་འགྲོ་བས། །ཉེ་བའི་སྙིང་པོ་བསྒོམ་དང་བཟླས། །འཇིགས་དང་སྐལ་ངན་མི་མཐུན་སེལ། །རིམ་གཉིས་འདོད་པའི་འབྲས་བུ་སྟེར། །ཕྱོགས་མེད་ངོ་མཚར་རྨད་བྱུང་གཙོ། །རང་བྱུང་གྲོལ་བའི་ཡེ་ཤེས་མཆོག །ས་གསུམ་གནས་པའི་འགྲོ་བ་རྣམས། །ནམ་ཡང་ཁྱེད་དང་བྲལ་མ་གྱུར། །ལུས་མེད་མཁའ་འགྲོའི་སྒྲུབ་ཐབས་རྫོགས་སོ། །ཞེས་བྱུང་། འཕྲོས་པའི་ཆོས་སྡེ་སློབ་དཔོན་ཏིལླི་པ་ཚུར་འབྱོན་པའི་ལམ་དུ་སྟེ། དེའི་གཞུག་ཏུ། ཨེ་མ་ཧོ། དཔལ་ལྡན་རྡོ་རྗེ་མཁའ་འགྲོ་མས། །ནམ་མཁའ་སྟོང་པའི་ངང་ལས་ནི། །བརྡ་སྐད་བྲག་ཆ་ཇི་བཞིན་དུ། །སྟོང་པའི་ངང་ལས་སྙིང་རྗེའི་སྒྲ། །དབྱེར་མེད་བདེ་ཆེན་ངང་དུ་བསྒྲགས། །སྐལ་ལྡན་བློ་ཡི་པདྨོ་དེ། །ཡེ་ཤེས་ཉི་མ་ཤར་བ་ཡིས། །རང་གྲོལ་ཤུགས་འབྱུང་ཁ་འཛུམ་ཕྱེ། །བློ་ལྡན་དྲི་མེད་གཟི་བརྗིད་ཁྱོད། །པུ་ལ་ཧ་རིའི་དགོན་པ་རུ། །བྷཱུ་ཏིའི་མ་རིག་མུན་སེལ་ལ། །ཡེ་ཤེས་སྣང་བས་ཁྱབ་པར་གྱིས། །དེ་སྐད་ཏཻ་ལོ་པས་ནཱ་རོ་པ་ལ་གསུངས་སོ་ཞེས་འབྱུང་། གཉིས་པའི་གཤམ་དུ། རྣལ་འབྱོར་དབང་ཕྱུག་ཏིལླི་ཆེན་པོ་ཡིས། །རྒྱལ་གྱི་རི་ཞེས་གྲགས་པར་བདག་ལ་གནང་། །གསང་སྔགས་སྙིང་པོ་ལུས་མེད་མཁའ་འགྲོ་ཡི། །ཆོས་སྐོར་མ་ལུས་དེ་རུ་རྫོགས་པར་གནང་། །ནམ་མཁའི་ཁམས་ནས་སྐུ་ལུས་མི་སྣང་བར། །མཁའ་ལ་རང་སྒྲ་བཞིན་དུ་རྡོ་རྗེའི་ཚིག །ཟབ་མོའི་མན་ངག་ནཱ་རོ་བདག་ལ་གནང་། །ལྔ་བརྒྱའི་ཐ་མར་གྱུར་ཚེ་ས་སྟེངས་སུ། །སྣོད་ལྡན་རྣམས་ཀྱི་པདྨ་དམ་པ་དང་། །ཁ་བ་ཅན་ལྗོངས་ཁྱོད་ཀྱི་སློབ་མ་ཡིས། །འདུལ་བར་འགྱུར་ཞེས་བླ་མའི་གསུང་ལས་ཐོས། །འགྲོ་ཀུན་བདེ་མཆོག་འབྲས་བུ་རྒྱས་གྱུར་ཅིག །ཅེས་བཤད་དོ། ཨེ་མ་རྒྱུད་སྡེའི་གསང་ཚིག་རྣམས། །ཇི་བཞིན་འབྱེད་ནུས་འདི་སྙམ་ནས། །མཁའ་འགྲོའི་ཕྱག་གི་གཅེས་པའི་དཔེ། །མ་ལུས་བདག་གི་མདུན་དུ་བཀོད། །དེ་ཕྱིར་བྱང་ཆུབ་སྙིང་པོའི་སྒོམ་ཆེན་པ། །འདིར་འདོད་ཆོས་ལམ་འགྲིམ་ལ་ངལ་བསོའི་སྟེགས། །ལེགས་བཤད་གསེར་ཁྲི་དངོས་གཙང་ཡིད་འབབ་པ། །རྒྱུད་དོན་ཏ་ལའི་གྲིབ་བསིལ་འཛིན་འདི་སྤྲུལ། །དེ་ལྟར་ངག་དབང་ནོར་བུས་ལུས་མེད་མཁའ་འགྲོའི་ཆོས་སྡེའི་རྣམ་པར་བཤད་པ་ཆོས་ཀྱི་ཉིང་ཁུ་ཞེས་བྱ་བ་གནམ་མཚོ་དོ་བ་སྟོན་སྒོམ་སེང་གེ་སྲབ་མེད་དུ་འཕྱོ་བ་ཆོས་གྲུབ་དཔལ་བཟང་པོས་སྒྲུབ་པ་སྙིང་པོར་བྱེད་པའི་སྲོལ་ཆེར་གཟུང་བའི་བྱ་དགར་སྦྱིན་པའི་ཡི་གེ་པ་ནི་གྲོ་མོ་བ་བློ་གྲོས་རྣམ་རྒྱལ་ལོ། །དགེ་བས་ཐམས་ཅད་ནམ་མཁའ་རྡོ་རྗེ་གྲོང་དུ་འགྲོ་བར་གྱུར་ཅིག་གོ། །།ཀུན་མཁྱེན་བླ་མའི་གསུང་འབུམ་ཁ་སྐོང་རིགས། །མཛོད་ཁྲི་ཐབས་མཁས་བཞེང་དགེས་དོན་བརྒྱུད་ཀྱི། །བསྟན་པ་འཕེལ་རྒྱས་སྐུ་གཤེགས་དཔལ་ལྡན་གཙོས། །འབྲེལ་ཐོག་མཁའ་མཉམ་བྱང་ཆུབ་མྱུར་ཐོབ་ཤོག། །།མངྒལཾ།། །། མཁའ་འགྲོ་སྙན་བརྒྱུད་ཀྱི་ཁྲིད་ལུགས་རྒྱས་པའི་ས་བཅད།མཁའ་འགྲོ་སྙན་བརྒྱུད་ཀྱི་ཁྲིད་ལུགས་རྒྱས་པའི་ས་བཅད་བཞུགས་སོ། །རྡོ་རྗེའི་ཆགས་པ་བདོ་བའི་ཀུ་མུཏྟའི། །སེམས་དཔའ་སྙིང་རྗེར་ཟླ་གཞོན་གྱིས་འཕྲོགས་པས། །དང་པོའི་དུས་ནས་སྙགས་ཀྱང་བསམ་རྫོགས་པ། །བཅུ་དྲུག་ཆ་ལས་འབྱུང་བ་དེར་ཕྱག་འཚལ། །སྙན་བརྒྱུད་རྡོ་རྗེའི་རྣལ་འབྱོར་མ་ཞེས་བྱ་བ་ཡིད་བཞིན་གྱི་ནོར་བུ་རྣམ་པ་གསུམ། །མདོ་རྒྱུད་ཐམས་ཅད་ཀྱི་སྙིང་པོ་ལས་སྙིང་པོར་གྱུར་པ་དཔལ་འཁོར་ལོ་སྡོམ་པའི་རྩ་བཤད་ཀྱི་གཞུང་ཆེན་པོ་རྣམས་ཀྱི་ལེགས་པར་སྦྱངས་པ། བསྐལ་པ་བཟང་པོ་རྣམས་ཀྱིས་ཐོས་བསམ་གྱིས་རྒྱལ་མཚན་གྱི་རྩེར་འཕྱར་ཏེ་སྒོམ་བྱུང་གི་མཆོད་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཆར་དུ་འབེབས་པའི་སྐབས་དབྱེ་བ་ལ། །བསྡུས་རྒྱ་གར་སྐད་དུ་དོན་གྱི་དཀོར་སྐུ་གསུམ་མཛོད་གསུམ་བཅས་ཚུལ། རྒྱས་བཤད་ཀྱིས་དེ་ནས་ཡིད་བཞིན་ནོར་བུ་ལེན་ཚུལ། །གཏད་རྒྱས་དེ་ལས་འདོད་དགུ་བབས་པའི་ཚུལ་བཤད་པ་གསུམ་ལས། གཉིས་པ་ལ། སྟོན་བསླབ་པ་གསུམ་བྱེད་སླབ་པ་སློབ་དཔོན་གྱི་མཚན་ཉིད། བསྟན་དད་བརྩོན་ས་སནྡྷེ་སློབ་མའི་མཚན་ཉིད། བསྟན་བྱ་ཆོས་ཀྱི་གནས་ལུགས་བསྟན་པ་གསུམ། དེ་ལ་ཕྱི་སྒྲོ་འདོགས་གཅོད་པར་བྱེད་པ་སྤྲུལ་པ་སྐུའི་གདམས་པ་བརྒྱུད་པ་ཡིད་བཞིན་གྱི་ནོར་བུ། ནང་ཉམས་ལེན་ལོངས་སྤྱོད་རྫོགས་པ་སྐུའི་གདམས་པ་སྨིན་ལམ་ཡིད་བཞིན་གྱི་ནོར་བུ། གསང་བ་ངོ་སྤྲོད་ཆོས་སྐུའི་གདམས་པ་གྲོལ་ལམ་ཡིད་བཞིན་ནོར་བུ་གསུམ་ལས། དང་པོ་ལ། སྔོན་རྡོ་རྗེ་འཆང་བྱུང་སྟོན་བདེ་གཤེགས་པའི་རྣམ་ཐར། རྗེས་ཉེས་དམིགས་འཇུག་སྔོན་རྟོགས་སུ་འདི་དོན་བྱ་ཚུལ་གཉིས། གཉིས་པ་ནང་ཉམས་ལེན་ལོངས་སྤྱོད་རྫོགས་པ་སྐུའི་གདམས་ངག་སྨིན་ལམ་ཡིད་བཞིན་གྱི་ནོར་བུ་ལ། ཐབས་གཙོ་བོར་སྟོན་པ་རྡུལ་ཚོན་ལ་སོགས་པའི་དཀྱིལ་འཁོར་ལ་བརྟེན་ནས་དབང་སྤྱི་ལུགས་སུ་བསྐུར་བ། དབང་བཞིས་རྒྱུད། ཤེས་རབ་གཙོ་བོར་སྟོན་པ་སིནྡྷུ་ར་ཡི་གེའི་དཀྱིལ་འཁོར་དུ་ཟབ་མོ་བརྡའི་དབང་བསྐུར་བ། དབང་དོན་སློབ་དཔོན་བཞི་མདུད་པའི་འགྲོལ་ཚུལ་གསུམ། དང་པོ་ལ། དངོས་ཐོག་མར་འཁོར་ལོ་བསྟན་རིགས་ཐམས་ཅད་པའི་དཀྱིལ་འཁོར་དུ་འདི་ཉིད་ཀྱི་ལུགས་ཐུན་མོང་མ་ཡིན་པའི་དབང་བསྐུར་བ་སའི་ཆོ་ག་རྒྱས་པ་དང་། ཤུགས་ལས་བཅུ་གསུམ་མའི་དཀྱིལ་འཁོར་དུ་དབང་བཞི་སྤྱི་མཐུན་དུ་བསྐུར་བ་འབྲིང་དང་། ལུས་དཀྱིལ་དུ་དབང་བསྐུར་བ་བསྡུས་པ་སྟེ་གསུམ་མོ། །གཉིས་པ་ཤེས་རབ་གཙོ་བོར་སྟོན་པ་སིནྡྷུ་ར་ཡི་གེའི་དཀྱིལ་འཁོར་དུ་ཟབ་མོ་བརྡའི་དབང་བསྐུར་བ་ལ། དངོས་ལྷ་མོ་བསྟན་ལྷ་མོ་བཅོ་ལྔའི་སྒོ་ནས་སྙན་བརྒྱུད་བརྡའི་དབང་བཞི་བསྐུར་བ་དབང་བཞི་དང་རྒྱས་པ། ཤུགས་ལས་ལྷ་བདུན་མ་དང་། ལྷན་ཅིག་སྐྱེས་མའི་སྒོ་ནས་བྱིན་བརླབས་འཕོ་བའི་དབང་ཙམ་སྦྱིན་པ་གསུམ་མོ། །གསུམ་པ་གསང་བ་ངོ་སྤྲོད་ཆོས་སྐུའི་གདམས་ངག་གྲོལ་ལམ་ཡིད་བཞིན་གྱི་ནོར་བུ་ལ། སྤྲོས་པ་སྨིན་པར་ཅན་ཐབས་ཀྱི་སྒོ་ཐབས་དང་ནས་ཁྲིད་པ་རྒྱས་པ་དང་། སྤྲོས་པ་ཆུང་ངུ་ཤེས་ཤེས་རབ་ཤེས་རབ་ཀྱི་སྒོ་ནས་ཁྲིད་པ་འབྲིང་དང་། ཁྲིད་ཟིན་སྙིང་པོ་སྒྲིལ་བ་ཟུང་འཇུག་གདན་ཟུང་རྫོགས་འབྲེལ་པ་གཉིས་ཤིན་ཏུ་བསྡུས་པ་གསུམ་ལས། དང་པོ་ལ། བུམ་དབང་དབང་པོ་སྨིན་དང་འབྲེལ་བ་བསྒོམ་བྱ་གཙོ་བོར་སྟོན་པ་ཐུན་མོང་ཡིད་བཞིན་གྱི་ནོར་བུ་དང་། དབང་བཞི་ཀ་དང་འབྲེལ་བ་བསྲུང་བྱ་གཙོ་བོར་སྟོན་པ་དམ་ཚིག་ཡིད་བཞིན་གྱི་ནོར་བུ་དང་། མཆོག་དབང་དང་འབྲེལ་བ་གནས་ལུགས་ཡིད་བཞིན་གྱི་ནོར་བུ་དང་གསུམ་ལས། དང་པོ་ལ། རྒྱལ་པོ་ཆོས་དབང་པོའི་ཉིད་མི་འགྱུར་བ། བློན་པོ་རིགས་གསུམ་ལས་བྱེད། དམངས་རྣལ་འབྱོར་ཕལ་པ་འཕྲིན་ལས་མཐུན་སྦྱོར་གྱི་གདམས་ངག་གསུམ་ལས། དང་པོ་ལ། སྦྱང་ཚངས་པའི་གཞི་མངལ་སྐྱེས་སྦྱོང་བའི་བསྐྱེད་རིམས་ཚངས་པའི་རྒྱས་པ། སྦྱང་གཞི་སྒོང་སྐྱེས་སྦྱོང་བའི་བསྐྱེད་རིམས་བསྡུས་པའི་འབྲིང་པོ། སྦྱང་གཞི་རྫུས་རྫུས་ཏེ་སྐྱེས་སྦྱོང་བའི་བསྐྱེད་རིམས་བསྡུས་པ། སྦྱང་གཞི་ཕྱི་རོལ་དུ་འཛིན་པ་སྦྱོང་བའི་ཟབ་ཀུན་མོ་བསྐྱེད་རིམས། ཐམས་ཅད་ལ་རྫོགས་རིམ་དུ་སྒྱུར་བའི་རྩི་བསྲེ་བསྲེ་བ་རོ་སྙོམས་དབང་སོགས་བཤད་པའོ། །གཉིས་པ་ལ། རྒྱལ་པོ་རྒྱལ་པོ་མཉེས་པར་བྱེད་པ་བདག་འཇུག་ལྟ་བུ་བྱིན་རླབས་འཇུག་པའི་གཞི། རང་གི་བློན་པོ་བྱ་བ་བློན་པོ་ལྟ་བུ་དངོས་གྲུབ་ཀྱི་གཞི། འབངས་དམངས་ཀྱི་དོན་བྱེད་དམངས་ཀྱི་པ་ལྟ་བུ་བསྙེན་སོགས་དག་པར་བྱ་བའི་གཞི། གསུམ་པ་ལ། ཟས་འཚམས། གོས། གཉིད་ཉལ། འགྲོ་འདུག འགྲོ་འདུག ཁྲུས་ཁྲུས། མཎྜྻལ་སོགས། མཆོད་བརྗོད་བདུན་ནོ། །གཉིས་པ་དམ་ཚིག་སྤྱི་དང་འབྲེལ་བའི་སྲུང་བྱ་གཙོ་བོར་སྟོན་པ་བཏོན་པ་དམ་ཚིག་ཡིད་ཀྱི་བཞིན་ནོར་བུ་ལ། གཞི་ཟབ་ཐུབ་པའི་པའི་དམ་ཚིག །ལམ་རྒྱ་ཆེ་སྐུ་གསུམ་ལ་བའི་དམ་ཚིག །འབྲས་བུ་ཟུང་འཇུག་གཞི་ལམ་གི་དམ་ཚིག་གསུམ་མོ། །གསུམ་པ་མཆོག་དབང་དང་འབྲེལ་བ་གནས་ལུགས་ཡིད་བཞིན་གྱི་ནོར་བུ་ལ། གསང་དབང་དང་འབྲེལ་བ་རྫོགས་རིམ་རྩ་རླུང་གི་གནད་སྟེང་སྒོ་རྣམ་པར་གྲོལ་བའི་ཆོས་དྲུག་དང་། ཤེས་རབ་ཡེ་ཤེས་ཀྱི་དབང་དང་འབྲེལ་བ་མཁའ་འགྲོའི་གསང་སྒྲོག་འོག་སྒོ་བདེ་ཆེན་དང་། ཚིག་དབང་དང་འབྲེལ་བ་ཕྱག་རྒྱ་ཆེན་པོ་ཡེ་ཤེས་གསལ་བྱེད་དང་། ལམ་བློ་ནས་ཆོད་པ་བར་དོ་ལམ་ཁྱེར་དང་། ཅིག་ཅར་བ་བྱ་སྤྱོད་ཚོགས་སུ་བསྒྱུར་བའི་གདམས་ངག་ལྔ་ལས། །དང་པོ་ལ། གཏུམ་མོ་བདེ་དྲོད་སྟེང་འོག་བར་དུ་རང་འབར། སྒྱུ་ལུས་ཆོས་བརྒྱད་རང་གྲོལ། རྨི་ལམ་འཁྲུལ་པ་རང་སངས། འོད་གསལ་མ་རིག་མུན་བྲལ། འཕོ་བ་གསེར་འགྱུར་གྱི་རྩི། གྲོང་འཇུག་སྦྲུལ་ལྤགས་འོད་ཟེར་འདོར་ལེན་དང་དྲུག་ལས། །དང་པོ་ལ། སྟེང་རང་བྱུང་ཡེ་ཤེས་སུ་སྦར་ནས། སྟེང་རླུང་གི་ལས་སྟོན། འོག་ཟིན་དང་ཟག་མེད་བདེ་ཆེན་འབྱུང་བ་དུ་སྦར་ནས་འོག་སྒོའི་བཅུད་འདོན། བར་ཉོན་མོངས་རང་འཁོར་འདས་རྒྱུན་རྩ་དང་རླུང་གཅོད་དུ་སྦར་ནས་རྩ་རླུང་གི་ཆིངས་སྟོན་པ་གསུམ་ལས། ཕྱིའི་གཏུམ་གཏུམ་མོ་མོ་དབྱེ་དང་ལུས་གནད། ནང་གི་གཏུམ་མོ་དབྱེ་དང་རླུང་གནད། གསང་བའི་གཏུམ་མོ་དབྱེ་དང་དམིགས་གདམས་པའི་གནད་གནད། དེ་ཁོ་ན་དབྱེ་དང་གཉིད་ཀྱི་གཏུམ་མོ་དཔྱིད་ཐིག་གི་གནད་བཞིའོ། །གཉིས་པ་ལ། རླུང་སྐྱོན་སྦྱོར་བའི་སྦྱང་བ། དྲག་སྲོག་རྩོལ་རླུང་གི་འདི་ཁྲིའི་ཚུལ་ཕོ་རླུང་འདུལ་བ། འཇམ་རྩ་བའི་རླུང་གི་རྣལ་འབྱོར་སྲོག མོ་རླུང་སྦྱང་བ། མ་རྡོ་རྗེ་ནིང་རླུང་གི་རྒྱུན་དུ་རྡོ་རྗེའི་བཟླས་པ་བཟླ་བ་བཞིའོ། །གསུམ་པ་གསང་བའི་གཏུམ་མོ་ལ། །ཕྱི་ལྷའིལྷ་སྐུ་སྟོང་ར། ནང་དྷཱུ་ཏཱི་རྩའི་སྟོང་ར། གསང་ཨ་ཧཾ་བ་མི་ཤིགས་པའི་ཐིག་ལེ་གསལ་གདབ་པ་གསུམ་མོ། །བཞི་པ་དེ་ཁོ་ན་ཉིད་ཀྱི་གཏུམ་མོ་དཔྱིད་ཐིག་གནད་བཤད་པ་ལ། དངོས་འབར་འཛག སྦྱོར་བ་ལུས་སྦྱོང་། གེགས་བསལ་བའོ། །གཉིས་པ་སྒྱུ་ལུས་ཆོས་བརྒྱད་རང་གྲོལ་ལ། གསེར་བོགས་འདོན་འགྱུར་གྱི་རྩིས་དམན་པ་རིམས་པ་འདི་མཆོག་ཏུ་བསྒྱུར་བ། ཉི་ཟླའི་གཟུགས་རྣམས་ཟེར་གྱིས་འཕེན་པའི་ཡེ་ཤེས་ངོ་སྤྲད་པ། མཉམ་པ་ཆགས་སྡང་ཉིད་ཀྱི་ཆོས་བརྒྱད་མཉམ་རྗེས་ཀྱི་རྒྱ་མདུད་འགྲོལ་བ། སེམས་ཀྱི་སྐྱོན་སེལ་བ་བཞིའོ། །གསུམ་པ་རྨི་ལམ་འཁྲུལ་པ་རང་སངས་ལ། དྲན་པའི་མཚན་དུས་ལྕགས་ཀྱུས་འདི་དང་བཟུང་བ། བརྗེད་བསྐུལ་གྱིས་སྦྱང་བ། འཕྲིན་ལས་ཀྱི་སྒྱུ་མར་བྱིན་གྱིས་རླབས་པ་གསུམ་ལས། དང་པོ་ལ། ཡི་དམ་དྲན་པའི་ལྕགས་ཀྱུས་བཟུང་བ། བླ་མ་དྲན་པའི་ལྕགས་ཀྱུས་བཟུང་བ། སྣང་བ་དྲན་པའི་ལྕགས་ཀྱུས་བཟུང་བ་གསུམ་མོ། །གཉིས་པ་བརྗེད་སྦྱར་དང་བསྐུལ་ཉི་ཟླ་གྱིས་སྦྱང་བ་ལ། སྤེལ་ཟིན་སྦྱོངས་བ། བསྒྱུར་བསྒྱུར་བ། སྤྲུལ་སྤྲུལ་པ། གེགས་གེགས་བསལ་བ་བཞི་འོ། །གསུམ་པ་འཕྲིན་ལས་ཀྱིས་སྒྱུ་མར་བྱིན་གྱིས་རླབས་པ་ལ་གསུམ། དག་པ་སྒྱུ་མར་གོམས་པ་སྦྱང་བ་དང་། དེ་ཁོ་ན་ཅིར་སྣང་ཉིད་དུ་སྒོམ་པའོ། །བཞི་པ་འོད་གསལ་མ་རིག་མུན་བྲལ་ལ། གནད་ཁྱད་པར་ལ་རྨི་ལམ་མེད་བརྟེན་ནས་སེམས་མལ་དུ་འཇུག་པ། ཏིང་ངེ་འཛིན་གྱིས་འོད་གསལ་མ་བུ་བསྲེ་བ། ལམ་བརྗོད་དུ་ཁྱེར་རྩལ་གྱི་མཐར་རྒྱུན་མི་འཆད་ཕྱིན་པར་བྱ་བ་གསུམ། གཉིས་པ་ལ། ཉིན་མོ་ལམ་དང་རང་བཞིན་གཅིག་ཏུ་བསྲེ་བ། མཚན་མོ་ལམ་དང་རང་བཞིན་གཅིག་ཏུ་བསྲེ་བ་གཉིས། དང་པོ་ལ་དངོས་རྣམ་རྟོག་དང་། བསམ་མི་ཁྱབ། གཉིས་པ་ལ། སྦྱོར་དངོས་གཉིད་རྗེས་འདོད་ཆགས་ལ་གསུམ་མོ། །ལྔ་པ་འཕོ་བ་གསེར་འགྱུར་གྱི་རྩི་ལ། སྔོན་དུ་འགྲོ་བ་དུས་སྒོའི་གནད། དངོས་གཞི་འཕོ་བའི་རྣལ་འབྱོར། །རྗེས་འཕོ་བས་འབྲས་བུ་བཤད་པ་གསུམ། དང་པོ་ལ། འཆི་ལྟས་འཆི་ལྟས་བརྟག་པ། འཆི་བ་སླུ་བ་བསླུ་བ། དུས་ཀྱི་ཤར་ཚེ་གནད་སྒོའི་སྒོ་དགུ་གནད། བར་ཆད་ཞེན་པ་ཀྱི་མི་ཚུགས་པ་སོགས་ཀྱི་གནད་དོ། །གཉིས་པ་དངོས་གཞི་འཕོ་བའི་རྣལ་འབྱོར་ལ། སྤྲོས་མེད་ཆོས་སྐུའི་འཕོ་བ། སྤྲོས་བཅས་གཟུགས་སྐུའི་འཕོ་བ། ཡིད་འོང་མཁའ་འགྲོའི་འཕོ་བ་གསུམ། དེ་ལ་སྦྱང་སྟེ་འཕོ་བ་ལམ་ལ་བགྲོད་ན་དང་། བཙན་རྫས་དང་སྨན་ནམ། ཐབས་ཀྱི་འཕོ་བ་གཉིས། དང་པོ་ལ། སྦྱང་བ་བཀག་ལ་དང་ལས་ཧཱུྃ་ལ་སྦྱར་ཀྵ་ཡིག་བ་གཉིས་སོ། །དྲུག་པ་གྲོང་འཇུག་སྦྲུལ་ལྤགས་འདོར་ལེན་ལ། འཇུག་བྱ་སྐྱོན་མེད་ཡུལ་གྱི་གནད་ཚད་ལྡན་ལ་སྦྱང་བ། འཇུག་བྱེད་ལྷག་པར་ལས་སྣ་ཚོགས་དོན་ཆེན་སྦྱོར་གྱི་གནད་གང་འདོད་དུ་འཕང་བ། མཐུན་རྐྱེན་གྲོགས་གྲོགས་ཀྱི་གནད་ཀྱི་རྣམ་ཤེས་གསོས་གདབ་པ་དང་གསུམ་མོ། །གཉིས་པ་ཤེས་རབ་ཡེ་ཤེས་ཀྱི་དབང་དང་འབྲེལ་བ་མཁའ་འགྲོའི་གསང་སྒྲོག་འོག་སྒོ་བདེ་ཆེན་ལ། བསྟན་མཁའ་འགྲོའི་བྱ་ཕྱག་རྒྱའི་རྣམ་དབྱེ། བསྟེན་ཚུལ་མཁའ་འགྲོའི་གསང་སྒྲོག །བསྟེན་འབྲས་བདེ་ཆེན་གྱི་འཆར་རིམ་བཤད་པ་གསུམ་ལས། དང་པོ་ལ། རྣལ་འབྱོར་པ་རབ་ཀྱི་རྡོ་རྗེ་སེམས་དཔའི་བུད་མེད་བསྟེན་པ། འབྲིང་ཡིད་ཀྱི་རིག་མ། ཐ་མ་དང་པོའི་ལས་ལས་ཀྱི་ཕྱག་རྒྱ་བསྟེན་པའི་ཚུལ་གསུམ། གཉིས་པ་བསྟན་ཚུལ་མཁའ་འགྲོའི་གསང་སྒྲོག་ལ། རབ་རང་ཕྱག་རྒྱ་རིག་གི་གནད་ཟག་མེད་རོལ་ཀྱི་བདེ་སྟོང་སྦྱོར་བ། ཆགས་དང་ཆགས། འབྲིང་ཟག་བཅས་རྩལ་སྦྱོང་གི་གནད་ཀྱི་བདེ་སྟོང་བསླབ་བཅས་སྦྱོར་བ། ཐ་མ་བཙན་ཐབས་ཀྱི་གནད་ཀྱི་བདེ་སྟོང་སྦྱོར་བ་གསུམ་ལས། ཕྱི་མ་ལ། བདེ་ཚོལ་སྐྱེ་མེད་ཀྱི་སྒྲོན་མ་ཐིག་ལེ་གཏམས་པ། རྩ་སྙེན་སྦྱོར་ཆོས་ཀྱི་རྩ་མདུད་འགྲོལ་བ། དགའ་དགའ་བ་བཞིའི་དཔེ་བདེ་བའི་ཉམས་དོན་ལ་རྩལ་སྦྱོར་བ་གསུམ། གཉིས་པ་སྦྱོར་ཆོས་ཀྱི་རྩ་མདུད་འགྲོལ་བ་ལ། དབབ་ཅིག་ཅར་དབབ་པ་ལ་མཁས་པ་རུས་སྦལ་གྱི་ནུར་འགྲོས་ལྟ་བུ། འཛིན་བཟུང་པ་ལ་མཁས་པ་རྫིང་གི་འུར་ཐུར་སེལ་གཅུད་ཁུང་འགགས་པ་ལྟ་བུ། འདྲེན་བཟློག་པ་གླང་ཆེན་ལ་མཁས་པ་ཁྲོན་པའི་དཔྱང་རྩེ་གྱེན་དུ་འདྲེན་པ་ལྟ་བུ་འགྲེམ་བགྲམ་པ་ལ་མཁས་པ་སྦྱོར་བ་མཛངས་མ་ཞིང་ལ་ཆུ་གཏོང་བ་ལྟ་བུ། བདེ་གནས་བ་ཕྱག་རིག་མས་ཆེན་དུ་སྐྱེལ་བ་ལ་མཁས་པ་སྤྲིན་ནམ་མཁར་ཐིམ་པ་ལྟ་བུ་དང་ལྔའོ། །གསུམ་པ་བསྟེན་འབྲས་བདེ་ཆེན་གྱི་འཆར་རིམ་པ་བཤད་པ་ལ། འཛག་ལྷན་སྐྱེས་མེད་ཀྱི་དཔེ་དོན་འགྲོས་དང་། ཉམས་པའི་ཉེས་བག་མེད་དམིགས། དམིགས་བསལ་གསང་དབང་གྱི་ཉེས་མེད་བཤད་པའོ། །གསུམ་པ་ཚིག་དབང་དང་འབྲེལ་བ་ཕྱག་རྒྱ་ཆེན་པོ་ཡེ་ཤེས་གསལ་བྱེད་ལ། བསྒོམ་པ་སྤྲུལ་པ་སྐུའི་གནས་ཕྱག་རྒྱ་ངོས་ཡེ་ཤེས་གསལ་བྱེད་བཟུང་བ། བསྒོམ་བལྟས་པས་བྱེད་ལོངས་སྤྱོད་རྫོགས་པ་ཡེ་ཤེས་ལུས་སྐུའི་བྱ་བ་བསྟན་པ། བསྒོམ་བྱ་ཆོས་སྐུ་ཕྱག་རྒྱ་ཆེན་པོའི་དོན་བཤད་པ་དང་གསུམ་ལས། གསུམ་པ་བསྒོམ་བྱ་ཆོས་སྐུ་ཕྱག་རྒྱ་ཆེན་པོའི་དོན་བཤད་པ་ལ། ལྟ་བ་གཞི་ནས་མ་བཅོས་པའི་ཡེ་ཤེས་ངོས་ཡེ་ཤེས་བཟུང་། བསྒོམ་ཐ་མལ་པ་དེ་ལ་མ་བཅོས་མིག་སོགས་པར་བཞག་པ། སྤྱོད་པ་སྔ་ཕྱི་རོལ་ཕྱི་གཉིས་མེད་དུ་གཞི་ལམ་བསྲེ་བ། འབྲས་སེམས་ཉིད་བུ་ནམ་མཁའ་ལྟ་བུའི་ཡི་གེ་བཞི་འཆར་ཚུལ་བཞིའོ། །བཞི་པ་ལམ་བློ་ནས་ཆོད་པ་བར་དོ་ལམ་ཁྱེར་ལ། ལུས་བར་དོ་ལྡན་མཐར་མ་བཞིའི་བར་དོ། ངེས་ངེས་ཤེས་ཤེས་རྟགས་བསྐྱེད་རིམ་ཀྱི་བར་དོ། ངོ་ངོ་སྤྲོད་སྦྲོད་འབྲས་བུའི་བར་དོ་གསུམ། དེ་ལ་རབ་ས་ཆུ་ཆོས་སྐུ་ཐུག་སྐྱེ་ཤི་ཕྲད་ཀྱི་བར་དོར་འཆི་བ་ལམ་དུ་ཁྱེར་བ། འབྲིང་དེ་ལམ་སྲིད་དེ་མ་བརྟགས་པ་སྤྱི་ལུགས་ཀྱི་བར་དོ་བློ་ཆོད་དུ་བཏང་བ། ཐ་རྩ་ལྔ་མ་ཉིང་མཚམས་དེ་ལ་བརྟེན་སྦྱོར་བའི་བར་དོར་སྨོན་ལམ་གྱི་འཕེན་པ་བཞག་པ་གསུམ་མོ། །ལྔ་པ་གཅིག་ཅར་བ་བྱ་སྤྱོད་ཚོགས་སུ་བསྒྱུར་བ་ལ། ལམ་སྤྱིའི་གདམས་པ་སྤྱི་ལ་གེགས་རྩ་བ་སེལ་མི་མཐུན། བྱ་སྤྱོད་ཚོགས་བསྒྱུར། འབྲས་གོང་རིམས་བུ་མཆོག་འཁོར་ལོ་གི་དངོས་གྲུབ་བཤད་པ་རྣམ་པ་རིམས་པ་འདི་ལ་གསུམ་ལས། གཉིས་པ་བྱ་སྤྱོད་ཚོགས་སུ་བསྒྱུར་བ་ལ་དབང་གི་དབང་གི་གདམས་ངག །ལྟ་བདུད་ངོས་བཟུང་བས་བདུན་བརྟགས་དབང་དུསདེ་སྒོམ་པ་རྟགས་དང་སྦྲེལ་བ། སྤྱོད་བྱ་སྤྱོད་པ་གོལ་ས་གང་དང་བཅད་དེ་ཚོགས་བསྒྱུར་འཕྲིན་ལས་དང་སྦྲེལ་བ་གསུམ་མོ། །སྤྲོས་པ་ཆུང་དུ་ཤེས་རབ་ཀྱི་སྒོ་ནས་ཁྲིད་པ་ལ། བསྡུས། འབྲིང་། རྒྱས་པར་འཁྲིད་པ་ལ་གསུམ་ལས། འབྲིང་ལ་བསྐྱེད་རིམ་དང་རྫོགས་རིམ་གཉིས། དང་པོ་ལ། རྒྱལ་པོ་ཆོས་ཉིད་མི་འགྱུར་བ། བློན་པོའི་རིགས་གསུམ་ལས་བྱེད། དམངས་འཕྲིན་ལས་མཐུན་སྦྱོར། ཉེ་སྙིང་གི་སྒྲུབ་པ། ལྷ་མོ་བཅོ་ལྔ་མ། གོ་ཆའི་སྒྲུབ་པ། ལྷ་བདུན་མ། སྙིང་པོའི་སྒྲུབ་པ། ལྷན་ཅིག་སྐྱེས་མ། གཉིས་པ་རྫོགས་རིམས་ལ། ལྟ་བ་གཏན་ལ་དབབ་པ་ཐབས་ཀྱི་ཉམས་སུ་བླངས་པའི་གདམས་ངག་རྟོགས་པའི་དོན་ལ་སྒྲོ་འདོགས་གཅོད་པ་དང་། རྡོ་རྗེའི་ཚིག་དོན་དཀྲོལ་བའི་སྒོ་ནས་ཟབ་མོའི་དོན་རྣམ་པར་ཕྱེ་སྟེ་སྙན་བརྒྱུད་བརྡའི་གདམས་ངག་གི་ཉམས་མྱོང་རྟོགས་པའི་སྒྲོ་འདོགས་གཅོད་པ་དང་། གཉིས་སུ་མེད་པའི་དོན་ལ་ངོ་སྤྲད་པའི་སྒོ་ནས་ལས་དང་སྐལ་བར་ལྡན་པའི་གང་ཟག་གི་བློའི་པདྨ་ཁ་ཕྱེ་ནས་དེ་ཁོ་ན་ཉིད་ཞེན་པའི་སྒྲོ་འདོགས་གཅོད་པ་གསུམ། དང་པོ་ལ། དྲི་མེད་ཡེ་ཤེས་མཁའ་འགྲོ་མ་ལ་མཆོད་པར་བརྗོད་པ་དང་། བརྡའ་དོན་ངོས་བཟུང་སྟེ་བསྟན་པ་དང་། དེ་མངོན་དུ་གྱུར་པ་འབྲས་བུ་འཆར་ཚུལ་ལོ། །གཉིས་པ་ལ། ལྟ་སྒོམ་སྤྱོད་པ་གསུམ། རོ་སྙོམས་རྣམ་པ་གསུམ། ཐབས་ཤེས་ཟུང་འཇུག་གི་བརྡའ་རྣམ་པ་གསུམ་མོ། །གཉིས་པ་རྡོ་རྗེའི་ཚིག་དོན་དཀྲོལ་བའི་སྒོ་ནས་ཟབ་མོའི་དོན་རྣམ་པར་ཕྱེ་སྟེ་སྙན་བརྒྱུད་བརྡའི་གདམས་ངག་གིས་ཉམས་མྱོང་རྟགས་ཀྱི་སྒྲོ་འདོགས་གཅོད་པ་ལ། གཞི་སྨིན་པར་བྱེད་པའི་ལམ། སྨིན་གྲོལ་སེམས་ཀྱི་རྒྱ་མདུད་བཤིག་པ་དང་། དམ་ཚིག་རང་སེམས་མེ་ལོང་བསྟན་པ། དམ་རྫས་རྟོགས་པའི་ཉི་མ་འདེབས། སྤྱོད་པ་ཆུ་ལ་རལ་གྲི་འདེབས་པ། རང་གྲོལ་ཕྱག་རྒྱ་ཆེན་པོ་བསྟན་པ། རྩ་རླུང་དྲྭ་མིག་འཁོར་ལོ་བསྐོར་བ། རིག་པ་ཡེ་ཤེས་ཀྱི་སྒྲོན་མེ་བལྟམས་པ། །རོ་སྙོམས་ཕྱིའི་མེ་ལོང་བལྟ་བའོ། །དང་པོ་ལ། སྨིན་ལམ་དབང་གི་སེམས་ཀྱི་རྒྱ་མདུད་འགྲོལ་བ་དང་། གྲོལ་ལམ་གྱི་སྒོ་ནས་སེམས་ཀྱི་རྒྱ་མདུད་འགྲོལ་བའོ། །གཉིས་པ་ལ། སྒྱུ་མ་ལུས་ཀྱི་མེ་ལོང་ལ་རྩ་རླུང་ཐིག་ལེའི་དོན་བལྟ་བ། སེམས་ཉིད་སྟོང་པའི་མེ་ལོང་ལ་འོད་གསལ་གྱི་དོན་བལྟ་བ། སྤྲོས་བྲལ་དོན་གྱི་མེ་ལོང་ལ་གཟུང་འཛིན་གྱི་དྲི་མས་མ་གོས་པར་བྱའོ། །གསུམ་པ་ལ། སྣང་བ་ཐབས་སུ་རྟོགས་པ་དང་། སེམས་ཉིད་ཤེས་རབ་ཏུ་རྟོགས་པ་དང་། བདེ་ཆེན་ཡེ་ཤེས་ཀྱི་ཉི་མ་ལམ་དུ་བྱ་བའོ། །བཞི་པ་ལ། དབང་པོ་ཐ་མ་སྣང་བ་ཐབས་སྒྱུ་མ་ལྟ་བུའི་སྤྱོད་པ་དང་། འབྲིང་གིས་སྣང་བ་སེམས་སུ་ཤེས་པའི་སྤྱོད་པ་དང་། རབ་སྣང་བ་ཡེ་ཤེས་སུ་ཤེས་པའི་སྤྱོད་པའོ། །ལྔ་པ་ལ་ཐབས་ཀྱི་ཉམས་སུ་བླང་བ་དང་། ཤེས་རབ་ཀྱི་རང་གྲོལ་བའི་སེམས་མ་དང་བྲལ་བའོ། །དེའི་གཉིས་པ་ལ། རྩ་ཡེ་ཤེས་ཀྱི་རང་བཞིན་གསལ་སྟོང་ཟུང་དུ་འཇུག་པ་དང་། རླུང་ཆོས་ཉིད་ཀྱི་རང་བཞིན་སྣང་སྟོང་ཟུང་དུ་འཇུག་པ་དང་། སེམས་བདེ་སྟོང་གི་ཟུང་འཇུག་བྱང་སེམས་གཉུག་མའི་གདན་བཅིངས་པའོ། །དྲུག་པ་ལ། རྩ་བཤད་རླུང་བཤད། རླུང་ཡེ་ཤེས་གཉིས་མེད་དུ་བསྲེ་བ། དམིགས་པའི་གནད་ཀྱི་གེགས་བསལ་བ། སྤང་བྱ་སྤོང་ཚུལ། གཉེན་པོ་ཡེ་ཤེས་སྐྱེས་ཚུལ། ཕྱི་ནང་རྟགས་ཀྱི་འཆར་ཚུལ། ལམ་སྐྱོན་ལམ་དུ་བླངས་པས་གེགས་བསལ་བའི་གདམས་ངག །གསུམ་པ་གཉིས་སུ་མེད་པའི་དོན་ལ་ངོ་སྤྲད་པའི་སྒོ་ནས་ལས་དང་སྐལ་བར་ལྡན་པའི་གང་ཟག་གི་བློའི་པདྨོ་ཁ་ཕྱེ་ནས་དེ་ཁོ་ན་ཉིད་ཞེན་པའི་སྒྲོ་འདོགས་གཅོད་པ་ལ། བསྙེན་པ་དང་། སྒྲུབ་པ་གཉིས། དང་པོ་ལ། ཟག་བཅས་ལུས་ལ་བདེ་བ་མ་སྐྱེས་པ་བསྐྱེད་པ་དང་། སྐྱེས་པ་དབང་དུ་བྱ་བས་ཟག་མེད་སེམས་ཀྱི་བདེ་བ་འཆར་བར་བྱེད་པའོ། །དང་པོ་ལ། རོ་མའི་དབབ་ཐབས། རྒྱལ་མཚན་མཚོན་བསྣུན་གྱི་དབབ་ཐབས། ཡི་གེ་ཧཾ་བཅུ་དྲུག་པའི་དབབ་ཐབས། རྡོ་རྗེ་སེམས་དཔའི་དབབ་ཐབས། གསང་ཡུམ་ཡིད་ཀྱི་རིག་མ་ལ་བརྟེན་པའི་དབབ་ཐབས། ཀུན་ཏུ་རྒྱུས་ཕྱག་རྒྱ་ལ་བརྟེན་པའི་དབབ་ཐབས་སོ། །གཉིས་པ་ལ། རྩ་བཙལ་བ། དབབ་པ། གཟུང་བ། སྐྱིལ་བ། བཟློག་པ། དྲངས་པ། བགྲམས་པ། རྗེས་བཅད་པ། བདེ་བ་གནད་དུ་བསྡུ་བ། མཐར་མི་ཉམས་ཤིང་རྒྱས་པར་བྱའོ། །གསུམ་པ་གཏད་རྒྱས་དེ་ལས་དགོས་འདོད་ཀྱི་བཀའ་བབ་ཚུལ། སྔོན་བྱུང་བཅུ་གསུམ་རྗེས་འཇུག་ལུང་བསྟན། ཇི་ལྟ་བུས་གཏད་པ་གསུམ་མོ། །དེ་ལ་བྱིན་གྱིས་བརླབ་འདི་དོན་པ། ལུང་སྦྱིན་སྣོད་བཅུད་པ་རྡོ་རྗེ་སློབ་དཔོན་དུ་མཆོག་གི་བློ་ཅན་བསྐོ་བ། མཁའ་འགྲོ་ཆོས་སྐྱོང་དཔང་དུ་བཙུགས་ཏེ་གཏད། འཕྲིན་ལས་སྒྲུབ་པའི་ཆོས་སྐྱོང་བསྐོ་བ་དང་བཞིའོ།། །། བསྙེན་སྒྲུབ་ལས་ཟླ་སེང་ལུགས་ཀྱི་དཀར་ཆགབསྙེན་སྒྲུབ་ལས་ཟླ་སེང་ལུགས་ཀྱི་དཀར་ཆག་བཞུགས་སོ། །ཕག་མོའི་བྱིན་རླབས་མ་དྲོས་མཚོར། །རྒྱུད་འབྲས་མན་ངག་རིན་ཆེན་དུ། །བསྒྱུར་བའི་དཔལ་དེ་ཡེ་ཇི་བཞིན། །གཟིགས་ལ་མིག་མི་འཛུམ་ཆེན་པོར། །གང་གི་གྲགས་པའི་གསེར་མདོག་ནི། །ཕྱོགས་ཀྱི་གླེགས་བུའི་ངོས་དག་ལ། །ཆགས་པའི་ཡི་གེའི་འཕྲེང་བ་རྣམས། །དྲི་མེད་ཐོད་བཞིན་སྤྱི་བོར་ལོང་། །འདིར་རྒྱལ་བ་རྒོད་ཚང་པ་ཆེན་པོས་བརཏལ་ཞུགས་རང་དང་མཉམ་པ་ཨོ་རྒྱན་པ་ཞེས་གྲགས་པའི་རྗེ་གྲུབ་ཐོབ་ཆེན་པོ་དེས་དཔལ་ཨོ་རྒྱན་གྱི་ཡུལ་ནས་སྤྱན་དྲངས་པའི་རྡོ་རྗེ་གསུམ་གྱི་བསྙེན་སྒྲུབ་འདི་ལ། དེའི་དངོས་ཀྱི་སློབ་མའི་ཟིན་བྲིས་བགྲང་ཡས་པ་ལས་མཆོག་ཏུ་གྱུར་པ་ཟླ་བ་སེང་གེ་ཡིན་པས་དེས་གླེགས་བམ་དུ་བསྒྲིགས་པ་ནི། རྣམ་བཤད་གོ་ལུང་པ་ཆེན་པོ་གཞོན་ནུ་དཔལ་གྱི་ཟིན་བྲིས། བླ་མ་མཁས་བཙུན་བསོད་ནམས་འོད་ཟེར་བའི་ཟིན་བྲིས། སྙེ་མདོ་བ་ཀུན་དགའ་དོན་གྲུབ་ཀྱི་ཟིན་བྲིས། གཤོད་ལོ་ཙ་བ་རྡོ་རྗེ་རྒྱལ་མཚན་གྱི་ཟིན་བྲིས་བཞི་ཚེད་ཐུབ་དཔང་པོའི་ཚུལ་དུ་གྲངས་སོ། །གཞན་ལོ་རྒྱུས་རིན་ཆེན་འཕྲེང་བ། ཨོ་རྒྱན་སྤྲུལ་པའི་ཞིང་གི་ལམ་ཡིག །སྔོན་འགྲོ། རྡོ་རྗེའི་ཚིག་རྐང་། སྡུས་དོན། དབང་བཞིའི་ཐོ་ཡིག །མདོ་སྦྱར་དང་བསྙེན་སྒྲུབ་གཉིས་ཀྱི་ཁྲིད་ཡིག་དང་། སྒྲུབ་ཆེན་ཟབ་ལམ་གསེར་གྱི་སྙེ་མ་གསུམ་མཁར་ཆུ་བའི་ཟིན་བྲིས། བསྙེན་སྒྲུབ་གཉིས་ཀྱི་ཁྲིད། འགྲེལ་བཤད་ཡིད་བཞིན་ནོར་བུ། རླུང་འཛིན་སྟངས་ལྔ། བར་རླུང་། འཁྲུལ་འཁོར་བཅུ་བདུན་པ་དང་ལྔ་བཅུ་པ། ཕྲ་ཐིག་གི་ཟུར་བསྐོལ་ལུས་འཆི་མེད། དེའི་འཁྲུལ་འཁོར། བྱང་སེམས་འགྱུར་མེད། དེའི་འཁྲུལ་འཁོར། ཚེ་སྒྲུབ་གསེར་སྲང་པ། འགོ་བ་གསེར་སྲང་མ། འཕོ་བའི་ཞལ་གདམས་གཉིས། སློབ་མ་བདུན་ལ་གདམས་པ། ཙ་རི་བར་གནང་བའི་གེགས་སེལ། རིགས་བཞིའི་གདམས་ངག་ཕྱི་མ་མ་སྐལ་བཟང་གི་ཟིན་བྲིས། གཏུམ་མོ། །རིགས་དྲུག་ས་བོན་སྲེག་ལུགས། ཨོཾ་རྒྱ་ཅན། ཨ་རྒྱ་ཅན། ཧཱུཾ་རྒྱ་༼༢ན༣༽ཅན། འདི་གསུམ་ལ་གཟིགས་གསུམ་མར་ཡང་གྲགས། ཟབ་ལམ་ཡིད་བཞིན་ནོར་བུ། རང་ལུས་ཕྱི་ནང་གསང་བའི་འཁྲུལ་འཁོར། དབང་གི་ཞུ་ལན་ལོ་རྒྱུས། དཀྱིལ་འཁོར་ཆོ་ག །དབང་བཞི་དམར་ཁྲིད། བརྟག་དགུག་སྦ་དབྱུང་གི་ཡིག་ཆུང་། ཆུ་འཐུང་དྲི་མེད་རིགས་ལྔའི་བཅུད་ལེན། བདུད་རྩི་ལྔ་ཕྲུགས། ཕྱི་ནང་གསང་བ་ཡང་གསང་གི་འཁྲུལ་འཁོར། རྩ་རླུང་སྒྲ་གཅན་གྱི་ཆིངས། གཞུང་ཆུང་རྩ་འགྲེལ། ངོ་སྤྲོད་ཀྱི་ཡིག་རིགས་གསུམ། གེགས་སེལ་སྙན་རྒྱུད་མ་ཆེ་བ། བདུད་རྩི་འཕྲེང་བའོ་གཅེས་ཕྲུག་བརྒྱད་ཅུ་མ་ལ་གཞུང་ལྡེ་མིག་ཞལ་གདམས་གསུམ། རིན་ཆེན་འཕྲེང་བ། སྨན་དཔྱད་མ། གྲགས་བྱང་ཞུ་ལན། སྙན་རྒྱུད་མ་ཆུང་བ། ཧ་དམིགས་སྟག་འཐེན། དབྱུག་ཆོས། ཞལ་གདམས་ཐོར་བུ་བ་རྣམས་ཏེ་མཛད་བྱང་དམིགས་བསལ་མེད་པ་རྣམས་ཟླ་སེང་བའི་ཟིན་བྲིས་རྗེ་ཉིད་ཀྱི་སྤྱན་ལམ་དུ་བབ་པ་འབའ་ཞིག་གོ། །འདིར་རྒྱ་ཟོར་བའི་སྒྲུབ་ཆེན་གྱིས་དཔེ་ལྔ་རོལ་པའི་རྡོ་རྗེའི་ཟིན་བྲིས། བཀའ་བཞི་པའི་བར་རླུང་གི་ཁྲིད་རྣམས་བཞུགས་ཏེ་བར་རླུང་ཕལ་འདི་ལ་རྩིས་ཆེ་སྟེ་སྔ་མ་བཟང་། ཚ་ཆུད་པའི་བར་རླུང་དུ་གྲགས་པ་ཡིག་སྣ་གསུམ་རྣམས་སོ།། །།སརྦ་མངྒ་ལཾ། ཆོས་སྦྱིན་རྒྱ་ཆེར་སྤེལ་བའི་ཆེད། །ཁར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱེད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །། རྡོ་རྗེ་གསུམ་གྱི་བསྙེན་བསྒྲུབ་ཀྱི་འགྲེལ་བཤད་རྡོ་རྗེ་འཆང་གི་དགོངས་རྒྱན།རྡོ་རྗེ་གསུམ་གྱི་བསྙེན་བསྒྲུབ་ཀྱི་འགྲེལ་བཤད་རྡོ་རྗེ་འཆང་གི་དགོངས་རྒྱན་ཞེས་བྱ་བ་བཞུགས་སོ། །ར་སཱ་རྡོ་རྗེ་ནོར་བུར་རྡུལ་དང་ཉི་མ་མནན་པས་ཤེས་རབ་ཕ་རོལ་ཕྱིན་བརྙེས་ཤིང་། ལ་ལ་གཙུག་ཏོར་ཁུ་བ་རི་བོང་ཅན་གྱིས་བཀང་བས་སྙིང་རྗེའི་ཕུང་པོ་རྫོགས་གྱུར་པ། དྷཱུ་ཏཱི་སྒྲ་གཅན་གཡུང་མོ་མི་ཕྱེད་སྲིད་དང་སྲིད་མིན་མཉམ་པའི་གོ་འཕང་ལ་གནས་པའི། རྩ་རླུང་ཐིག་ལེ་ཡོངས་དག་བླ་མའི་ཞབས་ཀྱི་པདྨོར་དང་བས་བདག་ནི་ཕྱག་འཚལ་ལོ། །དཔལ་ལྡན་དུས་འཁོར་ངེས་པའི་ཚིག་གྱུར་ཁང་བཟང་ནི། ཕྱི་ནང་གཞན་གསུམ་སྒོ་གླེགས་ལེགས་པར་བསྡམས་གྱུར་པར། འཇུག་འདོད་རྣམས་ལ་ཡིད་ཀྱི་རེ་བ་དོན་ལྡན་དུ། བྱེད་ལ་རྣམ་བཤད་རིན་ཆེན་ལྡེ་མིག་སྦྱིན་པར་བྱ། དེ་ཡང་། རྒྱུད་ཐམས་ཅད་ཀྱི་ངེས་པའི་ཚིགས་སུ་གྱུར་པ་རྡོ་རྗེ་གསུམ་གྱི་བསྙེན་སྒྲུབ་ཀྱི་བརྗོད་བྱའི་དོན་རྣམ་པར་འགྲེལ་བར་བྱ་སྟེ། བརྒྱུད་པའི་ལོ་རྒྱུས་དང་གདམས་པ་གཉིས་སོ། །དང་པོ་ནི། རྣལ་འབྱོར་གྱི་དབང་ཕྱུག་ཆེན་པོ་རྒོད་ཚང་པའི་ལུང་བསྟན་པ་དང་བྱིན་གྱིས་བརླབས་པའི་འཕོ་བ་ཐོབ་པས། ནུབ་ཕྱོགས་ཨུ་རྒྱན་གྱི་ཡུལ་ཆེན་པོར་བགྲོད་དེ། ས་འོག་དང་། ས་སྟེང་དང་། ས་བླ་བའི་རྣལ་འབྱོར་མ་བྱེ་བ་སྙེད་ཀྱི་དབང་ཕྱུག་མོ་སྐུ་གསུང་ཐུགས་ཀྱི་འཁོར་ལོ་ཟད་མི་ཤེས་པའི་རང་བཞིན་དང་ལྡན་པའི་བཅོམ་ལྡན་འདས་མ་རྡོ་རྗེ་ཕག་མོ་ཚོགས་ཀྱི་འཁོར་ལོ་ཐམས་ཅད་ཀྱི་རྗེ་མོ་གང་དང་མངོན་སུམ་དུ་མཇལ་ཏེ། སངས་རྒྱས་ཐམས་ཅད་ཀྱི་སྤྱོད་ཡུལ་ལ་འཇུག་པ་ཐོབ་ཅིང་། ཡང་དག་པའི་ལམ་ཐམས་ཅད་དེ་བཞིན་དུ་བལྟ་བའི་མིག་ཏུ་གྱུར་པའི་རྡོ་རྗེའི་ཚིག་ཐོས་པས་བསམ་པ་ཡོངས་སུ་གྲུབ་ནས། ཆོས་ཐམས་ཅད་ལ་དབང་བསྒྱུར་བ་བརྙེས་ཏེ་འགྲོ་བ་ལམ་ཉམས་པ་རྣམས་འདྲེན་པར་མཛད་པས། ཨོ་ཌི་ཡཱ་ན་པ་ཆེན་པོ་ཞེས་ཉི་མ་དང་ཟླ་བ་ལྟ་བུར་གྲགས་པ་མཚན་གཞན་རིན་ཆེན་དཔལ་ཞེས་བགྱི་བའི་ཞབས་ཀྱིས། རིན་པོ་ཆེ་མཁར་ཆུ་བ། ཟླ་བ་སེང་གེ། བསོད་ནམས་འོད་ཟེར། རང་བྱུང་རྡོ་རྗེ། ཚ་ཆུང་བ་ལ་སོགས་པའི་སློང་མ་བརྒྱ་ཕྲག་མང་པོ་ལ་ཚེ་གཅིག་གིས་འདོད་པའི་དངོས་གྲུབ་ལམ་༼༢ན༣༽འདིས་བྱིན་པར་མཛད་པ་དེ་དག་ལས་རིམ་པར་བརྒྱུད་པའི་ཐུགས་ཀྱི་བཅུད་ཞལ་གྱི་པདྨོ་ལས་འོངས་པ། རྒྱལ་དབང་ཐམས་ཅད་མཁྱེན་པའི་རྣམ་དཔྱོད་ཀྱི་སྦྲང་རྩིའི་བུས་གཞིབས་ནས། རྡོ་རྗེ་འཆང་ངག་གི་དབང་པོའི་མཁྱེན་པའི་བྱ་སྐྱིབས་སུ་བསགས་པ་རྗེ་བཙུན་དེ་ཉིད་དང་། སྲས་ངག་གི་དབང་ཕྱུག་གྲགས་པས་ཁྱོངས་ཏེ། བདག་གི་རྣམ་པར་གྲོལ་བའི་ལུས་བརྟས་པའི་ཆེད་དུ་བྱིན་པར་མཛད་དོ། །གཉིས་པ་ལ། སྦྱང་གཞི་ལུས་ངག་ཡིད། སྦྱོང་བྱེད་རྡོ་རྗེ་གསུམ། སྦྱངས་འབྲས་སྐུ་གསུམ་གྱི་རྣམ་གཞག་བཤད་པ་གསུམ་ལས། དང་པོ་ལ། སྤྱིར་ལུས་ཇི་ལྟར་གྲུབ་པའི་ཚུལ། བྱེ་བྲག་རྩ་རླུང་ཐིག་ལེ་གསུམ་གྱི་ངོས་འཛིན། ཞར་བྱུང་འཆི་ལྟས་བརྟག་པ་བཤད་པ་གསུམ་ལས་དང་པོ་ནི། འཁོར་བའི་རྩ་བ་ནི་འཕོ་བའི་བག་ཆགས་ཏེ། འཕོས་པས་ཆགས་པ་དང་བྲལ་བའི་ཞེ་སྡང་དུ་འགྱུར་བ་དང་། དེས་རྒྱུད་འཁྲུགས་པས་གཏི་མུག་ཏུ་འགྱུར་བའོ། །དེ་ལྟར་ཉོན་མོངས་པ་གསུམ་གྱི་རང་བཞིན་མ་རིག་པ་སྟེ། དེ་རྟེན་ཅིང་འབྲེལ་པར་འབྱུང་བཅུ་གཉིས་རིམ་པ་བཞིན་དུ་འགྱུར་བ་ནི་སྐྱུར་མོ་ལས་ལྕེ་འཛག་པ་བཞིན་ནོ། །ཚུལ་དེས་འཁོར་བ་ན་འཁོར་ཏེ། དྲི་མེད་འོད་ལས། འདོད་ཆགས་ཉམས་པས་སྡིག་སྟེ་གང་ཕྱིར་ཤིན་ཏུ་སྡུག་བསྔལ་ལས་ནི་ཞེ་སྡང་སྐྱེ། སྡང་ལས་གཏི་མུག་འདི་ལས་རང་གི་རྡོ་རྗེ་ལྷུང་ལས་སེམས་ནི་རྟག་རྨོངས་ཏེ། མཆོག་མིན་མ་ལུས་བཟའ་དང་བཏུང་བ་ལ་སོགས་ཡུལ་གཞན་དག་ལ་རབ་ཏུ་འཇུག །དེ་ཡིས་སེམས་ལ་ཅོ་དྲིས་བདེ་བ་ཉམས་ཤིང་སྐྱེ་བ་དྲུག་ཏུ་འཁོར་བར་འགྱུར། ཞེས་སོ། །བྱེ་བྲག་མངལ་ནས་སྐྱེས་པ་བསྐྱེད་པའི་རིམ་པ་མའི་གཙུག་ཏོར་ནམ་མཁའི་ཁམས། དཔྲལ་བར་རླུང་། མགྲིན་པར་མེ། སྙིང་གར་ཆུ། །ལྟེ་བར་ས། ལྟེ་བ་ནས་གསང་བའི་བར་རིའི་རྒྱལ་པོ། གསང་བ་སྣ་ཚོགས་པདྨ། རྩ་གསུམ་འདུས་པ་ཟླ་ཉི་སྒྲ་གཅན། དེའི་སྟེང་དུ་ཕ་ལས་ཐོབ་པའི་དཀར་ཆ་བྱང་སེམས་ཟླ་བ་ཁུ་༼༢བ༤༽བ་ཨཱ་ལིའི་བདག་ཉིད་མཚན་གྱི་ངོ་བོ་དང་། མ་ལས་ཐོབ་པའི་དམར་ཆ་བྱང་ཆུབ་སེམས་ཉི་མ་རྡུལ་ཀཱ་ལི་བདག་ཉིད་དཔེ་བྱད་ཀྱི་ངོ་བོ་གཉིས་རོ་མཉམ་པར་གྱུར་པའི་དབུས་སུ། །ཀུན་གཞི་རྣམ་པར་ཤེས་པ་དྲི་ཟའི་སེམས་ཅན་སྒྲ་གཅན་ཨ་ཡིག་གི་རང་བཞིན་ཅན་ཞུགས་པས་ཐོག་མར་ལུས་ཆགས་ཏེ། རྩ་རྒྱུད་ལས། ཐིག་ལེ་ཟླ་བ་ཁུ་བ་སྐུ། རྣམ་པར་བཅད་པ་ཉི་རྡུལ་གསུང་། ཨ་ཡིག་མུན་ཅན་ཐུགས་རབ་བརྗོད། །མཁའ་ཁམས་ཨེ་ལ་རྣམ་པར་གནས། །ཞེས་དང་། གསང་བའི་པདྨར་ཁྲག་གི་ནང་དུ་གང་ཚེ་ལྟུང་བའི་བྱང་ཆུབ་ས་བོན་སོགས་དང་བཅས་པ་དག །ཅེས་གསུངས་སོ། །གསང་བར་གནས་པའི་ཁུ་ཁྲག་རྣམ་ཤེས་དང་བཅས་པ་དེ་ཉིད། སས་འཛིན་པར་བྱེད་ཅིག །ཆུས་འཐོར་བ་བསྡུས། མེས་སྨིན་པར་བྱས། མས་རོ་དྲུག་ཟོས་པ་རྣམས་ཀྱིས་སྟོབས་རྒྱས་པར་བྱས། རླུང་གིས་གོང་དུ་སྤེལ། ནམ་མཁས་གོ་སྐབས་ཡངས་པར་བྱེད་པ་སྟེ། ས་བོན་པདྨར་གནས་པ་དག་ནི་འཛིན་མས་འཛིན་ཏེ་དེ་ལས་ཆུ་ཡིས་སྡུད་དོ་ཕྱིས་ནས་ནི། མེ་ཡིས་སྨིན་པར་བྱེད་ཅིང་རོ་དང་རོ་ནི་ཟ་བར་བྱེད་དེ་འདི་ཡི་འཕེལ་བ་རླུང་གིས་སོ། །ནམ་མཁའ་དག་ཀྱང་འཕེལ་བའི་གོ་སྐབས་སྦྱིན་བྱེད་མི་ཡི་བདག་པོ་དུས་ལས་དེ་ལྟར་གྲུབ་པ་སྟེ། ཞེས་གསུངས་པས་སོ། །དེའི་ཚེ་སྐད་ཅིག་གཅིག་གིས་བདེ་བ་འབའ་ཞིག་ཡང་དག་པར་རིག་པ་དང་། ལུས་ཀྱང་ཉ་རོ་ཧི་ཏ་ལྟར་རྣམ་པ་ཅིག་པ་ཟླ་བ་གཅིག་ཏུ་གནས་པ་གང་ཡིན་པ་དེ་ནི་སྐད་ཅིག་གཅིག་གིས་བྱང་ཆུབ་པའོ། །ས་བོན་མྱུ་གུའི་་་་་་་་་་་སྙིང་གར་ཤིན་ཏུ་ཕྲ་བ་སྐྲའི་རྩེ་མོའི་ཚད་ཙམ་གྱི་རྩ་བཅུ་ཆགས་ཏེ། དེ་ནས་ཞག་རེ་རེར་རྩ་ཉིས་བརྒྱ་ཉིས་བརྒྱ་སྐྱེ་བས་ཁུ་བའི་ཁམས་འཕེལ་ལོ། །དེ་ལྟར་ལོ་གཅིག་གིས་རྩ་སྟོང་ཕྲག་བདུན་ཅུ་རྩ་གཉིས་རྫོགས་ནས་འཕེལ་བསྟོད་ཏེ་རྩ་ཆད་དོ། །རྩ་ཆད་སྐྱེས་ནས་ཉིན་ཞག་རེ་ལ་གཉིས་གཉིས་བསྐས་པས་ལོ་བརྒྱས་རྩ་སྟོང་ཕྲག་བདུན་ཅུ་རྩ་གཉིས་འཛད་དེ། བསྡུས་རྒྱུད་ལས། རྩ་རྣམས་སྟོང་ཕྲག་དྲུག་ནི་ཉིན་མོར་བྱེད་པས་བསྒྱུར་བའང་མངལ་གྱི་དབུས་དག་ཏུ་ཡང་འཕེལ་བ་ནི། བྱས་ནས་ལོ་ནི་རྫོགས་པ་ན་ཡང་སྟོང་སྟེ་རི་བོང་འཛིན་པ་༼༣ན༥༽ཉི་མ་དག་ཀྱང་འཕེལ་བར་བྱེད། ལོ་ནི་བཅུ་གཉིས་དག་ན་ཉིན་བྱེད་ཁམས་ནི་འཕེལ་བ་སྟོང་སྟེ་རང་གི་ལུས་པོ་དག་ལའོ། །རྩ་ནི་འཆད་པ་རབ་ཏུ་སྐྱེས་ནས་ཉིན་ཞག་དག་ལ་རིམ་པས་ཟུང་གི་གྲངས་སུ་འགྱུར། ཞེས་སོ། །དེ་ལྟར་ལོ་བརྒྱ་རྫོགས་ནས་ཁམས་ཐམས་ཅད་ཟད་དེ་རྣམ་པར་ཤེས་པ་ཡུལ་གཞན་དུ་འཕོའོ། །རྩ་ཆགས་པ་ནས་གཟུང་ཟླ་བ་གཉིས་ཀྱིས་གཟུགས་ལ་སོགས་པའི་བག་ཆགས་ཀྱི་བདག་ཉིད་ཅན་ཤེས་པ་ལྔ་ཡང་དག་པར་རིག་ཅིང་། རུ་སྦལ་ལྟར་འབུར་པོ་རྣམ་པ་ལྔ་ཐོན་པ་དེའི་ཚེ་རྣམ་པར་ལྔས་མངོན་པར་བྱང་ཆུབ་བོ། །དེ་ནས་ཟླ་བ་ལྔ་ལས་རེ་རེས་ཡན་ལག་ལྔ་སྐྱེད་པ་དང་། ཤ་ཁྲག་རུས་པ་སུམ་བརྒྱ་དྲུག་ཅུ་རྫོགས་པ་དང་། དེ་དག་གོང་དུ་འཕེལ་བ་དང་། སྣོད་དང་རྒྱུས་པ་རུས་པ་སྤུ་དང་པགས་པ་ལ་སོགས་པ་རྒྱས་པ་དང་། ཁ་མིག་ལ་སོགས་པ་དབང་པོའི་སྒོ་རྣམས་དོད་ནས་བཤད་གཅི་ལ་སོགས་པ་གྲུབ་ཅིང་། ལུས་ཀྱང་ཕག་ལྟར་དུ་དབྱིབས་མཚུངས་སུ་གནས་པས་ཕག་པའི་གནས་སྐབས་ཏེ། ཤེས་པ་ལྔ་པོ་རྣམས་ཀྱི་སོ་སོ་རང་གི་ས་ལ་སོགས་པའི་ཁམས་བཞིའི་བག་ཆགས་ཀྱི་དབྱེ་བས་ལུས་ཀྱང་སོར་མོ་ཉི་ཤུ་ཡོངས་སུ་རྫོགས་པའི་ཚེ་རྣམ་པ་ཉི་ཤུས་བྱང་ཆུབ་བོ། །དེ་ནས་ཟླ་བ་གཅིག་ལ་ལུས་སེང་གེ་དང་མཚུངས་པ་ནི་སེང་གེའི་གནས་སྐབས་ཏེ་ཟླ་བ་དགུ་རྫོགས་པ། དེ་ནས་བཅུ་པ་ལ་སྐྱེས་ནས་སོ་མ་སྐྱེས་ཀྱི་བར་མིའུ་ཐུང་གི་གནས་སྐབས། དེ་ནས་སོ་མ་ལྷུང་བར་དགྲ་སྟར་མ། སོ་བ་རྗེས་པའི་མཚམས་རཱ་མའི་སྐབས། དེ་ནས་བུད་མེད་ལ་བཅུ་གཉིས་དང་སྐྱེས་པ་བཅུ་དྲུག་གི་བར་ནག་པོ། དེ་ནས་འཆི་ཀའི་བར་སངས་རྒྱས་འཆི་བ་རིགས་ལྡན་གྱི་སྐབས་ཏེ། ཉ་དང་རུ་སྦལ་ཕག་པར་འགྱུར་ཏེ་མི་ཡི་སེང་གེ་མིའུ་ཐུང་རཱ་མ་རཱ་མ་དག་དང་ནི། ནག་པོ་སངས་རྒྱས་མི་དབང་རྣམ་བཅུར་འགྱུར་ཏེ་འདི་དག་རྣམས་ཀྱང་གནས་སྐབས་རྣམ་པ་བཅུ་ཡིན་ནོ། །ཞེས་གསུངས་པས་སོ། །དེ་ལྟར་མངལ་ནས་བཙས་ནས་མཐའ་ཡས་པའི་དངོས་པོ་ཡང་དག་པར་རིག་པ་ནི་སྒྱུ་འཕྲུལ་དྲ་བས་མངོན་པར་བྱང་ཆུབ་པའོ། །་་་་་་་་པ་བྱེ་བྲག་རྩ་རླུང་༼༣བ༦༽ཐིག་ལེ་གསུམ་གྱི་ངོས་འཛིན་ལ། སྐུའི་སྦྱང་གཞི་རྩ། གསུང་གི་སྦྱང་གཞི་རླུང་། ཐུགས་ཀྱི་སྦྱང་གཞི་ཐིག་ལེ་གསུམ་ལས། དང་པོ་ནི། ཐོག་མར་སྟེང་དང་འོག་ཏུ་རྩའི་གཙོ་མོ་གསུམ་གསུམ་སྟེ། ལྟེ་བའི་སྟེང་གི་གཡོན་དུ་ཟླ་བ་འབབ་འོད་དཔག་མེད་ཀྱི་རང་བཞིན་ལ་ལནཱ་ཐབས་ཀྱི་སྐུ་དང་། གཡས་ཉི་མ་མེ་རིན་འབྱུང་གི་རང་བཞིན་ར་སཱ་ན་ཤེས་རབ་ཀྱི་གསུང་དང་། དབུས་སྒྲ་གཅན་འབར་བ་ནམ་མཁའ་མི་བསྐྱོད་པའི་རང་བཞིན་ཨ་ཝ་དྷཱུ་ཏཱི་ཐབས་ཀྱི་ཐུགས་དང་། ལྟེ་བའི་འོག་ཏུ་རྩ་དབུས་མ་བཤད་བ་འབབ་པ་ལུག་སའི་ཁམས་ལས་བྱུང་བ་རྣམ་སྣང་གི་རང་བཞིན་ཤེས་རབ་ཀྱི་སྐུ་དང་། གཡོན་གཅི་བ་འབབ་པ་སེར་སྐྱ་རླུང་གི་ཁམས་ལས་བྱུང་བ་དོན་གྲུབ་ཀྱི་རང་བཞིན་ཐབས་ཀྱི་གསུང་དང་། འོག་གི་གཡས་པ་ཁུ་བ་འབབ་པར་དུང་ཅན་མ་ཡེ་ཤེས་ཀྱི་ཁམས་ལས་བྱུང་བ་རྡོ་རྗེ་སེམས་དཔའི་རང་བཞིན་ཤེས་རབ་ཀྱི་ཐུགས་ཏེ། ཐབས་སུ་གཞོག་པ་ནི་ཁུ་བའི་ཁམས་ལས་བྱུང་བས་དང་། ཤེས་རབ་ནི་རྡུལ་གྱི་ཁམས་ལས་བྱུང་བས་སོ། །རྩ་དྲུག་པོ་དེ་ཁམས་དྲུག་པོ་དེའི་རིགས་ཡིན་ཅིང་། དེ་ལས་གྱེས་པའི་རྩ་ཐམས་ཅད་ཀྱང་རིགས་དེ་དག་ཏུ་ཤེས་པར་བྱའོ། །བུད་མེད་རྣམས་ཀྱི་དུང་ཅན་མ་དེ་ཉིད་རྡུལ་གྱི་དུས་སུ་རྡུལ་འབབ་པའི་ཕྱིར་གཏུམ་མོ་ཞེས་བརྗོད་ལ་དེ་ཉིད་སྐྱེས་པའི་ཁུ་བ་འབབ་པའི་ཕྱིར་མཁའ་འགྲོ་གདོང་མའོ། །བུད་མེད་རྣམས་ཀྱི་རྡུལ་གྱི་དུས་སུ་རྡུལ་འགག་པའི་ཕྱིར་གཡུང་མོ་ཞེས་བརྗོད་དེ། བུད་མེད་དག་ལ་སྐྱེས་པས་རེག་པར་བྱ་བ་མ་ཡིན་པའི་ཕྱིར་རོ། །སྐྱེས་པའི་ཁུ་བ་བགྲོད་པའི་དུས་སུ་ཀུན་འདར་མ་ཞེས་བརྗོད་དེ། དེ་ལྟར་ཡང་། གཡོན་དུ་རྩ་ནི་རི་བོང་མཚན་མ་འབབ་སྟེ་ངེས་པར་དཀར་པོ་གཡས་སུ་དམར་པོ་ཉི་མའོ། །དབུས་སུ་དུས་མེའི་གཟུགས་ནི་རབ་ཏུ་འབབ་སྟེ་ཞེས་དང་། དབང་མདོར་བསྟན་ལས། ཟླ་བའི་ལམ་ནི་དྲི་ཆེན་རྩ། ཉི་མའི་དྲི་ཆུ་འབབ་པའོ། །སྐྱེ་འཆི་མཉམ་དང་འདོད་ཆགས་ལས། སྒྲ་གཅན་གཡོན་པས། ཞེས་དང་། ཡང་། དང་པོ་ལས། ཉི་ཟླ་སྒྲ་གཅན་དྲི་ཆེན་དང་། དྲི་ཆུ་ས་བོན་འབབ་པའི་ལམ། ཆུ་མེ་སྟོང་པས་དང་རླུང་། ཡེ་ཤེས་ཁམས་རྣམས་དག་གི་རིགས། ༼༤ན༧༽གང་རྣམས་ཉི་ཟླ་མན་ཅན་ནི། །ལུས་ངག་སེམས་ཀྱི་རྩ་དེ་རྣམས། །སྲོག་དང་ཐུར་སེལ་རིམ་པ་ཡིན། །དྲི་ཆུ་དྲི་ཆེན་ས་བོན་འབབ། །ཐབས་ཀྱི་སྐུ་ནི་ཟླ་བ་ལ། །ཤེས་རབ་གསུང་ནི་ཉིན་མོར་བྱེད། །ཤེས་རབ་སྐུ་ནི་དྲི་ཆེན་མ། །དྲི་ཆུ་འབབ་པ་གཙོ་བོའི་གསུང་། །སྟེང་འོག་སེམས་ཀྱི་རྩ་གཉིས་ནི། །ས་བོན་དབབ་མ་མུན་ཅན་དང་། །ཐབས་ཀྱི་ཐུགས་ནི་མུན་པ་ཅན། །ས་བོན་འབབ་མ་ཤེས་རབ་ཀྱི། །སྐུ་གསུང་ཐུགས་ཀྱི་རྣམ་དབྱེར་གྱིས། །སྟེང་འོག་རིགས་དྲུག་རྩ་རྣམས་སོ། །ཞེས་གསུངས་སོ། །དེ་ལྟར་སྲོག་དང་ཐུར་སེལ་གྱི་རྩ་འདི་རྣམས་ལྟེ་བའི་དབུས་སུ་འདུས་ནས་འཁོར་ལོ་གཞན་བཞི་ལ་ལུ་གུ་རྒྱུད་བཅིངས་པའི་ཚུལ་དུ་གནས་སོ། །རིགས་དྲུག་པོ་དེ་རྣམས་ལས་འཁོར་ལོ་དྲུག་ཏུ་འགྱུར་ཏེ། དེའང་གཙུག་ཏོར་ཏུ་རྩ་འདབ་བཞིའི་འཁོར་ལོ་ནམ་མཁའི་ཁམས་ཀྱི་རང་བཞིན། དཔྲལ་བ་ཟླ་རྐང་ཚེས་ཀྱི་རྩ་འདབ་བཅུ་དྲུག་ལ་གཉིས་སྟོང་པ་སྟེ་ཆུ་ཡི་ཁམས་སོ། །མགྲིན་པར་རྒྱུ་སྐར་གྱི་སོ་གཉིས་བཞི་སྟོང་པ་སྟེ་མེའི་ཁམས་སོ། །སྙིང་གར་གཟའི་རྩ་བརྒྱད་རླུང་གི་ཁམས་སོ། །ལྟེ་བ་ཆུ་ཚོད་ཀྱི་རྩ་འདབ་དྲུག་ཅུ་རྩ་བཞི་ལ་བཞི་སྟོང་པ་སྟེ་སའི་ཁམས་སོ། །སྟོང་པ་ཞེས་པ་རྩ་དེ་དག་ཏུ་ཉི་ཟླའི་རླུང་རྒྱུ་བ་མེད་པས་སོ། །བསྐྱེད་པའི་རིམ་པས་དམལ་བར་རླུང་དང་། སྙིང་གར་ཆུ་ཡང་གསུངས་སོ། །ལྟེ་བའི་ནང་དུ་དུས་སྦྱོར་གྱི་རྩ་བཅུ་གཉིས་དང་། དེའི་ནང་དུ་ཐུན་བརྒྱད་ཀྱི་རྩ་བརྒྱད་དང་། དེའི་ནང་དུ་ཐུན་བརྒྱད་ཀྱི་རྩ་བརྒྱད་དང་། དེའི་ནང་དུ་ཐུན་མཚམས་བཞིའི་རྩ་བཞིའོ། །བཞི་པོ་དེ་ཡེ་ཤེས་ཀྱི་ཁམས་སོ། །གསང་བའི་འཁོར་ལོ་དབྱངས་ཀྱི་རྩ་བཅུ་དྲུག་ཡེ་ཤེས་ཀྱི་ཁམས་སོ། །དེའི་ནང་དུ་ཕུང་པོ་ལྔ་དང་ཁམས་ལྔའི་རྩ་བཅུའོ། །དེའི་ནང་དུ་སྟོང་པ་དྲུག་གི་རྩ་དྲུག་སྟེ་གསང་བའི་རྩ་སུམ་ཅུ་སོ་གཉིས་སོ། །དེ་སྐད་དུ་དུས་འཁོར་ལས། གཙུག་ཏོར་ལས་ནི་ཆུ་གཏེར་སྙིང་གའི་བརྒྱད་དེ་སྤྱི་བོར་མི་བདག་མཁྲིན་པ་ལ་ཡང་སོ་ཡི་གྲངས། ལྟེ་བར་བརྒྱད་ནི་བརྒྱད་ཀྱིས་བསྒྱུར་བ་དག་སྟེ་ཉིས་འགྱུར་མི་བདག་གསང་བའི་དབུས་སུ་རབ་ཏུ་གྲགས། ཞེས་སོ། །གཙུག་ཏོར་གྱི་རྩ་ནི་དཔྲལ་བའི་འཁོར་ལོ་ནས་རྩ་གསུམ་གྱེས་པའི་དབུ་མ་སྤྱི་བོ་ནས་༼༤བ༨༽མདུན་དུ་འཁྱོགས་ཏེ་སྨིན་མཚམས་སུ་ཟུག་པ་རྩེ་མོ་བཞིར་གྱེས་པའོ། །གཡས་གཡོན་ནི་སྣར་ཟུག་གོ། །དེ་བཞིན་དཔྲལ་བ་དང་མགྲིན་པའི་འཁོར་ལོའི་ནང་དུ་རྩ་འདབ་བརྒྱད་བརྒྱད་རྣམས་དང་། རྡོ་རྗེ་ལ་རྩ་བཅུ་དྲུག་དང་ནོར་བུ་ལ་བཞི། ཕྲག་པ་དང་དཔུང་པའི་ཚིགས་གཉིས་དང་། དཔུང་པ་དང་ཉི་བའི་དཔུང་བ་དང་། ཉེ་བའི་དཔུང་པ་དང་ལག་པའི་དང་། དཔྱི་དང་བརླའི་དང་། བྱིན་པ་དང་བོལ་གྱི་ཚིགས་གཉིས་ཏེ་ལས་ཀྱི་འཁོར་ལོ་བཅུ་གཉིས་པོ་རྣམས་ལ་རྩ་འདབ་སུམ་ཅུ་སུམ་ཅུ། བྱ་བའི་འཁོར་ལོ་ལག་པ་དང་རྐང་པའི་སོར་མོའི་ཚིགས་དྲུག་ཅུ་རྣམས་ལ་རྩ་འདབ་དྲུག་དྲུག་གོ། །གཞན་ཡང་། སྐྲ་དང་བ་སྤུའི་མཐར་ཐུག་པར་རྩའི་ནུས་པ་རྒྱས་པར་རིག་པར་བྱའོ། །རྩ་དེ་རྣམས་བཅོམ་ལྡན་འདས་དུས་ཀྱི་འཁོར་ལོའི་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་དུ་འགྱུར་ཏེ། སྤྱི་གཙུག་ཏུ་རྩ་འདབ་བཞིས་ལུས་ངག་སེམས་དང་། ཡེ་ཤེས་དག་པའི་གཙོ་བོ་ཡབ་ཡུམ་དང་། སྙིང་གར་ནུས་མ་བཅུ་དང་། དཔྲལ་བར་བཅུ་དྲུག་གི་སངས་རྒྱས་ཡབ་ཡུམ་བརྒྱད་ལ་ཐབས་ཤེས་ཀྱི་དབྱེ་བས་བཅུ་དྲུག་དང་། མགྲིན་པར་ས་གཉིས་སྐྱེ་མཆེད་བཅུ་གཉིས་དང་། ཁྲོ་བོ་བཞི་ལ་ཐབས་ཤེས་ཀྱི་དབྱེ་བས་སུམ་ཅུ་སོ་གཉིས་རྣམས་ཏེ་ཐུགས་ཀྱི་འཁོར་ལོ་དང་། ལྟེ་བའི་ཕྱི་རོལ་ལ་ཆུ་ཚོད་ཀྱི་ལྷ་མོ་དྲུག་ཅུ་རྩ་བཞི་དང་། དེའི་ནང་ན་བརྒྱད་ཀྱིས་གསུང་གི་གཙོ་མོ་བརྒྱད་ནི་གསུང་གི་འཁོར་ལོ་དང་། ཚིགས་ཆེན་བཅུ་གཉིས་ལ་སྐུའི་འཁོར་ལོ་བཅུ་གཉིས་ཏེ་སྐུའི་དཀྱིལ་འཁོར་དང་། རྐང་པའི་སོར་མོའི་ཚིགས་བཅུ་ལ་ཀླུའི་རྒྱལ་པོ་བཅུ་དང་། ལག་པའི་སོར་མོ་རྣམས་ལ་རབ་ཏུ་གཏུམ་མོའི་འཁོར་ལོ་དང་། ཡང་ན་གསང་བའི་པདྨ་ལ་ཀླུ་དང་རབ་ཏུ་གཏུམ་མོ་སྟེ། སྐྲ་རྣམས་ཀྱིས་གྲུབ་པ་རྣམས་དང་། བ་སྤུ་[WP:76,70]མས་ཀྱིས་འབྱུང་པོའི་རིགས་བྱེ་བ་ཕྲག་ཕྱེད་དང་བཞི་སྟེ། དེ་ལྟར་ཁམས་དྲུག་དང་ལྡན་པའི་མིའི་ལུས་དཀྱིལ་འཁོར་གྱི་བདག་ཉིད་དུ་གནས་པས་སོ། །གཉིས་པ་གསུང་གི་སྦྱང་གཞི། རླུང་ནི་མངལ་དུ་རླུང་མུན་ཅན་མར་གནས་ཤིང་དེའི་སྟོབས་ཀྱིས་མངོན་ཤེས་འབྱུང་ལ། མངལ་ཆགས་༼༥ན༩༽པའི་ཟླ་བ་དྲུག་པ་སྲོག་སྐྱེ་བའི་དུས་ནི་ཉིན་ཞག་དེའི་དུས་སྦྱོར་ཀརྐ་ཊར་བབ་པ་ལ་སྐྱེ་སྟེ། ཕྱི་རོལ་ཏུ་ཉི་མ་ཀརྐ་ཊར་སྐྱེས་པ་དང་མཚུངས་སོ། །ཁྱིམ་གཞན་དུ་འབབ་པ་ལ་ནི་མ་ཡིན་ནོ། །ཕྱི་རོལ་ཏུ་ལོ་དང་ནང་དུ་ཉིན་ཞག་གནད་མཚུངས་པ་སྟེ། བསྡུས་རྒྱུད་ལས། སྲོག་ཟུང་དགུ་བརྒྱ་ཉིས་འགྱུར་དག་གིས་འཕོ་བར་འགྱུར་ཏེ་དུས་སྦྱོར་ཀརྐ་ཊ་ནས་མི་ཡི་དབང་། དུས་སྦྱོར་གང་ལ་ཉི་མ་གནས་པས་ཉིན་དང་མཚན་མོ་འཁོར་བ་དེ་ལ་དེ་ནི་རིག་པར་བྱ། ཞེས་སོ། །དེ་ནས་མངལ་ནས་སྐྱེ་བའི་ཚེ་དང་པོར་དབུགས་ལྔ་བཅུད་དྲུག་དང་བཞི་ཆ་ཅིག་དབུ་མ་ནས་འབབ་བོ། །དེ་ལྟར་སྲོག་སྐྱེས་ནས་ཇི་སྲིད་མ་བཅོས་ཀྱི་བར་དེ་སྲིད་རླུང་གི་ཁམས་འཕེལ་ལ། དེ་ནས་འཕེལ་བ་སྟོང་པས་དབུགས་ཕྱིར་འབྱུང་བ་ནི་འཆི་བཞུགས་པ་སྟེ་བདུད་ཀྱི་བུ་མོར་བརྗོད་དོ། །རླུང་བཅུ་རྩ་བཅུ་དང་ལྷན་དུ་ཆགས་ཀྱང་འགྲོ་འོང་བྱེད་པ་མེད་ལ། མངལ་ཆགས་ནས་ཟླ་བ་དྲུག་གིས་སྲོག་སྤྱི་བོ་ནས་ལྟེ་བའི་བར་དུ་རྒྱུ་བས་སྲོག་སྐྱེ་བ་ཞེས་བྱའོ། །དེ་ནས་ལུག་ལ་སོགས་མི་མཉམ་པའི་དུས་སྦྱོར་ལ་སྐྱེས་པ་ཡིན་ན་རྩ་གཡོན་པ་ནས་སྲོག་རླུང་ཟླ་བ། ཨ་ལིའི་རང་བཞིན་ཏེ། རྣམ་པར་ཤེས་པ་དང་། འདུ་བྱེད་དང་། ཚོར་བ་དང་། འདུ་ཤེས་དང་། གཟུགས་ཀྱི་ཕུང་པོ་རྣམས་ཀྱི་རང་བཞིན་གྱི་དཀྱིལ་འཁོར་ལྔ་རྣམས་བསྐྱེད་པའི་རིམ་པས་འབབ་སྟེ། དབང་མདོར་བསྟན་ལས། སྣ་བུག་གཡོན་པའི་རྩ་ལ་ནི། རྣམ་ཤེས་ལ་སོགས་དཀྱིལ་འཁོར་ལྔ། ཞེས་སོ། །གལ་ཏེ་གླང་ལ་སོགས་པ་མཉམ་པའི་དུས་སྦྱོར་ལ་སྐྱེས་པ་ཡིན་ན། །རྩ་གཡས་ནས་སྲོག་གི་རླུང་ཉི་མ་ཀཱ་ལིའི་བདག་ཉིད་ས་དང་ཆུ་དང་མེ་དང་རླུང་དང་ནམ་མཁའི་ཁམས་ཀྱི་རང་བཞིན་གྱི་དཀྱིལ་འཁོར་ལྔ་རྣམས་སྡུད་པའི་རིམ་པས་འབབ་པ་སྟེ། དེ་ཉིད་ལས། ས་ཆུ་མེ་རླུང་སྟོང་པ་ནི། སྡུད་པ་ཡི་ནི་འབབ་པའོ། །ཞེས་སོ། །དེ་ལྟར་སྲོག་ཅེས་པ་མཉམ་གནས་དང་གྱེན་དུ་རྒྱུ་བ་དང་། ཁྱབ་བྱེད་དང་། ཀླུ་དང་། རུ་སྦལ་དང་། རྩངས་པ་དང་། ལྷ་སྦྱིན་དང་། ནོར་ལས་རྒྱལ་དང་། སྲོག་དང་། ཐར་སེལ་གྱི་རླུང་རྣམས་ཏེ། སྲོག་དང་ཐུར་སེལ་མཉམ་གནས་པདྨ་ནར་༼༥བ༡༠༽གྱི་འདབ་མ་དག་ལ་རླུང་ནི་གྱེན་དུ་རྒྱུ་བ་དང་། ཁྱབ་བྱེད་ཀླུ་དང་རུ་སྦལ་དག་དང་རྩངས་པའི་རླུང་དང་ལྷ་སྦྱིན་དང་ནི་ནོར་ལས་རྒྱལ། ཞེས་སོ། །དེ་ལྟར་རླུང་བཅུ་དང་། རྩ་བཅུ་ནི་རྩ་སྟོང་ཕག་བདུན་ཅུ་རྩ་གཉིས་པོ་ཐམས་ཅད་ལ་ཁྱབ་པར་བྱ་བ་ཡིན་ནོ། །དེ་ལྟ་བུའི་རླུང་བཅས་པོ་དེ་དག་གི་བྱེད་ལས་ཀྱང་། ཟླ་བ་དང་ཉི་མའི་རང་བཞིན་སྲོག་གི་རླུང་གིས་སྟོབས་བྱེད་དོ། །ཐུར་སེར་གྱིས་རོ་དྲུག་གི་བཟའ་བ་དང་བཏུང་བ་འོག་ཏུ་འདྲེན་པར་བྱེད་དོ། །མཉམ་གནས་ཀྱིས་ནི་སྤུ་ལ་སོགས་པ་ཁམས་བདུན་རོ་མཉམ་པར་བྱེད་དོ། །གྱེན་རྒྱུས་ཟློས་གར་དང་སྨྲ་བ་དང་འགྲོ་བ་ལ་སོགས་པ་བྱེད་དོ། །ཁྱབ་བྱེད་ཀྱིས་ལུས་འཇིག་པ་སྟེ་ནད་བྱེད་དོ། །ཀླུས་སྒྲེགས་པར་བྱེད་དོ། །རུ་སྦལ་གྱིས་རྐང་པ་དང་ལག་པ་བསྐུམ་པ་བྱེད་དོ། །རྩརས་པས་ཁྲོ་བ་དང་གཡེང་བ་མཐའ་དག་བྱེད་དོ། །ལྷ་སྦྱིན་གྱིས་གླལ་བ་བྱེད་དོ། །ནོར་ལས་རྒྱལ་བས་ཤི་བའི་ལུས་མི་གཏོང་བར་བྱེད་པ་སྟེ། སྲོག་ནི་ཉི་མ་ཟླ་བའི་ལམ་ལ་གནས་པ་དག་ཀྱང་སྲོག་བྱེད་བཟའ་དང་བཏུང་བ་བཞུ་བ་མ་ལུས་པ། དེ་དག་ཐུར་སེལ་གྱིས་ནི་འོག་ཏུ་འདྲེན་ཏེ་མཐའ་དག་རོ་མཉམ་ལུས་ལ་མཉམ་གནས་དག་གིས་ཐོབ། ལུས་ལ་གྱེན་རྒྱུས་གཡོ་བར་བྱེད། དེ་ཁ་དང་ལག་པ་རྐང་པ་རྣམས་ཀྱིས་གླུ་དང་ཟློས་གར་བྱེད། ཁྱབ་བྱེད་ཀྱིས་ནི་ནད་དག་བྱེད་དེ་རང་བཞིན་ཡོན་ཏན་དབང་གིས་ལུས་ནི་འཇིག་པ་དེ་ལྟར་ཉིད། ཀླུ་ཡང་སྒྲེགས་པ་ཉིད་དེ་གསལ་བར་ལག་པ་རྐང་པ་བསྐུམ་པ་དག་ནི་རུ་སྦལ་རླུང་གིས་སོ། །ཁྲོ་དང་གཡེང་བ་མཐའ་དག་དེ་ནི་རྩངས་པའི་རླུང་དག་གིས་ཏེ་གླལ་བ་དག་ཀྱང་ལྷ་སྦྱིན་གྱིས། ལུས་ནི་ལྔ་པ་ཉིད་འགྱུར་གཏོང་བར་མི་བྱེད་མི་ཡི་བདག་པོ་རླུང་གཅིག་ནོར་ལ་རྒྱལ་བའོ། །དེ་ལྟར་སྙོག་ལ་སོགས་པའི་རླུང་རྣམས་ཐམས་ཅད་རང་བཞིན་གྱིས་གནས་ཡོན་ཏན་དག་ནི་སྟོང་མི་བྱེད། ཅེས་སོ། །ནང་དུ་རླུང་དེ་དག་ཀྱང་སྟེང་དུ་འཁོར་ལོ་ལྔའི་ལྟེ་བར་རྒྱུ་བའི་ཚུལ་ལ་ལྟེ་བའི་ཆུ་སྐྱེས་ལ་སའི་ཡོན་ཏན་ལྔ་སྟེ། དྲི་དང་། གཟུགས་དང་། རོ་དང་། རེག་བྱ་དང་། སྒྲའི་མཚན་ཉིད་དོ། །སྙིང་ག་ཆུ་སྐྱེས་ལ་ཆུའི་ཡོན་ཏན་བཞི་སྟེ། གཟུགས་དང་། རོ་དང་། རེག་བྱ་༼༦ན༡༡༽དང་། སྒྲའི་མཚན་ཉིད་རྣམས་སོ། །མགྲིན་པའི་ཆུ་སྐྱེས་ལ་མེའི་ཡོན་ཏན་གསུམ་སྟེ། རོ་དང་། རེག་བྱ་དང་། སྒྲའི་མཚན་ཉིད་རྣམས་སོ། །དཔྲལ་བའི་ཆུ་སྐྱེས་ལ་རླུང་གི་ཡོན་ཏན་གཉིས་ཏེ། རེག་བྱ་དང་། སྒྲའི་མཚན་ཉིད་དག་གོ། །གཙུག་ཏོར་གྱི་འདམ་སྐྱེས་ལ་སྟོང་པའི་ཡོན་ཏན་གཅིག་སྟེ་སྒྲ་ཙམ་མོ། །འདི་རྣམས་བཟུང་ནས་ཨ་ཝ་དྷཱུ་ཏཱི་ར་བ་ཏུ་འབབ་པ་ནི་ལྟེ་བའི་ས་སྙིང་གའི་ཆུ་ལ་ཐིམ། ཆུ་མགྲིན་པའི་མེ་ལ་ཐིམ། མེ་དཔྲལ་བའི་རླུང་ལ་ཐིམ། རླུང་གཙུག་ཏོར་གྱི་ནམ་མཁའ་ལ་ཐིམ་པ་སྡུད་པའི་རི་པ་པ་ཡིས་ཁམས་ཟད་པར་བྱ་བའི་ཕྱིར་རླུང་ཕྱི་རོལ་དུ་འབྱུང་བར་འགྱུར་ཏེ། ས་ལས་ཆུ་དང་རྩེ་མོ་ཅན་དང་རླུང་གི་རྡུལ་ཕྲན་ཕྱེ་ནས་ཆུའི་ཁམས་ལ་འཇུག་པར་བྱེད། ཆུ་ལས་ས་མེ་རླུང་ཕྱེ་རྩེ་མོ་ཅན་ལའོ་རྩེ་མོ་ཅན་ལས་ས་དང་ཆུ་དང་རླུང་ཕྱེ་སྟེ། རླུང་ལས་ས་དང་ཆུ་དང་རྩེ་མོ་ཅན་དག་བྱེ་ནས་ལས་ཀྱི་རླུང་ཡང་སྟོང་པ་ལ། ཞེས་སོ། །སྲོག་གི་རླུང་དེ་ནི་ལུས་ཀྱི་ཁམས་འཕེལ་བར་བྱ་བའི་ཕྱིར་ནང་དུ་འཇུག་པ་དག་བསྐྱེད་པའི་རིམ་པས་འཇུག་སྟེ། གཙུག་ཏོར་ནམ་མཁའ་ནས་ལྟེ་བ་སའི་བར་ལའོ། །ས་ཡི་རྟན་ནི་ཆུ་སྟེ་འབར་བར་བྱེད་པ་དག་ཀྱང་ཆུ་ཡི་རླུང་ནི་དག་པར་བྱེད་པ་དག་གིའོ། །རླུང་གིས་སྟོང་པར་རབ་ཏུ་འགྱུར་ཏེ་མི་ཡི་དབང་པོ་འབྱུང་བའི་རྟེན་དང་བརྟེན་པ་ཇི་ལྟ་བཞིན། ཞེས་སོ། །ཨ་ཝ་དྷཱུ་ཏཱི་ནས་རླུང་ཕྱིར་འགྲོ་བ་དང་ནང་དུ་འོང་བ་ལྟེ་བ་ནས་ལྟེ་བའི་དབུས་ཕུག་ནས་ཡིན་ཏེ། དབང་མདོར་བསྟན་ལས་ལྟེ་བ་དང་ནི་ལྟེ་བའི་དབུས། ཀུན་འདར་མ་ནི་གཤེགས་ཤིང་འབྱོན། ཞེས་སོ། །ལ་ལ་ནཱ་དང་ར་སཱ་ན་དག་ནི་གཡས་དང་གཡོན་པའི་འདབ་མ་ལ་རབ་ཏུ་རྒྱུའོ། །དེ་ལྟར་ལམ་གསུམ་པ་བཞི་བྱས་ནས་ལ་ལ་ནཱ་སྣ་བུག་གཡོན་པ་དང་། ར་སཱ་ན་སྣ་བུག་གཡས་པ་དང་། ཨ་ཝ་དྷཱུ་ཏཱི་ནི་ཅིག་ཅར་དུ་སྣ་བུག་གཉིས་ནས་འགྲོའོ། །ལྟེ་བའི་རྩ་འདབ་མ་དྲུག་ཅུ་རྩ་བཞི་ལས་བཞི་སྟོང་པ་ཡིན་པས་ལྷག་མ་དྲུག་ཅུ་ལ་དཀྱིལ་འཁོར་དྲུག་ཅུ་རྩ་རྣམས་རིམ་པ་བཞིན་འབབ་པ་ལ་གཡོན་གྱི་འདབ་མ་ལ་ལུག་དང་། འཁྲིག་པ་དང་། སེང་གེ་དང་། སྲང་དང་། ༼༦བ༡༢༽གཞུ་དང་། བུམ་པའི་བདག་ཉིད་རྣམས་ལ་རྣམ་ཤེས་ལ་སོགས་དཀྱིལ་འཁོར་ལྔའི་བདག་ཉིད་ལས་དཀྱིལ་འཁོར་སུམ་ཅུའོ། །གཡས་པའི་དུས་སྦྱོར་གྱི་འདབ་མ་རྣམས་ལ་ནི་གླང་དང་། ཀརྐ་ཊ་དང་། བུ་མོ་དང་། སྡིག་པ་དང་། ཆུ་སྲིན་དང་། ཉའི་བདག་ཉིད་རྣམས་ལས་ལ་སོགས་པའི་དཀྱིལ་འཁོར་ལྔའི་བདག་ཉིད་ལས་དཀྱིལ་འཁོར་སུམ་ཅུ་རྣམས་འབབ་བོ། །རེ་རེ་པདྨ་འདབ་མ་དག་ལ་རབ་ཏུ་འབབ་སྟེ་ནུབ་ཏུ་འཛིན་མ་དང་ནི་བྱང་དུ་ཆུ། ལྷོ་རུ་མེ་དང་ཤར་དུ་རླུང་ནི་རབ་ཏུ་འབབ་སྟེ་འདབ་མའི་དབུས་དག་ཏུ་ཡང་སྟོང་པའོ། །དབྱེ་བ་ལྔ་ཡིས་འཕོ་བར་འགྱུར་ཏེ་མཉམ་པར་རབ་ཏུ་འབབ་པ་དམན་པའི་དབུགས་ནི་དྲུག་ཅུའོ། །དེ་ལྟར་འཕོ་བའི་དབྱེ་བ་རྣམས་ནི་ཉིན་ཞག་སོ་སོའི་དུས་སུ་དུས་སྦྱོར་དབྱེ་བ་དག་གིས་འགྱུར། །ཞེས་སོ། །ལྟེ་བར་གཡས་སུ་གླང་ལ་སོགས་པའི་དུས་སྦྱོར་གྱི་རྩ་དང་པོ་ལ་རྩ་འདབ་ལྔའི་ནུབ་ནས་ས་རླུང་རྒྱུ་བ་དེའི་ཚེ་སྣ་བུག་གཡས་པའི་འོག་གི་ཆ་ལས་ས་རླུང་སེར་པོ་སོར་བཅུ་གཉིས་ཕྱིར་འགྲོ་ཞིང་ནང་གི་ལྟེ་བའི་འོག་ཏུ་སོར་བཞི་འགྲོའོ། །དེ་བཞིན་དུ་བྱར་གི་འདབ་མ་ནས་རྒྱུ་བའི་ཚེ་སྣ་བུག་གི་གཡོན་སྣ་རྒྱུད་ཀྱི་ཕྱོགས་ནས་ཆུ་རླུང་དཀར་པོ་སོར་བཅུ་གསུམ་དང་། འོག་ཏུ་སོར་གསུམ། ལྷོའི་འདབ་མ་ནས་སྣ་བུག་གི་གཡས་མཁུར་བའི་ཕྱོགས་ནས་མེ་རླུང་དམར་པོ་སོར་བཅུ་བཞི། འོག་ཏུ་སོར་གཉིས། ཤར་གྱི་འདབ་མ་ནས་སྣ་བུག་གི་སྟེང་གི་ཚལ་རླུང་གི་རླུང་ནག་པོ་སོར་བཅོ་ལྔ་དང་། འོག་ཏུ་སོར་གཅིག་འདབ་མ་དབུས་མ་ནས་སྣ་བུག་གི་དབུས་སུ་ནམ་མཁའི་རླུང་སྔོན་པོ་སོར་བཅུ་དྲུག་འགྲོ་ཞིང་། ནང་དུ་ལྟེ་བའི་པདྨ་ཉིད་ནས་ལྡོག་གེ། དེ་ལྟར་དཀྱིལ་འཁོར་ལྔ་པོ་རེ་རེ་ཞིང་དབྱུག་གུ་རེ་རེའི་ཚད་དུ་འབབ་ཅིང་། དེ་ལའང་བཅུ་གཅིག་བཞི་ཆས་དམན་པ་ནི་ངེས་པའོ། །དབང་མདོར་བསྟན་ལས། གང་ཡང་དྲུག་བརྒྱས་ལྷག་པ་ཡི། སྟོང་ཕྲག་ཉི་ཤུ་རྩ་ལྔ་སྟེ། གཡས་པ་དང་ནི་གཡོན་པའི་རྩར། དེ་ཡི་དམན་པ་དེ་རྣམས་འབབ། ཅེས་སོ། །དེ་བཞིན་དུ་གཡོན་པའི་རྩ་ལ་ལུག་ལ་སོགས་པའི་དུས་སྦྱོར་ལ་སྣ་བུག་གི་དབུས་སུ་སྟོང་༼༧ན༡༣༽པའི་དཀྱིལ་འཁོར་འབབ་པ་དེའི་ཚེ་ལྟེ་བའི་དཀྱིལ་འཁོར་ལ་འདབ་མའི་དབུས་སུ་འབབ་བོ། །དེ་ནས་སྟེང་དུ་རླུང་གི་དཀྱིལ་འཁོར་འབབ་པའི་ཚེ་འདབ་མའི་ཤར་དུའོ། །དེ་བཞིན་དུ་གཡས་སུ་མེའི་དཀྱིལ་འཁོར་རོ། །གཡོན་དུ་ཆུའི་དཀྱིལ་འཁོར་རོ། །འོག་གི་ཆ་ནུབ་ལ་སའི་དཀྱིལ་འཁོར་རོ། །ཡང་། རྩ་བར་ས་ཏེ་གཡོན་དུ་ཆུ་དང་གཡས་སུ་སྲེག་ཟ་དག་ནི་རབ་ཏུ་འབབ་སྟེ་སྟེང་དུ་རླུང་། གཉིས་ཀྱི་དབུས་ན་ནམ་མཁའ་དང་ནི་མཉམ་པ་རབ་ཏུ་འབབ་སྟེ་སྣ་བུག་དག་ལ་རིམ་པས་སོ། །འདི་དག་རྣམས་ནི་དབུགས་ཏེ་ནུས་པ་མཆོག་གི་གནས་དང་བཅུ་གཉིས་མཐའ་དང་ཆ་ཡི་མཐའ་རུ་འགྲོ། །ཞེས་སོ། །རླུང་དེ་རྣམས་ཀྱང་སྣ་བུག་སོ་སོ་དང་ལྟེ་བར་ནུབ་ཏུ་རྣམ་སྣང་ལ་སོགས་པ་སའི་ཁམས་པ་རྣམས་ཀྱི་ཤར་གྱི་རླུང་ཁམས་པ་རྣམས་དང་ཤར་གྱི་དོན་ཡོད་གྲུབ་པ་ལ་སོགས་པ་རྣམས་ཀྱིའང་། ནུབ་ཀྱིས་ཁམས་མ་རྣམས་ཕན་ཚུན་ཐབས་ཤེས་སུ་བྱེད་དེ། སའི་ཁམས་ཀྱི་བདག་ཉིད་ཀྱི་ལུས་ཀྱིས་རླུང་གི་ཁམས་ཀྱི་རང་བཞིན་གྱི་ཡུལ་རེག་བྱ་འཛིན་པའི་ཕྱིར་རོ། །དེས་ན་གཞན་གྱི་རིག་མ་ལ་འཁྱུད་པས་བྱ་བ་འགྲུབ་སྟེ། རང་ཉིད་ལ་རང་ཉིད་ཀྱི་བྱ་བ་མི་འགྲུབ་པའི་ཕྱིར་རོ། །གཡས་དང་གཡོན་དུ་མེ་དང་ཆུ། །ཕན་ཚུན་ཐབས་དང་ཤེས་རབ་སྟེ། །ཞེས་པའོ། །དབུ་མ་ནས་རྒྱུ་བའི་དབུགས་ཀྱི་གྲངས་ཇི་ཙམ་ཞེ་ན། སྤྱིར་འདི་ཁམས་དྲུག་པ་ཡེ་ཤེས་ཀྱི་ཆ་ཡིན་ཅིང་། དེ་ཡང་ཟླ་ཉི་སྒྲ་གཅན་གསུམ་གྱི་ལོངས་སྤྱོད་ཀྱི་བུ་ལོན་དུ་གྱུར་པ་ཡིན་པ་ལས་འདི་ཉི་མའི་ཡེ་ཤེས་ཆ་ཡིན་ཅིང་། དེ་ལ་རགས་པར་བརྩིས་ན་སུམ་ཅུ་ཆ། ཤིན་ཏུ་ཞིབ་པར་བརྩིས་ན་སུམ་ཅུ་སོ་ཕྱེད་དང་གསུམ་ན་ཆ་རེ་ཡིན་པ་ལ། འདིར་འབྲིང་དུ་བརྩིས་ནས་སོ་ཆ་སྟེ་དབུགས་རེའི་སུམ་ཅུ་སོ་གཉིས་ཆ་ཡེ་ཤེས་ཀྱི་རླུང་ཡིན་ལ། དེ་བསགས་པས་དཀྱིལ་འཁོར་རེ་རེ་དབུགས་བཅུ་གཅིག་བཞི་ཆ་ཡེ་ཤེས་ཀྱི་ཆ་ཡིན་པས། དེ་རྣམས་སུ་མ་རྒྱུས་པར་གཟུང་ནས་དུས་སྦྱོར་གཅིག་འཆར་བའི་སྔོན་མཚམས་སུ་ཁ་དོག་ལྗང་ཁུ་དབུགས་ཀྱི་བཞི་ཆ་དང་བཅས་པའི་ལྔ་བཅུ་རྩ་དྲུག་རྒྱུའོ། །སྲོག་ནི་ལུས་ལ་ལྷག་པ་གང་ཡིན་རབ་གསལ་གསལ་མཚམས་སུ་རིག་བྱེད་རྐང་ཆབ་ཀྱིས་༼༧བ༡༤༽དམན་དྲུག་ཅུ་སྟེ། ཞེས་གསུངས་སོ། །སའི་དཀྱིལ་འཁོར་གྱི་མཐར་འབབ་པའི་ཚེ་སའི་རླུང་དང་ཚད་མཚུངས་ཤིང་། ནམ་མཁའི་རླུང་གི་མཐར་འབབ་པའི་ཚེ་ནམ་མཁའི་རླུང་དང་མཚུངས་པ་ཡིན་ནོ། །གཞན་པ་ཆུ་དང་མེ་དང་རླུང་གི་དཀྱིལ་འཁོར་གྱི་མཐར་ནི་འབབ་པ་ཡོད་པ་མ་ཡིན་ནོ། །དེས་ན་ཞག་གཅིག་གི་དུས་སྦྱོར་བཅུ་གཉིས་ཀྱི་མཚམས་སུ་རྒྱུ་བ་རྣམས་བསྡོམས་ནས་དབུགས་འབྱུང་འཇུག་བདུན་ཅུ་རྩ་ལྔས་ལྷག་པའི་དྲུག་བརྒྱ་རྣམས་ཞག་གཅིག་ལ་འབབ་པའོ། །དེའི་ཕྱིར་སེམས་ཅན་ཐམས་ཅད་ཀྱི་ལུས་ལ་ཞག་གཅིག་གི་དབུགས་འབྱུང་འཇུག་དྲུག་བརྒྱ་རྣམས་ཀྱིས་ལྷག་པའི་སྟོང་ཕྲག་ཉི་ཤུ་རྩ་གཅིག་པོ་རྣམས་ལས། ཞག་གཅིག་གི་ཡེ་ཤེས་ཀྱི་རླུང་དྲུག་བརྒྱ་བདུན་ཅུ་རྩ་ལྔ་པོ་འདི་ཡིས་དམན་པའི་ལྷག་མ་གང་ཡིན་པ་དེ་རྣམས་གཡོན་པ་ལ་ལ་ནཱ་དད་གཡས་པ་ན་སཱ་ན་ཡི་རྩར་འབབ་བོ། །ཞག་རེ་རེའི་ཡེ་ཤེས་ཀྱི་རླུང་དྲུག་བརྒྱ་བདུན་ཅུ་རྩ་ལྔ་པོ་རྣམས་ལོ་བརྒྱའི་ཉིན་ཞག་སྟོང་ཕྲག་སུམ་ཅུ་རྩ་དྲུག་པོ་རྣམས་ཀྱིས་བསྒྱུར་བ་རྣམས་ལས་ཞག་གཅིག་གི་དབུགས་ཉི་ཁྲི་ཆིག་སྟོང་དྲུག་བརྒྱས་བགོས་པའི་ཐོབ་ནོར་སྟོང་ཕྲག་ཉི་ཤུ་རྩ་ལྔ་ནི་ཉིན་ཞག་གི་གྲངས་ཡིན་ལ། དེ་ལོ་གཅིག་གི་ཞག་སུམ་བརྒྱ་དྲུག་ཅུས་བགོས་པའི་ཐོབ་ནོར་གསུམ་ནི་ལོའི་གྲངས་ཡིན་ཅིང་། ལྷག་མ་བཞི་བཅུ་ཞེ་ལྔ་ནི་ཟླ་ཕྱེད་གསུམ་གྱི་ཞག་གྲངས་ཡིན་པས་དེ་ལྟ་ན་ལོ་བརྒྱའི་དབུ་མའི་རླུང་ཕྱོགས་གཅིག་ཏུ་བསྡོམས་ན་ཕྱོགས་ཏེ་ཟླ་ཕྱེད་གསུམ་དང་བཅས་པའི་ལོ་གསུམ་རྣམས་སོ། །ལོ་གསུམ་དང་བཅས་ཕྱོགས་གསུམ་ནི། །ལོ་བརྒྱ་ཡིས་ནི་དབུ་མར་འགྱུར། །ཞེས་སོ། །ས་ལ་སོགས་པ་སྡུད་པ་དང་། །ནམ་མཁའ་ལ་སོགས་པ་བསྐྱེད་པའི་རིམ་པས་འབབ་པའི་ཆུ་ཚོད་གཅིག་ལ་དབུགས་དུ་འབབ་ཙ་ན། ཆུ་ཚོད་གཅིག་ལ་དབུགས་འབྱུང་འཇུག་གཅིག་ཏུ་བྱས་པའི་དྲུག་ཅུ་དང་བཅས་པའི་སུམ་བརྒྱའི་དབུགས་འབབ་བོ། །དུས་སྦྱོར་གཅིག་ལ་དེ་ལྔས་བསྒྱུར་བས་དབུགས་བརྒྱ་ཕྲག་བཅོ་བརྒྱད་དེ། དེ་རྣམས་བསྡོམས་པས་ཆུ་ཚོད་ལྔར་འབབ་པའོ། །དེ་བཅུ་གཉིས་ཀྱིས་བསྒྱུར་བས་ཆུ་ཚོད་དྲུག་ཅུ་དབུགས་༼༨ན༡༥༽ཉི་ཁྲི་ཆིག་སྟོང་དྲུག་བརྒྱ་རྣམས་ཉིན་མཚན་གཅིག་ལ་འབབ་པའོ། །དེ་ནས། འོག་འཁོར་ལོ་གསུམ་གྱི་ཆུ་སྐྱེས་ལ་ཐུར་སེལ་རྒྱུ་བའི་ཚུལ་བཤད་པར་བྱ་སྟེ། འོག་ཏུ་ལྟེ་བའི་ཆུ་སྐྱེས་ལ་དུད་ཅན་མའི་ལུས་ཀྱི་ཁམས་འབབ་པ་ནི་སྙིང་སྟོབས་དང་རྡུལ་དང་མུན་པའི་དབྱེ་བས་ཡོན་ཏན་གསུམ་དང་། གསང་བའི་ཆུ་སྐྱེས་ལ་ངག་ཡོན་ཏན་གཉིས་དང་། རྡོ་རྗེ་ནོར་བུའི་ཆུ་སྐྱེས་ལ་སེམས་ཡོན་ཏན་གཅིག་གི་བདག་ཉིད་འབབ་པ་ནི་ཕྱི་རོལ་ཏུ་འབྱུང་བ་སྡུད་པའི་རང་བཞིན་ཅན་ནོ། །ཐུར་སེལ་གྱི་རླུང་དེ་ནི་ནང་དུ་འཇུག་པ་དག་སེམས་དང་ངག་དང་ལུས་སྐྱེ་བའི་རིམ་པས་འཇུག་པས་སྐྱེད་པའི་རང་བཞིན་ཅན་ནོ། །མདོར་བསྟན་ལས། ལྟེ་གསང་ནོར་བུའི་པདྨ་ལས། ལུས་ངག་སེམས་ནི་འབབ་པ་སྟེ། །གཤེགས་པ་དང་ནི་བྱོན་པ་ནི། །སྡུད་དང་སྐྱེད་པའི་གཟུགས་ཅན་མ། །ཞེས་སོ། །མདོར་ན། གཡོན་པར་ཟླ་བ་གནས་པ་གང་ཡིན་པ་དེ་ཤེས་རབ་ཡུམ་དང་བཅས་པའི་མི་བསྐྱོད་པ་ལ་སོགས་པའི་རང་བཞིན་རྣམ་ཤེས་ལ་སོགས་པའི་དཀྱིལ་འཁོར་གྱི་འཁོར་ལོ་དང་། གཡས་པར་ཡང་ཐབས་ཡབ་དང་བཅས་པའི་སྤྱན་མ་ལ་སོགས་པའི་རང་བཞིན་ས་ལ་སོགས་པའི་དཀྱིལ་འཁོར་གྱི་འཁོར་ལོ་སྟེ་དབུ་མ་ཨ་ཡིག་ཆོས་ཐམས་ཅད་ཀྱི་གཞིར་སྒྱུར་བའི་ཆོས་ཉིད་དང་། རོ་རྐྱང་དབྱངས་གསལ་གྱི་ཆོས་ཅན་དག་གི་རང་བཞིན་སྔགས་དང་ལྷའི་བདག་ཉིད་སྤྲོ་བ་དང་སྡུད་པའི་གཟུགས་ཅན་ལྷན་ཅིག་སྐྱེས་པའི་སེམས་ཅན་ཐམས་ཅད་ལ་གནས་པའོ། །གསུམ་པ་ཐུགས་ཀྱི་སྦྱང་གཞི་ཐིག་ལེ་ནི། ཁུ་བ་ལས་རྐང་དང་རུས་པ་དང་ཆུ་རྒྱུས་དང་། རྡུལ་ལས་པགས་པ་དང་ཁྲག་དང་ཤ་སྐྱེ་ཞིང་། མངལ་ནས་སྐྱེས་ནས་ཟླ་བ་གསུམ་ལོན་པ་ནས་བརྩམས་ཏེ་རྡུལ་ཤེས་རབ་ཀྱི་ཁམས་ལོ་བཅུ་གཉིས་དང་། ཁུ་བ་ཐབས་ཡེ་ཤེས་ཀྱི་ཁམས་ལོ་བཅུ་དྲུག་ཚུན་འཕེལ་ཞིང་སྨིན་པས་ཕྱི་རོལ་ཏུ་མི་འཛག་ལ། དེ་ནས་བུད་མེད་ཀྱི་ལོ་བཅུ་གཉིས་དང་། སྐྱེས་པའི་ལོ་བཅུ་དྲུག་ལ་ཁམས་ཕྱིར་འཕོ་བར་འགྱུར་བས་འཕེལ་བསྟོངས་པའོ། །དེ་ལྟར་ཁ་རྡུལ་མུན་ཅན་གསུམ་སྐུ་གསུང་ཐུགས་དང་། དེ་ལས་སྐྱེས་པའི་བཤང་གཅིག་ཆེན་གྱི་དངས་མ་གསུམ་བསྣན་པ་༼༨བ༡༦༽རིགས་དྲུག་དང་། མུན་ཅན་བཞག་པ་ལྔ་ནི་རིགས་ལྔ་སྟེ། འདུ་བྱེད་དོན་ཡོན་གྲུབ་པ་ཚོར་བ་དྲི་མེད་ནོར་བུའི་ཕྱག་སྟེ་འདུ་ཤེས་སྣང་བ་མཐའ་ཡས་སོ། །གཟུགས་ནི་འཁོར་ལོ་ཅན་ནོ་རི་བོང་ཅན་དང་སྟོབས་ཁྲག་གཅི་བ་བཤང་བ་རྣམ་པར་དག་པའོ། །ཞེས་གསུངས། དེ་དག་ལས་སྤྲུལ་སོགས་པ་བཅུར་གྱུར་པ་ནི་ས་བཅུ་སྟེ། སྤུ་དང་པགས་པ་ཤ་དང་ཁྲག་དང་རོ་དང་བཅས་པ་དག་དང་དེ་བཞིན་རུས་པ་དང་ནི་རྐང་དང་རྩ། དེ་དག་རྣམས་ལ་སྲོག་རྩོལ་རླུང་སྟེ་ཀུན་ནས་རླུང་གི་དབུས་སུ་ཉི་མ་ཟླ་བའི་བགྲོད་པའོ། །ཞེས་དང་། སྤུ་ལ་སོགས་པ་ཟླ་བའི་མཐར་ནི་མཐའ་དག་ལུས་ལ་གནས་རྣམས་གང་ཞིག་ས་བཅུར་གསུངས་པ་རྣམས། ཞེས་སོ། །ཡང་། དེ་དག་ཁམས་སུམ་ཅུ་རྩ་དྲུག་ཏུ་གྱུར་པ་རིགས་སུམ་ཅུ་རྩ་དྲུག་སྟེ། བཤང་བ་གཅི་བ་དང་ནི་ཁྲག་དང་ཤ་དང་བཅས་པས་ལྷ་མོ་རྣམས་ནི་བཞི་པོར་འགྱུར་བ་སྟེ། རྣ་བ་སྣ་དང་མིག་དང་ལྕེ་དང་བཤད་ལམ་བྷ་ག་སྒྲ་ཡི་རྡོ་རྗེ་མ་ལ་སོགས་པ་དྲུག །རྣག་དང་བད་ཀན་དང་ནི་ཤིག་དང་སྲིན་བུ་ཆུ་སེར་ཞག་དང་བ་སྤུ་སྐྲ་དང་བརྒྱད་པོ་ཡང་། རྒྱུ་མ་མཁྲིས་པ་རུས་པ་རྐང་དང་སྣ་ཚོགས་ལུས་ལ་གནས་པ་མཆིན་པ་དང་ནི་གློ་བ་དང་། རྩ་དང་་་་་་་་་་་་་་དང་སྙིང་དང་ཚིལ་བུ་ལྡན་པ་བཅུ་རུ་འགྱུར་རོ་མི་ཡི་བདག །རྣ་བ་དང་ནི་སྣ་དང་མིག་དང་ཁ་དང་བཤང་ལམ་དབུགས་དང་བྷ་ག་དང་མཆན་ཁུང་སོགས། ལུས་ཀྱི་ཡན་ལག་བརྒྱད་ལ་གནས་པའི་དྲི་མ་མི་ཡི་བདག་པོ་ལྷ་མིན་མོ་རྣམས་བརྒྱད། ཅེས་སོ། །ཡང་ན། ཁམས་དེ་རྣམས་ཀྱི་སྟེངས་སུ་ཁམས་དྲུག་ཅུ་རྩ་བཞི་བསྣན་པ་དག་པས་རིགས་བརྒྱ་སྟེ། དེ་ཉིད་ལས། སེ་ན་མོ་དང་བཅས་སོ་དང་ཡན་ལག་བཅུ་གཉིས་ཐོད་པ་རྣལ་འབྱོར་མ་རྣམས་བརྒྱད་པ་བརྒྱད་དུ་འགྱུར། ཞེས་སོ། །དེ་ལྟར་ཁམས་དྲུག་པ་དེ་ཉིད་ལ་རྟེན་གྱི་སྒོ་ནས་ས་བཅུ་གཉིས་ལ་དབྱེ་བས་ཞིང་ལ་སོགས་པ་སུམ་ཅུ་རྩ་དྲུག་ཏུ་འགྱུར་རོ། །དེ་ལྟར་བཤད་པའི་ཁམས་དེ་དག་ཀྱང་མདོར་བསྡུ་ན་ཤ་ཆེན་གྱི་དངས་མ་ལུས་ཀྱི་ཐིག་ལེ་སད་པའི་གནས་སྐབས་བསྐྱེད་པ། བཤང་གཅིའི་དངས་མ་ངག་གི་ཐིག་ལེ་རྨི་ལམ་གྱི་གནས་སྐབས་བསྐྱེད་པ། ཁུ་ཁྲག་གི་དངས་མ་༼༩ན༡༧༽ཡིད་ཀྱི་ཐིག་ལེ་གཉིད་ལོག་པའི་གནས་སྐབས་བསྐྱེད་པ། དབང་པོ་ལྔའི་དངས་མ་ཡེ་ཤེས་ཀྱི་ཐིག་ལེ་བཞི་པའི་གནས་སྐབས་བསྐྱེད་པ་སྟེ། བཞི་པའི་གནས་སྐབས་ཤིན་ཏུ་གཉིད་ལོག་ངེས་པར་སླར་ཡང་གཞན་དང་ལུས་ཀྱི་དབྱེ་བས་སད་པ་སྟེ། དེ་ལྟར་ལུས་ཀྱི་རབ་ཏུ་དབྱེ་བས་སྲོག་ཆགས་རྣམས་ཀྱི་ལུས་ལ་ཡིད་ནི་རྣམ་པ་བཞི་རུ་གནས། ཞེས་སོ། །བཞི་པའི་གནས་སྐབས་ནི་སྙོམས་འཇུག་གོ། །དེ་ལྟ་བུའི་བྱང་ཆུབ་ཀྱི་སེམས་དཀར་ཆ་ནི་ཡང་ངོའི་ཚེས་གཅིག་ལ་གཙུག་ཏོར་གྱི་རྩེ་དང་། ཚེས་ལྔས་དཔྲལ་བ། སྙིང་གར་ཚེས་བཅུ་དང་། གསང་བས་ཚེས་བཅོ་ལྔ་སྟེ། ཆ་བཅུ་དྲུག་པ་རྡོ་རྗེའི་རྩེ་མོར་གནས་ལ། ནག་པོའི་ཚེས་གཅིག་འོངས་པ་ན་དེ་འཕོའོ། །དེ་བཞིན་དུ་རྡུལ་གྱི་གཟུགས་ཉི་མའི་ཆ་དང་པོ་ནོར་བུའི་རྩེ་མོ་ལའོ། །གསང་བར་ཚེས་ལྔ་དང་། སྙིང་གར་ཚེས་བཅུ་དང་། དཔྲལ་བར་གནམ་སྟོང་། གཙུག་ཏོར་གྱི་པདྨར་སོན་པ་བཅུ་དྲུག་སྟེ་དེ་ནས་འཕོའོ། །གསུམ་པ། ཞར་བྱུང་འཆི་ལྟས་བཤད་པ་ནི། སྟེང་དུ་ཟླ་བའི་རྩ་འགགས་ན་འོག་ཏུ་བཤད་པའི་རྩ་འགག །དེ་བཞིན་ཉི་མ་འགགས་ན་གཅི་བ་དང་། སྒྲ་གཅན་འགགས་ན་ཁུ་བའི་རྩ་འགག་ལ། སྟེང་གི་གསུམ་གྲོལ་ན་འོག་གི་གསུམ་གྲོལ་བར་འགྱུར་རོ། །དེ་ལས་གྱེས་པའི་རྩ་སྟོང་ཕྲག་བདུན་ཅུ་རྩ་གཉིས་མ་མཉེས་པས་ནད་དང་། ཡན་ལག་ཉམས་པ་དང་སྨྱོ་འབོག་དང་འཆི་བྱེད་དེ། གཙུག་ཏོར་དང་དཔྲལ་བའི་རྩ་ཉི་ཤུས་བད་ཀན་དང་། མགྲིན་པ་དང་སྙིང་གའི་བཞི་བཅུས་མཁྲིས་པ་དང་། ལྟེ་བ་རང་གསང་བའི་ཕྱི་སྐོར་བཅུ་དྲུག་སྟེ་བརྒྱད་ཅུས་རླུང་། གསང་བའི་ནང་སྐོར་བཅུ་དྲུག་གིས་འདུས་པའི་ཁམས་འཁྲུག་པར་བྱེད་པས་སོ། །དེ་དག་ནི་རྩ་ལས་གྱུར་པའི་འཆི་ལྟས་ཡིན་ལ། རླུང་གིས་རྒྱུ་བས་བྱེད་པ་ནི་འདི་ལྟར། གླང་ལ་སོགས་པ་མཉམ་པའི་དུས་སྦྱོར་ལ་སྐྱེས་པ་རྣམས་ཀྱི་གཡས་ནས་ཉིན་ཞག་ལྔ་བར་མ་ཆད་པར་རླུང་འབབ་ན་ཉི་མའི་འཆི་ལྟས་སུ་འགྱུར་ཏེ། དབང་མདོར་བསྟན་ལས། གཡོན་པ་འམ་ནི་གཡས་པ་ལས། ཉིན་མཚན་ལྔ་དང་དེ་བཞིན་གཅིག །རླུང་ནི་རབ་ཏུ་འབབ་པ་ན། དེ་ལས་ལོ་གསུམ་གྱིས་འཆི་འགྱུར། ༼༩བ༡༨༽ཞེས་དང་། དེ་བཞིན་དུ་ཁྱིམ་ལྔའི་བར་དུ་འཆི་ཞག་ལྔ་ལྔ་འཕེལ་བའི་བཅུས་གཉིས་དང་བཅོ་ལྔས་ལོ་གཅིག་དང་། ཉི་ཤུས་ཟླ་བ་དྲུག་དང་། ཉེར་ལྔས་ཟླ་བ་གསུམ་དང་། ཞག་རེ་འཕེལ་བའི་ཉེར་དྲུག་གིས་ཟླ་བ་གཉིས་དང་། ཉེར་བདུན་གྱིས་ཟླ་བ་གཅིག་དང་། དེ་ནས་འཆི་ཞག་ཁོ་ན་བར་མ་ཆད་དུ་རྒྱུ་བས་ཉིན་ཞག་བཅོ་ལྔ་དང་། བཅུ་དང་ལྔ་དང་གསུམ་ནི་འཆི་ཞག་སུམ་ཅུ་རྩ་གསུམ་མོ། །གཡས་པ་ཉི་མའི་འཆི་ལྟས་ལ། །ལྔ་དང་ཕྱོགས་ཚེས་ཉི་ཤུ་དང་། །དེ་བཞིན་གཅིག་ལྷག་གཞན་རིམ་པས། །ཉིན་ཞག་སུམ་ཅུ་གསུམ་རྒྱུ་བས། །གསུམ་གཉིས་གཅིག་ལོ་ཟླ་བ་ནི། །དྲུག་གསུམ་ཟུང་ཟླ་ཉིན་ཞག་ཚེས། །ཕྱོགས་ལྔ་ཡོན་ཏན་གཉིས་གཅིག་གིས། །ལུས་ཅན་རྣམས་ཀྱི་ཚེ་འགྲོའོ། །ཞེས་སོ། །དེ་ལ་ཉི་མའི་ལོ་གསུམ་ལ་ཁྱིམ་གྱི་འདབ་མ་དང་པོར་རྒྱུ་བ་དང་བཅས་པའི་ཉིན་ཞག་སུམ་བརྒྱ་དང་སུམ་ཅུ་ལྔས་འདོར་ཏེ། དེ་ནས་འདབ་མ་དང་པོ་བསྐམས་ནས་རྩ་འདབ་དེ་ལ་རླུང་རྒྱུ་བ་མེད་དེ། དེ་བཞིན་དུ་གཉིས་པ་ལ་སུམ་བརྒྱ་བཞི་བཅུ་ཞེ་ལྔ་རྒྱུ་བའོ། །གསུམ་པ་ལ་བརྒྱ་བདུན་ཅུའོ། །བཞི་པ་ལ་བརྒྱད་ཅུ་རྩ་གཉིས་དང་། །ལྔ་པ་ལ་ལྔ་བཅུ་རྩ་བདུན་དང་། །དྲུག་པ་ལ་ཉེར་བརྒྱད་རྒྱུས་ཏེ། དེ་ནི་རྒྱུ་བ་དང་། འཚོ་བ་ཐུན་མོང་བའི་རྣམ་གཞག་གོ། །དུས་དེ་ཡན་ཆད་ལ་འཆི་བ་བླུ་བའི་ཐབས་ཀྱིས་བཟློག་པར་ནུས་ཀྱི། དེ་ལས་འདས་ནམ་ཡིན་ཏེ། ཁྱིམ་བདུན་པ་ལ་འཆི་ལྟས་ཞུགས་པ་ནི་རྫོགས་པའི་དུས་ཏེ་ཁུ་བའི་ཁམས་ལ་འཆི་ལྟས་ཀྱི་རླུང་རབ་ཏུ་ཞུགས་པའི་ཕྱིར་རོ། །རྩ་འདབ་བརྒྱད་པ་ནས་ནི་འཆི་བ་ཁོ་ནས་རྒྱུ་བའོ། །དེ་ཡང་བདུན་པ་ལ་ཉིན་ཞག་ཉེར་བདུན་དང་། བརྒྱད་པ་ལ་བཅོ་ལྔ་དང་། དགུ་པ་ལ་བཅུ་དང་། བཅུ་པ་ལ་ལྔ་དང་། བཅུ་གཅིག་པ་ལ་གསུམ་མོ། །དེ་རྣམས་ཀྱིས་གཡས་ཀྱི་རྩ་ཟད་པར་བྱས་ནས་རྩ་བ་ཆུ་གཉིས་པ་ལ་ཉིན་ཞག་གཉིས་རྒྱུ་བ་ནི་ཁུ་བའི་ཁམས་ཟད་པའི་སླད་དུ་སྣ་བུག་གཡོན་པ་ནས་འབབ་སྟེ། གཡས་པའི་རྩ་ལ་སྲོག་རྒྱུ་བ་མེད་པའི་ཕྱིར་རོ། །དེ་ནས་དབུས་མ་ནས་ཞག་གཅིག་བབ་ནས་རྣལ་འབྱོར་པ་མ་ཡིན་པ་རྣམས་ལས་ཀྱི་དབང་གིས་འགྲོ་བ་གཞན་དུ་འཕོ་སྟེ། སྔོན་དུ་ཉི་མའི་ལོ་༼༡༠ན༡༩༽གསུམ་དག་གིས་ཉིན་ཞག་ཚོགས་ནི་མདའ་དང་མེ་དང་འཇིག་རྟེན་འདོར་བར་བྱེད། དེ་ནས་རྒྱུ་བ་དང་བཅས་མདའ་དུས་རྩེ་མོ་ཅན་དང་མཁའ་རི་ཟླ་བ་དག་ནི་གསུམ་པ་ལའོ། །མིག་སྤྲུལ་རི་བོ་མདའ་དང་ནོར་དང་ལག་པ་གཞན་ཏེ་བདུན་པ་ལ་ནི་རྒྱུ་བ་དག་ཀྱང་ངོ་། །ད་ེནས་ཚེས་ལ་སོགས་པའི་ཉིན་ཞག་ཚོགས་པ་དག་ཀྱང་གང་ཞིག་ལྟེ་བ་ཇི་སྲིད་ཉིད། ཅེས་སོ། །དེ་བཞིན་དུ་ལུག་ལ་སོགས་མི་མཉམ་པའི་དུས་སྦྱོར་ལས་སྐྱེས་པ་རྣམས་ལ་གཡོན་པ་ཟླ་བའི་འཆི་ལྟས་སུ་འགྱུར་ཏེ། དེ་ཡང་གཡོན་གྱི་འདབ་མ་དང་པོ་ནས་ཉིན་ཞག་གཅིག་བར་མ་ཆད་དུ་བབས་ན་ལོ་གསུམ་ན་འཆི་སྟེ། དེ་ཡང་ཟླ་བ་དང་པོ་ལ་གཅིག་དང་། དེ་བཞིན་དུ་ཟླ་བ་གསུམ་པ་ལ་གཉིས་པ་དང་། ལྔ་པ་ལ་གསུམ་པ་བར་མ་ཆད་དུ་རྒྱུས་ཤིང་། གཉིས་པ་དང་བཞི་པ་དང་རླུང་པ་ལ་མི་རྒྱུ་སྟེ། དེ་ལྟར་ཟླ་བ་དྲུག་གིས་ཁྱིམ་གྱི་རྩ་འདབ་དང་པོ་དོར་ནས་རྩ་དེས་སྲོག་རྒྱུ་བ་མེད་ཅིང་ཟླ་བ་སུམ་ཅུ་ན་འཆིའོ། །དེ་བཞིན་དུ་ཟླ་བ་རེ་ལ་འཆི་ཞག་རེ་རེ་འཕེལ་བའི་ཉིན་ཞག་དྲུག་གིས་འདབ་མ་གཉིས་པ་དོར་ནས་ཟླ་བ་ཉེར་བདུན་ན་འཆིའོ། །དེ་ལྟར་ཉིན་ཞག་དགུས་འདབ་མ་གསུམ་པ་དོར་ནས་ཟླ་བ་ཉེར་བཞི་ནའོ། །ཉིན་ཞག་བཅུ་གཉིས་ཀྱིས་བཞི་པ་དོར་ནས་ཉེར་གཅིག་ནའོ། །བཅོ་ལྔས་ལྔ་པ་དོར་ཏེ་བཅོ་བརྒྱད་ནའོ། །བཅོ་བརྒྱད་ཀྱིས་དྲུག་པ་དོར་ཏེ་ཟླ། ་་་་བཅོ་ལྔ་ནའོ། །ཉེར་གཅིག་གིས་བདུན་པ་དོར་ཏེ་བཅུ་གཉིས་ནའོ། །ཉེར་བཞིས་བརྒྱད་པ་འདོར་ཏེ་དགུ་ནའོ། །ཉེར་བདུན་གྱིས་དགུ་པ་དོར་ཏེ་དྲུག་ནའོ། །སུམ་ཅུས་བཅུ་པ་དོར་ཏེ་གསུམ་ནའོ། །དེ་ནས་སྔ་མ་བཞིན་དུ་ཉིན་ཞག་རེ་རེ་འཕེལ་བས་ཞག་སུམ་ཅུ་རྩ་གཅིག་དང་། རྩ་གཉིས་དང་། རྩ་གསུམ་རྣམས་ཀྱིས་ཁྱིམ་གྱི་རྩ་འདབ་མ་བཅུ་གཅིག་པ་དོར་ནས་གཡོན་གྱི་རྩལ་སྲོག་མི་རྒྱུ་བས་ལུས་ཀྱི་ཁམས་དང་སྙིང་སྟོབས་ཟད་དོ། །དེ་ནས་རྩ་འདབ་དང་པོའི་དུས་ཀྱི་ཟླ་བ་གཉིས་པ་བཞི་པ་དྲུག་པ་གསུམ་ལ་མ་རྒྱུས་པར་གཟུང་བའི་ཞག་གསུམ་པོ་དེ་ལས་རྩ་འདབ་བཅུ་གཉིས་པ་ནས་ཞག་གཉིས་གཡས་ཀྱི་རྩ་ལ་ངག་གི་ཁམས་དང་རྡུལ་ཟད་པའི་དོན་དུ་༼༡༠བ༢༠༽འབབ་བོ། །དེ་ནས་ཉིན་ཞག་གཅིག་དབུ་མའི་རྩ་ནས་ཡིད་ཀྱི་ཁམས་དང་མུན་པའི་ཁམས་ཟད་པའི་ཕྱིར་འབབ་སྟེ་རྣམ་པར་ཤེས་པ་ལས་ཀྱི་དབང་གིས་འགྲོ་བ་གཞན་དུ་འཕོའོ། །དེ་སྐད་དུ་ཡང་དབང་མདོར་བསྟན་ལས། རྩ་བ་ནས་གཅིག་ལྷག་པ་ཡིས། གཡོན་པའི་ཟླ་བའི་རྒྱུ་བར་འགྱུར། ཞེས་སོ། །བསྡུས་རྒྱུད་ལས་ཀྱང་། སྲོག་ནི་གལ་ཏེ་རྩ་གཅིག་ཉིན་ལ་ཉིན་དང་མཚན་མ་འབབ་ན་འཚོ་བ་དག་ནི་དུས་ཀྱི་ལོ། གལ་ཏེ་ཕྱོགས་ཅིག་རྣམ་པར་མ་ཆད་འབབ་ན་མི་རྣམས་ཀྱི་ནི་འཚོ་བ་ཕྱེད་དང་བཅས་པའི་ལོ། ཟླ་བ་གཅིག་ཏུ་རྣམ་པར་མ་ཆད་འབབ་ན་མི་ཡི་བདག་པོ་འཚོ་བ་དག་ཀྱང་ཟླ་བ་གསུམ། དེ་ལྟར་རྣལ་འབྱོར་པས་ནི་རང་ལུས་དག་ལ་ཟླ་བགྲོང་འཆི་བ་དུས་ཀྱི་འཁོར་ལོར་ཤེས་པར་བྱ། ཞེས་སོ། །དེ་ལྟར་ཉི་མ་དང་ཟླ་བའི་འཆི་ལྟས་ལ་དིམ་པ་བཞིན་ཉི་མ་ལྔ་དང་། ཟླ་བ་ལ་ཞག་གསུམ་རྣམས་ཀྱིས་འཆི་བའི་ལྟས་ཀྱི་ཞག་འཕེལ་ཞིང་། ཉི་མས་སུམ་བརྒྱ་སུམ་ཅུ་རྩ་ལྔ་ལ་སོགས་པ་ཞག་དང་། ཟླ་བ་ལ་ཞག་སུམ་ཅུ་པ་གསུམ་ལ་སོགས་པས་འཚོ་བ་འགྲིབ་བོ། །མཉམ་པའི་དུས་སྦྱོར་ལས་སྐྱེས་པ་དུས་མ་ཡིན་པ་འཆི་བ་མེད་པ་ཅིག་ལ་ལོ་དགུ་བཅུ་རྩ་དྲུག་དང་ཕྱེད་དང་བཅས་པའི་ཟླ་བ་བཅུའི་བར་དུ་འཆི་ལྟས་དབུགས་ཆུ་སྲང་ཆུ་ཚོད་ཀྱི་འཁོར་ལོར་རྒྱུས་པས་ཉིན་ཞག་ཏུ་སློངས་ཏེ་དེ་ནས་གཟུང་ནས་ཉིན་ཞག་ཏུ་རྒྱུ་བ་ལ་དང་པོར་སྣ་བུག་གཡས་ནས་འཆི་ལྟས་ཉིན་ཞག་གཉིས་རྒྱུའོ། །དེ་ནས་གཉིས་འཆི་ལྟས་མེད་པར་རང་བཞིན་པར་རྒྱུའོ། །དེ་ནས་སྣ་བུག་གཡོན་ལ་འཆི་ལྟས་ཞག་གཅིག་རྒྱུའོ། །དེ་ནས་གཡས་ལ་བཞི་རྒྱུའོ། །བཞི་རང་བཞིན་དུའོ། །གཡོན་ལ་གསུམ་རྒྱུའོ། །གསུམ་རང་བཞིན་དུའོ། །གཡས་ལ་དྲུག་རྒྱུའོ། །དྲུག་རང་བཞིན་དུ་སྟེ་དེ་ལྟར་གཉིས་དང་བཞི་དང་དྲུག་སྟེ་སྡེ་ཚན་གསུམ་གྱིས་གཡས་ཀྱི་གླང་ལ་སོགས་པ་མཉམ་པའི་དུས་སྦྱོར་དྲུག་པོ་རྣམས་ལ་སའི་དཀྱིལ་འཁོར་རབ་ཏུ་འབབ་པ་སྲོག་གི་རླུང་གིས་འདོར་རོ། །དེ་ནས་གཡོན་ལ་ལྔ་རྒྱུའོ། །ལྔ་རང་བཞིན་དུ་རྒྱུའོ། །དེ་༼༡༡ན༢༡༽ལྟར་གཅིག་དང་གསུམ་དང་ལྔས་མི་མཉམ་པའི་སྡེ་ཚན་གསུམ་གྱིས་ལུག་ལ་སོགས་པ་མི་མཉམ་པའི་འདབ་མ་དྲུག་པོ་རྣམས་ལ་སྟོང་པའི་དཀྱིལ་འཁོར་རབ་ཏུ་འབབ་པ་སྲོག་གི་རླུང་གིས་འདོར་རོ། །དེ་བཞིན་དུ་འཆི་ལྟས་ཀྱི་ཞག་གྲངས་ཇི་ཙམ་རྒྱུས་པ་དེ་བཞིན་དུ་རང་བཞིན་པ་ཡང་རྒྱུ་བར་འོག་མ་རྣམས་ལའང་ཤེས་པར་བྱའོ། །དེ་བཞིན་དུ་གཡས་ལ་བརྒྱད་དང་། བཅུ་དང་། བཅུ་གཉིས་ཀྱིས་ཆུའི་དཀྱིལ་འཁོར་འདོར་རོ། །གཡོན་ལ་བདུན་དང་དགུ་དང་བཅུ་གཅིག་གིས་རླུང་གི་དཀྱིལ་འཁོར་འདོར་རོ། །གཡས་ལ་བཅུ་བཞི་དང་བཅུ་དྲུག་དང་བཅོ་བརྒྱད་ཀྱིས་མེའི་དཀྱིལ་འཁོར་འདོར་རོ། །གཡོན་ལ་བཅུ་གསུམ་དང་བཅོ་ལྔ་དང་བཅུ་བདུན་གྱིས་མེའི་དཀྱིལ་འཁོར་འདོར་རོ། །གཡས་ལ་ཉི་ཤུ་དང་ཉེར་གཉིས་དང་ཉེར་བཞིས་རླུང་གི་དཀྱིལ་འཁོར་འདོར་རོ། །གཡོན་ལ་བཅུ་དགུ་དང་ཉེར་གཅིག་དང་ཉེར་གསུམ་གྱིས་ཆུའི་དཀྱིལ་འཁོར་འདོར་རོ། །གཡས་ལ་ཉེར་དྲུག་དང་ཉེར་བརྒྱད་དང་སུམ་ཅུས་ནམ་མཁའི་དཀྱིལ་འཁོར་འདོར་རོ། །གཡོན་ལ་ཉེར་ལྔ་དང་ཉེར་བདུན་དང་ཉེར་དགུས་སའི་དཀྱིལ་འཁོར་འདོར་ཏེ། དེ་ལྟར་མི་མཉམ་པ་དང་མཉམ་པའི་རྒྱུ་བའི་ཉིན་ཞག་སུམ་ཅུ་དང་འཕོ་བའི་ཉིན་ཞག་སུམ་ཅུ་ཡན་ཆད་ཀྱི་དུས་སྦྱོར་བཅུ་གཉིས་ཀྱི་རྩའི་དཀྱིལ་འཁོར་རྣམས་ལ་དཀྱིལ་འཁོར་ལྔ་འདོར་རོ། །དེ་ནས་གཡོན་པའི་རྩ་མི་མཉམ་པའི་འདབ་མ་རྣམས་ལ་འཆི་ལྟས་སོ་གཅིག་རྒྱུ་ཞིང་དེ་ནས་རང་བཞིན་སོ་གཅིག་རྒྱུ་སྟེ། དེས་བད་ཀན་གྱི་རྩ་སྙིང་སྟོབས་ཀྱི་ཁམས་ཟད་དོ། །དེ་ནས་གཡས་ལ་འཆི་ལྟས་སོ་གཉིས་དང་རང་བཞིན་པ་སོ་གཉིས་ཀྱིས་མཁྲིས་པའི་རྩ་རྡུལ་གྱི་ཁམས་ཟད་དོ། །དེ་ནས་གཡོན་ལ་འཆི་ལྟས་སོ་གསུམ་དང་རང་བཞིན་པ་སོ་གསུམ་གྱིས་རླུང་གི་རྩ་མུན་པའི་ཁམས་ཟད་དེ་ལོ་གསུམ་ཕྱོགས་གསུམ་དུ་ཞག་གསུམ་གྱིས་དམན་པ་སོང་ངོ་། །དེ་ནས་ལོ་གསུམ་ཕྱོགས་གསུམ་གྱི་ཞག་ལ་སུམ་ཅུ་སོ་ཕྱེད་དང་གསུམ་གྱིས་བགོས་པའི་ཐོབ་ནོར་ཞག་སོ་བཞི་ཆུ་ཚོད་སོ་དྲུག་ཆུ་སྲང་ང་ལྔ་དབུགས་གཉིས་དབུགས་བཅུ་གསུམ་ཆ་བཞི་རྣམས་འཆི་ལྟས་འབའ་ཞིག་པར་རྒྱུ་བ་ནི་མངལ་གྱི་རྩ་མ་ཆགས་པའི་ཟླ་བ་གཅིག་དང་ཞག་གསུམ་གཡས་གཡོན་དུ་རྒྱུ་ཞིང་གཅིག་༼༡༡བ༢༢༽ལྟེ་བ་ལ་རྒྱུ་བ་ཡིན་ལ། ཆུ་ཚོད་ལ་སོགས་པ་ནི་ཞག་སོ་སོའི་སྟེང་སུ་ཆ་བགོས་ནས་རྒྱུ་བས་ཞག་རེ་རེའང་ཆུ་ཚོད་གཅིག་ཆུ་སྲང་ལྔ་དབུགས་བཅུ་གསུམ་ཆ་བཅུ་གཉིས་དེའི་བཅུ་བདུན་རྣམས་ལྷག་པར་རྒྱུའོ། །དེ་ལ་ཉིན་ཞག་གཅིག་གཡས་ལའོ། །དེ་ནས་གཅིག་གཡོན་ལའོ། །དེ་ལྟ་བུའི་རིམ་པས་ཉིན་ཞག་སུམ་ཅུ་སོ་གསུམ་གྱི་བར་དུ་རྒྱུ་སྟེ། ཐ་མ་སོ་གསུམ་པ་གཡས་པའི་རྩལ་རྒྱུ་ཞིང་འཕོ་བ་ཐམས་ཅད་མེད་པས་ཕུང་པོ་ལྔ་ཁམས་ལྔ་དབང་པོ་ལྔ་ཡུལ་ལྔ་ལས་དབང་བྱ་བ་ལྔ་རྣམས་ཡང་དག་པར་གཅོད་ཅིང་ཕན་ཚུན་ཡང་དག་པར་སྦྱོར་བ་མེད་པར་འགྱུར་རོ། །དུས་ཀྱི་ལོ་ཡི་བར་དུ་ངེས་པར་ཉིན་ཞག་བགྲོད་པའི་དབང་གིས་འཕོ་ཞིང་རྒྱུ་བར་བྱེད་པ་སྟེ། ཟླ་བ་ཞེས་དང་ཉི་མའི་ལམ་ལ་མི་མཉམ་པ་ཡི་ཉིན་ཞག་རེ་རེ་འཕེལ་བའི་རིམ་པས་སོ། །སླར་ཡང་འཕོ་བའི་དབྱེ་བ་མི་མཉམ་པ་ཡི་ཉིན་ཞག་རྣམས་ཀྱིས་བཅུ་གཉིས་རྩིབས་ལ་བྱེད་པ་སྟེ། ཞེས་དང་། དབུགས་དང་ཆུ་སྲང་དང་ནི་ཆུ་ཚོད་ཉིན་མན་དུས་རྣམས་དེ་ནས་རིམ་པ་ནས་ནི་རྒྱུ་བ་སྟེ། བགྲོད་པའི་ཡན་ལག་ལས་ནི་ལོ་བདུན་དག་གིས་བགྲོད་པའི་འགྲོ་བའི་དབང་ལས་ལོ་ནི་དྲུག་ཅུས་ཀྱང་། ཟླ་བ་གསུམ་ལས་སུམ་ཅུའི་ལོ་ཡིས་ཉིན་ཞག་བགྲོད་པའི་དབང་ལས་དུས་ཀྱི་ལོ་དང་ཕྱོགས་ཀྱིས་ཀྱང་། དུས་ཀྱི་འཁོར་ལོ་དག་ལས་ཕྱེད་བཅས་སུམ་ཅུ་གཉིས་ཀྱིས་བགོས་པའི་ཉིན་ཞག་ཚོགས་ཀྱིས་རྒྱུ་བར་འགྱུར། །ཞེས་སོ། །དེ་ནི་སྒྲ་གཅན་གྱི་འཆི་ལྟས་ཏེ་རླུང་གི་འཆི་ལྟས་བཤད་ནས། བྱང་ཆུབ་སེམས་ཀྱི་འཕོ་བ་འཆི་ལྟས་སུ་འགྱུར་ཚུལ་བཤད་པར་བྱ་སྟེ། རྡུལ་མེའི་རང་བཞིན་སྟེང་དུ་འཛེག་པས་ཟད་ཅིང་། ཁུ་བ་ཆུའི་རང་བཞིན་འོག་ཏུ་ཟགས་པས་འཛད་ལ། དེ་གཉིས་ཟད་པས་མུན་པའི་ཁམས་ཟད་ཅིང་དེ་གསུམ་ཟད་པས་ཁམས་ཐམས་ཅད་ཟད་དེ་འཆི་འཕོ་བར་འགྱུར་རོ། །གཉིས་པ། སྦྱོང་བྱེད་རྡོ་རྗེ་གསུམ་བཤད་པ་ལ། རྒྱུད་སྨིན་པར་བྱེད་པ་དབང་གི་རྣམ་གཞག །འཇིག་རྟེན་པའི་དངོས་གྲུབ་སྒྲུབ་པའི་ཐབས་བསྐྱེད་རིམ། འཇིག་རྟེན་ལས་འདས་པའི་དངོས་གྲུབ་སྒྲུབ་པའི་ཐབས་རྡོ་རྗེའི་རྣལ་འབྱོར་བསྟན་པ་གསུམ་ལས། དང་པོ་ནི། དབང་༼༡༢ན༢༣༽བསྐུར་བའི་ཡུལ་ནི་གཉིས་ཏེ། འཇིག་རྟེན་པའི་དངོས་གྲུབ་བསྒྲུབ་པ་དང་། ཕྱག་རྒྱ་ཆེན་པོའི་དངོས་གྲུབ་བསྒྲུབ་པའོ། །དང་པོ་ལ། བྱིས་པ་འཇུག་པའི་དབང་བདུན་སློབ་མ་འབྱོར་པ་དང་ལྡན་པ་ལ་རྡུལ་ཚོན་གྱི་དཀྱིལ་འཁོར་དུ་སྦྱིན་པར་བྱ་སྟེ། དེ་ཡང་། བྱིས་པ་སྐྱེས་མ་ཐག་མས་ཁྲུས་བྱེད་པ་བཞིན་དུ། ཡུམ་ལྔའི་ཆུའི་དབང་དང་། བྱིས་པ་ལ་འདྲེག་མཁན་གྱིས་གཙུག་ཕུད་བཞག་པ་བཞིན་དུ་སངས་རྒྱས་ལྔའི་ཅོན་པན་གྱི་དབང་དང་། བྱིས་པའི་རྣ་བ་འབུགས་པ་བཞིན་དུ་ནུས་མ་བཅུའི་དར་དཔྱངས་ཀྱི་དབང་དང་། བྱིས་པ་རྒོད་པ་དང་སྨྲ་བར་བྱེད་པ་བཞིན་དུ་གཙོ་བོ་ཡབ་ཡུམ་གྱི་རྡོ་རྗེ་དྲིལ་བུའི་དབང་དང་། བྱིས་པ་འདོད་ཡོན་ལྔ་ལ་ལོངས་སྤྱོད་པར་བྱེད་པ་བཞིན་དུ་སེམས་དཔའ་སེམས་མའི་བརཏལ་ཞུགས་ཆེན་པོའི་དབང་དང་། བྱིས་པ་ལ་མིང་བཏགས་པ་བཞིན་དུ་ཁྲོ་བོ་ཁྲོ་མོའི་མིང་གི་དབང་དང་། བྱིས་པ་ལ་ཕས་ཀློག་ལ་སོགས་པ་བྱེད་དུ་འཇུག་པ་བཞིན་དུ་རྡོ་རྗེ་སེམས་དཔས་རྗེས་སུ་གནང་བ་དང་ཡང་དག་པར་ལྡན་པའི་དབང་སྟེ། དེ་ལྟར་བྱིས་པ་འཇུག་པའི་དབང་བསྐུར་བ་རྣམ་པ་བདུན་ནོ། །དེ་ཡང་། སྨན་དང་དྲི་དང་ལྡན་པའི་རྒྱལ་དང་རྣམ་རྒྱལ་བུམ་པ་རྣམས་ཀྱིས་ལྷ་མོ་རྣམས་ཀྱིས་ཁྲུས་བྱའོ། །སངས་རྒྱས་རབ་ཏུ་དབྱེ་བས་ཅོད་པན་སྦྱིན་ཏེ་མཆོག་གི་བླ་མས་ནུས་མ་རྣམས་ཀྱིས་དར་དཔྱངས་ཉིད། རྡོ་རྗེ་དྲིལ་བུ་ཉི་ཟླ་ལས་ཏེ་བརཏལ་ཞུགས་དག་ཀྱང་དབང་པོར་བཅས་པའི་ཡུལ་གྱིས་སྦྱར་བར་བྱ། ཁྲོ་བོ་རྣམས་ཀྱིས་བྱམས་སོགས་མིང་སྟེགས་ལ་བར་རྒྱལ་བའི་བདག་པོས་རྗེས་གནང་འདོགས་བཅས་རབ་ཏུ་སྦྱིན། ཞེས་གསུངས་ཤིང་། དེ་དག་གི་དག་པ་ཡང་། ཐོག་མར་ལུས་ཀྱི་དག་པ་མངལ་དུ་ཁམས་དང་ཕུང་པོ་གྲུབ་པས་ལུས་གྲུབ་པ་ཡིན་པ་བཞིན་དུ། འདིར་ཐོག་མར་ཆུ་དང་ཅོད་པན་གྱི་མངོན་པར་དབང་བསྐུར་བ་གཉིས་ཀྱིས་ལུས་ཀྱི་ཆོས་ཁམས་དང་ཕུང་པོའི་དྲི་མ་ཡོངས་སུ་དག་པས་ལུས་ལེགས་པར་དག་པར་བྱེད་དོ། །དེ་ནས་མངལ་དུ་རྩ་དང་རླུང་གྲུབ་པ་བཞིན་དུ་དར་དཔྱངས་དང་རྡོར་དྲིལ་གྱི་དབང་གཉིས་ཀྱིས་ངག་གི་ཆོས་རླུང་དང་རྩའི་དྲི་མ་དག་པས་དག་དག་པར་བྱེད་དོ། །དེ་ནས་མངལ་དུ་དབང་པོ་དང་ལས་དབང་གྲུབ་པ་བཞིན་དུ་བརཏལ་ཞུགས་༼༡༢བ༢༤༽དང་མིང་གིས་མངོན་པར་དབང་བསྐུར་བ་གཉིས་ཀྱིས་སེམས་ཀྱི་ཆོས་དབང་པོ་ལ་བརྟེན་ནས་ཡུལ་ལ་ལོངས་སྤྱོད་པར་བྱེད་པའི་དྲི་མ་དག་པས་སེམས་ནི་ལེགས་པར་དག་པར་བྱེད་དོ། །དེ་ནས་བྱིས་པ་སྐྱེས་མ་ཐག་ཡེ་ཤེས་ཀྱི་རླུང་རྒྱུ་བར་བྱེད་པ་བཞིན་དུ་རྗེས་གནང་གི་དབང་གིས་ཡེ་ཤེས་ཀྱི་ཆོས་ཆགས་པའི་དྲི་མ་དག་པས་ཡེ་ཤེས་ཡང་དག་པར་བྱེད་དོ། །ཁམས་ལ་སོགས་པའི་རྣམ་དག་ནི། ཆུའི་དབང་ནི་ས་ལ་སོགས་པ་ཁམས་ལྔ་པོ་རྣམས་ཀྱི་སྒྲིབ་པ་མེད་པ་ཉིད་དུ་དག་པར་བྱེད་པ་སྟེ་སྒྲིབ་བཅས་ཀྱི་ཁམས་ལྔ་པོ་རྣམས་སྤྱན་མ་ལ་སོགས་པའི་རིག་མ་ལྔ་པོ་ཉིད་ཀྱིས་རྫོགས་པ་ལས་ཆུའི་དབང་མཚོན་པར་བྱེད་དོ། །ཅོན་པན་གྱི་དབང་ནི་གཟུགས་ལ་སོགས་པའི་ཕུང་པོ་ལྔ་རྣམས་སྒྲིབ་པ་མེད་པ་ཉིད་དུ་རྣམ་པར་སྦྱོང་བར་བྱེད་པ་སྟེ། གཟུགས་སོགས་ཕུང་པོ་ལྔ་རྣམ་པར་སྣང་མཛད་ལ་སོགས་པ་ཉིད་ཀྱིས་རྫོགས་པ་ཇི་སྲིད་པར་ཅོད་པན་གྱི་དབང་ངོ་། །དར་དཔྱངས་ཀྱི་དབང་ནི་དུ་བ་མ་ལ་སོགས་པའི་ནུས་མ་བཅུ་རླུང་བཅུ་སྒྲིབ་པ་མེད་པ་ཉིད་དུ་བྱེད་ཅིང་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་བཅུ་སྟེ། དེ་རྣམས་ཀྱི་དག་པ་ནི་ཡོངས་སུ་རྫོགས་པ་སོ་སོར་དམིགས་པ་སྟེ་དེའི་དོན་དུ་དཔའ་བོའི་དར་དཔྱངས་ཀྱི་དབང་ངོ་། །འཁོར་བའི་སྡུག་བསྔལ་མཐའ་དག་གིས་མི་ཕྱེད་ཅིང་དེ་ཡིས་འཁོར་བའི་སྡུག་བསྔལ་དེ་འབྱེད་ཅིང་འཇོམས་པར་བྱེད་པ་ཉིད་ཀྱིས་ཀྱང་མི་འགྱུར་བའི་བདེ་བ་ཆེན་པོ་ཉིད་རྡོ་རྗེའོ། །མཐའ་ཡས་པའི་ལྷ་དང་མི་ལ་སོགས་པ་རྣམས་ལ་དེ་དང་དེའི་སྐད་ཀྱིས་ཆོས་སྟོན་པའི་སངས་རྒྱས་ཀྱི་སྐད་རྒྱུན་མི་འཆད་པར་ཆོས་ཀྱི་བདུད་རྩི་བསྟན་པའི་དོན་དུ་གཞོམ་དུ་མེད་པའི་སྒྲའི་རང་བཞིན་ནི་རྡོ་རྗེ་དྲིལ་བུའོ། །ཉི་མ་ར་སཱ་ན་དང་ཟླ་བ་ལ་ལ་ནཱ་དག་གཅིག་ཏུ་དག་པ་ནི་སྲོག་ཐུར་གཡས་གཡོན་དུ་འབབ་པ་དག་ཅིག་པ་ཉིད་ཀྱིས་ཨ་ཝ་དྷཱུ་ཏཱིར་རབ་ཏུ་ཞུགས་པ་སྟེ། དེའི་དོན་དུ་རྡོ་རྗེ་དང་རྡོ་རྗེ་དྲིལ་བུ་དང་ལྡན་པའི་ལག་པ་དག་གིས་འཁྱུད་པའི་ཚུལ་བྱེད་པ་ནི་རྡོ་རྗེ་དྲིལ་བུའི་དབང་ངོ་། །བརཏལ་ཞུགས་ཀྱི་དབང་ནི་གཟུགས་ལ་སོགས་པའི་ཡུལ་དང་མིག་ལ་སོགས་༼༡༣ན༢༥༽པའི་དབང་པོ་རྣམས་ལགས་པར་དག་པར་བྱེད་པ་སྟེ། ཐ་མལ་པའི་ཡུལ་དབང་རྣམ་ཤེས་རྣམས་འགགས་ནས་ལྷའི་མིག་ལ་སོགས་པའི་དབང་པོ་རྣམས་ཀྱི་ལྷའི་རྣམ་པར་ཤེས་པ་རྣམས་སྟོང་པ་ཉིད་ཀྱི་གཟུགས་ཀྱི་ཡུལ་ལ་བེམ་པོ་མ་ཡིན་པར་རབ་ཏུ་འཇུག་པར་ངེས་པས་ཕྱག་རྒྱ་ཆེན་པོའི་དངོས་གྲུབ་ཐོབ་པར་བྱེད་པའི་ཕྱིར་འཕོ་བ་མེད་པ་རྡོ་རྗེ་བརཏལ་ཞུགས་ཀྱི་དབང་དུ་འགྱུར་རོ། །མིང་གི་དབང་ནི་བྲམ་ཟེ་ལ་སོགས་པའི་རིགས་བཞི་གཅིག་ཏུ་བྱེད་པ་ཉིད་གྱི་དགོངས་པས་ཆེ་གེ་རྡོ་རྗེ་ཞེས་མིང་བཏགས་པའི་རྒྱུ་ལས་བྱམས་པ་དང་སྙིང་རྗེ་ལ་སོགས་པ་ཚངས་པའི་གནས་བཞི་ཡོངས་སུ་རྫོགས་པ་དུས་ཐམས་ཅད་དུ་འདོད་ཆགས་དང་ཞེ་སྡང་ལ་སོགས་པ་རྣམ་པར་དག་པ་སྒྲིབ་པ་མེད་པ་ཉིད་དུ་ཡང་དག་པར་དག་པར་བྱེད་དོ། །རྗེས་གནང་གི་དབང་གིས་དཔག་ཏུ་མེད་པའི་སེམས་ཅན་གྱི་ཁམས་ལ་བསམ་པ་ཇི་ལྟ་བར་ཀུན་རྫོབ་དང་དོན་དམ་པའི་བདེན་པའི་རྣམ་པར་དབྱེ་བས་མཆོག་ཏུ་གསང་བ་རྡོ་རྗེ་ཐེག་པ་བསྟན་པའི་དོན་དུ་རྗེས་སུ་གནང་བས་སངས་རྒྱས་ཉིད་དག་ཅིང་རྫོགས་པར་བྱེད་པ་སྟེ། ཆུ་ནི་སྒྲོལ་མ་ལ་སོགས་ལྷ་མོ་ཅོན་པན་ཞེས་པ་རྒྱལ་བ་དཔའ་བོའི་དར་དཔྱངས་ནུས་མ་རྣམས། །རྡོ་རྗེ་དྲིལ་བུ་ཉི་ཟླ་དག་དང་བརཏལ་ཞུགས་དག་ཀྱང་ཡུལ་རྣམས་མིང་ནི་བྱམས་སོགས་སྦྱོར་བའོ། །རྗེས་གནང་རྫོགས་པའི་བྱང་ཆུབ་དཔལ་མོ་སྲིད་པའི་འཇིགས་འཇོམས་དུས་ཀྱི་འཁོར་ལོ་རྗེས་སུ་རིག་པ་སྟེ། སྡིག་པའི་དྲི་མ་འཕྲོག་པའི་དབང་བསྐུར་བདུན་པོ་འདི་རྣམས་དཀྱིལ་འཁོར་དུ་ནི་ཡང་དག་རབ་སྦྱིན་བྱ། ཞེས་སོ། །ཕྱག་རྒྱ་ཆེན་པོའི་དངོས་གྲུབ་དོན་དུ་གཉེར་བ་ལ། བུམ་པ་སོགས་པའི་དབང་སྦྱིན་པར་བྱ་སྟེ། དེ་ལ་ཡང་དྲི་མེད་འོད་ལས། འདིར་དབང་གོང་མ་ནི་རྣམ་པ་གཉིས་ཏེ། གཅིག་ནི་སེམས་ཅན་གཞུག་པའི་དོན་དང་། ལམ་ཡོངས་སུ་ཤེས་པའི་དོན་དང་། རྒྱུད་ཉན་པ་ལ་དབང་བའི་དོན་དུའོ། །གཞན་ནི་སློབ་དཔོན་ཆེན་པོའི་གནས་སྦྱིན་པ་དང་། སྟོན་པ་པོ་བྱེད་པའི་སླད་དུའོ། །ཞེས་གསུངས་པས་ཕྱག་རྒྱའི་ནུ་མ་ལ་རེག་པ་བུམ་པའི་དབང་། དེ་ནས་གསང་བའི་མཆོད་པ་བྱས་ནས་སློབ་༼༡༣བ༢༦༽མའི་ཁར་བདུད་རྩི་མཐེབ་སྲིན་གྱིས་སྦྱིན་ཞིང་ཕྱག་རྒྱའི་བྷ་ག་ལ་ལྟ་བར་བྱེད་པ་གསང་བའི་དབང་། ལས་ཀྱི་ཕྱག་རྒྱ་གཏད་པས་དབང་པོ་གཉིས་ལས་སྐྱེས་པ་འགྱུར་བའི་བདེ་བ་རྟོགས་པར་དབང་གསུམ་པ། ནོར་བུའི་ང་དུ་ཆུད་པའི་བྱང་ཆུབ་སེམས་ཀྱི་བདེ་བ་རྟོགས་པ་བཞི་པ་སྟེ། དཔལ་ལྡན་ཤེས་རབ་ནུ་མ་ལ་ཡང་དང་པོར་རེག་པ་གང་ཡིན་བུམ་པའི་དབང་ནི་དེ་ཉིད་དོ། །གསང་བདག་ལས་རི་བོང་འཛིན་པ་མྱང་བ་དང་ནི་ལྟ་བ་དག་གིས་གསང་བའི་དབང་དུ་འགྱུར། ཤེས་རབ་ཡེ་ཤེས་དབང་ལ་མཐའ་དག་རྒྱལ་བའི་རིགས་ཀྱི་ཡན་ལག་ཞལ་གྱི་སྦྱང་བ་བྱས་ནས་ནི། རྒྱལ་བ་དག་ཀྱང་འདིར་ནི་བླ་མས་དབང་པོར་བྱས་ནས་སློབ་མ་ལ་ནི་ཕྱག་རྒྱ་སྦྱིན་པར་བྱ། ཞེས་སོ། །གཉིས་པ་ལ་བུམ་དབང་དང་འདྲ། གསང་དབང་ས་བོན་དང་བཅས་པའི་རྡོ་རྗེ་སློབ་མའི་ཁར་སྦྱིན་པ་གསང་དབང་། ལས་ཀྱི་ཕྱག་རྒྱ་ལ་འཁྱུད་པ་ལས་སྐྱེས་པའི་དབང་པོ་གཉིས་ཀྱི་བདེ་བ་ནི་དབང་གསུམ་པ། མཆོག་ཏུ་མི་འགྱུར་བའི་བདེ་བ་ནི་དབང་བཞི་པའོ། །དེ་ཡང་། རྒྱན་རྣམས་ཐམས་ཅད་དང་ལྡན་ཞན་མའི་གསེར་དང་མཚུངས་ཤིང་བཅུ་གཉིས་ལ་ལོན་མཛེས་པའི་བུ་མོ་ནི། ཁྲག་དང་ལྡན་ལ་ཤེས་རབ་ཐབས་ཀྱི་བདག་ཉིད་དག་གི་རང་གི་རྡོ་རྗེ་ནོར་བུས་འདོད་སྤྱད་ནས། ས་བོན་དང་བཅས་རྡོ་རྗེ་དག་ཀྱང་སློབ་མ་དག་པར་ཤེས་ནས་ཁ་རུ་འཕང་བ་བྱས་ནས་ནི། ཕྱི་ནས་རང་གི་ཕྱག་རྒྱ་སྦྱིན་བྱ་དེ་ནས་སླར་ཡང་གཞན་ནི་དུ་བའི་ལམ་སོགས་ལྡན་པའོ། །ཞེས་སོ། །ཡང་ཕྱག་རྡོར་སྟོད་འགྲེལ་དང་། རྒྱུད་འདི་ཉིད་ལས། ཤེས་རབ་ཀྱི་ནུ་མ་ལ་རེག་པས་དགའ་བ་བུམ་དབང་། གསང་བར་རྡོ་རྗེ་བཅུག་པ་ལས་སྐྱེས་པའི་མཆོག་དགའ་གསང་དབང་། རྡོ་རྗེ་བརྟན་པར་བསྐྱོད་པ་ལས་སྐྱེས་པའི་ཁྱད་དགའ་དབང་གསུམ་པ། ཕྱག་རྒྱ་ཆེན་པོ་ལས་སྐྱེས་པའི་མི་འགྱུར་བའི་བདེ་བ་ནི་དབང་བཞི་པ་སྟེ། འདི་ནི་སློབ་དཔོན་ཆེན་པོའི་དབང་གོང་མར་ཕྱག་རྡོར་སྟོད་འགྲེལ་ལས་བཤད་ལ། སྔ་མ་ནི་དྲི་མེད་འོད་ལས་བཤད་ཅིང་། གཉིས་པོ་ཅུང་ཟད་མི་འདྲ་བར་ཡོད་པས་གཉིས་༼༡༤ན༢༧༽ཀ་ཚང་དགོས་སོ། །འདིར་ནི་དབང་བསྐུར་རྣམ་པ་གཉིས་ཀྱང་བུ་ཡི་ཡོན་ཏན་དབང་གིས་འཇིག་རྟེན་འཇིག་རྟེན་འདས་པའོ། །གང་ཞིག་ཤེས་རབ་ཀྱི་ནི་ནུ་མ་ལ་རེག་གཞན་པ་བདུད་རྩི་མྱང་དང་འཁྱུད་པ་གང་ཡིན་དང་། ཤེས་རབ་དང་འགྲོགས་བྱང་ཆུབ་སེམས་ནི་ཞུ་བ་དག་ལ་བཞི་པའི་སྐད་ཅིག་བདུད་རྩི་རྟོགས་པ་གང་། དེ་དག་ཐམས་ཅད་ངེས་པར་འཇིག་རྟེན་པ་སྟེ་མཆོག་གི་སྙིང་རྗེ་ཡིས་ནི་ལམ་གྱི་རྒྱུ་རུ་བསྟན། འཇིག་རྟེན་འདས་པའི་དབང་གང་མཆོག་གི་རྒྱལ་བའི་བདག་པོའོ་ཕྱག་རྒྱ་མཆོག་ལ་རྗེས་སུ་སྦྱོར་བའོ། །ཞེས་གསུངས་པས། ལས་ཀྱི་ཕྱག་རྒྱའི་རྒྱུ་ལས་སྐྱེས་པའི་རྒོད་པ་དང་། བལྟ་བ་དང་། ལག་བཅས་དང་། གཉིས་གཉིས་འཁྱུད་པ་ལས་སྐྱེས་པའི་བདེ་བ་ནི་དེ་ཁོ་ན་ཉིད་མ་ཡིན་ཏེ། སེམས་ཅན་ལམ་ལ་གཞུག་པའི་དོན་དུ་བསྟན་པ་འཇིག་རྟེན་ཀུན་རྫོབ་པའི་དབང་ཡིན་ནོ། །ཕྱག་རྒྱ་ཆེན་མོ་ལས་སྐྱེས་པ་མི་འགྱུར་བའི་བདེ་བ་གཉིས་སུ་མེད་པའི་ཡེ་ཤེས་ནི་དོན་དམ་པའི་དབང་ངོ་། །ཤེས་རབ་མ་བཅུ་གཉིས་མ་ནས་ཉི་ཤུ་མའི་བར་དབང་བསྐུར་བ་ན་རང་གི་སེམས་དགའ་བའི་སྐལ་བ་དང་ལྡན་མ་དེའི་ནུ་མར་ཡན་ལག་གིས་རེག་པས་གཙུག་ཏོར་གྱི་པདྨ་འདས་མ་བཞི་པ་ལས་བྱང་ཆུབ་སེམས་ཁུ་བ་བདུད་རྩིའི་རྒྱུན་འཕོ་བའི་ཚུལ་གྱིས་དཔྲལ་བའི་པདྨ་འདབ་མ་བཅུ་དྲུག་པའི་ལྟེ་བར་འོངས་པས་སྐུའི་དགའ་བ་དང་། གསུང་གི་དགའ་བ་དང་། ཐུགས་ཀྱི་དགའ་བ་དང་། ཡེ་ཤེས་ཀྱི་དགའ་བའི་བདག་ཉིད་ཀྱི་བདེ་བ་ཉམས་སུ་མྱོང་བར་བྱེད་པ་གང་ཡིན་པ་དེ་ནི་ནུ་མས་དབང་བསྐུར་བ་བུམ་པའི་དབང་ལུས་ཀྱི་དྲི་མ་དག་པར་བྱེད་པ་གང་ལས་འཇིགས་པའི་བདེ་བ་ཐོབ་པ་དེ་དབང་དང་པོ་ཐོབ་པ་ཉིད་ཀྱི་ཕྱིར་བྱིས་པའོ། །གཉིས་པ་ནི་ཤེས་རབ་མའི་གསང་བར་རང་གི་རྡོ་རྗེ་བཅུག་སྟེ་དུས་ཅུང་ཟད་གཅིག་གསོལ་བ་ལས་སྐྱེས་པའི་ཁུ་བ་བྱང་ཆུབ་ཀྱི་སེམས་མགྲིན་པའི་པད་འདབ་སུམ་ཅུ་སོ་གཉིས་པ་ལས་སྙིང་གའི་པད་འདབ་བརྒྱད་པའི་ལྟེ་བའི་བར་དུ་འོངས་པས་སྐུའི་མཆོག་དགའ་དང་། གསུང་གི་མཆོག་དགའ་དང་། ཐུགས་ཀྱི་མཆོག་དགའ་དང་། ཡེ་ཤེས་ཀྱི་༼༡༤བ༢༨༽མཆོག་དགའི་བདག་ཉིད་ཀྱི་བདེ་བ་ཉམས་སུ་མྱོང་བ་ངག་གི་དྲི་མ་དག་པར་བྱེད་པ་གསང་བའི་དབང་བསྐུར་བ་སྟེ་འགྱུར་བའི་བདེ་བ་ཐོབ་པ་དེ་ནི་སྔ་མ་ལས་ཁྱད་པར་དུ་གྱུར་པ་ཉིད་ཀྱི་ཕྱིར་དར་མའོ། །གསུམ་པ་ནི་དེ་ནས་གསང་བར་རྡོ་རྗེ་ཡུན་རིང་པོར་བསྐྱོད་པ་ལས་སྐྱེས་པའི་བྱང་ཆུབ་ཀྱི་སེམས་ཁུ་བ་ལྟེ་བའི་པད་འདབ་དྲུག་ཅུ་རྩ་བཞི་པོ་ལས་གསང་བའི་པད་འདབ་སུམ་ཅུ་སོ་གཉིས་པའི་བར་དུ་བགྲོད་པ་ཆ་བཅོ་ལྔའི་རྩེ་མོ་ཤིན་ཏུ་དང་བའི་ཁུ་བ་རྡོ་རྗེ་ནོར་བུའི་བུ་གའི་མཐར་ཐུག་པར་བགྲོད་པས་སྐུའི་ཁྱད་པར་གྱི་དགའ་བ་དང་། གསུང་གི་ཁྱད་པར་གྱི་དགའ་བ་དང་། ཐུགས་ཀྱི་ཁྱད་པར་གྱི་དགའ་བ་དང་། ཡེ་ཤེས་ཀྱི་ཁྱད་པར་གྱི་དགའ་བའི་བདག་ཉིད་ཀྱི་བདེ་བ་ཉམས་སུ་མྱོང་བར་བྱེད་པ་ནི་ཡིད་ཀྱི་དྲི་མ་དག་པར་བྱེད་པ་ཤེས་རབ་ཡེ་ཤེས་ཀྱི་དབང་བསྐུར་བ་སྟེ་འཛག་པའི་བདེ་བ་ཐོབ་པ་དེ་ནི་སྔ་མ་ལས་ཆེན་པོར་གྱུར་བའི་ཕྱིར་རྒན་པོའོ། །དེའི་རྗེས་སུ་ཆགས་པའི་ཕྱི་རོལ་རང་གི་ཉམས་སུ་མྱོང་བ་བསྒོམ་པ་ལས་སྐྱེས་པ་ཐིག་ལེ་རྡོ་རྗེ་ནོར་བུ་ལས་ཕྱི་རོལ་དུ་འཛག་པ་མེད་པས་སྐུའི་ལྷན་ཅིག་སྐྱེས་དགའ་དང་། གསུང་གི་ལྷན་ཅིག་སྐྱེས་དགའ་དང་། ཐུགས་ཀྱི་ལྷན་ཅིག་སྐྱེས་དགའ་དང་། ཡེ་ཤེས་ཀྱི་ལྷན་ཅིག་སྐྱེས་དགའི་བདག་ཉིད་ཀྱི་བདེ་བ་ཉམས་སུ་མྱོང་བ་ཡེ་ཤེས་ཀྱི་དྲི་མ་དག་པར་བྱེད་པ་ཤེས་རབ་ཆེན་པོའི་དབང་བསྐུར་བ་སྟེ་ཕྱག་རྒྱ་ཆེན་པོ་ལ་རྗེས་སུ་ཆགས་པ་གང་ལས་མི་འགྱུར་བའི་བདེ་བ་རྟོགས་པ་དེ་བཞི་བ་དེ་བཞི་པ་དེ་ཡང་དེ་བཞིན་ནོ་ཞེས་གསུངས་པའོ། །འདི་ནི་སྒྲིབ་པ་མེད་པ་འཇིག་རྟེན་ལས་འདས་པའི་ཡེ་ཤེས་ལྷག་པར་རྟོགས་པ་སྟེ། གྲུབ་པའི་དངུལ་ཆུས་ཟངས་ལ་སོགས་པའི་ཁམས་རྣམས་གསེར་གྱི་ངོ་བོར་བསྒྱུར་བ་བཞིན་དུ། ཕུང་པོ་ལྔ་དེ་བཞིན་གཤེགས་པ་ལྔ་དང་ཁམ་ལྔ་ཡུམ་ལྔ་ལ་སོགས་པས་ཐམས་ཅད་སྒྲིབ་བྲལ་དུ་རྫོགས་པར་བྱེད་པའི་ཕྱིར་སྐྱེ་དགུའི་བདག་པོར་ཤེས་པར་བྱའོ། །དབང་མདོར་བསྟན་ལས། དབང་བསྐུར་གསུམ་གྱི་རིམ་པ་ཡིས། །ལུས་ངག་སེམས་ནི་དག་པར་བྱེད། །བཞི་པ་ཡེ་ཤེས་དག་པ་སྟེ། །ཞེས་དང་། བཅུ་དྲུག་ཕྱེད་ཕྱེད་ཐིག་ལེ་ཅན། ཞེས་གསུངས་པས་སོ། །དོན་དམ་པར་བཞི་༼༡༥ན༢༩༽པ་ཉིད་ཀྱི་སྐབས་སུ་ཡང་དབང་བཞི་ཅར་ཚང་སྟེ། བུམ་དབང་བསྙེན་པ་སྟེ་དེའི་མཐར་རྡོ་རྗེ་བསླང་བའི་བདེ་བ་སྐྱེས་པའི་ཕྱིར་དང་། གསང་དབང་ཉེར་བསྒྲུབ་སྟེ་དེའི་མཐར་རྡོ་རྗེ་མེ་ལ་སྲོག་ཞུགས་པའི་བདེ་བ་སྐྱེས་པའི་ཕྱིར་དང་། ཤེས་རབ་ཡེ་ཤེས་བསྒྲུབ་པ་སྟེ་མི་འགྱུར་བའི་བདེ་བའི་ཆ་དང་པོ་སྐྱེས་པ་ནི་སྔར་བླ་མས་ཚིག་གིས་བསྟན་པ་དེ་རྗེས་སུ་དྲན་པས་དེའི་དོན་རང་གིས་རིག་ཅིང་ཉམས་སུ་མྱོང་བའི་ཕྱིར་རོ། །དབང་བཞི་པ་ནི་བསྒྲུབ་པ་ཆེན་པོ་སྟེ་མི་འགྱུར་བའི་བདེ་བའི་ཆ་ཡོངས་སུ་རྫོགས་པ། ཆགས་དང་ཆགས་བྲལ་མཐའ་དང་དང་པོའི་སྐད་ཅིག་མ་ལ་དོན་གྱི་བཞི་པ་ཐོབ་བོ། །དབང་གིས་སྡོམ་པ་ཐོབ་ཚུལ་ཀྱང་འདི་ལྟར་འགྱུར་ཏེ། དང་པོར་ཆུ་དག་ལ་ནི་དགེ་བསྙེན་ཉིད་དུ་འགྱུར་ཏེ་བུམ་པ་ལ་ཡང་དགེ་ཚུལ་ཉིད་དུ་འགྱུར། གསང་བའི་དབང་ལ་དགེ་སློང་དང་ནི་གོང་མའི་བྱེད་པ་ལ་ཡང་གནས་བརྟན་ཞེས་པར་འགྱུར་བ་སྟེ། ཞེས་གསུངས། དེ་བས་དབང་བསྐུར་ལེགས་པར་ཐོབ་པའི་གང་ཟག་གིས་དམ་ཚིག་ལ་གནས་པར་བྱ་སྟེ་གང་ཞེ་ན། རྡོ་རྗེ་སེམས་དཔའི་བརཏལ་ཞུགས་ཀྱི་དམ་ཚིག་ནི། འཚེ་དང་མི་བདེན་གཞན་གྱི་བུད་མེད་སྤང་བྱ་གཞན་གྱི་ནོར་དང་ཆང་གི་བཏུང་བ་དེ་བཞིན་ཉིད། འཁོར་བར་རྡོ་རྗེའི་ཞགས་པ་དག་སྟེ་རང་གི་དགེ་བ་འཇོམས་བྱེད་སྡིག་པ་ལྔ་པོ་འདི་དག་གོ། །གང་ཞིག་གང་གི་དུས་སུ་འབྱུང་བ་ལྷ་དང་མི་ཡི་བླ་མ་དེ་ལ་མཚན་གྱིས་རབ་སྦྱིན་བྱ། །སྣ་ཚོགས་གཙོ་བོའི་བཀའ་འདི་སྲིད་པའི་འཇིགས་པ་འཇོམས་པ་དག་སྟེ་ཁྱོད་ཀྱིས་ཀྱང་ནི་བསྐྱང་བར་བྱ། ཆོ་ལོ་ཁ་ན་མ་ཐོ་བཅས་པའི་ཟས་དང་ཚིག་ངན་ཀློག་དང་འབྱུང་པོ་ལྷ་མིན་དབང་པོའི་ཆོས། བ་ལང་བྱིས་པ་བུད་མེད་སྐྱེས་པ་རྣམས་དང་ལྷ་མིའི་བླ་མ་གསོད་པ་ལྔ་ནི་མི་བྱའོ། །གྲོགས་པོ་རྗེ་བོ་རྣམས་དང་ལྷ་དང་མི་ཡི་བླ་མ་དགེ་འདུན་ཡིད་བརྟན་རྣམས་ལ་འཁུ་བ་ཡང་། དབང་པོ་རྣམས་ནི་ཆགས་པ་དག་དང་དེ་ལྟར་སྲིད་པའི་བདག་པོ་དག་གི་བརཏལ་ཞུགས་ཉི་ཤུ་ལྔ། རིགས་དྲུག་གི་དྲང་ངེས་མ་ཕྱེ་བ་ནི། འདོད་པའི་རྡོ་རྗེ་ལ་ནི་རྡོ་རྗེ་དྲིལ་བུ་ཕྱག་རྒྱ་བླ་མ་དག་ཀྱང་སྤྱི་བོས་གཟུང་བར་བགྱི། རིན་ཆེན་ལ་ནི་སྦྱིན་པ་སྦྱིན་བགྱི་འཁོར་ལོ་འདི་ལ་རྒྱལ་བ་༼༡༥བ༣༠༽མཆོག་གི་དམ་ཚིག་བསྐྱང་བར་བགྱི། རལ་གྲི་ལ་ནི་མཆོད་པ་བགྱི་སྟེ་གསལ་བར་ཆུ་སྐྱེས་རིགས་ལ་སྡོམ་པ་དག་ནི་བསྐྱང་བར་བགྱི། །སེམས་ཅན་རྣམས་ནི་ཐར་པའི་སླད་དུ་རྒྱལ་བ་བསྐྱེད་མཛད་རིགས་ལ་བྱང་ཆུབ་བདག་གིས་བསྐྱེད་པར་བགྱི། དྲང་ངེས་ཕྱེ་བ་ནི། རྡོ་རྗེ་དྲིལ་བུ་རབ་ཏུ་ཕྱིན་ནས་རབ་མཆོག་སྙིང་རྗེ་དག་གིས་དག་པའི་ཆོས་ནི་བསྟན་པར་བྱ། ངེས་པར་རྡོ་རྗེའི་རིགས་དག་ལ་ནི་སྲོག་གཅོད་བྱ་སྟེ་རལ་གྲི་ལ་ཡང་བདེན་པ་མིན་པའི་ཚིག །རིན་ཆེན་ལ་ན་གཞན་ནོར་དབྲོག་བྱ་མཆོག་གི་པདྨའི་རིགས་ཉིད་ལ་ཡང་གཞན་གྱི་བུད་མེད་ར་བྲོག །ཆང་དང་སྒྲོན་མ་སངས་རྒྱས་རྣམས་དང་བཟང་པོའི་ཡུལ་རྣམས་མཐའ་དག་འཁོར་ལོ་ལ་ནི་བསྟེན་པར་བྱ། གདོལ་པ་མོ་སོགས་མཐའ་དག་བུད་མེད་རྣམས་ནི་གྲི་གུག་ལ་ཡང་མཁའ་ཡི་པདྨར་སྨད་མི་བྱ། སེམས་ཅན་དོན་གྱི་སླད་དུ་ནོར་དང་བཅས་པའི་ལུས་འདི་སྦྱིན་པར་བྱ་སྟེ་ཁྱོད་ཀྱིས་བསྲུང་མི་བྱ། རིགས་ཀྱི་བུ་ཀྱེ་སངས་རྒྱས་ཉིད་དུ་འགྱུར་བ་གཞན་དུ་མཐའ་ཡས་བསྐལ་པས་མིན་པར་རྒྱལ་བས་གསུངས། ཞེས་དང་། བསྲུང་བའི་དམ་ཚིག་ནི། དཔལ་ལྡན་བླ་མའི་ཐུགས་དཀྲུགས་པ་ལས་བུ་རྣམས་ཀྱི་ནི་རྩ་བའི་ལྷུང་བ་རི་བོང་འཛིན་པར་འགྱུར། དེ་ཡི་བཀའ་ལ་འགོངས་པས་གཞན་དུ་འགྱུར་ཏེ་ངེས་པར་དེ་བཞིན་སྤུན་ལ་ཁྲོས་པས་གསུམ་པའོ། །བྱམས་པ་བཏང་བས་བཞི་པར་འགྱུར་ཏེ་བྱང་ཆུབ་སེམས་ནི་རབ་ཏུ་ཉམས་པ་ལས་ཀྱང་མདའ་རུ་འགྱུར། དྲུག་པ་གྲུབ་པའི་མཐའ་ལ་སྨོད་པའོ་རི་བོ་དག་ཀྱང་མ་སྨིན་མི་ལ་གསང་བ་བྱིན་ལས་སོ། །ཕུང་པོ་ཉོན་མོངས་པ་ལས་ཀླུ་རུ་འགྱུར་ཏེ་སླར་ཡང་དགུ་པ་དག་པའི་ཆོས་ལ་མ་དད་གང་། རྒྱུ་ཡི་བྱམས་པ་དང་ནི་མིང་སོགས་བྲལ་བའི་བདེ་བ་སྟེར་ལ་རྟོག་པ་ཕྱོགས་དང་དྲག་པའོ། །དག་པའི་སེམས་ཅན་དག་ལ་སྐྱོན་བརྗོད་པ་ལས་ཉི་མ་དམ་ཚིག་ཐོབ་པ་གཏོང་བ་ལས་ཀྱང་གཞན། བུད་མེད་ཐམས་ཅད་ལ་སྨོད་ངེས་པར་མ་ནུར་འགྱུར་ཏེ་རྡོ་རྗེ་ཐེག་པར་གནས་པ་རྣམས་ལའོ། །ཞེས་གསུངས་པ་རྣམས་ལེགས་པར་བསྐྱང་བར་བྱའོ། །གཉིས་པ་འཇིག་རྟེན་པའི་དངོས་གྲུབ་སྒྲུབ་པའི་ཐབས་བསྐྱེད་རིམ་ནི། ཕུང་ཁམས་༼༡༦ན༣༡༽སྐྱེ་མཆེད་ཀྱི་ཆོས་རྣམས་རེ་རེ་བཞིན་ལ་མ་དག་པའི་སྣང་བའི་དུག་བསལ་ནས་རྣམ་པ་སྣ་ཚོགས་སུ་སྣང་བ་འདི་ཉིད་དཀྱིལ་འཁོར་གྱི་འཁོར་ལོའི་སྣང་བ་འབའ་ཞིག་ཏུ་བསྒྱུར་བའི་ཏིང་ངེ་འཛིན་ལུས་རྫོགས་པ་དཀྱིལ་འཁོར་རྒྱལ་མཆོག་དང་། ངག་རྫོགས་པ་ལས་རྒྱལ་མཆོག་དང་། ཡིད་རྫོགས་པ་ཕྲ་མོའི་རྣལ་འབྱོར་དང་། བདེ་བ་རྫོགས་པ་ཐིག་ལེའི་རྣལ་འབྱོར་གྱིས་ཤིན་ཏུ་སྦྱངས་པ་ལས་བྱུང་བའི་ཡིད་སོ་སོ་རང་གི་རིག་པ་ཐོབ་པ་ནི་ཞི་སོགས་ལས་ཆེན་བཅུ་གཉིས་དང་། ཐུན་མོང་གི་གྲུབ་པ་བརྒྱད་ལ་སོགས་པ་འོག་མིན་གྱི་མཐར་ཐུག་པའི་དངོས་གྲུབ་ཐམས་ཅད་ལ་གང་འདོད་པ་བཞིན་བསྒྲུབས་པས་འགྲུབ་པར་འགྱུར་ཏེ་ཕྱག་རྒྱ་ཆེན་པོ་མཆོག་གི་དངོས་གྲུབ་ནི་མ་ཡིན་ནོ། །དེ་ཡང་དྲི་མེད་འོད་ལས། གཟུགས་བརྙན་ལ་སོགས་རྟོག་པའི་དཀྱིལ་འཁོར་གྱི། འཁོར་ལོ་བསྒོམས་པ་གོམས་པར་གྱུར་པ་ཡིས། །གྲུབ་པ་འཇིག་རྟེན་པ་དག་འགྲུབ་འགྱུར་གྱི། །འདོད་པའི་དངོས་གྲུབ་ཆེ་པོ་ག་ལ་ཞིག །ཅེས་སོ། །གསུམ་པ་འཇིག་རྟེན་ལས་འདས་པའི་དངོས་གྲུབ་སྒྲུབ་པའི་ཐབས་རྡོ་རྗེའི་རྣལ་འབྱོར་བཤད་པ་ལ། །ལུས་རྩ་དག་པར་བྱེད་པ་སྐུ་རྡོ་རྗེ་བསྙེན་པའི་ཡན་ལག །ངག་རླུང་དག་པར་བྱེད་པ་གསུང་རྡོ་རྗེ་བསྒྲུབ་པའི་ཡན་ལག །ཡིད་ཐིག་ལེ་དག་པར་བྱེད་པ་ཐུགས་རྡོ་རྗེ་བསྒྲུབ་པ་ཆེན་པོའི་ཡན་ལག་གསུམ་ལས། དང་པོ་ནི། སྐུ་རྡོ་རྗེ་མ་ཐོབ་པ་ཐོབ་པར་བྱེད་པའི་ཐབས་སོར་སྡུད་གཙོ་བོར་བསྟན་ནས་ཐོབ་པ་མཐར་ཕྱིན་པར་བྱ་བའི་ཐབས་ཀྱི་བསམ་གཏན་ཞར་གྱིས་བསྟན་པར་མཛད་དོ། །དེ་ལ་དང་པོ་སོར་སྡུད་ཀྱི་ངོ་བོ་ནི་རང་གི་ལུས་ལ་གཟུགས་ལ་སོགས་པ་ཕྱི་རོལ་གྱི་ཡུལ་རྣམས་ལ་ཡུལ་ཅན་མིག་ལ་སོགས་པ་དབང་པོ་བུ་དྡྷ་པོ་རྣམས་ཀྱི་འབྲེལ་པས་མིག་གི་རྣམ་པར་ཤེས་པ་ལ་སོགས་པ་རྣམས་རབ་ཏུ་འཇུག་པ་མེད་པར་ནང་གི་ཡུལ་སྟོང་པའི་གཟུགས་རྣམས་ལ་གཞན་ཤའི་མིག་གི་དབང་པོ་ལ་སོགས་པ་རྣམས་ཀྱི་ཤའི་མིག་གི་རྣམ་པར་ཤེས་པ་ལ་སོགས་པ་རྣམས་རབ་ཏུ་འཇུག་པ་སྟེ། ནང་དུ་སྟོང་པ་ཉིད་ལ་དམིགས་པ་པྲ་ཕབ་པའི་གཞོན་ནུ་མས་མེ་ལོང་ལ་མཐོང་བ་ལྟར་སྟོང་པ་ལ་མ་བརྟགས་པའི་དངོས་པོ་ཐམས་ཅད་༼༡༦བ༣༢༽མཐོང་བ་ནི་སོ་སོར་སྡུད་པའི་ཡན་ལག་སྟེ། སོ་སོར་སྡུད་པ་ལུས་ལ་ཡུལ་དང་ཡུལ་ཅན་བཅུ་པོ་རྣམས་ཀྱི་རབ་ཏུ་འཇུག་པ་མེད་པའོ། །ཞེས་སོ། །སྒྲ་དོན་ནི། པྲ་ཏྱ་ཧ་རའི་སྒྲ་ལས་སོ་སོར་སྡུད་པ་དང་། སོ་སོར་སྤོང་བ་རྣམ་གྲངས་ཏེ་དབང་པོ་རྣམས་སོ་སོར་ནང་དུ་བསྡུས་ནས་ཕྱིར་འདོད་པར་བྱ་བའི་ཡུལ་གཟུགས་སོགས་ལ་འཇུག་ཏུ་མི་སྟེར་བས་སོ་སོར་སྡུད་པའམ། སོ་སོར་སྤོང་གཞེས་བྱ་ལ། ཡང་ན་ཨཱ་ཧ་རའི་སྒྲ་ནི་ཟ་བ་ལ་འཇུག་པས་ཐ་མལ་གྱི་མིག་སོགས་སྐྱེ་མཆེད་དྲུག་གིས་ཡུལ་དྲུག་ཟ་བ་སྟེ་འཛིན་པའི་དོན་ཡིན་ལ། པྲ་ཏི་དགག་པའི་དོན་ཉིད་ཀྱི་ཕྱིར་ཐ་མལ་པའི་མིག་སོགས་དྲུག་གི་གཟུང་འཛིན་གྱི་འབྲེལ་བ་བཀག་པས་སོ། །ཡང་ན། པྲ་ཏི་ཟློས་པའི་དོན་དུ་གཟུང་ནས་གཞན་ཡུལ་དང་ཡུལ་ཅན་གཉིས་མེད་ཀྱི་སྣང་བ་མངོན་སུམ་དུ་མཐོང་བས་སོ་སོར་ཟ་བ་ཞེས་བྱ་སྟེ། འདུས་པར། དབང་པོ་བཅུ་པོ་རྣམས་ཀྱི་ནི། རང་ལ་འཇུག་གནས་ཐམས་ཅད་ནས། འདོད་པ་ཕྱི་ཕྱིར་སྡུད་པས་ན། སོ་སོར་སྡུད་པ་ཞེས་བརྗོད་དོ། །ཞེས་སོ། །དབྱེ་བ་ནི། སོར་སྡུད་རྡོ་རྗེ་སེམས་དཔའ་ཡེ་ཤེས་ཀྱི་ཕུང་པོ་ལ་དུ་བ་ལ་སོགས་པ་མཚན་མོའི་དབྱེ་བས་ས་བཅུ་སྟེ། སོ་སོར་སྡུད་པ་རྒྱལ་བའི་དབང་པོར་འགྱུར་ཞིང་རྣམ་པ་བཅུ་སྟེ་ཞེས་པའི་ལུང་གིས་སོ། །དེ་ལྟ་བུའི་མཚན་མ་དེ་ལམ་ཇི་ལྟ་བུ་ལས་འབྱུང་ཞེ་ན། མཚན་མོ་དང་ཉིན་མོའི་རྣལ་འབྱོར་ལས་ཏེ། དང་པོ་ནི་གནས་བུག་པ་མེད་པའི་ཁྱིམ་དུ། དུས་རླུང་གཡས་ནས་རྒྱུ་བའི་ཚེ་སྐྱིལ་ཀྲུང་གསུམ་གྱི་གནད་བཅིངས་ནས་གཙུག་ཏོར་འཁོར་ལོབ་སྒྱུར་བའི་ལྟ་སྟངས་ལ་སོགས་པ་གསུམ་གྱིས་མིག་མི་འཛུམ་པར་ལྟ་བས་ནམ་མཁའི་ཆོས་འབྱུང་ལ་ཐུགས་རྡོ་རྗེ་ཀུན་ནས་ཞེན་པའི་སེམས་རབ་ཏུ་གཞག་སྟེ། བསམ་པ་ཐམས་ཅད་ཡོངས་སུ་སྤོངས་ནས་སྟོང་པར་རྩེ་གཅིག་པའི་ཡིད་དུ་བྱས་པས་ཁམས་གསུམ་པའི་མཚན་ཉིད་བརྟན་གཡོའི་བདག་ཉིད་སངས་རྒྱས་ཀྱི་གཟུགས་བརྙན་དུ་བསྒྲུབ་པར་བྱ་ཞིང་དེ་ཉིད་ལ་དགོངས་པའི་སྐད་ཀྱིས་གཙུག་ཏོར་ཆེན་པོའི་གཟུགས་བརྙན་ཞེས་གསུངས་ཏེ། བསྙེན་པའི་དུས་སུ་གཙུག་ཏོར་ཆེའི། །གཟུགས་བརྙན་འབད་པས་རྣམ་བསྒོམ་བྱ། ཞེས་སོ། །དེ་ལྟ་བུས་ཉི་མ་གཅིག་ཡོངས་སུ་བརྟགས་ན་དུ་བ་ལ་སོགས་༼༡༧ན༣༣༽པའི་མཚན་མ་རྙེད་པ་ནི་བཅོ་ལྡན་འདས་ཀྱི་ངེས་པ་སྟེ། བསམ་ས་ཐམས་ཅད་ཡོངས་སྤངས་ནས། ཉི་མ་གཅིག་ནི་ཡོངས་སུ་བརྟག །དེ་ལ་རྟགས་ནི་མ་བྱུང་ན། །དེ་ཚེ་ང་ཡི་རྫུན་ཚིག་ཡིན། །ཞེས་པས་སོ། །དེ་ཡང་གཡས་པ་སའི་དཀྱིལ་འཁོར་རྒྱུ་དུས་སུ་བསྒོམས་པས་ས་རླུང་ལྟེ་བར་ཟིན་པ་སྟེ་ཇི་སྲིད་ཡིད་མ་ཡེངས་པ་དེ་སྲིད་དུ་ཕྱིར་འཕོ་བ་མེད་པས་ས་ཆུ་ལ་ཐིམ་པའི་ཚུལ་ས་རླུང་རྒྱུ་བའི་གྲངས་ཉུང་ངུ་སོང་ཞིང་ཆུ་རླུང་ཇི་ལྟ་བ་བཞིན་རྒྱུ་བའི་དབང་དེས། དང་པོར་དུ་བ་མཐོང་སྟེ་སྨིག་རྒྱུ་ནི་མ་ཡིན་ནོ་ཞེས་རང་གི་ཉམས་སུ་མྱོང་བས་ཤེས་པར་བྱའོ། །དེ་ལྟར་གོམས་པས་ཆུ་མེ་དང་། །མེ་རླུང་དང་། རླུང་ནམ་མཁའ་ལ་ཐིམ་པའི་དབང་གིས་སྨིག་རྒྱུ་དང་། མཁའ་སྣང་ངམ་མེ་ཁྱེར་དང་། སྒྲོན་མའམ་འབར་བ་མཐོང་བར་འགྱུར་བ་མཚན་མོའི་དུས་གཙོ་བོར་འབྱུང་བའི་ཕྱིར་མཚན་རྟགས་ཞེས་བྱ་ལ་དེ་དག་ཀྱང་བསྒོམས་པའི་རྟགས་ཡིན་གྱི་གྲུབ་པ་ཉི་མཚན་མ་མ་ཡིན་ཏེ། ཕྱག་རྡོར་གྱིས་ཁ་ཅིག་གྲུབ་པའི་དུས་སུ་ཞེས་སྨྲ་བར་འགྱུར་བ་དེ་ཐམས་ཅད་ནི་བཅོམ་ལྡན་འདས་ཀྱི་དམ་བཅའ་འཇོམས་པར་བྱེད་པ་སྟེ། བསམ་པ་ཐམས་ཅད་ཡོངས་སྤངས་ནས། ཉི་མ་གཅིག་ནི་ཡོངས་སུ་བརྟགས། ཅེས་པའི་བཅོམ་ལྡན་འདས་ཀྱི་བཀའ་ལ་རྣམ་པར་འཐོ་འཚམ་པའོ། །གྲུབ་པའི་དུས་སུ་འཇིག་རྟེན་པའི་དུ་བ་ལ་སོགས་པ་གང་ཞིག་སྒྱུ་མ་དང་རྨི་ལམ་ལྟ་བུ་དེ་ནི་མཚན་མར་མི་འགྱུར་ཏེ། འདིར་དུ་བ་དང་འབར་བ་ལ་སོགས་པ་ཡོངས་སུ་བསྲེས་པའི་བྱ་བ་ནུས་པའི་ཕྱིར་རོ། །དེ་བཞིན་དུ་གུར་ཀུམ་དང་རིན་པོ་ཆེ་དང་མེ་ཏོག་དང་གསེར་ལ་སོགས་པའི་ཆར་ཡང་ངོ་། །དེའི་ཕྱིར་ཡང་ལག་དྲུག་གི་རྣལ་འབྱོར་ལས་དུ་བ་ལ་སོགས་པའི་མཚན་མར་འགྱུར་རོ། །དེ་བཞིན་དུ་མཁའ་འགྲོ་མ་རྡོ་རྗེ་གུར་དུ་བཅོམ་ལྡན་འདས་ཀྱིས་གསུངས་པ། ཡན་ལག་དྲུག་བསྒོམ་དེ་ནས་ནི། སླར་ཡང་རང་བྱིན་བརླབ་པ་སྟེ། རྗེས་མཐུན་ཆོ་གའི་རིམ་པ་ཡིས། ཕྱི་ནས་མཚན་མ་མཚོན་པར་བྱ། ཞེས་པའོ་ཞེས་གསུངས་པས་སོ། །དེ་ལ་གོམས་ནས་ཉིན་མོའི་རྣལ་འབྱོར་ནི་སྤྲིན་མེད་པའི་ནམ་མཁའ་ལ་ཉི་མའི་འོད་ཟེར་གྱི་གནོད་པས་༼༡༧བ༣༤༽མིག་རབ་རིབ་ཏུ་འགྱུར་བ་སྤང་བའི་ཕྱིར་སྔ་དྲོ་དང་ཕྱིར་སྔ་དྲོ་དང་ཕྱི་དྲོ་ཉི་མ་ལ་རྒྱབ་བསྟན་ནས་ལྟ་སྟངས་དང་འཇོག་ཚུལ་སྔར་བཞིན་དུ་བརྒད་པའི་མིག་གིས་ཉི་མ་སོ་སོར་བལྟ་བར་བྱ་སྟེ། མེའི་རྣམ་པ་སྟོང་པའི་སྣང་བ་ནི་འབར་བ་སྟེ་སེམས་རྣམ་རྟོག་ཐམས་ཅད་དང་བྲལ་བའི་ཕྱིར་སྤྲིན་མེད་ཀྱི་ནམ་མཁའ་ལས་བྱུང་བའི་སྣང་བ་དེ། ནམ་མཁའ་ལས་བྱུང་རང་བྱུང་བ། ཤེས་རབ་ཡེ་ཤེས་མེ་བོ་ཆེ། འབར་བའོ། །ཟླ་བའི་རབ་ཏུ་སྣང་བ་ནི། འོད་ཆེན་རྣམ་པར་སྣང་བར་བྱེད། ཡེ་ཤེས་སྣང་བ་ལམ་མེ་བའོ། །འགྲོ་བའི་མར་མེ་ནི་ཉི་མའོ། །ཡེ་ཤེས་སྒྲོན་ནི་མུན་ཅན་ཏེ་སྒྲ་གཅན་ཡིན་ཏེ་རིན་པོ་ཆེ་ནག་པོ་ལྟར་སྣང་བའོ། །གཟི་བརྗིད་ཆེན་པོ་འོད་གསལ་བ་ནི་གློག་གི་སྣང་བ་སྟེ་མཆོག་གི་ཆའོ། །རིག་པའི་རྒྱལ་མཆོག་སྔགས་དབང་པོ་ནི། ཐིག་ལེའི་རབ་ཏུ་སྣང་བ་ཟླ་བའི་དབྱིབས་འདྲ་བ་ཁ་དོག་སྔོན་པོ་དང་པོ་ཆེན་པོ་ཟླ་བ་ཙམ་གྱིས་ཇེ་ཆུང་ཇེ་ཆུང་ཡུངས་ཀར་སྦོམ་པོའི་ཚད་ཙམ་མོ། །གསང་སྔགས་རྒྱལ་པོ་དོན་ཆེན་བྱེད་ཅེས་བ་བུམ་པ་དང་སྣམ་བུ་ལ་སོགས་པ་རྣམ་པ་ཐམས་ཅད་པའི་གཟུགས་ཁམས་གསུམ་པའི་དངོས་པོའི་རྣམ་པ་ཐམས་ཅད་རབ་ཏུ་སྣང་བ་སྒྱུ་མ་དང་རྨི་ལམ་དང་པྲ་ཕབ་པ་དང་མཚུངས་པར་མཐོང་བའོ། །མཚན་མ་དྲུག་པོ་འདི་རྣམས་སྤྲིན་མེད་པའི་ནམ་མཁའ་ལྟར་སྣང་བ་ལས་འབྱུང་བའི་ཕྱིར་ཉིན་མོའི་རྣལ་འབྱོར་གྱིས་མཐོང་བའོ། །དེ་ནས་ཐིག་ལེའི་དབུས་སུ་རྗེས་མེད་ཅིང་བརྟགས་པ་དང་བྲལ་བའི་ཕྱིར་ཡུལ་དང་རྣམ་པར་བྲལ་བའི་ལོངས་སྤྱོད་རྫོགས་པའི་སྐུའི་བདག་ཉིད་ཀྱི་སངས་རྒྱས་ཀྱི་གཟུགས་མཐོང་བ་དང་ལྷན་ཅིག་སྐད་ཅིག་ལ་ལག་པར་གནས་པའི་ཆུ་ལྟར་ཤིན་ཏུ་དང་བ་རྣམ་པ་ཐམས་ཅད་པའི་བུམ་པ་དང་སྣམ་བུ་ལ་སོགས་པ་མཐོང་བ་ནི་སྣ་ཚོགས་གཟུགས་བརྙན་འོད་གསལ་བའོ། །དེ་ནས་གཟུགས་ཀྱི་རྣལ་འབྱོར་གྱིས་གཞོམ་དུ་མེད་པའི་སྒྲ་གང་ཡིན་པ་ཐོས་ཏེ། དེ་ལྟར་གཟུགས་སྣང་བ་ལས་སྤྲུལ་སྐུ་དང་། སྒྲ་སྣང་བ་ལས་ལོངས་སྐུའོ། །དེ་ཡང་ཐིག་ལེའི་དབུས་སུ་རེ་ཁཱ་ནག་པོ་སྐྲའི་ཚད་ཙམ་དྲི་མེད་འོད་ཟེར་འཕྲོས་དུས་ཀྱི་རྩ་ཨ་ཝ་དྷཱུ་ཏཱི་ལ་མཐོང་གི་བར་དུའོ། །དེ་ལ་ཐིག་ལེའི་དབུས་སུ་རེ་ཁཱ་ནག་པོ་སྐྲའི་ཚད་ཙམ་དྲི་མ་མེད་པའི་འོད་ཟེར་འཕྲོ་བ་ཤིན་ཏུ་དང་ཞིང་གསལ་༼༡༨ན༣༥༽བ་དེའི་དབུས་སུ་ཁམས་གསུམ་ཤའི་མིག་གིས་མཐོང་བའོ། །རྒྱུད་ཕྱི་མ་ལས། སོ་སོར་སྡུད་སོགས་དྲུག་པོ་རྣམས་ཀྱིས་སྟོབས་བཅུའི་སྟོབས་དང་ལྡན་པས་སྟོང་པ་ཉིད་ནི་བསྒོམ་པར་གསུངས་སོ། །མཚན་མོ་དུ་བ་ལ་སོགས་རྣལ་འབྱོར་སླར་ཡང་ཉིན་མོ་མཁའ་ལ་འབར་བ་ལ་སོགས་རྣམས་ཀྱང་ངོ་། །སོ་སོར་སྡུད་པས་རྣལ་འབྱོར་པ་ནི་ནམ་མཁའི་མཐིལ་དུ་སོན་པའི་དུས་སུ་གཟུགས་རྣམས་མཐོང་བར་འགྱུར། དེ་ལ་བསམ་གཏན་གྱིས་སེམས་བརྟེན་པར་ཡང་ནི་བྱེད་དེ་ཕྱི་རོལ་དངོས་པོ་རྣམས་ནི་རྣམ་པར་སྤོང་། ཞེས་པ་དང་། ནམ་མཁར་ཀུན་ནས་ཞེན་པའི་སེམས་དང་མིག་ནི་མི་འཛུམས་རྡོ་རྗེའི་ལམ་དུ་རབ་ཏུ་ཞུགས་པ་ཡིས། སྟོང་པ་ལས་ནི་དུ་བ་སྨིག་རྒྱུ་རབ་གསལ་དྲི་མ་མེད་པའི་མཁའ་སྣང་ཉིད་དང་མར་མེ་དང་། འབར་བ་དང་ནི་ཟླ་བ་ཉི་མ་རྡོ་རྗེ་རྣམས་དང་མཆོག་གི་ཆ་དང་ཐིག་ལེ་མཐོང་བར་འགྱུར། དེ་ཡི་དབུས་སུ་སངས་རྒྱས་གཟུགས་ནི་ཡུལ་དང་རྣམ་པར་བྲལ་བ་དུ་མ་ལོངས་སྤྱོད་རྫོགས་པའི་སྐུ། ནམ་མཁའ་ཆུ་འཛིན་བྲལ་བ་དག་ནི་རྣལ་འབྱོར་པ་ཡིས་བརྒད་པའི་མིག་གིས་བལྟ་བར་བྱ་བ་སྟེ། རེ་ཁཱ་ནག་པོ་དྲི་མེད་འོད་ཟེར་འཕྲོ་བ་དུས་ཀྱི་རྩ་ལ་མཐོང་བར་གྱུར་གྱི་བར་དུའོ། །དེ་ལ་ཀུན་མཁྱེན་གཟུགས་ནི་ཆུ་ལ་ཉི་མ་ལྟ་བུ་གོས་པ་མེད་པ་ཁ་དོག་སྣ་ཚོགས་ཏེ། རྣམ་པ་ཀུན་ལྡན་རང་སེམས་ཡུལ་དང་རྣམ་པར་བྲལ་བདག་སེམས་ནི་གཞན་པ་མིན་པ་ཉིད། ཅེས་གསུངས་པས་སོ། །དེ་ལྟར་མཐོང་བ་དེ་དངོས་པོར་ཡོད་པའི་གཟུགས་མཐོང་བ་མིན་ཏེ། དངོས་པོར་ཡོད་པའི་གཟུགས་མཐོང་ན། རང་གི་གདོང་པ་ཅིས་མི་མཐོང་སྟེ་མཐོང་བར་འགྱུར་རོ། །དངོས་པོར་མེད་པ་མཐོང་བ་ཡང་མིན་ཏེ་གལ་ཏེ་དངོས་པོར་མེད་པའི་གཟུགས་མཐོང་ན་རི་བོང་གི་རྭ་དང་མོ་གཤམ་གྱི་བུ་ཡང་ཇི་ལྟར་མཐོང་བ་མིན། དེ་བས་འདི་དངོས་པོ་དང་དངོས་པོ་མེད་པའི་ཕྱོགས་ལས་འདས་པའི་གཟུགས་བརྙན་ཡིན་པས་པྲ་ཕབ་པའི་དཔེས་གསལ་བར་གསུངས་པ་སྟེ། དེ་བས་སངས་རྒྱས་དོན་དུ་གཉེར་བ་རྣམས་ཀྱིས་ཐེ་ཚོམ་མེད་པར་དུ་བ་ལ་སོགས་པའི་ལམ་བསྒོམ་པར་བྱའོ། །དབང་མདོར་བསྟན་ལས། བཀབ་དང་མ་བཀབ་མིག་དག་གིས། སྟོང་པ་འདི་ནི་རྗེས་བཏགས་མིན། ༼༡༨བ༣༦༽རྨི་ལམ་བཞིན་དུ་གཟུགས་མཐོང་འགྱུར། །གཟུགས་དེ་རྟག་ཏུ་བསྒོམ་པར་བྱ། །ཞེས་པས་སོ། །ཕྱག་རྒྱ་ཆེན་པོ་བསྒོམ་པ་ཡང་རྟོག་པས་སྒྲོ་བཏགས་པའི་མཚན་མ་མཐའ་དག་གིས་མཚོན་དུ་མེད་པ་མ་ཡིན་ནམ། གཟུགས་དེ་བསྒོམ་པར་བྱ་ཞེས་ཇི་ལྟར་བརྗོད་ཅེ་ན། སྐྱོན་མེད་དེ་འདིར་སེམས་ཀྱི་བསམ་པའི་དབང་གིས་རྣལ་འབྱོར་པའི་ལྷའི་དམིགས་པ་མངོན་སུམ་དང་རྗེས་དཔག་གཉིས་ཏེ། མངོན་སུམ་ནི་རྟོག་པའི་མཚན་མ་མཐའ་དག་དང་བྲལ་བ་བླ་མ་དམ་པས་ལམ་ཉེ་བར་བསྟན་པ་ལས་སྐྱེས་པ་དེ་ནི་དེ་ཁོ་ན་ཉིད་ཀྱི་སྦྱོར་བས་ནམ་མཁའ་ལ་སྐར་མའི་ཚོགས་བཞིན་དུ་ལོངས་སྤྱོད་རྫོགས་པའི་སྐུ་དུ་མ་ཤ་ལ་སོགས་པའི་མིག་གིས་གཟུང་བར་བྱ་བ་སྲིད་པ་གསུམ་དང་དུས་གསུམ་སྒྱུ་མ་དང་རྨི་ལམ་དང་མཚུངས་པའོ། །འདིར་དང་པོ་ལས་དང་པོ་པའི་རྣལ་འབྱོར་པ་མངོན་པར་ཤེས་པ་མེད་པས་ཤའི་མིག་གིས་སྣ་ཚོགས་དབུགས་མཐོང་ངོ་། །དེ་ནས་མངོན་པར་ཤེས་པའི་མཚམས་ཀྱི་དབང་གིས་ལྷའི་མིག་གིས་སོ། །དེ་ནས་འདོད་ཆགས་དང་བྲལ་བའི་མཚམས་ཀྱི་དབང་གིས་སངས་རྒྱས་ཀྱི་སྤྱན་གྱིས་སོ། །དེ་ནས་བྱང་ཆུབ་སེམས་དཔའི་མཚམས་ཀྱི་དབང་གིས་ཤེས་རབ་ཀྱི་སྤྱན་གྱིས་སོ། །དེ་ནས་ཡང་དག་པར་རྫོགས་པའི་སངས་རྒྱས་ཀྱི་མཚམས་ཀྱི་དབང་གིས་ཡེ་ཤེས་ཀྱི་སྤྱན་གྱིས་གཟིགས་ཏེ། ལྷག་མ་ཀུན་ལས་རྣམ་གྲོལ་བ། ཞེས་སོ། །དེ་ལྟར་དེ་བཞིན་གཤེགས་པའི་སྤྱན་ལྔ་པོ་རྣམས་སྟོང་པ་ཉིད་གཟིགས་པ་ལ་གསུངས་པ་སྟེ། སེམས་ཅན་གཞན་ནི་སྟོང་པ་ཉིད་ལྟ་བའི་ཡུལ་ལ་དམུས་ལོང་ངོ་། །རྗེས་དཔག་ནི་དེ་ཁོ་ན་ཉིད་མཐོང་བ་མེད་པའི་དབང་གིས་ཤི་བའི་ལུས་བཞིན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་རི་མོ་དང་སྐུ་གཟུགས་བྱས་པ་དང་དཀྱིལ་འཁོར་གྱི་འཁོར་ལོ་བྲིས་ནས་ངེས་པའི་རྣམ་པས་བལྟ་བར་བྱ་སྟེ། བྱིས་པའི་རྣལ་འབྱོར་པ་དམན་པ་རྣམས་ཀྱི་དོན་དུ་རྟོག་པའི་སྒོམ་པའོ། །ལྷ་ཡི་་་་་་་པ་གང་ཡིན་མངོན་སུམ་དང་ནི་རྗེས་སུ་དཔག་པ་རྣམ་པ་གཉིས་སུ་འགྱུར་བ་སྟེ། མངོན་གསུམ་ངག་ནི་དེ་ཉིད་སྦྱོར་བས་མཁའ་ལ་སྐར་མ་བཞིན་དུ་དུ་མ་ལོངས་སྤྱོད་རྫོགས་པའི་སྐུ། མངོན་སུམ་མིན་ན་རྗེས་སུ་དཔག་པ་ཤི་བའི་ལུས་༼༡༩ན༣༧༽བཞིན་དེ་ཉིད་མིན་པ་ཡིས་ནི་བརྟགས་པ་གང་། དེ་ནི་རི་མོ་སོགས་ལ་བལྟ་བྱ་ཡོངས་སུ་མ་སྨིན་བློ་ཅན་རྣམས་ཀྱིས་བསྒོམ་པའི་དོན། ཞེས་དང་། སྤྱན་ལྔ་ཡང་རྒྱུད་ཕྱི་མ་ལས། ཁྱི་ལ་སོགས་པ་ཤའི་མིག་དང་རང་བཞིན་ཡོན་ཏན་དབང་གིས་ལྷ་ལ་སོགས་པའི་ལྷ་ཡི་སྤྱན། རང་རྒྱལ་ཉན་ཐོས་དག་གིས་གཞན་གྱི་སེམས་རྟོགས་ཤེས་པ་སངས་རྒྱས་སྤྱན་ཏེ་གསུམ་པའོ། །བྱང་ཆུབ་སེམས་དཔའ་རྣམས་ཀྱིས་དྲི་མ་བྲལ་བ་རྣམ་དག་བཞི་པ་ཤེས་རབ་སྤྱན་དུ། སངས་རྒྱས་རྣམས་ཀྱི་ཐམས་ཅད་གཟིགས་པ་དྲི་མ་གསུམ་དང་བྲལ་བ་ལྔ་པ་ཡེ་ཤེས་སྤྱན། །ཞེས་གསུངས་པས་སོ། །སོར་སྡུད་ཀྱི་དག་པ་གཟུགས་བརྟན་པར་གྱུར་པས་རྣལ་འབྱོར་པ་རྣམ་པར་དག་པར་གྱུར་པ་དེའི་ཚེ་སྔགས་ཀྱིས་བྱིན་གྱིས་རློབ་སྟེ། ཙིག་གི་མཆོག་སྦྱིན་པ་ལ་སོགས་པ་སྦྱིན་པར་འགྱུར་རོ། །སོ་སོར་སྡུད་པ་ཡུལ་དང་རྣམ་པར་བྲལ་བ་སྔགས་རྣམས་ཀུན་གྱིས་བྱིན་གྱིས་རློབ། ཅེས་པས་སོ། །འདི་ལས་ནི་རོ་རྐྱང་གི་རླུང་འགག་བ་ལས། མིག་གི་རླུང་འགག་ཅིང་། དབང་པོ་ཐམས་ཅད་ནུབ་པར་འགྱུར་བ་དང་། འོག་གི་རླུང་གསུམ་ཡང་འགག་པ་ལས་རྣམ་རྟོག་གི་བཞོན་པའི་རླུང་ཁགས་པའི་ཕྱིར་སེམས་རྣམ་པར་མི་རྟོག་པ་ལ་རྩེ་གཅིག་པའི་ཏིང་ངེ་འཛིན་མངོན་དུ་འགྱུར་བ་ཡིན་ཏེ། ཇི་སྐད་དུ། དབང་མདོར་བསྟན་ལས། ཟླ་བ་ཉི་མའི་རྩ་འགག་ན། དྲི་ཆེན་དྲི་ཆུའི་རྩ་འགག་གོ། །སྒྲ་གཅན་རྩ་ནི་འགགས་གྱུར་ན། སྟེང་འགས་བོན་འབབ་མ་བཀླག །ཅེས་གསུངས། དེ་ལྟ་བུའི་ལུས་སེམས་ཤིན་ཏུ་སྦྱངས་པ་ལས་བྱུང་བའི་ཏིང་ངེ་འཛིན་ཡན་ལག་ལྔ་དང་ལྡན་པ་སྟེ། ཤེས་རབ། རྟོག་པ། དཔྱོད་པ། དགའ་བ། གཡོ་མང་བདེ་བའོ། །དུ་སོགས་སྟོང་པ་ཉིད་ཀྱི་དངོས་པོ་ལ་སེམས་རྩེ་གཅིག་ཏུ་བཞུགས་པར་ལྟ་བ་ནི་ཤེས་རབ། རོ་གཅིག་ཏུ་བསྲས་ཏེ་འཛིན་པ་ནི་རྟོག་པ། གཉིས་མེད་དུ་བརྟན་པར་ཡོངས་སུ་དཔྱོད་པ་ནི་དཔྱོད་པ། དེ་ལས་སྟོང་པ་ཉིད་ལ་རྗེས་སུ་ཆགས་པའི་བདེ་བ་ནང་གི་མྱོང་བ་རང་བྱིན་གྱིས་བརླབ་པའི་མཚན་ཉིད་ཅན་ནི་དགའ་བ། དེ་ལས་སྟོང་པ་ཉིད་ལ་རྩེ་གཅིག་པ་ཉིད་ཀྱིས་ནང་ལུས་ཤིན་ཏུ་སྦྱངས་པའི་བད་བ་རྩོ་ལ་མེད་དུ་སོ་སོ་རང་གིས་རིག་པ་གཡོ་མེད་༼༡༩བ༣༨༽བདེ་བ་ནི་འབྲས་བུ་ཡིན་པར་རིག་པར་བྱའོ། །གཟུགས་སོགས་ཡུལ་ལྔ་དང་། མིག་སོགས་ཡུལ་ཅན་ལྔ་འགོག་པ་ལས་དབྱེ་བ་རྣམ་པ་བཅུ་སྟེ། གཟུང་འཛིན་བཀག་ན་སེ་གཉིས་མེད་དུ་བརྟན་པར་བྱེད་པ་ལས་སོ། །དེ་ཡང་མཉམ་གཞག་ཏུ་ནར་གྱི་དང་། རྗེས་ཤེས་སུ་ཐ་མལ་པའི་ཡུལ་ཡུལ་ཅན་འགོག་པའོ། །དེ་ཡང་། བསམ་གཏན་དག་ཀྱང་ཤེས་རབ་རྟོག་དང་དཔྱོད་པ་དགའ་དང་གཡོ་མེད་བདེ་བ་རྩེ་གཅིག་སེམས་པའོ། །ཞེས་དང་། རྣམ་པ་བཅུ་སྟེ་བསམ་གཏན་མི་བསྐྱོད་པ་ཉིད་དོ། །ཞེས་པས་བསམ་གཏན་གྱི་རྣམ་པར་དག་པ་ནི་མི་བསྐྱོད་པ་རྣམ་ཤེས་ཀྱི་ཕུང་པོ་དང་། འབྲས་བུ་ནི་མིག་མི་འཛུམས་པར་གྱུར་པའི་ཚེ་ལྷའི་མིག་དང་། རྣ་བ་དང་། གཞན་གྱི་སེམས་ཤེས་པ་དང་། སྔོན་གྱི་གནས་རྗེས་སུ་དྲན་པ་དང་། རྫུ་འཕྲུལ་གྱི་མངོན་པར་ཤེས་པ་སྟེ་རྣམ་པ་ལྔའོ། །མེ་ལོང་ཤེས་པ་ལྔ་ནི་ཐོབ་པ་འགྱུར་ཏེ་མེ་ཡི་བདག་པོ་བསམ་གཏན་སྦྱོར་བ་དག་པའོ། །ཞེས་སོ། །དེ་ལྟར་སྐུ་རྡོ་རྗེའི་ལམ་འདིར་ཡོད་པ་རྟག་པའི་མཐའ་དང་། མེད་པ་ཆད་པའི་མཐའ་རྣམ་པར་སྤངས་པ་སོ་སོ་རང་གིས་རིག་པའི་བདག་ཉིད་ཀྱི་རྣམ་པར་མི་རྟོག་པ་དེ་ལ་དབུ་མའི་སེམས་ཞེས་བྱའོ། །དེ་ཡང་། ཡོད་དམ་མེད་པ་རྣམ་པར་སྤངས། སོ་སོ་རང་གིས་རིག་བྱ་བ། དབུ་མའི་སེམས་ཞེས་བྱ་བ་སྟེ། རྣམ་པར་མི་རྟོག་བདག་ཉིད་དོ། །ཞེས་པས་སོ། །དབུ་མའི་སེམས་དེ་ཡང་རྡོ་རྗེའི་སྐུའི་རང་བཞིན་གྱིས་འཇིག་རྟེན་གསུམ་པོ་ཐམས་ཅད་ལ་ཁྱབ་པའི་ཐིག་ལེའི་གཟུགས་ཅན་ཉིད་ཀྱི་ཕྱིན། སྒྲིབ་པའི་སྤྲིན་གྱི་དྲ་བ་ལས་གྲོལ་བའི་བྱང་ཆུབ་སེམས་ཀྱི་ཟླ་བ་གཙུག་ཏོར་གྱི་པདྨའི་མཐར་ཐུག་པར་གང་བས་ས་བཅུ་གསུམ་གྱི་དབང་ཕྱུག་རྡོ་རྗེ་འཆང་པོ་ཉིད་དུ་འགྱུར་བ་སྟེ། ས་ནི་ཆུ་ལ་རབ་ཏུ་འཇུག་ཅིང་ཆུ་ཡང་འབར་བྱེད་ལ་སྟེ་གཙང་བར་བྱེད་པ་རླུང་ལའོ། །་་་་་་ནི་སྟོང་པ་ལ་སྟེ་སྟོང་པ་ངེས་པར་མཚན་མ་རྣམ་པ་བཅུ་རུ་འགྱུར་ཞིང་མཚན་མ་ནི། རྣམ་པ་ཐམས་ཅད་པ་རུ་འགྱུར་ཏེ་མི་ཟད་མཆོག་གི་བདེ་བ་གཞོམ་དུ་མེད་པ་ཡེ་ཤེས་སྐུ། ཡེ་ཤེས་ལས་ནི་རྫུ་འཕྲུལ་དངོས་གྲུབ་ཏུ་འགྱུར་མི་བདག་སྐྱེས་བུ་རྣམས་ཀྱི་སྐྱེ་བ་འདི་ཉིད་ལའོ། །ཞེས་གསུངས་སོ། །འདི་ཡང་དབང་པོ་རབ་སྐུ་རྡོ་རྗེ་གཅིག་པུའི་༼༢༠ན༣༩༽ལམ་གྱིས་གྲོལ་བའི་དབང་དུ་བྱས་པ་སྟེ། དེས་ཕྱག་རྒྱ་ཆེན་མོ་གཅིག་པུ་ལ་མཉམ་པར་སྦྱོར་བའི་ཚུལ་གྱིས་འདོད་པའི་དངོས་གྲུབ་མངོན་དུ་བྱས་པ་ཡིན་ཏེ། ལས་ཀྱི་ཕྱག་རྒྱའི་སྙོམས་འཇུག་དང་། ཡེ་ཤེས་ཕྱག་རྒྱ་སོགས་དམིགས་དང་། ཕྱག་རྒྱ་ཆེན་མོ་གཅིག་སྦྱོར་ལས། མི་འགྱུར་བ་དེ་འཕེལ་བར་འགྱུར། ཞེས་སོ། །དེའི་ཕྱིར་ལས་དང་ཡེ་ཤེས་ཀྱི་ཕྱག་རྒྱའི་ཉེར་ལེན་ལས་མ་བྱུང་ཞིང་། རེ་གཉིས་ཀྱིས་མཚོན་པའི་ཕྱག་རྒྱ་ཆེན་མོ་ལས་མངོན་པར་གསལ་བ་ཉིད་ཀྱི་ཕྱིར། སྟོང་པ་ཉིད་ལ་རྒྱུ་དང་། མི་འགྱུར་བའི་བདེ་བ་ལ་འབྲང་བུའི་ཐ་སྙད་དུ་བྱ་བ་སྟེ། གསུངས་པ། ཤེས་རབ་རྒྱུ་ལམ་མ་བྱུང་ཞིང་། ཤེས་རབ་རྒྱུ་ལས་བྱུང་བ་འབྲས། ཤེས་རབ་ཡེ་ཤེས་རྒྱུ་སྐྱེས་མིན། ཞེས་རྩ་བའི་རྒྱུད་ལས་སོ། །གཞན་རིམ་པ་དྲུག་ཀ་ལ་འཇུག་འོས་པ་དག་ལ་ནི། ལྟེ་བའི་སྟེང་དུ་ར་སཱ་ནའི་རྩ་ནས་ཡུལ་ལྔ་ལ་འཇུག་པའི་རླུང་འགགས་པས་འཁོར་ལོ་ལྔའི་རྟེན་ཅན་གྱི་དྷཱུ་ཏཱིར་ལྟེ་བར་ཁ་ཕྱེ་བའི་རེ་ཁཱའི་དབུས་སུ་སྣ་ཚོགས་པའི་གཟུགས་མཐོང་བའོ། །དེའི་སྟོབས་ཀྱིས་ལྟེ་བའི་འོག་ཏུ་ལ་ལ་ནཱའི་རྩ་ནས་ཐུར་སེལ་གྱི་རླུང་འགགས་པས་འཁོར་ལོ་གསུམ་གྱི་རྟེན་ཅན་གྱི་དྷཱུ་ཏཱི་ལྟེ་བར་རང་ཁ་བྱེ་བས་རོ་རྐྱང་ལ་སོགས་པའི་རྩ་རྣམས་དབུ་མར་དག་པས་ལས་ནད་དུ་བྱེད་ལ་དེའི་ཚེ་རྐྱེན་གཞན་ལ་མ་ལྟོས་པར་རྡོ་རྗེ་ལངས་པའི་བདེ་བ་འབྱུང་། དེ་ནས་གཟུང་ནས་སྲོག་འགོག་ནུས་པས་སྲོག་རྩོལ་གྱི་འགོ་འཇུག་པའོ། །གཟུགས་ནི་མཐོང་བར་གྱུར་ནས་ཉིན་ཞག་སོ་སོའི་དུས་སུ་སྲོག་གི་རླུང་ནི་འགོག་པར་རབ་བྱ་སྟེ། འོད་ཟེར་འཁོར་ལོ་རང་གི་ལུས་ལ་ཡོངས་སུ་བསྐོར་ཞིང་འཁོར་བར་བྱེད་པ་མཐོང་གི་བར་དུའོ། །ཞེས་གསུངས་པས་སོ། །གཉིས་པ་ངག་རླུང་དག་པར་བྱེད་པ་གསུང་རྡོ་རྗེ་བསྒྲུབ་པའི་ཡན་ལག་ནི། སྲོག་རྩོལ་གྱིས་གསུང་རྡོ་རྗེ་མ་ཐོབ་པ་ཐོབ་པར་བྱེད་པས་གཙོ་བོར་བསྟན་ཅིང་འཛིན་པ་ཐོབ་པ་མི་ཉམས་པར་བྱེད་པའི་ཐབས་ཞར་འབྱུང་དུ་གསུངས་སོ། །དེ་ལ་དང་པོར་སྲོག་རྩོལ་གྱི་ངོ་བོ་ནི་གཡོན་པའི་ལམ་ལ་ལ་ནཱ་དཀྱིལ་འཁོར་ལྔའི་ཆོས་ཅན་རྣམ་ཤེས་ལ་སོགས་ཕུང་བོ་ལྔའི་རླུང་འབབ་པ་དང་། གཡས་པའི་ལམ་ར་སཱ་ན་དཀྱིལ་འཁོར་༼༢༠བ༤༠༽ལྔའི་ཆོས་ཅན་ས་ལ་སོགས་པའི་ཁམས་ལྔའི་རླུང་རྒྱུ་བ་སྟེ། འདི་ཉིད་བསྒྱེལ་བ་སྟེ་འགོག་པ་ལས་སྲོག་གི་རླུང་གཡས་གཡོན་གྱི་དཀྱིལ་འཁོར་བཅུ་རྟག་ཏུ་དབུ་མ་ཨ་ཝ་དྷཱུ་ཏཱིའི་ལམ་དུ་རབ་ཏུ་འཇུག་པའོ། །སྲོག་གི་རྩོལ་བ་དག་ཀྱང་ལམ་ནི་གཉིས་པོ་བསྐྱེལ་ཞིང་དབུ་མར་སྲོག་ནི་ཞུགས་པ་དག་ཏུ་འགྱུར། ཞེས་སོ། །སྒྲ་དོན་ནི། པྲཱ་ཎཱ་ཡ་མུ། ཞེས་པ་ལ། པྲཱ་ཎཱ་ནི་སྲོག་དང་། ཨཱ་ཡ་མུ་འགོག་པ་དང་། མཆེད་པ་གཉིས་ལ་འཇུག་པའི་དོན་གྱིས་རོ་རྐྱང་གི་སྲོག་ཨ་ཝ་དྷུ་ཏཱིར་འགོག་པ་དང་། ཨ་ཝ་དྷཱུ་ཏཱིའི་སྲོག་མཆེད་པར་བྱ་བས་སྲོག་རྩོལ་ལོ། །དཀྱིལ་འཁོར་བཅུ་འགོག་པ་ལ་དབྱེ་བ་བཅུ་དང་། དོན་ཡོད་གྲུབ་པ་འདུ་བྱེད་ཀྱི་ཕུང་པོ་རྣམ་པར་དག་པའོ། །དེ་ཡང་། སྲོག་རྩོལ་དག་ཀྱང་རལ་གྲི་ཅན་ནོ་ཞེས་པས་སོ། །དེ་གང་ལམ་དུ་བྱས་པ་ལས་ཐོབ་པ་བཤད་པར་བྱ་སྟེ། འབྱུང་འཇུག་གནས་པས་གསུམ་རླུང་ངག་དབྱེར་མི་ཕྱེད་པའི་ཚུལ་གྱིས་བཟླས་པ་དང་། ཕོ་མོ་མ་ནིང་གི་རླུང་སོ་སོ་ལ་བསླབ། གདོང་ཁ་སྦྱོར་ཕྱི་ནང་དང་སྲོག་ཐུར་གོང་བུ་གཅིག་ཏུ་བསྲེ་བའི་བུམ་པ་ཅན་གྱིས་སོ། །དེ་ཡང་། ཁ་ཡང་བཀབ་སྟེ་སྣ་ཡི་བུ་ག་གཉིས་བདག་ནས་ཕྱི་རོལ་དག་གི་རླུང་ནི་མ་ལུས་པ། སྲོག་གི་ཤུགས་ཀྱིས་བཀུག་སྟེ་དྲི་མ་མེད་པའི་གློག་དང་མཚུངས་པར་ཐུར་སེལ་རླུང་ལ་སྦྱར་བྱས་པ། དུས་ཀྱི་གོམས་པའི་སྦྱོར་བ་དག་ལ་ཟླ་བའི་ཉི་མའི་དབུས་སུ་རོ་ནི་མཉམ་པར་འགྱུར། ལུས་ལ་ཟས་ལ་སོགས་པ་དང་ནི་བཀྲེས་དང་སྐོམ་པ་འཕྲོག་སྟེ་འཆི་བ་མེད་པ་ཉིད་ཀྱང་སྟེར། ཞེས་གསུངས་པས་སོ། །དེ་ལྟར་འཆི་བ་བླུ་པའི་ཟོལ་གྱིས་སྲོག་རྩོལ་གྱི་རྣལ་འབྱོར་གསུངས་སོ། །དེ་ལྟ་བུའི་བུམ་པ་ཅན་གྱི་རྣལ་འབྱོར་འདི་ནི་ཇི་སྲིད་རླུང་འཕོ་བ་བཅུ་གཉིས་རྣམ་པར་སྤངས་ནས། སྣང་བུ་ག་གཉིས་ནས་ཅིག་ཅར་དུ་རྟག་ཏུ་འབབ་པར་འགྱུར་བ་དེ་སྲིད་དུ་བསྒོམ་པར་བྱའོ། །དེ་ལྟར་སྲོག་ལ་བརྟན་པ་ཐོབ་ནས་ཞི་རྒྱས་དབང་དྲག་གི་ལས། ཐོགས་པ་མེད་པར་འགྲུབ་སྟེ། ཁྱབ་བདག་གིས་ནི་དཔལ་ལྡན་སྔགས་དང་སངས་རྒྱས་གཟུགས་ཀྱང་རྣལ་འབྱོར་པ་ཡིས་རྟག་ཏུ་བསྒྲུབ་པར་བྱ། ཕྱི་ནས་ཉི་མའི་དབྱེ་བ་རྣམས་ཀྱིས་གནས་པ་ཡོན་ཏན་དཔག་ཏུ་མེད་པའི་ལས་རྣམས་འགྲུབ་པར་འགྱུར། ཞེས་སོ། །སྲོག་༼༢༡ན༤༡༽རྩོལ་གྱི་དག་པ་གཡས་གཡོན་གྱི་རྒྱུ་བ་བྲལ་ཏེ་རྟག་ཏུ་དབུ་མར་རྒྱུ་བའི་ཚེ་བྱང་ཆུབ་སེམས་དཔའ་རྣམས་ཀྱིས་མཆོད་ཅང་བསྔགས་པར་བྱེད་དོ། །དེ་ཡང་། སྲོག་གི་རྩོལ་བས་དག་པ་རི་བོང་ཅན་དང་ཉི་མ་དང་བྲལ་བྱང་ཆུབ་སེམས་དཔའ་རྣམས་ཀྱིས་མཆོག །ཅེས་སོ། །དེ་ལྟར་ཡང་མཚན་བརྗོད་ལས། འཇམ་དབྱངས་ཆེན་པོ་སྒྲ་ཆེ་བ། །འཇིག་རྟེན་གསུམ་ན་སྒྲ་གཅིག་པ། །ནམ་མཁའི་མཐའ་ཀླས་སྒྲ་སྒྲོག་པའི། །སྒྲ་དང་ལྡན་པ་རྣམས་ཀྱི་མཆོག །ཅེས་ཏེ། ཟླ་བ་ཉི་མའི་གཡོ་བ་བཅོམ་ནས་དབུ་མར་ཞུགས་པ་ནི་འཇམ་དབྱངས་ཆེན་པོ་སྟེ། དེ་ཉིད་འཁོར་ལོ་དྲུག་ལ་བརྟེན་པས་ནཱ་དའི་རང་བཞིན་གཞོམ་དུ་མེད་པ་སྟེ། སྒྲའམ་སྲོག་ཆེན་པོའོ། །འཇིག་རྟེན་གསུམ་པོ་ནི་ལུས་ངག་ཡིད་གསུམ་སྟེ། སྲོག་ཐུར་གྱི་རླུང་རྣམས་དབུ་མར་རོ་མཉམ་གཅིག་ཏུ་འདྲེས་པ་ནི་སྒྲ་གཅིག་པའོ། །ནམ་མཁའི་མཐའ་ཀླས་ཞེས་པ། སྐྲ་དང་སེན་མོ་དང་བ་སྤུའི་མཐར་ཐུག་པར་རླུང་ལ་དབང་འབྱོར་པས་ན་སྒྲ་སྒྲོག་པའོ། །དེ་ཉིད་ཀྱིས་སེམས་ཅན་རྣམས་ཀྱི་རང་རང་གི་སྐད་བཞིན་ཆོས་སྟོན་པར་ནུས་ཏེ། གསུང་རྣམ་པ་ཐམས་ཅད་པའོ། །དེ་ལས་གཞན་པའི་མཆོག་གི་སྒྲ་མེད་པས་ན་སྒྲ་དང་ལྡན་པ་རྣམས་ཀྱི་ནང་ནས་མཆོག་ཏུ་གྱུར་པའོ། །གཞན་ཡང་མཚན་བརྗོད་ལས། རིགས་གསུམ་འཆང་བ་གསང་སྔགས་འཆང་། །དམ་ཚིག་ཆེན་པོ་གསང་སྔགས་འཛིན། གཙོ་བོ་དཀོན་མཆོག་གསུམ་འཛིན་པ། །ཐེག་པ་མཆོག་གསུམ་སྟོན་པ་པོ། །ཞེས་ཏེ། རིགས་གསུམ་ནི་སྟེང་གི་ལུས་ངག་ཡིད་གསུམ་ནི་རྩ་དང་རླུང་དག་པ་དང་། དམ་ཚིག་ཆེན་པོ་གསང་སྔགས་འཛིན་ནི་འོག་གི་ལམ་གསུམ་ཟག་པ་མེད་པ་དང་། གཙོ་བོ་ནི་རྣམ་པར་ཤེས་པ་སྟེ། དཀོན་མཆོག་གསུམ་ནི་འབྱུང་འཇུག་གནས་གསུམ་འཁོར་ལོ་ལྔའི་ལྟེ་བ་ལ་འཛིན་པ་སྟེ་བརྟན་པའོ། །ཐེག་པ་ནི་འོག་གི་ལམ་མཆོག་གི་བྱང་ཆུབ་ཀྱི་སེམས་བརྟན་པ་གཙུག་ཏོར་དུ་མཐར་ཕྱིན་པས་ཐེག་པ་གསུམ་ཅིག་ཅར་དུ་སྟོན་པར་བྱེད་པ་སྟེ་རྫོགས་པའི་སངས་རྒྱས་སོ། །དེ་ལྟར་ལྟེ་བར་སའི་དཀྱིལ་འཁོར། སྙིང་གར་རླུང་། མགྲིན་པར་མེ། དཔྲལ་བའི་ཐིག་ལེར་ཆུའི་དཀྱིལ་འཁོར་གྱི་ལྟེ་བའི་དབུས་སུ་སྲོག་རབ་ཏུ་༼༢༡བ༤༢༽ཞུགས་ཤིང་འགྲོ་འོང་མེད་པར་གཡོ་མེད་དུ་འཛིན་པ་འཛིན་པའི་ངོ་བོ་ཡིན་ཏེ། ཐིག་ལེར་སྲོག་ནི་རབ་ཏུ་ཞུགས་ཤིང་གཉིས་ཀའི་བགྲོད་པ་བཅོམ་སྟེ་རྩེ་གཅིག་སེམས་པ་འཛིན་པའོ། །ཞེས་པས་སོ། །སྒྲ་དོན་ནི། དྷྲྀ་ཉ་འཛིན་པ་ལའོ། །ཞེས་པའི་བྱིངས་ལས། འཁོར་ལོ་དྲུག་གི་ལྟེ་བའི་ཐིག་ལེ་རླུང་སེམས་རྩེ་གཅིག་ཏུ་བརྟན་པར་བྱེད་པས་ན་འཛིན་པའོ། །ཡན་ལག་འདི་ནི་དེ་བཞིན་གཤེགས་པ་རིན་ཆེན་འབྱུང་ལྡན་ཚོར་བའི་ཕུང་པོ་རྣམ་པར་དག་པ་སྟེ། འཁོར་ལོ་ལྔའི་ལྟེ་བར་སྲོག་འགྲོ་བ་དང་འོང་བ་འཛིན་པའི་དབྱེ་བས་བཅུའོ། །སླར་ཡང་རྣམ་པ་བཅུ་སྟེ་འཛིན་པ་ཕྱག་ན་རིན་ཆེན་ནོ། །ཞེས་པས་སོ། །དེ་ལྟར་སྟེང་གི་རྩ་གསུམ་ནས་རྒྱུ་བའི་སྲོག་ཞག་གཅིག་དང་ཟླ་བ་ཕྱེད་དང་ཟླ་བ་གཅིག་དང་ཟླ་བ་དྲུག་རིམ་པ་བཞིན་འགོག་ནུས་ན་དཔྲལ་བ་མགྲིན་པ་སྙིང་ག་ལྟེ་བ་རྣམས་སུ་ཐིག་ལེ་འཛིན་ནུས་སོ། །ལོར་འགོག་ནུས་ན་གསང་གནས་སུ་གང་བ་འཛིན་ནུས་ཏེ་སྒྲུབ་པའི་ཐབས་ཀྱིས་སོ། །རྟག་ཏུ་འཛིན་ནུས་ན་ཉི་ཁྲི་ཆིག་སྟོང་དྲུག་བརྒྱ་འགགས་པས་ནོར་བུའི་རྩེ་མོར་གང་བ་འཛིན་ནུས་ཏེ་སྒྲུབ་ཆེན་གྱི་ཐབས་ཀྱིས་སོ། །དེས་ན་བུམ་པ་ཅན་གྱིས་སྟེང་ལམ་གསུམ་བཀག་ན་འོག་གསུམ་རང་འགག་སྟེ་བུམ་པ་ཞབས་ཚགས་ཅན་གྱི་ཆུ་བཞིན་ནོ། །དེས་ན་སྟེང་གསུམ་འགོག་མི་ནུས་པར་འོག་གསུམ་རྩོལ་བས་འགོག་ནུས་ཟེར་བ་ནི་ཤིན་ཏུ་མཚར་རོ། །མཚན་བརྗོད་ལས། དོན་ཡོད་ཞགས་པ་རྣམ་པར་རྒྱལ། འཛིན་པ་ཆེན་པོ་རྡོ་རྗེ་ཞགས། ཞེས་པའི་དོན་ཡོད་ཞགས་པ་ནི་སྲོག་རླུང་། སྟེང་འོག་གི་ལམ་གསུམ་འགགས་པས་བྱང་སེམས་འཆིང་བར་བྱེད་པས་ཞགས་པ། བདུད་རིགས་དྲུག་བརྒྱས་ལྷག་པའི་སྟོང་ཕྲག་ཉི་ཤུ་རྩ་གཅིག་བཅོམ་པའི་ཕྱིར་རྣམ་རྒྱལ། འཛིན་པ་ནི་སྡུད་པ་སྟེ་གྱེན་དུ་འགྲོ་བའི་འཁོར་ལོ་ལྔའི་རླུང་དང་། ཐུར་སེལ་བསྐྱེད་པའི་རིམ་པར་ལྟེ་བར་འདུས་པ་དང་། ཟླ་བ་དྲུག་ལ་སོགས་པར་འགོག་པ་ཆེན་པོ་སྟེ། ལྟེ་བ་མན་ཆད་བྱང་ཆུབ་ཀྱི་སེམས་ཀྱིས་གང་བར་འཛིན་ནུས་པ་ནི་རྡོ་རྗེ་ཞགས་པའོ། །འཛིན་པའི་དག་པ་འགྲོ་འོང་ཟད་ཅིང་གཅིག་ཏུ་འདྲེས་པས་བདུད་དང་ཉོན་མོངས་པ་གཡས་གཡོན་གྱི་རྒྱུ་བ་ལ་སོགས་པ་ཉམས་ཤིང་སྟོབས་༼༢༢ན༤༣༽བཅུ་སྟེ། སྟོང་པ་ཉིད་ཀྱི་སེམས་གཟུང་བའི་སེམས་ལ་འཇུག་པར་འགྱུར་རོ། །བདུད་དང་ཉོན་མོངས་ལ་སོགས་ཉམས་ཤིང་སྟོབས་བཅུ་ལ་ནི་འཇུག་པར་འགྱུར་ཏེ་འཛིན་པའི་སྟོབས་ཀྱིས་སོ། །ཞེས་གསུངས་པས་སོ། །དེའི་ཚེ་རི་རབ་ཙམ་གྱི་ཟས་ཟོས། རྒྱ་མཚོས་གྱི་སྐོམ་འཐུངས་ཀྱང་འཇུ་བའི་ཕྱིར། །སྒྱུ་འཕྲུལ་རྡོ་རྗེ་གསུམ་པོ་ཆེ། །ཞེས་གསུངས་སོ། །དེ་ལྟར་སྟེང་འོག་གི་རླུང་དག་འགགས་པར་གྱུར་པས། སྤྱི་བོ་ནས་ཧཾ་ཡིག་བྱང་ཆུབ་ཀྱི་སེམས་བསྐྱོད་པར་གྱུར་བ་གཏུམ་མོའི་མེས་ཡང་དག་པར་བསྲེགས་ཏེ། ཤེས་རབ་དང་ཐབས་གཉིས་སུ་མེད་པའི་སྦྱོར་བ་དག་གིས། སེམས་དང་སེམས་འབྱུང་གི་གནས་སྐབས་མཐའ་དག་ནུབ་ནས། ཡེ་ཤེས་དང་རྣམ་པར་ཤེས་པ་གཅིག་ཏུ་འགྱུར་ཏེ་སྒྲིབ་པ་མཐའ་དག་དང་བྲལ་བ། སྐུ་བཞི་ཡེ་ཤེས་ལྔའི་རང་བཞིན་ཏེ། སྲོག་དང་ཐུར་སེལ་འགགས་པར་གྱུར་ན་རི་བོང་འཛིན་པ་བསྐྱོད་པ་མིའི་གཟུགས་སུ་རབ་ཏུ་འགྱུར། རྡོ་རྗེ་པདྨས་རབ་ཏུ་སད་ནས་སླར་ཡང་འདིར་ནི་ཉི་མའི་གཟུགས་ཀྱི་མེ་ལྕེས་ཞུ་བར་བྱེད། རླུང་དང་ཟླ་བ་ཉི་མ་འགག་པར་གྱུར་ན་རྣམ་པར་ཤེས་པ་དང་ནི་ཡེ་ཤེས་གཅིག་ཏུ་འགྱུར། དེ་ལྟ་དེ་ལྟ་དང་ནི་དེ་བཞིན་དེ་ལྟར་རྣམ་གསུམ་དུ་འགྱུར་གཞན་ནི་ཅུང་ཟད་ཡོད་མ་ཡིན། ཞེས་སོ། །དེ་ལྟར་ཁམས་ཀྱི་དངས་སྙིགས་ཕྱེ་ནས་དངས་མ་བདེ་བ་ཆེན་པོས་ཟག་པ་མེད་པའི་ལུས་དང་ངག་དང་སེམས་སུ་གྱུར་ནས། གཡས་གཡོན་དང་སྟེང་འོག་གི་རྒྱུ་བ་རང་གནས་སུ་དག་པ་ནི་སྲིད་པ་གསུམ་ན་གཞོམ་དུ་མེད་པའི་སྐུ་ཅན་ནོ། །ཟླ་བའི་ཉི་མའི་རྒྱུ་བ་ཉམས་ཤིང་ལམ་ནི་གཉིས་ཀ་ཡི་ཡང་སྲོག་གི་རླུང་ནི་ཆེན་པོ་འགགས། ཆུ་སྐྱེས་རབ་ཏུ་སད་ཅིང་རི་བོང་ཅན་ཞུ་ཉི་མའི་གཟུགས་ཆེན་ལ་ནི་རབ་ཏུ་ཞུགས། དངོས་དང་དངོས་མེད་གཅིག་གྱུར་རྣམ་གསུམ་སྲིད་པ་ལ་གནས་གཞོམ་མེད་ལེགས་པར་རབ་ཏུ་རྟོགས་གྱུར་པ། དེ་ཡི་དུས་སུ་རྣལ་འབྱོར་དེ་གང་ལ་གཉིས་ནི་ཅུང་ཟད་མེད་པ་མཆོག་གི་གོ་འཕང་འགྲོ། ཞེས་སོ། །རིམ་པ་དྲུག་ཀ་བསྒོམ་དགོས་པའི་གང་ཟག་ལ་ནི། སྟེང་ལམ་ནས་གཡས་གཡོན་གྱི་རླུང་ལྟེ་བར་འདུས་ཏེ་འགྲོ་ལྡོག་བྱེད་པས་མེའི་རི་མོ་གཡོས་པས་སྙིང་གའི་སྒྲ་༼༢༢བ༤༤༽ཙམ་འཁྱོག་ཅིང་རྦ་རླབས་ཕྱེད་པས་སེམས་མ་བརྟན་ཏེ་ཐིག་ལེ་ནོར་བུར་མ་ཟིན་ནོ། །གཡས་གཡོན་གྱི་རླུང་མི་རྒྱུ་བས་དུས་མེ་འབར་ཞིང་རྦ་རླབས་ཞི་བས་བརྟན་རྒྱུ་དེས་ཐིག་ལེ་འཛིན་ནུས་པའི་དཔེ་བུམ་པ་སྟེང་ནས་རླུང་རྒྱུ་བའི་སྒོ་འགགས་པས་འོག་ནས་ཆུ་མི་འཛག་པ་བཞིན་ནོ། །གཞན་ཡང་རོ་དྲུག་ཟོས་པ་དང་འཐུངས་པ་མཉམ་གནས་ཀྱི་རླུང་གིས་དངས་སྙིགས་ཕྱེ་ནས་དེའི་དངས་མ་བད་ཀན་དུ་འགྱུར་རོ། །བད་ཀན་གྱི་དངས་ཁྲག །ཁྲག་གི་དངས་ཤ། ཤའི་དངས་པགས། པགས་པའི་དངས་རྒྱུས་པ་སྟེ་རྩར། རྩའི་དངས་དུས་པ། རུས་པའི་དངས་བཅུད་དེ་རྐང་མར། རྐང་གི་དངས་མ་ཁུ་བ་སྟེ། ཁུ་བའི་དངས་མས་རྣམ་པར་ཤེས་པའི་རྟེན་བྱེད་པའི་ཧཾ་ཡིག་དང་། ལུས་ཀྱི་མདངས་དང་སྟོབས་འཕེལ་བར་འགྱུར་རོ། །དེ་ལྟར་མདངས་འཕེལ་ཞིང་རྒྱས་པས་བ་སྤུའི་མཐར་ཐུག་པར་ཡོངས་སུ་གང་བ་ཉིད་མི་འཕོ་བའི་རྒྱུར་གྱུར་པ་ནི་རིལ་པ་ཞབས་ཚགས་ཅན་གྱི་སྟེང་ནས་རླུང་མི་རྒྱུ་ཡང་ཆུས་ལེགས་པར་གང་བ་མེད་ན་ཆུ་འཛག་པ་བཞིན་ནོ། །དེས་ན་ཡན་ལག་བཞི་པ་འདིས་སངས་རྒྱས་ཀྱི་སྤྱན་ཐོབ་ཅིང་སྟེང་གི་སྲོག་སྟེང་གི་ལྟེ་བར་བརྟན་པས་རྦ་རླབས་ཞི་བར་བྱས་ནས། ཡན་ལག་ལྔ་པ་དང་དྲུག་པས་ནོར་བུའི་མཐར་ཐུག་པ་གང་བར་བྱས་ན་མི་འགྱུར་བའི་བདེ་བ་ཐོབ་པར་འགྱུར་རོ། །གསུམ་པ་ཡིད་ཐིག་ལེ་དག་པར་བྱེད་པ་ཐུགས་རྡོ་རྗེ་བསྒྲུབ་པ་ཆེན་པོའི་ཡན་ལག་ནི། རྗེས་དྲན་གྱིས་ཐུགས་རྡོ་རྗེ་མ་ཐོབ་པ་ཐོབ་པར་བྱས་ནས་ཏིང་ངེ་འཛིན་དུ་ཐོབ་པ་མཐར་ཕྱིན་པར་བྱེད་པ་སྟེ། རྗེས་དྲན་གྱི་ངོ་བོ་ནི་འཛིན་པའི་སྟོབས་ཀྱིས་ལྟེ་བར་གནས་པའི་གཏུམ་མོ་འབར་བའི་སྣང་བ་རང་གི་འདོད་པའི་ལྷ་མཐོང་བ་གཟུགས་བརྙན་གྱི་རྣམ་པར་རྟོག་པ་དང་བྲལ་བ་སྟེ། སྒྲིབ་པ་ཐམས་ཅད་དང་བྲལ་བ་པྲ་ཕབ་པ་ལྟ་བུར་ཕྱག་རྒྱ་ཆེན་མོ་དེ་ལས་སངས་རྒྱས་ཀྱི་འོད་ཟེར་གྱི་སྤྲིན་མཐའ་ཡས་པ་སྤྲོ་བར་བྱེད་པའི་གཟུགས་འོད་ཀྱི་དཀྱིལ་འཁོར་གྱིས་རྣམ་པར་སྤྲོས་པ་མཐོང་བ་དང་། དེ་ལས་རྣམ་པར་འཕྲོ་བའི་གཟུགས་ཁམས་གསུམ་པོ་མཐའ་དག་ནམ་མཁའི་མཐིལ་མཐའ་དག་ཁྱབ་པར་སྤྲོ་བའོ། །གཏུམ་མོའི་སྣང་བར་གང་ཞིག་གྱུར་༼༢༣ན༤༥༽པ་ངེས་པར་ལུས་དང་ནམ་མཁའ་ལ་ཡང་རྗེས་སུ་དྲན་པར་འགྱུར། ཞེས་སོ། །སྒྲ་དོན་ནི། སྨྲྀ་དང་དྷྱེ་སེམས་པ་ལའོ་ཞེས་བསམ་གཏན་དང་སྐད་ཀྱི་བྱིངས་གཅིག་པའི་དབང་ལས་བསམ་གཏན་གྱི་ཡན་ལག་ཏུ་རྟགས་བཅུ་ལ་ཡན་ལག་ལྔས་རྣམ་པར་མི་རྟོག་པ་རོ་གཅིག་ཏུ་གྱུར་པ་ནི། སྔོན་དུ་དྲན་པའམ་སྔོན་དུ་བསམ་གཏན་ཞེས་བྱ་བ་ཡིན་ལ། འདིར་ནི་དུ་བ་ལ་སོགས་པ་མཚན་མ་ལྔའི་རིམ་པས་སྟོང་གཟུགས་ཁམས་གསུམ་པོ་ཁྱབ་པའི་ནང་གི་བདག་ཉིད་ཀྱི་ལྷར་འཆར་བ་ལ་རྣམ་པར་མི་རྟོག་པ་རོ་གཅིག་ཏུ་གྱུར་པ་ནི། རྗེས་སུ་དྲན་པའམ་རྗེས་སུ་བསམ་གཏན་ཞེས་བྱ་བའི་དོན་ཡིན་ནོ། །རྗེས་དྲན་འོད་དཔག་མེད་འདུ་ཤེས་ཀྱི་ཕུང་པོ་ལ་འདོད་པའི་གནས་སྐབས་བཅུའི་དབྱེ་བས་བཅུ་སྟེ། བསམ་དང་འདོད་དང་ལུས་ལ་རིམས་དང་ཁ་མཆོག་པདྨ་སྐམ་དང་ཟས་ལ་རབ་ཏུ་མི་འཇུག་དང་། འདར་དང་སྨྱོ་དང་རབ་ཏུ་རྨོངས་པར་འགྱུར་དང་ཡིད་ནི་རྣམ་པར་འཁྲུལ་དང་དྲག་ཏུ་བརྒྱལ་བ་རྣམས། རྡོ་རྗེ་ཅན་གྱི་དུ་བ་ལ་སོགས་རབ་གསལ་རྣམ་པ་བཅུ་སྟེ་སྲོག་ཆགས་ལུས་ལ་འཇིག་རྟེན་དུ། རབ་ཏུ་གསལ་ཞིང་ངེས་པ་དེ་རྣམས་ཡིད་སྲུབས་གནས་སྐབས་སུ་ཞིག་བརྒྱལ་བ་འདོད་པ་དེ་ནི་སུ། ཞེས་པས་བཅུའོ། །གདོལ་པ་མོ་ལ་རྗེས་སུ་དྲན་པ་པདྨ་འཛིན་པར་འགྱུར་ཏེ་ཞེས་པས་སོ། །རྗེས་དྲན་གཟུགས་ལ་འཁྱུད་པའི་སེམས་རྣམ་པར་རྟོག་པ་ཐམས་ཅད་དང་བྲལ་བས་དག་པ་དེའི་ཚེ་འོད་ཀྱི་དཀྱིལ་འཁོར་དུ་འགྱུར་བ་བ་སྤུའི་ཁུང་བུ་ནས་འོད་ཟེར་ལྔ་འཕྲོ་ཞིང་ངེས་པར་རྒྱུའོ། །རྗེས་སུ་དྲན་པ་ལེགས་པར་དག་པ་དྲི་མེད་འོད་ཀྱི་དཀྱིལ་འཁོར་དག་ཀྱང་ཡེ་ཤེས་གཟུགས་ལས་སོ། །ཞེས་དང་། ཤེས་རབ་ཀྱི་སྤྱན་ཐོབ་པ་ཡིན་ནོ། །དེ་ཡང་། གཡོན་དང་གཡས་ཕུང་པོ་དང་ཁམས་ཀྱི་རླུང་ལྟེ་བའི་པདྨར་གཅིག་ཏུ་བསྡུས་ནས་གཏུམ་མོ་ཡེ་ཤེས་ཀྱི་མེ་ཧོ་ཡིག་ཡེ་ཤེས་ཀྱི་སྙིང་པོ་ས་ལ་སོགས་པ་རིགས་དྲུག་གི་ས་བོན་རབ་ཏུ་སྦར་བས་དབང་ཡུལ་རྣམས་བསྲེགས་ཏེ་མགོ་བོའི་ཧཾ་ཡིག་ལས་བྱང་ཆུབ་ཀྱི་སེམས་ཀྱི་རྒྱུན་འོག་ཏུ་མགྲིན་སྙིང་དང་ལྟེ་གསང་དང་ནོར་བུའི་མཐར་ཐུག་པའི་བར་དུ་དགའ་བ་དང་མཆོག་དགའ་དང་ཁྱད་པར་གྱི་དགའ་བའི་༼༢༣བ༤༦༽རང་བཞིན་གྱི་ཆ་བཅོ་ལྔས་གཤེགས་པ་དེར་ཆ་བཅུ་དྲུག་པ་རྫོགས་པ་ནོར་བུའི་རྩེ་མོར་བརྟན་པ་ནམ་གྱུར་གྱི་བར་དུ་གཙུག་ཏོར་ནས་ནོར་བུའི་རྩེ་མོར་ཕབ་ནས་ཡང་ནོར་བུ་ནས་གཙུག་ཏོར་ཏུ་བཟློག་གོ། །དེ་ལྟར་ཡང་དང་ཡང་དུ་དབབ་པ་དང་བཟློག་པ་འཁོར་ལོའི་ཚུལ་དུ་བྱའོ། །དེའི་སྟོབས་ཀྱིས་དགའ་བྲལ་གྱི་ཆ་ཆགས་པས་བཅོམ་པས་ལུས་ཅན་གྱི་དགའ་བྲལ་དང་བེམ་པོའི་ཁམས་བཅོམ་པ་ལྷན་སྐྱེས་དགའ་བ་ཐིག་ལེ་མཐའི་སྐད་ཅིག་དེ་ཉིད་གསུམ་པའི་དུས་ཀྱི་དཔེའི་ཡེ་ཤེས་ཏེ། རླུང་ནི་ཡང་དག་ཕྲད་པ་རྣམས་ཀྱིས་གློག་གི་མེ་ཡིས་རྩེ་མོས་སྤྱི་བོའི་ཟླ་བ་ཞུ་བར་བྱེད། ཐིག་ལེ་གང་གང་ཞུ་བ་དེ་ནས་མགྲིན་པ་སྙིང་ག་ལ་སོན་ལྟེ་བ་གསང་གནས་དག་ལ་འགོག །ཐིག་ལེ་ལས་ནི་གཡོ་བའི་ཁུ་བ་རྡོ་རྗེ་ནོར་བུ་ལམ་ནས་རྒྱལ་མཚན་རྩེ་ལ་འགོག་པ་གང་། དེ་ནི་ཤེས་རབ་ཡེ་ཤེས་སྐད་ཅིག་གལ་ཏེ་ཐིག་ལེའི་འཕྲེང་བ་འཕོ་བ་མེད་པས་བདེ་བའོ། །དེ་ཕྱིར་དབྱེར་མེད་བདེ་བའི་སྐད་ཅིག་ལྷན་ཅིག་སྐྱེས་པ་འདིར་ནི་ཆོས་ཀྱི་དབྱིངས་ནི་སྟེར་བར་བྱེད། སྲོག་གི་རོ་ཡི་འགྲོ་བ་རྣམས་ལ་གནས་ལ་ཐམས་ཅད་བཀུག་ཅིང་ཉོན་མོངས་བདུད་རྣམས་བཅོམ་བྱས་ནས། རྫུ་འཕྲུལ་ཀུན་མཁྱེན་ས་དང་སྲིད་གསུམ་བླ་མ་ཉིད་ནི་རྣལ་འབྱོར་རྣམས་ཀྱི་སྐྱེ་བ་འདི་ལ་སྟེར། ཞེས་སོ། །ཡང་ན། དབང་པོ་རཏལ་པོས་ལས་ཀྱི་ཕྱག་རྒྱ་དང་འབྲིང་པོས་ཡེ་ཤེས་ཀྱི་ཕྱག་རྒྱ་དང་རྣོན་པོས་ཕྱག་རྒྱ་ཆེན་མོ་ལ་བརྟེན་ནས་མི་འགྱུར་བའི་བདེ་བ་སྒྲུབ་པར་བྱེད་པ་ནི་རྗེས་དྲན་ཡིན་ནོ། །དེ་ལ་ལས་ཀྱི་ཕྱག་རྒྱའི་ངོ་བོ་ནི་ནུ་མ་དར་སྐྲར་ལྡན་པ་འདོད་པ་ཁམས་ཀྱི་བདེ་བའི་རྒྱུའོ། །ལས་ནི་ཙུམྦ་དང་འཁྱུད་བ་དང་གསང་བར་རེག་པ་དང་རྡོ་རྗེ་བསྐྱོད་པ་ལ་སོགས་པའི་བྱ་བའི་བདག་ཉིད་ཅན་ཏེ་དེ་ཡིས་ཉེ་བར་མཚོན་པའི་ཕྱག་རྒྱ་ནི་ཡིད་ཆེས་པར་བྱེད་པ་མོ་ཡིན་ལ་ཡིད་ཆེས་པ་ནི་འདིར་འགྱུར་བའི་བདེ་བ་མཚོན་པར་བྱེད་པ་སྟེ་མུ་དྲ་ནི་ངེས་ཚིག་གིས་མུ་དཾ་བདེ་བའི་ཁྱད་པར་རཱ་ཏི་སྟེར་བར་བྱེད་པའོ། །ཡེ་ཤེས་ཀྱི་ཕྱག་རྒྱ་ནི་རང་གི་སེམས་ཀྱིས་ཡོངས་སུ་བརྟགས་པ་སྣ་ཚོགས་ཡུམ་ལ་སོགས་པ་ལྷ་མོའི་རང་བཞིན་ཏེ་གཟུགས་ཁམས་ཀྱི་བདེ་བའི་རྒྱུའོ། །ཡེ་ཤེས་ནི་སྔོན་ལྟ་བ་དང་རྒོད་པ་ལ་སོགས་པ་༼༢༤ན༤༧༽སྒོམ་པའི་མཚན་ཉིད་ཅན་ཏེ་ཡིད་ཆེས་པ་ནི་འདིར་གཡོ་བའི་བདེ་བ་མཚོན་པར་བྱེད་པའོ། །ཕྱག་རྒྱ་ཆེན་མོ་ནི་ཆེན་པོ་ཡང་འདི་ཡིན་ལ་ཕྱག་རྒྱ་ཡང་འདི་ཡིན་པས་ཆེན་མོ་སྟེ་ཆེན་པོ་ནི་རྣམ་པ་ཐམས་ཅད་ཀྱི་མཆོག་དང་ལྡན་པ་ཉི་ཚོ་བ་མ་ཡིན་པ་ཉིད་ཡིན་ལ། བྱང་ནུབ་ཀྱི་སེམས་རྡོ་རྗེ་འདིས་རྒྱས་འདེབས་པའི་ཕྱིར་ཕྱག་རྒྱ་སྟེ་ཡིད་ཆེས་པ་ནི་འདིར་རང་གི་སེམས་ཀྱིས་ཡོངས་སུ་བརྟགས་པའི་ཆོས་དང་བྲལ་བ་དུ་བ་ལ་སོགས་པའི་མཚན་མ་སྔོན་དུ་འགྲོ་བའི་རང་གི་སེམས་རབ་ཏུ་གསལ་བ་རྣལ་འབྱོར་པས་རྟོགས་པར་བྱ་བ་པྲ་ཕབ་པ་ལྟ་བུའོ། །དེ་ལྟར་ཡང་། རྒྱལ་བའི་ལྷན་སྐྱེས་བདེ་བ་འདི་ནི་འཕེལ་བའི་དོན་སླད་དང་པོར་ལས་ཀྱི་ཕྱག་རྒྱ་བརྟེན་པར་བྱ། དེ་ནས་ཉི་མའི་གཟུགས་ནི་གདོད་དང་ལག་པ་རྐང་པ་གཙུག་ཏོར་ཡན་ལག་ཐམས་ཅད་རྫོགས་པ་སྟེ། གློག་གི་དབང་ཕྱུག་པའི་རྗེས་མཐུན་འཕོ་མེད་བདེ་བ་སྐྱེད་པར་བྱེད་མ་མཚན་ཉིད་ཡན་ལག་ཐམས་ཅད་རབ་ཏུ་རྫོགས། རྡོ་རྗེ་རྣམས་ཀྱི་རབ་ཏུ་གནང་བར་བྱེད་མ་སྲིད་གསུམ་གནས་ལུས་ཆོས་ཀྱི་དབྱིངས་ནི་དེ་ནས་འགྱུར། ཞེས་སོ། །འོ་ན་ལས་དང་ཡེ་ཤེས་ཀྱི་ཕྱག་རྒྱ་སྤང་བར་བཤད་པ་དང་འགལ་ལོ་ཞེ་ན། སྟོང་པ་ཉིད་ཀྱི་གཟུགས་བརྙན་དང་བྲལ་བའི་ཕྱག་རྒྱ་གཉིས་ཀྱི་མི་འཛག་པ་ཙམ་གྱིས་འདོད་པ་དང་གཟུགས་ཀྱི་ཁམས་ཀྱི་འབྲས་བུར་འགྱུར་བ་སྟོང་པ་ཉིད་ཀྱི་གཟུགས་བརྙན་དེ་ལས་སྐྱེས་པའི་མི་འགྱུར་བའི་བདེ་བ་ལྷན་ཅིག་སྐྱེས་པའི་ཕྱག་རྒྱ་གཉིས་ནི་འཇིག་རྟེན་པའི་འབྲས་བུར་མི་འགྱུར་གྱི་མི་འགྱུར་བའི་བདེ་བ་འཕེལ་བའི་གྲོགས་སུ་གྱུར་རོ། །དེས་ན་སངས་རྒྱས་ཐོབ་པའི་དངོས་རྒྱུར་ཕྱག་རྒྱ་གཉིས་བཀག་པ་དང་། ཡང་། མེ་ནི་དངུལ་ཆུའི་དགྲ་ཉིད་ཡིན་ཏེ་མ་དང་རྣམ་པར་བྲལ་ན་ནམ་ཡང་དངུལ་ཆུ་འཆིང་བ་མེད། མ་བཅིངས་ན་ནི་གསེར་བྱེད་མེད་དེ་གསེར་དང་བྲལ་ནག་སྨྲ་པོ་རྣམས་ལ་ལོངས་སྤྱོད་མེད་པ་ཉིད། དེ་བཞིན་བུད་མེད་སྦྱོར་བ་བྲལ་ན་རྟག་ཏུ་རྣལ་འབྱོར་པ་རྣམས་དག་གི་སེམས་ནི་འཆིང་མི་འགྱུར། བཅིངས་པ་མེད་ན་ལུས་འབིགས་མེད་དེ་མ་ཕུག་ལུས་ཀྱི་འདིར་ནི་ལྷན་སྐྱེས་བདེ་བ་སྟེར་བ་མིན། ཞེས་གསུངས་པས། འཛག་མེད་སྒྲུབ་པའི་ཐབས་ལ་མེ་༼༢༤བ༤༨༽དང་བྲལ་བའི་དངུལ་ཆུ་འཆིང་བར་མི་ནུས་པས་དགོངས་པར་གསུངས་པའི་བྱེ་བྲག་ལེགས་པར་ཕྱེ་སྟེ་རྟོགས་པར་བྱའོ། །དེ་ཡང་། འཇིག་རྟེན་པའི་གནས་ལུགས་ནི་ཆུ་ཐར་དུ་འགྲོ་མེ་གྱེན་ལ་འབར་བས་གཙུག་ཏོར་གྱི་ཁུ་བ་ནོར་བུར་འཛག་པས་འཕོ་བའི་བག་ཆགས་སུ་འགྱུར། རྡུལ་གྱེན་ལ་འབར་བས་དབང་པོའི་སྒོར་ཐོན་ནས་ཡུལ་ལྔ་ལ་འཇུག་པས་གཟུང་འཛིན་གྱི་རྟོག་པ་སྐྱེད། སངས་རྒྱས་ཀྱི་དེ་ལས་བཟློག་ནས་ཡོད་པས་དེ་ཡང་འཇིག་རྟེན་པའི་གནས་ལུགས་ཀྱི་མཐའི་སྐད་ཅིག་དེ་ནོར་བུར་དང་གཙུག་ཏོར་དུ་འཛིན་མ་ནུས་ན་དེ་ལས་བཟློག་པའང་མི་ཐོབ་སྟེ། དེ་ཡང་དང་པོ་འཇིག་རྟེན་པའི་མཐའི་སྐད་ཅིག་སྦྱོར་བ་ཡན་ལག་དྲུག་གི་མན་ངག་གིས་ཐོབ་སྟེ། དེ་ཡང་ཏིང་ངེ་འཛིན་གྱི་དུས་སུ་ནོར་བུར་ཁུ་བ་ཟིན་པ་དང་། གཙུག་ཏོར་དུ་ཁྲག་ཟིན་པ་དུས་མཚུངས་པ་དེ་ནི་འཇིག་རྟེན་པའི་ཆོས་ཀྱི་མཆོག་ཡིན་ལ་དེའི་སྐད་ཅིག་མ་ནས་ཁུ་བ་གྱེན་ལ་བཟློག་པ་དང་ཁྲག་ཐུར་ལ་ལོག་པའང་དུས་མཚུངས། དེ་ནས་ས་དང་པོ་ཐོབ་ནས་ས་བཅུ་གཉིས་པའི་དུས་སུ་རྡོ་རྗེ་ལྟ་བུའི་ཏིང་ངེ་འཛིན་ཐོབ་པ་མྱ་ངན་ལས་འདས་པ་སྟེ། ཁུ་བ་གཙུག་ཏོར་ཏུ་ནོན་པ་དང་། ཁྲག་ནོར་བུར་ནོན་པ་དུས་མཚུངས་ཏེ་ལུགས་ལས་བཟློག་གོ། །དབུས་སུ་སྲོག་ནི་རབ་ཏུ་ཞུགས་པ་སྣ་ཚོགས་ཡུམ་ལ་ཡུལ་དང་རྣམ་པར་བྲལ་བས་འཁྱུད་པ་སྟེ། པདྨར་ཞུགས་པ་རང་གི་རྡོ་རྗེ་སྤྲོ་བ་དག་ཀྱང་དེ་བཞིན་ཟླ་ཉིའི་དབུས་སུ་རབ་ཞུགས་པ། བདེ་བ་ས་བོན་མ་ལྷུང་བ་ལ་རབ་དགའི་དགའ་བར་གནས་པ་རྣལ་འབྱོར་རྣམས་ཀྱི་རྣལ་འབྱོར་འདི། ཕྱག་རྒྱའི་དངོས་གྲུབ་དོན་སླད་ཁྱབ་བདག་གིས་ནི་དཔལ་ལྡན་གསང་བ་ལས་ཀྱང་མཆོག་ཏུ་གསང་བའོ། །ཞེས་དང་། མཚན་བརྗོད་ལས། རྐང་པ་ཡ་གཅིག་མཐིལ་གྱིས་གནོན། །རྐང་མཐེབ་སེན་མོའི་ཁྱོན་གྱིས་ཀྱང་། །ཚངས་པའི་ཡུལ་ས་རྩེ་ནས་གནོན། །ཞེས་དང་། དྲི་མེད་འོད་ལས། ཞབས་གཅིག་རྡོ་རྗེ་ནོར་བུར་རྡུལ་དང་ཉི་མ་དང་། །གཉིས་པ་གཙུག་ཏོར་ཁུ་བ་རི་བོང་ཅན་ལ་ནི། །རྟག་ཏུ་མི་ཕྱེད་དབྱེར་མེད་འདོད་པ་བཀོད་གྱུར་པ། །འཇིག་རྟེན་གསུམ་གྱིས་མཆོད་པའི་གཙོ་ལ་སྤྱི་བོས་ཕྱག་འཚལ་ལོ། །ཞེས་གསུངས་༼༢༥ན༤༩༽པས་སོ། །དེ་ཡང་སོ་སོར་སྡུད་པ་ལ་སོགས་པ་ཡན་ལག་བཞིའི་མཐར་གྱེན་ཐུར་གྱི་རླུང་སྲོག་ཐུར་ལྟེ་བར་ཁ་བལྟས་པས་ཤེས་པ་ཁ་ནང་དུ་ལོག །དེ་ནས་ཡན་ལག་དྲུག་པ་ཏིང་ངེ་འཛིན་གྱི་ཡས་མཐར་ཆོས་ཐམས་ཅད་ནོར་བུའི་རྩེ་མོར་འདུས་པ་དེའི་ཚེ་ཕྱིའི་མ་དག་པའི་ཕུང་ཁ་ནས་ཐམས་ཅད་དེར་འགགས་པས་ཆོས་ཐམས་ཅད་སྐད་ཅིག་མ་གཅིག་ལ་པྲ་ཕབ་པ་དང་འདྲ་བར་སྣང་བ་འདི་དོན་དམ་པ་སྟེ། དེའི་སྐད་ཅིག་མ་དེ་དང་ནོར་བུར་བཅིངས་པ་དུས་མཉམ་པས་དོན་དམ་པར་འཆིང་བའོ། །དེ་ནས་ཁམས་གྱེན་དུ་གཤེགས་པའི་བདེ་བ་འགྱུར་བ་མེད་པའི་དབང་གིས་ཏིང་ངེ་འཛིན་ཐོབ་པ་སྟེ། དེའི་ངོ་བོ་ཡང་འདོད་པའི་ལྷ་ལ་རྗེས་སུ་ཆགས་པ་ལས་ཤེས་བྱ་དང་ཤེས་པ་གཅིག་ཏུ་འདྲེས་པར་གྱུར་པ་ཉིད་ཀྱིས་འགྱུར་བ་མེད་པའི་བདེ་བ་ཐོབ་པའི་ཡེ་ཤེས་ཀྱི་གཟུགས་ཏེ། དེ་ལ་སེམས་རྩེ་གཅིག་ཏུ་བྱེད་པ་གཟུང་བ་དང་འཛིན་པ་དང་བྲལ་བའི་སེམས་ནི་ཏིང་ངེ་འཛིན་ནོ། །སྒྲ་དོན་ནི། ས་མཱ་དྷི་ཞེས་པའི་སཾ་ཡང་དག་པ། ཨཱ་བྱ་བྟ་ཀུན་ཏུ་ཁྱབ་པ། དྷ་ར་འཛིན་པ་ལའོ་ཞེས་པའི་བྱིངས་ཀྱི་དབང་ལས་དྷྲྀ་འཛིན་པ་སྟེ་ཁམས་གསུམ་པོ་ཁྱབ་པའི་ཆོས་ཅན་གྱི་སྟོང་པ་ཉིད་ཀྱི་གཟུགས་ལ་རོ་གཅིག་པའི་བདེ་བ་ཆེན་པོ་མངོན་སུམ་དུ་བྱེད་པ་ཞེས་པའི་དོན་ཏོ། དེ་ཡང་། ཤེས་རབ་ཐབས་ཀྱི་བདག་ཉིད་ཀྱིས་ནི་འགྱུར་མེད་བདེ་བའི་དབང་གིས་ཡེ་ཤེས་གཟུགས་ལ་ཏིང་ངེ་འཛིན། ཞེས་སོ། །རྣམ་སྣང་གཟུགས་ཀྱི་ཕུང་པོ་རླུང་བཅུ་འགོག་པའི་དབྱེ་བས་བཅུ་སྟེ། དཔལ་ལྡན་ཏིང་འཛིན་འཁོར་ལོ་ཅན་ཞེས་པས་སོ། །གཟུང་འཛིན་གྱི་སེམས་དག་གཅིག་པ་ཉིད་ཀྱིས་འགྱུར་བ་མེད་པའི་བདེ་བ་ཏིང་ངེ་འཛིན་དག་པས་ལོ་གསུམ་ཕྱོགས་གསུམ་གྱིས་ཡེ་ཤེས་ཀྱི་ལུས་དབང་བཅུ་ལ་སོགས་པ་ཐོབ་པའི་བྱང་ཆུབ་སེམས་དཔར་འགྱུར་རོ། །དེ་ནས་ཏིང་ངེ་འཛིན་གྱིས་དག་པ་ཉིན་ཞག་འགའ་ཞིག་དག་གིས་ཡེ་ཤེས་ལུས་ནི་འགྲུབ་པར་འགྱུར། ཞེས་སོ། །དེར་ཚོར་བ་དྲག་པོ་ཉམས་སུ་མྱོང་བས་ཕུང་ཁམས་ཕུག་ནས་དབང་པོ་སྡུད་པར་བྱེད་པའི་དཔེ་དང་རྒྱུ་ནི་ཇི་ལྟར་སྦྲུལ་གདུག་གི་མཆེ་བས་བཟུང་བའི་ཚོར་བ་རྣོན་པོས་སྡུག་བསྔལ་ལ་རྩེ་༼༢༥བ༥༠༽གཅིག་ཏུ་དབང་པོ་འདུས་ནས་ལུས་ལ་ཀུན་ཏུ་ཁྱབ་པས་འཆི་བ་བཞིན་དུ་རྣལ་འབྱོར་པ་ལ་རྡོ་རྗེ་ནོར་བུའི་རྩེ་མོར་བྱང་ཆུབ་ཀྱི་སེམས་ཕྱིན་པའི་ཚེ་འཇིག་རྟེན་པའི་ཟག་བཅས་ཀྱི་བདེ་བ་བྱེ་བ་ཕྲག་སྟོང་གི་ཆར་ཡང་མི་ཕོད་པའི་བདེ་བའམ་ཚོར་བ་རྣོན་པོ་ལ་དབང་པོ་རྩེ་གཅིག་ཏུ་འདུས་ནས་ནོར་བུའི་རྩེ་མོ་ནས་ལུས་པོ་མ་ལུས་པ་ལ་ཁྱབ་པའི་སྐད་ཅིག་དེ་ལ། ཕྱི་རོལ་གྱི་ཡུལ་ལ་འཇུག་པའི་དབང་པོ་འགག་ནས་ནང་དུ་ཆོས་ཐམས་ཅད་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་པྲ་ཕབ་པ་དང་རྨི་ལམ་དང་སྒྱུ་མ་ལྟ་བུར་སྐད་ཅིག་དེ་ལ་གནས་པར་འགྱུར་རོ། །མཆེ་རྨའི་ཚོར་བའི་སྡུག་བསྔལ་ནི། དུག་རྫོགས་གནས་སྐབས་གྱུར་པ་ན། རྨ་ལས་རིག་མིན་གཞན་དུ་མིན། ཡུལ་རྣམས་དབང་པོའི་སྒོ་རྣམས་ཀྱིས། དེ་བཞིན་རྣལ་འབྱོར་དམ་པའི་བདེ། སེམས་རྫོགས་ཆར་གྱུར་རྡོ་རྗེ་ཡིས། །ནོར་བུ་རིག་མིན་གཞན་དུ་མིན། ཞེས་སོ། །མཆོག་ཏུ་མི་འགྱུར་བའི་བདེ་བའི་བྱང་ཆུབ་ཀྱི་སེམས་ཀྱི་རྩིས་ལུས་ཕུག་ནས་ཡེ་ཤེས་ཀྱི་སྐུར་བསྒྱུར་བའི་ཚུལ་ཡང་། སྨད་དང་མེ་རྣོན་པོའི་སྟོབས་ཀྱིས་གནས་སྐབས་ལྔས་མི་འདར་བར་བྱས་པའི་དངུལ་ཆུ་རྒན་པོའི་ལུགས་ཀྱི་གོང་བུའི་ཕྱོགས་གཅིག་ཏུ་བསྐུས་ནས་མེ་རྣོན་པོས་གདུངས་ན་ཕྱོགས་གཅིག་ཏུ་གནས་པ་དེས་ཀྱང་ཀུན་ཏུ་འབིགས་ཤིང་ཁྱབ་པར་བྱས་ནས་ལྕགས་ཀྱི་རང་བཞིན་དོར་ཏེ་གསེར་དུ་འགྱུར་རོ། །ཇི་ལྟར་རོ་ཆེན་ལྕགས་རྣམས་ཀྱི། །ཕྱོགས་གཅིག་ཡང་དག་གནས་པ་ནི། །ལྕགས་ལ་དྲག་པོའི་མེས་གདུངས་ན། །ཀུན་ནས་ཀུན་ཏུ་འབིགས་པར་འགྱུར། །ཞེས་གསུངས་སོ། །དེ་བཞིན་དུ་ཡན་ལག་ལྔས་དག་པར་བྱས་པའི་བྱང་ཆུབ་ཀྱི་སེམས་རྒན་པོས་ལུས་ཀྱི་ཕྱོགས་གཅིག་ན་རྡོ་རྗེ་ནོར་བུའི་རྩེ་མོར་སོན་པའི་ཚེ་གཟུགས་བརྙན་ལ་ཆགས་པའི་མེ་རྣོན་པོས་གདུངས་ན་ནོར་བུའི་རྩེ་མོ་ན་གནས་པ་དེས་ཕུང་ཁམས་ཐམས་ཆད་ལ་ཁྱབ་ཅིང་འབུགས་པར་བྱེད་དེ་བེམ་པོའི་ཁམས་ཀྱི་རང་བཞིན་ཐམས་ཅད་དོར་ནས་མི་འགྱུར་བའི་བདེ་བར་རོ་མཉམ་པར་བྱེད་དོ། །དབུགས་ནི་བཅད་པའི་མཐའ་རུ་རྣམ་གསུམ་བགྲོད་པ་འདི་དང་རྣམ་པ་དྲུག་ཀྱང་ཡོད་པ་མ་ཡིན་ཏེ། ཐིག་ལེ་བཀག་པར་གྱུར་ན་ཀུན་༼༢༦ན༥༡༽ནས་མཆོག་གི་ཁྱབ་བདག་བདེ་བ་མཐའ་ཡས་དུས་སུ་འཇུག་པར་འགྱུར། ཞེས་གསུངས་པས་སོ། །ཤེས་རབ་ལ་སྤྲོས་ཟླ་བའི་ཐིག་ལེ་རྡོ་རྗེ་ནོར་བུར་གནས་པའི་འགྱུར་མེད་གསུམ་ནི་བསྒྲུབ་པ་ལ། ཞེས་དང་། དེ་བཞིན་ཡང་དང་ཡང་དུ་མེས། །འདོད་ཆགས་མེ་ཡིས་དྲི་མ་མེད་ཅེས་གསུངས་སོ། །དབང་མདོར་བསྟན་ལས། ཇི་ལྟར་རྒྱ་མཚོར་ཆུ་ཞུགས་པ། །དེ་ནི་རྒྱ་མཚོའི་ཆུ་མཚུངས་འགྱུར། །དེ་བཞིན་དངོས་པོའི་ཚོགས་འདི་ནི། །འགྱུར་བ་མེད་པར་འགྱུར་མེད་མཚུངས། །ཞེས་དང་། གང་ཞིག་མཐའ་དག་རྒྱལ་བའི་སྲས་དང་སངས་རྒྱས་རྣམས་ཀྱིས་རྟེན་པ་རྣལ་འབྱོར་དབང་པོས་བརྟེན་བྱ་སྟེ། ཡེ་ཤེས་མེ་ལྕེ་རབ་ཏུ་རྒྱས་པ་དེ་ནི་བདུད་ཚོགས་ཡུལ་དང་བཅས་པ་མཐའ་དག་སྲེག་བྱེད་ཅིང་། ལུས་ལ་ཆགས་པ་ལ་སོགས་ཀྱང་སྟེ་རྣལ་འབྱོར་ལ་ལོ་ཡི་སྦྱོར་བས་བདེ་མཉམ་སྟེར་བར་བྱེད། ཅེས་གསུངས་སོ། །དེ་བས་སོར་སྡུད་ནས་ཇི་སྲིད་ཏིང་ངེ་འཛིན་མ་ཐོབ་བར་ནི་གཟུགས་མ་རྫོགས་པས་བེམ་པོའི་ཁམས་མ་ཟད་པའི་ཕྱིར་རྟེན་དང་བརྟེན་པའི་འབྲེལ་པ་ཡོད་ལ་དུ་བ་ལ་སོགས་པའི་གཟུགས་རྫོགས་པ་ཡིད་རྡོ་རྗེ་ནོར་བུ་ཆུད་པའི་ཚེ་གཟུགས་རྫོགས་པའི་ཕྱིར་བེམ་པོའི་ཁམས་ཟད་པས་རྟེན་དང་བརྟེན་པའི་འབྲེལ་པ་མེད་དེ་རྒྱུ་མཚན་དེས་རྗེས་དྲན་རྒྱུར་བྱས་པའི་ཏིང་ངེ་འཛིན་འབྲས་བུར་བཤད་པ་ཡིན་ནོ། །བྱང་ཆུབ་སེམས་ཀྱི་མྱུ་གུ་རྡོ་རྗེ་ནོར་བུའི་རྩེ་མོར་སོན་པ་ཆོས་མཆོག་ཐ་མའི་ཡེ་ཤེས་ལ་བརྟེན་ནས་འཁྲུངས་པ་དབང་བཞི་པ་ཤེས་རབ་ཆེན་པོའི་ཡེ་ཤེས་ཟག་པ་དང་བཅས་པའི་བདེ་བ་དད་བྲལ་བས་ཕྱི་རོལ་གྱི་དབང་པོའི་སྤྱོད་ཡུལ་མ་ཡིན་པ་ཆ་གཉིས་ཀྱི་དབུས་སུ་རང་གིས་རིག་པ་མི་འགྱུར་བའི་བདེ་བ་ནི་ཚིག་གིས་བརྗོད་པ་དང་བྱིས་པ་རྣམས་ཀྱིས་ཉམས་སུ་མྱོང་བ་དང་རྟོག་དཔྱོད་ཀྱི་ཡུལ་མ་ཡིན་པ་ཡན་ལག་དྲུག་གི་མཐར་ཐོབ་པ་དེས་ན་ལོག་པའི་བདེ་བ་ལ་ཡང་དཔེས་བརྗོད་པར་མི་ནུས་ན་མི་འགྱུར་བའི་བདེ་བ་ལྟ་ཅི་སྨོས། དེ་ཉིད་བྱིས་པ་རྣམས་ཀྱིས་ཚིག་གིས་དཔྱད་པ་ནི་དམུས་ལོང་གིས་འོ་མའི་ཁ་དོག་ཅི་འདྲ་དྲིས་པ་དང་དུང་འདྲའོ་ཞེ་ན། དུད་སྒྲར་འཛིན་པ་དང་དེ་ཅི་འདྲ་ཞེས་དྲིས་པ་ལས་འབྲས་ཕྱེ་འདྲའོ། །༼༢༦བ༥༢༽ཞེས་པ་ན། དུང་གི་སྒྲའི་ཁ་དོག་འཇམ་པར་འཛིན། ཡང་དེ་ཅི་འདྲ་ཞེས་འདྲི་ན་ཁ་བ་འདྲའོ་ཞེན་འབྲས་ཕྱེའི་ཁ་དོག་གྲང་བར་འཛིན་པ་བཞིན་དང་། ཉི་མ་ཤར་རོ་ཞེས་སྨྲ་ན་ག་རེ་ཞེས་ལག་པ་ཉུག་པ་བཞིན་ནོ། །དེ་ལྟར་བྱང་ཆུབ་ཀྱི་སེམས་ཀྱི་མྱུ་གུ་ཁ་གྱེན་དུ་བལྟས་པའི་སྐད་ཅིག་ནི་ས་དང་པོའི་ཡ་མཐའ་ཡིན་ལ། དེ་ནས་མཛོད་སྤུའི་འཁོར་ལོར་སོན་པ་ནས་ས་བཅུ་པ་ཐོབ་པ་དེ་སྲིད་དུ་འབད་པ་མེད་པར་གྱེན་དུ་འབབ་པ་སྟེ་ལོ་ཀ་བས་འཁྲིག་པའི་དུས་སུ་འབད་པ་མེད་པར་ཁམས་ཐུར་དུ་འགྲོ་བ་བཞིན་གཙུག་ཏོར་ནས་འབབ་པ་ཅི་ལྟ་བ་བཞིན་ནོར་བུ་ནས་བརྩམས་ནས་འབད་པ་མེད་པར་གཙུག་ཏོར་དུ་འགྲོའོ། །དེ་ལྟར་གཙུག་ཏོར་དུ་སོང་བ་ནི་སངས་རྒྱས་སོ། །གཞན་ཡང་དངོས་པོ་གཅིག་ཀུན་གྱི་རང་བཞིན་ཡིན་ལ་དངོས་པོ་ཀུན་གཅིག་གི་རང་བཞིན་ནོ། །དེས་ན་དངོས་པོ་གཅིག་དེ་བཞིན་ཉིད་དུ་རྟོགས་ན་ཀུན་དེ་བཞིན་ཉིད་དུ་རྟོགས་ཏེ་དཔེར་ན་ཟོ་ཆུན་གྱི་འཕྲེང་བ་རྡོག་ཏབས་གཅིག་གིས་བསྐྱོད་པས་ཐམས་ཅད་འགུལ་བ་བཞིན་ནོར་བུ་དང་གཙུག་ཏོར་དུ་མི་འགྱུར་བའི་བདེ་བའི་སྐད་ཅིག་མ་ལ་རིགས་མཐུན་པའི་ཆོས་ཐམས་ཅད་དུས་གཅིག་ལ་ཤེས་པའོ། །སྐད་ཅིག་གཅིག་གིས་བྱེ་བྲག་བྱེད། སྐད་ཅིག་གཅིག་གིས་རྫོགས་སངས་རྒྱས། ཞེས་གསུངས་སོ། །ཐུར་འབབ་གྱེན་བཟློག་ལ་རྒྱུ་འབྲས་ཀྱི་དབྱེ་བས་བདེན་དོན་བཅུ་གཉིས་དང་དེ་ཉིད་བཅུ་དྲུག་རིག་གཉིས་ཏེ་གཉིས་ཀར་ཡང་ལན་གཉིས་རྫོགས་ཏེ། དེ་ལ་ཐུར་དབབས་ནི་སྤྱི་གཙུག་ནས་བརྩམས་ནས་རླུང་ཉི་ཁྲི་ཆིག་སྟོང་དྲུག་བརྒྱ་ནོར་བུར་འགགས་པས་མ་རིག་པ་ནས་རྒ་ཤིའི་བར་འགེགས་པས་རྒྱུའི་ས་བཅུ་གཉིས་ཐོབ་པས་བདེན་དོན་བཅུ་གཉིས་དང་། བདེན་པ་བཞི་ལ་ཆོས་ཤེས་པ་ལ་སོགས་པ་བཅུ་དྲུག་ཡུལ་དང་ཡུལ་ཅན་གྱི་དབྱེ་བས་ཤེས་པ་བརྒྱད་དང་རྟོགས་པ་བརྒྱད་ཕྱེ་བས་དགའ་བ་བཅུ་དྲུག་ངོ་བོ་གཙུག་ཏོར་ནས་ནོར་བུར་རྫོགས་པ་རྒྱུའི་དེ་ཉིད་བཅུ་དྲུག་རིག་གོ། །དེ་གཉིས་གཉིས་ཀར་ཡང་གཙུག་ཏོར་ནས་ནོར་བུར་རྫོགས་པ་ཇི་ལྟ་བ་བཞིན་དུ་ནོར་བུ་ནས་གཙུག་ཏོར་དུ་རྫོགས་པས་འབྲས་བུའི་ས་བཅུ་གཉིས་དང་དེ་ཉིད་བཅུ་དྲུག་རིག་གོ། །དེས་ན་དཔའ་བར་འགྲོ་བའི་༼༢༧ན༥༣༽ཏིང་ངེ་འཛིན་སངས་རྒྱས་མ་ཡིན་པས་མི་ཐོབ་པ་དང་འཇིག་རྟེན་ཆོས་མཆོག་ན་ཡོད་པར་བཤད་པའི་རྒྱུ་མཚན་ཡང་དེ་ཡིན་ནོ། །དེ་ཡང་། ཡན་ལག་བཅུ་གཉིས་འགགས་པ་ཡིས། །དུས་སྦྱོར་རྣམས་ནི་མི་འབབ་ཕྱིར། །ས་རྣམས་བཅུ་གཉིས་ཞེས་གྲགས་པ། །དོན་དམ་པར་ནི་གནས་ལ་སོགས། །ཞེས་དང་། རྡོ་རྗེའི་རྩེ་མོར་ཡེ་ཤེས་དང་། ནོར་བུར་ཐུགས་དང་། གསང་བར་གསུང་དང་། ལྟེ་བར་སྐུའི་ཐིག་ལེ་འཛག་མེད་དུ་འཚིངས་པ་ཐབས་ཀྱི་ཆའི་རྣམ་པར་བཞག་པ་དང་། ཤེས་རབ་ཀྱི་ཆའི་རྣམ་པར་བཞག་པ་ནི་དཔྲལ་བར་སྐུ། མགྲིན་པར་གསུང་། སྙིང་གར་ཐུགས། ལྟེ་བར་ཡེ་ཤེས་རྡོ་རྗེའི་ཐིག་ལ་འཛག་པ་མེད་པ་དགའ་བ་བཅུ་དྲུག་སྟེ། འདོད་པ་སྤྲུལ་པའི་སྐུ་ནི་སྐུ་གཅིག་རབ་ཏུ་འགྱུར་ཏེ་རྫོགས་པ་དག་ནི་དེ་ཡིས་གསུང་ཉིད་དོ། །འབར་བ་སྤྲུལ་པའི་ཐུགས་ཏེ་དེ་ཡི་མཆོག་གི་བདེ་བ་བྱེད་པའི་ཡེ་ཤེས་དག་ནི་ཨོཊྚྷ་ཉིད། དགའ་བ་ལོངས་སྤྱོད་རྫོགས་པའི་སྐུ་ལྟེ་མཆོག་དགའ་དང་བཅས་ཁྱད་པར་དགའ་བའི་རིམ་པ་འདི་ཡིས་ནི། གསུང་དང་ཐུགས་སོ་ལྷན་ཅིག་སྐྱེས་པའི་དགའ་བ་ཉིད་ཀྱང་བདེ་འབྱུང་དེ་ཡི་ཡེ་ཤེས་རྡོ་རྗེར་འགྱུར། འདར་བ་ཉིན་ནི་སྲིད་པ་གསུམ་གྱིས་བཏུད་པ་ཆོས་ཀྱི་སྐུ་སྟེ་འབྱུང་བ་དེ་ཡི་གསུང་དུ་འགྱུར། གཉིད་ཡུལ་ཉིད་ནི་ཆོས་ཀྱི་ཐུགས་ཏེ་གཉིས་ནི་འདི་ཡིས་སྲིད་པའི་འཇིགས་འཇོམས་ཡེ་ཤེས་ཁོ་ནའོ། །ཡི་གེ་ཉིད་ནི་དག་པའི་སྐུ་སྟེ་དབྱངས་དང་བྲལ་བའི་ཆ་དང་ཐིག་ལེ་ནཱ་ད་རིམ་པ་ཡིས། བདེ་འབྱུང་དག་པའི་སྐུ་ཡིས་གསུང་དང་ཐུགས་དང་ཡེ་ཤེས་རྡོ་རྗེ་རྣམ་གསུམ་སྲིད་པར་གནས་པའོ། །ཞེས་སོ། །ཇི་ལྟར་ཟླ་བ་རང་གི་ངོ་བོ་ལ་དཀར་གནག་མེད་པས་དབུས་ཀྱི་ཆ་བཅུ་དྲུག་པ་ཞེས་བྱ་བ་མཚོན་དུ་མེད་ཀྱང་གྲིབ་མའི་འཕེལ་འགྲིབ་ཀྱི་དབང་གིས་དཀར་པོ་རྫོགས་ནས་ནག་པོར་མ་ཞུགས་པ་ལ་དབུས་ཞེས་མཚོན་ནོ། །དེ་བཞིན་ཡེ་ཤེས་རང་གི་ངོ་བོ་ལ་གསལ་འགྲིབ་མེད་པས་ནོར་བུ་དང་གཙུག་ཏོར་དུ་རྫོགས་པའི་སྐད་ཅིག་ལ་དབང་བཞི་པ་ཞེས་མཚོན་དུ་མེད་ལ་འོན་ཀྱང་བརྟགས་པའི་བག་ཆགས་དག་པའི་རིམ་པས་གྱེན་ཐུར་གྱི་དགའ་བ་རྣམས་རྫོགས་ནས་བྲལ་བར་མ་སོང་༼༢༧བ༥༤༽པའི་མཐའ་དེ་གཉིས་ལ་དབུས་སམ་བཞི་པ་ཞེས་མཚོན་པའོ། །དབང་ནི་དྲི་མེད་རི་བོ་ཅན་མཚུངས་མེ་ལོང་གཟུགས་བརྙན་ལྟ་བུ་འདི་ལ་ཞུགས་པ་གང་ཡིན་པ། དེ་ལས་མྱ་ངན་ལས་འདས་པའི་བདེ་བ་འཕོ་མེད་ལྷན་ཅིག་སྐྱེས་པ་འགྱུར་མེད་ཉིད་ནི་བཞི་པ་སྟེ། སངས་རྒྱས་ཞལ་འདི་གང་གི་སྙིང་དང་ཁ་ལ་གནས་པར་གྱུར་པ་དེ་ནི་དཔལ་ལྡན་བླ་མ་ལའོ། །ཞེས་གསུངས་སོ། །གཞན་ཡང་། ཟླ་བ་རང་གི་ངོ་བོ་ལ་ཚེས་གཅིག་ལ་སོགས་པའི་ཆ་ཤས་དང་འཕེལ་འགྲིབ་མེད་ཀྱང་གྲིབ་མའི་དབང་གིས་དེ་ལྟར་སྣང་བ་བཞིན་དུ་ཡེ་ཤེས་རང་གི་ངོ་བོ་ལ་དགའ་བ་བཅུ་དྲུག་གི་རིམ་པས་ཡེ་ཤེས་འཕེལ་བ་དང་། དགའ་བྲལ་བཅུ་དྲུག་གི་རིམ་པས་འབྲི་བ་དང་རླུང་ཉི་ཁྲི་ཆིག་སྟོང་དྲུག་བརྒྱ་འགགས་པའི་རིམ་པས་ས་རྣམས་རིམ་པ་བཞིན་ཐོབ་པས་ཉོན་མོངས་པ་འགགས་ཡེ་ཤེས་འཕེལ་བ་ལ་སོགས་མཆེ་ཆུང་དང་འཕེལ་འགྲིབ་མེད་ཀྱང་སེམས་ཀྱི་དྲི་མ་ཞེས་བྱ་བ་ཡོད་པ་མ་ཡིན་པ་རང་གིས་བཏགས་པ་དེ་བསལ་བའི་རིམ་པས་དེ་སྐད་དུ་བརྗོད་པའོ། །གསུམ་པ། སྦྱང་འབྲས་སྐུ་གསུམ་གྱི་རྣམ་གཞག་བཤད་པ་ལ། ཇི་ལྟར་མངོན་པར་བྱང་ཆུབ་པའི་ཚུལ། མི་འགྱུར་བའི་གོ་འཕང་ངོས་གཟུང་། དེ་ཉིད་སྐུ་གསུམ་དུ་་་་་་་་་་འགྱུར་བའི་ཚུལ་བཤད་པ་ལས། དང་པོ་ནི། ཡེ་ཤེས་དང་རྣམ་པར་ཤེས་པའི་བདག་ཉིད་ཐིག་ལེ་འཕོ་བ་མེད་པ་རང་བཞིན་གྱི་སྐུ་ཡེ་ཤེས་རྡོ་རྗེའི་རྣལ་འབྱོར་རྡོ་རྗེ་སེམས་དཔའ་དོན་ཐམས་ཅད་གཟིགས་པ་སྟེ། སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་སྟེ། སྐད་ཅིག་གཅིག་གིས་བྱང་ཆུབ་པ་ནི། འདིར་དབུགས་ཉི་ཁྲི་ཆིག་སྟོང་དྲུག་བརྒྱ་ཡོངས་སུ་རྫོགས་པའི་མཚན་ཉིད་དེ་དབུགས་ཀྱི་འཁོར་ལོ་ཟད་པའི་ཕྱིར་རོ། །རྩ་བའི་རྒྱུད་དུ་ཡང་། རྒྱལ་དབང་རྣམས་ཀྱི་སྐྱེ་བའི་གནས། །དུས་གཅིག་འབྱུང་བ་མེད་པ་དང་། །སྲོག་ཆེན་པོ་དང་སེམས་གནས་དང་། །སྲོག་རླུང་ཟད་པར་སོན་པ་དང་། །ལྷ་ཡི་དབང་པོར་གྱུར་པ་དང་། །ཤ་ཡི་དབང་པོའི་ཚོགས་ཉམས་དང་། །ཐ་མལ་སྐྱེ་མཆེད་ཉམས་པ་དང་། །ལྷ་ཡི་སྐྱེ་མཆེད་ཀྱིས་མཐོང་ན། །ཐམས་ཅད་བལྟའོ་རྒྱལ་པོའི་དབང་། །བདག་ལ་རྟག་ཏུ་མི་མཐོང་མེད། །ཅེས་སོ། །དེ་ཉིད་ཆོས་ཀྱི་སྐུ་ཐུགས་རྡོ་རྗེའི་རྣལ་འབྱོར་སེམས་༼༢༨ན༥༥༽དཔའ་ཆེན་པོ་མཆོག་ཏུ་མི་འགྱུར་བའི་བདེ་བ་སྟེ། རྣམ་པར་ལྔས་མངོན་པར་རྫོགས་པར་སངས་རྒྱས་ཕྱིར་རོ། །རྣམ་པ་ལྔས་མངོན་པར་རྫོགས་པར་བྱང་ཆུབ་པ་ནི། འདིར་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་མཚན་ཉིད་དེ། ས་ལ་སོགས་པའི་ཁམས་དང་གཟུགས་ལ་སོགས་པའི་ཕུང་པོ་ལྔ་ཤེས་རབ་དང་ཐབས་ཀྱི་བདག་ཉིད་དཀྱིལ་འཁོར་ལྔ་འགོག་པའི་རང་བཞིན་ཡིན་པའི་ཕྱིར་རོ། །དེ་ཉིད་ལོངས་སྤྱོད་རྫོགས་པའི་སྐུ་གསུང་རྡོ་རྗེའི་རྣལ་འབྱོར་བྱང་ཆུབ་སེམས་དཔའ་བདེན་དོན་རྣམ་པ་བཅུ་གཉིས་པ། བྱང་ཆུབ་སེམས་དཔའ་རྣམས་རྗེས་སུ་འཛིན་པ་སེམས་ཅན་ཐམས་ཅད་ཀྱི་སྐད་ཀྱིས་ཆོས་སྟོན་པ་པོ་སྟེ། རྣམ་པ་ཉི་ཤུས་མངོན་པར་རྫོགས་པར་སངས་རྒྱས་པའི་ཕྱིར་རོ། །རྣམ་པ་ཉི་ཤུས་མངོན་པར་བྱང་ཆུབ་པ་ནི་དབང་པོ་ལྔ་དང་། ཡུལ་ལྔ་དང་ལས་ཀྱི་དབང་པོ་ལྔ་དང་། ལས་ཀྱི་དབང་པོའི་བྱ་བ་ལྔ་སྒྲིབ་པ་མེད་པའི་མཚན་ཉིད་དེ། འཕོ་བ་བཅུ་གཉིས་སྒྲིབ་བྲལ་དུ་འགགས་པའི་མཐུ་ལས་བྱུང་བའོ། །དེ་ཉིད་སྤྲུལ་པའི་སྐུ་རྡོ་རྗེའི་རྣལ་འབྱོར་དམ་ཚིག་སེམས་དཔའ་དེ་ཉིད་རྣམ་པ་བཅུ་དྲུག་རིག་པ། ལྷ་ལ་སོགས་པ་རྣམས་རྗེས་སུ་འཛིན་པ་མཐའ་ཡས་པའི་སྒྱུ་འཕྲུལ་དྲ་བ་རྣམས་ཀྱི་སྤྲོས་པའི་སྐུ་སྟེ། སྒྱུ་འཕྲུལ་དྲ་བས་མངོན་པར་རྫོགས་པར་སངས་རྒྱས་པའི་ཕྱིར་རོ། །སྒྱུ་འཕྲུལ་དྲ་བས་མངོན་པར་བྱང་ཆུབ་པ་ནི་འདིར་ཅིག་ཅར་མཐའ་ཡས་ཤིང་མཐར་ཐུག་པ་མེད་པར་སྣ་ཚོགས་པའི་སྒྱུ་མ་སྤྲུལ་པའི་མཚན་ཉིད་དེ་སྐུའི་དགའ་བ་ལ་སོགས་པ་ཐིག་ལེ་བཅུ་དྲུག་སྒྲིབ་བྲལ་དུ་འགགས་པ་ལས་རྣམ་པར་ཤེས་པར་བྱའོ། །དེ་ལྟར་བྱང་ཆུབ་པའི་མཚན་ཉིད་ཅན་གྱི་སྐུ་བཞི་པོ་ཉིད་དུས་ཀྱི་འཁོར་ལོ་སྟེ། དྲི་མེད་འོད་ལས། ཀ་ཡིག་ལས་ནི་རྒྱུ་ཞི་བ། ལ་ཡིག་ལས་འདིར་ཐིམ་པ་ཉིད། ཅ་ཡིག་ལས་ནི་གཡོ་བའི་སེམས། ཀྲ་ཡིག་རིམ་པ་བཅིངས་ལས་སོ། །ཞེས་པའི་དོན་ཀཱ་ནི་ངེས་པའི་ཚིག་ཏུ་ན་ཀཱ་ར་ཎ་ཞེས་པ་རྒྱུ་སྟེ་བྱང་ཆུབ་ཀྱི་སེམས་ལུས་ཀྱི་ཐིག་ལེའོ། །དེ་ཞིབ་ནི་སད་པའི་གནས་སྐབས་ཟད་པས་རྣམ་པར་རྟོག་པ་དང་བྲལ་བ་སྟེ། དཔྲལ་བར་ལུས་ཀྱི་ཐིག་ལེ་འགགས་པ་སྤྲུལ་པའི་སྐུའོ། །ལ་ནི་ལ་ཡོ་ཞེས་པ་ཐིམ་པ་སྟེ། རྨི་ལམ་གྱི་གནས་སྐབས་ཟད་པའི་བདག་ཉིད་སྲོག་ཐིམ་༼༢༨བ༥༦༽པ་སྟེ། མགྲིན་པར་ངག་གི་ཐིག་ལེ་འགགས་པ་ལོངས་སྤྱོད་རྫོགས་པའི་སྐུའོ། །ཙ་ནི་ཙ་ལ་ཙིཏྟ་ཞེས་པ་གཡོ་བའི་སེམས་ཏེ། སད་པ་དང་རྨི་ལམ་གྱི་གནས་སྐབས་སུ་སྒྲ་ལ་སོགས་པའི་ཡུལ་རྣམས་འབའ་ཞིག་དོན་དུ་གཉེར་བ་འཕོ་ཞིང་གཡོ་བའི་ཆོས་ཅན་མུན་པས་ཟིལ་གྱིས་མནན་པའི་སེམས་ཁམས་བཅོ་བརྒྱད་ཀྱི་རྣམ་པར་འགྱུར་བ་རྣམས་རྫོགས་པ་དེ་ཡིན་ལ། དེ་བཅིངས་པ་ནི་མུན་པ་དང་བྲལ་བ་ཤིན་ཏུ་གཉིད་ལོག་པའི་གནས་སྐབས་སྒྲིབ་བྲལ་དུ་འགགས་པ་སྙིང་བར་སེམས་ཀྱི་ཐིག་ལེ་འགགས་པ་ཆོས་ཀྱི་སྐུའོ། །ཀྲ་ནི་ཀྲམ་བན་དྷ་ཞེས་པ་རིམ་པ་བཅིངས་པ་སྟེ། རིམ་པ་ནི་ལུས་ལ་སོགས་པའི་ཐིག་ལེ་འཕོ་བ་ཡིན་ལ་དེ་བཅིངས་པ་ནི་ལྷན་ཅིག་སྐྱེས་པའི་བདེ་བས་བཞི་པའི་གནས་སྐབས་ཟད་པ་སྟེ། ལྟེ་བར་ཡེ་ཤེས་ཀྱི་ཐིག་ལེ་འགགས་པ་ལྷན་ཅིག་སྐྱེས་པའི་སྐུ་སྟེ་སྐུ་བཞིའི་བདག་ཉིད་དོ། །གཉིས་པ་ནི་གང་ཕྱིར་ཨ་སོགས་ཀ་སོགས་རི་བོང་ཅན་དང་ཉིན་བྱེད་གཅིག་ཉིད་རྡོ་རྗེ་ཅན་གྱི་གདན་མིན་ཞིང་། ཧཱུཾ་ཡིག་ཉིད་ཀྱི་མཚན་མ་དང་ནི་ཡོངས་སུ་གྱུར་པ་གཞན་པ་ཁ་དོག་གཟུགས་དག་མི་འདོད་དེ། འགྱུར་མེད་དག་གིས་སྐྱེད་ཅིག་འགྱུར་པ་ཉམས་པར་གྱུར་པ་མཆོག་གི་དབང་པོ་དག་དང་ལྡན་པ་ནི། རྣམ་པ་ཀུན་ལྡན་ཐིག་ལེ་མཐའ་དག་རྒྱལ་བའི་བདག་པོ་སྣ་ཚོགས་སྒྱུ་མ་འཛིན་པ་འདི་ལའོ། །ཞེས་གསུངས་པ་མི་འགྱུར་བའི་སྒྲ་ཡིས་མཆོག་ཏུ་མི་འགྱུར་བའི་བདེ་བའི་ཡེ་ཤེས་རྡོ་རྗེ་སེམས་དཔའོ། །དེ་བཞིན་དུ་ཡིད་སྐྱོག་པར་གྱུར་པ་ཉིད་ཀྱི་ཕྱིར་སྔགས་ཀྱང་མཆོག་ཏུ་མི་འགྱུར་བའི་ཡེ་ཤེས་བརྗོད་དོ། །རྩ་བའི་རྒྱུད་དུ་ཡང་། ལུས་ངག་སེམས་ཀྱི་ཁམས་རྣམས་ནི། གང་ཕྱིར་སྐྱོབ་པར་གྱུར་དེའི་ཕྱིར། སྔགས་དོན་སྔགས་ཀྱི་སྒྲ་ཡིས་ནི། སྟོང་ཉིད་ཡེ་ཤེས་འགྱུར་མེད་དེ། བསོད་ནམས་ཡེ་ཤེས་ལས་བྱུང་སྔགས། སྟོང་ཉིད་སྙིང་རྗེའི་བདག་ཉིད་ཅན། །ཞེས་པའོ། །དེ་བཞིན་དུ་གཞན་རང་གི་རིག་པ་ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་གྱིས་འོད་གསལ་བ་ཕྱག་རྒྱ་ཆེན་མོ་ལྷན་ཅིག་སྐྱེས་པའི་དགའ་བའི་གཟུགས་ཅན་མཆོས་ཀྱི་དབྱིངས་ཀྱི་རྒྱུ་མཐུན་པ་རྫོགས་པའི་གནས་སྐབས་སོ། །རྡོ་རྗེ་སེམས་དཔའ་དང་སངས་རྒྱས་ཀྱི་ཡུམ་རྟེན་ཅིང་འབྲལ་བར་འབྱུང་བའི་དབང་པོ་རྣམས་ཀྱི་སྤྱོད་ཡུལ་མ་ཡིན་པའི་མཆོག་གི་དབང་པོའི་སྤྱོད་༼༢༩ན༥༧༽ཡུལ་མཆོག་ཏུ་མི་འགྱུར་བའི་བདེ་བའི་རང་བཞིན་རྡུལ་ཕྲ་རབ་ཀྱི་ཆོས་ཉིད་ལས་འདས་པ་མེ་ལོང་གི་པྲ་ཕབ་པ་དང་རྨི་ལམ་དང་མཚུངས་པ་དེ་དག་ནི་རྒྱལ་བ་རྣམས་ཀྱི་ལྷན་ཅིག་སྐྱེས་པའི་སྐུ་ཞེས་གསུངས་ཏེ་མཆོག་ཏུ་མི་འགྱུར་བའི་བདེ་བའི་རང་བཞིན་གྱི་ཕྱིར་རོ། །འདིར་འགྱུར་མེད་རྣམས་ནི་གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་སྒྲིབ་པ་མེད་པ་རྣམས་འགྱུར་མེད་ལྔ་སྟེ་སྟོང་པ་ཆེན་པོར་གསུངས་སོ། །དེ་བཞིན་དུས་དང་ཆུ་དང་མེ་དང་རླུང་དང་ནམ་མཁའི་ཁམས་སྒྲིབ་པ་མེད་པ་རྣམས་འགྱུར་མེད་ལྔར་གསུངས་སོ། །འགྱུར་མེད་དྲུག་ནི་མིག་དང་རྣ་བ་དང་སྣ་དང་ལྕེ་དང་ཡིད་སྒྲིབ་པ་མེད་པ་རྣམས་ཏེ་སོ་སོ་རང་གི་ཡུལ་འཛིན་པ་རྣམ་པར་སྤངས་པ་རྣམས་སོ། །དེ་བཞིན་དུ་གཟུགས་དང་སྒྲ་དང་དྲི་དང་རོ་དང་རེག་ཆོས་ཀྱི་ཁམས་སྒྲིབ་པ་མེད་པ་རྣམས་ཀྱང་འགྱུར་མེད་དྲུག་ཏུ་གསུངས་ཏེ་ཕུང་པོ་དང་ཁམས་དང་སྐྱེ་མཆེད་འདི་རྣམས་གཅིག་ཏུ་རོ་མཉམ་པར་གྱུར་པ་ནི་ཐིག་ལེ་སྟོང་པར་འགྱུར་རོ། །ལེ་དེ་ཡང་མི་འཕོ་བར་གྱུར་ན་མཆོག་ཏུ་མི་འགྱུར་བའི་བདེ་བར་བརྗོད་དོ། །མཆོག་ཏུ་མི་འགྱུར་བ་ཡང་ཨ་ཡིག་སྟེ་ཨ་ཡིག་ལས་བྱུང་བ་ནི་ཡང་དག་པར་རྫོགས་པའི་སངས་རྒྱས་ཤེས་རབ་དང་ཐབས་ཀྱི་བདག་ཉིད་རྡོ་རྗེ་སེམས་དཔའ་མ་ནིང་གི་གོ་འཕང་ལྷན་ཅིག་སྐྱེས་པའི་སྐུ་ཞེས་བརྗོད་དོ་ཤེས་པ་དང་ཤེས་བྱའི་བདག་ཉིད་རྒྱུ་དང་འབྲས་བུ་དབྱེར་མེད་པའི་ཕྱིར་རོ། །ཕན་ཚུན་འཁྱུད་བཞི་པ་སྟེ། མ་ནིང་གི་ནི་གོ་འཕང་མཆོག །ཅེས་གསུངས་སོ། །དེ་ཡང་བཅོམ་ལྡན་འདས་དུས་ཀྱི་འཁོར་ལོ་ཏེ་མཆོག་ཏུ་མི་འགྱུར་བའི་བདེ་བའི་གོ་འཕང་ངོ་། །མཚན་ཡང་དག་པར་བརྗོད་པར་ཡང་གསུངས་པ། གསང་སྔགས་དོན་ཀུན་བསྐྱེད་པ་པོ། ཐིག་ལེ་ཆེན་པོ་ཡི་གེ་མེད། སྟོང་པ་ཆེན་པོ་ཡི་གེ་ལྔ། ཐིག་ལེ་སྟོང་པ་ཡི་གེ་དྲུག །ཅེས་གསུངས་སོ། །གཞན་ཡང་སྒྱུ་མ་དང་རྨི་ལམ་དང་དྲི་ཟའི་གྲོང་ཁྱེར་དང་པྲ་ཕབ་པ་ལ་སོགས་དེ་བཞིན་དུ་མ་བརྟགས་པའི་ཕུང་པོ་དང་ཁམས་དང་སྐྱེ་མཆེད་ལ་སོགས་༼༢༩བ༥༨༽པ་མ་ལུས་པ་མཐོང་བ་ཀུན་རྫོབ་ཀྱི་བདེན་པ་མཐོང་བ་སྟེ་རང་བྱིན་གྱིས་བརླབས་པར་བརྗོད་དོ། །ཀུན་རྫོབ་ཀྱི་བདེན་པ་དེ་ཡང་། དོན་དམ་བདེན་པ་འོད་གསལ་བས་ཡོངས་སུ་དག་པ་མེ་ལོང་ལྟ་བུའི་ཡེ་ཤེས་ལ་སོགས་པའི་ངོ་བོ་རྣམ་པར་སྣང་མཛད་ལ་སོགས་པའི་བརྟེན་པའི་ཚོགས་དང་རྟེན་དཀྱིལ་འཁོར་ཡང་དེ་ཉིད་ཡིན་པར་རྒྱུད་ཀྱི་རྒྱལ་པོ་ཐམས་ཅད་དུ་གསུངས་ཤིང་། བདེན་པ་གཉིས་གཉིས་སུ་མེད་པའི་རང་བཞིན་འདི་ཉིད་ཟུང་དུ་འཇུག་པ་ངོ་བོ་ཉིད་ཀྱི་སྐུ་ཞེས་བྱ་སྟེ། སྟོང་ཉིད་སྙིང་རྗེ་དབྱེར་མེད་ཅིང་། ཆགས་དང་ཆགས་བྲལ་རྣམ་པར་སྤངས། ཤེས་རབ་མ་ཡིན་ཐབས་ཀྱང་མིན། འདི་ནི་ངོ་བོ་ཉིད་ཀྱི་སྐུ། ཞེས་གསུངས་པས་སོ། །གསུམ་པ་ནི། མཚན་མ་ནི་སངས་རྒྱས་དང་བྱང་ཆུབ་ཅེས་པ་ལ་སོགས་པ་རྣམ་པར་རྟོག་པའི་སེམས་ཀྱི་རྒྱུ་ཡིན་ལ་རྒྱུ་དེ་ཡང་སྟོང་པ་ཉིད་ཡིན་པས་རྒྱུ་མེད་པའི་ཕྱིར་མཚན་མ་མེད་པའི་ཡེ་ཤེས་མཚན་མ་མེད་པའི་རྣམ་པར་ཐར་པ་སྟེ། དེ་ཡིས་རྣམ་པར་དག་པ་མུན་པས་ཟིལ་གྱིས་མནན་པ་ཤིན་ཏུ་གཉིད་ལོག་པའི་གནས་སྐབས་སྒྲིབ་བྲལ་དུ་ཟད་པ་ལས་རྟག་མི་རྟག་ལ་སོགས་གཉིས་དང་བྲལ་བ་བྱམས་པའི་བདག་ཉིད་སྐུ་གཉིས་སྤྲོས་པ་རྣམས་ཀྱིས་འགྲོ་བའི་དོན་བྱེད་པ་རྣམ་རྟོག་མེད་པའི་སེམས་ཐུགས་རྡོ་རྗེ་སྟེ། དེ་ཉིད་ཆོས་ཀྱི་སྐུ་ཤེས་རབ་དང་ཐབས་ཀྱི་བདག་ཉིད་ཆོས་ཀྱི་རྣལ་འབྱོར་རོ། །མཚན་མ་མེད་པའི་ཕྱིར་རྟོག་པ་མེད་ལ་རྟོག་པ་མེད་པའི་ཕྱིར་སྨོན་པ་མེད་པ་སྟེ། སྨོན་པ་ནི་བདག་རྫོགས་པའི་སངས་རྒྱས་སུ་གྱུར་ཅིག་ཅེས་པ་ལ་སོགས་པ་ཡིན་ལ། གང་ལ་དེ་མེད་པ་ནི་སྨོན་པ་མེད་པའི་རྣམ་པར་ཐར་པའོ། །དེ་ཡིས་རྣམ་པར་དག་པ་སྲོག་གིས་བསྐྱེད་པ་ཡོད་པ་དང་མེད་པའི་རྨི་ལམ་ཟད་པ་ལས་མི་ཟད་ཅིང་གཞོམ་དུ་མེད་པའི་སྒྲ། སེམས་ཅན་ཐམས་ཅད་ཀྱི་སྐད་ཀྱི་བདག་ཉིད་ཀྱི་སྔགས་དགའ་བའི་མཚན་ཉིད་སེམས་ཅན་ཐམས་ཅད་ཀྱི་སྐད་རྣམས་ཀྱིས་སེམས་ཅན་ཐམས་ཅད་དགའ་བར་བྱེད་པའི་ཕྱིར་དང་། ཡིད་སྐྱོབ་པར་གྱུར་པའི་ཕྱིར་ཡང་སྔགས་གསུང་རྡོ་རྗེ། དེ་ཉིད་ལོངས་སྐུ་ཤེས་རབ་དང་ཐབས་༼༣༠ན༥༩༽ཀྱི་བདག་ཉིད་སྔགས་ཀྱི་རྣལ་འབྱོར་རོ། །སྨོན་པ་མེད་པའི་ཕྱིར་གང་ལ་དཀར་པོ་དང་། དམར་པོ་དང་། སྲོག་གི་རྩོལ་བ་དང་། རྣམ་པར་ཤེས་པའི་མཚན་ཉིད་མངོན་པར་འདུ་བྱེད་པ་འདི་རྣམས་མེད་པའི་ཡེ་ཤེས་ནི་མངོན་པར་འདུས་མ་བྱས་པའི་རྣམ་པར་ཐར་པའོ། །དེ་ཡིས་རྣམ་པར་དག་པ་རྣམ་པར་རྟོག་པ་དུ་མའི་དངོས་པོའི་འདུ་ཤེས་ཀྱི་བདག་ཉིད་སད་པའི་གནས་སྐབས་ཟད་པ་ལས་མཐའ་ཡས་པ་མཐའ་ཡས་པའི་སྤྲུལ་པའི་སྐུ་སྤྲོས་པ་རྣམས་ཀྱི་ཉོན་མོངས་པའི་གཉེན་པོ། ལམ་འདྲེན་པར་བྱེད་པ་དྲག་པོ་དང་ཆགས་པ་དང་བཅས་པ་དང་ཞི་བ་ལ་སོགས་པའི་གཟུགས་རྣམས་ཀྱིས་དོག་པ་མེད་པ་བཏང་སྙོམས་ཀྱི་བདག་ཉིད་སྐུ་རྡོ་རྗེ་སྟེ། དེ་ཉིད་སྤྲུལ་པའི་སྐུ་ཤེས་རབ་དང་ཐབས་ཀྱི་བདག་ཉིད་དབྱིབས་ཀྱི་རྣལ་འབྱོར་རོ། །དྲི་མེད་འོད་ལས། རྣམ་པ་ཐམས་ཅད་མཆོག་ལྡན་པའི། སྐུ་ནི་མོས་པ་སྣ་ཚོགས་ལས། རང་རང་བསམ་པས་སེམས་ཅན་གྱིས། །མཐོང་བ་སྤྲུལ་པའི་མཚན་ཉིད་དོ། །གང་ཞིག་སེམས་ཅན་ཀུན་གྱི་སྒྲས། །རྫུ་འཕྲུལ་བདག་ཉིད་རབ་གསལ་བྱེད། །སེམས་ཅན་བསམ་པའི་དབང་གིས་ནི། །ལོངས་སྤྱོད་རྫོགས་སྐུའི་མཚན་ཉིད་དོ། །མི་རྟག་པ་མིན་རྟག་པ་མིན། །གཅིག་མིན་དུ་མའི་མཚན་ཉིད་མིན། །དངོས་མིན་དངོས་པོ་མེད་པའང་མིན། །གང་འདི་རྟེན་འབྲེལ་ཆོས་སྐུའོ། །ཞེས་གསུངས་པས་སོ། །ཟབ་རྒྱས་མེ་ཏོག་ལྕིད་ཀྱི་གཡུར་ཟ་བའི། །དཔལ་ལྡན་དུས་འཁོར་འཛམ་བུའི་འཁྲི་ཤིང་གི། །ངེས་པའི་སྙེ་མ་བདག་ཡིད་ཆུ་ཀླུང་དུ། །ལྷུང་བ་ལེགས་བཤད་ན་དཱིའི་ཕྱེ་མར་སོང་། །བླ་མའི་བཀའ་དྲིན་སྟོན་ཀའི་ཟླ་ཉའི་མདངས་ཀྱི་ཉམས་དགར་གྱུར་པ་ཡི། །དད་པའི་རྫིང་བུར་རྣམ་དཔྱོད་ཀུ་མུ་ཏ་རྒྱས་པའི་འཕྲེང་བ་ལ་ཆགས་པའི། ལེགས་བཤད་ཟེ་འབྲུ་ལུང་རིགས་གསེར་གྱི་བྱུག་པས་འཚེར་བྱས་པ། མཁས་པའི་མིག་ལ་རྔོམ་བརྗིད་བྱེད་འདི་རྟག་ཏུ་ས་ལ་འཆར་༼༣༠བ༦༠༽གྱུར་ཅིག །ཅེས་དཔལ་དུས་ཀྱི་འཁོར་ལོ་ལ་སོགས་པ་རྒྱུད་ཀྱི་རྒྱལ་པོ་ཐམས་ཅད་ཀྱི་མཐར་ཐུག་པའི་དོན། །རྡོ་རྗེ་གསུམ་གྱི་བསྙེན་སྒྲུབ། དོན་བཞིན་དུ་བཀྲལ་བ་རྡོ་རྗེ་འཆང་གི་དགོངས་པའི་རྒྱན་ཞེས་བྱ་བ། པདྨ་དཀར་པོས་ཡུལ་ལྷོ་ཕྱོགས་ཀྱི་སའི་ཐིག་ལེ་སྨད་འབྲུག་གི་གདན་ས་ཆེན་པོ་དཔལ་ཁོ་མཐིང་ལྷ་ཁང་དུ་སྦྱར་བའི་ཡི་གེ་པ་ངག་དབང་བརྩོན་འགྲུས་བཟང་པོས་བགྱིས་པ་བདེ་ལེགས་སུ་གྱུར་ཅིག། །།ཆོས་སྦྱིན་རྒྱ་ཆེར་སྤེལ་བའི་ཆེད། པར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱེད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །། ཨོ་ཌི་ཡཱ་ཎ་ལས་བྱུང་བ་རྡོ་རྗེ་གསུམ་གྱི་བསྙེན་སྒྲུབ་ཀྱི་ཁྲིད་མཁའ་འགྲོ་མའི་སྲོག་སྙིང་།ཨོ་ཌི་ཡཱ་ཎ་ལས་བྱུང་བ་རྡོ་རྗེ་གསུམ་གྱི་བསྙེན་སྒྲུབ་ཀྱི་ཁྲིད་མཁའ་འགྲོ་མའི་སྲོག་སྙིང་ཞེས་བྱ་བ་བཞུགས་སོ། །བླ་མ་དམ་པའི་ཞབས་ལ་ཕྱག་འཚལ་ལོ། །མཆོག་དང་ཐུན་མོང་གི་དངོས་གྲུབ་ཐམས་ཅད་ཀྱི་འབྱུང་གནས། དུས་གསུམ་སངས་རྒྱས་ཐམས་ཅད་བགྲོད་པ་གཅིག་པའི་ལམ། རྣལ་འབྱོར་གྱི་དབང་ཕྱུག་གྲུབ་ཆེན་རྣམས་ཀྱི་གཤེགས་ཤུལ། དབང་རྣོན་གྱི་གང་ཟག་ཚེ་གཅིག་གིས་རྡོ་རྗེ་འཆང་ཆེན་པོའི་སར་སྐྱེལ་བའི་གདམས་ངག །རྡོ་རྗེ་གསུམ་གྱི་བསྙེན་སྒྲུབ་འཆད་པར་བྱེད་པ་ལ། ཡིད་ཆེས་ཤིང་ཁུངས་བཙུན་པར་བྱེད་པ་བརྒྱུད་པའི་ལོ་རྒྱུས་དང་། བརྒྱུད་པ་དེ་ལས་བྱུང་བའི་གདམས་ངག་གཉིས་ལས། དང་པོ་གཞན་དུ་གསལ། གཉིས་པ་ལ་སྨིན་བྱེད་དང་། གྲོལ་བྱེད་ཀྱི་ལམ་གཉིས་ལས། དང་པོ་དབང་བཞིའོ། །གཉིས་པ་ལ། སྔོན་འགྲོ། དངོས་གཞི་གཉིས་ལས། དང་པོ་ལ། རྒྱུ་སྣོད་དུ་རུང་བར་བྱེད་པ་སྐྱབས་སེམས། སྡིག་སྒྲིབ་སྦྱོང་བར་བྱེད་པ་རྡོར་སེམས་བསྒོམ་བཟླས། བྱིན་རླབས་འཇུག་པར་བྱེད་པ་བླ་མའི་རྣལ་འབྱོར་ཚོགས་རྫོགས་པར་བྱེད་པ་མཎྜྻལ། ལུས་ངག་ཡིད་སྦྱོང་བར་བྱེད་པ་དབེན་པ་གསུམ་བསྟན་པ་དང་ལྔའོ། །གཉིས་པ་དངོས་གཞི་ལ། བསྙེན་བསྒྲུབ་གསུམ་ལ་བརྟེན་ནས་འཇིག་རྟེན་དང་འཇིག་རྟེན་ལས་འདས་པའི་ལམ་བགྲོད། ལམ་དེ་ལ་བར་ཆད་༼༢ན༣༽མེད་པར་བྱ་བའི་ཕྱིར་བསམ་གཏན་གྱི་གེགས་བསལ། གེགས་བསལ་ནས་མཐར་ཐུག་གི་འབྲས་བུ་ཐོབ་པའི་ཚུལ་བསྟན་པ་གསུམ་ལས། དང་པོ་ལ། ལུས་རྩ་དག་པར་བྱེད་པ་སྐུ་རྡོ་རྗེ་བསྙེན་པའི་ཡན་ལག །ངག་རླུང་དག་པར་བྱེད་པ་གསུང་རྡོ་རྗེ་བསྒྲུབ་པའི་ཡན་ལག །ཡིད་ཐིག་ལེ་དག་པར་བྱེད་པ་ཐུགས་རྡོ་རྗེ་སྒྲུབ་ཆེན་གྱི་ཡན་ལག་དང་གསུམ་ལས། དང་པོ་ལ། སོར་སྡུད། དེའི་བྱེད་ལས། འབྲས་བུ་བསམ་གཏན་གསུམ་ལས། དང་པོ་ལ། མཐུན་པའི་རྐྱེན། བསྒོམ་པའི་དུས། ཇི་ལྟར་བསྒོམ་པའི་ཚུལ་དང་གསུམ་ལས། དང་པོ་ནི། མཚན་ཉིད་ལྡན་པའི་བླ་མ་དང་། མཆོག་གི་སྣོད་དུ་འོས་པའི་སློབ་མ་དང་། ཁ་ན་མ་ཐོ་བ་བྲལ་བའི་ཡོ་བྱད་འཛོམ་པས་དཀྱིལ་འཁོར་གྱི་འཁོར་ལོ་ལ་སོགས་པ་རྣམ་པར་རྟོག་པའི་བསྒོམ་པ་ཡོངས་སུ་དོར་ནས་ཕྱག་རྒྱ་ཆེན་པོའི་དངོས་གྲུབ་བསྒྲུབ་པའི་ལམ་ལ་འཇུག་སྟེ། གང་ཞེ་ན། སོར་སྡུད། བསམ་གཏན། སྲོག་རྩོལ། འཛིན་པ། རྗེས་དྲན། ཏིང་ངེ་འཛིན་ནོ། །དེ་དག་ཀྱང་། སོར་སྡུད་རྒྱུ། བསམ་གཏན་འབྲས་བུ། སྲོག་རྩོལ་རྒྱུ། འཛིན་པ་འབྲས་བུ། རྗེས་དྲན་རྒྱུ། ཏིང་ངེ་འཛིན་འབྲས་བུ་ཡིན་པའི་དབང་གིས་རྒྱུ་མེད་པར་འབྲས་བུ་༼༢བ༤༽མི་འབྱུང་བས། རྒྱུ་གཙོ་བོར་བཏོན། འབྲས་བུ་ཞར་བྱུང་དུ་བྱས་ཏེ་རྡོ་རྗེ་གསུམ་གྱི་བསྙེན་སྒྲུབ་ཏུ་བསྡུས་སོ། །དེ་བསྒོམ་པའི་གནས་ཀྱང་ཆོས་ཀྱི་རྒྱལ་པོའི་ཁྲིམས་ཡོད་པའི་ཡུལ་དང་། དབེན་ཞིང་བཀྲ་ཤིས་པར་རོ། །བྱེ་བྲག་མཚན་མའི་རྣལ་འབྱོར་བསྒོམ་པའི་གནས་ནི། ཁང་བུ་འོག་གཤེར་མེད་ཅིང་ཞལ་བས་དང་སྤྲོ་བ། སྒོ་འཁྱོག་རིམ་པ་གསུམ་བཏོད་པས་མུན་པའི་གནག་ལ་སྣང་བ་འབྱུང་བའི་བུ་ག་ཕྲ་མོའང་མེད་པར་རོ། །གཉིས་པ་བསྒོམ་པའི་དུས་ནི་འབྱུང་བ་སྡུད་རིམ་དང་མཐུན་པར་འབབ་པ་གཡས་ནས་རླུང་རྒྱུ་བའི་དུས་དེར་རོ། །གསུམ་པ་ཇི་ལྟར་བསྒོམ་པའི་ཚུལ་ལ། སྟེང་གི་སྐྱིལ་ཀྲུང་གིས་སྟེང་གི་རླུང་བཅིང་བ་དང་། འོག་གི་སྐྱིལ་ཀྲུང་གིས་འོག་གི་རླུང་བཅིང་བ་དང་། བར་གྱི་སྐྱིལ་ཀྲུང་གིས་བར་གྱི་རླུང་བཅིང་བ་གསུམ་ལས། དང་པོ་ལ། མཚན་མོའི་རྣལ་འབྱོར་དང་། ཉིན་མོའི་རྣལ་འབྱོར་གཉིས། དང་པོ་ལ། ལུས་ཀྱི་བྱེད་ཆིངས། མིག་གོ་ལྟ་སྟངས། སེམས་ཀྱི་གཞག་ཐབས་གསུམ་ལས། དང་པོ་ནི། སྟོང་ཕྲག་བདུན་ཅུ་རྩ་གཉིས་རྩ་ཡི་བཅུད། ཅེས་པའི་སྟོང་ཕྲག་བདུན་ཅུ་རྩ་གཉིས་ནི་རྡོ་རྗེའི་ལུས་ལ་གནས་པའི་རྩའི་གྲངས་སོ། །དེའི་བཅུད་ནི་རྩ་དེ་དག་ཏུ་རྒྱུ་བའི་རླུང་དང་། རླུང་དེ་དག་ལ་ཞོན་པའི་ཐིག་ལེ་དང་། ཐིག་ལེ་དེ་དག་ལ་བརྟེན་པའི་རྣམ་ཤེས་དག་གོ། །ནམ་མཁའི་མཐོངས་སུ་གཟའ་རྣམས་བརྟན་པར་བཅིངས། ཞེས་པའི་ནམ་མཁའ་ནི་འདིར་མུན་པའི་དབྱིངས་དང་། ཉིན་མོའི་རྣལ་འབྱོར་ལ་སྤྲིན་མེད་པའི་རྒྱན་ནམ་མཁའོ། །གཟའ་རྣམས་ནི་བུ་ག་དགུ་སྟེ། བརྟན་པར་བཅིངས་ཞེས་པ་སྔར་བཤད་པའི་བཅུད་བུ་ག་དེ་དག་ནས་འཇིག་པ་སྡོམ་པ་སྟེ། གོང་གིས་ཞེན་བྱེད་ཆིངས་ཀྱིས་སོ། །ཅིའི་ཕྱིར་སྡོམ་ཞེ་ན། འཛག་པ་ལས་དྲུག་གསུམ་སྐྱེ་ལ། དེས་ལས་རྣམ་པར་འཇོག་ཅིང་། ལས་དེའི་རྣམ་སྨིན་ལས་འཇིག་རྟེན་གསུམ་གྱི་སྤྲོས་པ་སྣ་ཚོགས་པ་སྐྱེ་ལ། སྤྲོས་པ་ངེས་བཏགས་པའི་བག་ཆགས་ཀྱིས་འཁོར་བར་འཁོར་དུ་འཇུག་གོ། །བྱེད་པ་བཅིངས་པས་༼༣ན༥༽ནི་ལུས་ངག་ཡིད་མི་གཡོ་གར་གཏན་ལ་འབེབས་པས། དེའི་ཚེ་སྤྲོས་པའི་རྣམ་པར་རྟོག་པ་རྣམས་ངང་གིས་ཞི་ལ། ཞི་བའི་དབྱིངས་སམ་དང་དེར་འོད་གསལ་བའི་རྟགས་རྣམས་འཆར་བར་འགྱུར་བས་སོ། །དེ་ཡང་། རགས་པ་ལུས་འཆིངས་ན་པྲ་བཤུགས་ཀྱིས་འཆིངས། དེ་བཅིངས་པས་ཤིན་ཏུ་ཕྲ་བའི་ཡིད་འཆིང་བར་འགྱུར་བའི་ཕྱིར་དང་པོར་ལུས་གནད་བསྟན་ཏེ། རྐང་པ་གཡོན་འོག་གཡས་སྟེང་དུ་བཏོན་པའི་རྡོ་རྗེ་སྐྱིལ་ཀྲུང་། ལག་པ་རྡོ་རྗེ་ཁུ་ཚུར་དམ་པོར་བསྡམས་པ་བརླ་དང་ལུས་ཀྱི་འབྲེལ་མཚམས་སུ་བཙུགས་ཏེ་གྲུ་མོ་བསྲངས། སྒལ་ཚིགས་ཁྲོངས་ཤིང་དཔུང་པ་ཕྱིར་གདེངས་པས་ཐལ་གོང་ཡངས་པར་བྱ། ཨོག་སྐོས་ཨོལ་མདུད་ནོན་ཙམ་པས་མགྲིན་པ་ཡིད་སྒུག་ལྟོག་པ་དྲངས་པོར་བསྒྲེང་། སོ་དང་མཆུ་ལ་བར་ཡོད་ཙམ་གྱིས་ལྕེ་རྐན་ལ་སློག །བཞིན་རས་ཅུང་ཟད་གཉེར་བ་དང་རྣ་བ་སྲེང་བྱའོ། །དེ་དག་རིམ་པ་བཞིན་གྱིས་ཐུར་སེལ། མེ་མཉམ། ཁྱབ་བྱེད། གྱེན་རྒྱུ། སྲོག་འཛིན་རྣམས་བཅིངས་ཏེ། བགས་ཀྱིས་དབུ་མར་འབབ་པར་བྱེད་དོ། །གཉིས་པ་མིག་གི་ལྟ་སྟངས་ནི། གཙུག་ཏོར་འཁོར་ལོས་བསྒྱུར་བའི་ལྟ་སྟངས་ཏེ། མིག་བགྲད་འབྲས་བུ་གྱེན་དུ་བསྒྲིལ་ནས་མི་འཛུམ་པར་གཙུག་ཏོར་གྱི་ནམ་མཁའ་ལ་བལྟ་བའོ། །འདིས་སྒོ་ལྔ་བཅུད་ལ་བོར་བས་ཡན་ལག་གི་རླུང་འཆིང་བར་བྱེད་དོ། །གསུམ་པ་སེམས་ཀྱི་གཞག་ཐབས་ནི། འདས་པ་མི་མནོ། མ་བྱུང་བ་མི་སེམས་ད་ལྟའི་འཆར་སྒོའི་རྗེས་མི་འབྲང་། བློས་གཞག་གི་སྒོམ་མི་འཚོལ། བརྟག་དཔྱད་ཀྱིས་སྟོང་པར་མི་བལྟ་བར་མ་བསམ་པའམ། མ་བརྟགས་པའམ་མ་དཔྱད་པར་ནམ་མཁའི་ཆོས་འབྱུང་ལ་ཐུགས་རྡོ་རྗེ་ཀུན་ནས་ཞེན་པའི་སེམས་སུ་བཞག་སྟེ། བཅོམ་ལྡན་འདས་ཀྱིས། བསམ་པ་ཐམས་ཅད་ཡོངས་སྤངས་ནས། ཉི་མ་གཅིག་ནི་ཡོངས་བརྟག་བྱ། ཞེས་གསུངས་པའི་ཕྱིར་རོ། །ཚུལ་དེས་རྣམ་པར་རྟོག་པ་ནུབ་པའི་རྣམ་པར་མི་རྟོག་པ་རྙེད་ཅིང་བརྟན་པར་འགྱུར་བས་འཁོར་བ་མའི་མིག་སོགས་ཀྱི་ཤེས་པས་༼༣བ༦༽གཟུགས་སོགས་སྡུད་པ་དེ་འདིས་འགོག་པའི་ཕྱིར་སོ་སོར་སྡུད་པ་ཞེས་བྱ། དེ་ལ་རྟགས་ནི་མ་བྱུང་ན། དེ་ཚེ་ང་ཡི་རྫུན་ཚིག་ཡིན། དེའི་ཚེ་སེམས་ཀྱི་རྒྱུ་བ་ཆད་པ་ལྟ་བུར་དོགས་པ་མི་བྱ་སྟེ། དེ་ཉིད་ཀྱི་ངང་ནས་དང་པོར་མུན་པའི་ནམ་མཁའ་ལ་དུ་བ་ལྟ་བུ་མཐོང་། དེ་ལ་གཞན་དུ་མི་གཡོ་བར་རྩེ་གཅིག་ཏུ་གཞག་པས་དེ་ངང་གིས་ཡལ་ནས་སྨིག་རྒྱུ་ལྟ་བུ། དེ་ལའང་དེ་བཞིན་དུ་གཞག་པས་དེ་ཡལ་ནས་རབ་ཏུ་གསལ་བ་དྲི་མ་མེད་པའི་མེ་ཁྱེར། དེ་ལའང་དེ་བཞིན་དུ་གཞག་པས་ཡལ་ནས་མར་མེ་ལྟ་བུ་མཐོང་ངོ་། །དེའི་ཕྱིར་འདིས་ཤའི་མིག་སེམས་ཀྱི་ཤེས་པས་རྣམ་པ་ཐམས་ཅད་པའི་སྟོང་པའི་གཟུགས་སོགས་རིས་མེད་པ་ལེན་པའི་ཕྱིར་ཡང་སོ་སོར་སྡུད་པ་ཞེས་བྱའོ། །རྟགས་འདི་དག་ལས་སྒོམ་པ་བརྩམས་པའི་མོད་ལའམ། ཉིན་ཞག་གི་མཐའ་ཚུན་ལ་གཅིག་ཅི་ནས་རྙེད་པར་འགྱུར་བས་ལམ་འདི་ཤིན་ཏུ་མྱུར་བའི་ལམ་དུ་ཤེས་པར་བྱའོ། །རྟགས་ཀྱི་གོ་རིམ་འདི་ཡང་དུས་གནད་ངེས་པ་དང་ལྡན་པ་ལ་ཡིན་གྱི། གཞན་དུས་གནད་ངེས་པ་དང་བྲལ་བའི་རྩ་རླུང་གི་བྱེད་པའི་དབང་ལས་རིམ་པ་མེད་པར་འཆར་བ་ཡང་ཡོད་དོ། །དེའི་ཕྱིར་ཤིན་ཏུ་ཟབ་མོའི་ལམ་འདི་ཁ་ཟས་ཀྱི་དུས་མ་ཡིན་པ་ཐམས་ཅད་དུ་བསྒོམ་པར་བྱ་བ་སྟེ། མཚན་མོའང་རྒྱབ་ཏུ་སྙེས་ས་ཅུང་ཟད་དང་བཅས་པའི་ཅོག་པུར་ཉལ་བས་དང་པོར་གཉིད་མི་ཁུགས་པ་འོང་ཡང་བྱང་ནས་གཉིད་ཕེབས་ཤིང་རྨི་ལམ་དུ་རྟགས་དེ་དག་ཆེས་གསལ་བར་འབྱུང་ངོ་། །ཁ་ཟས་ཀྱི་དུས་དེར་ཡང་ལྟ་སྟངས་མ་ཤོར་བར་བྱའོ། །ལར་ཐམས་ཅད་དུ་སེམས་མ་ཡེངས་ལ་རྩོལ་བ་མེད་པའི་གནད་ཤེས་དགོས་ཏེ། དེ་ཤེས་ན་རྟགས་དཔྲལ་ལ་འཆར་ཞིང་རྫོགས་པར་འགྱུར་ལ། དེ་ལས་གཞན་དུངས་དུངས་འཇུག་གྲག་རང་གི་སྒོམ་དེ་ཡང་སྣ་སུན་པར་ཟད་དོ། །གཉིས་པ་ཉིན་མོའི་རྣལ་འབྱོར་ནི། ཁང་སྟེང་ངམ་རི་མཐོན་པོའི་རྩེར་ཕྱིན་ཏེ། སྔ་མ་བཞིན་ལུས་ཀྱི་བྱེད་ཆིངས་དང་ལྟ་སྟངས་སྤྲིན་མེད་པའི་རྒྱན་ནམ་མཁའ་སྔོ་དང་ངེ་བ་ལ་གཏད། སེམས་རྣམ་པར་༼༤ན༧༽མི་རྟོག་པ་ལ་གཞག་པས་སྤྲིན་མེད་པའི་ནམ་མཁའ་ལ་འབར་བ་མཐོང་། དེ་ནས་ཟླ་བར་སྣང་བ་དང་། ཉི་མར། སྒྲ་གཅན་དུ། མཆོག་གི་ཆ་སྟེ་གློག་ཏུ། དེ་ནས་ཐིག་ལེ། དེ་དག་གི་ཐ་མར་བུམ་པ་དང་སྣམ་བུ་སོགས་དང་། ཐིག་ལེའི་དབུས་སུ་སྣ་ཚོགས་གཟུགས་བརྙན་སྤྲུལ་པའི་སྐུ་དང་། སྒྲ་བརྙན་གྱི་ལོངས་སྐུ་ཐོས་ཏེ། དྲུག་པོ་དེ་དག་ཀྱང་སྔ་མ་སྔ་མ་ལ་སེམས་གཟུང་སྟེ་གཞག་པས་དེ་ངང་གིས་ཡལ་ནས་ཕྱི་མ་ཕྱི་མ་འབྱུང་བའོ། །འདིའི་དུས་སྔ་དྲོ་དང་ཕྱི་དྲོ་ཉི་མ་ལ་རྒྱབ་གཏད་དེ་བསྒོམ། གུར་ལ་ངལ་བསོའོ། །དེ་ནས་ཐིག་ལེའི་དབུས་སུ་རི་མོ་ནག་པོ་སྐྲའི་ཚད་ཙམ་དྲི་མ་མེད་པའི་འོད་ཟེར་ཅན་མཐོང་སྟེ། དེའི་ཚེ་ཉིན་མོའི་རྣལ་འབྱོར་འདིའི་རྟགས་རྫོགས་པར་གསུངས་སོ། །གཉིས་པ་འོག་གི་སྐྱིལ་ཀྲུང་གི་ས་འོག་གི་རླུང་འཆིང་བ་ལ། ལུས་ཀྱི་བྱེད་ཆིངས། མིག་གི་ལྟ་སྟངས། སེམས་ཀྱི་གཞག་ཐབས་གསུམ་ལས། དང་པོ་ནི། ཉིན་མཚན་གྱི་རྣལ་འབྱོར་གང་གིས་ཀྱང་རུང་། རླུང་སྟེང་དུ་འཆུགས་ཏེ། མགོན། སྤྱི་བོ་སྐྲངས། མིག་ཚ་བ་སོགས་བྱུང་ནས་མ་བཅོས་ན་རླུང་གིས་ཚངས་པའི་བུ་ག་ཕུག་སྟེ་མཁའ་སྤྱོད་དུ་འཕོ་བར་འགྱུར་བས་དེ་བཟློག་པའི་ཕྱིར། རྒྱ་མཚོའི་གཏིང་དུ་རྩ་གསུམ་ཡན་ལག་བསྡམ། རྒྱ་མཚོ་ནི་ལྟོ་བ། གཏིང་འོག་སྒོ། རྩ་གསུམ་དྲི་ཆེན་དྲི་ཆུ་ཁུ་བ་འབབ་པ། ཡན་ལག་ཆད་པ། བསྡམ་པ་ནི་བྱེད་ཆིངས་ཏེ། རྡོ་རྗེ་སྐྱིལ་ཀྲུང་ལ་རྐང་པའི་ཉྭ་བཞི་དང་སོར་མོ་དང་སྐེད་པ་མན་སྲིམ་བསྒྲིམ། སྟོད་གློད། ལག་པ་པུས་བཀབ་བོ། །གཉིས་པ་ལྟ་སྟངས་ནི། རྣམ་པར་སྣང་མཛད་ཀྱི་ལྟ་སྟངས་ཐུར་དུའོ། །གསུམ་པ་སེམས་ཀྱི་གཞག་ཐབས་ནི། རང་གི་འོག་འབྱུང་བ་བཞིའི་རྟེན་གཞིའི་ནམ་མཁའ་ལ་གཏད་དེ་རླུང་འོག་སྒོར་འཕུལ། དེར་རླུང་སེམས་བསྲེས་ལ་གཞག་གོ། །གསུམ་པ་བར་གྱི་སྐྱིལ་ཀྲུང་གི་བར་གྱི་རླུང་འཆིང་བ་ལ། ལུས་ཀྱི་བྱེད་ཆིངས། མིག་གི་ལྟ་སྟངས། མིག་གི་ལྟ་སྟངས། སེམས་ཀྱི་གཞག་ཐབས་སོ། །དང་པོ་ནི། སྔ་མ་གཉིས་ཀྱི་ཤུགས་བསྟན་ཏེ། རྐང་པ་གཡོན་པའི་རྟིང་པས་༼༤བ༨༽གསང་རྩ་ཐེམ་པར་མནན། གཡས་པ་དེའི་བོལ་གོང་ནས་ལྟེམས་པའི་སེམས་སྐྱིལ་མཉམ་གཞག །གྲུ་མོ་དང་སྒལ་ཚིགས་བསྲངས། ཐལ་གོང་འགྱེད། མགྲིན་པ་སྒུག །སོ་མཆུ་བར་ཡོད་ཙམ། ལྕེ་ཡར་རྐན་ལ་གཏད་པའོ། །གཉིས་པ་མིག་གི་ལྟ་སྟངས་ནི། ཞི་མ་ཁྲོའི་ལྟ་སྟངས་ཏེ། མིག་ཅུང་ཟད་བསྒྲིམས་ཏེ་ཐད་ཀར་བལྟ་བའོ། །གསུམ་པ་ནི། རླུང་ཕོ་བར་ཡིད་ཙམ་འཕུལ་ནས་དེར་རླུང་སེམས་བསྲེས་ནས་མཉམ་པར་འཇོག་གོ། །འདིས་སྟེང་འོག་གཉི་གའི་སྐྱོན་སེལ། ཕོ་བའི་མེ་དྲོད་གསོ། ཟས་འཇུ། དངས་སྙིགས་འབྱེད། རླུང་སེམས་ལུས་གནས་སོ་སོར་འགྲེམས་པ་དང་ལག་སོར་ལ་ཚུད་པར་ཡང་བྱེད་དོ། །ལུས་རླུང་ཐིག་ལེ་གཅིག་ལ་གཅིག་བརྟེན་ཡིན་པས་ལུས་གནད་ལ་སྒྲིམ་མོ། །གཉིས་པ་དེའི་བྱེད་པའི་ལས་ནི། མ་ཆེན་མོའི་རྣལ་འབྱོར་ཙམ་བསྒོམ་པའི་དང་། ཉིན་མོའི་རྣལ་འབྱོར་མཐར་ཐུག་པར་བསྒོམ་པའོ། །དང་པོ་ནི། ཉི་ཁྲི་ཆིག་སྟོང་དྲུག་བརྒྱ་རླུང་གི་ཚོགས། སྟེང་འོག་རྩ་ཡིས་བཅིངས་པས་ཟིན་པར་འགྱུར། ཞེས་པའི་ཉི་ཁྲི་ཆིག་སྟོང་དྲུག་བརྒྱ་ནི། གང་འཛིན་རྒྱུའི་རླུང་འཇུག་གནས་དབྱུང་གསུམ་གཅིག་ཏུ་བྱས་པ་ལ་དབུགས། དེ་སྐྱེས་བུ་དར་བབ་ཁམས་སྙོམས་པ་ལ་ཉིན་མཚན་གྲགས་གཅིག་གི་རིང་ལ། སྣ་སྒོ་ར་འབབ་པའི་གྲངས་སོ། །སྟེང་འོག་རྩ་ཞེས་པ་ནི་འཛིན་པའི་གནས་ཏེ། སྟེང་སྒོ་དང་འོག་སྒོའི་རྩ་དྲུག་ཏུའོ། །བཅིངས་པས་ཞེས་པ་ནི། གང་གིས་འཆིང་བའི་བྱེད་ཆིངས་ཏེ། སྔར་བཤད་པ་དག་གིའོ། །ཟིན་པར་འགྱུར་ཞེས་པ་ནི། ཟིན་པ་ཉིད་ཀྱི་ངོ་བོ་བཤད་པ་སྟེ། རྒྱུ་བའི་གྲངས་དང་། རྒྱུ་བའི་རིང་ཐུང་དང་། རྒྱུ་བའི་ཤེད་དང་། རྒྱུ་བའི་ཁ་དོག་དང་། རྒྱུ་བ་མེད་པ་ལ་ནུས་པ་ཟིན་པ་ཞེས་བཏགས་པ་ལྔ་ལས་འདིར་ཕྱི་མའོ། །དོན་ལས་རླུང་རྒྱུ་བ་ནས་བརྩམས་ཏེ་རྣལ་འབྱོར་བསྒོམས་པས་སེམས་གནས་ལ། གནས་པའི་རིང་དེར་དེ་དུས་འབབ་རྒྱུའི་རླུང་དེ་མ་རྒྱུས་པར་ཁད་དེ་བསྡད་པའོ། །དང་པོར་ས་རླུང་རང་བསྡད་པས་དེའི་དབང་གིས་དུ་བ་ཤར་རོ། །ས་རླུང་གི་འཕོ་ཆུང་རིལ་པོ་གཅིག་བསྡད་པ་ཙམ་ན་དུ་བའི་རྟགས་རྫོགས་ནས་དེ་ཡལ་བའི་འགོ་ཟུག་གོ། །དེ་ནས་ཆུའི་འཕོ་ཆུང་ཆ་ཤས་རེ་༼༥ན༩༽ཙམ་བསྡད་པ་ན་སྨིག་རྒྱུ་ཤར་ཏེ། གཉིས་པ་རིལ་ཡང་བསྡད་པས་དེ་རྫོགས་ནས་ཡལ་བར་ཟུག་གོ། །དེ་ནས་མེའི་འཕོ་ཆུང་གི་ཆ་ཤས་བསྡད་པས་མེ་ཁྱེར། རིལ་པོ་ཡང་བསྡད་པས་དེ་རྫོགས་ནས་ཡལ་བར་ཟུག །དེ་ནས་རླུང་གི་འཕོ་ཆུང་གི་ཆ་ཤས་རེ་ཙམ་བསྡད་པས་མཛེས་ཤར་ལ། རིལ་པོ་བསྡད་པས་རྫོགས་ཏེ། འཕོ་ཆུང་བཞི་ཙམ་འགགས་པའི་རྣམ་པར་མི་རྟོག་པ་བརྟན་ན། ཉིན་མོའི་རྣལ་འབྱོར་ལ་བསླབ་བོ། །འདིར་རྒྱུད་ལས། ནམ་མཁར་ཀུན་ནས་ཞེན་པའི་སེམས་དང་མིག་ནི་མི་འཛུམ་རྡོ་རྗེའི་ལམ་དུ་ཞུགས་པ་ཡིས། སྟོང་པ་ལས་ནི་དུ་བ་སྨིག་རྒྱུ་རབ་གསལ་དྲི་མ་མེད་པའི་མཁའ་སྣང་ཉི་དང་མར་མེ་དང་། ཞེས་གསུངས་པའི་རྡོ་རྗེའི་ལམ་ནི་དབུ་མ་ཡིན་པས་སྔར་འབྱུང་བཞིའི་རླུང་རང་གནས་སུ་བཅིངས་པ་ཙམ་ལས་མ་བཤད་པ་འདི་དང་ཇི་ལྟར་འགྲིག་སྙམ་ན་བདེན་ཏེ། སྔ་མ་ནི་གཙོ་ཆེ་བས། ས་ནི་ཆུ་ལ་རབ་ཏུ་འཇུག་ཅིང་ཆུ་ཡང་འབར་བྱེད་ལ་སྟེ་གཙང་བར་བྱེད་པ་རླུང་ལའོ། །ཞེས་གསུངས་པ་དུས་གནད་ངེས་པའི་དབང་དུ་མཛད་ལ། དུས་གནས་མ་ངེས་པ་ནི། རླུང་གང་གི་སྐབས་སུ་ཡ། ཟིན་པར་འགྱུར་བས་ན་མཉམ་དུ་འབབ་པའི་དུས་སུ་ཡིན་ན། དེ་མི་འབབ་པར་སྡོད་ལ་དེའི་སྡོད་ས་དེ་དབུ་མ་ཡིན་པས་དེ་ལ་བལྟོས་ནས་དབུ་མར་ཟིན་པ་ཞིག་ཀྱང་འདིར་འཐད་པ་ཡིན་ནོ། །དེའི་ཕྱིར་ཐར་པ་ཆ་མཐུན་ཐོབ་པ་ལ་ལམ་ཞུགས་ཞེས་བརྗོད་པ་བཞིན། དབུ་མར་རླུང་ཟིན་པའི་ཆ་ཙམ་ཐོབ་པས་ཀྱང་རྡོ་རྗེའི་ལམ་དུ་འགས་པ་ཞེས་བྱའོ། །དེ་ཙམ་དུ་མ་ཟད་ཉིན་རེ་ཙམ་རྣམ་པར་མི་རྟོག་པ་ལ་འབྱམས་པ་ཡང་འབྱུང་བས་དང་། ལས་རླུང་རྣམས་ཀྱང་དབུ་མ་ལ་འབབ་པར་ཕྱོགས་པའི་ཕྱིར་ཡང་དེ་སྐད་གསུངས་སོ། །ད་ནི་ཉིན་མོའི་རྣལ་འབྱོར་མཐར་ཐུག་པའི་བར་སྒོམ་པའི་བྱེད་ལས་གསུངས་པ། ས་ཆུ་མེ་རླུང་ནམ་མཁའི་བདག་ཉིད་ཀྱིས། །འབྱུང་བའི་རླུང་རྣམས་ནང་དུ་འགག་པར་བྱེད། སྟོང་པ་ནམ་མཁའི་རླུང་འབབ་པ་དེ་ཡང་བསྡད་པ་ཙམ་ནས་འབྱུང་བ་ལྔའི་རླུང་དེ་དག་ཀྱང་སྲོག་རྩོལ་གྱི་སྟོབས་ཀྱིས་དབུ་མའི་ནང་དུ་༼༥བ༡༠༽ཞུགས་པས་དུས་སྦྱོར་རེ་ཙམ་དུ་ཕྱིར་རྒྱུ་བ་འགག་གོ། །དེ་ལས་དང་པོར་ས་རླུང་ཞུགས་པས་འོད་ཟེར་སེར་པོའི་དཀྱིལ་འཁོར་མཐོང་བ་འབར་བ། ཆུ་ཀླུང་ཞུགས་པས་འོད་དཀར་པོའི་དཀྱིལ་འཁོར་མཐོང་བཟླ་བ། མེ་རླུང་ཞུགས་པས་དམར་པོའི་ཉི་མ། རླུང་གི་རླུང་ཞུགས་པས་མཐིང་ག་ཁྲོ་བོའི་གསུས་པ་འདྲ་བ་སྒྲ་གཅན། སྟོང་པའི་རླུང་ཞུགས་པས་གློག་ཁེམ་ཙམ་ཁེམ་ཙམ་བྱེད་པ་ལྟར་སྣང་བ་མཆོག་གི་ཆ་སྟེ། འདི་ཁེམ་པ་ཇེ་དྲག་ཏུ་སོང་ནས་སྣ་གཉིས་བལྟ་བ་སྟེ་སྦྲེལ་ནས་ཐིག་ལེར་འགྱུར་ལ། དེ་ཡང་མཐིང་ཀ །དེའི་མཐོངས་སུ་ཤེས་པ་གཏད་ན་རྒྱ་ཇེ་ཆུང་ངུ་འགྲོ། འོད་ཀྱི་གདངས་ལ་གཏད་ན་རྒྱ་ཇེ་ཆེར་འགྲོ་བས་རྫོགས་ཆེན་ནས་ཐིག་ལེ་གོང་འཕེལ་དུ་འགྲོ་བ་དང་། དུས་འཁོར་ནས་ཇེ་ཕྲར་འགྲོ་བར་བཤད་པའི་གནད་དེ་ཡིན་ནོ། །དེའི་ནང་དུ་སྤྲུལ་པའི་སྐུ་རྐྱང་པ་དང་ཚོམ་བུ། ཞི་བ་དང་ཁྲོ་ཆགས་མཐོང་། དེ་ནས་སྒྲའི་སྣང་བརྙན་གྱི་ལོངས་སྐུ་ཐོས་སོ། །མཐར་དེ་ཡུངས་འབྲུ་ཙམ་དུ་གྱུར་པའི་དཀྱིལ་དུ་རི་མོ་ནག་པོ་འོད་ཟེར་འཕྲོ་བ་སྐྲའི་རྩེ་མོ་ཙམ་དུ་ཕྲ་བ་སྣང་ལ། དེའི་ཡང་དབྱིངས་སུ་ཤེས་པ་གཏད་ན་དེར་སྣ་ཚོགས་གཟུགས་དང་ལོངས་སྐུ་འཆར་རོ། །འདི་ཡང་ཤེས་པའི་ཁ་ཕྱིར་གཏད་པའི་དབང་གིས་ཕྱིར་ཆད་པ་ལྟ་བུར་སྣང་ལ། དེའི་ཚེ་ཁ་ནང་དུ་ལྟེ་བའི་འཁོར་ལོར་གཏད་དེ་བསྒོམ་ན། ལྟེ་བའི་སྟེང་དུ་ར་སཱ་ན་ནས་ཡུལ་ལྔ་ལ་འཇུག་པའི་རླུང་འགག་པས་འཁོར་ལོ་ལྔའི་བརྟེན་ཅན་གྱི་དྷཱུ་ཏཱི་ལྟེ་བར་ཁ་བྱེ་བའི་རེ་ཁཱའི་དབུས་སུ་སྣ་ཚོགས་གཟུགས་མཐོང་སྒྲ་བརྙན་ཐོས་པར་འགྱུར་རོ། །དེའི་སྟོབས་ཀྱིས་ལྟེ་བའི་འོག་ཏུ་ལཱ་ལ་ནའི་རྩ་ནས་ཐུར་སེལ་གྱི་རླུང་འགག་གོ། །དུས་དེར་ཚིག་གི་མཆོག་འགྲུབ། སྟེང་འོག་གི་རླུང་གསུམ་པ་གཉིས་འགགས་པས་རྣམ་པར་རྟོག་པའི་བཞོན་པ་ཁེགས་པས་རྣམ་རྟོག་ནུབ་སེམས་རྣམ་པར་མི་རྟོག་པའི་རང་བཞིན་ལ་རྩེ་གཅིག་ཏུ་བརྟན་པས་ཕྱིན་ཆད་དེ་བསམ་གཏན་པར་འགྱུར་རོ། །དེ་ནི་སོ་སོར་སྡུད་པའི་མཐར་ཐུག་གི་བྱེད་ལས་བརྗོད་པར་བཞེད་ནས། བདེ་གསལ་མི་རྟོག་ཏིང་འཛིན་ལས་སུ་རུང་། བདེ་ཞེས་པ། རྒྱུ་སྟོང་པ་ཉིད་ཀྱི་གཟུགས་༼༦ན༡༡༽བརྙན་ལ་སེམས་རྩེ་གཅིག་ཏུ་གཞག་པ་དེ་ལ་བརྟེན་ནས་འབྲས་བུ་གཟུགས་ལ་ཆགས་པ་སེམས་གཞན་དུ་མི་འགྱུར་ཞིང་མི་གཡོ་བའི་བདེ་བ་སྐྱེའོ། །གསལ་ཞེས་པ། བདེ་བ་དེ་དང་རང་གི་རིག་པའི་ཡེ་ཤེས་གཉིས་ཀྱིས་སྟོང་པ་ཉིད་ཀྱི་གཟུགས་བརྙན་མི་སྟོང་པར་འཛིན་པ་འབྲས་བུའི་རྒྱས་བཏབ་བོ། །མི་རྟོག་ཅེས་པ། དེ་གཟུང་བས་གཟུགས་བརྙན་ལས་གཞན་དུ་མི་གཡོ་བས་རྒྱུས་འབྲས་བུ་ལ་རྒྱས་བཏབ་པའོ། །དེ་ལྟར་རྒྱུ་དང་འབྲས་བུ་གཅིག་གིས་གཅིག་ལ་རྒྱས་བཏབ་པས། རྒྱུ་དང་འབྲས་བུ་དབྱེར་མེད་པ་ཕྱག་རྒྱ་ཆེན་མོ་ཞེས་བྱ་སྟེ། དབང་མདོར་བསྟན་ལས། སྟོང་པ་ལས་བྱུང་གཟུགས་བརྙན་རྒྱུ། འབྲས་བུ་མི་འགྱུར་ལས་སྐྱེས་བདེ། འབྲས་བུས་རྒྱུ་ལ་རྒྱས་གདབ་ཅིང་། རྒྱུ་ཡིས་འབྲས་བུ་རྒྱས་གདབ་བོ། །ཞེས་གསུངས་པས་སོ། །དེའི་ཕྱིར་ལམ་འདི་ལ་རྡོ་རྗེའི་རྣལ་འབྱོར་ཞེས་གསུངས་པ། དེ་ཡང་མཐའ་ཐམས་ཅད་དང་བྲལ་བའི་སེམས་ཀྱི་གཤིས་ལུགས་དེ་ཇི་ལྟ་བར་གཏན་ལ་འབེབས་པས་དབུ་མའི་ལམ་ཆོས་ཐམས་ཅད་ལ་སྐྱོན་མེད་པར་འཇུག་པར་ཡང་ཡིན་ནོ། །རྒྱུ་དམིགས་བཅས་ཀྱི་སྟོང་པ་དེ་ཡང་། རླུང་ཁམས་ཀྱི་ངོ་བོ་མ་རིག་པ་གཞོམ་དུ་མེད་པ་དག་པས་སྟོང་པར་སྣང་ལ་རྡུལ་ཕྲན་མེད་པ་སྟོང་པ་ཉིད་ཀྱི་གཟུགས་བརྙན་ཡུལ་དུ་འཆར་བ། དེ་ཉིད་ཡོད་པ་དང་མེད་པ་ལས་འདས་པ་པྲ་བརྒྱད་ཀྱིས་ཉེ་བར་མཚོན་ཏེ། ཚུལ་ཇི་ལྟར་མཚོན་ཞེ་ན། པྲ་བབས་པའི་གཞོན་ནུ་མས་མེ་ལོང་གི་ནང་དུ་རྐུན་མོའི་གཟུགས་མཐོང་སྟེ། དེ་མེ་ལོང་གི་ནང་དུ་ཡོད་ནས་མཐོང་བ་མ་ཡིན་ཏེ། དེའི་ནང་ན་རྐུན་མོ་མེད་པའི་ཕྱིར་རོ། །མེད་པ་མཐོང་བ་ཡང་མ་ཡིན་ཏེ། དེའི་ནང་དུ་སྣང་བས་སོ། །ཞེས་པའི་དཔེ་འདིས་མཚོན། དེའི་ཕྱིར་སྟོང་གཟུགས་དེ་དག་རྨི་ལམ་དང་མེ་ལོང་གི་གཟུགས་བརྙན་བཞིན་དུ་རང་སེམས་དག་པ་ལ་དེར་སྣང་ངོ་། །སྒྱུ་མ་སྨིག་རྒྱུ་བཞིན་དུ་རྡུལ་ཕྲན་མེད་པར་སྣང་བ་དང་། བརྟན་པར་གྱུར་ནས་ཆུ་ཟླ་བཞིན་གང་བལྟས་པར་སྣང་བ་དང་སྒྲ་བརྙན་བཞིན་དུ་རྒྱུ་རྐྱེན་ཚོགས་པ་ལས་སྣང་བ་དང་། དྲི་ཟའི་གྲོང་ཁྱེར་བཞིན་ནམ་༼༦བ༡༢༽མཁའ་ལ་སྣང་བ་དང་། སྤྲུལ་པ་བཞིན་སྣ་ཚོགས་སུ་སྣང་ངོ་། །འབྲས་བུ་སྙིང་རྗེ་ནི་ཁམས་མི་འགྱུར་བའི་བདེ་བ་ལ་བརྗོད་དོ། །དབང་པོ་རབ་ཀྱིས་དེ་ལྟ་བུའི་རྒྱུ་འབྲས་མི་ཕྱེད་པའི་ཕྱག་རྒྱ་ཆེན་པོ་མཐོང་། ལས་རླུང་ལམ་གཉིས་ཀྱི་ཆོས་ཅན་འགགས་པས་རྩ་ཐམས་ཅད་དབུ་མར་དག །རླུང་ཐམས་ཅད་མི་རྟོག་པའི་རླུང་དུ་སོང་། དེ་ལས་མི་རྟོག་པའི་ཡེ་ཤེས་ཀྱི་གཏུམ་མོ་རང་འབར་ཏེ་ཐིམ་རིམ་གྱི་ངེས་པ་ལས་འཆར་བའི་མངོན་པར་བྱང་ཆུབ་པའི་མིང་ཅན་གྱི་འོད་གསལ་རྟོགས་པས་ཐིག་ལེ་འགྱུར་བ་མེད་པའི་རང་དབང་དུ་གྱུར། མཆོག་ཏུ་མི་འགྱུར་བའི་བདེ་བ་ཆེན་པོ་མངོན་དུ་བྱས་པས་ཕྲ་བའི་རླུང་ཉི་ཁྲི་ཆིག་སྟོང་དྲུག་བརྒྱ་དག་ནས་ཐམས་ཅད་ཀྱི་དབང་ཕྱུག་རྡོ་རྗེ་འཆང་ཆེན་པོར་འགྱུར་བ་ཡིན་ནོ། །འབྲིང་གཅིག་གི་རྩ་དག་ཀྱང་། རླུང་གིས་ལུས་ཐམས་ཅད་དགང་བའི་སྦྱོར་བ་དང་བྲལ་ན་ཡེ་ཤེས་ཀྱི་རླུང་འབའ་ཞིག་པར་བྱེད་མི་ནུས་པས་སྲོག་རྩོལ་ལ་འཇུག་གོ། །ཐམས་ནི་རགས་པའི་རྩ་ཐམས་ཅད་སྲོག་རྩོལ་གྱི་སྟོབས་ལས་སྟོང་པར་གྱུར་པས་བསམ་གཏན་ལ་འཇུག །དེས་རྣལ་འབྱོར་གྱི་སྟོབས་ལས་གནས་པའི་རྩའི་མདུད་པ་རྣམས་བཤིག་པས་ལས་རླུང་འགག་པའི་ནུས་པ་རྙེད་པས་གསུང་རྡོ་རྗེ་ལ་འཇུག །དེས་རླུང་གར་འདོད་པར་འཆིང་བའི་ནུས་པ་རྙེད་དེ་ཐིག་ལེ་འཛག་པ་མེད་པར་འཆིང་ནུས་པ་ཙམ་ནས་ཐུགས་རྡོ་རྗེ་ལ་འཇུག་པར་བྱེད་དོ། །གསུམ་པ་འབྲས་བུ་བསམ་གཏན་བསྟན་པ་ནི། འབྱུང་བའི་རླུང་རྣམས་ནང་དུ་ཟིན་པ་ཡིས། རྟགས་དང་། འབྱུང་བ་ལྔའི་རླུང་དབུ་མར་ཞུགས་པ་ནས་མི་ཤིགས་པའི་ཐིག་ལེ་སྟེང་དུ་རླུང་ཟིན་པ་ན་བསམ་གཏན་ཐོབ་པའི་རྟགས་རྣམས་འབྱུང་སྟེ། བསམ་གཏན་གྱི་ངོ་བོ་ནི་སྒྱུ་མ་ལྟ་བུའི་ཏིང་ངེ་འཛིན། དམིགས་ཡུལ་ནི་སོར་སྡུད་ཀྱིས་མཐོང་བའི་སྟོང་གཟུགས། ཡན་ལག་ནི་ཤེས་རབ་རྟོག་པར་དཔྱོད་པ་དགའ་བསམས་རྩེ་གཅིག་ཏུ་གནས་པ་སྟེ། ཤེས་རབ་ཅེས་པ་དམིགས་ཡུལ་གྱི་གཟུགས་བརྙན་དེ་ཉིད་སྣང་བ་ཡིན། རྟོག་པ་དེ་དག་སྟོང་པའི་དངོས་པོར་འཛིན་པ་ཡིན། དཔྱོད་པ་སྒྱུ་མ་ལྟ་བུའི་རྟགས་སྣང་རྣམས་སྤྲོས་པ་མེད་པའི་སེམས་ཀྱི་རང་བཞིན་དུ་ངེས་པ་ཡིན། དགའ་བ་ནི་༼༧ན༡༣༽གཟུགས་བརྙན་ལ་གཉིས་སྣང་གི་ཞེན་པ་བྲལ་ཏེ་ལྷའི་བདག་ཉིད་ནང་གི་བདེ་བ་ཙམ་ཐབས་ཤེས་རོ་གཅིག་པའི་དེ་ཁོ་ན་ཉིད་ལ་ཞུགས་པའི་བདེ་བ་ཡིན། སེམས་རྩེ་གཅིག་ཏུ་གནས་པ་བསྒོམ་པས་ཡུལ་དང་དབང་པོ་འདྲེས་ནས་སྒྱུ་མ་ལྟ་བུའི་སེམས་སུ་རྩེ་གཅིག་བྱེད་པ་ཡིན་ནོ། །ཡོན་ཏན་རྣམས་ནི་རིམ་བཞིན་འབྱུང་། བསམ་གཏན་ཐོབ་ནས་ཡོན་ཏན་ལྷའི་མིག་ལ་སོགས་པའི་མངོན་པར་ཤེས་པ་ལྔ་དང་རྫུ་འཕྲུལ་སྟོན་ནུས་པ་སོགས་འབྱུང་བས་རིམ་བཞིན་ཞེས་གསུངས་སོ། །གཉིས་པ་ངག་རླུང་དག་པར་བྱེད་པ་གསུང་རྡོ་རྗེ་བསྒྲུབ་པའི་ཡན་ལག་ལ། སྲོག་རྩོལ། འབྲས་བུ་འཛིན་པ། དེ་གཉིས་ཀྱི་བྱེད་ལས། བྱེད་ལས་ཀྱིས་བསྒྲུབ་པའི་འབྲས་བུ་དང་བཞི་ལས། དང་པོ་ལ། སྔོན་འགྲོ། དངོས་གཞི། རྗེས། འཕྲོས་དོན་བར་རླུང་བཤད་པ་དང་བའི། དང་པོ་ལ། རྡོ་རྗེའི་བཟླས་པ་དང་། རླུང་གི་མལ་འཚོལ་བ་གཉིས་ལས། དང་པོ་ནི། སྲོག་རྩོལ་ཞེས་པ་སྲོག་གི་རླུང་། རྩོལ་བ་ནི་ཀུན་ནས་འགེགས་པ་སྟེ་རོ་རྐྱང་གི་རླུང་དྷཱུ་ཏཱིར་གཞུག་པ་ཞེས་བྱ་བའི་དོན་ཏོ། ཡང་རྩོལ་བ་ཞེས་པ་མཆེད་པ་ལ་བྱས་ནས་དབུ་མའི་རླུང་འཕེལ་བ། དེ་གཉིས་ཀྱི་དགག་སྒྲུབ་ཀྱི་དོན་སོ་སོར་ཕྱེ་ཡང་དོན་གཅིག་ཏུ་འབབ་བོ། །དེ་རྣལ་འབྱོར་དུ་བྱེད་པའི་ལུས་གནད་བར་གྱི་སྐྱིལ་ཀྲུང་ཇི་བཞིན་པའམ། རྐང་པ་བསྣོལ་བའི་ཙོག་པུ་སྒོམ་ཐག་གིས་བསྡམས་པའི་བསམ་གཏན་གྱི་ཆོས་ལྔ་གང་རུང་ངོ་། །མིག་ནི་བདུད་རྩི་འཁྱིལ་བའི་ལྟ་སྟངས་བགེགས་མཐར་བྱེད་ཀྱིས་ཏེ་མིག་འཐས་གྱེན་དུ་སློག་སྟེ་མཛོད་སྤུའི་དབུས་སུ་བལྟ་བའོ། །རླུང་གི་གནད་ནི། རླུང་རོ་ལན་གསུམ་ཕྱུང་སྟེ་ཆ་མཉམ་པར་རྒྱུ་བ་ཤིན་ཏུ་ཕྲ་བ་སྣའི་སྒོ་ནས་རོ་རྐྱང་གི་ལམ་དུ་འཇུག་པ་ཨོཾ་སྟེ་ཟླ་བ། དུད་ཅན་གྱི་ཁ་སྒོར་འོག་རླུང་འཐེན་པ་དང་ལྷན་ཅིག་གནས་པ་ཧཱུཾ་སྟེ་སྒྲ་གཅན། དེ་ནས་རོ་རྐྱང་གི་ལམ་ནས་སྣའི་སྒོར་འགྱུ་བ་མི་ཚོར་བ་ཙམ་དུ་ཤེད་ཆུང་བས་དབྱུང་བ་ཨཱཿསྟེ་ཉི་མ་ཡིན་ནོ། །འཇུག་གནས་ལྡང་གསུམ་ཀ་ལ་སྤྲོས་པ་མེད་པའི་རྣལ་འབྱོར་གྱི་སེམས་རོ་གཅིག་པར་བྱ་བ་སྟེ། དེའི་ངང་དུ་རྟགས་རྣམས་འཆར་བས་སྐབས་འདིའི་སོར་སྡུད་ཀྱང་ཡིན་ནོ། །དེའི་ཕྱིར་ཡི་གེའི་གདངས་༼༧བ༡༤༽དང་ཁ་དོག་དང་བཅས་པའི་དབྱིབས་སུ་བསྒོམ་པར་བྱ་བ་ནི་མ་ཡིན་ཏེ། འཇུག་གནས་ལྡང་གསུམ་པོ་དེས་དེ་ཉིད་གསུམ་མཚོན་པར་དགོངས་ནས། དེ་བཞིན་གཤེགས་པས་ཡི་གེ་གསུམ་གྱི་བརྡར་བཏགས་ནས་བསྟན་པས་སོ། །གཉིས་པ་ནི་ནམ་མཁའི་རླུང་གི་འཛིན་སྟར་ས་འཇུག་གནས་ལྡང་བ་ཚོར་རིག་མེད་པ་ལྟ་བུར་འཇམ་ཞིང་དལ་ལ་ཆ་མཉམ་པར་ཡུན་རིང་དུ་གཟུང་ངོ་། །དེ་བཞིན་དུ། རླུང་གི་རླུང་དྲག་ལ་རིང་བ། མེ་རླུང་དྲག་ལ་ཐུང་རྦུད་རྦུད་པ། ཆུའི་རླུང་སོ་ཅུང་ཟད་བསྡམས་པའི་བར་ལ་བཞར་ནས། ས་རླུང་ནམ་མཁའ་ལ་ཅུང་ཟད་དྲག་ཙམ་ལས་ལྗིད་དང་ལྡན་པར་འཛིན་ཅིང་། འཇུག་གནས་ལྡང་བ་ཡི་གེ་གསུམ་དུ་སྔར་བཞིན་བརྟག་གོ། །གཉིས་པ་དངོས་གཞི་ལ། བསྐྱེད་རིམ་བསྒོམ་ཚུལ། དེ་ལ་བརྟེན་པའི་བཟླས་པ། ལས་བསྒྲུབ་པའི་ཚུལ་གསུམ། དང་པོ་ལ། འོག་ཐུར་སེལ་ལ་བརྟེན་ནས་དཀྱིལ་འཁོར་དང་གདན། སྟེང་སྲོག་རླུང་ལ་བརྟེན་ནས་ཡིག་འབྲུ། བར་མ་ནིང་གི་རླུང་ལ་བརྟེན་ནས་ཕྱག་མཚན། ཁ་སྦྱོར་བུམ་པ་ཅན་ལ་བརྟེན་ནས་ལྷ་བསྒོམ་པ་དང་བཞི། དང་པོ་ནི། ལུས་དང་མིག་འོག་གི་སྐྱིལ་ཀྲུང་ཇི་ལྟ་བས། ནམ་མཁའ་རླུང་མེ་ཆུ་དང་ས་རྣམས་ཀྱིས། འཐུར་དུ་བསྡམ་པས་དཀྱིལ་འཁོར་གསལ་བར་བལྟ། ཞེས་པས་རྩ་འཕྱར་མ་ནས་རླུང་བསྐྱེད་རིམ་དུ་འཐུར་དུ་འབབ་དེ་འཆིང་བའི་ཕྱིར་ཏེ། དང་པོར་ནམ་མཁའི་རླུང་རང་གི་འཛིན་སྟངས་བཞིན་གཟུང་ནས་སྲིན་པོའི་སྒོར་དྲག་ཏུ་འཕུལ་ནས་སྐད་ཅིག་ལ་འོག་སྒོ་དྲ་གཏུ་འཐེན་ཏེ་ལྟེ་བ་མན་ཐེར་གྱིས་དགང་། སྟེང་གློད་འོག་མཉམས་པར་གཟུང་པ་ལ་ཤེས་པ་གཏད་དེ། ཨེ་ལས་ནམ་མཁའི་དཀྱིལ་འཁོར་ཐམས་ཅད་ཀྱི་གོ་འབྱེད་པའི་དབྱིབས་ཟུར་གསུམ་མཐིང་ཀ་དབུས་སུ་ཡེས་མཚན་པ་བློས་འཁྱུད་ཚད་དུ་བ་སྦོམས་ཏེ་རླུང་སེམས་གཅུན་ལ་གཞག་གོ། །དེས་ཇི་ཞིག་ལྟར་ན་ལུས་མེད་ཅིང་ཐམས་ཅད་དུ་ཐོགས་པ་དང་བྲལ་བ་ལ་སོགས་པའི་ཉམས་དངོས་སམ་རྨི་ལམ་དུ་འབྱུང་ངོ་། །དེ་ནས་རླུང་གི་རླུང་ཡཾ་ལས་རླུང་གི་དཀྱིལ་འཁོར་ཡང་ཞིང་གཡོ་བ་དབྱིབས་ཟླ་གམ་སྟེང་ཟིལ་བཅག་པའི་འཕྲོ་ལྟར་ནག་ཐིང་བ་ལོགས་༼༨ན༡༥༽ནས་བལྟས་ན་གཞུའི་དབྱིབས་སུ་འཆར་བའི་དབུས་སུ་ཡཾ་དང་རྩེ་མོ་བཞིར་བ་དན་ནག་པོ་གཡོ་ཞིང་བསྐྱོད་པས་མཚན་པ། དེས་ལུས་ཡང་ཞིང་གཡོ་བ་དང་འགྲོ་བ་འདོད་པའི་ཉམས་འབྱུང་ངོ་། །དེ་ནས་མེ་རླུང་རཾ་ལས་མེའི་དཀྱིལ་འཁོར་ཚ་ཞིང་སྲེག་པ། དབྱིབས་གྲུ་གསུམ་ཟངས་ཀྱི་ཞུན་ལྟར་དམར་ཐིང་བ་དབུས་སུ་རཾ་དང་ཟུར་གསུམ་ལ་བཀྲ་ཤིས་ཀྱིས་མཚན་པ། ལུས་དྲོད་ཚ་ཞིང་གྱེན་དུ་འཛེག་པའི་ཉམས་འབྱུང་། དེ་ནས་ཆུའི་རླུང་བཾ་ལས་ཆུའི་དཀྱིལ་འཁོར་བསིལ་ཞིང་གཤེར་བ་དབྱིབས་ཟླུམ་པོ་འོ་མའི་མཚོ་ལྟར་དཀར་ཐིང་བ། བཾ་དང་པདྨས་མཚན་པ། གསིལ་བ་དང་འཐུར་དུ་ལྷུང་བའི་ཉམས་འབྱུང་། དེ་ནས་སའི་རླུང་རང་གི་འཛིན་སྟངས་བཞིན་གཟུང་། སྲིན་པོའི་སྒོར་དྲག་ཏུ་འཕུལ་ནས་སྐད་ཅིག་ལ་འོག་རླུང་དྲག་ཏུ་འཛུམ་པས་ཐུར་སེལ་གྱི་རླུང་འཐེན་ཏེ། ལྟེ་བ་མན་ཐེར་གྱིས་དགང་། སྟེང་གློད་འོག་མ་ཉམས་པར་གཟུང་བ་ལ་ཤེས་པ་གཏད་དེ། ལཾ་ལས་སའི་དཀྱིལ་འཁོར་སྲ་ཞིང་བརྟན་པ་དབྱིབས་གྲུ་བཞི་ས་ལེ་སྤྲམ་ཕྱིས་པ་ལྟར་སེར་ཐིང་བ་དབུས་སུ་ལ། མཚམས་བཞིར་རྡོ་རྗེ་རྒྱ་གྲམ་བཞིས་མཚན་པ་བློས་འཁྱུད་ཚད་ཙམ་དུ་བསྒོམས་ཏེ་རླུང་སེམས་གཅུན་ལ་གཞག་གོ། །དེས་ཇི་ཞིག་ལྟར་ན་ལུས་སྲ་ཞིང་བརྟན་པ་དང་། ལྕི་བའི་ཉམས་དངོས་སམ་རྨི་ལམ་དུ་འབྱུང་ངོ་། །དེ་དག་མདུན་ན་ཡོད་པ་ལྟ་བུར་མཐོང་ནས་དཀྱིལ་འཁོར་སོ་སོའི་སྟེང་དུ་གདན་བལྟ་སྟེ། ནམ་མཁའ་ལ་ཡེ་ཤེས་ཀྱི་གདན། རླུང་ལ་སྒྲ་གཅན། མེ་ལ་ཉི་མ། ཆུ་ལ་ཟླ་བ། ས་ལ་དུས་མེ། ཐམས་ཅད་ཀྱང་ཟླུམ་པ་རང་རང་གི་རླུང་གནད་ཀྱིས་དཀྱིལ་འཁོར། དེ་ནས་རླུང་གནད་དེ་ཀ་ཇི་བཞིན་པས་གདན་བསྒོམ་མོ། །དེ་དག་ཀྱང་སྔ་མ་སྔ་མ་ལ་རྟགས་འཐོན་ནས་ཕྱི་མ་ཕྱི་མ་ལ་འཇུག་གོ། །འོག་ནས་འཇུག་པའི་རླུང་འདི་ཟིན་པས་ནད་ཐམས་ཅད་སེལ་ཞིང་ཕོངས་ཀྱིས་ཆུ་འཐུང་བ་དང་བཅུད་ཀྱི་ལེན་དུ་ཡང་འགྱུར་བ་དང་། སྟེང་རླུང་ཡང་རང་ཤུགས་ཀྱིས་ཟིན་ཏེ། འཐུར་དུ་ཟིན་པས་སྟེང་ཡང་དེ་བཞིན་ནོ། །ཞེས་པས་སོ། །གཉིས་པ་སྟེང་སྲོག་རླུང་ལ་རྟེན་ནས་ཡིག་འབྲུ་བསྒོམ་པ་ནི། ལུས་དང་མིག་སྟེང་གི་སྐྱིལ་ཀྲུང་ཇི་ལྟ་བས། ས་ཆུ་༼༨བ༡༦༽མེ་རླུང་ནམ་མཁའི་བདག་ཉིད་ཀྱི། ཡིག་འབྲུའི་རྒྱུ་བ་ཨཱ་ལི་ཀཱ་ལིའི་རླུང་། ཡི་གེ་གསུམ་གྱིས་སྟེང་དུ་བསྡམས་ལས། ཞེས་རྩ་བཅུད་མ་ནས་རླུང་སྡུད་རིམ་བཞིན་དུ་འབབ་པ། དེ་འཆིང་བའི་ཕྱིར་དང་། སྟེང་སྒོའི་གཡས་སུ་ཀཱ་ལིའི་རྩ་རྣམས་ཀྱི་རླུང་འབབ་པས་ངང་གིས་ཀཱ་ལིའི་རང་སྒྲར་འབྱུང་བས་དང་། གཡོན་དུ་ཨཱ་ལིའི་རྩ་རྣམས་ཀྱི་རླུང་འབབ་པས་ངང་གིས་ཨཱ་ལིའི་རང་སྒྲར་འབྱུང་བས་དང་། དེ་དག་འཇུག་གནས་ལྡང་གསུམ་གྱི་བདག་ཉིད་ཅན་ཏེ། དེ་འཆིང་བར་བྱེད་པས་སོ། །ཚུལ་གང་གིས་ཞེ་ན། ཡིག་འབྲུའི་རྒྱུ་བས་ཏེ། དེ་ཡང་སྔར་གྱི་གདན་རེའི་སྟེང་དུ་ཡིག་འབྲུ་བསྒོམ་ཏེ། རླུང་སྦྱོར་གཅིག་གིས་སའི་དཀྱིལ་འཁོར། གཉིས་པ་དུས་མེའི་གདན་བལྟས་ཏེ་ས་རླུང་འཛིན་བཞིན་དུ། འཇུག་པ་ཨོཾ་གྱི་དུས་སུ་གཡོན་ཕྱོགས་ནས། ཨ་ཨཱ་ཨི་ཨཱི་རྀ་རཱྀ་ཨུ་ཨཱུ་ལྀ་ལཱྀ་ཨ་ཨཱ་ཨེ་ཨཱཻ་ཨར་ཨཱར་ཨོ་ཨཽ་ཨ་ལ་ཨཱ་ལ་ཧ་ཧཱ་ཡ་ཡཱ་ར་རཱ་ཝ་ཝཱ་ལ་ལཱ་གཡས་ཕྱོགས་ནས། ཀ་ཀཱ། ཁ་ཁཱ། ག་གཱ། ང་ངཱ། ཅ་ཅཱ། ཆ་ཆཱ། ཇ་ཇཱ། ཉ་ཉཱ། ཊ་ཊཱ། ཋ་ཋཱ། ཌ་ཌཱ། ཎ་ཎཱ། པ་པཱ། ཕ་ཕཱ། བ་བཱ། མ་མཱ། ཏ་ཏཱ། ཐ་ཐཱ། ད་དཱ། དྷ་དྷཱ། ན་ནཱ། ས་སཱ། ཉྥ་ཉྥཱ། ཥ་ཥཱ། ཤ་ཤཱ། ཐཀ་ཐཀཱ། ཞེས་པ་གསེར་གྱི་འཕྲེང་བ་ལྟར་སེར་ནར་རར་སྣ་སྒོའི་ཐད་ཙམ་ན་ས་ནམ་མཁའི་སོར་བཅུ་གཉིས་ཙམ་ནས་འོང་། དེའི་ཐད་ནས་འཐུར་དུ་བབས་ཏེ་དུས་མེའི་གདན། རང་གི་ལྟེ་བའི་འོག་ཙམ་གྱི་ཐད་དུ་གནས་པའི་སྟེང་དུ་བབས། གནས་པ་ཧཱུཾ་གི་དུས་ཐུར་སེལ་འཐེན་ནས་གདན་གྱི་སྟེང་དུ་ཨཱ་ལི་གཡོན་སྐོར། ཀཱ་ལི་གཡས་སྐོར་དུ་སྲམ་མེར་འདུག་པ་དབྱུང་བ་ཨའི་དུས། དེ་ནས་སྤྲུལ་ལངས་པ་བཞིན་གྱི་སྣའི་ཐད་ཀ་ཙམ་དུ་གྱེན་དུ་སོང་། དེ་ཙམ་ནས་སོར་བཅུ་གཉིས་ཀྱི་བར་ཐད་ཀ་ལས་ཅུང་ཟད་འཐུར་དུ་ཕྱོགས་པ་ནུབ་ལོགས་སུ་སོང་བར་བལྟའོ། །དེ་ནས་ཚུལ་དེ་འདྲ་བས་ཆུ་རླུང་། ཡིག་འབྲུ་མུ་ཏིག་གི་འཕྲེང་བ་ལྟ་བུ་སོར་བཅུ་གསུམ་གཡོན་བྱང་། མེ་རླུང་། ཡིག་འབྲུ་བྱི་རུའི་འཕྲེང་བ་ལྟ་བུ་སོར་བཅུ་བཞི་གཡས་ལྷོ། རླུང་གི་རླུང་། ཡིག་འབྲུ་ལུང་ཐང་གི་འཕྲེང་བ་ལྟ་བུ་སོར་བཅོ་ལྔ་སྟེ་ཤར། ནམ་མཁའི་རླུང་། ཡིག་འབྲུ་མུ་མེན་གྱི་འཕྲེང་བ་ལྟ་བུ་དབུས་སོར་བཅུ་དྲུག །༼༩ན༡༧༽དེ་དག་ཀྱང་སྔ་མ་སྔ་མ་ལ་རྟགས་འཐོན་ནས་ཕྱི་མ་ཕྱི་མ་ལ་འཇུག་གོ། །རྟགས་ནི་སྔར་བས་ཆེས་སྟོབས་སུ་གྱུར་པའོ། །སྟེར་འགགས་པ་ལས་འོག་ཏུ་ཟིན་པར་འགྱུར། ཐུར་དུ་ཟིན་པས་སྟེང་ཡང་དེ་བཞིན་ནོ་སྟེ། སྟེང་དུ་སྲོག་གི་རླུང་ཟིན་པས་འོག་ཏུ་ཐུར་སེལ་གྱི་རླུང་ཟིན་ཏེ། རིལ་བ་ཞབས་ཆགས་ཅན་བཞིན་ནོ། །ཞེས་སྟོན་པའོ། །གསུམ་པ་བར་མ་ནིང་གི་རླུང་ལ་བརྟེན་ནས་ཕྱག་མཚན་བསྒོམ་པ་ནི། ལུས་དང་མིག་བར་གྱི་སྐྱིལ་ཀྲུང་བཞིན་གྱིས། རྡོ་རྗེ་རལ་གྲི་རིན་ཆེན་པདྨ་དང་། འཁོར་ལོ་རྣམས་ནི་རིམ་བཞིན་གསལ་བལ་བལྟ། སྟེང་འོག་གོང་བུར་བསྲེ་བའི་ཕྱིར་ཏེ། སྟེང་རླུང་གཟུང་། འོག་རླུང་འཐེན། ཕོ་བ་རྣམས་བརྒྱངས་ནས་སྟེང་འོག་གློད། བར་མ་ཉམས་པས། ནམ་མཁའི་དཀྱིལ་འཁོར་གདན་ཡིག་འབྲུ་རྣམས་རླུང་སྦྱོར་རེ་རེས་གསལ་བཏབ་ནས། ཡེ་ཤེས་ཀྱི་གདན་གྱི་ཁའི་ཡིག་འབྲུ་ཡོངས་སུ་གྱུར་པ་ལས། སྟེང་དང་འོག་ཏུ་རྭ་ལྔ། པདྨ་གཉིས། མུ་ཁྱུད་བཞི་རིམ་ལྟེ་བ་ཟླུམ་པོ་དང་བཅས་པའི་རྡོ་རྗེ་མཐིང་ཤུན་རླན་གྱིས་སྤངས་པ་ལྟ་བུ་བསྒོམ། དེ་བཞིན་དུ་རླུང་སྦྱོར་སོ་སོས། སྒྲ་གཅན་གྱི་གདན་གྱི་ཡིག་འབྲུ་ཡོངས་སུ་གྱུར་པའི་རལ་གྲི་ནག་པོ་འོད་ཟེར་འབར་བ་དང་། རིན་པོ་ཆེ་ཆ་དགུ་པ་དམར་པོ་ཉི་མའི་གཟུགས་གཞན་པ་ལྟ་བུ་དང་། པདྨ་དཀར་པོ་ཟླ་བའི་མེ་ལོང་གཉིས་པ་ལྟ་བུ་དང་། འཁོར་ལོ་རྩིབས་སྟོང་སེར་པོ་ལྟེ་བ་མུ་ཁྱུད་དང་བཅས་པ་འཁོར་ལོ་སྒྱུར་བའི་འབྱོར་བ་ལྟ་བུ་རྣམས་བསྒོམ། བཞི་པ་ཁ་སྦྱོར་བུམ་པ་ཅན་ལ་བརྟེན་ནས་ལྷ་བསྒོམ་པ་ནི། སྟེང་འོག་བར་གསུམ་བསྡམས་པས་ཐོབ་པར་འགྱུར། ཞེས་གསུངས་པས་བུམ་པ་ཅན་བསྟན་ཏེ། ལས་དང་པོ་པའི་དུས་ཀྱི་དང་། རྣལ་འབྱོར་པའི་དུས་ཀྱིའོ། །སྔ་མ་ནི། པུས་མོ་བསྐོར་ཞིང་སེ་གོལ་བརྡབ། བརྒྱ་དང་རྩ་བརྒྱད་ཟིན་པའི་ཚད། ཅེས་པ་རབ་ཚུལ་དེ་ལྟར་བགྲངས་པའི་བདུན་ཅུ་རྩ་གཉིས་འབྲིང་། སུམ་ཅུ་རྩ་དྲུག་ཐ་མར་བསྟན་པའོ། །གཉིས་པ་ནི། ཉིན་གཅིག་སྲོག་ཕྱིར་འཕོར་མི་སྟེར་བའི་བུམ་པ་ཅན་ནད་འཕྲོག་པར་བྱེད་པ་ཆུང་ངུ་། ཞག་བཅོ་ལྔར་སྲོག་ཕྱིར་འཕོར་མི་སྟེར་བ་ནམ་མཁའ་ལ་འཕུར་༼༩བ༡༨༽བ་དངོས་སུ་སྦྱིན་པ་འབྲིང་། ཟླ་བ་གཅིག་ཏུ་སྲོག་ཕྱིར་འཕོར་མི་འཇུག་པ་འཆི་བ་མེད་པའི་ཚེ་དངོས་སུ་སྟེར་བ་ཆེན་པོ། ཟླ་བ་དྲུག་གི་རིང་སྲོག་ཕྱིར་སྐད་ཅིག་མི་རྒྱུ་བར་འཆིང་བ་ནི་སྲོག་གི་གཟུགས་སམ་རིག་མའི་སྐྱེས་བུ་གྲུབ་པའི་དངོས་ཀྱི་རྒྱུ་དེ་བུམ་པ་ཅན་ཆེན་པོའི་ཆེན་པོའོ། །དེ་ལྟར་འབུམ་ལྔར། ཉིན་མཚན་དུ་ནི་དབུ་མར་སྲོག །ཞུགས་པས་ནད་རྣམས་འཕྲོག་པར་བྱེད། ཆོས་ཀྱི་ཉིན་ཞག་སྲོག་བཅིངས་ན། འདིས་ནི་མཁའ་སྤྱོད་ཉིད་སྟེར་བྱེད། ཟླ་གཅིག་སྲོག་སད་སྙིང་ཁར་གནས། རྣལ་འབྱོར་པ་རྣམས་འཆི་མེད་འགྱུར། ལྟེ་བར་ཟླ་དྲུག་བསྲེགས་ན་ནི། འདི་ཡིས་ཐམས་ཅད་མཁྱེན་ཉིད་སྟེར། ཞེས་གསུངས་པས་སོ། །སྲོག་འགོག་པ་ནི་སྔར་བསམ་གཏན་དུ་འོད་གསལ་གོམས་པར་བྱེད་པ་ཉིད་ཀྱིས་ཞར་ལ་རླུང་རྣམས་རྒྱུ་བ་ཞན་པར་གྱུར་པའི་རིམ་གྱིས་འགགས་པར་གསུངས་པ་དེ་ཉིད་མཆོག་ཡིན་པས་སྡོམ་འབྱུང་ལས་ཀྱང་། སྟེང་དང་འོག་ཏུ་འགྲོ་བའི་རླུང་། ཁ་སྦྱོར་དུ་ནི་ཡིད་ཀྱིས་བྱ། ཞེས་གསུངས་ལ། དེ་གོམས་པར་བྱེད་མི་ནུས་པ་ལ་ནི། རྡོ་རྗེའི་བཟླས་པ་དང་ཁ་སྦྱོར་བུམ་པ་ཅན་ཉིད་གཙོ་བོར་གསུངས་སོ། །སྣོད་བཅུད་ཐ་མལ་འཛིན་པ་རབ་སྤངས་ཏེ། ཞེས་པ་ནི་སྔོན་དུ་བསྐྱེད་རིམ་པས་སྟོང་པ་བསྒོམ་པ་བཞིན་སྲོག་གཟུགས་བསྒྲུབ་པའི་རྣལ་འབྱོར་པ་འདིས་ཀྱང་རྡོ་རྗེའི་བཟླས་པ་ལ་བརྟེན་ནས་སྟོང་པ་ཉིད་ཀྱི་གཟུགས་བསྒོམ་སྟེ། དེས་དངོས་པོར་སྣང་བ་ཐམས་ཅད་ལ་དངོས་པོར་འཛིན་པ་དང་བྲལ་བས་སྒྱུ་མ་ཙམ་དུ་བལྟའོ་ཞེས་པའི་དོན་ཏོ། གདན་དང་ཡིག་འབྲུ་ཕྱག་མཚན་གསལ་བ་ལས། ཞེས་པ་ནི། སྟོང་པ་ཉིད་དེའི་གསལ་སྣང་ལས། དཀྱིལ་འཁོར་དང་། གདན་དང་། ཡིག་འབྲུ་དང་། ཕྱག་མཚན་རྣམས་གོ་རིམ་བཞིན་དུ་རླུང་སྦྱོར་རེས་བསྒོམ་པར་བསྟན་ནོ། །རིགས་ལས་སྐྱེས་པ་དེ་བཞིན་གཤེགས་པའི་སྐུ། ཞེས་པས། ཁམས་ལྔའི་དབྱེ་བས་རིགས་ལྔའམ་དྲུག་གིས་ལྷ་དེ་དང་དེར་སློང་ཞེས་པའོ། །སློང་བའི་ཚུལ་ཡང་། གདན་དང་ལོང་བུ་སྐེ་རགས་ཚངས་སྐུད་དང་། ཕྱག་དང་ཞལ་དང་སྤྱན་དང་སྐྲ་མཚམས་དང་། རྒྱན་དང་ཆ་ལུགས་མ་ལུས་རབ་༼༡༠ན༡༩༽རྫོགས་ནས། །གཙུག་ཏོར་བར་དུ་རིམ་བཞིན་གསལ་བར་བལྟ། ཞེས་མས་རིམ་དུ་བསྒོམ་པ་དང་། གཙུག་ཏོར་ནས་གཟུང་གདན་ལའང་དེ་བཞིན་ནོ། །ཞེས་ཡས་རིམ་གྱིས་བསྒོམ་པ་ལ་གོམས་པར་བྱེད་པ་བརྟན་པས་འདིར་ལུས་དང་མིག་རྡོར་བཟླས་བཞིན་ནོ། །རླུང་གི་གནད་ནི། ནམ་མཁའི་རླུང་རང་གི་འཛིན་སྟངས་ཀྱིས་གཟུང་སྟེ་འོག་ཏུ་འཕུལ་འོག་དྲང་པོར་འཛུམ་པས་སྟེང་དུ་འཐེན། བར་གྱི་རླུང་ཕོ་བ་དང་བཅས་པའི་ལྟེ་བར་བརྒྱངས་ཏེ་གསུམ་སྦྱོར་དུ་བྱའོ། །དེ་ནས་དམིགས་པ་ཡེ་ཤེས་ཀྱི་གདན་གྱི་ནམ་མཁའི་རྡོ་རྗེ་སྔོན་པོ་ཡོངས་སུ་གྱུར་པ་ལས་མི་བསྐྱོད་པ་རྡོ་རྗེ་དབྱིངས་ཕྱུག་མས་འཁྱུད་པ། སྐྱིལ་ཀྲུང་གིས་བཞུགས་ཤིང་ཡུམ་པདྨའི་སྐྱིལ་ཀྲུང་གིས་འཁྱུད་པ་རལ་པའི་ཅོན་པན་ཅན་རྒྱན་མེད་པ། རྡོ་རྗེ་དང་དྲིལ་བུ་འཛིན་པ་བསྒོམ། དེ་བཞིན་དུ། རལ་གྲི་ལས་དོན་གྲུབ་རྣམ་སྣང་ལྟ་བུའི་སྤྱན་མས་འཁྱུད་པ། རལ་གྲི་དང་ཕུབ་འཛིན་པ། རིན་པོ་ཆེ་ལས་རིན་འབྱུང་སྣང་མཐའ་ལྟ་བུའི་མཱ་མ་ཀིས་འཁྱུད་པ་མེའི་མདའ་གཞུ། འོད་དཔག་མེད་རིན་འབྱུང་ལྟ་བུའི་གོས་དཀར་མོས་འཁྱུད་པ་ཐོ་བ་དང་པདྨ། འཁོར་ལོ་ལས་རྣམ་སྣང་དོན་འགྲུབ་ལྟ་བུའི་སྒྲོལ་མས་འཁྱུད་པ་འཁོར་ལོ་དང་དུང་། གོམས་ནས་འབྱུང་བ་རྣམས་བརྩེགས་མ། གདན་རྣམས་བརྩེགས། སྤྱན་གསུམ་པ། མཆེ་བ་གཙིགས་པ། རལ་པའི་ཅོད་པན་ཅན། རྡོ་རྗེའི་རྒྱན་ཐམས་ཅད་ཀྱིས་བརྒྱན་པ། སྟག་གི་པགས་པའི་ཤམ་ཐབས་གསོལ་བ། ཕྱག་གཉིས་རྡོ་རྗེ་དང་དྲིལ་བུ་འཛིན་པ། སྣ་ཚོགས་ཡུམ་ལ་ཡང་དག་པར་འཁྱུད་པ། སྣ་ཚོགས་ཡུ་མི་གསེར་གྱི་མདོག་ཅན་གྲི་གུག་དད་ཐོད་པ་འཛིན་པས་ལབ་ལ་འཁྱུད་ཅིང་རྒྱན་ཐམས་ཅད་ཀྱིས་བརྒྱན་པ། སྐད་ཅིག་གིས་བལྟས་ནས། རྒོད་པའི་ཚེ་སྟེང་གློད། སྨད་བསྒྲིམས་ནས་མས་རིམ་གྱིས་༼༡༠བ༢༠༽གསལ་བཏབ། བྱིང་བའི་ཚེ་སྨད་གློད། སྟོད་བསྒྲིམས་ནས་ཡས་རིམ་གྱིས་སྤྱི་མི་གསལ་ན་སྤྱི། བྱེ་བྲག་མི་གསལ་ན་བྱེ་བྲག་བསྒོམ་ཞིང་། ཡབ་བཅུ་དྲུག་པའི་ལང་ཚོ་དང་། ཡུམ་བཅུ་གཉིས་པའི་ན་ཚོད་ཅན་དུའོ། །རྒྱུན་དུ་སྐུ་ཝ་ལ་ལེར་སྣང་ཡང་རང་བཞིན་གྱིས་སྟོང་པ་མེ་ལོང་གིས་གཟུང་བའི་གཟུགས་བརྙན་ལྟ་བུར་བལྟའོ། །གཉིས་པ་དེ་ལ་བརྟེན་པའི་བཟླས་པ་ནི། འབྱུང་འཇུག་གནས་གསུམ་རྩ་བའི་རླུང་རྣམས་ཀྱང་། དེ་དུས་སྐུ་གསུང་ཐུགས་ཀྱི་བཟླས་པར་འགྱུར། ཞེས་པ། བུམ་པ་ཅན་དེས་གཡས་གཡོན་འབའ་ཞིག་པའི་འཕོ་བ་ཁེགས་ནས་དབུ་མའི་རླུང་དུ་སོང་བ་དེའི་དུས་ན་རྩ་བའི་རླུང་ལ་སོགས་པའི་འབྱུང་འཇུག་གནས་པའི་རླུང་དང་ཡི་གེ་གསུམ་གྱི་སྔགས་དབྱེར་མི་ཕྱེད་པའི་འོད་གསལ་བ་ཉིད་མངོན་དུ་བྱས་པ་སླར་གོམས་པར་བྱས་པའི་བཟླས་པར་འགྱུར་ཞེས་པ་སྟེ། གོམས་པ་དེས་སྲོག་ཕྱིར་རྒྱུ་བ་མེད་པའི་འགོག་པའི་བཟླས་པ་ཡང་འགྲུབ་པར་བྱེད་དོ། །དེ་ནི་མ་ནིང་གི་རླུང་གོམས་པར་བྱེད་པའི་བཟླས་པ་དེ་ཡང་། དམ་ཚིག་གི་བཟླས་པ་སྐུའི། ཁྲོ་བོའི་བཟླས་པ་གསུང་གི། དོ་ལིའི་བཟླས་པ་ཐུགས་ཀྱི་བཟླས་པའོ། །དང་པོ་ནི། ལྷའི་ཐུགས་ཀར་ཉི་མ་ལ་ས་བོན་ཨཱ་ལི་ཀཱ་ལིའི་སྔགས་འཕྲེང་གིས་བསྐོར་བ། རླུང་ཕྱིར་དབྱུང་བ་ཨཱཿའི་དུས་སྔགས་འཕྲེང་ལས་ལྷ་འམ་འོད་ཟེར་དཀར་པོ་འཕྲོས། ཞི་སོགས་ལས་ཀྱིས་སེམས་ཅན་གྱི་དོན་བྱས། འཕགས་པ་རྣམས་མཆོད། འཇུག་པ་ཨོཾ་གྱི་དུས་དེ་བཞིན་གཤེགས་པ་ཐམས་ཅད་ཀྱི་མཐུ་སྟོབས་ཐམས་ཅད་ཁབ་ལེན་གྱིས་ལྕགས་བཞིན་དུ་བསྡུས། གནས་པ་དྷཱུཾ་གི་དུས་ས་བོན་སྔགས་འཕྲེང་དང་བཅས་པ་ལ་ཐིམ་པར་མོས་པས། སྔགས་ཀྱང་དང་པོར་ཨོཾ་ཨཱཿདང་མཐར་ཧཱུཾ་དང་སྭཱཧཱས་བཅིང་བའོ། །གཉིས་པ་ནི། ཡབ་ཡུམ་རྗེས་སུ་ཆགས་པའི་དུས་སྔགས་ཀྱི་འཕྲེང་བ། ཞི་བ་ལ་མག་ལ་མེ་འཁོར་བ་ལྟ་བུ། རྒྱས་པ་ལ་སྒྲོའི་ཆུན་པོ་ལྟ་བུ། དབང་ལ་ལྕགས་སྒྲོག་སྦྲེལ་བ་ལྟ་བུ། དྲག་པོ་ལ་ཐིག་གུ་བསྒྲིལ་བ་ལྟ་བུར་ཡབ་ཀྱི་ཞལ་ནས་ཡུམ་གྱི་ཞལ་ཏེ་པདྨ་དང་རྡོ་རྗེར་འཁོར་བར་བསྒོམ་མོ། །གསུམ་པ་ནི། སྔགས་༼༡༡ན༢༡༽འཕྲེང་རྡོ་རྗེ་ནས་ཡུམ་གྱི་བྷ་གར་དེ་ནས་ཡུམ་གྱི་ཞལ་ནས་ཡབ་ཀྱི་ཞལ་དུ་འཁོར་བར་དམིགས་པ་སྟེ་རྗེས་སུ་ཆགས་པས་བདེ་སྟོང་བསྐྱེད་པའི་བཟླས་པ་ཞེས་བྱའོ། །དེ་དག་ལ་བོགས་འབྱིན་པ་ནི། ལག་པ་ས་གནོན་ནུ་བྱས་ཏེ་ཕོ་སྐོར་དང་བཅས་པས་སྔགས་འཕྲེང་རླུང་འཁོར་བཞིན་དུ་འཁོར་བར་བསམས་ཏེ་ཞི་རྒྱས་གཡས་དང་དབང་དྲག་ལ་གཡོན་དུའོ། །གསུམ་པ་ལས་བསྒྲུབ་པའི་ཚུལ་ནི། རང་རང་རིགས་ཀྱི་འབྱུང་བའི་ཁ་དོག་བཞིན། ཞི་རྒྱས་དབང་དང་མངོན་སྤྱོད་རིམ་པས་ཡིན། ཞེས་པས་ཏེ། གྲུབ་ཆེན་པ་ཉིད་ཀྱིས། ཆུ་རླུང་བཞི་སྦྱོར་ཞི་བའི་ལས། ས་རླུང་བཞི་སྦྱོར་རྒྱས་པའི་ལས། མེ་རླུང་བཞི་སྦྱོར་དབང་གི་ལས། རླུང་གི་བཞི་སྦྱོར་དྲག་པོའི་ལས་ཞེས་གསུངས་པ་བཞིན། ལས་དང་མཐུན་པའི་ལྷར་བསྐྱེད་པ། སྔགས་བཟླ་བ། ཏིང་ངེ་འཛིན་བསྒོམ་པ། ལས་ལ་སྦྱར་བ་བཞི་ཕྲུགས་ཀྱིས་ཏེ། བཏང་སྙོམས་པའི་སེམས་ཀྱིས། སྔར་བཤད་པའི་ཚུལ་གྱིས་ལྷ་འོད་དཔག་མེད་བསྐྱེད། ཐུགས་ཁར་ཟླ་གདན་པདྨ་ལ་ས་བོན་ཨུ་ཡཐར་སྔགས་ཨོཾ་ཨུ་ཨཱུ་ཁ་ཚ་ཋ་ཐ་ཕ་ཝ་ཉྥ་སྭཱཧཱ། སྒྲུབ་པའི་སྔགས་སོ། །ལས་སྦྱོར་ལ་སྤེལ་ཚིགས་སྭཱཧཱ་བཞག་ནས། ཆེ་གེ་མོ་ཤཱནྟིང་ཀུ་རུ་ན་མཿབཟླས་པ་དང་། ཏིང་ངེ་འཛིན་ཆུ་རླུང་དབྱུང་བའི་དུས་འོད་ཟེར་དཀར་པོ་འཕྲོས། འཇུག་པའི་དུས་ཞི་བའི་ལྷ་ཚོགས་སྤྱན་དྲངས། དེ་རྣམས་སྐུ་གསུང་ཐུགས་ཡེ་ཤེས་མི་ཕྱེད་པའི་བདུད་རྩིར་དཀར་ལྟེམ་གྱིས་ཞུ་བ་རང་ངམ་བསྒྲུབ་བྱའི་སྤྱི་བོ་ནས་ཞུགས། སྡིག་པ་དང་སྒྲིབ་པ་ཐམས་ཅད་དུད་ཁུའི་རྣམ་པ་གདན་བགེགས་འཆི་བདག་གི་བདུད་སོགས་སྲོག་ཆགས་མི་སྡུག་པའི་རང་བཞིན་དུ་འོག་གི་སྒོ་ནས་འཐོན་ཏེ། ལུས་ངག །གནས་དུས་དངས་མ་ཡེ་ཤེས་ཀྱི་ནུས་པས་རྐང་མཐིལ་ནས་སྤྱི་བོའི་བར་ཁེངས་ཏེ་དམ་ཚིག་པ་དང་འདྲེས་པར་བསམ་སྟེ། ཐམས་ཅད་ཀྱང་རྣམ་པར་མི་རྟོག་པར་རྩེ་གཅིག་པས་སོ། །དེ་བཞིན་དུ་རྒྱས་པ་ལ་དགའ་བའི་སེམས་ཀྱིས་རྣམ་སྣང་། ལྟེ་བར་དུས་མེ་ལ་འཁོར་ལོ་ས་བོན་ལ་སྔགས། ཨོཾ་ལྀ་ལཱྀ་ཀ་ཙ་ཊ་ཏ་པ་ལས་སྭཱཧཱ། ཆེ་གེ་མོའི་ཕུན་སུམ་ཚོགས་པ་ཐམས་ཅད་༼༡༡བ༢༢༽པུཥྚིཾ་ཀུ་རུ་སྭཱཧཱ། འོད་ཟེར་གྱིས་རྒྱས་པའི་རིགས་ཀྱི་ལྷ་ཐམས་ཅད་སྤྱན་དྲངས། དེ་རྣམས་སྐུ་གསུང་ཐུགས་མི་ཕྱེད་པའི་འཁོར་ལོ་རོ་གཅིག་པ་བདག་གམ་བསྒྲུབ་བྱ་ལ་ཐིམ་པས་བསོད་ནམས་དམན་པ་དང་སྐལ་བ་ཞན་པའི་ལས་ཀྱི་རྣམ་པར་སྨིན་པས་བོན་དང་བཅེས་བདག །ཕུན་སུམ་ཚོགས་པའི་བསོད་ནམས་སྐྱེས་ཏེ་ཚེ་དང་ལོངས་སྤྱོད་དང་མངའ་ཐང་རྒྱས་ཏེ། ཟད་པ་མེད་པ་ནམ་མཁའི་མཛོད་ཐོབ་པས་སེམས་ཅན་ཐམས་ཅད་ཀྱི་ཡོངས་འདུའི་ཤིང་ཆེན་པོར་གྱུར་ཏེ་འདོད་པ་ཐམས་ཅད་སྦྱིན་པར་བསམ་མོ། །དབང་ལ་རྗེས་སུ་ཆགས་པ་བྱམས་པའི་སེམས་ཀྱིས་རིན་འབྱུང་། ལྟེ་བར་ཉི་མ་ལ་རིན་པོ་ཆེ་ལ་ས་བོན་རྀ་སྔགས། ཨོཾ་རྀ་རཱྀ་ག་ཛ་ཌ་ད་བ་ར་ཥ་སྭཱཧཱ། ཆེ་གེ་མོ་བཽཥ་ཊ། འོད་ཟེར་གྱིས་དབང་དང་འགུགས་བྱེད་ཀྱི་རིགས་ཀྱི་ལྷ་ཐམས་ཅད་སྤྱན་དྲངས་ཏེ། དེ་རྣམས་ཀྱིས་ལྕགས་ཀྱུ་ཞགས་པ་ཐོགས་ཏེ་རྒྱལ་པོའམ་བཙུན་མོ་ལ་སོགས་པ་སྣང་སྲིད་ཀྱི་ལྷ་འདྲེ་མི་གསུམ་གང་དབང་དུ་བྱ་འདོད་པ་སྟེ། སྐྱེས་པའི་སྙིང་ཀ །བུད་མེད་ཀྱི་བྷ་གར་བཏབ། ཞགས་པས་བཅིངས་པས་བདེ་བས་མྱོས། བདག་གི་མདུན་དུ་བཀུག་སྟེ་གན་རྐྱལ་དུ་གནས་པ་ཁབ་ལེན་དང་ཕྲད་པའི་ལྕགས་བཞིན་དུ་ཚུར་འདུས་པ་འདར་ཧེད་ཧེད་དབང་དང་བྲལ་བར་བསམ་མོ། །དྲག་པོ་ལ་ཤིན་ཏུ་སྙིང་རྗེ་བའི་ནང་གི་མ་རུངས་པའི་སེམས་ཀྱིས་ལྷ་དོན་གྲུབ། ལྟེ་བར་སྒྲ་གཅན་ལ་ས་བོན་ཨི་སྔགས། ཨོཾ་ཨི་ཨཱི་གྷ་ཛྙྱ་ཌྷྜྷ་དྷ་བྷ་ཡ་ཤ་སྭཱཧཱ། འོད་ཟེར་གྱིས་དྲག་པོའི་རིགས་ཀྱི་ལྷ། འཇིག་རྟེན་ལས་སྒྲུབ་ཀྱི་འདྲེ་དང་བཅས་པ་བཀུག །དེ་དག་གི་སྤྲུལ་པའི་ཕོ་ཉ་ཁྲོ་ཞིང་ཞུད་པ་འཇིགས་ཤིང་གཏུམ་ལ་མི་བཟད་པའི་མཚོན་ཐོགས་པ་དཔག་ཏུ་མེད་པ་བཀྱེ། དགྲ་བགེགས་འགོ་བའི་ལྷ་དང་ཕྲལ་ཏེ་བདག་གི་རྐང་པའི་དྲུང་། གཤིན་རྗེའི་བཙོན་ཁང་དུ་བཅུག །སྲོག་གཅད་དབུགས་འགམ་བློ་ཟོས་ཏེ་ཤ་ཁྲག་ལ་སྦྲང་བུ་རུལ་བའི་དྲི་ལ་འཐིབས་པ་བཞིན་དུ་ཕུངས་ཕུངས་རུབ་པར་བསམ་མོ། །བསྐྲད་པ་ལ། འཇུག་དུས་བསྒྲུབ་བྱ་བཀུག །གནས་དུས་རླུང་ལྟར་མགྱོགས་པའི་རྔ་མོ་ལ་བསྐྱོན། དབྱུང་དུས་རྒྱ་མཚོའི་མཐའ་ལ་༼༡༢ན༢༣༽ཐུག་པར་བསྐྲད་པར་བསམ་སྟེ། དྲག་པོའི་སྔགས་མཐར། ཆེ་གེ་མོ་ཨུ་ཙྪ་ཊ་ཡ་ཧཱུཾ། རེངས་པ་ལ། ས་རླུང་རྔུབ་དུས་བཀུག་སྟེ་བསྐྱེལ་བའི་ལུས་ངག་ཡིད་ལ་ཕུར་བུས་བཏབ། གནོན་དུས་རི་རབ་ཀྱི་འོག་ཏུ་མནན། སྟཾ་བྷ་ཡ། དབྱེ་བ་ལ་དབྱེ་བྱ་དགུག །བྱ་འོག་དང་འུག་པའམ་རྟག་དང་གཡག་ཏུ་སོང་ནས་རླུང་གི་དཀྱིལ་འཁོར་ལ་བསྐྱོན་ནས་འཁོར་དུས་དེ་གཉིས་ཅི་ཡང་འཐབ་པར་སེམས་པ་དང་ལྟེ་བའི་རླུང་གཡས་གཡོན་དུ་དཀྲུགས་པས་མཐར་ཅིག་ཤོས་ཇེ་ངན་དུ་སོང་ནས་ཕྱིར་འབུད་པ་དང་བསྐྲད་པ་བཞིན་བྱའོ། །ཆེ་གེ་མོ་པྲ་པེ་ཤ་ཡ་ཕཊ། ནམ་མཁའི་རིགས་ཀྱི་ལྷ། ཡེ་ཤེས་ཀྱི་གདན་ལ། རྡོ་རྗེ་ས་བོན་ཨ། སྔགས་ཨོཾ་ཨ་ཨཱ་ང་ཉ་ཎ་ན་མ་ཐཀ་སྭཱཧཱ། དབྱུང་པ་འོད་ཟེར་འཕྲོས། གནས་པ་ལུས་ཐམས་ཅད་ནམ་མཁའི་རང་བཞིན་དུ་སོང་བར་བསམ། འཇུག་པའི་དུས་ལྷ་ལ་སོགས་པར་དམིགས་པས་མི་སྣང་བར་བྱེད་དེ་གཞན་ཡང་། ལས་ཐམས་ཅད་ལ་དེ་དང་འདྲ་བར་སྦྱོར་རོ། །སྔགས་ནི་འདིར་ཨཱ་ལི་ཀཱ་ལི་ཉིད་ཀྱི་དབང་དུ་བྱས་ལ། གཞན་དུ་ལས་སོ་སོའི་གཞུང་བཞིན་གྱིས་རུང་ངོ་། །གསུམ་པ་རྗེས་ནི། འབྱུང་བའི་རླུང་རྣམས་རང་རང་འཛིན་སྟངས་ཀྱིས། བསྐྱོད་པར་གྱུར་ཚེ། ཞེས་ཚུལ་དེ་དག་གིས་འབྱུང་བ་རླུང་རང་རང་གི་འཛིན་སྟབས་ཀྱིས་ཕྱིར་འགྲོ་བ་འགོག་པས་དང་པོར་ལྟེ་བའི་དྷཱུ་ཏཱི་ཁ་བྱེ། དེར་སེམས་རླུང་གི་བཞོན་པ་ཅན་རྣམས་བཙན་ཐབས་སུ་འདུས་པས་ལུས་ལ་མི་བཟད་པའི་ཟུག་རྔུ་ལྤགས་པ་ཐམས་ཅད་ཁབ་ཀྱིས་ཕུག་པ་ལྟ་བུ་འབྱུང་བ་དེ་ཤིན་ཏུ་སྦྱངས་པའི་བདེ་བར་བསྒྱུར་བའི་ཕྱིར་ལུས་སྦྱོང་བསྟན་པ་སྟེ། རྩ་བ་བཅུ་བདུན་མ་དང་། དེ་ཕྱེ་བ་ལྔ་བཅུ་པའི་མིང་ཅན། འགྲངས་ལྟོགས་སྙོམས་པའི་དུས་དུ་བའི་གནོད་པ་མེད་པར་རླུང་ལེགས་པར་གཅུན་ནས་གནས་སོ་སོར་འཆུན་འཐོན་པས་བསྒྲུབ་པར་བྱའོ། །དེའི་ཞར་ལ་རྐང་མགྱོགས་ཀྱི་རླུང་སྦྱོར་གསུངས་ཏེ། འགྲོ་བའི་དུས་སུ་རྐང་པ་རླུང་གི་དཀྱིལ་འཁོར་གཞུའི་དབྱིབས་ཅན་སྣ་གཉིས་གཡོ་བའི་བ་དན་གྱིས་མཚན་པ། ལྟེ་བར་བླ་མའི་སྐུ་མཚོན་གང་བ་ཞིག་བསྒོམ། མིག་པར་སྣང་ལ་གཏད་དེ་རིག་པ་དར་བསྐྱེད་ནས་འགྲོ་བར་བྱའོ། །༼༡༢བ༢༤༽རྒྱུད་དུ་རྐང་མགྱོགས་ཀྱི་འཕྲུལ་འཁོར་ལ་འབད་དོ། །རླུང་སྨན་དུ་བཏང་བ་རིམས་ནད་བཟློག་པ་སོགས་དང་། ཟས་སུ་ཟ་བ་བུམ་པ་ཅན་དང་བསྟུན་སོ་རྩི་དང་ལྕེ་ཆུང་འཇིབ་ཅིང་མཆིལ་མ་མིད་དོ། །བཞི་པ་འཕྲོས་དོན་བར་རླུང་བཤད་པ་ལ། ངོ་བོ། དབྱེ་བ། བོགས་འདོན་དང་གསུམ། དང་པོ་ནི། སྙིང་གཡོན་ཚད་སྲོག་སྟེ་ཕོ། ལྟེ་བ་མན་ཆད་ཐུར་སེལ་ཏེ་མོ། དེའི་བར་ནི་མ་ནིང་གི་རླུང་ཞེས་བྱ་སྟེ་ཡོན་ཏན་ཐམས་ཅད་ཀྱི་གཞིའོ། །དེ་འཛིན་པ་ནི། ལུས་དང་མིག་བར་གྱི་སྐྱིལ་ཀྲུང་ཇི་ལྟ་བ་ལ་སེམས་མི་རྟོག་པ་ལ་བཞག་སྟེ། སྟོད་སྨད་ལ་འཆུན་མ་ཤོར་བར་ལྟེ་བ་མདུན་དུ་འཕུལ་ནས། རླུང་འགྲོ་འོང་མི་འགོག་པར་རང་སར་གཞག །སྨད་མ་བདེ་ན་རྒྱ་མཚོ་སྟོད་དུ་འཕུལ། སྟོད་མ་བདེ་ན་ལྟེ་འོག་ཡུམ་ཚན་མོའི་གནས་སུ་ཤུགས་ཆེ་བར་འཕུལ་ལོ། །གཉིས་པ་ལ་རྩོལ་མེད། རང་འགག་གསུམ་སྦྱོར་གསུམ། དང་པོ་ནི། རྒྱ་མཚོ་ཕྱིར་འབུལ་བ་དེ་ཉིད་རྩོལ་བ་ཅི་ཡང་མེད་པར་རྒྱུན་དུ་བསྟེན་ཅིང་། སྨྲ་བརྗོད་རླུང་འཇུག་དབྱུང་གི་ཚེ་ཡང་མི་མཉམ་པར་རོ། །གཉིས་པ་ནི། སྲོག་རྩོལ་མི་རྔུབ་པར་རང་འགགས་སུ་ཁབ་བགགས་ཏེ་ལྟེ་འོག་ཏུ་བསྒྱུར་ནས་ཐུབ་ཚད་དུ་མནན་མི་ཐུབ་པ་དང་ཁ་སྣ་གཉིས་ནས་དུས་གཅིག་ལ་འཁུན་བུ་དང་བཅས་ནས་གཏོང་། གསུམ་པ་ལ། སྟེང་རླུང་གཙོ་ཆེ་བའི་གསུམ་སྦྱོར། འོག་རླུང་གཙོ་ཆེ་བའི་གསུམ་སྦྱོར། སྟེང་འོག་བར་གསུམ་ལ། དེ་ལ་བཟློག་པ་མཉམ་པ་གསུམ། བདེ་རླུང་གཙོ་ཆེ་བའི། དྲོད་རླུང་གཙོ་ཆེ་བའི་གསུམ་སྦྱོར་དྲུག །རིམ་པ་བཞིན་དང་པོར་སྟེང་། དེ་ནས་འོག་ཤུགས་རྫོགས་པར་འཐེན། བར་རླུང་བརྒྱངས། ལྟེ་བར་བསྲེས་ནས་རྒྱ་མཚོ་སྟོད་དུ་འཕུལ་ཏེ་དེར་འཆུན་འཐོན་པ་དང་། དང་པོ་ཐུར་སེར་རྒྱབ་ནས་དྲངས་མདུན་ནས་འོག་ཏུ་འཕུལ། དེའི་ཁར་སྟེང་རླུང་དང་བར་ཤུགས་རྫོགས་པར་འཕུལ་ཏེ་ཡུམ་ཆེན་མོའི་གནས་སུ་འཕུལ་ཏེ་གསང་བར་འཆུན་འཐོན་པ་དང་། སྟེང་མནན། འོག་འཐེན་པ་དུས་མཉམ་པས་ལྟེ་བར་བསྲེས་ནས་ཐད་ཀར་འཕུལ་བས་སྟོད་སྨད་ཆ་མཉམ་དུ་འཆུན་འཐོན་པ་དང་། ཐུར་སེལ་རྒྱབ་ནས་དྲངས་ཏེ་འཐུར་དུ་འཕུལ་ནས་སྟེང་རླུང་མནན། བར་རླུང་བརྒྱངས་༼༡༣ན༢༥༽ནས་པ་དེ་དྲོད་གསང་གསུམ་དུ་འཕུལ་བས་དེ་གསུམ་སྤྱིར་འཆུན་འཐོན་པ་དང་། ལུས་ཅུང་ཟད་དགྱེ་བས། འོག་རླུང་འཐེན་སྟེང་མནན། བར་རླུང་བརྒྱངས་ནས་བདེ་རླུང་གི་གནས་སུ་འཕུལ་བ་དྲི་ཆུའི་ལམ་དུ་འཆུན་འཐེན་པ་དང་། འོག་འཐེན། སྟེང་མནན། བར་བརྒྱངས་ནས་ལུས་ཅུང་ཟད་སྒུར་བས་དྲོད་རླུང་དུ་འཕུལ་བ་ལྕི་ལམ་དུ་འཆུན་འཐོན་པའོ། །འདི་ཐམས་ཅད་ལ་རླུང་འཛིན་གཏོང་གཉིས་ཀར་རྒྱ་མཚོ་གཡོ་འགུལ་མེད་པར་དགོས་སོ། །གསུམ་པ་བོགས་འདོན་ལ། གསུམ་སྦྱོར་དང་རྩལ་སྦྱོང་གཉིས། དང་པོ་ལ། བྱེད་ཆིངས་དང་གཉིད་ལོག་གཉིས་ལས། དང་པོ་ལ། གོས་དཀར་མོའི་ལམ་འགོག་པ། ཐབས་འགོག་པ། ཤེས་རབ་འགོག་པ། གཉི་ག་འགོག་པ་བཞི། རིམ་པ་བཞིན་ལུས་གནད་གཞན་སྔར་བཞིན་ལས། ལག་པ་གཡས་བསྲང་བའི་སོར་མོ་ཕོང་ཚོས་འོག་ཏུ་གཞུག །གཡོན་པའི་མཐེབ་སྲིད་གྱིས་གོས་དཀར་མོའི་ཕོ་བྲང་མགྲིན་པའི་རྦ་རླབས་མི་དྲག་ཙམ་ལྟེམ། རླུང་གསུམ་སྦྱོར་དུ་འཛིན་པ་དང་། གཞན་འདྲ་བ་ལ་གཡོན་པའི་སྲིན་ལག་གིས་རྐྱང་མའི་རླབས་ལྟེམ་པ་དང་། ལག་པ་གཡོན་སྔར་བཞིན་བཙུགས། གཡས་པའི་སྲིན་ལག་གིས་རོ་མའི་རླབས་ལྟེམ་པ་དང་། སླར་གཡོན་པའི་སོར་མོས་གཉི་ག་དྲག་པར་གནོན་པའོ། །འདི་ནི་བྱེད་པ་སྒོ་ལྔའི་ཤེས་པ་གཅུད་ལ་འབོར་བའི་བཅིང་བ་ཡིན་པས་བྱེད་བཅིངས་སོ། །གཉིས་པ་གཉིད་ལོག་བཅུ་གཉིས་ཏེ། ལག་གཉིས་བསྣོལ་བ་དཔུང་མགོ་ལ་འཇུས་གསུམ་སྦྱོར་གཟུང་། སྐེད་པ་གཡོན་ནས་གཡས་ཀྱི་དཔུང་པར་འཐེན་ཅིང་ཕྲག་པར་གཅུད། དེ་བཞིན་གཡོན་གྱི་དཔུང་པར་འཐེན་ནས་ཕྲག་པར་འཐེན་པ་གཉིད་ལོག་ཆུང་ངུ་། མ་ཀོ་བོ་མདུན་དུ་བཀུག་སྟེ་མདུན་གྱི་རྩ་གནོན། རྒྱབ་ཏུ་དགྱེ་བོར་བཏང་ནས་ལྷག་པས་རྒྱབ་རྩམ་ནན་པ་དང་བསྟུན་ལུས་གཡས་སུ་གཅུས་ཏེ་གཡས་རྩ་མནན། གཡོན་དྲུག་ཅུས་ཏེ་གཡོན་རྩ་གནོན་པ་གཉིད་ལོག་ཆེན་པོ། བར་ལྷུའི་འོག་གྲུ་མོའི་སྟེང་ཙམ་དུ་འཇུས་ནས་གཉིད་ལོག་ཆུང་ངུ་གྲུ་མོ་གཅུད། ཆེན་པོ་དེའི་སྟེང་ནས་གྲུ་མོ་དང་ལུས་སྔར་བཞིན་གཅུད་པ་དང་། རྡོ་རྗེ་ཁུ་ཚུར་ལག་མགོའི་༼༡༣བ༢༦༽འབྲེལ་མཚམས་ནས་སྙིང་གར་བསྣོལ་ནས་ལག་མགོ་རྐང་ངར་གཉིས་ལ་འཆུན་འཐོན་པ་ཆུང་ངུ་། ལག་མགོ་དང་ལུས་བྱིན་ཆེན་པོ་དང་། ལག་པ་གཉིས་དཀུར་མཐེ་བོང་ནང་དུ་བསྟན་པས་མནན་ནས་དཔྱི་གཉིས་གཅུད་པ་ཆུང་ངུ་། དཔྱི་དང་ལུས་བྱིན་ཆེན་པོ་དང་། བརླའི་འོག་པུས་མགོ་ནས་རྡོ་རྗེ་ཁུ་ཚུར་གྱིས་མནན་ཏེ་པུས་མགོ་གཅུད་པ་ཆུང་ངུ་། པུས་མོ་དང་ལུས་བྱིན་ཆེན་པོ་དང་། བོལ་གོང་ནས་འཇུས་ཏེ་བྱིན་པ་དང་རྐང་མགོ་གཅུད་པ་ཆུང་ངུ་། བྱིན་པ་དང་རྐང་མགོ་ལུས་བྱིན་ཆེན་པོ། འདིས་ནི་ཚིག་ཆེན་བཅུ་གཉིས་ཀྱི་རྩ་མནན་པས་དེ་དང་དེར་ལས་རླུང་རྒྱུ་བ་འགགས་ནས་འཕོ་ཆེན་བཅུ་གཉིས་ཀྱི་རླུང་དབུ་མར་འབབ་པར་བྱེད་དོ། །གཉིས་པ་རྩལ་སྦྱོང་ལ། བསྐྱས་འདོད། རྒྱབ་གྱེས། གཤོག་རྒྱང་། གཤོག་སྡུད། གྲོག་སྐེད། གཙུབ་སྤྲུག་དྲུག་ལས། དང་པོ་སྐ་རགས་འཆིང་སའི་སྟེང་ཙམ་དུ་འཕུལ་བ། མས་ཤར་འུབ་འཐེན་ནས་ནུ་མའི་ཐད་ཙམ་དུ་འཐེན་པ། མར་ལྟེ་བའི་ཐད་གོང་དུ་འཕུལ་བ། ལྟེ་བར་འཕུལ་བ། ལྟེ་བའི་འོག་གསང་བར་འཕུལ་བ། བདེ་རླུང་དུ་འཕུལ་བ། དྲོད་རླུང་དུ་འཕུལ་བ། བདེ་དྲོད་དུས་མཉམ་པར་འཕུལ་བའོ། །གཉིས་པ་སྟེང་འོག་གི་རླུང་རང་འགགས་སུ་གཟུང་སྟེ། འོག་རླུང་འཐུར་དུ་དྲག་པོར་འཕུལ། སྟེང་རླུང་སྟོད་དུ་དྲག་པོར་འཐེན་པ་དུས་གཅིག་ལ་བྱེད་པའོ། །གསུམ་པ་ནི། རྒྱ་མཚོ་ཕྱོགས་བཞིར་བརྒྱད་པ་དང་། གཡས་གཡོན་གཉིས་དུས་གཅིག་སོ་སོར་བརྒྱང་བའོ། །བཞི་པ་ནི། གཡས་ནང་དུ་འཐེན་ནས་གཡོན་དུ་འཕུལ་ཞིང་གཅུད་པ་དང་། དེ་བཞིན་གཡོན་ནང་དུ་འཐེན་ནས་གཡས་སུ་འཕུལ་ཞིང་གཅུད་པ་དང་། དུས་གཅིག་ཏུ་དྲག་པོར་དབུས་སུ་སྡུད་པའོ། །འདི་བར་རླུང་ཡོ་བ་དང་ཧ་ཅང་ཅེས་པའི་གེགས་སེལ་ལོ། །ལྔ་པ་ནི། ལྟ་བའི་རྒྱབ་ཉག་པོར་འཐེན་པ་དང་། མདུན་གྱི་ལྟེ་བ་ཉག་པོར་དང་། ལྟོ་བ་གཡས་སུ་ཉག་པོར་དང་། ལྟོ་བ་གཡོན་དུ་ཉག་པོར་འཐེན་པའོ། །དྲུག་པ་ནི། རླུང་དྲག་པོར་ཐད་དུ་འཕུལ་ནས་ལྟོ་བའི་ཕྱི་མ་ཡིན་པ་ནང་དྲག་པོར་སྤྲུག་པའོ། །འདིས་གཡས་གཡོན་སོ་སོར་དུས་མཉམ་དུ་བསྐོར་བ་ཡང་བསྟན་ཏེ། ལས་རླུང་རྒྱུན་ཆད་ནས་དབུ་༼༡༤ན༢༧༽མ་ནས་མཉམ་པར་འབབ་ལ་མཐར་ཕྱིན་པ་ན་རླུང་རེངས་ཏེ་རྒྱུ་བ་མེད་པར་འགྱུར་རོ། །གཉིས་པ་འབྲས་བུ་འཛིན་པ་ནི། འཁོར་ལོ་བཞིར་ཐིག་ལེ་བཞི་བཞི་ལ་སྲོག་བཅུག་ནས་ཐ་མར་དཔྲལ་བར་སེམས་དང་ཐིག་ལེ་དབྱེར་མེད་པར་འཛིན་པས་ན་འཛིན་པའོ། །དེ་བས་ན་འཛིན་པ་ཞེས་པ་ཡང་ལག་པས་གང་ཡང་རུང་བའི་དངོས་པོ་འཛིན་པ་ལྟ་བུ་མ་ཡིན་ཏེ། གཟུང་འཛིན་གཡོ་མེད་དུ་བཅིང་བ་གཉིས་མེད་དུ་བརྟན་པར་མངོན་དུ་བྱེད་པའི་མིང་ཡིན་ནོ། །དེའི་ཕྱིར་སྲོག་ཐུར་འདྲེས་པ་ཞེས་པའི་ངེས་པ་ཡང་གཟུང་འཛིན་འདྲེས་པ་ལ་བྱ་ལ། གནས་སྐབས་སྟེང་འོག་གི་རླུང་གོང་བུར་གྱུར་པ་ལ་ཡང་ཟེར་ཞིང་གཉིས་པོ་ཕུགས་གནད་གཅིག་ཏུ་འབབ་བོ། །དེ་ཡང་འདིར། རླུང་གིས་མེ་སྦར་ནས། དངས་མ་ཞུ་བས་མི་ཟད་ཉོན་མོངས་འབར། ཞེས་པས་གསུངས་ཏེ། སྲོག་དང་ཐུར་སེལ་གྱི་རླུང་ལྟེ་བར་འཐབས་པས། ཙཎྜྻཱ་ལིའི་མེ་འབར། བསམ་དང་འདོད་དང་སོགས་པའི་གནས་སྐབས་བཅུ་ཤར། རི་རབ་ཙམ་གྱི་ཟས་ཟོས། རྒྱ་མཚོ་ཙམ་གྱི་སྐོམ་འཐུངས་ཀྱང་དངས་མར་ཞུ་ནས་ལུས་ཐམས་ཅད་ལ་ཁྲིམས་པས་དྲི་ཆུ་དང་དྲི་ཆེན་དུ་མི་འཕོ་སྟེ། སྒྱུ་འཕྲུལ་རྡོ་རྗེ་གསུས་པོ་ཆེ་ཞེས་བྱ་བ་དེར་གྱུར་པས་སོ། །ཞེས་སྟོན་པ་ཡིན་ལ། དེ་ལམ་དུ་བྱེད་པའི་ཚུལ་ཡང་། ལུས་མིག་སྔར་བཞིན་ལ། རང་ཉིད་ལྷར་བལྟས་པའི་ལུས་ཀྱི་དབུས་སུ་དབུ་མ་ལྗང་ཁུ་གཡས་གཡོན་དུ་རོ་རྐྱང་དང་བཅས་པ་དྲང་པོར་གནས་པ། འོག་ཏུ་གཞན་གཉིས་ཀྱི་ཁ་དབུ་མ་ལ་ཕྱོགས་པ་དང་། སྟེང་དུ་སྣའི་སྒོར་ཟུག་པ་དང་། ལྟེ་བར་སའི་རང་བཞིན་གྱི་རྩ་འདབ་དྲུག་ཅུ་རྩ་བཞི་སེར་པོའི་ལྟེ་བར་ཟླ་བའི་དཀྱིལ་འཁོར་གྱི་དབུས་སུ་ཨོཾ་ཡིག་དཀར་པོ་ནཱ་དར་བཅས་པ། ཁ་སྦྱོར་བུམ་པ་ཅན་ས་བོན་དང་རོ་གཅིག་ཏུ་སྤྲོས་པ་མེད་པའི་དྲུང་དུ་གཟུང་བར་བྱ་ཞིང་སླར་དལ་བུས་བཏང་བར་བྱའོ། །དེ་བརྟན་ནས་ས་ཆུ་ལ་འཇུག་པའམ་ཐིམ་པའི་ངེས་པས། སྙིང་གར་ཆུའི་རང་བཞིན་གྱི་འཁོར་ལོ་འདབ་བརྒྱད་ལྟེ་བར་ཉི་མ་ལ་ཨཱཿཡིག་རྣམ་བཅད་དང་བཅས་པ། མགྲིན་པར་མེའི་འཁོར་ལོ་འདབ་མ་སོ་༼༡༤བ༢༨༽གཉིས་སུ་ཉི་མ་ལ་ཧཱུཾ་ཐིག་ལེ་རཱ་དར་བཅས་པ། སྤྱི་བོར་རླུང་གི་དཀྱིལ་འཁོར་འདབ་མ་བཅུ་དྲུག་པར་སྒྲ་གཅན་ལ་ཧོཿཡིག་བལྟས་ཏེ། དེ་ཡང་ལྟེ་བར་བུམ་པ་ཅན་གྱི་སྲོག་ཐུར་འདྲེས་པ་ཐོབ་པ་ན་སྙིང་ག་ལ་སོགས་པའི་འཁོར་ལོ་བུམ་པ་ཅན་བྱའི། སྔ་མ་སྔ་མ་མ་བརྟེན་པར་འཁོར་ལོ་གོང་མ་གོང་མར་སྦྱོར་བ་བརྩམས་ན་གེགས་སུ་འགྱུར་རོ། །འདིར་ཐིམ་པ་ཞེས་པ་ཡང་རླུང་འོད་གསལ་དང་རོ་མཉམ་དུ་གོམས་པར་བྱས་པས་དེ་དང་དེའི་རང་ས་འབྱེད་པ་ཉམས་ནས་རང་བཞིན་གྱི་ཚུལ་དབང་དུ་བྱེད་པ་ལ་བྱའི། ཐིམ་པ་ཉིད་ནས་རྣལ་འབྱོར་པ་ལ་དེའི་རྒྱུ་བ་མི་འབྱུང་བ་ལྟ་བུ་ནི་མ་ཡིན་ནོ། །གསུམ་པ་དེ་གཉིས་ཀྱི་བྱེད་ལས་ལ། གཏུམ་མོ་ལ་བརྟེན་པ་ཐིག་ལེའི་རྣལ་འབྱོར། ཐིག་ལེ་ལ་བརྟེན་པ་ཕྲ་མོའི་རྣལ་འབྱོར། བྱེད་ཆིངས་ལ་བརྟེན་པ་ལུས་འཆི་མེད། མན་ངག་ལ་བསྙེན་པ་ཀྱང་སེམས་འགྱུར་མེད། འཕྲོས་དོན་འདའ་ཀ་མའི་རྣལ་འབྱོར་བཤད་པ་དང་ལྔ། དང་པོ་ནི། སྲོག་རྩོལ་གྲུབ་པའི་ཚད་གཙུག་ཏོར་དུ་སྲོག་ཐམས་ཅད་དྷཱུ་ཏཱི་ནས་ཕྱིན་པ་ཡིན་ལ། དེ་ལ་སྟེངས་དུ་ཐལ་ན་ཚེ་ཐུང་བར་འགྱུར་བས། མགོ་བོ་ན་བ་ལ་སོགས་པ་དེའི་མཚན་མ་མཐོང་བ་ན་སླར་གསང་གནས་ཀྱི་འཛིན་པ་ལ་སྦྱོར་བས་གེགས་བསལ་ཞིང་བོགས་འབྱིན་པར་བྱ་བའི་ཕྱིར། རྩིགས་མ་བད་ཀན་ཆུ་སེར་ཁྲག་དང་ནི། ཤ་དང་རུས་པ་རྒྱུས་པའི་བཅུད་རྣམས་ལས། རང་རང་གནས་སུ་ནད་དང་ལུས་ཟུངས་སྐྱེད། ཅེས་ཟས་སྐོམ་གང་ཟོས་པ་དེ་ཉིད་ལན་བདུན་དུ་འགྱུར་བ་ལས་ཁུ་བ་དེས་ལུས་རྒྱས་པར་བྱེད་ལ། འཁོར་བ་མེ་དྲོད་ཞན་པས་སྙིགས་མ་དྲི་ཆེན་དྲི་ཆུར་འབབ་ལ། འབྱུང་བ་འཁྲུགས་པའི་དབང་གིས་དྲི་མ་ཡང་གྱུར་ནས་ནང་སྐྱེད་དོ། །སྲོག་རྩོལ་དང་འཛིན་པའི་རྣལ་འབྱོར་གྱི་དབང་གིས་རྩིགས་མ་དང་དྲི་མ་མེད་པར་བྱས་ནས་ལུས་ཟུངས་སུ་བྱེད་དོ། །ལུས་ཟུངས་ཟླ་བའི་ཆ་ཤས་འཕོས་པ་ལས། ཡན་ལག་བཅུ་གཉིས་སྲིད་པའི་ལུགས་བཞིན་འཁོར། ལུས་ཟུངས་ཀྱི་ཁུ་བ་ཟླ་བ་བཞིན་དཀར་ཆའི་ཆ་བཅུ་དྲུག་ཚུན་འཕེལ་ནས་ནག་པོ་ཚེས་གཅིག་ཞུགས་པ་ནས་གནམ་སྟོང་གི་༼༡༥ན༢༩༽མཐར་ཐུག་པའི་བར་དུ་ཟད་པར་བྱེད་པ་དང་། རྡུལ་ནི་ཉི་མ་བཞིན་བྱང་བགྲོད་ཀྱི་ཟླ་བ་དྲུག་ཏུ་འཕེལ། ལྷོ་བགྲོད་ཀྱི་ཟླ་བ་དྲུག་ཏུ་འགྲིབ་པར་སྟོན་པའོ། །འཛིན་པ་ཐོབ་པ་ནས། སྒྲ་གཅན་གྱིས་ནི་རབ་ཏུ་ཟོས་པ་ལས། མེ་དཔུང་རབ་ཏུ་འབར་བས་སྲེག་པར་བྱེད། །དེ་ཇི་ལྟར་ཉི་ཟླའི་ཆོས་ཅན་གྱི་ཐིག་ལེ་གཉིས། སྒྲ་གཅན་གྱི་ཆོས་ཅན་གྱི་ཐིག་ལེ་མེའི་དབུས་སུ་རོ་མཉམ་པ་ལས་ནི་འཕེལ་འགྲིབ་མེད་པས་རྟག་ཏུ་གང་བར་གནས་སོ། །དེ་ཡང་། ལུས་གནད་ཙོག་པུ་བསམ་གཏན་གྱི་ཆོས་ལྔའོ། །མིག་ནི་བདུད་རྩི་འཁྱིལ་བ་བཞིན་ནོ། །རླུང་ནི་གསུམ་སྦྱོར་བུམ་པ་ཅན། །དམིགས་པ་ནི་བྱང་ཆུབ་ཀྱི་སེམས་བསྐུལ་བའི་སླད་དུ་འཛིན་པའི་སྟོབས་དང་རང་དུས་འཁོར་ཡབ་ཡུམ་གསལ་བའི་རྗེས་སུ་ཆགས་པས་གསང་གནས་ཀྱི་གཏུམ་མོ་གློག་གི་དབང་ཕྱུག་པ་ལྟ་བུ་ལྷག་པར་འབར་བ་ལ་འབད་དེ་གཟུང་འཛིན་རོ་མཉམ་པའི་འོད་གསལ་བ་ལ་རྩེ་གཅིག་ཏུ་གནས་པས་སོ། །དེར་སྤྱི་བོར་གནས་པའི་ཐིག་ལེ་བདག་པོར་གྱུར་པ་ཉིད་ཀྱིས་ཁུ་བ་རྗེས་སུ་ཞུ་སྟེ་སྤྱི་བོ་ནས་མགྲིན་པར་ཞུགས་པ་དགའ་བ། སྙིང་ཀའི་བར་མཆོག་དགའ། ལྟེ་བའི་བར་ཁྱད་དགའ། གསང་གནས་ནོར་བུའི་རྩེར་བ་བས་པ་ལྷན་སྐྱེས་ཀྱི་དགའ་བ་སྟེ། དགའ་བ་དེ་དང་དེའི་དུས་སུ་འོད་གསལ་བའི་བདག་ཉིད་དུ་མྱོང་བ་བརྟན་པས་ཉམས་སུ་བླང་ངོ་། །གཉིས་པ་ནི། རྩིགས་མ་འཐུར་དུ་སོང་བས་ནད་མེད་ཅིང་། དངས་མ་ལུས་ལ་རྒྱས་པས་བདེ་དང་སྟོབས། ཞེས་ཁུ་བ་དྷཱུ་ཏཱིའི་ནང་དུ་ཡང་དག་པར་སྦྱོར་བ་ལས་འཕོ་བ་མེད་པའི་བདེ་བ་ནི་ཕྲ་མོའི་རྣལ་འབྱོར་ཞེས་བྱ་སྟེ། ཡུམ་གྱི་པདྨའི་རྩར་བྱང་ཆུབ་ཀྱི་སེམས་ཐིག་ལེ་ཡུངས་འབྲུག་ཙམ་ལྷུང་བ་སླར་རྒྱུ་མཐུན་ལ་སོགས་པའི་དབྱེ་བས་རང་གི་དབུ་མའི་གནས་ནས་སྟེང་དུ་གཤེགས་པ་གསང་བའི་འཁོར་ལོ་དྲི་མ་མེད་པའི་ཐིག་ལེ་ཙ་ན་ཀའི་ཚད་ཙམ་འོད་ཟེར་ལྔའི་གུར་ཁྱིམ་དུ་རྡོ་རྗེ་སེམས་དཔའ་ཡབ་ཡུམ། ལྟེ་བར་ཡང་ཐིག་ལེ། དེ་ལྟ་བུའི་ནང་དུ་རྣམ་སྣང་། དེ་བཞིན་དུ་སྙིང་གར་འོད་དཔག་མེད། མགྲིན་པར་རིན་འབྱུང་། ༼༡༥བ༣༠༽སྤྱི་བོར་དོན་གྲུབ་གཙུག་ཏོར་དུ་མི་བསྐྱོད་པ་པྲ་ཕབ་པ་ལྟ་བུ་ཐམས་ཅད་ཀྱི་ཡེ་ཤེས་ཀྱི་འཁོར་ལོར་གཏུམ་མོ་སྤུ་ཤད་ཀྱིས་བྲིས་པ་ལྟ་བུ་འདར་ཕྲི་ལི་ལི་འབར་བ་ལས་འོད་ཀྱི་སྤྲོ་བསྡུ་བྱའོ། །དུས་དེར་ཐིག་ལེའི་དངས་སྙིགས་ཕྱེད་ནས་སྙིགས་མ་འཐུར་དུ་འགྲོ་ཞིང་། དངས་མ་ལུས་ལ་རྒྱས་པས་བདེ་དྲོད་འཕེལ་དེའི་ནུས་པས་ཁ་ཟས་ཟོས་པའི་བཅུད་ཀྱིས་སྙིགས་མ་ཇེ་ཉུང་དུ་སོང་ནས་ཟད་དེ་དངས་མ་ལུས་ཟུངས་སྐྱེད་པ་འབའ་ཞིག་པར་འགྱུར། དེའི་ནུས་པ་ཕུང་སོགས་ཇེ་དངས་ལ་སོང་བའི་འཇའ་ལུས་པར་འགྱུར་གྱི། ཁོག་ནས་འབུ་འཐོན་པ་ལྟ་བུའི་འཇའ་ལུས་པ་ནི་མ་ཡིན་ནོ། །གསུམ་པ་ནི། ཧ་ཧཱ་ཧི་ཧཱི་ཧུཾ་ཧཱུཾ་ཕཊ་ཀྱི་སྒྲ། སྟེང་དུ་བསྒྲགས་པས་རྩིགས་མ་འདོན་པ་དང་། དངས་མ་རང་གི་གནས་སུ་འཛིན་པར་བྱེད། ཅེས་ལུས་འཆི་བ་མེད་པ་ཞེས་པ་ནི། རྒས་པ་དང་ནད་དང་འཆི་བ་རྣམས་མེད་པ་ལ་ཟེར་ལ། དེ་བསྒྲུབ་པ་ནི། དཀར་ཆ་འཛག་མེད་དུ་འཆིངས་ན་རྟག་ཏུ་བཅུ་དྲུག་པའི་གང་བ་ལ་གནས་པའི་ཕྱིར། རྩ་དངས་ཤིང་ཁམས་འཕེལ། རླུང་ཚུལ་བཞིན་དུ་རྒྱུ་བས་ལུས་བརྒྱད་གཉིས་ཀྱི་ལང་ཚོ་ལས་ཡོལ་བར་མི་འགྱུར་རོ། །དེ་ནི་ཧཱུཾ་ཐུང་ཧཱུཾ་རིང་གིས་སྤྱི་གཙུག་སངས་རྒྱས་པ་དང་དཀྱིལ་ལ་སོགས་པའི་འདྲེན་གསུམ་གྱིས་ཏེ། འདིས་སྤ་བ་སྦུབས་སུ་ནུབ་པ་དང་། གཙུག་ཏོར་དང་ཆུ་བོ་གྱེན་ལ་བཟློག་པ་འགྲུབ་བོ། །རླུང་སེམས་ཀྱི་དངས་མ་ལུས་ཐམས་ཅད་དུ་ཁྱབ་ན་རྩིགས་མ་དང་དྲི་མ་མི་འབྱུང་བས་འབྱུང་བ་ཆ་སྙོམས། དེའི་རྒྱུས་ནད་མེད་པར་འགྱུར་བ་དེ་ནི་ཧི་ཐུང་ཧཱི་རིང་གི་འགྲེམས་གསུམ་གྱིས་སོ། །འདིས་ཡོན་ཏན་བརྒྱད་ཐོབ་པར་བྱེད་དོ། །དང་པོར་དངས་སྙིགས་ཕྱེ་ནས་རྩིགས་མ་འཐུར་དུ་འབེབས་ཤིང་། ཕྱིས་རྩིགས་མ་ཟད་ནས་དངས་མ་འབའ་ཞིག་པར་འགྱུར་བས་ཚེ་ཉི་ཟླ་དང་མཉམ་པར་བྱེད་ནུས་ལ། དེ་ཡང་ལས་རླུང་ཉི་མའི་སྡེ་འོག་ཏུ་ནོན་པ་ལ་རག་ཅིང་། དེ་བསྒྲུབ་པ་ནི་ཧ་ཐུང་ཧཱ་རིང་གིས་གླིང་བཞི་གཅུད་ལ་བོར་བས་སོ། །འདིས་ནི་ཉི་མ་སྟོད་ལ་གནོན་པ་ཡང་འགྲུབ་བོ། །བཞི་པ་ནི། ཡཾ་རཾ་བཾ་དང་ལཾ་གྱི་ཡི་གེའི་སྒྲས། དཀྱིལ་འཁོར་༼༡༦ན༣༡༽རབ་ཏུ་གཡོ་བས་བསྒྲག་ཅིང་གདབ། གཙུག་ཏོར་ནམ་མཁའི་ཁམས་ནས་སྤྱི་མགྲིན་སྙིང་ཀ་ལྟེ་བ་རྣམས་ལ་རླུང་མེ་ཆུས་དང་གསང་བའི་པདྨར་ཡེ་ཤེས་ཀྱི་རང་བཞིན་གྱི་རྡོ་རྗེ་བཙུན་མོའི་བྷ་གའི་དཀྱིལ་འཁོར་རྣམས་ལ་རབ་ཏུ་གཡོ་བས་བྱང་ཆུབ་ཀྱི་སེམས་ཡི་གེ་གསུམ་མམ་སྒྲའི་དེ་ཉིད་ཀྱི་འོག་གི་ཆར་གཤེགས་པ་སྟོང་པ་ཉིད་དང་བསྒྲག་ཅིང་། དེར་དེ་རྣམ་པ་ཐམས་ཅད་པའི་སྟོང་པ་ཤར་ནས་སླར་མཆོག་ཏུ་མི་འགྱུར་བའི་བདེ་བས་རྒྱས་གདབ་བོ། །རྩོལ་བ་དྲག་པོས་རྩ་གསུམ་འོག་ཏུ་བསྡམ། ཞེས་རྩོལ་བ་ནི་ཕྱག་རྒྱ་གསུམ་སྟེ་གང་ལ་སྦྱོར་ཀྱང་འདྲ། གསང་བའི་བུམ་པ་ཅན་གྱིས་བསྐུལ་ནས་གསང་བའི་པདྨ་ནས་ལྟེ་སྙིང་མགྲིན་སྤྱི་བོ་གཙུག་ཏོར་དུ་ཇི་ལྟར་གཤེགས་པ་དེ་ལྟར་བྱོན་ཏེ་ཡན་ལག་བཅུ་གཉིས་འགོག་པས་ས་བཅུ་གཉིས་ཐོབ་པར་མཛད་དོ། །འབྱེད་འཛུམ་དེས་ནི་རྩིགས་མ་ཐུར་དུ་འགྲོ། ཞེས་ལས་དང་པོ་པས་སྟེང་སྒོ་འབྱེད་ཅིང་འོག་སྒྲོ་འཛུམ་པ་དང་། འོག་སྒོ་འབྱེད་ཅིང་སྟེང་སྒོ་འཛུམ་པའི་གནད་ཀྱིས་རླུང་དང་འཁྲུལ་འཁོར་བརྩོན་པར་བྱའོ། །བྱང་སེམས་འགྱུར་མེད་ཅེས་པ་འདི་ནི། དོན་རྡོ་རྗེ་གསུམ་གྱི་བསྙེན་སྒྲུབ་སྟན་ཐོག་གཅིག་ཏུ་སྤྲུགས་ཏེ་བསྒོམ་པའི་མན་ངག་ཡིན་པས་དེའི་གནད་གཅེས་པའི་ཕྱིར་རྒྱས་པར་ལོགས་སུ་བཤད་དོ། །ལྔ་པ་འཕྲོས་ནས་འདའ་ཀ་མའི་རྣལ་འབྱོར་བཤད་པ་ལ། འཆི་ལྟས་བརྟགས་ནས་འཆི་བ་བླུ་བ་ཚེ་བསྒྲུབ། མ་ལྷུས་ན་འཆི་ཀ་མའི་རླུང་སེམས་གང་འདོད་དུ་འཕེན་པའི་འཕོ་བ་བཤད་པ་གཉིས་ལས། དང་པོ་ལ་འཆི་ལྟས། དེ་བཟློག་པའི་རྣལ་འབྱོར་གཉིས། དང་པོ་ནི། རྩ་རྒུད་པ་དང་། ཞར་བ་དང་། བསྐམས་པ་ལས་འཆི་བ་འབྱུང་བ་ལུས་ཀྱི་འཆི་ལྟས། རླུང་གཡས་འབའ་ཞིག་ནས་འབབ་པ་ཉི་མའི་འཆི་ལྟས། གཡོན་འབའ་ཞིག་ནས་འབབ་པ་ཟླ་བའི་འཆི་ལྟས། མཉམ་རྒྱུ་རང་བཞིན་པ་སྒྲ་གཅན་གྱི་འཆི་ལྟས་ཏེ་ངག་གི་འཆི་ལྟས། ཐིག་ལེ་དཀར་པོ་འཐུར་དུ་འཛག་པ་དང་། དམར་པོ་གྱེན་དུ་ཟག་པ་ནི་ཡིད་ཀྱི་འཆི་ལྟས་ཞེས་བྱའོ། །དེ་ལ་ལུས་ཀྱི་གསུམ་ཆ་གཉིས་ཙམ་དུ་བསྐམས་པ་གསོར་བཏུབ། ༼༡༦བ༣༢༽རླུང་འཆི་ཞག་ཉེར་བདུན་པར་ལོངས་པ་ཚུན་གསོ་བཏུབ། ཐིག་ལེ་ཟད་པར་རྔུགས་པ་ཚུན་གསོ་བཏུབ་ལ་བཟློག་ན་མི་ལྷུས་སོ། །གཉིས་པ་དེ་བཟློག་པའི་རྣལ་འབྱོར་ལ། བྱེད་ཆིངས་ཀྱིས་ལུས་ཀྱི་འཆི་བ་འཆིང་། སྲོག་རྩོལ་གྱིས་ངག་གི་འཆི་བ་འཆིང་། སེམས་དམིགས་ཀྱིས་ཡིད་ཀྱི་འཆི་བ་འཆིང་བ་གསུམ། དང་པོ་ནི། ཁྲོ་བོའི་གཟུགས་ཀྱིས། ཞེས་པས་བསྟན་ཏེ། ལུས་མ་མོ་དང་ལྟ་སྟངས་སྟེང་གི་སྐྱིལ་ཀྲུང་ཇི་ལྟ་བ་ལ། ལག་པ་གཉིས་རྡོ་རྗེ་ཁུ་ཚུར་བསྣལ་བས་མཆན་འོག་གི་འཕར་རྩ་དྲག་ཏུ་བསྡམ། བཞིན་ཤིན་ཏུ་ཁྲོ་བར་བྱའོ། །གཉིས་པ་ནི། སྒོ་དགུའི་རྒྱུ་བ་ནང་དུ་བསྡུས་པ་ལས། ཞེས་པ་སྟེ། རླུང་གསུམ་སྦྱོར་གྱི་བུམ་པ་ཅན་གཟུང་ནས་སྒོ་དགུའི་རྒྱུ་བ་ཐེར་དགག་ལ་བཏང་ངོ་། །གསུམ་པ་ནི། རང་གནས་བདེ་བར་བྱེད། དེ་རླུང་རྡོ་རྗེའི་བཟླས་པ་སྔར་བཤད་པ་དེས་སྟོང་གཟུགས་བསྒྲུབ་པའི་མཐར། ཁ་སྦྱོར་གྱི་རླུང་གིས་རང་ཉིད་སྐད་ཅིག་གིས་ཚེ་དཔག་ཏུ་མེད་པ་པདྨ་རཱ་གའི་མདོག་ལྟར་དམར་ཞིང་འཚེར་བ། མཉམ་གཞག་གི་སྟེང་དུ་བུམ་པ་འཆི་མེད་ཀྱི་བདུད་རྩིས་གང་བ་བསྣམས་པ། པདྨའི་སྐྱིལ་ཀྲུང་གིས་ཉི་མ་ལ་བཞུགས་པ་སྙིང་གར་སྲཱིཿམཐར་ཨོཾ་ཨ་མཱ་ར་ཎི་ཛཱི་ཝནྟི་ཡ་བདག་གི་ཚེ་དང་བསོད་ནམས་ཐམས་ཅད་པུཥྚིཾ་ཀུ་རུ་སྭཱཧཱ། བཏགས་པས་བསྐོར་བ། རང་ཉིད་ཀྱི་སྟེང་གི་ནམ་མཁར་ཡང་དེ་ལྟ་བུ་བསྒོམ། རླུང་དབྱུང་བའི་དུས་སུ་སྔགས་འཕྲེང་དམར་པོ་འོད་ལྕགས་ཀྱུ་ལྟ་བུ་འཇིག་རྟེན་ཁམས་ཐམས་ཅད་དུ་སོང་ནས། འཇུག་དུས་ན་ཚེ་དང་བསོད་ནམས་དང་དཔལ་སྐྱེད་པའི་ས་ཆུ་མེ་རླུང་ནམ་མཁའ་སེམས་ཅན་གྱི་ལས། སངས་རྒྱས་སྲས་བཅས་ཀྱི་བྱིན་རླབས་ཐམས་ཅད་དབང་མེད་དུ་མདུན་བསྐྱེད་ཀྱི་བུམ་པར་བཀུག །གནས་དུས་འཆི་བ་མེད་པ་ཡེ་ཤེས་ཀྱི་བདུད་རྩིར་ཞུ་ནས་ཆིལ་ཆིལ་ཁོལ་བར་བསམས་ལ་བརྒྱ་རྩ་བརྒྱད་ཀྱིས་བསྙེན་ནས། རང་གི་སྣ་གཡས་ནས་དབྱུང་དུས་རླུང་སྔགས་དབྱེར་མེད་པ་དེ་ཉིད་མདུན་གྱི་བུམ་པའི་ནང་དུ་སོང་བདུད་རྩི་དྲངས་ཏེ་ལོག །སྣ་སྒོ་གཡོན་ནས་གསེར་གྱི་སྒོ་བརྒྱུད་དབུ་མ་ནས་སོང་རྩའི་འཁོར་ལོ་ཐམས་ཅད་གང་བར་བསམས་ལ་རླུང་སྦྱོར་༼༡༧ན༣༣༽བརྒྱས་གཞུག་པར་བྱས་ཏེ། མཐར་རང་ལུས་སྲ་བ་དང་སྣུམ་པ་དང་བཀྲག་པ་དང་། དྲོད་ཡང་རྩལ་ཕུན་སུམ་ཚོགས་པར་ལྡན། འཆི་བ་མེད་པའི་ཚེ་འགྲུབ་པར་བསམས་ཏེ་འོད་གསལ་བའི་ངང་དུ་གཞག་གོ། །གཉིས་པ་མ་ལྷུས་ན་འཆི་ཀ་མའི་རླུང་སེམས་གང་འདོད་དུ་འཕེན་པའམ་འཕོ་བ་བཤད་པ་ལ། ལུས་བཙན་ཐབས་ཀྱི་འཁྲུལ་འཁོར། ངག་བཙན་ཐབས་ཀྱི་སྲོག་རྩོལ། ཡིད་བཙན་ཐབས་ཀྱི་དམིགས་པ་གསུམ་ལས། དང་པོ་ནི། གྱད་ཀྱི་སྟོབས་ཀྱིས་སྒྲ་གཅན་ལས་སུ་རུང་། ཞེས་པས་བསྟན་ཏེ། རྐང་པ་པུས་གཙུགས་རྟིང་པ་ལ་ཕོང་ཚོས་གཏད། ལག་གཉིས་རྡོ་རྗེ་ཁུ་ཚུར་བསྣོལ་བསམ་ཆ་རྩ་བསྡམས་ཤིང་དམིགས་པ་དང་བསྟུ་ནས་གྱད་ལྕགས་ཀྱི་ཕ་བོང་འདེགས་པ་ལྟར་གྱེན་དུ་གཅུད་པའོ། །གཉིས་པ་ནི། དེ་ཚེ་གང་ཞིག་གཅུད་ལ། ཞེས་པས་ཏེ། རླུང་ཁ་སྦྱོར་མི་ཐུབ་ལ་ཁད་ཐུག་གཟུང་ནས་གྱེན་དུ་གཅུད་པའོ། །གསུམ་པ་ནི། རབ་ཏུ་འཕང་། ཞེས་རང་ཉིད་དུས་འཁོར་དང་སྤྱི་བོར་བླ་མ་མི་བསྐྱོད་པ་གཉིས་ཀ་སྟོང་ར་གསལ་བའི་སྐུའི་དབུས་སུ་དབུ་མ་ལྗང་ཁུ། རང་གི་དབུ་མའི་སྟེང་རྒྱ་མཐོངས་ལྟ་བུའོ་གཟུམ་པ་བླ་མའི་སྙིང་གའི་ཐད་དུ་ཐུགས་རྡོ་རྗེ་ཧཱུཾ། རང་གི་སྤྱི་བོར་རྣམ་པར་ཤེས་པ་ཨ་ཡིག་གསལ་བཏབ། རླུང་གཅུད་ཅིང་གྱེན་དུ་འཕང་དུས། ཧཱུཾ་གིས་ཨ་གྱེན་དུ་འཐེན་པས་བླ་མའི་ཐུགས་ཀར་ཐིམ་པར་བསམ་པས། སྤྱི་བོ་འཕར་བ་དང་ཆོག་པ་དང་དྲོད་དང་རྡུལ་འབྱུང་ཞིང་། བསམ་དུ་མེད་པ་ལ་གཞག་པས་གང་དུ་སྨོན་ལམ་བཏབ་པ་དེར་འཕོ་བར་འགྱུར་རོ། །བཞི་པ་བྱེད་ལས་ཀྱིས་བསྒྲུབ་པའི་འབྲས་བུ་ནི། སྲོག་རྩོལ་ཙམ་ནས་སངས་རྒྱས་ཀྱི་མིག་ཐོབ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ལུང་སྟོན་པ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་གྱིས་མཆོད་པ་ཞེས་ཀྱང་བྱའོ། །འཛིན་པ་གྲུབ་པས་རླུང་བཅུའི་འགྲོ་འོད་ཟད་ཅིང་གཅིག་ཏུ་འདྲེས་པ་བརྟན་པ་ལས་བདུད་དང་ཉོན་མོངས་པའི་ཚོགས་བཅོམ་ནས་སྟོབས་བཅུར་གྱུར་པའོ། །སྐུ་གསུང་ཐུགས་ཀྱི་རྡོ་རྗེ་རྣམ་པ་གསུམ། བཅུ་དྲུག་བརྟན་ཅིང་བཅུ་གཉིས་ཟིན་པས་ཐོབ། ༼༡༧བ༣༤༽ཅེས་གསུངས་ཏེ། བྱང་ཆུབ་ཀྱི་སེམས་འཁོར་ལོ་སོ་སོར་སླར་གཤེགས་པ་ན་ལྟེ་བའི་བར་དུ་ཕྱིན་པས་འདོད་པའི་ཁམས་རྣམ་པར་དག་ཅིང་ལུས་ཀྱི་ཐིག་ལེ་འགོག་པ་སྐུ་རྡོ་རྗེར་གྲུབ་པ། དཔྲལ་བར་འགོག་པས་གཟུགས་ཀྱི་ཁམས་དག་ཅིང་ངག་གི་ཐིག་ལེ་འགོག་པ་གསུང་རྡོ་རྗེ། གཙུག་ཏོར་དུ་ཕྱིན་པས་འཕོ་བའི་བག་ཆགས་གཟུགས་མེད་པའི་སྲིད་པ་དག་ཅིང་སེམས་ཀྱི་ཐིག་ལེ་འགོག་པ་ལྷན་ཅིག་སྐྱེས་པ་མངོན་དུ་བྱས་པ་ཐུགས་རྡོ་རྗེར་གྲུབ་ལ། གནས་སྐབས་འདི་ཙམ་པའི་བྱང་ཆུབ་ཀྱི་སེམས་རང་གནས་སུ་ཕྱིན་པའི་ལྷན་སྐྱེས་གཙུག་ཏོར་ཏུ་མྱོང་བ་ན་ཁུ་བ་གྱེན་དུ་རེངས་པའི་སྟོབས་ཀྱིས་ཁུ་བ་རྣམ་པ་ཐམས་ཅད་པ་རང་བྱུང་དུ་ཤར་བ་དང་། ཁྲག་འཐུར་དུ་སོང་བས་ནཱ་དའི་རང་སྒྲ་རྣམ་པ་ཐམས་ཅད་པར་འཆར་བ་ཡིན་ལ། སྲོག་གཟུགས་ཙམ་གྲུབ་པ་ལ་ཆ་མཐུན་པ་འཇིག་རྟེན་པའི་དབང་ཕྱུག་བརྒྱད་ཐོབ་པ་དང་། དབང་པོ་རྣོན་པོས་ཡེ་ཤེས་ཀྱི་སྐུར་གྲུབ་པ་ལ་དངོས་སུ་བཤད་དེ། ཏིང་ངེ་འཛིན་གྱི་སྐབས་ཇི་བཞིན་པ་སྟེ། འབྲིང་སྲོག་རྩོལ་ཙམ་གྱིས་གྲོལ་བའི་དབང་དུ་བྱས་པའོ། །འདིར་གཞུང་འགའ་ཞིག་གེགས་སེལ་གྱི་མཐར་དབྱུང་བ། དོན་གེགས་སེལ་རྣམས་སྲོག་རྩོལ་གྱིས་མ་དག་པའི་བྱེད་ལས་དེ་སྦྱངས་པས་འདིར་བཤད་པའི་དག་པའི་བྱེད་ལས་རྣམས་གྲུབ་པའི་ཕྱིར་རོ། །གསུམ་པ་ཡིད་ཐིག་ལེ་དག་པར་བྱེད་པ་ཐུགས་རྡོ་རྗེ་བསྒྲུབ་པ་ཆེན་པོའི་ཁྲིད་ལ། འཇིག་རྟེན་པའི་ལམ་རྫོགས་པར་བསྟན་པ་རྗེས་དྲན། འཇིག་རྟེན་ལས་འདས་པའི་ལམ་རྫོགས་པར་བསྟན་པ་ཏིང་ངེ་འཛིན་གཉིས་ལས། དང་པོ་ལ། དབང་པོ་རབ་གཏུམ་མོ་ལ་བརྟེན་པ། འབྲིང་རང་ལུས་ལ་བརྟེན་པ། ཐ་མ་གཞན་ལུས་ལ་བརྟེན་པ་གསུམ་ལས། དང་པོ་ལ། བྱེད་ཆིངས། སྲོག་རྩོལ། དམིགས་པ་གསུམ། དང་པོ་བྱེད་ཆིངས་ནི། ལུས་དང་མིག་བར་གྱི་སྐྱིལ་ཀྲུང་ཇི་ལྟ་བའམ། ཡང་ན་ལག་པ་པུས་བཀབ། དྲོད་མྱུར་བར་འདོད་ན་ཙོག་པུ་ལ་བརྟེན་པའི་བསམ་གཏན་གྱི་ཆོས་ལྔའོ། །གཉིས་པ་ནི། སྟེང་འོག་བར་གསུམ་རབ་ཏུ་བསྡམ་པར་བྱ། ཞེས་པས། རླུང་རོ་ལེགས་པར་བསལ། ལྡང་འཇུག་གནས་པ་ཡི་གེ་༼༡༨ན༣༥༽གསུམ་དུ་ངེས་པས་སྟེང་རླུང་ཤུགས་རྫོགས་པར་འོག་སྒོར་མནན། དེ་ནས་འོག་རླུང་དྲག་པོར་ལྟེ་བར་འཐེན། བར་གྱི་རླུང་བརྒྱངས་པ་དང་བསྲེས་ཡུམ་ཆེན་མོའི་གནས་སུ་གཅུད་པའོ། །གསུམ་པ་ལ། རླུང་གོས་སུ་བགོ་བ་སྔོན་འགྲོ། འབར་འཛག་ལ་བསླབ་པ་དངོས་གཞི། འབྲས་བུ་བསྟན་པ་རྗེས་སོ། །དང་པོ་ནི། སྔར་སྲོག་རྩོལ་དུ་བསྟན་པའི་གོ་རིམ་ཇི་ལྟ་བས་བདག་ཉིད་དུས་ཀྱི་འཁོར་ལོར་བསྐྱེད། མེའི་རླུང་གཟུང་ནས་ཕྱི་རོལ་རྣམ་པར་རྡོ་རྗེའི་ས་གཞིར་བ་གུར་བླ་རེ་རྡོ་རྗེ་མདའི་དྲ་བ་དང་བཅས་པ་དེའི་ཕྱི་ནང་ཐམས་ཅད་ཡེ་ཤེས་ལྔའི་བདག་ཉིད་ཀྱི་མའི་ཕུང་པོར་གཅིག་པ་མེས་འཇིག་བཞིན་པའི་བསྐལ་པ་ལྟ་བུར་བལྟའོ། །དེས་ལུས་ཐམས་ཅད་མེའི་གོང་བུ་ལྟ་བུར་འགྱུར་རོ། །གཉིས་པ་ལ། འབར་བས་རིགས་དྲུག་གི་ས་བོན་སྲེག་པ་དང་། འཇག་པས་བདེ་ཆེན་གྱི་འགྲོས་ལ་བསླབ་པ་གཉིས། དང་པོ་ནི། རིགས་དྲུག་ས་བོན་བསྲེགས་པར་གྱུར་པ་ལས། ཞེས་པ་སྟེ། འཛིན་པ་ཐོབ་ནས་ཆགས་པའི་སྟོབས་ཀྱིས་ཕྱག་རྒྱ་རྗེས་སུ་དྲན་པ་ཡིན་པས་རྗེས་དྲན་ཞེས་བྱ་ལ། འཛིན་པས་སྤྱི་བོའི་ཐིག་ལེར་སྲོག་འཆིངས་པས་གཏུམ་མོ་ཅུང་ཟད་འབར། དེའི་ནུས་པས་འདོད་པའི་གནས་སྐབས་བཅུ་འཆར་བའི་འགོ་ཙམ་ལ། དེ་ཉིད་དུ་རྫོགས་པ་དང་དག་པར་བྱེད་མ་ནུས་པས་ད་ནི་འདི་བསྒོམ་སྟེ། རང་ཉིད་དུས་ཀྱི་འཁོར་ལོར་གསལ་བ་དེ་ཉིད་སྟོང་ར་སོར་མོའི་བར་ཐམས་ཅད་ཀྱང་སྟོང་སང་ངེ་བའི་སྐུའི་གཙུག་ཏོར་གྱི་རྩའི་འཁོར་ལོ་ལྗང་ཁུ་འདབ་མ་བཞི། སྤྱི་བོར་ནང་སྐོར་བཞི། དེ་ནས་བར་བརྒྱད། དེ་ནས་ཕྱིར་བཅུ་དྲུག་ཡོད་པའི་རྩ་འཁོར་ལོ་ནག་པོ། མགྲིན་པར་ནང་དུ་བཞི་བར་བརྒྱད་བཅུ་དྲུག་དང་ཕྱིར་སོ་གཉིས་ཡོད་པའི་འཁོར་ལོ་དམར་པོ། སྙིང་གར་ནང་དུ་བཞི་ཕྱིར་བརྒྱད་ཡོད་པའི་འཁོར་ལོ་དཀར་པོ། ལྟེ་བར་ནང་དུ་བཞི་བར་དུ་བརྒྱན་བཅུ་གཉིས་ཕྱིར་དྲུག་ཅུ་རྩ་བཞི་ཡོད་པའི་འཁོར་ལོ་སེར་པོ། གསང་གནས་སུ་ནང་སྐོར་དྲུག་དང་བར་སྐོར་བཅུ་དང་ཕྱི་སྐོར་བཅུ་དྲུག་ཡོད་པའི་འཁོར་ལོ་སྔོན་པོ། གསང་གནས་སྟེང་དང་གཙུག་ཏོར་འོག་ཏུ་ཁ་ཕྱོགས་པ་ཤེས་༼༡༨བ༣༦༽རབ་དང་ཐབས། ལྟེ་བ་སྟེང་དང་སྙིང་ཀ་འོག་ཏུ་ཁ་ཕྱོགས་པ་ཤེས་རབ་དང་ཐབས། མགྲིན་པ་སྟེང་དང་དཔྲལ་བ་འོག་ཏུ་ཕྱོགས་པ་ཤེས་རབ་དང་ཐབས་སུ་གནས་པ་འཁོར་ལོ་དྲུག་པོ་དེའི་ལྟེ་བར་དབུ་མས་ཕུག་པ་དབུ་མའི་སྦོམ་ཕྲ་མདའ་སྨྱུག་ཙམ་པ་དྲང་པོར་གནས་པ་ལྗང་ཁུ་ཡས་སྣ་གཙུག་ཏོར་དུ་ཟད། མར་སྣ་གསང་བའི་འཁོར་ལོ་ནས་གཡས་སུ་འཁྱོགས་ཏེ་ནོར་བུར་ཟུག་པ། གཡོན་དང་གཡས་སུ་ལཱ་ལ་ན་དང་ར་སཱ་ན་གཉིས་དཀར་དམར་འདབ་མ་ལ་བརྟེན་ཅིང་འཁྱོག་བ་གནས་པ། འཁོར་ལོ་སོ་སོའི་ལྟེ་བར་དབུ་མ་ལ་ལུ་གུ་རྒྱུད་དུ་བཅིངས་ནས་དེར་ནང་གི་ཁོངས་གཅིག་པའི་བུ་ག་དབུ་མ་དང་གཅིག་ཏུ་བྱས་པ། སྟེང་དུ་གཙུག་ཏོར་ནས་འོག་ཏུ་ཕྱོགས་ཏེ་སྣའི་སྒོར་ཟུག་པ། གསང་གནས་ནས་གཉིས་སུ་གྱེས་ཏེ་བཤང་གཅིའི་ལམ་ལ་ཟུག་པ་གནས་ལུགས་ཇི་ལྟ་བ་སྒོམ། དེ་ནས་གཙུག་ཏོར་དུ་ཧཾ་ལྗང་ཁུ་མགོ་མེད་ཐིག་ལེ་ནཱ་དས་བརྒྱན་པ་འཐུར་དུ་བསྟན། སྤྱི་བོར་ཨོཾ་དཀར་པོ་འཐུར་བསྟན། མགྲིན་པར་ཨཱཿདམར་པོ་གྱེན། སྙིང་གར་ཧཱུཾ་སྔོན་པོ་འཐུར་བསྟན། ལྟེ་བར་ཧོ་སེར་པོ་གྱེན། གསང་གནས་སུ་ཀྵ་དམར་སེར་གྱེན་དུ་བལྟ་བར་བསམ་ལ། སྟེང་དུ་མེ་རླུང་གཟུང་ནས་སྣའི་སྒོ་ནས་རོ་རྐྱང་གི་ལམ་གཉིས་སུ་ཞུགས་ཏེ་གསང་བར་སླེབ། འོག་ནས་རླུང་འཐེན་དུས་འོག་རླུང་གིས་འཕུལ་བཞིན་པས་ལྟེ་བར་སླེབ་པར་རླུང་བརྒྱངས་ནས་གསུམ་པོ་བསྲེས་ཏེ། སླར་ཡུམ་ཆེན་མོའི་གནས་སུ་འཕུལ་བས་དབུ་མའི་ཁ་ནང་དུ་ཞུགས་ཏེ་ཀྵ་ཡིག་དང་རོ་མཉམ་པར་གྱུར་པས་ཀྵ་ཡིག་མེར་ཧུར་གྱིས་སོང་། མི་ཐུབ་ན་རྒྱབ་ཏུ་བཞར་ནས་རླུང་འཁུན་པ་དང་བཅས་པས་དབྱུང་ངོ་། །སྦྱོར་བ་དེས་ཙཎྜྻཱ་ལིའི་མེ་ཁབ་ཀྱི་རྩེ་ཙམ་དུ་ཕྲ་བ་གསང་གནས་ཀྱི་རྩ་ཐམས་ཅད་དུ་ཞུགས་ཤིང་། འོག་རྐང་པའི་སོར་མོའི་མཐར་ཐུག་པའི་བར་དུ་ཡང་སོང་། ལས་ཀྱིས་བསྒོས་པའི་བག་ཆགས་ཀྱི་དབང་གིས་གྲུབ་པའི་རྩ་གཟུགས་ཐམས་ཅད་བསྲེགས་ཏེ་ཐམས་ཅད་ཀྱང་རྩའི་དབྱིབས་མ་དོར་ལ་རང་བཞིན་མེར་སྣང་བསམ་གར་གྱི་སོལ་མལ་ན་ལྕགས་སོལ་བ་ཐམས་༼༡༩ན༣༧༽ཅད་མེར་སྣང་བ་བཞིན་དུ་བསྒོམ། དེ་ནས་མེ་ཡར་ལམ་གསུམ་ཀ་ནས་མཆེད་དེ་ལྟེ་བའི་ས་བོན་ལ་ཞུགས་པས་དེ་ཡང་འབར་ཏེ། དེ་ལས་གྱེས་པའི་རྩ་ཐམས་ཅད་གང་ཞིང་རྩ་གཟུགས་བསྲེགས་གཡོན་ནས་ཕུང་པོ་ལྔའི་ཆོས་ཅན་གྱི་ཡུམ་ལྔ་དང་། གཡས་ནས་ཁམས་ལྔའི་ཆོས་ཅན་གྱི་དེ་བཞིན་གཤེགས་པ་ལྔ་བསྲེགས། སླར་ཡང་གྱེན་དུ་སོང་བས་ཚུལ་དེ་ཉིད་ཀྱིས་སྙིང་མགྲིན་སྤྱི་བོ་གཙུག་ཏོར་གྱི་བར་གྱི་ཡི་གེ་ལ་ཞུགས་ནས་འཁོར་ལོ་སོ་སོ་ནས་གྱེས་པའི་རྩ་ཐམས་ཅད་བསྲེགས་པས་ལུས་སེམས་རླུང་ཐམས་ཅད་མེ་དང་ཚོགས་པ་གཅིག་པར་བསྒོམ་ཞིང་སྣ་སྒོ་ནས་འཐོན་པས་འཇིག་རྟེན་གྱི་ཁམས་ཐམས་ཅད་འབར་བར་ལྟའོ། །གཉིས་པ་འཛག་པས་བདེ་ཆེན་གྱི་འགྲོས་ལ་བསླབ་པ་ནི། འཛག་པའི་བདེ་བ་རིམ་བཞིན་སྐྱེ་བའི་ཕྱིར། ཞེས་པས་ཏེ། དྲོད་བརྟན་པར་གྱུར་ནས་ཆུ་རླུང་གཟུང་། ཐིག་ལེ་འཕེལ་བ་དང་བཅས་པས་འཁོར་ལོ་རྣམས་རིམ་པར་འགེངས་བཞིན་པ་ཉིད་ཀྱིས་ལྟེ་བའི་གཏུམ་མོ་ལ་ཁྲུས་གསོལ་བས། ཡང་ལྷག་པར་འབར་བའི་འོད་ཀྱི་གདུང་བས་རྩ་ཐམས་ཅད་ཡོངས་སུ་གང་བར་བསྒོམ་ཞིང་ཁམས་གཉིས་རོ་མཉམ་པའི་བདེ་བ་འོད་གསལ་བའི་ངོ་བོར་སོ་སོ་རང་གིས་རིག་པར་བྱའོ། །ཚུལ་འདིའི་རྣལ་འབྱོར་གོམས་པ་ན། མེའི་དྲོད་ཀྱིས་གཙུག་ཏོར་གྱི་བྱང་སེམས་ཞུ་བ་མགྲིན་པའི་བར་དུ་འོངས་པ་ནི་རྣམ་པ་སྣ་ཚོགས་པའི་སྐད་ཅིག་མ་དང་། དགའ་བ། ཕྱི་རོལ་དུ་དཀར་པོའི་ཚེས་གཅིག་ནས་ལྔའི་བར་དུ་དག་པ་ཡིན་ལ། དེ་བཞིན་དུ་སྙིང་གའི་བར་དུ་འོངས་པ་རྣམ་པར་སྨིན་པ་དང་མཆོག་དགའ། ཚེས་དྲུག་ནས་བཅུའི་བར་དང་། ལྟེ་བར་འོངས་པ་རྣམ་པར་ཉེད་པ་དང་ཁྱད་དགའ། བཅོ་ལྔའི་བར་དག་པ་དང་། ནོར་བུའི་རྩེ་མོའི་མཐར་ཐུག་བར་ཡོངས་སུ་གང་བ་ནི་༼༡༩བ༣༨༽མཚན་ཉིད་དང་བྲལ་བའི་སྐད་ཅིག་མ་དང་ལྷན་སྐྱེས་ཀྱི་དགའ་བ། བཅོ་ལྔའི་ཟླ་བའི་ཆ་ཡོངས་སུ་རྫོགས་ནས་ནག་པོའི་ཚེས་གཅིག་མ་ཞུགས་པའི་བར་གྱི་ཆ་བཅུ་དྲུག་པའི་སྐད་ཅིག་རྣམ་པར་དག་པའོ། །དེའི་ཕྱི་རིམ་བཞིན་སྐྱེ་ཞེས་གསུངས་སོ། །གསུམ་པ་འབྲས་བུ་བསྟན་པ་རྗེས་ནི། རྗེས་དྲན་ནས་ཤེས་རབ་ཀྱི་མིག་ཐོབ། འོད་ཀྱི་འཁོར་ལོ་ལུས་ལ་བསྐོར། རླུང་གིས་མེ་སྦར་ས་བསྲེགས་ཆུ་བཞུ་སྟེ། ནམ་མཁའ་སྟོང་པའི་དོན་ལ་འཇུག་པར་འགྱུར། ཞེས་པ་ནོར་བུའི་རྩེ་མོར་གནས་པའི་བྱང་ཆུབ་ཀྱི་སེམས་ཀུནྡ་དང་ཟླ་བ་ལྟར་དངས་པ་དྲི་མ་མེད་པའི་ཐིག་ལེའི་མ་འོང་དུ་སོ་སོ་རང་རིག་པའི་ཡེ་ཤེས་ཀྱི་མིག་རྡུལ་མེད་པས་རྣམ་པ་ཐམས་ཅད་པའི་སྟོང་པ་རིས་མེད་པའི་དཀྱིལ་འཁོར་གྱི་འཁོར་ལོ་མཐའ་ཀླས་པའི་སངས་རྒྱས་ཀྱི་སྤྲིན་སྤྲོ་བ་མཐོང་བ་ནི། དབུ་མའི་རླུང་གིས་སྟོང་པ་ཉིད་ཀྱི་མེ་སྦར་བ་ཞེས་བྱ་ལ། དེས་རགས་པ་སའི་ཁམས་བདག་པོར་བྱས་པའི་ལུས་ངག་ཡིད་གསུམ་བསྲེགས་ནས། ཆུའི་མཚན་ཉིད་ཅན་གྱི་ཁུ་བའི་བདེ་བར་བྱས་པ་ཡིན་ལ། ཁུ་བའི་བདེ་བ་ཉིད་སྟོང་པ་རིས་མེད་པར་འཆར་བཞིན་པ་དེ་ཡང་དྷཱུ་ཏཱིའི་ནམ་མཁའ་ཐམས་ཅད་སྟོང་པ་འོད་གསལ་བའམ། རྣམ་པ་མེད་པའི་མཆོག་ཏུ་མི་འགྱུར་བའི་བདེ་བ་འམ། ལྷན་ཅིག་སྐྱེས་པ་གཉུག་མའི་སེམས་སམ། དམིགས་པ་མེད་པའི་སྙིང་རྗེ་ཆེན་པོ་དེར་ཐིམ་མོ། །དེ་ནས་ཟུང་འཇུག་གི་སྐུར་ལྡང་སྟེ། དེའི་ཡོན་ཏན་གཟུགས་ཕྲ་བ་ལ་སོགས་པའི་དབང་ཕྱུག་བརྒྱད་དོ། །རིམ་གྱིས་མི་སློབ་པ་མ་ནིང་གི་གོ་འཕང་ཡང་འགྲུབ་སྟེ། དེའི་ཡང་ཡོན་ཏན་སྐུ་དང་གསུང་གི་དབང་ཕྱུག་ལ་སོགས་པ་བརྒྱད་དོ། །ཟུང་འཇུག་ཏུ་ལངས་པ་ཕྱིན་ནས་ཏིང་ངེ་འཛིན་དུ་བཞག་གོ། །གཉིས་པ་དབང་པོ་འབྲིང་རང་ལུས་ལ་བརྟེན་པ་ལ། དངོས་དང་། འཕྲོས་པ་ཤེས་རབ་མའི་རང་ལུས་ཀྱི་གདམས་ངག་གཉིས། དང་པོ་ལ། བསྐྱེད་རིམ་གསལ་གདབ་པ། ཡེ་ཤེས་སེམས་དཔའ་དགུག་ཅིང་གཞུག་པ། དེ་ལ་རྒྱས་གདབ་པ། དེ་ནས་རྗེས་བཅད་པ། དེ་ལམ་དུ་བཏང་བ་དང་ལྔའོ། །དང་པོ་ནི། རྡོ་རྗེ་བསླང་ཞིང་གསོར་བའི་བདེ་བ་ལས། ཐོག་མ་བར་དང་༼༢༠ན༣༩༽ཐ་མའི་བདེ་བ་འབྱུང་། དགུག་གཞུག་བཅིང་མཉེས་རོ་མཉམ་བརྟན་པར་བྱ། རིམ་པ་འདི་ཡིས་ངེས་པར་འགྲུབ་པར་འགྱུར། གལ་ཏེ་སྲོག་རྩོལ་གྱི་སྟོབས་ལས་གཏུམ་མོ་འབར་ཞིང་བྱང་སེམས་བསྐུལ་བར་དཀའ་ན། ཡིད་ཀྱི་རིག་མ་ལ་སློབ་པའི་རིམ་པ་འདིས་བསྒྲུབ་སྟེ། བདེ་བའི་སྟན་ལ་ལུས་སྙེས་ཅུང་ཟད་དང་བཅས་པས་རྐང་པ་གཡོན་པའི་སོར་མོ་གྱེན་ལ་གཏད། དེའི་རྟིང་པ་ལ་གཡས་པའི་སོར་མོ་བཙུགས་ཏེ་རྟིང་པས་སྒོ་གཉིས་ཀྱི་བར་བདེ་བ་རྒྱུ་བའི་རྩ་དེ་ལེགས་པར་ལྟེམ་མོ། །དེ་མ་ཐེབས་ན་བདེ་བའི་རྟེན་འཛག་པས་མན་ངག་དོན་མེད་དུ་འགྱུར་རོ། །དེ་ནས་གཡོན་པའི་ཡན་ལག་སྣུམ་གྱིས་གཤེར་བར་བྱས་ལ། རང་ཉིད་དུས་ཀྱི་འཁོར་ལོར་སྔར་བཞིན་དུ་བསྐྱེད། ལག་པ་དེ་སྣ་ཚོགས་ཡུམ་དུ་བསྐྱེད། རང་དང་ཤེས་རབ་གཉི་གའི་དཔྲལ་བར་ཨོཾ། མགྲིན་པར་ཨཱཿསྙིང་གར་ཧཱུཾ། ལྟེ་བར་ཧོཿ གསང་བར་སྭཱ། སྤྱི་བོར་ཧཱ་ཤེས་རབ་ཀྱི་གསང་གནས་མི་དམིགས་པའི་ངང་ལས། ཨ་ལས་པདྨ་འདབ་བརྒྱད་ཧཱུཾ་ལས་སྐྱེས་པའི་རྡོ་རྗེ་མཚན་པ། རང་གི་གསང་གནས་ཧཱུཾ་ལས་རྡོ་རྗེ་རྩེ་ལྔ་པ་ཨཱ་ལས་སྐྱེས་པའི་པདྨས་མཚན་པ་ནི་རྡོ་རྗེ་བསླང་བ་ཞེས་པའི་དོན་ཏོ། གཉིས་པ་ནི། དེའི་ཚ་ལག་པའི་ཕྱག་རྒྱས་རྡོ་རྗེ་བསྲུབ་ཅིང་། ཧཱུཾ་ཕཊ་ཀྱི་དོན་རྡོ་རྗེ་འཛིན་པའི་ང་རྒྱལ་གྱིས་སྙོམས་པར་ཞུགས་པས། ལྟེ་བའི་རྩ་འདབ་བདུན་ཅུ་རྩ་གཉིས་ཀྱི་ལྟེ་བའི་ནང་ན་ཧོ་ཡིག་ཡེ་ཤེས་ཀྱི་རྡོ་རྗེའི་རང་བཞིན་གཏུམ་མོ་ཡེ་ཤེས་ཀྱི་མེ་གསང་གནས་ཀྱི་གཡས་ཀྱི་རྩེ་མོ་ནས་འབབ་པས་ཕུང་པོ་ཁམས་སོགས་སྐུལ་བར་བྱེད་པ་དེ་རབ་ཏུ་འབར་བས་གཡོན་གྱི་དཀྱིལ་འཁོར་སངས་རྒྱས་ལྔ་དང་། གཡས་ཀྱི་དཀྱིལ་འཁོར་ཡུམ་ལྔ་དང་། མིག་སོགས་དབང་པོ་དྲུག །གཟུགས་སོགས་ཡུལ་དྲུག་པོ་རྣམས་བསྲེགས་ཏེ། རླུང་རྒྱུ་བ་མེད་པ་དབང་པོ་ཡུལ་ལ་འཇུག་པ་མེད་པར་བྱས་ནས་མེ་དེ་ཨ་ཝ་དྷཱུ་ཏཱི་ནས་སོང་སྟེ་སྤྱི་བོའི་ཐིག་ལེའི་གཟུགས་ཅན་ལ་རེག་པས་ཧཾ་ཞུ་ནས་ནོར་བུའི་སྣ་རྩེར་ཟླ་བའི་ཆ་བཅོ་ལྔ་ཡོངས་སུ་གང་བའི་ཚུལ་དུ་བྱོན་པ་ནི་ཆགས་༼༢༠བ༤༠༽པའི་ཕྱོགས་ཐོག་མའི་དགའ་བ། དེར་འཆིང་བར་མ་ནུས་ན་ཕྱིར་ལྷུང་བ་དགའ་བ་བྲལ་བ་ཐ་མའི་གནས་སྐབས། དེ་གཉིས་ཀྱི་དབུས་སམ་བར་དུ་མདུན་རླུང་སྟེང་དང་། རྒྱབ་རླུང་འཐུར་དུ་འཕུལ་ནས་བཅིངས་ཏེ་པདྨ་དང་རྡོ་རྗེའི་སྣ་རྩེར་ཐིག་ལེ་འཛོམ་པའི་ཀུནྡ་ལྟ་བུའི་བྱང་ཆུབ་སེམས་ཀྱི་ཐིག་ལེའི་ནང་དུ་པྲ་ཕབ་པ་ལྟ་བུའི་ཡེ་ཤེས་ཀྱི་སྣང་བ་སྤྲོས་ཏེ་མི་འཕོ་བའི་བདེ་བའི་འོད་ཟེར་གྱིས་སྲིད་གསུམ་མཐའ་དག་དུས་གསུམ་ཅིག་ཅར་དུ་ཤེས་པའི་ལྷའི་རྣལ་འབྱོར་གྱི་དཀྱིལ་འཁོར་གྱི་འཁོར་ལོ་སྤྲོ་བར་བྱའོ། །ལས་དང་པོ་པས་ནི། གཙུག་ཏོར་གྱི་དགའ་བའི་ཡེ་ཤེས་པ་གནས་གཞན་མགྲིན་པར་དགུག་པ་ནི་དེར་འབེབས་པའོ། །གཞུག་པ་ནི་འཛིན་པ་སྟེ་རླུང་སེམས་དབུ་མར་གཞུག་པའི་འཁྲུལ་འཁོར་གྱིས་སོ། །དེ་ལ་གོམས་ནས་མཆོག་ཏུ་དགའ་བའི་ཡེ་ཤེས་པ་སྙིང་གར་དགུག་ཅིང་གཞུག །དེ་ལ་གོམས་ནས་ཁྱད་དགའི་ཡེ་ཤེས་པ་ལྟེ་བར་དགུག་ཅིང་གཞུག །དེ་ནས་ལྷན་སྐྱེས་ཀྱི་ཡེ་ཤེས་པ་ནོར་བུའི་རྩེར་དགུག་པར་བསམ་ཞིང་གནས་སུ་གཞག་གོ། །དེ་ནི་གསོར་བའི་བདེ་བ་ལས། ཐོག་མ་བར་དང་ཐ་མའི་བདེ་བ་འབྱུང་། དགུག་གཞུག་ཅེས་པའི་དོ་ཏེ། འདིར་ནི་དྲག་པོར་བསྐུལ་བའི་དབང་གིས་ལྷན་སྐྱེས་བར་དུ་བཞག་པ་སྟེ། རྒྱུད་ལས་ཀྱང་། ཆགས་དང་ཆགས་བྲལ་མཐའ་ཐོག་ལ་གནས་སྐད་ཅིག་མ་ཡང་ཁྱབ་བདག་གི་ནི་དབུགས་ཀྱི་གྲངས་འཕེལ་ལོ། །ཞེས་སོགས་ཀྱིས་སོ། །གསུམ་པ་ནི། གསང་བའི་སྣ་རྩེར་ལྷུང་བའི་ཐིག་ལེ་དེ། ཇི་ལྟར་བྱོན་པ་བཞིན་དུ་རྒྱུ་མཐུན་པའི་འབྲས་བུའི་ཚུལ་དུ་ལྟེ་བར་གཤེགས། རྣམ་སྨིན་གྱི་ཚུལ་དུ་སྙིང་ག །སྐྱེས་བུ་བྱེད་པའི་ཚུལ་དུ་མགྲིན་པ། དྲི་མ་དང་བྲལ་བའི་ཚུལ་དུ་སྤྱི་བོར་གཤེགས་པར་མོས་ཏེ། གསང་བ་ཙོག་པུའི་འདྲེན་བཞི། ནང་ཉལ་བའི་འདྲེན་བཞི། ཕྱི་ལངས་པའི་འདྲེན་བཞི་པོ་ཐམས་ཅད་མདུན་རླུང་གནོན་རྒྱབ་གྱེན་དུ་གཅུད་ཅིང་འདྲེན་པས་བྱའོ། །འདིས་ནི་མི་འཕོ་བར་བྱེད་པ་ཡིན་པས་རྒྱས་བཏབ་པ་ཞེས་གསུངས་ཏེ་བཅིང་བ་ཞེས་པའི་༼༢༡ན༤༡༽དོན་ཏོ། ལས་དང་པོ་པ་ལ་གནས་གཞན་དང་པོར་གཞུག་པའི་དུས་དེ་ས་བཟློག་པ་སོགས་བྱ། དེ་ལ་གནས་དང་པོ་དང་གཉིས་པ་གཉིས་པ་གཉི་གར་གཞུག་སྟེ་བཟློག །དེ་ལ་གོམས་ནས་གསུམ་པ་དང་། མཐར་བཞི་པ་སྟེ་དེ་ནས་ཁྱད་པར་མེད་དོ། །བཞི་པ་ཕྱི་ལངས་པའི་བཀྲམ་བཞི། ནང་ཉལ་བའི་བཀྲམ་བཞི། གསང་བ་ཙོག་པུའི་བཀྲམ་བཞི་རིམ་པས་རླུང་གསུམ་སྦྱོར་བུམ་པ་ཅན་གྱིས་སོ། །རྩའི་གནས་ཐམས་ཅད་དུ་རླུང་གིས་ཐིག་ལེ་ཁྲིད་དེ་ཕྱིན་པས་བདེ་བ་སྐྱེས་པ་ལ་རྣམ་པར་མི་རྟོག་པར་བཞག་གོ། །དེ་ནི་མཉེད་པ་ཞེས་པའི་དོན་ཏེ་ལུས་ཀྱི་གནས་ཐམས་ཅད་དུ་ཉེད་པ་ཡིན་པས་ཕྱིན་ཆད་མི་འཕོ་བས་རྒྱུ་མཚན་དེས་རྗེས་བཅད་པ་ཞེས་ཀྱང་བྱའོ། །ལྔ་པ་ལ། རླུང་གིས་ལམ་དུ་བཏང་བ། སྟོང་པ་རྒྱས་གདབ་པ། རྩིགས་མ་འཐུར་དུ་འབེབས་པ། འགྲུབ་པའི་གནས་སྐབས་བཤད་པ་བཞི་ལས། དང་པོ་ནི། འགྲེམས་རྫོགས་པའི་མཐར་རླུང་གསུམ་སྦྱོར་ཐངས་འགའ་རེ་བསྒོམས་ཏེ། དེ་མ་བསྒོམས་ན་ས་དབང་དུ་སོང་སྟེ་གཉིད་ཀྱི་རྒྱུ་བྱེད་ལ། བདེ་བ་ཆེན་པོའི་ཡེ་ཤེས་མི་བསྐྱེད་པས་སོ། །རོ་མཉམ་ཞེས་པའི་དོན་ཏོ། གཉིས་པ་དེ་ནས་རྣམ་པར་མི་རྟོག་པའི་ངང་དུ་གཞག་ནས་བདེ་བ་རང་རྒྱུད་པར་མེ་ཤོར་བར་བྱའོ། །བརྟན་པར་བྱ་བའི་དོན་ཏོ། གསུམ་པ་ནི། མཐར་ཕོ་སྐེད་ལྟེ་བ་བསྐོར་ཞིང་འོག་སྒོ་འབྱེད་འཛུམ་བྱས་ནས་བར་གནོན་གསུམ་ལ་སོགས་པས་རྩིགས་མ་འཐུར་དུ་འབེབས་དགོས་ཏེ། གཞན་དུ་ལུས་ནག་པ་དང་། ཤ་ལྷད་དང་། དབང་པོ་མི་གསལ་བར་འགྱུར་བའོ། །འདི་ནི་རིམ་པ་འདིའི་ཞེས་པའི་ཤུགས་བསྟན་ཏེ། ལམ་རིམ་པ་འདིས་རྩིགས་མ་འཐུར་དུ་འབྱིན། དངས་མ་ལུས་ལ་རྒྱས་པར་བྱེད་པའི་ཕྱིར་རོ། །འཐུལ་ཚུལ་ནས་འདྲེན་ལྟ་བུ་གཅིག་ལ་ཡང་། རླུང་སེམས་སྟེང་གི་སྒོ་འབའ་ཞིག་ཏུ་བཅིང་བ་འདྲེན་གྱི་འདྲེན། ཐད་ཀར་གཅུད་པ་འདྲེན་གྱི་འགྲེམས། འཐུར་དུ་བཅུད་པ་འདྲེན་གྱི་འགྲེམས། འཐུར་དུ་བཅུད་པ་འདྲེན་གྱི་འབེབས། དེ་བཞིན་དུ་འགྲེམས་འབེབས་ལའང་འདྲེན་གཙོ་བ། འགྲེམས་དང་འབེབས་གཙོ་བ་ཞེས་འབྱེད་ཅིང་རེ་༼༢༡བ༤༢༽རེས་དོན་འགྲུབ་་་་ལག་པའི་ཆུ་སྐྱེས་ཀྱང་རེ་མོས་སུ་བྱ་སྟེ་གཅིག་ཁོ་ནས་བསྲུ་བས་ན་ཕྱོགས་གཞན་སྐམ་པའི་ཉེས་པར་འགྱུར་རོ། །བཞི་པ་ནི། ངེས་པར་འགྲུབ་པར་འགྱུར། འདིས་ནོར་བུར་ལྷན་སྐྱེས་རྟོགས་ནས་སྟོང་པ་ཉིད་དུ་ཤར་བའི་སྟོང་ཉིད་དེ་ཕྱག་རྒྱ་ཆེན་མོ་ཡིན་ལ། དེ་རྣམ་པ་མེད་པའི་གཉུག་མའི་སེམས་སུ་ཞི་བར་བྱེད་ཐུབ་པས་མཆོག་ཏུ་མི་འགྱུར་བའི་བདེ་བའི་སྐད་ཅིག་དང་པོ་མངོན་དུ་གྱུར་པ་ནས་ཉི་ཁྲི་ཆིག་སྟོང་དྲུག་བརྒྱ་མངོན་དུ་གྱུར་པའི་བར་འགྲུབ་ཅེས་པའོ། །དེ་ལྟ་བུའི་ཞུ་བའི་བདེ་བའི་ཟད་པ་དེ་དག་ཉིད་རིགས་དྲུག་ཡིན་ཏེ། རྒྱུད་ཕྱི་ལས། འཛག་མེད་དགའ་བ་ཁུ་བ་རྡོ་རྗེ་ཡང་སྟེ་དེ་འཛིན་པ་ལས་ངེས་པར་རྡོ་རྗེ་འཛིན་པའོ། །ཞེས་པ་ལ་སོགས་པ་གསུངས་སོ། །གཉིས་པ་འཕྲོས་པ་ཤེས་རབ་མའི་རང་ལུས་ཀྱི་གདམས་ངག་ནི། ཆགས་ལྡན་གྱི་བུད་མེད་འཇའ་ལུས་སུ་བྱེད་པའི་རླུང་གནད་དོ། །སྐྱེས་པ་ལ་ཡང་གོམས་པས་ཉི་མ་སྟོང་དུ་གནོན་པར་བྱེད་པའི་རྒྱུར་གསུངས་སོ། །དེ་ཡང་། སྔོན་འགྲོའི་དུས་སུ་གཡོན་པའི་ཡན་ལག་གིས། སྣུམ་འདྲེན་ཆུ་སྐྱེས་དག་ལ་བདེ་བ་བསྒོམ། དབབ་དང་གཟུང་བཟློག་དགྲམ་པའི་ལས་རྣམས་ཀྱིས། དངོས་གཞིའི་དུས་སུ་གདེངས་དང་ལྡན་པར་འགྱུར། རིན་ཆེན་མཁའ་འགྲོས་གནང་བའི་གདམས་ངག་ཡིན། ཞེས་པས། སེམས་སྐྱིལ་ལེགས་པར་བཅས་པའི་རྟིང་པ་གཡོན་པས་སྒོ་གཉིས་ཀྱི་མདུད་བྱང་སེམས་རྒྱུ་བའི་རྩ་བཅིང་། ལག་པ་གཡས་བསྲངས་ཐལ་མོ་ཁ་སྦུབ་ཕྱིར་བཀན་པའི་སོར་མོའི་ཁར་ཕོང་ཚོས་བཞག །གཡོན་པས་ཤོ་མང་གི་རྩ་བ་ཤིན་ཏུ་འཇམ་པ་རྡོ་རྗེའི་དབྱིབས་བདེ་བ་བསྐྱེད་པའི་རྫས་དང་སྣུམ་གྱིས་ཤིན་ཏུ་འཇམ་པར་བྱས་པ་ལག་པས་བཟུང་སྟེ། དེ་བཅོམ་ལྡན་འདས་སུ་དང་། བདག་ཉིད་སྣ་ཚོགས་ཡུམ་དུ་བསྐྱེད་མཁའ་གསང་བྱིན་གྱིས་བརླབས་ཏེ། བཅོམ་ལྡན་འདས་མའི་ང་རྒྱལ་གྱིས་སྙོམས་པར་གཞུག་ཅིང་རྫས་ཀྱི་བོ་ལས་ཆུ་སྐྱེས་བསྲུབས་ཏེ་བདེ་བ་ལ་སེམས་གཟུང་ཞིང་གློད། མཐར་གསང་གནས་ཐུག་འབེབས་སོ། །དམར་ཆ་འཛིན་པའི་འཁྲུལ་འཁོར་གྱིས་༼༢༢ན༤༣༽འཛིན། དེ་ནས། རླུང་ཅན་རླུང་མེད་དག་གིས་ཉི་ཟླ་བཟུང་། །གླིང་བཞི་བཅུད་ཅིང་ཉིད་ལག་བསྐུམ་དང་བསྒྲད། །རྒྱ་མཚོ་བཀོལ་ལ་སྲིན་པོའི་གཏིང་དུ་མནན། །སྒྲ་གཅན་རྒྱས་པས་སྐྱོན་དག་ཡོན་ཏན་རྫོགས། །རྡོ་རྗེ་མཁའ་འགྲོས་གནང་བའི་གདམས་ངག་ཡིན། །རླུང་བཟུང་མ་བཟུང་གང་གིས་ཀྱང་རུང་། ལག་པ་གཡོན་པའི་མཐེབ་སྲིན་གྱིས་མགྲིན་པའི་རྦ་རླབས་ལྟེམས་ལ་ཉམས་འཆར་དུ་བཅུག །ཚིལ་ཏེ་ཤར་བ་ནས་གླིང་བཞི་བཅུད། ཉིང་ལག་རྣམས་ལ་འཆུན་འདོན་རླུང་སེམས་ལྟོ་བ་བརྒྱངས་ནས་སྲིན་པོའི་ཁར་དྲག་ཏུ་འཕུལ། དེས་ཉམས་ཡལ། ཡང་སྔར་བཞིན་ལས་ཆེ་བ་ཙམ་དུ་འཆར་དུ་གཅུག །འགྲེམས་དྲག་པོ་བྱས་ཀྱང་ཁོའི་ཉམས་ཤུགས་ཆོས་ནས་འཕྲོ་མཆོད་ཀྱང་སྐྱོན་དུ་མི་འགྱུར་བས་ཉམས་རྒྱ་ཡན་དུ་བཏང་ངོ་། །རེས་ཤིག་ནས་ཁོ་རང་གཉིད་སད་པ་བཞིན་སངས་འགྲོ་བས་དེ་རང་དྲན་པས་ཟིན་མ་ཐག་ཏུ་འགྲེམས་དྲག་པོར་གཅུད་པ་ཡིན། དེ་ལྟར་ཡང་ཡང་སྦྱངས་པས་ཉམས་སྣང་དེ་དང་འགྲེམས་ནུས་ཤུགས་འགྲན་པས་མཇུག་ཏུ་འགྲེམས་ཁ་རྒྱལ་ནས་ཤུགས་དྲག་གི་ཉམས་སྣང་དེ་རང་དབང་ཐོབ་པའི་གསལ་སྟོང་དུ་ཤར་ནས་རྩ་རླུང་ལ་དབང་ཐོབ། དབུ་མ་རྩོལ་མེད་དུ་རྒྱས་ནས་མི་འགྱུར་བའི་བདེ་བར་འཆར་བའི་གྲོགས་བྱེད་དོ། །དེས་ནི་བཟུང་བཟློག་དགྲམ་པ་ཅིག་ཅར་དུ་འགྲུབ་པར་བྱེད་པ་ཡིན་ནོ། །དེ་ནས། ཏིང་འཛིན་རླུང་དང་ལག་པའི་ཕྱག་རྒྱ་ཡིས། བྱང་སེམས་བདེ་བ་ཆེན་པོར་ཕབ་བྱས་ནས། རྒྱ་མཚོ་བཅོལ་ཞིང་སྨད་ལ་དགྲམ་པར་བྱ། །རླུང་སེམས་ཐིག་ལེ་གྱེན་དུ་བུད་པ་སེལ། །པདྨ་མཁའ་འགྲོས་གནང་བའི་གདམས་ངག་ཡིན། དེ་ནས་ཡང་དང་ཡང་དབབ་ཅིང་མཐར་གསུས་པ་མདུན་དུ་བརྒྱངས་ཤིང་ཁྱད་པར་ལྟེ་འོག་ཏུ་འཕུལ། རྡོ་རྗེ་སྐྱིལ་ཀྲུང་གིས་ཉྭ་བཞི་བསྒྲིམ་ཞིང་སྨད་གཅུད། རྐང་སོར་གཉིས་བསྐུམ། འོག་སྒོ་གཉིས་འཕུལ། དམིགས་པ་ནམ་མཁའི་མཐོངས་སྤྲིན་གྱི་ཁྲོད་དུ་ཟླ་བའི་དཀྱིལ་འཁོར་ལྔ་ཚོམ་ལ་སེམས་གཏད། མཐར་གླིང་བཞི་གཅུད་འབོར་འཕར་གནོན་ལ་སོགས་པའི་༼༢༢བ༤༤༽འབེབས་བྱ། དེ་ནས། སྨད་ཀྱི་ཉྭ་བཞི་གཡས་གཡོན་སྟེང་འོག་རྡེབ། སྟོད་ཀྱི་ཉྭ་བཞི་ཁུ་ཚུར་གྱེན་དུ་བརྒྱངས། བདེ་དྲོད་རླུང་གཉིས་ཐབས་ཤེས་གཅིག་ཏུ་བསྡུ། ཤེས་རབ་དངས་མ་དམར་པོ་དབང་དུ་འགྱུར། སྣ་ཚོགས་མཁའ་འགྲོས་གནང་བའི་གདམས་ངག་ཡིན། རྐང་པ་གཡོན་བསྐུམ་གཡས་པ་དེའི་སྟེང་དུ་བཞག་པས་པུས་མོ་གཉིས་ཐད་ཀར་བརྩེགས་གཡོན་པའི་རྟིང་པས་བཤང་གཅིའི་བར་ལྟེམ། གཡས་པའི་རྟིང་པ་གཡོན་པའི་ཕྱི་ལོགས་སུ་སླེབ་པར་བྱས་ནས་དལ་མོ་དགྱེ་བོར་བཏང་། ཚིགས་པ་བསྲང་། དཔུང་པ་ཕྱིར་བརྒྱང་ཞིང་གྱེན་དུ་གཏོད། ལག་པ་གཉིས་རྡོ་རྗེ་ཁུ་ཚུར་བརླའི་སྟེང་དུ་བཙུགས། ལྕེ་རྐན་ལ་སྦྱར། མིག་གྱེན་ལ་བཟློག །ཉན་བྱེད་སྲེད་བྱ། རླུང་གཉིས་པོ་གཅིག་ཅར་དུ་བསྡུས་ནས་དབུ་མ་བཙུགས་ཏེ་དམིགས་པ་སྤྱི་བོའི་ཧཾ་ལ་བསྟིམ་སྟེ་ཙམ་ཐུབ་བྱ། མཐར་འགྲེམས་འབེབས་རླུང་དང་བསྲེ་བ། སྟོང་པས་རྒྱས་གདབ་པ། རྩིགས་མ་འཐུར་འདོན་རྣམས་བྱའོ། །སྨད་ཁོ་ནར་བཟློག་ཅིང་དགྲམ་པ་ནི། །དམར་ཆ་གྱེན་དུ་འཕོ་བ་འཆིང་བ་ཡིན་ལ། །མན་ངག་འདི་ནི་སྔར་ཞལ་ཤེས་སུ་མཛད་དོ། །དེའི་ཕྱིར། ཐབས་ཀྱི་མེ་གསུམ་རབ་ཏུ་སྦར་བ་དང་། །ཤེས་རབ་ལ་ཡང་མེ་གསུམ་དེ་བཞིན་ཏེ། །ཞེས་སྐྱེས་པ་དང་བུད་མེད་གཉིས་ཀ་ལ་རྗེས་ཆགས་ཀྱི་མེ་གསུམ་གསུམ་སྟེ། ལང་ཚོ་དུས་ཀྱི་མེ། སྒོམ་པ་ཏིང་ངེ་འཛིན་གྱི་མེ། སྦྱོར་བ་བསྒྲུབ་པ་ལས་བྱུང་བའི་མེ་སྟེ་གསུམ་ཡོད་པས་ཇི་ལྟར་སྐྱེས་པ་བཞིན་ཤེས་རབ་བུད་མེད་ཀྱིས་ཀྱང་གཏུམ་མོ་རང་ལུས་ཀྱི་ལམ་འདིས་སྦར་བར་བྱའོ་ཞེས་པའི་དོན་ཏོ། གསུམ་པ་དབང་པོ་ཐ་མ་གཞན་ལུས་ལ་བརྟེན་པ་ལ། བསྒྲུབ་པའི་སྔོན་དུ་འགྲོ་བ། གང་ལ་བརྟེན་ནས་ཚུལ་ཇི་ལྟར་བསྒྲུབ་པ་གཉིས་ལས། དང་པོ་ལ། ལུས་ཟུང་བསྐྱེད་པ་བཅུད་ལེན། ཕྱག་རྒྱ་བརྟག་པ། དགུག་པ། མི་སྣང་བར་བྱ་བ་བཞི། དང་པོ་ནི། གསོ་དཔྱད་ཀྱི་གཞུང་ལས། བཅུད་ལེན་དང་རོ་ཙ་གཉིས་སུ་བཤད་པའི་དང་པོས་ནི་རྒ་བ་ན་བ་འཆི་བ་འཆིང་བ་ཡིན་ལ། གཉིས་པས་ནི་ལུས་ཀྱི་ཁུ་བ་རྒྱས་པས་ཆགས་པ་སྤེལ་བ་ལས་འདིར་ཕྱི་མ་སྟེ། སྙིང་དཀར་༼༢༣ན༤༥༽ནག་གི་མཚམས་ན་རོ་ཙ་ནའི་ཐིག་ལེ་གནས་པ་དེ་རྒྱས་པ་ལས་མདངས་སྟོབས་ཆགས་པ་འཕེལ། རྒུད་པ་ལས་མདངས་ཤོར། ཤེད་ཆུང་། འདོད་པ་སྤྱོད་མི་ནུས་པས་སོ། །རོ་ཙའི་སྨན་གྱིས་ཐིག་ལེ་དེ་འཕེལ་བར་བྱེད་པ་ཡིན་ནོ། །བདུད་རྩི་ལྔ་དང་དངུལ་ཆུ་ལ་སོགས་པའི་སྦྱོར་བས་ནི་གཉིས་ཀ་སྒྲུབ་པ་ཡིན་ནོ། །གཉིས་པ་ནི། སྤྱིར་བྱང་ཆུབ་ཀྱི་སེམས་འདིས་རྒྱས་གདབ་པར་བྱ་བས་ཕྱག་རྒྱའོ། །བྱེ་བྲག་ལུས་ཀྱི་ལས་གང་དང་གང་གི་ཁུ་བ་ལ་བརྟེན་པའི་བྱང་ཆུབ་སེམས་ཀྱིས་རྒྱས་གདབ་པར་བྱ་བས་ལས་ཀྱི་ཕྱག་རྒྱ་སྟེ་བུད་མེད་ལ་བྱའོ། །དེའི་རིགས་རྣམ་པར་ཕྱེ་ན། ས་དང་ཆུ་དང་མེ་དང་རླུང་རྣམས་དང་། ནམ་མཁའ་ལས་སྐྱེས་དེ་བཞིན་གཤེགས་པའི་ཡུམ། ཇི་ལྟར་སྲིད་ལག་གི་རྩ་བར་འཁོར་ལོའི་མཚན་མ་དང་། མདོག་སེར་བ་དང་། ང་རྒྱལ་ཤས་ཆེ་བ་དང་། བྲམ་ཟེ་མོ་ནི་ས་ཁམས་ལས་བྱུང་བ་སྤྱན་མའི་རིགས། པདྨའི་མཚན་མ་དང་། དཀར་བ་དང་། འདོད་ཆགས་ཤས་ཆེ་བ་དང་། རྒྱལ་རིགས་ནི་ཆུའི་ཁམས་ལས་བྱུང་བ་མཱ་མ་ཀཱའི་རིགས། རིན་པོ་ཆེའི་མཚན་མ་དང་། མདོག་དམར་བ་དང་། ཞེ་སྡང་ཤས་ཆེ་བ་དང་། ང་རྒྱལ་ཤས་ཆེ་བ་དང་། གར་མ་ནི་མེའི་ཁམས་ལས་བྱུང་བས་གོས་དཀར་མོ། རལ་གྲིའི་མཚན་མ་དང་། མདོག་ནག་པ་དང་། ཕྲག་དོག་ཤས་ཆེ་བ་དང་། ཚོམ་མ་ནི་རླུང་ཁམས་ལས་བྱུང་བ་སྒྲོལ་མའི་རིགས་སོ། །རྡོ་རྗེའི་མཚན་མ་དང་། མདོག་སྔོ་བ་དང་། གཏི་མུག་ཤས་ཆེ་བ་དང་། གཡུང་མོའམ་གཏུམ་མོ་ནི་ནམ་མཁའི་ཁམས་ལས་བྱུང་བ་ནམ་མཁའི་དབྱིངས་ཀྱི་དབང་ཕྱུག་མའི་རིགས་སོ། །རྣལ་འབྱོར་པའང་དེ་བཞིན་གཤེགས་པ་ལྔའི་རིགས་སུ་ངེས་པས། ཐབས་ཀྱང་རྒྱལ་བ་རྣམས་ཀྱིས་རབ་ཕྱེ་བ། ཞེས་གསུངས་ལ། རྣལ་འབྱོར་པ་གང་ལ་ཕྱག་རྒྱ་གང་ཤིས་པ་ནི། རང་རང་རིགས་དང་ལུས་དང་བསམ་པ་ལས། རིགས་ནི་གཞན་དང་ཞེས་པས། རང་གི་རིགས་ལ་འཁྱུད་པར་མ་གསུངས་ཏེ། ལུས་ལ་བསམ་པ་རབ་ཏུ་ཞུགས་པའི་དབང་གིས་དགྲ་དང་སྤྲད་པར་བྱ་སྟེ། རྣམ་སྣང་གི་རྣལ་འབྱོར་པས་སྒྲོལ་མའི་རིགས་ཀྱི་བུད་མེད་བསྟེན་པར་བྱ་བ་སོགས་ཀྱིས་སོ། །འདྲེས་༼༢༣བ༤༦༽མ་གང་ལ་ཡང་། དེ་དང་དེ་ཡི་ཡབ་ཡུམ་རིགས་ཀྱིས་འགྲུབ། ཅེས་པ་ནི། རྡོ་རྗེའི་རིགས་ཀྱི་རྣལ་འབྱོར་པ་ལ། དེ་ཐམས་ཅད་ཀྱིས་འགྲུབ་སྟེ། རིགས་འདིར་རིགས་ཐམས་ཅད་གཅིག་པའི་ཕྱིར་རོ། །ཡང་ན་གཉིས་སུ་ཕྱེ་སྟེ། ཡང་ན་ཐབས་ཀྱང་ཟླ་བ་ཉི་མའི་རིགས། ཞེས་པས་མེ་ཐབས། ཆུ་ཤེས་རབ་སྟེ་གཉིས་སུ་ཐམས་ཅད་བསྡུས་པས་སོ། །ཤེས་རབ་ཀྱང་ནི་ཉི་མ་ཟླ་བས་ཏེ། ཞེས་པ། བུད་མེད་གང་རྡུལ་གནམ་སྟོང་ལ་འབབ་པ་དང་། རྡུལ་ཉ་ལ་འབབ་པའི་དབྱེ་བས་སོ། །དེ་དག་ཀྱང་རང་བཞིན་གྱི་དང་། གནས་དང་། ཞིང་དང་། རིགས་དང་། སྔགས་དང་། མཐར་སྐྱེས་ཀྱི་རྣལ་འབྱོར་མར་ཕྱེ། རྩ་རིགས་ཀྱིས་དུང་ཅན། རི་མོ་ཅན། གླང་སྣ་མ། མཆོག་པདྨ་ཅན་ཏེ་བཞི། ན་ཚོད་ཉིར་གཅིག་ནས་ཉེར་ལྔའི་བར་དབང་གི་རྟེན། ཉི་ཤུ་མ་མཁའ་སྤྱོད་ཀྱི། བཅུ་དྲུག་མ་མཆོག་བསྒྲུབ་པའི། བཅུ་གཉིས་མ་དམ་ཚིག་གི། བཅུ་གཅིག་མ་འཇའ་ལུས་ཀྱི་དོན་དུ་བསྟེན། ལྷག་མ་ཉེར་དྲུག་མན་ནི་བདེ་བ་སྐྱོང་བའི་རྟེན་ཙམ་དུ་རུང་གིས། དམར་ཆ་བསྡུ་བའི་རྟེན་དུ་མི་རུང་ངོ་། །མདོར་ན་ལུས་མཛེས་སྡུག་གི་དཔྱིད་ཐམས་ཅད་ཀྱིས་བརྒྱན་པ་སྨིན་མཚམས། བྷ་གའི་སྟེང་དུ་རི་མོ་གྱེན་བསྒྲེང་གསུམ་གཤིབས་སམ་གཅིག་ངེས་པར་ཡོད་པ། སྐེད་པ་ཕྲ་ཞིང་སྟོད་སྨད་རྒྱས་པ། ལྟོ་གཡས་སུ་འཁྱིལ་ཞིང་ཟབ་པ། ནུ་མ་མ་ཁྲང་ལ་བྷ་ག་རུ་སྦལ་གྱི་རྒྱབ་འདྲ་བར་འབུར་ཞིང་སྤུ་མེད་པ། ནང་དོག་ཅིང་དྲོད་ཆེ་ལ་ཆུ་ཆུང་ཞིང་གསང་རྩ་ཕྱིར་འཐོན་པ་དེ་མཆོག་ཏུ་ཤིས་སོ། །གསུམ་པ་དགུག་པ་ནི། སྔར་བཤད་པས་སམ། རྫས་སྔགས་ཏིང་ངེ་འཛིན་གཞན་གྱིས་ཀྱང་ངོ་། །བཞི་པ་མི་སྣང་བར་བྱ་བ་ནི། སྔར་བཞིན་ནམ། གཞན་གྱིས་ཀྱང་ངོ་། །གཉིས་པ་གང་ལ་བརྟེན་ནས་ཚུལ་ཇི་ལྟར་བསྒྲུབ་པ་ལ། རྡོ་རྗེ་ཟླ་བ་བཅིང་བ་དང་། རྡོ་རྗེ་ཉི་མ་དབང་དུ་བྱེད་པ་གཉིས་སོ། །དང་པོ་ལ། སྔོན་འགྲོ། དངོས་གཞི། མཇུག་གསུམ། དང་པོ་ནི། དབང་དུས་སུ་ངོ་སྤྲོད་ནས་དེ་གོམས་པར་བྱེད་པ་ལ་འདི་གསུངས་ཏེ། སྤྲོས་བཅས་ལ་བརྟེན་པས་ཕྱག་རྒྱ་མ་དཔག་ཏུ་མེད་པའམ། སྤྲོས་པ་མེད་པས་ལྷ་གྲངས། ཤིན་ཏུ་སྤྲོས་པ་མེད་༼༢༤ན༤༧༽པས་གཅིག་ཙམ་དང་། དང་པོ་དེ་ལ་དགེ་བསྙེན་གྱི་སྡོམ་པ་བྱིན་ལ། སེམས་བསྐྱེད་དབང་བསྐུར་ནས་ཟབ་མོའི་ལམ་ལ་སྐྲག་པ་མེད་ཅིང་གུས་པར་གྱུར་པའི་རྒྱུད་སྦྱང་བ་བྱས་ནས་འབྱོངས་ནས། ཁ་ཟས་དང་གཏུང་བ་དང་ཙ་བའི་སྨན་ངག་གིས་ལུས་བརྟས་པར་བྱས། སྔར་བཞིན་བསྐྱེད་རིམ་མཁའ་གསང་བྱིན་གྱིས་བརླབ་པའི་བར་དུ་བྱའོ། །ཐུགས་ཁའི་འོད་ཟེར་གྱིས་ལྷ་ཐམས་ཅད་སྤྱན་དྲངས། ཡབ་ལ་ཡབ། ཡུམ་ལ་ཡུམ་ཐམས་ཅད་བསྟིམ། གཉིས་ཀ་གདན་གསུམ་གྱི་ལྷར་བལྟས། བྷ་གའི་ནང་དུ་སངས་རྒྱས་སྲས་དང་བཅས་པ་ཐམས་ཅད་དུས་ཀྱི་འཁོར་ལོའི་དཀྱིལ་འཁོར་ཆེན་པོར་བཞུགས་པར་བསྒོམ། གཉིས་པ་དངོས་གཞི་ལ། དབབ་པ། བཟུང་བ། བཟློག་པ། དགྲམ་པ། རྗེས་བཅད་པ་ལྔའོ། །དང་པོ་ནི། འཁོར་ལོ་དྲུག་དང་ནོར་བུའི་རྩེ་མོ་ལས། ཟླ་བའི་ཆ་རྣམས་རིམ་གྱིས་འཕོ་བ་དང་། ཅེས་པས་ཏེ། བསྐྱོད་དྲགས་ན་ཆུ་མངའ་བརྒྱབ་པ་བཞིན་ཐལ་འགྲོ་བས། རུ་སྦལ་གྱི་ནུར་འགྲོས་ཀྱིས་དབབ་པར་བྱ་སྟེ། བདེ་བའི་སྟན་ལ་གཉིས་ཀ་གཅེར་བུ་བྱས་ནས་ཕན་ཚུན་བལྟ་བ་དང་ཆགས་པའི་གཏམ་དང་། འོ་བྱེད་པ་དང་། མ་མཆུ་མྱང་བ་དང་། ལྕེ་འཇིབ་པ་དང་། རེག་པའི་གཡའ་བསྐུལ་བ་དང་། སེན་མོ་འདེབས་པ་དང་། འཁྱུད་པ་དང་། ཞོན་པ་ཙམ་བྱས་ནས་ཆགས་པ་རྒྱས་པའི་རྟགས། གཉི་ག་འདར་བ་དང་། རྡུལ་བ་དང་། སྐད་འབྱིན་པ་ལ་སོགས་པ་བྱུང་ནས་གཡོས་པའི་བདེ་བ་ལ་སེམས་བརྟན་པར་བྱས་ཏེ་རྣམ་པར་མི་རྟོག་པ་ལ་གཞག་གོ། །ཅུང་ཟད་འཕོ་བ་ན་འོག་ནས་འབྱུང་བའི་འདྲེན་འགྲེམས་ཀྱི་མན་ངག་ཤེས་པས་མི་འཕོ་བར་བྱའོ། །ཚུལ་དེ་ལ་གོམས་པ་བརྟན་པས་ཕྱིས་གཟུང་བ་དང་འཛིན་པའི་སེམས་དག་གཅིག་པ་ཉིད་དང་། གཏུམ་མོ་དང་ཁུ་བ་དག་གཅིག་པ་ཉིད་དང་། དེ་ལས་ངེས་པར་གྲུབ་པའི་དབང་ཕྱུག་དང་ལྡན་པ་སྟེ་ཚངས་པར་སྤྱོད་པ་མི་འགྱུར་བའི་བདེ་བ་ཤེས་རབ་དང་ཐབས་སྙོམས་པར་འཇུག་པས་བྷ་ག་དང་། ལུས་ཀྱི་ལྷ་རྣམས་ལ་འཁྲིག་ཐབས་ཀྱི་རོལ་མོ་དུ་མས་མཆོད་པ་བརྩམ་པར་བྱའོ། །༼༢༤བ༤༨༽སྤྱི་བོ་ནས་མགྲིན་པར་བབས་པའི་དུས་ཚོད་རྣམ་པ་སྣ་ཚོགས་པའི་སྐད་ཅིག་མ། ངོ་བོ་ནི་དགའ་བའི་བདེ་བ། དེ་ཡང་ངོ་བོ་ངོས་གཟུང་དུ་མེད་པས་སྟོད་པ། རང་བཞིན་གསལ་བ། རྣམ་པ་གསལ་སྟོང་བདེ་བའི་རླན་དང་མ་བྲལ་བ་སྟེ། དེ་ཉིད་ཀྱི་ཐོག་ཏུ་ཤིག་གིས་བཤིག་ལ་མཉམ་པར་གཞག །དེ་ནས་འདྲེན་འགྲེམས། དེ་ནས་བསྲུབས་པས་སྙིང་གར་སླེབ་པའི་དུས་རྣམ་སྨིན། སྔར་ལས་ཆེས་བདེ་བས་མཆོག་དགའ། དེའི་སྟེང་དུ་ཡང་སྔར་བཞིན་བསྐྱངས། དུས་དེར་ཕྱག་རྒྱ་ལ་དབུགས་རྒོད་པ་དང་། པདྨ་རློན་པ་དང་། འདར་བ་དང་། ལུས་སྤྲིན་པ་ལ་སོགས་པ་འབྱུང་ངོ་། །རང་གིས་ཀྱང་ཕྱག་རྒྱ་དང་རང་གཉིས་སུ་འཛིན་པ་ཙམ་ལས་གཞན་སྣང་བ་རགས་པ་ནུབ། དེ་ནས་ཡང་ལྟེ་བར་སླེབ་པའི་དུས་རྣམ་ཉེད། ངོ་བོ་ཁྱད་དགའ། དུས་དེར་ཕྱག་རྒྱ་ངུ་བ་དང་། རྒོད་པ་དང་ལུས་ཀྱི་རྣམ་པར་འགྱུར་བ་ཅི་ཡང་འབྱུང་རང་ལ་ཕྱག་རྒྱའི་རྟོག་པ་ནུབ། དེའི་དུས་སྔར་བཞིན་མཉམ་པར་གཞག་གོ། །དེ་ནས་ཡང་བསྲུབས་པས། གསང་གནས་སུ་སླེབ་པའི་དུས་མཚན་ཉིད་དང་བྲལ་བའི་སྐད་ཅིག་ངོ་བོ་ལྷན་ཅིག་སྐྱེས་པའི་དགའ་བ། དེའི་དུས་ཕྱག་རྒྱ་བདེ་བས་བརྒྱལ། རང་གི་ཡང་དབང་པོ་ཡུལ་དང་བཅས་པའི་སྤྲོས་པ་འགགས། དེར་སོ་སོ་རང་གིས་རིག་པའི་ཡེ་ཤེས་ཀྱི་བདེ་བ་དེ་རྣམ་པ་ཐམས་ཅད་པའི་སྟོང་པ་ཉིད་རིས་མེད་པའི་སྣང་བའི་སྤྲིན་སྤྲོ་བདེར་སྦྱར་རོ། །བདེ་བ་མ་སྐྱེས་པར་ཐིག་ལེ་མི་གཟུང་། སྐྱེས་ནས་བཟུང་། བདེ་བ་རྫོགས་ནས་མི་བཟུང་འགོ་གཡོས་ཙམ་ནས་བཟུང་། བསྐྱོད་ཅིང་མི་བཟུང་བསྐྱོད་འཕྲོ་བཅད་ནས་བཟུང་། རྡོ་རྗེའི་རྩེ་མོར་མི་བཟུང་རྩ་བར་བཟུང་། དེ་ལས་གཞན་ཚོད་མ་ཟིན་པ་དང་། རིག་མ་ཡིད་དུ་འོང་དྲགས་པས་དང་། བདེ་བ་ལ་ཞེན་པས་འཕྲོ་གཅོད་མ་ནུས་ན་གཉེན་པས་མ་ཟིན་པ་ཞེས་བྱ་སྟེ་ཐིག་ལེ་ཉམས་པའི་རྒྱུའོ། །ཉམས་ན་ཐིག་ལེ་ཤོར་བས་དགའ་བའི་རྟེན་ཤོར་བའི་ཕྱིར་དགའ་བྲལ་ཞེས་བྱ་ལ། ཐིག་ལེ་བཟུང་ནས་བཟློག་པས་བདེ་བ་ཡལ་བ་ལ་ཡང་དགའ་བྲལ་དུ་བཏགས་པ་ཞིག་ཡོད་དེ། སྔ་མ་ཆགས་པ་ཐ་མལ་པ་དང་། ཕྱི་མ་ཆགས་པ་ངོས་ཟིན་པས་སྦྱངས་པ་ཡིན་པའི་༼༢༥ན༤༩༽ཕྱིར་ཁྱད་པར་ཆེའོ། །གཉིས་པ་བགྲུད་བ་ནི། སྒྲ་གཅན་གྱིས་ནི་རབ་ཏུ་ཟོས་པ་ལས། ཞེས་པས་བསྟན་ཏེ། དབུ་མར་འཆིངས་པ་ཞེས་བྱ་བའི་དོན་ཏོ། རླུང་དང་འཁྲུལ་འཁོར་གཉིས། དང་པོ་ལུས་སེམས་སྐྱིལ། པུས་བཀབ་ཅུང་ཟད་སྒུར་བས་བདེ་རླུང་མདུན་དུ་འཕུལ་ཞིང་། དྲོད་རླུང་རྒྱབ་ནས་གྱེན་དུ་འཐེན་པས་ཆུ་རྩ་ལྷོད་འགྲོ་བ་དང་། འོག་སྒོ་དྲག་ཏུ་འཛུམ་ཐུབ་པ་དུས་མཉམ་དུ་འབྱུང་། དེ་ནི་བདེ་རླུང་བྲན་དུ་འཁོལ་ཞིང་དྲོད་རླུང་དབང་དུ་འདུས་པ་ཞེས་བྱ་བ་དང་། བཟློག་སྟེ་ལུས་ཅུང་ཟད་དགྱེ་བས་དྲོད་རླུང་འོག་ཏུ་འཕུལ། བདེ་རླུང་སྟེང་དུ་དྲངས་པས་ཆུ་གྲིམས་ཤ་འཐོན་པས་དང་འོག་སྒོ་ལྷོད་འགྲོ་བས་སོ། །དེ་ནི་བདེ་རླུང་དབང་དུ་འདུས་ཤིང་དྲོད་རླུང་བྲན་དུ་འཁོལ་བ་ཞེས་བྱ་སྟེ། དེ་གཉིས་ཀྱིས་འཛིན་ཅིང་མིག་ནམ་མཁར་བསྒྲད། རྡོ་རྗེ་ཁུ་ཚུར་གྱེན་དུ་གཅུད་པས་སོ། །གཉིས་པ་དཀར་ཆ། དམར་ཆ། དངས་མ་གསུམ་འཛིན་པའི་འཁྲུལ་འཁོར་རྣམས་ཀྱིས་འཛིན་ནོ། །ཟིན་པའི་ཚད། རྟགས་སྲ་ཞིང་ཐུང་རིལ་འགྲོ་བ་དང་། པདྨ་ཁ་རུབ་ཏུ་འགྲོའོ། །རོ་སྨད་ལྕི་བེམ་བྱེད་ན་ཐ་མའོ། །གསུམ་པ་བཟློག་པ་ནི། ཡང་གསང་གི་འདྲེན་བཞི། གསང་བའི་འདྲེན་བཞི། ནང་ཉལ་བའི་འདྲེན་བཞི། ཕྱི་ལངས་པའི་འདྲེན་བཞིའོ། །འདྲེན་རང་གི་རླུང་གནད་འཛིན་བཞིན་ནོ། །ཕྱིས་འཁྲུལ་འཁོར་རེ་རེ་ལ་འདྲེན་འགྲེམས་འབེབས་གཙོ་བོར་བྱ་བས་སོ་སོའི་རླུང་དང་སྦྱར་ཏེའོ། །དམིགས་པ་གསང་གནས་ཀྱི་ཐིག་ལེ་དབུ་མའི་ནང་ན་ཡར་སྐྱ་ཆིལ་ལི་ལི་སོང་ནས་ཧཾ་ལ་ཐིམ་པར་བསམ། གནས་སུ་མ་འཁྱོལ་ན་ཆུ་དང་བསྡོངས་ཏེ་འཛག་གོ། །བཟློག་པའི་རྟགས་ངར་ཆག །སྦ་བ་སྦུབས་སུ་ནུབ། སྨད་ཡང་བ་དང་བདེ་སིང་འགྲོ། མགོ་བོ་ན་བ་དང་། མིག་ཚག །སྟོད་ལྗི་འཁྱོམ་བྱེད་པ་འབྱུང་ངོ་། །བཞི་པ་དགྲམ་པ་ནི། རླུང་གསུམ་སྦྱོར་བཟུང་། ཕྱི་ལངས་པའི་བཀྲམ་བཞི། ནང་ཉལ་བའི་བཀྲམ་བཞི། གསང་བ་ཙོག་པུའི་བཀྲམ་བཞི། ཡང་གསང་གི་བཀྲམ་བཞིའོ། །གཞན་ཡང་སྲོག་རྩོལ་གྱི་འཁྲུལ་འཁོར་ཐམས་ཅད་ཀྱང་བཟང་ངོ་། །དེས་ཁྲེམས་པའི་རྟགས་ལུས་བདེ་༼༢༥བ༥༠༽ཞིང་མ་ཉེན། རིག་པ་གསལ་ལ་དངས། མགོ་བོ་དང་སྟོད་ན་བ་ཡང་མེད་པར་འགྱུར་རོ། །དབབ་མ་ཐོག་བཟུང་། ཟིན་མ་ཐོག་འདྲེན། དྲངས་མ་ཐོག་དགྲམ། འདི་བཞི་ལ་བར་དུ་སྐད་ཅིག་མའི་ལེ་ལོ་ཡང་བྱེད་མི་ཉན་ཏེ། དབབ་མ་ཐོག་མ་ཟིན་ན་འཆོར། ཟིན་མ་ཐོག་མ་དྲངས་ན་ཐིག་ལེ་ཁྱེངས་ཏེ་འདྲེན་མི་ཐུབ། དྲངས་མ་ཐོག་མ་བཀྲམ་ན་དེར་ཁེངས་ཏེ་ལུས་ཐམས་ཅད་ལ་ཁྱབ་པར་མི་འགྱུར་རོ། །དཔེར་ན་ལུགས་སུ་བླུགས་རྒྱུའི་ཟངས་ཞུན་བཞིན་ནོ། །ཁྲེམས་པའི་མཐར་རྩ་མིག་ཏུ་གདབ་བོ། །ལྔ་པ་རྗེས་བཅད་པ་ལ། རླུང་དང་བསྲེ་བ། རྩིགས་མ་འཐུར་དུ་དབབ་པ། སྟོང་པས་རྒྱས་གདབ་པ་དང་གསུམ། དང་པོ་ནི། ཐིག་ལེ་ལས་ལ་སྦྱར་བ། དེའི་རྗེས་ལ་གསུམ་སྦྱོར་ཁམས་དང་རིག་པ་དངས་པའི་ཚད་ནམ་བྱུང་ཚུན་བསྒོམ་སྟེ། དེས་དངས་སྙིགས་འབྱེད་དོ། །དེ་མ་བྱས་ནས་དབང་ཤོར་ནས་གཉིད་ལ་སོགས་པ་རིག་པ་ཉོག་པར་འགྱུར་རོ། །གཉིས་པ་ནི། མགྲིན་སྟོད་ཕོ་སྐེད་ལྟེ་བ་དཔྱི་མིག་རྣམས་བསྐོར་ཞིང་འོག་ཏུ་འབྱེད་འཛུམ་གྱི་འཁྲུལ་འཁོར་གྱིས་མཐར་འབེབས་རྣམས་བྱས་པས་རྩིགས་མ་འཐུར་དུ་འབྱིན་ནོ། །དེ་ལྟར་མ་ཡིན་ན་མིག་ཚག་ཅིང་མི་གསལ། རྣ་བ་ནས་རྣག་འོང་འོན། སྐྲ་དང་སྨིན་མ་བྱི་བ་ལ་སོགས་པ་འབྱུང་ངོ་། །གསུམ་པ་ནི། ཆགས་ཆེན་གྱི་ཉམས་ཐམས་ཅད་རྣམ་པར་མི་རྟོག་པའི་དབང་དུ་འདུ་དགོས་ཏེ། དེ་མ་འདུས་ན་ཆགས་པ་དེ་མི་འཆིང་ཞིང་གྲོལ་བའི་ཐབས་མཆོག་ཏུ་མི་འགྱུར་བས་སོ། །གསུམ་པ་མཇུག་ནི། དེ་ཡི་རྗེས་སུ་ཉི་མའི་ཆ་རྣམས་ཀྱང་། །རིམ་པ་བཞིན་དུ་དེ་ཡིས་ཟ་བར་འགྱུར། །ཉི་ཟླ་ཟོས་པའི་རྗེས་ལ་དྲི་ཆེན་དང་། །དྲི་ཆུ་ཤ་ཆེན་དབུས་ཀྱི་བཅུད་ཀྱང་ཟ། །རྩིགས་མ་བད་ཀན་ཆུ་སེར་ཁྲ་གཟོས་ནས། །ཤ་དང་རུས་པ་རྩ་རྣམས་མ་ལུས་ཟ། །ཡང་དང་ཡང་དུ་ཚུལ་དེས་རྗེས་སུ་ཆགས་པའི་བདེ་བ་མྱོང་བ་དེ་དྲན་པས་གསང་བའི་འཁོར་ལོར་གཏང་། དེར་བདེ་བ་ལྷང་ལྷང་སྐྱེས་པ་ན་ལྟེ་བར་དྲངས། དེ་ནས་སྙིང་མགྲིན་སྤྱི་ལུས་ཐམས་ཅད་དུ་གཏད་པས་ལུས་ཐམས་ཅད་བདེ་བའི་གོང་བུར་འགྱུར། ༼༢༦ན༥༡༽དེ་ནས་གང་ཤར་གྱི་སྟེང་དུ་དྲངས་པས་སྣང་བ་ཐམས་ཅད་བདེ་བར་འཆར། བདེ་བདེ་སྟོང་པ་རིས་མེད་པར་གྱུར་པས། ནོར་བུར་ལྷན་ཅིག་སྐྱེས་པ་བརྟན་ཅིང་། གོམས་པ་ལས་ཁམས་དཀར་པོ་འཛག་པའི་སྒྲིབ་པ་དང་བྲལ་ནས་རིམ་བཞིན་དམར་ཆ་སྒྲིབ་བྲལ་དུ་གྱུར་ཏེ། ལུས་ཐམས་ཅད་ཀྱི་སྙིགས་མ་ཟད། དངས་མར་གྱུར། དེ་ནས་ཀྱང་སྟོང་པ་ཡང་མཆོག་ཏུ་མི་འགྱུར་བའི་བདེ་བ་ཆེན་པོ་མངོན་དུ་གྱུར་པ་ནི་ཏིང་ངེ་འཛིན་གྱི་ཡན་ལག་གོ། །གཉིས་པ་རྡོ་རྗེ་ཉི་མ་དབང་དུ་བྱེད་པ་ལ། སྔོན་དུ་སྐུ་མཉེ། དངོས་གཞི་རླུང་སྦྱང་བ། རྗེས་བྱེད་ལས་འབྲས་བུ་དང་བཅས་པ་གསུམ་ལས། དང་པོ་ནི། རང་གི་ལིངྒར་སྣུམ་བྱུགས་ལ་མཉེ་ཞིང་ལས་སུ་རུང་བ་དང་བཞག་པ་ཞག་ཁ་ཡར་བྱས་ཏེ། དེས་མཉེན་ཅིང་འབོལ་བ་དང་ཆེ་བར་འགྱུར་རོ། །ཟས་བཅུད་ཅན་བརྟེན། འཇུ་དཀའ་བ་དང་གྲང་བསྐྱེད་པའི་ཁ་བྲས་སྤང་། སྤྱོད་ལམ་ཤིན་ཏུ་གཟབ་པར་བྱའོ། །གཉིས་པ་ལ། རླུང་གིས་སྦྱང་བ། རྫས་ཀྱིས་སྦྱང་བ། འབྱོངས་པ་དང་ཕོ་ཉ་མོའི་བཅུད་བླང་བ་དང་གསུམ། དང་པོ་ནི། སྟན་བདེ་བ་ལ་སེམས་དཔའི་སྐྱིལ་ཀྲུང་ལྟར་བཅས། ལག་པའི་ཐལ་མོ་གཉིས་པུས་བཀབ་མཁལ་མའི་ཐད་གཉིས་གྱེན་དུ་འུབ་འཐེན་ནས་དབུ་མ་བཙུགས། སྟེང་རླུང་དྲག་ཏུ་འཕུལ་བ་མི་ཐུབ་ན་མནན། དམིགས་པ་དྷཱུ་ཏཱི་ནོར་བུར་ཟུག་པའི་ཁ་ནས་མདའ་འཕངས་པ་ལྟར་སོང་། དེ་ནས་འོག་རླུང་དྲག་པོར་འཐེན་ཏེ་འདྲེན་བཞིན་དུ་བྱ། རླུང་དབུ་མའི་ནང་ན་ཡར་མདའ་འཕངས་པ་བཞིན་བསམ། དེ་ལྟར་རེས་འཇོག་ཏུ་བསྒོམས་པས་གོམས་པ་དང་སྲོག་ཐུར་གོང་བུ་གཅིག་ཏུ་འདྲེས་པར་འགྱུར་རོ། །གཉིས་པ་ནི། གལ་ཏེ་དེས་མ་འབྱོངས་ན། སྨྱུག་མའམ་ཟངས་སམ་ལྕགས་ཀྱི་སྦུབས་རྡོ་རྗེའི་བུ་གར་རན་ཙམ་པ་མཐོ་གང་སོར་བཞི་རྡོ་རྗེའི་ཁ་ནས་འོག་ཏུ་བཞར་ཏེ་ཐེར་ཡ་ཐུག་བཏང་། དེ་ནས་རླུང་དང་བསྟུན་ཕྱི་ནང་དུ་འཕུལ་བས་མཐར། བུ་གར་ཐུར་མ་མི་མངོན་པ་ཙམ་དུ་འགྱུར་ལ། སྔར་བཞིན་དུ་རླུང་འཕུལ་འཐེན་སྤེལ་བས་རླུང་འདྲོངས། དེ་ནས་ཆུ་དང་འོ་མ་ལ་སོགས་མ་འདྲེན་ཐུབ་བོ། །གལ་ཏེ་དེས་ཀྱང་ཐེར་ཡ་ལས་བགྲོད་དཀའ་ན། དང་པོར་༼༢༦བ༥༢༽མིའི་ཕུགས་དང་། དེ་ནས་ལྒངས་བུབ་གི་དབུགས་འཕུལ་འཐེན་ལ་བསླབ། དེས་ངེས་པར་འདྲོངས་སོ། །ཆུ་ཡང་འཇམ་པ་ཚ་བ་གསུམ་ལ་སོགས་པའི་སྨན་བཏབ་ལ་འདྲེན་ཏེ་གཞན་གྲང་བའི་ནད་དུ་འགྲོའོ། །ད་ེནས་འོ་མ་དང་ཁྲག་འདྲོངས་པ་ནས་ཐུར་མ་མེད་པ་ལ་དེ་དག་ཀྱང་ངོ་། །དེ་དག་གི་དུས་སུ་ལུས་མི་བསྒུལ་བར་རླུང་མནན་ལ་ཕྱིར་སངས་ཀྱིས་འབོའོ། །ཞར་ལ་རྒྱབ་ཐུར་གྱི་རླུང་གནད་གཞན་འདྲ་འབྱེད་འཛུམ་གྱིས་སོ། །གསུམ་པ་ནི། མན་ངག་འདི་ནི་མཁའ་འགྲོ་མ་སེང་གེའི་གདོང་པ་ཅན་གྱིས་གྲུབ་ཆེན་པ་ལ་གནང་བ་སྟེ། ཞུ་བའི་ཟླ་བ་མ་ཡིན་པ། ཉི་མ་ལོན་ན་འབྱོངས་པའི་ཚད། ཅེས་པས་སོ། །གཞུང་ལས། ཕལ་པའི་ལུས་ལ་འབབ་པ་མ་ཡིན་ན། དག་པའི་རྟེན་ལ་འབར་བའི་མ་བསྒྲུབས་ཏེ། དེ་ཡིས་ཕུང་པོ་ངེས་པར་བསྲེག་པར་བྱ། ཞེས་པས་བསྟན་ཏེ། ཕལ་པ། ནད་ཅན། ཉེར་ལྔ་ལས་བརྒལ་བའི་དང་། རིགས་ངན་པ་རྣམས་ཀྱི་ལུས་ལ་འབབ་པའི་དམར་ཆ་འདྲེན་དུ་མི་རུང་ངོ་། །དགེ་བ་སྔར་བཤད་པའི་རིགས་དང་ན་ཚོད་ཅན་དེ་དག་གིའོ། །དེ་དག་གིས་ཡང་འབབ་ཚང་ནི་མ་ཡིན་ལ། ཚིགས་དང་པོར་འབབ་པའི་དུས་སུ། །སྔ་མ་ལ་བུར་བྱ་བ་ཅིག་འོང་དེ་འདྲེན། གཞན་དུ་སྙིགས་མ་རྣམས་རྫོགས་པའི་དངས་མ་སྲིད་འཛིན་པ་དེ་དྲངས་སོ། །ཐིག་ལེ་དབབ་བཟློག་ཡང་དང་ཡང་དུ་བྱས། །འཇུག་ཏུ་སླ་མོར་སོང་བ་དེ་བྷ་གར་བཏང་བས་རཀྟ་འབབ། དེ་དང་བཅས་པ་སྔར་གྱི་རླུང་སྦྱོར་དེས་འདྲེན་ཅིང་། དམིགས་པ་རིག་མ་བདེ་བའི་ངོ་བོར་ཞུ་བའི་ཐིག་ལེ་དམར་པོ་རྡོ་རྗེའི་བུ་ག་ནས་གྱེན་དུ་ན་རར་བྱུང་ནས་སྤྱི་བོའི་ཧཾ་ལ་ཐིམ་པར་བསམ་མོ། །འདྲེན་འགྲེམས་འབེབས་རྣམས་ཟླ་བ་བཞུ་དུས་ལས་ལོག་འགྱུར་ཅིས་ཀྱང་དགོས་སོ། །འདྲོངས་པའི་རྟགས། རྡོ་རྗེའི་བུ་ག་བརྒྱངས་ཤིང་ཚ་སྦལ་མི་བཟོད་པ་ཙམ་དུ་སྐྱེའོ། །ཕྱག་རྒྱ་རྟེན་བཟང་ན་དེའི་རྩ་རྡོ་རྗེའི་བུ་གར་བཅུག་ནས་རླུང་གནད་སྔར་བཞིན་དུ་བྱས་པས་སྲོག་ཐུར་ཅིག་ཅར་དུ་འདྲེའོ། །རྩ་འཆོལ་དཀའ་ན། ཕྱག་རྒྱའི་མཁལ་ཁུང་གཉིས་སུ་དྲུ་གུ་སྟེང་སྒ་ལྟ་བུའི་ཤིང་ལེབ་ཀྱིས་བཀབ་པ་དམ་༼༢༧ན༥༣༽པར་བསྡམས། དྲུག་མདོའི་འོག་ཏུ་སྟན་མཐོ་བ་དང་། བཤང་ལམ་དུ་འཇམ་པའི་བོ་དོ་བཅུག་ནས་གན་རྐྱལ་བས་རྩ་སྣ་སོར་བཞི་གསུམ་གཉིས་གཅིག་ཅིས་ཀྱང་འབུར་དུ་དོད་འོང་། དེ་རྡོ་རྗེའི་བུ་གར་བཅུག་ནས་དལ་བུར་མནན་ཏེ་བསྲུབ་བོ། །གལ་ཏེ་དེ་མ་གྲུབ་ན་འདུག་སྟངས་ཀྱིས་ཏེ། པདྨ་ཅན་ལ་གན་རྐྱལ་པུས་བྲང་སྦྱར་བའམ་མཆན་ཁུང་དུ་སྦྱར་བས་སོ། །དུང་ཅན་མ་དེའི་གཡས་པའི་རྐང་པ་ཕྲག་པར་བཀལ། གཡོན་ཕབ་ནས། རི་མོ་ཅན་མར་དེ་བཟློག་པས་སམ། དེའི་ལུས་ཐམས་ཅད་བགྲད་པས་སོ། །གླང་ཆེན་མ་ལ་སྟོད་མཐོ་བ་ཐབས་ཀྱི་ལག་པས་དེའི་མགོ་མནན་པས་སོ། །གསུམ་པ་རྗེས་བྱེད་ལས་འབྲས་བུ་དང་བཅས་པ་ནི། ལྷན་ཅིག་སྐྱེས་པའི་སྒོམ་པ་འདི་ཉིད་ནི། ངེས་པར་ཡུལ་གྱི་རྐྱེན་ལས་སྒོམ་པ་ལས། །རྨི་ལམ་ཤེས་པ་དེ་ཡི་རྗེས་སུ་འཇུག །ལན་ཅིག་ཟིན་པས་དྲོད་བཙན་ཐབས་སུ་འབར། །གཉིས་པ་མ་ནས་ཚེ་འཕེལ། །བཅུད་ཤ་ལྤགས་རུས་རྩལ་འདུ་སྟེ། །དང་པོས་ནི་ཤ་ལོ་ལེགས་པའི་ལྗང་པ་ལྟ་བུར་འཕེལ། །དཀར་ཞིང་དངས། འོན་ཀྱང་ཧ་ཅང་རྒྱས་དྲགས་ན་ཡོན་ཏན་སྐྱོན་དུ་སོང་བ་ཡིན་པས་གཤོག་སྡུད་ཀྱིས་བསྡུའོ། །བར་པས་ནི་ཤེད་ཆེ། ལུས་སྲ། ཤ་སྐམ། མདངས་སྟོབས་འཕེལ། གསུམ་པས་མདངས་པདྨ། བཀྲག་ཉི་ཟླ། རྩལ་གླང་པོ་ཆེ། ཡང་རྩལ་ཁྱུད་དང་མཉམ། ཤེས་པ་གསལ་ཞིང་གཞུངས། ཤེས་རབ་འཕེལ། རྒས་པ་གཞོམ། ནང་མི་འབྱུང་ངོ་། །དེ་ནས་ཁམས་རྣམས་ཇེ་དངས་སུ་སོང་། སའི་ཡོན་ཏན་གྱིས་སྲེད་མེད་ཀྱི་བུའི་སྟོབས། ཆུའི་ཡོན་ཏན་གྱིས་མེས་མི་ཚིག །མེའི་ཡོན་ཏན་གྱིས་ཆུར་མི་འབྱིང་། རླུང་གིས་རྐང་མགྱོགས། ནམ་མཁའི་རྩིག་པ་དང་རིལ་མི་ཐོགས་འཕུར་བ། ཟླ་བའི་རླུང་གིས་ཁམས་དངས་པའི་ཤེལ་ལྟར་སོང་བས་གྲིབ་མ་མེད། ཉི་མའི་ཡོན་ཏན་གྱིས་སྙིགས་མ་ཟད་པའི་འཇའ་དང་མཚུངས་པའི་སྲོག་གཟུགས་སུ་འགྱུར། མཐར་ཡིད་ལུས་སུ་སོང་ནས་གཞན་གྱིས་མི་མཐོང་། ཐམས་ཅད་ཀུན་ཏུ་སོན་པའི་ཡོན་ཏན་བུ་གའི་རླུང་ཐམས་ཅད་འགགས། དབུ་༼༢༧བ༥༤༽མའི་སྒོ་བྱེ། ཆོས་ཐམས་ཅད་ལ་ཐོགས་པ་མེད། འདི་ནས་ཕྲ་སོགས་ཀྱི་དབང་ཕྱུག་ཐོབ་པར་བཤད་ལ། དབང་པོ་རྣོན་པོས་དཀར་དམར་ཕྲད་པའི་དུས་ཉིད་དུ་ཤར་བའི་འཇིག་རྟེན་པའི་ལྷན་སྐྱེས་བསྒོམ་པ་དེ་ཡུལ་སྟོང་པ་ཉིད་དང་སྦྱར་བས་ཕྱག་རྒྱ་ཆེན་མོ་མངོན་དུ་གྱུར། དེ་ཟག་པ་མེད་པའི་བདེ་བས་རྒྱས་ཐེབས་པས་འོད་གསལ་བའི་དབྱིངས་སུ་གཉིད་ལོག །དེ་ལས་ཕྲ་མོའི་རླུང་གི་བྱེད་ལས། སྤྱན་མ་ལ་སོགས་པའི་ལྷ་མོའི་གླུས་བསྐུལ་བས་རྨི་ལམ་ལྟ་བུའི་ཟག་པ་དང་བཅས་པའི་ཟུང་འཇུག་ཏུ་ལྡང་སྟེ། ཁ་སྦྱོར་ཡན་ལག་བདུན་དང་ལྡན་པའོ། །འཕྲོས་དོན་རླུང་སེམས་དབུ་མར་འཇུག་དུས་ཕྱི་ནང་གི་རྟེན་འབྲེལ་ལས་གཟའི་ནད་འགའ་ཞིག་འབྱུང་བར་འགྱུར་བས་སྒྲ་གཅན་བཅིང་བ་བཤད་དེ། ལུས་རྡོར་སྐྱིལ། ཚིགས་བསྲངས། ལག་པ་པུས་མོ་ལ་བཀབ། ཐུར་སེལ་དྲག་པོ་མིན་ཙམ་བསྡུ། སྟེང་རླུང་སོལ་བཞག་འོག་རླུང་སྒྲ་གཅན་གྱི་དཀྱིལ་འཁོར་གནག་ཅིང་ཟླུམ་པ་ཕུབ་ཙམ་ཞིག་བསྒོམ་ཞིང་དམིགས་པས་སྒྲ་གཅན་བསྟིམ། དེའི་སྟེང་དུ་རང་ཉིད་དུས་འཁོར་ཡབ་ཡུམ་སྔར་བཞིན་དུ་གསལ་བཏབ་སྟེ་མནན་པར་བསམ། དབུ་མཇུག་གསུམ་གྱི་འཁྲུལ་འཁོར་བྱ། མཐར་ཕྱག་རྒྱ་ཆེན་པོའི་ངང་དུ་གཞག་གོ། །དབང་པོ་དམན་པ་དམན་པ་དག་གི་རྣལ་འབྱོར་པས། ལས་རྒྱ་ཡང་དག་པར་བསྟེན་པ་ལས་ཤེས་རབ་ཀྱི་ཆགས་པས་བཞུ་བའི་བྱང་ཆུབ་ཀྱི་སེམས་བཅིང་བ་ཉིད་ཀྱིས་ལུས་ཕུག་ནས་ལྷན་སྐྱེས་ཀྱི་བདེ་བ་སྟེར་བའི་ཕྱིར། བུད་མེད་ཀྱི་སྦྱོར་བས་དམན་པ་ལ་ནི་མ་ཡིན་ནོ། །དཔེར་ན་དངུལ་ཆུའི་དགྲ་མེ་ཡིན་ཀྱང་དངུལ་ཆུ་འཆིང་བ་མེ་ལ་རག་ལས་པ་བཞིན་ཏེ། མེ་ནི་དངུལ་ཆུའི་དགྲ་ཉིད་ཡིན་ཏེ་ཞེས་སོགས་ཀྱིས་སོ། །དབང་པོ་འབྲིང་གི་ཡེ་ཤེས་ཀྱི་ཕྱག་རྒྱ་སྟེ། དེ་ལ་ཡང་གཉིས། རབ་གཅིག་གིས་གཏུམ་མོ་དང་། འབྲིང་གཅིག་གིས་རང་ལུས་ཡིད་ཀྱིས་བཏགས་པའི་རིག་མ་ལ་བརྟེན་ནས་བསྒྲུབ་ལ། དང་པོས་ཉི་ཟླ་དབུ་མར་སྦྱོར་བ་དང་བྲལ་ན་མི་འགྲུབ། གཉིས་པས་ནི་གཟུང་འཛིན་གྱི་རྟེན་དཀར་དམར་དབུ་མར་གཅིག་ཏུ་སྦྱོར་བ་མེད་ན་མི་འགྲུབ། ཡོད་ན་འགྲུབ། དེ་ཀའི་མཐར་ཕྱག་རྒྱ་ཆེན་མོ་མངོན་དུ་འགྱུར། ༼༢༨ན༥༥༽དེ་ལས་མཆོག་ཏུ་མི་འགྱུར་བའི་བདེ་བ་སྐྱེལ། སྟོང་པ་ཉིད་དུ་རྒྱས་མ་ཐེབས་པའི་ལྷན་སྐྱེས་དང་ཕྱག་རྒྱ་ཆེན་མོ་དེ་ཙམ་ཡང་འདིར་འཇིག་རྟེན་པའི་ལམ་དུ་བསྟན། མཆོག་ཏུ་མི་འགྱུར་བའི་དངོས་ཀྱི་རྒྱུར་སྟོང་པ་ཉིད་དེ་ངེས་པར་དགོས། བརྒྱུད་པའི་རྒྱུར་ནི་སྔ་མ་གཉིས་ལས་གང་རུང་ངམ། གཉི་ག་བློའི་སྐལ་བའི་རྗེས་སུ་འགྲོ་ལྡོག་ཡིན་པས་དགོས་ཤིང་དེའི་ཕྱིར་ལས་ཀྱི་ཕྱག་རྒྱ་འཛག་བདེ། ཡེ་ཤེས་ཀྱི་ཕྱག་རྒྱ་འགྱུར་བའི་བདེ་བ། ཕྱག་རྒྱ་ཆེན་མོ་ནི་མི་འགྱུར་བའི་བདེ་བ་སྦྱིན་པ་མོ་ཡིན་ནོ་ཞེས་ཤེས་པར་བྱའོ། །རྒྱུད་ལས། ལས་ཀྱི་ཕྱག་རྒྱའི་སྙོམས་འཇུག་དང་། ཡེ་ཤེས་ཕྱག་རྒྱའི་དམིགས་པ་དང་། ཕྱག་རྒྱ་ཆེན་མོ་གཅིག་སྦྱོར་བས། མི་འགྱུར་བ་དེ་འཕེལ་བར་འགྱུར། ཞེས་གསུངས་པའི་ཕྱིར་རོ། །གཉིས་པ་འཇིག་རྟེན་ལས་འདས་པའི་ལམ་རྫོགས་པར་བསྟན་པ་ཏིང་ངེ་འཛིན་གྱི་ཁྲིད་ནི། དམིགས་པ་དང་བཅས་པའི་བདེ་བ་དང་། དམིགས་པ་མེད་པའི་བདེ་བ་ཆེན་པོ་ཁྱག་པ་དང་ཆུ་བཞིན་གཉིས་སུ་མེད་པ་རང་རིག་པའི་བདེ་བ་ལ་སེམས་རྩེ་གཅིག་ཏུ་གནས་པས་ན་ཏིང་ངེ་འཛིན་ནོ། །འདིར་དམིགས་བྱེད་ཀྱང་བདེ་སྟོང་གཉིས་མེད། དམིགས་ཡུལ་ཀྱང་བདེ་སྟོང་གཉིས་མེད་དོ། །འདི་ཡང་། རྩ་སྦྱངས་པས་ནི་ལུས་ཀྱི་དྲི་མ་དག །རླུང་སྦྱངས་པས་ནི་ངག་གི་དྲི་མ་དག །འཛག་མེད་ཐོབ་པས་ཡིད་ཀྱི་བག་ཆགས་བཅོམ། །འཁོར་ལོའི་མདུད་པ་དགའ་བཞིའི་འགྲོས་ཀྱིས་བཤིག །མ་རིག་གཉིད་ནི་བརྒྱལ་བ་ལོག་པས་དངས། ཆགས་བྲལ་ཉམས་པ་ཞེ་སྡང་ཟད་པའི་སེམས། ཆགས་པ་དག་པས་བདེ་བ་ཆེན་པོར་གྲོལ། ཞེས་པའི་དོན། དབང་རྣོན་གྱི་རྣལ་འབྱོར་པ་ཕྱག་རྒྱ་ཆེན་པོ་ལ་སྦྱར་བའི་དེ་མ་ཐག་ཏུ་གནས་པའི་རྩ་ཐམས་ཅད་ཕྲ་བའི་དབུ་མར་སོང་བས་ལུས་དག །ལས་ཀྱི་རླུང་ཐམས་ཅད་ཕྲ་བ་ཡེ་ཤེས་ཀྱི་རླུང་དུ་སང་བས་ངག་དག །ཐིག་ལེ་ཕྱི་རོལ་དུ་འཕོ་རྒྱུ་ཐམས་ཅད་རྡོ་རྗེ་ནོར་བུ་ནས་ཕྱིར་འཛག་པ་མེད་པར་འཆིངས་པས་ཡིད་དག་པས། འཇིག་རྟེན་ལས་འདས་པའི་མཐོང་བའི་ལམ་ཐོབ་པའི་མོད་དེར། མ་རིག་པ་ཐམས་༼༢༨བ༥༦༽ཅད་དག་པའི་རིག་པ་ཆེན་པོས་ཆོས་ཐམས་ཅད་ཤེས། སྙིང་རྗེས་ཆགས་བྲལ་ཟད་པས་ཞེ་སྡང་དག །སྟོང་ཉིད་ཀྱིས་ཆགས་པ་ཟད་པས་འདོད་ཆགས་དག་སྟེ། བྱང་ཆུབ་ཀྱི་སེམས་མས་བརྟན་པའི་དགའ་བ་བཞི་ཤིན་ཏུ་མྱུར་བར་སྐད་ཅིག་ཡུད་ཅིག་ལ་ཕྲ་བའི་རྩ་རླུང་ཐིག་ལེའི་ལམ་སྦྱོངས་པས། དུག་སྦྲུལ་གྱི་མཆེ་བའི་དུག་རྫོགས་པའམ། འབར་བའི་ལྕགས་ལ་གྲུབ་པའི་དངུལ་ཆུས་རེག་པ་ལྟ་བུའི་སྐད་ཅིག་ཉིད་དེ་ལ་ཐམས་ཅད་མཁྱེན་པ་ཆེན་པོར་འགྱུར་བས། སྐད་ཅིག་གཅིག་གིས་བྱེ་བྲག་ཕྱེད། སྐད་ཅིག་གིས་རྫོགས་སངས་རྒྱས། ཞེས་གསུངས་སོ། །དབང་པོ་ཅུང་ཟད་རཏལ་བ་ཞིག །སྔར་གྱི་སྟོང་པ་ཉིད་ཀྱི་གཟུགས་ལ་འཛག་པ་མེད་པའི་བདེ་བ་ཆེན་པོ་གཞན་མ་ཡིན་པར་སྐྱེས་པ་དེ་ལ་ཉིན་མཚན་དུ་མཉམ་པར་གཞག་པས་སེམས་མི་གཡོ་ཞིང་བརྟན་པར་གནས་པ་ལ་གོམས་པར་བྱེད་པས་སྒོམ་པའི་ལམ་སྟེ། ནོར་བུ་ནས་ནི་གཙུག་ཏོར་འཁོར་ལོའི་བར། བརྒྱ་ཕྲག་བཅོ་བརྒྱད་ལས་ཀྱི་རླུང་འགགས་པས། རིམ་པ་བཞིན་དུ་ས་རེ་ཐོབ་པར་འགྱུར། །རྣལ་འབྱོར་བླ་ན་མེད་རྒྱུད་རྣམས་ཀྱི། །སྙིང་གི་གནད་རྣམས་འདི་གཞུང་རྟོགས་པས་འཐོབ། ཅེས་པས། ནོར་བུའི་རྩེར་ཁམས་ཐམས་ཅད་མི་འགྱུར་བའི་བདེ་བས་དབང་བྱས་པས་འཁོར་བའི་གནས་སྐབས་ལས་ཕྱིན་ཅི་ལོག་ཏུ་གྱུར་པའི་ས་དང་པོ་ནས་ཀྱང་ཕྱག་རྒྱ་གསུམ་གང་རུང་ཐམས་ཅད་ལ་གོམས་པར་བྱས་པས་མཉམ་རྒྱུའི་རླུང་སྟོང་བརྒྱད་བརྒྱ་པ་གཅིག་ཟད་པ་ནས་གསང་གནས་ཀྱི་ཕྱེད་དུ་བྱང་སེམས་མས་བརྟན། མཆོག་ཏུ་མི་འགྱུར་བའི་བདེ་བ་དེ་སྙིང་ཅིག་རྟོགས་པ་ཐེ་བའི་བརྒྱ་ཕྲག་བཅོ་བརྒྱད་པ་བཅུ་གཉིས་ཀྱི་མཐར་ཁུ་བ་གཙུག་ཏོར་གྱི་མཐར་ཐུག་པར་རེངས་པར་འགྱུར་ཞིང་། རྡུལ་ནོར་བུའི་རྩེ་མོ་དང་རྐང་སོར་གྱི་མཐར་ཐུག་པར་བརྟན་ཏེ། དེའི་དབང་གིས་འཛག་པ་ཐམས་ཅད་དང་བྲལ་བ་གཉིས་སུ་མེད་པའི་ཡེ་ཤེས་ཆེན་པོ་དུས་ཀྱི་འཁོར་ལོ་མངོན་དུ་འགྱུར་རོ། །བདེ་མཆོག་དགྱེས་རྡོར། གསང་བ་འདུས་པ་ཡང་དེ་ཁོ་ན་ཡིན་པས་རྒྱུད་ཐམས་ཅད་ཀྱི་མཐར་ཐུག་པའི་གནད་རྟོགས་༼༢༩ན༥༧༽པ་ཡིན་ནོ། །དེ་ལྟར་དྲི་མེད་འོད་ལས། ཞབས་གཅིག་རྡོ་རྗེ་ནོར་བུ་རྡུལ་དང་ཉི་མ་དང་། གཉིས་པ་གཙུག་ཏོར་ཁུ་བ་རི་བོང་ཅན་ལ་ནི། རྟག་ཏུ་མི་ཕྱེད་དབྱེར་མེད་འདོད་པ་བཀོད་གྱུར་པ། འཇིག་རྟེན་གསུམ་གྱིས་མཆོད་པའི་གཙོལ་སྤྱི་བོས་འདུད། ཅེས་དང་། རྐང་པ་ཡ་གཅིག་མཐིལ་གྱིས་གནོན། རྐང་མཐེབས་སེན་མོའི་ཁྱོན་གྱིས་ཀྱང་། ཚངས་པའི་ཡུལ་ས་རྩེ་ནས་གནོན། ཞེས་སོ། །གཉིས་པ་ལམ་དེ་ལ་བར་ཆད་མེད་པར་བྱ་བའི་ཕྱིར། བསམ་གཏན་གྱི་གེགས་བསལ་བ་ལ། གཞུང་དོན་དུ་མདོར་བསྡུས་པ་དང་། སླར་མངོན་རྟོགས་རྒྱས་ཁ་འཕངས་ཏེ་བཤད་པ་གཉིས། དང་པོ་ལ། ལས་དད་པོ་པའི་དབང་དུ་བྱས་པ་དང་། རྣལ་འབྱོར་པའི་དབང་དུ་བྱས་པ་གཉིས། དང་པོ་ནི། ལུས་ལ་གནས་པ་རླུང་དང་ནད་གཞིའི་རྩིགས། འབྱུང་བའི་རླུང་འཁྲུགས་པ་དང་ལོག་པས་འཕེལ་བ་སྟོང་པའམ་རེ་རེ་ཙམ་འཕེལ་དྲགས་པས་ཕོ་བའི་མེ་ཞན་རྩིགས་མ་རྒྱས། སྣོད་ཀྱི་དྲི་མ་འཕེལ། དེ་ལས་ནད་དུ་གྱུར་པའོ། །གྱེན་དུ་འཕང་ཞིང་འོག་ཏུ་བཅིང་བ་དང་། ཐད་ཀར་སེང་ཞིང་རང་སར་གཞིལ་བར་བྱ། སྨད་ཀྱི་གེགས་ཐིག་ལེ་འཛག་པ་ལ་སོགས་པ་ཐམས་ཅད་སྟོད་ཀྱི་རླུང་སྦྱོར་གྱིས་གྱེན་དུ་གཅུད་པ་ཧ་འདོན་རྣམས་དང་། ལྟག་འཐེན་གྱིས་འཕང་ངོ་། །སྟོད་དུ་འཚངས་ཤིང་ཐིག་ལེ་གྱེན་དུ་བུང་པ་སོགས་ཐམས་ཅད་སྨད་ཀྱི་རླུང་སྦྱོར་གྱིས་གཅུད་ཅིང་འབེབས་པས་སེལ་ལོ། །ཐད་ཀའི་ནང་ཟུག་རྣམས་སྟེང་འོག་བར་གསུམ་གྱི་རླུང་སྦྱོར་གྱི་གནད་གཅུན་པས་རྐྱེན་ཐམས་ཅད་རང་ཡལ་དུ་ཞི་བར་བྱེད་པའམ། ཡང་ནད་གང་ཞིང་ཟུག་རྔུའི་གནས་སུ་འཕང་། སྟེང་འོག་བར་གསུམ་གྱི་རླུང་གཅུན་ན་ཟུག་གང་ཡོད་པའི་སར་རླུང་སེམས་དྲིལ་ནས་ནད་ཐམས་ཅད་ཐད་ཀ་ནས་ཕར་འཐོན་པར་བསམས་ལ་འཁྲུལ་འཁོར་གྱིས་གཅུན་ནོ། །དེས་ན་སེལ་ན་གཉེན་པོ་བསམ་གཏན་གྱིས་འཆོས་པའི་ཕྱིར་གསུངས་པ། ས་དང་ཆུ་དང་མེ་དང་རླུང་རྣམས་ཀྱང་། དགྲ་དང་གྲོགས་སུ་རང་གི་གནས་པ་ལས། ཚ་གྲང་གཉེན་པོའི་རིམ་པས་སྦྱང་བར་བྱ། དུས་དང་། ན་ཚོད་དང་། ནད་དང་། འབྱུང་བ་གང་༼༢༩བ༥༨༽འཕེལ་བའི་རིམ་པ་ཤེས་པས། དེ་དང་དེའི་དགྲ། སའི་གཉེན་པོར་རླུང་བསྒོམ་པ་ལྟ་བུ་དང་། དགྲ་དང་སྤྲད་པས་མ་སེལ་ན་གྲོགས་དང་སྡེ་བ་སྟེ་མེའི་འོག་ཏུ་རླུང་བསྒོམ་པ་ལྟ་བུའོ། །དེའི་ཕྱིར། སྟེང་གི་ཉེས་པ་འོག་ཏུ་བཅིངས་པས་སེལ། འོག་གི་ལོག་རྣམས་སྟེང་གིས་དེ་བཞིན་ནོ། །ཞེས་གསུངས་སོ། །བར་དུ་སོང་བ་ལས་འཕྲོས་ནས། ཐད་ཀའི་གཟེར་ཟུག་དྲོད་དང་བྲལ་བ་རྣམས། རང་རང་གནས་སམ་བསྐྱེད་པའི་རྩ་སྒོ་ནས། ཟུག་རྔུ་དེ་ནི་ཐད་ཀར་དབྱུང་བར་བྱ། ཞེས་པས་ཚད་པ་ལ་སོགས་པ་མ་ཡིན་པའི་ཐད་ཀའི་ཟུག་ནི་དབང་ཕྱུག་ཆོས་ཀྱིས་རང་སར་གཞིལ་ལོ། །གཉིས་པ་རྣལ་འབྱོར་པའི་དབང་དུ་བྱས་ནས་གསུངས་པ། བདག་པོ་གསུམ་གསུམ་རླུང་སེམས་ལས་སུ་རུང་། རྩའི་བདག་པོ་དབུ་མ། རླུང་གི་བདག་པོ་ཡེ་ཤེས་ཀྱི་རླུང་། ཐིག་ལེའི་བདག་པོ་མི་ཤིགས་པའི་ཐིག་ལེ་ཡིན་ལ། དེ་གསུམ་གྱིས་རླུང་སེམས་ལས་སུ་རུང་བར་བྱས་པས་སྒོ་གསུམ་དག་པར་བྱེད་པའོ། །གླིང་བཞི་དང་ནི་རི་རབ་གང་ལ་ཡང་། ཉི་ཟླའི་རྒྱུ་བ་འགགས་པར་གྱུར་པའི་ཚེ། གླིང་གཞི་ཞེས་པ་འཕོ་ཆུང་གི་ཕྱོགས་བཞིའི་རྩ་ནས་འབབ་པར་འབྱུང་བ་བཞིའོ། །རི་རབ་ནི་དབུས་ནས་འབབ་པ་ནམ་མཁའ་སྟེ། དེ་དག་གང་ལ་ཡང་ཞེས་པས་ཐམས་ཅད་ཟིན་པས་སོ། །ཚུལ་ཇི་ལྟ་བུས་ན་ཉི་ཟླའི་ཆོས་ཅན་ལས་བཟློག་པ་སྟེ། དེ་ཡི་ཚེ་ན་འབྱུང་བ་འཁྲུག་པར་འགྱུར། དུས་དེར་དངས་སྙིགས་མ་བྱེ་བ་བྱེ་འདོད་པ་དང་། སྟེང་འོག་འདྲེ་འདོད་ནས་འཐབ་པ་དང་། དབུ་མར་འཇུག་འདོད་ནས་ནང་གི་རྩ་ལམ་རྣམས་སུ་སེམས་རླུང་གི་གཞོན་པ་ཅན་རྣམས་འདུ་བས་རྩམ་བྱང་བའི་དབང་གིས་ཟུག་རྔུ་འབྱུང་བ་སྟེ། སྨན་དང་ནད་ཕྲད་པས་ཟུག་དང་། ཚ་གྲང་འཐབས་པས་འབྲུག་འབྱུང་བ་བཞིན་ནོ། །དེ་ལྟར་ཡང་། རྗེ་བཙུན་མི་ལས་གེགས་དང་གོལ་ཤོར་མང་བ་དེ། ཆོས་སྐྱོན་ཅན་ཡིན་པ་མ་ལགས་ཏེ། རྟགས་མྱུར་དུ་འཐོན་པའི་སྔ་ལྟས་ཡིན། ཞེས་གསུངས་སོ། །སྲོག་ཐུར་འདྲེས་ཀྱང་བྱང་སེམས་རྒྱས་ནས་འཐུར་དུ་ལུད་པ་དང་། འཛིན་པ་ལ་སོགས་པས་སྲོག་ཧ་ཅང་གྱེན་དུ་༼༣༠ན༥༩༽སོང་དྲགས་པས་ཕུགས་མཁའ་སྤྱོད་ཐོབ་ཀྱང་གནས་སྐབས་ཚེ་ཐུང་བས་དང་། བྱང་སེམས་རགས་པས་ལམ་འགགས་པ་སོགས་འབྱུང་ངོ་། །དེ་དག་འཆོས་པ་ནི། གྲང་བའི་ཕྱོགས་ནི་སྟོབས་ཀྱི་སྦྱོར་བས་སེལ། ཞེས་སྲོག་བསྐུལ་ནས་གཏུམ་མོ་ལྷག་པར་སྟོབས་བྱང་བས་རྩ་འཁྱགས་ནས་ཁ་མ་བྱ་བ་དང་། བྱང་སེམས་འཐུར་དུ་ལུད་པ་སོགས་སེལ་བ། དྲོད་ལ་ངེས་པར་བསིལ་བའི་ཆུ་རྒྱུན་དབབ། ཅེས་པ། རླུང་གྱེན་ལ་འབུད་དུ་ཉེ་བ་ན། གསང་འཁོར་གྱི་བུམ་པ་ཅན་བྱས་ལ་བྱང་སེམས་འོག་ཏུ་དྲངས་པས་སེལ། རང་སའི་རྒྱུན་ལམ་དུ་འགགས་པས། འཕང་ཞིང་བརྡུང་བཞི་སྦྱོར་བས་སེལ་བར་འགྱུར། འཁྲུལ་འཁོར་གྱིས་སོ། །གང་དུ་གཅུད་པ་དེ་ནི་སྟོབས་ཀྱི་རླུང་དགང་ཞིང་གཅུད་ལ་བོར་བས་རབ་ཏུ་སེལ། གང་དུ་གཅུད་པ་ཞེས་པ་ནི་རླུང་རྣམས་ཏེ། དེ་རྣམས་ཀྱི་གེགས་ཐམས་ཅད་ནི་བུམ་པ་ཅན་གྱི་གནས་སྐབས་དེས་སམ། བྱེད་པ་བཅིངས་ནས་སྒོ་ལྔ་གཅུད་ལ་བོར་བའི་རྣམ་པར་མི་རྟོག་པས་སེལ་ལོ། །གེགས་བསལ་བས་གནས་སྐབས་ཀྱི་དགོས་པ། ལུས་ཀྱི་ནད་འཇོམས་སྟོབས་དང་བདེ་བ་རྒྱས། ཞེས་པས། འབྱུང་འཁྲུགས་ཀྱི་ནད་སེལ། རྩ་བྱང་། རླུང་ལས་རླུང་། ཐིག་ལེ་འཕེལ། དེའི་དབང་གིས་མདངས་སྟོབས་ལྷ་འདྲའོ། །གཉིས་པ་སླར་མངོན་རྟོགས་རྒྱས་པ་ཁ་འཕངས་ཏེ་བཤད་པ་ལ། གེགས་སེལ་སྤྱིར་བསྟན་པ་དང་བྱེ་བྲག་ཏུ་བསྟན་པ་གཉིས། དང་པོ་གེགས་སེལ་སྤྱིར་བསྟན་པ་ལ། སྙན་རྒྱུད་མཆེ་བ། བདུད་རྩིའི་ཕྲེང་བ། རིན་ཆེ་འཕྲེང་བ། སྨན་དཔྱད་མ། གྲགས་བྱང་ཞུས་ལན། ཐོར་བུ་བའོ། །གཉིས་པ་ལ། གྱེན་དུ་འཕང་བ་ཧ་དམིགས་དང་ལྟག་འཐེན། འཐུར་དུ་འབེབས་པ་སྙན་རྒྱུད་མ་ཆུང་བ། ཐད་ཀར་སེང་བ་དབང་ཕྱུག་བཅོས་སོ། །གསུམ་པ་གེགས་བསལ་ནས་མཐར་ཐུག་གི་འབྲས་བུ་ཐོབ་ཚུལ་ལ་དངོས་གྲུབ་ཐོབ་པའི་དུས་དང་། ཕྱག་རྒྱ་ཆེན་པོའི་དངོས་གྲུབ་དངོས་གཉིས་ལས། དང་པོ་ནི་འགའ་ཞིག་ལོ་གསུམ་ཕྱོགས་གསུམ་གྱིས་ཡེ་ཤེས་ཀྱི་རླུང་ལོ་བརྒྱ་ནས་རྫོགས་པ་དེ་ལ་ཐོབ་པར་འདོད་པ་མི་འཐད་དོ། །ལོ་གསུམ་ཕྱོགས་༼༣༠བ༦༠༽གསུམ་ན་བྱང་ཆུབ་ཀྱི་སེམས་སྒྲིབ་པ་དང་བྲལ་བར་གསུངས་པས་སོ། །ཡང་སོ་སོར་སྡུད་པ་ནས། ཏིང་ངེ་འཛིན་གྱི་བར་ལོ་གསུམ་ཕྱོགས་གསུམ་གྱིས་ཐོབ་ཟེར་བ་ཡང་མི་འཐད་དོ། །དེ་ཡང་། བསྙེན་པའི་ཡན་ལག་ལོ་གཅིག་དང་། ཉེར་བསྒྲུབ་ལ་ཟླ་བ་དྲུག་ཏུ་གསུངས་ཏེ། པདྨ་དཀར་པོས། སྟོང་པ་ཉིད་ཀྱི་གཟུགས་ལ་འཇུག་པ་རྣལ་འབྱོར་པ་ལོ་གཅིག་གི་སྦྱོར་བ་བྱས་པས་ཨ་བ་དྷཱུ་ཏཱིར་གནས་སོ། །དེ་ནས་བུམ་པ་ཅན་གྱིས་བདེ་བ་ཆེན་པོའི་སྐད་ཅིག་བསྐྱེད་པར་བྱ་ཞིང་། བདེ་བ་རྣམ་པར་འཕེལ་བའི་བྱ་བར་ངེས་པའོ། །ཞེས་གསུངས་པས་དང་། ཡང་། སྲོག་དང་རྩོལ་བ་འཛིན་པའི་ཚད་ནི། སྐུ་མཐོང་བར་གྱུར་ནས་ཉིན་མཚན་སོ་སོའི་དུས་སུ་སྲོག་གི་རླུང་ཉིད་རབ་ཏུ་འགགས་པར་བྱས་པ་དང་། བརཏལ་ཞུགས་ཅན་རྣམས་ལམ་གྱི་སེམས་ནི་ཟླ་བ་དྲུག་གིས་རེག་བྱ་བྲལ་ནས་བདེ་བ་མཉམ་པོར་འགྱུར་བའོ། །ཞེས་རྗེས་དྲན་ཏིང་ངེ་འཛིན་ལོ་གསུམ་ཕྱོགས་གསུམ་སྟེ། དེ་ཡང་། སྒྲུབ་ཐབས་ལེའུར། དེ་ནས་ཏིང་ངེ་འཛིན་གྱི་དག་པས་ཅུང་ཟད་ཉིན་ཞག་རྣམས་ཀྱི་ཡེ་ཤེས་སྐུ་ནི་འགྲུབ་པར་འགྱུར། ཞེས་པའི་འགྲེ་པར། ཅུང་ཟད་ཉིན་ཞག་རྣམས་ཀྱི་ཞེས་བྱ་བ་ལས། ཟླ་བ་ཕྱེད་དང་གསུམ་དང་། ལོ་གསུམ་གྱི་ཉིན་ཞག་རྣམས་ཀྱིས་ཏེ། ཡེ་ཤེས་སྐུ་ནི་ཐོབ་པར་འགྱུར། ཞེས་བྱ་བ་ལ་དབང་ལ་སོགས་པ་ཐོབ་པའི་བྱང་ཆུབ་སེམས་དཔའ་ཞེས་གསུངས་པས་སོ། །ལོ་ཕྱེད་དང་གཉིས་པོ་དེ། ལོ་གསུམ་ཕྱོགས་གསུམ་གྱི་ནང་གསེས་སོ་སྙམ་ན་དེ་ལྟར་མ་ཡིན་ཏེ་བསྒྲུབ་ཐབས་ལེའུར། ལོ་གཅིག་དང་ཕྱེད་དག་ཏུ་བླ་མའི་ངེས་པའི་དབང་ལས་ཞེས་སོགས་ཀྱི་འགྲེལ་པར། རྟོག་པ་སྤངས་པའི་སྟོང་པ་ཉིད་ཀྱི་གཟུགས་བརྙན་ལ་ལོ་ཕྱེད་དང་ལོ་གཅིག་དག་ཏུ་བླ་མའི་ངེས་པའི་དབང་ལས་ཇི་སྲིད་བརྟན་པར་གྱུར་གྱི་བར་ཕྱག་རྒྱའི་སྦྱོར་བ་ཡིན། ཞེས་བྱ་བ་ནི། འདིར་སོ་སོར་སྡུད་པ་དང་། བསམ་གཏན་དང་། སྲོག་རྩོལ་དང་། འཛིན་པའི་སྟོབས་ཀྱིས་རང་སེམས་བརྟན་པར་གྱུར་གྱི་བར་ཕྱག་རྒྱའི་སྦྱོར་བ་ཡིན་ཏེ། དེ་ནས་ཉིན་ཞག་ཅུང་ཟད་རྣམས་ཀྱི་ཞེས་བྱ་བ་ནི། དུས་ཀྱི་འཁོར་ལོའི་ཉིན་ཞག་རྣམས་ཀྱི་སྟེ། ཉི་ཤུ་རྩ་ལྔ་༼༣༡ན༦༡༽ལྷག་པའི་བརྒྱ་ཕྲག་བཅུ་གཅིག་གིས་སོ། །འགྱུར་བ་མེད་པ་ཉིད་དུ་འགྱུར་ཞེས་བྱ་བ་ནི། ཉིན་ཞག་འདི་རྣམས་ཀྱིས་བྱང་ཆུབ་ཀྱི་སེམས་དྲི་མ་དང་བྲལ་བར་འགྱུར་ཞེས་བྱ་བར་འགྲེལ་ལོ། །ཞེས་པ་དེས་ན། དོན་སོར་སྡུད་ཐོག་མའི་ཆ་ནས་ཏིང་ངེ་འཛིན་གྱི་མཐར་ཕྱིན་པའི་བར་ལོ་བཞི་དང་། ཟླ་བ་ཕྱེད་དང་བརྒྱད་ཀྱིས་ཐོབ་བོ། །གལ་ཏེ་བསྒོམ་པའི་ལོང་མེད་ན། སྐྱེ་བ་ཕྱི་མར་ལམ་འདི་དང་ཕྲད་ནས་ཕྱག་རྒྱ་ཆེན་པོའི་དངོས་གྲུབ་འཐོབ། བརྩོན་འགྲུས་དང་མི་ལྡན་པ་ཡང་དག་པའི་ལམ་བསྒོམ་པར་མ་བྱས་ཀྱང་སྟོང་པ་ཉིད་ཀྱི་བག་ཆགས་ཀྱི་སྟོབས་ཀྱིས་སྐྱེ་བ་བདུན་ཚུན་ཆད་ལ་ཐོབ་པར་གསུངས་སོ།། །།གཉིས་པ་ཕྱག་རྒྱ་ཆེན་པོའི་དངོས་གྲུབ་དངོས་ནི། ལུས་དང་ཕུང་པོའི་སྒྲིབ་པ་བཅོམ་པ་ལས། སེམས་ལ་འཛིན་པའི་བག་ཆགས་མི་སྐྱེ་བས། ནམ་མཁའ་སྤྲིན་དང་བྲལ་བའི་རྒྱུ་སྐར་བཞིན་རིམ་པ་འདིས་ནི་ཐམས་ཅད་མཁྱེན་པར་འགྱུར། ཞེས་པ། ངག་བྱེད་རྣམ་པར་ཐར་པ་བཞིས། དག་བྱ་ལུས་དག་སེམས་བག་ཆགས་བཞིའི་སྒྲིབ་པ་དག་པར་བྱས་པ་ཞེས་པའི་དོན་ནོ། །འཛག་པ་ལས་ནི་དུག་གསུམ་སེམས་སྐྱེ་བས། འདི་ཡི་རིམ་པས་འཛག་པ་ཟད་པ་ལས། ཉོན་མོངས་སྒྲིབ་པའི་བདུད་ལས་རྒྱལ་གྱུར་ཏེ། རིམ་པ་འདིས་ནི་དུག་གསུམ་འཇོམས་པར་འགྱུར། གནས་བཞིར་མངོན་པར་བྱང་ཆུབ་བཞི། རྡོ་རྗེ་བཞི་དང་། མཁྱེན་པ་བཞི་དང་། སྐུ་བཞིར་གྲུབ་པ་ཞེས་པའི་དོན་ནོ། །བདུད་རྩི་ལྔ་ཡི་དངས་མའི་རྩིགས་ཟོས་པས། རྩིགས་མེད་དངས་མའི་ལུས་སུ་གྱུར་པའི་ཚེ། །ཐོག་བཅས་དངོས་པོའི་བདུད་དང་བྲལ་བའི་ཕྱིར། འཇའ་ལུས་རྡོ་རྗེའི་སྐུ་རུ་འདི་ཡིས་འགྲུབ། ཅེས་རྡུལ་རྐང་མཐིལ་དུ་མནན་པས་འཕོ་བ་བཅུ་གཉིས་རྟེན་ཅིང་འབྲེལ་པར་འབྱུང་བའི་ཟད་པ་བདེན་དོན་གྱི་མཐའ་བཅུ་གཉིས་མངོན་དུ་བྱས་པ་འཁོར་བ་ལ་མི་གནས་པ་དང་། ཁུ་བ་གྱེན་དུ་རྫོགས་པས་དཀར་པོའི་ཆ་རྫོགས་པ་སྐུ་བཞི་ལ་བཅུ་དྲུག་ཏུ་ཕྱེ་བའི་དེ་ཉིད་བཅུ་དྲུག་རིག་པས་སྙིང་རྗེས་ཞི་བ་ལ་མི་གནས་པས། མྱ་ངན་ལས་འདས་པའི་མཚན་ཉིད་ཅན་མ་ནིང་གི་གོ་འཕང་མངོན་དུ་བྱས་པ་ནི་ཕྱག་རྒྱ་ཆེན་པོ་༼༣༡བ༦༢༽མཆོག་གི་དངོས་གྲུབ་ཐོབ་པ་ཞེས་བྱའོ། །ཞེས་པའི་དོན་ནོ། །འདི་དོན་བྱིན་རླབས་སྟོབས་ཀྱིས་གནང་བ་རྣམས། །རང་གི་རྟོག་དཔྱོད་བློ་ཡིས་མ་འདྲེས་པར། །རྟོག་དཔྱོད་བརྗེད་པས་འཇིགས་ནས་ཡི་གེར་བཀོད། །ནོངས་ཤིང་འཁྲུལ་པ་ཡོད་ན་བཟོད་པར་གསོལ། །བོད་དུ་འཁྲུངས་ཀྱང་། ཨོ་ཌི་ཡཱ་ཎར་བྱོན་པས། ཨོ་ཌི་ཡཱ་ཎ་པ་ཞེས་མཚན་དུ་གསོལ་བའི་སློབ་དཔོན་ཆེན་པོ་རིན་ཆེན་དཔལ་གྱིས། རྡོ་རྗེ་རྣལ་འབྱོར་མའི་གསུང་ལས་རྙེད་ཅིང་། ཕྱིས་ཡི་གེའི་རིས་སུ་སྤེལ་བར་ཡང་གནང་བ་ཐོབ་པ་བཞིན་བྲི་བར་མཛད་པས་དེ་སྐད་དུ་གསུངས་སོ། །དེ་ལྟར་རྡོ་རྗེ་གསུམ་གྱི་བསྙེན་སྒྲུབ་ཀྱི་ཁྲིད་མཁའ་འགྲོ་མའི་སྲོག་སྙིང་ཞེས་བྱ་བ་འདི་པཎ་ཆེན་དབོན་པོ་ལ་སོགས་པའི་དོན་གཉེར་གྱིས་བསྐུལ་ཞིང་། གནས་གསུམ་གྱི་མཁའ་འགྲོ་མའི་ཚོགས་པས་ཀྱང་གནང་བ་སྦྱིན་པ་ཐོབ་པ། དུས་ཀྱི་འཁོར་ལོའི་རྣལ་འབྱོར་པ། སརྦ་མངྒ་ལཾ། ཆོས་སྦྱིན་རྒྱ་ཆེར་སྤེལ་བའི་ཆེད། །པར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱེད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །། རྡོ་རྗེ་གསུམ་གྱི་བསྙེན་སྒྲུབ་སྒྲུབ་ཆེན་གདན་རྫོགས་སུ་བསྒོམ་པའི་བྱང་སེམས་འགྱུར་མེད་ཀྱི་མན་ངག་གྲུབ་པའི་སྙིང་ཏིགརྡོ་རྗེ་གསུམ་གྱི་བསྙེན་སྒྲུབ་སྒྲུབ་ཆེན་གདན་རྫོགས་སུ་བསྒོམ་པའི་བྱང་སེམས་འགྱུར་མེད་ཀྱི་མན་ངག་གྲུབ་པའི་སྙིང་ཏིག་བཞུགས་སོ།། འོག་མིན་གནས་དེར་རྡོ་རྗེ་འཛིན་པའི་རྒྱལ། །འདུས་ནས་གསང་བའི་བགྲོ་བ་ཅི་མཛད་དེ། །ཨོ་ཌི་ཡཱ་ཎའི་བུ་མོ་ལ་ཟག་པ། །ཇི་ལྟ་དེ་ལྟར་སྟོན་པའི་བླ་མར་བདུད། །སྡིག་པ་སྦྱོང་ཞིང་ཚོགས་བསྒྲུབ་པ་ལ་གོམས་པས། །ཅི་བཤད་ཡིན་ལུགས་གཉུག་མའི་དོན་དེར་འཁྲིལ། །དང་པོ་ལ་སྙིང་པོར་བསྒྲིལ་བ་ཡང་། །ཚིག་གི་སྤུན་བའི་གསེབ་ཏུ་འཐོར་ནས་འཚོལ། །ཨེ་མ་དེ་ཕྱིར་སྟོན་ལ་ཅི། །རང་གི་བསོད་ནམས་དབང་ཁོ། །འོན་ཀྱང་ཐབས་མཁས་ཐུབ་པ་བཞིན། །དྲང་པོས་བསྙད་ནས་ངེས་ལ་སྦྱར། །ཨོ་ཌི་ཡཱཎ་ལས་བྱུང་བའི་མན་ངག །བྱང་སེམས་འགྱུར་བ་མེད་པར་སྒྲུབ་པའི་ཐབས། ཕྱག་རྒྱ་གསུམ་དང་སྦྱོར་བའི་བདེ་ལམ་འདི་ལ། བཤད་པས་གཏན་ལ་ཕབ། བསྒོམ་པས་ཉམས་སུ་བསྟར་བ་གཉིས་ལས། །དང་པོ་ནི། རྗེ་གྲུབ་ཐོབ་ཆེན་པོས་ཨོ་རྒྱན་དུ་བྱོན་པའི་ཚེ། ཡུལ་དེའི་དབུས་དྷུ་མ་ཐ་ལ་ཞེས་པའི་གྲོང་ཁྱེར་ཆེན་པོར་༼༢ན༣༽རང་བྱུང་གི་གཡུང་དྲུང་རིས་དམར་པོས་མཛོད་སྦུ་མཛེས་པའི་བུད་མེད་ཅིག་གིས། ཁྱོད་འདོད་པའི་དངོས་གྲུབ་ཀ་བོ་ཀར་འབྱུང་ཞེས་ལུང་བསྟན་པ་བཞིན། དེར་བྱོན་པས་སྤྲུལ་པའི་རྣལ་འབྱོར་མ་སྨད་འཚོང་མའི་ཚུལ་བཟུང་བ་ས་མུནྡྲ་སུ་ཁ་ཟེར་བ་དེས་རྗེས་སུ་གཟུང་བས་བཅོམ་ལྡན་འདས་མ་ཉིད་དང་མངོན་སུམ་དུ་མཇལ་རྡོ་རྗེ་གསུམ་གྱི་བསྙེན་སྒྲུབ་གསན་ཞིང་བྱིན་གྱིས་བརླབས་པས་མཆོག་དང་ཐུན་མོང་གི་དངོས་གྲུབ་ཐོབ། སླད་ནས་བུ་མོ་དེས་ལམ་འདི་སྩལ་བ་ཡིན་ལ། བསྙེན་སྒྲུབ་ཀྱི་མན་ངག་འདི་ལ། གཙོ་བོ་ལུས་ལྟ་བུའི་གཞུང་གཉིས། འཕྲོས་པ་ཡན་ལག་ལྟ་བུའི་གཞུང་ལྔ་ཡོད་པའི་འདི་གཙོ་བོ་ལུས་ལྟ་བུའི་གཞུང་གཅིག་ཡིན་ནོ། །དེ་ལ་དང་པོར་བསྒྲུབ་པ་ཆེན་པོའི་ནད་སེལ་སྨན་གྱི་མཆོག །ཅེས་གསུངས་ཏེ། བསྒྲུབ་པ་ཆེན་པོ་ཞེས་བྱ་བ་ནི་ཡིད་བྱང་ཆུབ་སེམས་ནང་དུ་ཆུད་པས་འདོད་པའི་དངོས་གྲུབ་ཕྱག་རྒྱ་ཆེན་པོ་བསྒོམ་པར་བྱའོ། །དེ་ལྟར་བདེ་མཆོག་རུང་ངུ་ལས། །ཡིད་༼༢བ༤༽ནི་ནང་དུ་ཆུང་པ་ཡིས། །འདོད་པའི་དངོས་གྲུབ་བསྒོམ་པར་བྱ། ཞེས་གསུངས་པས་སོ། །འདིར་རྡོ་རྗེ་ནོར་བུའི་ནང་དུ་གནས་པའི་བྱང་ཆུབ་ཀྱི་སེམས་འཛག་པ་མེད་པ་ལ་ཡིད་ནང་དུ་ཆུད་པ་ཞེས་བྱའོ། །བྱང་སེམས་དེ་ལས་སམ་ཡེ་ཤེས་ཀྱི་ཕྱག་རྒྱ་དང་འགྲོགས་པའི་དུས་ཁམས་གསུམ་པའི་མཚན་ཉིད་སངས་རྒྱས་ཀྱི་གཟུགས་སུ་བསྒོམས་པས་དེ་ལྟར་ཤར་ལ། ཤར་བ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་མ་རྣམ་པ་ཐམས་ཅད་པའི་མཆོག་དང་ལྡན་པའོ། །དེས་བྱང་སེམས་མི་འཕོ་བར་འཛིན་པས་དང་།ཆེན་མོ་གཉིས་དང་ལྡན་པའི་ཕྱིར་ཕྱག་རྒྱ་ཆེན་མོ་ཞེས་བྱའོ། །དེ་ཉིད་ཤེས་རབ་ཀྱི་རྒྱུད་ལས་འདོད་པའི་དངོས་གྲུབ་ཅེས་བཤད་པར་ཕྱག་རྡོར་གྱི་སྟོད་འགྲེལ་དུ་གསུང་ལ། འདོད་པ་ནི་དམིགས་པ་མེད་པའི་སྙིང་རྗེ་ཆེན་པོའོ། །དངོས་གྲུབ་ནི་དམིགས་པ་དང་བཅས་པའི་ཆེན་པོ་སྟོང་ཉིད་དེ་རྣལ་འབྱོར་པ་རྣམས་ཀྱི་རང་གིས་རིག་པའི་ཕྱིར་རོ། །འདི་ཉིད་བསྒོམ་པ་ནི་འཁོར་བའི་གནས་སྐབས་ཀྱི་ནང་ཐམས་ཅད་འཇོམས་པའི་ཕྱིར་སྨན་ལྟ་བུའོ། །ཕྱག་རྡོར་གྱིས། འདི་ཉིད་བསྒོམ་པ་ཡང་རྣམ་པ་གཉིས་ཏེ། སྔོན་དུ་གཟུགས་བརྙན་སྒོམ་པ་དང་། །ཕྱི་ནས་གཟུགས་བརྙན་བསྒོམ་པའོ། །ཞེས་གསུངས་པས། སོར་བསམ་དང་སྲོག་འཛིན་དང་རྗེས་ཏིང་མཐར་ཆགས་སུ་བསྒོམ་པ་ནི་དང་པོ་ཡིན་ལ། ཕྱི་མ་འདི་ལས་བཤད་པའི་བསྒོམ་པ་སྟེ། དེ་ཡང་ཇི་སྲིད་བྱང་ཆུབ་སེམས་འདོར་བ། །དེ་སྲིད་རྣལ་འབྱོར་པས་མི་བྱ། །རྒྱུན་མི་ཆད་པར་སྐྱེ་གནས་ལ། །མཆོག་ཏུ་དགའ་བ་ཐོབ་པར་འགྱུར། །བདེ་བའི་རང་བཞིན་དེ་ཉིད་ཀྱིས། །ཇི་སྲིད་ཁུ་བ་བརྟན་༼༣ན༥༽པའི་བར། །རྫོགས་པའི་སངས་རྒྱས་གཟུགས་བརྙན་གྱི། །བདག་ཉིད་རྟག་ཏུ་བསྒོམ་པར་བྱ། ཞེས་ལས་རྒྱ་དང་། དེ་ནས་ཡེ་ཤེས་ཀྱི་ཕྱག་རྒྱ་དང་། དེ་ནས་ཕྱག་རྒྱ་ཆེན་མོ་ལ་སྦྱོར་བ་སྟེ། ལས་ཀྱི་ཕྱག་རྒྱའི་དངོས་གྲུབ་ནི་འདོད་པ་ན་སྤྱོད་པའི་འབྲས་བུའི། ཡེ་ཤེས་ཀྱི་ཕྱག་རྒྱའི་དངོས་གྲུབ་ནི་གཟུགས་ན་སྤྱོད་པའི་འབྲས་བུ། ཕྱག་རྒྱ་ཆེན་མོའི་དངོས་གྲུབ་ཐམས་ཅད་མཁྱེན་པའི་འབྲས་བུའོ། །ལས་ཀྱི་ཕྱག་རྒྱའི་བདེ་བ་ནི་འཛག་བད། ཡི་རྒྱའི་བདེ་བ་ནི་གཡོ་བའི་བདེ་བ། ཕྱག་རྒྱ་ཆེན་མོའི་བདེ་བ་ནི་མཆོག་ཏུ་མི་འགྱུར་བའི་བདེ་བའོ། །དང་པོའི་སངས་རྒྱས་ལས། འདོད་པ་ན་སྤྱོད་དངོས་གྲུབ་ནི། །ལས་ཀྱི་ཕྱག་རྒྱས་བསྒྲུབ་པར་བྱ། །ཡེ་ཤེས་ཕྱག་རྒྱས་གཟུགས་ཁམས་ཀྱི། །འོག་མིན་གནས་གྱི་མཐར་ཐུག་པར། །ཡན་ལག་ཕྱག་རྒྱ་ཆེ་བསྒོམས་པས། །རྣལ་འབྱོར་ཆེན་པོ་ཀུན་མཁྱེན་ཉིད། །འགྱུར་མེད་བདེ་བའི་རང་བཞིན་ཉིད། །སྐྱེ་བ་འདིར་ནི་སངས་རྒྱས་ཉིད། །ཅེས་དང་། ལས་ཀྱི་ཕྱག་རྒྱའི་སྙོམས་འཇག་དང་། །ཡེ་ཤེས་ཕྱག་རྒྱའི་དམིགས་པ་དང་། །ཕྱག་རྒྱ་ཆེན་མོ་གཅིག་སྦྱོར་བས། །མི་འགྱུར་བ་དེ་འཕེལ་བར་འགྱུར། ཞེས་དང་། བསྡུས་རྒྱུད་ལས། ཤེས་རབ་ཐབས་ཀྱི་བདག་ཉིད་ཀྱིས་ནི་འགྱུར་མེད་བདེ་བའི་དབང་གིས་ཡེ་ཤེས་གཟུགས་ལ་ཏིང་ངེ་འཛིན། འདི་རྣམས་དམན་པ་ལ་སོགས་དབྱེ་བ་རྣམས་ཀྱི་གཙོ་བོའི་སྒྲུབ་ཐབས་རྣམ་པ་གསུམ་དུ་འགྱུར། ཕྱག་རྒྱ་གསུམ་དང་གནས་སྐབས་གསུམ་ནི་རྣམ་གསུམ་བགྲོད་པའི་དབང་གིས་ལས་དང་ཀུན་རྟོག་མཆོག །ཅེས་གསུངས་སོ། །ད་ནི་དེ་བསྒྲུབ་པའི་ཕྱག་རྒྱ་ཆེན་མོ་༼༣བ༦༽ལ་ཡང་དག་པར་སྦྱོར་བའི་ཚུལ་གསུངས་བ། ཆར་ཀུན་པོའི་རྩེ་ནས་འབེབས། ཆར་ནི་བྱང་ཆུབ་སེམས་འཐུར་དུ་འཛག་པའོ། །གང་ནས་འཛག་པ་ཞེན་སྒལ་ཚིགས་ལྷུན་པོའི་སྟེང་གཙུག་ཏོར་ནམ་མཁའི་ཁམས་ལས་སོ། །གང་དུ་འབབ་ན་གསང་བ་ཡེ་ཤེས་ཀྱི་ཁམས་དེར་རོ། །རྣལ་འབྱོར་བྱོན་ཚེ་དེར་སླེབ་པའི་དུས་ཡིད་ནང་དུ་ཆུད་པས་འདོད་པའི་དངོས་གྲུབ་བསྒོམ་པར་བྱའོ། །རྩ་གསུམ་འདེགས་ཞེས་པ་ནི་ཁམས་འགྱུར་མེད་ཀྱི་ཐིག་ལེར་གྱུར་པས་ལས་རླུང་ཡེ་ཤེས་ཀྱི་རླུང་དུ་ཐིམ་རྒྱུ་དེས་གནས་པ་རྩའི་མདུད་པ་ཐམས་ཅད་གྲོལ་བས་སོ། །ཚངས་པ་ནི་གསེར་སྒོ་དེར་ཟུག་པའི་གཙུག་ཏོར་གྱི་འཁོར་ལོ་ནས་དམར་ཆ་འཐུར་དུ་རྐང་ཐེབ་ཀྱི་མཐར་ཐུག་པའི་བར་དུ་གནོན་པའོ། རྡོ་རྗེའི་བྲག་ལ་རྩ་གསུམ་འཁྱུད། །མི་ཆོད་མི་ཤིགས་བདེན་སྲ་བརྟན། ཐོགས་མེད་མ་ཕམ་ལ་སོགས་པའི་ཆོས་བདུན་གྱི་རྡོ་རྗེའི་བྲག་ཡང་དག་པའི་མཐའ་ལ་བཏགས་སོ། །རྩ་ནི་མི་ཤིགས་པའི་དབུ་མའོ། གསུམ་ཞེས་པ་ནི་ཡེ་ཤེས་ཀྱི་རླུང་དང་། དྭངས་མའི་ཐིག་ལེ་དང་། དེ་ལ་བརྟེན་པའི་བདེ་བ་ཐམས་ཅད་དེར་ཐིམ་པས་གཉིས་སུ་མེད་པར་འཁྱུད་པ་ཞེས་བྱའོ། །རྒྱུ་དེས་ཐམས་ཅད་མཁྱེན་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དང་། ལམ་མཁྱེན་པ་ཉིད་དང་། ལམ་གྱི་རྣམ་པ་ཐམས་ཅད་མཁྱེན་པ་ཉིད་དང་། སྟོབས་བཅུ་མི་འཇིགས་པ་བཞི་ལ་སོགས་པའི་སངས་རྒྱས་ཀྱི་ཡོན་ཏན་མཐའ་དག་ཐོབ་པར་འགྱུར་རོ། །ཡེ་ཤེས་ཀྱི་ཕྱག་རྒྱ་ལ་སྦྱར་ནས་ཕྱག་རྒྱ་༼༤ན༧༽ཆེན་པོ་བསྒྲུབ་པའི་ཚུལ་གསུངས་པ། ཚངས་པའི་སྐུད་པ་འོག་ཏུ་བསྡམ། ཚངས་པ་ནི་འདིར་ཚངས་དབྱུག་ཅེས་བྱ་བ་དབུ་མའོ། །སྐུད་པ་དེར་གནས་སྐབས་བཞི་བསྐྱེད་པའི་ས་བོན་ལྟ་བུའི་ཁམས་ཀྱི་དྭངས་མ་འོད་ཀྱི་ཐིག་ལེ་བྲང་དེར་གནས་པ་དེའོ། །འོག་ཏུ་བསྡམ་པ་ནི་ལྟེ་བའི་བུམ་པ་ཅན་དེ་གཡས་དང་གཡོན་དུ་རབ་ཏུ་རྒྱུ་བ་བཀག་ནས་དབུ་མར་ཡི་གེ་གསུམ་གྱི་བཟླས་པས་སྲོག་ཐུར་ལྟེ་བར་དང་པོར་འཐབ་ཅིང་ཕྱི་ནས་འདྲིའོ། །དེ་ལ་གོམས་ནས། ཉི་ཟླ་གྱེན་བཟློག་ཧཾ་ལ་གཏད། འཁོར་ལོ་གཟན་གསུམ་གྱི་ལྟེ་བའི་དྷཱུཏཱིར་སྲོག་ཐུར་འདྲེས་ཤིང་རེངས་པའི་སྦྱོར་བ་བྱས་ནས་གཙུག་གཏོར་གྱི་ཧཾ་ལ་འཛིན་ནོ། །ཕག་པའི་ལྟོབས་དངོས་མ་གཟུང་། དེས་རླུང་འགགས་པས་གཏུམ་མོ་རང་བྱུང་དུ་འབར་ཏེ་གཙུག་ཏོར་གྱི་ཧཾ་ཞུ་བ་ལུས་ཀྱི་ཆ་ཐམས་ཅད་ནས་འོངས་ཏེ་གསང་བའི་འཁོར་ལོའི་མཐར་ཐུག་པའི་བར་དུ་སོན་པ་དེའི་ཚེ། ཕག་པ་ནི་གཏི་མུག་ལ་བཏགས་ཤིང་དེའི་རྩ་ཡིན་པས་དབུ་མའོ། །ལྟོ་བ་ནི་གསང་གནས་ཀྱི་འཁོར་ལོ་འབའ་ཞིག་ཏུ་ཐིག་ལེ་བརྟན་པར་བྱེད་པའོ། །སྟེང་དུ་རྡོ་རྗེའི་སྒྲ་བསྒྲགས་པས། ཞེས་ཡུལ་ཡུལ་ཅན་བཅུའི་རྩ་འཆིངས་ཏེ་དབང་ཡུལ་གྱི་འབྲེལ་བ་ཁེང་པས་འཁོར་ལོ་དྲུག་གི་རྩ་འཆིངས། དེས་རླུང་འཆིངས། དེས་བྱང་ཆུབ་ཀྱི་སེམས་ཀྱིས་སྤྱི་བོ་གང་བར་བྱེད་ནུས་ལ། དེས་རགས་པའི་ལུས་ངག་ཡིད་དང་ཡེ་ཤེས་འགོག་པས། རིགས་པའི་རླུང་དག་པའི་ནཱ་དའི་རང་སྒྲ་ཇི་སྙེད་པའི་སྒྲ་སྐད་དུ་སྨྲ་བར་ནུས་པའོ། །འོག་ཏུ་རྡོ་རྗེ་བདེ་བ་ཆེ། ཚུལ་དེས་རགས་༼༤བ༨༽པའི་ཐིག་ལེ་བརྟན་པར་བཅིངས་པས་མངོན་དུ་གྱུར་པའི་དགའ་བ་བཞིའི་ཡེ་ཤེས་མངོན་དུ་བྱེད་པ་ཞེས་བྱ་སྟེ། འདིས་མོས་སྤྱོད་དུ་བཞག་པའི་བདེན་དོན་བཅུ་གཉིས་པའི་ས་དང་དེ་ཉིད་བཅུ་དྲུག་རིག་པའི་སའོ། །དུས་དེར་སྲོག་བདུད་རྩི་འཁྱིལ་པའི་གཟུགས་བརྙན་དུ་བསྒྲུབ་པར་དེ་ཡིན་དུ་ཆུད་པས་འདོད་པའི་དངོས་གྲུབ་ཏུ་བསྒོམ་པར་བྱ་སྟེ། །བྱེད་པ་བཅིངས་པའི་སྦྱོར་བ་ཡིས། །ས་གསུམ་པོ་ནི་བསྒྲུབ་པར་བྱ། ཞེས་གསུངས་པའོ། །ད་ནི་བསྒྲུབ་པ་ལས་ཀྱི་ཕྱག་རྒྱ་ལ་སྦྱར་ནས་ཡེ་རྒྱ་བསྒྲུབས། །དེ་ནས་ཕྱག་ཆེན་བསྒྲུབ་པའི་ཚུལ་གསུངས་པ། ཡཾ་རཾ་བཾ་ལཾ་མྱུར་དུ་བརྗོད། གཙུག་ཏོར་ནམ་མཁའི་ཁམས་ནས་བྱང་ཆུབ་སེམས་འོག་གི་ཆར་སྤྱི་བོ་རླུང་། མགྲིན་པ་མེ། སྙིང་ག་ཆུ། ལྟེ་བ་ས་ནས། གསང་གནས་ཡེ་ཤེས་ཀྱི་བདག་ཉིད་ཀྱི་རྡོ་རྗེ་བཙུན་མོའི་བྷ་གར་བྱོན་པ་ན། ཀྵ་ཀྵི་ངག་ཏུ་བརྗོད་པས་བཟློག །དེར་བྱང་སེམས་མི་སྤྲོ་བར་ཁམས་གསུམ་པོ་ཐམས་ཅད་ལྷའི་འཁོར་ལོ་སངས་རྒྱས་ཀྱི་གཟུགས་བརྙན་དུ་སྤྲོས་པས་སྤྲོས་པ་ཐམས་ཅད་བཟློག་པར་བྱ་སྟེ། བྷ་གར་ལིངྒ་རབ་བཞག་ནས། །བྱང་ཆུབ་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་པ། །སངས་རྒྱས་གཟུགས་སུ་སྤྲོ་བར་བྱ། ཞེས་གསུངས་པས་སོ། །ནང་ཧཱུྃ་དྲག་པོ་དྭངས་མ་བསྐྱལ་འདྲེན་ནོ། །ཁྱབ་འཇུག་གླིང་བཞི་ཀུན་ལ་དགྲམ། ཁྱབ་འཇུག་ཐུགས་ཀྱི་རྡོ་རྗེ་ཞེས་འདོན་པས་ན་ཡིད་ཐིག་ལེ་ལ་བྱའོ། །གླིང་བཞི་ནི་ཡན་ལག་གོ། །དེས་མཚོན་ནས་ཐིག་ལེས་ལུས་ཐམས་ཅད་ཁྱབ་པར་བྱད་པ་འགྲེམས་སོ། །འབྱེད་འཛུམ་གྱིས་ནི་རྩིགས་འཐུར་འབྱིན།༼༥ན༩༽ནངས་སྙིགས་ཕྱེ་བའི་རྩིགས་མ་འཐུར་ལ་འབེབས་པའོ། །དེ་ནས་བདེ་བ་གོམས་པར་བྱ་བའི་ཕྱིར་ཡེ་ཤེས་ཀྱི་ཕྱག་རྒྱ་ལ་བསླབ། དེ་ནས་ཕྱག་རྒྱ་ཆེན་མོ་བསྒོམ་པར་བྱའོ། །དེས་ཁྱབ་བདག་ཀུན་གྱི་དཔལ་དུ་གྱུར། འདིའི་དོན་མཚན་བརྗོད་ནས། །ཆགས་བྲལ་དང་པོ་ཆགས་པ་ཆེ། །ཁ་དོག་སྣ་ཚོགས་འབར་བའི་འོད། །རྡོ་རྗེ་སྐྱིལ་ཀྲུང་རྫོགས་སངས་རྒྱས། །སངས་རྒྱས་འགྲོ་བའི་ཆོས་འཛིན་པ། ཞེས་པས་གསུངས་ཏེ། ཆགས་བྲལ་ནག་པོའི་ཕྱོགས། དེའི་དང་པོ་ནི་དེའི་སྔོན་དུ་ཞེས་པའི་དོན། ཆགས་པ་ནི་བཅོ་ལྔའི་བདག་ཉིད་ཅན་གྱི་དཀར་ཕྱོགས། ཆེ་ཞེས་པ་དེའི་མཐར་ཆགས་པ་ཆེན་པོ་ཆ་བཅུ་དྲུག་ལ་ཞེས་པའོ། །ཁ་དོག་སྣ་ཚོགས། ཤེས་ཕྱིན་རྣམ་པ་ཀུན་གྱི་མཆོག་དང་ལྡན་པ་སྟེ། འབར་བའི་འོད་སོ་སོ་རང་གི་རིག་པ་རྡོ་རྗེ་བྱང་སེམས། སྐྱིལ་ཀྲུང་ནི་འཛག་མེད་དུ་བཅིངས་པ། རྫོགས་སངས་རྒྱས་ནི་བྱང་ཆུབ་སེམས་འགྱུར་བ་མེད་པར་གྱུར་བ། སངས་རྒྱས་འགྲོ་བའི་ཆོས་འཛིན་པ་ནི། མས་བརྟན་པའི་ཚུལ་གྱིས་འཁོར་ལོ་བཞིར་སྐུ་གསུང་ཐུགས་ཡེ་ཤེས་ཀྱི་ཐིག་ལེ་བཞི་འཛིན་པའོ། །ཡང་དེ་ཉིད་ལས། རྣམ་པ་ཀུན་ལྡན་རྣམ་པ་མེད། །བཅུ་དྲུག་ཕྱེད་ཕྱེད་ཐིག་ལེ་ཅན། །ཆ་མེད་ཆ་ལས་འདས་པ་སྟེ། །བསམ་གཏན་བཞི་པའི་རྩེ་མོ་འཆད། ཞེས་རྣམ་པ་ཀུན་ལྡན་རྣམ་པ་མེད་ནི་རྒྱུ་སྟེ་སྔར་བརྗོད་པའི་སངས་རྒྱས་ཀྱི་གཟུགས་བརྙན་ནོ། །བཅུ་དྲུག་ཕྱེད་ཕྱེད་ཐིག་ལེ་ཅན་ནི་འབྲས་བུ་སྟེ་བྱང་སེམས་ཞུ་བའི་མཐར་འཆིང་བའོ། །དེ་ཉིད་འདུས་པར་ཡང་། རྡོ་རྗེ་སྐྱིལ་ཀྲུང་གི་སེམས་ནི། ༼༥བ༡༠༽ནོར་བུའི་ནང་དུ་གནས་པ་བལྟ། རྒྱུ་མཐུན་ལ་སོགས་བདེ་བ་རྫོགས། །དྲི་མ་མེད་པའི་བར་དུ་བསྒོམ། ཞེས་གསུངས་པས། འགྱུར་བ་མེད་པར་གྱུར་ནས་གྲུབ་པའི་དངུལ་ཆུ་དང་སྦྲུལ་གྱི་མེ་བའི་དུག་བཞིན། ལུས་ཐམས་ཅད་སྐད་ཅིག་གིས་དངས་མ་ཡེ་ཤེས་ཀྱི་སྐུར་འགྱུར་ལ། དེ་ཁམས་ཕྲ་བ་ཐམས་ཅད་སྦྱངས་པས། གཉུག་མའི་ལུས་ངག་ཡིད་དུ་གྱུར་པས་གསང་བ་བསམ་གྱིས་མི་ཁྱབ་པའམ། སྐུ་མི་ཟད་པ་རྒྱན་གྱི་འཁོར་ལོའམ་སྐུ་རྣམ་པ་ཐམས་ཅད་པ། གསུང་མི་ཟད་པ་རྒྱན་གྱི་འཁོར་ལོའམ་གསུང་རྣམ་པ་ཐམས་ཅད་ལ། ཐུགས་མི་ཟད་པ་རྒྱན་གྱི་འཁོར་ལོའམ་ཐུགས་རྣམ་པ་ཐམས་ཅད་བཞེས་བྱ་བ་དང་ལྡན་པའི་ཁ་སྦྱོར་ཡན་ལག་བདུན་དང་ལྡན་པའི་སྐུ་དེ་ཐོབ་པར་འགྱུར་རོ། །འགྱུར་མེད་ཐོབ་ནས་འཕེལ་བའི་ཕྱིར་དུ་ཕྱག་རྒྱ་གཞན་གཉིས་བཞག་ནས་ཕྱག་རྒྱ་ཆེན་མོ་འབའ་ཞིག་ལ་འཁྱུད་པར་གསུངས་ཏེ། ལས་ཀྱི་ཕྱག་རྒྱ་ཡོངས་དངོར་ཞིང་། །ཡེ་ཤེས་ཕྱག་རྒྱ་རྣམ་སྤངས་ཏེ། །མཆོག་ཏུ་མི་འགྱུར་རྣལ་འབྱོར་གྱིས། །ཕྱག་རྒྱ་ཆེན་མོ་རྣམ་བསྒོམ་བྱ། ཞེས་པའོ། །ཕྱག་རྒྱ་གསུམ་རོ་གཅིག་ཏུ་འཆར་བའི་ཕྱིར་བསྟན་ཀྱང་འགལ་བ་ཡོད་པ་མ་ཡིན་ཏེ་སྔར་བཤད་པའི་ལུང་གིས་ཀྱང་གྲུབ་བོ། །གཉིས་པ་སྒོམ་པས་ཉམས་སུ་བསྟར་བ་ལ། ལས་ཀྱི་ཕྱག་རྒྱ་ལ་འཁྱུད་པ་བསྙེན་པ། ཡེ་ཤེས་ཀྱི་ཕྱག་རྒྱ་ལ་འཁྱུད་པ་བསྒྲུབ་པ། ཕྱག་རྒྱ་ཆེན་མོ་ལ་འཁྱུད་པ་སྒྲུབ་ཆེན་དང་གསུམ་ལས། །དང་པོ་ནི། པདྨ་ཅན་ལ་སོགས་པའི་རིགས་མ་མཚན་ཉིད་དང་ལྡན་ཞིང་རྒྱུད་དག་པ་དང་ལྷན་ཅིག་དབེན་པར་གཟུགས་ལྟ་བ།༼༦ན༡༡༽སྒྲ་མཉན་པ། དྲི་སྣོམ་པ། མཆུའི་རོ་མྱང་བ། རེག་བྱ་རེག་པས་ཆགས་པའི་མེ་སྦར་ཞིང་བདེ་བ་ངོས་ཟིན་པའི་རླན་གྱིས་གཞིལ་ལོ། །དེ་ནས་ཕན་ཚུན་འཁྱུད་དེ། རང་དང་ཕྱག་རྒྱ་པདྨ་ཉི་ཟླ་སྒྲ་གཅན་གྱི་གདན་ལ། ཧཱུྃ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པ་དང་། ཕྲེཾ་ལས་གྲི་གུག་ཕྲེཾ་གྱིས་མཚན་པ་ཡོངས་སུ་གྱུར་པའི་དཔལ་དུས་ཀྱི་འཁོར་ལོ་སྐུ་མདོག་སྔོན་པོ་ཞལ་ཅིག་ཕྱག་གཉིས་ཞབས་གཡས་བརྐྱང་པ་དམར་པོ། །གཡོན་བསྐུམ་པ་དཀར་པོས་བདུད་དང་དྲག་པོ་མཉམ་པར་མནན་པ་ལ་གཽ་རཱི་དང་དགའ་མ་གཉིས་འདུད་པ་དང་བཅས་པས་ཞབས་བཏེག་པ། སྤྱན་གསུམ་པ་མཆེ་བ་ཅུང་ཟད་གཅིག་པར་རལ་པའི་ཅོད་པན་ཅན། རྡོ་རྗེའི་རྒྱན་ཐམས་ཅད་ཀྱིས་བརྒྱན་པ། སྟག་གི་པགས་པའི་ཤམ་ཐབས་གསོལ་བ། ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་སྣ་ཚོགས་ཡུམ་ལ་ཡང་དག་པར་སྦྱོར་བ། སྣ་ཚོགས་ཡུམ་གསེར་དོག་ཅན་གྲི་གུག་དང་ཐོད་པ་འཛིན་པས་ཡབ་ལ་འཁྱུད་ཅིང་རྒྱ་ཐམས་ཅད་ཀྱིས་བརྒྱན་པའོ། །ཡབ་ཡུམ་གཉིས་ཀའི་དཔྲལ་བར་ཨོཾ་དཀར་པོ། །མགྲིན་པར་ཨཱཿདམར་པོ། །སྙིང་གར་ཧཱུྃ་སྔོན་པོ། ལྟེ་བར་ཧོཿསེར་པོ། །གསང་བར་སྭཱ་སྔོན་པོ། གཙུག་ཏོར་དུ་ཧཱ་ལྡང་གུ། རིགས་དྲུག་གི་ས་བོན་ལ་འོད་འཕྲོས། དེ་བཞིན་གཤེགས་པ་ཡབ་ཡུམ་སྲས་དང་བཅས་པ་དུས་ཀྱི་འཁོར་ལོ་ཡབ་ཡུམ་གྱི་རྣམ་པར་སྤྱན་དྲངས། ཡབ་རྣམས་ཡབ་ལ། ཡུམ་རྣམས་ཡུམ་ལ་ཐིམ། གཉིས་ཀའང་གདན་གསུམ་གྱི་ལྷར་དག་པར་བལྟས་ཏེ། ཤེས་རབ་ཀྱི་གསང་༼༦བ༡༢༽བ་མི་དམིགས་པའི་ངང་ལས་ཨ་ལས་པདྨ་འདབ་མ་བརྒྱུད་པ་ཧཱུྃ་ལས་སྐྱེས་པའི་རྡོ་རྗེས་མཚན་པར་བསྒོམས་ནས་རྡོ་རྗེ་འཛིན་པའི་ང་རྒྱལ་གྱིས་བྷ་གར་ལིངྒ་བཀོད་དེ་དབུ་མའི་མས་སྣ་གཅིག་ཏུ་སྦྱར་ནས་བསྲུབ་ཅིག་བསྲུབ་པའི་ཆོ་གས་སྙོམས་པར་ཞུགས་པའི་དུས་ཤིན་ཏུ་དགའ་བའི་སྒྲས་ཁམས་གསུམ་བརྟན་གཡོའ་དངོས་པོ་ཐམས་ཅད་རང་ལ་བཅུག་སྟེ་བྱང་སེམས་ཟླ་བའི་རང་བཞིན་དུ་ཞུ་བ་ཐིག་ལེའི་གཟུགས་ཀྱིས་མགྲིན་སྙིང་ལྟེ་གསང་དུ་དགའ་བ་དང་མཆོག་དགའ་དང་ལྷན་ཅིག་སྐྱེས་པའི་དགའ་བའམ། ཡང་རྣམ་པ་སྣ་ཚོགས་པའི་དང་། རྣམ་སྨིན་དང་། རྣམ་ཉིད་དང་། མཚན་བྲལ་གྱི་རང་བཞིན་གྱི་ཆ་བཅུ་དྲུག་རྫོགས་པ་ནོར་བུའི་མཐར་སོན་ཅིང་རིག་མའི་པདྨའི་ནང་དུ་སློས་པ་དང་། དེར་དེ་ཡོངས་སུ་གྱུར་པ་ལས་བཅོམ་ལྡན་འདས་དུས་ཀྱི་འཁོར་ལོ་ཡབ་ཡུམ་ཀྱི་རྣམ་པ་དཔག་ཏུ་མེད་པར་གྱུར་པ་ལས། སླར་རིགས་ལྔ་ཡབ་ཡུམ་རྣམས་རང་གི་སྙིང་གར་བཅུག་ནས་བྱང་སེམས་ཞུ་བ་རྡོ་རྗེ་ནས་དེ་རྣམས་ཀྱི་སྤྱི་བོར་སྦོས་པས་དབང་བསྐུར་ཏེ་ཐམས་ཅད་ཀྱི་སྐུ་བྱང་ཆུབ་ཀྱི་སེམས་ཀྱིས་གང་བས་ལྷན་ཅིག་སྐྱེས་པའི་བདེ་བས་ཚིམ་པར་བསམ་ཞིང་དེ་རྣམས་ཀྱི་ཕུང་པོ་ལྔ་། ཀྵ་ཀྵ། ྀ་ཀྵུ་ྀ་ལས་དེ་བཞིན་ཤེགས་པ་ལྔ་། ཁམས་ལྔ་། ཀྵཱ་ཀྵིརཱུ་ཀྵ་ྀརཱུ ཀྵཱུ་ུ་ྀལས་གཤེགས་མ་ལྔ། དབང་པོ་དྲུག །ཀྵ་ཀྵེ་ཀྵར་ཀྵོ་ཀྵ་ལ་ཀྵ྄ཾ་ལས་སེམས་དཔའ་དྲུག །ཡུལ་དྲུག །ཀྵཱ་ཀྵཱཻ་ཀྵཱར་ཀྵཱཽ་ཀྵཱལ་ཀྵཱ་སེམས་མ་དྲུག །ལས་དབང་ལྔ། ཀྵ་ཧ་ཀྵཡ་ཀྵར་་ཀྵཝ་ཀྵལ་ལས་ཁྲོ་བོ་ལྔ། བྱ་བ་ལྔ།༼༧ན༡༣༽ཀྵཧཱ ་ཀྵཡཱ་ཀྵརླ་ཀྵཝཱ་ཀྵལཱ་ལས་ཁྲོ་མོ་ལྔ་ཏེ་ལྷ་སོ་གཉིས་མཚན་སོ་གཉིས་སུ་གྱུར་པའི་བཅོམ་ལྡན་འདས་ཡབ་་་ཡུམ་དུ་བལྟས་ཏེ་རང་རང་གི་ཞིང་དུ་གཤེགས་པར་བསམ་མོ། །འདི་ལ་གཙུག་ཏོར་ནས་འབབ་པའི་ཁུ་བ་ལྷར་བ་ལྟ་བའི་ཕྱིར་གཙུག་ཏོར་ཆེན་མོའི་གཟུགས་བརྙན་ཞེས་བྱ་སྟེ། བསྙེན་བའི་དུས་སུ་གཙུག་ཏོར་ཆེ། །གཟུགས་བརྙན་འབད་པས་བསྒོམ་པར་བྱ། ཞེས་གསུངས་སོ། །དེ་ནས་འཁྲུལ་འཁོར་དྲུག་གིས་འདྲེན་ཞིད་བཀྲམ་སྟེ་འབྱེད་འཛུམ་གྱིས་དྭངས་སྙིགས་འབྱེད་ཅིང་རྩིགས་མ་འབོད་དོ། །གཉིས་པ་ནི། དེ་ནས་ལས་རྒྱ་བཞག་སྟེ། ལུས་བར་གྱི་སྐྱིལ་ཀྲུང་དང་། ལྟ་སྟངས་བགེགས་མཐར་བྱེད་ཇི་ལྟ་བས། ཨཱཿཡིག་གིས་དབྱུད་བ་དང་། ཨོཾ་ཡིག་གིས་འཇུག་པ་དང་། ཧཱུྃ་ཡིག་གིས་གནས་པས་སྟེང་རླུང་ཤུགས་རྫོགས་པར་མནན། འོག་རླུང་དྲག་པོར་འཐེན་ཅིང་བར་རླུང་བཀད་པས་བསྲེས་ཏེ། ལྟེ་བར་འཆུན་བཏོན་ནས། ཡིད་ཀྱིས་ཡབ་ཡུམ་རྗེས་སུ་ཆགས་པའི་མེས་གཏུམ་མོ་སྦྲ་ཐིག་ལེ་གྱེན་དུ་དྲངས་ལྟེ་བའི་དུས་མེད་དང་བདེ་བ་རོ་གཅིག་པར་བསྒོམ་ཞིང་བརྟན་ནས་སྙིང་ག་དང་མགྲིན་པ་དད་སྤྱི་བོ་དང་གཙུག་ཏོར་དུ་ཟླ་ཉི་སྒྲ་གཅན་སྟོང་བའི་ཐིག་ལེ་དང་རོ་གཅིག་པར་བསྒོམ་མོ། །ཡང་ལས་རྒྱས་ཞུ་བའི་ཁུ་བ་གསང་བའི་འཁོར་ལོར་ཕབ་ལ་སྔར་བཞིན་དུ་སྤྲོ་བསྡུ་བྱའོ། །ཡང་འདྲེན་དང་འགྲེམས་དང་འབེབས་བྱས་ནས་ཡེ་ཤེས་ཕྱག་རྒྱ་ལ་སློབ་ཅིང་། དེ་ཛེམ་པ། ལས་རྒྱ་བསྟེན་པ་ཇེ་ཉུང་དུ་བཏད་པས་ལས་རྒྱ་དང་ཡིད་ཀྱིས་བཏགས་པ་ཁྱད་མེད་པའི་བདེ་བ་བྱུང་ན་དེ་ལ་གཙོ་བོར་བསླབ་བོ། །དེ་ནི་བདུད་རྩི་སྟེ་དྷཱུ་ཏིའི་དྭངས་མ་ཡིན་ལ་དེར་རླུང་༼༧བ༡༤༽སེམས་མི་ཕྱེད་པར་འཛིན་པས་འཁྱིལ་བ་སྟེ་བདུད་རྩི་འཁྱིལ་བའི་གཟུགས་བརྙན་ཞེས་བྱའོ། །དེ་ལྟར་ཡང་། ཉེ་བའི་བསྒྲུབ་པའི་དུས་སུ་ནི། །བདུད་རྩི་འཁྱིལ་བའི་གཟུགས་བརྙན་ནོ། །ཞེས་སོ། །གསུམ་པ་ནི། ཡེ་རྒྱ་ལ་གོམས་ནས། ནོར་བུའི་རྩེར་བྱང་སེམས་སྟེང་གི་སྐྱིལ་ཀྲུང་དང་། གཙུག་ཏོར་འཁོར་ལོས་སྒྱུར་བའི་ལྟ་སྟངས་ཇི་ལྟ་བས་གཙུག་ཏོར་གྱི་དྷུ་ཏཱིའི་ནང་གི་ནམ་མཁའ་ལ་ཤེས་པ་བཅིངས་ནས། འཇུག་ཤེས་ཡུལ་ལ་འཐོར་བ་བཀག་ནས་རྩ་བའི་རྣམ་པར་ཤེས་པ་གཅིག་པུ་བཞག་ལ། དེ་རྣམ་པར་རྟོག་པའི་རྦ་རླབས་ཅི་ཡང་མེད་པའི་ཡིན་ལུགས་ལ་མ་བརྟགས་མ་ཡེངས་པར་བཞག་གོ། །དེ་ལ་ཁམས་གསུམ་པ་ཐམས་ཅད་སངས་རྒྱས་ཀྱི་གཟུགས་བརྙན་དུ་བསྒོམ་སྟེ། ཤེར་ཕྱིན་རྣམ་པ་ཀུན་གྱི་མཆོག་དང་ལྡན་པ་ཉིད་དུས་ཀྱི་རྩ་བའི་རྩེར་སྟོང་པ་ལ་མ་བརྟགས་པར་མཐོང་བའོ། །དེ་ལ་མི་འགྱུར་བའི་ཡིད་ཀྱིས་ངོས་ཟིན་ཙམ་བྱས་ཏེ་སྦང་བློ་མ་ཞུགས་པ་དེ་ཁ་ལྟར་བཞག་པས་རྣམ་པ་དེ་ནུབ་ནས་རྣམ་པ་མེད་པའི་བདེ་བ་ལ་གཉིས་ལོག་པ་ལྟ་བུར་ཐིམ་ནས་སླར་སད་པར་འདྲ་བར་དེ་གཟུགས་བརྙན་དང་རོ་གཅིག་པར་འགྱུར་ཏེ། འདི་ནི་འདིར་འདོད་པའི་དངོས་གྲུབ་ཅེས་གསུངས་པའོ། །དེ་གོམས་པ་ཉིད་ལས་རྫོགས་པའི་སངས་རྒྱས་མཁྱེན་པ་ཡེ་ཤེས་སྐུ་དང་ཉིན་མོར་ཕྱེད་པའི་སྐུ་སྟེ་པདྨའི་འདབ་མ་རྒྱས་པའི་སྤྱན། ཞེས་གསུངས་པའི་སྐུ་བཞིའི་མཚན་ཉིད་ཅན་དེ་འགྱུར་རོ། །དེ་གོམས་པར་བྱེད་པ་ཡང་གཙོ་བོར་ཕྱག་རྒྱ་ཆེན་པོ་ཉིད་ལ་སྦྱར་བ་ཡིན་ལ། དེ་ཡི་རྒྱའམ་ལས་རྒྱས་ཀྱང་རུང་སྟེ་དུས་དེར་བཅུ་དྲུག་ཆའི་སྟེང་ནས་སངས་རྒྱས་ཀྱི་གཟུགས་༼༨ན༡༥༽བརྙན་བསྒོམ་པ་ལ་སྦྱོར་བ་གཅིག་ཏུ་འདུ་འོ། །དང་པོར་ལས་རྒྱའི་དུས་སུ་ཡང་དེར་སྟོང་གཟུགས་བསྒྲུབ་ནུས་ན་ཡིད་ཀྱི་རིག་མ་ལ་བསླབ་པར་བྱ་མི་དགོས། དེ་དག་ཀྱང་། རྣལ་འབྱོར་བརྩོན་པས་བསྒྲུབ་པ་ལ། །ལྷ་ཡི་གཟུགས་བརྙན་བསྒོམ་བྱ་སྟེ། །བསྒྲུབ་པ་ཆེན་པོའི་དུས་སུ་ནི། །སངས་རྒྱས་ལྔ་བདག་གཟུགས་བརྙན་ནོ། །ཞེས་གསུངས་སོ། །འདི་ནི་ཟུག་འཇུག་གི་གཟུགས་སུ་བསྒོམ་པའི་ཕྱིར་སངས་རྒྱས་ཀྱི་གཟུགས་བརྙན་ཞེས་བྱའོ། །ཚུལ་འདིས་བསྙེན་སྒྲུབ་ཡན་ལག་གསུམ་སྟན་གཅིག་ལ་སྦྲུགས་ཏེ་བསྒོམས་པས་བྱང་ཆུབ་ཀྱི་སེམས་འགྱུར་བ་མེད་པའི་གནས་སྐབས་ཐོབ་པ་ལ་དཀའ་བ་མེད་དོ། །སྟོན་པའི་བཞེད་པ་དྲི་མེད་ཟླ་བའི་ཤེལ། །རྣམ་པར་འགྱུར་བ་ནམ་ཡང་མི་བརྟེན་ཀྱང་། །ལེགས་བཤད་ཆབ་ནང་ཀུན་ན་སྣ་ཚོགས་གཟུགས། །མཁས་བླུན་འབྱེད་པའི་ཞལ་ལྕེ་མཁན་དུ་འོངས། །ཞེས་བྱང་སེམས་འགྱུར་མེད་ཀྱི་མན་ངག་གྲུབ་པའི་སྙིང་ཏིག་ཅེས་བྱ་བ། མུས་པ་ཆེན་པོའི་དོར་པདྨ་དཀར་པོས་རྒྱལ་བྱེད་ཚལ་དུ་སྦྱར་བའོ། །སྟག་མོའི་སྐྱུགས་སྟངས། གླང་ཆེན་ཧིང་། སེང་གེ་རྣམ་རོལ། གཡང་མོའི་སྤྲུག །སེང་གེ་རྩལ་སྦྲུག །རྩ་མིག་བརྡབ། །མངྒ་ལཾ།། །། བསྙེན་བསྒྲུབ་གྱི་ས་བཅད།བསྙེན་བསྒྲུབ་གྱི་ས་བཅད་བཞུགས། །འདིར་མཆོག་དང་ཐུན་མོང་གི་དངོས་གྲུབ་ཐམས་ཅད་ཀྱི་འབྱུང་གནས། དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ཉེ་ལམ། རྣལ་འབྱོར་དབང་ཕྱུག་གྲུབ་ཆེན་རྣམས་གཤེགས་ཤུལ། དབང་རྣོན་གྱི་གདམས་ངག་ཚེ་གཅིག་གིས་རྡོ་རྗེ་འཆང་ཆེན་པོའི་སར་སྐྱེལ་བའི་གདམས་ངག་རྡོ་རྗེ་གསུམ་གྱི་བསྙེན་བསྒྲུབ་འདི་ཉིད་འཆད་པར་བྱེད་པ་ལ། ཡིད་ཆེས་ཤིང་ཁུངས་བཙུན་པར་བྱེད་པ་བརྒྱུད་པའི་ལོ་རྒྱུས་དང་། བརྒྱུད་པ་དེ་ལས་བྱུང་བའི་གདམས་ངག་གཉིས་སོ། །གཉིས་པ་ལ་སྨིན་བྱེད་དབང་དང་གྲོལ་བྱེད་ཀྱི་ལམ་གཉིས་སོ། །གཉིས་པ་ལ་སྔོན་འགྲོ་དངོས་གཞི་གཉིས་སོ། །དང་པོ་ལ་རྒྱུ་སྣོད་དུ་རུང་བར་བྱེད་པ་སྐྱབས་འགྲོ་སེམས་བསྐྱེད་ཀྱི་ཁྲིད། སྡིག་སྒྲིབ་སྦྱོང་བ་རྡོ་རྗེ་སེམས་དཔའི་བསྒོམ་བཟླས། བྱིན་རླབས་འཇུག་པར་བྱེད་པ་བླ་མའི་རྣལ་འབྱོར། བསོད་ནམས་ཀྱི་ཚོགས་རྫོགས་པར་བྱེད་པ་མཎྜྻལ། ལུས་ངག་ཡིད་སྦྱང་བར་བྱེད་པ་དབེན་གསུམ་གྱི་ཁྲིད་དང་ལྔའོ། །གཉིས་པ་དངོས་གཞི་ལ། བསྙེན་སྒྲུབ་གསུམ་ལ་བརྟེན་ནས་འཇིག་རྟེན་དང་འཇིག་རྟེན་ལས་འདས་པའི་ལམ་བགྲོད། ལམ་དེ་ལ་བར་ཆད་མེད་པར་བྱ་བའི་ཕྱིར་བསམ་གཏན་གྱི་གེགས་བསལ། གེགས་བསལ་མཐར་ཐུག་གི་འབྲས་བུ་ཐོབ་ཚུལ་བསྟན་པ་དང་གསུམ་ལས། དང་པོ་ལ། ལུས་རྩ་དག་པར་བྱེད་པ་སྐུ་རྡོ་རྗེ་བསྙེན་པའི་ཡན་ལག །ངག་རླུང་དག་པར་བྱེད་པ་གསུང་རྡོ་རྗེ་བསྒྲུབ་པའི་ཡན་ལག །ཡིད་ཐིག་ལེ་དག་པར་བྱེད་པ་ཐུགས་རྡོ་རྗེ་བསྒྲུབ་པ་ཆེན་པོའི་ཡན་ལག་དང་རྣམ་པ་གསུམ་མོ། །དང་པོ་བསྙེན་པ་ལ། སོར་སྡུད། དེའི་རྩར་ལས། འབྲས་བུ་བསམ་གཏན་དང་གསུམ་མོ། །དང་པོ་མཐུན་པའི་རྐྱེན། བསྒོམ་པའི་༼༢ན༣༽དུས། ཇི་ལྟར་བསྒོམ་པའི་ཚུལ་དང་གསུམ་མོ། །དེ་ལ་མཚན་མོའི་རྣལ་འབྱོར་དང་། ཉིན་མོའི་རྣལ་འབྱོར་གཉིས་སོ། །དང་པོ་ལ། སྟེང་གི་སྐྱིལ་ཀྲུང་ལ་བརྟེན་ནས་སྟེང་གི་རླུང་བཅིང་བ་དང་། འོག་གི་སྐྱིལ་ཀྲུང་ལ་བརྟེན་ནས་འོག་གི་རླུང་འཆིང་བ་དང་། བར་གྱི་སྐྱིལ་ཀྲུང་ལ་བརྟེན་ནས་བར་གྱི་རླུང་བཅིང་བ་དང་གསུམ་མོ། །དེ་རེ་རེ་ལའང་ལུས་ཀྱི་བྱེད་བཅིངས། མིག་གི་ལྟ་སྟངས། སེམས་ཀྱི་གཞག་ཐབས་དང་གསུམ་མོ། །གཉིས་པ་ངག་རླུང་དག་པར་བྱེད་པ་གསུང་རྡོ་རྗེ་བསྒྲུབ་པའི་ཡན་ལག་ལ། སྲོག་རྩོལ། སྲོག་རྩོལ་གྱི་འབྲས་བུ་འཛིན་པ། དེ་གཉིས་ཀྱི་བྱེད་ལས། བྱེད་ལས་ཀྱི་བསྒྲུབ་པའི་འབྲས་བུ་དང་བཞིའོ། །དང་པོ་ལ་སྔོན་འགྲོ། དངོས་གཞི། རྩ་མདུད་བཤིག་པའི་འཁྲུལ་འཁོར་དང་གསུམ་མོ། །དང་པོ་ལ། རྡོ་རྗེའི་བཟླས་པ་དང་། རླུང་གི་མལ་ཚོལ་བ་གཉིས་སོ། །གཉིས་པ་དངོས་གཞི་ལ། འོག་ཐུར་སེལ་ལ་བརྟེན་ནས་དཀྱིལ་འཁོར་དང་གདན་གསལ་བཏབ་པ། སྟེང་སྲོག་རྩོལ་ལ་བརྟེན་ས་ཡིག་འབྲུ་བསྒོམ་པ། བར་རླུང་ལ་བརྟེན་ནས་ཕྱག་མཚན་གསལ་བཏབ་པ། ཁ་སྦྱོར་ལ་བརྟེན་ནས་ལྷའི་སྐུར་སློང་བ་དང་རྣམ་པ་བཞིའོ། །གསུམ་པ་ལ། དངོས་དང་། དར་རླུང་གི་གདམས་ངག་ཟུར་བཀོལ་དུ་བཤད་པའོ། །བཞི་པ་ལ། བསྐྱེད་རིམ་གྱི་སྒོམ་ཚུལ། དེ་ལ་བརྟན་པའི་བཟླས་པ། བཟླས་པ་ལ་བརྟེན་པའི་འཕྲིན་ལས་སྒྲུབ་ཚུལ་དང་གསུམ་མོ། །གསུམ་པ་དེ་གཉིས་ཀྱི་བྱེད་ལས་ལ། བྱེད་ཆིངས་ལ་བརྟེན་ནས་ལུས་འཆི་མེད་དུ་བསྒྲུབ་པ། གཏུམ་མོ་ལ་བརྟེན་པ་ཐིག་ལེའི་རྣལ་འབྱོར། ཐིག་ལེ་ལ་བརྟེན་པ་ཕྲ་མོའི་རྣལ་འབྱོར། དེ་གཉིས་ཀྱི་གེགས་སེལ་བ་བྱང་སེམས་འགྱུར་མེད། འཆི་ཁ་མའི་རླུང་སེམས་གང་འདོད་ཀྱི་༼༢བ༤༽གནས་སུ་འཕང་བའི་མན་ངག་དང་ལྔའོ། །དེ་ལ་འཆི་ལྟས་བརྟགས་ནས་འཆི་བ་བསླུ་བ། ཚེ་སྒྲུབ་གསེར་སྲང་མ། མ་ལྷུས་ན་འཆི་ཁ་མའི་རླུང་སེམས་གང་འདོད་དུ་འཕང་བ་གསེར་སྲང་མའོ། །གསུམ་པ་ཡིད་ཐིག་ལེ་དག་པར་བྱེད་པ་ཐུགས་རྡོ་རྗེ་སྒྲུབ་པ་ཆེན་པོའི་ཡན་ལག་ལ། འཇིག་རྟེན་པའི་ལམ་རྫོགས་པར་བསྟན་པ་རྗེས་དྲན། འཇིག་རྟེན་ལས་འདས་པའི་ལམ་རྫོགས་པར་བསྟན་པ་ཏིང་ངེ་འཛིན་གཉིས་སོ། །དང་པོ་ལ། དབང་པོ་རབ་གཏུམ་མོ་ལ་བརྟེན་པ། དབང་པོ་འབྲིང་དང་ལུས་ལ་བརྟེན་པ་ཐིག་ལེའི་རྣལ་འབྱོར། དབང་པོ་ཐ་མ་གཞན་ལུས་ལས་ཀྱི་ཕྱག་རྒྱ་ལ་བརྟེན་པ་སྤོགས་པའི་ཆོ་ག་བསྟན་པ་དང་གསུམ་མོ། །གཉིས་པ་ལ་རང་ལུས་དངོས་དང་། རིགས་བཞི། མཁའ་འགྲོའི་གདམས་ངག་ཟུར་བཀོལ་དུ་བཤད་པའོ། །གསུམ་པ་ལ། བསྒྲུབ་པའི་སྔོན་དུ་འགྲོ་བ། གང་ལ་བརྟེན་ནས་ཚུལ་ཇི་ལྟར་བསྒྲུབ་པ་གཉིས་སོ། །དང་པོ་ལ། ལུས་ཟུངས་བསྐྱེད་པ་བཅུད་ལེན། ཕྱག་རྒྱ་བརྟག་པ། དགུག་པ། མི་སྣང་བ་བྱ་བ་དང་བཞིའོ། །གཉིས་པ་གང་ལ་བརྟེན་ནས་ཚུལ་ཇི་ལྟར་བསྒྲུབ་པ། རྡོ་རྗེ་ཟླ་བ་བཅིང་བ། རྡོ་རྗེ་ཉི་མ་དབང་དུ་བྱེད་པ་གཉིས་སོ། །དང་པོ་ལ། སྔོན་འགྲོ། དངོས་གཞི། མཇུག་གསུམ་མོ། །གཉིས་པ་དངོས་གཞི་ལ། དབབ་པ། གཟུང་བ། བཟློག་པ། དགྲམ་པ། རླུང་དང་བསྲེ་བའོ། །གཉིས་པ་རྡོ་རྗེ་ཉི་མ་དབང་དུ་བྱ་བ་ལ་སྔོན་འགྲོ་བསྐུ་མཉེ་བྱ་བ། དངོས་གཞི་རླུང་སྦྱང་བ། རྗེས་ཀྱི་བྱ་བ་འབྲས་བུ་དང་བཅས་པའོ། །དངོས་གཞི་རླུང་སྦྱང་བ་ལ། རླུང་སྦྱང་བ། རྫས་ཀྱི་རྟེན་འབྲེལ་བྱ་བ། དེ་འབྱོངས་ནས་ཕོ་ཉ་མོའི་བཅུད་བླང་བ། འཕྲོས་དོན་སྒྲ་གཅན་གྱི་འཆིང་དང་བཞིའོ། །གཉིས་པ་ལམ་དེ་ལ་བར་ཆད་མེད་པར་བྱ་བའི་ཕྱིར་བསམ་གཏན་གྱི་གེགས་སེལ་བ་ལ། གེགས་སེལ་སྤྱིར་བསྟན་པ་དང་། བྱེ་བྲག་ཏུ་བསྟན་པ་གཉིས་སོ། །དང་པོ་ལ། ༼༣ན༥༽གེགས་སེལ་སྙན་རྒྱུད་མ་ཆེ་བ། གཅེས་ཕྲུག་བརྒྱད་ཅུའི་གེགས་སེལ། གེགས་སེལ་རིན་ཆེན་འཕྲེང་བ། གེགས་སེལ་སྨན་དཔྱད་མ། བླ་མ་གྲགས་བྱང་གི་ཞུ་ལན། གེགས་སེལ་ཐོར་བུ་བ་དང་དྲུག་གོ། །གཉིས་པ་བྱེ་བྲག་ཏུ་བསྟན་པ་ལ། གྱེན་དུ་འཕང་བ་ཧ་དམིགས་དང་ལྟག་འཐེན། འོག་ཏུ་འབེབས་པས་རྒྱལ་བ་སྡེས་ཞུས་པའི་སྙན་རྒྱུད་མ་ཆུང་བ་གཉིས། ཐད་ཀར་གསེང་བ་དབང་ཕྱུག་ཆོས་དང་གསུམ་མོ། །ཟླ་བ་སེང་གེའི་ཁྲིད་ཡིག་གཞིར་བཞག་བཞིན་པདྨ་དཀར་པོས་སྦྱར་བའོ།། །།ཆོས་སྦྱིན་རྒྱ་ཆེར་སྤེལ་བའི་ཆེད། པར་བཞེངས་གླེགས་བུ་རེ་རེ་ལ། དངུལ་ཀྲང་ཡོན་འགྱེད་མཛད་པོ་ནི། ཆོས་རྒྱལ་བསོད་ནམས་རྒྱལ་མཚན་ནོ།། །། རྡོ་རྗེ་གསུམ་གྱི་བསྙེན་སྒྲུབ་ཀྱི་དཀའ་གནས་ལ་དཔྱད་པ།རྡོ་རྗེ་གསུམ་གྱི་བསྙེན་སྒྲུབ་ཀྱི་དཀའ་གནས་ལ་དཔྱད་པ་བཞུགས་སོ། །རྣལ་འབྱོར་ཡན་ལག་དྲུག་ལ་དཔྱད་པ་ནི། བདག་གིས་ལོ་ཉེར་ལྔ་པའི་དུས་སུ་དགོངས་པའི་དབང་གིས་སྦྱར་བའི་དྲི་བ་འདི་ལ། དུས་ཀྱི་འཁོར་ལོ་ཤེས་པར་རློམ་པ་འགའ་ཞིག་གིས་དྲི་ལན་བརྗོད་དོན་གྱིས་འཕོངས་པ་དང་། ཆེན་པོ་འགའ་ཞིག་རྟ་ཐུལ་གྱི་དྲི་བ་ལ་ཚངས་པ་ལྟ་བུར་ཟོལ་ལྷུར་ལེན་ནོ། །དེ་དག་གིས་ཁོ་བོའི་འདོད་པ་མ་རྫོགས་ལ། འདི་དོགས་པ་དང་མི་ལྡན་ནམ་སྙམ་པ་ཡང་སྲིད་དེ་སྐྱེ་བོ་ཕལ་མོ་ཆེ་ཅལ་རྒྱུགས་ལ་དགའ་བས་སོ། །དེས་ན་རང་ཉིད་ཀྱི་དྲི་བ་དོན་ཅན་མདོ་ཙམ་བཤད་པར་བྱའོ། །བཅོམ་ལྡན་འདས་དུས་ཀྱི་འཁོར་ལོ་ལ་ཕྱག་འཚལ་ལོ། །རང་འདོད་པའི་ལྷ་ལ་ཕྱག་འཚལ་བ་སྔར་བཏང་སྟེ། མཐའ་དྲུག་ཚུལ་བཞི་ཕྱི་ནང་གཞན་གསུམ་གྱིས། བཅིངས་པའི་རྒྱུད་སྡེ་འབྱེད་པའི་མན་ངག་ནི། དཔལ་ལྡན་རྡོ་རྗེ་རྣལ་འབྱོར་ཡན་ལག་དྲུག །ཇི་བཞིན་མཁྱེན་པ་ཐམས་ཅད་ཕྱག་བྱའི་འོས། ཞེས་སྨྲས་ཏེ། མཆོག་ཏུ་མི་འགྱུར་བ་གཏན་ལ་ཕབ་པའི་ཕྱིར། ཟབ་ལམ་རྡོ་རྗེའི་རྣལ་འབྱོར་ཡན་ལག་དྲུག་པ་འདི་རྒྱུད་ཐམས་ཅད་འབྱེད་པའི་མན་ངག་གོ། །དེ་ཇི་ལྟ་བ་མཁྱེན་ནས་གཞན་ལ་སྟོན་པའི་སློབ་དཔོན་དེ་དག་ནི་བདག་གི་ཕྱག་གི་འོས། མཆོད་པའི་གནས་ཡིན་ཏེ་ཐམས་ཅད་ཀྱི་བདག་པོ་ཆེན་པོར་དབང་བསྐུར་བ་བརྙེས་པས་སོ། །དེ་སྐད་མ་སྨྲས་ན་སྐྱོན་འདི་ཡང་ཡོད་དེ། བླུན་པོ་དྲི་བ་མི་བཟོད་པ་དག་གིས་འདི་ནི་རྣལ་འབྱོར་ཡན་ལག་དྲུག་འགེགས་མཁན་ནོ་ཞེས་སྒྲོག་པར་བྱེད་དེ། དཔལ་ཤཱཀྱ་མཆོག་ལྡན་གྱིས་སྡོམ་གསུམ་རབ་དབྱེར་དྲིས་པ་བཞིན་ནམ། ཡང་། དུས་འཁོར་ལ་རྗེ་རེད་མདའ་པའི་དྲི་བ་བཞིན་དུ་ལམ་འདི་ལ་ཀླན་ཀ་བརྐོ་བ་ཡིན་ནམ་སྙམ་སྐྱེ་སྲིད་པས། དེ་དག་བཟློག་པར་བྱ་བའི་ཕྱིར་བདག་ཉིད་ལམ་འདི་ལ་གུས་པ་དང་འདི་སྟོན་པ་པོ་ཐམས་ཅད་ལ་སངས་རྒྱས་སུ་ལྟ་བ་ཡོད་དོ་ཞེས་བསྟན་ཏོ། །དེ་ནས། ཚིག་ཙམ་སྨྲ་ལ་གནད་རྣམས་མ་ཟིན་པ། ད་དུང་དགེ་བའི་བཤེས་ཀྱི་ཞབས་བསྟེན་ནས། ལམ་འདིར་ཐོས་བསམ་སྒོམ་པ་མཐར་ཕྱིན་པའི། ཆེད་དུ་ཡིན་གྱི་གཞན་དུ་དྲིས་པས་ཅི། གོང་མའི་ཁྲིད་ཀྱི་ཡི་གེ་ཙམ་རྗེས་ཟློས་སུ་༼༢ན༣༽བྱེད་ལ། དེ་ལ་གཏམ་རྒྱུད་ལ་སོགས་པ་སྦྱར་བ་བཤད་པར་རློམ་པ་སློབ་དཔོན་དུ་མི་འོས་པས་ད་དུང་ལམ་འདི་ལ་ཐོས་བསམ་མཐར་ཕྱིན་པར་མཛོད་ཅིག་གུ། གཞན་དུ་ན། ལམ་རྒྱུས་མེད་པས་མཁན་དུ་བྱས་པས་ཕྱོགས་བསླད་པ་ལྟ་བུ་ཉེན་ཆེའོ། །དེས་ན་གནད་འདི་ལྟ་བུ་ལ་ཐེགས་པ་མེད་པར་ལུང་བཞིན་དུ་སྨྲ་ནུས་མི་ནུས་བརྟག་པའི་ཕྱིར་ཏེ། དང་པོ། སོར་སྡུད་སྐབས་འདིར་རླུང་སེམས་ཟིན་པའི་རྟགས། བཤད་པའི། ཞེས་པ་ནི། སོ་སོར་སྡུད་པ་སྟེ་རྣལ་འབྱོར་དྲུག་གི་དང་པོའི་སྐབས་སུ། རྒྱུ་རླུང་སེམས་ཟིན་ན་འབྲས་བ་སྟོང་པ་ཉིད་གསལ་པོར་མཐོང་བའི་འབྲེལ་པ་གཟིགས་ནས། བྱེད་བཅིང་གིས་རླུང་སེམས་འཛིན་པ་གཙོ་བོར་སྟོན་པའོ། །རྣལ་འབྱོར་དེས། ས་ཆུ་མེ་དང་རླུང་གི་རླུང་། ཟིན་པའི་གནས་གང་། ཡིན་ཞེས་དྲི། ཟིན་ཉིད་ཅི་ལ་དང་། ཞེས་དང་། དབུ་མར་ཆུད་དང་དེ་ལ་བྱེ་བྲག་ཅི། ཞེས་དྲི་བ་གསུམ་བྱས་སོ། །དྲི་དགོས་པའི་རྒྱུ་མཚན་ནི། ནམ་མཁར་ཀུན་ནས་ཞེན་པའི་སེམས་དང་མིག་ནི་མི་འཛུམ་རྡོ་རྗེའི་ལམ་དུ་རབ་ཏུ་ཞུགས་པ་ཡི། ཞེས་པའི་སྔ་འགྲེལ་དུ། རྡོ་རྗེའི་ལམ་དུ་རབ་ཏུ་ཞུགས་པ་ཞེས་པ་འདིར་དབུ་མར་སྲོག་རབ་ཏུ་ཞུགས་པས་སྟོང་པ། ཁོ་ན་ལས་དུ་བ་ལ་སོགས་པའི་མཚན་མ་མཐོང་སྟེ་ཞེས་དང་། འདིར་དང་པོར་རྣལ་འབྱོར་པས་དབུ་མར། སྲོག་ནི་རབ་ཏུ་གཞུག་པར་བྱ་སྟེ་གང་གི་མཚན་མ་མཐོང་བར་འགྱུར་བ་ཨ་ཝ་དྷཱུ་ཏཱིར་རོ། །ཞེས་གསུངས་པས། དུ་སོགས་མཐོང་བའི་དུས་དེར་དབུ་མར་ཚུད་པ་ལྟ་བུ་ཞིག་གསུངས་པ་དང་། ས་ནི་ཆུ་ལ་རབ་ཏུ་འཇུག་ཅིང་ཆུ་ཡང་འབར་བྱེད་ལ་སྟེ་གཙང་བར་བྱེད་པ་རླུང་ལའོ། །ཞེས་པའི་འགྲེལ་པར། དེས་ན་གཡས་ཀྱི་རྩ་ལ་སའི་དཀྱིལ་འཁོར་ལས་སྲོག་ཆུའི་དཀྱིལ་འཁོར་ལ་འཇུག་སྟེ། དེ་བཞིན་དུ་ཡེ་ཤེས་ཀྱི་དཀྱིལ་འཁོར་གྱི་བར་དུའོ། །གཡོན་གྱི་རྩ་ལ་ནམ་མཁའ་ལ་སོགས་པས་འཇུག་གོ། །དེ་བཞིན་དུ་སྟོང་པ་ཉིད་ངེས་པར་དུ་བ་ལ་སོགས་པའི་མཚན་མ་རྣམ་པ་བཅུ་རུ་འགྱུར་ཞིང་ཞེས་པ་དང་། བླ་མ་ཐམས་ཅད་ཀྱི་ཡི་གེར། ས་རླུང་འགགས་པ་ལས་༼༢བ༤༽དུ་བ་ཞེས་སོགས་གསུངས་པའི་ས་ནས་ཡེ་ཤེས་ཀྱི་རླུང་ལ་འཇུག་པའི་བར་ཐམས་ཅད་རོ་མ་ཉིད་ལ་དང་། དེ་བཞིན་ནམ་མཁའ་ནས་འཇུག་པ་ཐམས་ཅད་རྐྱང་མ་ཉིད་ལ་བཞག་པས་རྩ་བའི་མདོ་མ་མཐུན་པ་ལྟར་སྣང་ངོ་། །ལན་ནི། མ་དྲོས་པའི་མདུན་ལོགས་སུ་རྒྱུ་བའི་གངྒཱ་དེ་ལ་ཡང་རྒྱ་མཚོར་འབབ་པ་ཞེས་པའི་ཐ་སྙད་འཇུག་ཀྱང་། ད་ལྟ་དེར་མ་སོང་དེ་ཡང་རྒྱ་མཚོ་ལ་ཁ་ཕྱོགས་པ་ཉིད་ཀྱིས་ཐ་སྙད་དེ་བཏགས་པར་འདུག་པ་བཞིན། ས་ནས་ཡེ་ཤེས་ཀྱི་བར་ཐམས་ཅད་དབུ་མར་འབབ་པ་ལ་ཕྱོགས་པས་དབུ་མར་ཞུགས་པ་ཞེས་གསུངས་ཀྱི། དངོས་སུ་ལས་དང་པོ་པ་ལ་མཚན་མོའི་རྟགས་རྫོགས་པའི་བར་ལ་དེར་མི་འཇུག་སྟེ་དབུ་མའི་ཁམ་བྱེ་བས་སོ། །སོར་སྡུད་ཀྱི་མཐར་ཐུག་པ་ན་དབུ་མར་འཇུག་པར་ཡིན་ཏེ། གངྒཱ་རྒྱ་མཚོར་འབབ་པ་ལྟ་བུའོ། །དེ་ལྟར་ཡང་འགྲེལ་པར། དེ་ལྟར་སྲོག་དང་ཐུར་སེལ་ལམ་གསུམ་རྣམས་ཞེས་པ་སྟེ། སྟེང་དུ་སྲོག་གི་གཡོན་དང་། གཡས་དང་དབུ་མའི་ལམ་རྣམས་དང་། འོག་ཐུར་སེལ་གྱི་བཤང་བ་དང་གཅི་བ་དང་ཁུ་བའི་ལམ་རྣམས་སོ། །རྡོ་རྗེ་དང་བཅས་པདྨ་ནི་བུད་མེད་རྣམས་ཀྱི་སྐྱེ་གནས་ཏེ། གཡོ་བ་ཉིད་ཀྱི་ཕྱིར་རོ། །ནོར་བུ་དང་བཅས་པའི་རྡོ་རྗེ་ནི་འགྱུར་བའི་ཕྱིར་རོ། །ཆུ་སྐྱེས་ལྡན་པ་ཉིད་ནི་ཁ་འབྱེད་པའི་ཕྱིར་རོ། །རླུང་གཉིས་ཡང་དག་ཕྲད་པའི་དབུས་སུ་ཞེས་པ་ལྟེ་བར་སྲོག་དང་ཐུར་སེལ་གྱི་རླུང་ཡང་དག་པར་ཕྲད་པའི་དབུས་སུ་ཡུལ་རྣམས་ཞེས་པ་རྣམ་པར་དབྱེ་བ་མེད་པའི་ཚིག་སྟེ་ཡུལ་རྣམས་ལ་ཡུལ་ཅན་མིག་ལ་སོགས་པའི་རྩ་རྣམས་འབྱུང་བ་དང་རབ་ཏུ་འཇུག་པ་ཡང་དེ་ལྟར་རོ། །དེ་ཉིད་ནི་སྔར་བརྗོད་ཟིན་ཏོ། དུ་བ་ལ་སོགས་རྣམས་ཀྱི་མཚན་མ་འཛིན་པ་ནི་ཨ་ཝ་དྷུ་ཏཱིའི་སྒོ་ནས་ཏེ་ཀྱང་གི་སྒྲས། ལྟེ་བ་འདི་ཉིད་ལ་འོག་འདི་དག་ཐམས་ཅད་གསང་བར་བྱ་སྟེ་བྱིས་པའི་སྐྱེ་བོ་རྣམས་ལ་སྦ་བར་བྱའོ་ཞེས་གསུངས་པས། ཐིག་ལེ་མཐོང་བ་དང་དུང་ཅན་མའི་ཁ་བྱེ་བ་དུས་མཉམ། དེ་ནས་དབུ་མར་འཇུག་པ་ནི་གསང་བར་བྱའོ། །ཞེས་པའི་དོན་དང་ལྟེ་བ་སྔར་བཤད་ཅེས་པའང་གསང་༼༣ན༥༽བའི་འཁོར་ལོ་སྟེ། གསང་བའི་པདྨ་ལ་དབུས་སུ་དུང་ཅན་མའོ་ཞེས་པའོ། །དེས་ན་ཤའི་མིག་ཀྱང་དེ་ཙམ་ཚུན་ཡོད། དེ་ནས་ལྷའི་མིག་ཏུ་འགྱུར་ཞིང་རྣལ་འབྱོར་ཀྱང་བསམ་གཏན་དང་། རྣལ་འབྱོར་པའང་བསམ་གཏན་པའོ། །དེ་བས་ན་ས་སོགས་ཐིམ་རིམ་གྱི་རྒྱུ་བ་རང་གནས་སུ་འཆིངས་པ་ཙམ་མཚན་མོའི་རྣལ་འབྱོར་གྱི་དུས་སོ། །ནམ་མཁའ་སོགས་བསྐྱེད་རིམ་གྱི་རྒྱུ་བ་ཐིམ་པ་ཉིན་མོའི་དུས་ཏེ་འབར་བ་ལ་སོགས་པ་གོ་བཟློག་གི་རྟགས་སུ་བཤད་པའི་གནད་དེ་ཡིན། དུས་སྦྱོར་གཉིས་ཙམ་མི་རྒྱུ་བར་སྡོད་ན་ངེས་པར་དུང་ཅན་ཁ་བྱེ་འོང་ངོ་། །འདི་ནི་རགས་པའི་རྩའི་དབང་དུ་བྱས་ལ། ཕྲ་བ་ཆོས་ཉིད་ཀྱི་དབུ་མའི་བྱེད་པ་མེད་ན་དེར་སྟོང་གཟུགས་རྣམས་བཞག་རྒྱུ་མེད་པ། རགས་པའི་ཐིམ་རིམ་མེད་པར་དམིགས་པ་མི་འགག་ལ། འགག་ན་དེ་ཀ་ཕྲ་བར་ཐིམ་པ་ཡིན་པས། དེ་ལས་སྟོང་པ་རྙེད་དེ། སེམས་རྣམ་པར་དབེན་པར་གྱུར་པའོ། །དེས་དངས་མའི་འབྱུང་བ་རེངས་པའི་གཟུགས་ནི་དུ་སོགས་ཏེ་གནས་འདི་ལ་དགོངས་ནས་བཀའ་རྒྱུད་ཀྱི་བླ་མ་རླུང་དབུ་མར་ཚུད་པ་ཞེས་ཆུ་སྐྱེས་ཀྱི་སྦུབས་ཤིག་ཏུ་རླུང་སོང་བ་རྣམ་པ་ཀུན་ཏུ་མ་ཡིན། རླུང་དེ་དང་དེ་རང་གར་ཡལ་བ་ལ་བྱེད་པའི་སྐབས་ཀྱང་ཤེས་དགོས་པ་ཡིན་ནོ་ཞེས་གསུང་བ་མེད་དོ། །དང་པོ་ནི་རྟེན་ལུས་ལ་བྱེད་བཅིངས་ཀྱིས་དབང་མེད་དུ་རླུང་སེམས་འཆིང་བ་དེའི་འགྲོས་ཏེ། འདུས་པར། བྱེད་པ་བཅིངས་པའི་སྦྱོར་བ་ཡིས། ས་གསུམ་པོ་ནི་བསྒྲུབ་པར་བྱ། ཞེས་པས་སོ། །གཉིས་པ་ནི་སེམས་བཅིངས་ན་རླུང་རང་འཆིངས་པ་སྟེ། བསམ་པ་ཐམས་ཅད་ཡོངས་སྤངས་ནས། ཉི་མ་གཅིག་ནི་ཡོངས་སུ་བརྟག །ཅེས་པས་དང་པོ་རགས་པའི་རྩ་ལ་དགོངས། ཕྱི་མ་ཕྲ་བ་ལ་དགོངས། དོན་རྣལ་འབྱོར་པའི་སེམས་གཟུགས་ཡིན་པས་གཉིས་པོ་གང་དུ་མོས་པ་དེར་འགྲོ། གཉིས་ཀར་སྟོང་གཟུགས་ནི། སྒྱུ་མ་མཁན་གྱིས་སྔགས་དང་རྫས་ལ་བརྟེན་ནས་སྒྱུ་མ་འགྱེད་པ་ལྟ་བུ། སེམས་རྣམ་པར་དབེན་པའི་སྟོང་པ་དང་། འབྱུང་བའི་རླུང་དངས་མ་རེངས་པའི་རྫས་ལ་བརྟེན་ནས་༼༣བ༦༽གྲུབ་པར་ཡིན་ནོ། །སྦྱོར་དྲུག་པ་ཕལ་མོ་ཆེ་རྣམ་གཞག་དང་པོ་ཁོ་ནའི་དབང་དུ་བྱས་ནས་འཆད་དེའི་ཚེ་དུ་སོགས་འཆར་དུས་འབྱུང་བ་རང་རང་མི་རྒྱུ་བར་སྡོད་པ་ནི། དེ་དང་དེའི་རླུང་ཟིན་པ་དེས་འཁོར་ལོའི་མདུད་པ་རྣམས་ལྷོད་པོར་བྱས་པས་སྲོག་ཐུར་དབུ་མར་ཆུད་དེ་གསང་གནས་སུ་ཕྲད་ཐུགས་སྟོང་གཟུགས་རྣམ་པ་ཐམས་ཅད་པར་འགྲོ་བ་ཡིན་ནོ། །ཕྱི་མ་བཀའ་རྒྱུད་རིན་པོ་ཆེའི་གསུང་བགྲོས་སེམས་འཆིང་བའི་འགྲོས་ཡང་འགྲེལ་པར། དོན་དམ་པར་ནི་སྟོང་པ་ཉིད་ཀྱི་གཟུགས་བསྒོམ་པ་ལ་གཟུགས་དང་སྐུའི་རྟོག་པ་མེད་དེ། དེ་ལྟར་རང་འོད་དང་རང་འོད་མ་ཡིན་པ་ཞེས་པ་མེད་དོ། །རྣམ་པ་ཐམས་ཅད་པ་དང་ཁ་དོག་ཐམས་ཅད་པའི་ཕྱིར། ཤེས་པ་དང་ཤེས་བྱ་རྡུལ་ཕྲ་རབ་ཀྱི་རྫས་ཀྱི་རྣམ་པར་རྟོག་པ་དང་བྲལ་བ་དག་ལ་རང་བཞིན་མེད་དོ། །དེའི་ཕྱིར་རང་བཞིན་མེད་པའི་སྲིད་པ་བསྒོམ་པ་ནི། བུམ་པ་དང་སྣམ་བུ་དང་ཤིང་རྟའི་སྡེ་ལ་སོགས་པ་རྣམས་ཀྱི་བྱ་བ་ཉི་ཚེ་བ་མ་ཡིན་པ་འཇིག་རྟེན་པའི་ཐ་སྙད་མཐའ་དག་དང་བྲལ་བའོ་ཞེས་པ་དབུ་མ་པའི་གྲུབ་པའི་མཐའ་སྟེ། སྔགས་ཀྱི་ཚུལ་གྱི་དེ་ཁོ་ན་ཉིད་ཀྱི་རིགས་པ་ལས་སོ་ཞེས་པས་རྣམ་གཞག་འདི་ལ་དབུ་མར་ཟིན་ཚུད་ཁྱད་མེད། སེམས་སྟོང་ཆེན་ལས་མི་གཡོ་བ་ཁོ་ན་ཟིན་ཚུད་གཉིས་ཀའི་དོན་དུ་འཆད་པས་སོ། །འདིར་འཆར་བའི་རྟགས་བཅུ་ལ། རྒྱལ་དབང་རྗེས་ཆོས་སྐུའོ་ཞེས་སྒྲོ་མི་འདོགས། འཁྲུལ་སྣང་ངོ་ཞེས་སྐུར་པ་མི་འདེབས། ཉམས་སྣང་ངོ་ཞེས་ཐད་ཀར་གཞག་ན་ལེགས་ཞེས་གསུང་བའི་རྒྱུ་མཚན། སོ་སྐྱེའི་ཡིད་ཀྱིས་དཔྱོད་ནུས་པས་ཆོས་སྐུར་མ་སོང་། རྣལ་འབྱོར་གྱི་འཁྲུལ་པ་མངོན་གྱུར་པ་འགགས་པས་འཁྲུལ་སྣང་དུ་མི་འགྱུར་བས་དེ་ལྟ་བུ་ལ་ཉམས་སྣང་ཞེས་སངས་རྒྱས་རྣམས་ཀྱིས་བརྡར་མཛད་ཅིང་དུ་བ་ལྟ་བུ་གཟུང་བ་དེ་མྱོང་བའི་རིགས་པ་རྟགས་ཅན་འོད་གསལ་ཡིན་ནོ། །རྩ་རྣམས་དག་ཚེ་དབུ་མ་ལས་གཞན་པའི། རྣམ་གཞག་རྒྱུད་ལས་མ་མཐོང་། ཞེས་པ་ནི་དཔལ་ལྡན་རྒྱུད་ལས། མུན་པ་དག་གི་མཐར། ཤེས་རབ་ཐབས་ཀྱི་བདག་ཉིད་ངེས་༼༤ན༧༽པར་སྟེར་ཏེ་རྩ་ནི་ཟླ་བ་ཉི་མ་དག་ནི་འགོགས་པ་ལས། ས་ལ་སོགས་པ་རྣམས་ནི་ཀུན་ནས་འབིགས་བྱེད་དྲི་མེད་ནོར་བུ་དང་མཚུངས་སྟོང་པ་གཅིག་པ་སྟེ། ཐོག་མ་མེད་ཅིང་མཐའ་མེད་དབུས་ཀྱང་མེད་པ་ཡུལ་མེད་ཡུལ་ནི་བསྒྲུབ་པ་དུས་ཀྱི་འཁོར་ལོའོ། །ཞེས་གསུངས་པས་སོ། །ཀུན་མཁྱེན་ཆེ། འཁོར་བ་གནས་གྱུར་མྱང་འདས་མི་བཞེད་པས། རོ་རྐྱང་འཁོར་བའི་རྩ་ཚོགས་གང་དུ་སོང་། ཀུན་མཁྱེན་དོལ་བུ་པ། འཁོར་བའི་ཆ་ཡིན་པ་ཅི་ཡང་མྱ་ངན་འདས་པའི་ཕྱོགས་སུ་འགྲོ་བ་མི་བཞེད་ལ། དེ་ལྟར་ན། རོ་རྐྱང་ད་ལྟ་གཟུང་འཛིན་གྱི་རྩ་ཡིན་པ། སོར་བསམ་གྱི་མཐར་དབུ་མར་འགྲོ་ན་རང་གི་དམ་བཅའ་ཉམས། མི་འགྲོ་ན་རྒྱུད་ཀྱི་ལུང་དེར་རྩ་ཐམས་ཅད་དབུ་མར་འགྲོ་ཚུལ་བཤད་པ་དང་འགལ་ལོ། །ཡང་། རོ་རྐྱང་ཡལ་ནས་དབུ་མ་གཅིག་པུའོ་སྙམ་ན་རྩ་ཐམས་ཅད་དབུ་མར་འགྱོངས་ནས་ཉི་ཟླའི་ལམ་བསྒྱེལ་དགོས་ཡོད་པར་བཤད་པ་དང་མི་འགལ་ལམ་ཞེས་དྲི། རྒྱུ་མཚན་འཁོར་བའི་ཕྱོགས་ཀྱི་མཚན་གཞི་གཅིག་གཟུང་ན་ངན་པ་ཨ་ཁག་པ་ཞིག་གོ་སྙམ་ཨེམས་པ་དགག་པ་དང་། ཡེ་ཤེས་ལེའུ་རེ་རྩ་ཐམས་ཅད་ཀྱི་ཨ་ཝ་དྷཱུ་ཏཱི་གཅིག་ཇི་ལྟ་བ་བཞིན་ནོ། །ཞེས་གཞི་དུས་སྔར་དྲངས་པ་འབྲས་དུས་དོན་དུ་རྩ་ཐམས་ཅད་དབུ་མར་འཆད་བཞེད་པའོ། །ལན་ནི། རོ་རྐྱང་དབུ་མ་ལས་གྱེས་མ་ཡིན་མོད་ཀྱང་རྩ་མདུད་ཀྱི་དབང་ལས་གཟུང་འཛིན་སྐྱེད་པ་དེ་སྲིད་བྱེད་ལས་ཀྱི་འཁོར་བར་བཞག་པ་ནི་རང་གི་སྤུན་དགྲ་ལ་ངོ་བལྟས་པ་ལྟ་བུ། རྩ་མདུད་ཞིག་པས་དབུ་མ་དང་བྱེད་ལས་མཐུན་པར་གྱུར་ན་དབུ་མ་རབ་ཏུ་གཞག་སྟེ། སྤུན་སླར་རང་ལ་དོ་བལྟས་པ་ལྟ་བུའོ། །དེ་གཉིས་དབུ་མར་སོང་ནས་ཡང་ཉི་ཟླའི་ལམ་བསྒྱེལ་དགོས་པར་བཤད་པ་དབུ་མ་འབའ་ཞིག་ཏུ་འབབ་པར་བྱེད་པ་ལ་དགོངས་པ་སྟེ་འཆད་པས་ཤེས་སོ། །སོར་སྡུད་ཉིད་ཀྱིས་གྲོལ་བའི་གང་ཟག་དེའི། རྩ་མདུད་གང་གིས་བཤིག་དང་དཀར་དམར་གྱི། འཕོ་བ་༼༤བ༨༽དག་དང་བཅུ་གཉིས་བདེན་དོན་ས། རྒྱུ་རྐྱེན་ཅི་ལས་འབྱུང་འདི་གསལ་བར་སྨྲོས། ཞེས་རབ་སོར་སྡུད་ཁོ་ནས་གྲོལ་བ་ཞེས་བཞག་པ་དེའི་ཚེ་གང་ཟག་དེའི་རྩ་མདུད་གང་གིས་བཤིག་པ་ཞེས་དང་། དཀར་ཆ་ཁུ་བའི་འཕོ་བ་དང་། དམར་ཆ་རྡུལ་གྱི་འཕོ་བ་སྦྱོང་བར་བྱེད་མཁན་སུ། ས་བཅུ་གཉིས་ཐོབ་པའི་ཚུལ་ཅི་ཞེས་དྲི་བ་གསུམ། རྒྱ་མཚན་འགྲེལ་པར། དོན་དམ་པའི་བདེན་པ་སངས་རྒྱས་ཀྱི་སྐུ་རྫོགས་པ་བརྗོད་པར་བྱ་སྟེ། འདིར་དང་པོ་སྟོང་ཉིད་བྱང་ཆུབ་ཅེས་པ་ནི་མུན་པ་ལ་ཅུང་ཟད་ཀྱང་བསམ་པར་མི་བྱའོ། །དེ་ནས་ཟླ་བ་ཐིག་ལེ་དག་ནི་ཡང་དག་འཛིན་ཞེས་པ་ནི་དུ་བ་ལ་སོགས་པའི་མཚན་མ་ཐིག་ལེའི་མཐར་ཐུག་པར་འཛིན་པའོ། །དེ་ནས་གཟུགས་དག་བསྐྱེད་ཅིང་ཞེས་པ་ནི་ཐིག་ལེ་དེ་ནས་སྣ་ཚོགས་མཐོང་བ་ནི་གཟུགས་བསྐྱེད་པའོ། །རབ་མཆོག་རོ་ཡི་རིགས་རྣམས་དག་གི་ཤེས་པ་སྒྲིབ་པ་མེད་པའི་ཕུང་པོ་དྲུག་རྣམས་ཀྱིས་སོ། །ཡི་གེ་དགོད་པ་ཞེས་པ་ནི་ཉི་ཚེ་བའི་ཕུང་པོ་དང་། ཁམས་དང་སྐྱེ་མཆེད་ལ་སོགས་པ་རྣམས་འགོག་པའོ། །དེའི་ཕྱིར་ས་ཐོབ་པས་དམན་པ་ལ་སོགས་པའི་དབྱེ་བར་འགྱུར་ཏི་ཇི་སྲིད་ས་བཅུ་གཉིས་ཀྱི་དབང་ཕྱུག་ཏུ་མ་གྱུར་གྱི་བར་དུའོ། །དེའི་ཕྱིར་བདེན་དོན་རྣམ་པ་བཅུ་གཉིས་ལྡན། དེ་ཉིད་རྣམ་པ་བཅུ་དྲུག་རིག །རྣམ་པ་ཉི་ཤུས་བྱང་ཆུབ་པ། རྣམ་པར་སངས་རྒྱས་ཀུན་རིག་མཆོག །ཅེས་པ་ངེས་པའོ་ཞེས་གསུངས་པས་སོ། །འདིའི་དམན་སོགས་ཀྱི་དབྱེ་བ་ནི་མདོར་བསྡུས་གཉིས་པར་མཚན་མ་གསུམ་དུ་བཞག་པ་དེའོ། །དང་པོ་རང་གིས་ཐོབ་པའི་རྣམ་གཞག་བསྟན་རུང་། གང་ཟག་གཅིག་འཚང་རྒྱ་བ་ལ་ངེས་པར་ཡན་ལག་དྲུག་ཀ་བསྒོམ་དགོས་སོ་སྙམ་པ་དང་། སློབ་པ་སྙིང་རུས་ཅན་ན་སོ་དར་ལ་བབ་པས་སོར་སྡུད་ཡུན་རིང་པོ་བསྒོམས་ཏེ་རྟགས་མཐའ་ཡས་པ་མཐོང་ལ་ཕྱིས་རྩ་རླུང་གུད་ནས་རྟགས་ཡལ་ཏེ་ཐ་མལ་དུ་ཁྲེས་སེ་ལོག་པ་ཕལ་ཆེ་བས་དེ་དག་ལ་སྙིང་རྗེ་བའོ། །༼༥ན༩༽ལན་ནི། ཕྱག་རྒྱ་སྒྱུ་མའི་རྗེས་སུ་མཐུན་པ་ཡིད་དང་ནམ་མཁའ་ལ་ནི་མེ་ལོང་དག་ལ་གཟུགས་བཞིན་ཏེ། འཇིག་རྟེན་གསུམ་པོ་སྣང་བར་བྱེད་ཅིང་དྲི་མེད་གློག་དང་མཚུངས་པའི་འོད་ཟེར་དུ་མ་འཕྲོ་བར་བྱེད། ཕྱི་དང་ལུས་ལ་དབྱེར་མེད་ཡུལ་དང་རྣམ་པར་བྲལ་བ་སྣང་བ་ཙམ་ནི་མཁའ་ལ་གནས་པ་ཡི། སེམས་དང་སེམས་བྱུང་ལ་ནི་བདག་གིས་འཁྱུད་དེ་འགྲོ་བ་དུ་མའི་གཟུགས་ཀྱིས་དེ་ནི་གཅིག་པུའོ། །ཞེས་ཁམས་གསུམ་པའི་གཟུགས་མཐོང་ནས་སྟོང་གཟུགས་དེ་ཕྱི་སྣོད་ཀྱི་སྟེང་དུ་འཁྲིད་པས་དེ་ཡང་དངས་གཟུགས་སུ་འགྱུར་ཏེ་དེས་ཀུན་རྫོབ་ཇེ་ཕྲའམ་ཤས་ཇེ་ཆུང་དུ་སོང་ནས་འགག་པ། ཕྱག་ཆེན་པའི་སྣང་པ་ལམ་ཁྱེར་དང་མཐུན་པས་གཟུགས་ཐམས་ཅད་སྦྱོར་བ་གཅིག་ཏུ་མཐོངས་ཏེ། ཐམས་ཅད་ཉེ་བར་ཞི་བས་སོ། །ཡང་ན་ཡེ་ལེར་དུས་ཀྱི་རྩ་ལ་མཐོང་བར་འགྱུར་གྱི་བར་དུའོ། །ནང་དུ་འདུས་པ་ཀུན་མཁྱེན་གཟུགས་ནི་ཁམས་གསུམ་པོ་མ་ལུས་པ་ཆུ་ལ་ཉི་མ་ལྟ་བུར་གོས་པ་མེད་པ་ཁ་དོག་སྣ་ཚོགས་པ་སྟེ། རྣམ་པ་ཀུན་ལྡན་རང་སེམས་ཡུལ་དང་རྣམ་པར་བྲལ་བ་དག་གོ་སེམས་ནི་གཞན་པ་མིན་པ་ཉིད། གཞན་གྱི་སེམས་ནི་མ་ཡིན་ཏེ། གཞན་གྱི་སེམས་ཤེས་པ་མེད་པའི་ཕྱིར་རོ། །ཞེས་འབྱུང་བ་སྟེ། འདི་གཉིས་ཕན་གྱི་སྒོམ་ཐམས་ཅད་འཛིན་པར་བྱེད་པའི་མྱོང་བས་སེམས། གཟུང་བྱ་དུ་སོགས་ཀྱི་རྟགས་ལ་རབ་ཏུ་ཞུགས་པ་སྟེ་སྟད་མོ་ཆེན་པོ་ལ་སེམས་ཟིན་པ་བཞིན་ནོ། །རྒྱུ་དེས་རྟགས་རྣམས་རིམ་པ་བཞིན་དུ་འགྱུར་ཞིང་མང་དུ་མང་དུ་འགྲོ་བས་རྩ་རླུང་དར་བའི་རིང་ཉམས་ལ་ཟད་རྒྱུ་མེད། ཕྱི་མ་འདི་གཉིས་ནས། ཉམས་དེ་ཟད་ནས་སེམས་ཀྱི་རང་ངོ་རྗེན་པར་མཐོང་བར་འགྱུར་བས་་་་་་་་་་དང་བྲལ་བ་དག་གོ་ཞེས་གསུངས། ཕྱི་མ་ནང་དུ་འདུས་པ་ཡོད་པའི་ཇི་ལྷར་བསྒོམ་པ་བསྒྲུབ་ལེར། དབུས་སུ་སྲོག་ནི་རབ་ཏུ་ཞུགས་པ་སྣ་ཚོགས་ཡུམ་ལ་ཡུལ་དང་རྣམ་པར་བྲལ་བའི་འཁྱུད་པ་སྟེ། ཞེས་པས་དུང་ཅན་མའི་ཁ་བྱེ་བ་དེ་ཙམ་ནས་དམིགས་པ་ནམ་མཁའ་ལ་མི་༼༥བ༡༠༽གཏོར་པར་དབུ་མའི་་་་་་གསང་བར་གཏད་ནས་གྲུབ་ཆེན་ཨུ་རྒྱན་པས། རྒྱ་མཚོའི་གཏིང་དུ་རྩ་གསུམ་ཡན་ལག་བསྡམ། ཞེས་གསུངས་པའི་གནད་དེ་བཅིངས་ན་སྲོག་ཐུར་གོང་བུར་འགྲོ་བས་སྟེང་འགག་པ་ལས་ཐུར་དུ་ཟིན་པར་འགྱུར། འོག་ཏུ་ཟིན་པས་སྟེང་ཡང་དེ་བཞིན་ནོ། །ཞེས་སོ། །རྒྱུ་འདིས་རྩའི་མདུད་པ་ཐམས་ཅད་གྲོལ་བར་བྱེད་པ་ནི་བ་སྤུའི་མཐར་ཐུག་པར་སྲོག་ཐུར་གོང་བུར་གྱུར་པས་གང་བ་ཡིན་ལ། གཉིས་པ་དཀར་དམར་གྱི་འཕོ་བ་མེད་པར་བྱེད་པ་ནི། ཡེ་ལེར་སྲོག་དང་ཐུར་སེལ་འགགས་པར་གྱུར་ན་རི་བོང་འཛིན་པ་བསྐྱོད་པ་ཉི་མའི་གཟུགས་སུ་རབ་ཏུ་འགྱུར། ཞེས་པའོ། །གསུམ་པའི་ལན། དེ་ནས་དབུ་མར་བགྲོད་པའི་སྲོག་ཟད་པའི་ཕྱིར་དུ་བར་གྱི་སྐྱིལ་ཀྲུང་སྙིང་གར་རླུང་སེམས་འཆིང་། སྔ་མས་འགྱུར་མེད་ཙམ་དང་། ཕྱི་མས་ཤེས་རབ་ཀྱི་ཕ་རོལ་དུ་ཕྱིན་པའི་ཡེ་ཤེས་སུ་འགྱུར་རྫུ་འཕྲུལ་སོགས་ནི་ཟག་པ་མེད་པའི་རྫུ་འཕྲུལ་དང་མངོན་པར་ཤེས་པ་དེ་ལས་འབྱུང་བ་ནི་ཤེས་རབ་ཀྱི་ཕར་ཕྱིན་དེ་ལ་ཆོས་འབྱུང་ཞེས་པའི་སྒྲ་བཤད་འཇུག་ཚང་བ་ཡིན་ཏེ། མཆོག་མི་འགྱུར་ལས། ཕྱག་རྒྱ་ཆེན་པོ་ནི་ཆོས་ཐམས་ཅད་རང་བཞིན་མེད་པའི་མཚན་ཉིད། རྣམ་པ་ཐམས་ཅད་ཀྱི་མཆོག་དང་ལྡན་པ་ཤེས་རབ་ཀྱི་ཕ་རོལ་དུ་ཕྱིན་མ་སངས་རྒྱས་སྐྱེད་པར་མཛད་པའོ། །ཆོས་འབྱུང་གི་སྒྲ་ཡིས་ཀྱང་བརྗོད་དེ། ཆོས་འབྱུང་གང་ལས་ཆོས་ཐམས་ཅད་རང་བཞིན་མེད་པར་འབྱུང་བར་འགྱུར་བའོ། །རང་བཞིན་མེད་པའི་ཆོས་རྣམས་ནི་སྟོབས་བཅུ་དང་མི་འཇིགས་པ་ལ་སོགས་པ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་རྣམས་སོ། །དེ་རྣམས་འབྱུང་བར་གྱུར་པ་ནི་ཆོས་འབྱུང་སྟེ་སངས་རྒྱས་ཀྱི་ཞིང་ངོ་། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་གནས་ཏེ་བདེ་བའི་གནས་དང་། སྐྱེ་བའི་གནས་སོ་ཞེས་པས་སོ། །གང་ཟག་འགའ་ཞིག་ལ་འགྲེལ་པར། གང་གི་ཚེ་སོར་སྡུད་ལ་སོགས་པས་གཟུགས་མཐོང་བར་གྱུར་པ་ལ་སྲོག་མ་བཅིངས་པ་ཉིད་ཀྱིས་འགྱུར་བ་མེད་པའི་སྐད་ཅིག་མ་མ་སྐྱེས་༼༦ན༡༡༽ན་དེའི་ཚེ་ནཱ་ད་གོམས་པས་སོགས་ཀྱིས། བསྙེན་སོགས་རེས་རླུང་འཕོ་མེད་དུ་མ་འཆིངས་ན་འཆིང་བ་ལ་བཙན་ཐབས་རེ་གསུངས་པ་དེ་དག་གི་ཁྱད་པར་ཕྱག་རྒྱ་མ་བསྟེན་མ་བསྟེན་གྱི་སྒོ་ནས་མ་ཡིན་ཏེ་གསུམ་གར་བསྟེན་མཉམ་ཡིན། འོ་ན་གང་ཞེ་ན། ཞུ་བ་དེའི་བཅུ་དྲུག་པའི་མཐའི་འཆིང་བྱེད་ཀྱི་སྒོ་ནས་ཏེ། འདིར་ནཱ་ད་གོམས་པས་ཞེས་པ་སེམས་ཡུལ་ལ་མི་གཡོ་བར་བཅིངས་པའི་སྒོ་ནས་སོ། །སྲོག་རྩོལ་དུས་སུ་ཕྱི་ནས་བརྔུབས་པའི་རླུང་། དབུ་མར་འཇུག་པའི་གནས་དེ་འཁོར་ལོ་གང་། ཞེས་ཕྱི་ནས་བརྔུབས་པའི་རླུང་དབུ་མར་འཁོར་ལོ་གང་ནས་འཇུག །དེ་ཉིད་དབུ་མའི་ནང་དུ་མི་འཇུག་ན། བརྔུབས་ཏེ་ནང་དུ་བཀང་བའི་དགོས་པ་ཅི། ཞེས་དྲི་བ་གཉིས། རྒྱུ་མཚན་རོ་རྐྱང་གི་རྒྱུ་བ་འགགས་པ་ལ་དབུ་མར་འཇུག་པའི་ཐ་སྙད་བྱས་ཀྱི་ཕྱི་རོལ་གྱི་རླུང་བརྔུབས་པ་ལ་དགོས་པ་མེད་དོ་ཞེས་སྨྲ་བ་དང་། ལམ་བསྒྱེལ་འཚར་ནས་དེ་གཉིས་སུ་རླུང་མི་འཇུག་སྙམ་པ་དང་། འཁོར་བའི་ཆ་མྱ་ངན་ལས་འདས་པའི་ཆར་མི་འགྲོ་བ་འདིར་ཡང་དགག་པས་སོ། །ལན་ནི། སོར་བསམ་གྱིས་སྲོག་ཐུར་ཕྲད་ཙམ་ལས་མ་ནུས་ན་སྲོག་རྩོལ་གྱི་ཐབས་འདི་ལ་འཇུག །སྔར་ཕྲད་བྱའང་མདུད་མཚམས་དང་དབུ་མ་ཉིད་ཀྱི་ཡིན་ལ། འདིར་ཕྱི་རོལ་གྱི་རླུང་ཐམས་ཅད་དང་ཡང་སྦྱོར་བ་གཅིག་ཏུ་བྱ་དགོས་པའི་ཕྱིར་ཏེ། སྐྱིལ་ཀྲུང་བཅིང་བ་བྱས་ནས་ཕན་ཚུན་སོ་དག་རེག་པ་མིན་པར་ཁ་ནི་རྣམ་པར་ཕྱེ་བ་ཡིས། ཕྱི་རོལ་རླུང་དག་བཀུག་སྟེ་དེ་དང་བདུད་རྩིར་བཅས་པ་ལྟེ་བའི་དབུས་སུ་རབ་ཏུ་བཅུག་པ་ཡིས། སོགས་དང་། ཁ་ཡང་བཀབ་སྟེ་སྣ་ཡི་བུག་པ་གཉིས་ཀ་དག་ནས་ཕྱི་རོལ་དག་གི་རླུང་ནི་མ་ལུས་པ། སྲོག་ནི་ཤུགས་ཀྱིས་བཀུག་སྟེ་དྲི་མ་མེད་པའི་སྲོག་དང་མཚུངས་པ་ཐུར་སེལ་རླུང་དང་སྦྱར་བྱས་ནས། དུས་ཀྱི་གོམས་པའི་སྦྱོར་བ་དག་ལས་ཟླ་བ་ཉི་མ་མེ་ཡི་དབུས་སུ་རོ་ནི་མཉམ་པར་འགྱུར། ཞེས་གསུངས་པས། ཕྱི་རོལ་གྱི་རླུང་རྔུབ་པ་འདི་ཀ་ཐུར་སེལ་དང་སྦྱར་ནས་གསང་བའི་འཁོར་ལོ་བརྒྱད་དེ་༼༦བ༡༢༽དབུ་མར་འཇུག་པ་ཡིན་ཞིང་། ལྟེ་བ་ཞེས་པ་ནི་གསང་བའི་འཁོར་ལོ་སྟེ། ལྟེ་བར་གཏུམ་མོ་བསྒོམ་པ་ཞེས་པ་ཡང་དེ་ལ་སྙེག་དགོས་པས་སོ། །དུས་དེའི་དབུ་མར་འཇུག་ཀ་ཚུན་ལས་རླུང་དབུ་མའི་ནང་དུ་སོང་ཕན་ཆད་ཡེ་ཤེས་ཀྱི་རླུང་། ཡེ་ཤེས་ཀྱི་རླུང་ཡང་དུ་སྦྱོར་རེའི་མཐའི་ང་དྲུག་རྐང་བཅས་སུ་རྒྱུ་བ་ལ་བཞག་པ་དང་། དབུ་མར་ཞུགས་གནས་ལ་བཞག་པ་དང་། རླུང་ཐམས་ཅད་ཀྱི་དེ་ཁོ་ན་ཉིད་ལ་བཞག་པ་ལས་འདི་བར་མའོ། །ཡང་ན་སེམས་གནད་ཀྱིས་རང་ཡལ་ལ་བཏང་བ་གཉིས་པོ་གང་རུང་གིས་རླུང་ཐམས་ཅད་ཡེ་ཤེས་ཀྱི་རླུང་དུ་འགྲོ་བའོ། །སྔར་སོར་བསམ་གྱི་རླུང་རང་གི་ངང་གིས་གོང་བུར་གྱུར་པས་སྲོག་རྩོལ་གྱིས་དབུ་མར་ཞུགས་པ་ཞེས་བྱ། འདི་ནང་ལེར། སྲོག་དང་ཐུར་སེལ་དག་ཕན་ཚུན་ཡང་དག་པར་སྦྱོར་བ་ནི་རྣལ་འབྱོར་ཏེ་དེ་གང་ལ་ཡོད་པ་ནི་རྣལ་འབྱོར་པའོ་ཞེས་པས་རྣལ་འབྱོར་གྱི་སྟོབས་ཀྱིས་དབུ་མར་ཚུད་པ་ཡིན་པས་གཉིས་པོ་ཁྱད་པར་རོ། །སྐབས་ཐོབ་བམ་ལུས་གནད་བཅོས་པ་ལྟ་བུ་ལམ་བརྟེན་པར་སྲོག་ནམ་འདོད་འདོད་དབུ་མར་འཇུག་ཐུབ་ན་སྲོག་རྩོལ་མཐར་ཕྱིན་པའི་ཚད་དེ་ནས་དབུ་མར་འཆིང་དགོས་པས་འཛིན་པ་ལ་སློབ་པ་ཡིན་ནོ། །འདི་དུས་ཕྱི་ནང་སྟེང་འོག་གཡས་གཡོན་ཐམས་ཅད་ཀྱི་རླུང་གཅིག་ཏུ་འདྲེས་པ་ཁོ་ནའོ། །སྤྱི་བོ་ནས་རྐང་ལག་གི་སོར་མོའི་བར་ཐམས་ཅད་གང་དེས་རང་སྟོབས་ཀྱི་འབར་འཛག་བྱེད། དེས་འཚང་རྒྱ་བ་ཡང་། སྲོག་གི་རོ་ཡིས་འགྲོ་བ་རྣམས་ལ་གནས་པ་ཐམས་ཅད་བཀུག་ཅིང་ཉོན་མོངས་བདུད་རྣམས་བཅོམ་བྱས་ནས། རྫུ་འཕྲུལ་ཀུན་མཁྱེན་ས་དང་སྲིད་གསུམ་བླ་མ་ཉིད་ནི་རྣལ་འབྱོར་རྣམས་ཀྱིས་སྐྱེ་བ་འདི་ལ་སྟེ། ཞེས་གསུངས། རྩ་མདུད་བཤིག་པ་སོགས་ནི་སྔར་ལྟ་བུ་སྟེ། པདྨར་ཞུགས་པའི་རང་གི་རྡོ་རྗེ་སྤྲོ་བ་དག་ཀྱང་དེ་བཞིན་ཟླ་ཉིའི་དབུས་སུ་རབ་ཞུགས་པ། ཞེས་གསུངས་པས་སོ། །རླུང་རྣམས་ཕྱི་རོལ་འཕོས་པའི་སྐྱོན་གསུངས་ནས། ཞེས་པ་ནང་ལེར། དྲུག་གི་རྩ་ནི་འཁོར་ལོ་འགག་པ་ཟླ་ཉི་མ་ཡི་དབྱེ་བས་རྣམ་གསུམ་ལམ་ལ་གནས་པ་གང་། སྲོག་ཆགས་རྣམས་ལ་འཆི་བ་སྟེར་བ་ཞེས་སོགས་མང་༼༧ན༡༣༽ངོ་། །ཡང་འདིར་མཉམ་རྒྱུའི་འཕོ་བ་བསྒྲུབ་བྱར་བསྟན། ཞེས་པ་ནི། ཉི་མ་ཟླ་བ་འགོག་པ་མཉམ་དང་མི་མཉམ་བགྲོད་པ་ལ་ཏེ་དབུ་མ་མེ་ལ་རབ་ཏུ་ཞུགས། སྲོག་དང་ཐུར་སེལ་གཉིས་པོ་དག་ཀྱང་ཉིན་ཞག་དང་པོ་སོང་ན་དུས་མིན་འཆི་བ་བླུ་བ་སྟེ། སོགས་ཀྱིས་སོ། །དེ་ཉིད་གཞན་ལས་སྒྲ་གཅན་འཆི་ལྟས་བཤད། ཅེས་པ་ནི། སྲོག་གི་རྩོལ་བས་ཀུན་ནས་བདེ་མཉམ་འབྲས་བུ་སྟེར་བ་ཇི་སྲིད་མགོ་ཡི་བར་དུ་འདོད་པ་སྟེ། དེ་ལས་སྟེང་དུ་འདོར་བ་མ་ཡིན་འཆི་བའི་འཇིགས་པ་བྱེད་པ་ཕུང་པོ་ངེས་པར་འཇིག་པའི་རྒྱུ། ཞེས་བསྒྲུབ་ལེར་གསུངས་སོ། །འདི་འདྲ་འགལ་མེད་སྟོན་པའི་རིགས་པ་ཅི། ཞེས་དྲི། རྒྱུ་མཚན་རླུང་ཕྱིར་འཕོ་བ་རང་ལ་ཡང་སྐྱོན་དུ་འགྲོ་མི་འགྲོ་གཉིས་ཡོད་དེ་སྟོན་པའི་ཕྱིར་རོ། །ལན། ཟླ་ཉིའི་འཆི་ལྟས་བགག་པའི་སྐབས་མ་ཡིན་པ་ཐམས་ཅད་སྐྱོན། དེའི་ཚེ་མཉམ་པར་མ་ཕབ་ན་ཡོན་པོར་འཕོ་བའི་ཅིག་ཤོས་ཀྱི་རྩ་བསྐམས་པ་མི་གསོས་པ་དེ་ལ་ངེས་པར་མཉམ་རྒྱུ་བསྒྲུབ་བྱ་ཡིན་ནོ། །འདིར་ལྟེ་བར་སྲོག་རྒྱལ་བས་འཆི་བ་བྱེད་པ་ཡིན་པས་ཡོན་པོའི་འཆི་ལྟས་དང་མི་གཅིག །འདི་བླུ་བ་དང་བོགས་འདོན་གཉིས་ཀ་ལ་བཙན་ཐབས་ཀྱི་སྦྱོར་བ་སྟོན་ཏེ། ནུས་མ་གང་ཞིག་ལྟེ་བའི་དབུས་ནས་གཞན་གྱི་གནས་སུ་བཅུ་གཉིས་མཐའ་དང་ཆ་ཡིས་མཐར་འགྲོ་བ། དེ་ནི་ལྟེ་བར་འགོག་པ་དང་བཅས་དྲི་མེད་གློག་དང་མཚུངས་པ་དབྱུག་པའི་གཟུགས་ཅན་ལངས་པ་ཡང་། འཁོར་ལོ་ནས་གང་འཁོར་ལོའི་བར་དུ་ངེས་པར་དམན་ཞིང་རོལ་པའི་བགྲོད་པས་དབུ་མའི་རྩ་ལ་བསྐྱོད། ཇི་སྲིད་གཙུག་ཏོར་བུག་པར་བཙན་ཐབས་ཉིད་ཀྱིས་ཕྱི་རོལ་གྱི་ནི་པགས་པ་དག་ལ་ཁབ་བཞིན་རེག །དེ་ཡི་དུས་སུ་ཐུར་དུ་སེལ་བ་མཆོག་གི་བཙན་ཐབས་ཉིད་ཀྱིས་སྟེང་གི་ལམ་དུ་བསྐུལ་བར་བྱ། ཟུང་གི་རླུང་དག་འགགས་པ་ན་ནི་གཙུག་ཏོར་ཕུག་ནས་མཆོག་གི་གྲོང་ཁྱེར་དག་ཏུ་འགྲོ་བར་འགྱུར། དེ་ལྟར་ཡིད་ལ་རྡོ་རྗེ་རབ་ཏུ་སད་པས་ཡུལ་དང་བཅས་པ་མཁའ་ལ་སྤྱོད་པ་ཉིད་དུ་འགྱུར། ཞེས་པའི་གཙུག་ཏོར་ཕུག་པ་ཞེས་པ་སྐབས་འདི་ཀ་རང་གིས་བསྟན། དོན་༼༧བ༡༤༽ནི་ཨ་ཝ་དྷཱུ་ཏཱི་རེངས་པས་སྟེང་དུ་སོན་པ་སྟེ། གཙུག་ཏོར་གྲུབ་པ་དང་འོག་གི་སྦ་བ་སྦུབས་སུ་འཇུག་པ་ཡིན་ཏེ། ཡུལ་དང་བཅས་པ་མཁའ་ལ་སྤྱོད་པ་ཞེས་གསུངས་པའི་ཕྱིར་རོ། །འདིར་ཡུལ་ནི་རྟེན་ལུས་ཡིན་ནོ། །གཞན་འཕོ་བའང་བསྟན་ལ། གྲོང་འཇུག་ཀྱང་མཆོག་གི་གྲོང་ཁྱེར་དག་ཏུ་འགྲོ་བར་འགྱུར། ཞེས་པས་གྲོང་གཞན་ལ་འཇུག་པ་དང་། དེ་ལྟར་ཡིད་ལ་རྡོ་རྗེ་སད་པས་ཞེས་སོགས་རྟེན་ཕྱི་མས་བགྲོད་བྱ། དེས་མཚོན་ནས། བར་དོའང་ནང་ལེར། འོད་ཟེར་གྱི་ལམ་གསུམ་གསུངས་པ་བར་དོའི་འཕྲད་གསུམ། བག་ཆགས་གསུམ་ལས་གྲོལ་བར་བཤད་པ་འཕྲང་སྒྲོལ་བའི་ཐབས་གསུམ། གལ་ཏེ་ལམ་བགྲོད་མ་ཐུབ་ན་སྐྱེ་གནས་བརྒྱུད་པའི་བར་དོ། །སྐྱེ་བ་བདུན་བླངས་པའི་རྟེན་ལས་སངས་རྒྱ་བར་བཤད་པའོ། །ཐུར་སེལ་མཆོག་གི་བཙན་ཐབས་ཞེས་པའི་ལས་སྦྱོར་དེ་ཡེ་ལེར། དགུར་འཁྱོགས་མ་ཞེས་གསུངས་པ་དེ་ཡིན། གཞན་རྩ་རྒྱུད་ལས། ཨ་ཝ་དྷཱུ་ཏཱི་མེ་ཡི་སྣ། འོད་ཟེར་ལྔ་ཡི་རང་བཞིན་སྲོག །དཀྱིལ་འཁོར་ལྔ་ནི་འབབ་བྱེད་པ། སྣ་རྩེ་ཡུངས་ཀར་དུ་གྲགས་པ། དེ་ཡང་སྲོག་གི་རྩོལ་བར་བཤད། ཁམས་གསུམ་པོ་ནི་མ་ལུས་ནས། སྲིད་པ་གསུམ་ནི་ཡོངས་ཤེས་པ། ཡུངས་དཀར་སྲོག་ལ་རྒྱུ་བཅས་དང་། རྒྱུ་མེད་འགོག་པ་དེ་ཡང་ངོ་། །ཞེས་པ་རྣམ་གྲངས་སོ། །སྲོག་རྩོལ་གྱིས་ནི་རླུང་རྣམས་འགགས་བྱས་ནས། འཛིན་པས་རིགས་དྲུག་རྩེ་མོར་འཆིངས་དེ་ལ། སླར་ཡང་ཏིང་ངེ་འཛིན་འདིར་ཉི་ཁྲི་དང་། ཆིག་སྟོང་དྲུག་བརྒྱ་འགགས་དགོས་ཅི་སྟེ་གསུངས། ཞེས་དྲི་བ་གཅིག །རྒྱུ་མཚན་ནི། དབུགས་ནི་བཅད་པའི་མཐའ་རུ་རྣམ་གསུམ་བགྲོད་པ་འདི་དང་རྣམ་པ་དྲུག་ཀྱང་ཡོད་པ་མ་ཡིན་ཏེ། ཞེས་རླུང་འགགས་ནས་ཕྱིར་ལྟ་ཅི་སྨོས། ནང་དུའང་རིགས་དྲུག་གི་བྱེད་པ་མེད་པ་གསུངས་འཚར་ནས། ཏིང་ངེ་འཛིན་དུ་ཉི་ཁྲི་ཆིག་སྟོང་དྲུག་བརྒྱ་གཅིག་འགག་རིམ་བཤད་པ་འགལ་བ་ལྟར་སྣང་བ་དང་། ཏིང་ངེ་འཛིན་དུའང་ད་ལྟར་སྣ་ནས་འབབ་རིམ་འདི་ཀ་འགག་རྒྱུ་བའི་བཤད་པས་དཔེ་༼༨ན༡༥༽མང་པོའི་ལོགས་གང་འདུག་པ་དེ་དག་བཟློག་པའི་ཕྱིར་རོ། །ལན་ནི། སྦྱོར་བ་མཐར་གྱིས་པའི་དབང་དུ་བྱས་པ་འདི་ལ་ཏིང་ངེ་འཛིན་གྱི་རྣལ་འབྱོར་བསྒོམ་རན་པ་ན་ཡོན་པོའི་རྒྱུ་བ་འདི་ཐམས་ཅད་འགག་དགོས་པ་ཡིན་ཏེ། ཟླ་བ་ཉི་མའི་རྒྱུ་བ་ཉམས་ཤིང་ལམ་ནི་གཉིས་ཀ་ཡི་ཡང་སྲོག་གི་རླུང་ནི་ཆེན་པོ་འགགས། ཆུ་སྐྱེས་རྡོ་རྗེ་རབ་ཏུ་སད་ཅིང་རི་བོང་ཅན་ཞུ་ཉི་མའི་གཟུགས་ཆེན་ལ་ནི་རབ་ཏུ་ཞུགས། དངོས་དང་དངོས་མེད་གཅིག་གྱུར་རྣམ་གསུམ་སྲིད་པ་ལ་གནས་གཞོམ་མེད་ལེགས་པར་རབ་ཏུ་རྟོགས་གྱུར་པ། དེ་ཡི་དུས་སུ་རྣལ་འབྱོར་པ་སྟེ་གང་ལ་གཉིས་ནི་ཅུང་ཟད་མེད་པ་མཆོག་གི་གོ་འཕང་འགྲོ། ཞེས་འབྱུང་ཞིང་། དེ་ཡང་། རླུང་ཕྱིར་འཕོ་བ་ཐམས་ཅད་འགགས་པ་ལོ་ཙམ་ཐུབ་པ་སྲོག་རྩོལ་གྱི་བྱེད་པར་གསུངས་པ་དང་ཡོན་པོའི་རྒྱུ་བ་མ་འགགས་ན་གཏུམ་མོའི་མེ་བརྟན་པར་མི་འགྱུར། འདིར་ཡོན་པོ་འགགས་པས་གཏུམ་མོ་ལྷག་པར་འབར་བས་རྗེས་དྲན་དུ་འགྱུར་བ་ཡིན་ཞིང་། ལམ་དྲུག་རང་གི་ངོ་ཏིའི་རྗེས་དྲན་དེ་ལ་བྱེད་པ་ཡིན་ནོ། །འོན་ཀྱང་རྣལ་འབྱོར་པ་དེ་ལ་རྣལ་འབྱོར་ལ་མི་འཇུག་པའི་དུས་སུ་རླུང་ཕྱིར་འཕོ་བ་ནི་མཉམ་རྒྱུ་ཡིན་ནོ། །ཡོན་པོ་དེས་པའང་སྣ་གཡས་གཡོན་རང་དུ་མ་ཟད་སྟེང་འོག་སོགས་གང་དུའང་ཕྱོགས་ཁྱེར་ལ་ཟུག་པ་དེ་ཡིན་ནོ། །འོ་ན་དེ་མེད་ན་འདིར་འགག་རྒྱུ་མེད་དམ་སྙམ་ན་ཡོད་དེ། ཟླ་བ་ཉི་མའི་གཟུགས་ནི་ཟོས་ནམ་མཁའ་ལ་ཉིན་མོ་དང་ནི་མཚན་མོ་ནམ་ཡང་མིན་པ་ཉིད། ཐུན་མཚམས་དེ་ནི་ལུས་ཀྱི་དབུས་སུ་རྣལ་འབྱོར་རྣམས་ཀྱི་དུས་ཀུན་བདུད་རྩིའི་གོ་འཕང་ལ་གནས་པའོ། །ཕྱོགས་ཟད་ཟླ་བ་མཁའ་ལ་གནས་པ་ཉི་མའི་གཟུགས་ལ་རོ་ནི་མཉམ་པར་འགྱུར་བ་ཇི་ལྟ་བར། སྲོག་དང་ཐུར་སེལ་ཟད་པར་གྱུར་ན་གསལ་བར་ཡང་ནི་ལུས་ལ་དངོས་གྲུབ་དུས་སུ་དེ་འགག་གོ། །ཞེས་པས་སོ། །དེ་གང་ཞེ་ན་ལས་རླུང་གི་བག་ཆགས་ལས་ཀྱི་རླུང་གི་གྲངས་དེའི་རྗེས་སུ་འགྲོ་བ་དེ་འགག་པ་སྟེ། དེའི་ཕྱིར་འདིའི་འགག་པ་རླུང་དབུ་མར་ཐིམ་པ་ཞེས་གསུངས་ཤིང་། དེ་ཀ་ཞི་བ་ཅན་ནམ་འགོག་པ་༼༨བ༡༦༽རྡོར་བཟླས་སོ། །དེ་དག་མཆོག་མི་འགྱུར་ལས། དེའི་ཕྱིར་ལུས་མེད་ཅིང་དབུགས་འབྱུང་བ་དང་འཇུག་པ་དག་ཀྱང་མེད་པར་ཐོག་མ་མེད་པའི་སེམས་ཀྱི་བག་ཆགས་གློ་བུར་བ་ནི་ཡང་དང་ཡང་དུ་སྐྱེ་བའི་དབང་གིས་འགྱུར་ཏེ། སེམས་ཅན་རྣམས་ཀྱི་རང་བཞིན་ཅན་ནི་མ་ཡིན་ནོ། །གལ་ཏེ་འཁོར་བའི་བག་ཆགས་འདི་རང་བཞིན་ཅན་དུ་གྱུར་པ་ཡིན་ན། དེའི་ཚེ། སེམས་ཅན་རྣམས་སངས་རྒྱས་ཉིད་ཅེས་བྱ་བར་མི་འགྱུར་རོ། །རྒྱུ་གང་གིས་གློ་བུར་བ་ཡིན་པའི་རྒྱུ་དེ་ཡིས་འདི་ཟད་པར་འགྱུར་ཏེ་དེ་ཟད་པ་ལས་སངས་རྒྱས་ཉིད་དུ་དེ་བཞིན་གཤེགས་པས་གསུངས་སོ། །དེ་ལྟར་རྣམ་པ་དུ་མས་རྣམ་པར་དཔྱད་ན་འཁོར་བ་འདི་ནི་རང་གི་སེམས་ཡིན་གྱི། འགྱུར་བ་མ་ཡིན་ནོ་ཞེས་གསུངས་ལ། འདིར་འཇོག་བྱེད་འཁྲུལ་པས་བཞག་པའི་བག་ཆགས་བདེ་ཆེན་གྱི་སྦྱང་གཞི་དང་། འཇོག་བྱེད་མྱང་འདས་ཀྱིས་བཞག་པའི་བག་ཆགས་དེའི་སྦྱོང་བྱེད་ལམ་དུ་བཤད་པས་མ་རིག་བག་ཆགས་ཀྱིས་པ་ཞེས་པ་ཐོབ་ལ་བཞག་པ་དག་ལའང་གཉིས་ཀ་ཡོད་པ་ཡིན་ནོ། །ཏིང་ངེ་འཛིན་དེར་རྩ་མདུད་གྲོལ་བ་དང་། འཛག་བདེ་དག་གསུངས་སྔོན་མ་རྣམས་ལ་མིན། ལམ་འདིར་ཁྱད་ཆོས་ལྷག་པ་ཅི་ཞིག་ཡོད། མེད་ན་སྐབས་འདིར་གསུང་བའི་རྒྱུ་མཚན་གང་། འདིར་རྩ་མདུད་བཤིག་བྱེད་ཀྱི་ཆོས་ཁྱད་པར་བཅི། གལ་ཏེ་མ་བསྟན་ན་དེའི་རྣམ་གཞག་འདི་ཁོ་ནར་བསྟན་ལ། གཞན་དུ་མི་གསུང་བའི་རྒྱུ་མཚན་ཞེས་དྲི་བ་ཅིག །རྒྱུ་མཚན་གོང་དུ་བཤད་པས་གང་ཟག་འདིའི་རྩ་མདུད་བཤིག་མ་ནུས་པས་ལམ་འདིའི་བར་དུ་བསྒོམ་དགོས་བྱུང་བ་དང་། འདི་ཉིད་ཀྱི་ལམ་རྣམ་གྲངས་པ་དང་། བཙན་ཐབས་ལེགས་པར་བཤད་འདོད་པའོ། །ལན་ནི། རླུང་དང་ཟླ་བ་ཉི་མ་འགགས་པར་གྱུར་ན་རྣམ་པར་ཤེས་པ་དང་ནི་ཡེ་ཤེས་གཅིག་ཏུ་འགྱུར། དེ་ལྟར་དེ་ལྟར་དང་ནི་དེ་བཞིན་དེ་ལྟར་རྣམ་གསུམ་དུ་འགྱུར་གཞན་ནི་ཅུང་ཟད་ཡོད་མ་ཡིན། ཞེས་པའི་རྣམ་ཤེས་ཀྱང་། དེ་དག་རྣམས་ལ་སྲོག་སོགས་རླུང་སྟེ་ཀུན་ནས་རླུང་གི་དབུས་སུ་ཉི་མ་ཟླ་བའི་བགྲོད་པའོ། །ཟླ་བའི་དབུས་སུ་དྲི་༼༩ན༡༧༽མེད་ནོར་བུ་བཞིན་དུ་དངོས་པོ་ཀུན་གྱིས་འཁྱུད་པའི་རྣམ་པར་ཤེས་པ་སྟེ། དེ་ནི་དངོས་དང་དངོས་མེད་གཉིས་མེད་ཉིད་དང་མཆོག་གི་བདུད་རྩི་ཡི་ནི་ཁྱབ་བྱེད་གཞོམ་མེད་དོ། །ཞེས་པའི་རྣམ་ཤེས་མི་ཤེགས་པའི་ཐིག་ལེ་ལེན་པའི་བྱ་བ་ནས་སྨོས་པ་དེའོ། །སོར་བསམ་བྱིས་རྩ་སྦྱངས། དེ་ཀ་རང་ངམ་དེའི་མཐའི་བཙན་ཐབས་ཀྱིས་སྲོག་དགག་རུང་བསྡད་ན་ཡུན་རིང་དུ་འགོར་བས། ལོ་གཅིག་ཚུན་དེ་བསྒོམས། དེ་ནས་སྲོག་འཛིན་གྱིས་རླུང་སྦྱངས་དེ་རང་ངམ་དེ་ཀའི་བཙན་ཐབས་བསྟན་ཀྱང་འཕོ་བའི་བག་ཆགས་སྦྱོང་མ་ནུས་པས་ཟླ་བ་དྲུག་དེ་བསྒོམ་དུ་བཅུག །དེ་ནས་གཏུམ་མོ་བསྟན་པས་སམ། དེ་ཡང་མ་ནུས་ན་དེའི་མཐའི་བཙན་ཐབས་སམ་ཡང་ན་ཕྱག་རྒྱ་བཞིའི་སྒོ་ནས་འཁྲིད་པས་རྣམ་ཤེས་དང་ཡེ་ཤེས་གཅིག་ཏུ་འགྱུར་བ་ཡིན་པས་ཏེ། རང་གི་སེམས་ནི་བརྒྱལ་དང་གཉིད་ལོག་ལ་རབ་ཞུགས་པ་མི་ཡི་བདག་པོ་རང་བཞིན་མེད་པར་འགྱུར། སད་ལ་རང་བཞིན་དང་བཅས་གསལ་བར་བྱེད་པ་དེ་ནི་སྲོག་ཆགས་རྣམས་ཀྱི་ཐར་པའི་ལམ་མ་ཡིན། དངོས་དང་དངོས་མེད་ཀྱིས་ཕྱེ་སེམས་ཀྱི་རྡོ་རྗེ་རྣལ་འབྱོར་པ་རྣམས་དག་ལ་བདེ་མཉམ་སྟེར་བ་ཡིན། ཕན་ཚུན་མཁའ་ཡི་ཤེས་རབ་ལ་འཁྱུད་ལྷན་སྐྱེས་བདེ་བར་གནས་པའི་རང་སེམས་དེ་ནི་ཐར་བ་སྟེར། ཞེས་པས་དབུ་མའི་ལམ་གང་ཟག་ལ་བལྟོས་པ་ནི་དེར་འདུག །སྦྱང་གཞི་རྩ་རླུང་ཐིག་ལེའི་ཁྱད། སྦྱོང་བྱེད་ནི་སོར་བསམ་སྟོང་པ་ཉིད་དང་། སྲོག་འཛིན་སྲོག་ཐུར་འདྲེས་པ་དང་། རྗེས་དྲན་ཞུ་བདེའི་སྟོང་ཉིད་ལ་སྦྱོར་བ་ཙམ། ཏིང་ངེ་འཛིན་ནི་འཕོ་བ་མེད་པའི་བདེ་ཆེན་ཡིན་པའི་ཁྱད་དོ། །འདི་ལོ་གསུམ་ཕྱོགས་གསུམ་བསྒོམས་པས་སངས་རྒྱས་སུ་འགྱུར་བ་ཡིན་ནོ། །ཐིག་ལེ་བགག་པར་གྱུར་ན་ཀུན་ནས་མཆོག་གི་ཁྱབ་བདག་བདེ་བ་མཐའ་ཡས་དུས་སུ་འཇུག་པར་འགྱུར། །འཁོར་བདག་གི་བདེ་བ་སྤངས་ནས་མཆོག་གི་བླ་མའི་ཞལ་ནི་རྣལ་འབྱོར་པ་ཡིས་བསྒོམ་པར་བྱ། སྤྱོད་པ་སྒེག་པའི་གཟུགས་དང་མཆོག་ཏ་འཇིགས་པ་བྱེད་ལ་རྣལ་འབྱོར་མ་རྣམས་དགྱེས་པ་མ་ཡིན་ནོ། །ཞེས་པས་སོ། །དེ་བས་ན་ལམ་སོ་སོ་ནུས་པ་༼༩བ༡༨༽འཐོན་པ་ནི་དབང་པོ་རྣོ་བ་ཟུར་བསྟན་པས་གོ་བ་དང་། ཕྱི་མ་འདི་ལྡེབས་བསྟན་ན་གོ་བ་ལྟ་བུའི་ཁྱད་ཡོད། འདིར་གཏུམ་མོ་བསྒོམས་པ་ཞིག་ན་ལས་རྒྱ་བཙན་ཐབས་སུ་འགྲོར་ཆུག་སྟེ། ལས་རྒྱ། ཡེ་རྒྱ། ཕྱག་ཆེན་ལ་སློབ་པའི་སྒོ་གསུམ་བྱུང་བའི་ལས་རྒྱ་ལའང་དེ་བཙན་ཐབས་སུ་འགྲོ་བ་ཞིག་དགོས་ལ། དེ་གང་ཞེ་ན་རླུང་ནི་ཡང་དག་ཕྲད་པ་རྣམས་ཀྱི་གློག་གི་མེ་ཡི་རྩེ་མོས་སྤྱི་བོའི་ཟླ་བ་བཞུ་བར་བྱེད། ཐིག་ལེ་གང་གང་བཞུ་བ་འདི་ནས་མགྲིན་པ་སྙིང་ག་ལ་སོན་ལྟེ་བ་གསང་བ་དག་ལ་འགོག །ཐིག་ལེ་ལས་ནི་གཡོ་བའི་ཁ་བ་རྡོ་རྗེ་ནོར་བུ་ལ་གནས་རྒྱལ་མཚན་རྩེ་ལ་འགོག་པ་གང་། དེ་ནི་ཤེས་རབ་ཡེ་ཤེས་སྐད་ཅིག་གལ་ཏེ་ཐིག་ལེའི་འཕྲེང་བ་འཕོ་བ་མེད་པས་བདེ་བའོ། །ཞེས་པ་ནི་ཕྱག་རྒྱ་རང་གཞུང་དུ་སོང་། དེ་ཕྱིར་གཡོ་མེད་བདེ་བའི་སྐད་ཅིག་ལྷན་ཅིག་སྐྱེས་པ་འདིར་ནི་ཆོས་ཀྱི་དབྱིངས་ཀྱི་སྟེར་བྱེད་དེ། ཞེས་པ་བཙན་ཐབས་དེ་ཡང་རྡོ་རྗེ་དབྱིངས་ཀྱི་དབང་ཕྱུག་མའམ་པདྨ་ཅན་གྱི་བྷ་གའི་དབུས་ཀྱི་རྩ་དེ་ལ་བཞག །དེས་རྣལ་འབྱོར་རྣམས་སུ་འདུག་སྟངས་དང་ཁ་སྦྱོར་གྱི་ཐིག་ལེ་དྲང་དགོས་པའི་ཕྱིར་རྡོ་རྗེ་ཆུ་འཐུང་བ་ལ་སོགས་པ་བསྟན་མོད། དཔེ་དེ་འདྲ་མཐོང་ན་རྣལ་འབྱོར་པའི། སྤྱོད་རྩིང་དུ་གོ་བདག་ནི་རྡོ་རྗེ་ཐེག་པའི་དབང་གོང་མས་གཟུང་བར་བྱ་བ་མ་ཡིན་ནོ། །གདུལ་བྱའི་རིགས་འགའ་ཞིག་ལ་ལམ་འདི་མེད་ན་མི་གྲོལ་བས་ན། མེ་ནི་དངུལ་ཆུའི་དགྲ་ཉིད་ཡིན་ཏེ་སོགས་གསུངས་སོ། །ཡང་། ཕྱག་རྒྱ་བཞི་ནི། ལས་དང་། ཡེ་ཤེས་དང་། ཕྱག་རྒྱ་ཆེན་པོ་དང་། དམ་ཚིག་གི་ཕྱག་རྒྱ་དག་སྟེ། རྒྱལ་བའི་ལྷན་སྐྱེས་བདེ་བ་འདི་ནི་འཕེལ་བའི་དོན་སླད་དང་པོར་ལས་ཀྱི་ཕྱག་རྒྱ་བསྟེན་པར་བྱ། ཞེས་པས་ལས་རྒྱ། དེ་ནས་ཉི་མའི་གཟུགས་ནི་ལུས་དང་གདོང་དང་རྐང་པ་གཙུག་ཏོར་ཡན་ལག་ཐམས་ཅད་རྫོགས་པར་ཏེ། ཞེས་པ་ཡེ་རྒྱ། གློག་གི་དབང་ཕྱུག་པའི་རྗེས་མཐུན་འཕོ་མེད་བདེ་བསྐྱེད་པར་བྱེད་མ་མཚན་ཉིད་ཡན་ལག་རབ་ཏུ་རྫོགས། ཕྱག་ཆེན། རྡོ་རྗེ་རྣམས་ཀྱི་རབ་ཏུ་སྣང་བར་བྱེད་མ་སྲིད་གསུམ་གནས་ལུས་ཆོས་ཀྱི་དབྱིངས་ནི་དེ་ནས་འགྱུར། དམ་རྒྱའོ། །འགྱུར་བ་མེད་པའི་བདེ་བའི་འབྲས་སྟེར་ཕྱག་རྒྱ་བཞི་༼༡༠ན༡༩༽པོ་འདི་རྣམས་གྲོང་དང་འབྲོག་དགོན་དུར་ཁྲོད་དང་། སོགས་ཀྱིས་སྒོམ་པའི་གནས་སོགས་བཤད་པ་ཡིན་ནོ། །ཕྱག་ཆེན་ཞེས་པའི་སྒྲ་ཡང་སྐབས་དུ་མ་ལ་གསུངས་ཏེ། རྩ་རྒྱུད་ལས། དུད་ཅན་མ་འདི་ཕྱག་རྒྱ་ཆེ། དེ་ནི་གཏུམ་མོར་རབ་ཏུ་བརྗོད། དང་། སོ་སོར་སྡུད་ལ་ཕྱག་རྒྱ་ཆེ། ནམ་མཁའ་སྟོང་པའི་མཚན་ཉིད་དོ། །སོགས་ཀྱིས་སོ། །ཡང་། བསམ་དང་འདོད་དང་ལུས་ལ་རིམས་དང་ཁ་མཆོག་པདྨ་སྐམ་དང་ཟས་ལ་རབ་ཏུ་མི་འཇུག་དང་། འདར་དང་སྨྱོ་དང་རབ་ཏུ་རྨོངས་པར་གྱུར་དང་ཡིད་ནི་རྣམ་པར་འཁྲུལ་དང་དྲག་ཏུ་རྒྱལ་བ་དག །ཅེས་ཆགས་པའི་གནས་སྐབས་བཅུ་གསུངས། རྡོ་རྗེ་ཅན་གྱིས་དུ་བ་ལ་སོགས་རབ་གསལ་རྣམ་པ་བཅུ་སྟེ་སྲོག་ཆགས་ལུས་ལ་འཇིག་རྟེན་དུ། རབ་ཏུ་གསལ་ཞིང་ངེས་པ་དེ་རྣམས་ཡིད་སྲུབས་གནས་སྐབས་སུ་ནི་བརྒྱལ་བར་འདོད་པ་དེ་ནི་སུ། ཞེས་པས་ཆགས་པ་བཅུ་རྗེས་དྲན་གྱི་་་་་བར་འདོད་པ་ན་རྨོངས་པ་སྟེ། དེ་ནི་ཐ་མལ་པ་དག་གི་ཆགས་པ་ཡིན་པས་སོ། །འོ་ན་གང་ཞེ་ན་དུ་སོགས་ཀྱི་མིང་ཅན་བཅུ་སྟེ། ཆགས་པ་དེ་དང་དེ་རང་རིག་གིས་དག་པའི་ནུས་གཟུགས་ཡིན་པས་རྗེས་དྲན་ནོ། །དེ་ལྟར་འགྱུར་བ་ཡང་། དགའ་བའི་རླུང་དང་ལྷན་ཅིག་སྐྱེས་པའི་རླུང་གཉིས་བཤད་པའི་འདིར་དང་པོའི་རླུང་འཆིངས་པ་ཡིན་ལ། ཏིང་ངེ་འཛིན་དུ་ཕྱི་མའོ། །དེ་ལྟར་སློབ་དཔོན་ཀྱེ་ར་ལི་པས། བརྒྱལ་བས་ཀུན་ནས་ཡེ་ཤེས་མེད། ཅུང་ཟད་ཤེས་པ་ཕྱི་མོའི་ཕྱེད། ཡེ་ཤེས་ཕྱི་མོ་ཉིད་དུ་འགྱུར། ཞེས་དང་། བརྒྱལ་བར་འདོད་པ་དེ་ནི་སུ། ཞེས་པས་བརྒྱལ་བའི་གནས་སྐབས་དེ་ལམ་དུ་མི་འགྱུར་བས་དགག་པའོ། །དེས་གནས་སྐབས་ལྷག་མའང་འགྲེའོ། །ལུས་གཅིག་ཉིད་ཀྱིས་ཡེ་ཤེས་སྐུ་འགྲུབ་པ། གསལ་བར་གསུངས་ན། ལུས་ལས་མ་གཏོགས་གང་ཞིག་ཁྱབ་བྱེད་ཐར་པ་སྟེར་བའི་སངས་རྒྱས་གཞན་ནི་འགའ་ཡང་ཡོད་མ་ཡིན། ཞེས་པའི་འགྲེལ་པར། འདིར་ལུས་ཀྱི་ཁམས་སྒྲིབ་པ་མེད་པ་རྣམས་སངས་རྒྱས་ཉིད་སྟེར་བར་བྱེད་པ་དང་ཐར་བ་སྟེར་༼༡༠བ༢༠༽པའོ། །ཞེས་པས་སོ། །རྩ་སོགས་སྙིགས་མའི་ཁམས། ཇི་ལྟར་དངས་འགྱུར། ཞེས་དྲི། སྙིགས་མའི་ཕུང་པོ་འདི། སྤངས་ན་ལུས་གཅིག་དེ་ཡང་ཇི་ལྟར་འགྱུར། ཞེས་སྙིགས་མ་སྦྲུལ་ལྤགས་པ་བརྗེ་བ་བཞིན་གཞོག་པར་འདོད་པ་དག་ལ་ལུས་གཅིག་གིས་སངས་རྒྱས་འགྲུབ་པར་མ་སོང་སྟེ། ལུས་གཉིས་པའི་རྟེན་དེ་ལས་སོ་ཞེས་བརྒལ་བ་དང་བཅས་ནས་དྲི་བ་གཉིས། དྲི་དགོས་པའི་རྒྱུ་མཚན་ནི། སྔར་བྱེད་ལས་ཀྱིས་སྙིགས་མར་བཞག་པ་དེ་རྣམས་དངས་མར་འགྱུར་མི་སྲིད་སྙམ་པ་བཟློག་པ་དང་། སྙིགས་མ་འདི་ཀ་དངས་མར་འགྲོ་བ་དང་། ཡེ་ལེར་དེའི་ཕྱིར་རུལ་བའི་ལུས་འདི་ནི་ལྷའི་སྐུར་བརྗོད་པར་མི་ནུས་ཏེ། སྙིང་པོ་མེད་པ་ཉིད་ཀྱི་ཕྱིར་རོ། །ཞེས་པ་མི་འགལ་བར་སྟོན་འདོད་པའོ། །ལན་ནི། སྙིགས་མ་དངས་མར་འགྲོ་ཚུལ། མཆོག་མི་འགྱུར་རང་དུ། ཤེས་རབ་ཀྱི་ཆགས་པ་ལས་བྱུང་བ་མི་འགྱུར་བའི་བདེ་བ་ཆེན་པོའི་སྐད་ཅིག་རྣམས་ཀྱིས་དེ་བཞིན་གཤེགས་པའི་ས་འདི་རྣམས་འཐོབ་སྟེ། མི་འཕོ་བའི་སྐད་ཅིག་བརྒྱ་ཕྲག་བཅོ་བརྒྱད་ཐོབ་པས་ས་དང་པོ་འཐོབ་བོ། །གྲངས་འདི་ཡིས་ས་བཅུ་གཉིས་ཀྱི་མཐར་ཐུག་པའོ། །མི་འགྱུར་བའི་སྐད་ཅིག་ཉི་ཁྲི་ཆིག་སྟོང་དྲུག་བརྒྱ་རྣམས་ཀྱིས་བཅུ་གཉིས་འཐོབ་སྟེ། ཡན་ལག་བཅུ་གཉིས་འགགས་པ་ཇི་སྲིད་བར་རོ། །དུས་སྦྱོར་བཅུ་གཉིས་འགགས་པས་ཟླ་བ་བཅུ་གཉིས་འགག་གོ། །ཟླ་བ་བཅུ་གཉིས་འགགས་པས་ཉིན་ཞག་སུམ་བརྒྱ་དྲུག་ཅུ་འགག་གོ། །ཉིན་ཞག་སུམ་བརྒྱ་དྲུག་ཅུ་འགགས་པས་ཆུ་ཚེ་དེ་ཉི་ཁྲི་ཆིག་སྟོང་དྲུག་བརྒྱ་རྣམས་འགག་སྟེ། དེ་ལྟར་ཕྱི་རོལ་ལ་ཇི་ལྟ་བ་དེ་བཞིན་དུ་ལུས་ལ་ཆུ་ཚོད་ཀྱི་གྲངས་དབུགས་རྣམས་འགག་གོ། །དབུགས་འགགས་པས་ལུས་འགག་སྟེ་བྱང་ཆུབ་ཀྱི་སེམས་འགྱུར་བ་མེད་པའི་སྐད་ཅིག་རྣམས་ཀྱིས་སོ། །ཇི་ལྟར་དངུལ་ཆུ་སྐོལ་བ་ནི་ལྕགས་དང་རིན་པོ་ཆེ་རྣམས་ཟོས་ཤིང་དེ་རྣམས་ཀྱིས་ཚོན་ཆེན་པོ་གཟུང་ནས་གནས་ཏེ། བེམ་པོའི་ཁམས་ཉིད་ནི་མ་ཡིན་ནོ། །ཚོན་ཆེན་པོ་དེས་ལྕགས་གང་ལ་རེག་པར་བྱེད་པའི་ལྕགས་དེ་རྣམས་ནི་དྲི་མ་དང་བྲལ་བར་འགྱུར་ཞིང་རྡོ་རྣམས་ནི་༼༡༡ན༢༡༽རིན་པོ་ཆེར་འགྱུར་རོ། །དེ་བཞིན་དུ་བྱང་ཆུབ་ཀྱི་སེམས་བསྒོམ་པ་ནི་ཕུང་པོ་དང་ཁམས་དང་སྐྱེ་མཆེད་སྲོག་དང་བཅས་པ་རྣམས་ཟོས་ཤིང་དེ་རྣམས་ཀྱིས་ཚོན་ཆེན་པོ་གཟུང་ནས་གནས་ཏེ་བེམ་པོ་ཉིད་ནི་མ་ཡིན་ནོ། །ཚོན་དེས་བསོད་ནམས་ཀྱི་དབང་ལས་སེམས་ཅན་བདག་ལ་བྱིན་གྱིས་བརླབ་པར་བྱེད་པ་དེ་རྣམས་ལ་མངོན་པར་ཤེས་པར་འགྱུར་གྱི། ཡང་དག་པར་རྫོགས་པའི་སངས་རྒྱས་ཉིད་ནི་མ་ཡིན་ཏེ། གང་གི་ཚེ་ལྕགས་སྐོལ་བ་རྣམས་དངུལ་ཆུ་དང་ལྷན་ཅིག་ཉིད་དུ་འགྱུར་བ་དེའི་ཚེ་དངུལ་ཆུས་ཕུག་པའི་ལྕགས་རྣམས་དྲི་མ་མེད་པར་འགྱུར་གྱི། བེམ་པོའི་ཁམས་ཉིད་མེད་པ་ནི་མ་ཡིན་པ་བཞིན་ནོ། །ཕན་ཚུན་ཡང་དག་པར་ལྡན་པ་དེའི་ཕྱིར་ཁམས་ལ་ཁམས་ཉིད་མེད་ཅིང་དངུལ་ཆུ་ལ་དངུལ་ཆུ་ཉིད་མེད་དེ་སྔར་གྱི་རང་བཞིན་ཡོངས་སུ་བཏང་བའི་ཕྱིར་རོ། །དེ་བཞིན་དུ་སེམས་དང་ལྷན་ཅིག་ཏུ་གྱུར་པའི་ལུས་ཀྱི་ཁམས་རྣམས་ལ་ཁམས་ཉིད་མེད་ཅིང་སེམས་ལ་སེམས་ཉིད་མེད་དེ། སྔར་གྱི་འཁོར་བའི་བག་ཆགས་མེད་པའི་ཕྱིར་རོ། །དེའི་ཕྱིར་བཅོམ་ལྡན་འདས་ཀྱིས་སེམས་གང་ཡོད་པའི་སེམས་དེ་ནི་སེམས་མ་ཡིན་ནོ། །ཞེས་གསུངས་པས། སྙིགས་སོགས་དངས་མར་འགྲོ་ཚུལ་རྒྱས་པར་བཤད་དེ། སྙིགས་མ་སྤངས་པ་ཞེས་སྦྲུལ་ལ་ལྤགས་པ་འཇོག་རྒྱུ་འབྱུང་བ་དང་འདྲ་བར་སེམས་པ་ལས་ནོར་བ་ཆེ་བ་ཅི་ཡོད། འོ་ན་སྤྱོད་བསྡུས་སྒྲོན་མར། སྦྲུལ་ལྤགས་པ་བརྗེས་པ་བཞིན་དུ་རྒྱལ་པོ་ཨིནྡྲ་བྷཱུ་ཏི་ཡང་ལུས་བརྗེས་ཏེ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་བགྲོད་པར་བཤད་པ་ཇི་ལྟར་འགྱུར་ཞེ་ན། བཅུད་ལེན་པ་སྔར་གྱི་ལང་ཚོ་ལས་ཆེས་ཕུན་སུམ་ཚོགས་པར་གྱུར་ན། དེ་འདྲ་སྔར་གྱི་གཟུགས་བརྗེས་ནས་ཆེས་ཕུན་སུམ་ཚོགས་པར་གྱུར་ཡོད་ཟེར་བ་ལྟ་བུའོ། །དྲི་བ་གཉིས་པའི་ལན་ནི། སྙིགས་མ་སྤངས་ཁྱེར་དེ་མ་གོ་བར་ཟད་པ་དང་། ཡེ་ལེར་གསུངས་པའི་ཚིག་ལ་འཁྲུལ་པའོ། །ལུང་དེར་ནི། སྙིགས་མ་རྡུལ་གྲུབ་ལ་བཞག་ནས། དེ་འདྲ་སངས་རྒྱས་སུ་འགྱུར་བ་དགག་པ་ཡིན། དེ་དགག་དགོས་པ་ཡང་། སྔར་རྡུལ་གྲུབ་ཞལ་གྱིས་བཞེས་ནས། འཇིག་རྟེན་ཁམས་སོགས་གསུངས་པའི་གང་ཟག་དེའི་ངོར་ཡིན་ལ། རྡུལ་དུ་གྲུབ་པར་༼༡༡བ༢༢༽ཞལ་གྱིས་བཞེས་པའང་ངོ་གཟུང་བས་གཏོགས་དེ་ལྟར་གནས་པ་མ་ཡིན་པས་སོ། །སེམས་ཀྱི་སྣང་བ་ཙམ་ཡིན་པ་དགག་པར་མི་མཛད་པའི་ཁར་བསྒྲུབ་པ་དེ། སངས་རྒྱས་རྣམས་ཀྱི་རྟོགས་བྱ་མིན་པ་དཔག་མེད་ཡོན་ཏན་དང་ལྡན་སངས་རྒྱས་སྤྲུལ་པ་སྒྱུ་མ་ནི། སྲིད་པ་གསུམ་གྱི་གནས་སུ་བདག་ཉིད་སྟོན་པར་བྱེད་དེ་བརྒྱ་བྱིན་གཞུ་ནི་ཇི་བཞིན་ཉིད་དུའོ། །སྣ་ཚོགས་དངོས་རྣམས་ཀྱིས་ཕྱེ་རྒྱལ་བ་དང་བཅས་ལྷ་མི་རྣམས་ཀྱི་རང་རང་སེམས་ལར་བཞུགས་པ། འདི་ནི་མ་སྐྱེས་ཆོས་དེ་ཆུ་ལ་ནམ་མཁའ་བཞིན་དུ་འདིར་ནི་སྐྱེ་བར་འཁྲུལ་པ་སྟེར་བར་རོ། །བཅོམ་ལྡན་འདས་ཀྱིས་གསུང་འདིའི་ཕྱིར་བཅོམ་ལྡན་འདས་ནི་གཟུགས་ཀྱི་སྐུར་མི་འགྱུར་ཏེ་སངས་རྒྱས་ཐམས་ཅད་འདུས་པའི་ཕྱིར་རོ། །གལ་ཏེ་སངས་རྒྱས་གཟུགས་ཀྱི་སྐུ་ཡིན་ན་དེའི་ཚེ་རྡུལ་ཕྲ་རབ་ཀྱི་གཟུགས་ཀྱིས་ཀྱང་འདུས་པར་མི་འགྱུར་རོ། །ཞེས་འབྱུང་བས་དོན་འཁྲུལ་སྣང་ཤས་ཆེ་བའི་ཚེ་ལུས་སོགས་རགས་པ། འཁྲུལ་སྣང་ཤས་ཆུང་དུ་སོང་ན་དེ་ཀ་ཕྲ་བ་མི་ཤིགས་པ། འཁྲུལ་སྣང་ཐམས་ཅད་ཟད་པ་ན་གཉུག་མ་དོན་དམ་པའི་རྡོ་རྗེ་གསུམ་དུ་འགྱུར་བས་སོ། །གཞན་སྔར་གྱི་ཁུ་རྡུལ་མེད་པར་འགྲོ། གསར་པ་ཞིག་ཡོང་རྒྱུ་ཡིན་ན། མཚན་བརྗོད་ཀྱིས། རྐང་པ་ཡ་གཅིག་མཐིལ་གྱིས་གནོན། རྐང་མཐེབ་སེན་མོའི་ཁྱོན་གྱིས་ཀྱང་། ཚངས་པའི་ཡུལ་ས་རྩེ་ནས་གནོན། ཞེས་གསུངས་པ་བཞིན། སྤྱན་རས་གཟིགས་ཀྱིས། ཞབས་གཅིག་རྡོ་རྗེ་ནོར་བུ་རྡུལ་དང་ཉི་མ་དང་། གཉིས་པ་གཙུག་ཏོར་ཁུ་བ་རི་བོང་ཅན་ལ་ནི། རྟག་ཏུ་མི་ཕྱེད་དང་དབྱེར་མེད་འདོད་པ་བཀོད་གྱུར་པ། ཞེས་པ་འབྲེལ་མེད་པར་འགྱུར་རོ། །དེ་བས་དམར་ཆ་རྡུལ་འོག་ཏུ་གནོན་པ་ནི་ཡན་ལག་བཅུ་གཉིས་ཟད་པ་དང་། དྲང་དོན་དུའང་ཉི་མ་སྟོད་གནོན། ཁུ་བ་གཙུག་ཏོར་གྱི་མཐར་ཐུག་པར་གང་། དྲང་དོན་དུ་ཆུ་བོ་གྱེན་བཟློག །དེ་ཡང་། ཡེ་ལེར། དེས་ན་ཡན་ལག་བཅུ་གཉིས་འགགས་ཤིང་སྲོག་ཟད་པས། རྡོ་རྗེ་ཉི་མ་སྣང་བ་ཆེ། བདེན་དོན་རྣམ་པ་བཅུ་གཉིས་ལྡན། ཞེས་པ་སྟེ་རྡུལ་འགགས་པའི་ཕྱིར་རོ། །ཆ་བཅུ་དྲུག་གི་ཁུ་བར་དགགས་པས། རྡོ་རྗེ་ཟླ་བ་༼༡༢ན༢༣༽དྲི་མེད་འོད། དེ་ཉིད་རྣམ་པ་བཅུ་དྲུག་རིག །ཅེས་པ་སྟེ། བཅོམ་ལྡན་འདས་དུས་ཀྱི་འཁོར་ལོ་བསྒྲུབ་བོ་ཞེས་གསུངས་པ། བདེན་དོན་རྣམ་པ་བཅུ་གཉིས་ཀྱི་དབང་དུ་བྱས་ནས་ས་བཅུ་གཉིས་སུ་གསུངས་པ་ཤས་ཆེ། དེ་ཉིད་རྣམ་པ་བཅུ་དྲུག་ཏུ་བྱས་ནས་ས་བཅུ་དྲུག །འདི་དག་ལ་རྒྱུ་འབྲས་ཀྱི་དབྱེ་བས་གཉིས་སུ་ཡང་འབྱེད་པ་རིགས་པ་སྟེ། སོར་བསམ་ནས་ཏིང་ངེ་འཛིན་གྱི་བར་དུ་ལུས་ངག་ཡིད་ཡེ་ཤེས་ཀྱི་དག་པ་བཟོ་དགོས་པས་དེའི་མི་མཐུན་ཕྱོགས་རགས་པའི་ཡན་ལག་བཅུ་གཉིས་དག་པ་དང་། ཡས་ཀྱི་དགའ་ཤི་བརྟན་པས་ཡས་བརྟན་དུ་བཞག་པའི་དགའ་བ་བཅུ་དྲུག་རིག་པ་གཉིས་འབྱུང་བས་སོ། །བཅུ་གཉིས་ཀྱི་རྣམ་གཞག་སྤངས་པས་འབྱེད་པ་དང་། བཅུ་དྲུག་གི་རྣམ་གཞག་རྟོགས་པས་ཡིན་ཏེ་གྲངས་མང་ཉུང་གི་དབྱེ་བསྡུ་ནི་ཤེས་དགོས་སོ། །རྒྱུད་ལས། ཁྲོ་བོ་སངས་རྒྱས་ལྷ་མོ་དང་བཅས་ངེས་པར་རོ་ཡི་རྡོ་རྗེ་རྣམས་དངས་ཡི་སྙིང་པོ་སོགས། རབ་ཏུ་དགའ་བའི་ཐུགས་རྣམས་རྣལ་འབྱོར་པ་ལ་གྲུབ་པའི་དུས་སུ་ནམ་མཁའ་ལ་ནི་མངོན་སུམ་འགྱུར། དེ་ནི་འདོད་པའི་དངོས་གྲུབ་རི་བོང་ཅན་གྱི་ཞག་གི་ཐོ་རངས་དང་ནི་མཚན་མོ་ཕྱེད་ལ་འགྱུར། རིན་པོ་ཆེའམ་མེ་ཏོག་ཆར་ནི་མཆོག་གྱུར་དུས་ཀྱི་སྦྱོར་བས་ས་ཡི་སྟེང་དུ་རབ་ཏུ་འབབ་པར་འགྱུར། ལུས་ནི་དངས་ཤིང་རྡུལ་ཕྲན་ཉམས་པ་ནམ་མཁའ་དང་མཚུངས་མཚན་ལ་སོགས་པ་རྣམས་ཀྱི་རབ་རྫོགས་འགྱུར། སྣ་ཚོགས་འཇིག་རྟེན་གསུམ་པོ་ཉིད་ནི་དྭངས་ཤིང་སྒྲིབ་པ་རྣམ་པར་བྲལ་བ་རྨི་ལམ་བཞིན་དུ་སྣང་། སྐད་ནི་ཀུན་ནས་ཆད་པ་མེད་ཅིང་དུ་མའི་སྐད་གཞན་དག་གིས་གཞན་གྱི་སྙིང་ལ་འཇུག་པ་སྟེ། སེམས་ནི་དམ་པའི་བདེ་བས་གང་ཞིང་མི་གཡོ་ཐམས་ཅད་དུས་སུ་ལྷན་ཅིག་སྐྱེས་པས་འཁྱུད་པའོ། །ཞེས་གསུངས་པ་ནི་འོག་མིན་དུ་ལོངས་སྤྱོད་རྫོགས་སྐུའི་རྟེན་ལ་སངས་རྒྱ་བའི་རྣམ་གཞག་སྟེ་སམྦུ་ཊ་ནས་རིག་མའི་སྐྱེས་བུ་གྲུབ་པའི་ཚུལ་བཤད་པ་དེ་ཡིན། འདིའི་ལོངས་སྐུའི་གནས་འོག་མིན་ཡང་། སངས་རྒྱས་ཞིང་ནི་མ་ལུས་ལུས་ཅན་མིན་པ་སྲིད་གསུམ་སྐྱེད་༼༡༢བ༢༤༽པར་མཛད་པས་རྣམ་པར་གཟིགས་ནས་ནི། གཉིས་ཀ་རོ་མཉམ་དག་པའི་རྡུལ་ལ་སངས་རྒྱས་ཐམས་ཅད་བྱང་ཆུབ་སེམས་དཔའ་རྣམས་ཀྱིས་བསྐོར་བ་སྟེ། སོ་སོ་རེ་རེའི་རོ་ཡི་རྡུལ་ལ་གཉིས་ཀ་རིགས་ཀྱི་དབང་གིས་རྡོ་རྗེའི་སྲས་པོ་རྣམས་ཀྱིས་བསྐོར། ས་ལ་སོགས་པའི་རྡུལ་ལམ་ལུས་རིགས་ལ་གནས་པ་མཐའ་ཡས་མི་གཡོ་སོགས་ལ་རབ་བཞུགས་རྣམས། ཞེས་པའི་འགྲེལ་པར། ད་ནི་ལས་ཀྱི་རླུང་ལས་གྲོལ་བ་རྣམས་ཀྱི་བཞུགས་ས་གསུངས་པ། སངས་རྒྱས་ཞིང་ཞེས་པ་ལ་སོགས་པ་སྟེ། འདིར་བཟང་པོ་སྤྱོད་པ་བསྒྲགས་པ་ལས་བཅོམ་ལྡན་འདས་ཀྱིས་གསུངས་པ་འདི་ལྟ་སྟེ། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། སངས་རྒྱས་སྲས་ཀྱི་དབུས་ན་བཞུགས་པ་དག །ཅེས་གསུངས་པའི་ཕྱིར་ཀུན་རྫོབ་ཏུ་སངས་རྒྱས་ཀྱི་བཞུགས་ས་གང་ཡིན་པ་དེ་ནི་རྟེན་སྤངས་པ་དང་རྟེན་མེད་པ་མ་ཡིན་ནོ། །སྒྲིབ་པ་མེད་པའི་ཆོས་ཀྱི་དོན་དམ་པ་ནི་བཞུགས་པ་མེད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་འཕགས་ཀྱི་ལེའུ་ལས། སངས་རྒྱས་རྣམས་ལ་གང་དུའང་གཤེགས་པའམ་བྱོན་པ་མ་བྱུང་ངོ་། །འབྱོན་པར་མི་འགྱུར་རོ། །མི་འབྱུང་ངོ་། །ཞེས་གསུངས་སོ། །དེས་ན་དག་པའི་རྡུལ་ཕྲ་རབ་གྲུབ་པའི་བཅུད་ཁམས་ཐམས་ཅད་འབིགས་པར་བྱེད་པ་རྡུལ་གཅིག་གི་རྩེ་མོའི་རྟེན་ལ་སངས་རྒྱས་ཐམས་ཅད་ཏེ། གང་དག་སྟོང་པའི་མཚན་ཉིད་སྒྲིབ་པ་མེད་པ་རྣམས་མཐའ་དག་གོ། །དེ་ལྟར་སངས་རྒྱས་ཀྱི་ཞིང་ནི་མ་ལུས་ལས་ཅན་མིན་པར་ཏེ་ལས་ཀྱི་རླུང་དང་བྲལ་བར་སྲིད་གསུམ་སྐྱེད་པར་མཛད་པ་ཡེ་ཤེས་སྐུ་ཡིས་རྣམ་པར་གཟིགས་ནས་ནི། དག་པའི་རྡུལ་སངས་རྒྱས་ཐམས་ཅད་དེ་དེ་རྣམས་དང་ཐབས་ཅིག་ཏུ་བཞུགས་སོ། །གཉིས་ཀ་རོ་མཉམ་དག་པའི་རྡུལ་ལ་ཞེས་པ་ནི་ཕལ་པའི་བཅུད་གྲུབ་པའི་བཅུད་དུ་བྱས་པ་དང་། འཁོར་བ་པའི་བྱང་ཆུབ་ཀྱི་སེམས་མི་འགྱུར་བར་བྱས་པའོ་ཞེས་པའི་དོན་ཏོ། བྱང་ཆུབ་སེམས་དཔའ་རྣམས་ཀྱིས་བསྐོར་བ་སྟེ་ཞེས་པ་ནི་སྒྲིབ་པའི་ཆ་ཅུང་ཟད་ཙམ་གྱིས་སྨོན་པའི་སེམས་ལའོ། །རྡོ་རྗེ་སྲས་༼༡༣ན༢༥༽པོ་རྣམས་ཞེས་པ་ནི་སོ་སོ་རེ་རེའི་རོའི་རྡུལ་ལ་ཞེས་པ་ཤེས་རབ་དང་ཐབས་གཉི་གའི་ཆོས་ལ་གནས་པ་རྣམས་ཏེ་མི་གཡོ་བ་ལ་སོགས་པ་ལ་གནས་པ་རྣམས་སོ་ཞེས་པའི་དོན་ནོ། །དེ་བཞིན་དུ་སལ་སོགས་པའི་རྡུལ་ལ་འདོད་ཆགས་དང་བྲལ་བ་ལ་སོགས་པ་ས་ལ་སོགས་པའི་ཟད་པར་མངོན་སུམ་དུ་བྱས་པ་མཐའ་ཡས་པ་རྣམས་ཏེ་མི་གཡོ་བ་ལ་སོགས་པ་རབ་ཏུ་ཞུགས་པ་རྣམས་སོ་ཞེས་པའི་དོན་ཏོ། འདིར་རྡུལ་གྱི་སྒྲ་ཡིས་མི་གཡོ་བ་ལ་སོགས་པའི་ས་རྣམས་གསུངས་ཀྱིས་རྡུལ་ཕྲ་རབ་རྣམས་ནི་མ་ཡིན་ནོ། །དག་པའི་རྡུལ་གྱི་སྒྲ་ཡིས་རྟེན་དུ་གྱུར་པའི་ས་བཅུ་གཉིས་པོ་རྣམས་ཏེ་སྒྲིབ་པ་ཐམས་ཅད་ཟད་པའི་ཕྱིར་རོ་ཞེས་པའི་དོན་ཏོ། །དེ་དག་རྣམས་དང་ཐབས་ཅིག་རྡོ་རྗེ་སེམས་དཔའ་ཆགས་པའི་དུས་ཀྱི་བར་དུ་མཁའ་ལ་རྣམ་པར་བཞུགས་ཞེས་པ་ནི། འདིར་ཇི་སྲིད་སེམས་ཅན་རྣམས་ཀྱི་བསོད་ནམས་དང་ཡེ་ཤེས་ཀྱི་ཚོགས་རྫོགས་པར་མ་འགྱུར་པ་དེ་སྲིད་དུ་དེ་རྣམས་ཀྱིས་སངས་རྒྱས་འབྱུང་བ་མཐོང་བར་མི་འགྱུར་རོ། །དེས་ན་ནམ་མཁའ་ལ་རྣམ་པར་བཞུགས་ཏེ་ཆོས་ཀྱི་སྐུ་ལ་གནས་སོ་ཞེས་པའི་དོན་ཏེ་ཞེས་རྒྱས་པར་གསུངས་པའི་དོན་ས་བརྒྱད་པ་ཚུན་ལོངས་སྤྱོད་རྫོགས་སྐུ་མི་མཐོང་བ་དང་དེའི་ཞིང་ཁམས་ཀྱང་མི་བགྲོད་པ། འདིའི་ལོངས་སྐུ་མཚན་ཉིད་ཐེག་པ་བ་དང་མཐུན་པར་མཚན་དཔེས་བརྒྱན་པའི་སྐུ་ཞིག་ལ་ངོས་གཟུང་། དེ་ཡངས་པ་དེ་དག་གི་ཏིང་ངེ་འཛིན་སྣང་བ་དང་བཅས་པའི་མཐུ་ཡིན་ལ་ཏིང་ངེ་འཛིན་དེ་ཡངས་འོག་མ་ལ་བལྟོས་ན་མཉམ་གཞག་རང་དུ་ཡོད་རང་སེའི་རྗེས་ཐོབ་ཏུ་སོང་སྟེ་སྣང་བ་དང་བཅས་པའི་ཕྱིར་རོ། །ཆོས་རྒྱུན་གྱི་ཏིང་ངེ་འཛིན་མ་ཐོབ་ཚུན་སངས་རྒྱས་མཐོང་མི་ནུས་འདིའི་སངས་རྒྱས་ནི་ལོངས་སྐུ་དེའི་རྒྱུ་མཐུན་པ་སྤྲུལ་པའི་སྐུ་སྟེ། འདི་རྣམས་དགྲོལ་བའི་སླད་དུ་སྲས་དང་བཅས་པ་རྒྱལ་བའི་བདག་པོ་ལས་ཀྱི་སར་ནི་རབ་ཞུགས་ཏེ། མངལ་ནི་རབ་ཏུ་གཟུང་བ་མཛད་ཅིང་མཆོག་གི་ཐུགས་རྗེ་དག་གིས་བྱང་ཆུབ་བསྐྱེད་པ་མཛད་ནས་ནི། ཉོན་མོངས་དང་ནི་བདུད་རྣམས་བཅོམ་ནས་ས་ཡི་སྟོང་གི་གནས་༼༡༣བ༢༦༽སུ་ཆོས་ཀྱི་འཁོར་ལོ་རབ་བསྐོར་ཏེ། སྤྲུལ་པ་སྒྱུ་མ་མཛད་ནས་སླར་ཡང་བཅོམ་ལྡན་འདས་ནི་དག་པའི་སྐུ་ཅན་དེ་ཉིད་ལ་ཐིམ་མོ། །འདིར་ཇོ་ནང་པས། གཟུགས་སྐུའི་རྒྱུ་གསར་བྱུང་ལ་འདོད་པའང་ནོར་བ་སྟེ། དེ་ཉིད་ཀྱི་འཕྲོས་སུ། དེ་ཕྱིར་རྒྱལ་བའི་དག་པའི་སྐུ་ནི་སྐྱེས་ཤིང་མཉམས་སྲིད་པ་གསུམ་པོ་ལའང་གནས་པ་སྟེ། བཅོམ་ལྡན་དེ་ཡིས་ཐམས་ཅད་དུས་སུ་སེམས་ཅན་དོན་ནི་མི་འདོར་ལས་ཀྱིས་བཅིངས་པ་མ་ཡིན་ནོ། །དེ་ལྟར་འཇིག་རྟེན་དབང་ཕྱུག་དག་ནི་སྲིད་པ་གསུམ་གྱི་གནས་སུ་ལས་ཀྱི་སར་གནས་ཉི་མ་ཀྱེ། སེམས་ཅན་རྣམས་ལ་ལམ་ནི་སྦྱིན་བྱེད་དམྱལ་བའི་འཇིགས་འཕྲོག་ལྷ་གཞན་དག་ནི་ནམ་ཡང་མ་ཡིན་ནོ། །ཞེས་པས་སོ། །དེ་ནི། འོག་མིན་གནས་མཆོག་ཉམས་དགའ་བར། ཡང་དག་སངས་རྒྱས་དེར་སངས་རྒྱས། སྤྲུལ་པ་པོ་གཅིག་འདིར་སངས་རྒྱ། ཞེས་པའི་དོན་ནོ། །དག་པའི་སྐུ་གཉིས་ལ་གདུལ་བྱ་གཉིས་སྣང་བས་སྐུ་གཉིས་སུ་བཟོ། ཆོས་རྒྱུན་ནི་ཚོགས་ལམ་ནས་བཞག་པ་ཡིན་ལ། ས་བདུན་པ་ཚུན་སྤྲུལ་པའི་སྐུའི་གདུལ་བྱའོ། །དེ་ཡང་། སྐྱེ་བ་སྔ་མར་རང་གི་སྙིང་གིས་བསྐྱེད་པའི་ཞི་དང་ཆགས་པ་ལ་སོགས་དངོས་པོ་རྣམས་ཀྱིས་ནི། བག་ཆགས་སྟོབས་ཀྱིས་འཁོར་ལོ་གནས་པ་གཅིག་ནི་རྣམ་པ་དུ་མར་མཐོང་སྟེ་སྨོན་ལམ་དབང་གིས་སོ། །དོན་གཅིག་དུ་མའི་སྐད་ནི་རང་རང་དངོས་པོ་རྣམས་ཀྱིས་སྲོག་ཆགས་རྣམས་ཀྱི་སྙིང་ལ་རབ་ཏུ་འཇུག །ཅེས་གསུངས་སོ། །ས་བཅུའི་བསྒོམ་བྱ་ཕར་ཕྱིན་ཀྱང་། ནོར་ནི་གཏོང་བ་སྦྱིན་པ་ཡིད་དང་བུད་མེད་འགྲོགས་པ་ལས་ཀྱང་འཕོ་བ་མེད་པ་ཚུལ་ཁྲིམས་ཏེ། བཟོད་པ་སྒྲ་ལ་སོགས་པ་མི་འཇུག་པ་སྟེ་རླུང་གིས་གཉིས་ཀའི་བགྲོད་པ་འཇིག་པ་བརྩོན་འགྲུས་ཉིད། བསམ་གཏན་ཤེས་རབ་དག་ཀྱང་ལྷན་སྐྱེས་བདེ་ལ་གནས་པའི་སེམས་དང་ཀུན་ཏུ་འགྲོ་བ་ཀུན་གྱི་སྐད། དེ་ལས་སེམས་ཅན་དོན་དང་རྫུ་འཕྲུལ་སྲིད་པ་མཐར་བྱེད་མི་སྐྱེ་འཐོབ་སྟ་གཞན་པ་བཞི་རྣམས་སོ། །ཞེས་པ་ཉིད་དོ། །འདིར་མཆོག་མི་འགྱུར་ལས། སྐད་ཅིག་གང་ལ་ཡོད་པའི་སྐད་ཅིག་དེ་ལ་སངས་༼༡༤ན༢༧༽རྒྱས་ཉིད་དུ་མི་འགྱུར་ཏེ་སེམས་སྒྲིབ་པ་དང་བཅས་པའི་ཕྱིར་རོ། །སྐད་ཅིག་གང་ལ་སངས་རྒྱས་ཉིད་ཡིན་པའི་སྐད་ཅིག་དེ་ལ་བདུད་མེད་དེ་སྒྲིབ་པ་ཐམས་ཅད་ཟད་པའི་ཕྱིར་རོ། །ཞེས་དང་། བདུད་བཞི་དེར། སེམས་ཅན་རྣམས་ཀྱི་ལུས་དང་ངག་དང་སེམས་དང་མ་རིག་པའི་བག་ཆགས་ཀྱི་བདག་ཉིད་བདུད་བཞི་སྟེ། དེ་རྣམས་ལས། ལུས་ཁྱི་སྒྲིབ་པ་ནི་ཕུང་པོའི་བདུད་དོ། །ངག་གི་སྒྲིབ་པ་ནི་ཉོན་མོངས་པའི་བདུད་དོ། །སེམས་ཀྱི་སྒྲིབ་པ་ནི་འཆི་བདག་གི་བདུད་དོ། །ཕྱི་རོལ་གྱི་མ་རིག་པའི་འཇུག་པ་ནི་ལྷའི་བུའི་བདུད་དོ་ཞེས་དང་། དེ་ནི་དེ་བཞིན་གཤེགས་པས་མཆོག་ཏུ་མི་འགྱུར་བའི་སྐད་ཅིག་གིས་རྣམ་པར་བཅོམ་པ་ནི་བདུད་ཀྱི་དཔུང་བཅོམ་པ་སྟེ་འདོད་ཆགས་དང་ཞེ་སྡང་དང་གཏི་མུག་དང་ཁོང་ཁྲོ་མ་རིག་པའི་གཟུགས་ཅན་རྣམས་ཟད་པའོ་ཞེས་པས། གཞན་སྔར་སྤངས་ཟིན། འདིར་འགག་རྒྱུ་ནི་ཡེ་ཤེས་ཀྱི་ཐིག་ལེའི་འཕོ་བ་ལས་མེད་ལ། ལུང་འདི་ལས་ལུས་སོགས་ཚང་མ་བཤད་པ་ཅི་ཡིན་སྙམ་དགོས་སོ། །དེ་སེལ་བ་ནི་ཐིག་ལེ་དེ་ཀའང་ལུས་སོགས་བཞི་ལྡན་དུ་གནས་སོ་ཞེས་མཆོག་མི་འགྱུར་ལས། རྣམ་པ་གཞན་དུ་ན་ཚོགས་པའི་ཡོན་ཏན་རྣམས་མེད་པར་ཡོན་ཏན་གཅིག་ལས་འཁོར་བའི་བག་ཆགས་སུ་མི་འགྱུར་རོ་ཞེས་པའི་ལུང་གིས་སོ། །དེས་ན་གཙོ་བོ་ཡེ་ཐེག་དང་ཕལ་པའི་ཡོན་ཏན་གཞན་གསུམ་གྱི་རྣམ་གཞག་འདིས་མཚོན་ན་སྐུ་མང་པོར་ཤེས་པར་བྱེད་དགོས་ཡོད་དོ། །འདིར་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་མི་འགྱུར་བའི་རིག་པ་འཛིན་པ་འཁོར་བའི་བག་ཆགས་ལས་འདས་པ། དེའི་ཆོས་མི་མཐུན་པས་འཁོར་བ་པ་རྣམས་འགྱུར་བའི་རིག་པ་འཛིན་པ་འཁོར་བའི་བག་ཆགས་ཀྱིས་གཟུང་བའོ་ཞེས་པས་འཁོར་འདས་ལག་པའི་ལྟོ་རྒྱབ་ལྟ་བུར་བཤད་ཅིང་། སངས་རྒྱས་ལས་གཞན་རྣམ་གྲངས་ཀྱི་དོན་དམ་བདེན་པར་བཤད་དོ་ཞེས་གདམས་སོ། །གཞན་ཡང་ཚུལ་འདིར་དཔྱད་པ་མང་མོད་ཀྱང་། རེ་ཞིག་ཡི་གེས་འཇིགས་ནས་ངས་མ་བཀོད། ཅེས་པ་ནི་ཞར་ཞར་ལ་བརྗོད་པ་དང་མ་བརྗོད་༼༡༤བ༢༨༽པའང་མང་ངོ་། །རྒལ་ལན་མི་ཐེབས་མཁས་པའི་ཁུར་བོར་ལ། སློབ་མའི་འདུ་ཤེས་གཟུང་ལ་འདིར་ཤོག་ཅིག །ཅེས་པ་ནི། དཔེ་ལྷོགས་ཙམ་ཚིག་འགའ་ཞིག་ཁོང་དུ་ཆུད་པ་རྒྱུ་མཚན་དུ་བྱས་ནས་གཞན་ལ་ལམ་འདི་སྟོན་མི་འོས་ཏེ། དེ་དག་གི་རྒྱུད་ཆུད་ཟ་བ་མཉེས་པ་ཆེན་པོར་འགྱུར་རོ། །རང་གིས་ཤེས་པར་བྱས་ཏེ་སྟོན་པར་འོས་པས་སློབ་དཔོན་འདི་ནའོ་ཞེས་སྟོན་པའོ། །ཡང་མཁས་པར་སྙེམས་པ་འགའ་ཞིག་ཡོད་མཆིས་ན། རྒྱུད་དང་སེམས་འགྲེལ་འཕགས་ཡུལ་གྲུབ་པའི་གཞུང་། ཚད་ཐུབ་དཔང་པོར་བཞག་ནས་རྩོད་བྱ་ཡིས། རིགས་པས་དཔྱད་བཟོད་ཡོད་ན་འདིར་ཤོག་ཅིག །ཅེས་པ་ནི་ཁོ་བོའི་ཚིག་ལ་སྐྱོན་ཆགས་སྙམ་ན་བརྩད་པར་བྱའོ། །དེ་ཡང་གཞན་རྣམ་པར་གྲོལ་བའི་ལམ་ཤེས་འདོད་པ་ཁོ་ནའོ།། །།མངྒ་ལཾ། ཆོས་སྦྱིན་རྒྱ་ཆེར་སྤེལ་བའི་ཆེད། པར་བཞེངས་གླེགས་བུ་རེ་རེ་ལ། དངུལ་ཀྲང་ཡོན་འགྱེད་མཛད་པོ་ནི། ཆོས་རྒྱལ་བསོད་ནམས་རྒྱལ་མཚན་ནོ།། །། དཔལ་པདྨ་དཀར་པོའི་རྡོ་རྗེའི་གླུའི་འཕྲེང་བ་སྔ་མ།དཔལ་པདྨ་དཀར་པོའི་རྡོ་རྗེའི་གླུའི་འཕྲེང་བ་སྔ་མ་བཞུགས་སོ། །རྒྱལ་བ་ཐམས་ཅད་ཀྱི་གོང་བུ་དཔལ་འབྲུག་པ་ཡབ་སྲས་ལ་ཕྱག་འཚལ་ལོ། །རྒྱལ་བའི་ཐུགས་རྗེའི་ཨུཏྤལ་རྒྱས་པའི་སྙིང་། །འཇམ་མགོན་རལ་གྲི་ཞུགས་པའི་དཔལ་གྱི་གཟི། །འཁོར་བའི་མུན་པ་གཞོམ་ལ་ཉིན་བྱེད་ལྟའི། །ངོ་མཚར་ནུས་པའི་ཕུལ་ལ་ཕྱག་འཚལ་ལོ། །སྣ་ཚོགས་གདུལ་བྱའི་ངོ་ན་རྣ་བའི་བཅུད། །དྲི་ཟའི་གླུ་དབྱངས་འདྲ་བ་བརྒྱ་ཕྲག་མང་། །མགུར་ལས་མངོན་འོངས་ཐར་པར་དྲང་བའི་ཐབས། །ཀུན་དགའི་འདོད་དགུར་འཆར་བ་འདི་ནའོ། །འཕགས་པ་ཐུགས་རྗེ་ཆེན་པོའི་སྤྲུལ་པ་རྒྱལ་བའི་དབང་པོ་གསུམ་པ། དཔལ་འབྲུག་པ་རིན་པོ་ཆེ་ཞེས་སྙན་པའི་གྲགས་པ་ས་གསུམ་ན་ཁྱབ་པ་ཆེན་པོ་དེའི་རྡོ་རྗེ་མགུར་ཆེ་བའི་རིམ་པ་དགུང་ལོ་བཅུ་དགུ་ནས་ལྔ་བཅུའི་བར་དུ་ཕེབས་པ་ཆབས་གཅིག་ཏུ་བསྒྲིགས་པ། དཔལ་འཇིགས་བྱེད་ཧེ་རུ་ཀ་དགྱེས་པར་རོལ་པའི་གནས་ཆེན། །དཔའ་བོ་དང་དཔའ་མོ་སྤྲིན་བཞིན་དུ་འདུ་བའི་ས་ཙ་རི་ཏྲ་བསྐོར་བར་ཕྱིན་པའི་ཚེ་བླངས་པ་ལྟ་སྒོམ་སྤྱོད་པ་གསུམ་གྱི་གླུ། དཔལ་ཕུན་ཚོགས་ཀུན་གྱི་བྱེད་པ་པོ། །ཡོངས་མི་མངོན་དབྱིངས་ཀྱི་རྡོ་རྗེ་འཆང་། །དུས་ད་ལྟ་ངག་དབང་ཆོས་ཀྱི་རྒྱལ། །ཕ་འགྲན་ཟླ་མེད་པའི་ཞབས་ལ་འདུད། །སྣང་ཐོག་ཏུ་ཚོལ་དང་སྟོང་པ་ཉིད། །རིག་ཐོག་ཏུ་ལྟོས་དང་གཞི་རྩ་བྲལ། །བལྟ་རྒྱུ་དང་ལྟ་བ་གནས་རྙེད། །བཟང་ངན་ལ་རྩོད་པས་༼༢ན༣༽ཅི་རང་མཛད། །ལུང་རིགས་ཀྱིས་འཇལ་བ་མ་ཡིན་པའི། །ཉམས་སུ་མྱོང་བ་འདི་གཅེས་པར་གོ། །དཔེ་ཁྱུང་ཆེན་མཁའ་ལ་ལྡིང་བ་བཞིན། །ཡིད་གཞུངས་ནས་སྒོམས་ཤིག་པདྨ་དཀར། །ཐོལ་སྐྱེས་ཀྱི་ཤེས་པ་ལྷུག་པར་སྐྱོངས། །ཚོགས་དྲུག་གི་སྟོང་དུ་མ་བཅོས་གློད། །གང་ཤར་ལས་གཞན་དུ་སྒོམ་མི་སྣང་། །སེམས་འཛིན་གྱི་སྤྲོས་པས་ཅིར་མཛད། །རྒྱ་འབྱམས་སུ་སོང་བ་མ་ཡིན་པའི། །ཡིད་བྱེད་དང་བྲལ་བ་ཞིག །གཅེས་པར་གོ། །དཔེ་རྒྱུན་ཆད་མེད་པའི་ཆུ་བོ་བཞིན། །ཡིད་གཞུངས་ནས་སྒོམས་ཤིག་པདྨ་དཀར། །ཉོན་མོངས་ཀྱི་རང་ངོ་རྗེན་པར་ལྟོས། །རེ་དོགས་ཀྱི་སྟེང་དུ་ཐོག་བརྫིས་ཐོང་། །འགལ་རྐྱེན་ལས་གཞན་པའི་མཐུན་རྐྱེན་མེད། །སྤང་གཉེན་གྱི་བླང་དོར་ཅི་རང་མཛད། །རྒྱུ་འབྲས་ལ་ཁྱད་གསོད་མ་ཡིན་པའི། །འཇར་ཉལ་འཁྲིས་མེད་ཞིག་གཅེས་པར་གོ། དཔེ་གླང་ཆེན་མྱོས་པ་རྒྱུག་པ་བཞིན། །ཡིད་གཞུངས་ནས་སྒོམས་ཤིག་པདྨ་དཀར། །མགོན་ཧེ་རུ་ཀ་དཔལ་རོལ་པའི་ཞིང་། །མ་མཁའ་འགྲོའི་དོར་ཙ་རི་ཏྲ། །ཉམས་རྟོགས་པ་ཅིག་ཅར་ནགས་མའི་ལྗོངས། །གྲུབ་བརྒྱུད་ཀྱི་མཆོད་སྡོང་དམ་པ་ན། །རྒྱལ་ཁམས་ལ་འཕྱོ་བའི་བསམ་གཏན་པ། །ཡིད་དགའི་ཞིང་སྐྱིད་དུ་ཚོར་ནས་བླངས། །དབྱངས་མཆོད་པར་འབུལ་ལོ་དཀོན་མཆོག་རྣམས། །དྲན་གསོའི་གླུ་ཤར་ཀོང་པོའི་ཡུལ་གྱི་སྒྲུབ་གནས་ཆེན་པོ་མེ་རག་མདོར་མཚམས་ཀྱི་བཅད་རྒྱ་ལ་འདུག་པའི་ཚེ་བླངས་པ། བློ་མ་སྤྲོ་མ་སྤྲོ་ནང་དུ་ཁུག །བློ་སྤྲོས་ན་འདོད་ཡོན་གྱི་སྣང་བ་དྲན། །དགའ་གདུངས་ཀྱི་སྲེད་པ་འགྲོགས་ཡུན་རིང་། ཉོན་མོངས་ཀྱི་དགྲ་བོ་བློ་འདྲིད་མཁས། རྣམ་རྟོག་གི་དཔུང་ཚོགས་རགས་ལ་མང་། བྱིང་རྒོད་ཀྱི་སོ་པ་ཅང་ལ་གྲིམ། ༼༢བ༤༽དྲན་ཤེས་ཀྱི་གྲོགས་པོ་རྒྱུ་མ་རིང་། །སྙོམས་སེམས་ཀྱི་ལེ་ལོ་འགྲོ་མཚམས་མཁས། །ཅོལ་ཆུང་གི་བློ་ན་འགྲོ་ལ་དགའ། །ཞི་གནས་ཀྱི་ཡུལ་འཁོར་འཇོམས་ཉེན་གདའོ། །ཁ་ནང་དུ་ལྟོས་ཤིག་པདྨ་དཀར། །སེམས་མ་བཅིངས་མ་བཅིངས་གློད་ལ་ཞོག །སེམས་བཅིངས་ན་ཕྱོགས་བཅུར་འགྲོ་བར་རྩོམ། །རྒྱ་ཡན་དུ་གཞག་ན་རྣལ་དུ་ཕེབས། །ཡེངས་མེད་དུ་བསྐྱངས་ན་རང་མཚང་རིག །སྡུག་བཙིར་རང་བྱས་པའི་སྒོམ་གྱིས་སླུ། །བཅས་བཅོས་ཀ་མ་བྱེད་ལྷུག་པར་ཞོག །ཚོགས་དྲུག་གི་སྣང་བ་ཐད་ཀར་ཁྱེར། །ཀུན་རྫོབ་ཀྱི་རྫུ་ན་ཕུགས་དབང་མེད་རྡིབ། །འཁྲུལ་ཚོགས་ཀྱི་བྲོས་མཚང་ཐམས་ཅད་རིག །དགྲ་ཐབས་ཀྱི་བརྩོམ་པ་གྲོགས་སུ་འགྲོ། །འཁོར་འདས་ཀྱི་ཞེ་ཁོ་ན་གཏིང་ནས་སངས། །ཞེས་པའོ། །མཁས་པ་ཕལ་ཆེར་ཆོས་བརྒྱད་ཕུང་པོས་ངལ། །སྒོམ་ཆེན་རྣམས་ཀྱང་འཇིག་རྟེན་རི་ལ་འཛིན། །ད་ལྟ་དུས་ངན་སྙིགས་མས་གང་བའི་སྐབས། །སྙིང་ནས་ལྷ་ཆོས་བྱེད་པ་ཤིན་ཏུ་དཀོན། །རབ་བྱུང་ཁས་འཆེ་འདོད་པའི་བྲན་དུ་སོང་། །རྟོགས་ལྡན་རྣམས་ནི་སྒོམ་མའི་རྗེས་སུ་བསྙེག །སངས་རྒྱས་བསྟན་པ་ནུབ་ལ་ཉེ་བའི་དུས། །ཐོས་བསམ་སྒོམ་པ་ཚུལ་བཞིན་སྒྲུབ་པ་དཀོན། །ཀུན་ཏུ་ཆོས་བཞིན་འདའ་བར་རྫུ་བ་ཚོ། །རྐྱེན་ངན་གནོད་པའི་དྲུང་ན་དམ་ཆོས་ཡར། །བྱས་ཚད་དོན་མེད་འགྱུར་བ་ཁོ་ན་ལས། །རང་གཞན་ཕན་དང་བདེ་ལ་འབད་པ་དཀོན། །ཆེར་རློམ་ཕལ་ཆེར་གྲགས་འདོད་རེ་བས་བཅིངས། །དམའ་རྣམས་བརྙས་པའི་དོང་དུ་ལྷུང་བས་མནར། །བར་མ་དོན་མེད་བྱམས་ཉིན་མཚན་བྲེལ། །དལ་འབྱོར་དོན་ལྡན་བྱེད་པ་ཤིན་ཏུ་དཀོན། །འདུས་བྱས་ཐམས་ཅད་མི་རྟག་ཡིན་པའི་གཏམ། །མང་པོའི་དབུས་སུ་རྟག་པར་སྒྲོག་བྱེད་ཀྱང་། །ཕྱི་ཚིགས་གསོག་འཇོག་ཁོ་ན་སྒྲུབ་བྱེད་པས། །ཁ་དང་ཞེ་ཕུགས་མཐུན་པ་ཤིན་ཏུ་དཀོན། །ཚུལ་འདི་གཞན་སྐྱོན་གླེངས་པ་མ་ཡིན་ཀྱང་། །གནས་ཚུལ་བརྗོད་པས་༼༣ན༥༽མཚང་འདྲུར་སོང་བ་ཡིན། །དེ་ལས་ཕྱིར་ཟློག་བསྟན་པའི་རྗེས་འཇུག་པ། །ཐུབ་གསུང་ཇི་བཞིན་སྤྱོད་པ་ཤེས་ལྡན་ནོ། །དམན་པའི་ས་གཟུང་སྲུལ་པོའི་གོས་གྱོན་ལ། །ལྟོ་གོས་གཏམ་གསུམ་ཀུན་ལ་གྱོང་བསྐུར་ཏེ། །དབེན་པར། ཀུན་ཏུ་ཐོས་བསམ་སྔོན་འགྲོ་བའི། །རྩེ་གཅིག་སྒྲུབ་པ་སྙིང་པོར་བྱ་བ་གཅེས། །དཀོན་པ་ལྔ་ཡི་དབྱངས་ཆུང་འདི། །རྟོགས་ལྡན་རྡོ་རྗེ་སེམས་དཔའ་ལ། །དགེ་སློང་པདྨ་དཀར་པོ་ཡིས། །ཕན་ལ་རེ་ན་བླངས་པ་ཡིན། །ཞེས་སོ། །དལ་འབྱོར་རྙེད་དཀའ་ཡིན་པ་ཤེས་གྱུར་ཅིང་། །ནམ་འཆི་ངེས་མེད་པའང་གོ་མོད་ལ། །ལས་འབྲས་བསླུ་མེད་སྨིན་པའི་ཚུལ་མཐོང་ཡང་། །སྙིང་ནས་དམ་ཆོས་མི་བྱེད་སྒྱིད་པ་སྐྱུར། །བསགས་པ་ཀུན་གྱི་མཐའ་མ་ཟད་པར་གོ། །འདུས་བྱས་མྱུར་དུ་འབྲལ་བར་ལེགས་རྟོགས་ཤིང་། །ཀུན་གྱི་ཆོས་ཉིད་འཇིག་པའི་ཚུལ་རིག་ཀྱང་། །རྟག་རྩིས་གསོག་འཇོག་བྱེད་པ་སྒྱིད་པ་སྐྱུར། །དགེ་བའི་བར་ཆོད་ལེ་ལོ་སྙོམས་ལས་ཡིན། དགེ་ལེགས་འབྱུང་གནས་ཐུབ་བསྟན་ཡུན་ཐུང་ལས། །དགེ་འབྲས་ལེན་ལ་བརྩོན་པར་མི་བྱེད་པའི། །ཆོས་པར་ཁས་ཀྱིས་འཆེ་བ་སྒྱིད་པ་སྐྱུར། །ཕན་བདེ་མཚན་ལྡན་བླ་མ་ལས་འབྱུང་ཞིང་། །དེ་ཉིད་མཉེས་པའི་ཐབས་ཀྱིས་བསྟེན་དགོས་ཀྱང་། །འདོད་པ་ཅུང་ཟད་མ་འགྲུབ་ལོག་ལྟ་སྒོམ། །ཚེ་གཅིག་སངས་རྒྱས་རེ་བ་སྒྱིད་པ་སྐྱུར། །ཆོས་རྣམས་སེམས་ཉིད་གཅིག་པུའི་རོལ་པ་སྟེ། །འཛིན་པ་གཏན་ལ་ཕེབས་ན་རྟོགས་ལགས་ཀྱང་། །བྱིང་རྒོད་རྨུགས་པའི་དབང་དུ་རྟག་པར་སོང་། །སྟོང་སྐད་གནམ་ལ་འཕྱར་ཀྱང་སྒྱིད་པ་སྐྱུར། །སྒྱིད་སྐྱུར་ལྔ་ཡི་དབྱངས་ཆུང་ལ། །འཁོར་འདས་གཉིས་ཀྱི་འདུས་ས་ཡོད། །སེམས་ལ་འདེབས་པའི་གཟེར་ཆེན་ཡིན། །ཉམས་ལེན་བྱེད་པའི་ངོ་སྤྲོད་ཟབ། །ཅེས་འདི་ཀོང་ཡུལ་ཤར་ཕྱོགས་སུ། །དགེ་སློང་སངས་རྒྱས་འབྲུག་རྒྱས་ལ། །འགྲོ་བར་ཆས་པའི་དུས་སུ་ནི། །པདྨ་༼༣བ༦༽དཀར་པོས་གདམས་པའོ། །གངས་རིའི་ཁྲོད་ན་འགྲན་ཟླ་མེད་པའི་སྒྲུབ་གནས་ཆེན་པོ། །ར་ལུང་ཐེལ་གྱི་དཔལ་སྤོས་སྐྱའི་ཡང་དབེན་དུ་བསྒོམས་པའི་ཚེ། རང་ལ་གྲོས་འདེབས་ཀྱི་གླུ་མི་རྟག་པའི་དཔེ་བཅུ་འདི་འཐེན་ནོ། །རྒྱ་གར་ན་ཌོམྦི་ཧེ་རུ་ཀ་བོད་འབངས་ཀྱིས་ནཱ་རོ་པ་ལོ་ཙར་བཏགས། རྗེ་དེ་དང་གཉིས་སུ་དབྱེར་མེད་པ། །དཔལ་ངག་གི་དབང་པོར་གསོལ་བ་འདེབས། །ཀུན་རྫོབ་རྣམས་ཆུ་ཡི་ཆུ་ལྦུར་འདྲ། །འཕྲལ་ལ་སྐྱེ་ཞིང་འཕྲལ་མར་ནུབ། །གསབ་གསོབ་ལ་བདེན་ཞེན་མ་ཆེ་བར། །སྙིང་པོའི་དོན་ལ་སྒྲིལ་ཅིག་ཡང་། །འདུས་བྱས་ཀུན་ཆུ་ཤིང་སྡོང་པོ་འདྲ། །བརྟགས་ཤིང་དབྱད་ན་སྙིང་པོ་མེད། །བློ་བྲིས་ཀྱི་སྒྱུ་མ་བཀྲག་ལེགས་ཀྱང་། །འདོད་པ་དང་སྲེད་པ་མ་སྐྱེ་ཨང་། །ལུས་བདག་པོ་མེད་པའི་ཁང་པ་འདྲ། །ཕྱི་ལོ་ཟླའི་ཆར་གྱིས་བརྡུངས་ནས་ཞིག །ནང་ཞག་དང་ཟ་མའི་ཐིགས་པས་བཅོམ། །རྒྱུན་རིངས་ཀྱི་སྡོད་གྲབས་མི་ཐུབ་ཨང་། །ཚེ་རི་གཟར་ངོས་ཀྱི་རྦབ་དང་འདྲ། །ཡུད་ཙམ་ཞིག་སྡོད་པའི་ལོང་མེད་པར། །འཆི་བདག་གི་དྲུང་དུ་འབད་པས་སྙེག །རྟག་རྩིས་ཀྱི་གཤོམ་ར་མ་འདིངས་ཨང་། །སྲོག་འཚུབ་མའི་ནང་གི་མར་མེ་འདྲ། །རྐྱེན་གནོད་པ་ཁོ་ནའི་དྲུང་ན་འཁོད། །དར་ཅིག་ལ་ཐུབ་ཀྱང་གདེང་མ་ཁེལ། །ལོང་ཡོད་ཀྱི་ལེ་ལོ་མ་བྱེད་ཨང་། །དབུགས་འཇག་སྐྱའི་རྩེ་མོའི་ཟིལ་བ་འདྲ། །དུས་ད་ལྟ་རང་ལ་མ་ཡལ་རུང་། ཡུན་རིང་པོ་སྡོད་པ་མི་སྲིད་པས། །དོན་མེད་ཀྱི་བསམ་རྒྱ་མ་ཆེ་ཨང་། །ལུས་སེམས་ཚོང་དུས་ཀྱི་གནས་མགྲོན་འདྲ། །ལྷན་ཅིག་ཏུ་འགྲོགས་པའི་དེ་མ་ཐག །ཕྱོགས་ཕྱོགས་སུ་གྱེས་ནས་འགྲོ་དགོས་པས། དགའ་གདུངས་ཀྱི་ཆགས་པས་མ་འཆིང་ཨང་། འཆི་བ་ཁོ་ཉི་ནས་གྲིབ་སོ་འདྲ། ཕར་ཕར་བྲོས་ཀྱང་ཚུར་ཚུར་འདེད། །ཅང་འཁྱུག་ཏུ་འཛོམ་ཡང་ཐར་ས་མེད། །མདོ་མེད་ཀྱི་བྱ་བ་མ་མང་ཨང་། མི་ཚེ་འདི་བཤས་རའི་དུད་འགྲོ་འདྲ། སྐད་ཅིག་རེས་འཆི་བར་ཉེ་བ་ལ། དེ་རིང་དང་སང་གི་༼༤ན༧༽ངང་རིངས་ན། །མལ་མཐའ་ནས་འོ་དོད་འཆོར་རོ་ཨང་། །དལ་འབྱོར་འདི་མུན་ཁྲོད་ཀྱི་གློག་དང་འདྲ། །སྐམ་ཙམ་ཞིག་སྔོན་བསགས་མཐུ་ཡིས་རྙེད། །དེས་ཡེངས་མེད་ཕན་བདེ་མ་བསྒྲུབས་ན། །ཕྱིས་ཡང་ཡང་འབྱོར་པ་མིན་ནོ་ཨང་། །མགོན་གྲུབ་པའི་འབྱུང་གནས་ར་ལུང་ཐེལ། །གནས་བཀྲ་ཤིས་གཡང་ཆགས་ཉམས་དགའ་ཡང་། བློ་རྒྱ་འབྱམས་བཏང་བས་དོན་མི་འགྲུབ། །ལུས་དབེན་པར་བསྡད་པའི་དོན་གོ་སྟོར། སེམས་ནང་དུ་ཁུག་ལ་དྲན་པས་འཐུལ། །སྤྱིར་འཁོར་བའི་ཆོས་ལ་ཡིད་བརྟན་མེད། །དགོས་འདིར་ཞེན་རང་ཉིད་སྡུག་བསྔལ་སྐྱེད། །བློ་སྲེད་འདོད་སྐྱུར་ཅིག་པདྨ་དཀར། །ཡང་དབེན་གནས་དེ་ཉིད་དུ་འདག་སྦྱར་ཤིན་ཏུ་དམ་པས་རིག་པ་དངས་སྙིགས་ཕྱེ། དེའི་སྟོབས་ཀྱིས་རྣམ་པར་རྟོག་པ་རི་གཟར་ལ་ཆུ་རྒྱུག་པ་བཞིན་ཤར། ངོས་འཛིན་གྱི་དྲན་པ་དང་རྒྱུ་རིང་། འབད་པས་བཀུག་ཀྱང་ཡོང་མ་ཉན་པས། སྐྱོ་གྲོགས་རྒྱང་གླུ་འདི་ལ་བཅོལ་བ་ལགས་སོ། །དཔལ་ཡོན་ཏན་ཀུན་ལ་དབང་སྒྱུར་བ། །མགོན་སྒྱུ་མའི་གར་མཁན་རིན་པོ་ཆེ། །མཚན་ཡོངས་སུ་གྲགས་པའི་ཀུན་སྤངས་རྗེ། །བུ་གསོལ་བ་འདེབས་སོ་ཐུགས་རྗེས་གཟིགས། །ཕ་བླ་མེ་དགྱེས་པའི་རི་ཁྲོད་བསྟེན། །མིག་ཡར་ལ་བལྟས་ནས་འདག་སྦྱར་བྱས། །ཕྱི་སྐྱེ་བོའི་རྒྱུ་འགྲུལ་པད་ཀྱིས་ཆོད། །མཐུན་འཇུག་གི་ངོ་བསྲུང་ངང་གིས་དེངས། །རྣམ་གཡེང་གི་འདུ་འཛི་རྡོག་པས་མནན། །སྐྱིད་འདོད་ཀྱི་རེ་བ་རླུང་ལ་བསྐུར། །གྲོགས་མེད་ཀྱི་བསམ་གཏན་ཁང་བུར་བསྒོམས། །ངག་ལོང་གཏམ་འཕེལ་བའི་སྨྲ་བ་བཅད། །སྒོ་གསུམ་དགེ་སྦྱོར་གྱི་བསྲངས་སུ་བཅུག །རང་བབས་ཀྱི་བྱ་བ་ཆོས་སུ་སོང་། །གནས་ཉམས་སུ་དགའ་ལ་བག་ཀྱང་ཕེབས། །ཡིད་གཏོད་ས་བཟང་བས་དང་ཡང་སྤྲོ། །དེར་རིག་པ་དངས་སྙིགས་སངས་ཀྱིས་ཕྱེད། །སེམས་བཅོལ་ཆུང་པོ་ཁོ་བཞུགས་མ་ཉན། །སྔར་འདས་ཀྱི་ཤུལ་རྗེས་ཐམས་ཅད་༼༤བ༨༽བསྙེགས། མ་འོངས་པའི་བྱ་ལོ་བྱེ་ལོ་སེམས། །ད་ལྟ་འདོད་ཡོན་ལ་དུང་དུངས་བྱེད། །ངལ་བ་དང་དུབ་པ་ཡང་མི་དྲག་ལ། །སྐྱོ་སུན་གྱི་ཉམས་ཀྱང་མི་གདའ་འོ། །གཏད་མེད་ལ་བཀྲ་ལག་ཆེ་ཆེ་མོ། །ཉམས་ཀྱང་ནི་དགའ་ལ་རྒོད་ཀྱང་བྲོ། །མནན་པས་ནི་མནན་པའི་ཡུལ་དང་བྲལ། ངོས་འཛིན་གྱི་དྲན་པ་རྒྱུ་མ་རིངས། །དགོས་སྐབས་དེར་སླེབ་པའི་དུས་མ་བྱུང་། །བཀུག་པས་ཀྱང་འགུགས་མཁན་ཁོང་ཕྱོགས་ཐལ། །ཕན་འདོགས་པ་མེད་ལ་གནོད་པ་མང་། །བློ་རྣལ་དུ་ཕེབས་པ་ཅི་ལས་དཀའ། །ཞི་གནས་ཀྱི་ཏིང་འཛིན་རྒྱང་རིང་བཞུད། །ལྷག་མཐོང་གི་རྟོགས་པ་སྩལ་དུ་གསོལ། །གང་ཤར་ཚོ་རང་སར་གྲོལ་བ་དང་། །ཡེངས་མེད་ཀྱི་མཉམ་གཞག་སྦྱིན་དུ་གསོལ། །སྣང་སྟོང་གཉིས་རོ་མཉམ་འགྱུར་བར་ཤོག །རྗེ་བཙུན་ཁྱོད་ཐུགས་རྗེའི་གཏེར་མཛོད་ལགས། །འབངས་ཉམས་ཆུང་ང་ལ་བྱིན་གྱིས་རློབས།། །།ཡང་དེ་ཉིད་དུ་བསྐོམས་པའི་ཚེ་ཡིད་ལ། །མཚན་ལྡན་གྱི་གླ་མས་ནི་རྗེས་སུ་བཟུང་། །སྙན་རྒྱུད་ཀྱི་གདམས་ངག་ནི་ཐོག་ཞེ་འབོད་ཀྱི་སྤྲོས་པ་ནི་ཞི། འཇིག་རྟེན་གྱི་འཆིང་བ་ནི་གྲོལ། །གནམ་ས་ཆ་ལང་བཞིན་དུ་རྡེབ་ཀྱང་ཉམ་ང་ཁུ་འཕྲིག་ནི་མེད། །ལས་སུ་བྱ་བ་ནི་དམ་པའི་ལྷ་ཆོས་ཁོ་ན་ཡིན་པས་ཉམས་དགའ་ཞིང་སྐྱིད་དུ་ཚོར། །འདི་དག་ཐམས་ཅད་བླ་མའི་བཀའ་དྲིན་དུ་འདུག་བསམ་ནས་གུ་ཡངས་ཀྱི་རྒྱང་གླུ་འདི་འཐེན་པ་ལགས་སོ། །ས་གོན་ཕྱག་ན་པདྨའི་ཞིང་ཁམས་ཀྱི། །ཡུལ་གཡང་ཆགས་དབུས་གཙང་གཉིས་ཀྱི་མདུད། དཔལ་གྲུབ་པའི་འབྱུང་གནས་ར་ལུང་ཐེལ། །རི་སྤོས་དད་ཅན་གྱི་ཡང་དབེན་ནས། །ཡིད་སྐྱོ་བསངས་ཀྱི་རྒྱང་ཀླུ་འདི་ལྟར་འཐེན། །སྔོན་སྦྱངས་ཀྱི་ལས་འཕྲོ་དཀར་པོ་སད། །གཞོན་ནུས་དམ་པའི་ཆོས་སྒོར་ཞུགས། །ཐོས་བསམ་གྱི་ཤེས་རབ་མི་དམན་ཙམ། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །བདེན་བྲལ་གྱི་མུན་ལམ་མ་འཁྱམས་པར། །དཔལ་དགང་པོ་བཀའ་༼༥ན༩༽རྒྱུད་དེ་ལ་ཐུག །འཇིག་རྟེན་གྱི་འཁྲི་བ་ངང་གིས་ཆོད། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །རྗེ་རྡོ་རྗེ་འཆང་ཆེན་མི་གཟུགས་ཅན། །ཕ་ངག་གི་དབང་པོས་དབུ་མཛད་པའི། །མཚུངས་བྲལ་གྱི་རྗེ་བཙུན་འགའ་དང་མཇལ། །ཨ་ལ་ལ་མཚན་ལྡན་བླ་མའི་དྲིན། །དྲིན་ལེན་དུ་སྒྲུབ་པའི་མཆོད་པ་འབུལ། །ཆོས་ཐེག་པའི་ཡང་རྩེ་གསང་ཆེན་གྱི། །གནད་ཟབ་དགུའི་ཉིང་ཁུ་འཐུངས་ལགས་པས། །དུས་ད་ལྟ་ཤེས་པ་གདེངས་དང་ལྡན། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །ངན་པ་ལ་སྤང་བློ་མ་སྐྱེས་ཤིང་། །བཟང་པོ་ཞིག་བསྒྲུབ་བློམ་མཆིས་པས། །གང་བྱུང་གིས་འཚོ་བའི་སྟབས་བདེ་པོ། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །བཟང་ངན་གྱི་སྣང་བ་ཇི་སྙེད་པ། །རང་སེམས་ཀྱི་ཟློས་གར་སྒྱུར་ལུགས་ཏེ། །ཆུ་བོ་དང་ཆུ་རླབས་ལྟ་བུར་སོང་། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །སེམས་ཉིད་ཀྱི་སྟེང་དུ་བལྟས་ལགས་པས། །ལྟ་བྱེད་ཀྱི་ཤེས་པ་དབྱིངས་སུ་ཡལ། །བལྟ་བྱ་དང་ལྟ་མཁན་ཐམས་ཅད་ཟད། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །ཐོལ་སྐྱེས་ཀྱི་ཤེས་པ་མ་བསླད་པ། །བཟོ་མེད་དུ་བསྐྱངས་པས་ས་རྒྱ་ཆོད། །སེམས་འཛིན་གྱི་སྡུག་སྒུར་བྱ་མ་དགོས། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །སྣང་ཐོག་ཏུ་སྟོང་པའི་འདུག་ལུགས་རིག །སྟོང་ཐོག་ཏུ་སྣང་བའི་འཆར་ཚུལ་གོ། །གར་ཤར་ལ་སྒོམ་གྱི་ངོ་ཏི་བྱས། །ཨ་ལ་ལ་མཚན་ལྡན་བླ་མའི་དྲིན། །དྲིན་༼༥བ༡༠༽ལན་དུ་སྒྲུབ་པའི་མཆོད་པ་འབུལ། །བློ་རེ་བའི་མགོ་བོ་དོགས་པས་བཅག །གང་དོགས་པའི་སྟེང་དུ་ཐོག་བརྫིས་གཏོང་། །ཁོང་གནམ་ས་རྡེབ་ཀྱང་ཉམ་མིང་། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །སྐྱིད་ན་ནི་བདེ་བ་ཀུན་ལ་བགོ། །སྡུག་བསྔལ་སྔོན་ལས་ཀྱི་འཁྲུད་མར་བལྟས། །སྐྱིད་སྡུག་ལ་གདམ་ཀ་བྱེད་མ་ཤེས། །ཨ་ལ་ལ་མཚན་ལྡན་བླ་མའི་དྲིན། །དྲིན་ལན་དུ་སྒྲུབ་པའི་མཆོད་པ་འབུལ། །ཞེས་ཀྱང་སྨྲས་སོ།། །།ཡང་ཀར་འབྲུག་གཉིས་འཁྲུགས་པའི་ཚེ། །ཡིད་ལ་སྤྱིར་སྙིགས་མའི་དུས་སུ་སོང་། །སྒོས་གངས་ཅན་གྱི་སྐྱེ་བོ་རྣམས་ཆགས་སྡང་གིས་མི་བསྲུན་པར་གྱུར་པས་དོན་མེད་དུ་གནོད་ཅིང་འཚོལ། །ངན་ལན་ངན་གྱིས་འཇལ་བ་ནི་ཆ་མ་ཡིན། །རྐྱེན་ཐམས་ཅད་གྲོགས་སུ་འགྲོ་བ་ནི་དཀའ། །དེ་བས་ཆེ་ཐབས་ཀྱི་སྤྲོས་པ་སྤངས་ནས་མི་མེད་ཀྱི་ལུང་སྟོང་རྣམས་སུ་གཅིག་པུར་བསྒྲུབ་པ་སྙིང་པོར་བྱས་ན། །བསྟན་པ་ལའང་དེ་ཀ་ཕན་སེམས་ཅན་གྱི་དོན་དུའང་དེ་ཉིད་འགྱུར་ཆེ་བསམ། །ཡིད་སྐྱོ་དྲན་འདེབས་ཀྱི་གླུ་ཞེ་མནའ་དགུ་མ་འདི་འཐེན་པ་ལགས་སོ། །དཔལ་དུས་གསུམ་རྒྱལ་བའི་ཐུགས་རྗེའི་སྐུ། །འབངས་དད་པའི་སྣང་ངོར་ཤར་བ་ལ། །རྗེ་དག་གི་དབང་པོ་མི་ཟེར་རམ། །ཕ་གསོལ་བ་འདེབས་སོ་ཐུགས་རྗེས་གཟིགས། །ཆུ་གཏེར་ལྟར་གཡོ་བའི་ཟང་ཟིངས་ནོར། །གཅིག་བྱུང་གཉིས་དགོས་ཀྱི་ངང་ནས་འཛད། །དེ་ཕྱུག་པོར་གསོགས་ཀྱང་རྩོད་པའི་གཞི། །ད་ཕྱག་དར་རྩྭ་བཞིན་མི་འདོར་རི། །ཆུ་འཛིན་ལྟར་འདུས་པའི་འཁོར་མང་ཡོད། །སྣོད་ལྡན་གྱི་སློབ་མ་སྲིད་པ་ཙམ། །འདུ་ཚོགས་འདི་གཞན་རྒྱུད་འཁྲུག་པའི་རྒྱུ། །ང་གཅིག་པུར་དབེན་པ་མི་བསྟེན་རི། །ཆུ་ཤིང་ལྟར་སྙིང་པོ་མི་སྣང་བའི། །ཉམ་ཆུང་གི་མངའ་རིས་སྐྱོང་བྲན་ལ། །ཞེ་སྡང་གི་དགྲ་བོ་བཏུལ་གྱིན་ལྡང་། །ང་བཅོས་མའི་ཆེ་ཁྱད་མི་འདོར་རི། །ཆུ་གཏེར་ལྟར་གཅིག་རྗེས་གཅིག་ནོན་པའི། །༼༦ན༡༡༽ལས་བྱེད་རྒྱུ་མང་ལ་ཟིན་རྒྱུ་ཆུང་། །དེ་གྲུབ་ཀྱང་འཚེངས་པ་མི་གདའ་བས། །ང་འཇིག་རྟེན་བྱ་བ་མི་གཏོང་རི། །ཆུ་རླབས་ལྟར་གཡོ་བའི་མི་སེམས་ལ། །མཐུན་འཇུག་གིས་ཟིན་དུ་རེ་ན་ཡང་། །གཅིག་གཟུང་གཉིས་ཤོར་གྱིས་སྦྱང་གྲིར་ཤི། །ང་ངོ་བསྲུང་ཐག་པ་མི་གཅོད་རི། །ཆུ་རྙོག་ལྟར་མི་གཙང་སྒྱུ་མའི་ལུས། །གཞོན་ལང་ཚོས་གཡོགས་དུས་དགའ་བ་ཙམ། །རྒས་རང་བཞིན་བསྟན་ཚེ་སྐྱུག་བྲོའི་གནས། །ང་གཅོས་པའི་བསྲུང་སྐྱོབ་མི་བཤོལ་རི། །ཆུ་ལྦུར་ལྟར་འཁྲིགས་པའི་འདོད་ཡོན་རྣམས། །སྔར་འདྲིས་ཀྱི་མིག་ངོར་བཀྲག་ལེགས་ཀྱང་། །བློ་གཞིགས་ན་སྐྱོན་གྱི་ལྟད་རྩེ་ཡིན། །ང་ཞེན་ཆགས་རྩད་ནས་མི་སྐྲོད་རི། །ཆུ་རྒྱུན་ལྟར་རྒྱུག་པའི་ཚེ་སྲོག་འདི། །སྐད་ཅིག་མ་རེར་ཡང་སྡོད་མི་ཁོམ། །གློ་བུར་བའི་རྐྱེན་གྱིས་ཤི་ཡང་སྲིད། །ང་ཕྱི་བཤོལ་གྱི་སྙོམས་ལས་མི་སྤོང་རི། །ཆུ་ཤེལ་ལྟར་གང་ཡང་འགྲིབ་པ་ལ། །ནམ་ཕུགས་ཞིག་སེམས་པའི་བློ་རྒྱ་ཡང་། །རང་སྡུག་ལ་རིན་གྱིས་ཉོས་པར་གོ། །ང་རང་མགོ་ཆོས་ཀྱི་མི་འདོན་རི། །དུས་སྙིགས་མར་སྤྱོད་པའི་གནས་སྐབས་འདིར། །བདུད་རིགས་ཀྱི་བར་ཆད་མང་ལགས་པས། །རང་ཆོས་བཞིན་བྱས་ཀྱང་གཞན་གྱིས་འཚེ། །རྐྱེན་གྲོགས་སུ་ཤར་བ་གཤིས་ཀྱིས་དཀའ། །དྲན་ཤེས་ཀྱི་གཉེན་པོ་རེས་འཇོག་ལ། །ཡུལ་ངན་པ་ཐམས་གྱིས་སྤོང་ཞེས་གྲགས། །ང་དེ་ཕྱིར་མི་མེད་ཀྱི་ལུང་སྟོང་འགྲོ་མ། །བློ་འཁོར་བའི་བཙོན་རས་འཇིགས་ལགས་ཤིང་། །འཆི་བདག་གིས་ཟིན་དོགས་ལྷག་པར་བྲེད། །མ་འགྲོ་དྲུག་སྡུག་པ་ཤས་མི་བཟོད། །བཏང་སྙོམས་སུ་སྡོད་པར་ཅི་ལ་ནུས། །འདུ་འཛི་ལ་དགའ་གདུངས་ག་ནས་སྐྱེ། །བློ་རྩེ་གཅིག་དམ་པའི་ཆོས་ལ་འབུངས། །ཚེ་བློས་བཏང་སྒྲུབ་པའི་རྒྱང་སོ་འཛུགས། །ཡབ་དཀར་རྒྱུད་གོང་མའི་བཤུལ་རྗེས་སྙེག །ཁྱེད་རྣམས་གཡེང་འདོད་པའི་འཁོར་སློབ་དང་། །ཁོང་འདིར་སྣང་སྒྲུབ་པའི་ཆེན་པོ་རྣམས། །ཡོངས་སྐྱིད་པར་སྙེག་གམ་འཁྲུག་ཅིང་༼༦བ༡༢༽རྩོད། མི་འདུ་ལོང་གང་ཆེར་རྒྱུག་བཤར་བྱེད། རང་གང་མནོ་ལགས་སོ་ཅི་དགྱེས་མཛོད།། །།ཡང་། གཙང་ཤར་ཁ་གཞུང་གི་སའི་ཐིག་ལེ། རྒྱལ་བྱེད་ཀྱི་ཚལ་ཆེན་པོའི་ནགས་ཁྲོད་ན་འདུག་དུས། མཚན་ལྡན་བླ་མ་དྲན་པའི་མོས་གུས་ཀྱིས་གདུང་བས་ཡིད་བརྒྱལ་བ་སངས་པར་བྱེད་པ། བླ་མ་རྒྱང་ནས་འབོད་པ་རྡོ་རྗེའི་གླུ་འདི་ཉམས་དབྱངས་སུ་འཐེན་ནོ། །དཔལ་འཛམ་བུ་གླིང་གི་བྱང་གི་རྒྱུད། །རི་ཁ་བ་ཅན་གྱིས་བསྐོར་བའི་ཞིང་། །མི་གདོད་དམར་ཡུལ་གྱི་ལྟེ་བ་ན། །མ་མཁའ་འགྲོའི་མཆོད་སྡོང་ར་ལུང་ཐེལ། །གནས་གཡང་ཆགས་གྲུབ་པའི་འབྱུང་ཁུངས་ན། །ཁོང་རྫོགས་པའི་སངས་རྒྱས་བཀའ་བགྲོས་ནས། །འབངས་སྙིགས་དུས་འགྲོ་བའི་གཙུག་རྒྱན་ལ། །མགོན་རིགས་བརྒྱའི་ཁྱབ་བདག་རྡོ་རྗེ་འཆང་། །མི་གཟུགས་ཀྱིས་བྱོན་པ་ཐུགས་རྗེའི་གཏེར། །ཕ་མཚན་སྙན་ངག་དབང་ཆོས་ཀྱི་རྒྱལ། །འབངས་སྙིང་ནས་དྲན་ནོ་བཀའ་དྲིན་ཅན། །བུ་མོས་པས་གདུང་ལ་བརྩེ་བས་གཟིགས། །སྐུ་མཐོང་ན་དགའ་བའི་གཟི་མདངས་ཅན། །དེ་བལྟས་ཀྱིན་མི་ངོམས་མཚན་དཔེས་བརྗིད། །ཞལ་མཇལ་པའི་མོད་ལ་སྣང་བ་བསྒྱུར། །བློ་ཆོས་ཀྱིས་ཕྲོགས་ནས་འདིར་སྣང་འགག །ལུས་བཅོས་མིན་དད་པའི་བ་སྤུ་ལྡང་། །ཡིད་གདུང་ཤུགས་དྲག་པོའི་མཆི་མ་འཁྲུག །ལག་ཐལ་སྦྱར་ལྷ་ཕྱག་ཅི་ཡང་འཚོར། །རྗེ་མཐོང་ཐོས་དྲན་པའི་སྐད་ཅིག་ལ། །རྐྱེན་བར་ཆད་ཐམས་ཅད་རང་སར་ཞི། །དཔལ་ནུས་མཐུའི་གོང་བུ་ར་ལུང་པ། །འབངས་སྙིང་ནས་དྲན་ནོ་བཀའ་དྲིན་ཅན། །བུ་མོས་པས་གདུངས་ལ་བརྩེ་བས་གཟིགས། །ཁོང་སྐལ་བ་བཟང་པོའི་ཚོགས་ཀྱི་དབུས། །ཚེ་གཅིག་གི་སངས་རྒྱས་རྙེད་སླ་བའི། །ཐབས་རྡོ་རྗེ་ཐེག་པའི་སྙིང་ཕྱུང་བ། །གནད་ཟབ་ཅིང་འདྲིལ་བའི་ཆོས་ཀྱི་མཛོད། །ཚིག་ཐ་སྙད་ཙམ་དུ་མི་འཇོག་པར། །དོན་གཅམ་བུར་མ་ལུས་ཡིན་ལུགས་ཉིད། །ཚིག་སྙན་པའི་དབྱངས་ཀྱིས་རྗེན་པར་སྟོན། །མཐར་ཐུག་པའི་སྙིང་པོ་གཞན་༼༧ན༡༣༽རྒྱུད་ལ། །བདེ་བླག་ཏུ་སྟོན་པའི་ཐབས་མཁས་པོ། །མཚུངས་བྲལ་གྱི་རྗེ་བཙུན་འབྲུག་པའི་ཞབས། །འབངས་སྙིང་ནས་དྲན་ནོ་བཀའ་དྲིན་ཅན། །བུ་མོས་པས་གདུངས་ལ་བརྩེ་བས་གཟིགས། །ཐ་མལ་གྱི་ཤེས་པའི་རང་མ་ཚང་དེ། །གཟིགས་ལགས་པས་དག་དང་མ་དག་པའི། །སྣང་གྲགས་རྣམས་ཕྱག་རྒྱ་ཆེན་པོར་རོལ། །བསྒོམ་བྱ་དང་སྒོམ་བྱེད་གཉིས་ལས་གྲོལ། །སྤང་བླང་གི་མདུད་པ་དམ་པོ་ཞིག །སྒྲིབ་གཉིས་ཀྱི་མུན་པ་རང་སར་དེངས། །ཚད་མེད་ཀྱི་ཐུགས་རྗེའི་གློང་བརྡོལ་བས། །མཁའ་མཉམ་ལ་ཁྱབ་པའི་འཕྲིན་ལས་ཅན། །མཚན་ཉིད་ཀུན་ལྡན་གྱི་དགེ་བའི་བཤེས། །སྐྱབས་གསུམ་གྱི་མཐར་ཐུག་རིན་པོ་ཆེ། །འབངས་སྙིང་ནས་དྲན་ནོ་བཀའ་དྲིན་ཅན། །བུམ་མོས་པས་གདུངས་ལ་བརྩེ་བས་གཟིགས། །ཚེ་འདི་ནས་ཕྱི་མ་གར་སྐྱེས་ཀྱང་། །དུས་བྱང་ཆུབ་སྙིང་པོ་མ་ཐོབ་བར། །སྐྱབས་མགོན་དང་རེ་ས་གཞན་མི་འཚོལ། །སྒོ་གསུམ་ཆིག་དྲིལ་གྱི་བློ་བལྟོས་འཆའ། །འབངས་དད་པའི་གཙུག་རྒྱུན་མཛད་དུ་གསོལ། །ཡིད་ལྟེམ་རྐྱང་མེད་པའི་གསོལ་བ་འདེབས། རྗེ་མི་མངོན་དབྱིངས་ནས་མི་གཟིགས་སམ། །ངེད་ཁམས་གསུམ་སེམས་ཅན་མ་ལུས་པ། །སྡུག་བསྔལ་གྱི་བཙོན་རར་མི་འཁོར་བར། །བདེ་ཆེན་གྱི་ས་ལ་སྐྱེལ་བ་ཞིག །ཕ་རྗེ་བཙུན་མཁྱེན་ནོ་ཐུགས་རྗེ་ཅན།། །།ཡང་། དམར་སེར་གྱི་མེ་ཏོག་གཞོན་ནུ་མ། །ཟིལ་དངར་གྱི་ལང་ཚོ་རྒྱས་དུས་འདིར། །དགྲ་བ་མོ་འཕོག་ན་མི་རུང་བས། །རོགས་ལྷོ་སྤྲིན་སྦྲོན་ཅིག་རྐང་དྲུག་རྣམས། །སྔོ་ལྗང་གི་མྱུ་གུ་ཡིད་འཕྲོག་མ། །འབྲས་སྙེ་མའི་ནུ་འབུར་མཐོ་དུས་འདིར། །དགྲ་སེར་བ་བབ་ན་མི་དུང་བས། །རོགས་སྔགས་འཆང་སྦྲོན་ཅིག་སྲེད་ལྡན་ཚོ། །དཀར་དངས་ཀྱི་བདུད་རྩིའི་འོད་ལྡན་མ། །བཅུ་དྲུག་གི་ཆ་ཤས་གང་དུས་འདིར། །དགྲ་མུན་ཅན་བྱུང་ན་མི་རུང་བས། །རོགས་བརྒྱ་བྱིན་སྤྲོན་ཅིག་རྒྱུ་སྐར་རྣམས། །བསོད་ནམས་ཀྱི་དལ་༼༧བ༡༤༽པ་འབྱོར་པའི་མི། །བླང་དོར་གྱི་དབྱེ་བ་ཕྱེད་དུས་འདིར། །དགྲ་འཆི་བདག་བྱུང་ན་མི་རུང་བས། །རོགས་དཀོན་མཆོག་སྦྲོན་ཅིག་པདྨ་དཀར། །ཙན་དན་གྱི་ལྗོན་ཤིང་ན་གཞོན་མ། །བསུང་ཞིམ་གྱི་བྱུག་པས་བསྒོས་དུས་འདིར། །དགྲ་སྟར་ཐོགས་ཡོང་ན་མི་རུང་བས། །རོགས་ཚང་ཚིང་སྦྲོན་ཅིག་ནགས་མའི་ལྗོངས། །མཛེས་སྡུག་གི་ན་བུན་སྔོ་བསངས་མ། །འཇའ་རིས་ཀྱི་རྒྱན་གྱིས་བརྒྱན་དུས་འདིར། །དགྲ་རླུང་དམར་ལྡང་ན་མི་རུང་བས། །རོགས་དྲོ་འཇམ་སྦྲོན་ཅིག་བར་སྣང་ཁམས། །རབ་དཀར་གྱི་དད་མོ་བཞིན་བཟང་མ། །འགྱུར་ཁུག་གི་གླུ་དབྱངས་སྙན་དུས་འདིར། །དགྲ་ཐག་རྙིས་གཟུང་ན་མི་རུང་བས། །རོགས་སྟོབས་ལྡན་སྤྲོན་ཅིག་ཆུ་བྱ་རྣམས། །དུས་ལན་ཅིག་རྙེད་པའི་མི་ལུས་ཀྱིས། །ཚེ་ཕ་རོལ་དོན་ཆེན་སྒྲུབ་དུས་འདིར། །དགྲ་ལེ་ལོས་ཟིན་ན་མི་རུང་བས། །རོགས་བརྩོན་འགྲུས་སྐྱེད་ཅིག་པདྨ་དཀར། །ལུས་འཁྱོག་པོར་བགྲོད་པའི་དལ་འགྲོ་མ། །རྦ་རླབས་ཀྱི་འཛུམ་དཀར་སྤྲོ་དུས་འདིར། །དགྲ་ཐན་པས་བཅོམ་ན་མི་རུང་བས། །རོགས་ཆུ་ཆར་སྤྲོན་ཅིག་ཆུ་བོའི་ཚོགས། །སྤུ་སྡུག་གི་རི་སྐྱེས་ན་ཆུང་མ། མིག་ཡངས་ཀྱི་ཟུར་མིག་འཕེན་དུས་འདིར། །དགྲ་སྦྱངས་ཀྱིས་སླེབ་ན་མི་རུང་བས། །རོགས་རྫ་རི་སྦྲོན་ཅིག་རི་དགས་ཚོ། །མཐོ་རིས་ཀྱི་བུ་མོ་མེ་ན་ཀ །ལུས་འདོད་དགུའི་གར་གྱིས་རྩེ་དུས་འདིར། །དགྲ་སྦྱིན་སྐྱེས་བྱུང་ན་མི་རུང་བས། །རགས་དཔུང་བཞི་སྦྲོན་ཅིག་ལྷ་གཞོན་རྣམས། །ཚེ་མི་རྟག་ངེས་པའི་ཡུན་ཐུང་ལ། །བློ་རྩེ་གཅིག་སྒྲུབ་པའི་དུས་ཚོད་འདིར། །དགྲ་ཆགས་སྡང་གཟིར་ན་མི་རུང་བས། །རོགས་ཞེན་ལོག་སྦྲོན་ཅིག་པདྨ་དཀར། །ཞེས་པ་འདི་ཡང་རྒྱལ་བྱེད་ཀྱི་ཚལ་དུའོ།། །།ཡང་དེའི་ཚེ་ཉིན་གཅིག་གདུགས་འཇམ་ཞིང་ཤིན་ཏུ་དངས་པ་ལ། བྱ་རྒྱལ་རྒོད་པོ་ཞིག་མདུན་གྱི་བར་སྣང་ལ་ལྡིང་ཞིང་ནམ་འཕང་སྤྱོད་ཀྱིན་འདུག་པ་ན། ཡིད་ངེས་འབྱུང་ཚད་མེད་པས་བསྐུལ་བའི་རྐྱེན་གྱིས། སྣང་བ་བསྒྱུར་བ་རྡོ་རྗེའི་གླུ་འཕྲིན་༼༨ན༡༥༽དུ་བསྐུར་བ་འདི་ལྟར་རོ། །བར་སྣང་མཐོན་པོ་ལ་ལྡིང་བའི། །ཐང་དཀར་རྒོད་པོ་ཁྱོད་ཉོན་དང་། །བོད་ཁམས་རྒྱལ་སྡེ་ཡི་ཁྲོམ་ལ། །བདེན་པའི་འཕྲིན་གླུ་འདི་སྐྱོལ་ཞིག །འདུས་བྱས་དངོས་པོ་ཡི་ཆོས་ཉིད། །སྐད་ཅིག་འགྱུར་ཞིང་ལ་འཇིག་པས། །བློ་གཏད་གདེངས་ཁེལ་དུ་མི་སྣང་། །བསམས་ཀྱིན་ཡིད་མུག་གི་རྟེན་མ། །ཤོ་མོ་ཉམས་བསངས་ལ་སྐྱོ་ནས། །དམ་པའི་ལྷ་ཆོས་ལ་འབུང་ངོ་། །དལ་བརྒྱད་འབྱོར་པ་དང་ལྡན་པ། །སྔོན་བསགས་མང་པོ་ལས་ཐོབ་སྟེ། །འཆི་བདག་གཤིན་རྗེ་ཡི་ཕོ་ཉས། ནམ་གསོད་ངེས་པ་དང་བྲལ་སྣང་། །ཤོ་མོ་ཉམས་བསངས་ལ་སྐྱོ་ནས། །རྩེ་གཅིག་སྒྲུབ་པ་ལ་འཇུག་གོ། །འདོད་ཡོན་བློ་འདྲིད་ཀྱི་སྒྱུ་མ། །སྤྱད་ཅིང་སྲེད་པ་ཡིས་གདུངས་ཤིང་། །འཁོར་བ་སྐྱིད་མེད་ཀྱི་བཙོན་རར། །སྐྱིད་བསྒུག་སྡུག་བསྔལ་གྱིས་མནར་བས། །ཤོ་མོ་ཉམས་བསངས་ལ་སྐྱོ་ནས། །འཇིག་རྟེན་བྱ་བ་ཚོ་གཏོང་ངོ་། །དགོས་དུས་ཕན་མེད་ཀྱི་ཉེ་འཁོར། །འབྱོར་དུས་ལང་ལོང་དུ་འདུས་པ། །གཞན་རྒྱུད་ཆགས་སྡང་གི་ས་བོན། །ཆོས་མཐུན་གྲོགས་པོ་ནི་དཀོན་པས། །ཤོ་མོ་ཉམས་བསངས་ལ་སྐྱོ་ནས། །ད་ནི་གཅིག་པུར་རང་བསྒོམ་མོ། །རང་སེམས་ཉོན་མོངས་ཀྱིས་རེངས་པའི། །ཁ་ནས་ཆོས་བཤད་ཀྱི་འགྲོ་དོན། །སྐལ་བཟང་གདུལ་བྱ་དང་ཕྲད་ཀྱང་། །ཕན་མེད་གནོད་པ་རུ་སྣང་བས། །ཤོ་མོ་ཉམས་བསངས་ལ་སྐྱོ་ནས། །མི་མེད་ལུང་སྟོན་འདྲ་འགྲིམ་མོ། །གྲོང་ལྟག་སྡེ་དགོན་གྱི་འདུ་འཛི། །ཡོན་བདག་དད་ལྡན་གྱི་ཚོགས་གསོག །སྙིགས་དུས་མིག་ལམ་ལ་བཟང་ཡང་། །རྣམ་སྨིན་སྡུག་བསྔལ་དུ་འདུག་པས། །ཤོ་མོ་ཉམས་བསངས་ལ་སྐྱོ་ནས། །དཀའ་ཐུབ་སྡུག་སྒུར་ལ་བརྟེན་ནོ། །ཐོས་བསམ་ཕྱོགས་མེད་དུ་སྦངས་ཀྱང་། །ཉོན་མོངས་ཁ་རྒྱལ་དུ་ཤོར་བའི། །བཟང་རྫུ་རྒྱབ་ལག་གིས་ཆོས་ཚུགས། །མི་ལུས་སུན་འབྱིན་དུ་གདའ་བས། །ཤོ་མོ་ཉམས་བསངས་ལ་སྐྱོ་ནས། །ཁ་ཞེ་མཐུན་ངེས་ཞིག་བྱའོ། །ཞེས་ཀྱང་སྨྲས་སོ།། །།༼༨བ༡༦༽དྲན་པའི་མོད་ལ་བརྩོན་པས་མི་བསྒྲུབ་པར། །ཕྱིས་ནས་བྱེད་ལོར་འབྱམས་པའི་ངང་རིངས་ལ། །འཆི་བ་ཐོག་བབས་བྱུང་ན་ཇི་ལྟར་བྱེད། །ཉིན་མཚན་ཡེངས་མེད་སྒོམས་ཤིག་པདྨ་དཀར། །ཡུན་རིངས་འབད་པས་བསྒྲུབས་པའི་ཐེམ་སྐས་ལས། །ཐར་པའི་གྲོང་ཁྱེར་ཆེ་དེར་མ་ཕྱིན་ན། །འཁོར་བའི་མྱ་ངན་ཐང་ལས་བསྒྲལ་བའི་སྐབས། །ཕྱི་ནས་ཅུང་ཟད་མེད་དོ་པདྨ་དཀར། །སྒོ་གསུམ་དོན་ཆུང་དབང་དུ་བཏང་བཏང་ནས། །རང་གཞན་ཕན་དང་བདེ་བ་ཡལ་བར་དོར། །ཤེས་ལྡན་རློམ་པའི་སྙིང་རུལ་ཁྱོད་འདྲ་བ། །འཁོར་བར་གཏན་འཁྱམས་ཡོང་ངོ་པདྨ་དཀར། །ཞེས་འདི་ཡང་སེ་བྲག་གཡའ་ལུང་གི་རི་བོའི་མགུལ་དུ་ཐོལ་བྱུང་གིས་སྨྲས་པའོ།། །།གྲོས་འདེབས་ཀྱི་གླུ་གཅེས་པ་བཅུ་པ་ཞེས་བྱ་བ། །རིང་དུ་བསྟེན་ན་ཆགས་སྡང་དབང་གིས། །ང་རིས་གཅོད་པའི་བླ་མ་སློབ་དཔོན། །མེད་ཀྱང་ཆོག་སྟེ་མཚན་ཉིད་ཀུན་ལྡན། །དགེ་བའི་བཤེས་སུ་བསྟན་པ་གཅེས་སོ། །འབད་པས་སྦྱངས་ཀྱང་རྣམ་མཁྱེན་ཐོབ་ལ། །ཁ་ཐག་རིང་བའི་ཐ་སྙད་སློབ་གཉེར། །མེད་ཀྱང་ཆོག་སྟེ་རྒྱུད་སྡེའི་ཉིང་ཁུ། །གདམས་ངག་ཟབ་མོའི་ཐོས་བསམ་གཅེས་སོ། །མང་དུ་བསྒོམས་ཀྱང་ཉམས་རྟོགས་བུལ་ཞིང་། །གོལ་ཤོར་འབྱུང་དེར་བརྩོན་ཅིང་འགྲུས་པ། །མེད་ཀྱང་ཆོག་སྟེ་རྒྱུད་ལྡན་གདམས་པ། །ཆུད་ཟོས་མེད་པའི་ཉམས་ལེན་གཅེས་སོ། །གཉིས་གསུམ་ཚོགས་ཀྱང་ལོང་གཏམ་འཕེལ་ལ། །མང་དུ་ཚོགས་ན་མིག་ལྟོས་ལད་པ། །མེད་ཀྱང་ཆོག་སྟེ་ཆོས་མཐུན་གྲོགས་རེ། །བཙན་ས་ཟིན་ཟིན་བསྟན་པ་གཅེས་སོ། །རྟགས་དང་མཚན་མ་བྲང་བྲེང་རེ་ལ། །ཆོས་ཉིད་མཐོང་བའི་ཁོང་ཡུས་ཆེན་པོ། །མེད་ཀྱང་ཆོག་སྟེ་ཤིག་དང་འཛུབ་བཞིན། །འཆི་ཀར་བྲོད་པའི་གདེང་ཚད་གཅེས་སོ། །སྐྱིད་པའི་སྐབས་དེར་ཆོས་པའི་བཟང་ཤོས། །རྐྱེན་ངན་སླེབ་ཚེ་ཐ་མལ་འགྱུར་བ། །མེད་ཀྱང་ཆོག་སྟེ་བཟང་ངན་ཀུན་ལ། །ཐོག་ཏུ་བརྫི་བའི་རོ་སྙོམས་གཅེས་སོ། །༼༩ན༡༧༽འཐབ་མོས་བསྐུལ་ནས་ཆོས་ལ་བྲོས་ཤིང་། །ཆོས་བཞིན་གཅུར་ན་ཡར་བའི་འཁོར་རྣམས། །མེད་ཀྱང་ཆོག་སྟེ་དད་པའི་དབང་གིས། །ཅི་གསུང་བསྒྲུབ་ན་སྐྱོང་བྲན་གཅེས་སོ། །འཆི་བས་འཇིགས་ནས་རང་ཉིད་གཅིག་པུ། །ཐར་པ་སྒྲུབ་པའི་ཡོན་ཏན་སྣ་ཚོགས། །མེད་ཀྱང་ཆོག་སྟེ་འགྲོ་བ་ཀུན་ལ། །བུ་གཅིག་ལྟར་བརྩེའི་སྤྱོད་པ་གཅེས་སོ། །མི་རྟག་འཇིག་པ་ཁ་ནས་བཤད་ཀྱིན། །རྟག་ཏུ་རེ་བའི་བཤོམ་ར་འདིང་པ། །མེད་ཀྱང་ཆོག་སྟེ་འདུས་བྱས་དངོས་པོའི། །ཆས་ཉིད་མཐོང་བའི་ཞེན་ལོག་གཅེས་སོ། །ནོར་དང་གཡོ་སྒྱུ་ཚུལ་འཆོས་དབང་གིས། །གཞན་སེམས་འདྲིད་པའི་ཚུགས་ཁྱེར་བཟང་པོ། །མེད་ཀྱང་ཆོག་སྟེ་རང་སེམས་བཏུལ་ནས། །བསྡུ་བ་རྣམ་བཞིས་གཞན་ཕན་གཅེས་སོ། །ཞེས་པ་འདི་དགེ་སློང་བསམ་གཏན་པ་ཤེས་རབ་དཔལ་ལྡན་ལ་གདམས་པའོ།། །།འབྱོར་པ་ཆེན་པོ་གཡེང་བ་སྟེ། །འབྱོར་པ་སྤངས་ན་དབེན་པའི་ངང་། །གྲོགས་མང་ལོང་གཏམ་འཕེལ་བ་སྟེ། །གཅིག་པུར་བསྡད་ན་དགེ་སྦྱོར་དང་། །བྱ་མང་འཆིང་བའི་སྒྲོག་ཡིན་ཏེ། །བྱ་བ་བཏད་ན་བདེ་བའི་ངང་། །སྨྲ་བ་ཟུག་རྔུའི་གཞི་མོ་སྟེ། །སྨྲ་བ་བསྐྱུངས་ན་ཆོས་ཀྱི་དད། །སེམས་འཛིན་འཕྲོ་བའི་རྒྱུ་ཉིད་དེ། །མ་ཡེང་ས་གློད་ན་གྲོལ་བའི་ངང་། །བལྟ་བྱ་ལྟ་བྱེད་དུག་ཡིན་ཏེ། །ལྟུག་པར་ལྟ་བ་ཡང་དག་དང་། ཚོགས་དྲུག་འགེགས་པ་དལ་བ་སྟེ། །དེ་ཉིད་ཁོ་ན་སྟོད་པའི་ངང་། །སྟོང་པ་ཅང་མེད་སྒོམ་སྐྱོན་ཏེ། །སྣང་བར་ཤེས་ན་ཟུང་འཇུག་དང་། །སྒྱུ་མར་ཤེས་ཀྱང་དམན་པ་སྟེ། །སྣང་མི་སྣང་ཟད་ཆོས་དབྱིངས་དང་། །འཇིག་རྟེན་ཕན་འབད་ཉམ་ཆུང་སྟེ། །འབད་མེད་དོན་བྱེད་སྙིང་རྗེའི་ངང་། །ངང་བཅུ་པའོ།། །།རྣལ་འབྱོར་པ་རྡོ་རྗེ་བསམ་གྲུབ་ཀྱི་ངོར་བླངས་པའི་གླུ་ལམ་ཟབ་ངོ་སྤྲོད་མེ། །དཔལ་གང་གི་དྲིན་གྱིས་བོད་ཁམས་འདི། །མགོན་གྲུབ་པ་བརྙེས་པས་གང་མཛད་པའི། །རྗེ་མཚུངས་༼༩བ༡༨༽བ་མེད་པའི་ཐུགས་རྗེའི་གཏེར། །ཕ་ངག་གི་དབང་པོར་གསོལ་བ་འདེབས། །བུ་ཕ་དང་མཉམ་པའི་བྱིན་རླབས་ཞུ། །མི་ང་ལ་ཉམས་མྱོང་མི་བདོག་སྟེ། །ཕ་གྲུབ་ཐོབ་མཇལ་བའི་གསང་ཚིག་ཡོད། །དེ་ཉམས་དགའ་སྤྲོ་བས་གླུ་རུ་ལེན། །ཕ་མཚན་ལྡན་རྗེ་ལ་བློ་གཏད་ནས། །གནད་དམིགས་པའི་ཁ་བསྒྱུར་གསོལ་འདེབས་ཀྱིས། །ཡིད་བཞིན་དུ་འདོད་པ་འཇོ་བས་ན། །ལམ་ཟབ་མོ་འདི་ལ་ཅིས་མི་འཇུག །དཔལ་བསམ་གྱིས་མི་ཁྱབ་གཉུག་མའི་དོན། །རང་རིག་གིས་གཏན་ལ་མ་ཕབ་ན། །གཞན་རྐྱེན་གྱིས་རྟོགས་པ་མི་སྲིད་པས། །ངེས་དོན་གྱི་བླ་མ་ནང་དུ་འཚོལ། །གང་སྲིད་ཞིའི་ཕུན་ཚོགས་ཀུན་བྱེད་ཀྱང་། །དབྱིངས་ཆོས་ཀྱི་སྐུ་ལས་མི་གཡོ་བ། །རྗེ་སངས་རྒྱས་ཟེར་བའི་སྒྲ་བོ་ཆེ། །རང་སྣང་ལས་གཞན་དུ་མཆེད་པ་མིན། །ཤེས་བྱ་དང་ཤེས་བྱེད་རོ་གཅིག་པའི། །རང་སེམས་ལ་ཞལ་མཇལ་མ་ཞུས་པར། །ཕ་ཆོས་ཀྱི་སྐུ་དང་མི་ཕྲད་པས། །བློ་བཟོ་བཅས་བཤིག་ལ་མཉམ་གཞག་སྐྱོངས། །སེམས་འཛིན་གྱི་སྒྱུ་མ་གྲངས་མང་པོས། །ཡིན་ལུགས་ལ་ཚོད་འཇལ་མ་བྱས་ན། །ཉམས་མཚོན་དུ་མེད་པའི་ཡེ་ཤེས་དང་། །སྔར་འདྲིས་ཀྱི་མི་བཞིན་གཏུག་གིས་མཇལ། །སེམས་ཇི་བཞིན་གཞག་པའི་གསལ་ཆ་ལས། །དོན་གཞན་པའི་སྟོང་ཉིད་བཙལ་གྱུར་ན། །སྣང་གྲགས་རྣམས་བླ་མར་ཅི་ལ་འཆར། །གང་སྣང་གི་སྟེང་དུ་ལྷུག་པར་ཞོག །རྣམ་པ་ཀུན་ཆོས་སྐུའི་རོལ་པ་དང་། །ཆོས་སྐུ་ཉིད་རྣམ་པ་ཐམས་ཅད་པའི། །བདག་ཉིད་དུ་རིག་པའི་གསད་ཆེན་འདི། །མི་ཕལ་མོ་ཆེ་ལ་རྫུན་པའི་གཏམ། །ཡིན་ལུགས་ཀྱི་སྟེང་དུ་རྒྱ་འབྱམས་ནས། །བསྒོམ་བྱ་དང་སྒོམ་བྱེད་སྟོར་གྱུར་ན། །སྣང་སྲིད་དང་བླ་མ་དམ་པའི་སྐུ། །རོ་མཉམ་གྱི་ལྟད་མོ་མཐོང་བ་ཡིན། །ཨ་ལ་ལ་ཟབ་མོའི་ཉམས་ལེན་ལ། །ཚུལ་བཞིན་དུ་གཞན་དྲིང་མི་དགོས་པ། །ཨེ་མ་ཧོ་སྐལ་བ་བཟང་ངོ་སྙམ། །ཚེ་རབས་ནས་བསོད་ནམས་བསགས་པར་གོ། །༼༡༠ན༡༩༽ཞེས་རང་སེམས་དང་བླ་མ་དམ་པ་གཉིས་སུ་མེད་པར་སྟོན་པའི་གདམས་པའི་ཉིང་ཁུ་རྡོ་རྗེའི་ཚིག་གིས་བྱིན་པ་མངྒ་ལཾ།། །།ཆུ་མོ་གླང་ལོ་སྡེ་པ་བྱ་སྟག་གཉིས་མ་འཆམ་པའི་བཟླུམས་ལ་ཡོང་བའི་སྐབས། འབྲོག་པ་རི་སྒང་གི་ལྗོངས་ནས་གནོད་སྦྱིན་གངས་པ་བཟང་པོའི་གངས་རི་མཐོང་བའི་རྐྱེན་གྱིས་རང་ཚུལ་མཐུན་འཇུག་གི་མི་ཁྱུ་བསྙེག་བསྙེག་ནས་དམ་པའི་ཆོས་ཕྱི་བཤོལ་དུ་སོང་བར་མཐོང་ནས་ཡིད་སྐྱོ་དྲན་པའི་ལྕག་འདེབས་འདི་འཐེན་ནོ། །ས་ཡ་གི་ཉི་མ་ནུབ་ཀྱི་ཕྱོགས། །དགུང་སྔོ་བསངས་མཐོན་པའི་ཕ་མཐའ་ན། །སྤྲིན་དཀར་པོ་ལྡིང་ཞིང་འཁྲིགས་པའི་འོག །གངས་རྩེ་མོ་གནམ་དུ་སྙེག་འདྲ་བའི། །དཔལ་ནོར་སྦྱིན་དབང་པོ་གངས་པ་བཟང་། །འབྲོག་གཡང་ཆགས་རི་བོ་མཐོང་བའི་མོད། །ཡིད་སྐྱོ་ཤས་ཅན་གྱིས་རང་ཚུལ་དྲན། །རང་ཡིད་ལ་དྲན་འདེབས་གླུ་འདི་འཐེན། །ཚེ་སྔོན་བསགས་མཐུ་ཡིས་བརྒྱ་ལམ་ནས། །སྟོས་དབང་གིས་ཐོབ་པའི་མི་ལུས་འདི། །སྟོང་ཟད་དང་སྟོང་ངམ་པདྨ་དཀར། །དུས་གཏན་དོན་བསྒྲུབ་ན་རན་ནས་གདའོ། །ཕྱི་དུས་བཞི་མོ་སྡོད་འགྱུར་བ་སྟོན། །ཚེ་ལོང་མེད་ཕལ་ཆེར་གློ་བུར་འཆི། །རང་རྟག་པར་འཛིན་ནམ་པདྨ་དཀར། །ཆོས་སྙིང་ནས་བྱེད་ན་རན་ནས་གདའོ། །ལུས་ལང་ཚོ་རྒྱས་པས་རྟག་མི་ཐུབ། །སྲོག་ཟིལ་པ་འདྲ་བས་གདེངས་མ་ཁེལ། །བློ་ཕྱི་པ་ཤོལ་རུང་དམ་པདྨ་དཀར། །ཚེ་ཕ་རོལ་བསམས་ན་རན་ནས་གདའོ། །གྲོགས་མང་པོར་ཚོགས་པ་སོ་སོར་གྱེས། །ནོར་ཕྱུག་པོར་བསགས་པ་སུས་ཟ་མེད། །ཡིད་གཏད་ཐུབ་རུང་ངམ་པདྨ་དཀར། །ད་ཆེ་ཐབས་བསྐྱུར་ན་རན་ནས་གདའོ། །ཞག་ཟ་མ་གཉིས་ཀྱི་རེ་མོས་འདིས། །ཚེམ་ཚོར་ཟད་ནས་རྒས་པའི་སྐབས། །ལུས་འབྱུང་བཞིས་ནུས་སམ་པདྨ་དཀར། །ད་དཀའ་སྤྱད་བསྒྲུབ་ན་རན་ནས་གདའོ། །ལུས་འཆི་བའི་ནད་ཀྱིས་བཏབ་པའི་ཚེ། །ལས་ཕན་དུ་རེ་བ་བརྒྱ་རྡུགས་ནས། །ཡིད་འགྱོད་ལུགས་༼༡༠བ༢༠༽མཐོང་ངམ་པདྨ་དཀར། །དེར་ཕན་དེས་ཚོལ་ན་རན་ནས་གདའོ། །ཡིད་ཁམས་གསུམ་སྡུག་བསྔལ་མི་འདོད་པར། །ལས་ནག་པོ་སྤོང་བར་མི་བྱེད་པ། །བློ་རྨོས་པ་ཡིན་ནམ་པདྨ་དཀར། །དེ་མིན་ན་སྡིག་སྦྱོང་རན་ནས་གདའོ། །ཁོང་འཁྲུལ་པའི་གཞན་ངོ་མ་བཟློག་པར། །དུས་རྟག་ཏུ་སྡུག་བསྔལ་སྤྱད་སྤྱད་ནས། །ད་སུན་པ་སྐྱེས་སམ་པདྨ་དཀར། །གནས་དེ་ནས་འབྲོས་ན་རན་ནས་གདའོ། །ད་ནི་བསམས་ན་ཚེ་འདིའི་བྱ་གཞག་རྣམས། །བྱས་པ་ཟིན་མེད་ཟིན་ཀྱང་དོན་མེད་འདིས། །རང་གཞན་ཕུང་བ་མིན་ནམ་པདྨ་དཀར། །འཁྲི་བ་བཙན་ཐབས་གཅོད་ན་རན་ནས་གདའོ། །བརྟགས་ཀྱིན་བརྟགས་ཀྱིན་ད་ལྟའི་འདུན་ཐབས་འདི། །དོན་ཆེན་ཡལ་བར་བོར་བར་མི་འདུག་གམ། །བསམས་གཞིག་ལེགས་པར་ཐོད་དང་པདྨ་དཀར། །དབེན་པར་རང་སེམས་འདུལ་བ་རན་ནས་གདའོ།། །།རྒྱུད་སྡེ་རིན་པོ་ཆེ་ནས་བཤད་པའི་དེ་ཝི་ཀོ་ཊི་ཡིན་ནོ་ཞེས་གྲགས་ཤིང་། ཕལ་གྱིས་ལྷོ་བྲག་མཁར་ཆུ་ཞེས་འབོད་པ། དཔའ་བོ་དང་དཔའ་མོ་སྤྲིན་བཞིན་དུ་འདུ་བའི་རི་བོ་ཡ་མཚན་རྒྱས་པའི་རྩེ་མོ་རིན་པོ་ཆེའི་གླིང་། ནོར་བུ་སྤུངས་པའི་གཞལ་མེད་ཀྱི་ཁང་པ་ན། ཉམས་དགའ་བ་སྐྱེས་པའི་དབྱངས་འདི་འཐེན་ནོ། །དཔལ་སྤྲུལ་པའི་ཆོས་རྒྱལ་མེས་དབོན་དང་། སྔ་རབས་ཀྱི་སློབ་དཔོན་པདྨ་འབྱུང་། དེ་སོགས་ཀྱི་གྲུབ་ཆེན་གྲངས་མེད་པས། ཡང་ཡང་དུ་བརྟེན་ནས་བྱིན་བརླབས་པ། ཡུལ་གཡང་ཆགས་མོན་དང་བོད་ཀྱི་མཚམས། ས་ཁོལ་བྱུང་མཁོ་མཐིང་གཉིས་ཀྱི་མདུད། ཤིང་ཚང་ཚིང་འཁྲིགས་པའི་ནགས་ཀྱི་ལྗོངས། གཅན་གཏུམ་པ་རྒྱུ་བའི་ཚལ་གྱི་དབུས། བྲག་དགར་པོ་མཚོན་ཆ་གཟིངས་འདྲའི་རི། སྤྲིན་ན་བུན་འཁྲུག་པའི་ར་བ་འདི། ས་མ་བརྟག་ཉམས་དགའ་མཁར་ཆུའི་བྲག །བརྟག་ས་ན་དཔའ་བོ་དགའ་མོའི་མཁར། །གནས་གདོད་ནས་དག་པའི་དུར་ཁྲོད་ན། །ང་བོད་ཀྱི་རྣལ་འབྱོར་པདྨ་དཀར། །སྐྱོ་བསངས་ཀྱི་རྒྱང་༼༡༡ན༢༡༽གླུ་འདི་ལྟར་འཐེན། །ཡུལ་འདོད་དགུའི་འབྱུང་གནས་བོད་ཡུལ་ཤར། །འཐུང་གཅོད་ཀྱི་གནས་སྒོར་སྐྱེས་ན་ཡང་། །ཕ་ཡུལ་ལ་ཞེན་པ་མ་མཆིས་པས། །རྒྱལ་ཁམས་འདི་གཏན་གྱི་ཡུལ་དུ་ཁུགས། །ད་ག་ན་བསྡད་ཀྱང་བདེ་བ་ལ། །དྲིན་གཅིག་ཏུ་ཚ་བའི་ཕ་དང་མ། །སེམས་འཕྲེང་བའི་དངོས་པོར་ཆེ་ལགས་ཀྱང་། །ཡིད་དུང་སེམས་ཞེན་པ་མ་མཆིས་པས། །རྗེ་མཚན་ལྡན་བླ་མ་ཕ་མར་ཁུགས། །ད་འདུན་མའི་ཞུ་ས་ལེགས་པ་ལ། །ཡིད་མཛའ་ཞིང་གཅུགས་པའི་གཉེན་དང་འཁོར། ཚེ་འདི་ན་དགོས་པའི་མཆོག་ཡིན་ཀྱང་། །བློ་ཆགས་སྡང་ཞེན་པ་མ་མཆིས་པས། །དཀོན་མཆོག་གསུམ་གཏན་གྱི་ཉེ་དུར་ཁུགས། །ར་སུ་དང་འགྲོགས་ཀྱང་བྱམས་པའི་གཉེན། །དུས་གར་ཡང་མཁོ་བའི་ཟང་ཟིང་ནོར། །མི་ཆེ་ཕྲན་ཡོངས་ཀྱིས་གསོ་མོད་ཀྱང་། །ང་སེར་སྣའི་གསོག་འཇོག་མ་ཤེས་པས། །ཆོག་ཤེས་འདི་རྒྱུན་གྱི་ནོར་དུ་ཁུགས། །ད་ཡོད་མེད་ཀྱི་རྩིས་གདབ་བྱ་མ་དགོས། །ཆོས་ཤེས་བྱ་ཀུན་ལ་སྦྱངས་སྦྱངས་ནས། །དོན་འཆུག་མེད་གཏན་ལ་འབེབས་དགོས་ཀྱང་། བློ་ཐ་སྙད་ཕྱིར་རྗེས་མ་བསྙེགས་པས། ཆོས་ཡིན་ལུགས་ལམ་གྱི་བསུན་མར་ཁུགས། ད་གང་ལྟར་བྱས་ཀྱང་ཆོས་སུ་སོང་། །ལུས་དབེན་པ་བསྟེན་པའི་བདག་སྦྱར་གྱིས། །སེམས་དྲན་པས་འདུལ་ལ་བརྩོན་དགོས་ཀྱང་། སེམས་འཛིན་ལ་ཞལ་འདྲིས་མ་གོས་པས། །ཐ་མལ་གྱི་ཤེས་པ་སྒོམ་དུ་ཁུགས། །ད་ཡིན་ལུགས་ཚོད་འཇལ་བྱེད་མ་དགོས། །ཚོགས་དྲུག་ཏུ་སྣང་བའི་རྟོག་པ་འདི། །ཆོས་གཞན་མ་སྤང་བྱར་བྱེད་མོད་ཀྱང་། ཅིར་སྣ་ལ་གདོང་བཟློག་མ་སྤོབས་པས། །གང་ཤར་གྱི་སྣང་དྲགས་སྟོང་པར་ཁུགས། །སྤང་བླང་གི་མདུད་པ་འགྲོལ་མ་དགོས། །དོ་ཤི་དང་དོ་ཆད་ལ་སོགས་པ། །འགལ་རྐྱེན་འདི་གཞན་དག་མི་འདོད་ཀྱང་། །གང་བྱུང་ལས་གཞན་ཞིག་མ་བཙལ་པས། །རྐྱེན་ངན་ཉིད་མཐུན་རྐྱེན་གྱི་༼༡༡བ༢༢༽མཆོག་ཏུ་ཁུགས། ད་རེ་དོགས་གཉིས་པོ་བྲོས་ནས་སོང་། ཨ་ལ་ལ་རྣལ་འབྱོར་གྱི་དགའ་བ་ལ། སྐྱིད་དུ་རང་ཚོར་རོ་དཀོན་མཆོག་གསུམ། ཞེས་སོ།། །།ཀྱེ་མ་བདག་གི་ཚེ་འདི་རླུང་གསེབ་མར་མེ་འདྲ། །སྐད་ཅིག་གནས་པའི་གདེང་ཡང་མ་ཐོབ་པས། །ཡུན་རིང་སྡོད་གྲབ་འདིང་བའི་སྙིང་རུལ་བོ། །འཆི་བདག་བདུད་ཀྱིས་བཅོམ་དུས་མི་འགྱོད་དམ། །བདེ་སྡུག་དགེ་སྡིག་ལས་ཀྱི་རྗེས་འགྲོ་ལ། །མཛའ་དང་མི་མཛའ་ཆེད་དུ་ཆགས་སྡང་བགྱིད། །དགྲ་གཉེན་རྟག་ཏུ་རེ་བའི་སྙིང་རུལ་པོ། །འཁོར་བར་གཏན་འཁྱམས་བྱུང་ན་མི་འགྱོད་དམ། །མཐོ་རིས་ངན་འགྲོའི་ཐེམ་སྐས་མི་ལུས་ལ། །ཅི་དགར་སྤྱད་དུ་ཡོད་དུས་སྙོམས་ལས་ཀྱིས། །ངན་འགྲོའི་གཡང་ས་འདེམ་པའི་སྙིང་རུལ་པོ། །འདི་ནས་ཕ་རོལ་ཆས་ཚེ་མི་འགྱོད་དམ། །ཐོག་མེད་དུས་ནས་ཚུད་པའི་བཙོན་ར་འདིར། །སྡུག་བསྔལ་འབའ་ཞིག་སྤྱད་ཀྱང་ད་དྲུང་དུ། །སྐྱིད་རེའི་བསྒུག་སྡོད་བྱེད་པའི་སྙིང་རུལ་བོ། །སྦྱངས་སྦྱངས་སྡུག་གྲིར་ཤི་ན་མི་འགྱོད་དམ། །སྔོན་མས་མ་ཚར་ལས་པའི་ཤུལ་མཐོང་ཤིང་། །བྱས་ཀྱང་ཟིན་པ་མེད་པའི་སྣང་ཚུལ་ལ། །རང་གི་འགྲུབ་ཏུ་རེ་བའི་སྙིང་རུལ་པོ། །བསམ་པ་ལམ་དུ་ལས་ཚེ་མི་འགྱོད་དམ། །འདུས་བྱས་ཀུན་གྱིས་མི་རྟག་དཔེ་སྟོན་ཅིང་། །གཡས་ཤི་གཡོན་ཤི་རེ་མོས་རང་ཡིན་ཀྱང་། །དོན་ཆུང་བྱ་བ་བཤོལ་སྙིང་རུལ་པོ། །གློ་བུར་འཆི་ནད་བཏབ་ཚེ་མི་འགྱོད་དམ། །སྲོག་ནི་རྩྭ་རྩེའི་ཟིལ་བ་བས་ཀྱང་གཡེར། །དབུགས་ནི་ལྷགས་པའི་གསེབ་ཀྱི་སྤྲིན་འདྲ་ལ། །མི་ཚེ་ལོང་ཡོད་རེ་བའི་སྙིང་རུལ་པོ། །ལྷ་ཆོས་ཕྱི་བ་ཤོལ་ལས་པ་མི་འགྱོད་དམ། །སྐྱེས་ནས་སྐད་ཅིག་མི་སྡོད་འཆི་བ་ལ། །འཇིག་རྟེན་འདི་ན་ཕན་པ་འགའ་མེད་ཀྱང་། །གཏད་མེད་བྱ་བས་བྲེལ་བའི་སྙིང་རུལ་པོ། །དོན་ཆེན་ཡལ་བར་བོར་གྲ་མི་འགྱོད་དམ། །མི་ཚེ་སྐད་ཅིག་བར་སྣང་གློག་འདྲ་ལ། །ཆོས་དང་འཇིག་རྟེན་བྱ་བའི་རྣམ་གྲངས་ཀྱི། །༼༡༢ན༢༣༽རང་ཉིད་རང་གིས་བསླུ་བའི་སྙིང་རུལ་པོ། བྱས་པ་དོན་མེད་གྱུར་པ་མི་འགྱོད་དམ། །མ་བརྟགས་ཉམས་དགའ་ཙམ་གྱི་འཇིག་རྟེན་ལ། །རྟག་བརྟན་བདེན་པར་འཛིན་པའི་ཆོས་གཟུགས་པ། །བློ་རྩེ་གང་སྐྱིད་འདེམ་པའི་སྙིང་རུལ་པོ། །རྐྱེན་ངན་བར་ཆད་བྱུང་ན་མི་འགྱོད་དམ། །བསམས་ཀྱིན་བསམས་ཀྱིན་ད་ལྟའི་བྱ་གཞག་རྣམས། །དལ་འབྱོར་སྟོང་པར་རློག་པའི་ཐབས་ཡིན་ནམ། །མནོ་བསམས་ནང་དུ་ཁུགས་དང་པདྨ་དཀར། །བཟང་རྫུས་ཐར་པའི་གོ་འཕང་མི་ཐོབ་བོ། །ཞེས་པདྨ་དཀར་པོ་རང་ཉིད་ཀྱི་སྣང་ཚུལ་ལ་སྐྱོ་ནས་རང་ལ་བཏབ་པའི་གླུའོ།། །།གནས་ཆེན་གྱི་མཆོག་དེ་ལྷོ་བྲག་གི་མཁར་ཆུ། །དཔའ་བོ་དང་མཁའ་འགྲོ་སྤྲིན་བཞིན་དུ་འདུས་པས། །ཉམས་མྱོང་དང་རྟོགས་པ་ཅིག་ཅར་དུ་སྐྱེའོ། །བར་ཆད་ལ་མེད་དོ་གནས་ཆེན་གྱི་ཁྱད་པར། །རྒྱལ་ཁམས་ཀྱི་མཆོད་གནས་རྣལ་འབྱོར་གྱི་དཔོན་སློབ། །སྒྲུབ་བརྒྱུད་ཀྱི་བསྟན་འཛིན་འགྲན་མེད་དུ་འདུག་པས། །ཐོས་བསམ་དང་བསྒོམ་པ་ཅིག་ཅར་དུ་བགྱིད་པ། །བར་ཆད་ལ་མེད་དོ་བྱིན་རླབས་ཀྱི་ཁྱད་པར། །ལྟ་བ་ཡི་མཆོག་དེ་རྟོགས་པ་ལ་ཐུག་པས། །ལུང་རིགས་ཀྱིས་སྒྲོ་འདོགས་གཅོད་དགོས་སུ་མ་བྱུང་། །མ་བཅོས་བ་ཆུ་བོའི་གཞུང་བཞིན་དུ་གཞག་གོ། །བར་ཆད་ལ་མེད་དོ་ཕྱག་ཆེན་གྱི་ཁྱད་པར། །བསྒོམ་པ་ཡི་མཆོག་དེ་གཏུམ་མོ་ལ་བྱས་པས། །བྱིང་རྒོད་ལ་རྨོངས་པའི་མཚན་མ་དང་བྲལ་ནས། །གང་ཤར་ཉིད་ཉམས་ལེན་གྱི་གཞུང་ཤིང་དུ་བྱུང་ངོ་། །བར་ཆད་ལ་མེད་དོ་རྩ་རླུང་གི་ཁྱད་པར། །སྤྱོད་པ་ཡི་མཆོག་དེ་ཐོག་བརྫིས་ལ་བྱས་པས། །རེ་དོགས་ཀྱི་མདུད་པ་རང་ས་རུ་ཞིག་ནས། །འགལ་རྐྱེན་དེ་མཐུན་རྐྱེན་གཙོ་བོ་རུ་བྱུང་ངོ་། །བར་ཆད་ལ་མེད་དོ་རོ་སྙོམས་ཀྱི་ཁྱད་པར། །བོགས་འདོན་གྱི་མཆོག་དེ་མོས་གུས་ལ་བཅོལ་བས། །ལོག་ལྟ་ཡི་དགྲ་བོ་དབང་མེད་དུ་བྲོས་ནས། །དགོས་འདོད་ཀྱི་བང་མཛོད་རང་སེམས་ལ་༼༡༢བ༢༤༽རྙེད་དོ། །བར་ཆད་ལ་མེད་དོ་ལམ་ཟབ་ཀྱི་ཁྱད་པར། །རྟེན་འབྲེལ་གྱི་མཆོག་དེ་མཉམ་གཞག་ཏུ་བསྒོམས་པས། །མ་དག་པའི་སྒྲིབ་པ་མ་སྤངས་པར་ངག་ནས། །ཇི་སྙེད་པའི་མཁྱེན་པ་ཕྱོགས་མེད་དུ་རྒྱས་སོ། །བར་ཆད་ལ་མེད་དོར་བདུན་མའི་ཁྱད་པར། །སྦྱིན་བདག་གི་མཆོག་དེ་ས་སྐྱོང་གི་ཀུན་བཟང་། །ཐོག་མེད་ཀྱི་དུས་ནས་ལས་འབྲེལ་དུ་ཟབ་པས། །དཔོན་སློབ་རྣམས་ཐུགས་ཡིད་གཅིག་འདྲེས་སུ་སོང་ངོ་། །བར་ཆད་ལ་མེད་དོ་དམ་ཚིག་གི་ཁྱད་པར། །ལྷོ་བྲག་མཁར་ཆུ་རིན་པོ་ཆེའི་གླིང་ནོར་བུ་སྤུངས་པའི་གཞལ་མེད་ཁང་ཆེན་པོར་སྡེ་པ་དྲུང་ཆེན་ཀུན་ཏུ་བཟང་པོ་ལ་ཤུགས་འབྱུང་དུ་གནང་བའོ།། །།ཤྲེ་ཡ་སེ་སྟུ། ང་གང་ཟག་ཕལ་པས་མ་བསླད་པའི། །མགོན་སངས་རྒྱས་སྤྲུལ་པ་ཉག་གཅིག་གི། །དཔལ་དགས་པོའི་བཀའ་རྒྱུད་མ་ལགས་པ། །གཞན་བརྒྱུད་པ་ཀུན་ལ་ཡིད་མ་ཤོར། །རང་མོས་པའི་ས་ཀ་མ་ལོག་ན། །གནས་འཁོར་བའི་འཇིགས་པས་གླགས་མི་རྙེད། །དུས་གཏན་གྱི་སྐྱབས་སུ་འདི་ཁ་བཟང་། །བློ་རེ་ལྟོས་ཚོལ་ཞིག་སྐལ་ལྡན་ཚོ། །རྗེ་རང་དོན་རྟོགས་པའི་རྒྱལ་ས་ཟིན། །གཞན་དོན་ཐུགས་རྗེའི་མཚན་ཁ་བརྡོལ། །ཕ་མཚན་ལྡན་འབྲུག་པ་མ་ལགས་པ། །གཞན་བླ་མ་ཀུན་ལ་ཡིད་མ་ཤོར། །རང་གསོལ་བ་འདེབས་ཕྱོགས་མ་ལོག་ན། །ཚེ་འདི་ཕྱིའི་དགོས་འདོད་ཇི་སྙེད་པ། །བདེ་བླག་ཏུ་སྟེར་བའི་ནུས་པ་མངའ། །བློ་ཚམ་ཚོམ་མེད་པའི་གསོལ་འདེབས་འཚལ། །ཆོས་བཤད་ན་རྒྱ་ཆེ་གཟུང་ན་འདྲིལ། །རྒྱུད་ཟབ་མོ་ཀུན་གྱི་ཁོང་པའི་སྙིང་། །ལམ་ཡང་ཟབ་བསྲེ་འཕོ་མ་ལགས་པ། །གཞན་གདམས་ངག་ཀུན་ལ་ཡིད་མ་ཤོར། །རང་ཉམས་ལེན་བྱེད་ཚུལ་མ་ལོག་ན། །རྩ་འཁོར་ལོ་དྲུག་གི་མདུད་གྲོལ་ནས། །བདེ་ཆེན་གྱི་འགྲོས་བཞི་མཐར་སོན་པའི། །ཚེ་གཅིག་གིས་སངས་རྒྱས་འགྲུབ་ངེས་ཡིན། །འདི་ཡང་མཁར་ཆུ་འཇིགས་རུང་རྔམ་པ་རྒོད་པའི་ནགས་མ་༼༡༣ན༢༥༽བཟང་པོར། ལྷ་ཁང་ནས་སྡེ་པ་མ་ཆེ་མི་དབང་ཆོས་ཀྱི་རྒྱལ་པོར་གདམས་པའོ།། །།དཔལ་བྱིན་རླབས་ཀྱི་སྡོང་པོ་བཀའ་རྒྱུད་རྗེ། །ཁྱེད་ཐུགས་རྗེའི་ཡལ་འདབ་གཡོ་བ་ཡིས། །འབངས་སྡུག་བསྔལ་ཚ་བས་གཟིར་པ་རྣམས། །དུས་རྟག་སྐྱོབས་ཤིག་འབྲུག་པའི་ཞབས། །ཁྱོད་ཤེས་བྱ་ཡངས་པའི་ཐང་ཆེན་དུ། །བློ་ཐ་སྙད་སྨིག་རྒྱུའི་ཕྱིར་བསྙེགས་པས། །ཆོས་གནས་ལུགས་ཆུ་དང་མི་ཕྲད་ཀྱི། །ད་ངེས་པའི་དོན་ལ་ཞལ་འདྲིས་ཐོགས། །ཁྱོད་སྤྲིན་ལྟར་གཡོ་བའི་འཇིག་རྟེན་འདིར། །བློ་དངོས་འཛིན་འདོད་པ་མ་ཆེ་བར། །ད་འདུ་འཛི་མེད་པར་པདྨོའི་མཚོར། །བྱ་ངང་མོ་བཞིན་དུ་འཇུག་པ་གཅེས། །ཁྱོད་བདེ་གསལ་ཉམས་ཀྱི་ཞི་གནས་ལ། །བློ་སོ་སོར་རྟོག་པའི་ཤེས་རབ་ཀྱིས། །ཁོང་ཉོན་མོངས་འཁྲི་ཤིང་གཅོད་བྱེད་པའི། །ཆོས་རྣམ་པར་འབྱེད་པའི་རལ་གྲི་འཚོལ། །ཁྱོད་ཐོག་མེད་མ་རྒལ་འགྲོ་དྲུག་ལ། །བློ་ཆགས་སྡང་ང་རིས་མ་དབྱེ་བར། །ཀུན་བྱམས་དང་སྙིང་རྗེའི་དྲིན་ལན་གྱིས། །མས་བུ་གཅིག་ལྟ་བུར་བསྐྱངས་ན་འཐད། །ཁྱོད་བདེ་བ་འདོད་ཕྱིར་སྡུག་བསྔལ་ལ། །བློ་སྤང་བློ་སྐྱེ་བ་ཇི་ལྟ་བར། །མཁའ་མཉམ་པའི་སེམས་ཅན་དེ་ལྟ་བས། །ད་བདག་གཞན་མཉམ་པའི་བྱང་སེམས་བསྒོམ། །ཁྱོད་བྱིས་པ་རང་གི་དོན་བྱས་པས། །བློ་གཏན་དུ་ངལ་བའི་ཉེས་དམིགས་ལ། །ཡིད་བསམས་ཤིང་བདག་གཞན་བརྗེ་བའི་སེམས། །ནད་དྲག་པོས་ཉེན་པའི་སྨན་བཞིན་བསྟེན། །ཁྱོད་གདོད་ནས་དག་པའི་བྱང་སེམས་ལ། །བློ་བཅོས་མའི་ལྷན་པ་མ་འདེབས་པར། །གང་སྤྲོས་དང་བྲལ་བའི་དེ་ཉིད་ལ། །སེམས་སྤྲོས་དང་བྲལ་བར་མཉམ་པར་ཞོག །ཁྱོད་ཡོན་ཏན་གོང་དུ་བླ་མ་ལ། །བློ་ལོག་ལྟའི་མཆོད་པ་མ་འབུལ་བར། །རྗེ་རྣམ་ཐར་ཅི་མཛད་ལེགས་མཐོང་བའི། །ད་མོས་གུས་གྱིས་དང་དོན་ཀུན་འགྲུབ། །ཁྱོད་རྩེ་གཅིག་སངས་རྒྱས་ཐོབ་འདོད་ན། །བློ་རྩེ་གཉིས་འཁྲི་བ་ལེགས་བཅད་དེ། །༼༡༣བ༢༦༽ཕ་བཀའ་རྒྱུད་བླ་མར་ཡིད་གཏད་ན། །དོན་མྱུར་དུ་འགྲུབ་པར་མི་འགྱུར་རམ། །རང་གི་སློབ་བུ་བྱང་པ་རབ་འབྱམས་ཆོས་དཔལ་བཟང་། །རིག་པ་འཛིན་པར་ཡང་གྲགས་པ་ལ་ཀུ་རི་བྱང་ཆུབ་སྙིང་པོའི་སྤོ་དམ་པར་གདམས་པའོ། །འཛམ་གླིང་ཆུ་མཚོན་འགྱིང་བ་ཀུ་མུད་ཀྱི་སྡོང་པོ། །དེ་ལ་མཛའ་གཅུག་ས་སུ་ལྡན་པ་ཆུ་ཤེལ་གྱི་ཟླ་བ། དུས་ཚོད་ཉིན་མཚན་གྱི་བགྲོད་པས་ཟླ་བ་ངས་ཆས་ནས། གླིང་གསུམ་ཉིན་འཁོར་ལ་བྱས་ནས་ལྷོ་གླིང་འདིར་སླེབ་འོང་། འོད་དཀར་དགའ་སྟོན་དུ་འགྱེད་དོ་ཀུ་མུད་ཀྱི་ནགས་ཚལ། ས་མོ་ས་སེར་བ་ལས་སྲུངས་ཤིག་སྔགས་འཆང་གི་ནག་པོ། །སྤང་གཤོངས་མཐོན་པོ་ན་མཛེས་པ་སྤང་རྒྱན་གྱི་སྔོན་མོ། དེ་ལ་མཛའ་གཅུགས་སུ་ལྡན་པ་སྟག་ཆུང་གི་བུང་བ། དུས་ཚོད་བསེར་བུ་ཡི་བསྐུལ་བས་བུང་བ་ངས་ཆས་ནས། ནགས་མཐའ་ཡུད་ཙམ་གྱིས་བསྐོར་ནས་སྤང་གཤོངས་འདིར་སློབ་འོང་། གླུ་སྒྲ་དང་དིར་གྱིས་འགེངས་སོ་སྤང་རྒྱན་གྱི་ཚལ་ཆེན། །མེ་ཏོག་བ་མོ་ལས་སྐྱོབས་ཤིག་ལྷོ་སྤྲིན་གྱི་སྨུག་པོ། །ལྷོ་བྲག་ལུང་གསུམ་ན་སྐྱིད་པ་གནས་ཆེན་གྱི་མཁར་ཆུ། དེ་ལ་མཛའ་གཅུགས་སུ་ལྡན་པ་རྣལ་འབྱོར་གྱི་པད་དཀར། དུས་ཚོད་བྱ་གཞག་གིས་བྲེལ་བས་པད་དཀར་ངས་ཆས་ནས། ལྷོ་གཙང་སྐད་ཅིག་གིས་བསྐོར་ནས་གནས་ཆེན་འདིར་སླེབ་འོང་། དམ་ཆོས་དགའ་སྟོན་དུ་འགྱེད་འདིར་བཞུགས་པའི་མཆོད་ཡོན། ཁྱེད་ཅག་བར་ཆད་ལས་སྐྱོབས་ཤིག་བླ་མ་ཡི་དཀོན་མཆོག །ཅེས་སོ།། །།ནགས་ལྗོངས་ཕལ་མོ་ལ་འགྲིམ་པ་རྒྱ་སྟག་གི་ཁྲ་བོ། །ཙན་དན་ནགས་མ་དང་ཕྲད་པས་སེམས་ཡིད་ལ་ཤོར་ནས། ནགས་མཐའ་སྙེག་པ་ལ་མི་དགའ་སྟག་ཕྲུག་གི་གཞོན་ནུ། །འཛུམ་དྲུག་བསྟན་ས་ལ་བྱ་ཡིན་ཙན་དན་གྱི་ནགས་མ། གངས་རི་ཟུར་ཁ་ལ་འགྲིམ་པ་སེང་གེ་ཡི་དཀར་མོ། གངས་སྟོད་མཐོན་པོ་དང་ཕྲད་པས་སེམས་ཡིད་ལ་ཤོར་ནས། ཟུར་ཁ་སྙེག་པ་ལ་མི་དགའ་སེང་ཕྲུག་གི་༼༡༤ན༢༧༽གཞོན་ནུ། །གཡུ་རལ་གསིགས་ས་ལ་བྱ་ཡིན་གངས་སྟོད་ཀྱི་མཐོན་པོ། མཚོ་མཐའ་སྒོར་མོ་ལ་འགྲིམ་པ་འགྱུར་ལྕམ་གྱི་ཉ་མོ། །ཆུ་ཀླུང་དངས་མོ་དང་ཕྲད་པས་སེམས་ཡིད་ལ་ཤོར་ནས། །མཚོ་མཐའ་སྙེག་པ་ལ་མི་དགའ་ལྟང་དཀར་གྱི་ཉ་ཕྲུག །གསར་མིག་བལྟ་ས་ལ་བྱ་ཡིན་གཡུ་མཚོ་ཡི་སྔོན་མོ། དགུང་སྔོན་མཐོན་པོ་ལ་འགྲིམ་པ་བྱ་རྒྱལ་གྱི་རྒོད་པོ། བྲག་དམར་རི་བོ་དང་ཕྲད་པས་སེམས་ཡིད་ལ་ཤོར་ནས། ནམ་འཕངས་སྤྱོད་པ་ལ་མི་དགའ་ཐང་དཀར་གྱི་གཞོན་ནུ། གཤོག་ཕྲུག་བརྐྱངས་ལ་བྱ་ཡིན་བྲག་དམར་གྱི་མཐོན་པོ། རྒྱལ་ཁམས་ཕྱོགས་མེད་ལ་འགྲིམ་པ་རྣལ་འབྱོར་གྱི་དཔོན་སློབ། གནས་ཆེན་མཁར་ཆུ་དང་ཕྲད་པས་སེམས་ཡིད་ལ་ཤོར་ནས། རྒྱལ་ཁམས་འགྲིམ་པ་ལ་མི་དགའ་བསྟན་འཛིན་གྱི་གཞོན་ནུ། །སྒོམ་སྒྲུབ་འདག་སྦྱར་ལ་བྱ་ཡིན་དེ་ཝི་ཡི་ཀོ་ཊི། ཞེས་པ་འདི་གཉིས་ཤུགས་འབྱུང་དུ་གསུངས་པའོ།། །།དགུང་སྔོན་མཐོན་པོ་ཡི་ཕྱོགས་སུ། །འཁྲིགས་གདུགས་ཉི་མ་ཡིས་སླེབ་ཚེ། མེ་ཏོག་གེ་སར་དུ་རྒྱས་པ། རྟེན་ཅིང་འབྲེལ་འབྱུང་དུ་འདུག་གོ་རིན་ཆེན་སྐྱེད་ཚལ་གྱི་ཕྱོགས་སུ། རྨ་བྱ་གཞོན་ནུ་འདྲ་སླེབ་ཚེ། །གླུ་དབྱངས་ཟློས་གར་གྱི་རོལ་པ། རྟེན་ཅིང་འབྲེལ་འབྱུང་དུ་འདུག་གོ། །ལྷོ་བྲག་རོང་གསུམ་གྱི་ཕྱོགས་སུ། །རྣལ་འབྱོར་དཔོན་སློབ་ཀྱིས་སླེབ་ཚོ། །སྐལ་ལྡན་ངལ་གསོ་རུ་གྱུར་པ། །རྟེན་རེ་འབྲེལ་འབྱུང་དུ་འདུག་གོ། །ཞེས་མཁོ་མཐིང་ལྷ་ཁང་དུ་སྡེ་པ་ཕྱག་རྡོར་རབ་བརྟན་པ་ལ་གདམས་པའོ།། །།ཤྲེ་ཡ་སེ་སྟུ། ནམ་གཞག་གཏན་གྱི་སྐྱབས་གནས། །མཚན་ལྡན་བླ་མ་རུ་འདུག་པས། །གསོལ་བ་སྙིང་ངང་ནས་ཐོབ་དང་། །དགོས་དགུ་ཡིད་བཞིན་དུ་འགྲུབ་བོ། །སྤྲུལ་པས་སྤྲུལ་སྐུ་ཡི་བསྟན་འཛིན། །དགས་པོ་བཀའ་བརྒྱུད་དུ་འདུག་པས། །འདི་ཕྱིའི་རེ་ལྟོས་འདྲ་ཞུས་དང་། །ཅི་བསམ་ཡིད་བཞིན་དུ་འགྲུབ་བོ། །ཐོག་མེད་དུས་ནས་ཀྱི་ཕ་མ། །འགྲོ་དྲུག་༼༡༤བ༢༨༽སེམས་ཅན་དུ་འདུག་པས། སྙིང་ནས་ཅི་ཕན་ཞིག་གྱིས་དང་། དོན་གཉིས་ཡིད་བཞིན་དུ་འགྲུབ་བོ། །འདི་ཡང་སྡེ་པ་བསྟན་འཛིན་དབང་བསྒྱུར་ལ་གདམས་པའོ།། །།དཔྱིད་གསུམ་ལྡུམ་ར་རུ་སྐྱེས་པའི། །མེ་ཏོག་ཧ་ལོ་ཡི་སྟོང་ལྡན། །མདངས་བཟང་གེ་སར་དུ་འཛོམ་དུས། །དཀོན་མཆོག་ཞབས་དྲུང་རང་སྟེན་ཅིག །ཙན་དན་འཁྲི་ཤིང་ལས་སྐྱེས་པའི། །བསྲུང་ཞིམ་སྤོས་ངད་ཀྱི་དམ་པ། །ལྷོ་ཕྱོགས་རླུང་གཞོན་དང་འཛོམ་དུས། །དོན་མཐུན་ངལ་གསོས་རང་གྱིས་ཤིག །སྔོན་བསགས་བསོད་ནམས་ལས་སྐྱེས་པའི། །ཡོན་ཏན་བདུན་ལྡན་གྱི་མི་ལུས། །སངས་རྒྱས་བསྟན་པ་དང་འཛམ་དུས། །དམ་པའི་ལྷ་ཆོས་རང་གྱིས་ཤིག །འདི་ཡང་ལྷ་ཁང་དུ་སྲས་མོ་རྡོ་རྗེ་སྒྲོལ་མ་ལའོ།། །།ན་མོ་རཏྣ་གུ་རུ། ཕྱི་རྨ་གཡང་བྲག་རི་ནགས་ཚལ་ཅན། །ནང་དག་པ་ལུས་ཀྱི་རྩ་ཁམས་དང་། །གཞན་རྡོ་རྗེ་བཙུན་མོའི་མཁའ་གློང་སྟེ། །གནས་ཡ་མཚན་ལྷོ་བྲག་མཁར་ཆུའི་རི། །ཕྱི་ལྟར་ན་དད་ལྡན་ཕོ་མོའི་ཁྲོམ། །ནང་ལྟར་ན་དཔའ་བོ་མཁའ་འགྲོའི་ཚོགས། །གཞན་ལྟར་ན་བདག་གཞན་གཅིག་པའི་ཞིང་། །གནས་ཡ་མཚན་ལྷོ་བྲག་མཁར་ཆུའི་རི། །ཕུ་གངས་དཀར་ཧཾ་ཡིག་བདེ་བའི་གནས། །མདའ་རོང་གསུམ་ཚད་པ་ཙཎྜྻཱིའི་མེ། །བར་འབབ་ཆུའི་རྒྱུན་འདི་དགའ་བཞིའི་འགྲོས། །གནས་ཡ་མཚན་ལྷོ་བྲག་མཁར་ཆུའི་རི། གཡས་མཁར་ཆེན་ཝཾ་ཡིག་རྡོ་རྗེའི་རི། གཡོན་ལྕགས་ཕུག་ཨེ་ཡིག་ཤེས་རབ་མཁའ། །དབུས་མཉམ་སྤྱོད་ཟུང་འཇུག་ཡངས་པའི་གླིང་། །གནས་ཡ་མཚན་ལྷོ་བྲག་མཁར་ཆུའི་རི། །ཕྱི་སྣང་བ་བརྡ་ཐབས་ཀྱི་རོལ་རྩེད་ཀྱིས། །ནང་རིག་པ་སེམས་ཀྱི་ཕུགས་བསྟན་ནས། །གཞན་ཕྱག་རྒྱ་ཆེན་པོར་སྦྱོར་བ་ཡི། །གནས་ཡ་མཚན་ལྷོ་བྲག་མཁའ་ཆུའི་རི། །ཕྱི་འགག་མེད་ཀྱི་འཆར་སྒོ་ཇི་སྙེད་པ། །ནང་སྟོང་ཉིད་ཀྱི་ངང་དུ་རོ་གཅིག་པའི། །གཞན་གསང་ཆེན་གྱི་ལྟད་མོ་སྙེག་འདོད་རྣམས། །གནས་ཡ་༼༡༥ན༢༩༽མཚན་ལྟོ་བྲག་མཁར་ཆུར་བྱོན། །ལྕགས་ཕུར་ཅན་གྱི་ཕུག་པ་གསང་བ་མཆོག་གི་ཞིང་དུ། པདྨ་དཀར་པོས་ཉམས་དབྱངས་སུ་བྱས་ཏེ། སྡེ་པ་ཆོས་རྒྱལ་བསྟན་འཛིན་དང་ཆོས་རྒྱས་རབ་བརྟན་ལ་གདམས་པའོ།། །།བརྒྱུད་པ་དེ་དགས་པོ་བཀའ་རྒྱུད་ལ་ཐུག་པ། །བླ་མ་དེ་དཔལ་ལྡན་འབྲུག་པ་ལ་ཞུས་ནས། །བློ་རྩེ་དེ་ཚེ་འདི་བློས་བཏང་ལ་གཏད་པས། །བསམས་ཀྱིན་སྣང་བའི་བདེ་ཤོས་སུ་བྱུང་ངོ་། །བརྟགས་ཀྱིན་ཉམས་བསངས་དགའ་བ་ལ་བྱུང་ངོ་། །ལྟ་བ་དེ་ཕྱག་ཆེན་སུ་གཏན་ལ་ཕབ་པ། སྒོམ་པ་དེ་ཆོས་དྲུག་གི་གསང་ལམ་ལ་ཞུས་ནས། བོགས་འདོན་དེ་རོ་སྙོམས་སྐོར་དྲུག་ལ་བཅོལ་བས། བསམས་ཀྱིན་སྣང་བའི་བདེ་ཤོས་སུ་བྱུང་ངོ་། །བརྟགས་ཀྱིན་ཉམས་བསངས་དགའ་བ་ལ་བྱུང་ངོ་། །ཆེ་ཐབས་ཀྱི་བཅོས་མ་ཁྱད་དུ་རང་བསད་ནས། །གང་བྱུང་ལ་འདུན་མའི་གཙོ་བོ་འདྲ་ཞུས་ནས། །གང་དགའ་སྟབས་བདེ་ལ་བློ་རྩེ་འདྲ་གཏད་པས། །བསམས་ཀྱིན་སྣང་བའི་བདེ་ཤོས་སུ་བྱུང་ངོ་། །བརྟགས་ཀྱིན་ཉམས་བསངས་དགའ་བ་ལ་བྱུང་ངོ་། །མ་རྒན་དེ་འགྲོ་དྲུག་གི་སེམས་ཅན་ལ་བྱས་པ། །དྲིན་ལེན་དེ་དམ་པའི་ལྷ་ཆོས་ལ་ཞུས་ནས། །ནམ་གཞག་གཏན་གྱི་དོན་ཆེན་འདྲ་སྒྲུབ་པ། །བསམས་ཀྱིན་སྣང་བའི་བདེ་ཤོས་སུ་བྱུང་ངོ་། །བརྟགས་ཀྱིན་ཉམས་བསངས་དགའ་བ་ལ་བྱུང་ངོ་། །ཞེས་པ་འདི་ཡང་ཅོག་བུ་བ་དགེ་སློང་ཤེས་རབ་འཕེལ་ལ་གནས་ཆེན་མཁར་ཆུར་གནང་བའོ།། །།ཚེ་དེས་མེད་དུ་འདུག་པས་སྙོམས་ལས་བསྒྱུར། །མ་འགྲོ་དྲུག་ཏུ་འདུག་པས་སྙིང་རྗེ་བསྒོམས། །རྗེ་སངས་རྒྱས་སུ་འདུག་པས་གསོལ་བ་ཐོབ། སེམས་ཆོས་སྐུར་འདུག་པས་རང་ཞལ་ལྟོས། ཡུལ་སེམས་གཟུགས་སུ་འདུག་པས་ལྷུག་པར་ཞོག །དགེ་བ་འབུན་སྐྱེད་དུ་འདུག་པས་སྨོན་ལམ་ཐོབ། །ཅེས་ཕར་གདོད་དབོན་པོ་ལ་གདམས་པའོ།། །།ཚེ་རབས་ཀྱི་འཕྲེང་བ་གྲངས་མང་པོར། བསོད་༼༡༥བ༣༠༽ནམས་ཀྱི་ཚོད་ཟོང་གིས་བསྒྲུབས་པའི། །མཐོ་རིས་ཀྱི་ཡོན་ཏན་བདུན་ལྡན་འདིས། །དུས་ནམ་གཞག་གཏན་དོན་བསྒྲུབ་པ་གཅེས། །སྡུག་བསྔལ་གྱི་རྦ་གློང་ཆེར་འཁྲུག་པའི། །གནས་འཁོར་བའི་ཆུ་བོ་མཐའ་མེད་ལ། །དུས་ད་རེ་སྒྲོལ་བའི་གྲུ་རྙེད་ཚེ། །སྙོམས་ལས་དང་ལེ་ལོ་བསྐྱུར་བ་གཅེས། །ཡུན་བར་སྣང་གློག་འགྱུ་ལྟ་བུ་ཡི། །བློ་སྐྱོ་བ་སྐྱེས་པའི་གནས་སྐབས་སུ། །བརྩོན་འགྲུས་ཀྱི་བསྐུལ་མ་ལེགས་བསྟེན་ནས། །བདེ་ཆེན་གྱི་གོ་འཕང་སྙེག་པ་གཅེས། །ཞེས་པ་འདི་ཡང་ཁྲ་བསམ་གྲུབ་རབ་བརྟན་རྩེ་ར་ནང་སོ་ངག་དབང་ལ་གདམས་པའོ།། །།ཚེ་འདིའི་སྐྱིད་དང་འདོད་ལ་མ་ཆགས་པར། །མི་མེད་དབེན་པའི་གནས་འདིར་བསྙེགས་ལགས་པས། །བཀའ་རྒྱུད་གོང་མའི་ཤུལ་རྗེས་མ་ནོན་ཀྱང་། །འཇིག་རྟེན་ཁྱིམ་པའི་ནང་དུ་འཁྱམས་ཨ་མད། ལོ་གསར་དྲང་ངད་ཚ་བའི་ཟླ་གསུམ་ལ། །གངས་དཀར་བསིལ་བའི་གླིང་དུ་བསྒོམས་པ་འདིས། །གཏུམ་མོའི་དྲོད་རྟགས་ཡོ་ཏན་མ་སྐྱེས་ཀྱང་། །གྲང་བའི་ནད་བུས་ཟིན་དགོས་སྡུག་བསྔལ་མེད། །ཚང་ཚིང་འཁྲིགས་པའི་ནགས་ཀྱི་མུན་རུམ་ན། །གཅིག་པུ་ཟླ་གྲོགས་མེད་པར་བསྡད་པ་འདིས། །གནས་ལུགས་ཕྱག་རྒྱ་ཆེ་དང་མ་མཇལ་ཀྱང་། །བར་ཆད་བགེགས་ཀྱི་དབང་དུ་སོང་དོགས་མེད། །བྱིས་པའི་དུས་ནས་ཆོས་ལ་ཐོས་བསམ་བྱས། །གཞོན་པའི་དུས་ནས་སྒྲུབ་ལ་ནན་ཏན་བགྱིས། །འཆི་ཡང་དོད་པའི་གདེངས་ཚད་མ་ཐོབ་ཀྱང་། །རྒས་འཁོགས་འཆི་བ་གང་ལ་འགྱོད་པ་མེད། །བསམ་པས་རང་དོན་བསྒྲུབས་པ་རྒྱབ་ཏུ་བསྐྱུར། །སྤྱོད་པས་ཞི་བདེ་དོན་གཉེར་ཁྱད་དུ་བསད། །བྱང་ཆུབ་སེམས་དཔའི་ཁྲོད་དུ་མ་ཚུད་ཀྱང་། དམན་ལམ་ཉན་རང་གཉིས་སུ་གོལ་བ་མེད། །དོན་ཆུང་ཚེ་འདིའི་བྱ་བ་གདོང་འདེད་བྱས། གཏན་དོན་དམ་པའི་ཆོས་ལ་སྙིང་རུས་བསྐྱེད། །བདག་གཞན་དོན་གཉིས་མྱུར་དུ་མ་གྲུབ་ཀྱང་། །བསམ་མེད་དྲེད་པོའི་ཟླ་ལ་ཤོར་བ་མེད། །བཟང་དང་སྐྱིད་པ་དང་དུ་མ་བླངས་ཤིང་། ༼༡༦ན༣༡༽ངན་དང་སྡུག་པ་ཆེད་དུ་མ་སྤངས་པས། །སྒོམ་ཆེན་རབ་ཀྱི་ལམ་ཁྱེར་མ་ཐུབ་ཀྱང་། །མཐའ་མའི་ཁྲོད་དུ་ནམ་ཡང་ལས་པ་མེད། །ཆེ་ཐབས་བཅོས་མའི་སྡིར་ཁ་དགྲ་བོར་གཟུང་། །གྲགས་འདོད་སྙན་པའི་གཏམ་ལ་ཕྱི་ཐག་བསྟུངས། །ཆོས་མཛད་དམ་པའི་རྒྱལ་ས་མ་ཐོབ་ཀྱང་། །སེར་གཟུགས་ཁྱིམ་པའི་བྲན་དང་མཚུངས་པ་མེད། །ཅེས་པ་འདི་དཔལ་མཁའ་ལ་སྤྱོད་པའི་དཔའ་བོའི་གནས། ཅིག་ཅར་དཔལ་གྱི་ནགས་ལྗོངས་གྱི་ཡང་དབེན་ནས་ལྷོ་ཕྱོགས་ནོར་འཛིན་སྐྱོང་བའི་དབང་པོ་མཚོ་སྐྱེས་རྡོ་རྗེ་ལ་གདམས་པའོ།། །།དཔལ་འགྲན་བྲལ་བཀའ་རྒྱུད་ཀྱི་བླ་མ་དང་། །མགོན་མཚུངས་མེད་ཀྱི་ཆོས་རྗེ་ཁུ་དབོན་སྲས། །སྒོས་བཀའ་དྲིན་ཅན་ངག་གི་དབང་པོ་ལ། །ང་ཁ་ཚིག་ཙམ་མིན་པར་གསོལ་བ་འདེབས། །གྲོགས་བཟང་པོ་ཚོང་དུས་མགྲོན་པོ་འདྲ། །དུས་ཁ་རྩང་བར་ཡོད་པ་དེ་རིང་མེད། །འདུས་པ་སོ་སོར་བྲལ་བས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། །མ་ཚུད་དབེན་པའི་རི་བོར་བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། །ཁོ་བོ་བསམས་ཀྱིན་དམ་པའི་ལྷ་ཆོས་དྲན། །འཇིག་རྟེན་བྱ་བ་མདངས་གསུམ་རྨི་ལམ་འདྲ། །ད་ལྟ་སྐྱིད་སྐྱིད་འདྲ་ཡང་ཡུད་ཀྱིས་སྡུག །སྐྱིད་སྡུག་རེ་མོས་འཁོར་བས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། མ་ཚུད་དབེན་པའི་རི་བོར་བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། །ཁོ་བོ་བསམས་ཀྱིན་དམ་པའི་ལྷ་ཆོས་དྲན། །བསགས་པའི་ནོར་རྫས་སྦྲང་མའི་སྦྲང་རྩི་འདྲ། །སེར་སྣས་སྙིང་དུ་བསམས་པ་དགྲ་འདྲེས་འཁྱེར། །རང་རྫས་གཞན་གྱིས་སྤྱོད་པས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། །མ་ཚུད་དབེན་པའི་རི་བོར་བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། །ཁོ་བོ་བསམས་ཀྱིན་དམ་པའི་ལྷ་ཆོས་དྲན། །ཚེ་འདིའི་གྲགས་པ་ལུང་སྟོང་བྲག་ཅ་འདྲ། །ད་གི་ལྷང་ལྷང་གསལ་༼༡༦བ༣༢༽ཀྱང་ད་ལྟ་མེད། །སྙན་པ་མི་རྟག་འགྱུར་བས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། །མ་ཚུད་དབེན་པའི་རི་བོར་བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། །ཁོ་བོ་བསམས་ཀྱིན་དམ་པའི་ལྷ་ཆོས་དྲན། །གཟུགས་ཀྱི་མཐོ་ཡོར་ཁང་བ་རུལ་པ་འདྲ། །བསྲུང་སྐྱོབ་ཅི་ཕན་བྱས་ཀྱང་ངེས་པར་འཇིག །མཐའ་མར་དུར་ཁྲོད་བོར་བས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། །མ་ཚུད་དབེན་པའི་རི་བོར་བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། །ཁོ་བོ་བསམས་ཀྱིན་དམ་པའི་ལྷ་ཆོས་དྲན། །དབུགས་ཀྱི་འགྱུ་བ་བར་སྣང་སྤྲིན་དང་འདྲ། །གློ་བུར་སྐྱི་བསེར་རླུང་གིས་འདེད་རིང་འདིས། །ན་མ་ཡལ་ངེས་པ་མེད་པས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། །མ་ཚུད་དབེན་པའི་རི་བོར་བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། །ཁོ་བོ་བསམས་ཀྱིན་དམ་པའི་ལྷ་ཆོས་དྲན། །ཚེ་འདིའི་བྱ་བ་ཆུ་ཡི་གཉེར་མ་འདྲ། །གཅིག་ཤུལ་གཅིག་གིས་ནོན་པར་བསྒྲུབས་བསྒྲུབས་ཀྱང་། །མཐའ་མར་ཟིན་རྗེས་མེད་པས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། །མ་ཚུད་དབེན་པའི་རི་བོར་བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། །ཁོ་བོ་བསམས་ཀྱིན་དམ་པའི་ལྷ་ཆོས་དྲན། །འདིར་དགོས་བློ་སྣ་བང་མཛོད་མཐིལ་བརྡོལ་འདྲ། །གཏན་དོན་ཡལ་བར་བོར་ནས་བཀང་བཀངས་ཀྱང་། །ཆོག་ཤེས་ཁེང་རྒྱུ་མེད་པས་བློ་མ་བདེ། །བློ་བདེ་ཁོང་དུ་ཚུད་དམ་རིག་འཛིན་པ། །མ་ཚུད་དབེན་པའི་རི་བོར་༼༡༧ན༣༣༽བསྒོམ་དུ་གཤེགས། །འཇིག་རྟེན་གཡེང་བ་གཞོག་ལ་བསྒོམ་དུ་གཤེགས། ཁོ་བོ་བསམ་ཀྱིན་དམ་པའི་ལྷ་ཆོས་དྲན། །བཟང་པོའི་གྲོགས་དེ་མི་རྟག་ཞིག་པ་འདིས། །ཁོ་བོ་སྙིང་ནས་སྐྱོ་བས་ཚུགས་པ་མེད། །ཁྱོད་ཀྱང་ངེས་པར་སྐྱོ་ཞིང་ཡིད་འབྱུང་ན། །ང་བཞིན་དབེན་པའི་གནས་སུ་བསྒོམ་དུ་བྱོན། །རྒྱལ་པོའི་ཕོ་བྲང་དག་ཏུ་ཡིད་ཕེབས་ཤིང་། །འདོད་པའི་འདུ་འཛིའི་གཡེང་བས་ཡིད་བྲེལ་ན། །བཤེས་གཉེན་ཁྱོད་ཀྱང་ནེ་ཙོའི་མཁས་པ་འདྲ། །སྙིང་ནས་མནོ་བསམ་མཐོང་ལ་བསྒོམ་དུ་བྱོན། །ཞེས་པ་གནས་ཆེན་ཙ་རི་ཏྲ་ཡེ་ཤེས་ཀྱི་འཁོར་ལོ་ནས་རབ་འབྱམས་སྨྲ་བ་ཆོས་དཔལ་བཟང་ལ་གདམས་པ་འདི་ཉིད་གཞུང་ལུགས་གྲངས་སུ་བཅད་པ་བཅོ་བརྒྱད་དང་། །མ་བཅད་པ་དུས་ཀྱི་འཁོར་ལོ་ལ་སོགས་པ་བཀའ་དང་བསྟན་བཅོས་མང་པོའི་བློ་ནོར་གྱིས་ཕྱུག་པ་སྟོན་སྒོམ་སངས་རྒྱས་ལེགས་པ་དེ་ཉིད་དུས་ཀྱི་ཆོས་ཉིད་དུ་གྱུར་པའི་ཚེ་ཡིད་སྐྱོ་ཤས་དྲག་པོས་བསྐུལ་བའི་རྐྱེན་གྱིས་སོ།། །།སྔོན་བྱོན་གྲུབ་ཐོབ་ཀྱི་དབུས་ན། རྩོད་མེད་ཡོངས་གྲགས་ཀྱི་རྗེ་བཙུན། །རས་ཆུང་རྡོ་རྗེ་ཡི་གྲགས་པ། །དད་ལྡན་གསོལ་འདེབས་ཀྱི་བུ་ལ། །བྱིན་རླབས་དངོས་གྲུབ་འདྲས་སྩལ་དང་། །མཁའ་སྤྱོད་རིག་འཛིན་གྱི་དབུས་ན། འཇའ་ལུས་སྒྱུ་འཕྲུལ་གྱི་གར་མཁན། །རས་ཆུང་རྡོ་རྗེ་ཡི་གྲགས་པ། །དད་ལྡན་གསོལ་འདེབས་ཀྱི་བུ་ལ། །བྱིན་རླབས་དངོས་གྲུབ་འདྲས་སྩོལ་དང་། །དམ་པ་རིགས་བརྒྱ་གི་དབུས་ན། ཁྱབ་བདག་རྡོ་རྗེའི་འཆང་དངོས། །རས་ཆུང་རྡོ་རྗེ་ཡི་གྲགས་པ། །དད་ལྡན་གསོལ་འདེབས་ཀྱི་བུ་ལ། བྱིན་རླབས་དངོས་གྲུབ་འདྲས་པོ་ལ་དང་། ཞིས་པ་འདི་ཡང་། རྗེ་བཙུན་རས་ཆུང་པའི་སྒྲུབ་གནས་གློན་བྱེས་འགོལ་དུ། །དམ་པ་དེ་ཉིད་དྲན་པའི་མོད་ལ་པདྨ་དཀར་པོས་བགྱིས་པའོ།། །།ཚེ་སྔོན་ནས་བསྒྲུབས་པའི་མི་ལུས་འདི། །དུས་གཏན་དོན་བསྒྲུབ་ན་མེད་མི་རུང་། ༼༡༧བ༣༤༽དེ་ཤིན་ཏུ་ཡུན་ཐུང་འཇིག་སླ་བ། །ཆོས་སྙིང་ནས་བཞེད་ན་ལེ་ལོ་བསྐྱུར། །ལམ་ཟབ་རྒྱས་གཉིས་ལ་ཐོས་བསམ་འདི། །བློ་རྨོངས་པ་སེལ་ན་མེད་མི་རུང་། །དེ་ཤིན་ཏུ་ཕ་མཐའ་ཆོད་དཀའ་བས། །ཆོས་སྙིང་ནས་བཞེད་ན་བརྩོན་འགྲུས་འཚལ། །ཡིད་མཉམ་གཞག་གི་བསམ་གཏན་སྐྱོང་བ་འདི། །འདི་བྱང་ཆུབ་བསྒྲུབ་ན་མེད་མི་རུང་། །དེ་ཤིན་ཏུ་བྱིང་རྒོད་འཕྲང་དམ་པས། །ཆོས་སྙིང་ནས་བཞེད་ན་རྩེ་གཅིག་བསྒོམས། །བློ་གཞན་དོན་གཉེར་བའི་སེམས་བསྐྱེད་འདི། །དཔལ་སངས་རྒྱས་བསྒྲུབ་ན་མེད་མི་རུང་། །དེ་ཤིན་ཏུ་སྤྱོད་པ་གཏིང་ཟབ་པས། །ཆོས་སྙིང་ནས་བྱེད་ན་རང་དོན་བསྐྱུར། །སྡེ་པ་ཚོང་འདུས་པར་གདམས་པའོ།། །།དཔལ་ལོངས་སྐུའི་ཞིང་གི་རྡོ་རྗེ་འཆང་། །འགྲོ་དྲུག་གི་སྣང་ངོར་རོལ་བའི་ཚེ། །མཚན་སྙན་པོ་ངག་དབང་ཆོས་རྒྱལ་ལོ། །ཕ་རྗེ་བཙུན་དེ་ཡི་བཀའ་དྲིན་ལས། །ཡུན་རིང་བ་ཙམ་རང་མ་སྦྱངས་ཀྱང་། །ཆོས་ལུང་རིགས་ཚད་མས་གཞལ་བ་ལ། །དུས་དེང་སང་སྨྲ་བའི་སེང་གེར་གྱུར། །ཁོང་མཁས་པ་ཚོགས་ཀྱེན་ང་རེ་བྲོད། །ཡིད་གཉེན་པའི་ཆུ་ལོན་མ་བྲན་ཏེ། །འདོད་ཡོན་གྱི་སྣང་བ་ཅི་བཀྲ་ཡང་། །ཞེན་ཆགས་ཀྱི་སྲེད་པ་མི་ལྡང་བས། །ཁོང་བཙུན་པོ་ཚོགས་ཀྱིན་ང་རེ་བྲོད། །རང་ཉིད་ཀྱིས་ཆེད་དུ་མ་གཉེར་ཀྱང་། །གཞན་ཕན་ལ་དགའ་བའི་བྱ་གཞག་འདིས། །སྲིད་ཞི་ཡི་ཕུན་ཚོགས་ཞར་ལ་བྱུང་། །ལོང་ཆེན་པོ་ཚོགས་ཀྱིན་ང་རེ་བྲེད། །ཐོས་ལོའི་ཐོབ་རྒྱ་མི་ཆེ་ཡང་། །ལམ་ཟབ་རྒྱས་འབྱེད་པའི་གདམས་ངག་རྣམས། །རང་རྒྱུད་དང་གཅིག་ཏུ་འདྲེས་པའི་ཕྱིར། །ཁོང་གདམས་ངག་ཅན་ཚོགས་ཀྱིན་ང་རེ་བྲོད། །འདག་སྦྱར་གྱི་བསྒོམ་ཡུན་མ་བྱས་ཏེ། །ལམ་ཉམས་སུ་མྱོང་བའི་དྲོད་རྟགས་ལ། །ཇི་ལྟ་བའི་སྤུ་རིས་ཕྱེད་པའི་ཕྱིར། །གྲོགས་སྒོམ་ཆེན་ཆོགས་ཀྱིན་ང་རེ་བྲོད། །བློ་བཅོས་མའི་ཐོ་ཅོ་མི་ཆེ་སྟེ། །སྐྱིད་འདོད་ཀྱི་རེ་བ་མ་བྱས་པས། །སྡུག་དོགས་ཀྱི་འཛིན་པ་རང་སར་དག །ཁོང་རྟོགས་༼༡༨ན༣༥༽ལྡན་ཚོགས་ཀྱིན་ང་རེ་བྲོད། །གཏོར་མ་དང་བཟླས་བསྒྲུབ་མི་བརྩོན་ཀྱང་། །མ་མཁའ་འགྲོ་ཆོས་སྐྱོང་དགྱེས་པའི་ཕྱིར། །གང་བསམས་ཀྱི་འདུན་མ་ཡིད་བཞིན་འགྲུབ། །ཁོང་དམ་ཚིག་ཅན་ཚོགས་ཀྱིན་ང་རེ་བྲོད། །མི་བདག་གི་བྲོད་པ་འདི་དག་ཀྱང་། །ཕ་མཚན་ལྡན་བླ་མ་ཁོང་གི་དྲིན། །དྲིན་འཁོར་ཐབས་མེད་པས་གསོལ་འདེབས་འདི། །རྗེ་དམ་པའི་སྙན་ལ་གཟན་ཡང་བྱས། །མི་ཁྱེད་ཀྱང་དེ་བཞིན་འབྱུང་འདོད་ན། །དུས་འདི་ཕྱིའི་རེ་ལྟོས་མ་མང་བར། །མཚན་ལྡན་གྱི་བླ་མ་ཉག་གཅིག་ལ། །རྩེ་གཅིག་གུས་པའི་གསོལ་འདེབས་ཀྱིས། །ཞེས་པདྨ་དཀར་པོས། རྒྱུད་སྡེ་མན་ངག་ལ་ཐོས་པ་ཅན་སྨོན་འགྲོ་ཀུན་སྤངས་པ་ལ་རྒྱལ་བྱེད་ཚལ་ནས་གདམས་པའོ།། །།དུས་དེའི་ཚེ། མཁས་བླུན་མང་པོ་ནི་གུ་ལ་སོགས་པའི་གདམས་པ་མིན་པ་གཞན་གྱིས་གོ་མི་ཆོད་པ་སྐད་བྱེད་སྣང་བ་ལ་ཟུར་ཟར་བླངས་པ། སྔོན་སྦྱངས་ཀྱི་ལས་འཕྲོས་རྒྱུད་བསྐུལ་ནས། །ལམ་ཟབ་མོ་ཚོལ་བའི་སྤོབས་པ་རྙེད། །ལམ་འབྲས་དང་ནི་གུ་སྦྱོར་དྲུག་སོགས། །བླ་མེད་ཀྱི་སྙིང་པོར་ཡིད་ཆེས་ཤིང་། །དབུས་གཙང་གི་ལྗོངས་ན་དར་མོད་ཀྱང་། །དུས་དིང་སང་ཁ་བཤད་ཁྲམ་པའི་ཆས། །ལག་ལེན་གྱི་འཕྲང་ལ་རྡུགས་མཐོང་ནས། །ཞུ་འདོད་ཀྱི་སྤྲོས་པ་དེ་ཁར་ཆབ །སྙན་རྒྱུད་ཀྱི་ཆུ་བོ་བཞི་འདུས་པའི། །དཔལ་ནཱ་རོའི་ཆོས་དྲུག་གཡེད་ཆེན་པོ། དེ་བཤད་ན་རྒྱ་ཆེ་གཟུང་ན་ཡང་། ཕྱག་བཞེས་ཀྱི་བྱིན་རླབས་མ་ཡལ་བས། །ཡིད་རྩེ་གཅིག་སྒྲིལ་ས་འདི་ལ་བྱས། །སྒམ་སྒོམ་གྱི་བླ་མ་མ་ལགས་མ། །ཡོངས་གྲགས་ཀྱི་རྗེ་བཙུན་བསྟེན་ལས་རྙེད། འབངས་སྦྱོང་བའི་ངལ་བ་མ་དགོས་པར། །ཆོས་ཀུན་ལ་མཁས་པའི་གནས་ཐོབ་པས། །རྗེ་བཀའ་དྲིན་ཅན་དུ་ཅིས་མི་ཤེས། །སྐུ་དྲིན་ལ་འཁོར་ཐབས་ག་ལ་ཡོད། །ཆོས་ཁ་བོ་ཆེ་བ་མང་ན་ཡང་། །སྔར་བསྒོམས་པས་དྲོད་རྟགས་འཐོན་པ་སྟེ། །བཀའ་རྒྱུད་ཀྱི་གཞུང་ལམ་འདི་ཀ་མང་། །ང་བསམས་༼༡༨བ༣༦༽ཀྱིན་འཚེངས་སོ་འདིར་ཚོགས་རྣམས། །བློ་གསལ་པདྨ་དཀར་པོ་བདག་ཉིད་གནས་ཆེན་དེ་ཝི་ཀོ་ཊི་ན། དད་འདུས་ཀྱི་ཚོགས་ལ་རོ་སྙོམས་སྐོར་དྲུག་ལ་སོགས་པའི་ཟབ་ཆོས་ཐོས་བསྒྲགས་སུ་བྱེད་པའི་ཚེ། །ཆོས་པ་བཟང་པོར་རློམ་པའི་སྤྱོད་ཚུལ་འཇིག་རྟེན་འདིར་ནང་ལས་མ་འཕགས་པ་མང་དུ་མཐོང་། རང་སྤྱོད་དམ་པའི་ཆོས་བཞིན་དུ་སྣང་བ་བླ་མའི་དྲིན་དུ་ཤེས་པའི་གླུ་འདི་འཐེན་པ་ཡིན་ནོ།། །།ན་མོ། ཆོས་ཆོས་བཞིན་སྟོན་པའི་བླ་མ་ལ། །རྗེ་མཚན་ལྡན་འབྲུག་པ་སྐད་ཀྱིན་གདའ། །ང་གཞན་མའི་སློབ་དཔོན་མཐོང་བཞིན་དུ། །རྗེ་ཁོང་ལ་བསམས་བཞིན་དད་པ་སྐྱེས། །ཡིད་བལྟོས་པ་བཅས་པའི་བུ་སློབ་ལ། །ཆོས་བརྒྱད་ཀྱི་གར་བུམ་བཟོས་པར། །ཚེ་བློས་བཏང་སྒྲུབ་པའི་གནས་སུ་བཞག །དེ་དྲན་ཀྱིན་སྙིང་ནས་མོས་གུས་སྐྱེས། །མགོན་མཚུངས་མེད་དེ་ཡི་བཀའ་དྲིན་ལས། །བློ་བཅོས་མའི་ཁྲིགས་ཁམ་ལགས་པའི། །ཉམས་ལེན་གྱི་གདེངས་ཚད་འདི་ལྟར་ཐོབ། །ཨ་ལ་ལ་ཐུགས་སར་གཏུགས་པའི་མཐུས། །འགྱུ་བྱེད་ཀྱི་ཡལ་ས་ཤེས་པའི་ཕྱིར། །རྣམ་རྟོག་གི་སྟེང་དུ་ཐོག་བརྫིས་བཏང་། །སྤང་བླང་དུ་འཛིན་པའི་གཉིས་ཆོས་ཞིག །ལྟས་ངན་པ་གཡང་ལོན་བླ་མའི་དྲིན། །ཐབས་མཁས་ཀྱི་གནད་ཀ་ལྡན་པའི་ཕྱིར། །ཉོན་མོངས་ལ་བཟློག་པའི་བསྒོམ་པ་བྱས། །ཡེ་ཤེས་གསལ་འདེབས་ཀྱི་གདེངས་ཚད་ལོན། །དུག་བདུད་རྩིར་བསྒྱུར་བ་བླ་མའི་དྲིན། །ནང་རྩ་གནས་རྟེན་འབྲེལ་ཤེས་པའི་ཕྱིར། །འཁྲུལ་སྣང་གི་གདོན་ལ་རོ་སྙོམས་བགྱིས། །བར་ཆད་དངོས་གྲུབ་ཀྱི་རོལ་པར་སོང་། །བགེགས་རྒྱན་དུ་ཤར་བ་བླ་མའི་དྲིན། །འགྲོ་བ་ཀུན་ཕ་མར་མཐོང་བའི་ཕྱིར། །བདག་གཞན་གཉིས་བརྗེ་བའི་བྱང་སེམས་བསྒོམས། །སྡུག་བསྔལ་དང་ལེན་གྱི་གོ་ཆ་ཐོབ། །རྐྱེན་གྲོགས་སུ་སོང་བ་བླ་མའི་དྲིན། །ནད་སྒྲིབ་པའི་ཕྱགས་མར་ངེས་པའི་ཕྱིར། །ཕན་འདོད་ཀྱི་བདག་འཛིན་བློས་བཏང་བས། །འབྱུང་བཞི་རོ་སྙོམས་ཀྱི་ལྟད་མོ་མཐོང་། །ཟུག་བདེ་༼༡༩ན༣༧༽བར་ཤར་བ་བླ་མའི་དྲིན། །གཞི་གཉུག་མའི་འཆར་ཚུལ་ངོ་འཕྲོད་ཕྱིར། །ཚོགས་དྲུག་གི་སྣང་བ་ལམ་དུ་འཁྱེར། །འོད་གསལ་གྱི་མ་བུ་འདྲེས་ནས་ཐལ། །འཆི་དུས་སུ་བྲོད་པ་བླ་མའི་དྲིན། །བཟང་རྫུ་ལ་རེ་བ་མ་དགོས་པར། །ལྟོ་འགྲངས་ཉིན་དྲོས་ཀྱི་ཆོས་པ་མིན། །ཆེ་འདོད་ཀྱི་ཁོང་སྐྲན་མ་ཞུགས་པས། །ཅི་དྲག་གི་རྩི་ཁ་ཞུ་དགོས་མེད། །ཅེས་སྨྲས་སོ།། །།གཞན་དོན་ལྷུར་ལེན་གྱི་བསམ་པ་བཅངས། །ལག་ལེན་དུ་བསྡུ་བ་བཞི་བསླབས། །རང་འདོད་ཀྱི་ཁོང་མཚང་ཡུལ་ནས་བཏོན། །ཡ་རབས་གཅོད་པའི་བུ་ཚ་མིན། །ལུང་རིགས་ཀྱི་ཚིག་གིས་བརྡར་ཤ་བཅད། །མཉམ་གཞག་གིས་དོན་གྱི་སྒྲོ་འདོགས་བསལ། །འཆུགས་མེད་ཀྱི་དམ་ཆོས་ངོས་སུ་རྙེད། །རྫུན་འོལ་བཤད་བྱེད་པའི་མཁས་པ་མིན། །རང་རིག་གི་ངང་དུ་ཉོན་མོངས་བཏུལ། །ལས་འབྲས་ལ་ཡིད་ཆེས་བླང་དོར་བྱས། །ཞེན་ལོག་གིས་རློམ་པའི་དྲི་མ་དབྲལ། །ཚེར་མ་དར་གཏུམས་ཀྱི་ཆོས་པ་མིན། །ཆོས་རྒྱུད་སྡེ་བཞི་ཡི་ཁོང་སྙིང་རྣམས། །ལག་ལེན་གྱི་འཕྲང་ལ་བརྡར་བརྡར་བའི། །སྨར་ཁྲིད་དུ་བསྟན་པ་རྒྱུད་ལ་སིམ། །ཆོས་དཔེ་ཐོག་ལས་པའི་མཁས་པ་མིན། །གཅེས་འཛིན་གྱི་འགོང་པོ་དྲན་པས་བསད། །འདོད་ཡོན་གྱི་སེར་བ་གདོང་ནས་བཟློག །འཇར་ཉལ་འཁྲིས་མེད་ཀྱི་ཉམས་ལེན་ཤེས། །བཟང་རྫུ་ལ་སྐྱབས་པའི་སྒོམ་ཆེན་མིན། །སྟོང་ཉིད་ཀྱི་བསྲུང་བ་རང་ལས་རྙེད། །བདག་འཛིན་བློས་བཏང་གི་ངང་དུ་ཉལ། །བྱར་མེད་ཀྱི་ངང་དུ་ལས་ཀུན་ཟིན། །མཐོ་ཅོ་ལ་རེ་བའི་རྟོགས་ལྡན་མིན། །འཇིག་རྟེན་པའི་མིག་ངོར་མཛེས་པའི་ཆོས། །ཁོང་ཆེ་དགུས་ཧབ་བཤའ་མཛད་པས་ཟད། །ཉོན་མོངས་ཀྱི་གཉེན་པོར་གྱུར་པའི་ཆོས། །མི་རྣལ་འབྱོར་ང་ཡི་སྐལ་བར་ལས། །ཞེས་སྨྲས་སོ།། །།བྱིན་རླབས་ཀྱི་གོང་བུ་བཀའ་རྒྱུད་ལ། །མོས་གུས་ཀྱི་ལྟེམ་ཀྱང་མ་ཤོར་བས། །སངས་རྒྱས་ཀྱི་ས་ལ་སྐྱེལ་མི་སྐྱེལ། །རྗེ་ཁྱེད་ཀྱི་ཐུགས་རྗེར་༼༡༩བ༣༨༽དག་ལ་བྱུང་། །སྙན་རྒྱུད་ཀྱི་གདམ་ངག་ཟབ་དགུ་ཤེས། །ལག་ལེན་གྱི་ཐད་དུ་མ་རྨོངས་པས། །དངས་མའི་འཇའ་ལུས་ཞིག་འགྲུབ་མི་འགྲུབ། །ཉམས་སུ་ལེན་ཚུལ་ལ་རག་ལས་བྱུང་། །སྙིང་ནས་འཆི་དྲན་གྱི་བསྐུལ་མ་བྱུང་། །སྲིད་གསུམ་གྱི་འབྱོར་པར་མ་ཆགས་པས། །བློ་ཆོས་སུ་འགྲོ་བ་ཡོང་མི་ཡོང་། །ཐག་ཆོད་ཀྱི་བློ་ལ་རག་ལས་བྱུང་། །རྒྱུད་གཉའ་རེངས་ཡན་པར་མ་གཏང་ཞིང་། །གཞན་གནོད་ཀྱི་བྱ་བ་མ་བགྱིས་པས། །ཆོས་ལམ་དུ་འགྲོ་བ་ཡོང་མི་ཡོང་། །རློམ་སེམས་ཡོད་མེད་ལ་རག་ལས་བྱུང་། །འཁོར་བའི་དེ་ཉིད་ཤེས་པའི་ཕྱིར། །འཁྲུལ་མེད་ཀྱི་སྒྲུབ་བྱེད་མ་བཤམས་པས། །ལམ་འཁྲུལ་པ་སེལ་བ་ཡོང་མི་ཡོང་། །ཐོག་བརྫིས་ཀྱི་སྤྱོད་པར་རག་ལས་བྱུང་། །བྱམས་སྙིང་རྗེ་གཉིས་པོ་ཁོང་ནས་བརྡོལ། །སྡུག་བསྔལ་དང་ལེན་གྱི་བསུན་མ་བྱུང་། །གཞན་དོན་ལྷུན་གྲུབ་ཞིག་ཡོང་མི་ཡོང་། །ཞེ་འདོད་བྲལ་བ་ལ་རག་ལས་བྱུང་། །འདི་ཡང་ལྕགས་ཕུར་ཅན་དུ་སྔགས་འཆང་མཁྱེན་རབ་རྒྱ་མཚོས་བསྐུལ་བའི་ངོར་བགྱིས་པའོ།། །།ཡང་གནུབས་ཀྱི་སྔགས་འཆང་མཁྱེན་རབ་རྒྱ་མཚོ་དེ་ཉིད། །དྲག་པོ་མངོན་སྤྱོད་ཀྱི་ལས་ལ་སུན། །རྣམ་སྨིན་ལ་བྲེད། །རང་གིས་རང་སུན་མ་ཕྱིན་པར་སྒྲུབ་པ་ཆོས་བཞིན་དུ་བྱེད་དགོས་པ་ནམ་སྙམ་པའི་ཐེ་ཚོམ་ལོག་གེ་བ་ཞིག་འདུག་པའི་ཚེ། །པདྨ་དཀར་པོས་གཏམ་གྲོས་སུ་བསྙད་ནས། །བརྗེད་ཐོ་གླུར་བཀོད་པ་འདི་བྱས་སོ། །ཡུལ་རྒྱ་གར་དབུས་ན་སྒྲ་ཆེ་བ། །རྗེ་ཏིལླི་ནཱ་རོ་སྐད་པར་གདའ། །མགོན་མཆོག་གཟིགས་གཉིས་པོའི་རྒྱལ་སར་བཞུགས། །མཚུངས་མེད་ཀྱི་ལོ་ཆེན་མར་པའི་ཞབས། །མས་ཁོང་ལ་ཐུག་པའི་བཀའ་རྒྱུད་འདི། །ཆོས་ལག་ཏུ་བཀལ་ནས་སེམས་རྒྱུད་སྦྱོང་། །དེ་བྱིན་རླབས་ཚན་ཁ་ཆེ་བའི་ཕྱིར། །གྲུབ་ཐོབ་ཀྱི་གཏེར་ཁ་གྲངས་མེད་ཕྱེད། །ཚེ་གཅིག་གི་སངས་རྒྱས་བཞེད་པ་ན། །མི་ཁྱོད་ཀྱང་སྒྲུབ་བརྒྱུད་འདི་ལ་ཞུགས། །ཟིན་མེད་ཀྱི་༼༢༠ན༣༩༽བྱ་བ་བསྒྲུབས་ནས་ཅི། །ཐག་ཆོད་ཀྱི་མི་ཚེ་ཆོས་ལ་སྐྱོལ། །རྗེ་རས་ཆེན་དང་ཟླ་འོད་ངན་རྫོང་པ། །གླིང་རས་དང་འགྲོ་མགོན་གཙང་པའི་ཞབས། །བཀའ་ཐེག་པ་རིམ་དགུར་སྦྱངས་རྣམས་ཀྱང་། །དྲོད་རྟགས་ཀྱི་ཡོན་ཏན་འདི་ལས་འཐོན། །དེ་བསམས་ཀྱིན་གནུབས་ཀྱི་སྔགས་འཆང་ཁྱོད། །རང་སེམས་ལ་རང་གིས་གྲོས་བཏབ་ནས། །དལ་འབྱོར་གྱི་མི་ལུས་དོན་ལྡན་དུ། །རྩེ་གཅིག་གིས་སྒྲུབ་པར་མི་འབྱོན་ནམ། །རྣམ་གཡེང་གི་འདུ་འཛི་རྒྱང་རིང་བཞུད། །མི་དགེ་ཡི་ཆོམ་རྐུན་ངང་གིས་ཞི། །བསམ་གཏན་གྱི་ཚེར་མས་དབེན་པའི་གནས། །དཔལ་མཁའ་སྤྱོད་དབང་པོའི་དོ་རར་བྱོན། །མ་གནས་གསུམ་མཁའ་འགྲོ་དེ་ན་འདུ། །དཔལ་ཆོས་སྐྱོང་བསྲུངས་མས་དེ་ན་སྐྱོབ། །བག་ཕེབས་ཀྱི་ནགས་མ་དེ་ན་བཟང་། །ཚེ་བློས་བཏང་མཛད་ན་དེ་རུ་བྱོན། །གནས་དེ་ན་དུད་འགྲོའི་སེམས་ཅན་ཡང་། །མཁའ་སྤྱོད་ཀྱི་ས་ལ་ཐོགས་མེད་འགྲོ། །རང་ཤེས་ལྡན་གྱི་མི་ལ་དགོས་པའི་རྫས། །མཆོག་ཐུན་མོང་གི་དངོས་གྲུབ་དེ་ལ་ཡོད། །ཅེས་སྨྲས་སོ།། །།འདི་ཕྱི་ཀུན་གྱི་སྐྱབས་མགོན་ཞུས། །མཚན་ལྡན་འཐུག་པ་ཁོ་རང་ལ་བྱས་ནས། །སྙིགས་དུས་ཁྲམ་པའི་བུ་སློབ་ལ་སྐྱོ་བའི། །རྒྱད་གླུ་གནས་ཆེན་མཁར་ཆུ་ནས་ཐེན་ནོ། །དད་ཟས་ལེན་དུས་ཀྱི་ཧམ་པ་ཅན་ཚོ། །ཟོས་ཚད་རྒྱལ་བ་ཅིག་ཡིན་ཡིན་མ་འདྲ། །རང་རྒྱུད་དེ་གྱོང་པའི་ཤིང་ལྟར་རེངས་དུས། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །ཆོས་འགལ་ལ་སྤྱོད་པའི་ངོ་ལྐོག་ཅན་ཚོ། །གསངས་པས་ཉེས་མེད་ཅིག་ཡིན་ཡིན་མ་འདྲ། །འདི་ཕྱི་གཉིས་མེད་ཀྱི་མཁའ་ལ་འཁྱོམ་ཚེ། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །འདོད་ཡོན་ལ་སྲེད་པའི་དོན་གཉེར་ཅན་ཚོ། །བསྒྲུབས་ཚད་ཡགས་པ་ཅིག་ཡིན་ཡིན་མ་འདྲ། །ངན་པ་ལང་ཤོར་གྱི་བག་ཆགས་འཐས་དུས། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །སྡུག་དགོས་ཁོང་འཚངས་ཀྱི་སེར་སྣ་ཅན་ཚོ། །བསགས་༼༢༠བ༤༠༽ཚད་དོན་ལྡན་ཅིག་ཡིན་ཡིན་མ་འདྲ། །འཆི་བདག་གཏུམ་པོ་ཁོའི་ཤབ་བརྒྱུགས་སླེབ་ཚེ། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །ཆེན་པོ་ལ་རིང་བའི་ཞེ་འདོད་ཅན་ཚོ། །བསམས་ཚད་ཡོང་བ་ཅིག་ཡིན་ཡིན་ཡ་འདྲ། །དོན་མེད་རྒྱལ་སྡེ་ཡི་མི་ཁས་བཅོམ་དུས། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །གཞན་སྐྱོན་གླེང་བསླང་གི་ཁ་བདེ་པོ་ཆེ། །བཤད་ཚད་ཡགས་པ་ཅིག་ཡིན་ཡིན་མ་འདྲ། །རང་ཉིད་མི་ཁའི་འདམ་རྫབ་ལ་བྱིང་སྐབས། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །ཉམས་ལེན་ཕྱི་བཤོལ་བའི་ལེ་ལོ་ཅན་ཚོ། །ཉལ་ཚད་ཡགས་པ་ཅིག་ཡིན་ཡིན་མ་འདྲ། །ཅི་ཡང་མི་ནུས་པའི་བློ་དྲེད་ཁྱེར་ཚེ། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །གདམས་ངག་ཟིན་བྲིས་ཀྱི་ཁུར་པོ་ཅན་ཚོ། །བཏབ་ཚད་ལེགས་པ་ཅིག་ཡིན་ཡིན་མ་འདྲ། །ཆོས་དང་ཤེས་རྒྱུད་ཐ་དད་དུ་ཤོར་ཚེ། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །ཕན་གཏམ་ལ་མི་ཉན་པའི་དྲེད་པོ་བརྒྱ་ཚོ། །བྱས་ཚད་ཐོག་ཁེལ་ཞིག་ཡིན་ཡིན་མ་འདྲ། །མི་ཚེ་རིང་པོ་འདི་འབྱིད་དགོས་བབ་ཚེ། །འགྱོད་པ་སྐྱེས་ཀྱང་འཕྱིས་པ་ཙམ་མིན་ནེ། །ཞེས་པ་འདི་འགའ་ཞིག་ལ་དགོངས་པ་ཅན་གྱིས་གནང་བར་གདའོ།། །།ཞགས་པ་དེའུའི་བླ་མར། སྲིད་གསུམ་གྱི་འབྱོར་པར་མ་ཆགས་པར། །ཚེ་བློས་བཏང་སྒྲུབ་པའི་རྒྱལ་མཚན་ཚུགས། །ཐ་སྙད་ཀྱིས་འཇལ་བར་མི་ནུས་པའི། །དོན་རང་རྒྱུད་ལ་རྟོགས་པ་ཐེ་མི་ཚོམ། །མཚན་ལྡན་གྱི་བླ་མར་གསོལ་བ་ཐོབ། །ཚེ་འདི་དང་ཕྱི་མའི་ཕུན་ཚོགས་རྣམས། །བདེ་བླག་ཏུ་འབྱུང་བར་ཐེ་མི་ཚོམ། །དགྲ་གཉེན་ཞེས་རིས་སུ་མ་གཅོད་པར། །བདག་གཞན་མཉམ་ཉིད་ཀྱི་བྱང་སེམས་བསྒོམས། །ཆགས་སྡང་གི་མིང་ཡང་མི་གྲགས་པའི། །ཞིག་པོ་ཞིག་འབྱུང་བར་གདོན་མི་ཟ། །སྐྱིད་འདོད་ཀྱི་ཁོང་སྐྲན་མ་ཞུགས་པས། །རྐྱེན་ཐོག་ཏུ་སྤང་བློ་མ་ཤོར་ན། །ཆོས་རྫུ་ལ་སྐྱབས་པ་མ་ཡིན་པའི། །སྒོམ་ཆེན་ཞིག་ཡོང་བར་ཐེ་མི་ཚོམ། །རང་འདོད་ཀྱི་༼༢༡ན༤༡༽འདུན་མ་རླུང་ལ་བསྐུར། །ཟོས་བདེ་ལ་གཏན་གྱི་དགྲ་བོར་གཟུང་། །དུག་གསུམ་ལ་དྲན་ཤེས་ཀྱི་སོ་པ་གཞོག །གཞན་དོན་ལྷུན་གྲུབ་ཅིག་ཐེ་མི་ཚོམ། །ཞེས་སོ།། །།ལུས་བསྒྱུར་ལ་ཆོས་གོ་སྤྱོད་སྤྱོད་ནས། །གཏན་དོན་གྱི་ཕན་བདེ་མ་བསྒྲུབས་པས། །ཚེ་སྟོང་ཟད་སོང་བ་འཆི་ཀར་ཚོར། །དེ་མཐོང་གིན་སྙིང་ནས་ལྷ་ཆོས་དྲན། །ཐ་སྙད་ཀྱི་ཚིག་གུམ་འཐུ་འཐུ་ནས། །གལ་ཅན་གྱི་ཉམས་ལེན་མ་བྱས་པས། །ཆོས་མདོ་མེད་ལས་པ་འཆི་ཀར་ཚོར། །དེ་མཐོང་གིན་སྙིང་ནས་ལྷ་ཆོས་དྲན། །ཚུལ་འཆོས་ལ་ཁྲིམས་སུ་སེམས་སེམས་ནས། །ཆགས་བྲལ་གྱི་ཞེན་ལོགས་རས་སུ་བོར། །རྒྱུད་ཆོས་དང་གྱེས་པ་འཆི་ཀར་ཚོར། །དེ་མཐོང་གིན་སྙིང་ནས་ལྷ་ཆོས་དྲན། །འཕྲལ་ཕྱིད་ཀྱི་ལྷོ་ཕྱིར་ལྡོམ་ལྡོམ་ནས། །དོན་ལྡན་གྱི་སྒྲུབ་པ་བྱེད་མ་ཁོམ། །རྒྱུད་ཐ་མལ་དུ་ལས་པ་འཆི་ཀར་ཚོར། །དེ་མཐོང་གིན་སྙིང་ནས་ལྷ་ཆོས་དྲན། །ཁ་བཤད་ཀྱི་ཁྲམ་པ་བྱེད་བྱེད་ནས། །བློ་གཏད་ཀྱི་ཤེས་རྒྱུད་ཆུད་ཟོས་བཏང་། །རང་གཞན་གཉིས་འཕུང་དེ་འཆི་ཀར་ཚོར། །དེ་མཐོང་གིན་སྙིང་ནས་ལྷ་ཆོས་དྲན། །བག་འཁྱལ་ལ་ཞིབ་པོར་ལྟ་ལྟ་ནས། །རྒྱུ་འབྲས་ཀྱི་ལྷ་ཆོས་ཁྱད་དུ་བསད། །རྣམ་སྨིན་གྱི་སྡུག་བསྔལ་འཆི་ཀར་ཚོར། །དེ་མཐོང་གིན་སྙིང་ནས་ལྷ་ཆོས་དྲན། །ལར་སྙིགས་དུས་ཀྱི་ཆོས་པར་སེམས་པ་ཕུལ། །རང་ཉིད་ལ་མགོ་སྐོར་གྱི་གཡོ་ཐབས་མཁན། །ཁྱེད་རང་སེམས་ལ་རང་གིས་གྲོས་ཐབས་ན། །གཏམ་འདི་དོན་ལ་མྱངས་ཀྱིན་བླང་དོར་འཚལ། །གནས་ཁམས་གསུམ་གྱི་འཁོར་བ་ཉམ་ང་ཡང་། །བློ་བག་ཚ་མི་དགོས་སྐྱོབ་པའི་གཉེན། །ཕ་མཚན་ལྡན་གྱི་བླ་མས་བསྐྱངས་པའི་བུ། །མི་ང་རང་གི་འདུན་མ་གང་བྱས་བདེ། །ཞེས་དཀའ་བཅུ་སྨྲ་བ་སྟག །མིང་དངོས་དབང་ཕྱུག་དཔལ་ལྡན་ལ་གནས་ཆེན་མཁར་ཆུར་གདམས་པའོ།། །།ན་མོ་གུ་རུ། སྙིགས་དུས་གྲྭ་སློབ་ལྷོ་རྒྱབ་འཁོལ་པོ་ལ། །སྙན་རྒྱུད་གདམ་༼༢༡བ༤༢༽ངག་ཐང་མར་བརྡལ་ནས་ཅི། །དེ་བས་འཆད་པའི་རྣམ་གཡེང་དོར་ནས་སུ། །དབེན་པར་རང་སེམས་འཐུལ་དང་པདྨ་དཀར། །དུས་ངན་མི་འདི་བྱས་ཆུང་ཡུས་ཆེ་ལ། །བསྟུན་པ་བདེ་བདེའི་ངོ་བསྲུང་བྱས་ནས་ཅི། །དེ་བས་ཚེ་འདིའི་འཁྲི་བ་བཅད་ནས་སུ། །གཅིག་པུར་ཉམས་ལེན་གྱིས་དང་པདྨ་དཀར། །གཟུགས་བརྙན་བཙུན་པའི་སྡུག་གསོག་སྐྱོང་བྲན་ལ། །བསྟན་པ་འཛིན་པའི་མིང་བཟང་བཏགས་ནས་ཅི། །དེ་བས་འདོད་པའི་འདུ་ལོང་བོར་ནས་སུ། །རྩེ་གཅིག་སྒྲུབ་པ་གྱིས་དང་པདྨ་དཀར། །རྨོངས་པའི་ཁྲོད་དུ་ཡིན་ལུགས་ཆོས་ཀྱི་གཏམ། །དཔེ་དང་དོན་དུ་མཐུན་པ་བསྟན་ནས་ཅི། །དེ་བས་སྨྲ་བ་རྒྱང་རིང་སྤངས་ནས་སུ། །རང་རྒྱུད་ཆོས་དང་བསྟུན་དང་པདྨ་དཀར། །ཞེས་སོ།། །།མཚན་ལྡན་གྱི་རྗེ་བཙུན་འབྲུག་པའི་ཞབས། །མི་བདག་གི་སྤྱི་བོར་བཞུགས་ནས་ཀྱང་། །ལུས་ངག་ཡིད་བྱིན་གྱིས་བརླབས་ནས་སུ། །རྗེ་ཁྱེད་རང་འགྲུབ་པར་མཛད་དུ་གསོལ། སྤྱིར་ཁམས་གསུམ་འཁོར་བའི་རྒྱལ་ཁམས་ན། །བློ་གཏད་ཐུབ་ཀྱི་བདེ་བ་མ་མཐོང་ཞིང་། སྒོས་སྙིགས་མ་ལྔ་བདོའི་བོད་ཡུལ་དུ། །ཡིད་བསམས་ཀྱིན་དགའ་བ་སུ་ཡིས་རྙེད། ང་དེ་ཕྱིར་དམ་པའི་ལྷ་ཆོས་ལ། ཁ་ཙམ་ཞིག་མིན་པའི་འདོད་པ་སྐྱེས། ད་ཚེ་འདིའི་འཁྲ་བ་བཅད་ནས་སུ། གནས་དབེན་པ་མ་མེད་ཀྱི་རི་ཁྲོད་དུ། །རྩེ་གཅིག་ཏུ་སྒྲུབ་པ་སྙིང་པོར་བྱེད། །བློ་སྙོམས་སེམས་ལེ་ལོ་རྒྱང་དུ་དོར། །མཐུན་འཇུག་གི་ངོ་བསྲུང་བསྐྱུར་ནས་གཏོང་། །འདི་ཡང་ལྷ་ཁང་དུ་སྡེ་པ་སྐུ་སྐྱེ་ལ་གནང་བའོ།། །།ཁུ་བྱུག་སྔོན་མོ་ལྕང་གསེབ་རྒྱུ་བ་དགའ་མོ་ལྟ་འདུག་སྟེ། ཐག་རྙི་ཕྲ་མོས་གར་ཟིན་མེད་ལ་འདི་སྐྱོ་རང་དྲགས་ནས། །གཤོག་སྒྲོ་བརྐྱང་ནས་སྣང་བ་དེ་མོ་ལ་སྐོར་བ་བསྐོར་གྱིན། །ཐང་དཀར་རྒོད་པོའི་ཕྱིར་རྗེས་སྙེག་པ་ལ་ཡིད་སྨོན་འཆའོ། །ཉེའུ་སྐྱ་བོ་ཆུ་མཐའ་བསིལ་མོས་དགའ་མོ་ལྟ་འདུག་སྟེ། །ལྕགས་ཀྱུ་སྔོན་མོས་ནམ་འདེབས་མེད་༼༢༢ན༤༣༽པ་འདི་སྐྱོ་རང་དྲགས་ནས། །གཙང་ཆབ་གཞུང་གི་རྦ་གློང་མེད་པ་ལ་དཔའ་རྩལ་ངོམ་ཀྱིན། །ཉ་ཆེན་ཡོར་མོའི་ཕྱིར་རྗེས་སྙེག་པ་ལ་ཡིད་སྨོན་འཆའོ། །པདྨ་དཀར་པོ་འཆད་ཉན་བྱེད་པ་དགའ་མོ་ལྟ་འདུག་སྟེ། །འཆི་བདག་བདུད་པོས་ནམ་སླེབ་མེད་པ་འདི་སྐྱོ་རང་དྲགས་ནས། འཁྲི་བ་བཅད་ནས་མི་མེད་ལུང་སྟོང་ལ་སྒྲུབ་པ་བྱེད་ཀྱིན། །བཀའ་རྒྱུད་གོང་མའི་ཕྱིར་རྗེས་སྙེག་པ་ལ་ཡིད་སྨོན་འཆའོ། །འདི་ཡང་ཤུགས་འབྱུང་དུ་བགྱིས་པའོ།། །།འཁྲུངས་ས་བཟང་ཅིག་ལ་བཟང་པ་དེ་ཕྱིའི་དང་རྒྱ་མཚོ། །འཁྲུངས་ས་བཟང་ཀྱང་ལ་མ་ཆགས་པའི་མེ་ཤེལ་ཉི་མ་ཁྱོད་རང་། །གླིང་བཞི་བསྐོར་ཀྱིན་མུན་པ་སེལ་བ་དགའ་མོ་ལྟ་ཡིན་ཏེ། །འབྲལ་བས་སྐྱོ་བ་ཅིག་དོག་སའི་འདབ་བརྒྱ་ངེད་ལ་བྱུང་བས། ཕྱི་མིག་ཅིག་གཟིགས་ནས་དགུང་སྔོན་མཐོན་པོ་འདི་ཁར་བཞུགས་དང་། འཁྲུངས་ས་བཟང་ཅིག་ལ་བཟང་བ་དེ་གངས་རི་དང་དཀར་མོ། འཁྲུངས་ས་བཟང་ཀྱང་ལ་མ་ཆགས་པའི་དར་སེང་དཀར་མོ་ཁྱོད་རང་། རི་ཕུག་བསྐོར་ཞིང་དཔའ་རྩལ་ངོམ་པ་དགའ་མོ་ལྟ་ཡིན་ཏེ། འབྲལ་བས་སྐྱོ་བ་ཅིག་ནགས་ཀྱི་རི་དགས་ངེད་ལ་བྱུང་བས། །ཕྱི་མིག་ཅིག་གཟིགས་ནས་རི་ངོས་ཡངས་པ་འདི་ཁར་བཞུགས་དང་། འཁྲུངས་ས་བཟང་ཅིག་ལ་བཟང་བ་དེ་ཆོས་དབྱངས་དང་སྤྲོས་བྲལ། འཁྲུངས་ས་བཟང་ཀྱང་ལ་མ་ཆགས་པའི་མཚན་ལྡན་འབྲུག་པ་ཁྱོད་རང་། །འཁོར་བར་བསྐོར་ཀྱིན་གཞན་ཕན་མཛད་པ་དགའ་མོ་ལྟ་ཡིན་ཏེ། །འབྲལ་བས་སྐྱོ་བ་ཅིག་དད་ལྡན་བུ་ཚ་ངེད་ལ་བྱུང་བས། ཕྱི་མིག་ཅིག་གཟིགས་ནས་སྙིང་གི་གུར་ཁང་འདི་ཁར་བཞུགས་དང་། འཁྲིགས་གདུགས་ཉི་འོད་ལན་བརྒྱར་འཐུངས་པས། ཟིལ་དང་ར་ཞིམ་པོ་འདབ་རྒྱས་སྐྱུགས་བྱུང་། །སྐྱུགས་ཀྱང་ཆོག་སྣང་ཟེ་འབྲུ་རྒྱས་ཟིན། །བསམས་ཀྱིན་དགའ་ནས་བུང་པ་ངེད་ཚོ། །བར་སྣང་བདེ་མོར་ཕྱམ་པས་༼༢༢བ༤༤༽བྱའོ། །དབྱར་གསུམ་ནམ་པའི་ཁུ་རླངས་འཐིབས་པས། །སྦྲང་ཆར་ཟམ་ཟིམ་སྤྲིན་པས་སྐྱུགས་བྱུང་། །སྐྱུགས་ཀྱང་ཆོག་སྣང་ཆུ་རིས་གཡོས་དྲག །བསམས་ཀྱིན་དགའ་ནས་རྨ་བྱ་ངེད་ཚོ། །དོག་ས་བདེ་མོར་ཕྱམ་པས་བྱའོ། །ཟབ་རྒྱས་ཆོས་ཀྱི་གནད་མཚངས་ལོན་པས། །གདམས་ངག་ཟབ་མོ་བླ་མས་བསྟན་བྱུང་། །བསྟན་ཀྱང་ཆོག་སྣང་སྐལ་བར་ལྡན་འདུག །བསམས་ཀྱིན་དགའ་ནས་རྡོ་རྗེ་སྤུན་ཚོ། །དོར་བདེ་མོར་ཕྱམ་པས་བྱའོ། །ཞེས་སོ།། །།སེམས་འཐུལ་གྱི་སངས་རྒྱས་ག་ནའང་དཀའ། །སེམས་འདུལ་ལ་མ་ཡེངས་པའི་སྒོམ་པ་གཅེས། །སེམས་རང་རིག་གི་གཞི་རྩ་ཆོད་གྱུར་ན། །སེམས་ངོ་ཤེས་ཀྱི་གྲུབ་ཐོབ་འབྱུང་ངོ་བུ། །རྐྱེན་ཐོག་ཏུ་མི་འདྲེའི་སྤྱོད་པས་ཅི། །རྐྱེན་གང་བྱུང་ལམ་དུ་ཁྱེར་བ་ལ། །རྐྱེན་གང་བྱུང་ཐུག་ཕྲད་འབུར་འཇོམ་གྱིས། །རྐྱེན་སྣང་རང་གྲོལ་དུ་འཆར་ངེས་ཡིན། །རེ་དོགས་ཀྱི་འཆིང་བ་མ་གྲོལ་བར། །རེ་བའི་འབྲས་བུ་མི་རྙེད་པས། །རེ་བ་གང་བྱུང་དོགས་པ་མཐོང་། །རེ་ཞིག་ན་ཐམས་ཅད་གཉེན་དུ་ཁུགས། །མངའ་རིས་ཟངས་དཀར་བ་དཔོན་པོ་བློ་གྲོས་ལ་མཁར་ཆུར་གདམས་པའོ།། །།མི་རྟོག་པ་ལ་ལྷོད་དེ་བཞག་པས། །བདེ་བའི་རང་གདངས་འོད་གསལ་དུ་ཤར་ནས། །འགྱུ་བའི་ཕུ་ཐག་རིག་ཐོག་ཏུ་བཅད་པ། །ཨ་ལེ་མ་དཔའ་བོ་དགའ་བའི་གླུ་སྒྲ། །ལ་ལེ་མ་དཔའ་མོ་དགྱེས་པའི་གར་སྟབས། ཨ་འོ་བྱས་རྩེ་གཅིག་གི་དོ་རར་ཤིགས་ཤིགས། །འཁྲུལ་ཐོག་ཏུ་གློད་པས་དོར་རྒྱུ་མ་རྙེད། །གྲོལ་ཐོག་ཏུ་བཞག་པས་བསྣན་རྒྱུ་ཟད་འདུག །བླང་དོར་མེད་པ་འདི་སེམས་ཀྱི་གནས་ལུགས། །དགའ་འོ་བྱས་བླ་མ་དགྱེས་པའི་མཆོད་སྤྲིན། །སྐྱིད་དོ་བྱས་མཁའ་འགྲོ་མཉེས་པའི་དམ་རྫས། །སྤྲོས་བྲལ་གྱི་མཁའ་ལ་འབོལ་ལེ་འཛོམ་འཛོམ། །ཡུལ་ཐོག་ཏུ་བཞག་པས་སྟོང་པར་ལངས་སོང་། །སེམས་ཐོག་ཏུ་གནས་པས་བདེ་ཆེན་དུ་གྲོལ་བ། །ཟུང་འཇུག་འདི་སྣང་སེམས་ཀྱི་སྟེང་ནས་རྙེད་༼༢༣ན༤༥༽བ། ཨའོ་གཡས་པ་འདི་རྡོ་རྗེའི་གར། །ཏོ་ཁྱངས་གཡོན་པ་འདི་དྲིལ་བུའི་འདུག་སྟངས། །རོ་གཅིག་གི་དོ་ར་ལ་རལ་ས་གསིག་གསིགས་པས་བྱའོ། །མཉམ་ཉིད་ལས་གཏན་དུ་མ་གཡོས། །ཐུགས་རྗེའི་ཆུ་བོ་ནི་བརྡོལ། །གང་བྱས་ཆོས་སྐུའི་ཡོ་ལང་འདི་ཁ །དགའ་འོ་སྨྲས་ཏེ་གཡས་པ་རྒྱོབ། །སྐྱིད་པ་སྨྲས་ཏེ་གཡོན་པ་བསྒྱུར་ནས། །སྒོམ་མེད་ཆེན་པོ་ན་འབོལ་མོ་ཤོག་ཤོག །དཔོན་ཚང་ལྷ་མོ་རིག་འཛིན་ལ་བློ་གསལ་པདྨ་དཀར་པོས་སྦྱིན་པའི་གླུའོ།། །།རྒྱལ་བྱེད་ཀྱི་ཚལ་དུ་རང་སྤྱོད་ལ་བསམས་གཞིགས་བཏང་བས་ཡིད་སྐྱོ། །བླ་མ་དྲན། །ཕ་རྗེས་སུ་བསབ་པ་ཞིག་མ་བྱུང་ན་བརྒྱུད་པ་བཟང་པོ་འདིའི་རིགས་སུ་སྐྱེས་པ་ལ་དོན་མི་འདུག་བསམ་ནས་གླུ་འདི་བླངས་སོ། །རྗེ་དྲན་གྱིན་དུ་གདུང་སེམས་ཇེ་ཆེར་འཕེལ། །འབངས་ང་ཡིས་ནི་འདི་ཕྱི་བར་མདོར། །བློ་གཏོད་ས་རུ་བྱས་པ་ཁྱོད་ལས་མེད། །ཕ་མཇལ་ཙམ་ཞིག་གནང་དང་འབྲུག་པའི་རྗེ། །ང་བསྟན་པའི་གཟུགས་བརྙན་ཞིག་སྐྱོང་བ་འདི། །མི་ཆེན་པོའི་ངོ་འཛིན་གྱི་ཐེས་སུ་འདུག །ཟིན་མེད་ཀྱི་སེམས་གཟུང་འདི་བསྐྱུར་ནས་སུ། །ཕ་ཁྱེད་རྗེས་འབྲང་བའི་ལྷ་ཆོས་ཞིག་བྱེད། །བུའི་འདོད་དོན་འགྲུབ་པ་ཞིག་བྱིན་གྱིས་རློབས། །མིང་བཙུན་པ་སྐད་བཏགས་པའི་བློ་འདྲིད་ཀྱི། །སྐྲ་མེད་ཀྱི་དྲུང་འཁོར་བསྐྱང་བས་ནི་བྲེལ། དགོས་མེད་ཀྱི་འདུ་ཚོགས་འདི་བསྐྱུར་ནས་སུ། ཕ་ཁྱེད་རྗེས་འབྲང་བའི་ལྷ་ཆོས་ཞིག་བྱེད། བུའི་འདོད་དོན་འགྲུབ་པ་ཞིག་བྱིན་གྱིས་རློབས། །ཁ་བཤད་འདོད་བསྒྲུབ་པའི་བསླབ་སྦྱངས་འདི། །ཚེ་ཕལ་ཆེར་ཟད་འཇུག་གི་སྙད་ཁར་གོ། ཁྲམ་གཏམ་ལ་ཞེན་པ་འདི་བསྐྱུར་ནས་སུ། ཕ་ཁྱེད་རྗེས་འབྲང་བའི་ལྷ་ཆོས་ཞིག་བྱེད། བུའི་འདོད་དོན་འགྲུབ་པ་ཞིག་བྱིན་གྱིས་རློབས། །ཆོས་བཤད་དོ་སྙམ་ནས་ཡུས་པ་འདིས། །ཐོས་ལོ་དོན་གཉེར་བའི་ཚེ་འབྱིད་དུ་གོ། །འཁོར་མེད་ཀྱི་གཡར་ཁྲལ་འདི་བསྐྱུར་ནས་སུ། །༼༢༣བ༤༦༽ཕ་ཁྱེད་རྗེས་འབྲང་བའི་ལྷ་ཆོས་ཞིག་བྱེད། །བུའི་འདོད་དོན་འགྲུབ་པ་ཞིག་བྱིན་གྱིས་རློབས། །གཞན་ཕན་དུ་བསམས་ནས་འགྲོ་འགྲོ་བ། །བྱེད་དགོས་ངེས་ཀྱི་བྱ་བའི་བཤོལ་འདེབས་ཏེ། །ད་མི་ཁྱུའི་བཤུལ་སྙེག་འདི་བསྐྱུར་ནས་སུ། །ཕ་ཁྱེད་རྗེས་འབྲང་བའི་ལྷ་ཆོས་ཞིག་བྱེད། །བུའི་འདོད་དོན་འགྲུབ་པ་ཞིག་བྱིན་གྱིས་རློབས། །ཉེའོ་སྙམ་བསམ་ནས་འགྲོགས་འགྲོགས་པ། །སྙིང་གཏམ་དེ་རླུང་ལ་བསྐུར་མཁན་དུ་མཐོང་། །གཉིས་ཚོགས་ཀྱི་ཡོང་གཏམ་འདི་བསྐྱུར་ནས་སུ། །ཕ་ཁྱེད་རྗེས་འབྲང་བའི་ལྷ་ཆོས་ཞིག་བྱེད། །བུའི་འདོད་དོན་འགྲུབ་པ་ཞིག་བྱིན་གྱིས་རློབས། །ཞེས་སོ།། །།དཔལ་ཕྱོགས་དུས་ཀུན་ལས་རྣམ་རྒྱལ་བའི། །མགོན་གྲུབ་པའི་དཔའ་བོ་ར་ལུང་པ། །མཚན་ཐོས་པས་འཚེངས་པའི་རྗེ་བཙུན་ཁྱེད། །འབངས་རྣམ་གཡེངས་ཅན་ལ་ཐུགས་རྗེས་གཟིགས། །ཆུང་མ་ལས་སྐྱེས་ནས་ད་བར་ལ། །ཚེ་བློས་བཏང་གི་ཆོས་ཤིག་བྱའོ་སྙམ། །འཕྲལ་བསྟན་པར་བསྙད་པའི་འཛིན་སྐྱོང་འདིས། སྔན་ཆད་ཀྱི་བསམ་མནོ་ངོ་མར་ཐལ། ད་དུང་མཐུན་འཇུག་ལ་མི་འབྱམས་པར། ཆོས་སྙིང་ནས་བྱེད་པར་ཐུགས་རྗེས་གཟུང་། ཆུང་བསྟན་པའི་སྒོ་རུ་ཞུགས་ཙ་ན། །ཆོས་རྒྱུད་ཁེལ་བ་ཞིག་བྱའོ་སྙམ། འཕྲལ་བཤད་པར་བསྙད་པའི་ཁྲམ་གཏས་འདིས། །སྔན་ཆད་ཀྱི་བསམ་མནོ་རོ་མར་ཐལ། །ད་དུང་ཐ་སྙད་ལ་མི་འབྱམས་པར། །ཆོས་རྐྱེན་དང་འདྲེ་བར་ཐུགས་རྗེས་གཟུང་། །ཆུང་སྨྲ་ཤེས་དོན་གོ་ཙམ་ཚུན་ནས། །རྒྱུན་ཉོན་མོངས་འཐུལ་པ་ཞིག་བྱའོ་སྙམ། །འཕྲལ་འབྲུག་པར་བསྙད་པའི་ཕྱོགས་རིས་འདིས། །སྔན་ཆད་ཀྱི་བསམ་མནོ་རོ་མར་ཐལ། །ད་དུང་ཆགས་སྡང་ལ་མི་འབྱམས་པར། །དག་སྣང་འབྱོངས་པ་ཞིག་ཐུགས་རྗེས་གཟུང་། །ཆུང་མཚན་ལྡན་བླ་མས་ཟིན་ཙ་ན། །བརྒྱུད་པ་ཟིན་པ་ཞིག་བྱའོ་སྙམ། །འཕྲལ་གདུལ་བྱར་བསྙད་པའི་འདུ་ལོང་འདིས། །སྔན་ཆད་ཀྱི་བསམ་མནོ་རོ་མར་ཐལ། །༼༢༤ན༤༧༽ད་དུང་རྣམ་གཡེང་ལ་མི་འབྱམས་པར། །འབྲེལ་ཚད་དོན་ལྡན་ཞིག་ཐུགས་རྗེས་གཟུང་། །འདི་ཡང་རྒྱལ་རྩེར་རོ།། །།དང་པོ་ལྷ་ཆོས་ཚུལ་བཞིན་མཛད་ནས། །བར་དུ་མཆོག་གི་དངོས་གྲུབ་བརྙེས་ཏེ། །མཐའ་མར་གཞན་དོན་འབའ་ཞིག་མཛད་པ། །ང་ཡི་དང་བླ་མ་མཚན་ལྡན་འབྲུག་པ་ཁོང་ཡིན། །དང་པོ་ལྟ་བས་སྒྲོ་འདོགས་བཅད་ནས། །བར་དུ་རླུང་སེམས་ཐིག་ལེ་གཅུན་ཏེ། །མཐའ་མར་སྤྱོད་པས་བོགས་འདོན་བྱེད་པ། །ང་ཡི་དང་དམ་ཆོས་བསྲེ་འཕོ་སྐོར་གསུམ་ཁོང་ཡིན། །དང་པོ་ཚེ་འདིའི་ཞེན་པ་དོར་ནས། །བར་དུ་ཐོས་བསམ་སྒོམ་ལ་འབད་ཅིང་། །མཐའ་མར་རང་འདོད་ཡུལ་ནས་འདོན་པ། །ང་ཡི་དང་རྣམ་ཐར་གཞན་དོན་བྱེད་པ་ཁོང་ཡིན། །དང་པོ་ལང་ཤོར་སེམས་རྒྱུད་བཏུལ་ནས། །བར་དུ་རིག་པ་རང་སོ་གཟུང་སྟེ། །མཐའ་མར་རྐྱེན་གྱི་ཐོག་ཏུ་བསྲེ་བ། །ང་ཡི་དང་ཉམས་ལེན་མ་བཅོས་གཞག་པ་ཁོང་ཡིན། །དང་པོ་རྩོལ་བསྒྲུབ་རྣམ་གཡེང་མ་མཆིས། །བར་དུ་བསྲུང་སྐྱོབ་ངལ་བ་མེད་ཅིང་། །མཐའ་མར་མཛད་པའི་དོགས་པ་བྲལ་བ། །ང་ཡི་དང་འཕགས་ནོར་བཅུད་ལེན་ཟབ་མོ་ཁོང་ཡིན། འདི་བྱང་ཁྲི་ལྕམ་ལའོ།། །།མཚན་ཐོས་ཀྱིན་དུ་སྐྱོབ་བསངས་པའི་རྗེ། །ཡིད་དྲན་གྱིན་དུ་མོས་གུས་སྐྱེ་བའི་མགོན། །བློ་བསམ་ཀྱིན་དུ་ཐུགས་རྗེ་ཆེ་བའི་སྐྱབས། །སེམས་བརྟགས་ཀྱིན་དུ་དྲེན་ཅན་འབྲུག་པ་མཁྱེན། །ཚེ་འདི་ལ་ཙམ་ཐུབ་ཀྱི་ངེས་མེད། །འཆི་བདག་ནི་དལ་བྲེལ་གྱི་དུས་མི་བལྟ། །རྐྱེན་གློ་བུར་དུ་འོང་པ་འདི་མཐོང་བཞིན་དུ། །སྙིང་ནས་ཀྱི་ལྷ་ཆོས་ཤིག་མི་བྱེད་རི། །བློ་མཛའ་བས་ཀྱང་བཤོལ་བའི་སྐབས་མེད་ཅིང་། །ཡིད་གཅུགས་ཀྱང་ནི་འཛིན་པའི་མཐུ་ཟད་ནས། །ཉེ་དུ་དང་འབྲལ་བ་འདི་མཐོང་བཞིན་དུ། །སྙིང་ནས་ཀྱི་ལྷ་ཆོས་ཤིག་མི་བྱེད་རི། །ཡུལ་ཁང་ཁྱིམ་བཙན་པ་ཚོ་ཕྱི་ནས་བོར། །ནོར་བསགས་པའི་ཕྱོགས་ལ་ནི་མིག་ཅེ་རེ། །རང་ལག་སྟོང་དུ་ཆས་པ་འདི་མཐོང་བཞིན་དུ། །སྙིང་ནས་ཀྱི་ལྷ་ཆོས་ཤིག་མི་༼༢༤བ༤༨༽བྱེད་རི། །ལུས་གཅེས་གཅེས་སུ་བསྐྱངས་པ་བལྟབ་སྟེ་བཞག །བྱད་ཕྱི་བསྟར་གྱིས་སྦྱངས་པ་བྱ་ཁྱིས་ཟ། །མིང་ཙམ་གྱི་ལྷག་མ་འདི་མཐོང་བཞིན་དུ། །སྙིང་ནས་ཀྱི་ལྷ་ཆོས་ཤིག་མི་བྱེད་རི། །ཆོས་ཁ་བཤད་ཀྱི་ཡོང་ཤས་དགོས་ཀར་གཏོང་། །ཚེ་སོམ་གཉིས་ཀྱི་བྱས་པ་ཁྲམ་པར་ཤེས། །འཆི་དུས་ཀྱི་བྲད་སྡངས་འདི་མཐོང་བཞིན་དུ། །སྙིང་ནས་ཀྱི་ལྷ་ཆོས་ཤིག་མི་བྱེད་རི། །ངས་གཏན་དུ་གང་ཕན་གྱི་མནོ་བསམ་བཏང་། །ཚེ་བློས་བཏང་གི་ཆོས་ལས་གཞན་མ་རྙེད། །སྔན་ཆད་རྐྱེན་དབང་གིས་ཅུང་ཟད་གནོད། །ད་ཞེན་པའི་འཁྲི་བ་མི་གཅོད་རི། །མི་ངེད་ཕྱིར་འབྲང་འདོད་ཀྱི་ཆོས་མཛད་རྣམས། །ཁ་མཁས་དང་ལུས་བཅོས་ལ་མ་འབྱམས་པར། །ཕ་བླ་མའི་བཞུགས་གནས་རི་ཁྲོད་དུ། །གྱོང་ལྟོ་གོས་གཏམ་ལ་བསྐུར་ཏེ་སྒྲུབས། །འདི་ཡང་རྒྱལ་རྩེ་རུའོ།། །།ངས་བཀའ་རྒྱུད་ཀྱི་སྙིང་པོ་འབྲུག་པ་བསྟེན། །ཆོས་ཤེས་སར་གཏུགས་པའི་གནད་ཀ་དེས། །ཕྱི་སྣང་སྲིད་ཀྱི་འཁོར་ལོ་དཔེ་ཆར་ཤར། །སྡུག་བཙིར་གྱིས་བསླབ་སྦྱངས་ཞིག་མ་དགོས་པར། །བློ་རྣོ་ཞིང་གསལ་བའི་མཁས་པར་གྱུར། །ཤེས་སོ་སྙམ་སྦོས་པ་ཚོའི་འཇུ་སྨན་ཡིན། །ཨ་ལ་ལ་བདེན་རྫུན་ཐུག་ན་གསལ། །མི་རློམ་པ་ཅན་ཡོད་ན་རྩོད་པས་ཆོག །ངས་རང་རྒྱུད་ལ་ངན་ལང་མ་བཏང་བར། །བློ་དྲན་ཤེས་ཀྱིས་ཉམས་སུ་བསྟར་བ་དེས། །ཁོང་དུག་ལྔའི་དགྲ་བོ་རྣམས་སྲིད་དུ་ཆོད། །སྡུག་འཁུམས་ཀྱིས་སྒོ་གསུམ་མ་མནར་བར། །གྲོགས་འཕགས་པ་རྣམས་དགྱེས་པའི་བཙུན་པར་གྱུར། །བཙུན་མི་བཙུན་གཞལ་བ་ལ་འབྱེད་ཐང་ཡིན། །ཨ་ལ་ལ་བདེན་བརྫུན་གཉིས་གཞིགས་ན་གསལ། །མི་སུམ་ཉི་ཅན་ཡོད་ན་ངོ་ལྐོག་གཟིགས། །ངས་གཞན་དོན་འབའ་ཞིག་སེམས་སེམས་ནས། །རང་འདོད་ཀྱི་ཁོང་མཚང་ཚོ་འཐོན་པ་དེས། །སྡུག་བསྔལ་དང་ལེན་གྱི་གོ་ཆ་རྙེད། །ཕྱོགས་རིས་ཀྱི་རྨོངས་ཞེན་མ་མཆིས་པར། །བྱམས་སྙིང་རྗེ་ཚད་༼༢༥ན༤༩༽མེད་ཀྱི་གཞན་དབང་སོང་། །ཁོང་བཟང་པོར་གྲགས་པ་ཚོའི་བཀྲུ་སྨན་ཡིན། །ཨ་ལ་ལ་བདེན་རྫུན་འབྲེལ་གྱིན་གསལ། །མི་ལོག་ལྟ་ཅན་ཡོད་ན་ཉེ་རིང་ལྟོས། །འདི་ཡང་རྒྱལ་རྩེར་ལྷོ་པ་དཔོན་ཚང་ལྷ་མོ་རིག་འཛིན་ལའོ།། །།ནམ་གཞག་གཏན་དུ་བའི་སྐྱབས་མགོན། །རུས་གསུམ་སངས་རྒྱས་ཀྱི་སྤྱི་གཟུགས། །བལྟས་པ་ངོས་མེད་ཀྱི་སྐུ་ཅན། །མཚན་ལྡན་འབྲུག་པ་དེ་དྲན་པ། །ཐ་སྙད་ལུང་རིགས་ངང་མཐུན་པས། །ཡིན་ལུགས་ངེས་དོན་ལ་གཞོལ་བའི། །གང་གསུང་གདམ་ངག་གི་གཏེར་ཆེན། །མཚན་ལྡན་འབྲུག་པ་དེ་དྲན་པ། །སྐལ་ལྡན་ཆོས་བྱེད་ཀྱི་དབུས་ན། །དད་ལྡན་ཐར་པ་ལ་དགོད་པའི། །ཡ་མཚན་རྣམ་ཐར་གྱི་རོལ་པའི། །མཚན་ལྡན་འབྲུག་པ་དེ་དྲན་པ། །ཡོན་གནས་རྗེ་བཙུན་གྱི་དབུས་ན། །མཉམ་མེད་དགས་པོ་ཡི་དཀར་བརྒྱུད། །ཀུན་འདུས་ཡིད་བཞིན་གྱི་ནོར་བུ། །མཚན་ལྡན་འབྲུག་པ་དེ་དྲན་པ། །མཐོང་ཐོས་དྲན་རེག་གི་གདུལ་བྱ། །ཁམས་གསུམ་འཁོར་བ་ལས་ཕྱུངས་ནས། །ཐར་པའི་བདེ་ལམ་ལ་འགོད་པའི། །མཚན་ལྡན་འབྲུག་པ་དེ་དྲན་པ། །སྙིགས་དུས་བཤེས་གཉེན་གྱི་ཁྲོད་ན། ཆོས་བརྒྱད་མགོ་སྙོམས་སུ་བྱེད་ཅིང་། །དམ་ཆོས་དམ་ཆོས་སུ་སྟོན་པའི། །མཚན་ལྡན་འབྲུག་པ་དེ་དྲན་པ། །ཅེས་སོ།། །།ཁོང་ཐུལ་བར་དཀའ་བའི་བདག་འཛིན་འདི། །སེམས་གཉུག་མའི་ཕ་མཁར་དང་ཕྲལ་ནས། །གནས་མི་བཟད་འཁོར་བའི་བརྩོན་རར་བཅིངས། །དགྲ་དེ་འདྲ་ཐུལ་ན་དཔའ་བོ་ཡིན། །དོན་ཡིན་ལུགས་རང་ངོ་ཤེས་པ་འདིས། །སྤང་གཉེན་གྱི་རེ་དོགས་ཀུན་བྲལ་ནས། །གནས་ཞི་བའི་བདེ་ལ་སྐྱིད་དུ་བཅུག །གཉེན་དེ་འདྲ་མཐོང་ན་ཕོ་སྐྱེས་ཟེར། །ཅེས་སོ།། །།ཨའོ་རང་དྲོ་འཇམ་ད་ཁྱོངས་ནས་འཁྲིགས་གདུགས་ང་སླེབ་ཡོད། །དགའ་མོས་གྱིས་ཨང་དགུང་བསངས་ཀྱི་མཐོན་པོ། །བསམ་ཚད་འགྲུབ་པ་འདབ་བརྒྱ་ལ་འོད་དག །༼༢༥བ༥༠༽སྐྱིད་ཟེར་ར་གཡུ་སྦྲང་གཞོན་ནུའི་བགོས་སྐལ། །སྦྲང་ཆར་ཐོགས་ནས་ལྷོ་སྤྲིན་ང་སླེབ་ཡོད། །དགའ་མོས་གྱིས་ཨང་ནམ་ལའི་རྒྱལ་མོ། །བསམ་ཚད་འགྲུབ་པ་དོགས་ལ་འོང་དག །སྐྱིད་ཟེར་ཁུ་བྱུག་སྔོན་མོའི་བགོས་སྐལ། །ལེགས་བཤད་འཁྱེར་ནས་པད་དཀར་དུ་སླེབ་ཡོད། །དགའ་མོས་ཀྱིས་ཨང་ཐུབ་བསྟན་གྱི་བགྲེས་པོ། །བསམ་ཚད་འགྲུབ་པ་ཐར་འདོད་ལ་འོང་དེག །སྐྱིད་ཟེར་ར་དད་ཅན་སློབ་མའི་བགོས་སྐལ། །འདི་རྣམས་འཕྱོང་རྒྱས་སུའོ།། །།དཔལ་དྲི་མ་མོད་པའི་ཞིང་ཁམས་སུ། །ཡོངས་ཉི་ཟླ་ལྟར་གྲགས་ཤིང་རྟའི་སྲོལ། །རྗེ་བཀའ་རྒྱུད་བླ་མས་གཏོད་པའི་ལམ། །སེམས་གཉུག་མའི་དོན་དང་སྤྲོད་པའི་ཐབས། །ཡིད་རྩེ་གཅིག་ཏུ་བསྒོམ་པའི་རྣལ་འབྱོར་རྣམས། །མཆོག་ཐར་པའི་གོ་སར་འཇུག་པ་ལ། །བདེ་བླག་ཏུ་གེགས་མེད་ཤིས་པར་རྙེད། །མ་ཁམས་གསུམ་འགྲོ་བའི་དོན་འགྲུབ་ཅིང་། །དཔལ་འབྲུག་པའི་བསྟན་པ་དར་བ་སྙམ། །འདི་གཞུང་གསེར་ཏོག་དུའོ།། །།རྗེ་དྲན་ཀྱིན་དུ་གདུང་ཤུགས་ཇེ་ཆེར་ཐལ། །རྗེ་དྲན་བཞིན་དུ་གདུང་སེམས་མི་འཕེལ་དུ། །སྔར་མཇལ་ས་ཡོད་པ་དང་ད་མ་འདྲ། །ཕ་ཁོང་གི་རྣམ་ཐར་དེ་གཞན་ལ་མེད། །འདི་བསམས་ཀྱིན་བསམས་ཀྱིན་དུ་བླ་མ་དྲན། །བསྒོམས་ཀྱིན་དུ་མཚུངས་མེད་ཀྱི་འབྲུག་པ་དྲན། །ཁོང་མི་ཚེ་རིང་སྦྱངས་པའི་མཁས་པས་ཀྱང་། །དོན་ཡིན་ལུགས་སུ་བསྙད་པ་བློས་མི་འཆུན། །ཕ་གཅིག་ཤེས་ཀུན་གྲོལ་གྱི་རྒྱལ་ཁམས་ན། །ཆོས་ཚིག་རེ་ལ་འཁོར་འདས་ཀྱི་མདོ་རྒྱས་སྟོན། །འདི་བསམས་ཀྱིན་བསམས་ཀྱིན་དུ་བླ་མ་དྲན། །བསྒོམས་གྱིན་དུ་མཚུངས་མེད་ཀྱི་འབྲུག་པ་དྲན། །ཁོང་གདམས་ངག་སྣ་ཚོགས་པའི་གཏེར་བདག་པོ། ལམ་བསྒྱུར་ཁ་བསྒྱུར་ཁ་ལ་སངས་རྒྱས་འཚོལ། །ཕ་མ་ཡེངས་པའི་འཇོག་ཚུལ་གཅིག་པུ་ལ། །ཐེག་གསུམ་གྱི་བྱང་ཆུབ་དེ་སོ་སོར་བྱོན། །འདི་བསམས་ཀྱིན་བསམས་ཀྱིན་དུ་བླ་མ་དྲན། །བསྒོམས་༼༢༦ན༥༡༽ཀྱིན་དུ་མཚུངས་མེད་ཀྱི་འབྲུག་པ་དྲན། །ཁོའོ་སྒྲུབ་པ་མཛད་མཛད་པའི་ཞིག་པོ་ཆོ། །བླང་དོར་གྱི་སྤུ་རིས་དེ་ཅི་ལས་ཕྱེད། །ཕ་རྐྱེན་ངན་ལ་དགེ་བའི་བཤེས་དགོངས་ནས། །ལམ་གང་ཤར་ལ་དགག་སྒྲུབ་མི་དགོས་གསུངས། །འདི་བསམས་ཀྱིན་བསམས་ཀྱིན་དུ་བླ་མ་དྲན། །བསྒོམས་ཀྱིན་དུ་མཚུངས་མེད་ཀྱི་འབྲུག་པ་དྲན། །ཁོང་ཕལ་ཆེར་བྱང་སེམས་ཀྱི་ཞལ་པོ་འདོན། །མི་གཞན་མ་ལེགས་པའི་ཚེ་སྡུག་བསྔལ་མཛད། །ཕ་རང་ཉིད་ནི་དམན་པའི་ཁྲོད་ཞུགས་ནས། །མི་གཞན་མ་ཅི་ལེགས་ཀྱི་ཐབས་རྩོལ་མཛད། །འདི་བསམས་ཀྱིན་བསམས་ཀྱིན་དུ་བླ་མ་དྲན། །བསྒོམས་ཀྱིན་དུ་མཚུངས་མེད་ཀྱི་འབྲུག་པ་དྲན། །ཁོང་འདུལ་ཁྲིམས་ལ་གཙོ་བོར་མཛད་དགོངས་པ། སྡེ་དགོན་གྱི་ཁྲོད་དུ་ཀ་ཁ་འཚོལ་མཛད། །ཕ་ཉོན་མོངས་ཀྱི་སྔན་ཆད་རེངས་རེངས་པའི། །རང་སེམས་འདི་བཏུ་ལ་ན་འདུལ་བར་སྟོན། །འདི་བསམས་ཀྱིན་བསམས་ཀྱིན་དུ་བླ་མ་དྲན། །བསྒོམས་ཀྱིན་དུ་མཚུངས་མེད་ཀྱི་འབྲུག་པ་དྲན། །ཁོང་ཡི་དམ་གྱི་ལྷ་ཚོགས་བསྙེན་སྒྲུབས། །ཕྱི་དགྲ་བགེགས་ཀྱི་སྟེང་དུ་འཕྲིན་ལས་སྟོན། །ཕ་རང་ལུས་ཀྱི་ལྷ་ལ་མཆོད་མཆོད་ནས། །དགྲ་ངར་འཛིན་གྱི་སྟེང་དུ་མཐུ་གཏད་སྤུངས། །འདི་བསམས་ཀྱིན་དུ་བླ་མ་དྲན། །ཁོང་ཡི་དམ་གྱི་ལྷ་ཚོགས་བསྙེན་སྒྲུབ་པ། །ཕྱི་དགྲ་བགེགས་ཀྱི་སྟེང་དུ་འཕྲིན་ལས་སྟོན། །ཕ་རང་ལུས་ཀྱི་ལྷ་ལ་མཆོད་མཆོད་ནས། །དགྲ་ངར་འཛིན་གྱི་སྟེང་དུ་མཐུ་གཏད་སྤུངས། །འདི་བསམས་ཀྱིན་བསམས་ཀྱིན་དུ་བླ་མ་དྲན། །བསྒོམས་ཀྱིན་དུ་མཚུངས་མེད་ཀྱི་འབྲུག་པ་དྲན། །ཁོང་སྣང་བ་ལ་རང་དབང་འདུས་འདུས་པོ། །མྱོས་བྱེད་ཀྱི་རང་ཉམས་སྟོན་སྟོན་པའི་ངང་། །ཕ་གཞན་གྱི་དོན་དུ་ནི་མི་འགྱུར་ན། །སྐུ་རྣམ་འགྱུར་ལ་འགྱུར་བ་མི་མངའ་བས། །འདི་བསམས་ཀྱིན་བསམས་ཀྱིན་དུ་བླ་མ་དྲན། །༼༢༦བ༥༢༽བསྒོམས་ཀྱིན་དུ་མཚུངས་མེད་ཀྱི་འབྲུག་པ་དྲན། །འདི་རྒྱལ་བྱེད་ཚལ་དུ་ཤུགས་འབྱུང་དུའོ།། །།ངའི་དང་བླ་མཚན་ལྡན་འབྲུག་ཕ་ལ་ཐུགས་རྗེ་ཡོད་གྲག་འོ་འཕྲིན་ལས་འཆོལ་དང་ཡའི། །ངའི་དང་ཕ་ཡུལ་རྒྱལ་ཁམས་ཕྱོགས་མེད་ལ་གུ་ཡངས་ཡོད་གྲག་འོ་ཉམས་དགའ་སྐྱོངས་དང་ཡའི། ངའི་དང་ཉེ་ཚན་འགྲོ་དྲུག་སེམས་ཅན་ལ་ཉེ་རིངས་མེད་གྲག་འོ་བྱང་སེམས་སྤྱོངས་དང་ཡའི། །ངའི་དང་ཕ་ནོར་འཕགས་པའི་ནོར་བདུན་ལ་ཟད་པ་མེད་གྲག་འོ་ཀུན་ལ་བགོས་དང་ཡའི། །ངའི་དང་ལྟ་བ་ཕྱག་རྒྱ་ཆེན་པོ་ལ་ལྟད་མོ་ས་དང་ཡའི་བལྟ་རྒྱུ་ཨེ་འདུག་གཟིགས། ངའི་དང་སྒོམ་པ་ནཱ་རོ་ཆོས་དྲུག་འདི་ཡེངས་མེད་སྒོམས་དང་ཡའི་ཟབ་ཁྱད་ཨེ་འདུག་གཟིགས། ངའི་དང་སྤྱོད་པར་སྙོམས་སྐོར་དྲུག་ལ་སྤྱད་པ་སྤྱོད་དང་ཡའི་སྤང་བླང་ཨེ་འདུག་གཟིགས། །ངའི་དང་འབྲས་བུ་ཤར་གྲོལ་དུས་མཉམ་ལ་ཡ་མཚན་ཡོད་གྲག་འོ་རེ་དོགས་ཨེ་འདུག་གཟིགས། བློ་བདེ་པོ་གུ་ཡངས་པ་གནས་ལུགས་ཕྱག་རྒྱ་ཆེན་པོའི་ངང་དུ་བློ་བདེ་པོ་གུ་ཡངས་པ། བློ་བདེ་ལ་གུ་ཡངས་པ་འཁྲུལ་ལུགས་འཁོར་བའི་རང་མཚད་རིག་པ་བློ་བདེ་པོ་གུ་ཡངས་པ། བློ་བདེ་པོ་གུ་ཡངས་ལ་ད་ལྟ་གང་ཤར་གཞི་མེད་རྩ་བྲལ་བློ་བདེ་པོ་གུ་ཡངས་པ། བློ་བདེ་པོ་གུ་ཡངས་པ་ཚོགས་དྲུག་སྣང་སྒྱུ་མའི་གློང་དུ་བདེ་པོ་གུ་ཡངས་པ། བློ་བདེ་པོ་གུ་ཡངས་པ་རང་སེམས་སྟོང་པ་གཤིས་དང་འདྲེས་ཕ་བློ་བདེ་པོ་གུ་ཡངས་པ། བློ་བདེ་པོ་གུ་ཡངས་པ་ད་ལྟ་སྣང་བ་ཆོས་སྐུའི་རྒྱ་ཡན་བློ་བདེ་པོ་གུ་ཡངས་པ། བློ་བདེ་པོ་གུ་ཡངས་པ་འཁོར་འདས་ཆོས་གྱི་རྫུན་ཕུབ་རྡིབ་པ་བློ་བདེ་པོ་གུ་༼༢༧ན༥༣༽ཡངས་པ། བློ་བདེ་པོ་གུ་ཡངས་པ་བསམ་གྱིས་མི་ཁྱབ་གཉུག་མའི་ངང་དུ་བློ་བདེ་པོ་གུ་ཡངས་པ། བློ་བདེ་པོ་གུ་ཡངས་པ་ད་ལྟ་སྣང་སྲིད་དག་པ་རབ་འབྱམས་བློ་བདེ་པོ་གུ་ཡངས་པ། འདི་གཉིས་འཕྱོང་རྒྱས་སུ་རྒྱལ་བུ་སྐུ་གཞོན་པ་འཆོས་བྲོའི་ཚུལ་དུ་བགྱིས་སོ།། །།འོག་མིན་པའི་སྟོན་པའི་གཅེས་ཕྲུག་ལ། །རྒྱ་གར་བ་མཆོག་གཟིགས་རྣམ་གཉིས་ཟེར། །མཚན་བརྗོད་ན་ཏིལླི་ནཱ་རོ་ལོ། །པཎ་གྲུབ་ཀྱི་དབུས་ན་ཁྱད་དུ་འཐོན། །གངས་ཅན་ན་སྔོན་ཚེ་བསྟན་པ་དར། །གསང་ཆེན་གྱི་ཐེག་པ་སྦས་ནས་སྤྱོད། །སྡིག་སྤྱོད་ཀྱི་རྒྱལ་པོས་བསྣུབས་པའི་རྗེས། །བཀའ་དྲི་མེད་ལག་ཏུ་དྲི་མར་ལེན། །དེར་སྐྱེ་དགུའི་བསོད་ནམས་ཚོང་ཟོང་གིས། །འཕགས་མཆོག་གི་ཐུགས་རྗེ་ཉོས་པ་ལ། །འཇིག་རྟེན་གྱི་དམིགས་བུ་མཐའ་དག་བྱོན། །ཁོང་དེ་པའི་དབུས་ན་སྒྲ་ཆེ་བ། །རྗེ་མར་པའི་ལོ་ཙ་སྐད་ཀྱིན་གདའ། །མི་ཁོང་གི་རྗེས་འཇུག་གྲུབ་པའི་ཁྱུས། །མཁའ་སྤྱོད་ཀྱི་ཞིང་ཁམས་དོག་པོར་བཏང་། །ཕ་དེར་རྗེས་འབྲངས་པའི་བཀའ་རྒྱུད་པ། །ཚེ་བློས་བཏང་ཆོས་ཅིག་སྙིང་བསམས། །འཇིག་རྟེན་པའི་མཐུན་འཇུག་ལ་དེ་མི་བརྩི། །སྔོན་བསགས་ཀྱི་ནུས་པས་འཕངས་པ་ཡིས། །འཕྲལ་འབྱོར་པར་སྣང་ཡང་ཞེན་པ་མེད། །མི་ཕྲག་དོན་ཅན་གྱིས་དགག་མི་ཐུབ། །ཐུགས་ལྷོད་དེར་བཞུགས་དང་དད་པ་ཅན། །རྗེ་མཚན་ལྡན་བླ་མའི་སྐུ་རྡོ་རྗེ། །བརྟན་གཡོ་ཀུན་དང་མཉམ་པ་ཉིད། །དེ་སྣ་ཚོགས་གཟུགས་བརྙན་སྤྲུལ་སྐུའོ། །སྐུ་མ་མཇལ་དགོངས་པ་མཛད་མི་དགོས། །ཤར་ཚད་མོས་གུས་སུ་འཁྱེར་བ་འཚལ། །འདི་རྡོ་རྗེ་ཐེག་པའི་གསེབ་ལམ་ཡིན། །རྗེ་མཚན་ལྡན་བླ་མའི་གསུང་རྡོ་རྗེ། །ཟིན་མ་ཟིན་སྒྲ་དང་མཉམ་པ་ཉིད། །དེ་གཞོམ་མེད་ཐམས་ཅད་མཁྱེན་པའི་སྐད། །དོན་དེ་ཕྱིར་གྲག་ཚད་བླ་མའི་གསུང་། །གསུང་མ་ཐོས་དགོངས་པ་མཛད་མི་དགོས། །ཅི་གསན་མོས་གུས་སུ་༼༢༧བ༥༤༽འཁྱེར་བ་འཚལ། །འདི་རྡོ་རྗེ་ཐེག་པའི་གསང་ཚིག་ཡིན། །རྗེ་མཚན་ལྡན་བླ་མའི་ཐུགས་རྡོ་རྗེ། །རྟོག་མི་རྟོག་ཀུན་དང་མཉམ་པ་ཉིད། །དེ་ལྷན་སྐྱེས་རྣམ་པ་ཐམས་ཅད་པ། །དོན་དེ་ཕྱིར་དྲན་ཚད་བླ་མའི་ཐུགས། །དྲིན་མ་བསྐྱངས་དགོངས་པ་མཛད་མི་དགོས། །རིག་ཚད་མོས་གུས་སུ་འཁྱེར་བ་འཚལ། །འདི་གྲུབ་ཐོབ་ཀུན་གྱི་ཐུགས་ཀྱི་བཅུད། །ཅེས་པ་འདི་བྱང་ཁྲི་ལྕམ་ཀུན་དགའ་དཔལ་སྒྲོན་ལའོ།། །།སྙིང་རྗེ་ཅན་གཞན་གྱི་དོན་མཛད་པ། །དུས་གསུམ་གྱི་རྒྱལ་བ་སྲས་བཅས་སྐད། །རྗེ་དེ་དང་གཉིས་སུ་མ་མཆིས་པ། །མི་ཁོ་བོའི་སྙིང་ག་མཛེས་པའི་རྒྱན། །དཔལ་ཕྱོགས་དུས་ཀུན་ལས་རྣམ་རྒྱལ་བ། །ཕ་གྲུབ་པའི་རིགས་བདག་འབྲུག་པའི་ཞབས། །ས་གསུམ་གྱི་མཆོད་རྟེན་དེ་ལ་འདུད། །གཞན་ང་ཟེར་ཡ་མཚན་མི་ཆེ་ཡང་། །ཁོང་རྡོ་རྗེ་འཛིན་པ་རྣམས་བགྲོས་པའི། །རྟོགས་པ་དོན་བརྒྱུད་ཀྱི་གསང་ཚིག་ཐོས། །དེ་གཞན་ལ་མ་གྲགས་སྙན་པའི་གཏམ། །དུས་ད་རེས་ཅུང་ཟད་དབྱངས་སུ་འཐེན། །བློ་གཉིས་སྣང་ལ་མཐོ་རེག་མ་ཐོངས་པར། །ལས་འབྲས་ལ་སྐུར་པ་མ་འདེབས་ཨང་། འདི་འཁྲུལ་ངོར་སྣང་བ་ལྟར་སྨིན་ལ། །དོན་བརྟགས་ན་མི་བཟོད་ཆུ་ཟླའི་གར། །རང་ཞི་བ་དོན་གཉེར་ལམ་ཞུགས་ནས། །ཉམས་བདེན་པའི་དེ་ཉིད་འཚོལ་བ་ལའང་། །ཐེག་དམན་ཞེས་སྐུར་པ་མི་གདབ་སྟེ། །མཐར་ཐུག་གི་ཐེག་པར་མཆོངས་སྟེགས་ཡིན། །ཐབས་ཀུན་རྫོབ་བྱང་སེམས་ལ་སྦྱངས་ནས། །ཚོགས་གཉིས་ཀྱི་བསགས་པའི་འཚོལ་བ་ཡང་། །རིང་ལམ་ཞེས་ཀླན་ཀའི་སྙད་མ་བཀོད། །རྒྱུ་འབྲས་དབྱེར་མེད་ཀྱི་ཁྱེར་ཚུལ་ཡིན། །བྱ་བ་དང་རྣལ་འབྱོར་གང་གིས་ཀྱང་། །ཉོན་མོངས་རྣམས་ཁ་སྒྱུར་བྱེད་པ་ཡང་། །བསྒྱུར་ལམ་ཡིན་ནོ་ཞེས་འཇོག་མི་དགོས། །མཉམ་ཉིད་དུ་ཁྲིད་བའི་སྙད་ཀ་ཡིན། །གཞི་དངོས་པོའི་གནས་ཚུལ་གཏན་ལ་ཕབ། །ལམ་སྨིན་པར་༼༢༨ན༥༥༽བྱེད་པའི་དབང་ལ་ཞུགས། །དོན་བསྐྱེད་རྫོགས་ཟུང་འཇུག་ཉམས་སུ་བསྟར། །འབྲས་ཡིན་ལུགས་ཡིན་བཞིན་མངོན་དུ་གྱུར། །འདི་གྲུབ་ཐོབ་ཀུན་གྱི་ཞལ་སྐྱིན་ཏེ། །དཔལ་རྡོ་རྗེ་སེམས་དཔའི་དགོངས་པའི་དོན། །མ་མཁའ་འགྲོ་རྣམས་ཀྱི་ཁོང་པའི་སྙིང་། །རྒྱུད་ཟབ་མོའི་ཞོ་ལས་མར་ལྟ་བུ། །མི་ང་དང་ང་འདྲའི་ཆོས་སྐལ་ཡིན། །ལུས་ཁམས་དྲུག་ལྡན་པའི་ཆགས་ཚུལ་བསྟན། །རྩ་ཕྲ་རགས་དབུ་མའི་རིམ་པར་ཕྱེ། །རླུང་ལས་དད་ཡེ་ཤེས་འཇུག་ལྡོག་གསལ། །ཁམས་ཐིག་ལེ་རང་བཞིན་རྣམ་འགྱུར་བརྗོད། །དོན་ཟབ་གསལ་ཟུང་འཇུག་ཡིན་པར་བཤད། །གཏན་ལ་ཕྱག་ཆེན་དུ་ཁྲིད་ནས་འབེབས། །རྟོགས་པའི་དོན་དབང་ཞིག་ཐོབ་བམ་བལྟ། །གང་ཟག་ལ་བསྐལ་ན་མོས་རྗེས་བསྐུར། །དང་པོར་བསྐྱེད་རིམ་ལ་ཟུང་འཇུག་སློབ། །ངེས་ཐུན་མོང་གི་སྒྲུབ་ཆེན་ཨ་ཅང་ཆེ། །འགའ་ཞིག་ལ་མཆོག་གི་བདེན་པའང་སྟོན། །བརྒྱ་གལ་ཏེ་འགྱངས་ན་གཏུམ་མོས་ཁྲིད། །གནད་རྡོ་རྗེའི་ལུས་ལ་རླུང་སེམས་གཅུན། །རྫས་ཕྱག་མཚན་སྒོམ་པའི་ཙཎྜྻཱི་སྦོར། །ཉམས་སེམས་ཁར་འཇོགས་ཞར་ལ་འབྱུང་། །ཁྱད་ཐིག་ལེ་ནཱ་དའི་གཏུམ་མོས་འདོན། །མཆོག་གཉུག་མ་དོན་གྱི་བསུན་མ་སླེབ། །དུས་དེ་ནས་རྡོ་རྗེ་འཆང་དུ་འགྲོ། །འགའ་ཞིག་ལ་བཙན་ཐབས་ཕོ་ཉའི་ལམ། །རྟེན་ཕུན་ཚོགས་འབྱོར་བའི་མཐུ་ལས་ཁྲིད། །ཡུལ་སྟོང་བཞིར་སྦྱངས་པས་དེ་དང་དེར། །ཐབས་དགའ་བཞིས་ཡེ་ཤེས་མྱུ་གུ་སྐྱེད། །ཡང་ན་ནི་སྒྱུ་མ་གསུམ་གྱིས་འཁྱུད། །ཉིན་སྣང་རྣམས་འཇའ་ཚོན་འདྲ་བར་དངས། མཚན་དུས་སུ་འདོད་དགུར་སྒྱུར་བ་ཐོབ། །བར་དོ་མི་འཁྲུལ་ཏེ་ལོངས་སྐུར་འབྱོངས། །དོན་མངོན་པར་བྱང་ཆུབ་ཀྱི་ལམ་ལ་ཞུགས། །ཟུང་འཇུག་གི་སྐུ་གཉིས་རིམ་པས་བཞེངས། །ཚེ་འདི་ལ་ལོངས་མེད་གཡེངས་པས་འཁྱེར། །བར་དུ་དང་པོ་ལ་ནམ་ཡང་འགྲུབ། །ཉམས་ཐོད་བརྒལ་འབྱོངས་ན་གྲོང་འཇུག་བརྟེན། །༼༢༨བ༥༦༽ལམ་སྦྱངས་པ་དམན་ན་འཕོ་བས་བསུ། །རྒྱུད་སྤྱོད་པ་བོགས་འབྱིན་རོ་སྙོམས་དྲུག །འདི་ཁ་སྦྱོར་ཡན་ལག་བདུན་ཚང་བའི། །ལམ་རྡོ་རྗེའི་ས་ལ་མྱུར་དུ་སྐྱེལ། །ཅི་འགྱངས་ཀྱང་སྐྱེ་བ་ཕྱི་མ་ཙམ། །དེ་ཕྱིར་དམ་ཚིག་གི་གནད་ལ་བསྒྲིམས། །ཅི་བྱེད་གཞན་དོན་དུ་སོང་བ་ན། །དགེ་ཡང་འཚེངས་ལ་སྡིག་ཀྱང་འཚེངས། །ཞེས་པཎ་ཆེན་དབོན་་་་་མདོ་སྔགས་ཀྱི་ཞུང་ལུགས་བརྒྱ་ཕྲག་སྨྲ་བ་གང་དེ་གངས་རི་ཆེན་པོ་ཏི་སེའི་རྡོར་འཛད་ལ་ཆས་པའི་དུས་སུ་པདྨ་དཀར་པོས་གདམས་པའོ།། །།གནས་གད་པ་གསེར་གྱི་བྱ་སྐྱིབས་ཅན། ཉམས་དགའ་སྐྱིད་འཛོམ་པའི་ནགས་གྱི་ཁྲོད། དཔལ་ཅོག་སྒར་ཤེལ་གྱི་གཞལ་མེད་ནས། ད་རྣལ་འབྱོར་སྐྱིད་པའི་གླུ་ཅིག་ལེན། །སྔོན་སྦྱངས་ཀྱི་ལས་འཕྲོ་དཀར་པོ་སད། །བཙལ་ནི་མཚན་ལྡན་གྱི་བླ་མ་བཙལ། །ཐུག་ནི་ཡིད་བཞིན་གྱི་ནོར་བུར་ཐུག །བསམ་ཚད་འགྲུབ་པ་འདི་རྒྱན་དུ་ཆེ། །འདི་བསམ་ཀྱིན་བྱས་པའི་ལས་ལ་འཚེངས། །འདི་བརྟགས་ཀྱིན་འདུག་མའི་ཡང་རྩེ་ཨང་། །སྔོན་སྒྱངས་ཀྱི་ལས་འཕྲོ་ཆོས་སུ་སད། །བསླབ་ནི་སྙན་བརྒྱུད་ཀྱི་གདམས་པ་བསླབས། །ཤེས་ནི་མདོ་རྒྱུད་ཐམས་ཅད་ཤེས། །གཅིག་ཤེས་ཀུན་གྲོལ་འདི་རྒྱན་དུ་ཆེ། །འདི་བསམས་ཀྱིན་བྱས་པའི་ལས་ལ་འཚེངས། །འདི་བརྟགས་ཀྱིན་འདུན་མའི་ཡང་རྩེ་ཨང་། །སྔོན་གོམས་ཀྱི་བག་ཆགས་བཟང་པོ་སད། །བྱས་ནི་དམ་པའི་ལྷ་ཆོས་བྱས། །བྱུང་ནི་མི་ཆེན་གྱི་མགོན་ཅིག་བྱུང་། །འདི་ཕྱི་གཉིས་འགྲུབ་འདི་རྒྱན་དུ་ཆེ། །འདི་བསམས་ཀྱིན་བྱས་པའི་ལས་ལ་འཚེངས། །འདི་བརྟགས་ཀྱི་འདུན་མའི་ཡང་རྩེ་ཨང་། །སྔོན་ལས་ཀྱི་གོམས་པ་ངང་གིས་སད། །བྱས་ནི་སེམས་ཅན་ལ་གང་ཕན་བྱས། །བྱུང་ནི་ཐུབ་བསྟན་གྱི་དཔལ་ཅིག་བྱུང་། །འཆད་རྩོད་རྩོམ་གསུམ་འདི་རྒྱན་དུ་ཆེ། །འདི་བསམས་ཀྱིན་བྱས་པའི་ལས་ལ་འཆོངས། །འདི་བརྟགས་ཀྱིན་འདུན་མའི་ཡང་རྩེ་ཨང་། །༼༢༩ན༥༧༽གར་གསེར་དུ་དཔོན་དྲུང་མགོན་པོ་རབ་བརྟན་པས་བསྐུལ་བའི་རྐྱེན་གྱིས་སོ།། །།རྗེ་བཟང་ངན་གྱི་རྩོད་པ་མི་དགོས་པར། །མདོ་རྒྱུད་ནས་བཤད་པའི་མཚན་ཉིད་ལྡན། །དཔལ་འབྲུག་པ་ཡབ་སྲས་ཐུགས་རྗེའི་གཏེར། །འབངས་བློ་སྣ་ཚོགས་འགྱུར་བར་མཛོད། །ཕྱི་འདོད་ཡོན་གྱི་སྣང་བ་བཀྲག་ཆེ་ཡང་། །ནང་བློ་གྲོས་ཀྱིས་གཞིག་ན་རྟག་མི་ཐུབ། །དོན་མདོ་མེད་ཅིག་ལ་མ་སྐྱེལ་བར། །ངེས་འབྱུང་སྐྱོ་ཤས་སྐྱེད་ཅིག་ཧེ་རུ་ཀ །ཕྱི་གནས་བསྐོར་གྱི་མཐོང་རྒྱ་ཙམ་ཆེ་ཡང་། །ནང་རང་སེམས་འཐུལ་བར་མ་གྱུར་ན། །དོན་ལྷ་ཆོས་ཀྱི་དགོས་པ་སྟོར་བའི་ཕྱིར། །དབེན་གནས་རི་ཁྲོད་འགྲིམས་ཤིག་ཧེ་རུ་ཀ །ཕྱི་ལུས་ངག་གི་སྤྱོད་པ་ཙམ་རྫིག་ཀྱང་། །ནང་ཞེན་ལོག་གིས་འཁྲི་བ་མ་ཆོད་ན། །དོན་ཐར་བའི་རྒྱལ་ས་མི་སྙོགས་པས། །བཟང་རྫུའི་སྤྱོད་པ་བོར་དང་ཧེ་རུ་ཀ །ཕྱི་ཧེ་རུ་ཀ་དཔལ་གྱི་ཆ་བྱད་ཀྱང་། །ནང་བརཏལ་ཞུགས་ཀྱི་དར་དང་མི་ལྡན་ན། །དོན་གསང་ཆེན་གྱི་སྤྱོད་པར་མི་འགྲོ་བས། །ཐོ་ཅོའི་རྩ་དི་སྲལ་སྤོངས་ཤིག་ཧེ་རུ་ཀ །ཕྱི་ཕོ་ཉའི་ལམ་གྱིས་རྩལ་ཡོངས་ཡང་། །ནང་འཛག་བདེའི་རྒྱུ་ལམ་མ་ཁེགས་ན། །དོན་དགའ་བཞིའི་ཕ་མཐར་མི་སོན་པས། །ཕྱག་རྒྱའི་འཁྲི་བ་ཆོད་ཅིག་ཧེ་རུ་ཀ །ཕྱི་རྩ་རླུང་གི་རྩབ་རྩུབ་ཅི་བྱས་ཀྱང་། །ནང་དཔྱིད་ཀྱི་ཐིག་ལེ་འདི་མ་འབར་ན། །དོན་ལུས་ཀྱི་རྩ་མདུད་མི་ཁྲོལ་བས། །གདན་ས་པའི་གནད་ཀ་གཟུང་ཞིག་ཧེ་རུ་ཀ །ཕྱི་སྨྲ་ཚོད་ཀྱི་ལྟ་བ་ཙམ་བཟང་ཡང་། །ནང་གཟུང་འཛིན་གྱི་མགོ་བོ་མཆོག་ན། །དོན་ཡིན་ལུགས་ཀྱི་སྒྲོ་འདོགས་མི་ཆོད་པས། །ད་ཁ་ནང་དུ་ལྟོས་ཤིག་ཧེ་རུ་ཀ །ཕྱི་ཟབ་ཟབ་ཀྱི་སྒོམ་ཚུལ་ཅི་མང་ཡང་། །ནང་བཅོས་མིན་གྱི་གདེངས་ཚད་མ་རྙེད་ན། །དོན་གནས་ལུགས་ཀྱི་རང་ངོ་མི་མཐོང་བས། །སེམས་བཅས་བཅོས་སྤོངས་ཤིག་ཧེ་རུ་ཀ །ཕྱི་ལྟ་ཚུལ་ལ་སྦྱོར་བའི་ཐབས་མཁས་ཀྱང་། །ནང་སྟོང་ཉིད་ཀྱི་ཁྱེར་༼༢༩བ༥༨༽སོས་མ་ཟིན་ན། །དོན་མཐར་ཐུག་གི་ས་ལམ་འདི་མི་བགྲོད་པས། །ཁ་དང་ཞེ་ཕུགས་བསྟུན་ཞིག་ཧེ་རུ་ཀ །ཕྱི་གཞན་སྣང་གི་འགྲོ་དོན་རྒྱ་ཆེ་ཡང་། །ནང་རང་འདོད་ཀྱི་འཁྲི་བ་མ་ཟད་ན། །དོན་བདག་གཞན་གྱི་ཕན་བདེ་མི་འགྲུབ་པས། །ད་རང་འདོད་སྤོངས་ཤིག་ཧེ་རུ་ཀ །འདི་ཡང་གཞུང་ལུགས་རབ་འབྱམས་སྨྲ་བ་མདོ་སྔགས་རས་ཆེན་ཁྲག་འཐུང་ཀུན་དགའ་དཔལ་ཞེས་པའི་སློབ་བུ་ལ། མ་དང་མཁའ་འགྲོའི་འདུན་ས་ཙ་རི་ཏྲར་གདམས་པའོ།། །།ཡུལ་པུར་རྒྱལ་བོད་ཀྱི་རྒྱལ་ཁམས་འདིར། །ཆོས་མཁས་པར་རློམ་པ་གྲངས་མང་ཡང་། །དོན་ཡིན་ལུགས་མཛུབ་ཚུགས་སྟོན་པ་དེ། །མཚན་སྙན་པར་གྲགས་པའི་ར་ལུང་པ། །དཔལ་ངག་དབང་ཆོས་ཀྱི་རྒྱལ་པོ་ཙམ། །ཕ་དུས་གསུམ་རྒྱལ་བའི་གར་པུ་དེར། །ཚེ་འདི་ཕྱི་ཀུན་གྱི་སྐྱབས་གཏད་ནས། །ཁྱོད་ཁ་ཙམ་མིན་པར་གསོལ་བ་ཐོབ། །མཆོག་ཐུན་མོང་ཟེར་བའི་སྒྲ་བོ་ཆེ། །འབད་མེད་དུ་འབྱུང་བར་ཐེ་མི་ཚོམ། །བསྒོམ་བྱ་དང་སྒོམ་བྱེད་སྒོམ་པ་གསུམ། །ཡིན་ལུགས་ལ་སྒྲིབ་པའི་ཟོལ་སྦྱོར་ཏེ། །རྣམ་རྟོག་གི་དགྲ་བོས་སྲིད་དུ་བཀུག །བཅོས་མའི་གྱ་གྱུར་ཆགས་ཀྱང་ཅི། །སེམས་མ་བཅོས་ཇི་བཞིན་བཞག་པ་ལ། །གཉེན་པོའི་ལྷན་པ་མི་གདབ་མ། །འདི་དུས་གསུམ་རྒྱལ་བའི་གཞུང་ལམ་ཡིན། །ཆོས་ཀུན་གྱི་རང་ཞལ་ཡེངས་མེད་བལྟས། །བྱིང་རྒོད་ཀྱི་མཚན་མ་དེ་ཁར་ཞིག །སྤང་གཉེན་མཉམ་ཉིད་ཀྱི་ངང་དུ་འབྱམས། །དུས་རྟགས་ལ་མ་ལྟོས་རྒྱལ་ས་སྙོགས། །རྗེས་ཤེས་ལ་སྙིང་རྗེའི་རང་ཉམས་འཆར། །སྒྱུ་མ་ལ་སྒྱུ་མའི་མཁན་པོས་བཞིན། །སྡིག་སྦྱོང་དགེ་སྒྲུབ་ལ་ལག་ལེན་གྱིས། །ཚིག་དེ་སྐད་བཀའ་བརྒྱུད་བླ་མའི་བུ། །མིང་ཡོངས་སུ་གྲགས་པའི་པད་དཀར་གྱིས། །ཁྱོད་བྱས་པ་ཅན་གྱིས་དྲིས་པའི་ལན། །ཚིག་སྒྲ་ཚད་ཀྱིས་གཞལ་ན་ངེས་ཤེས་སྐྱེ། །དོན་གསུང་རབ་ལ་གཏུགས་པས་ཉིང་ཁུར་མཐོང་། །༼༣༠ན༥༩༽ཞེས་པ་སྐྱིད་ཞོད་ནས་སྡེ་པ་ཨ་བསོད་པས་ཞུས་པ་ལ་གནང་བའོ།། །།འཕན་པོ་རབ་འབྱམས་པ་ཆོས་གྲུབ་དཔལ་བཟང་བཅུད་ལེན་ལ་བརྟེན་ནས་ལོ་བདུན་བྱང་སེན་མོ་དོར་སྒྲུབ་པ་ལ་བཞུགས། སྐབས་ཞིག་བྱ་ཡུལ་གྱི་གཞིས་ཁ་ཆོས་རྒྱལ་ལྷུན་རྩེར་མཇལ་བ་ལ་ཁོར་ཅིག་ཡོངས་པ་ལ་གནང་བ། དབེན་གནས་རི་ཁྲོད་འགྲིམ་པ་ན། ཆེད་གཉེར་གྱི་རི་ཁྲོད་འགྲིམ་པ་ན། །ཆེད་གཉེར་གྱིས་ཁ་ཟས་མི་བསྒྲུབ་ཅིང་། །སྡུག་སྒུར་གྱིས་ལུས་ཆུད་མི་གསན་པར། །གང་བྱུང་ལ་བརྟེན་ན་ལེགས་པར་གོ། །སེམས་མི་རྟོག་ངང་དུ་འབྱམས་པའི་དུས། །ལྟོགས་སྐོམ་གྱི་སྣང་བ་གང་ཡང་མེད། །མིང་སྙན་པོ་ཏིང་འཛིན་གྱི་ཁ་ཟས་ཟེར། །ཁྱོད་སྒོ་གསུམ་བསྲངས་སུ་བཅུག་པ་ན། །ལུས་དལ་ཡང་སེམས་ཁོ་རྒྱུ་འགྲུལ་མང་། །དེ་བསྒོམ་ཆེན་བུབ་པའི་ས་ཅིག་ཡིན། །བློ་མདེའུ་རྩེ་ནང་དུ་གཏད་ནས་སུ། །སྐད་ཅིག་མ་རེར་ཡང་ཡངས་མ་འཇུག །བསམ་མེད་ཀྱི་ངང་དུ་ལས་མེད་པར། །མཉམ་གཞག་ལ་ཇི་ཙམ་གཞག་སྡོང་པ། །དེ་ནས་ཟད་པར་སོགས་ཡང་ཡང་བསླབ། །མངོན་ཤེས་དང་རྫུ་འཕྲུལ་ཅི་དགའ་འབྱུང་། །ཞེ་འདོད་ཀྱི་ཁོང་སྐྲན་མ་ཞུགས་ཤིང་། །ཡོན་ཏན་ལ་དགའ་རློམ་མ་སྐྱེལ་བས། །སྙིང་རུས་ཀྱིས་སྒོམ་པ་མཐར་ཕྱུང་བ། །བཀའ་བརྒྱུད་ཀྱི་བླ་མའི་གྲྭ་སར་ཆུག །ཤཱཀྱ་ཐུབ་ཀྱི་བསྟན་པའི་སྲོལ་ཁ་ཟིན། །ཐབས་མཁས་ཀྱི་འགྲོ་དོན་འགྲུབ་སྟེ་འོང་། །མི་ང་ཟེར་བདེན་ནམ་རྫུན་པ་སྟེ། །ཅི་ཟེར་དེ་ལག་ཏུ་བླངས་ན་གསལ། །རྒྱུས་མེད་ཀྱི་རྒྱུས་གཏམ་བཤད་མཁན་མིན། །བློ་འཆུག་མེད་ཀྱི་གདེངས་ཚང་བཀལ་བས་ཆོག །ཅེས་སོ།། །།རྗེ་བཙུན་འབྲུག་པ་འདི་བླ་མར་བཟང་ན་བསྟེན། །མོས་གུས་ལྟེམ་བརྐྱང་འདི་ཞེ་ནས་འཛངས་ནས་བསྐྱུར། །བྱིན་རླབས་ཆེན་པོ་འདི་གནང་ང་ལ་མཁས་པས་བྱུང་། །ཅི་གསུང་དང་བཀའ་སྒྲུབ་འདི་ཞུ་བ་ལ་ཤེས་པས་བྱུང་། །གནང་མཁས་དང་ཞུ་ཤེས་འདི་༼༣༠བ༦༠༽སྣང་བ་བདེ་བས་བྱུང་། །སེམས་ཉིད་བདེ་བས་བྱུང་། །གཅིག་ཤེས་ཀུན་གྲོལ་འདི་ཡིད་སྨོན་ཤོར་རར་བྱུང་། །ཀུན་ཤེས་གཅིག་རྡུགས་ལ་ཞེ་ནས་ཁྲེལ་བས་བསྐྱུར། །པདྨ་དཀར་པོ་འདི་འཆད་པ་ལ་མཁས་པར་སོང་། །དད་ལྡན་བུ་སློབ་ཚོ་ཉན་པ་ཤེས་པས་ཆོག །འཆད་ཤེས་དང་ཉན་ཤེས་འདི་སྣང་བ་བདེ་བས་བྱུང་། །སེམས་ཉིད་བདེ་བས་བྱུང་། །ལྷོ་ཕྱོགས་རྒྱལ་ཁམས་འདི་དུས་ཁམས་བདེ་བས་གཟུང་། །སྒོམ་འདྲིས་དྲེད་པོ་ལ་ཞེ་ནས་འཛངས་པས་གཟུང་། །སུ་དགོས་ཕན་འདོགས་འདི་ཆོས་པའི་རྣམ་ཐར་ཡིན། །བྱས་ཤེས་དྲིན་བཟོ་འདི་མི་ལུགས་ལེགས་པར་གྲག །ཕན་འདོགས་དང་དྲིན་གཟོ་འདི་སྣང་བ་བདེ་བས་བྱུང་། །སེམས་ཉིད་བདེ་བས་བྱུང་། །སྒྲུབ་འདོད་གཤའ་མ་གཅིག་སྙིང་གི་ཁོང་ནས་ལངས། །རྣམ་གཡེངས་བཤོལ་འདེབས་ཤིག་ག་ནས་འོང་སྙམ་དྲེད། །གོང་མའི་གཤེགས་བཤུལ་བྲོས་དུས་སླེབ་པ་ན། ཁམས་གསུམ་འཁོར་བ་ལ་རྒྱང་པོར་རན་པ་ནོ། །བྲོས་དུས་དང་པོར་དུས་འདི་སྣང་བ་བདེ་བས་བྱུང་། །སེམས་ཉིད་བདེ་བས་བྱུང་། །ཞེས་པ་དམག་སྡེ་གདགས་ཕུ་དགོན་གསར་དུའོ།། །།འདི་ཁ་ཤེད་གསང་སྔགས་རྡོ་རྗེའི་གླིང་། །རྗེ་མཐུ་སྟོབས་ཞབས་ཀྱི་གདན་སའི་མཐལ། །ཁྱབ་བདག་རང་བྱོན་གྱི་དགའ་ཚལ་ན། །ཉམས་སྤྲོ་བའི་ངང་དུ་ཡལ་ལ་ལ། །བློ་བདེ་བའི་རྒྱང་གླུ་རྩེ་རེ་རེ། །ཕུ་ཡིད་འོང་བྲག་རི་མཐོན་པོའི་རྩེར། །གཡའ་སྤང་གི་སྨིན་འཁྱུག་བརྗིད་ཆགས་པ། །སྤྲིན་སྨུག་པོའི་འཁོར་ས་གཟིགས་མོར་ཆེ། །བྱ་རི་དགས་རྩེད་འཇོ་ཡིད་ལ་འབབ། །ཚེ་བློས་བཏང་མཛད་པའི་བཞུགས་སར་གདའ། །བར་ཙན་དན་ནགས་མ་སྨན་གྱི་ལྗོངས། །གཙུག་ལག་ཁང་ཁང་པ་ཕྲན་གྱིས་བསྐོར། །ཆོས་བྱེད་ཀྱི་འདུ་ལོང་དེ་རུ་བྱེད། །ཚེ་དོན་ལྡན་གྱི་སྐལ་བ་དགེ་ས་འདིར། །ཐོས་བསམ་ཞིག་མཛད་ན་ད་ལྟ་བྱོན། །མདའ་དད་ལྡན་སྦྱིན་བདག་འདུ་བའི་གྲོང་། །དེ་འབྱོར་༼༣༡ན༦༡༽ཞིང་རྒྱས་པ་མི་ཡིས་གང་། །ཁོང་གདོང་དམར་བོད་དང་ཁ་ཁྭའི་ཟོང་། །ཅི་འདོད་ཀྱི་འགྲིམ་ས་དེ་ན་མཆིས། །ཕྱུག་པོ་ཞིག་མཛད་ན་དེ་ཚོར་སོང་། །རང་གང་འདོད་ཡོད་པའི་འདུ་ས་འདི། །སུམ་རྩེན་གྱི་གནས་ལྷག་ཡིན་ནམ་སྙམ། ཞེས་རྡོ་རྗེ་གླིང་གི་གནས་བསྟོད་ཕྱག་མཛོད་བསོད་རྒྱམ་པའི་ངོར་བླངས་པའོ།། །།བླ་མས་བསྟན་པའི་གདམས་ངག་ཚུལ་བཞིན་དུ། །སྒོམ་པ་འདི་ཉིད་ཚོགས་གསོག་རབ་ཡིན་གྱི། །དུས་རྣམས་ཀུན་ཏུ་འབད་པ་ཆེན་པོ་ཡིས། །ཚེ་གཅིག་སངས་རྒྱས་བསྒྲུབ་པའི་གོ་ཆ་གྱོན། །ཟབ་ཁྲིད་མང་པོའི་ཐོས་ལོ་གསོགས་པ་ལས། །སྙིང་ལ་གང་ཕན་གཅིག་ལ་ཕུར་བཙུགས་ནས། །ཉིན་མཚན་ལེ་ལོ་མེད་པའི་བརྩོན་འགྲུས་ཀྱིས། །ཐོས་བསམ་སྒོམ་པའི་སྙིང་པོ་བླང་བར་གྱིས། །རྒྱལ་ཁམས་ཕྱོགས་མེད་འགྲིམས་པའི་ལྡོམ་བུ་བས། །ཆགས་མེད་སྟན་ཐོགས་གཅིག་ཏུ་འདུག་ཚུགས་པ། །འདུན་མའི་སྤྱོད་ཁམས་ཆེ་བར་ངེས་པས་སུ། །མ་གཅིག་ཚེ་དང་བསྒྲུབ་པ་ཨེ་སྙོམས་ལྟོས། །སེམས་འཛིན་དམིགས་པ་མང་པོའི་སྤྲོ་བསྡུ་བས། །མ་ཡེངས་དྲན་པས་རྩེ་གཅིག་བཞུར་བ་འདི། །སྒོམ་ཐབས་ཟབ་ཤོས་ཡིན་ནོ་རྣམ་ཀུན་ཏུ། །སྐད་ཅིག་ཉིད་ལ་ཡེངས་སམ་བྱ་ར་གྱིས། །ཡི་དམ་ལྷ་ལ་བསྙེན་བསྒྲུབ་བྱ་བ་ལས། །གཅིག་ཆོག་བླ་མ་ཡིན་པར་ཤེས་ནས་སུ། །གསོལ་འདེབས་ཁོ་ནས་ནམ་གཞག་འདའ་བ་འདི། །ལམ་གྱི་ས་ཆོད་ཆེའོ་རབ་འབྱམས་པ། །ཞེས་པ་ལྷོ་བྲག་རྒྱལ་རྩེ་སྤང་དུ་བྱ་རྒོད་གཤོང་བའི་རབ་འབྱམས་པ་ཆོས་འཕེལ་བཟང་པོ་ལ་གདམས་པའོ།། །།རྒྱལ་བྱེད་ཚལ་དུ་ངོ་མཚར་བའི་ལྟས་བརྒྱད་གླུར་བླངས་པ། །ཡབ་བཀའ་རྒྱུད་བླ་མའི་གཅེས་ཕྲུག་ང་། །ཡུམ་གནས་གསུམ་མཁའ་འགྲོས་སྐྱོང་བཞིན་པ། །སྣང་ཉམས་ལ་དོ་གལ་མི་ཆེ་ཡང་། །འཕྲལ་མཚར་བའི་རྨི་ལྟས་དབྱངས་སུ་ཐེན། །ཤར་སྐྱིད་པའི་འབྱུང་གནས་ཀོང་༼༣༡བ༦༢༽པོའི་མཐིལ། །གནས་ཁུ་ཆུ་གསང་བའི་ནགས་ཁྲོད་དེར། །མགོན་འཁོར་ལོ་སྡོམ་པ་བསྙེན་པའི་ཚེ། །འོད་མཐོན་མཐིང་སྤྱི་བོར་ཞུགས་པའི་མོད། །ཟིལ་མཚུངས་པ་མེད་དེ་བརྒྱལ་བ་ཙམ། །ལུས་ཨིནྡྲ་ནཱི་ལའི་བཅག་འཕྲོ་འདྲ། །དེར་གཡོན་གྱི་ཕྱོགས་ནས་བར་ཆད་བགེགས། །རླུང་དམར་པོ་འཚུབས་ཀྱིན་དོན་པ་རྨིས། །གངས་དབེན་པའི་རི་བོ་སྤོས་དད་ལྡན། །རང་བྱུང་གི་འཕགས་པ་བཞུགས་པའི་སར། །ཡིད་བསྒོམས་ཀྱང་མི་ཤེས་སྒྱུ་མའི་ལུས། །ལྷ་རིག་འཛིན་དྲག་པོ་རྩལ་དུ་ཤར། །རི་རྟ་གདོང་འབར་དྲའི་བྱིན་ཆགས་མདུན། ཁོང་ལྷ་སྲིན་དམ་བཅའ་ལེན་པ་རྨིས། །མ་གྲུབ་པའི་རྒྱལ་མོས་ལུང་བསྟན་པ། །ལྗོངས་རྡོ་བོད་མཚམས་ཀྱི་བྱེས་འགོལ་དུ། །མིག་ངོམ་པ་མེད་པའི་ན་ཆུང་གཉིས། །གཡས་གཡོན་ནས་བསྟེན་པའི་རས་ཆུང་པ། །མཛེས་སྡུག་གི་ཕུལ་ཕྱིན་གཞོན་ནུའི་ཚུལ། །རས་དྲི་མེད་དཀར་བའི་ན་བཟའ་ཅན། །འཛུམ་བཞིན་དུ་བྱིན་གྱིས་རློབས་པ་རྨིས། །དཔལ་བཀྲ་ཤིས་མཐོང་སྨོན་ཆོས་གྲྭ་དེར། །ཕ་བཞད་པ་རྡོ་རྗེའི་ཞལ་སྔ་ནས། །ཞིང་མངོན་དགའ་རྒྱལ་བའི་སྲས་ཀྱི་གཙོ། །མཚན་པ་ལ་གླང་སྤོས་ཀྱི་གླང་པོ་ཞེས། །སྐུ་སྔོ་བསངས་འདྲེན་བྱེད་བདུད་རྩིའི་བཅུད། །ས་སྐྱེད་མོས་ཚལ་གྱི་གཞལ་མེད་དུ། །མཚམས་ལྷ་བུས་སྦྱར་ཏེ་མཇལ་བ་རྨིས། །ཡུལ་ཌཱ་ཀིའི་འདུན་ས་ཙ་མི་ཚ་རི། རི་མ་རྒད་ཞུན་མས་བྱུགས་འདྲའི་སྤོར། མཚོ་ཟླ་བ་ལྟར་དཀར་ཆེ་བའི་མཁར། །མི་གཡོ་མགོན་སྤྲིན་ཕུང་འཁྲིགས་འདྲ་བ། །ཤར་ཉིན་བྱེད་ཤར་བའི་འོད་ཟེར་བཅས། །བྱིན་མཚུངས་པ་མེད་པའི་ཟིལ་འོད་ཀྱིས། མི་ཁོ་བོའི་སྙིང་མུན་བསལ་བ་རྨིས། །གཙང་གཡང་ཆགས་ཉང་ལུང་བར་གྱི་ཁུལ། །མི་ཆོས་སྨྲའི་འདུན་ས་རྒྱལ་བྱེད་ཚལ། །ནུབ་ཕྱོགས་ཀྱི་དགུང་སྔོན་མཐོན་པོའི་དབུས། །འཇའ་འོད་ཀྱི་ཆུ་འཛིན་འཛུམ་པའི་བར། །འཇམ་པའི་དབྱངས་ལྷོ་ལ་ཆོས་འཆད་པ། ཕུན་༼༣༢ན༦༣༽སུམ་དུ་ཚོགས་པའི་བཀོད་པ་རྨིས། །ལྷོ་མཁོ་མཐིང་གཏེར་གྱི་ལྷ་ཁང་དུ། །ཐད་སྙོམས་པ་ལག་མཐིལ་འདྲ་བའི་དབུས། །རི་ཕག་པ་འདྲ་བ་སྨུག་པོའི་བྲག །དཔལ་དིང་རི་གླང་འཁོར་ཡིན་སྙམ་པར། །ཕ་དམ་པ་སངས་རྒྱས་འགྲོ་བའི་མགོན། །ལམ་སྡུག་བསྔལ་ཞི་བར་བྱེད་པ་ལ། །ཅེར་མཐོང་གི་བཀའ་བབས་གཏད་པ་རྨིས། །མཁའ་འགྲོ་མ་འདུ་བ་དུད་གི་བྲག །སེམས་ཉམས་དགའི་ནོར་བུ་སྤུངས་བའི་ནང་། །གཡའ་དག་གི་མེ་ལོང་གཙང་མ་དེར། །ཁོང་དུས་གསུམ་རྒྱལ་བའི་སྤྱི་གཟུགས་པ། །མཚན་སྙན་པོ་མར་པ་ལོ་ཙ་བྱོན། །རྒྱུད་བརྟག་གཉིས་རྫོགས་པར་ཉན་པ་རྨིས། །ཞེས་སོ།། །།དེར་རྨི་ལམ་བརྡ་བཞི་མགུར་དུ་བླངས་པ། ཤར་གསང་ཡུལ་ནེ་ཙུ་ལ་ཡི་ཚལ། །རྒྱལ་ཆེན་གྱི་ཕོ་བྲང་ཉམས་དགའ་བར། །མདུན་བཞུགས་ཀྱི་མཆོག་གསུམ་ཁོ་བོ་སྐྱོང་། །ལྟས་ངོ་མཚར་མ་འོངས་ལུང་སྟོན་བརྡ། །ལྷོ་དེ་ཝི་ཀོ་ཊིའི་བྲག་སྟེང་དུ། །ཕ་རྗེ་བཙུན་སྐུ་གདུང་ཟོས་ཀྱིན་འཕེལ། །མཐར་ས་གཞི་ཐམས་ཅད་འཕྱུར་གྱིས་ཁྱབ། །ལྟས་ངོ་མཚར་མ་འོངས་ལུང་སྟོན་བརྡའ། །ནུབ་སྤོས་སྐྱའི་ཡང་དབེན་གཡའ་སྤངས་མཚམས། །བཀའ་འགྱུར་རོའི་གླེགས་བམ་ཟིན་སྙམ་པར། །ཀུན་གཅིག་ལ་གཅིག་ཐ་མི་རྔར་གྱུར་བརྡུངས། །ལྟས་ཡ་མཚན་མ་འོངས་ལུང་སྟོན་བརྡའ། །བྱང་ཟབ་ཡང་དབུ་རྩེ་ཆེན་པོའི་འདབ། །རྗེ་འཇམ་མགོན་ཕྱག་གི་རལ་གྲི་རྙེད། །དེ་གཡུགས་པས་ནགས་ཚལ་དུམ་བུར་བཅད། །ལྟས་ཡ་མཚན་མ་འོངས་ལུང་སྟོན་བརྡ། །ཅེས་སོ།། །།གནས་ཁམས་གསུམ་འཁོར་བའི་བཙོན་་་་་་་། འགྲོ་དྲུག་མནར་བ་འདི་བསམ་ཀྱིན། །ཆོས་སྙིང་ནས་བྱེད་པའི་གོ་ཆ་ཡིས། །རིགས་དྲུག་ལ་ཐར་པའི་གོ་འཕང་སྦྱིན། །ཕ་མཚན་ལྡན་གྱི་བྱིན་རླབས་མ་ཞུགས་ན། །དོན་རྒྱ་ཆེན་གྱི་གཞན་དགའ་མི་བྱུང་བས། །དུས་རྒྱུན་ཆད་མེད་པར་མོས་གུས་གྱིས། །གསོལ་འདེབས་ལ་༼༣༢བ༦༤༽བརྩོན་པ་ཅིས་ཀྱང་ལེགས། །རང་རྒྱུད་ལ་སུ་ཕན་དགེ་བའི་བཤེས། །ཕྱོགས་འཛིན་གྱི་གདོན་གྱིས་མ་བསླང་བར། །ཕྱོགས་མེད་ལ་བླ་མར་མཐོང་གྱུར་ན། །སྣང་སྲིད་ཀུན་བླ་མར་འགྱུར་ངེས་ཡིན། །གཅིག་ཤེས་ཀུན་གྲོལ་གཅིག་ཅིས་མི་ཡོང་། །ཞེས་རྫ་སྣ་གདན་ས་ཚུལ་ཁྲིམས་སེང་གེ་ལ་འབྲོག་རི་བོ་བྲག་ཏུ་གདམས་པའོ།། །།ཆོས་སྔར་བྱས་ཀྱི་དོན་ཀུན་སྒྲུབ་པའི་མི། །ཉམས་རྟོགས་ཀྱི་ཡོན་ཏན་འབར་བས་ན། །དངོས་འཛིན་གྱི་རྟོག་པར་བསྙོན་ཐངས་མཁན། །ཕྱག་ཆེན་རྒྱལ་ཁམས་འགྲིམ་པ་ཡི། །མི་ཁྱེད་དང་སྔོན་ནས་འབྲེལ་བའི་བཤེས། །མིང་ཡོངས་སུ་གྲགས་པའི་པདྨ་དཀར། །གཞན་ཕན་དུ་བསྙད་པའི་རྣམ་གཡེང་གིས། །ཀུན་རྫོབ་ཀྱི་གློང་དུ་འཁྱམས་པ་ལགས། །བདེན་གཉིས་ལ་ཐ་དད་མ་ཕྱེད་པས། །བློ་ཆེན་པོའི་ངོ་ན་བསམ་གཏན་ལ། །དེ་བདེན་རྫུན་གྲུབ་ཐོབ་ཁྱོད་ཀྱིས་ལྟོས། །མི་གཞན་ངོར་ཚིག་འདི་སྙད་ཀའི་གཞི། །རང་དཔོན་སློབ་གཉིས་ལ་བརྗོད་བྲལ་ཡིན། །ཞེས་རི་བོ་བྲག་ནས་རྫ་སྣ་བླ་མ་ཀུན་སྤངས་པ་ལ་སྤྲིངས་པའོ།། །།དེ་ཡང་ཙ་རི་སྟག་དུ་ནམ་བྱི་གུང་ཐུན་ལ་གནས་མཉམ་དུ་བསྐོར་བའི་གསེབ་ན་ངོ་མཚར་གྱི་རྟེན་འབྲེལ་ཁོ་བོས་འགྲིག་པ་ཤེལ་གོང་མདུན་དུ་མཉམ་པར་གནས་ཀྱང་རྡོ་རྗེ་ཀརྨ་བབས་པ་ལ་དེ་ཉིད་དུ་ཅིར་ཡང་འཆར་ལ་གཞན་མིག་སྐྱོན་མེད་པའི་ཡུལ་ཀྱིས་བརྒྱལ་ཀྱང་ཤེས་རྗེན་ཅེ་རེ་བ་ལྟར་དུ་ངེས་ནས་འདི་བགྱིས་སོ། །གནས་བྱིན་རླབས་སུ་ཆེའོ་མཁའ་སྤྱོད་གྱི་ཙ་རི། །རྒྱུད་གཉན་པོ་ཀུན་ནས་གནས་མཆོག་ཏུ་གསུངས་པ། །གནས་བྱིན་རླབས་སུ་ཆེ་བསམ་ངག་དབང་གི་ནོར་བུ། །སེམས་དད་པ་ལ་བརྟེན་ནས་བསྐོར་བ་ལ་ཆས་སོ། །ལུས་ངལ་དུབ་ཏུ་གྱུར་ཀྱང་ཁུ་འཁྲིག་འདྲ་མེད་པས། །སྔོན་གྲུབ་ཐོབ་ཀྱིས་བྱོན་པའི་བཤུལ་རྗེས་སུ་བསྙེགས་པ། །ཕྱི་རི་མཚོ་ཤིང་གསུམ་དེ་ཙམ་ཞིག་མིན་པ། །ནང་སྤྲུལ་པའི་ལྷ་ཞལ་རིས་མེད་དུ་༼༣༣ན༦༥༽ཤར་བས། མཆོག་ཐུན་མོང་གི་དངོས་གྲུབ་འབད་མེད་དུ་རྙེད་ནས། །ཡུལ་སྣང་དང་རང་སེམས་གཉིས་མེད་དུ་འདྲེས་པ། །རྗེ་ཁོང་ཚོ་དང་མཉམ་པའི་ངོ་མཚར་གྱི་ལྟས་ཙམ། །མི་ང་ལ་ཡོང་བའི་རེ་གོ་ཡང་ཅེ་མཆིས། །གནས་ལྷན་ཅིག་ཏུ་འཁོར་སྙམ་ཡུས་པོའི་གསེབ་ན། །མ་མཁའ་འགྲོས་གཟིགས་པ་ཁོ་བོ་ལ་བྱུང་བས། །རྐྱེན་ཕྱི་ནང་གི་བར་ཆད་རང་སར་ཞི་ནས། །ཉམས་ངོ་མཚར་གྱི་མཚན་མ་དུ་མའི་འཆར་སྒོ། །འཕྲལ་དགོས་འདོད་ཀྱི་རྟེན་འབྲེལ་ཡིད་བཞིན་དུ་འགྲིག་བྱུང་། །ཕྱི་སྣང་བའི་རྐྱེན་ལ་ཁྱད་པར་མེད་ཀྱང་། །རང་མོས་པའི་རྗེས་འགྲོ་མིག་ཅན་མདུན་དུ། །ཤེལ་གོང་སོགས་རྐྱེན་ཞིག་ཁྱད་མེད་དུ་བཀོད་ཀྱང་། །པྲ་བབས་ཀྱི་ན་ཆུང་གཅིག་པུས་མཐོང་ལྟར། །ང་རང་སྣང་ལ་ཡིད་ཆེས་དགའ་ཡོ་སྐྱིད་དོ། །གནས་ཙ་རི་འཁོར་བསམ་ཉམས་དགའ་བློ་བདེ། །དོན་འཆུགས་མེད་འགྲུབ་པས་འབོལ་ལེ་ཤིག་ཤིག །ད་གང་བྱས་བདེ་བའི་གུ་ཡངས་ལ་བསླེབ་བོ། །ཅེས་སོ།། །།ཡུལ་དབུས་གཙང་དག་པའི་ཞིང་ཁམས་སུ། །ལྷ་ཞིང་སྐྱོང་ཌཱ་ཀི་བསུ་མར་བསླེབ། །མ་འགྲོ་དྲུག་སྒྲོལ་བའི་རྟེན་འབྲེལ་ཞིག །དཔལ་ཙ་རི་ཏྲ་རུ་སྒྲིགས་ཤིག་ལོ། །འདིར་སྣང་ལ་དོ་གལ་མ་བྱས་པས། །གནས་ཌཱ་ཀིའི་ཕོ་བྲང་ཆེན་པོར་བསླེབ། །མགོན་རྡོ་རྗེ་བཙུན་མོའི་ལྷ་ཁང་བགྱིས། །དེར་གནས་གསུམ་མཁའ་འགྲོ་གླུ་གར་མཛད། །དེ་མཐོང་ཐོས་བསམ་གཏན་བདེ་བར་རེག །ཨེ་མ་ཧོ་སྐལ་བ་བཟང་ངོ་སྙམ། །དཔལ་རྡོ་བའི་སྙིང་ཕུག་ཆེན་པོར་བསྒོམ། །ཁོང་ཞིང་སྐྱོང་མཁའ་འགྲོའི་གྲལ་ཁྱུར་ཚུད། །ཚོགས་རོ་བརྒྱ་ལྡན་པའི་ཁ་ཟས་མྱོང་། །ལོངས་སྤྱོད་མི་འབྱུང་གི་དོན་མ་མཆིས། །སང་དེ་ནས་སྒྲོལ་མའི་བླ་རི་བརྒལ། །མགོན་ནག་པོ་ཆེན་པོ་བཞུགས་པའི་རོང་། །བྱ་རོག་གདོང་གཏམ་སྙན་དབྱངས་སུ་གྱེར། །དགྲ་གཉའ་རེངས་ཡན་བར་མི་འཆོར་གསུང་། །ས་དེ་ནས་ལ་གསུམ་བརྒལ་བའི་༼༣༣བ༦༦༽ཕུག །མ་རྡོ་རྗེ་ཕག་མོའི་མཚན་སྙན་དུ། །ཕྱོགས་ཤར་ནས་དཀར་གསལ་ཟླ་ཤར་ཚེ། །མི་ཁོ་བོ་འདུག་པའི་བྲག་སྟེང་ནས། །རྫས་ནོར་བུ་ཆུ་ཤེལ་འཛག་པའི་ཆུ། །གོས་དམར་སྟེང་འཁྱིལ་བ་མྱངས་ཀྱིན་ཞིམ། །དེ་ནས་རྐྱེན་མེད་ཀྱི་སྒྲ་ཆེན་གྲག །སང་རྣམ་པར་རྒྱལ་བའི་མཆོད་རྟེན་མཐོང་། །གསར་བྱུང་གི་བདུད་རྩི་སྐོམ་དུ་བསྟེན། །དེར་ས་གཞི་འདར་ཞིང་རི་བོ་འཁྲོལ། །བར་ཆད་དངོས་གྲུབ་འཐབ་པ་ཕྱི་མ་རྒྱལ། །མི་འཇིགས་པའི་སེང་གེའི་ཁྲི་ཆེན་རྙེད། །མཁའ་འགྲོ་མ་འདུ་བའི་རྒྱལ་སྒོ་མཐོང་། །ལྷ་རྣམས་རྒྱལ་ཐུགས་ཀྱི་འོད་ཟེར་ལྔ། །མི་ཁོ་བོའི་སྙིང་གར་ཐལ་གྱིས་ཟུག །ལམ་དཀའ་ཡང་བསྡོས་ཏེ་ཕྱིན་པས་འཚངས། །འོད་འབར་དུ་དགོས་འདོད་ཀྱི་རྟེན་འབྲེལ་འགྲིག །གཡུ་མཚོར་བགེགས་ཚོགས་ཀྱི་བབས་ཞུས་ལོངས། །སྟག་ཚང་དུ་མངོན་སྤོད་ཀྱི་ལས་པར་བསྐོས། །ཉམས་འཕྲལ་སྣང་གི་འཆར་སྒོ་བཤད་མི་རྫོགས། །དུས་མ་འོངས་སྟོན་པ་འདི་ཀ་ཙམ། །ཁྱེད་གྲོགས་ལ་དགའ་ནས་བླངས་པ་ཡིན། །མི་ཀུན་ལ་མི་བསྒྲགས་གསང་བར་འཚལ། །གཏམ་བདེན་རྫུན་ལོ་རས་གསལ་དུ་འགྲོ། །ང་དགའ་ཡོ་སྐྱིད་དོ་ཐོལ་ལེ་རྒྱལ། །ཅེས་སོ།། །།ཡུལ་ཌཱ་ཀིའི་ཕོ་བྲང་དཔལ་གྱི་ཙ་རི། །གསང་ཆེན་གྱི་དཀྱིལ་འཁོར་རིས་མེད་དུ་འཆར་བ། །དེ་འདྲ་ཚོ་འཁོར་བ་སྐལ་བཟང་གི་མེ་ལོང་། །དངོས་གྲུབ་ལེན་ཤེས་འདི་འདུན་མའི་ཡང་རྩེ། །བསམས་ཀྱིན་འཚེངས་པ་འདི་གཏན་གྱི་གཏན་དོན། །དད་ལྡན་བསྐོར་མི་ཚོ་སྐྱིད་པའི་གླུ་ལེན། །གསང་ཆེན་སྣོད་གྱུར་འདིས་དགའ་བའི་བྲོ་བརྡུང་། །བློ་བདེ་དང་གུ་ཡངས་སུ་འབོལ་མོ་འཛོམ་འཛོམ། །དལ་འབྱོར་གྱི་མི་ལུས་དོན་ལྡན་དུ་སྦྱར་ནས། །གཞན་དོན་གྱི་སྙིང་པོ་བྱང་ཆུབ་མཆོག་སྒྲུབ་པ། །དེ་འདྲ་ཚོ་ཤཱཀྱ་ཐུབ་བསྟན་འཛིན་གྱི་མེ་ལོང་། །ལྷ་ཆོས་བྱེད་ཤེས་འདི་འདུན་མའི་ཡང་རྩེ། །བྱས་པས་འཚེངས་པ་འདི་གཏན་གྱི་གཏན་དོན། །དད་ལྡན་མཆེད་ལྕམ་ཚོ་སྐྱིད་པའི་གླུ་ལེན། །སངས་རྒྱས་༼༣༤ན༦༧༽སར་ཆས་འདིས་དགའ་བའི་བྲོ་བརྡུང་། །ཐར་པ་དང་རྣམ་གྲོལ་དུ་འབོལ་མོ་འཛོམ་འཛོམ། །མཚན་ལྡན་གྱི་བླ་མ་ཚུལ་བཞིན་དུ་བསྟེན་ནས། །ཐོས་བསམ་གྱི་མཐར་ཐུག་སྒྲུབ་པ་ལ་སྦྱར་བ། །དེ་འདྲ་ཚོ་བྱ་བཏང་ཚོགས་བའི་མེ་ལོང་། །ཕ་རྗེས་སྙོག་ཤེས་འདི་འདུན་མའི་ཡང་རྩེ། །བློ་རྩེ་གཅིག་འདྲིལ་འདི་གཏན་གྱི་གཏན་དོན། །སྒོམ་ཆེན་གྲལ་རིང་ཚོ་སྐྱིད་པའི་གླུ་ལེན། །ཆགས་ཞེན་མེད་པ་འདིས་དགའ་བའི་བྲོ་བརྡུང་། །འོག་མིན་གནས་མཆོག་ཏུ་འབོལ་མོ་འཛོམ་འཛོམ། །ཞེས་པ་འདི་ཡང་ཤར་མེ་རག་མདོ་པ་སངས་རྒྱས་རྒྱ་མཚོ་དང་། །བསོད་ནམས་འབྲུག་རྒྱལ་གཉིས་ཀྱིས་བསྐུལ་བའི་ངོར་པདྨ་དཀར་པོས་སྦྱོར་བའོ།། །།མ་འགྲོ་དྲུག་གི་དོན་དུ་རབ་དམིགས་ནས། །ཕ་མཚན་ལྡན་གྱི་བླ་མར་བློ་གཏད་དེ། །སེམས་བཅོས་མིན་གྱི་ངང་དུ་མཉམ་པར་ཞོག །ཚོགས་དྲུག་གི་སྣང་བ་མི་དགག་ལ། །གསར་སྐྱེས་ཀྱི་རྟོག་པའི་རང་ངོ་བལྟ། །ཆུ་ཐོག་ཏུ་ཆུ་རྒྱུན་བླུག་པ་བཞིན། །རྐྱེན་རང་གྲོལ་གྱི་ཉམས་ལེན་བློ་བདེ་པོ། །བོགས་རླུང་རྩོལ་གྱིས་བཏོན་ན་གསལ་ཉམས་ཆེ། །ཡིད་མི་རྟོག་པའི་ངང་དུ་འབྱམས་ཀླས་ན། །རང་ཅི་འདོད་ཀྱི་མངོན་ཤེས་རྫུ་འཕྲུལ་འགྲུབ། །དེ་མྱུར་ལམ་གསོལ་འདེབས་ཀྱི་ཟབ་མོ་ཡིན། །ཐུན་མཇུག་ཏུ་དགེ་བ་གཞན་དོན་བསྔོས། །ཐུན་མཚམས་སུ་གཏོར་མཆོས་སྤྱོད་རེམ། །བདེན་གཉིས་ཟུང་འབྲེལ་གྱི་ལམ་ཆེན་པོ། །སངས་རྒྱས་སུ་འགྲོ་བའི་སྟགས་ཀ་ཡིན། །ནོར་ཡོད་དགུ་དགེ་སྦྱོར་གྱི་བྱ་བཏང་ཁྱོད། །གནས་འདི་འདྲར་བསྒོམ་པ་སྐལ་བ་བཟང་། །ཚེ་འདི་དང་ཕྱི་མ་ཐམས་ཅད་དུ། །འབྲལ་མེད་ཀྱི་སྨོན་ལམ་ཁོ་བོས་འདེབས། །ཞེས་སྟང་རྩ་དགེ་སློང་ཀུན་དགའ་དབང་ཕྱུག་ཙ་རི་ཏྲར་ལོ་མཚམས་ཀྱི་བཅད་རྒྱར་གནས་པའི་བྱ་དགར་པདྨ་དཀར་པོས་གདམས་པའོ།། །།ལྟོ་གོས་གཏམ་གསུམ་ལ་རྩི་གཞག་བསྒྱུར་བ་ནོ། །༼༣༤བ༦༨༽འཇིག་རྟེན་ཆོས་བརྒྱད་ལ་ཐེག་བརྫིས་བྱེད་པ་ནོ། །ཚེ་འདི་བློས་གཏང་ལ་ཉམས་ལེན་བྱེད་པ་ནོ། །ཆོས་རྗེ་རྒྱ་རས་ཀྱི་རྣམ་ཐར་སློབ་པ་ནོ། །ལོ་རྒོད་རྣམ་གཉིས་ཀྱི་སྲོལ་ལ་འཇུག་པ་ནོ། །ཕ་རྗེས་བུས་གསེབ་ཀྱི་གོ་ཆ་གྱོན་པ་ནོ། །རི་ཁྲོད་དབེན་དང་ལ་ཕ་ཡུལ་བྱེད་པ་ནོ། །ཞེན་ལོག་སྙིང་རུས་ལ་པ་ནོར་བྱེད་པ་ནོ། །སྙིང་རྗེ་དང་མོས་གུས་ལ་གྲོགས་པོ་འཆོལ་བ་ནོ། །སྟོང་ཉིད་ཟབ་མོ་ལ་རྟེན་ཕུར་འཛུགས་པ་ནོ། །ཆགས་སྣང་རྨོངས་གསུམ་ལ་རོ་སྙོམས་བྱེད་པ་ནོ། །རང་དོན་ཡིད་བྱེད་ལ་དགྲ་རུ་ལྟ་བ་ནོ། །སེམས་ཅན་ཀུན་དོན་ལ་ལག་ལེན་བྱེད་པ་ནོ། །ཞེས་པ་མཚོ་ཡུལ་པདྨ་གླིང་དུའོ།། །།ལྷ་བཟང་པོ་དཀོན་མཆོག་རིན་ཆེན་གསུམ། །མཚན་སྙན་པོ་བཤད་ན་འབྲུག་པའི་རྗེ། །ཕ་དེ་ལ་དད་པའི་གསོལ་འདེབས་མཁན། །ངེད་རྣལ་འབྱོར་གྱི་བྱུང་ཚུལ་འདི་ལྟར་ཡིན། །ཡུལ་གྲགས་པ་ཅན་གྱི་ཀོང་པོར་སྐྱེས། །ཐོག་མེད་ཀྱི་རིགས་བདག་བླ་མར་བསྟེན། །ལོ་གསུམ་གྱི་ངོ་ན་ཆོས་དང་མཇལ། །སྔར་སྦྱངས་ཀྱི་ལས་འཕྲོ་ཡིན་ལུགས་སད། །རིགས་རྒྱུད་དང་སྐྱེས་ས་མི་དྲག་ཀྱང་། །མི་ཆེན་གྱི་ཁྲོད་དུ་འབད་མེད་ཚུད། །འབངས་ཆབ་སྲིད་བོད་ཡུལ་སུ་ཆེར་དོ། །ཆེ་བཙུན་གྱི་བློ་གཏད་བཤད་མི་རྫོགས། །ཚེ་འདི་ཀས་འཐུས་ན་དེ་ཀས་འོང་། །རིག་གནས་ཀུན་མ་བསླབས་ཁོང་དུ་ཆུད། །ཡི་དམ་གྱི་བྱིན་རླབས་ངོ་མཚར་ཆེ། །དུས་ད་ལྟ་དབུས་གཙང་དག་པའི་ལྗོངས། །སུ་མཁས་ཀྱི་ཚོགས་སུ་རྩོད་ཀྱིན་དུ། །མི་ཁོ་བོའི་ཤེས་པར་འགྲན་མཁན་མེད། །མཐོས་དོགས་ཀྱི་ཟུག་རྔུ་ལྡང་བ་མང་། །གཟུར་གནས་ཀྱིས་སྨྲ་བའི་དབང་པོར་བསྔགས། །ཆོས་ཤེས་རྒྱུའི་སྦག་སྦུག་བྱེད་མ་དགོས། །ཆོས་བཤད་ལ་འགྲན་མེད་ཅིས་མི་འོང་། །སྡོམ་གསུམ་གྱི་ནོམ་པ་ཚུལ་བཞིན་བླངས། །གཞན་ཕན་གྱི་ཆེད་དུ་སྒོ་གསུམ་བཀོལ། །རང་དོན་གྱི་གཉེར་ཁ་རྒྱང་དུ་བྲིམས། །གནོད་བྱས་ཀྱི་ལན་དུ་བདེ་བ་སྤྲོ། །༼༣༥ན༦༩༽སྨན་ལན་དུ་དུག་འཇལ་ལ་མི་ཁྲོ། །ཕྲག་དོག་གིས་གཞན་ལེགས་དགག་མ་མྱོང་། །རང་རྒྱུད་ལ་ཉོན་མོངས་ཡན་མི་གཏོང་། །ཁ་འཇམ་གཏིང་རྩུབ་ལ་ཁྱད་གསད་བྱས། །ཚེར་མ་དར་བསྟུམས་དང་ཅུང་མི་འདྲ། །མི་ཚེ་རབ་ཅིག་འདྲ་དེས་ཕྱིར་མོད། །ང་དེ་ཀུན་གྱིས་བློ་ཁ་མ་རྫོགས་ནས། །རྗེ་རས་ཆེན་འདྲ་བའི་ཆོས་ཅིག་བསམས། །འཇིག་རྟེན་ཆོས་བརྒྱད་ལ་རྔོག་བརྫིས་བྱེད། །སྙིང་ནས་ཀྱི་ཐར་པ་སྒྲུབ་ལ་འགྲོ། །མི་ངེད་ཀྱི་རྗེས་སུ་འཇུག་པ་དཀའ། །ཁྱེད་ལྷ་ཡི་སྲས་མོ་དད་པ་ཅན། །བློ་རྩེ་གཅིག་མཚན་ལྡན་བླ་མར་གཏོད། །ལས་མི་དགེ་བཅུ་ལ་མཛེས་པ་དང་། །དཀར་པོ་དགེ་བ་བརྩོན་པས་བསྒྲུབས། །འདི་ཕྱི་བར་གསུམ་དུ་ལེགས་པའི་ཐབས། །ཞེས་སྤེལ་བྱུང་ནས་ཨ་ཆེ་བསོད་ནམས་དབང་མོས་བསྐུལ་བའི་ངོར་པདྨ་དཀར་པོས་མཁོ་མཐིང་ལྷ་ཁང་ཆེན་པོར་བྲིས་པ་དགེ། །ཐུབ་བསྟན་ལང་ཚོ་བདོ་བའི་ཐང་བྱམས་པ་ཆེན་པོའི་ཆོས་ཀྱི་གླིང་དང་ཁང་ཉེ་བའི་ལྗོན་ཤིང་གི་གསེབ་ཏུ་གནས་པའི་ནུབ་གཅིག་རྨི་ལམ་དུ། །གནས་བརྟན་མཁས་པར་རློམ་པའི་བཙུན་པ་རྒན་སེབ་པ་ཞྭ་ཅན་ཞིག་ན་རེ། །ཁྱོད་མདོ་རྒྱུད་སྡེ་རབ་འབྱམས་ལ་སྦྱངས་པ་མ་བྱས་པར་ཤོད་མི་འོས། །ཆོས་ལ་བརྒྱུད་པ། །དེ་ཡང་ཐོས་བསམ་བྱས་པ་བར་མ་ཆད་པ་དགོས་པ་ཡིན། །གཞན་མཁའ་འགྲོའི་ཆད་པ་འོད་ཟེར་བའི་ལན་འདི་སྐད་བཏབ་པ་རྨིས་སོ། །རྗེ་ན་མོ། །དུས་གསུམ་གྱི་སངས་རྒྱས་སྐད་གྲགས་ཅན། །མཚན་ལྡན་གྱི་སློབ་དཔོན་འདི་ཁར་འདུག །དེ་ཕྱིར་བརྒྱུད་བརྒྱུད་ཀྱི་ཉེ་རིང་བཞག །བློ་བླ་མར་བཀལ་བ་ངེད་ཀྱི་ལུགས། །ཕ་རྡོ་རྗེ་འཆང་ཆེན་ངག་གི་དབང་། །འཁོར་མང་པོ་འདུས་པའི་ཚོགས་དབུས་སུ། །མི་ཁོ་བོའི་སྙིང་ལ་ཕྱག་མཛུབ་གཏད། །བསླབ་སྦྱང་གི་ངལ་བ་བྱ་མི་དགོས། །ཆོས་ཀུན་ཤེས་འདི་ནས་རང་བརྡོལ་འོང་། །ལྷག་པར་གཞན་དོན་གཤེགས་ཀའི་དུས། །༼༣༥བ༧༠༽མི་ཁྱོད་དང་ཆོས་སྐྱོང་ཕྱག་བཞི་པར། །སངས་རྒྱས་ཀྱི་བསྟན་པའི་ཁུར་བབ་གསུང་། །དེ་སྙིང་ལ་མ་བརྗེད་བྲིས་པའི་ཕྱིར། །དུས་ད་ལྟ་ཆགས་སྡང་གི་ཚེར་དོང་བུ། །ཟུང་རྔུ་ལ་མ་འཛེམ་བསྟན་པ་སྤེལ། །མི་བདག་གི་ལག་པའི་སྙིམ་པ་ཟུང་། །ཕ་རྗེ་བཙུན་ཕྱག་གིས་བཅངས་བཅངས་ནས། །སྟེང་འོག་དང་ཕྱོགས་བཞི་མཚམས་བརྒྱད་དུ། །བསྟན་པ་དར་ཞིང་དུ་རྒྱས་པའི་རྒྱུད། །ཁྱོད་ཉིད་གྱུར་ཅིག་གི་སྨོན་ལམ་མཛད། །བདེན་སྟོབས་ཀྱི་ཕུལ་འདིས་ཕྱོགས་དུས་གར། །མི་ཁོ་བོའི་འཕྲིན་ལས་ནུབ་མི་སྙམ། །གཞན་དུ་ཡང་རྗེ་བཙུན་བཙུན་མོ་ཅན། །དཔལ་ཨ་ཝ་དྷཱུ་ཏིའི་ཞལ་སྔ་ནས། །སྙན་རྒྱུད་ཀྱི་གདམས་ངག་ཅི་འཕྲོད་མཛད། །ལག་ཁྲིད་ཀྱི་འཕྲང་ལ་བརྡར་ནས་ཞུས། །ཕྱོགས་འདི་ལ་རྨོངས་པ་ཡིད་ཆེས་ཕྱིར། །བཀའ་ཐོབ་དང་ལུང་ཐོབ་ཙམ་གྱིས་ཆོག །མངལ་གནས་ཀྱི་དྲ་མི་མྱུར་དུ་བྱང་། །ཚིག་རེ་ལ་ཟབ་རྒྱས་ཀྱི་གཏེར་འདོན་ངེས། །མཆེད་ལྕམ་དྲལ་འདུས་པའི་དབུས་སུ་གསུང་། །རྗེ་རྡོ་རྗེ་གླིང་པ་མཐུ་སྟོབས་ཞབས། །ཇི་སྙེད་ཀྱི་དཔེ་ཀུན་ལག་གཏད་ནས། །ཁྱེད་ནཱ་རོ་ཆོས་ཀྱི་སྤྱན་ལྡན་ཡིན། ཆོས་ཀུན་གྱི་རྡོ་རྗེ་སློབ་དཔོན་འོས། །ཁྱད་པར་དུ་དུད་སོལ་ལྷ་མོ་ལ། །ང་ཕྱིན་ཆད་ད་ཕྱིར་མི་དགོས་ཀྱི། །མི་འདི་ཡི་ལུས་དང་གྲིབ་མར་འགྲོགས། །ཅི་བཅོ་བའི་ལས་ཀ་བགྱི་ཞེས་གདམས། །དེ་བདེན་པའི་དཔང་དུ་མཆེད་གྲོགས་མང་། །ཕ་གྲུབ་ཐོབ་གསུམ་གྱིས་བྱིན་གྱིས་བརླབས། །ལུང་བསྟན་དང་རྗེས་སུ་གནང་བ་ཐོབ། །ཁོང་ཕྱོགས་བཅུའི་སངས་རྒྱས་བྱོན་ལགས་ཀྱང་། །དོན་དེ་བས་ལྷག་པ་ཡོད་སྙམ་མེད། །ཚེ་འདི་ལ་རྣམ་པར་གཡེང་བའི་ངང་། །མི་གཞན་མ་བྱ་བྱ་སྦྱང་མ་ཁོམ། །འོན་ཀྱང་དུ་ཤེས་བྱ་རིག་པའི་གནས། །ཕལ་ཆེར་ལ་མ་རྨོངས་མཁས་པར་གྲགས། །དུས་ད་ལྟ་སྡེ་སྣོད་འཛིན་པའི་ཁྲོད། །མི་ཁོ་བོའི་དོ་ཡ་ནོན་མཁན་མེད། །ང་དེ་ཕྱིར་ཤེས་ནས་འཆད་པ་ཡིན། །གནང་བ་ཐོབ་ནས་རྩོམས་པ་ཡིན། །ལོག་སྨྲ་འདུག་ནས་རྩོད་༼༣༦ན༧༡༽པ་ཡིན། །འདི་བསམས་ཀྱིན་རྗེ་བཙུན་ལུང་བསྟན་དྲན། །དྲན་གྱིན་དུ་གདུང་ཤུགས་ཇེ་ཆེར་ཐལ། །ཞེས་ནམ་སེང་ཕྲལ་ཟིན་བྲིས་སུ་བྱས་སོ།། །།དཔལ་གང་གི་ཞབས་སྐྱེས་འཁོར་ལོ་ཟུང་། །སུ་དད་པས་ཐོད་བཞིན་བསྟེན་པ་དེ། །དགྲ་མི་མཐུན་ཕྱོགས་ལས་རྣམ་རྒྱལ་བའི། །མགོན་རྒྱལ་བ་རྒྱ་མཚོའི་གྲལ་ཁྱུར་འཛུད། །ད་དེ་ཕྱིར་དད་པས་གསོལ་བ་འདེབས། །ཁྱོད་ཉོན་དང་ཆོས་མཛད་སྒྲུབ་པ་པོ། །བློ་རྩེ་གཅིག་སངས་རྒྱས་བསྒྲུབ་ཟེར་ན། །མ་ཁམས་གསུམ་འགྲོ་ལ་སྙིང་རྗེའི་བློས། །ཚེ་འདི་ཕྱིའི་སྐྱབས་མགོན་བླ་མར་ཞུས། །དུས་རྒྱུན་ཆད་མེད་པའི་གསོལ་བ་ཐོབ། །ཆོས་ཀུན་གྱི་གནས་ལུགས་ཇི་ལྟ་བ། །རང་སེམས་ལས་གཞན་དུ་མི་རྙེད་པས། །སེམས་ཇི་བཞིན་བཞག་པ་སྒོམ་པའི་ལམ། །ཕྱིས་གཉེན་པོས་བཅོས་སླད་མི་གཞུག་པར། །གང་ཤར་གྱི་སྟེང་དུ་རྒྱ་ཡན་གློད། །མཉམ་ཉིད་ཀྱི་གློང་དུ་འབྱམས་པར་མཆིས། །མ་བཅོས་ལྷུན་གྲུབ་ཀྱིས་འབྲས་བུ་འབྱུང་། །ཕ་བཀའ་བརྒྱུད་བླ་མའི་གསང་ཚིག་ཡིན། །ཁོང་ཀུ་ས་ལི་པའི་སྨན་སྦྱོར་ཏེ། །བཀའ་མདོ་རྒྱུད་ཀུན་གྱི་ཞེ་ཕུགས་ལགས། །ཞེས་རོང་ལུང་བསྟན་དགོན་པ་དཔོན་སློབ་རྣམས་ཀྱིས་ཞུས་པ་ལའོ།། །།རྗེ་བླ་མའི་སྒྲུབ་གནས་རོང་རི་འཐུལ་དུ་གནས་འབྲེལ་ཙམ་བགྱིས་པའི་ནུབ། །བཙུན་པ་ཆེན་པོ་གཅིག་གིས་བྱང་དྲངས་ཁྲོམ་ཚད་མེད་པ་ཞིག་ཁོ་བོ་ལ་དགའ་བའི་ལུགས་ཀྱིས་བསྙེན་བཀུར་འཕྲོས་པ་སྣ་ཚོགས་གཏམ་དུ་བགྱིད་པའི་རྨི་ལམ་ཅུང་ཟད་གསལ་བཏབ་པ། ཁྱོད་འདིར་ཚོགས་ལྟ་འདྲེ་གྲོས་བྱས་ནས། མཐོ་འཚམ་དམག་གི་བསྐོར་ལགས་ཀྱང་། །ཕ་ཆོས་ཉིད་བདེན་པ་གཟིགས་པ་དེས། །བློ་བདེ་བའི་རྩལ་དུ་ཁྱེར་བས་སུ། །བར་ཆད་བདུད་ཀྱི་སྐབས་མ་ཕྱེ། །དེར་ཡ་མཚན་ཁྱེད་ཀྱིས་མཚན་གསོས་པ། །དཔལ་སྒྱུ་མའི་གར་མཁན་རིན་པོ་ཆེ། །ཁྱེད་ཐམས་ཅད་བཀའ་ཡི་འབངས་སུ་བགྱིས། །དེ་མི་ཏྲ་ཛ་གིའི་༼༣༦བ༧༢༽ཐུགས་རྗེའི་རླབས། །མི་ཁོ་བོའི་སྙིང་ལ་གསོས་སུ་བརླན། །བློ་པདྨ་དཀར་པོའི་འདབ་བརྒྱ་ཕྱེ། །ཆོས་ལེགས་བཤད་དྲི་བཟང་ཁུངས་སུ་སོང་། །མགོན་འཇམ་པའི་དབྱངས་ཀྱི་གདན་དུ་ཕུལ། །ཁོང་བློ་གསལ་སྙིང་ག་སིམ་མོད་ཀྱང་། །ཉམས་བདུད་རྩིའི་ཟིལ་དངར་རྒྱས་པའི་ཕྱིར། །ས་འདིར་ཡང་བག་ཕེབས་གྲོགས་སུ་བསྙེན། །དེ་ལྷ་མི་ཚོགས་པའི་དགའ་སྟོན་ཡིན། །རྗེ་དམ་པའི་བཀའ་བཏགས་རྗེས་དགོངས་ལ། །གནས་འདིར་བསྒོམ་འགལ་རྐྱེན་མི་འབྱུང་བར། །ཡིད་མཐུན་པའི་དོན་ཀུན་གྲུབ་པར་མཛོད། །ཅེས་སྨྲས་སོ།། །།དེ་ལ་གནས་བསྟོད་དུ་བགྱིས་པ། །རྗེ་ན་མོ། །སྟེང་བྲག་དམར་ཟུར་གསུམ་རྩེ་མ་ཐོབ། །དེ་སྔོན་མོ་གནམ་གྱི་གྲོགས་འོས་སྙམ། །མཚམས་ཆུ་འཛིན་འཐུག་པོས་སྦྱར་བ་ཡིས། །གཏམ་སྙན་པ་འབྲུག་གིས་ཆེས་ཆེར་སྒྲོག །ཉམས་དགའ་པའི་རོལ་པ་གློག་གི་རྩེས། །སྒྲ་འུར་འུར་གནམ་ལྕགས་ཐོག་གིས་སྦྱོར། །ཡིད་སེམ་པ་ཟླ་ཤེལ་ཁུ་བས་སྐྱེད། །དེ་ངོ་མཚར་ལྷ་ཡི་སྐྱེད་མོས་ཚལ། །བར་གཡའ་སྡང་འཐབ་པ་འཇའ་ཚོན་འདྲ། །ནད་བརྒྱ་རྩ་འཇོམས་པའི་སྨན་ཀུན་འཁྲུངས། །བྱ་ཡིད་འོད་དུས་ཀྱི་སྒྲ་སྙན་བསྒྱུར། །ཆུ་དངས་མོ་རྫིང་དུ་འཁྱིལ་བ་ཅན། །རི་གཡས་གཡོན་སྤང་པོ་ངོས་གཟར་བ། །དབྱར་མཐོན་ཁའི་ནེ་གསིང་བརྡལ་བ་ལ། །བློ་སྤྲོ་བའི་མེ་ཏོག་ཚལ་དུ་ཆགས། །ཁོང་བུང་བ་གླུ་ལེན་ལྡིང་བའི་ཁྲོད། །ལྷ་གཉན་པོ་ཀུན་གྱི་རྩེད་འཇོ་རྩོམ། །སྨན་མཚར་མོའི་དོར་གཟིགས་མོར་ཆེ། །ས་དེ་འདྲའི་སྐྱིབས་ན་བསམ་གཏན་ཁང་། །ཕ་ནམ་མཁའ་རྡོ་རྗེའི་གྲོང་བཞུགས་པ། །གནས་རྡོ་རྗེའི་གདན་དང་མཚུངས་པ་ཡོད། སྨད་བྲག་རི་ནགས་ཚལ་དྲ་བ་ཅན། །གཅན་གཏུམ་པོའི་ངུར་སྒྲ་སྐྱི་ཤ་གཡའ། །ཆུ་དྲག་པོའི་ཧཱུཾ་སྒྲ་བ་སྤུ་ལྡང་། །འདྲེ་ལྟ་སྲིན་གྱི་གས་སྒྲ་ཞེ་རྩ་འཇིགས། །མི་སྐལ་མེད་ཀྱི་སྲོག་ལ་ཧབ་བཤའ་ཡོང་། །གྲོགས་སྐལ་ལྡན་གྱི་ཚོགས་ལ་སྤ་བཀོང་ནས། །མཐར་དངོས་གྲུབ་སྟེར་བའི་གཉེན་དུ་ཁུགས། །༼༣༧ན༧༣༽ས་དེ་ལ་མཚན་སྙན་རོང་རི་འཐུལ། །མདུན་རྡོ་བོད་མཚམས་ཀྱི་གངས་རི་རྣམས། །འཕྲལ་སྐྱོ་ཤས་ཀྱི་དགེ་བསྐུལ་ཆེ་ལ་བདར། །རྐྱེན་བསེར་བུས་བྱིང་བ་སེལ་བའི་དཔྱིད། །ཚེ་བློས་བཏང་གི་འབྱོན་ས་འདི་ན་གདའ། །ཞེས་སོ།། །།སྡོན་བྱོན་གྲུབ་ཐོབ་ཀྱི་པདྨ་འབྱུང་། །ཕྱིས་དར་པ་རྗེ་བཙུན་རས་ཆུང་ནས། །ཕ་སྒྱུ་མའི་གར་མཁན་ཡན་ཆོད་དུ། །སྐྱེས་ཆེན་གྱིས་བྱིན་བརླབས་བྱར་བུའི་ནགས། །དཔལ་རྡོ་རྗེ་གཞོན་ནུ་སྒྲུབ་པའི་གནས། །ས་དེར་ཡང་རྣལ་འབྱོར་སྒྱུ་མའི་འཕྲུལ། །ངེས་འགའ་ནི་མི་ཆེན་གྱི་ཚོགས་དབུས་ན། །སྡིག་སྤྱོད་ལ་ཙ་ར་བདའ་འདེད་པ། །འགའ་ཞིག་ཏུ་རབ་བྱུང་བཙུན་པའི་གསེབ། །ལུང་རིགས་ཀྱིས་ཆོས་ལོག་སུན་འབྱིན་མཁན། །ལ་ལ་ན་ཕ་རྗེས་བུས་སྙོག་པའི། །ཚེ་བློས་བཏང་རྣལ་འབྱོར་བྲེལ་བ་ཅན། །བརྟགས་ན་བྱར་མེད་ཀྱི་རྣལ་འབྱོར་པ། །མ་བརྟགས་པའི་ངོ་ན་ལས་མང་པོ། །འདི་ཐམས་ཅད་གཞན་དོན་གྱི་རྩལ་སྦྱོང་ཞེས། །ཉམས་དགའ་ནས་རྒྱ་གླུ་འཐེན་ལགས་ཀྱི། །ཁྱེད་བློ་ཁ་ཚིམ་མམ་དད་ལྡན་རྣམས། །དབྱངས་མཆོད་པའི་རྫས་བཞེས་ཌཱ་ཀི་མ། །ཞེས་སོ།། །།བྱང་དམ་རིངས་ཀྱི་ཆོས་གྲྭ་ཆེན་པོར་དགེ་བའི་བཤེས་གཉེན་སློབ་དཔོན་འབུམ་རབ་འབྱམས་པ་ལ་བསྲིངས་པ། །དཔལ་སྙིང་པོ་དོན་གྱི་བསྟན་འཛིན་ལ། །རྒྱ་གར་ན་གྲུབ་ཐོབ་བརྒྱད་ཅུ་བཞི། །བོད་ཡུལ་ན་དགས་པོ་བཀའ་བརྒྱུད་ཙམ། །གཞན་ཐ་སྙད་ལ་སངས་རྒྱས་དངོས་སུ་རེ། །ངེད་བཅོས་མིན་གྱི་ལམ་པ་ཕྱག་རྒྱ་ཆེ། །གཤིས་རྣམ་དབྱེས་བཏང་བའི་ལྷན་ཅིག་སྐྱེས། །རང་གཞན་གྱི་སྟོང་པ་སྒྲོ་བཏགས་ཡིན། །ཁྱབ་གདལ་དུ་འཇོག་ཤེས་ཅིག་ཅར་བ། །སེམས་སྐྱེ་མེད་རིམ་པའི་ཕྱོགས་ལ་ནི། །རྩེ་གཅིག་དང་སྤྲོས་བྲལ་རོ་གཅིག་དང་། །སྒོམ་མེད་ཀྱི་ལྷན་ཅིག་སྐྱེས་རྣམ་བཞི། །མི་ཐོད་བརྒལ་འཇུག་པའི་ལམ་རིམ་མོ། །སེམས་ཤིན་སྦྱངས་ཡིད་བྱེད་ཀྱི་རང་བཞིན་ལ། །མིང་རྩེ་གཅིག་ཕ་རྒྱུད་༼༣༧བ༧༤༽པ་སེམས་དབེན་ཟེར། །སེམས་རྣམ་བཅས་དམིགས་པ་ཉེར་ཞི་ལ། །སྤྲོས་བྲལ་ཏེ་མངོན་པར་བྱང་ཆུབ་པ། །སྔར་དུ་མར་གཟུང་བ་གཅིག་ཏུ་འདྲེས། །དེ་རོ་གཅིག་སློབ་པའི་ཟུང་འཇུག་སྟེ། །གློ་བུར་གྱི་བརྫུས་མ་ཐམས་ཅད་ཟད། །ལམ་གཞིར་ཕེབས་སྒོམ་མེད་མི་སློབ་པ། །དེ་རེ་རེ་ཆུང་འབྲིང་ཆེན་པོའི་ཚུལ། །ཉམས་མྱོང་གི་སྤུ་རིས་རིམ་གྱིས་པ། །དེ་ལྟ་བ་གཏན་ལ་འབེབས་ཚུལ་ཡིན། །ལུས་བྱེད་བཅིངས་ཁ་སྦྱོར་རླུང་གནད་ཀྱིས། །ཡུལ་ཐིག་ལེས་རྩ་རྣམས་སྦྱངས་པའི་མཐར། །དཔྱིད་བདེ་བའི་སྙོམས་འཇུག་ལ་ཞུགས་པས། །ཉམས་ཐུན་མོང་ཁྱད་པར་མཆོག་གསུམ་འཆར། །དཔེ་ཅན་གྱི་སྒྱུ་མ་ཀུན་གྱིས་སྨྲ། །ལྟ་གཟུགས་ཀྱི་རོལ་མོ་གསང་སྔགས་པ། །མཆོག་རྣམ་པ་ཀུན་ལྡན་འདི་ཤེས་པས། །དེ་སྣང་རྨི་བར་དོའི་ལམ་ཁྱེར་ཡིན། །ཕྱི་མངོན་བྱང་མཚོན་བྱེད་དོན་དམ་པ། །སེམས་རྟོག་པ་སྔ་ཕྱིའི་བར་དུ་འབར། །གཉིད་དུས་སུ་མངོན་སུམ་བྱེད་འདིའི་ཁྱད། །འཆི་དུས་སུ་ཅིས་ཀྱང་རྩལ་རྫོགས་ལོ། །སྐལ་དམན་ལ་འཕོ་བའི་སྐྱེས་མེ་ཞེས། །འདི་སྒོམ་པ་ལམ་གྱི་ཁྱེར་སོ་ཡིན། །སྔོན་འགྲོ་ལ་མི་མཐུན་བྱུང་ན་དགའ། །དངོས་གཞི་སྟོང་ཉིད་མ་བཅོས་པ། །རྣམ་རྟོག་དང་ཉོན་མོངས་ལྟ་འདྲེ་དང་། །སྡུག་བསྔལ་དང་ན་ཚ་འཆི་བ་སོགས། །རི་མཉམ་དུ་ཁྱེར་བ་སྤྱོད་པ་ཡིན། །ཚིག་ཆ་ཙམ་འབུམ་ཕྲག་གཞུང་འཛིན་པ། །ཆོས་བཤད་པས་གོ་བ་དེ་ལ་གདམས། །ཞེས་སོ།། །།གཅིག་ཤེས་ཀུན་གྲོལ་གྱི་བླ་མ། །སྙིང་གའི་ཐིག་ལེ་ལ་བཞུགས་པས། །མགྲིན་པ་ལོངས་སྤྱོད་ཀྱི་འཁོར་ལོ། །འཛད་མེད་ལེགས་བཤད་ཀྱི་གང་བྱུང་། །མ་བཅོས་མཉམ་གཞག་གི་དང་ན། །སྣང་གྲགས་ལྷ་ཞལ་དུ་མཐོང་བས། །ཅི་བྱེད་གཞན་དོན་དུ་གྱུར་ནས། འཕྲིན་ལས་ཕྱོགས་མེད་དུ་ལྡན་སོང་། །སེམས་གཡེང་བར་བཅད་དུ་ཤེས་ཏེ། །ཡེངས་མེད་དྲན་པ་རུ་བརྟེན་པས། །བདུད་རིགས་ཆོས་སྐྱོང་དུ་འགྱུར་ནས། །༼༣༨ན༧༥༽གང་བསྒོ་དང་ལེན་ལ་ཆས་བྱུང་། །ལས་འབྲས་ཚུལ་བཞིན་དུ་གོ་བས། །འཁོར་བ་སྡུག་བསྔལ་དུ་ཤེས་ཏེ། །ཀུན་འབྱུང་གཉེན་པོ་ལ་འབད་པས། །ཐར་པ་གཏན་འདུན་ལ་ཁུགས་བྱུང་། །ཞི་བདེ་རང་དོན་དུ་ཤེས་ནས། །སྐད་ཅིག་དེ་དབང་དུ་མ་བཏང་། །སྒོ་གསུམ་གཞན་ཕན་ལ་བསྔོས་པས། །སྐྱིད་སྡུག་གདམ་དེ་དང་བྲལ་སོང་། །སྣང་བ་རྩལ་སྦྱོར་ལ་ཁོ་ནས། །སྦྱིན་སོགས་ཆོས་སྤྱོད་ལ་བརྩོན་བཞིན། །ཞེན་པ་རང་གྲོལ་དུ་བཏང་བས། །འཁོར་གསུམ་ཡོངས་དག་ཏུ་གྱུར་སོང་། །གང་ཤར་རང་རིག་གི་ལོངས་སྤྱོད། །སྣང་མེད་གཤིས་ལུགས་ཀྱི་བབས་གཉིས། །བལྟ་བྱ་ལྟ་བྱེད་དུ་འདྲེས་ནས། །མཉམ་ཉིད་ཁྱབ་གདལ་དུ་ལངས་སོང་། །མཁའ་ཁྱབ་སེམས་ཅན་གྱི་དོན་ལ། །འབད་མེད་སྒྱུ་མ་ཡི་རོལ་རྩེད། རྟོགས་ལྡན་རྣལ་འབྱོར་གྱི་བྱ་གཞག །ཁ་སྐད་མིང་རྐྱང་དུ་མ་ལུས། །ཅེས་པ་འདི་ཡང་བླ་མ་ནེའུ་རིངས་པ་ཆོས་སྐྱོང་བདེ་ལེགས་འགྲོ་དོན་ཇི་ལྟར་བྱེད་འདྲི་བ་ན་རང་ལུགས་ཀྱི་འགྲོ་དོན་འདི་ལྟར་བྱེད་ཅེས་གདམས་པའོ།། །།དེ་ལྟར་ཀུན་མཁྱེན་པདྨ་དཀར་པོ་དགུང་ལོ་ལྔ་བཅུ་ལ་ཕེབས་པ་ཡན་གྱི་རྡོ་རྗེའི་གླུ་ཇི་ལྟར་རྙེད་པ་ཕྱོགས་གཅིག་ཏུ་བསྡེབས་པ་འདིས་ཀྱང་འགྲོ་བ་ཐམས་ཅད་ཡང་དག་པའི་ལམ་ལ་སྐལ་བ་བཟང་པོ་དང་ལྡན་པར་གྱུར་ཅིག། །།ཆོས་སྦྱིན་རྒྱ་ཆེར་སྤེལ་བའི་ཆེད། །པར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱིད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །། དཔལ་པདྨ་དཀར་པོའི་གསུང་མགུར་ཞལ་གདམས་ཀྱི་རིམ་པ་འཐོར་བུ།དཔལ་པདྨ་དཀར་པོའི་གསུང་མགུར་ཞལ་གདམས་ཀྱི་རིམ་པ་འཐོར་བུ་བཞུགས་སོ། །སྙིང་པོའི་ལམ་ལ་མཛུབ་བཙུགས་ནས། །དག་པ་རབ་འབྱམས་སར་སྐྱེལ་བ། །འགྲོ་བའི་དེད་དབོན་འབྲུག་པའི་ཞབས། །བྱང་ཆུབ་ཕྱིན་ཀྱི་བར་དུ་མཆོད། །གཞུང་བརྒྱ་སྨྲ་བའི་ཀོང་སྟོན་ཁྱོད། །ལུང་དང་རིགས་པས་རྨོངས་པ་ཅི། །དེ་ལ་ནན་བརྟག་བྱ་མི་འཚལ། །ཡང་དག་འཇོག་ཁྱེར་ཅུང་ཟད་བཤད། །ཚིག་གི་ཐ་དད་མི་མཛད་པར། །དོན་གྱི་རུ་མ་ཅི་འདུག་ལྟོས། །གནས་ལུགས་གཏན་ལ་འབེབས་པ་ལ། །མདོ་སྔགས་གཉིས་ཀ་བློ་རྩེ་གཅིག །འོན་ཀྱང་དངོས་ཟིན་འབེབས་ཁྱེར་ལ། །ཟབ་དང་ཡང་ཟབ་བླ་མ་གསུང་། །ཕར་ཕྱིན་ཐེག་པའི་འཇུག་སྒོ་ལ། །དཔྱད་སྒོམ་འཇོག་སྒོམ་རྣམ་གཉིས་སྣང་། །ཐོས་པས་སྒྲོ་འདོགས་ལེགས་དཔྱད་ནས། །སྒོམ་ལ་འཇུག་པ་སྔ་མའི་ལུགས། །འདི་ལ་ཐོས་དོན་སེམས་པའི་རིང་། །སྒོམ་སྐད་བཏགས་ཀྱང་བསམ་བྱུང་ཡིན། །རེ་ཞིག་བརྟག་དཔྱད་ཙམ་བཞག་ནས། །རྣམ་པར་མི་རྟོག་གང་སྐྱེ་བྱ། །ཞི་གནས་སེམས་རྙེད་བརྟན་པར་བྱ། །ཇི་ཙམ་བཞག་ལོ་གནས་པར་ནུས། །དེ་ཡི་ངོ་བོ་དྲན་པ་ཡིན། དྲན་པ་ཡེངས་པ་མེད་ལ་བཏགས། མ་ཡེངས་པ་ན་འགྱུར་བ་རིག །རིག་པའི་ཆ་དེ་ཤེས་བཞིན་ཡིན། །དེ་ཉིད་དུས་གཅིག་ཉིད་བྱུང་བས། །དྲན་ཤེས་འཇུག་པ་གཅིག་ཏུ་གསུངས། །ཐུན་ལ་འཇུག་དང་ཐུན་ནས་སུ། །སྔར་གྱི་ཐོས་དོན་ལ་སེམས་ལ། །དངོས་གཞིའི་དུས་སུ་མི་རྟོག་གཞག །སྦྱོར་དུས་རྟེན་རྒྱུ་ཐ་དད་པས། །དངོས་གཞི་སོ་སོ་སོར་འགྱུར། །དེས་ན་ཞི་གནས་ཡིད་བྱེད་ལམ། །བསམ་གཏན་བཞི་པ་དག་ཐོབ་ནས། །མངོན་ཤེས་རྫུ་འཕྲུལ་འབྱུང་བའི་ཕྱིར། །དེ་འདོད་པ་རྣམས་དེ་ལ་འཇུག །འདོད་སེམས་རྩེ་གཅིག་ལ་བརྟེན་ནས། །ལྷག་མཐོང་བགྲོད་པ་རྐྱང་གྲོལ་བཞིན། །ཟག་མེད་ལམ་གྱི་ཁྱད་པར་གྱིས། །ཉན་ཐོས་པ་བཞིན་འདི་མི་འགྱུར། །ཐོས་པས་༼༢ན༣༽སྒྲོ་འདོགས་མ་ཆོད་ཀྱང་། །བླ་མའི་མན་ངག་ཙམ་བསྟེན་ནས། །རྣམ་པར་མི་རྟོག་བསྒོམ་པ་ལ། །འཇོག་སྒོམ་པ་ཞེས་དིང་སང་གྲགས། །གཉིས་ཀར་རྩེ་གཅིག་སེམས་བརྟན་དད། །ཤེས་བཞིན་གྱིས་དཔྱོད་སོར་རྟོག་སྟེ། །ལྷག་མཐོང་དངོས་རྒྱུ་འདི་ཡིན་གྱི། །ལུང་རིགས་དཔྱད་པས་མི་རྟོགས་ཏེ། །དེ་ནི་ཁ་ཕྱིར་ཕྱོགས་པ་དང་། །གནས་ལུགས་ནང་ཕྱོགས་རང་རིག་ལས། །གཟུང་འཛིན་གྱིས་བཏང་གསལ་རིག་ཤར། །རང་ངོ་རང་གིས་ཤེས་སྙམ་རྗེས། །རྩེ་གཅིག་སེམས་ལས་འགྱུར་ཙམ་མཐོང་། །འགྱུར་བ་རང་དུས་ལས་མི་གནས། །འགྱུར་མཐོང་ཉིད་དུས་རང་གྲོལ་བ། །ཐོག་སྦྲུལ་ཐག་པར་མཐོང་བ་བཞིན། །མཐོང་དང་མཐོང་བྱ་བརྟགས་ན་སྟོང་། །མ་དཔྱད་སྒྱུ་མ་ཙམ་དུ་སྣང་། །གང་ཤར་ངོས་ཟིན་འདི་ལ་ཟེར། །དེས་ནི་དམིགས་པ་ཉོན་མོངས་དང་། །སྤྱོད་པ་ཀུན་ལ་འདི་རིག་པས། །གང་ཞིག་སྤང་རྒྱུ་སུ་ཡིས་སྤོང་། །ཇི་ལྟར་བྱས་སྤོང་མི་དམིགས་པས། །སྤང་བླང་མེད་པའི་ལམ་འདི་ཡིས། །ཆོས་ཀུན་གདོད་ནས་གནས་པར་འབྱོར། །དེ་ཕྱིར་ལྷན་ཅིག་སྐྱེས་སྦྱོར་གསུངས། །ཅུང་ཟད་སྣང་རྒྱུ་དམིགས་རྒྱུ་ཡོང་། །དེ་སྲིད་ངོ་ཤེས་རང་གྲོལ་ཡོད། །རྣམ་རྟོག་ཆོས་སྐུར་འཆར་སྐབས་ཡིན། །ལྟག་མཐོང་མངོན་སུམ་གྱུར་པ་ཟེར། །སྣང་དམིགས་ཐམས་ཅད་དག་པ་ན། །འབྲས་བུ་ཕྱག་རྒྱ་ཆེན་པོར་སོང་། །དེ་ནི་ཀུན་ཁྱབ་ཕྱོགས་ཆ་བྲལ། །བྱིས་པའི་བློ་ཡིས་རྟོགས་པ་མིན། །སངས་རྒྱས་ཁོ་ནའི་གཞལ་བྱའོ། །དེས་ན་མཚན་ཉིད་དངོས་ཟིན་ལ། །བརྒྱུད་པས་ཉོན་མོངས་འདུལ་བ་ཡིན། །ཤར་དུས་གྲོལ་བ་འདིའི་གནད་ཀྱིས། །གསང་སྔགས་པ་རྣམས་དངོས་རྒྱུ་འཇོམས། །ཉོན་མོངས་ཉིད་མཐོང་བྱང་ཆུབ་ཏུ། །ཟབ་མོའི་མདོ་ལས་ཀྱང་གསུངས་པས། །ཕུགས་སུ་མདོ་སྔགས་དགོངས་པ་གཅིག །ཅེས་ཀོང་ཡུལ་རྡོ་རྗེ་གདན་ནས་པདྨ་དཀར་པོས་སྤུར་སྟེང་ཆོས་སྡེའི་སློབ་དཔོན་ཀོང་སྟོན་གཞུང་བརྒྱ་སྨྲ་བགྲགས་པ་རིན་ཆེན་ལ་བསྲིངས་པའོ།། །།གཟུང་འཛིན་༼༢བ༤༽གྱི་འཆར་སྒོ་དྲག་པའི་ཚེ། །འདུ་འཛི་གཡེང་བས་འབྱམས་གྱུར་ན། །མཁས་མཁས་བསླབ་པ་པག་ཤིར་སོང་། །བདེན་མེད་དུ་འཆར་བ་ཞིག་དགོས་དགོས་འདྲ། །ཉོན་མོངས་ཀྱི་རླུང་འཚུབ་ལངས་པའི་ཚེ། །གཉེན་པོ་གར་ཁྱེར་མ་བྱུང་བའི། །བཙུན་བཙུན་སྐད་བྱས་ཚུལ་འཆོས་ཡིན། །ཞི་དུལ་དུ་སོང་བ་ཅིག་དགོས་པ་འདྲ། །ཆོས་བརྒྱད་ཀྱི་རྦ་གློང་འཁྲུག་ཙ་ན། །མགོ་སྙོམས་ཀྱི་གྲུ་བོ་འཆག་མཁན་དེ། །ཞིག་ཞིག་སྐད་བྱས་ཀྱང་བཟང་བརྫུ་ཡིན། །རོ་སྙོམས་སུ་འགྲོ་བ་ཞིག་དགོས་པ་འདྲ། །ཆགས་སྡང་གི་མཚོན་རྩེ་གཟིངས་ཙ་ན། །སྡུག་བསྔལ་ལེན་ཞིག་མི་བསམ་པའི། །བློ་སྦྱོང་སྦྱོང་བྱས་ཀྱང་རེངས་པོ་ཡིན། །བདག་གཞན་མཉམ་ཉིད་གཅིག་དགོས་པ་འདྲ། །ཞེས་རབ་འབྱམས་སྨྲ་བ་སངས་རྒྱས་རྡོ་རྗེ་ལ་གདམས་པའོ།། །།དུས་སྙིགས་མར་གྱུར་པའི་གནས་སྐབས་འདིར། །ཆགས་སྡང་གི་གློང་ན་བན་བཙུན་འཁྱམ། །མི་གཞན་མའི་ཕུན་ཚོགས་མི་བཟོད་འཁྲུགས། །འདི་བསམས་ཀྱིན་གྲོང་ཡུལ་གྱི་ཕྱོགས་ལ་བྱོལ། །ཟང་ཟིང་གི་འདུ་ལོང་དུག་གི་ཟས། །འབགས་ཆེ་ཀྱིན་ཐར་པའི་སྲོག་ལ་གཟན། །དེ་བས་ཆགས་མེད་ཀྱི་བྱ་བཏང་ལ། །ཆོས་འདུལ་བའི་སྙིང་པོར་བསམས་ནས་ཞུགས། །རྒྱུད་ཆོས་བརྒྱུད་གཅིག་དང་མ་བྲལ་རིང་། །ཡེངས་མེད་ཀྱི་ཞི་གནས་གསེར་ལས་དཀོན། །དེས་ན་ཞེན་ཡུལ་གྱི་སྟེང་འདི་རུ། །ལུང་རིགས་ཀྱི་རལ་གྲིས་ཅིས་མི་བསྣུན། །གར་གཏང་ལ་ལྷོད་དེ་སྡོད་ཚུགས་ན། །རྣམ་རྟོག་གི་གཡོ་སྒྱུ་དེ་ཀར་འཇིག །ཉམས་བདེ་གསལ་བའི་གློང་ན་རིག་པ་ཤར། །བདེན་འཛིན་ལ་འཇོམས་བྱེད་དཔའ་བོར་སོང་། །ཉོན་མོངས་པའི་རང་མཚང་དེ་ན་རིག །སྤང་རྒྱུ་ཞིག་མེད་པ་ལག་ཏུ་ལོན། །ཐོབ་མེད་ཀྱི་འབྲས་བུ་ཐོབ་པ་ལ། །དཀའ་ཚེགས་མེད་སྙམ་ངེས་ཤེས་སྐྱེད། །ཅེས་མཚན་སྒྲོག་མཁན་ཆེན་གྱིས་བསྐུལ་བས་པདྨ་དཀར་པོས་གླུར་བགྱིས་སོ།། །།ཟང་ཟང་ནེ་རིང་གི་སྒྲུབ་ཆེན་པ། །སྲས་བདེ་ལེགས་རྒྱལ་མཚན་གྱི་རྣམ་༼༣ན༥༽ཐར་སྐྱོང་། །ཕ་རྗེས་བུས་འཛིན་གྱི་དཔའ་དར་ལ། །ནོར་དངོས་པོའི་ཞེན་པ་ལོག་པས་ན། །གཏམ་དབྱངས་སུ་བསྙད་པའི་བསླབ་བྱ་བྱེད། །དེ་ཞིབ་མོར་བརྟགས་ལ་བླང་དོར་མཛོད། །གསར་བུ་ཡི་གེ་ནག་ཐུག་དུས། །གོ་ལ་རེ་ནས་སློབ་པས་ངལ། །ཟུར་གོ་ཙམ་ནས་ཙམ་གྱིས་གཞོག །སྙིང་རུས་ཅན་གྱིས་བློ་གསལ་ཐོན། །མི་གཞན་མས་སློབ་དཔོན་འོང་རེས་བཏུད། །གཞན་ལས་ཟབ་ཁྱད་ཆེས་བསམ་ནས། །ཚིག་གྱ་གྱུ་ཅིག་ལ་ཁྲིད་ཁྲིད་ནས། །གཞུང་ལུགས་ཀྱི་ཚུགས་ཁ་ཤོར་ནས་ཐལ། །ཐོས་བསམ་པ་ཡི་འབུབ་པ་ཡིན། །ཐོས་པ་བྱས་པའི་དགོས་པ་དེ། །ཚིག་ལས་དོན་མཚོན་དོན་ཡང་ནི། །དྲང་ངེས་གཉིས་ལས་ངེས་དོན་འཁྲིལ། །སྒོ་འདོགས་མེད་པ་དགོས་རྒྱུར་གདའ། །གཞོན་དུས་གདམས་ངག་སྣ་རེས་ཐོས། །གསར་འགྲོགས་བྱས་ནས་བསྒོམས་པའི་མཐུས། །ཉམས་སུ་མྱོང་བ་སྣ་རེ་རྙེད། །བྲོད་ཀ་སྐྱེས་ནས་རི་ལ་བསྡད། །ལྟོ་གོས་གཉིས་ལ་གྱོང་ཁུར་བས། །མི་ཆོས་པ་རྣམས་དད་པ་སྐྱེས། །སྔས་སྲུངས་རིམ་གྲོར་སྤྱན་འདྲེན་བྱས། །གྲོང་ལྟག་གཅིག་ཏུ་དགོན་པ་བཅས། །ཉམས་ཀྱི་སྣང་བ་འདུ་འཛིས་ཁྱེར། །སྒྱུར་འགོང་ལེགས་ཕྱོགས་སྒྲུབ་རྟགས་རློམ། །སྒོམ་ཆེན་རྣམས་ཀྱི་འབུབ་སར་མཐོང་། །བསྒོམས་པའི་དགོས་པ་གང་ཡིན་ན། །ཏིང་ངེ་འཛིན་གྱིས་དངོས་སྣང་བཤིག །ཤེས་རབ་ཟབ་མོས་ཞེན་པ་ཕྱུང་། །ཆོས་བརྒྱད་མགོ་བོ་སྙོམས་གྱུར་པས། །རྒས་ཀྱིན་རི་ཁྲོད་ཇེ་མཐོར་གཏོང་། །བྱིས་པ་ཞིག་ནས་དཀོར་ལ་བཟས། །རྣམ་རིག་བཀྲ་ན་རེ་བ་ཆེ། །འཇུན་མཁན་ཡོད་རིང་བསྟོད་ར་ཡོང་། །རང་དབང་ཐོབ་ནས་བག་ཡངས་ཀྱིས། །མི་ནག་པ་ལས་བུ་གཙིས་ཆེ། །བྱ་བྱེད་དེ་ཡི་ཆེད་དུ་སྤུང་། །རྒས་ཀར་དཀོར་སྨིན་སྡུག་ལ་གཏད། །བརྒྱུད་ཅན་བླ་མའི་འབུབ་སར་མཐོང་། །བརྒྱུད་པ་ངོམ་པའི་དགོས་པ་དེ། །ཕ་མེས་བྱ་བའི་སྲོལ་བཟུང་ནས། །སྡེ་དགོན་གུད་པ་བསྲུང་བ་དང་། །རང་ཉིད་ངན་འགྲོར་མི་འཁྱམ་ཙམ། །ཁ་ཞེ་མཐུན་པ་དགོས་རྒྱུར་གདའ། །དད་པ་ཅན་གྱིས་༼༣བ༦༽བསྙེན་བཀུར་བྱས། །རྒྱལ་ཁམས་རྣམས་སུ་མཚན་སྙན་གྲགས། །འདུས་པ་ཆར་སྤྲིན་ལྟ་བུར་འདུ། །ནོར་རྫས་རི་ལྟར་སྤུངས་ཙ་ན། །རང་གིས་ཆོག་པར་མི་འཛིན་པར། །གཞན་མའི་དེ་ཡང་བསྙབ་ལ་རིངས། །འོག་ཏུ་མ་འདུས་རྩོད་པ་འཛུགས། །ང་རིས་དམག་དཔོན་ཆེན་པོ་དེ། །བླ་ཆེན་རྣམས་ཀྱི་འབུབ་སར་མཐོང་། །མཚན་ཉིད་ལྡན་པའི་བླ་མ་ནི། །བསགས་པ་གཞན་ལ་ཕན་པར་སྦྱོར། །འདུས་པ་ཆོས་ལ་འགོད་པ་དང་། །ཀུན་མཐུན་ཀུན་ལ་གང་ཕན་སྒྲུབ། །འབྲེལ་ཚད་དོན་ལྡན་བྱེད་པ་ལགས། །ཟང་ཟང་ནི་རིང་གི་སྒྲུབ་ཆེན་ཆོས་སྐྱོང་བདེ་ལེགས་ཀྱིས་གསེར་ལ་སོགས་པའི་རྙེད་པ་ཕུལ། །ལྷག་པར་སྒྲུབ་ཚུགས་དཔེ་མེད་པ་གཟུང་། །ད་དུང་འཇིག་རྟེན་ཆོས་བརྒྱད་སེར་སྲུངས་ཐུ་བོས་སེར་བ་ལ་བཞིན། གདོང་བཟློག་ཏུ་བྱེད་པའི་བྱ་དགར། ཤར་ཀོང་པོའི་ཟ་ཡུལ་ཕུ་དཀར་རྒྱུད་ཆོས་སྡིངས་སུ་སྦྱར་བའོ།། །།སྔར་བྱས་པའི་སྡིག་དང་ལྟུང་བ་ཚོ། སེམས་འགྱོད་པས་བཤགས་ཤིང་བསྡམས་པས་འདག །དེ་མ་བྱས་ཉོན་མོངས་སྐྱེ་བའི་ཚང་། །ངན་སོང་གི་སྡུག་བསྔལ་འབྱུང་ས་ཡིན། །དུས་གསུམ་གྱི་དགེ་བ་གཞན་དོན་བཏང་། དེ་བླ་མེད་བྱང་ཆུབ་ཆེན་པོར་བསྔོ། །བསོད་ནམས་ཀྱི་ཚོགས་རྫོགས་དེ་ལས་འབྱུང་། །སངས་རྒྱས་ཤིག་སྒྲུབ་ན་མེད་ཀ་མེད། །དགེ་སྡིག་གི་རྩ་བ་སེམས་ལ་ཐུག །སེམས་སེམས་སུ་གཟུང་ན་གོལ་ནས་འགྲོ། །སེམས་སྟོང་ཉིད་དུ་ཤེས་ན་ལམ་གྱིས་འཁྱེར། །སྒྱུ་འཕྲུལ་བྱ་རོལ་རྩེ་བྱ་བའི་གྲོགས། །ཞེས་ལ་སྟོད་ལྷོ་པ་དགེ་སློང་འཕྲིན་ལས་རྒྱ་མཚོ་ལ་གདམས་པའོ།། །།རྗོད་བྱེད་ལུང་གི་སྒོ་ནས་རྣམ་མང་ཡང་། །ཅི་བཤད་སྙིང་པོ་གཅིག་ཏུ་འཁྲིལ་བས་སུ། །རང་སར་བདེན་དང་ཐུགས་གཅིག་མཛུབ་བཙུགས་པ། །ཆོས་ཀྱི་བླ་མར་འོས་ཀྱིས་མི་དབང་སྟེན། །དྲི་བྲལ་ཤེལ་ལ་ཚོན་ཆགས་མིན་ན་ཡང་། །གབ་རྩེ་གང་དུ་བཙལ་བའི་གདངས་འགྱུར་བཞིན། །མོས་དང་ཁམས་དང་བག་ལ་ཞི་དབང་གིས། གསུང་གཅིག་རྣམ་པ་མང་པོར་སོང་བ་༼༤ན༧༽ལས། །སྤྲིན་བཅས་སྤྲིན་མེད་དུས་ནའང་ནམ་མཁའི་ཁམས། །རྣམ་པར་མ་གྱུར་དེ་བཞིན་ཆོས་དབྱིངས་ལ། །སེམས་ཅན་སངས་རྒྱས་དབྱེ་བ་མེད་འདིས་སུ། །བཤད་བྱ་གཅིག་ཏུ་མི་འབབ་ཀ་མེད་ཡིན། །དེས་ན་གཅིག་ཤེས་ཀུན་གྲོལ་བསྒྲུབ་པ་ཡིས། །ཐོབ་པའི་སྙིང་པོ་བསམ་པའི་ལྷུན་ཆགས་པས། །སྒོམ་བྱུང་འབྲས་བུའི་དཔལ་བྱི་དགའ་ཆར་བྱིས། །འཇིག་རྟེན་ཁམས་ཀུན་འདོད་དགུས་ཚིམ་པར་འགྱུར། །འདི་མཁྱེན་འདོད་པའི་སྡེ་ལ་རྒྱབ་ཕྱོགས་པ། །གངས་དང་རི་སུལ་ནགས་ཕུག་དབེན་པར་མོད། །རྒྱལ་པོའི་ཕོ་བྲང་འཁོར་དུ་ལང་ལོང་མིན། །ཤཱཀྱའི་རིང་ལུགས་རང་ནི་དེ་ལགས་སོ། །ནོར་དང་ཆེར་འགྱིང་ཆོས་ཀྱིས་བསྒྲུབ་བྱ་ན། །འཁོར་ལོས་བསྒྱུར་བའི་སྲིད་སྤངས་ནགས་རྒྱུ་ཅི། །བཟའ་བཏུང་ག་ཞ་བྱ་བའི་སྙིང་ཡིན་ན། །ཀློག་དང་སྤོང་བར་བསྟན་འཛིན་བསྙན་ནས་ཅི། །སྡེ་དགོན་ཁེ་འཚོལ་གསོག་འཇོག་བྱེད་པ་དང་། །ཐལ་འགྱུར་སྔོ་ཕྱེར་སོང་བའི་ཚིག་སྦྱངས་དང་། །སྙིང་པོས་འཕོངས་པས་ཕཊ་བརྗོད་སྲང་རྒྱུ་རྣམས། །མོད་ཀྱང་ཆོས་སུ་སོང་སྙམ་མ་མཆིས་པ། །རྒྱལ་པོ་ཆོས་ཀྱི་སྣང་བ་མཆོག་གི་མདུན། །དམ་ཚིག་ངོ་མཚར་གཟིགས་མོ་འབུལ་ཞོས་སྙམ། །ལེགས་བཤད་ཚིག་རེའི་སྟང་སྟབས་ཉམས་འགྱུར་གྱི། །རྩེད་འཇོར་བགྱི་འདིར་སྤྱན་རས་བཙའ་བར་འོས། །ཞེས་པ་རིན་སྤུངས་སྡེ་པ་ཆོས་ཀྱི་རྒྱལ་པོ་ངག་དབང་ནོར་བུ་བཟང་པོ་ལ་གདམས་པའོ།། །།རིགས་ཀུན་བདག་རྡོ་རྗེ་འཆང་ཆེན་ཡང་། །མཚན་ལྡན་གྱི་བླ་མ་འདི་ཀ་ལགས། །ལོགས་ཤིག་ནས་སྐྱབས་གནས་འཚོལ་མི་དགོས། །ད་ས་སྡེ་བཙུགས་ནས་གསོལ་བ་ཐོབ། །ཐག་ཉེ་རིང་ལ་བལྟོས་པ་མ་མཆིས་པས། །རང་འདོད་པའི་དོན་ཀུན་བདེ་བླག་འཐོབ། །ཡོན་ཏན་ཀུན་སྐྱེ་བའི་ཞིང་ས་དེ། །ཡུལ་ཁྱད་པར་ཅན་ལ་དད་པ་ཡིན། །གང་དད་པ་ལྡན་ན་སྡིག་ལས་ཟློག །དགེ་ཚོགས་ཡར་སྤེལ་ལ་སྤྲོ་བ་ཚོ། །བཟོད་པའི་གོ་ཆ་དང་གིས་རྙེད། །བརྩོན་འགྲུས་ཀྱི་རྟ་ལ་དེ་ཞོན་ནས། །བསམ་༼༤བ༨༽གཏན་གྱི་བདེ་བའི་དགའ་སྟོན་ཅན། །ཤེས་རབ་ཀྱི་མཁར་བཟངས་སུ་ཡུད་ཀྱི་འགྲོ། །མ་ཚོར་བར་ཐར་པའི་ས་ལ་སྙོགས། །བླ་མེད་ཀྱི་གསེར་ལམ་དེ་དུས་རྙེད། །ཆོས་བྱས་སོ་སྙམ་མེད་པའི་དད་ཞིག་ལ། །རྫོགས་པའི་སངས་རྒྱས་སུ་སོང་ལགས་པ། །འདི་དྭགས་པ་དཀར་རྒྱུད་ཀྱི་ཟང་ཁྱད་ཡིན། །གླེགས་བམ་གྲལ་བསྒྲིགས་ཚོའི་བརྗོད་དོན་ཡིན། །ཐ་སྙད་མཁན་གྱི་བཤད་པ་ཡིན། །སྒོམ་ཆེན་རི་འཛིན་གྱི་བཅུད་ལེན་ཡིན། །ཁྱིམ་པ་བྱང་སེམས་ཀྱི་རྣམ་ཐར་ཡིན། །ཁྱེད་མི་དབང་དད་ཅན་གྱི་ཆོས་སྐལ་མཛོད། །ཆོས་བཤད་པ་མདོ་རུ་མ་འགྲིལ་ན། །ཚིག་རིགས་ཀྱི་བཤར་བྱང་ཟིན་དུས་མེད། །མདོ་དོན་ཉམས་སུ་མ་བླངས་ན། །ཤེས་ཀྱང་ཁྲོམ་གཏམ་ཟད་མ་ཡིན། །ཉམས་སུ་མྱོང་བའི་དུས་ཙ་ན། །དེ་ལ་ཡེངས་མེད་ཅིག་གཅེས་པ་ཡིན། །འདི་ཡང་གྲི་གུག་ནས་སྡེ་པ་དགོས་དགོས་ཀྱིས་ཞུས་པའི་ངོར་གནང་བའོ།། །།མཚན་ལྡན་གྱི་བླ་མ་རིན་པོ་ཆེ། །དད་པ་ཅན་གྱི་གཙུག་རྒྱན་ན། །ཡིད་བཞིན་ནོར་བུ་ཉིད་དུ་མཐོང་། །དགོས་འདོད་ཞུ་ས་བཟང་ལགས་ནས། །མི་ངའི་བློ་གཏད་དེ་ཀ་ཡིན། །དེ་བས་དེ་ཡི་རྗེས་སུ་སློབ། །ཆོས་བཟང་པོའི་རྩ་བ་བྱང་སེམས་ཡིན། །ཀུན་ལ་ཉེ་རིང་མི་འབྱེད་པར། །རྣམ་གྲོལ་ལམ་ལ་འགོད་པར་འདོད། །མི་ངའི་ཉམས་ལེན་དེ་ཀ་ཡིན། །དེ་བས་འབངས་ལ་བྱམས་བརྩེས་སྐྱོང་། །སྐྱེ་བོ་ཕལ་ཆེར་ཁྲམ་པ་ཅན། །ཁ་ཞུ་གཏིང་འཁྱགས་ཀྱི་དཔེ་རུ་གདའ། །ཞུ་བའི་སྟབས་སུ་མི་བཏང་བར། །འཐད་དམ་མི་འཐད་བརྟགས་ནས་བྱེད། །མི་ཁོ་བོའི་སྤྱོད་འགྲོས་དེ་ཀ་ཡིན། །མི་རྒྱལ་ཁྱོད་ཀྱང་དེ་ལྟར་མཛོད། །ཆོས་ཀྱི་རྒྱལ་པོ་བྱ་བའི་སྡེ་པ་དམག་དཔོན་ཆེན་པོས་བསྐུལ་བའི་ངོར་པདྨ་དཀར་པོས་སྦྱར་བའོ།། །།ཚངས་པ་མཚུངས་པར་སྤྱོད་པ་རྒན་པོའི་གྲོགས། །དབེན་པར་བག་ཕེབས་བསྙད་བྱ་སྙན་པའི་བཅུད། །ཡིད་ཀྱི་བདུད་རྩི་སྟེར་བའི་འཕྲིན་ཡིག་གི། །འདབ་བརྒྱ་གད་དེ་བདག་མདུན་འཁྲིགས་པར་གྱུར། །བདག་ཀྱང་མཁས་རློམ་ཁུར་གྱིས་མནོན་ཅིང་། །ཚེ་འདིར་༼༥ན༩༽ཆགས་པའི་སྒྱིད་སྙོམས་རྒྱང་དོར་ནས། །གྲུབ་པའི་ཕྱིར་རྗེས་སྙེག་པའི་སྤྱོད་ཚུལ་གྱིས། །ནགས་མཐའ་ཐར་འདོད་རེ་བ་སྐོང་བཞིན་མཆིས། །ཆེད་དོན་མཁས་རློམ་ཆུ་ཤིང་ནགས་ཁྲོད་དུ། །དྲི་བའི་སྟ་རེ་བཟོད་པ་མི་རྙེད་པར། །དྲང་པོར་སྣྲ་ལ་ཚིག་ལན་འདི་དག་ནི། །མཛའ་བོས་མངགས་པའི་ཕོ་ཉ་བཞིན་དུ་བྱུང་། །འོན་ཀྱང་རྒྱལ་རིགས་སཱ་ལའི་ཚལ་འཁྲུངས་པ། །རྣམ་དཔྱོད་མེ་ཏོག་ཕོན་བུའི་སྙན་དངགས་ཀྱི། །དྲི་བསུང་ཞིམ་པོས་བདག་ཡིད་མགུ་བྱས་ཀྱང་། །བརྗོད་དོན་འབྲས་བུས་འཕོངས་ཕྱིར་ཚིམ་པ་ཅི། །ལོག་རྟོག་བ་མོའི་འཇུག་པས་མ་བཅོམ་པར། །བཤེས་གཉེན་སྟོན་ཀའི་དུས་ཅིག་བསྟེན་གྱུར་ན། །མཁས་པ་དགའ་བའི་ལེགས་བཤད་འབྲས་བུ་ནི། །མི་དབང་ཨ་མྲའི་ཤིང་དེར་ཆགས་སྙམ་སེམས། །དཔྱོད་ལྡན་དེ་ཡིད་རེ་བའི་ལན་གྱི་ཆ། །ཕུལ་བྱུང་རིག་པ་དང་ལྡན་ལུང་སྦྱར་བ། །བསྲིངས་པའི་གླེགས་བུ་འདི་ལ་ཀུན་རྟོག་གི། །པིར་བརྒྱས་རི་མོར་མཛོད་ཅེས་ཁྱོད་ཀྱིས་གསོལ། །གླེང་པས་དྲི་ཚིག་འབེན་གང་མ་མཐོང་བས། །ལན་དུ་སྨྲ་བའི་ཟོལ་སྦྱོར་མདའ་འཕངས་པ། །བླུན་པོའི་ཁྲོམ་པ་བཞད་གད་སྐྱེད་མོད་ཀྱང་། །དཔྱོད་ལྡན་འཕོངས་མཁས་རྣམས་ནི་ཁྲེལ་བའི་རྒྱུ། །གཟུ་ལུམས་ཅན་དང་རྩོད་པ་དོན་མེད་པས། །བདག་སེམས་བཏང་སྙོམས་ན་མང་ཁྱོད་ཚིག་གིས། །རིང་ནས་བསྐུལ་བ་མ་ལྷོགས་མཚན་ཙམ་ཞིག །སླན་ཆད་འཆལ་གཏམ་མི་སྨྲའི་ཆེད་དུ་སྦྱར། །འཕགས་པའི་ཡུལ་དུ་མཆིས་འདྲ་སྨྲ་བའི་གྲྭར། །རྒོལ་དང་ཕྱིར་རྒོལ་གང་རུང་ཁས་བླངས་ནས། །བསྟན་པ་དཔང་བཙུགས་རྩོད་པས་མཆོག་གྱུར་ན། །བདག་སེམས་དགའ་ཡང་གངས་རིའི་ཁྲོད་འདིར་མིན།། །།སེམས་ཅན་ཐམས་ཅད་དྲིན་ཅན་མ་ལགས་པས། །བདེ་འདོད་སྡུག་བསྔལ་བྲལ་ན་བསམ་པའི་བློས། །བླ་མེད་བྱང་ཆུབ་སྒྲུབ་པར་དམ་བཅའ་བ། །ཐེག་པ་ཆེན་པོའི་ཆོས་ཀྱི་འཇུག་སྒོ་ཡིན། །བསམ་པས་རང་དོན་ཞི་བ་རྒྱང་བྲིམས་ནས། །ལུས་ངག་གཞན་གྱི་བྲན་དུ་བཀོལ་ནུས་ཏེ། །༼༥བ༡༠༽ཡོངས་སུ་བསྔོ་བའི་རྒྱས་འདེབས་ལ་འབད་ན། །རྫོགས་པའི་སངས་རྒྱས་སྒྲུབ་པའི་ལམ་མཆོག་ཡིན། །དངོས་ཀུན་སེམས་ལ་སེམས་ཉིད་སྟོང་པས་ན། །ཡེངས་མེད་དྲན་པའི་རྒྱུན་ལམ་མ་ཆད་པའི། །ཅི་སྣང་དེ་ཁར་འཛིན་མེད་འཇོག་ནུས་ན། །དམིགས་མེད་མ་དང་མཇལ་བ་ཆོས་ཉིད་ཡིན། །ལུས་ལྷ་བརྗོད་པ་སྔགས་སུ་ཡིད་ཆེས་ཀྱི། །དབང་པོ་ཆེ་མདུན་སྡུག་བསྔལ་ག་ལ་ཡོད། །ཐམས་ཅད་བདེ་བར་འབར་ཕྱིར་གཡུགས་བགྱིས་དང་། །ཕྱག་རྒྱ་ཆེན་པོའི་གློང་དུ་བརྒྱལ་ཏེ་འགྲོ། །ཞེས་ཕག་མོ་ལྷ་ཁང་ནས་གདམས་སོ།། །།ཁྱེད་སྔོན་གྱི་ལས་འཕྲོ་ཆོས་སུ་སད། །གཞོན་ནུ་ཉིད་ནས་ཆོས་སྒོར་འཚངས། །བླ་མ་མང་པོའི་ཞལ་སྐྱིན་ལོན། །དེ་ཕྱིར་སྙན་བསྐུལ་ག་ལ་དགོས། །འོན་ཀྱང་ཡང་དག་ལམ་གྱི་གནད། །མ་ནོར་དཔལ་ལྡན་འབྲུག་པའི་གསུང་། །ཁོ་བོའི་མགྲིན་པར་འཁྱིལ་བ་མང་། །ཅུང་ཟད་སྟོན་གྱིས་ལེགས་པར་གསོན། །ཡང་དག་བླངས་པའི་ཚུལ་ཁྲིམས་ཀྱིས། །འདོད་ཡོན་ལྔ་ལ་གདོང་འདེད་ཐོང་། །བཙུན་པ་རང་དུ་དེ་ནས་སླེབ། །ཐར་པའི་རྨང་གཞི་ཐིངས་པ་ལགས། །ཐོས་པ་བྱས་པའི་ཆོས་ཐམས་ཅད། །རང་གི་རྒྱུད་ཐོག་འབེབས་ཚུགས་ན། །མཁས་པ་རང་དེ་དེ་ལ་ཟེར། །ཐོས་པའི་སྙིང་པོ་སྒྲུབ་པར་བརྩིགས། །ཉམས་སུ་བླངས་པའི་དྲོད་རྟགས་དེས། །ཚེ་འདིའི་སྣང་ཤས་སྡུག་ཟད་བཏང་། །ཞིག་པོ་རང་དེ་དེ་ལ་འོང་། །གཅིག་ཤེས་ཀུན་གྲོལ་མཁར་དུ་ལོངས། །རང་རྒྱུད་རྟོགས་པ་ལྡན་ཙ་ན། །ཐབས་ལ་མཁས་པའི་འཁོར་ལོ་བསྒྱུར། །འགྲོ་དོན་རང་ཅིག་དེ་ལ་འབྱུང་། །མཐོང་ཐོས་དྲན་རེག་ཐམས་ཅད་འཚེངས། །དེ་ལྟར་གཞི་ལམ་འབྲས་བུའི་བར། །ཨེ་བདེན་གཟིགས་ན་ཡང་དག་སྟེ། །མི་ཤེས་དྲི་བ་བྱེད་པའི་ངོར། །རྫུན་པོ་དཀྱུ་བའི་བླ་མ་མིན། །ཐུག་སར་ཐུག་པའི་གནད་ཀ་དེས། །ཐ་སྙད་ཚིག་སྒུམ་གསོག་མ་ཁོམ། །ཤཱཀྱ་ཐུབ་དང་འགལ་དོགས་པས། །ནོར་རྫས་སྒྲུབ་རྩོལ་བྱེད་མ་ནུས། །གཞན་ལ་སྒྲོ་འདོག་སྐུར་བཏབ་ནས། །༼༦ན༡༡༽སྡིག་ལ་བྲེ་གསོག་བྱེད་མ་ཤེས། །དམ་ཆོས་སྙིང་ལ་ཟུག་པའི་ཕྱིར། །རྒྱལ་ཁམས་མི་དང་བསྟུན་པ་མིན། །མཁའ་འགྲོ་ཆོས་སྐྱོང་ཁྲོས་དོགས་ནས། །ཆོས་འགལ་དང་དུ་ལེན་ལ་ཞེད། །སྒྲ་རྣམས་བྲག་ཆར་མཚུངས་མཐོང་བས། །བསྟོད་སྨད་མཉམ་པ་ཉིད་དུ་བཏང་། །བློ་བདེ་ཕུགས་སུ་འཚངས་པས་ན། །འཕྲལ་སྣང་ཐམས་ཅད་བདེ་བར་ཤར། །ཨ་ལ་ལ་ཧོ་བླ་མའི་དྲིན། །ལན་ལོན་པར་དཀའ་ཡང་བརྩེ་བས་སྐྱོངས། །གྱང་མཐོ་སྤྲུལ་སྐུ་བདེ་ཆེན་རོལ་པ་ལ་པདྨ་དཀར་པོས་འབྲུག་ཆོས་སྡིང་ནས་བསྲིངས་པ་དགེ་ལེགས་འཕེལ་བའི་རྐྱེན་དུ་གྱུར་ཅིག། །།ཡང་དག་ཕུལ་གྱི་ལམ་ནས་འགྲོ་བ་ཀུན། །རྣམ་བྱང་རྡོ་རྗེའི་ས་ལ་འདོད་མཁས་པ། །མཚུངས་པ་མེད་པའི་རྗེ་བཙུན་འབྲུག་པའི་ཞིབས། །ཀུན་གྱི་ཅོད་པན་འོས་དེར་གསོལ་བ་འདེབས། །གང་གི་བཤད་པའི་མ་ནུས་སར་འཁོད་པའི་འགྲོ། །དབྱངས་ཅན་མགྲིན་པར་འཆང་བ་འབའ་ཞིག་བཞིན། །ལེགས་བཤད་སྙིང་གར་འཚངས་རྣམས་ཉེར་ཞི་བའི། །བདུད་རྩིས་ཚིམ་པར་གྱུར་ལ་ཕྱག་འཚལ་ལོ། །ལས་དགེ་བ་ཉིད་དུ་འགྱུར་མི་འགྱུར། །རང་སེམས་ཀྱི་བསམ་ཚུལ་ཉིད་ལ་རག །རྩེ་གཅིག་གིས་དད་པའི་ལས་བྱས་ན། །ཐར་པའི་རྒྱུ་རུ་ཐེ་མི་ཚོམ། །སྤྲོས་མེད་མངོན་པར་བྱང་ཆུབ་མ་མཐོང་ན། །སྤྲོས་བཅས་དམིགས་པའི་ཆོས་ཀྱི་མཐའ་མི་ཆོད། །དེས་ན་སྒོ་གསུམ་གཡེང་བ་རྒྱང་བོང་ལ། །རང་སེམས་དྲན་པའི་ར་བས་བསྐོར་བ་འཐད། །ཚུར་བཀུག་དྲན་པའི་གོ་བས་ཚུགས་མི་ཐུབ། །མ་བཅོས་རང་ཚུགས་ཐུབ་ན་དེ་ཁའི་གོར། །རྐྱེན་སྣང་ཕྲ་རགས་གཉིས་མེད་འབྱོར་བར་སེམ། །དེ་ཚེ་ཆུ་ལ་ཆུ་གཞག་ལྟ་བུར་འགྱུར། །ཞེས་གདམས་སོ།། །།དཔལ་དགམ་པོའི་བཀའ་བརྒྱུད་སྙན་གྲགས་ཆེ། །སྒོས་སྒྲུབ་པའི་བཀའ་བབས་འབྲུག་པར་ཐུག །སེམས་ཡིད་གཉིས་མེད་པས་གསོལ་བཏབ་ན། །དོན་སྙིང་པོ་གཅེར་མཐོང་ཐེ་མི་ཚོམ། །ལས་བྱས་པ་མདོ་ཡོད་སེམས་ཅན་དོན། །རང་སྐྱིད་ཕྱིར་མིན་ན་ཚོགས་གཉིས་འཕེལ། །༼༦བ༡༢༽འབྲས་སྐུ་གཉིས་ལག་པའི་རྩེ་ལ་བཞུགས། །ཆོས་རྒྱུད་ལ་ཁེལ་ན་ཟེར་ཚད་བདེན། །འདི་ཡང་ཇོ་གདན་མཁན་པོར་གནང་བའོ།། །།མཐའ་མེད་ཁམས་གསུམ་འཁོར་བ་འདིར་འཁྱམས་ཤིང་། །མི་བཟོད་སྡུག་བསྔལ་དྲག་པོ་མྱོང་གྱུར་ཚེ། །བདག་ཅག་ཁྱེད་ལ་རེ་ས་མི་ཞུ་ན། །གཞན་པའི་སྐྱབས་གནས་སུ་འདུག་སྤྱན་རས་གཟིགས། །གསོལ་བ་འདེབས་སོ་རྗེ་བཙུན་སྙིང་རྗེའི་གཏེར། །ཐུགས་རྗེས་ལའུར་གཟིགས་དང་འཇིག་རྟེན་དབང་། །བྱིན་རླབས་དངོས་གྲུབ་ཞུའོ་ལྷག་པའི་ལྷ། །ལྷ་མིའི་དབང་པོ་སྟོབས་ལྡན་ཀུན་འཇོམས་པའི། །འཆི་བདག་བདེ་ཆེན་དེས་ནི་བདག་ཅག་ཀྱང་། །ཤུལ་ལམ་འཕྲང་དུ་དབང་མེད་ཁྲིད་ཙ་ན། །གཞན་པའི། སྐྱེས་ནས་ད་ཕན་དོན་མེད་ལས་ལ་ཟད། །ད་ནི་དམ་འཆི་ཆ་མེད་རྒས་ལ་ཐུག །དལ་འབྱོར་སྟོང་ལོག་སོང་ལ་འགྱོད་ཙ་ན། །ཡར་གྱི་མཐོན་པོའི་དཔལ་ལ་སྦྲུས་ཀྱིན་བཟས། མར་གྱི་ཁྲལ་མི་བཞུར་ཞིང་བག་མེད་སྤྱད། །འདི་འདྲའི་ལན་ཆགས་ཕྱི་མ་འཇལ་དགོས་ཚེ། །བསྐྱངས་ཀྱིན་ལོད་རུང་འགའ་ཞིག་གཉེན་སྙམ་བརྩེ། །སུས་ཕན་དེས་པ་མེད་ཀྱང་ལ་ལར་སྡང་། །ཐམས་ཅད་མར་གྱུར་ཤེས་ནས་འགྱོད་ཙ་ན། །བྱམས་པའི་གཉེན་བསྐྱུར་བསགས་པའི་ནོར་བཞག་ཅིང་། །མངའ་རིས་བོར་ཏེ་འཇུར་མིག་བར་དོའི་འཕྲང་། །སྒྲོན་མེ་ལག་སྟོང་ཤད་ཚེ་ཅི་དྲག་ན། །འདོད་པ་མ་ཁེངས་དགེ་བའི་བཤེས་ལ་སྨད། །ཀུ་རེ་ཀྱལ་ཁས་ཡོན་གནས་རྣམས་ལ་སྨྲེ། །དེ་འདྲའི་རྣམ་སྨིན་ངན་འགྲོར་ལྷུང་ཙ་ན། །ད་ནི་མཚན་ལྡན་བླ་མའི་ཞབས་བསྟེན་ནས། །སྙིང་ནས་དམ་པའི་ཆོས་ལ་ཕྱོགས་པ་ཡི། །བྱང་ཆུབ་སྤྱོད་པ་རྒྱ་མཚོར་སླེབ་ཀྱི་རིང་། །མདོར་ན་སྐྱེ་བ་འདི་དང་བར་དོ་གཞན། །བྱང་ཆུབ་སྙིང་པོར་སླེབ་པ་དེ་བར་དུ། །བློ་གཏད་རེ་ས་ཁྱོད་ཉིད་གཅིག་པུ་སྟེ། །མི་དབང་མཚོ་སྐྱེས་རྡོ་རྗེ་དྲན་གྱུར་པའི། །སྐྱོ་བསངས་པའི་ར་ཟླར་ཁྱོད་སྦྲན་ནས། །མི་དབང་དེ་དང་བདག་ཅག་ཁྱོད་མདུན་དུ། །ལྷན་ཅིག་ཆོས་༼༧ན༡༣༽ཀྱི་དགའ་བས་འཚོ་བར་ཤོག །ཅེས་པ་འདི་གཞིས་ཀ་ཆོས་རྒྱལ་ལྷུན་གྲུབ་རྩེའི་ཡངས་པ་ཅན་གྱི་འདུན་སར་འབོག་ཀོང་གདན་ས་པས་ཞུས་པའི་ངོར་པདྨ་དཀར་པོས་སྦྱར་བའོ།། །།རྒྱལ་བས་མདོ་རྒྱུད་ཀུན་ནས་བླ་མ་ཉིད། །མཉེས་བྱེད་ཆོས་ཀྱི་སྙིང་པོར་གསུངས་པས་ན། །སྐྱེས་ཆེན་དམ་པ་ཐམས་ཅད་དང་དུ་བཞེས། །དེ་ཚུལ་ཁྱོད་ལ་སྣང་བས་བློ་བ་དགའ། །རྐྱེན་ངན་ཁྲག་ཁྲིག་སྤུངས་ཀྱང་ཉམ་མི་ང་། །དགེ་ལེགས་བྱེ་པ་རྙེད་ཀྱང་མི་དཔའ་བ། །སྔོན་དུས་འབྲུག་པའི་སྒོམ་ཆེན་རྣམས་ལ་ཡོད། །དེ་ཡང་ཁྱོད་བློར་སོང་བས་བདག་སེམས་མགུ། །ཅལ་སྒྲོག་བླུན་པོའི་གཏམ་རྗེས་མི་སྙེགས་པར། །དཔྱོད་ལྡན་མཁས་ལ་ཡིད་ཆེས་འདི་ལྟ་བུ། །དམ་པའི་སྤྱོད་པ་རྡོ་ལ་བྲིས་འདྲ་བས། །ཁྱོད་ཚུལ་བསམས་ཀྱིན་བདག་ནི་ཡི་རང་སྐྱེས། །ཞེས་རྒྱལ་བྱད་ཚལ་དུ་དགེ་སློང་ལ་གདམས་པའོ།། །།དལ་འབྱོར་ཀྱི་མི་ལུས་རྙེད་དཀའ་བ། །སྔོན་བསགས་ཀྱི་དཔལ་ལས་ཐོབ་དུས་འདིར། །སྙིང་ནས་ཀྱི་ཆོས་གཅིག་མ་བྱས་ན། །འདི་ཐོབ་པས་ཕན་པ་ཨེ་འདུག་གཟིགས། །དུས་གཏན་གྱི་སྐྱབས་མགོན་མཚན་ལྡན་རྗེ། །འབྲལ་མེད་སྙིང་གི་དཀྱིལ་དུ་བསྒོམས། །བློ་རེ་ལྟོས་འཆོས་ལ་གསོལ་བ་ཐོབ། །རྐྱེན་གང་བྱུང་ཐུགས་རྗེར་ཤེས་པ་དང་། །འཇིག་རྟེན་གྱི་སྐྱེ་བོས་དབེན་པའི་གནས། །མི་མེད་ཀྱི་རི་ལ་མི་ཚེ་སྐྱོལ། །སྐྱིད་འདོད་ཀྱི་འཁྲི་བ་རྦད་ཆོད་ལ། །མ་བཅོས་པའི་སེམས་ལ་གོམས་འདྲིས་གྱིས། །ཀུན་ཁྱབ་ཀྱི་ཡེ་ཤེས་ཆེན་པོ་འདི། །ཡིན་པ་ལ་ཡིན་པར་ངོ་ཤེས་པ། །གསང་སྔགས་ཀྱི་ལམ་དུ་རྒྱལ་བས་གསུངས། །ཟ་ཆོས་ལ་མ་བརྩོན་གནས་ལུགས་བསྒོམས། །ཐ་སྙད་ཀྱི་ཆོང་ལ་ཟད་པ་མེད། །ལམ་ཟབ་ཀྱི་གདམས་ངག་རི་ལ་བསྒོམས། །རི་ཁྲོད་དུ་ཤི་བས་ཆོས་མགོ་ཐོན། །ཆོས་ཕྱིར་དུ་ཤི་བས་བསམ་དོན་རྫོགས། །རང་འདོད་ཀྱི་བསམ་པ་ཡུལ་ཕུད་ལ། །རྟོགས་ལྡན་གྱི་རྗེ་ལ་གསོལ་བ་ཐོབ། །མཆོག་ཐུན་མོང་གི་དངོས་གྲུབ་འབྱུང་བར་ངེས། །རེ་མ་ཆེ་ཆགས་མེད་ཀྱི་ལྷ་ཆོས་༼༧བ༡༤༽གྱིས། །ཞེས་ཟང་ཟང་ནེའུ་རིང་པ་ཆོས་སྐྱོང་བདེ་ལེགས་ལ་གདམས་པའོ།། །།ཆོས་བརྒྱད་ཚེ་འདིའི་སྣང་བ་བོར། །བླ་མ་རྗེ་ལ་བློ་སེམས་གཏོད། །དབེན་པའི་རི་ལ་སྒོམ་ནས་སྡོད། །མ་རྒན་འགྲོ་དྲུག་དོན་ལ་འབུངས། །དགེ་སློང་དོན་གྲུབ་དཔལ་འབྱོར་ལ་གདམས་པའོ།། །།དང་པོར་བྱམས་དང་སྙིང་རྗེ་བྱང་སེམས་སྦྱོངས། །དེ་ནས་ཕྱག་རྒྱ་ཆེ་ལ་བབས་ཀྱིས་གཞོལ། །བརྟན་པ་ཐོབ་ཕྱིར་གཉིས་མེད་སྤྱོད་པ་སྐྱོང་། །ལག་ཏུ་ལོང་ན་སངས་རྒྱས་ཐེ་མི་ཚོམ། །ཟང་ཟང་ནེའུ་རིང་པ་ཀརྨ་ཚེ་རིང་ལ་གདམས་པའོ།། །།དཔལ་འཐུང་སྤྱོད་གྲོང་གི་ནགས་འདབ་ན། །ཟོང་འདོད་དགུས་གང་བ་བོད་ཡུལ་ཤར། །མི་སྐལ་བཟང་རོལ་པའི་ཞིང་ཁམས་སུ། །རིགས་སྔགས་སྐྱེས་དགེ་སློང་པདྨ་དཀར། །གནས་ཅི་ཞིག་ངེས་པས་མ་བཅིངས་པས། །རྗེ་རས་ཆུང་བླ་མའི་གདན་སར་སླེབ། །སེམས་བཅོས་མའི་འཇོག་ཐབས་མ་རྙེད་ཀྱང་། །རང་བབས་ཀྱི་ངང་ནས་སྣང་གྲགས་ཀུན། །རང་བཞིན་སྟོང་པའི་ངེས་ཤེས་རྙེད། །སྟོང་ཉིད་དང་སྣང་བ་དབྱེར་མེད་འདྲེས། །ཡོད་མེད་ཀྱི་སྒྲོ་འདོགས་གཅོད་པས་འཕོངས། །འཁྲུལ་རྫོགས་སྣང་བ་རང་སར་བསྟན། །གཉེན་པོའི་ཡེ་ཤེས་མ་རྙེད་པས། །དགག་སྒྲུབ་ཀྱི་མཚན་མ་སྤྲོས་སམ་ཅི།། །།མ་སྨད་ཡོན་ཏན་ཀུན་གྱི་རབ་དཀར་ཞིང་། །ལེགས་བཤད་མགྲིན་རྔ་བརྡུང་ལ་ཟླ་མེད་པའི། །རྒྱལ་སྲས་ངང་པའི་གཙོ་བོ་རས་ཆུང་པ། །བདག་ཅག་འགྲོ་བའི་ཡིད་མཚོར་རོལ་བར་མཛོད། །སྡུག་བསྔལ་འཛིན་འཁྲི་རབ་ཏུ་འཁྲིགས་གྱུར་པའི། །འཁོར་བའི་རྒྱ་མཚོར་ལྟུང་བའི་འགྲོ་བ་རྣམས། །བྱམས་དང་ཐུགས་རྗེའི་ཕྱག་གིས་ལེགས་དྲངས་ནས། །རྣམ་གྲོལ་སྐམ་སར་ཞོག་ཅིག་རྗེ་བཙུན་ལགས། །པདྨ་དཀར་པོས་བྱས་པའོ།། །།བཅོམ་ལྡན་འདས་དེ་བཞིན་གཤེགས་དང་གྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ལ་ཕྱག་འཚལ་ལོ། །བྱང་ཆུབ་སེམས་༼༨ན༡༥༽དཔའ་སེམས་དཔའ་ཆེན་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་ཕྱག་འཚལ་ལོ། །སངས་རྒྱས་དེ་དག་ལ་དམིགས་ནས་ལན་བདུན་བརྗོད། །དབུགས་བསྔམས་རང་ལུས་འཇིག་རྟེན་དབང་ཕྱུག་སྐུ། །ཕྱི་ལྷ་ནང་སྟོང་དབུས་ན་དབུ་མའི་རྩ། །ཚངས་བུག་ནས་བཟུང་ལྟེ་བའི་བར་དུ་སླེབ། །འོག་ཟུམ་སྟེང་ནི་རྒྱ་གླིང་གོ་བཟློག་བཞིན། །སྙིང་ཐད་རང་གི་རྣམ་པར་ཤེས་པ་སྲཱིཿ སྤྱི་བོའི་ཐད་མདུན་བླ་མ་འོད་དཔག་མེད། །ཐུགས་ཀར་སྲཱིཿཡིག་འོད་ཟེར་ལྕགས་ཀྱུའི་དབྱིབས། །ཚངས་བུག་ནས་འོང་བདག་གི་སྙིང་སྲཱིར་ཟུག །ངག་ཏུ་ཧིག་བརྗོད་དེས་སྲཱིཿཡར་ཡར་དྲངས། །ཚངས་བུག་ནས་འཐོན་སྟོན་པའི་ཐུགས་ཀར་ཐིམ། །བདག་ནི་འདི་ནས་ཚོ་འཕོས་གྱུར་མ་ཐག །བདེ་བ་ཅན་དུ་རྫུས་ཏེ་སྐྱེ་བར་ཤོག །དེར་སྐྱེས་ནས་ནི་འོད་དཔག་མེད་པའི་དྲུང་། །བྱང་ཆུབ་སྤྱོད་པ་མཆོག་ལ་སློབ་བྱེད་ཤོག །ཅེས་ལན་མང་དུ་བརྗོད་དོ། །བདེ་བ་ཅན་གྱི་འཕོ་བའོ། །སངས་རྒྱས་དང་བྱང་ཆུབ་སེམས་དཔའ་གསུམ་གྱི་མཚན་གང་གིས་དྲན་པ་ཙམ་གྱིས་ཞིང་དེར་སྐྱེ་བར་བདེ་བ་ཅན་གྱི་ཞིང་བཀོད་ནས་གསུངས་བ་བཞིན། གསང་སྔགས་ཆོས་གླིང་དུ་གདམས་པའོ།། །།ལུས་ངག་ཡིད་གསུམ་རྣལ་དུ་ཕབ། །མཚན་ལྡན་བླ་མ་སྤྱི་བོར་བསྒོམ། །ཡང་དང་ཡང་དུ་གསོལ་བ་ཐོབ། །མཐར་གཉིས་སུ་མེད་པ་བསྟིམ་ནས་སུ། །དཔྱད་དཔྱད་བསམ་བསམ་མི་བྱ་བར། །གང་ཤར་སྟེང་དུ་ལྷུག་པར་བཞག །མི་སྡོད་འགྲོ་ན་སུ་འགྲོ་བལྟ། །བལྟས་པས་མི་མཐོང་དངོས་མེད་ཞིག །ཅང་མེད་མིན་པས་དངོས་པོ་ཡང་། །གང་བྱས་མི་འགལ་སྤང་བླང་ཞི། །དེ་སྒོམ་པ་པོ་ལ་གནད་དུ་ཆེ། །ཤེལ་དཀར་ཆོས་མཛད་ལ་གདམས་པའོ།། །།ཨོཾ་སྭ་སྟི། །མི་ལུས་ཡིད་བཞིན་འདི་ནི་ཐེངས་གཅིག་ཙམ། །དེ་ཡང་འཆི་བདག་གཏུམ་པོས་ནམ་འཇོམས་མེད། །དེ་ལ་ཕན་ངེས་དམ་པའི་ལྷ་ཆོས་ཡིན། །སྙིང་ནས་སྙོམས་༼༨བ༡༦༽ལས་དོར་ཅག་པདྨ་དཀར། །གཞོན་པའི་ལང་ཚོ་འདི་ནི་ཡུད་ཙམ་ནས། །ལ་འུར་རྒས་པའི་ནད་ཀྱིས་འཛིན་པར་ངེས། །དེ་ཚེ་བློ་དང་འབྱུང་བཞི་རྒུད་ལགས་པས། །ད་ལྟ་འབད་པ་ཐོན་ཅིག་པདྨ་དཀར། །ཉེ་འཁོར་དག་ནི་ཚོང་འདུས་གནས་འགྲོན་བཞིན། །མྱུར་དུ་འབྲལ་བར་ངེས་པའི་ཚུལ་མཐོར་ནས། །ཞེན་ཆགས་སྲེད་པ་སྐྱེ་བ་མ་འཁྲུལ་ལམ། །སེམས་ཉིད་ནང་དུ་ཁུག་གཅིག་པདྨ་དཀར།། །།ན་མོ་ལོ་ཀ་ཤྭ་ར་ཡེ། །ཁམས་གསུམ་འཁོར་བའི་སྡུག་བསྔལ་ཞི་འདོད་ན། །བགྲང་ཡས་འགྲོ་བ་ཀུན་ལ་བརྩེ་བའི་གཉེན། །སྤྱན་རས་གཟིགས་ལ་སྙིང་ནས་སྐྱབས་ཞུས་ལ། །ཡིག་དྲུག་རེམ་ལས་བགྲོངས་དང་ཤེས་ལྡན་ཚོ། །སྙིགས་དུས་ཚེ་འདི་དགུན་ཀའི་ཉི་མ་བཞིན། །ལོང་མེད་མྱུར་དུ་འཇིག་པར་ངེས་ལགས་པས། །སྙོམས་ལས་ལེ་ལོ་སོས་དལ་མ་བཞུགས་པར། །ཡིག་དྲུག་འདི་ལ་ཀུན་གྱིས་བརྩོན་འགྲུས་ཞུ། །མི་རྣམས་ཕལ་ཆེ་དུས་མིན་འཆི་བ་ལ། །རྟག་ཏུ་རེ་བའི་ངང་རིང་ཅི་ལ་ཁོམ། །དེ་བས་ཉིན་མེད་མཚན་མེད་ཞལ་འདི་ལས། །ཡིག་དྲུག་ལྷང་ངེ་བགྲོངས་དང་ཤེས་ལྡན་ཚེ། །མི་ཕན་ཚེ་འདིའི་བྱ་བས་མ་བྲེལ་བར། །ཕན་ངེས་དམ་པའི་ཆོས་ལ་བསྒྲིལ་རེ་རན། །སྙིང་ནས་འཆི་བདག་བདུད་ལ་སོམས་མཛོད་ལ། །ཆོས་ཀྱི་སྙིང་པོ་ཡིག་དྲུག་འདི་ལ་བསྒྲིལ། །བདེ་ཞིང་སྐྱིད་དགེ་བའི་འབྲས་བུ་ལགས། །སྡིག་པའི་ལས་ལ་སྡུག་བསྔལ་ཁོ་ན་འབྱུང་། །དེ་ཕྱིར་འདམ་ཁ་ལོག་པར་མ་མཛད་པར། །དམ་ཆོས་མ་ཎི་འདྲེན་ལ་བརྩོན་པར་འཚལ། །ཚེ་འདིའི་ལེགས་པ་སྔར་བསགས་འབྲས་བུ་ཡིན། །ཕྱི་མའི་དོན་རྣམས་ད་རེས་མ་བསྒྲུབས་ན། གར་སྐྱེས་རང་དབང་མེད་དོ་ཤེས་ལྡན་རྣམས། །སྙིང་ནས་ཡིག་དྲུག་འདི་ལ་ཐུགས་དམ་འཚལ། །བདེ་སྡུག་ཐམས་ཅད་མི་རྟག་འགྱུར་བའི་ཆོས། །བསམ་ན་བློ་གཏད་ཐུབ་པ་མེད་བཞིན་དུ། །འཕྲལ་སྐྱིད་མངའ་ཐང་རེ་ལ་ར་རྒྱལ་བ། །མི་དེ་དང་བསླུས་ཡིན་ནོ་མ་ཎི་བ། གཞན་དོན་ཐམས་ཅད་རང་གི་ཡོན་ཏན་༼༩ན༡༧༽རྒྱུ། བསམ་མེད་པོ་གཅིག་རང་ཕན་ཉིད་ལ་སྒྲིལ། །སྙིགས་དུས་ཆོས་པ་ཧ་ལ་ལ་ཡིད་ཅིག་སྐྱོ། །འཁྲུལ་མེད་མ་ཎི་འདི་ལ་འབུངས་མཛོད་དང་། །ཁ་ཤད་ཁྲམ་པའི་ཆོས་ཀྱིས་རྒྱུད་མི་འཐུལ། །བླུན་སྒོམ་འདག་སྦྱར་འདི་ཡང་འཚང་རེ་ཆེ། །ཁེ་ཆེ་ཉན་ཆུང་ཆོས་དེ་རྒྱལ་བས་ཀྱང་། །ཡིག་དྲུག་འདྲེན་པ་འདི་ཀ་ཡིན་པར་གསུངས།། །།དམ་ཆོས་བྱེད་པའི་མི་ལུས། ཡང་ཡང་ཐོབ་པར་མི་འདུག །ཁར་རྗེས་ལན་ཅིག་རྙེད་དུས། །གཏན་གྱི་དོན་ལ་རེམས་དང་། །རྙེད་དཀའི་དལ་འབྱོར་དེ་ཡང་། །ཚུལ་ཁྲིམས་བསྲུངས་ན་ཐོབ་པས། །མི་དགེ་བཅུ་པོ་སྤངས་པའི། །དགེ་བའི་ལས་ལ་འབད་དང་། །མཐོ་རིས་ཐར་པར་འཛེག་གམ། །ངན་འགྲོའི་གཡང་སར་འབབ་པ། །རང་དབང་རང་ལ་ཡོད་དུས། །འདམ་ཁ་ཡར་ལ་གྱིས་དང་། །འཆི་བདག་གཏུམ་པོ་དེ་ནི། །དལ་བྲེལ་ལྟ་བར་མི་འདུག །ཐོག་རྒྱུགས་ནམ་ཡོང་མེད་པས། །སྙིང་ནས་ལྷ་ཆོས་གྱིས་དང་། །སྔན་མས་བསགས་པའི་ནོར་རྫས། །སུས་ཟ་ཨེ་འདུག་གཟིགས་ལ། །སེར་སྣའི་མདུད་པ་བཀྲོལ་ནས། །བསགས་ཚད་སྦྱིན་པར་ཐོད་དང་། །སྐྱེས་ནས་སྐད་ཅིག་མི་སྡོད། །འཆི་བདག་དྲུང་དུ་སྙེག་པས། །རྟག་རྩིས་ཕྱེ་བཤོལ་མ་ཁོམ། །བློ་སྣ་ཆོས་ལ་སྒྱུར་དང་། །འཆི་ཁ་མ་ཡི་མི་ལ། །བཤོལ་འདེབས་ཐུབ་ཀྱི་ཨེ་འདུག །བསླུས་བས་ལྷུས་ས་མེད་པ། །རང་ལའང་ངེས་པར་འོང་ངོ་། །སྣ་མཆོག་གྲོང་གེ་སཱ་ལང་། ཐུབ་དབང་དེ་ཡང་གཤེགས་ན། །སྙིང་པོ་མེད་པའི་ལུས་ཚོ། །མི་རྟག་འཇིག་པ་ཨ་ཅང་། །ལས་འབྲས་བསླུ་བ་མེད་ཅིང་། །སྐྱིད་སྡུག་དགེ་སྡིག་རྗེས་འབྲང་། །དེས་ན་སྡིག་པ་བསྐྱུར་ནས། །དགེ་བ་དུམ་རེ་གྱིས་དང་། །ཟུག་རྔུ་ཨེན་ཙམ་བསམས་ཀྱིན། །འཁོར་བའི་སྡུག་བསྔལ་སུས་བཟོད། །སྡུག་བསྔལ་བསྐྱུར་བས་མི་འཁྱུར། །ཉོན་མོངས་ལས་དེ་སྤོངས་དང་། །གཏན་གྱི་སྐྱབས་གནས་ཞུ་ས། །མཚན་ལྡན་བླ་མ་བཟང་སྟེ། །དཀོན་མཆོག་གསུམ་འདུས་ཡིན་འདུག །གསོལ་བ་༼༩བ༡༨༽སྙིང་ནས་ཐོབ་དང་། །བསྟེན་པའི་ལྷ་ལ་སུ་བཟང་། །སྤྱན་རས་གཟིགས་དབང་རྒྱལ་སྲས། །རྒྱལ་བའི་ཐུགས་རྗེ་འདུས་ནས། །སེམས་ཅན་དོན་ལ་བྱོན་འདུག །འདྲེན་པའི་སྔགས་དེ་ཡིག་དྲུག །ཕན་ཡོན་བཤད་པས་མི་རྫོགས། །བོད་འབངས་ཀུན་གྱི་སྔགས་སྐལ། །རེམ་ལས་གསུང་དང་ཁྲོམ་པ། །བཤད་ཀྱང་ཁ་ཡི་ཁྲམ་པ། །བསྒོམས་ཀྱང་བླུན་བསྒོམ་ངང་དུ། །ཕལ་ཆེར་འགྲོ་ཡི་འདུག་པས། །རང་བློ་མ་ཎིར་སྒྲིལ་དང་། །མ་ཎི་བ་ཡི་སྙིང་གཏམ། །རྒྱལ་སྡེ་ཁྲོམ་ལ་ཞུས་པ། །གསན་དགོངས་མཛད་ན་ཨེ་ལེགས། །ཁྱེད་རང་རྣམ་པས་གཟིགས་ལ། །སྙིང་པོ་མ་ཎིར་སྒྲིལ་དང་།། །།ན་མོ་གུ་རུ། ཞིང་ཁམས་འཛམ་གླིང་བྱང་གི་ཕྱོགས། །གངས་ཅན་བརྤ་ཏ་ཉིད་ན། །འཇམ་དབྱངས་མི་ཡི་གཟུགས་སྤྲུལ་པ། །ངག་དབང་ཆོས་ཀྱི་རྒྱལ་པོ་ཡི། །ཐུགས་རྗེས་བྱིན་གྱིས་བརླབས་པའི་བུ། །རྣལ་འབྱོར་ངག་དབང་ནོར་བུ་ང་། །འཇིག་རྟེན་འཁོར་བའི་བྱ་བ་ལ། །དགོས་མེད་བསམ་པ་སྐྱེས་ལགས་པས། །གང་ལའང་ཞེན་པ་མེད་པས་སྐྱིད། །ཅི་བྱས་ཀྱང་སྐྱིད་པའི་སྤྲང་པོ་ང་། །མཚན་ལྡན་གྱི་བླ་མ་དམ་པ་ལ། །ཞེན་མེད་ཀྱི་མོས་གུས་བྱས་ལགས་པས། །བླ་མ་རང་སེམས་སུ་ཤེས་པས་སྐྱིད། །སྐྱེ་བ་དང་ཚེ་རབས་ཐམས་ཅད་དུ། །མ་རྒན་གྱི་འགྲོ་དྲུག་སེམས་ཅན་ལ། །སྙིང་རྗེ་དང་གཞན་དོན་བགྱིས་ལགས་པས། །ད་ལྟ་རང་འདོད་བྲལ་བས་སྐྱིད། །བདེ་གཤེགས་ཀྱི་བསྟན་པ་ལ་བསམས་ནས། །ཡང་ཡང་དུ་སྤྲུལ་པའི་ཚུལ་བཟུང་སྟེ། །གཟུགས་སྐུ་གཉིས་ཤུགས་ལས་ཐོབ་སྟེ་སྐྱིད། །རྗེ་ཡོངས་འཛིན་དམ་པའི་བྱིན་བརླབས་ཀྱིས། །ལྷན་སྐྱེས་ཀྱི་རང་བཞིན་ཆོས་ཀྱི་སྐུ། །བདེ་བླག་ཏུ་རྟོགས་པས་བདག་རེ་སྐྱིད། །ཨ་ལ་ལ་སྐྱིད་པའི་ཉི་མ་ཤར། །ཨ་ཧོ་ཡའི་སྲིད་པའི་བདེ་བ་ཡིས། །འགྲན་མིན་གྱི་བདེ་བ་ཁོང་ནས་རྒྱས། །ཨ་ཀྱང་ཀུ་རེ་བགྱིས་པ་ལགས། །འཕགས་པ་རྣམས་དགོངས་པ་མི་ཁྲེལ་འཚལ། །ཞེས་པ་འདི་ཡང་གཉལ་གྱི་སའི་ཆ། །ཕོ་༼༡༠ན༡༩༽བྲང་ལྷུན་གྲུབ་ཡང་རྩེའི་པོ་ཏ་ལར་སྦྱར་བ་དགེ། །རྒྱལ་བའི་སྙིང་རྗེའི་གཏེར་རྣམས། །གཅིག་ཏུ་བསྡུས་པའི་འཕགས་མཆོག །སྤྱན་རས་གཟིགས་དབང་ཁྱེད་ལ། །སྙིང་རྗེའི་རྒྱང་འབོད་ཐལ་ལོ། །སེམས་ཅན་ཐམས་ཅད་སྒྲོལ་བར། །མགོན་པོ་ཁྱོད་ཀྱིས་དམ་བཅས། །བདག་སོགས་ད་དུང་འཁྱམས་པ། །སྐྱོབས་ཤིག་སྤྱན་རས་གཟིགས་དབང་། །མ་རུངས་སྡིག་ལ་སྤྱད་པས། །སངས་རྒྱས་ཀུན་གྱིས་མ་འཐུལ། །སྙིགས་དུས་འདི་དུ་འཁོར་བ། །སྐྱོབས་ཤིག་སྤྱན་རས་གཟིགས་དབང་། །བཟོད་དཀའི་མཚོན་ཆས་གཏུབ་ཅིང་། །བསྐལ་མེས་སྲེག་དང་འཚོད་པ། །ལས་ངན་རྣམ་སྨིན་རྡོལ་རྣམས། །སྐྱོབས་ཤིག །ལྟོ་ཆེ་ཁ་སྐམས་མིག་ཞན། །བཀྲེས་སྐོམ་ཆོ་ངེས་ཁོལ་བ། །ཉམ་ཐག་གཤིན་རྗེའི་འཇིག་རྟེན། །སྐྱོབས་ཤིག །བརྡེག་འཚོག་བཀོལ་དང་གསོད་པ། །གཅིག་ལ་གཅིག་ཟས་རྨོངས་པས། །སླར་ཡང་ངན་འགྲོར་གཞོལ་ཀུན། སྐྱོབས་ཤིག །རང་དབང་ཡུད་ཙམ་ཡོད་དུས། །སྡིག་ལ་ཧབ་ཤ་བྱས་ནས། ངན་འགྲོར་ཆས་པའི་མི་ཚེ། །སྐྱོབས་ཤིག །རང་གི་འབྱོར་པས་མ་ཚིམ། །གཞན་གྱི་དཔལ་ལ་སྡང་བས། །ཁྲོ་འཁྲུགས་འཐབ་པའི་ལྷ་མིན། །སྐྱོབས་ཤིག །ཆོག་ཤེས་མེད་པས་འབྱོར་པ། །སྤྱད་པས་སྔར་དགེ་ཟད་པའི། །ཆོས་ཀྱི་འཕོངས་པའི་མཐོ་རིས། །སྐྱོབས་ཤིག །ཁ་ཆོས་ཞེ་ལ་མེད་པས། །ཆོས་བརྒྱད་ག་བུར་གྱུར་ཏེ། །ཀུན་སློང་གཅིག་པུ་ཤེས་རྣམས། །སྐྱོབས་ཤིག །དད་རྫས་ཁོང་དུ་བརྫངས་ནས། །བག་མེད་ལས་ཀར་ལེན་པའི། །གཟུགས་བཙུན་དྲེད་པོའི་ཚོགས་རྣམས། །སྐྱོབས་ཤིག་སྤྱན་རས་གཟིགས་དབང་། །མི་བཟང་འཁོར་བའི་བརྩོན་རར། །ཉམ་ཐག་སྡུག་གིས་ཨེ་མནར། །བསམ་མནོ་བཏང་ཚོ་བགྲོས་ནས། །དམ་པའི་ཆོས་ལ་གཤེགས་དང་། །གནོད་མང་ཚེ་ལ་རྟག་འཛིན། དང་གིས་རང་བསླུས་ངེས་སོ། །འཆི་དྲན་དད་པ་ལྡན་ཚོ། །དམ་པའི་ཆོས་ལ་གཤེགས་དང་། ༼༡༠བ༢༠༽གཏན་དོན་སྒྲུབ་པའི་མི་ལུས། །མཚན་མོའི་གློག་ལྟར་ཡུན་ཐུང་། །སྟོང་ལོག་མི་གཏོང་བ་ན། །དམ་པའི། བར་དོར་གཤིན་རྗེའི་དྲུང་དུ། །དཀར་ནག་རྡེའུ་སྤུངས་ཚེ། །སྡིག་ལ་འགྱོད་ཀྱང་འཕྱིས་ཀྱི། །དམ་པའི། སྐྱིད་འདོད་སྡིག་པ་སྤྱད་པས། །ཇེ་སྡུག་ཇེ་སྡུག་འགྲོ་པའི། །འཁོར་བར་ཆགས་རྒྱུ་ཅི་ཡོད། །དམ་པའི། སྔ་མས་བྱས་པའི་མདོ་ཙམ། །ཕྱི་མ་བྱས་པའང་དེ་འདྲ། །དོན་མེད་ལས་ལ་མ་འབྱམས། །དམ་པའི། །བསགས་པའི་མཐའ་མ་འཛད་ཅིང་། །འདུས་པའི་ཐ་མ་འབྲལ་བ། །བརྩིགས་པའི་ཐ་མ་འགྱེལ་བས། །མི་རྟག་རྟག་པར་འཛིན་དང་། །མི་ཕན་ཕན་པར་རེ་བ། །མི་གཙང་གཙང་འཛིན་བོར་ནས། །དམ་པའི་ཆོས་ལ་གཤེགས་དང་། །དཀོན་མཆོག་གསུམ་ལ་སྐྱབས་ནས། །བྱང་ཆུབ་སེམས་ལ་སྦྱངས་ཏེ། །མར་གྱུར་དྲིན་ལེན་བསབ་ཕྱིར། །དམ་པའི་ཆོས་ལ་གཤེགས་དང་། །མཚན་ལྡན་གྱི་བླ་མ་སྤྱི་བོར་བསྒོམས། །སྒོ་གསུམ་ཆིག་དྲིལ་གྱི་གསོལ་འདེབས་བྱས། །སེམས་ཇི་བཞིན་འདི་ཡི་ངང་དུ་གཞག །དེ་རང་ངོ་ཤེས། །ཕྱག་ཆེན་ཡིན། །ཤེས་སོ།། །།མཚོན་གྲགས་པ་ཅན་གྱི་ར་ལུང་པ། །ཕ་བྱིན་རླབས་ཅན་གྱི་ཞབས་པད་ཟུང་། །ཁོང་ས་གསུམ་འགྲོ་བའི་ཟུར་ཕུད་ལ། །ཡིད་བཞིན་གྱི་ནོར་བུར་གྱུར་ཕྱིར་བཏུད། །ཁྱེད་བསོད་ནམས་ཅན་གྱི་མི་དབང་ལ། །ཁོང་གནའི་མི་མཛངས་པའི་ལུགས་འགའ་ཙམ། །འཇིག་རྟེན་གྱི་རྒན་རབས་ཤེས་ལྡན་བཞིན། །ཅུང་ཟད་ཅིག་གསོལ་གྱི་མ་ཡེངས་གསོན། །དུས་སངས་རྒྱས་བྱོན་པའི་ཞིང་དུ་འཁྲུངས། །མཆོག་དགེ་བའི་བཤེས་ཀྱི་རྟེན་མ་བཟང་། །དོན་དམ་པས་སྤྱོད་པ་དར་བའི་ཚེ། །དུས་གཏན་དོན་བསྒྲུབས་ན་ཅང་སྲིག་གྲུང་། །མི་ཆེན་པོ་ཕལ་གྱི་ཚེ་འདི་ལ། །ཐུགས་ཞེན་ཆགས་ཚ་བས་སྡིག་ལ་ཧ་པ། འཕྲལ་ཁ་ཉེ་མིག་ཉེའི་དབང་བཏང་ནས། ཚེ་ཕྱི་མ་ཕན་ཆད་ཡལ་བར་འབོར། །ཁྱོད་དེ་བཞིན་མ་མཛད་ཆོས་བཞིན་སྤྱོད། །མ་རབས་པོ་ངན་པའི་བྱ་བ་སྤོངས། །བློ་གཏད་ཐུབ་༼༡༡ན༢༡༽མངའ་འབངས་བྱམས་པས་སྐྱོངས། །སངས་རྒྱས་ཀྱི་བསྟན་ལ་སྲི་ཞུར་མཛོད། །ལུས་སྲོག་གཅོད་འདོད་གཡེམ་མ་བྱིན་ལེན། །ངག་བརྫུན་ཕྲ་ཚིག་རྩུབ་འཁྱལ་པར་སྨྲ། །ཡིད་བརྣབ་སེམས་གནོད་སེམས་ལོག་ལྟ་བཅུ། །འདི་ངན་འགྲོར་འཕེན་པའི་ལམ་ཡིན་ལ། །རང་ལྷ་མིའི་རྟེན་འབྱོར་དུས་ཀྱིས་ཀྱང་། །ཚེ་ཐུང་དང་ནད་མང་གནོད་པ་ཀུན། །དེ་ཁོ་ནས་བྱས་ཕྱིར་དུག་ཟས་བཞིན། །བཅུ་པོ་དེ་སྤང་བ་དགེ་བཅུའི་ཁྲིམས། །འདི་མངོན་པར་མཐོ་པ་འཛེག་པའི་སྐས། རྟེན་རྣམ་པར་ཐར་པ་སྐྱེ་བའི་སྒོ། །ཐར་པ་དང་ཐམས་ཅད་མཁྱེན་པའི་ཡུལ། །ཚེ་ཡུན་ཐུང་ནམ་འཆི་དུས་བཏབ་མེད། །དེས་ན་དགེ་སྒྲུབ་ལ་ཕྱི་བཤོལ་སྤོང་། །ལས་བྱས་པ་མདོ་ཡོད་བསོད་ནམས་བསགས། །དེར་རྒྱུ་འབྲས་བསམས་ཀྱིན་བླང་དོར་མཛོད། །སྦྱིན་པ་དང་ཚུལ་ཁྲིམས་བཟོད་བརྩོན་འགྲུས། རྟེན་རྡོ་རྗེའི་ལུས་ལ་རླུང་སེམས་གཅུན། །ཕྱག་མཚན་སྒོམ་པའི་ཙཎྜྻ་ལིས། །སེམས་ཁར་འཇོག་པའི་གཏུམ་མོ་སྤོར། །དེར་ཐིག་ལེ་ནཱ་དའི་དཔྱིད་ཐིག་གིས། །མཐའ་ལོག་ཕྱག་རྒྱ་ཆེན་པོ་འགྲུབ། །ལམ་འདི་ལྟའི་གནད་ལ་དབང་འབྱོར་པ། །ངེད་དཔལ་ལྡན་འབྲུག་པའི་བུ་བརྒྱུད་ཡིན། །ཕ་བཟང་གིས་བསྐྱངས་པའི་བུ་སློབ་རྣམས། །བདེ་ཆེན་གྱི་གནས་སུ་ཁ་ཡན་འཕྱོ། །ཞེས་རྒྱལ་མཁར་རྩེར་སྡེ་པ་དད་པ་བཞིན་མི་འགྱུར་མཚན་འཛིན་པ་ལ་པདྨ་དཀར་པོས་གདམས་པའོ།། །།རྡོ་རྗེ་འཆང་ཆེན་བླ་མའི་ཞབས་ལ་འདུད། །སྤྱིར་སྒོམ་ཆེན་གྱི་མཁྱེན་རྒྱ་རྣམ་རྟོག་རྒྱུ། །སྒོ་ས་མི་རྒན་ཁྱོད་ཉམས་སུ་ལེན་པ་ལ། །ལུས་གདོད་མ་ནས་དག་པ་ལྷ་ཡི་སྐུ། །འཇའ་ཚོན་ལྟར་གསལ་བའི་སྤྱི་གཙུག་ཏུ། །ཁོང་དུས་གསུམ་གྱི་སངས་རྒྱས་རྡོ་རྗེ་འཆང་། །༼༡༡བ༢༢༽ཕ་བླ་མ་ལས་གཞན་དུ་མི་བལྟ་བར། །མ་སེམས་ཅན་རྣམས་འཁོར་བ་ལས་བསྒྲལ་ཕྱིར། །མཆོག་ཐུན་མོང་གི་དངོས་གྲུབ་ཐོབ་འདོད་པས། །ཚེ་འདི་ཉིད་ནས་རྣམ་པ་ཐམས་ཅད་དུ། །སྐྱབས་མགོན་དང་རེ་ས་གཞན་མེད་པར། །ཡིད་རྩེ་གཅིག་ཏུ་གསོལ་བ་དྲག་པོ་ཐོབ། །ཕ་བླ་མའི་སྣང་བརྙན་འོད་དུ་ཞུ། །བདག་ལུས་ལ་ཐིམ་པས་དབྱེར་མེད་འདྲེས། །ནམ་མཁའ་ལ་ནམ་མཁའ་ཇི་བཞིན་དུ། །གནས་ལུགས་ཀྱི་དང་དུ་གཉིས་མེད་གཞག །བཞག་པ་ལྟར་གནས་ན་རྩེ་གཅིག་ཟེར། །སེམས་རང་ཐོག་ཏུ་སླེབ་ན་སྤྲོས་པ་བྲལ། །ཀུན་ཟུང་འཇུག་ཏུ་ཤེས་ན་རོ་གཅིག་རྟོགས། །སྒོམ་མེད་སངས་རྒྱས་ཀྱི་དགོངས་པ་ཡིན། །མདོ་རྒྱུད་ཀྱི་སྙིང་པོ་མོས་གུས་ལ། །བགྲད་ཐང་རྟོགས་ལྡན་གྱི་ཆོས་སྐལ་གྱིས། །བློ་རྩེ་གཅིག་བསྒྲུབ་འདོད་ཁོ་ན་བས། །གནས་དབེན་པ་བསྟེན་ཅིག་རང་རྒྱུད་སྦྱོངས། །སེམས་ཡེངས་མེད་དྲན་པས་གཞུར་ཐུབ་ན། །ཁོང་བྱིང་རྒོད་ཀྱི་འཕྲང་ལ་འཇིགས་མི་དགོས། །གྲོགས་བཟང་པོ་བརྩོན་འགྲུས་གཅེས་པ་ཡིན། །བོགས་མོས་གུས་ཀྱིས་འཐོན་པས་གསོལ་བ་ཐོབ། །མ་འགྲོ་དྲུག་ཏུ་ཤེས་ན་བྱང་སེམས་སྐྱེས། །ཆོས་ཅི་བྱས་བླ་མེད་ཀྱི་བྱང་ཆུབ་བསྔོས། །ཞེས་གདམས་པའོ།། །།སེམས་དབང་པོའི་གྲོང་ལ་འཁྱམས་བཅུག་ན། །ཕྱི་གཟུང་བའི་སྣང་བ་མི་འགག་ལ། །ནང་འཛིན་པའི་བྱ་བས་བག་ཆགས་འགུགས། །མངོན་བྱང་གི་གཟིགས་མོ་འབྱུང་བར་དཀའ། །སེམས་བཟོ་བཅོས་མེད་པའི་ཀློང་དུ་བཅུག །དྲན་ཤེས་བཞིན་སྒོ་བ་བཟང་པོ་བསྐོས། །བལྟར་མེད་ཀྱི་ལྟད་མོ་དེ་ལ་འཆར། །དགག་གཞག་གི་ཡུལ་ལས་འདས་པས་ན། །བླ་མ་དཀོན་མཆོག་ལེགས་འཛིན་ལ་གནང་བའོ། །ན་མོ་གུ་རུ་བྷྱཿབཀའ་བླ་མེད་ཆོས་ཀྱི་སྒྲོན་མེ་ཡིས། །སྲིད་གསུམ་གྱི་མུན་པ་སེལ་མཛད་པའི། །བརྒྱུད་པ་གཅིག་ཡོད་པ་དཀར་བརྒྱུད་ཅེས། །དེ་སྲིད་ཞིའི་དཔལ་འབྱོར་ཡིན་པར་ངེས། །དོན་ཆོས་ཀྱི་སྐུ་ལས་གཞན་དུ་མེད། །ཡེ་གདོད་༼༡༢ན༢༣༽ནས་གནས་པའི་རང་གི་སེམས། །དེ་སངས་རྒྱས་དངོས་སུ་ངོ་སྤྲོད་པའི། །བླ་མ་གཅིག་ཡོད་པ་ངག་གི་དབང་། །རིགས་ཀུན་གྱི་ཁྱབ་བདག་ཡིན་པར་ངེས། །ཐ་མལ་ཤེས་པ་ལས་གཞན་དུ་མེད། །མཆོག་ཐུན་མོང་གི་དངོས་གྲུབ་རྣམ་གཉིས་པོ། །བདེ་བླག་ཏུ་སྩོལ་བར་མཛད་པ་ཡི། །ཡི་དམ་ཅིག་ཡོད་པ་འཁོར་ལོ་སྡོམ། །དེ་བརྟན་གཡོ་ཀུན་གྱི་རང་བཞིན་ཡིན། །དོན་ལྷན་ཅིག་སྐྱེས་ལས་གཞན་དུ་མེད། །བདུད་བཞི་ཡི་བར་ཆད་ཇི་སྙེད་པ། །དེ་ཐུགས་རྗེས་འཇོམས་པར་བྱེད་པ་ཡི། །ཆོས་སྐྱོང་ཞིག་ཡོད་པ་ཕྱག་བཞི་པ། །དཔལ་ཧེ་རུ་ཀ་དང་དབྱེར་མེད་པའི། །ཡེ་ཤེས་ཀྱི་རྩ་ལ་ལས་གཞན་དུ་མེད། །འཕྲིན་ལས་ཀུན་ཇི་ལྟར་བསྒོ་བ་བཞིན། །ཐོགས་མེད་དུ་སྒྲུབ་པར་བྱེད་པ་ཡི། །མཁའ་འགྲོ་ཅིག་ཡོད་པ་དུད་སོལ་མ། །དུས་གསུམ་གྱི་རྒྱལ་བའི་ཡུམ་མཆོག་དེ། །སྟོང་ཉིད་ཀྱི་དོན་ལས་གཞན་དུ་མེད། །གནད་ཟབ་ཅིང་རྒྱ་ཆེ་བའི་བདག་ཉིད་ཅན། །ལས་ཀུན་ལས་ཕུལ་དུ་བྱུང་བ་ཡི། །གདམས་ངག་ཅིག་ཡོད་པ་སྡོང་པོ་གསུམ། །ཚེ་གཅིག་ལ་སངས་རྒྱས་སྟེར་བར་ངེས། །འགག་མེད་ཀྱི་རྩལ་ལས་གཞན་དུ་མེད། །དོན་ཐ་སྙད་ཚིག་གི་བརྗོད་བྲལ་ཞིང་། དེ་གཉིས་སུ་མེད་པའི་ངོ་བོ་ཅན། །ལྟ་བ་ཅིག་ཡོད་པ་ཁས་ལེན་བྲལ། །དེ་རྒྱལ་བ་ཀུན་གྱི་དགོངས་པ་ཡིན། །རང་སེམས་ལས་གཞན་དུ་ཡོད་པ་མིན། །བསྒོམ་བྱ་སྒོམ་བྱེད་ཀྱི་མཚན་མ་ཡི། །མཐའ་དེ་ལས་འདས་པའི་བདག་ཉིད་ཅན། །སྒོམ་པ་ཅིག་ཡོད་པ་ཡིད་བྱེད་བྲལ། །དེ་འཁོར་འདས་ཀུན་གྱི་རང་བཞིན་ཏེ། །དོན་གཉུག་མའི་ཡེ་ཤེས་ལས་གཞན་དུ་མེད། །འདི་བྱ་དང་འདི་བྱེད་ལས་འདས་ཤིང་། །བཟའ་གཏད་དང་ཕྱོགས་ལྷུང་བྲལ་བ་ཡི། །སྤྱོད་པ་ཅིག་ཡོད་པ་བླང་དོར་བྲལ། །དེ་ཞེན་མེད་ལྷུག་པར་སྤྱོད་པ་ཉིད། །དོན་ཟག་པ་མེད་ལས་གཞན་དུ་མེད། །འགྱུར་བ་མེད་པའི་ལྷན་ཅིག་སྐྱེས། །དེ་འཆིང་བ་ཀུན་ལས་འདས་པ་ཡི། །འབྲས་བུ་ཞིག་ཡོད་པ་དེ་དོགས་བྲལ། །དེ་ཡང་དག་དོན་གྱི་རྒྱལ་༼༡༢བ༢༤༽བ་སྟེ། ཆོས་ཉིད་ཀྱི་གཏན་ཡུལ་ཟིན་ལས་མེད། །དོན་དེ་ལྟར་རྟོགས་པའི་རྣལ་འབྱོར་པས། །ཕ་བླ་མའི་ཆོས་སྲིད་ཟིན་པ་ཡིན། །དཀར་བརྒྱུད་ཀྱི་བསྟན་པའི་མངའ་བདག་ཉིད། །དེ་ངག་དབང་ནོར་བུའི་མྱོང་གླུ་ཡིན། །མི་སྐལ་བཟང་འགའ་ཞིག་མ་གཏོགས་པ། །དོན་ཀུན་གྱིས་གོ་བ་དཀའ་མོ་མཆི། །ཞེས་པ་བཀྲ་ཤིས་མཐོང་སྨོན་དུ་ཤུགས་འབྱུང་དུ་བགྱིས་པའོ།། །།ན་མཿཤྲཱི་ཝ་གནྡྲཱི་ཡ། ཕ་གྲུབ་པའི་དབང་ཕྱུག་ཆོས་ཀྱི་རྒྱལ། །ཆེ་རབས་ཀྱི་འདྲེན་པ་སྐུ་དྲིན་ཅན། །དཔལ་ཀུན་མཁྱེན་ངག་གི་དབང་པོ་དེ། །བདག་གི་གཙུག་རྒྱན་དུ་བཞུགས་སུ་གསོལ། །རྗེ་འབྲུག་པའི་བརྒྱུད་འཛིན་བླ་མའི་བུ། །རི་ཁྲོད་པའི་དགེ་སློང་ངག་གི་དབང་། །ཀུན་དགའ་ཡི་རྣམ་རྒྱལ་སྐད་པ་ལ། །ཁྱེད་བྱ་བ་བཏང་བའི་རྣལ་འབྱོར་བ། །སངས་རྒྱས་ཀྱི་རྒྱ་མཚོ་ཞེས་གྲགས་པས། །མི་ཕྱེད་པའི་དད་པའི་ཤུགས་དྲག་གིས། །བཀའ་དམ་པའི་བདུད་རྩི་དགོས་སོ་སྐད། །ཚིག་སྡེབས་སྦྱོར་མཁས་པོ་མི་ཤེས་ཀྱང་། །མི་ཁྱོད་ཀྱི་ངོ་གདོང་མ་བཟློག་པས། །དོན་ཅུང་ཟད་བཀོད་དེ་མ་ཡེངས་ཉོན། །སྔོན་རྒྱལ་བ་ཆོས་ཀྱི་སྤྱན་ལྡན་དེས། །སེམས་ཅན་གྱི་བློ་དང་གང་འཚམས་པར། །ཆོས་བརྒྱད་ཁྲི་བཞི་སྟོང་གསུངས་པ་ཡང་། །དོན་རང་སེམས་འོད་གསལ་ཆོས་སྐུར་འདུས། །རྣམ་རྟོག་གིས་འཁོར་བར་སྣང་བ་ཡང་། །དོན་ཆོས་སྐུ་ཉིད་ལས་གཞན་མ་ཡིན། །དཔེ་ཆུ་བོ་གཅིག་ལས་འཁྱག་རུམ་དང་། །རྦ་རླབས་དང་རླབས་མེད་ཅིར་ཡང་སྣང་། །ཆུ་བོ་ཡི་ངོ་བོར་གཅིག་པ་ལྟར། །ཅིར་སྣང་མཛད་ཕྱག་རྒྱ་ཆེན་པོ་ལས། །ལོགས་ནས་གཞན་པ་ཡོད་མ་ཡིན། །རང་ཉིད་ལ་ཡོད་པའི་སངས་རྒྱས་ཏེ། །མི་མཐོང་བར་གཞན་ནས་འཚོལ་བ་མང་། །གཏམ་ཚིག་གསུམ་བྱ་བཏང་རྒན་པོ་ཡི། །ཡིད་དཀྱིལ་དུ་ཞོག་ཅིག་སངས་རྒྱས་པ། །མི་ཁྱེད་དང་བྱ་བྲལ་དགེ་སློང་ང་། །སྐྱབ་ནས་ཚེ་རབས་ཐམས་ཅད་དུ། །འབྲལ་མེད་དུ་དམ་པའི་ཆོས་སྤྱོད་ཅིང་། །རྣམ་མཁྱེན་ཀྱི་༼༡༣ན༢༥༽སངས་རྒྱས་མྱུར་ཐོབ་ཤོག །མཉམ་གྲོགས་རང་ཚོད་བཟུང་བའི་བསྟེན་ཐབས་འདི། །བྱིན་རླབས་རླུང་ལ་བསྐུར་བའི་རྒྱུར་འདུག་པས། །རྙེད་དཀའ་རྙེད་པའི་བསམ་པ་རྟག་བཅངས་ནས། །མཉེས་པར་བྱ་ལ་འབད་པ་བསླབ་བྱ་ཡིན། ཞུ་བའི་དུས་སུ་ཐོས་ལོར་བཞག་པ་འདི། །ལག་ལེན་རླུང་ལ་བསྐུར་བའི་རྒྱུར་འདུག་པས། །ཚིག་དོན་ཞུ་གཏུག་བྱེད་ཅིང་ཉམས་འོག་གཞུག །ཉན་ཚད་རྒྱུད་ལ་ངེས་ཁེལ་བརླབ་བྱ་ཡིན། །ད་ལྟ་གཞོག་མཐོང་ཕྱིས་ནས་བྱའོ་སྙམ། །ཉམས་ལེན་རླུང་ལ་བསྐུར་བའི་རྒྱུར་འདུག་པས། །མི་རྟག་འཆི་བ་ནམ་ཡོད་ངེས་མེད་པས། །དྲན་པའི་མདོ་རང་སྒྲུབ་པ་བསླབ་བྱ་ཡིན། །གཟིམས་དཔོན་འཇམ་དབྱངས་པད་དཀར་ལ་བསླབ་བྱར་གདམས་པའོ།། །།ཟང་ཟིང་གི་ལོངས་སྤྱོད་འདུས་དུས་ན། །དགོས་མེད་ཀྱི་བློ་སྣས་རྡོག་བརྫིས་བྱས། །དབེན་གནས་གང་མཐོར་བགྲོད་པ་དེ། །ཞེན་ལོག་པའི་རྣམ་ཐར་ཡིན་པས་བསྔགས། །མོས་སྒོམ་གྱི་གཉེན་པོ་རྒྱང་བསྲིངས་ནས། །ཡིན་ལུགས་ཀྱི་སྟེང་དུ་མ་ཡེངས་བཞག །ལས་ཟིན་སྐྱེས་བུ་དེ་ལ་འབྱུང་། །ཕྱོགས་བྲལ་གྱི་རྣལ་འབྱོར་བློ་རེ་བདེ། །འགྲོ་དྲུག་ལ་དམིགས་པའི་བྱང་སེམས་ཀྱང་། །འཁྲུལ་སྣང་ལ་གསལ་འདེབས་ཡིན་མཐོང་ནས། །བདག་གཞན་མཉམ་ཉིད་ཀྱི་གློང་ཡངས་སུ། །འཁོར་གསུམ་དག་པའི་སེམས་སྦྱངས་འཚལ། །སྐུ་གཉིས་ལྷུན་གྲུབ་ཅིག་དེ་ལ་འབྱུང་། །ནམ་མཁའ་ལྟ་བུའི་རྒྱུ་འབྲས་ཟེར། །རོ་གཅིག་དུ་མར་ཤར་འདིས་སུ། །སྒོམ་མེད་ཀྱི་རྒྱལ་ཁམས་བཀྲ་ཡིན། །ཅེས་པ་འདི་ཡང་ནེ་རིང་སྒྲུབ་ཆེན་ལ་གནང་བའོ།། །།ཀྭ་ཡེ་ལྟ་ཡི་བླ་མའི་བློ་གྲོས་བྱིན། །ཁ་བའི་རི་ལྟར་སྤུངས་འཐུག་བསོད་ནམས་གཟིས། །ག་ལ་བརྒྱན་པའི་ས་སྤྱོད་དེ་ཡི་ཚིག །ང་ཡི་ཡིད་ཀྱི་ངལ་བའི་གསོས་སུ་སྨིན། །ཅ་རེ་ཁྱོད་ཀྱི་གྲགས་སྙན་གུར་ཀུམ་ཆར། ཆ་ཙམ་མིན་ལ་བསྟོད་པའི་ཙ་ཏ་ཀ །ཇ་ཡི་ལོ་མ་ལྟ་བུའི་གཤོག་བརྐྱང་ནས། །ཉ་རྒྱས་༼༡༣བ༢༦༽ཟླ་བའི་གྲོང་ཁྱེར་དེ་དྲུང་འཕུར། །ཏ་ཐཱ་ག་ཏའི་བསྟན་ལ་སྦྱིན་པའི་བདག །ཐ་མལ་སྲིད་པའི་ལུས་ཀྱིས་མི་མགུ་བར། །ད་ལྟ་ཆོས་ཀྱི་ནོར་ཅན་འཆོ་་་་་་། ན་གདུང་མ་བསམ་པ་ཡི་ཕྱོགས་འདིར་འོངས། །པ་ར་མ་ཡི་ཚུལ་ལ་འདྲིས་པའི་ཞར། །ཕ་རོལ་ཐ་སྙད་ཚོགས་ཀྱི་མགྲོན་བསྟབས་པས། །བ་བཞིན་ཚིག་གི་འདོད་འཇོ་སྦྱིན་ནུས་པས། །མ་ལུས་འགྲོ་བའི་ཉེར་འཚོར་འགྱུར་བའི་ཕྱིར། །ཙ་རི་ཏྲ་ལྟར་དབེན་པའི་ནགས་ནང་དུ། །ཚ་གྲངས་བཟོད་པའི་བསམ་གཏན་སྒོམ་འདོད་ཀྱང་། །ཛ་ལང་སྐྱེ་བོའི་ཁྲོད་འདིར་རྟག་ལྷུང་བས། །ཝ་ལེར་ལྷ་ཆོས་དྲན་ཀྱང་ཕྱི་བཤོལ་ལས། །ཞྭ་ལྟར་མཁས་བཙུན་བཟང་བཀུར་མི་དབང་ཁྱེད། །ཐ་མའི་མགྲོན་ལས་ལྷག་པས་སྙིགས་དུས་ལ། །ལའུར་མེད་པའི་བདེ་ལ་སྦྱོར་ཞིག་ཅེས། ཡ་རབས་ཁྱོད་ཀྱིས་རྣ་བའི་རྒྱན་དུ་བསྲིངས། །རཱ་ཛ་ཕལ་ཆེར་མི་བསྲུན་འདི་འདྲའི་དུས། །ལ་ལར་ནོར་ཕྱིར་སྲོག་ཀྱང་འཚོང་ཕོད་པ། །ཤ་ཟ་ལྟ་བུའི་ཁྲེལ་མེད་ཀྱིས། །གང་བའི། ས་སྟེང་འདི་ན་བདག་གིས་ཅི་བྱར་མཆིས། །ཧ་ཅང་མཛའ་བའི་སྤྱི་བརྟོལ་སྨྲས་པ་ལ། །ཨ་ལ་ལ་ཞེས་ཁྱོད་ཀྱིས་དགོངས་པར་རིགས། །དེ་སྐད་བཀྲ་ཤིས་རྣམ་པར་རྒྱལ་བ་ནས། །བཀྲ་ཤིས་ཁ་བཏགས་སྐྱེས་བཅས་བསྲིངས་པ་དགེ། །།ལྷ་རིགས་ཕུན་ཚོགས་དགའ་བའི་ཚལ་ནང་དུ། །སྔོན་བསགས་ལས་འཕྲོ་བརྡར་སོན་ལེགས་སྨིན་ནས། །ཚུལ་ལྡན་དང་པོའི་མྱུ་གུ་ཕྲར་མཐོན་པ། །བསྐྱངས་པས་ཐོས་བསམ་ཡལ་འདབ་རྫོགས་པ་དེས། །སྙན་པའི་དྲི་ལེན་དང་བའི་ཕོ་ཉ་བས། །འབིགས་བྱེད་ཁྱོད་བློར་ཆགས་པའི་དེས་གསར་སྤྲིན། །རྩོམ་པའི་གྲུ་ཆར་དུ་བཞུ་འདི་ཕོབ་ཅེས། །བསྐུལ་ལ་སྤྲོ་བའི་དབྱར་སྐྱེས་རྔར་བཅས་བསྲིངས། །བློ་རཏལ་ཆར་སྡོད་ཙ་ར་ཀ་ཡི་ཝ། །ངོམས་པ་ཎ་མ་མ་རྣོན་ཀླུ་དབང་སྡེའི། །རྣམ་དཔྱོད་ཉེར་འཚོའི་ཆུ་ཀླུང་སྤེལ་བའི་འོས། །ཞིབ་མོ་ཞིབ་མོར་བྱེད་པའི་ཤེས་རབ་ལྕེས། །མྱང་པས་ཤེས་མོད་བརྟགས་ནས་ཇི་འདྲའི་ལན། །མངག་གཞུག་ན་བུན་༼༡༤ན༢༧༽གཞོན་ནུ་འདི་ལ་བསྐུར། །ཆར་འདི་རང་བློ་དད་པའི་རྗེས་འབྲངས་སུ། །བབས་པར་ཁྱོས་མཐོང་ཆེན་སྦྱངས་སྟོབས་ཀྱིས། །ཉི་འོད་བཀྱེ་ནས་ལུང་རིགས་དབང་པོའི་གཞུས། །ཀུན་དགའི་ངོ་མཚར་སྟོན་གྱི་ལྟད་མོར་བྱོན། །ཕྱོགས་ལྷུང་ཐན་པ་ཆེན་པོས་མ་གཅོས་པའི། །སྨྲ་བའི་ནགས་ནང་དེར་ནི་ཁོ་བོའི་ཡིད། །དང་བས་བསྟོད་ཚིག་ཅ་ཅོ་སྤེལ་བྱེད་པ། །ཐར་འདོད་མདོངས་ཐ་ཅན་གྱི་རྩེ་དགའི་གཉེན། །ཚིག་སྦྱོར་གྱིས་བཀྲ་དོན་བཟང་བསུང་ཞིམ་པ། །ལེགས་བཤད་གསར་པ་གསར་པའི་དཔལ་ཡོན་གྱིས། །ཐུབ་བསྟན་ཨུཏྤལ་མཐིང་ཁའི་ཚལ་དར་ལ། །བརྩོན་འདི་མཁས་པའི་སྙན་གོང་ཕྱོགས་ལྷུང་དབང་། །བཤད་པའི་གེ་སར་གཡོ་བ་ཙམ་མིན་པ། །ལག་ཁྲིད་གདམས་པའི་སྦྲང་རྩིར་སྨིན་པས་ཀྱང་། །སྐལ་བཟང་བུང་བའི་དཔྱིད་དུ་ཆོས་སྨྲའི་མཚོར། །ལེགས་སོའི་ཉི་འོད་འཐུང་དེ་པད་དཀར་ལོ།། །།ཆོས་ཟབ་དགུའི་ཉིང་ཁུ་གསོལ་གསོལ་ནས། །སྣོད་ལྡན་གྱི་ངོ་ན་སྐྱུག་མཁན་དེ། །དཀར་བརྒྱུད་ཀྱི་གསེར་སྦྲང་རྐང་དྲུག་ལྡན། །རྣམ་གྲོལ་གྱི་མཁའ་ལ་འཕུར་རྣམས་ཡིན། །ཁྱོད་དེ་རྗེས་འབྲང་བའི་རྣལ་འབྱོར་པ། །བླ་མ་སློབ་དཔོན་གྱི་ཁུར་འཛིན་སྤངས། །སྒྲུབ་ཆེན་ཆོས་སྐྱོང་བདེ་ལེགས་ཁྱོད། །མི་མེད་ཀྱི་དབེན་དགུ་འགྲིམ་འདོད་པར། །ང་རྗེས་སུ་ཡི་རང་སྐྱེས་ནས་སུ། །ནན་ཏན་དང་དབུ་ཚུགས་མ་བྱས་སོ། །དུས་ད་ལྟ་སྙིགས་མ་ལྔ་བདོའི་ནང་། །སངས་རྒྱས་དང་བྱང་ཆུབ་སེམས་དཔའ་སྐད། །མི་གཞན་ལེགས་མཐོང་ན་ཐུགས་འཁྲུགས་ནས། །སྐྱོན་མེད་ཀྱི་མི་ལ་མི་ཁ་འཆོས། །ལས་འབྲས་བསླུ་མེད་ཀྱི་གནད་གོ་བས། རང་སྨོད་པའི་འདམ་དུ་ལྷུང་གྱུར་ན། །ལས་སྔོན་བྱས་འདག་བསམ་དགའ་བ་སྐྱེད། །ཁ་གཏོང་ལ་དེ་ཙམ་མ་འཇིགས་པ། །དེ་ཙམ་གྱི་བསྟོད་ར་གཏོང་མཁན་སྣང་། །རང་བྱས་ལ་གཡོ་སྒྱུ་མ་ཞུགས་པ། །ཆོས་ལག་ལེན་དུ་བསྒྲིལ་བའི་མདོ་སྡེ་ཡིན། །དེ་བདག་བསྟོད་སྨད་༼༡༤བ༢༨༽མཉམ་ཉིད་འབྱོངས། །ཁོར་གཞན་ལུགས་དད་ན་དད་པས་ལེགས། །དག་སྣང་འབྱོངས་པའི་ཆོས་ལུགས་ཡིན། །མ་དད་ན་བཏང་སྙོམས་གཞོག་ལ་ཐོང་། །དགྲ་ཟུན་གྱི་ལབ་ལོབ་རྣ་བར་གཟན། །ཆགས་སྡང་གི་བགྱི་བ་ཞེ་རྩ་འཁྲུག །ཁ་རོག་པར་སྡད་ན་དེ་ཀས་ཆོག །ཆོས་སྙིང་པོའི་དོན་ལ་རང་ཅག་སྤྱོད། །མ་ཡེངས་པའི་འཇོག་པ་གཤིས་ཐོག་ཡིན། །སྣང་གྲགས་བྱུང་ན་སྒོམ་གྱི་གྲོགས། །གང་ཤར་ཆོས་སྐུའི་ཡོ་ལང་ཡིན། །ཞེས་སྒྲུབ་ཆེན་ནེ་རིངས་པ་ཏི་སི་ལ་སོགས་པའི་ཁུར་འཁུར་གྱི་བླ་མར་འོས་སྙམ་སྨྲས་པས། །ཚེ་བློས་བཏང་གི་སྒྲུབ་པ་མཐར་སྐྱེལ་བའི་དགོངས་གྲོལ་ཞུས་དུས་ཞལ་གདམས་སུ་བྱས་པའོ།། །།རྟག་ཏུ་འཆར་ལ་ནུབ་པ་མི་སྲིད་པ། རྒྱལ་བ་ཀུན་གྱི་ཐུགས་རྗེའི་ཉི་མའོ། །དེ་དང་དེ་ཡི་རེག་བྱས་ཡིད་སིམ་པས། །ཐམས་ཅད་རྣམ་པ་ཀུན་གྱི་ཕྱག་གི་འོས། །སྙིགས་དུས་ཕྱོགས་རིས་ཟུག་རྔུ་ཆེས་པ་དང་། །སྔོན་ལས་ཀྱིས་འཕངས་སྨྲ་མཆུ་མང་ན་ཡང་། །རང་སྤྱོད་རྒྱལ་བའི་བསྟན་ལས་མ་གཡོས་ན། །བྱས་ཚད་འཚེངས་པ་ཡིན་ནོ་རིགས་ཀྱི་བུ། །ངོས་སུ་ཚུལ་ལེགས་ལྐོག་ཏུ་བག་འཁྱལ་བའི། །དགེ་སྦྱོང་འཇིག་རྟེན་མིག་ངོར་མཛེས་ན་ཡང་། །གང་བྱས་རྣམ་སྨིན་རང་ལ་འོང་འདིས་སུ། །མཛུབ་མོ་བཀུག་ལ་རང་རྒྱུད་རེངས་མ་འཇུག །བླ་ཆེན་རྣམས་ནས་གྲྭ་རྐྱང་སྙོམས་ཆུང་བར། །ཟང་ཟིང་ནོར་ཕྱུགས་ངོམ་ཞིང་གཞན་དགའ་ཡང་། །དེ་འདྲ་འདུལ་བ་དམད་པའི་ལས་ཡིན་གྱི། །གང་ལའང་དྲོད་རིགས་འདོད་ཆུང་ཆོག་ཤེས་གྱིས། །བག་ཆགས་ངན་པ་འགྲོགས་ཡུན་རིང་འདིས་སུ། །གར་སླེབ་ངེས་པ་མེད་པས་སྒོ་གསུམ་སྤྱོད། །ཅི་བྱེད་སྔོན་དུ་ལེགས་པར་བརྟགས་ནས་སུ། ཆོས་མཐུན་གང་ཡིན་་་་་ལ་གཞན་མ་བཤོལ། སྦྱིན་པས་བོས་ལ་སྙན་པའི་གཏམ་སྨྲ་ཞིང་། །དོན་སྤྱོད་བག་ཕེབས་གྱུར་ནས་དོན་མཐུན་པར། །གཏན་གྱི་དོན་ཆེན་སྒྲུབ་ལ་སྦྱར་ནུས་ན། །འགྲོ་དོན་ཆེན་པོ་འོང་གི་ཐེ་མ་ཚོམ། །སྙིགས་དུས་ལོག་༼༡༥ན༢༩༽སྒྲུབ་དར་བའི་འཁོར་གྱི་ཁྲོད། །བཟོད་པ་ཁོང་བདེན་འཇམ་ལ་ཐབས་མཁས་པས། །རྣལ་མར་སྒྲུབ་པའི་ཆོ་ག་སྦྱོར་ཤེས་ན། །ཐམས་ཅད་བདུན་པ་ལག་པའི་རྩེ་ལ་འོང་། །གལ་ཏེ་བྱས་ཀྱང་ཚབས་སུ་མི་འགྲོ་ན། །སྔོན་ལས་ཡིན་གྱི་དེ་རུ་སྡིག་པ་སྦྱོངས། །དཀོན་མཆོག་གསུམ་ལ་ར་མདའ་ཞུ་བ་ལས། །གཞན་པའི་ཐབས་གཞན་མི་དགོས་དེ་ཡིས་ཆོག །ཐ་སྙད་ཀྱོག་པོའི་འཐེན་ཁྱེར་ཆོས་ཀྱི་དགྲ། །དེ་བསྐྱུར་བཀའ་དང་དགོངས་འགྲེལ་གཞུང་ཀུན་དང་། ཚིག་དོན་ཞུ་དག་ཐུབ་པའི་ཐོས་པ་ལ། །བསམ་ཞིག་བཏང་ན་བསྟན་པ་གཟུང་བ་ཡང་། །ལན་རེར་གོ་བ་དཀའ་ཡང་ཡང་དང་ཡང་། །མཇལ་དང་ངེས་རྟོགས་དགོས་ཀྱི་དེ་དང་དེར། །ཀློག་པའི་མོད་ལ་ཡིད་སུན་མི་སྐྱེ་བར། །ཚིག་དོན་གར་སོང་གདོས་དང་ཀུན་ཤེས་འབྱུང་། །ཤིན་ཏུ་ཟབ་མོའི་གནས་ལ་ཐེ་ཚོམ་ན། །དད་པའི་སྟོབས་ལས་གཞན་གྱིས་རྙེད་དཀའ་བས། །མཚན་ལྡན་བླ་མ་དམ་པར་བློ་བཀལ་ནས། །རྩེ་གཅིག་གསོལ་བ་ཐོབ་དང་འདོད་དོན་འགྲུབ། །མདོར་ན་རང་མཐོང་སྐྱོན་ཡིན་དམན་ས་གཟུང་། །གཞན་ངོར་མི་འགྲོ་དགེ་ཡང་ཅམ་གྱིས་ཞོག །ཕན་འགྱུར་སྲོག་ལ་མི་བལྟ་སྒྲུབ་ལ་ཐུག །དེ་སྐད་པདྨ་དཀར་པོའི་ལེགས་བཤད་གསུང་། །མྱངས་ན་ཞིམ་པ་གང་ལ་བསྲིངས་འདིས་སུ། །བློ་གསལ་བུང་བའི་སྡེ་རྣམས་ཡིད་དགའ་བའི། །ཟློས་གར་ཆེན་པོས་ས་འདི་ཁྱབ་གྱུར་ཅིག །ཅེས་རྒྱལ་བྱེད་ཚལ་ནས་མདོ་གྲྭ་འཆད་ཉན་པ་འཇམ་དཔལ་གྲགས་པ་ལ་པདྨ་དཀར་པོས་ཉུང་དུར་གདམས་པའོ།། །།རྗེ་ཉི་ཟླ་ལྟར་གྲགས་རིན་པོ་ཆེ། །དཔལ་ངག་དབང་ཆོས་ཀྱི་རྒྱལ་པོར་འདུད། །ཁྱོད་སྒྲུབ་བརྒྱུད་འཛིན་པའི་བུ་སློབ་ལ། །ཚིག་མང་པོའི་སྤྲོས་པ་བགྱི་མི་འོས། །དོན་ཉམས་ལེན་གནད་དུ་དྲིལ་ཏེ་བཤད། །བློ་རྩེ་གཅིག་ཉོན་དང་བླ་སྦྱང་པ། །བརྒྱུད་ལྡན་གྱི་བླ་མ་དམ་པ་ལ། །སངས་རྒྱས་དངོས་སུ་མཐོང་གྱུར་ན། །ཚེ་གཅིག་གིས་སངས་རྒྱས་ལག་རྩེར་ཞོན། །དེ་ཕྱིར་མོས་གུས་ལ་༼༡༥བ༣༠༽སྙིང་ཕུད་ཚུགས། །ལུས་འདོད་ནས་གྲུབ་པའི་ལྟར་ཤེས་ནས། །གདངས་རྟེན་དང་བརྟེན་པར་གསལ་འདེབས་ཙམ། །དོན་ཟུང་འཇུག་གི་སྟེང་དུ་བསྒྲིལ་གྱུར་ན། །ལྷ་ཐམས་ཅད་གཅིག་གི་འགྲུབ་པར་གོ། །སྟེང་རོ་མ་ལམ་དུ་བྱེད་པའི་སྒོ། །ཨ་ཧཾ་གི་འབྲོས་འདོད་ཡ་མཚན་ཅན། །ཉི་ཟླ་འཕེན་སྡུད་མི་བགྱིད་པར། །རླུང་དབུ་མར་བཅུག་ན་འགྲུབ་པར་གོ། །འོག་རྐྱང་མའི་ཁ་ལས་འཛག་མེད་བཅིངས། །རྟེན་ཕོ་ཉའི་གསེབ་ལམ་ལ་ཕྱིན་ནས། །ཆོས་ཕྱག་ཆེན་གྱི་རང་ཞལ་བལྟ་ཤེལ་ན། །ཟུང་འཇུག་ཀྱང་མིང་དུ་མི་ལས་སྙམ། །ཞེས་པ་བླ་མ་སྦྱང་པ་བློ་གྲོས་བླ་མ་ལ་གདམས་པའོ།། །།སྐྱབས་ཀྱི་མཐར་ཐུག་བླ་མ་རིན་པོ་ཆེ། །འགྲོ་བ་ཀུན་ལ་བརྩེ་བའི་སྤྱན་རས་གཟིགས། །ཁྱོད་ལ་གསོལ་བ་འདེབས་སོ་མཁྱེན་པས་དགོངས། །བདག་རྒྱུད་ཁྱེད་དང་མཉམ་པར་བྱིན་གྱིས་རློབས། །དེ་ནས་བརྩམས་ཏེ་གར་སྐྱེ་ཐམས་ཅད་དུ། །ཡོངས་འཛིན་དགེ་བའི་བཤེས་སུ་ཁྱོད་བསྟེན་པས། །རྣམ་མཁྱེན་རྫོགས་པའི་སངས་རྒྱས་བསྒྲུབ་པ་ལ། །གེགས་མེད་མཆོག་ཏུ་དཔའ་བར་བྱིན་གྱིས་རློབས། །ཞེས་སོ།། །།རྗེ་སྔོན་གྱི་གདུལ་བྱའི་སྣང་ངོ་ན། །མཚན་མི་ཏྲ་ཛོ་ཀི་ལྷ་ཡི་གསོལ། །དུས་ད་ལྟ་ངེད་ཅག་གདུལ་བྱའི་ཕྱིར། །དཔལ་སྒྱུ་མའི་གར་མཁན་གྲུབ་པའི་རྗེ། །ང་དྲན་པའི་གདུང་ཤུགས་ཇེ་ཆེར་ཐལ། །ཕ་མཁྱེན་པས་གཟིགས་ཤིག་སྐུ་དྲིན་ཅན། །འབངས་ཡལ་བར་འདོར་གཏན་དུ་གཟིགས། །དུས་ད་ལྟ་ཞལ་མཇལ་ཞུས་ན་བསམ། །ཕ་བུ་ལ་བརྩེ་བའི་དུས་ལ་བབ། །ཅེས་སྟག་རྩེ་སྒྲུབ་སྡེར་ལོ།། །།བདེ་ཆེན་དམུ་སྟེང་གནས་མཆོག་འདིར། །མེས་པོ་རྗེ་བཙུན་རས་པས་བྱོན། །དག་པ་ལོངས་སྐུའི་ལྷ་ཚོགས་གཟིགས། །དཔའ་བོ་དཔའ་མོས་དབུས་སུ་མཆོད། །བདེ་ཆེན་གྱི་རོལ་གར་ཅི་ཡང་བཀྱེ། །དེ་ཕྱིར་བྱིན་རླབས་ཡ་མཚན་ཆེ། །ང་དེ་ལ་བསམ་ནས་བསྐོར་དུ་འོངས། །སྐལ་ལྡན་ཕོ་མོ་ཚོགས་ཀྱི་མཚོན། །ལྷ་ཡི་མངོན་དབྱིངས་སུ་༼༡༦ན༣༡༽དགྱེས་པ་ངེས། །རྒྱུད་བྱིན་གྱིས་བརླབས་པས་རིག་པ་འུར། །འཕྲལ་བཅོས་མའི་འཁྲིགས་ག་རང་སར་ཞིག །དབྱིངས་སུ་རིག་པ་ཐིམ་པ་སྙམ། །སྣང་བ་ཚོགས་སུ་སོང་བ་སྙམ། །ཉམས་དགའ་བོ་ཞིག་ལ་གུ་ཡངས་པོ། །བློ་བདེ་པོ་ཞིག་ལ་རྒྱ་ཡན་པོ། །དངོས་གྲུབ་མྱུར་དུ་ཐོབ་ཐོབ་འདྲ། །དཀར་བརྒྱུད་ཀྱི་རྣམ་ཐར་འཁྱོངས་སམ་བསམ། །ཉམས་དགའ་བོ་སྐྱིད་དོ་འདིར་ཚོགས་ཚེ། །ཞེས་བདེ་ཆེན་དམུ་སྟེགས་སུའོ།། །།མཚན་ཐོས་པས་འཁོར་བར་མི་ལྡོག་པ། །དཔལ་དགས་པོ་དཀའ་བརྒྱུད་བྱིན་རླབས་ཅན། །ལྷག་པར་སྒྲུབ་བརྒྱུད་འབྲུག་པའི་རྗེ། །དུས་གསུམ་དུ་བྱོན་རྣམས་ཁོ་བོའི་སྐྱབས། །རྩེ་གཅིག་ཏུ་ཁོང་ལ་བློ་གཏད་པས། །དོན་ངང་གིས་གྲུབ་པས་འཚེངས་པར་བྱུང་། །དད་ལྡན་གྱི་ཡོན་བདག་ཁྱེད་རང་ཡང་། །དུས་གཏན་གྱི་རེ་བལྟོས་དེ་ལ་གཏོད། །བསམ་པ་ཐོག་ཁེལ་ཞིག་གདོན་མི་ཟ། །རྗེ་དེ་དག་རྣམས་ཀྱི་སྐྱབས་ཞུགས་ནས། །ལས་སྡིག་པ་བྱེད་པ་མི་རིགས་པས། །དུས་དེ་ནས་གཟུང་སྟེ་དགེ་བཅུ་ལ། །བློ་ནུས་དང་སྦྱར་ཀྱིན་བགས་ཀྱིས་སློབས། །སྤྱིར་ཁམས་གསུམ་འཁོར་བའི་མཚང་ལ་ལྟོས། །སྒོས་སྙིགས་དུས་རྩོད་པ་ལྷུར་ལེན་ལ། །སེམས་བརྟགས་གཞིགས་བཅུག་ན་ཐར་འདོད་སྐྱེས། །དེ་སྨོན་ལམ་གྱིས་ཟིན་ན་ལམ་དུ་ཞུགས། །རང་དོན་མིང་བྱེད་དུ་མ་ལས་པར། །འཇིག་རྟེན་རྒན་པོ་བསམ་ཤེས་ཅན། །གྲོས་འདུན་ལ་འབད་འགྲན་མ་རྒན་རྣམས། །བདེ་ཐབས་ལ་བརྩོན་ན་བྱང་ཆུབ་མཆོག །རྫོགས་པའི་སངས་རྒྱས་ཉིད་དུ་འགྱུར། །དེ་ཕྱིར་དགེ་རྩ་བྱང་ཆུབ་སྔོས། །ཞེས་དེར་རྒྱས་པའི་ཨའོ་ལའོ།། །།འཁོར་བའི་ཉེས་དམིགས་ཤེས་ནས་ཐར་འདོད་ཀྱི། །བྱང་ཆུབ་རྒྱུ་ལ་འབད་པའི་རྩོམ་པ་ལ། །རྟག་ཏུ་བར་ཆད་མེད་ཅིང་འགྲུས་པ་ཡིས། །བསམ་པའི་དོན་ཀུན་འགྲུབ་པར་གྱུར་ཅིག་གུ། །རྡུལ་ཚོན་ལུས་དང་བྷ་ག་བྱང་སེམས་ཀྱི། །དཀྱིལ་འཁོར་བཞིར་ཞུགས་ལུས་ངག་ཡིད་རྣམ་ཤེས། །བུམ་༼༡༦བ༣༢༽གསང་ཤེས་རབ་བཞི་པ་ལེགས་བསྒྲུབས་ནས། །སྐུ་བཞི་མངོན་གྱུར་དམ་ཚིག་སྐྱོང་བར་ཤོག །རང་ལུས་རྡོ་རྗེ་ཕག་མོ་ལུས་དབུས་ནང་། །རྩ་གསུམ་འཁོར་ལོ་བཞི་ནང་ལས་ཀྱི་རླུང་། །འཕོ་མེད་བཅིངས་པའི་འབར་འཛག་ཉམས་ཡིན་གྱིས། །མཆོག་གི་གཏུམ་མོ་འབར་བར་གྱུར་ཅིག་གུ། །སྣང་སྲིད་སྒྱུ་མ་ལྟ་བུར་མཐོང་བའི་མཐུས། །འཇིག་རྟེན་ཆོས་བརྒྱད་མགོ་བོ་སྙོམས་གྱུར་ནས། །ཕུང་ཁམས་སྐྱེ་མཆེད་དག་པའི་ལྷར་གསལ་བོས། །ཉིན་མཚན་བར་དོ་ལམ་དུ་ལོངས་པར་ཤོག །ཆོས་རྣམས་ཉུན་གྱི་གནས་ལུགས་འོད་གསལ་མ། །ཕྱག་རྒྱ་ཆེ་ལ་མཉམ་གཞག་གོམས་ཤུགས་བུས། །མངོན་གྱུར་ཟུང་འཇུག་ཉིད་ལས་རྡོ་རྗེ་འཆང་། །ཡན་ལག་བདུན་ལྡན་མྱུར་དུ་འགྲུབ་པར་ཤོག །ཚེ་འདིའི་སྣང་བ་ནུབ་པར་ཉེ་བའི་ཚེ། །བླ་མ་མཁའ་འགྲོའི་ཚོགས་ཀྱིས་མདུན་བསུས་ནས། །མཁའ་སྤྱོད་ཆེན་པོའི་ས་ལ་འཕོས་ནས་སུ། །གཞན་དོན་ཐམས་ཅད་རྟག་ཏུ་བྱེད་པར་ཤོག །ཅེས་སོ།། །།གཞུང་བརྒྱའི་ཚིག་ལ་ལྷ་ཡི་བླ་མ་དང་། །དོན་འབྱེད་ཀོཎྜྻ་ནྟི་ལྟར་གྱུར་པས། ལུང་རིགས་སྨྲ་ལ་སྤོབས་པ་དགེ་བ་ཅན། །གང་གི་ཞུ་འཕྲིན་ཟླ་བའི་བཞིན་རས་ནི། །ཚིག་རྒྱན་མེ་ཏོག་འཕྲེང་བས་སྤུད་པ་དང་། །སྐྱེས་ལྔའི་མཛའ་བ་དང་འགྲོགས་བོད་ཡུལ་ཤར། །ཅོག་སྐར་རྒྱུ་སྐར་རྒྱུ་འདྲའི་གསེབ་སོན་པས། །སྔར་གྱི་ཡིད་གཅུགས་སྲིད་ལ་མངོན་སུམ་བཞིན། །ཕྱོགས་དེར་སློབ་འདོད་རྣམས་ཀྱི་རེ་སྐོང་དུ། །གང་གི་ཤེས་པའི་དཔག་བསམ་བཀོད་གྱུར་ལ། །འཆད་རྩོད་རྩོམ་པའི་དྲི་བཟང་འགྱེད་པའི་ཚུལ། །ཐོས་པའི་ལམ་ཞུགས་གྲགས་པའི་ཕོ་ཉ་བས། །སྙིང་ལ་སིམ་པ་བྱེད་དུ་ངལ་བ་བྱས། །བདག་ཀྱང་འདུས་བྱས་ཆོས་ཀྱི་གནས་ཚུལ་ལས། །བདེན་གཉིས་རྣམ་པར་བྱེ་བའི་ཚུལ་རྟོགས་པས། །ནམ་མཁའ་སྤྲིན་བཅས་སྤྲིན་ནི་གོ་འབྱེད་པར། །ཇི་བཞིན་བྱ་བ་ཐམས་ཅད་ལམ་དུ་ཁྱེར། །རེས་འགའ་མཁས་པའི་ལས་༼༡༧ན༣༣༽བསམ་གཞུང་ལུགས་འབྱེད། །རེས་འགའ་གྲུབ་པའི་ཤུལ་འཛིན་སྒོམ་བཟླས་བྱས། །ཕལ་ཆེར་སྐྱེ་བོའི་ངོ་བཞིན་འགྱིང་བག་ནི། །དབང་ཕྱུག་ཆེན་པོའི་མདུན་ས་དྲུང་སླེབ་ཙམ། །ཐུབ་པས་འདུལ་བའི་ལུང་ལས་རབ་ཞིར་བསྔགས། །རང་ངོར་དེ་ཉིད་ཁོ་ནར་སྙིང་པོར་བྱས། །ལྔ་བརྒྱ་པ་རྣམས་འདོད་ཆེན་མཐོན་པོར་འཛིན། །དེ་ཕྱིར་ཆེན་པོའི་སྲོལ་ཡང་མ་བསྣུབས་གཟུང་། །བདག་སྤྱོད་འདི་ལྟར་ཁྱོད་ཀྱིས་ཤེས་གྱུར་ན། །སྲིད་ཞི་མཉམ་པ་མཁའ་དང་ལག་མཐིལ་བཞིན། །བདེ་སྡུག་རོ་གཅིག་ཙན་སྟེའུ་སྟེ། །བཟང་ངན་མ་མཆིས་གསེར་དང་བོང་བའི་དཔེ། །འདི་དག་ཀུན་རྫོབ་ཡོད་མ་མྱོང་བས་དང་། །དོན་དམ་མེད་མ་མྱོང་བས་མ་གྲུབ་སྐད། །ཕྱོགས་བྲལ་དབུ་མའི་ལུགས་སུ་ཞུགས་གྱུར་ན། །འཁོར་གསུམ་དག་པའི་ཉམས་ལེན་ལག་རྩེར་ལོན། །ཕྱག་རྒྱ་ཆེན་པོ་བྱས་ཀྱང་དེ་ཀ་རང་། །བྱས་ཚེ་དམ་པའི་ཆོས་ལས་གཞན་པ་མིན། །གདུལ་བྱ་འདུལ་བའི་འཕྲིན་ལས་རྒྱ་ཆེན་དེ། །མཁས་པ་ཁྱོད་ཀྱིས་བརྟགས་ཀྱིན་རི་མོར་འོས། །ཅུང་ཟད་བསྙད་འདིའི་རྟེན་དུ་བྱིན་བརླབས་པའི། །བདུད་རྩིའི་རིལ་བུ་ནུས་པ་མི་བསླུ་བ། །ཀཱ་ལ་ཀུ་ཊའི་ནད་འཇོམས་སྨན་ཐུམས་དང་། །ཕྱག་རྒྱ་ཆེན་པོའི་བཤད་སྦྱར་ངུར་སྨྲིག་གི། །མདངས་འཛིན་ཐེར་མ་ཟུང་ལ་རྟགས་བཀོད་དེ། །སྤྲིན་ཐོགས་ཆོས་ཀྱི་ཕོ་བྲང་ཆེན་པོ་ནས། །བཤོལ་ལྡན་གསུམ་པའི་ཚེས་བཅུར་བརྫངས་པ་ཡིན།། །།ཚེ་འདི་བློས་བཏང་གི་རྣམ་ཐར། །ལྟོ་གོས་གཏམ་གསུམ་ལ་མི་རྩེག །གཡའི་སྤང་གངས་ཁྲོད་དུ་སྡོད་པའི། །མཉམ་མེད་བླ་མ་ཡི་རིང་ལུགས། །སྒྲུབ་འདོད་སྨོན་ལམ་དུ་བྱས་ནས། །ལག་ལེན་མི་ཁྱུ་རུ་སྙེགས་བས། །རྒྱལ་སྲིད་འདུན་ཐབས་དང་འདྲེས་ཏེ། །ཁ་དང་ཞེ་ཕུགས་སུ་འཛོལ་ནས། །མི་དབང་ཕོ་བྲང་དུ་འཁྱམས་པ། །སྙིང་ནས་སྐྱོ་མོ་འདྲས་བྱུང་ངོ་། །རྒྱལ་ཁ་ཕ་རོལ་ལ་སྦྱིན་ནས། །ཕམ་ཁ་རང་སྐལ་དུ་ལོན་པ། །བདག་༼༡༧བ༣༤༽ལས་གཞན་གཅེས་སུ་མཐོང་བའི། །སེམས་དཔའ་ཆེན་པོ་ཚོའི་རྣམ་ཐར། །སྒྲུབ་འདོད་སྨོན་ལམ་དུ་བྱས་ནས། །ལག་ལེན་དགྲ་གཉེན་ལ་ཆགས་པས། །ཚེ་འདིའི་ཆེ་ཐབས་དང་འདྲེས་ཏེ། །ཁ་བཤད་ཁམ་གཏམ་དུ་ལུས་ནས། །གཟུགས་བཙུན་ཧོ་འདྲའི་གསེབ་འཁྱམས་པས། །སྙིང་ནས་སྐྱོ་མོ་འདྲས་བྱུང་ངོ་། །ཞེས་པ་འདི་ཕོ་བྲང་སྲོང་བཙན་དུ་བགྱིས་པའོ།། །།གནས་བཀྲ་ཤིས་བང་སོར་བཞུགས་པ་ལ། །ལུས་སྲོག་ལ་ཕངས་པ་མེད་པ་དགོས། །ཕུང་པོ་གཟན་སྐྱར་གྱི་གནད་འདི་ཀས། །གཉན་ས་འགྲིམ་པའི་གཅོད་དུ་གོ། །གནས་བཀྲ་ཤིས་བང་སོར་བཞུགས་པ་ལ། །ལྷགས་ངེད་ལ་འཇིགས་པ་མེད་པ་དགོས། །སྡུག་སྲན་རེ་བའི་གནད་འདི་ཀས། །སྒོམ་ཆེན་ཕལ་ཆེར་གྱི་རས་ཕུད་གོ། །ཞེས་སོ།། །།རྒྱལ་བ་རྣམས་ཀྱི་ཐུགས་རྗེའི་འཕྲུལ་ཆེན་པོ། །ངོ་མཚར་ཀུན་ཏུ་སྣང་བའི་གཞལ་མེད་ཁང་། །ཇོ་བོ་རྣམ་གཉིས་རྟག་པར་བསྙེན་པ་འདི། །བསོད་ནམས་དམ་པའི་དམ་པ་ཡིན་སྙམ་མཛོད། །སྡིག་པ་ཆེ་ཡང་བཤགས་པས་མི་འདུག་མེད། །དེས་ན་སྔར་བྱས་ཐམས་ཅད་སྟོབས་བཞིས་ཤོགས། །ཕྱིན་ཆད་སྲོག་ལ་བབ་ནའང་མི་བགྱིད་བ། །དྲན་པས་དབང་པོ་བསྡམས་ན་འགྲུབ་པ་ཡིན། །དགེ་བ་ཆུང་ཡང་ཡོངས་སུ་བསྔོ་བས་འཕེལ། །བྱང་ཆུབ་བར་དུ་འབྲས་འབྱིན་སྟོབས་ཆེར་འགྲོ། །དེས་ན་ཅི་བྱས་རང་དོན་མ་ཡིན་པར། །སེམས་ཅན་ཀུན་ལ་སྟེར་བ་ཐབས་མཁས་མཆོག །དགེ་སྡིག་བསམ་པའི་རྩ་བ་ལ་རག་པས། །བྱེད་པ་ཆོས་སུ་ཨེ་འགྲོ་འགྲོ་ན་བྱ། །མི་འགྲོ་དུག་ཅན་ཟས་བཞིན་འདོར་བའི་ཕྱིར། །ཤེས་བཞིན་བྱ་ར་རྟག་ཏུ་འཛུགས་པར་བྱ། །མདོར་ན་སྡིག་སྤོང་དགེ་བ་བསྒྲུབ་པ་དང་། །རང་སེམས་འདུལ་བར་སྡེ་སྣོད་གསུམ་འདུས་པས། །ཉམས་སུ་ལེན་པ་སྙིང་པོར་སྒྲིལ་ཤེས་མཛོད། །ཐོས་དང་ཚིག་རྗེས་དཔྱད་པའི་བསམ་པ་དང་། །འཇིག་རྟེན་སྒོམ་པ་ཀུན་གྱི་སྙིང་པོའི་དོན། །རྟོགས་དཀའ་རྟོགས་བྱེད་དད་པ་ཁོ་ན་བར་༼༡༨ན༣༥༽མདོ་རྒྱུད་ཀུན་ལས་གསུངས་ཕྱིར་བཤེས་གཉེན་སྟེན། །བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་བཞིན། །འགྱུར་ངེས་བསླུ་བ་མེད་པའི་ཚིག་ལགས་པས། །ཡང་དག་དོན་ལ་མཉམ་པར་འཇོག་པ་གཅེས། །ཞེས་ཆོས་འཁོར་ལྷ་སར་དཀོན་གཉེར་གྱིས་བསྐུལ་ནས་པདྨ་དཀར་པོས་གདམས་པའོ།། །།ངོ་མཚར་མ་ལུས་འཁྲིལ་བའི་གོང་བུ་གང་། །སྣང་བར་བྱེད་པས་ཉི་མ་ལས་འགོངས་ཤིང་། །སྤྱད་ཀྱིན་རེ་བ་ཀུན་འགྲུབ་ནོར་བུས་ཀྱང་། །མི་མཚོན་ཕྱག་འོས་འཇམ་དཔལ་དེ་ལ་འདུད། །མ་རིག་མ་རྟོགས་ཁོང་འཚངས་རྣམ་འགྱུར་ལས། །རིགས་ལྡན་རིས་མེད་འོད་རྣམས་འདུལ་བ་ལ། །ཐུབ་དབང་མ་ལུས་གཟིགས་དེས་གསུང་རབ་ཀྱང་། །རྣམ་མང་གསུངས་ཕྱིར་ཐེག་ཀུན་དགོངས་པ་ཅན། །དེ་ཕྱིར་གང་ཡང་རྒྱ་མཚོའི་རྒྱ་ལྟ་བུར། །ཡངས་པའི་བློ་གྲོས་ཁོག་ཏུ་བཅུག་ནས་ཀྱང་། །སྲིད་ཞུར་མཛད་ན་དད་པ་ཅན་ཞེས་བྱ། །མི་རྒྱལ་མཛད་སྤྱོད་ཆོས་སུ་དེ་འགྲོ་ངེས། །བོད་འདིར་མཁས་པ་མང་ཡང་ཚིག་རེའི་རྗེས། །བསྙེགས་པས་སྙིང་པོའི་ཕྱོགས་ལ་མཇལ་མི་སྤྲོ། །བྱང་ཆུབ་སྙིང་པོའི་སྤོ་ལ་སྔར་བྱུང་བཞིན། །དཔའ་བོར་འགྱུར་འདོད་དོན་གྱི་སྙིང་པོ་ལོན། །དལ་བ་རྙེད་དཀའ་རྙེད་ནས་མྱུར་འཇིག་དང་། །འདུས་བྱས་སྐད་ཅིག་མི་གནས་ཁར་ཆུབ་ཀྱང་། །ཟང་ཟིང་རྙེད་པའི་དྲུང་དུ་དེ་ཡར་ནས། །བརྩེག་རུམ་རྩོད་པ་ལྷུར་ལེན་འདིས་སྐྱོ་ན། །ལས་བགྱིས་འབྲས་བུ་གང་འབྱིན་དེ་བསམས་ལ། །མི་འདོད་ངན་སོང་འགྲོ་བ་རྣམས་བགགས་ཏེ། །མཐོ་རིས་རྣམ་ཐར་རྒྱུར་གཟུང་རྟེན་དེ་ཡི། །ཐར་པའི་ས་ལ་འཛེག་ཏུ་ཅིས་མི་འབྱོན། །རྣམ་གྲོལ་ཐོབ་པར་འདོད་ཙམ་མ་ལགས་པས། །སྨོན་འཇུག་བྱང་ཆུབ་སེམས་ལ་བློ་སྦྱངས་ལ། །རྡོ་རྗེ་ཐེག་ཐབས་གསེར་འགྱུར་རྩིས་བྲན་ན། །རྫོགས་པའི་སངས་རྒྱས་མྱུར་དུ་ཐོབ་པར་ངེས། །ཞེས་སྡེ་པ་སྙེ་མོ་བར་གནང་བའོ།། །།༼༡༨བ༣༦༽སེམས་དཀར་པོ་དགེ་དང་མ་བྲལ་ན། །ལས་བྱས་ཚད་ཆོས་སུ་འགྲོ་ངེས་ཡིན། །ཚེ་ཕྱི་མ་མཐོ་རིས་རྟེན་བཟང་ཐོབ། །རྒྱུ་འབྲས་བསླུ་མེད་མཐོང་བ་ཡིས། །ཚོགས་ཅི་བསགས་བྱང་ཆུབ་ཆེན་པོར་སྔོས། །རྣམ་མཁྱེན་གྱི་གོ་འཕང་བཅར་དེས་ཡིན། །དེ་ཐམས་ཅད་དགེ་བའི་བཤེས་རག །སངས་རྒྱས་དངོས་སོམས་གསོལ་བ་ཐོབ། །ཅེས་པ་འདི་ཡང་ཧོར་སྨད་པའི་དཔོན་མ་ལའོ།། །།སྟོབས་ལྡན་ལྷ་དབང་གི་བརྒྱ་བྱིན། །འཆི་བདག་བདུད་པོ་ཡིས་གཙེས་ཚེ། །སྐྱབས་ཡུལ་སངས་རྒྱས་ལ་ཞུས་ནས། །བསོད་ནམས་ཚོགས་བསགས་ཀྱིས་བཟློག་འདུག །ད་ལྟ་བདེ་སྐྱིད་དུ་འཛོམ་རུང་། །མི་རྟག་འཇིག་པ་འདྲ་འོང་ངེས། །ལོང་ཡོད་ལྷ་ཆོས་ཀྱི་སྙིང་པོ། །ཚོགས་གཉིས་རྫོགས་ཐབས་ལ་འབོད་ཅིག །ཅེས་པ་འདིའང་གཞུག་སྣ་བར་གནང་བའོ།། །།རྗེ་བཙུན་བླ་མ་ཁྱོད་ཀྱིས་རྗེས་གཟུང་ནས། །སྐྱེ་དང་སྐྱེ་བར་དམ་པའི་ཆོས་སྤྱོད་ཅིང་། །ཁམས་གསུམ་འཁོར་བའི་རྒྱ་མཚོ་ལས་བརྒལ་ཏེ། །རྣམ་མཁྱེན་ནོར་བུའི་གླིང་དུ་ཕྱིན་པར་ཤོག །སྐྱེ་བ་འདི་དང་ཚེ་རབས་ཐམས་ཅད་དུ། །དཔལ་ལྡན་འབྲུག་པའི་བསྟན་ལ་ལེགས་ཞུགས་ནས། །ཚུལ་གནས་ཐོས་བསམ་སྒོམ་ལ་འབད་པ་ཡིས། །རྫོགས་པའི་བྱང་ཆུབ་ཐོབ་པར་བྱིན་གྱིས་རློབས། །ཞེས་པ་འདིའང་ཧོར་སྨད་པའི་དཔོན་མོ་ལ་གནང་བའོ།། །།བསྟན་སྐྱོང་མཁས་གྲུབ་རྒྱ་མཚོའི་སྤྱིར་གནས་ནས། །ཐར་འདོད་རེ་སྐོང་ལེགས་བཤད་ཆར་འབེབས་པས། །དམ་ཆོས་རྫོགས་ལྡན་དུས་བཞིན་རྟག་འཛིན་པ། །མི་ཕམ་པདྨ་དཀར་པོར་གསོལ་བ་འདེབས། །ཞེས་པ་འདི་འཕན་ཡུལ་ལྕང་གླིང་ཆོས་སྡིངས་པར་གནང་བའོ།། །།ཟབ་རྒྱས་ཆོས་ཀྱི་གཏེར་ཆེན་རྣམ་ཕྱེ་ནས། །ཐར་འདོད་རེ་བ་སྐོང་བའི་སྐྱབས་གཅིག་པུ། །རྗེ་བཙུན་བླ་མ་སངས་རྒྱས་ཀུན་གྱི་དངོས། །པདྨ་དཀར་པོའི་ཞབས་ལ་གསོལ་བ་འདེབས། །བདག་གིས་དགེ་བ་ཇི་ལྟར་བསགས་པའི་མཐུས། །སྐྱེ་དང་སྐྱེ་བར་༼༡༩ན༣༧༽དགེ་བའི་བཤེས་རྙེད་ཅིང་། །བྱང་ཆུབ་ཆེན་པོའི་སྤྱོད་ལ་ལེགས་སྦྱངས་ཏེ། །རྡོ་རྗེ་འཆང་དབང་མྱུར་དུ་ཐོབ་གྱུར་ཅིག །ཅེས་སོ།། །།རྗེ་བཙུན་པདྨ་དཀར་པོ་ཁྱོད་ཁོ་ན། །འདི་དང་ཕྱི་མ་ཀུན་གྱི་སྐྱབས་ཏེ། །དཀོན་མཆོག་གསུམ་གྱི་ངོ་བོར་བདག་ཅག་ནི། །དད་ཅིང་དང་བས་ཕྱག་འཚལ་གསོལ་བ་འདེབས། །ཇི་ལྟར་རྒྱ་མཚོ་ཆེ་ལ་ཨ་ག་ཧྱ། །རྒྱལ་བའི་གཞུང་ལུགས་ཀུན་ལ་ཁྱོད་ཉིད་དེ། །མ་ལུས་ཐུགས་སུ་ཆུད་པའི་ལེགས་བཤད་ཀྱི། །ཆོས་སྒྲ་དྲག་ཏུ་སྒྲོག་པར་གསོལ་བ་འདེབས། །གང་ཐོས་བདག་ཀྱང་མ་རིག་སྒྲིབ་བྲལ་བས། །ཡང་དག་ལམ་གྱི་ཕ་མཐར་ཕྱིན་ཐོབ་ཅིང་། །དེ་བར་བྱང་ཆུབ་སེམས་ཀྱིས་རྒྱུད་སྦྱངས་ཏེ། །ཞི་དུལ་ངེས་པའི་དཔལ་ལ་སྤྱོད་གྱུར་ཅིག །ཅེས་པ་འདི་རི་མོ་མཁན་ཕྱག་རྗེས་པའི་ངོར་པདྨ་དཀར་པོས་སྦྱར་བའོ།། །།བདག་གིས་དུས་གསུམ་དགེ་བ་ཅི་བགྱིས་པ། །འདི་ནས་གཟུང་སྟེ་ཚེ་རབས་ཐམས་ཅད་དུ། །ཡོན་ཏན་བདུན་ལྡན་མི་ཡི་རྟེན་གྲུབ་སྟེ། །རྗེ་བཙུན་བླ་མ་ཁྱེད་ཞབས་མཉེས་བྱེད་ཅིང་། །རྡོ་རྗེ་འཆང་གི་ལམ་ལ་འབད་གྱུར་ཅིག །ཅེས་རྗེ་བཙུན་བསམ་འཕེལ་ནས་ལ་གནང་བའོ།། །།དགུང་བསངས་མཐོན་པོ་ཡི་ཕྱོགས་སུ། །ཉི་ཟླ་ཟུང་གཅིག་གི་འཁོར་ལུགས། །ཡ་མཚན་དཔེ་ཟླ་དང་ཀྲལ་བ། །ལྷོ་ཕྱོགས་དགའ་སྟོན་དུ་ཆས་བྱུང་། །མེ་ཏོག་པདྨ་ཚོ་སྐྱིད་དོ། །རྒྱལ་ཁམས་ཕྱོགས་མེད་ཀྱི་ཕྱོགས་སུ། །མཚན་ལྡན་བླ་མ་ཡི་འགྲོ་དོན། །ཡངས་པའི་རྒྱལ་ཁམས་འདིར་ཕེབས་བཞུད། །མཆོད་ཡོན་ཞལ་མཇལ་ལ་སྐྱིད་དོ། །ཞེས་དང་།། །།སངས་རྒྱས་ཆོས་དང་འཕགས་པའི་དགེ་འདུན་ལ། །ཇི་སྲིད་བྱང་ཆུབ་སྙིང་པོ་དེ་སྲིད་དུ། །སྐྱབས་ཞུས་ཁྱེད་ཀྱི་ཐུགས་རྗེས་བདག་ཅག་ལ། །རྣམ་པ་ཀུན་ཏུ་སྐྱོབས་པའི་གསོལ་བ་འདེབས། །འཁོར་བར་གནས་པའི་ཚེ་ཡང་ཡོན་ཏན་རྟེན། ཡོན་ཏན་བདུན་ལྡན་མཐོ་རིས་ཐོབ་གྱུར་༼༡༩བ༣༨༽ནས། །སངས་རྒྱས་དགྱེས་པ་བསྐྱེད་པ་ཀུན་བསྒྲུབ་ལ། །རྟག་ཏུ་འབད་པས་སངས་རྒྱས་ཉིད་ཐོབ་ཤོག །ཅེས་པ་འདི་གཉིས་ནང་སོ་རེ་དགའ་ནས་མེ་མོར་གདན་འདྲེན་ཞབས་ཏོག་ལ་བྱོན་དུས་པདྨ་དཀར་པོས་བགྱིས་སོ།། །།དཔལ་ཙ་རི་ཏྲར་བྱོན་དུས་ཀྱི་གཟིགས་སྣང་སྙན་དངགས་ཀྱི་འཕྲེང་བ་བཞུགས་སོ།། །།གནས་གསུམ་མཁའ་འགྲོའི་ཚོགས་ཀྱིས་ཞབས་བརྟེན་པའི། །རྡོ་རྗེ་བཙུན་མོ་གང་དང་འཁོར་ལོའི་མགོན། །ལྷན་ཅིག་སྐྱེས་དགའི་དཔལ་དུ་རོལ་བའི་ཞིང་། །ཙ་རི་ཏྲ་དེར་དད་པས་ཕྱག་བགྱིའོ། །དགེ་ལེགས་རིན་ཆེན་བྱེ་བ་ཕྲག་སྙེད་ཀྱིས། །འཇིག་རྟེན་གསུམ་རྣམས་སྐལ་བཟང་བགྱིད་པ། །སྤྲུལ་པའི་ཞིང་དུ་ཁོ་བོ་སླེབ་པའི་ཚེ། །ངོ་མཚར་ལྟད་མོའི་དམ་པ་འདི་འདྲ་མཐོང་། །ཉི་ཟླའི་མིག་ཅན་མཐོན་མཐིང་ནམ་མཁའི་རལ་པ་དང་། །རྒྱུ་སྐར་ཅོན་པན་གློག་གི་འཕྲེང་བའི་དོ་ཤལ་ཅན། །སྔོ་བསངས་ལུས་ཀྱིས་ཕྱོགས་ཀྱི་འཁོར་ལོ་རྣམ་འགེངས་པ། །ཆུ་འཛིན་དྲག་པོའི་གཟིགས་མས་བགེགས་རྣམས་བཅིངས་པ་བཞིན། །གངས་རིའི་བཞིན་རས་བྲག་སྐྱིབས་ཨུཏྤལ་མིག །རི་བོའི་མྱོས་བུམ་ནགས་ཀྱི་དོ་ཀེར་ཅན། །ཁ་བའི་གོས་ཅན་འཛིན་མའི་འོད་དཀར་ནི། །ཆོས་བཟང་འདུན་སའི་མདངས་མཛེས་འཕོས་པ་སྙམ། །བྲག་དམར་འདི་དག་དགའ་བའི་འཛུམ་ཤོར་ནས། །སོ་ཡི་འོད་ཀྱིས་གདོང་པ་བྱུགས་པ་ལ། །མཚོ་སྔོན་ལྟ་བས་བྲེལ་ཚེ་ཟླ་བ་ཡིས། །མཁའ་ལས་བབས་ཏེ་སྟེང་ནས་བཀབ་པ་འདྲ། །ཁ་བའི་ཕོ་ཉས་གནམས་སྦྲེལ་བ་ལ། །རླུང་བཞོན་ཕྲ་མོས་བསྐྱོད་པའི་ལྗོན་ཤིང་གིས། །ལག་པས་ཡུན་རིང་བཟློག་ཀྱང་མ་ཁེགས་པས། །ཡིད་ཆད་གངས་ཀྱི་ཕག་ཏུ་ཡིབས་པར་གྱུར། །རྦ་རླབས་འཛུམ་ལས་ཉར་མའི་ཟེར་འཐོར་བའི། །ལྷུང་ལྷུང་གཏམ་གྱིས་མགྲོན་རྣམས་དགའ་བྱེད་པའི། །ཆུ་རྒྱུན་རྣམས་ཀྱང་ཟླ་བ་ཆུ་ཤེལ་གྱི། །གྲོགས་དང་ལྷན་ཅིག་བདེ་བར་གཉིད་པ་༼༢༠ན༣༩༽བཞིན། ན་བུན་ཞལ་བས་བརྒྱན་པའི་བྲག་སྐྱིབས་སུ། །རྩྭ་ཡི་གདིང་བ་མཆོག་ལ་བྱ་དང་ནི། །རི་དགས་དག་ཀྱང་ཤིན་ཏུ་བག་ཕབ་ནས། །དཀའ་ཐུབ་མཐར་ཐུག་དམ་པ་ལེན་པར་བགྱིད། །འདོད་པའི་འདུ་འཛི་དག་ལ་རྒྱབ་ཕྱོགས་ནས། །རྩེ་གཅིག་སྒྲུབ་པས་བྲེལ་བའི་བསམ་གཏན་པར། །བརྒྱ་བྱིན་དད་པས་བསྒོས་ནས་བི་ཤྭ་དེས། །ཀརྐེ་ཏ་ཡི་ཁང་བུ་བཟོས་པ་བཞིན། །ཟབ་རྒྱས་ཆོས་ཀྱི་སྣང་བ་བྱེ་བ་ཡིས། །སྲིད་གསུམ་རྨོངས་པའི་མུན་ནག་མཐར་བྱེད་པའི། །བསྟན་འཛིན་ཉིན་བྱེད་དབང་པོ་ང་མཐོང་བས། །ཉི་ཟླ་སྤྲིན་གྱི་རུམ་དུ་གབ་པ་བཞིན། །ཞེས་ས་གའི་དུས་ཆེན་གྱི་ཉིན་དཔལ་ཙ་རི་ཏྲར་སྦྱར་བའོ།། །།མངྒ་ལཾ། །ཆོས་སྦྱིན་རྒྱ་ཆེར་སྤེལ་བའི་ཆེད། །པར་བཞེངས་གླེགས་བུ་རེ་རེ་ལ། །དངུལ་ཀྲང་ཡོན་འགྱེད་མཛད་པོ་ནི། །ཆོས་རྒྱལ་བསོད་ནམས་རྒྱལ་མཚན་ནོ།། །། ཏིལླིའི་གསང་ཚིག།ཏིལླིའི་གསང་ཚིག་བཞུགས་སོ། །རྒྱ་གར་སྐད་དུ། ཏིལླི་མནྟྲི། བོད་སྐད་དུ། ཏིལླིའི་གསང་ཚིག་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཨེ་ཝཾ་རྣམ་དག་གོ་འཕང་ལ། །ཕྱག་བྱས་རྡོ་རྗེ་ཅན་གསུང་བའི། །སྤྱོད་པའི་གསང་ཚིག་ཏིལླི་པས། །ཕ་རོལ་དོན་དུ་བཤད་པར་བྱ། །མི་ཤེས་རྨོངས་པའི་སེམས་ཅན་གང་། །ཡེ་ཤེས་ཐབས་ནི་རྣམ་པར་སྤངས། །ཕྱི་རོལ་དངོས་པོར་མངོན་ཞེན་པས། །རྟོག་པའི་དྲྭ་བས་དྲྭ་བར་བྱས། །དང་པོའི་སྒོམ་པ་གོམས་པས་ནི། །སྤྲོས་པའི་རོལ་མོ་རྣམ་བསལ་བའི། །རྣམ་པར་མི་རྟོག་དམིགས་མེད་པ། །གང་ལས་སངས་རྒྱས་འབྱུང་འགྱུར་བའི། །ཤེས་རབ་ལྷ་མོ་བླ་ན་མེད། །འདི་ནི་ཕ་རོལ་ཞེས་བྱར་བརྗོད། །ཐབས་ཀྱི་དེ་ནི་བསྐུལ་བའི་ཕྱིར། །སྔགས་པས་རང་ལུས་དེ་ཉིད་དང་། །རྡོ་རྗེ་ཅན་དངོས་དབྱེར་མེད་པའི། །སྤྱོད་པ་སྣ་ཚོགས་གསལ་གྱུར་པ། །རྡོ་རྗེ་རང་བཞིན་དེ་ཀུན་བཟང་། །གཉིས་མེད་ངེས་པར་བྱས་ནས་ནི། །འཇིག་རྟེན་པ་ཡིས་གང་སྨད་པ། །དེ་དེའི་གཟུགས་སུ་གནས་བྱས་ལ། །སྒྱུ་མའི་སེམས་དང་རྗེས་མཐུན་པས། །དམ་ཚིག་སྤྱོད་པ་གསང་བའོ། །སྟེང་དང་འོག་ཏུ་གཉིས་གཉིས་འཁྱུད། །ཨཱ་ལི་ཀཱ་ལི་མཉམ་པར་སྦྱར། །ཨཱ་ལི་བུང་བ་ཞེས་བྱར་བརྗོད། །བུང་བ་རྡོ་རྗེ་འཇིགས་བྱེད་ཉིད། །འཇིགས་བྱེད་རྡོ་རྗེའི་སྒྲ་ཡིས་ནི། །རྫོགས་པའི་རྣལ་འབྱོར་སྦྱོར་བས་སུ། །རླུང་དང་མེ་དང་བདུན་པའི་དོན། །རྡོ་རྗེ་ཅན་གྱི་ས་བོན་སྦྱར། །ཐིག་ལེ་སྒྲ་ཡི་ཡང་དག་གནན། །ཆར་གྱི་རྒྱུན་ཞེས་བརྗོད་པར་བྱ། ཕྱོགས་བཅུ་རྣམས་ནས་མཛེས་སྤྱིར་དགུག །དབྱངས་ཀྱི་དང་པོ་མཆོག་ས་བོན། །དེ་ཡི་དབུས་སུ་གཟུང་བར་བྱ། །ཀཱ་ལི་མེ་ཏོག་ཤེས་པར་བྱ། །མེ་ཏོག་རྡོ་རྗེ་ཅན་གྱི་ལུས། །ཡེ་ཤེས་ཆུ་བོ་རྒྱ་མཚོ་འདི། །ཤེས་རབ་ཆུ་སྲིན་དབྱངས་ཀྱི་ཉས། །གཉིས་སུ་མེད་སྲུབས་འདམ་གྱི་དབུས། །ཕ་རོལ་ཕྱིན་དྲུག་སྦྱོར་བ་ཡིས། །ཐབས་ཀྱི་རྣམ་པའི་མྱུ་གུ་ནི། །བནྡྷུ་ལྟ་བུར་ཕྱེ་བ་ཉིད། །སྦྲང་རྩི་དང་ནི་བདུད་རྩིའི་གནས། །ཀཱ་ལི་བདུད་རྩི་ཉིད་ཀྱི་ཡང་། ཆུ་དང་མེ་ཏོག་ནང་དུ་འཕོར། །ཧཱུྃ་གི་གླུ་ཡི་རྣམ་པ་ཡིས། །རྣལ་འབྱོར་མ་ཀུན་མཉེས་པར་བྱེད། །རྡོ་རྗེ་ཡན་ལག་དགྱེས་པའི་མཐུས། །སྤྱན་གྱིས་གཟིགས་པར་མཛད་པ་ཡིན། །ཡི་གེ་དང་པོའི་རང་བཞིན་གྱིས། །སྟོང་པར་རོལ་པ་ཉིད་ཀྱི་ནི། །དངོས་དང་དངོས་མེད་རྣམ་སྤངས་ལ། །སྙིང་པོ་ཡང་ནི་འཚལ་བ་ཉིད། །མ་ལུས་པ་ཡི་བསམ་པ་དང་། །ཡི་གེ་ཐམས་ཅད་གཞོམ་པར་གྱིས། །རིག་མའི་སྐྱེས་སྒྲུབ་བརཏལ་ཞུགས་ཡིན། །དང་པོར་འཁོར་ལོ་ཆེན་པོ་ནི། །སྙིང་ག་ཡི་ནི་དཀྱིལ་འཁོར་དུ། །རང་གི་དབང་སོགས་རྒྱས་པ་ཡི། །རང་གི་ནང་དུ་ཞུགས་པ་དེས། །གཉིས་མེད་ཆོས་ནི་ཐོབ་པས་ན། །ཐར་པ་ཡང་ནི་ཐོབ་པ་ཉིད། །འཁོར་བའི་བདེ་བས་རྨོངས་པས་ན། །གྲོལ་བ་ཡང་ནི་སྤངས་པ་ཉིད། །སྒྱུ་མར་གནས་པས་དུ་མ་ཀུན། །སྣ་ཚོགས་གཟུགས་ཀྱི་སེམས་ཅན་སྨིན། །སངས་རྒྱས་ཀུན་དང་མཉམ་སྦྱོར་བ། །མཁའ་འགྲོ་མ་ཡི་དྲྭ་བ་སྡོམ། །དེ་ནི་ཕྱོགས་ཀུན་རྣམ་རྒྱལ་ལོ། །རྣལ་འབྱོར་དབང་ཕྱུག་ཏཻ་ལོ་པས་མཛད་པ་རྫོགས་སོ།། །།བལ་ཡུལ་དུ་ཡེ་ཤེས་ཀྱི་མཁའ་འགྲོ་མས་བསྒྱུར་བ་ཆོས་ཀྱི་རྗེས་མཁར་ཆུའི་གནས་ནས་སྤྱན་དྲངས་པ་དཔེ་རྙིང་ཇི་ལྟ་བའོ།། །། ༈ ཙཎྜྻཱ་ལཱི་ལ་མཆོད་སྦྱིན་བྱེད་པ་སེམས་ཀྱི་རྣལ་འབྱོར་ལ་གོམས་པ། །ཚུར་རོལ་འཁོར་བའི་ཆོས་ཀུན་སྤངས་ཏེ་ཤེས་རབ་རྒྱ་མཚོའི་ཕར་ཕྱིན་ནས། །སྒྱུ་མའི་གར་མཁན་ཉིད་དུ་ལངས་ཏེ་ཆོས་ཀྱི་སྒོ་མོར་ཀུན་དྲང་བ། །མཁས་པའི་དམིགས་བུ་གྲུབ་པའི་ཚོགས་རྗེ་ས་གསུམ་བླ་མར་ཕྱག་འཚལ་ལོ། །རྗེ་བཙུན་མཆོག་དེའི་བཀའ་དྲིན་གྱིས། །མ་ལུས་རྒྱུད་སྡེའི་གསང་ཚིག་རྣམས། །འཇིགས་མེད་བཤད་པའི་སྤོབས་པས་ནི། །པད་དཀར་འབའ་ཞིག་ས་ལ་དགེ །འདིར་རོ་སྙོམས་ཀྱི་གཞུང་གཉིས་པ་སློབ་དཔོན་ཆེན་པོ་ཏིལླི་པས་མཛད་པའི་གསང་ཚིག་བཤད་པར་བྱ་སྟེ། རྒྱ་གར་སྐད་དུ། ཏིལླི་མནྟྲི། བོད་སྐད་དུ། ཏིལླིའི་གསང་ཚིག་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་དག་ནི་འགྱུར་མཛད་པས་ཏེ་ངེས་པར་སླའོ། །ཨེ་ཝཾ་རྣམ་དག་གོ་འཕང་ལ། །ཕྱག་བྱས་ཞེས་སློབ་དཔོན་ཉིད་ཀྱིས་བསྟན་བཅོས་ཀྱི་དང་པོར་ཕྱག་འཚལ་བ་འདི་མཛད་དེ། གསང་སྔགས་པ་གཞི་ལམ་འབྲས་བུས་བསྡུས་པའི་ཆོས་ཐམས་ཅད་ཨེ་ཝཾ་མི་ཕྱེད་པ་ལ་འཇོག་པའི་ཕྱག་གི་གནས་སུ་བསྟན་ལ། ཨེ་ཝཾ་མི་ཕྱེད་པའི་དོན་ཡང་། ཨེ་ཡི་ཆ་བྱད་བཟང་པོ་དང་། དབུས་སུ་ཝཾ་གི་རྣམ་པར་བརྒྱན། །བདེ་བ་ཐམས་ཅད་ཀྱི་ནི་གནས། །སངས་རྒྱས་རིན་ཆེན་ཟ་མ་ཏོག །ཅེས་པའོ། །ཕྱག་མཛད་ནས་ཅི་བྱ་ཞེ་ན། རྡོ་རྗེ་ཅན་གསུང་པའི། །སྤྱོད་པའི་གསང་ཚིག་ཏིལླི་པས། །བཤད་པར་བྱ། རྡོ་རྗེ་ཅན་སངས་རྒྱས་རྣམས་ཀྱི་རྒྱུད་དུ་གཉིས་སུ་མེད་པའི་སྤྱོད་པ་གསུངས་པ་རྣམས་བླ་མའི་མན་ངག་ལ་བལྟོས་པ་ཡིན་ན། མན་ངག་ཉིད་ལ་གསང་སྟེ་བཤད་པའི་དོན་གྱིས་གསང་ཚིག་ཅེས་བྱ་སྟེ། དེ་རྩམ་ཞེས་པའོ། །བརྩམས་པ་ལ་དགོས་པ་ཅི་ཡོད་ཅེ་ན། ཕ་རོལ་དོན་དུ། དབང་པོ་རྣོན་པོ་ཉོན་མོངས་པ་ཆེས་རགས་པ་དག་གིས་འདི་ལས་ཆགས་ཆེན་གྱི་སྤྱོད་པ་ཤེས་ཤིང་། དེ་ལ་ཞུགས་པས་འཁོར་བའི་ཕ་འགྲམ་ཐར་པ་ཞེས་བྱ་བ་དེར་ཕྱིན་པར་འགྱུར་རོ། །གཉིས་སུ་མེད་པའི་སྤྱོད་པ་དེ་ཡང་། ལས་དང་པོ་དང་། རྣལ་འབྱོར་པ་དང་། གྲུབ་པ་དང་། ཐམས་ཅད་མཁྱེན་པའི་གནས་སྐབས་ཀྱི་ཕྱེ་བས་བཞིར་འགྱུར་ཏེ། ཀུན་བཟང་། གསང་བ། རིག་པ་བརཏལ་ཞུགས། ཕྱོགས་ལས་རྣམ་རྒྱལ་གྱི་སྤྱོད་པའོ། །དང་པོ་དེ་སྟོན་པར་བཞེད་ནས། མི་ཤེས་རྨོངས་པའི་སེམས་ཅན་གང་། །ཡེ་ཤེས་ཐབས་ནི་རྣམ་པར་སྤངས། །ཕྱི་རོལ་དངོས་པོར་མངོན་ཞེན་པས། །རྟོག་པའི་དྲྭ་བས་དྲྭ་བར་བྱས། །ཉོན་མོངས་པ་ཐབས་ཀྱིས་མ་ཟིན་ན་འཁོར་བའི་རྐྱེན། ཟིན་ན་མྱ་ངན་ལས་འདས་པ་ཐོབ་པའི་གྲོགས་སུ་འགྱུར་ལ། ཐབས་ཀྱིས་ཟིན་པ་དང་མ་ཟིན་པའི་ཁྱད་ཀྱང་རང་བཞིན་ཡོངས་སུ་མ་ཤེས་པ་དངོས་པོར་ཞེན་པས་དང་། ཤེས་པས་མ་ཞེན་པ་སྟེ། དཔེར་ན་སྒྱུ་མ་མཁན་གྱིས་སྤྲུལ་པའི་རྟ་ལྟ་བུ་དེར་ཞེན་པ་དང་། སྒྱུ་མར་ངེས་པའི་ཁྱད་པར་ལྟ་བུའོ། །དེའི་ཕྱིར་དངོས་པོར་རྟོག་པ་ནི་འཁོར་བའི་རྩ་བ་ནད་ལྟ་བུ་དང་། དངོས་པོ་མེད་པར་རྟོག་པ་ནི་སྨན་མ་ཞུ་བ་ལྟ་བུར་བཞག་གོ །དང་པོའི་སྒོམ་པ་གོམས་པས་ནི། །སྤྲོས་པའི་རོལ་མོ་རྣམ་བསལ་བ། །དངོས་པོར་ལྟ་བ་དེ་ཡང་སྤྲོས་པ་ལ་དགའ་བ་ལ་བསྐྱེད་པ་དཔའ་མོའི་རིམ་པས་ལམ་དུ་ཁྱེར་བ་ནི། སྣང་གྲགས་ལྷ་སྔགས་སུ་བསྒྱུར་བ་མཚན་མ་དང་བཅས་པའི་ཞི་གནས་ལ་གནས་པས་ཐ་མལ་གྱི་རྣམ་པར་རྟོག་པའི་རོལ་མོ་རྣམས་སེལ་བ་ཡིན་ཏེ། བསྐྱེད་པའི་རིམ་པའི་རྣལ་འབྱོར་གྱིས་བརཏལ་ཞུགས་ཅན་གྱི་སྤྲོས་པ་བསྒོམ། སྤྲོས་པ་རྨི་ལམ་ལྟར་བྱས་ནས། །སྤྲོས་པ་ཉིད་ཀྱང་སྤྲོས་མེད་བྱེད། །ཅེས་སོ། །མཚན་མ་དང་བཅས་པའི་ཞི་གནས་དེ་ཡང་སྦྱང་བའི་ཕྱིར། རྣམ་པར་མི་རྟོགས་དམིགས་མེད་པ། །ཞེས་གསུངས་ཏེ། ལྷ་དང་སྔགས་སུ་བསྒོམ་པ་དེ་ཡང་། མཚན་མ་མེད་པའི་ཞི་གནས་སུ་སོ་སོར་རྟོག་པའི་ཤེས་རབ་ཀྱིས་སྦྱངས་ཏེ། སེམས་ཀུན་རྫོབ་པའི་ངོ་བོ་ཉིད་ཙམ་ལ་གནས་པ་དོན་སྣང་གསུམ་གྱི་ཡེ་ཤེས་སམ། ཉམས་ཀྱི་འོད་གསལ་རྩེ་གཅིག་ལ་བཞག་པ་དེའོ། །དེ་ནས་དངོས་པོ་མེད་པའི་སྟོང་པ་ཉི་ཚེ་བ་ཙམ་དེ་ལམ་དུ་བྱེད་པའི་ཕྱིར་བདག་བྱིན་གྱིས་རློབ་པའི་ལམ་གསུངས་པ། གང་ལས་སངས་རྒྱས་འབྱུང་གྱུར་བའི། །ཤེས་རབ་ལྷ་མོ་བླ་ན་མེད། །འདི་ནི་ཕ་རོལ་ཞེས་བྱར་བརྗོད། །སངས་རྒྱས་ཐམས་ཅད་བསྐྱེད་པའི་ཡུམ་ཆེན་མོ་ནི་དམིགས་པ་དང་བཅས་པའི་སྟོང་པ་ཉིད་དེ། རྣམ་པ་ཀུན་གྱི་མཆོག་དང་ལྡན་པའི་ཕྱག་རྒྱ་ཆེན་མོའོ། །དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པར་བཤད་ནས། དེས་ཡོངས་སུ་ཟིན་པས་ཐབས་ཐམས་ཅད་ལ་སློབ་པའི་ཚུལ་ནི། ཐབས་ཀྱི་དེ་ནི་བསྐུལ་བའི་ཕྱིར། །སྔགས་པས་རང་ལུས་དེ་ཉིད་དང་། །རྡོ་རྗེ་ཅན་དངོས་དབྱེར་མེད་པའི། །སྤྱོད་པ་སྣ་ཚོགས་གསལ་གྱུར་བ། །རྡོ་རྗེའི་རང་བཞིན་དེ་ཀུན་བཟང་། །ཇི་ལྟར་ཆུ་ཟླ་བཞིན་རང་བཞིན་མེད་པ་ཉིད་ལ་རྣམ་པ་ཐམས་ཅད་པར་འཆར་དུ་རུང་བ་ནི་ཆོས་ཉིད་ཡིན་པས། ཚོགས་ཀྱི་དཀྱིལ་འཁོར་བསྒྲུབས་ཏེ་ཀུན་ཏུ་བཟང་པོའི་སྤྱོད་པ་བརྩམ་ཞིང་། དེར་སྣང་བ་ཐམས་ཅད་བྱིན་གྱིས་རློབས་ན་རྣལ་འབྱོར་པ་འབད་པ་མེད་པར་སངས་རྒྱས་ཐམས་ཅད་མཉེས་པར་བྱེད་དོ། །གཉིས་པ་གསང་བའི་སྤྱོད་པ་ནི། གཉིས་མེད་ངེས་པར་བྱས་ནས་ནི། །ཐམས་ཅད་སྒྱུ་མ་ཙམ་དུ་མངོན་སུམ་པས་མཐོང་ན། འཇིག་རྟེན་པ་ཡིས་གང་སྨད་པ། །དེ་དེའི་གཟུགས་སུ་གནས་བྱས་ནས། །སྒྱུ་མའི་སེམས་དང་རྗེས་མཐུན་པས། །དམ་ཚིག་སྤྱོད་པ་གསང་བའོ། །ཇི་ལྟར་སྨྱོན་པ་ལྟ་བུས་སམ། དཱ་རི་ཁ་པས་སྨད་འཚོང་མའི་གཡོག་ཏུ་བརྫུས་པ་བཞིན་དམན་པའི་ཟོལ་གྱིས་སྤྱོད་པ་གསང་སྟེ་ལྷག་པའི་ལྷའི་ངེས་པས་གསང་ཆེན་གྱི་སྤྱོད་པ་ཤ་ལྔ་བཟའ་བ་དང་། བདུད་རྩི་ལྔའི་བཏུང་བ་སྒྱུ་མ་ཙམ་གྱིས་ལོངས་སྤྱོད་དེ། ཇི་ལྟར་སྒྱུ་མ་མཁན་བཟང་པོས་སངས་རྒྱས་འཁོར་དང་བཅས་པ་ལ་ཕྱི་སའི་ཕུང་པོ་སྒྱུ་མའི་སྔགས་ཀྱིས་ལྷ་མིའི་བཟའ་བར་སྤྲུལ་ཏེ་མཆོད་པ་ལྟ་བུའོ། །གཞན་ཞེན་པ་ཉིད་ཀྱིས་དེ་དག་ལོངས་སྤྱོད་ན་ཡེ་ཤེས་ཀྱི་ལྷའི་ཞལ་མི་གཙང་བའི་རྫས་ཀྱིས་བཀག་པར་འགྱུར་བས་ཉེས་པར་ཆེའོ། །ཚུལ་འདིས་ནང་རྩའི་ལྷ་མཉེས་པས་ཕྱི་རོལ་གྱི་ཕོ་ཉ་ཀུན་མཉེས་ནས་ཐུན་མོང་གི་དངོས་གྲུབ་གང་འདོད་པ་སྟེར་རྒྱུ་དེས་མཐའ་ཡས་པའི་རྫུ་འཕྲུལ་འབྱོར་ནས་སྒྱུ་མ་ཙམ་གྱི་སྣང་བ་དང་བྲལ་བའི་སྣང་བ་མེད་པའི་ཡེ་ཤེས་ལ་རེས་འགའ་གནས་པ་ཐོབ་སྟེ། འཕགས་པའི་གྲངས་སུ་དེ་ནས་ཚུད་དོ། །གསུམ་པ་ནི་གསང་བའི་སྤྱོད་པས་རྣམ་པ་མེད་པའི་ཏིང་ངེ་འཛིན་ཐོབ་ནས་དེ་ལས་ཆུ་ལས་ཉ་འཕར་བ་ལྟར། དེ་ཉིད་ལས་གཞན་དུ་མེད་པའི་སྒྱུ་ལུས་སུ་ལངས་ནས་ས་ལྷག་མ་ཡོངས་སུ་སྦྱང་བ་སྟེ། སྟེང་དང་འོག་ཏུ་གཉིས་གཉིས་འཁྱུད། །སྟེང་ཞེས་པ། གཟུང་བ་དང་འཛིན་པའི་ཆོས་གཉིས་སུ་མེད་པར་བྱེད་པ་སྟེ། ཤེས་བྱ་དང་ཤེས་བྱེད་རོ་མཉམ་པའོ། །འོག་ཅེས་པ་ཆགས་པ་དང་ཆགས་བྲལ་རོ་མཉམ་པ་སྟེ། སཾ་བུ་ཊར། སྟེང་གི་སྒོ་དང་འོག་ཉིད་དེ། །འོག་གི་སྒོས་ནི་རྣམ་པར་ཤེས། །སྟེང་གི་སྒོས་ནི་དབྱིངས་ཉིད་དོ། །རྩ་ནི་ཐམས་ཅད་མཉམ་སྦྱོར་བ། །རྣལ་འབྱོར་པས་ནི་འཇུག་པར་བསམ། །ཞེས་སོ། །ཚུལ་གང་གིས་འཁྱུད་པ་ཞེ་ན། ཨཱ་ལི་ཀཱ་ལི་མཉམ་པར་སྦྱར། །ཨཱ་ལི་ནི་ཀུན་རྫོབ་བྱང་སེམས། ཀཱ་ལི་ནི་དོན་དམ་བྱང་སེམས་ཏེ། དཀར་ཆ་དང་དམར་ཆ་རྣལ་འབྱོར་པ་དང་རྣལ་འབྱོར་མ་ཡང་བྱེད་ལས་ཀྱི་དབང་གིས་དེ་གཉིས་སུ་འབྱེད་དོ། །དེ་གཉིས་གཉིས་སུ་མེད་པར་སྦྱར་བ་སྟེ་ཐབས་ཧེ་རུ་ཀ་དགྱེས་པ་རྡོ་རྗེ་དང་ཤེས་རབ་བདག་མེད་མ་སྙོམས་པར་འཇུག་པ་ཞེས་བྱ་བ་ཡང་ཡིན་ནོ། །ཨཱ་ལི་བུང་བ་ཞེས་བྱར་བརྗོད། །ཨཱ་ལི་ནི་ངེས་པའི་ཚིག་གི་ཚུལ་གྱིས་ཨ་སམ། མི་མཉམ་པའམ་དཔེ་མེད་པ། ལཱ་ནི་ལེན་ཅིང་ཀུན་ནས་འཛིན་པར་བྱེད་པ་སྟེ། འཆང་བར་འགྱུར་བའི་མེ་ཏོག་དེ་ལས་མི་མཉམ་པའི་བདེ་བ་ལེན་པར་བྱེད་པས་བུང་བ་ཞེས་བྱའོ། །ཡང་ན་བུང་བ་ནི་བྷྲ་མ་ཏཱ་ར། བྷྲ་མ་འཁྲུལ་པ། བི་དཱ་ར་ཎ། རྣམ་པར་འཇོམས་པར་བྱེད་པས་སམ། ར་ཧ་ཡ་ཏི་བྲལ་བར་བྱེད་དོ། །ཞེས་འཁྲུལ་པ་འཇོམས་པར་བྱེད་པས་དེ་སྐད་དུ་བརྗོད་ལ། ཡང་ན་བྷྲ་མ་འཁོར་བ། ར་ནི་རྣམ་པར་རོལ་པ་སྟེ། འཁོར་བ་རྣམ་པར་རོལ་པ་སྙིང་རྗེའི་ངོ་བོ་ཉིད་དུ་བཤད་པའོ། །བུང་བ་རྡོ་རྗེ་འཇིགས་བྱེད་ཉིད། །བུང་བ་དེ་ཆོས་ཀྱི་དབྱིངས་ཡེ་ཤེས་དང་མི་ཕྱེད་པས་རྡོ་རྗེ། དམན་པ་རྣམས་སྐྲག་པར་བྱེད་པས་འཇིགས་བྱེད་དོ། །འཇིགས་བྱེད་རྡོ་རྗེའི་སྒྲ་ཡིས་ནི། །འཇིགས་བྱེད་རྡོ་རྗེ་སྤྱི་བོའི་ཁུ་བའོ། །སྒྲ་ནི་ལྟེ་བའི་ནཱ་ད་དེ་རྡུལ་ལོ། །རྫོགས་པའི་རྣལ་འབྱོར་སྦྱོར་བས་སུ། །དེ་གཉིས་གཏུམ་མོའི་རྣལ་འབྱོར་གྱིས་སྦྱར་བས། །རླུང་དང་མེ་དང་བདུན་པའི་དོན། །རླུང་ནི་སྲོག་མེ་ནི་དུས་ཀྱི་མེ་སྟེ་དོན་ཐུར་སེལ་བདུན་པའི་དོན་ཁམས་ཞུ་བའི་ཐིག་ལེ་སྟེ་ལན་བདུན་པ་ཞེས་བྱ་བའི་དོན་གྱིས་སོ། །རྡོ་རྗེ་ཅན་གྱི་ས་བོན་སྦྱར། །རྡོ་རྗེ་ཅན་སྟོང་པ་ཉིད་དམ་བདག་མེད་མ། དེའི་ས་བོན་ནི་དབུ་མའི་ནང་གི་ཨ་ཤད་དོ། །དེར་རོ་གཅིག་པར་བྱས་པས། ཐིག་ལེ་སྒྲ་ཡི་ཡང་དག་གནན། །ཐིག་ལེ་སྟེང་དུ་འཆིངས་པར་འགྱུར་བ་དང་། སྒྲ་དེ་རྡུལ་འོག་ཏུ་མནན་པ་ཐོབ་སྟེ། རྒྱུ་དེས། ཆར་གྱི་རྒྱུན་ཞེས་བརྗོད་པར་བྱ། །བར་ལུས་ཀྱི་གནས་སྐབས་ཐམས་ཅད་དུ་བྱང་སེམས་དཀར་དམར་ཐུག་ཕྲད་དུ་རྩེ་བ་དེ་ལ་ཆར་ཞེས་བརྗོད་དོ། །ཕྱོགས་བཅུ་རྣམས་ནས་མཛེས་སྤྱིར་བཀུག །ཕྱོགས་དང་མཚམས་ཀྱི་རྩ་ལས་གྱིས་པའི་རྩ་ཐམས་ཅད་ནས་ཕུང་པོ་ལ་སོགས་པའི་དེ་བཞིན་གཤེགས་པ་དྲི་མ་མེད་པའི་རྒྱུན་དུ་གཏུམ་མོ་བཞུ་བ་རྣམས་མཛེས་སྤྱི་ཞེས་པ་ཤེས་རབ་མའི་གསང་བའི་སྣར་སོན་པའི་མཁའ་འགྲོ་གདོང་མའོ། །དེར་ཕབ་ནས། དབྱངས་ཀྱི་དང་པོའི་མཆོག་ས་བོན། །དེ་ཡི་དབུས་སུ་གཟུང་བར་བྱ། །དབྱངས་ཀྱི་དང་པོ་ནི་ཨ་ཞེས་བྱ་ལ། ཨ་ནི་སྐྱེ་བ་མེད་པ་སྟོང་པ་ཉིད་དེ། དེ་ལ་སེམས་གཞག་པས་ས་བོན་བྱང་ཆུབ་ཀྱི་སེམས་མི་འཕོ་བར་འཛིན་པའོ། །ཀཱ་ལི་མེ་ཏོག་ཤེས་པར་བྱ། །ཀཱ་ནི་ཀཾ་སུ་ཁ། བདེ་བ། ཨཱ་ལི་ཊི། ཀུན་ནས་མྱོང་བའི་ཕྱིར་བྷ་གའོ། །རྡོ་རྗེ་ཉི་མས་ཁ་འབྱེད་པའི་ཕྱིར་མེ་ཏོག །ཤེས་པར་བྱ་ཞེས་པའི་སྐད་དོད། རཉྫྱ་ཡ་ཏི་འཚེད་པར་བྱེད་པ་ལ་འཇུག་པས་ཐབས་ཀྱི་བྱང་སེམས་འཚེད་པར་བྱེད་པའོ། །མེ་ཏོག་རྡོ་རྗེ་ཅན་གྱི་ལུས། །དེས་ཁྱད་པར་དུ་བྱས་པའི་ལུས་ལ་བི་གྲ་ཧ་ངེས་པའི་ཚིག་གིས་བི་ཤེ་ཥ་ཎ་གྲི་ཏ་ཁྱད་པར་དུ་ལེན་པའི་ཕྱིར་ཁུ་བའི་ཁམས་དེས་ཁྱད་པར་དུ་བྱས་པའི་སེམས་ཀྱི་རྡོ་རྗེ་ཅན་ནི་མེ་ཏོག་རྡོ་རྗེ་ཅན་གྱི་ལུས་ཞེས་བྱའོ། །ཡེ་ཤེས་ཆུ་བོ་རྒྱ་མཚོ་འདི། །ཤེས་རབ་ཆུ་སྲིན་དབྱངས་ཀྱི་ཉས། །གཉིས་སུ་མེད་སྲུབས། ཆགས་བྲལ་ནི་ཡེ་ཤེས། ཆགས་པ་ནི་ཆུ་བོ། དེ་གཉིས་རོ་མཉམ་པ་ནི་རྒྱ་མཚོ། དོན་ཡས་ཀྱི་མཐའི་ལྷན་སྐྱེས་རིག་པ་ལ་བྱའོ། །ཤེས་རབ་ནི་སྟོང་པ་ཉིད་དེ་དོན་དེའི་དུས་ཀྱི་མྱོང་བའི་བདེ་བ་སྟོང་པ་ཉིད་རྣམ་པ་ཐམས་ཅད་པར་འཆར་དུ་འཇུག་པ་སྟེ། བྷ་གར་ལིངྒ་རབ་གཞག་ནས། །བྱང་ཆུབ་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་པ། །སངས་རྒྱས་གཟུགས་སུ་སྤྲོ་བར་བྱ། །ཞེས་རྩ་བའི་རྒྱུད་མང་པོ་ལས་གསུངས་པས་སོ། །ཤེས་རབ་ནི་འཛིན་པ་ཆུ་སྲིན། དབྱངས་ཞེས་པ་ཤེས་རབ་དེ་ཡང་དམིགས་པས་ཁྱད་པར་དུ་བྱས་ལ་གཟུང་བ་དེ་ནི་ཉ་སྟེ། ཆུ་སྲིན་ལས་ཁྱད་པར་ཉ་མིག་གི་ཁའི་ཁྲག་གི་རྒྱ་མཚོ་རྣམས་དམར་པོར་བསྒྱུར་བས་གཟུགས་ཅན་གྱི་རྒྱན་ནི། བདེ་སྟོང་ཕན་ཚུན་འདྲེས་ནས་གཉིས་མེད་དུ་གྱུར་པ་ལ་གཉིས་སུ་མེད་པར་བཞག་པ་ཉིད་བསྲུབ་པའོ། །འདམ་གྱི་དབུས། ཕ་རོལ་ཕྱིན་དྲུག་སྦྱོར་བ་ཡིས། །ཐབས་ཀྱི་རྣམ་པའི་མྱུ་གུ་ནི། །བནྡྷུ་ཀ་ལྟར་བྱེ་བ་ཉིད། །དེ་ལྟར་གཉིས་སུ་མེད་པ་ནི་འདམ་སྟེ། རྣམ་པ་མེད་པའི་ཡེ་ཤེས་མངོན་པར་བྱང་ཆུབ་པའི་མིང་ཅན་གྱི་ཐམས་ཅད་སྟོང་པ་འོད་གསལ་ལོ། །དེ་ལས་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་ལྷག་པའི་ས་དྲུག་ཐབས་ཀྱི་རྣམ་པ་ཞེས་པས་བསྡུས་པ། ཐབས་སྨོན་ལམ་སྟོབས་ཡེ་ཤེས་ལྷག་པའི་ས་བཞིར། ཡེ་ཤེས་ཀྱི་ལུས་རྣམས་མེ་ཏོག་བནྡྷུ་ཀ་ལྟ་བུར་བྱེ་བ་སྟེ་བདག་བྱིན་གྱིས་རློབས་པས་ལྡང་བ་ཞེས་པའི་དོན་ནོ། །སྦྲང་རྩི་དང་ནི། རིན་པོ་ཆེ་པདྨའི་ཕ་རོལ་ཏུ་ཕྱིན་པ་དང་། བདུད་རྩིའི་གནས། རྡོ་རྗེ་ལས་ཀྱི་ཕ་རོལ་ཏུ་ཕྱིན་པའི་ས་གཉིས། དེ་ལྟར་ས་བཅུ་གཉིས་གནས་དང་རབ་ཏུ་དགའ་བ་ལ་སོགས་པའི་མིང་ཅན་ཐོབ་པར་བཤད་པའོ། །ཀཱ་ལི་བདུད་རྩི་ཉིད་ཀྱི་ཡང་། །ཀཱ་ལི་ནི། བྷ་ག་སྟེ་འཁོར་ལོ་དྲུག་གི་ལྟེ་བས། བདུད་རྩི་ནི་བྱང་ཆུབ་སེམས་ཀྱི་ཐིག་ལེའོ། །ཉིད་ཀྱི་སྤང་ཞེས་པ། དེ་དག་ཉིད་ཀྱི་བཞོན་པར་གྱུར་བའི་རླུང་སྟེ། དོན་རླུང་དང་ཐིག་ལེ་འཁོར་ལོ་དྲུག་གི་བྷ་གར་རང་བྱུང་གི་བརྟན་པའི་ལྡོག་པ་ལས་དེ་དག་ཕྱེའོ་ཞེས་སྟོན་པའོ། །ཆུ་དང་མེ་ཏོག་ནང་དུ་འཁོར། །ཆུ་ནི་ཐབས་ཀྱི་དཀར་ཆ། མེ་ཏོག་ཅེས་པ་ཤེས་རབ་ཀྱི་དམར་པོ་སྟེ། ནང་དུ་འཁོར་ཞེས་པས། དཀར་ཆས་པདྨ་ཅན་སོགས་མཚན་ཉིད་ལྡན་པའི་བུད་མེད་ལས་དམར་ཆ་ཕབ་པ་དང་བསྲེས་ནས་རྡོ་རྗེ་ནོར་བུ་ནས་རང་གི་ལུས་ལ་བཅུག་སྟེ་འཐུངས་ན་མྱུར་བར་འགྲུབ་བོ་ཞེས་བསྟན་པའོ། །ཧཱུྃ་གི་གླུ་ཡི་རྣམ་པ་ཡི། །ཧཱུྃ་ནི་རྩ་དབུ་མར་དག་པ་ཐུགས་རྡོ་རྗེའི་རང་བཞིན་དེའོ། །དེའི་གླུ་ནི་རླུང་ཡེ་ཤེས་ཀྱི་རླུང་དུ་དག་པ་གཞོམ་དུ་མེད་པའི་སྒྲའོ། །རྣམ་པ་ཐིག་ལེ་སྟེ་དུས་དེ་མི་ཤིགས་པའི་ཐིག་ལེའི་རྣམ་པ་ཙམ་ཞིག་ལུས་པར་བཤད་པའོ། །རྣལ་འབྱོར་མ་ཀུན་མཉེས་པར་བྱེད། །རྣམ་པ་མེད་པའི་འོད་གསལ་ལས། །ས་ཁམས་དག་པའི་རྣལ་འབྱོར་མས་ན་མ་ལ་སོགས་པ་བཞིས་བདག་བྱིན་གྱིས་བརླབ་པའི་ལུས་སུ་ལྡང་བར་བྱེད་པ་ལ་བསྐུལ་བ་ཞེས་པའོ། །རྡོ་རྗེ་ཡན་ལག་དགྱེས་པའི་མཐུས། །སྤྱན་གྱི་གཟིགས་པར་མཛད་པ་ཡིན། །རྡོ་རྗེ་ནི་སྟོང་པ་ཉིད། ཡན་ལག་ནི་འཁོར་བ། དེ་དགྱེས་པ་ནི་སྙིང་རྗེ་དོན་སྟོང་ཉིད་སྙིང་རྗེའི་ངོ་བོར་རྫོགས་པས། ཤ་དང་། ལྷ་དང་། ཤེས་རབ་དང་། ཆོས་དང་། སངས་རྒྱས་ཀྱི་སྤྱན་གྱིས་གཟིགས་པར་མཛད་པ་ཡིན་ཏེ། དེས་མཚོན་ནས་བྱང་ཆུབ་སེམས་དཔའི་གནས་སྐབས་ཀྱི་ཡོན་ཏན་དང་རྫུ་འཕྲུལ་མཐའ་ཡས་པ་མཐོང་བར་འགྱུར་ཞེས་སྟོན་པའོ། །ཡི་གེ་དང་པོའི་རང་བཞིན་གྱིས། །སྟོང་པར་རོལ་པ་ཉིད་ཀྱིས་ནི། །དངོས་དང་དངོས་མེད་རྣམ་སྤངས་ལ། །སྙིང་པོ་ཡང་ནི་འཚལ་བ་ཉིད། །ཆོས་ཐམས་ཅད་སྒྱུ་མ་དང་རྨི་ལམ་ཙམ་དུ་ལམ་དུ་ཁྱེར་བས་སྣང་ཙམ་ལ་ཞེན་པ་མེད་པས་སྒྱུ་མར་བཞག་པ་དེ་ཡང་བདག་སྟེ་གཉུག་མའི་རང་བཞིན་ཉིད་ལ་གནས་པར་འགྱུར་རོ། །མ་ལུས་པ་ཡི་བསམ་པ་དང་། །ཡི་གེ་ཐམས་ཅད་གཞོམ་པར་གྱིས། །རིག་མའི་སྐྱེས་སྒྲུབ་བརཏལ་ཞུགས་ཡིན། །མ་ལུས་པ་ཡི་བསམ་པ་ཞེས་པས་ཀུན་རྫོབ་པའི་ཆོས་ཐམས་ཅད་སྨོས་ལ། ཡི་གེ་ཐམས་ཅད་ཀྱིས་ནི་རྩ་དབུ་མ་སྟེ་འོད་ཀྱི་སྐུད་པ་ལྟ་བུ་དང་། །རླུང་འོད་ཟེར་ལྔ་པའི་སྣང་བ་ཅན་དང་། ཐིག་ལེ་དྭངས་མའི་གཟུགས་རྣམ་པ་ཐམས་ཅད་པས་ཁྱད་པར་དུ་བྱས་པ་དག་སྦྱངས་ན་རིག་མའི་སྐྱེས་བུ་རྫོགས་པའི་སངས་རྒྱས་སུ་འགྱུར་རོ། །དེ་བས་སྒྲུབ་པ་དེ་ཙམ་སྟེ། སྒྲུབ་པ་ལ་འཇུག་པའི་བར་འདི་བརཏལ་ཞུགས་ཀྱི་སྤྱོད་པ་ཡིན་ནོ་ཞེས་སྟོན་ནོ། །ད་ནི་སྤྱོད་པ་བཞི་པ་སྟོན་ཏེ། དང་པོའི་འཁོར་ལོ་ཆེན་པོ་ནི། །གཞི་འབྲས་དབྱེར་མེད་པའི་དཀྱིལ་འཁོར་ཆེན་པོར་ཞུགས་ནས། སྙིང་ག་ཡི་ནི་དཀྱིལ་འཁོར་དུ། །རང་གི་དབང་སོགས་རྒྱས་པ་ཡི། །རང་གི་ནང་དུ་ཞུགས་པ་དེས། །འདི་ནི་རྡོ་རྗེ་རྩེ་མོ་ལས། །དེ་ནས་སངས་རྒྱས་ཐམས་ཅད་ནི། །ཐུགས་ཀ་ནས་ནི་བྱུང་ནས་ནི། །ཆོས་ཀྱི་དབང་བསྐུར་བཞི་པ་ཡིས། །དེ་ཚེ་ཐུབ་པ་དབང་བསྐུར་འགྱུར། །ཞེས་དང་། དབང་བསྐུར་བཞི་པོ་དེ་ཡང་དེར། །རྡོ་རྗེ་སེམས་དཔའི་དབང་བསྐུར་བས། ངོ་བོ་ཉིད་ཀྱི་སྐུ་རུ་འདོད། །རྡོ་རྗེ་ཆོས་ཀྱི་དབང་བསྐུར་བས། །ལོངས་སྤྱོད་རྫོགས་པའི་སྐུ་རུ་འདོད། །རྡོ་རྗེ་རིན་ཆེན་དབང་བསྐུར་བས། །དེ་ནི་མཚན་དང་དཔེ་བྱད་དོ། །སངས་རྒྱས་ཀུན་གྱི་ཡེ་ཤེས་ཆེ། །ཁམས་མཚུངས་ཆོས་ཀྱི་སྙིང་པོ་ཅན། །རྡོ་རྗེ་ལས་ཀྱི་དབང་བསྐུར་བས། །སྤྲུལ་པ་ཡི་ནི་སྐུ་རུ་འདོད། །གསང་བ་བཞི་ཡི་དབང་བསྐུར་བས། །རྫོགས་སངས་རྒྱས་ཀྱི་བྱང་ཆུབ་ཐོབ། །དེ་ནས་མིང་གི་དབང་བསྐུར་བས། །ཐུབ་སྟེ་རྣམ་པར་སྣང་མཛད་འགྱུར། །ཆོས་ཉིད་ཀྱང་ནི་ཡང་དག་རྟོགས། །ཆོས་དང་ལོངས་སྤྱོད་རྫོགས་པར་རྟག །ཅེས་གསུངས་ལ། དོན་རྩ་རླུང་ཐིག་ལེ་འཛག་པ་མེད་པའི་བདེ་ཆེན་གྱི་མྱོང་བ་ཐམས་ཅད་དག་པས། ཆོས་ཐམས་ཅད་ཤིན་ཏུ་རབ་ཏུ་ཀུན་ཏུ་སངས་རྒྱས་པར་རྟོགས་པ་འབྲས་བུའི་དབང་ཐོབ་པ་ཡིན་ནོ། །དེ་ཡང་སྤྱོད་པའི་མཐར་ཕྱག་རྒྱའི་ཉེ་རྒྱུས་མཚམས་སྦྱོར་ལ། གཞན་དུ་ངེས་པ་མེད་དོ། །གཉིས་མེད་ཆོས་ནི་ཐོབ་པས་ན། །ཐར་པ་ཡང་ནི་ཐོབ་པ་ཉིད། །འདིས་ཤེས་རབ་ཀྱིས་འཁོར་བ་ལ་མི་གནས་པ་བསྟན། འཁོར་བའི་བདེ་བས་རྨོངས་པས་ན། །གྲོལ་བ་ཡང་ནི་སྤངས་པ་ཉིད། །འདིས་སྙིང་རྗེས་ཞི་བ་ལ་མི་གནས་པར་བསྟན་ཅིང་། ཐབས་ཤེས་རེ་རེ་བར་མི་ལྷུང་བས་མ་ནིང་གི་གོ་འཕང་ཞེས་ཀྱང་བཏགས་སོ། །སྒྱུ་མར་གནས་པས་དུ་མ་ཀུན། །སྣ་ཚོགས་གཟུགས་ཀྱིས་སེམས་ཅན་སྨིན། །ཞེས་པ་ནི། བདེ་བ་ཆེན་པོ་གཅིག་ཉིད་སེམས་ཅན་ཐམས་ཅད་ལ་སྨན་པ་དང་བདེ་བའི་བྱེད་པོར་འཆར་བ་ནི་ཟླ་བ་ཆུ་ནང་བཞིན་ནོ། །སངས་རྒྱས་ཀུན་དང་མཉམ་སྦྱོར་བ། །འདིས་ནི་སངས་རྒྱས་ཐམས་ཅད་དང་མཉམ་པ་ཉིད་དུ་གྱུར་པས་ཟབ་པ་བསྟན་ནོ། །མཁའ་འགྲོ་མ་ཡི་དྲྭ་བ་སྡོམ། །འདིས་ནི་རྒྱ་ཆེ་བ་ཤེས་བྱ་ལ་སྲིད་ཚད་དུ་ཟབ་པ་དེ་སྣང་བ་བསྟན་ཏེ་རྒྱ་ཆེ་བའོ། །དེ་ནི་ཕྱོགས་ཀུན་རྣམ་རྒྱལ་ལོ། །འདི་ནི་བདུད་བཞི་ལས་རབ་ཏུ་རྒྱལ་བའི་གོ་འཕང་མཆོག་གི་སྤྱོད་པ་ཡིན་པས་དེ་སྐད་ཅེས་བཏགས་སོ། །ཡོན་ཏན་འདིར་ནི་མིང་ཙམ་བསྟན་གྱི། ཐམས་ཅད་ནི་སངས་རྒྱས་ཉིད་ཀྱིས་ཇི་སྲིད་ནམ་མཁའ་གནས་པ་དེ་སྲིད་དུ་བརྗོད་པ་ཕྱོགས་གཅིག་ཀྱང་འཛད་པར་མི་འགྱུར་ན་ཚང་བར་སུས་སྨྲ་བར་ནུས། རྣལ་འབྱོར་དབང་ཕྱུག་ཏིལླི་པས་མཛད་པ་རྫོགས་སོ།། །།བལ་ཡུལ་དུ་ཡེ་ཤེས་ཀྱི་མཁའ་འགྲོ་མས་བསྒྱུར་བ་ཆོས་ཀྱི་རྗེས་མཁར་ཆུའི་གནས་ནས་སྤྱན་དྲངས་པའི་དཔེ་རྙིང་ཇི་ལྟ་བའོ། །དེ་ལྟར་ཏིལླིའི་གསང་ཚིག་གི་འགྲེལ་པ་འདི་ཡང་རིག་པ་འཛིན་པའི་ཐིག་ལེ་པད་དཀར་ཅན་གྱིས་རྒྱལ་བྱེད་ཀྱི་ཚལ་དུ་བྲིས་པ་ཕྱོགས་དུས་གནས་སྐབས་ཐམས་ཅད་དུ་གསང་བ་ཆེན་པོའི་སྤྱོད་པས་སྐྱེ་རྒུ་ཐམས་ཅད་རྡོ་རྗེ་འཆང་ཆེན་པོར་བགྲོད་པ་ལ་སྐལ་བ་དགེ་བར་གྱུར་ཅིག། །།ཀུན་མཁྱེན་བླ་མའི་གསུང་འབུམ་ཁ་སྐོང་རིགས། །མཛོད་ཁྲི་ཐབས་མཁས་བཞེངས་དགེས་དོན་བརྒྱུད་ཀྱི། །བསྟན་པ་འཕེལ་རྒྱས་སྐུ་གཤེགས་དཔལ་ལྡན་གཙོས། །འབྲེལ་ཐོག་མཁའ་མཉམ་སྐུ་བཞི་ཐོབ་པར་སྨོན།། །།མངྒ་ལཾ།། །། ཁྲིད་ཆེན་བརྒྱད་མཛེས་པར་བྱེད་པའི་རྒྱན།ཁྲིད་ཆེན་བརྒྱད་མཛེས་པར་བྱེད་པའི་རྒྱན་བཞུགས་སོ། །ཁྲིད་ཆེན་བརྒྱད་ཀྱི་མཛེས་རྒྱན་ཞེས་བྱ་བ། དཔལ་འབྲུག་པ་ཡབ་སྲས་ཀྱི་ཞབས་ཀྱི་པདྨོ་དྲི་མ་མེད་པ་ལ་གུས་པས་ཕྱག་འཚལ་ལོ། །དུལ་ཞིང་ཉེར་ཞི་རྟག་ཏུ་དྲན་ལྡན་པའི། །འཇིག་རྟེན་མགོན་པོ་སྐྱབས་མཆོག་བླ་མེད་པ། །ཐུབ་དབང་རྗེས་སྐྱེས་སྲས་བཅས་ཐམས་ཅད་དང་། །གཉིས་མེད་དཀར་བརྒྱུད་དེ་ལ་ཕྱག་འཚལ་ལོ། །ལེགས་བྱས་ཐབས་ཚུལ་སྣ་ཚོགས་འོད་ཟེར་གྱིས། །འགྲོ་འདིའི་རྨོངས་པའི་མུན་པ་མཐར་འབྱིན་པའི། །དཔལ་ལྡན་འཇིགས་མེད་བདུད་ལས་རྒྱལ་བ་ཡི། །བཤེས་གཉེན་བླ་མ་དེ་ཡིས་འདིར་སྲུངས་ཤིག །འདི་ན་འཁོར་བའི་རྒྱ་མཚོར་ཆོས་ཀྱི་རྫིངས། །སྦྱར་བ་ལྟ་ངན་རླུང་གིས་བསྐྱོད་པ་ཡིས། །ལོག་སྡེ་སྲིན་མོའི་གླིང་འཁྱམས་ཤེས་ལྡན་འགའ། །ཐེག་མཆོག་ཅང་ཤེས་འདི་ཞོན་འབྲོས་པར་གྱིས། །སྐྱེ་བོ་ཕལ་ཆེར་མྱ་ངམ་ཐང་ཆེན་པོར། །ཆོས་མིན་སྨིག་རྒྱུའི་རྗེས་འབྲང་ངལ་གྱུར་པ། །དེ་དག་ཟབ་རྒྱས་གཏིང་མཐའ་མི་དཔོགས་པའི། །ཆོས་མཚོ་འདི་འཐུངས་མངོན་པར་ཚིམ་པར་བྱོས། འདིར་གངས་ཅན་གྱི་ལྗོངས་ཀྱི་གྲུབ་པའི་རིང་ལུགས་པ་ཆེན་པོ་དཔལ་འབྲུག་པ་ཞེས་གྲགས་པའི་གསུང་གི་བདུད་རྩི་རྣལ་འབྱོར་ཅན་གྱི་དབང་ཕྱུག་རྣམས་ཀྱིས་སྐུ་ཉམས་སུ་བསྟར་བའི་ཁྲིད་ཆེན་པོ་བརྒྱད་པོ་འདི་དག་སྐྱེས་བུ་སྐལ་བ་བཟང་པོ་རྣམས་ཀྱིས་སྤྱོད་པའི་ཡུལ་དུ་གྱུར་པ། བདེ་བར་གཤེགས་པའི་གསུང་རབ་ཐམས་ཅད་ཀྱི་སྙིང་པོ་གསལ་བར་སྟོན་པའོ། །དེ་འཆད་པ་ལ་ཉེ་བར་མཁོ་བ་འགའ་ཞིག་བརྗོད་པ་ལ་འཇུག་པར་བྱ་སྟེ། དེ་ཡང་བླ་མ་མོས་གུས་དང་། ཕྱག་ཆེན་དང་། ནཱ་རོ་པ་ཆེན་པོའི་ཆོས་དྲུག་དང་། གསང་སྤྱོད་བཟློག་སྒོམ་གྱི་ཁྲིད་དག་དང་པོ་ནས་རྒྱས་པར་བཞུགས་ལ། ཕྱི་མ་རྣམས་རྗེ་འགྲོ་བའི་མགོན་པོ་རྒྱ་རས་པ་ཉིད་ཀྱི་རྩ་བ་ཙམ་ཞིག་མཛད། དེ་ལས་རྒྱས་པར་རྒྱལ་བ་རྒོད་ཚང་པས་མཛད། དེ་ལས་ཀྱང་ཆེས་ཆེར་རྒྱས་པར་རྒྱལ་བ་ཡང་དགོན་པ་དང་། གྲུབ་ཐོབ་ཆེན་པོ་ཨོ་ཊི་ཡ་ཎ་པ་རིན་ཆེན་དཔལ་ལ་སོགས་པས་མཛད་དོ། །འདིར་དཔལ་རྒྱལ་བའི་དབང་པོས་མཛད་པ་ཟབ་གནད་དང་། ལེགས་པར་བཤད་པ་ཆེས་མང་བར་སྣང་བ་ལས། བརྒྱུད་པ་ལའང་འདི་ཉིད་གདན་རབས་གཙོ་ཆེ་བར་གཟུང་ན་ལེགས་པར་མངོན་ནོ། །གཞན་ཡང་ཕྱག་ཆེན་གྱི་བརྒྱུད་པ། དཀར་བརྒྱུད་འདི་ཉིད་ཀྱི་ཆོས་སྲིད་ཀྱི་སྦྱོར་བས་ཕུན་སུམ་ཚོགས་པའི་བླ་མ་དག །ནཱ་རོ་པ་ནས། ཌོམྦི་པ། ཇོ་བོ་རྗེ་དེའི་སློབ་མ་དགོན་པ་བ་ལས་རིམ་པར་བརྒྱུད་དེ་དྭགས་པོས་གསན་ཞེས་ཚིག་བརྒྱུད་དང་། དོན་བརྒྱུད་ནཱ་རོ་པ་ནས་མར་པ་དང་། མི་ལ་དྭགས་པོ་ཡིན་ཞེས་བརྗོད། དེ་ལ་ཁོ་བོ་ཅག་འདི་སྐད་དུ་སྨྲ་སྟེ། དེ་ལྟར་ན་སྨྲ་བའི་དབང་ཕྱུག་ཆེན་པོ་ས་སྐྱ་པཎྜྻིཏ་ཀུན་དགའ་རྒྱལ་མཚན་དཔལ་བཟང་པོའི་ཞབས་ཀྱིས། ཆོས་དྲུག་བོར་ནས་ལམ་འབྲས་དང་། །ཕྱག་རྒྱ་ཆེན་པོ་ལ་སོགས་པ། །གཞན་གྱི་གདམ་ངག་སྒོམ་བཞིན་དུ། །ནཱ་རོའི་བརྒྱུད་པ་འདེད་བྱེད་པ། །གཞན་དང་འགལ་བ་ལྟ་ཅི་སྨོས། །རང་ལུགས་དང་ཡང་འགལ་བ་ཡིན། །ཞེས་གསུངས་པ་ལ་ལན་གདབ་ཏུ་མེད་དོ། །གཞན་ཡང་ལ་ལ་དག །ཕྱག་རྒྱ་ཆེན་པོ་མདོའི་ཕྱོགས་ཀྱི་མན་ངག་ཡིན་ནོ་སྙམ་དུ་སེམས་ཤིང་། གཞན་དག་ལའང་བརྗོད་པར་བྱེད་དོ། །དེ་ལྟར་ན་ཁྱེད་ཅག་ཉིད་ཀྱི་བདག་ཉིད་ཆེན་པོ་ས་སྐྱ་པཎྜྻི་ཏའི་གསུང་ལས་ལྟ་སྒོམ་དབུ་མ་ལས་ལྷག་པ་མེད་པར་སྨྲ་བ་ལ་སྐྱོན་དུ་བལྟ་ཞིང་། དགག་པ་ལྟར་བཅོས་པའི་ཚིག་འགའ་ཞིག་གི་འདོམ་གྱིས་མཁས་པའི་དགོངས་པ་ནམ་མཁའ་ལྟ་བུ་ལ་འཇལ་བར་བྱེད་པས་ན་རྣམ་དཔྱོད་ཀྱིས་དབེན་པར་འཇལ་ལོ། །གཞན་ཡང་དེ་སྐད་དུ་སྨྲ་བ་ནི། བཀའ་ཕྱག་ཆུ་བོ་གཉིས་འདྲེས་ཞེས་པའི་དོན་ལ་ངེས་པ་མ་རྙེད་པ་ལྟ་ཅི་སྨོས་ཏེ། ངེས་པ་ཚད་མས་མ་དམིགས་པ་ཡིན་ནོ། །དེ་ཙམ་དུ་མ་ཟད་ལྟ་བ་ཁས་ལེན་དང་བྲལ་བ་ཞེས་རང་སྟོང་པ་ཁོ་ན་ལྟར་བཤད་ནས། བདག་ཅག་དཀར་བརྒྱུད་རིན་པོ་ཆེའི་ལྟ་བ་ནི་འདི་ཡིན་ལ། གཞན་བཤད་པ་པོ་ཕལ་ཆེ་བས་བཤད་པ་ནི་ལོག་པའོ་ཞེས་སྨྲ་བ་ནི། །རྡོ་རྗེ་ཐེག་པ་ཆེན་པོ་བླ་ན་མེད་པ་ལ་ངེས་པ་མ་དམིགས་པའོ། །བདག་ནི་ཕྱག་རྒྱ་ཆེན་པོ་གསང་སྔགས་ཀྱི་རྫོགས་རིམ་མཚན་ཉིད་པ་དང་། བརྒྱུད་པ་རྗེ་མི་ལ་ནས་བརྒྱུད་པར་ཁས་ལེན་ནོ། །དེ་ལ་རྒྱུ་མཚན་མེད་པར་སྨྲ་ན། སྔ་མ་ནི་དཀར་བརྒྱུད་འདི་ཉིད་ཀྱི་བླ་མ་དམ་པ་ཕལ་མོ་ཆེ་བཞེད། ཕྱི་མ་ནི་ཕག་མོ་གྲུབ་པའི་ཕྱག་ཆེན་ཚིགས་བཅད་མ་ལས་བཤད། དེ་ལས་རྒྱས་པར་བདག་གི་ཡོངས་སུ་འཛིན་པ་ཆེན་པོ་དཔལ་ངག་གི་དབང་པོའི་ཞལ་སྔ་ནས་ཀྱིས། མདོ་རྒྱུད་ཀྱི་ལུང་རྒྱ་ཆེན་པོས་བསྒྲུབ་པར་མཛད་པ་དང་། མཚུངས་མེད་རྒྱལ་བའི་དབང་པོའི་བཤད་པ་ལས་འདིར་མངས་ཀྱི་དོགས་ནས་མ་སྤྲོས་སོ། །དེ་བས་ན་བཤད་པར་བྱ་བ་དེ་དག་གི་ས་བཅད་ཙམ་ཞིག་བརྗོད་པས་ཕྱི་རབས་པ་རྣམས་འཇུག་པ་བདེ་བར་འགྱུར་བ་དེ་ཉིད་ཀྱི་ཆེད་དུ་བཤད་པ། བྱིན་རླབས་ཐམས་ཅད་ཀྱི་རྩ་བ། དངོས་གྲུབ་ཐམས་ཅད་ཀྱི་འབྱུང་གནས། གསང་སྔགས་རྡོ་རྗེ་ཐེག་པ་ཐམས་ཅད་ཀྱི་སྙིང་པོ། བླ་མ་མོས་གུས་ཀྱི་ཁྲིད་ལ་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ། བླ་མ་ཚོགས་ཞིང་དུ་བྱས་ནས་མནྜལ་འབུལ་བ། བླ་མ་རིགས་བདག་ཏུ་བྱས་ནས་སྡིག་སྒྲིབ་སྦྱང་བ། བླ་མ་སྐྱབས་གནས་སུ་བྱས་ནས་གསོལ་བ་འདེབས་པ། བླ་མ་རང་སེམས་དང་བསྲེས་ཏེ། བར་ཆད་སེལ་བ་དང་བཞིའོ། །དང་པོ་ལ། བསྒྲུབ་པའི་མནྜལ་དང་མཆོད་པའི་མནྜལ་ལོ། །གསུམ་པ་ལ། ཕྱིའི་གསོལ་འདེབས་ཀྱི་རྒྱུད་སྦྱང་བ་དང་། ནང་གི་གསོལ་འདེབས་ཀྱི་བྱིན་དབབ་པའོ། །དེ་ལ་རིང་བརྒྱུད་ཁྲོམ་ཚོགས་སུ་བསྒོམ་པ་དང་། ཉེ་བརྒྱུད་མཐོ་བརྩེགས་སུ་བསྒོམ་པ་དང་། ཀུན་འདུས་ནོར་བུ་ལུགས་སུ་བསྒོམ་པའོ། །གཉིས་པ་དངོས་གཞི་ལ། སྨིན་བྱེད་དབང་དང་། དབང་དོན་ཉམས་སུ་བླང་བའོ། །དང་པོ་ལ། རྒྱས་འབྲིང་བསྡུས་པ་གསུམ་མོ། །གཉིས་པ་ལ། མོས་པ་ལམ་བྱེད་སྤྲུལ་སྐུའི་ལམ་ཁྱེར། རྣམ་པ་ལམ་བྱེད་ལོངས་སྐུའི་ལམ་ཁྱེར། མངོན་སུམ་ལམ་བྱེད་ཆོས་སྐུའི་ལམ་ཁྱེར་རོ། །གཉིས་པ་ལ་རགས་པ་ལྷ་སྐུ་ལ་བསླབ་པ། འབྲིང་པོ་ཕྱག་མཚན་ལ་བསླབ་པ། ཕྲ་བ་ས་བོན་ལ་བསླབ་པའོ། །གསུམ་པ་ལ། རང་སེམས་བླ་མ་ཆོས་སྐུ་ལ་སྒྲོ་འདོགས་བཅད། རྣམ་པ་བླ་མ་ཆོས་སྐུ་ལ་རྩལ་སྦྱང་། སྣང་སྲིད་བླ་མ་ཆོས་སྐུའི་ངོ་བོར་རྫོགས་པར་བྱའོ། །དེ་དག་གི་ཉམས་ལེན་འདིར་འདུ་སྟེ། མོས་པ་ལམ་བྱེད་སྤྲུལ་སྐུའི་ལམ་ཁྱེར་གྱིས་བླ་མ་སྤྲུལ་པའི་སྐུར་བསྒྲུབ་པ། རྣམ་པ་ལམ་བྱེད་ལོངས་སྐུའི་ལམ་ཁྱེར་གྱི་གནད་ཀྱིས་བླ་མ་ལོངས་སྤྱོད་རྫོགས་པའི་སྐུར་བསྒྲུབ་པ། མངོན་སུམ་ལམ་བྱེད་ཆོས་སྐུའི་ལམ་ཁྱེར་གྱི་གནད་ཀྱིས་བླ་མ་ཆོས་སྐུར་བསྒྲུབ་པའོ། །དེ་ལ་དང་པོ་ཕྱི་བསྒྲུབ། གཉིས་པ་ནང་བསྒྲུབ། གསུམ་པ་གསང་བའི་བསྒྲུབ་པ་ཡིན་ལ་སྔོན་དུ་འགྲོ་བ་བཞི་པར་བླ་མ་འཕྲིན་ལས་བཞི་པའི་ལས་སྦྱོར་དང་སྦྱར་ཏེ་བཤད་དགོས་སོ། །གསུང་རབ་ཆུ་བོ་ཇི་སྙེད་པ། །མངོན་པར་འབབ་པ་ཟབ་མོའི་ལམ། །མོས་གུས་མ་དྲོས་མཚོ་འདིར་ནི། །སྐལ་བཟང་ཀླུ་དབང་དགྱེས་སྤྱོད་ཅིག །གང་གིས་རིང་གནས་ཐོབ་དཀའ་བའི། །མགོན་པོ་ཚེ་འདིར་སྒྲུབ་པའི་ཐབས། །བླ་མའི་གསུང་བཞིན་འདི་བཀོད་པས། །ཤེས་ལྡན་བག་ཡོད་བརྟེན་པར་རིགས། །ཞེས་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཐ་མལ་གྱི་ཤེས་རྒྱུད་ཡང་དག་པའི་ཡེ་ཤེས་སུ་ངོ་སྤྲོད་པར་བྱེད་པ་ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་ཁྲིད་ལ་གསུམ་སྟེ། སྔོན་འགྲོ། དངོས་གཞི། རྗེས་སོ། །དང་པོ་ལ་ཐུན་མོང་དང་ཐུན་མོང་མ་ཡིན་པའོ། །གཉིས་པ་ལའང་ཐུན་མོང་གི་ཉམས་ལེན་དང་། ཐུན་མོང་མ་ཡིན་པའི་ཉམས་ལེན་ནོ། །དང་པོ་ལ། སྒོམ་གྱི་རྩ་བ་ཞི་གནས་ཀྱི་ཉམས་བཙལ་ཏེ་རྩེ་གཅིག་གི་རྣལ་འབྱོར་ཉམས་སུ་བླང་བ་དང་། གནས་འགྱུའི་རྩ་བ་བཅད་དེ་ལྷག་མཐོང་ངོས་གཟུང་ནས་སྤྲོས་བྲལ་གྱི་རྣམ་འབྱོར་བསྒོམ་པའོ། །དང་པོ་ལ། ཐོལ་སྐྱེས་རྦད་གཅོད། གང་ཤར་བཟོ་མེད། གཞག་ཐབས་ཀྱི་གནད་དོ། །གཉིས་པ་ལ། གནས་འགྱུའི་རྩ་བ་བཅད་པ། ལྷག་མཐོང་ངོས་གཟུང་བ། སྤྲོས་བྲལ་གྱི་རྣལ་འབྱོར་བསྒོམ་པའོ། །དེ་ལ་དུས་གསུམ་གྱི་སྒོ་ནས་དཔྱད་པ། དངོས་པོ་དངོས་མེད་ཀྱི་སྒོ་ནས་དཔྱད་པ། གཅིག་ཐ་དད་ཀྱི་སྒོ་ནས་དཔྱད་པའོ། གཉིས་པ་ཐུན་མོང་མ་ཡིན་པའི་ཉམས་ལེན་ལ། ཆོས་ཐམས་ཅད་སྣང་སེམས་དབྱེར་མེད་ཀྱི་སྒོ་ནས་ཟུང་འཇུག་ཏུ་རོ་གཅིག་པས་རོ་གཅིག་གི་རྣལ་འབྱོར་ཉམས་སུ་ལེན་པ་དང་། ཆོས་ཐམས་ཅད་གཉུག་མ་ལྷན་ཅིག་སྐྱེས་པ་ཆོས་ཀྱི་སྐུར་གཏན་ལ་ཕབ་ནས་སྒོམ་མེད་ཀྱི་རྣལ་འབྱོར་ཉམས་སུ་ལེན་པའོ། །དང་པོ་ལ། གཉིད་དང་རྨི་ལམ་གྱི་དཔེས་སྣང་བ་སེམས་སུ་ངོ་སྤྲད་པ་དང་། ཆུ་དང་ཆབ་རོམ་གྱི་དཔེས་སྣང་སྟོང་ཟུང་འཇུག་ཏུ་ངོ་སྤྲད་པ་དང་། ཆུ་དང་རླབས་ཀྱི་དཔེས་ཆོས་ཐམས་ཅད་རོ་མཉམ་ཏུ་གཏན་ལ་འབེབས་པའོ། །གསུམ་པ་རྗེས་ལ་ཕྱག་རྒྱ་ཆེན་པོ་ངོས་གཟུང་ཞིང་རང་ངོ་སྤྲད་པ། གེགས་དང་གོལ་ཤོར་བཅད་ཅིང་ཉམས་རྟོགས་གོ་བ་གསུམ་གྱིས་ཤན་དབྱེ་བ། འབྲས་བུ་སྐུ་གསུམ་གྱི་ཐོབ་ཚུལ་བསྟན་པའོ། །དེ་དག་གི་ཉམས་ལེན་ཐམས་ཅད་འདིར་འདུས་ཏེ། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུའི་གནད་ཀྱིས་ལྟ་བ་གཏན་ལ་དབབ་པ། སྣང་བ་ལྷན་ཅིག་སྐྱེས་པ་རང་འོད་གཟུགས་སྐུའི་གནད་ཀྱིས་སྒོམ་པ་ཉམས་སུ་བླང་བ། སྣང་སྲིད་ལྷན་ཅིག་སྐྱེས་པ་དབྱེར་མེད་ཀྱི་གནད་ཀྱིས་འབྲས་བུ་མཐར་ཕྱིན་པར་བྱ་བའོ། །ཕལ་ཆེར་གཉིས་སུ་འཛིན་ཅིང་འགལ་བའི་ཆོས། །རོ་མཉམ་ཉིད་དུ་འཇལ་བྱེད་ཚད་མ་གང་། །གྲུབ་པ་མཆོག་གིས་མངོན་སུམ་གཟིགས་པ་ཡི། །ཚུལ་དེར་སྤྱོད་ལ་སྤྲོ་བ་འདིར་ཞུགས་ཤིག །ཅེས་ཀྱང་སྨྲས་སོ། །གསུམ་པ་རྡོ་རྗེའི་ལུས་ལ་རླུང་སེམས་ཀྱི་རྟེན་འབྲེལ་གནད་དུ་བསྣུན་པས་ལྷན་ཅིག་སྐྱེས་པའི་ཡེ་ཤེས་རང་དབང་མེད་པར་མངོན་སུམ་དུ་སྟེར་བར་བྱེད་པ་ཐབས་ལམ་ཁྱད་པར་ཅན་གྱི་ཁྲིད་ལ་གཉིས་ཏེ། སྔོན་འགྲོ་དང་། དངོས་གཞིའོ། །གཉིས་པ་ལ། གཏུམ་མོ། སྒྱུ་ལུས། རྨི་ལམ། འོད་གསལ། བར་དོ། འཕོ་བ་དང་དྲུག་གོ །དང་པོ་ལ། སྔོན་འགྲོ། དངོས་གཞི། རྗེས་སོ། །དང་པོ་ལ། ཕྱི་ལུས་ཀྱི་སྟོང་ར། ནང་རྩའི་སྟོང་ར། བསྲུང་བའི་འཁོར་ལོ། རྩ་ལམ་སྦྱང་བ། རྩ་གནས་བྱིན་གྱིས་བརླབ་པ་དང་ལྔའོ། །གཉིས་པ་དངོས་གཞི་ལ། ལུས་ཀྱི་གནད་མེ་ཐབ་དྲུག་ཆིངས། ངག་གི་གནད་སྦྱོར་བ་བཞི་ལྡན། སེམས་ཀྱི་གནད་གཏུམ་མོ་རྣམ་གསུམ་མོ། །དེ་ལ་ལས་གྱི་གཏུམ་མོ། །ཉམས་ཀྱི་གཏུམ་མོ། །མཆོག་གི་གཏུམ་མོའོ། །གསུམ་པ་རྗེས་ལ། དྲོད་ཀྱི་བོགས་འདོན་རྩུབ་ཤིང་མ་དང་། བདེ་བའི་བོགས་འདོན་ཨ་ཧཾ་གི་འབར་འཛག་གོ །དེ་ལ་རང་ལུས་ཐབས་ལྡན་དང་། གཞན་ལུས་ཤེས་རབ་བོ། །དང་པོ་ལ། སྔོན་འགྲོ་ཡིད་རིག །དངོས་གཞི་འབར་འཛག་གོ །གཉིས་པ་སྒྱུ་ལུས་ལ། མ་དག་པའི་སྒྱུ་ལུས་སྒྱུ་མར་སྦྱང་བ་སྤྱི་དོན་གྱི་སྒྱུ་མ། དག་པའི་སྒྱུ་ལུས་སྒྱུ་མར་སྦྱང་བ་སྦས་དོན་གྱི་སྒྱུ་མ། གཉིས་བསྡུས་ཀྱི་ཆོས་ཐམས་ཅད་སྒྱུ་མར་སྦྱང་བ་མཐར་ཐུག་གི་སྒྱུ་མའོ། །གསུམ་པ་རྨི་ལམ་ལ། རྨི་ལམ་གཟུང་བ། སྦྱང་ཞིང་སྒྱུ་མར་བསླབ་པ། རྨི་ལམ་གྱི་དེ་ཁོ་ན་ཉིད་ལ་རྩལ་སྦྱང་བ། དང་པོ་ལ། འདུན་པའི་སྟོབས་ཀྱིས་གཟུང་བ། རླུང་གི་སྟོབས་ཀྱིས་གཟུང་བ། དམིགས་པའི་སྟོབས་ཀྱིས་གཟུང་བའོ། །བཞི་པ་འོད་གསལ་ལ་གསུམ་སྟེ། གཞིའི་འོད་གསལ། ལམ་གྱི་འོད་གསལ། འབྲས་བུའི་འོད་གསལ་ལོ། །གཉིས་པ་ལ། ཉིན་སྣང་ལམ་དང་རང་བཞིན་གཅིག་ཏུ་བསྲེ་བ། མཚན་སྣང་ལམ་དང་རང་བཞིན་གཅིག་ཏུ་བསྲེ་བ། བར་དོ་ལམ་དང་རང་བཞིན་གཅིག་ཏུ་བསྲེ་བའོ། །ལྔ་པ་བར་དོ་ལ། རང་བཞིན་དག་པ་ཆོས་སྐུའི་ལམ་ཁྱེར། རྣམ་པ་དག་པ་ལོངས་སྐུའི་ལམ་ཁྱེར། བྱེད་ལས་དག་པ་སྤྲུལ་སྐུའི་ལམ་ཁྱེར། རོ་མཉམ་དག་པ་ངོ་བོ་ཉིད་སྐུའི་ལམ་ཁྱེར་རོ། །དྲུག་པ་འཕོ་བ་ལ། རབ་ཆོས་སྐུར་འཕོ་བ། འབྲིང་ལོངས་སྐུར་འཕོ་བ། ཐ་མ་སྐྱེ་བ་འཛིན་པའི་འཕོ་བའོ། །ཆོས་དྲུག་པོ་དེ་དག་ཀྱང་བསྲེ་བ་གསུམ་དུ་འདུས་པ་ཡིན་ཏེ། ཉིན་སྣང་ལམ་དང་རང་བཞིན་གཅིག་ཏུ་བསྲེ་བའི་གནད་ཀྱིས། གཏུམ་མོ་དང་སྒྱུ་ལུས་སྤྲུལ་སྐུའི་ལམ་ཁྱེར། །མཚན་སྣང་ལམ་དང་རང་བཞིན་གཅིག་ཏུ་བསྲེ་བའི་གནད་ཀྱིས་འོད་གསལ་དང་རྨི་ལམ་ཆོས་སྐུའི་ལམ་ཁྱེར། །བར་དོ་ལམ་དང་རང་བཞིན་གཅིག་ཏུ་བསྲེ་བའི་གནད་ཀྱིས་བར་དོ་དང་འཕོ་བ་ལོངས་སྐུའི་ལམ་ཁྱེར་དང་གསུམ་པོ་འདིར་འདུས་སོ། །རྒྱུད་སྡེ་མཆོག་གི་སྙིང་པོའི་སྙིང་པོ་གང་། །ལེགས་པར་གཟིགས་ནས་གཞན་ལ་འདོམས་མཛད་པ། །རྗེ་བཙུན་ནཱ་རོའི་གདམས་ངག་འདི་བཤད་པས། །འགྲོ་རྣམས་བདེ་བར་གཤེགས་པའི་ས་ཐོབ་ཤོག །ཅེས་སོ། །བཞི་པ་ཐུན་མོང་དང་ཐུན་མོང་མ་ཡིན་པའི་འགལ་རྐྱེན་ཐམས་ཅད་གྲོགས་སུ་ཁྱེར་ཞིང་། མཐུན་རྐྱེན་ཐམས་ཅད་ལམ་དུ་ལོངས་ཤིང་བར་ཆད་ཐམས་ཅད་དངོས་གྲུབ་ཏུ་སྡུད་པར་བྱེད་པའི་གནད་མ་ནོར་བ་གསང་སྤྱོད་བཟློག་བསྒོམ་གྱི་ཁྲིད་ལ་བཞི་སྟེ། ཀུན་ཏུ་བཟང་པོའི་སྤྱོད་པ་དང་། གསང་བའི་སྤྱོད་པ་དང་། ཚོགས་ཀྱི་སྤྱོད་པ་དང་། ཕྱོགས་ལས་རྣམ་པར་རྒྱལ་བའི་སྤྱོད་པའོ། །གཉིས་པ་ལ་གནས་གང་དུ་འགྲོ་བ། གྲོགས་གང་དང་འགྲོགས་ནས་འགྲོ་བ། དུས་ནམ་འགྲོ་བ། སྤྱོད་ལམ་ཇི་ལྟ་བུས་འགྲོ་བ་དང་བཞིའོ། །དེ་ལ་དབང་པོ་རབ་ཀྱི་ཉམས་ལེན། འབྲིང་གི་ཉམས་ལེན། དབང་པོ་ཐ་མའི་ཉམས་ལེན་ནོ། །དང་པོ་ལ། གཞི་ལྟ་བའི་གོ་ཆ། རྐྱེན་བླ་མའི་མོས་གུས། དམིགས་པ་བསྒོམ་པའི་མཚོན་ཆའོ། །གཉིས་པ་ལ། སྔོན་འགྲོ་འདུན་པ་བཏང་བ། དངོས་གཞི་སྟོང་ཉིད་ཀྱི་ངང་ལ་བཞག་པ། རྗེས་རོ་མཉམ་པའོ། །གསུམ་པ་ལ། རང་དོན་རྟོགས་པའི་རྩལ་སྦྱོང་། གཞན་དོན་སྙིང་རྗེའི་རྩལ་སྦྱོང་། ཐུན་མོང་དུ་ཆོས་བརྒྱད་མགོ་སྙོམས་པའོ། །དེ་དག་ལས་སྤྱོད་པ་གཞན་གསུམ་ཤུགས་བསྟན་དང་། གསང་སྤྱོད་བསྟན་བྱའི་གཙོ་བོ་ཡིན་ལ། དེའི་ཉམས་ལེན་མདོར་བསྡུ་ན་གཅེར་ཉལ་འཁྲིག་མེད་ཀྱི་གནད་ཀྱིས་གདོན་ཆོས་ཀྱི་སྐུར་གཏན་ལ་འབེབས་པ་ལྟ་བའི་ཐག་ཆོད། ཕུང་པོ་ཚོགས་འཁོར་གྱི་གནད་ཀྱིས་གདོན་ལོངས་སྤྱོད་རྫོགས་པའི་སྐུར་རྩལ་སྦྱོང་བསྒོམ་པའི་ལམ་ལོངས། ཕུང་པོ་གཟན་སྒྱུར་གྱི་གནད་ཀྱིས་གདོན་སྤྲུལ་པའི་སྐུར་ལྟ་བ་སྤྱོད་པའི་བོགས་འདོན་དང་གསུམ་དུ་འདུས་སོ། །གྲུབ་པ་མཆོག་རྣམས་གཤེགས་པའི་ལམ་ཆེན་པོ། །གསང་ཆེན་ཀུན་ཏུ་སྤྱོད་པ་འདིར་ཞུགས་ན། །མཆོག་གི་ས་ལ་འབད་པ་མེད་པར་ཡང་། །བགྲོད་འགྱུར་སྐལ་བཟང་རྣམས་ཀྱིས་བརྟེན་པར་བྱོས། །ཞེས་སྨྲས་སོ། །ལྔ་པ་ཟབ་མོ་དག་སྣང་ཞིང་སྦྱོང་གི་ཁྲིད་ལ་གཙོ་བོར་སྔགས་ཀྱི་ཐེག་པ་དང་མཐུན་པ་ཞིང་སྐུ་གསུམ་དུ་སྦྱང་བ། ཞར་བྱུང་ཐུན་མོང་ཐེག་པ་དང་མཐུན་པ་ཞིང་བརྒྱུད་པའི་སྒོ་ནས་སྦྱང་བའོ། །དང་པོ་ལ། ངོ་བོའི་སྒོ་ནས་ཆོས་སྐུ་ཡིན་ཚུལ། རྣམ་པའི་སྒོ་ནས་ལོངས་སྐུར་འཆར་ཚུལ། བྱེད་ལས་ཀྱི་སྒོ་ནས་སྤྲུལ་སྐུར་གྲུབ་ཚུལ་ལོ། །གཉིས་པ་ལ་བསྐྱེད་རིམ་གཙོ་བོར་གྱུར་པའི་སྐབས། རྫོགས་རིམ་གཙོ་བོར་གྱུར་པའི་སྐབས། རིམ་གཉིས་མཉམ་པར་གནས་པའི་སྐབས་སོ། །གཉིས་པ་ཐུན་མོང་བརྒྱུད་པའི་སྒོ་ནས་སྦྱང་བ་ལ། ཞིང་སྒྱུ་མར་སྦྱང་བ། ཞིང་སྟོང་ཉིད་དུ་སྦྱང་བ། ཞིང་སྟོང་ཉིད་སྙིང་རྗེ་དབྱེར་མེད་དུ་སྦྱང་བའོ། །སྲིད་ཞིའི་སྒྱུ་ཐབས་མིག་འཕྲུལ་ལྟ་བུ་ཡང་། །དག་པ་རབ་འབྱམས་ཉིད་དུ་སྣང་བ་ཅན། །གང་དེ་མ་རིག་པ་རྣམས་འདིར་ཞུགས་ཏེ། །སླད་ནས་གནས་པ་ཉིད་དུ་ཤེས་པར་བྱོས། །ཞེས་སྨྲས་སོ། །དྲུག་པ་ཆོས་བརྒྱད་མགོ་སྙོམས་ཀྱི་ཁྲིད་ལ་གསུམ་སྟེ། སྤང་བྱ་གཉེན་པོའི་སྒོ་ནས་སྤང་བ་དང་། ཐབས་ལ་མཁས་པས་སྤང་བ་དང་། རང་བཞིན་གཅིག་ཏུ་རོ་མཉམ་པའི་ཚུལ་གྱིས་སྤང་བའོ། །དེ་ལ་སྤང་བར་གདམས་པ་དང་། སྤོང་བའི་ཚུལ་གཉིས་སོ། །དང་པོ་ལ། རྩ་བར་གྱུར་པའི་སྒོ་ནས་སྤང་བར་གདམས་པ་དང་། འབྱུང་ཉེ་བའི་སྒོ་ནས་སྤང་བར་གདམས་པ། སྤང་དཀའ་བའི་སྒོ་ནས་སྤང་བར་གདམས་པའོ། །དང་པོ་ལ། ཆོས་བརྒྱད་ངོས་བཟུང་བ། དེ་ཉིད་རྩ་བ་གང་ལས་བྱུང་བའི་ཚུལ་ལོ། །གཉིས་པ་ལ། སྔོན་འགྲོ་དང་། དངོས་གཞིའོ། །དེ་ལ་སྣང་བ་སེམས་སུ་རོ་མཉམ་པ། སེམས་སྒྱུ་མར་རོ་མཉམ་པ། སྒྱུ་མ་རྟེན་འབྲེལ་དུ་རོ་མཉམ་པ། རྟེན་འབྲེལ་སྟོང་ཉིད་དུ་རོ་མཉམ་པ། སྟོང་ཉིད་ཟུང་འཇུག་ཏུ་རོ་མཉམ་པ། ཟུང་འཇུག་གཉིས་མེད་དུ་རོ་མཉམ་པ། གཉིས་མེད་ཁྱབ་གདལ་དུ་རོ་མཉམ་པའོ། །དང་པོ་ལ། སྣང་བ་སེམས་ཡིན་ཚུལ་དང་། རྨི་ལམ་ལ་བརྟེན་ནས་རོ་མཉམ་པ། མངོན་སུམ་ལ་བརྟེན་ནས་རོ་མཉམ་པའོ། །ལྔ་པ་ལ། བདེ་སྟོང་ཟུང་འཇུག་ཏུ་རོ་མཉམ་པ། གསལ་སྟོང་ཟུང་འཇུག་ཏུ་རོ་མཉམ་པ། རིག་སྟོང་ཟུང་འཇུག་ཏུ་མཉམ་པའོ། །དེ་དག་གི་དོན་ཉེ་བར་བསྡུ་ན། རབ་ཆོས་སྐུར་མཉམ་པ་གྲོལ་ལམ་སྲིད་ཞི་མཉམ་ཉིད། འབྲིང་ལོངས་སྐུར་མཉམ་པ་ཐབས་ལམ་བདེ་སྟོང་མཉམ་ཉིད། མཐའ་མ་སྤྲུལ་སྐུར་མཉམ་པ་ཐུན་མོང་སྐྱིད་སྡུག་ལམ་ཁྱེར་དང་གསུམ་མོ། །སྡུག་བསྔལ་ཆུ་བོ་མ་ལུས་ཇི་སྙེད་པ། །བདེ་ཆེན་རྒྱ་མཚོར་རོ་མཉམ་གཅིག་གྱུར་པའི། །ཐབས་བཟང་འདི་ནི་སྐལ་བ་མཆོག་རྣམས་ཀྱིས། །བརྟེན་འོས་ཉིད་ཡིན་གཟུ་བོས་ཉམས་སུ་ལོངས། །ཞེས་སྨྲས་པ་དགེ་བ་ཉིད་དོ། །བདུན་པ་ལམ་ཟབ་མོ་ཐམས་ཅད་ཀྱི་གནད་སྐལ་ལྡན་བྱང་ཆུབ་ཏུ་བགྲོད་པར་བྱེད་པ་ལ་རིང་བ་མ་ཡིན་པ་བྱམས་སྙིང་རྗེའི་ཁྲིད་ལ། ཐུན་མོང་དང་། ཐུན་མོང་མ་ཡིན་པའོ། །དེ་ལ་གསུམ་སྟེ། སེམས་ཅན་ལ་དམིགས་པའི་སྙིང་རྗེ། ཆོས་ལ་དམིགས་པའི་སྙིང་རྗེ། དམིགས་པ་མེད་པའི་སྙིང་རྗེའོ། །དེ་དག་གི་དོན་ཡང་། རབ་ཆོས་སྐུ་དང་རྣམ་པ་མཐུན་པ་དམིགས་པ་མེད་པའི་སྙིང་རྗེ། འབྲིང་ལོངས་སྐུ་དང་རྣམ་པ་མཐུན་པ་ཆོས་ལ་དམིགས་པའི་སྙིང་རྗེ། མཐའ་མ་སྤྲུལ་སྐུ་དང་རྣམ་པ་མཐུན་པ་སེམས་ཅན་ལ་དམིགས་པའི་སྙིང་རྗེ་དང་གསུམ་དུ་འདུས་སོ། །འཇིག་རྟེན་མགོན་དང་དེ་སྲས་བཅས་རྣམས་ཀྱིས། །ཇི་ལྟར་འགྲོ་བའི་དོན་དུ་བསླབ་མཛད་གང་། །གྲུབ་དབང་ཤིང་རྟའི་སྲོལ་ལས་ལེགས་འོངས་པ། །མི་ཕམ་པད་དཀར་བདག་གིས་དགའ་བས་སྨྲས། །ཅེས་ཀྱང་བཤད་པ་ལེགས་པ་ཡིན་ནོ། །བརྒྱད་པ་ཆོས་ཐམས་ཅད་རྟེན་ཅིང་འབྲེལ་པར་འབྱུང་བ་རྒྱུ་འབྲས་རྟེན་འབྲེལ་གྱི་ཁྲིད་ལ་གཉིས་ཏེ། ཤེས་བྱའི་ཚུལ་གྱི་གཏན་ལ་དབབ་པ་དང་། བསྒོམ་བྱའི་ཚུལ་གྱིས་ཉམས་སུ་ལེན་པའོ། །དེ་ལ་བཞི་སྟེ། གཅིག་ཆོག་ཉམས་སུ་བླང་བ་དང་། རྩལ་རྫོགས་ཉམས་སུ་བླང་བ་དང་། སྤེལ་སྦྱང་ཉམས་སུ་བླང་བ། ཞར་ལ་སྒྲིག་དུས་བཞི་མ་འཆོལ་བའོ། །དང་པོ་ལ་ཡང་བཞི་སྟེ། རྩ་བ་གཅིག་ཆོག་ཉམས་སུ་བླང་བ་དང་། ཡན་ལག་བཞི་ཕྱོགས་བཞིར་བརྒྱང་བ་དང་། དམ་ཚིག་གསུམ་པོ་ཁྲིད་དུ་བྱ་བ་དང་། ཐབས་ཀྱི་སྒོ་ནས་ཕན་འདོགས་ཀྱི་བྱ་བ་ཡོངས་སུ་བསྒྲུབ་པའོ། །གཉིས་པ་ལ་བཞི་སྟེ། བྱ་བ་བཏང་བ། ཆོག་ཤེས་པ། འདོད་པ་ཟད་པ། སྡོད་ཚུགས་པའོ། །གསུམ་པ་ལ་ནི། ལུས་ཀྱི་དམ་ཚིག་དང་། ངག་གི་དམ་ཚིག་དང་། ཡིད་ཀྱི་དམ་ཚིག་གོ །གཉིས་པ་རྩལ་རྫོགས་ལ་བཞི་སྟེ། བྱ་བ་སྣ་ཚོགས་ལ་རྩལ་སྦྱང་བ། རིག་པ་སྣ་ཚོགས་ལ་རྩལ་སྦྱང་བ། གདོན་སྣ་ཚོགས་ལ་རྩལ་སྦྱང་བ། སྤྱོད་ལམ་སྣ་ཚོགས་ལ་རྩལ་སྦྱང་བའོ། །གསུམ་པ་སྤེལ་སྦྱང་ལ་གཉིས་ཏེ། སྡིག་པ་ཕྲ་ཞིང་ཕྲ་བ་ནས་སྦྱང་བ་དང་། དགེ་བ་ཕྲ་ཞིང་ཕྲ་བ་ནས་སྤེལ་པའོ། །བཞི་པ་སྒྲིག་དུས་བཞི་ནི། བླ་མའི་དྲུང་དུ་མོས་གུས་གྱི་རྟེན་འབྲེལ་སྒྲིག་པ། འཇིག་རྟེན་བློས་བཏང་གི་དུས་སུ་ཞེན་ལོག་གི་རྟེན་འབྲེལ་སྒྲིག་པ། སྒྲུབ་པའི་དུས་སུ་ཉམས་ལེན་གྱི་རྟེན་འབྲེལ་སྒྲིག་པ། འགྲོ་དོན་གྱི་དུས་སུ་གཞན་ཕན་གྱི་རྟེན་འབྲེལ་སྒྲིག་པའོ། །དེ་དག་གི་དོན་ཉེ་བར་བསྡུས་པ་འདི་ཡིན་ཏེ། གང་ལ་གང་འདུལ་གྱི་གནད་ཀྱིས་དངོས་པོར་སྣང་བའི་རྒྱུ་འབྲས་སྤྲུལ་སྐུའི་རྩལ་སྦྱོང་། སྣང་ལ་རང་བཞིན་མེད་པའི་གནད་ཀྱིས་སྒྱུ་མ་ལྟ་བུའི་རྒྱུ་འབྲས་ལོངས་སྐུའི་རྩལ་སྦྱོང་། ཟབ་གསལ་གཉིས་མེད་ཀྱི་གནད་ཀྱིས་ནམ་མཁའ་ལྟ་བུའི་རྒྱུ་འབྲས་ཆོས་སྐུའི་རྩལ་སྦྱོང་དང་གསུམ་དུ་མ་འདུས་པ་མེད་དོ། །རྟེན་ཅིང་འབྲེལ་འབྱུང་བདག་ཉིད་རྒྱལ་བའི་གསུང་། །གཞན་གྱིས་བདེ་བླག་ཉིད་དུ་རྟོགས་བྱའི་ཕྱིར། །འགྲོ་མགོན་རྗེ་ཡིས་ལེགས་པར་འདོམས་མཛད་པ། །ཇི་བཞིན་བཤད་འདི་བླང་བར་འོས་མིན་ནམ། །ཤེས་ལྡན་ཁྱེད་རྣམས་ཆོས་མིན་འཆིང་བུའི་ཚོགས། །ནོར་བུར་ཞེན་པའི་བློ་དེ་ཡོངས་སྤོངས་ལ། །ཟབ་དོན་ནོར་བུ་ཚེ་འདིར་རབ་བཟུང་ནས། །འགྲོ་བའི་རེ་བ་བསྐང་ན་མི་ལེགས་སམ། །ལ་ལ་རྨིག་རྗེས་ཆུ་དང་རྒྱ་མཚོ་དང་། །ཡུངས་འབྲུ་རི་རྒྱལ་མཆོག་ནི་མཚུངས་བལྟ་ཞིང་། །འདི་དང་གཞན་ནི་འདྲ་བར་སེམས་པའང་། །དེ་ལྟར་འཕགས་པ་རྣམས་ཀྱིས་དགོངས་པ་ཉིད། །ལ་ལ་ཁམས་ཀྱི་རྒྱལ་པོའི་ལོངས་སྤྱོད་ཀྱིས། །འཁོར་ལོས་བསྒྱུར་རྒྱལ་དཔལ་ལ་འགྲན་བྱེད་པ། །དེ་ལྟར་རང་བཟོའི་སྒྲོ་བཏགས་ལྟར་སྣང་ཆོས། །འདི་དང་མཚུངས་ཞེས་སྨྲ་བ་བླུན་པ་ཉིད། །གཞན་ལ་ཕན་ཕྱིར་ལེགས་བྱས་འདི་བཤད་པས། །དགེ་བ་གང་གིས་བདག་གཞན་ཐམས་ཅད་ཀྱིས། །མྱུར་དུ་འཁོར་བའི་རྒྱ་མཚོ་ལེགས་བསྒྲལ་ཏེ། །རྣམ་མཁྱེན་མྱ་ངན་འདས་པའི་གླིང་བགྲོད་ཤོག །ཅེས་པ་འདི་ནི་གཙང་སྟོད་སའི་ཐིག་ལེ་དཔལ་ལྡན་ས་སྐྱའི་བྱང་འདབས་སུ་སྐྱེས་པ། སྡོམ་བརྩོན་སྡེ་སྣོད་འཛིན་པ་འཛིམས་དཀར་ཉི་ཟླ་རབ་འབྱམས་ཀྱིས་ཉེ་བར་བསྐུལ་བའི་ངོར། ཤཱཀྱའི་དགེ་སློང་ཆོས་སྨྲ་བ། འབྲུག་པ་རིན་པོ་ཆེའི་རིང་ལུགས་འཛིན་པ་མི་ཕམ་པདྨ་དཀར་པོ་ཕྱོགས་ཐམས་ཅད་ལས་རྣམ་པར་རྒྱལ་པའི་སྡེས། ལྷོ་བརྒྱུད་བྱར་ཕུའི་དབེན་གནས་ཀུན་དགའ་བདེ་ཆེན་དགོན་པར་སྦྱར་བའོ།། །།སརྦ་མངྒལཾ། རྫོགས་པ་ཆེན་པོའི་སྙིང་པོ་དྲིལ་བ་པདྨ་སྙིང་ཏིགརྫོགས་པ་ཆེན་པོའི་སྙིང་པོ་དྲིལ་བ་པདྨ་སྙིང་ཏིག་ཅེས་བྱ་བ་བཞུགས་སོ། །བཅོམ་ལྡན་འདས་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་ཀུན་ཏུ་བཟང་པོའི་རོལ་གར་ལས། །ཞི་ཁྲོའི་འཁོར་ལོ་ཅིར་ཡང་ཤར་ལས་འདིར། །དགའ་རབ་རྡོ་རྗེར་སྣང་དང་གཉིས་མིན་པའི། །པདྨ་འབྱུང་གནས་གང་དེར་བདག་སྐྱབས་སོ། །ཐེག་བརྒྱད་ཆུ་ཀླུང་མ་ལུས་གཞོལ་བའི་གཞི། །སེམས་ཀློང་གཏིང་མཐའ་མི་ཟད་ཆུ་གཏེར་གྱི། །བརྗོད་དོན་གདེངས་ཅན་བདག་པོའི་གཙུག་གི་རྒྱན། །མན་ངག་བསམ་འཕེལ་ནོར་བུ་འདིར་ཁྱོངས་སོ། །དྲང་དོན་གཏམ་གྱི་གྲིབ་མས་བློ་དམན་ཚིམ། །རྟོག་གེའི་ཁྲམ་གྱི་ཆང་གིས་ཤེས་ལྡན་བཟིར། །བླ་མེད་རྫོགས་ཆེན་ཡན་ལག་བརྒྱད་ལྡན་ཆབ། །པད་དཀར་འབའ་ཞིག་དགའ་བའི་སྐྱེམས་སུ་སོང་། །དེ་ཡང་། ཐེག་པ་རིམ་པ་བརྒྱད་ཀྱི་གཞོལ་ས། སེམས་སྡེ་ཀློང་སྡེ་རྒྱ་ཆེ་བའི་ཉིང་ཁུ། རྫོགས་པ་ཆེན་པོའི་མན་ངག་ཟབ་མོ་ཐམས་ཅད་ཀྱི་ཡང་རྩེ། སྐལ་བ་དང་ལྡན་པའི་གང་ཟག་སྒོམ་པའི་ཡུན་ལ་མ་བལྟོས་པར་སངས་རྒྱས་ཀྱི་སར་དཀྲི་བའི་ཐབས་མཆོག་ཏུ་གྱུར་པ་འདི་བཤད་པར་བྱ་སྟེ། གདུལ་བྱ་སྤྲོ་བ་བསྐྱེད་པའི་བྱུང་ཁུངས། གང་བྱུང་བའི་ཆོས་ཀྱི་སྒོ་རྣམ་པར་དབྱེ་བའོ། །དང་པོ་ནི། ཡོན་ཏན་རྫོགས་པའི་དབྱིངས་སུ་མངོན་པར་བྱང་ཆུབ་ནས་ལོངས་སྤྱོད་རྫོགས་པའི་སྐུ་ཞི་ཁྲོའི་འཁོར་ལོ་རིས་མེད་པར་བཞེངས་ནས་མཐའ་ཀླས་པའི་འགྲོ་བའི་བསམ་པ་དང་བསྟུན་པའི་སྤྲུལ་པའི་སྐུ་ཅིར་ཡང་འཆར་བཞིན་པའི་སྟོན་པ་ཀུན་ཏུ་བཟང་པོས། འོག་མིན་གྱི་གནས་སུ་རྡོ་རྗེ་འཆང་ཆེན་པོར་ཡང་དག་པར་སྣང་བར་མཛད་ནས། སྤྲུལ་པའི་སྐུ་དེ་བཞིན་གཤེགས་པ་ཐམས་ཅད་ཀྱི་གསང་བའི་མཛོད་འཛིན་པ་ཕྱག་ན་རྡོ་རྗེ་ལ་བཤད་པ་ཇི་ལྟ་བ་བཞིན་དུ། དེས་ཀྱང་འགྲོ་བ་མིའི་ལུས་ལྟར་སྣང་ཡང་དགོངས་པ་སངས་རྒྱས་དང་ཐ་མི་དད་པའི་དཔའ་བོ་ཆེན་པོ་དགའ་རབ་རྡོ་རྗེ་ལའོ། །དེས་ཀྱང་ཟླ་ཚེས་གསར་པའི་ལུས་ལྟར་དཀར་བའི་ཞབས་སེན་གྱི་འཕྲེང་བས་གྲུབ་པ་དང་རིག་པ་འཛིན་པ་ཐམས་ཅད་ཀྱི་རལ་པ་ཀུན་ཏུ་དཀྲིས་པ་སྐལ་བ་མཆོག་ཏུ་དགེ་བ་ལ་སྦྱོར་བར་མཛད་པའི་སློབ་དཔོན་ཆེན་པོ་པདྨ་འབྱུང་གནས་ལའོ། །དེས་དཔལ་འབྲུག་པ་རིན་པོ་ཆེ་རྒྱལ་དབང་ཐམས་ཅད་མཁྱེན་པའི་ཞལ་སྔ་ནས་ལ་སྟེ། དེའི་ཚུལ་ཡང་། གསལ་རྗེ་གངས་ཀྱི་ར་བར་དམ་ཆོས་དགོངས་པ་འདུས་པ་གསན་པའི་ཚེ། ཉིན་གཅིག་དྲི་མ་མེད་པའི་ནམ་མཁར་འཇའ་འོད་སྣ་ལྔའི་གུར་ཁྱིམ་ཆེར་བཀྲ་བའི་དབུས་ན། ཁྱེའུ་ལོ་བརྒྱད་ཙམ་ལོན་པ་བླ་གོས་ངུར་སྨྲིག་གསོལ་ཞིང་དར་གྱི་པཎ་ཞྭ་ཅན་ཤིན་ཏུ་བཞེངས་སྐུར་ཡོད་པ། ཕྱག་གཡས་ཆོས་འཆད་དང་། གཡོན་མཆོད་སྦྱིན་གྱི་ཚུལ་དུ་མཛད་པ་ཅིག་དངོས་སུ་གཟིགས་པ་ནི། འདི་ནི་ངེས་པར་སྔགས་འཆང་གྲུབ་པ་བརྙེས་པ་པདྨ་འབྱུང་གནས་ཡིན་པར་ཐེ་ཚོམ་མེད་སྙམ་དུ་སེམས་ཤིང་ཡོད་པའི་ཚེ། ཁྱེའུ་དེའི་ཞལ་ནས། རིགས་ཀྱི་བུ་ཆོས་ཐམས་ཅད་ལ་བལྟ་བར་འདོད་པས་ནི་གང་ལ་ཡང་བལྟ་བར་མི་བྱའོ། །གང་ལ་ཡང་བལྟ་བར་མི་བྱ་བས་ནི་ཆོས་ཐམས་ཅད་ལ་བལྟ་བར་བྱའོ་ཞེས་གསུངས་ཤིང་བྱིན་རླབས་འཕོ་བའི་དབང་བསྐུར་ནས། རྫོགས་པ་ཆེན་པོའི་དགོངས་པ་ཟ་འོག་བཀྲམ་པ་ལྟ་བུར་མངོན་དུ་མཛད་པའི་བཀའ་དྲིན་སྩལ་ཏེ་འཇའ་ཡལ་བ་བཞིན་དུ་སོང་ངོ་། །དེས་ཀྱང་མཚན་གྱི་ཟེར་ཙམ་ཐོས་པས་སྲིད་པའི་གདུང་བ་སྐྱེངས་པར་ནུས་པའི་གྲུབ་པའི་ཟླ་བ་ངག་དབང་ཆོས་ཀྱི་རྒྱལ་པོའི་ཞལ་སྔ་ནས་ལའོ། །དེས་བདག་ལ་མཆོག་ཏུ་བཀའ་དྲིན་དུ་མཛད་པ་ཡིན་ཞིང་། བརྒྱུད་པ་རིང་མོའི་སྤྲོས་པ་ལ་དགའ་བ་དག་ནི། རྒྱལ་བའི་དབང་པོས་དཔལ་ཡིད་བཟང་རོལ་བའི་ཞལ་སྔ་ནས་ལ་ཐེག་པའི་རྩེ་མོ་ཨ་ཏིའི་ཆོས་ཚུལ་མ་ལུས་པ་ཁོང་དུ་ཆུད་པར་ནོད་པའི་ཚུལ་འདིས་ཡིད་ཆེས་པའི་གནས་སུ་གྱུར་པ་ཡིན་ནོ། །གཉིས་པ་ལ། གཏན་ལ་དབབ་པའི་གཞི་ཀ་དག་དང་ལྷུན་གྲུབ། གཏན་ལ་འབེབས་པའི་ལམ་ཁྲེགས་གཅོད་དང་ཐོད་བརྒལ། གཏན་ལ་ཕབ་པའི་འབྲས་བུ་སྐུ་དང་ཡེ་ཤེས་བཤད་པ་གསུམ་ལས་དང་པོ་ནི། རྡོ་རྗེའི་ཚིག་འདིར། རིགས་ཀྱི་བུ་ཆོས་ཐམས་ཅད་ལ། ཞེས་གསུངས་པའི་ཆོས་ཐམས་ཅད་ནི་གཞིའི་གནས་ཚུལ་ཡིན་ལ་དེ་ལ་བལྟ་བར་འདོད་པས། ཞེས་པ་ལམ་ཉམས་སུ་ལེན་པའི་དབང་དུ་བྱས་ནས་བསྟན་ཅིང་། དེ་ཡང་རྣམ་པ་གཉིས་ཀྱི་དབྱེ་བས། གང་ལ་ཡང་བལྟ་བར་མི་བྱའོ་ཞེས་ཁྲེགས་གཅོད་དང་། སླར་ཐོད་བརྒལ་གྱི་ལམ་སྟོན་པའི་ཕྱིར། གང་ལ་ཡང་བལྟ་བར་མི་བྱ་བས་ནི་ཆོས་ཐམས་ཅད་ལ་བལྟ་བར་བྱའོ། །ཞེས་གསུངས། དེ་ལྟར་ལམ་བསྒོམས་པས་འབྲས་བུ་ཞར་གྱི་རྙེད་པའི་ཕྱིར་འབྲས་བུ་ཤུགས་ལ་བསྟན་པ་ཡིན་ནོ་ཞེས་རྡོ་རྗེའི་ཚིག་ཅུང་ཟད་ཕྱེ་ནས་ཤིན་ཏུ་རྣམ་པར་དབྱེ་བ་ལ་འཇུག་པར་བྱ་སྟེ། གཞིའི་གནས་ལུགས་ངོ་བོ་ཀ་ནས་དག་ཅིང་། རང་བཞིན་ལྷུན་གྱིས་གྲུབ་པ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པར་གནས་པ་སྟེ། དེ་གཉིས་ངོ་བོ་གཅིག་པའི་ཕྱིར་སྣང་སྟོང་གཉིས་མེད་དུ་བཞག་ལ། དེའི་གནས་ལུགས་སྟོང་པ་མི་འགྱུར་བ་སྐུའི་བདག་ཉིད་དེ། དོན་ལ་སྐུ་གསུམ་འདུ་འབྲལ་མེད་པ་ཉི་མའི་དཀྱིལ་འཁོར་ལྟར་ནང་དུ་གསལ་ཡང་དངོས་པོ་དང་མཚན་མར་མ་གྲུབ། རང་བཞིན་ཡེ་ནས་འོད་དུ་གསལ་ཡང་ཕྱིར་སྣང་ཁ་དོག་རིས་ཅན་དུ་མེད། དེ་ཉིད་ཐུགས་རྗེ་རིག་པའི་ཡེ་ཤེས་སུ་བཞུགས་ཀྱང་རྣམ་པ་ཕྱི་རོལ་ཡུལ་ལ་མི་སྤྱོད་པས་ཕྱི་རྒྱ་མ་རལ་བ་ལྷུན་གྲུབ་རིན་པོ་ཆེའི་སྦུབས་གཞོན་ནུ་བུམ་པ་སྐུའི་གནས་ལུགས་ཞེས་བྱ་སྟེ། ངོ་བོ་རང་བཞིན་ཐུགས་རྗེ་གསུམ་དུ་བཞུགས་པ་ཡིན་ནོ། །དེ་སྐད་དུ་ཡང་རང་ཤར་ལས། ང་མེད་པའི་སྔོན་རོལ་ན་གཞི་འདི་ལྟར་དུ་གནས་ཏེ། གཞི་ཀ་དག་ཆེན་པོ་ཞེས་བྱ་སྟེ། ངོ་བོ་རང་བཞིན་ཐུགས་རྗེ་གསུམ་དུ་གནས་སོ། །ངོ་བོ་སྟེ་མི་འགྱུར་བའི་ཡེ་ཤེས་མ་འགགས་པར་གསལ་བ་གཞོན་ནུ་བུམ་པ་སྐུའི་གནས་ལུགས་ཞེས་བྱའོ། །རང་བཞིན་འོད་ལྔའི་སྣང་བ་མ་འགགས་སོ། །ཐུགས་རྗེའི་སྣང་བ་ནི་དཔེར་ན། ནམ་མཁའ་སྤྲིན་མེད་པ་ལྟ་བུའོ་ཞེས་གསུངས་སོ། །གཉིས་པ་ལ། སྨིན་བྱེད་ཏིང་ངེ་འཛིན་གྱི་དབང་དང་། གྲོལ་བྱེད་ལམ་གྱི་རང་བཞིན་བཤད་པའོ། །དང་པོ་གཞན་དུ་ཤེས་ལ། གཉིས་པ་ལ། སྔོན་འགྲོ། དངོས་གཞི་གཉིས། དང་པོ་ལ། ལུས་ངག་ཡིད་ཀྱི་སྔོན་འགྲོ་གསུམ་ལས། དང་པོ་ནི། དབེན་ཞིང་ཡིད་དུ་མཆིས་པའི་གནས་སུ་འབོལ་བའི་སྟན་ལ་ལུས་གློད། རྐང་པའི་པུས་མོ་གཉིས་ཕྱིར་བཀྱེ་ཞིང་མཐིལ་གཉིས་སྤྲད། ལག་གཉིས་སྤྱི་བོར་ཐལ་མོ་སྦྱར་བས་རྡོ་རྗེ་རྩེ་གསུམ་པའི་དབྱིབས་སུ་བྱས་ཏེ། མཐིང་ཤུན་དྲི་མ་མེད་པའི་ཁ་དོག་ཅན་དུ་བསམ་པ་ལ་སེམས་གཟུང་སྟེ་གཞག་གོ །དེ་ཡང་། རྐང་པ་རྡོ་རྗེ་སྐྱིལ་ཀྲུང་བཅས། ལུས་སྦྱངས་སེམས་ལ་ཕན་པ་ཡིན། ཞེས་གསུངས། གཉིས་པ་ནི། ལུས་དེ་ཉིད་ཀྱི་ངང་ནས་ཁ་ཅུང་ཟད་ལྡང་ཙམ་བྱས་ལ། ཧཱུཾ་གི་སྒྲ་ཧ་ཅང་མི་ཆེ་མི་ཆུང་བ་རིང་བར་བླང་བ་དང་བསྟུན་ཁོང་ནས་རྣམ་ཤེས་ཧཱུཾ་གི་ངོ་བོ་སྣ་ནས་ཐལ་ཐལ་བྱུང་ནས་སྣང་བ་ཐམས་ཅད་མེར་གྱིས་གང་བས་ཕྱིའི་སྣང་བ་ལ་རྒྱས་ཐེབས་པ་དང་། ཧཱུཾ་གོང་ལས་ཐུང་བར་བགྲངས་པས་ཧཱུཾ་དེ་དག་རླུང་ནང་དུ་བརྔུབས་པ་དང་མཉམ་དུ་བྱུང་བས་ལུས་མེར་གྱིས་ཁེངས་པར་མོས་པས་ནང་ཕུང་པོ་ལ་རྒྱས་གདབ་པར་བྱའོ། །དེ་ལ་བརྟེན་ནས་ཧཱུཾ་ཞེས་ངར་དང་བཅས་བརྗོད་པས་རང་གི་རིག་པ་ཧཱུཾ་གི་རྣམ་པར་ཕྱིའི་དངོས་པོ་གང་མཐོང་ཐམས་ཅད་ཕར་ཐལ་ཚུར་ཐལ་ཕུག་པར་བསམས་ཤིང་། བརྟན་པ་དང་ཧཱུཾ་དེ་ཁོང་པ་ནས་སྤྱི་བོ་དང་། སྤྱི་བོ་ནས་རྐང་མཐིལ་དང་། མཐར་ལུས་སྐོར་ལེ་མེད་པར་ཐལ་ཐལ་ཕྱིན་པར་མོས་པ་རྩལ་སྦྱངས་པའོ། །དེ་ནས་ཧཱུཾ་ཞེས་དྲག་ཏུ་བརྗོད་པས་ཧཱུཾ་གཅིག་རྟིང་ལ་གཉིས་རྟིང་ཐོན་པ་དམིགས་རྟེན་གང་སྣང་ལ་ཁྲིལ་ཁྲིལ་དཀྲིས་ནས་རྩེ་མོར་འཁོར་བ་དང་། ཧཱུཾ་དལ་བུར་བྱས་པས་དཀྲིས་པ་དེ་དར་ཅིག་གློད་པ་བསྙེན་བཙལ་བའོ། །དེ་ནས་མདུན་དུ་རི་མོ་སྤྲིན་འགྲོས་ལྟ་བུར་བྲིས། ཧཱུཾ་སྙན་ལ་རིང་བར་བརྗོད་པས་ཧཱུཾ་དེ་ལ་ཞུགས་ཏེ་སོང་། འཁྱོག་མཚམས་སུ་ངལ་བསོ་ཞིང་མཐར་ཐུག་གི་བར་ཕྱིན། ཚུར་ལོག་པ་ལ་སྦྱང་བ་ལམ་དུ་ཞུགས་པ་སྟེ། ངག་ནི་ཧཱུཾ་ཞེས་གནས་པ་ལ། །རྒྱས་བཏབ་པ་དང་རྩལ་སྦྱང་དང་། །བསྙེན་བཙལ་ལམ་དུ་ཞུགས་པ་ཡི། །ངག་སྦྱངས་སེམས་ལ་ཕན་པ་ཡིན། །ཞེས་གསུངས། གསུམ་པ་ནི། རིག་པ་འདི་དང་པོ་གང་ལས་ཚུལ་ཇི་ལྟར་བྱུང་ཕྱི་ནང་བར་གང་དུ་གནས། མཐར་གང་དུ་ཇི་ལྟར་འགག་པ་རྩད་བཅད་པས་སེམས་ཀྱི་ངོ་བོ་སྟོང་པ་ཉིད་བྱུང་གནས་འགྲོ་གསུམ་དང་བྲལ་བ་ཡིན་པ་ལ་ཡིན་པར་ངེས་ཤེས་སྐྱེ་བ་ཡིན་ནོ། །སེམས་ཉིད་དང་པོར་བྱུང་བ་དང་། །བར་དུ་གནས་དང་ཐ་མར་འགྲོ །དེ་ལྟར་སེམས་ལ་བརྟགས་བྱས་ནས། །སེམས་སྦྱང་སེམས་ཀྱི་གནས་ལུགས་ཤེས། །ཞེས་གསུངས། དེ་ནས། ལུས་ངག་ཡིད་གསུམ་ཐ་མལ་གྱི་རྐྱེན་གྱིས་མི་གཡོ་བར་རང་བབས་སུ་འདུག་པས་རྣལ་དུ་དབབ་པར་བྱའོ། །གཉིས་པ་དངོས་གཞི་ལ། དབང་པོ་ཡང་རབ་ཐོས་གྲོལ་དུས་གཅིག་གིས་ཁྲིད་པ་ཁྲེགས་གཅོད། དབང་པོ་རབ་བསྒོམ་པའི་ཡུན་གྱིས་ཁྲིད་པ་ཐོད་བརྒལ་གཉིས་ལས། དང་པོ་ལ། ངོ་རང་ཐོག་ཏུ་སྤྲད་པས་ལ་བཟླ། ཐག་ཆིག་ཆོད་དུ་བཅད་པས་ཆིངས་བསྡམས། གདེངས་གྲོལ་ཐོག་ཏུ་བཅའ་བས་འཕྲང་བསལ་བའོ། །དང་པོ་ནི། ཕྱི་སྣང་བ། ནང་རིག་པ། བར་གཟུང་འཛིན། སྣང་རྟོགས་འཁོར་འདས་ཀྱིས་བསྡུས་པའི་ཆོས་ཐམས་ཅད་མེད་པ་གསལ་སྣང་ཙམ་སྟེ། བློ་ལ་སྣང་ཡང་སྣང་དུས་དེ་ཉིད་དུ་ཕྱི་ནང་གང་དུ་ཡང་ཡོད་མ་མྱོང་པས། རབ་རིབ་ཅན་གྱི་སྐྲ་ཤད་དང་མཚུངས་ལ། ཐམས་ཅད་རིག་པའི་ངོ་ལ་རང་སྣང་བའི་ཆ་ནས་ཅིར་བརྟགས་ཀྱང་མི་འགལ་ཞིང་། སྟོང་པའི་ངོས་ནས་རིག་པས་འཁྲུལ་སྣང་འཁོར་བ་མ་མཐོང་། དག་སྣང་འདས་པ་མ་མཐོང་། འཁོར་འདས་ཀྱི་རིག་པ་མ་མཐོང་། ཐམས་ཅད་གཞི་མེད་མཉམ་པ་ཆེན་པོའི་ངང་ལས་གཡོས་པ་མེད་དེ། ངོ་བོར་མ་གྲུབ་པས་མཐོང་བ་དང་མཐོང་བྱེད་ལས་འདས་པ་རིག་པའི་ངང་ནས་ཤར་བས་འཁོར་འདས་རིག་པའི་རང་མདངས་སམ་རོལ་པ་ཞེས་བཏགས་པ་ཙམ་སྟེ། དོན་དུ་ལྷུན་མཉམ་ཡངས་པ་ཆེན་པོའི་ཀློང་བཅིངས་གྲོལ་སྤང་བླང་མེད་པའི་ངང་དུ་ཐམས་ཅད་ཡེ་ནས་འདས་ཟིན་པས་འཁོར་འདས་མིང་མེད་ཆེན་པོར་ལ་བཟླ་བའོ། །ཚུལ་འདི་རྗེ་བཙུན་རས་ཆུང་ཞབས་ཀྱིས་ཀྱང་། རྫོགས་པ་ཆེན་པོ་ལ་ཕྱོགས་རིས་མེད། །ཕྱོགས་རིས་བྱུང་ན་རྫོགས་ཆེན་མིན། །ཞེས་གསུངས་པ་ཡིན་ནོ། །གཉིས་པ་ལ། མ་བཅོས་པར་གློད་པ། ཐོག་བབས་སུ་གཞག་པ། མཉམ་པ་ཆེན་པོ་ཁྱབ་གདལ་བ་གསུམ་ལས། དང་པོ་ནི། ལུས་སྐྱིལ་ཀྲུང་། མིག་བར་སྣང་ལ་སྲིག་གེ་བལྟས་ཏེ། བློས་འཛིན་རྩོལ་དང་ཆེད་དུ་བསྒོམ་པའི་གཉེན་པོ་མ་ཞུགས་པར་ཕྱིར་མི་སྤྲོ། ནང་དུ་མི་སྡུད། བར་དུ་མི་སེམས་སེམས་ཀྱི་འཕྲོ་འདུ་ཀུན་བཅད་ནས་རིག་པ་དྭངས་སང་ཕྱེད་པའི་ངང་ངོས་གཟུང་སྟེ། རང་བབས་ཀྱི་རིག་པ་རང་གསལ་དུ་རྗེན་ནེ་གཞག་གོ །དེ་ཡང་། གཞི་རྩ་མེད་པའི་ཆོས་ཉིད་འདི། །མ་བཙལ་གཞག་པས་ངོ་མཚར་ཆེ། །ཞེས་གསུངས་སོ། །དེ་ལྟར་གཞག་པས་རླུང་ལྔ་དབྱིངས་སུ་འཆིངས་ཏེ་རང་སྣང་དག་པའི་འོད་གསལ། ཕྱིར་དུ་བ་སྨིག་རྒྱུ་འཇའ་འོད་ལ་སོགས་པ་དང་། ནང་ཆོས་ཉིད་སྟོང་གསལ་བར་སྣང་དག་པ་ལྟར་འཆར་ཏེ། རང་སྣང་མི་རྟོག་ཆེན་པོ་ལ། །གསལ་ལ་རྟོག་མེད་ཉམས་སྐྱེའོ། །ཞེས་གསུངས་སོ། །གཉིས་པ་ནི། སྒོ་གསུམ་ལྷུག་པར་གློད་ལ་གང་ཤར་ལ་བཅར་ཕོག་ཏུ་གཞག་པས་རང་སངས་སུ་ཆལ་ཆལ་སོང་བའི་ངང་དུ་མ་ཡེངས་པར་འཇོག་པའོ། །སེམས་ནི་དམ་དུ་མ་བཅིངས་པར། །རང་ཤར་ངང་ལ་མ་ཡེངས་པའོ། །ཞེས་གསུངས། དེ་ལྟར་ཤེས་པ་གང་འགྱུས་ཀྱི་སྟེང་དུ་གཞག་པས་སེམས་ཀྱི་ཁང་བུ་རང་ཞིག་ནས་འགྱུ་བ་རྟོག་སངས་ཀྱི་འབྲས་བུ་འཆར་རོ། །གསུམ་པ་ནི། ཚོགས་དྲུག་ཡུལ་གྱི་སྣང་བ་ལ་འཛིན་པའི་བཟོ་རྒྱ་མི་བྱེད་པར་སྣང་བ་ཡུལ་གྱི་གནད་གང་སྣང་གི་སྟེང་དུ་གཞག་པས་བེམ་པོའི་སྣང་བ་དེར་འཛིན་མེད་པས་ཡུལ་སེམས་གཉིས་མེད་ཀྱི་འབྲས་བུ་འཆར་བ་ཡིན་ནོ། །དེ་ཡང་། ལུས་དང་ཡུལ་དང་རིག་པ་ཡི། །རང་སྣང་དག་པའི་ཚད་དུ་གཟུང་། །ཞེས་སོ། །གསུམ་པ་གདེངས་གྲོལ་ཐོག་ཏུ་བཅའ་བས་འཕྲང་བསལ་བ་ནི། ཉན་རང་ལྟར་ཉོན་མོངས་སྤོང་བ། །སེམས་དཔའ་ལྟར་སྦྱོང་བ། ཐེག་པ་ཐུན་མོང་བ་ལྟར་གཉེན་པོས་འདུལ་བ། སྔགས་འོག་མའི་བསྐྱེད་རིམ་ལྟར་བསྒྱུར་བ། རྫོགས་རིམ་ལྟར་རང་ཞིར་གཏོང་བ། སེམས་སྡེ་ལྟར་རང་ལུགས་སུ་འཇོག་པ། ཀློང་སྡེ་ལྟར་དེ་ཉིད་ཆོས་ཉིད་དུ་བྱེད་པས་དག་པ་ལྟ་བུ་མ་ཡིན་གྱི། ཕྱི་ནང་གཉིས་མེད་ཟང་ཐལ་བའི་རིག་པ་ཤེལ་གོང་དྲི་མ་མེད་པ་ལྟ་བུ་ལ་གཞི་མེད་པའི་གནད་ཀྱིས་འཁྲུལ་པའི་རྒྱུ་མེད་པས་རྩལ་དང་བྲལ་བའི་རིག་པ་ལ་ལམ་མེད། ལམ་མེད་པས་འབྲས་བུ་ཁམས་གསུམ་དུ་ལྡོག་པའི་ས་མེད་དེ། ཡེ་ནས་གྲོལ་ཟིན་ནམ་མཁའ་ལྟ་བུའི་དགོངས་པར་ལྷུན་གྱིས་གྲུབ་ཟིན་པ་ཡིན་ནོ། །དེ་ལྟར་ཕྱི་སྣང་བ། ནང་ལུས་སེམས་དང་བཅས་པ་ཐམས་ཅད་མེད་པ་གསལ་སྣང་ཆུའི་ཟླ་བ་ལྟ་བུར་རྟོགས་པས་རྩལ་འབྱོངས་ཚེ་རིག་པ་ནམ་མཁའ་ལྟ་བུའི་དོན་ལ་གནས་པའི་ཕྱིར་ཆོས་ཟད་པས་སྣང་བ་དང་ལུས་ཆུ་ཟླ་ལྟ་བུ་འབྱོངས་ཏེ། རྩིག་པ་དང་ར་བ་ལ་སོགས་པ་ལ་ཐོགས་པ་མེད་ཅིང་། སྤྱན་དང་མངོན་ཤེས་ཚད་མེད་འཐོབ། འཕགས་པའི་བདེན་པ་མཐོང་ནས་ཡང་སྲིད་རྣམ་པར་གྲོལ་ཏེ། ཀ་དག་གི་ས་ལ་འགྲོལ་བ་ནི། འབྱུང་བཞིའི་རྡུལ་ཕྲན་ནུས་མེད་པོ་ཡེ་ཤེས་ཀྱི་མེས་བསྲེགས་ཏེ། ན་བུན་ཡལ་བ་ལྟར་ནམ་མཁའི་མཐོངས་སུ་སྐུའི་རྫུ་འཕྲུལ་བསྟན་ནས་དོན་དུ་འགྱུར་ན་ཡེ་ཤེས་ཀྱི་མེས་བསྲེགས་པའི་རྡུལ་ཕྲན་དེ་དག་སྐུ་གདུང་རིང་བསྲེལ་དུ་བྱིན་གྱིས་རློབ་ཅིང་མི་འགྱུར་ན་རང་དངོས་སུ་ཞི་བར་མཛད་ནས་རིག་པ་ཆོས་སྐུའི་དབྱིངས་སུ་ཞུགས་ཏེ་གཟུགས་སྐུ་འཕྲིན་ལས་དང་བཅས་པ་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་མཛད་པ་ཡིན་ནོ། །དབང་པོ་རབ་བསྒོམ་པའི་ཡུན་གྱིས་བཀྲི་བ་ཐོད་བརྒལ་ལ། རབ་ཡེ་ཤེས་ཀྱི་རང་མདངས་ལ་འཁྲིད་པ་ཚེ་འདི་ཉིད་ལ་འཚང་རྒྱ་བའི་གདམས་ངག འབྲིང་ཆོས་ཉིད་སྟོབས་སུ་བྱས་ནས་ཆོས་ཉིད་ཀྱི་བར་དོར་འཚང་རྒྱ་བའི་གདམས་ངག མཐའ་མ་མངལ་དུ་མི་གཏོང་བ་སྤྲུལ་པ་སྐུའི་ཞིང་དུ་དབུགས་དབྱུང་བའི་གདམས་ངག་གོ །དང་པོ་ལ། གནད་གསུམ་གཟིར་ནས་མངོན་སུམ་རང་ཐོག་ཏུ་སྤྲད་པ། དེ་ལས་སྣང་བ་བཞིན་ཇི་ལྟར་འཆར་ཚུལ་བཤད་པ་གཉིས་ལས། དང་པོ་ལ། བཅའ་བ་ལུས་ཀྱི་གནད་གསུམ། གཟིགས་པ་སྒོའི་གནད་གསུམ། ཁྲིད་པ་དབྱིངས་ཀྱི་གནད་གསུམ། སྣང་བ་ཡུལ་གྱི་གནད་གསུམ་སྟེ། བཞི་ལས། དང་པོ་ནི། ལུས་འགྱིང་ཚུགས་རྐང་མཐིལ་གཉིས་ས་ལ་ཕབ། ལག་སོར་བསྒོངས་ཏེ་སར་བཙུགས། རོ་སྟོད་སེང་ལ་བོར། རྩལ་མཇིང་པ་ལ་བསྐྱུར་བ་ཆོས་སྐུ་སེང་གེའི་འདུག་སྟངས། ཁ་སྦུབ་པུས་བྲང་དུ་སྦྱར། རྐང་སོར་ཕྱིར་འཕུལ། ལག་པའི་གྲུ་མོ་ས་ལ་སྦྱར་ཏེ་ལྐོག་མ་བརྟེན། མགྲིན་པ་ཅུང་ཟད་གྱེན་ལ་བཏེགས་པ་ལོངས་སྐུ་གླང་པོ་ཆེའི་འདུག་སྟངས། ལུས་ཙོག་པུ་པུས་བྲང་སྦྱར་བའི་པུས་སྟེང་དུ་གྲུ་མོ་བསྣོལ། ལུས་སྤྱི་དང་མཇིང་པ་ཐད་ཀར་བསྲང་བ་སྤྲུལ་སྐུ་དྲང་སྲོང་གི་འདུག་སྟངས་ཏེ། ལུས་གནད་དེ་དག་ཁོང་ལྷོད་པར་བཅས་པས་རྩ་རླུང་བདེ་ལུགས་སུ་གནས་པའི་དགོས་པ་ཡོད་ཅིང་། རླུང་གི་གནད་ཀྱང་ཁ་དང་། གློ་བར་འབྲེལ་བའི་གློ་བའི་རྩ་བའི་རྩ་སོག་སྦུབས་ཙམ་དེའི་ནང་གི་སེམས་ཀྱི་རྟ་དེ་རང་འགགས་ལ་གཏོང་བའི་ཕྱིར། རླུང་ཁ་ནས་དལ་བུས་ཕྱིར་དྲངས་ལ་ཡུན་ཇི་ཙམ་གནས་པ་བཟུང་བས། རྟ་དང་མི་གཉིས་སོ་སོར་བྲལ་ཏེ་མི་སྙིང་ནང་གི་རིག་པ་ལ་ཐིམ་ནས་མི་རྟོག་པའི་བསམ་གཏན་རང་བབས་སུ་འབྱུང་བ་ཡིན་ནོ། །གཉིས་པ་ནི། ཙིཏྟ་རིན་པོ་ཆེའི་ནང་ན་གཞི་འཛིན་པའི་ཀ་དག་གི་འོད་གསལ་སྙིང་པོ་ལྔ་ལྡན་གྱི་རིག་པ་གདོད་མའི་མགོན་པོ་འོད་མི་འགྱུར་བ་དེ་ངོ་བོ་ཀ་དག་ལ། རང་བཞིན་ལྷུན་གྲུབ། ཐུགས་རྗེ་སེམས་ཅན་ཀུན་ལ་ཁྱབ་པར་བཞུགས་པ་ཞི་ཁྲོ་ལ་སོགས་པ་ཀུན་གྱི་འབྱུང་གནས་སུ་གྱུར་པ་དེ་ནི་བུམ་ནང་གི་མར་མེ་བཞིན། ཤ་ཁྲག་གི་སྦུབས་ཀྱིས་མ་འཐུམས་པར་རིག་པའི་རང་གདངས་ཕྱིར་གསལ་བའི་སྒེར་ཁུང་ལྟ་བུའི་སྒོའི་གནད་ནི་མིག་ཡིན་པས་དེ་མི་བསྒུལ་བར་གཟིར་ཏེ། ཆོས་སྐུའི་གཟིགས་སྟངས་གྱེན་དུ་བཟློག་སྟེ་སྟེང་གི་ནམ་མཁའ་ལ་བལྟ་བ་དང་། ལོངས་སྐུའི་གཟིགས་སྟངས་ཟུར་གྱི་ཐད་ཀ་ལ་བལྟ་བ་དང་། སྤྲུལ་སྐུའི་གཟིགས་སྟངས་ས་ལ་ཕབ་སྟེ་བལྟ་བར་བྱ་སྟེ། རྒྱང་ཞགས་འགུལ་བ་མེད་པ་གནད། །འདི་དུས་ལྟ་སྟངས་གསུམ་དང་སྦྱར། །ཞེས་སོ། །གསུམ་པ་ནི། འཆར་སྒོ་རྙེད་ནས་མིག་དལ་བུས་སྟེང་། ཟུར་འོག་གང་སྣང་གི་སྟེང་དུ་དབྱིངས་སྣང་ཁྲིད་ཤེས་པ་མ་འགྱུས་པར་ཤིག་གེ་འཇོག་པ་སྟེ། དབྱིངས་ཀྱི་གནད་ནི་ཁྲིད་པ་སྟེ། །ཞེས་སོ། །བཞི་པ་ནི། ཕྱིའི་ཡུལ་སྤྲིན་མེད་པའི་ནམ་མཁའི་དབུས། ཉི་མ་ལ་ཁྲུ་གང་ཙམ་གྱི་འོག་ཏུ་གཏད་། དེའི་རིག་པ་དྭངས་སངས་ཕྱེད་པས་སྣང་བའི་འཕེལ་མྱུར། ནང་གི་ཡུལ་དབྱིངས་ཀྱི་སྒྲོལ་མ་ལ་གཏད། རྡོ་རྗེ་ལུ་གུ་རྒྱུད་ཤར་བ་དང་དེ་ཉིད་བཙོན་དུ་བཟུང་བས་འོད་གསལ་མ་བུ་འབྲེལ། གསང་བའི་ཡུལ་རིག་པ་རང་དྭངས་ཨ་ལ་གཏད་པས་རྡོ་རྗེ་ལུ་གུ་རྒྱུད་སོ་སོར་རང་རིག་མཐོང་བས་ཀ་དག་ཆོས་ཟད་ཀྱི་དགོངས་པ་རང་ས་ན་གསལ་ལོ། །གལ་ཏེ་དབྱིངས་རིག་གི་སྣང་བ་མ་ཤར་ན་མིག་ཟུར་ལ་མཉམ་པར་བལྟས་ནས། མཐོང་དུས་ནམ་མཁའི་དཀྱིལ་སྨིན་ཕྲག་གི་ཐད་ལ་མི་བསྒུལ་བར་བལྟ་བ་གནད་ཡིན་ཏེ། མིག་ནི་ནམ་མཁའ་ཁམས་སུ་བརྟག །སངས་རྒྱས་སྐུ་ཡི་ཐིག་ལེ་འཆར། །དེ་ཉིད་དགོངས་པའི་དྲོད་རྙེད་ནས། །རིག་པའི་སྐུ་ནི་ལུ་གུ་རྒྱུད། །སྐུ་དང་བཅས་པ་སྣང་བའོ། །ཞེས་གསུངས། གཉིས་པ་དེ་ལས་སྣང་བ་བཞི་ཇི་ལྟར་འཆར་ཚུལ་བཤད་པ་ལ། ཆོས་ཉིད་མངོན་གསུམ་གྱི་སྣང་བ། ཉམས་གོང་འཕེལ་གྱི་སྣང་བ། རིག་པ་ཚད་ཕེབས་ཀྱི་སྣང་བ། ཆོས་ཉིད་ཟད་པའི་སྣང་བ་བཞི་ལས། དང་པོ་ནི། འཁོར་འདས་གཉིས་ཀྱི་ཆ་འཛིན་པས་དག་སྣང་དང་འཁྲུལ་སྣང་མཐོང་བྱེད་དུ་སྐྱེས་པའི་དབང་རྟེན་དྭངས་བ་དང་། དེ་ལ་བརྟེན་པའི་འོད་རྩ་དྭངས་བ་ནི་རྒྱང་ཞགས་ཆུའི་སྒྲོན་མའོ། །དེས་ཆོས་ཉིད་མངོན་སུམ་གྱི་སྣང་བ་མཐོང་བས་གྲུབ་མཐའ་འདོད་རྒྱལ་དུ་འཛིན་པ་ལས་བློ་བཟློག་སྟེ། དེ་ཡང་ཆོས་ཉིད་ནི། དངོས་པོ་གཤིས་ཀྱི་གནས་ལུགས་ངོ་བོ་ངོས་གཟུང་དང་བྲལ་བས་བདེན་པར་མ་གྲུབ། རང་བཞིན་ཡེ་ནས་རྣམ་དག་གི་ངང་དུ་རང་གསལ་བས་མེད་ཅེས་སྟོང་པ་ཆད་ཆད་མ་ཡིན་པས་རྟག་ཆད་ཀྱི་མཐའ་དང་བྲལ་ཞིང་མཐའ་བྲལ་ལས་ཀྱང་འདས་པའོ། །མངོན་སུམ་ནི་དེ་རྗེས་སུ་དཔག་མ་དགོས་པར་དབང་པོའི་སྤྱོད་ཡུལ་དུ་དངོས་སུ་མཇལ་བར་བྱར་ཡོད་པས་སོ། །སྣང་བཞིའི་མཁའ་ལ་རིག་པ་རྡོ་རྗེ་ལུ་གུ་རྒྱུད་དབྱིངས་རིག་དབྱེར་མི་ཕྱེད་ཚུལ་ཏེ། དེ་ཡང་ལུས་ངག་ཡིད་མི་བསྒུལ་བ་གསུམ་ལ་གཞི་བཅས། ཡུལ་ནམ་མཁར་རླུང་སེམས་འཕུལ་ཏེ། རིག་པ་རྡོ་རྗེ་ལུ་གུ་རྒྱུད་གསེར་གྱི་སྐུད་པ་ལྟ་བུ་བྲེང་ཆགས་འཁྱོག་མཚམས་ཐིག་ལེས་སྦྲེལ་བ་ལ་མིག་མི་བསྒུལ་བར་བསྡད་པས། ཐོག་མར་དཀར་ཟིང་ཟིང་བ་སྐར་མ་འཕྲོ་བ་ལྟ་བུ་ལས། ཐིག་ལེ་ཁ་དོག་ལྔ་ལྡན་རེ་རེ་བ་གསུམ་སྦྲེལ་གྱི་བར་མཐོང་སྟེ། དེའི་ཚེ་ལུས་རུ་སྦལ་འཁར་གཞོང་དུ་བཅུག་པ་དང་། སེམས་བྱ་རྙི་ལ་ཟིན་པ་ལྟ་བུར་འགྱུར་ཞིང་མངོན་པར་ཤེས་པ་དང་མི་རྟོག་པའི་ཏིང་ངེ་འཛིན་སྐྱེ་བ་ཡིན་ནོ། །གཉིས་པ་ནི། ཐིག་ལེ་འོད་ལྔའི་མུ་ཁྱུད་ཟླུམ་པོས་བསྐོར་བ་རང་གསལ་ཁ་དོག་དྭངས་པ་ནི་ཐིག་ལེ་སྟོང་པའི་སྒྲོན་མ་སྟེ། དེས་ཉམས་གོང་འཕེལ་དུ་མཐོང་བས་བདེ་བ་རང་རྒྱུད་དུ་འཛིན་པའི་སྣང་བ་ལས་བློ་བཟློག་སྟེ། དེ་ཡང་ཉམས་ནི་ཤེས་ཉམས་ལ་མི་བྱ་བར་སྣང་ཉམས་ལ་བྱ་སྟེ། ཡེ་ཤེས་ལྔའི་ཁ་དོག་གི་སྣང་བ་མཐོང་བས་འཁོར་བའི་ལས་ཀྱི་མཐའ་ཕྱིར་གཟུང་བ་ཡུལ་དུ་སྣང་བ་ལས་འདས་ལ། དབྱིངས་ཀྱི་སྣང་བ་མཐོང་བས་དེའི་སྟེང་དུ་འཛིན་པ་རྟོག་པའི་ཆའི་ཕྱེད་མེད་པ་སྟོང་ཆད་དུ་འཛིན་པ་ལོག་པས་འཁོར་བའི་ཆའི་སུམ་གཉིས་ལས་འདས་ལ། ཀུན་རྟོག་གཞི་གྲོལ་རང་སངས་སུ་དག་པའི་འཛིན་ཆའི་ཕྱེད་སྣང་བ་རང་མཚན་དུ་འཛིན་པ་ལོག་པས། གཟུང་འཛིན་གང་ཟག་དང་ཆོས་ཀྱི་བདག་མེད་རྟོགས་པ་ཞེས་བྱའོ། །གོང་འཕེལ་ནི་སྣང་བ་དེ་དག་ཇེ་བཀྲ་ཇེ་ལེགས་ཇེ་མང་ལ་སོང་བའོ། །སྣང་བ་ནི་རིག་པ་ཚད་ལ་མ་ཕེབས་ཀྱི་བར་དུ་ཤར་བ་ཐམས་ཅད་དོ། །དེ་ཡང་། ཆོས་ཉིད་ཀྱི་ཏིང་ངེ་འཛིན་ལ་མཉམ་པར་གཞག་པས་ཤེས་པ་འཕྲོ་བསྡུ་དང་བྲལ་ནས། རྣམ་པར་མི་རྟོག་པའི་ངང་ལ་ལྷན་གྱིས་གནས་པ་ངོ་བོ་ཀ་དག་གི་རིག་གདངས་ནམ་མཁར་གཏད་པས་སྐུ་དང་ཐིག་ལེ་ལ་སོགས་པར་སྣང་བ་རང་བཞིན་ལྷུན་གྲུབ་ཀྱི་གདངས་སོ། །དེའི་ཚེ་འཁྲུལ་པའི་སྣང་བ་འདི་ནུབ་ནས་དག་པ་ཡེ་ཤེས་འོད་ལྔའི་སྣང་བ་རྩིབས་ཤར་དང་གྱེན་བསྒྲེང་མདུང་རྩེའི་རྣམ་པ་དང་། རེ་ལྡེ། པདྨ་སྟོང་ལྡན། མཆོད་རྟེན་རིས། ཐིག་ལེ་མེ་ལོང་ཙམ་དང་། འཁར་གཞོང་ཙམ། ཕུབ་ཙམ། འོད་ཡུལ་གྲུ་ཙམ། གར་བལྟས་འོད་ཀྱི་འཇིག་རྟེན་དུ་འཆར་རོ། །ཚུལ་དེ་རིག་པ་ལ་ཉིན་མཚན་མེད་པར་སྣང་བས་ན་ལུས་ལ་གཉེར་མ་མེད་ཅིང་ཟས་སྐོམ་གྱི་སྣང་བ་མི་འཆར། རང་སྣང་ལ་འབྲལ་མི་ཕོད་པ་དང་། འཁྲུལ་པའི་གཏམ་མི་འབྱུང་། ནམ་མཁའ་ལ་དངོས་སུ་འགྲོ། ཐིག་ལེ་ཡུལ་ཁམས་ཙམ་མུ་ཁྱུད་ལྔ་ལྡན་གྱི་ར་བས་བསྐོར་བ་ཤར་ཚེ། སྔར་མི་ཤེས་པའི་ཆོས་ཤེས་ཤིང་། དགྲ་གཉེན་གྱི་འཁྲུལ་པ་ཞིག འདིའི་དུས་ཕྱི་སྣང་བ་སྡོད་པས་རྐྱེན་ངན་གྲོགས་སུ་ཤར། ནང་རིག་པ་སྡོད་པས་འཁྲུལ་པའི་རྒྱུ་དང་བྲལ། གསང་བ་རླུང་སེམས་སྡོད་པས་རྣམ་པར་རྟོག་པ་སྐྱེ་མི་སྲིད་དོ། །གསུམ་པ་ནི། མཐིང་ཁ་ལས། ལྔ་ལྡན་དུ་མཆེད་དེ་འོད་ལྔའི་མུ་ཁྱུད་ཟླུམ་པོ་ནང་ན་པད་འདབ་དང་བཅས་པ་ཟ་འོག་བེར་ཁྱིམ་ལྟར་སྣང་བ་སྟེ། རིག་པ་ལུ་གུ་རྒྱུད་གཟེར་འདེབས་པའི་ར་བར་བྱུང་བ་ནི་དབྱིངས་རྣམ་དག་གི་སྒྲོན་མ་སྟེ། དེས་རིག་པ་ཚད་ཕེབས་སུ་མཐོང་བ་མ་དག་པ་འཁྲུལ་པའི་སྣང་བ་ལས་བློ་བཟློག་སྟེ། རིག་པ་ནི། གཞི་འཛིན་ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་དང་། ཡུལ་གྱི་རིག་པ་སྟོང་གསལ་གང་དང་ཡང་དབྱེར་མི་ཕྱེད་པའོ། །ཚད་ནི་ཕྱི་སྣང་བ་ལ་དབང་ཐོབ་པས་སྣང་རྐྱེན་ཞིང་ཁམས་སུ་གྲོལ། ནང་སྒྱུ་ལུས་ལ་དབང་ཐོབ་པས་རང་ལུས་འོད་གསལ་དུ་གྲོལ། གསང་བ་རིག་པ་ལ་དབང་ཐོབ་པས་ལྔ་ལྡན་ལྷ་སྐུར་སྨིན་པའོ། །སྣང་བ་ནི་དེ་ལྟར་ཤར་བའི་ངང་ལ་གནས་པའོ། །དེ་ཡང་། ལྔ་ལྡན་འོད་ཀྱི་སྣང་བས་འཇིག་རྟེན་གྱི་ཁམས་ཀྱི་ས་རྡོ་རི་བྲག་གི་སྣང་བ་ཐམས་ཅད་ནུབ་ཅིང་མུ་ཁྱུད་ལྔ་ལྡན་གྱི་ཐིག་ལེ་འཆར། དེ་དག་རེའི་ནང་དུ་རྡོ་རྗེ་སེམས་དཔའ་ལ་སོགས་པའི་སྐུ་རྐྱང་པ་དང་། གྲོགས་རིགས་ལྔ་རེ་རེ་ལ་གཞན་བཞིས་བསྐོར་བ་དང་། ལྔ་ལྡན་འོད་ཀྱི་རིགས་ལྔས་སྟོང་གསུམ་གང་དུ་བལྟས་པ་ཐམས་ཅད་ཁེངས། རིག་པ་རྡོ་རྗེ་ལུ་གུ་རྒྱུད་འགུལ་བ་མ་ཡིན། དེའི་ཚེ་རང་གི་ལུས་ཀྱང་འོད་གསལ་ཟང་ཐལ་དུ་གྲོལ་ཏེ། རྡོས་བཅས་ཤ་ཁྲག་ཏུ་སྣང་བ་མེད་དོ། །འདིའི་དུས་ན་རིགས་ལྔའི་ཐུགས་ཀ་ནས་འོད་ཤིན་ཏུ་ཕྲ་བ་ཐག་པ་བསྒྲིལ་པ་ལྟ་བུ་རང་ལ་ཟུག་པ་དང་། དེ་བཞིན་གཤེགས་པའི་གཙོ་བོ་ལ་གཞན་རྣམས་བཞིས་བསྐོར་བ་རང་གི་སྙིང་གར་ཟུག་པ་ཡང་འབྱུང་ངོ་། །བཞི་པ་ནི། རྒྱང་ཞགས་ཐིག་ལེ་དབྱིངས་གསུམ་མ་བསྒུལ་བར་གཏད་པས། ནང་དུ་རང་རིག་དྭངས་སངས་ཕྱེད་པ་རང་གནས་ཀྱི་དགོངས་པ་ཀློང་རྡོལ་གྱི་ཤེས་རབ་དང་བཅས་པ་ནི་ཤེས་རབ་རང་བྱུང་གི་སྒྲོན་མ་སྟེ། དེས་ཆོས་ཉིད་ཟད་པའི་སྣང་བ་མཐོང་སྟེ་སྐུ་དང་ཡེ་ཤེས་སུ་ཞེན་པ་ལས་བློ་བཟློག་པའོ། །ཆོས་ཉིད་ནི་དངོས་པོའི་གནས་ལུགས་ཕྱིན་ཅི་མ་ལོག་པར་གནས་པ་དེའོ། །ཟད་པ་ནི་ལུས་སེམས་ཀྱི་སྤྲོས་པ་དང་གྲུབ་མཐའི་ཞེན་པ་ཀུན་ཟད་དེ་ཅིར་ཡང་གྲུབ་པ་མེད་པའོ། །སྣང་བ་ནི་སེམས་ཉིད་སྒྲིབ་བྲལ་གྱི་མཁར་ཐུགས་རྗེའི་ཡེ་ཤེས་ཀྱི་མཛད་པའི་སྤྲིན་རྒྱུན་མི་འཆད་པར་འཆར་བའོ། །དེ་ཡང་། རིག་པ་ཚད་ཕེབས་ཀྱི་སྣང་བ་རྫོགས་ནས་ཆོས་ཉིད་ཟད་པའི་སྣང་བ་ལ་ཇེ་ཐིམ་ཇེ་ཐིམ་དུ་གྱུར་ཏེ། ལུས་ཀྱང་རེས་སྣང་རེས་མི་སྣང་བ་ཙམ་དུ་འགྱུར་བས། སྐབས་སུ་རང་གི་ལག་པའི་སོར་མོ་འོད་དུ་སྣང་བ་དག་ཡིན་ནོ། །དེའི་ཚེ་ལུས་སེམས་གཉིས་མེད་འོད་ཀྱི་རང་བཞིན་དུ་འདྲེས་པས་ཐུགས་རྗེའི་ཟེར་ཐག་འདུས་ཏེ་རིགས་ལྔའི་ཐུགས་ཀར་ཐིམ་ནས་མཐར་ཕྱིན་མི་སློབ་པའི་ལམ་སངས་རྒྱས་ཀྱི་གཞི་གདོད་མའི་ཀུན་ཏུ་བཟང་པོའི་ཀློང་དུ་བྱང་ཆུབ་པར་ཉེ་བ་ཡིན་ནོ། །དེའི་དུས་ངོ་བོ་ཀ་དག་གི་སྣང་བ་མཐོང་དུ་ཉེ་བས། ཆོས་ཅན་དང་ཆོས་ཉིད་ཀྱི་སྤྲོས་པ་ཀུན་ཟད་སར་འཁྱོལ་བའོ། །འདིའི་དུས་ན་སྐྱེ་བ་ལ་རང་དབང་ཐོབ་པས་སེམས་ཅན་གྱི་དོན་བྱེད་པར་འདོད་ན། རང་གི་ལག་པའི་སོར་མོ་ལ་གཏད་ཅིང་བལྟས་པས་ཟད་པའི་སྣང་བ་རང་ལོག་སྟེ། སེམས་ཅན་གྱི་དོན་དུ་འཕོ་བ་ཆེན་པོའི་སྐུ་འཇིག་རྟེན་དུ་ཇི་སྲིད་གནས་ཀྱང་སྐྱེ་འཆི་མེད་པ་རྡོ་རྗེ་སྐུ་ཐོབ་པར་འགྱུར་རོ། །དེའི་ཚེ་གང་ལ་གཏད་པའི་དངོས་པོ་འཇུ་བར་ནུས་པ་དང་། བེམ་པོ་ལ་རིག་པ་བཅུག་ན་དེ་ཉིད་འགུལ་བ་དང་། སྐད་འབྱིན་པར་ནུས་པ་དང་། མི་ལུས་ཐོབ་པའི་སེམས་ཅན་སུམ་སྟོང་ལ་རང་གི་རིག་པ་བཅུག་ན་འབྱུང་བ་དག་ནས་དེ་ཉིད་དུ་སངས་རྒྱས་པར་འགྱུར་རོ། །རྟགས་འདི་དག་མ་རྫོགས་པར་གྲོལ་བ་ཐོབ་པ་ཡོད་དོ། །དང་པོའི་གཞི་ཆོས་ཉིད་མངོན་སུམ་དུ་མ་མཐོང་ན་ལྷག་མ་གསུམ་གྱི་འཆར་གཞི་མེད་པས་རྟེན་དང་བརྟེན་པའི་གཞིར་དང་པོ་ཆོས་ཉིད་མངོན་སུམ་གྱི་སྣང་བ་འཆར་བའོ། །དེ་ཉིད་ཤར་བས་ཆོས་ཐམས་ཅད་ཀྱི་དོན་མཐོང་བས་རང་བྱུང་གི་ཡེ་ཤེས་རང་ལས་རྙེད་པ་ཞེས་བྱའོ། །དེ་ནས་མངོན་སུམ་དེ་ཉམས་སུ་མ་མྱོང་ན་ཚིག་ཙམ་ལ་འབྲས་བུ་མི་འབྱུང་བ་ལས། དོན་ཉམས་སུ་མྱོང་བས་དེའི་ཉམས་གོང་འཕེལ་དུ་བྱུང་བའོ། །དེ་ལྟར་ཉམས་སྐྱེས་པའི་ཚད་བརྟན་པར་བྱེད་དགོས་ཏེ། མ་བརྟན་ན་ཉམས་ལ་ཐུག་པ་མེད་པས་ཆོས་ལ་ཟིན་པ་མེད་ཅིང་། འཚང་ལ་རྒྱ་རྒྱུ་མི་འབྱུང་བ་ལས། ཉམས་བརྟན་པའི་ཚད་ལ་ཕེབས་པས། རིག་པ་ཚད་ཕེབས་ཀྱི་སྣང་བ་བྱུང་བའོ། །རིག་པའི་སྣང་བ་ཚད་ལ་ཕེབས་ཀྱང་དེ་ལས་གཞན་དུ་མི་འགྱུར་ན་སྐུ་གསུམ་འབྲས་བུར་འདོད་པ་དང་ཁྱད་མེད་ལ། དངོས་སྣང་མཚན་མའི་ཆོས་ལ་དོན་གྱི་འབྲས་བུ་རེ་བ་ཐུན་མོང་བ་རྣམས་དང་ཁྱད་མེད་པ་ལས། སྣང་ཉམས་གཞི་ལ་ཐིམ་སྟེ། ཕྲ་རགས་ཀྱི་སྣང་འཛིན་ནུབ་ནས། ཀ་དག་ཆོས་ཟད་ལ་སྤྱོད་པས་ཆོས་ཉིད་ཟད་པའི་སྣང་བ་བྱུང་བའོ། །དེ་དག་ཀྱང་དང་པོ་སྤྲུལ་སྐུ། ཚད་ཕེབས་ལོངས་སྐུ། ཟད་པ་ཆོས་སྐུའི་སྣང་བ་ལམ་དུ་བྱས་པས་སྐུ་གསུམ་ལམ་སྣང་དུ་ཤར་བས་འབྲས་བུ་ཆོས་ཟད་ཀ་དག་གི་དབྱིངས་ལ་ཐུག་པའི་ཕྱིར། རང་སྣང་གི་རྩལ་སྐུ་གསུམ་རིག་པའི་ངང་དུ་ཐིམ་པས། རིག་པ་ཀ་དག་གི་འབྲས་བུ། རིག་པའི་དབྱིངས་ནས་གདོད་ཕྱིར་རང་རྩལ་སྐུ་གསུམ་ཤར་བས་དོན་བྱེད་པ་ཞེས་བྱའོ། །གཉིས་པ་འབྲིང་ཆོས་ཉིད་སྟོབས་སུ་བྱས་ནས་ཆོས་ཉིད་ཀྱི་བར་དོར་འཚང་རྒྱ་བའི་གདམས་ངག་ལ། རང་བཞིན་གནས་པའི་བར་དོར་ཤེས་བྱའི་དྲས་ཐག་བཅད་པ་ཐི་བ་ཚང་དུ་འཇུག་པ་ལྟ་བུའི་གདམས་ངག འཆི་ཀ་མའི་བར་དོ་ལ་མི་གསལ་བ་གསལ་འདེབས་པ་སྒེག་མོ་མེ་ལོང་བལྟ་བ་ལྟ་བུའི་གདམས་ངག ཆོས་ཉིད་བར་དོར་རང་སྣང་ལ་ཡིད་ཆེས་པ་བུ་མའི་པང་དུ་འཇུག་པ་ལྟ་བུའི་གདམས་ངག་གསུམ་ལས། དང་པོ་ནི། རང་བཞིན་གནས་པའི་བར་དོ་ལ་རྒྱུད་ལུང་མན་ངག་ཟབ་མོས་ཚིག་གི་སྒྲོ་འདོགས་བཅད། བསྒོམས་པས་དོན་རང་ཐོག་ཏུ་ཕབ་སྟེ། ཆོས་ཉིད་ཀྱི་ངང་དུ་ལ་བཟླ་བ་ནི། བྱ་ཐི་བར་རང་གི་ཚང་དུ་འཇུག་པ་ལྟ་བུའོ། །གཉིས་པ་ནི། ཕྱི་ནང་གི་འཆི་ལྟས་བརྟགས་ནས་འཆི་བ་བླུ་བའི་ཐབས་ལ་འབད། མ་སླུས་ན་གསང་བའི་འཆི་ལྟས། ས་ས་ལ་ཐིམ་པས་བག་བཞི་ས་ལ་ལྷུང་། ཤེས་པ་རྨུགས་སུ་འགྲོ །ཆུ་ཆུ་ལ་ཐིམ་པས་ཁ་སྣ་མིག་རྣ་བ་ནས་ཆུ་གློ་བུར་དུ་འབྱུང་ཞིང་བསྐམས། སོ་དྲེག་ཆགས། ཤེས་པ་ལང་ལོང་དུ་འགྲོ། མེ་མེ་ལ་ཐིམ་པས་དྲོད་སྡུད། མིག་གི་བཀྲག་ཤོར། ཤེས་པ་ནག་ཐིབས་འགྲོ །རླུང་རླུང་ལ་ཐིམ་པས་ཕྱི་དབུགས་རྒོད་ཅིང་རྩེགས་མ་མང་། ནང་དུ་ཤེས་པ་མི་གསལ། རླུང་རྣམ་ཤེས་ལ་ཐིམ་པས་ཕྱི་དབུགས་ཆད། ནང་དབུགས་ལུས་པའི་དུས་གྲོགས་མྱོང་བ་ཅན་གྱིས་སྨྱུག་མའི་དབུགས་ཆུས། སྐྱེས་པའི་གཡས། བུད་མེད་ཀྱི་རྣ་བ་གཡོན་པར་གཏད་ལ། ཁྱོད་རང་གི་ཤེས་པ་དག་པའི་སྣང་བ་ཆོས་ཉིད་ཀྱི་བར་དོ་ལ་འོད་དང་ཐིག་ལེ་སྐུའི་སྣང་བ་འཆར་བ་ཡིན་གྱི། དེ་རང་སྣང་དུ་ངོ་ཤེས་པར་གྱིས་ཤིག་ཅེས་ལན་གསུམ་དུ་བརྗོད་པར་བྱའོ། །གསུམ་པ་ལ་འཇུག་པ་ཚོམ་བུའི་སྣང་བ། གྲོལ་བ་ཡེ་ཤེས་ཀྱི་སྣང་བ། མཐར་ཕྱིན་པ་ལྷུན་གྲུབ་ཀྱི་སྣང་བ་གསུམ་ལས། དང་པོ་ནི། རྣམ་ཤེས་ནམ་མཁའ་ལ་ཐིམ་པའི་དུས་ལུས་རྡོས་བཅས་བེམ་སྟོང་དུ་ལིང་གིས་སོང་། དབུགས་བར་སྣང་ལ་བུན་གྱིས་ཡལ་ནས། རིག་པ་མེ་སྟག་ཡར་བའི་རྣམ་པ་ལྟར་ཆོས་ཉིད་བར་དོ་རང་སྣང་དུ་ཤར་བའི་ཚེ། ནམ་མཁའ་ལ་འོད་གསལ་ཐིམ་པ་ཞེས་བྱ་བ་སྣང་བ་ཐམས་ཅད་འོད་ལྔའི་རྣམ་པར་མེར་གྱིས་འཆར་ཞིང་། དེ་ནས་འོད་གསལ་ཟུང་འཇུག་ལ་ཐིམ་པའི་དུས་རང་གི་ལུས་འོད་དུ་གསལ་ཞིང་། སྣང་བ་ཐམས་ཅད་འོད་ཀྱི་སྐུ་རིགས་ལྔ་ཚོམས་སུ་སྦྲེལ་མ་བསམ་གྱིས་མི་ཁྱབ་པ་འཆར་ཞིང་དེའི་ཚེ་རང་གི་སྙིང་ག་ནས་འོད་ཀྱི་ཟེར་ཐག་ཚོམ་བུའི་ཐུགས་ཀར་འབྲེལ་ནས། ཚོམ་བུའི་སྣང་བ་ལ་སེམས་ཟིན་ཏེ། དེའི་ངང་གི་བསམ་གཏན་ལ་ཞག་ལྔར་གནས་པ་འབྱུང་ངོ་། །གཉིས་པ་ནི། ཟུང་འཇུག་ཡེ་ཤེས་ལ་ཐིམ་པའི་དུས་རང་གི་སྙིང་ག་ནས་འོད་ཟེར་དཀར་པོ་གཅིག་ཤར་བ་དེ་ལས་མཆེད་ནས། རང་གི་དབང་པོའི་ཡུལ་ཙམ་ཁ་དོག་དཀར་པོའི་སྣམ་བུ་ཤིན་ཏུ་གསལ་བའི་དཀྱིལ་དུ། ཤེལ་གྱི་མེ་ལོང་འདྲ་བའི་ཐིག་ལེ་དཀར་པོ་མཆོག་ཏུ་གསལ་བ་ཁ་དོག་བཞིའི་ཐིག་ལེ་ལས་བརྒྱན་པ་ནི་མེ་ལོང་ལྟ་བུའི་ཡེ་ཤེས་ཀྱི་རང་མདངས་དེའི་སྟེང་དུ་མཉམ་ཉིད་ཡེ་ཤེས་ཀྱི་རང་མདངས་སེར་པོ་དང་། སོར་རྟོག་གི་རང་མདངས་དམར་པོ་དང་། ཆོས་དབྱིངས་ཡེ་ཤེས་ཀྱི་སྔོན་པོ་སྟེ། ཡེ་ཤེས་བཞི་སྦྱོར་གྱི་སྣང་བ་ཞེས་བྱ་ལ། རང་ཤར་དུ་རང་ངོ་ཤེས་ན་རྡོ་རྗེ་སེམས་དཔའ་ཁོང་གསེང་གི་ལམ་སྟེ། དེ་ཉིད་དུ་ཕྱིར་མི་ལྡོག་པའི་གདེངས་ཐོབ་པ་ཡིན་ནོ། །གསུམ་པ་ནི། ཡེ་ཤེས་བཞིའི་སྣང་བ་ལ་རང་ཐིམ་པའི་སྐད་ཅིག་མ་ལ་སྣང་བ་སྟེང་འོག་ཕྱོགས་མཚམས་ཐམས་ཅད་དུ་འོད་ཀྱི་ཟླུམ་པོ། ལྗང་། སེར། དམར་དཀར་བའི་དབུས་མཐིང་ཁ་སྟོན་གནམ་དག་པ་ལྟ་བུ་ཕྱི་ནང་ཟང་ཐལ་བ། དབང་པོའི་སྤྱོད་ཡུལ་དུ་མི་གྱུར་བ་དེ་ཐམས་ཅད་དེ་ལྟར་སྣང་བ་ལྷུན་གྲུབ་ཡེ་ཤེས་རིན་པོ་ཆེའི་སྣང་བའམ། རིན་པོ་ཆེ་གསང་བའི་སྦུབས་ཞེས་བྱ། འདི་ལ་ཤར་ལུགས་བརྒྱད་སྐད་ཅིག་ལ་འབྱུང་སྟེ། ཐུགས་རྗེ་ལྟར་ཤར་བས་སེམས་ཅན་ཀུན་ལ་བརྩེ་བ། འོད་ལྟར་ཤར་བས་འཇིག་རྟེན་གྱི་ཁམས་ཁྱབ་པ། སྐུ་ལྟར་ཤར་བས་ཐམས་ཅད་ཡི་དམ་གྱི་ལྷར་སྣང་། ཡེ་ཤེས་ལྟར་ཤར་བས་སངས་རྒྱས་ཀྱི་ཞིང་ཁམས་མངོན་སུམ་དུ་གསལ། གཉིས་མེད་དུ་ཤར་བས་ཏིང་ངེ་འཛིན་དུ་གནས། མཐའ་གྲོལ་དུ་ཤར་བས་ཆོས་ཉིད་ཟང་ཐལ་དུ་རྟོགས། མ་དག་པ་འཁོར་བའི་སྒོ་ལྟར་ཤར་བས་འཁྲུལ་སྣང་གི་ཆོས་རྨི་ལམ་སྒྱུ་མར་མཐོང་། དག་པ་ཡེ་ཤེས་ཀྱི་སྒོ་ལྟར་ཤར་བས་ཇི་ལྟ་བ་ཇི་སྙེད་པའི་ཡེ་ཤེས་ཀྱི་མཁྱེན་པ་ཅི་རིགས་པ་འཆར་རོ། །འདིའི་དུས་རང་སྣང་ལ་ཡིད་ཆེས་པར་བྱས། ཏིང་ངེ་འཛིན་ལ་བློ་གནས་པས་ལྷུན་གྲུབ་ཡེ་ཤེས་རིན་པོ་ཆེའི་གདེང་རྙེད་པ་དེའི་ཚེ་མངོན་པར་ཤེས་པ་དྲུག་ཚན་རྣམས་འཆར་ཞིང་། ཐུགས་རྗེ་ཐུགས་རྗེ་ལ་ཐིམ་པ་ནས། མ་དག་པ་འཁོར་བའི་སྒོ། དག་པ་ཡེ་ཤེས་ཀྱི་སྒོ་ལ་ཐིམ་པའི་བར་གྱིས་ལྷུན་གྲུབ་ཀ་དག་ལ་ཐིམ་པ་ཞེས་བྱ་སྟེ། གདོད་མའི་ས་ལ་གྲོལ་བ་མཐར་ཕྱིན་པས། མི་བརྗེད་པའི་གཟུངས་དང་། རྒྱུན་གྱི་ཏིང་ངེ་འཛིན་ལ་སོགས་པ་ནས་སངས་རྒྱས་ཀྱི་ཡོན་ཏན་མ་ལུས་པ་ཐོབ་པར་འགྱུར་བ་ཡིན་ནོ། །གསུམ་པ་མཐའ་མ་མངལ་དུ་མི་གཏོང་བ་སྤྲུལ་པ་སྐུའི་ཞིང་ཁམས་སུ་དབུགས་དབྱུང་བའི་གདམས་ངག་ནི། སྲིད་པ་བར་དོར་རྨི་ལམ་ལྟ་བུ་ཞག་ཞེ་དགུ་གནས་པ་དེའི་ཚེ། གང་དུ་འགྲོ་བར་འདོད་པའི་ཡུལ་དེར་སྐད་ཅིག་གི་ཕྱིན་པ་དང་། གང་ལ་རྣམ་ཤེས་བཅུག་ཀྱང་ཚུད་པ་ལ་སོགས་པའི་ཡོན་ཏན་དང་མངོན་ཤེས་རྫུ་འཕྲུལ་ཐོགས་པ་མེད་པ་ཡོད་ཅིང་། བར་དོ་ནང་དང་ལྷ་མིག་དག་པས་མཐོང་ལ། སྔར་བས་དྲན་པ་བདུན་འགྱུར་གྱིས་གསལ་ཞིང་དབང་པོ་ཀུན་ཚང་བར་ཡོད་པས་ན། སྔོན་བླ་མ་དམ་པས་ངོ་སྤྲད་པའི་ཆོས་ཉིད་མངོན་སུམ་གྱི་དོན་ལ་ཅུང་ཟད་སྦྱངས་པའི་མཐུས། སྤྲུལ་སྐུའི་ཞིང་དེ་དྲན་པ་ཙམ་གྱིས་གོང་གི་བག་ཆགས་ཟད་ནས། གཉིད་སད་པ་ལྟར་སྲིད་པའི་བར་དོ་ལས་ཤར་ཕྱོགས་མངོན་པར་དགའ་བའི་ཞིང་དུ་པདྨའི་སྙིང་པོ་ལས་རྫུས་ནས་སྐྱེས་ཏེ། བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པའི་ཞལ་བལྟ་ཞིང་། ཆོས་ཉན་པ་ལོ་བརྒྱ་ཉི་ཤུ་རྩ་ལྔ་གནས་ནས། ཉོན་མོངས་པ་ཞེ་སྡང་གི་སྒྲིབ་པ་ཡོངས་སུ་སྦྱངས་ནས། ལྷོ་ཕྱོགས་དཔལ་དང་ལྡན་པ་རིན་ཆེན་འབྱུང་ལྡན་ལ་བརྒྱ་ཉི་ཤུ་རྩ་ལྔར་ཆོས་ཉན་ནས། ཉོན་མོངས་པ་གཏི་མུག་སྤངས། པདྨ་བརྩེགས་པར་སྣང་བ་མཐའ་ཡས་ལས་ལུང་བསྟན་པ་ཐོབ་ཅིང་། འདོད་ཆགས་ཀྱི་དྲི་མ་སྦྱངས། ལས་རབ་རྫོགས་པར་དོན་ཡོད་གྲུབ་པས་དབུགས་དབྱུང་། ཉོན་མོངས་པ་ང་རྒྱལ་ཕྲག་དོག་སྦྱངས། ཉོན་མོངས་པའི་དྲི་མ་བཅས་པ་མ་ལུས་པར་དག་སྟེ། མདུན་གྱི་ནམ་མཁའ་མི་ཕྱེད་བརྩེགས་པ་ལ་འཇིགས་པའི་དུར་ཁྲོད་མེ་རི་འབར་བར་ཁྲོ་བོའི་གཟུགས་སྣ་ཚོགས་འདུག་པར་མཐོང་ནས། སྐལ་བ་དང་ལྡན་པ་དེ་དེ་ཉིད་དུ་གྲོལ་བར་འགྱུར་རོ། །གསུམ་པ་གཏན་ལ་ཕབ་པའི་འབྲས་བུ་སྐུ་དང་ཡེ་ཤེས་ནི། ལམ་སྣང་བ་བཞི་འཆར་ཚུལ་ཡོངས་སུ་རྫོགས་པའི་ཚེ། སྣང་བའི་འཕེལ་དང་། ལུས་རྡོས་བཅས་དང་། སེམས་ཀྱི་སྤྲོས་པ་ཐམས་ཅད་ཟད་ནས་ལྷུན་གྲུབ་སྐུའི་སྣང་བའི་ངོ་བོ་ཀ་དག་ཏུ་གནས་པ་དེའི་ཐུགས་རྗེའི་ངོ་བོ་ཟེར་ཐག་ལ། ལུས་འོད་གསལ་དང་། སེམས་འོད་གསལ་གཉིས་འདྲེས་པ་སྟེ། འདུས་ནས་ཟེར་ཐག་ལྷུན་གྲུབ་གསུམ་འདུ་འབྲལ་མེད་པའི་ཐུགས་རྗེར་ཐིམ་པའི་ཚེ། གྲོལ་བའི་གདེངས་ཐོབ་ནས་མྱ་ངན་ལས་འདས་པ་ཞེས་བྱ་བ། ཆོས་སྐུ་ཀུན་ཏུ་བཟང་པོའི་དགོངས་པ་ལ་རང་གནས་པས། འོག་མིན་གནས་སུ་མངོན་པར་བྱང་ཆུབ་པའོ། །དེའི་ཚེ་ཞི་བ་དང་ཁྲོ་བོའི་ཞིང་ཁམས་ཐམས་ཅད་དུ་རང་གསལ་ཏེ། སྐུ་དང་ཡེ་ཤེས་འདུ་འབྲལ་མེད་པའི་ངང་ནས་ཐུགས་རྗེའི་མཛད་པ་རྒྱུན་མི་འཆད་པ་ཡིན་ནོ། །འདྲེན་བྱེད་རྣམས་ལ་བདུད་རྩིའི་རྦ་རླབས་ནི། །ཅི་ཡང་སྤྲོ་བ་པདྨའི་འབྱུང་གནས་གང་། །སྐྱེ་བར་བརྟེན་པའི་སྲེད་པ་ཡང་ཡང་དུ། །ལྡང་བར་གྱུར་དེ་པུཎྜྻ་རཱི་ཀའོ། །མཆོག་གི་གནས་སུ་བཀའ་དྲིན་མཛད་དེའི་གཏམ། །ཡང་དག་ཕུལ་གྱི་རྩེ་མོར་སོན་མཐོང་ནས། །བདག་དང་སྐལ་མཉམ་ཡིད་ཀྱི་ངལ་བསོའི་ཆེད། །ཁོ་བོས་ལེགས་བཤད་རིན་ཆེན་ཁྲི་འདི་བསྒྲུབས། །སྔོན་བྱོན་མཁས་རྣམས་སྤྲོས་པ་རྒྱ་ཆེ་བས། །དུས་ཀྱིས་སྐྱེ་བོ་རྣམས་ལ་མཁོ་མ་གྱུར། །དེ་ཕྱིར་ཉུང་ངུའི་ཚིག་གི་ཟབ་མོའི་གནད། །ཐམས་ཅད་འབྱེད་འདི་བདག་གི་སྐལ་བར་བབ། །རྫོགས་པ་ཆེན་པོ་ཡང་གསང་གི་ཐེག་པ་གྲུབ་པའི་ཞལ་ལས་ཇི་ལྟར་ཐོས་པ་བཞིན་པདྨ་དཀར་པོས། སྣུབས་ཀྱི་སྔགས་འཆང་མཁྱེན་རབ་རྒྱ་མཚོས་ཀྱང་བསྐུལ་བས། ལྷོ་བྲག་མཁར་ཆུ་རིན་པོ་ཆེའི་གླིང་ནོར་བུ་སྤུངས་པའི་གཞལ་མེད་ཀྱི་ཁང་དུ་སྦྱར་བ་རྫོགས་སོ།། །།བཀྲིས།། ། |