 ཀཿཐོག་རིག་འཛིན་ཆེན་པོ་ཚེ་དབང་ནོར་བུའི་གསུང་འབུམ།གླེགས་བམ་གསུམ་པ་ཞལ་གདམས་མགུར་གླུ་བདེ་མཆོག་ཉུང་ངུའི་མཆན་འགྲེལ་གྱི་སྐོར།རིག་འཛིན་ཆེན་པོ་ཚེ་དབང་ནོར་བུ།Nitartha Internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། སྙིགས་དུས་རྣལ་འབྱོར་གཟུགས་འཛིན་སྤྲང་བན་ཚེ་དབང་ནོར་བུ་བདག་ཉིད་ཕྱོགས་ཀུན་རྒྱུ་བའི་རྟོགས་བརྗོད་ལས་འཕྲོས་སྐྱོ་ཤས་གླུ་དབྱངས་སྣ་ཚོགས་པདྨའི་ཕྲེང་བ།༄༅། །སྙིགས་དུས་རྣལ་འབྱོར་གཟུགས་འཛིན་སྤྲང་བན་ཚེ་དབང་ནོར་བུ་བདག་ཉིད་ཕྱོགས་ཀུན་རྒྱུ་བའི་རྟོགས་བརྗོད་ལས་འཕྲོས་སྐྱོ་ཤས་གླུ་དབྱངས་སྣ་ཚོགས་པདྨའི་ཕྲེང་བ་བཞུགས་སོ། ། ༈ དུས་སྙིགས་མར་རྣལ་འབྱོར་གཟུགས་བརྙན་ཙམ་དུ་འཛིན་པའི་དཀོར་ཟན་སྙོམས་ལས་མཁན་ཚེ་དབང་ནོར་བུའི་དཔལ་གྱི་རྒྱ་མཚོ་བདག་ཉིད་སྣང་བ་སྒྱུ་མའི་ལྟད་མོར་ཕྱོགས་ཀུན་རྒྱུ་བའི་རྟོགས་བརྗོད་ཀྱུ་རུ་ལུགས་སུ་ས་བོན་ཙམ་ངེས་པར་བྱུང་བ་སྐྱོ་ཤས་ཀྱི་གླུ་དབྱངས་སྨོས་པ་སྣ་ཚོགས་པདྨའི་ཕྲེང་བ་ཞེས་བྱ་བ་འདི་ལྟ་སྟེ། ཨོཾ་སྭཱ་སྟི། བླ་མེད་བླ་མ་འཁྲུལ་སྤངས་ཡེ་ཤེས་རྒྱས། །དཔེ་དང་དོན་སྦྱོར་སྐྱོབ་པའི་དཔལ་དམ་པ། །རྒྱལ་བའི་བསྟན་སྤྱོད་ཚོགས་ཞིང་རྒྱལ་བ་པོ། །དཀོན་པའི་མཆོག་གྱུར་གསུམ་ལ་ཕྱག་འཚལ་ལོ། །རྒྱལ་བ་རབ་འབྱམས་དཀྱིལ་འཁོར་ཀུན་འདུས་གཙོ། །མཚོ་སྐྱེས་རྡོ་རྗེ་མཚུངས་མེད་འགྲོ་བའི་མགོན། །དྲན་མཆོག་བདེ་ཆེན་འཁོར་ལོའི་དབང་ཕྱུག་ཆེ། །སྙིང་ནས་གསོལ་འདེབས་བདག་རྒྱུད་བྱིན་གྱིས་རློབས། །ཀྭ་ཡེ་རང་ཚུལ་རང་གིས་ཅུང་གླེང་ན། །སྐྱོན་གྱུར་ཉོན་མོངས་ཆུ་གཏེར་རབ་འཁྲུགས་ཤིང་། །ཡོན་ཏན་ཕུན་ཚོགས་ནོར་དང་མི་ལྡན་པ། །ཚེ་དབང་ནོར་བུར་གྲགས་པའི་ཏིར་རྒན་བདག །ཕ་ནི་གཉིད་ཆང་ལ་སྲེད་ཞེ་སྡང་ཆེ། །ཁོག་དྲང་གཡོ་སྒྱུ་ཆུང་ཞིང་དགེ་ལ་མོས། །མ་ནི་ངང་ཐུང་ང་རྒྱལ་སེར་སྣ་ཆེ། །གཞུངས་བཟང་དད་གུས་ལྷ་སྔགས་བཟླ་ལ་མོས། །དེ་ལྟའི་ཕ་མ་སྐྱོན་ཡོན་གཉིས་ལྡན་པ། །མགོན་དང་མཚོ་ཞེས་བྱ་བ་གཉིས་ཀྱི་བུར། །ཀཿཐོག་ལྷོ་ཕྱོགས་འཇང་ཆུ་ཉེ་བའི་གཡོན། །སྐྱེ་མ་ཐག་ཏུ་དམ་ཆོས་འཕྲད་པར་སྐྱེས། །པད་འབྱུང་བཻ་རོའི་ཐུགས་ཀྱི་སྤྲུལ་པ་ཆེ། །ཟབ་གཏེར་མངའ་བདག་བདེ་ཆེན་གླིང་པ་ཡི། །དབང་བསྐུར་མིང་གནང་སྐལ་བར་ལྡན་པ་ཡི། །སྐྱེས་བུ་འོང་བར་ལུང་བསྟན་གཟེངས་ཡང་བསྟོད། །ཆུང་ངུ་ལོ་ཤས་དུས་སུ་སྔོན་གནས་ཚུལ། །གསལ་བར་དྲན་ཞེས་ཁོང་ཚོའི་ངག་ལས་ཐོས། །ང་རང་ཡིད་ལ་ཅི་བྱས་ཆ་ནི་མེད། །ཡིད་ལ་ངེས་པར་ལྷ་བསྒོམ་སྔགས་བཟླ་དང་། །ཁྱད་པར་སེམས་ངོ་ཐོད་བརྒལ་བསྐྱང་ཚུལ་སྤྲོ། །གཏེར་སྟོན་གནས་སྒོ་ཕྱེ་ཚུལ་རྩེད་མོར་སྤྱོད། །སེམས་གསལ་སྣང་བ་ཞེན་མེད་རྨི་ལམ་འདྲ། །དངོས་ཉམས་རྨི་ལམ་ལྷ་དང་འདྲེ་མང་མཐོང་། །གཞན་གྱི་ཡིད་ལ་ཅི་བསམ་འགའ་ཡང་ཤེས། །དེ་དག་བྱིས་པའི་ཚུལ་གྱི་སྤྱོད་ཚུལ་ཡིན། །ཚུལ་འདི་སྔོན་ལས་འཕྲོ་བཟང་ཅུང་ཟད་ཅིག །ཡིན་པར་སྲིད་ཙམ་མཐའ་མ་བཀག་ནའང་། །ནར་སོན་བླ་མའི་གཟུགས་བརྙན་ཙམ་ཞིག་འདི། །བཟུང་མཐུས་ཡོན་ཏན་རྒྱབ་ཀྱིས་རབ་ཕྱོགས་ཏེ། །ལྷ་ཆོས་འོད་མཆོག་བ་ལང་སྤྱོད་དུ་གཞོལ། །འདི་སྣང་ཆོས་བརྒྱད་ཤར་རིའི་ཕྲག་ནས་འཕོས། །བཟང་རྫུ་ཁེ་གྲགས་དབྱར་མཚོ་བཞིན་དུ་རྒྱས། །དམ་པའི་རྣམ་ཐར་སྟོན་མཇུག་རྩི་ཐོག་འདྲ། །འཕྲལ་བསམ་རང་མགོ་བསྐོར་ན་སྐྱིད་སྐྱིད་ལ། །ཕུག་བསམ་ཕྱི་མ་དྲན་ཚེ་གློ་སྙིང་འདར། །རང་གི་རང་ཉིད་ཚུལ་འདི་ཞིབ་བསམ་ན། །སྐྱོ་ཞིང་སྡུག་བསྔལ་རྒྱུ་ལས་གཞན་ཅི་ཞིག །ཀྭ་ཡེ་ད་དུང་བདག་ཚུལ་མདོ་ཙམ་སྨྲ། །ཆུང་ངུའི་སྐབས་སུ་སྔོན་གནས་ཅུང་དྲན་པས། །དེ་དུས་སྤྲུལ་པའི་སྐུ་རུ་ཡིན་མིན་ཞེས། །སྣ་ཚོགས་གླེང་གྱུར་འགའ་ཡང་འགའ་ཡིས་ནི། །གྲུབ་ཆེན་པད་མ་ནོར་བུའི་སྤྲུལ་སྐུ་དེ། །ཡུལ་འདིར་མི་འཁྲུངས་ལུང་བསྟན་ཡོད་དོ་སྐད། །ལ་ལས་བླ་མ་གནས་རིགས་འདེམ་ནུས་ཏེ། །ཨ་མགོན་རང་གའི་བུར་སྐྱེ་མི་སྲིད་ཟེར། །ལ་ལས་ཕ་མས་ངག་བསླབ་བཟོ་བཅོས་ཀྱིས། །སྤྲུལ་མིན་སྤྲུལ་པའི་སྐུ་རུ་རྫུ་འདུག་ཟེར། །ལ་ལས་ཨ་ཁུ་གོང་མའི་གྲྭ་རྒན་གཤིས། །དེ་ཚོས་བསླབ་ནས་གང་དྲན་བརྗོད་འདུག་ཟེར། །ལ་ལས་སྤྲུལ་སྐུ་ཡིན་ཀྱང་སྔོན་གནས་ཚུལ། །འདི་ཙམ་གསལ་བ་འདྲེ་ཡི་བསླུས་སམ་ཤེས། །ལ་ལས་རོང་སྟོན་བུ་དང་ཚ་བོ་ཀུན། །གང་ཆེ་གང་དྲག་སྤྲུལ་སྐུར་བཟོ་འདུག་ཟེར། །གང་ལྟར་ང་ཡི་སྐྱེ་ས་དམན་སྟབས་ཀྱིས། །སྤྲུལ་སྐུའི་མིང་ཙམ་ལས་ཀྱིས་གྲགས་པ་དེ། །ཀུན་གྱིས་ཞེ་ཁྲེལ་ཧབ་དགོད་རྒྱུར་བདག་བྱས། །ཡུན་རིང་རྒྱུས་ཡོད་འགྲོགས་པའི་གྲོགས་པོ་འགས། །སྐྱེ་བ་དྲན་ཚུལ་བག་ཆགས་བཟང་པོ་བཅས། །སྤྲུལ་སྐུ་བསླུ་མེད་འདུག་ཅེས་བསྟོད་པར་བྱས། །གོང་མའི་དབོན་ཉེ་གྲྭ་ཚང་གང་གིས་ཀྱང་། །སྤྲུལ་སྐུ་ཡིན་མིན་ཐེ་ཚོམ་བཅད་ཙམ་ཡང་། །མ་མཛད་ཚེ་ན་བདག་རྐྱེན་སྨོས་ཅི་དགོས། །གྲུབ་རྟགས་རྡོ་ལ་ཞབས་རྗེས་བཞག་གྱུར་པའི། །གྲུབ་ཆེན་པདྨ་ནོར་བུར་གྲགས་པ་དེའི། །སྤྲུལ་སྐུར་བདག་འདྲ་སྤྲང་ཕྲུག་མུ་ཏོ་ཞིག །ཡིན་ཡང་གང་ཡིན་མིན་པར་ཐུགས་རེ་བདེན། །དེས་ན་གཏེར་སྟོན་ཁྱུང་གྲགས་རྡོ་རྗེ་ཞེས། །གྲགས་དེས་སྤྲལ་སྐུ་མིན་པར་གསུང་མཐོན་པོར། །བསྒྲགས་དེ་རང་གིས་རང་ལ་བརྟག་པའི་ཚེ། །རྗེས་སུ་ཡི་རང་ལན་གྲངས་བརྒྱ་བརྒྱར་འབུལ། །འོན་ཀྱང་ཕྱི་དུས་བདག་ཉིད་རོལ་ལམ་དུ། །ཡོད་སྐབས་གཏེར་ཆེན་མཆོག་སྟེ་སྟག་བུ་རུ། །གདུལ་བྱར་ཕེབས་སྐབས་འཁྲུལ་མེད་སྤྲུལ་སྐུ་རུ། །ཡིན་ཞེས་རྡོ་རྗེའི་གསུང་གིས་བསྒྲགས་མཛད་པ། །སྐལ་མེད་བདག་འདྲ་ལས་ངན་སྤྲུལ་བརྫུ་ཡང་། །ཆོས་ལ་སྤྲོ་བ་བསྐྱེད་ཕྱིར་རྗེས་བཟུང་ཚིག །གནང་འདུག་སེམས་ནས་གུས་པའི་ཐལ་སྦྱར་ལས། །མ་མཆིས་དེ་དག་འཕྲལ་ཚུལ་ཅུང་ཟད་ལགས། །དེ་བས་གཞན་གྱུར་རང་ཉིད་བྱིས་པའི་དུས། །བཟུང་ནས་དེང་དུས་ལྔ་ཕྲག་ལྔ་ལོ་བར། །དགེ་སྡིག་བཟང་ངན་དགའ་སྡུག་ལེགས་ཉེས་ཚུལ། །ཞིབ་པར་བརྗོད་པ་བགྲང་གིས་མི་ལོངས་ཤིང་། །སྨྲས་ཀྱང་ཀུན་གྱི་ཁོང་ཁྲེལ་རྒྱུ་བསྐྱེད་ལས། །ལེགས་བཤད་ཡོན་ཏན་ཚིག་དོན་མི་འབྲེལ་བར། །སྣག་ཤོག་ཆུད་ཟོས་ཁོ་ནའི་རྒྱུས་ཅི་བྱ། །དེས་ན་རྒྱས་པར་འདི་རུ་མི་སྨོས་ཀྱི། །མདོ་ཙམ་བདེ་སྡུག་གླེང་མོའི་ཚུལ་བཤད་ནས། །རང་ལོ་བདུན་པའི་སྐབས་སུ་སྒྱུ་མ་ཡི། །ཉམས་སྐྱེས་བཅུ་གསུམ་ལོན་དུས་འདྲེན་པ་རྗེ། །རྒྱལ་ཀུན་སྤྱི་གཟུགས་པད་འབྱུང་བདེ་གླིང་ཞབས། །བདག་གིས་མགོ་བོས་རེག་བྱས་དམ་པ་དེའི། །དྲུང་དུ་ཕྱག་ཆེན་གནས་ལུགས་ཡིད་བཞིན་ནོར། །དོན་བརྒྱུད་མ་ཉམས་སྟོད་འབྲུག་སྨར་ཚང་ཟུང་། །ཆུ་བོ་གཅིག་འདྲེས་གདམས་པ་ལྷད་མེད་དང་། །ཐེག་ཀུན་རྩེ་མོ་འོད་གསལ་རྡོ་རྗེ་སྙིང་། །གསང་ལས་ཆེས་གསང་ཡང་གསང་བླ་མེད་པ། །རྫོགས་ཆེན་ཀློང་གསལ་ཌཱ་ཀི་སྙིང་ཏིག་བཅས། །སྔོན་འགྲོ་ཁྱོན་གཅིག་བྱེ་བྲག་མན་ངག་གནད། །མ་འདྲེས་མ་ནོར་མ་ཆུག་མ་ཐོར་བར། །ཇི་བཞིན་བྱང་ཆུབ་སར་སྦྱོར་ལམ་སྣེ་ཉིད། །ཚུགས་པར་ཁྲིད་མཛད་བཀའ་དྲིན་བརྗོད་པ་ན། །ནམ་མཁའི་མཐའ་རུ་མ་ཤོང་དེ་བས་ཅི། །འོན་ཀྱང་རང་ཉིད་ཆོས་ལ་ལས་འཕྲོ་དབེན། །སྙིང་རུས་བརྩོན་འགྲུས་དག་གིས་མ་ཕེར་བས། །ཉམས་རྟོག་ཅི་བཞིན་མཐའ་རུ་མ་ཕྱིན་ཀྱང་། །གོལ་ཤོར་ལོག་ནོར་ལམ་ལ་མ་སོང་བས། །དགེ་སྦྱོར་འཁྲུལ་མེད་སྐྱོང་ཤེས་ཙམ་འདི་གྱུར། །དེ་ཡང་བདག་གི་ཉམས་ལེན་སྐྱེ་ལུགས་འདི། །ཉམས་རྟོགས་སྐྱེ་བུལ་སྐྱེས་པ་ས་ཆོད་ཆེ། །རྩལ་རྫོགས་དཀའ་ཡང་ཕྱིན་ཅི་མ་ལོག་འཆར། །དེས་ན་གང་ཟག་རིམ་སྐྱེས་རབ་ཏུ་རྟོགས། །ཐོག་མར་སེམས་འཛིན་བསྟེན་ལ་རིག་པ་ཉིད། །སྔོན་བསུ་རྗེས་གཅོད་ད་ལྟའི་རྟོག་དཔྱོད་ཀྱི། །མ་རྙོགས་རང་བབ་རང་གྲོལ་ཉིད་བཞག་པས། །གནས་ཆ་དང་པོ་རི་གཟར་ཆུ་ལྟར་འཆགས། །རིམ་བཞིན་གནས་ཡུན་ཐུང་ཡང་གསལ་དྭངས་ཤིང་། །ད་དུང་འགྱུ་དུས་ཕལ་ཆེར་ངོ་མ་ཤེས། །ངེས་པར་འདི་ཡིས་བསྒོམ་གོ་མི་ཆོད་ཀྱང་། །རང་གིས་བསྒོམ་ཡིན་སྙམ་ནས་བྲོད་སྐྱེ་འདུག །དེ་ནས་ལུས་བདེ་སེམས་གསལ་རྗེན་ཧྲིག་གེ །རྣམ་རྟོག་གང་ཤར་ཕལ་ཆེར་ཐུག་འཕྲད་གྲོལ། །མཚན་མོའི་རྨི་ལམ་སྐབས་འགར་དགེ་སྦྱོར་ཟིན། །གནད་ལ་རང་དབང་ཚུད་འདྲ་དགའ་སྤྲོ་འཆར། །དེང་སང་བསྒོམ་ཆེན་འགའ་ཡི་ཐུགས་དམ་མཐིལ། །འདི་འདྲར་གཏད་ཚོད་འདུག་ཀྱང་ལམ་འདི་ནི། །འདུས་བྱས་དགེ་བ་རྣམས་ཀྱི་མཆོག་ཡིན་པས། །སྲིད་རྩེའི་ཞི་བདེ་གྲུབ་པའི་ཐབས་ཟབ་ཀྱང་། །མྱ་ངན་འདས་པའི་ས་དང་རྒྱང་ཐག་རིང་། །དེ་བས་ཆོས་ཉིད་དོན་ལ་གཟིགས་འཚལ་ཞུ། །དེ་ཡི་མུས་སུ་དགེ་སྦྱོར་ཁོ་ན་ཞིག །སྐྱོང་རྒྱུ་བྱུང་ན་རྟོགས་ལྡན་ཡོངས་འདུག་སྟེ། །ཉམས་ལེན་དེ་ཙམ་རང་ལོ་བཅུ་གསུམ་ཞུགས། ཁུ་བོ་ལྷ་སྐྱབས་གོང་མའི་གྲྭ་རྒན་ཞེན། །ཆེ་གཤིས་སྟག་དབོན་བསྐལ་བཟང་དྲུང་ཕྱིན་ནས། །སྤྲང་ཕྲུག་བདག་འདྲ་སྤྲུལ་སྐུ་ཡིན་ཟོབ་ཀྱི། །བསྐུལ་ནས་ཕྱག་མཛོད་ཚེ་མགོན་བདག་བསུར་བཏང་། །རྐྱེན་དེས་འཇང་ཆུ་རི་བཀྲའི་དགོན་དུ་ཕྱིན། །ལོ་གཅིག་འདུ་བྱས་བདེ་སྡུག་སྣ་ཚོགས་ཅིག །ཉམས་མྱོང་སླར་ཡང་བསྭོ་དགོན་རོལ་ལམ་དུ། །རྩ་བའི་བླ་མའི་དྲུང་ཕྱིན་འདི་སྣང་ལ། །རྒྱབ་ཕྱོགས་ལྷ་ཆོས་ཁོ་ནར་དྲིལ་སེམས་ཡང་། །གྲོགས་ངན་རྐྱེན་དང་བདུད་ཀྱི་ཕྱེ་གཏོར་ལ། །གཡེང་བའི་འགྱོད་པ་དེང་དུས་འཕྱིས་སུ་སོང་། །བར་སྐབས་དགེ་སྦྱོར་ཅུང་ཟད་བྱེད་ཁུལ་གྱིས། །ཉམས་ཀྱི་འཆར་ཚུལ་ལྷོང་གྲོལ་སྣ་ཚོགས་པ། །ཞིབ་པར་འདི་རུ་བརྗོད་པར་མི་ལང་ཞིང་། །མདོ་ཙམ་གང་གི་ཉམས་ལེན་དེ་ཡི་འཕྲོ། །ཞི་གནས་དྭངས་ཆ་ལྷག་མཐོང་རྩལ་གྱིས་ཟིན། །རིམ་བཞིན་སེམས་དང་སེམས་བྱུང་དབྱེར་མེད་པ། །གང་ཤར་ཤར་གྲོལ་རང་ངོ་རང་གསལ་བར། །རྗེན་ཅེར་ལྷེན་ནེ་སྐྱེ་འགག་མཐའ་བྲལ་བ། །ཞི་ལྷག་བསམ་གཏན་ཤེས་རབ་ཟུང་འཇུག་ཉིད། །རང་སེམས་རྣལ་མར་ཅུང་ཟད་འབྱོར་ཙམ་གྱུར། །དེ་ནི་རྟོགས་ཚོད་འོལ་བཞག་མ་ཡིན་པར། །ཉམས་མྱོང་སེམས་ལ་རྡོ་རུས་གཏུགས་ཚུལ་བྱས། །གཞན་ཡང་དྲན་མཆོག་ཞབས་དེའི་བཀའ་དྲིན་གྱིས། །བསྐྱེད་རིམ་ལྷ་སྔགས་ཏིང་འཛིན་དམ་པ་དང་། །རྫོགས་རིམ་ཕོ་ཉ་ཐབས་ལམ་རིམ་པ་སོགས། །གང་འདོད་ཡིད་བཞིན་རྨད་བྱུང་བསྩལ་བར་མཛད། །མདོར་ན་རྗེ་བཙུན་མཆོག་དེའི་བྱིན་རླབས་ཆབ། །བདག་སོགས་བུམ་པར་ཅུང་ཟད་བལྟམས་བྱས་མཐུས། །བདག་ལ་སྤངས་རྟོགས་ཡོན་ཏན་ཕྲན་བུའི་ཚོགས། །མཆིས་པ་མ་ལུས་དེ་དྲིན་ཁོ་ནར་སྨྲ། །རང་གི་རང་ལ་སྤྱད་ཚེ་ལས་ངན་པ། །བདག་འདྲར་དམ་པ་དེ་ཡི་བ་སྤུ་གཅིག །བྱེ་བ་ཐེར་འབུམ་གཤག་ཚལ་ཡེ་ཤེས་རྩལ། །འཕོ་བ་ཡིན་ཞེས་སྨྲ་སྤོབས་ཞུམ་ལགས་ཀྱང་། །གཞན་ངོར་སྣང་ཚུལ་བླུན་དང་དད་ཅན་འགའ། །ཡུན་རིང་འགྲོགས་པའི་མཆེད་གྲོགས་རེ་ཟུང་གིས། །བདག་ལུས་རྗེ་བཙུན་མཆོག་དེའི་སྐུར་མཐོང་ཞིང་། །རང་གིསའང་འཕྲིག་པའི་རྗེས་འབྲང་དཔག་ཞིག་དང་། །ཁྱད་པར་རིག་འཛིན་དངོས་ཀྱི་ཞལ་ནས་ཀྱང་། །རྡོ་རྗེའི་གསུང་མཆོག་གསང་བའི་ཚིག་འགའ་ཟུང་། །བདག་ལ་ལན་མང་གསུང་བའི་དོན་མཐུན་པས། །རྒྱུད་ལ་ཡེ་ཤེས་ཅུང་འཕོས་སེམས་ཙམ་འགྱུར། །དེས་ན་རང་ལོ་བཅུ་དྲུག་སྐབས་སོན་དུས། །རིག་འཛིན་མཆོག་གི་སྐུ་དངོས་གདུལ་བྱ་ནི། །རྫོགས་ཚུལ་ལེ་ལོ་ཅན་རྣམས་སུན་དབྱུང་ཕྱིར། །ཧོར་ཟླ་བཅུ་གཅིག་གནམ་སྟོང་ཐོ་རེངས་དུས། །གཟུགས་སྐུའི་ཆུ་ཤེལ་ཆོས་ཉིད་སྟོང་ལ་བསྡུས། །བདེ་ཆེན་པདྨའི་སྦུབས་སུ་གཤེགས་གྱུར་པ། །ཐོས་མ་ཐག་ཏུ་བདག་སྙིང་གས་པ་ལྟར། །རབ་ཏུ་མྱ་ངན་ཁང་བུ་དམ་པོར་ཆུད། །ལུས་འདར་སར་འགྲེ་གདོང་པ་མཆི་མས་བརླམས། །ཀྱེ་མ་ཀྱེ་ཧུད་སྡུག་རེ་བསྔལ་སྨྲས་ཤིང་། །དམ་པ་དེ་ཡི་ཞལ་མཇལ་གསུང་ཐོས་ཀྱང་། །རང་ཉིད་ལས་ངན་ལེ་ལོ་སྙོམས་ལས་པས། །ཆོས་བཞིན་སྤྱོད་པ་བརྩོན་པས་མ་འཕེར་ནས། །ཉམས་རྟོགས་ཀློང་དུ་མ་གྱུར་ཅེ་རེར་ལོང་། །གང་དུ་བཙལ་ཡང་ཡོངས་འཛིན་དེ་མཚུངས་པར། །རྙེད་དཀའ་ད་ནི་བདག་གསོན་ཅི་ཞིག་བྱ། །དམ་ཆོས་མི་འགྲུབ་སྒྱུ་ལུས་སྡུག་གོག་འདི། །བདེ་བར་གཤེགས་པའི་དགོངས་པ་མ་རྫོགས་ཚུན། །བོར་ན་རེས་དགའ་རེས་སྐྱིད་སྙམ་པ་ཞིག །ཞེ་ཕུགས་རུས་པའི་གཏིང་ནས་ཡང་ཡང་ཤར། །ཀྱེ་མ་དེ་ལྟར་སེམས་ཡང་ཕན་ཅི་ཡོད། །རྟགས་སྣང་ལེ་ལོའི་མངོན་མཚན་དེར་མཐོང་ཡང་། །འགྱོད་པ་ཕྱིས་སོང་རང་ཉིད་ཨ་ཐང་ཆད། །བསམ་བཞིན་སྐྱོ་ཤས་གནས་ལས་ཅི་ཞིག་གུ །བླ་མའི་སྐུ་བརྙན་སྒྱུ་མའི་ཟློས་གར་འདྲ། །ཞལ་མཇལ་གསུང་ཐོས་རྨི་ལམ་སད་པ་འདྲ། །གྲྭ་ཚང་བྱེས་བྲལ་ཚོང་འདུས་མགྲོན་པོ་འདྲ། །རང་ཉིད་ཅི་བྱ་མེད་པ་དྭ་ཕྲུག་འདྲ། །ཕན་བཏགས་གྲོགས་པོ་ཉིན་མོའི་སྐར་མ་འདྲ། །དོན་མེད་གནོད་བསྐྱལ་མུན་འཚུབ་རྒྱུ་སྐར་འདྲ། །ཕན་མེད་བཏང་སྙོམས་བཞག་པ་ས་རྡུལ་འདྲ། །བྱས་པ་དོན་མེད་སྲན་ཆུང་བཀབ་པ་འདྲ། །བླ་མར་དུང་ཡང་ཞལ་མཇལ་གསུང་ཐོས་མེད། །སྡུག་བསྔལ་ཚེ་ཡང་བྱ་བའི་ཐབས་ནི་མེད། །གདམས་ཟབ་མ་ཞུས་འགྱོད་ཀྱང་ཕན་པ་མེད། །ཅི་ལྟར་བསམ་ཀྱང་སེམས་ཁྲེལ་ཉིད་ལས་མེད། །འདི་སྣང་བྱ་བ་སྒྱུ་མ་སྨིག་རྒྱུ་འདྲ། །མཐོང་བཞིན་རང་བློ་དྲེད་འདི་ཨ་རེ་འགྱོད། །བླ་མའི་ཞལ་རས་ཨུ་དུམ་ཝ་ར་འདྲ། །མཇལ་དུས་སྐྱིད་པར་མི་ཤེས་ཨ་རེ་འགྱོད། །བླ་མའི་གསུང་ནི་འཆི་མེད་བདུད་རྩི་འདྲ། །ཅི་ཐོས་དྭངས་བླང་མི་ཤེས་ཨ་རེ་འགྱོད། །བླ་མ་ཡིད་བཞིན་དབང་གི་རྒྱལ་པོ་འདྲ། །ཅི་འདོད་གསོལ་བཏབ་མི་ཤེས་ཨ་རེ་འགྱོད། །བླ་མ་གཏན་བདེའི་སར་སྐྱེལ་གྲུ་རྫིང་འདྲ། །འཁོར་བའི་ཆུ་བརྒལ་མི་ཤེས་ཨ་རེ་འགྱོད། །བླ་མ་ཉོན་མོངས་ནད་སེལ་སྨན་སྡོང་འདྲ། །གང་དགོས་མྱོང་བར་མ་ཤེས་ཨ་རེ་འགྱོད། །ཀྱེ་མ་ཀྱེ་ཧུད་བདག་འདྲའི་ལས་ངན་པ། །བླ་མའི་སྐུ་ནི་རྟགས་སྣང་ངང་དུ་འབྱམས། །དམ་པའི་ཆོས་ནི་ཡིད་སྨོན་ངང་དུ་ལུས། །བྱ་བ་སྔོན་སོང་འགྱོད་པ་ཅི་ཞིག་ཕན། །ཉིན་མོའི་ཟས་འགག་མཚན་མོར་གཉིད་མི་ཁུག །རང་གི་རང་ལ་བསམ་ཞིང་སེམས་སྐྱོ་སྡུག །བླ་མ་བཞུགས་དུས་སྐྱིད་དགའ་མ་ཤེས་ཤིང་། །སྙོམས་ལས་དབང་སོང་མཚང་དེ་མཐོང་ན་ཡང་། །ནམ་མཁའ་སྤར་མོ་མི་འཁྱིག་ཅི་བྱར་ཡོད། །སེམས་ཁྲེལ་བྱེད་པ་རང་སྒྱིད་ལུག་པའི་རྒྱུ། །བླ་མ་བཞུགས་དུས་དམ་ཆོས་སྙིང་པོ་ལ། །སྙིང་རུས་འབད་པར་མ་ནུས་འདི་དུས་སུ། །སྡུག་བསྔལ་སྙིང་སྲོག་གས་ཙམ་བྱས་ན་ཡང་། །རང་ཉིད་ངལ་བའི་རྒྱུ་ལས་གཞན་ཅི་ཞིག །འོན་ཀྱང་སྡུག་བསྔལ་ཕལ་དང་མི་མཚུངས་ཏེ། །སྡུག་བསྔལ་བྱས་པས་ཚེ་འདས་གཞན་ལ་གནོད། །བླ་མའི་ཆེད་དུ་སྡུག་བསྔལ་ཅུང་ཟད་དང་། །མཆི་མ་སྲན་ཙམ་རླག་གྱུར་མི་དེ་ཡིས། །བསྐལ་པ་སྟོང་དུ་བསགས་པའི་སྡིག་སྒྲིབ་ཀུན། །ཡོངས་སུ་དག་པར་འགྱུར་ཞེས་རྒྱལ་བས་གསུངས། །དེས་ན་བླ་མའི་ཆེད་དུ་སྡུག་བསྔལ་ནི། །གང་བྱས་དོན་ལྡན་ཡིན་པས་ཤེས་པར་བྱོས། །རང་ཆེད་བླ་མའི་ཐུགས་སུན་ཡུད་ཙམ་དང་། །བསྐལ་པར་མཚམས་མེད་ལྔ་སྤྱོད་མཉམ་པར་གསུངས། །ཚུལ་འདི་ཤེས་ན་སྤང་བླངས་བྱེད་པར་གཅེས། །གང་ཡང་བླ་མ་བཞུགས་དུས་དགྱེས་ཐབས་དང་། །དམ་ཚིག་ཚུལ་ལྡན་ཆོས་ལ་མ་བརྩོན་ན། །འདས་རྗེས་ཞེ་འགྱོད་འཕྱིས་སོང་ཤེས་པར་གྱིས། །ཀྱེ་མ་གསོན་དང་ལས་ངན་བདག་འདྲ་ཡི། །བླ་མ་བཞུགས་དུས་ལེ་ལོ་སྙོམས་ལས་དང་། །རྟག་སྣང་ཞེན་པས་གཤེགས་རྗེས་ཞེ་འགྱོད་ཆེར། །བྱུང་ཚུལ་བརྗོད་འདི་ཀུན་གྱིས་ཨེ་གོ་བསམ། །ཀྭ་ཡེ་གསོན་དང་བླ་མ་མཚན་ལྡན་གྱི། །གྲྭ་འཁོར་བྱེད་པའི་མཆེད་གྲོགས་དང་ཕྱིས་ཚོ། །བསླབ་བྱ་ཡིན་ཁུལ་བླུན་པོའི་འཆལ་ཚིག་ཅིག །བརྗོད་པར་ཐུགས་སུན་མི་གནང་དྭངས་བླངས་འོས། །དེང་སང་དུས་ངན་སྙིགས་མ་ལྔ་བདོ་འདིར། །ཆོས་བཞིན་སྤྱོད་པ་རི་བོང་རྭ་དང་མཚུངས། །དུག་ལྔ་རག་ཅིང་གཡོ་སྒྱུའི་ལས་ལ་མཁས། །བདེན་སྨྲ་ཆོས་བཞིན་སྤྱོད་ལ་དད་པ་ཉུང་། །དེས་ན་ཚོགས་དབེན་གྲྭ་ཚོགས་གང་ན་ཡང་། །བསླབ་གསུམ་ངོས་ལྐོག་མཚུངས་པ་རུས་སྦལ་སྤུ། །ཆོས་ལ་མོས་པའི་གང་ཟག་དམ་པ་ཡང་། །དེ་འདྲའི་གྲོགས་དང་འགྲོགས་ཚེ་སྤྱོད་ངན་པ། །འགོ་བར་འགྱུར་བས་བག་ཡོད་ཡིད་བསྡམ་ཞིང་། །སྡིག་ཅན་གྲོགས་པོ་དུག་སྦྲུལ་བཞིན་དུ་སྤོངས། །ལེ་ལོ་རྣམ་གཡེང་ཅན་དང་རྒྱང་ཐག་བསྲིང་། །འདི་སྣང་ཞེན་པ་ཅན་དང་འགྲོགས་མི་འཚལ། ། ཀྱེ་ཧོ། གྲོགས་པོ་ཚོ་རྣམས་ཁོ་བོར་ཚུར་གསོན་དང་། །སྣང་བ་འདི་ནི་སྒྱུ་མའི་གྲོང་ཁྱེར་འདྲ། །མི་རྟག་ཆོས་ཅན་འདི་ལ་ཡི་རེ་འཕྱ། །རྫོགས་པའི་སངས་རྒྱས་རྣམས་ནི་མཚན་དཔེ་ཡི། །རབ་བརྒྱད་རྡོ་རྗེའི་སྐུ་མཆོག་ཡེ་ཤེས་ཞལ། །མཐའ་ཡས་ནམ་མཁའི་མཐར་ནི་ཟད་སྲིད་ཀྱང་། །སྐུ་ཡི་མཐར་ནི་མཛད་མི་ཤེས་འདའ་དཀའ། །མཆོག་ཀྱང་འདུས་བྱས་མཚན་ཉིད་བསྟན་པའི་ཕྱིར། །མཛད་པ་མཐའ་མ་མི་རྟག་ཚུལ་བསྟན་ཏེ། །བཟང་པོ་མཐོང་བསྐལ་འདིར་ཡང་སངས་རྒྱས་ལ། །འཁོར་བ་འཇིག་དང་གསེར་ཐུབ་འོད་སྲུངས་ཆེ། །ཤཱཀྱ་ཐུབ་སོགས་མྱ་ངན་འདས་ལ་བསམ། །དེ་བས་བསོད་ནམས་མཐུ་ཡིས་ལྷ་ཆེན་པོ། །ཚངས་པ་དབང་ཕྱུག་ཁྱབ་འཇུག་བརྒྱ་བྱིན་དང་། །འཁོར་ལོས་བསྒྱུར་རྣམས་རང་དབང་མ་མཆིས་པར། །སྡུག་བསྔལ་ཆེ་དང་བཅས་ཏེ་འཆི་གྱུར་ན། །སེམས་ཅན་བསོད་ནམས་ཕྲན་བུའི་ཆུ་བུར་ལུས། །ཐོབ་འདི་མྱུར་བ་ཉིད་དུ་ཅིས་མི་འཇིག །ཕྱི་ནང་གསང་བ་མི་རྟག་ཚུལ་འདི་འདྲ། །མཐོང་ཡང་མི་འཇིགས་སྙིང་སྲན་ཅན་རེ་སྡུག །འཇིག་རྟེན་ཁམས་འདིར་རྟག་པ་མཐོང་ཐོས་སམ། །མི་ཚེའི་ཡུན་ནི་སྐད་ཅིག་ཡུད་ཙམ་སྟེ། །ཡུད་ཙམ་མི་ལ་ཡུད་ཙམ་ཉིད་ནས་རོ། །མངོན་སུམ་སྣང་བ་འདིར་ལྟོས་ཨ་ཙ་མ། །རྫོགས་སངས་རྒྱས་རྣམས་སྙིགས་དུས་འགྲོ་བ་ལ། །ཕན་གདགས་བླ་མའི་སྐུ་རུ་སྟོན་རྣམས་ཀྱང་། །སྐྱེ་རྒ་ན་དང་འཆི་བའི་ཚུལ་བསྟན་ལྟོས། །འདི་སྣང་ཞེན་པ་ཅན་རྣམས་ཨ་ཙ་མ། །ཀྱེ་ཧུད་དེང་སང་གྲྭ་འཁོར་བཙུན་གཟུགས་འགའ། །དཔོན་སློབ་ཡིན་ཁུལ་བླ་མ་མིན་ན་ཡང་། །བླ་མའི་ཡོན་ཏན་མི་རྟག་སྐྱོན་ལ་བརྟགས། །མི་གཟུགས་བྱ་སྤྱོད་འགྲན་སེམས་མཉམ་འགྲོགས་བྱེད། །དམ་ཚིག་ངོས་དང་ལྐོག་གཉིས་མི་མཚུངས་སྤྱོད། །དད་པ་ཁ་དང་ཞེ་གཉིས་སོ་སོར་འཇོལ། །མི་རྟག་འཆི་བ་ཆ་ཙམ་མི་དྲན་པར། །འདི་སྣང་ཡུད་ཙམ་བདེ་ཐབས་སྐྱིད་ཐབས་དང་། །ཁ་རྒྱབ་ཕྱི་ཐབས་ཁེ་དྲག་སྒྲུབ་པའི་ཐབས། །རབ་འབད་བག་ཡངས་མགོ་ཤོར་རྩེ་རྒྱུར་འབྲང་། །ཆང་ལ་ཞེན་ཅིང་བུད་མེད་དག་ལ་གདུང་། །གཉིད་ལ་དགའ་ཞིང་རོ་ཉལ་སྙོམས་ལས་སྤྲོ། །ཉེས་ལྟུང་མི་རྩི་དཀོར་ལ་རྔམས་ཟས་བྱེད། །ཆོག་ཤེས་མེད་པར་རྒྱུ་རྫས་གང་འཆོར་བྱེད། །ཁ་གཅིག་ཆོས་ཕྱིར་བླ་མ་བསྟེན་ཁུལ་དུ། །དྲུང་དུ་བསྡད་ཀྱང་དམ་ཚིག་མི་བསྲུང་ཞིང་། །ཡོན་ཏན་སྙིང་པོ་བསྒོམ་ལ་མི་བྱེད་པར། །གྱེར་འཆམ་རིག་གནས་ལ་གཉེར་རེ་དོགས་བསྒྲུབ། །ཁ་གཅིག་ངོས་ལ་དད་ཁུལ་ཞེ་ས་འབུལ། །ཞི་ཞི་གུས་གུས་ཁ་འཇམ་གཏིང་སྐྱོན་བཅས། །དམ་ཆོས་ཆོག་ཤེས་མེད་པར་ཞུ་བྱས་ཏེ། །ལྐོག་ཏུ་མི་ཆོས་གཤེ་འབར་དམ་ཚིག་ཉམས། །ལ་ལ་དབང་གི་དམ་ཚིག་བསྲུང་སྡོམ་མཚམས། །ཁེ་ཉེན་སྐྱོན་ཡོན་མི་ཤེས་མཚར་འདོད་དང་། །རྩེད་མོའི་རྣམ་པར་མཚུངས་སེམས་དབང་ལུང་ཞུ། །ཕན་ལས་ཉེས་ལྟུང་ཆེ་བའི་རྒྱུ་རབ་བསགས། །ཀྱེ་ཧུད་དབང་ཆོས་ཞུ་བ་གྲངས་མང་ཡང་། །དམ་ཚིག་མི་འཛིན་ལམ་ཁའི་རྡོ་བཞིན་བོར། །བཀུར་བསྟི་ཞབས་ཏོག་མྱ་ངན་ཐང་གི་ཆབ། །དད་མོས་ཇི་བཞིན་དགུན་གཞུག་མེ་ཏོག་འདྲ། །ཁ་གཅིག་རང་ཉིད་རིག་གནས་ཅུང་ཟད་ལ། །བློ་ཁ་ཕྱོགས་པར་ཁེངས་ཤིང་དྲེགས་བྱས་ཏེ། །བླ་མས་དབང་ཆོས་བཤད་ལ་བློ་མ་རྫོགས། །བྱིན་རླབས་མ་ཞུགས་ཉམས་ཆགས་རྒྱུར་འགྲོ་མང་། །ཁ་གཅིག་རྟོག་གེའི་ཤེས་རབ་ཕྲན་བུ་ཡིས། །བླ་མའི་མཚན་ཉིད་བརྟག་པའི་ཁུལ་བྱས་ཏེ། །ཡིད་གཉིས་ཐེ་ཚོམ་མང་པོའི་རྒྱར་ཆུད་ཅིང་། གཤེ་བསྐུར་ངན་བརྗོད་ངན་འགྲོར་གཡེང་བ་མང་། །ལ་ལ་བླ་མས་རང་ལ་བདག་རྐྱེན་བཟང་། །བྱས་ན་དད་པ་མ་བྱས་ལོག་པར་སྨོན། །ལ་ལས་ཞབས་ཏོག་ཕྲན་བུ་འགྲུབ་ན་ཡང་། །དེ་ལ་ངས་བྱས་དྲིན་དང་དྲིན་ལན་རྩོད། །ལ་ལས་མཆེད་གྲོགས་ནང་དུ་བླ་མ་ཡི། །བདག་རྐྱེན་ཆེ་ཆུང་ཆེན་ཆུན་བཞིན་དུ་འདྲེན། །ལ་ལས་རང་ཉིད་ཆེ་དང་གྲགས་འདོད་ཀྱིས། །མཐོ་དམན་དགའ་སྡུག་ཆུ་ཚན་བཞིན་དུ་ཁོལ། །ལ་ལས་རང་ལ་ཡོན་ཏན་མ་མཆིས་པར། །བླ་མས་བདག་རྐྱེན་མ་བྱུང་རེ་ཁེངས་བྱེད། །ལ་ལས་རང་སྔོན་བསོད་ནམས་མ་མཆིས་བཞིན། །གདུལ་བྱ་འདོད་སྨོན་ཆེ་འདོད་རླུང་ལྟར་འཚུབས། །ལ་ལས་བླ་མའི་ཕྱག་རྫས་འདོད་ཡོན་ལ། །ཉེས་ལྟུང་མི་རྩི་དུད་འགྲོ་ཚྭ་ལྟར་རྔམས། །ལ་ལས་གཡོ་སྒྱུས་བླ་མའི་དབུ་རྨོངས་བྱས། །ཕྱག་རྫས་དཀོར་ལ་ཐབས་ཀྱིས་བྲུ་ཇག་རྒྱུགས། །ལ་ལ་བླ་མས་ཕན་བྱའི་བསླབ་བྱ་ལ། །ལོག་པར་རྟོགས་ནས་འཁོན་དུ་བཟུང་བར་བྱེད། །ལ་ལས་བླ་མ་ཉེ་འབྲེལ་ཕ་ཁུ་རུ། །མཐོང་ནས་མཉམ་འགྲོགས་དམ་དང་འགལ་བར་བྱེད། །ལ་ལ་བླ་མར་ཚོད་ཡོད་བརྙས་ཆོས་ཀྱིས། །ཐུགས་སུན་དབྱུངས་ནས་ངན་འགྲོའི་རྒྱུ་རང་བསགས། །ལ་ལ་ཐོག་མར་ཞབས་ཕྱི་ལེགས་བསྒྲུབ་མཐར། །མ་ལེགས་སྤྱོད་ཅིང་དམ་ཚིག་རབ་ཉམས་བྱེད། །མདོར་ན་དེང་སང་དུས་བསྐལ་ངན་པའི་མཐུས། །གྲྭ་ས་རྒན་གཞོན་སུ་ལ་བལྟས་ཀྱང་རུང་། །མི་རྟག་འཆི་དྲན་དངོས་པོར་ཞེན་ལོག་དང་། །ཆོས་ལ་སྙིང་རུས་མཐར་ཕྱིན་སུ་མ་མཐོང་། །ཕ་ཚོའི་ཚིས་དང་ཉེ་འབྲེལ་གཟའ་ཚང་ཚིས། །འབད་རྩོལ་ཟང་ཟིང་ཆེད་དུ་སྲོག་བློས་བཏང་། །བླ་མ་མཇལ་བས་བུད་མེད་གདོང་སྐྱ་ཞིག །མཐོང་ན་ཡིད་དགའ་འཛུམ་གྱིས་བསུ་བ་མང་། །གདམས་ཟབ་གཅིག་ལས་ཆང་ཕོར་གང་འདེམ་ཞིང་། །བླ་མའི་གསུང་བས་ཁྲམ་ཤམ་ཚིག་ལ་རྩི། །བདེ་སྐྱིད་བྱུང་ན་བླ་མའི་དྲིན་མི་ཤེས། །སྐྱིད་ནས་སྐྱིད་འདོད་རྒྱས་ཤིང་རྒྱས་པར་འདོད། །འདི་བས་ལྷག་གཅིག་གཞན་ན་ཡོད་དོ་བསམ། །དཔེ་ལུང་གཞན་ལེགས་བསྒྲངས་ཤིང་བླ་མར་འབར། །དགེ་སྦྱོར་བསྐུལ་མ་ཆོས་ཁྲིམས་བསྒྲིགས་པ་ལ། །ཡིད་མི་དགའ་ཞིང་དེ་ལ་དགྲ་རུ་འཛིན། །བླ་མའི་ཆེད་དུ་དཀའ་ལས་ཅུང་ཟད་ཅིག །བྱུང་བ་རྐྱེན་མི་ཐེག་ཤིང་སྡུག་བསྔལ་གྱིས། །ཆེ་ཤོས་བརྩིས་ནས་རྟག་ཏུ་ཡུས་ཆེ་བསྒྲངས། །རང་དོན་ཚོང་ཁེ་མདོ་དབུས་བསྒྲོད་པའི་སར། །ཚ་གྲང་བཀྲེས་སྐོམ་སྡུག་བསྔལ་བཟོད་མེད་ཀྱི། །གཅེས་སྲོག་ཆད་ཀྱང་ངལ་མེད་དང་དུ་བླངས། །འཇིག་རྟེན་བྱ་བར་མི་ཚེ་བསྐྱལ་ན་ཡང་། །ད་དུང་ངོམ་མེད་དེ་ལ་རབ་ཏུ་གདུངས། །དགེ་སྦྱོར་མཚམས་བསྒྲུབ་བམ་ནི་བླ་མ་ཡི། །ཞབས་ཕྱི་ཟླ་ཤས་ཙམ་ཞིག་བསྒྲུབ་པ་ན། །སུན་དུབ་ངལ་སྣང་བྱེད་ཅིང་ངས་བྱས་ཀྱི། །དྲིན་བརྩི་ངོམ་སོ་ཁྱེར་སོ་རྒྱུན་དུ་བྱེད། །གྲྭ་ས་འགའ་ཞིག་འཕྲལ་ཕུགས་བསམ་པ་ལ། །གཞིགས་མི་ཤེས་པར་བག་མེད་ཅི་དགར་སྤྱོད། །ལ་ལ་རྒན་ཡང་བསམ་པ་མ་རྫོགས་པར། །བྱིས་པའི་རྩེད་གྲོགས་ལེགས་ཉེས་མཁྱེན་རྒྱ་དབེན། །གྲྭ་ས་འགའ་ཞིག་ཡོན་ཏན་བསླབ་ཁུལ་ཡང་། །གནས་ལུགས་མི་གཉེར་ཚེ་འདིའི་ཤེས་བྱར་འབད། །བླ་མས་དམ་ཆོས་འཆད་ཀྱང་བློ་དྲེད་ནས། །ཆུ་ནང་རྡོ་ལྟར་སེམས་ལ་འགོ་མ་ཐུབ། །ལ་ལས་ཁ་ནས་བཤད་བཤད་ཆོས་སྨྲ་ཡང་། །རང་རྒྱུད་མ་ཕན་ནེ་ཙོའི་ཆོས་བཤད་འདྲ། །ཁ་ཅིག་དམ་ཚིག་རྒྱུ་འབྲས་ཤེས་བཞིན་དུ། །བསྲུང་སྡོམ་མི་བྱེད་རྡོ་རྗེ་དམྱལ་བར་བསྒྲུབ། །ཕལ་ཆེར་དམ་ཚིག་སླ་དུས་བསྲུང་ཟོལ་ལ། །དཀའ་དུས་རྒྱུ་འབྲས་དམ་ཚིག་རྒྱབ་ཏུ་བོར། །གང་ལྟར་མི་རྟག་འཆི་བ་མི་དྲན་ཞིང་། །དགེ་སྡིག་རྒྱུ་འབྲས་སྐྱོན་ཡོན་མ་ཤེས་བཞིན། །དམ་ཚིག་གཉན་པོའི་ཁེ་ཉེན་མ་ཤེས་ན། །ཉོན་མོངས་རང་ཁར་ཡན་ཚེ་ཚུལ་དེ་འདྲ། །ཟད་པའི་མཐའ་མེད་བརྗོད་ཀྱིས་ཅི་ཕྱིར་ལང་། །གྲྭ་ཚང་མཚང་ལ་བདག་གིས་རྒོལ་མིན་ཡང་། །སྐྱོན་མ་ཤེས་ན་ཡོན་ཏན་བསྒྲུབ་མེད་པས། །ཅུང་ཟད་སྨྲས་འདི་བརླང་པོའི་ཚིག་གྱུར་ནས། །མཆེད་གྲོགས་རྣམས་ཀྱི་ཐུགས་འཁྲུགས་རྐྱེན་སོང་ན། །བདག་ཉིད་རབ་ཏུ་གནོང་ངོ་བཟོད་འཚལ་ཞིང་། །གང་ཞིག་ཆོས་ལ་སྙིང་ནས་སྤྱོད་པ་རྣམས། །སྤྱོད་ངན་དེ་འདྲ་ཆ་ཤེས་ཡང་སྤང་འཚལ། །མི་ཚེ་མུན་པར་གློག་འགྱུ་འདྲ་བ་འདི། །རྟག་སྣང་ཚེ་འདིའི་རྣམ་གཡེང་ཁོ་ན་ལ། །རབ་འབྱམས་ཕན་ངེས་བསླབ་བྱར་ཉན་མཁན་དཀོན། །རང་སེམས་གྱོང་པོ་འདི་ལ་སུས་ཅི་ཕན། །ཀྱེ་ཧུད་དུས་ངན་སྙིགས་མ་ལས་ཡང་སྙིགས། །འདི་དུས་བདག་སོགས་སྤྱོད་ཚུལ་འདི་ལྟོས་དང་། །བསམ་བཞིན་མཆི་མ་ཤོར་བའི་རྒྱུ་ལས་ནི། །གཞན་མེད་འཆི་བ་ཐོགས་བབ་ནམ་འོང་ཨང་། །ཆོས་མེད་བན་དེ་འཆི་ཁར་འགྱོད་པ་ནི། །མགོ་བོ་ཆད་ནས་གསོ་བྱེད་བཙལ་བ་འདྲ། །དེ་བས་ད་དུས་ལོང་སྐབས་སྤྲིན་བར་གྱིས། །ཉི་ཤུར་ཙམ་འདིར་ཆོས་ལ་འབད་རེ་རན། །ཀྱེ་ཧོ་གྲོགས་དག་ཁོ་བོར་ཚུར་གསོན་དང་། །རང་གིས་རང་ཉིད་ཆོས་ལ་མ་བསྐུལ་ན། །ཆོས་ལ་བསྐུལ་འདེབས་བྱེད་མཁན་མི་གཅིག་ཀྱང་། །འོང་བར་དཀའ་འོ་རང་བསམ་ཐེག་རེ་རན། །དེ་བས་ད་དུས་བླ་མའི་དྲུང་སྡོད་དུ། །གྲྭ་ཚང་རྩེ་དགའ་ཧ་བཞད་ཀུ་རེའི་ངང་། །ཉིན་མོའི་སྣང་བ་ཁ་ཡེངས་མིག་ཡེངས་འབྱམས། །ཟད་མེད་ལས་དང་མཚན་མོར་གཉིད་ལ་སྲེད། །དབེན་པར་མཚམས་བསྒྲུབས་བྱེད་ཁུལ་སྡོད་ན་ཡང་། །རོ་ཉལ་སྙོམས་ལས་བག་ཡངས་ཅི་དགའི་ངང་། །གཉིས་འཛིན་འཁྲུལ་རྟོག་མང་པོ་རྒྱ་ཡན་འབྱམས། །དོན་མེད་བྱི་བ་ཁུང་དུ་ཉལ་འདྲ་ཞིང་། །ཚོགས་དབེན་གང་དུའང་དེ་དང་དེ་འདྲའི་ངང་། །མི་ཚེ་ཡུད་ཙམ་གར་སོང་ཆ་མེད་པར། །དམ་ཆོས་ཐོས་ལོ་སྒོམ་ལོ་ཙམ་བྱས་ཀྱང་། །དོན་དམ་རྒྱལ་པོའི་གདན་ས་སྨོན་འདྲར་ལུས། །མཚན་ལྡན་བླ་མ་མི་ཚེ་ཡུན་བསྟེན་ཡང་། །ཡོན་ཏན་མ་གོས་ཆུ་དང་དངུལ་ཆུ་འདྲ། །ནམ་ཞིག་ཚེ་ན་རང་ཉིད་ཐོག་བབས་སུ། །འཆི་དུས་བབ་ནས་བློ་སྙིང་འདར་བའི་ཚེ། །ཆོས་ལ་མ་འབད་མི་ཚེ་སྟོང་ཟད་དུ། །སོང་བའི་མཚང་མཐོང་འགྱོད་ཀྱང་ཅི་ཞིག་ཕན། །ཡང་ན་རང་གི་རྩ་བའི་བླ་མ་མཆོག །རེ་ལྟོས་ཡུལ་དེ་གཤེགས་སོ་འདས་སོ་ཞེས། །མཐོང་ཐོས་གྱུར་ཚེ་བདེན་ནམ་མི་བདེན་ནམ། །ཨ་ཀྱང་མི་བདེན་རྨི་ལམ་ཨེ་ཡིན་ཨང་། །སྙམ་ཞིང་སེམས་སྐྱོ་ཡིད་འཕྱ་སྡུག་ལྷང་ལྷང་། །གྲྭ་ཚང་རྣམས་ཀྱང་བསམ་པ་སོ་སོར་བྱེད། །ཆོས་བཞིན་སྤྱོད་པ་རྣམས་ནི་རི་ཁྲོད་འགྲིམ། །སྒོམ་ཆེན་རྣམས་ནི་མཚམས་ཁང་བཟུང་དུ་འགྲོ། །མདོ་མེད་རྣམས་ནི་ས་མཐར་འཁྱར་ནས་འགྲོ། །ཁྲེལ་མེད་ཆོས་དྲེད་དཀོར་ལ་ཧབ་ཤ་བཀྱེད། །ལ་ལས་གོས་བརླམ་ལ་ལས་གསེར་ལ་བརླམ། །ལ་ལས་ཇ་དར་ལ་ལས་གསེར་དངུལ་བརླམ། །ལ་ལས་སྐུ་གཟུགས་ལ་ལས་པུསྟི་བརླམ། །ལ་ལས་གྲྭ་འཁོར་ལ་ལས་དགོན་གཞིས་བརླམ། །ལ་ལས་མཆོད་ཆ་ལ་ལས་སྣོད་སྤྱད་བརླམ། །ལ་ལས་སྦྲ་གུར་ལ་ལས་སྒོ་ནོར་བརླམ། །མི་རྟག་པ་ཡི་ངོ་སྤྲད་མངོན་སུམ་ཤར། །གྲྭ་ཚང་ཕལ་ཆེར་ཚོང་འདུས་མགྲོན་ལྟར་གྱེས། །བསྒོམ་ཆུང་གསར་པ་རྣམས་ནི་བསྒོམ་ནི་ཡལ། །བསྒོམ་ཆེན་རྟོགས་ལྡན་རྟོགས་པའི་བསྐུལ་མ་འདེབས། །མདོར་ན་བསམ་ཤེས་ལྡན་པའི་གྲྭ་པ་རྣམས། །ཞེ་འགྱོད་མང་པོའི་ཤུགས་རིང་ནར་ནར་འབྱིན། །ཆོས་འདོད་རྣམས་ཀྱི་དམ་ཆོས་མ་ཞུས་འགྱོད། །ཤེས་རབ་ཅན་གྱི་དྲི་བ་མ་བྱས་འགྱོད། །དབང་བསྐུར་འདོད་རྣམས་ཕྱག་ལེན་མ་བྱས་འགྱོད། །མན་ངག་འདོད་ཀུན་ཞལ་ཤེས་མ་ཞུས་འགྱོད། །བསམ་ཆུང་རྣམས་ནི་ཕན་གནོད་མི་ཤེས་པར། །ཅི་མ་སྙམ་པ་ཅི་དགའི་ངང་དུ་སྤྱོད། །བླ་མ་བཞུགས་དུས་ཆགས་ཉམས་སོང་བ་འགའ། །དྲན་པས་རྗེས་སླེབ་བཤགས་སྦྱང་མ་འགྲུབ་འགྱོད། །ལ་ལས་བླ་མས་ཅི་གསུང་མ་བསྒྲུབ་འགྱོད། །ལ་ལས་འབྲལ་མེད་ཞབས་ཏོག་མ་བསྒྲུབ་འགྱོད། །ལ་ལས་བསྒོམ་ལ་བརྩོན་པ་མ་བྱས་འགྱོད། །ལ་ལས་ཡོན་ཏན་བསླབ་སྦྱངས་མ་བྱས་འགྱོད། །ལ་ལས་བླ་མས་རང་ལ་བདག་རྐྱེན་བཟང་། །མཛད་དུས་སྐྱིད་པར་མ་ཤེས་རབ་ཏུ་འགྱོད། །གང་ལྟར་ལོག་པའི་བདུད་རིགས་གད་མོ་འབྱིན། །དཀར་ཕྱོགས་སྐྱོང་བའི་ལྷ་རྣམས་མྱ་ངན་བྱེད། །ཞིང་བཅུ་ཚང་བ་རྣམས་ཀྱི་སྐྱིད་གླུ་བླང་། །རེ་ལྟོས་བྱེད་པའི་བྲན་འཁོར་སྡུག་ཤིང་བསྔལ། །བསྟན་བཤིག་དགྲ་བོ་རྣམས་ཀྱིས་ཞལ་རས་འཛུམ། །བསྟན་འཛིན་སྐྱེས་བུ་རྣམས་ཀྱིས་ཐུགས་ཁྲེལ་བྱེད། །རང་གི་ཕྱོགས་ལ་ཞེན་ཀུན་ཡི་མུག་སྐྱེ། །བླ་མར་སྙིང་བརྩེ་བྱེད་ཀུན་མཆི་མ་བླགས། །གྲྭ་པ་དམ་ཉམས་ཁ་གཅིག་དགའ་སྤྲོ་བྱེད། །ཉེ་གནས་དཀོར་ཟན་འགའ་ཞིག་ཁོང་དགོད་ཤོར། །ཆོས་མིན་འདོད་རྣམས་བག་ཡངས་སྤྱོད་ཅིང་བདེ། །ཕལ་ཆེར་དགའ་སྡུག་མེད་པར་བཏང་སྙོམས་གནས། །དེ་འདྲའི་དུས་གཅིག་ངེས་པར་འབྱུང་བ་སྟེ། །སྔོན་བྱོན་རིག་འཛིན་གྲུབ་ཐོབ་བཀའ་བརྒྱུད་ཀྱི། །བླ་མའི་ཚོགས་རྣམས་གཤེགས་བཞུད་མ་ཐོས་སམ། །ད་ཡང་ཉེ་བར་མཐོང་འདི་བསམ་གཞིག་འཚལ། །དེ་བས་མཆེད་གྲོགས་གྲྭ་འཁོར་ལེགས་དགོངས་དང་། །ད་ལྟ་བླ་མ་སངས་རྒྱས་མཇལ་དུས་འདིར། །མི་ལ་སྙིང་ཡོད་སྙིང་ལ་རུས་པ་ཐོན། །ཆོས་ལ་འབད་པ་མཛོད་ཅིག་སྐལ་ལྡན་ཚོ། །ཨེ་མ་ཆོས་ལ་སེམས་པའི་མཆེད་གྲོགས་ཚོ། །བསླབ་བྱའི་སྙིང་པོ་འདི་དག་ཐུགས་ཞོག་དང་། །དེང་སང་བླ་མ་བསྟེན་པའི་སློབ་མའམ། །ཉེ་གནས་གྱུར་གང་བླ་མར་མཉམ་འགྲོགས་ལས། །རྫོགས་སངས་རྒྱས་དང་བྱང་ཆུབ་སེམས་དཔའ་ཉིད། །ཡིན་པར་ཤེས་པའི་མི་ནི་ཤིན་ཏུ་དཀོན། །ལ་ལ་ཐོག་མར་ཅུང་ཟད་དད་ན་ཡང་། །ཡུན་གྲོགས་ཅུང་ཟད་རྐྱེན་གྱིས་ལོག་ལྟ་མང་། །བླ་མར་སྐྱོན་གྱིས་ཆ་ཤས་ཅི་མཐོང་ཡང་། །ཐམས་ཅད་རང་སེམས་འཁྲུལ་པའི་སྐྱོན་ཁོ་ན། །རབ་རིབ་ཅན་གྱིས་འབྲས་ལ་སྐྲ་ཤད་དང་། །མཁྲིས་ཅན་དུང་ལ་སེར་པོར་མཐོང་བ་བཞིན། །རང་སྐྱོན་འདི་ཉིད་ནང་ནས་མ་དག་པར། །ཕྱི་ནས་སྐྱོན་གྱི་སྣང་བ་ཟད་མེད་འཆར། །སངས་རྒྱས་ཉེ་གནས་དགེ་སློང་ལེགས་སྐར་གྱིས། །ཤཱཀྱ་ཐུབ་པ་སྐྱོན་གྱི་ཕུང་པོར་མཐོང་། །རང་སེམས་འཁྲུལ་པའི་སྐྱོན་དུ་གྱུར་པ་ལ། །སངས་རྒྱས་དངོས་སུ་མཇལ་དང་ཚུལ་དེ་འདྲ། །དེས་ན་བླ་མར་སྐྱོན་འདུག་སེམས་པ་ཀུན། །བླ་མར་སྐྱོན་མེད་རང་སེམས་སྐྱོན་ཡིན་ནོ། །གང་ཞིག་བླ་མས་བཀའ་བཀྱོན་ཕྱག་འབེབས་སོགས། །རང་ལ་གནོད་པ་སྐྱལ་བ་མཐོང་བ་ཡང་། །རང་ཉིད་ལས་སྒྲིབ་ངན་པའི་སྐྱོན་གྱིས་ནི། །དེ་ལྟར་མཛད་པའི་སྣང་བ་འཆར་བ་ཡིན། །ཅི་ཞེས་དམྱལ་བའི་སེམས་ཅན་ཉོན་མོངས་པས། །ཀུན་ཏུ་བཟང་པོ་གཤིན་རྗེའི་རྒྱལ་པོར་མཐོང་། །དམ་ཆོས་གསུང་བ་རྒྱོབ་གསོད་སྒྲ་རུ་གོ །དེ་ཡང་རང་གི་སེམས་འཁྲུལ་སྣང་བ་ལས། །ངེས་པར་བདེན་ན་ལྕགས་བསྲེགས་སུ་ཡིས་བཟོ། །གཤིན་རྗེ་རང་ཡང་སེམས་ཅན་བསྲེག་བཏུབ་ཀྱིས། །ལས་དེའི་སྡུག་བསྔལ་མེ་ཡི་མི་འཇིག་བསམ། །དེ་ཀུན་དམྱལ་སེམས་རང་གི་འཁྲུལ་སྣང་ཡིན། །དེས་ན་བླ་མས་བཀའ་བཀྱོན་བརྡུང་བཙོག་ཀུན། །རང་ལས་ངན་པའི་སྣང་བར་ངོས་བཟུང་ལ། །ལོག་པར་མི་བལྟ་སྡིག་སྒྲིབ་ཕྱགས་མ་རུ། །ཤེས་ནས་དྭངས་བར་གྱིས་དང་དོན་ཆེན་འགྲུབ། །ལེགས་པར་སོམས་དང་འཁོར་བ་ཐོག་མེད་ནས། །བརྡེག་བཙོག་སྡུག་བསྔལ་སྐྱེ་འཆི་གྲངས་མེད་པ། །བྱས་ཀུན་ངལ་བ་དོན་མེད་ཁོ་ན་སྟེ། །ད་རེས་ཐར་པའི་ལམ་སྟོན་བླ་མ་ཡི། །བརྡེག་བཙོག་ཚིག་རྩུབ་ཅི་དང་ཅི་མཛད་པ། །རྣམ་ཀུན་བྱང་ཆུབ་རྒྱུ་རེ་ངེས་འགྱུར་ན། །བྱ་བའི་སྙིང་པོ་དོན་ཆེན་འགྲུབ་པ་སྟེ། །བཀའ་བཀྱོན་བརྡུང་བཙོག་འདི་རང་བཀའ་དྲིན་ཆེ། །བཀའ་བཀྱོན་ཚིག་རྩུབ་དམ་ཆོས་ཁྱད་འཕགས་ཡིན། །ཕྱག་འབེབ་བརྡུང་བཙོག་དབང་བསྐུར་སྙིང་པོ་ཡིན། །དེ་དོན་གོ་ནས་ལྷག་པར་དད་གུས་པ། །སྲི་ཞུ་གྱིས་དང་རྫོགས་པའི་སངས་རྒྱས་འགྲུབ། །སྤྱིར་ནི་མཚན་ལྡན་བླ་མ་དམ་པ་ཡིས། །གྲྭ་སློབ་ཉེ་གནས་ཆོས་ལ་སྤྱོད་བཞིན་དུ། །སྐྱོན་གྱུར་ཕྲན་བུ་ཙམ་ཡང་སུན་ཕྱུངས་ནས། །མི་མཉེས་ཚུལ་བསྟན་བཀའ་བཀྱོན་མཛད་ཡུལ་དེས། །ཐུགས་ལ་གཅེས་ཤིང་ཐར་པ་འགྲུབ་རྟགས་ཡིན། །གྲྭ་འཁོར་ཆོས་མིན་སྤྱོད་ཅིང་ལོག་ལྟ་ཅན། །དམ་ཉམས་རྣམས་ལ་མི་དགྱེས་ཚུལ་མེད་པར། །ངོ་བསྲུང་ཟང་ཟིང་གནས་སྦྱིན་བཅས་བྱེད་ཡུལ། །དེ་ནི་ཐར་པའི་ལམ་ཐག་ཡོང་ཆད་དེ། །ངན་འགྲོར་བསྒྲོད་ཅིང་ཐུགས་དཀའ་མི་དགྱེས་ཤིང་། །ཐུགས་རྗེ་མི་འཛིན་པ་ཡི་རྟགས་ཡིན་པས། །འདི་དག་གལ་ཆེན་གནད་ཡིན་ཤེས་པར་གྱིས། །དེ་འདྲའི་དགོངས་པ་ཅན་གྱི་མཛད་སྤྱོད་ལ། །ཁ་ཅིག་མི་མོས་སྣང་བ་ཤར་བ་དང་། །རྣལ་འབྱོར་ལ་ལ་བདུད་ཀྱི་བར་གཅོད་ཀྱིས། །སེམས་ལ་ང་ཡིས་དད་གུས་ཞབས་ཏོག་བྱས། །ཆོས་བཞིན་འདི་ལྟར་སྤྱོད་ཀྱང་མི་དགྱེས་ཤིང་། །བཀའ་བཀྱོན་བརྡུང་བཙོག་སྤྱོད་པས་འདི་འདྲ་བསྐྱེད། །ཁོང་ཚོས་དམ་འགལ་ཆོས་མིན་སྤྱོད་ན་ཡང་། །དགྱེས་འདུག་སྙམ་ནས་ལོག་ལྟ་སྐྱེ་བའམ། །ཡང་ན་བདག་ལ་ཟས་གོས་མི་སྟེར་ཞིང་། །གཞན་ལ་ཕངས་མེད་འདི་འདྲ་བྱིན་སྙམ་འཁྲུགས། །ལ་ལ་གཞན་ལ་གདམས་ངག་ཟས་སྟེར་འདུག །ང་ལ་མི་སྟེར་སྙམ་ནས་ཉམས་ཆག་བསགས། །དེ་དང་དེ་འདྲ་ཆགས་སྡང་སྣང་བའི་ཚོགས། །གང་ཤར་བདུད་ཀྱི་བྱིན་གྱིས་བརླབ་པ་སྟེ། །དེ་སྐྱོན་ངེས་བཟུང་རྣལ་འབྱོར་རབ་རྣམས་ཀྱིས། །ཆགས་སྡང་གཞི་མེད་རྩ་བྲལ་ལམ་དུ་ཁྱེར། །འབྲིང་གི་བླ་མ་རང་རིག་དབྱེར་མེད་བསྲེ། །ཏིང་ངེ་འཛིན་གྱིས་དབང་བླངས་བཤགས་པ་བྱ། །ཐ་མས་བླ་མར་དངོས་སུ་འགྱོད་བཤགས་ཕུལ། །ཞེ་བཅད་དམ་བཅའ་དྲག་པོས་བསྲུང་སྡོམ་བྱ། །དེ་ལྟར་བྱས་པས་ཉམས་ཆག་སོར་ཆུད་ཅིང་། །བདུད་ཀྱང་ཁ་སྐྱེངས་བར་ཆད་བརྩམས་མི་ནུས། །བླ་མའི་ཐུགས་དགྱེས་རང་གི་མཆོག་ཐུན་ཐོབ། །གཅེས་པའི་བསླབ་བྱ་ཡིན་ནོ་ཡིད་ལ་བཟུང་། །ཀྱེ་མ་ཧོ། དལ་འབྱོར་སྙིང་པོ་ལེན་པ་དམ་ཆོས་ཡིན། །དམ་ཆོས་རྩ་བ་དགེ་བའི་བཤེས་གཉེན་ཡིན། །ཚེ་གཅིག་སངས་རྒྱས་ཐོབ་བྱེད་གསང་སྔགས་ཆོས། །དེ་སྟོན་རྩ་བའི་བླ་མ་རབ་གཉན་པས། །དམ་ཚིག་བསྲུང་མཚམས་ཁེ་ཉེན་དུག་སྦྲུལ་མགོའི། །ནོར་བུ་བཞིན་དུ་ཕུང་འཚེང་གཉིས་འགྲུབ་པས། །བག་ཡོད་དྲན་པས་དུས་རྟག་ཟིན་བཞིན་དུ། །དམ་ཚིག་སྲོག་པས་ལྷག་མཛོད་སྙིང་གཏམ་ཡིན། །བླ་མའི་མཚན་ཉིད་ཐོག་མར་བརྟགས་པ་ལ། །དབང་ཆོས་ཞུས་རྗེས་བརྟག་པར་མི་རུང་སྟེ། །བཟང་རུང་ངན་རུང་ལྷའམ་བདུད་ཀྱང་རུང་། །ཅི་མཛད་དག་སྣང་སྦྱོང་ཞིག་སྙིང་གཏམ་ཡིན། །བླ་མའི་མཛད་པ་འཕྲིན་ལས་བཞིའི་རྗེས་འགྲོས། །ཞེ་སྡང་འདོད་ཆགས་གཏི་མུག་དུག་ལྔའི་ཚུལ། །སྤྱོད་ཀུན་ལོག་པར་མི་བལྟ་རྒྱལ་བ་ཡི། །མཛད་པར་བལྟ་བར་བྱའོ་སྙིང་གཏམ་ཡིན། །ཅི་ཞེས་ཞེ་སྡང་ཚུལ་གྱིས་སྲོག་བཅད་ཀྱང་། །ཤཱཀྱ་ཐུབ་པ་རྫོགས་སངས་རྒྱས་པའི་དུས། །དུར་ཁྲོད་གནས་སུ་གཤིན་རྗེ་གཤེད་ཆེན་པོར། །སྐུར་བསྟན་བདུད་སྡེ་ཕྱེ་མར་གཞོམ་བྱས་ཤིང་། །དེ་བཞིན་འདོད་ཆགས་གདུང་བའི་ཚུལ་གྱིས་ནི། །བདེ་མཆོག་འཁོར་ལོ་སྡོམ་པ་དགྱེས་རྡོ་རྗེ། །གསང་བ་འདུས་པ་དུས་ཀྱི་འཁོར་ལོ་དང་། །རྟ་མཆོག་ཡང་ཕུར་ཧེ་རུ་ཀ་ཡི་ཚོགས། །རིགས་ལྔ་བདེ་བར་གཤེགས་བཅས་དུས་རྟག་པར། །ལྷན་སྐྱེས་གསང་བའི་ཡུམ་དང་འབྲལ་མེད་པར། །རྡོ་རྗེ་པདྨ་ཟུང་སྦྱོར་འཁྲིལ་སྙོམས་ལྟོས། །རྒྱལ་བ་རྣམས་ཀྱི་མཛད་པ་དེ་འདྲ་དང་། །བླ་མའི་མཛད་པ་མཚུངས་པར་ཤེས་གྱིས་ཤིག །གཞན་ཡང་རྒྱ་གར་རིག་འཛིན་ཆེན་པོ་བརྒྱད། །གྲུབ་ཆེན་བརྒྱད་ཅུ་སོགས་དང་བོད་ཡུལ་དུ། །རྗེ་འབངས་ཉེར་ལྔ་སྤྲུལ་པའི་གཏེར་སྟོན་དང་། །མར་རྔོག་ས་ངོར་ཀམ་འབྲུག་འབྲི་སྟག་གིས། །སྐྱེས་བུ་མཆོག་རྣམས་བདེ་ཆེན་སྐྱེད་པ་ཡི། །གསང་བའི་ཡུམ་ལ་དགྱེས་བཞིན་བརྟེན་ནས་ནི། །དགའ་བ་བཅུ་དྲུག་རོ་ལ་མྱོང་བ་དང་། །གྲུབ་ཐོབ་བིརྺ་པ་དང་ཤ་ཝ་རི། །བྱཱ་ལི་པ་དང་རྒྱལ་བ་ཞང་སོགས་ཀྱིས། །བྱ་དང་རི་དྭགས་སྲོག་ཆགས་ལིང་བྱེད་ཅིང་། །ཞེ་སྡང་དྲག་པོའི་ཚུལ་གྱིས་གཡུལ་འཁྲུགས་མཛད། །དེ་བཞིན་ལཱ་ཝ་པ་སོགས་གྲུབ་ཆེན་འགའ། །ལོ་ཟླ་ཞག་དུས་མང་པོར་ཐུན་གཅིག་དང་། །གཉིད་ཅིང་རྟག་ཏུ་གཉིད་ལ་བརྩོན་པ་སོགས། །རིགས་གྲུབ་རྣམས་ཀྱི་མཛད་སྤྱོད་དཔག་དཀའ་དང་། །ཉི་ཤུ་རྩ་བཞིའི་གནས་ནས་ཡེ་ཤེས་ཀྱི། །མཁའ་འགྲོས་ཆང་འཚོང་ཚོས་འཚོང་སྨད་འཚོང་མ། །ཤན་པ་གདོལ་པ་རྒས་ཁོག་མི་སྡུག་པར། །སྤྲུལ་ནས་གདུལ་བྱར་ཕན་གདགས་དུ་མ་སོགས། །སངས་རྒྱས་རྣམས་ཀྱི་མཛད་སྤྱོད་སྣ་ཚོགས་པ། །མཐའ་ཡས་རོལ་པ་དུ་མར་འཆར་བ་ཉིད། །ཚད་བཟུང་ལས་འདས་སྤྱོད་པའི་རྣམ་གྲངས་ཀྱིས། །འགྲོ་རྣམས་དོན་མཛད་ཐོས་ཤིང་ཤེས་བྱས་ཏེ། །དེས་ན་རང་གི་རྩ་བའི་བླ་མ་ཡི། །མི་དགྱེའི་རྣམ་པ་ཅི་དང་ཅི་མཛད་ཀྱང་། །འཁྲུལ་པ་མི་མངའ་ཉེས་པའི་སྐྱོན་བྲལ་བས། །དད་གུས་མོས་པ་རབ་ཏུ་བརྟན་པར་བྱོས། །དེ་ལྟར་དཔལ་ལྡན་རྩ་བའི་བླ་མ་ཡི། །སྐུ་གསུང་ཐུགས་སྤྱོད་དགེ་དང་མི་དགེའི་ལས། །ཐམས་ཅད་རྒྱལ་བའི་མཛད་པར་དྭངས་བླངས་ཤིང་། །ཆོས་ནས་ཆོས་བཞིན་སྤྱོད་མཛད་སྙིང་གཏམ་སྟེ། །ཁ་ཅིག་བླ་མ་གྲུབ་ཐོབ་མཛད་སྤྱོད་རྗེས། །དཔག་ནས་ཉོན་མོངས་བག་ཡངས་སྤྱོད་པ་ལ། །སློབ་བུ་བློ་ཆུང་ཞུགས་པར་མི་བྱ་སྟེ། །མི་དགེའི་སྤྱོད་པ་ཆ་ཤས་སྤང་ཡང་འཚལ། །ཅི་ཞེས་རྨ་བྱས་བཙན་དུག་ཟ་བ་ལ། །དཔག་ནས་ཁྭ་ཏས་བཙན་དུག་ཟོས་ན་འཆི། །དེ་བཞིན་གསང་སྔགས་ལྟ་སྤྱོད་དགོངས་པའི་ཕུག །མ་ལོན་བག་མེད་སྤྱོད་པ་འཆོལ་ཉོག་ལ། །གསང་སྔགས་སྤྱོད་པར་རློམ་ཞིང་ཁས་འཆེ་ན། །མཚམས་མེད་ལྔ་ལ་བསྐལ་པར་སྤྱོད་པ་ཡི། །སྡིག་པ་འདི་ཆེ་རྡོ་རྗེ་དམྱལ་བ་རུ། །ལྟུང་བར་ངེས་པར་རབ་ཏུ་འཛེམ་པར་གྱིས། །ཀྭ་ཡེ། ལེགས་པར་གསོན་དང་དེང་དུས་གྲོགས་པོ་ཚོ། །ཆོས་ལ་བསམ་ནས་བཙུན་པའི་གྲལ་ཞུགས་ཤིང་། །གདམས་ངག་བསམ་ནས་བླ་མ་བསྟེན་པ་ཀུན། །བསླབ་བྱའི་གཙོ་བོ་འདི་ཀོ་ཡིད་གཟུང་འཚལ། །རང་རེ་མི་ཚེ་སྤྲིན་བར་ཉི་ཤར་ཙམ། །སྐད་ཅིག་ཙམ་དེའི་བདེ་འདིར་མ་ཞེན་པར། །གཏན་བདེའི་ཞིང་དུ་ཐར་འདོད་བརྩོན་པ་ཆེ། །རབ་བསྐྱེད་ལུས་ངག་དགེ་བའི་ལས་ལ་འཁོལ། །སྣང་བ་སྒྱུ་མའི་ལྟད་མོར་ཨ་མ་འཐས། །མི་རྟག་འཆི་བ་སྙིང་ནས་དྲན་པར་གྱིས། །ངན་སོང་གནས་གསུམ་སྡུག་བསྔལ་དཔག་དཀའ་ཞིང་། །ཚེ་ཡི་ཚད་ཀྱང་བགྲང་བར་ནུས་མིན་གྱི། །ད་རེས་མཐོ་རིས་གནས་སུ་ཡུད་ཙམ་ཞིག །ཕྱིན་ཆད་སླད་མར་དེ་རུ་འཁོར་བའི་རྒྱུ། །དེ་བས་ད་ལྟ་ཐར་པ་ཆེན་པོའི་སར། །འཁོད་ཐབས་མྱུར་དུ་བསྒྲུབ་པའི་དུས་ལ་བབ། །དེ་རིང་སང་ཉིན་མི་འཆིའི་གདེང་མེད་པས། །དགེ་བའི་ལས་ལ་ད་ལྟ་ཉིད་གྱིས་ཤིག །མཁར་ཞིང་བང་མཛོད་ནོར་ཕྱུགས་ཉེ་འབྲེལ་ཡང་། །འཆི་དུས་ཤུལ་ལུས་རང་ཉིད་གཅིག་པུར་འགྲོ། །རང་གི་དགེ་སྡིག་ཅི་བྱས་རང་ལ་སྨིན། །གྲོགས་མེད་ཕ་རོལ་འགྲོ་ངེས་འདི་ལ་བསམ། །དེ་ན་དུས་དེར་ཕན་ཐབས་ཟབ་མོ་ཞིག །སྒྲུབ་པའི་དུས་ནི་ད་ལྟ་ཡིན་ངེས་སོ། །ཕན་ཐབས་རྒྱལ་བས་གསུང་པ་གྲངས་མང་དོན། །བསྡུ་ན་སྤྱོད་པ་སྡོམ་པ་རྣམ་པ་གསུམ། །བསྒོམ་པའི་གཙོ་བོ་ལམ་འབྲས་ཕྱག་ཆེན་དང་། །ལྟ་བའི་གཙོ་བོ་དབུ་མ་རྫོགས་པ་ཆེ། །དེ་ལ་སྤྱོད་པ་སྡོམ་པ་རྣམ་གསུམ་ཡང་། །འདུལ་བ་དང་བསྟུན་སོ་སོར་ཐར་པ་ཡང་། །རྩ་བ་མི་དགེ་བཅུ་སྤང་དགེ་བཅུ་བསྒྲུབ། །ཡང་སྙིང་རྩ་བཞི་ཆང་ལྔ་སྤང་བ་གཙོ། །རྩ་བ་སྲོག་བཅད་སྤང་ནས་ཞི་དུལ་སྤྱོད། །རྩ་བ་མ་བྱིན་ལེན་སྤང་བག་ཡོད་སྤྱོད། །རྩ་བ་བུད་མེད་སྤྱད་སྤང་ཁྲེལ་ཡོད་སྤྱོད། །རྩ་བ་རྫུན་སྨྲ་སྤང་ནས་དྲང་པོར་བརྗོད། །ཆང་ནི་རྒྱལ་བས་ཡང་ཡང་བཀག་པ་ལ། །ཤེས་བྱས་ཧ་ལའི་དུག་ལྟར་སྤང་བ་གཅེས། །འདི་དག་མ་སྤངས་ཉེས་ལྟུང་སྤང་ཕན་ཡོན། །བཀའ་བསྟན་བལྟས་ནས་སྤངས་བླང་ནན་ཏན་སྤྱོད། །ཐེག་ཆེན་རྩ་བ་བྱང་སེམས་བསླབ་སྤྱོད་ཀྱང་། །རྩ་བ་ཚད་མེད་བཞི་དང་ཕྱིན་དྲུག་བསྒྲུབ། །ཡང་སྙིང་བྱམས་པ་སྙིང་རྗེས་གཞན་ཕན་བསྒྲུབ། །དེ་ཡང་གཞན་ལ་འདི་ཕྱི་བདེ་ཐབས་ཉིད། །གསང་སྔགས་རྩ་བ་དམ་ཚིག་སྤྱོད་པ་ཡང་། །རྩ་བ་སྐུ་གསུང་ཐུགས་གསང་ཉིད་བསྲུང་འདུ། །ཡང་སྙིང་ལྷ་བསྙེན་བླ་མ་དགྱེས་ཐབས་ཡིན། །དེ་ཡང་རྡོ་རྗེ་སློབ་དཔོན་གསུང་བསྒྲུབ་གཙོ། །དེས་ན་ཐོག་མར་བླ་མ་གུས་པས་བསྟེན། །བར་དུ་ཅི་གསུངས་བཀའ་བཞིན་གུས་པས་བསྒྲུབ། །མཐའ་རུ་དམ་སེལ་མེད་པར་ཉམས་ལེན་དྲིལ། །རི་ཁྲོད་དབེན་པ་བསྟེན་འཚལ་སྙིང་གྲོས་ལ། །ད་དུང་གལ་ཆེ་གནད་གྱུར་འདི་སྐད་སྨྲ། །སྙིང་རྗེས་ཀུན་སླང་རྒྱལ་བསྟན་ཕན་པ་ལས། །གཞན་སྲོག་འཚེ་བ་སྤང་བ་རབ་ཏུ་གཅེས། །ངན་སྔགས་བསྒྲུབ་པར་མི་འཚལ་སྙིང་གྲོས་ཡིན། །བསྟན་པའི་ཞབས་ཏོག་གཞན་ཕན་དགེ་རླབས་ཆེན། །འགྲུབ་ན་མ་རྟོགས་མ་བྱིན་ལེན་སྤང་གཅེས། །རྒྱལ་བཀས་གནང་ངམ་གདུང་བརྒྱུད་འཛིན་ཆེད་དམ། །རྩ་རླུང་གྲོགས་ལས་མི་གཙང་སྤྱོད་སྤང་གཅེས། །འགྲོ་ཕན་དོན་ཆེན་བསྒྲུབ་དང་གསང་སྤྱོད་ཆེད། །མ་གཏོགས་རྫུན་ཚིག་མི་སྨྲ་ཤིན་ཏུ་གཅེས། །རྩབཞི་ཆང་ལྔ་མདོ་སྔགས་ཐུན་མོང་དུ། །རབ་སྡོམ་མཛད་དེ་འདི་ཉིད་ཡལ་དོར་ན། །ཆོས་པ་ཡིན་ཞེས་མིང་གིས་ཅི་ཞིག་ཕན། །དཔེར་ན་སྡོང་པོ་བཅད་པའི་ཡལ་གའམ། །ས་བོན་བསྲེག་པའི་སྙེ་མ་དག་དང་མཚུངས། །ཁ་ཅིག་ལྟ་བ་རྟོགས་ཚེ་རྒྱུ་འབྲས་ལ། །རྩིང་སྤྱོད་ཆོག་ཅེས་བདུད་ཀྱིས་ཚིག་སྨྲ་སྟེ། །ལྟ་བ་རྟོགས་ཚེ་རྒྱུ་འབྲས་རྩིང་ཆོག་ན། །ཤཱཀ་ཐུབ་སྤྱོད་ལམ་གསུངས་དང་བཅས་པ་ཡི། །རྒྱུ་འབྲས་ཁོ་ནར་ཕྲ་ཞིབ་མཛད་པས་ན། །ཤཱཀ་ཐུབ་ལྟ་བ་མ་མཐོང་སྨྲ་ལགས་སམ། །དེ་བས་མུ་ཅོར་སྨྲ་བ་སྙིང་རེ་རྗེ། །སྔགས་ནས་དུག་ལྔ་མི་སྤང་གསུངས་པ་ཡང་། །སྙིང་རྗེས་ཞེ་སྡང་ཞེན་བྲལ་འདོད་ཆགས་དང་། །འོད་གསལ་གཏི་མུག་བྱར་མེད་ང་རྒྱལ་དང་། །རང་གྲོལ་ཕྲག་དོག་དུག་ལྔ་ཡེ་ཤེས་ལྔར། །ཤར་བའི་ཕྱིར་ལས་ཉོན་མོངས་རང་ག་མ། །སྤྱོད་ཅེས་རྒྱུད་སྡེ་གང་ནའང་གསུངས་པ་མེད། །ཆང་ཡང་རྟེན་འབྲེལ་རྫས་དང་བག་ཡོད་དུ། །རྟེན་ལས་ཆང་འཐུང་ར་རོ་འཁྲུལ་སྣང་བ། །འབྱམས་པར་གྱིས་ཞེས་རྒྱུད་ལུང་གང་ནའང་མེད། །རང་གི་ཉོན་མོངས་མགོ་མ་ནོན་པ་ལ། །སྔགས་སྤྱོད་ཁ་གཡར་འདུལ་ཁྲིམས་རྩིས་མེད་དོར། །ལྟ་བ་རྟོགས་པའི་གདེང་དང་མི་ལྡན་པར། །བག་མེད་འཆོལ་ཉོག་ངང་དུ་རྩིང་སྤྱོད་དང་། །ཐོ་ཅོ་གྲུང་པོའི་བྱ་བ་བྱེད་པ་ནི། །འདི་དག་གསང་སྔགས་བསྟན་ལ་དམའ་བྱེད་ལས། །སྔགས་དོན་ཅུང་ཟད་ཙམ་ཡང་མ་གོ་འཁྲུལ། །འོན་ཀྱང་རྒྱལ་བའི་སྤྲུལ་པ་སྣ་ཚོགས་སྤྱོད། །ཚུལ་གྱིས་འགྲོ་བ་འདུལ་བྱེད་ཡོད་སྲིད་པས། །དེ་དག་རྣམས་ལ་སྐྱོན་བརྗོད་མ་ལགས་ཤིང་། །དེ་བས་ཚུལ་ངན་འདི་འདྲ་སྤང་འཚལ་གནད། །གཞན་ཡང་དེང་དུས་མཐུ་རྫས་སྔགས་ཀྱིས་ནི། །མི་སྲོག་བཅད་ལ་ཉེས་པ་མེད་སྨྲ་ཐོས། །དེ་ནི་རྒྱུ་འབྲས་མ་གོ་འཁྲུལ་ཚབ་ཆེ། །ཅི་ཞེས་ཤཱཀྱའི་རིགས་ལ་སངས་རྒྱས་དེས། །སྡིག་པ་བགྱིས་དང་ཡི་རང་བྱས་པ་གཉིས། །ཉེས་པ་མཉམ་ཞེས་གསུངས་ན་རང་ཉིད་ཀྱིས། །ལུས་ངག་སེམས་ཀྱིས་འབད་དེ་སྦྱོར་བའི་ལས། །ཉེས་པའི་རྣམ་པར་སྨིན་པ་ཅིས་མི་འབྱུང་། །པདྨ་སྐྱེས་དེས་སྔགས་པས་མཐུ་བསྒྲུབས་ཤིང་། །སྒྲུབ་ཁང་གོས་གོན་མཐུ་རྫས་བསོགས་གསུངས་དང་། །རྒྱལ་བས་གདུག་བྱམས་རྩ་ལྟུང་བཅུར་གསུང་རྣམས། །སངས་རྒྱས་བསྟན་དང་ཉེས་མེད་སེམས་ཅན་ལ། །འཚེ་བར་བྱེད་པ་བསྒྲལ་ནས་བསྟན་པ་མཆོག །གཉེན་ཕྱིར་བྱེད་ལས་རང་འདོད་རུང་མ་གསུངས། །སྤྱིར་ཡང་ཞིང་བཅུ་བསྒྲལ་བར་གསུང་པ་ཡང་། །ལས་ངན་དེ་དག་མཚམས་མེད་རྣམ་སྨིན་གྱི། །དགེ་ཟད་ཐར་པའི་དཔྱང་ཐག་ཆད་པ་ལ། །མངོན་སྤྱོད་མཐུ་ཡིས་མྱུར་དུ་བསྒྲལ་བྱས་ཏེ། །ཐར་པ་བྱང་ཆུབ་ས་བོན་བཞག་གནས་ནི། །དག་པའི་ཞིང་དུ་དྲངས་པའི་དགོངས་པ་ཡིན། །དེ་བས་རང་དང་རྩ་བའི་བླ་མའི་སྐུར། །འཚེ་ན་མ་གཏོགས་ངན་སྔགས་ནུས་པའི་མཐུས། །གཞན་སྲོག་མི་གཅོད་ཁོ་བོས་སྙིང་གྲོས་འདེབས། །འདི་ཡང་གལ་ཆེ་གནད་ཡིན་ཐུགས་བཞག་འཚལ། །མདོར་ན་དགེ་སྒྲུབ་སྡིག་སྤོང་རྒྱུ་འབྲས་ཞིབ། །ཀུན་གྱི་རྩ་བ་རང་སེམས་གྱོང་པོ་བཏུལ། །ཞི་དུལ་བཟོད་ལྡན་བྱ་སྤྱོད་རབ་བརྩོན་པར། །ངོ་ལྐོག་མེད་པར་མཚུངས་པ་སྤྱོད་པའི་གཙོ། །བསྒོམ་པའི་གཙོ་བོ་ལམ་འབྲས་ཕྱག་ཆེན་ཡང་། །མཚན་བཅས་སྒོམ་པ་ལམ་འབྲས་ཐབས་ཀྱི་གནད། །ཡེ་ཤེས་དྷུ་ཏཱི་རླུང་སེམས་གཉིས་མེད་དུ། །རབ་ཆུབ་ཐིག་ལེ་ཟག་བྲལ་དབྱིངས་ཐིམ་ཞིང་། །མཚན་བྲལ་བསྒོམས་པ་ཕྱག་རྒྱ་ཆེན་པོ་ནི། །གནས་ལུགས་གཉུག་མ་བརྗོད་མཚན་སྤྲོས་ཚོགས་ལས། །རབ་འདས་ངོ་བོར་ཅིར་སྣང་ཆོས་སྐུའི་ལམ། །མ་གཡེང་མི་སྒོམ་ཉམས་ལེན་རྩ་བ་ཡིན། །ལྟ་བའི་གཙོ་བོ་དབུ་མ་རྫོགས་ཆེན་ཡང་། །མཐའ་བྲལ་དབུ་མ་ཉིད་དུའང་མི་དམིགས་པ། །གཅིག་དང་ཐ་དད་ཡིད་བློའི་སྤྲོས་ཞི་བ། །ཆོས་ཉིད་སྐྱེ་འགག་ཟག་བྲལ་རྒྱ་ཆེ་མཆོག །རྫོགས་ཆེན་ཀ་དག་བློ་འདས་ཆོས་སྐུའི་ཐུགས། །མངོན་སུམ་ཉིད་མྱོང་གསང་ལས་ཆེས་གསང་བ། །ཁྲེགས་ཆོད་ཐོད་རྒལ་རང་བྱུང་རིག་པའི་དོན། །བརྡའ་དག་ཟུང་འཇུག་རྩོལ་བྲལ་ཉམས་ལེན་གཙོ། །མདོར་ན་ཆོས་ཚིག་དཔེ་ལ་མ་ལུས་པར། །རང་རིག་དོན་ལ་ཉམས་མྱོང་ཁོ་ཐག་གནད། །ཆོད་ན་འདི་ཕྱི་བར་དོ་གསུམ་གང་རུང་། །གྲོལ་བའི་གདེང་ཡོད་ཆུག་དང་དེ་རང་ཆོག །ལྟ་སྒོམ་སྤྱོད་གསུམ་གཞི་ལམ་འབྲས་བུ་སོགས། །མང་མང་བཤད་ཀུན་ཚིག་ཡིན་མ་འབྱམས་པར། །བླ་མ་མཚན་ལྡན་ཞལ་གདམས་རང་ཉིད་ཀྱི། །སྙིང་བུར་བརྩོན་བསྐྱེད་བསྒོམ་ཞེས་སྙིང་གཏམ་སྟེ། །ཀྱེ་མ། དེང་སང་དུས་ངན་སྙིགས་མའི་དུས། །བདག་གི་དེ་སྐད་སྨྲ་བས་ཅི་ཞིག་ཕན། །སྔོན་བྱོན་ད་ལྟར་བཞུགས་པར་གྱུར་པ་ཡི། །སྐྱེས་མཆོག་མི་ཡི་སངས་རྒྱས་དངོས་བྱོན་དུས། །གྱུར་པ་རྣམས་ཀྱི་གདུལ་བྱར་ཕན་པའི་ཕྱིར། །གསུང་མགུར་ཞལ་གདམས་དྲང་ངེས་གདམས་པ་ཆེ། །དུ་མ་གསུང་ཡང་དེ་ལ་ཅི་ལྟ་བ། །སྤྱོད་པ་ཉིན་སྐར་དང་མཚུངས་དེ་བས་ཀྱང་། །རྒྱལ་གསུང་འགའ་ཞིག་བྲ་ཕྱིའི་ཚངས་སྟན་དུ། །རྩིས་མེད་དོར་གྱུར་འདི་འདྲ་ཀྱེ་མ་ཧུད། །དེ་བས་སྤྲང་བན་མུ་ཏོ་བདག་འདྲ་བས། །ཕན་འདོད་བསླབ་བྱ་ཡིན་ཁུལ་བརྗོད་པ་ནི། །དོན་མེད་ཐང་སྟོང་ཁྱི་ཟུག་ཅིར་མི་ཡོང་། །ལར་ཡང་ཐར་པ་དགེ་བའི་ཆོས་ཅི་ཡིན། །བཤད་ལས་ཚོང་ཁེ་གཡོ་སྒྱུ་ཟོལ་ཟོག་ཚིག །གུས་པར་ཉན་འདིར་བསམ་ཞིང་ཡིད་རེ་མུག །དེ་བས་ཆོས་བཞིན་སྤྱོད་འདོད་མཆེད་གྲོགས་ཚོ། །བག་མེད་འཁྲུལ་པའི་ཚིག་རྗེས་མི་འབྲང་བར། །བདེན་སྨྲར་གུས་ཉན་རྣམ་པར་དགེ་བ་ལ། །འབད་པར་འཚལ་ཞེས་བདག་གི་གྲོས་ཆེན་དེ། །དེ་སྐད་ད་ལྟའི་དུས་དང་ཕྱིས་འབྱུང་གིས། །བླ་མའི་ཉེ་གནས་གྲྭ་འཁོར་གྱུར་རྣམས་ལ། །སྐྱོ་བས་བསྐྱེད་དེ་ངེས་པར་འབྱུང་བའི་གཏམ། །ཆ་ཤས་ཙམ་ཞིག་སྐབས་འདིར་སྨྲ་བྱེད་འདི། །བདེན་པར་བརྗོད་ལ་རྩུབ་མོའི་ཚིག་ཀྱང་མེད། །དགེ་བར་བསྐུལ་ལས་འཁྲུལ་པའི་གཏམ་ཡང་མིན། །དེས་ན་ཚིག་དོན་ལེགས་པར་བསམ་གཞིག་སྟེ། །འཆི་དྲན་ཆོས་འབད་བླ་མ་མཉེས་བགྱིད་འཚལ། །ཞེས་པ་ཞར་བྱུང་ཚིགས་སུ་གླེང་བྱས་ཏེ། །ད་ནི་གང་འཕྲོས་བླུན་རྒན་བདག་སྤྱད་ཚུལ། །ཅུང་ཟད་ཙམ་ཞིག་སླར་ཡང་སྨྲ་བྱེད་ན། །བཅུ་དྲུག་ལོ་མཇུག་རྩ་བའི་བླ་མ་མཆོག །གཤེགས་པའི་རྐྱེན་དང་ཕྱི་ནང་གསང་བའི་ཚུལ། །དུ་མས་ཡིད་སྐྱོ་ཡིད་བསུན་རབ་བྱུང་ཕྱིར། །ཁྱད་པར་བསམ་བློ་ཉིན་མཚན་ཁ་སྦྱོར་ཡང་། །དལ་འབྱོར་མི་ལུས་རྙེད་དཀའ་ད་རེས་ཙམ། །ཐོབ་དུས་འདི་རུ་ཁ་གཏིང་མེད་པ་ཡིས། །ཆོས་ཅིག་བྱས་ནས་གཏན་བདེའི་མདུན་མ་ཞིག །འགྲུབ་མ་ཐུབ་ན་ཕྱི་མ་ཅི་ལྟ་བུ། །འགྱུར་བ་ཆ་མེད་མུན་ཁུང་མདའ་དང་འདྲ། །དེས་ན་མི་ཚེ་སྐད་ཅིག་ཡུད་ཙམ་དེར། །ཐབས་མཁས་འཇིག་རྟེན་ཆོས་བརྒྱད་དང་བསྟུན་ནས། །དགོན་གནས་མགོ་འཛིན་བླ་མའི་མིང་བཟུང་སྟེ། །རང་མགོ་གཡོག་ན་ཕྲལ་དུ་སྐྱིད་གྱུར་ཀྱང་། །ལོ་བརྒྱ་ཐོག་གཅིག་ཟད་ལ་ཤོར་བ་ཡིན། །ཕྱི་མ་ངན་འགྲོར་སྡུག་བསྔལ་བཟོད་མེད་པར། །མྱོང་བར་གྱུར་ན་ཡུད་ཙམ་བདེ་སྐྱིད་ཀྱི། །ཅི་ཕན་དེ་བས་ཆོས་ལ་གནས་དགོས་ངེས། །ཆོས་ཀྱང་དྲང་ངེས་བྱེ་བྲག་ཤིན་ཏུ་མང་། །དྲང་དོན་མཚན་ཉིད་ཐེག་པ་བཟང་ན་ཡང་། །གྲངས་མེད་མང་པོར་ཚོགས་བསགས་སྒྲིབ་སྦྱངས་ནས། །བྱང་ཆུབ་སྒྲུབ་འདི་ཧ་ཅང་རྒྱང་ཐག་རིང་། །ངེས་པའི་དོན་འགྱུར་སྔགས་ཀྱི་ཐེག་པ་ཡང་། །ཕྱི་རྒྱུད་བྱ་སྤྱོད་རྣལ་འབྱོར་སྤྲོས་བཅས་ཀྱི། །བསྐྱེད་བཟླས་ཏིང་འཛིན་རིམ་པ་ལེགས་ན་ཡང་། །སྐྱེ་བ་གྲངས་ཆེན་བྱང་ཆུབ་སྙིང་པོ་འགྱངས། །ནང་རྒྱུད་མ་ཧཱ་ཨ་ནུ་བསྐྱེད་རྫོགས་ཆོས། །རྡོ་རྗེ་གསུམ་སྦྱངས་རྩ་རླུང་ཐིག་ལེའི་གནད། །བརྫུན་པར་བྱེད་འདི་ངོ་མཚར་ཆེ་ན་ཡང་། །བློས་བྱས་སྒྲིབ་དང་མ་བྲལ་ཅུང་ཟད་བུལ། །དེས་ན་ཚེ་གཅིག་སངས་རྒྱས་རྡོ་རྗེ་སྙིང་། །རྫོགས་ཆེན་སེམས་སྡེ་ཕྱག་རྒྱ་ཆེན་པོའི་དོན། །རྫོགས་ཆེན་ཀློང་སྡེ་འོད་གསལ་ཡེ་ཤེས་གཤིས། །རྫོགས་ཆེན་མན་ངག་ཁྲེགས་ཆོད་ཀ་དག་ཆེ། །ཡང་གསང་བླ་མེད་ཐོད་རྒལ་མངོན་སུམ་དུ། །སྣང་བ་བློ་འདས་ཀུན་བཟང་ཐུགས་ཀྱི་སྙིང་། །ཐེག་དགུའི་རྩེ་མོ་དེ་ལ་རབ་ཞུགས་ནས། །འདི་ཕྱི་བར་དོ་གྲོལ་བ་ཐོབ་ཕྱིར་ལས། །ཀུན་རྫོབ་ཆོས་གྱུར་ཕྱི་ཡི་རིག་པའི་གནས། །སྒྲ་སྙན་མངོན་བརྗོད་ཟློས་གར་སྡེབ་སྦྱོར་དང་། །སྨན་རྩིས་འཁྱུད་དཔྱད་མོ་པྲ་རྫས་སྔགས་མཐུ། །བཟོ་དང་མཚན་ཉིད་རིག་པ་ལ་སོགས་ཀུན། །ད་ལྟ་ཡུད་ཙམ་མཁས་གྲགས་མཛེས་ན་ཡང་། །ནམ་ཞིག་འཆི་བའི་དུས་ལ་བབ་པའི་ཚེ། །ཤེས་བྱར་གྱུར་པ་དེ་དག་གང་གིས་ཡང་། །བདེ་འགྲོ་མཐོ་རིས་ཐོབ་ནུས་འགའ་ཞིག་ལས། །རང་སེམས་འཁྲུལ་པ་སངས་བར་མི་ནུས་ཀྱི། །བྱང་ཆུབ་ཆེན་པའི་གོ་འཕང་འགོད་ནུས་མིན། །དེ་བས་ཤེས་བྱའི་ཡོན་ཏན་རིག་གནས་ལ། །གཉེར་བའི་དོན་མེད་ཇི་བཞིན་བྱང་ཆུབ་ཀྱི། །ཉམས་ལེན་སྙིང་པོ་ནང་གི་རིག་པའི་གནས། །གཅིག་ཤེས་ཀུན་གྲོལ་གནད་དེ་བསྒོམ་གདུང་ཡང་། །དེ་སྟོན་བླ་མ་མཚན་ལྡན་མ་འཕྲད་ན། །ཅི་ལྟར་བྱས་ཀྱང་ཐར་ལམ་མི་ཟིན་པས། །དེས་ན་དེང་སང་དུས་ཀྱི་སྙིགས་མ་འདིར། །མཚན་ལྡན་བླ་མ་མཆོག་གྱུར་ཕལ་ཆེར་གཤེགས། །ཞལ་བཞུགས་པ་ལ་ས་ཐག་རིང་པའི་སྟབས། །རང་ཉིད་ལུས་ཟུངས་མ་རྫོགས་ཕྱིན་མ་ནུས། །ལ་ལ་སྐུ་བགྲེས་མྱ་ངན་འདའ་ཉེ་བས། །ཆོས་ཀྱང་ཐོབ་དཀའ་གདམས་པ་རྫོགས་མི་ནུས། །ལ་ལ་ཁམ་ཆེ་ཆོས་ཀྱང་ཞིབ་མི་ཐོབ། །ལ་ལ་ཁྲིད་ལུང་ཙམ་གྱུར་བློ་མ་ཁེངས། །ལ་ལ་བླ་མ་ངོ་བོ་བཟང་ན་ཡང་། །སྐུ་ན་མ་སྨིན་བསླབ་སྦྱོང་རྩལ་མ་རྫོགས། །འགའ་ཞིག་ལྟ་དགོངས་ཆེ་བའི་སྙན་གྲགས་ཀྱང་། །ལེགས་བརྟག་ཚེ་ན་བྱིས་པའི་འཇའ་ཚོན་མཐོང་། །འགའ་ཞིག་རྟོགས་ལྡན་ཉམས་ཁྲིད་བཙུན་ཁུལ་ཡང་། །གཏན་ལ་ཕབ་ཚེ་ཁུངས་མེད་བླུ་བསྒོམ་མང་། །ལ་ལ་བཤད་རྒྱུའི་ཚིག་ལ་མཁས་ན་ཡང་། །དོན་དང་མ་འབྲེལ་ནད་ལ་སྨན་བཤད་འདྲ། །ལ་ལ་ཉམས་མྱོང་དོན་ལ་མཁས་གྲགས་ཀྱང་། །རྣམ་རྟོག་མ་བྲལ་བྱ་གཤོག་ཡ་བྲལ་འདྲ། །མདོར་ན་རང་ཉིད་མཐོང་ཐོས་ཤེས་རབ་ཆུང་། །ལྐོག་གྱུར་མངོན་པར་ཤེས་པ་མ་ཐོབ་ཕྱིར། །བླ་མ་གང་བསྟེན་བསམ་ནས་སེམས་བསྔལ་ཞིང་། །རང་དབང་ཆོས་ལ་མ་ཐོབ་སྡུག་བསྔལ་མྱོང་། །ཆོས་ཕྱིར་ཕྱོགས་མེད་རྒྱལ་ཁམས་འགྲིམས་འདོད་ཀྱང་། །ཉེ་འབྲེལ་བླ་སློབ་གྲྭ་འཁོར་རྣམས་བཤོལ་ངོས། །བཟློག་པར་མ་ནུས་ཅི་བྱས་ཐབས་མེད་དུ། །གྱུར་ན་རེ་ཞིག་འབྲི་འཇགས་ས་ཕྱོགས་དེར། །འདུག་པས་རིམ་གཉིས་རྣམ་གཡེང་ལྷ་བུའི་བདུད། །འདོད་ཡོན་གདུལ་བྱ་ཇེ་ལས་ཇེ་ཆེར་འཕེལ། །མི་ཚེ་ལོ་གྲངས་ཞག་རེ་བཞིན་དུ་ཟད། །ཆོས་ལ་བརྩོན་འགྲུས་སང་བྱེད་གནང་བྱེད་ལུས། །ཆགས་འཛིན་སྡང་འཁྲུགས་ཞེན་པ་ཇེ་ཆེར་སོང་། །རྣམ་གཡེང་མི་ཆོས་རིམ་གྱིས་ཡར་ཡར་འཕེལ། །འཁྲུལ་པའི་རྟོག་ཚོགས་བུ་ཡུག་ལྟར་དུ་འཚུབ། །སེམས་ལ་འདོད་སྨོན་མང་པོ་རླུང་ལྟར་ལྡང་། །དེ་དང་དེ་འདྲའི་འཁྲུལ་སྣང་རབ་འབྱམས་ནས། །མི་རྟག་འཆི་བ་དེ་ཡང་སྐབས་རེ་བརྗེད། །དད་པ་དག་སྣང་དེ་ཡང་རིམས་ཀྱིས་དྲེད། །ཉམས་མྱོང་བསྒོམ་པ་དེ་ཡང་ཕར་ཕར་ཡལ། །སྐབས་རེར་རི་ཁྲོད་བརྟེན་པར་འདོད་ན་ཡང་། །རང་དབང་མི་ཐོབ་མི་ཁོམས་ལས་ལ་འབྱམས། །གྲྭ་འཁོར་ཡོན་བདག་བླ་སློབ་ཕལ་ཆེ་བས། །རང་དོན་མི་དགོས་ཁྱོད་ཀྱིས་སྔོན་དུས་གྲུབ། །ད་རེས་སྤྲུལ་སྐུ་འགྲོ་དོན་ཕྱིར་དུ་ཡིན། །འགྲོ་དོན་བོར་ནས་རང་ཉིད་ཞི་བདེ་དེ། །ཐེག་དམན་ཉན་རང་ལམ་དུ་མི་གོལ་ལམ། །དེ་བས་འགྲོ་དོན་གྱིས་ཞེས་བསྐུལ་འདེབས་ཤིང་། །ཀུན་གྱིས་རང་ལ་བསྟོད་སྙན་ཚིག་བཟང་པོས། །རང་ཉིད་གློ་བོ་དགའ་བར་བྱེད་གྱུར་ནས། །དེ་འདྲའི་སྐབས་སུ་རང་ཡང་བདུད་ཀྱིས་བྱིན། །རང་ཉིད་སྤང་རྟོགས་ཡོན་ཏན་མེད་བཞིན་དུ། །རང་མཐོང་ང་རྒྱལ་བསམ་པ་སྙིང་ནས་ཤར། །ཚུལ་འདིར་བསམ་ཞིང་དེང་སང་རང་ཉིད་བྲེད། །སྐབས་རེ་རང་གིས་བསམ་གཞིག་བཏང་བའི་ཚེ། །རྒྱང་བའི་ས་ནི་ཁོ་ཚོས་བཤོལ་བཏབ་ཅིང་། །འདི་རུ་འདུག་ཚེ་མི་ཁོམ་བྲེལ་བས་གཡེང་། །ད་ནི་ཆོས་མེད་མི་ཚེ་སྟོང་ཟད་དུ། །ནམ་འཆི་ཨ་སྙམ་རང་གྲོས་འདི་སྐད་བཏབ། ། ཀྱེ་མ། གསོན་འཚལ་ཚེ་དབང་ནོར་བུ་བ། །སྒྱུ་མའི་ལྟད་མོར་བྱིས་པ་ཞེན་ཞེན་ནས། །མཐའ་མེད་གཡེང་འཁྱམས་སྔ་མ་དེ་ཙམ་ཡིན། །ད་དུང་རང་གྲོས་རང་ལ་བཏབ་རེ་རན། །འཆི་བདག་བདུད་པོ་ཞེས་པ་སྒྲ་བོ་ཆེ། །སྟོན་གཞུགས་ལྷག་པ་བཞིན་དུ་ཚུར་ཚུར་ཉེ། །འཆི་ལ་ན་ཚོད་རྒན་གཞོན་ཅི་ཡང་མེད། །ནམ་འཆི་ཆ་མེད་ལྷ་ཆོས་སྒྲུབས་རེ་རན། །གལ་ཏེ་མི་ཚེ་རིང་ཡང་གཞོན་དུས་སུ། །དམ་པའི་ཆོས་ཞིག་སྙིང་ནས་མ་འབད་ན། །ན་སོ་གྱུར་ཚེ་འབྱུང་བའི་ཚོགས་རྒུད་ཅིང་། །སེམས་འཐིབ་དབང་པོ་ཉམས་ཚེ་ཆོས་དྲན་ཡང་། །བསྒོམ་པའི་ལོང་མེད་ཉམས་ལེན་རྩལ་རྫོགས་དཀའ། །དེ་བས་དེང་དུས་ཆོས་ལ་འབད་རེ་རན། ། ཀྱེ་མ། བྱས་པ་དོན་མེད་མགོ་འཁོར་སྨྱོན་པའི་ལས། །བག་ཆགས་འཁྲུལ་ཞེན་སྔ་མ་དེ་ཙམ་ཡིན། །ད་ནི་འཁྲུལ་མེད་བྱང་ཆུབ་བསྒྲུབ་འདོད་ན། །མཚན་ཉིད་ལྡན་པའི་བླ་མ་བསྟེན་པ་དང་། །སྤྲོས་མེད་དབེན་པའི་རི་ཁྲོད་འགྲིམས་པའི་ཕྱིར། །ཕ་ཡུལ་བདུད་ཀྱི་བཙོན་ར་སྤངས་རེ་རན། །གཡའ་རི་གངས་ཁྲོད་མི་མེད་ལུང་སྟོང་དུ། །བྱ་དང་རི་དྭགས་བག་ཡངས་རྒྱུ་བའི་ས། །ལྷུང་ལྷུང་ཆུ་སྒྲ་འཇམ་པར་འབབ་པའི་ངོགས། །རང་བཞིན་ཤུགས་ཀྱིས་བསམ་གཏན་འཕེལ་བའི་སར། །གྲོགས་མེད་གཅིག་པུར་ད་དུང་རྒྱུ་རེ་རན། །དགྲ་མེད་གཉེན་མེད་ཆགས་སྡང་ཞེན་པ་མེད། །ཕན་མེད་གནོད་མེད་རེ་དང་དོགས་པ་མེད། །འཁྲུལ་མེད་འཛིན་མེད་གནས་ལུགས་སྙིང་བོའི་དོན། །མངོན་རྟོགས་རང་གཞན་དོན་གཉིས་མྱུར་འགྲུབ་ཕྱིར། །ཕྱོགས་མེད་ཡངས་པའི་རྒྱལ་ཁམས་འགྲིམས་ནས་ནི། །དམ་པ་མཆོག་གྱུར་བསྟེན་པའི་དུས་ལ་བབས། །འཕྲལ་སྣང་ལེགས་ལེགས་བསླུ་བྲིད་བདུད་ཀྱི་ལས། །རང་དོན་མ་འགྲུབ་ཤི་གསོན་དཀོར་ལ་འབག །མི་ཆོས་བླ་གཟུགས་མི་གཙང་དར་བཏུམ་འདྲ། །མི་རྟག་འདུས་བྱས་ལུས་འདི་བོར་ཙམ་ན། །དཀར་ནག་ལས་འབྲས་བསླུ་མེད་འཆར་བའི་ཚེ། །ཀྱེ་ཧུད་བླ་གཟུགས་ཁྱོད་ལ་མགོན་སུ་ཞིག །དེ་བས་དེང་དུས་ཐར་ལམ་བསྙེག་རེ་རན། །ཅེས་སོགས་སྐྱོ་བས་གླུ་དབྱངས་མང་བླངས་ནས། །རང་ལ་རང་གི་ཆོས་ཕྱིར་བསྐུལ་ན་ཡང་། །རེ་ཞིག་མི་ཆོས་བླ་བའི་གཟུགས་བཟུང་མཐུས། །བླ་མ་བསྟེན་དང་དབེན་པ་འགྲིམ་པའི་ཐབས། །མ་རྙེད་ལེ་ལོ་བཏང་སྙོམས་ངང་དུ་ནི། །རང་ལོ་ཉེར་གཉིས་ཉེ་ལ་སླེབ་ཀྱི་བར། །སྐབས་སུ་བསོད་སྙོམས་བླ་མའི་ཞབས་ཏོག་བྱས། །སྐབས་སུ་གྲོང་ཆོག་ཡོན་བདག་ངོ་ལོན་བྱས། །སྐབས་སུ་ཡུལ་སྡེ་མི་སྡེ་འཁྲུགས་པ་བསྡུམ། །སྐབས་སུ་ཡི་དམ་བསྙེན་བསྒྲུབ་ཉུང་རེ་བྱས། །སྐབས་སུ་འགྲོ་དོན་ཡིན་ཁུལ་ཁྲིད་ཆོས་བཤད། །བདེ་སྡུག་མྱོང་བ་ཕལ་ཆེར་རོ་སྙོམས་བསྒོམ། །སྤྱོད་པ་བླ་མ་དཀོན་མཆོག་དགྱེས་ཐབས་དང་། །ཟས་ནོར་རྣམས་ལ་སྲེད་ཞེན་ཆུང་བར་བསླབ། །སུ་འབྲེལ་རྣམ་དཀར་ལ་སྦྱོར་གང་ནུས་དང་། །གཡོ་སྒྱུ་ཟོལ་ཟོག་རང་འདོད་ཉུང་བར་བསླབ། །ཁེ་དྲག་ཕྲག་དོག་གྱུར་པ་སྤངས་ཐབས་དང་། །ཆོས་ཀྱི་སྤྱོད་པ་ཅི་འདྲེས་བྱས་ནའང་། །སྔོན་ཚེ་འཁྲུལ་པའི་བག་ཆགས་ངན་གོམས་དང་། །ཆོས་ཉིད་དོན་ལ་བརྟན་པ་མ་ཐོབ་ཕྱིར། །ཕྱི་ཚུལ་ལྟར་སྣང་བླ་གཟུགས་བཟུང་ནའང་། །རང་སྐྱོན་རང་གིས་བརྟག་ཚེ་རང་ཉིད་ཀྱིས། །ཤེས་རྒྱུད་གྱོང་པོ་དུག་ལྔ་ཤུགས་ཀྱིས་རགས །དེས་ན་སྤྱོད་པ་དགེ་སྡིག་དཀར་ནག་ཆོས། །འདྲེས་མ་ཆལ་ཆོལ་མ་ངེས་ངང་དུ་སོང་། །དེ་འདྲས་མཚན་ལྡན་བླ་མ་མ་མཇལ་ཞིང་། །དབང་ཁྲིད་ཆོས་ཀྱང་ཉུང་ལས་མ་ཐོབ་སྟེ། །སྡུག་བསྔལ་མཚན་མོའི་གཉིད་ཀྱང་ཕལ་ཆེར་ཡེངས། །རང་ལོ་ཉེར་གསུམ་སྣེ་ལ་ཟིན་པའི་ཚེ། །དགོས་མེད་སྙིང་ནས་ཤར་ཏེ་གླུ་འདི་བླངས། ། ཨེ་མ་ཧོ། ལེགས་པར་སོམས་དང་ཚེ་དབང་ནོར་བུ་བ། །དལ་འབྱོར་བཅོ་བརྒྱད་བརྒྱན་པའི་མ་ལུས་འདི། །ཡང་ཡང་ཐོབ་དཀའ་བསྐལ་བ་ད་རེས་ཙམ། །དོན་མེད་གསེར་གླིང་སྟོང་ལོག་ཅང་སྲིད་དམ། །མི་ཚེ་འདི་ནི་ཡུད་ཙམ་ཉིད་ཡིན་ཏེ། །ལུས་ནི་མི་རྟགས་ཁང་རྒན་འགྱེལ་ཉེན་འདྲ། །ངག་གི་མི་རྟག་ཚོང་འདུས་སྒྲ་སྙན་འདྲ། །སེམས་ནི་མི་རྟག་ནམ་མཁའི་སྤྲིན་དང་འདྲ། །ནམ་འཆི་ཆ་མེད་འདི་སྣང་བྱ་བ་འདི། །དགོས་པ་མེད་དོ་ཞེན་པ་བཏང་རེ་རན། །བཅའ་བཅའ་བཀོད་བཀོད་དགོན་གནས་གདན་ས་ཡང་། །སྟོན་མཇུག་མེ་ཏོག་བྱིས་པ་རློམ་པ་འདྲ། །རང་ཉིད་འཆི་ཚེ་དགོན་གནས་ཤུལ་དུ་ལུས། །བྱས་པའི་སྙིང་པོ་སྒྱུ་མའི་ལྟད་མོ་འདྲ། །དེ་བས་དབེན་གནས་འདུ་འཛི་ཉུང་བའི་སར། །གཏན་གྱི་འདུན་མ་ལྷ་ཆོས་སྒྲུབ་རེ་རན། །མཛེས་མཛེས་སྐུ་གསུང་ཐུགས་ཀྱི་རྟེན་རྣམས་ཀྱང་། །ཧ་ཅང་སྲེད་ན་ཆགས་སྡང་འཆིང་ཞེན་རྒྱུ། །འཆི་དུས་དེ་དག་དགོས་མེད་ཤུལ་དུ་ལུས། །ཡུད་ཙམ་སྣང་ཞེན་བྱིས་པ་འཇའ་འདེད་འདྲ། །དེས་ན་ཟང་ཟིང་རྟེན་གྱིས་དགོས་པ་ཅི། །གཏན་གྱི་སྙིང་པོ་དམ་ཆོས་བསྒྲུབ་རེ་རན། །བརྩེ་བརྩེ་དུང་དུང་ཕ་མ་ཉེ་འབྲེལ་ཡང་། །འཆི་དུས་བབ་ཚེ་བརྩེ་བས་བཤོལ་དུ་མེད། །ཚོང་འདུས་མགྲོན་ལྟར་སོ་སོར་ཕྱེས་ནས་འགྲོ །དེ་བས་གཏན་གྲོགས་བླ་མ་བསྟེན་རེ་རན། །གྲྭ་འཁོར་ཟང་ཟིང་མི་ཆོས་མཛེས་ན་ཡང་། །ཐར་པའི་གྲོགས་མིན་ཆགས་སྡང་འཁྲུལ་བའི་རྒྱུ། །འགྲོ་དོན་དུས་མིན་རྣམ་གཡེང་ལྷ་བུའི་བདུད། །རིང་དུ་སྤངས་ནས་ལྷ་ཆོས་དྲིལ་རེ་རན། །བློ་ཐག་རང་གིས་རང་ཉིད་མ་བཅད་ན། །ཐར་པའི་གྲོགས་བྱེད་ཉིན་མོའི་སྐར་མ་ཙམ། །ཆོས་ཀྱི་ཕྱི་བཤོལ་བྱེད་པ་རབ་ཏུ་མང་། །དེ་བས་བསམ་འདི་དེང་དུས་བསྒྲུབ་དུས་བབ། །ཅེས་སྨྲ་རྩེན་ཆེན་དགོན་ནས་བླ་རྒན་ལ། །བཀའ་ཞུས་རིག་འཛིན་རོལ་པའི་རྡོ་རྗེ་མཆོག །ཞལ་མཇལ་འདུན་པས་གློ་བུར་ཉིད་ཆས་ནས། །བ་ཟལ་ཕྱིན་ཚེ་མཆོག་སྤྲུལ་བླ་མ་རྗེས། །བཤོལ་མཐུས་རེ་ཞིག་མཚམས་སྡད་དེ་སྐབས་སུ། །རིག་འཛིན་ཆེན་པོ་ཞི་བར་མྱ་ངན་འདས། །ཐོས་ནས་སྡུག་བསྔལ་བསམ་མི་ཁྱབ་བྱུང་ཞིང་། །ཅིས་ཀྱང་རང་ཡུལ་སྡོད་འདོད་མ་ཤར་ནས། །དབྱར་དུས་བབ་ཚེ་གྲོགས་པོ་གཉིས་ཁྲིད་དེ། །རིག་འཛིན་དེ་ཡི་རྩ་བའི་བླ་མ་རུ། །གྱུར་ཅིང་ཆོས་བདག་རྣམས་ཀྱི་གཙོ་བོ་མཆོག །ཆེ་ཚང་ཞེས་གྲགས་མཁས་ཤིང་གྲུབ་དེའི་དྲུང་། །སོང་སྟེ་དེ་སྔོན་ངོ་ཤེས་མེད་ཡུལ་དུ། །བྱེས་འགྲོ་བྱེད་མ་མྱོང་ཞིང་དཀོན་མཆོག་གི །ཐུགས་རྗེས་དཀའ་ཚེགས་མེད་པར་སྐུ་མདུན་སླེབ། །གྲོགས་གཉིས་ཕྱིར་ལོག་རང་ཉིད་གཅིག་པུ་རུ། །ཟླ་ངོ་གསུམ་འདུག་གནས་ལུགས་ཐུགས་ཀྱི་མཛོད། །ཕྱག་ཆེན་སྙན་བརྒྱུད་ཡིད་བཞིན་ནོར་བུའི་ཁྲིད། །སྦྱོར་དངོས་རྗེས་གསུམ་ཚང་ལ་རྒྱས་པར་ཐོབ། །དེ་ཞར་ཀརྨ་སི་ཏུ་ཆོས་འབྱུང་བའི། །ཞལ་མཇལ་ཆོས་འབྲེལ་རང་བྱུང་སྨོན་ལམ་མནོས། །རིག་འཛིན་ཆེན་པོའི་རིགས་གཅུང་ཆོས་ཀྱི་སྲས། །ཞལ་ཚབ་རུང་ངེས་ཨོ་རྒྱན་མཚན་འཆང་དྲུང་། །གཏེར་གསར་ཕྱག་རྡོར་ཐེམ་ཆེན་ཐེམ་མེད་དང་། །མཁའ་འགྲོ་སེང་གདོང་སྒྲུབ་སྐོར་ཡོངས་རྫོགས་ཐོབ། །གར་དབང་སྤྲུལ་སྐུ་ལ་ཡང་དབང་འབྲེལ་ནོས། །དེ་ནས་སླར་ཡང་རང་གི་ཕ་ཡུལ་ནས། །ཞང་པོ་ཤི་བའི་སྐད་མ་སླེབ་པ་དང་། །གྲྭ་པ་འབྲུག་གྲགས་དེ་ཀར་བདག་གི་སར། །སྡོད་མ་འདོད་ནས་བླ་མ་རྣམ་གཉིས་ཀྱིས། །ཤོག་ཅེས་ནན་ཆགས་གསུང་འཕྲེང་ཡོད་རྫུས་ནས། །རང་ཡུལ་ལོག་ནས་བ་ཟལ་དགོན་ཕྱིན་པས། །ཚད་རིམས་ནད་ཀྱི་རང་ཉིད་འཆིར་ཐུག་ཚེ། །ནད་ཉིད་རོ་སྙོམས་བསྲེ་ལ་ཨེ་ནུས་ཚད། །དེ་ཚེ་ཟུག་གཟེར་དེ་ཡང་སྟོང་ལྷང་ངེ་། །ངོ་བོའི་གཤིས་ལ་ནད་དང་མ་ནད་ཅེས། །ཐ་སྙད་ཚིག་དང་མཚན་མ་ལས་འདས་དང་། །རང་མདངས་རྟེན་འབྲེལ་འབྱུང་བཞི་འཁྲུགས་པ་ཡི། །ཟུག་གཟེར་འགག་མེད་བཀྲ་མདངས་ཁྱུག་སེ་རྒྱུགས། །ན་ཞེས་ཀུན་རྟོག་ཟུག་གཟེར་དྲག་པོ་དང་། །རང་རིག་ངོ་བོ་རྗེན་ནེ་གཟོ་མེད་གཉིས། །ལྷན་སྐྱེས་མཉམ་ཉིད་ཐ་དད་བློ་ཡིས་ནི། །མ་རྙོག་ངང་དུ་གང་ཤར་སྐྱེ་འགག་ལས། །འདས་གྱུར་མཐའ་བྲལ་གཉུག་མའི་ཆོས་ཉིད་ལ། །མཉམ་བཞག་རང་འབབ་ཀློང་སྐྱོང་གང་ནུས་བྱ། །ཟླ་གཅིག་ཙམ་སོང་ནད་དེ་ལས་ཐར་དེ། །དེ་འཕྲལ་བླ་མ་སྙུན་པའི་ཞབས་ཕྱི་བསྒྲུབ། །བསྙེན་གྲོལ་ཚེ་ན་བདག་ཉིད་རྩེན་ཆེན་དུ། །བསུ་བ་ཡེ་ཤེས་བློ་གྲོས་དཔོན་སློབ་རྣམས། །ཕེབས་བྱུང་དེ་དུས་བླ་མ་པད་དབང་གི །རྣལ་གྱི་སྣང་བར་རྔ་ཡབ་དཔལ་རི་ཡི། །ཕོ་བྲང་བཀོད་པ་རིག་འཛིན་གཙོ་འཁོར་བཅས། །ཡ་མཚན་སྣང་བ་གསལ་བར་གྱུར་པ་དང་། །ལུང་བསྟན་རྗེས་གནང་འགའ་རེ་བྱུང་བར་འདུག །གཞན་ཡང་དག་སྣང་འགའ་རེ་ཤར་བར་མངོན། །དེ་ནས་རྩེན་དུ་འགྲོ་ཞོར་པེའུ་ལུང་ཕྱིན། །འདི་སྐབས་ཉེ་གནས་བར་ཆད་དབང་སོང་ནས། །བློ་སུན་ཡིད་དཀྲུག་སེམས་མི་བདེ་བ་བྱུང་། །ལས་དབང་འཁྲུལ་སྣང་འདི་ལ་ཡིད་རེ་སྐྱོ། །མྱུར་དུ་རྩེན་ཆེན་བླ་མའི་སྐུ་ཞབས་སླེབ། །སྤྲོ་བའི་དྲི་མེད་དགྱེས་པའི་སྤྱན་རས་འཛུམ། །དེ་ཡི་དབྱར་ངོས་ནག་པ་ཟླ་བ་ལ། །རྒྱལ་བའི་སྲས་གྱུར་དྷརྨཱ་པ་ལ་དང་། །སྤྲུལ་སྐུ་པདྨ་ཛྙཱ་ན་ས་སིདྡྷི། །ཨོ་རྒྱན་ཀརྨ་དྷི་ར་དྷ་ར་དང་། །བླ་མ་དམ་པ་པྲ་ནི་དྷ་ན་དང་། །རང་སློབ་སྔ་ཤོས་དྷརྨཱ་དྷ་ར་ཎི། །ཡོངས་དྲིལ་བླ་སློབ་བདུན་ཅུ་ལྷག་ཙམ་ལ། །གསང་ལས་ཆེས་གསང་བླ་མེད་རྫོགས་པ་ཆེའི། །ཁྲིད་བཏབ་འདི་བས་སྔོན་དུ་ཁོ་བོ་ཡིས། །ཁྲིད་བཀའ་ལན་གྲངས་འགའ་རེ་བྱས་ན་ཡང་། །རྟེན་འབྲེལ་གནད་ཀྱིས་འདི་དུས་གང་འཛོམས་པའི། །ཚོམ་བུ་དེ་རྣམས་དམ་སེལ་མ་བྱུང་ན། །ངེས་པར་ཐར་པའི་ལམ་རྐང་ཚུགས་གོ་སེམས། །རང་ཡང་འདི་སྐབས་རྨི་ལམ་སྣང་བ་རུ། །ཀུན་བཟང་བི་མའི་ཐུགས་སྤྲུལ་ཀུན་མཁྱེན་ཞབས། །མཇལ་ནས་སྙིང་ཏིག་སྐོར་བཞིའི་བཀའ་གཏད་དང་། །རྫོགས་ཆེན་གདམས་པ་གཞན་ལ་སྟོན་རྗེས་གནང་། །སྔགས་ཀྱི་མ་མོས་སྲུང་སྐྱོབ་ཞལ་བཞེས་བྱུང་། །རང་གི་ཉམས་ལེན་འདི་དུས་སྔར་བས་བོག །རབ་ཐོན་ཐེ་ཚོམ་ཁུ་ཁྲིག་དང་བྲལ་ཏེ། །རིག་པ་རང་ངོར་ཟང་ཀ་རྗེན་པ་མཐོང་། །སྔོན་ཚེ་འཁྲུལ་སྣང་ཚོར་དང་མ་ཚོར་ནས། །དམ་ཚིག་འགལ་ཉམས་གྱུར་པ་བཤགས་པའི་ཕྱིར། །སཱཙྪ་འདོད་གསོལ་ལྡན་པ་གྲངས་ལྡན་དང་། །ཁྱད་པར་རྟེན་གསུམ་དྲུང་དུ་དུས་ཆེན་སོགས། །ཕྱག་དང་སྨྲེ་བཤགས་ཕུལ་ཞིང་ཕྱིན་ཆད་དུ། །སྡོམ་པའི་ཕྱིར་དུ་དམ་བཅའ་བཅུ་གསུམ་བླང་། །དེ་ནས་བཟུང་སྟེ་ཟང་ཟིང་བསྡུ་བྱེད་པ། །འགྲོ་དོན་མིང་བཏགས་གྲོང་འབྱམས་ཟོབ་ཚོང་སྟེ། །གཏན་ནས་སྤང་པའི་ནུས་པ་མ་རྙེད་ཀྱང་། །འཕྲལ་དུ་ཆག་མེད་བསོད་སྙོམས་འབུལ་སྡུད་དང་། །གྲོང་ཆོག་གདན་འདྲེན་བྱ་བ་ཕལ་ཆེར་བོར། །གར་ཕྱིན་འགྲོ་བ་རང་འདོད་མེད་ཁུལ་གྱིས། །དབང་ཆོས་ཕྲན་བཤད་དགེ་བའི་ལས་ལ་བསྐུལ། །སྐབས་སུ་ཁྲིད་གདམས་བསྟན་ནས་འགྲོ་ཕན་དང་། །སྐབས་སུ་བསྟན་དོན་དྲག་སྔགས་ཁ་ཡར་བསྒྲུབ། །སྐབས་སུ་ཡི་དམ་ལྷ་ཡི་བསྙེན་བསྒྲུབ་དང་། །སྐབས་སུ་རང་ཉམས་བོག་འདོན་གང་ནུས་བྱས། །མདོར་ན་རྣམ་དཀར་ལས་ལ་རྒྱལ་བ་ཡི། །གསུང་པའི་སྤྱོད་པར་རང་གི་ལུས་ངག་ཡིད། །གང་ནུས་ལ་ཡང་འབད་པའི་ཁུལ་དུ་བྱས། །དེ་སྐབས་ཡུལ་དེའི་འགྲོ་བ་ཁ་ཅིག་ནི། །གུས་ཤིང་དད་དུང་བདག་ལ་ཐལ་སྦྱར་ཞིང་། །ཁ་ཅིག་མི་མོས་གཤེ་སྐུར་སྣ་ཚོགས་དང་། །མི་ངན་འདི་ཉིད་མ་ཤི་ཨང་ཟེར་ཐོས། །ལ་ལས་འདྲེ་འདི་ཡུལ་འདིར་མེད་ན་ཟེར། །དེ་དང་དེ་འདྲ་འཁོར་བའི་སྣང་བ་ནི། །སྒྱུ་མ་ལྟ་བུ་ཅི་ཡང་འཆར་བའི་རྒྱུ། །ཞེན་མེད་ཆོས་ཉིད་འོད་གསལ་དག་པའི་ཀློང་། །ལམ་དུ་འཁྱེར་མཛོད་རང་གིས་རང་ལ་གདམས། །དེ་ནས་མཛེས་བྱེད་ཆུ་ཡོས་དབྱར་ར་བ། །དུས་ཆེན་ས་གར་རིག་འཛིན་ཆེན་པོའི་གདུང་། །ཧྲིལ་པོར་མཆོད་རྟེན་སྒྲོམ་དུ་ཞུགས་པ་དེ། །ཞུགས་ལ་ཞེན་པའི་རྡོ་རྗེ་སློབ་དཔོན་ནི། །པད་དབང་གིས་མཛད་རྒྱལ་ཐེབ་བདག་གིས་བྱས། །ཐུན་མོང་ཐུན་མིན་ཡ་མཚན་ལྟས་བཟང་པོས། །སྐལ་ལྡན་ཐམས་ཅད་རབ་དགའི་ས་ལ་བཀོད། །དེ་རྗེས་བདག་ཉིད་མཚམས་སུ་བསྡད་བྱས་སྐབས། །ཀཿཐོག་རྡོ་རྗེ་གདན་གྱི་ཆོས་ཀྱི་རྗེ། །རྒྱལ་དབང་བསོད་ནམས་ལྡེའུ་བཙན་མཚན་འཆང་དེ། །ས་གའི་ཚེས་ལྔར་དགོངས་པ་དབྱིངས་ཐིམ་པའི། །སྐད་ཐོས་པ་ཡི་སེམས་ངལ་རབ་གཡོས་ཤིང་། །འཕྲལ་དེར་ཀཿཐོག་གཉེར་པ་རྟ་མགྲིན་ཞེས། །དགོངས་རྫོགས་མཆོད་བསྔོ་ཆེད་དུ་བྱུང་བ་ལས། །སྤྲུལ་སྐུ་འབྱུང་འགྱུར་སྨོན་ལམ་བྲིས་ཏེ་བསྐུར། །དེ་ནས་རང་སེམས་སྔར་ནས་ཕ་ཡུལ་ལ། །ཡིད་སུན་བཞིན་དུ་ལྷག་པར་བླ་མ་རྣམས། །གཤེགས་འགྱུར་རྐྱེན་དེས་རེ་ཞིག་ཕྱོགས་མེད་དུ། །གནས་བསྐོར་རྟེན་མཇལ་བླ་མ་བསྟེན་པའི་ཕྱིར། །འགྲོ་བའི་བློ་ཐག་སྙིང་གི་དཀྱིལ་ནས་བཅད། །སྤྱིར་ཡང་རང་དོན་མ་གྲུབ་འགྲོ་དོན་འདིས། །བེའུ་སྦྲེལ་གཡང་དུ་ལྷུང་དང་ཅི་ཞིག་ཁྱད། །དེ་བས་རང་དོན་ཅི་བཞིན་སྐྱོང་དགོས་སེམས། །ཅི་ཞེས་འགྲོ་དོན་དུས་ལ་བབས་མ་བབས། །ཚད་ནི་རང་དོན་ཟད་དང་མ་ཟད་ཡིན། །རང་དོན་ངེས་པར་ཟད་ཚེ་འགྲོ་དོན་དུ། །བབས་པས་གཞན་དོན་སྐེ་རགས་བཅིང་དུས་ཡིན། །དེ་བས་བདག་ནི་རང་འདོད་མ་ཟད་ལས། །རང་དོན་སྣང་བ་གཞན་ལས་ཆེ་ཞིང་མཁྲེགས། །དེ་ཚེ་འགྲོ་དོན་མིང་བཏགས་འ་འུར་ནི། །འཁྲུལ་ལ་འཁྲུལ་སྣོན་ངན་འགྲོའི་རྒྱུར་བསགས་ངེས། །འདི་ནི་ཁ་ཙམ་ཚིག་ཙམ་མ་ཡིན་ཏེ། །སྙིང་ཁུང་རུས་པའི་གཏིང་ནས་མིན་རེ་སྐན། །དེང་སང་ཁ་ཅིག་ཕྱི་ཚུལ་བཙུན་ཁུལ་ལ། །རང་ཉིད་སངས་རྒྱས་དངོས་འདྲར་རློམ་པ་མང་། །ཕྱི་ལ་མ་བལྟ་ནང་གི་མཚན་ཉིད་བརྟག །རང་སེམས་རང་ལྟོས་རང་མཚང་ཕུད་པར་གཅེས། །ཡང་ཅིག་དེང་སང་བདག་འདྲའི་སེར་གཟུགས་འགའ། །སྦྱངས་པ་སྔོན་སོང་ད་ལྟ་མི་དགོས་སྐད། །དེ་ལྟ་ན་ཡང་བསྐལ་བཟང་སངས་རྒྱས་དེས། །བསྐལ་པ་གྲངས་མེད་གསུམ་དུ་ཚོགས་བསགས་ཤིང་། །གྲགས་མེད་གསུམ་དུ་སྒྲིབ་པ་སྦྱངས་བྱས་ལས། །སྐྱེ་བ་གཅིག་གི་དགེ་བས་ངོམ་མ་གསུངས། །མཐར་ཡང་གཟིགས་སྟངས་ལྔ་ཡིས་འཛམ་གླིང་འདིར། །གླིང་བཞི་འཁོར་ལོས་བསྒྱུར་རིགས་གོ་ཏམ་གདུང། །ཟས་གཙང་སྲས་འཁྲུངས་རྒྱལ་བུ་དོན་གྲུབ་དེས། །ཁྱིམ་མེད་རབ་བྱུང་ནཻ་ར་ཉྫཱ་ནའི་འགྲམ། །ལོ་དྲུག་དཀའ་བ་སྤྱད་ནས་སངས་རྒྱས་ཐོབ། །དེས་ན་སངས་རྒྱས་ལས་ལྷག་རང་ཅག་མིན། །ཚེ་འདིར་དགེ་སྒྲུབ་སྡིག་སྤངས་དམ་ཆོས་ལ། །འབད་པ་ནན་དུ་བྱ་འཚལ་གྲོས་ཆེན་གདབ། །ད་དུང་གསོན་དང་རྫོགས་ཆེན་ཐོས་གྲོལ་ལ། །སྦྱངས་བསྒྲོད་མི་དགོས་ཟེར་བ་འགའ་ཡང་ཐོས། །དེ་ལྟར་ཐོས་གྲོལ་བཀའ་དྲིན་གྱིས་བསྐྱངས་ཀྱང་། །རྫོགས་ཆེན་སྟོན་པ་དགའ་རབ་རྡོ་རྗེ་ཞེས། །རྡོ་རྗེ་སེམས་དཔའ་རིག་འཛིན་ཚུལ་སྣང་དེ། །རི་བོ་སྣང་བྱེད་བྱ་བར་ལོ་མང་པོར། །ཏིང་འཛིན་དོན་ལ་མཉམ་པར་བཞག་ཅེས་པ། །རྫོགས་ཆེན་བླ་མེད་ལོ་རྒྱུས་རྣམས་ནས་གསུངས། །དེ་བཞིན་འཇིག་རྟེན་འདི་ན་འགྲན་བྲལ་བ། །མཚོ་སྐྱེས་བླ་མ་རྡོ་རྗེ་འཆང་ཆེན་ཡང་། །གསང་སྔགས་སྒྲུབ་དང་ཉམས་ལེན་དཀའ་སྤྱད་ཚུལ། །དཔག་མེད་རྡོ་རྗེའི་ལྕེས་ཀྱང་བརྗོད་ནུས་མིན། །གཞན་ཡང་རྒྱ་བོད་རིག་འཛིན་གྲུབ་ཆེན་དགུའི། །བསྒྲུབ་ལ་དཀའ་སྤྱད་སྙིང་རུས་མཛད་ཚུལ་དང་། །སོ་ཟུར་སྣུབ་༼གནུབས༽དང་དམ་བཙང་བྱམས་པ་འབུམ། །ཀློང་སྡེའི་བླ་བརྒྱུད་རྩང་རྒན་མི་ཕམ་མྱང་སྟོན་ཤ་བ་ཅན། །མྱང་བན་ལྕེ་བཙུན་༼མན་ངག་སྙིང་ཐིག་༽བླ་བརྒྱུད་ཀུན་མཁྱེན་མཆོག་སོགས་པས། །ཆོས་ལ་ཉམས་ལེན་དཀའ་སྤྱད་ཚུལ་དཔག་མེད། །རྒྱལ་བ་གོང་མ་སྐྱེས་ཆེན་དེ་ཚོ་ཡིས། །རྫོགས་ཆེན་ཡིན་ནོ་ཐོས་ཆོག་ཡིན་ནོ་ཞེས། །བག་མེད་རོ་ཉལ་ངང་དུ་འཇའ་ལུས་སྐུར། །གཤེགས་པ་མིན་པས་ཚུལ་འདི་ཤེས་བགྱིད་འཚལ། །ཁ་ཅིག་རྫོགས་ཆེན་ས་ལམ་རྩི་བ་མེད། །གཅིག་ཆོད་ཡིན་ཞེས་སྨྲ་བ་འགའ་ཐོས་ཏེ། །དེར་བརྟེན་ཁ་ཅིག་ཡི་མི་རང་བ་དང་། །ཁ་ཅིག་གནས་ལུགས་སོམ་ཉིར་ལུས་པ་མཐོང་། །དེ་ལྟར་གྱུར་ན་བླ་མེད་ཁྲེག་ཆོད་དང་། །དོན་མཐུན་རྫོགས་ཆེན་སེམས་སྡེར་ཉམས་རིམ་བཞི། །གནས་དང་མི་གཡོ་མཉམ་ཉིད་ལྷུན་གྲུབ་ཞེས། །རེ་རེ་ལ་ཡང་གཡོ་གོམས་བརྟན་ཐོབ་པ། །སྦྱངས་ཁམས་དབང་གིས་གསུམ་གསུམ་དབྱེ་བར་མཛད། །འདི་དང་ཕྱག་ཆེན་རྣལ་འབྱོར་བཞི་རིམས་རྣམས། །མཐུན་སྦྱོར་ཀཿཐོག་དམ་པ་ཡབ་སྲས་དང་། །མཁས་གྲུབ་མང་པོས་མཛད་པའི་གཞུང་མང་ཡོད། །དེ་བཞིན་ཐོད་རྒལ་སྣང་བ་བཞི་ཞེས་པ། །མངོན་སུམ་སྣང་བ་མཐོང་ལམ་དོན་མཐུན་དང་། །གོང་འཕེལ་སྒོམ་ལམ་ཚད་ཕེབས་བླ་མེད་ལམ། །ཟད་པ་ཆོས་ཟད་མྱ་ངན་འདས་པ་སྟེ། །དེ་དག་རེ་རེ་ལ་ཡང་རིམ་གྱི་དབང་། །སྣང་བ་མཆེད་དང་ཉེར་མཆེད་ཐོབ་ཉེར་ཐོབ། །བཞི་བཞིར་དབྱེ་བ་བཅུ་དྲུག་ས་རུ་གསུངས། །ཐེག་པ་ཆུང་ངུའི་ས་ལམ་ཕྲ་ཞིབ་ཆེ། །དེ་བས་གཅིག་ཆར་ཞེས་གྲགས་སྐྱེས་བུ་ནི། །ངོ་སྤྲོད་རྟོགས་དང་རྩལ་རྫོགས་དུས་མཉམ་པས། །གཅིག་ཆོད་གྲངས་མེད་ས་ལམ་མེད་པ་མིན། །དེ་འདྲ་གསར་རྙིང་ཡོངས་ལ་རེ་འགའ་ཙམ། །དེས་ན་ཁ་འབྱམས་ལྟ་གདེངས་མི་འཆལ་བར། །ཡང་དག་གནས་ལུགས་ངེས་པའི་སྒྲོ་འདོགས་ཆོད། །འོན་ཀྱང་རྫོགས་ཆེན་ཐོས་པའི་ཕན་ཡོན་ནི། །བསམ་མི་ཁྱབ་པར་རྒྱལ་བས་བསྔགས་ན་ཡང་། །མ་བསྒོམ་ཕྱི་བཤོལ་སངས་རྒྱས་རྒྱང་ཐག་རིང་། །ཅི་སྐད་ཆོས་རྗེ་ཡང་དགོན་པ་ཆེན་པོས། །གང་ཟག་རང་ཉིད་རྫོགས་ཆེན་མ་གྱུར་པས། །དམ་ཆོས་རྫོགས་ཆེན་གྱུར་ཀྱང་ཅི་ཞིག་ཕན། །གསུངས་པའི་དོན་དེ་ཡིད་ལ་འཆང་བྱེད་ནས། །རྫོགས་ཆེན་ཐོས་ཆོག་གོ་ཡུལ་མ་བཞག་པར། །ཉམས་ལེན་གནད་ཕུར་ཚེ་གཅིག་ཀུན་བཟང་གི །དགོངས་པ་མངོན་གྱུར་སྐུ་གསུམ་ལྷུན་གྲུབ་མཛོད། །དེ་བས་དམ་ཆོས་གཞན་ལས་ཆེས་འཕགས་ཀྱང་། །རང་གི་ཉམས་ལེན་དག་གིས་མ་ཕེར་ན། །གླེན་མོས་སྒྱེད་པོ་གསེར་དུ་བཙུགས་པ་དང་། །དབུལ་པོའི་ཁྱིམ་དུ་ནོར་གཏེར་མོད་དང་མཚུངས། །ཀྭ་ཡེ་ད་དུང་དེང་སང་འདི་སྐད་དོ། །ཁ་ཅིག་ཟབ་གདམས་ཕྱག་རྒྱ་ཆེན་པོའི་སྐོར། །ཞུགས་ལོ་ཐོས་ལོ་ཙམ་བྱས་ཞག་ཟླ་ཙམ། །སོང་ཚེ་བདག་ནི་རྩེ་གཅིག་སྤྲོས་བྲལ་དང་། །རོ་གཅིག་སྒོམ་མེད་ཡིན་ཁས་བླངས་འགའ་མཐོང་། །ཧེ་ཧེ་བླ་མར་དད་གུས་གསོལ་འདེབས་དང་། །བསྒོམ་ལ་སྙིང་རུས་ཞག་གཅིག་མི་དགོས་པར། །དེ་འདྲའི་ངང་དུ་རྟོགས་ལྡན་ཡོངས་ཚོད་ན། །ང་འདྲའི་ལེ་ལོ་ཅན་ཚོ་སྐྱིད་རེ་བྲོ། །ཨ་ཀྱང་སྔོན་བྱོན་རྒྱལ་བའི་མཛད་སྤྱོད་ལ། །དཔག་ན་སློབ་དཔོན་འཇམ་དཔལ་བཤེས་གཉེན་གྱི། །སྤྲུལ་པ་གུང་ཐང་མི་ལ་རས་པ་དེ། །ལོ་གྲངས་བཞི་བཅུར་བླ་མའི་ཞབས་ཏོག་བྱས། །བྲག་དཀར་རྟ་སོར་མི་ལོ་བཅུ་གསུམ་བར། །གྲོགས་མེད་དཀའ་ཐུབ་བསྒྲུབ་ལ་སྙིང་རུས་བཏོན། །གཞན་ཡང་བསྒྲུབ་གནས་དུ་མར་དཀའ་སྤྱད་མཐར། །དགུང་ལོ་རེ་གཅིག་ཆུ་ཕོ་༼ལ་ལར་དགུང་སྙིང་ལྕགས་འབྲུག་ཏུ་གསུངས་པ་ལྟར་ན་དོན་གསུམ་ཡིན། ༽འབྲུག་གི་ལོར། །མགྲིན་པའི་རྩ་མདུད་ཞིག་ནས་རོ་གཅིག་རྟོགས། །བརྒྱ་ཅུ་རྩ་བཞི་མྱ་ངན་འདའ་བའི་དུས། །རོ་གཅིག་ཆེ་ཡིན་ལྷག་མའི་རྣལ་འབྱོར་རྣམས། །མངོན་དགའི་གནས་སུ་སྦྱངས་བ་ཡིན་ནོ་ཞེས། །རྒྱལ་བ་ཡང་དགོན་དཔའ་བོ་གཙུག་ལག་དང་། །སྟག་ལུང་བཀྲ་ཤིས་དཔལ་གྲུབ་རྣམས་ཀྱིས་གསུངས། །ཡང་ཅིག་མཉམ་མེད་དྭགས་པོ་ལྷ་རྗེ་ཞེས། །སྔོན་དུས་བྱང་ཆུབ་སེམས་དཔའ་ཟླ་འོད་ཞལ། །ད་ལྟ་ཨ་ཤཱ་ཀ་ཞེས་ཞིང་ཁམས་སུ། །རྫོགས་སངས་རྒྱས་གྱུར་དྲི་མ་མེད་པའི་འོད། །གྱུར་པ་དེས་ཀྱང་བསྒོམ་མེད་ཆེན་མོ་རུ། །ཞལ་བཞེས་རེས་གནང་རེས་མི་གནང་བ་རུ། །མཛད་ཅེས་སི་ཏུ་མཆོག་གི་སྤྲུལ་པའི་སྐུ། །ཀུན་མཁྱེན་ཆོས་ཀྱི་འབྱུང་དེས་བདག་ལ་གསུངས། །གཞན་ཡང་དེ་སློབ་དུས་མཁྱེན་ཕག་གྲུ་དང་། །འབྲི་འབྲུག་གཡའ་སྟག་སྨར་ཚལ་གྲགས་པ་ཡི། །རྒྱལ་བ་གོང་མར་གྱུར་ཚེ་ཞེན་ལོག་དང་། །མོས་གུས་དཀའ་སྤྱད་སྙིང་རུས་མཛད་ནས་ནི། །ཕྱག་རྒྱ་ཆེན་པོ་རྟོགས་པར་གསུང་པ་ལས། །བླ་མར་དད་དམ་གུས་གསོལ་མི་དགོས་པར། །ཆོས་ལ་ཐོས་ཆོག་རོ་ཉལ་བག་མེད་དང་། །ཕྱག་ཆེན་རྟོག་གོ་གྲོལ་ལོ་ཡེ་མ་གསུངས། །དེས་ན་སྔོན་བྱོན་སྐྱེས་མཆོག་དེ་དག་ལས། །ལྷག་ཞེས་ཁས་ལེན་ནུས་པ་དིང་ཡོད་དམ། །དེ་དག་དྲང་དོན་བརྡའ་ཆོས་ཡིན་ནོ་སྐད། །རྒྱལ་བས་དྲང་དོན་གདུལ་བྱ་དྲང་ཕྱིར་ཡིན། །རང་རེ་རྒྱལ་བ་དེ་དག་གདུལ་བྱ་རུ། །ཡིན་ན་དེ་ཡི་རྗེས་སློབ་ཅིས་མི་དགོས། །ད་དུང་ཁ་ཅིག་ལྟ་དགོངས་མཐོ་དྲག་ན། །ས་ལམ་དམན་ལ་ཆ་རྒྱུས་མེད་དོ་སྐད། །ཧ་ཧ་ཚིག་འདི་མཁས་གྱུར་གྱིས་གསན་ན། །ཐུགས་ནས་ཁྲེལདགོད་རྒྱུར་རྐྱེན་ཅིས་མི་འགྱུར། །ལྷུན་པོ་ཁ་ནས་གླིང་བཞིར་ལྟད་མོ་དང་། །རི་ཆེན་རྩེ་ནས་རི་ཕྲན་ལྟད་མོ་རུ། །མངོན་འདིར་བལྟོས་ལ་སྨྲ་བ་དེ་གྱིས་ཤིག །ཀུན་བཟང་རྡོར་འཆང་ཤཱཀ་ཐུབ་པད་འབྱུང་སོགས། །ས་ལམ་དམན་ལ་ཕྲ་ཞིབ་གསུངས་འདིར་སྤྱོད། །རྒྱ་གར་ས་ར་ཧ་དང་ཏེ་ལོ་པ། །བོད་དུ་གླིང་རས་རང་བྱུང་མཁའ་སྤྱོད་སོགས། །གཅིག་ཅར་སྐྱེས་བུ་མཆོག་གྱུར་དེ་ཚོ་ཡི། །ལྟ་བ་མཐོ་དྲག་ས་ལམ་དམན་པ་ལ། །ཆ་རྒྱུས་མེད་ཅེས་གཏན་ནས་གསུངས་པ་མེད། །དེས་ན་ཚིག་འདི་མཁས་པས་སྤང་བར་འོས། །ཡང་གཅིག་དེང་སང་ཕྱོགས་རེར་ཞེན་པ་འགས། །རྒྱལ་བ་གོང་མའི་དཀའ་སྤྱད་དེ་འདྲ་ཡིན། །རྟོགས་ཚུལ་དེ་འདྲར་གྱུར་ཚེ་དེང་དུས་ཀྱིས། །རྟོགས་པ་སྐྱེ་ཞེས་སྨྲ་འདི་མི་བདེན་པར། །གཟུང་དང་ཁ་གཅིག་ལས་འཕྲོ་ལྡན་པ་ཡི། །སྐྱེས་བུ་མཆོག་གྱུར་རྣམས་ཀྱང་ཚེ་འདི་ལ། །བརྩོན་འགྲུས་དཀའ་སྤྱད་མ་བྱས་རྟོགས་པ་ནི། །མི་ཤར་ཞེས་པའི་ཁ་ཚོན་གཅོད་པ་ཡི། །སྤོབས་པ་སྐྱེ་བར་གྱུར་པ་མང་མཐོང་སྟེ། །དེ་ལ་བླུན་པོ་ཁོ་བོས་སེམས་པ་ནི། །ཚེ་འདིར་མི་རྟོགས་ཕྱི་མར་རྟོགས་དགོས་ན། །ཐེག་པ་ཐུན་མོང་རྣམས་དང་ཅི་ཁྱད་ཅིང་། །གསང་སྔགས་ཚེ་གཅིག་ཉེ་ལམ་དོན་དང་འགལ། །དེས་ན་ཚེ་འདིར་མི་རྟོག་སྨྲ་མི་འོས། །རྒྱལ་བ་རྒྱལ་སྲས་མཛད་པ་དཔག་དཔའ་བ། །རྒྱལ་བ་ཉིད་མིན་གཞན་གྱིས་རྟོགས་མ་གསུངས། །དེ་ཚེ་གང་ཟག་མཆོག་ཏུ་གྱུར་པ་ཡི། །དཀའ་སྤྱད་སྙིང་རུས་ཁོ་ནར་རག་མ་ལུས། །སངས་རྒྱས་མཛད་པ་མཐའ་གཅིག་མི་བཀག་སྟེ། །སྣང་མཛད་སྐུ་ཚེ་གྲངས་ལས་འདས་པ་དང་། །ཚོགས་ཆེན་གཙོ་བོ་སྐུ་ཚེ་ཉིན་གཅིག་ཚད། །ཤཱཀ་ཐུབ་དཀའ་བ་ལོ་དྲུག་བར་དུ་སྤྱད། །བྱམས་པས་དཀའ་སྤྱད་མེད་པར་རྫོགས་འཚང་རྒྱ། །དེ་དག་ཚུལ་དོན་རྒྱལ་ལས་གཞན་གྱིས་མིན། །སངས་རྒྱས་མཛད་པ་དེ་སྟེ་རྒྱལ་བའི་སྲས། །སྐྱེས་བུ་རྣམས་ཚུལ་དེ་དང་མི་འདྲ་ཞེས། །ཐ་ན་རྒྱ་བོད་རིག་འཛིན་གྲུབ་ཐོབ་ནི། །གཅིག་ཆར་རྟོགས་གྲོལ་གྱུར་པ་གྲངས་མེད་ཡོད། །མཉམ་མེད་འཚོ་བྱེད་ཁོ་ནའི་དྲུང་དུ་ཡང་། །མཇལ་བའི་ལམ་དང་སྒམ་པོའི་རི་མཐོང་དང་། །གཟིམས་སྤྱིལ་མཐོང་དང་ཞལ་མཇལ་ཚིག་རེ་ཡིས། །སྤྲོས་བྲལ་རོ་གཅིག་སྒོམ་མེད་སྐྱེས་པ་མང་། །དེ་འདྲར་མཉམ་མེད་མཆོག་དེའི་ཞལ་ནས་ཀྱང་། །རྣ་བ་སྔོན་ཡོད་པ་ལས་རྭ་རྗེས་སྐྱེས། །མཐོང་བའི་དཔེ་བཞིན་བཀའ་བརྒྱུད་སྔ་མ་ཡི། །དཀའ་སྤྱད་ལྟ་བུ་མ་དགོས་དེང་དུས་སུ། །བདག་གི་སློབ་མ་རྟོགས་པ་རྟོགས་མགྱོགས་པ། །ཡིན་ཞེས་རྡོ་རྗེའི་གསུང་གིས་བསྒྲགས་པ་དང་། །གླིང་རས་ཕག་གྲུར་ཞག་གསུམ་ཁྲིད་བསྐྱངས་པས། །སྒོམ་མེད་སྐྱེས་དང་རྒྱལ་སྲས་སྤོམ་བྲག་པ། །དགུང་ལོ་གསུམ་ནས་རང་བྱུང་སྒོམ་མེད་སྐྱེས། །རྒོད་རས་ཁྲིད་བསྐྱངས་ཞག་བདུན་སྤྲོས་བྲལ་རྟོགས། །ཡང་དགོན་དགུང་ལོ་བདུན་ལ་སྤྲོས་བྲལ་རྟོགས། །གྲུབ་ཐོབ་ཨོ་རྒྱན་པ་ཡི་རྒོད་ཚང་གི །གཟིམ་སྤྱིལ་མཐོང་མ་ཐག་ཏུ་སྤྲོས་བྲལ་རྟོགས། །ཆུ་ཕུར་ཤཱཀ་རིན་དགུང་ལོ་གསུམ་དུས་ནས། །སྤྲོས་དང་བྲལ་བའི་རྟོགས་པ་ཤར་རོ་སྐད། །དེ་བཞིན་གསར་མའི་སྐྱེས་ཆེན་དུ་མ་དང་། །རྙིང་མའི་གཏེར་གྲུབ་གྱུར་པ་མང་པོ་ཞིག །སྤྲོས་བྲལ་རོ་ཅིག་སྒོམ་མེད་ཅིག་ཆར་དུ། །ཤར་བའི་ལོ་རྒྱུས་ཡ་མཚན་རྣམས་ལ་གཟིགས། །དེས་ན་གང་ཟག་མཆོག་ཏུ་གྱུར་པ་ཞིག །སྤྲོས་བྲལ་རོ་གཅིག་སྒོམ་མེད་རྟོགས་པ་ལ། །དཀའ་སྤྱད་སྡུག་རྩིར་བླུན་ལས་མི་འདུག་ཅེས། །སྒྲོ་སྐུར་རྒྱུ་འདི་སྤང་བར་འོས་སམ་སྙམ། །ཁྱད་པར་སྙིགས་མ་ལྔ་མཐར་ཐུག་དུས་འདིར། །འདུལ་བསྟན་གཟུགས་བརྙན་ཙམ་ཡིན་མཁས་ལ་གྲགས། །ཐེག་ཆེན་མར་མེ་འཆི་ཁ་ལྟར་གསལ་དང་། །ཁྱད་པར་རྫོགས་ཆེན་ཀུན་བཟང་ཐུགས་ཀྱིས་འདུལ། །དུས་ཡིན་ཞེས་སུ་སྙིང་ཐིག་ནས་གསུངས་པས། །སྙིགས་དུས་རྟོགས་པ་མི་སྐྱེ་ཁས་ལེན་འདི། །རང་ཉིད་ངལ་བའི་རྒྱུ་རུ་འགྱུར་རམ་སེམས། །གཞན་ཡང་མདོ་ཁམས་ཀཿཐོག་མི་རིང་བར། །གནས་གྱུར་གང་ཟག་ཁས་ལེན་ཁ་ཅིག་གིས། །ཡབ་སྲས་སྤྲུལ་སྐུ་ཡིན་ཞེས་ཆེན་པོ་ཡི། །གོ་སར་ཕྱུང་ནས་ཞུགས་གྱུར་འདི་འདྲ་དང་། །གཏེར་སྟོན་ཡིན་ནོ་དེ་སྲས་ཡིན་ནོ་ཞེས། །གྲགས་དང་སྟག་བུར་བླ་མའི་མིང་འཛིན་འགའི། །ཆོས་ཁྲིད་བཤད་འདི་ཐོས་དང་བསམ་ཙམ་གྱིས། །དོན་དང་མི་ལྡན་ཅི་ཕྱིར་རང་ཅག་ལྟར། །བསྒོམ་ལ་ཚེ་འདིར་སྦྱངས་ཡུན་མ་ནུས་ཤིང་། །ཐོས་བསམ་སྒོམ་དང་རྒྱབ་གྱེས་ཡིན་ནོ་ཞེས། །སྨྲ་བའི་སྙིང་ཁམས་བསྐྱེད་པ་འགའ་ཐོས་ཏེ། །དེ་ལྟར་ཐོས་ན་རྒྱ་བོད་རིག་གྲུབ་ཚོ། །ལྔ་རིག་ལ་བྱང་བསྐྱེད་རྫོགས་རྟོགས་འབྲས་བུ། །ཚེ་འདིར་འོད་ཕུང་ཡལ་བ་གྲངས་མེད་ཅིང་། །པད་འབྱུང་ཀླུ་སྒྲུབ་རྣམ་པར་ཐར་ལ་གཟིགས། །ཤེས་རབ་ཅན་བསྒོམ་ཁྱུང་ཆེན་ས་ཆོད་དང་། །ཤེས་རབ་མེད་བསྒོམ་བྱིའུ་ཆུང་རྩལ་རླབས་སུ། །རྒྱལ་བས་གསུངས་ཏེ་སྒོམ་པའི་སྔོན་འགྲོ་ནི། །ཐོས་བསམ་ཡིན་ནོ་ཐུགས་ལ་དགོངས་འཚལ་ལོ། །དམར་ནས་ཞྭ་སོགས་མཆོག་གི་སྤྲུལ་སྐུ་རྣམས། །སྐྱེས་མ་ཐག་ནས་ཉམས་རྟོགས་ཤར་བ་ལས། །རྩལ་རྫོགས་མངོན་མཁྱེན་གྲུབ་རྟགས་སྟོན་ལ་ལྟོས། །གཏེར་སྟོན་ཉི་ཤར་དབྱུགས་པས་མི་ཁེབས་ཀྱི། །སྟག་བུར་བླུན་རྒན་བླ་གཟུགས་བདག་ཙམ་ལས། །གཞན་ཀུན་འོད་གསལ་རྫོགས་ཆེན་སྙིང་པོ་ཡི། །དོན་གྱི་རང་གཞན་མ་བསླུས་གདིང་ལ་འཁོད། །ཐོས་བསམ་གསང་སྔགས་རྙིང་བསྟན་རྩ་ལག་ཏུ། །གྱུར་ལ་གཤེ་ཡང་དགོངས་པ་ཅི་དགྱེས་མཛོད། །སྤྱིར་ཡང་མི་ཤེས་སྐྱེ་བོའི་ཚོགས་རྣམས་ལ། །མཁས་པས་བརྟག་མིན་རང་བཞིན་བཏང་སྙོམས་སོ། ། ཀྭ་ཡེ། སོ་སོ་སྐྱེ་གྱུར་མི་ཤེས་བླུན་བདག་གི །ཆོས་ཀྱི་མཚན་ཉིད་རྟོགས་པའི་མིག་ཟུམ་ཡང་། །རྒྱལ་བ་གོང་མའི་གསུང་གི་རྗེས་འབྲངས་ཏེ། །ཆ་ཤས་སྨྲས་འདི་སྙིང་གཏམ་ཡིན་ཁུལ་ཏེ། །མདོར་ན་རྟོགས་པ་ཤར་རོ་མི་ཤར་ཞེས། །འདི་དག་ཐམས་ཅད་ཐ་སྙད་ཚིག་ཡིན་གྱི། །ཐ་སྙད་ཚིག་ཀུན་ཕྱི་ཡི་ཤུན་པར་མཐོང་། །གསང་སྔགས་ཆོས་ནི་བྱིན་རླབས་ལམ་པ་ཡིན། །བྱིན་རླབས་མོས་གུས་ལམ་ཡིན་དོན་དེས་ན། །མ་ནོར་མ་འཁྲུལ་ཡང་དག་བླ་མ་ལ། །ལྷད་མེད་ཆུགས་མེད་གདམས་པ་ལེགས་མནོས་ནས། །གསོལ་འདེབས་སྙིང་ཁུང་གཏིང་ནས་ཕར་བཏབ་ན། །བྱིན་རླབས་དབང་མེད་སྙིང་དཀྱིལ་འཆར་ནས་འོང་། །བླ་མར་སྙིང་ནས་དད་མོས་མ་སྐྱེས་ན། །ཁ་ཙམ་གསོལ་འདེབས་དོན་མེད་ཅ་ཅོ་ཡིན། །ཡང་དག་རྟོགས་པ་རྒྱལ་པོའི་ཁྲིར་སྨོན་འདྲ། །བཀའ་བ་སྤྱད་དང་མ་སྤྱད་ཞེས་པ་དང་། །སྔོན་སྦྱངས་ཡོད་མེད་སྨྲ་བ་ཐང་ཆད་རྒྱུ། །ཚིག་རྗེས་མ་འབྲངས་གནས་ལུགས་དོན་ལ་སོམས། །དད་མོས་གུས་པ་ཆོས་ཀྱི་རྩ་བ་ཡིན། །བྱམས་དང་སྙིང་རྗེ་ཆོས་ཀྱི་གཞི་མ་ཡིན། །རྒྱུ་འབྲས་དམ་ཚིག་ཆོས་ཀྱི་སྲོག་ཤིང་ཡིན། །ཕྱིར་མི་ལྡོག་པ་ཆོས་ཀྱི་སྐྱེལ་སོ་ཡིན། །རྟོགས་པའི་ངོ་བོ་རིག་པ་གཉུག་མ་ཡི། །ཤེས་པ་རང་ངོ་རང་གི་ཤེས་པ་སྟེ། །དེ་ནི་བླ་མའི་ཐུགས་རྗེས་དག་ལ་བརྟེན། །མཐོང་འདི་དཔེ་བྲལ་ཡེ་ཤེས་ཆེན་པོར་གྲགས། །རྟོགས་དང་མི་རྟོགས་བློ་ཡི་ལྟོས་གཞི་འདི། །ངེས་དོན་སྙིང་པོ་སྒྲིབ་པའི་དྲི་མ་ཡིན། །དེས་ན་རྟོགས་ཆུག་མ་རྟོགས་ན་ཡང་ཆུག །རང་རིག་མ་བཅོས་ཟང་ཀ་རྗེན་པ་ལ། །སྤང་བླངས་རེ་དོགས་དགག་སྒྲུབ་ལས་འདས་པར། །མ་གཡེང་རྒྱུན་སྤྱོད་གདམས་པའི་སྙིང་པོ་ཡིན། །ཁ་ལ་བཤད་པ་དཔེ་ཡིས་མཚོན་པ་དང་། །བློ་ཡི་དཔྱད་དང་ཡིན་མིན་ཁུ་འཕྲིག་དང་། །གྲུབ་མཐའི་ཐ་སྙད་ཚིགས་སུ་གྱུར་པ་ཀུན། །ཡང་དག་རྟོགས་པའི་ཚེ་ན་རྫུན་པོ་ཆེ། །བླ་མའི་བྱིན་རླབས་སྙིང་ལ་ཞུགས་པའི་མི། །རང་སེམས་རང་གིས་མཐོང་བའི་རྣལ་འབྱོར་ལ། །ཆོས་ཉིད་བདེན་མཐོང་ཞེས་པའི་སྒྲ་བོ་ཆེ། །ཕ་རྒན་བཀའ་བརྒྱུད་གོང་མའི་གཤེགས་ཤུལ་ཏེ། །རིང་པོའི་བར་མིན་རང་སེམས་དྲུང་ན་ཡོད། །ཡུན་དུ་འགོར་མིན་སྐད་ཅིག་བསྒྲོད་ལམ་ཡིན། །དེ་ལྟར་མ་རྟོགས་བྱིས་པའི་ཚོགས་འགའ་ཡིས། །རྒྱལ་བ་གོང་མས་དབང་རིམ་གདུལ་བྱའི་དོན། །དཀའ་བ་སྤྱད་དང་དཀའ་བ་མི་སྤྱད་ཚུལ། །དྲང་དོན་གཙོ་དང་ངེས་དོན་གཙོར་སྟོན་ཚུལ། །མཛད་པ་དུ་མ་བརྒྱད་ཁྲི་བཞི་སྟོང་སྒོ། །བཅུ་གཉིས་ཡན་ལག་རྒྱུ་འབྲས་ཐེག་ཆེ་ཆུང་། །དགོངས་དང་ལྡེམ་པོ་མ་སྦས་ཆོས་ཉིད་དོན། །དཔག་པར་དཀའ་སྟེ་རྒྱལ་དང་དེ་སྲས་ཀྱིས། །ལེགས་མཛད་མཐའ་དཔོག་སྐྱེ་མཐའ་བྱང་ཆུབ་ཤིང་། །དྲུང་དུ་རྒྱལ་དེ་ལས་ནི་ནམ་མཁའི་མཐས། །སྙེགས་མི་དེ་སྲས་གྱུར་པ་ཕལ་གྱིའང་མིན། །དེས་ན་གང་ཟག་ཆོས་ཀྱི་ཚུལ་གྱུར་པ། །མཐའ་དེར་འཐས་ནས་རྟ་ལྗང་དབྱུག་འགེབས་བཞིན། །ཆོས་སྤང་ལས་གྱུར་ངན་འགྲོའི་རྒྱུ་ལྕི་བར། །འགྱུར་ལ་རྟག་ཏུ་ཀུན་གྱིས་སྤང་བར་བྱ། །ཡང་དག་དོན་ལ་སྒྱུ་མའི་རྩེད་མོ་བཞིན། །སུས་བཀག་སུས་སྒྲུབ་མཉམ་ཉིད་དོན་ལ་ལྟོས། ། ཀྱེ་མ། བདག་འདྲ་སེར་གཟུགས་མཁས་མིན་བླུན་ལས་ཀྱང་། །ཆེས་བླུན་རྐང་གཉིས་ལུས་ལ་རྐང་བཞིའི་སེམས། །གྱུར་པ་ཁོ་བོས་ཕྱི་ནང་གཞན་གསུམ་དང་། །དྲང་ངེས་ཆོས་ཚུལ་དབྱེ་ནུས་མ་ལགས་ཀྱང་། །དེང་སང་དུས་དབང་ཕྱོགས་འདིར་བདག་མཚུངས་རིས། །འགའ་ཡི་མུ་ཅོར་ཚིག་གི་སྐྱེ་བོའི་ཚོགས། །རྣམ་རྟོག་དུ་མ་སློང་བའི་རྒྱུར་མཐོང་སྟེ། །དེ་དག་ལས་ངན་འཛད་ནུས་བདག་མེད་ཀྱང་། །མཐའ་རེར་འཛིན་པའི་ཞགས་པ་བཀྲོལ་འདོད་ནས། །གང་ཤར་བླུན་ཚིག་གླུ་རུ་བླངས་པ་འདི། །ཐོས་བསམ་སྒོམ་པའི་ཡོན་ཏན་ཆེར་དབེན་ཀྱང་། །བླ་མའི་བྱིན་རླབས་མཐུ་ལས་ཆ་ཤས་ཙམ། །ཐོས་མྱོང་ལས་བྱུང་ཚིགས་སུ་སྨྲས་པ་ཡིན། །བྲེ་མོ་འཁྱལ་ཚིག་བརྗོད་པ་མིན་ཁུལ་ཏེ། །མཁས་མགུ་སྡེབ་སྦྱོར་བླུན་དགུའི་ངོ་འཇམ་མེད། །དོན་མེད་རྫུན་ཚིག་བརླངས་པོའི་ཚིག་ཀྱང་མེད། །དེས་ན་རྣལ་འབྱོར་ཉམས་ལེན་སྤང་ལྗོངས་ལ། །ལེགས་བཤད་ཆུ་ཀླུང་མེ་ཏོག་སྣ་ཚོགས་བཀྲ། །དོན་གྱིས་མ་རྒྱུ་ཆ་ཤས་མཆིས་སྲིད་ན། །བློ་ལྡན་ར་ཡི་གཉིས་པའི་དགའ་སྟོན་མཛོད། ། ཀྱེ་མ་ཧོ། གྲོགས་ཚོ་ད་དུང་བདག་ལ་ཚུར་གསོན་དང་། །དེང་སང་དུས་བསྐལ་སྙིགས་མའི་མཐའ་ལ་ཐུག །ཚེ་ཡང་སུམ་ཅུ་ཁ་རལ་ཉིད་གྱུར་འདིར། །ནམ་འཆི་ཆ་མེད་ཚེ་ཚད་ངེས་བཟུང་མེད། །མྱུར་བ་ཉིད་དུ་འཆི་བར་ཐེ་མི་ཚོམ། །དེ་བས་བདག་ནི་ཉི་ཤུ་རྩ་གྲངས་ཟིན། །ཚེ་ཡི་ཚད་ཀྱང་འཁྱོལ་ལ་ཉེ་བ་སྟེ། །ཁ་ཆེམས་ཡིན་ནོ་སྙིང་གཏམ་ཚིག་འདི་སྨྲ། །ཐུན་མོང་དལ་བ་ཁྱད་པར་འབྱོར་པ་བཅུ། །གསང་སྔགས་ངེས་པའི་དོན་དང་འཕྲད་པའི་ལུས། །འདི་འདྲ་བསྐལ་པ་གྲངས་མེད་བསམ་ཡས་ལས། །ད་རེས་ཙམ་ཡིན་ཆུད་ཟོས་བཏང་ཕོད་དམ། །དམྱལ་བའི་སེམས་ཅན་རྣམས་ནི་མཐོང་གྱུར་ཚེ། །ཡི་དྭགས་བྱོལ་སོང་ལུས་གྱུར་སྲིད་པ་ཙམ། །བྱོལ་སོང་ཁ་འཐོར་ལྷ་མིའི་གནས་སུ་སྟེ། །དེར་བལྟས་མི་ལུས་སྲིད་ཙམ་འདི་ལ་བསམ། །དབྱར་དུས་ཤ་ཡི་ཕུང་པོ་ས་གཞིའི་ཁྱོན། །ཁེངས་པ་མ་ལུས་འབུ་ཡི་རང་བཞིན་གྱིས། །ས་གཞི་ཁེངས་གྱུར་བར་མ་དོའི་སེམས་ཅན། །གྱུར་པ་དེ་ཡང་ཉུང་ངུ་ཉིད་ཡིན་ལ། །དེ་ལ་དཔག་ཚེ་མི་ལུས་སྲིད་པ་ཙམ། །ཨུ་དུམ་ཝ་རའི་མེ་ཏོག་ལྟ་བུར་མཐོང་། །མི་ལུས་ཙམ་གྱུར་འགྲོ་བ་འདིར་ལྟོས་དང་། །དམ་ཆོས་དར་སར་སྐྱེས་གྱུར་སྲིད་པ་ཙམ། །དམ་ཆོས་དར་སར་སྐྱེས་ཀྱང་ཆོས་ཀྱི་སྒོར། །ཞུགས་པར་གྱུར་པ་ཉིན་མོའི་སྐར་མ་ཙམ། །ཆོས་སྒོར་ཞུགས་ཀྱང་ཆོས་བཞིན་སྤྱོད་པ་ནི། །རུས་སྦལ་སྤུ་ལྟར་དཀོན་གྱུར་ཀྱེ་མ་ཧུད། །ཚེ་འདིར་སྒྱུ་མའི་འཁྲུལ་སྣང་ཉིད་ལ་འབྱམས། །རྙེད་དཀའ་མི་ལུས་དོན་མེད་ཆུད་ཟོས་བཏང་། །ཕྱི་མ་གར་སྐྱེའི་ཆ་ནི་མ་མཆིས་ཏེ། །མུན་ཁུང་ལོང་བའི་མདའ་ལྟར་ཡ་རེ་ཆ། །ཀྱེ་མ་སྙིང་ལྡན་གྲོགས་ཚོ་འདིར་དགོངས་དང་། །ངན་སོང་གནས་ཀྱི་སྡུག་བསྔལ་སྐད་ཅིག་ཡང་། །མི་ལ་བརྒྱ་སྟོང་ཕྱེ་བ་དུ་མ་ལ། །མི་ཚེ་བདེ་བ་རིང་ཡང་ལོ་བརྒྱ་སྟེ། །དེ་ཡང་མི་སྐྱོལ་གློ་བུར་དུ་མས་འཇིག །དེ་བས་གཏན་གྱི་ལམ་བཟང་ཐེག་པ་ཆེ། །བྱང་ཆུབ་མཆོག་གི་གོ་འཕང་འཁོད་འདོད་ཀུན། །ཚེ་འདིར་ཆོས་ལ་སྙིང་རུས་བྱེད་རེ་རན། །དེང་སང་དུས་ངན་སྙིགས་མ་ཚེ་ཐུང་འདིར། །ཐོས་བསམ་མང་པོ་བྱེད་པའི་ལོང་མེད་ཀྱི། །ཡང་དག་སྙིང་པོ་ཕྱག་རྫོགས་ཉམས་ལེན་ལ། །དྲིལ་བར་མཛོད་ཅིག་ཁོ་བོའི་སྙིང་གཏམ་ཡིན། །སྙིགས་མའི་དུས་འདིར་མཚན་ལྡན་བླ་མ་དཀོན། །འདྲ་མིན་བཟང་ངན་བརྡར་ཤ་ལེགས་གཅོད་ལ། །གཅིག་ཆོག་རྒྱལ་པོ་མཚན་ལྡན་རྙེད་དུས་དེར། །ལེ་ལོ་མེད་པར་ཆོས་མཛོད་སྙིང་གཏམ་ཡིན། །འཁྲུལ་མེད་གཏེར་ལུང་གོང་མས་ཟིན་པ་དང་། །རྩོད་བྲལ་གྲུབ་བརྙེས་དམ་པས་ཐག་གཅོད་པའི། །སྐྱེས་བུ་རྣམས་ཀྱི་མཛད་སྤྱོད་ཅི་འདྲ་ཡང་། །བརྟག་དཔྱད་མེད་པར་ཆོས་མཛད་སྙིང་གཏམ་ཡིན། །གང་ཡང་རང་གིས་དབང་ཆོས་མ་འབྲེལ་སྔོན། །ཤེས་རབ་ལྡན་པས་བརྟག་དཔྱད་བྱེད་པ་ལས། །དབང་གདམས་འབྲེལ་ནས་ལྷ་བདུད་སུ་ཡིན་ཆུག །ཐེ་ཚོམ་མི་འཚལ་མོས་མཛོད་སྙིང་གཏམ་ཡིན། །སྤྱིར་ཡང་གསང་སྔགས་གེགས་ཀུན་ཐེ་ཚོམ་ཡིན། །བརྟག་དཔྱད་མང་པོ་ངན་འགྲོའི་རྒྱུ་རུ་འགྱུར། །ཚད་མའི་ཁུངས་ལྡན་མངོན་ཤེས་མེད་ཕྱིན་ཆད། །བརྟག་དཔྱད་མ་མང་ཁོ་བོའི་སྙིང་གཏམ་ཡིན། །སྤྱིར་ནི་རྣམ་དཔྱོད་མཐོང་རྒྱ་ཆེ་བ་ལས། །བླུན་པོ་དད་པ་བརྟན་ན་དངོས་གྲུབ་མྱུར། །གསུངས་པས་དག་སྣང་ཕྱོགས་མེད་སྦྱོངས་བ་དང་། །ཐག་ཆོད་ཆོས་གཅིག་ཆོག་མཛོད་སྙིང་གཏམ་ཡིན། །གྲྭ་འཁོར་མཆེད་གྱུར་ནང་དུ་སྡོད་པའི་ཚེ། །མཐོ་དམན་ང་རྒྱལ་ཕྲག་དོག་ཀུན་སྤངས་ལ། །ཞི་དུལ་འཇམ་ལྡན་ཀུན་དང་མཐུན་བྱེད་མཁས། །ཉོན་མོངས་ལས་བསགས་མི་རུང་སྙིང་གཏམ་ཡིན། །རྒྱལ་བས་གསུངས་པའི་སྡེ་སྣོད་མང་པོ་ཡང་། །མདོར་བསྡུས་བདག་འཛིན་འཁྲུལ་པ་ཞིག་ཐབས་ཡིན། །དེ་དོན་ཆོས་ཀུན་གཙོ་བོ་ཕྱག་རྫོགས་ཏེ། །ཉམས་ལེན་གནད་དུ་ཕུར་ཅིག་སྙིང་གཏམ་ཡིན། །ཟང་ཟིང་བསགས་ནས་འདུས་བྱས་དགེ་བ་ཆེ། །སྤྱོད་པ་ཕལ་ཆེར་དགེ་དོན་སྡིག་བསགས་མང་། །དེ་བས་རྒྱལ་དགོངས་དགེས་པ་བསྒྲུབ་པས་བསྒྲུབས། །ཟག་བྲལ་དགེ་སྒྲུབ་མཆོག་ཡིན་སྙིང་གཏམ་ཡིན། །འཇིག་རྟེན་ཐབས་མཁས་མི་ཆོས་རྣམ་དཔྱོད་དང་། །མཛེས་བཙུན་ཚིག་བཅས་སྙན་གྲགས་བསྐྱེད་པ་འདི། །འཕྲལ་ལེགས་ནམ་ཕུག་དོན་མེད་ལས་ངལ་ཡིན། །སྙོམས་ཆུང་བག་ཡོད་སྤྱོད་མཛོད་སྙིང་གཏམ་ཡིན། །རྩོད་པ་ཅན་གྱི་གནས་དགོན་བརྟེན་པ་དང་། །ཁེ་གྲགས་ཆེ་བའི་གྲོང་དུ་བསྡད་པ་འདི། །ཉོན་མོངས་ཤུགས་ཀྱིས་འཕེལ་བྱེད་ས་བོན་ཏེ། །རིང་དུ་སྤངས་བར་མཛོད་ཅིག་སྙིང་གཏམ་ཡིན། །མིག་སེར་ཅན་གྱི་གྲོགས་དང་འགྲོགས་པ་དང་། །རྒྱུད་ངན་མི་ལ་གྲོགས་པོ་བྱེད་པ་འདི། །ཆགས་སྡང་ཞོར་དུ་འཕེལ་བའི་རྒྱུ་ཡིན་པས། །རིང་དུ་སྲིངས་བྱས་ལེགས་སོ་སྙིང་གཏམ་ཡིན། །འདུ་འཛི་ཟང་ཟིང་ཟས་གོས་མང་པོ་ཡི། །གྲྭ་འཁོར་བསྡུད་འདི་བསྟན་པ་ཡིན་སེམས་ཡང་། །སྙིགས་དུས་ཆོས་བཞིན་ལྡན་པ་རབ་དཀོན་ཞིང་། །རང་དོན་བར་ཆད་རྒྱུར་འགྱུར་སྙིང་གཏམ་ཡིན། །ཡུལ་སྡེ་འཁྲུགས་བསྡུམ་ཁ་མཁས་ཕྱག་ཡངས་ཤིང་། །ཀུན་གྱིས་བཀུར་བྱེད་རང་མཐོང་བཅས་པ་འདི། །འཕྲལ་དུ་ཡིན་ཡིན་འདྲ་བའི་བླ་གཟུགས་ཏེ། །ནམ་ཕུག་དགོས་ཆུང་དབེན་བསྟེན་སྙིང་གཏམ་ཡིན། །ཤ་ཆང་ལོངས་སྤྱོད་འདུ་ལོང་སྤེལ་བ་འདི། །མི་ཚེ་ཡུད་ཙམ་མཆིན་པ་སྐྱིད་ལགས་ཀྱང་། །ནམ་ཕུག་དཀོར་གྱི་རྣམ་སྨིན་རང་ཉིད་ལ། །ལྕི་ངེས་བག་མེད་སྤངས་འཚལ་སྙིང་གཏམ་ཡིན། །ལྟར་སྣང་མཛེས་པའི་མངའ་རིས་འཁོར་འབངས་འདི། །འཇིག་རྟེན་སྣང་བར་མི་ཁ་ཆོད་ན་ཡང་། །སྙིང་པོ་མེད་ཅིང་ཆོས་མིན་འཕེལ་བའི་རྒྱུ། །ཆོས་བཞིན་རི་ལ་སྤྱོད་ལེགས་སྙིང་གཏམ་ཡིན། །ཕན་པར་རེ་ནས་རང་གི་ཟས་གོས་ཀྱིས། །བསྐྱང་པའི་གྲོགས་འགའ་མཐར་ནི་དགྲར་འགྱུར་མང་། །དེ་བས་གྲོགས་ལ་རེ་དོགས་ཆགས་སྡང་སྤངས། །གང་བྱུང་ཆོག་ཤེས་མཛོད་ཅིག་སྙིང་གཏམ་ཡིན། །རང་གི་བློ་གཏད་ཁེལ་སེམས་བྱས་ན་ཡང་། །སྙིང་གྲོས་བྲིས་ནས་མིས་ཀྱང་བློ་བརྐུ་བས། །དུས་ངན་འདི་འདྲར་སུས་ཀྱང་བློ་ཁེལ་དཀའ། །བློ་གཏད་དཀོན་མཆོག་གསུམ་མཛོད་སྙིང་གཏམ་ཡིན། །ཡིན་མིན་མཁས་དང་གྲོས་ཞིབ་ལེགས་ན་ཡང་། །སྙིགས་དུས་མི་རྣམས་ཁྲེལ་མེད་གཡོ་སྒྱུ་མཁས། །རང་གི་བརྟག་དཔྱད་ཡིན་ངེས་གདིང་ཚོད་ཚེ། །རང་ཐག་རང་གིས་ཆོད་འཚལ་སྙིང་གཏམ་ཡིན། །ཁུངས་མེད་མི་ལ་འདུན་གྲོས་བྱེད་པ་དང་། །ཁ་མང་མི་ལ་གསང་གྲོས་བཤད་པ་ནི། །ཐ་མ་བརྗོད་ངན་འབྱུང་བའི་གཞི་མ་ཡིན། །ངག་ལ་བག་དང་ལྡན་འཚལ་སྙིང་གཏམ་ཡིན། །རྒྱུད་ངན་མི་ལ་ཆེ་བཀུར་བྱེད་པ་དང་། །མདོ་མེད་མི་ལ་གཉེར་ཁ་གཏད་པ་འདི། །ཐ་མ་འཐབ་འཁོན་ཁྲོ་འཁྲུགས་རྒྱུ་རུ་འགྱུར། །དེ་འདྲ་རང་སར་འཇོག་ལེགས་སྙིང་གཏམ་ཡིན། །སེམས་ངན་མི་ལ་ཕན་ཆེར་བཏགས་པ་དང་། །ལོག་ལྟ་ཆེ་ལ་ཉེ་གནས་བཅོལ་བ་ཡིས། །མཐར་ནི་སྒྲོ་སྐུར་ངན་པའི་རྒྱུར་འགྱུར་བས། །ཐབས་ཀྱིས་བསྐྱངས་ལེགས་ཁོ་བོའི་སྙིང་གཏམ་ཡིན། །འདོད་པོ་ཆེ་ལ་ལས་སྒོ་གཉེར་གཏད་དང་། །ཁོག་ཆུང་མི་ལ་གཏམ་བཤད་བཅོལ་བ་ནི། །ཐ་མ་ཞེ་སུན་ཟེར་རའི་རྒྱུ་རྐྱེན་ཡིན། །བཏང་སྙོམས་བཞག་མཛོད་ཁོ་བོའི་སྙིང་གཏམ་ཡིན། །གཞུང་ངན་མི་ལ་བཟང་ལེན་རེ་བ་དང་། །ཁྲེལ་མེད་མི་ལ་བློ་གཏད་བྱས་པ་ནི། །དོན་མེད་རང་ཡིད་ཆད་པའི་རྒྱུ་རུ་འགྱུར། །ཕན་གནོད་མ་རེ་བབ་ཞོག་སྙིང་གཏམ་ཡིན། །དགེ་མེད་མི་ལ་རྒྱུ་འབྲས་བསྲུང་རེ་དང་། །དྲེད་མེད་ཆོས་མེད་དམཚིག་བསྲུང་རེ་ནི། །རང་སེམས་རང་གིས་ངལ་བའི་ལས་སུ་ཆེ། །རིང་དུ་སྤང་བ་ཁོ་བོའི་སྙིང་གཏམ་ཡིན། །ངོ་འཇོ་ཅན་གྱིས་ཆོས་བྱེད་བརྗོད་པ་དང་། །ཆགས་སྲེད་ཅན་གྱིས་བློས་གཏང་ཡིན་ཞེས་འདི། །རང་མཚང་རང་གིས་སྟོན་པའི་རྒྱུ་རྐྱེན་ཡིན། །དེ་འདྲའི་ཚོགས་རྗེས་མ་འབྲང་སྙིང་གཏམ་ཡིན། བླ་མར་གུས་མེད་གདམས་ངག་ལ་གདུང་དང་། །བརྩོན་འགྲུས་མི་ལྡན་ཆོས་ལ་སྲེད་པ་ནི། །མཐར་ནི་ཆོས་ཀྱི་རྐང་འདྲེན་གཞི་ཡིན་པས། །ངོ་བསྲུངས་ཟས་ཚིག་གིས་བསྐྱངས་སྙིང་གཏམ་ཡིན། །ལས་མེད་རེ་བ་ཆེན་པོ་བྱེད་པ་དང་། །མགུ་འཁོང་རགས་པའི་རིགས་སུ་གྱུར་པ་དེ། །རིང་པར་བཏང་སྙོམས་ངང་དུ་མ་བཞག་ན། །དཔོན་སློབ་སེམས་སུན་གཞི་ཡིན་སྙིང་གཏམ་ཡིན། །དམ་ཚིག་ངོ་ལྐོག་བྱེད་པའི་ལས་ངན་དང་། །དཀོར་སྲེད་ལྐོག་ལབ་མཁས་པའི་མི་ངན་འདི། །རྒྱང་གྲགས་བཅུ་ཡི་ཕ་རོལ་མ་བསྐྲད་ན། །གྲོགས་ཀུན་སྤྱོད་ངན་དེ་འགོ་སྙིང་གཏམ་ཡིན། །གྲྭ་ཚང་ནང་སེལ་ཕྲ་མ་མཁན་པོ་དང་། །ཟ་འདོད་འགུལ་ཚེར་རོ་ཉལ་དགའ་བ་དང་། །ཁོང་ཁྲོས་གཞན་གྱིས་སེམས་རྒྱུད་སད་བྱེད་རྣམས། །ནང་འཁྲུགས་རྒྱུ་ཡིན་སྤང་མཛོད་སྙིང་གཏམ་ཡིན། །དོན་མེད་སྨྲ་བ་མང་པོ་བྱེད་པ་དང་། །དྲང་པོའི་ཚིག་ལ་ལན་མེད་སྨྲ་སྒོ་དོག །འདི་དག་སེམས་དཀྲུག་བསྐྱེད་པའི་རྒྱུ་ཡིན་པས། །ལྷོད་བཞག་ངང་བོར་ལེགས་སོ་སྙིང་གཏམ་ཡིན། །རང་དོན་ཚད་ལ་མ་རྫོགས་གདུལ་བྱ་ཆེ། །ཟང་ཟིང་སྙན་གྲགས་འར་འུར་ལྷ་བུའི་བདུད། །རང་ཉིད་འཁོར་བར་སྐྱུར་བའི་ཞགས་པ་ཡིན། །རང་དོན་དབེན་པ་འགྲིམས་ཤིག་སྙིང་གཏམ་ཡིན། །ཆོས་ཉིད་དོན་གྱི་བཟོད་པ་མ་ཐོབ་པར། །གྲོགས་འཁོར་མང་པོའི་ནང་དུ་འདུག་པ་འདི། །ཁྲོ་འཁྲུགས་ཆགས་སྡང་མང་པོ་བསྐྱེད་རྒྱུ་སྟེ། །རི་ཁྲོད་འགྲིམས་ལེགས་ཁོ་བོའི་སྙིང་གཏམ་ཡིན། །སེམས་དང་མི་མཐུན་གྲོགས་དང་ནན་ཆེ་བས། །འགྲོགས་ཀྱང་བློ་མི་བདེ་བའི་རྒྱུ་ཡིན་གྱི། །གཅིག་པུར་གནས་ན་རང་བློ་བདེ་བའི་རྒྱུ། །ཆོས་མིན་གྲོགས་སྤངས་ལེགས་སོ་སྙིང་གཏམ་ཡིན། །རང་འདོད་ཞེ་ཡི་ཕུག་ཏུ་འཆང་བ་ཡི། །ཕྱི་ཐག་མེད་པའི་མཛའ་བོ་བསྟེན་པ་འདི། །འདོད་དོན་རླུང་གིས་ཁྱེར་བའི་རྒྱུ་རྐྱེན་ཡིན། །རང་ཚུགས་ཟིན་པར་གྱིས་ཤིག་སྙིང་གཏམ་ཡིན། །ཡོན་བདག་ངོ་བསྲུང་མི་ཆོས་བཙུན་པོ་འདི། །རང་སེམས་རང་གིས་འཆིང་བའི་ཞགས་པ་ཡིན། །རང་བབས་ཆོས་མཐུན་སྤྱོད་པ་མ་གཏོགས་པ། །ངོ་འཛིན་ཆེ་གཉེར་མི་བྱེད་སྙིང་གཏམ་ཡིན། །འཇིག་རྟེན་ལས་ཀུན་སྙིང་པོ་མ་མཆིས་ཏེ། །ལེགས་པར་ལྟར་སྣང་ཉེས་པའི་རྒྱུ་བསྐྱེད་པས། །འདི་སྣང་བྱ་བ་ཤུགས་ཀྱིས་རྒྱང་བསྲིངས་ནས། །ཐར་པ་མཆོག་ལམ་ཞུགས་མཛོད་སྙིང་གཏམ་ཡིན། །འབད་པས་བརྩམས་པའི་ཟང་ཟིང་མཆོད་སྦྱིན་དང་། །སེམས་བསྐྱེད་མ་ཟིན་འདུས་བྱས་དགེ་འགའ་ཡང་། །ཐབས་ཀྱིས་མ་སྤྱད་ཆགས་སྡང་བསྐྱེད་རྒྱུ་སྟེ། །རང་བབ་སྤྱོད་མཛོད་ཁོ་བའི་སྙིང་གཏམ་ཡིན། །སྙིང་རིང་གྲོགས་དང་ཆོས་ལ་བློ་དྲེད་དང་། །ཟུར་ཟ་ཕྱིན་ཅི་ལོག་བློ་གསལ་བ་དང་། །འགྲོགས་ན་ལས་ངན་རྒྱུ་བསགས་གཞི་ཡིན་པས། །དེ་འདྲ་འབྲེལ་ཐག་བཅད་ལེགས་སྙིང་གཏམ་ཡིན། །དམ་ལ་མི་གནས་བློ་དྲེད་བྱེད་མཁན་དང་། །ཚོད་ཡོད་བརྙས་བཅོས་ངན་མཁྲེགས་གྲོགས་པོ་དེ། །ཉོན་མོངས་ཞོར་བསགས་ངན་སོང་གཏིང་རྡོ་ཡིན། །གཏན་ནས་སྤང་མཛོད་ཁོ་བའི་སྙིང་གཏམ་ཡིན། །ཞེན་མེད་ཟང་ཟིང་ཚོགས་བསགས་གཞི་ཡིན་ཀྱང་། །ཧ་ཅང་མོད་ན་དགྲ་བོ་མང་བའི་རྒྱུ། །རྔམ་སེམས་ཆེ་ན་རང་སྲོག་སྐྱེལ་བའི་གཞི། །ཞེན་པ་ཆུང་མཛོད་ཁོ་བོའི་སྙིང་གཏམ་ཡིན། །ཟས་ནོར་ཚོང་སྐྱེལ་རྒྱ་དབུས་མདོ་བསྒྲོད་འདི། །འཕྲལ་དུ་མངའ་ཐང་བདེ་སྐྱིད་ཡིན་ཁུལ་ལ། །ནམ་ཕུག་ཆ་མེད་སྦྲང་མའི་རྩི་དང་འདྲ། །ཆོག་ཤེས་ལྡན་པར་མཛོད་ཅིག་སྙིང་གཏམ་ཡིན། །དགྲ་བཏུལ་གཉེན་སྐྱོང་རང་རྒྱལ་གཞན་ཕམ་ལས། །བརྩོན་འདི་འཕྲལ་དུ་མི་ཁ་ཆོད་འདྲ་ཡང་། །རང་སེམས་གཟེ་རེ་རེ་དོགས་སྡུག་བསྔལ་གཞི། །ཐར་པའི་གེགས་ཆེ་སྤང་མཛོད་སྙིང་གཏམ་ཡིན། །ལྷ་མཆོད་རྟེན་བཞེངས་ཁྲོམ་ཚོགས་བསྡུ་བ་འདི། །འབྲེལ་ཚད་རྣམ་དཀར་དོན་ལྡན་མཐུ་མེད་ན། །ལས་འདི་ཕལ་ཆེར་འཁོར་བའི་རྒྱུར་འགྱུར་མཐོང་། །དེ་བས་སྤྲོས་མེད་དགེ་འདྲིལ་སྙིང་གཏམ་ཡིན། །འདི་སྣང་ཡུད་ཙམ་བདེ་བདེ་སྐྱིད་སྐྱིད་ཀྱི། །བྱ་བ་འདི་ཡིས་གཏན་ཆས་བསླུ་ངེས་པས། །སྲོག་འཚོ་ཙམ་གྱི་ཟས་དང་ལྷག་སྐྱོབས་ཀྱི། །གོས་ཙམ་མ་གཏོགས་བདེ་སྐྱིད་ཆེད་གཉེར་སྤངས། །འཆི་དུས་ཕན་ངེས་དགོངས་འཚལ་སྙིང་གཏམ་ཡིན། །ཚེ་འདིའི་སྙན་པ་སྐད་ཅིག་བྲག་ཆ་འདྲ། །མངོན་མཐོའི་སྟོབས་འབྱོར་སྟོན་གཞུགས་ལྷོ་སྤྲིན་འདྲ། །འཕྲལ་སྣང་མིག་མཛེས་འཇའ་ཡི་ལྟད་མོ་འདྲ། །མི་རྟག་སོམ་དང་ཆོས་རན་སྙིང་གཏམ་ཡིན། །འཁོར་བའི་ལས་ལ་ཟིན་པའི་མཐའ་ཡང་མེད། །མ་ཤིའི་བར་དུ་བྲེལ་བ་སངས་དུས་མེད། །དམ་ཆོས་གལ་བྱུང་ངང་དུ་ལུས་པ་འདི། །ཀྱེ་ཧུད་ད་ལྟ་ཆོས་གྱིས་སྙིང་གཏམ་ཡིན། །ད་དུང་གསོན་དང་འདི་སྐད་སྨྲ། །དེང་སང་གངས་རིའི་ལྗོངས་འདིའི་ཚུལ། །དུ་མ་ལྡན་ཀུན་སངས་རྒྱས་བསྟན་པ་ལས། །ཕྱི་རོལ་པ་ཡི་ཆོས་ལུགས་ཆེར་མ་མཆིས། །དེས་ན་འགྲོ་བ་དབང་ཁམས་ཅི་སྙེད་པ། །འདུལ་ཕྱིར་ཐེག་པའི་རྣམ་གྲངས་མང་པོར་སྤྲུལ། །ཀུན་ཀྱང་བྱང་ཆུབ་སྙིང་པོར་སྦྱོར་བྱེད་དེ། །སྤང་བླང་མ་བྱེད་དག་སྣང་ཕྱོགས་མེད་གཅེས། །ཁྱད་པར་རྫོགས་པའི་རིམ་པ་ཆེར་གྲགས་པ། །བྱང་ཆུབ་སེམས་མཆོག་ལ་བཀོད་བློ་སྦྱངས་དང་། །མཐའ་བྲལ་དམིགས་མེད་ཟབ་མོ་དབུ་མའི་གཞུང་། །སྔགས་ལམ་གསང་བ་རིམ་ལྔའི་གདམས་པ་ཆེ། །མ་ཡ་དབྱིབས་ཀྱི་རྣལ་འབྱོར་རྣམ་པ་གསུམ། །དགྱེས་རྡོར་རྫོགས་རིམ་ནཱ་རོ་ནི་གུ་ཡི། །ཆོས་དྲུག་བིར་ཝའི་བཞེད་པ་ལམ་འབྲས་དང་། །དང་པོའི་སངས་རྒྱས་དུས་འཁོར་རྫོགས་རིམ་དུ། །སངས་རྒྱས་པ་ལ་མངོན་སྦྱོར་སྦྱོར་དྲུག་དང་། །སྡུག་བསྔལ་ཞི་བར་བྱེད་པའི་ཞི་བྱེད་དང་། །འཁྲུལ་སྣང་བདག་འཛིན་གཞིག་བྱེད་གཅོད་ཡུལ་དང་། །མཉམ་ཉིད་གཉུག་མའི་ངོ་བོ་ཕྱག་རྒྱ་ཆེ། །ཐམས་ཅད་རྫོགས་གྱུར་འགྲན་བྲལ་རྫོགས་ཆེན་སྟེ། །དེ་ཀུན་གཞི་མཐུན་བྱང་ཆུབ་སེམས་བསྐྱེད་ཡིན། །དེ་ཀུན་ལམ་མཐུན་ཚོགས་བསགས་སྒྲིབ་སྦྱང་ཡིན། །མན་ངག་གནད་མཐུན་དད་མོས་གུས་པ་ཡིན། །བསྲུང་བྱ་མདོ་འདུས་སྡོམ་དང་དམ་ཚིག་ཡིན། །སྤྱོད་པ་དོན་མཐུན་རྒྱུ་འབྲས་བླང་དོར་ཡིན། །འབྲས་བུ་མཐར་གཅིག་མངོན་རྫོགས་སངས་རྒྱས་ཡིན། །ལྟ་བ་མི་མཉམ་ངོ་གདོང་རྩལ་གྱི་ཁྱད། །བསྒོམ་ཚུལ་མི་གཅིག་ཐུན་མོང་ཁྱད་དང་མཆོག །གྱུར་པས་ལམ་ལ་ཉེ་རིང་དུ་མར་སྣང་། །ཀུན་གྱི་ཡང་རྩེ་ཕྱག་རྫོགས་ཉིད་ཡིན་ལ། །དེ་ཡང་ཕྱག་རྒྱ་ཆེན་པོ་ཞེས་གྲགས་ནི། །ངོ་བོ་སྤང་བླངས་བློ་མཚན་སྤྲོས་པའི་ཚོགས། །ཡོངས་བྲལ་གཉུག་མ་ལྷན་སྐྱེས་ཡེ་ཤེས་ཁམས། །ཡིད་ལ་མི་བྱེད་ཆོས་ཉིད་རྣལ་མ་ཉིད། །ལམ་དུ་བྱེད་པ་ཕྱག་ཆེན་རྩ་བ་ཡིན། །དེ་ཉིད་འབྱུང་གནས་འགྲོ་བའི་གཞི་རྩ་གཅོད། །གཞི་མེད་རྩ་བྲལ་སྣང་བ་རང་གི་སེམས། །སེམས་ཉིད་སྟོང་པ་སྟོང་ཉིད་ཟུང་འཇུག་དང་། །རྣམ་ཀུན་མཆོག་ལྡན་གདོད་ནས་དག་པ་ཆེར། །གོ་དང་མྱོང་བ་རྟོགས་དང་མངོན་དུ་གྱུར། །མཐའ་རུ་ཕྱིན་པའི་དབང་དུ་བྱས་ནས་ནི། །བསམ་གྱིས་མི་ཁྱབ་གསང་བའི་རྒྱུད་དོན་དང་། །བསྟུན་ནས་ས་ལམ་ཚོད་འཛིན་རྣལ་འབྱོར་བཞིར། །རྒྱ་བོད་རིགས་གྲུབ་འགའ་ཡིས་བཀྲལ་བ་དང་། །ཁྱད་པར་ཡོངས་སུ་གྲགས་ཆེ་དྭགས་པོ་རྗེའི། །ཁྱད་ཆོས་ཉིད་དུ་སྣང་བ་དེ་ཉིད་ལས། །དེ་རྗེས་ཞུགས་གྱུར་གྲུབ་གནས་གསལ་མཛད་དེ། །དེ་ལ་དབྱེ་ལུགས་བག་གཅིག་མ་འདྲ་སྟེ། །ཕག་ཚལ་ཀམ་འབྲུག་འབྲི་སྟག་སོ་སོ་ལ། །ཀུན་ཀྱང་དོན་མཐུན་བབས་ས་གཅིག་ལགས་ཀྱང་། །དེང་སང་མ་རྟོགས་རྟོགས་དང་མ་གྲུབ་གྲུབ། །ཚུལ་འགའི་རང་རང་རྟོགས་ཉམས་དང་མཐུན་པར། །ཡིན་སྐད་མཉམ་མེད་རྣལ་འབྱོར་དོན་ལ་སྒྲིབ། །འོན་ཀྱང་སྤང་བླངས་ཤན་འབྱེད་བདག་འདྲས་མིན། །རང་གིས་མ་རྟོགས་གཞན་ལ་ཅི་ཞིག་སྨྲ། །དེ་ཡང་རྒྱལ་གོང་རྡོར་གསུང་སོར་བཞག་སྟེ། །བསམ་བཟང་གཞན་ཕན་སྲིད་མཉམ་འདི་སྐད་བརྗོད། །དེ་ཡང་སྤངས་རྟོགས་མཆོག་ལྡན་བླ་མ་ཡི། །བརྒྱུད་པ་བྱིན་ལྡན་དམ་སེལ་དྲི་མེད་པའི། །མཚན་ལྡན་བླ་མ་ཡང་དག་མཆོག་གི་དྲུང་། །འཁོར་བར་ཡིད་སུན་བྱང་ཆུབ་སྙིང་པོ་ལ། །གུས་ལྡན་སློབ་མ་མཚན་ཉིད་ལྡན་པ་ཡི། །ཚེ་འདིའི་རྣམ་གཡེང་རྒྱབ་ཏུ་དོར་བྱས་ཏེ། །ཆོས་ལ་ཆིག་དྲིལ་གདམས་པར་ངེས་ཤེས་བསྐྱེད། །བསྒྲུབ་ལ་བརྩོན་འགྲུས་སྙིང་རུས་ངར་འདོན་ཞིང་། །ཡོན་ཏན་ཆེ་གྲགས་ལོ་འདོད་མ་སོང་ཞིང་། །གང་བསྒྲོད་ལྟོས་གཞི་མེད་པར་ཉམས་ལེན་ལ། །འབད་ཚེ་བླ་མའི་བྱིན་བརླབས་ཞུགས་གྱུར་ཏེ། །ཉམས་རྟོགས་རྣལ་འབྱོར་གང་ཟག་དབང་ཁྱད་ཀྱི། །གཅིག་ཆར་རིམ་གྱིས་ཐོད་རྒལ་ཉིད་འཆར་ཏེ། །དེ་ཡང་རིམ་གྱིས་དབང་བཏང་ལྟར་དོན་ན། །ཐོག་མར་སེམས་ཉིད་མི་གནས་གནས་པའི་ཐབས། །མཚན་བཅས་མཚན་མེད་དུ་མའི་ཐབས་ཀྱིས་ནི། །གནས་པ་དང་པོ་བར་པ་མཐར་གྱིས་ནི། །རྒྱ་མཚོ་རླུང་གིས་མི་བསྐྱོད་ལྟར་དུ་ཆགས། །དེ་ལྟར་གནས་པས་ཞི་བ་ཉིད་རྙེད་ནས། །འགྱུ་ཐོག་རང་གྲོལ་ལྷག་མཐོང་རྩལ་གྱིས་ཟིན། །གནས་འགྱུ་དབྱེར་མེད་རྩེ་གཅིག་ངོ་བོ་མཐོང་། །དེ་ལ་བར་མ་ཆད་པར་ཉམས་བླངས་པས། །རིམ་བཞིན་གོམས་ཐོབ་རྟེན་ལ་ཆེ་འབྲིང་ཆུང་། །བསྒྲོད་དེ་དེ་ལ་མདོ་ཕྱོགས་ས་ལམ་དང་། །མཐུན་པར་སྦྱོར་ན་ཚོགས་དང་སྦྱོར་ལམ་གྱིས། །ངེས་འབྱེད་བཞི་དང་མཐུན་པར་གོང་མས་གསུངས། །དེ་ཡང་རྩེ་གཅིག་ཞེས་དོན་སེམས་གནས་པ། །ཐུན་ཐུབ་ངང་དུ་འགྱུར་རྩལ་འགག་མེད་ཆ། །ཤར་བ་རང་ངོ་ཤེས་ཤིང་སྣང་བ་སེམས། །ཉམས་མྱོང་རྣལ་མ་རྒྱུད་ལ་འབྱོར་བས་གྲགས། །དེ་བས་དེང་སང་ཁ་ཅིག་ཞི་གནས་པ། །འཐུག་ལྡིང་བློས་བྱས་གོ་བའི་ཚིག་ཙམ་ལས། །འགྱུ་བ་ཕྲ་རགས་ངོ་མ་མཐོང་བ་ཡི། །རྩེ་གཅིག་ངོ་སྤྲོད་འདི་ནི་བདག་བློ་ཚོམ། །གཞན་ཡང་རྣམ་རྟོག་རྗེས་དེད་གཟུང་འཛིན་གྱིས། །ཕྲ་རགས་ངོ་མཐོང་རློམ་ནས་འཁྲུལ་སྣང་གི །འཕྲེང་རྒྱུན་སྐོར་ལ་ལྷག་མཐོང་འདོད་པ་ནི། །གྲུབ་ཐོབ་གོང་མའི་གསུང་དང་རྒྱབ་གྱེས་མངོན། །དེ་ལ་སོགས་ཏེ་འདྲ་མིན་ནོར་གོལ་ས། །འགའ་ལ་ཞེན་པ་དེང་སང་མང་མཐོང་ཡང་། །རང་སྐྱོན་མ་དག་གཞན་སྐྱོན་བརྗོད་ནུས་མིན། །དེ་བས་བཏང་སྙོམས་ཉེར་བཞག་རྒྱལ་བས་གནང་། ། ཀྱེ་ཧོ། རྩེ་གཅིག་རྣལ་འབྱོར་ཞེས་གྲགས་དེ་ཉིད་ནི། །མཚོན་བྲལ་དཔེ་མེད་རང་བྱུང་ཡེ་ཤེས་ཁམས། །རྣམ་རྟོག་འཁྲུལ་སྣང་དྲི་མ་གློ་བུར་གྱིས། །རིང་པོར་སྒྲིབས་ཏེ་དེ་རིང་བླ་མའི་དྲིན། །དྲི་མ་དག་པ་ཅུང་ཟད་ཕྱིས་པའི་མཐུས། །རང་ངོ་རང་མཐོང་ཡིད་བཞིན་ནོར་བུ་དེ། །རང་ལ་ཡོད་པ་དེང་དུས་ཤེས་བྱུང་སྟེ། །དབུལ་མོའི་གཏེར་རྙེད་ལྟ་བུའི་་་་་་༼འདི་ནས་མ་དཔེ་ལྡེབས་མ་གཅིག་ཆད༽ རྣལ་འབྱོར་པ་ཚེ་དབང་ནོར་བུའི་རྒྱུན་སྤྱོད་དགེ་བའི་ལམ་རིམ་གླུ་རུ་བླངས་པ་ཐར་པའི་འཇུག་ངོགས།༄༅། །རྣལ་འབྱོར་པ་ཚེ་དབང་ནོར་བུའི་རྒྱུན་སྤྱོད་དགེ་བའི་ལམ་རིམ་གླུ་རུ་བླངས་པ་ཐར་པའི་འཇུག་ངོགས་ཞེས་བྱ་བ་བཞུགས་སོ། ། ༈ ཧ་ཧོ། མི་བདག་གི་བདེ་ཆེན་འཁོར་ལོའི་སྟེང་། །སྐྱབས་ཀུན་འདུས་ངོ་བོ་པདྨ་འབྱུང་། །སྐུ་དཀར་དམར་པད་ཞྭ་གསེར་མདངས་ཅན། །རྩེ་རྨ་བྱ་རྒོད་ལྡེམ་རྡོ་རྗེས་མཚན། །མདུན་རྒྱ་གྲམ་ཉི་ཟླ་ནོར་བུས་བརྒྱན། །ཕྱག་གཡས་ན་རིག་སྟོང་རྡོ་རྗེ་གསོར། །གཡོན་བདེ་སྟོང་ཐོད་པ་ཚེ་བུམ་བསྣམས། །སྐུ་སྔགས་ཕོད་མདོ་ཡི་ཆོས་གོས་གསུམ། །འཁོར་བསྒྱུར་ཆས་བེར་ཆེན་ལྔ་ལྡན་གསོལ། །གསང་གོས་དཀར་རྡོ་རྗེའི་སྐ་རགས་བཅིངས། །མགུལ་ནོར་བུ་ཕྱག་ཞབས་གསེར་གདུབ་འཁྲོལ། །ཞབས་སག་ལྷམ་རིན་ཆེན་ཕྲ་ཡིས་བརྒྱན། །ཞལ་འཛུམ་མདངས་སྤྱན་གསུམ་ལྟ་སྟངས་གཟིགས། །གྲུ་ཁ་ཊྭཾ་བརྡའ་རྟགས་དུ་མས་བརྒྱན། །སྐུ་འོད་དང་འོད་ཟེར་རབ་འབར་དཔང་། །མ་མཚོ་རྒྱལ་དཀར་སྔོ་མཛེས་འཛུམ་འཁྱུད། །དབུ་ལྕང་ལོ་ནོར་བུའི་ཐོར་གཙུག་ཅན། །དར་ཅོད་པཎ་དམར་རྒྱན་པྲོག་ཞུ་གསོལ། །རུས་རིན་ཆེན་རྒྱན་དྲུག་དར་དཔྱངས་ཕུར། །ཕྱག་རྡོ་རྗེ་ཐོད་པ་བདུད་རྩི་སྟོབས། །ཡབ་ཡུམ་གཉིས་དགྱེས་བདེ་ཟག་མེད་རོལ། །དེ་གཡས་ཕྱོགས་གསང་འདུས་ཧེ་རུ་ཀ །དཔལ་བདེ་གླིང་དམར་སྨུག་རྣལ་འབྱོར་ཆས། །ཕྱག་གསང་རྔ་བན་དྷ་བདུད་རྩིས་བཀང་། །སྐུ་སྟག་ཤམ་རུས་པའི་རྒྱན་གྱིས་བརྒྱན། །གཡོན་ཕྱོགས་སུ་བདེ་ཆེན་འཁོར་ལོ་སྡོམ། །རྗེ་ཀརྨ་རིག་འཛིན་གསུང་རབ་ཞབས། །སྐུ་དཀར་གསལ་ཆོས་གོས་རྣམ་གསུམ་གསོལ། །ཕྱག་རྡོ་རྗེ་དྲིལ་བུ་ཐུགས་ཀར་བསྣོལ། །དེ་ལྟ་བུའི་རྩ་བའི་བླ་མ་ལ། །འཁོར་རྩ་གསུམ་མཆོག་གསུམ་སྤྲིན་དུ་འཁྲིགས། །ཐུགས་ཚད་མེད་སྙིང་རྗེས་རབ་དགོངས་པ། །དུས་རྒྱུན་ཆད་མེད་པར་སྤྱི་བོ་རུ། །བཞུགས་སྒོམ་ཞིང་གསོལ་བ་འདེབས་ཡུལ་ཡིན། །མི་ང་ལ་སྐྱབས་ཡུལ་ཁོང་བས་མེད། །བློ་ལིངས་ཀྱིས་བོར་པ་འདི་རང་ཡིན། །ཚེ་འདི་ཕྱིའི་བདེ་སྡུག་ཅི་བྱུང་དང་། །ཡུལ་མཐོ་དམན་གར་བཏང་ཁོང་རྣམས་ཤེས། །དེ་ང་ཡི་ཆོས་ཀུན་སྙིང་པོའོ། །མི་བདག་གིས་བསྐྱེད་རིམ་བསྒོམ་པ་ནི། །གཞི་མངོན་བྱང་ལྔ་དང་ཏིང་འཛིན་གསུམ། །དེ་སྐད་ཅིག་དྲན་རྫོགས་ཧེ་རུ་ཀ །སྐུ་སྣང་སྟོང་ཞེན་མེད་ཆུ་ཟླ་བཞིན། །སེམས་ཕྱོགས་འཇོག་ཡིན་སྙམ་མ་ཡིན་པར། །དབུ་སྐྲ་རྩེ་མན་ནས་རྐང་མཐིལ་ཡན། །ཕྲ་ཞིབ་གསལ་སྐུ་མདོག་ཕྱག་མཚན་བརྒྱན། །ཚུལ་མ་འདྲེས་སེམས་དཔའ་གསུམ་ལྡན་དང་། །རྗེན་ལྷང་ངེར་རྟག་ཐུབ་བཀོད་པ་སྟེ། །མཆོག་ཐུན་མོང་དངོས་གྲུབ་སྒྲུབ་ཕྱིར་དང་། །སེམས་ཉམས་དང་རྟོགས་པ་བོགས་འདོན་ཕྱིར། །མི་ང་ཡི་བསྐྱེད་རིམ་བསྒོམ་ཚུལ་ཡིན། །ཡང་བདག་གི་བཟླས་པ་བཟླ་བ་ནི། །སྔགས་མ་དག་བཟླས་པའི་སྐྱོན་ལྔ་སྤང་། །སེམས་མ་ཡེངས་མྱུར་བུལ་ཞན་དྲག་རན། །སྒྲ་ཆེ་དང་ཤུབ་བུ་གསང་འགོག་བཟླས། །དོན་མ་འདྲེས་རང་རང་སྐབས་བབ་ལྟར། །མི་ང་ཡི་གསང་སྔགས་བཟླ་ཚུལ་ཡིན། །མི་བདག་གི་ཐུན་མཚམས་དགེ་སྦྱོར་ནི། །དངོས་ཡིད་ཀྱི་མདུན་མཁའ་སེང་ཁྲིའི་སྟེང་། །དཀོན་མཆོག་རྟེན་གྲངས་མེད་གསལ་ངང་དུ། །ཕྱག་བསྐོར་བ་མཎྜལ་བསྟོད་པ་ཕུལ། །ལམ་ཐེག་པ་ཆེན་པོའི་སྨོན་ལམ་བཅས། །ཡིག་འབྲི་དང་ཁ་ཏོན་དོན་སེམས་སོགས། །དེ་ཐུན་མཚམས་བྱ་ལས་ཚུལ་ཡིན་ནོ། །མི་ཁོ་བོའི་ཉམས་ལེན་སྙིང་པོ་དེ། །ལུས་དལ་འབྱོར་བཅོ་བརྒྱད་རིན་ཆེན་འདི། །དུས་ནམ་ཡང་མི་ཐོབ་ད་རེས་ཙམ། །དེ་གསེར་གླིང་སྟོང་ལོག་མི་བྱེད་པར། །ཚེ་ཕྱི་མ་ཅི་འགྱུར་ཆ་མེད་ཀྱི། །ལུས་འདི་ཡི་ཐར་པ་སྒྲུབ་ངེས་གཅེས། །དོན་དེ་ཕྱིར་ཆོས་ལ་འབད་ལོ་ཡིན། །ཕྱི་འབྱུང་བ་བསྐལ་པ་ཆགས་འཇིག་བཅས། །རྫོགས་སངས་རྒྱས་བྱང་སེམས་ཚངས་བརྒྱ་བྱིན། །ཀུན་མི་རྟག་གཤེགས་པའི་ཚུལ་བསྟན་ན། །རང་ཆུ་སྦུར་ལུས་ཅན་དུས་སྙིགས་མ། །ཚེ་སུམ་ཅུ་ཁ་རལ་སྐྱེས་པའི་མི། །དུས་མྱུར་དུ་འཆི་བར་ཐག་ཆོད་པས། །ཚེ་འདིར་སྣང་རྒྱུ་རྫས་ཟས་ནོར་དང་། །གནས་ཁང་ཞིང་བྲན་འཁོར་འབངས་ལ་སོགས། །ཆོས་དགེ་བའི་ཕྱིར་དུ་མ་གཏོགས་པར། །ཚེ་འདི་ཡི་ལོ་འདོད་ཁེངས་གྲགས་ཕྱིར། །སྤྱོད་དོན་མེད་བྱ་བ་གང་ལ་ཡང་། །ཆོག་ཤེས་ཤིང་འབད་བཀག་མེད་པ་འདི། །རྗེ་བཀའ་རྒྱུད་གོང་མའི་གཤེགས་ཤུལ་ཏེ། །མི་ང་རང་འཇུག་ལམ་ཟབ་རྒྱས་ཤར། །མི་བདག་གི་ཟ་ཞིང་བསྒོམ་ཙ་ན། །འདི་ཕྱི་ནང་གསང་བའི་གོ་རིམ་གྱིས། །ཟས་ཟ་ཤེས་ཚུལ་ནི་མང་ན་ཡང་། །མདོ་དོན་འདྲིལ་རང་ལུས་རྒྱལ་བའི་དཀྱིལ། །དགོས་ཁྱད་པར་མགྲིན་པར་པད་ཟླའི་སྟེང་། །སྐྱབས་མཚུངས་མེད་པདྨ་ཡབ་ཡུམ་ལ། །མཆོད་ཚུལ་དུ་ལག་སོར་མཆོད་ལྷ་མོ། །ཟས་ཚོགས་འཁོར་ཤེས་ནས་ཞལ་གྲུ་གསུམ། །ལྕེ་མེ་ལྷ་ཡར་སྐན་སྣང་མཐའ་ཡས། །སྐན་འོག་མ་གོས་དཀར་ཡ་སོ་ནི། །དཔའ་བོ་དང་མ་སོ་ནི་མཁའ་འགྲོ་མ། །ཤེས་བྱས་ཏེ་ཟས་ཟོས་བདུད་རྩིའི་བཅུད། །རྗེ་ཨོ་རྒྱན་ཡབ་ཡུམ་དཀྱིལ་འཁོར་ལྷ། །མཆོད་བསམ་པ་ཕྱི་ཡི་ཚོགས་འཁོར་ཚོགས། །ནང་གསང་སྔགས་གནད་ཀྱི་ཉམས་ལེན་ཏེ། །སྡིག་དཀོར་སྒྲིབ་མི་འབྱུང་ཚོགས་བསགས་ཐབས། །མི་ང་ཡི་ཟ་ལུགས་སྙིང་པོ་ཡིན། །སྐོམ་བཏུང་བ་བདུད་རྩི་དཀར་དམར་དུ། །ཤེས་བྱས་ཏེ་རང་ལུས་ལྷ་ལ་མཆོད། །ཟག་མེད་པའི་བདེ་ཆེན་རྒྱས་མོས་འདི། །མི་བདག་གི་བཏུང་བ་བཏུང་ཚུལ་ཡིན། །ཡང་བདག་གི་འགྲོ་ཞིང་བསྒོམ་ཙ་ན། །མི་ཁོ་བོའི་ཕྲག་གཡས་ནམ་མཁའི་ཀློང་། །སྐུ་གཟུགས་དང་གླེགས་བམ་མཆོད་སྡོང་བཅས། །ལྷ་རྩ་གསུམ་རྒྱ་མཚོ་སྤྲིན་དུ་འཁྲིགས། །ལྷ་མཆོག་དུ་ཨོ་རྒྱན་ཡབ་ཡུམ་གསལ། །དེ་བསྐོར་བར་བསམ་ནས་གོམས་པ་འདོར། །དེས་འགྲོས་ལ་ཆུད་ཟོས་མི་འགྱུར་ཞིང་། །ལུས་སྒྲིབ་པ་སྦྱངས་པའི་མན་ངག་འདི། །བདག་ཚེ་དབང་ནོར་བུའི་འགྲོ་བསྒོམ་ཡིན། །མི་ཁོ་བོ་འདུག་ཅིང་བསྒོམ་ཙ་ན། །ལུས་རྣམ་པར་སྣང་མཛད་ཆོས་བདུན་དང་། །དབུགས་འགྲོ་འོང་སྟེང་བཅས་བུམ་པ་བཅས། །སྟེང་འོག་རླུང་དང་ཁ་སྦྱོར་རླུང་དུ་དྲིལ། །རྔུབ་དགང་གཞིལ་འཕང་བཅས་སྦྱོར་བ་བཞི། །གནད་མ་འཆུགས་ངང་ནས་སྤྱོད་པ་འདི། །རླུང་དྷུ་ཏིར་གཅུན་པའི་མན་ངག་སྟེ། །མི་བདག་གི་འདུག་ནས་བསྒོམ་ཚུལ་ཡིན། །བདག་ཉལ་ཞིང་ཉལ་ནས་སྒོམ་པ་ནི། །གཞོགས་གཡས་ཕབ་སེང་གེའི་ཉལ་སྟབས་ལ། །མགྲིན་འཁོར་ལོའི་དབུས་སུ་ཨཿདཀར་ལ། །སེམས་གཏད་ནས་ཆོས་ཀུན་རྨི་ལམ་ལྟར། །ཤེས་ངང་དེར་མ་ཡེངས་དྲན་པ་བཅས། །གཉིད་ལོག་ནས་རྨི་ལམ་འོད་གསལ་སྦྱངས། །དེ་ཉལ་ནས་སྒོམ་ཚུལ་ཆ་ཤས་ལགས། ། ཨེ་མ། མི་ཚེ་དབང་ལས་ཀྱི་རྡོ་རྗེ་དང་། །དུས་ལན་རེ་གཏི་མུག་ངང་དུ་བསྒོམ། །དེ་སྐད་ཅིག་རྟོག་མེད་ཕྲ་བ་དེ། །ལམ་རིམ་པ་འོད་གསལ་ངང་དུ་སྦྱངས། །བཏང་སྙོམས་གནས་ངང་དུ་ཝལ་ལེ་དེ། །སེམས་མི་རྟོག་རང་གཤིས་ངང་དུ་སྦྱངས། །གཉིད་བག་ཆགས་རྨི་ལམ་འཐུག་པོ་དེ། །དོན་རྩོལ་མེད་ཆོས་ཉིད་ངང་དུ་སྦྱངས། །སྤྱིར་རྨི་ལམ་ཟིན་པ་འདི་ཉིད་ཀྱང་། །འཇམ་བག་ཆགས་རྩུབ་མོས་ཟིན་པ་འགའ། །ཁོང་ལ་ལ་དགའ་བྲོད་རློམ་པ་ཞུགས། །དེ་མ་ཟིན་མི་དགེའི་སྣང་བ་འཆར། །དོན་རྨི་ལམ་མི་བདེན་སྒྱུ་མའི་དཔེ། །དེར་དགའ་སྡུག་དེ་ཙམ་འཕེལ་བ་ན། །དངོས་ཨ་འཐས་འཁྲུལ་སྣང་ཅི་ཕྱིར་ཆོད། །དོན་དེས་ན་རྨི་ལམ་སྣང་བ་འདི། །ཉིན་ཉམ་ཐག་མཐོ་དམན་གང་ཡིན་གྱི། །ཚད་རྨི་ལམ་དག་ལ་བཟུང་ཙམ་ལས། །ཉིན་མ་སྒོམ་མཚན་ལ་ཅི་ཕྱིར་རྟོགས། །མི་ལ་ལས་རྨི་ལམ་ཟད་དོ་སྐད། །མི་ལ་ལས་རྨི་ལམ་མི་དམིགས་སྐད། །འདི་ཐ་དད་ཅི་བཞིན་རྟོགས་པའི་མཐུས། །འཁྲུལ་རྨི་ལམ་རྒྱུན་ཐག་ཆད་པ་ནི། །དུས་དེང་དུས་བརྒྱ་ལམ་རེས་འགའ་ཙམ། །ཉམས་རྟོགས་པ་འདྲ་མིན་མང་བའི་ཕྱིར། །འདྲ་ཉམས་དང་དོན་ནོར་བྱིས་པ་འགའ། །ཚུལ་འདི་འདྲར་ཞེན་པ་ཡ་རེ་མཚན། །མི་ང་ནི་རྨི་ལམ་ཟིན་དགའ་དང་། །ཟིན་མ་ཐུབ་འགྱོད་པའི་སེམས་ཀྱང་མེད། །གང་བྱས་ཀྱང་བདེའོ་རྣལ་འབྱོར་པ། །ལར་ཉིན་མོར་འཁྲུལ་མེད་བསྒོམ་ཡོད་ན། །མཚན་རྨི་ལམ་མ་ཟིན་ན་ཡང་བཟོད། །ཉིན་འཁྲུལ་པའི་སྣང་བ་འབྱམས་པ་ན། །མཚན་རྨི་ལམ་ཟིན་ཀྱང་དགོས་པ་ཆུང་། །དོན་དེས་ན་འཁྲུལ་སྣང་བག་ཆགས་དབང་། །བཏང་མི་བྱ་འབད་རྩོལ་མ་མཆིས་ངང་། །ཡེངས་མེད་པའི་བྱ་ར་བཏང་ལ་འབུངས། །ལུང་མ་བསྟན་སྙོམས་ལས་སྤང་འཚལ་ཏེ། །མི་ཁོ་བོའི་གཏི་མུག་ཉམས་ལེན་ཡིན། །མི་བདག་གི་འདོད་ཆགས་ངང་སྒོམ་པ། །རྒྱུ་ཟང་ཟིང་དངོས་པོའི་ཞེན་ཆགས་དེ། །འཁྲུལ་མིག་ཡོར་སྒྱུ་མ་ལྟར་དུ་སྦྱངས། །སེམས་འདོད་སྨོན་བཟང་ངན་དུ་མ་དེ། །དེ་ཞེན་མེད་ནམ་མཁའི་རླུང་ལྟར་སྦྱངས། །ཡུལ་ཆགས་སེམས་བུད་མེད་བསྟེན་པ་ཡང་། །སེམས་ཆགས་མཁན་ངོ་བོ་ཅེར་བལྟས་ཤིང་། །ཆགས་བྲལ་བ་སྟོང་སྙིང་དོན་ལ་སྦྱངས། །དེ་ངང་ལས་མ་གཡོས་རིག་པའི་རྩལ། །ལྷ་ཡི་དམ་ཡབ་ཡུམ་ལམ་གྱིས་བསྒོམ། །གསང་རྡོར་པད་ཧཱུྃ་སམ་ཕཊཿགྱིས་མཚན། །སྐུ་སྣང་སྟོང་དབྱེར་མེད་འཁྲིལ་སྦྱོར་གྱིས། །སྤྱི་གཙུག་ཏུ་བླ་མ་པདྨ་འབྱུང་། །ལོངས་སྐུའི་ཆས་མཚོ་རྒྱལ་ཡུམ་དང་འཁྲིལ། །རང་ཞེན་མེད་ཡུམ་དང་སྦྱོར་བྱས་ཏེ། །ཁམས་ཐིག་ལེ་དབབ་བསྐྱིལ་བཟློག་དང་དགྲམ། །གནད་མཁས་པ་བཞི་ཡིས་སྦྱངས་བྱས་ཏེ། །བདེ་དགའ་བ་བཞི་ལ་ཉམས་ལེན་ནས། །དོན་རང་བྱུང་རྟོགས་པའི་བོགས་འདོན་འདི། །དུག་སྨན་དུ་འགྱུར་བའི་བདུད་རྩི་འདྲ། །གྲོགས་བུད་མེད་བསྟེན་པའི་སྔགས་འཆང་གིས། །སེམས་འདོད་ཆགས་ཉམས་ལེན་བྱེད་ཚུལ་ལོ། །ཡང་ཞེ་སྡང་ངང་དུ་སྒོམ་པའི་ཚེ། །རྐྱེན་གྱིས་དཀྲུག་རྣམ་རྟོག་རགས་པ་དེ། །རང་ངོ་བོ་ཉིད་ལ་ཅེར་ཀློག་པས། །ཕྱི་ཡུལ་དང་ནང་གི་རང་སེམས་གཉིས། །དམིགས་མཚོན་མེད་ཞེན་མེད་གཉིས་སྣང་བྲལ། །འདི་འདི་འོ་སྤྲོས་པའི་མིང་ལས་འདས། །གཟུང་འཛིན་བྲལ་རིག་པ་རྗེན་པར་འཆར། །དེ་ངང་དུ་བཞག་ལས་གཞན་འགྱུ་པ། །ཞེ་སྡང་བ་དགག་སྒྲུབ་སྤང་བསྒྲུབ་སོགས། །བློས་བཅོས་བྲལ་ཡང་མེད་ཅི་དགའ་འདི། །མི་ང་ཡི་ཞེ་སྡང་ཉམས་ལེན་ཡིན། །སྤྱིར་དུག་གསུམ་ངོ་བོ་དེ་དག་དང་། །ང་རྒྱལ་བ་ཕྲག་དོག་ལ་སོགས་པ། །ཀུན་སྒྱུ་མའི་སྐྱེས་བུའི་འཕྲུལ་འཁོར་བཞིན། །སྤངས་བླངས་བྲལ་ཨ་འཐས་མ་ཞུགས་པར། །སེམས་རང་གཤིས་ཀ་དག་གདོད་མའི་ཁམས། །གཞི་བདེ་གཤེགས་སྙིང་པོར་ལྟ་བ་འདི། །བུ་ཚེ་དབང་ནོར་བུའི་ཉམས་ལེན་ཡིན། །མི་བདག་གི་ཐུན་བཞིར་ཉམས་ལེན་ན། །དུས་ཐོ་རངས་དང་པོར་བབ་པའི་ཚེ། །གཉིད་གཏི་མུག་འཁྲུལ་པ་བསྐྲོག་བྱས་ཏེ། །ལུས་སྟོང་རར་གསལ་དང་རླུང་གསུམ་འབུད། །སེམས་ཏིང་ངེ་འཛིན་གྱི་བདག་དབང་ལེན། །ངག་བཟླས་བརྗོད་བསྔགས་བཞི་ཚར་བདུན་བསྒྲག །རྗེ་གུ་རུའི་གསོལ་འདེབས་ཚར་བདུན་བཀླག །དེ་མ་ཡེང་ངང་ནས་སྙིང་པོ་བསྒྲང་། །སྔགས་ཡང་སྙིང་ཡིག་བརྒྱ་བརྒྱ་ཕྲག་བཟླ། །ལྷ་རྡོར་སེམས་སྒོམ་ནས་བསྟོད་བཤགས་བྱས། །རྗེས་རང་རིག་རྡོར་སེམས་དབྱེར་མེད་བསྟིམ། །བློ་ཤེས་རབ་འཕེལ་ཕྱིར་འཇམ་དཀར་དང་། །སྡིག་སྒྲིབ་པ་སྦྱངས་བྱེད་སྤྱན་རས་གཟིགས། །བར་གཅོད་པ་སེལ་བྱེད་ཕྱག་རྡོར་སྐུ། །བསྒོམ་བྱས་ནས་བཟླས་པ་གང་ནུས་བསྐྱལ། །དེ་ཐོ་རངས་ཐུན་གྱི་བྱ་ལས་ཡིན། །ནམ་ལངས་ཚེ་སྐད་ཅིག་ལྷར་གསལ་དང་། །ཐུགས་ཡེ་ཤེས་སེམས་དཔའི་སྙིང་ཀ་རུ། །སྲོག་མི་ཤིག་ས་བོན་ཀ་བ་གཙུག །སྔགས་བཟླ་ལུགས་བཞི་ཡིས་འཁྲུལ་འཁོར་བསྐོར། །འཕྲིན་ལས་བཞི་གང་འདོད་དམིགས་པ་བསྒྱུར། །དེ་ངང་ནས་ཐུགས་དམ་ལྷག་པའི་ལྷ། །སྔགས་ཛབ་པ་ཏི་དབྱངས་གྲགས་ལྡན་སྒྲོགས། །སྐབས་དགའ་རུང་འཕྲལ་གྱི་སྤྱོད་པ་དང་། །ཚིག་འབྲེལ་འབྱུང་འགའ་ཡང་སྨྲ་བ་ཡིན། །ཞར་བབ་བྱུང་དགེ་སྦྱོར་འགའ་ཡང་བྱེད། །མདོར་དྲིལ་བ་རང་གཞན་དགེ་ལ་བསྐུལ། །དེ་ཉིན་མོར་སྤྱོད་པའི་མཐུན་ཡིན་ནོ། །དུས་དགོང་མོར་བསྲུང་མར་གཏོར་བསྔོས་དང་། །རང་འཁོར་བཅས་བསྲུང་དང་བསྟན་དོན་དུ། །བསྲུང་བཟློག་དང་བསད་པའི་དྲག་སྔགས་བཟླས། །གནས་གཞི་བདག་དཀར་དམར་གསུར་གྱིས་མཆོད། །ཡུལ་རིས་མེད་མཆོད་སྦྱིན་གཏོར་མར་འབད། །དེ་དགོང་མོའི་དུས་ཀྱི་ཐུན་སྤྱོད་དོ། །སྲོད་བབ་ཚེ་སྐད་ཅིག་གཏུམ་མོའི་སྐུ། །ལྡངས་བྱས་ཏེ་བླ་མའི་རྣལ་འབྱོར་སྤྱོད། །ལུས་རྩ་ཡི་སྟོང་ར་བུམ་ཆེན་སྦྱངས། །རྗེས་འབར་བ་ཨ་ཤད་བྱ་ལས་དང་། །བདེ་སྐྱིད་པ་ཧཾ་གྱི་རྒྱུན་འབབ་ལ། །ཡིད་གཏད་ནས་ཉམས་ལེན་རླུང་ལ་འབད། །རྗེས་དམིགས་མེད་ངང་དུ་མཉམ་བཞག་དང་། །བསྔོ་སྨོན་ལམ་བཟང་པོའི་མཚམས་སྦྱོར་དང་། །ལུས་ཕུང་པོ་མཆོད་སྦྱིན་ཞེན་མེད་དང་། །དོན་ཉམས་ལེན་མ་ཡེངས་ལྟ་བའི་ངང་། །མཚན་གུང་དུ་རང་བབས་ངང་དུ་རྣལ། །དེ་རྣམས་ནི་སྲོད་དང་དགོང་ཐུན་ཡིན། ། ཨེ་མ། མི་ང་ཡི་ཉམས་ལེན་མདོར་དྲིལ་ན། །ལུས་ཞེན་མེད་ལྷ་སྐུར་གསལ་བ་འདི། །དེ་བསྐྱེད་རིམ་ཡོངས་ཀྱི་འདུ་སོ་ཡིན། །གཏུམ་ཧཾ་ཨ་འབར་འཛག་སྲོག་སྩོལ་འདི། །རླུང་ཐབས་ལམ་བསྒོམ་པའི་འདུ་སོ་ཡིན། །ངག་སྔགས་ལ་རྟག་ཏུ་བརྩོན་པ་འདི། །ལྷ་ཡི་དམ་ནུས་བསྒྲུབ་འདུ་སོ་ཡིན། །སེམས་མ་ཡེངས་རིག་པ་རྒྱུན་ཆགས་འདི། །ཆོས་བསྐྱེད་རྫོགས་ཡོངས་ཀྱི་འདུ་སོ་ཡིན། །སེམས་རང་བབས་བརྗོད་བྲལ་བློ་འདས་གཤིས། །འདི་ལྟ་བ་ཡོངས་ཀྱི་འདུ་སོ་ཡིན། །གང་ཤར་ཀུན་རྩོལ་མེད་མཉམ་བཞག་འདི། །བསྒོམ་ཉམས་ལེན་ཀུན་གྱི་འདུ་སོ་ཡིན། །དགག་སྒྲུབ་བྲལ་རྒྱུ་འབྲས་ཕྲ་ཞིབ་འདི། །འདི་སྤྱོད་པ་ཡོངས་ཀྱི་འདུ་སོ་ཡིན། །རེ་དོག་བྲལ་རིག་པ་རང་གདེང་ཐོབ། །འདི་འབྲས་བུ་ཡོངས་ཀྱི་འདུ་སོ་ཡིན། །རྗེ་བླ་མ་མི་བརྗེད་དྲན་པའི་རྒྱུན། །ཆད་མེད་འདི་ཉམས་ལེན་ཡོངས་ཀྱི་འདུ་སོ་ཡིན། །དུས་རྟག་ཏུ་དད་པ་འགྱུར་མེད་འདི། །ཆོས་རྣམ་དཀར་མ་ལུས་འདི་སོ་ཡིན། །དུས་རྟག་ཏུ་འདའ་མེད་དམ་ཚིག་འདི། །ཆོས་གསང་སྔགས་བསྒྲུབ་པའི་སྲོག་རྩ་ཡིན། །ལས་དཀར་ནག་རྒྱུ་འབྲས་ཞིབ་པ་འདི། །བཀའ་རྒྱལ་གསུང་མ་ལུས་འདུ་སོ་ཡིན། །དུས་རྟག་ཏུ་བག་ཡོད་སྤྱོད་བརྩོན་པ། །འདི་ཐར་པ་སྒྲུབ་པའི་གྲོགས་མཆོག་ཡིན། །དུས་རྟག་ཏུ་གཞན་ཕན་སེམས་བསྐྱེད་པ། །འདི་སངས་རྒྱས་བསྒྲུབ་པའི་ས་བོན་ཡིན། །དུས་རྟག་ཏུ་མ་བཅོས་དྲན་པ་འདི། །བསྒོམ་ཉམས་རྟོགས་མྱུར་རྫོགས་སྙིང་པོ་ཡིན། །དུས་རྟག་ཏུ་རང་གཞན་དགེ་སྦྱོར་བ། །འདི་བཀའ་བརྒྱུད་གོང་མའི་རྣམ་ཐར་ཡིན། །སེམས་གཡོ་སྒྱུ་མེད་པའི་དྲང་པོ་འདི། །སྤྱོད་པ་ཡ་རབས་ཡོངས་ཀྱི་འདི་སོ་ཡིན། །རང་འདོད་པ་ཁེ་གྲགས་ཆུང་སློབ་འདི། །ཆོས་གཤའ་མ་བསྒྲུབ་པའི་ལམ་རྐང་ཡིན། །རྐྱེན་ཅི་བྱུང་རོ་སྙོམས་གང་ནུས་འདི། །ཁོང་རྟོགས་ལྡན་ཡོངས་ཀྱི་རྣམ་ཐར་ཡིན། །འདི་རྣལ་འབྱོར་ཚེ་དབང་ནོར་བུ་ཡི། །ཉམས་ལེན་ཚུལ་བརྗོད་པའི་སྙིང་པོ་ཡིན། ། ཨེ་མ། མི་བདག་གི་བསྒོམ་ཚུལ་ཅི་འདྲ་ན། །ལྷ་ཨ་འཐས་བསྒོམ་པ་ཨ་འཐས་ཡིན། །ཨ་མ་འཐས་སྟོང་གཟུགས་ཆུ་ཟླ་བཞིན། །སེམསསྐྱེ་མེད་མཁའ་ནས་འགག་མེད་བསྩལ། །དབྱིངས་འཇའ་ཚོན་ལྟར་དུ་རང་རྩལ་སྦྱངས། །དེང་ལ་ལས་བསྐྱེད་རིམ་བསྙེན་བསྒྲུབ་ལ། །རྫོགས་རིམ་ལ་ཆོས་བློ་མི་བྱེད་འདུག །འདི་རྟག་ལྟའི་ཕྱོགས་སུ་འཁྱམས་དོགས་ཆེ། །ཡང་ཅིག་རྫོགས་རིམ་སྟོང་པ་སྐད། །ལྷ་བསྐྱེད་རིམ་བསྒོམ་པར་མི་མོས་ཤིང་། །སེམས་རྣམ་རྟོག་ཡོ་ལངས་ཅི་བྱས་ཟེར། །འདི་སྟོང་པ་ཆད་པ་ཆད་ལྟའི་རྒྱུར། །འགྲོ་དོགས་པ་ཡང་ཡང་གཟབ་དགོས་མཐོང་། །ཅི་ཕྱིར་ཞེས་སེམས་ཀྱི་རྣམ་རྟོག་རྒྱུན། །འཕྲལ་མི་འཆར་ཐབས་ནི་མ་མཆིས་ཀྱི། །དེ་བག་ཡངས་རྒྱལ་བས་མ་གསུང་ཞིང་། །གནས་འགྱུར་ཚེ་སོར་རྟོག་ཡེ་ཤེས་བཞེད། །སེམས་མ་དག་དངོས་པོའི་རྣམ་རྟོག་ལ། །དུས་ཡེ་ནས་སྒོམ་སྟེ་ད་བར་འཁྲུལ། །དེ་ངོ་ཤེས་ཙམ་གྱི་ངང་ཆོག་ན། །ཁོ་ཐར་པ་ནག་པོ་ཅི་ཕྱིར་གོལ། །ས་བརྒྱད་པའི་སེམས་དཔའ་ཡིན་པར་གྲགས། །དོན་དེས་ན་མ་དག་དངོས་ཞེན་འདི། །སྦྱང་ཕྱིར་དུ་རྒྱལ་བ་ཐབས་མཁས་དེས། །ལྷ་བསྐྱེད་རིམ་སྒྱུ་ལུས་མང་དུ་གསུངས། །ཐབས་བསྐྱེད་རིམ་ཤེས་རབ་རྫོགས་རིམ་ལ། །ཟུང་འཇུག་ནས་ཉམས་ལེན་ཁྱད་ཆོས་ཡིན། །དེ་ཟུང་འཇུག་ཀྱང་སྔར་ཡིན་ཡིན་པ་ལས། །སྔར་མི་གཅིག་པ་གསར་དུ་བལྟས་པ་མིན། །སེམས་ཉིད་ཀྱི་ངོ་བོ་ཡེ་སྟོང་དེ། །རྫོགས་རིམ་གྱི་ཐ་སྙད་མ་ལགས་སམ། །རང་མདངས་ནི་རྣམ་པ་ཐམས་ཅད་ལ། །འགག་མེད་དུ་ཤར་བའི་ལྷ་སྐུ་དེ། །བསྐྱེད་རིམ་ཞེས་ཐ་སྙད་མི་འདོགས་བསམ། །བསྐྱེད་རྫོགས་གཉིས་དོན་དེ་ཡེ་ནས་གཅིག །ད་བསྐྱེད་རིམ་ཅིག་བསྒོམ་ཀྱང་རྫོགས་རིམ་དངོས། །རྫོགས་རིམ་ཞིག་སྒོམ་ཀྱང་བསྐྱེད་རིམ་ཉིད། །ད་རྣལ་འབྱོར་སྨྱོན་པ་ནི་གཏད་མེད་སྟེ། །གཏད་མེད་ཀྱི་ཉམས་ལ་དེ་ལྟར་བདོག །བསྐྱེད་རྫོགས་ནི་རོ་གཅིག་ངང་དུ་སོང་། །ཟབ་གསལ་གྱི་ངང་དུ་ཨ་ལ་ལ། །རིག་སྟོང་གི་ངང་དུ་རྗེན་ནེ་ནེ། །བྱ་བ་ཀུན་ཆོས་ཉིད་ཁྲོལ་ལོ་ལོ། །གང་བྱས་ཀྱང་སྒྱུ་མར་འལ་མ་འོལ། །འདི་ཁོ་ཡི་རྣམ་ཐར་ཡང་ཏིག་སྟེ། །ཏིག་ཏིག་ཅིག་སྨྱོན་པ་ཅི་ལ་ཡོང་། །ཏིག་ཏིག་ཅིག་མེད་ཀྱང་རང་ཉིད་སྤྲོ། །མཇལ་དགོས་ཀྱི་མཚན་ལྡན་བླ་མ་མཇལ། །དམ་ཚིག་ལ་ངོ་ལྐོག་སྤུ་ཙམ་མེད། །ཐོབ་དགོས་ནི་ཕྱག་རྫོགས་མན་ངག་ཐོབ། །མ་གོ་བའི་ཁོང་ཕྲན་རྡུལ་ཙམ་མེད། །མཐོང་དགོས་ཀྱི་སེམས་ངོ་ཕྱོགས་ཙམ་མཐོང་། །ཐེ་ཚོམ་ཞིག་གཅོད་དགོས་ད་ནི་མེད། །རང་ཡིན་ལུགས་ནི་ཅུང་ཟད་ད་རྙེད་པས། །སྐྱེ་སྐྱེ་དང་སྤྲུལ་སྤྲུལ་མིན་ཀྱང་ཆོག །ཉམས་མྱོང་ནི་བདེ་ཆེན་གླིང་པར་སྐྱེས། །རྟོགས་པ་ནི་གསུང་རབ་རྒྱ་མཚོར་ཐུག །ཉམས་མྱོང་གང་ཕྱག་ཆེན་གདམས་པས་བཤད། །རྟོགས་གདིང་ནི་རྫོགས་ཆེན་གཞུང་གིས་ཆུད། །ལྟ་གྲུབ་མཐའ་ནི་ཀློང་ཆེན་རབ་འབྱམས་ལུགས། །དག་སྣང་གི་རྒྱལ་བསྟན་སྤྱི་ལ་སྦྱོངས། །རང་གདེངས་ནི་སེམས་ལ་ཆུད་པས་བདེ། །ཆགས་སྡང་གི་ཞགས་པ་མི་དམ་པས། །རང་སེམས་འདི་གུ་ཡངས་ཆལ་མ་ཕྱོགས། །སྐྱེ་སྔོན་ནས་ཐེག་ཆེན་སྨོན་ལམ་ཐེབས། །སྐྱེས་མཆོག་གི་བླ་མ་འབའ་ཞིག་མཇལ། །ངེས་དོན་སྒོམ་བག་ཆགས་རྟག་ཏུ་བཞག །ཅི་ནུས་ཀྱི་འགྲོ་དོན་ཁོ་ནར་སྤྱོད། །འདི་དག་ནི་ཁོ་བོའི་ངང་ཚུལ་སྟེ། །རང་ཉིད་ཀྱི་ཉམས་ལེན་ཚུལ་ཇི་བཞིན། །ཡིན་ལུགས་ཀྱི་གླུ་དབྱངས་དེ་སྐད་ནི། །རི་མགོ་ཀུན་གངས་དཀར་མཆེ་གཙིགས་འདྲ། །ཀླུང་ནགས་ཀྱི་དོམ་ལྤགས་བསྒྱངས་འདྲ་བ། །ཆུ་བོ་ཀུན་རྦ་ཀློང་དྲག་འཁྲུག་འབེབ། །མི་ཀུན་ཀྱང་ཁྲོ་གཏུམ་གདུག་པ་ཆེ། །སྦས་ཡུལ་མཆོག་བྲག་སྐད་རྫོང་ཞེས་པའི། །ཡུལ་གྲུའི་དབུས་མཁར་ཆུའི་དབེན་གནས་སུ། །དག་པ་ཟླ་བའི་ཚེས་བཟང་བཅོ་ལྔ་ལ། །རིག་པ་འཛིན་པ་ཚེ་དབང་ནོར་བུས་སྨྲས། །ཡི་གེ་པ་ལྷ་ལྡིང་གོ་སའི་རིགས། །དག་མགྱོགས་སྐྱེན་བློ་དབང་གིས་བགྱིས་སོ། །དགེ་བ་ཅི་མཆིས་པས་རང་གཞན་ཀུན། །དགེ་བློ་གང་བསྐྱེད་ནས་དགེ་སྦྱོར་འབད། །དགེ་འབྲས་ཀུན་མྱུར་མིན་རྫོགས་སངས་རྒྱས། །དགེ་བསྔོ་ཡི་དབང་ཕྱུག་ཡོངས་ཐོབ་ཤོག ། ཅེས་རྒྱལ་ཁམས་པ་ཚེ་དབང་ནོར་བུའི་རང་གི་རྒྱུན་སྤྱོད་ཀྱིས་དགེ་སྦྱོར་གླུར་སྨྲས་པ། རང་ལོ་ཉི་ཤུའི་སྟེང་དུ་སྙེགས་པ་སྣ་ཚོགས་དབྱིག་ཞེས་ཤིང་འབྲུག་ནག་ཟླའི་ཚེས་བཟང་པོར་སྤུ་སྐོང་ས་ཡི་མཚམས་བྲག་སྐད་རྫོང་དུ་སྨྲས་པ་སྟེ། རང་གཞན་བློ་བསྒྱུར་ཆོས་ལ་ཕྱོགས་པའི་རྒྱུར་གྱུར་ཅིག །མངྒ་ལཾ། ། དཔལ་རིག་པ་འཛིན་པ་ཆེན་པོ་ཚེ་དབང་ནོར་བུའི་གསུང་མགུར་ཞལ་གདམས་ཀྱི་ཚོགས།༄༅། །དཔལ་རིག་པ་འཛིན་པ་ཆེན་པོ་ཚེ་དབང་ནོར་བུའི་གསུང་མགུར་ཞལ་གདམས་ཀྱི་ཚོགས་ཇི་སྙེད་པ་བཞུགས་སོ། ། ༈ རང་ཉིད་ལ་གྲོས་འདེབས་ཀྱི་མགུར།༈ ཀྭ་ཡེ། སྤྲུལ་སྐུར་མིང་ཐོགས་ཚེ་དབང་ནོར་བུ་ལགས། །ལེ་ལོ་སྙོམས་ལས་ཅན་ཁྱོད་ཚུར་གསོན་དང་། །ཁྱོད་ལ་འདི་ནང་མི་ཆོས་བསླབ་བྱ་མཁན། །མང་མཆིས་མོད་ཀྱང་གཏན་བདེའི་ལམ་བཟང་མཆིད། །སློབ་མཁན་དུས་སྙིགས་དུས་འདིར་བདག་ཙམ་སྟེ། །དེས་ན་གྲོས་ཚིག་འདི་ཀུན་མ་ཡེངས་བཟུང་། །རྟག་ཏུ་བྲེ་མོ་བརྗོད་དང་འདི་མི་འདྲ། །སྙིང་མེད་མདོ་ཤོར་མི་ལ་ཅི་ཆ་ཡོད། །ཀྱེ་མ། དལ་འབྱོར་ལུས་འདི་སྔོན་བསགས་ལས་འཕྲོ་སྟེ། །རྙེད་དཀའ་མ་ཤེས་བྱིས་པས་ནོར་རྙེད་འདྲ། །ཟོག་མེད་སྐྱེ་དྲན་བག་ཆགས་སྲབ་ལགས་ཀྱང་། །ཆོས་བཞིན་མ་སྤྱོད་ནོར་བུ་འདམ་བྱིང་འདྲ། །ལས་འཕྲོ་བཟང་སད་ཆོས་ལ་མོས་ན་ཡང་། །གནད་ཐོག་མ་ཁེལ་དབུལ་མོའི་གསེར་སྒྱེ་འདྲ། །སྨོན་ལམ་བཟང་པོས་མཚན་ལྡན་མཇལ་ན་ཡང་། །གསོལ་འདེབས་མ་ཤེས་སྦྲང་ནག་པད་ཚལ་འདྲ། །དད་དང་དག་སྣང་ཅུང་ཟད་ཤེས་ན་ཡང་། །བརྟེན་ཕུར་མ་ཚུགས་ས་རྒོད་ནས་བཏབ་འདྲ། །དམ་པའི་བཀའ་དྲིན་ཁྲིད་ལུང་མནོས་ན་ཡང་། །ཅི་བཞིན་མ་རྟོགས་རྒྱང་ནས་བྱ་ར་འདྲ། །ཟབ་ལེགས་སྙན་སྙན་ཆོས་མང་ཐོས་ན་ཡང་། །རང་གིས་མ་འཕེར་རྡོ་རྒྱབ་ཆུ་བླུགས་འདྲ། །རྒྱུ་འབྲས་དམ་ཚིག་ཕྱོགས་ཙམ་གོ་ན་ཡང་། །རྒྱུད་ལ་མ་འབྱོར་ཀོ་གྱོང་སྣུམ་དྲེད་འདྲ། །མཚན་ཉིད་ལྡན་པའི་བླ་མ་ཡུན་བསྟེན་ཡང་། །ཆོས་བཞིན་མ་རྟོགས་སྡེ་པའི་ཧོར་འདྲ་འདྲ། །བླ་མ་མཆོག་མཇལ་དམ་ཆོས་ཞུར་ཡོད་དུས། །བརྩོན་འགྲུས་མ་བྱས་གསེར་གླིང་སྟོང་ལོག་འདྲ། །དགེ་བའི་ལས་ལ་བག་ཙམ་སྤྱོད་ན་ཡང་། །རང་འདོད་ཀྱིས་བཅིངས་ཟས་བཟང་དུག་འདྲེས་འདྲ། །ཆོས་བརྒྱད་འཁོར་བའི་བཙོན་ར་ཡིན་ཤེས་ཀྱང་། །སྤང་བར་མ་ནུས་སྲིན་མོའི་གཟུགས་ཆགས་འདྲ། །མི་རྟག་འཆི་བ་བྲེང་ཙམ་དྲན་ན་ཡང་། །འདི་སྣང་ཚུལ་འཛིན་ཤེས་བཞིན་དུག་འཐུང་འདྲ། །ཆོས་ཚུལ་ཉམས་ལེན་སྐྱོང་བདེ་ཤེས་ན་ཡང་། །རྒྱུད་ཐོག་མ་འབྲེལ་རིག་འཛིན་རྙེད་གཏོར་འདྲ། །དམ་ཆོས་སྒྲུབ་པའི་ཞེ་གདེངས་ཡོད་ན་ཡང་། །སང་བྱེད་གནང་བྱེད་སྟོན་ཐོག་སད་ཁྱེར་འདྲ། །ཁ་མཁས་ཚིག་བཙུན་ཆོས་བཤད་རྣར་འཇེབས་ཀྱང་། །རང་ཉམས་མ་མྱོང་སྨན་མེད་སྨན་བཤད་འདྲ། །རྒྱུ་འབྲས་དམ་ཚིག་གཞན་ལ་བཤད་བཤད་ཀྱང་། །རང་གིས་མ་སྤྱོད་ནེ་ཙོའི་ཆོས་བཤད་འདྲ། །ནན་སྐྱེད་སྡུག་བཙིར་བཅའ་ཁྲིམས་བསྒྲིགས་ན་ཡང་། །ཁེངས་དྲེགས་དབང་གྱུར་དཔོན་པོའི་དམག་ཁྲིམས་འདྲ། །རང་ལ་ཕན་རེ་བཅས་བསྐྱང་གྲྭ་འཁོར་ཡང་། །ཕལ་ཆེར་ཕན་མེད་འདབ་ཆགས་བྱིའུ་གསོས་འདྲ། །ཆོས་དང་མཐུན་རེས་སྐྱོང་བའི་སྦྱིན་བདག་ཡང་། །ཕལ་ཆེར་སྤྲ་སྤྲེལ་མི་ལྟོགས་སྲོག་ཤུགས་འདྲ། །རྩ་རླུང་གྲོགས་རེ་གསང་གྲོགས་བསྟེན་པ་ཡང་། །ཕལ་ཆེར་མཉམ་གྲོགས་འཇིག་རྟེན་གཟའ་སྡེབ་འདྲ། །དམ་ཚིག་གཉེན་འབྲེལ་བསླབ་པའི་སློབ་བུ་ཡང་། །ཇི་བཞིན་ཚུལ་ལྡན་ཉིན་མོའི་སྐར་མ་འདྲ། །ཡུལ་སྡེ་འཁྲུག་རྩོད་མི་ཚེ་བསྐྱལ་ན་ཡང་། །ལས་ལ་ཟད་མེད་ཆུ་ནག་གཉེར་མ་འདྲ། །བྱ་བ་བསྐོར་ཚེ་ཆོས་ལ་འབད་བསམ་ཀྱང་། །བྱ་བ་ཟད་མེད་རྒྱ་སྲང་འགྲིམ་འགྲུལ་འདྲ། །ཆོས་བཞིན་མ་རྟོགས་ཆོས་པའི་གཟུགས་འཛིན་ཀྱང་། །ཕྱི་ཚུལ་མཛེས་ཏེ་མི་གཙང་དར་བཏུམ་འདྲ། །རྒྱལ་བསྟན་མ་ཕན་གདན་ས་སྤྲུལ་མིང་ཡང་། །མྱུར་དུ་མི་རྟག་ནམ་ལངས་སྐར་མ་འདྲ། །འུར་འུར་ཟང་ཟིང་མངའ་ཐང་འཕྲལ་བདེ་ཡང་། །སྐད་ཅིག་ཉིད་འགྱུར་སྒྱུ་མའི་ལྟད་མོ་འདྲ། །བཅའ་བཅའ་བཀོད་བཀོད་བྱ་བྱེད་མཛེས་ལེགས་འདི། །ད་ལྟ་ཉིད་འཇིག་སད་ཁའི་རྨི་ལམ་འདྲ། །སྙན་སྙན་ཚེ་འདིའི་མི་ཆོས་བསླབ་བྱ་དེ། །འཕྲལ་མཛེས་མཐའ་མེད་ཚོང་འདུས་ལྟད་མོ་འདྲ། །དཔོན་སློབ་འར་འུར་མཛའ་འཕྲལ་སྐྱིད་ན་ཡང་། །མི་རྟག་སྒྱུ་མ་སྐྱེས་བུའི་གྲོང་ཁྱེར་འདྲ། །གོས་འཇམ་ཟས་ཞིམ་འཕྲལ་དུ་བདེ་ན་ཡང་། །རྟག་པར་མི་འགྱུར་ཉི་ཤར་ཤིང་ཟིལ་འདྲ། །མཚན་ཉིད་མི་ལྡན་བླ་གཟུགས་བདག་འདྲ་ནི། །དོན་གཉིས་མི་འགྲུབ་བེའུ་སྦྲེལ་གཡང་ལྷུང་འདྲ། །ཡོན་ཏན་མེད་པར་སྤྲུལ་སྐུར་བསྒྲགས་ན་ཡང་། །བོང་བུ་གཟིག་ཤུན་གྱོན་པའི་གཡོ་ཅན་འདྲ། །རང་དོན་མ་གྲུབ་འགྲོ་དོན་ཡིན་རློམ་འདི། །སྐྱེས་བུ་སྨྱོན་པ་ཚོགས་དཔོན་སོང་བ་འདྲ། །བསམ་པ་སྣ་མང་ཆིག་དྲིལ་མེད་པ་ནི། །གར་ཡང་མི་ཕོག་ལོང་བའི་མདའ་འཕེན་འདྲ། །ད་ནི་ཆོས་བློ་ཚིག་དྲིལ་མ་བྱས་ན། །མི་ཚེ་སྟོང་ཟད་རྒྱལ་ས་ཡིད་སྨོན་འདྲ། །ཀྱེ་མ་དེ་སྐད་འདྲ་དཔེ་སོ་བརྒྱད་འདི། །རང་གི་ཚུལ་ལ་རང་ཉིད་སྐྱོ་ནས་གླེང་། །ཕྱི་ནང་གསང་བ་དུས་ཀྱི་འགྱུར་ལྡོག་རྣམས། །མཐོང་ངམ་ཐོས་སམ་ཚེ་དབང་ནོར་བུ་བ། །རིགས་དྲུག་འཁོར་བའི་སྡུག་བསྔལ་སྐྱེ་འཆིའི་ཚུལ། །དྲན་ན་སྙིང་འདར་ཉམས་སུ་མྱོང་ཚེ་ཅི། །ད་ནི་ཐོག་ཏུ་བབ་ལ་མྱུར་དུ་ཉེ། །ཡང་ནས་ཡང་འཁོར་ལས་འདི་ཡ་རེ་ཚ། །ཀྭ་ཡེ་དེང་ནས་དམ་བཅའ་ཚུལ་བཞིན་དུ། །རང་གིས་རང་ལ་གདམས་འདི་བརྟན་ཕུར་ཚུགས། །སྔོན་ཆད་སྡུག་པའི་ལས་ལ་གནོང་ཞིང་འགྱོད། །བག་མེད་སྙོམས་ལས་བྱ་བར་རབ་ཁྲེལ་ནས། །ཕྱིན་ཆད་གཏན་བདེའི་ལམ་བཟང་བྱང་ཆུབ་འབྲས། །མྱུར་ཐོབ་དེང་ཚེ་རི་ཁྲོད་དབེན་པར་བསྙེགས། །ཆོས་མིན་ཆོས་པའི་གཟུགས་སུ་མ་འཆོས་པར། །རང་སེམས་དཔང་ཚུགས་མདོ་རྒྱུད་དགོངས་པའི་དོན། །ཆིག་དྲིལ་སེམས་ཉིད་བརྡར་ཤ་ལེགས་གཅོད་ཅིང་། །འདུལ་ཁྲིམས་མི་འཆལ་བག་ཡོད་སྤྱོད་པར་རེམས། །སེམས་བསྐྱེད་མི་ཉམས་སྙིང་གི་ནོར་བུར་འཆང་། །དམ་ཚིག་ཕྲ་བཅས་རྒྱུད་ལ་རབ་འཇོག་འཚལ། །གྲོགས་མེད་བརྟུལ་ཞུགས་དབེན་པའི་རི་ཁྲོད་བརྟེན། །ངེས་མེད་སྤྱོད་པས་རྒྱལ་ཁམས་ཡོངས་ལ་བསྐོར། །བདག་མེད་དོན་དམ་རྟོགས་པའི་སྒྲོ་འདོགས་བཅད། །ཞེན་མེད་ཕ་ཡུལ་བྱ་བ་བཏང་རེ་རན། །ད་ནི་ཇི་བཞིན་རང་དོན་མ་གྲུབ་པར། །འཆི་བར་གྱུར་པའི་སྲོག་ལ་བབ་ཀྱང་སླའི། །བསམ་ཐོག་ཆིག་དྲིལ་ཆོས་ལ་རབ་འབུངས་ནས། །ཕ་ཡུལ་འདི་རུ་ད་ནི་སྡོད་རེ་སྐན། །ཆོས་ནས་ཆོས་བཞིན་བསམ་པ་བཟང་པོ་འདི། །བར་ཆད་ལོག་པའི་བགེགས་དང་ཡོངས་བྲལ་ནས། ཇི་བཞིན་འགྲུབ་རོགས་བླ་མ་ཡི་དམ་ལྷ། །མཁའ་འགྲོ་བསྲུང་མས་མཛོད་ཅིག་མཐུ་མ་ཆུང་། །ཞེས་པའང་རྣལ་འབྱོར་སྙོམས་ལས་རོ་ཉལ་མཁན། །ཚེ་དབང་ནོར་བུར་གྲགས་དེའི་གང་ཤར་གླུ། །རང་གཞན་ཆོས་ལ་བསྐུལ་ཕྱིར་ཡུལ་གཞན་དུ། །བགྲོད་འདུན་བྱུང་ནས་མཛེས་བྱེད་སྟོན་ཟླ་ཡི། །ཚེས་བཟང་ཉེར་གསུམ་ཉིན་པར་བཀོད་པ་སྟེ། །ཡིག་རིས་རང་གི་སློབ་མ་མཆོག་སྤྲུལ་སྐུ། །འཕྲིན་ལས་བསྟན་འཛིན་བཟང་པོས་ཡོངས་བགྱིས་པ། །ཀུན་གྱི་སྙིང་ལ་ཚིག་འདི་འཇུག་པར་ཤོག ། ༈ དམ་བཅའ་བཅུ་གཅིག་གི་མགུར།ཀྱེ་མ་ཧོ། བསྐལ་པར་རྙེད་དཀའ་དལ་འབྱོར་རིན་ཆེན་ལུས། །ད་རེས་ཐོབ་འདི་སྟོང་ལོག་མི་འཚལ་ཏེ། །སྔོན་ཆད་ལས་ཀུན་གཡེང་བ་བག་མེད་དང་། །ཉོན་མོངས་རགས་པ་ཆོས་བརྒྱད་དབང་དུ་སོང་། །ཚུལ་དེ་དྲན་ན་སྐྱོ་ཤས་འཕེལ་བའི་རྒྱུ། །མི་ཚེ་ངལ་ཀུན་ལག་སྟོང་ཅན་དུ་བཅུག །དེང་ནས་བཟུང་སྟེ་ལྷག་བསམ་དྲིལ་བར་བྱ། །འགྲུབ་པར་རྩ་བརྒྱུད་བླ་མའི་བྱིན་གྱིས་རློབས། །ཀྱེ་མ། ཚུལ་མིན་བག་མེད་ལུས་ཀྱི་སྤྱོད་མང་འདི། །གཞན་སྣང་མི་མཐུན་ཐར་པའི་གེགས་སུ་ཆེ། །དེ་བས་སྤྱོད་ལམ་ཀུན་ཏུ་བག་ཡོད་ཞིང་། །ཚུལ་ལྡན་བྱེད་པ་དམ་བཅའ་གཅིག་པ་ཡིན། །ཀྱེ་མ། ཐབས་ཀྱིས་མ་ཟིན་རླུང་ནུས་མ་ཐོབ་བར། །བུད་མེད་གྲོགས་བརྟེན་རང་ཁྲེལ་ངན་སོང་ལྟུང་། །དེ་བས་ཐབས་ལྡན་ནུས་པ་མ་འབྱོངས་བར། །བུད་མེད་མི་བརྟེན་དམ་བཅའ་གཉིས་པ་ཡིན། །ཀྱེ་མ། ངག་འཁྱལ་བྲེ་མོའི་འཆལ་ཚིག་བརྗོད་པ་འདི། །རང་གཞན་ཆགས་སྡང་དོན་འཆལ་བཟླས་བརྗོད་བདུད། །དེ་བས་ངག་ལ་བག་ཆགས་ཚིག་དམ་ཞིང་། །ཆོས་མིན་མི་སྨྲ་དམ་བཅའ་གསུམ་པ་ཡིན། །ཀྱེ་མ། བདག་གཞན་བསྟོད་སྨད་ཚིག་གི་སྒྲོ་སྐུར་འདི། །རང་གཞན་ཕྱོགས་འཛིན་དུཿཁའི་རྒྱུ་བསགས་པས། །དེ་བས་དག་སྣང་ཕྱོགས་མེད་བསྟོད་སྨད་སྤངས། །བཏང་སྙོམས་བཞག་པ་དམ་བཅའ་བཞི་པ་ཡིན། །ཀྱེ་མ། རྫུན་ཚིག་འདི་ནི་ཀུན་ཏུ་མི་མཐུན་ཞིང་། །གསུང་གི་ཡོན་ཏན་འཇོམས་པའི་ཧ་ལ་འདྲ། །དེས་ན་གཏིང་དཔག་དཀའ་ཕྱིར་མ་གཏོགས་པར། །རྫུན་དུ་མི་སྨྲ་དམ་བཅའ་ལྔ་པ་ཡིན། །ཀྱེ་མ། དཀོན་མཆོག་མནའ་སྤང་འདི་ནི་མནར་མེད་པར། །རྡོ་རྗེ་དམྱལ་བར་ལྟུང་བྱེད་ཞགས་པ་སྟེ། །དེ་ཡང་བསྟན་ཕན་གལ་ལྕི་མ་གཏོགས་པར། །བརྗོད་པར་མི་བྱེད་དམ་བཅའ་དྲུག་པ་ཡིན། །ཀྱེ་མ། རོ་ཉལ་ལེ་ལོ་སྙོམས་ལས་གཡེང་བ་འདི། །མི་ཚེ་སྟོང་ཟད་དངོས་གྲུབ་གཉིས་ཀྱི་གེགས། །དེ་བས་རོ་ཉལ་ལེ་ལོ་ཉུང་བྱས་ཤིང་། །ཆོས་བརྗོད་བརྩོན་བསྐྱེད་དམ་བཅའ་བདུན་པ་ཡིན། །ཀྱེ་མ། ཆོས་ཀུན་རྩ་བ་རྩ་བའི་བླ་མ་ལ། །འགལ་ན་རབ་འཇིགས་རྡོ་རྗེ་དམྱལ་ལྟུང་ངེས། །དེས་ན་དམ་ཚིག་སྲོག་དང་ཁྱད་མེད་པར། །འདའ་མེད་བསྲུང་བ་དམ་བཅའ་བརྒྱད་པ་ཡིན། །ཀྱེ་མ། སེམས་ཀྱི་རེ་དོགས་འདོད་སྨོན་བྱེད་པ་འདི། །བྱ་བ་ཆོས་འདྲེས་བྱེད་པའི་སེལ་ངན་ཡིན། །དེ་ཡང་མི་བྱེད་གང་ཤར་ཞེན་མེད་པར། །སྒྱུ་མ་ལྟར་སྦྱངས་དམ་བཅའ་དགུ་པ་ཡིན། །ཀྱེ་མ། དགེ་སྦྱོར་རང་ཉིད་གཅིག་པུའི་ཞི་བདེ་ཉིད། །བསྒྲུབ་འདོད་ཉན་རང་གོལ་དང་གཟུགས་སྐུ་སྒྲིབ། །དེས་ན་དགེ་སྦྱོར་བྱ་བ་གང་ཡང་རུང་། །མཁའ་མཉམ་འགྲོར་བསྔོ་དམ་བཅའ་བཅུ་པ་ཡིན། །ཀྱེ་མ། རང་ལ་ཡོན་ཏན་མེད་པར་ཡོད་བརྗོད་པའི། །ཟོལ་གྱི་ཚིག་འདིས་མཐར་ཐུག་ཐར་འབྲས་བརླག །དེས་ན་དད་ལྡན་སྤྲོ་ཕྱིར་མ་གཏོགས་པར། །ཡོན་ཏན་སྦས་སྤྱོད་དམ་བཅའ་བཅུ་གཅིག་ཡིན། །དེ་ལྟར་དམ་བཅའ་བཅུ་གཅིག་འདི་ཉིད་ནི། །ཚེ་འདིར་ནམ་ཡང་འདའ་བར་མི་བྱ་སྟེ། །དེ་ཡི་དགེ་བས་འགྲོ་ཀུན་སངས་རྒྱས་པ། །མྱུར་ཐོབ་སྐུ་གཉིས་ལྷུན་གྱིས་གྲུབ་པར་ཤོག ། ཅེས་ཚེ་དབང་ནོར་བུས་རང་ལོ་བཅོ་ལྔ་པ་ཆོས་ཁྲིད་ཞུ་བའི་སྐབས་སུ་དམ་བཅས་པ་སྟེ་རང་གཞན་རྒྱུད་ལ་ཕན་པར་གྱུར་ཅིག ། ༈ གནས་ལུགས་དོན་དམ་པའི་ཡིན་ལུགས་ཇི་བཞིན་པར་ངེས་ཤེས་སྐྱེས་ཏེ་སྨྲས་པ་ཉུང་ངུ་རབ་གསལ་རྡོ་རྗེའི་གླུ་ཡོད།ཨོཾ་སྭཱ་སྟི། ཁྱབ་བདག་རྡོ་རྗེ་ཅན་གྱི་དངོས། །རྩ་བའི་བླ་མར་ཕྱག་བྱས་ནས། །རང་གི་མྱོང་བ་འདི་སྐད་ཅེས། །སྨྲ་བས་ཉེས་མེད་དགེ་གྱུར་ཅིག །བྱེ་བྲག་མདོ་སྡེ་སྨྲ་བ་དང་། །རྣམ་བདེན་རྣམ་རྫུན་སེམས་ཙམ་པ། །རང་རྒྱུད་གོང་འོག་ཐལ་འགྱུར་པ། །ཐ་དད་ལྟར་སྣང་གྲུབ་མཐའ་ཀུན། །ལན་ཚྭ་ཆུ་ལ་ཐིམ་པ་ལྟར། །ཆོས་ཉིད་ངོ་བོར་རོ་གཅིག་འདྲེས། །གནས་སྐབས་གླང་པོ་ཆེ་ཡི་ལུས། །དམུས་ལོང་རྣམས་ཀྱིས་བཏགས་པ་ལྟར། །ངོ་བོའི་ཕྱོགས་རེ་ངོས་བསྒྲུབ་ནས། །གྲུབ་མཐའ་འཆད་པ་དེ་ཡང་མཚར། །གྲུབ་མཐའ་དེ་ཀུན་ཡོངས་རྫོགས་ཤིང་། །སངས་རྒྱས་ཡེ་ཤེས་ཀུན་རྫོགས་པར། །བརྡ་ཆད་ཚིག་གི་དཀྲི་བྱེད་ཆོས། །དེ་ལ་རྫོགས་པ་ཆེ་ཞེས་བརྗོད། །སྣང་བ་ཡེ་ཤེས་རིག་པ་རྒྱུན་མི་ཆད། །ངོ་བོ་ཉིད་མེད་ཡེ་ཤེས་རྟག་བརྟན་ཅིང་། །ཆོས་ཀུན་སྟོང་བཞིན་སྟོང་ཉིད་རིག་པའི་རྒྱུན། །རིག་སྟོང་ཟུང་འཇུག་དཔེ་མེད་བསམ་བརྗོད་འདས། །ཆོས་ཉིད་དོན་ནི་བསམ་གྱིས་མི་ཁྱབ་ན། །ཆོས་ཉིད་ཟབ་མོ་རྟོག་གེས་དཔྱད་བྱ་མིན། །སངས་རྒྱས་གསུང་ལ་ཡིད་ཆེས་བླ་མ་ལ། །མི་ཕྱེད་དད་པས་གསོལ་བ་བཏབ་ན་རྟོགས། །ཆོས་དབྱིངས་ཆོས་སྐུ་ཡོངས་གྲུབ་གང་། །རིག་པ་ཡེ་ཤེས་དེ་ལ་བྱ། །དེ་ནི་འགྲོ་འོང་གནས་པ་བྲལ། །བློ་ཡི་ར་བས་ཡོངས་མི་འཁྱུད། །སྲིད་ཞི་མྱང་འདས་རོ་མཉམ་ན། །བླང་དང་དོར་བའི་གནས་མ་མཆིས། །དེ་ལྟ་ན་ཡང་བདག་ཉིད་ལ། །རྣམ་རྟོག་ཡོད་པ་དེ་སྲིད་དུ། །ཆོས་ཉིད་དེ་ལ་ཡོངས་དམིགས་ནས། །འདུས་བྱས་དགེ་བ་ལ་འབད་བྱ། །དེ་ལྟར་ཉུང་ངུའི་ཚིག་དག་ནི། །ཟབ་མོའི་གནད་འགའ་གསལ་བར་སྨྲས། །ཨྠྀི། ཞེས་པ་ཀུན་དགའ་ཆུ་སྟོད་ཟླ་བའི་ཚེས་བཅུ་བདུན་པར་བོད་ཡུལ་གཙང་ལ་སྟོད་ལྷོ་བྱང་གི་མཚམས་ལྷ་ཆེན་པོ་ལྷ་རྒོད་མདུང་རྩེའི་ལ་མགུལ་སྤང་གཤོང་ཞིག་ཏུ་འགྲོ་བཞིན་པའི་ངང་ལ་བླ་མའི་བྱིན་རླབས་ཀྱི་ཚུལ་དེ་ལྟར་གོ་བ་སླར་རྟོགས་པ་བརྗོད་པར་ལ་སྟོད་དིང་རི་གླང་འཁོར་ཟེ་རུ་ཀུན་དགའ་ཤིང་སྟག་གྲོ་བཞིན་ཟླ་བའི་དམར་ཕྱོགས་ཚེས་དགུར་སྨྲས་པ་གམྦྷིར་རྒྱཿ དགེའོ། ། ༈ སྒྲུབ་ཆེན་པར་གསུངས་པ་ཉམས་ལེན་གནད་ཀྱི་ཞལ་གདམས།སྙན་གསོན་དང་སྒྲུབ་ཆེན་དད་པ་ཅན། །ཚེ་འདི་ཕྱིར་ཕན་པའི་ཞལ་གདམས་ཤིག །དགོས་ཡང་ཡང་གསུང་ངོ་མ་ལྕོགས་ཙམ། །ཚིག་གླུ་ལས་དྲངས་ཏེ་སྨྲ་ཡིས་གསོན། །ལུས་དལ་འབྱོར་འདི་འདྲ་རྟག་རྙེད་དཀའ། །དེ་མི་རྟག་ཡུད་ཙམ་རྨི་ལམ་འདྲ། །ཕྱིས་སྡུག་བསྔལ་རྒྱ་མཚོ་ཐར་དུས་མེད། །བདེ་འདོད་ན་ད་ལྟ་ཆོས་བསྒྲུབ་བརྩོན། །ཆོས་ཡང་དག་སྙིང་པོ་བྱེད་པ་ལ། །ཚེ་འདི་སྣང་ཞེན་པ་ལོག་པ་དགོས། །བསྟོད་སྙན་གྲགས་བདེ་སྐྱིད་བློས་ཐོང་དགོས། །སྐྱབས་བླ་མ་མཚན་ཉིད་ཚང་ངེས་འཚོལ། །ལམ་གནད་འགག་ཆེ་ཤོས་འདི་ཡིན་པས། །དེ་མ་ནོར་འཁྲུལ་མེད་རྙེད་པ་གཅེས། །དེ་རྙེད་ནས་ལོག་ལྟ་མཉམ་གྲོགས་དང་། །གསུངས་བཅག་དང་སོམ་ཉི་སྨོས་ཅི་དགོས། །མཐར་ཀུ་རེ་བྲེ་མོ་ཙམ་ཡང་སྤངས། །དཔེ་བག་གསར་ཁྱོ་ཁྱིམ་ཞུགས་པ་བཞིན། །སེམས་ཡེངས་མེད་བག་ཡོད་བླ་མ་བསྟེན། །ཡིད་གུས་པ་དམ་ཚིག་སྲོག་ལྟར་བསྲུང་། །ལས་རྒྱུ་འབྲས་ཡིད་ཆེས་དང་དུ་ལོངས། །ཆོས་བསྒྲུབ་ལ་ལེ་ལོ་ཕྱི་བཤོལ་སྤོངས། །སྐྱབས་ཕུར་ཚུགས་བླ་མ་དཀོན་མཆོག་བཟུང་། །མཁའ་མཉམ་འགྲོར་སེམས་བསྐྱེད་སྙིང་ལ་ཕུར། །སྒྲིབ་སྦྱངས་ཤིང་ཚོགས་བསགས་ལས་ལ་འབད། །དུས་ཀུན་ཏུ་བླ་མ་སྤྱི་བོར་བསྒོམ། །ལམ་དབང་བཞི་ཏིང་འཛིན་ཐུན་དྲུག་བླངས། །ཚེ་འདི་ལ་གྲོལ་བློའི་བརྩོན་འགྲུས་བྲབས། །དལ་ལོང་མེད་མི་རྟག་འཆི་བ་བསྒོམ། །བློ་ཁྱོད་ཤེས་བླ་མར་ལིངས་ཀྱིས་འབོག །འདི་ཆོས་ཀུན་གནད་ཏིག་རྩ་བ་སྟེ། །མེད་ཐབས་མེད་རྟག་ཏུ་ཡིད་ལ་བཟུང་། །ཆོས་སྨིན་བྱེད་དབང་བཞི་ཚང་ཞུས་ལ། །དེ་སོ་སོའི་དམ་ཚིག་གཞུང་བཞིན་བསྲུང་། །ལམ་གྲོལ་བྱེད་བསྐྱེད་རྫོགས་རྩ་རླུང་ཡང་། །ལྷ་བསྐྱེད་རིམ་མངོན་བྱང་ལྔ་དང་ནི། །ཏིང་འཛིན་གསུམ་སྐད་ཅིག་ཐོལ་སྐྱེས་སོགས། །རང་ཡིད་ལ་གང་བདེར་གཞུང་བཞིན་བསྒོམ། །དུས་གྲངས་རྟགས་བསྙེན་པ་ཚད་ལྡན་སྐྱོལ། །སྒྲུབ་ལས་སྦྱོར་ནུས་པ་ལྡན་པར་མཛོད། །དོན་རྫོགས་རིམ་སྒོམ་ཡང་ཁ་འབྱམས་དང་། །ཡིད་ཡུལ་དང་བློས་བྱས་བཅས་བཅོས་སོགས། །སྒོམ་ཡེངས་དང་རེ་དོགས་གཏན་ནས་སྤངས། །སེམས་མ་བཅོས་གཉུག་མའི་ངང་དུ་གློད། །རྒྱས་བཏབ་དང་དགག་སྒྲུབ་སྤང་བླངས་དང་། །བསྒོམ་གང་བགྲོད་ལྟོས་གཞི་ཉིད་ཀྱང་གྲོལ། །སྒོམ་ཡིན་མིན་ཐེ་ཚོམ་དགའ་སྡུག་སོགས། །སེམས་གཟུང་འཛིན་དང་བྲལ་ལྷུག་པར་ཞོག །བསྒོམ་བཞག་ཐབས་གནད་ལ་མཁས་པ་ན། །ལམ་གེགས་དང་གོལ་པ་ཤིན་ཏུ་ཉུང་། །ལར་བླ་མ་ཉམས་མྱོང་ལྡན་ཕྲད་གཅེས། །དཔེ་ཚིག་སྐམ་རྗེས་སུ་མི་འབྲངས་གཅེས། །ཆོས་ཉམས་ལེན་གནད་དུ་འཁེལ་བ་གཅེས། །སེམས་རུས་གཏིང་བརྡར་ཤ་ཆོད་པ་གཅེས། །རྐྱེན་གང་ཤར་ལམ་དུ་ཁྱེར་བ་གཅེས། །སྤང་བླངས་ཀུན་འབུར་འཇོམས་ནུས་པ་གཅེས། །གནས་འགྱུ་བ་འདོར་ལེན་མི་འཚལ་གྱིས། །ཀུན་རང་སེམས་ཆོས་སྐུའི་རོལ་རྩལ་ཡིན། །ད་མ་བཅོས་རང་བབ་རིང་དུ་ཞོག །འཁྲུལ་རྟོག་དབང་མ་ཤོར་ཅེར་གྱིས་ལྟོས། །དོན་ཐ་མལ་ཤེས་པ་གཟོ་བྲལ་འདི། །རང་རང་ངོ་ཤེས་པས་གྲོལ་བ་ལགས། །ཉམས་རྟོགས་པ་གོ་རིམ་རྣལ་འབྱོར་བཞི། །གནས་འགྱུ་བ་དབྱེར་མེད་རྩེ་གཅིག་དང་། །ཡུལ་གཉིས་འཛིན་བློས་བྱས་སྤྲོས་དང་བྲལ། །གཉིས་ཆོས་ཀུན་དབྱེར་མེད་རོ་གཅིག་འདྲེས། །ཆོས་ཀུན་ཟད་སྒོམ་མེད་རྣལ་འབྱོར་གྲགས། །འདི་རྫོགས་པ་ཆེན་པོ་ཁྲེག་ཆོད་རྟགས། །གཞན་ཞི་གཅོད་དབུ་ཕྱག་ཞེས་ཀྱང་ཟེར། །ཀུན་རང་རིག་གཅིག་པོའི་མིང་ཡིན་ལ། །དེ་སྐྱོང་ཐབས་ཡེངས་མེད་དྲན་པ་གཅེས། །མདོར་དྲིལ་ན་དུས་དང་རྣམ་པ་ཀུན། །རྗེ་བླ་མའི་ཐུགས་དང་རང་སེམས་བསྲེས། །སེམས་མ་བཅོས་རང་ངོ་རང་གིས་ལྟོས། །ལས་སྤངས་བླངས་དམ་ཚིག་ཉམས་མེད་མཛོད། །མཐར་སྒོམ་མེད་སྒོམ་བྱ་རང་སར་ཡལ། །མཉམ་རྗེས་མེད་འདྲེས་པར་བརྩོན་འཚལ་ལགས། །ལམ་ཐོད་རྒལ་ཡང་ཟབ་དེ་ཡི་གྲོགས། །དུས་ཀུན་ཏུ་དབྱིངས་རིག་གཅུན་གཟིར་འཚལ། །ཐབས་རྩ་རླུང་ཐིག་ལེ་སྐད་པ་ཡང་། །དོན་དབུ་མའི་རྩ་མདུད་གྲོལ་ཐབས་དེ། །དེ་ཞུ་བདེ་ཉམས་སུ་བླང་བ་ཉིད། །རྟེན་སྲོག་རྩོལ་སྦྱོར་བཞིའི་དབང་དུ་བསྡུས། །རྩ་གསུམ་འདུས་སྒྲ་གཅན་ཁ་རུ་བཟའ། །མེ་ཨ་མདངས་ཞུས་པས་དཔའ་བོ་བཞུ། །ལམ་དཀྱིལ་འཁོར་བཞི་རུ་བརྟུལ་བྱས་ཏེ། །བདེ་དྲོད་སྦྱོར་སྟོང་ཉིད་རང་ཞལ་བལྟ། །མཐར་བཟློག་ཁྱབ་རྗེས་ཤེས་གནད་དུ་བསྣུན། །འདི་ཁྱད་ཆེ་ཉེན་ཆུང་ཐབས་ལམ་ཡིན། །དེ་གཞན་ལུས་ཐབས་ནུས་རྩལ་རྫོགས་ཚེ། །རྐྱེན་རིགས་ལྡན་བརྟགས་ཤིང་འགུགས་སྒྲིབ་ནས། །ལམ་མཉམ་པ་གསུམ་པོ་སྔོན་འགྲོ་བས། །གནས་སྐྱོན་བཞི་བསལ་ནས་མཁའ་བཞི་སྦྱངས། །ཕྱི་བོ་ལ་ཀ་ཀོ་ལ་སྦྱོར་ཞིང་། །ནང་མུ་ཁ་སྒྲ་གཅན་བུ་གར་སྦྱོར། །གསང་ཉི་ཟླ་ཨེ་ཀློང་གཅིག་ཏུ་སྦྱོར། །དོན་ཨ་ཧཾ་སྐྱེ་མེད་མཁའ་ལ་སྦྱོར། །ཁམས་སྲོག་གི་དབྱུག་གུར་ཡོངས་སུ་ཁེངས། །གནས་བརྟན་གཡོའི་མདུད་པ་ཡོངས་སུ་བཀྲལ། །རླུང་ཁྱབ་རྒྱུ་བདུད་རྩིའི་རྒྱུ་བར་ཐིམ། །ཀུན་དྭངས་མའི་སྙིང་པོ་བཅུད་དུ་སྨིན། །འདི་རྡོ་རྗེ་ཐེག་ལམ་རྨད་བྱུང་ཡང་། །ཁེ་ཉེན་ཆེ་དུག་སྦྲུལ་ནོར་བུ་འདྲ། །གནད་འདི་ལ་ཤིན་ཏུ་ཐབས་མཁས་གཅེས། །འོན་དེང་སང་ཚུལ་ལྡན་ཉིན་སྐར་ཙམ། །ཁོང་ལ་ལས་ཐབས་ལམ་ཡིན་ནོ་སྐད། །ཁྲོམ་ཀུན་རྒྱུ་བུད་མེད་མཐོང་ཞོན་བྱེད། །སེམས་ཆགས་སྲེད་སྔར་བས་ཇེ་ཆེར་སོང་། །སྤྱོད་འདི་འདྲ་དིང་སང་མང་ཙམ་མཐོང་། །དོན་ཉམས་ལེན་གནད་དུ་འཁེལ་བ་ན། །ཡུལ་སྣང་བ་ཀུན་ཀྱང་བདེ་བར་འཆར། །སེམས་ཆགས་ཞེན་འཛིན་རྟོག་རང་གྲོལ་ཤར། །དེ་ཐབས་ལམ་གནད་དུ་སོང་རྟགས་ཡིན། །ལར་ལྟ་བའི་གདེང་ཚད་གཅིག་མེད་ན། །ལས་ཕལ་ཆེར་འཇིག་རྟེན་ལམ་དུ་འགྲོ། །གནད་མན་ངག་རྒྱུད་ལ་མ་འཁེལ་ན། །ཐབས་ཕལ་ཆེར་འཁོར་བའི་རྒྱུ་རུ་འགྱུར། །ལར་ཆེད་དུ་མི་སྤང་མི་སྒྲུབ་པར། །གང་བྱུང་ལ་ལམ་འཁྱེར་གནད་དུ་ཆེ། །ཀུན་ཞེན་བྲལ་སྒྱུ་མའི་ངང་དུ་སྦྱོང་། །འདི་ཉམས་ལེན་གནད་ཡིན་ཐུགས་ལ་ཞོག །ལར་ལུས་ངག་ཡིད་གསུམ་བག་ཡོད་དང་། །ཕྱི་གདུལ་བྱའི་དང་བ་འདྲེན་པ་དང་། །ནང་དད་ལྡན་དཀོར་ཟས་འཇུ་བ་དང་། །གསང་བསྟན་པའི་མིག་རྒྱན་ཕན་ཐབས་གསུམ། །དུས་ཀུན་ཏུ་མཛད་འཚལ་ཐུགས་ལ་བཟུང་། །གནད་ཞལ་གདམས་མདོར་བསྡུས་སྨྲས་ཟིན་གྱིས། །ཐུགས་གཏིང་ལ་ལྷན་ནེར་སྤྱོད་འཚལ་ལོ། ། ཞེས་པ་མང་ཡུལ་གུང་ཐང་རྒྱལ་ཁབ་ཁྱུང་རྫོང་དཀར་མོའི་ཤར་ཕྱོགས་ཟ་འོག་ཞེས། རྗེ་མི་ལ་རས་པ་དང་རས་ཆུང་པ་ཐོག་མར་མཇལ་བའི་གནས་མཆོག་དེར་མདོ་ཁམས་ཀཿཐོག་ཚེ་དབང་ནོར་བུས་རང་གི་སློབ་མ་སྐྱིད་གྲོང་གནས་ནུབ་ཨོ་རྒྱན་གྱི་སྒྲུབ་བ་པ་ཀུན་བཟང་ཆོས་དབྱིངས་དཔལ་འབར་གྱིས་བསྐུལ་ངོར་མེ་ལུག་སྨིན་དྲུག་ཟླ་བའི་ཚེས་བཅོ་བརྒྱད་ཀྱི་སྔ་ཆར་གང་དྲན་སྨྲས་པའོ། ། ༈ སྙན་གསོན་དང་འདིར་འདུས་དད་པ་ཅན་ཞེས་པའི་མགུར།ཀྭ་ཡེ། སྙན་གསོན་དང་འདིར་འདུས་དད་པ་ཅན། །ཀུན་མི་རྟག་སྒྱུ་མའི་ཚུལ་འདིར་སོམས། །དུས་དེང་སང་སྙིགས་དུས་ལས་ཤུགས་ཀྱིས། །ལས་བསམ་ཞིང་བསམ་ཞིང་ཡི་མུག་སྐྱེ། །ལོ་རེ་རེ་སོང་བཞིན་དུས་ངན་འགྲོ། །མཐའ་དམག་འཁྲུག་འུར་སྒྲ་འབྲུག་ལས་ཆེ། །ཁྲལ་འུ་ལག་མང་པོ་ཟད་མཐའ་མེད། །གཅིག་གོང་ན་གཅིག་བཙན་ཐམས་ཅད་སྡུག །དུས་ཕམ་རྒྱལ་རེ་དོགས་སྡུག་བསྔལ་ཆེ། །རང་དབང་མེད་གསོས་ཕྲུག་དགྲ་ལ་འཐབ། །ནོར་བསགས་པ་སུས་སྤྱོད་ཆ་ཡང་མེད། །དཔོན་མང་པོའི་ངོ་འཛིན་བློ་སེམས་ཁོལ། །ཕན་རེ་བ་འགའ་ཡང་གནོད་པར་འགྱུར། །མི་བཙན་ཞན་མང་པོ་གོ་ལྡོག་བརྗེས། །གྲོགས་ཡིད་མཐུན་གྲོགས་མེད་སོ་སོར་བྲལ །དཔའ་སྲོག་གི་སྐྱེལ་སོ་དགྲ་ལ་བྱེད། །ལས་སྤྱད་ཚད་འགའ་ཡང་སྡིག་པར་འགྲོ། །དུས་སང་ཕོད་གནང་ཕོད་བདེ་རེ་བྱས། །དེ་མི་བདེ་སྔར་བས་ཇེ་ཡང་ཐུ། །ཚེ་དེ་དང་སྡུག་ཟད་གྱུར་ནས་འཆི། །འཆི་བདུད་པོའི་ཞགས་པས་ཐེབས་ཙམ་ན། །ལས་བྲེལ་བས་བཤོལ་མེད་ངང་དུ་འགྲོ། །ཆོས་དྲན་ཀྱང་སྡོད་པའི་དབང་མི་ཐོབ། །འཆི་འཚེར་ཡང་ཐབས་མེད་ཨ་ཙ་མ། །བསམ་ཤེས་ནས་ཟས་ནོར་ལ་ཞེན་ནས། །ཐབས་གཡོ་སྒྱུ་དུ་མས་བསགས་པའི་ནོར། །དུས་དེ་དུས་རང་དབང་འཁྱེར་རྒྱུ་མེད། །དེ་བསམ་བཞིན་ལྷ་ཆོས་སྙིང་ནས་འཚལ། །དེ་སྙིང་བརྩེ་གྲོགས་འཁོར་གཉེན་འབྲེལ་རྣམས། །འབྲལ་མི་ཕོད་གཅིག་སེམས་གཅིག་ལ་ཆགས། །འཆི་བབས་ཚེ་ཐབས་མེད་སོ་སོར་འབྲལ། །དེ་བསམ་བཞིན་སྙིང་ནས་ལྷ་ཆོས་འཚལ། །དུས་ཡུད་ཙམ་བདེ་བ་རྨི་ལམ་འདྲ། །དེ་མི་རྟག་སྐད་ཅིག་ཉིད་ལ་འགྱུར། །ད་འགྱུར་མེད་བདེ་བ་བསྒྲུབ་འདོད་ན། །ཆོས་ཡང་དག་བགྱིད་ན་མི་འཐད་དམ། །ད་གསོན་དང་འཁོར་བའི་བྱ་བ་འདི། །ཡུན་རྟག་ཐུབ་གྱུར་པ་གཅིག་ཀྱང་མེད། །ཀུན་མི་རྟག་འཆི་བ་ཉིད་དུ་འགྱུར། །དེ་དྲན་པར་ཤེས་ན་བློ་སྙིང་འདར། །རྗེ་བླ་མ་མི་རྟག་འཇའ་ཡལ་འདྲ། །དཔོན་སྲིད་འཛིན་མི་རྟག་ན་བུན་འདྲ། །ནང་ཉེ་འབྲེལ་ཐོ་རངས་སྐར་ཚོགས་འདྲ། །ནོར་ལོངས་སྤྱོད་སྦྲང་མའི་སྦྲང་རྩི་འདྲ། །སྟོབས་མངའ་ཐང་སྟོན་མཇུག་ཤིང་ལོ་འདྲ། །ཚེ་ཡུད་ཙམ་བར་སྣང་གློག་དང་འདྲ། །སེམས་ཤིང་ཁའི་བྱིའུ་ཆུང་འཕུར་ཁ་འདྲ། །དཔེ་དེ་འདྲའི་མི་རྟག་ཟད་མཐའ་མེད། །དེ་བསམ་ནས་ཆོས་གཅིག་སྙིང་ནས་འཚལ། །ལས་མི་དགེ་སྡིག་པ་དུག་ལྟར་འཛེམ། །ལས་དགེ་བའི་བྱ་བར་ཅི་ནུས་འབུངས། །ཕ་བླ་མ་གཏན་གྱི་དཔོན་པོར་གྱིས། །ཆོས་གདམས་ངག་གཏན་གྱི་ནོར་སྐལ་གྱིས། །ཚོགས་བསགས་ཁྱབ་གཏན་གྱི་ཞིང་སྐལ་གྱིས། །བྱམས་སྙིང་རྗེ་གཏན་གྱི་སྐུ་མཁར་གྱིས། །ཆོས་འཇིག་རྟེན་བྱ་བ་གང་ལ་ཡང་། །གཞུང་བཟང་ཞིང་ཕྱི་ཐག་རིང་བ་དང་། །ཁྲེལ་ངོ་ཚ་ལྡན་ཞིང་བག་ཡོད་འདི། །ཚེ་འདི་ཕྱིའི་ཀུན་སྤྱོད་ཡང་རབ་ཡིན། །ཁྲེལ་ངོ་ཚ་རྣ་གཞུང་མི་རྩི་བཞིན། །བརྟན་མི་ཐུབ་བསྐྱོད་ཁ་སླ་བ་དང་། །དད་མོས་གུས་འགྱུར་ལྡོག་རྐྱེན་པ་ནི། །ཚེ་འདི་ཕྱི་ཀུན་ཏུ་བྱུར་འདྲེ་ཡིན། །མདོར་དྲིལ་ན་དུས་རྣམས་ཐམས་ཅད་དུ། །བློ་བསླུ་མེད་དཀོན་མཆོག་གསུམ་ལ་གཏོད། །རྟེན་འདི་ཕྱིའི་སྐྱབས་གནས་དེ་རང་བཟང་། །རྗེ་བླ་མར་མོས་གུས་སྙིང་ནས་དྲིལ། །ལས་རྒྱུ་འབྲས་བསླུ་མེད་ཞིབ་ཏུ་རྩིས། །ཆོས་ཀུན་གྱི་རྩ་བ་རང་རྒྱུད་ཐུལ། །གནད་ཕྱིན་ཅི་མ་ལོག་དམ་ཚིག་བསྲུངས། །སེམས་ཡེངས་མེད་ཉམས་ལེན་ནན་ཏན་གྱིས། །ལར་འཆི་ཁར་འགྱོད་པ་མེད་པ་ཞིག །དུས་དེང་སང་བྱས་ན་མི་ལེགས་སམ། །ཆོས་སང་བྱེད་གནང་བྱེད་མི་ཚེ་ཟད། །རྐྱེན་དེ་དབང་མ་ཤོར་ཆོས་ལ་དྲིལ། །ལར་མི་རྟག་འཆི་བ་མ་དྲན་ན། །ཆོས་བྱེད་བློའི་ངང་དུ་ཕྱི་བཤོལ་འགྲོ། །དོན་དེས་ན་མི་རྟག་དྲན་པར་གྱིས། །ཀུན་དམ་པའི་ཆོས་ལ་འབད་འཚལ་ལོ། ། ཞེས་པ་མང་ཡུལ་གུང་ཐང་གི་དབེན་པ་གའུ་ལྷ་སྡིངས་སུ་དད་ལྡན་རྣམས་ཀྱིས་བསྐུལ་ངོར་མི་རྟག་སྐྱོ་ཤས་བསྐྱེད་པའི་གླུར་མདོ་ཁམས་ཀཿཐོག་གི་ཆར་སྐྱེས་ཤིང་ཕྱོགས་ཀུན་ཉུལ་བ་ཚེ་དབང་ནོར་བུས་སྨྲས་པའོ། ། ༈ རྗེ་བཙུན་མི་ལའི་སྒྲུབ་གནས་ར་ལའི་ཟ་འོག་ཕུག་ནས་རང་ལ་གྲོས་འདེབས་སུ་བཞེངས་པའི་མགུར།ཨེ་མ། སྙན་གསོན་དང་ཚེ་དབང་ནོར་བུ་ལགས། །ལུས་དལ་འབྱོར་ཐོབ་པ་ད་རེས་ཙམ། །དེ་སྙིང་པོ་དམ་ཆོས་མི་བརྩོན་པར། །ལས་སྟོང་ལོག་ཕོད་དམ་སྙིང་ནས་བསམ། །ད་ཁོ་བོའི་བསླབ་བྱ་སྙིང་ཁྲག་ཅིག །བུ་ཁྱོད་ལ་བཤད་ཀྱིས་ཡིད་ལ་ཟུངས། །ལུས་བག་མེད་རོ་ཉལ་བྱས་པ་འདི། །ཆོས་ཐར་པའི་དགྲ་བོ་འདི་བས་སུ། །ཚིག་བསྟོད་སྙན་སྐོར་གྱི་འདུ་ལོང་འདི། །ལམ་དཀར་པོའི་ལམ་གེགས་འདི་ལས་སུ། །ཚེ་འདི་སྣང་ཁེངས་དྲེགས་ཆོས་བཤད་འདི། །ལས་ལོག་པའི་གཡང་ས་འདི་བས་སུ། །རང་སྐྱིད་འདོད་ཞེན་པ་ཆེ་བ་འདི། །ཚེ་སྟོང་ཟད་བདེ་དབྱེན་འདི་བས་སུ། །སེམས་ཕྱོགས་འཛིན་ཆགས་སྡང་སྣང་བ་འདི། །དམྱལ་སྡུག་བསྔལ་ས་བོན་འདི་བས་སུ། །རང་སེམས་རྒྱུད་མ་དུལ་ཁེངས་པ་འདི། །དགེ་ས་བོན་བསྲེག་མེ་འདི་བས་སུ། །གཞན་རྣམས་ལ་ཟུར་ཟ་ཕྲག་དོག་འདི། །གཏན་བྱུས་ཕུང་བྱུར་སྲི་འདི་བས་སུ། །གྲོགས་འཁོར་ལ་ཞེན་པ་སྐྱེ་བ་འདི། །མཆོག་བསྒྲུབ་ལ་བར་ཆད་འདི་བས་སུ། །ཇ་ཤ་ཆང་ཞིམ་ཟས་སྲེད་པ་འདི། །གནས་དབེན་འཇོམས་ཇག་པ་འདི་བས་སུ། །སྨན་ཤ་མཛེས་གཟུགས་ལ་ཆགས་པ་འདི། །མར་འཐེན་པའི་གཏིང་རྡོ་འདི་བས་སུ། །ནོར་ཟང་ཟིང་གསོག་འདོད་འཛིན་པ་འདི། །བདེ་བཅོམ་པའི་ཆོམ་པོ་འདི་བས་སུ། །ཆོས་བཤད་མཁས་རང་རྒྱུད་མ་དུལ་འདི། །རང་རང་གིས་མགོ་སྐོར་འདི་བས་སུ། །ཚིག་སྙན་སྙན་གནད་ཐོག་མ་ཁེལ་འདི། །དོན་སྟོང་ལས་མདོ་མེད་འདི་བས་སུ། །ཆོས་སང་བྱེད་གནང་བྱེད་བཤོལ་བ་འདི། །བདུད་ནག་པོའི་བསླུ་བ་འདི་བས་སུ། །གཞན་ངོ་བསྲུང་རང་དབང་མ་ཐོབ་འདི། །རང་རང་འཆིང་ཞགས་པ་འདི་བས་སུ། །ཁ་ཆལ་ཆོལ་བྲེ་མོ་རྩེ་དགའ་འདི། །འཕགས་ནོར་འཕྲོག་རྐུན་མ་འདི་བས་སུ། །སེམས་ངང་ཐུང་ཁོང་ཁྲོ་སྐྱེ་བ་འདི། །བཟོད་འཇིགས་བྱེད་ཕུང་འདྲེ་འདི་བས་སུ། །དེ་ཀུན་ནི་ཆོས་ཀྱི་དགྲ་བོ་སྟེ། །དགྲ་དེ་ཚོས་འཕྲལ་དུ་ཕན་པ་ལྟར། །ཁྱོད་མགོ་བོ་བསྐོར་བ་མ་ཤེས་ཏེ། །དབང་དེ་ལ་སོང་བ་ཡ་རེ་ང་། །ད་མི་རྟག་ཆོས་ཀྱི་བྱ་བྱུང་བས། །དགྲ་དེ་དག་ལག་ནས་ཐར་ཙམ་ཞིག །དུས་ད་ལྟ་འབད་ན་རན་ཏེ་གདའ། །དུས་ད་ལྟ་ཉིད་ལ་མ་འབད་ན། །ལས་སྡུག་བསྔལ་རྒྱ་མཚོའི་བཙོན་དོང་དུ། །ལམ་ཡང་ཡང་འཁོར་བའི་ཞགས་པས་བསྡམས། །རང་བྱ་བྱས་མཚོན་ཆས་གློ་སྙིང་འབིགས། །སྐྱབས་མགོན་མེད་གྱུར་ཚེ་ཅི་དྲག་འཕྱིས། །དོན་དེ་བས་ད་ལྟ་བྲོས་ན་ཐར། །གནས་རི་སུལ་དབེན་པའི་བཙན་རྫོང་དུ། །ཁོང་སྐྱབས་གཅིག་མཚན་ལྡན་བླ་མ་བཞུགས། །དགྲ་འཁོར་བ་འཇོམས་པའི་མཚོན་ཆ་ཡོད། །རྐྱེན་དུག་ལྔ་ཞི་བའི་བདུད་རྩི་ཡོད། །སེམས་སྡུག་བསྔལ་ཞི་བའི་དཔའ་བོ་མཆིས། །དཔུང་ཉོན་མོངས་བཅོམ་པའི་གོ་ཡང་བཙན། །གནས་དེ་རུ་བྲོས་ན་དེ་ནས་ཐར། །བུ་ཁྱོད་ཀྱིས་ང་ཡི་ཚིག་ཉན་ན། །དུས་ད་ལྟ་འཆི་ཆོས་སྒྲུབ་རེ་རན། །འཆི་ཐོག་བབས་ནམ་ཡོང་ཆ་མེད་ཀྱིས། །དེ་དུས་སུ་འགྱོད་མེད་དེང་མཛད་འཚལ། ། ཞེས་གུང་ཐང་རྒྱལ་ཁབ་ཀྱི་ཤར་ཕྱོགས་ར་ལ་ཟ་འོག་ཕུག་ཞེས་རྗེ་བཙུན་མི་ལའི་སྒྲུབ་གནས་སུ་མེ་ལུག་སྨིན་དྲུག་ཟླ་བའི་ཚེས་བཅུ་བདུན་སྐབས་རང་ཉིད་སྐྱོ་བས་གསལ་བྱེད་ཏིལ་མེའི་མདངས་ལ་རང་གི་བསླབ་བྱ་གང་དྲན་སྨྲས་པ་ལགས། བཀྲ་ཤིས། ༈ གུང་ཐང་སྨད་ལིང་བ་བྲག་དམར་རྫོང་ནས་བཞེངས་པའི་གྲོས་འདེབས་ཀྱི་མགུར།ཨ་ཧོཿ ཚེ་རབས་ཀུན་ཏུ་བཀའ་དྲིན་མཚུངས་མེད་ཕ། །སངས་རྒྱས་ཀུན་ལས་ལྷག་པའི་པདྨ་འབྱུང་། །དྲན་ཞིང་དབང་མེད་དད་པའི་འཆི་མ་འཁྲུགས། །དད་པ་ཅན་གྱི་བུ་ལ་ཐུགས་རྗེས་གཟིགས། །སྐྱེ་བ་ཀུན་ཏུ་སྐྱོང་མཛད་དྲིན་ཅན་མ། །རྒྱལ་ཀུན་ཡུམ་མཆོག་ཡེ་ཤེས་མཚོ་རྒྱལ་དྲན། །དྲན་ཞིང་དབང་མེད་དད་པའི་འཆི་མ་འཁྲུག །དད་པ་ཅན་གྱི་བུ་ལ་ཐུགས་རྗེས་གཟིགས། །དུས་ཀུན་འབྲེལ་ཟབ་བླ་མེད་སྟོན་མཆོག་ཕ། །འགྲན་བྲལ་ལོ་ཙཱ་བཻ་རོ་ཙ་ན་དྲན། །དྲན་ཞིང་༝ དད་པ་༝ རང་སེམས་འདི་ཉིད་བྱིན་གྱིས་བརླབས་པའི་ཕ། །གྲུབ་དབང་གནུབས་བན་ནམ་མཁའི་སྙིང་པོ་དྲན། །རང་གཞན་དོན་གཉིས་གཡེལ་མེད་གྲུབ་པའི་ཕ། །ད་ལྟ་སེམས་ཉིད་པདྨ་ནོར་བུ་དྲན། །ཡང་དག་ཐར་པའི་ལམ་བཟང་སྟོན་པའི་ཕ། །བསླུ་མེད་དྲན་མཆོག་དྭངས་མ་བདེ་གླིང་དྲན། །གེགས་སེལ་བོགས་འདོན་སྙན་བརྒྱུད་སྟོན་པའི་ཕ། །མཚུངས་མེད་བླ་མ་གསུང་རབ་རྒྱ་མཚོ་དྲན། །ཞལ་མཇལ་གསུང་ཐོས་དད་པ་ཐོབ་པའི་ཕ། །རྒྱལ་དབང་དམར་ནག་མཆོག་སྤྲུལ་སྙིང་ནས་དྲན། །ཆོས་མེད་སེར་གཟུགས་དྲེད་པོ་སྙོམས་ལས་མཁན། །དལ་འབྱོར་སྟོང་ལོག་རྟ་རྒན་བདག་འདྲ་ལ། །ཐུགས་རྗེས་གཟིགས་ཤིག་འཕགས་མཆོག་བླ་མ་རྣམས། །བདག་ནི་ལས་ངན་དུག་ལྔ་སྒྲོམ་བུ་ཆེ། །སྤྱོད་ཀུན་འཁོར་བ་ངན་སོང་རྒྱུ་རུ་འཕེལ། །བྱ་བ་གང་བྱས་མི་ཆོས་ཉིད་དང་འདྲེས། །ཉམས་རྟོགས་རྩལ་ཁ་རྫོགས་པའི་དུས་མ་མཆིས། །ཆོས་མིན་རྣམ་རྟོག་ཇེ་ལས་ཇེ་ཆེར་འཕེལ། །བསམ་བཞིན་སྐྱོ་བ་སྙིང་གི་དཀྱིལ་ནས་སྐྱེ། །རེ་དོགས་འཛིན་པ་འདི་ལ་ཡ་རེ་ང་། །མ་རིག་ཕྲ་བ་འདི་ལ་ཡི་རེ་མུག །ད་ནི་དབེན་པའི་རི་སུལ་སྙེག་རེ་རན། །ལས་ཀྱི་སྐྱེ་མཐའ་ཚེ་འདིར་བཅད་རེ་རན། །བསླུ་མེད་རྟེན་འབྲེལ་བཟང་པོ་སྒྲིགས་རེ་རན། །པདྨའི་བཀའ་ལུང་རྟེན་འབྲེལ་སྒྲིགས་རེ་རན། །རང་ལ་བརྩོན་པའི་ལྕགས་ཀྱིས་བསྐུལ་རེ་རན། །ཡེངས་མེད་དགེ་སྦྱོར་བཟང་པོ་སྐྱོང་རེ་རན། །འཕགས་མཆོག་གོང་མའི་ཞབས་དྲུང་སྐྱོངས་རེ་རན། །དོན་གཉིས་ལྷུན་གྲུབ་ད་ལྟ་སྒྲུབ་རེ་རན། །ཚེ་དབང་ནོར་བུ་རང་གྲོས་འདེབས་རེ་རན། །རང་གྲོས་སྟོང་ཚུགས་མེད་པ་སྤྱོད་རེ་རན། ། ཞེས་མང་ཡུལ་གུང་ཐང་སྨད་ལིང་བ་བྲག་དམར་རྫོང་དུ་དོན་མེད་པའི་ཡིད་སྐྱོ་ཤས་དང་དགའ་བདེ་གཉིས་ཀ་འཕེལ་ཞིང་རང་ཉིད་སྐྱེ་བ་ཕྱི་མ་གར་སྐྱེ་དེ་དང་ཚུལ་འགའ་ཞིག་ཡིད་ལ་ཤར་བའི་ཚེ་ཚེ་དབང་ནོར་བུས་མེ་ལུག་ཧོར་ཟླ་བཅུ་པའི་ཚེས་དྲུག་ནུབ་སྣང་གསལ་མར་མེའི་མདངས་ལ་གང་དྲན་བྲིས་པ་ལེགས་སོ། །བཀྲ་ཤིས། ༈ བལ་བོད་མཚམས་ཆུ་མིག་བརྒྱ་རྩར་བཞེངས་པའི་ནམ་མཁའི་རྣལ་འབྱོར་བདེ་བའི་མགུར་གླུ།ཨ་ཧོ། སྙན་གསོན་དང་འདིར་འཁོད་ལྷ་འདྲེ་མི། །སྤྲང་ཕྱོགས་བྲལ་ཁོ་བོས་གླུ་ཅིག་ལེན། །སྐྱབས་བླ་མ་སྤྱི་བོའི་གཙུག་ཏུ་བཞུགས། །གླུ་མཆོད་པར་འབུལ་ལོ་བྱིན་གྱིས་རློབས། །ཨེ་མ། གནས་ཡ་ལ་མཚན་པ་བལ་བོད་མཚམས། །རི་གངས་དཀར་རྒྱལ་མཚན་འཕྱར་འདྲ་བ། །ཁོང་སྲིད་པའི་ལྷ་ཆེན་གླེ་རུ་ཞེས། །རྗེ་ཨོ་རྒྱན་ཆེན་པོའི་དགེ་བསྙེན་ལགས། །དེ་མདུན་ངོས་བྲག་རི་རྡོ་རྗེ་སྤོ། །ཆབ་བདུད་རྩི་ཆུ་མིག་བརྒྱ་རྩ་ཞེས། །སྒྲུབ་གནས་མཆོག་ངོ་མཚར་གཟི་བྱིན་འབར། །གཏེར་ཟས་ཆོས་མང་པོའི་བཞུགས་གནས་ལགས། །འདིར་འདུས་པའི་དད་ལྡན་ཕོ་མོ་རྣམས། །སྔོན་ཚོགས་བསགས་ལས་བཟང་སྐལ་བར་ལྡན། །དངོས་རྣམ་དཀར་ཆོས་ལ་མོས་པ་ཡི། །རིགས་བཟང་ལྡན་དཔའ་བོ་མཁའ་འགྲོ་ལགས། །མི་མ་ཡིན་ལྷ་འདྲེའི་ཚོགས་རྣམས་ཀྱང་། །སེམས་བྱང་ཆུབ་བསྐྱེད་པའི་སེམས་དཔའ་སྟེ། །ཆོས་དཀར་ཕྱོགས་སྐྱོང་བའི་བསྲུང་མ་ཡིན། །དོན་དཔལ་ཆེན་ཡབ་ཡུམ་སྤྲུལ་པ་ལགས། །མི་ཁོ་ཡང་ཨོ་རྒྱན་གུ་རུའི་སྲས། །བསམ་བཞིན་དུ་གདུལ་བྱར་སྐྱེ་བ་ལེན། །ཕྱི་གཞན་ངོར་གང་ལྟར་སྣང་ཡང་རུང་། །དོན་རང་ངོར་བསླུ་བ་མེད་སྙམ་བདེ། །ཆུང་དྲན་ནས་སྡུག་པའི་ལས་ལ་འཛེམ། །ལས་དཀར་པོའི་དགེ་ལ་སྙིང་ནས་དད། །རྒྱུ་འབྲས་ལ་རྩིས་མེད་མ་བྱས་ཏེ། །རང་བསམ་ན་འགྱོད་པ་མེད་པས་བདེ། །ནར་སོན་ནས་ཨོ་ཟོབ་མ་རྒྱང་བར། །རྗེ་སྐྱེས་མཆོག་མང་པོའི་ཞབས་ལ་གཏུགས། །སྤྱིར་མཁས་གྲུབ་བླ་མ་བཅུ་གསུམ་མཇལ། །རང་སྐལ་བཟང་གྱུར་པས་ཞེ་བློ་བདེ། །ཆོས་སྤོམ་ཡོར་སོམ་ཉིར་མ་བཞག་པར། །ཕྱི་སྒྲ་ཚད་རིག་གནས་མ་མཁས་ཀྱང་། །སེམས་གནས་ལུགས་ཕྱག་རྫོགས་ཉམས་ལེན་དོན། །དགོངས་མི་མཐོ་ཡང་རང་སེམས་ཚུགས་པས་བདེ། །གཞན་གྱུར་གྱི་བླ་ཚུལ་འཛིན་པ་འགའ། །བཟང་ས་དང་བསླུ་ཁྲེལ་ཅི་མཐོང་ཡང་། །ཡིད་སྨོན་དང་ལོག་ལྟ་གཉིས་ཀ་མེད། །རང་ཉིད་ཀྱི་རང་ས་ཟིན་པས་བདེ། །རང་རྒྱལ་གྱི་རློམ་པ་ཆེར་མེད་ཀྱང་། །རྒྱན་ལྷབ་ལྷུབ་དང་སལ་སིལ་སྒེག་འཆོས་དང་། །འཁོར་ཟང་ཟིང་གི་བཅོས་པའི་བླ་མ་མིན། །དོན་གཉུག་མའི་རྣལ་འབྱོར་ཡིན་ནོ་བདེ། །ཕྱི་ཡུལ་སྣང་ཀུན་ཆུ་ནང་ཟླ་རིས་བཞིན། །དོན་བུ་ཆུང་གི་སེམས་འདྲ་དགོད་རེ་བྲོ། །ནང་རྟོག་ཚོགས་ཀུན་གཏད་མེད་སང་མ་སིང་། །སྒོམ་གཉིས་འཛིན་གྱི་གཟེབ་ན་གྲོལ་ལོ་བདེ། །མིང་སྙན་སྙན་གྱི་སྒོམ་མིང་མ་ཐོབ་ཀྱང་། །གནས་འགྱུ་བ་ཡི་རང་ངོ་དབྱིངས་སུ་ཞིག །ཡུལ་གཞི་མེད་ཀྱི་རྩ་བྲལ་དུ་རང་ངོ་ཤེས། །ད་གང་བྱས་ཀུན་དགེ་སྦྱོར་ཀློང་གྱུར་བདེ། །ལར་ཆུང་ནས་སྐྱིད་ཉལ་མ་བྱས་ཏེ། །སྐྱབས་རྩ་བའི་བླ་མ་རྣམ་གཉིས་བསྟེན། །གསུང་བདུད་རྩི་ངེས་དོན་ཉམས་སུ་ལེན། །ཚིག་ཐ་སྙད་ལ་མ་འཇལ་ཞེ་བློ་བདེ། །དུས་ད་ལྟ་ཡང་རྒྱལ་ཁམས་འགྲིམ་པ་འདི། །ཁ་རྒྱབ་མ་ཕྱིད་ནས་འགྲོ་བ་མིན། །ལུས་སྙིང་པོ་ལེན་ཕྱིར་གནས་རྟེན་མཇལ། །ཡུལ་བདུད་རྩི་བརྟེན་པའི་བྱ་བཏང་བདེ། །གནས་གང་དུ་སོང་ཡང་ཞེན་པ་མེད། །གྲོགས་སུ་དང་འགྲོགས་ཀྱང་བདེ་སྡུག་ཆུང་། །ལུས་སྐྱེ་འཆི་གྱུར་ཀྱང་ཡ་ང་སྲབ། །སྤྲང་སྟོང་ཉིད་དབྱིངས་སུ་ཐམས་ཅད་བདེ། །ཚིག་དེ་སྐད་རྦད་ཤོད་ཆེ་ལགས་ཀྱང་། །དབྱར་རྒྱས་པའི་སྤངས་ལ་ཅི་ཡང་སྐྱེ། །མི་རྣལ་འབྱོར་ཉམས་ལ་ཅི་ཡང་འཆར། །ང་རྣལ་འབྱོར་ཉམས་ཀྱི་རྒྱང་གླུ་བདེ། །མགུ་མི་མགུ་འཆར་ཀུན་ཅི་དགྱེས་མཛོད། །མི་ང་རང་ནི་ནམ་མཁའི་རྣལ་འབྱོར་ལགས། ། ཞེས་མང་ཡུལ་སྐྱིད་གྲོང་གི་སྡེ་མཐར་ཐུག་པ་བལ་བོད་མཚམས་ཆུ་མིག་བརྒྱ་རྩར་མེ་ལུག་ཧོར་ཟླ་བཞི་པའི་དམར་ཕྱོགས་ཚོགས་འཁོར་སྐབས་བསྐུལ་བ་པོའི་ངོར་རིག་འཛིན་ཚེ་དབང་ནོར་བུ་ཀརྨ་བསྟན་པ་མཐར་རྒྱས་ཀྱིས་གླུར་སྨྲས་པའོ། ། ༈ རྐྱང་ཕན་ནམ་མཁའ་རྫོང་དུ་རང་ཚུལ་གླེང་བའི་མགུར་གླུ་གཞན་བློ་ཆོས་བསྐུལ།ན་མོ་གུ་རུ་ཝེ། ཁྱེད་འདིར་འདུས་མཆེད་ལྕམ་ཚུར་གསོན་དང་། །སྤྲང་ཕྱོགས་མེད་ཚེ་དབང་ནོར་བུ་བདག །སྔོན་རྣམ་དཀར་འབྲས་བུ་ཅུང་ཟད་མཐུས། །ལུས་དལ་འབྱོར་བྲེང་ཙམ་འདི་ཉིད་ཐོབ། །འོན་བག་ཆགས་ལས་བཟང་བྱེད་པ་ཡི། །ཆུང་མ་ལས་སྐྱེས་པའི་རྐན་མར་ནས། །དུས་ད་བར་ཁ་ཟས་དཀོར་ལ་བྱས། །དེ་དྲན་ཞིང་གློ་སྙིང་དབང་མེད་འདར། །ལར་རང་དབང་ཆོས་ལ་མ་ཐོབ་པའི། །ལས་ཅི་བྱེད་ངན་འགྲོར་འཕེན་པའི་རྒྱུ། །ཚུལ་མི་ཆོས་བླ་མའི་གཟུགས་བརྙན་མཁན། །མིང་སྤྲུལ་སྐུར་བཏགས་པའི་སྐྱག་ཟན་ང་། །ཆོས་བཤད་བཤད་མང་པོས་གཞན་མགོ་བསླུ། །ཚུལ་ཡིན་ཡིན་རློམ་པས་རང་དོན་བརླག །དོན་བསྐྱེད་རྫོགས་གདེང་ཚད་མ་ལོན་པའི། །མིང་འགྲོ་དོན་བཏགས་པས་རང་གཞན་ཕུང་། །ཁ་ཆོས་བཤད་མཛེས་ཀྱང་སེམས་དང་འཛོལ། །བློ་ཆོས་ལ་མོས་ཀྱང་གཡེང་བས་ཁྱེར། །ལས་བཟང་བསགས་སྤྲོ་ཡང་ངན་དབང་ཆེ། །ཚུལ་དགེ་སྒྲུབ་དད་ཀྱང་སྡིག་དང་འདྲེས། །ཚེ་འདི་ལ་ཞེན་པ་མེད་སྨྲ་ཡང་། །གཏིང་མཐོ་དམན་ཆགས་སྡང་ཆུ་ལྟར་འཁོལ། །སྤྱིར་ཆོས་བརྒྱད་བླ་གཟུགས་བདག་འདྲ་བ། །རང་སྐྱོན་ཀུན་མི་རོ་བཞིན་དུ་སྦེད། །གཞན་སྐྱོན་མཐོང་ལྷ་དར་བཞིན་དུ་འཕྱར། །ཚིག་སྙན་པོས་རང་མགོ་རང་གིས་བསྐོར། །སེམས་མངོན་ཤེས་མ་ཐོབ་ལུང་བསྟན་སྒྲོགས། །ཟབ་གདམས་ངག་མི་ཆོས་ངོ་དགའ་བཤད། །རང་ཉམས་ལེན་རྟོག་པ་འལ་འོལ་ལ། །ཁ་ཕོ་སོ་རྦད་ཁོག་འབྲུག་ལས་ཆེ། །ཚུལ་འདི་སོགས་བྱ་སྤྱོད་མང་པོ་དེས། །རང་རང་གིས་བསླུས་པ་མཐོང་ལགས་སམ། །ལར་གདན་ས་མིང་བཏགས་དགོན་ཆུང་དེར། །མིང་ཆུང་ཡང་གཉེན་པོར་སྐུ་སྐྱེ་བཏགས། །ལས་དོན་མེད་རྒྱལ་ཁམས་དཀོར་བསླུ་བསྡུད། །དོན་ཆེ་བ་ཉམས་ལེན་གལ་ཆུང་ཤོར། །ཆོས་ཟབ་དགུ་གདམས་ངག་རྒྱང་བོར་ལུས། །གོམས་ཟོལ་ཟོལ་ཀུན་གྱི་མཐིལ་ལ་ཐུག །ཚུལ་མ་ཡིན་བྱ་བ་འདི་དག་མང་། །དེ་བསམ་ཞིང་སྙིང་ནས་ཡི་རེ་མུག །སྐྱེ་ཡུལ་གྱི་མི་ཆོས་རྣམ་གཡེང་དེ། །གཞན་ཡུལ་དུ་མེད་སྙམ་རྒྱལ་ཁམས་འགྲིམ། །ལྟོགས་འཁྱག་གི་དཀའ་བ་ཁྱད་བསད་ཀྱང་། །རྟེན་བཟང་དང་བླ་མ་མཇལ་བྱས་ཤིང་། །རྣམ་དཀར་གྱི་སྨོན་ལམ་ཐེབས་ཙམ་ལས། །སེམས་ཉིད་ནི་གྱོང་པོར་ཐོ་མ་ཕོག །མཐོ་འདོད་དང་ང་རྒྱལ་སྔར་ལས་ཆེ། །ཚུལ་མི་འཆོས་སྔར་བས་མཁས་སུ་སོང་། །དེ་བསམ་ཞིང་སྙིང་ནས་སྐྱོ་ཤས་ལྡང་། །སྤྱིར་གཏམ་དཔེར་བྱི་བ་མ་བརྗེས་ན། །ཁུང་བརྗེས་ཡང་ཕན་པ་ཆུང་ངུ་ཞེས། །ཚིག་དེ་ཡི་མདོ་དོན་སེམས་ལ་ཕོག །ད་ཆོས་ཤིག་སྙིང་ནས་བྱེད་སྙམ་ལ། །མིང་ཆོས་སུ་བཏགས་མཚོན་ཆོས་གཟུགས་དང་། །ཁར་རྟོགས་ལྡན་སྨྲ་བའི་སྟོང་སྒྲ་དེས། །རང་མགོ་བསྐོར་བྱས་ན་དགོས་མེད་མཐོང་། །དོན་ཡིན་ལུགས་མ་བཅོས་ཅོག་བཞག་ལ། །སེམས་གནས་ལུགས་རང་ངོ་གཅེར་ལ་གཏད། །ཡུལ་ཚོགས་དྲུག་སྣང་བ་གཏན་ལ་དབབས། །གཟུང་འཛིན་བྲལ་གུ་ཡངས་ལྷུག་པའི་ངང་། །ཚུལ་མི་ཆོས་དགོས་པ་ཆུང་ངོ་བོར། །ཚེ་འདི་ཡི་ཞེན་པས་བསླུས་སོ་བྲོས། །གནས་དབེན་པ་རི་ཁྲོད་ལུང་སྟོང་དུ། །གཡེང་དབང་དུ་མ་ཤོར་ཆོས་ལ་བརྩོན། །ལས་རྒྱུ་འབྲས་ཞིབ་ཚགས་བག་ཡོད་ཅིང་། །ཆོས་ཀུན་གྱི་སྲོག་རྩ་དམ་ཚིག་བསྲུང་། །རྗེ་བླ་མ་གང་དགྱེས་ཐབས་ལ་འབད། །མ་འགྲོ་དྲུག་ཡོངས་ལ་སྙིང་རྗེ་བསྐྱེད། །རང་གྲོགས་མེད་གཅིག་པུར་ངེས་དོན་སྤྱོད། །ཚིག་ཉག་ཉོག་གླེང་མོལ་རིང་སྤང་ནས། །དོན་སེམས་ངོ་ཉམས་ལེན་ཉིད་ལ་དྲིལ། །ཚུལ་དེ་འདྲ་སྤྱོད་པའི་ཡིད་སྨོན་ཅིག །མི་ཁོ་བོའི་སྙིང་གི་དཀྱིལ་ནས་ཤར། །དེ་མྱུར་དུ་འགྲུབ་པའི་སྨོན་ལམ་འདེབས། །རང་ངང་ཚུལ་རང་གི་གླེང་འདི་ཡིས། །མི་ཀུན་ཀྱང་བློ་ཁ་ཆོས་ཕྱོགས་ཤོག ། ཞེས་རྗེ་བཙུན་མི་ལ་རས་པའི་སྒྲུབ་གནས་རྐྱང་འཕན་ནམ་མཁའ་རྫོང་དུ་མེ་ལུག་ཧོར་ཟླ་བརྒྱད་པའི་ཚེས་བཅུ་བཞིའི་སྲོད་ལ་མདུན་གྲལ་སྐབས་སུ་ཚེ་དབང་ནོར་བུས་སྨྲས་པའོ། ། ༈ གཞན་གྱི་བསྐུར་འདེབས་ལ་སྙིང་རྗེ་སྐྱེས་ནས་བཞེངས་པའི་མགུར།ཨའུ་ཡེ་གསོན་དང་གླུ་དབྱངས་ལ། །འདིར་འདུས་ཀྱི་ཁྲོམ་ཚོགས་ཆེ་ཕྲ་ཚོ། །རིགས་ཀུན་གྱི་ཁྱབ་བདག་འོད་མི་འགྱུར། །རྒྱལ་ཀུན་གྱི་ངོ་བོ་པདྨ་འབྱུང་གནས། །སྙིགས་དུས་སུ་འགྲོ་འདྲེན་སྤྲུལ་པའི་སྐུ། །རྗེ་རྒྱལ་དབང་ཀརྨ་ཡབ་སྲས་དང་། །ཟབ་གཏེར་སྟོན་རིག་གྲུབ་རྣམས་ལ་འདུད། །བུ་མོས་གུས་ཅན་ལ་ཐུགས་རྗེས་གཟིགས། །དེང་མདོ་ཁམས་ཀཿཐོག་ཆར་སྐྱེས་པའི། །སྤྲང་རྒྱལ་ཁམས་འཁྱམས་པའི་རྣལ་འབྱོར་གཟུགས། །མིང་ཀུན་བཏགས་ཚེ་དབང་ནོར་བུའི་སྡེས། །གླུ་ཤུགས་བྱུང་སྒྲོ་བསྐུར་བྲལ་བའི་གཏམ། །ཟོག་འཆལ་ཚིག་བསླད་མེད་དྲང་པོར་བརྗོད། །ཐུགས་ཡོན་པོར་གྱུར་རྣམས་བཟོད་པར་མཛོད། །བདག་ཆོས་སྐུ་ཡེ་ཤར་མི་གཅིག་ལ། །མི་རྣམས་ཀྱི་སྣང་བ་སྣ་ཚོགས་ཤར། །ཁོང་ལ་ལས་རྒྱལ་བའི་སྤྲུལ་པར་མཐོང་། །ཕྱག་ཐལ་སྦྱོར་ཞལ་མཇལ་སུས་ཐོབ་བྱེད། །ཁོང་ལ་ལས་མི་སྡུག་ཐན་དུ་མཐོང་། །སྣ་ལག་པས་འགབ་ཅིང་འཕྲད་ལམ་བྱོལ། །ཁོང་ལ་ལས་དགེ་སྦྱོར་བཟང་པོར་མཐོང་། །ཡིད་གུས་པས་སྐྱབས་འཇུག་བསྔོ་འབྲེལ་ཞུ། །ཁོང་ལ་ལས་དཀོར་ཟན་ཁྲམ་པར་མཐོང་། །སྒོ་བསོད་སྙོམས་སོང་ཡང་ཕྱིར་ལྟས་མེད། །ཁོང་ལ་ལས་ནུས་ལྡན་སྔགས་པར་ཤེས། །བཀའ་ལྷ་སྲིན་བསྲུང་བའི་སྤྲིང་ཡིག་ཞུ། །ཁོང་ལ་ལས་སྔགས་གསར་མཐུ་མེད་མཐོང་། །ལས་མི་མཚམས་བརྙས་བཅོས་སྣ་ཚོགས་བྱས། །ཁོང་ལ་ལས་ཐབས་ལམ་མཁན་དུ་མཐོང་། །ཚོགས་ཀུན་ཏུ་རྒྱུ་ཡི་དགའ་སྟོན་ཕུལ། །ཁོང་ལ་ལས་ཁྲེལ་མེད་ཡ་ཡོར་མཐོང་། །རྐང་ཟུར་འགྲོས་མིག་ལོག་ཁྲེལ་རྒོད་བྱེད། །ཁོང་ལ་ལས་འབྲེལ་ཚད་དོན་ལྡན་མཐོང་། །སྒོ་གསུམ་གྱི་གུས་པས་ཞབས་ཏོག་བྱེད། །ཁོང་ལ་ལས་འདྲེ་ཕུང་ཟོག་པོར་མཐོང་། །ཕྱེ་ཁྱོམ་བུ་གང་ཡང་ཤོར་དོགས་བྱེད། །ཁོང་ལ་ལས་རྟོགས་ལྡན་རྣལ་འབྱོར་མཐོང་། །ཉམས་གེགས་སེལ་བོགས་འདོན་བསླབ་བྱ་ཞུ། ཁོང་ལ་ལས་བསྒོམ་གསར་ཐ་མར་མཐོང་། །ཚུར་ཆོས་བཤད་ང་རྒྱལ་འབྲུག་ལྟར་ལྡིར། །ཁོང་ལ་ལས་པད་འབྱུང་སྲས་སུ་མཐོང་། །ཡིད་རྩེ་གཅིག་མི་ཕྱེད་བློ་གཏད་བྱེད། །ཁོང་ལ་ལས་རྫུན་རྐྱལ་མཁན་དུ་མཐོང་། །ཚིག་བདེན་པར་བརྗོད་ཀྱང་ལོག་པར་རྟོགས། །དེ་ལ་སོགས་རང་རང་ལས་དབང་གིས། །འགྲོ་སོ་སོའི་མཐོང་སྣང་བརྗོད་མཐའ་མེད། །ཁོང་ལ་ལས་ཡིས་བཟང་པོ་ཡིན་འདྲ་ཟེར། །ཁོང་ལ་ལས་ཡིས་ཟོག་པོ་ཡིན་ཐག་བཅད། །ཁོང་ལ་ལས་འདི་ནི་བརྫུས་མ་ཡིན། །དོན་ཡང་ན་བཟང་ལ་ཡང་ན་ངན། །འདི་ལྷ་བདུད་གང་རུང་ཡིན་ངེས་ཞེས། །གཏམ་ཕྱོགས་བཅུར་དྲིལ་དུ་སྒྲོག་ཐོས་ཏེ། །འདི་ཐག་ཆོད་ཧ་ཅང་ཆེ་གྲགས་རུང་། །མཚོ་ཆེན་པོས་ཅ་ཅོ་སྒྲོགས་མིན་ཏེ། །ལུང་དོག་པོའི་ཆུ་ཕྲན་ཀུ་ཅོ་ཆེ། །དཔེ་དེ་བསམ་རང་འདྲར་གད་མོ་ཤོར། །སྤྱིར་ཤཱཀ་ཐུབ་པད་འབྱུང་མཉམ་མ་གཏོགས། །ཕལ་གང་ཟག་ཚོད་འཛིན་གང་ཟག་མིན། །རང་བཟང་ངན་རང་གི་ཆ་མེད་བཞིན། །གཞན་ཚོད་འཛིན་བྱེད་འདི་གད་མོ་ཤོར། །འོན་བདག་ནི་ལྷ་བདུད་གཉིས་ཀར་རུང་། །ཁོང་དག་སྣང་ལྡན་ཆོས་བླ་མར་མཐོང་། །གཤིས་ལོག་ལྟ་ཅན་ཚོས་བདུད་དུ་མཐོང་། །ཕལ་ཀུན་གྱི་སྣང་ངོར་སོ་སོ་སྐྱེ། །རང་རང་ལ་ལྟས་ཀྱང་དེ་དང་འདྲ། །ཚུལ་བསམ་བཞིན་བསམ་བཞིན་མགོ་བོ་འཁོར། །བདག་རྒྱལ་ཁམས་སྤྲང་པོ་ཡིན་ལགས་ཀྱང་། །ཡུལ་གཅིག་ཏུ་གྲོང་གྲགས་རེ་གཉིས་ཀྱི། །སྟབས་ལེགས་ནས་བཀུར་བའི་ཁེངས་པ་མེད། །དེ་རྟོགས་པས་གྲོལ་བ་མ་ལགས་ཏེ། །ཆུང་སོ་བཞི་བཟུང་ནས་ད་བར་དུ། །མི་རང་ཐད་ཆེ་གཉན་འགའ་དང་འགྲོགས། །དོན་དེས་ན་གསར་དུ་ཁེངས་རྒྱུ་ཆུང་། །མི་མང་པོས་གཤེ་བཀུར་བཏང་ན་ཡང་། །ཚེ་འདི་ཞེན་ཕྲ་བས་ང་ཡ་ཆུང་། །སྤྱིར་བསྟོད་སྨད་ཚིག་ཀུན་བྲག་ཆ་འདྲ། །སྤང་བླངས་ཀུན་རྣམ་རྟོག་རང་གྲོལ་ལ། །བློ་བཅོས་མའི་སྦུན་ཐག་ཆད་ནས་ཚར། །ལར་རྣལ་འབྱོར་ཕྲན་ཆུང་ཟོག་རྒན་བདག །ཡུལ་རང་ཡུལ་གཞན་ཡུལ་གར་ཕྱིན་ཀྱང་། །ཕྱི་གཞན་ངོར་མཛེས་ཆས་ཡང་མ་བསྒྲིགས། །ལྐོག་བག་ཡང་སྤྱོད་ངན་ཡང་མ་བྱས། །ངོས་ལྐོག་མཚུངས་ཚུལ་སྤྱོད་ལྷུག་པ་ལ། །རང་མ་ཁྲེལ་ཙམ་བྱས་སོས་དལ་བདེ། །མཚམས་བསྙེན་བསྒྲུབ་དཀའ་སྤྱད་བྱས་ཚུལ་དང་། །སྡོམ་བཙུན་ཚིག་ངོམ་རྒྱུ་མ་མཆིས་ཀྱང་། །རྗེ་རྒྱལ་བའི་བསྟན་ལ་རྗེས་འཇུག་ཚིག །ཁོ་འགྲོ་ལ་ཕན་ཐབས་མ་གཏོགས་པ། །མི་གཞན་སྣང་བསླུ་བའི་ཁ་མཁས་དང་། །ཚིག་མཛེས་མཛེས་མི་ཆོས་འབད་མ་མྱོངས། །སེམས་རང་ཉིད་ཆེ་འདོད་བཀུར་འདོད་སོགས། །ཚེ་འདི་སྣང་ཞེན་པ་ཆེན་པོ་མེད། །ལར་ཆུང་ནས་དམ་པའི་ཆོས་དང་མཇལ། །རྗེ་མཚུངས་མེད་བླ་མའི་རྗེས་སུ་བཟུང་། །བཀའ་ཕྱག་རྫོགས་གདམས་པའི་ཉིང་ཁུ་ཐོབ། །སེམས་རང་ངོ་བཅུ་གསུམ་ལོ་ལ་འཕྲོད། །ཉམས་འདྲ་མིན་གོལ་སས་མ་བསླུས་ཏེ། །རིག་དྲན་ཤེས་ངོ་བོར་རྡོ་རུས་གཏུགས། །ང་ཡིན་སྙམ་རློམ་པས་མ་ཁྱེར་ཏེ། །ཕྱོགས་ཀུན་འཁྱམས་བླ་མ་གང་སྙེད་བསྟེན། །རང་ཆེ་འདོད་ཨང་ལྡིར་མ་བྱས་ཤིང་། །ཁ་ཕོ་ཟོབ་སྟོང་སྐད་མ་སྒྲགས་པར། །རང་ཤར་ཆ་ཉམས་ལེན་རྫུན་མེད་ཐིམ། །ཡུལ་ཞུ་འོས་ཀུན་ལ་བཀའ་འདྲི་ཞུས། །དུས་ད་ལྟར་ཐེ་ཚོམ་ཆེར་མེད་ཀྱང་། །ཡུལ་ཞུ་འོས་མཆིས་ན་ཞུ་སྙིང་འདོད། །ཕྱི་ཐོས་བསམ་མཐའ་རྒྱ་ཆོད་དཀའ་ཡང་། །དོན་གཅིག་ཤེས་ཀུན་གྲོལ་རང་སེམས་གནད། །སྒོམ་ཉམས་རྟོགས་སེམས་ལ་གང་འཕེལ་བྱས། །ད་གོ་མྱོང་ཅུང་ཟད་སེམས་ལ་ཆགས། །ཁ་མཁས་མཛངས་མི་ཆོས་མ་འབྱོར་ཡང་། །ལས་རྒྱུ་འབྲས་རང་མ་ཁྲེལ་ཙམ་བྱས། །ཚུལ་ཞི་ཞིང་དུལ་དུལ་མ་འབྱོང་ཡང་། །སེམས་བསམ་བཟང་བྲེང་ཙམ་མ་ཆད་བྱས། །ཆོས་ཀུན་སྲོག་རྩ་བའི་དམ་ཚིག་ཀྱང་། །རང་སེམས་ལ་ངོས་ལྐོག་མེད་ངེས་ལ། །སྤྱིར་བླ་མ་ལྔ་ཕྲག་དྲུག་ཙམ་བསྟེན། །ཀུན་དམ་ཚིག་སེལ་མེད་ཐུགས་ཡིད་འདྲེས། །སྒོས་རྩ་བའི་བླ་མ་རྣམ་གསུམ་གྱི། །ཐུགས་གཏིང་ནས་གཅེས་པའི་ཐུགས་སྲས་མཛད། །ཁྱོད་རང་དོན་གྲུབ་ཅེས་དབུགས་བྱུང་ཞིང་། །ད་གཞན་དོན་གྱིས་ཞེས་གཟེངས་ཀྱང་བསྟོད། །སྤྱིར་སྐྱེས་མཆོག་གཏེར་གྲུབ་ཚད་ལྡན་འགའ། །ལས་སྐལ་མཆོག་ལྡན་ཞེས་བསྔགས་པར་གནང་། །མི་རང་ཡང་བླ་མར་སྙིང་དཀྱིལ་ནས། །དད་གུས་དང་དམ་ཚིག་བསྲུང་བའི་མཐུས། །ཁོང་མི་མིན་མཁའ་འགྲོ་ངང་གིས་འདུ། །འདྲེ་ལྷ་སྲིན་འགའ་ཡང་ནུས་པས་བཏུལ། །དོན་དེས་ན་རླུང་ཞགས་མ་བཀོལ་ཡང་། །ཡུལ་གར་ཕྱིན་མི་ཀུན་ང་ལ་མོས། །འབྲེལ་ཚད་ནི་དོན་དང་ལྡན་དཀའ་ཡང་། །གང་འབྲེལ་ཀུན་ཆོས་ལ་བློ་ཁ་བསྒྱུར། །རང་འདོད་ནི་ཧ་ཅང་ཆེ་བ་མེད། །གཞན་ཕན་གྱི་སྨོན་ལམ་གང་ཟབ་བཏབ། །ལས་སྒྲོ་བསྐུར་བྲལ་བའི་གཏམ་འཆད་ལ། །མི་ཁ་ཅིག་རང་བསྟོད་བྱས་སྙམ་ཁྲེལ། །ང་རང་བསྟོད་དགོས་པའི་དོ་གལ་ཆུང་། །ཚེ་འདི་ཡི་ཁ་རྒྱབ་ནམ་ཡང་ཕྱིད། །བསྟོད་སྙན་གྲགས་ཨེ་ཡོང་རེ་བ་ཆུང་། །དཀོར་འཇུ་དཀའ་ཞེན་པ་གཏིང་ནས་ལོག །ང་རང་བསྟོད་གཞན་བསླུ་དེ་མི་དགོས། །ལར་རང་འདོད་མ་དགོས་ཙམ་ཞིག་བདོག །ཕ་རྗེ་བཙུན་བླ་མའི་བཀའ་དྲིན་ལས། །ཚེ་འདི་སྣང་སྒྱུ་མ་ལྟ་བུར་རྟོགས། །བསྟོད་སྙན་གྲགས་བྲག་ཆ་ལྟ་བུར་གོ །ཆོས་བདེན་མེད་རྨི་ལམ་ལྟ་བུར་རྟོགས། །ཀུན་གཞི་མེད་རྩ་བྲལ་རང་སེམས་མཐོང་། །ལས་རྒྱུ་འབྲས་བསླུ་མེད་ཉིད་གོ་བས། ཚུལ་མི་ཆོས་རྫུན་ནི་སྨྲ་དགོས་མེད། །སྒྲོ་བསྐུར་བྲལ་གཏམ་ནི་རྒྱལ་བས་གནང་། །དོན་དེས་ན་ཤུགས་འབྱུང་གླུ་དབྱངས་འདི། །མི་འགའ་ཡི་ལས་ངན་སྤང་ཕྱིར་སྨྲས། །རང་མངོན་ཤེས་རྣམ་ལྔ་མ་ཐོབ་བར། །གཞན་བཟང་ངན་ཐག་ཆོད་སྨྲ་མི་འཚལ། །ཁ་འཇམ་འཇམ་གཞན་ངོར་མཛེས་ཆ་ལ། །གཏིང་བསྒོམ་ཆུང་ཁྱད་གསོད་མི་མཛད་ཞུ། །མི་ཁོ་བོ་ཆ་ནི་ཅི་དགའ་སྨྲོས། །ཚིག་དེ་འདྲས་ཕན་དོན་གོ་བ་བྲལ། །ཡིད་མི་དགའ་བ་ཡང་ཆེར་མེད་ཀྱང་། །གཞན་སྦས་ཚུལ་གསང་སྔགས་རྣལ་འབྱོར་ལ། །སྐུར་གྲགས་ན་རང་ཉིད་དམྱལ་བསྒྲུབ་ཡིན། །དོན་དེས་ན་སྨྱོན་པའི་འཆལ་གླུ་འདི། །ཐུགས་ཁོང་ཁྲོ་མེད་པར་དང་བཞེས་འཚལ། ། ཞེས་རྐྱང་ཕན་ནམ་མཁའ་རྫོང་དུ་གནས་སྐབས་མང་ཡུལ་གནས་ཤཪ་གྱི་མི་འགའ་ཟུང་གི་ཁོ་བོ་ལ་འདི་ཕལ་པ་ནི་མིན་འདྲ་ལྷ་བདུད་གང་རུང་ཞིག་ཡིན་འདུག་ཞེས་དྲིལ་སྒྲོགས་ཚེ། ཨ་ཨ་སྙིང་རེ་རྗེ་སྙམ་ནས་མདོ་ཁམས་ཀཿཐོག་པ་ལྷ་བཙུན་ཚེ་དབང་ནོར་བུས་ཧོར་ཟླ་བརྒྱད་པའི་ཚེས་བཅུ་བདུན་ལ་དེར་འདུས་རྣམས་ལ་སྨྲས་པ་ཧེ་ཧེ་ཕཊ། ལྟ་བ་ལས་འཕྲོས་པའི་ཚིགས་བཤད་ཁ་ཤས་གླུར་བླངས་པ་རང་ལུགས་གསལ་བའི་ལམ་སྟོན་ཞེས་བྱ་བ་ཡོད། ༈ ཐེག་ཆེན་ལམ་གྱི་ལྟ་བའི་མགུར་གླུ་བདེ་ཆེན་འཁོར་ལོ།ན་མོ་པདྨ་ཀཱ་ར་ཡ། བདེ་ཆེན་འཁོར་ལོར་མོས་པའི་རང་གཟུགས་ལས། །ལེགས་སྐྱེས་གེ་སར་འདབ་མ་འབུམ་ལྡན་དབུས། །འཁོར་འདས་བརྟན་གཡོ་ཀུན་གྱི་བཅུད་དང་མགོན། །མཚོ་སྐྱེས་རྡོ་རྗེས་བདག་བློ་རྟག་སྐྱོང་མཛོད། །བདག་ནི་དལ་འབྱོར་རྟེན་ཐོབ་མཚན་ལྡན་གྱིས། །བླ་མས་རྗེས་བཟུང་ཟབ་དགུའི་གདམས་ངག་ཐོས། །དེ་མཐུས་བདག་བློ་དམན་ཡང་མདོ་རྒྱུད་ཀྱི། །ངེས་དོན་མ་ནོར་བློར་ཆུད་ཕྱག་རྫོགས་ཀྱི། །དགོངས་པ་ཇི་བཞིན་སྨྲ་བར་སྤོབས་པ་འདི། །ཁྱབ་བདག་བླ་མའི་དྲིན་ལས་གཞན་ཅི་ཞིག །བཀའ་དྲིན་སྙིང་ནས་དྲན་ནོ་བླ་མ་ཆེ། །གླུ་དབྱངས་མཆོད་པར་འབུལ་ལོ་གུ་རུ་རྗེ། །རྣལ་འབྱོར་བདག་ཉིད་ཉམས་ལ་འདི་ལྟར་སྣང་། །ཕྱི་རོལ་ཡུལ་དུ་བཏགས་པའི་བེམ་པོ་དང་། །བདག་ཉིད་སེམས་སུ་བཏགས་པའི་ཤེས་པ་ཡང་། །གཅིག་དང་ཐ་དད་བརྟག་པའི་རྨོངས་པ་འཁྲུལ། །གཅིག་ཀྱང་ཆོས་ཉིད་གཉིས་ཀྱང་ཆོས་ཉིད་དང་། །དེ་ཡང་ཆོས་ཉིད་དེ་མིན་ཆོས་ཉིད་སྟེ། །གདོད་མའི་གཤིས་ལ་ཐམས་ཅད་ཆ་མཉམ་ཞིང་། །ཆ་མེད་ཀུན་འགྲོ་སྣ་ཚོགས་ཁྱབ་པ་པོ། །སེམས་དང་སེམས་བྱུང་རྣམ་རྟོག་རྟག་བཏགས་པས། །རྟག་པའི་རྒྱུ་ཟད་མི་རྟག་དོན་ཀྱང་ཅི། །ངོ་བོ་འགྱུར་མེད་རྣམ་པ་ཐམས་ཅད་པ། །གཞན་སྟོང་དབུ་མ་ཆེ་འདི་རྨད་དུ་བྱུང་། །གཟུང་འཛིན་ཀུན་བཏགས་རང་གི་ངོ་བོས་སྟོང་། །རྣམ་ཤེས་གཞན་དབང་མཐར་ཐུག་འབྲས་བུས་སྟོང་། །ཡོངས་གྲུབ་ཆོས་ཉིད་སྤྲོས་པ་མཐའ་ཡིས་སྟོང་། །སྟོང་པའི་ཚུལ་འདི་ངེས་དོན་མཐར་ཐུག་བཞེད། །ཚུལ་འདི་རྟོག་གེའི་ང་རྒྱལ་མཁྲེགས་པོ་དང་། །སྤོམ་ཡོར་ཆེ་ཚུལ་འཛིན་འགའི་བློར་མ་ཤོངས། །འཁོར་ལོ་རྣམ་གསུམ་དགོངས་པ་གཅིག་དྲིལ་ཞིང་། །ངེས་དོན་མཐར་ཐུག་འཁོར་ལོ་མཐའ་མའི་དོན། །རང་རིག་རང་གསལ་གཞི་མེད་རྩ་བྲལ་བ། །འདི་ཀོ་ལྟ་བུའི་མཐར་ཐུག་ཉིད་དུ་གོ །ཚུལ་དེ་ཐུན་མོང་ལམ་གྱིས་བསྒོམས་པ་ལ། །གངས་ཅན་ཕྱོགས་འདིར་ཕྱག་རྒྱ་ཆེ་ཞེས་གྲགས། །དོན་དེ་ཐུན་མོང་མ་ཡིན་ཟབ་མོའི་གནད། །ལྟ་བ་གཏན་ཕབ་བསྒོམ་པ་ལ་བཟླ་བ། །གཅེར་མཐོང་ཅོག་བཞག་གནད་ཀྱི་མེ་རྩ་འདི། །རྫོགས་ཆེན་ཁྲེག་ཆོད་ཡིན་ཞེས་ཁོ་བོས་སྨྲ། །ཀྱེ་ཧོ་སྒྱུ་མའི་གྲོགས་པོ་ཚུར་ཉོན་དང་། །སྣང་བ་འལ་འོལ་འདི་ལ་གཏད་པ་ཅི། །ཡུལ་དུ་བདེན་པ་འཛིན་ན་འཁྲུལ་པའི་བློ། །ཡུལ་མིན་སེམས་སུ་རློམ་པ་འཛིན་པའི་ཡིད། །དེ་དོན་བརྟག་དཔྱད་བྱེད་ཀུན་ཀུན་བརྟགས་སེམས། །དེ་བྲལ་འཆར་གཞི་ཙམ་འདི་རྣམ་ཤེས་ཏེ། །རྣམ་པར་ཤེས་དང་ཡེ་ཤེས་ཁྱད་པར་ནི། །སྨན་དང་དུག་འདྲ་སྤྲིན་དང་ནམ་མཁའ་འདྲ། །གསེར་དང་གཡའ་འདྲ་འདམ་དང་ནོར་བུ་འདྲ། །རྣམ་ཤེས་ཡེ་ཤེས་དབྱེ་ལ་མཁས་དགོས་ཞེས། །གངས་ཅན་འདི་ན་མཁས་པའི་མཁས་པ་མཆོག །དྲི་མེད་འོད་ཟེར་རྟོན་པ་བཞི་ལྡན་དང་། །རང་བྱུང་ཞབས་དང་སྒྲོལ་བའི་མགོན་སོགས་ཀྱིས། །གསུང་འདི་དཔྱོད་ལྡན་རྣམས་ཀྱིས་གོ་ལགས་སམ། །དོན་དེ་མ་འཁྲུལ་རྒྱལ་བའི་དགོངས་བཞེད་མཐིལ། །ཡིན་པ་ངེས་དོན་མདོ་རྒྱུད་གཟིགས་ལགས་སམ། །མི་ཚེ་ཡུད་ཙམ་ཚོང་ཁེའི་བྱ་བ་སོགས། །ཅུང་ཟད་རེ་ལའང་རྟོག་དཔྱོད་ཆེར་བཅུག་ན། །ཚེ་རབས་གཏན་གྱི་འདུན་མ་དམ་ཆོས་ཀྱི། །འཇུག་སྒོ་མ་ནོར་དཔྱད་པ་ཅིས་མི་བཅུག །བདག་ལྟ་རྨོངས་ཤིང་འཁྲུལ་པས་ཟིན་ནའང་། །སྔོན་བསགས་སྨོན་ལམ་རྣམ་དཀར་ཅི་བསགས་པ། །དེ་ཡི་ངེས་དོན་སྙིང་པོའི་ཆོས་དང་མཇལ། །ཡིད་ཆེས་དེར་ཞུགས་རང་ལ་དགའ་བ་སྐྱེས། །མཁས་འགའ་ལྟ་བ་ཡན་ལག་ཡིན་སྨྲ་ཡང་། །པད་འབྱུང་བི་མ་ལ་དང་བཻ་རོ་སོགས། །སངས་རྒྱས་དངོས་བྱོན་འགའ་ཡི་ཐེག་པའི་ཁྱད། །ལྟ་བས་དབྱེ་གསུང་བདག་ནི་དེ་རྗེས་འབྲང་། །ཁ་ཅིག་དབུ་མ་ལས་ལྷག་ལྟ་བ་མེད། །སྒྲོགས་ཀྱང་ཐེག་ཆེན་ལྟ་བ་དབྱེར་མེད་ན། །སེམས་ཙམ་དབུ་མའི་ལྟ་བ་དབྱེ་དོན་ཅི། །དབུ་མ་ཡིན་ཕྱིན་ཁྱད་པར་མེད་ལགས་ན། །རང་རྒྱུད་ཐལ་འགྱུར་དབྱེ་བ་ཅི་ཕྱིར་མཛད། །སྤྲོས་མེད་ཙམ་གྱི་ལྟ་བའི་མཐར་ཐུག་ན། །རང་རྒྱུད་པ་ལས་ཐལ་འགྱུར་ཅི་ཞིག་ལྷག །དེས་ན་ལྟ་བ་ཐལ་འགྱུར་ལས་ལྷག་པ། །མེད་ཁྱབ་འདིའང་སྐྱོ་མ་སྔ་བཙན་གོ །དེས་ན་རང་ལུགས་ཐལ་འགྱུར་ལས་ལྷག་པའི། །ལྟ་བ་མདོ་ལུགས་རྣམ་རིག་དབུ་མ་དང་། །སྔགས་ཀྱི་མཐར་ཐུག་ལྟ་བ་རྫོགས་པ་ཆེ། །སྤྲོས་བྲལ་ཡིན་ཡང་སྤྲོས་པ་བྲལ་བའི་གཞི། །ཇི་བཞིན་ཡང་དག་གནད་ལ་བསྣུན་པས་སོ། །དེས་ན་རྣམ་རིག་སེམས་ཙམ་ཡིན་བཟུང་དང་། །རྫོགས་ཆེན་ལྟ་བར་ཁྱད་ཆོས་མེད་སེམས་རྣམས། །ད་དུང་རྣམ་དཔྱོད་སྤྱན་རས་བཟང་པོ་དེ། །ཡར་ལ་སྤང་བླངས་རྒྱལ་བཀའ་མདོ་རྒྱུད་གཞུང་། །གཟིགས་ནས་ལམ་བཟང་འདི་ལ་འཇུག་མཛོད་ཀྱེ། །བདག་ནི་ཤེས་རབ་ཆུང་ཞིང་རྨོངས་ལགས་ཀྱང་། །རྒྱལ་བའི་བཀའ་ལ་ཡིད་ཆེས་གྱུར་པ་ཡི། །ཚུལ་འདི་གཞན་གྱིས་ནམ་ཡང་མི་ཕྱེད་པའི། །ཆོས་ཀྱི་རྗེས་འབྲང་དད་པ་བརྟན་པོ་ཡོད། །དེས་ན་རང་དང་རིགས་སྐལ་མཐུན་པ་རྣམས། །དགའ་བ་སྐྱེས་ཕྱིར་གཏམ་དུ་སྨྲས་པ་ལ། །མ་འཁྲུལ་ལྟ་བའི་གནས་ལུགས་དེ་གོ་ཡང་། །རྟོགས་བྱེད་སྒོམ་པའི་ལམ་ལ་འབད་ཀྱང་རིགས། །བསྒོམ་གྱི་རྩ་བ་བླ་མའི་བྱིན་རླབས་ཏེ། །འཇུག་ཐབས་མོས་གུས་གནད་དུ་བསྣུན་ཡང་འཚལ། །རང་ལ་བཀའ་དྲིན་ཆེ་བའི་བླ་མ་དེ། །དུས་གསུམ་སངས་རྒྱས་ཀུན་ལས་ལྷག་གོ་ཞེས། །རྒྱུད་སྡེ་ཀུན་ནས་མགྲིན་གཅིག་དབྱངས་གཅིག་ཏུ། །གསུངས་པ་འདི་ལ་ཡིད་ཆེས་བྱེད་ཀྱང་འཚལ། །ཇི་སྲིད་རྣམ་པར་རྟོགས་པ་ཡོད་ཀྱི་བར། །ལས་ཀྱི་འབྲས་བུ་དག་ཀྱང་བསྐྱེད་ནུས་པས། །རྒྱུ་འབྲས་འདོར་མོད་གནད་རྣམས་མ་འཆུག་པར། །རྒྱལ་བའི་བཀའ་བཞིན་ཚུལ་ལྡན་སྤྱོད་ཀྱང་འཚལ། །དྲོད་ཐོབ་ཙ་ན་སྔགས་ཀྱི་སྤྱོད་པ་ཡིས། །རིམ་གཉིས་གོང་འཕེལ་བྱེད་པ་རྨད་བྱུང་ཡང་། །དེ་སྲིད་བར་དུ་འདུལ་བ་དང་བསྟུན་ནས། །གསང་སྔགས་གསང་སྟེ་སྤྱོད་པ་ངོ་མཚར་ཆེ། །མདོར་ན་རྡོ་རྗེ་ཐེག་པའི་དམ་ཚིག་གིས། །གཏན་ཕུར་བཙུགས་པ་བླ་མའི་གསོལ་འདེབས་དང་། །སྟོང་ཉིད་ལྟ་བ་གཞན་སྟོང་སྙིང་རྗེ་མཆོག །ཟུང་དུ་འབྲེལ་བས་བསོད་ནམས་བསགས་པའི་ལས། །ཆེར་འབད་རྒྱལ་བ་ཀུན་གྱི་གཤེགས་ཤུལ་ཡིན། །དེ་སྐད་རབ་བྱུང་ཉི་མའི་ཤིང་ཡོས་ལོར། །པདྨའི་སྦས་ཡུལ་མཆོག་གྱུར་འབྲས་ལྗོངས་བྱང་། །འབྲི་མཚམས་ཞེས་གྲགས་དབེན་གནས་གསང་སྔགས་རིར། །ནག་ཟླའི་ཚེས་པ་བཅུ་གཉིས་དུས་བཟང་པོར། །རིག་འཛིན་ཚེ་དབང་ནོར་བུས་སྨྲས་པ་ཡིས། །ཡིག་རིགས་དགེ་སློང་ཀུན་བཟང་གཞན་ཕན་ནོ། །འདིས་ཀྱང་འགྲོ་ཀུན་མ་ནོར་ཐེག་ཆེན་ལམ། །བཟང་པོར་འཇུག་པའི་རྒྱུ་རུ་གྲུབ་གྱུར་ཅིག ། ༈ ཉམས་ལེན་སྙིང་པོ་ཞལ་གདམས་སྙིང་ཁུག་དྭངས་མའི་ཤོག་དྲིལ་མགུལ་ཁུག་མ་ཡོད།ཆིག་ཆོག་རི་ཆོས་ཟབ། བླ་མ་རྡོ་རྗེ་སེམས་དཔའི་ཞབས་པད་དུ། །རྟག་ཏུ་ཕྱག་བྱས་དེ་ཡི་གསང་བའི་དོན། །རང་གི་གོ་མྱོང་དང་བསྟུན་མན་ངག་གནད། །སྙིང་ཁྲག་ཐིག་པ་ལྟ་བུ་འདིར་སྟོན་ནོ། །རྒྱལ་ཆོས་བྱེ་བྲག་གྲངས་མེད་ཀུན་འདུས་སོ། །རང་རིག་ངོ་རྟོགས་སངས་རྒྱས་ཐབས་བཞིན་ནོ། །དེ་ཐབས་མཆོག་ནི་དབུ་ཕྱག་རྫོགས་པ་ཆེ། །ཡང་ཞུན་རྫོགས་ཆེན་ཉིད་དོ་ངོ་མཚར་ཆེ། །དེ་དོན་མདོར་དྲིལ་ལྟ་སྒོམ་སྤྱོད་འབྲས་བཞི། །ཉམས་ལེན་སྦྱོར་བ་འཁོར་བར་ཡིད་སུན་ནས། །ངེས་འབྱུང་བསམ་པས་སྐྱབས་སེམས་ཚོགས་བསགས་དང་། །སྒྲིབ་སྦྱང་ཁྱད་པར་བླ་མའི་རྣལ་འབྱོར་འབད། །དངོས་གཞི་སྒོམ་ཐོག་ལྟ་བ་ངོས་བཟུང་སྟེ། །བསྒོམ་པའི་ངོ་བོ་ཁྲེག་ཆོད་ཡིན་ནོ་ཀྱེ། །ཁྲེགས་ཆོད་ངོ་བོ་ཀ་དག་ཡེ་ཤེས་ཏེ། །ཉམས་སུ་ལེན་པའི་ཐོག་མར་བཞག་ཐབས་ནི། །འཁོར་བར་སྣང་བ་ཕྱི་ནང་ཕྲ་རགས་ཀྱི། །འགྱུ་རྟོག་ཉིད་དང་མི་རྟོག་གནས་པ་དང་། །སེམས་ཉིད་གཟུང་འཛིན་བློ་ཡི་བརྟགས་གཞིགས་དང་། །བཅས་བཅོས་དགག་སྒྲུབ་གང་ཡང་མ་བྱེད་ཀྱི། །རང་གི་རང་སྒྲིབ་གསེར་ཉིད་གཡའ་ཡིས་སྒྲིབ། །དྭངས་པའི་ཆུ་བོ་གཟོ་བྱས་རྙོགས་མས་སྒྲིབས། །རང་རིག་ངོ་བོ་གློ་བུར་སེམས་ཀྱིས་སྒྲིབ། །གཉུག་མའི་ངོ་བོ་གཟུང་འཛིན་བཅོས་མས་བསླད། །ཀྱེ་ཧོ། རང་བྱུང་གདོད་ནས་ཀ་དག་རྫོགས་པ་ཆེ། །གློ་བུར་དྲི་བྲལ་རང་བཞིན་ངོ་བོའི་གཤིས། །འདི་ལ་དཔེ་མཚོན་བརྟག་དཔྱད་ཚིག་གི་ཡུལ། །མ་ཡིན་ཡིན་ནོ་མཐའ་དང་བྲལ་ལོ་ཀྱེ། །མི་རྟོག་གནས་པ་སྒྲུབ་དང་དེ་ཉིད་གཤིས། །གང་ཡང་དྲི་མ་ཡིན་ནོ་ཅི་གནས་ཆུག །འགྱུ་བ་རྟོག་ཚོགས་དགག་དང་དེ་འཕྲོ་མཐུད། །གང་ཡང་རྣམ་རྟོག་ཡིན་ནོ་རང་ཐོག་ལྷོད། །དུས་གསུམ་དུས་མེད་རྟོག་པའི་ངོ་བོ་འདི། །སྔར་འདས་རྟོགས་པའི་འཕྲོ་རྗེས་ལ་མ་ཞེན། །ཕྱིས་འབྱུང་རྣམ་རྟོག་མང་པོའི་སྔོན་མ་བསུ། །ད་ལྟའི་རྟོག་པར་བརྟག་དཔྱད་བཅོས་བསླད་སྤང་། །རྣམ་རྟོག་མ་དགག་གུ་ཡངས་ཀློང་དུ་ཞོག །རྣམ་རྟོག་མ་གྲུབ་རང་ངོ་ཉིད་ལ་ལྟོས། །ཐེ་ཚོམ་མ་བྱེད་གང་ཤར་གདོང་དེད་ཐོང་། །བློ་ཡིས་མ་བཟོ་ཅི་ཤར་ཉིད་དུ་ཞོག །ཞོག་ཅེས་ཆེད་གཉེར་མེད་དོ་ཅི་བདེར་ཆུག །ཡན་ཞེས་ཕུལ་སོ་མེད་དོ་ལྷན་ནེ་ཞོག །ཡེངས་མེད་རང་རིག་ངོ་བོས་རྟག་ཏུ་འཚོ། །བསྒོམ་མེད་ཤར་གྲོལ་ཁྱབ་བརྡལ་ཡན་མཛོད་ཀྱེ། །ཧཻ། བསྒོམ་མེད་བསྒོམ་པའི་ངོ་བོ་དེ་འཆད་ཚེ། །བག་མེད་འཁྲུལ་དབང་ཐུན་མཚམས་མ་ཤོར་བར། །མཉམ་རྗེས་ཆིག་དྲིལ་ཀུན་བཟང་ཡེ་ཤེས་ཆེ། །ཟང་ཐལ་ཀ་དག་ཉིད་ལ་རྟག་གནས་མཛོད། །གསེར་གླིང་ས་རྡོ་ཕལ་པ་མི་ནུས་བཞིན། །གང་ཤར་ཆོས་སྐུའི་ངང་དུ་རྟོགས་ཀྱིས་ཤིག །གཉེན་པོ་མེད་ཀྱང་རྡོ་རྗེའི་ཏིང་འཛིན་གྱིས། །ཕྲ་རགས་དྲི་ཀུན་འཇོམས་པར་མཛོད་དོ་ཀྱེ། །ཨེ་མ། ལྟ་བ་ཡིད་དཔྱོད་ལས་འདས་རྫོགས་པ་ཆེ། །ལྷུན་གྲུབ་ཐོད་རྒལ་སྣང་བ་དེ་ལྟོས་ཤིག །རྡོ་རྗེ་ལུས་ཀྱི་རྟེན་འབྲེལ་བཞུགས་སྟངས་གསུམ། །གང་རུང་འམ་ནི་གཙོ་བོའི་དྲང་སྲོང་སྟངས། །མ་འགུལ་ཁ་སྣང་རླུང་སྦྲེལ་དལ་བྱས་ཏེ། །མིག་ཟིམ་དབྱིངས་འོད་སྟོང་པ་ཐིག་ལེ་དང་། །ཤེས་རབ་རང་བྱུང་སྒྲོན་མདངས་རྡོ་རྗེ་སེམས། །ལུག་རྒྱུད་ཤེལ་ལམ་མུ་ཏིག་འཕྲེང་བའམ། །རྟ་རྔའི་མདུད་འདྲ་འགྲོ་འོང་ལྡན་པ་དེ། །དུས་གསུམ་རྒྱལ་བ་ཡོངས་ཀྱི་ཞལ་ཡིན་གྱིས། །དེ་མཐོང་དེ་ནི་སངས་རྒྱས་ཡོངས་ཀྱི་སྲས། །ཡིན་ཞེས་ཀུན་བཟང་རྡོ་རྗེའི་ལྗགས་ཀྱིས་གསུངས། །དེས་ན་དེ་ལ་རྟག་ཏུ་མ་ཡེངས་ལྟོས། །བལྟ་བྱ་བལྟ་བྱེད་གཅིག་མིན་གཉིས་ཀྱང་མིན། །མ་བཟུང་མ་འཛིན་བརྟག་དཔྱད་མང་མ་བྱེད། །སྣང་ཡུལ་ཉིད་ལ་ཆེད་དུ་མ་ཞེན་ལ། །ཆེད་དུ་མ་གློད་གུ་ཡངས་བློ་བདེའི་ངང་། །རང་བབ་རང་གཤིས་དེར་ལྟོས་ངོ་མཚར་ཀྱཻ། །ཁྲེག་ཆོད་མ་རྟོགས་སྣང་ཡུལ་འཇའ་འོད་ལ། །ཆེད་དུ་འཐས་ན་གཟུགས་ཁམས་ས་བོན་དང་། །མཚུངས་ཞེས་ཀུན་ཏུ་བཟང་པོས་རྒྱུད་དུ་གསུངས། །ཞེན་མེད་སྣང་བ་འདི་ནི་ཡེ་ཤེས་ཏེ། །ཀུན་བཟང་གདོད་མའི་སངས་རྒྱས་དེ་ཉིད་ཀྱི། །ཐུགས་ཀྱི་རང་མདངས་འདི་ཡིན་ཨེ་མ་ཀྱེ། །དེ་ལྟར་ཐོད་རྒལ་ཉམས་སུ་ལེན་པ་ལ། །མི་འགུལ་གསུམ་གྱི་གཞི་བཅས་སྡོད་པ་གསུམ། །ཚད་དུ་བཟུང་བས་རིམ་བཞིན་ཡེ་ཤེས་ལ། །གོམ་ཚོད་སྣང་བ་བཞི་རུ་འཆར་བ་སྟེ། །མདོར་དྲིལ་སྣང་སེམས་ལུས་ངག་ཡིད་ཀྱི་རྟགས། །ཅི་བྱུང་ཆོས་ཉིད་རོལ་རྩེད་ཉིད་ཤེས་ནས། །བཟང་པོར་དགའ་བ་མ་བྱེད་སེང་ངེར་གློད། །ངན་པར་སྡང་བ་མ་ཤར་འཕྱད་མེར་ཞོག །རྟག་ཚད་རེ་དོགས་མེད་པ་ཁྱབ་བརྡལ་དང་། །ཉམས་ལེན་ལེ་ལོར་མ་ཤོར་དྲིལ་གྱིས་ཤིག །བཏང་པས་མི་འགྲོ་བཟུང་པས་མི་ཟིན་པ། །འདི་ལ་བཏང་བཟུང་བྱེད་པར་རློམ་པ་ནི། །བླུན་ལས་ཆེས་བླུན་རིག་པ་རང་བབ་ངང་། །རིག་མདངས་ལུག་རྒྱུད་བཙོན་དུ་ད་བཟུང་ཅིག །གནད་འདི་ལྟ་བ་ཐོད་རྒལ་ཡོང་ཟབ་དོན། །ཡིན་པས་རབ་ཏུ་གཅེས་པས་ཉམས་སུ་ལོངས། །སྤྱད་པ་བླ་མེད་ཐབས་ལམ་ཟུང་འཇུག་ཆོས། །ཟབ་ལམ་གཏུམ་མོའི་གདམས་པ་འདིར་སྟོན་ཉོན། །རང་ལུས་མི་དམིགས་རྟེན་བརྟེན་སྟོང་པའི་ངང་། །སྐད་ཅིག་རྣམ་པ་ཆོས་འབྱུང་ཨོ་རྒྱན་ཡུལ། །དབུས་སུ་ཨེ་དམར་པད་ཉི་བཾ་རོའི་སྟེང་། །ཨ་ལས་ཕག་མར་ཁྲོ་མོའི་ཆས་རྫོགས་པ། །གཡས་གཡོན་གྲི་ཐོད་ཞབས་གཉིས་གར་སྟབས་རོལ། །ལུས་ནང་སྟོང་ར་དར་དམར་གུར་ཕུབ་འདྲ། །དབུས་སུ་རྩ་མཆོག་དབུ་མ་ཤེལ་སྦུབ་ལྟར། །མཚན་ཉིད་བཞི་ལྡན་གཡས་གཡོན་རོ་རྐྱང་ཟུང་། །མར་སྣེ་ལྟེ་འོག་གཉེར་ནས་དབུ་མར་ཆུད། །དབུ་མའི་ཡར་སྣེ་ཚངས་བུག་རོ་རྐྱང་སྣ། །འཁོར་ལོ་བཞི་བཅས་གསལ་སྣང་འདུས་གསུམ་ཁ། །ལྟེ་འོག་སོར་བཞིར་ཉི་སྟེང་བླ་མ་དང་། །དབྱེར་མེད་རཾ་དམར་མེ་འབར་ཡིད་གཏད་ངང་། །བླ་མར་གསོལ་བཏབ་གནད་ལྡན་རླུང་དགུ་འབུད། །དལ་རྔུབ་དར་གཅིག་ལྷོད་བཞག་སླར་རྔུབ་འདོད། །ཤར་ཚེ་རྔུབ་ཆུང་བསྣན་བཅས་ལྟེ་འོག་བསྣན། །རོ་རྐྱང་ནས་བརྒྱུད་དབུ་མར་རླུང་ཞུགས་པས། །རཾ་ལས་མེ་འབར་ལྟེ་བའི་རྩ་འདབ་གང་། །རིམ་བཞིན་གོམས་ནས་གསང་གནས་སྙིང་ག་ཁེངས། །བསམ་བྱས་འཕོངས་སྐོར་སྐེད་སྐོར་སྐབས་སྐབས་བྱ། །མི་ཐུབ་སྙམ་ཚེ་མིག་ཟིམ་རིགས་པ་ཉིད། །ལྟེ་འོག་ལ་གཏད་རླུང་དོར་ལྷག་མེད་བུད། །དེ་ལྟར་རྔུབ་སྒང་གཞིལ་འབུད་སྦྱོར་བ་བཞི། །གསུང་པ་རླུང་སྒང་མི་ཐུབ་པ་སྙམ་ཚེ། །བ་སྤུའི་བུ་ག་ཁྲོལ་ཚག་ལྟར་བསམ་ནང་། །རླུང་རྣམས་སྔོ་ཐུལ་སོང་དམིགས་ལུས་འདར་བཏོན། །དེ་ནས་འབུད་བྱ་རླུང་སྒང་རན་ཚོད་གཅེས། །འདི་དུས་འཁྲུལ་འཁོར་ཡན་ལག་ལྔ་སྦྱང་ནི། །རྩ་མདུད་གྲོལ་ཕྱིར་འབད་གཅེས་གསུང་པས་བྱ། །དེ་ལ་སྒོམ་ནས་ཡེ་ཤེས་གཏུམ་མོ་ནི། །ལྟེ་འོག་ཨ་ཤད་མེ་ཡི་སྦྱི་བོ་རུ། །ཟླ་བ་ཧཾ་མགོ་ཐུར་བསྟན་དྲོད་ཀྱིས་ཞུ། །བདུད་རྩི་བབས་པ་མེ་དང་བྲོས་དེད་མཐར། །སྙིང་ཀར་འདྲེས་ཏེ་རིམ་བཞིན་བྱང་སེམས་རྒྱས། །མགྲིན་སྙིང་ལྟེ་གསང་འཁོར་ལོ་རྩ་འདབ་གང་། །དམིགས་གནད་དགའ་བཞི་ངོས་བཟུང་ཡས་བརྟན་བརྟག །སླར་ཟློག་རིག་པ་སྤྱི་བོའི་མཁའ་ལ་གཏད། །སྦྱོར་བ་དྲུག་གི་འདྲེན་བྱས་མས་བརྟན་དགའ། །འཁོར་ལོ་བཞིར་མྱོང་དུད་འགྲོ་འགྱུར་བཞི་ཡི། །ཚངས་པའི་སར་སྐྱེལ་སེང་རོལ་ཆོས་འབྱུང་གིས། །བཀྲམ་བྱས་ཁུ་ཚུར་ཟུག་པས་རྩ་མིག་གདབ། །དེ་ནས་བདེ་སྟོང་ཆོས་ཉིད་ཀློང་ཡངས་སུ། །དམིགས་བརྗོད་ཞེན་བྲལ་ངང་ལྷོད་འདི་ནི་བསྔགས། །ཐབས་ལམ་རྩ་བ་བོགས་འདོན་སྤྱོད་གཙོ་ཡིན། །དེ་བས་ཐུན་མོང་ཐུན་མིན་སྤྱོད་པ་ནི། །ཀུན་དར་ཀུན་བཟང་བརྟུལ་ཞུགས་རྣམ་རྒྱལ་སྤྱོད། །གང་ཟག་དབང་རིམ་གསུམ་མཐུན་ཚོགས་དབེན་སྤྱོད། །མདོར་དྲིལ་ཕྱི་ལྟར་ཚངས་སྤྱོད་འདུལ་ཁྲིམས་བསྟུན། །ནང་ལྟར་སེམས་བསྐྱེད་སྙིང་རྗེ་གཙོ་བོར་འདོན། །གསང་བ་ཐབས་ལམ་གསང་སྔགས་ཟབ་མོར་སྤྱོད། །ཀུན་ཀྱང་ཐོ་ཅོ་བག་མེད་རྩིང་སྤྱོད་དང་། །གྲགས་སྙན་ལོ་འདོད་རྒྱུ་མིན་ཞེན་བྲལ་ངང་། །རང་གིས་རང་མ་བསླུ་བའི་གདེང་ལྡན་དང་། །བག་ཡོད་རྒྱལ་བས་གསུང་མཐུན་དོན་ལ་སྤྱོད། །ཨེ་མ་འབྲས་བུ་ཞེས་གྲགས་སྒྲ་ཆེན་དེ། །སྔར་མེད་གཞན་ནས་བྱུང་བ་ཞིག་མིན་ཀྱེ། །ཀུན་རྫོབ་གློ་བུར་དྲི་མ་རང་སངས་ཏེ། །རང་རིག་སྒྲིབ་བྲལ་མཐོང་ལ་འབྲས་བུར་བཏགས། །འཁྲུལ་པ་སངས་ཚེ་སྐུ་དང་ཡེ་ཤེས་རྒྱས། །དེ་ལ་སངས་རྒྱས་ཞེས་སུ་བརྗོད་པ་སྟེ། །བརྩོན་འགྲུས་ལྡན་པས་རྫོགས་ཆེན་ཉམས་བླང་མཐར། །རེ་དོགས་འཕྲང་ལས་གྲོལ་ཚེ་འབྲས་བུ་ཡིན། །དེ་ལྟར་ལྟ་སྒོམ་སྤྱོད་འབྲས་མདོར་དྲིལ་ན། །ལྟ་བ་རྒྱ་མཚོ་ནང་གི་གཟའ་སྐར་ལྟར། །དེར་འཛིན་ཤེས་པ་རྩིས་གདབ་བྲལ་བར་ཞོག །བསྒོམ་པ་ནམ་མཁའ་ཡངས་པའི་ཀློང་བཞིན་དུ། །ཕྱོགས་རིས་བློས་བྱས་བསྒོམ་དང་བྲལ་བར་ཞོག །སྤྱོད་པ་སྒྱུ་མའི་སྐྱེས་བུའི་འཕྲུལ་འཁོར་བཞིན། །ཞེན་བྲལ་རང་བབས་བག་ཡངས་ངང་དུ་ཞོག །འབྲས་བུ་རི་བོ་ཆེན་པོ་ཇི་བཞིན་དུ། །གོང་བགྲོད་ལྟོས་གཞི་རེ་དོགས་མེད་པར་ཞོག །གསང་སྔགས་ཆོས་ཀུན་རྩ་བ་བྱིན་རླབས་ཡིན། །བྱིན་རླབས་བླ་མར་རག་ལས་མོས་གུས་གཅེས། །ཐེག་ཆེན་གཞི་ཡིན་གཞན་ཕན་སེམས་བསྐྱེད་གཅེས། །ཆོས་ཀྱི་སྲོག་ཡིན་སྡོམ་དང་དམ་ཚིག་གཅེས། །བསྟན་པའི་གཞི་ཡིན་ཚོགས་གཉིས་ཟུང་འཇུག་གཅེས། །ཆོས་ཀྱི་ལམ་གྲོགས་བརྩོན་འགྲུས་སྙིང་རུས་གཅེས། །ཀྱེ་མ་སྤྱིར་ཡང་ཆོས་བཞིན་སྤྱོད་པ་ལ། །དམ་ཚིག་མི་བསྲུང་སངས་རྒྱས་རེ་བ་ནི། །སོལ་བ་ཕྱི་བརྡར་བྱས་ནས་དུང་འོད་བྲལ། །རྒྱུ་འབྲས་མི་བསྲུང་བྱང་ཆུབ་ཐོབ་འདོད་ནི། །བྱེ་མ་བཙིར་ནས་མར་ཁུ་འདོད་པ་འདྲ། །བླ་མ་མ་དགྱེས་དགེ་བ་གང་སྒྲུབ་ཀུན། །ས་བོན་མེ་ལ་བསྲེག་པའི་ལྗང་བུ་འདྲ། །དེ་བས་རྟག་ཏུ་བླ་མར་གུས་ཀྱིས་ཤིག །དེ་ལྟར་ཞལ་གདམས་ཚུལ་འདི་རང་འདྲ་བའི། །བློ་རྨོངས་ཉམས་མྱོང་དམན་ལ་ཕན་སྙམ་ཕྱིར། །རྒྱལ་བཀའ་གྲུབ་ཐོབ་ཞལ་ལུང་ཁྱད་པར་དུ། །རྩ་བའི་བླ་མའི་གསུང་གི་མན་ངག་ཉིད། །རང་གི་ཉམས་སུ་མྱོང་བ་དང་བསྟུན་ནས། །སྨྲ་ལས་མི་ཤེས་མཁས་འདོད་ཚེ་འདི་ཡི། །བསྟོད་སྙན་གྲགས་པ་སྒྲུབ་པའི་ཆེད་དུ་མིན། །འདི་ལྟར་སྟོན་ལ་གཏན་ཚིགས་ལུང་དང་ནི། །མན་ངག་ཆེ་བའི་ཚིག་ཚོགས་མང་པོ་ཞིག །བརྗོད་པར་ཡི་གེར་འཇིགས་པས་མ་སྨྲས་ཤིང་། །སྤྱིར་ཡང་ཉམས་སུ་མ་བླངས་ཚིག་སྐམ་པོ། །འབྲུག་སྟོང་ལྡིར་ཡང་འཆི་དུས་སྟོང་སྐད་ཡིན། །ཉམས་ལེན་མཐུན་ན་རྒྱལ་གསུང་ཚིག་རེས་མཆོག །རྒྱལ་བའི་གསུང་ཆོས་རྒྱ་མཚོ་ལྟ་བུ་ལ། །བློ་རྨོངས་བདག་གི་ཚིག་གིས་ཅི་ཞིག་བྱ། །འོན་ཏེ་བསྐུལ་ངོ་མ་ལྕོག་ཙམ་འདི་སྨྲས། །འདི་ནི་ཇི་བཞིན་ཉམས་ལེན་བུ་རེ་ལས། །འཕྱར་ཆོས་བྱེད་ན་དེ་སྲོག་མ་དམ་གཟས། །རོལ་མཛོད་བཛྲ་ས་མ་ཡ་དམ་ཛཿཉམས་ལེན་བུ་ལ་རྟག་ཏུ་གྲོགས་མཛོད་ཅིག ། གཉག་རིགས་རྣལ་འབྱོར་མ་ནམ་མཁའ་ཡེ་ཤེས་གསལ་སྒྲོན་གྱི་ངོར་ཞེས་མདོ་ཁམས་ཀཿཐོག་ལྷོ་ཕྱོགས་སྟག་བུའི་ཡུལ་དུ་སྐྱེས་པའི་ལྷ་རིགས་རྔུ་ཡི་རྣལ་འབྱོར་ཚེ་དབང་ནོར་བུས་ཤིང་སྦྲུལ་ཧོར་ཟླ་བཅུ་བའི་ཚེས་ཉེར་དགུ་བོད་ཡུལ་གྱི་རྡོ་རྗེ་གདན་བསམ་ཡས་མི་འགྱུར་ལྷུན་འགྲུབ་ཀྱི་གཙུག་ལག་ཁང་ཤར་འཇམ་དཔལ་གླིང་ག་ལ་བ་དེར་སྦྱར་བའི་ཡིག་རིས་ཨོ་རྒྱན་བློ་གྲོས་དབང་པོས་བགྱིས་པ་དགེའོ། །དགེའོ། །དགེའོ། །དགེའོ། ། ༈ མང་ཡུལ་སའི་ཐིག་ལེ་སྐྱིད་གྲོང་འཕགས་པ་ཝ་ཏིའི་སྤྱན་སྔར་སྔགས་འཆང་ཚེ་དབང་ནོར་བུའི་ཉམས་མྱོང་རྟོགས་པ་སྐྱེས་པ་མཎྜལ་ཚུལ་དུ་སྒྲོ་བསྐུར་དང་བྲལ་བའི་གླུ་ཕུལ་བ་སྙན་པའི་ཏམྦུ་ར་སེང་གེའི་རྒྱུད་ཀྱི་སྒྲ་དབྱངས།༈ མང་ཡུལ་སའི་ཐིག་ལེ་སྐྱིད་གྲོང་འཕགས་པ་ཝ་ཏིའི་སྤྱན་སྔར་སྔགས་འཆང་ཚེ་དབང་ནོར་བུའི་ཉམས་མྱོང་རྟོགས་པ་སྐྱེས་པ་མཎྜལ་ཚུལ་དུ་སྒྲོ་བསྐུར་དང་བྲལ་བའི་གླུ་ཕུལ་བ་སྙན་པའི་ཏམྦུ་ར་སེང་གེའི་རྒྱུད་ཀྱི་སྒྲ་དབྱངས་ཞེས་བྱ་བ་བཞུགས་སོ། །སརྦ་མངྒ་ལཾ་བྷ་ཝནྟུ། བདེ་ཆེན་འཁོར་ལོའི་ཆུ་སྐྱེས་འདབ་སྟོང་དབུས། །རང་རིག་དྲན་མཆོག་དྭངས་མའི་མགོན་པོ་ཆེ། །སྐྱེ་འགག་གནས་བྲལ་སློབ་དཔོན་པདྨ་འབྱུང་། །བདེ་བ་ཆེན་པོ་གསུང་རབ་རྒྱ་མཚོར་འདུད། ། ༡ བཀའ་དྲིན་མཚུངས་མེད་རྡོ་རྗེ་སློབ་དཔོན་གྱི། །བྱིན་རླབས་སྙིང་ལ་ཆ་ཤས་ཞུགས་པའི་མཐུས། །མན་ངག་ཉམས་མྱོང་གླུ་རུ་བླངས་བགྱི་ཡི། །ཆོས་བསྲུང་ཌཱ་ཀིའི་ཚོགས་ཀྱིས་གནང་བ་སྩོལ། ། ༢ སངས་རྒྱས་ཀུན་གྱི་རྒྱུད་ལ་མངོན་གྱུར་ཞིང་། །སེམས་ཅན་རྣམས་ཀྱི་རྒྱུད་ལ་ཡོངས་ཁྱབ་པ། །རྣལ་འབྱོར་ཉམས་ལ་སྣང་བའི་ཉམས་ལེན་ཏེ། །ཀུན་གཞི་བདེ་གཤེགས་སྙིང་པོ་དེ་ལ་འདུད། ། ༣ རིག་འཛིན་གོང་མའི་ཐུགས་མཚོར་ཉེར་རོལ་ཞིང་། །བདག་བློར་ཆ་ཤས་ཤར་བའི་ཡེ་ཤེས་དེ། །བདག་མིན་ནམ་མཁའི་མཐའ་ཀླས་འགྲོ་ཀུན་དང་། །བདག་གི་བརྒྱུད་འཛིན་སློབ་མ་བརྒྱུད་བཅས་ཤིང་། ། ༤ མཐོང་ཐོས་དྲན་རེག་འགྲོ་བ་མཐའ་དག་པའི། །རྒྱུད་ལ་ཇི་བཞིན་འཆར་བའི་དགེ་ལེགས་སྩོལ། །རྒྱལ་བའི་བསྟན་པ་གྲུབ་མཐའ་རྣམ་པ་བཞི། །ཐེག་དམན་ལམ་ལ་བྱེ་སྨྲ་མདོ་སྡེ་གཉིས། ། ༥ རྣམ་པ་ཤེས་པ་ཐ་དད་བྱེ་བྲག་པ། །རྣམ་ཤེས་དབྱེར་མེད་སྨྲ་བའི་མདོ་སྡེ་པ། །དེ་བཞིན་ཐེག་ཆེན་ལམ་ལ་གཉིས་ཡིན་ཏེ། །རྣམ་ཤེས་བདེན་གྲུབ་འདོད་པའི་སེམས་ཙམ་པ། ། ༦ རྣམ་ཤེས་བདེན་མེད་འདོད་པའི་དབུ་མ་པ། །མཐར་ཐུག་དབུ་མ་ཆེན་པོ་ལ་ཡང་གཉིས། །དང་པོ་འཁོར་ལོ་བར་པ་ངེས་དོན་གྱི། །དགོངས་དོན་ཐལ་འགྱུར་ངོ་བོ་ཉིད་མེད་སྨྲ། ། ༧ གཉིས་པ་འཁོར་ལོ་ཐ་མ་ངེས་དོན་གྱི། །མཐར་ཐུག་རྣམ་རིག་ཆོས་ཉིད་ཡོངས་གྲུབ་བསྟན། །དབུ་མའི་མཐར་ཐུག་འཁོར་ལོ་གསུམ་པའི་དོན། །ཡིན་ཞེས་རྒྱལ་མཆོག་དྲི་མེད་འོད་ཟེར་སྡེ། ། ༨ ཀུན་མཁྱེན་དོལ་པོ་རྟོན་པ་བཞི་ལྡན་དང་། །རང་བྱུང་རྡོ་རྗེ་བུ་སྟོན་རིན་ཆེན་གྲུབ། །རྗེ་བཙུན་ཆེན་པོ་ཏཱ་ར་ནཱ་ཐ་སོགས། །མཁས་མཆོག་ཐུན་མིན་མང་པོའི་བཞེད་གཞུང་ཡིན། ། ༩ དེས་ན་རྣམ་རིག་དབུ་མ་ཆེན་པོ་ཡི། །བཞེད་པ་རྒྱུ་ཡི་སྐབས་སུ་བདེ་གཤེགས་སྙིང་། སྣང་སྲིད་སྣོད་བཅུད་ཡོངས་ལ་འདུས་མ་བྱས། །ཆོས་དབྱིངས་རང་བཞིན་གདོད་ནས་ཁྱབ་པར་འདོད། ། ༡༠ ལམ་གྱི་སྐབས་སུ་མཚན་ཉིད་རྣམ་པ་གསུམ། །གཏན་ཕབ་ཡེ་ཤེས་དབྱིངས་ལ་སྦྱང་བར་འདོད། །འབྲས་བུའི་སྐབས་སུ་ཡོངས་གྲུབ་ཆོས་ཀྱི་སྐུ། །གློ་བུར་དྲི་མའི་སྐྱོན་དང་བྲལ་བར་འདོད། ། ༡༡ དེ་ཡང་གཟུང་འཛིན་རྣམ་ཤེས་ཡུལ་གཞན་སྟོང་། །རིག་རྒྱུན་ཆོས་སྐུ་རྟག་པས་གཞན་སྟོང་བརྗོད། །མདོར་ནི་སངས་རྒྱས་མཐར་ཐུག་ཆོས་ཀྱི་སྐུ། །ཤེས་བྱ་ཀུན་ཁྱབ་འགྲོ་ཀུན་མགོན་བཅུད་དུ། ། ༡༢ རྒྱུ་འབྲས་མ་ཡིན་ཆོས་དབྱིངས་སྤྲོས་བྲལ་བཞུགས། །དེ་ཡོད་འཁོར་འདས་འབྱུང་བས་ཀུན་གཞིར་གྲགས། །དེ་མདངས་འཁོར་བའི་ཆོས་དང་འཛོམས་ལ་ལམ། །ཟེར་དེ་དེ་ལྟའང་དེ་ཡིས་འཁོར་བ་སྤངས། ། ༡༣ གང་ཟག་འཁྲུལ་ཟད་སངས་རྒྱས་འཁྲུལ་སྤངས་ཚེ། །གང་ཟག་ཉིད་ཀྱང་སྤངས་ཏེ་སྔ་མའི་ཤུགས། །གནས་འགྱུར་ཡེ་ཤེས་སངས་རྒྱས་སྐྱེས་བུར་བརྗོད། །རིག་པ་ལམ་གཞན་དང་འདྲེས་དབྱིངས་གཅིག་འདོད། ། ༡༤ དེ་ནི་མདོ་ཆོས་གྲུབ་མཐའི་རྩེ་མོར་བཞེད། །བླ་མེད་སྔགས་རྒྱུད་དོན་ལ་ཤིན་ཏུ་འབྱོར། །དེས་ན་བློ་ངན་རྟོག་ཚོགས་ཀུན་སྤངས་ནས། །རྒྱལ་དང་རྒྱལ་སྲས་ཀུན་གྱི་སྙིང་པོའི་ལམ། ། ༡༥ ཀུན་མཁྱེན་ཆོས་རྗེ་ཇོ་ནང་ཡབ་སྲས་ཀྱི། །ལྟ་བའི་ལམ་འདིར་ཚེ་རབས་ཐམས་ཅད་དུ། །འཇུག་ཅིང་དེ་ཡི་བསྟན་ལ་བྱ་བ་མཆོག །བྱེད་པར་སྨོན་ལམ་སྙིང་གི་དཀྱིལ་ནས་འདེབས། ། ༡༦ ཡང་ཅིག་བོད་ཡུལ་གངས་རིའི་འཛིན་མ་འདིར། །ཐ་མལ་ཤེས་པ་ཞེས་པའི་སྒྲ་བོ་ཆེ། །ཕྱག་རྒྱ་ཆེན་པོར་བརྗོད་པའི་གྲུབ་པའི་མཐའ། །ལྷ་རྗེ་དྭགས་པོའི་བཀའ་བརྒྱུད་ཆོས་ཀྱི་སྲོལ། ། ༡༧ རྒྱ་ཆེན་གཏིང་ཟབ་འཆད་ཚུལ་མང་ན་ཡང་། །དཔལ་ལྡན་སྒྲུབ་བརྒྱུད་སྟོད་འབྲུག་༼རྒོད་ཚང་པ་ཡབ་སྲས། ༽སྨར་ཀམ་གྱི། །༼སྨན་ཚང་པའི་ལུགས། ཀམ་ཚང་སྙན་བརྒྱུད་ལུགས། ༽ཆུ་བོ་གཅིག་འདྲེས་བདག་བློར་ཅུང་འབབ་མཐུས། །རང་གི་རྟོགས་ཚུལ་ཆ་ཙམ་འདིར་བརྗོད་ཀྱི། ། ༡༨ མཚན་ལྡན་བླ་མས་སེམས་ཀྱི་བཞག་ཐབས་ནི། །སྲང་གསུམ་རྐྱེན་བཞི་ལ་སོགས་རྟེན་འབྲེལ་གནད། །ལེགས་བརྟེན་མཆོག་ཏུ་མོས་གུས་ཀྱིས་དྲངས་ནས། །གནས་འགྱུ་རིག་པའི་རང་ཞལ་གཏན་ལ་ཕབ། ། ༡༩ བདེ་གསལ་མི་རྟོག་ཞི་གནས་ཉམས་མྱོང་རྒྱས། །ཚོགས་དྲུག་རང་གྲོལ་ལྷག་མཐོང་རང་རྩལ་འཕྱོ། །རྩེ་གཅིག་གནས་པ་སེམས་ཀྱི་རྒྱན་དུ་ཤེས། །སྤྲོས་བྲལ་འགྱུ་བ་སེམས་ཀྱི་རོལ་པར་སྟོང་། ། ༢༠ རོ་གཅིག་སྣང་སེམས་འཁོར་འདས་མཉམ་ཉིད་རྟོགས། །སྒོམ་མེད་སྒོམ་བྱ་སྒོམ་བྱེད་དབྱིངས་སུ་སྟོར། །རྣལ་འབྱོར་བཞི་ཡི་ཉམས་ལེན་ངང་ཚུལ་དེ། །བླ་མའི་མཐུ་ཡིས་ད་ནི་ཅུང་ཟད་གོ ། ༢༡ ཡང་གཅིག་གསོན་དང་ཁོ་བོའི་ཉམས་ལེན་མཐིལ། །ཕྱག་རྒྱ་ཆེན་པོའི་ཚུལ་དེ་འདི་སྐད་དོ། །བུ་ཆུང་སྐྱེས་དུས་ཐ་མལ་ཤེས་པ་དང་། །ད་ལྟ་ཕྱག་ཆེན་རྟོགས་པའི་ཉམས་མྱོང་གཉིས། ། ༢༢ རང་ངོ་ཤེས་དང་མ་ཤེས་ཁོ་ན་ལས། །བསལ་བཞག་མེད་པའི་རོ་མཉམ་གདེང་ཚད་སྐྱེས། །ཐ་མལ་གཉུག་མ་སོ་མ་ལྷུག་པ་དེ། །གོལ་ཤོར་ལས་འདས་རང་སེམས་རང་ཞལ་མཐོང་། ། ༢༣ ཡུལ་མེད་རང་ངོ་ཤེས་པའི་ཤེས་རབ་རྒྱས། །སྤྲོས་དང་བྲལ་ཞིང་མི་སྤྲོས་གང་ཡང་མེད། །འགལ་འདུ་ལྟར་དུ་སྣང་ཡང་འགལ་བ་མེད། །ཁོ་ཐག་ཆོད་པའི་ཕྱག་ཆེན་རྒན་པོ་བདེ། ། ༢༤ ཡང་ཅིག་ཟབ་དགུའི་ཆོས་ཀྱི་སྙིང་པོ་སྟེ། །ཐེག་པ་ཀུན་གྱི་རྩེ་རྒྱལ་མཐར་ཐུག་པ། །རིག་འཛིན་བྱེ་བ་འབུམ་སྟེ་གཤེགས་པའི་ཤུལ། །མཚན་ཙམ་གྱིས་ཀྱང་འཁྲུལ་སྣང་ཧྲུལ་པོར་བཏང་། ། ༢༥ སངས་རྒྱས་ཡེ་ཤེས་དྲང་ཐད་བསྟན་པའི་ཆོས། །བླ་མེད་བླ་མ་འོད་གསལ་རྡོ་རྗེ་སྙིང་། །པད་འབྱུང་བི་མའི་བཞེད་གཞུང་ཇི་བཞིན་པ། །དྲི་མེད་འོད་ཟེར་མཁྱེན་རབ་ཟུར་ཕུད་ཅན། ། ༢༦ གང་གི་བཀའ་སྲོལ་བདུད་རྩི་ཅུང་ཟད་གཅིག །འཐུང་བས་མྱོས་ཏེ་ཉམས་རྟོགས་གླུ་དབྱངས་ལེན། །དཔལ་ལྡན་བླ་མ་རྡོ་རྗེ་སེམས་དཔའ་དང་། །ཐ་དད་མི་དམིགས་དད་དམ་གཞིར་བརྟེན་ནས། ། ༢༧ ཐུན་མོང་ཐུན་མིན་ཁྱད་པར་སྔོན་འགྲོ་བས། །ཟབ་གནད་དུ་མས་སེམས་ཀྱི་དྲི་མ་བསལ། །ཡང་ཁྱད་སེམས་ཀྱི་ཁོང་བུ་གཉིས་སྣང་ཡིད། །བློ་ཡིས་བརྟགས་ནས་རང་མཚང་རང་གིས་བཤིག ། ༢༨ འདས་བྱས་སེམས་དང་འདུས་མ་བྱས་རིག་པ། །སོ་སོར་དབྱེ་ནས་གཉིས་མེད་ཡེ་ཤེས་དངོས། །རིག་པའི་རང་ངོ་གཅེར་མཐོང་གཏན་ལ་ཕབ། །ཡིན་ལུགས་རང་གི་ངོ་བོ་རང་ཐོག་འཕྲོད། ། ༢༩ ཡུལ་དང་ཡུལ་ཅན་ཡེ་སྟོང་ལ་བཟླ་ཞིང་། །འཁོར་འདས་རིག་པ་མཉམ་ཉིད་ངང་ཐག་བཅད། །གང་ཤར་ལམ་ལ་སྤང་བླངས་ཡོངས་བྲལ་བར། །ཆོས་ཀུན་ཆོས་ཉིད་རོལ་པར་རང་སར་གྲོལ། ། ༣༠ ཡིན་ལུགས་ཅོག་བཞག་བཞི་ཡིས་གཏན་ལ་ཕབ། །ཁམས་གསུམ་ཡོངས་གྲོལ་གཞི་ཐོག་འབྲས་བུ་བསྐྱལ། །ཡེ་ཤེས་ཆིག་ཆོད་རང་རིག་ལམ་རྫོགས་པ། །རྫོགས་ཆེན་ཁྲེག་ཆོད་དགོངས་པ་གཟེར་དུ་གདབ། ། ༣༡ ཆོས་ཚུལ་གཞན་ལས་ཁྱད་པར་བདུན་བྱས་པ། །ཟབ་གསང་འོད་གསལ་མངོན་སུམ་ཐོད་རྒལ་དོན། །སྒོ་གསུམ་གནད་བཞི་བྱིན་རླབས་འཕོ་བ་ལ། །བརྟེན་ནས་ཡིད་དཔྱོད་མུན་བསྒོམ་ལས་འདས་པ། ། ༣༢ མཐའ་གྲོལ་ཤེས་རབ་རང་བྱུང་སྒྲོན་མ་ཆེ། །ཡེ་ཤེས་ཟང་ཐལ་དྲི་མེད་རྡོ་རྗེ་སེམས། །ལྟ་བའི་སྟོད་ཕུར་བཏབ་ནས་སྐུ་གསུམ་གྱི། །སྣང་བ་བཞི་རྫོགས་ལོ་ཟླས་སངས་རྒྱས་པ། ། ༣༣ ཀུན་ཏུ་བཟང་པོའི་ཐུགས་ཀྱི་གསང་ལམ་མཆོག །ཆོས་དཀོན་རྙེད་པར་དཀའ་བའི་མན་ངག་འདི། །མཇལ་བའི་དགའ་ཚོར་ཉིན་མཚན་འཁོར་ཡུག་འབྱམས། །ཆོས་ཚུལ་ཇི་བཞིན་མྱོང་བའི་རྣལ་འབྱོར་བདེ། ། ༣༤ ཀྱེ་ཧོ་དེ་ལྟར་ཟབ་དགུ་ཆོས་ཀྱི་མཆོག །དབུ་མ་ཕྱག་རྒྱ་རྫོགས་ཆེན་མན་ངག་དོན། །གོ་མྱོང་རྟོགས་པའི་ངང་ཚུལ་དེ་ལྟར་ཏེ། །ད་དུང་རང་གི་ཡིན་ལུགས་དབྱངས་འདི་ལེན། ། ༣༥ སྔོན་ཚེ་ཡེངས་པའི་དགྲ་བོར་འཇིགས་པ་ཡི། །མ་ཡེངས་དྲན་པའི་སོ་བ་རྟག་ཏུ་བཙུགས། །ད་ནི་ཡེངས་པ་དྲན་པའི་ངོ་བོར་ལོངས། །མ་ཡེངས་དྲན་པ་ཁོ་ཡང་བྱ་རྒྱུ་སྟོར། ། ༣༦ སྔོན་ཚེ་ཕྲ་བ་ངོ་མི་ཤེས་ཀྱིས་དོགས། །ཤེས་བྱེད་དྲན་པའི་རྫིའུ་རྟག་ཏུ་བཞག །ད་ནི་ཕྲ་བ་ངོ་ཤེས་རིག་པར་ཐིམ། །ཡུལ་མེད་རང་ངོ་ཆོས་ཀྱི་སྐུ་རུ་གྲོལ། ། ༣༧ སྔོན་ཚེ་བདག་མེད་སྟོང་པའི་ཚིག་བཤད་དེ། །སྨྲ་བ་སྙན་ཡང་གནས་ལུགས་སེམས་ལ་སྡུག །ད་ནི་ཆོས་ཉིད་སྟོང་པའི་དབྱིངས་མཐོང་ཚེ། །གོ་ཚིག་སྟོང་ཉིད་དཔྱད་སྒོམ་ཡུལ་བུད་ཤོར། ། ༣༨ ཐ་སྙད་ཚིག་ཁྱོད་ཇི་ལྟར་དགྱེས་དགྱེས་མཛོད། །ཡིད་ཆེས་ཁོང་ནས་རྙེད་པའི་རྣལ་འབྱོར་བདེ། །སྔོན་ཚེ་མཉམ་བཞག་རྣམ་རྟོག་རྒྱུན་གྱིས་སྤྲུལ། །བསལ་བཞག་བློ་ཡིས་ཆོས་ཉིད་རང་ངོ་སྒྲིབ། ། ༣༩ ད་ནི་རྣམ་རྟོག་མཉམ་བཞག་ངོ་བོར་གྲུབ། །རྣམ་རྟོག་ཆོས་སྐུར་ཞིག་ཚེ་བསལ་བཞག་ཅི། །སྤང་གཉན་མཁན་ཚོ་ཇི་ལྟར་དགྱེས་དགྱེས་མཛོད། །གུ་ཡངས་བློ་བདེ་རྙེད་པའི་རྣལ་འབྱོར་བདེ། ། ༤༠ སྔོན་ཚེ་རྣམ་རྟོག་འགྱུ་དང་རྟོག་མེད་གནས། །རྟོག་མེད་གནས་པ་ལམ་གྱི་རྐང་དུ་བྱས། །ད་ནི་གནས་མེད་འགྱུ་མེད་རང་ངོས་སྟོང་། །མི་གཡོ་གནས་པའི་རྒྱང་ཐག་རིང་དུ་ཆད། ། ༤༡ གཡོ་བ་འགྱུ་འཕྲོའི་སྤུན་ཐག་ཁོང་ནས་ཞིག །ཡིན་ལུགས་རིག་པའི་རང་ངོ་གཏིང་ནས་སད། །གང་ཤར་རིག་ཐོག་གྲོལ་བའི་བྱ་བྲལ་བདེ། །གནས་འགྱུ་གདམས་ངག་ཅན་ཚོ་ཅི་དགྱེས་མཛོད། ། ༤༢ སྔོན་ཚེ་མཉམ་རྗེས་འབྱེད་ལ་དགའ་ཚོར་སྐྱེས། །མཉམ་བཞག་བརྟན་པོ་ཐོབ་པ་ཡིད་ཀྱིས་སྨོན། །ད་ནི་མཉམ་བཞག་བློ་ཡིས་བཞག་སོ་ཟད། །རྗེས་ཐོབ་ཡུལ་སྣང་རྣམ་རྟོག་སྤྲོས་པ་འགགས། ། ༤༣ མཉམ་རྗེས་ཆིག་ཆོད་རྟོགས་པའི་རྣལ་འབྱོར་བདེ། །མཉམ་རྗེས་དབྱེ་བ་མཁན་ཚོ་ཅི་དགྱེས་མཛོད། །སྔོན་ཚེ་ལྷ་སྐུ་བསྒོམ་པའི་བསྐྱེད་རིམ་དང་། །མི་རྟོག་སྟོང་ཉིད་སྒོམ་པའི་རྫོགས་རིམ་གཉིས། ། ༤༤ གཅིག་དང་ཐ་དད་འཛིན་པའི་མགོ་བོ་འཁོར། །ད་ནི་རང་རིག་ངོ་བོ་ལྷ་སྐུར་ཤར། །ལྷ་སྐུ་བསྒོམ་ཀྱང་མི་རྟོག་སྟོང་པ་ཉིད། །མི་རྟོག་སྟོང་ཉིད་ལྷ་སྐུའི་ཞལ་ཕྱག་བཀྲ། ། ༤༥ དེས་ན་སྟོང་པ་ཉི་ཚེས་ཆོག་གོ་ཞེས། །བསྐྱེད་རིམ་དགོས་མེད་ནན་འགོག་སྡིག་ཅན་མིན། །ཟབ་གསལ་དབྱེར་མེད་རྣམ་ཀུན་མཆོག་ལྡན་པ། །བསྐྱེད་རྫོགས་དབྱེར་མེད་རྟོགས་པའི་རྣལ་འབྱོར་ཡིན། ། ༤༦ སྔོན་ཚེ་ཡེ་ཤེས་ཉམས་སུ་མྱོང་འདོད་པས། །ཁ་སྣའི་རླུང་རྣམས་འགོག་པའི་དཀའ་སྤྱད་དང་། །ཁུ་ཆུ་འཛིན་འདྲེན་འབད་པའི་སྡུག་བཙིར་ཀྱིས། །བྱ་བྱེད་དགག་སྒྲུབ་མང་པོའི་གཟེབ་ཏུ་ཆུད། ། ༤༧ ད་ནི་རྫོགས་ཆེན་རང་རིག་དོན་མཐོང་ཚེ། །རྩོལ་བྱས་ཐབས་ལམ་འབད་ལ་རག་མ་ལས། །གང་ཤར་ལམ་བླང་བདེ་བ་ཁོང་ནས་ཤར། །གནས་ལུགས་ལྟ་བ་འདི་ནི་གོ་ཆོད་པོ། ། ༤༨ བུ་ཕྲུག་མེད་ཆེད་ཁུ་ཆུ་བསྐྱིལ་ཐབས་ཙམ། །བྱས་ཀྱང་ཆགས་སྲེད་ཞེན་པ་རང་ག་ཅན། །བདེ་སྟོང་གནས་ལུགས་རང་ཞལ་མ་གཟིགས་པའི། །མི་ངན་ཐབས་ལམ་ཁ་གཡར་ཡ་ཕོ་མིན། ། ༤༩ འཕོ་མེད་བདེ་ཆེན་འབྲས་བུར་དམིགས་པ་ཡི། །ཀུན་རྫོབ་རྒྱུ་ཡི་ཐིག་ལེ་སྤེལ་སྦྱངས་ཀྱང་། །རིག་པའི་རང་རྩལ་སྒྱུ་མ་ཙམ་དུ་མྱོང་། །ཞེན་སྤང་ཞེན་ལྡན་ཐབས་ལམ་རྣལ་འབྱོར་ཡིན། ། ༥༠ སྔོན་ཚེ་མི་རྟག་འཆི་ལ་ཆེས་འཇིགས་མཐུས། །ད་ནི་འཆི་བ་རྣམ་རྟོག་ཉིད་དུ་རྟོགས། །རྣམ་རྟོག་སྟོང་པ་སྟོང་ཉིད་རིག་པའི་སྙིང་། །རིག་པ་ཆོས་ཀྱི་སྐུ་རུ་ཐག་ཆོད་པས། ། ༥༡ རྣམ་རྟོག་ལས་གཞན་འཆི་བྱ་འཆི་བྱེད་བྲལ། །དེས་ན་འཆི་བདག་བདུད་ཁྱོད་སྒྲ་ཆེ་ཡང་། །དགའ་དང་ཧ་ཅང་ཆེ་ཆེས་འཇིགས་སྐྲག་མེད། །བློ་བདེ་ཁོང་ནས་རྙེད་པའི་རྣལ་འབྱོར་ཡིན། ། ༥༢ ཨེ་མ་རྩ་བའི་བླ་མའི་ཐུགས་རྗེ་ལ། །བརྟེན་ནས་རང་གི་ཉམས་མྱོང་རྟོགས་པའི་ཚུལ། །དེ་ལྟ་ན་ཡང་དེང་སང་དུས་དབང་གིས། །ཆོས་སྤུན་གཞོན་འགའ་ཚུལ་འདི་རྟོགས་པ་དཀོན། ། ༥༣ ཁ་ཅིག་གོ་བའི་ཉམས་མྱོང་བཟང་ཙམ་ལ། །བརྟེན་ནས་ཁ་འབྱམས་ཚིག་གིས་ཁྲོམ་གསེབ་ཏུ། །གསང་སྒྲོགས་འཕྱར་གཡེང་དམ་པ་གཞན་རྣམས་ལ། །སྨོད་བྱས་རང་ཉིད་མནར་མེད་དམྱལ་བ་བསྒྲུབ། ། ༥༤ ཁ་ཅིག་ཐོག་མར་དགེ་སྦྱོར་ཅུང་ཟད་སྐྱེས། །བར་དུ་བརྩོན་འགྲུས་དམན་པས་ཉམས་མྱོང་ཡལ། །ཐ་མ་ཆོས་མྱོང་བློ་དྲེད་ཁ་ལྟ་འཐོར། །གདེང་འཆའ་རང་གི་མགོ་བསྐོར་ངན་སོང་བསྒྲུབ། ། ༥༥ ཁ་ཅིག་ཉམས་མྱོང་ཙམ་ལ་ཆེད་འཛིན་ནས། །ཁམས་གསུམ་ས་བོན་དྲི་མ་གཏིང་ལ་ཞེན། །གཞན་དང་མཚུངས་མིན་སྙམ་པའི་ང་རྒྱལ་བརྟས། །ཡིན་ལུགས་མ་མཇལ་འཁོར་བའི་གནས་སུ་འཁྱམས། །༥༦ ཁ་ཅིག་རྟོགས་པ་ཕྱོགས་རེ་སྐྱེས་པ་ཡིས། །སེམས་ཀྱི་གནས་ལུགས་སྟོང་པའི་ཆ་མཐོང་སྟེ། །དགེ་སྡིག་རྣམ་རྟོག་མྱོང་བའི་སྟོང་ཞེན་གྱིས། །རྒྱུ་འབྲས་ཁྱད་གསོད་དུཿཁའི་གནས་སུ་ལྟུང་། ། ༥༧ དེ་སོགས་ངེས་པའི་དོན་རློམ་ངེས་དོན་གྱི། །སྒྲིབ་བྱེད་བདུད་ཀྱི་བར་ཆད་རྣམ་མང་པོ། །མདོ་རྒྱུད་དགོངས་པའི་གནད་ཕུགས་མ་ལོན་ཞིང་། །ཡིན་ལུགས་བླ་མའི་བཀའ་ཡིས་མ་ཟིན་པ། ། ༥༨ བདག་ལྟའི་སྐྱེ་བོ་ལས་རྐྱེན་དམན་པ་ལ། །གོལ་ཤོར་ནོར་འཁྲུལ་ཆེས་མོད་བདོ་ན་ཡང་། །བདག་ནི་རྩ་བའི་བླ་མ་ཐུགས་རྗེ་ཅན། །དྲན་མཆོག་འཁོར་ལོའི་དབང་ཕྱུག་བདེ་བ་ཆེ། ། ༥༩ སྲིད་ཞིའི་གདུང་སེལ་ཀུན་ཏུ་བཟང་པོའི་ཞལ། །དང་པོའི་མགོན་པོ་མཆོག་དེའི་བྱིན་རླབས་མཐུས། །གོལ་ཤོར་ལོག་ནོར་དབང་དུ་མ་གྱུར་པས། །གནས་ལུགས་རང་ངོ་རིག་པ་རྗེན་པར་འཕྲོད། ། ༦༠ རྣལ་འབྱོར་རིམ་ལས་དམན་དོན་གཏན་ཕབ་རྟོགས། །བར་མ་ཚུལ་བཞིན་ཉམས་ལེན་གོང་མའི་དོན། །ཡིན་ལུགས་མ་འཁྲུལ་བློ་དེས་མཐར་ཐུག་པ། །རྒྱལ་བའི་ཡེ་ཤེས་བཞུགས་ཚུལ་དེ་ཉིད་གོ ། ༦༡ དེ་ལྟར་གོ་ཤེས་ཉམས་མྱོང་རྟོགས་པ་ཡང་། །ཐ་དད་མ་དམིགས་རང་རིག་གཅིག་པུའི་གཤིས། །ལེགས་པར་རྟོགས་ཀྱང་རང་གིས་བགྲོད་པ་རྣམས། །སྐལ་བས་ཉམས་རྟོགས་མ་འདྲེས་འཇའ་ལྟར་བཀྲ། ། ༦༢ དེས་ན་ནོར་འཁྲུལ་སྐྱོན་མེད་སེམས་པ་ཡི། །ཉམས་སུ་མྱོང་བ་རྟོགས་པ་ཇི་བཞིན་པ། །བླ་མའི་བྱིན་རླབས་མཐུ་ཡིས་ཐོབ་པ་གང་། །ཆ་ཤས་བཀའ་དྲིན་དྲན་བཞིན་གླུ་རུ་བླངས། ། ༦༣ ཨེ་མ་ལྟེམ་རྐྱང་མེད་པའི་དད་མོས་ཀྱིས། །རྩ་བའི་བླ་མར་ཆོས་སྐུར་བལྟས་པ་འདི། །ཀུན་གོ་གཅིག་གིས་ཆོད་པའི་གོ་ཆོད་དོ། །གོ་ཆོད་ཁྱེད་ཀྱིས་གཅིག་ཤེས་ཀུན་ཀྱང་གྲོལ། ། ༦༤ དེ་ལྟར་གནས་ལུགས་འོད་གསལ་དོན་དམ་གོ །ཉམས་སུ་མྱོང་བ་བླ་མའི་མཐུས་སྐྱེས་ཀྱང་། །ད་དུང་རིག་ངོར་མཉམ་རྗེས་རོ་མཉམ་དུ། །ཐུན་མཚམས་ཡེ་ནས་དབྱེར་མེད་གཅིག་མ་གྱུར། ། ༦༥ འདི་ཕྱི་བར་དོ་རྣམ་རྟོག་ཡིན་མྱོང་ཡང་། །འོད་གསལ་མ་བུ་གཅིག་ཏུ་ཞལ་མ་མཇལ། །དཔེ་ཡི་འོད་གསལ་རྒྱུད་ལ་མྱོང་ན་ཡང་། །གདོས་སྣང་སྒྱུ་ལུས་མ་གྱུར་རྩལ་མ་རྫོགས། ། ༦༦ དེ་ཕྱིར་བསམ་པ་ལྷག་མེད་མ་གྱུར་ཏེ། །སླད་མར་རྩེ་གཅིག་སྒྲུབ་ལ་བརྩོན་པ་ཡིས། །བསྐྱེད་འབྲས་ལྷ་ཡི་ཕྱག་རྒྱ་མངོན་དུ་གྱུར། །ཐབས་ཀྱི་གཡོ་བ་དབུ་མར་ཞུགས་ནས་ཐིམ། ། ༦༧ ཁྱད་པར་མོས་གུས་མཐུ་ཡིས་དཀྱིལ་འཁོར་གཙོ། །བླ་མའི་བྱིན་རླབས་ལྷག་མེད་རྩལ་ཆེན་རྫོགས། །སེམས་དབེན་དཔེ་ཡི་འོད་གསལ་མཐར་ཐུག་པ། །ཉིན་མཚན་མཉམ་བརྗེས་འཁོར་ཡུག་འོད་གསལ་འདྲེས། ། ༦༨ དོན་དམ་འོད་གསལ་སྐད་ཅིག་མངོན་དུ་བྱས། །འཕོ་ཆེན་ཟུང་འཇུག་སྐུ་ཐོབ་སྙིང་ནས་སྨོན། །གཞན་ཡང་རྣམ་འདྲེན་རྫོགས་སངས་རྒྱས་པའི་ས། །རྡོ་རྗེ་གདན་དུ་བྱང་ཆུབ་ཤིང་དབང་བལྟ། ། ༦༩ དང་པོའི་མགོན་པོ་གྲུབ་པའི་དབང་ཕྱུག་ཆེ། །ཛྭ་ཀིའི་བླ་མ་མཆོག་སོགས་ཡེ་ཤེས་སྐུ། །བརྙེས་པ་མང་པོའི་ཞལ་མཇལ་གསུང་མྱོང་ཞིང་། །འཆི་བ་མེད་པའི་ལམ་མཆོག་ཡོངས་གྲུབ་པས། ། ༧༠ དཔག་མེད་འགྲོ་བ་མང་པོའི་དོན་སྤྱོད་པར། །རྗེས་ཀྱི་བསམ་སྨོན་དེ་འོ་འགྲུབ་གྱུར་ཅིག །འོན་ཀྱང་གོང་བགྲོད་ལྟོས་གཞི་རེ་དོགས་དང་། །གནས་ཡུལ་བསྒྲོད་འདོད་ཞེན་པ་རང་རྒྱུད་པ། ། ༧༡ མེད་པས་དེས་ན་སྒྱུ་མའི་འཕྲུལ་འཁོར་བཞིན། །གང་ཤར་བློ་ལ་གཏད་མེད་ཅི་བདེ་ཡིན། །གཞན་ངོར་ཡེ་ཤེས་ཐོབ་མཐོང་དག་སྣང་དང་། །མ་དག་ཉོན་མོངས་ཆེ་བའི་སྐྱེ་བོ་སོགས། ། ༧༢ ཇི་ལྟར་མཐོང་ཡང་རང་ངོ་ཆོས་ཉིད་ཀྱི། །དབྱིབས་ལས་མ་གཡོས་བྱ་བྲལ་བྱ་བ་ཅན། །རང་གི་རང་ཉིད་དཔྱད་བཟོད་མ་ཡིན་ཏེ། །འདི་ཡིན་གཏད་པ་མེད་པའི་སྨྱོན་པ་ཡིན། ། ༧༣ གང་ལྟར་ལས་སྨོན་རྣམ་པར་དག་པའི་མཐུས། །སྐྱེས་བ་ཀུན་ཏུ་གུ་རུས་རྗེས་སུ་བཟུང་། །སྐྱེ་འཕྲེང་དུ་མར་རིམ་གཉིས་དྲོད་ཚད་ཐོབ། །འབྲེལ་ཚད་དོན་ལྡན་ནུས་པའི་སྔགས་པར་རློམ། ། ༧༤ དེ་ལྟ་ན་ཡང་རང་གི་རྟེན་འབྲེལ་དང་། །ཕ་རོལ་འགྲོ་བ་སོ་སོའི་ལས་སྐལ་གྱིས། །ཁ་ཅིག་དམ་པ་མཆོག་ཅེས་བསྔགས་ཤིང་བསྟོད། །ཁ་ཅིག་བདུད་ཅེས་སྨད་ཅིང་ཆེས་གཤེ་ཡང་། ། ༧༥ རང་གི་ངོ་བོར་རོ་མཉམ་ཉིད་ཐོབ་པས། །བསྟོད་སྨད་ཚིག་ལ་ཞེན་དེ་འཁུ་འཕྲིག་གིས། །བ་སྤུ་གཅིག་ཀྱང་གཡོ་བའི་གོ་སྐབས་མེད། །ཡིན་ལུགས་དཔྱད་མེད་རང་བློ་ངལ་བསོ་བདེ། ། ༧༦ གཞན་གྱིས་ཧ་ཅང་བསྟོད་དང་ཧ་ཅང་སྨད། །ཚབ་འདི་ཆེས་པས་བར་མ་སོ་སོའི་སྐྱེ། །མིན་པའི་ཚད་མ་དེ་ཡིས་ངེས་འགྱུར་མོད། །གང་ལྟར་དགག་སྒྲུབ་མེད་པའི་སྔགས་འཆང་བདེ། ། ༧༧ དེ་སྐད་བོད་ཡུལ་ཉི་འོག་མདོ་ཁམས་ཀྱི། །ནོར་འཛིན་དབུས་འགྱུར་ཀཿཐོག་རྡོར་གདན་ལྷོ། །གཅོང་རོང་ངམ་གྲོག་ཆུ་ཀླུང་དྲག་པོ་འཁྲུགས། །ཚེར་མའི་ནགས་ཚལ་གཅན་གཟན་གཏུམ་པོ་རྒྱུ། ། ༧༨ མི་རྣམས་སྲིན་པོ་ཇི་བཞིན་སྲོག་གཅོད་བརྩོན། །གདུལ་དཀའི་གནས་དེར་འདུལ་བྱེད་རྨད་བྱུང་བ། །བླ་མེད་སྔགས་བསྟན་མ་ནུབ་དར་ཕྱོགས་དེར། །འོད་གསལ་ལྷ་ལྡིང་རྔུ་ཡི་རིགས་སྐྱེས་ཤིང་། ། ༧༩ ཤཱཀྱའི་དགེ་བསྙེན་ཚངས་སྤྱོད་གོས་དཀར་འཆང་། །གཙུག་ན་དབང་རྟགས་རལ་པའི་གདེང་ཀ་ཅན། །ཡ་ང་བག་ཚ་ཉུང་བའི་སྨྱོན་པ་ཆེ། །ཤ་ཆང་བུད་མེད་ཚོགས་ལ་ལོངས་སྤྱོད་པ། ། ༨༠ གྲུབ་ཆེན་ནམ་སྙིང་མཚན་གྱིས་བྱིན་བརླབས་པའི། །སྔགས་ཀྱི་རིག་འཛིན་ཚེ་དབང་ནོར་བུ་ཞེས། །ཨོ་རྒྱན་གུ་རུས་གསང་བའི་མིང་བཏགས་པ། །འོད་གསལ་བདེ་གཤེགས་སྙིང་པོ་གཏེར་བཞད་རྩལ། ། ༨༡ གང་དེས་བོད་ཡུལ་སྟོད་ཕྱོགས་མངའ་རིས་སྨད། །བལ་བོད་ས་མཚམས་མང་ཡུལ་གྲུབ་པའི་གནས། །ས་ཡི་ཐིག་ལེ་སྐྱིད་གྲོང་གནྡྷོ་ལ། །རང་བྱུང་སྤྲུལ་པའི་འཕགས་མཆོག་སྤྱན་རས་གཟིགས། ། ༨༢ བདེ་ལྡན་དབང་ཕྱུག་ཝ་ཏིའི་སྤྱན་སྔ་རུ། །མཎྜལ་ཚུལ་དུ་ཉམས་རྟོགས་ཆ་ཤས་ཙམ། །ལྕགས་ཕག་བྱང་ཆུབ་དུས་ཆེན་ས་ག་ཡི། །ཡར་ཚེས་བཟང་པོ་བཅུ་གཉིས་སྔ་ཆ་རུ། ། ༨༣ རབ་ཏུ་གུས་པས་གླུ་དབྱངས་བླངས་པ་དེ། །སྨྲས་པའི་ཡིག་རིས་སྐྱེ་བ་དུ་མ་ཞིག །ལས་སྨོན་གྱིས་འབྲེལ་སྐལ་ལྡན་སྙིང་གི་བུ། །ཨོ་རྒྱན་འཕྲིན་ལས་བསྟན་འཛིན་དཔལ་དེས་བགྱིས། ། ༨༤ ཚིག་འདི་དྲེགས་པ་ང་རྒྱལ་ཆེ་འདོད་སོགས། །ཆོས་བརྒྱད་སྣང་བས་དབེན་པར་སྙམ་ན་ཡང་། །ལོག་རྟོག་ཅན་གྱི་ཟོག་དང་ང་རྒྱལ་ཚིག །བཟུང་ཡང་ལས་མེད་བྱང་ཆུབ་རྒྱུར་འགྲོ་ཤོག ། ༨༥ རང་གི་ངང་ཚུལ་གཞན་བློར་ཤོངས་དཀའ་ཡང་། །འགའ་ལ་ཕན་སྙམ་ལྷག་བསམ་བཟང་པོ་ཡིས། །ཉམས་ལེན་མྱོང་བ་ཆ་ཤས་སྨྲས་པ་འདིས། །སློབ་མའི་མོས་གུས་རྟེན་འབྲེལ་རྒྱས་གྱུར་ཅིག ། ༨༦ ནོངས་གཞན་མ་མཆིས་གསང་བ་སྒྲོགས་པ་ཡི། །ཉེས་སྐྱོན་སྲིད་ན་ཡེ་ཤེས་སྤྱན་ལྡན་ལ། །མཐོལ་བཤགས་འདི་ཕྱི་བར་དོར་སྒྲིབ་མེད་པར། །དག་ཚངས་ཡིད་བཞིན་མཆོག་ཏུ་དབུགས་དབྱུང་གསོལ། ། ༨༧ དགེ་མཆིས་མཁའ་མཉམ་འགྲོ་ལ་བསྔོ་བའི་མཐུས། །ཡིན་ལུགས་མ་འཁྲུལ་ལྟ་བ་ཚུལ་བཞིན་རྟོགས། །ས་ལམ་ཡོན་ཏན་བྲི་མེད་གོང་དུ་འཕེལ། །ཀུན་ཏུ་བཟང་པོ་ཅི་འདྲ་དེ་ཐོབ་ཤོག །དགེའོ། །དགེའོ། ། དགེའོ། ། དེ་ལྟར་རང་གི་ཉམས་སུ་མྱོང་བ་འགའ་ཞིག་འཕགས་པ་ཝ་ཏིའི་སྤྱན་སྔར་མཎྜལ་ཚུལ་དུ་གླུར་བླངས་པ་སྟེ། སླར་གཙང་ལ་སྟོད་རྒྱལ་གྱི་ཤྲཱིའི་ནུབ་རྒྱུད། གྲུབ་པའི་བསྟི་གནས་བྷུ་ཊ་ཚིགས་བཅད་ཅི་རིགས་བསྲེས་ཤིང་ཞུ་དག་ཡང་བྱས་པའི་ཡི་གེ་པ་ནི་སྔ་མི་དེ་ཉིད་དོ། །འདི་ཉིད་གྲུབ་མཐའ་གཞན་དུ་ཁ་བསྐུ་བ་ཚིག་བསྒྱུར་བཅོས་སླད་འདྲ་མིན་བཅོས་པ་དང་། རང་ལ་ཉམས་རྟོགས་མ་སྐྱེས་པར་འདི་མ་གཞི་འཐུ་རྩོམ་པ་བྱས་ན། དེའི་སྲོག་རྩའི་སྦུ་གུ་དམ་ཅན་དྲེགས་པ་རྣམས་ཀྱིས་ཆོད་ཅིག །ས་མ་ཡ་དམ་རྒྱ། རང་མ་མོས་པ་རྣམས་ཀྱི་ཡི་གེ་འདི་ལ་གཙིགས་སུ་བཟུང་ཞིང་ལོག་པར་ཐེ་ཚོམ་ཆེ་བ་རྣམས་ལ་གསང་བར་བྱའོ། ། ༈ ཞལ་གདམས་མཚུངས་མེད་བླ་མའི་ཞལ་ལུང་།ཨ་ཧོཿ གཞི་ལྟ་བའི་གནས་ལུགས་སྐད་པ་དེ། །འགྲོ་དུས་ཁམས་དབང་སྐལ་དུ་མའི་དོན། །རྒྱལ་བ་རྣམས་ཀྱིས་དཔག་མེད་ཉིད་གསུངས་ཏེ། །མཐོ་ཐེག་དགུའི་ལྟ་བ་ཞེས་གྲགས་ཀྱང་། །མཐར་ཐུག་པ་ཉིད་ནི་གདོད་མའི་གཤིས། །སངས་རྒྱས་ཉིད་ཀྱིས་ཀྱང་མ་གཟིགས་ཤིང་། །དཔེ་ཚིག་བརྗོད་བློ་བསམ་ཡུལ་འདས་ལ། །ལམ་འཁོར་འདས་ཡོངས་ཀྱི་འཆར་གཞི་དེ། །ཕྱག་ཆེན་པོས་གཉུག་མ་ལྷན་ཅིག་སྐྱེས། །རྫོགས་ཆེན་པོས་ཀ་དག་གནས་ལུགས་ཞེས། །དོན་མཐའ་མེད་དབུས་མེད་རྟག་ཆད་མེད། །ཡིད་བྱེད་པ་ཀུན་བྲལ་མཐའ་བཞི་འདས། །ཡུལ་གཞི་མེད་རྩ་བྲལ་རྩ་བ་སྟོང་། །དོན་འདི་ཞེས་སུས་ཀྱང་མཚོན་མེད་ཅིང་། །རྣམ་ཀུན་ཏུ་མཆོག་ལྡན་བདེ་གཤེགས་སྙིང་། །ཕྲ་གསལ་ལ་ཟབ་ཞི་འོད་གསལ་བ། །དེ་གཞི་གནས་སྐབས་སུ་ཀ་དག་ཅེས། །སྐྱོན་ཀུན་བྲལ་སྐྱོན་ཡོན་མིང་ཡང་མེད། །གཞི་སྣང་བ་ལྷུན་གྲུབ་ཅེས་བྱ་བ། །དག་མ་དག་ཀུན་གྱི་འཆར་གཞི་གྲུབ། །དོན་ངོ་བོ་རང་བཞིན་ཐུགས་རྗེ་ཞེས། །ངོ་བོ་ལ་འཁྲུལ་པའི་མིང་ཡང་མེད། །རང་བཞིན་དང་གྲོལ་འཁྲུལ་ཐུགས་རྗེ་སྟོན། །ཡང་དག་ལ་བརྗོད་བྱ་ཀུན་ལས་འདས། །སྐྱེ་འགག་དང་འགྲོ་འོང་གནས་ཀུན་བྲལ། །དེ་གདོད་མའི་གནས་ལུགས་གཞི་ཞེས་བྱ། །ལྟ་བ་ཞེས་ཐ་སྙད་མིང་དུ་གྲགས། །ལམ་བསྒོམ་པ་རུ་སྐད་པ་དེ་ཉིད་ཀྱང་། །དོན་དྲིལ་ན་རང་སེམས་གཉུག་མ་འདི། །གཟོ་བཅོས་མ་སྐྱོན་གྱིས་ཡང་མ་བསླད། །ཡིད་ཆེད་གཉེར་བསྒོམ་རྒྱུ་ཅི་ཡང་མེད། །ཡང་འཁྲུལ་བའི་དབང་དུ་ཡང་མ་ཤོར། །འདས་མ་འོངས་རྣམ་རྟོག་བསུ་གཅོད་མེད། །དུས་ད་ལྟའི་ཤེས་པར་བརྟག་ཞིབ་བྲལ། །དེ་རང་བབ་ཡེངས་བསྒོམ་བྲལ་བར་བཞག །འདི་གསལ་ལོ་སྟོང་ངོ་བསམ་དུ་མེད། །གནས་འགྱུ་ཞེས་སྤང་བླངས་དགག་སྒྲུབ་བྲལ། །རིག་རང་ངོ་གཉིས་ལ་མ་བཅོས་འཇོག །འདི་རྒྱལ་བ་ཡོངས་ཀྱི་གཤེགས་ཤུལ་ལགས། །དོན་ངོ་བོར་དེ་ལས་གཞན་མེད་ཀྱང་། །དེ་གོ་མྱོང་རྟོགས་གྲོལ་གནས་ལུགས་ཀྱི། །ལམ་རྣལ་འབྱོར་བཞི་ཞེས་དྭགས་པོས་བཞེད། །བཀའ་རྫོགས་ཆེན་སེམས་སྡེར་ཉམས་བཞིར་གྲགས། །ཕྱི་ཚོགས་དྲུག་རྐྱེན་གྱི་བསྐྱོད་མེད་པ། །གནས་དེ་ཉིད་རྩེ་གཅིག་རྣལ་འབྱོར་དང་། །ནང་གཉིས་འཛིན་འཕྲོ་རྒོད་བྱིང་རྨུག་གི །རྒོལ་མེད་པ་སྤྲོས་བྲལ་རྣལ་འབྱོར་རོ། །བར་སྣང་སེམས་འཁོར་འདས་གཉིས་ཆོས་ཀུན། །མཉམ་གྱུར་ལ་དུ་མ་རོ་གཅིག་མྱོང་། །ཆོས་ཆོས་ཅན་བྱ་བ་ཀུན་ཟད་པར། །ལྷུན་གྲུབ་པས་བསྒོམ་མེད་ཡིད་ནོ་སྐད། །ཆོས་ཕྱག་རྫོགས་གཉིས་ཀྱི་ལམ་གཞུང་སྟེ། །མདོ་ད་ལྟའི་ཤེས་པ་འདི་ཉིད་ལས། །ཡུལ་གང་བགྲོད་བློ་ཡིས་ལྟོས་གཞི་མེད། །དོན་རང་རིག་ཅོག་བཞག་གཅིག་ངང་རྫོགས། །ཕྲ་རགས་སྦོམ་སེམས་ཀྱི་རྣམ་རྟོག་ཀུན། །རྐྱེན་རང་ཁར་བཏང་བ་ཡང་མི་འཚལ། །དེ་སྤང་ནས་འཇོག་པ་ཡང་མ་ལགས། །དོན་གཉེན་པོ་སྟོན་རྒྱུ་ཡང་མ་མཆིས། །དེ་གནས་ནས་བསྐྱུར་བ་ཡང་མིན་ཏེ། །ཁམས་རང་བབ་ངོ་ལ་རང་ཞལ་བལྟ། །སེམས་མ་རིག་འཇམ་དབང་མ་ཤོར་ལ། །དོན་མ་བཅོས་གཉུག་མ་ཉིད་དུ་ཞོག །མཚོ་མཚོ་རླབས་ཆུ་ལ་རོ་གཅིག་ལྟར། །སེམས་སེམས་བྱུང་རོ་གཅིག་ཆོས་སྐུར་འདྲེས། །བདེ་མི་རྟོག་གསལ་ལ་མི་ཞེན་ཅིང་། །སེམས་རང་ངོ་རྣལ་མ་ངང་ཉིད་ལ། །སྒོམ་ཡིན་མིན་ཐེ་ཚོམ་ཡོངས་སུ་སྤངས། །ཞི་གནས་ཞེས་གནས་ཆེའི་རྒྱ་མཚོ་ལ། །ལྷག་རང་མཐོང་བྱུང་བ་གཟའ་སྐར་བཀྲ། །འགྱུ་འགྱུ་བྱ་ཡུལ་མེད་རང་ངོ་ཤེས། །ཤེས་ཤེས་བྱའི་རྣམ་རྟོག་དབྱིངས་སུ་སྤུར། །འདི་བརྗོད་བྲལ་ངང་ལ་རྟག་ཏུ་རྩེད། །ལམ་གེགས་སེལ་བླ་མར་མོས་གུས་བསྣུན། །འགྲོ་གཞན་ཕན་སྙིང་རྗེ་རྟག་ཏུ་སྐྱོང་། །དུས་ཀུན་ཏུ་ཡེངས་མེད་གཉུག་མར་བཞག །འདི་བསྒོམ་བྱ་ཀུན་སྙིང་སྒོམ་བྱེད་བྲལ། །དོན་རང་རིག་གཉུག་མའི་བབས་ཉིད་དང་། །བཅོས་མེད་པར་བཞག་འདི་སྒོམ་པའི་མཆོག །དེ་བོགས་འདོན་སྤྱོད་པ་ཞེས་བྱ་ཡང་། །ཕྱི་འགྲོ་བའི་དངས་འདྲེན་འདུལ་ཁྲིམས་བསྲུང་། །ནང་ལྷ་སྔགས་ཏིང་འཛིན་རོལ་པ་བརྩོན། །གསང་ཐབས་ལམ་རླུང་ཐིག་གནད་དུ་བསྣུན། །དེ་ཁོ་ན་ཕྱག་རྫོགས་ཉམས་ལེན་དྲིལ། །ལས་རྒྱུ་འབྲས་སྤང་བླང་ཤན་དབྱེ་ཞིང་། །ཆོས་སྲོག་རྩ་རྩ་བ་དམ་ཚིག་ཞིབ། །སྤྱོད་ཀུན་ཀྱང་དོན་གཉིས་སྒྲུབ་དེར་འདུས། །མིང་འབྲས་བུ་བཏགས་པའི་སྒྲ་ཆེ་ཡང་། །སྔར་མེད་གཅིག་གསར་དུ་བྱུང་མེད་དེ། །རིག་རང་ངོའི་ཡོན་ཏན་རྩལ་རྫོགས་ཚེ། །སྐུ་ཡེ་ཤེས་ཞེས་བྱ་འབྲས་བུར་བརྗོད། །དོན་རེ་མེད་དོགས་མེད་འབྲས་བུའི་གདེངས། །ཆོས་བརྗོད་བྲལ་གནས་ལུགས་ལྟ་བའི་གདེང་། །སེམས་མ་བཅོས་ཅོག་བཞག་སྒོམ་པའི་གདེང་། །རྩལ་གང་ཤར་ལམ་ཁྱེར་སྤྱོད་པའི་གདེང་། །མིང་གཞི་ལམ་འབྲས་བུར་གྲགས་པ་ཀུན། །ཡུལ་ཐ་མལ་ཤེས་པ་གཉུག་མ་ཉིད། །རིག་མ་བཅོས་རང་ངོ་འདི་རང་སྟེ། །བློ་བཅས་བཅོས་ཐ་སྙད་དབྱིངས་སུ་ཡུལ། །ཨེ་མ། མཆོག་དམན་པ་དེ་ཡི་གསུང་ངོ་ཉིད། །ལྕོགས་མ་སྤོབས་པས་ན་མཚོན་ཙམ་དུ། །གཞི་ལམ་འབྲས་ངང་ཚུལ་ས་བོན་ཙམ། །རྗེ་མཚུངས་མེད་བླ་མའི་ཞལ་ལུང་ཉིད། །ཐོས་མཐུ་ཡི་རང་ཉམས་གོ་རྟོགས་ལས། །ཤར་བཞིན་དུ་གང་ཤར་ཆུ་བབ་ཉིད། །གླུར་འབུལ་བ་དགོངས་དོན་ལ་འཇུག་ཅིང་། །འགྲོ་དོན་དུ་ཞབས་པར་བརྟན་གྱུར་ཤོག ། ཞེས་རྣམ་འདྲེན་རྒྱལ་བ་འོད་དཔག་མེད་དངོས་ཞྭ་དམར་བ་ཆོས་ཀྱི་དོན་ཀུན་གྲུབ་པ་ཞབས་ཀྱི་རིགས་ཀྱི་གཅུང་ཆོས་ཀྱི་སྲས་དམ་པ་ཟྭ་ཕུག་སྤྲུལ་སྐུ་ཀརྨ་གར་དབང་དོན་གྲུབ་ཀྱིས་བཀྲ་ཤིས་པའི་རྟགས་ཀྱིས་ཡོངས་སུ་སྤྲས་པའི་ལྷ་རེག་གངས་རིའི་མདོག་ཅན་བཅས་ཞལ་གདམས་ཞིག་དགོས་ཞེས་ཕེབས་པ་ལྟར། འཕྲལ་དེར་མདོ་ཁམས་ཀཿཐོག་གི་ལྷོ་ཕྱོགས་ནགས་ལྗོངས་སུ་སྐྱེས་པའི་ལྷ་རིགས་ཀྱི་སྔགས་འཆང་རྒྱལ་ཁམས་པ་ཚེ་དབང་ནོར་བུ་གྲུབ་མཆོག་དབང་པོའི་སྡེ་ཞེས་པས་ས་སྤྲེལ་ཟླ་བ་དང་པོའི་ཆོ་འཕྲུལ་གྱི་ཚེས་བཟང་པོར་ར་ལ་ནས་ཕུལ། ༈ ཞལ་གདམས་མདོ་རྒྱུད་ཐེག་པའི་སྙིང་པོ།ཨེ་མ། སྙན་ལེགས་པར་གསོན་དང་རྣལ་འབྱོར་པ། །སྔོན་རྣམ་དཀར་ལས་ཀྱིས་མངའ་རིས་སྟོད། །ཡུལ་གློ་བོར་དལ་འབྱོར་ཡང་དག་ཐོབ། །ལས་བཟང་འཕྲོ་དམ་ཆོས་སྔགས་དང་མཇལ། །སྔོན་ཟབ་དགུ་ཐོབ་པ་རྗེས་ཡི་རང་། །མགོན་དེ་རྣམས་གསུང་གསང་བདུད་རྩི་མཆོག །ཐོབ་ལས་ལྷག་བདག་གི་ཞལ་གདམས་ཅི། །འོན་ཀྱང་ཡང་གསུང་ངོ་མ་ལྕོག་ཙམ། །ཚིག་ཉུང་ངུ་མཚོན་པ་ཞིག་འབུལ་ན། །ཆོས་མདོ་རྒྱུད་ཐེག་ཀུན་སྙིང་པོ་ནི། །སྐྱབས་ཀུན་གཙོ་བླ་མར་རག་ལས་ཤིང་། །དེ་དགྱེས་ཐབས་ལས་ཀུན་དང་དུ་ལོངས། །སྙིང་རུས་པའི་གཏིང་ནས་མོས་གུས་བསྐྱེད། །དུས་ཀུན་ཏུ་བྱིན་བརླབ་དབང་བཞི་ཞུས། །དམ་སེལ་མེད་སྙིང་སྲོག་ལྟར་དུ་བཅའ། །མཐར་རང་སེམས་བླ་མ་དབྱེར་མེད་བལྟ། །འདི་གནད་འགག་ཀུན་གྱི་ཆེ་ཤོས་ཡིན། །ལམ་བསྐྱེད་རྫོགས་རྫོགས་ཆེན་གང་བསྒོམ་ཡང་། །འདི་མེད་ཐབས་མེད་དོ་མོས་གུས་གཅེས། །ལྷ་བསྐྱེད་རིམ་སྣང་སྟོང་ཆུ་ཟླ་ལྟར། །བསྒོམ་གསུང་ཡང་ཡང་དག་ངོ་བོ་ལ། །སེམས་སྐྱེ་མེད་གནས་ལུགས་རྟོགས་པའི་མི། །ལྕགས་ཕ་བོང་སྒོམ་ཀྱང་གོལ་པ་མེད། །དོན་སྐྱེ་མེད་མ་གཏོགས་བློ་ཆུང་འགའ། །ལྷ་སྣང་སྟོང་བསྒོམ་ཡང་གཟུགས་མེད་ཁམས། །དོན་དེས་ན་ཞེན་འཛིན་ཡུལ་མེད་པའི། །ཆོས་སྐྱེ་མེད་རྩལ་འདོན་བསྐྱེད་རིམ་གྱིས། །ལམ་རྫོགས་རིམ་རྩལ་འདོན་རླུང་ཐིག་ཡང་། །མདོར་དྲིལ་ན་སྟེང་སྒོ་འོག་སྒོ་གཉིས། །གྲོལ་ཐབས་ལམ་གནད་དུ་བསྣུན་པ་སྟེ། །སྟེང་གཏུམ་མོ་དམ་ཚིག་ཕྱག་རྒྱ་ཡི། །རྩ་མདུད་བཀྲོལ་ཞུ་བདེ་ཉམས་སུ་ལོངས། །འོག་ཐབས་ལམ་བདེ་ཆེན་སྐད་པ་ཡང་། །བུམ་བཟང་མཚུངས་དབྱིབས་གསུམ་རྣལ་འབྱོར་བསླབ། །གསང་དབང་མཚུངས་དཀར་ཆ་དཀྱིལ་འདྲེན་བཀྲམ། །ཤེར་དབང་མཚུངས་དཀར་དམར་གཅིག་ཏུ་བསྲེས། །ཀུན་ཚིག་དབང་དང་བསྟུན་རྫོགས་རིམ་གཅེས། །ལམ་རྫོགས་པ་ཆེན་པོར་གྲགས་པ་ཡང་། །མདོར་དྲིལ་ན་ཁྲེག་ཆོད་ཐོད་རྒལ་གཉིས། །ཁྲེད་ཆོད་ཅེས་དེ་ནི་རང་རིག་དོན། །བསམ་དམིགས་ཡུལ་འཛིན་པ་ཀུན་དང་བྲལ། །དོན་མཚོན་མེད་བརྗོད་མེད་བློ་བྲལ་བ། །དེ་ཅོག་བཞག་བཞི་ཡི་ངང་དུ་སྐྱོངས། །ཐོལ་རྒལ་ཞེས་སྒྲོན་དྲུག་སྣང་བ་ཡང་། །བརྡ་རྟགས་དོན་དཔེ་ཡིས་མཚོན་པ་སྟེ། །དོན་རང་རིག་རང་མདངས་དབྱིངས་སུ་སྣང་། །འདི་ཨ་ཏི་རྫོགས་ཆེན་ཁྱད་ཆོས་ཡིན། །ཆོས་གཞན་གྱི་རླུང་རྟགས་བཅུ་པོ་དང་། །ཆ་མཚུངས་དང་ཁྱད་པར་འདི་ཉིད་འཕགས། །འོན་ཁྲེག་ཆོད་རྟོགས་གདེང་མ་ཆུད་པར། །སེམས་ཞེན་འཛིན་སྣང་བས་འོད་མདངས་ལ། །བལྟས་གྱུར་ན་གཟུགས་ཁམས་ས་བོན་ཆ། །མཚུངས་གྱུར་ཞེས་ཀློང་གསལ་རྒྱུད་ནས་གསུངས། །སྤྱིར་དེང་སང་བསྟན་པ་སྙིགས་དུས་འདིར། །ཆོས་ཕྱག་རྫོགས་སྙན་གྲགས་ཆེ་ན་ཡང་། །རང་གནད་འཁེལ་གཞན་ལ་འཆད་ནུས་ནི། །དཔེ་ཉིན་སྐར་ལྟ་བུར་དཀོན་པར་མཐོང་། །ལྷག་རྫོགས་ཆེན་གྲུབ་མཐའ་འཁྲུལ་མེད་པ། །གནད་ཡང་དག་མཁྱེན་པ་རེ་རེ་ཙམ། །དེ་བསམ་བཞིན་སྙིང་ནས་སྐྱོ་གྱུར་ཡང་། །འོན་བོད་འདིར་ལོ་གྲངས་བརྒྱ་བརྒྱ་ནས། །རྗེ་བི་མ་ལ་ཡི་རྣམ་འཕྲུལ་རེ། །འབྱོན་འགྱུར་ནས་རྫོགས་ཆེན་གསལ་བྱེད་གསུངས། །དེ་མྱུར་འབྱོན་སྨོན་ལམསྙིང་ནས་འདེབས། །གཞན་དུས་དང་རྣམ་ཀུན་ཐམས་ཅད་དུ། །རང་ངེས་འདྲོངས་བླ་མར་གསོལ་བ་ཐོབ། །དགོས་ཁྱེད་རང་ཚེ་སྔོན་ལས་འབྲས་ཀྱི། །རྗེ་རྟ་མཆོག་དངོས་གྱུར་སྟག་ཤམ་ཞབས། །ལས་འཕྲོ་བཟང་ལགས་པས་རྩ་བ་ཡི། །སྐྱབས་བླ་མ་ཀུན་འདུས་ངོ་བོར་བཟུང་། །ལས་རྒྱུ་འབྲས་བསླུ་མེད་ཞིབ་ཏུ་རྩིས། །སེམས་ཡེངས་མེད་དྲན་པ་རྟག་ཏུ་སྐྱོང་། །ཁོང་རྣལ་འབྱོར་མཆོག་དེས་བསྐུལ་བའི་ངོར། །ཚིག་དེ་སྐད་རྒྱལ་ཁམས་པ་དེས་སོ། ། མངའ་རིས་གློ་བོ་ཆུ་མིག་བརྒྱ་རྩ་ཕྱོགས་སུ་འཁྲུངས་པའི་རྣལ་འབྱོར་དབང་ཕྱུག་ཨོ་རྒྱན་ལྷུན་གྲུབ་རྒྱ་མཚོས་གསུང་གིས་བསྐུལ་ངོར་མདོ་ཁམས་ཀཿཐོག་ལྷོ་ཕྱོགས་སུ་སྐྱེས་པའི་ལྷ་རིགས་རྣལ་འབྱོར་པ་ཚེ་དབང་ནོར་བུས་བལ་ཡུལ་མཐིལ་དང་བལ་ཡུལ་ཚ་ཤོད་ཀྱི་མཚམས་ཀ་ཀཀྪོ་ཞེས་པའི་རྩེ་མོར་ས་སྤྲེལ་ནག་ཟླའི་ཚེས་ཉེར་གཉིས་ལ་སྐད་ཅིག་གང་དྲན་སྨྲས་པའོ། ། ༈ ཞལ་གདམས་འཕྲིན་གླུ་གུ་ཡངས་རྒྱལ་ཁམས།ཨ་ཧོཿ སྙན་དར་ཅིག་གསོན་དང་སྐལ་པ་ཅན། །སྙིང་ལྟ་བུར་དམ་ཚིག་བརྩོན་པ་ཅན། །ཕ་སྨྱོན་པ་གཟའ་གཏད་བྲལ་གྱུར་པ། །ཁོང་རྒྱལ་ཁམས་ཀྱི་འཁྱམས་པོ་གུ་ཡངས་པོ། །དཔལ་ཚེ་དབང་ནོར་བུ་གྲུབ་པའི་སྡེ། །གྲགས་དེ་ཡི་གླུ་དབྱངས་འདི་སྐད་ཐལ། །དུས་སྙིགས་མ་ལྔ་འདུས་ད་ལྟའི་སྐབས། །ཕྱི་ནང་གསང་གང་བལྟས་སྐྱོ་བའི་གནས། །སྤྱིར་མི་རྟག་ཆོས་ཅན་འདི་ཡིན་ཀྱང་། །དགོས་འཕོ་འགྱུར་མྱུར་འདི་ཡི་རེ་མུག །དུས་འདི་ལས་སང་ཕོད་བདེ་རེ་ཡང་། །རེ་བཞིན་དུ་མ་གྱུར་ཇེ་ཆེར་བསྔལ། །དཔོན་ཆེ་བཙན་རེས་མོས་འཕོ་འགྱུར་གྱིས། །ངོ་ལོན་དཀའ་མི་ཚེ་བྲེལ་བས་ཟད། །དེ་ལས་ཀྱི་ཕྱོགས་འཛིན་རེ་དོགས་ཤོར། །མཐར་དོན་མེད་སྒྱུ་མའི་ལྟད་མོ་འདྲ། །དགོས་སྦྱིན་བདག་གྲྭ་འཁོར་གཉེན་ཚན་ཡང་། །དུས་དབང་གིས་རྟག་ཅིང་བརྟན་བརླིང་དཀའ། །གཡོ་སྒྱུ་མེད་དྲང་པོ་རེ་རེ་ཙམ། །དམ་ཚིག་བསྲུང་ངོ་ལྐོག་མེད་པ་དཀོན། །རང་བསོད་ནམས་འཕེལ་བསྐྱེད་བྱུང་བ་ན། །མི་ཕལ་ཆེར་ནོམ་པ་སྤྱོད་ལ་འདུ། །རང་གདུལ་བྱ་རྒུད་པ་ཞིག་བྱུང་ན། །གྲོགས་གཅེས་བྱས་ཀུན་ཀྱང་སོ་སོར་བྲལ། །ལར་འདི་སྣང་ཟས་གོས་འབྱོར་པ་ན། །མི་ཀུན་གྱིས་བསྟོད་པའི་གནས་སུ་བྱེད། །ཆོས་ཚུལ་བཞིན་ངོ་བསྲུང་མེད་པ་ན། །མི་ཀུན་ཀྱང་དེ་ལ་སྡང་བར་བྱེད། །དེང་སྙིགས་དུས་ཚུལ་འདི་གང་བྱས་བྱས། །དོན་དེ་ན་བུ་ཡི་དོན་པོ་ཁྱོད། །གནས་བཀའ་བརྒྱུད་གོང་མའི་སྒྲུབ་ཁང་དུ། །ཚེ་འདི་སྣང་ཆོས་བརྒྱད་རྒྱབ་དོར་ནས། །ཕ་བརྒྱུད་པའི་བླ་མའི་རྣམ་ཐར་བཟུང་། །དོན་ཚུལ་བཞིན་གནས་ལུགས་ཉམས་ལེན་བརྩོན། །སེམས་ཡེངས་མེད་དྲན་པའི་བྱ་ར་ཐོང་། །དུས་རྟག་ཏུ་སྙིང་རྗེའི་རྩི་ཡིས་བཟུང་། །ལྷ་ཡི་དམ་བསྙེན་བསྒྲུབ་རྒྱུན་མ་བཅད། །མ་མཁའ་འགྲོའི་དུས་བཟང་མཆོད་པ་བཟུང་། །ཆོས་བསྲུང་མར་རྟག་ཏུ་གཏོར་མས་བསྐང་། །ལུས་ཕུང་པོ་ཚོགས་འཁོར་ཆག་མེད་བྱ། །སྲོད་ཐོ་རངས་བུམ་ཅན་གཏུམ་མོར་འབད། །ཟེར་གཉིས་དུས་ཐོད་རྒལ་ཉམས་ལེན་སྐྱོང་། །དུས་རྒྱུན་དུ་མཉམ་བཞག་ངང་དུ་བཞག །ལུས་སྤྱོད་ལམ་བག་ཡོད་དངས་པར་འཚལ། །དེང་བློ་གཏད་ཡུལ་གྱུར་མི་དཀོན་པས། །བློ་བསླུ་མེད་གཏད་པ་དཀོན་མཆོག་ཡིན། །དེ་སངས་རྒྱས་ཀུན་འདུས་ངོ་བོར་བསྒོམ། །དད་དམ་ཚིག་སྙིང་གཏིང་རུས་ལ་ཕུར། །འགྱུར་ལྡོག་མེད་མོས་གུས་སྟོབས་སུ་བསྐྱེད། །སྐད་མཐོན་པོས་མཚན་བོས་གསོལ་བ་ཐོབས། །མཐར་རང་སེམས་བླ་མ་དབྱེར་མེད་བསྲེས། །དུས་རྒྱུན་དུ་ཡང་དག་འཇོག་ལ་འཚལ། །འདི་ཚིག་རེའི་དོན་རེ་མཚོན་པ་སྟེ། །དོན་གལ་འགག་ཡོད་དོ་ཐུགས་ལ་འཆང་། །འབྱུང་འགྱུར་གྱི་ལུང་ཀྱང་ཅུང་ཟད་མཆིས། །འོན་སྒྱུ་མའི་རོལ་པ་ཉིད་ཤེས་བྱ། །དབྱངས་དེ་སྐད་ཚེ་དབང་ནོར་བུ་ཡི། །གནས་གྲོམ་པའི་གཙུག་ལག་ཡང་རྩེ་ནས། །དུས་བཟང་པོ་ཆོ་འཕྲུལ་ཚེས་བཟང་ལ། །ཡིད་གཅེས་པའི་བུ་ལ་འཕྲིན་དུ་ཕུལ། ། ༈ ཞལ་གདམས་བྷུ་སུ་ཀུའི་མགུར་གླུ།ཨ་ཧོཿ སྐྱེ་སྔོན་ལས་འཕྲོ་སྐལ་བཟང་ཐོབ། །དེ་མཐུས་དལ་འབྱོར་རྟེན་བཟང་རྙེད། །མཇལ་དཀའི་བླ་མ་ངོ་མཚར་ཅན། །རྡོར་སེམས་ཀྱི་སྒྱུར་འཕྲུལ་གཏེར་ཆེན་མཇལ། །མ་ནོར་བའི་ལམ་མཆོག་རྫོགས་ཆེན་ཆོས། །ལེགས་འཕྲད་ནས་བསྒྲུབ་པའི་རྣལ་འབྱོར་ལ། །རྣམ་གྲོལ་ཞེས་ཡིད་ཀྱི་གྲོགས་པོ་ཁྱོད། །དར་ཅིག་ལ་སྙན་གྱི་དབང་པོ་རུ། །སྤྲང་པོ་རུ་གྱུར་པའི་བློ་བདེ་པོ། །གུ་ཡངས་ཤིང་གཟའ་གཏད་བྲལ་གྱུར་པ། །ཅི་བདེ་རུ་སྤྱོད་པའི་བྷུ་སུ་ཀུ། །སྒྱུ་མ་ཡི་སྐྱེས་བུ་དེ་ཉིད་ཀྱི། །གླུ་དབྱངས་སུ་འདི་སྐད་ཤུགས་འབྱུང་ཐལ། །འདམ་གྱི་ནང་དུ་སྐྱེས་པའི་པདྨ་ལ། །རྐང་དྲུག་གི་རྩི་བཅུད་གནད་དུ་སློངས། །དེ་བཞིན་དུ་བདག་འདྲ་ཁམས་དམན་ཡང་། །གླུ་དབྱངས་ལ་འདོན་བཅུད་འདུག་ན་ཞེས། །ཨེ་མ་ཡེ་རང་སེམས་ངོ་བོར་ལྟོས། །ཨེ་མ་རང་སེམས་བལྟས་ཙ་ན། །སྣང་བ་འདི་ཆུ་ནང་ཟླ་རིས་འདྲ། །དངོས་སྣང་སུ་འཛིན་ན་བྱིས་པ་འཁྲུལ། །བདེན་མེད་དུ་སེམས་ན་བློ་རུ་འགྱུར། །དངོས་འཛིན་དང་བདེན་མེད་གཉིས་ཀ་ཐོང་། །གཉིས་སྣང་གི་ཞེན་པ་དབྱིངས་སུ་ཁྲོལ། །ནང་སེམས་ངོ་བརྟག་ན་བརྟག་བྱེད་སྟོང་། །སྟོང་པ་རུ་ཡིན་ཡང་བརྗོད་དོན་མེད། །ཨ་འཐས་ནི་དེ་བས་ཡོངས་དོན་མེད། །ཡོད་མེད་ནི་གཉིས་ཀ་རང་སར་ཡལ། །རྣམ་རྟོག་གི་ཤར་ཆ་དུ་མ་ནི། །རྗེས་མཐུན་དུ་བྱས་ནས་ལུག་རྒྱུད་འགྱུར། །འཕྲོ་བཅད་དུ་བྱས་ནས་རྒྱས་འདེབས་ཤོར། །སྒོམ་ཉམས་ཤིག་བྱུང་ན་བློ་རུ་འཁྲུལ། །ཡིད་དབང་དུ་ཤོར་ན་འཁྲུལ་རྒྱ་འབྱམས། །སྐྱོན་མེད་ཀྱི་རིག་པ་གཅེར་བུ་དེ། །རྟེན་མེད་ཀྱི་མཁའ་ལ་སྤར་རེ་ཐོང་། །བྱ་བྲལ་གྱི་གནས་ལུགས་དེ་སྐྱོང་འཚལ། །ཁམས་འདུས་སོགས་སྙིང་རླུང་ཅི་བྱུང་ཡང་། །བར་སྣང་གི་རླུང་ལྟར་གཞི་རྩ་བྲལ། །ཆེད་གཉེར་གྱི་དགག་སྒྲུབ་ག་ལ་འཚལ། །ཅི་ཤར་ཀུན་གདོང་འདེད་ཉིད་དུ་ཐོང་། །ཨ་ཧོཿ སྣང་བ་འདི་སྒྱུ་མར་བན་མ་བུན། །བསྟོད་སྨད་སྒྲ་གྲགས་སྟོང་སང་མ་སིང་། །གང་ཤར་ནི་ཆོས་ཉིད་འལ་མ་འོལ། །ཐམས་ཅད་ཀྱང་རིག་གདངས་ཏ་ལ་ལ། །ད་དུང་ཡང་ཅིག་སྙན་གསོན་དང་། །ཁམས་དྲུག་ལྡན་རྡོ་རྗེའི་ལུས་པོ་ལ། །བྱེད་བཅིང་གི་རྟེན་འབྲེལ་བསྒྲིགས་པའི་ཚེ། །རྩ་རླུང་དང་ཐིག་ལེའི་གཡོ་འགུལ་གྱི། །སྣང་སེམས་ཀྱི་ཤར་ཚོགས་དཔག་པར་དཀའ། །ཅི་ཤར་ཀུན་རང་བབ་ཉིད་དུ་ཞོག །འོན་ཏེ་ཡང་རྣལ་འབྱོར་ལམ་བཟང་ཀུན། །ཚོགས་སྦྱོར་ནས་འཕགས་ལམ་ཐོབ་ཀྱི་བར། །ལམ་དེ་ལ་ལྷོང་གྲོལ་བསམ་མི་ཁྱབ། །དེ་སྐྱོན་འཛིན་བགྱིས་ན་རྣལ་འབྱོར་འཁྲུལ། །ཡོན་ཏན་དུ་རློམ་ཡང་མི་འཚལ་གྱི། །རེ་དོགས་དང་བྲལ་བའི་ཀློང་དུ་ཀློད། །སྤྱིར་རྗོད་བྱེད་ཀྱི་ཚིག་ལ་དགོས་པ་ཅི། །བརྗོད་མེད་ཀྱི་དོན་ལ་དྲིལ་བ་ཞུ། །ལར་རྡོ་རྗེའི་རྣལ་འབྱོར་དམ་པ་ཁྱེད། །ཚེ་འདི་རུ་ཇི་ལྟར་མཛད་ན་ཡང་། །ཤེས་རབ་ཀྱི་སྤྱད་པ་ལེགས་འདུག་པས། །བློ་གདེངས་ལྡན་གྱི་དམ་ཚིག་བརྟན་ཚུགས་ན། །དུས་ཕྱི་མར་ནི་ངེས་པར་ལམ་ཐོབ་འགྱུར། །དེ་གནས་ཚུལ་ཡང་ཁོ་བོས་ཅུང་ཤེས་ཏེ། །འདིར་མི་སྨྲའོ་ཡིད་གཉིས་གྱུར་གྱིས་དོགས། །གླུ་དེ་སྐད་ནི་རུ་ལག་གྲོམ་པ་ཡི། །སྒྲུབ་ཕུག་ནས་ཚེ་དབང་ནོར་བུ་ཞེས། །མི་སྨྱོན་པ་དེས་གང་ཤར་འཕྲལ་དུ་བྲིས། །མངྒ་ལཾ། ༈ འདི་འགྱུར་མེད་རྣལ་གྲོལ་ལ་གནང་བ་ལགས།ཀྱེ་ཧོཿ སྐྱབས་མཚུངས་མེད་དྲན་མཆོག་འཁོར་ལོའི་མགོན། །མཚན་དྲན་པས་སྲིད་པའི་སྡུག་བསྔལ་གཞོམ། །ཁོང་པདྨ་ཐོད་འཕྲེང་མ་ལགས་སམ། །མགོན་དེ་དང་དབྱེར་མེད་བདེ་ཆེན་གླིང་། །མི་བདག་གི་སྤྱི་བོའི་རྒྱན་བཀོད་ནས། །སེམས་མཉམ་བཞག་ངང་ནས་ཤུགས་འབྱུང་གླུ། །ཁྱོད་བསྐུལ་བ་པོ་ཡི་ངོ་སྐལ་དུ། །འདིར་ཅུང་ཟད་སྨྲ་ཡི་སྙན་དབང་གསོན། །ལུས་ཁམས་དྲུག་ལྡན་པ་རྡོ་རྗེའི་གཟུགས། །ཆོས་གསང་སྔགས་སྣོད་རུང་འདི་འདྲ་ནི། །ཐོབ་དཀའ་ཡི་ཨུ་དུམ་ཝ་ར་ལྟར། །དུས་ད་རེས་ཙམ་ཡིན་ཐུགས་ལ་ཞོག །སྐྱེ་འཆི་བ་འཕོ་དང་འགྱུར་བ་ནི། །དུས་ཆ་མེད་སྐད་ཅིག་ཉིད་ལ་འགྱུར། །ཚེ་ལོང་མེད་དེ་ཉིད་སྙིང་ནས་བསམ། །དེ་བསམ་བཞིན་དམ་པའི་ལྷ་ཆོས་འཚལ། །ཆོས་སང་བྱེད་གནང་བྱེད་མི་ཚེ་ཟད། །ལས་གཏན་ཆིས་གལ་ཆུང་ངང་དུ་ལུས། །ད་སྐྲ་དཀར་གཉེར་མ་འདུས་སྣེར་ཟིན། །ད་ལོང་མེད་ཐོག་བབ་འཆི་ཡང་སྲིད། །དོན་དེར་སེམས་དེང་དུས་དབང་ཡོད་དུས། །ཆོས་མ་ནོར་ཐེག་ཆེན་ལམ་ཞུགས་ནས། །བཀའ་རྫོགས་པ་ཆེན་པོ་ཞེས་བྱ་བ། །ཆོས་ཟབ་ཁྱད་ཅན་དེ་བསྒོམ་རེ་རན། །སྐྱབས་མ་ནོར་གཞན་རྒྱུད་བྱིན་རླབས་ནུས། །མཚན་ངེས་ལྡན་བླ་མ་བསྟེན་བྱས་ནས། །གཡོ་སྒྱུ་མེད་དམ་ཚིག་གཙང་མར་བསྲུང་། །ཐུགས་དགེས་ཐབས་སྒོ་གསུམ་འབད་དེ་བསྒྲུབ། །སྐྱབས་དཀོན་མཆོག་གསུམ་ལ་བློ་སྙིང་གཏོད། །བྱམས་སྙིང་རྗེ་བྱང་སེམས་གཞི་མ་ཐིང་། །དད་མོས་གུས་འགྱུར་མེད་གནད་དུ་དྲིལ། །ལས་རྒྱུ་འབྲས་མ་ནོར་འདོར་ལེན་ཞིབ། །རྗེ་རྒྱལ་བ་ཀུན་འདུས་ངོ་བོ་ཉིད། །མགོན་རྩ་བའི་བླ་མ་དེ་ཉིད་ནི། །སྐུ་བཙུན་རུང་མི་བཙུན་ནའང་རུང་། །བཟང་ངན་དང་མཁས་རྨོངས་བརྟག་དཔྱད་དོར། །ལར་བླ་མ་མ་བསྟེན་གོང་དུ་ནི། །བླང་དོར་བྱའི་གནས་ལ་རབ་ཏུ་བརྟག །དེར་ཉེས་པ་མེད་པ་རྒྱལ་བས་གནང་། །ཆོས་ཞུས་ནས་བརྟག་མེད་དག་སྣང་སྦྱངས། །དེ་ལྟར་དུ་བཀའ་དྲིན་མཆོག་གྱུར་དེ། །དུས་རྟག་ཏུ་སྤྱི་བོའི་གཙུག་བསྒོམ་ནས། །སྙིང་ཁོང་ནས་གསོལ་འདེབས་དབང་བཞི་བླང་། །མཐར་བླ་མ་རང་སེམས་དབྱེར་མེད་བསྲེས། །དེ་ངང་ནས་སེམས་སྦྱོངས་བདུན་ལ་འབད། །ལུས་ངག་ཡིད་ཕྱི་ནང་དུ་ཤན་དབྱེ། །རྒྱུ་ས་བོན་བསྲེག་སྦྱང་གནད་དུ་བསྣུན། །སྒོ་གསུམ་པོ་མནལ་དབབ་སོར་དུ་བཞུགས། །མཐར་ཅོག་བཞག་བཞི་ཡི་ངང་ལ་བཞག །སེམས་སེམས་བྱུང་སེམས་རིག་ཤན་ཡང་དབྱེ། །དེ་སྤོམ་ཡོར་ལྡིང་སོར་མ་སོང་གཅེས། །བཀའ་གཞུང་མཐུན་ཉམས་རྟོགས་གཏན་ལ་ཕོབས། །འདི་གལ་འགག་ཆེ་བའི་གནད་ཡིན་ཀྱང་། །དུས་དེང་སང་རྫོགས་ཆེན་འཆད་མཁན་ནི། །ཁོང་མཁས་གྲུབ་རེ་རེ་ཙམ་མ་གཏོགས། །ཚིག་ཟར་ཟིར་ཕྱག་རྫོགས་འལ་འོལ་ལས། །ཆོས་ཇི་བཞིན་བཤད་པ་ཕྱོགས་འདིར་དཀོན། །ཁ་སྟོང་བཤད་གློ་སྐམ་ཐུག་པ་བཞིན། །རི་ཀླུང་ཀུན་ཁྱབ་པར་མཐོང་བའི་ཚེ། །མི་བདག་ནི་སྙིང་ནས་སྐྱོ་ཤས་སྐྱེ། །ཁྱེད་སྙིང་ནས་ཆོས་གཅིག་བྱེད་བསམ་ན། །ཁ་ཆོས་བཤད་ཕྱི་ཡི་ཤུན་པ་མཐོང་། །དོན་ཉམས་ལེན་ངོ་བོ་ཇི་བཞིན་པར། །གནད་མ་འཁྲུལ་རིག་པ་གཏན་ལ་ཕོབས། །ཀ་ཡེ་ནས་དག་པའི་ཁྲེག་ཆོད་དེ། །ངོ་རང་ཐོག་རང་ངོ་ཤེས་པས་ཆོད། །ཐག་གཅིག་ཐོག་བློ་དང་བྲལ་བས་ཆོད། །གདེང་གྲོལ་ཐོག་ཆོས་སྐུའི་ངང་དུ་ཞོག །ད་མདོར་བསྡུས་སྒོམ་མེད་སྒོམ་བློ་ཕྲོལ། །ཡེངས་འཁྲུལ་བའི་དབང་དུ་ཡང་མ་གཏོང་། །ད་སྒོམ་མེད་ཡེངས་མེད་ངང་དུ་གཞོག །སེམས་གཡོ་མེད་རིག་པ་རྟག་བརྟན་ཅིང་། །ལམ་མཐར་ཐུག་ཟབ་མོ་ཐོད་རྒལ་བསྒོམ། །དབྱིངས་གསུམ་དང་སྒྲོན་དགུ་གཏན་ལ་ཕོབས། །དོན་རིག་པ་ལུག་རྒྱུད་བཙོན་དུ་བཟུང་། །དབྱིངས་ར་བར་ནམ་ཡང་འདའ་མེད་བསྒོམ། །ལམ་དབྱིངས་རིག་སྣང་བ་མངོན་སུམ་སྣང་། །དེ་ཉམས་མེད་འཕེལ་བའི་གོང་འཕེལ་ཡིན། །མཐར་བཙན་ས་ཟིན་པས་ཚད་ཕེབས་ཡིན། །ཆོས་ཆོས་ཅན་ཀུན་ཟད་ཆོས་ཟད་ཡིན། །དེར་མིང་ལ་ཐོད་རྒལ་སྣང་བཞི་ཟེར། །ཉམས་བླང་ནུས་འཇའ་ལུས་ལོ་དྲུག་བརྙེས། །བཀའ་གསང་སྔགས་རྙིང་མའི་ཁྱད་ཆོས་ཡིན། །ཁོང་སངས་རྒྱས་ཀུན་གྱི་ཉེ་ལམ་ཡིན། །ཆོས་ཀུན་བཅུད་གཅིག་ལ་རྫོགས་པས་ན། །མིང་རྫོགས་པ་ཆེན་པོ་ཞེས་སུ་བཏགས། །ཆོས་ཟབ་པ་གཅིག་པུས་མི་ཕན་ཏེ། །དེ་སྟོན་མཛད་བླ་མ་མཚན་ལྡན་དང་། །རང་མོས་གུས་སྙིང་རུས་འཛོམས་པས་ན། །ཁོང་ཚེ་གཅིག་སངས་རྒྱས་ཟེར་བ་ཡང་། །ཐག་རིང་པོར་མེད་དོ་ཙ་ན་ཡོད། །དོན་དེས་ན་ཉམས་ལེན་ཧྲིལ་དྲིལ་མཛོད། །ཉམས་མ་མྱོང་མཁས་ཀྱང་འཁྲུལ་པ་ཡིན། །ཉམས་མྱོང་ན་སུ་ཡང་བྱང་ཆུབ་ཐོབ། །ད་འདིར་སྣང་ཞེན་པ་ཕྱི་ལ་ཐོང་། །དོན་དངོས་ངོ་ཤེས་པའི་འཆི་རྩིས་ཀྱིས། །ཐབས་ཟབ་མོ་མི་ལྡན་རྒྱོ་བ་ཡང་། །མིང་རྣལ་འབྱོར་བཏགས་ཀྱང་དམྱལ་སྒྲུབ་ཡིན། །སེམས་མ་བཅོས་ཅོག་བཞག་མ་ཤེས་ན། །སྐྲ་ལྕང་ལོ་བྱས་ཀྱང་འཆོར་སྐྲ་ཡིན། །སེམས་རྒྱུ་འབྲས་ཞིབ་ཏུ་མ་བརྩིས་ན། །གོས་དམར་སེར་གྱོན་ཀྱང་དགོས་པ་མེད། །ཆོས་ཀུན་སྣང་སྟོང་སྒྱུ་མར་མ་ཤེས་ན། །སྡོམ་གསུམ་བསྲུང་ཨ་འཐས་ཞེན་པ་ཡིན། །དོན་ཇི་བཞིན་གནས་ལུགས་མ་རྟོགས་ན། །ལས་གང་བྱས་ཀུན་ཀྱང་འཁོར་བ་ཡིན། །ད་གཏན་གྱི་ཐར་པའི་ལམ་རྐང་ཚུགས། །དུས་ད་རེས་གསེར་གླིང་སྟོང་མ་ལོག །ལར་སྤྲང་པོའི་གླུ་དབྱངས་སྙན་ན་ཡང་། །མི་ཆེན་པོའི་རྣ་བར་སེམས་པ་དཀའ། །ཞེས་མང་མཁར་རི་སུལ་ཟ་ལུང་གི །རྗེ་བླ་མའི་དབོན་མོ་སྔགས་སྐྱེས་མ། །ཁོང་ཀུན་བཟང་འཕྲིན་ལས་དབང་མོ་ཡིས། །ཡང་ཡང་ནས་ཞལ་གདམས་དགོས་གསུངས་ནས། །ཡུལ་ཀཿཐོག་ལྷོར་སྐྱེས་རིག་པ་འཛིན། །སྤྲང་བླ་ཆུང་ཚེ་དབང་ནོར་བུ་ཞེས། །མིང་གངས་ཅན་འཛིན་མར་ཡོངས་གྲགས་དེས། །གནས་ལ་སྟོད་གཡས་རུ་བྱང་ཞེས་པའི། །ས་མང་མཁར་དབུས་འགྱུར་བསམ་གྲུབ་ཞེས། །སེང་དཀར་པོའི་རིགས་གྱུར་ཐིག་ལེ་ནི། །འདར་མི་རྗེའི་ཕོ་བྲང་ག་ལ་བར། །ལོ་ས་བྱ་ཧོར་ཟླ་གཉིས་པ་ཡི། །ཚེས་བཅུ་དྲུག་མཁའ་འགྲོ་འདུ་བའི་དུས། །ཡིད་གང་ཤར་ཉམས་ལེན་ངང་དུ་བྲིས། །སརྦ་མངྒ་ལཾ། ༈ ཞལ་གདམས་ཚོགས་མགུར་དབྱིངས་སྐྱེ་མེད།ཨ་ཧོཿ དབྱིངས་སྐྱེ་བ་མེད་པའི་ངོ་བོ་ལ། །ཀློང་ལྷུན་གྱིས་གྲུབ་པའི་འོད་གསལ་ཆེ། །མཁའ་མཐའ་བྲལ་གནས་ལུགས་གདོད་མའི་གཤིས། །དོན་བསམ་བརྗོད་བྲལ་བའི་ཡེ་ཤེས་ཆེ། །དུས་ཀུན་ཏུ་འབྲལ་མེད་ཆོས་ཀྱི་སྐུ། །སུས་མ་བསླད་ཕྲ་གསལ་ཁྱབ་བརྡལ་དང་། །ཡུལ་སེམས་ཅན་ཀུན་གྱི་སྙིང་པདྨོར། །ཡེ་ནས་འབྱུང་ད་ལྟའི་བར་གནས་པ། །མཚན་པདྨ་འབྱུང་གནས་ཞེས་གྲགས་པ། །དེ་ཀུན་ལ་ཡོད་ཀྱང་ངོ་མ་ཤེས། །ངོ་ཤེས་ནས་སྐད་ཅིག་མ་འདིར་ཡོད། །ངོ་སྤྲོད་མཁན་རྩ་བའི་བླ་མར་གྲགས། །ངོ་ཤེས་ཐབས་བླ་མར་མོས་གུས་གཅེས། །ངོ་ཤེས་བྱ་ཤེས་བྱེད་ཅེས་པ་ཡང་། །དོན་ཡང་དག་ཚེ་ན་ཅང་མེད་ཀྱང་། །ཕྲལ་བརྗོད་ཚིག་འདི་ལས་བྱེད་མ་ཐུབ། །ད་ཚིག་སྐམ་ཕྱི་ཡི་ཤུན་པར་མཐོང་། །སྙིང་གཏིང་ནས་བླ་མར་གསོལ་ཐོབ་ལ། །ལམ་དབང་བླང་མཐར་ནི་རང་སེམས་བསྲེ། །སེམས་དེ་ལ་བཅས་བཅོས་ཡེ་མ་བྱེད། །བསྒོམ་དམིགས་གཏད་ཡོད་ན་བློ་ཡིན་གྱི། །ཡེངས་རྒྱ་འབྱམས་སོང་ན་འཁྲུལ་པ་ཡིན། །འགྱུ་མུ་མཐུད་འཁྲུལ་སྣང་ལུག་རྒྱུད་ཡིན། །སེམས་འོག་འགྱུ་ཤོར་ན་མ་རིག་ཡིན། །སེམས་ཧ་ཅང་གྲིམ་ན་གཟུང་འཛིན་ཡིན། །སེམས་ཧ་ཅང་ཀློད་ན་འཁྲུལ་སྣང་འབྱམས། །དོན་དེས་ན་རང་སེམས་ངོ་བོ་འདི། །གཟུང་མི་ཟིན་བཏང་བས་ཡང་མི་འགྲོ། །སེམས་གྲིམ་ལྷོད་བྲལ་བའི་ངང་ལ་ཞོག །དྲན་རིག་པ་མ་ཡེངས་རྟག་ཏུ་ཚོལ། །བདེ་གསལ་སྣང་མི་རྟོགས་ལ་མ་ཆགས། །གནས་དགའ་དང་འགྱུ་བཀག་ཡེ་མ་བྱེད། །དེ་གནས་པ་སེམས་ཀྱི་རྒྱུན་ཤེས་ཤིང་། །འགྱུ་སེམས་ཀྱི་རོལ་པར་ཤེས་པ་ན། །ལས་གང་བྱེད་ཐམས་ཅད་བསྒོམ་གྱི་ཀློང་། །སྤྱིར་ཡིད་ལ་ཉོན་མོངས་ཅི་ཤར་ཡང་། །དེ་མི་སྤང་མི་གྲུབ་ལམ་ཁྱེར་དང་། །ཀུན་ཐུག་འཕྲད་འབུར་འཇོམས་བཏང་འཚལ་ལོ། །ཚོགས་དྲུག་སྣང་ཀུན་ཀྱང་ཞེན་མེད་སྦྱངས། །མདོར་ཧྲིལ་དྲིལ་དུས་དང་རྣམ་ཀུན་ཏུ། །སྐྱབས་བླ་མ་ཡིད་དང་མ་བྲལ་ཅིག །སྡོམ་དམ་ཚིག་དྲི་མས་མ་གོས་བསྲུང་། །སེམས་གནས་ལུགས་བལྟ་བ་མ་བྲལ་སྐྱོང་། །རིས་མ་མཆིས་འགྲོ་ལ་སྙིང་རྗེ་བསྐྱེད། །མཆེད་ལྕམ་དྲལ་ཀུན་ལ་དག་སྣང་སྦྱོངས། །དུས་རྟག་ཏུ་ཁྲེལ་ཡོད་ངོ་ཚ་སོགས། །ལམ་འཕགས་ནོར་བདུན་དང་འགྲོགས་པར་མཛོད། །གླུ་དེ་སྐད་ཕྱོགས་མེད་རྒྱལ་ཁམས་པ། །མིང་ཚེ་དབང་ནོར་བུར་གྲགས་པ་དེས། །གནས་མང་ཡུལ་སྐྱིད་གྲོང་ལ་ལྡེབ་ཀྱི། །ཕུ་དཀར་ཞེས་དམ་པའི་སྒྲུབ་ཕུག་ཏུ། །ཚོགས་འཁོར་ལོའི་སྐབས་སུ་གང་ཤར་ཚིག །བསྐུལ་པ་པོའི་ངོ་རུ་བླངས་པ་དགེ ། ༈ མགུར་གླུ་ཚེ་དབང་དཔལ་འབར།ན་མོ་གུ་རུ་ཝེ། །རྗེ་དུས་གསུམ་རྒྱལ་བ་ཀུན་གྱི་དངོས། །མགོན་མཚུངས་པ་མེད་པ་པདྨ་འབྱུང་། །ཕ་དེ་དང་དབྱེར་མེད་བདེ་ཆེན་གླིང་། །མི་བདག་གི་སྙིང་དབུས་བཞུགས་པར་ངེས། །བུ་སྐལ་ལྡན་དར་ཅིག་ཚུར་གསོན་དང་། །ལུས་དལ་འབྱོར་གྱི་རྟེན་བཟང་འདི་ཐོབ་པར་དཀའ། །དེ་ཡུན་རིང་དུ་མི་རྟག་འཇིགས་ངེས་ཀྱི། །ད་དམ་ཆོས་ཞིག་བསྒྲུབ་ན་མྱུར་དུ་འཚལ། །ལམ་ཐམས་ཅད་ཀྱི་རྩ་བ་དགེ་བའི་བཤེས། །དེ་མ་ནོར་ངེས་ཤེས་ཀྱི་མཚན་ལྡན་དགོས། །འདི་ཁེ་ཉེན་ཆེ་བས་ནན་ཏན་བརྟག །མཚན་ཉིད་ལྡན་ངེས་ཀྱི་རྗེས་སུ་འཇུག་པར་འཚལ། །མཚན་ལྡན་བླ་མ་དེ་དུས་གསུམ་རྒྱལ་ཀུན་གྱི། །ངོ་བོ་ཀུན་འདུས་སུ་གྱུར་ཅིང་ཀུན་ལས་ལྷག །མཉེས་པ་འབའ་ཞིག་ལ་འབད་ཅིང་མི་མཉེས་སྤང་། །དམ་ཚིག་སྙིང་དབུས་སུ་ཆོངས་ཤིག་སྐལ་ལྡན་བུ། །མདོ་རྒྱུད་གཞུང་ལུགས་ཀྱི་རྒྱ་མཚོ་མཐའ་དག་ཀྱང་། །སྙིང་པོ་ཡང་དག་ཏུ་དྲིལ་ན་གནས་ལུགས་དོན། །ཕྱག་ཆེན་དང་རྫོགས་ཆེན་ལས་གཞན་མེད་དོ་བུ། །མཐར་ཐུག་རྫོགས་ཆེན་ནི་སྙིང་པོའི་ཡང་རྩེ་ཡིན། །རྫོགས་ཆེན་མཐར་ཐུག་ཁྲེག་ཆོད་ཐོད་རྒལ་གཉིས། །ཁྲེག་ཆོད་ཅོག་བཞག་གསུམ་ལམ་གྱི་གཞི་མ་བསྐྱིད། །ནམ་མཁའ་གསུམ་སྤྲུགས་ཀྱི་རིག་པའི་རྩལ་ཆེན་སྤར། །ཐོལ་རྒལ་དབྱིངས་གསུམ་གྱི་མཁའ་ལ་སྒྲོན་དྲུག་ཤར། །མཐར་ཐུག་རང་རིག་གི་ངོ་བོ་གཟེར་ཆེན་བཏབ། །ཁམས་གསུམ་མྱོང་གྲོལ་གྱི་ལམ་ལ་གཞོལ་བ་ན། །ཚེ་གཅིག་སངས་རྒྱས་སུ་འགྲུབ་པར་གདོན་མི་ཟ། །ལམ་མཆོག་མཐར་ཐུག་དེར་ཞུགས་མཛོད་སྐལ་ལྡན་བུ། །མདོ་དོན་སྙིང་པོ་རུ་དྲིལ་ན་ཉམས་ལེན་མཐིལ། །བླ་མའི་མོས་གུས་ཀྱི་ལམ་གྱི་གཞི་བཅའ་ཞིང་། །མ་ཡེངས་དྲན་པ་ཡི་རྒྱང་སོ་རྟག་ཏུ་བཙུགས། །རིས་མེད་སྙིང་རྗེ་ཡི་ཟིན་པ་ཉིད་དུ་འདུ། །དེ་སྐད་ཚིག་ཚོགས་ཀྱི་སྤྲོས་པ་མི་མང་ཡང་། །ཉམས་ལེན་སྙིང་པོ་ཡི་མདོ་དོན་སྣེ་ཚང་ཞིག །ཀོང་པོ་མཆིམས་ཡུལ་གྱི་རྗེ་རིགས་དད་པ་ཅན། །ཚེ་དབང་དཔལ་འབར་གྱི་གསུང་ངོར་གླུ་རུ་བླངས། ། ཞེས་པ་ཡང་དཔལ་རིག་པ་འཛིན་པ་ཚེ་དབང་ནོར་བུའི་རབ་བྱུང་བཅུ་གསུམ་པ་རྒྱལ་ཟླའི་དམར་ཕྱོགས་ཀྱི་རྒྱལ་བ་གཉིས་པ་ལ་ལྷ་ལྡན་བྱ་འདབས་སུ་སྨྲས་པ་སརྦ་མངྒ་ལཾ། ༈ ཞལ་གདམས་མོས་གུས་རྣལ་འབྱོར།སྭཱ་སྟི། བླ་མ་བརྒྱ་ཡོད་སྟོང་ཡོད་ཀྱང་། །རང་སེམས་ངོ་སྤྲོད་བླ་མའི་མཆོག །སངས་རྒྱས་ལས་ལྷག་བཀའ་དྲིན་ཅན། །རྩ་བའི་བླ་མར་ཕྱག་འཚལ་ལོ། །རང་གི་སེམས་ཀྱི་ངོ་བོ་ཉིད། །སྐྱེ་འགག་གནས་པ་ཀུན་ལས་འདས། །དེ་ལ་རྫོགས་ཆེན་པ་རྣམས་ཀྱིས། །རིག་པ་ཞེས་སུ་གདགས་པར་མཛད། །དེ་ཉིད་ལམ་དུ་བྱེད་པ་ལ། །མ་ཡེངས་མི་བསྒོམ་ཁོ་ན་ལས། །ཉམས་ལེན་སྙིང་པོ་གཞན་ཡོད་མིན། །དེས་ན་ཡེངས་མེད་གཉུག་མ་སྐྱོངས། །དེ་ཡང་གནས་འགྱུ་དབྱེར་མེད་ཞེས། །གནས་པ་སྐྱེ་བ་མེད་པ་ལ། །འགྱུ་བ་འགག་པ་མེད་པར་འཕྲོ། །གནས་འགྱུ་སྐྱེ་འགག་དབྱེར་མེད་དོ། །མ་ཡེངས་དྲན་པ་རྒྱལ་ཀུན་ལམ། །ཡེངས་པ་འཁོར་བའི་དོ་ར་ཡིན། །དེས་ན་ཡེངས་མེད་དྲན་པའི་ངང་། །ཉིན་མཚན་འཁོར་ཡུག་འདྲེས་པར་བྱ། །སེམས་ཀྱི་རང་བཞིན་འོད་གསལ་བ། །རྣམ་རྟོག་དྲི་མ་དག་པ་དགོས། །འགྱུ་བ་སྤང་ལེན་མི་བྱ་སྟེ། །འགྱུ་བ་ངང་གིས་གྲོལ་བ་དགོས། །དགེ་སྦྱོར་སྐྱེ་བའི་རྩ་བ་ཡང་། །བླ་མའི་མོས་གུས་ཁོ་ན་ཡིན། །དེས་ན་བླ་མའི་རྣལ་འབྱོར་ལ། །ལྟེམ་རྐྱང་མེད་པར་རྟག་ཏུ་འབད། །དེ་སོགས་བཤད་བྱ་མཐའ་ཡས་ཀྱང་། །སྙིང་པོའི་ཉམས་ལེན་སྐབས་བབས་བཞིན། །ཅུང་ཟད་ཙམ་ཅིག་སྨྲས་འདིས་ཀྱང་། །ཉམས་རྟོགས་ཡར་ཟླ་ལྟར་འཕེལ་ཤོག ། ཞེས་མངའ་རིས་སྨད་གློ་བོ་ཡི་རྒྱལ་པོ་ཨ་མགོན་བསྟན་འཛིན་གྱི་ཉམས་བཞེས་ཆེད་དུ་རིག་འཛིན་ཚེ་དབང་ནོར་བུས་ས་སྦྲུལ་མགོ་ཟླའི་དཀར་ཕྱོགས་དགའ་བ་གསུམ་པར་སྨོན་ཐང་དུ་སྨྲས་པའོ། །སརྦ་མངྒ་ལཾ། ༈ ཞལ་གདམས་ལྟ་སྒོམ་སྤྱོད་འབྲས་མགུར་གླུ།ཨོཾ་སྭཱསྟི། སྲིད་འདིར་འདྲེན་པ་མཚུངས་མེད་རྫོགས་སངས་རྒྱས། །རིགས་མཆོག་འོད་དཔག་མེད་མགོན་རྡོ་རྗེ་ཆོས། །ཀུན་དངོས་དྲན་མཆོག་རྩ་བའི་བླ་མ་ལ། །བྱང་ཆུབ་སྙིང་པོའི་བར་དུ་ཕྱག་བྱས་ཏེ། །སྐལ་ལྡན་སློབ་མས་བསྐུལ་ཕྱིར་གདམས་ངག་གི །བརྗོད་བྱ་ཡི་གེ་མདོ་ཙམ་འདིར་བཀོད་བྱ། །མངོན་མཐོའི་ལམ་ལ་ངེས་པར་འཇུག་འདོད་ན། །ངན་སོང་སྡུག་བསྔལ་ཤེས་ཤིང་འཇིགས་པ་དགོས། །ངེས་ལེགས་ཐར་པའི་ལམ་ལ་གཞོལ་འདོད་ན། །ཁམས་གསུམ་འཁོར་བས་བློ་སྣང་དུབ་པ་དགོས། །དམ་པའི་ལྷ་ཆོས་སྙིང་ནས་སྤྱོད་པ་ལ། །རྟག་ཏུ་མི་རྟག་སྐྱོ་ཤས་དྲན་པ་དགོས། །བྱང་ཆུབ་མཆོག་གི་ལམ་ལ་འཇུག་པ་ན། །གཞན་ལ་ཕན་པའི་ལྷག་བསམ་ཁོ་ན་དགོས། །གསང་སྔགས་ཆོས་ཀྱི་བྱིན་རླབས་ཞུགས་འདོད་ན། །འཆི་ཐུབ་ན་ཐུབ་བླ་མར་མོས་གུས་དགོས། །རྡོ་རྗེ་ཐེག་པའི་ཆོས་ཀྱི་འཇུག་སྒོ་ནི། །མ་ཉམས་ཕྱག་ལེན་རྒྱུན་ལྡན་དབང་བསྐུར་དགོས། །མ་དག་དངོས་སྣང་འགོག་པའི་གཉེན་པོ་རུ། །བསྐྱེད་རིམ་ལྷ་ཡི་གསལ་སྣང་བརྟན་པ་དགོས། །ཐ་མལ་སྒྲ་ཡི་ཞེན་པ་གཞོམ་སླད་དུ། །ཡི་དམ་ལྷ་སྔགས་བཟླས་པ་རྟག་ཏུ་དགོས། །ཡིད་ཀྱི་སེམས་འཁྲུལ་ཆུ་རྒྱུན་གཅོད་སླད་དུ། །མ་ཡེངས་དྲན་པའི་གྲུ་གཟིངས་རྟག་ཏུ་དགོས། །དེ་ལྟར་དགོས་དགུ་འཛོམ་པའི་ཞལ་གདམས་འདི། །སྐལ་ལྡན་སློབ་མ་ཁྱོད་ཀྱི་ཐུགས་དབུས་སུ། །རྟག་ཏུ་བཞག་ནས་ཉམས་སུ་ལེན་བྱ་རུ། །རྡོ་རྗེ་སློབ་དཔོན་ཚུལའཛིན་དེ་ཡིས་གདམས། ། ཀྱེ་ཧོ་ད་དུང་ཡང་གཅིག་སྙིང་པོའི་གཏམ། །ཡང་གསང་རྫོགས་པ་ཆེན་པོའི་ཉམས་ལེན་གནད། །ལྟ་བའི་རྒྱལ་པོ་རང་སེམས་ཆོས་ཉིད་དབྱིངས། །སྐྱེ་འགག་གནས་བྲལ་ཀུན་ཁྱབ་སྤྲོས་བྲལ་གཤིས། །ཡོད་མིན་ཡིན་མིན་རྟག་ཆད་ཡུལ་བྲལ་བ། །ཁས་ལེན་ངོས་བཟུང་བྲལ་འདི་ལྟ་བ་ཡིན། །དེ་ལྟར་ཇི་བཞིན་ལྟ་བ་གཏན་ཕེབས་དོན། །དེ་ལ་མ་ཡེངས་རིག་པ་ས་ལེ་བ། །ཆེད་དུ་མ་བསྒྲིམ་ཆེད་དུ་མ་ལྷོད་པ། །རང་བབ་ཅོག་བཞག་མཚོ་ལ་གཟའ་སྐར་བཞིན། །འཛིན་པ་མེད་ལ་རང་ངོ་ཤེས་པ་ཡོད། །མ་ཡེངས་བསམ་མེད་བསྒོམ་པའི་རྒྱལ་པོ་ཡིན། །རྟོག་ཚོགས་བཟང་ངན་བྱ་བ་ལེགས་ཉེས་དང་། །སྤྱོད་ལམ་འགྲོ་སྡོད་སྨྲ་བརྗོད་མང་ཉུང་དང་། །དབེན་པའི་གནས་དང་ཚོགས་སུ་སྤྱོད་པ་སོགས། །ཅི་བྱས་རང་སེམས་ཡེངས་མེད་དྲན་པའི་ངང་། །རྒྱ་མཚོ་རྦ་རླབས་མཐའ་དག་ཆུ་གཅིག་བཞིན། །མཐའ་དག་རང་རིག་ཆོས་སྐུའི་རང་རྩལ་ལས། །སྤང་བླང་གཉེན་པོ་ཐ་དད་ཡེ་མེད་པ། །འདི་ཀོ་རྫོགས་ཆེན་མཆོག་གི་སྤྱོད་པ་ཡིན། །ལྟ་སྒོམ་སྤྱོད་པའི་རིམ་པ་དེ་ལྟ་སྟེ། །འབྲས་བུ་སྐུ་གསུམ་ཞེས་པའི་གཞི་རྩ་ཡང་། །རང་སེམས་སྟོང་པ་འདི་ནི་ཆོས་ཀྱི་སྐུ། །རང་སྣང་གསལ་བ་འདི་ནི་ལོངས་སྤྱོད་རྫོགས། །གསལ་སྟོང་དབྱེར་མེད་རིག་པ་སྤྲུལ་པའི་སྐུ། །འདི་ཉིད་མངོན་དུ་གྱུར་ལ་འབྲས་བུ་སྟེ། །དེ་བས་གཞན་དུ་སྐུ་གསུམ་རང་རྒྱུད་མེད། །དེས་ན་གསལ་སྟོང་རིག་པ་སྐུ་གསུམ་དངོས། །ཤེས་ནས་གོང་བགྲོད་ལྟོས་གཞི་མེད་པ་རུ། །རང་རིག་འདི་ཀར་ཁོ་ཐག་གཅོད་ཀྱང་འཚལ། །བཤད་བཤད་ཚིག་ཚོགས་སྤྲོས་པ་མང་ན་ཡང་། །མདོ་དོན་ལྟ་སྒོམ་སྤྱོད་འབྲས་བདག་འདིར་འདུས། །དེ་ཡང་མཐར་ཐུག་གསང་བ་སྙིང་ཐིག་གནད། །ཆོས་ཉིད་མངོན་སུམ་དོན་ལ་མ་ཡེངས་ཤིང་། །སྲོག་རྩོལ་རྡོ་རྗེའི་བཟླས་པར་འབད་པ་ལ། །བླ་མར་སངས་རྒྱས་མཐོང་བའི་མོས་གུས་ཀྱིས། །ལྟེམ་རྐྱང་མེད་པའི་གསོལ་འདེབས་འབད་ནུས་ན། །ཚེ་གཅིག་སངས་རྒྱས་འགྲུབ་པར་གདོན་མི་ཟ། །དེ་སྐད་ཚིག་ཚོགས་སྤྲོས་པ་མང་དོར་ནས། །ཉམས་ལེན་གནད་ཐོག་དབབ་པའི་གདམས་པ་ཡིན། ། ཞེས་པ་ཡང་བོད་ཡུལ་དབུས་ལྷོ་རྒྱུད་རྟ་མདོ་ཡི་སྡེ་པ་དད་གུས་རྣམ་དཔྱོད་ཀྱི་དཔལ་དང་ལྡན་པ་ཚེ་དབང་ཕུན་ཚོགས་གང་གི་གསུང་གི་ནན་ཏན་ཆེན་པོས་གསོལ་བ་བཏབ་པའི་ངོར་རིག་པ་འཛིན་པ་ཚེ་དབང་ནོར་བུས་ཆུ་ཕག་དབྱུག་གུ་ཟླ་བའི་དཀར་ཕྱོགས་དགའ་བ་གཉིས་པར་ཀོང་ཡུལ་ལྷ་ཡི་རི་བོ་ཟང་ངེའི་ཞོལ་གུ་རུའི་སྒྲུབ་ཕུག་དང་ཉེ་བའི་བྱ་འདབས་ཁང་གསར་རྫོང་གི་བ་གམ་རྩེར་ཡུད་ཅིག་ལ་བྲིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ། ༈ ཟབ་མགུར་ཡེ་ཤེས་དཔྱིད་དཔལ།ཨོཾ་སྭཱསྟི། །རྒྱལ་བ་ཀུན་གྱི་ཐུགས་ཀྱི་ཡེ་ཤེས་དཔྱིད། །གཅིག་ཏུ་བསྡུས་པའི་ཐིག་ལེ་པདྨ་འབྱུང་། །ཞབས་ལ་སྲིད་པ་གསུམ་གྱིས་ཕྱག་བྱས་པ། །མགོན་པོ་དེ་ཡིས་རྟག་ཏུ་དགེ་བར་མཛོད། །ཕུན་ཚོགས་སྡེ་བཞིའི་འདུ་བ་རྒྱལ་པོའི་ཁབ། །རྣམ་མང་རྩིས་མཁན་ཀུན་གྱི་གཙོ་བོ་མཆོག །གང་གི་སྲས་གྱུར་དད་གུས་དགེ་སེམས་ཅན། །རྡོ་རྗེ་སློབ་མར་གྱུར་པ་གང་དེ་ལ། །དལ་འབྱོར་དོན་ལྡན་ཆེད་དུ་བླ་མ་ཡི། །ཞལ་གདམས་ཉམས་ལེན་སྙིང་པོ་འདི་སྐད་གསོལ། །འཁོར་བ་ཐོག་མེད་དུས་ནས་ད་ལྟའི་བར། །སྐྱེ་འཆི་གྲངས་མེད་སྡུག་བསྔལ་རྒྱ་མཚོར་བྱིངས། །ད་རེས་བསོད་ནམས་མཐུ་ལས་དུས་ལན་ཅིག །མི་ལུས་ཐོབ་འདི་སྙིང་པོ་ལེན་པར་གཅེས། །གཟོད་མེད་ངན་སོང་སྡུག་བསྔལ་མ་ཤེས་ན། །བདེ་འགྲོ་ཐར་པའི་ཕན་ཡོན་རྟོགས་མིན་ཅིང་། །ཁམས་གསུམ་འཁོར་བར་ཞེན་པ་མ་ལོག་ན། །གཏན་བདེ་ཞི་བ་བསྒྲུབ་པར་ཡིད་མི་གཏོད། །དེས་ན་ངན་སོང་སྡུག་བསྔལ་ཡོངས་ཤེས་ཤིང་། །ཁམས་གསུམ་འཁོར་བར་ཞེན་པ་ལོག་ཀྱང་འཚལ། །དེ་ཡི་ཆེད་དུ་སྐྱབས་གནས་ཀུན་གྱི་གཙོ། །དཀོན་མཆོག་གསུམ་ལ་མི་བྱེད་སྐྱབས་འགྲོ་བྱ། །རང་ཉིད་གཅིག་པུར་ཞི་བདེ་རྙེད་མིན་པར། །མཁའ་ཁྱབ་འགྲོ་ལ་རྟག་ཏུ་སེམས་བསྐྱེད་བྱ། །ཐར་ལམ་ཆོས་ཀྱི་རྣམ་གྲངས་མཐའ་ཡས་ཀྱང་། །ཀུན་གྱི་མཐར་ཐུག་བླ་མེད་གསང་སྔགས་ཡིན། །དེ་ཡི་ལམ་རིམ་བསྐྱེད་དང་རྫོགས་པ་སྟེ། །བསྐྱེད་རིམ་རྣམ་གྲངས་མང་ཡང་སྙིང་པོ་ནི། །ཐ་མལ་བདག་འཛིན་ཕུང་པོ་སྟོང་པའི་ལྷུམས། །སེམས་ཉིད་རང་གདངས་རླུང་སེམས་གཉུག་མའི་ལུས། །རྣམ་ཀུན་ལྷ་སྐུའི་ཕྱག་རྒྱར་གསལ་གདབ་སྟེ། །མེད་བཞིན་སྣང་ལ་སྣང་བཞིན་མ་གྲུབ་པ། །སྒྱུ་མ་མེ་ལོང་པྲ་ཕབ་ཇི་བཞིན་དུ། །རྣམ་པ་གསལ་ཞིང་ང་རྒྱལ་བརྟན་པར་བྱ། །ཡེ་ཤེས་ཕེབས་སོགས་བསྐྱེད་རིམ་མ་རྫོགས་ནས། །ཚེ་རིང་ཐུན་མོང་མཆོག་རྣམས་འབད་མེད་དང་། །བར་དོར་ཡང་དག་མཆོག་ཐོབ་ཐེ་ཚོམ་མེད། །ཅི་ལྟར་འགྱང་ཡང་ཕྱི་མ་བྱང་ཆུབ་འགྲུབ། །དེ་བས་བླ་མེད་སྔགས་ཀྱི་བསྐྱེད་རིམ་ནི། །ཡོན་ཏན་དུ་མ་དྲན་བཞིན་བསྒྲུབ་འོས་ཡིན། །ཡན་ལག་རིག་སྔགས་ངག་བཟླས་རིམ་པ་ཡང་། །རྣམ་གཡེང་བྲེལ་དབང་སྤངས་པ་རྟག་ཏུ་འབད། །ཡིད་འགོག་རླུང་སྦྱོར་རྡོ་རྗེའི་བཟླས་པ་ཡི། །ཚེ་གཅིག་སངས་རྒྱས་འབྲས་བུ་མངོན་སྟེར་བྱེད། །རྫོགས་རིམ་མཚན་བཅས་མཚན་མེད་གྲངས་མང་ཡང་། །སྙིང་པོར་དྲིལ་ན་སངས་རྒྱས་ཆོས་ཀྱི་སྐུ། །རང་གི་སེམས་ཉིད་ལྷན་སྐྱེས་རང་ངོ་ཉིད། །ཇི་བཞིན་ཤེས་ལས་གཞན་གྱུར་རྫོགས་རིམ་མེད། །དེ་ཡང་མཚན་ལྡན་བླ་མས་མན་ངག་གནད། །སེམས་ཀྱི་འགྲོ་འོང་གནས་ལུགས་རྩད་གཅད་དེ། །དམིགས་མེད་བརྗོད་འདས་སྤྲོས་པའི་མཐའ་བྲལ་བ། །ཚིག་ཙམ་མ་ཡིན་ཇི་བཞིན་གནད་ཕེབས་གཅེས། །དེ་ཡང་ད་ལྟའི་སེམས་ཉིད་རང་བབས་དང་། །ཧ་ཅང་མི་སྒྲིམ་ཧ་ཅང་མི་ལྷོད་པར། །རང་ངོ་ཤེས་ཙམ་ཉམས་ལེན་རྩ་བར་བཟུང་། །དེ་བས་སྒྲིམ་ན་འཇུར་བུའི་གཟེབས་སུ་ཆུད། །ཀློད་ན་བག་མེད་གཡེངས་པའི་དབང་དུ་འགྲོ། །གྲིམ་ལྷོད་མཚམས་པ་དར་ཟབ་སྐུད་པ་ལྟར། །ཤེས་བཞིན་སྐྱོང་བ་ནང་དོན་མཁན་ཀུན་བཞེད། །མེད་ཐབས་མེད་པ་ཟབ་མོའི་གནད་ཉིད་ཡིན། །མཐར་ཐུག་རྟོགས་པ་མངོན་དུ་གྱུར་པ་ན། །གྲིམ་དང་ཀློད་པའི་སྤྲོས་པ་ག་ལ་ཡོད། །མཐའ་བརྒྱད་ལས་འདས་ཡང་དག་ལྟ་བ་ཡིན། །ཉིན་མཚན་འོད་གསལ་འཁོར་ཡུག་བསྒོམ་པའི་མཆོག །བླང་དོར་རྣམ་རྟོག་ཟད་པ་སྤྱོད་པའི་རྩ། །སྐུ་གསུམ་བཙན་ས་ཟིན་པ་འབྲས་བུར་འདོད། །དེ་ལྟ་མངོན་དུ་གྱུར་ཐབས་རྟེན་འབྲེལ་གནད། །མཐའ་དག་བླ་མའི་བྱིན་རླབས་ཁོ་ནས་ཡིན། །དེ་ཡང་དབང་ཆོས་མ་འབྲེལ་སྔོན་རོལ་དུ། །བླ་མའི་མཚན་ཉིད་ལེགས་པར་བརྟག་པ་གཅེས། །འདྲེས་ཁྱེར་དམ་སེལ་ཟག་ཟོག་ཅན་རྣམས་ཡང་། །དབང་ཆོས་འབྲེལ་ནས་བརྟག་དཔྱད་བྱ་མི་རུང་། །དབང་དོན་སྤྱི་དང་ཁྱད་པར་སེམས་ཉིད་དོན། །སྟོན་པའི་བླ་མ་སངས་རྒྱས་ཀུན་ལས་ལྷག །འཕང་ཚད་མིག་དང་གཅེས་ཚད་སྙིང་ལྟ་བུར། །ལྟེམ་རྐྱང་མེད་པར་མོས་གུས་གསོལ་འདེབས་འབད། །དམ་ཆོས་བརྒྱད་ཁྲི་བཞི་སྟོང་སྙིང་པོ་ནི། །མཐར་ཐུག་སངས་རྒྱས་སྒྲུབ་ཐབས་ཁོ་ན་སྟེ། །དེ་ཡི་མཐར་ཐུག་སྨིན་གྲོལ་རིམ་པ་གཉིས། །དེ་ཡི་སྲོག་རྩ་བླ་མར་མོས་གུས་ཏེ། །མེད་ཐབས་མེད་པའི་ཆོས་ཀྱི་སྙིང་པོ་རུ། །བརྒྱ་བཤད་སྟོང་བཤད་རྩ་བ་དེ་ལ་ཐུག །དེ་འདྲ་བཤད་ན་འཛད་པའི་མཐའ་མེད་ཀྱི། །གལ་ཚིག་མདོ་ཙམ་སྨྲས་པ་ཐུགས་ལ་ཞོག ། ཞེས་ཀོང་ཡུལ་རྩེ་ལྷ་སྒང་གི་རྫོང་བཞུགས་སྡེ་བ་རྩིས་དཔོན་སྲས་ཕུན་ཚོགས་རྣམ་རྒྱལ་གྱིས་ཡང་ཡང་བསྐུལ་བའི་ངོར་ཤིང་གླང་ལོ་ཕུག་ལུགས་བཤོལ་འདོན་གྱི་སྨིན་དྲུག་ཟླ་བའི་དམར་ཕྱོགས་དགའ་བ་གསུམ་པར་ལྗོན་པ་ཀླུང་དུ་རིག་པ་འཛིན་པ་ཚེ་དབང་ནོར་བུས་བྲིས་པ་སརྦ་མངྒ་ལཾ། ༈ ཞལ་གདམས་མདོ་དོན་སྙིང་དྲིལ།ཀྱེ་ཧོ་དད་པ་ཅན་ཁྱོད་ཚུར་གསོན་དང་། །དལ་འབྱོར་རིན་ཆེན་འདི་ནི་རྙེད་དཀའ་ཞིང་། །ནམ་འཆི་ཆ་མེད་ཡིད་ལ་དྲན་པ་དང་། །འཆི་དུས་ཕན་པ་དམ་པའི་ལྷ་ཆོས་མཛོད། །བསླུ་མེད་སྐྱབས་གནས་དཀོན་མཆོག་གསུམ་བརྟེན་ཅིང་། །འགྲོ་ཀུན་ཕ་མར་ཤེས་པའི་སེམས་བསྐྱེད་དང་། །ཚེགས་ཆུང་དོན་ཆེ་ཚོགས་བསགས་མཎྜལ་དང་། །སྒྲིབ་སྦྱངས་སྙིང་པོ་ཡིག་བརྒྱ་འབད་ཀྱང་འཚལ། །རྒྱལ་བའི་བསྟན་པ་ཀུན་ནས་ཆེ་ཐང་དུ། །བཤེས་གཉེན་བླ་མ་བསྟེན་ཚུལ་ཁོ་ན་བསྔགས། །དེས་ན་ཡིད་ཆེས་གཏིང་ཚུགས་བླ་མ་ལ། །མོས་གུས་ལྟེམ་རྐྱང་མེད་པའི་གསོལ་འདེབས་འཚལ། །སྔགས་ལམ་བསྐྱེད་རིམ་སྣང་སྟོང་སྒྱུ་མ་དང་། །རྫོགས་རིམ་སེམས་ཉིད་རང་ངོ་ཤེས་པ་ཡི། །ཡེངས་མེད་དྲན་པ་རྟག་ཏུ་བརྟན་པ་དང་། །དེ་ཡང་བྱང་ཆུབ་སེམས་ཀྱིས་ཟིན་ཡང་འཚལ། །མདོ་དོན་འཁོར་བར་ཞེན་པ་ལོག་པ་དང་། །བླ་མའི་མོས་གུས་དམ་ཚིག་སྲོག་ཕུར་བཙུགས། །སྒོ་གསུམ་ལེ་ལོར་མ་ལུས་དགེ་ལ་འབད། །དལ་འབྱོར་སྟོང་ལོག་མ་སོང་སྙིང་པོ་ལོངས། །ཚིག་ཚོགས་མང་པོའི་སྤྲོས་པ་མ་ལྕོག་པས། །མདོ་དོན་སྙིང་པོར་དྲིལ་བའི་གཏམ་འདི་ཉིད། །རིག་པ་འཛིན་པ་ཚེ་དབང་ནོར་བུ་ཡིས། །ཨ་ཇོ་བསྟན་འཛིན་པ་ལ་གདམས་པ་ཡིན། །སརྦ་མངྒ་ལཾ། ༈ གདམས་མགུར་ཨུ་དུམ་ཝ་ར།ཨེ་མ་གསན་འཚལ་སྒྲུབ་པོ་རྣལ་འབྱོར་པ། །ཚིག་སྤྲོས་མང་པོ་བྲི་ལ་མ་རྨོངས་ཤིང་། །དབེན་པར་ཡང་དག་འཇོག་ཅིང་སྙིང་འདྲ་བར། །བདག་ལྟར་རྣམ་གཡེངས་ཅན་གྱི་ཞལ་གདམས་ཅི། །འོན་ཀྱང་བསྐུལ་ངོ་མ་བཅག་མཚོན་ཙམ་པ། །ཡིན་ལུགས་ས་བོན་ཙམ་ཞིག་འདི་རུ་སྨྲས། །འགྲོ་དྲུག་གནས་ལ་དལ་འབྱོར་ཐོབ་དཀའ་སྟེ། །ཨུ་དུམ་ཝ་རའི་དཔེ་མཚུངས་ད་རེས་ཙམ། །ནམ་འཆི་ཆ་མེད་ཚེ་ནི་གློག་དང་འདྲ། །ཆུ་ཚོད་རེ་ཡི་འཆི་ལ་དེ་ཙམ་ཉེ། །དཀར་ནག་འབྲས་བུ་བསླུ་བ་མེད་ངེས་ཏེ། །ཆུ་ཀླུང་བཞིན་དུ་ལས་ཀྱི་རྗེས་སུ་འབྲངས། །ཐར་པའི་མཆོག་ནི་རྫོགས་པའི་སངས་རྒྱས་ཏེ། །དེ་བསྒྲུབ་ལམ་ལ་རབ་ཏུ་འབད་པར་རིགས། །བློ་ལྡོག་བཞི་འདི་ཆོས་ཀྱི་རྨང་གཞི་སྟེ། །ཐར་པའི་ལམ་སྐས་མེད་ཐབས་མེད་པ་ཡིན། །སྐྱབས་གནས་ཀུན་འདུས་ངོ་བོ་བླ་མ་སྟེ། །སྐྱིད་སྡུག་གང་བྱུང་བློ་གཏད་དེ་ལ་འཆའ། །འགྲོ་དྲུག་སེམས་ཅན་ཕ་མའི་རང་བཞིན་ཏེ། །དགེ་བསྒྲུབ་ཀུན་ཀྱང་འགྲོ་དོན་ཁོ་ནར་བསྔོ། །མདོ་རྒྱུད་ཆོས་རྣམས་ཀུན་གྱི་ཡང་སྙིང་ནི། །རང་རིག་གནས་ལུགས་རྟོགས་ཐབས་ཁོ་ན་ཡིན། །ལམ་གྱི་བྱེ་བྲག་དབུ་ཕྱག་ཞི་གཅོད་དང་། །ནཱ་རོ་ནི་གུའི་ཆོས་དྲུག་ལམ་འབྲས་བུ། །སྦྱོར་དྲུག་རྫོགས་ཆེན་སོགས་སུ་འདོགས་ལགས་ཤིང་། །ཀུན་གྱི་མཐར་ཐུག་དོན་གྱི་གནད་འགག་ནི། །བྱིན་རླབས་བླ་མའི་མོས་གུས་ཁོ་ན་ཡིན། །འདི་ཡོད་ཆོས་རྣམས་ཀུན་གྱི་སྲོག་སྙིང་ཡོད། །འདི་མེད་ཆོས་ཀྱི་སྲོག་རྩ་ཆད་པ་ཡིན། །དེས་ན་སྐྱིད་སྡུག་དཀའ་སླ་ཅི་བྱུང་ཡང་། །བླ་མར་མོས་གུས་ལྟེམ་རྐྱང་མེད་པ་ཡི། །དད་མོས་དམ་ཚིག་ཕུར་པ་སྙིང་ལ་བཏབ། །རང་སེམས་ཆོས་ཀྱི་སྐུ་རུ་ངོ་སྤྲད་པའི། །བླ་མ་དེ་ནི་སངས་རྒྱས་ཀུན་ལས་ལྷག །གཞན་གྱི་སྣང་ངོར་ཇི་ལྟར་ཤར་ན་ཡང་། །རང་གི་རྡོ་རྗེ་སེམས་དཔའ་དངོས་སུ་བལྟ། །དེ་མཐུས་ཉམས་རྟོགས་འབྲས་བུར་སྨིན་གྱུར་ཏེ། །ཉམས་རྟོགས་ཞེས་པའི་སྒྲ་བོ་ཆེ་དེ་ཡང་། །རང་ངོ་ཤེས་དང་མ་ཤེས་ཁྱད་ཙམ་ལས། །ད་ལྟའི་མ་བཅོས་ཤེས་པ་འདི་ཉིད་སྟེ། །འདི་ཞེས་ཚིག་ཀྱང་མིང་སྟོང་ཙམ་དུ་ཟད། །ཡོད་མེད་ཡིན་མིན་སྤྲོས་པ་ལས་འདས་ཤིང་། །བྱར་མེད་བློ་ཡུལ་ལས་འདས་ཆོས་ཉིད་དེ། །དེ་བཞིན་ཉིད་ཀྱི་གནས་ལུགས་ཞེས་པར་བརྗོད། །དེ་ཡང་གནས་སྐབས་མདོ་དོན་ལག་བླང་ན། །སྔར་འདས་རྟོག་པའི་འཕྲོ་བཅད་མ་འོངས་པའི། །རྣམ་རྟོག་ལ་སོགས་ད་ལྟའི་ཤེས་པ་ལ། །གཟོ་བྲལ་གཉུག་མ་བརྗོད་མི་ཤེས་པའི་དོན། །རང་ངོར་སྣང་བ་འདི་ནི་ཆོས་ཀྱི་སྐུ། །གདོད་མའི་ཡེ་ཤེས་བྱ་བར་མཁས་རྣམས་བཞེད། །དེ་ཡང་དུས་ཀུན་སྤང་བླངས་བཅས་བཅོས་དང་། །ཡིན་མིན་རེ་དོགས་གོང་བགྲོད་ལྟོས་གཞི་སོགས། །སྤངས་ཏེ་མ་ཡེངས་མི་བསྒོམ་རང་ཐོག་ཏུ། །སྐྱོང་ན་གནས་ལུགས་དྲི་མེད་མངོན་གྱུར་ཐོབ། །དེ་ཡི་བོགས་འདོན་ཁྱད་པར་གནད་བདུན་གྱིས། །འཕགས་པ་རྫོགས་ཆེན་ཐོད་རྒལ་ཞེས་གྲགས་ཏེ། །མཁའ་གསུམ་སྒྲོན་བཞི་རང་རིག་ལུག་རྒྱུད་ཀྱི། །འབེན་ལ་ལོངས་སྤྱོད་སྣང་བཞི་མངོན་གྱུར་ནས། །ཀུན་བཟང་དགོངས་ཀློང་སྐྱེལ་བྱེད་ལམ་མཆོག་སྟེ། །རིམ་ལྔ་སྦྱོར་དྲུག་སོགས་ཀྱི་རླུང་རྟགས་དང་། །འདི་མི་མཚུངས་ཤིང་ཁྱད་པར་འཕགས་པ་ཡིན། །དེས་ན་མི་འགུལ་གསུམ་དང་སྡོད་གསུམ་གྱི། །ཉམས་ལེན་འབད་ན་ཚེ་འདིར་སངས་རྒྱས་ངེས། །ཉམས་ལེན་རྩ་བའི་སྙིང་པོ་དེ་ཡིན་ལ། །དེ་གྲོགས་ཐབས་ལམ་རྩ་ཐིག་རླུང་གསུམ་གྱི། །མན་ངག་རྣམས་ཀྱང་ཞེན་བྲལ་བལྟ་བའི་ངང་། །སྐྱོང་བས་དྲོད་ཚད་མྱུར་དུ་སྐྱེ་བར་འགྱུར། །དེ་སྐད་བུ་ལེ་གངས་རི་ཁྲོད་གནས་པ། །ཚེ་འདིའི་ཞེན་ལོག་ངེས་དོན་རྫོགས་ཆེན་གྱི། །རྣལ་འབྱོར་དམ་པ་ཀུན་བཟང་ཡོངས་གྲོལ་དེས། །བཀྲ་ཤིས་བུམ་པ་སྤོས་ཁང་ལྷ་གོས་རྟེན། །བཅས་ཤིང་གསུང་གི་བསྐུལ་ངོར་མདོ་ཁམས་པ། །རྒྱལ་བ་པདྨའི་སྲས་གྱུར་རིག་པ་འཛིན། །ཚེ་དབང་ནོར་བུར་གྲགས་པའི་རྒྱལ་ཁམས་པ། །དེ་ཡིས་ལྕགས་ཕག་མགོ་ཟླའི་ཚེས་གཅིག་གི །སྔ་ཆར་གང་ཤར་ཆུ་བབ་ཉིད་སྤེལ་བའི། །ཡི་གེ་པ་ནི་དགེ་ཚུལ་དཔལ་འབར་ཡིན། །མངྒ་ལཾ།ལྷག་པའི་བསམ་པ་ཟླ་བ་ལྟར་དཀར་བས། །ཚིགས་སུ་བཅད་པའི་འོད་དཀར་བདུད་རྩི་བཞིན། །སྐལ་ལྡན་སློབ་མའི་སྙིང་གི་ཀུ་མུད་གང་། །རབ་འཛུམ་དགེ་བའི་དྲི་བསུང་ཆེར་རྒྱས་ཤོག ། ༈ གདམས་པ་འཇིགས་མེད་བློ་གྲོས།ཨོཾ་སྭཱསྟི། དཔལ་ལྡན་བླ་མའི་རིགས་སྲས་དམ་པའི་གཅུང་། །ཐུབ་བསྟན་ངུར་སྨྲིག་གོས་ཀྱིས་ཉེར་མཛེས་པ། །དགེ་སློང་ལག་ན་༼ཕྱག་རྡོར་དབང་ཕྱུག་༽རྡོ་རྗེ་ཞེས་བྱ་བ། །རང་གི་སློབ་མར་གྱུར་ལ་འདི་སྐད་གསོལ། །སྟོང་གསུམ་ལུས་ཅན་ཇི་སྙེད་གནས་ཀུན་ལས། །ལུས་མེད་སྐྲ་རྩེའི་མཁའ་ལ་མཉམ་འཇུག་མང་། །ལུས་ཅན་རྣམས་ནས་དལ་འབྱོར་རྟེན་བཟང་ནི། །ཡང་ཡང་ཐོབ་དཀའ་ངེས་ཤེས་གཏིང་ནས་སྐྱེ། །སྣང་སྲིད་སྣོད་བཅུད་ཀུན་ཀྱང་མི་རྟག་ཅིང་། །འཕྲལ་དུ་སྐྱེས་ནས་ད་བར་དགྲ་དང་གཉེན། །བར་བའི་འགྲོ་ཀུན་འཆི་འགྱུར་རང་ཉིད་ཀྱང་། །མྱུར་དུ་འཆི་ངེས་མི་རྟག་དུས་ཀུན་བསྒོམ། །ཚེ་འདིའི་སྙན་གྲགས་ཟང་ཟིང་འདུ་ལོང་ཀུན། །སད་ཁའི་རྨི་ལམ་ཇི་བཞིན་མྱུར་དུ་འཇིག །དེ་ལ་ཞེན་མེད་གཏན་བདེའི་འདུན་མ་མཆོག །དམ་པའི་ལྷ་ཆོས་སྙིང་གི་དཀྱིལ་ནས་འབད། །ཆོས་རྣམས་ཀུན་གྱི་རྩ་བ་རྒྱུ་འབྲས་ཏེ། །རྒྱུ་འབྲས་ལས་གཞན་ཆོས་འགའ་ཡོད་མིན་པས། །དཀར་ནག་ལས་ལ་བླང་དོར་མ་ནོར་བ། །རང་གིས་རང་ལ་སྐུལ་མ་གདབ་ཀྱིན་བྱོས། །ཐུབ་བསྟན་གནས་པའི་ཚད་ནི་འདུལ་བ་སྟེ། །དེ་ཡི་ངོ་བོ་སོ་ཐར་ཚུལ་ཁྲིམས་ཡིན། །དེས་ན་དགེ་སློང་གོ་འཕང་སྲིད་གསུམ་གྱི། །རྒྱལ་སྲིད་ཐོབ་པའི་ཟླ་མིན་དགའ་བར་འཚལ། །སྙིགས་དུས་མིག་ལྟོས་ངན་པའི་བསྲེ་སླད་ཀྱི། །བུད་མེད་ཆང་གི་ཡོ་ལང་སྤྱད་པ་འདི། །འདྲེན་པ་དུས་གསུམ་བྱོན་པ་ཀུན་གྱིས་བཀག །དེས་ན་དེ་སྤངས་གོ་ཆ་རྟག་ཏུ་བརྟེན། །སྔགས་ཀྱི་ལས་རྒྱ་ཉེར་ཐོབ་ལྷན་སྐྱེས་ཀྱི། །མཚོན་བྱེད་ཆེད་ལས་སྤྲོས་བཅས་སྐབས་མིན་པར། །སྔགས་ནས་བཀག་ན་མདོ་ནས་སྨོས་ཅི་འཚལ། །དེ་བས་བུད་མེད་རིང་སྤང་ཞེ་ལ་བསྣག །རང་སེམས་ཆོས་ཉིད་མངོན་སུམ་རྟོགས་པའི་ཚེ། །བདེ་སྟོང་ཡེ་ཤེས་དེ་དང་ལྷན་ཅིག་ཤར། །ཁུ་ཁྲག་འདྲེས་པའི་བདེ་བར་རག་མི་ལས། །དེས་ན་མི་འགྱུར་བདེ་ཆེན་བསྒྲུབ་ལ་འབུང་། །ཚེ་གཅིག་སངས་རྒྱས་ཉེ་ལམ་རྩ་བ་ནི། །མཚན་ཉིད་ལྡན་པའི་བླ་མར་རག་ལས་པས། །མ་ནོར་རྒྱུད་ནས་བཤད་བཞིན་ཐོག་མར་བཙལ། །རྙེད་ནས་བསྟེན་ཚུལ་རྒྱུད་ནས་བཤད་བཞིན་འབད། །སྔགས་ཀྱི་སྲོག་རྩ་དམ་ཚིག་ཁོ་ན་སྟེ། །གཡོ་སྒྱུ་མངོན་ལྐོག་ཚུལ་འཆོས་མ་ཡིན་པར། །ཆོས་དང་རང་སེམས་གཉིས་པོ་ཞུས་དག་བཏང་། །དྲི་མེད་ཤེལ་ལྟར་རྟག་ཏུ་འབད་འོས་ཡིན། །བླ་མ་སངས་རྒྱས་ཀུན་ལས་ལྷག་ཞེས་པ། །ཚིག་ཙམ་མ་ཡིན་སྙིང་གི་དཀྱིལ་ནས་བསྒོམ། །སྒོ་གསུམ་འབད་པས་མཉེས་པའི་ཞབས་ཏོག་བསྒྲུབ། །ཐུན་དྲུག་གསོལ་འདེབས་ཆད་མེད་སྙིང་ལ་བཞག །རྒྱ་བོད་ཀུན་ཏུ་ཟབ་དགུ་དམ་པའི་ཆོས། །ཡང་གསང་ཀུན་གྱི་མཐར་ཐུག་རྫོགས་པ་ཆེ། །ཀུན་བཟང་དགོངས་པ་དྲང་ཐད་བསྟན་པ་ཉིད། །ཉམས་ལེན་ལ་འབད་ཚེ་གཅིག་སངས་རྒྱས་ངེས། །དེ་ལྟའི་བརྗོད་བྱའི་ཚིག་ལ་ཟད་པ་ཅི། །རྣམ་པ་མང་པོ་སྨྲས་ཀྱང་ཇི་ཞིག་ཕན། །ཐུགས་ལ་བཞག་ན་ཉུང་ངུའི་ངག་དེས་ཀྱང་། །དོན་གཉིས་ཕུན་ཚོགས་འགྲུབ་པར་སོམ་ཉི་མེད། །དེ་སྐད་རང་གཞན་གྲུབ་མཐའ་རྒྱ་མཚོ་ཆེ། །འཇུག་ལ་འཇིགས་མེད་བློ་གྲོས་གྲུ་གཟིངས་ཅན། །གངས་རིའི་ཁྲོད་དུ་རིག་པ་འཛིན་པ་ཞེས། །རྒྱལ་ཁམས་སྤྱོད་པ་ཚེ་དབང་ནོར་བུ་ཡི། །རྗེ་བཙུན་ཆེན་པོའི་སྒྲུབ་གནས་ཟ་འོག་ཕུག །དཀར་པོའི་ལོ་ཞལ་གསར་འཆར་རྒྱལ་ཟླ་ཡི། །ཡར་ཚེས་རྒྱལ་བ་གཉིས་པའི་ཐུན་མཚམས་སུ། །གང་ཤར་ལྷུག་པར་བརྗོད་འདི་དགེ་གྱུར་ཅིག །དགེའོ། །སརྦ་མངྒ་ལཾ། ༈ ལྟ་སྒོམ་སྤྱོད་པའི་སྒོ་ནས་ཞལ་གདམས་མདོར་བསྡུས་རིན་ཆེན་མཛོད་འཛིན་ཡོད།ཨོཾ་སྭཱ་སྟི། རྒྱལ་ཀུན་ངོ་བོ་མཚོ་སྐྱེས་རྡོ་རྗེར། །སྙིང་ཁོང་རུས་པའི་གཏིང་ནས་ཕྱག་འཚལ། །ཕྱོགས་མེད་རྒྱལ་ཁམས་རྣལ་འབྱོར་པ་ལ། །ཞལ་གདམས་དགོས་ཞེས་གསུང་གིས་བསྐུལ་བར། །མང་མང་བྲི་བར་ཁོམ་ལོང་མ་བྱུང་། །མཚོན་བྱེད་ཙམ་ཞིག་སྨྲ་བར་བྱས་ན། །རྒྱལ་བས་གསུང་པའི་ཆོས་སྒོ་བརྒྱད་ཁྲི། །བཞི་སྟོང་གྲགས་པའི་སྙིང་པོ་བསྡུ་ན། །རྒྱུ་འབྲས་ཐེག་པ་གཉིས་ལས་གཞན་མེད། །རྒྱུ་ལ་ཆེ་དང་ཆུང་ངུ་ཉན་རང་། །འཁོར་བ་སྡུག་བསྔལ་རང་བཞིན་ཤེས་ནས། །སྤང་འདོད་གོ་ཆས་ཞི་བ་ཕྱོགས་གཅིག །དོན་དུ་གཉེར་བས་ལྷག་བསམ་རྒྱ་ཆུང་། །འབྲས་བུའི་སྐུ་དང་མཁྱེན་ལ་སྒྲིབ་པས། །ཞི་བར་གཞོལ་ཡང་མྱང་འདས་དངོས་མིན། །དེས་ན་ཐེག་ཆེན་བླང་བྱར་མ་བཤད། །རྒྱུ་ཡི་ཐེག་ཆེན་ཀུན་ཀྱང་བཞེད་མཐར། །ལྟ་བ་བདག་མེད་གཉིས་དང་བསྒོམ་པ། །སྨོན་འཇུག་སྟོང་ཉིད་སྙིང་རྗེར་ཡོངས་འབྲེལ། །སྤྱོད་པ་ཀུན་ཀྱང་ལྷག་བསམ་གྱིས་ཟིན། །འབྲས་བུ་སྐུ་དང་མཁྱེན་གཉིས་རྒྱས་བཞེད། །འདི་ནི་སྲིད་ཞིའི་མཐའ་ལ་གནས་མིན། །བྱང་ཆུབ་འབྲས་འདིར་མཚུངས་གཞན་ཡོངས་མེད། །དེས་ན་བྱང་ཆུབ་ཆེ་ཞེས་ཡོངས་གྲགས། །འོན་ཀྱང་ཐེག་ཆེན་གྲུབ་མཐའི་ནང་ཚན། །སེམས་ཙམ་པ་ལ་རྣམ་བདེན་རྣམ་རྫུན། །དབུ་མ་རང་རྒྱུད་ཐལ་འགྱུར་རྣམ་རིག །རྒྱ་བོད་མཁས་པའི་ཁས་ལེན་མང་ཡང་། །འོན་ཀྱང་རང་ལུགས་མཁས་པའི་མཁས་པ། །ཤིང་རྟ་ཆེན་པོར་རྒྱལ་བས་ལུང་བསྟན། །དམ་པ་མང་པོའི་བཞེད་པ་མཐུན་ཞིང་། །རྫོགས་ཆེན་ལྟ་བར་ཤིན་ཏུ་འཇུག་པས། །འཁོར་ལོ་གསུམ་པའི་དགོངས་དོན་ཇི་བཞིན། །རྣམ་རིག་དབུ་མའི་ཁས་ལེན་བྱེད་མོད། །དེ་དག་རང་གི་གནས་ལུགས་བརྗོད་པས། །འགོད་བཞག་ཡིག་ཚོགས་མང་བས་མ་སྤྲོས། །འབྲས་བུའི་ཐེག་པ་སྔགས་སྡེ་གཉིས་ལས། །ཕྱི་པ་ཐུབ་རྒྱུད་སྐྱེ་བ་གྲངས་དང་། །སྐྱེ་བའི་གྲངས་ཀྱིས་སངས་རྒྱས་བཞེད་མོད། །ནང་པ་ཐབས་རྒྱུད་འདི་ཕྱི་བར་དོར། །རྫོགས་སངས་རྒྱས་པའི་འབྲས་བུ་འགྲུབ་བཞེད། །དེ་ལྟར་སྔགས་རྒྱུད་རྣམ་པ་ཀུན་གྱི། །མཐར་ཐུག་ཨ་ཏི་ཡོ་ག་ཞེས་གྲགས། །དེ་ལ་སྡེ་གསུམ་སྡེ་བཞིར་གྲགས་མོད། །དེང་སང་བཀའ་སྲོལ་འགའ་དང་ཁྱད་པར། །སྙིང་ཐིག་བཞི་སོགས་ཡང་གསང་སྡེར་ངེས། །སྔགས་རྒྱུད་ཀུན་གྱི་རྩེ་རྒྱལ་ལགས་པ། །བདག་ནི་གྲུབ་མཐའ་དེ་ཡི་བཞེད་པ། །ཅི་ནུས་ཉིད་དུ་སྐྱོང་བའི་ཁུལ་ལགས། །དེ་དག་བདག་རང་ལྟ་བའི་གནས་ལུགས། །ཅི་འདྲའི་ངང་ཚུལ་འཕྲོས་སུ་ཕུལ་ལ། །མདོ་སྔགས་ལྟ་བའི་རྒྱལ་པོ་དེ་འདྲར། །སྐལ་ལྡན་རྣམས་ཀྱང་ཞུགས་པར་འོས་མོད། །ཡང་དག་དོན་ལ་ལྟ་བ་ཞེས་པ། །ལྟ་བྱ་ལྟ་བྱེད་ལྟ་བའི་ཡུལ་འདས། །དོན་ལ་མིང་ཚིག་མིང་ཚིག་དོན་ཞེན། །སྤྲོས་པའི་མཐའ་ཀུན་བྲལ་བ་དེ་ལགས། །བསྒོམ་པ་ཞེས་གྲགས་རིམ་གཉིས་རྣལ་འབྱོར། །བསྐྱེད་པ་སྦྱང་བྱ་སྦྱོང་བྱེད་རིམ་པ། །མ་འཁྲུལ་ཆོ་གས་ལྷ་ཡི་སྣང་བ། །བསམ་གཏན་དུག་མེད་གསལ་སྣང་བསྐྱེད་བཅིང་། །རྫོགས་པའི་རིམ་པ་རྟེན་ཅན་རྟེན་མེད། །བརྟེན་ཅན་ཕྲ་ཐིག་བུམ་ཅན་གཏུམ་སོགས། །རྟེན་མེད་གནས་ལུགས་དཔྱད་འཇོགས་ཀྱིས་བསྒོམ། །དཔྱད་སྒོམ་དག་ལ་དམོད་མི་བྱེད་ཡང་། །རང་ལུགས་ཚུལ་བཞིན་འཇོག་བསྒོམ་གཙོར་བྱེད། །འཇོག་བསྒོམ་ཟབ་པ་གཙོ་བོར་སྟོན་དང་། །གསལ་བ་གཙོར་སྟོན་བཞེད་པ་མང་ཡང་། །ཟབ་གསལ་དབྱེར་མེད་ལམ་གྱི་སྙིང་ལགས། །དེས་ན་བསྒོམ་པ་ཀུན་གྱི་མཐར་ཐུག །ཟབ་གསལ་བདེ་བ་ཆེ་འདི་རྨད་བྱུང་། །འོན་ཀྱང་ཟབ་མོ་གཏན་ལ་མ་ཕབ། །གསལ་བའི་ཡེ་ཤེས་གནད་དུ་བསྣུན་མིན། །ཟབ་མོ་གནས་ལུགས་ཆོས་ཉིད་དེ་ཡང་། །ཞི་གཅོད་ཕྱག་སེམས་བཞེད་པ་དབྱིངས་གཅིག །གནས་སྐབས་ཁས་བླང་འདྲ་མིན་མང་མོད། །དེ་ཡི་མན་ངག་རྣལ་འབྱོར་ཙམ་འགྱུར། །དེ་ཡང་ཟབ་མོའི་མཐར་ཐུག་ཁྲེག་ཆོད། །རྫོགས་སངས་རྒྱས་ཀྱི་གཞི་དང་འབྲས་བུ། །རང་རིག་རང་གསལ་རང་བྱུང་རྗེན་པ། །དེ་ཉིད་གཏན་ལ་ཕབ་པའི་ཁྱད་ཆོས། །སྔོན་འགྲོ་སེམས་ཀྱི་ཁང་བུ་བཤིག་ཅིང་། །དངོས་གཞི་གཅེར་མཐོང་རང་གྲོལ་ངོ་བོ། །རང་ངོ་རང་སྤྲོད་རང་ཐག་དབྱིངས་གཅོད། །གྲོལ་ཐོག་གདེང་བཟུང་སྐུ་བཞིར་ལ་བཟླ། །མདོར་ན་རིག་སྟོང་ལྷན་སྐྱེས་ཟང་ཀ། །བློ་ཡུལ་གོ་བ་ཙམ་མིན་རྗེན་པ། །ཆེད་ཀྱི་བསྒོམ་རྒྱུ་རྡུལ་ཕྲན་ཙམ་མེད། །ཡེངས་པའི་དབང་དུ་ནམ་ཡང་མ་ཤོར། །རང་ངོ་རང་ཤེས་ཡེངས་མེད་ཟང་ཐལ། །འདི་ཀ་སྐྱོང་ལས་གསལ་བཞག་གཞན་མེད། །གོང་བགྲོད་ལྟོས་གཞི་ནམ་ཡང་མི་འཆའ། །གཤིས་ཐོག་གོ་བར་མ་ཤོར་གནད་ལགས། །ཅོག་བཞག་བཞི་དང་གསུམ་གྱི་ངང་ལ། །དུས་རྟག་སྐྱོང་ལ་རྫོགས་ཆེན་ཁྲེག་ཆོད། །གནད་གདམས་ཀུན་ཀྱང་དེ་རུ་འདུ་བས། །སྙིང་པོའི་ཉམས་ལེན་ཉིད་ལ་བརྩོན་འཚལ། །གསལ་བའི་ཉམས་ལེན་རྣམ་གྲངས་མང་མོད། །སྔགས་རྒྱུད་ཐུན་མོང་ཀུན་ནས་བསྐྱེད་རིམ། །ལ་བཞེད་འགས་ནི་མ་བརྟག་སྐུ་དང་། །དེ་བཞིན་འོད་གསལ་སྟོང་གཟུགས་ལའང་བཞེད། །རང་ལུགས་རྫོགས་པ་ཆེ་ནི་ཐོད་རྒལ། །དབྱིངས་གསུམ་སྒྲོན་མ་དགུ་དང་དྲུག་གམ། །བཞིར་བཞེད་སྙིང་པོ་ཤེས་རབ་རང་བྱུང་། །དཔེ་དོན་རྟགས་ཀྱིས་གཏན་ལ་ཕབ་པ། །ཁམས་གསུམ་ཡོངས་གྲོལ་དགོངས་པ་ཉིད་དང་། །མི་འགུལ་མི་འགྱུར་ཐོབ་གདེང་འཆའ་འདིས། །ཐོད་རྒལ་གནད་ཀུན་དེ་ལ་འདུ་བས། །བྱ་བ་དགུ་སྤྲུག་བཏང་ནས་འབད་འཚལ། །བསྒོམ་པའི་རྟགས་ཚད་སྣང་བཞིའི་ཉམས་རིམ། །མཐར་ཐུག་ཆོས་ཟད་དབྱིངས་སུ་བསྐྱལ་ཏེ། །འདི་ལ་གསར་མའི་མཁས་པ་འགའ་ཡིས། །ཆོས་ཟད་ཚིག་ལ་དཔྱད་པར་མཛད་ཀྱང་། །ཆོས་ནི་རྣམ་ཤེས་བློ་ཡུལ་དོན་གཅིག །དེ་མ་ཟད་ཀྱི་བར་དུ་སྒྲིབ་ལྡན། །དེ་ནས་ས་བཅུ་པ་ཡང་རྣམ་ཤེས། །ཆ་ཤས་ཀྱིས་ནི་ཤེས་བྱའི་སྒྲིབ་གྲགས། །དེས་ན་བློ་ཡིད་བཞི་ཡི་རྣམ་ཤེས། །དེ་ཟད་པ་ལ་ཆོས་ཟད་མིང་བཏགས། །མཁས་མཆོག་འགའ་ནི་འདི་ལ་གནས་འགྱུར། །མིང་དུ་བཏགས་མོད་དོན་ལ་གནད་གཅིག །དེ་མ་གོ་འགའ་ཆོས་ཟད་ཞེས་པའི། །ཚིག་ཙམ་ཉིད་ལ་དངངས་སྐྲག་སྐྱེ་རྣམས། །རྟོག་གེའི་བློ་ཡིས་འཕྱང་མོ་ཉུག་སྟེ། །ཚིག་གི་སྨིག་རྒྱུར་རི་དྭགས་གཡོམ་པོ། །ཡང་དག་དོན་ལ་ཆོས་ཉིད་ཡེ་ཤེས། །ཟད་དང་མ་ཟད་རྟགས་ཀྱང་དེར་མིན། །ཟད་མི་ཟད་ནི་མིང་བཏགས་ཁོ་ན། །ཆོས་ཉིད་དོན་ནི་ཁས་ལེན་ལས་འདས། །འདི་ལ་ཚིག་ཚོགས་ཡི་གེའི་འཇིགས་ལས། །སྐབས་འདིར་རྒྱ་ཆེར་སྤྲོ་མ་བྱས་མོད། །འོན་ཀྱང་ཉིད་སོགས་དམ་པས་ཟིན་ཅིང་། །རྩེ་གཅིག་གནས་ལུགས་འཇོག་ལ་བརྩོན་པས། །བསྒོམ་བྱུང་ཤེས་རབ་ནང་ནས་རྒྱས་ཚེ། །དོན་དམ་རྟོགས་ལ་སོམ་ཉི་ཅི་ཞིག །བདག་ནི་ཆོས་མང་ཐོས་བསམ་ཤེས་ཀྱང་། །རྣམ་གཡེང་བདུད་ཀྱི་བསྒོམ་པས་དབེན་གྱུར། །ནེ་ཙོ་བཞིན་དུ་ཚིག་ཚོགས་ཀློག་ལ། །ངོ་མཚར་ལྡན་ཞེས་རང་གིས་མི་སེམས། །དེས་ན་རྣལ་འབྱོར་བསྒོམ་ལ་བརྩོན་པར། །བདག་ལྟའི་ཞལ་གདམས་མིང་གིས་ཅི་ཞིག །འོན་ཀྱང་སྣང་བ་དག་པའི་གཟིགས་པས། །ཞལ་གདམས་དགོས་ཞེས་གསུང་ངོ་ཙམ་ལགས། །ཡང་ཅིག་སྤྱོད་པ་ཞེས་སུ་གྲགས་དེ། །སྤྲོས་དང་སྤྲོས་མེད་བྷུ་སུ་ཀུ་སོགས། །རྒྱུད་སྡེ་ནས་བཤད་རྣམ་གྲངས་མང་ཡང་། །མདོར་བསྡུ་གནས་སྐབས་ལག་ཏུ་བླང་བྱ། །ཚུལ་ཁྲིམས་རྩ་བ་ལས་འབྲས་ལ་གཞིབ། །བཙུན་ཚུགས་གཞན་གྱི་དྭངས་བ་འདྲེན་དང་། །མཛེས་ཁྲིག་གཞན་ངོ་ཙམ་མིན་སྙིང་ནས། །འགྲོ་ཕན་ལྷག་བསམ་ནམ་ཡང་དོར་མིན། །གསང་སྔགས་ཆོས་ཀུན་སྲོག་རྩ་དམར་པོ། །དམ་ཚིག་གཉན་ལ་སྙིང་ནས་འབད་འཚལ། །དེ་དག་ཀུན་གྱི་སྙིང་པོ་དྲིལ་ན། །ལྟ་བ་དམིགས་མེད་རང་བཞིན་ཡེ་ཤེས། །བསྒོམ་པ་ཟབ་གསལ་བདེ་ཆེན་ཟུང་འཇུག །སྤྱོད་པ་བླང་དོར་མ་འཁྲུལ་བརྟུལ་ཞུགས། །ཀུན་གྱི་གཞི་རྟེན་བླ་མར་མོས་གུས། །གནད་ཀྱི་ཡང་ཏིག་རྡོ་རྗེའི་དམ་ཚིག །ནམ་ཡང་གཡེང་མེད་སྙིང་ལ་གཟེར་ནས། །རིམ་གཉིས་བསྒོམ་ལ་བརྩོན་བསྐྱེད་བྱས་ཏེ། །དེར་མ་འདུ་བ་འགའ་ཡང་མ་མཆིས། །དེས་ན་སྙིང་པོའི་དོན་དེར་སྤྱོད་འཚལ། །དེ་སྐད་དགོས་ཡུལ་འབྲི་མཚམས་བཞུགས་པའི། །ཀཿཐོག་གྱང་རིས་ཚལ་ཁའི་རྒྱུད་འཛིན། །སྔ་འགྱུར་རྡོ་རྗེ་ཐེག་པའི་རྣལ་འབྱོར། །བློ་བཟང་སྙན་གྲགས་རབ་བརྟན་གང་གི །གསོལ་བ་བཏབ་ངོར་མདོ་ཁམས་དབུས་འགྱུར། །ཀཿཐོག་རྡོ་རྗེ་གདན་གྱི་མངའ་རིས། །ས་ཡི་ཐིག་ལེ་འབྲི་རྒྱུད་ཕྱོགས་སྐྱེས། །པད་འབྱུང་ལུང་གིས་མངགས་པའི་ཕོ་ཉར། །རློམ་པ་ལྷ་རིགས་ཤཱཀྱའི་དགེ་བསྙེན། །གཞུང་ལུགས་རྒྱ་མཚོ་སྨྲ་ལ་མི་འཇིགས། །སྤོབས་པའི་མགྲིན་པས་ལང་ཚོ་བརྒྱན་གྱུར། །ཚེ་དབང་ནོར་བུ་དཔལ་གྱི་རྒྱ་མཚོས། །པདྨའི་སྦས་ཡུལ་འབྲས་ལྗོངས་བྱང་ཕྱོགས། །གྲུབ་པའི་བསྟི་གནས་གསང་སྔགས་རི་བོར། །ཤིང་ཡོས་ནག་ཟླའི་ཚེས་ཉེར་གསུམ་གྱི། །ཐུན་སྐབས་གཅིག་ཏུ་གང་ཤར་བྲིས་པའི། །ཡིག་རིས་རང་གི་སློབ་མར་གྱུར་པ། །ཨོ་རྒྱན་བསྟན་འཛིན་རྡོ་རྗེས་བགྱིས་སོ། །མངྒ་ལཾ། དགེའོ། །དགེའོ། །དགེའོ། ། ༈ གདམས་མགུར་མདོ་རྒྱུད་དོན་བསྡུས།ཨོཾ་སྭཱ་སྟི། རྒྱལ་བཀའ་མདོ་རྒྱུད་གྲུབ་ཐོབ་གོང་མའི་གསུང་། །ཉམས་སུ་བླངས་ན་དེ་ཀུན་ཞལ་གདམས་ཡིན། །གསར་དུ་བདག་གིས་སྨྲས་པས་ཅི་ཞིག་བྱ། །འོན་ཀྱང་བསྐུལ་ངོ་མ་གཅོག་ཅུང་ཟད་ཅིག །སྨྲ་ན་དལ་འབྱོར་རིན་ཆེན་མི་ཡི་ལུས། །ཨུ་དུམ་ཝ་ར་ཇི་བཞིན་རྙེད་དཀའ་ཞིང་། །ནམ་འཆི་ཆ་མེད་རིང་མིན་མྱུར་འཆི་བ། །དལ་འབྱོར་དོན་ལྡན་བརྩོན་པས་ཆོས་ལ་འབད། །ཆོས་ལ་མོས་ཀྱང་སྙིགས་དུས་གྲོགས་རྐྱེན་གྱིས། །ཆོས་མིན་ལོག་པའི་ལམ་དུ་དཀྲི་མང་བས། །ཆོས་མཐུན་གྲོགས་བརྟེན་རང་སྐྱོན་རང་གིས་བརྟག །བཀའ་བརྒྱུད་གོང་མའི་རྣམ་ཐར་བསམ་བཞིན་བསླབ། །ཆོས་ཀུན་ལས་འབྲས་བསླུ་མེད་ཡིད་ཆེས་སུ། །ཤེས་བཞིན་སྔགས་ཆོས་ཀུན་གྱི་རྩ་བའི་གནད། །བླ་མར་མོས་གུས་དམ་ཚིག་ཁོ་ན་ལ། །ལུས་སྲོག་ལྟོས་པ་མེད་པའི་ངང་དུ་བསྐྱེད། །གནས་ལུགས་ཕྱག་ཆེན་ཞེས་པའི་སྒྲ་བོ་ཆེ། །རང་སེམས་མ་བཅོས་རང་བབ་ལྷུག་པ་ལ། །མ་ཡེངས་དྲན་པ་རྒྱུན་ཆགས་བརྟེན་པ་ལས། །གཞན་མེད་ཉིན་མཚན་འཁོར་ཡུག་དེ་ལ་འབད། །ཐུན་མཚམས་འགྲོ་ལ་སྙིང་རྗེ་གཞན་ཕན་གྱི། །སྨོན་ལམ་བཟང་པོ་དུང་དུང་རྟག་ཏུ་བྱ། །ལྷ་བསྒོམ་སྔགས་བཟླས་ཀུན་ཀྱང་དགེ་སྦྱོར་གྲོགས། །ཡི་དམ་སྙིང་པོ་ཅི་ནུས་འབད་པ་གནད། །དེ་སྐད་སྒྲུབ་པོ་སྦྱིན་པ་རྒྱ་མཚོའི་ངོར། །རིག་པ་འཛིན་པ་ཚེ་དབང་ནོར་བུ་ཡི། །གང་ཤར་ཚིགས་བཅད་སྨྲས་ཏེ་དོན་ལྡན་པར། །རྣམ་མཁྱེན་སངས་རྒྱས་རྒྱུ་རུ་འགྲོ་བར་ཤོག །སརྦ་མངྒ་ལཾ། ༈ ཞལ་གདམས་ཀུན་ཏུ་རྒྱལ་བའི་སྤྲིན་ཚོགས།ཨོཾ་སྭཱསྟི། ཀུན་ཏུ་རྒྱལ་བའི་སྤྲིན་ཚོགས་སྤྲོ་དང་བསྡུ། །མ་ལུས་བྱེད་པོ་ལག་ན་པདྨོ་ཅན། །དབྱེར་མེད་འཁོར་ལོའི་མགོན་པོ་བདེ་བ་ཆེ། །དེ་ཡི་བྱང་ཆུབ་མཆོག་བར་བསྲུང་གྱུར་ཅིག །གང་ཁྱེད་ཡུལ་དབུས་མཁས་མང་འདུ་བའི་ལྗོངས། །ཐུབ་བསྟན་སྒོར་ཞུགས་ངུར་སྨྲིག་གོས་ཀྱིས་མཛེས། །སྔོན་བསགས་མ་སྨད་ཤེས་རབ་བསླབ་གསུམ་རྒྱས། །མཚུངས་མེད་མགོན་གྱིས་རྗེས་བཟུང་དམ་པར་ངེས། །བདག་ནི་མཐའ་འཁོབ་ཡུལ་སྐྱེས་ཆོས་ཀྱིས་དབུལ། །སྐྱེ་དང་སྦྱངས་པས་མངོན་པར་མཐོ་བའང་མིན། །འོན་ཀྱང་མཆོག་གྱུར་མང་པོས་རྗེས་བཟུང་མཐུས། །ཁྱེད་ཞལ་མ་བསྐྱུང་ཙམ་དུ་འདི་སྐད་གསོལ། །རྣམ་དཀར་ཀུན་གྱི་སྔོན་འགྲོ་དགེ་བའི་ཆོས། །མཐའ་དག་བསྐྱེད་པའི་གཞི་རྟེན་དད་པ་སྟེ། །འདོད་འདུན་མི་ཕྱེད་དག་པའི་དད་པ་ཉིད། །རྒྱུད་ལ་བསྐྱེད་པ་ཤིན་ཏུ་གལ་ཆེ་མོད། །དེ་ཡང་ཇི་བཞིན་བསྐྱེད་པའི་གཞི་རྟེན་ནི། །རྫོགས་སངས་རྒྱས་ལ་ཡིད་ཆེས་སྐྱེ་བ་སྟེ། །དེ་ཡི་མཛད་པ་ཆེ་བའི་ཡོན་ཏན་རྣམས། །རྟག་པར་རྗེས་དྲན་སྙིང་གི་དཀྱིལ་དུ་བཞག །ཁམས་གསུམ་གཟུགས་འདོད་གནས་སྐྱེ་འགྲོ་བ་ཀུན། །ཡོངས་སུ་སྡོམ་ཀྱང་མཁའ་ཁམས་བ་སྤུའི་ཁྱོན། །གཟུགས་མེད་བག་ཉལ་སེམས་ཅན་ཆ་ཤས་ཡང་། །བཟུང་བར་ནུས་མིན་འཁོར་སེམས་རྫོགས་མཐའ་ཅི། །ལུས་ཅན་འགྲོ་བ་དྲུག་ལས་ལྷ་མིའི་རྟེན། །ཆོས་དཀོན་དེ་ལས་དལ་འབྱོར་ཕུན་ཚོགས་ལུས། །ངོ་བོ་རྒྱུ་དཔེ་རྣམ་གྲངས་དུ་མ་ནས། །རྙེད་པར་དཀའ་ཚུལ་དུ་མའི་སྒོ་ནས་བརྟག །མི་ཡི་ལུས་འདི་ཤིན་ཏུ་འཇིག་སླ་སྟེ། །དྲི་ཟའི་གྲོང་དང་ཆུ་ཡི་ལྦུ་བ་འདྲ། །གནོད་མང་ཕན་ཉུང་འཆི་རྐྱེན་དུ་མ་ལ། །བསམ་བྱས་སྙིང་ནས་མི་རྟག་སྐྱོ་ཤས་བསྐྱེད། །དེས་ན་ཅུང་ཟད་ཁོམ་ལོང་ལྡན་དུས་འདིར། །མགོ་ལ་མེ་ཤོར་པང་དུ་སྦྲུལ་ཞུགས་བཞིན། །མངོན་མཐོ་ངེས་ལེགས་ལམ་ལ་མ་བརྩོན་ན། །དོན་མེད་སྟོང་ལས་མཁན་དུ་ཅིས་མི་འགྱུར། །འཁོར་བའི་མཚན་ཉིད་འབར་བའི་མེ་འོབས་དང་། །ཚེར་མའི་གདན་དང་ཀིམ་པའི་འབྲས་བུ་བཞིན། །སྡུག་བསྔལ་གསུམ་གྱིས་འཁོར་བ་ཐོག་མེད་ནས། །ད་ལྟའི་བར་དུ་གདུང་འདི་ཡིད་རེ་སྐྱོ། །ད་ཡང་དེ་ཡི་བཟློག་ཐབས་མ་འབད་ན། །ནམ་མཁའ་ཇི་སྲིད་འཁོར་བའི་རྒྱ་མཚོ་རུ། །སྡུག་བསྔལ་འཛིན་འཁྲིའི་ཉེར་ཁེང་བར་མེད་དུ། །གཙེར་འདི་རང་གིས་རང་ལ་སྙིང་རྗེས་ལྟོས། །ཆོས་དབྱིངས་ཁམས་ལ་གཞན་པའི་ཆོས་ཐམས་ཅད། །རྒྱུ་རྐྱེན་རྟེན་འབྲེལ་རོལ་པ་ལས་གྲུབ་ན། །མི་དགེའི་ལས་ཀྱི་ངན་སོང་དུཿཁ་དང་། །དགེ་ཡང་བདག་ལྡན་མཐོ་རིས་འགྱུར་བཅས་རྒྱུ། །རྣམ་ཀུན་བདེ་བ་ཐར་པའི་ལམ་བཟང་ནི། །དེ་བཞིན་གཤེགས་པའི་བསྟན་ལས་གཞན་ཡོད་མིན། །དེས་ན་དེ་གསུང་ལས་འབྲས་དམ་པའི་ཆོས། །ཅི་ནུས་སྤྱོད་པ་གནད་ཀྱི་ཉམས་ལེན་སྟེ། །སྔོན་བྱོན་རྒྱལ་བ་སྲས་སློབ་ཀུན་གྱི་ཚུལ། །འདི་གཟིགས་ཐར་ལ་གཤེགས་པར་ངེས་བྱས་ནས། །སྔོན་འགྲོར་མིང་བཏགས་སྣང་ཆུང་འདི་མི་འཛིན། །ཉིན་མཚན་ཐུན་དྲུག་བསྒོམ་དགོས་ཆོས་མཆོག་ཡིན། །སྡུག་བསྔལ་རྒྱུན་ལས་སྒྲོལ་བའི་སྐབས་གནས་ནི། །མཚུངས་པ་གཞན་མེད་དཀོན་མཆོག་རིན་ཆེན་གསུམ། །འདི་ནས་བྱང་ཆུབ་བར་དུ་སྐྱབས་ཀྱི་ཡུལ། །རེ་གནས་གཅིག་པུར་ཁས་བླངས་བློ་ཐག་བཅད། །དེ་ཡང་སྐྱིད་དུས་རང་གི་ཕོ་སྒོ་དང་། །སྡུག་དུས་དཀོན་མཆོག་གསུམ་ལ་ཡུས་འཚོང་འདི། །མ་རབས་བྱིས་པ་རྣམས་ཀྱི་ངང་ཚུལ་ཏེ། །རང་ཅག་དམ་པའི་ལུགས་སུ་དེ་མི་སྤྱོད། །སྐྱིད་ན་བླ་མ་དཀོན་མཆོག་ཐུགས་རྗེར་ངེས། །སྡུག་ན་སྔོན་ལས་རྣམ་སྨིན་ལྷག་མ་སྟེ། །དེ་དག་ཀུན་ཀྱང་གཏད་མེད་སྒྱུ་མ་བཞིན། །ཤེས་པར་བྱ་བ་དམ་པའི་རིང་ལུགས་ཡིན། །ཁམས་གསུམ་འཁོར་བ་ལས་གྲོལ་ཐར་པ་ཡང་། །གཉིས་ཏེ་ཆུང་ངུ་རང་ཉིད་ཞི་བདེའི་འབྲས། །ཉན་རང་ཐེག་ཞེས་ངེས་འབྱུང་རྨ་མེད་ཙམ། །སྐྱེས་བུ་འབྲིང་པོའི་ལམ་དུ་མགོན་རྣམས་བཞེད། །ཕ་མའི་རང་བཞིན་ཁམས་གསུམ་སེམས་ཅན་རྣམས། །འཁོར་བའི་སྡུག་བསྔལ་དུ་མས་གཟིར་བ་ལ། །མི་བལྟ་རང་ཉིད་ཞི་བདེའི་ངོ་ཚ་ཆུང་། །ཁྲེལ་བོར་ཐ་ཆད་འདི་ཡིས་ཅི་ཞིག་བྱ། །ཞི་བའི་འགོག་པ་ལ་གནས་བགྲངས་ཡས་བསྐལ། །ཕ་མཐའི་བར་དུ་བྱང་ཆུབ་སྤྱད་སྤྱོད་པའི། །གེགས་འདི་རིང་སྤང་རྒྱལ་དང་དེ་སྲས་འཕགས། །ཀུན་གྱི་གསུང་ན་བློ་ཅན་སུ་ཞིག་འཇུག །ཀྱེ་ཧོ་གྲོགས་པོ་ཚུར་གཤེགས་ཐར་པའི་ལམ། །སྲིད་དང་ཞི་བའི་མཐའ་གཉིས་ལས་འདས་པ། །དོན་གཉིས་ལྷུན་གྲུབ་རྒྱལ་བའི་གནས་དམ་པ། །འདི་ལ་ལྷན་ཅིག་ཚངས་པར་མཚུངས་སྤྱོད་མཛོད། །སེམས་བསྐྱེད་ཆོ་གས་ལེན་པ་བཟང་མོད་ཀྱང་། །ཐེག་ཆེན་བསམ་པ་གཙོ་བོར་གྱུར་པ་ཡི། །དེས་ན་ལྷག་པའི་བསམ་པ་འབའ་ཞིག་པས། །མཐའ་ཡས་འགྲོ་ལ་ཕན་པ་རྟག་བསྒྲུབ་འཚལ། །མདོ་དང་ཤིང་རྟ་ཆེན་པོའི་གསུང་རྣམས་སུ། །སྨོན་འཇུག་བསླབ་བྱ་རྒྱ་མཚོ་ལྟར་གསུང་མོད། །མདོར་བསྡུས་སངས་རྒྱས་ལ་སྨོན་དེ་རྒྱུར་འཇུག །ཕྱིན་དྲུག་བསྡུ་དངོས་བཞི་ལ་འདུ་བར་རྟོགས། །འཕྲལ་དུ་དཀར་ནག་ཆོས་བརྒྱད་སྤངས་བླང་དང་། །ཕམ་པ་བཅོ་བརྒྱད་མ་གོས་པ་ཡང་གཅེས། །དོན་དམ་སེམས་བསྐྱེད་ཤེར་ཕྱིན་ཆོས་ཉིད་གཤིས། །དེ་ཉིད་རྟོགས་ཐབས་བསགས་སྦྱངས་ལས་ལ་འབད། །འོན་ཀྱང་ཕར་ཕྱིན་ལམ་གྱི་དབང་རྣོན་ནི། །བསྐལ་པ་གྲངས་མེད་གསུམ་ནས་འཚང་རྒྱར་བཞེད། །འཁོར་ལོ་གསུམ་པའི་ལམ་རིམ་འཇོག་བསྒོམ་ལུགས། །དེ་བས་ཀྱང་ནི་མྱུར་བར་འདོད་པའང་མཐོང་། །དབང་བརྟུལ་གྲངས་མེད་བསྐལ་པ་སོ་གསུམ་དང་། །སྨོན་ལམ་མཐུས་ནི་དེ་ལྟ་ཡང་མ་ངེས། །འདི་ཡི་ཚུལ་མང་མཐོང་དང་བཤེས་གཉེན་མཆོག །ཞལ་ལུང་ཞིབ་མོར་ཉན་པའང་གནད་དུ་ཆེ། །ཐེག་ཆེན་ཐུན་མིན་གསང་བ་སྔགས་ཀྱི་ལམ། །དེ་ཡི་མཐར་ཐུག་བླ་མེད་རྡོ་རྗེ་ཐེག །མྱུར་དེ་རྫོགས་པའི་ལམ་མཆོག་དེར་འཇུག་པར། །སྟོན་བྱེད་རྡོ་རྗེ་སློབ་དཔོན་མཚན་ལྡན་གཅེས། །དེ་ཡང་དབང་ཁྲིད་ལུང་གི་རྒྱུན་ཙམ་ལ། །འདྲེས་ཁྱེར་དམ་སེལ་མེད་པ་ཁོ་ནས་ཆོག །ཇི་བཞིན་འདྲེན་པ་ཉིད་དུ་བརྟེན་པ་ལ། །སངས་རྒྱས་འབྱུང་ནས་ཞལ་དང་ཐུགས་ཀྱི་སྒོར། །གནས་པ་ཉིད་ལས་གཞན་གྱི་ནུས་མིན་ཞེས། །དཔལ་ལྡན་དང་པོའི་སངས་རྒྱས་རྒྱུད་ནས་གསུངས། །འོན་ཀྱང་སྙིགས་དུས་སྐྱོན་ཡོན་འདྲེས་གྱུར་ཀྱང་། །ཡོན་ཏན་མང་ན་བླ་མར་བརྟེན་འོས་ཞེས། །ལག་ན་ཆུ་སྐྱེས་འཆང་བའི་མགོན་པོ་དེས། །དོན་དམ་བསྙེན་པའི་གཞུང་དུ་ལེགས་པར་གསུངས། །དེང་སང་མ་བརྟགས་གསར་ངེས་གྱ་ཚོམ་དབང་། །ཤས་ཆེར་སྤྱོད་ན་བཤད་ཚོད་ལས་ཅི་ཞིག །འཇིག་རྟེན་ཕལ་གྱི་ཞག་ཤས་གྲོགས་ལ་ཡང་། །བཟང་དང་ངན་ཞེས་ནན་ཏན་བརྟག་བྱེད་ན། །གཏན་བདེའི་ལམ་མཁན་རྩ་བའི་བླ་མ་གང་། །གྱ་ཚོམ་མ་ཡིན་བརྟག་དཔྱད་ཤིན་ཏུ་གཅེས། །སྔགས་ཀྱི་འཇུག་ངོགས་གཞི་རྟེན་སྨིན་བྱེད་དབང་། །རྒྱལ་བས་རྒྱུད་ནས་གསུང་བཞིན་གྲུབ་པའི་སྲོལ། །མ་ཉམས་ལྷག་ཆད་མེད་པར་མནོས་བྱས་ནས། །དེ་ཡི་བཅས་པ་སྙིང་གི་དཀྱིལ་དུ་གཅགས། །སྔགས་ཀྱི་ལམ་ལ་ཞུགས་པའི་སྲོག་རྩ་ནི། །མེད་ཐབས་མེད་པ་བླ་མའི་དམ་ཚིག་ཡིན། །བླ་མ་ལ་ཡང་རྩ་བ་ཡན་ལག་གཉིས། །རྩ་བའི་བླ་མ་སངས་རྒྱས་ཀུན་ལས་ལྷག །ཡན་ལག་ཀུན་ཀྱང་དེ་ཡི་སྤྲུལ་པར་བལྟ། །ཉིན་མཚན་མེད་པར་གསོལ་བ་ཕུར་ཚུགས་གདབ། །ཅི་མཛད་ལེགས་བལྟ་ཅི་གསུང་ཚད་མར་འཛིན། །དེ་ལ་མི་འདུ་དམ་ཚིག་འགའ་ཡོད་མིན། །ཡི་དམ་ལྷ་ཡང་བླ་མའི་སྒྱུ་འཕྲུལ་ཏེ། །མཁའ་འགྲོ་ཆོས་སྐྱོང་དེ་ཡི་རང་མདངས་ཙམ། །རྟག་ཏུ་ཤེས་བཞིན་བསྒོམ་སྒྲུབ་ལ་འབད་ན། །དངོས་གྲུབ་མྱུར་དུ་ཐོབ་ལ་སོམ་ཉི་ཅི། །སྔགས་ལམ་མདོར་བསྡུས་བསྐྱེད་རྫོགས་རིམ་པ་གཉིས། །སྐྱེས་སྦྱངས་མ་དག་དངོས་སྣང་འགོག་བསྐྱེད་རིམ། །གསལ་བརྟན་དག་པ་ལྡན་པའི་རྣལ་འབྱོར་གྱིས། །དཀྱིལ་འཁོར་འཁོར་ལོ་རག་སྦོམ་ཕྲ་གསལ་བ། །ཐུན་དང་ཉིན་ཞག་མཉམ་པར་བཞག་ནུས་ན། །ཐུན་མོང་གྲུབ་ཆེན་ཞག་ཟླས་ཉེར་འགྲུབ་ཅིང་། །ཐུན་མིན་ཕྱག་རྒྱ་ཆེ་ཡང་རིང་མིན་ཞེས། །རྡོ་རྗེ་ཅན་ཞབས་དཔལ་གྱི་མགུར་ནས་ཐོས། །རྫོགས་རིམ་ལ་ཡང་མཚན་བཅས་མཚན་མེད་གཉིས། །མཚན་བཅས་ཡིག་འབྲུ་ཐིག་ལེ་རླུང་སྦྱོར་སོགས། །ཉེར་བརྟེན་བོད་འདིར་ཆོས་དྲུག་རིགས་གཉིས་དང་། །ལམ་འབྲས་ལ་སོགས་སྔགས་ཀྱི་མྱུར་ལམ་མང་། །མཚན་མེད་དབང་བཞིའི་ཡེ་ཤེས་རྒྱ་བོད་དུ། །འདོད་ཚུལ་མང་མོད་རེ་ཞིག་བོད་ཡུལ་འདིར། །ཞི་བྱེད་གཅོད་ཡུལ་མདའ་སྣུན་ལུགས་ཕྱག་ཆེན། །རྫོགས་ཆེན་སེམས་ཀློང་གསང་སྐོར་རྣམས་ལ་བཞག །གང་ལྟར་རང་རིག་ཟབ་གསལ་བདེ་བ་ཆེ། །མངོན་སུམ་རྟོགས་ན་བཞི་པའི་ཡེ་ཤེས་ཡིན། །དེ་ཡང་ཟབ་མོའི་ཕྱོགས་ནས་གཞལ་བ་ན། །ཕར་ཕྱིན་ལྟ་བའི་ཁྲིད་དང་ཤིན་ཏུ་མཐུན། །མི་འགྱུར་བདེ་ལམ་སྔགས་ཀྱི་ཁྱད་པར་ཆོས། །གསལ་བ་དཀྱིལ་འཁོར་འཁོར་ལོས་ཡང་ནི་སོ། །འཕགས་ཀླུའི་རིམ་ལྔ་ཡེ་ཤེས་ཞབས་གྲོལ་ཐིག །དུས་འཁོར་སྦྱོར་དྲུག་རྫོགས་ཆེན་ཡང་གསང་གི །བཞི་པའི་ལམ་རྣམས་སངས་རྒྱས་ཀྱི་ཡེ་ཤེས། །བཞུགས་ཚུལ་ཉིད་དང་མཐུན་པར་ངེས་ཤེས་སྐྱེས། །འདི་དོན་ཞིབ་མོར་བླ་མའི་ཞལ་ལུང་ལས། །དཔེ་ཀློག་འཕྲིན་བསྐུར་ཙམ་གྱིས་ནུས་མ་ཡིན། །མདོ་རུ་གཞན་གྱིས་བརྗོད་མི་ལྷན་ཅིག་སྐྱེས། །ཡེ་ཤེས་དེས་ནི་བླ་མའི་བྱིན་རླབས་མཐུ། །ནམ་ཞིག་སྙིང་ལ་ཞུགས་པར་གྱུར་པའི་ཚེ། །མངོན་སུམ་བྱེད་ལས་དཔེ་ཚིག་སྤྱོད་ཡུལ་མིན། །རྒྱུད་དོན་མཁས་པས་བཞག་པ་དེ་ལྟ་ཡང་། །རྟོགས་ལྡན་རྣལ་འབྱོར་རྣམས་ཀྱི་གླེན་ཚིག་ཏུ། །རྩ་བའི་བླ་མར་སྙིང་ནས་གུས་པ་ཡི། །ཕུར་ཚུགས་གསོལ་འདེབས་ཁམས་འདུས་རྗེས་ཤེས་སུ། །དུས་གསུམ་རྣམ་པར་རྟོག་པས་མ་བསླད་པའི། །རང་རིག་རྗེན་པ་ས་ལེ་སིང་ངེ་བ། །རང་བབ་གཉུག་མའི་ངང་དུ་གནས་པ་འདི། །བསྒོམ་མེད་ཡེངས་མེད་ངང་དུ་བསྐྱང་ནུས་ན། །དུས་གསུམ་རྒྱལ་བ་ཀུན་གྱི་བགྲོད་གཅིག་ལམ། །སེམས་ཉིད་ཆོས་ཀྱི་སྐུ་རུ་ངོ་སྤྲད་ཞེས། །ཚིག་ལ་མཁས་རྣམས་མགུའམ་མི་མགུ་རུང་། །ངེད་ཅག་རྣལ་འབྱོར་རྣམས་ཀྱི་ཉམས་ལེན་ཡིན། །དེ་ཡང་ཚིག་དང་གོ་ཉམས་རྟོགས་པ་བཞི། །མ་འདྲེས་སོ་སོར་སྤུ་རིས་འབྱེད་པ་གཅེས། །ཚིག་ཙམ་ཁོ་ནའི་རྗེས་བཟློས་ནེ་ཙོའི་དཔེ། །གོ་བ་མ་བསྒྲོད་ཡུལ་བཀོད་ཐོས་སེམས་བཞིན། །ཉམས་མྱོང་ཡུལ་བཀོད་ཤོག་ཁྲ་མཐོང་སེམས་ཙམ། །རྟོགས་པ་མངོན་སུམ་མིག་གི་སྤྱོད་ཡུལ་བཞིན། །ཚིག་ཙམ་འདྲ་ཡང་རང་གི་སེམས་ཐོག་ཏུ། །བཞག་ཚེ་དེ་རྣམས་ཁྱད་པར་ཤིན་ཏུ་ཆེ། །འོན་ཀྱང་གནས་ལུགས་ཉམས་ལེན་སྙིང་པོ་ལ། །བསྒོམ་འདོད་བློ་ཡིན་ཡེངས་དབང་འཁྲུལ་པ་ཉིད། །གནས་དང་འགྱུ་ལ་དགག་བསྒྲུབ་རེ་དོགས་གཟབ། །དེས་ན་རང་བབ་མ་ཡེངས་ཙམ་སྐྱོངས་གནད། །རྣམ་རྟོག་རགས་སྦོམ་ཕྲ་བ་མི་སློང་བར། །གནས་ཉམས་ཙམ་གྱི་ཐར་ལ་འགྲོ་མིན་གྱི། །དེས་ན་རགས་སྦོམ་ཕྲ་བའི་སྤུ་རིས་གང་། །ལེགས་པར་འབྱེད་ནས་ལམ་དུ་སློང་བ་འདི། །དུས་འདིར་དུས་གསུམ་རྒྱལ་ཀུན་འདུས་པའི་ཞལ། །བདག་གི་རྩ་བའི་བླ་མ་རྡོ་རྗེ་ཅན། །གང་གི་བྱིན་རླབས་གསུང་གི་ཆ་ཕྲ་མོ། །སྙིང་ལ་གནས་པ་ཁྱེད་ལ་བརྩེ་བས་གདམས། །དེང་དུས་གནས་ཉམས་བན་བུན་སྐྱེས་པའམ། །རྦད་གཤོད་རྩིང་ཧྲལ་ཙམ་ལ་ཡིད་མགུ་ན། །བདག་གིས་གཙིགས་སུ་བཟུང་ནས་ཕྲ་མོའི་གནས། །འདི་ཡི་ཅི་བྱ་རང་ཉིད་ངལ་བར་ཟད། །འོན་ཀྱང་ཉིད་ནས་དག་པའི་སྣང་བ་ཡིས། །ཞལ་གདམས་དགོས་ཞེས་གསུང་གིས་བསྐུལ་བ་ན། །གལ་འགག་ཟབ་གནད་འགའ་ཞིག་མདོར་བསྡུས་ནས། །འདི་རུ་གསོལ་ལ་ཉེས་པ་མེད་པར་སེམས། །དེ་སྐད་ལག་ན་པདྨོའི་གདུལ་བྱའི་ཞིང་། །རྡུལ་དཀར་རབ་བརྒྱན་དབྱིག་འཛིན་དཀྱིལ་འཁོར་ལ། །དབང་བསྒྱུར་གྲུ་འཛིན་བདག་པོ་རྒྱལ་བ་མཆོག །འཇིག་རྟེན་མགོན་པོ་སྐལ་བཟང་རྒྱ་མཚོ་ཡི། །ཞབས་པད་ཉེ་བར་བསྙེན་པ་དགེ་བའི་བཤེས། །འཕྱོངས་རྒྱས་རི་བོ་བདེ་ཆེན་མཁན་པོ་ཆེ། །སྡེ་སྣོད་འཛིན་པ་བསྟན་འཛིན་རྒྱ་མཚོ་ཡིས། །གསུང་ངོ་མ་ལྕོག་ཙམ་དུ་ཞལ་གདམས་ཚུལ། །ཕྱོགས་མེད་རྒྱལ་ཁམས་ཀུན་སྤྱོད་བྱ་བྲལ་བ། །རྒྱ་བལ་བོད་ཡུལ་ཀུན་ཏུ་གྲགས་གྱུར་མིང་། །རིག་འཛིན་ཚེ་དབང་ནོར་བུ་ཞེས་པ་ཡིས། །རབ་བྱུང་བཅུ་གསུམ་སྐྱེས་བདག་ལོ་གསར་འཆར། །དཀར་ཕྱོགས་དགེ་བའི་དུས་ཚེས་བཟང་པོ་ལ། །གྲུབ་པའི་བསྟི་གནས་སྟོད་ལུང་མཚུར་ཕུ་རུ། །གང་ཤར་ཆུ་བབ་ཐུན་གཅིག་ལ་གྲུབ་པར། །སྨྲས་འདི་དགེ་ལེགས་འཕེལ་བའི་བཙས་གྱུར་ཤོག །དགེའོ། །དགེའོ། །སརྦ་མངྒ་ལཾ། ༈ གདམས་མགུར་ཕུན་ཚོགས་ཟླ་བ།སྭཱ་སྟི། དུས་གསུམ་རྒྱལ་བ་ཀུན་གྱི་རང་གཟུགས་མཆོག །དྲན་པས་སྲིད་ཞིའི་རྒུད་པ་ཡོངས་སེལ་མགོན། །རྩ་བའི་བླ་མ་བདེ་ཆེན་གླིང་པ་དེ། །སྤྱི་བོར་དྲན་བཞིན་ཁྱོད་ལ་འདི་སྐད་སྨྲ། །དལ་འབྱོར་རྟེན་བཟང་ཐོབ་འདི་རྙེད་དཀའ་ན། །དོན་མེད་སྟོང་ཟད་ངང་དུ་མ་སོང་གཅེས། །འཆི་བདག་བདུད་པོ་ནམ་ཡོང་ཆ་མེད་ཀྱི། །དགེ་བའི་ལས་ལ་སྔ་འགྲོས་ཆུབ་པ་གཅེས། །ལས་འབྲས་འདི་ནི་ནམ་ཡང་མི་བསླུ་བས། །དགེ་སྡིག་འདོར་ལེན་སྙིང་ནས་འབད་པ་གཅེས། །གཏན་གྱི་འདུན་མ་དམ་པའི་ལྷ་ཆོས་ཏེ། །མཐར་ཐུག་སངས་རྒྱས་ལམ་ལ་འབད་པ་གཅེས། །བག་མེད་རྣམ་གཡེང་དབང་དུ་མ་སོང་བར། །ཆོས་སྤྱོད་བཅུ་ལ་ཅི་ནུས་འབད་པ་གཅེས། །མ་དག་དངོས་སྣང་འགོག་པ་བསྐྱེད་རིམ་སྟེ། །ལྷག་པའི་ལྷ་ཡི་སྐུ་ལ་སེམས་གཏད་གཅེས། །བར་ཆད་ཞི་ཞིང་སྒྲིབ་པ་སྦྱངས་པའི་མཆོག །ཡི་དམ་རིགས་སྔགས་བཟླ་བའང་མཆོག་ཏུ་གཅེས། །ཆོས་རྣམས་ཀུན་གྱི་སྙིང་པོར་གྱུར་པ་ནི། །བླ་མའི་དམ་ཚིག་ཡིན་པས་སྲོག་ལྟར་གཅེས། །དེ་ཡང་རྫོགས་སངས་རྒྱས་ལ་ཡིད་ཆེས་པའི། །དད་པ་བརྟན་པོ་སྙིང་གི་དཀྱིལ་ནས་གཅེས། །བྱང་སེམས་བསླབ་པ་གཞན་ཕན་པ་འབའ་ཞིག་སྟེ། །རྟག་ཏུ་བྱམས་དང་སྙིང་རྗེ་བསྒོམ་པ་གཅེས། །དེ་འདྲ་བརྗོད་ན་མཛད་པའི་མཐའ་མེད་པས། །མདོ་དོན་སྙིང་པོ་རེ་ཞིག་དེ་ཙམ་བཟུང་། །དེ་སྐད་མངའ་རིས་ཕྱོགས་ནས་དད་པ་ཅན། །ཕུན་ཚོགས་ཟླ་བས་ལན་གྲངས་ཡང་ནས་ཡང་། །གསོལ་བ་བཏབ་པའི་ངོ་དགའ་མ་བསྐྱུང་བར། །རྒྱལ་ཁམས་པར་གྱུར་རིག་པ་འཛིན་པ་དེས། །ལྷག་པའི་བསམ་པས་ཅུང་ཟད་སྨྲས་པ་འདིའི། །དགེ་བས་ཁྱེད་ཀྱང་བྱང་ཆུབ་འབྲས་སྨིན་ཤོག །སརྦ་མངྒ་ལཾ། ༈ གདམས་བསྡུས་ཨུཏྤལ་དཀར་པོ།སྭཱ་སྟི། དད་པས་བདག་ལ་ཡང་ཡང་འདུད་བྱེད་པ། །བློ་གསལ་ཉི་མ་རྡོ་རྗེའི་འཕྲིན་ཡིག་སོན། །གྲངས་མེད་རྩྭ་ལྡུམ་དབུས་ནས་དལ་འབྱོར་གྱི། །ཨུཏྤལ་དཀར་པོ་རྙེད་པ་ད་རེས་ཙམ། །བག་མེད་རྣམ་གཡེང་སད་ལ་མ་བསྐུར་བར། །བསྐྱེད་རྫོགས་རྩེ་གཅིག་བསྒོམ་པ་དོན་ལྡན་ཡིན། །མི་བཟད་ནད་ནི་སྔོན་གྱི་ལས་ཡིན་པས། །སྙིང་ནས་དམ་ཆོས་བསྒྲུབ་ན་བསྐུལ་མ་ཡིན། །ལས་ཀྱིས་བསྡུས་པའི་གདོན་རིགས་འབྱུང་པོ་ཡང་། །སྙིང་རྗེ་གཏིང་ནས་སྐྱེས་ན་གྲོགས་སུ་འགྱུར། །བླ་མ་མི་རུ་བཟུང་བའི་འཛིན་ཚུགས་དང་། །དད་པ་ལྟེམ་རྐྱང་ཅན་ལ་དངོས་གྲུབ་མེད། །དེས་ན་སྐྱིད་སྡུག་ལེགས་ཉེས་ཅི་བྱུང་ཡང་། །བླ་མ་སངས་རྒྱས་མོས་གུས་ལྟེམ་རྐྱང་སྤངས། །ལྷ་དང་བླ་མ་དབྱེར་མེད་ངོ་ཤེས་ནས། །ཡི་དམ་བསྒོམ་བཟླས་འདི་ཕྱིའི་དོན་ཆེན་འགྲུབ། །ཁྲོ་འཁྲུག་སེམས་ཀྱི་དྲག་སྔགས་མང་ན་ཡང་། །གནས་སྐབས་རྐྱེན་སེལ་འགྱུར་སྲིད་གཏན་བདེ་མིན། །དེས་ན་གཏན་གྱི་བདེ་བ་ལ་དམིགས་ནས། །བྱང་ཆུབ་སེམས་བསྐྱེད་ཡི་དམ་བསྒོམ་བཟླས་འབད། །བདག་ལ་སྙིང་ནས་མོས་གུས་སྐྱེས་གྱུར་ན། །མོས་པའི་རང་ངོ་རང་རིག་རྗེན་པར་ལྟོས། །དེ་མཐོང་རང་རིག་བླ་མའི་ངོ་བོར་ཤར། །ལམ་ཟབ་བླ་བསྒྲུབ་སྙིང་པོ་དེ་རང་ཡིན། །ཚིག་ཚོགས་མང་པོ་སྤྲོས་ན་ཟད་མཐའ་མེད། །ཉམས་ལེན་སྙིང་པོར་བསྡུ་ན་དེ་ལ་འདུ། །དེ་སྐད་སངས་རྒྱས་ཐོག་སྟོན་གྱི་དབོན་རིགས། །སྐྱིད་རོང་ཚོང་འདུས་བླ་མ་ཉི་རྡོར་བ། །ནད་གདོན་གྱིས་གཙེར་དེ་ལ་བརྩེ་སེམས་ཀྱིས། །ཕྱོགས་བྲལ་ནམ་མཁའི་རྣལ་འབྱོར་རྒྱལ་ཁམས་པ། །རིག་པ་འཛིན་པ་ཚེ་དབང་ནོར་བུ་ཡིས། །ལྷ་མོ་སྒང་ནས་སྤེལ་བའི་ལི་ཁི་ཏམ། །སརྦ་མངྒ་ལཾ། ༈ གདུང་སེལ་སཱ་ལའི་བསིལ་གྲིབ།སྭཱ་སྟི། སྲིད་པའི་དྲྭ་བ་མཐའ་དག་ཡོངས་གཅོད་ཅིང་། །ཞི་བའི་མལ་སར་རྣལ་བར་མི་མཛད་པ། །གཉིས་མེད་གསུང་བ་རྫོགས་པའི་སངས་རྒྱས་ལ། །རྟག་ཏུ་ཕྱག་འཚལ་ཀུན་ཏུ་དགེ་ལེགས་སྩོལ། །རིགས་རུས་རྣམ་དག་སྐྱེ་ཤིང་འཕྲེང་བའི་དབུས། །མངོན་མཐོ་སཱ་ལའི་ཤིང་འདྲ་ལྕེ་ཡི་གདུང་། །ལུགས་གཉིས་མཁྱེན་དཔྱོད་ལྡན་པ་སྤྲུལ་པའི་སྐུ། །གང་དེའི་ཐུགས་ངལ་གསོ་ཕྱིར་འདི་སྐད་གསོལ། །འདུས་བྱས་ཆོས་རྣམས་ཐམས་ཅད་མི་རྟག་པའི། །ངེས་པར་རྒྱལ་བ་སྲས་བཅས་ཀུན་གྱིས་གདམས། །དེས་ན་མི་རྟག་པ་ཡི་ངང་ཚུལ་གང་། །ཇི་བཞིན་དྲན་པར་བྱ་སྟེ་དེ་ཡི་ཚུལ། །ཡུལ་ལྗོངས་མི་རྟག་དྲི་ཟའི་གྲོང་ཁྱེར་འདྲ། །འདུས་ཚོགས་མི་རྟག་ཚོང་འདུས་མགྲོན་པོ་འདྲ། །ནང་མི་མི་རྟག་ཐོ་རངས་སྐར་མ་འདྲ། །ཕ་མ་མི་རྟག་ཚེས་གསུམ་ཟླ་བ་འདྲ། །རང་ཉིད་མི་རྟག་ཐལ་གྲང་མེ་སྟག་འདྲ། །ལོངས་སྤྱོད་མི་རྟག་རྩྭ་ཁའི་ཟིལ་པ་འདྲ། །རྗེ་དཔོན་མི་རྟག་སྟོན་གཞུག་མེ་ཏོག་འདྲ། །མངའ་ཐང་ཐོབ་ཤོར་མིག་མངས་རྩེ་བ་འདྲ། །སྙན་པའི་གཏམ་ནི་བྲག་ཆ་ཡལ་བ་འདྲ། །བདེ་བའི་གོ་སྐབས་མུན་ཁུང་གློག་འཁྱུག་འདྲ། །སྡུག་བསྔལ་འཛད་མེད་ཆུ་ཡི་གཉེར་མ་འདྲ། །གཏམ་གསར་མང་པོ་སོལ་མེའི་འགར་སྦུད་འདྲ། །ཇི་ལྟར་སྣང་ཀུན་བདེན་མེད་སྒྱུ་མ་འདྲ། །གང་ལྟར་སྣང་ཡང་རྨི་ལམ་སད་ཁ་འདྲ། །འཁོར་བའི་མཚན་ཉིད་ཀུན་ནས་སྡུག་བསྔལ་ཞིང་། །བྱེ་བྲག་སྙིགས་མ་ལྔ་བདོའི་མཐར་ཐུག་འདིར། །བསམ་བཞིན་སྐྱོ་བ་སྐྱེ་ལས་གཞན་མེད་ན། །དམ་པའི་ཆོས་ལ་རྩེ་གཅིག་གཞོལ་བར་འོས། །དེས་ན་གནས་དུས་འགྱུར་བ་ཆེ་བའི་སྐབས། །ཡབ་རྗེ་གཤེགས་པ་ཤིན་ཏུ་མ་ལེགས་ཀྱང་། །ཀུན་རྫོབ་ཆོས་ཀུན་མི་རྟག་མཚན་ཉིད་དུ། །ཤེས་བཞིན་ཐུགས་ངལ་རིང་དུ་སྤོང་བར་མཛོད། །འཁོར་བའི་མངོན་མཐོ་ཀིམ་པའི་འབྲས་བུ་བཞིན། །འཕྲལ་དུ་བདེ་ཡང་ནམ་ཕུགས་སྡུག་བསྔལ་རྒྱུ། །གང་ལ་བལྟས་ཀྱང་སྙིང་པོ་མི་འདུག་པས། །གཏན་བདེའི་འདུན་མ་དམ་པའི་ལྷ་ཆོས་ལ། །སྙིང་ནས་འབད་པའི་བསྐུལ་མ་ཉིད་ལ་ལྟོས། །སྙིགས་མའི་དུས་སྐྱེས་ཆུ་བུར་ལྟ་བུའི་ལུས། །མྱུར་དུ་འཇིག་པར་འགྱུར་བ་སྨོས་ཅི་འཚལ། །བསོད་ནམས་མཐུ་ལྡན་འཁོར་ལོའི་བསྒྱུར་རྒྱལ་དང་། །ཚངས་དང་བརྒྱ་བྱིན་རྣམས་ཀྱང་མི་རྟག་ལ། །དེ་བས་ཆེས་མཆོག་རྫོགས་པའི་སངས་རྒྱས་ཀྱི། །མཚན་དཔེ་རྡོ་རྗེའི་སྐུ་ཡང་བརྟུལ་མཛད་ན། །ལུས་ཅན་འགྲོ་བ་གཞན་རྣམས་སྨོས་ཅི་འཚལ། །སངས་རྒྱས་རྣམས་ཀྱི་ངེས་དོན་ཆོས་དབྱིངས་ཞིང་། །འཐུག་པོ་བཀོད་པར་རྟེན་འགྱུར་ལོངས་སྤྱོད་རྫོགས། །བརྟེན་པ་ཆོས་སྐུ་སྐུ་དང་ཡེ་ཤེས་ཚུལ། །ཟུང་འཇུག་བྲལ་མིན་རྒྱལ་བ་གང་དེ་ལས། །གཞན་གྱུར་མཐའ་དག་མི་རྟག་ཚུལ་ཅན་ཏེ། །དེས་ན་རྟག་བརྟན་བདེ་བ་སིབ་པའི་གནས། །གང་གི་གོ་འཕང་སྒྲུབ་ལ་སྙིང་ཁམས་ཀྱི། །བརྩོན་པར་བསྐྱེད་དུས་འདི་ལ་འབད་པར་རིགས། །དེས་ན་ཚེ་འདིའི་བདེ་སྡུག་སྣང་བ་ཀུན། །ཡལ་ཡུད་རྨི་ལམ་སྒྱུ་མ་ཉིད་དུ་མཚུངས། །དེ་ལ་ཞེན་པར་བྱ་བའི་གནས་མིན་གྱི། །བདེན་མེད་འཛིན་མེད་ངང་དུ་ལམ་འཁྱེར་འབད། །ཆོས་རྣམས་ཀུན་གྱི་མཐར་ཐུག་སྙིང་བོའི་སྲོག། །བསླུ་མེད་ལས་འབྲས་ཉིད་ལ་ཡིད་ཆེས་ཤིང་། །གཞན་ཕན་ལྷག་བསམ་རྒྱ་ཆེན་གཞི་རུ་འདིང་། །བླ་མར་མོས་གུས་དམ་ཚིག་སྲོག་ཕུར་བཏབ། །གནམ་ས་གོ་ལྡོག་རྒྱ་མཚོའི་ལྟོ་འཁྲུག་ཀྱང་། །རྩ་བའི་བླ་མ་མཆོག་གསུམ་ཡོངས་མི་སྤོང། །མ་བརྗེད་སྙིང་གི་དབུས་སུ་ཝ་ལེར་བསྒོམ། །དེས་ནི་གཏན་བདེ་བྱང་ཆུབ་ལམ་རྐང་ཚུགས། །ཆོས་རྣམས་ཀུན་གྱི་མཐར་ཐུག་སྐྱེལ་སོ་ནི། །བླ་མར་མོས་གུས་གནད་དུ་བསྣུན་པའི་ཚེ། །བྱིན་རླབས་སྙིང་ལ་ཞུགས་པས་རང་མདངས་སུ། །ཆོས་ཉིད་གདོད་མའི་གནས་ལུགས་ཆོས་ཀྱི་སྐུ། །རང་རིག་སྟོང་གསལ་འཛིན་པ་ཀུན་ལས་འདས། །སངས་རྒྱས་ཀྱིས་ཀྱང་གཟིགས་མིན་སྟོང་པ་ཉིད། །འཁོར་འདས་མཐའ་དག་འཆར་གཞི་འོད་གསལ་གཤིས། །གང་དེ་ཕྱོགས་སུ་བསླན་པ་ཉམས་མྱོང་དང་། །ཕྱོགས་ཆ་མཐོང་བ་རྟོགས་པའི་ཐ་སྙད་དེ། །ས་ལམ་གོང་བགྲོད་མཐར་ཐུག་སངས་རྒྱས་ཀྱང་། །འདི་ཉིད་མངོན་དུ་གྱུར་ལས་གཞན་ཡོད་མིན། །གཏན་བདེ་འཆི་མེད་གནས་འདི་ལ་འབད་འཚལ། །རྒྱལ་གསུང་བརྒྱད་ཁྲི་བཞི་སྟོང་ཆོས་ཀུན་ཡང་། །མཐར་ཐུག་སྙིང་པོར་དྲིལ་པ་འདི་ལས་མེད། །དེས་ན་དལ་འབྱོར་ཐོབ་དཀའ་འཇིག་སླ་བ། །ཡུད་ཙམ་སྐབས་འདིར་གཏན་གྱི་བདེ་བ་མཆོག །གྲུབ་པའི་ལས་ལ་སྙོམ་ལས་མ་ཡིན་པར། །དེ་དོན་བརྩོན་འགྲུས་བསྐྱེད་པའི་དུས་ལ་བབས། །དེ་ལྟའི་ངང་ཚུལ་མཆོག་ལ་ཞུགས་ཙ་ན། །གཏན་རྗེ་ཕ་མཆོག་རྩ་བའི་བླ་མ་ཡིན། །གཏན་གྱི་མ་མ་མ་མོ་མཁའ་འགྲོ་ཡིན། །གཏན་གྱི་གྲོགས་པོ་ཆོས་སྐྱོང་དམ་ཅན་ཡིན། །གཏན་གྱི་འདུན་མ་ཐར་པའི་ལམ་བཟང་ཡིན། །གཏན་གྱི་ནོར་སྐལ་འཕགས་པའི་ནོར་བདུན་ཡིན། །དེས་ན་སེམས་ཀྱི་རི་དྭགས་འཕྲལ་བདེ་ཡི། །སྨིག་སྒྱུར་མ་ཞེན་གཏན་བདེའི་ལམ་མཆོག་ལ། །འཇུག་པར་མཛོད་ཅིག་སྐལ་ལྡན་སྙིང་གི་བུ། །དམ་པ་ཁྱོད་ལ་ཁོ་བོས་འཕྲིན་དུ་གདམས། །དེ་སྐད་ས་ལ་སྤྱོད་པའི་འོག་མིན་མཆོག །དཔལ་ལྡན་མཚུར་ཕུ་ཕོ་བྲང་གནྡྷོ་ལ། །འཇིག་རྟེན་དབང་ཕྱུག་མཆོག་གི་བསྟི་གནས་ནས། །ཕྱོགས་མེད་རིས་མེད་སྤྲང་པོ་བྱ་བྲལ་བ། །དཔལ་ལྡན་རིག་འཛིན་ཚེ་དབང་ནོར་བུ་ཡིས། །བཅོ་བརྒྱད་ཆོས་རྗེ་ན་ལེནྟྲ་པ་ཡི། །ཡབ་རྗེ་གཤེགས་པའི་ཐུགས་ངལ་སེལ་བྱེད་དུ། །གང་ཤར་གསོལ་འདིས་དགེ་ཚོགས་འཕེལ་འགྱུར་ཤོག །སརྦ་མངྒ་ལཾ། ༈ དགའ་བའི་གླུ་དབྱངས།སྭཱ་སྟི། བླ་མ་བརྒྱ་ཡོད་སྟོང་ཡོད་ཀྱང་། །རང་སེམས་ངོ་སྤྲོད་བླ་མའི་མཆོག །སློབ་མ་བརྒྱ་ཡོད་སྟོང་ཡོད་ཀྱང་། །སེམས་ངོ་འཕྲོད་པ་སློབ་མའི་མཆོག །སྡོམ་པ་གསུམ་ཞེས་གྲགས་པ་ཡང་། །ཚུལ་ཁྲིམས་ནང་ནས་སེམས་གཙོ་ལ། །བྱང་སྡོམ་དོན་དམ་སེམས་བསྐྱེད་གཙོ། །དབང་བསྐུར་ནང་ནས་བཞི་པ་གཙོ། །དེས་ན་གནས་ལུགས་ཉམས་ལེན་གནད། །མདོ་ནི་སྡོམ་གསུམ་རྩ་བ་སྟོང་། །དབང་བསྐུར་རྒྱུད་བཤད་མན་ངག་ཅེས། །གསང་སྔགས་མཁན་ལ་གྲགས་ཆེ་བ། །དེ་ཡང་དབང་ནི་དོན་དབང་གཙོ། །དོན་དབང་སེམས་ཕྱོགས་ཉམས་ལེན་ཡིན། །རྒྱུད་བཤད་པ་ཡང་མཐར་ཐུག་པ། །ཉམས་ལེན་སེམས་ཀྱི་འདྲིལ་ཐབས་ཡིན། །མན་ངག་དེ་ཡི་ལམ་སྟོན་དངོས། །དེ་ཕྱིར་ཆོས་ཀུན་སེམས་ལ་འདུ། །དེས་ན་རང་ཤར་ཕྱག་རྒྱ་ཆེ། །དེ་ལ་སྙིང་ནས་གུས་པར་བགྱི། །རང་ཤར་ཕྱག་རྒྱ་ཆེན་པོ་ཡང་། །ད་ལྟའི་ཤེས་པ་ས་ལེ་བ། །ངོས་བཟུང་མེད་ལ་ངོ་ཤེས་ཡོད། །དེ་ག་རྟག་ཏུ་སྐྱོང་བ་ལས། །ཕྱག་རྒྱ་ཆེ་ཞེས་དོན་གཞན་མེད། །དེ་ཕྱིར་དེ་ལ་ཡང་དག་འབད། །དེ་ཡི་རྩ་བ་བླ་མ་ཡི། །མོས་གུས་ལྟེམ་རྐྱང་མེད་པ་གཅེས། །ཚུལ་འདི་གནད་ལ་འཁེལ་ནུས་ན། །ཆོས་གཟུགས་ཙམ་ལ་རག་མ་ལས། །མཁས་དང་གོ་འཕང་ཆེ་རྣམས་ཀྱང་། དོན་འདི་མ་རྟོགས་སྟོང་ཡོད་ངེས། །དེས་ན་བདག་གི་རྗེས་འཇུག་བུ། །གསེར་རམ་ཟ་འོག་རས་མ་བཞིན། །ངེས་དོན་སྙིང་པོའི་ལམ་བཟང་ལ། །དགའ་བའི་གླུ་དབྱངས་ལེན་ཀྱིན་ཤོག ། ཞེས་དད་པ་ཅན་པྲ་ཏིཥྛ་ཀྵ་རའི་ངོར་སྐྱིད་གྲོང་རང་བྱུང་འཕགས་པའི་འདབས་སུ་དཔལ་གདོང་ཆུ་བྱ་རྒྱུད་རྩིས་བཤོལ་མེད་རྒྱལ་ཟླའི་དམར་ཕྱོགས་ཀྱི་ཐོབ་པ་དང་པོའི་ཐུན་མཚམས་སྐད་ཅིག་མར་རིག་པ་འཛིན་པ་ཚེ་དབང་ནོར་བུའི་ཡང་དག་པར་བརྗོད་པ་དགེའོ། །སརྦམངྒ་ལཾ། ༈ རི་ཁྲོད་པ་འོད་གསལ་ཟླ་བ་ལ་གདམས།རྒྱལ་བས་གསུང་པའི་ཆོས་ཀྱི་གྲངས། །རྒྱལ་བ་ཉིད་ལས་སུ་ཡིས་རྟོགས། །ཆོས་ཀུན་བསྡུ་ན་སྙིང་པོ་ནི། །མདོ་སྔགས་ཐེག་པ་གཉིས་ལ་འདུ། །དེ་ཡང་སྙིང་པོར་དྲིལ་ན་སྔགས། །དེ་ཡི་རྩ་བ་བླ་མར་རག །དེས་ན་དེ་ལ་གསོལ་བ་ཐོབ། །དེ་ཡི་བྱིན་རླབས་ཞུགས་པ་ན། །གཅིག་ཤེས་ཀུན་གྲོལ་ཞེས་བྱ་བའི། །རང་སེམས་རང་བཞིན་འོད་གསལ་རྟོགས། །དེ་དང་སྙིང་རྗེ་ཟུང་འཇུག་སྤྱོད། །དེས་ནི་རྒྱལ་བའི་གོ་འཕང་ཐོབ། ། ཞེས་པ་ཡང་ཚེ་དབང་རིག་འཛིན་པདྨ་ཀའི་ཕོ་ཉར་གྱུར་པ་དེས་སོ། །མངྒ་ལཾ། ༈ མགུར་བསྡུས་བླ་མ་ཆོས་སྐུ།སྭཱ་སྟི། བླ་མར་མོས་གུས་གནད་དུ་གྱུར་པ་ན། །ཚུལ་ཁྲིམས་ཏིང་འཛིན་ཤེས་རབ་བསླབ་གསུམ་རྫོགས། །སྒོ་གསུམ་གུས་པའི་སྤྱོད་པ་རྩོམ་པ་འདི། །བྱ་སྤྱོད་རྣལ་འབྱོར་རྒྱུད་ཀྱི་མན་ངག་རྫོགས། །བླ་མའི་སྐུ་གསུང་ཐུགས་སུ་ལམ་ཁྱེར་བ། །བླ་མེད་རྒྱུད་སྡེའི་དགོངས་པ་ཡང་ཏིག་ཡིན། །མདོར་ན་ཐེག་པ་རིམ་དགུའི་ཆོས་རྣམས་ཀུན། །བླ་མའི་རྣལ་འབྱོར་དག་ལ་མ་འདུས་མེད། །དེ་ཡང་ཅི་མཛད་ལེགས་མཐོང་ཅི་གསུང་ཉན། །མོས་གུས་འཕེལ་འགྲིབ་མེད་པ་ཁོ་ནར་འདུ། །མཐར་ཐུག་སྙིང་པོ་རང་རིག་ངོ་བོ་གང་། །དཔེ་མེད་བསམ་བྲལ་ཟབ་གསལ་བདེ་བ་ཆེ། །འདི་ཀ་བླ་མའི་ངོ་བོར་གོ་ཡུལ་ཙམ། །མ་ཡིན་སྙིང་གི་དཀྱིལ་ནས་ནམ་རྟོགས་ཚེ། །རང་སེམས་ངོ་ཤེས་བླ་མ་ཆོས་སྐུ་ཞེས། །རྣལ་འབྱོར་རྒད་པོ་རྣམས་ཀྱིས་རླུང་ལྟར་བསྒྲགས། །དེས་ན་དོན་གཉེར་སྐྱེ་བོ་མཐའ་དག་ཀྱང་། །ལམ་མཆོག་ངེས་པ་དེ་ལ་འཇུག་བྱ་ཡིན། །དེ་ཕྱིར་ཐར་འདོད་ཁྱོད་ཀྱང་དམ་པ་ཡི། །གདམས་པ་ཇི་བཞིན་ཉམས་སུ་བཟུང་བར་འོས། །དེ་སྐད་སྙིང་ནས་གུས་པའི་དཔལ་འཛིན་པ། །ཨ་འཐས་རྗེ་བཙུན་གང་གི་དད་པའི་གསོས། །རིག་འཛིན་ཚེ་དབང་ནོར་བུས་བརྗོད་པ་ཡིན། །མངྒ་ལཾ། ༈ གདམས་བསྡུས་རིན་ཆེན་དོན་ཡོད།སྭཱ་སྟི། ངེས་པར་བྱུང་བའི་བསམ་པ་མ་སྨད་ཅིང་། །དོན་བསྒོམ་མཆོག་ལ་ཞུགས་པའི་རྣལ་འབྱོར་པ། །བོད་ཆེན་ཕྱོགས་སྐྱེས་རིན་ཆེན་དོན་ཡོད་ཀྱི། །ཉམས་ལེན་རྟོགས་པ་ཕུལ་ལ་ལན་འདི་གསོལ། །རྒྱལ་བས་གསུང་པ་བརྒྱད་ཁྲི་བཞི་སྟོང་ཆོས། །ཀུན་གྱི་མཐར་ཐུག་ཐེག་ཆེན་ངེས་དོན་ཆོས། །དེ་ཡི་མཐར་ཐུག་རྡོ་རྗེ་ཐེག་པ་སྟེ། །དེ་ཡང་སྨིན་གྲོལ་གཉིས་ལ་མ་འདུས་མེད། །སྨིན་བྱེད་དབང་གི་མཐར་ཐུག་བཞི་པ་སྟེ། །གྲོལ་བྱེད་ལམ་གྱི་མཐར་ཐུག་ཕྱག་རྒྱ་ཆེ། །དེ་ཉིད་མངོན་སུམ་རྟོགས་པར་བྱེད་པའི་ཐབས། །ཚོགས་བསགས་སྒྲིབ་སྦྱངས་བླ་མའི་རྣལ་འབྱོར་ལས། །གཞན་གྱུར་ཉེ་བའི་ལམ་དུ་ཡོང་མ་ཡིན། །དེས་ན་བླ་མར་མོས་གུས་གནད་དུ་བསྣུན། །བླ་མའི་རང་བཞིན་ཆོས་སྐུ་མཁའ་ཁྱབ་སྟེ། །རང་བཞིན་འོད་གསལ་ངེས་པ་ལྔ་ཡི་བདག །གང་འདུལ་དེར་སྟོན་བདག་གི་འདྲེན་པ་སྟེ། །ཅི་མཛད་ལེགས་མཐོང་ཅི་གསུང་ཚད་མར་འཛིན། །ཉིན་མཚན་ཐུན་དྲུག་གསོལ་འདེབས་རྒྱུན་མི་བཅད། །ལྟེམ་རྐྱང་མེད་པའི་མོས་གུས་སྲོག་ཏུ་བཟུང་། །བླ་མའི་བྱིན་རླབས་སྙིང་ལ་ཞུགས་པ་ན། །བླ་མ་རང་རིག་དབྱེར་མེད་གཅིག་ཏུ་རྟོགས། །སྨྲ་བསམ་བརྗོད་ཚིག་དཔེ་ཡི་ཡུལ་ལས་འདས། །སྐྱེ་འགག་གནས་པའི་སྤྲོས་པ་ཁོང་ནས་ཞིག །འདི་ཀོ་མཁའ་ཁྱབ་རྒྱལ་བའི་ཡེ་ཤེས་ཀྱང་། །གཞན་དུ་ཡོད་མིན་གདོད་ནས་རྣམ་པར་དག །འདི་རྟོགས་རྒྱལ་བ་ཀུན་དང་རོ་མཉམ་པས། །ཕྱག་ཆེན་གཅིག་ཆོད་ཅེས་ཀྱང་དེ་སྐད་ལོ། །དེ་ཡང་བློས་བྱས་ཡིད་དཔྱོད་འདྲ་མིན་དང་། །གོལ་ཤོར་དབང་དུ་མ་གྱུར་ཤིན་ཏུ་གཅེས། །འོན་ཀྱང་མོས་གུས་དྲན་པ་སྙིང་རྗེ་གསུམ། །གཅིག་ཏུ་དྲིལ་ན་གེགས་རྣམས་ཀུན་གྲོལ་ངེས། །དེ་ལྟར་སྤྲོས་པའི་ཚིག་ཚོགས་མང་པོ་ཞིག །བཤད་ན་ཟད་པའི་མཐའ་ཡིས་མི་བཏུབ་པས། །སྙིང་པོ་ས་བོན་ཙམ་ཞིག་སྨྲས་པ་འདི། །དད་དང་ལྡན་ཁྱོད་དགེ་བའི་རྒྱུ་འཕེལ་ཤོག །དེ་སྐད་སྐྱེས་བདག་ལོ་ཞལ་གསར་འཆར་བ། །གངས་ཅན་རྩིས་པ་ཕལ་གྱིས་མཆུ་ཟླ་དང་། །རང་ལུགས་རྒྱུད་རྩིས་དག་པས་སྦོ་ཟླ་རུ། །བཞེད་པའི་དཀར་ཕྱོགས་ཟླ་བ་དྭངས་པའི་དུས། །འཇིག་རྟེན་མགོན་པོའི་ཕོ་བྲང་མཚུར་ཕུ་ནས། །རིག་འཛིན་ཚེ་དབང་ནོར་བུའི་སྤེལ་འདི་དགེ །སརྦ་མངྒ་ལཾ། ༈ སྒྲོལ་མ་པ་དཔོན་སློབ་ལ་གདམས་པ།རྒྱལ་བའི་བཀའ་བཞིན་དུ། །རྒྱུ་འབྲས་བླང་དོར་གྱིས། །བླ་མར་མོས་གུས་འབད། །དམ་ཚིག་སྙིང་ཕུར་བཟུང་། །འཁོར་བའི་སྡུག་བསྔལ་ལ། །ནམ་ཡང་ཟད་པ་མེད། །མི་ཚེ་ཡུད་ཙམ་སྟེ། །ཡད་ཡུད་ངང་ལ་འགྲོ། །ནམ་ཞིག་འཆི་དུས་སུ། །ལག་སྟོང་མཆན་དུ་བཅུག །དེ་འདྲ་མ་སོང་བར། །བསྐྱེད་རྫོགས་བསྒོམ་པར་འཚལ། །དེ་འདྲ་བརྗོད་པ་ན། །ནམ་ཡང་ཟད་པ་མེད། །སྙིང་གཏམ་ཉུང་ངུ་ཞིག །འདི་རུ་སྨྲས་པ་སྟེ། །སྙིང་ལ་བཞག་པ་ན། །བདེ་འབྲས་ཐོབ་པར་ངེས། །ནམ་འཆི་ཆ་མེད་དེ། །ཡིད་ལ་མི་སེམས་པར། །སྡོད་ཤོམ་ལོང་འཁྱམ་འདིས། །ནམ་ཕུགས་བསླུ་བར་ངེས། །སྙིང་མེད་མདོ་ཤོར་ལ། །བལྟས་ཤིང་སྙིང་ནས་ཁྲེལ། །དགོས་མེད་བྱ་བ་ལ། །སྤྱད་ཅིང་སྐྱོ་བ་སྐྱེ། །འཆི་བདག་བདུད་པོ་ལ། །བསམ་བཞིན་སྙིང་རྩ་འདར། །འདུས་བྱས་རང་མཚང་དེ། །མྱུར་དུ་བསྟན་ལ་ཁད། །ཀྱེ་མ་འོ་རེ་བརྒྱལ། །འཆི་ཆོས་སྙིང་ནས་འཚལ། །དུས་ཀྱི་འཕོ་འགྱུར་ལ། །ནམ་ཞིག་བསྐུལ་མར་སྣང་། །དབེན་པའི་སྒྲུབ་གནས་སུ། །བཙན་ས་བཟུང་བར་རིགས།དེ་འདྲ་སྨྲ་མཁན་གྱི། །རྣལ་འབྱོར་སྨྱོན་པ་དེ། །འཆི་བ་མི་དྲན་པར། །སྐྱེ་འཆི་བར་དོ་ཀུན། །སྒྱུ་མར་འལ་མ་འོལ། །གཏད་མེད་ཤག་མ་ཤིག །བློ་བདེའི་ངང་ལ་འདུག །གར་འགྲོ་གཏད་པ་བདོག །བདེ་བ་ཅན་དུའོ། །འབྲེལ་ཚད་དོན་དང་ལྡན། །ཐར་པའི་ལམ་དུའོ། །དེ་འདྲའི་གདེང་ཚད་ཞིག །མེད་ན་སྙིང་ནས་བསྒོམ། །ཀྱེ་མ་ཡ་རེ་ང་། །ཕྱི་མ་ཅི་འདྲ་འགྱུར། །བྱས་པ་དོན་མེད་ལ། །བསམ་ནས་དོན་ལྡན་མཛོད། ། ཞེས་པ་ཡང་རིག་པ་འཛིན་པས་སྒྲོལ་མ་བ་དཔོན་སློབ་རྣམས་ལ་གླུ་རུ་བླངས་པ་སྟེ་དགེའོ། ། ༈ འཆི་མེད་གཞོན་ནུའི་ལང་ཚོ།ཨོཾ་སྭཱ་སྟི། །འཆི་མེད་གཞོན་ནུ་ལང་ཚོའི་དྲོད་རྒྱས་པས། །ཆགས་ལྡན་དཔྱིད་ཀྱི་དཔལ་མོའི་ལྗོན་ཤིང་ཁར། །སེམས་ཀྱི་ཁུ་བྱུག་རྒྱག་ནས་ས་ཊག་ཞེས། །ཡང་ཡང་སྒྲོགས་པ་འདི་ནི་ངོ་མཚར་གནས། །རྣམ་པ་ཐམས་ཅད་ཆོས་སྐུའི་རང་མདངས་ཏེ། །ཅིར་སྣང་རིག་པའི་རང་རྩལ་ཐག་ཆོད་ཚེ། །ཆགས་ཞེན་སྲེད་པ་བདེ་ཆེན་དབྱིངས་སུ་ནུབ། །ཉོན་མོངས་ཤར་ཀུན་ཡེ་ཤེས་གྲོགས་སུ་ཆེ། །དེ་འདྲ་ལྟ་བའི་གནས་ལུགས་མ་རྟོགས་པར། །སྤྱོད་ལམ་འཇམ་དེས་ཁྲེལ་ཡོད་ངོ་ཚའི་གོས། །རབ་བགོས་བཙུན་ཚུགས་བཟུང་བ་ཁོ་ན་ཉིད། །ཐར་ལམ་ཀུན་གྱི་གཞི་ཡིན་འབད་པར་འོས། །ཡང་དག་ཡེ་ཤེས་རྒྱུད་ལ་མ་སྐྱེས་པའི། །ལྕང་ལོ་རས་གོས་བགོས་པས་ཅི་ཞིག་ཕན། །མི་འགྱུར་བདེ་བའི་གྲོགས་སུ་མ་སོང་ན། །ཆོས་པ་ཕོ་མོ་སྡེབ་པས་རྒྱལ་བ་བསླུ། །དེ་བས་དད་པའི་མིག་གིས་ཡར་ལྟོས་ལ། །རྙེད་དཀའ་དལ་འབྱོར་མི་ལུས་ཐོབ་དུས་འདིར། །བརྒལ་དཀའ་འཁོར་བའི་རྒྱ་མཚོ་སྒྲོལ་སླད་དུ། །བསླབ་སྡོམ་དག་པའི་གྲུ་ཆེན་རྩིས་སུ་བཟུང་། །དེ་སྐད་སྙིང་ནས་བརྩེ་བས་བསླབ་བྱའི་ཚིག །མི་མོ་གཞོན་ནུ་མང་པོའི་ཚོགས་དབུས་སུ། །འཛེམ་མེད་འཁྲིལ་སྦྱོར་ལས་ལ་རྟག་སྤྱོད་པ། །རིག་འཛིན་ཚེ་དབང་ནོར་བུས་གླུ་རུ་བླངས། །སརྦ་མངྒ་ལཾ། ༈ ཞལ་གདམས་ཀུན་ཁྱབ་བདེ་ཆེན།ཨོཾ་སྭཱ་སྟི། ཀུན་ལ་ཁྱབ་པ་བདེ་བ་ཆེན་པོའི་དངོས། །ཀུན་ཏུ་བཟང་པོའི་རང་བཞིན་ཆོས་ཀྱི་སྐུ། །རང་རིག་ངོ་བོར་སྟོན་མཛད་འདྲེན་པ་མཆོག །རྩ་བའི་བླ་མས་ཁྱེད་ལ་ཤིས་པར་མཛོད། །ཉིད་ནི་མཐོ་རིས་ལང་ཚོས་མ་སྨད་ཅིང་། །ལུགས་གཉིས་མཁྱེན་དཔྱོད་པདྨའི་འདབ་ལྟར་ཡངས། །བླང་དོར་གནས་ལ་རྨོངས་པར་མ་གྱུར་ན། །དེ་ལ་བདག་གི་ཞལ་གདམས་ཅི་ཞིག་བྱ། །འོན་ཀྱང་ཆེན་པོའི་གསུང་གིས་བསྐུལ་བ་ན། །ཞལ་ངོ་མ་སྐྱུང་ཙམ་དུ་རྣལ་འབྱོར་པས། །གང་ཤར་ཆུ་འབབས་ཉིད་དུ་ཆ་ཤས་ཙམ། །དགེ་བའི་སེམས་ཀྱིས་གསོལ་ལ་ཉེས་ཡོད་མིན། །ངེས་ལེགས་གཏན་གྱི་འདུན་མ་དམ་པའི་ཆོས། །མངོན་མཐོ་མཐོ་རིས་ལམ་ཡང་དེ་ཡི་སྟེགས། །ཟུང་དུ་འབྲེལ་ཞེས་དམ་པའི་དམ་པ་རྣམས། །ཡང་ཡང་གསུང་བཞིན་དོན་དེ་སིམ་པར་འཚལ། །འཇིག་རྟེན་འདི་ན་རྙེད་པར་དཀའ་བའི་ལུས། །དལ་འབྱོར་བཅོ་བརྒྱད་ཚང་བའི་མི་ཉིད་སྟེ། །དེ་ཉིད་ཐོབ་པ་ཤིན་ཏུ་དཀོན་ཤེས་ན། །སྟོང་ལོག་མ་ཡིན་རྣམ་དཀར་དགེ་ལ་འབད། །ཨ་ཧོ་ཡེ་གནས་འདི་གང་ཡིན་ཟེར་ཙ་ན། །གུ་རུའི་གནས་ཆེན་ལྗོན་པ་ལུང་། །མ་དང་མཁའ་འགྲོ་འདུ་བའི་ཞིང་། །མཁའ་སྤྱོད་དག་པའི་ཞིང་ཁམས་ལགས། །བླ་མ་སུ་ཡིན་ཟེར་ཙ་ན། །དགུ་ལྡན་རིག་འཛིན་བརྒྱུད་པའི་སྲས། །འབྲེལ་ཚད་དོན་ལྡན་ཐུགས་རྗེ་ཅན། །རིག་འཛིན་ཚེ་དབང་ནོར་བུ་ཡིན། །མི་ང་རང་སུ་ཡིན་ཟེར་ཙ་ན། །འདི་སྣང་ཕ་ཡུལ་རྒྱབ་ཏུ་བོར། །རྗེ་མཚན་ལྡན་བླ་མའི་ཆོས་ཀྱི་སྲས། །དལ་འབྱོར་དོན་ལྡན་གྱུར་པའི་རྣལ་འབྱོར་ལགས། །ཆོས་ལུགས་གང་ཡིན་ཟེར་ཙ་ན། །བཀའ་མདོ་རྒྱུད་སྙིང་པོ་ཀུན་གྱི་བཅུད། །ཆོས་འཁོར་ལོ་གསུམ་པའི་ལྟ་བ་མཆོག །དཔལ་འོད་གསལ་རྡོ་རྗེ་སྙིང་པོ་ལགས། །ཁྱོད་ལྟ་བ་གང་ཡིན་ཟེར་ཙ་ན། །ང་མཐའ་བྲལ་གྱི་ལྟ་བ་རྫོགས་པ་ཆེ། །ཐེག་བརྒྱད་ཀྱི་ཡིད་ཆོས་ལས་འདས་རྩེ། །རྩོད་བྲལ་ཀ་དག་ལྷུན་གྲུབ་ཀྱི་དགོངས་པ་ཡིན། །ཁྱོད་བསྒོམ་པ་གང་ཡིན་ཟེར་ཙ་ན། །སེམས་མཉམ་བཞག་དུས་གསུམ་སྤྲོས་པ་བྲལ། །ལམ་གང་ཤར་གནས་ལ་སྤང་བླངས་མེད། །ང་བསྒོམ་པ་ཕྱག་རྒྱ་ཆེན་པོ་ཡིན། །ཁྱེད་སྤྱོད་པ་གང་ཡིན་ཟེར་ཙ་ན། །ཕྱི་འདུལ་བ་ལྟར་དུ་ཚངས་པར་སྤྱོད། །ནང་རྣལ་འབྱོར་ལྟར་དུ་གསང་སྔགས་སྤྱོད། །གསང་འུབ་ཆུབ་བློ་འདས་སྤྱོད་པ་ཡིན། །ཁྱེད་འབྲས་བུ་གང་ཡིན་ཟེར་ཙ་ན། །ང་རང་དོན་ཆོས་སྐུའི་འབྲས་བུ་ཡིན། །གཞན་དོན་དུ་གཟུགས་སྐུའི་རོལ་གར་ཅན། །དཔལ་སྐུ་གཉིས་མཐར་ཐུག་འབྲས་བུ་ཡིན། །དེ་འདྲ་བླངས་ཤིང་ཞབས་བྲོ་རྒྱབ། །ཞབས་བྲོ་གཡས་སུ་ཆེམ་སེ་ཆེམ། །གཡས་སུ་དཔའ་བོའི་ཞབས་བྲོ་ཆེམ། །ཞབས་བྲོ་གཡོན་དུ་ཆེམ་སེ་ཆེམ། །དཔའ་མོའི་ཞབས་བྲོ་ལྡེམ་སེ་ལྡེམ། ། ༈ མགུར་གླུ་བྱ་རུང་ཁ་ཤོར།ཨེ་མ་ཧོཿ མཆོད་རྟེན་ལ་བྱ་རུང་ཁ་ཤོར། །དུས་གསུམ་རྒྱལ་བའི་ཐུགས་རྟེན། །མ་བཞེངས་ལྷུན་གྱིས་གྲུབ་པ། །བཞེངས་ནས་བསམ་པའི་དོན་གྲུབ། །སངས་རྒྱས་འོད་སྲུང་གི་བསྟན་པ་ལ། །བྱ་རྫི་ཡུམ་སྲས་ཀྱིས་བཞེངས་པ། །སངས་རྒྱས་ཤཱཀ་ཐུབ་པའི་བསྟན་པ་ལ། །ཨོ་རྒྱན་གུ་རུའི་བསྔགས་པའི་མཆོད་རྟེན། །རྩོད་ལྡན་སྙིགས་མའི་དུས་སུ། །སྔགས་འཆང་ཤཱཀྱ་བཟང་པོས་གུ་རུའི་ལུང་བཞིན། །ཞིག་གསོ་བགྱིས་པའི་མཆོད་རྟེན། །རྩོད་ལྡན་སྙིགས་མའི་མཐར་ཐུག་དེང་དུས། །ངེད་ཅག་དཔོན་སློབ་ཀྱི་ཞིག་གསོ་བགྱིས་པའི་མཆོད་རྟེན། །ཨེ་མ་མཆོད་རྟེན་ལ་བྱ་རུང་ཁ་ཤོར །རྩིགས་པ་མི་འདྲ་སྐྱེས་པ་ཞིག་འདྲ་འདུག །རྒྱ་མཚོའི་གཏིང་ནས་བརྡོལ་པ་ཞིག་འདྲ་འདུག །རི་རྒྱལ་ལྷུན་པོ་འགྱིང་བ་ཞིག་འདྲ་འདུག དགུང་སྔོན་དབྱིངས་ནས་སྙོགས་པ་ཞིག་འདྲ་འདུག །བཅོ་ལྔའི་ཟླ་བ་ཤར་བ་ཞིག་འདྲ་འདུག སྨོན་ལམ་གང་བཏབ་འགྲུབ་པའི་མཆོད་རྟེན། །འབྲེལ་ཚད་དོན་དང་ལྡན་པའི་མཆོད་རྟེན། །འབྲེལ་གྱུར་འགྲོ་བ་མཐའ་དག །བདེ་བ་ཅན་དུ་སྐྱེ་བའི་མཆོད་རྟེན། །བལ་ཡུལ་ས་བཅུད་ཡོང་པའི་མཆོད་རྟེན། །བོད་ཡུལ་ཕུན་ཚོགས་བསྐྱེད་པའི་མཆོད་རྟེན། །རྒྱལ་ཁམས་མཐའ་དག་བདེ་བའི་མཆོད་རྟེན། །འཛམ་གླིང་འདི་ན་བྱིན་ལྡན་མཆོད་རྟེན། །ལྷ་མི་ཀུན་གྱིས་བསྟོད་པའི་མཆོད་རྟེན། །འཇིག་རྟེན་གསུམ་གྱི་སྒྲོན་མེ་མཆོད་རྟེན། །བཀྲ་ཤིས་རྒྱལ་བའི་དཀྱིལ་འཁོར་བཟང་པོ། །རྫོགས་སངས་རྒྱས་དང་དེ་ཡི་མཆོད་རྟེན། །ཡང་ནས་ཡང་དུ་མཇལ་བར་ཤོག་ཅིག །ཛ་ཡ་ཛ་ཡ་བི་ཛ་ཡ། །ས་དབང་ཆོས་ཀྱི་རྒྱལ་པོ། །འགྱུར་མེད་ཕྱོགས་ལས་རྣམ་རྒྱལ། །གངས་ཅན་ཡོངས་ཀྱི་བདག་པོ། །རྡོ་རྗེའི་ཁྲི་ལ་བཞུགས་ཡོད། །གངས་ཅན་ཡོངས་ཀྱི་མགོན་པོ། །རྒྱལ་བ་བསྐལ་བཟང་རྒྱ་མཚོ། །མི་རྗེ་ཆོས་ཀྱི་རྒྱལ་པོ། །ཐུགས་ཡིད་གཅིག་ཏུ་འདྲེས་ཡོད། །རྒྱལ་དབང་པདྨའི་རྒྱལ་སྲས། །རིག་འཛིན་ཚེ་དབང་ནོར་བུ། །ཕྱོགས་མེད་འགྲོ་དོན་སྐྱོང་བའི། །འབྲེལ་ཚད་སྨིན་གྲོལ་བཀོད་ཡོད། །མཐོང་ཐོས་དྲན་རེག་གྲོལ་བའི། །མཆོད་རྟེན་བྱ་རུང་ཁ་ཤོར། །བོད་བལ་ཡོངས་ཀྱི་བདེ་ཐབས། །ཞིག་གསོ་ཕུན་ཚོགས་གྲུབ་ཡོད། །ཛ་ཡ་ཛ་ཡ་བི་ཛ་ཡ། ། ༈ ཞལ་གདམས་སྙིང་པོ།༄༅། །ཞལ་གདམས་སྙིང་པོ་བཞུགས་སོ། ། ༈ ཨོཾ་སྭཱསྟི། མཚན་ཙམ་བརྗོད་ཀྱང་དུཿཁའི་འཁྲུལ་འཁོར་འཇིག །གསོལ་འདེབས་ཐར་པའི་ལམ་ལ་ཡོངས་སྦྱོང་མཛད། །མཚུངས་མེད་བླ་མ་པད་འབྱུང་བདེ་བ་ཆེ། །བདག་གི་བླ་མ་ཡིན་ནོ་གུས་ཕྱག་འཚལ། །སྐལ་ལྡན་ཐར་འདོད་བདག་དང་ལས་མཐུན་པ། །ཡོད་ན་ཁོ་བོའི་སྙིང་གི་གཏམ་འདི་ཉོན། །དལ་འབྱོར་འདི་ནི་ཤིན་ཏུ་རྙེད་དཀའ་བ། །ཨུ་དུམྺ་ར་ལྟ་བུར་རབ་ཏུ་དཀོན། །ནམ་མཆི་ཆ་མེད་ཚེ་ལ་ངེས་མེད་པ། །བར་སྣང་གློག་ལྟར་སྐད་ཅིག་འགྱུར་ནས་འགྲོ། །རྒྱུ་འབྲས་ལས་འདི་ནམ་ཡང་མི་བསླུ་བས། །དགེ་སྡིག་སྤང་བླང་ལས་ལ་མཁས་པར་བྱོས། །ཐར་པའི་མཐུན་འཇུག་སངས་རྒྱས་གོ་འཕང་སྟེ། །དེ་ཡི་མཐུན་འཇུག་སྔགས་ཀྱི་ལམ་ཡིན་ལ། །དམ་ཚིག་ཆོས་ཀྱི་སྲོག་རྩ་དམར་པོས་གྲགས། །འདི་དག་ཀུན་ལ་གཅེས་པའི་ཞལ་གདམས་ཡིན། །ཉམས་ལེན་སྙིང་པོ་གནས་ལུགས་ཕྱག་རྫོགས་ཀྱང་། །རང་གི་སེམས་ཀྱི་ངོ་བོ་རིག་པ་ཉིད། །རང་ངོ་རང་གི་ཤེས་ལས་གཞན་པ་མེད། །དེ་ཡང་སེམས་ཉིད་ངོ་བོ་འདི་ལྟ་ཞེས། །དཔེ་གཟུགས་མཚན་ཉིད་བརྗོད་པའི་ཡུལ་མ་གྲུབ། །མེད་དོ་ཞེས་ན་འཁོར་འདས་ཐམས་ཅད་འཆར། །ཡོད་དོ་ཞེས་ནི་མཛུབ་ཏུ་འཛུགས་པ་མེད། །དེ་ནི་སེམས་ཉིད་གདོད་མའི་གཤིས་ལུགས་ཏེ། །གཤིས་ལུགས་དེ་ལས་ཚོལ་རྒྱུ་གཞན་ནི་མེད། །དེ་ཀ་མ་ཡེངས་རང་ངོ་ཤེས་བཞིན་སྐྱོང་། །ཡང་དག་དོན་ལ་བསྐྱང་བྱ་སྐྱོང་བྱེད་མེད། །འོན་ཀྱང་གཞི་ལམ་འོད་གསལ་མ་འདྲེས་བར། །མ་ཡེངས་དྲན་པས་སངས་རྒྱས་ཀུན་གྱི་ལམ། །ཡིན་ནོ་ཡིན་ངེས་དེས་ན་དྲན་པ་སྐྱོང་། །དེ་ཡང་བློ་འདས་ལྟ་བའི་མཐར་ཐུག་ཡིན། །དམིགས་གཏད་མེད་པ་བསྒོམ་པའི་མཐུན་འཇུག་ཡིན། །མ་ཡེངས་དྲན་པ་སྤྱོད་པའི་མཐུན་འཇུག་ཡིན། །རེ་དོགས་མེད་པ་འབྲས་བུའི་ངོ་བོ་ལགས། །མང་པོ་བརྗོད་ན་ཟད་པའི་མཐའ་མེད་ཀྱང་། །མདོར་བསྡུས་སྙིང་གཏམ་དེས་ཀྱང་ཕན་ཐོགས་འགྱུར། །དེ་སྐད་ལྷོ་ཡི་གཏེར་སྟོན་ལས་འཕྲོ་གླིང་། །གང་གི་གདུང་རིགས་དྲི་མ་མེད་པ་ལས། །འཁྲུངས་པའི་སྔགས་འཆང་པདྨ་ཚངས་དབྱངས་དང་། །དབུས་གྱུར་ལྷོ་རྒྱུད་རྒྱལ་རིགས་བྱ་བ་ཡི། །བློན་གྱུར་དད་གུས་བློ་གྲོས་ལང་ཚོ་ཅན། །ཚེ་རིང་རྣམ་རྒྱལ་ཞེས་པར་ཕན་སླད་དུ། །རྒྱལ་དབང་པདྨ་ཀ་རའི་ཕོ་ཉ་བ། །རིག་པ་འཛིན་པ་ཚེ་དབང་ནོར་བུ་ཞེས། །གངས་ཅན་རི་བོའི་ཁྲོད་དུ་གྲགས་པ་དེས། །གཉལ་ཡུལ་ས་ཡི་ཐིག་ལེ་བྲ་གོར་དུ། །སྐད་ཅིག་མ་ལ་བརྗོད་པར་བྱས་པ་སྟེ། །ཚིག་འདི་མ་བརྗེད་རྟག་ཏུ་དྲན་བྱས་ན། །ཐར་པ་མཆོག་གི་ལམ་ལ་འཛེག་པ་དང་། །ཀུན་ཏུ་དགེ་ལེགས་དཔལ་ལ་སྤྱོད་པར་ཤོག །མངྒ་ལཾ། ༈ གཉལ་དགེ་རི་ནས།ན་མོ་གུ་རུ་པདྨ་ཡེ། དལ་འབྱོར་གྱི་ལུས་རྟེན་འདི་ཐོབ་མོད་ཀྱང་། །དུས་སྙིགས་དུས་སུ་སྐྱེས་པ་འདི་ཡིད་རེ་སྐྱོ། །རྗེ་བཙུན་ལྡན་གྱི་བླ་མ་མཇལ་ལགས་ཀྱང་། །མོས་གུས་འཁོར་ཡུག་དུ་མ་སོང་འདི་ཡིད་རེ་སྐྱོ། །ཟབ་དགུ་མན་ངག་བདུད་རྩི་ཐོབ་མོད་ཀྱང་། །ཉམས་ལེན་བརྩོན་པ་ཡི་མ་ཕོར་ཡིད་རེ་སྐྱོ། །ཕ་ཡུལ་བདུད་ར་རུ་ཤེས་ནས་སྤང་ལགས་ཀྱང་། །མི་ཡུལ་ཆོས་བརྒྱད་ཀྱི་འཆིང་འདི་ཡིད་རེ་སྐྱོ། །ལྷག་མེད་འཇའ་ལུས་ལ་བློ་གདེང་གཏད་འདོད་ཀྱང་། །འཁོར་བའི་འཁྲུལ་སྣང་ལ་འབྱམས་འདི་ཡིད་རེ་སྐྱོ། །ཕྱོགས་མེད་རྒྱལ་ཁམས་ལ་འདུན་པ་གཏད་མོད་ཀྱང་། །ཆེ་གཉེན་དུ་མ་ཡིས་བླ་མར་བཀུར་འདི་སྐྱོ། །འཇིག་རྟེན་འཁྲུལ་ཞིག་ལ་བློ་ཕུག་གཏད་མོད་ཀྱང་། །འཁྲུལ་སྣང་ཞེན་པ་ཡིས་འཆིང་འདི་ཡིད་རེ་སྐྱོ། །འགྲོ་དོན་རླབས་ཆེན་ལ་སྙིང་ནས་འདུན་མོད་ཀྱང་། །ད་དུང་རང་དོན་ཡང་མ་འགྲུབ་འདི་ཡིད་རེ་སྐྱོ། ། ༈ ས་སྦྲུལ་གློ་བོར་ཕེབས་སྐབས།ཨེ་མ་གཞན་ཕན་གྱི་འཁོར་ལོ་འཁོར། །ཨེ་མ་སེམས་ཅན་གྱི་དོན་ལ་བརྩོན། །གཟུགས་ཅན་མི་ཡི་འཁུ་འཕྲིག་སངས། །གཟུགས་མེད་ལྷ་འདྲེའི་ཡ་ཁ་ཞི། །དམ་ཅན་རྣམས་ཀྱི་དམ་ཚིག་གསོས། །སེམས་བསྐྱེད་ཅན་གྱི་སེམས་བསྐྱེད་གསོས། །འདྲེ་རྙིང་པའི་དམ་བཅའ་དྲན་པར་བྱས། །གསར་སྐྱེས་རྣམས་ལ་གཡར་དམ་ཕོག །ཀུན་ཀྱང་བྱང་ཆུབ་ལམ་བཟང་པོ། །ཐར་པ་ཕུན་ཚོགས་རྒྱུ་རུ་བསྔོ། །བདག་གི་ཚ་ངམ་རྩུབ་སྤྱོད་ཡང་། །གཏིང་ནས་སྙིང་རྗེ་རོལ་པ་ཡིན། །ཁྱེད་མི་མིན་ལྷ་འདྲེ་འབྱུང་པོ་ཀུན། །སྙིང་ནས་མོས་གུས་དགའ་བ་བསྐྱེད། །ང་བྱར་མེད་ནམ་མཁའི་རྣལ་འབྱོར་ལ། །གཟུང་ཡུལ་དང་འཛིན་པ་ཁད་དེར་འདྲེས། །སྐྱེ་མེད་དུ་རྟོགས་པའི་བློ་གདེང་དེ། །འགག་མེད་ཀྱི་འཆར་བ་ཞེན་མེད་སྤྱོད། །སྒྱུ་མ་དང་རྨི་ལམ་ལྟད་མོ་བཞིན། །ཡུལ་མེད་དང་ཡུལ་ཅན་མཉམ་ཉིད་ཤར། །སྣང་སྲིད་འཁོར་འདས་ཆོས་རྣམས་ཀུན། །རང་རིག་ཆོ་འཕྲུལ་ཉིད་དུ་ཁུམས། །དེ་ཡང་གཅིག་དང་ཐ་དད་པའི། །སྤྲོས་པའི་ཚོགས་ཀུན་ཉེར་བར་ཞི། །ཚུལ་འདི་རྩ་བའི་བླ་མའི་མཐུས། །གདོད་མའི་གནས་ལུགས་དེ་ལྟར་རྟོགས། །དེས་ན་ལྷ་འདྲེའི་ཚོགས་རྣམས་ཀྱང་། །བདག་གི་རྣམ་རྟོག་རི་མོ་ཙམ། །མེད་ལ་ཡོད་པའི་སྣང་ཚུལ་སྟེ། །བདེན་གཉིས་ཟུང་འཇུག་ངང་དུ་ཤར། །འདི་རུ་གདུལ་བྱར་གྱུར་པ་རྣམས། །སྤྲོ་བ་བསྐྱེད་ཕྱིར་ཅུང་ཟད་སྨྲས། །མི་མིན་ལྷ་འདྲེ་ཁྱེད་རྣམས་ཀྱང་། །དེ་རིང་ཕྱིན་ཆད་རྒྱལ་བའི་སྲས། །བྱང་ཆུབ་ལམ་ལ་ངེས་ཞུགས་པས། །དགའ་བ་སྤྲོ་བ་བསྐྱེད་པར་བགྱིས། །དེང་ནས་ངེས་དོན་བསྟན་པ་མཆོག །གཉེན་ཕྱིར་བསྲུང་མ་དྲག་པོ་མཛོད། །རིག་འཛིན་ཚེ་དབང་ནོར་བུ་ཡི། །རྗེས་འཇུག་བུ་བཞིན་སྐྱོང་བར་མཛོད། །རིག་འཛིན་ཚེ་དབང་ནོར་བུ་ཡི། །ལྷག་པའི་སྨོན་ལམ་དག་པའི་མཐུས། །བྱང་ཆུབ་སྤྱོད་པར་མཐུན་སྤྱོད་ཅིང་། །ཚོམ་བུ་གཅིག་ཏུ་སངས་རྒྱས་ཀྱི། །ཉམས་དགུའི་བཞད་མོ་ཐིག་ལེ་གྱིས། །སྤྲོ་བའི་ཞབས་བྲོ་ཁྲིག་གེར་རོལ། །ཀུན་ཏུ་དགེ་བ་བཀྲ་ཤིས་པ། །བྱང་ཆུབ་སེམས་ཀྱི་དོ་ར་འདི། །ལྷ་མི་འགྲོ་བ་མཐའ་དག་པ། །ཕུན་ཚོགས་དཔལ་ལ་རྟག་སྤྱོད་ཤོག ། ༈ ཡེ་ཤེས་ཐིག་ལེ།ཨོཾ། གདོད་མའི་ཡེ་ཤེས་ཀྱི་ཐིག་ལེ་དེ། །ཁ་དོག་དབྱིབས་བྲལ་གྱི་འོད་ཟེར་འཕྲོ། །ཀུན་ཁྱབ་སྤྲོས་བྲལ་གྱི་ཐིག་ལེ་དེ། །མཐའ་ཡས་མུ་མེད་ཀྱི་འོད་ཟེར་འཕྲོ། །རང་བྱུང་བདེ་ཆེན་གྱི་ཐིག་ལེ་དེ། །བྱང་ཆུབ་རྟོག་མེད་ཀྱི་འོད་ཟེར་འཕྲོ། །ལྷུན་གྲུབ་འོད་གསལ་གྱི་ཐིག་ལེ་དེ། །ལྔ་ལྡན་རང་མདངས་ཀྱི་འོད་ཟེར་འཕྲོ། །མི་ཤིགས་གཞོམ་མེད་ཀྱི་ཐིག་ལེ་དེ། །རླུང་སྔགས་རང་མདངས་ཀྱི་འོད་ཟེར་འཕྲོ། །འཕོ་མེད་རིག་པ་ཡི་ཐིག་ལེ་དེ། །རང་ཤར་རང་གྲོལ་གྱི་འོད་ཟེར་འཕྲོ། །ཆོས་ཉིད་གཉུག་མ་ཡི་ཐིག་ལེ་དེ། །བྱས་མེད་གཟོ་བྲལ་གྱི་འོད་ཟེར་འཕྲོ། །རང་གསལ་ཡེ་ཤེས་ཀྱི་ཐིག་ལེ་དེ། །མ་འདྲེས་ངང་རྫོགས་ཀྱི་འོད་ཟེར་འཕྲོ། །དོན་དམ་ཆོས་སྐུ་ཡི་ཐིག་ལེ་དེ། །གཟུགས་སྐུ་རྣམ་གཉིས་ཀྱི་འོད་ཟེར་འཕྲོ། །སྣང་མེད་འོད་གསལ་གྱི་ཐིག་ལེ་དེ། །སྣང་བྱེད་དབྱིངས་གྲོལ་གྱི་འོད་ཟེར་འཕྲོ། །དྲན་མེད་ཁྱབ་བརྡལ་གྱི་ཐིག་ལེ་དེ། །རང་ཤེས་རང་གྲོལ་གྱི་འོད་ཟེར་འཕྲོ། །ཡིད་གཉིས་བློ་བྲལ་གྱི་ཐིག་ལེ་དེ། །དྲི་མེད་རྗེན་པ་ཡི་འོད་ཟེར་འཕྲོ། །འུབ་ཆུབ་བློ་འདས་ཀྱི་ཐིག་ལེ་དེ། །སྣང་སྟོང་དབྱེར་མེད་ཀྱི་འོད་ཟེར་འཕྲོ། །ལྔ་ལྡན་ཡེ་ཤེས་ཀྱི་ཐིག་ལེ་དེ། །འབྱུང་ལྔ་དབྱིངས་གྲོལ་གྱི་འོད་ཟེར་འཕྲོ། །ཆོས་ཉིད་སྐྱེ་མེད་ཀྱི་ཐིག་ལེ་དེ། །འགག་མེད་འབྱམས་ཀླས་ཀྱི་འོད་ཟེར་འཕྲོ། །རྟག་བརྟན་དབུ་མ་ཡི་ཐིག་ལེ་དེ། །མཐའ་དབུས་ཡོངས་བྲལ་གྱི་འོད་ཟེར་འཕྲོ། །འབྲི་མེད་གང་མེད་ཀྱི་ཐིག་ལེ་དེ། །བྲལ་སྨིན་ཡོངས་རྫོགས་ཀྱི་འོད་ཟེར་འཕྲོ། །མི་འགྱུར་བདེ་ཆེན་གྱི་ཐིག་ལེ་དེ། །ཞུ་བདེ་རང་གྲོལ་གྱི་འོད་ཟེར་འཕྲོ། །དུ་མ་རོ་གཅིག་གི་ཐིག་ལེ་དེ། །གཅིག་དང་དུ་བྲལ་གྱི་འོད་ཟེར་འཕྲོ། །སྒོམ་མེད་བྱར་མེད་ཀྱི་ཐིག་ལེ་དེ། །ཡེངས་མེད་རང་ཤེས་ཀྱི་འོད་ཟེར་འཕྲོ། །ཞེན་མེད་རང་གྲོལ་གྱི་ཐིག་ལེ་དེ། །ཚོགས་དྲུག་འགོག་མེད་ཀྱི་འོད་ཟེར་འཕྲོ། །དབྱིངས་ཆོས་ཡེ་བྲལ་གྱི་ཐིག་ལེ་དེ། །ཁ་སྦྱོར་ཟུང་འཇུག་གི་འོད་ཟེར་འཕྲོ། །གཉུག་མ་བསྒོམ་མེད་ཀྱི་ཐིག་ལེ་དེ། །ཡེངས་མེད་རང་ཤེས་ཀྱི་འོད་ཟེར་འཕྲོ། །སྨྲ་བསམ་བརྗོད་མེད་ཀྱི་ཐིག་ལེ་དེ། །འཁོར་འདས་སྣ་ཚོགས་ཀྱི་འོད་ཟེར་འཕྲོ། ། ༈ མར་ཡུལ་རྒྱལ་བློན་ལ་གདམས་པ།མར་ཡུལ་གྱི་རྒྱལ་བློན་སྤྱི། །ཁ་ཆེ་ཡི་ཚོང་པ་བཅས། །ང་གཉོམ་ཆུང་གི་རྣལ་འབྱོར་ལ། །དད་གུས་ལ་རྗེས་ཡི་རང་། །ཕྱོགས་མེད་ཀྱི་བྱ་བྲལ་བ། །གཟའ་གཏད་ནི་ཅི་ཡང་མེད། །གང་ཤར་ནི་གདོང་འདེད་ཡིན། །ཕྱོགས་མེད་དུ་འགྲོ་བར་རིང་། །ད་ལྟ་ཕན་ལོ་ཟླ་རུ། །མར་ཡུལ་གྱི་རྒྱལ་བློན་རྣམས། །ཕན་བདེ་ཡི་བཙས་སུ་རེ། །སྒོ་གསུམ་གྱི་དཀའ་བ་སྤྱད། །ཅི་ནུས་ཀྱིས་འབད་འབུང་བཏོན། །ལྷག་བསམ་ནི་རྣམ་པར་དག །བཟང་ཟླུམ་ནི་ལེགས་པར་གྲུབ། །ད་ཆ་ནི་སྨྱོན་པ་ཁོ། །ཟང་ཟིང་གི་ནོར་རྫས་ལ། །ཧ་ཅང་གིས་མི་ཞེན་པས། །སྦྱིན་བདག་གི་ངོ་བསྲུངས་ཡང་། །དེ་ཙམ་གྱི་དགོས་པ་མེད། །སྲབ་འཇམ་གྱི་གོས་བཟང་ནི། །ཤར་ཕྱོགས་ཀྱི་དབུས་སུ་མོད། །ཤ་ཐུད་ཀྱི་ཁ་ཟས་ནི། །ལ་སྟོད་ཀྱི་ལྷོ་རུ་མོད། །སྐོམ་མཆོག་གི་ཇ་བཟང་ནི། །མདོ་ཁམས་ཀྱི་སྨད་དུ་མང་། །ཉི་ཚེ་ཡི་དད་རྫས་ནི། །གང་དུ་ཡང་ཕྱིན་ན་ཡོད། །མཚར་སྡུག་གི་ནཱ་རི་ནི། །ཐོ་རེ་བ་གང་དུའང་སྣང་། །མཚན་ལྡན་གྱི་མཁའ་འགྲོ་ནི། །གནས་ཆེན་ཚོའི་འདབས་སུ་མང་། །སྣོད་ལྡན་གྱི་སློབ་མ་ནི། །ལས་སྨོན་ཉིད་མཐུན་པར་མཆིས། །སྦྱིན་བདག་ཏུ་བསྙད་པ་ནི། །རྒྱལ་ཁམས་པ་ཀུན་ཏུ་ཡོད། །རྣ་བ་ཡི་སོ་གསོད་ནི། །ཕྱོགས་གཞན་དུ་འགྲོ་ན་བདེ། །རྒྱལ་པོ་ཡི་མཆོད་གནས་ལས། །རྒྱལ་ཁམས་ཀྱི་བསོད་སྙོམས་བདེ། །རིང་མིན་དུ་འཆི་བ་ལ། །འདི་སྣང་ལ་དེ་ཙམ་ཅི། །སླེ་མཁར་སོགས་ལ་དྭགས་ཀྱི། །རྒྱལ་ཁམས་སུ་འགྲོ་བ་ནི། །སྤྲང་པོ་ཡི་བློ་ཡུལ་དུ། །འཇུག་པ་ཞིག་མི་འདུག་པས། །དོ་གལ་དུ་མི་འཚལ་ཏེ། །འདབ་ཆགས་ནི་རྙི་རྒྱ་ལས། །ཐོན་པ་བཞིན་ཤར་ཕྱོགས་སུ། །བགྲོད་པ་ཡི་གོ་སྐབས་ལགས། །ཚེ་རབས་ཀྱི་རྒྱལ་པོ་ནི། །རྫོགས་པ་ཡི་སངས་རྒྱས་ལགས། །བློ་གཏད་ཀྱི་དཔོན་པོ་ནི། །རྩ་བ་ཡི་བླ་མར་བྱས། །འཁོར་བུ་ཡི་ལོངས་སྤྱོད་ནི། །དམ་པ་ཡི་ལྷ་ཆོས་ཡིན། །རྫས་ནོར་གྱི་བང་མཛོད་ནི། །ཆོག་ཤེས་འདི་ཁོ་ན་བཟང་། །སྙིང་སྡུག་གི་མཛའ་མོ་ནི། །མ་མོ་དང་མཁའ་འགྲོ་ལེགས། །གཏན་ཚིགས་དང་རྒྱབ་དཔུང་ནི། །རྒྱུ་འབྲས་ཀྱི་བླང་དོར་གཤིན། །དམག་ཚན་དང་དཔུང་གྲོགས་ནི། །ཆོས་སྐྱོང་དང་བསྲུང་མ་དགེ། །བྲན་འཁོར་དང་གཡོག་པོ་ནི། །འཇིག་རྟེན་གྱི་ལྷ་འདྲེ་བཟང་། །གཟུགས་ཅན་གྱི་མི་རྣམས་ནི། །འཕེལ་འགྲིབ་དང་སྒང་གཤོང་ཆེ། །ཁོ་བོ་ནི་དེ་བས་ཀ །ཕྱོགས་མེད་ཀྱི་རྒྱལ་ཁམས་ལེགས། །ས་ཕྱོགས་གནས་གཅིག་ཏུ་སྡོད་པ་ཡང་། །དགོས་པ་ནི་ཆེ་བ་མེད་ལགས་ཀྱི། །ད་ནི་ཕྱོགས་གཞན་དུ་འགྲོ་ན་ལེགས། །རིག་པ་འཛིན་པ་ཚེ་དབང་ནོར་བུ་ནི། །ཨོ་རྒྱན་གྱི་རྒྱལ་པོའི་ཕོ་ཉ་སྟེ། །འབྲེལ་ཚད་ནི་དོན་དང་ལྡན་པར་རློམས། །ལྷན་ཅིག་ཏུ་མཐོང་ཞིང་སྤྱོད་ན། །ཕལ་པ་ཡི་མི་དང་མཚུངས་འདྲ་ཡང་། །རེས་འགའ་ལས་ཡང་ཡང་འཕྲད་པར་དཀའ། །དེ་བས་ན་སྙིང་ནས་གསོལ་བ་ཐོབ། །ཚེ་རབས་ཀུན་ཡང་ཡང་འཕྲད་པར་ངེས། །གཏན་བདེ་ཡི་ས་བོན་གསོས་སུ་འགྱུར། །དེ་སྐད་ནི་རིག་འཛིན་རྒྱལ་ཁམས་པ། །སྨྱོ་འཆོལ་དང་འདྲེས་པ་དེ་ཡིས་སྨྲས། །སྒམ་སྒམ་དང་ཏིག་ཏིག་མ་མཆིས་པའི། །མདོ་ཁམས་ཀྱི་རྣལ་འབྱོར་སྤྲང་འཆལ་ལ། །རྒྱལ་བློན་རྣམས་ཐུགས་ཀྱིས་མི་ཁྲེལ་ཞུ། །དགའ་བདེ་ཡི་གླུ་དབྱངས་ལེན་པར་ཤོག །ཧ་ཧ་ཧི་ཧི་ཧཱུྃ་ཧཱུྃ། བཀྲ་ཤིས་ཤོག ། ༈ ཐོལ་གླུ་དག་སྣང་འདབ་བརྒྱ་མ།ཨེ་མ་ཧོཿ དག་སྣང་འདབ་བརྒྱ་ཡི་གེ་སར་བཞད་པའི་སྟེང་། །རང་རིག་རང་གསལ་གྱི་ངོ་བོ་པདྨ་འབྱུང་། །ཟུང་འཇུག་ལྷུན་གྲུབ་ཀྱི་གཤིས་ལུགས་བདེ་ཆེན་གླིང་། །བྱང་ཆུབ་ཐོབ་ནས་ཡང་འབྲལ་བའི་ཐབས་མ་རྙེད། །ཨེ་ཧོ། ངོ་བོ་བརྗོད་མེད་ལ་རྣམ་པ་བརྗོད་བཅས་བརྡའ། །སེམས་ཉིད་གཤིས་ལུགས་ཀྱི་མཚན་ཉིད་ཆ་ཤས་ཅིག །ཤུགས་འབྱུང་འགག་མེད་ཀྱི་གླུ་རུ་བླང་ལགས་ན། །གཉིས་མེད་རང་གྲོལ་གྱི་ངང་དུ་ཁྲོལ་ལོ་ལོ། །ནམ་མཁའ་འདུས་མ་བྱས་སྐྱེ་འགག་གནས་དང་བྲལ། །འདི་ཡིན་ཚད་འཛིན་གྱི་དངོས་པོ་འདུག་གམ་ཀྱཻ། །སེམས་ཉིད་སྤྲོས་བྲལ་གྱི་ངོ་བོ་དེ་འདྲ་ན། །ཀུན་ཁྱབ་ཡེ་ཤེས་དེར་ངེས་པ་ཅིས་མི་སྐྱེ། །ཐེ་ཚོམ་ངེས་ཤེས་ཀུན་རྣམ་རྟོག་རླབས་ཕྲེང་སྟེ། །རྦ་རླབས་རྒྱ་མཚོ་ཀུན་ཆུ་ཡི་ངོ་བོར་གཅིག །གསལ་ལོ་སྟོང་ངོ་དེ་བློ་ཡི་རི་མོ་ཙམ། །གསལ་སྟོང་དབྱེར་མེད་ཀྱི་ངོ་བོ་རིག་པ་ཉིད། །ཤར་གྲོལ་དུས་མཚུངས་སུ་སྦྲུལ་མདུད་ནམ་མཁར་གྲོལ། །ཕྱོགས་དུས་གནས་སྐབས་ཀྱི་རྟོག་དཔྱོད་ཀུན་དང་བྲལ། །དཔྱོད་བྲལ་བརྗོད་མེད་ཀྱི་ངང་ནས་རྟེན་འབྲེལ་ཤར། །ངང་ཚུལ་འདི་ལྟ་ནི་ཁོ་བོའི་མྱོང་བ་སྟེ། །ལེགས་ཀྱང་ཆོས་ཉིད་ཀྱི་ཆོ་རོལ་ཉིད་དུ་ཟད། །ཉེས་ཀྱང་ཀུན་རྫོབ་ཀྱི་རྫུན་ཁུང་བརྡིབ་པས་བཟང་། །ངེས་པ་མེད་པ་ལ་ངེས་ཤེས་ཐོབ་པ་འདི། །བླ་མ་སངས་རྒྱས་ཀྱི་བྱིན་རླབས་མཐུ་ཡིས་རྟོགས། །གཏན་མེད་ཡིད་ཀྱི་ཁྱེའུ་ཉམས་དགའ་དེས། །ཞེན་མེད་བྲག་ཆ་ལྟ་བུ་ཉམས་མྱོང་གླུ། །འཛིན་མེད་བར་སྣང་བསེར་བུ་རྒྱུ་བ་བཞིན། །སྨྲ་འདི་མཉམ་བཞག་ངང་དུ་ཏ་ལ་ལ། །དེ་སྐད་ཡོན་ཏན་མང་པོས་བརྒྱན་པའི་ཡུལ། །མཐའ་བྲལ་དབུ་མར་གནས་པ་གུང་ཐང་ལྗོངས། །འཆི་མེད་གྲུབ་པའི་གནས་མཆོག་བཟང་པོ་དེར། །རིག་པ་འཛིན་པས་དགེ་བའི་སྟོན་མོར་སྤེལ། ། ཞེས་འཕགས་ཡུལ་དུ་དཀར་པོར་འབོད་པ་ས་སྦྲུལ་གྱི་ལོ་བདག་ཅག་གི་སྟོན་པས་ཟླ་མེད་པའི་ཆོ་འཕྲུལ་གྱིས་འདུལ་བར་མཛད་པའི་དུས་ཆེན་དབོ་ཟླའི་དཀར་ཕྱོགས་ཀྱི་རྒྱལ་བ་དང་པོར་ཟ་འོག་ཕུག་ཏུ་དམ་པའི་ཆོས་ཐོས་བསམ་གྱི་སྐབས། །རང་གི་རྟོགས་པ་སྐད་ཅིག་མ་གཅིག་ལ་རྒྱ་མཚོ་དྭངས་བའི་ངོས་བཞིན་སྣང་བ་ལ་ཆེད་དུ་བརྗོད་པའི་གླུ་དཔལ་རིག་པ་འཛིན་པ་ཚེ་དབང་ནོར་བུས་ཡང་དག་པར་བརྗོད་པའོ། །སརྦ་མངྒ་ལཾ། ༈ དུར་ཁྲོད་ཆེན་པོའི་ཧཱུྃ་གླུ།ཧཱུྃ་ཧཱུྃ། རྣམ་རྟོག་གི་དུར་ཁྲོད་ཆེན་པོ་ནས། །རྟོག་མེད་ཀྱི་རིག་པ་ཧེ་རུ་ཀ །བརྗོད་མེད་ཀྱི་དྲག་སྔགས་ནཱ་དའི་དབྱངས། །འཛིན་མེད་ཀྱི་ངང་དུ་འདི་སྐད་སྒྲོགས། །ཧཱུྃ་ཧཱུྃ། ཁྱེད་མི་མིན་ལྷ་འདྲེ་དྲེགས་པའི་ཚོགས། །ཡང་དག་གི་དོན་དུ་ཕྱི་རོལ་ཅི། །ནང་ངར་འཛིན་རྟོགས་པའི་རང་མདངས་ཡིན། །དེ་རྟོག་མེད་ཀྱི་དབྱིངས་སུ་ཚར་གཅོད་ཅིག །ཧཱུྃ་ཧཱུྃ། དོན་དེ་ཡང་ལྷ་འདྲེ་གང་ཡང་མེད། །ཀུན་འོད་གསལ་དབྱིངས་སུ་ཏ་ལ་ལ། །ཀུན་རྫོབ་ཏུ་ལྷ་ཡོད་འདྲེ་ཡང་ཡོད། །གནོད་བགེགས་ཀུན་མ་གནས་ཕྱིར་དེངས་ཤིག །ཧཱུྃ་ཧཱུྃ། ཡོད་མེད་དང་ཡིན་མིན་དགག་སྒྲུབ་ཀུན། །ཐ་སྙད་ཀྱི་ཚིག་ལས་དོན་དམ་ཅི། །ཚིག་ཉིད་ཀྱང་དོན་དམ་གཤིས་ཀྱི་གདངས། །གདངས་ཡེ་ཡིན་འདི་ལས་མ་འདའ་ཤིག །ཧཱུྃ་ཧཱུྃ། མར་མཐོ་བ་ལྟ་བའི་བགེགས་དང་བྲལ། །མར་དམའ་བ་སྤྱོད་པའི་འཕྲང་ལས་གྲོལ། །བར་ཐལ་སོ་གནས་ལུགས་རིག་པ་འདི། །དོན་ཡིན་ལུགས་དབྱིངས་ལས་སྤྲིངས་ཡིག་སྨྲས། །ཧཱུྃ་ཧཱུྃ། ཚུར་སེམས་ཉིད་ངོ་བོ་ལ་བལྟས་ཙ་ན། །ཆོས་ཉིད་ཀྱི་རིག་པ་ལྗེན་ནེ་ལྗེན། །ཕྱི་ཚོགས་དྲུག་གི་ཡུལ་ལ་བལྟས་ཙ་ན། །སྣང་བ་གཏད་མེད་ཀྱི་དབྱིངས་སུ་ཕྱ་ལ་ལ། །ཧཱུྃ་ཧཱུྃ། ད་དེ་འདྲ་ལ་འདྲེ་བགེགས་ཅི་འདྲ་ཞིག །བཙལ་བས་ཀྱང་རྙེད་པ་མ་ཡིན་མོད། །འོན་ཏེ་ཡང་རྟོག་ཚོགས་མ་ཟད་པར། །འདྲེ་བགེགས་ལ་ཟད་པ་ཡོད་རེ་ཤི །ཧཱུྃ་ཧཱུྃ། དེ་བས་རྣམ་རྟོག་མ་ལུས་ཀུན། །འཛིན་མེད་དང་རྟོགས་མེད་དབྱིངས་སུ་བཞག །འདྲེ་བགེགས་དང་འབྱུང་པོ་ཐམས་ཅད་ཀུན། །སེམས་ཉིད་ཀྱི་རྩལ་དུ་གྲོལ་གྱུར་ཕཊ། ཧཱུྃ་ཧཱུྃ། ཞེས་གང་ཤར་གཟའ་གཏད་མེད་པའི་རྣལ་འབྱོར་པ་དེས་ཅི་ཤར་ཆོས་ཉིད་ཀྱི་གླུ་རང་ཤར་གྲོལ་བའི་སྤྲིང་ཡིག་ངང་ཤར་གྱི་ཀློང་ནས་སྤེལ་བ་ཧ་ཧ། ཧི་ཧི། ཧུམ་ཧུམ། ཧེ་ཧེ། །ཧོ་ཧོ། །ཧམ་ཧཿ ཨ་ཡ་མ་དུ་རུ་ཙ་ཤ་ན་བཛྲཿམ་ཡ་རཀྵ་རཀྵཿ ༈ སྨོན་མགུར་དཔལ་ལྡན་མགྲིན་སྔོན།གནས་འདི་ནི་སློབ་དཔོན་པདྨའི་གནས། །ཡུལ་བཀྲ་ཤིས་བལ་ཡུལ་ཚ་བ་ཤོད། །ལྷ་བཀྲ་ཤིས་འཇིག་རྟེན་སྐྱོང་བའི་གཙོ། །དཔལ་མཆོག་དང་ལྡན་པ་མགྲིན་སྔོན་རྒྱུད། །ལྷ་ཆེན་མོ་དཔལ་མོ་ཉེར་མཚུངས་མ། །དཔལ་བལ་ཡུལ་གྱི་རྒྱལ་མོ་མ་ལགས་བསམ། །ཁོང་ཆོས་མཛད་ཡོངས་ཀྱི་དགྲ་ལྷ་ཡིན། །དཔལ་རིག་པ་འཛིན་པའི་བསྲུང་མ་ཡིན། །སྒོས་རྣལ་འབྱོར་བདག་གི་སྙིང་གྲོགས་ཡིན། །ཡུལ་འདིར་གནས་ཀྱི་ལྷ་སྲིན་སྡེ་བརྒྱད་རྣམས། །ཀུན་བྱང་ཆུབ་སྤྱོད་པའི་གྲོགས་བཟང་ཡིན། །ཡུལ་མི་གཅིག་མི་རིགས་མང་པོ་ཡི། །གླུ་རང་རང་ཡུལ་ཆོས་མཐུན་པ་འདི། །ལྷ་གཉན་པོ་ཁྱེད་ལ་མཆོད་པར་འབུལ། །གནས་འདིར་ཚོགས་ཀྱི་དཔོན་སློབ་འཁོར་འབངས་ཀུན། །ལས་ཅི་ལ་ཚོགས་པ་ཆོས་ལ་ཚོགས། །ཆོས་རྣམ་དཀར་དགེ་བ་བསྒྲུབ་ལ་ཚོགས། །ཆོས་རྣམ་དཀར་དགེ་བའི་འབྲས་བུ་དེ། །ཁྱེད་མི་མིན་རྣམས་དང་ཐུན་མོང་བསྔོ། །དོན་བྱང་ཆུབ་སེམས་ཀྱི་དཀྱིལ་འཁོར་དུ། །དུས་གཅིག་ཏུ་ཚོགས་པའི་མཆེད་ལྕམ་ཡིན། །དུས་འདི་ནས་བྱང་ཆུབ་སྙིང་པོའི་བར། །དུས་ཀུན་ཏུ་ལྷན་ཅིག་ཚོགས་པར་ཤོག །སརྦ་མངྒ་ལཾ། བདེ་མཆོག་ཉུང་ངུའི་ཕྱག་མཆན།༄༅། །བདེ་མཆོག་ཉུང་ངུའི་ཕྱག་མཆན། ༄༅། ། ཀཿཐོག་རིག་འཛིན་ཆེན་པོ་ཚེ་དབང་ནོར་བུ་མཆོག་གི་བདེ་མཆོག་ཉུང་ངུའི་ཕྱག་མཆན་འདི་འབྲས་ལྗོངས་མི་རྗེ་འབའ་ཉག་པའི་ཕྱག་དཔེའི་ཁྲོད་ནས་བྱུང་བ་ཡིན། འདིར་མགོ་ནས་ལྡེབ་མ་གསུམ་དང་། མཇུག་ལྡེབ་སུམ་ཅུ་བའི་ཤོག་སྣེ་ཆད་འདུག གློག་ཀླད་དུ་འཇུག་སྐབས་མ་དཔེར་བརྡ་རྙིང་དང་ཡང་འཇུག འཕྲད་དང་རྣམ་དབྱེ་དབྱངས་དང་མགོ་འདོག་སོགས་དེང་དུས་ཀྱི་བརྡ་དག་དང་མི་མཐུན་པ་མང་དུ་ཡོད་པ་མ་བཅོས་པར་རང་སར་བཞག་ཡོད། འབྲུ་མ་གསལ་བ་དང་། ངོས་འཛིན་ནོར་བ། མཆན་བཙུད་ཉེས་པ། རྟགས་ལ་མཆན་སྦྱོར་རྒྱུ་མ་རྙེད་པ་དང་མཆན་གང་དུ་འཇུག་དགོས་མ་ཤེས་པ་སོགས་ནོར་འཁྲུལ་ཅི་མཆིས་ཡོད་པས་མཁས་དབང་དམ་པ་རྣམས་ཀྱིས་མ་དཔེ་དང་བསྡུར་ནས་ཞུ་དག་ཟབ་ནན་གནང་བར་ཞུ། སྒྲིག་པ་པོས་༢༠༠༤་༡༢་༡༠་ལ། ། ༄༅། །ལ་ཁུ་ཚུར་གྱིས་བརྡེག་༼དང་ཟེར་༽དང་། མིག་རྒྱུའི་ཆུ་ནི་འཐུང་༼པ་དང་ངོམས་པ་མེད་༽དང་མཚུངས་༼ཏེ་དངོས་གྲུབ་མི་ཐོབ་༽། །༼༣་པ་རྒྱུད་ཀྱི་ཆེ་བ་བསྟན་པ་༽རྣལ་འབྱོར་༼འདུས་པ་ལ་སྟགས་པ་ལས་སཾ་བྷ་ར་༽འདི་ནི་༼སཾ་བྷ་རའི་དལ་དུ་འཇུག་པ་དང་དབང་ཐོབ་ན་༽མཆོག་རབ་དང་། །སྦྱོར་བ་ཀུན་གྱི་དམ་པ་ཡིན། །གང་ཞིག་རྟག་ཏུ་༼དེ་ལྟར་༽འདོད་འགྱུར་བ། །དེ་ནི་ལྷ་མི་༼ཐམས་ཅད་༽ཟིལ་༼གྱིས་༽གནོན་༼པར་༽འགྲོ། །དཀྱིལ་འཁོར་འདིར་ནི་དབང་བསྐུར་བ། རྒྱུད་རྣམས་ཀུན་གྱི་བསྒྲུབ་པོར་༼རྒྱུད་ཀྱི་ཆེ་བ་༽གསུངས། ༼ལྷ་དང་སྦྱར་ན་༽ །རྒོད་དང་ལྟ་བ་༼བྱ་བ་སྤྱོད་པ་༽ལག་༼རྣལ་འབྱོར་༽བཅངས་༼མི་དང་ལྷ་མི་མ་སྦྱོར་བ་ཉིད་་་་་༽དང་། །༼བླ་ན་མེད་པ་༽གཉིས་གཉིས་མཁྱུད་པ་ལ་སོགས་བདག །རྒྱུད་རྣམས་༼མ་བླ་ན་མེད་པའི་བར་དུ་༽ཀུན་ཏུ་མ་གསུངས་ཏེ། ༼གང་དུ་མ་གསུང་ན་༽ །དེ་ཉིད་བསྡུས་པ་༼དང་༽འཁོར་སྡོམ་༼རྒྱུད་རྒྱས་པར་མ་གསུང་པའོ་༽འམ། །གསང་པ༼འདུས་པའམ་༽འམ་རྡོ་རྗེ་འཇིགས་བྱེད་ལས། །དཀྱིལ་འཁོར་རྣམས་ཀྱི་མཆོག་འདི་ནི། ༼རྒྱུད་དེ་དག་ཏུ་སྔར་༽ །མ་བྱུང་༼ཕྱིས་༽འབྱུང་བར་མི་འགྱུར་རོ།༼འདིས་དངོས་གྲུབ་༽ །བཤད་དང་མ་བཤད་གང་ཅིའང་རུང་། །དེ་ཀུན་དཔལ་ལྡན་ཁྲག་འཐུང་༼གི་དལ་ལ་བརྟེན་ནས་༽གནས། །དཔལ་ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་ཡོན་དང་བཅས་པའི་དབང་བསྐུར་བའི་ཆོ་གའི་ལེའུ་སྟེ་གསུམ་པའོ། ། ༼དབང་བསྐུར་བ་དང་དེ་ཁོ་ན་འབྲེལ་བས་དབང་གི་རྗེས་ལ་དེ་ཁོ་ན་ཉིད་བསྟན། རིམ་པ་༢་ལ་དལ་དང་ལྷ་དང་སྔགས་དང་ཡེ་ཤེས་ཏེ་དེ་ཁོ་ན་ཉིད་༤་༤་བརྒྱར་བསྟན་ཏེ་མཆོག་དབང་༣་བ་སོང་བ་ ་དབང་བསྐུར་ནས་ནི་དེ་ཉིད་བསྟན་ཅེས་པས་འབྲེལ་རྙོག་ ་ལ་གུ་སཾ་བ་ར་འདིར་གསུངས་པ་འདི་ལ་༽ །དེ་ནས་༼དཀྱིལ་འཁོར་གྱི་དེ་ཁོ་ན་༽རྣལ་འབྱོར་མ་༼དལ་དང་ལྷའི་དེ་ཉིད་སྟན་པའི་ཚིག་གིས་༤་པར་ཡང་བཞེད་ ་རྒྱུད་གཞན་གྱི་སྐྱེད་པ་པས་མཚོན་ནས་རླུང་ནས་གཞལ་ཡས་ཁང་སྐྱེད་པའི་བར་དུ་༽རྣམས་ནི། །༼རྫོགས་པ་ལྟར་རྐང་མཐིལ་རླུང་ལ་སོགས་པ་ལུས་དལ་ལོ་རེ་ལ་རོལ་བ་རྩ་༽ས་ལ་རྣམ་པར་རོལ་པ་སྟེ། །༼ལྷའི་དེ་ཁོ་ན་ཉིད་༽བརྩོན་ཆེན་འཁོར་ལོ་༼མ་ནས་མ་བཀོད་པ་ནི་སློབ་དཔོན་མེད་པར་འཇུག་པ་དགག་པ་༽བསྒྱུར་མ་༼རྩོགས་པ་མཁའ་འགྲོ་མ་རྣམས་རྩའི་གཟུགས་༽དང་། །སྟོབས་ཆེན་མ་དང་རབ་དཔལ་མོ། །འཁོར་ལོའི་གོ་ཆ་༼ཤོན་དེ་ནི་༽ཆང་འཚོང་མ། །ཁཎྜ་རོ་ཧ་འཁོར་ལོའི་ཤུགས༼སྐུའི་བརྒྱད་༽ ། ༼ཁ་ག་ན་ ༽ །བྱ་གདོང་མ་དང་རྟ་རྣ་མ། །ཤིན་ཏུ་བཟང་མོ་ལྗང་ལྷ་མོ། །༼བསྐྱེད་པ་ཙཀྲ་༤་ལས་ ་ལྷ་བཅུ་༢་ཤུགས་ལ་ཤེས་པར་བྱ་༽ཆང་འཐུང་མ་དང་༼མངོན་པར་དགའ་བ་༤འི་རྟོགས་པ་སྐྱེ་བས་༽རླུང་ཤུགས་མ། །དེ་བཞིན་འཇིགས་བྱེད་ཆེན་མོ་དང་། ༼ཨེ་ར་བ་ཏི་༽ །ས་སྲུངས་མ་དང་༼གསུང་གི་བརྒྱད་ ་གསང་བའི་ལུས་རྩ་༽ཤིང་གྲིབ་མ། །ལང་ཀའི་བདག་མོ་མི་ཐུང་མ། །དཔའ་བོའི་བློ་མ་སྣ་ཆེན་མ། །འོད་ལྡན་མ་དང་གཏུམ་མིག་མ། །རབ་གཏུམ་མ་སྟེ་༼ཐུགས་ཀྱི་བརྒྱད་༽སྒྲུབ་བྱེད་ཡིན། །༼རྩ་ཉི་ཤུ་རྩ་༢་ཀྱི་ངོ་བོར་གནས་སོ་༽མཁའ་འགྲོ་མ་ནི་ཉི་ཤུ་བཞི། །སྐུ་གསུང་ཐུགས་ཀྱི་དབུས་སུ་ནི། །ཇི་ལྟར་ཕྱི་རོལ་ནང་དེ་བཞིན། །འདི་དག་སྔོན་ཉིད་༼ཞིང་ནཾ་གྲུབ་པའི་དུས་སུ་མཁའ་འགྲོ་མ་ཡང་གྲུབ་པས་༽གྲུབ་པ་ཡིན།༼རྫོགས་པ་ཙཀྲ་༤་དང་རྩ་༢་ལ་ཨ་ལི་ཀི་ལ་སོགས་པ་དགོད་༽ །རང་མིང་༼སྔགས་ཀྱི་དེ་ཁོ་ན་༽བརྗོད་པའི་སྔགས་ལ་ནི། །མཐར་ནི་ཧཱུྃ་ཧཱུྃ་ཕཊ་དང་སྦྱར། །རྣལ་འབྱོར་མཆོག་ནི་འདི་མཐོང་ན། །མེ་༼དང་འདྲ་༽སྟེ་༼རྒྱུད་སྡེ་༽གཞན་དག་རྩ་དང་མཚུངས། །ཨོྃ་ནི་ཐམས་ཅད་༼ཀྱི་དང་པོ་༽གསལ་བྱེད་སྟེ། །༼ཞི་བ་ལ་སོགས་པའི་ཕྲིན་ལས་དལ་དང་ལྷའི་དེ་ཉིད་སྟན་པའི་ཚིག་གིས་༤་པར་ཡང་བཞེད་བདེ་བ་ཆེན་པོའི་ཡེ་ཤེས་འཕེལ་བ་་་དངོས་༽གྲུབ་༼རྫོགས་པའི་རྩའི་ནང་ན་ཨ་ལི་ཀ་ལིའི་འོག་དང་ཞབས་སུ་ཨོཾ་དང་ཧཱུཾ་ཕཊ་ཡོད་༽སྩོལ་འདོད་༼ཅིང་༽པ་ཐམས་ཅད་༼སྟེར་བར་༽བྱེད། ༼ཡེ་ཤེས་ཀྱི་དེ་ཁོ་ན་༽ །དཔའ་བོ་༼ཡུམ་དང་ཞལ་སྦྱོར་དུ་༽ཉིད་འགྱུར་གྲུབ་པ་ནི། །༼རྩའི་༽ཁྱིམ་དུ་༼པད་མ་༽དཀྱིལ་འཁོར་༼ཐབས་དང་ཤེས་རབ་སྙོམས་འཇུག་བྱས་པ་ལས་བདེ་བ་དེ་ཁོ་ན་ཉིད་༽མཐོང་བ་ཡིན། །༼བདེ་བ་༽དེ་ཤེས་རྟག་ཏུ་བསྒོམ་པ་ནི། །དངོས་གྲུབ་༼ཐོབ་པར་༽དེ་བཞིན་གཤེགས་པས་གསུངས། །ཧེ་རུ་ཀ་མངོན་པར་བརྗོད་པ་ལས་དཔའ་བོ་དང་རྣལ་འབྱོར་མ་གཉིས་སུ་མེད་པར་དགོད་པའི་ཆོ་གའི་ལེའུ་སྟེ་བཞི་པའོ། །༼དེ་ལྟར་དབང་ཐོབ་པས་འབྲས་བུའི་གསང་པ་བསྒྲུབ་པ་ལ་འཇུག་པས་ཐུན་མོང་གི་འབྲས་བུ་བསྒྲུབ་པའི་ཐབས་སྔགས་བཏུ་བ་བསྟན་ཏོ༽ །དེ་ནས་༼ཨ་ལི་དང་ཀ་ལི་༽ཐམས་ཅད་ཆོས་འབྱུང་༼གྲུ་༣་དུ་འབྱུང་པར་༽བར། །སྣ་ཚོགས་༼པད་མའི་༽ལྟེ་བར་མི་ཤིགས་༼ཨ་དགོད་༽དགེ །བྲིས་ནས་༼དེ་ནས་༽ཆོ་ག་བཞིན་དུ་༼ཨ་ལི་ཀ་ལི་བཀོད་ལ་མཆོད་པ་བྱས་ལ་རྟེན་ཆོས་འབྱུང་ལ་བརྟེན་པ་ཨ་ལི་ཀ་ལིའ་༽བསྔགས།༼ལེའུ་ལྔ་བ་འདིས་ལུས་བཏུ།བདུན་པས་ཡན་ལག་བཏུའོ། ནང་བྲི་དེས་འགྲེ་སྡེ་ཚན་གྱི་གྲངས་འདི་རྣམས་ཀའི་སྡེ་ཚན་ནས་བགྲང་པར་ཤེས་པར་བྱའོ༽ །ཆོས་ཀུན་གཅིག་ཏུ་བསྡུས་པ་བྱ། །སྔགས་ཀྱི་ཚིག་ནི་འདི་ཡིན་ཏེ། ༼སྡེ་ཚན་བརྒྱད་ལྷག་ཆད་མེད་པར་༽ །ཨ་ལི་ཀ་ལི་མཉམ་བྱས་ནས། ༼བསྒྱུར་གཞི་ཀ་ལི་བསྒྱུར་བྱེད་ཨ་ལི་༽ །སྡེ་ཚན་༼བརྒྱད་བཀོད་པ་དེ་༽རྣམས་ནི་བསྒྱུར་བར་བྱ།༼ཨ་ལིའི་མཚན་བསྒྱུར་བྱེད་༽ །བཞི་བཞི་རུ་༼སྟེ་བཅུ་དྲུག་བཅད་དེ་པད་མའི་འདབ་མ་༡་ལ་བྲི་༽ནི་ཤེས་བྱས་ལ། །ཐུབ་པ་༼འདི་བསྒྱུར་བའི་སྔགས་ཀྱིས་ཐམས་ཅད་ཐུབ་པས་བསྒྱུར་བྱེད་ཨ་ལི་ཡིས་བསྒྱུར་གཞི་ཀ་ལི་ཚན་༽མཆོག་གིས་བརྒྱན་པར་བྱ། །དེར་གནས་༼ནས་༽དཔའ་བོ་༼སྟེ་ཡབ་ཀྱི་རྩ་སྔགས་༽བཏུ་བར་བྱ་༼རྐང་བ་བརྒྱད་པ་༽། །འདོད་དོན་༼ཕན་ཡོན་དངོས་གྲུབ་༢་༽ཐམས་ཅད་་སྒྲུབ་བྱེད་པ། ༼རྐང་བ་བརྒྱད་པའི་རྐང་པ་དང་པོ་༽ །བཞི་པ་ཡི་ནི་ལྔ་པ་དང་། །ལྔ་པ་ཡི་ཡང་ལྔ་པ་དང་། །ལྔ་པ་ཡི་ནི་བཞི་པ་༼བྷ་༽དང་། །དང་པོའི་གསུམ་པ་༼ག་༽གང་ཡིན་དང་། །དེ་བཞིན་ཉི་ཤུ་རྩ་དགུ་པ༼་ཝ་༽། །བཞི་པའི་དང་པོ་༼ཏ་༽གང་ཡིན་དང་། །མཐར་གནས་པ་ཡི་བཞི་པ་༼ཝ་༽དང་། །དེ་ཉིད་ཀྱི་ནི་གཉིས་པ་༼ར་༽དང་། །སུམ་བཅུ་པ་༼ཤ་ས༽ནི་ཡང་དག་བླང་། །ཉི་ཤུ་དྲུག་པ་༼ཡ་༽ཉིད་དང་ནི། །དེ་བཞིན་བརྒྱ་ཡི་ཕྱེད་ཕྱེད་༼ཉི་ཤུ་རྩ་ལྔ་པ་མ་༽དང་། །དེ་ནས་སུམ་བཅུ་གསུམ་པ་༼ཧ་༽དང་། །དང་པོའི་དང་པོ་༼ཀ་༽ཉིད་དག་དང་།༼ལ་ལ་པ་བཏགས་པ་ལ་ཨ་བཏགས་པ་ཡང་འོང་ཀས༽ །༼བར་འདིར་པ་དང་ཨ་ནི་བཏུ་བ་ལེའུ་བདུན་པ་ལས་འབྱུང་ངོ་༽མཐར་གནས་པ་ཡི་གསུམ་པ་དང་། །དང་པོ་ཡི་ནི་གསུམ་པ་༼ག་༽ཉིད། །སུམ་བཅུ་རྩ་གཉིས་པ་༼ས་༽ཉིད་ནི། །བཞི་པ་ཡི་ནི་ལྔ་པ་༼ན་༽དང་། །ལྔ་པ་ཡི་ནི་བཞི་པ་༼བྷ་༽དང་།༼ ཀ་ནས་བགྲང་བའི་དེས་འོག་ཐམས་ཅད་ལ་ཡང་འགྲེའོ།༽ །མཐར་གནས་པ་ཡི་དང་པོ་༼ཡ་༽ གཉིས་པ་༽དང་། །གཉིས་པ་ཡི་ནི་གསུམ་པ་༼ཛ་༽དང་། །གསུམ་པའི་དང་པོ་༼ཊ་༽གང་ཡིན་དང་། །ལྔ་པ་ཡི་ཡང་པ་ལྔ་པ་༼མ་༽དང་། །དང་པོ་ཡི་ནི་དང་པོ་༼ཀ་༽དང་། །དེ་བཞིན་བཅུ་གཅིག་པ་༼ཊ་༽ཉིད་དང་། །དེ་བཞིན་མཁས་བས་བཅུ་དྲུག་པ་༼ཏ་ལ་འདོགས་པའི༽། །གསུམ་པའི་དང་པོ་༼ཊ་༽གང་ཡིན་དང་། །དེ་བཞིན་ཉི་ཤུ་རྩ་༼གསུམ་པ་༽དྲུག་པ་༼ཡ་༽། །བཞི་བའི་གསུམ་པ་༼ད་༽གང་ཡིན་དང་། །ཨུཥམ་༼ཤ་ཥ་ས་ཧ་༤་སྟེ་ དྲོད་༽ཡི་ནི་གཉིས་པ་༼ཥ་༽དང་། །དང་པོའི་དང་པོ་༼ཀ་༽གང་ཡིན་དང་། །དེ་བཞིན་ཉི་ཤུ་རྩ་བདུན་པ་༼ར་༽། །ཉི་ཤུ་རྩ་བརྒྱད་པ་ལ་ཡང་ངོ། །དང་པོ་ཡི་ནི་གསུམ་པ་༼ག་༽དང་། །ལྔ་པ་ཡི་ཡང་བཞི་པ་༼བྷ་༽དང་། །དེ་བཞིན་སུམ་བཅུ་རྩ་གཅིག་༼ཥ་༽བླང་། །བཅྭ་ལྔ་པ་༼ཎ་༽ནི་ཉིད་དག་དང་། །དེ་བཞིན་ཉི་ཤུ་རྩ་ལྔ་པ་༼མ་༽། །དང་པོའི་གཉིས་པ་༼ཁ་༽གང་ཡིན་དང་། །དེ་བཞིན་ཉི་ཤུ་རྩ་གཅིག་པ་༼པ་༽། །ཨན་ཏསྡྱ་ཡི་གཉིས་པ་༼ ར་༽དང་། །དེ་བཞིན་ཡང་ནི་སུམ་བཅུ་པ༼ཤ་༽། །ལྔ་པ་ཡི་ནི་དང་པོ་༼པ་༽དང་། །ཨུཥ་མ་ཡི་ནི་དང་པོ་༼ཤ་༽དང་། །དེ་བཞིན་ཡི་གེ་དྱ་ཉིད་དང་། །བཞི་པའི་དང་པོ་༼ཏ་༽གང་ཡིན་དང་། །ཨུཥ་མའི་དང་པོ་༼ཤ་༽གང་ཡིན་དང་། །དེ་བཞིན་ཉི་ཤུ་རྩ་བརྒྱད་༼ལ་༽པ། །དང་པོའི་གཉིས་པ་༼ཁ་༽གང་ཡིན་དང་། །གསུམ་པའི་དང་པོ་༼ཊ་༽ཉིད་དག་དང་། །དང་པོའི་གསུམ་པ་༼ག་༽གང་ཡིན་དང་། །བཞི་པའི་བཞི་པ་༼དྷ་༽གང་ཡིན་དང་། །ཨན་ཏསྡྱ་ཡི་གཉིས་པ་༼ ར་༽དང་། །གསུམ་པ་ཡི་ཡང་ལྔ་པ་༼ཎ་༽དྲུག་པ་༽དང་། །ཡི་གེ་བྱ་ནི་དེ་བཞིན་བླང་༼ལས་ཟེར་༽། །དང་པོ་ཡི་ནི་བཞི་པ་༼གྷ་༽དང་། །དེ་ནས་བརྒྱད་པ་༼ཛ་༽ཉིད་དག་དང་། །བཞི་པའི་ལྔ་པ་༼ན་༽གང་ཡིན་དང་། །ལྔ་པ་ཡི་ཡང་ལྔ་པ་༼མ་༽དང་། །དེ་བཞིན་ཉི་ཤུ་རྩ་བདུན་པ་༼ར་༽། །བཞི་པ་ཡི་ནི་བཞི་པ་༼དྷ་༽དང་། །སླར་ཡང་ཉི་ཤུ་རྩ་བདུན་པ་༼ར་༽། །དེ་བཞིན་ཉི་ཤུ་རྩ་དྲུག་པ་༼ཡ་༽བདུན་པ་༽། །ཉི་ཤུ་རྩ་ལྔ་༼མ་༽ཡང་དག་བླང་། །སུམ་བཅུ་རྩ་གསུམ་༼ཧ་༽ཉིད་དག་དང་། །བཞི་པ་ཡི་ནི་བཞི་པ་༼དྷ་༽དང་། །ལྔ་པ་ཡི་ནི་ལྔ་པ་༼མ་༽དང་། །བཞི་པ་ཡི་ཡང་ན་ལྔ་པ་༼ན་༽དང་། །དང་པོའི་དང་པོ་༼ཀ་༽ཉིད་དག་དང་། །དེ་བཞིན་ཉི་ཤུ་རྩ་བདུན་པ་༼ར་༽། །ཨན་ཏསྡྱ་ཡི་བཞི་པ་༼ཝ་༽དང་། །དེ་བཞིན་ཉི་ཤུ་རྩ་གཅིག་པ་༼པ་༽། །ཨུཥ་མ་ཡི་ནི་གཉིས་པ་༼ཥ་༽ཉིད། །དེ་བཞིན་རྩ་ཉི་ཤུ་དྲུག་པ་༼ཡ་རྐང་པ་བརྒྱད་དོ་༽འོ། ཀ་ར་ཀ་ར། ཀུ་རུ་ཀུ་རུ། བྷན་དྷ་བྷན་དྷ་། ཏྲ་ས་ཡ་ཏྲ་ས་ཡ། ཀོཥ་བྷ་ཡ་ཀོཥ་བྷ་ཡ། ཧྲོཾ་ཧྲོཾ་། ཧྲ་ཧྲ་། ཕེཾ་ཕེཾ་། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷཀཥ་བྷཀཥ། བ་ས་རུ་དྷི་རཱ་ནྟྲ་མཱ་ལཱ་བ་ལཾ་བཱི་ནེ། གྷྲིཧྣ་གྷྲིཧྣ་ས་པྟ་པཱ་ཏ་ལ་ག་ཏཱ་བྷུ་ཛཾ་ག་སརྦཾ་བཱ་ཏརྫ་ཡ་ཏརྫ་ཡ། །ཨཱ་ཀ་ཊ་ཧ། །ཨཱ་ཀ་ཊ་ཧ། །ཧྲཱིཾ་ཧྲཱིཾ། ཛྣོཾཛྣོཾ་། ༼ཀཾ་ཥ་ན་མཱ་ཀཾ་ཥ་ན་མཱ། །ཧཱུཾ་ཧཱུཾ། ཧཱི་ཧཱི།ཀི་ལི་ཀི་ལི། །སི་ལི་སི་ལི། །ཧི་ལི་ཧི་ལི།དྷི་ལི་དྷི་ལི། །ཧཱུཾ་ཧཱུཾ་ཕཊ།མཆོད་པའི་དུས་སུ་༼དཔའ་བོ་ཉི་ཤུ་རྩ་བཞི་༽ །རིག་པའི་རྒྱལ་པོ་གསང་སྔགས་༼ཏེ་ཟེར་༽ཏེ། །བསྒྲུབ་པ་༼ལ་མི་ལྟོས་ཏེ་ཀླགས་པ་ཙམ་གྱིས་འགྲུབ་པའོ་༽ཐམས་ཅད་རྣམ་སྤངས་པའོ། །འདི་ལས་ཤིན་ཏུ་མཆོག་གྱུར་པ། །འཇིག་རྟེན་གསུམ་ན་ཡང་མེད་དེ་ ༼ཡོད་མིན་ཟེར་༽། །དཔལ་ལྡན་ཁྲག་འཐུང་༼གི་རྩ་སྔགས་༽སྔགས་ཤེས་ན། །༼སྔགས་༽གཞན་དག་སྙིང་པོ་མེད་རྩར་མཚུངས། དཔལ་ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་རྩ་བའི་སྔགས་ཀྱི་ཡི་གེ་བཏུ་བ་ཞེས་པའི་ཆོ་གའི་ལེའུ་སྟེ་ལྔ་པའོ། ། ༼སྙིང་པོའི་སྔགས་དང་ཉེ་སྙིང་གི་སྔགས་རང་འོག་ནས་འབྱུང་ཡང་འདིར་རྩ་བའི་སྔགས་དང་ཕྱོགས་༡་ཏུ་བསྟན་པའི་ཕྱིར་འདིར་ཡང་ཟུར་ཙམ་བསྟན་༽ །གཞན་ཡང་ཡི་གེ་ཉི་ཤུ་གཉིས་༼པ༽། །སྙིང་པོ༼འི༽་ཡིག་༼གེ་༽བདུན་ཉེ་སྙིང་པོ༼འོ༽། །ཡ་ཚོགས་༼ཡ་ནས་བགྲངས་པའི་༽བརྒྱད་པའི་ས་བོན་དང་། །དེ་བཞིན་༼བཅུ་༢་བྲིས་ལ་ཨ་ལི་ལ་བྱ་༽གུག་བསྒྱེད་༼རི་རཱི་ལི་ལཱི་༤་བོར་བ་༽བཅུ་གཉིས་ཀྱིས། །ཡི་གེ་བར་མ་༼རིང་པོ་དྲུག་༽དོར་བྱས་ལ་༼རིང་པ་དྲུག་བོར་བས་ཐུང་པ་དྲུག་གོ་༽། །༼ཧ་དྲུག་པོའི་ཡན་ལག་ཏུ་སྦྱར་བའོ་༽ཡན་ལག་དྲུག་༼ལ་དགོད་པ་༽ནི་ཧེ་རུ་ཀ །༼ཡི་གེ་དྲུག་པོ་༽དཔའ་བོ་དྲུག་དང་མཉམ་སྦྱོར་བ་༼ཧ་དྲུག་བཀོད་པ་དེ་ཉིད་ལ་ཨ་ལི་ཐུང་པ་དྲུག་་་་བས་ཧི་ཧེ་་་་༽། །ཡི་གེ་རེ་རེ་ཡང་དག་སྦྱར། ༼དེ་རྣམས་ཀྱི་གོང་དུ་ཨོཾ་སོགས་རེ་རེ་སྦྱོར། ཧའི་མགོ་ སྦྱར་བས་ཨོཾ་ཧ་རུ་འགྲོ་དེས་འགྲེ་༽ །ཨོཾ་ན་མ་སྭཱ་ཧཱ་པོ་ཥཊ༽ །ཧཱུཾ་ཧཱུཾ་ཕཊ་དང་ཡང་དག་ལྡན། །བསྒྲུབ་བོས་༼དཔའ་བོ་དྲུག་གི་༽སྙིང་པོར་ཤེས་པར་བྱ། ༼ ལེའུ་ལྔ་པ་རུ་ལུས་ཐུ་བའི་ཡི་གེ་འདྲི་ཙ་ན། ན་མ་བྱ་བའི་གོང་དུ་ཨོཾ་བྲི་བའི་གོག་པ་གཅིག་བཞག་ནས་ཡོད་པ་དེར་ལྔ་བའི་ཡན་ལག་ཐུ་ཙ་ན་དབྱངས་ཡིག་བཅུ་༣་ཉིད་ཟེརཅི་ན་དེར་ཨོཾ་བྲིའོ༽ །དང་པོ་སྙིང་ཁ་ཉིད་དུ་སྟེ། །གཉིས་པ་སྦྱི་བོར་ཤེས་པར་བྱ། །གསུམ་པ་སྤྱི་གཙུག་དག་ཏུ་སྦྱར། །བཞི་པ་གོ་ཆར་གྱུར་པ་༼སྦྲགས་པ་༽ཡིན། །ལྔ་པ་མིག་ཏུ་གྱུར་པ་སྟེ། །དྲུག་པ་མཚོན་བྱ་ཞེས་བྱར་འདོད། །ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་དཔའ་བོ་དྲུག་གི་གོ་ཆ་བཏུ་བའི་ཆོ་གའི་ལེའུ་སྟེ་དྲུག་པའོ། ། དེ་ནས་༼ཨོ་༽དབྱངས་ཡིག་བཅུ་གསུམ་པ། ༼ཡི་གེ་གཉིས་པ་ཅེས་པ་ལ་སོགས་པའི་གྲངས་རྣམས་སྔར་ཀ་ལི་ལས་ལུས་བཏུས་པའི་ཡི་གེ་བཀོད་པ་རྣམས་ཀྱི་གྲངས་སུ་ཤེས་པར་བྱའོ༽ །ཡི་གེ་གཉིས་བ་དག་དང་སྦྱར༼མ་ལས་ཨོ་སྦྱར་བས་མོ་རུ་འགྲོ་དེས་འགྲེ༽། །དབྱངས་ཡིག་བཅུ་གཅིག་༼ཨེ་༽ཡང་དག་ལྡན། །ཡི་གེ་དྲུག་པ་༼ཏེའུ་སོང་༽ཡང་དག་བརྒྱན། །དབྱངས་ཀྱི་བཞི་པ་༼ཨཱི་༽ཉིད་དང་ནི། །ཡི་གེ་བདུན་པ་༼ཝ་༽ཉིད་དང་སྦྱར། །དབྱངས་ཡིག་བཅུ་གཅིག་པ་༼ཨེ་༽ཉིད་ནི། །མཁས་པས་ཡི་གེ་བརྒྱད་པ་༼ར་༽སྦྱར། །དབྱངས་ཡིག་གཉིས་པ་༼ཨཱ་༽དང་ལྡན་པ། །ཡི་གེ་དགུ་པ་༼ཤ་༽བརྒྱན་པར་བྱ། །༼རྐང་པ་དང་པོ་༽དབྱངས་ཀྱི་ཡི་གེ་གཉིས་པ་༼ཨཱ་༽ཉིད། །ཡི་གེ་བཅུ་གཉིས་པ་༼ཧ་༽དང་སྦྱར། །༼འོག་མ་འདིས་པ་རིང་པོར་སོང་སྟེ་ཨར་རླག་འགྲོ་༽དབྱངས་ཡིག་གཉིས་པར་༼ཨཱ་༽ལྡན་པ་ནི། ༼ཀ་ལི་རང་གི་ཀ་ནས་བགྲངས་པའི་༽ །ཡི་གེ་ཉི་ཤུ་གཅིག་པ༼འོ་པ༽་གཟུང་། ༼མཁས་པས་༽ །ཡི་གེ་བཅུ་བཞི་པ་༼ལ་༽དང་༼ བས་ལ་ལས་པ་རིང་པོར་ལཱ་བཏགས་པ་༡་ཏུ་འགྱུར་རོ། ལས་འོག་ཏུ་སྦྱར་བའོ་༽སྦྱར། །ཡི་གེ་ཉི་ཤུ་པ་༼ན་༽དང་ནི། ༼ག་དང་ན་ཉ་ཀ་ལ་༽ །དབྱངས་ཀྱི་༼ཨི་གུ་གུར་སྦྱིན་༽གསུམ་པ་༼ཨི་༽ཉིད་དག་དང་། །ཡི་གེ་༼པ་ཨ་ལུས་ན་མེད་པས་བོར་བས་༽བཅྭ་ལྔ་པ་༼དེ་༢་ཀ་༽དང་སྦྱར། །དབྱངས་ཡིག་བཅྭ་ལྔ་༼ཨཾ་༽ཡང་དག་༼སྟེང་དུ་༽ལྡན་༼པའི༽། །ཡི་གེ་བཅུ་དྲུག་བས་༼ས་༽མཛེས་བྱ་༼སཾ་དུ་སོང་༽། །དབྱངས་ཡིག་གསུམ་པ་༼ཨི་༽དང་ལྡན་པའི། །ཡི་གེ་བཅུ་བདུན་པ་༼ན་༽རུ་འདོད། །དབྱངས་ཀྱི་གཉིས་པ་༼ཨཱ་༽ཉིད་དང་ནི། །ཡི་གེ་བཅྭ་བརྒྱད་པ་༼བྷ་༽རུ་སྦྱར་༼༢་པ་༽། །དབྱངས་ཡིག་གི་ནི་གཉིས་པ་༼ཨཱ་༽ཉིད། །ཡི་གེ་ཉི་ཤུ་གཅིག་པར་༼ཊ་༽སྦྱར། །མ་མོའི་ལྔ་པ་༼ཨུ་༽ཉིད་དང་ནི། །ཡི་གེ་ཉི་ཤུ་གསུམ་པར་༼ཀ་༽སྦྱར་༼ཀུ་རུ་འགྲོ༽། །དབྱངས་ཡིག་བཅུ་གསུམ་པ་ཨོ་༽ཉིད་ནི། །ཡི་གེ་ཉི་ཤུ་བཞི་པར་༼ཊ༽་སྦྱར། །དང་པོའི་དང་པོ་༼ཀ་༽བླངས་ནས་ནི། །ཡི་གེ་ཉི་ཤུ་ལྔ་པར་༼ཏ་༽སྦྱར་༼ཀཾ༽། །དབྱངས་ཡིག་གཉིས་པ་༼ཨཱ་༽དང་ལྡན་པར། །ཡི་གེ་ཉི་ཤུ་དྲུག་པར་༼ཊ་༽འགྱུར་༼༣་པ༽། །ཉི་ཤུ་བརྒྱད་པ་༼ཌ་༽ཉིད་དག་ནི། །༼ཨ་ལི་༽དབྱངས་ཡིག་བཅྭ་ལྔ་པ་༼ཨཾ་༽དང་སྦྱར། །ཡི་གེ་ཉི་ཤུ་རྩ་དགུ་པ་༼ཥ་ལ༽། །གསུམ་པའི་དང་པོ་༼ཊ་༽ཡང་དག་ལྡན་༼དེ་ལ་ཡང་༽ ། ༼འོག་ཏུ་བཏགས་པས་ཥཊ་༽ །འོག་གི་ཆ་༼ར་༽ནི་མེ་དང་བཅས། ༼དེ་ལ་༽ །དེ་བཞིན་དབྱངས་ཡིག་གཉིས་པར་༼ཨཱ་༽སྦྱར་༼ཥཊ་༽། །ཡི་གེ་སུམ་བཅུ་རྩ་གཅིག་པ་༼ར་༽། །དབྱངས་ཡིག་གཉིས་པར་༼ཨཱ་༽ཡང་དག་སྦྱར། །ཡི་གེ་སུམ་བཅུ་རྩ་གཉིས་པ་༼ལ་༽། །དབྱངས་ཡིག་བཅུ་གསུམ་བར་༼ཨོ་༽ལྡན་བྱ། །ཡི་གེ་སུམ་བཅུ་རྩ་གསུམ་པ་༼ག་༽། །ཉི་མར་༼ར་༽ཡང་དག་ལྡན་པར་བྱ། །ཕྱི་མོའི་བཞི་བ་༼ཨཱི་༽ཉིད་དག་དང་། །ཡི་གེ་སུམ་བཅུ་བཞི་༼བྷ་༽ལྡན་པ། ༼སྔགས་ཀྱི་ཆེ་བ་བསྟན། དེས་ཐམས་ཅད་ལ་འགྲེའོ་༽ །འདོད་པའི་དོན་ཀུན་སྒྲུབ་བྱེད་ཡིན། །ཕྱི་མོའི་ལྔ་པ་༼ཨུ་༽ཉིད་དང་ནི། །སུམ་བཅུ་བདུན་པར་༼མ་༽ཡང་དག་ལྡན། །མཁའ་འགྲོ་མ་རྣམས་སྒྲུབ་བྱེད་ཡིན། །སུམ་བཅུ་བརྒྱད་པ་༼ཁ་༽ཉིད་དག་ནི། །དབྱངས་ཡིག་གཉིས་པ་༼ཨཱ་༽དང་སྦྱར་བ་༼བཞི་བ་༽། །ལྷ་རྣམས་ཐམས་ཅད་བསྒྲུབ་པ་ནི། །འདི་ཉིད་ཡིན་པར་ཐེ་ཚོམ་མེད། །བཞི་བཅུ་རྩ་གཉིས་པ་༼ས་ ༽ཉིད་ནི། །མེ་༼ར་༽་དང་འོག་ཏུ་བསྒྲུབ་པོས་སྦྱར། །བཞི་བཅུ་གསུམ་པ་༼བྷ་༽ཉིད་དང་ནི། །དབྱངས་ཡིག་ལྔ་པ་༼ཨུ་༽ཉིད་དང་སྦྱར། །ཡི་གེ་བཞི་བཅུ་ལྔ་པ་༼བྷ་༽ནི། །དབྱངས་ཀྱི་ཡི་གེ་གཉིས་པར་༼ཨཱ་༽སྦྱར། །དབྱངས་ཀྱི་ལྔ་པ་༼ཨུ་༽ཉིད་དག་དང་། །བཞི་བཅུ་རྩ་དྲུག་པར་༼ས་༽ལྡན་པ། །༼འདིས་༽དཔའ་བོ་ཐམས་ཅད་རབ་མཆོད་ཡིན། །བཞི་བཅུ་རྩ་བདུན་པ་༼ར་༽ཉིད་ནི། །དབྱངས་ཡིག་གཉིས་པ་༼ཨཱ་༽དང་སྦྱར་བ། །རྡོ་རྗེ་སེམས་དཔའ་མཆོག་ཏུ་འདོད། །དེ་བཞིན་ལྔ་བཅུ་རྩ་གཅིག་པ་༼ཤ་༽། །དབྱངས་ཡིག་ལྔ་པ་༼ཨུ་༽ཉིད་དག་གིས། །མཛེས་པ་མཆོག་ནི་ཡིན་པར་འདོད། །ལྔ་བཅུ་རྩ་གཉིས་པ་༼པ་༽ཉིད་ནི། །དབྱངས་ཡིག་གཉིས་པ་༼ཨཱ་༽དང་སྦྱར་བ། །ལྷ་རྣམས་ཐམས་ཅད་སྒྲུབ་བྱེད་པ། །འདི་ཉིད་ཡིན་པར་ཐེ་ཚོམ་མེད། །དེ་བཞིན་ལྔ་བཅུ་རྩ་གསུམ་པ་༼ཤ་༽། །དབྱངས་ཡིག་བཅུ་གསུམ་པ་༼ཨོ་༽དང་སྦྱར། །ཡི་གེ་རྣམས་ལས་འདི་མཆོག་སྟེ། །དགྲ་རྣམས་ངེས་པར་གསོད་བྱེད་ཡིན། །ཡི་གེ་ལྔ་བཅུ་རྩ་དྲུག་པ་༼ཤ་༽། །དབྱངས་ཡིག་དྲུག་པ་༼ཨཱུ་༽དག་དང་ལྡན། །ཡི་གེ་ལྔ་བཅུ་རྩ་དགུ་པ་༼ཊ་༽། །ཨན་ཏསྡྱ་ཡི་༼ཝ ༽བཞི་པ་༼ཊ་ ཝ་༽དང་། །༼དེ་ལ་༽དབྱངས་ཡིག་གཉིས་པར་༼ཨཱ་༽ལྡན་པར་བྱ། ༼དེ་ལ་༽ །དེ་བཞིན་༼ ཨོཾ་༽བཅྭ་ལྔ་པ་༼ཊཾ་༽དང་༼སྟེང་དུ་༽སྦྱར། །དངོས་གྲུབ་ཐམས་ཅད་བསྒྲུབ་པ་ཡིན། །ཡི་གེ་དྲུག་བཅུ་རྩ་གཅིག་༼དྷ་༽ཉིད། །དབྱངས་ཡིག་གཉིས་པ་༼ཨཱ་༽དག་དང་སྦྱར། །འདི་ཉིད་མཆོག་ནི་ཡིན་པར་བཤད། །དེ་བཞིན་དྲུག་བཅུ་རྩ་གཉིས་པ་༼ར་༽། །དབྱངས་ཡིག་གསུམ་པར་༼ཨི་༽སྦྱར་བ་ནི། །མཁའ་འགྲོ་མ་ཡི་མཆོག་ཏུ་འདོད། །ཡི་གེ་དྲུག་བཅུ་རྩ་གསུམ་༼ཎ་༽ཉིད། །དབྱངས་ཡིག་བཅུ་གཅིག་༼ཨེ་༽དག་དང་ལྡན། །མཛེས་པའི་ཡི་གེ་ཀུན་མཆོག་༼དྲུག་པ་༽ཡིན། །དྲུག་བཅུ་རྩ་བཞི་པ་༼བྱ་༽ཉིད་ནི། །དབྱངས་ཡིག་གཉིས་པར་༼ཨཱ་༽ཡང་དག་ལྡན། །གྲུབ་སྦྱིན་ཐར་པའི་སྦྱན་ཆེན་པོ། །ཡི་གེ་དྲུག་བཅུ་རྩ་ལྔ་པ་༼གྷ་༽། །རྡོ་རྗེ་སེམས་དཔས་༼ར་༽ཕྱེ་བ་དག །ཡི་གེ་དྲུག་བཅུ་རྩ་དྲུག་པ་༼ཛ་༽། །དབྱངས་ཡིག་གསུམ་པར་༼ཨི་༽ཡང་དག་སྦྱར། །དངོས་གྲུབ་ཀུན་སྦྱིན་བདེ་གཤེགས་གསུངས། །ཡི་གེ་དྲུག་བཅུ་རྩ་བདུན་པ་༼ན་༽། །ཡི་གེ་གཉིས་པར་༼ཨཱ་༽ཡང་དག་ལྡན། །རྣལ་འབྱོར་མ་ཡི་དགོས་པ་ཀུན། །འདི་ཉིད་བྱེད་པར་ཐེ་ཚོམ་མེད། །དྲུག་བཅུ་བརྒྱད་པ་༼མ་༽ཉིད་དག་ལ། །འདི་ནི་ཡི་གེ་བ་སྦྱར་བ། །འོག་གི་ཆར་ནི་བརྟག་པར་༼མ༠༽བྱ། ༼མ་ལ་ནི་བཏགས་པས་༽ །ཡི་གེ་བདུན་བཅུ་རྩ་གཅིག་པ་༼ར་༽། །༼དབྱངས་ཀྱི་༽ཡི་གེ་གཉིས་པར་༼ཨཱ་༽ཡང་དག་སྦྱར། །ཡི་གེ་ཀུན་ལ་མཛེས་པ་ནི། །འདི་ཉིད་ཡིན་པར་ཐེ་ཚོམ་མེད་༼བདུན་པ་༽། །བདུན་བཅུ་རྩ་བཞི་པ་༼ཏ་༽ཉིད་ནི། །དབྱངས་ཡིག་གཉིས་པར་༼ཨཱ་༽སྦྱར་བ་དག །གདོད་ནས་གྲུབ་པ་ཡིན་པར་ནི། །དེ་བཞིན་གཤེགས་པའི་ཞལ་ནས་གསུངས། །ཡི་གེ་བདུན་བཅུ་ལྔ་པ་༼དྷ་༽ཉིད། །མ་མོའི་དྲུག་པ་༼ཨཱུ་༽དང་ལྡན་པ། །འདི་ནི་རྣལ་འབྱོར་མཆོག་ཡིན་ཏེ། །དགེ་བ་ཀུན་ལ་དམ་པ་ཡིན། །བདུན་བཅུ་རྩ་དྲུག་པ་༼མ་༽ཉིད་ནི། །དབྱངས་ཡིག་གཉིས་པ་༼ཨཱ་༽དང་ལྡན་ཞིང་། །འཏག་ཏུ་མེ་དང་ལྡན་པ་ལས། །ཡི་གེ་པ་དང་སྦྱར་བར་བྱ་༼རའི་འོག་ཏུ་ཡང་་ལག་ལེན་ཡིན་ནོ་༽མ༠། །གཞན་དག་མཛེས་པ་ཡོད་མ་ཡིན། །ཡི་གེ་བདུན་བཅུ་རྩ་བདུན་པ་༼ན་༽། །དེར་ནི་དྷ་དང་སྦྱར་བར་བྱ། །༼ན་ལ་ཧ་བཏགས་པས་གྷ་༽མཁའ་འགྲོ་མ་ཡི་མཛེས་པར་འདོད། །བདུན་བཅུ་རྩ་བརྒྱད་པ་༼ཀ་༽ཉིད་ནི། །དབྱངས་ཡིག་གཉིས་པ་༼ཨཱ་༽དག་དང་སྦྱར། །རྒྱུ་ཡི་མཆོག་ནི་ཡིན་པར་འདོད། །ཡི་གེ་བརྒྱད་བཅུ་རྩ་གཅིག་པ་༼པ་༽། །༼ཨའི་༤་བའི་མཐར་ཨུ་༽བཞི་པའི་མཐའ་ཡིས་ཁྱད་པར་༼པ་ལ་ ་ས་ལ་ ཨུ་བཏགས་པས་པུའོ་ ་༽དབྱེ། །གདོད་ནས་གྲུབ་བྱེད་༼དངོས་གྲུབ་༽འདི་ཡིན་ཏེ། །༼འབྲས་བུའི་༽དངོས་གྲུབ་ཀུན་ལ་འཇུག་བྱེད་པའོ། །ཡི་གེ་བརྒྱད་བཅུ་རྩ་གཉིས་པ་༼ཥ་༽། །དེ་བཞིན་དབྱངས་ཡིག་གཉིས་པར་༼ཨཱ་༽སྦྱར།༼ བརྒྱད་དོ་༽ །འདི་ནི་རྩ་བའི་གསང་སྔགས་སུ། །མཁས་པ་རྣམས་ཀྱིས་ཤེས་པར་བྱ། །དངོས་གྲུབ་ཀུན་གྱི་གནས་ཡིན་ཞིང་། །མཁའ་འགྲོའི་སྙིང་ནི་འཇོམས་པ་༼འགུགས་པ་༽ཡིན། །དཔལ་ལྡན་ཁྲག་འཐུང་ལྟ༼འི་༽རིག་༼སྔགས་༽རྒྱལ་༼པོ༽། །ཀླགས་པས་འགྲུབ་པ་དོན་ཡོད་པ། །ཨོཾ་ནི་དང་པོར་སྦྱར་བར་བྱ། །ཧཱུཾ་༼ཧཱུ་༽དང་ཕཊ་ནི་༼ཀུན་གྱི་༽མཐའ་མར་སྦྱར། ༼རྐང་བ་རེ་རེའི་བར་དུ་ཧཱུཾ་ཕཊ་སྦྱར་བ་འོག་ནས་ཀྱང་འབྱུང་ངོ་༽ །འདི་ནི་རྩ་བའི་གསང་སྔགས་ཏེ། །བསྒྲུབ་པ་ཐམས་ཅད་༼དངོས་གྲུབ་༽འགྲུབ་བྱེད་ཡིན། །ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་སྔགས་བཏུ་བའི་ཆོ་གའི་ལེའུ་སྟེ་བདུན་པའོ། །དེ་ནས་༼དངོས་གྲུབ་༽ཐམས་ཅད་བདག་ཉིད་ཀྱིས། །དཔའ་བོ་ཐམས་ཅད་༼དང་༽མཉམ་སྦྱོར་བ།༼ཡབ་ཡུམ་ཞལ་སྦྱོར་མི་བྱེད་པར་བཞུགས་པའོ་གསུང་༽ །མཁའ་འགྲོ་མ་ཡི་༼ཚོགས་པའམ་༽དྲ་བ༼འི༽་སྡོམ་༼པ༽། །༼གཙོ་བོའི་མཚན་༽འཁོར་ལོ་བདེ་མཆོག་ཡིན་པར་འདོད། །ཧཱ་སྭཱ་ར་བྷ་སཾ་ལཱ་ཛྭ་ནཱི་ཀཱི་ཌཱ་ཊཕ་ཧཱུཾ་ཧཱུཾ་ཀཾ་རུ་རུ་ཧེ་ཧེ་ཛྲབ་ཤྲི་ཨོཾ།༼ཡི་གེ་འགོད་པ་དང་ཀློག་པ་ནི་ཨོཾ་ནས་རིམ་པས་བྱའོ་༽ །རིག་པའི་རྒྱལ་པོའི་སྙིང་པོ་ནི། །མ་བྱུང་འབྱུང་བར་མི་འགྱུར་རོ། །ཕཊ་ཧཱུཾ་ཧྲཱིཾ་ཧྲཱིཾ་ཧིཾ་ཨོཾ་། ༼གོང་མ་རྣམས་ཨོཾ་ནས་རིམ་པས་འགོད་པ་ལ་འདི་དག་རིམ་པས་སྦྱར་ཏེ་འགོད་དོ་༽ །ཡི་གེ་༼ཨོཾ་ལས་རིམ་པས་སྦྱར་༽བཾ་༼ཧཾ་ལ་༽དང་ཡོཾ་དང་ནི། །ཡི་གེ་མོཾ་དང་ཧྲཱིཾ་༼ཧྲཱིཾ་ལ་༽ཉིད་དང་། །ཧཱུཾ་༼ཧཱུཾ་ལ་༽དང་ཕཊ་༼ཕཊ་ལ་སྦྱར་༽ཅེས་བཤད་པ་ནི། །རྣལ་འབྱོར་མ་ནི་དྲུག་ཏུ་གྲགས། །ཨོཾ་བཛྲ་བཱཻ་རོ་ཙ་ནི་ཡེ་ཧཱུཾ་ཧཱུཾ་ཕཊ་སྭཱ་ཧཱ། །མཁའ་འགྲོ་མ་ཡི་རིག་པ་ཆེ། །མ་བྱུང་འབྱུང་བར་མི་འགྱུར་རོ། ༼གསང་སྔགས་༢། སྙིང་པོ་༢༡་་་་ཆ། ཉེ་སྙིང་༡་ཏེ་བཞི་༽ །ས་སྟེངས་ན་ནི་རིན་ཆེན་བཞི། ༼དེ་དག་༽ །ཕྲེང་བའི་སྔགས་ནི་དམ་པ་ཡིན། །མཁའ་འགྲོ་མ་ཡི་རིག་པ་ཆེ། །རིག་པའི་རྒྱལ་པོ་ཧེ་རུ་ཀ །ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་གོ་བཟློག་པའི་སྙིང་པོ་དང་རྣལ་འབྱོར་མ་དྲུག་གི་སྔགས་བཏུ་བའི་ཆོ་གའི་ལེའུ་སྟེ་བརྒྱད་པའོ། །༼དེ་ལྟར་ཡི་གེ་བཏུ་བས་འབྲས་བུའི་གསང་པ་ལ་འཇུག་པའི་ཡན་ལག་བསྟན་ནས་འཇུག་པ་དངོས་སྟོན་ཏེ་༽དེ་ནས་༼ལེའུ་དང་པོར་འདོད་པའི་དོན་ཀུན་སྒྲུབ་བྱེད་པ་ལ་སོགས་པས་བསྟན་པའི་འབྲས་བུའི་གསང་པ་འདིར་རྒྱས་པར་བཤད་དེ། དེ་ལས་ཀྱང་མཆོག་བསྒྲུབ་པ་ལ་བསྟན་ཏེ་༽རྩ་བའི་སྔགས་ཀྱི་ནི། །ལས་མཆོག་༼དུ་མ་འགྲུབ་པར་བྱེད་པའི་༽གོ་རིམས་ཇི་བཞིན་དུ། །དེ་ནི་རྣམ་པར་བཤད་བྱ་སྟེ་། ༼སྤྱི་དོན་གཉིས་ལས་དང་པོ་ལོ་ཀ་བ་མནན་པའི་ལས་༽ །འཇིག་རྟེན་གསུམ་ན་གང་ཡོད་རྣམས། །༼རབ་ཀྱིས་༽ཐམས་ཅད་༼དུས་མྱུར་པར་༽སྐད་གཅིག་གིས་༼རྩ་བའི་སྔགས་ཀྱིས་༽འགྲུབ་པར། །ལས་རྣམས་ཐམས་ཅད་བྱེད་པའོ། ༼དེ་གང་ཞེ་ན་དབང་པོ་རབ་ལྷའམ་རྩ་བའི་སྔགས་དྲན་པ་ཙམ་གྱིས་འགྲུབ་པ་སྟེ་འོང་། རབ་ཀྱིའོ༽ །ལྷ་ཐམས་ཅད་ཀྱི་སྐྱེ་གནས་༼ནས་བསྐྱོད་པར་བྱེད་ཀླུ་ལ་སོགས་པ་སྐྲོད་པར་བྱེད་༽དང་༼ཏེ་རིགས་དྲུག་གི་མ་ལ་ཡང་འཇིགས་པར་བྱེད་པ༽། །ལྷ་ཐམས་ཅད་ཀྱི་གནས་དང་། །ཀླུ་ཐམས་ཅད་དང་། །གནོད་སྦྱིན་ཐམས་ཅད་དང་། །དྲི་ཟ་ཐམས་ཅད་༼ལྷའམ་རྩ་བའི་སྔགས་ཡིད་ལ་༽དྲན་པ་ཙམ་གྱིས་གསོད་པར་བྱེད་དོ༼དབང་པོ་རབ་ཀྱིས་འདི་ལྟར་འབྲིང་བསམ་གཏན་དང་སྔགས་༢་ཀྱིས། ཐ་མས་འཁྲུལ་འཁོར་དང་༣། དེ་བས་ཀྱང་ཐ་ཤལ་གྱིས་སྦྱིན་སྲེག་དང་བཅས་པས་འགྲུབ་གསུང་༽ ༼ཐ་མ་འང་༢་ཀྱིས་སོ་༽ །སྤྲིན་རྣམས་འཐོར་བར་བྱེད་པ་དང་། ༼ རྡོ་རྗེ་མཁའ་འགྲོ་མ་ལ་བརྟེན་ ༼༢་པ་ཙཀྲ་ལ་བརྟེན་པ་པད་མ་བརྟེན་པའི་ལས་དུ་མ་བསྟན་པའོ། རས་རིས་ལ་བརྟེན་པ་དང་འཁྲུལ་འཁོར་ལ་བརྟེན་པ་༢་ཀྱིས་སོ༽ །ཆར་འབེབས་པར་བྱེད་དོ།༼རས་རིས་ཡིན་ན་སྤེལ་ཚིག་སྤོས་པས་ཆོག འཁྲུལ་འཁོར་ཡིན་ན་འོ་མས་བཀྲུ་བ་དང་སྤེལ་ཚིག་སྤོ་བའོ་༽ །༼ཆར་ཆེས་ཆེ་བ་༽བཟློག་པར་བྱེད་དོ། །༼འཁོར་ལོ་དེ་གྱོ་མོ་ལ་བྲིས་ལ་རབ་གནས་ལ་སོགས་པ་ཐམས་ཅད་བྱས་ཏེ། དེ་ནས་བཅག་ཏེ་རྒྱ་མཚོར་དོར་ན་༽རྒྱ་མཚོ་སྐེམས་པར་བྱེད་དོ། །ཆུ་བོ་རྒྱུན་ཕྱོགས་ལས་༼གྱེན་ལ་༽བཟློག་སྟེ་འབབ་པར་སྟོན་སྟོ། ༼འཁོར་ལོ་སྔ་མ་ཉིད་བྲིས་ཏེ་རབ་གནས་བྱས་ཏེ་ལུས་ལ་བཏགས་པའམ་ཙཀྲ་དེ་ལག་པ་གཡོན་པ་ལ་བྲིས་ཏེ་སྔགས་སྤེལ་ཚིག་དང་བཅས་པ་བཟླས་ན་༽ །དབང་པོ་༼ཐོག་༽བཟློག་པར་བྱེད་དོ། །གསང་སྔགས་འདི་བཟླས་བརྗོད་འབུམ་བྱས་ན། ༼ལག་པ་གཡོན་པ་ལ་སྤེལ་ཚིག་དང་བཅས་འཁོར་ལོ་བྲིས་ཏེ་སྤེལ་ཚིག་ངངར་བཅས་པ་བཟླས་ཏེ་ས་ལ་བརྟབས་ན་༽ །ས་གཡོ་བར་བྱེད་དོ། ༼བ་རུ་རའི་ཤིང་ལ་ལྷམ་ལྟ་བུར་བྱས་ཏེ་དེའི་ཞབས་སུ་ཙཀྲ་བཅུག་ནས་༽ །ཤིང་ལ་འཛེགས་ཏེ་གང་དུ་འདོད་པ༼འི་ཡུལ་དུ་༽དེར་༼ནམ་མཁའ་ལ་༽འགྲོ་བར་བྱེད་དོ། ༼འཁོར་ལོ་དེ་ཉིད་སྤེལ་ཚིག་དང་བཅས་པ་བྲིས་ཏེ་རབ་ཏུ་གནས་པ་བྱས་ཏེ་བཏགས་ན་ཕ་རོལ་གྱི་༽ །སྔགས་༼དངོས་གྲུབ་༽ཐམས་ཅད་འཕྲོག་པར་བྱེད་པ་དང་། ༼ཕ་རོལ་པོས་གཏེར་དང་རལ་གྲི་ལ་སོགས་པ་བསྒྲུབ་པ་དེ་༽ །དངོས་གྲུབ་ཐམས་ཅད་འཕྲོག་པར་བྱེད་དོ། ༼དཔའ་བོའི་ཐོད་པའི་ཁྲག་ལ་སོགས་པས་བྱ་བའི་སྦྱོར་བ༽ །ཁྲག་འདྲེན་པར་བྱེད་པ་དང་། །སླར་ཡང་༼དེ་སོས་པར་༽གཏོང་པར་བྱེད་དོ། ༼པར་དུ་བ་ ་ཐོད་པ་དུ་མ་བསགས་པ་དེར་ཉུངས་དཀར་བཏབ་ཏོ། དེ་སྨིན་པར་བྱས་ནས་བླངས་ཏེ་ལུས་ལ་བཏགས་ན་༽ །གཟུགས་བརྒྱ་ཕྲག་སྟོང་དུ་མར་༼རྫས་དེདཾ་བསམས་པའི་བྱེ་བྲག་གིས་བགྲུབ་སྟེ་༽བྱེད་དོ། ༼ལུས་༽ །འདོད་ན་སྣང་བར་བྱེད་ཅིང་། ༼བསམས་པས་༽ །མི་འདོད་ན་༼ལུས་༽མི་སྣང་བར་བྱེད་དོ། ༼འཁོར་ལོ་སྔ་མ་ཉིད་རྫ་གསཾ་པ་ལ་བྲིས་ལ་རབ་གནས་བྱས་ཏེ་བཅག་ནས་༽ །ཁང་བཟང་༼ལ་བསྣུན་ན་ཡང་༽དང་ཤིང་གི་རྩེ་མོ་ལ་སོགས་པ་༼མཐོན་པོ་ལ་བསྣུན་དེ་ ཁབ་ལོང་སྣ་བདུན་གང་རུང་ལ་བྱས་པའི་ཁ་ཊཾ་ཀ་བྱས་ལ་དེའི་ཐོད་པ་ལ་ཡང་སྤེལ་ཚིག་བྲིས་ཏེ་བཙུགས་པས་བསྣུན་་་་ ་ཡིན་གྱི་ངོ་བོ་ངེས་པ་མེད་གསུང་དྲིས་པས་༽ཕྱེ་མར་བྱེད་དོ། །༼ལག་པ་གཡོན་པ་ལ་ཙཀྲ་བྲིས་ཏེ་སྦྱོར་བ་བྱས་ན་༽དུག་བདུད་རྩིར་བྱེད་པ་དང་། །༼བདུད་རྩི་ལག་པར་བླུགས་ན་༽བདུད་རྩིར་ཡང་དུག་ཏུ་བྱེད་དོ། ༼ཆང་འོ་མར་ཨརྒའི་ཤིང་གི་ཕྱེ་མ་ལ་རྩ་བའི་སྔགས་བཟླས་ཏེ་འོ་མར་བྱས་པའི་སྤེལ་ཚིག་དང་བཅས་པར་བྱས་ན༽ །ཟླ་བ་ཆུར་བྱེད་པ་དང་། །༼འོ་མ་ཆང་ཆུར་༽ཆུ་ཟླ་བར་བྱེད་དོ། །དྲི་རྣམས་༼ངན་པ་བཟང་པོར་བཟང་པ་ངན་པར་༽འཕྲོག་པར་བྱེད་དོ། །གང་དུ་འདོད་པ་༼རིགས་བཟང་པོ་ངན་པར་༽དེར་འཕོ་བར་བྱེད་དོ། །༼ཤིང་གི་འབྲས་བུ་ཁའི་མཆུ་ལྟར་འོང་བ་༽ནམ་མཁའ་ལྡིང་གི་གདོང་དང་། ༼དེ་ཞུ་ཚོད་ཙ་ན་༽ །ཟླ་བ་འདུས་པ་ལ་ལྷ་མོ་དང་ཀུན་དུ་སྤྱོད་པས་འགྲོ་བ་འབྱིན་པར་བྱེད་པ་༼དཔལ་དང་བསོད་ནམས་༽དང་། །མིའི་མཆོག་དེའི་ལག་མཐུལ་ལ་ཡོད་པའི་དཔལ་༼དང་བསོད་ནམས་༽གང་གིས་ཀྱང་མི་འཕྲོགས་པར་༼དང་འཕེལ་བར་༽འགྱུར་རོ། །རྣམ་པ་དེ་ལྟ་བུ་དང་ལྡན་པའི་༼གང་འདོད་པའི་༽དངོས་གྲུབ་ཐམས་ཅད་འབྲས་བུ་དང་བཅས་༼དེ་མི་འགྲུབ་མི་སྲིད་༽པར་འགྱུར་རོ། ༼དེདི་ནུས་པ་བརྟན་པའི་༽ །དྲན་པ་ཙམ་གྱིས་གསོད་པར་བྱེད་པ་དང་༼གསོ་བ་ཡང་ནུས་༽ ། ༼དུར་ཁྲོད་ཐལ་བ་དང་ཁྲག་གི་སྦྱོར་བས་ཤིང་མེར་སྣང་པ་ཡོད། ཁབ་ལེན་ལྕགས་ལས་རྡོ་རྗེ་རྩེ་༡་པ་བྱས་པའི་སྦྱོར་བས་༽མ་བསྐྱེད་པར་བྱེད་དོ། །ས་འོག་རྣམ་བར་འཇོམས་པར་བྱེད་༼གཏེར་ཐོན་པར་འགྱུར་༽པ་དང་། ༼ཐ་ཆེན་དང་ཤ་ཆེན་གྱི་སྦྱོར་བས་ གུ་གུམ་དང་ཤ་ཆེན་དང་དབང་པོ་ལྔའི་བདུག་པས་༽ །སེར་བ་འབེབས་པ་དང་། ༼ཀ་ར་བི་རའི་ཕྱེ་མ་ལ་སྔགས་བཟླས་པས་༽ །དྲན་པ་ཙམ་གྱིས་གློག་བསྐྱེད་བར་བྱེད་དོ། ༼ཕྱི་རོལ་པའི་༽ལྷ་ཐམས་ཅད་ཀྱི་༼རྐང་རྗེས་ཀྱི་ས་ལ་སོགས་པའི་རྫས་ལས་གཟུགས་བརྙན་བྱས་ལ་སྙིང་ཁར་ཙཀྲ་གཞུགས་པ་ལ་སོགས་པ་༽གཟུགས་བརྙན་གར་བྱེད་དུ་འཇུག་གོ གང་ཞིག་བསྒྲུབ་པའི་མིང་ནས་བཟུང་སྟེ། ལན་གཅིག་བཟླས་ན་དེ་དེའི་མོད་ལ་འཆི་པར་འགྱུར་རོ། །ས་མ་ལུས་པ་༼སྟེ་ས་གསུམ་༽རྣམས་ལ་ལོངས་སྤྱོད་༼པའི་བདག་པོར་༽པར་འགྱུར་རོ། འདོད་ན་སྡུད་པར་འགྱུར་རོ། བཅོམ་ལྡན་འདས་༼ཞེས་བོས་ནས་སུ་ ཞེས་བོས་པའི་ཚིག་འདི་ལ་བྷ་བ་པའི་བཞེད་པས་བཤད་རྒྱུད་རྣམས་ནི་ཡབ་ཀྱིས་གསུང་ནས་ཡུམ་གྱིས་བསྡུས་པ་ཡིན་ལ་རྩ་བའི་རྒྱུད་འདི་ནི་ཡུམ་གྱིས་གསུང་པས་ན་བ་ག་བན་ལ་་་ བོད་པའོ་ཞེས་འདོད་༽འདི་ལ་ནི་བརྟུལ་ཤུགས་མ་དགོས། ༼ལུས་ངག་གི་༽སྤྱོད་པ་དང་བསྙུང་བ་མི་དགོས་ཏེ། ཆོ་ག་༼འདི་ཀླགས་པ་ཙམ་གྱིས་འགྲུབ་པ་ཡིན་པས་སོ་༽འདིས་ཅི་འདོད་པའི་ལས་རྣམས་བྱའོ། གལ་ཏེ་ཁྲོས་པས་༼ སྣ་ནས་འོད་ཟེར་ནག་པོ་འཕྲོས་པའི་སྦྱོར་བས་སྦྱོར་བ་ རེ་རེ་ལ་སྤེལ་ཚིག་ཡོད་པ་ནག་པོའི་བསམ་པས་སྦྱར་ན་༽ལན་གཅིག་བཟླས་ན་བྱེ་བ་གསོད་པར་བྱེད་དོ། ཞི་བས་༼འོད་ཟེར་དཀར་པོས་༽བཟླས་ན་འཚོ་བར་བྱེད་དོ། དུར་ཁྲོད་ཀྱི་སོལ་བ་ལ་ལན་གཅིག་བཟླས་པས་གང་ལ་༼དངོས་སམ་གཟུགས་བརྙན་ལ་༽ཕོག་པ་དེ་དེའི་མོད་ལ་ལྟུང་བར་༼དོན་ལ་གསོད་པར་སུ་༽བྱེད་དོ། ༼ཁྱི་ཤི་བ་དང་ལྷན་༡་ཆུང་མ་བསྲེགས་པའི་ཐལ་བ་༽ཐལ་བ་ལ་ལན་གཅིག་བཟླས་ཏེ་གང་ལ་ཕོག་པ་དེ་༼དངོས་སམ་གཟུགས་བརྙན་ལ་༽དེའི་མོད་ལ་ཤ་ཟས་བཟུང་བར་༼དོན་ལ་འཆི་བར་༽འགྱུར་རོ། དུར་ཁྲོད་ཀྱི་སོལ་བ་ལ་ལན་གཅིག་བཟླས་ནས་སྤང་ལེབ་བམ་རྩིག་པའམ་མཚན་མ༼འི་ལྟེ་བ་༽་ལ་༼གཟའ་མིག་དམར་གྱི་མཚན་མ་ཕུར་བུ་འམ་རལ་གྲི་ལ་སོགས་པའི་༽གང་གི་མིང་བྲིས་པ་དེ་གདོན་ཆེན་པོས་བཟུང་བར་འགྱུར་རོ། །ཨ་ཏི་མུག་ཏའི་ལྕུག་མ་ལ་༼ མེ་ཏོག་དམར་པོ་ཁྲུ་ཕྱེད་དང་༢་ཙམ་ན་སྐྱེ་བ་༡་ཡོད་གསུང་༽ལན་གཅིག་བཟླས་ནས་༼དངོས་སམ་གཟུགས་བརྙན་༽གང་ལ་བསྣུན་པ་དེ་དེའི་མོད་ལ་རླུང་གི་ཤུགས་ཀྱིས་༼གམ་དུ་འོང་བའམ་དབང་དུ་༽འོང་བར་འགྱུར་རོ། ༼རྫ་ལ་ཙཀྲ་བྲིས་ཏེ་བཅག་ལ་༽གསེག་མ་ལ་ལན་གཅིག་བཟླས་ནས་གང་ལ་༼དངོས་སམ་གཟུགས་བརྙན་ལ་༽བརྡེག་པ་དེ་རེངས་པར་འགྱུར་རོ། ༼དུམ་བུ་བསྡུས་ཏེ་སླར་གཏོར་ན་ཡང་ཡུལ་གང་འདོད་པར་སྐྲོད་པར་འགྱུར་གསུང་༽ །གང་འདོད་པ་དེར་འགྲོ་བར་འགྱུར་རོ། །གུ་གུལ་གྱི་བདུག་པ་༼དང་རའི་ཡན་ལག་ལྔའི་ཤ་༽ལ་ལན་གཅིག་བཟླས་ཏེ་སྤོས་སུ་སྦྱར་ན། །སེམས་ཅན་ཐམས་ཅད་༼བསྙོ་ཞིང་འབབ་ཅོལ་སྨྲ་བ་ལ་སོགས་པར་འགྱུར་རོ་༽འབེབས་པར་འགྱུར་རོ། ལག་པ་༼གཡོན་པ་ལ་འཁོར་ལོ་བྲིས་ཏེ་༽ལ་ལན་གཅིག་བཟླས་ཏེ་༼ལག་པ་གཡས་པས་༽བཀབ་ན་དུག་གིས་ཟིན་པའི་དུག་སོས་པར་བྱེད་དོ། ༼སྔར་གྱི་འབེབས་གསོ་་་་བ་ཡང་གསུང་༽མཁའ་འགྲོ་མས་རྒྱས་བཏབ་པ་༼རྨོངས་ཤིང་སྨྲ་མི་ཤེས་པ་ལ་སོགས་པ་༽ལ་ལན་གཅིག་བཟླས་པའི་ཆུས་བཏབ་ན་རེངས་པ་གྲོལ་བར་བྱེད་དོ། ༼མེ་ཏོག་དམར་པོ་༽ཀ་ར་བི་རའི་ལྕུག་མ་ལ་ལན་གཅིག་བཟླས་པས་མངལ་གང་དུ་འདོད་པ་༼མི་ནས་ཕྱུགས་ལ་སོགས་པའི་མངལ་དུ་༽དེར་འཕོ་བར་འགྱུར་རོ། ༼ལྡོག་པའི་སྒོ་ནས་ཕན་ཡོན་བསྟན་༽ །དཔལ་ལྡན་ཁྲག་འཐུང་༼རྩ་བའི་༽གསང་སྔགས་ནི།༼ གིས་སི་ཏི་བསྒྲུབ་པ་ལ་གསུང་༽ །༼རྩ་བའི་སྔགས་ཀྱིས་སི་ཏི་མི་ཤེས་པར་གོ་ཆ་ལ་སོགས་པ་སྔགས་གཞན་གྱིས་སི་ཏི་བསྒྲུབ་པར་འདོད་ན་༽མི་ཤེས་༼པར་༽དངོས་གྲུབ་མངོན་འདོད་པ། །༼དེ་ནི་༽རྨོངས་པ་ཕུབ་མ་བརྡུང་༼པ་ལ་ནས་མི་འོང་། ཆུ་བཤིགས་པ་རང་ལས་མར་དང་འདྲ་༽མཚུངས་ཏེ། །གསང་སྔགས་འདི་ནི་མེདཔ་རུ། །དངོས་གྲུབ་༼༢་༽དང་ནི་བདེ་བ་དག །༼བསྒྲུབ་པ་༽མི་ཡིས་༼དངོས་གྲུབ་༽ཐོབ་པར་མི་འགྱུར་རོ། །༼རྩ་བའི་༽གསང་སྔགས་འདི་ནི་མི་ཤེས་པ། །རྣལ་འབྱོར་པ་ནི་རྣལ་འབྱོར་འདོད། །དེ་ཡི་༼མྱུར་དུ་མི་འགྲུབ་༽ངལ་བ་དོན་མེད་དེ། །འབྲས་བུ་༼༢་༽ཐོབ་པར་མི་འགྱུར་རོ། །༼རྗེས་སུ་འཕྲོ་བའི་སྒོ་ནས་ཕན་ཡོན་བསྟན་པ་༽གསང་སྔགས་འདི་ནི་འདོད་༼པ་༽སྤྱོད་པའི་༼དམིགས་པ་གསལ་བས་ན་གསལ་བས༽། །༼འབྲས་བུ་༽དངོས་གྲུབ་༼རབ་འབྲིང་༣་༽ཐམས་ཅད་སྦྱིན་བྱེད་ཡིན། །དེ་བཞིན་གཤེགས་པས་གསུངས་པ་ཡི། །ཕྱག་རྒྱ་༼དང་༽སྔགས་ནི་བསྒྲུབ་པ་པོས། །༼ལག་མཆོད་གསུང་༽བཟའ་བཏུང་༼གི་༽དངོས་གྲུབ་སྟོན་མོ་དང་། །བཅུད་ལ་སོགས་པའི་དངོས་གྲུབ་བསྒྲུབ་༼བསྒྲུབ་པ་བརྒྱད་༽ ། ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་རྩ་བའི་ཆོ་གའི་ལེའུ་སྟེ་དགུ་པའོ། །༼དེ་ལྟར་རྩ་བའི་སྔགས་ཀྱི་ལས་བསྟན་ནས་སྙིང་པོའི་བསྒྲུབ་པ་སྟོན་༽དེ་ནས་༼འབྲས་བུ་༽ཧེ་རུ་ཀ་གཉིས་༼སུ་༽མེད་༼པའི༽། །༼སྐུ་གསུམ་གྱི་༽སྦྱོར་པ་གང་གིས་ཤེས་ཙམ་གྱིས། །འགྲུབ་པར་ཐེ་ཚོམ་མེད་པ་ཡི་༼བསྒྲུབ་པོ་ཕྱག་རྒྱ་སྔགས་ཤེས་པས་ཟེར་༽ ། ༼མཆོག་ཐུན་མོང་༢་ལ་དངོས་མཆོག་བསྒྲུབ་པ་༽ །སྐུ་གསུམ་པོ་ནི་བཤད་པར་བྱ། །༼ལེའུ་དང་པོ་རུ་རིམ་པ་རྣམ་པ་༤་སྐུ་༤་དང་སྦྱར་བ་གསུང་ཀྱང་ཕྱག་རྒྱ་བཞི་གསུང་པའི་དེའི་སྐུ་༤་པ་འདིར་བསྟན་སྐུ་༣་རོ་༡་པ་ངོ་བོ་ཉིད་ཀྱི་སྐུ་བསྟན་༽ཆོས་ཀྱི་སྐུ་ཡི་༼དོན་རྣམ་པ་༢་ལས་དང་པོ་བཀའ་ལས་འདས་པའི་འབྲས་བུ་བསྟན་ཏེ་༽ལུས་ཅན་གྱི༼ པྲ་པེག་་་དང་བཞི་བ་གཉིས་མཚོན༽། །གང་ཚེ་བསྒྲུབ་པ་པོ་འགྱུར་བ། །དེ་ཚེ་དེ་ཡིས་ཆོས་སྐུར་བཤད། །༼གསང་དབང་མཚོན་༽ལོངས་སྤྱོད་རྫོགས་སྐུའི་ལུས་ཅན་དུ། །གང་ཚེ་བསྒྲུབ་པ་པོ་འགྱུར་བ། །དེ་ཚེ་ལོངས་སྤྱོད་རྫོགས་པར་སྨྲ། །༼བུམ་དབང་མཚོན་༽སྤྲུལ་པའི་སྐུ་ཡི་ལུས་ཅན་དུ། །གང་ཚེ་བསྒྲུབ་པ་པོ་འགྱུར་བ། ༼དེ་ཡན་ཆད་དུ་རྩོལ་ལམ་ལ་སྐུ་གསུམ་སྦྱར་༽ །དེ་ཚེ་སྤྲུལ་པར་ངས་བཤད་དེ། ༼འདི་མན་ཆད་གཙོ་བོར་འབྲས་བུ་༽ །ཆོས་དང་ལོངས་སྤྱོད་རྫོགས་སྤྲུལ་པ། །ཡང་དག་ཐོབ་པར་གདོན་མི་ཟ། །བདག་ཉིད་ཤྲཱིི་ནི་ཧེ་རུ་ཀ །འགྲུབ་འགྱུར་འདི་ལ་ཐེ་ཚོམ་མེད། ༼དོན་༢་པ་ལོ་ཀའི་འབྲས་བུའི་ཡོན་ཏན། དེ་ལྟར་མཆོག་བསྒྲུབ་པར་བསྟན་ནས་ཐུན་མོང་གི་འབྲས་བུ་གསང་པ་ཡང་བསྒྲུབ་པར་སྟོན། ༢་པ་ཐུན་མོང་བསྒྲུབ་པ་༽ །གསང་སྔགས་འདི་ཡི་སྙིང་པོ་ནི་༼སྙིང་པོ་ཡི་གེ་ཉི་ཤུ་རྩ་༽། །བཤད་ཀྱིས་བསྒྲུབ་པ་པོ་རྣམས་ཉོན། ༼སྐྱེ་བ་བདུན་པའི་གོ་རོ་ཙ་ན་བླངས་ཏེ་དཔྲལ་བར་ཐིག་ལེ་བྱས་པའི་སྦྱོར་བས་༽ །སྙིང་པོ་བཟླས་པས་དཔག་ཚད་བྱེ་བ་འཕགས་པར་འགྱུར་ཞིང་། །འགྲོ་བ་དང་འོང་བར་འགྱུར་རོ། ༼ཐོད་པར་ཉུངས་དཀར་གྱི་སྦྱོར་བའམ་གཟུགས་སྣ་ཚོགས་ཀྱི་གྷི་ཝང་གི་སྦྱོར་བ་བཅས་པའི་ཐིག་ལེས་༽ །གཟུགས་བརྒྱ་སྟོང་དུ་མར་བྱེད་དོ། ༼བ་རུའི་ཤིང་ལ་སྙིང་པོའི་ཡི་གེ་ཉི་ཤུ་༢་པའི་ཙཀྲ་བྲིས་ཏེ་རབ་གནས་བྱས་ཏེ་གོན་ནས་༽ཁང་བཟངས་དང་ཤིང་དང་ཁྱིམ་ལ་འཛེགས་ཏེ་རྣལ་འབྱོར་མ་རྣམས་དང་དཔག་ཚད་བྱེ་བའི་བར་དུ་འགྲོ་བར་འགྱུར་རོ། ནམ་མཁའ་ལ་འགྲོ་ཞིང་འོང་ལ། གཞན་དུ་༼མི་འགྲུབ་པར་༽མི་འགྱུར་རོ། ༼ སྐྱེ་བ་བདུན་པའི་གོ་རོ་ཙ་ནའི་སྦྱོར་བས་ཐིག་ལེ་༽འདོད་ན་སྣང་བར་འགྱུར་ཞིང་། ༼ ཐིག་ལེ་བྱས་པས་༽འདོད་ན་མི་སྣང་བར་འགྱུར་རོ། ༼སེམས་ཅན་སྣ་ཚོགས་ཀྱི་གོ་རོ་ཙའི་སྦྱོར་བས་༽འདོད་ན་བྱིས་པ་དང་། རྒན་པོ་དང་། དར་ལ་བབ་པའི་གཟུགས་འཛིན་པར་འགྱུར་རོ། འདོད་ན་གླང་པོ་དང་། མ་ཧེ་དང་། བ་ལང་དང་། སྟག་དང་། སེང་གེ་དང་། ཁྱུ་མཆོག་དང་། བྱི་བ་དང་། རི་བོང་དང་། རྔ་མོའི་གཟུགས་འཛིན་པར་འགྱུར་བ་དང་། འདོད་་ན་རྨ་བྱ་དང་། ཁྱིམ་བྱ་དང་། ངང་པ་དང་། དུར་པ་དང་། ཆུ་སྐྱར་དང་། འུག་པ་དང་། ཁྲ་དང་། བྱ་རྒོད་དང་། ཁྲའི་གཟུགས་འཛིན་པར་འགྱུར་རོ། གང་དུ་འདོད་པ་དེའི་གཟུགས་སུ་བྱེད་དོ། ༼སྨྲ་མི་ཤེས་པ་༽ཚིག་འཕྲོག་པ་དང་། ༼མི་མཐོང་པར་༽མཐོང་བ་འཕྲོག་པ་དང་། ༼མི་ཐོས་པར་༽རྣ་བ་འཕྲོག་པ་དང་། །༼དྲི་མི་ཚོར་པར་༽་འཕྲོག་པ་དང་། ལྕེ་འཕྲོག་པ་༼རོ་མི་ཚོར་༽བྱེད་དོ། གང་གི་འདོད་པའི་ཁྲག་འདྲེན་པར་བྱེད་པ་དང་། གནོད་པར་བྱེད་དོ།་མིང་རུས་ལས་བྱ་པའི་ཕུར་བ་ལྕེ་ལ་བཙུགས་པས་སྨྲ་མི་ཤེས་དེས་འགྲོཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་སྐུ་གསུམ་འགྲུབ་པའི་སྙིང་པོའི་སྔགས་ཀྱི་ཆོ་གའི་ལེའུ་སྟེ་བཅུ་པའོ་༼སྦྱོར་བའི་རྩ་བའི་སྔགས་དང་འདྲ་བ་ལས་སྔགས་ཉི་ཤུ་རྩ་གཉིས་པའོ༽། །༼སྐྱེ་བ་བདུན་པ་བརྟགས་པ་འདིར་མདོར་བསྟན་བཞི་བཅུ་རྩ་དགུ་པས་རྒྱས་པར་བཤད། བསྒྲུབ་པ་ལེའུ་བཅུ་བཞི་པར་གསུངས་༽ །དེ་ནས་གཞན་ཡང་༼སྙིང་པོའི་ལས་༽བསྒྲུབ་པ་པོས་༼བཤད་དེ་༽། །༼སྐྱེ་བ་བདུན་པ་༽གང་ཞིག་བརྟེན་པ་༼བསྒྲུབ་པ་༽ཙམ་གྱིས་ནི། །མྱུར་དུ་དངོས་གྲུབ་ལ་འཇུག་པའི། །དངོས་གྲུབ་ཐོབ་ཐབས་༼སྐྱེ་བ་བདུན་པའི་གོ་རོ་ཙ་ན་ལ་བརྟེན་པ་༽བཤད་པར་བྱ། ༼དང་པོ་སྐྱེ་བ་བདུན་པ་བརྟག་པ་བསྟན་༽སྐྱེས་བུ་གང་གི་༼སྐྱེ་བའི་བདུན་པའི་ལུས་ལ་༽རྡུལ་དྲི་ཞིམ་པར་༼གླ་རྩིའི་དྲིར་༽འགྱུར་བ་དང་། ༼ངག་འཇམ་པ་༽བདེན་པར་༼རྫུན་མི་༽སྨྲ་བ་དང་། ༼གཞན་གྱི་འབྱེད་འཛུམས་བདུན་གྱི་བར་དུ་འབྱེད་འཛུམས་རེ་རེ་ལས་མི་བྱེད་པ་༽ཡུན་རིང་པོར་མིག་མི་འཛུམ་པ་དང་། ཁྲོ་བ་མེད་པར་འགྱུར་བ་དང་། ཁ་ནས་དབུགས་དྲི་ཞིམ་པ་འབྱུང་བ་དེ་ནི་སྐྱེ་བ་བདུན་དུ་མིར་གྱུར་པ་ཡིན་ཏེ།དེ་༼ལ་༽བསྣམས་ན་༼སྙིང་ཀའི་ཐད་ཀ་ནས་བླ་རྩི་དང་ཙན་དན་ལ་སོགས་པའི་དྲི་ཞིམ་པོ་ཡོང་བ་༽དེའི་སྙིང་ཁ་ལ་བརྟེན་པའི་གོ་རོ་ཙ་ན་ཡོད་དེ༼བྷ་ཏན་ཀ་ན་ཀའི་རྫས་སུ་་ ནས་བསྒྲལ་བའི་ཐ་དགོས་གསུང་སྟེ་ཨ་བྷི་ད་ན་བྷ་དན་ཏ་ལྷར ༽། །དེ་བླངས་པ་ལ་༼སྐྱེ་བ་བདུན་པ་དེ་བསྒྲུབ་པ་བསྟན་༽དཔལ་ཧེ་རུ་ཀའི་༼སྙིང་པོའི་༽སྔགས་བརྒྱ་རྩ་བརྒྱད་བཟླས་༼ཕྱིས་བརྒྱ་དཔེ་ལས་བཟླས་ཟེར་༽ནས་ཐིག་ལེ་བྱས་ན་༼དེ་ལ་བསྙེན་བསྐུར་བྱས་པས་བོད་པར་ཡིན་པས་ལུས་བགྲེས་པ་འདོར་གསུང་༽སྟེང་དུ་༼ཚངས་པའི་གནས་སུ་༽ལྡིང་བར་འགྱུར་ཞིང་༼མཁའ་སྤྱོད་དུ་༽དཔག་ཚད་བྱེ་བར་འགྲོ་བར་འགྱུར་རོ། །དེ་ཟོས་པ་ཙམ་གྱིས་༼མངོན་ཤེས་༽དུས་གསུམ་གྱི་ཡེ་ཤེས་ཅན་དུ་འགྱུར་རོ། །དཔག་ཚད་ལྔ་བཅུར་སོང་ནས་ཉིན་མཚན་གཅིག་གིས་༼རྐང་མགྱོག་༽འོང་བར་འགྱུར་རོ། །ལྷའི་ལུས་ཀྱང་ཐོབ་པར་༼མངོན་ཤེས་ཅན་ལུས་ལ་འབྱུང་པའི་གནོད་པ་མེད་པ་ལུས་ཀྱི་བཅུད་ལེན་དུ་༽འགྱུར་རོ། དཔལ་ཧེ་རུ་ཀའི་སྙིང་པོ་༼སྐྱེ་བ་བདུན་པའི་རོ་ཙ་ན་༽གང་གིས་ཤེས་པ་དེ་གང་དང་གང་འདོད་པ་དེ་དང་དེ་༼སའི་བདག་པོ་༽ཐོབ་པར་འགྱུར་རོ། ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས། སྐྱེ་བ་༼མའི་སྐྱེ་བ་༽བདུན་པའི་མཚན་ཉིད་ཀྱི་༼ཕན་ཡོན་༽ཆོ་གའི་ལེའུ་སྟེ་བཅུ་གཅིག་པའོ། །༼སྙིང་པོའི་ལས་བསྟན་པ་དེ་ནས་༽ །དེ་ནས་ཉེ་བའི་སྙིང་པོ་ནི། །༼ཐུན་མོང་གི་༽དངོས་གྲུབ་ཐམས་ཅད་འགྲུབ་བྱེད་ཅིང་། །འཇིག་རྟེན་གསུམ་ན་གང་ཅུང་ཟད་༼ཡོད་པའི་ལས་ཀྱི་ཚིག་རྣམས་༽། །དེ་ཀུན་སྐད་ཅིག་གིས་འགྲུབ་༼དུས་མྱུར་བ་ལ་དགོངས་༽བཤད། །ཊཕ་ཧཱུཾ་ཧཱུཾ་ཧ་ཧ་ཧྲི་ཨོཾ། །འདི་ནི་སྙིང་པོའི་ཉེ་བའི་སྙིང་པོའོ།༼ཉེ་སྙིང་གི་༽སྔགས་འདི་ལན་འབུམ་བཟླས་པས་༼འདི་ན་མར་གྱི་ལས་ཚོགས་འདི་ཐམས་ཅད་བསྒྲུབ་པ་ལ་འཁོར་ལོ་དང་ལག་པ་༢་མི་འབྲལ་བས་བསྒྲུབ་དགོས་གསུང་། ཡི་གེ་བདུན་པའི་འཁོར་ལོ་བྲིས་ཏེ་རབ་གནས་བྱས་ནས་ལུས་ལ་བཏགས་པའམ་ལག་པ་ལ་བྲིས་ཏེ་ས་ལ་བརྡབས་ན་ས་བླ་ས་འོག་ས་སྟེངས་༣་༽འཇིག་རྟེན་གསུམ་ཡང་གཡོ་བར་བྱེད་དོ། ༼ཙན་དན་དམར་པོ་ལ་སོགས་པས་བྲིས་པའི་འཁོར་ལོར་བྲིས་ཏེ་རབ་གནས་བྱ་སྟེ་བཅངས་པ་པོ་༽ལྷ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཀླུ་དང་། དྲི་ཟ་དང་། མིའམ་ཅི་དང་བཅས་པ་རྣམས་འགུགས་པར་བྱེད་དོ། ༼ཉེ་སྙིང་གི་སྔགས་བཟླས་པ་ཐམས་ཅད་ལ་འདྲ། ཙཀྲ་རྫ་ལ་བྲིས་ཏེ་རབ་གནས་བྱས་ནས་དུམ་བུར་བཅག་ཏེ་ཆུ་བོ་ལ་སོགས་པ་ལ་གཏོར་ན་༽རྒྱ་མཚོ་དང་ཆུ་བོ་དང་རྫིང་བུ་ལ་སོགས་པ་སྐེམས་ཤིང་རེངས་པར་བྱེད་དོ།༼གནས་༽གང་དུ་༼བསྒྲུབ་པ་པོས་སྔགས་༽ཟློས་པའི་གནས་དེར་མཁའ་འགྲོ་མ་ཐམས་ཅད་བསྒྲུབ་པའི་མངག་གཞུག་བྱེད་པར་འགྱུར་རོ། ༼ལག་པ་གཡོན་པ་ལ་འཁོར་ལོར་ཙན་དན་དཀར་པོས་བྲིས་ཏེ་རབ་གནས་བྱས་ནས་བཀྲུས་ནས་བཀྲུས་པས་༽དེ་ཆུ་ལ་ཡོངས་སུ་བཟླས་ལ། ༼ཆུ་དེས་༽བདག་ཉིད་ཀྱི་མིག་བཀྲུས་ན་སྐྱེ་བ་བདུན་པ་༼གང་ཡིན་༽ཤེས་པར་འགྱུར་རོ། ༼ཡང་སྦྱོར་བ་དེས་༽ཚེ་ཟད་ཅིང་འཆི་བ་༼གཞན་༽ཉིད་དུ་སྣང་བ་དང་༼ཤེས་༽ ། ཚེ་རིང་བ་དང་སྲོག་དང་བཅས་པ་༼འཁོར་ལོར་བཀྲུས་པའི་ཆུ་དེས་མིག་ལ་བྱུག་ན་༽མཐོང་བར་འགྱུར་རོ། །མིག་ལ་མངོན་པར་༼སྔགས་ཉེ་སྙིང་ཡི་གེ་བདུན་པའི་འཁོར་ལོ་དང་ལྡན་པས་༽བསྔགས་ནས། གང་ལ་བལྟས་པ་དེ་༼ལུས་ངག་༽རེངས་བར་འགྱུར་རོ། ༼དཔའ་མོ་ཤི་བའི་ཞེས་རྒྱ་དཔེ་ལས་འབྱུང་༽མི་རོའི་རྐང་མཐིལ་གྱི་ལྤགས་པ་བླངས་ཏེ།༼ ཆོས་བསྲུངས་ལ་སོགས་པ་མངག་གཞུག་བྱེད་དུ་མ་འདོད་པ་དང་དེ་ལྟ་བུ་མངག་གཞུག་པར་བྱེད་ན། ཟངས་ལ་འཁོར་ལོ་དང་ཡི་གེ་གཟོང་རིས་བྱས་པ་ལ་སོགས་པ་སྟེ། སྦུབས་བྲུས་པའི་ཤུལ་ཙན་དན་དམར་པོ་དང་གཡོན་པའི་སྲིན་ལག་གི་ཁྲག་གིས་དགང་པ་ལ། དེའི་སྟེང་དུ་ཁྱིམ་གྱི་དུ་བས་དང་སྟེང་དུ་ཁ་བཀང་ལ་རབ་གནས་བྱ་སྟེ། དེ་ལ་ལག་པས་རེག་ལ་སྔགས་སྟོང་ལ་སོགས་པ་བཟླས་ནས་མངག་གཞུག་བྱེད་དོ༽ ༼དེ་རང་གི་གསུང་༽མིའི་ཁྲག་དང་བཏགས་ལ་རི་ལུའི་ནང་དུ་ལིག་བུ་མིག་བཅུ་ལ་ལྡོང་རོས་དང་། གྷི་ཧཾ་དང་གུར་གུམ་དང་། ༼སྔར་རང་གི་ལ་གསུང་༽ཁྲག་དང་བསྲེས་ཏེ༼རི་ལུ་བྱ༽། ༼འཁོར་ལོའི་ལྟེ་བ་ལ་ཧཱུཾ་གི་མཐའ་མ་རུ་ལྷ་གང་ཡིན་པ་དེ་དབང་དུ་གྱིས་ཅིག་པའི་སྤེལ་ཚིག་བྲིའོ༽ ༼རི་ལུ་དེ་༽གྲིབ་མ་ལ་བསྐམས་ལ་ལྕགས་གསུམ་གྱིས་༼གསེར་དངུལ་ཟངས་༽དཀྲིས་ཏེ་༼དེ་རོའི་སྙིང་ཁར་བཅུག་ནས་༽ ། ཡང་༼དེ་ལྡོང་པ་ལ་རི་ལུ་བསྐྱེད་ལ་ལྷའི་ཙཀྲ་བསྟིམ་པ་ལ་གསུང་༽ལྷག་པར་གནས་པར་བྱས་ལ། སྐར་མ་རྒྱལ་ལ་བབ་་པ་ན། ༼རོའི་ཁ་ནས་རི་ལུ་མྱུག་བྱུང་པ་དེ་རང་གི་ལྕེས་བླངས་དེ་༽དཔལ་ཧེ་རུ་ཀའི་ཞལ་དུ་བཅུག་ལ། ལག་པ་གཡོན་པས་༼རང་གི་༽ཁ་བཀབ་ལ། ཡང་༼ཉེ་སྙིང་༽སྟོང་རྩ་བརྒྱད་བཟླས་ན། དེ་དེའི་མོད་ལ་༼ལུས་༽མི་སྣང་བར་འགྱུར་ཞིང་། གྲིབ་མ་ཡང་མི་སྣང་བར་འགྱུར་ཏེ། ལྷ་རྣམས་ཀྱིས་ཀྱང་༼དེ་ལུས་༽མི་མཐོང་བར་འགྱུར་ན་༼ཐ་མལ་བའི་༽མི་རྣམས་ཀྱིས་ལྟ་སྨོས་ཀྱང་ཅི་དགོས། ༼རི་ལུ་དེ་ཡང་༽ཁ་ནས་བཏོན་ན་ནི་༼ལུས་༽སྣང་བར་འགྱུར་རོ། རྒྱུད་འདིར་མཁའ་སྤྱོད་གྲུབ་པའི་རི་ལུ་འདི་ནི་༼མ་འོངས་པའི་ཡིད་ཆེས་པ་བསྐྱེད་པའི་ཕྱིར་ཏེ་སྡུད་པ་པོའི་ཚིག་༣་༽དཔའ་བོ་རང་ཉིད་ཀྱིས་གསུངས་པ་ཡིན་ནོ་༼ཐེ་ཚོམ་མི་བྱ༽། །དཔལ་ཧེ་རུ་ཀའི་སྙིང་པོའི་ཉེ་བའི་སྙིང་པོའི་སྔགས་འདིས་འཛུབ་མོ་རྩེ་མོ་དང་། །༼དཔའ་བོ་ཤི་བའི་༽མགོ་བོའི་ཐོད་པ་ཤ་མེད་པར་བྱས་ལ་༼ དེ་ལ་ཙཀྲ་བྲིས་ཏེ་རབ་གནས་བྱ་སྟེ་འཛུབ་མོ་གཡོན་པའི་རྩེ་མོ་འཁོར་ཏེ་མཉེ་ཞིང་ཁྲག་འདྲེན་པར་བསམ་ཞིང་སྔགས་བཟླས་ན༽། །མཉེས་ན་དེའི་ཁྲག་འདྲེན་པར་བྱེད་དོ་༼སྦྱོར་བ་རྩ་བའི་སྔགས་ཀྱི་སྐབས་དང་འདྲ༽། །༼གཡོན་༽གཡོན་པ༼འི་འཛུབ་མོ༽ས་༼འཁོར་ལོ་དེ་༽ཡང་དང་ཡང་དུ་མཉེས་པས་ནི་༼ཁྲག་སླར་ལུས་ལ་༽འཇུག་པར་འགྱུར་རོ། ༼ཡི་གེ་བདུན་པ་ལ་སྔོན་དུ་བསྙེན་པ་བསྐྱལ་ཏེ་༽མངོན་པར་༼ཉེ་སྙིང་༽བཟླས་ཏེ་༼དཔའ་བོ་ཤི་བའི་༽མགོ་བོའི་ཐོད་པ་ལ་༼བསྒྲུབ་པ་པོའི་ཙཀྲ་བྲིས་ཏེ་རབ་གནས་བྱས་ཏེ་དེ་ལ་༽ཁུ་ཚུར་བསྣུན་ན་གང་གི་མིང་༼ཨ་ཀར་ཤ་ཡ་ཛ་ཅེས་པའི་སྤེལ་ཚིག་དང་བཅས་པ་༽ནས་སྨྲོས་པ་དེའི་ཀླད་པ་ན་བར་འགྱུར་རོ། གསང་སྔགས་༼གསོ་བའི་བསམ་པ་ཡིད་ལ་༽དྲན་༼པ་ཙམ་གྱིས་༽ལ་༼དཔའ་བོ་ཡི་༽ཐོད་པ་༼དེ་༽འོ་མས་བཀང་ན་དེ་ཉེ་བར་ཞི་བར་འགྱུར་རོ། ༼དུད་འགྲོ་ལ་སོགས་པ་གང་ཡང་རུང་པའི་༽གྷི་ཧཾ་ལ་བཟླས་ཏེ་ཐིག་ལེ་བྱས་ནས་གང་ལ་བལྟས་པ་༼རེངས་པ་ལ་སོགས་པ་ལ་༽དེ་རྒྱས་བཏབ་པར་འགྱུར་རོ། ༼འཁོར་ལོ་དང་ལྡན་པས་༽འཛུབ་མོ་ལ་༼ཡི་གེ་བདུན་པ་༽ཡོངས་སུ་བཟླས་ཏེ། ༼དངོས་སུ་༽གང་ལ་སྡིགས་འཛུབ་བྱས་པ་དེ་དེའི་མོད་ལ་ལྟུང་༼འགྱེལ་༽བར་འགྱུར་རོ། །༼འཁོར་ལོ་དང་ལྡན་པའི་ལག་པས་༽སྔགས་བཟླས་པས་ས་ལ་༼ཟེར་ཡང་གཟུགས་བརྙན་ལ་བསྣུན་པས་གསུང་༽བསྣུན་ན་གང་གི་མིང་ནས་སྨོས་པ་དེ་དེའི་མོད་ལ་འཆི་བར་འགྱུར་རོ། །༼གསོ་བ་༽ཆུ་ལ་བཟླས་ཏེ་ས་ལ་༼གཟུགས་བརྙན་ལ་གསུང་༽བཏབ་ན་སླར་འཚོ་བར་འགྱུར་རོ། །༼འཁོར་ལོ་དང་ལྡན་པའི་ལག་པས་༽སྔགས་བཟླས་ལ་༼གཡོན་པའི་༽འཛུབ་མོའི་རྩེ་མོ་དེས་སྟོང་ལ་སྡིགས་འཛུབ་བྱས་ན། །ཡང་དེ་ཐམས་ཅད་གནོན་༼ཏེ་རེངས་གསུང་༽པར་འགྱུར་རོ། །ཚིག་གིས་༼སོས་པའི་སྨོན་ལམ་བཏབ་པས་༽ནི་གྲོལ་བར་འགྱུར་རོ། །༼ཤན་པ་༽རྨེ་ཤ་ཅན་གྱི་༼འདི་ཡང་ཙཀྲ་དང་ལྡན་པས་༽ཐལ་བ་ལ་བཟླས་བརྗོད་བརྒྱ་བྱ་སྟེ། །༼བྲམ་ཟེ་ལ་སོགས་པ་༽སེམས་ཅན་གང་རྗེས་སུ་དྲན་ཏེ་༼དེ་ལ་༽། །བསྣུན་པ་༼ན་༽དེ་དེའི་གཟུགས་འཛིན་པར་འགྱུར་རོ། །༼དྲག་པོའི་༽སྦྱིན་བསྲེག་གི་༼ད་རུ་ར་ལ་སོགས་པ་བསྲེགས་པའི་༽མེའི་ཐལ་པ་ལ་བཟླས་བརྗོད་བརྒྱ་བྱས་ཏེ་༼གཟུགས་བརྙན་ལ་ལོ་ཀ་བའི་༽བསྣུན་ན་དེ་ལྷ་དེ་ཉིད་ཀྱིས་ཀྱང་༼རང་གིས་རང་༽མི་མཐོང་རོ། །ཆུ་ལ་༼ལན་༽བདུན་བཟླས་པས་༼ལུས་ལ་༽གཏོང་ན་སླར་༼རང་གིས་མཐོང་པའམ་ལུས་༽སྣང་བར་འགྱུར་རོ། ༼སྐྱེས་པའི་ཐོད་པ་ལ་ཙཀྲ་བྲིས་ལ་རབ་གནས་བྱས་ལ་ལག་པ་ལ་ཙཀྲ་བྲིས་པས་བཟུང་མ་བསྒྲུབ་པའམ་ཡང་ན་ལག་པ་ལ་ཙཀྲ་བྲིས་ལ་རབ་གནས་བྱས་ལ་ལག་པར་སྦྱར་ལ་ཐོད་པའི་ཕྱག་རྒྱ་བྱས་ལ་ལས་བསྒྲུབ། བསྒྲུབ་ལུགས་གསུམ་མོ་་་ ཁྱིའི་ཐོད་པ་ལ་འཁོར་ལོ་བྲི་ལག་པ་༢་ལ་ཡང་འཁོར་ལོ་བྲིས་ལ་རབ་གནས་བྱས་ཏེ། དེ་ནས་ལག་པ་༢་ཁ་སྦྱར་བའི་འཁོར་ལོའི་བར་དུ་ཀྱི་ཐོད་ཙཀྲ་བྲིས་པ་དེ་བཅུག་ལ་ལག་པ་སྟེང་འོག་བསྒྱུར་ཅིང་ཉེ་སྙིང་བཟླས་གསུང་༽ །ཐོད་པའི་ཕྱག་རྒྱ་ཁ་སྦྱར་བཅིངས་ལ་༼ལག་པ་༢་བསྡམས་པའི་དབུས་སུ་ཐོད་པ་བཅུག་སྟེ་སྟེང་འོག་ཡང་ཡང་བསྒྱུར་བ་ཡང་གསུང་། ཐལ་མོ་ཁོང་སྟོང་དུ་སྦྱར་ཏེ་སྟེང་འོག་ཡང་ཡང་བསྒྱུར་གསུང་༽དབུགས་༼ཕྱིར་མི་རྒྱུ་བར་བྱ་༽མི་འབྱིན་པར་གང་གི་མིང་ནས་སྨོས་ཏེ་བཟླས་པ་དེ་སྨྱོ་བར་འགྱུར་རོ། །སྐྱེ་བོ་སྟོང་ཡང་མྱོས་པར་འགྱུར་རོ། །ཡིད་ཀྱིས་༼གསོ་བ་༽ནི་གྲོལ་བར་༼གྱུར་༡་ཅེས་བྱ་བ་ཙམ་གྱིས་༽འགྱུར་རོ། །༼འདི་ཡང་འཁོར་ལོ་དང་ལྡན་པའི་ལག་པས་༽གང་གི་མིང་ནས་སྨོས་ཏེ་གཙུག་ཕུད་ལ་༼སྔགས་༽ལན་བདུན་བཟླས་ཏེ་མདུད་༼པ་བྱས་ན་༽ན་མཁའ་འགྲོ་མ་ཐམས་ཅད་འོང་བར་འགྱུར་རོ། ༼ཙཀྲ་དང་ལྡན་པས་༽ཁང་སྟོང་༼རྒྱལ་པོའི་སྐོར་ཁང་ལ་སོགས་པར་གསུང་༽དུ་སོང་སྟེ་ལན་བརྒྱ་བཟླས་ནས་༼ལག་པ་༢་ཀས་སྐྲ་༽སྤྱི་བོར་བཅིངས་ལ་མིག་བགྲད་དེ་ཇི་སྲིད་དུ་བཟླས་པ་དེ་སྲིད་དུ་མི་སྣང་བར་འགྱུར་རོ། །༼གསོ་བ་ཙུག་ཕུད་༽བཀྲོལ་ན་སྣང་བར་འགྱུར་རོ། །༼དཔའ་བོའི་༽ཐོད་པའི་ནང་དུ་༼འཁོར་ལོ་བྲིས་ཏེ་རབ་ཏུ་གནས་པ་བྱས་ནས་བཅག་ནས་༽གསེག་མ་༼གྱོ་དུམ་༽བླུགས་ལ་མངོན་པར་བཟླས་ཏེ། །སྟེང་དང་འོག་དང་ཕྱོགས་འཚམས་རྣམས་སུ་གཏོར་ན་༼ཆིངས་༡་ཅེས་བྱ་བ་ལ་སོགས་པས་སྤེལ་ཏེ་ཕྱོགས་ཕྱོགས་སུ་གཏོར་ཏེ་༽ ། ལྷ་དང་ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཀླུ་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཐམས་ཅད་ཀྱང་བཅིངས་པར་འགྱུར་རོ་༼དེ་གནོད་པ་མི་ནུས་སོ༽། །༼སྦྱོར་བ་དེས་༽མཁའ་འགྲོ་མའི་སྤྱོར་བ་༼སྟེ་གནོད་པ་དུ་མ་༽འཕྲོག་པར་འགྱུར་རོ། །སྟན་དང་མལ་ཁྲི་ལས་སྐྱེས་པའམ་བུད་མེད་༼ཉལ་བ་༽འདུག་པ་ལ་༼ཙཀྲ་དང་ལྡན་པ་དེས་༽བལྟས་ཏེ། །སྔགས་ལན་བརྒྱ་བཟླས་ན་༼ལྕེ་སྤྱང་གི་མཇུག་མ་ལ་བཟླས་ཏེ་མལ་འོག་ཏུ་སྦས་ན་༽མི་འབྱེ་བར་འགྱུར་རོ། །ཡིད་ཀྱིས་ནི་༼གྲོལ་བར་སྨོན་ལམ་བཏབ་ན་༽གྲོལ་བར་འགྱུར་རོ།༼ལེའུ་བཅུ་པས་སྙིང་པོའི་ལས་བསྒྲུབ་པ་དང་༡༡་པས་སྐྱེ་བ་བདུན་པ་བརྟག་པ་དང་སྙིང་པོའི་ལས་བསྒྲུབ་པ་བསྟན་ལ་ལེའུ་བཅུ་༢་པས་ཉེ་སྙིང་གི་ལས་བསྒྲུབ་པ་བསྟན་པ་༽ །གསེག་མ་ལ་ཡོངས་སུ་བཟླས་ཏེ་༼གྱོ་མོ་ལ་ཙཀྲ་བྲིས་ཏེ་རབ་གནས་བྱས་ཏེ་བཅག་ནས་༽། །ཆུ་བོར་བཅུག་ན་རྒྱུན་ཕྱོགས་ལས་བཟློག་སྟེ་འབབ་པར་འགྱུར་རོ། །གསེག་མ་དེ་ཉིད་ཀྱིས་རྦ་རླབས་༼ཆེན་པོ་ལ་གཏོར་ན་༽གནོན་པར་འགྱུར་རོ། །ཡིད་ཀྱི་སྟེང་དུ་བལྟས་ཏེ། །༼སྔགས་༽སྟོང་བཟླས་ན་༼གསེག་མ་དེ་སྟེང་དུ་གཏོར་ན་༽ཆར་ཆེན་པོ་གཅོད་པར་འགྱུར་རོ།༼ མཁའ་འགྲོ་ལྟར་དགྲ་བོ་མཚོན་ཆ་ལྔ་བཟློག་པའི་སྨན་ལྔའི་ཆུས་ཙཀྲ་བྲིས་ཏེ་རབ་གན་ལ་སོགས་པ་བྱས་ཏེ་དེ་བཅང་དེ་༽ །གཞན་གྱི་དཔུང་མངོན་པར་༼མདའ་སོགས་༽།འཕྲུལ་འཁོར་གྱི་༼རལ་གྲི་སོགས་༽འཕན་མི་འཕན་དང་། །དེ་༤ན་༼འཁོར་ལོ་སོགས་༽ལག་པས་འཕེན་པ་དང་། འཕངས་་ནས་བཟུང་བ་ཉིད་དག་ནི། །ལག་པས་མཚོན་ཆ་༼སྤར་འཛིན་དང་ཅོད་ཀ་༽འགྱེད་དང་ལྔ། །འཇིག་རྟེན་༣་པོ་མ་ལུས་ན། །འདི་ལྔ་མཚོན་ཆར་རབ་ཏུ་གྲགས། སྨན་ལྔ་ལ་ཀྲོ་ཏ་ཀ་བྱ་བ་ཁ་ཏོག་དམར་པོ་༼དོ་བ་འདྲ་༡་ཡོད་གསུང་༽རྡོག་པོ་ཆེ་བ་༼དེས་འགྲེ་བ་༽༡་ཡོད། ཧོ་མི་ནི་བྱ་བ་ཏ་རུ་ར་རྡར་ལ་ཤ་ན་བྱ་བའི་ཤིང་ཏོག་གཅད་ན་འཁོར་ལོ་ལྟ་བུ་འོང་བ་༡་ཡོད། འཛབ་མནན་ཏ་པ་ ་ས མ་ཡ་བྱ་བ་ལུག་མིག་པ་ཨ་པ་ར་ཛི་ཏ་དཀར་པོའི་མེ་ཏོག དེ་ལྔའི་ཁུ་བས་ལག་པ་གཡོན་པའི་ལག་མཐིལ་དུ་འཁོར་ལོ་བྲིས་ཏེ་ཁུ་ཚུར་བཅངས་ནས་གཡུལ་དུ་ཞུགས་ན་མཚོན་གྱིས་མི་ཚུགས་སོ་་་་ལྔ་ལ་སོགས་པས་་༼མིག་གི་རྟགས་ཅན་འདི། བར་འདི་ནས་ཡིན་མིན་དཔྱོད༽ཕྱོགས་པ་ནི། །བཟླས་བརྗོད་སྟོང་བཟླས་ཏེ་གཡུལ་དུ་ཞུགས་ན། །མཚོན་ཆ་བརྒྱ་བསྣུན་ཀྱང་གནོད་པའི་ཚོར་བ་འབྱུང་བར་མི་འགྱུར་ཞིང་། །མཚོན་གྱིས་ཀྱང་༼ལུས་༽ཆོད་པར་མི་འགྱུར་རོ། །རྡོ་རྗེའི་ལུས་ཅན་དུ་འགྱུར་རོ། །དཔལ་ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས། ཉེ་བའི་སྙིང་པོའི་ལས་ཀྱི་ཆོ་ག་སྟེ་བཅུ་གཉིས་པའོ། །དེ་ནས་གོ་ཆའི་༼དཔའ་བོ་དང་དཔའ་མོའི་གོ་ཆ་༢་དུས་༡་ཏུ་བསྟན་༽ལས་རྣམས་ཀྱིས། །འཇིག་རྟེན་༼ལས་༽གསུམ་ན་༼ལས་༽གང་ཡོད་པ༼འི་སི་ཏི་༽། །ཡིད་ལ་འདོད་པ་ཀུན་༼བསྒྲུབ་པར་༽བྱེད་པ། །གོ་རིམ་བཞིན་དུ་༼དཔའ་བོ་དང་དཔའ་མོའི་གོ་ཆ་ལ་བརྟེན་པའི་ལས་མཆོག་གི་སི་ཏི་ལག་པ་༢་ལ་གོ་ཆའི་ཙཀྲ་བྲིས་ཏེ་རབ་ཏུ་གནས་པ་༽བཤད་པར་བྱ། །དེ་ལ་༼དེ་ལ་འཁོར་ལོ་གྲོ་ག་ལ་སོགས་པ་ལ་ཇི་ལྟ་བ་༤ན་བྲིས་ཏེ་རབ་གནས་བྱས་ཏེ་དཔུང་པ་ལ་བཏགས་ནས་༽གོ་ཆ་བཟློས་བཞིན་དུ་ལམ་དུ་ཞུགས་ན་༼ཡང་ན་གོས་ཀྱི་ཐུ་བ་ལ་རླངས་པ་ཕྱིར་མི་འཆོར་བར་བྱས་ཏེ་གོ་ཆའི་སྔགས་བརྗོད་ཅིང་འཁོར་ལོ་བསམས་ནས་མདུད་པ་བྱས་ཏེ་ལམ་དུ་ཞུགས་ན༽། །རྐུན་མ་འམ་སྟག་གིས་འཇིགས་པར་མི་འགྱུར་བའམ། །མི་སྣང་བར་འགྱུར་རོ། །༼འཁོར་ལོ་དང་ལྡན་པས་༽གོ་ཆ་ཟློས་བཞིན་དུ་ཡང་རྒྱལ་པོའི་ཕོ་བྲང་དུ་༼སྐོར་མཛོད་དང་བཙུན་མོའི་ནང་དུ་༽སླས་ཀྱི་ནང་དུ་ཞུགས་ན་ཡང་མི་སྣང་བར་འགྱུར་ལ། །གང་འདོད་པ་དེ་བླངས་ཏེ་འགྲོ་བར་འགྱུར་རོ། །ལྷ་རྣམས་ཀྱིས་ཀྱང་མི་མཐོང་ངོ། །གོ་ཆའི་སྔགས་བརྒྱ་བཟླས་པའི་ལག་པས་གང་ལ་རེག་པ་དེ་མདུང་བཞིན་དུ་རེངས་པར་འགྱུར་ཏེ། །༼རེངས་པ་དེ་༽སུམ་བཅུ་རྩ་གསུམ་པས་ཀྱང་མི་གཡོའོ། །༼གོང་གི་ལག་པའི་འཁོར་ལོ་དེ་བྲིས་པའི་ཆུ་གཏོར་ཞིང་༽སྔགས་བཟླས་ཏེ་༼བདགགི་༽རྐང་པས་བསྣུན་ན་༼རེངས་བ་དེ་༽ཐར་པར་འགྱུར་རོ། །༼མིའི་ཐོད་པར་རང་གི་མཛུབ་མོའི་ཁྲག་གིས་མནངས་ཏེ་༽རང་གི་ཁྲག་གིས་ཐིག་ལེ་བྱ་སྟེ་༼གོ་ཆའི་སྔགས་༽ལན་གསུམ་བཟླས་ན།༼ཐོད་པ་ལ་ཙཀྲ་བྲིས་ཏེ་རབ་གནས་བྱས་ཏེ་མཛུབ་མོ་ལས་ཁྲག་གཏོན་ལ་ཐོད་པའི་ཙཀྲ་ལ་བསྐུས་ལ་འཛུབ་མོས་ཙཀྲ་དེ་མཉེས་ནས་དཔྲལ་བར་ཐིག་ལེ་བྱས་ན་བལྟས་ན་རྫས་ལ་སོགས་པ་༽ །གང་གིས་མཐོང་ཞིང་གང་མཐོང་བ་ཐམས་ཅད་ཀྱི་ཁྲག་འདྲེན་པར་བྱེད་དོ། །གང་གི་ཁྱིམ་དུ་ཁྲོ་བ་དང་བཅས་པས་ལན་སྟོང་བཟླས་ན་ཐམས་ཅད་རིམས་ཀྱིས་བཏབ་པར་འགྱུར་རོ། །༼འཁོར་ལོ་བཀྲུས་པའི་ཆུས་༽ཆུ་ལ་ལན་ལྔ་བཟླས་ཏེ་གཏོར་ན་སླར་འཚོ་བར་འགྱུར་རོ།༼གང་གི་སྣ་གཡས་ནས་ཐུགས་ཀའི་ཧཱུཾ་ལས་གོ་ཆའི་སྔགས་སྤྲོས་ཏེ་བསྒྲུབ་བྱའི་ལྕེ་ལ་ཐིམ་པར་བསམ་ཞིང་སྔགས་བཟླས་ན་ ༤་བ་ཙན་དན་ག་བུར་གྱིས་རྒྱས་པ་དང་བསྲུང་བ་ལ་གྷི་ཧཾ་དང་ཁྲག་གིས་སོ། དབང་དང་དགུག་པ་ལ་ཁྲག་དང་རྒྱ་སྐྱགས་ཀྱིས་སོ། མངོན་སྤྱོད་ལ་དུག་དང་ལན་ཚྭ་དང་སྐྱེ་ཚེས་སོ། དེ་བཞིན་དུ་ཞི་དྲག་གི་ཡིག་མགོ་ནང་དུ་བསྟན༽ །གང་གི་གདོང་ལ་བལྟས་ཏེ་བཟླས་ན་དེའི་ཚིག་འཕྲོག་པར་འགྱུར་རོ།༼སོ་ པོ་ན་ཀའི་ཤིང་རྟོག་སྐྱུར་པོ་དང་པར་མའི་རོ་དང་བསྲེས་ཏེ་ལུས་ལ་བྱུགས་ན༽ །ཆུ་བོ་དང་རྫིང་བུར་གནས་ཏེ། །སྟོང་བཟླས་ན་ཆུའི་སྟེང་དུ་འགྲོ་སྟེ་། ༼ ་་་་་་་་་་་ཞི་དྲག་གཉིས་སུ་ཕྱེ་ནས་ཞི་བའི་ཁོངས་སུ་རྒྱས་པ་དང་དབང་བསྡུད། མངོན་སྤྱོད་ཀྱི་ཁོངས་སུ་བརྒྱལ་བ་དང་རེངས་པ་དང་དབྱེ་བ་དང་བསྐྲད་པ་ལ་སོགས་པ་བསྡུད་གསུང་།ཞི་བའི་ཡིག་མགོ་ནང་དུ་བསྟན་དྲག་པོའི་ལས་རྣམས་ལ་ཕྱིར་བསྟན་གསུང་༽ །ཐང་ལ་ཇི་ལྟ་བ་བཞིན་དུ་ཆུ་ལའང་དེ་བཞིན་དུ་འགྲོའོ། །༼པདྨའི་སྐྱལ་བུར་ཉ་ལྕིབས་ལ་སོགས་པ་བརྫངས་ཏེ་རང་གི་དེ་ཁའི་གཏིང་དུ་བཅུག་སྟེ་ཡང་ན་རང་གི་ལུས་ལ་བཅངས་པ་རང་གིས་ཆུའི་གཏིང་དུ་བསྡད་ཀྱང་མི་འཆི་གསུང་། རང་གི་ཁའི་ཁར་བཏོན་ན་མི་འབྱིང་པའོ་༽ཆུ་ལ་ཞུགས་ན་ཆུ་བོ་ཡང་རྒྱ་མཚོ་བཞིན་དུ་གནས་སོ། །༼ཁྲག་དང་རྒྱ་རྐྱགས་རྗེས་པས་༽ལག་པ་གཉིས་ཉེད་བཞིན་དུ་ལན་སྟོང་བཟླས་ན་༼ ཡང་རྒྱལ་ལ་རས་སུ་འཐག་པའི་དུས་ངན་ཡང་རྒྱལ་ལ་བྱ་སྟེ་རྒྱལ་༣་གྱི་སྦྱོར་བས་སོ་༽རྣལ་འབྱོར་མ་ཐམས་ཅད་དབང་དུ་འགྱུར་རོ། །རྣལ་འབྱོར་སྣ་ཚོགས་པའི་གཟུགས་ཅན་མཁའ་འགྲོ་མ་དང་། ལཱ་མ་དང་། ༼ཚིགས་པ་མཐོ་དམན་དུ་ཡོད་པའི་ཤ་དཀར་པོར་འོང་། དམའ་མོའི་ཤ་ནག་པོར་འོང་སྟེ་༽ཁཎྜ་རོ་ཧར་གྲགས་པ་ཐམས་ཅད་དེའི་དབང་དུ་འགྲོ་བར་འགྱུར་རོ། ༼དེ་ཡང་སྦྲུལ་གྱི་རྒྱལ་པོ་བྱ་བ་དཀར་ནག་ཁྲེའུར་ཡོད་པ་དེ་སོ་སོར་ཕྱེ་སྟེ་དཀར་པོའི་ཞག་རས་སྐུད་འཐག་པ་ཆ་༡་ལ་བསྐུ་ནག་པོའི་ཞག་རས་སྐུད་འཐག་པ་ཆ་༡་ལ་བསྐུས་ཏེ་སྦྲུལ་གྱི་གཟུགས་བརྙན་དེ་ནས་བརྟགས་ཏེ་སོ་སོར་ཤེས་པར་བྱས་ལ་དཀར་པོའི་ཕྱོགས་ལ་དཀར་པ་བྱུགས་ལ་གྱོན།ནག་པོའི་ཕྱོགས་ལ་ནག་པོ་གྱོན་ནའོ།ཡར་ངོ་ལ་དཀར་པོ་གྱོན།མར་ངོ་ལ་ནག་པོ་གྱོན།དང་པོ་རས་བལ་འདེབས་པ་ན་ཡང་རྒྱལ་ལ་བཏུས་ཏེ་རླམ་པ་ལ་སོགས་པ་ན་༽ །སྐར་མ་རྒྱལ་ལ་རས་བྱས་ལ་དེ་གྱོན་པའི་ལུས་ཀྱིས་སྟོང་ཕྲག་བཅུ་བཟླས་ན། །དེའི་འོག་ཏུ་འགྲུབ་པར་འགྱུར་རོ། །དེ་གྱོན་པའི་ལུས་དཔག་ཚད་སྟོང་གི་བར་དུ་ནམ་མཁར་༼འགྲོ་ཞིང་༽མི་སྣང་བར་འགྱུར་རོ། །༼ཡུལ་ཕྱོགས་༽གང་དུ་འདོད་པ་དེར་༼རྐང་འགྱོགས་ཀྱིས་༽འགྲོ་བར་འགྱུར་རོ། །དེས་རྒྱ་མཚོའི་མཐར་ཐུག་པའི་ས་རྣམས་སུ་འགྲོ་བར་འགྱུར་རོ། །༼མཁའ་སྤྱོད་དུ་ལོ་ཀ་དང་དུ་ཁའི་གནས་༽སྟེང་གི་རྒྱུན་དུ་འགྲོ་བར་འགྱུར་རོ། །༼དེ་ལྟར་དངོས་གྲུབ་འགྲུབ་པ་དེ་ཡང་དཔེར་ན་༽དབང་པོ་༼དྲུག་༽དང་གང་ལམ་༼དུ་ཡུལ་གསལ་བར་༽འགྱུར། །དེ་དང་དེ་ཡི་ངོ་བོར་བྱ། །༼དེ་༤ན་དུ་༽མཆོག་ཏུ་༼བསྐྱེད་རྫོགས་༢་ལ་༽མཉམ་བཞག་སྦྱོར་བ་ཡིས། །༼དངོས་པོ་༽ཐམས་ཅད་༼དེ་ཁོ་ན་ཉིད་ཀྱི་ངོ་་བོར་རྟོགས་པར་འགྱུར་གསུང་༽སངས་རྒྱས་རང་བཞིན་༼མཆོག་དུ་༽འགྱུར། །ཤིང་ཡོངས་འདུའི་ཁུ་བཅུད་བླངས་ལ་༼མེ་ཏོག་སྔོན་པོ་ཡོད་པ་དེ་ཡང་ཆོས་གང་ཡང་འཛིན་པའི་རྩི་ཡིན།གོ་ཆའི་སྔགས་༢་ཅར་ལས་སྦྱོར་དུས་སུ་༽བཟླས་བརྗོད་སྟོང་བྱ་སྟེ་གང་ལ་ཐིག་ལེ་བྱས་པ་དེ་༼རེངས་པར་༽ཤིང་དུ་འགྱུར་རོ། །༼ཐིག་ལེ་དེ་ཉིད་བཀྲུས་པའི་ཆུས་༽ཆུ་ལ་༼གོ་ཆའི་སྔགས་༢་པོ་དེ་༽ལན་བདུན་བཟླས་ཏེ་གཏོར་ན་སླར་འཚོ་བར་འགྱུར་རོ། །འདི་དག་གླང་པོ་ཆེའི་རྐང་རྗེས་ཀྱི་༼ས་འམ་དམིགས་པའི་དུམ་བུ་༽བསྒྲུབ་བྱའི་༼རྐང་རྗེས་ཀྱི་༽རྡུལ་བླངས་ཏེ། །ལན་སྟོང་བཟླས་ན་གང་ལ་བསྣུན་པ་དེ་གླང་པོ་ཆེར་འགྱུར་རོ་༼རྟ་ལ་སོགས་པ་ཡང་དེས་འགྲེའོ་༽། །དཔལ་ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་གོ་ཆའི་སྔགས་ཀྱི་ཆོ་གའི་ལེའུ་སྟེ་བཅུ་གསུམ་པའོ། །དེ་ནས་བོང་བུའི་རྣལ་འབྱོར་བདག་༼ཉིད་བྱས་པས་རྟེན་འབྲེལ་གྱི་ཆེ་བ་ཡིན་གསུང་༽ །༼མྱུར་དུ་༽ཡིད་ཀྱིས་ཤུགས་ནི་༼མི་འགྲུབ་པ་བཟློག་ཏེ་མྱུར་དུ་འགྲུབ་པ་༽བཟློག་པའི་ཕྱིར། །གང་གིས་བསྒྲུབ་པ་པོ་༼མྱུར་དུ་༽འགྲུབ་པའི། །༼དེ་ལྟ་བུའི་༽བསྒྲུབ་པ་དེ་ནི་བཤད་པར་བྱ་༼སྔོན་དུ་བསྙེན་པ་སོང་བས་དལ་བྲི་བ་ན་སྙིང་པོའི་གཞི་འདི་ལྟར་བྱས་ཏེ་བྲི་ཐུགས་ཀྱི་རྣམས་ནམ་མཁའ་ལྡིང་གི་གདོང་ཅན་དུ། གསུང་གི་རྣམས་རྨ་བྱའི་གདོང་དུ། སྐུའི་རྣམས་སེང་གེའི་གདོང་ཅན་དུ། སྒོ་མ་༤་འདྲ འཚམས་༤་ཧེ་ཀྲི་སྣ་པ་རི་སྟག་དང་དོམ་མགོ་ཅན་དུ་བྲི་༽། །རྣལ་འབྱོར་མ་ནི་ལཱ་མའི་གཟུགས། །དེ་བཞིན་དུ་ནི་མཁའ་འགྲོ་མ། །ཁཎྜ་རོ་ཧའི་འདོད་གཟུགས་ཅན། །བོང་བུའི་༼གདོང་པ་༽རྣམ་པ་ཁྲག་གི་གདོང་།༼དེ་ནས་ལྷོ་ཕྱོགས་སུ་འབྲས་ཕུབ་མས་མིའི་སྐྱེ་བ་བདུན་པ་ལ་སོགས་པ་གང་འདོད་ཀྱི་གཟུགས་བོང་ཁོང་སྟོང་དུ་འཇུག་དུ་འདོད་པ་བྱས་མདོག་ཅན་བྱས་ལ་སྙིང་ཁར་འཁོར་ལོ་བཅུག་སྟེ་མདུན་དུ་མེ་ལོང་བཞག་ཏེ་བལྟས་ན་གང་འདོད་པའི་སྐྱེ་བ་བདུན་ན་གང་ན་ཡོད་པ་དེའི་གཟུགས་མཐོང་བའམ་ཚེ་དེ་ལུས་འདོར་བ་དང་མ་ཟད་པ་སོགས་ཟད་པ་ལ་སོགས་པ་དེའི་གཟུགས་ནག་པོར།མ་ཟད་པ་དཀར་པོ་མཐོང་བ་ལ་སོགས་པ་འབྱུང་ངོ་༽ །མཁའ་འགྲོ་རྩེ་གསུམ་ལག་ན་ཐོགས། །༼རང་གཞན་༢་ཀ་༽ཚེ་ཟད་པ་དང་ཚེ་རིང་བ། །སྣང་བ་ཡིད་དུ་གྲུབ་པ་ཡིན། །འདི་ནི་བོང་འདྲའི་རྣལ་འབྱོར་པས། །དེ་ཚེ་བོང་བུར་༼འི་ནང་ནས་༽བལྟ་བར་བྱ། །གླང་པོ༼འི་སྐྱེ་བ་བདུན་པ་༽་ཉིད་དུ་སྔོན་དུ་གང་། །མཐོང་སྟེ་གླང་པོའི་གཟུགས་ཅན་ཡིན། །༼མིའི་སྐྱེ་བ་བདུན་པའམ་གླང་པོ་ཆེ་སོགས་བདུན་༽གང་དང་གང་ནི་སྐྱེ་བ་ནི། ༼སྔར་གྱི་༽ །སྔོན་གྱི་སྐྱེ་༼བ་བདུན་༽བར་འགྱུར་བ་དག །༼སྐྱེ་བ་བདུན་༽དེ་ནི་དེ་འདྲའི་གཟུགས་དག་ཏུ། །རྣལ་འབྱོར་པས་ནི་འདི་ནི་མཐོང་། །དེ་ནི་གྲུབ་པའི་༼ཅི་འདོད་༽སྐྱེས་བུ་འགྱུར། །སྐྱེ་བ་བདུན་༼པ་རྙེད་ནས་༽གྱི་རིམ་པ་ཡིས།༼སྐྱེ་བ་བདུན་པའི་ཤ་མི་ཤ་༽ །དེ་ཡིས་༼ཊ་ཀི་ནིའི་ལ་༽གཏོར་མ་༼སྦྱིན་བསྲེག་ཟེར་༽རིམ་པར་བྱས། །བསྒྲུབ་པ་པོ་ནི་༼དངོས་གྲུབ་ཐམས་ཅད་༽འགྲུབ་པར་འགྱུར།༼སྐྱེ་བ་བདུན་པ་དེའི་ཤ་ཟོས་པའམ་གོ་རོ་ཙ་ནས་ཐིག་ལེས་བྱས་ནས་༽ །དེ་བཞིན་དཔག་ཚད་བརྒྱ་ཕྲག་ནི། །སྟོང་༼སྟེང་ཟེར་༽གི་སྟེང་དུ་༼མཁའ་སྤྱོད་དུ་༽སྐད་ཅིག་༼གིས་༽འགྲོ། །རྣལ་འབྱོར་༼སྙིང་པོའི་ཡི་གེ་ཉི་ཤུ་༢་པའི་༽སྔགས་མཆོག་དམ་པ་སྟེ། །མཁའ་འགྲོ་མ་ཡི་སྦྱོར་༼བས་ ཕྱིའི་རིགས་ལྡན་མ་མཆོད་པ་ལ་ངོ་ཤེས་དགོས་ངོ་ཤེས་པ་ལ་བརྡའ་དགོས་པ་༽གྲུབ་བྱེད། །རྣལ་འབྱོར་མཚན་མས་༼སྔོན་དུ་བསྙེན་པ་ལ་མཚན་མ་ཐོབ་ནས་༽གང་༼ཐོབ་ནས་༽ཟློས་པ་༼དེ་ནས་༽ །༼ཐུན་༤་ངེས་པ་༽ །ཟླ་བ་གཅིག་གིས་འགྲུབ་པར་འགྱུར། །གསང་བ་ཡི་ནི་སྔགས་༼ཉི་ཤུ་༢་པ་༽འདི་ནི། །སྙིང་པོ༼འི་སྔགས་༽་ཤིན་ཏུ་དགེ་བ་ཡིན། །གང་ཞིག་༼སྔགས་༽དེ་ཉིད་༼སྙིང་པོའི་སྔགས་སྐྱེ་བ་བདུན་པའི་བསྒྲུབ་པ་༽ཤེས་པ་ནི། །དེ་འདིར་རྣལ་འབྱོར་པ་ཉིད་དུ། །ཐེ་ཚོམ་མེད་དེ་༼ཛེ་ཀ་༽དེ་ཉིད་ནི། །ང་ཡིས་དེ་རྣམས་༼འགྲུབ་པར་༽བསྟན་པ་ནི། །མཁའ་འགྲོ་དྲ་བའི་བདེ་མཆོག་ཡིན་༼དང་པོ་ནམ་མཁའ་དང་མཉམ་པ་ལས་ཕྱིས་གུ་སཾ་བྷྲ་ར་ལས། ལས་བསྟན་པ་དེ་ཕྱིས་འདིར་བསྡུས་ཏེ་བསྟན་༽། །དཔལ་ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་དཔལ་ཧེ་རུ་ཀ་བོང་བུའི་རྣལ་འབྱོར་མཛད་པའི་ཆོ་གའི་ལེའུ་སྟེ་བཅུ་བཞི་པའོ། །དེ་ནས་༼ནམ་མཁའ་དང་མཉམ་པ་དང་ཨ་བི་ར་ན་དང་ཧེ་རུ་ཀ་འབྱུང་པ་ལ་སོགས་པ་༽སྡོམ་པ་ཐམས་ཅད་ལ། །གང་ཞིག་༼དེ་ལྟ་བུའི་ལམ་དང་འབྲས་བུའི་གསང་པ་ཡང་རིགས་ལྡན་མ་མཆོད་པ་ལས་འགྲུབ་ལ་དེ་ལ་རིགས་ལྡན་མ་ངོ་ཤེས་དགོས་ལ་དེ་ལ་བརྡའ་དགོས་པས་ཡི་གེ་རེ་རེ་བའི་བརྡའ་བསྟན་ཏོ།འདི་ན་མར་ཡི་གེ་ལྡབས་པ་རྣམས་ནི་སྐབས་ཀྱི་སྟོབས་ཀྱིས་དོན་སོ་སོ་ལ་འཇུག་པ་ཡིན་ལ་སྐབས་ཀྱི་སྟོབས་དང་མ་འབྲེལ་ན་ནི་དོན་དེ་དག་དྲན་པས་ཆོག་གསུང་སྐད༽བརྡ་ནི་ཤེས་འབྱུར་བ། །དེ་ཉིད་ཀྱིས་དེ་འགྲུབ་པར་ནི། །ཐེ་ཚོམ་མེད་པར་བཤད་པ་ཡིན། །རྟ་ཞེས་བྱ་བ་སྐྱེས་བུར་བཤད། ༼ཕར་བྱེད་ན་ཡང་བྱེད་དང་ཚུར་བྱེད་ན་ཡང་བྱེད་དེ་ཡི་གེ་དེ་དང་དེའི་དོན་གྱི་གོ་བ་སྐྱེས་བུ་ཞེས་བྱ་བའམ་བུད་མེད་ཞེས་བྱ་བ་ལ་སོགས་པ་བསྐྱེད་པའོ༽ །༼ཡི་གེ་འདི་གསལ་པོ་མི་མཐོང་ཌི་༽ཞེས་བྱ་བ་༼དོན་གོ་བ་ཙམ་གྱིས་ཆོག་བྱ་མི་དགོས་གསུང་༽སྐྱེས་བུར་བཤད། །ཌི་ཞེས་བྱ་བ་བུད་མེད་ཡིན། །པུ་ཞེས་བྱ་བ་གནོན་པ་༼སྙོམས་འཇུག་༽ཡིན། །སུ་ཞེས་བྱ་བ་༼འབྲས་ཆན་ལ་སོགས་པ་༽ཟ་བ་ཉིད། །མ་ཞེས་བྱ་བ་མ་རུ་བཤད། །ཨ་༼ཨོ་༽ཞེས་བྱ་བ་ཆུང་མ་ཉིད། །བྷི་༼དྲི་ཟ་༽ཞེས་བྱ་བ་སྲིང་མོ་ཡིན། དྷི་ཞེས་བྱ་བ་མཛའ་མོར་བཤད། །ལུ་ཞེས་བྱ་བ་བུ་མོ་ཡིན། །སྟི་ཞེས་བྱ་བ་༼ཟླ་མཚན་གྱི་༽ཁྲག་ཏུ་བཤད། །ས་ནི་ཞི་བའི་༼ཆང་༽བཏུང་པ་ཡིན། །པེ་ཞེས་བྱ་བ་ཐུག་པ་སྟེ། །ཧེ་ཞེས་བྱ་བ་དེ་བཞིན་ཤ། བྷ་ཞེས་བྱ་བ་༼ཤ་༽ཟ་བ་ཡིན། བྷུ་ཞེས་བྱ་བ་༼འཕྲད་པའི་༽ཕྲད་པ་ཡིན། །པཱི་ཞེས་བྱ་བ་དུར་ཁྲོད་ཡིན། བྷུ་ཞེས་བྱ་བ་རོ་ཡིན་ནོ། དྷི་ཞེས་བྱ་བ་༼བྷ་ར་ཧི་༽རྣལ་འབྱོར་མ། །༼གོ་ཟེར་༽ལེ་ཞེས་བྱ་བ་ལཱ་མ་ཡིན་༼མཁའ་འགྲོ་མའི་རིགས་མས་བྱུང་བའོ༽། །སཏྲི་ཞེས་བྱ་བ་གཟུགས་ཅན་ཡིན། །ཀུ་ཞེས་བྱ་བ་མཁའ་འགྲོ་མ། །ཧ་ནི་ཁཎྜ་རོ་ཧ་ཉིད། །ཛ་ཞེས་བྱ་བ་བྱིན་པ་གཉིས༼འཁྲིལ་ལེ་བ་༽། །བྷ་ཞེས་བྱ་བ་༼གསང་བའི་རྡོ་རྗེ་བོ་ལའི་བརྡའ་ཡིན་༽དཔུང་བ་ཡིན། །སུ་ཞེས་བྱ་བ་༼བཀྲ་ཤིས་པའི་ཚིག་༽གསོང་པོར་སྨྲ། །ས་ཞེས་བྱ་བ་ལེགས་འོངས་ཡིན། །༼འདི་ཚོ་བྷ་དན་ཏའི་དཔེའ་ལས་མ་བྱུང་གསུང་༽མི་ཞེས་བྱ་བ་ཉ་ཡིན་ལ།བྷྱོ་ཞེས་བྱ་བ་བཟའ་བ་ཡིན། །བྱི་ཞེས་བྱ་བ་བཏུང་བ་ཡིན། །ག་ནི་༼བྲམ་ཟེ་མ་སོགས་༽བགྲོད་དང་བགྲོད་མིན་༼རྡོལ་བ་མོ་སོགས་༽ཡིན། །ཀ་ཞེས་བྱ་བ་འདོང་པ་ཡིན། །ས་ཞེས་བྱ་བ་གཞན་༼དུ་༽མི་འགྲོ་༼བ་༽། །ར་ཞེས་བྱ་བ་ཁྲོ་༼བ་༽མེད་མ། ༼འདི་མན་ཆད་ཡོད་༽ །དུ་ཞེས་བྱ་བ་སྤྱོད་ངན་མ་༼དྲིས་བའི་འདི་དག་མེད་གསུང་༽། །སུ་ཞེས་བྱ་བ་སྐལ༼་བ༽་བཟང་༼གཞོན་པ་༽མོ། །ན་ཞེས་བྱ་བ་༼རྒན་མོའི་༽སྐལ་ངན་མོ། །ས་ཞེས་བྱ་བ་དམ་ཚིག་ཅན། །ཨ་ཞེས་བྱ་བ་དམ་ཚིག་མེད། །ཨཱ་ཞེས་བྱ་བ་༼ཚོགས་ཀྱི་ནང་དུ་༽འོངས་པ་ཡིན། །ན་ཞེས་བྱ་བ་༼ཚོགས་ཀྱི་ནང་དུ་༽མ་འོངས་ཡིན། །སོ་ཞེས་བྱ་བ་༼བརྩེ་སེམས་ཆེ་བ་༽ཆགས་པ་ཡིན།༼ཡི་གེ་རེ་རེ་དོན་༢་སྟོན་པར་འདོད་པའམ་ཡི་གེ་སོ་སོས་དོན་༡་སྟོན་པར་འདོད་པ་འབྱུང་ཡང་བརྡ་དེས་དོན་གཉིས་སྟོན་པར་གོ་བར་ཆོག་གསུང་༽ །འདི་དག་ནི་ཡི་གེ་རེ་རེ་ཞིང་བརྡ་ཡིན་ཏེ། །དཔའ་བོ་དང་སྲིང་མོར་༼༡་གིས་༡་ངོ་༽ཤེས་པར་བྱའོ།༼བསྒྲུབ་པ་པོ་ཉན་ཐོས་ལ་སོགས་པ་༽ །དད་པ་དང་མི་ལྡན་པ་རྣམས་ལ་༼བརྡའ་ན་༽སྦྱིན་པར་མི་བྱའོ།༼ རིགས་ལྡན་མ་མཆོད་པ་ལ་སོ་སོའི་སྐྱེ་བོ་དང་ཏིར་ཏི་ཀ་དང་མཚན་ཉིད་ཐེག་པ་ལ་སྦྱིན་པར་མི་བྱ་གསུང་༽ །༼གསང་སྔགས་མཆོག་ལ་༽དམ་ཚིག་གི་མཆོག་ཡིད་དུ་འོང་བ་ལ་༼དད་ལ་༽དགོས་པ་དང་ལྡན་པ་རྣམས་ལ་སྦྱིན་པར་བྱའོ།༼ཌ་ཀི་ནི་སྤྱིའི་མཚན་ཉིད་ལྔ་ལྔར་བསྟན་ སྤྱིར་བསྟན་༽ །དཔལ་ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་བརྡ་བའི་ལེའུ་སྟེ་བཅྭ་ལྔ་པའོ། །དེ་ནས་༼མཧཱ་མུ་ཏྲ་༽དངོས་གྲུབ་ཆེན་པོ་༼གྲུབ་པའི་རྒྱུ་རིགས་ལྡན་མ་ཡིན་པས་དེའི་མཚན་ཉིད་ གཞན་ལ་༽གསང་། །བསྒྲུབ་པ་པོ་ལ་བཤད་བྱ་བ། ༼སི་ཏི་བསྒྲུབ་པ་ལ་༽ །དད་པ་རབ་དང་ལྡན་པ་དང་༼བླ་མ་དང་བུད་མེད་ཐམས་ཅད་ལ་དད་པ་བདེ་མཆོག་དང་ ལྡན་པ་༣༽། །༼ཤ་ལྔ་བདུད་རྩི་ལྔ་རྟེན་པ་ལ་ རྣམ་རྟོག་ཆུང་༽མཆོག་ཏུ་དམ་ཚིག་བརྟེན་པའི་སྣོད་༼དུ་གྱུར་པ༽། །དེ་ལ་རབ་ཏུ་བསྟན་པར་བྱ། །ཡིད་ནི་དགའ་བ་༼དང་ལྡན་གཞན་ལ་༽ཕན་བྱེད་པ།༼རིགས་བདུན་དུ་མངོན་པ་ནི་ཧེ་རུ་ཀ་རྡོ་རྗེ་སེམས་དཔའ་༡་ཡིན་༽ །དད་པ་ཅན་ལ་རབ་སྦྱིན་པ། །ཁ་དོག་༼གི་རྟགས་དང་༽དྲ་ལ་༼དབྱིབས་གོས་དགའ་བའི་ཡུལ་གྱི་སྤྱོད་ལམ་ཏེ་༽སོགས་པ་དང་། །༼དེ་ལྟ་བུ་དེ་སྙོམས་འཇུག་བྱས་ཏེ་དེ་ཁོ་ནའི་ པུ་ཙས་མཆོད་པ་༽གཉིས་མེད་དཔའ་བོས་བརྟེན་པར་བྱ། །༼ཌ་ཀི་ནི་༽དེ་ཉིད་༼ཀྱི་མཚན་ཉིད་༽ཤེས་པ་ཙམ་གྱིས་ནི། །༼མཧཱ་མུ་ཏྲའི་༽བསྒྲུབ་པ་པོས་ནི་དངོས་གྲུབ་ཐོབ་༼འདི་རྒྱུ་རྡོ་རྗེ་འཛིན་པའི་དབང་དུ་བྱས་པ་ནི། དབྱེ་བཞི་ལ་རིགས་དང་སྤྱོད་ལམ་དང་ལས་དང་པོ་རིགས་ཀྱི་དབྱེ་གཞི་ལས་ཕྱེ་བའོ༽། །༼རྒྱལ་རིགས་ཀྱི་བུ་མོ་དང་རྡོ་རྗེ་སེམས་དཔའི་རིགས་༽བུད་མེད་པད་༼མ་དཀར་པོ་༽རྩ་ལྟར་༼ཁ་ཏོག་གི་རྟགས་༽དཀར་ཞིང་། ༼བུད་མེད་གང་ཡང་རུང་སྟེ་མཚན་མ་འདི་དག་དང་ལྡན་ན་མིའི་རྒྱལ་རིགས་མར་གདགས། ལྷའི་རྡོ་རྗེ་སེམས་དཔའི་རིགས་ཞེས་བྱ་གསུང་། དེས་འོག་མ་རྣམས་འདྲེ། རེས་ཕལ་ཆེར་མཚན་མ་འདི་རྣམས་རྒྱལ་རིགས་ལ་འོང་གསུང་།༽ །༼དབྱིབས་ཀྱི་རྟགས་༽པད་མའི་འདབ་༼མ་༽ལྟར་དཀྱུས་རིང་༼པའི་༽མིག །༼གོས་ཀྱི་རྟགས་༽རྟག་ཏུ་གོས་ནི་དཀར་ལ་དགའ། །༼དྲིའི་རྟགས། དབུགས་དང་རྡུལ་༽ཙན་དན་གསར་བའི་དྲི་དང་ལྡན། །༼དགའ་བའི་ཡུལ་གྱི་སྤྱོད་ལམ། ཆོས་འཆད་པ་དང་ཆོས་བྱེད་པ་མཐོང་ན་དགའ་བ་དང་༽བདེ་གཤེགས་འདུས་པ་ཉིད་ལ་དགའ། །༼རྡོ་རྗེ་སེམས་དཔའ་དང་ཕག་མོའི་རིགས་༽རིགས་རྒྱུད་༼འདི་དང་འོག་གི་དམར་ཞིང་༽ལས་བྱུང་ཤེས་པར་བྱ། །བུད་༼མེད་༽གང་༼ཁ་ཏོག་༽བཙོ་མའི་གསེར་འདྲ་ཞིང་། །༼གོས་༽དམར་དང་སེར་བའི་གོས་ལ་དགའ། །༼དྲི་༽ཛཱ་ཏི་༼དོམ་པའི་༽ཙམ་པའི་དྲི་༼ནིའི་རིགས་༽དང་ལྡན། །དེ་ཡང་༼རད་ནའི་བསྒྲུབ་པ་པོ་༽དཔའ་བོའི་༼བཟང་ཟེར་༽རྗེས་འགྲོ་འགྱུར། ༼དབྱིབས་དང་དགའ་བའི་ཡུལ་སྔ་མས་ཤེས་པར་བྱ་སྟེ་སྔ་མ་ལ་ལྟོས་པ་འོག་མར་ཀུན་ལ་ཤེས་པར་བྱ་༽ །༼དམངས་མོ་ཧེ་རུ་ཀའི་རིགས་༽ཐམས་ཅད་ཨུད་པལ་ལྟར་༼ཁ་ཏོག་༽སྔོ་བསངས། །དྲི་དང་གོས་ནི་སྔོ་ལ་དགའ། །ཨུད་པལ་སྔོན་པོའི་དྲི་ཡོད་པ། །དེ་ནི་དཔའ་བོ་བཟང་༼མི་བསྐྱོད་པའི་བསྒྲུབ་པ་པོའི་༽རྗེས་འགྲོ༼་ཚོས་མ་དོན་གྲུབ་ཀྱི་རིགས་ལ་དགའ༽། །ཤིན་ཏུ་རྣམ་དག་༼གར་མ་དང་སྣང་བ་མཐའ་ཡས་ཀྱི་རིགས་༽བུད་མེད་ནི། །པད་མ་དཀར་འདྲའི་༼གཡུང་མོ་གསུང་༽མདོག་གང་ཡིན། །རྟག་ཏུ་༼དམར་པོ་༡་ཡོད་༽པད་མའི་རྩ་བའི་དྲི། །དེ་ཡང་དེ་བཞིན་དཔའ་བོའི་བློ་༼སྣང་བ་མཐའ་ཡས་བསྒྲུབ་པ་པོས་བསྟེན༽ །༼འདི་འབྲས་བུ་རྡོ་རྗེ་འཛིན་པའི་དབང་དུ་བྱས་པ་ཡིན་༽ །དམར་ཞིང་སེར་སྐྱའི་༼འདི་ཡང་རྡོ་རྗེ་སེམས་དཔའི་རིགས་ཏེ་གྱུང་མོ་ལ་བརྟག༽བུད་མེད་གང་༼ཁ་ཏོག་༽། །གཟུགས་བཟང་གོས་ནི་དམར་བ་དང་། །མ་ལི་ཀ་དང་ཨུད་པལ་དྲི། །༼བཛྲ་བྷ་ར་ཧིའི་རིགས་༽དེ་ནི་རྡོ་རྗེའི་༼སེམས་དཔའ་༽རིགས་བྱུང་བ། ༼རྡོ་རྗེ་སེམས་དཔའ་༢་འབྱུང་པ་སྔར་ནི་རྒྱུ་རྡོ་རྗེ་འཛིན་པའི་རིགས་ཏེ་༡་དུ་བྱས་པས་དྲུག་ལས་མེད་གསུང་།༽ །སེར་ཞིང་ལྗང་བའི་བུད་མེད་གང་། །གོས་ནི་དཀར་ལ་དགའ་བ་དང་། །ཤྲི་ཤའི་དྲི་ཡི་མེ་ཏོག་༼གི་དྲི་དང་༽ལྡན། །དེ་བཞིན་གཤེགས་རིགས་རྗེས་འགྲོ་ཡིན། །བུད་མེད་གང་ཞིག་༼བྲམ་ཟེ་མོ་དང་རྣམ་པར་སྣང་མཛད་ཀྱི་རིགས་ཀྱི་༽ཁ་དོག་དམར། །དེ་ཡི་མདོག་ཅན་གོས་འཆང་ཞིང་། །༼རད་ནའི་རིགས་ལ་༽རྟག་ཏུ་ག་བུར་དྲི་དང་ལྡན། །རྣམ་སྣང་རིགས་ཀྱི་རྗེས་འགྲོ་ཡིན།༼འདི་རྣམས་ནི་བསྒྲུབ་པ་པོས་བསྟེན་༽ །རྣལ་འབྱོར་མ་ཡི་རིགས་རྣམས་ནི། །དེ་ལྟར་༼བསྡུས་ན་དྲུག༽བདུན་པོ་༼སོ་སོར་བདུན་དུ་༽ངེས་བཤད་པ། །༼བྱ་བ་ཐམས་ཅད་ལག་པ་༽གཡོན་པའི་༼དབྱེ་གཞི་༢་པ་སྤྱོད་ལམ་གྱི་དབྱེ་བ་ནི། སྤྱིའི་མཚན་ཉིད་རྐང་བ་གཡོན་པ་སྔོན་ལ་འགྲོ་བ་མིག་གཡོན་པ་སྔོན་ལ་བལྟས་༽ཀུན་སྤྱོད་ལ་རྟག་དགའ། །༼སོ་སོའི་མཚན་ཉིད་༽འདི་དག་རང་གི་མདོག་གིས་ཁྱབ་༼འདི་ཡན་ཆད་ཕག་མོའི་རིགས་ཡིན་གསུང་། ཕག་མོ་ལ་རིགས་དྲུག་དུ་ཕྱེ་བའོ༽། །༼འདི་ན་མར་རྡོ་རྗེ་སེམས་དཔའི་རིགས་ཡིན་གསུང་༽རིགས་༼ཐམས་ཅད་ཀྱི་༽ཀྱི་རིག་པའི་ཡི་གེ་༼སྟེ་རིགས་ཐམས་ཅད་ཀྱི་མཚན་མ་དང་༽ཡང་། །ཁ་དོག་དྲུག་ཏུ་འགྱུར་བ་ཡིན་༼ཀ་སྟེ་སྣ་ཚོགས་དང་ལྡན་གསུང་༽། །རང་གི་༼རིགས་ཀྱི་༽ཕྱག་རྒྱ་༼ལུས་ལ་༽བཅིང་བ་དང་། །རང་༼གི་༽རིག༼ས་ཀྱི་སྔགས་༽ལས་༼ཏྲཾ་༽བྱུང་ཚིག་༼ངག་༽ཏུ་སྨྲ། །༼ཕྱོགས་༽གཡོན་ནས་འགྲོ་བའི་བུད་མེད་གང་༼སྤྱོད་ལམ་༽། །རྣལ་འབྱོར་པའི་ཡང་གཡོན་ལ་བརྟག །ལག་པ་གཡོན་གྱིས་༼བརྡའ་ཐམས་ཅད་༽མཚོན་པ་དང་། །གཡོན་༼གྱིས་མིག་ཟུར་དམིག་གིས་བལྟ་གསུང་༽ནས་བལྟ་བས་རྣམ་བར་བལྟ། །ལྷ་མོ་རྣམས་དང་༼བུད་མེད་གར་འཚོགས་པར་༽དགའ་སྨྲ་བ། །དེ་ནི་༼བྱིན་གྱིས་བརློབ་ནུས་པ་༽དམ་ཚིག་ལྡན་པར་༼དེ་མེད་ན་༽བཤད། །བུད་གང་གུས་པར་བྱེད་པ་༼པད་མའི་རིགས་ཀྱི་༽ཡིས། །༼རང་གི་༽རིགས་ཀྱི་༼སྔགས་བཟློས་པ་ཧྲི་ཉེས་པ་༽ས་བོན་རབ་སྟོན་ཅིང་། །རིགས་ཀྱི་བྱ་བ་༼པད་མའི་རིགས་ཀྱི་བྱ་བ་༽་མི་འདོར་ལ། །རང་གི་གཙུག་ལག་ཚིག་མི་སྤོང་། །རང་གི་རིག་པ་༼ཧྲི་༽ཟློས་བྱེད་པ། །༼རང་གི་རིགས་ཀྱི་༽དམ་ཚིག་ལྡན་པར་བསྟན་པ་ཡིན། །༼མི་བསྐྱོད་པའི་རིགས་ཀྱི། ཐལ་མོ་གཉིས་སྤྱི་བོར་སྦྱོར་བ་༽ཕྱག་འཚལ་བ་ནི་གང་འཆིང་བ། །གཡོན་པའི་ལུས་ཀྱིས་རྟག་ཏུ་འདུད། །༼བུད་མེད་འདུས་པ་ལ་༽ལྷ་མོ་རྣམས་དང་གང་སྨྲ་བ་༼ཀུན་ཟེར་༽། །དེ་ནི་ངེས་པར་བདེན་པར་འགྲོ་༼བསྒྲུབ་པ་པོ་ལ་སི་ཏི་སྟེར༽། །༼དོན་གྲུབ་ཀྱི་༽མཐེ་བོང་གཡོན་པས་ས་ལ་ནི། ༼རིགས་ཀྱི་མཚན་མ་ཡང་ན་ཨོཾ་ཞེས་པ་༽ །རྟག་པར་རི་མོ་འབྲི་བྱེད་ཅིང་། །མགོ་ནི་འཕྲུག་པར་༼རྡོ་རྗེའམ་རལ་གྲིའམ་ཐོད་པ་གྲུ་༣་པ་འདྲི་༽བྱེད་པ་དང་།༼སྐྱེས་པ་དང་འཕྲད་ཙ་ན་༽ །༼དོན་བསྒྲུབ་ནི་བསྒྲུབ་པ་པོ་ལ་༽ཟུར་གྱིས་ལྟ་ཞིང་༼བརྡའི་༽ལག་པ་སྟོན། །བསྒྲུབ་པོའི་ཡུལ་ལ་ཕན་པ་རུ། །དེ་ཡི་རང་བཞིན་༼དེའི་སྔགས་སུ་ཁ་ཞེས་པ་༽དྲན་པ་དང་། ༼རྣམ་སྣང་གི་རིགས་སུ་༽ །མཁུར་བའམ་ཀོ་སྐོ་དག་དང་ནི། །སྣ་དག་ཏུ་ནི་སོར་མོ་སྟོན་༼རེག༽། །ཟུར་གྱིས་༼བ་རོའི་བསྒྲུབ་པ་པོ་ལ་༽ལྟ་ཞིང་ལན་གཅིག་༼བྲུཾ་ཞེས་པ་རང་གི་རིགས་ཀྱི་༽སྔགས། །ཟློས་ཤིང་རིག་པ་རྟག་པར་༼བསྒྲུབ་པ་པོ་ལ་༽ལྟ། །བདེན་པར་༼དངོས་གྲུབ་སྟེར་བར་༽འགྲོ་བའི་རྣལ་འབྱོར་མ། །ངེས་བར་དམ་ཚིག་ཅན་ཡིན་ནོ། །༼དེ་ལྟ་བུ་དེ་༽རྣལ་འབྱོར་མ་ནི་༼དངོས་གྲུབ་སྟེར་བ་༽ཡིད་ཆེས་འགྱུར། །ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས་རྣལ་འབྱོར་མ་བདུན་གྱི་མཚན་ཉིད་ངེས་པར་བརྟག་པའི་ཆོ་གའི་ལེའུ་སྟེ་བཅུ་དྲུག་པའོ། །དེ་ནས་༼ལོ་ཀ་དང་ལོ་ཀ་ལས་འདས་པའི་མིང་གི་རྣམ་གྲངས་༽རྙེད་དཀའི་རྣལ་འབྱོར་མ། །དེ་བཞིན་༼ཕྱོགས་༡་དུ་བསྟན་༽མཁའ་འགྲོ་མ་རྣམས་ཀྱིས་༼ངོ་ཤེས་པར་བྱ་སྟེ་བསྙེན་བསྐུར་ཞིང་བསྟེན་པ་ལ་༽ ། ༼ད་ནི་ལོ་ཀ་དང་ལོ་ཀ་ལས་འདས་པའི་མིང་གི་རྣམ་གྲངས་ཀྱི་སྒོ་ནས་རིགས་ངོ་ཤེས་པར་བྱ་བ་བསྟན། མཁའ་འགྲོ་མ་བདུན་པོ་འདི་ཨ་བི་ད་ན་ནས་ལས་ལས་སྐྱེས་པར་འདོད། ཀུན་སྤྱོད་ཞིང་སྐྱེས་སུ་འདོད། རྡོ་རྗེ་མཁའ་འགྲོ་དང་གཞུང་འདི་༢་སྔགས་སྐྱེས་སུ་འདོད་ན་གསུང་། ནང་དུ་བདུད་རྩི་ལྔ་ལ་བརྟེན་ནས་ཕྱི་རོལ་དུ་སི་ཏི་འབྱུང་བས་༽ །བདུད་རྩི་ལྔ་རྣམས་༼ཏེ་དངོས་གྲུབ་ལྔ་རྣམས་སུ་༽ཡང་དག་འབྱུང་། །༼ལོ་ཀ་དང་འདས་པའི་མིང་གི་རྣམ་གྲངས་༽ཡ་མི་ནི་དང་སྐྲག་བྱེད་མ་༼དབྱེ་༤་༢་ལས་དབྱེ་བ་ལྔ་དང་དྲུག༽། །འདོད་ལྡན་མ་དང་འཇིགས་གཟུགས་མ། །ཀུན་ཏུ་སྤྱོད་མ་མཛེས་མ་དང་། བྷ་སུ་ར་དང་རྣམ་པ་བདུན། ༼འདི་དག་འཇིག་རྟེན་ལས་འདས་པའི་ཁོ་ན་ལས་གྲགས་པ་དང་འདས་པའི་སྤྱོད་པ་དང་ལྡན་པས་སོ། དོན་གོ་ཆའི་དཔའ་མོ་དྲུག་གོ༽ །སྡུད་པ་མོ་ནི་འདིར་བཤད་བྱ། ༼འདི་ལོ་ཀ་པ་ནས་གྲགས་པ་དང་འདས་པའི་སྤྱོད་པ་དང་ལྡན་པས་༽ །གཟུགས་ཅན་མ་དང་༼ཡ་མི་ནི་གཟུགས་ཅན་མར་སོང་དེས་འདྲེའོ་༽ཙུམ་པི་ཀ་༼སྐྲག་བྱེད་མ་༽ །ལཱ་མ་ཡོངས་གྱུར་༼འདོད་ལྡན་མ་འཇིགས་གཟུགས་༽བྱིས་བཅས་མོ་༼ཀུན་སྤྱོད་༽། །༼མཛེས་མ་༽མི་ལྡོག་ཨེ་ཧི་ཀ་ལྷ་མོ་༼བྷ་སུ་རའོ༽། །མཁའ་འགྲོ་མ་ནི་བདུན་དུ་བཤད་༼ཨུ་ད་༽ ། ༼ནིར་དེ་༽ །མངོན་པར་༼བསྒྲུབ་པ་པོ་ལ་ཆགས་པས། ལོ་ཀ་བའི་བདུན་པའི་རྟགས་སམ་མཚན་ཉིད་སོ་སོར་བཤད་པའི་༽ཞེན་པས་ལྟ་བ་དང་། །སྨིན་མ་༼གཡས་གཡོན་ཡོ་མིན་༽འདེགས་པར་གང་བྱེད་ཅིང་། །༼ཕྱིས་ཀྱི་ རྒྱུ་བ་བོར་ནས་དང་པོའི་རྒྱུ་པ་འཛིན་པ་༽སྔོན་བཞིན་གཟུགས་ནི་སྡུད་བྱེད་ལ། ༼བཞི་སྡུད་པ་དང་འཇོག་པ་ལ་གསུང་། སྔར་གྱི་ རྒྱུ་བ་བོར་ནས་ཕྱིས་ཀྱི་རྒྱུ་བ་འཛིན་པ་༽ །ཕྱིས་ནི་འཇོག་པར་བྱེད་པ་ཡིན། །དེ་ནི་གཟུགས་ཅན་མར་ཤེས་བྱ། །དཔའ་བོ་༼རྣལ་འབྱོར་མ་དེ་༽གཉིས་༼སུ་༽མེད་༼པར་༽བསྟེན་བྱ་འོ་༼བསྟེན་དུ་བཏུབ་པོ་༽ ། ༼གཟུགས་བྱིས་པ་སྡུག་པའམ་མི་སྡུག་པ་ལ་༽ །སྡུག་པའམ་ཡང་ན་མི་སྡུག་པའི། །བྱིས་པ་༼ལ་༽མཁྱུད་ཅིང་ཙུམ་པ་༼འོ་བྱེད་པ་༽ན། །དེ་ནི་ཙུམ་པི་ཀར་ཤེས་བྱ་༼འོ་བྱེད་པར་༽། །༼དེ་བསྟེན་པ་པོ་༽མཁའ་འགྲོ་སྡིག་པ་ཟད་བྱེད་ཡིན་༼བརྟེན་དུ་བཏུབ༽། །ཟས་ཟ་བ་ན་ཟུར་དུ་༼གཡོན་དུ་༽ལྟ། །༼བཞིན་༽ཁྲོ་གཉེར་དང་ནི་གདོང་དག་༼འཁོར་༽དང་། །༼བར་བར་དུ་༽སྨིན་མ་བསྒྱུར་ཅིང་སྡིགས་འཛུབ་བྱེད། །འདི་ནི་གཞན་དུ་༼རྒྱུ་བ་དེ་ཉིད་ལས་གཞན་དུ།བསྒྱུར་༽མི་འབྱིན་ཅིང་། །༼གཞན་དེས་༽འཇིགས་པར་བྱེད་པ་གང་ཡིན་པ། །དེ་ནི་ལ་༼འདིར་བརྟེན་དུ་མི་རུང་གསུང་༽མ་ཡིན་པར་བསྟན། །ཕག་དང་སེང་གེ་བྱི་ལ་དང་། །ལྕེ་སྤྱང་ར་དང་རྟ་དག་དང་། །ཐམས་ཅད་༼སྐྲོད་ཅིང་སྐྲག་པར་བྱེད་པས་༽དེར་ནི་འཇིགས་བྱེད་པ། །༼དེ་ལྟ་བུ་སྐྲག་ཅིང་བསྒྱུར་བར་བྱེད་པས་༽ཡོངས་སུ་གྱུར་མར་དེ་༼མི་བསྟེན་༽བཤད་དོ། །༼བསྒྲུབ་པ་པོ་ལ་༽ཤིན་ཏུ་དགའ་བ་༼ཧ་ཧ་ཞེས་༽རྒོད་པ་༼པ་གསལ་བ་༽དང་། །༼གང་སོང་བར་༽སོང་ནས་སླར་ཡང་མི་ལྡོག་ལ། ༼སྐྱེས་པའམ་བསྒྲུབ་པ་པོ་ལ་༽ །རྗེས་སུ་ཆགས་ནས་གསལ་བར་རྒོད། ༼བྱིས་པའི་སྤྱོད་པ་དང་ལྡན་པས་བྱིས་བཅས་མོ་༽ །ཁཎྜ་རོ་ཧར་དེ་༼དེ་བསྟེན་ནོ་༽བཤད་དོ། །༼དེའི་རྒྱུ་ བ་གང་གིས་མཐོང་བ་དེའི་༽ཡིད་ནི་ཀུན་ཏུ་སྐྱོ་བ་དང་༼དེ་ལྟ་བ་ལ་སོགས་པ་མི་འདོད༽། །༼དེའི་༽རྐང་པ་༼འམ་༽ལག་པས་བོང་བའམ། །གོས་མཐའ་ཡང་ནི་ཤིང་དག་གིས། །དེས་རེག་པ་ནི་༼དེས་གང་ལ་རེག་པ་དེ་མི་འཚོ་༽འཚོ་མི་འགྱུར། ༼ འདི་སྔར་དྲན་པའི་མཚན་ཉིད་དམ་རྟགས་དང་། མི་འདྲ་བ། ཁ་དོན་དང་། དྲི་དང་། ཤའི་གཉེར་མ་ལ་སོགས་པའི་རྟགས་སྟན་གསུང་ ༽ །མི་ལྡོག་༼མར་༽མར་ནི་ཤེས་༼པར་༽བྱ་སྟེ། །བསྒྲུབ་པ་མིན་པར་དེ་གྲགས་སོ།༼ དྲུག་པོ་མེད་པར་དེ་༡་བུས་མཆོད་ཅིང་བསྟེན་དུ་མི་རུང་པས། དྲུག་པོ་ཡོད་ན་༡་གིས་༡་གྲོགས་བྱས་པས་མཆོད་ཅིང་བསྟེན་དུ་རུང་༽ །རྒོད་དང་རྒྱུ་མེད་པ་རུ་ནི། །༼དེའི་འཕྲོ་ལ་༽ངུ་ཞིང་རབ་ཏུ་ཁྲོ་བ་སྟེ། །དེ་ནི་ཨེ་ཧི་ཀར་དྲན་བྱ། །༼དེ་༽ལྷ་མོ་༼གསལ་པོར་༽གསོང་པོར་སྨྲ་བ་ཡིན་༼མི་བསྟེན་༽ ། ༼འདིར་སྡུད་པ་པོའི་དོད་ཡིན་གསུང་༽ །སངས་རྒྱས་པ་དང་རྟག་ཏུ་སྨྲ་༼སངས་རྒྱས་པ་གང་ན་ཡོད་པའི་སར་ཕྱིན་ཏེ་༽། །དེ་ཉིད་རྡོ་རྗེའི་རིགས་ལས་བྱུང་། ༼སྡུད་བྱེད་༽ །མཁའ་འགྲོ་མ་ཡི་རིགས་༼སྡུད་བྱེད་བརྒྱད་ཀྱིས་བསྡུས་པ་ཡི་ཌ་ཀི་ནི་བདུན་པོ་མཆོད་པ་ན། རྟེན་བྲིས་སྐུ་ལ་སོགས་པ་མ་འབྱོར་ན་མཚན་མ་བྲིས་ཏེ་མཆོད་པར་བསྟན༽་ཕྱག་རྒྱ་༼བརྒྱད་ཀྱི་༽། །དཔའ་བོས་བསྙེན་ཕྱིར་མཚན་མ་བལྟ། །༼རྒྱུ་བ་ཅན་གྱི་༽ཐོད་པ་༼ཙི་པི་ཀའི་༽དགྲ་སྟ་༼ལ་མའི་༽མཆེ་བ་དང་། ༼ཡོངས་གྱུར་མའི་༽ །འཁོར་ལོ་༼བྱིས་བཙེས་མོའི་༽རྒྱལ་མཚན་༼མི་ལྟོག་མའི་༽རལ་གྲི་དང་། ༼སྡུད་བྱེད་བརྒྱད་ཀྱིས་བསྡུས་བྱ་རྣལ་འབྱོར་མ་སུམ་བཅུ་བདུན་བསྡུས་ཏེ། དེ་ལ་ཡང་པྲཛྙ་ར་ཀྲི་ཏའི་ཏིག་ཆུང་དང་འབའ་དན་ཏ་གསུང་པས་ན། ན་རོ་པའི་དགོས་པ་འདི་ཡིན་གསུང་པ་དང་། བགྲེས་པོ་རྣམས་གསུང་པ་གསུམ་དུ་ཤེས་པར་བྱ་དགོས་སོ༽ །སྐྲག་བྱེད་༼རྡོ་རྗེ་༽བརྒྱད་པ་༼ཨོ་ཧི་ཀ་ལ་མོའི་སྡུད་པ་མོ་༽དུང་དུ་བཤད་༼ཕག་མོའིལ་རྒྱུ་འབྲས་༢་སུ་ཕྱེ་བའི་ཕྱག་མཚན༽། །དཔའ་བོའི་དབང་ཕྱུག་༼སུམ་བཅུ་བདུན་༽ཐམས་ཅན་ཀྱི། །རིགས་ཀྱི་ཕྱག་རྒྱ་༼བརྒྱད་དུ་བསྡུས་པ་༽ཡིན་པར་བཤད། །དཔལ་ཧེ་རུ་ཀ་མངོན་པར་བརྗོད་པ་ཞེས་བྱ་བ་ལས། རྣལ་འབྱོར་མ་ཐམས་ཅད་ཀྱི་གཟུགས་ཡོངས་སུ་བརྗོད་པ་དང་ཕྱག་མཚན་གྱི་ཕྱག་རྒྱ་བསྟན་པའི་ཆོ་གའི་ལེའུ་སྟེ་བཅུ་བདུན་པའོ། །དེ་ནས་གཞན་ཡང་བཤད་བྱ་པ་༼ཙུན་བྷི་ཀས་བསྡུས་པའི་མཁའ་འགྲོ་མ་ལ་རིགས་དྲུག་དུ་ནང་ཚན་གྱི་དབྱེ་བ་སྟོན་༽། །མཁའ་འགྲོ་རྣམས་ཀྱི་༼རྟེན་མའི་བུ་མོ་ལ་ཡོད་པའི་༽མཚན་ཉིད་ནི་༼མཁའ་འགྲོ་མ་དྲུག་དུ་དབྱེ་བ༽། །༼དམ་ཚིག་ཅན་༽གང་གིས་༼བསྒྲུབ་པ་པོ་ཤེས་པར་བྱ་སྟེ་མཆོད་པས་དངོས་གྲུབ་གསོལ་བས་༽ཡང་དག་ཤེས་པ་ཡི། །མཁའ་འགྲོའི་དམ་ཚིག་ལ་གནས་པའོ། ༼པདྨའི་རིགས་ཀྱི་མཁའ་འགྲོ་མ༽ །དམར་ཞིང་སེར་བའི་བུད་མེད་གང་༼འདི་སྔར་བསྟན་པའི་བུད་མེད་དམ་རྟགས་དང་མི་འདྲ་བ་ཁ་དོག་དང་དྲི་དང་ཤའི་གཉེར་མ་ལ་སོགས་པའི་རྟགས་བསྟན་གསུང་༽། །༼ཁ་དང་ཆོས་འབྱུང་ནས་༽པད་མའི་དྲི་ནི་རྣམ་པར་གཏོང་། །ལྟ་སྟངས་རང་བཞིན་ཞི་བ་དང་། །ཞེན་པའི་༼ཆགས་པས་༽ལྟ་བ་རྗེས་འགྲོ་བ། །བུད་མེད་གང་གི་སེན་མོ་དམར། །མིག་ནི་ཀུན་ཏུ་དམར་བ་དང་། །ཁྱིམ་དུ་པད་མ་བྲི་བ་༼བྲིས་ནས་མཆོད་པ་༽ནི། །པད་མ་གར་དབང་རིགས་བྱུང་༼མ་༽ཡིན། །༼རྡོ་རྗེ་རིགས་ཀྱི་མཁའ་འགྲོ་མ་༽སྨིན་མའི་དབུས་ན་རྩེ་གསུམ་༼གྱི་རི་མོ་༽ཡོད། །ལུས་ནི་སྔོ་༼སྐྱ་༽བསངས་༼སྔོ་༽སྐྱ་མོ་དང་། །༼ཡི་དམ་དུ་༽རྟག་ཏུ་རྡོ་རྗེའི་རིགས་བསྒོམ་པ། །གང་གི་༼རང་གི་༽ཁྱིམ་དུ་རྡོ་རྗེ་འབྲི་༼ཞིང་དེ་ལ་༽། །རྟག་པར་མཆོད་པ་བྱེད་པ་ཡི། །མཁའ་འགྲོ་མ་དེ་༼བསོད་ནམས་ཆེ་བ་དང་༽དཔལ་ལྡན་ནི། །ཧེ་རུ་ཀ་ཡི་རིགས་བྱུང་༼ཞིང་སྐྱེས་ཀྱི་ཌ་ཀི་ནི་བྱིན་གྱིས་བརླབས་པ་ཡིན་པས་འདི་ཤིན་ཏུ་གྲུབ་ཐག་ཉེ་བས་བསྟེན་གསུང་༽ཡིན། །གང་གི་༼སྨིན་མ་བས་མཐོ་བ་ན་༽དཔྲལ་བར་༼བུད་མེད་རད་ནའི་རིགས་༽རྩེ་གསུམ་འམ་༼སོན་ཟེར་༽། །མདུང་ཐུང་༼འདྲ་བ་༽དག་ཀྱང་སྣང་འགྱུར་ཞིང་། ༼ཤ་རྩི་༽ །མིག་དམར་མདོག་ནི་དམར་སེར་ཡང་༼སེར་བ་ཡང་༽། །དེ་བཞིན་རྐང་པ་ལག་པ་དམར། །ར་སྐྱེས་ཁྱིམ་བྱ་དག་ལ་ཡང་། །རྟག་ཏུ་ཡིད་ནི་དགའ་འགྱུར་ཞིང་༼དེ་ཁྱིམ་དུ་བསྟེན་༽། །དེ་ཡི་ཁྱིམ་དུ་རྡོ་རྗེའི་མཚན་༼མ་བྲིས་ནས་དེ་ལ་༽། །རྟག་ཏུ་གང་ཞིག་མཆོད་བྱེད་པ། ཤྲཱི་ཧེ་ཀའི་༼རད་ནའི་རིགས་ཀྱི་༽རིགས་ལས་བྱུང་། །མཁའ་འགྲོ་ཡིན་པར་གདོན་མི་ཟ་༼དེ་བསྟེན་༽། །༼དེ་༤ན་གཤེགས་པའི་རིགས་ཀྱི་ཌ་ཀི་ནི་༽འཁོར་ལོ་གང་གི་དཔྲལ་བ་འམ། །ལག་པ༼འི་མཐིལ་དུ་༽ར་ཡང་ནི་སྣང་བར་འགྱུར། །སྤྲིན་སྔོན་དག་དང་༼མདོག་སྔོ་ནག་དུ་༽འདྲ་བ་ནི། ༼ ཐོད་དམ་སྟོད་གཡོགས་ཀྱིས་འགོ་འགྱེབས་པ་༽ །རྟག་ཏུ་དཔྲལ་བར་གོས་འཆང་བྱེད། །སྐལ་བ་ཆེན་པོ་༼བསྡུ་ན་༽ཕུན་འཚོགས་ཤིང་། །མཆོག་ཏུ་༼བརྫུན་མི་སྨྲ་བས་༽བདེན་པ་གང་ཡིན་༼པ་སྨྲ་༽དང་། །ཁྱིམ་དུ་འཁོར་ལོ་འབྲི་བྱེད་ཅིང་། །རྟག་ཏུ་དེ་ལ་མཆོད་བྱེད་པ། །རྡོ་རྗེ་ཕག་མོའི་༼ཐ་ཏའི་༽རིགས་བྱུང་བའི། །མཁའ་འགྲོ་མ་ནི་༼ང་རྒྱལ་ཆེ་བ་༽སྟོབས་ཀྱིས་དྲེགས། ༼འདི་ཡང་རྡོ་རྗེའི་རིགས་སུ་གསུང་༽ །གང་ཞིག་མིག་སྨན་༼གྱི་མཚམས་༽གནག་འདྲ་ཞིང་། །༼ཁྱད་པར་ནི་༽སོ་ནི་དཀར་ཞིང་མཐོ་བ་༼ སྟོ་ སྲོ་བ་༽དང་། །རྟག་ཏུ་གདུག་པར་༼ཞེ་སྡང་ཡུ་རