གཞུང་འགྲེལ་བརྒལ་ལན་གྱི་སྐོར་ཚོ།
ཤེར་ཕྱིན་མངོན་རྟོགས་རྒྱན་གྱི་སྤྱི་དོན་བྱམས་མགོན་དགོངས་པའི་གསལ་བྱེད་བླ་མ་བརྒྱུད་པའི་ཞལ་ལུང་།
༄༅།།ཤེར་ཕྱིན་མངོན་རྟོགས་རྒྱན་གྱི་སྤྱི་དོན་བྱམས་མགོན་དགོངས་པའི་གསལ་བྱེད་བླ་མ་བརྒྱུད་པའི་ཞལ་ལུང་བཞུགས་སོ།། ཨོཾ་སྭ་སྟི། ཚོགས་གཉིས་གསེར་སྦྱངས་ལས་གྲུབ་མཚན་དཔེའི་སྐུ། །མཁྱེན་བརྩེའི་འོད་ཟེར་སྟོང་གི་དྲྭ་བ་ཅན། །སྲིད་པ་གསུམ་ན་མཚུངས་མེད་ཤཱཀྱའི་རྒྱལ། །སྐལ་བཟང་རྣམ་འདྲེན་བཞི་པས་དགེ་ལེགས་སྩོལ། །འོད་མཚན་སྟོང་འབར་རྒྱལ་བའི་གསང་གསུམ་འཕྲུལ། །སུནྡྷིའི་པད་མཚོར་འཆི་མེད་རྡོ་རྗེའི་སྐུར། །ཡོངས་བཞེངས་རྒྱལ་དབང་པདྨ་སམ་བྷ་བའི། །ཞབས་སེན་ནོར་བུའི་ཕྲེང་བ་གཙུག་ཏུ་མཆོད། །བཀྲ་ཤིས་སྲིད་པ་གསུམ་ན་སྙན་པའི་དབྱངས། །ཚངས་སོགས་ཆེ་རྒུའི་རྣ་བའི་རྒྱན་གྱུར་པ། །མཉམ་མེད་ཐུབ་པ་ཆེན་པོའི་གསུང་གི་ཕུལ། །ཞི་བསིལ་བདུད་རྩིའི་དཔལ་དེས་རིང་དུ་སྐྱོངས། །ཟབ་རྒྱས་ཆོས་ཚུལ་རྒྱ་མཚོའི་སྙིང་པོའི་བཅུད། །རྒྱལ་སྲས་སེམས་དཔའ་ཆེ་རྣམས་འཇུག་པའི་ངོགས། །དུས་གསུམ་རྒྱལ་བ་ཀུན་གྱིས་གཤེགས་པའི་ཤུལ། །ཤེས་རབ་ཕ་རོལ་ཕྱིན་པའི་ལམ་ཆེན་པོ། །རྒྱལ་བའི་རྒྱལ་ཚབ་རྒྱལ་སྲས་མི་ཕམ་པས། །ལེགས་བཤད་ངོ་མཚར་རྒྱ་ཆེན་སྤྱོད་པའི་སྲོལ། །ཤིང་རྟ་ཆེན་པོའི་གཞུང་ལུགས་རྒྱ་མཚོ་ལས། །སྙིང་པོར་དྲིལ་བའི་གཏམ་གྱི་དགའ་སྟོན་སྤྲོ། །ཞེས་ཚིགས་སུ་བཅད་པ་ཉུང་ངུས་མདུན་བསུས་ནས་འདིར་འཕགས་བཞིའི་བསྐྱེད་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་སྦས་དོན་མངོན་རྟོགས་ཀྱི་རིམ་པ་གཏན་ལ་འབེབས་པའི་མན་ངག་མགོན་པོ་བྱམས་པས་མཛད་པའི་བསྡུས་དོན་ནི། སྟོན་པ་ཕུན་སུམ་ཚོགས་པ་བདག་ཅག་གི་སྟོན་པ་སྐལ་བཟང་རྣམ་འདྲེན་བཞི་པས། གནས་ཕུན་སུམ་ཚོགས་པ་རྒྱལ་པོའི་ཁབ་ཀྱི་བྱ་རྒོད་སྤུང་པའི་རི་བོར། འཁོར་ཕུན་སུམ་ཚོགས་པ་ཤེས་རབ་ནམ་མཁའ་དང་མཉམ་པ། སྙིང་རྗེ་ཆུ་ཀླུང་དང་མཚུངས་པའི་ཐེག་པ་ཆེན་པོའི་རིགས་ཅན་ཤ་སྟག་ལ། དུས་ཕུན་སུམ་ཚོགས་པ་གདུལ་བྱའི་འཁོར་ཉེ་བར་འདུས་ཤིང་དུས་ལ་བབ་པ་ན། ཆོས་ཕུན་སུམ་ཚོགས་པ། བཀའ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ། རྒྱས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ། འབྲིང་པོ་སྟོང་ཕྲག་ཉི་ཤུ་ལྔ་པ། བསྡུས་པ་སྟོང་ཕྲག་བརྒྱད་པ་སོགས་ཀྱིས་བརྗོད་བྱའི་དོན་ཟབ་པ་དང་རྒྱ་ཆེ་བའི་ཕྱོགས་གཉིས་ལས། དངོས་བསྟན་སྟོང་ཉིད་ཀྱི་དོན་རྣམས་ཤིང་རྟ་ཆེན་པོ་དཔལ་མགོན་འཕགས་པ་ཀླུ་སྒྲུབ་ཀྱིས་དབུ་མ་རིག་ཚོགས་སུ་གཏན་ལ་ཕབ་པ་ཟབ་མོ་ལྟ་བའི་སྲོལ་དང་། སྦས་དོན་མངོན་རྟོགས་ཀྱི་རིམ་པ་རྣམས་རྒྱལ་ཚབ་མི་ཕམ་པས་བསྟན་བཅོས་མངོན་རྟོགས་རྒྱན་གྱིས་གསལ་བར་མཛད་པ་རྒྱ་ཆེན་སྤྱོད་པའི་སྲོལ་གཉིས་ལས་འདིར་ཕྱི་མ་སྟེ། དུས་གསུམ་གྱི་རྒྱལ་བ་ཐམས་ཅད་གཤེགས་པའི་ཤུལ། རྒྱལ་སྲས་བྱང་ཆུབ་སེམས་དཔའ་རྣམས་ཀྱི་བསྒྲོད་པ་གཅིག་པའི་ལམ། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འདི་ཉིད་ཀྱི་སྤྱི་དོན་མདོ་ཙམ་འཆད་པའི་དབང་དུ་བྱས་ན། རྗོད་བྱེད་དོན་ལྡན་གྱི་མཚན་དང་། བརྗོད་བྱ་དེ་ལྡན་གྱི་གཞུང་། གང་གིས་བསྒྱུར་བའི་འགྱུར་བྱང་དང་གསུམ་ལས། དང་པོ་ལ་དངོས་དང་། འགྱུར་ཕྱག་གཉིས་ལས། དང་པོ་ནི། རྒྱ་གར་སྐད་དུ། ཨ་བྷི་ས་མ་ཡ་སོགས་ནས། ཤཱསཏྲ་ཞེས་པ་སྟེ། འདུལ་བའི་ཚིག་ལེའུར་བྱས་པ་ལས། མཉན་ཡོད་གནས་བཅས་ཙམ་པ་ཀ །ཝ་ར་ཎཱ་སི་ཡངས་པ་ཅན། །རྒྱལ་པོའི་ཁབ་ནི་དྲུག་པོ་སྟེ། །འདི་དྲུག་གྲོང་ཁྱེར་ཆེན་པོར་ཤེས། །ཞེས་པ་ལྟར། གྲོང་ཁྱེར་ཆེན་པོ་དྲུག་ཡོད་པའི་ཕྱོགས་ལ་རྒྱ་གར་འཕགས་བའི་ཡུལ་ཞེས་བྱ་སྟེ། ཡུལ་དེ་རྣམས་ཀྱི་སྐད་དུ་བསྟན་བཅོས་འདིའི་མཚན་ལ་དེ་སྐད་ཅེས་ཟེར། དེ་བོད་སྐད་དུ་བསྒྱུར་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སོགས། རྒྱན་ཅེས་བྱ་བ་སྟེ། དེ་ལྟར་སྐད་གཉིས་ཤན་སྦྱར་གྱི་སྒོ་ནས་མཚན་སྨྲོས་ན། ཆོས་ལ་ཡིད་ཆེས་སྐྱེ། སྐད་ལ་བག་ཆགས་འཇོག །རྒྱུད་ལ་བྱིན་རླབས་འབྱུང་བའི་དགོས་པ་ཡོད་དོ། །འགྱུར་ཕྱག་ནི། སངས་རྒྱས་དང་སོགས། འཚལ་ལོ། །ཞེས་པ་སྟེ། དེ་ནི་མངའ་བདག་ཁྲི་རལ་པ་ཅན་གྱི་དུས་དུ་བཀས་བཅད་པའི་སྡེ་སྣོད་ངོས་འཛིན་གྱི་ཕྱག་ཅེས་བྱ་སྟེ། ལོ་ཙཱ་བ་རྣམས་ཀྱིས་འགྱུར་ལ་བར་ཆད་མེད་ཅིང་མཐར་ཕྱིན་པའི་དོན་དུ་སྦྱར་བ་ཡིན། གཉིས་པ་གཞུང་གི་དོན་ལ། བཤད་པ་ལ་འཇུག་པའི་ཡན་ལག བཤད་བྱ་གཞུང་གི་རང་བཞིན། བཤད་པ་མཐར་ཕྱིན་པའི་ཚུལ་དང་གསུམ་ལས། དང་པོ་ལ་ཡང་། གདུལ་བྱ་དང་བ་བསྐྱེད་པའི་ཡན་ལག་མཆོད་པར་བརྗོད་པ་དང་། མཁས་པ་བསྟན་བཅོས་ལ་འཇུག་པའི་ཡན་ལག་དགོས་འདྲེལ་བསྟན་པ་གཉིས་ལས། དང་པོ་ནི། བསྟན་བཅོས་མཛད་པའི་ཐོག་མར། རང་དོན་དུ་སྐྱེས་བུ་དམ་པ་རྣམས་ཀྱི་སྤྱོད་པ་དང་མཐུན་པར་བསྟན་པ་དང་། གཞན་དོན་གདུལ་བྱ་དང་བ་བསྐྱེད་ནས་ཐོས་བསམ་སྒོམ་པའི་ཤེས་རབ་རིམ་གྱིས་བསྐྱེད་ནས་མཐར་བྱང་ཆུབ་ཐོབ་པའི་དོན་དུ། རྗེ་བཙུན་བྱམས་པས་བསྟན་བཅོས་ཀྱི་བརྗོད་བྱ་མཁྱེན་པ་གསུམ་དུ་བསྡུས་ནས། དེ་ལ་ཕྱག་མཛད་པ་ནི། ཉན་ཐོས་ཞི་བ་འཚོ་ལ་སོགས་ཡུམ་དེ་ལ་ཕྱག་འཚལ། ཞེས་པ་སྟེ། ཉན་རང་ཐེག་དམན་གྱི་གང་ཟག་རང་དོན་ཞི་བདེ་གཉེར་བ་རྣམས། ཉོན་མོངས་དང་སྡུག་བསྔལ་ཉེ་བར་ཞི་བ་མྱ་ངན་ལས་འདས་པའི་དབྱིངས་སུ་འཁྲིད་པར་མཛད་པའི་གཞི་ཤེས་དང་། འགྲོ་ལ་ཕན་པར་མཛད་པའི་རྒྱལ་སྲས་བྱང་ཆུབ་སེམས་དཔའ་རྣམས་ཀྱིས་འཇིག་རྟེན་པ་ཐམས་ཅད་ཀྱི་གནས་སྐབས་མངོན་མཐོ་དང་། མཐར་ཐུག་གི་དོན་ངེས་ལེགས་བྱང་ཆུབ་གསུམ་གྱི་གོ་འཕང་སྐལ་བ་དང་འཚམས་པར་སྒྲུབ་པར་མཛད་པའི་ལམ་ཤེས་དང་། ཐུབ་པ་སངས་རྒྱས་བཅོམ་ལྡན་འདས་རྣམས་ཀྱིས་བརྗོད་བྱ་རྟོགས་པའི་ཆོས་ཀྱི་རྣམ་པ་ཀུན་དང་ལྡན་པའི། བརྗོད་བྱེད་ལུང་གི་ཆོས་དྲང་ངེས་སྣ་ཚོགས་པ་འདི་རྣམས་གསུང་པར་མཛད་པའི་རྣམ་མཁྱེན་ཏེ། ཉན་རང་བྱང་ཆུབ་སེམས་དཔའ་རྫོགས་པའི་སངས་རྒྱས་དང་བཅས་པའི་འཕགས་པ་བཞིའི་ཡུམ་དུ་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་ཕྱག་འཚལ་ལོ། །ཞེས་གསུངས། གཉིས་པ་དགོས་འདྲེལ་བསྟན་པའི་སྒོ་ནས་ཤུགས་ཀྱིས་བརྩམ་པར་དམ་བཅའ་བ་ནི། སྟོན་པས་འདི་ལས་སོགས། རྩོམ་པའི་དགོས་པ་ཡིན། །ཞེས་གསུངས་ཏེ། མཆོད་པར་བརྗོད་པའི་འོག་ཏུ། ཤེས་རབ་དམན་པའི་གང་ཟག་རྣམས་ཀྱིས། བསྟན་བཅོས་མངོན་པར་རྟོགས་པའི་རྒྱན་འདི་ལ། བརྗོད་བྱ་དང་། དགོས་པ་དང་། ཉིང་དགོས་དང་འདྲེལ་བ་མེད་དོ་སྙམ་པའི་དོགས་པ་བཅད་ནས། དེ་བཞི་ཡོད་པའི་ངེས་ཤེས་སམ། ཡོད་ལས་ཆེ་སྙམ་པའི་དོན་འགྱུར་གྱི་ཐེ་ཚོམ་བསྐྱེད་ནས་བསྟན་བཅོས་ལ་འཇུག་པའི་ཕྱིར་ཐོག་མར་བརྗོད་བྱ་བསྟན་ཏེ། སྟོན་པ་རྫོགས་པའི་སངས་རྒྱས་ཀྱིས། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་བཤད་པ་གང་ཡིན་པའི། ཡུལ་མཁྱེན་པ་གསུམ། རྒྱུ་སྦྱོར་བ་བཞི། འབྲས་བུ་ཆོས་ཀྱི་སྐུ་སྟེ་སྐབས་བརྒྱད་ཀྱིས་བསྟན་པའི་ལམ་འབྲས་བུ་དང་བཅས་པའོ། །གཉིས་པ་ཉིང་དགོས་མཐར་ཐུག་ནི། རྒྱལ་སྲས་བྱང་ཆུབ་སེམས་དཔའ་རྣམས་ལས་གཞན་གྱིས་མྱོང་བ་སྟེ་ཐོབ་པར་ནུས་པ་མ་ཡིན་པ་རྣམ་པ་ཐམས་ཅད་མཁྱེན་པའི་སངས་རྒྱས་ཉིད་ཡིན་ལ། དེ་ནི་བྱང་སེམས་རྣམས་ཀྱི་བྱང་ཆུབ་ཀྱི་སེམས་དང་ཆོས་སྒྲུབ་པའི་སྤྱོད་པ་ཕར་ཕྱིན་བཅུའི་བདག་ཉིད་ཅན་གྱི་ཤེར་ཕྱིན་གྱི་མདོ་ཡི་དོན་དྲན་པ་ལ་བཞག་ནས་འཐོབ་དགོས་པར་བསྟན། གསུམ་པ་དགོས་པ་ནི། མདོའི་དོན་རྣམས་ཚེགས་མེད་པར་བདེ་བླག་ཏུ་རྟོགས་པར་བྱེད་པ་ནི་བསྟན་བཅོས་འདི་ཉིད་བརྩམ་པའི་དགོས་པ་ཡིན་པར་བཤད། བཞི་པ་འདྲེལ་པ་ནི་ཤུགས་ལ་བསྟན་ཏེ། བསྟན་བཅོས་འདི་ལ་བརྟེན་ནས། མདོའི་དོན་རྟོགས་ཏེ། ཚུལ་བཞིན་བསྒྲུབ་པས་རྣམ་མཁྱེན་སངས་རྒྱས་ཀྱི་གོ་འཕང་ཐོབ་པར་འགྱུར་བས་སོ། །གསུམ་པ་བཤད་བྱ་གཞུང་གི་རང་བཞིན་ལ་གདུལ་བྱའི་གང་ཟག་རྒྱས་པ་ལ་མོས་པ་རྣམས་ལ་མངོན་རྟོགས་བརྒྱད་དུ་ཕྱེ་ནས་བཤད་པ། འབྲིང་པོ་ལ་མོས་པ་རྣམས་ལ་དྲུག་ཏུ་བཤད་པ། བསྡུས་པ་ལ་མོས་པ་རྣམས་ལ་གསུམ་དུ་བསྡུས་ནས་བཤད་པ་གསུམ་ལས། འདིར་དང་པོ་ལ། ལུས་རྣམ་པར་བཞག་པ་དང་། ཡན་ལག་རྒྱས་པར་བཤད་པ་གཉིས་ལས། འདིར་ལུས་རྣམ་པར་བཞག་པ་ཙམ་ཞིག་བཤད་པ་ལ། སྐབས་བརྒྱད་དུ་ཕྱེ་བའི་སྒོ་ནས་མདོར་བསྟན་པ་དང་། དོན་བདུན་ཅུར་ཕྱེ་བའི་སྒོ་ནས་རྒྱས་པར་བཤད་པ་གཉིས་ཀྱི་སྒོ་ནས་བསྟན་བཅོས་ཀྱི་ལུས་རྣམ་པར་བཞག་སྟེ་བསྟན་ན། ཕྱིས་རྒྱས་བཤད་ཀྱི་དུས་སུ། དོན་ཚན་རྣམས་མི་འཁྲུགས་པར། འཆད་པ་པོས་འཆད་བདེ་ཞིང་། ཉན་པ་པོས་གོ་སླ་བའི་དགོས་པ་ཡོད་པའི་ཕྱིར་དེ་ལྟར་བཤད་དོ། །དེ་ལ་དང་པོ་སྐབས་བརྒྱད་དུ་ཕྱེ་བ་དེ་ཡང་ཚིགས་སུ་བཅད་པ་བཅོ་ལྔས་སྟོན་པ་ལས་ཐོག་མར། ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །ཅེས་གསུངས་ཏེ། ཤེས་རབ་ཀྱི་ཕ་རོལ་ཕྱིན་པའི་མདོའི་དོན་དངོས་པོ་བརྒྱད་དུ་ཕྱེ་ནས་བཤད་ན། རྗོད་བྱེད་གཞུང་ཤེར་ཕྱིན་ཀྱི་དོན། བརྗོད་བྱ་ལམ་དང་འབྲས་བུའི་ཤེར་ཕྱིན་མ་ལུས་པ་མཐའ་དག་ཡང་དག་པར་ཕྱིན་ཅི་མ་ལོག་པར་བཤད་པར་འགྱུར་བས་དེ་ལྟར་བཤད་དགོས་སོ་ཞེས་གསུངས། དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་གཞི་ནི། ཐེག་ཆེན་འཕགས་ལམ་གསུམ་གྱིས་ཆོས་ཐམས་ཅད་རང་བཞིན་མེད་པར་རྟོགས་པའི་སྒོམ་བྱུང་གི་ཤེས་རབ། མཚན་ཉིད་ནི། ཆོས་ཉིད་སྤྲོས་བྲལ་མངོན་སུམ་དུ་རྟོགས་པའི་མཁྱེན་པ་གང་ཞིག་མི་གནས་པའི་མྱང་འདས་སུ་ཕྱིན་པའམ་ཕྱིན་བྱེད་དེ། སྡུད་པ་ལས། ཆོས་རྣམས་རང་བཞིན་མེད་པ་ཡོངས་སུ་ཤེས་གྱུར་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་གསུངས། དེ་ལྟར་ན་སློབ་དཔོན་ཕྱོགས་ཀྱི་གླང་པོས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དེ་དང་ལྡན་པས། །གཞུང་དང་ལམ་ལ་དེ་སྒྲས་བསྟན། །ཞེས་པ་ལྟར། སངས་རྒྱས་དང་། བྱང་སེམས་འཕགས་པའི་མཉམ་བཞག་གིས་བསྡུས་པའི་རྣམ་པར་མི་རྟོག་པའི་ཡེ་ཤེས་ནི་གཙོ་བོ་དང་། རྗེས་ཐོབ་ཀྱི་ཆ་རྣམས་ཤེར་ཕྱིན་ཕལ་པ་སྟེ་མཚན་ཉིད་པ་ཡིན་ལ། མོས་སྤྱོད་ཀྱི་ལམ་དང་གཞུང་ཤེར་ཕྱིན་རྣམས་བཏགས་པ་བ་ཡིན། ས་མཚམས་ནི། ཐེག་ཆེན་མཐོང་ལམ་ནས། སངས་རྒྱས་ཀྱི་སའི་བར་དུ་ཡོད་པ་ཡིན་ནོ། །ངེས་ཚིག་ནི། མདོ་སྡེ་རྒྱན་ལས། དོན་དམ་ཤེས་པའི་ཕྱིར་བཤད་དོ། །ཞེས་པ་ལྟར་སྟོང་ཉིད་ལ་དམིགས་པའི་ཤེས་པ་ནི་ཤེས་པའི་རབ་སྟེ། སྲིད་ཞིའི་ཕ་རོལ་ཏུ་ཕྱིན་པར་བྱེད་པས་སོ། །དེ་ལ། མངོན་རྟོགས་བརྒྱད། དངོས་པོ་བརྒྱད། སྐབས་བརྒྱད་ཅེས་པ་རྣམས་ཀྱི་ཁྱད་པར་ནི། དོན་བསྡུས་སྒྲོན་མེར། མངོན་རྟོགས་ཤེས་རྒྱུད་རིམ་པ་སྟེ། །དངོས་པོ་བརྒྱད་ནི་བརྗོད་བྱ་ལ། །སྐབས་ནི་བརྗོད་བྱེད་ཤཱནྟི་གསུང་། །ཞེས་པ་ལྟར། མངོན་རྟོགས་ནི་གང་ཟག་གི་ཤེས་རྒྱུད་ལ་སྐྱེ་ཚུལ་དང་། དངོས་པོ་ནི་བརྗོད་བྱ་དོན་གྱི་དབང་དུ་བྱས་པ་དང་། སྐབས་ནི་རྗོད་བྱེད་ཚིག་གི་དབང་དུ་བྱས་པ་ཡིན་པར་གསུངས། འོ་ན་དངོས་པོ་བརྒྱད་པོ་གང་ཡིན་ཞེ་ན། །རྣམ་ཀུན་མཁྱེན་ཉིད་ལམ་ཤེས་ཉིད། །དེ་ནས་ཐམས་ཅད་ཤེས་པ་ཉིད། །རྣམ་ཀུན་མངོན་རྫོགས་རྟོགས་པ་དང་། །རྩེ་མོར་ཕྱིན་དང་མཐར་གྱིས་པ། །སྐད་ཅིག་གཅིག་མངོན་རྫོགས་བྱང་ཆུབ། །ཆོས་ཀྱི་སྐུ་དང་དེ་རྣམ་བརྒྱད། །ཅེས་པ་ལྟར་བརྒྱད་དུ་ཡོད་པ་རྣམས་ཀྱི་མཚན་ཉིད་རིམ་པ་བཞིན་འདི་ལྟར་ཡིན་ཏེ། ཇི་ལྟ་ཇི་སྙེད་ཀྱིས་བསྡུས་པའི་ཤེས་བྱའི་རྣམ་པ་ཐམས་ཅད་དུས་སྐད་ཅིག་མ་གཅིག་ལ་རྟོག་མེད་མངོན་སུམ་དུ་མཁྱེན་པ་དེ་དང་པོ་རྣམ་མཁྱེན་གྱི་མཚན་ཉིད། དབྱེ་ན་ཇི་ལྟ་ཇི་སྙེད་ཀྱི་རྣམ་མཁྱེན་གཉིས་ཡོད། ཐེག་པ་གསུམ་གྱི་ལམ་མཐའ་དག་རང་བཞིན་མེད་པའི་ཚུལ་དུ་རྟོགས་ཤིང་། རྫོགས་སྨིན་སྦྱང་གསུམ་གྱི་སྒོ་ནས་ཡང་དག་པའི་མཐའ་མངོན་དུ་བྱེད་པའི་སློབ་ལམ་པའི་མཁྱེན་པ་དེ་གཉིས་པ་ལམ་ཤེས་ཀྱི་མཚན་ཉིད། དབྱེ་ན་ཐེག་གསུམ་གྱི་ལམ་ཤེས་པའི་ལམ་ཤེས་གསུམ་ཡོད། གཞི་ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་ཐམས་ཅད་གང་ཟག་གི་བདག་གིས་སྟོང་པར་རྟོགས་པའི་ཉི་ཚེ་བའི་མཁྱེན་པ་དེ་གསུམ་པ་གཞི་ཤེས་ཀྱི་མཚན་ཉིད། དབྱེ་ན་ཉན་ཐོས་དང་རང་རྒྱལ་གྱི་གཞི་ཤེས་གཉིས་ཡོད། མཁྱེན་གསུམ་གྱི་རྟོགས་པ་ལ་རང་དབང་ཐོབ་པར་བྱ་བའི་ཕྱིར། གཞི་ལམ་རྣམ་གསུམ་སྐྱེ་མེད་སྤྲོས་པ་དང་བྲལ་བའི་རང་བཞིན་དུ་བསྡུས་ཏེ་སྒོམ་པའི་སེམས་དཔའི་རྣལ་འབྱོར་དེ་བཞི་པ་རྣམ་ཀུན་མངོན་རྫོགས་རྟོགས་པའི་མཚན་ཉིད། དབྱེ་ན་མི་གནས་པའི་སྦྱོར་བ་དང་། མི་སྦྱོར་བའི་སྦྱོར་བ། ཟབ་པའི་སྦྱོར་བ་སོགས་སྦྱོར་བ་ཉི་ཤུ་ཡོད། རྣམ་རྫོགས་སྦྱོར་བ་ལ་བརྟེན་ནས་སྐྱེ་མེད་གསུམ་བསྡུས་ཏེ་སྒོམ་པ་ལ་རང་དབང་དུ་གྱུར་པའི་སེམས་དཔའི་རྣལ་འབྱོར་དེ་ལྔ་པ་རྩེ་མོར་ཕྱིན་པའི་སྦྱོར་བའི་མཚན་ཉིད། དབྱེ་ན་སྦྱོར་ལམ་དྲོད་རྩེ་སོགས་བདུན་ཡོད། མཁྱེན་པ་གསུམ་གྱི་ཤེས་པའི་རྣམ་པ་ཐམས་ཅད་གཅིག་ཆར་དུ་སྐྱེ་བའི་རྟོགས་པ་བརྟན་པོར་བྱ་བའི་ཕྱིར་མཁྱེན་གསུམ་གྱི་རྣམ་པ་རྣམས་རིམ་གྱིས་སྒོམ་པའི་སེམས་དཔའི་རྣལ་འབྱོར་དེ་དྲུག་པ་མཐར་གྱིས་པའི་སྦྱོར་བའི་མཚན་ཉིད། དབྱེ་ན་སྦྱིན་པའི་ཕར་ཕྱིན་གྱི་མཐར་གྱིས་པ་སོགས་བཅུ་གསུམ་ཡོད། མཁྱེན་གསུམ་རིམ་གྱིས་སྒོམ་པ་མཐར་ཐུག་པའི་སེམས་དཔའི་རྣལ་འབྱོར་དེ་བདུན་པ་སྐད་ཅིག་མ་གཅིག་གིས་མངོན་པར་རྫོགས་པར་བྱང་ཆུབ་པའི་སྦྱོར་བའི་མཚན་ཉིད། དབྱེ་ན་རྣམ་པར་སྨིན་པ་མིན་པའི་ཆོས་ཐམས་ཅད་སྐད་ཅིག་ལ་རྟོགས་པ་སོགས་བཞི་ཡོད། སྦྱོར་བ་བསྒོམ་པའི་འབྲས་བུ་མཐར་ཐུག་པ་ཟག་མེད་ཀྱི་ཡན་ལག་དུ་མ་དང་ལྡན་པ་དེ། བརྒྱད་པ་ཆོས་ཀྱི་སྐུའི་མཚན་ཉིད་ཡིན་ཏེ། བདེན་གཉིས་ལས། ཆོས་རྣམས་ཀུན་གྱི་ལུས་ཡིན་ཕྱིར། །ཡོན་ཏན་བསམ་ཡས་ཀུན་རྟེན་ཕྱིར། །རིགས་པའི་རྗེས་འབྲང་ངོ་བོའི་ཕྱིར། །སྐྱོབས་པ་རྣམས་ཀྱི་ཆོས་སྐུ་ཡིན། །ཞེས་སོ། །དབྱེ་ན་ངོ་བོ་ཉིད་ཀྱི་སྐུ་སོགས་བཞི་ཡོད་དོ། །དེ་ལྟར་ན། ཤེར་ཕྱིན་གྱི་མདོའི་བརྗོད་བྱའི་དངོས་པོའམ། མངོན་པར་རྟོགས་པ་ནི་བརྒྱད་པོ་འདི་ལས་མང་མི་དགོས་ཤིང་ཉུང་ན་མི་འདུ་བས་གྲངས་ངེས་པ་ཡིན་ནོ། །འོ་ན་གྲངས་བརྒྱད་དུ་ངེས་པའི་རྒྱུ་མཚན་ཅི་ཞེ་ན། གང་ཟག་གཅིག་འཚང་རྒྱ་བ་ལ། ཤེས་པར་བྱ་བའི་ཡུལ་མཁྱེན་པ་གསུམ་དང་། ཉམས་སུ་ལེན་པའི་ལམ་སྦྱོར་བ་བཞི་དང་། འབྲས་བུའི་མཐར་ཐུག་ཆོས་ཀྱི་སྐུ་དང་གསུམ་དུ་གྲངས་ངེས་པ་ཡིན་ཏེ། དོན་བསྡུས་སྒྲོན་མེ་ལས། ཤེས་བྱའི་ཡུལ་དུ་མཁྱེན་པ་གསུམ། །སྒོམ་པའི་དུས་སུ་སྦྱོར་བ་བཞི། །འབྲས་བུའི་མཐར་ཐུག་ཆོས་ཀྱི་སྐུ། །ཞེས་གསུང་། འོ་ན་ཤེས་བྱ་མཁྱེན་པ་གསུམ་དུ་གྲངས་ངེས་པ་ཅི་ཡིན་ཞེ་ན། དཔེར་ན་ཡིད་བཞིན་གྱི་ནོར་བུའི་ཡོན་ཏན་ཐོས་ན་དེ་ཐོབ་པའི་ཐབས་ལ་བརྩོན་པ་ལྟར། དང་པོར་བྱང་ཆུབ་དོན་གཉེར་གྱི་གང་ཟག་འབྲས་བུ་ལ་བྲོད་པ་བསྐྱེད་པའི་དོན་དུ། རང་གཞན་གྱི་དོན་གཉིས་དང་ལྡན་པའི་རྣམ་མཁྱེན་བསྟན། དེ་ཐོས་ནས་དེའི་ཐབས་ལ་འཇུག་པས། དེ་འཐོབ་པའི་ཐབས་སམ་ལམ་ཚང་ལ་མ་ནོར་བ་ལམ་ཤེས་བསྟན། དེའི་མི་མཐུན་ཕྱོགས་ཀྱི་གོལ་ས་ཤེས་ནས་སྤོང་དགོས་པས། དེའི་ཆེད་དུ་གཞི་ཤེས་བསྟན། དེ་ལྟར་ན་ཐོབ་བྱའི་འབྲས་བུ། ཐོབ་བྱེད་ཀྱི་ལམ། དེའི་གོལ་ས་མི་མཐུན་ཕྱོགས་བཅས་ལེགས་པར་ཤེས་ན་ལམ་ཐོས་བསམ་གྱིས་སྒྲོ་འདོགས་གཅོད་པའི་གནས་སྐབས་ཀྱི་ཤེས་བྱ་ཐམས་ཅད་དེ་ཙམ་དུ་འདུས་པ་ཡིན་ཏེ། ཇོ་བོ་རྗེ་དཔལ་ལྡན་ཨ་ཏི་ཤས། ཐོས་བསམ་དུས་སུ་འབྲས་བུ་དང་། །རྒྱུ་དང་མི་མཐུན་ཕྱོགས་དག་ཏུ། །གཏན་ལ་ཕབ་པ་རྫོགས་པ་ཡིན། །ཅེས་གསུང་། འོ་ན་ཉམས་ལེན་སྦྱོར་བ་བཞིར་གྲངས་ངེས་པ་ཅི་ཡིན་ཞེ་ན། མཁྱེན་པ་གསུམ་གཏན་ལ་ཕབས་ནས་ཤེས་པ་ཙམ་གྱིས་མི་ཆོག །འབྲས་བུ་མངོན་དུ་བྱེད་པ་ལ་སྒོམ་ནས་ཉམས་སུ་ལེན་དགོས། དེ་ཡང་མཉམ་བཞག་ཏུ་ཟབ་མོའི་ཉམས་ལེན་སྤྲོས་བྲལ་རྣམ་པར་མི་རྟོག་པའི་ཡེ་ཤེས་རང་རྒྱུད་ལ་མ་སྐྱེས་པ་སྐྱེ་བར་བྱེད་པའི་རྣམ་རྫོགས་སྦྱོར་བ་དང་། དེ་ཉིད་འཇིག་རྟེན་དང་འཇིག་རྟེན་ལས་འདས་པའི་སྒོམ་བྱུང་རབ་ཀྱི་ངོ་བོར་སྐྱེས་པ་རྩེ་མོའི་སྦྱོར་བ་དང་། རྗེས་ཐོབ་ཏུ་རྒྱ་ཆེ་བའི་ཉམས་ལེན་རྣམ་ཀུན་མཆོག་ལྡན་གྱི་ཏིང་ངེ་འཛིན་ལ་བརྟན་པ་ཐོབ་པར་བྱེད་པ་མཐར་གྱིས་པའི་སྦྱོར་བ་དང་། དེ་ལ་བརྟན་པ་ཐོབ་ནས་རྒྱུའམ་ལམ་གྱི་མཐར་ཐུག་པ་སྐད་ཅིག་མའི་སྦྱོར་བ་སྟེ། དེ་བཞིར་གྲངས་ངེས་པ་ནི། དོན་བསྡུས་སྒྲོན་མེ་ལས། སྒོམ་པའི་དུས་སུ་སྦྱོར་བ་དང་། །གནས་སྐབས་འབྲས་བུ་བརྟན་བྱེད་པ། །རྒྱུ་ཡི་མཐར་ཐུག་དག་གིས་རྫོགས། །ཞེས་གསུངས་པ་ལྟར་དང་། འབྲས་བུའི་སྒོ་ནས་ཀྱང་གྲངས་ངེས་ཏེ། རྣམ་ཀུན་དང་རྩེ་མོ་གཉིས་ཀྱིས་རང་དོན་དུ་སྤངས་པ་ཕུན་སུམ་ཚོགས་པ་མངོན་དུ་བྱས་ཏེ་འབད་མེད་ལྷུན་གྲུབ་ཀྱི་ཆོས་སྐུ་ཐོབ་ཅིང་། མཐར་སྐད་གཉིས་ཀྱིས་གཞན་དོན་གྱི་རྟེན་རྟོགས་པ་ཕུན་སུམ་ཚོགས་པ་མངོན་དུ་བྱས་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་སྟེ་གཟུགས་སྐུ་མཛད་པ་དང་བཅས་པ་ཞར་ལ་འཐོབ་པར་འགྱུར་བ་ཡིན་ནོ། །འབྲས་བུ་ནི་ཆོས་ཀྱི་སྐུ་གཅིག་ཏུ་གྲངས་ངེས་པ་ཡིན་ཏེ། གཞི་ཐོས་བསམ་གྱིས་གཏན་ལ་ཕབ་ནས་ལམ་སྦྱོར་བཞི་ཉམས་སུ་བླངས་པའི་མཐར་ཐུག་གི་འབྲས་བུ་དེ་ཁོ་ནར་ངེས་པས་སོ། །གཉིས་པ་དོན་བདུན་ཅུའི་སྒོ་ནས་རྒྱས་པར་བཤད་པ་ལ། ཡུལ་མཁྱེན་གསུམ་གྱི། ལམ་སྦྱོར་བཞིའི། འབྲས་བུ་ཆོས་སྐུའི་ལུས་རྒྱས་པར་བཤད་པ་གསུམ་ལས། དང་པོ་ལ་ཡང་། རྣམ་མཁྱེན། ལམ་ཤེས། གཞི་ཤེས་ཀྱི་ལུས་རྒྱས་པར་བཤད་པ་གསུམ་ལས། དང་པོ་རྣམ་པ་ཐམས་ཅད་མཁྱེན་པའི་ཡེ་ཤེས་མཚོན་པའི་ཆོས་བཅུ་ཡོད་དེ། གང་ཞེ་ན། གཞུང་རྩ་བ་ལས། སེམས་བསྐྱེད་པ་དང་གདམས་ངག་དང་། །ངེས་འབྱེད་ཡན་ལག་རྣམ་བཞི་དང་། །སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་དང་། །དམིགས་པ་དག་དང་ཆེད་དང་ནི། །གོ་ཆ་འཇུག་པའི་བྱ་བ་དང་། །ཚོགས་ནི་ངེས་པར་འབྱུང་བཅས་རྣམས། །ཐུབ་པའི་རྣམ་ཀུན་མཁྱེན་པ་ཉིད། །ཅེས་གསུངས་པ་ལྟར་རོ། །དེས་ཇི་ལྟར་མཚོན་ཚུལ་ལ་སྔོན་གྱི་མཁས་པ་རྣམས་ཀྱིས་བཞེད་ཚུལ་མི་འདྲ་བ་གསུམ་ཏེ། བཅུ་པོ་འདི་ནི་རྣམ་མཁྱེན་ཐོབ་པའི་རྒྱུ་ཡིན་པས་རྒྱུས་མཚོན་ནས་འབྲས་བུ་བསྟན་པ་ཡིན་ཏེ། ཇོ་བོ་རྗེས། རྒྱུ་བཅུ་རྫོགས་པའི་འབྲས་བུ་རྣམ་མཁྱེན་ཉིད། །ཅེས་གསུངས་པ་ལྟ་བུ་དང་། ཡང་ཆེད་དུ་བྱ་བ་གསུམ་གྱིས་འབྲས་བུ་དང་། ལྷག་མས་རྒྱུ་བསྟན། དེ་ཙམ་དུ་མ་ཟད། དམིགས་པ་ཆོས་རྣམས་ཐམས་ཅད་དེ། །ཞེས་ཤེས་བྱའི་ཆོས་ཐམས་ཅད་བསྟན་པས། རྒྱུ་འབྲས་ཀྱི་རྣམ་པ་ཐམས་ཅད་མཁྱེན་པ་ནི། རྣམ་མཁྱེན་ཡིན་ནོ་ཞེས་ཡུལ་གྱིས་ཡུལ་ཅན་མཚོན་ནས་བསྟན་པར་བཞེད་པ་དང་། ཡང་གྲོལ་བ་དོན་གཉེར་གྱི་གང་ཟག་རྣམས་ཀྱི་འདོད་པའི་གཙོ་བོ། ཤེས་བྱ་གཙོ་བོའི་དོན་བཅུ་ཙམ་བཤད་པས་རྣམ་མཁྱེན་རྫོགས་པར་མཚོན་ནུས་པ་ཡིན་ཏེ། རྣམ་འགྲེལ་ལས། འདི་ཡིས་སྲིན་བུའི་གྲངས་མཁྱེན་པ། །ངེད་ལ་ཉེར་མཁོ་འགའ་ཡང་མེད། །བླང་དང་དོར་བྱའི་དེ་ཉིད་ནི། །ཐབས་དང་བཅས་པ་རིག་མཛད་པ། །གང་ཚེ་ཚད་མ་ཉིད་འདོད་ཀྱི། །ཐམས་ཅད་རིག་མཛད་མ་ཡིན་ནོ། །རིང་པོ་མཐོང་ངམ་མིན་ཀྱང་རུང་། །འདོད་པའི་དེ་ཉིད་མཐོང་བ་ཡིན། །ཞེས་གསུང་། དེ་ལྟ་བུའི་རྣམ་མཁྱེན་མཚོན་པའི་ཆོས་རྣམས་རྒྱས་པར་བཤད་པ་ལ། ལམ་གྱི་རང་བཞིན་སེམས་བསྐྱེད་བཤད་པ། དེ་ཉིད་དག་བྱེད་གདམས་ངག་བཤད་པ། གདམས་པའི་འབྲས་བུ་ངེས་འབྱེད་ཡན་ལག །གདམས་པའི་དོན་ཕྱིན་ཅི་མ་ལོག་པར་སྒྲུབ་པའི་ཚུལ་དང་བཞི་ལས། དང་པོས་སེམས་བསྐྱེད་ཀྱི་ངོ་བོ་ནི། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་ལྟར། སེམས་བསྐྱེད་སྐྱེ་བའི་ཐབས་ཀྱི་རྟེན་ནི། སྤྱིར་མི་ཡིན་པ་དང་། བྱེ་བྲག་སོ་ཐར་གྱི་སྡོམ་ལྡན་སོགས་དགོས་པས་ཁྱབ་པ་མེད་དེ། ལྷ་ཀླུ་གནོད་སྦྱིན་སོགས་ཐམས་ཅད་ལ་སྐྱེ་བར་ལམ་ཤེས་ཀྱི་མདོ་དང་། མདོ་གཞན་ལས་ཀྱང་གསུང་བའི་ཕྱིར། སེམས་ཀྱི་རྟེན་ནི། རྒྱལ་བ་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་སེམས་ཀྱི་སྤྱོད་པ་ལ་སློབ་པར་འདོད་པ་གསུམ་ཡིན་ཏེ། དཀོན་མཆོག་སྒྲོན་མེའི་མདོ་ལས། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །རྒྱལ་སྲས་རྣམས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་ལ་དད་གྱུར་ནས། །སྐྱེས་བུ་ཆེན་པོ་རྣམས་ཀྱི་སེམས་སྐྱེའོ། །ཞེས་དང་། མདོ་སྡེ་རྒྱན་ལས། དེ་ཡི་རྩ་བ་སྙིང་རྗེར་འདོད། །ཅེས་པ་ལྟར་རོ། །སེམས་བསྐྱེད་ཀྱི་མཚན་གཞི་ཐོགས་མེད་སྐུ་མཆེད་སེམས་བྱུང་སེམས་པ་དང་འདུན་པ་ལ་བཞེད་པ་ནི་བཏགས་པ་བ་ཡིན་ལ། འཕགས་པ་གྲོལ་སྡེ་དང་། སློབ་དཔོན་སེངྒེ་བཟང་པོ། དཀར་ཆོས་ཀུན་གྱི་རྟེན་གཞི་ཡིད་ཀྱི་རྣམ་ཤེས་མཚན་གཞིར་བཞེད་པ་མཚན་ཉིད་པ་ཡིན་ནོ། །མཚན་ཉིད་ནི་རྩ་བས་དངོས་བསྟན་ལྟར། ཆེད་དུ་བྱ་བ་གཞན་སེམས་ཅན་ཐམས་ཅད་འཁོར་བ་རྒྱུ་འབྲས་ལས་བསྒྲལ་ནས་བྱང་ཆུབ་གསུམ་གྱི་གོ་འཕང་ལ་སྐལ་བ་བཞིན་འགོད་པའི་དོན་དུ། རྣམ་པ་ཐམས་ཅད་མཁྱེན་པ་རྫོགས་པའི་བྱང་ཆུབ་འདོད་པའི་གཙོ་སེམས་ཡིད་ཀྱི་རྣམ་ཤེས་མཚུངས་ལྡན་དང་བཅས་པའི་སེམས་ཁྱད་པར་ཅན་ཡིན་ནོ། །དེ་ལ་དབྱེ་ན། ངོ་བོས་སྒོ་ནས་སྨོན་འཇུག་གཉིས་ཏེ། རྒྱལ་སྲས་ཞི་བ་ལྷས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་པས་རྫོགས་བྱང་དོན་གཉེར་གྱི་བསམ་པ་གང་ཞིག། ལུས་ངག་གི་བྱ་བས་ཟིན་མ་ཟིན་དང་། ཆོ་གའི་སྒོ་ནས་སྡོམ་པ་བཟུང་བ་དང་། མ་བཟུང་བའི་བྱེ་བྲག་ལས་འདི་གཉིས་ཀྱི་ཁྱད་པར་ཕྱེ་སྟེ། སྨོན་པ་སེམས་བསྐྱེད་ཚོགས་ལམ་ཆུང་ངུ་དང་། འཇུག་པ་སེམས་བསྐྱེད་ཚོགས་ལམ་འབྲིང་པོ་ནས་བཞག་དགོས་སོ། །སྐྱེ་ཚུལ་གྱི་སྒོ་ནས་དབྱེ་ན་རགས་པ་བརྡའ་ལས་ཐོབ་པ་ཆོ་གས་བསྐྱེད་པ་ཀུན་རྫོབ་སེམས་བསྐྱེད་དང་། ཕྲ་བ་ཆོས་ཉིད་ཀྱིས་ཐོབ་པ་སྒོམ་སྟོབས་ལས་སྐྱེ་བ་དོན་དམ་པའི་སེམས་བསྐྱེད་པ་གཉིས་ཡོད་དེ། སྔ་མ་ནི། མདོ་སྡེ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་སྟོབས་ལྔ་ལས་སྐྱེ་བ་ལས། སྔ་མ་མི་བརྟན་པ་དང་། ཕྱི་མ་བཞི་བརྟན་པའི་སེམས་བསྐྱེད་དེ་གཉིས་ཀ་ཡང་། གཞན་དགེ་བའི་བཤེས་གཉེན་གྱིས་ངག་གི་རིག་བྱེད་ཀྱིས་བསྟན་པའི་སེམས་བསྐྱེད་ཡིན་ནོ། །ཕྱི་མ་ནི། དེ་ཉིད་ལས། སངས་རྒྱས་རྣམས་ནི་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་པ་ལྟར། ཡོངས་འཛིན་དམ་པ་རྫོགས་པའི་སངས་རྒྱས་ལས་ལུང་མནོས་པ་དང་། རྗེས་སྒྲུབ་དམ་པ་ཚོགས་གཉིས་གྲངས་མེད་གཅིག་ཏུ་བསགས་པ་དང་། རྟོགས་པ་དམ་པ་ཆོས་ཐམས་ཅད་ལ་བདག་མེད་པར་མངོན་སུམ་དུ་རྟོགས་པ་སྟེ། དེ་གསུམ་གྱིས་ཁྱད་པར་དུ་བྱས་པའི་སེམས་དོན་དམ་པའི་ངོ་བོར་སྐྱེས་པ་ཞི་གནས་དང་ལྷག་མཐོང་གི་རྣལ་འབྱོར་གོམས་པར་གྱུར་པ་ལས་ཐོབ་པ་གང་ཡིན་པ་དེ་ནི་དོན་དམ་སེམས་བསྐྱེད་དོ། །ས་མཚམས་ཀྱི་སྒོ་ནས་དབྱེ་ན། མདོ་སྡེ་རྒྱན་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་པ་ལྟར། ཚོགས་ལམ་ནས་མོས་པ་ལས་བྱུང་བ་དང་། ས་དང་པོ་ནས་ལྷག་བསམ་དག་པ་དང་། ས་བརྒྱད་པ་ནས་རྣམ་པར་སྨིན་པ་དང་། སངས་རྒྱས་ཀྱི་ས་ལ་སྒྲིབ་པ་སྤངས་པའི་སེམས་བསྐྱེད་བཞག་སྟེ་རྣམ་པ་བཞིའོ། །བཞེད་ཚུལ་གྱི་སྒོ་ནས་དབྱེ་ན། སེམས་ཅན་ཐམས་ཅད་སངས་རྒྱས་ཀྱི་སར་བཀོད་ནས་རང་ཉིད་གྲོལ་བར་འདོད་པ་ཕྱུགས་རྫི་ལྟ་བུ་དང་། བདག་གཞན་མཉམ་དུ་སངས་རྒྱས་པར་འདོད་པ་མཉན་པ་ལྟ་བུ་དང་། རང་སངས་རྒྱས་ནས་གཞན་སྒྲོལ་བར་འདོད་པ་རྒྱལ་བ་ལྟ་བུ་དང་གསུམ་དུ་བཞེད་དོ། །སེམས་བསྐྱེད་ཀྱི་ཕན་ཡོན་ནི། མཐར་ཐུག་གི་འབྲས་བུ་རྒྱལ་བའི་གོ་འཕང་འཐོབ་ཅིང་། གནས་སྐབས་ཀྱི་འབྲས་བུ་མིང་རྒྱལ་བའི་སྲས་སུ་འཕོ་ཞིང་། དོན་ལྷ་མི་ཀུན་གྱིས་ཕྱག་བྱ་བའི་འོས་སུ་འགྱུར་བའི་ཚུལ། སྤྱོད་འཇུག་ལས། གསེར་འགྱུར་རྩི་ཡིས་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་བཟུང་། །བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་སོ། །མདོར་ན་སེམས་བསྐྱེད་པའི་བསོད་ནམས་ཀྱི་ཚད་ནི་ནམ་མཁའ་དང་མཉམ་པར་བསམ་གྱིས་མི་ཁྱབ་པ་སྟེ། དཔལ་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་གང་ཡང་། །དེ་ནི་དེ་བས་བསོད་ནམས་ཆེ། །ཞེས་གསུངས་སོ། །དེ་ལྟར་སེམས་བསྐྱེད་པ་ནི་རྒྱལ་སྲས་བྱང་ཆུབ་སེམས་དཔའ་རྣམས་ཀྱིས་རྣམ་མཁྱེན་སངས་རྒྱས་སྒྲུབ་པའི་སྤྱོད་པ་རླབས་པོ་ཆེ་ལ་འཇུག་པའི་སྒོ་དང་པོ་ཡིན་པས་མཚན་ཉིད་ལས་འཕྲོས་པའི་དོན་གྱི་དབྱེ་བ་ཅུང་ཟད་བཤད་ནས། ད་ནི་གཞུང་གིས་བསྟན་པའི་ས་མཚམས་ཀྱིས་དབྱེ་བ་ཉི་ཤུ་རྩ་གཉིས་ནི། གཞུང་རྩ་བར། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་གསུངས་པའི་དོན། དཔེ་ས་ནས་སྤྲིན་ལྟ་བུའི་བར་གྱི་ཉི་ཤུ་རྩ་གཉིས་ཀྱིས་མཚོན་པའི། དོན་སེམས་བསྐྱེད་རང་གི་ངོ་བོ། འདུན་པ་སེམས་བསྐྱེད་ནས། ཆོས་སྐུ་དང་མཚུངས་པར་ལྡན་པའི་སེམས་བསྐྱེད་ཀྱི་བར་གྱི་དབྱེ་བ་ཉི་ཤུ་རྩ་གཉིས་པོ། ཆོས་མཐུན་ཉི་ཤུ་རྩ་གཉིས་ཀྱིས་དཔེ་དོན་མཚུངས་པར་སྦྱར་བའི་སྒོ་ནས་ཤེས་པར་བྱ་བ་སྟེ། དེ་ཡང་ཇི་ལྟར་ན། དང་པོ་བླ་མེད་རྫོགས་བྱང་དོན་གཉེར་གྱི་འདུན་པ་དང་མཚུངས་པར་ལྡན་པའི་སེམས་བསྐྱེད་ཆོས་ཅན་དཔེ་ས་ལྟ་བུ་ཡིན་ཏེ། སངས་རྒྱས་དང་དེའི་རྒྱུ་ཚོགས་ཀྱི་ཆོས་དཀར་པོ་ཐམས་ཅད་ཀྱི་གཞིའི་དངོས་བོའི་བྱེད་བའི་ཕྱིར། གཉིས་པ་སེམས་བསྐྱེད་དེ་ཉིད་ཀྱི་རྒྱུན་གནས་པའི་བསམ་པ་དང་ལྡན་པའི་སེམས་བསྐྱེད་ཆོས་ཅན། དཔེ་གསེར་ལྟ་བུ་ཡིན་ཏེ། ཕར་ཕྱིན་དྲུག་གིས་བསྡུས་པ་ཕན་བདེའི་བསམ་པ་བཟང་པོ་བྱང་ཆུབ་ཀྱི་བར་དུ་མི་འགྱུར་བའི་ཕྱིར། གསུམ་པ་ལྷག་པའི་བསམ་པ་དང་མཚུངས་པར་ལྡན་པའི་སེམས་བསྐྱེད་ཆོས་ཅན་དཔེ་ཟླ་བ་ཚེས་པ་ལྟ་བུ་ཡིན་ཏེ། བྱང་ཆུབ་ཕྱོགས་ཀྱི་ཆོས་སོ་བདུན་སོགས་དགེ་བའི་ཆོས་ཐམས་ཅད་གོང་ནས་གོང་དུ་འཕེལ་བའི་ཕྱིར། བཞི་པ་སྐྱེ་མེད་གསུམ་མཁྱེན་པའི་སྦྱོར་བ་དང་ལྡན་པའི་སེམས་བསྐྱེད་ཆོས་ཅན། དཔེ་མེ་ལྟ་བུ་ཡིན་ཏེ། མཁྱེན་གསུམ་ཡུལ་ཤེས་པའི་གེགས་བྱེད་པའི་སྒྲིབ་པའི་བུད་ཤིང་སྲེག་པའི་ཕྱིར། ལྔ་པ་སྦྱིན་པའི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་གཏེར་ཆེན་པོ་ལྟ་བུ་ཡིན་ཏེ། ཆོས་དང་ཟང་ཟིང་གི་ལོངས་སྤྱོད་ཀྱིས་སེམས་ཅན་ཐམས་ཅད་ཚིམ་པར་བྱེད་ཀྱང་མི་ཟད་པའི་ཕྱིར། དྲུག་པ་ཚུལ་ཁྲིམས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་རིན་པོ་ཆེའི་འབྱུང་གནས་ལྟ་བུ་ཡིན་ཏེ། སྟོབས་སོགས་ཡོན་ཏན་རིན་པོ་ཆེ་ཐམས་ཅད་འབྱུང་བའི་གཞིར་གྱུར་པའི་ཕྱིར། བདུན་པ་བཟོད་པའི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་རྒྱ་མཚོ་ཆེན་པོ་ལྟ་བུ་ཡིན་ཏེ། མེ་མཚོན་སོགས་མི་འདོད་པའི་དངོས་པོས་ཡིད་མི་འཁྲུགས་པའི་ཕྱིར། བརྒྱད་པ་བརྩོན་འགྲུས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་རྡོ་རྗེ་ལྟ་བུ་ཡིན་ཏེ། བླ་མེད་བྱང་ཆུབ་ལ་ཡིད་ཆེས་བརྟན་པར་གྱུར་པ་བདུད་ཀྱིས་མི་ཕྱེད་པའི་ཕྱིར། དགུ་པ་བསམ་གཏན་གྱི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་རིའི་རྒྱལ་པོ་ལྟ་བུ་ཡིན་ཏེ། མཚན་མར་དམིགས་པའི་རྣམ་པར་གཡེང་བས་ཏིང་ངེ་འཛིན་ལས་མི་བསྐྱོད་པའི་ཕྱིར། བཅུ་པ་བདག་མེད་གཉིས་རྟོགས་པའི་ཤེར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་སྨན་ཆེན་པོ་ལྟ་བུ་ཡིན་ཏེ། ཆགས་སོགས་ཉོན་མོངས་པ་དང་། གཟུང་བར་རྟོག་པ་སོགས་ཤེས་བྱའི་སྒྲིབ་པའི་ནད་ཐམས་ཅད་ཉེ་བར་ཞི་བར་བྱེད་པའི་ཕྱིར། བཅུ་གཅིག་པ་ཐབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་དགེ་བའི་བཤེས་གཉེན་ལྟ་བུ་ཡིན་ཏེ། སྙིང་རྗེ་དང་ཐབས་ལ་མཁས་པས་འབྱོར་རྒུད་གང་གི་ཚེ་ཡང་སེམས་ཅན་ཐམས་ཅད་ཀྱི་དོན་ཡོངས་སུ་མི་གཏོང་བའི་ཕྱིར། བཅུ་གཉིས་པ་སྨོན་ལམ་གྱི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་ཡིད་བཞིན་གྱི་ནོར་བུ་ལྟ་བུ་ཡིན་ཏེ། གནས་ཀྱི་དབང་དུ་བྱས་པའི་སྨོན་ལམ་ཐམས་ཅད་བསམ་པ་བཞིན་དུ་འགྲུབ་པའི་ཕྱིར། བཅུ་གསུམ་པ་སྟོབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་ཉི་མ་ལྟ་བུ་ཡིན་ཏེ། གདུལ་བྱའི་རྒྱུད་ཀྱི་དགེ་བའི་ལོ་ཏོག་ཡོངས་སུ་སྨིན་པར་བྱེད་པའི་ཕྱིར། བཅུ་བཞི་པ་ཡེ་ཤེས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ཆོས་ཅན། དཔེ་དྲི་ཟའི་གླུ་ལྟ་བུ་ཡིན་ཏེ། ཆོས་ཀྱི་སྒྲ་དབྱངས་སྙན་པ་གདུལ་བྱའི་ཡིད་འདུན་པར་བྱེད་པ་སྟོན་པའི་ཕྱིར། བཅོ་ལྔ་པ་མངོན་པར་ཤེས་པ་དང་ལྡན་པའི་སེམས་བསྐྱེད་ཆོས་ཅན། དཔེ་རྒྱལ་པོ་ཆེན་པོ་ལྟ་བུ་ཡིན་ཏེ། མཐུ་ཐོགས་པ་མེད་པས་གཞན་གྱི་དོན་སྒྲུབ་པའི་ཕྱིར། བཅུ་དྲུག་པ་བསོད་ནམས་དང་ཡེ་ཤེས་ཀྱི་ཚོགས་དང་ལྡན་པའི་སེམས་བསྐྱེད་ཆོས་ཅན། དཔེ་མཛོད་ཁང་ལྟ་བུ་ཡིན་ཏེ། ཚོགས་བསམ་གྱིས་མི་ཁྱབ་པའི་གནས་ཡིན་པའི་ཕྱིར། བཅུ་བདུན་པ་བྱང་ཆུབ་ཕྱོགས་ཀྱི་ཆོས་སོ་བདུན་དང་ལྡན་པའི་སེམས་བསྐྱེད་ཆོས་ཅན། དཔེ་ལམ་པོ་ཆེ་ལྟ་བུ་ཡིན་ཏེ། འཕགས་པ་ཐམས་ཅད་གཤེགས་ཤིང་རྗེས་སུ་གཤེགས་པའི་ཕྱིར། བཅོ་བརྒྱད་པ་གཞན་དོན་ལ་བརྩེ་བའི་སྙིང་རྗེ་དང་། ཆོས་རང་བཞིན་མེད་རྟོགས་ཀྱི་ལྷག་མཐོང་དང་ལྡན་པའི་སེམས་བསྐྱེད་ཆོས་ཅན། དཔེ་བཞོན་པ་བཟང་པོ་ལྟ་བུ་ཡིན་ཏེ། སྲིད་ཞིའི་མཐར་མི་ལྟུང་བར་མི་གནས་པའི་མྱང་འདས་སུ་བདེ་བླག་ཏུ་འགྲོ་བའི་ཕྱིར། བཅུ་དགུ་པ་ཚིག་དོན་མི་བརྗེད་པར་འཛིན་པའི་གཟུངས་དང་། གཞན་ལ་ཐོགས་མེད་དུ་འཆད་པའི་སྤོབས་པ་གཉིས་དང་ལྡན་པའི་སེམས་བསྐྱེད་ཆོས་ཅན། དཔེ་བཀོད་མའི་ཆུ་བོ་ལྟ་བུ་ཡིན་ཏེ། ཐོས་པ་མཐའ་དག་འཛིན་ཅིང་མི་ཟད་པར་སྟོན་པའི་ཕྱིར། ཉི་ཤུ་པ་ཆོས་ཀྱི་སྡོམ་བཞི་སྟོན་པའི་ཆོས་ཀྱི་དགའ་སྟོན་དང་ལྡན་པའི་སེམས་བསྐྱེད་ཆོས་ཅན། དཔེ་ཀུན་དགའི་སྒྲ་བརྙན་ལྟ་བུ་ཡིན་ཏེ། ཐར་འདོད་ཀྱི་གདུལ་བྱ་ལ་ཆོས་ཀྱི་སྒྲ་དབྱངས་སྙན་པར་སྒྲོགས་པའི་ཕྱིར། ཉེར་གཅིག་པ། བགྲོད་པ་གཅིག་པའི་ལམ་དང་ལྡན་པའི་སེམས་བསྐྱེད་ཆོས་ཅན། དཔེ་ཆུ་བོའི་རྒྱུན་ལྟ་བུ་ཡིན་ཏེ། ཤེས་དང་ཤེས་བྱ་མཉམ་པ་ཉིད་དུ་རྟོགས་པས་སྙིང་རྗེ་དང་ཤེས་རབ་ཀྱིས་རང་གི་ངང་གིས་འཇུག་ཅིང་རྒྱུན་མ་འཆད་པར་གཞན་དོན་གྱི་བྱ་བ་རིས་སུ་མ་ཆད་པར་འཇུག་པའི་ཕྱིར། ཉེར་གཉིས་པ་ཆོས་ཀྱི་སྐུ་དང་ལྡན་པའི་སེམས་བསྐྱེད་ཆོས་ཅན། དཔེ་སྤྲིན་ལྟ་བུ་ཡིན་ཏེ། དགའ་ལྡན་ན་བཞུགས་པ་སོགས་མཛད་པ་བཅུ་གཉིས་ཀུན་ཏུ་སྟོན་པས་སེམས་ཅན་གྱི་ཕན་བདེའི་ལོ་ཏོག་སྨིན་པར་བྱེད་པའི་ཕྱིར། དེ་ལྟར་བཤད་པའི་སེམས་བསྐྱེད་ཀྱི་དབྱེ་བ་ཉི་ཤུ་རྩ་གཉིས་པོ་འདིས་ནི་རྒྱུ་འབྲས་གཉིས་ཀས་བསྡུས་པའི་སེམས་བསྐྱེད་མཐའ་དག་བསྟན་པ་ཡིན་ལ། ས་མཚམས་ཀྱང་། དང་པོ་གསུམ་ཚོགས་ལམ། དེ་ནས་གཅིག་སྦྱོར་ལམ། དེ་ནས་སྦྱིན་པ་ནས་ཡེ་ཤེས་ཀྱི་བར་བཅུ་དང་ལྡན་པའི་སེམས་བསྐྱེད་རྣམས་མཐོང་སྒོམ་གྱིས་བསྡུས་པའི་ས་བཅུ། དེ་ནས་མངོན་ཤེས་སོགས་དང་ལྡན་པ་ལྔ་ནི་ས་བཅུ་པའི་ཁྱད་པར་གྱི་ལམ་དང་། དེ་ནས་ཆོས་ཀྱི་དགའ་སྟོན་དང་ལྡན་པ་སོགས་ཐ་མ་གསུམ་ནི་སངས་རྒྱས་ཀྱི་སའི་སྦྱོར་དངོས་རྗེས་གསུམ་གྱིས་བསྡུས་ཏེ་དེ་རྣམས་ན་ཡོད། དེས་རྣམ་མཁྱེན་མཚོན་པའི་ཆོས་དང་པོ་སེམས་བསྐྱེད་བསྟན་པ་དེ་སོང་། །གཉིས་པ་སེམས་བསྐྱེད་དག་བྱེད་གདམས་ངག་སྟེ། དེའི་མཚན་ཉིད་ནི། བླ་མེད་རྫོགས་བྱང་དུ་སེམས་བསྐྱེད་པའི་གང་ཟག་གིས་དོན་དུ་གཉེར་བྱའི་ལམ་དང་འབྲས་བུའི་ཆོས་རྣམས་ཐོབ་པར་བྱེད་པའི་ཐབས་མ་ནོར་བར་སྟོན་པའི་རྗོད་བྱེད། དེ་ལ་དབྱེ་ན་ཐེག་ཆེན་གྱི་ལམ་ཕྱོགས་རེ་ཙམ་སྟོན་པ་གདམས་ངག་ཕལ་པ་དང་། ཐེག་ཆེན་གྱི་ལམ་འབྲས་བུ་དང་བཅས་པ་ཚང་ལ་མ་ནོར་བར་སྟོན་པའི་བཀའ་དང་བསྟན་བཅོས་ཐམས་ཅད་གདམས་ངག་ཁྱད་པར་ཅན་ཡིན། དེ་ཡང་གདམས་ངག་ནོད་པ་པོའི་གང་ཟག་སེམས་དང་པོ་བསྐྱེད་མ་ཐག་པ་དང་། ཆོས་རྒྱུན་གྱི་ཏིང་ངེ་འཛིན་ཐོབ་པའི་མོས་སྤྱོད་ལ་གནས་པ། ནོད་ཡུལ། ཐེག་ཆེན་གདམས་ངག་སྟོན་ནུས་ཀྱི་བཤེས་གཉེན་ཐམས་ཅད་དང་། ཁྱད་པར་སངས་རྒྱས་རྣམས་ཡིན་ཏེ། མདོ་རྒྱན་ལས། དེ་ཚེ་ཆོས་ཀྱི་རྒྱུན་ལས་ནི། །སངས་རྒྱས་རྣམས་ལས་ཞི་གནས་དང་། །ཡེ་ཤེས་ཡངས་པ་ཐོབ་བྱའི་ཕྱིར། །གདམས་ངག་རྒྱ་ཆེན་རྙེད་པར་འགྱུར། །ཞེས་གསུང་། དབྱེ་ན་རྣམ་པ་བཅུ་ཡོད་དེ། སྒྲུབ་དང་བདེན་པ་རྣམས་དང་ནི། །སངས་རྒྱས་ལ་སོགས་དཀོན་མཆོག་གསུམ། །མ་ཞེན་ཡོངས་སུ་མི་ངལ་དང་། །ལམ་ནི་ཡོངས་སུ་འཛིན་པ་དང་། །སྤྱན་ལྔ་དང་ནི་མངོན་ཤེས་ཀྱི། །ཡོན་ཏན་དྲུག་དང་མཐོང་ལམ་དང་། །སྒོམ་ཞེས་བྱ་ལ་གདམས་ངག་ན། །བཅུ་ཡི་བདག་ཉིད་ཤེས་པར་བྱ། །ཞེས་པ་ལྟར་བཅུ་ལས། དང་པོ་སྒྲུབ་བྱ་བྱང་ཆུབ་སེམས་དཔའི་སྤྱོད་པ་ཐམས་ཅད་ལ། སྒྲུབ་ཚུལ་དོན་དམ་པར་འཁོར་གསུམ་དང་བྲལ་བས་བདེན་ཞེན་མེད་པར། ཐ་སྙད་དུ་སྒྱུ་མ་ལྟ་བུར་དམིགས་ཏེ་བདེན་པ་གཉིས་མི་འགལ་བའི་ཚུལ་གྱིས་བསླབ་པར་བྱའོ་ཞེས་སྒྲུབ་པ་རང་གི་ངོ་བོ་ལ་གདམས་སོ། །གཉིས་པ་ཡུལ་བདེན་པ་བཞི་ལ་གདམས་པ་ནི། བྱང་སེམས་ཀྱི་འཇུག་ལྡོག་གི་བྱ་བའི་ཡུལ་བདེན་པ་བཞི་སྟེ། སྡུག་བསྔལ་ལ་ཤེས་བྱར་ཞེན་པ་དང་། ཀུན་འབྱུང་ལ་སྤང་བྱར་ཞེན་པ་དང་། འགོག་པ་ལ་ཐོབ་བྱར་ཞེན་པ་དང་། ལམ་བདེན་ལ་རྒྱུད་ལ་བསྟེན་བྱར་ཞེན་པ་སྟེ། ཞེན་པ་བཞི་པོ་དང་བྲལ་བའི་ཚུལ་གྱིས་བླང་དོར་བྱ་བ་ལ་གདམས་པའོ། །གསུམ་པ་རྟེན་དཀོན་མཆོག་གསུམ་ལ་གདམས་པ་ནི། ལམ་གྱི་ཆོས་མ་སྐྱེས་པ་རྣམས་སྐྱེ་བ་དང་། སྐྱེས་པ་མི་ཉམས་པར་གོང་དུ་འཕེལ་བ་སྐྱབས་སུ་འགྲོ་བ་ལ་རག་ལས་པས་སྐྱབས་སུ་འགྲོ་དགོས་ལ། སྐྱབས་སུ་འགྲོ་བའི་ཡུལ་ཐེག་པ་ཆེན་པོའི་དཀོན་མཆོག་གསུམ་ཡོན་ཏན་བརྒྱད་བརྒྱད་དང་ལྡན་པ་རྣམས་ལ། སྐྱབས་སུ་འགྲོ་བའི་ཚུལ་སངས་རྒྱས་ལ་སྟོན་པ་དང་། ཆོས་ལ་ལམ། དགེ་འདུན་ལ་གྲོགས་སུ་བདེན་པར་ཞེན་པ་མེད་པ་སྒྱུ་མ་ལྟ་བུའི་ཚུལ་གྱིས་བསླབ་པར་བྱ་བར་གདམས་པ་ཡིན་ནོ། །བཞི་པ་སྒྲུབ་པའི་མི་མཐུན་ཕྱོགས་སྙོམས་ལས་ཀྱི་ལེ་ལོ་སྤོང་བྱེད། སྒོ་གསུམ་གྱི་བདེ་བ་ལ་མངོན་པར་ཞེན་པ་མེད་པའི་བརྩོན་འགྲུས་ལ་བསླབ་པར་གདམས་པ་དང་། ལྔ་པ་སྒྱིད་ལུག་པའི་ལེ་ལོའི་གཉེན་པོ་མི་ངལ་བའི་བརྩོན་འགྲུས་ལ་གདམས་པ་དང་། དྲུག་པ་བདག་ཉིད་བརྙས་པའི་ལེ་ལོའི་གཉེན་པོར་ལམ་ཡོངས་སུ་འཛིན་པའི་བརྩོན་འགྲུས་ལ་གདམས་པ་དང་། བདུན་པ་སྒྲུབ་པའི་ཡོན་ཏན་མཐར་ཐུག་སངས་རྒྱས་ཐོབ་པ་དང་། གནས་སྐབས་རང་གཞན་གྱི་དོན་སྒྲུབ་པའི་ཐབས་ལ་མཁས་པའི་ཕྱིར། སྟོང་གསུམ་གྱི་གཟུགས་ཐམས་ཅད་མཐོང་བ་ཤའི་སྤྱན་དང་། ཕྱོགས་བཅུའི་སེམས་ཅན་རྣམས་ཀྱི་འཆི་འཕོ་བ་དང་སྐྱེ་བ་ཤེས་པ་ལྷའི་སྤྱན་དང་། འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་ཀྱི་དེ་ཁོ་ན་ཉིད་ཤེས་པ་ཤེས་རབ་ཀྱི་སྤྱན་དང་། འཕགས་པའི་གང་ཟག་ཐམས་ཅད་ཀྱི་དབང་པོ་རྣོ་རྟུལ་དང་གསུང་རབ་ཡན་ལག་བཅུ་གཉིས་ཀྱི་ཚིག་དོན་རྣམས་ཐོགས་མེད་དུ་ཤེས་པ་ཆོས་ཀྱི་སྤྱན་དང་། ཇི་ལྟ་ཇི་སྙེད་ཐམས་ཅད་རྣམ་པ་ཐམས་ཅད་དུ་མངོན་སུམ་དུ་ཤེས་པ་སངས་རྒྱས་ཀྱི་སྤྱན་སྟེ། སྤྱན་ལྔ་ཐོབ་པའི་རྒྱུ་ཕྱིན་དྲུག་གིས་བསྡུས་པའི་ཆོས་རྣམས་ལ་ཀུན་རྫོབ་ཏུ་སྒྱུ་མ་ལྟར་བལྟས་ནས་སློབ་ཅིང་དོན་དམ་པར་སྤྲོས་བྲལ་དེ་བཞིན་ཉིད་རྟོགས་པས་བསླབ་པར་བྱ་བར་གདམས་པ་དང་། བརྒྱད་པ། སེམས་ཅན་རྣམས་ཆོས་མཉམ་པ་ཉིད་ལ་འགོད་པ་དང་། འཕགས་པ་རྣམས་ཀྱི་བྱམས་པ་དང་། ཡིད་འོང་གི་ཡུལ་རྣམས་དང་ཕྲད་པ་དང་། ལྷ་རྣམས་ཀྱིས་ཕྱག་བྱ་བ་དང་། བྱང་ཆུབ་ཏུ་ལུང་བསྟན་པ་ཐོབ་པ་སོགས་ཀྱི་ཆེད་དུ། ས་གཡོ་བ་དང་འོད་འགྱེད་པ་སོགས་རྫུ་འཕྲུལ་གྱི་མངོན་ཤེས། འཇིག་རྟེན་གྱི་སྒྲ་ཆེ་ཆུང་ཐམས་ཅད་ཐོས་པ་ལྷའི་རྣ་བའི་མངོན་ཤེས། སེམས་ཅན་གྱི་སེམས་ཀྱི་རྒྱུ་བ་ཐམས་ཅད་ཤེས་པ་གཞན་སེམས་ཤེས་པའི་མངོན་ཤེས། རང་གཞན་རྣམས་ཀྱི་སྔོན་གྱི་ཚེ་རབས་དཔག་ཏུ་མེད་པ་རྗེས་སུ་དྲན་པ་སྔོན་གྱི་གནས་རྗེས་སུ་དྲན་པའི་མངོན་ཤེས། ཕྱོགས་བཅུའི་སེམས་ཅན་འཆི་འཕོ་བ་དང་སྐྱེ་བ་རྣམས་ཀྱི་གཟུགས་ཀྱི་རྣམ་པ་ཐམས་ཅད་མཐོང་བ་ལྷའི་མིག་གི་མངོན་ཤེས། སྒྲིབ་གཉིས་སྤོང་བའི་གཉེན་པོར་གྱུར་པའི་མི་སྐྱེ་བའི་ཡེ་ཤེས་མངོན་དུ་བྱེད་པ་ཟག་པ་ཟད་པའི་མངོན་ཤེས་སྟེ་མངོན་པར་ཤེས་པ་དྲུག་པོ་དེ་ཐ་སྙད་དུ་རྒྱུད་ལ་བསྐྱེད་ཅིང་དོན་དམ་པར་སྤྲོས་པ་ཉེ་བར་ཞི་བའི་ཚུལ་གྱིས་བསླབ་པར་གདམས་པ་དང་། དགུ་པ་མཐོང་སྤང་ཀུན་བརྟག་གི་གཉེན་པོར་སྡུག་བསྔལ་ཆོས་བཟོད། ཆོས་ཤེས་སོགས་མཐོང་ལམ་སྐད་ཅིག་མ་བཅུ་དྲུག །སྒྱུ་མ་མཁན་རང་གིས་སྤྲུལ་པའི་སྒྱུ་མ་ལ་མངོན་ཞེན་མེད་པ་བཞིན་རང་རྒྱུད་བསྐྱེད་པར་བྱ་བར་གདམས་པ་དང་། བཅུ་པ་སྒོམ་སྤང་ལྷན་སྐྱེས་སྤོང་བའི་གཉེན་པོར། ཐེག་ཆེན་སྒོམ་ལམ་ལ་སྤང་གཉེན་གཉིས་སུ་མེད་པར་ཤེས་པའི་ཚུལ་གྱིས་སྒོམ་པར་བྱ་བར་གདམས་པ་སྟེ་གདམས་ངག་བཅུ་པོ་འདི་ཙམ་ཁོ་ནས་གང་ཟག་གཅིག་འཚང་རྒྱ་བའི་བཞེད་དོན་ཐམས་ཅད་ཕུན་སུམ་ཚོགས་པར་འགྱུར་པས་གྲངས་ངེས་པ་ཡིན་ནོ། །རྣམ་མཁྱེན་མཚོན་པའི་ཆོས་གཉིས་པ་ཐལ། གསུམ་པ་གདམས་པའི་འབྲས་བུས་ངེས་འབྱེད་ཡན་ལག་ནི། གདམས་པའི་དོན་ཉམས་སུ་བླངས་པ་ལས། ངེས་འབྱེད་ཀྱི་ཡན་ལག་སྦྱོར་ལམ་རྒྱུད་ལ་སྐྱེ་བ་ཡིན་ཏེ། དེའི་མཚན་ཉིད་ནི། ཐེག་ཆེན་ཐར་པ་ཆ་མཐུན་གྱི་རྗེས་སུ་སྐྱེས་པའི་མངོན་རྟོགས་གང་ཞིག་མོས་སྤྱོད་ཀྱི་སས་བསྡུས་པ་སྟེ། དབྱེ་ན། དམིགས་རྣམ་རྒྱུ་གསུམ། ཡོངས་འཛིན་བཤེས་གཉེན། བསྟན་བཅོས་རྟོག་པ་དང་། ལྔས་ཉན་རང་གི་སྦྱོར་ལམ་ལས་ཁྱད་པར་དུ་འཕགས་པའི་དྲོད་རྩེ་བཟོད་མཆོག་བཞིའོ། །སྦྱོར་ལམ་སྐྱེ་བའི་རྟེན་ནི། གླིང་གསུམ་གྱི་མི་དང་། འདོད་པའི་ལྷ། བསམ་གཏན་ས་དྲུག་གང་རུང་ཐོབ་པའོ། །ངོ་བོ་སྒོམ་བྱུང་འཇིག་རྟེན་པའི་ཡེ་ཤེས་གང་ཞིག་བདག་མེད་ཀྱི་དོན་སྤྱི་འཇལ་བའི་བློ་སྒྲ་དོན་སྣང་བའི་རྟོག་པ་ཡིན་ལ། སོ་སོའི་ངོ་བོ་ནི། གཟུགས་སོགས་དོན་གྱི་དངོས་པོ་རྣམས་ཡིད་ཀྱིས་བརྗོད་པ་ཙམ་ལས་མ་གཏོགས་པར་རང་བཞིན་གྱིས་གྲུབ་པ་མེད་པར་རྟོགས་པ་ནི། དྲོད་སྣང་བ་ཐོབ་པའི་ཏིང་ངེ་འཛིན་ཏེ་ཆོས་ལ་ངེས་རྟོག་གི་བཟོད་པ་དང་པོ་ཡིན། རྟོགས་པའི་དོན་ལ་ཞེན་མེད་ཀྱིས་བརྩོན་འགྲུས་བརྟན་པོར་བ་རྩམ་པས་ཆོས་ཀྱི་སྣང་བ་དེ་ཉིད་གོང་ནས་གོང་དུ་འཕེལ་བ་ནི་རྩེ་མོ་སྣང་བ་མཆེད་པའི་ཏིང་ངེ་འཛིན་ནོ། །བརྩོན་པའི་འབྲས་བུ་ཡུལ་དུ་སྣང་བ་འདི་ནི་ནང་གི་སེམས་ཁོ་ནར་ཟད་དོ་ཞེས་སེམས་ཙམ་ལ་གནས་པ་ནི། གཟུང་བའི་རྣམ་པར་གཡེང་བ་སྤོང་བའི་ཕྱིར་བཟོད་པ་དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པའི་ཏིང་འཛིན་ནོ། །དེ་ལྟར་གཟུང་བའི་གཡེང་བ་སྤངས་པའི་དེ་མ་ཐག་ཏུ་འཛིན་པ་ཡང་རང་བཞིན་མེད་པར་ཤེས་པའི་མཇུག་ཏུ་མཐོང་ལམ་རྣམ་པར་མི་རྟོག་པའི་ཡེ་ཤེས་ལ་རེག་པར་འགྱུར་བ་ནི་ཆོས་མཆོག་དེ་མ་ཐག་པའི་ཏིང་འཛིན་ཅེས་བྱ། དེ་ལྟར་སྦྱོར་ལམ་བཞི་པོ་རེ་རེ་བཞིན་ཆུང་འབྲིང་ཆེན་པོར་ཕྱེ་བས་ནང་གསེས་བཅུ་གཉིས་སུ་འགྱུར་བ་ཡིན་ནོ། །དེས་རྣམ་མཁྱེན་མཚོན་པའི་ཆོས་གསུམ་པ་ཐལ། བཞི་པ་གདམས་པའི་དོན་ཕྱིན་ཅི་མ་ལོག་པར་སྒྲུབ་པ་ལ། སྒྲུབ་པའི་རྟེན་རིགས། སྒྲུབ་པའི་དམིགས་པ། སྒྲུབ་པའི་ཆེད་དུ་བྱ་བ། སྒྲུབ་པ་རང་གི་ངོ་བོ་དང་བཞི་ལས། དང་པོ་ནི། ཆོས་ཀྱི་དབྱིངས་གང་ཞིག་སྦྱངས་ན་བླ་མེད་བྱང་ཆུབ་ཀྱི་རྒྱུར་འགྱུར་བ་དེ་ཐེག་པ་ཆེན་པོའི་རིགས་ཀྱི་མཚན་ཉིད། དེ་ལ་སྤྱིར་ཉན་ཐོས་སྡེ་པ་རྣམས་སེམས་བྱུང་འདོད་ཆགས་མེད་པ་ལ་འཕགས་པའི་རིགས་སུ་འདོད་པ་དང་། སེམས་ཙམ་པ་སྐྱེ་མཆེད་དྲུག་གི་ཁྱད་པར་རམ་ཀུན་གཞིའི་སྟེང་གི་ཟག་མེད་ཀྱི་ཆོས་བསྐྱེད་པའི་ནུས་པ་ལ་རིགས་སུ་བྱས་ནས་འདུས་བྱས་ལ་འདོད་པ། སེམས་ཀྱི་ཆོས་ཉིད་རང་བཞིན་གྱིས་འོད་གསལ་བ་གཤིས་ལ་རང་གི་ངོ་བོས་དུས་ཐམས་ཅད་དུ་གྲུབ་པ་བསལ་བཞག་མེད་པའི་ཆོས་ཉིད་འདུས་མ་བྱས་ལ་འདོད་པ་གཉིས། དབུ་མ་པ་སེམས་ཀྱི་རང་བཞིན་གཤིས་ལ་ཅིར་ཡང་མ་གྲུབ་པའི་ཆོས་ཀྱི་དབྱིངས་འདུས་མ་བྱས་ལ་རིགས་སུ་འདོད་པ་རྣམས་སུ་ཡོད་པ་ལས། འདིར་ཕྱི་མ་ཡིན། དེ་ལ་དབྱེ་ན། རྟོགས་པ་ཡི་ནི་ཆོས་དྲུག་དང་། །གཉེན་པོ་དང་ནི་སྤོང་བ་དང་། །དེ་དག་ཡོངས་སུ་གཏུགས་པ་དང་། །ཤེས་རབ་སྙིང་བརྩེར་བཅས་པ་དང་། །སློབ་མ་ཐུན་མོང་མིན་ཉིད་དང་། །གཞན་གྱི་དོན་གྱི་གོ་རིམ་དང་། །ཡེ་ཤེས་རྩོལ་བ་མི་མངའ་བར་། །འཇུག་པའི་རྟེན་ལ་རིགས་ཤེས་བྱ། །ཞེས་པ་ལྟར། བདག་མེད་པ་རྟོགས་པའི་ཚེ། ངེས་འབྱེད་བཞི། མཐོང་སྒོམ་གཉིས་དང་དྲུག །གཉེན་པོ་བར་ཆད་མེད་པའི་ལམ། སྤོང་བ་རྣམ་གྲོལ་གྱི་ལམ། སྤང་གཉེན་གྱི་རྣམ་པར་རྟོག་པ་སྤོང་བ་ཤེས་སྒྲིབ་སྤང་བའི་སྒྲུབ་པ། ཤེས་རབ་དང་སྙིང་རྗེ་ཆེན་པོའི་ཐབས་ཀྱི་སྒྲུབ་པ། སློབ་མ་ཉན་རང་དང་ཐུན་མོང་མིན་པའི་ལམ་གྱི་སྒྲུབ་པ། སྐལ་བ་དང་མཚམས་པར་གཞན་གྱི་དོན་གོ་རིམ་བཞིན་དུ་སྒྲུབ་པ། ཡེ་ཤེས་རྩོལ་བ་མི་མངའ་བར་འཇུག་པའི་སྒྲུབ་པ་སྟེ་བརྟེན་ཆོས་སྒྲུབ་པ་བཅུ་གསུམ་གྱི་བྱེ་བྲག་གིས། རྟེན་རིགས་ཀྱི་དབྱེ་བ་བཅུ་གསུམ་དུ་བཞག་པ་ཡིན་ནོ། །དེས་རྣམ་མཁྱེན་མཚོན་པའི་ཆོས་བཞི་པ་ཐལ། གཉིས་པ་བསྒྲུབ་པའི་དམིགས་པ་ནི། དམིགས་པ་གང་ཞིག་སྒྲུབ་པ་པོ་བྱང་ཆུབ་སེམས་དཔའི་ཤེས་བྱར་གྱུར་པ་ནི་དམིགས་པའི་མཚན་ཉིད། དེ་ལ་དབྱེ་ན། དམིགས་པ་ཆོས་རྣམས་ཐམས་ཅད་དེ། །དེ་ཡང་དགེ་ལ་སོགས་པ་ཡིན། །འཇིག་རྟེན་པ་ཡི་རྟོགས་པ་དང་། །གང་དག་འཇིག་རྟེན་འདས་འདོད་དང་། །ཟག་བཅས་ཟག་པ་མེད་ཆོས་དང་། །གང་དག་འདུས་བྱས་འདུས་མ་བྱས་། །སློབ་མ་ཐུན་མོང་ཆོས་རྣམས་དང་། །གང་དག་ཐུབ་པའི་ཐུན་མོང་མིན། །ཞེས་པ་ལྟར། བྱང་སེམས་ཀྱིས་དང་པོར་བདག་གིས་བླང་བྱ་དང་དོར་བྱ་དང་བཏང་སྙོམས་སུ་བྱ་བ་གང་ཡིན་སྙམ་པའི་བློ་སྐྱེས། དེའི་དབང་དུ་བྱས་ཏེ། དགེ་བ་དང་། མི་དགེ་བ་དང་། ལུང་མ་བསྟན་གསུམ་དམིགས་པར་བཞག་གོ། །དེ་ནས་བླང་བྱའི་དགེ་བ་དེ་ལ། དང་པོ་དང་། ཕྱི་ནས་བླང་བར་བྱ་བ་གང་ཡིན་ཅེས་སེམས་པ་ལ། འཇིག་རྟེན་པ་དང་། འཇིག་རྟེན་ལས་འདས་པ་གཉིས་དམིགས་པར་བཞག །འཇིག་རྟེན་ལས་འདས་པ་འཕགས་པའི་ལམ་གྱིས་སྤང་བྱ་དང་། ངོ་བོ་གང་ཡིན་སེམས་པ་ན། དེ་ནི་ཟག་བཅས་དང་ཟག་པ་མེད་པའོ་ཞེས་དེ་གཉིས་དམིགས་པར་བཞག །ཟག་མེད་ལམ་གྱི་དམིགས་པ་གང་ཡིན་ཅེས་སེམས་པ་ན། འདུས་བྱས་ཀུན་རྫོབ་དང་འདུས་མ་བྱས་དོན་དམ་གཉིས་ཡིན་ནོ་ཞེས་དེ་གཉིས་དམིགས་པར་བཞག །འཕགས་པའི་གང་ཟག་རྣམས་ནི་འདུས་མ་བྱས་ཀྱིས་རབ་ཏུ་ཕྱེ་བ་ཡིན་པས། འདུས་མ་བྱས་ལ་དམིགས་པའི་འབྲས་བུ་གང་ཡིན་ཅེས་སེམས་པ་ན། སློབ་མ་ཉན་ཐོས་སོགས་དང་ཐུན་མོང་བའི་ཆོས་དང་། ཐུབ་པའི་ཐུན་མོང་མ་ཡིན་པའི་ཆོས་གཉིས་ཡིན་ནོ་ཞེས་དེ་གཉིས་དམིགས་པར་བཞག །དེ་ལྟར་ན་དང་པོ་དགེ་བ་ནས། ཐ་མ་སྟོབས་སོགས་ཐུན་མོང་མིན་པའི་ཆོས་ཀྱི་བར་ལ་རིམ་གྱིས་དམིགས་ནས་སྒྲུབ་པ་ལ་འཇུག་དགོས་པས། སྒྲུབ་པའི་དམིགས་པ་ནི་བཅུ་གཅིག་པོ་དེ་དག་ཡིན་ནོ། །འདི་ལ་ས་མཚམས་རྣམ་པར་བཞག་པ་མེད་དེ། ཤེས་བྱ་ཀུན་ལ་ཁྱབ་པས་སོ། །དེས་རྣམ་མཁྱེན་མཚོན་པའི་ཆོས་ལྔ་པ་ཐལ། གསུམ་པ་སྒྲུབ་པའི་ཆེད་དུ་བྱ་བ་ནི། གང་ཞིག་ཐོབ་པར་བྱ་བའི་ཆེད་དུ་བྱང་སེམས་རྣམས་སྒྲུབ་པ་ལ་འཇུག་པར་འགྱུར་བའི་མཐར་ཐུག་གི་འབྲས་བུ་དེ་ཆེད་དུ་བྱ་བའི་མཚན་ཉིད། དེ་ལ་དབྱེ་ན། སེམས་ཅན་ཀུན་མཆོག་ཉིད་སེམས་དང་། །སྤོང་དང་རྟོགས་དང་གསུམ་པོ་ལ། །ཆེན་པོ་གསུམ་གྱི་རང་འབྱུང་གི །ཆེད་དུ་བྱ་བ་འདི་ཤེས་བྱ། །ཞེས་པ་ལྟར། སེམས་ཅན་ཀུན་གྱི་མཆོག་སངས་རྒྱས་ནི་མཆོག་ཉིད་ཆེན་པོ་དང་། སྒྲིབ་གཉིས་མ་ལུས་པ་སྤངས་པའི་སྤོང་བ་ཆེན་པོ་དང་། ཇི་ལྟ་ཇི་སྙེད་ཐམས་ཅད་གཟིགས་པའི་རྟོགས་པ་ཆེན་པོ་སྟེ། ཆེན་པོ་གསུམ་གྱི་བདག་ཉིད་ཅན་གྱི་སངས་རྒྱས་ནི་རང་བྱུང་བྱང་ཆུབ་སེམས་དཔའ་རྣམས་ཀྱིས་ཆེད་དུ་བྱ་བ་ཡིན་པར་ཤེས་པར་བྱ་ཞེས་པ་སྟེ། ས་མཚམས་ནི་སངས་རྒྱས་ཀྱི་ས་ཁོ་ནའོ། །དེས་རྣམ་མཁྱེན་མཚོན་པའི་ཆོས་དྲུག་པ་ཐལ། བཞི་པ་སྒྲུབ་པ་རང་གི་ངོ་བོ་ལ། ཐེག་ཆེན་ལ་འཇུག་ཕྱིར་གོ་བགོས་པ་གོ་ཆའི་སྒྲུབ་པ་དང་། ཞུགས་པ་འཇུག་པའི་སྒྲུབ་པ་དང་། ཞུགས་པ་མཐར་ཕྱིན་བྱེད་ཚོགས་ཀྱི་སྒྲུབ་པ་དང་། མཐར་ཕྱིན་པ་ངེས་འབྱུང་གི་སྒྲུབ་པ་བཞི་ལས། དང་པོ་གོ་ཆའི་སྒྲུབ་པ་ནི། ཐེག་ཆེན་སེམས་བསྐྱེད་ལ་བརྟེན་ནས་དོན་གཉིས་སྒྲུབ་པའི་བྱ་བ་གང་ཞིག་ཕར་ཕྱིན་དྲུག་རེ་རེའི་ནང་དུ་དྲུག་དྲུག་ཚང་བར་བསྡུས་ནས་ཉམས་སུ་ལེན་པ་དེ་གོ་ཆའི་སྒྲུབ་པའི་མཚན་ཉིད། དེ་ཡི་མི་མཐུན་ཕྱོགས་ཀྱིས་མི་ཕྱེད་པའི་ཕྱིར་གོ་ཆ་ཞེས་བྱ་ལ་ཚོགས་ལམ་ནས་ཡོད་ཅིང་། དབྱེ་ན། དེ་དག་སོ་སོར་སྦྱིན་ལ་སོགས། །རྣམ་པ་དྲུག་ཏུ་བསྡུས་པ་ཡིས། །གོ་ཆའི་སྒྲུབ་པ་གང་ཡིན་ཏེ། །དྲུག་ཚན་དྲུག་གིས་ཇི་བཞིན་བཤད། །ཅེས་པ་ལྟར། རང་ཉིད་དེ་ལ་གནས་ཤིང་གཞན་དེ་ལ་འགོད་པ་དང་སེམས་ཅན་ཐམས་ཅད་དང་ཐུན་མོང་དུ་བྱས་ནས་བྱང་ཆུབ་ཏུ་བསྔོ་བ་ནི་སོ་སོའི་སྦྱིན་པ། རང་དོན་ཡིད་ལ་བྱེད་པའི་ཉན་རང་གི་བསམ་པ་དང་མ་འདྲེས་པ་སོ་སོའི་ཚུལ་ཁྲིམས། རང་གི་མི་མཐུན་ཕྱོགས་དང་གཞན་གྱིས་ལོག་སྒྲུབ་ཀྱིས་སེམས་མི་འཁྲུགས་པ་སོ་སོའི་བཟོད་པ། གཞན་དོན་དུ་ཕྱིན་དྲུག་སྒྲུབ་པ་ལ་ཆེས་ཆེར་སྤྲོ་བ་སོ་སོའི་བརྩོན་འགྲུས། གཞན་དོན་དང་རྣམ་མཁྱེན་ལ་སེམས་རྩེ་གཅིག་པས་བསྒྲུབ་པ་སོ་སོའི་བསམ་གཏན། ཀུན་རྫོབ་ལ་བརྟེན་ནས་བྱང་ཆུབ་ཏུ་བསྔོ་བ་དང་། དོན་དམ་ལ་བརྟེན་ནས་འཁོར་གསུམ་དུ་མི་དམིགས་པས་རློམ་སེམས་མེད་པ་སོ་སོའི་ཤེས་རབ་སྟེ། ཕན་ཚུན་རེ་རེའི་ནང་དུ་དྲུག་དྲུག་བསྡུས་ནས་ཉམས་སུ་ལེན་པ་སྟེ། བསྡུ་ན་གོ་ཆའི་སྒྲུབ་པ་དྲུག་དང་། རྒྱས་པར་སོ་དྲུག་གོ །དེས་རྣམ་མཁྱེན་མཚོན་པའི་ཆོས་བདུན་པ་ཐལ། གཉིས་པ་འཇུག་པའི་སྒྲུབ་པ་ལ། ཐེག་ཆེན་སེམས་བསྐྱེད་ལ་བརྟེན་ནས་བླ་མེད་བྱང་ཆུབ་ཀྱི་ཆེད་དུ་དོན་གཉིས་སྒྲུབ་པ་གང་ཞིག་སྒོམ་བྱུང་གཙོ་བོར་གྱུར་པའི་སྒོ་ནས་ཐེག་ཆེན་ལ་འཇུག་པའི་བྱ་བ་དེ་འཇུག་སྒྲུབ་གྱི་མཚན་ཉིད། འཇུག་སྒྲུབ་ཙམ་ཚོགས་ལམ་དང་ཁྱད་པར་ཅན་སྦྱོར་ལམ་ཆོས་མཆོག་འབྲིང་ནས་ཡོད་ཅིང་། དབྱེ་ན་འཇུག་ཡུལ་ཐེག་ཆེན་དགུ་ཡོད་པས་དེ་ལ་འཇུག་པའི་སྒྲུབ་པ་དགུ་ཡོད་དེ། བསམ་གཏན་གཟུགས་མེད་སྦྱིན་སོགས་དང་། །ལམ་དང་བྱམས་ལ་སོགས་པ་དང་། །དམིགས་པ་མེད་དང་ལྡན་པ་དང་། །འཁོར་གསུམ་རྣམ་པར་སྦྱིན་སོགས་དང་། །ཆེད་དུ་བྱ་དང་མངོན་ཤེས་དྲུག །རྣམ་ཀུན་མཁྱེན་པའི་ཚུལ་ལ་ནི། །འཇུག་པའི་སྒྲུབ་པ་ཐེག་ཆེན་ལ། །འཛེག་པ་ཡིན་པར་ཤེས་པར་བྱ། །ཞེས་པ་ལྟར། དང་པོ་ནི། སེམས་ཡུལ་ལ་གཡེང་བ་ལས་ལྡོག་ནས་དམིགས་པ་ལ་བརྟན་པར་བྱ་བའི་དོན་དུ། བསམ་གཏན་དང་གཟུགས་མེད་པའི་སྙོམས་འཇུག་ལ་འཇུག་པ་དང་། གཉིས་པ་ནི། སེམས་བརྟན་པ་དེ་ཚོགས་གཉིས་ལ་སློབ་པས་དེའི་འོག་ཏུ་སྦྱིན་སོགས་ཕྱིན་དྲུག་ལ་འཇུག་པ་དང་། གསུམ་པ་ནི། ཚོགས་བསགས་པ་ནི་དེ་ཁོ་ན་ཉིད་ཀྱི་དོན་ལ་ལྷག་པར་མོས་པ་སྐྱེ་བའི་ཕྱིར། དེ་རྟོགས་པ་མཐོང་བ་དང་སྒོམ་པའི་ལམ་ལ་འཇུག་པ་དང་། བཞི་པ་ནི། འཕགས་ལམ་ཐོབ་པ་ནི་གཞན་དོན་བྱེད་པར་སྤྲོ་བའི་ཕྱིར་ཚད་མེད་བཞི་ལ་འཇུག་པ་དང་། ལྔ་པ་ནི། གཞན་དོན་ལ་འཇུག་པ་ན་དེའི་འཆིང་བ་ནི་མངོན་ཞེན་ཡིན་པས། ཆོས་ཐམས་ཅད་དམིགས་པ་མེད་པ་དང་ལྡན་པ་ལ་འཇུག་པ་དང་། དྲུག་པ་ནི། ངོ་བོ་ཉིད་མེད་པར་རྟོགས་པའི་རྣལ་འབྱོར་པ་དེ་སྒྲུབ་པ་ལ་འཇུག་པ་ན། ལས་དང་བྱ་བ་དང་བྱེད་པོ་གསུམ་ལ་བདེན་ཞེན་མེད་པ་སྒྱུ་མའི་སྐྱེས་བུ་བཞིན་དུ་དངོས་པོ་ཐམས་ཅད་ལ་འཁོར་གསུམ་ཡོངས་སུ་དག་པའི་སྒོ་ནས་འཇུག་པ་དང་། བདུན་པ་ནི། དེ་ལྟར་བདེན་པ་གཉིས་དང་མི་འགལ་བར་སྤྱོད་པ་རྣམས། རང་གིས་བསྒྲུབ་བྱ་མཐར་ཐུག་གི་དོན་ལ་འཇུག་པའི་ཕྱིར་ཆེན་པོ་གསུམ་ཆེད་དུ་བྱ་བ་ལ་འཇུག་པ་དང་། བརྒྱད་པ་ནི། ཆེད་དུ་བྱ་བ་ལ་འབད་པ་རྣམས་དེའི་རྒྱུའི་གཙོ་བོ་གཞན་སེམས་ཤེས་པ་སོགས་ཀྱི་ཕྱིར་བརྩོན་པས་མངོན་པར་ཤེས་པ་དྲུག་ལ་འཇུག་པ་དང་། དགུ་པ་ནི། མངོན་ཤེས་ཐོབ་པ་རྣམས་ད་ནི་བདག་གིས་རྣམ་པ་ཐམས་ཅད་མཁྱེན་པ་ཐོབ་པར་བྱའོ་སྙམ་དུ་མངོན་པར་འཚང་རྒྱ་བ་ལ་སྤྲོ་བ་ཆེན་པོ་སྐྱེ་བས་རྣམ་མཁྱེན་ལ་འཇུག་པ་སྟེ་འཇུག་པའི་སྒྲུབ་པ་དགུའོ། །དེས་རྣམ་མཁྱེན་མཚོན་པའི་ཆོས་བརྒྱད་པ་ཐལ། གསུམ་པ་ཚོགས་ཀྱི་སྒྲུབ་པ་བཤད་པ་ནི། ཐེག་ཆེན་སེམས་བསྐྱེད་ལ་བརྟེན་ནས་བླ་མེད་བྱང་ཆུབ་ཀྱི་ཆེད་དུ་དོན་གཉིས་སྒྲུབ་པའི་བྱ་བ་གང་ཞིག་བྱང་ཆུབ་ཆེན་པོར་དངོས་སུ་འབྱིན་པ་དེ་ཚོགས་སྒྲུབ་ཀྱི་མཚན་ཉིད། སྤྱིར་ཚོགས་ཙམ་ཞིག་ཚོགས་ལམ་ནས་ཡོད་ཀྱང་། འདི་གཙོ་བོ་སྟོང་ཉིད་རྟོགས་པ་དང་། འབྲས་བུ་བྱང་ཆུབ་ཀྱི་དངོས་རྒྱུ་ཞིག་ལ་འདོད་པས། སྦྱོར་ལམ་ཆོས་མཆོག་ཆེན་པོ་ན་ཚོགས་སྒྲུབ་དང་པོ་བཅོ་ལྔ་དང་། ས་དང་གཉེན་པོའི་ཚོགས་གཉིས་མཐོང་སྒོམ་གྱིས་བསྡུས་པའི་ས་བཅུ་ན་ཡོད། དེ་ལ་དབྱེ་ན། བརྩེ་དང་སྦྱིན་ལ་སོགས་པ་དྲུག །ཞི་གནས་ལྷག་མཐོང་བཅས་པ་དང་། །ཟུང་དུ་འདྲེལ་བའི་ལམ་གང་དང་། །ཐབས་ལ་མཁས་པ་གང་ཡིན་དང་། །ཡེ་ཤེས་དང་ནི་བསོད་ནམས་དང་། །ལམ་དང་གཟུང་དང་ས་བཅུ་དང་། །གཉེན་པོ་ཚོགས་ཀྱི་སྒྲུབ་པ་ཡི། །རིམ་པ་ཡིན་པར་ཤེས་པར་བྱ། །ཞེས་པ་ལྟར་བཅུ་བདུན་ཡོད་དེ། གྲངས་མེད་པའི་སེམས་ཅན་རྣམས་བྱང་ཆུབ་གསུམ་ལ་འགོད་པར་འདོད་པའི་བསམ་པ་སྙིང་རྗེའི་ཚོགས་དང་། དེར་འགོད་པའི་ཐབས་སྦྱོར་བ་ཕྱིན་དྲུག་གི་ཚོགས་དྲུག་དང་། སེམས་ཅན་གྱི་དོན་ལ་རྩེ་གཅིག་པའི་ཞི་གནས་དང་། ཞི་གནས་ཀྱི་ཡུལ་མི་དམིགས་པར་རྟོགས་པའི་ལྷག་མཐོང་དང་། སྲིད་ཞིའི་མཐར་མི་ལྟུང་བ་དེ་གཉིས་ཟུང་དུ་འདྲེལ་བའི་ལམ་སྟེ་མཉམ་བཞག་གིས་བསྡུས་པའི་ཚོགས་གསུམ་དང་། མཉམ་པར་མ་བཞག་པས་བསྡུས་པ། རྣམ་མཁྱེན་ཡིད་བྱེད་ཀྱིས་ཕྱིན་དྲུག་ལ་སྤྱོད་ཅིང་སེམས་ཅན་གྱི་དོན་བྱེད་པའི་ཐབས་ལ་མཁས་པ་དང་། ལྟ་བས་བསྡུས་པ་སྟོང་པ་ཉིད་ཉི་ཤུ་རྟོགས་པའི་ཡེ་ཤེས་དང་། སྤྱོད་པས་བསྡུས་པ་དཔའ་བར་འགྲོ་བའི་ཏིང་ངེ་འཛིན་ནས། ནམ་མཁའ་ལྟར་ཆགས་པ་མེད་པས་རྣམ་པར་གྲོལ་ཞིང་གོས་པ་མེད་པའི་ཏིང་ངེ་འཛིན་གྱི་བར་ཏིང་ངེ་འཛིན་གྱི་རྣམ་གྲངས་བརྒྱ་རྩ་གཅིག་ནི། དེ་རྣམས་ལ་བརྟེན་ནས་སེམས་ཅན་གྱི་དོན་དང་། བསོད་ནམས་མང་པོ་སྐྱེ་བའི་རྒྱུ་ཡིན་པས་བསོད་ནམས་དང་། འབྲས་བུ་སྒྲུབ་པས་བསྡུས་པ། བྱང་ཕྱོགས་སོ་བདུན་གྱི་ངོ་བོར་གྱུར་པ། མཐོང་སྒོམ་གཙོ་བོར་གྱུར་པའི་ལམ་དང་། དམིགས་པ་འཛིན་པས་བསྡུས་པ་དྲན་ཤེས་ཀྱིས་ཆོས་ཀྱི་ཚིག་དོན་འཛིན་པ་དང་། གསང་སྔགས་དང་བཟོད་པའི་རྒྱུར་གྱུར་པའི་གཟུངས་དང་། འཇིག་རྟེན་ལས་འདས་པའི་ཡེ་ཤེས་གང་ཞིག་ཤས་ཆེ་བ་དང་། ཀུན་རྫོབ་པའི་ཡོན་ཏན་གྱི་རྟེན་བྱེད་པ་ས་དང་། མཐོང་སྒོམ་ལམ་གྱི་སྤང་བྱ་གཟུང་འཛིན་གྱི་རྟོག་པ་བརྒྱད་སྤོང་བའི་གཉེན་པོའི་ཚོགས་ཏེ་ཚོགས་ཀྱི་སྒྲུབ་པ་བཅུ་བདུན་ནོ། །དེས་རྣམ་མཁྱེན་མཚོན་པའི་ཆོས་དགུ་པ་ཐལ། བཞི་པ་ངེས་འབྱུང་སྒྲུབ་པ་ནི། ཐེག་ཆེན་སེམས་བསྐྱེད་ལ་བརྟེན་ནས་བླ་མེད་བྱང་ཆུབ་ཆེད་དུ་དོན་གཉིས་སྒྲུབ་པའི་བྱ་བ་གང་ཞིག་འབྱུང་ས་མཐར་ཐུག་ཏུ་གདོན་མི་ཟ་བར་འབྱིན་བྱེད་ས་བཅུ་པའི་ཁྱད་པར་ལམ་གྱིས་བསྡུས་པ་དེ། ངེས་འབྱུང་སྒྲུབ་པའི་མཚན་ཉིད། དེ་ལ་དབྱེ་ན། ཡུལ་འབྱུང་ས་བརྒྱད་ཡོད་པས། དེ་ལ་ལྟོས་ནས་ངེས་འབྱུང་གི་སྒྲུབ་པ་བརྒྱད་ཡོད་དེ། ཆེད་དུ་བྱ་དང་མཉམ་ཉིད་དང་། །སེམས་ཅན་དོན་དང་་འབད་མེད་དང་། །མཐའ་ལས་འདས་པར་ངེས་འབྱུང་དང་། །ཐོབ་བའི་མཚན་ཉིད་ངེས་འབྱུང་དང་། །རྣམ་པ་ཐམས་ཅད་མཁྱེན་ཉིད་དང་། །ལམ་གྱི་ཡུལ་ཅན་ངེས་འབྱུང་སྟེ། །རྣམ་པ་བརྒྱད་ཀྱི་བདག་ཉིད་འདི། །ངེས་འབྱུང་སྒྲུབ་པ་ཡིན་ཤེས་བྱ། །ཞེས་པ་ལྟར། ཆེད་དུ་བྱ་བ་ཆེན་པོ་གསུམ་གྱི་བདག་ཉིད་ཅན་དུ་ངེས་པར་འབྱུང་བ་དང་། ཤེས་རབ་ཀྱིས་ཆོས་ཐམས་ཅད་ནམ་མཁའ་ལྟར་མཉམ་པ་ཉིད་དུ་རྟོགས་པར་ངེས་པར་འབྱུང་བ་དང་། སྙིང་རྗེས་གྲངས་དང་ཚད་མ་མཆིས་པའི་སེམས་ཅན་གྱི་དོན་བྱ་བར་ངེས་པར་འབྱུང་བ་དང་། ཤེས་རབ་དང་སྙིང་རྗེ་ཟུང་དུ་འདྲེལ་བས་གཞན་དོན་ལ་འབད་པ་མེད་པར་ལྷུན་གྱིས་གྲུབ་པར་ངེས་པར་འབྱུང་བ་དང་། སྲིད་ཞིའི་མཐའ་ལ་མི་གནས་པའི་མྱང་འདས་སུ་ངེས་པར་འབྱུང་བ་དང་། ཐོབ་བྱ་ཐེག་པ་གསུམ་གྱི་སྤང་རྟོགས་ཀྱི་རིགས་ཐམས་ཅད་ཐོབ་པའི་མཚན་ཉིད་ཅན་དུ་ངེས་འབྱུང་བ་དང་། ཤེས་བྱའི་ཆོས་ཀྱི་རྣམ་པ་ཐམས་ཅད་སྐད་ཅིག་མ་གཅིག་ལ་རྣམ་པར་མི་རྟོག་པར་མཁྱེན་པའི་རྣམ་པ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བ་སྟེ་བདུན་ནི་སའི་མཐར་ཐུག་པ་སངས་རྒྱས་ཀྱི་ས་དང་། རྣམ་མཁྱེན་ལ་དངོས་སུ་སྦྱོར་བའི་ཁྱད་པར་གྱི་ལམ་བར་ཆད་མེད་རྩེར་ངེས་པར་འབྱུང་བ་ནི་ལམ་གྱི་མཐར་ཐུག་ཏུ་ངེས་པར་འབྱུང་བ་སྟེ། འབྱུང་ས་མཐར་ཐུག་བརྒྱད་པོ་དེ་ཡུལ་དུ་བྱས་པའི་ཡུལ་ཅན་ཐབས་ཤེས་ཁྱད་པར་ཅན་གྱི་བྱ་བ་རྣམས་ནི་ངེས་པར་འབྱིན་བྱེད་ཀྱི་སྒྲུབ་པ་ཡིན་པས་ངེས་འབྱུང་གི་སྒྲུབ་པ་བརྒྱད་དུ་ཤེས་པར་བྱའོ། །འབྱུང་ས་སྔ་མ་བདུན་མི་སློབ་ལམ་དང་། ཕྱི་མ་སློབ་ལམ་ན་ཡོད་དོ། །དེས་རྣམ་མཁྱེན་མཚོན་པའི་ཆོས་བཅུ་པ་ཐལ། །དེ་ཡན་ཆད་ཀྱིས་ཆོས་བཅུས་མཚོན་པའི་རྣམ་མཁྱེན་ནི། ཐོག་མར་ཐོས་བསམ་གྱིས་གཏན་ལ་དབབ་པའི་གནས་སྐབས་ན། ཤེས་བྱའི་ཡུལ་གྱི་གཙོ་བོ་དང་། བར་དུ་ཉམས་ལེན་སྦྱོར་བཞིའི་གནས་སྐབས་ན་སྒོམ་བྱའི་རྣམ་པའི་གཙོ་བོ་དང་། ཐ་མ་ལམ་མཐར་ཕྱིན་པའི་གནས་སྐབས་ཐོབ་བྱ་འབྲས་བུའི་གཙོ་བོ་ཡིན་པས་ཅུང་ཟད་རྒྱས་པར་བཤད་པ་ཡིན་ལ། གཞན་ལམ་ཤེས་སོགས་ཀྱི་སྐབས་ལྷག་མ་རྣམས་མདོ་ཙམ་དུ་བརྗོད་དེ། གཉིས་པ་ལམ་ཤེས་མཚོན་པའི་ཆོས་ལ་བཅུ་གཅིག་ཡོད་དེ། མོག་མོག་པོར་བྱེད་སོགས། དེ་ལྟར་བཤད་ཅེས་པ་ལྟར་ལས། དང་པོ་ལམ་ཤེས་ཀྱི་ཡན་ལག་གི་རྟེན་ནི། སེམས་བསྐྱེད་དང་ལྡན་ཅིང་ང་རྒྱལ་སྤང་བ་དང་། གཉིས་པ་ཡན་ལག་ཅན་གྱི་ལམ་ལ་གསུམ་ལས། གང་ཟག་གི་བདག་མེད་ཙམ་རྟོགས་པའི་ཉི་ཚེ་བའི་མཁྱེན་པ་དེ་སློབ་མ་ཉན་ཐོས་གྱི་ལམ་གྱི་མཚན་ཉིད། དབྱེ་ན་སྦྱོར་མཐོང་གི་ལམ་གཉིས་ཀྱིས་མཚོན་པའོ། །བདག་མེད་ཕྱེད་དང་གཉིས་རྟོགས་པའི་ཉི་ཚེ་བའི་མཁྱེན་པ་དེ་བསེ་རུ་རང་རྒྱལ་ལམ་གྱི་མཚན་ཉིད། དབྱེ་བ་ཉན་ཐོས་ཀྱི་སྐབས་དང་འདྲ། བྱང་སེམས་ཀྱི་ལམ་ལ་གཉིས་ལས། ཟག་མེད་སྒོམ་ལམ་མ་སྐྱེས་གོང་གི་བདག་མེད་གཉིས་རྟོགས་པའི་འཇིག་རྟེན་ལས་འདས་པའི་ཡེ་ཤེས་དེ། ཐེག་ཆེན་མཐོང་ལམ་གྱི་མཚན་ཉིད། དབྱེ་བ་སྐད་ཅིག་མ་བཅུ་དྲུག་ཡོད། སྒོམ་ལམ་ལ་གཉིས་ལས། སྒོམ་ལམ་གྱི་འབྲས་བུར་གྱུར་པའི་ཕན་ཡོན་དེ་སྒོམ་ལམ་བྱེད་པའི་མཚན་ཉིད། དབྱེ་ན་དྲུག་ཡོད། བྱེད་པ་ཅན་གྱི་སྒོམ་ལམ་ལ་ཟག་བཅས་ཟག་མེད་ཀྱི་སྒོམ་ལམ་གཉིས་ལས། དང་པོ་ཟག་བཅས་སྒོམ་ལམ་ལ་གསུམ་དུ་ཡོད་པའི་ཐོག་མ་ནི། ཟག་བཅས་སྒོམ་ལམ་གང་ཞིག །ཤེར་ཕྱིན་ལ་ཡོན་ཏན་ཅན་དུ་ངེས་པར་འཛིན་པ་མོས་པ་སྒོམ་ལམ་གྱི་མཚན་ཉིད། དབྱེ་ན་མོས་པ་ཉེར་བདུན་ཡོད། མོས་པ་སྒོམ་པའི་བྱང་སེམས་ལ། སངས་རྒྱས་དང་བྱང་སེམས་གོང་མ་རྣམས་དགྱེས་ནས་བསྔགས་པ་བརྗོད་པ་མོས་པ་སྒོམ་ལམ་གྱི་ཕན་ཡོན་གྱི་མཚན་ཉིད། དབྱེ་བ་ཉེར་བདུན་ཡོད། ཟག་བཅས་སྒོམ་ལམ་གང་ཞིག་གཞན་དོན་དུ་དགེ་བ་བྱང་ཆུབ་ཀྱི་ཡན་ལག་ཏུ་བྱེད་པ་དེ་བསྔོ་བ་སྒོམ་ལམ་གྱི་མཚན་ཉིད། དབྱེ་ན་བཅུ་གཉིས་ཡོད། ཟག་བཅས་སྒོམ་ལམ་གང་ཞིག་རང་གཞན་གྱི་དགེ་བ་ལ་མངོན་པར་དགའ་བ་དེ་ཡི་རང་སྒོམ་ལམ་གྱི་མཚན་ཉིད། དབྱེ་བ་གཉིས་སོ། །གཉིས་པ་ཟག་མེད་སྒོམ་ལམ་ལ་གཉིས་ལས། ཐེག་ཆེན་གྱི་ཟག་མེད་སྒོམ་ལམ་གང་ཞིག་རྟོགས་པ་མཐར་ཐུག་གི་རྒྱུར་གྱུར་པ་དེ་སྒྲུབ་པ་སྒོམ་ལམ་གྱི་མཚན་ཉིད། དབྱེ་ན་ངོ་བོ་ཉིད་ལ་སོགས་པའི་ལྔ་ཡོད། ཐེག་ཆེན་ཟག་མེད་སྒོམ་ལམ་གང་ཞིག་སྤངས་པ་མཐར་ཐུག་གི་རྒྱུར་གྱུར་པ་དེ་རྣམ་དག་སྒོམ་ལམ་གྱི་མཚན་ཉིད། དབྱེ་ན་སྒོམ་སྤང་དགུའི་གཉེན་པོ་དགུ་ཡོད། དེས་རྟེན་བྱང་ཆུབ་སེམས་དཔའ་རྣམས་ལ་ཡོད་པའི་ལམ་ཤེས་མཚོན་པའི་ཆོས་བཅུ་གཅིག་པ་ཐལ། གསུམ་པ་གཞི་ཤེས་མཚོན་པའི་ཆོས་ལ་དགུ་ཡོད་དེ། ཤེས་པས་སྲིད་ལ་སོགས་ནས། དེ་ལྟར་ཀུན་ཤེས་ཉིད་དུ་འདོད། །ཅེས་པ་ལྟར་ལས། དང་པོ་རང་བཞིན་མེད་རྟོགས་ཀྱི་ཤེས་རབ་ཀྱིས་སྲིད་པའི་རྒུད་པ་བཟློག་པའི་མཁྱེན་པ་དེ། ཤེས་པས་སྲིད་ལ་མི་གནས་པའི་གཞི་ཤེས་ཀྱི་མཚན་ཉིད། སེམས་བསྐྱེད་ཁྱད་པར་ཅན་གྱིས་ཞི་བའི་རྒུད་པ་བཟློག་པའི་མཁྱེན་པ་དེ། སྙིང་རྗེས་ཞི་ལ་མི་གནས་པའི་གཞི་ཤེས་ཀྱི་མཚན་ཉིད། ཤེས་བྱ་ལམ་འབྲས་གསུམ་ལ་མཚན་མར་བཟུང་ནས་མཚན་འཛིན་གྱི་གཉེན་པོ་བྱེད་མི་ནུས་པ་དེ། འབྲས་བུའི་ཤེར་ཕྱིན་བསྐྱེད་པའི་ཐབས་མ་ཡིན་པས་དེ་ལས་རིང་བའི་གཞི་ཤེས་ཀྱི་མཚན་ཉིད། ཐབས་ཤེས་ཁྱད་པར་ཅན་དང་ལྡན་པའི་མཁྱེན་པ་དེ་འབྲས་བུའི་ཤེར་ཕྱིན་བསྐྱེད་པའི་ཐབས་ལ་མཁས་པས་དེ་ལས་རིང་བ་མིན་པའི་གཞི་ཤེས་ཀྱི་མཚན་ཉིད། གཞིའི་གནས་ལུགས་ལ་ཕྱིན་ཅི་ལོག་ཏུ་ཞུགས་པའི་འཛིན་པས་བཅིང་པས་བྱང་སེམས་གྱིས་སྤང་བྱར་གནས་པ་དེ། མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད། གཞི་རང་བཞིན་མེད་པར་རྟོགས་པས། མཚན་འཛིན་གྱི་གཉེན་པོ་བྱེད་ནུས་པའི་མཁྱེན་པ་དེ། གཉེན་པོའི་ཕྱོགས་ཀྱི་གཞི་ཤེས་ཀྱི་མཚན་ཉིད། གཞི་གཟུགས་སོགས་ལ་ཞེན་པ་བཀག་ནས་བསྒོམ་པས་ཉན་རང་གི་སྦྱོར་བ་ཤུགས་ལ་འཕེན་བྱེད་དེ། གཞི་ཤེས་ཀྱི་སྦྱོར་བའི་མཚན་ཉིད། དེ་ལ་དབྱེ་ན་སྦྱོར་བ་བཅུ་ཡོད། གཞི་ཤེས་ཀྱི་སྦྱོར་བ་བསྒོམ་པའི་རྣམ་པ་གང་ཞིག་ཡུལ་དང་ཡུལ་ཅན་དུ་རློམ་པ་འགོག་བྱེད་དེ། སྦྱོར་བའི་མཉམ་ཉིད་ཀྱི་མཚན་ཉིད། དབྱེ་ན་སྦྱོར་བ་བཅུ་ལ་རློམ་མེད་བཞི་བཞི་སྟེ་བཞི་བཅུ་ཡོད། སྒྲོ་འདོགས་སུམ་ཅུ་རྩ་གཉིས་དང་བྲལ་བའི་བདེན་པ་གསར་མཐོང་གང་ཞིག །ཐེག་དམན་གྱི་མཐོང་ལམ་ཤུགས་ལ་འཕེན་བྱེད་དེ། མཐོང་ལམ་གྱི་མཚན་ཉིད་དེ། དེས་གཞི་ཤེས་མཚོན་པའི་ཆོས་དགུ་པོ་དེ་ཐལ། དེ་ལྟར་ན་ཡུལ་མཁྱེན་པ་གསུམ་གྱིས་བསྡུས་པའི་དོན་སུམ་ཅུ་དེ་སོང་ནས། །གཉིས་པ་སྦྱོར་བཞིའི་ལུས་རྒྱས་པར་བཤད་པ་ལ། རྣམ་རྫོགས་སྦྱོར་བ། རྩེ་མོ། མཐར་གྱིས་པ། སྐད་ཅིག་མའི་ལུས་རྒྱས་པར་བཤད་པ་བཞི་ལས། དང་པོ་རྣམ་ཀུན་མངོན་རྫོགས་ཀྱི་ཆོས་ལ་བཅུ་གཅིག་ཡོད་པ་དེ་ལས། རྣམ་པར་སྦྱོར་བ་སོགས་ནས། ཐབས་མཁས་བཅས་པ་ཡིན་ཅེས་པ་ལྟར། དང་པོ་རྣམ་པ་ནི། ཡུལ་ལམ་མཁྱེན་པའི་ཁྱད་པར་གང་ཞིག་སྦྱོར་བའི་བསྒོམ་བྱར་གྱུར་པ་སྟེ། དབྱེ་ན་རྣམ་པ་བརྒྱ་དང་དོན་གསུམ་མོ། །གཉིས་པ་སྦྱོར་བ་ནི། རྟོགས་པ་ལ་རང་དབང་དུ་བྱ་བའི་ཕྱིར་མཁྱེན་གསུམ་བསྡུས་ཏེ་སྒོམ་པའི་རྣལ་འབྱོར་ཏེ། དབྱེ་ན་ཚེགས་ཆེན་ཡུན་རིང་རྟོགས་པའི་སྦྱོར་བ་སོགས་ཉི་ཤུའོ། །གསུམ་པ་ཡོན་ཏན་ནི། སྦྱོར་བ་བསྒོམ་པས་གནས་སྐབས་དང་མཐར་ཐུག་གི་ཐོབ་བྱ་སྟེ། དབྱེ་ན་བདུད་ཀྱི་མཐུ་བཅོམ་པ་ལ་སོགས་བཅུ་བཞི་ཡོད་དོ། །བཞི་པ་སྐྱོན་ནི། རྣལ་འབྱོར་སྐྱེས་པ་དང་ཁྱད་པར་དུ་འགྲོ་བ་ལ་བར་དུ་གཅོད་པའི་བདུད་ལས་ཏེ། དབྱེ་ན་ཞེ་དྲུག་གོ། །ལྔ་པ་མཚན་ཉིད་ནི། སྦྱོར་བའི་ངོ་བོའམ་ནུས་པ་མཚོན་བྱེད་ཀྱི་མཁྱེན་པ་སྟེ། དབྱེ་ན་གོ་གཅིག་ཡོད་དོ། །དྲུག་པ་ཐར་པ་ཆ་མཐུན་ནི། བླ་མེད་བྱང་ཆུབ་ཏུ་བགྲོད་པའི་ལམ་གང་ཞིག་རྣམ་བྱང་དབང་པོའི་ངོ་བོར་མ་གྱུར་པའི་གནས་སྐབས་ཀྱི་ལམ་མོ། །བདུན་པ་ངེས་འབྱེད་ཆ་མཐུན་ནི། སེམས་ཅན་ལ་དམིགས་པའི་རྣམ་པ་ཁྱད་པར་བ་དང་ལྡན་ཞིང་སྒོམ་བྱུང་གཙོ་བོར་གྱུར་པའི་མོས་སྤྱོད་ཀྱི་ཡེ་ཤེས་སོ། །བརྒྱད་པ་སློབ་པ་ཕྱིར་མི་ལྡོག་པའི་ཚོགས་ནི། སྲིད་ཞི་གང་དུ་ཡང་མི་ལྟུང་བར་ངེས་པའི་རྟགས་དང་ལྡན་པའི་སེམས་དཔའ་སྟེ། དབྱེ་ན་སྦྱོར་མཐོང་སྒོམ་གསུམ་ལ་གནས་པ་གསུམ་མོ། །དགུ་པ་སྲིད་དང་ཞི་བ་མཉམ་ཉིད་ཀྱི་སྦྱོར་བ་ནི། འཁོར་འདས་གཉིས་རང་བཞིན་མེད་པར་རྟོགས་ནས་སྒོམ་པའི་སྦྱོར་བའོ། །བཅུ་པ་ཞིང་དག་པ་བླ་ན་མེད་པའི་སྦྱོར་བ་ནི། རང་གང་དུ་སངས་རྒྱས་པའི་ཞིང་གི་སྣོད་བཅུད་གཉིས་ཀྱི་ཉེས་པ་དང་བྲལ་བར་བྱེད་པའི་སྦྱོར་བ་སྟེ། དབྱེ་ན་སྣོད་བཅུད་ཀྱི་ཞིང་དག་པའི་སྦྱོར་བ་གཉིས་སོ། །བཅུ་གཅིག་པ་ཐབས་ལ་མཁས་པའི་སྦྱོར་བ་ནི། ཐབས་མཁས་པའི་ཡུལ་བཅུ་མངོན་དུ་བྱེད་པ་ལ་དུས་དང་དུས་མིན་ཤེས་པའི་སྦྱོར་བ་སྟེ། བཅུ་གཅིག་པོ་འདི་ནི། མཁྱེན་གསུམ་གྱི་རྣམ་པ་ཀུན་མངོན་དུ་ཕྱོགས་ཏེ་རྫོགས་པར་རྟོགས་པ་ཡིན་ནོ། །དེས་རྣམ་རྫོགས་སྦྱོར་བའི་ཆོས་བཅུ་གཅིག་ཐལ། གཉིས་པ་རྩེ་མོའི་ཆོས་ལ་བརྒྱད་ཡོད་དེ། དེ་ཡི་རྟགས་དང་་རྣམ་འཕེལ་དང་། །བརྟན་དང་སེམས་ཀུན་གནས་པ་དང་། །མཐོང་ཞེས་བྱ་དང་བསྒོམ་པ་ཞེས། །བྱ་བའི་ལམ་ནི་སོ་སོ་ལ། །རྣམ་པར་རྟོག་པ་བཞི་དང་ནི། །གཉེན་པོ་རྣམ་པ་བཞི་དང་ནི། །བར་ཆད་མེད་པའི་ཏིང་ངེ་འཛིན། །ལོག་པར་སྒྲུབ་དང་བཅས་པ་ནི། །རྩེ་མོ་མངོན་རྟོགས་མཐར་གྱིས་པ། །ཞེས་པ་ལྟར། སྐྱེ་མེད་ཀྱི་རྟོག་པ་རང་དབང་དུ་གྱུར་པའི་རྩེ་མོ་དེའི་རྟགས་ནི། བསྡུས་སྒོམ་རབ་ཏུ་གྱུར་པ་མཚོན་བྱེད་གང་ཞིག་དྲོད་ཀྱིས་བསྡུས་པ་སྟེ། དབྱེ་ན་རྟགས་བཅུ་གཉིས་སོ། །གཉིས་པ་རྣམ་འཕེལ་ནི། བསྡུས་སྒོམ་རབ་ཏུ་གྱུར་པ་གོང་དུ་འཕེལ་བའི་ཆ་གང་ཞིག་སྦྱོར་ལམ་རྩེ་མོས་བསྡུས་པ་སྟེ། དབྱེ་ན་རྣམ་འཕེལ་བཅུ་དྲུག་གོ། །གསུམ་པ་ངེས་པར་བརྟན་པ་ནི། མཁྱེན་གསུམ་གྱི་རྟོགས་པ་ཅི་རིགས་པ་དང་། སེམས་ཅན་གྱི་དོན་མི་གཏོང་བ་ལ་བརྟན་པ་ཐོབ་པའི་རྩེ་མོ་གང་ཞིག་སྦྱོར་ལམ་བཟོད་པས་བསྡུས་པ་སྟེ། དབྱེ་ན་བརྟན་པ་གཉིས་སོ། །བཞི་བ་སེམས་ཀུན་ཏུ་གནས་པ་ནི། སེམས་དང་པོ་བསྐྱེད་པ་སོགས་བྱང་སེམས་བཞིའི་སེམས་བསྐྱེད་པ་ལ་ཡི་རང་བའི་དོན་ལ་སེམས་རྩེ་གཅིག་ཏུ་གནས་པའི་རྩེ་མོ་གང་ཞིག་ཆོས་མཆོག་གིས་བསྡུས་པའོ། །ལྔ་པ་མཐོང་ཞེས་བྱ་བའི་ལམ་གྱི་རྩེ་མོ་ནི། བསྡུས་སྒོམ་རབ་ཏུ་གྱུར་པ་གང་མཐོང་སྤང་རྟོག་པའི་ཐུན་མོང་མ་ཡིན་པའི་གཉེན་པོ་བྱེད་པའོ། །དྲུག་པ་སྒོམ་པ་ཞེས་བྱ་པའི་ལམ་གྱི་རྩེ་མོ་ནི། བསྡུས་སྒོམ་རབ་ཏུ་གྱུར་པ་གང་ཞིག །སྒོམ་སྤང་རྟོག་པའི་ཐུན་མོང་མ་ཡིན་པའི་གཉེན་པོ་བྱེད་པའོ། །མཐོང་སྒོམ་གྱི་ལམ་གཉིས་པོ་སོ་སོར། འཇུག་པ་གཟུང་རྟོག་དང་ལྡོག་པ་གཟུང་རྟོག་གཉིས། རྫས་འཛིན་རྟོག་པ་དང་། བཏགས་འཛིན་རྟོག་པ་གཉིས་ཏེ་བཞི་རེ་བཞི་རེ་ཡོད་པའི་གཉེན་པོ། སྦྱོར་བ་དང་འཇུག་པའི་ལམ་གཉིས་གཉིས་ཏེ་རྣམ་པ་བཞི་ཡོད་དོ། །བདུན་པ་བར་ཆད་མེད་པའི་ཏིང་ངེ་འཛིན་ནི། བསྡུས་སྒོམ་རབ་ཏུ་གྱུར་པ་གང་ཞིག་རྣམ་མཁྱེན་གྱི་དངོས་རྒྱུར་གྱུར་པའོ། །བརྒྱད་པ་བསལ་བྱ་ལོག་སྒྲུབ་ནི། བདེན་གཉིས་འགལ་བར་འཛིན་པའི་མི་ཤེས་པ་སྟེ། དབྱེ་ན་བཅུ་དྲུག་གོ །དེ་ལྟར་རྩེ་མོའི་མངོན་རྟོགས་བརྒྱད་ལས། དང་པོ་བདུན་རྩེ་མོའི་ངོ་བོ་དང་། བརྒྱད་པ་ནི་རྩེ་མོས་སྤང་བྱ་ཡིན་ཏེ། དེས་རྩེ་མོའི་ཆོས་བརྒྱད་ཐལ། གསུམ་པ་མཐར་གྱིས་པའི་ཆོས་ལ་བཅུ་གསུམ་ཡོད་དེ། མཐར་གྱིས་པ། རྣམ་གསུམ་རྣམ་བཅུ། ཞེས་པ་ལྟར། མཁྱེན་གསུམ་གྱི་རྟོགས་པ་ལ་བརྟན་པ་ཐོབ་པར་བྱ་བའི་ཕྱིར་རྣམ་པ་རྣམས་རིམ་གྱིས་སྒོམ་པའི་སེམས་དཔའི་རྣལ་འབྱོར་གང་ཞིག་སྦྱིན་པ་རིམ་ལྡན་དུ་སྒོམ་པ་ནས་ཤེས་རབ་ཀྱི་བར་རིམ་ལྡན་དུ་སྒོམ་པ་སྦྱིན་པའི་མཐར་གྱིས་པ་སོགས་དྲུག་དང་། དེ་བཞིན་གཤེགས་པའི་ཡོན་ཏན་དོན་དམ་པར་མི་དམིགས་ཤིང་། ཀུན་རྫོབ་ཏུ་ཇི་ལྟ་བ་བཞིན་རིམ་ལྡན་དུ་དྲན་པ་སངས་རྒྱས་རྗེས་སུ་དྲན་པའི་མཐར་གྱིས་པ་དང་། དེ་བཞིན་དུ་དགེ་མི་དགེ་ལུང་མ་བསྟན་གྱི་ཆོས་དང་། སློབ་པ་ཕྱིར་མི་ལྡོག་པའི་ཚོགས་དང་། སྡོམ་སྡུད་དོན་བྱེད་གསུམ་གྱིས་བསྡུས་པའི་ཚུལ་ཁྲིམས་དང་། ཆོས་དང་ཟང་ཟིང་གི་སྦྱིན་པ་དང་། ལྷར་སྐྱེས་པའི་འཕགས་པ་རྣམས་དོན་དམ་པར་མི་དམིགས་ཤིང་། ཀུན་རྫོབ་ཏུ་ཕྱིན་ཅི་མ་ལོག་པར་རིམ་ལྡན་དུ་རྗེས་སུ་དྲན་པ། ཆོས་དང་དགེ་འདུན་དང་། ཚུལ་ཁྲིམས་དང་། སྦྱིན་པ་དང་། ལྷ་རྗེས་སུ་དྲན་པའི་མཐར་གྱིས་པ་རྣམས་ཏེ་དྲུག་དང་། དངོས་མེད་ངོ་བོ་ཉིད་དུ་ཤེས་པའི་མཐར་གྱིས་པ་ནི། ཆོས་ཐམས་ཅད་དོན་དམ་པར་ངོ་བོ་ཉིད་མེད་པར་རྟོགས་ནས་རིམ་གྱིས་སྒོམ་པ་སྟེ། དེ་ལྟར་དཀོན་མཆོག་གསུམ་རྗེས་སུ་དྲན་པའི་རྣམ་པ་གསུམ་དང་། ལྷག་མ་རྣམ་པ་བཅུ་སྟེ་བཅུ་གསུམ་ནི་མཐར་གྱིས་པའོ། །དེ་རྣམས་ཀྱང་རེ་རེ་ཞིང་ཕྲལ་ནས་བསྒོམ་པ་མ་ཡིན་ཏེ། མཁྱེན་གསུམ་གྱི་རྣམ་པ་རྣམས་རིམ་གྱིས་བསྒོམ་པ་ན། རེ་རེ་ལ་ཡང་བཅུ་གསུམ་པོ་ཐམས་ཅད་ཚང་བའི་ཚུལ་གྱིས་བསྒོམ་དགོས་པ་ཡིན་ནོ། །དེས་མཐར་གྱིས་པའི་ཆོས་བཅུ་གསུམ་ཐལ། བཞི་པ་སྐད་ཅིག་མའི་སྦྱོར་བ་ལ་བཞི་ཡོད་དེ། སྐད་ཅིག་མ། །གཅིག་གིས་མངོན་རྫོགས་བྱང་ཆུབ་པ། །མཚན་ཉིད་ཀྱིས་ནི་རྣམ་པ་བཞི། །ཞེས་པ་ལྟར། བྱ་རྫོགས་ཀྱི་སྐད་ཅིག་མ་གཅིག་གིས་ཆོས་ཐམས་ཅད་མངོན་པར་རྫོགས་པར་བྱང་ཆུབ་པའི་སྐད་ཅིག་མའི་སྦྱོར་བ་དེ་ལ་མཚན་ཉིད་དམ་ལྡོག་པས་ཕྱེ་ན། རྣམ་པར་སྨིན་པ་མ་ཡིན་པའི་ཆོས་ཐམས་ཅད་དང་། རྣམ་པར་སྨིན་པའི་ཆོས་ཐམས་ཅད་དང་། ཆོས་ཐམས་ཅད་མཚན་ཉིད་མེད་པར་དང་། ཆོས་ཐམས་ཅད་གཉིས་སུ་མེད་པར་སྐད་ཅིག་མ་གཅིག་ལ་རྟོགས་པ་བཞིའོ། །དེས་སྐད་ཅིག་མའི་སྦྱོར་བའི་ཆོས་བཞི་ཐལ་ཏེ། སྦྱོར་བཞིས་བསྡུས་པའི་དོན་སོ་དྲུག་སོང་། གསུམ་པ་འབྲས་བུ་ཆོས་སྐུའི་ལུས་རྒྱས་པར་བཤད་པ་ལ། དབྱེ་གཞི་ནི་སངས་རྒྱས་ཀྱི་སྐུ་ཡིན་ལ། དབྱེ་བའི་ངོ་བོ་ནི་རྣམ་པ་བཞི་ཡོད་དེ། ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཅེས་གསུང་སྟེ། དེ་ལ་བཞི་ལས། དང་པོ། ངོ་བོ་ཉིད་ཀྱི་སྐུ་ནི། དབྱིངས་རང་བཞིན་གྱིས་དག་པ་གང་ཞིག གློ་བུར་གྱི་དྲི་མ་མ་ལུས་པ་དག་པའི་དག་པ་གཉིས་ལྡན་གྱིས་ཁྱད་པར་དུ་བྱས་པའི་སྐུའོ། །གཉིས་པ་ལོངས་སྤྱོད་རྫོགས་པའི་སྐུ་ནི། གདུལ་བྱའི་ནང་ནས་བྱང་སེམས་འཕགས་པ་ཁོ་ན་ལ་སྣང་བའི་སྐུ་གང་ཞིག་སྤྲུལ་སྐུའི་འཆར་གཞིར་གྱུར་པ་མཚན་དང་དཔེ་བྱད་ཀྱིས་བརྒྱན་པའོ། །གསུམ་པ་དེ་གཉིས་གཞན་པ་སྤྲུལ་པའི་སྐུ་ནི། ལོངས་སྐུའི་བདག་རྐྱེན་ལས་བྱུང་བའི་སངས་རྒྱས་ཀྱི་སྐུ་གང་ཞིག གདུལ་བྱའི་འགྲོ་བ་དག་པ་དང་། མ་དག་པ་དུ་མ་ལ་སྣང་ཞིང་དེ་དག་གི་དོན་བྱེད་པའོ། །བཞི་བ་ཡེ་ཤེས་ཆོས་སྐུ་ནི་སངས་རྒྱས་ཀྱི་སའི་གནས་ཡོངས་སུ་གྱུར་པའི་མཐར་ཐུག་པའི་ཡེ་ཤེས་གང་ཞིག་ཟག་མེད་ཀྱི་ཆོས་སྡེ་ཚན་ཉི་ཤུ་རྩ་གཅིག་གི་རྟེན་དུ་གྱུར་པའོ། །ཞར་བྱུང་ཆོས་སྐུའི་མཛད་པ་ནི། འགྲོ་རྣམས་ཞི་བའི་ལས་དང་ནི། །བསྡུ་རྣམ་བཞི་ལ་འགོད་པ་དང་། །ཞེས་པ་ནས། མྱ་ངན་འདས་ལ་འགོད་པ་སྟེ། །ཆོས་ཀྱི་སྐུ་ཡི་ཕྲིན་ལས་ནི། །རྣམ་པ་ཉི་ཤུ་བདུན་དུ་བཞེད། །ཅེས་པའི་བར་གྱིས་བསྟན་པའི་ཕྲིན་ལས་ཉི་ཤུ་རྩ་བདུན་དུ་གསུང་བ་རྣམས་ཀྱང་། ལམ་གྱི་རྟེན་དང་། ལམ་དང་། ལམ་གྱི་འབྲས་བུ་ལ་འགོད་པ་གསུམ་དུ་འདུ་བ་ཡིན་ནོ། །དེས་འབྲས་བུ་ཆོས་ཀྱི་སྐུའི་མངོན་རྟོགས་བཞི་ཐལ། །དེ་ལྟར་ན་མཛད་པ་ནི། ཆོས་སྐུའི་ཕྲིན་ལས་ཡིན་པས་ཟུར་དུ་མི་བགྲང་ལ། སེམས་བསྐྱེད་ནས་བཟུང་། ཡེ་ཤེས་ཆོས་སྐུའི་བར་གྱིས། སྐབས་བརྒྱད་དོན་བདུན་བཅུའི་སྒོ་ནས་རྒྱས་པར་བཤད་པ་དེ་སོང་ནས། གཉིས་པ་མངོན་རྟོགས་འབྲིང་པོ་ལ་མོས་པ་རྣམས་ལ་དྲུག་ཏུ་བཤད་པ་ནི། མཚན་ཉིད་དེ་ཡི་སྦྱོར་བ་དང་། །དེ་རབ་དེ་ཡི་གོ་རིམ་དང་། །དེ་མཐའ་དེ་ཡི་རྣམ་སྨིན་ནི། །དོན་བསྡུས་གཞན་ཏེ་རྣམ་པ་དྲུག །ཅེས་པ་ལྟར། མཁྱེན་གསུམ་ནི་བསྒོམ་བྱའམ་རང་རྒྱུད་ལ་བསྐྱེད་པར་བྱ་བའི་ཡུལ་གྱི་མཚན་ཉིད་དང་། རྣམ་ཀུན་ནི་དེ་སྒོམ་པའི་སྦྱོར་བ་དང་། རྩེ་མོ་ནི་སྦྱོར་བ་རབ་ཏུ་གྱུར་པའི་གནས་སྐབས་དང་། མཐར་གྱིས་པ་ནི་དེ་གོ་རིམ་བཞིན་དུ་མཉམ་པར་སྐྱོང་བའི་གནས་སྐབས་དང་། སྐད་ཅིག་མ་ནི་མཁྱེན་གསུམ་གྱི་རྟོགས་པ་རིམ་གྱིས་བསྒོམ་པ་དེ་མཐར་ཐུག་པའི་གནས་སྐབས་དང་། ཆོས་ཀྱི་སྐུ་ནི་སྦྱོར་བཞི་བསྒོམ་པའི་རྣམ་པར་སྨིན་པ་མཐར་ཐུག་པ་འབྲས་བུའི་གནས་སྐབས་ཏེ། མངོན་རྟོགས་དྲུག་ཏུ་བསྟན་པ་ནི་གཙོ་བོ་གོ་རིམ་ངེས་པའི་དབང་དུ་བྱས་ནས་བཞག་པའོ། །བསྡུས་པ་ལ་མོས་པ་ལ་གསུམ་དུ་བཤད་པ་ནི། ཡུལ་ནི་རྣམ་པ་གསུམ་པོ་རྒྱུ། །སྦྱོར་བ་བཞི་ཡི་བདག་ཉིད་དང་། །ཆོས་སྐུ་ཕྲིན་ལས་འབྲས་བུ་ནི། །དོན་བསྡུས་གཞན་ཏེ་རྣམ་པ་གསུམ། །ཞེས་པ་སྟེ། མཁྱེན་པ་གསུམ་ནི་ཡུལ་དང་། སྦྱོར་བ་བཞི་ནི་རྒྱུ་དང་། ཆོས་ཀྱི་སྐུ་ཕྲིན་ལས་དང་བཅས་པ་ནི་འབྲས་བུར་བཤད་དེ། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཐམས་ཅད་མངོན་རྟོགས་གསུམ་དུ་བསྡུས་ནས་བཤད་པ་ནི་གཙོ་བོར་གྲངས་ངེས་པ་དང་། ཟློས་སྤོང་གི་དབང་དུ་བྱས་ནས་བཞག་པའོ། །དེ་ལྟར་ན་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ། རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་དོན་དུ་གཉེར་བའི། རྒྱལ་སྲས་བྱང་ཆུབ་སེམས་དཔའ་རྣམས་ཀྱི་ལམ་འབྲས་བུ་དང་བཅས་པ་ཚང་ལ་མ་ནོར་བར་སྟོན་པའི་གཞུང་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་མན་ངག་གི་སྒོ་ནས་སྟོན་པའི་སྤྱི་དོན་བླ་མ་བརྒྱུད་པའི་ཞལ་ལུང་བཞིན་ལེགས་པར་བཤད་ཟིན་ཏོ། །ཟབ་ཡངས་ཆོས་ཚུལ་རྒྱ་མཚོའི་སྙིང་པོའི་བཅུད། །ཤེས་རབ་ཕ་རོལ་ཕྱིན་ཚུལ་ཡིད་བཞིན་དབང་། །ལེགས་བཤད་རྒྱལ་མཚན་མཐོན་པོའི་རྩེར་མཆོད་པས། །ཕན་བདེའི་ཆར་གྱིས་ཕྱོགས་ཀུན་ཁྱབ་གྱུར་ཅིག །གངས་ཅན་ལྗོངས་འདིར་རྒྱལ་བསྟན་པདྨོའི་ཚལ། །རྒྱས་མཛད་མཁན་སློབ་ཟུང་དང་ཆོས་རྒྱལ་རྗེའི། །རིང་ལུགས་དྲི་མེད་སྲིད་མཐའི་བར་དུ་ཡང་། །ནུབ་མེད་བཤད་སྒྲུབ་འོད་སྟོང་འབར་བར་ཤོག །སྲས་བཅས་རྒྱལ་བ་དགྱེས་པའི་ལམ་བཟང་འདི། །གདེངས་ཅན་དབང་པོའི་གཙུག་གི་རྒྱན་བཞིན་དུ། །མཁས་ཚུལ་གསུམ་གྱིས་ལེགས་པར་བཟུང་བ་ཡིས། །ཐུབ་བསྟན་ཕྱོགས་བརྒྱར་རྒྱས་པའི་བཀྲ་ཤིས་ཤོག །ཅེས་པ་འདི་ནི་གྲུབ་དབང་རྫོགས་ཆེན་པའི་སྐུ་ཕྲེང་ལྔ་པ་གསེར་ཁྲིར་ཐོག་མར་མངའ་གསོལ་བའི་སྐབས་སུ་ལེགས་བཤད་ཀྱི་དགའ་སྟོན་དུ་པདྨ་བཛྲ་པས་བྲིས་པ་དགེ་བར་གྱུར་ཅིག། དགེའོ།།
སེམས་བསྐྱེད་ཀྱི་ཟིན་བྲིས་རྒྱལ་སྲས་ལམ་གྱི་གསལ་བྱེད།
༄༅།།སེམས་བསྐྱེད་ཀྱི་ཟིན་བྲིས་རྒྱལ་སྲས་ལམ་གྱི་གསལ་བྱེད་ཅེས་བྱ་བ་བཞུགས་སོ།། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སྲིད་ཞིའི་ཕན་བདེ་མཐའ་དག་བསྐྱེད་པའི་གཞི། །རྒྱལ་སྲས་རྣམས་ཀྱི་བགྲོད་པ་གཅིག་པུའི་ལམ། །ཐེག་པ་ཀུན་གྱི་མཐར་ཐུག་འབྲས་བུའི་མཆོག །བྱང་ཆུབ་མཆོག་གི་སེམས་དེར་ཕྱག་འཚལ་ལོ། །མཚོ་ལྟར་གཏིང་ཟབ་སྤྲོས་བྲལ་ལྟ་བུའི་ཀློང་། །མཁའ་ལྟར་རྒྱ་ཆེ་ཀུན་བཟང་སྤྱོད་པའི་སྒོ། །ས་བཅུའི་དབང་ཕྱུག་རྣམས་ཀྱི་སྤྱོད་ཡུལ་ལ། །ཉམ་ཆུང་བྱིས་པའི་བློ་ཡིས་ཇི་ལྟར་གཞལ། །དེ་ལྟ་ནའང་བྱང་ཆུབ་སེམས་ཀྱི་ཆུས། །ཐུགས་རྒྱུད་ཡོངས་སུ་གང་བའི་བཤེས་གཉེན་གྱིས། །བརྩེ་བའི་གསུང་གིས་བསྐུལ་བའང་ལྡོག་དཀའ་བས། །དང་པོའི་ལས་ཅན་བདག་གིས་འདི་སྐད་དོ། །དེ་ལ་འདིར་རྒྱལ་བའི་སྲས་པོ་བྱང་ཆུབ་སེམས་དཔའ་རྣམས་ཀྱི་སྤྱོད་པ་རྒྱ་མཚོ་ལྟ་བུ་ལ་འཇུག་པའི་སྒོ་དང་པོ། ཐམས་ཅད་མཁྱེན་པའི་ལམ་གྱི་རྩ་བ་ཐེག་པ་ཆེན་པོའི་བྱང་ཆུབ་མཆོག་ཏུ་སེམས་བསྐྱེད་པའི་ཆོ་ག་ལ་སྔོན་འགྲོ་དངོས་གཞི་རྗེས་ཀྱི་རིམ་པ་གསུམ་ལས། སྔོན་འགྲོ་གདམས་ངག་ཁྱད་པར་ཅན་གྱིས་བློ་བཅོས་པའི་སྐབས་སུ་སྲིད་དང་ཞི་བའི་མཐའ་གཉིས་དང་བྲལ་བའི་བྱང་ཆུབ་ཀྱི་སེམས་རིན་པོ་ཆེ་ལ་སྤྲོ་བ་བསྐྱེད་པ་ནི། ཆོ་ག་རྒྱས་པའི་ཚེ་བྱང་ཆུབ་སེམས་ཀྱི་རང་བཞིན་གཏན་ལ་དབབ་པའི་ཚུལ་རྒྱས་བསྡུས་ཇི་ལྟར་རིགས་པར་སློབ་དཔོན་གྱི་ངག་གིས་བརྡ་བཀྲོལ་ནས་སློབ་མའི་རྒྱུད་ལ་གོ་བརྡ་འཕྲོད་ངེས་སུ་བྱེད་པར་གསུངས་པ་ལས། སྐལ་བ་དང་ལྡན་པའི་གཞི་རིགས་ཀྱི་རང་བཞིན། བསླབ་པ་ལ་སྦྱོར་བའི་གཞི་སེམས་བསྐྱེད་ཀྱི་རྣམ་བཞག མྱུར་དུ་སངས་རྒྱས་ཀྱི་གོ་འཕང་ཐོབ་པའི་གཞི་བྱང་ཆུབ་སེམས་དཔའི་བསླབ་པ་དང་གསུམ་གྱི་སྒོ་ནས་ངེས་པར་བྱའོ། །དེ་ལ་དང་པོ་རིགས་ཞེས་བྱ་བ་ནི་སྤྱིར་ཁམས་དང་ས་བོན་དང་རྒྱུ་རྣམས་ལ་འཇུག་པ་ལས། འདིར་ཐར་པ་དང་ཐམས་ཅད་མཁྱེན་པའི་རྒྱུའམ་ས་བོན་ཏེ། དེ་ལ་གྲུབ་མཐའི་དབང་གིས་ཉན་ཐོས་རྣམས་ཀྱིས་ནི་བསོད་སྙོམས་དང་། ཆོས་གོས་དང་། གནས་མལ་ངན་ངོན་ཙམ་གྱིས་ཆོག་ཤེས་ཤིང་སྤོང་བ་ལ་མངོན་པར་དགའ་བའི་གང་ཟག་རྣམས་ལ་འཕགས་པའི་རིགས་ཅན་ཟེར་ཏེ། དེའི་རྒྱུད་ཀྱི་སེམས་བྱུང་ཆོག་ཤེས་པ་སྟེ་འདོད་ཆགས་མེད་པའི་དགེ་བའི་རྩ་བ་ལ་འཕགས་པའི་རིགས་སུ་འདོད། སེམས་ཙམ་པ་ལའང་ཆོས་ཅན་འདུས་བྱས་ལ་རིགས་སུ་འདོད་པ་དང་། ཆོས་ཉིད་འདུས་མ་བྱས་པའི་རིགས་སུ་འདོད་པ་གཉིས་ཡོད་དེ། དང་པོ་ནི་བྱང་ཆུབ་སེམས་དཔའི་ས་ལས། དེ་ལ་རིགས་གང་ཞེ་ན། མདོར་བསྡུ་ན་རྣམ་པ་གཉིས་ཏེ། རང་བཞིན་དུ་གནས་པ་དང་། ཡང་དག་པར་བསྒྲུབ་པའོ། །དེ་ལ་རང་བཞིན་གྱིས་གནས་པའི་རིགས་ནི། བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། དེ་ནི་གཅིག་ནས་གཅིག་ཏུ་བརྒྱུད་དེ་འཁོར་བ་ཐོག་མ་མེད་པའི་དུས་ཅན་ཆོས་ཉིད་ཀྱིས་ཐོབ་པ་དེ་ལྟ་བུ་ཡིན་ནོ། །དེ་ལ་ཡང་དག་པར་བསྒྲུབ་པའི་རིགས་ནི་སྔོན་དགེ་བའི་རྩ་བ་གོམས་པར་བྱས་པ་ལས་ཐོབ་པ་གང་ཡིན་པ་སྟེ་ཞེས་པ་ལྟར། ཐོག་མ་མེད་པའི་དུས་ནས་གཅིག་ནས་གཅིག་ཏུ་ཟབ་པའི་སེམས་ཅན་གྱི་ཤེས་པའི་རྒྱུད་ཀྱི་སྟེང་ན་ཡོད་པའི་ཟག་མེད་ཀྱི་ཡེ་ཤེས་བསྐྱེད་པའི་ནུས་པ་སྐྱེ་མཆེད་དྲུག་པོ་དང་གཅིག་དང་ཐ་དད་པ་གང་དུ་བརྗོད་དུ་མེད་པ་ཆོས་ཉིད་ཀྱིས་ཐོབ་པ་ཞེས་བྱ་བ་ཐོས་བསམ་སོགས་ཀྱིས་གསར་དུ་བསྐྱེད་པ་མ་ཡིན་པ་དེ་ལྟ་བུ་ཞིག་ལ་རང་བཞིན་གནས་རིགས་སུ་འདོད། གཉིས་པ་ནི། རྒྱུད་བླ་མ་ལས། གཏེར་དང་འབྲས་བུ་ཤིང་བཞིན་ཏུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླང་བ་མཆོག་ཉིད་དོ། །ཞེས་གསུངས་པའི་རང་བཞིན་གནས་རིགས་དེ་ཉིད་ལས། དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བཞག་དང་བསལ་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ངོ་། །ཞེས་བསལ་བཞག་དང་བྲལ་བའི་ཆོས་ཉིད་འདུས་མ་བྱས་ལ་གསལ་བར་བཤད་པ་གང་ཡིན་པའོ། །དབུ་མ་པ་སྤྱིའི་ལུགས་ལ། སེམས་ཅན་ཐམས་ཅད་ཀྱི་ཆོས་ཉིད་ཆོས་ཀྱི་དབྱིངས་རང་བཞིན་གྱིས་འོད་གསལ་བ་སྟེ། ཉོན་མོངས་པའི་སྦུབས་ན་གནས་པ་ཉིད་ལ་བདེ་གཤེགས་སྙིང་པོ་ཞེས་གྲགས་པ་ལ་དེ་ཉིད་རང་བཞིན་གནས་རིགས་སུ་འདོད་པ་ཡིན་ཏེ། ཆོས་དབྱིངས་བསྟོད་པ་ལས། ཇི་ལྟར་བུམ་ནང་མར་མེ་ནི། །ཕྱི་རོལ་ཀུན་ཏུ་མི་སྣང་ལྟར། །དེ་བཞིན་ཆོས་ཀྱི་དབྱིངས་འདི་ཡང་། །འཁོར་བར་འོད་ནི་གསལ་མ་ཡིན། །ཞེས་དང་། ཕལ་པོ་ཆེ་ལས། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་རིགས་ཞེས་བྱ་བ་ནི་ཆོས་ཀྱི་དབྱིངས་ལྷུར་ལེན་པ་ནམ་མཁའ་ལྟར་ཡངས་པ་རང་བཞིན་གྱིས་འོད་གསལ་བ་སྟེ། ཞེས་གསུངས་པ་ལྟར་རོ། །རྒྱས་འགྱུར་གྱི་རིགས་ནི་ཐེག་པ་ཆེན་པོའི་ཆོས་ལ་ཐོས་བསམ་དང་བྱང་ཆུབ་ཏུ་སེམས་བསྐྱེད་པ་སོགས་ཀྱི་རྣམ་པར་དཀར་བའི་རྐྱེན་གང་ཡང་རུང་བས་རང་བཞིན་གནས་པའི་རིགས་ལ་གསོས་དང་པོར་བཏབ་པ་ཉིད་ཡིན་ཏེ། རྒྱ་མཚོའི་སྤྲིན་ལས། སེམས་བསྐྱེད་པ་ནི་གཞན་ཡིན་པར་རིག་པར་བྱ་སྟེ། རིགས་དེ་ཉིད་གནས་སྐབས་ཀྱི་ཁྱད་པར་གཞན་དུ་གྱུར་པ་ལ་མིང་གཞན་གྱིས་བསྟན་པ་ནི་ཡང་དག་པར་བསྒྲུབས་པ་ཞེས་བྱ་བས་སོ། །ཞེས་དང་། སེམས་བསྐྱེད་ཀྱི་སྐབས་སུ་ཡང་། དེ་རིང་སངས་རྒྱས་རིགས་སུ་སྐྱེས། །ཞེས་པའི་དོན་ཡིན་ནོ། །དེས་ན་འདིར་ནི་ཀུན་མཁྱེན་ཆོས་ཀྱི་རྒྱལ་པོས། ཕར་པ་དགེ་བའི་རྟེན་ནི་རིགས་ཡིན་ལ། །དེ་ཡང་སེམས་ཀྱི་རང་བཞིན་འོད་གསལ་བ། །དྲི་མེད་ཁམས་ཏེ་རང་བཞིན་གནས་པའི་རིགས། །དེ་ཡི་སྣང་ཆ་སྐུ་གཉིས་དཔེ་རྣམས་དགུ། །སྙིང་རྗེའི་རང་བཞིན་ཡེ་ནས་གནས་པ་ནི། །རྒྱས་འགྱུར་རིགས་ཞེས་བདེ་བར་གཤེགས་པས་གསུངས། །རྩ་བ་རིག་པའི་ཡེ་ཤེས་འོད་གསལ་ལ། །ངོ་བོ་དུག་གསུམ་མེད་པའི་དགེ་བ་ཡིན། །ཞེས་པའི་འགྲེལ་པར། དེའང་རང་བཞིན་གྱིས་དག་ཅིང་ངོ་བོ་ཉིད་དྲི་མ་མེད་པའི་སེམས་ཉིད་སངས་རྒྱས་ཀྱི་ཡེ་ཤེས་དམ་པ་ཡེ་ནས་གནས་པའི་སེམས་ཀྱི་རང་བཞིན་འོད་གསལ་བའི་སྣང་ཆ་ལས་སངས་རྒྱས་ཀྱི་གཟུགས་སྐུའི་ཡོན་ཏན་ལྷུན་གྲུབ་ཏུ་ཡོད་པ་དཔེ་དགུས་བསྟན་ཅིང་སྟོང་ཆ་ལ་ཆོས་སྐུའི་ཡོན་ཏན་ནམ་མཁའ་ལྟ་བུའི་དཔེ་མདོ་དང་རྒྱུད་ཐམས་ཅད་ནས་བཤད་ལ་དེ་གཉིས་དབྱེར་མི་ཕྱེད་པ་ནི་ཐོག་མ་མེད་པའི་ཆོས་ཁམས་དགེ་བ་སྟེ། འགྱུར་བ་མེད་པའི་གནས་པའི་རིགས་དང་། དྲི་མ་སྦྱངས་ནས་ཡོན་ཏན་རྒྱས་པར་མངོན་པས་རྒྱས་འགྱུར་གྱི་རིགས་ཞེས་བཏགས་ཀྱང་། རྩ་བ་རིག་པའི་འོད་གསལ་བ་ཉིད་དོ། །ཞེས་གསུངས་པ་ལྟར། སྒྲ་ཇི་བཞིན་དུ་འདོད་དེ། རིགས་གཉིས་སུ་བཤད་པའང་ངོ་བོ་གཅིག་ལ་ལྡོག་པས་ཕྱེ་བ་ཙམ་ལས་དོན་ལ་ནི་རང་གི་སེམས་ཉིད་སྤྲོས་བྲལ་རང་བྱུང་གི་ཡེ་ཤེས་གཤིས་ཅིར་ཡང་མ་གྲུབ་པ་ལ་གདངས་འགག་མེད་དུ་འཆར་བའི་གཉུག་མའི་ཤེས་པ་དྭངས་གསལ་རྗེན་པ་འདི་ཉིད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ས་བོན་ནམ་བདེ་བར་གཤེགས་པའི་སྙིང་པོ་ཡིན་ཏེ། སེམས་ཀྱི་རྡོ་རྗེ་ལ་བསྟོད་པ་ལས། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ནས་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་། གསང་བའི་སྙིང་པོ་ལས། ཕྱོགས་བཅུ་དུས་བཞི་ཀུན་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཞིག །ཞེས་དང་། རྡོ་རྗེ་གུར་ལས། ཆོས་ཀྱི་དབྱིངས་ནི་མཆོག་ཏུ་ཞི། །འདི་ནི་རིན་ཆེན་སེམས་སུ་བརྗོད། །འདོད་དོན་འབྲས་བུ་རབ་སྟེར་བ། །སེམས་ཀྱི་དེ་ཉིད་རང་བཞིན་དག །ཅེས་དང་། དོ་ཧ་ལས་ཀྱང་། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །དེ་ལྟ་བུའི་བདེ་གཤེགས་སྙིང་པོ་དེ་ནི་འགྲོ་བ་ཐམས་ཅད་ལ་ཁྱབ་གདལ་དུ་ཡོད་དེ། ཟླ་བ་སྒྲོན་མེའི་མདོ་ལས། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །ཅེས་གསུངས་པ་ལྟ་བུའོ། །དེ་ལྟར་བྱང་ཆུབ་ཆེན་པོའི་རིགས་སམ་ཁམས་བདེ་བར་གཤེགས་པའི་སྙིང་པོ་དེ་ཉིད་རང་ལ་ཡོད་པའི་ཚུལ་འདི་དག་ཐོག་མར་ངེས་དགོས། དེ་མ་ངེས་ན་སངས་རྒྱས་སྒྲུབ་པར་འདོད་པའི་བློ་མི་སྐྱེ་སྟེ། དཔེར་ན་ས་འོག་ན་གསེར་ཡོད་པར་མ་ངེས་ན་གསེར་རྐོ་འདོད་ཀྱི་བསམ་པ་མི་སྐྱེ་བ་ལྟ་བུའོ། །དེས་ན་རིགས་དེ་དག་ཡོད་པར་རྟགས་ཀྱི་སྒོ་ནས་ཀྱང་ཤེས་པར་བྱ་སྟེ། རྒྱུད་བླ་མ་ལས། གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང་། །མྱ་ངན་འདས་ལ་འདོད་པ་དང་། །དོན་གཉེར་སྨོན་པའང་མེད་པར་འགྱུར། །སྲིད་དང་མྱ་ངན་འདས་ལ་དེའི། །སྡུག་བདེའི་སྐྱོན་ཡོན་མཐོང་བ་འདི། །རིགས་ཡོད་ལས་ཡིན་གང་ཕྱིར་དེ། །རིགས་མེད་དག་ལ་མེད་ཕྱིར་རོ། །ཞེས་གསུངས་པ་ལྟར། སྲིད་པའི་སྡུག་བསྔལ་ལ་སྐྱོ་བའི་སེམས་ཅན་དེས། ཐར་བའི་བདེ་བ་ལ་སྨོན་པའི་སེམས་སྐྱེ་བ་དེ་ཡང་ཡེ་ནས་རང་གི་རྒྱུད་སྡུག་བསྔལ་དང་འབྲལ་རུང་དང་མྱང་འདས་འཐོབ་རུང་དུ་ཡོད་པའི་རྟགས་ཡང་དག་པ་ཡིན་པར་བཤད་དོ། །དེ་ལྟར་བདེ་གཤེགས་སྙིང་པོ་དེ་ཉིད་རང་ལ་ཡོད་ཀྱང་མི་མངོན་པ་ཅི་ཞེ་ན་ཐོག་མ་མེད་པའི་དུས་ནས་གོམས་པའི་ལས་ཉོན་བག་ཆགས་ཀྱིས་སྒྲིབ་པའི་ཕྱིར་ཡིན་ཏེ། རྒྱུད་བླ་མ་ལས། ཐོག་མེད་གྱུར་ཀྱང་ཐ་མ་དང་ལྡན་པ། །རང་བཞིན་གྱིས་དག་རྟག་པའི་ཆོས་ཅན་ནི། །ཐོག་མེད་སྦུབས་ཀྱིས་བསྒྲིབ་ཕྱིར་མི་མཐོང་སྟེ། །ཇི་ལྟར་གསེར་གྱི་གཟུགས་ནི་བསྒྲིབས་པ་བཞིན། །ཞེས་པ་ལྟར་དང་། བརྟགས་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་ཉིད། །ཅེས་སོ། །དེ་ལྟར་གཤིས་ཀྱི་གནས་ལུགས་ཤེས་པ་ཙམ་གྱིས་མི་ཕན་པས་སྒྲིབ་པ་སྤོང་བའི་ཚུལ་ལ་འབད་དགོས་ཤིང་། དེའི་ཐབས་ཀྱི་མཆོག་ནི་བྱང་ཆུབ་ཏུ་སེམས་བསྐྱེད་པ་ཁོ་ན་ཡིན་ཏེ། སེམས་མ་བསྐྱེད་པར་སངས་རྒྱས་པའི་ཐབས་གཞན་མེད་པ་ཡང་། དཔལ་མགོན་འཕགས་པ་ཀླུ་སྒྲུབ་ཞབས་ཀྱིས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ཡང་ནི་མི་འཐོབ་ཅིང་། །འཁོར་བར་བདག་གཞན་དོན་བསྒྲུབ་པའི། །ཐབས་གཞན་ཡོད་པ་མ་ཡིན་ནོ། །ཞེས་དང་། སྤྱོད་འཇུག་ལས། འདི་ཉིད་དེ་བཞིན་གཤེགས་པ་མཉེས་བྱེད་ཡིན། །རང་དོན་ཡང་དག་འགྲུབ་པའང་འདི་ཉིད་དོ། །འཇིག་རྟེན་སྡུག་བསྔལ་སེལ་བའང་འདི་ཉིད་དེ། །དེ་བས་བདག་གིས་རྟག་ཏུ་འདི་ཉིད་བྱ། །ཞེས་གསུངས་པ་ལྟར་རོ། །བྱང་ཆུབ་མཆོག་ཏུ་སེམས་བསྐྱེད་པ་དེ་ཡང་དགེ་རྩ་གོམས་པ་ལས་སམ། ཐེག་ཆེན་གྱི་སྡེ་སྣོད་ཐོས་པ་ལས་སམ། དགེ་བའི་བཤེས་གཉེན་གྱིས་རྗེས་སུ་བསྟན་པ་ལས་ཀྱང་རུང་སྟེ་རིགས་སད་པའི་རྟགས་དང་ལྡན་པའི་གང་ཟག་ཞིག་ལ་སྐྱེ་བས། དེ་ལ་རྒྱས་འགྱུར་གྱི་རིགས་སད་པའི་རྟགས་ནི། མདོ་སྡེའི་རྒྱན་ལས། །སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་དང་། རང་བཞིན་གནས་རིགས་སད་པའི་རྟགས་ནི། དབུ་མ་འཇུག་པ་ལས། སོ་སོའི་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ནས། །ལུས་ཀྱི་བ་སྤུ་ལྡང་བར་འགྱུར་བ་གང་ཡིན་པ། །དེ་ལ་རྫོགས་སངས་རྒྱས་པའི་བློ་ཡི་ས་བོན་ཡོད། །ཅེས་པ་ལྟར་རོ། །དེ་ལྟ་བུའི་རིགས་སད་པའི་རྟགས་དང་ལྡན་པ་དག་གིས། གཞུང་ནས་བཤད་པ་ལྟར་གྱི་ཆོ་ག་ཡན་ལག་ཚང་བ་ཞིག་གི་སྒོ་ནས་བྱང་ཆུབ་མཆོག་གི་སེམས་རིན་པོ་ཆེ་ཇི་ལྟ་བ་བཞིན་དུ་བསྐྱེད་ནས་བསླབ་པ་ལ་ཚུལ་བཞིན་དུ་སློབ་པར་བྱས་ན་རིང་པོར་མི་ཐོགས་པར་ཆོས་ཀྱི་རྒྱལ་པོ་ཐམས་ཅད་མཁྱེན་པའི་གོ་འཕང་འཐོབ་ནས་མཐའ་ཡས་པའི་ལུས་ཅན་ཐམས་ཅད་ཀྱི་སྐྱབས་དང་མགོན་དང་དཔུང་གཉེན་བྱེད་པར་འགྱུར་ཏེ། ཀུན་མཁྱེན་ཆོས་རྗེས། མ་ལུས་འགྲོ་ཀུན་བདེ་གཤེགས་སྙིང་པོ་ཅན། །གློ་བུར་དྲི་མས་གཡོགས་པའི་སྦུབ་ནང་ན། །འོད་གསལ་ཆོས་ཁམས་མར་མེ་ཡེ་ནས་གནས། །སྐུ་དང་ཡེ་ཤེས་ལྷུན་གྱིས་གྲུབ་པའི་ཆོས། །རང་ལ་ཡོད་དེ་དེ་ཉིད་ལྷུན་གྱིས་གྲུབ། །སྟོང་དང་སྙིང་རྗེའི་སྙིང་པོ་ལྷུར་ལེན་པས། །ཁམས་དེ་བྱང་ཆུབ་ཞེས་བྱའི་མིང་ཐོབ་ནས། །མ་ལུས་སྐྱེ་དགུའི་ཚོགས་ལ་ཕན་བདེ་བྱེད། །ཅེས་སོ། །དོན་གཉིས་པ་བསླབ་པ་ལ་སྦྱོར་བའི་གཞི་སེམས་བསྐྱེད་དངོས་ཀྱི་རྣམ་པར་བཞག་པ་ལ། སེམས་བསྐྱེད་སྐྱེ་བའི་རྟེན། བརྟེན་པ་བྱང་ཆུབ་སེམས་ཀྱི་རང་བཞིན། བྱང་ཆུབ་སེམས་ཀྱི་ཕན་ཡོན་བསྟན་པ་དང་གསུམ་ལས། དང་པོ་རྟེན་ལ་ལུས་ཀྱི་རྟེན་ནི་སེམས་ཙམ་གྱི་ལུགས་ལྟར་ན་སོ་ཐར་རིགས་བདུན་གང་རུང་གི་རྟེན་ལ་སྐྱེ་བས་གླིང་གསུམ་གྱི་སྐྱེས་པ་དང་བུད་མེད་ཡིན་པ་དགོས་ཀྱང་དབུ་མའི་ལུགས་འདི་ལ་དེ་ལྟར་དགོས་པའི་ངེས་པ་མེད་དེ། མདོ་སྡེ་རྣམས་ལས་ལྷ་དང་ཀླུ་དང་ལྷ་མ་ཡིན་དང་དྲི་ཟ་དང་། ནམ་མཁའ་ལྡིང་ལ་སོགས་པ་འགྲོ་བ་དུ་མས་བྱང་ཆུབ་མཆོག་ཏུ་སེམས་བསྐྱེད་པར་བསྟན་པས་ལུས་ཀྱི་རྟེན་ལ་མི་ལྟོས་པར། བསམ་པའི་རྟེན་གཙོ་ཆེ། དེ་ལ་རྣམ་གྲངས་མང་ཡང་། སངས་རྒྱས་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་སེམས་ཀྱི་ཕན་ཡོན་ཐོས་པ་དང་གསུམ་ལ་འདུ་བ་ཡིན་ཏེ། དཀོན་མཆོག་སྒྲོན་མེའི་མདོ་ལས། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །རྒྱལ་སྲས་རྣམས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་ལ་དད་གྱུར་ན། །བློ་དང་ལྡན་པ་རྣམས་ཀྱི་སེམས་སྐྱེའོ། །ཞེས་དང་། མདོ་རྒྱན་ལས། དེ་ཡི་རྩ་བ་སྙིང་རྗེར་འདོད། །ཅེས་པ་ལྟར། དེ་ལས་ཀྱང་སྙིང་རྗེ་ནི་བྱང་ཆུབ་ཐོབ་པའི་རྒྱུའི་གཙོ་བོ་མེད་ན་མི་རུང་ཞིང་ཡོད་ན་དེ་ཁོ་ནས་ཀྱང་ཆོག་པ་ཡིན་ཏེ། དབུ་མ་འཇུག་པ་ལས། །ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་དང་། །གསང་བ་བསམ་གྱིས་མི་ཁྱབ་པའི་མདོ་ལས། གསང་བའི་བདག་པོ་ཐམས་ཅན་མཁྱེན་པའི་ཡེ་ཤེས་དེ་ནི་བྱང་ཆུབ་ཀྱི་རྒྱུ་ལས་བྱུང་བ་སྙིང་རྗེ་ཆེན་པོའི་རྩ་བ་ཅན་ཐབས་ཀྱིས་མཐར་ཕྱིན་པའོ། །ཞེས་སོ། །ཆོས་ཡང་དག་པར་སྡུད་པའི་མདོ་ལས། སྤྱན་རས་གཟིགས་ཀྱིས་གསོལ་པ། བཅོམ་ལྡན་འདས་སངས་རྒྱས་ཐོབ་པར་འདོད་པས་ཆོས་མང་པོ་ལ་བསླབ་པར་མི་བགྱི་ཡི་ཆོས་གཅིག་ལ་བསླབ་པར་བྱའོ། །དེ་གང་ཞེ་ན། སྙིང་རྗེ་ཆེན་པོའོ། །བཅོམ་ལྡན་འདས་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་དེ་འཁོར་ལོ་རིན་ཆེན་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིས་པ་ལགས་སོ། །ཞེས་གསུངས་པ་ལྟར་སྙིང་རྗེ་ཆེན་པོ་དང་ལྡན་པའི་བསམ་པ་གཙོ་ཆེའོ། །གཉིས་པ་བརྟེན་པ་སེམས་བསྐྱེད་ཀྱི་རང་བཞིན་ལ། སེམས་བསྐྱེད་ཀྱི་མཚན་ཉིད་དང་། རབ་ཏུ་དབྱེ་བ་གཉིས་སོ། །དང་པོ་ལ་མཚན་གཞི་དང་མཚན་ཉིད་གཉིས་ལས། མཚན་གཞི་ནི། སེམས་དང་སེམས་བྱུང་ལ་བཞེད་པ་མི་མཐུན་པ་མང་ཡང་། འདིར་ནི་གཙོ་སེམས་ཉིད་བཟུང་ཞིང་། དེ་ཡང་སྒོ་ལྔའི་རྣམ་ཤེས་ཁ་ཕྱིར་བལྟས་རྟོག་མེད་ཀྱི་རྣམ་པ་ཡིན་ལ། ཉོན་ཡིད་ནི་ནང་དུ་ཀུན་གཞི་ལ་དམིགས་ནས་ངར་འཛིན་གྱི་རྣམ་པ་ཅན་ཡིན་པས་དེ་དག་ནི་མཚན་གཞིར་མི་རུང་། དེས་ན་འདིར་ནི་དཀར་ཆོས་ཐམས་ཅད་ཀྱི་རྟེན་དུ་རུང་བ་ཡིད་ཀྱི་རྣམ་པར་ཤེས་པ་ཉིད་མཚན་གཞིར་འདོད་པ་ཡིན་ཏེ། དེ་ལྟར་ཡང་ཉི་ཁྲི་སྣང་བ་ལས། སེམས་བསྐྱེད་པ་ཞེས་བྱ་བ་ལ་སེམས་ནི་རྣམ་པར་ཤེས་པ་སྟེ་རྣམ་པར་རིག་པའོ། །རྣམ་པར་ཤེས་པ་གང་ཡིན་ཞེ་ན། ཡིད་ཀྱི་རྣམ་པར་ཤེས་པ་སྟེ། དཀར་པོའི་ཆོས་ཐམས་ཅད་ལ་དམིགས་པ་ནི་དེ་ལ་སྲིད་པའི་ཕྱིར་རོ། །ཞེས་གསུངས་པ་ལྟར་ཀུན་མཁྱེན་ཆེན་པོ་ཙོང་ཁ་པ་སོགས་མཁས་གྲུབ་ཐམས་ཅད་ཀྱིས་བཞེད་པ་ཡིན་ནོ། །མཚན་ཉིད་ནི། གཞན་སེམས་ཅན་ཐམས་ཅད་སྲིད་པའི་སྡུག་བསྔལ་ལས་བསྒྲལ་ཏེ་ཐམས་ཅད་མཁྱེན་པའི་བདེ་བ་བླ་ན་མེད་པ་ལ་འཇོག་པའི་དོན་གྱི་ཆེད་དུ་བྱང་ཆུབ་ཐོབ་པར་འདོད་པའོ། །དེ་ལྟར་ཡང་མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །གཉིས་པ་དབྱེ་བ་ལ། ངོ་བོའི་སྒོ་ནས་དབྱེ་བ། སྐྱེ་ཚུལ་གྱི་སྒོ་ནས་དབྱེ་བ། གྲོགས་ཀྱི་སྒོ་ནས་དབྱེ་བ། ས་མཚམས་ཀྱི་སྒོ་ནས་དབྱེ་བ། བཞེད་ཚུལ་གྱི་སྒོ་ནས་དབྱེ་བ་དང་ལྔ་ལས། དང་པོ་ལ་ངོ་བོ་གཅིག་ཏུ་བསྟན་པ་དང་། ལྡོག་པ་གཉིས་སུ་དབྱེ་བའོ། །དེ་ལ་ངོ་བོ་གཅིག་ཏུ་བསྟན་པ་ནི་ཐབས་སྙིང་རྗེ་ཆེན་པོའི་དང་མ་བྲལ་བའི་སྒོ་ནས་ཆོས་ཐམས་ཅད་ལ་རང་བཞིན་མེད་པར་རྟོགས་པའི་ཤེས་རབ་ཁྱད་པར་ཅན་དེ་ལ་སྟོང་ཉིད་སྙིང་རྗེའི་སྙིང་པོ་ཅན་གྱི་སེམས་ཞེས་བྱ་སྟེ། བསླབ་བཏུས་ལས། སྟོང་ཉིད་སྙིང་རྗེའི་སྙིང་པོ་ཅན། །བསྐྱེད་པས་བསོད་ནམས་དག་པར་འགྱུར། །ཞེས་དང་། མངོན་རྟོགས་རྒྱན་ལས། ཤེས་པས་སྲིད་ལ་མི་གནས་ཤིང་། །སྙིང་རྗེའི་ཞི་ལ་མི་གནས་པ། །ཞེས་སོ། །རྒྱུད་བླ་མ་ལས་ཀྱང་། བདག་སྲེད་མ་ལུས་ཤེས་རབ་ཀྱིས་བསལ་ནས། །སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་རྩེ་བྱང་ཆུབ་ཐབས་བརྟེན་ནས། །འཕགས་པ་འཁོར་བའམ་མྱ་ངན་འདའ་མི་འགྱུར། །ཞེས་བཤད་དོ། །སྟོང་པ་ཉིད་དང་སྙིང་རྗེ་གཉིས་པོ་ཡ་བྲལ་བར་གྱུར་ན་ནི་རྫོགས་པའི་བྱང་ཆུབ་ལས་ཕྱིར་ལྡོག་པར་འགྱུར་ཏེ། སྡུད་པ་ལས། ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྟུང་། །ཞེས་དང་། འཇམ་དཔལ་རྣམ་པར་འཕྲུལ་བའི་མདོ་ལས། སྟོང་པ་ཉིད་ལ་སོ་སོར་རྟོག་ཅིང་སེམས་ཅན་ཡལ་བར་འདོར་བ་ཡང་བདུད་ཀྱི་ལས་སོ། །ཤེས་རབ་ཀྱིས་རྣམ་པར་མི་དཔྱོད་ཅིང་སྙིང་རྗེ་ཆེན་པོ་ལ་དམིགས་པར་འཛིན་པ་ཡང་བདུད་ཀྱི་ལས་སོ། །ཞེས་དང་། ས་ར་ཧས་ཀྱང་། སྙིང་རྗེ་དང་བྲལ་སྟོང་པ་ཉིད་ཀྱིས་ཀྱང་། །དེས་ནི་ལམ་མཆོག་རྙེད་པ་མ་ཡིན་ཏེ། །གལ་ཏེ་སྙིང་རྗེ་འབའ་ཞིག་སྒོམ་ན་ཡང་། །འཁོར་བ་འདི་ནས་ཐར་པ་ཡོད་དམ་ཅི། །ཞེས་མདོ་རྒྱུད་བསྟན་བཅོས་ཐམས་ཅད་ནས་སྟོང་ཉིད་སྙིང་རྗེ་ཟུང་དུ་འཇུག་པ་ལ་བྱང་ཆུབ་ཀྱི་སེམས་སུ་གསུངས་སོ། །གཉིས་པ་དེ་ལ་ལྡོག་པས་དབྱེ་ན་སྨོན་པ་བྱང་ཆུབ་ཀྱི་སེམས་དང་། འཇུག་པ་བྱང་ཆུབ་ཀྱི་སེམས་གཉིས་སོ། །དེ་ལྟར་ཡང་སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་པ་ལྟར། སྙིང་རྗེ་ཆེན་པོ་ཡིད་ཀྱིས་ལུས་ཅན་ཐམས་ཅད་སྲིད་པའི་མཚོ་ལས་བསྒྲལ་བའི་ཕྱིར་སངས་རྒྱས་ཐོབ་པར་བྱའོ་སྙམ་པའི་བསམ་པ་རྐྱང་པ་ཞིག་དང་པོར་སྐྱེ་བ་ནི་སྨོན་པའི་སེམས་ཡིན་ཏེ། འགྲོ་འདོད་ལྟ་བུའོ། དེ་ནས་བྱང་ཆུབ་སེམས་དཔའི་སྡོམ་པ་བླངས་ནས་སྦྱོར་བ་ཕ་རོལ་དུ་ཕྱིན་པ་དྲུག་ལ་སློབ་པར་འདོད་པས་སྤྱོད་པ་ཕྱོགས་གཅིག་ལ་ཞུགས་པ་ནས་བཟུང་སྟེ་འཇུག་པའི་སེམས་ཡིན་ཏེ། འགྲོ་བ་དངོས་ལྟ་བུའོ། །དེ་ལྟར་ཀཱ་མ་ཤི་ལའི་སྒོམ་རིམ་དང་པོ་ལས། བྱང་ཆུབ་ཀྱི་སེམས་དེ་ཡང་རྣམ་པ་གཉིས་ཏེ་ཞུགས་པའི་སེམས་དང་སྨོན་པའི་སེམས་སོ། །དེ་ཉིད་འགྲོ་བ་དེ་དག་ལ་ཕན་པའི་ཕྱིར་སངས་རྒྱས་སུ་གྱུར་ཅིག ཅེས་གང་ཐོག་མར་དོན་དུ་གཉེར་བ་དེ་སྨོན་པའི་སེམས་དང་། གང་ཕན་ཆད་སྡོམ་པ་བཟུང་སྟེ་ཚོགས་རྣམས་ལ་ཞུགས་པ་དེ་ནི་ཞུགས་པའི་སེམས་སོ། །ཞེས་གསུངས་པ་བཞིན། དང་པོ་ཚོགས་ལམ་ཆུང་ངུ་དང་། གཉིས་པ་ཚོགས་ལམ་འབྲིང་པོ་ནས་བཞག་པ་ཡིན་ནོ། །གཉིས་པ་སྐྱེ་ཚུལ་གྱི་སྒོ་ནས་རགས་པ་བརྡ་ལས་སྐྱེས་པ་ཀུན་རྫོབ་སེམས་བསྐྱེད་དང་ཕྲ་བ་ཆོས་ཉིད་ཀྱིས་ཐོབ་པ་དོན་དམ་པའི་སེམས་བསྐྱེད་གཉིས་ཡོད་དེ། སྒོམ་རིམ་བར་མ་ལས། བྱང་ཆུབ་ཀྱི་སེམས་དེ་ཡང་རྣམ་པ་གཉིས་ཏེ། ཀུན་རྫོབ་དང་། དོན་དམ་པའོ། །དེ་ལ་ཀུན་རྫོབ་ནི། སྙིང་རྗེས་སེམས་ཅན་མཐའ་དག་གདོན་པར་དམ་བཅས་ནས་འགྲོ་བ་ལ་ཕན་པའི་ཕྱིར་སངས་རྒྱས་སུ་གྱུར་ཅིག་སྙམ་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་སེམས་དང་པོ་བསྐྱེད་པའོ། །དེ་ཡང་ཚུལ་ཁྲིམས་གྱི་ལེའུ་ལས་བསྟན་པའི་ཆོ་ག་བཞིན་དུ་བྱང་ཆུབ་སེམས་དཔའི་སྡོམ་པ་ལ་གནས་པ་མཁས་པ་ཕ་རོལ་པོ་ལས་བསྐྱེད་པར་བྱའོ། །དེ་ལྟར་ཀུན་རྫོབ་བྱང་ཆུབ་ཀྱི་སེམས་བསྐྱེད་ནས་དོན་དམ་བྱང་ཆུབ་ཀྱི་སེམས་བསྐྱེད་པའི་ཕྱིར་འབད་པར་བྱའོ། །དོན་དམ་པའི་བྱང་ཆུབ་ཀྱི་སེམས་ནི་འཇིག་རྟེན་ལས་འདས་པ་སྤྲོས་པ་མཐའ་དག་དང་བྲལ་བ་ཤིན་ཏུ་གསལ་བ་དོན་དམ་པའི་སྤྱོད་ཡུལ་དྲི་མ་མེད་པ་མི་གཡོ་བ་རླུང་མེད་པའི་མར་མེའི་རྒྱུན་བཞིན་དུ་མི་གཡོ་བའོ། །དེ་གྲུབ་པ་ནི་རྟག་ཏུ་གུས་པར་ཡུན་རིང་དུ་ཞི་གནས་དང་ལྷག་མཐོང་གི་རྣལ་འབྱོར་ལ་གོམས་པར་བྱས་པ་ལས་འབྱུང་ཞེས་གསུངས་སོ། །དེ་ལ་དང་པོ་སྨོན་འཇུག་གིས་བསྡུས་པའི་ཀུན་རྫོབ་བྱང་ཆུབ་ཀྱི་སེམས་དེ་རྒྱུ་ལྔ་ལས་སྐྱེ་སྟེ། དེ་ཡང་གྲོགས་བྱང་ཆུབ་སེམས་དཔའི་བཤེས་གཉེན་དང་འགྲོགས་ནས་དེས་བྱང་ཆུབ་སེམས་ཀྱི་ཕན་ཡོན་བརྗོད་པ་སོགས་ཀྱི་རྟེན་ལས་སྐྱེ་བ་ཡོད་ཀྱང་གྲོགས་ལ་རགས་ལས་ཤིང་དགེ་བའི་བཤེས་གཉེན་དང་བྲལ་ན་བྱང་ཆུབ་ཀྱི་སེམས་བརྗེད་པར་འགྱུར་སླ་བའི་ཕྱིར་མི་བརྟན་པའི་སེམས་ཞེས་བྱའོ། །རྒྱུ་རིགས་སད་པ་དང་དགེ་རྩ་རྒྱས་པར་འགྱུར་བ་སྟེ་སྙིང་རྗེ་ཆེན་པོ་སྐྱེས་པ་དང་། ཐེག་པ་ཆེན་པོའི་སྡེ་སྣོད་ཐོས་པ་དང་། དགེ་བ་གོམས་པ་སྟེ་བྱང་ཆུབ་ཀྱི་སེམས་ཡུན་རིང་དུ་བསྒོམ་པ་ལས་སྐྱེ་བ་བཞི་ནི་ལྡོག་པར་དཀའ་བས་བརྟན་པའི་སེམས་ཅེས་བྱའོ། །དེ་ལྟར་ཡང་། མདོ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་སོ། །འཕགས་རྒྱུད་ཀྱིས་བསྡུས་པ་ཞི་ལྷག་ཟུང་འདྲེལ་གྱི་ངོ་བོར་གྱུར་པའི་དོན་དམ་སེམས་བསྐྱེད་ནི། ཡོངས་འཛིན་རྫོགས་པའི་སངས་རྒྱས་རྣམས་མཉེས་པར་བྱས་ནས་དེ་ལས་གདམས་ངག་ནོད་པ་དང་། རྒྱུ་བསོད་ནམས་དང་ཡེ་ཤེས་ཀྱི་ཚོགས་དུས་ཡུན་རིང་པོར་བསགས་པ་དང་། འབྲས་བུ་ཆོས་ཐམས་ཅད་རྣམ་པར་མི་རྟོགས་པའི་ཡེ་ཤེས་དང་པོར་སྐྱེ་བ་སྟེ། དེ་གསུམ་ལ་བརྟེན་ནས་སྦྱོར་ལམ་ཆོས་མཆོག་ཆེན་པོའི་རྟེན་ལས་དང་པོ་ཐོབ་པ་དང་མཚུངས་ལྡན་དུ་སྐྱེ་བ་ཡིན་ཏེ། དེ་ཉིད་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོགས་ཡེ་ཤེས་ནི། །སྐྱེ་ཕྱིར་དེ་ནི་དམ་པར་འདོད། །ཅེས་སོ། །གསུམ་པ་གྲོགས་ཀྱི་དབྱེ་བ་ལའང་། གསུམ་དུ་དབྱེ་བ་དང་། དྲུག་ཏུ་དབྱེ་བ་དང་། ཉེར་གཉིས་སུ་དབྱེ་བའོ། །དང་པོ་ནི། ལྷག་པའི་བསླབ་པ་གསུམ་དང་མཚུངས་པར་ལྡན་པའི་སེམས་བསྐྱེད་གསུམ་དུ་བཞག་སྟེ། ཡུམ་བར་མ་ལས། གང་ཁ་ན་མ་ཐོ་བ་སྡོམ་པའི་སེམས་དང་། དགེ་བའི་ཆོས་སྡུད་པའི་སེམས་དང་། སེམས་ཅན་སྨིན་པར་བྱེད་པའི་སེམས་བསྐྱེད་པ་འདི་གསུམ་ལ་ནན་ཏན་དུ་བྱའོ། །ཞེས་སོ། །གཉིས་པ་ནི། ཕ་རོལ་ཏུ་ཕྱིན་པ་དྲུག་ལ་ལྟོས་ནས་བཞག་སྟེ། ཉི་ཁྲི་ལས། ཕ་རོལ་ཏུ་ཕྱིན་པ་དྲུག་དང་ལྡན་པའི་སེམས་ཡངས་པ་ཚད་མེད་པ་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་དུ་མ་གྱུར་པ་སྟེ། ཞེས་བཤད་པ་ལྟར་རོ། །གསུམ་པ་ནི། དཔེ་ཉེར་གཉིས་དང་ཆོས་མཐུན་པའི་གྲོགས་འདུན་པ་སོགས་ཉི་ཤུ་རྩ་གཉིས་དང་མཚུངས་པ་ལྡན་པའི་སེམས་བསྐྱེད་རྣམས་ཏེ། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་པ་ལྟར་ཡིན་ལ། དེ་རྣམས་ཀྱི་དཔེ་གྲོགས་སྦྱོར་བའི་ཆོས་མཐུན་ཇི་ལྟར་བརྩི་བའང་འདི་ལྟར་སྟེ། བྱང་ཆུབ་ལ་འདུན་པ་དང་མཚུངས་པར་ལྡན་པའི་སེམས་བསྐྱེད་ནི་ས་ལྟ་བུ་ཡིན་ཏེ། སངས་རྒྱས་དང་དེའི་རྒྱུ་ཚོགས་གཉིས་ཀྱི་ཆོས་དཀར་པོ་ཐམས་ཅད་ཀྱི་གཞིར་གྱུར་པས་སོ། །དེའི་རྒྱུན་གནས་པའི་བསམ་པ་དང་ལྡན་པའི་སེམས་བསྐྱེད་ནི་གསེར་ལྟ་བུ་སྟེ། ཕ་རོལ་ཏུ་ཕྱིན་པ་དྲུག་གི་སྒོ་ནས་གཞན་ལ་ཕན་བདེ་སྒྲུབ་པའི་བསམ་པ་བཟང་པོ་བྱང་ཆུབ་ཀྱི་བར་འགྱུར་བ་མི་མངའ་བས་སོ། །བསམ་པ་དེ་ཉིད་ཆེས་ཆེར་འཕེལ་བའི་ལྷག་པའི་བསམ་པ་དང་ལྡན་པའི་སེམས་བསྐྱེད་ནི་ཟླ་བ་ཚེས་པ་ལྟ་བུ་སྟེ་བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་སོགས་དགེ་བའི་ཆོས་མཐའ་དག་གོང་ནས་གོང་དུ་འཕེལ་བས་སོ། །རྣམ་པར་མི་རྟོག་པའི་ཡེ་ཤེས་ལ་དངོས་སུ་སྦྱོར་བའི་ཞི་ལྷག་གི་སྦྱོར་བ་དང་ལྡན་པའི་སེམས་བསྐྱེད་ནི་མེ་ལྟ་བུ་ཡིན་ཏེ། སྒྲིབ་པའི་བུད་ཤིང་བསྲེགས་པ་ལ་མྱུར་བས་སོ། །སྦྱིན་པའི་ཕར་ཕྱིན་དང་ལྡན་པའི་སེམས་བསྐྱེད་ནི་གཏེར་ཆེན་པོ་ལྟ་བུ་སྟེ། ཆོས་དང་ཟང་ཟིང་གི་ལོངས་སྤྱོད་ཀྱིས་སེམས་ཅན་ཐམས་ཅད་ཚིམ་པར་བྱས་ཀྱང་མི་ཟད་པས་སོ། །ཚུལ་ཁྲིམས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་རིན་པོ་ཆེའི་འབྱུང་གནས་ལྟ་བུ་ཡིན་ཏེ་སྟོབས་དང་མི་འཇིགས་པ་ལ་སོགས་པའི་ཡོན་ཏན་ཀྱི་རིན་པོ་ཆེ་རྣམས་འབྱུང་བས་སོ། །བཟོད་པའི་ཕར་ཕྱིན་དང་ལྡན་པའི་སེམས་བསྐྱེད་ནི་རྒྱ་མཚོ་ཆེན་པོ་སྟེ། མེ་མཚོན་སོགས་མི་འདོད་པའི་དངོས་པོ་ཐམས་ཅད་ཐོག་ཏུ་བབས་ཀྱང་ཡིད་མི་འཁྲུགས་པས་སོ། །བརྩོན་འགྲུས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་རྡོ་རྗེ་ལྟ་བུ་ཡིན་ཏེ། བླ་ན་མེད་པའི་བྱང་ཆུབ་ལ་ཡིད་ཆེས་བརྟན་པར་འགྱུར་པས་བདུད་བཞི་རྣམས་ཀྱིས་སྐབས་མི་ཕྱེད་པས་སོ། །བསམ་གཏན་གྱི་ཕར་ཕྱིན་དང་ལྡན་པའི་སེམས་བསྐྱེད་ནི་རི་ཡི་རྒྱལ་པོ་ལྟ་བུ་ཡིན་ཏེ། མཚན་མའི་རྣམ་པར་གཡེང་བས་ཏིང་ངེ་འཛིན་ལས་ཡིད་བསྐྱོད་མི་ནུས་པས་སོ། །བདག་མེད་གཉིས་རྟོགས་ཤེས་རབ་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་སྨན་ཆེན་པོ་ལྟ་བུ་ཡིན་ཏེ། ཆགས་སོགས་ཉོན་མོངས་པའི་སྒྲིབ་པ་དང་། གཟུང་བར་རྟོག་པ་སོགས་ཤེས་བྱའི་སྒྲིབ་པའི་ནད་རབ་ཏུ་ཞི་བར་བྱེད་པས་སོ། །ཐབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་དགེ་བའི་བཤེས་གཉེན་ལྟ་བུ་སྟེ། སྙིང་རྗེ་དང་ཐབས་ལ་མཁས་པས་འབྱོར་རྒུད་གང་གི་དུས་སུའང་སེམས་ཅན་གྱི་དོན་ཡོངས་སུ་མི་གཏོང་བས་སོ། །སྨོན་ལམ་གྱི་ཕར་ཕྱིན་དང་ལྡན་པའི་སེམས་བསྐྱེད་ནི་ཡིད་བཞིན་གྱི་ནོར་བུ་ལྟ་བུ་སྟེ། ཡིད་ལ་ཇི་ལྟར་སྨོན་པའི་འབྲས་བུ་མངོན་དུ་གྲུབ་པས་སོ། །སྟོབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་ཉི་མ་ལྟ་བུ་ཡིན་ཏེ། གདུལ་བྱའི་རྒྱུད་ཀྱི་དགེ་བའི་ལོ་ཏོག་སྨིན་པར་བྱེད་པའི་མཐུ་དང་ལྡན་པས་སོ། །ཡེ་ཤེས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་དྲི་ཟའི་གླུ་དབྱངས་ལྟ་བུ་སྟེ། གདུལ་བྱའི་ཁམས་དབང་དང་མཐུན་པར་ཡིད་འདུན་པར་བྱེད་པའི་ཆོས་སྟོན་པས་སོ། །མངོན་ཤེས་དྲུག་དང་ལྡན་བའི་སེམས་བསྐྱེད་ནི་རྒྱལ་པོ་ཆེན་པོ་ལྟ་བུ་སྟེ། གཞན་དོན་སྒྲུབ་པ་ལ་མཐུ་ཆེན་པོ་དང་ལྡན་པས་སོ། །ཚོགས་གཉིས་དང་ལྡན་པའི་སེམས་བསྐྱེད་ནི་བང་མཛོད་ལྟ་བུ་སྟེ། བསོད་ནམས་དང་ཡེ་ཤེས་བསམ་གྱིས་མི་ཁྱབ་པའི་གནས་སུ་གྱུར་པས་སོ། །བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་དང་ལྡན་པའི་སེམས་བསྐྱེད་ནི་ལམ་པོ་ཆེ་ལྟ་བུ་ཡིན་ཏེ། དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་གཤེགས་ཤིང་རྗེས་སུ་གཤེགས་པར་འགྱུར་བས་སོ། །ཐབས་ཤེས་གཉིས་དང་ལྡན་པའི་སེམས་བསྐྱེད་ནི་བཞོན་པ་བཟང་པོ་ལྟ་བུ་ཡིན་ཏེ། སྲིད་ཞི་གཉིས་ཀྱི་མཐའ་ལ་མི་ལྟུང་བར་མི་གནས་པའི་མྱང་འདས་ཀྱི་སར་བདེ་བླག་ཏུ་བགྲོད་པས་སོ། །རང་གི་ཐོས་པ་མི་བརྗེད་པར་འཛིན་པའི་གཟུངས་དང་གཞན་ལ་ཐོགས་མེད་དུ་འཆད་པའི་སྤོབས་པ་གཉིས་དང་ལྡན་པའི་སེམས་བསྐྱེད་ནི། བཀོད་མའི་ཆུ་ལྟ་བུ་སྟེ། བྲི་བ་དང་ཟད་པ་མེད་པས་སོ། །མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཞི་བའོ། །ཞེས་སྟོན་པའི་ཆོས་ཀྱི་དགའ་སྟོན་དང་ལྡན་པའི་སེམས་བསྐྱེད་ནི་སྒྲ་སྙན་ལྟ་བུ་ཡིན་ཏེ་སྙན་པར་བསྒྲགས་པས་སོ། །བགྲོད་པ་གཅིག་པའི་ལམ་དང་ལྡན་པའི་སེམས་བསྐྱེད་ནི། ཆུ་བོའི་རྒྱུན་ལྟ་བུ་སྟེ། གཞན་གྱི་དོན་དུ་འབད་རྩོལ་མེད་པར་ཤེས་རབ་དང་སྙིང་རྗེས་ངང་གིས་འཇུག་པས་སོ། །ཆོས་ཀྱི་སྐུ་དང་ལྡན་པའི་སེམས་བསྐྱེད་ནི་སྤྲིན་ལྟ་བུ་ཡིན་ཏེ། དགའ་ལྡན་གྱི་གནས་ན་བཞུགས་སྟེ། མཛད་པ་བཅུ་གཉིས་ཀུན་ཏུ་སྟོན་པའི་སྤྲིན་ཆེན་པོ་ལས་ཆོས་ཀྱི་ཆར་ཆེན་པོས་གདུལ་བྱའི་ལོ་ཏོག་སྨིན་པར་བྱེད་པས་སོ། །ཞེས་བཤད་པར་བྱའོ། །བཞི་པ་ས་མཚམས་ཀྱི་སྒོ་ནས་དབྱེ་བ་ལ་ཡང་། བཞིར་དབྱེ་བ་དང་། ལྔར་དབྱེ་བ་དང་། ཉེར་གཉིས་སུ་དབྱེ་བའི་ས་མཚམས་བསྟན་པའོ། །དང་པོ་ནི། རྒྱན་ལས། མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་པ་ལྟར། ཚོགས་སྦྱོར་ཀྱི་ལམ་ན་མོས་པས་སྤྱོད་པའི་སེམས་བསྐྱེད། ས་དང་པོ་ནས་བདུན་པའི་བར་དུ་ལྷག་བསམ་དག་པའི་སེམས་བསྐྱེད། །དག་པ་ས་གསུམ་རྣམ་པར་སྨིན་པའི་སེམས་བསྐྱེད། སངས་རྒྱས་ཀྱི་ས་ན་སྒྲིབ་པ་སྤང་བའི་སེམས་བསྐྱེད་དང་བཞིར་བཤད་པའོ། །གཉིས་པ་ནི་ཉི་ཁྲི་ལས། ལས་དང་པོ་པའི་སེམས་བསྐྱེད་དང་། ཡོངས་སུ་སྦྱང་བ་བྱས་པའི་སེམས་བསྐྱེད་དང་། ཆོས་མཐོང་བའི་སེམས་བསྐྱེད་དང་། རྣམ་པར་གྲོལ་བའི་སེམས་བསྐྱེད་དང་། བསམ་གྱིས་མི་ཁྱབ་པའི་སེམས་བསྐྱེད་པ་སྟེ། རབ་འབྱོར་འདི་ལ་མ་ཞུགས་པ་ཞུགས་པར་བྱའོ། །ཞུགས་པ་ཡོངས་སུ་སྦྱང་བར་བྱའོ། །ལྷའི་མིག་བསྐྱེད་པར་བྱའོ། །འཕགས་པའི་ལམ་བདེན་བསྒོམ་པར་བྱའོ། །སངས་རྒྱས་ཀྱི་སྤྱན་སྒྲིབ་པ་མེད་པ་ཐོབ་པར་བྱའོ། །ཞེས་གསུངས་པ་ལྟར་རོ། །ཚོགས་སྦྱོར་མཐོང་སྒོམ་མི་སློབ་པའི་ལམ་ལྔའི་དབྱེ་བས་ལྔར་ཤེས་པར་བྱའོ། །གསུམ་པ་གོང་དུ་བཤད་པའི་སེམས་བསྐྱེད་ཉེར་གཉིས་པོ་ས་མཚམས་གང་དང་གང་ལ་བཞག་ཅེ་ན། རྒྱན་འགྲེལ་དོན་གསལ་ལས། དེ་ལ་དང་པོ་གསུམ་ནི་ཆུང་ངུ་དང་། འབྲིང་དང་། ཆེན་པོ་ཉིད་ཀྱིས་ལས་དང་པོ་པའི་སས་བསྡུས་སོ། །དེའི་འོག་ཏུ་གཅིག་ནི་ས་དང་པོ་ལ་འཇུག་པའི་ལམ་གྱིས་བསྡུས་སོ། །དེའི་འོག་ཏུ་བཅུ་ནི། རབ་ཏུ་དགའ་བ་ལ་སོགས་པའི་ས་བཅུས་བསྡུས་ཏེ། མཐོང་བ་དང་། སྒོམ་པའི་ལམ་གྱི་སྤྱོད་ཡུལ་ཅན་ཡིན་ནོ། །དེའི་འོག་ཏུ་ལྔ་ནི་ཁྱད་པར་གྱི་ལམ་གྱིས་བསྡུས་སོ། །དེའི་འོག་ཏུ་སེམས་བསྐྱེད་པ་གསུམ་ནི་སྦྱོར་བ་དང་དངོས་དང་མཇུག་གི་སྒོ་ནས་སངས་རྒྱས་ཀྱི་སས་བསྡུས་སོ། །དེ་ལྟར་སེམས་བསྐྱེད་པའི་རབ་ཏུ་དབྱེ་བ་ནི། ལས་དང་པོ་པའི་ས་ནས་སངས་རྒྱས་ཀྱི་སའི་བར་གྱིས་བསྡུས་པ་ཡིན་ནོ། །ཞེས་པའི་དོན། དང་པོ་གསུམ་ནི། ཚོགས་ལམ་ཆེ་འབྲིང་ཆུང་གསུམ་དང་། དེ་ནས་གཅིག་སྦྱོར་ལམ། དེ་ནས་ས་བཅུ་པོ་སོ་སོར་སྦྱར། དེ་ནས་ལྔ་དག་པ་ས་གསུམ་དང་། དེ་ནས་གསུམ་ས་བཅུ་པ་ཆོས་ཀྱི་སྤྲིན་གྱི་སྦྱོར་དངོས་མཇུག་གསུམ་ལ་ཀུན་མཁྱེན་ཆེན་པོས་གསུངས་སོ། །ལྔ་པ་བཞེད་ཚུལ་གྱི་སྒོ་ནས་དབྱེ་བ་ནི། སེམས་ཅན་ཐམས་ཅད་སངས་རྒྱས་ལ་བཀོད་ནས་རང་ཉིད་འཚང་རྒྱ་བར་འདོད་པ་ཕྱུགས་རྫི་ལྟ་བུ་དཔེ་མེད་པའི་སེམས་བསྐྱེད་དང་། བདག་གཞན་ཐམས་ཅད་དུས་མཉམ་དུ་སངས་རྒྱས་པར་འདོད་པ་ལ་མཉེན་པ་ལྟ་བུ་ཡེ་ཤེས་དམ་པའི་སེམས་བསྐྱེད་དང་། རང་ཉིད་སངས་རྒྱས་ནས་གཞན་དགྲོལ་བར་འདོད་པ་རྒྱལ་པོ་ལྟ་བུ་འདོད་ཆེན་གྱི་སེམས་བསྐྱེད་དང་གསུམ་དུ་ཡོད་ཅིང་། དེ་རྣམས་ཀྱང་བློ་སྟོབས་ཆེ་ཆུང་གིས་གྲངས་མེད་གསུམ་དང་། བདུན་དང་། སུམ་ཅུ་རྩ་བདུན་ནས་སངས་རྒྱས་ཀྱི་གོ་འཕང་ཐོབ་པར་འགྱུར་བར་འདོད་པ་ཡིན་ནོ། །གསུམ་པ་བྱང་ཆུབ་སེམས་ཀྱི་ཕན་ཡོན་ནི་བསམ་གྱིས་མི་ཁྱབ་ཀྱང་། མདོར་བསྡུ་ན། སྤྱོད་འཇུག་ལས། གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་བཟུང་། །བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམ་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་དང་། དཔལ་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་དང་། བཟང་པོ་སྤྱོད་པ་ལས། གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བའི་མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་ཅིག་ཙམ་ཡང་དད་པ་བསྐྱེད་པ་ན། །བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་གསུངས་པ་ལྟར་བསོད་ནམས་མཐའ་ཡས་སོ། །གསུམ་པ་མྱུར་དུ་སངས་རྒྱས་ཐོབ་པའི་གཞི་བྱང་ཆུབ་སེམས་དཔའི་བསླབ་པ་བསྟན་པ་ནི། རྒྱས་པར་གཞུང་ལས་ཤེས་པར་བྱའོ། །མདོར་ན་ཐེག་ཆེན་བྱང་ཆུབ་སེམས་ཀྱི་སྒོར་ཞུགས་ནས་བཟུང་། དགེ་བའི་རྩ་བ་ཆེ་ཕྲ་གང་བསྒྲུབས་ཀྱང་རུང་སྟེ། སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་ལ་བསྔོ་བ་གསུམ་གྱིས་ཟིན་པར་བྱ། དེ་ཡང་ཁ་ཙམ་ཚིག་ཙམ་མ་ཡིན་པར་སྙིང་ཐག་པ་ནས་གཞན་དོན་ཁོ་ནར་བསམ་པ་མ་གཏོགས་རང་འདོད་ཀྱི་བསམ་པ་སྤུའི་རྩེ་མོ་ཙམ་ཞིག་ཀྱང་མ་འདྲེས་པར་བྱ་དགོས་ཏེ། སྤྱོད་འཇུག་ལས། དངོས་སམ་ཡང་ན་བརྒྱུད་ཀྱང་རུང་། །སེམས་ཅན་དོན་ལས་གཞན་མི་སྤྱད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་རྒྱུར་བསྔོའོ། །ཞེས་པ་ལྟར་རོ། །གལ་ཏེ་རང་འདོད་ཀྱི་བསམ་པ་སྐད་ཅིག་མ་ཞིག་སྐྱེས་ན་ཡང་དེ་ནི་བྱང་ཆུབ་སེམས་དཔའ་ལ་ཤིན་ཏུ་ལྕི་བའི་ལྟུང་བ་ཡིན་ཏེ། སྡུད་པ་ལས། གལ་ཏེ་བསྐལ་པ་བྱེ་བ་མང་པོར་དགེ་བའི་ལས་ལམ་བཅུ། །སྤྱད་ཀྱང་རང་རྒྱལ་དགྲ་བཅོམ་ཉིད་ལ་འདོད་བསྐྱེད་ན། །དེ་ནི་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་གསུངས་སོ། །དེས་ན་དུས་དང་རྣམ་པ་ཐམས་ཅད་དུ་རང་གི་སེམས་རྒྱུད་ལ་བརྟག་པ་འདི་ཁོ་ན་གལ་ཆེ་སྟེ། སྤྱོད་འཇུག་ལས། དེ་ལྟའི་བདག་གིས་སེམས་འདི་ནི། །ལེགས་བཟུང་ལེགས་པར་བསྲུང་བར་བྱ། །སེམས་བསྲུང་བརྟུལ་ཞུགས་མ་གཏོགས་པར། །བརྟུལ་ཞུགས་མང་པོས་ཅི་ཞིག་བྱ། །ཞེས་དང་། ལུས་དང་སེམས་ཀྱི་གནས་སྐབས་ལ། །ཡང་དང་ཡང་དུ་བརྟག་བྱ་བ། །དེ་ཉིད་ཁོ་ན་འདོར་ན་ནི། །ཤེས་བཞིན་བསྲུང་བའི་མཚན་ཉིད་དོ། །ཞེས་གསུངས་པ་ལྟར་བྱང་ཆུབ་སེམས་དཔའི་བསླབ་པའི་གནང་བཀག་ཐམས་ཅད་ཀྱི་ས་མཚམས་རང་འདོད་ཀྱི་ཞེན་འཁྲིས་ཡོད་མེད་ཁོ་ན་ལ་རག་ལས་པས་རྩ་བ་སེམས་ལ་ཐུག །སེམས་མི་ཉམས་པར་བསྲུང་བའི་ཐབས་ཀྱང་དྲན་པ་དང་ཤེས་བཞིན་གཉིས་སྲོག་གི་ཕྱིར་ཡང་མི་ཉམས་པ་ཞིག་བྱེད་དགོས་པ་ལགས་ཏེ། རྒྱལ་བའི་སྲས་པོ་ཞི་བ་ལྷས། སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དག །སྲོག་ལ་བབས་ཀྱང་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཞེས་གསུངས་པ་འདི་ལ་སངས་རྒྱས་ཐོབ་པར་འདོད་པ་ཐམས་ཅད་ཀྱིས་ཁོག་པའི་ནང་གི་སྙིང་བཞིན་དུ་གཅེས་སྤྲས་སུ་མཛད་དགོས་པར་གདའ་ལགས། །རྒྱལ་བའི་བཀའ་གསང་ཤིན་ཏུ་རྒྱ་ཆེ་ཡང་། །ངེས་བའི་སྙིང་པོ་བྱང་ཆུབ་མཆོག་གི་སེམས། །གཅིག་པུ་ལགས་ཀྱི་འདི་ལ་ཆིག་དྲིལ་དུ། །ཉམས་ལེན་མཛད་ན་སངས་རྒྱས་ལག་རྩེར་ཡོད། །བདག་ནི་ཐོས་ཉུང་བློ་དམན་སྦྱངས་པ་ཕྲ། །དེ་ཕྱིར་ཕྱོགས་འདིར་ཉེས་པ་གང་བཤད་པའི། །སྡིག་དེ་ཐོག་མེད་ནས་བསགས་ལས་རྣམས་དང་། །ལྷན་ཅིག་ཆོས་ཀྱི་སྤྱན་ལྡན་རྣམས་ལ་བཤགས། །གལ་ཏེ་དམ་པའི་གསུང་གིས་བསྐྱེད་པའི་ཆ། །ལེགས་པའི་ཤས་ཙམ་འདི་ལ་ཡོད་སྲིད་ན། །དེ་མཐུས་མཐའ་ཡས་མ་རྒན་དྲིན་ཆེན་རྣམས། །ཀུན་མཁྱེན་རྒྱལ་བའི་གོ་འཕང་ཐོབ་ཕྱིར་བསྔོ། །ཞིང་མང་དག་ན་རྒྱལ་སྲས་བྱེ་བའི་དབུས། །ལྷམ་མེར་མཛེས་པའི་རྒྱལ་བའི་སྐུ་མཆོག་དག །མཐོང་ནས་ཆོས་མིག་རྡུལ་དང་བྲལ་གྱུར་ཏེ། །ཀུན་བཟང་སྤྱོད་པ་རྒྱ་མཚོར་བརྩོན་པར་ཤོག །ཅེས་པ་འདི་ནི་དགེ་བའི་བཤེས་གཉེན་དམ་པ་གང་གི་གསུང་མི་ལྡོག་ཙམ་དུ་ཐེག་པ་ཆེན་པོའི་ཆོས་ལ་མོས་པ་ཐོབ་པའི་བཙུན་གཟུགས་པདྨ་བཛྲ་དུ་འབོད་པས་བྲིས་ཏེ་ཕུལ་བས་བདག་ཀྱང་ཐེག་པ་ཆེན་པོའི་ལམ་ལ་ཚུལ་བཞིན་དུ་སློབ་པའི་སྐལ་བ་དང་ལྡན་པའི་རྒྱུར་གྱུར་ཅིག། དགེའོ།། མངྒལཾ།།
དབུ་མའི་གཏན་ཚིགས་ལྔའི་བསྡུས་འགྲེལ་དཱི་པཾ་ཀ་རའི་ཞལ་ལུང་།
༄༅།།དབུ་མའི་གཏན་ཚིགས་ལྔའི་བསྡུས་འགྲེལ་དཱི་པཾ་ཀ་རའི་ཞལ་ལུང་ཞེས་བྱ་བ་བཞུགས་སོ།། དཔལ་ཤཱཀྱ་སེང་གེ་ལ་ཕྱག་འཚལ་ལོ། །གང་གི་རང་བཞིན་སྤྲོས་པ་ཀུན་བྲལ་བ། །རྟོག་པའི་ཡུལ་མིན་མཚན་མའི་ཆོས་ལས་འདས། །དོན་དམ་ཉིད་དེ་འཕགས་པའི་ཡེ་ཤེས་ཀྱིས། །གཉིས་མེད་ཚུལ་དུ་ཇི་བཞིན་གཟིགས་པ་ལགས། །ཡེ་ཤེས་མཆོག་དེ་བསྐྱེད་ཕྱིར་རྣལ་འབྱོར་པས། །ཐོག་མར་ཚོགས་ཀྱི་ལམ་ལ་གོམས་བྱས་ནས། །ཕྱི་ནས་ངེས་འབྱེད་དྲོད་སོགས་བཞིར་རིམ་བཞིན། །ཞི་གནས་བསྒྲུབ་བྱ་ལྷག་མཐོང་བསྐྱེད་པར་བྱ། །དེ་ལ་ཐོག་མར་ཞི་གནས་བརྟན་བསྒྲུབ་དེ་ཡིས་ཆོག་པར་མི་འཛིན་ཅིང་། །ཁམས་གསུམ་ཀུན་གྱི་སྐྱེ་བའི་འབྱུང་གནས་ཉོན་མོངས་རྩ་བ་དབྱུང་བ་དང་། །ཐབས་ཤེས་ཟུང་འདྲེལ་ཚོགས་གཉིས་མཆོག་རྫོགས་སྲིད་པའི་ཕ་རོལ་འགྲོ་འདོད་པས། །ཆོས་རྣམས་ཀུན་ལ་རྣམ་པར་མི་རྟོག་ལྷག་མཐོང་ཡེ་ཤེས་ཉིད་བསྐྱེད་བྱ། །དེ་རྒྱུ་ཐོས་བསམ་བསྒོམ་པ་ལས་བྱུང་ཤེས་རབ་ཏེ། །དེ་ལས་རེ་ཞིག་སྒོམ་པའི་ཤེས་རབ་ཅེས་བྱ་བ། །ཕུང་པོ་ཁམས་དང་སྐྱེ་མཆེད་ཀྱིས་བསྡུས་ཆོས་རྣམས་ལས། །སོ་སོར་བརྟགས་ཏེ་དེ་ཡི་རང་བཞིན་སྟོང་རྟོགས་པའོ། །བརྟགས་ཚུལ་དེ་ཡང་གང་ཞེ་ན། །ལུང་དང་རིག་པ་མན་ངག་གོ། །ལུང་དང་འདྲེལ་བའི་མན་ངག་ལས། །བྱུང་བའི་རིག་པ་མདོར་བསྡུ་ན། །གཏན་ཚིགས་ཆེན་པོ་བཞིའམ་ནི། །ལྔ་ཞེས་ཀླུ་སྒྲུབ་ཡབ་སྲས་ཀྱི། །རྗེས་འབྲང་དབུ་མ་རྣམས་བཞེད་ལ། །དེ་ཚུལ་འདིར་ནི་ཉུང་གསལ་བྲི། །དེ་ལ་འདིར་སྐྱེས་བུ་མཁས་པ་དག །ལམ་དབུ་མ་ཚོགས་གཉིས་ལ་བརྟེན་ནས། འབྲས་བུ་དབུ་མ་སྐུ་གཉིས་མངོན་དུ་བྱ་བར་འདོད་པས། གཞི་དབུ་མ་བདེན་གཉིས་གཏན་ལ་དབབ་པར་བྱའོ། །དེ་ཡང་དོན་དམ་པར་སྤྲོས་པ་ཐམས་ཅད་བྲལ་ཞིང་ཁས་ལེན་མེད་པར་དབུ་མ་པ་ཐམས་ཅད་མཚུངས་ཀྱང་། ཀུན་རྫོབ་འདི་ལྟར་སྣང་བའི་ཆོས་ཐམས་ཅད་ཐ་སྙད་དུ་གྲུབ་པར་ཁས་ལེན་མི་ལེན་གཉིས་སུ་ཡོད། མི་ལེན་པ་ནི་དོན་དམ་སྟོང་པ་ཉིད་ཁོ་ན་ཡུལ་དུ་བྱས་ནས་བཤད་པ་དང་། ཕྱི་རོལ་པ་དང་རང་སྡེ་དངོས་སྨྲ་བའི་གྲུབ་མཐའ་པ་རྣམས་དང་རྩོད་པའི་ཚེ་ན་དགོངས་པ་དང་དགོས་པའི་དབང་ལས་ཡིན་ལ། མགོན་པོ་ཀླུ་སྒྲུབ་ཀྱིས། གལ་ཏེ་ངས་དམ་བཅའ་འགའ་ཡོད། །དེ་ཚེ་ང་ལ་སྐྱོན་འདི་ཡོད། །ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་དང་། རྩོད་བཟློག་ལས། གལ་ཏེ་མངོན་སུམ་ལ་སོགས་པའི། །དོན་གྱི་འགའ་ཞིག་དམིགས་ན་ནི། །སྒྲུབ་པའམ་དགག་པར་བྱ་བ་དེ། །མེད་ཕྱིར་ང་ལ་ཀླན་ཀ་མེད། །ཅེས་དང་། ཟླ་གྲགས་ཀྱིས། ཇི་ལྟར་ཁྱོད་ཀྱིས་གཞན་དབང་དངོས་འདོད་ལྟར། །ཀུན་རྫོབ་ཀྱང་ནི་བདག་གིས་ཁས་མ་བླང་། །ཞེས་གསུངས་པ་ལྟར་ཀུན་རྫོབ་ཐ་སྙད་ཙམ་དུ་གྲུབ་པའང་ཞལ་བཞེས་མི་མཛད་དོ། །འདིར་ལམ་ཤེས་རབ་ཀྱི་གྲོལ་བའི་གནས་སྐབས་ལམ་རྗེས་ཐོབ་པ་ཐ་སྙད་དུ་ཡུལ་དུ་བྱེད་དུས་སྣང་ཚུལ་ཙམ་དུ་མི་འགོག་པར་ཆོས་ཐམས་ཅད་རྟེན་འབྱུང་སྒྱུ་མ་ཙམ་དུ་ཀུན་རྫོབ་བདེན་པའང་ཁས་བླང་བར་བྱ་བ་ཉིད་ཡིན་ཏེ། ཀླུ་སྒྲུབ་ཀྱིས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །དམ་པའི་དོན་ནི་མ་རྟོགས་ན། །ཐམས་ཅད་མཁྱེན་པའང་ཐོབ་མི་འགྱུར། །ཞེས་གསུངས་པ་ལྟར་དོན་དམ་སྟོང་པ་ཉིད་གཏན་ལ་འབེབས་པའི་ཐོག་མར་སྟོང་གཞི་ཆོས་ཅན་ངེས་དགོས་པའི་ཕྱིར་ཡང་ཁས་བླངས་ཏེ། འགྲེལ་པ་ཚིག་གསལ་ལས། ཆུ་འདོད་པས་སྣོད་ལྟར་ཐོག་མར་ཀུན་རྫོབ་ཀྱི་བདེན་པ་ནི་གདོན་མི་ཟ་བར་ཁས་བླང་བར་བྱའོ། །ཞེས་དང་། འཇུག་འགྲེལ་ལས། ཕྱོགས་འདི་ནི་མཁས་པ་དག་གིས་སྐྱོན་མེད་ཅིང་ཡོན་ཏན་དང་ལྡན་པའོ་སྙམ་དུ་བསམས་ཏེ་གདོན་མི་ཟ་བར་ཁས་བླང་བར་བྱའོ། །ཞེས་དང་། ཟླ་གྲགས་ཀྱིས། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །དེ་གཉིས་རྣམས་དབྱེ་གང་གིས་མི་ཤེས་པ། །དེ་ནི་རྣམ་རྟོག་ལོག་པའི་ལམ་དུ་ཞུགས། །ཞེས་གསུངས་པ་ལྟར། སྟོང་ཉིད་ལ་འཇུག་པའི་ཐོག་མར་ཀུན་རྫོབ་ཀྱི་བདེན་པ་ཇི་ལྟར་སྣང་བ་བཞིན་ཁས་བླང་བར་བྱའོ། །དེ་ནས་དོན་དམ་བདེན་པ་ལ་འཇུག་པར་བྱ་སྟེ། འདི་ལྟར་ཆོས་ཐམས་ཅད་སྐྱེ་བ་མེད་ཅིང་རང་བཞིན་གྱིས་མ་གྲུབ་པའི་སྟོང་པ་ཉིད་དུ་གཏན་ཚིག་ཆེན་པོ་དག་གིས་གཏན་ལ་ཕབ་ཅིང་ཆོས་ཐམས་ཅད་སྟོང་པ་ཉིད་དོ་སྙམ་དུ་བསྒོམ་པར་བྱའོ། །དེ་བརྟན་པར་གྱུར་ནས་སྟོང་འཛིན་གཉེན་པོའི་བློ་དེ་ཡང་རང་བཞིན་མེད་པར་གོམས་པར་བྱའོ། །དེ་ལྟར་སྒོམ་པའི་དགོས་པ་ཡང་། སྤྱོད་འཇུག་ལས། སྟོང་ཉིད་བག་ཆགས་གོམས་པས་ནི། །དངོས་པོའི་བག་ཆགས་སྤང་འགྱུར་ཞིང་། །ཅི་ཡང་མེད་ཅེས་གོམས་པས་ནི། །ཕྱི་ནས་དེ་ཡང་སྤང་བར་འགྱུར། །ཞེས་གསུངས་སོ། །དེ་ལྟར་ཡུལ་གཟུང་འཛིན་གྱི་ཤིང་བུ་མཐའ་དག་ཡུལ་ཅན་སོ་སོར་རྟོགས་པའི་ཤེས་རབ་ཀྱི་མེས་བསྲེག་ནས་ཤེས་རབ་ཉིད་རྟེན་མེད་ཅིང་ཡིད་ལ་བྱེད་པ་མེད་པ་ཆོས་ཉིད་བསམ་གྱིས་མི་ཁྱབ་པའི་ཀློང་དུ་ཞི་བར་གྱུར་པ་དེའི་ཚེ་འབྲས་བུ་ཆོས་ཀྱི་སྐུའི་རྒྱུ་སྣང་མེད་ཡེ་ཤེས་ཀྱི་ཚོགས་རླབས་བོ་ཆེ་ཡང་རྫོགས་པ་ཡིན་ཏེ། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགགས་པ་མེད། །སེམས་འགགས་པ་དེ་སྐུ་ཡིས་མངོན་སུམ་མཛད། །ཞེས་སོ། དེའི་དུས་སུ་དམིགས་པ་དང་ཡིད་ལ་བྱེད་པ་ཕྲ་མོ་ཙམ་ཡང་ཡོད་པ་མ་ཡིན་ཏེ། ཞི་བ་ལྷས། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས་པ་དེ་ཉིད་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཡིན་ཏེ། སྡུད་པ་ལས། གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །འདུ་ཤེས་རྣམ་པར་བཤིགས་ཏེ་སྤང་བ་ཕ་རོལ་འགྲོ། །ཞེས་པ་ལྟར་རོ། །དེས་ན་སྟོང་པ་ཉིད་མངོན་དུ་བྱས་ནས་བསྒོམ་པར་བྱ་བ་ཡང་ཆོས་ཐམས་ཅད་ལ་སོ་སོར་བརྟགས་པ་སྔོན་དུ་འགྲོ་བས་ཡིན་གྱིས། བརྟགས་མིན་གྱི་འགོགས་པའི་འདུ་བྱེད་བཏང་སྙོམས་དང་ཤེས་པ་ལུང་མ་བསྟན་གྱི་ངང་ལ་བཞག་པ་ཙམ་མ་ཡིན་ཏེ། བཅོམ་ལྡན་འདས་ཀྱིས། གལ་ཏེ་ཆོས་ལ་བདག་མེད་སོ་སོར་རྟོགས། །སོ་སོར་དེ་བརྟགས་དེ་ལྟར་བསྒོམ་ན་ནི། །དེ་ཉིད་མྱ་ངན་འདས་ཐོབ་འབྲས་བུའི་རྒྱུ། །རྒྱུ་གཞན་གང་ཡིན་དེས་ནི་ཞི་མི་འགྱུར། །ཞེས་གསུངས་པ་ལྟར་ཡིན་པས་ཐོག་མར་སོ་སོར་བརྟགས་པའི་ཤེས་རབ་འདི་ལྟར་བསྐྱེད་པར་བྱ་སྟེ། ཆོས་འདི་དག་མདོར་ན་གཟུགས་དང་གཟུགས་ཅན་མ་ཡིན་པའོ། །དེ་དག་ཀྱང་རང་བཞིན་གྱིས་མ་གྲུབ་པ་སྟེ་སྐྱེ་བ་མེད་པའི་ཕྱིར་རོ། །དེ་ཅིས་ཤེས། གཏན་ཚིག་ཆེན་པོ་བཞིའམ་ལྔ་དག་གིས་སོ། །དེ་དག་གང་ཞེ་ན། ཡོད་མེད་སྐྱེ་འགོག་གི་གཏན་ཚིག་དང་། རྡོ་རྗེ་གཟེག་མའི་དང་། གཅིག་དང་དུ་བྲལ་གྱི་དང་། རྟེན་འདྲེལ་ཆེན་པོའི་གཏན་ཚིག་ཞེས་བྱ་བའི་བཞི་པོ་འདི་དག་གམ། ཡང་ན་དོན་བྱེད་འགོག་པའི་གཏན་ཚིག་དང་ལྔའོ། །དེ་དག་གིས་ཚུལ་ཇི་ལྟར་ཞེ་ན། གོ་སླ་ཞིང་ཁུངས་བཙུན་པའི་ཕྱིར། སློབ་དཔོན་མཁས་པ་ཆེན་པོ་དི་པཾཀ་ར་ཤྲཱི་ཉྫཱ་ནའི་གཞུང་འདི་བཞག་པར་བྱའོ། །ཇི་ལྟར་ན། ཡོད་པ་སྐྱེ་བ་རིགས་མིན་ཏེ། །མེད་པའང་ནམ་མཁའི་མེ་ཏོག་བཞིན། །ཉེས་པ་གཉིས་ཀར་ཐལ་འགྱུར་ཕྱིར། །གཉིས་ཀ་དག་ཀྱང་འབྱུང་བ་མིན། །ཞེས་པས་ཡོད་མེད་སྐྱེ་འགོགས་ཀྱི་གཏན་ཚིག་བསྟན་ཏེ། འདི་ན་ཆོས་གང་དག་ཡོད་པ་ནི་སྐྱེ་བར་མི་འགྱུར་ཏེ། སྐྱེས་ཟིན་པའི་ཕྱིར། མེད་པའི་ཆོས་ཀྱང་སྐྱེ་བར་མི་འགྱུར་ཏེ། དེ་དག་རང་བཞིན་ཉིད་ཀྱིས་མ་གྲུབ་ཅིང་སྐྱེ་བའི་རྒྱུ་མེད་པའི་ཕྱིར་རོ། །གཉིས་ཀ་ཞེས་པའི་ཕུང་པོ་གསུམ་པ་ནི་འདི་ན་འགའ་ཡང་མེད་དོ། །དེའི་དོན་ཞི་བ་ལྷས་ཀྱང་། དངོས་པོ་ཡོད་པར་གྱུར་པ་ལ། །རྒྱུ་རྣམས་ཀྱིས་ནི་ཅི་ཞིག་བྱ། །འོན་ཏེ་དེ་ནི་མེད་ན་ཡང་། །རྒྱུ་རྣམས་ཀྱིས་ནི་ཅི་ཞིག་དགོས། །ཞེས་གསུངས་སོ། །ཚུལ་འདི་ཀུན་མཁྱེན་གྱིས་མཛོད་འགྲེལ་པདྨ་དཀར་པོ་ན་གསལ་བར་གསུང་སྟེ། སྣ་ཚོགས་སུ་སྣང་བ་འདི་ཆོས་ཅན། ངོ་བོ་མེད་པར་ཐལ། ངོ་བོ་ཡོད་མེད་ཀྱི་སྐྱེ་བ་དང་བྲལ་བའི་ཕྱིར་རོ། །དེའང་བུམ་པ་ཉིད་བུམ་པར་ཡོད་དུས་སྐྱེ་ན་བུམ་པ་གྲུབ་ཟིན་པའི་ཕྱིར་སྐྱེ་བ་མི་འཐད་ལ། མེད་དུས་སྐྱེ་ན་མེད་པ་ལས་ཡོད་པར་འབྱུང་མི་སྲིད་པས་དེ་རྫས་འགལ་བའི་ཕྱིར་རོ། །ཞེས་སོ། །ཡང་སློབ་དཔོན་གྱིས། དངོས་པོ་རང་ལས་མི་སྐྱེ་ཞིང་། གཞན་དང་གཉིས་ཀ་ལས་ཀྱང་མིན། །རྒྱུ་མེད་ལས་མིན་དེ་ཡི་ཕྱིར། །ངོ་བོ་ཉིད་ནི་རང་བཞིན་མེད། །ཅེས་བྱ་བ་འདིས་རྡོ་རྗེ་གཟེགས་མ་བསྟན་ཏེ། འདི་ལྟར་བདག དབང་ཕྱུག སྐྱེས་བུ་དང་། གཙོ་བོ་དང་། ལས་དང་། རང་བཞིན་དང་། ཡོན་ཏན་དང་། ཚངས་པ་དང་། ཁྱབ་འཇུག་དང་། ལྷ་ཆེན་པོ་ལ་སོགས་པ་ཕྱི་དང་ནང་གི་བྱེད་པའི་སྐྱེས་བུ་དང་། གཞན་ཡང་རང་གི་སྡེ་པ་དག་ཀྱང་རྒྱུ་དྲུག་དང་རྐྱེན་བཞིས་དངོས་པོར་སྐྱེ་བར་ཁས་ལེན་པ་དེ་དག་ནི་ལོག་པར་རྟོག་པ་ཡིན་ཏེ། དེ་དག་དགག་པའི་ཕྱིར། འཕགས་པ་ཀླུ་སྒྲུབ་ཀྱི་ཞལ་ནས་ཀྱང་། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དང་གང་ལ་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་དབུ་མ་རྩ་བ་ཤེས་རབ་ལས་གསུངས་སོ། །དེའི་དོན་ཟླ་བ་གྲགས་པས་མཐའ་བཞིའི་སྐྱེ་བ་འགོག་པའི་རིགས་པ་དམ་བཅའ་བཞི་མཛད་དེ། འཇུག་པ་ལས། དེ་ཉིད་དེ་ལས་འབྱུང་མིན་གཞན་དག་ལས་ལྟ་ག་ལ་ཞིག །གཉིས་ཀ་ལས་ཀྱང་མ་ཡིན་རྒྱུ་མེད་པ་ནི་ག་ལ་ཡོད། །ཞེས་པ་ལྟར་ལས། དང་པོ་རྒྱུ་རང་ལས་འབྲས་བུ་རང་སྐྱེ་བར་མི་རུང་སྟེ་རང་ཉིད་སྔར་གྲུབ་པས་གསར་དུ་སྐྱེ་བའི་ཡོན་ཏན་གསར་ཐོབ་མེད་པ་དང་། རྒྱུ་འབྲས་གཉིས་སུ་དུས་དང་ངོ་བོ་རྫས་རྣམས་གཅིག་པས་རྒྱུ་སྐྱེད་བྱེད་དང་འབྲས་བུ་བསྐྱེད་བྱར་མི་རུང་བ་དང་། ནམ་ཡང་རང་ལས་སྐྱེ་བ་རང་ཡིན་པའི་ཕྱིར་ས་བོན་སྲིད་མཐར་ཐུག་པར་སྐྱེ་བ་ལས་འབྲས་བུ་མྱུ་གུ་སོགས་མི་སྐྱེ་བར་ཐལ་ཏེ། འཇུག་པ་ལས། དེ་ནི་དེ་ལས་བྱུང་ན་ཡོན་ཏན་འགའ་ཡང་ཡོད་མ་ཡིན། །སྐྱེས་པར་གྱུར་པ་སླར་ཡང་སྐྱེ་བར་རིགས་པའང་མ་ཡིན་ཉིད། །སྐྱེས་ཟིན་སླར་ཡང་སྐྱེ་བར་ཡོངས་སུ་རྟོག་པར་འགྱུར་ན་ནི། །མྱུ་གུ་ལ་སོགས་སྐྱེ་བ་འདིར་རྙེད་མི་འགྱུར་ཞིང་། །ས་བོན་སྲིད་མཐར་ཐུག་པར་རབ་ཏུ་སྐྱེ་བ་ཉིད་དུ་འགྱུར། །ཞེས་སོ། །འདི་ཉིད་མཛོད་འགྲེལ་ལས་ཀྱང་། རང་ལས་སྐྱེ་བ་མ་གྲུབ་སྟེ། །བསྐྱེད་བྱ་སྐྱེད་བྱེད་རྫས་འགལ་བའི་ཕྱིར་རོ། །ཞེས་སོ། །གཉིས་པ་ལ་རྒྱུ་གཞན་ལས་འབྲས་བུ་གཞན་སྐྱེ་བར་མི་རུང་སྟེ། རྒྱུ་སྣང་བའི་བདག་ཉིད་ཅན་མེ་ལྕེ་ལས་ཀྱང་འབྲས་བུ་སྒྲིབ་པའི་མཚན་ཉིད་ཅན་མུན་པ་སྟུག་པོ་སྐྱེ་བ་དང་། རྒྱུ་ཡིན་མིན་ཐམས་ཅད་ལས་ཀྱང་འབྲས་བུ་ཡིན་མིན་ཐམས་ཅད་སྐྱེ་བར་ཐལ་ཏེ། འཇུག་པ་ལས། གཞན་ལས་གལ་སྟེ་གཞན་ཞིག་འབྱུང་བར་འགྱུར་ན་ནི། །འོ་ན་མེ་ལྕེ་ལས་ཀྱང་མུན་པ་འཐུག་པོ་འབྱུང་འགྱུར་ཞིང་། །ཐམས་ཅད་ལས་ཀྱང་ཐམས་ཅད་སྐྱེ་བར་འགྱུར་ཏེ་གང་གི་ཕྱིར། །སྐྱེད་པར་བྱེད་པ་མ་ཡིན་མ་ལུས་ལ་ཡང་གཞན་ཉིད་མཚུངས། །ཞེས་གསུངས་པ་དང་། མཛོད་འགྲེལ་ལས་ཀྱང་། གཞན་ལས་གཞན་ཉིད་སྐྱེ་ན་མེ་ལྕེ་ལས་ཀྱང་མུན་པ་སྐྱེ་བར་ཐལ་ཏེ་གཞན་ཡིན་པའི་ཕྱིར་རོ། །ཞེས་སོ། གསུམ་པ་བདག་གཞན་གཉིས་ཀའི་ཆ་ལས་སྐྱེ་བར་མི་རུང་བ་ནི་གོང་གི་རིགས་པ་གཉིས་ཀྱིས་རིམ་བཞིན་བསྟན་པས་ཆོག་པ་ཡིན་ཏེ། འཇུག་པ་ལས། གཉིས་ལས་སྐྱེ་བའང་རིག་པའི་ངོ་བོ་མ་ཡིན་གང་གི་ཕྱིར། །བཤད་ཟིན་ཉེས་པ་དེ་དག་ཐོག་ཏུ་བབ་པ་ཡིན་ཕྱིར་རོ། །ཞེས་གསུང་། མཛོད་འགྲེལ་པདྨ་དཀར་པོར་ཡང་། རྒྱུ་ཡོད་མེད་ལས་སྐྱེ་བ་རྫས་འགལ་བས་མ་གྲུབ་པའི་ཤུགས་ཀྱིས་གཉིས་ལས་སྐྱེ་བ་ཁེག་གོ། །ཞེས་སོ། །བཞི་པ་རྒྱུ་མེད་པ་ལས་སྐྱེ་བ་མི་རུང་སྟེ། ཐམས་ཅད་ལས་ཀྱང་ཐམས་ཅད་སྐྱེ་བ་དང་། ས་བོན་མ་བཏབ་བར་སྐྱེ་བ་དང་། བཏབ་ཀྱང་མི་སྐྱེ་བ་དང་། ལོ་ཏོག་གི་ཆེད་དུ་ཞིང་ལས་ཀྱི་བྱ་བ་ཐམས་ཅད་དོན་མེད་པར་ཐལ་ཏེ། འཇུག་པ་ལས། གལ་ཏེ་རྒྱུ་མེད་ཁོ་ནར་སྐྱེ་བ་ལྟ་ཞིག་འགྱུར་ན་ནི། །དེ་ཚེ་མཐའ་དག་རྟག་ཏུ་ཐམས་ཅད་ལས་ཀྱང་སྐྱེ་འགྱུར་ཞིང་། །འབྲས་འབྱུང་ཆེད་དུ་འཇིག་རྟེན་འདི་ཡི་ས་བོན་ལ་སོགས་ནི། །བརྒྱ་ཕྲག་དག་གི་སྒོ་ནས་སྡུད་པར་བྱེད་པ་ཡང་མི་འགྱུར། །གལ་ཏེ་འགྲོ་བ་རྒྱུ་ཡིས་སྟོང་པར་གྱུར་ན་ནམ་མཁའ་ཡི། །ཨུད་པ་ལ་ནི་དྲི་མདོག་ཇི་བཞིན་བཟུང་དུ་མེད་ཉིད་ན། །ཞེས་གསུངས་སོ། །ཀུན་མཁྱེན་གྱིས་ཀྱང་། རྒྱུ་མེད་ལས་སྐྱེ་བ་ཧ་ཅང་ཐལ་ཏེ་ནམ་མཁའ་ལས་ཨུཏྤ་ལ་སྐྱེ་བར་ཐལ་བའི་ཕྱིར་རོ། །ཞེས་སོ། །ཡང་སློབ་དཔོན་གྱིས། ཡང་ན་ཆོས་རྣམས་ཐམས་ཅད་དག །གཅིག་དང་དུ་མར་རྣམ་དཔྱད་ན། །ངོ་བོ་ཉིད་ཀྱིས་མི་དམིགས་པས། །རང་བཞིན་མེད་པ་ཉིད་དུ་ངེས། །ཞེས་བྱ་བ་འདིས་ནི་གཅིག་དང་དུ་མ་བྲལ་བའི་གཏན་ཚིག་བསྟན་ཏེ། ཡང་ན་ཞེས་བྱ་བ་འདིའི་དོན་ནི་བསྟན་པའོ། །གཅིག་དང་དུ་མས་རྣམ་དཔྱད་ན། །ཞེས་པའི་དོན་ནི། སློབ་དཔོན་ཞི་བ་འཚོས་བཤད་དེ། བདག་དང་གཞན་སྨྲས་དངོས་འདི་དག །ཡང་དག་དོན་དུ་རང་བཞིན་མེད། །གཅིག་དང་དུ་མ་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་གསུངས་སོ། །དེའི་དོན་ནི། རང་འགྲེལ་རང་བཞིན་ཡོད་པར་གྱུར་ན་ནི་གཅིག་པའམ་གཅིག་ཤོས་ལས་མི་འདའ་འོ། །དེ་དག་ཕན་ཚུན་སྤངས་ཏེ་གནས་པའི་མཚན་ཉིད་ཡིན་པས་ཕུང་པོ་གཞན་སེལ་བར་བྱེད་དོ། །རང་གི་སྡེ་པ་དང་ཕྱི་རོལ་པ་དག་གིས་སྨྲས་པའི་ཕུང་པོ་དང་། གཙོ་བོ་ལ་སོགས་པ་དེ་དག་ཡང་དག་པར་ན་མེད་དེ། རང་བཞིན་གསལ་བར་ཤེས་སོ། །ཞེས་གསུངས། དེ་ལ་ཐོག་མར་དངོས་པོ་འདི་དག་གཅིག་པ་ཉིད་དུ་མེད་པར་ཤེས་ན་དུ་མར་མེད་པ་ཚེགས་མི་དགོས་པར་རྟོགས་པར་འགྱུར་ཏེ། དུ་མ་གཅིག་བསགས་པ་ཡིན་པའི་ཕྱིར་རོ། །དེ་སྐད་དུ་ཡང་དབུ་མ་རྒྱན་ལས། དངོས་པོ་གང་ཞིག་རྣམ་དཔྱད་ན། །དེ་དང་དེ་ལ་གཅིག་ཉིད་མེད། །གང་ལ་གཅིག་ཉིད་ཡོད་མིན་པ། །དེ་ལ་དུ་མ་དག་ཀྱང་མེད། །ཅེས་པའི་འགྲེལ་པར། གང་ལ་གཅིག་པའི་རང་བཞིན་མི་འཐད་པ་དེ་དུ་མའི་བདག་ཉིད་དུ་ཁས་བླང་བར་རིགས་པ་མ་ཡིན་པ་ཉིད་དེ། འདི་ལྟར་དུ་མ་ནི་གཅིག་བསགས་པའི་མཚན་ཉིད་དོ། །ཞེས་སོ། དེ་ལྟར་རགས་པའི་རྩོམ་བྱེད་རྡུལ་ཕྲ་རབ་རང་བཞིན་མེད་པར་བསྟན་པ་ནི། དེ་ཉིད་ལས། བསྒྲིབ་དང་མ་བསྒྲིབ་དངོས་སོགས་ཕྱིར། །རགས་པ་རྣམས་ཀྱང་གཅིག་པུ་མིན། །འབྱར་བའམ་ནི་བསྐོར་བ་དང་། །བར་མེད་རྣམ་པར་གནས་ཀྱང་རུང་། །དབུས་གནས་རྡུལ་ཕྲན་རྡུལ་གཅིག་ལ། །བལྟས་པའི་རང་བཞིན་གང་ཡིན་པ། །རྡུལ་ཕྲན་གཞན་ལ་བལྟ་བར་ཡང་། །དེ་ཉིད་གལ་ཏེ་ཡིན་བརྗོད་ན། །དེ་ལྟ་ཡིན་ན་དེ་ལྟ་བུ། །ས་ཆུ་ལ་སོགས་རྒྱས་འགྱུར་རམ། །རྡུལ་ཕྲན་གཞན་ལ་བལྟ་བའི་ངོས། །གལ་ཏེ་གཞན་དུ་འདོད་ན་ནི། །རབ་ཏུ་ཕྲ་རྡུལ་ཇི་ལྟར་བུར། །གཅིག་པུ་ཆ་ཤས་མེད་པར་འགྱུར། །རྡུལ་ཕྲན་རང་བཞིན་མེད་གྲུབ་པ། །དེ་ཕྱིར་མིག་དང་རྫས་ལ་སོགས། །བདག་དང་གཞན་སྨྲས་མང་པོ་དག །རང་བཞིན་མེད་པར་མངོན་པ་ཡིན། །ཞེས་པས་སོ། །རྣམ་ཤེས་དོན་དམ་དུ་འདོད་པའི་ལུགས་ཀྱིས་ཤེས་པ་དེ་ཡང་གཅིག་པུའི་ངོ་བོར་མེད་དོ། །དེ་ཉིད་ལས། བེམ་མིན་རང་བཞིན་གང་ཡིན་པ། །དེ་འདིའི་བདག་ཉིད་ཤེས་པ་ཡིན། །གཅིག་པུ་ཆ་མེད་རང་བཞིན་ལ། །གསུམ་གྱི་རང་བཞིན་མི་འཐད་ཕྱིར། །དེ་ཡི་རང་གི་རིག་པ་ནི། །བྱ་དང་བྱེད་པའི་དངོས་པོར་མིན། །ཅེས་སོ། །དེ་ཡང་ཤེས་པའི་སྐད་ཅིག་མ་དེ་ལ་འཕྲད་པ་བརྟགས་པས། སྐད་ཅིག་མ་རང་བཞིན་མེད་པར་ཤེས་སོ། །ཡང་ན་ཡུལ་གྱི་རྣམ་པ་བཞིན་ཤེས་པའང་དུ་མར་འགྱུར་ཏེ། རྣམ་པ་རྣམས་དང་མ་བྲལ་བས། །རྣམ་ཤེས་གཅིག་པུ་མི་འགྱུར་རོ། །ཞེས་སོ། །དེ་ལྟར་ན་གཅིག་པུ་མ་གྲུབ་བོ། །དེ་ལྟར་གཅིག་དང་དུ་མ་བྲལ་བ་དེའི་ཚེ་དེ་ལས་གཞན་པའི་ཕུང་གསུམ་པ་ནི་འགའ་ཡང་མེད་དོ། །དེ་ཉིད་ལས། གཅིག་དང་དུ་མ་མ་གཏོགས་པར། །རྣམ་པ་གཞན་དང་ལྡན་པ་ཡི། །དངོས་པོ་མི་རུང་འདི་གཉིས་ནི། །ཕན་ཚུན་སྤངས་ཏེ་གནས་ཕྱིར་རོ། །ཞེས་གསུངས། ཚུལ་འདི་ཡང་མཛོད་འགྲེལ་ལས། དོན་དུ་སྣང་བ་ཆོས་ཅན། དངོས་དང་དངོས་མེད་གང་དུ་ཡང་མ་གྲུབ་པར་ཐལ། གཅིག་དང་དུ་མ་བྲལ་བའི་ཕྱིར་ཆུ་ཟླ་བཞིན། ཞེས་སོ། །གཞན་ཡང་སློབ་དཔོན་གྱིས། སྟོང་ཉིད་བདུན་ཅུའི་རིགས་པ་དང་། དབུ་མ་རྩ་བ་སོགས་ལས་ཀྱང་། དངོས་པོ་རྣམས་ཀྱི་རང་བཞིན་ནི། །སྟོང་པ་ཉིད་དུ་འགྲུབ་པར་བཤད། །ཞེས་བྱ་བ་འདིས་ནི་རྟེན་ཅིང་འདྲེལ་བར་འབྱུང་བའི་གཏན་ཚིག་བསྟན་ཏེ། འདིའི་དོན་ཡང་གཞུང་དེ་དག་ཉིད་དུ་བལྟ་བར་བྱའོ། །ཞེས་གསུངས་སོ། །དེ་ལྟར་ཡང་། རྩ་བ་ཤེས་རབ་ལས། རྟེན་ཅིང་འདྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་པས། འཁོར་འདས་ལམ་གསུམ་གྱི་ཆོས་ཐམས་ཅད་རྟེན་ཅིང་འདྲེལ་བར་འབྱུང་བ་འབའ་ཞིག་ལས་གཞན་དུ་མེད་ལ་རྟེན་ཅིང་འདྲེལ་བར་འབྱུང་བ་གང་ཡིན་པ་དེ་ནི་རྒྱུ་དང་རྐྱེན་ལས་སྐྱེ་བ་གཞན་ལ་རགས་ལས། རང་བཞིན་གྱིས་མ་གྲུབ་པ་སྣང་དུས་ཉིད་ནས་སྟོང་པར་གནས་པ་སྟེ་སྒྱུ་མའི་རྟ་གླང་དང་མེ་ལོང་གི་གཟུགས་བརྙན་བཞིན་ནོ། །དེ་ཉིད་ལས། གཟུགས་སྒྲ་དྲི་རོ་རེག་པ་དང་། །ཡིད་དང་ཆོས་དག་འབའ་ཞིག་སྟེ། །རྟེན་ཅིང་འདྲེལ་བར་འབྱུང་བའི་ཕྱིར། །དྲི་ཟའི་གྲོང་ཁྱེར་ལྟ་བུ་དང་། །སྨིག་རྒྱུ་རྨི་ལམ་འདྲ་བ་ཡིན། །སྒྱུ་མའི་སྐྱེས་བུ་ལྟ་བུ་དང་། །གཟུགས་བརྙན་འདྲ་བ་དེ་དག་ལས། །སྡུག་པ་དང་ནི་མི་སྡུག་པ། །འབྱུང་བར་ཡང་ནི་ག་ལ་འགྱུར། །ཞེས་སོ། །རྒྱུ་སྔ་མ་ལ་རྟེན་ཅིང་རྐྱེན་རྣམས་དང་འདྲེལ་བར་འབྲས་བུ་འབྱུང་བ་དེ་ནི་རྟེན་ཅིང་འདྲེལ་བར་འབྱུང་བ་ཡིན་ཅིང་། དེ་ལ་ཕྱིའི་རྟེན་འདྲེལ་དང་། ནང་གི་རྟེན་འདྲེལ་གཉིས་སུ་དབྱེ་བ་སོགས་རྒྱས་པར་ནི་ས་ལུ་ལྗང་པའི་མདོ་ལས་ཤེས་པར་བྱ་བ་ཡིན་ལ། འདིར་ནི་ལང་ཀར་གཤེགས་པ་ལས། བློ་གྲོས་ཆེན་པོ་ཇི་ལྟར་འཇིམ་པའི་གོང་བུ་ལས་རྫ་མ་བྱུང་བ་དེ་བཞིན་དུ་ཐག་པས་སྣམ་བུ་དང་། རྩིད་རྐྱང་ལས་རེ་ལྡེ་དང་། ས་བོན་ལས་མྱུ་གུ་དང་། སྲུབ་པ་ལ་སོགས་པ་མིའི་ནན་ཏན་དང་ཞོ་ལས་མར་འབྱུང་འདི་ནི། བློ་གྲོས་ཆེན་པོ་ཕྱིའི་རྟེན་ཅིང་འདྲེལ་བར་འབྱུང་བ་སྔ་མ་ལས་ཕྱི་མ་འབྱུང་བའོ། །ནང་གི་རྟེན་ཅིང་འདྲེལ་བར་འབྱུང་བ་ནི་འདི་ལྟ་སྟེ། མ་རིག་པ་དང་སྲེད་པ་ལས་ཆོས་འདི་དག་ལ་སོགས་ནི་ནང་གི་རྟེན་ཅིང་འདྲེལ་བར་འབྱུང་བ་ཞེས་བྱ་བའི་མིང་འཐོབ་བོ། །ཞེས་སོ། །དེ་ལྟ་བུའི་རྟེན་འདྲེལ་གྱི་ཚུལ་ལེགས་པར་ཤེས་ན་ཆོས་ཐམས་ཅད་རང་བཞིན་གྱིས་མ་གྲུབ་པའི་སྟོང་པ་དང་། ཐ་སྙད་ཙམ་དུ་བརྟེན་ནས་གདགས་པ་ཡང་མི་འགལ་བའི་ཕྱིར་ལམ་དབུ་མ་ཆེན་པོ་རྟོགས་པ་ཡིན་ཏེ། རྩ་ཤེས་ལས། རྟེན་ཅིང་འདྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ལ་བརྟེན་ནས་གདག་པ་སྟེ། །དེ་ཉིད་དབུ་མའི་ལམ་ཡིན་ནོ། །ཞེས་སོ། །དེས་གཏན་ཚིག་བཞིའི་མདོ་ཙམ་སྨྲོས་ནས། ལྔ་པ་དོན་བྱེད་འགོག་པའི་གཏན་ཚིག་ནི། ཀུན་མཁྱེན་གྱིས། ཤེས་བྱ་རྣམས་ཆོས་ཅན། དངོས་པོ་མ་གྲུབ་པར་ཐལ། དོན་བྱེད་པ་མ་གྲུབ་པའི་ཕྱིར་རོ། །སྐད་ཅིག་གིས་དོན་མི་བྱེད་དེ། དོན་བྱེད་པར་བཟོ་དུས་འགགས་ནས་མེད་དོ། །རིམ་གྱིས་མི་བྱེད་དེ། སྐད་ཅིག་རྒྱུན་ཁེགས་པས་ཞེས་གསུངས་སོ། །སློབ་དཔོན་གཞན་དག །རྒྱུ་ལ་དཔྱོད་པ་རྡོ་རྗེ་གཟེགས་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག །གཉིས་ཀ་ལ་དཔྱོད་པ་མུ་བཞི་སྐྱེ་འགོག །ངོ་བོ་ལ་དཔྱོད་པ་གཅིག་དང་དུ་བྲལ། རྟེན་འདྲེལ་ཆེན་པོའི་གཏན་ཚིག་དང་ལྔ་ཞེས་ཀྱང་བཞེད་དོ། །ཀུན་མཁྱེན་གྱིས་སྔ་མ་དག་གི་སྟེང་དུ་རྟག་འཇིག་མེད་པ་དང་། འགྱུར་མི་འགྱུར་དང་། ཆོས་བཞི་འགོག་པའི་གཏན་ཚིག་གསུམ་དང་བརྒྱད་དུ་བཞེད་དེ། འདི་དག་ནི་མདོར་ན་རིགས་པའི་སྒོ་ཙམ་སྨོས་པ་ཡིན་གྱི་གཏན་ཚིག་བཞིའམ་ལྔ་ལ་སོགས་པ་ངེས་པ་མེད་དེ། གཏན་ཚིག་འདི་དག་གིས་ཚད་མས་གཏན་ལ་དབབ་ཅིང་མཐར་ཐུག་གི་དོན་ལ་མི་བསླུ་བའི་རིགས་པའི་ཚིག་ཡིན་པས་དེ་སྐད་ཅེས་བྱའོ། །དེ་ལྟར་ན་སྔོན་གྱི་མཁས་པ་དག་གི་གཞུང་རེ་རེ་ལས་ཀྱང་། རིགས་པའི་སྒོ་འཕར་གྲངས་མེད་པ་དག་འབྱུང་བས་སོ། །འདིར་སྨྲས་པ། ཐུབ་ཆེན་གསུང་གི་མ་དྲོས་རྒྱ་མཚོ་ལས། །འོང་བའི་ལེགས་བཤད་ཆུ་ཀླུང་ཆེན་པོ་བཞིན། །རྒྱ་བོད་མཁས་པའི་གཞུང་ལུགས་ཆེས་མང་མོད། །ཉུང་ངུའི་གཏམ་གྱི་ཟིལ་ཐིགས་འདིས་ཅི་བྱ། །འོན་ཀྱང་རང་མཉམ་དང་པོའི་ལས་ཅན་འགའ། །རྒྱ་ཆེའི་གཞུང་ལ་འཇུག་པར་མི་བཟོད་ཕྱིར། །བློ་གྲོས་གསར་བུའི་སྒོ་འཕར་དབྱེ་བ་ལ། །ཕན་སྙམ་གཏམ་གྱི་སྦྱོར་བ་འདི་བྱས་སོ། །འདི་ལ་བདག་བློ་རྨོངས་པའི་སྐྱོན་ཆགས་པ། །ངེས་པར་མཆིས་མོད་མཁས་རྣམས་བཟོད་པར་འོས། །ལྷག་བསམ་དག་པའི་ལེགས་སྤྱད་གང་མཆིས་པ། །རང་གཞན་ཤེས་རབ་སྐྱེ་བའི་རྒྱུར་གྱུར་ཅིག། །། ཅེས་པ་འདི་ནི་རྨོངས་པ་པདྨ་བཛྲ་པས་སོ།། བཀྲ་ཤིས།། དགེའོ།།
སྔ་འགྱུར་རྒྱུད་འབུམ་གྱིས་མཚོན་པའི་མདོ་རྒྱུད་སྤྱིའི་འཆད་ཐབས་ཨུད་པ་ལའི་ཕྲེང་བ།
༄༅།།སྔ་འགྱུར་རྒྱུད་འབུམ་གྱིས་མཚོན་པའི་མདོ་རྒྱུད་སྤྱིའི་འཆད་ཐབས་ཨུད་པ་ལའི་ཕྲེང་བ་ཞེས་བྱ་བ་བཞུགས་སོ།། བླ་མ་ལ་ཕྱག་འཚལ་ལོ། །གང་གི་མཁྱེན་དང་བརྩེ་བའི་ཡེ་ཤེས་ཀྱིས། །ཤེས་བྱའི་ཆོས་ཁམས་མཐའ་དག་ཅིག་ཆར་དུ། །མཉམ་ཤིང་མ་འདྲེས་ཡོངས་སུ་རྫོགས་པ་རུ། །ཀུན་གཟིགས་ཁྱབ་བདག་བླ་མས་དགེ་ལེགས་སྩོལ། །རྣམ་དག་ཐུབ་པའི་གཞུང་ལུགས་རྒྱ་མཚོ་ལ། །སྦྱངས་པའི་སྤྱན་རས་ཡངས་པོར་གྱུར་པ་རྣམས། །འདི་འདྲའི་གཏམ་གྱི་སྦྱོར་བས་ཅི་ཞིག་མགུ། །འོན་ཏང་བློ་གསར་འཆད་ཉན་སྤྲོ་བ་དག །སྦྱོར་བ་གཏམ་གྱིས་ཆོས་སྒོ་འབྱེད་པ་ལ། །ཐོག་མར་དགེ་བ་འཆད་བྱའི་ཆོས་ངོས་བཟུང་། །གླེང་གཞི་སྟོན་པས་ཇི་ལྟར་གསུངས་པའི་ཚུལ། །བརྒྱུད་པའི་བབ་ལུགས་འཆད་པའི་གོ་རིམ་དང་། །འཆད་པའི་སློབ་དཔོན་ཉན་པའི་སློབ་མའི་ཚུལ། །འཆད་ཉན་བགྱིད་པའི་བསམ་པ་ཀུན་སློང་དང་། །སྦྱོར་བ་ཀུན་སྤྱོད་དམ་པ་གསུམ་ལྡན་གྱིས། །ཕན་ཡོན་དང་བཅས་གོ་རིམ་ཇི་བཞིན་བཤད། །དེ་ལ་འདིར་སྔ་འགྱུར་རྒྱུད་འབུམ་ལྟ་བུས་མཚོན་པའི་ཆོས་འཆད་པ་ལ་ཞུགས་པའི་ཚེ། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་བླ་ན་མེད་པ་ཟུང་འཇུག་སྐུ་བཞི་ཡེ་ཤེས་ལྔའི་བདག་ཉིད་ཁྱབ་བདག་རྡོ་རྗེ་འཆང་ཆེན་པོའི་གོ་འཕང་སྐུ་ཚེ་འདི་ཉིད་ལ་མངོན་དུ་བྱ། དེའི་ཆེད་དུ་ཟབ་གསང་བླ་ན་མེད་པ་རྡོ་རྗེའི་ཐེག་པའི་རྒྱུད་སྡེ་ཟབ་མོའི་རིམ་པ་རྣམས་གསན་ནས་དེ་དག་གི་བརྗོད་བྱའི་དོན་རྣམས་ཚུལ་བཞིན་ཐུགས་ཉམས་སུ་བཞེས་པར་བགྱིའོ་སྙམ་པའི་བསམ་པ་བྱང་ཆུབ་མཆོག་ཏུ་ཐུགས་བསྐྱེད་པ་དང་བཅས་པས་ཆོས་ཉན་པའི་ཀུན་སློང་དང་ཀུན་སྤྱོད་རྣམས་གསལ་གདབ་སྟེ། དྲན་པ་ཉེ་བར་བཞག་ནས་སྤང་བླང་མ་ནོར་བའི་སྒོ་ནས་གསན་པར་ཞུ། འདིར་གང་ཞིག་གསན་པར་བྱ་བ་སྐབས་སུ་བབ་པའི་ཆོས་ནི། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་ཀུན་མཁྱེན་ཤཱཀྱ་སེང་གེའི་གསུང་གི་གསང་བ་བསམ་གྱིས་མི་ཁྱབ་པ་ལས་གསང་སྔགས་རྙིང་མའི་རྒྱུད་འབུམ་ཞེས་ཡོངས་སུ་གྲགས་པ་སྔ་འགྱུར་ནང་རྒྱུད་སྡེ་གསུམ་གཙོ་བོར་གྱུར་པའི་རྒྱུད་སྡེ་རྣམས་འཆད་པའི་སྐབས་ཡིན། དེ་ལ་སྤྱིར་བདག་ཅག་གི་སྟོན་པ་གདུལ་བྱ་འདུལ་བའི་ཐབས་ལ་མཁས་ཤིང་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་གདུལ་བྱའི་སེམས་ཅན་རྣམས་ཀྱི་ཁམས་དང་དབང་པོ་བསམ་པའི་བྱེ་བྲག་དང་མཐུན་པའི་ཆོས་ཀྱི་སྒོ་དང་ཐེག་པའི་རྣམ་གྲངས་བསམ་གྱིས་མི་ཁྱབ་པ་ཞིག་གསུངས་པ་དེ་ཐམས་ཅད་སྤང་གཉེན་གྱི་སྒོ་ནས་བཞག་ན་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་སྟེ། ཀུན་བྱེད་རྒྱལ་པོའི་རྒྱུད་ལས། ཉོན་མོངས་འདོད་ཆགས་འདུལ་བའི་གཉེན་པོ་རུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཞེ་སྡང་འདུལ་བའི་གཉེན་པོ་རུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་གཏི་མུག་འདུལ་བའི་གཉེན་པོ་རུ། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །དུག་གསུམ་ཆ་མཉམ་འདུལ་བའི་གཉེན་པོ་རུ། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་པ་ལྟར་ལ། དེ་ཐམས་ཅད་རྗོད་བྱེད་ཚིག་གི་སྒོ་ནས་ལུང་སྡེ་སྣོད་གསུམ་དང་། བརྗོད་བྱ་དོན་གྱི་སྒོ་ནས་མངོན་རྟོགས་བསླབ་པ་གསུམ་སྟེ་ངོ་བོ་ལུང་རྟོགས་གཉིས་ཀྱི་ཆོས་སུ་གནས་པ་ཡིན་ཏེ། མཛོད་ལས། ཐུབ་པའི་བསྟན་པ་རྣམ་གཉིས་ནི། །ལུང་དང་རྟོགས་པའི་བདག་ཉིད་ཅན། །ཞེས་གསུངས། འོ་ན་གསང་སྔགས་རྡོ་རྗེའི་ཐེག་པ་ཡང་དེ་དག་ཏུ་འདུའམ་ཞེ་ན་འདུ་མོད་ཀྱི་འོན་ཀྱང་བསྡུ་བའི་ཚུལ་ལ། རྒྱ་གར་གྱི་སློབ་དཔོན་རྣམས་ཀྱང་འཆད་ལུགས་མི་འདྲ་བར་སྣང་སྟེ། ཁ་ཅིག་ནི། གསང་སྔགས་མདོ་སྡེའི་ཚུལ་དུ་བཤད་ཀྱིས་ཉོན། །ཅེས་པ་དང་། མདོ་སྡེ་འདི་ཡི་གཟི་བརྗིད་ཀྱིས། །ཞེས་པ་ལ་སོགས་པའི་རྗེས་སུ་འབྲང་ནས་མདོ་སྡེར་འཆད། སློབ་དཔོན་བི་མ་ལ་སོགས་ཁ་ཅིག་ནི། སྡེ་སྣོད་རིན་པོ་ཆེ་གསུམ་ལས་མངོན་པ་སྟེ་ཞེས་ལྟ་བ་དང་ཤེས་རབ་གཙོ་བོར་སྟོན་པའི་སྒོ་ནས་མངོན་པར་འཆད། སློབ་དཔོན་ཁ་ཅིག་ནི་སྡེ་སྣོད་གསུམ་གའི་མན་ངག་ཏུ་གྱུར་པ་གང་ཞིག་འབྲས་བུ་ལམ་དུ་བྱེད་ཅིང་ཐབས་མཁས་ཀྱི་ཁྱད་པར་སྤང་གཉེན་ཐ་དད་དུ་མི་བལྟ་ཞིང་ལམ་གྱི་ལུས་མི་འདྲ་བར་སྟོན་པའི་ཕྱིར་ཐུན་མིན་རིག་པ་འཛིན་པའི་སྡེ་སྣོད་ཅེས་སྡེ་སྣོད་ཟུར་པ་ཞིག་ཏུ་མཛད་དེ་སྡེ་སྣོད་བཞི་པར་བཞག་གོ། །དེ་དག་གང་ལྟར་ཡང་དོན་གྱི་ངོ་བོ་བསླབ་པ་གསུམ་དང་བྱང་ཆུབ་ཀྱི་སེམས་བསྒོམ་པའི་མན་ངག་ཏུ་འཆད་དགོས་པས་ན་ལམ་གྱི་ངོ་བོ་མཐུན་ཅིང་ཐབས་ཀྱིས་ཁྱད་པར་འཕགས་པ་ཁོ་ནའོ། །དེ་ལས་སྐབས་འདིར་ནི་རྒྱུ་མཚན་ཉིད་ཀྱི་ཐེག་པ་ལས་ཁྱད་པར་བཞིའི་སྒོ་ནས་འཕགས་པ་འབྲས་བུ་རྡོ་རྗེའི་ཐེག་པ་ཉིད་སྟོན་པའི་སྐབས་ཡིན། དེ་ལ་ལྟ་སྤྱོད་གཙོ་བོར་སྟོན་པའི་བྱེ་བྲག་གིས་བྱ་བའི་རྒྱུད་དང་རྣལ་འབྱོར་གྱི་རྒྱུད་གཉིས་ལས། བྱ་བའི་རྒྱུད་ལའང་བྱ་བའི་རྒྱུད་དངོས་དང་། དེའི་ཆ་མཐུན་སྤྱོད་པའི་རྒྱུད་དེ་གཉིས་ཡོད། རྣལ་འབྱོར་གྱི་རྒྱུད་ལའང་རྣལ་འབྱོར་གྱི་རྒྱུད་ཙམ་དང་། རྣལ་འབྱོར་བླ་ན་མེད་པའི་རྒྱུད་གཉིས་ཏེ་རྒྱུད་སྡེ་བཞིར་དབྱེ་བ་དང་། རྣལ་འབྱོར་བླ་ན་མེད་པའི་རྒྱུད་ལའང་ནང་གསེས་ཐབས་ཀྱི་རྒྱུད་དང་། ཤེས་རབ་ཀྱི་རྒྱུད་དང་། གཉིས་ཀའི་རྒྱུད་གསུམ་དུ་དབྱེ་བས་རྒྱུད་སྡེ་དྲུག་ཏུ་འགྱུར་བ་ཡིན་ལ། དེ་ལ་ཁ་ཅིག་བླ་མེད་ཀྱི་རྒྱུད་ལ་ཐབས་ཤེས་ཀྱི་རྒྱུད་གང་རུང་གིས་ཁྱབ་པས་གཉིས་མེད་ཀྱི་རྒྱུད་ཅེས་ཟུར་དུ་མི་བཞེད་པར་སྣང་བ་ནི། དོན་ལ་ལམ་གྱི་ངོ་བོ་ཐབས་ཤེས་གཉིས་ལས་མི་འདའ་བ་བདེན་མོད་ཀྱང་། གདུལ་བྱའི་ཁྱད་པར་ལས་ཚིག་གིས་ཟིན་ཚོད་དང་ལམ་གྱི་དངོས་གཞི་ལ་ཐབས་ཤེས་ཀྱི་ཕྱོགས་རེ་རེ་དང་། དེ་དག་ཆ་མཉམ་པའམ་ལམ་དེ་དག་ལས་སྐྱེས་པའི་ཡེ་ཤེས་གཙོ་བོར་སྟོན་མི་སྟོན་གྱི་བྱེ་བྲག་མངོན་སུམ་གྲུབ་པས་རྒྱུད་སྡེ་དྲུག་ཏུ་བཞག་པ་ལ་སྐྱོན་མེད་དོ། །དེ་ལྟར་རྒྱུད་སྡེ་བཞིའམ་དྲུག་ཏུ་བཞག་པ་དེ་དག་ལས། ད་རེས་ཀྱི་སྐབས་སུ་བབ་པ་ནི་གསང་ཆེན་བླ་ན་མེད་པའི་རྒྱུད་སྡེ་རིན་པོ་ཆེ་རྣམས་འཆད་པའི་སྐབས་ཡིན། དེ་ལ་བོད་འདིར་འགྱུར་སྔ་ཕྱིའི་དབང་གིས་བཞག་པའི་གསང་སྔགས་གསར་རྙིང་གཉིས་སུ་གྲགས་པ་ལས། འདིར་སྔ་འགྱུར་རྙིང་མའི་རིང་ལུགས་ལྟར་ན་སྔགས་བླ་མེད་ཀྱི་ལམ་ཐམས་ཅད་མདོ་སྒྱུ་སེམས་གསུམ་མམ། རྒྱུད་ལུང་མན་ངག་གསུམ་དུ་གྲགས་པ་ནང་རྒྱུད་ཡོ་ག་སྡེ་གསུམ་དུ་ཡོངས་སུ་རྫོགས་པར་འདུ་བ་ཡིན་ལ། དེ་ལས་གསར་རྙིང་ཐུན་མོང་དུ་བཞེད་པའི་བླ་མེད་ཀྱི་རྒྱུད་སྡེ་རྣམས་ནི་ཕལ་ཆེར་མ་ཧཱ་ཡོ་གའི་ཕྱོགས་སུ་གཏོགས་པ་ཡིན་ནོ། །སྔ་འགྱུར་གྱི་ཐུན་མོང་མ་ཡིན་པའི་རྒྱུད་སྡེ་རྣམས་ཕྱོགས་གཅིག་ཏུ་བཞུགས་པ་ལ་སྔ་འགྱུར་རྙིང་མའི་རྒྱུད་འབུམ་ཞེས་ཡོངས་སུ་གྲགས་པ་འདི་ཉིད་དོ། །གཞན་ཁ་ཅིག་ཕྱི་ནང་གི་རྒྱུད་སྡེ་ལྔའམ་དྲུག་ཏུ་བཞག་པ་རྣམས་ནི་རྒྱུད་སྡེའི་རིམ་པའི་དབྱེ་བ་ལས་ཐེག་པའི་རིམ་པ་མིན་ནོ་ཞེས་རྩོད་པ་ནི་ཚིག་ལ་རྩོད་པ་ཙམ་སྟེ། དོན་ལ་ནི་འབྲས་བུ་རྡོ་རྗེའི་ཐེག་པ་ཞེས་གསང་སྔགས་མཐའ་དག་ཐེག་པ་གཅིག་ཏུ་བཞག་པ་ནི་གསར་རྙིང་ཐུན་མོང་གི་རྒྱུད་སྡེ་རྣམས་དང་། རྒྱ་བོད་ཀྱི་མཁས་པ་ཆེན་པོ་ཐམས་ཅད་ལ་གྲགས་ཤིང་གྲུབ་པ་ཡིན་ནོ། །དེ་ལྟར་ན་སྤྱིས་བྱེ་བྲག་ལ་ཁྱབ་པ་ནི་རིགས་པར་སྨྲ་བ་རྣམས་བཞེད་པས། སྔར་རྒྱུད་རྣམས་སྤྱིར་ཐེག་པ་ཡིན་པ་གང་ཞིག །དེ་ལ་བྱེ་བྲག་རྒྱུད་སྡེའི་རིམ་པ་ཁས་བླངས་པའི་ཕྱིར་ཐེག་པའི་རིམ་པ་ཤུགས་ཀྱིས་གྲུབ་བོ། །འོན་ཀྱང་དེ་ལ་ཐེག་པ་མཆོག་དམན་དུ་འདོད་པ་མི་འཐད་དོ་ཞེ་ན། དེ་ནི་ཁྱེད་རང་རྣམས་འདོད་པའི་རྒྱུད་རྡོ་རྗེ་གུར་ལས་ཀྱང་། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །དབང་པོ་མཆོག་ལ་རྣལ་འབྱོར་རྒྱུད། །རྣལ་འབྱོར་བླ་མེད་དེ་ལྟག་ལའོ། །ཞེས་རྒྱུད་སྡེ་བཞི་པོ་རང་རང་གི་ཆེད་དུ་བྱ་བའི་གདུལ་བྱ་དབང་པོ་མཆོག་དམན་གྱི་རིམ་པ་བཞི་ལ་དགོངས་ནས་གསུང་བར་བཤད་པའི་ཕྱིར་རྒྱུད་སྡེ་གོང་འོག་ཏུ་གྲུབ་ཕྱིན་ཐེག་པས་མཆོག་དམན་དུའང་གྲུབ་པ་ཉིད་དོ། །བླ་མེད་ཀྱི་སྡེ་ཚན་ནང་རྒྱུད་སྡེ་གསུམ་པོའང་རིག་པ་དེ་ཉིད་ཀྱིས་ཐེག་པའི་རིམ་པ་ཡིན་པ་དང་། ཕ་རྒྱུད་ལས་མ་རྒྱུད་ཉིད་ལ་ཟབ་པའི་ཁྱད་པར་ཡོད་པ་རྒྱུད་ནས་བཤད་པ་བཞིན་འདིར་དོན་གྱི་འོད་གསལ་ལྷན་ཅིག་སྐྱེས་པའི་ཡེ་ཤེས་རྫོགས་པ་ཆེན་པོར་ཉེ་བ་དང་། ཤིན་ཏུ་ཉེ་བ་དང་། མངོན་དུ་བྱེད་པའི་སྒོ་ནས་དམན་མཆོག་གི་རིམ་པའང་གྲུབ་བོ། །རྒྱུ་མཚན་དེའི་ཕྱིར་རང་རང་གི་སྤྱོད་ཡུལ་དུ་གྱུར་པའི་མདོ་རྒྱུད་ཉི་ཚེ་བ་ཞིག་ལས། ཐེག་པ་རིམ་དགུའི་ཚིག་ཟིན་དངོས་སུ་མ་བྱུང་བ་ཙམ་ལ་བརྟེན་ནས་ནན་གྱིས་འགོག་པ་ནི་ཚིག་ཙམ་ལ་རྩོད་པ་ཁོ་ནའོ། །དེ་ལྟར་ཐེག་པ་རིམ་པ་དགུའི་རྩེ་མོར་གྱུར་པའི་ནང་རྒྱུད་ཡོ་ག་སྡེ་གསུམ་པོ་འདི་ཉིད་གང་གིས་གསུངས་པའི་སྟོན་པ་ནི་བསྐལ་བཟང་རྣམ་འདྲེན་བཞི་པ་ཤཱཀྱ་སེངྒེ་ཉིད་ཡིན་ལ། དེ་ལ་སྐུ་གསུམ་གྱི་སྣང་ཚུལ་མི་འདྲ་བ་གསུམ་ལས་གླེང་གཞིའི་རིམ་པ་ཡང་གསུམ་སྟེ། འཇམ་དཔལ་སྒྱུ་འཕྲུལ་དྲྭ་བའི་བཤད་རྒྱུད་ལས། གླེང་གཞི་རྣམ་པ་གསུམ་ཡིན་ཏེ། །འོག་མིན་གནས་དང་རི་རབ་རྩེ། །འཛམ་བུའི་གླིང་འདིར་གྲགས་པ་ཡིན། །བྱང་ཆུབ་སེམས་དཔའི་ལྷ་རྣམས་དང་། །མི་རྣམས་ཀྱི་ནི་དོན་དུ་གསུང་། །སྟོན་པ་ཡང་ནི་རྣམ་གསུམ་སྟེ། །སངས་རྒྱས་རྡོ་རྗེ་འཆང་ཆེན་དང་། །ལོངས་སྐུ་འཁོར་ལོས་སྒྱུར་བ་དང་། །ཤཱཀྱ་ཐུབ་པ་ཉིད་ཀྱིས་གསུངས། །དུས་ནི་གདུལ་བྱ་འདུལ་བའི་ཚེ། །འཁོར་རྣམས་འདུས་པའི་དུས་དེར་གསུང་། །ཞེས་གསུངས་པ་དང་མཐུན་པར་སངས་རྒྱས་ཉིད་ཀྱི་ཡེ་ཤེས་ཆེན་པོའི་རང་སྣང་ཤིན་ཏུ་རྣམ་པར་དག་པའི་འོག་མིན་ཆེན་པོ་ན་དབྱིངས་ངོ་བོ་ཉིད་ཀྱི་སྐུ་དང་ཡེ་ཤེས་ཆོས་ཀྱི་སྐུ་གཉིས་དབྱེར་མེད་པ་ཟུང་དུ་འཇུག་པའི་བདག་ཉིད་ཡེ་ཤེས་ཀྱི་བྱེ་བྲག་ཚད་མེད་པ་དང་ལྷན་ཅིག་ཟབ་ཞི་སྤྲོས་དང་བྲལ་བའི་འོད་གསལ་གྱི་དགོངས་པ་ལས་མི་གཡོ་བར་བཞུགས་པ་ནི་དཔལ་ཆོས་སྐུའི་སྟོན་པ་ཀུན་ཏུ་བཟང་པོས་འཁོར་ཉིད་ལས་མི་གཞན་པའི་རྒྱལ་བ་རྒྱ་མཚོའི་ཚོགས་ལ་ཆོས་འོད་གསལ་བརྗོད་དུ་མེད་པའི་དགོངས་པ་ཉིད་དུས་གཞི་རྫོགས་འཕོ་འགྱུར་མེད་པའི་དབྱིངས་སུ་སྒྲ་ཚིག་རང་མཚན་ལས་འདས་པའི་གསུང་གིས་སྣང་བར་མཛད་དོ་ཞེས་བཤད་དེ། འདི་ནི་གཞན་ངོར་ཆོས་སྟོན་པའི་ཐོག་མར་སྟོན་པ་རང་ཉིད་ཏིང་ངེ་འཛིན་གྱི་བྱེ་བྲག་དུ་མ་ལ་སྙོམས་པར་ཞུགས་སོ་ཞེས་མདོ་རྒྱུད་རྣམས་ཀྱི་གླེང་གཞིའི་སྐབས་ནས་འབྱུང་བ་དང་མཐུན་པ་སྟེ། སྟོན་པའི་རྣམ་མཁྱེན་གྱིས་ཇི་ལྟར་ཐུགས་སུ་ཆུད་པའི་ངོས་ནས་བཞག་པ་གླེང་གཞིའི་དང་པོར་གྲུབ་བོ། །དེ་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་དང་དམིགས་པ་མེད་པའི་ཐུགས་རྗེ་ཆེན་པོའི་རྐྱེན་ལས་གཟུགས་ཀྱི་སྐུ་རྣམ་པ་ཐམས་ཅད་པར་སྣང་བར་མཛད་ནས་ཆོས་ཀྱི་འཁོར་ལོ་མཐའ་དག་བསྐོར་བར་མཛད་པ་ལས། ཐོག་མར་དག་པའི་ས་ལ་གནས་པའི་བྱང་ཆུབ་སེམས་དཔའི་ཚོགས་རྣམས་ལ་སྟུག་པོའི་འོག་མིན་དང་། གཙང་གནས་ཀྱི་འོག་མིན་དང་། རི་རབ་ཀྱི་རྩེ་ལ་སོགས་པར་སྟོན་པ་ཉིད་ལོངས་སྤྱོད་རྫོགས་པ་རྣམ་པར་སྣང་མཛད་ཆེན་པོ་དང་རྡོ་རྗེ་འཆང་ཆེན་པོའི་རྣམ་པས་རྒྱུ་དང་འབྲས་བུའི་ཐེག་པ་ཆེན་པོ་བསམ་གྱིས་མི་ཁྱབ་པ་རྟག་པ་རྒྱུན་གྱི་འཁོར་ལོར་སྟོན་པར་མཛད་པ་གླེང་གཞི་གཉིས་པ་དང་། དེའི་བདག་པོའི་རྐྱེན་དང་གདུལ་བྱའི་སྣོད་དག་པའི་དབང་ལས་མཁའ་ཟླ་ཆུ་མཚོར་སྣང་བ་བཞིན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་སུ་སྟོན་པ་ཐུབ་པའི་དབང་པོ་སངས་རྒྱས་བཅོམ་ལྡན་འདས་ཀྱི་མཚན་དང་སྐུའི་རྣམ་འགྱུར་མི་འདྲ་བ་དུ་མར་སྣང་བས། འཁོར་རྣམ་པ་བཞི་དང་དབང་རྣོན་སྔགས་ཀྱི་གདུལ་བྱར་གྱུར་པ་རྣམས་ལ་དངོས་དང་བརྒྱུད་པའི་སྒོ་ནས་ཟབ་པ་དང་རྒྱ་ཆེ་བའི་ཆོས་ཀྱི་རྣམ་གྲངས་ཚད་མེད་པ་དང་། བྱེ་བྲག་ཏུ་རྡོ་རྗེའི་ཐེག་པ་ཉིད་ཡང་ནས་ཡང་དུ་རྒྱ་ཆེར་བསྒྲགས་པར་མཛད་པ་ནི་གླེང་གཞི་གསུམ་པའོ། །དེ་ལྟར་གླེང་གཞི་རྣམ་པ་གསུམ་གྱི་སྒོ་ནས་གསུངས་པའི་སྔགས་ཀྱི་རྒྱུད་སྡེ་རྒྱ་མཚོ་ལྟ་བུ་དེ་རྣམས་སྤྱིར་གསང་བའི་བདག་པོ་ལག་ན་རྡོ་རྗེ་དང་བྱེ་བྲག་རང་རང་གི་སྡུད་པ་པོ་རྣམས་ཀྱིས་བསྡུས་ཏེ་ཇི་ལྟར་བརྒྱུད་པའི་ཚུལ་ནི། མདོ་དགོངས་པ་འདུས་པ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་རིག་རྣ་བར་བརྒྱུད་པ་སྟེ། །གང་ལ་ཐུག་གི་བར་དུའོ། །ཞེས་པ་ལྟར། རྒྱལ་མཆོག་ཀུན་ཏུ་བཟང་པོའམ་རྡོ་རྗེ་འཆང་ཆེན་པོས་རྒྱལ་ཚབ་རིགས་ལྔ་སོགས་ཉིད་ལས་མི་གཞན་པའི་འཁོར་ལ་དགོངས་པས་བརྒྱུད་དེ་བཤད། རྒྱལ་ཚབ་སྐྱེས་བུ་རྣམས་ཀྱི་རང་རིགས་ཀྱི་སེམས་དཔའ་སེམས་མ་དཔའ་བོ་དང་རྣལ་འབྱོར་མའི་ཚོགས་རྣམས་ལ་རིག་པས་བརྒྱུད་ནས་བཤད། རྒྱལ་སྲས་རིགས་གསུམ་གྱི་སེམས་དཔའ་དང་ཁྱད་པར་གསང་བའི་བདག་པོ་སོགས་ཀྱིས་རང་རང་གི་གདུལ་བྱ་རྣམས་ལ་རྣ་བར་བརྒྱུད་པའི་ཚུལ་གྱིས་བཤད། དེ་ནས་རིམ་པར་ཆོས་རྒྱལ་ལུང་བསྟན་རྡོ་རྗེའམ་སྐལ་ལྡན་རྒྱལ་པོ་ཛཿདང་། སྤྲུལ་པའི་སྐུ་དགའ་རབ་རྡོ་རྗེ་སོགས་ནས་རིམ་པར་བརྒྱུད་ནས་བདག་ཅག་གི་བླ་མ་དམ་པའི་བར་དུ་སྨིན་བྱེད་དབང་གི་ལག་ལེན་མ་ཉམས། བཤད་བརྒྱུད་ཚིག་གི་ཕྲེང་བ་མ་ཆད། སྙན་བརྒྱུད་གདམས་པའི་ཆུ་བོ་མ་ནུབ་པར་བྱོན་པ་ཡིན་ནོ། །བརྒྱུད་པ་དེ་ལྟ་བུ་ལས་བྱུང་བའི་གདམས་ངག་ཇི་ལྟར་འཆད་པའི་གོ་རིམ་ཡང་སྔོན་གྱི་ཤིང་རྟ་ཆེན་པོ་དག་གི་ཕྱག་བཞེས་ལྟར་གདུལ་བྱ་རྣམས་བསྟན་པ་ལ་རིམ་གྱིས་གཞུག་པའི་ཚུལ་གྱིས། ཐོག་མར་ཐུན་མོང་རྒྱུ་འབྲས་ཀྱི་ཆོས་ཀྱིས་བློ་ཁ་དབྱེ་ཞིང་ངེས་འབྱུང་རྣམ་དག་གིས་དྲངས་པའི་སྐྱབས་སུ་འགྲོ་བ་གསུམ། བསླབ་པའི་གཞི་ལྔ་སོགས་སོ་སོ་ཐར་པའི་ཁྲིམས་ཀྱིས་རྒྱུད་བསྡམས། དེ་ནས་ཚད་མེད་བཞིས་བློ་སྦྱངས་ཏེ་སྙིང་རྗེས་དྲངས་པའི་བྱང་ཆུབ་མཆོག་ཏུ་སེམས་བསྐྱེད། གཟོད་རྒྱུད་སྡེ་ནས་བཤད་པ་ལྟར་གྱིས་དཀྱིལ་འཁོར་ཆེན་པོར་བཅུག་སྟེ་སྨིན་བྱེད་ཀྱི་རྒྱུ་དབང་ལེགས་པར་བསྐུར། དེ་ལྟར་སྡོམ་པ་གསུམ་ལ་གནས་ཤིང་རྒྱུད་དག་པའི་གང་ཟག་དེ་ལ་བློ་ནུས་དང་མཐུན་པར་རྒྱུད་ཀྱི་བཤད་པ་འབོགས་ཤིང་སྔགས་ལམ་གྱི་གོ་བ་ཆགས་པར་བྱ། དེ་ནས་སྙན་བརྒྱུད་གདམས་ངག་གི་དམར་ཁྲིད་ལག་ལེན་དུ་ཐེབས་པར་གདམས་ནས་ཉམས་ལེན་གྱིས་སེམས་ཐོག་ཏུ་ལོངས་པར་བྱ། དེ་དག་གི་རྒྱབ་རྟེན་དུ་རྒྱུད་སྡེ་སོ་སོའི་བཀླག་ལུང་ཕོག་སྟེ་ཆོས་གཞུག་རྫོགས་པར་བྱ་བ་ཡིན་ནོ། །སྐབས་འདིར་ཁྲིད་དང་ལུང་དང་བཤད་པ་གསུམ་གྱི་ཁྱད་པར་དཔྱད་ན། སྤྱིར་བཏང་ཙམ་ན་དེ་གསུམ་ག་དོན་གཅིག་དགོས་ཏེ། ཐུབ་པའི་བསྟན་པ་རྣམ་གཉིས་ཏེ། །ལུང་དང་རྟོགས་པའི་བདག་ཉིད་ཅན། །དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ན་ཡིན། །ཅེས་པ་ལྟར་ལུང་གི་བསྟན་པ་བཤད་པས་འཛིན་པ་ཡིན་པ་དང་། སྔོན་སྟོན་པས་ཀྱང་བསམ་གཟུགས་ཀྱི་ཏིང་ངེ་འཛིན་བསྒོམ་པའི་གདམ་ངག་གསན་པ་ལ་དེ་དང་དེའི་ལུང་བླངས་ཏེ་ཞེས་བཤད་པ་དང་། སྡེ་སྣོད་གསུམ་གྱི་ལུང་ཕོག་ཅེས་པ་དང་། ལུང་ནོད་པ་དང་། ཁ་ཏོན་དུ་བྱེད་པ་དང་། ཞེས་སོགས་ལུང་གིས་ཀྱང་བྱེ་བྲག་མ་ཕྱེ་བར་བཤད་པ་དང་། རིགས་པས་ཀྱང་ལུང་ནི་ལུང་ནོད་པའི་དོན་ཏེ། རྣམ་པར་དཀྲོལ་ཞིང་གསལ་བར་ཕྱེ་ནས་དོན་ཁོང་དུ་ཆུད་པར་བྱེད་པ་ཡིན་ལ། ཁྲིད་དང་བཤད་པ་ཡང་དེ་ཡིན་པས་སོ། །འོ་ན་ལུང་ཙམ་གྱིས་ཀྱང་དོན་ངེས་པར་བྱེད་ནུས་སམ་ཞེ་ན། དེ་ནི་མ་ངེས་ཏེ་འཆད་པའི་ཚུལ་དང་དབང་པོའི་བྱེ་བྲག་གིས་བཤད་ཁྲིད་ཁ་ཅིག་ལུང་བྱས་པ་དང་འདྲ་བར་དོན་མ་ངེས་པའང་ཡོད། ལུང་ཁ་ཅིག་དེ་དག་དང་མི་འདྲ་བར་དོན་སྤྱི་ངེས་པ་ཙམ་དུ་འགྲོ་བའང་ཡོད་པ་ཡིན་ནོ། །དེས་ན་བཤད་པ་དང་ལུང་གཉིས་གཅིག་རྒྱུན་གཅིག་གིས་འཛིན་པར་ནུས་སམ་སྙམ་མོ། །ཁྲིད་ཀྱང་གཞུང་ལུགས་ཆེན་མོ་རྣམས་གདམས་ངག་ཏུ་ཤར་བ་དགོས་སོ་ཞེས་མཁས་པའི་གསུང་ལས་བྱུང་བ་ལྟར་ན་བཤད་པ་དང་དོན་གཅིག་ཏུ་འགྲོ་མོད་ཀྱང་། སྔགས་ལ་ཚོགས་དང་སློབ་མ་ལ་བཤད་པའི་ཚུལ་ཐ་དད་དུ་ཡོད་པས་དེ་གཉིས་ལ་ཁྱད་པར་ཡོད་ཅིང་གཅིག་གིས་གཅིག་དོད་མི་ཐུབ་པའི་སྐབས་ཀྱང་ཡོད་སྲིད་དམ་སྙམ་མོ། །དེ་ལྟ་བུའི་དབང་ཁྲིད་ལུང་སོགས་གང་ཡིན་ཀྱང་འཆད་པ་པོ་རྡོ་རྗེ་སློབ་དཔོན་གྱི་མཚན་ཉིད་ནི། མདོ་སྡེའི་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པར་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཅེས་ཐེག་པ་ཆེན་པོ་སྤྱིར་སྟོན་པའི་སློབ་དཔོན་དང་། བྱེ་བྲག་ཏུ་སྔགས་ཀྱི་སློབ་དཔོན་ནི། རྒྱུད་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་དང་བརྒྱད་འཆང་བ། །ཞེས་རང་བཞིན་བརྒྱད་ལྡན་དུ་བཤད་པ་རྣམས་དང་ལྡན་པ་ཞིག་དགོས་སོ། །ཉན་པ་པོ་སློབ་མའི་མཚན་ཉིད་ཀྱང་དད་པ་བརྩོན་འགྲུས་ཤེས་རབ་སྙིང་རྗེ་སོགས་གཞུང་ནས་བཤད་པའི་ཡོན་ཏན་རྣམས་དང་ལྡན་པ་གལ་ཆེ། དེ་ནས་སློབ་མས་ཇི་ལྟར་ཉན་པའི་ཚུལ་ལ་ཐུན་མོང་གི་ཀུན་སློང་མི་དགེ་བ་དང་འདྲེས་མའི་བསམ་པ་རྣམས་དང་། སྣོད་ཀྱི་སྐྱོན་གསུམ་དྲི་མ་དྲུག་བཅས་སྤངས་ཤིང་། འདུ་ཤེས་བཞི་དང་ཕ་རོལ་ཏུ་ཕྱིན་པ་དྲུག་ཚང་བའི་བསམ་སྦྱོར་རྣམ་པར་དག་པའི་ངང་ནས་ཉན། ཐུན་མོང་མ་ཡིན་པ་སྟོན་འཁོར་གནས་དུས་རྣམས་ལ་ཐ་མལ་གྱི་སྣང་ཞེན་སྤངས་ནས་ཕུན་སུམ་ཚོགས་པ་ལྔའི་རང་བཞིན་གསལ་གདབ་སྟེ་གསན་པ་དང་། མདོར་ན་སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་ལ་བསྔོ་བ་སྟེ་དམ་པ་གསུམ་གྱིས་ཟིན་པའི་སྒོ་ནས་འཆད་ཉན་གྱི་བྱ་བ་ཐམས་ཅད་ཐོག་མ་བར་དང་ཐ་མར་དགེ་བའི་ཚུལ་གྱིས་མཐར་ཕྱིན་པར་བྱའོ། །དེ་ལྟར་འཆད་ཉན་ཚུལ་བཞིན་བགྱིས་པའི་ཕན་ཡོན་ནི་བསམ་གྱིས་མི་ཁྱབ་སྟེ། ཐོས་པས་ལས་ངན་གྱི་སྒྲིབ་པ་མཛད། བསམ་པས་ཤེས་རབ་ཀྱི་གཏེར་ཆེན་རྡོལ། བསྒོམས་པས་ཐར་ལམ་གྱི་བཙན་ས་ཟིན། སྐྱེ་བ་ཀུན་ཏུ་དམ་པའི་ཆོས་ཀྱི་སྣང་བ་དང་མི་འབྲལ། གནས་སྐབས་སུ་ཡང་དཀར་ཕྱོགས་ཀྱི་ལྷས་བསྲུང་། ནད་གདོན་དང་བར་ཆད་ཞི། བསམ་དགུ་ཡིད་བཞིན་དུ་འགྲུབ། མཐར་ཐུག་ཆོས་ཀྱི་རྒྱལ་པོའི་གོ་འཕང་མངོན་དུ་བྱས་ནས་ཆོས་ཀྱི་རྔ་ཆེན་འཇིག་རྟེན་ཀུན་ཏུ་བསྒྲག་པར་འགྱུར་ཏེ། ཀུན་མཁྱེན་བླ་མས། ཆོས་རྔ་སྒྲོག་པའི་སྒྲ་ཐོས་སེམས་ཅན་ཡང་། །ངན་སོང་རྣམ་གྲོལ་ཉན་རྣམས་སྨྲོས་ཅི་དགོས། །ཞེས་སོགས་གསུངས་པའི་ཚུལ་ལ་བསམ་ནས་སྤྲོ་དགའ་མཆོག་ཏུ་བསྐྱེད་དེ་ཉན་པར་ཞུ། །ཞེས་སོགས་མཚམས་སྦྱར་བར་བྱའོ། །རབ་དཀར་ལྷག་བསམ་གངས་ཀྱི་རི་བོ་ལས། །བབས་པའི་ལེགས་བཤད་ཕན་བདེའི་རླབས་ཕྲེང་ཅན། །ལྷུང་ལྷུང་དཔྱོད་ལྡན་རྣ་བའི་དགའ་སྟོན་དུ། །སྙན་སྙན་སྒྲོག་འདིས་ཡིད་དབང་སིམ་གྱུར་ཅིག །གང་ཟིན་ཚིག་འདིས་མཁས་རྣམས་ཅི་མགུ་ཡང་། །དམ་པའི་སྐྱེས་བུའི་ཐུགས་ཀྱི་བཞེད་དོན་བཞིན། །བྲིས་པས་དམ་པའི་ཐུགས་དགོངས་ཡོངས་རྫོགས་ཤིང་། །སྐྱེ་བར་ཆོས་ཀྱི་དགའ་བས་དགའ་བར་ཤོག། ཅེས་པ་འདི་ཡང་སྤྲང་བཙུན་པདྨ་བཛྲ་པས་སྨྲས་པ་དགེའོ།། བཀྲ་ཤིས།།
གསང་སྔགས་བླ་ན་མེད་པའི་ཏནྟྲའི་དོན་གྱི་རྣམ་དབྱེ་གསལ་བྱེད།
༄༅།།གསང་སྔགས་བླ་ན་མེད་པའི་ཏནྟྲའི་དོན་གྱི་རྣམ་དབྱེ་གསལ་བྱེད་བཞུགས་སོ།། ཨོ་རྒྱན་རྡོ་རྗེ་འཆང་ལ་ཕྱག་འཚལ་ལོ། །གསང་སྔགས་བླ་ན་མེད་པའི་ཏནྟྲའི་དོན་གྱི་གོ་བ་འདི་ལྟར་ཤེས་པར་བྱ་སྟེ། སྤྱིར་རྒྱུའི་ཐེག་པ་ལས་འབྲས་བུའི་ཐེག་པ་ནི་ཐབས་མང་བ་དང་མྱུར་བ་དང་ཤེས་རབ་ཟབ་པ་དག་གིས་ཕྱེ་ལ། ཁྱད་པར་སྔགས་ཕྱི་པ་ལས་ནང་པ་ནི་ལྟ་བ་དང་ཏིང་ངེ་འཛིན་དང་སྤྱོད་པས་ཕྱེ་བར་ཤེས་དགོས། སྔགས་ནང་པ་ལ་ཡང་ཕ་མ་གཉིས་མེད་ཀྱི་རྒྱུད་གསུམ་དུ་དབྱེ་བའང་། གཙོ་བོར་རྫོགས་རིམ་གྱི་ཁྱད་པར་ལས་འཇོག་ལ། དེ་ཡང་ཐབས་རང་ལུས་ལ་བརྟེན་པ་དང་། ཤེས་རབ་གཞན་ལུས་ལ་བརྟེན་པ་དང་། ཐབས་ཤེས་གཉིས་མེད་ཀྱི་འབྲས་བུ་ལྷན་སྐྱེས་གཙོ་བོར་སྟོན་པའི་སྒོ་ནས་འཇོག །གཙོ་བོར་སྟོན་ལུགས་ཀྱང་། སྟོན་པས་རྒྱུད་དེ་དང་དེར་དངོས་བསྟན་རྒྱ་ཆེ་ཆུང་དང་། རྗེས་འཇུག་ལམ་པས་མོས་པ་དང་དབང་པོའི་ཁྱད་པར་གྱིས་ཉམས་ལེན་གྱི་གཞུང་ཤིང་གང་ལ་བྱེད་པ་དག་གི་སྒོ་ནས་འབྱེད་པ་ལས། དོན་ལ་གང་ཟག་གཅིག་གི་ཉམས་ལེན་དུ་གསུམ་ཁ་རྒྱུ་འབྲས་ཀྱི་ཚུལ་དུ་ཚང་དགོས་པ་ལས་གང་རུང་གཅིག་ཡ་བྲལ་བས་འགྲུབ་པ་མ་ཡིན་ནོ། །བསྐྱེད་རིམ་རྒྱས་བསྡུས་གྱི་སྒོ་ནས་ཕྱེ་བ་ནི་རགས་པ་ཙམ་ལས་ཞིབ་པར་ནི་མིན་ཏེ། ཕ་རྒྱུད་དུ་གྲགས་པ་གསང་འདུས་དང་གཤེད་སྐོར། མ་རྒྱུད་དུ་གྲགས་པ་བདེ་མཆོག ཀྱཻ་རྡོ་རྗེ། སངས་རྒྱས་མཉམ་སྦྱོར། ཡང་དག་སོགས་དང་། གཉིས་མེད་རྒྱུད་དུ་གྲགས་པ་དུས་འཁོར་དང་། འཇམ་དཔལ་སྒྱུ་དྲྭ། རྡོར་སེམས་སྒྱུ་དྲྭ་སོགས་ལ་བསྐྱེད་རིམ་ཤས་ཆེ་ཆུང་གི་ཁྱད་པར་མི་འབྱུང་བ་མངོན་སུམ་པས་གསལ་ལོ། །དེ་ལས་སྔ་འགྱུར་པའི་ཆོས་སྐད་ཐུན་མོང་མ་ཡིན་པ་བསྐྱེད་པ་མ་ཧཱ། རྫོགས་པ་ཨ་ནུ། རྫོགས་ཆེན་ཨ་ཏི་ཞེས་གསུམ་དུ་ཕྱེ་བ་ཡང་། ཕ་མ་གཉིས་མེད་ཀྱི་རྒྱུད་གསུམ་སོ་སོར་ཐད་དྲང་དུ་སྦྱར་བའང་འོལ་སྤྱི་ཙམ་ཏེ། མ་ཧཱའི་ཏནྟྲ་བཅོ་བརྒྱད་ལ་ཡང་ནང་གསེས་ཀྱི་ཕ་མ་གཉིས་མེད་ཀྱི་རྒྱུད་གསུམ་དུ་དབྱེར་ཡོད་པ་དང་། དེ་མཚུངས་ཨ་ནུ་དང་ཨ་ཏི་གཉིས་ལ་ཡང་ནང་གསེས་ཀྱི་རྣམ་འབྱེད་ཕྲ་མོ་ཡོད་པ་ཡིན་ནོ། །དེས་ན་འདིར་ནི་བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུ། རྫོགས་པ་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུ། རྫོགས་ཆེན་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ། །ཞེས་ཇི་སྐད་གསུངས་པ་བཞིན་དུ། ཕ་མ་གཉིས་མེད་ཀྱི་རྒྱུད་གསུམ་པོ་རེ་རེ་བཞིན་ཡང་བསྐྱེད་རྫོགས་རྫོགས་ཆེན་གསུམ་རེ་ཡོད་པར་ཤེས་དགོས་སོ། །སྔགས་ནང་པར་གཏོགས་པའི་ལམ་ཚང་ལ་མ་ནོར་བ་ཞིག་ཡིན་ཕྱིན། སྦྱང་གཞི་སྦྱོང་བྱེད་ཚང་བའི་བསྐྱེད་རིམ་ཞིག་དང་། གསལ་བདེ་མི་རྟོག་པའི་ཐབས་ལ་བརྟེན་པའི་རྒྱུའི་རྫོགས་རིམ་ཞིག་དང་། ཐབས་བྱུང་འབྲས་བུའི་རྫོགས་རིམ་མམ་རྫོགས་པ་ཆེན་པོ་སྟེ་ལམ་གྱི་སྐྱེལ་སོ་མཐར་ཐུག་ཞིག་དང་གསུམ་མེད་དུ་མི་རུང་བའི་ཕྱིར་རོ། །འོ་ན་ཡོ་ག་སྡེ་གསུམ་ལ་རྒྱུད་སྡེ་དང་ཐེག་པའི་རྣམ་བཞག་སོ་སོ་བ་མི་རུང་ངམ་ཞེ་ན། རྡོ་རྗེ་འཆང་གིས་དངོས་བསྟན་གྱི་ལམ་རིམ་རྒྱ་ཆེ་ཆུང་དང་། གང་ཟག་གིས་གནས་སྐབས་དེ་དང་དེའི་ལམ་བགྲོད་བྱེད་ཡིན་པས་ཀླན་ཀ་མེད་དོ། །ལམ་གཅིག་ལ་ཡོ་ག་གསུམ་ཀ་རྫོགས་དགོས་ན་རྫོགས་ཆེན་གྱི་རྒྱུད་ལས་མ་ཧཱ་དང་ཨ་ནུ་གོལ་སར་བསྟན་པ་དེ་གང་སྙམ་ན་སྐབས་དེ་དང་དེའི་ལྟ་བསྒོམ་ལ་མཆོག་འཛིན་ཆེ་ན་མཐར་ཐུག་གི་ལམ་ལ་ཁ་འགྱང་བ་དང་། བྱ་རྩོལ་དང་བྲལ་བའི་ལམ་ལ་སླེབས་ཟིན་པ་ལ་བྱ་རྩོལ་གྱི་ལམ་དོན་མེད་པར་སྟོན་པའི་ཆེད་ཡིན་ཏེ། དེ་འདྲ་བ་དེ་ལམ་གྱི་ཐོག་མ་ངེས་འབྱུང་དང་། གྲུབ་མཐའི་ཐོག་མ་བྱེ་སྨྲ་བ་ནས་བརྩམས་ཏེ། མཐར་ཐུག་ཐེག་མཆོག་རྒྱལ་པོ་འདི་ལ་ཐུག་གི་བར་དུ་ལམ་དང་གྲུབ་མཐའི་བྱེ་བྲག་ཐམས་ཅད་ལ་ཐད་ཀ་ཐད་ཀའི་ཁྱད་འབྱེད་རེ་ཡོད་པ་ནི་ཤེས་ཀྱང་སླ་བ་ཡིན་ནོ། །དེ་ལྟར་སྤྱིར་ཤེས་པར་བྱས་ནས་ལམ་དངོས་ལ་འཇུག་པ་ནི། གདུལ་བྱའི་གང་ཟག་རང་རང་གི་ཁམས་དབང་མོས་པའི་བྱེ་བྲག་ལས་ཕ་མ་གཉིས་མེད་ཀྱི་རྒྱུད་སྡེ་གསུམ་པོ་གང་རུང་ཞིག་ལ་ཞུགས་ཏེ་བསྐྱེད་རྫོགས་རྫོགས་ཆེན་གསུམ་གྱི་ལམ་གནད་ཚང་ལ་མ་འཁྲུལ་བར་ཉམས་སུ་ལེན་ཤེས་དགོས་སོ། །དེ་ཡང་དེ་གསུམ་ཉམས་སུ་ལེན་ཚུལ་ལ་མཐའ་གཅིག་ཏུ་འདྲ་བ་མ་ཡིན་ཏེ། གང་ཟག་ལ་དབང་པོ་རྣོ་རྟུལ་གྱི་ཁྱད་པར་དང་། རྣོན་པོ་ལ་ཡང་རྒྱུ་དང་སྦྱངས་པའི་རྣོན་པོ། རྟུལ་པོ་ལ་ཡང་རང་བཞིན་དང་ལས་ཀྱིས་སྒྲིབ་པའི་རྟུལ་པོ་སོགས་གདུལ་བྱའི་ཁམས་དབང་ནི་རྒྱལ་བའི་ཡེ་ཤེས་ཀྱི་ཡུལ་ལྟར་རྒྱ་ཆེ་ལ། དེའི་ཕྱིར་སློབ་མའི་རྒྱུད་ལ་རྟོགས་པ་སྐྱེ་ངེས་ཀྱི་གདམས་ངག་འདེབས་པ་ལ་འཕགས་ལམ་དང་མངོན་ཤེས་ཐོབ་པའི་སློབ་དཔོན་དགོས་པར་གཞུང་མན་ངག་ཐམས་ཅད་ནས་ནན་ཆེར་གསུང་བ་ཡང་གནད་འདི་ཀས་ཡིན་ནོ། །དེ་ལྟར་གདུལ་བྱའི་ཁྱད་པར་གྱི་ལམ་བགྲོད་ཚུལ་ཀྱང་མཐའ་ཡས་པ་ཞིག་ཡོད་དེ། མཐར་གྱིས་འཇུག་པ་དང་ཐོད་རྒལ་པ་གཉིས། མཐར་གྱིས་པ་ལ་མྱུར་བུལ་གྱི་སྒོ་ནས་རིམ་གྱིས་པ་དང་། གཅིག་ཆར་པ་གཉིས། ཐོད་རྒལ་པ་ལ་བློ་སྟོབས་ཆེ་ཆུང་གིས་ཐོད་རྒལ་ཆུང་འབྲིང་ཆེན་པོའི་རྣམ་བཞག་དང་། སློབ་ཚུལ་གྱི་སྒོ་ནས་མོས་སློབ་དང་སྨིན་སློབ་གཉིས། ས་མཚམས་གྱི་སྒོ་ནས་ཟག་བཅས་དང་ཟག་མེད་གཉིས་སོགས་ལམ་གྱི་དབྱེ་བ་ནི་མང་ཞིག་ཡོད་ལ། དེ་ཐམས་ཅད་ལམ་གྱི་ངོ་བོའི་སྒོ་ནས་ཐབས་ཀྱི་ལམ་དང་། ཤེས་རབ་ཀྱི་ལམ་གཉིས་སུ་འདུས་པ་ཡིན་ནོ། །དེ་གཉིས་ཀྱི་སོ་སྐྱེའི་ལམ་དུ་གཙོ་བོར་འདོན་ལུགས་ཀྱི་སྒོ་ནས་བཞག་པ་མ་གཏོགས་གང་རུང་ཡ་བྲལ་བའི་ལམ་གྱིས་ནི་མཆོག་འགྲུབ་པ་མེད་དོ། །ཐབས་གྲོལ་ལམ་གྱི་ཐབས་ཅེས་པ་ནི། སྤྱིར་ཐབས་ཀྱི་ཕྱོགས་སུ་གཏོགས་པའི་ཆ་མང་ཡང་དངོས་ནི་དབང་གསུམ་པའི་ལམ་ཡིན་ནོ། །ཤེས་རབ་ཅེས་པ་ལ་ཕྱོགས་མང་ཡང་དངོས་ནི་ཐོས་བསམ་སྒོམ་པའི་ཤེས་རབ་གསུམ་ཡིན་ནོ། །དེས་ན་ཐབས་ལམ་ལ་ཤེས་རབ་ཀྱིས་མ་ཟིན་ན་འདོད་ཆགས་ཆོས་སུ་སྨྲ་བ་དབང་ཕྱུག་གི་ལམ་དང་ཁྱད་མེད་པ་དང་། ཤེས་རབ་ཐབས་ལམ་གྱིས་མ་ཟིན་ན་རྒྱུའི་ཐེག་ཆེན་དང་མཚུངས་པ་ལས་གསང་ཆེན་ཐབས་ཀྱིས་ཆེ་བའི་ལམ་དུ་མི་འགྲུབ་བོ། །ཞེས་རྒྱུད་ལས་བཤད་པ་ལྟར་རོ། །ཐབས་ལམ་ལ་དབང་བཞི་ཆར་འཇོག་དགོས་པ་མིན་ནམ། ཅིའི་ཕྱིར་གསུམ་པ་ཁོ་ན་སྨྲོས་ཅེ་ན་བདེན་མོད་དེ། འདིར་གཙོ་བོ་ངོས་བཟུང་བ་ཡིན་གྱི་དེའི་རྒྱུར་བུམ་གསང་དང་འབྲས་བུར་བཞི་པ་འོང་བས་དེར་བསྡུས་པའོ། །དེ་བཞིན་དུ་གྲོལ་ལམ་གྱི་གཙོ་བོ་ཡང་། དངོས་སྒོམ་བྱུང་གི་ཤེས་རབ་མངོན་སུམ་རང་གསལ་བློའི་ཡུལ་དང་བྲལ་བ་ཡིན་ཀྱང་དེའི་རྒྱུར་ཐོས་བསམ་གྱི་ཤེས་རབ་དང་གྲོགས་ཏིང་ངེ་འཛིན་དག་བསྡུས་པ་ཡིན་ནོ། །དེ་ལྟར་ན་ཐབས་ལམ་ནི་ལམ་གྱི་རྒྱུའམ་རྐྱེན་དང་གྲོལ་ལམ་ནི་འབྲས་བུར་འོང་བ་ཡིན་ནོ། །ཐབས་ལམ་དང་གྲོལ་ལམ་གཉིས་འཕགས་ལམ་འཐོབ་པ་ལ་གང་མྱུར་ཞེ་ན་རྣམ་པར་ཕྱེ་ནས་ལན་གདབས་པར་བྱ་བ་སྟེ། གྲོལ་ལམ་གཅིག་ཆར་ལ་ནི་ཐབས་ལམ་གཅིག་ཆར་བ་ལས་ཀྱང་མྱུར་ལ། གྲོལ་ལམ་རིམ་གྱིས་པ་ནི་ཐབས་ལམ་རིམ་གྱིས་པ་ལས་ཀྱང་བུལ་བ་ཡིན་ཏེ། ཀཽསྟུ་བྷ་དང་། མཀྵྀ་ཀའི་དཔེ་བཞིན་ནོ། །ད་མདོ་ཧྲིལ་གྱིས་དྲིལ་ན་སྔགས་བླ་མེད་ཀྱི་ལམ་ཐམས་ཅད་བསྐྱེད་རྫོགས་རྫོགས་ཆེན་གསུམ་དུ་འདུ། གསུམ་ཀ་དབང་བཞི་ཡོངས་རྫོགས་གཅིག་གི་ལམ་དུ་འདུ། དེ་ཡང་ཐབས་གྲོལ་གྱི་ལམ་གཉིས་སུ་འདུ། འཕགས་ལམ་ལ་ལམ་གྱི་རྣམ་བཞག་ཐ་དད་པ་མེད། དབང་གསུམ་པའི་ལམ་མ་བརྟེན་པར་སྔགས་བླ་མེད་ཀྱི་མཐོང་ལམ་དང་མཐར་ཐུག་གི་འབྲས་བུ་ལ་སྦྱོར་མི་སྲིད། དབང་གསུམ་པའི་ལམ་ཡིན་ན་ཤེས་རབ་མར་བརྟེན་དགོས་པས་ཁྱབ་ཀྱང་། ཤེས་རབ་མ་ཡིན་ན་ལས་ཀྱི་ཕྱག་རྒྱ་ཡིན་དགོས་པས་མ་ཁྱབ། རྒྱུ་མཚན་དེའི་ཕྱིར་ན་གྲོལ་ལམ་པ་དང་། བྱེ་བྲག་རྫོགས་ཆེན་པ་རིག་པ་རང་སྣང་གི་བློ་ཅན་རྣམས་ལ་དབང་བཞིའི་ལམ་ཡོངས་རྫོགས་ཡོད་ཀྱང་དེས་ཐབས་ལམ་པ་ཡིན་པར་མི་འགྱུར། སྤྱིར་སྔགས་ལམ་ལ་ཐབས་ཀྱི་ཐེག་པ་ཅེས་པའི་ཐབས་དང་། བྱེ་བྲག་ཐབས་གྲོལ་ལམ་གྱི་ཐབས་གཉིས་ལ་སྤྱིར་བཏང་དང་དམིགས་བསལ་ལམ་ཐུན་མོང་དང་ཐུན་མིན་གྱི་ཁྱད་པར་ཡོད་པ་ཤེས་དགོས། དེས་ན་རྒྱུད་ཀྱི་རྒྱལ་པོ་དཔལ་ལྡན་གསང་བའི་སྙིང་པོ་ལྟ་བུ་ནི་སྤྱི་རྒྱུད་ཡིན་པས་ན་ཕ་མ་གཉིས་མེད་ཀྱི་རྒྱུད་གང་ལྟར་བཤད་ཀྱང་ཆོག་པ་དང་། བསྐྱེད་རྫོགས་རྫོགས་ཆེན་གསུམ་གང་ལྟར་བཀྲལ་ཀྱང་འགལ་བ་མེད་ལ་དེ་ལྟར་ཡིན་པ་ཡང་ངེས་པའི་དོན་དང་སྒྲ་ཇི་བཞིན་པ་ཡིན་ནོ། །ཐབས་ལམ་དང་གྲོལ་ལམ་གྱི་ཁྱད་པར་ཡང་རྩ་རྒྱུད་ནི་གང་གི་ཕྱོགས་སུ་ཡང་མ་ལྷུང་ཞིང་བཤད་རྒྱུད་སྡེ་བཞི་སོ་སོའི་དགོངས་པས་ཐབས་གྲོལ་སོ་སོར་འཆད་ནུས་པ་ཉིད་དོ། །སྤྱིར་རྒྱུད་དོན་ལ་གཞི་ལམ་འབྲས་བུའི་རྒྱུད་གསུམ་ལས། གཞི་རྒྱུད་ནི་ཤེས་བྱ། ལམ་རྒྱུད་ནི་ཉམས་སུ་ལེན་བྱ། འབྲས་རྒྱུད་ནི་ཐོབ་བྱ་ཡིན་ལ། དེའི་ནང་ནས་ཀྱང་གཞི་ཤེས་བྱེད་དང་འབྲས་བུ་ཐོབ་བྱེད། ཉམས་ལེན་གྱི་ངོ་བོ་དངོས་ནི་ལམ་རྒྱུད་ཡིན་པས་དེའི་རང་བཞིན་ཤེས་པ་གལ་ཆེ། དེ་ཡང་ལྟ་སྤྱོད་དཀྱིལ་འཁོར་སོགས་རྒྱུད་ཀྱི་དངོས་པོ་བཅུ་འཁོར་དང་བཅས་པ་ཡིན་ཀྱང་དེའི་ནང་ནས་ཀྱང་གཙོ་ཆེ་ཤོས་ལྟ་བ་དང་ཏིང་འཛིན་གཉིས་ཡིན། ལྟ་བ་ནི་ལྷག་པའི་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བ་དེ་ཡིན་ཀྱང་། དེ་འཕགས་པའི་ཡེ་ཤེས་མངོན་སུམ་པའི་ཡུལ་ཡིན་ཕྱིར་སོ་སྐྱེས་བློའི་ཇི་བཞིན་པར་གཏན་ལ་འབེབས་མི་ནུས། དེས་ན་འཁོར་བ་དང་མྱང་འདས་སུ་བཏགས་པའི་ཞེན་སྣང་འདི་ཉིད་ལམ་ཐུན་མིན་གྱི་གཏན་ཚིག་རྣམས་ཀྱིས་གཞལ་བས་རྗེས་དཔག་གི་ཚད་མས་གཞི་རྒྱུད་ཀྱི་དོན་སྤྱི་ཙམ་ངེས་པ་དེ་ལྟ་བར་བཞག་ནས་ཏིང་ངེ་འཛིན་སྒོམ་དགོས། ཏིང་ངེ་འཛིན་དེ་ནི་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་བསྐྱེད་པའི་རིམ་པ་དེ་ཡང་། རྣལ་འབྱོར་ལྔའི་ཆིང་གིས་བཅིང་བ་དང་། བསྙེན་བསྒྲུབ་ཡན་ལག་བཞིའི་ཆིང་གིས་བཅིང་བ་གང་ལྟར་ཡང་འདྲའོ། །བསྐྱེད་རིམ་གྱི་ཆོ་ག་ནི་རྩ་རྒྱུད་ལས་ཡི་གེ་འཁོར་ལོའི་སྤྲིན་ལས་སྒྱུ་འཕྲུལ་དྲྭ་བའི་ཏིང་ངེ་འཛིན་དུ་སྒྲུབ་པ་ཙམ་ལས་མི་གསལ་ཡང་། བཤད་རྒྱུད་དང་སྒྲུབ་ཐབས་སོགས་ཀྱི་དགོངས་པས། བདག་སྲས་གཞན་སྲས་ཀྱི་ཆོ་ག་དང་། མངོན་བྱང་ལྔ་བསྐྱེད། རྡོ་རྗེའི་ཆོ་ག་གསུམ་བསྐྱེད་སོགས་གང་ལྟར་བྱས་ཀྱང་འགལ་བ་མེད་པའོ། །རྫོགས་རིམ་ན་གྲོལ་ལམ་བསྐྱེད་རིམ་ལྟར་རྣལ་འབྱོར་ལྔའི་ཆིང་གིས་བཅིང་བ་དང་། ཐབས་ལམ་སྟེང་འོག་གི་སྒོ་ཐུན་མོང་བ་ལྟར་དགའ་བཞིའི་ཆིངས་སུ་བཅིང་བ་དང་། ཐུན་མོང་མ་ཡིན་པ་འཁོར་ལོ་བཞིར་མན་ངག་བཞིའི་རྫོགས་རིམ་སྒོམ་ཚུལ་བཱི་མ་ལའི་གསང་ཐིག་ནས་འབྱུང་བ་ལྟར་བསྒོམ་པའི་རིམ་པ་རྣམས་སོ། །གྲོལ་ལམ་རྣལ་འབྱོར་ལྔའི་ཆིང་གིས་བཅིང་བ་ཟུར་པའི་བཤད་སྲོལ་ལས་བྱུང་བ་ནི་ལམ་གྱི་ངོ་བོ་རིམ་ལྔ་དང་ཕྱོགས་མཚུངས་ལ། རོང་ཟོམ་ཆེན་པོའི་དཀོན་མཆོག་འགྲེལ་དུ་གསུངས་པ་ནི་རྫོགས་ཆེན་ཁྲེག་ཆོད་ཀྱི་གདམས་པ་དང་ཕྱོགས་མཚུངས་པའོ། །བསྐྱེད་རིམ་ནས་རྫོགས་རིམ་ལ་འཇུག་ཚུལ་ནི། གྲོལ་ལམ་གཅིག་ཆར་བ་བསྐྱེད་རྫོགས་ཆིག་ཆོད་དུ་སོང་ནས་ལམ་དངོས་འཕགས་ལམ་ཟུང་འཇུག་གི་ངོ་བོར་གྱུར་པའོ། །གྲོལ་ལམ་རིམ་གྱིས་པ་དང་། ཐབས་ལམ་པ་རྣམས་ནི་བསྐྱེད་རྫོགས་རིམ་ཅན་དུ་སྦྱང་དགོས་ལ། དེ་ཡང་བསྐྱེད་རིམ་ཕྱག་རྒྱ་སྤྲོས་བཅས་རྫོགས་ནས་རྫོགས་རིམ་གསང་དབང་གི་ལམ་ནས་རིམ་བཞིན་འཇུག་པ་དང་། ཕྱག་རྒྱ་གཅིག་སྤྲོས་ཀྱི་རྟེན་ལ་གསང་དབང་གི་ལམ་སྦྱང་ནས་སྒྱུ་ལུས་དང་འོད་གསལ་མངོན་དུ་བྱས་ཏེ་ཚོགས་སྒྲུབ་ཤེར་དབང་ལམ་གྱི་ཉེ་རྒྱུས་རླུང་སེམས་ལས་གྲུབ་པའི་སྒྱུ་ལུས་ཀྱི་ལྷ་སྐུ་དོན་གྱི་འོད་གསལ་དུ་བསྡུས་ནས་ཟུང་འཇུག་གི་ལྷ་སྐུར་ལྡང་བ་དང་། ཉིན་མོ་སྟོང་ཆེན་རྣལ་འབྱོར་བསྒོམ་ནས་མཚན་མོ་གཉིད་ཀྱི་འོད་གསལ་དང་སྦྲེལ་ཏེ་དུ་བ་སོགས་ཀྱི་མཚན་མ་མཐོང་བ་ནས་དཔེའི་འོད་གསལ་བསྐྱེད་པ་རྫོགས་རིམ་གྱི་སྟོང་ཆེན། སྙིང་རྗེ་སྒྱུ་མའི་འཕེན་པས་ཉིན་མོ་ཕྱག་རྒྱ་གཅིག་སྤྲོས་གྱི་རྣལ་འབྱོར་བསྒོམ་པ་དང་འདྲེལ་བར་དཔེའི་འོད་གསལ་ལས་སྙིང་རྗེ་སྒྱུ་མའི་འཕེན་པས་སྒྱུ་ལུས་ཀྱི་ལྷ་སྐུ་ཕྱག་རྒྱ་གཅིག་སྤྲོས་སུ་ལྡང་བ་དེ་དང་། དེའི་རྣལ་འབྱོར་ཚུལ་དེ་ལྟར་བསྐྱེད་རྫོགས་ཟུང་འཇུག་གི་ལམ་གྱིས་སྦྱོར་ལམ་ཆོས་མཆོག་གི་བར་བགྲོད་ནས་རྟེན་དེ་ལ་ཚོགས་སྒྲུབ་གྱི་ཉེ་རྒྱུས་འཕགས་ལམ་ལ་སྦྱོར་བར་བཤད་པ་སོགས་བཤད་སྲོལ་དུ་མ་ཡོད། གང་ལྟར་རུང་ཕྱག་རྒྱ་གཅིག་སྤྲོས་ཀྱིས་བསྡུས་པའི་བསྐྱེད་རིམ་ལྷའི་རྣལ་འབྱོར་ལ་ངེས་པ་ཅི་རིགས་རྙེད་པའི་ཚེ་དེ་དག་དང་སྦྲེལ་ནས་གསང་དབང་གི་ལམ་རླུང་གི་རྣལ་འབྱོར་དང་ཤེར་དབང་གི་ལམ་གདམས་ངག་སྟེང་སྒོ་དང་འོག་སྒོ་ཡེ་ཤེས་ཀྱི་ཕྱག་རྒྱ་ལ་རྩལ་སྦྱང་བ་སོགས་བྱས་པས་སྟོང་བཞི་དང་། དགའ་བཞི་ཐབས་ཀྱི་ཁྱད་པར་ཙམ་ལས་ལམ་གྱི་མངོན་རྟོགས་སྦྱོར་ལམ་བཞི་དང་དོན་གཅིག་པ་སྐྱེ། དེ་ནས་ལས་རྒྱ་དངོས་ལ་བརྟེན་ནས་མཐོང་ལམ་ལ་སྦྱོར་བ་ལ་སྤྲོས་བཅས་སྤྲོས་མེད་ཀྱི་སྤྱོད་པ་དུས་ཚོད་དང་འདྲེལ་བར་བསྐྱངས་པས་ཆོག་གམ་སྙམ། ཤེར་དབང་གི་ལམ་རྟེན་ཁྱིམ་པ་དང་རབ་བྱུང་གང་ཡིན་ཀྱང་ཐབས་ཀྱིས་མ་ཟིན་ན་འཆིང་བ་མཉམ་ལ། ཟིན་ན་ཐབས་ཀྱི་ལམ་དུ་མཉམ་པས་གཞུང་ཇི་ལྟར་བ་བཞིན་བསྙེགས་ན་འགལ་བ་མེད་དམ་སྙམ། བཅས་རང་གི་ཁ་ན་མ་ཐོ་བ་འབྲས་བུ་དང་བཅས་པ་ཐོབ་མིན་གྱི་ཁྱད་པར་འདུ་ཤེས་གསུམ་སྒྲ་ཇི་བཞིན་པ་ལམ་དུ་སློང་མིན་དང་ཆགས་རྟོག་གི་ངོ་བོ་བདེ་སྟོང་དུ་གྲོལ་མིན་གྱིས་ཕྱེ་བ་དོན་གནས་དང་། འཕགས་ལམ་དངོས་དང་དེ་དང་བར་ཆད་མེད་པའི་ལམ་ལ་སྦྱར་ནས་བཟོད་ཐོབ་ངན་སོང་ལྟུང་མིན་སོགས་དང་བཤད་སྦྱར་མཛད་པ་ནི་གསང་སྔགས་ཐབས་ཀྱི་ཆེ་བ་དང་མ་སྦྱར་ཞིང་རྒྱུ་འབྲས་དང་ས་ལམ་གྱི་རྣམ་བཞག་སྤྱིར་བཏང་བ་དང་བསྟུན་པས་ཇོ་བོའི་བྱང་ཆུབ་ལམ་སྒྲོན་དང་ཧ་ལམ་དགོངས་པ་མཐུན་ནམ་སྙམ། སྤྱིར་ས་ལམ་འབྲས་བུའི་རྣམ་བཞག་ཐམས་ཅད་ཤེས་དགོས་ཀྱང་། ཁྱད་པར་ལས་དང་པོ་པས་ཚོགས་སྦྱོར་དང་། མཐོང་ལམ་ལ་སྦྱོར་ཚུལ་ཚུན་ཆད་འདི་ཞིབ་པར་ཤེས་པ་གལ་ཆེ། སྤྱིར་གྱིས་སྔགས་ལམ་དང་ཁྱད་པར་རྫོགས་ཆེན་ལམ་གྱི་མྱུར་ཁྱད་དང་ཐབས་ཀྱི་ཆེ་བ་ཐམས་ཅད་མཐོང་ལམ་ཚུན་ཆད་དུ་འདོན་ཤེས་དགོས་ཀྱི། དེ་ཕན་ཆད་ནི་ཐེག་ཆེན་ཡིན་ཕྱིན་ཁྱད་པར་ཅུང་ཟད་ཙམ་ཡང་ཡོད་ཅེས་མི་སྨྲའོ།། རྒྱལ་བའི་དགོངས་གསང་རྒྱལ་སྲས་མཆོག་གི་ཡུལ། །རྒྱལ་བའི་ལམ་བཟང་རྡོ་རྗེའི་ཐེག་པ་ལ། །ཉམ་ཆུང་བློ་ཡིས་དཔྱད་བཟོད་ལྟ་ཅི་ཞིག །དོགས་པ་གཅོད་འདོད་བྲིས་ལ་ཉེས་པ་མེད། །ཅེས་པའང་པདྨ་བཛྲ་དུ་འབོད་པས་བྲིས་པ་དགེའོ།། བཀྲ་ཤིས།།
འཁོར་ལོ་གསུམ་དང་རིག་འཛིན་སྔགས་ཀྱི་སྡེ་སྣོད་བཅས་པའི་དོན་བསྡུས།
༄༅།།འཁོར་ལོ་གསུམ་དང་རིག་འཛིན་སྔགས་ཀྱི་སྡེ་སྣོད་བཅས་པའི་དོན་བསྡུས་བཞུགས་སོ།། སངས་རྒྱས་ལ་ཕྱག་འཚལ་ལོ། །འོ་ལགས། བདག་ཅག་གི་སྟོན་པས་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བ་ནི། བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ། གཉིས་པ་མཚན་ཉིད་མེད་པའི་ཆོས་ཀྱི་འཁོར་ལོ། ཐ་མ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོ་གསུམ་ཡིན་ཏེ། དེ་ལ་དང་པོ་བདེན་པ་བཞི་ནི། གང་ཟག་ལས་དང་པོ་བ་འཁོར་བ་སྤངས་ནས། ཐར་པ་ཐོབ་པར་འདོད་པ་རྣམས་ཀྱི་དོན་དུ་གསུང་བ་སྟེ། འཁོར་བའི་མཚན་ཉིད་དང་། དེའི་རྒྱུ་དང་། ཐར་བའི་མཚན་ཉིད་དང་། དེ་འཐོབ་པའི་ཐབས་དང་བཞིའི་དབང་དུ་བྱས་ནས། བཅོམ་ལྡན་འདས་ཀྱིས་འདི་ནི་སྡུག་བསྔལ་གྱི་བདེན་པའོ། །སྡུག་བསྔལ་གྱི་བདེན་པ་ནི་ཤེས་པར་བྱའོ། །འདི་ནི་ཀུན་འབྱུང་གི་བདེན་པའོ། །ཀུན་འབྱུང་གི་བདེན་པ་ནི་སྤང་བར་བྱའོ། །འདི་ནི་འགོག་པའི་བདེན་པའོ། །འགོག་པའི་བདེན་པ་ནི་འཐོབ་པར་བྱའོ། །འདི་ནི་ལམ་གྱི་བདེན་པའོ། །ལམ་གྱི་བདེན་པ་ནི་རྒྱུད་ལ་བསྟེན་པར་བྱའོ། །གསུངས་པས། སྡུག་བསྔལ་གྱི་བདེན་པ་ཞེས་བྱ་བ་ནི། འཁོར་བའི་སྣོད་བཅུད་གཉིས་ཡིན། དེ་ལ་དབྱེ་ན་ཁམས་གསུམ་དང་། འགྲོ་བ་རིགས་དྲུག་ཡོད་དེ། དེ་ཐམས་ཅད་ཕུང་པོ་ལྔར་མ་འདུས་པ་མེད་དོ། །དེ་ཇི་ལྟར་ཤེས་པར་བྱ་ན། འཁོར་བ་སྡུག་བསྔལ་གྱི་མཚན་ཉིད་ནི་བཞི་པོ་འདི་ཡིན་ཏེ། སྡུག་བསྔལ་བ་དང་། མི་རྟག་པ་དང་། སྟོང་པ་དང་། བདག་མེད་པའོ། །དེ་ལ་སྡུག་བསྔལ་བ་ནི། འཁོར་བ་སྤྱིའི་སྡུག་བསྔལ་ལ་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་གསུམ་ཡིན། བྱེ་བྲག་འགྲོ་བ་རིགས་དྲུག་སོ་སོའི་སྡུག་བསྔལ་རྣམས་སོ། །མི་རྟག་པ་ནི། རགས་པ་འགྲོ་བའི་སྐྱེ་འཆི། སྣོད་ཀྱི་ཆགས་འཇིག །དུས་ཀྱི་འགྱུར་ལྡོག་ལ་སོགས་པ་དང་། ཕྲ་བ་འདུས་བྱས་ཐམས་ཅད་སྐད་ཅིག་སྐད་ཅིག་གིས་འགྱུར་ཞིང་མི་སྡོད་པ་ཡིན་ནོ། །སྟོང་པ་ནི། ཕུང་པོ་ལྔ་པོ་འདིའི་ཕྱི་ནང་བར་གསུམ་གང་དུ་བཙལ་ཀྱང་ངའམ་བདག་ཅེས་པ་དེ་མེད་པས་སྟོང་པ་ཞེས་བྱ་སྟེ། དཔེར་ན་ཁང་པའི་ནང་ན་མི་མེད་པས་སྟོང་པ་ལྟ་བུའོ། །བདག་མེད་པ་ནི། ཕུང་པོ་ལྔ་ལ་བདག་གི་མཚན་ཉིད། རྟག་པ་གཅིག་པུ། རང་དབང་ཅན་གསུམ་མེད་པས་བདག་མེད་པ་ཞེས་བྱ་སྟེ། དཔེར་ན་ཁང་པ་ལ་མིའི་མཚན་ཉིད་མེད་པས། ཁང་པ་མི་མ་ཡིན་པ་བཞིན་ནོ། །དེ་ལྟར་སྡུག་བདེན་གྱི་མཚན་ཉིད་ཤེས་པའི་དགོས་པ་ནི། །འཁོར་བ་ལ་སྐྱོ་ནས་དེ་ལས་ཐར་འདོད་ཀྱི་བློ་སྐྱེ་བ་དང་། བདག་མེད་པ་ལ་བདག་ཏུ་འཛིན་པའི་བློ་འདི་འཁྲུལ་བ་ཡིན་པར་ཤེས་པའི་དགོས་པ་ཡོད་དོ། །སྡུག་བསྔལ་གྱི་བདེན་པ་ཤེས་ནས་དེ་མི་འདོད་པའི་ཚེ་ན། དེའི་རྒྱུ་ཀུན་འབྱུང་གི་བདེན་པ་ཡིན་པར་ཤེས་ནས་དེ་སྤང་དགོས་པ་ནི། དཔེར་ན། ལུས་ཀྱི་ཚ་ན་སྡུག་བསྔལ་དུ་ཤེས་ནས་དེ་མི་འདོད་པའི་ཚེ། དེའི་རྒྱུ་ནད་གདོན་སྤངས་དགོས་པ་ལྟ་བུའོ། །དེ་ལ་ཀུན་འབྱུང་གི་བདེན་པ་ནི། ལས་དང་། ཉོན་མོངས་པ་གཉིས་སོ། །ལས་ནི་མི་དགེ་བ་བཅུ་དང་། ཐབས་ཀྱིས་མ་ཟིན་པའི་དགེ་བ་ཟག་བཅས་རྣམས་དང་། ལྷག་མཐོང་གིས་མ་ཟིན་པའི་ཞི་གནས་རྐྱང་པ་རྣམས་སོ། །ཉོན་མོངས་པ་ནི་ལས་དེ་རྣམས་ཀུན་ནས་སློང་བའི་རྒྱུ་སྟེ། རྩ་བ་དུག་གསུམ་དང་། དེ་ལས་བྱུང་བའི་རྩ་ཉོན་ཉེ་ཉོན་སོགས་ཉོན་མོངས་པ་ཐམས་ཅད་དོ། །ཉོན་མོངས་པ་ཐམས་ཅད་ཀྱི་རྩ་བའམ་ས་བོན་ལྟ་བུ་ནི་བདག་འཛིན་ཏེ། དེ་ལ་གང་ཟག་གི་བདག་ཏུ་འཛིན་པ་ཅེས་བྱ། ལྷན་སྐྱེས་ཀྱི་བདག་འཛིན་ཅེས་བྱ། རྟེན་འདྲེལ་བཅུ་གཉིས་ཀྱི་ཐོག་མའི་མ་རིག་པ་ཡང་དེ་ཡིན་ནོ། །དེས་ན་བདག་ཏུ་འཛིན་པ་དང་། དེ་ལས་བྱུང་བའི་ལས་ཉོན་དང་བཅས་པ་ཐམས་ཅད་ལ་ཀུན་འབྱུང་ཞེས་བྱ་སྟེ། སྡུག་བསྔལ་མཐའ་དག་གི་རྒྱུ་ཡིན་པར་ཤེས་དགོས། ཀུན་འབྱུང་གི་མཚན་ཉིད་ནི་བཞི་སྟེ། རྒྱུ་དང་། ཀུན་འབྱུང་བ་དང་། རབ་ཏུ་སྐྱེ་བ་དང་། རྐྱེན་ཞེས་བྱའོ། །དེ་རྣམས་རིམ་པ་བཞིན། དཔེར་ན། ས་བོན་གྱིས་འབྲས་བུ་བསྐྱེད་པ་བཞིན། ལས་ཉོན་གྱིས་འཁོར་བའི་སྡུག་བསྔལ་མཐའ་དག་བསྐྱེད་པས་ན་རྒྱུ་ཡིན་ནོ། །དཔེར་ན་ཞིང་ས་ལས་ལོ་ཏོག་འབྱུང་བ་བཞིན་ལས་ཉོན་ལས་སྡུག་བསྔལ་འབྱུང་བས་ཀུན་འབྱུང་བ་ཡིན་ནོ། །རྨ་ལ་ཁུ་ཚུར་བརྒྱབ་པ་བཞིན་ལས་ཉོན་དྲག་པོས་སྡུག་བསྔལ་ཆེན་པོ་འཕྲལ་ལ་བསྐྱེད་པས་ན་རབ་ཏུ་སྐྱེ་བ་ཡིན་ནོ། །ཆུ་ལུད་སོགས་ཀྱི་རྐྱེན་ལས་སྟོན་ཐོག་འགྲུབ་པ་ལྟར་ལས་ཉོན་གྱི་རྐྱེན་ལས་སྡུག་བསྔལ་འགྲུབ་པས་རྐྱེན་ཞེས་བྱའོ། །དེ་ལྟར་ཤེས་པའི་དགོས་པ་ནི། ནད་ཀྱི་རྒྱུ་དུག་དང་རིམ་སོགས་ཡིན་པར་ཤེས་ན་དེ་ལ་འཛེམས་ཤིང་སྤོང་འདོད་སྐྱེ་བ་བཞིན་ནོ། །ལས་ཉོན་བདག་འཛིན་དང་བཅས་པ་ལ་སྤོང་འདོད་ཀྱི་བློ་སྐྱེ་བ་ཡིན་ནོ། །ཀུན་འབྱུང་སྤངས་པས་འཁོར་བའི་སྡུག་བསྔལ་ལས་ཐར་ནས་འགོགས་པའི་བདེན་པ་མྱ་ངན་ལས་འདས་པ་མངོན་དུ་བྱས་ནས་ཐོབ་པར་འགྱུར་བས་ན། འགོག་བདེན་མངོན་དུ་བྱ་འདོད་ཀྱི་བསམ་པ་སྐྱེ་དགོས། དེ་ལ་འགོག་བདེན་ནི། ཀུན་འབྱུང་གི་ས་བོན་སྤངས་པས་ཕུང་པོ་ལྔ་དང་བྲལ་བའི་ཟག་མེད་ཀྱི་དབྱིངས་འདུས་མ་བྱས་པ་ཡིན་ཏེ། དེའི་མཚན་ཉིད་ནི། ཞི་བ། འགོག་པ། གྱ་ནོམ་པ། ངེས་པར་འབྱུང་བ་དང་བཞིའོ། །དེ་ལ་སྔར་ཡོད་ཀྱི་ལས་ཉོན་སྡུག་བསྔལ་ཟག་བཅས་འདུས་བྱས་ཀྱི་ཆོས་ཐམས་ཅད་ཉེ་བར་ཞི་བས་ཞི་བའོ། །གཉེན་པོས་ས་བོན་སྤངས་པས་ཕྱིས་མི་སྐྱེ་བའི་ཆོས་ཅན་དུ་འགྱུར་བས་འགོག་པ་ཞེས་བྱའོ། །ཞི་བའི་དབྱིངས་ཏེ་རྟག་ཏུ་མི་ཉམས་ཤིང་ཟག་མེད་ཀྱི་ཆོས་དང་ལྡན་པས་གྱ་ནོམ་པ་ཞེས་བྱའོ། །གྱ་ནོམ་པ་ནི་སྐྱོན་མེད་ཅིང་ཡོན་ཏན་དང་ལྡན་པ་བཟང་པོ་ཞིག་ལ་ཟེར། འགོག་པ་མངོན་དུ་ལན་གཅིག་བྱས་ནས་ཕྱིས་འཁོར་བར་ལྡོག་མི་སྲིད་པས་ངེས་པར་འབྱུང་བ་ཞེས་བྱའོ། །འགོག་པ། ཐར་པ། རྣམ་པར་གྲོལ་བ། མྱ་ངན་ལས་འདས་པ་རྣམས་དོན་ལ་གཅིག་གོ །དེ་ཤེས་པའི་དགོས་པ་ནི། དེའི་ཕན་ཡོན་ནམ་ཡོན་ཏན་མཐོང་ནས་ཐར་པ་དོན་དུ་གཉེར་བའི་བློ་སྐྱེའོ། །དེ་ལྟར་འཁོར་བ་སྡུག་བདེན་གྱི་ཉེས་དམིགས་དང་། ཐར་པ་འགོག་བདེན་གྱི་ཕན་ཡོན་ཤེས་ནས། འཁོར་འདས་ལ་བླང་དོར་བྱེད་པར་འདོད་པའི་གང་ཟག་གི་ཉམས་སུ་བླང་བར་བྱ་བ་ནི་ལམ་བདེན་ཡིན་ནོ། །དེ་ལ་ལམ་བདེན་ནི་གང་ཟག་གི་བདག་མེད་རྣམ་པར་མི་རྟོག་པའི་ཡེ་ཤེས་འཁོར་དད་བརྩོན་དྲན་པ་ཏིང་འཛིན་ཤེས་རབ་སོགས་དང་བཅས་པ་ཡིན་ནོ། །དེའི་མཚན་ཉིད་ནི། ལམ་རིགས་པ། སྒྲུབ་པ། ངེས་པར་འབྱིན་པ་བཞིའོ། །དེ་ལ་སོ་སོའི་སྐྱེ་བོའི་ས་ནས་ཐར་པ་བྱང་ཆུབ་བར་བགྲོད་པའི་ལམ་ཡིན་པས་ན་ལམ་ཞེས་བྱ། དེ་ནི་ཀུན་འབྱུང་ལས་ཉོན་གྱི་གཉེན་པོར་འོས་ཤིང་རིགས་པས་ན་རིགས་པ་ཞེས་བྱའོ། །དེས་ནི་རང་གི་སེམས་ཕྱིན་ཅི་མ་ལོག་པར་ཡང་དག་པའི་ལམ་དུ་སྒྲུབ་པས་ན་སྒྲུབ་པ་ཞེས་བྱ། ལམ་དེ་ཉམས་སུ་བླང་ན་འཁོར་བའི་འདམ་ལས་གདོན་མི་ཟ་བར་ངེས་པར་དབྱུང་བའམ་འབྱིན་པས་ན་ངེས་པར་འབྱིན་པ་ཞེས་བྱའོ། །དེ་ཇི་ལྟར་ཉམས་སུ་ལེན་པའི་ཚུལ་ནི། འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས་དེ་ལས་ཐར་འདོད་ཀྱི་ངེས་འབྱུང་གི་བསམ་པ་དྲག་པོས་ལམ་ཕྱིན་ཅི་མ་ལོག་པ་སྟོན་པའི་བླ་མ་དགེ་བའི་བཤེས་གཉེན་ཞིག་བཙལ་ནས་ཚུལ་བཞིན་བསྟེན་ཏེ། དེ་ལ་གདམ་ངག་ཞུས་ནས། ཚུལ་ཁྲིམས་རྣམ་པར་དག་པ་མིག་གི་འབྲས་བུ་བཞིན་སྲུང་ཞིང་། དབེན་པའི་གནས་སུ་མཚན་བཅས་མཚན་མེད་ཀྱི་ཞི་གནས་ལ་སེམས་རྩེ་གཅིག་ཏུ་གནས་པའི་གནས་ཆ་བརྟན་པོར་སྒྲུབ། དེ་ནས་བླ་མའི་མན་ངག་བཞིན་ལྷག་མཐོང་བཙལ་ནས་བདག་མེད་སྟོང་པ་ཉིད་ཀྱི་དོན་ལ་བློ་སྦྱངས། ཞི་ལྷག་ཟུང་འདྲེལ་གྱི་ངང་ནས་སེམས་ཉིད་ཀྱི་གནས་ལུགས་གཏན་ལ་ཕབས་ཏེ་རྣམ་པར་མི་རྟོག་པའི་ཡེ་ཤེས་རྒྱུད་ལ་བསྐྱེད། ཉམས་ཞེན་དང་ཡིད་དཔྱོད་ཀྱིས་མ་སླད་པའི་མཉམ་བཞག་གི་ངང་དུ། བདག་འཛིན་རྩ་བ་ཆོད། ལྟ་སྒོམ་གྱི་འཛིན་སྟངས་ཡལ། ཕྲ་རགས་ཀྱི་རྟོག་པ་དག །རང་མལ་གྱི་ཤེས་པ་ཡུལ་མེད་རང་གསལ་དུ་རྗེན་སང་ངེ་མ་སོང་གི་བར་དུ། བརྩོན་འགྲུས་དྲག་པོས་ཉམས་ལེན་ལ་འབད་དགོས། དེ་ནས་བཟུང་སྟེ་རྩོལ་མེད་རང་བབས་ཀྱི་ངང་ལ། ཡེངས་མེད་གཉུགས་མའི་དྲན་པས་རྒྱུན་སྐྱངས་ནས། རིག་སྟོང་སྐྱེ་མེད་ཀྱི་རང་མདངས། འགག་མེད་ཏིང་འཛིན་གྱི་རོལ་པར་རྩལ་སྦྱང་ཏེ། བྱམས་དང་སྙིང་རྗེ། དད་པ་དང་དག་སྣང་། བསྐྱེད་རྫོགས་དང་བཟླས་བརྗོད། ཚོགས་བསགས་དང་སྒྲིབ་སྦྱོང་། ཕྱིན་དྲུག་དང་བསྡུ་བཞི། བསྔོ་བ་དང་སྨོན་ལམ་སོགས་དོན་གཉིས་སྒྲུབ་པའི་སྤྱོད་པ་ཐམས་ཅད། སྒྱུ་མ་མཁན་སྒྱུ་མའི་རྩེད་འཇོ་ལ་རོལ་བའམ། ནམ་མཁའ་ལ་འབྱུང་བཞིའི་ཆོ་འཕྲུལ་སྟོན་པ་བཞིན། གཤིས་སྐྱེ་མེད་ལས་མདངས་འགག་མེད་སྣ་ཚོགས་སུ་ཤར་ཡང་། རོལ་བ་འཛིན་མེད་དུ་གྲོལ་བས། བདེན་གཉིས་ཟུང་འཇུག་གི་སྤྱོད་པ་དབྱེར་མེད་ཀྱི་ཉམས་ལེན། ཚོགས་གཉིས་ཟུང་འཇུག་གི་སྤྱོད་པ། ཐབས་ལ་མཁས་པའི་སྒོ་ཐམས་ཅད་ལ། ཆགས་མེད་ཞེན་མེད་ཀྱི་ངང་ནས། ཇི་ལྟར་པདྨོ་ཆུ་མི་ཆགས་པ་དང་། །ཉི་ཟླ་ནམ་མཁའ་ཐོགས་པ་མེད་ལྟར་སྤྱད། །ཅེས་པ་ལྟར་ཆགས་ཐོགས་མེད་པར་སྤྱད་པར་བྱའོ། །དེ་ཡང་སྔོན་འགྲོའི་ཁྲིད་ལྟ་བུ་ལ་མཚོན་ན། ཚེ་མི་རྟག་པ་དང་འཁོར་བའི་སྡུག་བསྔལ་བཤད་པ་ནི་སྡུག་བསྔལ་བདེན་པ་ཤེས་བྱར་བསྟན་པའི་ཁྲིད། ལས་རྒྱུ་འབྲས་བཤད་པ་ནི་ཀུན་འབྱུང་བདེན་པ་སྤང་བར་བསྟན་པའི་ཁྲིད། ཐར་པའི་ཕན་ཡོན་བསྟན་པ་ནི། འགོག་བདེན་ཐོབ་བྱར་བསྟན་པའི་ཁྲིད། དལ་འབྱོར་གྱི་རྟེན་ལ་བསམ་ནས་དགེ་བའི་བཤེས་གཉེན་བསྟེན་པ་ནི་ལམ་བདེན་ལ་འཇུག་པའི་རྒྱུ་རྐྱེན་གྱི་རྟེན་འདྲེལ་བསྒྲིག་པའི་ཁྲིད། སྐྱབས་སུ་འགྲོ་བ་ནས་བཟུང་བླ་མའི་རྣལ་འབྱོར་གྱི་མཐར་ཐུག་པའི་བར་ནས་ཕྱི་ནང་གསང་བའི་ཐེག་པ་གསུམ་ལ་རིམ་གྱིས་བཀྲི་བ་སྟེ་ལམ་བདེན་རྒྱུད་ལ་བསྟེན་པའི་ཁྲིད་ཡིན་ནོ། །དེས་ན་བདེན་པ་བཞི་འདི་ནི་འཁོར་འདས་གཉིས་ཀྱི་རང་བཞིན་ཤེས་ནས་བླང་དོར་བྱེད་ལུགས་བསྟན་པ་ཡིན་པས་ན། ལམ་ཐམས་ཅད་ཀྱི་ཁོག་འཕུབ། ཐེག་པ་ཐམས་ཅད་ཀྱི་སྤྱི་ཆིངས། འཕགས་པའི་གང་ཟག་ཐམས་ཅད་ཀྱི་ལམ་པོ་ཆེ་ཡིན་པས་མདོ་རྒྱུད་མན་ངག་གི་ཆོས་གང་ཉམས་སུ་ལེན་པ་ཡང་འདི་ཤེས་དགོས་པའི་གནད་གལ་པོ་ཆེ་ཡིན་ལགས། དེ་ནས་བཀའ་བར་པའི་སྐབས་སུ་ཆོས་ཐམས་ཅད་རྣམ་པར་ཐར་པའི་སྒོ་གསུམ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་གསུམ་དུ་གཏན་ལ་ཕབས་ནས། མཚན་ཉིད་མེད་པའི་ཆོས་ཀྱི་འཁོར་ལོ་བསྐོར་བའི་དོན་ཡང་། གདུལ་བྱ་ཐེག་པ་ཆེན་པོའི་རིགས་ཅན་རྣམས་ལ་དགོངས་ནས། ཀུན་འབྱུང་བདེན་པའི་སྐབས་སུ་སྲིད་པའི་རྩ་བར་གྱུར་པའི་བདག་འཛིན་ནམ་བདག་ལྟ་ལ། གང་ཟག་གི་བདག་འཛིན་དང་ཆོས་ཀྱི་བདག་འཛིན་གཉིས་སུ་ཕྱེ་ནས་ཆོས་ལ་བདག་ཏུ་འཛིན་པ་དེ་སྲིད་པའི་རྩ་བར་བསྟན་ཅིང་། དེ་སྤོང་བའི་གཉེན་པོ་ལམ་བདེན་གྱི་སྐབས་སུ་ཆོས་ཀྱི་བདག་མེད་རྫོགས་པར་བསྟན་པའི་ཆེད་དུ། ཟབ་མོ་སྟོང་པ་ཉིད་ཀྱི་དོན་ཤིན་ཏུ་རྒྱས་པ་གཏན་ལ་ཕབས་ནས་གསུངས་སོ། །དེ་ཉམས་སུ་བླང་ནས་ཤེས་སྒྲིབ་མཐའ་དག་སྤངས་ཏེ། ཐམས་ཅད་མཁྱེན་པའི་ཡེ་ཤེས་མངོན་དུ་མཛད་ནས་ནམ་མཁའ་ཇི་སྲིད་བར་སེམས་ཅན་གྱི་དོན་མཛད་པ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་ཉིད་བསྒོམས་ནས་བྱང་ཆུབ་སེམས་དཔའི་སྤྱོད་པ་མཐའ་ཡས་པ་ལ་སློབ་དགོས་པས་བྱང་ཆུབ་མཆོག་ཏུ་སེམས་བསྐྱེད་པ་དང་། ཏིང་ངེ་འཛིན་གྱི་སྒོ་མཐའ་ཡས་པ་བསྒྲུབ་པ་དང་། ཕ་རོལ་ཏུ་ཕྱིན་པ་དྲུག་དང་། ཚད་མེད་པ་བཞི་དང་བསྡུ་བའི་དངོས་པོ་བཞི་སོགས་ཐབས་སྤྱོད་པའི་ཕྱོགས་ཤིན་ཏུ་རྒྱ་ཆེ་བ་བསྟན་ནས་ཐབས་ཤེས་ཡ་མ་བྲལ་བར་ཉམས་སུ་ལེན་པར་གསུངས་པ་ཡིན། །བཀའ་ཐ་མའི་སྐབས་སུ་ཡང་། ཆོས་ཐམས་ཅད་ཀུན་བརྟགས་གཞན་དབང་ཡོངས་གྲུབ་གསུམ་དུ་ལེགས་པར་ཕྱེ་ནས། ཡོངས་གྲུབ་དོན་དམ་པའི་བདེན་པ་ཆོས་ཀྱི་དབྱིངས་འདུས་མ་བྱས་རང་བྱུང་གི་ཡེ་ཤེས་ཉིད་སྤྲོས་པའི་མཐའ་ཐམས་ཅད་དང་བྲལ་བའི་མཐའ་བྲལ་དབུ་མ་ཆེན་པོའི་རང་བཞིན་དུ་གཏན་ལ་ཕབས་ནས་བསྟན་པའི་དོན་ཡང་། །དངོས་པོ་བདེན་གྲུབ་ཏུ་ལྟ་བ་དང་། དངོས་མེད་སྟོང་པར་བལྟ་བའི་དམིགས་པ་དང་། བློའི་མཐའ་ཤིན་ཏུ་ཕྲ་བ་ཡང་། མཚན་མའི་རྟོག་པ་དང་ཡིད་བྱེད་ཕྲ་མོར་བསྟན་ནས། དེ་ལྟ་བུའི་ལྟ་གཞི་མཐའ་དག་སྤངས་པའི་བསམ་གྱིས་མི་ཁྱབ་པའི་ཡེ་ཤེས་སངས་རྒྱས་ཀྱི་དགོངས་པའི་སྤྱོད་ཡུལ་ལ་འཇུག་པར་བསྟན་པ་ཡིན་ཏེ། དེ་ཡང་ཀུན་འབྱུང་གི་གནས་ངན་ཕྲ་མོ་སྤངས་པའི་ཕྱིར། ལམ་བདེན་ཟབ་པའི་མཐར་ཐུག་པ་ཉིད་བསྟན་པ་ཡིན་ནོ། །དེས་ན་བཀའ་འཁོར་གསུམ་ག་ཡང་སྤྱིར་བདེན་བཞིའི་ལམ་ལས་མི་འདའ་ཞིང་། དེ་ལས་ཁྱད་པར་དུ་ཕྱེ་བ་ཙམ་དུ་ཟད་དོ། །དེ་ནས་གསང་སྔགས་བླ་མེད་རྡོ་རྗེ་ཐེག་པའི་ལུགས་ལ་ཡང་འཁོར་བའི་རྒྱུ་འབྲས་ལས་ལྡོག་སྟེ། མྱ་ངན་ལས་འདས་པའི་རྒྱུ་འབྲས་ལ་ཞུགས་ནས་རྣམ་མཁྱེན་མངོན་དུ་བྱེད་པ་ཡིན་པས། སྤྱིར་བདེན་བཞི་ལས་མི་འདའ་ཡང་། ཉམས་སུ་ལེན་ལུགས་ལ་ཁྱད་པར་འདི་ཡོད་དེ། སྡུག་བདེན་འཁོར་བའི་སྣོད་བཅུད་འདི་རྣམས་ལ། གནས་ལུགས་དང་སྣང་ལུགས་གཉིས་སུ་ཕྱེ་ནས། གནས་ལུགས་ཀྱི་ངོས་ནས་འཇལ་ན། སྣ་ཚོགས་སུ་སྣང་བ་འདི་རྣམས་ལ་གཞི་རང་བཞིན་སྤྲོས་བྲལ་རང་བྱུང་གི་ཡེ་ཤེས་སྣང་སྟོང་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་བཞུགས་པས་གཞི་ལྷུན་གྲུབ་ཀྱི་སངས་རྒྱས་ཞེས་བྱ་སྟེ། དཔེ་འདམ་རྫབ་ཀྱི་ནང་གི་ནོར་བུ་བཞིན་དུ་རང་ངོ་རྣམ་དག་ཏུ་ཡོད་ཅིང་། སྡུག་བདེན་གྱི་རང་བཞིན་འགོག་བདེན་དུ་གནས་པས་འཁོར་འདས་དབྱེར་མེད་ཅེས་བྱའོ། །དེ་ཉིད་གཞི་རྒྱུད་དམ་སྦྱོང་གཞི་ཡིན་ནོ། །དེ་ལྟར་རྟོགས་པ་ལ་འཁོར་འདས་དབྱེར་མེད་ཀྱི་ལྟ་བའམ་གྲུབ་མཐའ་ཟེར་བ་ཡིན་ནོ། །སྣང་ལུགས་ཀྱི་ངོས་ནས་འཇལ་ན། སོ་སོའི་སྐྱེ་བོས་ཐ་མལ་རང་རྒྱུད་དུ་ཞེན་པའི་སྣང་བ་ལ་ཇི་ལྟར་སྣང་བའི་ཕྱི་ནང་གི་དངོས་པོ་འདི་རྣམས་ལ་མ་རྟོགས་འཁྲུལ་བའི་སྣང་བ་ཟེར་ཏེ་སྦྱང་བྱ་ཡིན་ནོ། །དེ་ཉིད་སྡུག་བསྔལ་བདེན་པ་ལ་བཞག་གོ །ལས་ཉོན་ཀུན་འབྱུང་གི་བདེན་པ་ལ་ཡང་། རང་བཞིན་ཤེས་པས་ལམ་དུ་འགྲོ་ཚུལ་དང་། རང་ཁར་ཤོར་བས་ཀུན་འབྱུང་དུ་འགྲོ་ཚུལ་གཉིས་ལས། ལམ་དུ་འགྲོ་ཚུལ་ནི། ཉོན་མོངས་གང་སྐྱེས་ཀྱང་དགག་སྒྲུབ་མེད་པར་ཁོ་རང་གི་ཐོག་ཏུ་ལྷོད་ནས་བཞག་པས་རྩལ་གཞི་ཐོག་ཏུ་གྲོལ་བ་ཆབ་རོམ་ཆུར་ཞུ་བའམ། རླབས་རྒྱ་མཚོར་ཐིམ་པ་བཞིན་ཉོན་མོངས་ཁོ་རང་གི་ངོ་བོ་སྤྲོས་བྲལ་གཉུག་མའི་ཡེ་ཤེས་སུ་རྗེན་ལྷང་ངེ་འཆར། དེ་ཙ་ན་གཉེན་པོ་གཞན་མ་དགོས་པར་ཉོན་མོངས་ཉིད་ཡེ་ཤེས་སུ་ཤར་བས་ཀུན་འབྱུང་ལམ་བདེན་དུ་སོང་བ་ལ་ཉོན་མོངས་ལམ་དུ་བྱེད་པ་ཞེས་བྱའོ། །ལུས་ངག་གི་ལས་རྣམས་ཀྱང་ངོ་བོ་ལུང་མ་བསྟན་ཡིན་ཅིང་། དེ་དགེ་སྡིག་ཏུ་སྒྱུར་བའི་བྱེད་པོ་སེམས་ཡིན་པས། སེམས་ཉིད་གཟུང་འཛིན་ཨ་འཐས་སུ་མ་ཞེན་པར་གང་ཤར་གྱི་ངོ་བོ་མ་བཅོས་ཆོས་ཉིད་སྟོང་པའི་རང་འགྲོས་ཀྱི་ངང་དུ་གྲོལ་བ་ཤེས་རབ་དང་། སྦྱོར་བ་སེམས་བསྐྱེད་ཁྱད་པར་ཅན་དངོས་གཞི་ལྷ་སྔགས་ཏིང་འཛིན་གྱི་བྱེད་པས་ཐ་མལ་གྱི་སྣང་ཞེན་དག་སྣང་དུ་འཆར་བ། རྗེས་སུ་ཚོགས་གཉིས་རྫོགས་པའི་ཉེ་ལམ་དུ་སོང་བ་ནི་ཐབས་ཏེ། ཐབས་ཤེས་ཁྱད་པར་ཅན་དེ་ལྟ་བུས་ཟིན་ན་ལས་ཀྱང་ལམ་བདེན་དུ་འགྲོ་བའོ། །ཀུན་འབྱུང་དུ་འགྲོ་ཚུལ་ནི། ཐབས་ཤེས་ཁྱད་པར་བ་དང་བྲལ་ནས་བསམ་སྦྱོར་གཉིས་ཀ་ཐ་མལ་རང་རྒྱུད་དུ་ཤོར་ན་ལས་བསགས་ནས་འཁོར་བ་མཐའ་མེད་དུ་འཕེན་པས་ཀུན་འབྱུང་གི་བདེན་པར་འགྲོ་བ་ཡིན་ནོ། །དེས་ན་རྡོ་རྗེ་ཐེག་པའི་གནད་ཇི་ལྟ་བ་བཞིན་ཤེས་ནས་རྟོགས་གོམས་ཀྱི་གདེང་དང་ལྡན་ན། སྡུག་བདེན་གྱི་རང་བཞིན་འགོག་པ་དོན་དུ་ཤེས་ནས། ཀུན་འབྱུང་ལམ་བདེན་དུ་འཁྱེར་ནུས་པས་འཁོར་བའི་རྒྱུ་འབྲས་མྱང་འདས་ཀྱི་རྒྱུ་འབྲས་སུ་འགྱུར་ཏེ། སྤང་བྱ་གཉེན་པོར་སློང་ནས་འཁོར་འདས་དབྱེར་མེད་ཀྱི་རྟོགས་པ་མངོན་དུ་འགྱུར་རོ། །དེ་ལྟར་ཤེས་ན། སོར་བྱང་སྔགས་གསུམ་པོ་ལམ་བདེན་གྱི་སྐབས་སྤང་བསྒྱུར་ལམ་དུ་བྱེད་པའི་རྣམ་པ་མི་འདྲ་བ་ཙམ་ལས། དོན་ལ་ལས་ཉོན་རང་མཚན་པ་སྤངས་ནས། སྡུག་བདེན་འཁོར་བའི་སྣང་ཞེན་དག་སྟེ། འགོག་བདེན་མཐར་ཐུག་མངོན་དུ་བྱེད་པ་ལ་གནད་གཅིག་པ་ཡིན་ནོ། །དེའི་ཕྱིར་སྔགས་ལམ་ཡང་བདེན་བཞིའི་ལམ་ལས་མི་འདའ་བའི་རྒྱུ་མཚན་དེ་དག་གི་ཕྱིར་བདེན་བཞིའི་དོན་སྟོན་པའི་གཟུངས་སྔགས་རྟེན་འདྲེལ་སྙིང་པོ་འདི་ཉིད་མདོ་རྒྱུད་མན་ངག་ཐམས་ཅད་ན་མཆོག་ཏུ་བསྔགས་ཤིང་ཡོངས་སུ་གྲགས་པ་ཉིད་དོ། །འཁོར་ལོ་དང་པོས་དངོས་བསྟན་བདེན་པ་བཞི། །རྟེན་འདྲེལ་སྙིང་པོ་ཚིག་བཅད་གཅིག་གི་དོན། །མདོ་རྒྱུད་མན་ངག་ཀུན་གྱི་ལམ་རིམ་དུ། །འགྲོ་བའི་ལེགས་བཤད་གསར་པ་འདི་འདྲ་བ། །འཇམ་པའི་དབྱངས་ཀྱི་མཁྱེན་པའི་ཆུ་གཏེར་ལས། །དབྱངས་ཅན་ལྷ་མོའི་སྒྱུ་རྩལ་གྱིས་ཕྱུང་ནས། །སྐལ་བཟང་ཡིད་ལ་རབ་དགའ་བསྐྱེད་པའི་ཕྱིར། །རྒྱུད་མང་སྒྲ་ལས་བདག་ལ་བསྙད་པ་བཞིན། །བློ་གྲོས་ཤར་གྱི་རི་བོའི་བ་གམ་ནས། །གདམ་ངག་ཉི་གཞོན་འོད་སྟོང་སྤྲོས་པ་འདིས། །དད་དང་ཤེས་རབ་འདབ་སྟོང་འཛུམ་པ་ལས། །ཉམས་རྟོགས་དྲི་བསུང་ཕྱོགས་བརྒྱར་གཡོ་བར་ཤོག། །། ཅེས་པའང་པདྨ་བཛྲ་པས་བྲིས་པ་དགེ། །།
རྙིང་ལུགས་བཀའ་མའི་བྱིན་འབེབས་ཀྱི་འགྲེལ་པ་ལེགས་བཤད་སྤྲིན་གྱི་རོལ་མོ།
༄༅།།རྙིང་ལུགས་བཀའ་མའི་བྱིན་འབེབས་ཀྱི་འགྲེལ་པ་ལེགས་བཤད་སྤྲིན་གྱི་རོལ་མོ་ཞེས་བྱ་བ་བཞུགས་སོ།། སྣང་སྲིད་གདོད་ནས་དག་པའི་དཀྱིལ་འཁོར་དུ། །ཡོངས་གྲུབ་ལྷུན་མཉམ་རྡོ་རྗེ་བཀོད་པའི་རྒྱན། །མི་ཟད་རྟག་པ་རྒྱུན་གྱི་འཁོར་ལོ་རུ། །ཡེ་བཞུགས་འཕོ་འགྱུར་བྲལ་བའི་དབྱིངས་ལ་འདུད། །སྲིད་ཞི་དབྱེར་མེད་མཉམ་པ་ཆེན་པོ་རུ། །དབང་བསྒྱུར་ཏིང་འཛིན་སྔགས་རྒྱའི་བྱེད་པ་ཡིས། །རིག་པ་ཆོས་སྐུའི་ཀློང་ནས་ཡེ་ཤེས་བྱིན། །རྩོལ་མེད་རང་བབས་རྡོ་རྗེ་ཐེག་པའི་ལམ། །རྒྱུད་ཀྱི་དགོངས་པ་གྲུབ་པའི་མན་ངག་གིས། །ཇི་ལྟར་བཀྲལ་བ་བླ་མའི་ཞལ་ལུང་བཞིན། །མདོར་བསྡུས་ངག་གི་ལེགས་པར་བཤད་པ་འདི། །དམ་པ་དགྱེས་པའི་མཆོད་པར་མོས་ཏེ་སྤྲོ། །དེ་ལ་འདིར་སྔ་འགྱུར་བཀའ་མའི་སྒྲུབ་ཕྲིན་གྱི་ཡིག་རྙིང་རྣམས་ལས་བྱུང་བའི་བྱིན་འབེབས་བབས་དྲུག་འདས་བཞིར་གྲགས་པ་འདི་ཉིད་ཀྱི་དགོངས་པ་འཆད་པ་ལ། སྤྱི་དོན་དང་། ཡན་ལག་གི་དོན་གཉིས་ལས། དང་པོ་ལའང་། བྱིན་རླབས་དབང་དང་དངོས་གྲུབ་རྣམས་གང་གིས་འབེབས་པའི་བྱེད་པ་པོ་དང་། གང་ལ་དབབ་པའི་ཡུལ། གང་ཞིག་དབབ་བྱའི་བྱིན། ནམ་ཞིག་དབབ་པའི་དུས། ཕེབས་པའི་རྟགས་ཚད། ཇི་ལྟར་འབེབས་པའི་ཚུལ་དང་དྲུག་ལས། དང་པོ་ནི། བྱེད་པ་པོ་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དང་རང་བཞིན་དབྱེར་མི་ཕྱེད་པའི་རིགས་ལྔ་ཞི་ཁྲོའི་ལྷ་ཚོགས་བརྒྱུད་གསུམ་གྱི་བླ་མ་ཡི་དམ་མཁའ་འགྲོ་འཁོར་དང་བཅས་པ་རྣམས་སོ། །གཉིས་པ་ནི། བདག་གནས་ཡོ་བྱད་གསུམ་སྟེ། རྒྱུད་ལས། སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འགྲུབ་འགྱུར་མི་ལྡན་དོན་མེད་བརླག །ཅེས་གསུངས་པ་ལྟར་སྟོན་འཁོར་མཚན་ཉིད་ཚང་བའི་སྒྲུབ་པ་པོ་དང་། བཀྲ་ཤིས་བྱིན་ཆགས་པའི་གནས་སུ་ཚོགས་ཁང་རིམ་པ་གསུམ་པ་སོགས་ཀྱི་གནས་དང་། དཀྱིལ་འཁོར་སྒྲུབ་རྫས་སོགས་ཀྱི་ཡོ་བྱད་རྣམས་སོ། །གསུམ་པ་ནི། བདག་ཉིད་ཆེན་པོ་རྣམས་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་བྱིན་རླབས་དང་། ཡེ་ཤེས་རང་སྣང་གི་གཞལ་ཡས་ཁང་དགྱེས་དགུར་འཆར་བའི་ལོངས་སྤྱོད་དང་བཅས་པའི་གཟི་བྱིན་དང་བཅུད་རྣམས་སོ། །བཞི་བ་ནི། ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །མ་ཉམས་འཇུག་ལ་རབ་བརྩོན་ན། །ཞག་ནི་སུམ་བཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་གསུངས་པ་ལྟར། སྟོང་ཆེན། སྙིང་རྗེ་སྒྱུ་མ། ཕྱག་རྒྱ་གཅིག་པ་ཕྲ་རགས་གཉིས། ཕྱག་རྒྱ་སྤྲོས་བཅས་ཀྱི་ཆོ་ག་ལྔ་ལ་གསལ་བརྟན་གྱི་ཚད་རྫོགས་པས་ཏིང་འཛིན་ལས་སུ་རུང་བར་གྱུར་པའི་རྣལ་འབྱོར་པས། བཟའ་བཏུང་། གོས་རྒྱན། བྲོ་གར། གླུ་ཚིག །སྦྱོར་སྒྲོལ་གྱི་ཡོ་བྱད་ལྔ་ཚང་ཞིང་རྫོགས་པའི་སྒོ་ནས། ལྷ་སྔགས་འཕྲོ་འདུ་སྔགས་ཀྱི་ཡན་ལག་ལྔ་དང་ལྡན་པས་རྩ་བ་དང་ཡན་ལག་གི་དམ་ཚིག་མ་ཉམས་པར་སྒྲུབ་པ་ལ་འཇུག་ཅིང་ཞུགས་ནས་ཀྱང་། རིམ་གཉིས་ཀྱི་ཉམས་ལེན་ལ་རབ་ཏུ་བརྩོན་ན་དབང་པོའི་ཁྱད་པར་གྱིས་ཟླ་དྲུག་སོགས་ཀྱིས་དངོས་གྲུབ་ཐོབ་པའི་དུས་བསྟན་པ་ལྟར། བྱིན་དབབ་པའི་དུས་ཀྱང་དེ་ཡིན་ཏེ། དབང་ཐོབ་ཅིང་དམ་ཚིག་ལ་སེལ་མ་ཞུགས་པའི་སྒྲུབ་པ་པོ་མཆེད་ལྕམ་རྣམས་ཀྱིས། སྒྲུབ་པའི་དལ་དང་། རྫས་རྣམས་གཞུང་བཞིན་བཤམས་ཏེ། རིམ་གཉིས་ཀྱི་ཏིང་ངེ་འཛིན་ལ་གསལ་བརྟན་ཐོབ་པས། སྒྲུབ་པ་ཆེན་པོའི་ཆོ་ག་ཡན་ལག་མ་ཉམས་པ་ལ་ཚུལ་བཞིན་དུ་ཞུགས་པ་ན་རྒྱལ་བ་སྲས་དང་བཅས་པས་སྲས་དང་སྤུན་དུ་དགོངས་ཤིང་། མཁའ་འགྲོ་ཆོས་སྐྱོང་རྣམས་ཀྱིས་གྲོགས་དང་རྗེ་དཔོན་དུ་མཐོང་ནས་བྱིན་གྱིས་རློབས་ཤིང་དངོས་གྲུབ་སྟེར་བའི་དུས་ཡིན་ནོ། །དབང་དུས་སུ་བྱིན་དབབ་པ་ཡང་དེས་མཚོན་ཏེ། རྡོ་རྗེ་སློབ་དཔོན་ལྟ་དགོངས་དང་ལྡན་པས། སློབ་མ་སྣོད་དུ་རུང་ཞིང་དམ་ཚིག་གཙང་བ་ལ། དབང་གི་ཆོ་ག་ཡན་ལག་མ་ཉམས་པར་གཞུང་བཞིན་དུ་སྒྲུབ་པའི་ཚེ་ན་བྱིན་གྱིས་རློབ་པའི་དུས་ཡིན་ནོ། །འདི་ནི་གལ་ཆེ་སྟེ་ཚིག་དོན་གྱི་སྐབས་སུ་ཡང་དུས་ལ་བབས་སོ་ཞེས་ལན་དྲུག་ཏུ་གསོལ་བའི་དུས་ནི་འདི་ཁོ་ན་སྟེ། གཞན་དུ་ཡེ་ཤེས་པ་འབེབས་པའི་རྒྱུ་ཚོགས་གང་དང་ཡང་མི་ལྡན་བཞིན་དུ་དུས་ལ་བབས་སོ་ཞེས་ཡང་དང་ཡང་དུ་བསྐུལ་ཀྱང་ལྷ་དང་མཁའ་འགྲོའི་ཐུགས་ཀྱིས་ཁྲེལ་བའི་རྒྱུ་ལས་ཅི་ཡང་མེད་དོ། །ལྔ་བ་ནི། སྐུའི་བྱིན་ཕེབས་རྟགས་སུ་ལུས་འཕར་གཡོ་དང་ཞི་ཁྲོའི་ཉམས་གར་གྱི་འགྱུར་བ་འཆར་ཞིང་འབྱུང་བཞིའི་རྫུ་འཕྲུལ་སྟོན་ནུས་པ་དང་། གསུང་ཕེབས་རྟགས་སུ་སྔགས་དང་སཾ་སྐྲྀ་ཏའི་སྐད་སོགས་བཅོས་མིན་བྱུང་རྒྱལ་དུ་འབྱུང་བ་དང་། ཐུགས་ཕེབས་རྟགས་སུ་བདེ་གསལ་མི་རྟོག་པའི་ཉམས་འབར་བ་དང་། ཏིང་ངེ་འཛིན་དང་མངོན་ཤེས་ཀྱི་ཁྱད་པར་དུ་མ་འཆར་བ། གཞན་ཡང་སྒྲུབ་རྫས་འཕེལ་བ། སྨན་རག་ཁོལ་ཞིང་གནས་ཁང་གཟི་བྱིན་དང་ལྡན་པ་སོགས་འབྱུང་ངོ་། །དྲུག་པ་ནི། རྣལ་འབྱོར་ཕོ་མོ་རྣམས་ཞི་ཁྲོའི་གར་ཆས་དང་ལྡན་པས་དཀྱིལ་འཁོར་གྱི་མཐའ་ནས་བསྐོར་ཏེ། གཡབ་དང་ཧསྟ་སོགས་ཀྱིས་གཡོབ་ཅིང་ཁྱད་པར་གྱི་སྤོས་ལ་སོགས་བརྟུལ། འབུད་རྡུང་དཀྲོལ་བའི་རོལ་མོའི་བྱེ་བྲག་རྣམས་སྦིར། བཤུགས་པའི་གླུ་དང་གར་གྱི་བརྡས་བསྐུལ་ཏེ། མཉམ་པ་ཆེན་པོའི་དགོངས་སྤྱོད་ལ་གནས་པས་བྱིན་དབབ་པར་བྱའོ། །གཉིས་པ་ཡན་ལག་གི་དོན་ལ། རྡོ་རྗེའི་གླུས་བསྐུལ་ཏེ། སྙན་གསན་དབབ་པ་དང་། བྱིན་དབབ་པ་དངོས་གཉིས་སོ། །དང་པོ་ནི། ཨོཾ་ཧཱུྃ། ཞེས་ཞི་ཁྲོའི་གླུའི་མགོ་འདྲེན་པ་སྟེ། ཡིག་འབྲུ་སོ་སོས་སྐུ་ལྔ་ཡེ་ཤེས་ལྔ་སོགས་འབྲས་ཆོས་ཉེར་ལྔ་མཚོན་པས་རང་བཞིན་ལྷུན་གྲུབ་ཀྱི་དཀྱིལ་འཁོར་དབྱིངས་དང་ཡེ་ཤེས་གཉིས་སུ་མེད་པའི་བདག་ཉིད་དཀྱིལ་འཁོར་ཐམས་ཅད་ཀྱི་འཆར་གཞི་ཆེན་པོའི་དགོངས་པ་རང་གསལ་གདབ་པའོ། །ཨ་ལ་ལ་ཧོ་ཞེས་དེ་ལ་ངོམ་ཞིང་ངོ་མཚར་བ་སྟེ་ཞི་ཁྲོ་སོ་སོའི་ཆེ་བའི་ཡོན་ཏན་ལ་ངོམ་པའམ། དབྱིངས་ཡེ་ཇི་བཞིན་པའི་དཀྱིལ་འཁོར་ལས་ཡེ་ཤེས་ལྷུན་གྱིས་གྲུབ་པའི་དཀྱིལ་འཁོར་རྩོལ་མེད་རང་བྱུང་བདེ་བ་ཆེན་པོར་ཤར་བ་ལ་ངོ་མཚར་ཞིང་ངེས་པ་སྐྱེས་པའོ། །བྷ་ག་ཝཱན་ནི། བཅོམ་ལྡན་འདས་ཞེས་དཀྱིལ་འཁོར་ཐམས་ཅད་ཀྱི་བདག་པོ་ལ་བོད་པ་སྟེ། བདུད་བཞི་བཅོམ་པ་སྤང་བའི་ཡོན་ཏན་དང་། དབང་ཕྱུག་སོགས་དང་ལྡན་པ་རྟོགས་པའི་ཡོན་ཏན། སྲིད་ཞིའི་མཐའ་ལས་འདས་པ་ཆེ་བའི་ཡོན་ཏན་དང་ལྡན་པའི་སངས་རྒྱས་སོ། །ས་མ་ཡ་ཧོ། ཞེས་པ་དམ་ཚིག་ལ་དགྱེས་པར་མཛོད་ཅེས་ཐུགས་དམ་གནད་ནས་བསྐུལ་བ་སྟེ། གདུལ་བྱ་འདུལ་བའི་ཕྲིན་ལས་དུས་ལས་མ་ཡོལ་བར་མཛད་པའི་སྔོན་གྱི་དམ་བཅའ་ལ་ཉེ་བར་དགོངས་ཤིག་ཅེས་མཁྱེན་པར་གསོལ་བའོ། །ས་མ་ཡ་སྟྭཾ། ཞེས་པ་ཁྱོད་ཀྱི་དུས་ལ་བབས་ཞེས་དུས་གསོལ་བའོ། །དེ་ལྟར་བསྐུལ་བའི་སྒྲ་བྱུང་མ་ཐག་ཏུ། ཆོས་ཀྱི་དབྱིངས་རྩོལ་རྟོག་མི་མངའ་བའི་ངང་ལས་ཐུགས་རྗེ་ཆེན་པོའི་དབང་གིས་ཡེ་ཤེས་ཀྱི་འཁོར་ལོ་གང་འདུལ་ཞི་ཁྲོའི་རོལ་གར་ནམ་མཁའ་ཁྱབ་པར་འཆར་ཞིང་སད་པར་འགྱུར་བ་ནི་རྒྱལ་བ་རྣམས་ཀྱི་མ་འདྲེས་པའི་ཆོས་ཉིད་དོ། །གཉིས་པ་བྱིན་དབབ་པ་དང་། བསྡུ་བ་གཉིས་ལས། དང་པོ་ལ། དུས་གསོལ་བའི་སྒོ་ནས་ཐུགས་རྗེ་བསྐུལ་བ་དང་། ཉེ་བའི་ཚིག་དང་སྦྱར་ཏེ་འདོད་དོན་ཞུ་བ། དོན་བསྡུས་ཏེ་གསོལ་བ་གདབ་པ་དང་གསུམ་ལས། དང་པོ་ལའང་། ཐུགས་རྗེ་སྤྱིར་བསྐུལ་བ་དང་། འདོད་དོན་ཁྱད་པར་ཅན་ལ་བྱེ་བྲག་ཏུ་བསྐུལ་བ་གཉིས་ལས། དང་པོ་ནི། འཕགས་མཆོག་སོགས་རྐང་པ་གཉིས་ཏེ། དེ་ཡང་སྤྱིར་སོ་སོའི་སྐྱེ་བོའི་འཆིང་བ་ལས་གྲོལ་བའི་འདས་ལམ་མངོན་གྱུར་གྱི་འཕགས་པ་ལ་ཉན་རང་ཐེག་ཆེན་གྱི་འཕགས་པ་གསུམ། ཐེག་ཆེན་འཕགས་པ་ལའང་སློབ་ལམ་སར་གནས་ཀྱི་བྱང་སེམས་འཕགས་པ་དང་། སྤང་རྟོགས་མཐར་ཕྱིན་གྱི་སངས་རྒྱས་འཕགས་པ་གཉིས་ཏེ། བཞི་ལས། འདིར་འཕགས་པ་མཆོག་གི་སྒྲས་སངས་རྒྱས་འཕགས་པ་ཡིན་ཞིང་། དེ་ཡང་སྐུ་ལྔ་ཡེ་ཤེས་དྲུག་གི་རང་བཞིན་ཁ་སྦྱོར་གྱི་ཡན་ལག་བདུན་དང་ལྡན་པའི་བཅོམ་ལྡན་འདས་རྡོ་རྗེ་འཆང་ངམ་ཧེ་རུ་ཀ་སྟེ་དཀྱིལ་འཁོར་གྱི་དབང་ཕྱུག་ལ་བྱའོ། །གཙོ་བོ་བསྐུལ་བས་འཁོར་རྣམས་ཞར་ལ་བསྐུལ་བར་འགྱུར་ཏེ་འཁོར་ལོས་སྒྱུར་རྒྱལ་གང་དུ་ཕེབས་པ་དེར། དཔུང་ཚོགས་བཞི་ཤུགས་ཀྱིས་ལྷགས་པ་བཞིན་ནོ། །ཐུགས་རྗེ་ལ་དབྱེ་ན། རིམ་གསུམ་ལས། རྟག་རྒྱུན་རང་བཞིན་ཤུགས་གསོལ་དང་། །ཡུལ་དང་ཕྲད་ནས་འབྱུང་བར་སྣང་། །ཞེས་པ་ལྟར། རྟག་པ་རྒྱུན་གྱི་ཐུགས་རྗེ་དུས་ལས་མི་ཡོལ་བ་ཆུ་བོའི་རྒྱུན་ལྟ་བུ། རང་བཞིན་ཤུགས་ཀྱི་ཐུགས་རྗེ་རྩོལ་རྟོག་མེད་པར་ངང་གིས་འབྱུང་བ་ཉི་མའི་འོད་ཟེར་ལྟ་བུ། བསྐུལ་ཞིང་གསོལ་བ་གདབ་པའི་ཐུགས་རྗེ་སྙིང་རྗེ་ཅན་ལ་དབུལ་པོས་ནོར་སློང་བ་ལྟ་བུ། གདུལ་བྱའི་ཡུལ་དང་ཕྲད་པའི་ཐུགས་རྗེ་མཛངས་པས་སྤྱོད་ལོག་བྱེད་པ་མཐོང་བའམ། དཔལ་ཆེན་པོས་རུ་ཏྲ་ལ་ཐུགས་རྗེ་སྐྱེས་པ་ལྟ་བུ་སྟེ་བཞི་ལས་འདིར་བཞི་ག་སྟེ། གང་བསྐུལ་བར་བྱ་བ་སངས་རྒྱས་རྣམས་ཀྱི་རང་བཞིན་ཤུགས་ཀྱི་ཐུགས་རྗེ་སེམས་ཅན་གྱི་ཁམས་ལ་རྟག་པར་རྒྱུན་གྱིས་འཇུག་པ་ལ། གང་གིས་བསྐུལ་བ་པོ་གདུལ་བྱ་དུས་ལ་བབས་པ། རྨ་སྨིན་པ་མཚོན་གྱིས་བརྟོལ་རན་པ་ལྟ་བུའི་གང་ཟག་གིས་སྙིང་ནས་གདུང་ཤུགས་དྲག་པོས་བསྐུལ་ཞིང་གསོལ་བ་གདབ་པ་ན་ཐུགས་རྗེ་ཆེན་པོ་མི་སྐྱེ་བའི་དབང་མེད་དེ་རྒྱུ་རྐྱེན་ཚོགས་པའི་འབྲས་བུ་བཞིན་ནོ། །དེ་ཡང་གདུལ་བྱ་དུས་ལ་མ་བབ་ན་འདུལ་བྱེད་ཀྱི་ཐུགས་རྗེ་མི་འཇུག་པས་དུས་ལ་བབས་པ་གཙོ་ཆེ་སྟེ། རྒྱ་མཚོ་ཆུ་སྲིན་རྣམས་ཀྱི་གནས། །དུས་ལས་ཡོལ་བར་འགྱུར་ཀྱང་སྲིད། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །ཅེས་པ་ལྟར་རོ། །དེ་ལ་དུས་ནི་གོང་དུ་སྨོས་པ་ལྟར་སྒྲུབ་པ་པོ་དབང་གིས་སྨིན་པ། དམ་ཚིག་དག་པ། བསྐྱེད་རྫོགས་བརྟན་པ། སྒྲུབ་རྫས་ཚང་བ། ཡོ་བྱད་འབྱོར་བ། སྒྲུབ་པའི་ཆོ་ག་ཡན་ལག་མ་ཉམས་པས་ལེ་ལོ་གཉིད་ཆང་སོགས་ཀྱི་དབང་དུ་མི་གཏོང་བར་བརྩོན་པས་སྒྲུབ་ལ་འཇུག་པ་རྣམས་ནང་འཛོམས་པ་ན་བྱིན་རླབས་དབང་དང་དངོས་གྲུབ་ཐམས་ཅད་འབྱུང་བའི་དུས་ཡིན་པས། དུས་ལ་བབས་སོ་ཞེས་བརྗོད་པའང་སྐབས་སུ་བབ་པར་འགྱུར་བ་ཉིད་དོ། །དུས་གསོལ་བ་འོག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །དེའི་འོག་ཏུ་འཕགས་པ་མཆོག་གི་ཐུགས་རྗེ་བསྐུལ་ནས་ཅི་བྱ་ཞེ་ན། ཁྱད་པར་བསྟན་པའི་དུས་ལ་བབས། སྨོས་ཏེ། ཁྱད་པར་ཅན་གྱི་འདུལ་བྱའི་ཡུལ་གསང་བ་ཟབ་མོའི་ལམ་གྱི་སྣོད་དུ་རུང་བ་རྣམས་ཀྱིས། ཁྱད་པར་ཅན་གྱི་གདུལ་བྱེད་ཟབ་མོ་བསྙེན་སྒྲུབ་ཡན་ལག་བཞིའི་གཞུང་བསྲང་བས་ཁྱད་པར་ཅན་གྱི་མཐུ་བྱིན་དབང་དང་དངོས་གྲུབ་ཐམས་ཅད་དུས་ཕྱི་མར་མི་སྡོད་པར་ད་ལྟ་ཉིད་དུ་བསྟན་པའི་དུས་ལ་བབས་སོ་ཞེས་གསོལ་བའོ། །གཉིས་པ་ལས། ཁྱད་པར་བསྟན་པ་དེའང་གང་ཞེ་ན། ནུས་པ་མཐུ་ཡི་ཁྱད་པར། བྱིན་གྱིས་རླབས་ཀྱི་ཁྱད་པར། སྨིན་པ་དབང་གི་ཁྱད་པར། འབྲས་བུ་དངོས་གྲུབ་ཀྱི་ཁྱད་པར་དང་བཞི་སྟེ་གོ་རིམ་བཞིན། དང་པོ་ལམ་གྱི་འགལ་རྐྱེན་བསལ་བ་དང་། གཉིས་པ་ལམ་རྒྱུད་ལ་སྐྱེ་བའི་སྣོད་རུང་དུ་བྱེད་པ་དང་། གསུམ་པ་ལམ་ལ་རང་དབང་དུ་བྱ་བ་དང་། བཞི་བ་ལམ་དེས་གྲུབ་པའི་གནས་སྐབས་དང་མཐར་ཐུག་གི་འབྲས་བུ་བསྟན་པ་སྟེ། དེ་དག་ནི་རྒྱུ་འབྲས་དོན་གྱི་གོ་རིམ་ཡིན་ནོ། །དེ་ལ་དང་པོ་ནི། མཐུ་རྩལ་དབྱུང་བའི་དུས་ལ་བབས། །ཞེས་པ་སྟེ། རྒྱལ་བ་ཐུགས་རྗེའི་བདག་ཉིད་ཅན་ཁྱེད་རྣམས་ལ་མངའ་བའི་སྤྱན་དང་མངོན་ཤེས་རྫུ་འཕྲུལ་དང་སྟོབས་ལ་སོགས་པའི་མཐུ་དང་ནུས་པའི་རྩལ་ཆེན་པོ་དབྱུང་བ་སྟེ་ཕྱུང་བའི་དུས་ལ་བབས་སོ། །ཞེས་པའོ། །གཉིས་པ་ནི། བྱིན་གྱིས་རློབས་པའི་དུས་ལ་བབས། ཞེས་པ་སྟེ། གསེར་འགྱུར་གྱི་རྩིས་ལྕགས་ཁམས་གསེར་དུ་བྱེད་པ་ལྟར་རྡོ་རྗེ་གསུམ་གྱི་བྱིན་ཆེན་པོས་བདག་ཅག་གི་སྒོ་གསུམ་རྒྱལ་བའི་གསང་བ་གསུམ་དུ་རློབ་པའི་དུས་ལ་བབས་སོ། །ཞེས་པའོ། །གསུམ་པ་ནི། དབང་མཆོག་བསྐུར་བའི་དུས་ལ་བབས། །ཞེས་པ་སྟེ། གཞི་དུས་ཀྱི་རྩ་རླུང་ཐིག་ལེ་གཉུག་མ་ཡེ་ཤེས་ཀྱི་ཁམས་དང་བཅས་པའི་དཀྱིལ་འཁོར་བཞི་པོ་ལམ་བསྐྱེད་རྫོགས་ཡན་ལག་བཞིའི་རིམ་པས་སྦྱངས་ཏེ། འབྲས་བུ་རྡོ་རྗེ་བཞིའི་རྒྱལ་ཐབས་ལ་དབང་བསྐུར་བའི་དུས་ལ་བབས་སོ། །ཞེས་པའོ། །བཞི་པ་ནི། དངོས་གྲུབ་སྩོལ་བའི་དུས་ལ་བབས། །ཞེས་པ་སྟེ། སྨིན་གྲོལ་ཟབ་མོའི་ལམ་ལ་བསླབ་པའི་འབྲས་བུ་གྲུབ་པ་བརྒྱད་སོགས་ཐུན་མོང་དང་། རིག་འཛིན་བཞི་དང་ཁ་སྦྱོར་བདུན་སོགས་གནས་སྐབས་དང་མཐར་ཐུག་མཆོག་གི་དངོས་གྲུབ་ཐམས་ཅད་དུས་འདི་ཉིད་དུ་སྩོལ་བའི་དུས་ལ་བབས་སོ། །ཞེས་པའོ། །གཉིས་པ་ཉེ་ཚིག་དང་སྦྱར་ཏེ་འདོད་དོན་ཞུ་བ་ལའང་། དུས་གསོལ་བའི་གོ་རིམ་དང་མཚུངས་པར་བཞི་སྟེ། འགལ་རྐྱེན་བསལ་བ། བྱིན་གྱིས་རླབས་པ། དབང་བསྐུར་བ། དངོས་གྲུབ་སྩོལ་བར་ཞུ་བ་དང་བཞི་ལས། དང་པོ། མཐུ་ཆེན་བདུད་འདུལ་བཅོམ་ལྡན་འདས། །ཞེས་སྨོས་ཏེ། མཐུ་སྟོབས་ཆེན་པོའི་རྩལ་གྱིས་དངོས་གྲུབ་ལ་བར་དུ་གཅོད་པའི་བདུད་དང་དམ་སྲི་ཕྱི་ནང་གསང་བའི་རུ་ཏྲའི་སྡེ་དཔུང་སྤྱི་དང་བྱེ་བྲག་དབང་བཞིའི་ལམ་གྱི་སྦྱང་བྱར་གྱུར་པའི་སྒྲིབ་བཞིའི་ས་བོན་བཅོམ་སྟེ་གསང་བའི་བདུད་བཞི་ཐུལ་བར་མཛོད་ཅིག་བཅོམ་ལྡན་འདས་ཞེས་ཉེ་བའི་ཚིག་གིས་བོས་ཏེ་ཐུགས་དམ་གནད་ནས་བསྐུལ་བ་ནི་འོག་མ་གསུམ་ལ་ཡང་ཤེས་པར་བྱའོ། །གཉིས་པ་ནི། བྱིན་ཆེན་བྱིན་ཕོབ་བཅོམ་ལྡན་འདས། །ཞེས་པ་སྟེ། འབྲས་ཆོས་ཉི་ཤུ་རྩ་ལྔས་བསྡུས་པའི་མི་ཟད་རྒྱན་གྱི་འཁོར་ལོའི་བྱིན་རླབས་ཀྱི་དབྱིག་ཆེན་པོ་དང་ལྡན་པ་ཁྱོད་ཀྱིས་བདག་གནས་ཡོ་བྱད་ཐམས་ཅད་ལ་བྱིན་རླབས་ཀྱི་ཆར་ཆེན་པོ་ཕོབས་ཤིག་བཅོམ་ལྡན་འདས་ཞེས་པའོ། །གསུམ་པ། དབང་ཆེན་དབང་བསྐུར་བཅོམ་ལྡན་འདས། །ཞེས་པ་སྟེ། འཁོར་འདས་ཀྱི་ཆོས་ཐམས་ཅད་ལ་དབང་བསྒྱུར་བའི་དབང་ཕྱུག་ཆེན་པོའི་བདག་ཉིད་དུ་གྱུར་པ་ཁྱོད་ཀྱིས། གཞི་ལམ་འབྲས་བུའི་དབང་བསྐུར་བ་ཆེན་པོས་བདག་ལ་དབང་བསྐུར་ཅིག་བཅོམ་ལྡན་འདས། བཞི་བ་ནི། དངོས་གྲུབ་མཆོག་སྩོལ་བཅོམ་ལྡན་འདས། །ཞེས་པ་སྟེ། མཁའ་སྤྱོད་ལ་སོགས་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་ལམ་གྱུར་གྱི་འབྲས་བུ་རིག་འཛིན་བཞི་དང་། མཐར་ཕྱིན་འབྲས་བུ་སྐུ་དང་ཡེ་ཤེས་རྒྱ་མཚོའི་བདག་ཉིད་ལྷུན་རྫོགས་སྟུག་པོ་བཀོད་པའི་རྒྱན་ཉིད་དུ་བཞུགས་པ་སྟེ། དེ་ལྟ་བུའི་དངོས་གྲུབ་ཀྱི་མཆོག་དམ་པ་སྩོལ་བར་མཛོད་ཅིག་བཅོམ་ལྡན་འདས། ཞེས་པའོ། །ལམ་དང་འབྲས་བུས་བསྡུས་པའི་དངོས་གྲུབ་རྨད་དུ་བྱུང་བ་རྣམས་ཀྱང་གློ་བུར་གྱི་དྲི་མ་བྲལ་སྟོབས་ཀྱིས་རང་གནས་ཀྱི་ཡོན་ཏན་མངོན་ཏུ་གྱུར་པ་ལས་གཞན་བྱུང་དང་། གསར་ཐོབ་མ་ཡིན་ཏེ། རྒྱུད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ན་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་དང་། རྨད་བྱུང་རྒྱལ་པོ་ལས། སངས་རྒྱས་སྐུ་དང་ཡེ་ཤེས་ཞིང་ཁམས་དང་། །ཡེ་ཤེས་ཡོན་ཏན་ཕྲིན་ལས་ཇི་སྙེད་པ། །ཡེ་ཤེས་དེ་ཉིད་དེ་ལྟར་སྣང་བ་ཡིན། །གཞན་ནས་མ་ཡིན་དེ་ལྟར་ལྷུན་གྱིས་གྲུབ། །ཅེས་གསུངས་པ་ལྟར་རོ། །གསུམ་པ་དོན་བསྡུས་ཏེ་གསོལ་བ་གདབ་པ་ནི། བདག་ཅག་ལས་འབྲས་མཆིས་པར་མཛོད། །ཅེས་པ་སྟེ་བདག་ཅག་སྒྲུབ་པ་མཆོག་ལ་ཞུགས་པའི་མཆེད་དང་ལྕམ་དྲལ་རྣམས་ཀྱིས། སྒྲུབ་པའི་དལ་བཀྲམ། མཆོད་པའི་ཡོ་བྱད་སྦྱར། རིམ་གཉིས་ཀྱི་ཏིང་འཛིན་སྒོམ། བསྙེན་སྒྲུབ་གཉིས་ཀྱི་ལས་གཞུང་བསྲང་སྟེ་ཚུལ་བཞིན་ཏུ་སྒྲུབ་པའི་ལས་སམ་བྱ་བ་འདི་ལ་གནས་སྐབས་དང་། མཐར་ཐུག་གི་འབྲས་བུ་མཆིས་པ་སྟེ་དོན་ཡོད་པར་མཛོད་ཅིག་ཅེས་པའོ། །གཉིས་པ་བྱིན་བསྡུ་བ་ནི། ཧཱུྃཧཱུྃཧཱུྃ། ཞེས་བརྗོད་པ་ནི་སྡུད་པར་བྱེད་པའི་གསང་སྔགས་ཏེ། ནམ་མཁའ་གང་བའི་ཡེ་ཤེས་ཀྱི་འཁོར་ལོ་ཐམས་ཅད་བདག་གནས་ཡོ་བྱད་དང་བཅས་པར་རྒྱ་མཚོ་ཆེན་པོ་ལ་ཁ་ཆར་འབབ་པ་བཞིན་དུ་བབས་ཤིང་ཐིམ་པར་གྱུར་པས་གསལ་ཞིང་བརྟན་ལ་གཟི་བྱིན་དང་ལྡན་པར་མོས་པར་བྱའོ། །དེ་ལྟར་བཀའ་མའི་བྱིན་འབེབས་ཀྱི་གཞུང་འདི་ཉིད་ཚིག་བརླིང་ཞིང་དོན་རྟོགས་པར་དཀའ་བ་དེ་ལྟར་ནའང་། བཀའ་དྲིན་འཁོར་མཐའ་དང་བྲལ་བའི་འདྲེན་པ་མཆོག་གི་གསུང་གསང་སྤྱི་བོར་ཕེབས་པ་ལྡོག་ཏུ་མ་ནུས་པར་སྙོམ་ལས་པ་པདྨ་བཛྲ་དུ་འབོད་པས་གཡར་ཁྲལ་དུ་བྲིས་པ་དགེ་བར་གྱུར་ཅིག །དམ་པའི་ཞལ་ལུང་ཇི་བཞིན་མ་རྟོགས་པར། །རང་བཟོས་ནོངས་པའི་དྲི་མ་གང་མཆིས་པ། །ཆོས་ཀྱི་སྤྱན་ལྡན་རྣམས་ལ་སྙིང་ནས་འཆགས། །ཆོས་སྤོང་ལས་ཀྱི་སྒྲིབ་པར་མ་གྱུར་ཅིག །ལྷག་བསམ་ཆབ་ལས་བྱུང་བའི་ལེགས་བཤད་ཆའི། །དགེ་ཚོགས་པདྨ་དཀར་པོའི་ཕོན་པོ་འདི། །དམ་པའི་ལྷ་བྲལ་དགྱེས་པའི་དོ་ཤལ་དུ། །བླངས་ནས་རྗེས་སུ་འཛིན་པའི་རྒྱུར་གྱུར་ཅིག། ཅེས་ཀྱང་སྨྲས་སོ།།
སྒོམ་དོན་མདོར་བསྡུས།
༄༅།།སྒོམ་དོན་མདོར་བསྡུས་བཞུགས་སོ།། ཡུལ་རྐྱེན་དང་འཕྲད་ནས་ཆགས་སྡང་སྐྱེས་ཐོག་ན་རྩོལ་བ་ཡོད་མེད་ཀྱི་རྟགས་ཡོད་པས་དེ་ལ་ཚད་བཙུགས་པ་ཡིན། དེ་ཡང་རིག་རྩལ་འགགས་ནས་རྟོག་མེད་དུ་གནས་པ་ལ་ཆོད་ཟེར་བ་མིན། རྐྱེན་ཐོག་ཏུ་ཤར་ཐོག་ནས་མྱོང་ཚོར་རང་རིག་ཏུ་ཤར་ནས་རྩོལ་བ་ཇེ་ཆུང་དུ་འགྲོ་ཞིང་། མཐར་རྐྱེན་སྣང་བློ་འདས་སུ་ཤར་བ་ལ་ཆོད་ཟེར་བ་ཡིན། དེ་བས་ན་ཉོན་མོངས་པ་ཆེད་དུ་བསྐྱེད་ནས་བསམ་གཟུགས་སུ་ཤར་བས་རྩལ་རྫོགས། ལས་དང་པོའི་དུས་མ་བསགས་པའི་རང་ཐོག་ཏུ་ཀློད་པས། རིག་པའི་རྩལ་དུ་མྱོང་ཚོར་མ་འགགས་པར་ཤར་བ་དེ་རང་མ་གྲུབ་པར་རང་ངོ་ཤེས་པས་འཆིང་བྱེད་ཀྱི་རྟོག་པ་དེ་གྲོལ་བྱེད་ཀྱི་རྐྱེན་དུ་ཤར་བ་སྟེ། བརྟགས་གཉིས་ལས། ཆགས་པ་གང་གིས་འཆིང་གྱུར་པ། །དེ་ཉིད་ཀྱིས་ནི་རྣམ་པར་གྲོལ། །བཟློག་པའི་བསྒོམ་པ་འདི་དག་ནི། །སངས་རྒྱས་མུ་སྟེགས་ཀྱིས་མི་ཤེས། །ཞེས་སོ། གཉུག་མའི་སེམས་ཉིད་སྤྲོས་པ་དང་བྲལ་བའི་རྩལ་ལས་རིག་པའི་རྣམ་པ་ཆགས་སོགས་སུ་ཤར་བ། ཤར་དུས་ཉིད་ནས་ངོ་བོ་སྤྲོས་བྲལ་དུ་གནས་པ་རང་ངོ་མ་ཤེས་ནས་མཚན་མར་བཟུང་སྟེ་ཞེན་པ་ས་རང་རྒྱུད་འཆིང་ལ། མཁས་པས་རང་ངོ་ཤེས་པས་ཆགས་སོགས་མ་སྤང་རང་སར་གྲོལ་ཏེ། དགོངས་འདུས་ལས། ཐབས་ཆེན་གང་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་སོ། དེས་ན་ཆགས་སོགས་གང་ཤས་ཆེ་བ་དེ་ཆེད་དུ་བསྐྱེད་ནས་རང་ཐོག་ཏུ་ཀློད་ཅིང་། དེ་རང་གི་ངོ་བོའི་ངང་ལ་རྒྱང་འཚོ་བྱས་པས། རྟོག་པ་དེ་རང་གི་སྟེང་དུ་གཉུག་མའི་རང་ཞལ་མཐོང་སྟེ་མཚན་མ་རང་སར་གྲོལ་བར་འགྱུར་རོ། །གཉུག་མའི་ཤེས་པ་མཐའ་བྲལ་དེ་ཉིད་ཀྱི་རྩལ་ཉོན་མོངས་སྣ་ཚོགས་སུ་ཤར་བ་རང་ངོ་ཤེས་ན་རྟོག་པས་འཆིང་མི་ནུས་པས། དྲན་པའི་ཐག་པས་མི་བསྡམ་པར་གཉུག་མའི་ངང་དུ་རྒྱ་ཡན་ཏུ་བཞག་གོ། །སྒྲུབ་པ་ལག་ལེན་དུ་འདེབས་པ་ལ་གནད་ལྔ་འཛོམ་པས་ལམ་གྱི་འགགས་བསྡུ་དགོས། གང་ཞེ་ན། མོས་གུས་བསྒོམ་གྱི་མགོ་བོ། ཞེན་ལོག་བསྒོམ་གྱི་རྐང་པ། ལྟ་བ་བསྒོམ་གྱི་མིག །དྲན་པ་བསྒོམ་གྱི་སྲོག །སྙིང་རྗེ་བསྒོམ་གྱི་སྙིང་། འདི་ལྔ་འཛོམ་དགོས། རྩེ་གཅིག་གི་ངོ་བོ་ཞི་གནས། སྤྲོས་བྲལ་གྱི་ངོ་བོ་ལྷག་མཐོང་། རོ་གཅིག་གི་ངོ་བོ་དབྱེར་མེད། བསྒོམ་མེད་ཀྱི་ངོ་བོ་བློ་འདས། དོན་ལ་གནས་ཐོག་ངོ་ཤེས་པ་རྩེ་གཅིག །འགྱུ་ཐོག་ངོ་ཤེས་པ་སྤྲོས་བྲལ། སྣང་ཐོག་ངོ་ཤེས་པ་རོ་གཅིག །གཞི་ཐོག་ན་ངོ་ཤེས་པ་བསྒོམ་མེད་ཡིན་གསུངས་སོ།། །།པདྨ་བཛྲ་པས་བྲིས་པ་དགེའོ།། །།
རྡོར་སེམས་བསྒོམ་བཟླས་ཀྱི་འབྲེལ་བ་ལམ་ཟབ་རྡོ་རྗེའི་གསང་ལམ།
༄༅།།རྡོར་སེམས་བསྒོམ་བཟླས་ཀྱི་འབྲེལ་བ་ལམ་ཟབ་རྡོ་རྗེའི་གསང་ལམ་ཞེས་བྱ་བ་བཞུགས་སོ།། དུས་གསུམ་ཀུན་ཏུ་མི་འགྱུར་རིག་པའི་གཤིས། །བསམ་བརྗོད་དཔེ་བྲལ་ནམ་མཁའི་རང་བཞིན་ཅན། །ཁྱབ་བདག་བླ་མ་རྡོ་རྗེ་སེམས་དཔའ་ལ། །རང་བབ་གཉུག་མའི་ངང་ནས་ཕྱག་བགྱིའོ། །དེ་ལ་འདིར་སྐྱབས་མགོན་མཆོག་གི་དག་སྣང་གི་ཆོས་སྡེར་གཏོགས་པའི་རྡོ་རྗེ་སེམས་དཔའི་བསྒོམ་བཟླས་དངོས་གཞིའི་ལམ་དང་འབྲེལ་བ་ཞིག་སྣང་བ་འདིའི་དོན་ཉུང་གསལ་གོ་བདེར་བཤད་པ་ལ། སྔོན་འགྲོ་རང་རྒྱུད་དག་བྱེད་བླ་མ་རྡོ་རྗེ་སེམས་དཔའི་བསྒོམ་བཟླས། དངོས་གཞི་ཁྱད་པར་ཅན་གྱི་ལམ། རྗེས་ཀྱི་བསྔོ་བ་དང་རྒྱུན་གྱི་རྣལ་འབྱོར་ཇི་ལྟར་བྱ་བ་བཅས་གསུམ་ལས། དང་པོ་ནི་ཨེ་མ་ཧོ་ཞེས་ངོམ་ཞིང་ངོ་མཚར་བའི་ཚིག་གིས་འགོ་དྲངས་ཏེ་གང་ལ་ངོ་མཚར་ན། དངོས་གཞིའི་རྟོགས་པ་ཁྱད་པར་ཅན་རྒྱུད་ལ་སྐྱེ་བའི་གེགས་སུ་གྱུར་པའི་ཉམས་ཆགས་ཉེས་ལྷུང་ཐམས་ཅད་འཕྲལ་དུ་དག་པར་བྱེད་པའི་ཐབས་ཁྱད་པར་ཅན་འདི་ལྟ་བུ་ཡོད་དོ་ཞེས་སྒོམ་བྱའི་དོན་ལ་ངོ་མཚར་བའོ། །དེ་ཇི་ལྟ་བུ་ཞེ་ན། རང་ལུས་ཐ་མལ་པ་ཡི་སོགས་ཀྱིས་བསྟན་པའི་དོན་འདི་ལྟར། རང་ལུས་ཐ་མལ་པ་སྟེ་ད་ལྟའི་སྣང་ཚུལ་འདི་ལྟར་གནས་པའི་སྤྱི་བོའི་གཙུག་གི་སྟེང་རེག་ཐོགས་མེད་པར་མཐོ་གང་ཙམ་གྱི་ནམ་མཁར་རང་བྱུང་གི་པདྨའི་གདན་ཡངས་ཤིང་རྒྱ་ཆེ་བའི་གེ་སར་སྟེང་དུ་ཐབས་ཤེས་མཚོན་པའི་ཉི་མ་འོག་དང་ཟླ་བ་སྟེང་དུ་བྱས་པའི་གདན་གྱི་ལྟེ་བ་ལ་ཧཱུྃ་ཡིག་དཀར་པོ་གྱེན་དུ་འགྲེང་བ་བསམ། དེ་ལས་འོད་ཟེར་མཐའ་ཡས་པར་སྤྲོས་པས་ཕྱོགས་བཅུའི་སངས་རྒྱས་སྲས་དང་བཅས་པའི་ཐུགས་དམ་བསྐུལ་ཞིང་སྐུ་གསུང་ཐུགས་ཀྱི་བྱིན་རླབས་བསྡུས། སེམས་ཅན་ཐམས་ཅད་ཀྱི་སྒྲིབ་པ་སྦྱངས་ཏེ་དོན་གཉིས་བྱས་འོད་ཟེར་ཚུར་འདུས་ཧཱུྃ་ལ་ཐིམ། དེ་འོད་དུ་ཞུ་ནས་ཡོངས་སུ་གྱུར་བ་ལས་བླ་མ་རྡོ་རྗེ་སེམས་དཔའ་སྐུ་མདོག་དཀར་པོ་སྟོན་ཀའི་ཟླ་བ་ཉ་གང་བ་ལྟར་མཛེས་པའི་མདང་དང་ལྡན་པ་། དྲི་མ་མེད་པས་གསལ་བ། འོད་ཟེར་འབར་བས་འཚེར་བ། མཚན་དང་དཔེ་བྱེད་ཀྱིས་བརྒྱན་པས་ལྷུན་སྡུག་པ། ཐམས་ཅད་ཟིལ་གྱིས་གནོན་པས་གཟི་བྱིན་དང་ལྡན་པ་སྟེ་ཞི་གནས་ཀྱི་ཉམས་བཞི། ཕྱག་ཞབས་ཀྱི་སོར་མོ་རྣམས་གྱོང་ཁེངས་མེད་པས་མཉེན་པ་། ཡན་ལག་རྣམས་ཁྱོན་ཡངས་ཤིང་ཟླུམ་རྒྱས་བྱིན་གྱིས་ཕྲ་བས་ལྕུགས་པ་། སྐུའི་སྟོད་སྨད་ཀྱི་ཕྲ་སྦོམ་སྐབས་ཕྱེད་ཅིང་སྐུ་ཤ་ལྷོད་པོར་མ་གྱུར་པས་འཁྲིལ་བག་ཆགས་པ། ཚིག་མདུན་རྣམས་ཕྲ་ཞིང་སྐུ་དྲང་ལ་འགུལ་སྐྱོད་བདེ་བས་ལྡེམ་པ་། སྐུ་ཤ་རྒྱས་ཤིང་ལྤགས་པ་སྲབ་ལ་རེག་བྱ་འཇམ་པས་གཞོན་ཚུལ་ཅན་ལྷག་མཐོང་གི་ཉམས་ལྔ་སྟེ་ཞི་བའི་ཉམས་དགུ་དང་ལྡན་པ་། དར་དཀར་པོའི་སྟོད་གཡོགས་། ཚིག་གུའི་སྨད་དཀྲིས། མཐིང་གའི་ཟི་ལྡིར། སྣ་ཚོགས་པའི་ཅོད་པཎ། གར་གྱི་ཕུ་དུང་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། རྣ་ཆ། མགུལ་རྒྱན། སེ་མོ་དོ། དོ་ཤལ། ཕྱག་གདུབ། སྐ་རག་སྟེ་རིན་པོ་ཆེའི་རྒྱན་བརྒྱད། དེ་གཉིས་བསྡོམ་པས་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་གྱིས་སྤྲས་པ་། ཕྱག་གཡས་གསེར་གྱི་རྡོ་རྗེ་ཐུགས་ཀར་གཏོད་ཚུལ་གྱིས་འཛིན་ཅིང་། གཡོན་པས་དངུལ་དཀར་གྱི་དྲིལ་བུ་དཀུར་བརྟེན་པ་། ཐ་མལ་གདོས་བཅས་ཤ་ཁྲག་གི་ཕུང་པོ་མ་ཡིན་པ་དྭངས་མ་འོད་ཀྱི་རང་བཞིན་སྣང་སྟོང་ནམ་མཁའི་འཇའ་ཚོན་ལྟ་བུ། ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་། ཆེ་ཆུང་གི་ཚད་མ་ངེས་པ་སྣ་ཚོགས་སུ་སྤྲུལ་བ་སྟེ་རང་གི་བློ་རྩལ་སྦྱོང་ཕྱིར་ཆེ་བ་རི་རབ་ཙམ་ནས་ཆུང་བ་ཡུངས་དཀར་གྱི་འབྲུ་ཚད་ཙམ་སྐྱེས་མཆེད་རྫོགས་ལ་རྣམ་པ་གསལ་བར་བསྒོམ། དེ་ནི་སྐུ་ཕྱག་རྒྱའི་རྣལ་འབྱོར་རོ། །དེ་ནས་གསུང་བཟླས་པའི་རྣལ་འབྱོར་ནི། དེའི་ཐུགས་ཀར་པདྨ་དཀར་པོ་དང་ཟླ་བའི་དཀྱིལ་འཁོར་གྱི་དབུས་སུ་ཐུགས་སྲོག་ཧཱུྃ་ཡིག་གསལ་འཚེར་སྤུ་རྩེས་བྲིས་པ་ལྟ་བུའི་མཐའ་སྐོར་དུ་ཡི་གེ་བརྒྱ་པའི་སྔགས་འཕྲེང་གིས་བསྐོར་བ་ཤེལ་དཀར་གྱི་ཕྲེང་བ་བསྒྲིག་པ་འདྲ་བའི་རྣམ་པ་དེ་ལས་འོད་ཟེར་དཀར་སེར་དམར་ལྗང་མཐིང་ཁ་སྟེ་ཁ་དོག་སྣ་ལྔ་ཕྱོགས་བཅུའི་ཞིང་ཁམས་ཐམས་ཅད་དུ་ཁྱབ་པར་སྤྲོས་པས་སངས་རྒྱས་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ་ཏེ། སྐུ་གསུང་ཐུགས་ཀྱི་བྱིན་རླབས་ཐམས་ཅད་བདུད་རྩིའི་འོད་ཟེར་ཁ་དོག་སྣ་ཚོགས་པའི་རྣམ་པར་འདུས་ཏེ་སྤྱི་བོའི་བླ་མ་རྡོ་རྗེ་སེམས་དཔའི་སྐུ་གསུང་ཐུགས་ལ་ཐིམ་པར་བསམ་ནས། དེ་ལ་གསོལ་འདེབས་ཀྱི་ཚུལ་དུ་ཡི་གེ་བརྒྱ་བ་ཚིག་གིས་བར་མ་ཆོད་པ་ཅི་ནུས་བཟླའོ། །དེ་ནས་གཉེན་པོ་སྟོབས་བཞི་ཚང་པའི་སྒོ་ནས་བདུད་རྩི་འབེབས་སྦྱོང་བྱ་བ་ནི། བླ་མ་རྡོ་རྗེ་སེམས་དཔའི་སྐུ་ལས་བདུད་རྩི་འོ་མ་ལྟ་བུའི་རྒྱུན་བབས་ཏེ་རང་གི་ཚང་བུག་ནས་ཞུགས། བདག་གིས་ཚེ་རབས་ཐོག་མེད་དུས་ནས་ད་ལྟའི་བར་དུ་བསགས་པའི་སྡིག་སྒྲིབ་ཉེས་ལྟུང་ཅི་བསགས་པ་ཐམས་ཅད་བཀྲུས་ཞིང་བཤལ་བར་བྱས་ཏེ་འོག་སྒོ་ནས་ཐོན་རྣག་ཁྲག་དུད་ཁུ་དང་། སྦལ་སྦྲུལ་སྡོམ་སྡིག་གི་རྣམ་པ་འདྲ་བའི་སྲོག་ཆགས་གྱི་དབྱིབས་སོགས་མང་དུ་བྱུང་བ་ས་གས་པའི་འོག་ཏུ་སོང་། དེནས་འཆི་བདག་དང་ལན་ཆགས་བུ་ལོན་གྱི་བདག་པོ་རྣམས་འཐོན་པའི་ཁར་སོང་ནས་ཅིབ་བཅིབ་བཏུང་བས་དུས་མིན་གྱི་འཆི་བ་བཟློག་གདོན་བགེགས་རྣམས་ཚིམ་པའི་བཟའ་བཏུང་གི་མཆོག་ཏུ་གྱུར་པར་བསམ་དེ་ནི་སྡིག་སྒྲིབ་དག་བྱེད་ཀྱི་སྦྱོར་བའོ། །དེ་ནས་སྤྱི་བོའི་ལྷ་དེ་འོད་དུ་ཞུ་ནས་རྡོ་ཚན་གྱི་སྟེང་དུ་ཁ་བ་བབས་པ་བཞིན་རང་ལ་ཐིམ་ནས་དབྱེར་མེད་དུ་འདྲེས་པར་བསམ་སྟེ་ཐུགས་ཡིད་བསྲེས་ལ་ཅི་གནས་ཀྱི་ངང་དུ་བཞག་གོ། དེ་ཡོན་ཆད་སྔོན་འགྲོའི་ཁྲིད་དོ། །གཉིས་པ་དངོས་གཞི་ཁྱད་པར་ཅན་གྱི་ལམ་ལ་བརྡའ་དོན་རྟགས་གསུམ་ལས། དང་པོ་མཚོན་བྱེད་བརྡའི་རྡོ་རྗེ་སེམས་དཔའ་ནི། རང་གི་སྙིང་ཁར་བླ་མ་དང་རང་རིག་དབྱེར་མེད་ཀྱི་ངོ་བོ་རྡོ་རྗེ་སེམས་དཔའ་ཚོན་གང་བ་ཙམ་རྒྱན་དང་ཆ་ལུགས་རྫོགས་པ་ཡེ་ཤེས་ལྔའི་རང་མདངས་ཀྱི་འོད་ཟེར་ལམ་ལམ་འཕྲོ་བ་ཞིག་ལ་སེམས་རྩེ་གཅིག་ཏུ་གཏད་ནས་བཞག་པ་འདི་ནི་རང་རིག་འགྱུར་བ་མེད་པའི་དོན་ཡེ་ཤེས་ལྔར་མཚོན་པའི་བརྡའ་ཡིན་ནོ། །གཉིས་པ་མཚོན་བྱ་དོན་གྱི་རྡོ་རྗེ་སེམས་དཔའ་གནད་ལ་བརྟེན་ནས་ངོ་སྤྲོད་པ་ནི། ལུས་གནད་སེངྒེ་གླང་ཆེན་དྲང་སྲོང་གི་ཚུལ་ཏེ་བཞུགས་སྟངས་གསུམ་དང་ལྡན་པས། ཡུལ་གྱི་གནད་ནམ་མཁའ་སྤྲིན་བྲལ་གྱི་དུས་སུ་ཉི་མ་ཤར་བའི་ཚེ་ཉི་མའི་འོག་དང་གཡས་གཡོན་གྱི་ཁྲུ་གང་ཙམ་གྱིས་མཁའ་ལ། རླུང་གནད་རང་བབས་དལ་བར་བཞག སྒོའི་གནད་ཙཀྵུ་སྟེ་མིག་ཟིམ་བུས་གྱེན་དུ་ལྟ་བ། ཐད་ཀར་ཟུར་དུ་ལྟ་བ། ཕབས་ཏེ་ཐུར་དུ་བལྟ་བ་སྟེ་སྐུ་གསུམ་གྱི་གཟིགས་སྟངས་དང་བསྟུན་ནས་ཤར་དུ་བལྟ་ཞིང་། རིག་པའི་གནད་དུ་ཕྱིའམ་ནམ་མཁའ་དག་པའི་ངང་དང་། ནང་གི་སེམས་ཉིད་དག་པའི་ཡེ་ཤེས་དང་། བར་གྱི་རྩ་ལམ་དག་པ་དང་གསུམ་གཅིག་ཏུ་བསྲེས་ཏེ་དབྱིངས་རིག་དབྱེར་མེད་ཡིད་དཔྱོད་དང་འབྲལ་བའི་ཤེས་པ་ཟང་ཐལ་རྗེན་ལ་ཕུད་ནས་དེའི་ངང་དུ་དུས་གསུམ་གྱི་རྟོག་པ་ཕྲལ་ནས་འཇོག་པ་ཡིན་ཏེ། ནམ་མཁའ་ཆེ་ལས། སྔར་རྗེས་མི་དཔྱད་འདས་པའི་འདུ་ཤེས་འདོར། །ཕྱི་སྔོན་མི་བསུ་ཡིད་ཀྱི་འབྲེལ་ཐག་བཅད། །བར་དུ་འཛིན་མེད་ནམ་མཁའི་ངང་ལ་བཞག །ཅེས་གསུངས་པ་ལྟར་རོ། །དེ་ལྟར་བཞག་པའི་ཚེ་རིག་པའི་ངོ་བོ་གཤིས་གང་དུ་ཡང་མ་གྲུབ་པ་མདངས་བདེ་ཆེན་དུ་མ་འགག་པ། རྩལ་སྣ་ཚོགས་སུ་སྣང་བ། བསྒོམ་བྱ་སྒོམ་བྱེད་ཐམས་ཅད་ལས་འདས་པའི་ཤེས་པ་གསལ་རིག་རྗེན་ནེ་བ་དེ་ཡེ་ཤེས་ལྔའི་རང་བཞིན་དོན་གྱི་རྡོ་རྗེ་སེམས་དཔའ་འམ་ཀུན་ཏུ་བཟང་པོ་ཞེས་བྱ་བ་དེ་ཁོ་ན་ཉིད་ཡིན་ནོ། །དེ་ལྟར་ཡང་བླ་མའི་མན་ངག་ལས། བྱང་ཆུབ་སེམས་ཀྱི་རང་བཞིན་འདི། །ཀུན་ཏུ་བཟང་པོས་བསྟན་པར་དཀའ། །མིང་ཙམ་འདི་ཞེས་བརྗོད་པའི་འདི། རྡོ་རྗེ་སེམས་དཔས་མཚོན་དུ་མེད། །རིག་པ་སེམས་ཀྱི་ངོ་བོ་ཉིད། །སྤྲོས་མེད་རྣམ་དག་ཡེ་ཤེས་ཡིན། །ཀུན་གཞི་ཡེ་ནས་མ་བཅོས་པ། །བདེ་ཆེན་རང་ཤར་ཀློང་དུ་ཞོག །ཅེས་སོ། །རྗེས་ཤེས་སུ་རྟོག་པ་གང་ཤར་ཐམས་ཅད་ཤར་གྲོལ་རིས་མེད་དུ་དག་པ་ནི་ཉམས་སྐྱོང་བའི་ཚུལ་ཡིན་ནོ། །གསུམ་པ་རྟགས་ཀྱི་རྡོ་རྗེ་སེམས་དཔའ་ནི། དེ་ལྟར་བསྐྱངས་པས་ནང་དུ་རིག་སྟོང་ཐིག་ལེ་ཆེན་པོར་སྐུ་དང་ཞིང་ཁམས་ཐམས་ཅད་ཡེ་རྫོགས་སུ་བཞུགས་པའི་རང་གདངས་སྒོ་རྒྱང་ཞག་ཆུའི་སྒྲོན་མ་ནས་བརྒྱུད་དེ་དབང་པོའི་མངོན་སུམ་ལ་འཆར་སྒོ་སྣ་ཚོགས་སུ་སྣང་ངོ་། །དེ་ཡང་ཇི་ལྟར་ན་ལམ་སྣང་བ་བཞིའི་རིམ་པ་ལྟར་འཆར་ཏེ། དང་པོ་དབྱིངས་ཀྱི་རང་གདངས་མཐིང་ཁ་ཆེན་པོའི་གཞི་ལ། འོད་ལྔའི་ཐིག་ལེ་དང་ཐིག་ཕྲན་རྩིབ་ཤར་དང་གྱེན་འགྲེང་སོགས་ཀྱི་སྣང་བ་དང་། རིག་པའི་རང་གདང་རྡོ་རྗེ་ལུ་གུ་རྒྱུད་གསེར་གྱི་སྐུད་པ་ནམ་མཁར་བརྐྱང་པ་ལྟ་བུ་ལ་ཉ་མིག་ལྟ་བུའི་དབྱིབ་ཀྱི་ཐིག་ལེ་ཕྲ་མོས་བརྒྱན་པ་འགྲོ་འོང་གི་རྣམ་པ་ཅན་དུ་འཆར་བ་དང་། གཞན་ཡང་འོད་ལྔའི་སྣང་བ་པདྨ་སྟོང་ལྡན་དང་མཆོད་རྟེན་ཟ་ར་ཚག་སྟེ་དྲྭ་བ་དང་དྲྭ་ཕྱེད་ལྟ་བུ་དང་ཐིག་ལེ་གསུམ་འབྲེལ་དུ་སྣང་བ་ཚུན་ཆད་ཆོས་ཉིད་མངོན་གསུམ། དེ་ནས་ཐིག་ལེ་ལྔ་ཚོམ་འོད་ལྔའི་ར་བ་ཅན་གྱི་ནང་དུ། དབྱངས་གསལ་གྱི་ཡིག་འབྲུ། རིགས་ལྔའི་རྡོ་རྗེ་དང་རིན་པོ་ཆེ་སོགས་དང་། རིགས་ལྔ་གང་རུང་གི་སྐུ་རྐྱང་སྣང་བ་ཚུན་ཆད་ཉམས་གོང་འཕེལ་དང་། དེ་ནས་རིགས་ལྔ་ཡབ་ཡུམ་ཟུང་འབྲེལ་ལ་རིགས་ཆུང་གི་སེམས་དཔའ་དང་བཅས་པ་། ཧེ་རུ་ཀ་རིགས་ལྔ་ཡབ་ཡུམ་གནས་ཡུལ་སྒོ་མ་དབང་ཕྱུག་མའི་ཚོགས་དང་བཅས་ཏེ་ཞི་ཁྲོའི་སྐུ་སོགས་ཀྱི་སྣང་བ་ཆུང་དང་ཆེ་བའི་ཚད་རྣམ་འགྱུར་ཆ་ལུགས་མ་ངེས་སྣ་ཚོགས་སུ་སྣང་བས་དབང་པོའི་སྣང་ཡུལ་ཐམས་ཅད་དུ་ཁྱབ་པར་ཤར་ནས་ཁྲེག་གེར་གནས་པ་ཚུན་ཚད་རིག་པ་ཚད་ཕེབས་དང་། དེ་ལྟར་སྣང་བ་ལ་དངོས་པོར་འཛིན་པའི་ཞེན་པ་མེད་པས་ནང་དུ་ཡིད་དཔྱོད་ཟད་། ཕྱི་རུ་སྣང་བ་ཟད་། བར་དུ་རྡོས་བཅས་ཟད་དེ་རིག་པ་གདོད་མའི་གཞི་ལ་གྲོལ་དུ་ཉེ་བ་ན་ཆོས་ཉིད་ཟད་པའི་སྣང་བ་ཞེས་བྱའོ། །དེ་ལྟར་ནང་རིག་པའི་་ངོ་བོ་ཀ་དག་ཟང་ཐལ་དུ་སྐྱོང་བ་ཁྲེགས་ཆོད་དང་། རིག་གདངས་འོད་གསལ་ལྷུན་གྲུབ་ཀྱི་སྣང་བ་ལ་བལྟ་བ་ཐོད་རྒལ་གྱི་ཉམས་ལེན་ཏེ་ཟུང་འཇུག་གི་ལམ་མཐར་ཕྱིན་ནས་རིག་པ་ཀ་དག་གིས་ས་ལ་གཏན་སྲིད་ཟིན་ལྷུན་གྲུབ་འཁོར་འདས་ཀྱི་སྣང་བ་གཞི་ལ་དག་སྟེ་ནང་དབྱིངས་གཞོན་ནུ་བུམ་སྐུའི་ཀློང་དུ་མངོན་པར་རྫོགས་པར་སངས་རྒྱས་ནས་ནམ་མཁའ་དང་འཁོར་བ་ཇི་སྲིད་བར་དུ་རྩོལ་རྟོག་མེད་པའི་ཕྲིན་ལས་རྒྱུན་མི་ཆད་པར་འཇུག་པར་ཤོག་ཅེས་པ་ནི་མཐར་ཐུག་གི་འབྲས་བུ་བླ་ན་མེད་པའོ། །དེ་ཡན་ཆད་དངོས་གཞིའོ། །གསུམ་པ་རྗེས་ཀྱི་ཁྲིད་ལ་གཉིས་ལས་དང་པོ་བསྔོ་བ་ནི། དེ་ལྟར་ཡང་ཟབ་རྨད་དུ་བྱུང་བའི་ལམ་བསྒོམས་པའི་དགེ་བ་དེས་གཞན་དོན་དུ་མཁའ་ཁྱབ་ཀྱི་སེམས་ཅན་ཐམས་ཅད་དཔལ་ཀུན་ཏུ་བཟང་པོའི་ས་ལ་འདྲེན་པ་དང་། རང་དོན་དུ་བདག་དང་རྡོ་རྗེ་སེམས་དཔའ་གཞི་འབྲས་དབྱེར་མེད་དུ་མ་རོ་གཅིག་གི་ངོ་བོར་སངས་རྒྱས་པར་ཤོག་ཅེས་པའོ། །གཉིས་པ་རྒྱུན་གྱི་རྣལ་འབྱོར་ནི། ཟ་ཉལ་འགྲོ་འདུག་གི་སྤྱོད་ལམ་ཐམས་ཅད་དུ་རྩོལ་རྟོག་རང་ངོ་ཤེས་པའི་དྲན་རིག་དང་མ་བྲལ་བས་འཁྲུལ་སྣང་གང་ཤར་ཐམས་ཅད་རང་ཤར་རང་གྲོལ་དུ་བཏང་ནས་བློ་འདས་ཀྱི་རིག་པ་རྗེན་པ་དེ་ཡི་ངང་དུ་ཉིན་མཚན་ཁྱད་མེད་མཉམ་རྗེས་རོ་གཅིག་ཏུ་འདྲེས་པའི་སྒོམ་མེད་ཆུ་བོའི་རྒྱུན་གྱི་རྣལ་འབྱོར་ལ་ཤོག་ཅིག་ཅེས་པའོ། །གཞན་ཡང་དགེ་བ་འདི་ཡིས་སོགས་ནི་གོ་སླའོ། །མཛད་བྱང་ཨོ་རྒྱན་ཆེ་མཆོག་དག་སྣང་སོགས་གདམས་པ་སྟེ་དོན་གོ་སླའོ། །སྨྲས་པ། དེ་ལྟར་རྒྱུད་ལུང་མན་ངག་གི །གནས་བསྡུས་འོད་གསལ་སྙིང་པོའི་ལམ། །འཆོལ་བར་སྨྲ་བ་མི་འོས་ཀྱང་། །གཅོལ་ཆུང་ངག་གི་ལམ་ནས་ཐལ། །ཉེས་པ་ཅི་མཆིས་བླ་མ་དང་། །ལྷ་དང་མཁའ་འགྲོའི་ཚོགས་ལ་བཤགས། །དགེ་བས་འཁོར་བ་དོང་སྤྲུག་ནས། །གདོད་མའི་གཞི་ལ་གྲོལ་བར་ཤོག །བུདྡྷ་རསྨིས་བསྐུལ་བའི་ངོར། །མདོ་མེད་པདྨ་བཛྲ་པས། །བླ་མའི་གདམས་ངག་ཟབ་མོའི་དོན། །ལྷུག་པར་བཀྲོལ་ནས་སྨྲས་པའོ།། དགེའོ།།
སྔ་འགྱུར་རྙིང་མའི་གཞུང་ལ་བརྒལ་བའི་ལན་ལུང་དང་རིགས་པའི་སྐྱ་རེངས་དང་པོ།
༄༅།།སྔ་འགྱུར་རྙིང་མའི་གཞུང་ལ་བརྒལ་བའི་ལན་ལུང་དང་རིགས་པའི་སྐྱ་རེངས་དང་པོ་ཞེས་བྱ་བ་བཞུགས་སོ།། རྒྱལ་བ་རྫོགས་པའི་སངས་རྒྱས་ལ་ཕྱག་འཚལ་ལོ། །དྲི་བྲལ་མཁྱེན་པས་ཤེས་བྱ་ཀུན་གཟིགས་ནས། །ལེགས་འདོམས་གསུང་གིས་ལུས་ཅན་ཐར་ལམ་དུ། །དཀྲི་བའི་མཛད་བཟང་སྲིད་པའི་མཐར་འཕྲོ་བའི། །སྟོན་པ་མཚུངས་མེད་དེ་ལ་ཕྱག་འཚལ་ལོ། །རྒྱལ་ཀུན་གསུང་གི་དབང་ཕྱུག་ཧེ་རུ་ཀ །གྲུབ་བརྒྱའི་གཙོ་བོ་འཛམ་གླིང་མཛེས་པའི་རྒྱན། །གངས་ལྗོངས་བསྟན་པའི་ཤིང་རྟ་གཅིག་པུ་པ། །ཨོ་རྒྱན་སངས་རྒྱས་གཉིས་པས་དགེ་ལེགས་སྩོལ། །སྲིད་པའི་འཁྲི་ཤིང་གཅོད་ལ་ཆེས་དཔའ་བའི། །མཁྱེན་རབ་རལ་གྲིའི་གཉེན་གཅིག་ལྷག་པའི་ལྷ། །འཇམ་པའི་དབྱངས་དེས་བདག་དང་ཁྱོད་ཀྱི་ཡང་། །ཐེ་ཚོམ་དྲྭ་བ་མཐའ་དག་གཅོད་པར་མཛོད། །བསིལ་ལྡན་གངས་རིའི་ལྗོངས་འདི་རུ།། བཙད་པོ་ལྷ་རི་སྙན་ཤལ་ནས། །མངའ་བདག་ཁྲི་རལ་ཡན་ཆད་ཀྱི། །ཆོས་རྒྱལ་རྣམས་ཀྱི་སྐུ་རིང་ལ། །པཎ་ཆེན་ལྷ་རིག་སེང་གེ་ནས། །སྨྲི་ཏི་ཛྙཱ་ནའི་བར་དག་དང་། །ལོ་ཙཱ་ཐུ་མི་སམྦྷོ་ནས། །ཆོས་ཀྱི་བཟང་པོའི་བར་དག་ཏུ།། བྱོན་པའི་ལོ་པཎ་དེ་རྣམས་ཀྱིས། །བསྒྱུར་བའི་མདོ་རྒྱུད་དགོངས་འགྲེལ་བཅས།། ཇི་སྙེད་བཞུགས་པ་ཐམས་ཅད་ལ། །སྔ་འགྱུར་རྙིང་མ་ཞེས་སུ་གྲགས། །དུས་དེའི་ཆོས་རྒྱལ་ལོ་པཎ་ཚོགས། །ཕལ་ཆེར་ས་བཅུའི་དབང་ཕྱུག་ཏུ། །ཚད་མའི་སྐྱེས་བུས་ལུང་བསྟན་པར། །ཚད་མས་གྲུབ་པ་མ་ཡིན་ནམ། །དེས་ན་ལུང་དོན་རིགས་པ་ཡིས། །རྣམ་པར་དཔྱོད་པའི་བློ་ལྡན་ཞིང་། །གཟུ་བོར་གནས་པའི་གང་ཟག་རྣམས། །ལུགས་དེར་ཐེ་ཚོམ་ཟ་མི་སྲིད། །འོན་ཀྱང་བློ་མཐུ་ཞན་པ་དང་། མི་དགེའི་བཤེས་ཀྱིས་ཟིན་པ་དང་། །ཕྱོགས་ལྷུང་གདོན་གྱིས་གཙེས་པ་རྣམས། །ཐེ་ཚོམ་ལོག་ལྟས་བཅིང་བར་སྣང་། །དེ་ལྟ་ན་ཡང་ཁྱེད་ཅག་གིས། །ལྟར་སྣང་སྒྲོ་སྐུར་ཙམ་མིན་པར། །ཡང་དག་ལུང་དང་རིགས་པ་ཡིས། །རྙིང་གཞུང་ལོག་པར་སྒྲུབ་མི་ནུས། །ཅིའི་ཕྱིར་ཞེ་ན་གཞུང་དེ་ཀུན། །གལ་ཏེ་ལོག་པ་ཉིད་ཡིན་ན། །འདུལ་བ་ཤེར་ཕྱིན་དཀོན་བརྩེགས་དང་། །ཕལ་ཆེན་ལ་སོགས་མདོ་ཕྱོགས་དང་། །རྣམ་འཇོམས་དོན་ཞགས་མཚན་བརྗོད་དང་། །རྣམ་སྣང་མངོན་བྱང་རྒྱུད་ལ་སོགས། །སྔགས་ཕྱོགས་དེ་དག་དགོངས་འགྲེལ་བཅས། །བཀའ་དང་བསྟན་བཅོས་ཕལ་ཆེ་བ། །རྙིང་མའི་ལོ་པཎ་གྱིས་བསྒྱུར་ཕྱིར། །ཁྱོད་ལ་ལོག་པའི་ཆོས་སུ་འགྱུར། །དེ་ལྟ་ན་ནི་གངས་ལྗོངས་འདིར། །ཡང་དག་ཆོས་ཀྱི་སྐལ་བ་ཕྲ། །གལ་ཏེ་མདོ་དང་ཕྱི་རྒྱུད་སོགས། །དེ་རྣམས་ལོག་པ་མ་ཡིན་ཀྱང་། །རྙིང་མའི་བླ་མེད་རྒྱུད་སྡེ་རྣམས། །ལོག་པ་ཡིན་ཅེས་སྨྲ་ན་ནི། །མཉམ་སྦྱོར་ཟླ་གསང་ཐིག་ལེ་དང་།། གསང་འདུས་ཕུར་པ་རྩ་དུམ་སོགས། །ཚད་མའི་རྒྱུད་སྡེ་དེ་རྣམས་ཀྱང་།། རྣམ་དག་མིན་པར་ཐལ་བར་འགྱུར། །དེ་ཀུན་སྔ་འགྱུར་ཡིན་པའི་ཕྱིར།། འདོད་ན་གསང་སྔགས་གསར་མ་ཡང་། །ཡང་དག་མིན་པར་ཐལ་འགྱུར་ཏེ།། གསར་མ་ལ་ཡང་དེ་ཡོད་ཕྱིར། །གལ་ཏེ་སྔ་འགྱུར་རྙིང་མ་ཡི། །མདོ་ཕྱོགས་ཀུན་དང་གསང་སྔགས་ཀྱི། །ཕྱི་ནང་རྒྱུད་སྡེ་ཕལ་ཆེ་བ། །ཡང་དག་ཉིད་དུ་ཁས་ལེན་ཅིང་། །སྒྱུ་འཕྲུལ་དྲྭ་བ་འདུས་མདོ་དང་། །སེམས་ཀློང་མན་ངག་སྡེ་སོགས་ཀྱི། །རྒྱུད་སྡེ་ཁ་ཅིག་ཆོས་ལོག་ཏུ། །འདོད་ཅེས་ཁྱེད་ཅག་སྨྲ་ན་ནི། །སྒྱུར་བྱེད་ལོ་པཎ་གཅིག་ཉིད་ཀྱིས། །བསྒྱུར་བའི་མདོ་རྒྱུད་ལ་ལ་ཞིག །དག་ཅིང་ལ་ལ་མ་དག་པའི། །གཏམ་འདི་སྡང་ཞུགས་ཙམ་ཞིག་ལས། །རིགས་པས་འཐད་པ་མ་གྲུབ་ཀྱང་། །ཅི་སྟེ་གལ་གྱིས་འཆུ་བྱེད་ན། །འདི་ལ་མཁས་པས་དཔྱད་འོས་པའི། །རྣམ་དག་གཏན་ཚིག་ཅི་ཞིག་ཡོད། །འདི་ལྟར་སྡེབ་སྦྱོར་ཉམས་པ་དང་། །ལེགས་སྦྱར་སྐད་དང་མི་མཐུན་ཅིང་། །གྲོང་གི་སྐད་དང་འདྲེས་སོགས་ཀྱིས། །རྣམ་དག་མིན་པར་འདོད་ཅེ་ན། །ཕྱོགས་སྔའི་རྒྱུད་སྡེ་ཕལ་ཆེར་ལ། །རྟགས་འདི་མ་གྲུབ་ཁ་ཅིག་ལ། །གྲུབ་ཀྱང་དེ་ཡིས་ཆོས་མིན་པར། །ཐལ་བའི་ཁྱབ་པ་སྒྲུབ་མི་ནུས། །དེ་ཡི་རྒྱུ་མཚན་དུས་འཁོར་དང་།། ཕྱག་ཆེན་ཐིག་ལེའི་རྒྱུད་སོགས་ནས། །གསལ་བར་བཤད་པ་མ་མཐོང་ངམ།། དུས་ཕྱིས་རྒྱ་བལ་ཡུལ་གྲུ་འགར། །ཡོངས་སུ་གྲགས་པ་མེད་པ་དང་།། གསར་མའི་ལོ་ཙཱ་བ་རྣམས་ཀྱིས། །མཐོང་ཐོས་མེད་པའི་ཕྱིར་ཞེ་ན། །དེ་ལ་ཁྱབ་པ་མ་གྲུབ་སྟེ། །སངས་རྒྱས་འདས་ནས་ལོ་གྲངས་ནི། །བརྒྱ་ལྷག་ཙམ་དུ་ཐེག་ཆེན་གཞུང་། །ཡོངས་སུ་གྲགས་པར་མ་གྱུར་དང་། །དེང་སང་ཙམ་ནའང་འཕགས་ཡུལ་དུ་། །སྡེ་སྣོད་གསུམ་སོགས་རྒྱལ་བའི་བཀའ། །ཡོད་པའི་ངེས་པ་མ་མཆིས་ཀྱང་། །མེད་པ་ཙམ་གྱིས་མ་དག་པར། །སྒྲུབ་པ་མཁས་པའི་གཞུང་ལུགས་མིན། །ལོ་ཙཱ་འགའ་ཡིས་མ་མཐོང་བ། །གཏན་ཚིགས་ཉིད་དུ་མི་ཆེ་སྟེ། །བྷཾ་ག་ལ་ཡི་རྒྱལ་པོའི་སྲས། །ཡོངས་སུ་རྫོགས་པའི་པཎྜི་ཏ། །གྲུབ་པའི་ས་མཐོར་གཤེགས་གྱུར་པ། །ལྷ་གཅིག་དཱི་པཾ་ཀ་ར་སྟེ། དེས་ཀྱང་སྔོན་ཆད་མ་གཟིགས་པའི། །རྒྱུད་སྡེ་དུ་མ་བསམ་ཡས་ཀྱི། །རྒྱ་དཔེའི་ཁྲོད་ནས་གཟིགས་སོ་ཞེས། །ཇོ་བོའི་རྣམ་ཐར་ཉིད་དུ་གསལ།། མ་མཐོང་མེད་པ་མ་ཡིན་ཅེས། །གསུངས་པ་དེང་འདིར་དྲན་པར་བྱོས། །སྔ་འགྱུར་གཞུང་འདི་ཕྱིས་བྱོན་པའི། །མཁས་པ་མང་པོས་རྩོད་བཅས་སུ།། མཛད་ཕྱིར་རྣམ་དག་མིན་ཅེ་ན། །དེར་ཡང་ཁྱབ་པ་མ་གྲུབ་སྟེ། །སངས་རྒྱས་པ་ལ་མུ་སྟེགས་རྩོད། །ཐེག་ཆེན་གཞུང་ལ་ཉན་ཐོས་རྩོད། །བྱེ་མདོ་སེམས་ཙམ་དབུ་མ་སོགས། །གྲུབ་མཐའ་ཕན་ཚུན་མ་རྩོད་མེད། །གསར་མ་པའང་ནང་ཚན་གྱིས། །ཕན་ཚུན་ཐམས་ཅད་རྩོད་བཅས་ཕྱིར། །ཀུན་ཀྱང་ལོག་པ་ཡིན་ནམ་ཅི། །དཔལ་ལྡན་དུས་ཀྱི་འཁོར་ལོ་དང་། །ལམ་འབྲས་ཞི་བྱེད་གཅོད་ཡུལ་སོགས། །རྒྱུད་དང་མན་ངག་སྙན་རྒྱུད་ཆོས། །ཕལ་ཆེར་རྩོད་བཅས་ཁོ་ནའི་ཕྱིར། །དེ་ཀུན་དོར་བྱར་གྱུར་པས་ན། །ཧ་ཅང་ཉིད་དུ་མ་ཐལ་ལམ།། ཁྱོད་ཀྱིས་འགྱུར་བྱང་མ་འཁོད་དང་། །རྒྱ་འགྲེལ་ཟུར་ཙམ་མེད་དོ་ལོའི།། གཏན་ཚིག་ལྟར་སྣང་ཙམ་བཀོད་ཀྱང་། །དེ་ནི་མ་ངེས་རྟགས་ཡིན་པས།། ཚུལ་དེས་འགོག་པར་ག་ལ་ནུས། །འགྱུར་བྱང་འགྲེལ་པ་ཡོད་མེད་ཀྱིས།། ཆོས་དང་ཆོས་མིན་དབྱེ་བ་ནི། །བློ་གྲོས་ཕུར་ཁུང་ཐུག་པའི་གཏམ། །དེ་ལྟར་ནའང་རྙིང་རྒྱུད་ཕལ། །འགྱུར་བྱང་ཡོད་པ་ཤ་སྟག་སྟེ། །སེམས་སྡེ་སྔ་འགྱུར་བཻ་རོ་དང་། །ཕྱི་འགྱུར་བཱི་མ་ལ་ཡིས་བསྒྱུར། །ཀློང་སྡེའི་སྐོར་རྣམས་ཤྲཱི་སེང་དང་། །བཻ་རོ་གཡུ་སྒྲ་སོགས་ཀྱིས་བསྒྱུར། །མན་ངག་སྡེ་ཡི་རྒྱུད་བཅུ་བདུན།། བཱི་མ་སྐ་ཅོག་ཉང་སོགས་ཀྱིས། །བསྒྱུར་ཞིང་གཞན་ཡང་མདོ་སྒྱུ་སོགས།། འགྱུར་བྱང་རང་རང་གཤམ་ན་གསལ། །ཁ་ཅིག་འགྱུར་བྱང་མ་འཁོད་པས།། མ་དག་ཉིད་དུ་འདོད་མི་ནུས། །དཀོན་མཆོག་རྗེས་དྲན་མདོ་དང་ནི། །སཱ་ལུ་ལྗང་པའི་མདོ་ལ་སོགས། །འགྱུར་བྱང་མེད་པ་འགའ་ཡོད་ཀྱང་། །དེ་དག་རྣམ་དག་མིན་པར་ནི། །དཔྱོད་ལྡན་སུས་ཀྱང་སྨྲ་མི་སྤོབས། །དེ་ཕྱིར་བག་ཡོད་མཛད་ན་ལེགས། །འགྲེལ་པ་མེད་པའང་རྟགས་མ་གྲུབ། །རྒྱུད་རྒྱལ་གསང་བ་སྙིང་པོ་ལ། །རྒྱ་འགྲེལ་རིམ་གཉིས་སྤར་ཁབ་དང་། །ལམ་རིམ་ཉི་འོད་སེངྒེ་ཡི། །རྒྱ་ཆེར་འགྲེལ་སོགས་དུ་མ་དང་། །དགའ་རབ་བཱི་མ་ལ་གཉིས་ཀྱི། །མཚན་བརྗོད་རྫོགས་པ་ཆེན་པོ་རུ། །བཀྲལ་བའི་འགྲེལ་པ་རྣམ་གཉིས་དང་། །སློབ་དཔོན་འཇམ་དཔལ་བཤེས་གཉེན་གྱི། །འགྲེལ་པ་རྡོ་ལ་གསེར་ཞུན་དང་། །སློབ་དཔོན་པདྨ་སཾ་བྷཱ་བའི། །མན་ངག་ལྟ་བའི་ཕྲེང་བ་སོགས། །བཀའ་གཏེར་འགྲེལ་པ་མཐའ་ཡས་པ། །དེང་སང་དུས་ནའང་བཞུགས་པ་མང་། །གཞན་ཡང་བཅུ་བདུན་རྒྱུད་སོགས་ལ། །གནའ་དུས་འགྲེལ་པ་འགའ་མཆིས་ཀྱང་། །དེང་སང་དཔེ་རྒྱུན་དཀོན་པ་ཙམ། །མཚན་རྣམས་རྙིང་མའི་གཞུང་ན་ཡོད། །འགྲེལ་པ་མེད་པས་མ་དག་པར། །འཇོག་ན་དཀོན་བརྩེགས་ཕལ་ཆེན་སོགས། །མདོ་རྒྱུད་མང་ཞིག་ཅིར་འགྱུར་ཨཾ། །དེ་རྣམས་བྱིས་པའི་དགག་ཚུལ་དངོས། །ཡིན་མིན་དཔྱོད་ལྡན་རྣམས་ཀྱིས་ལྟོས། །འགྱུར་ཚུལ་བྲིས་ཀྱང་དེ་དག་ལ། །བསྒྱུར་བའི་དཔང་པོ་མེད་ཅེ་ན། །ལུང་ཟིན་སྤྲུལ་པའི་ཆོས་རྒྱལ་གྱི། །བཞུགས་གནས་ཆོས་འཁོར་རྣམ་པ་གསུམ། །ལུགས་གཉིས་ཁྲིམས་ཀྱི་བཀའ་བཙན་ཞིང་། །མཁས་པའི་སྐྱེ་བོས་གང་བའི་ཡུལ། །བསྒྱུར་གཞི་གནས་ཀྱི་དཔང་པོ་ཡིན། །མདོ་དང་རྒྱུད་སྡེ་དུ་མ་ནས། །རྒྱལ་བའི་ལུང་གིས་བསྔགས་མཛད་ཅིང་། །མི་རབས་དུ་མར་བཞུགས་པ་དང་། །དངོས་སྣང་སྒྱུ་མར་སྟོན་ནུས་པའི། །པད་འབྱུང་ཞི་འཚོ་བཱི་མ་སོགས། །འཕགས་ཡུལ་པཎ་ཆེན་བརྒྱ་རྩ་དང་། །སྐད་རིགས་སུམ་བརྒྱ་དྲུག་ཅུ་ལ། །མཁས་ཤིང་གནས་ཡུལ་བསྒྲོད་ནུས་པའི། །གྲུབ་བརྙེས་ལོ་ཙཱ་བརྒྱ་རྩ་སོགས། །སྒྱུར་བྱེད་གང་ཟག་དཔང་པོ་ཡིན། །དེ་རྣམས་དཔང་དུ་མི་ཆེ་ན། །རྒྱལ་རིགས་རྒྱལ་ས་མ་ཟིན་པར། །མཐའ་ལ་འཁྱར་བའི་སྦྱིན་བདག་དང་། །མཐའ་འཁོབ་ཡམ་བུའི་གྲོང་ཁྱེར་སོགས། །བླུན་པོས་བསྟེན་པའི་ཡུལ་རྣམས་དང་། །གསེར་འདོད་ཨ་ཙར་རྐང་འཁྱམས་དང་། །གྲགས་འདོད་འཕྲལ་སྐད་ཤེས་ཙམ་གྱིས། །ལོ་ཙཱའི་མིང་བཏགས་ཕལ་ཆེར་ཞིག །དཔང་པོ་ཉིད་དུ་ཇི་ལྟར་འོས། །འཛུབ་མོ་བྲང་ལ་ཚུགས་ལ་སོམས། །དཔལ་འཛིན་དམྱལ་བར་སོང་བ་ཡང་། །ཚད་མའི་སྒྲུབ་བྱེད་མིན་ནོ་སྐད། །རྫོགས་སངས་རྒྱས་ལ་སྡང་བ་ཡིས། །ལྷས་བྱིན་དམྱལ་བར་སོང་བ་དང་། །ཐེག་ཆེན་ཆོས་ལ་སྐུར་བཏབ་པས། །ཉན་ཐོས་ལྔ་བརྒྱ་གནས་ངན་དུ། །ལྷུང་བར་མདོ་ལས་བཤད་པ་རྣམས། །སངས་རྒྱས་དང་ནི་ཐེག་ཆེན་གཞུང་། །གཉེན་པོའི་ཡུལ་དུ་གྲུབ་པ་ཡི། །ཆེ་བ་བསྟན་ཕྱིར་མ་ཡིན་ནམ། །དེ་བཞིན་འདིར་ཡང་དཔལ་འཛིན་གྱིས། །སྔ་འགྱུར་གཞུང་ལ་སྐུར་བཏབ་ནས། །རྡོ་རྗེའི་དམྱལ་བར་གཤེགས་པ་དེས། །གཞུང་འདི་རྫོགས་པའི་སངས་རྒྱས་དང་། །མཚུངས་པ་ཉིད་དུ་ཡང་དག་གྲུབ། །དེ་ཕྱིར་སྒྲུབ་བྱེད་ཚད་མ་ཡིན། །དཔལ་འཛིན་ཉིད་ཀྱིས་སྦྱར་བ་ཡི། །གཞུང་དེ་ད་དུང་འདུག་གོ་ལོ། །གཞུང་དེའི་བརྗོད་བྱ་ལུང་རིགས་ཀྱིས། །ཚར་གཅོད་ཟིན་པ་དེ་གས་ཆོག །གཞུང་ཉིད་མེད་འགྲོ་ག་ལ་དགོས། །གཞན་དུ་མུ་སྟེགས་པས་སྦྱར་བའི། །དབང་ཕྱུག་ནག་པོའི་རྒྱུད་དང་ནི། །དབྱུ་གུ་གསུམ་པའི་གཞུང་ལ་སོགས། །ད་དུང་ཡོད་ཅིང་དེ་དག་ལ།། ཚད་མར་བྱེད་པའི་མུ་སྟེགས་པ། །རབ་ཏུ་མང་བའང་ཡོད་པའི་ཕྱིར། །ཕྱོགས་གླང་ཆོས་ཀྱི་གྲགས་པ་སོགས། །རིགས་པའི་དབང་ཕྱུག་དེ་རྣམས་ཀྱིས།། ཚར་མ་ཆོད་ཅེས་སྨའམ་ཅི། །དེས་ན་དེ་འདྲའི་གཞུང་ལུགས་དག །ཡོད་ཀྱང་ལོག་པར་རྟོག་པའི་སྲོག །རིག་པའི་མཚོན་གྱིས་བཅད་ཟིན་པས། །གཞུང་ལུགས་ཤི་བའི་རོ་ཡིན་ནོ། །མདོར་ན་དེ་དང་དེ་འདྲ་བའི། །རྙིང་གཞུང་འགོག་པའི་རིམ་པ་རྣམས། །འགལ་དང་མ་ཁྱབ་ཁྱབ་ཆེས་པའི། །སྐྱོན་གྱི་ཕུང་པོར་གྱུར་པ་མང་། །ངེས་པར་ཆོས་དང་ཆོས་མིན་གྱི། །རྣམ་དབྱེ་ལེགས་པར་ཕྱེ་འདོད་ན། །རྒྱལ་བ་ཉིད་ཀྱིས་རྗེས་གནང་ཞིང་། །རྒྱ་བོད་མཁས་པས་བཞེད་པ་ཡི། །བརྟགས་པ་གསུམ་དང་རྟོན་པ་བཞི། །བཀའ་རྟགས་ཕྱག་རྒྱ་རྣམ་བཞི་དང་། །དངོས་སམ་བརྒྱུད་ནས་དུག་གསུམ་གྱི། །གཉེན་པོར་འགྱུར་དང་མི་འགྱུར་སོགས། །ཚུལ་གསུམ་ལྡན་པའི་ཚད་མ་ཡི། །རིགས་པས་ཞིབ་ཏུ་བརྟག་དགོས་སོ། །དེ་ལྟར་ལེགས་པར་བརྟགས་པ་ན། །རྙིང་མའི་གཞུང་ལུགས་འཁྲུལ་མེད་རྣམས། །བསྲེག་བཅད་བརྡར་བའི་གསེར་ཞུན་བཞིན། །ལྷག་པར་མཛེས་ཀྱིས་གཞན་དུ་མིན། །དེ་ཡི་ཐད་ནས་ཕྱིས་འགྱུར་པའི། །གཞུང་ལུགས་ཕལ་ཆེར་སྣག་ཚའི་ཡུག །བཞག་པ་ཇི་བཞིན་གཟོད་མཐོང་འགྱུར། །འདིར་ནི་གསར་དུ་སྒྲུབ་མི་དགོས། །སྔོན་བྱོན་མཁས་པའི་མཁས་པ་མཆོག །རོང་ཟོམ་ཆོས་ཀྱི་བཟང་པོ་དང་། །རོག་སྟོན་ཤེས་རབ་འོད་ཟེར་དང་། །མཁས་པ་ཐང་སྟོན་ལོ་ཙཱ་བ། །ཀུན་མཁྱེན་བསམ་ཡས་པ་སོགས་ཀྱིས། །སྔ་འགྱུར་བཀར་སྒྲུབ་མཛད་པ་ཡོད། །གཞན་ཡང་རོང་ཟོམ་ཆེན་པོ་ཡིས། །མཛད་པའི་བསྟན་བཅོས་དུ་མ་དང་། །ཀུན་མཁྱེན་དྲི་མེད་འོད་ཟེར་གྱི།། མཛོད་ཆེན་བདུན་སོགས་རྩ་འགྲེལ་དང་། །ཁམས་དབུས་གཙང་གསུམ་ལ་སོགས་པར། །རྙིང་མའི་རྒྱུད་འབུམ་མང་བཞེངས་པའི། །དཀར་ཆག་དེབ་ཐེར་སོ་སོ་དང་། །རྒྱལ་དབང་ལྔ་པ་ཆེན་པོ་ཡི། །གསུང་འབུམ་ཕལ་ཆེར་རྣམས་སུ་ཡང་། །ལུང་དང་རིགས་པ་གཏིང་ཟབ་པས། །དཔྱིས་ཕྱིན་ཉིད་དུ་སྒྲུབ་པ་ཡོད། །སྔོན་དུས་སྔ་འགྱུར་གཞུང་ཉིད་ལ། །ལོག་པར་རྟོག་ནས་རྒོལ་བ་སོགས། །འབྲི་གུང་དགེ་སློང་དཔལ་འཛིན་དང་། །མ་རྟོགས་ཐེ་ཚོམ་ཀྱིས་དྲི་བ། །ཀརྨ་མི་བསྐྱོད་རྡོ་རྗེ་དང་། །དགོངས་གཞི་དང་ནི་དགོས་པ་ལ།། ལྟོས་ནས་གསར་རྙིང་ཐུན་མོང་དུ། །ཡེ་ཤེས་འོད་དང་ཞི་བ་འོད། །ཁུ་དབོན་གཉིས་ཀྱི་འབྱམས་ཡིག་དང་། །འཁོན་འཛིན་སྙིང་ནད་འབའ་ཞིག་གིས། །བྲིས་པ་འགོས་ལོའི་འབྱམས་ཡིག་དང་། །གཞན་ཡང་ས་པཎ་བུ་སྟོན་དང་། །པཎ་ཆེན་ཤཱཀ་མཆོག་ལ་སོགས་པས། །བརྟག་དཔྱད་གཞིར་མཛད་དགག་སྒྲུབ་བཅས། །མང་ཞིག་མཛད་པ་དེ་དག་གི །ལན་དང་དགོངས་པའི་གསལ་བྱེད་སོགས། །རིམ་པར་སྤྲོས་པ་རྒྱ་ར་བ། །ནམ་མཁའ་ཆོས་ཀྱི་རྒྱ་མཚོ་ཡི། །རྩོད་བཟློག་རྡོ་རྗེ་ཕ་ལམ་ཡོད། །སོག་བཟློག་བློ་གྲོས་རྒྱ་མཚོ་ཡིས། །དཔལ་འཛིན་ཉིད་ཀྱི་སྒེར་ལན་དུ། །རྩོད་བཟློག་ངེས་དོན་འབྲུག་སྒྲ་དང་། །མི་བསྐྱོད་རྡོ་རྗེའི་ཆབ་ཤོག་ལན། །དྲིས་ལན་ལུང་རིགས་འབྲུག་སྒྲ་ཡོད། །འབྱམས་ཡིག་གསུམ་གྱི་ལན་དང་ནི། །ས་པཎ་བུ་སྟོན་ཤཱཀ་མཆོག་གི །དགག་སྒྲུབ་དབྱེ་གསལ་བྱས་པའང་ཡོད། །ཤཱཀ་མཆོག་ལེགས་བཤད་གསེར་ཐུར་ལ། །བྱ་བ་ཆོས་རྗེ་སྐལ་བཟང་པས། །བརྒལ་ལན་ལུང་རིགས་སྒོ་འབྱེད་སྤྲིངས། །དེའི་ལན་པཎ་ཆེན་རང་ཉིད་ཀྱིས། །ངེས་དོན་རབ་གསལ་ཅེས་བྱ་བར། །རྙིང་མ་དགག་པ་མིན་ཚུལ་གྱི། །དག་ཞུས་ཞིབ་ཏུ་ཕུལ་བའང་ཡོད། །སྨིན་གླིང་རབ་འབྱམས་ཆོས་གྲགས་ཀྱིས། །སྔ་ཕྱིའི་རྩོད་པ་ཐམས་ཅད་ཀྱི། །ལན་གྱི་ཕྲེང་བ་རྒྱས་པ་ཡོད། །རིག་འཛིན་འཇིགས་མེད་གླིང་པ་ཡིས།། རྒྱ་ར་བ་ཡི་རྩོད་བཟློག་ལ། །རྣོ་བརྟགས་རྒྱས་པར་སྤྲོས་པ་དང་། །གྲུབ་མཐའ་རབ་ཏུ་དབྱེ་བའི་གཏམ། །རྟོག་གེའི་གཉེན་པོ་ཞེས་བྱ་དང་། །ཏནྟྲའི་ཕྱོགས་འཛིན་བཟློག་པའི་གཏམ། །དོན་གྱི་མདོ་འགག་ཅེས་བྱ་དང་། །ཤིན་ཏུ་རྣལ་འབྱོར་གྲུབ་མཐའ་བཞིར། །སྟོན་པ་རྡོ་རྗེ་ཟེག་མ་དང་། །རྫོགས་ཆེན་ལྟ་བ་ཧ་ཤང་གི། །མཚུངས་ཟླར་འཁྲུལ་བའི་ཤན་འབྱེད་དུ། །མཛད་པ་ཀུན་མཁྱེན་ཞལ་ལུང་སོགས། །ཚད་ལྡན་བསྟན་བཅོས་དུ་མ་ཡོད། །མཁས་པའི་དབང་པོ་ཀཿཐོག་པ། །འགྱུར་མེད་ཚེ་དབང་མཆོག་གྲུབ་ཀྱིས། །སྡོམ་གསུམ་རབ་དབྱེའི་གསལ་བྱེད་དུ། །འདུ་མ་བྱས་པའི་གན་མཛོད་དང་། །བྲག་དཀར་དགེ་བཤེས་རྩོད་ལན་དུ། །སྤེལ་བ་ལུང་གི་རྔ་ཆེན་སོགས། །རྩོད་བཟློག་བསྟན་བཅོས་མང་ཞིག་ཡོད། །བརྒལ་ལན་རྩོད་བཟློག་དེ་རྣམས་སུ། །བརྟག་པ་གསུམ་སོགས་ཚད་ལྡན་གྱི། །ལུང་རིགས་དུ་མས་རྣམ་དག་ཏུ། །བསྒྲུབས་ཟིན་པས་ན་དེར་ལྟོས་ཤིག །དེ་ལྟར་ལུང་དང་རིགས་པ་ཡིས། །རྙིང་མའི་གཞུང་ལུགས་མཐའ་དག་ཀུན། །བཀའ་དང་བསྟན་བཅོས་རྣམ་དག་ཏུ། །ལེགས་པར་གྲུབ་པར་གྱུར་པ་ན། །དེ་རྗེས་ཆུ་བརྒྱ་ཟོམ་འོག་དང་། །ལམ་བརྒྱ་འགག་འཕྲང་གཅིག་གི་དཔེས། །གཞུང་བརྒྱ་རིགས་པ་གཅིག་ཉིད་ཀྱིས། །གསལ་བར་གྲུབ་པ་མ་ཡིན་ནམ། །དེས་ན་རིགས་དྲུག་གནས་འདྲེན་དང་། །རིགས་བརྒྱའི་ཙཀ་གདུབ་རབ་བྱུང་གི །རྣམ་པའི་ལྷ་ཡིས་མཚོན་ཐོགས་སོགས། །ལམ་གྱི་གནད་དུ་མི་ཆེ་ཡང་། །གཞན་དོན་ཕྲིན་ལས་ཕྲན་ཚེག་དང་། །ཕྱག་བཞེས་མཚོན་བྱེད་དྲང་དོན་བརྡ། །ཅུང་ཟད་མི་འདྲའི་ཁྱད་པར་དག །རྙིང་མའི་གཞུང་ལས་བཤད་པ་ཡིན། །དེ་ཡང་རྒྱལ་བའི་བཀའ་ཡིན་པར། །རིགས་པ་སྔ་མས་བསྒྲུབས་ཟིན་ཏོ། །རྙིང་མའི་གཞུང་ལ་གྲགས་ནའང་། །གསར་མའི་རྒྱུད་དུ་མ་བཤད་པས། །དེ་དག་འཐད་པ་མིན་ཅེ་ན། །རྟགས་ཁྱབ་གཉིས་ཀ་མ་གྲུབ་སྟེ། །ངན་སོང་སྦྱོང་བའི་རྒྱུད་སོགས་ནས། །གནས་ནས་དྲང་བ་བཤད་ཕྱིར་དང་། །རས་བྲིས་སྐུ་གཟུགས་བཤད་ཕྱིར་དང་། །མི་འཁྲུགས་ཆག་བྲལ་སྤྲུལ་སྐུ་ཡིས། །མཚོན་ཆ་རྡོ་རྗེ་ཐོགས་ཕྱིར་རོ། །གཞུང་ལུགས་གཅིག་ལ་གྲགས་པ་དེ། །གཅིག་དང་མཐུན་པའི་ངེས་པ་མེད། །ཉན་ཐོས་པ་ཡི་བདེན་པ་བཞི། །མུ་སྟེགས་པ་ཡི་ལུགས་ལ་མེད། །ཐེག་ཆེན་པ་ཡི་ཁྱད་ཆོས་རྣམས། །ཉན་ཐོས་པ་ལ་མ་གྲགས་ཤིང་།། རྡོ་རྗེ་ཐེག་པའི་རིམ་པ་གཉིས། །ཕར་ཕྱིན་གཞུང་དུ་བཤད་པ་མེད། །ཐབས་ཤེས་རྒྱུད་ཀྱི་སྦྱོར་སྒྲོལ་སོགས། །ཕྱི་རྒྱུད་རྣམས་སུ་མ་བཤད་ཀྱང་། །དེས་དེ་ལོག་པར་ག་ལ་གྲུབ། །དེ་དང་འདི་དག་མཚུངས་པས་སོ། །ཙཀ་གདུབ་དཀྱིལ་འཁོར་དོད་ཡིན་པར། །སེམས་པའང་ཁྱོད་རང་འཁྲུལ་བར་ཟད། །ཆོས་རྗེ་ས་སྐྱ་པཎྜི་ཏས། །རབ་དབྱེ་ཐེག་དགུར་དཔྱད་སྐབས་ཀྱི། །ཚིག་དེ་དེང་སང་ས་སྐྱ་པ། །མཁས་བླུན་ཀུན་གྱིས་ཅལ་སྒྲོགས་སུ།། བྱེད་མོད་དེ་ཡི་གོ་བའི་གནད། །ཤེས་པ་ཁྱེད་ཀྱི་ཁྲོད་ན་དཀོན། །དེའི་དོན་རྫོགས་པ་ཆེན་པོ་ལ། །རྟོགས་བྱའི་དོན་དང་རྟོགས་བྱེད་ཐབས། །རྣམ་པ་གཉིས་སུ་དབྱེ་བ་ལ། །རྟོགས་བྱ་དོན་གྱི་རྫོགས་ཆེན་ནི། །ལྷན་ཅིག་སྐྱེས་པའི་ཡེ་ཤེས་ཏེ། །དམིགས་མེད་བརྗོད་པ་དང་བྲལ་བ། །དེ་ཡི་ངོ་བོའི་རང་ལྡོག་ནས། །མིང་ཚིག་ཡི་གེ་དང་བྲལ་ཕྱིར། །རྗོད་བྱེད་ཚིག་གི་ཐེག་པ་རུ།། བཞག་པ་མཁས་པ་མིན་ཅེས་གསུངས། །དེ་རྟོགས་པ་ཡི་ཐབས་ལ་ནི། །ཐེག་པའི་རིམ་པ་ཡོད་པ་ཡིན། །ཅེས་པས་རྟོག་བྱེད་ཐབས་ཀྱི་ནི། །ཐེག་རིམ་དགུ་པོ་ཤུགས་ཀྱིས་བསྟན། །འོན་ཀྱང་གསང་སྔགས་གསར་མ་ལ། །རྣལ་འབྱོར་ཆེན་པོའི་ལྟག་ན་ནི། །དེ་བས་མཐོ་བའི་རྒྱུད་སྡེ་མེད། །སྒོམ་པའི་དམིགས་པ་ཉིད་ཀྱང་ནི། །རྣལ་འབྱོར་ཆེན་པོའི་ལྟག་ན་མེད། །ཅེས་པས་ཐེག་རིམ་གོང་མ་གཉིས། །གསར་མ་པ་ལ་མེད་པ་ཡི། །རྣམ་བཅད་དངོས་སུ་བསྟན་པ་ཡིས། །དེ་གཉིས་རྙིང་མའི་ཁྱད་ཆོས་སུ། །ཡོད་པའི་ཡོངས་གཅོད་ཤུགས་ལས་བསྟན། །རྙིང་མའི་ལུགས་ལ་ཐེག་པ་དགུ། །ཡོད་པའི་ཞལ་བཞེས་གཞུང་འདི་དང་། །ཐུབ་དགོངས་སོགས་སུ་ཡང་ཡང་མཛད། །དེ་ལྟར་རྣམ་དབྱེ་ལེགས་ཕྱེས་ནས། །སྨྲས་ན་དམ་པའི་དགོངས་པ་གསལ། །གཞན་དུ་ཨ་ཏི་ཡོ་ག་ཉིད། །ཡེ་ཤེས་ཡིན་པར་བཞེད་པ་ལ། །ཐེག་པ་ཡིན་པར་སྤྱིར་བཀག་ཅེས། །ཁྱེད་ཅག་དེ་ལྟར་སྨྲ་ན་ནི། །རྒྱན་དང་ཐེག་བསྡུས་ལ་སོགས་པའི།། གཞུང་ལུགས་ཀུན་དང་འགལ་བའི་ཕྱིར། །ཙནྡན་སོལ་བར་བྱས་པ་བཞིན། །མཁས་པའི་ལེགས་བཤད་བློ་སྐྱོན་གྱིས། །དྲི་མ་ཅན་དུ་མ་བྱས་སམ། །འདི་དང་འདི་འདྲའི་རྒལ་ལན་ནི། །རྒྱུད་ལུང་མན་ངག་གསུམ་སྦྱར་ཞིང་། །རིགས་པས་འཐད་པར་བསྒྲུབ་པ་ཡིས། །ཡིད་ཆེས་ངེས་ཤེས་འདྲེན་ནུས་པའི། །ཤེས་བྱེད་དམ་པའི་ཞལ་གྱི་ལུང་། །མཆིས་མོད་དེ་དག་ཤེས་འདོད་ན། །རྒྱུད་སྡེའི་ཟབ་གནད་འཆད་དགོས་པས། །རྒྱུད་ནས་བཤད་པའི་འཆད་ཉན་གྱི། །ཚུལ་རྣམས་ཇི་བཞིན་བསྒྲུབ་དགོས་ཀྱི། །ཅོ་འདྲི་རྩེད་མོའི་རྩོད་ལེན་དུ། །ཟབ་དོན་གསང་བ་སུ་ཞིག་སྒྲོགས། །སྤྱིར་ནི་སྔ་འགྱུར་འཁྲུལ་མེད་རྣམས། །གསར་མའི་དུས་སུ་བྱོན་པ་ཡི། །ལྷ་ཅིག་ཇོ་བོ་ཆེན་པོ་དང་། །ཁ་ཆེ་ཤཱཀྱ་ཤྲཱི་དང་། །དམ་པ་སངས་རྒྱས་ལ་སོགས་པའི། །རྒྱ་གར་གྲུབ་ཐོབ་མང་པོ་དང་། །འགོས་ལོ་གཞོན་ནུ་དཔལ་བ་དང་། །ཐར་ལོ་ཉི་མ་རྒྱལ་མཚན་དང་། །འབྲི་གུང་རིན་ཆེན་དཔལ་བཟང་པོ། །རིག་རལ་ཇོ་ནང་ཀུན་མཁྱེན་པ། །གྲུབ་ཐོབ་ཨོ་རྒྱན་པ་དང་ནི། །ཀུན་མཁྱེན་ཙོང་ཁ་པ་སོགས་ཀྱི། །མཆོག་གཟིགས་དུ་མས་རྣམ་དག་ཏུ། །ཞལ་བཞེས་བསྔགས་བརྗོད་མཛད་པ་མང་། །སོ་སྐྱེ་ཤེས་རབ་འཆལ་བ་འགས། །སྨོད་པར་བྱེད་པ་སྙིང་རྗེའི་གནས། །དེ་ཙམ་དུ་ཡང་མ་ཟད་དེ། །གྲུབ་པ་ཐོབ་པའི་ལག་རྗེས་སུ། །སྔོན་བྱོན་རྗེ་འབངས་ཉེར་ལྔ་དང་། །བར་དུ་སོ་ཟུར་གནུབས་དང་གཉགས། །སློབ་རྒྱུད་ནམ་མཁའི་སྐར་ཚོགས་ཙམ། །ཕྱིས་བྱོན་ཉང་རལ་ཆོས་དབང་དང་། །གླིང་པ་བརྒྱད་སོགས་གཏེར་སྟོན་དང་། །ཀཿདཔལ་རྫོགས་ཆེན་གྲུབ་ཐོབ་རྣམས། །ཕུང་པོ་འོད་སྐུར་ཡལ་བ་དང་། །ཟུང་འཇུག་མཁའ་སྤྱོད་གྲུབ་པ་དང་། །གདུང་དང་རིང་བསྲེལ་བཞག་ནས་ཀྱང་། །སྒྲ་འོད་མེ་ཏོག་ཆར་དང་བཅས། །རང་བཞིན་སྤྲུལ་པའི་ཞིང་རྣམས་སུ། །ཕེབས་པའི་གང་ཟག་བགྲང་ལས་འདས། །གྲོལ་རྟགས་དེ་འདྲ་མངོན་སུམ་དུ། །འབྱུང་བའི་རྒྱུ་མཚན་ཉམས་ལེན་ཆོས། །སྔ་འགྱུར་ཡོ་ག་སྡེ་གསུམ་པོ། །རྒྱལ་བ་རྡོ་རྗེ་འཆང་ཆེན་གྱི། །ཉེ་ལམ་ཟབ་མོ་ཡིན་ཕྱིར་དང་། །དེ་ལ་དམ་ཉམས་བཀའ་རྐུན་གྱིས། །རང་བཟོས་བསླད་པ་མ་ཞུགས་དང་། །རྡོ་རྗེ་འཆང་ནས་ད་ལྟའི་བར། །བྱིན་རླབས་བརྒྱུད་པ་མ་ཆད་པའི། །རྟགས་སུ་མངོན་སུམ་ཚད་མའོ། །དེ་ཕྱིར་ཚད་མ་དུ་མ་ཡིས། །ཚད་མར་གྲུབ་པའི་ལམ་དེ་ལ། །ཚད་མ་ཉིད་དུ་བཟུང་བྱས་ན། །གང་ཟག་ཉིད་ཀྱང་ཚད་མར་འགྲོ། །ལན་ནི་འདི་དང་འདི་འདྲ་བའི། །རྩོད་ཡིག་དྲི་ཚིག་སྤེལ་བའི་རྒྱུ། །ཀུན་སློང་འདྲ་མིན་མང་ཡོད་ཀྱང་། །བརྟགས་ན་རྣམ་པ་གསུམ་དུ་ངེས། །བློ་ཆུང་གྲགས་པ་དོན་གཉེར་དང་། །སྙིང་ནས་ཆོས་ལ་སྡང་བ་དང་། །རྣམ་དག་ཆོས་ལ་སྒྲོ་སྐུར་གྱི།། ཐེ་ཚོམ་གཅོད་པར་འདོད་པའོ། །གལ་ཏེ་གྲགས་པ་དོན་གཉེར་ན། །གྲགས་སྐམ་སྙིང་པོ་མ་མཆིས་ཀྱང་། །དམ་པའི་རྣམ་ཐར་གཞན་དག་གིས། །སྒྲུབ་དང་འཕྲལ་ཕུག་ཀུན་ཏུ་དགེ། །ཆོས་དང་ཆོས་མིན་འབྱེད་དོ་ལོའི། །ཆོས་སྤངས་ལས་ཀྱི་སྒྲིབ་པ་འདིས། །གྲགས་པ་སྒྲུབ་པ་ཡ་ངའི་གནས། །ཁེ་ལས་ཉེན་ཆེ་སྤངས་ན་ལེགས། །ཞེ་ནས་ཆོས་ལ་སྡང་ཡིན་ན། །ཆོས་ལ་སྡང་པའི་གང་ཟག་ལ། །ཐར་ལམ་མེད་པར་ཐུབ་པས་གསུངས། །དེས་ན་ཡང་དག་ལུང་རིགས་ཀྱི། །ཐུགས་རྗེའི་དཔྱངས་ཐག་ལ་བརྟེན་ནས། །ཐར་པའི་ལམ་དུ་ཞུགས་ན་ལེགས། །ཅིས་ཀྱང་མི་ལྡོག་སྨོད་ན་ནི། །སྨྱོན་པའི་རྗེས་སུ་ལོང་བ་བཞིན། །ལྷ་སྦྱིན་དང་ནི་དཔལ་འཛིན་གྱི། །རྗེས་ལ་ཚམ་ཚོམ་མེད་པ་རུ། །མཆོང་བ་སྔོན་གྱི་ལས་ཡིན་པས། །རྒྱལ་བའི་ཕྱག་གིས་མི་ཁོག་ན།། བདག་དང་བདག་འདྲས་ཅི་ཞིག་བྱ། །ཁྱོད་ལ་སྡིག་པར་མ་གྱུར་ཅེས། །ལྷག་པའི་བསམ་པས་སྨོན་ལམ་འདེབས། །ཐེ་ཚོམ་གཅོད་པར་འདོད་ན་ནི། །གོང་དུ་བཤད་པའི་རྩོད་ལན་གྱི། །ཡིག་ཆ་དེ་དག་རྣམས་དང་ནི། །རྙིང་མའི་གཞུང་ལུགས་མཐའ་དག་ལ། །ཤེས་རབ་གསུམ་གྱི་མིག་སྒྲུབ་དང་། །སོམ་ཉིའི་གནས་ཀུན་ལྡོག་པ་ཡོད། །གལ་ཏེ་དེ་ལྟར་བརྟག་པ་ན། །རྒྱལ་བའི་བཀའ་ལུང་དང་འགལ་ཞིང། །གཏན་ཚིག་རྒྱ་ཡིས་མ་ཐེབས་པས། །འགྲེལ་པ་བསྟན་བཅོས་ཇི་སྙེད་དུ། །དགག་བཞག་སྤང་གསུམ་མ་ནུས་ཤིང་། །རྩོད་ལན་རྣམས་སུ་ལུང་རིགས་ཀྱིས། །ལེགས་པར་སྒྲུབ་པར་མ་གྱུར་པས། །ཡང་དག་ལམ་དུ་ཐེ་ཚོམ་པའི། །གནས་ཤིག་ཁྱོད་ལ་མངོན་གྱུར་ན། །དེ་ཚེ་འགལ་འདུའི་རང་བཞིན་གྱི། །གྲོང་ཚིག་ཁ་ཤག་ཙམ་མིན་པར། །སྤྱིར་བཏང་དམིགས་གསལ་རྫས་ལྡོག་དང་། །སེལ་དང་སྒྲུབ་པ་སྐབས་ཕྱེད་པའི། །བརྒལ་བརྟགས་མཁས་པས་དཔྱད་འོས་པར། །སྒྲུབ་པར་གྱིས་དང་དེའི་དུས་སུ། །དཔལ་ལྡན་ཆོས་ཀྱི་གྲགས་པ་ཡི། །གཞུང་དང་མཐུན་པའི་ལུང་རིགས་ཀྱི། །སྒོ་འཕར་འབྱེད་པར་སྐབས་ཕྱེའོ། །དེ་ལས་གཞན་དུ་སྔ་འགྱུར་གྱི། །གཞུང་ལུགས་རྣམ་དག་མ་མཐོང་བཞིན། །བློ་གྲོས་རྩིང་པོས་དཔྱད་པའི་གཏམ། །ཧོལ་རྒྱུག་བྱེད་པ་དཔྱད་འོས་མིན། །འབེན་མ་མཐོང་པའི་མདའ་འཕེན་དང་། །དཀྱུས་ས་མ་བསྟན་རྟ་རྒྱུག་དང་། །ཕྱོགས་སྔ་མ་ངེས་རྩོད་པ་གསུམ། །དཔྱོད་ལྡན་རྣམས་ཀྱིས་ཁྲེལ་བའི་གནས། །ཀྱེ་མ་དེང་སང་སྙིགས་མའི་གནས་སྐབས་འདིར། །རྟོག་གེ་ཟོལ་མས་ཐུབ་བསྟན་དཀྲུགས་པས་སྐྱོ། །འབྱུང་བྱ་མུན་པའི་སྨག་ལ་དགོད་མོད་ཀྱི། །ཉིན་མོ་ཧུཾ་སྒྲ་སྒྲོག་ན་ལྟས་ངན་ཡིན། །དཔང་གྱུར་མཁས་པའི་སྐྱེ་བོ་ཟད་པ་ན། །བླུན་པོས་བབ་ཅོལ་སྒྲོག་པ་ཆོས་ཉིད་ཀྱང་། །བསྟན་འཛིན་ཉི་ཟླའི་དཀྱིལ་འཁོར་བཀྲག་འབར་ཞིང་། །བཤད་སྒྲུབ་འོད་ཀྱིས་ཕྱོགས་ཀུན་ཁྱབ་དུས་འདིར། །འགལ་འདུའི་རང་བཞིན་གནག་རྫིའི་གཏམ་ཟང་མ། །འཛེམ་མེད་གཅེར་རྒྱུག་བྱེད་པ་ཨེ་མ་མཚར། །དེང་འདིར་ལོག་རྟོག་མུན་པ་སུན་འབྱིན་པའི། །བརྒལ་ལན་སྐྱ་རེངས་དང་པོ་སྤྲོས་ཟིན་གྱིས། །མ་བརྟགས་མུ་ཅོར་སྨྲ་རྣམས་བག་ཡོད་མཛོད། །ཕྱིས་ནས་ལུང་རིགས་ཉིན་བྱེད་འཆར་ཏ་རེ། །དེ་སྐད་ཡོངས་རྫོགས་བསྟན་པའི་མངའ་བདག་ཆེ། །མདོ་ཁམས་གྲུབ་པའི་དབང་ཕྱུག་རྫོགས་ཆེན་པའི། །བཀའ་འབངས་ཡོངས་ཀྱི་ཐ་ཤལ་སྙོམ་ལས་པ། །སྐྱེས་ཐོབ་སྦྱངས་པའི་བློ་གྲོས་ན་ཕྲ་ཡང་། །རང་གཞན་གྲུབ་མཐའ་རྒྱ་མཚོའི་མཐར་སོན་པའི། །སྨྲ་བའི་ཉི་མ་རྒྱལ་སྲས་ཆོས་རྗེ་དང་། །གཙུག་ལག་སྒོ་བརྒྱ་འབྱེད་ལ་ཟླ་བྲལ་བའི། །གཞོན་ནུ་འཇིགས་མེད་ཆོས་ཀྱི་དབང་པོ་སོགས། །ཡོངས་འཛིན་མཁས་དབང་དུ་མའི་ཞབས་ཀྱི་རྡུལ། །སྤྱི་བར་སོན་པའི་མཐུ་ལས་ལེགས་བཤད་གཏམ། །ཅུང་ཟད་སྨྲ་ལ་དབང་བའི་ཀློག་པ་བ། །པདྨ་བཛྲ་ཞེས་བྱར་འབོད་པ་དེས། །དོན་གཉེར་ཅན་འགས་ནན་གྱིས་བསྐུལ་བའི་ངོར། །རུ་དམ་དཔལ་གྱི་གཙུག་ལག་ཁང་ཆེན་པོའི། །ཉེ་གམ་བསམ་གཏན་སྒོམ་པའི་ཁང་བུ་ནས། །ཐུན་མཚམས་གསུམ་དུ་ཤར་མར་བྲིས་ནས་སྤྲིངས། །དེ་ལས་བྱུང་བའི་དགེ་ཚོགས་གངས་རིའི་ཏོག །སྟོན་ཟླའི་འོད་ཀྱིས་འཁྱུད་ལྟར་དཀར་བ་དེས། །རང་གཞན་ཐེ་ཚོམ་མུན་པ་ཀུན་བསལ་ནས། །ཆོས་རབ་རྣམ་འབྱེད་བློ་གྲོས་འཕེལ་གྱུར་ཅིག །ཅེས་པའང་བགྲོ་གླེང་པ་བསོད་ནམས་བསྟན་པས་བྲིས་པའི་ཡི་གེའི་ལན་དུ་ས་སྤྲེལ་ཟླ་༡༢པའི་ཚེས༡༣ལའོ།། །།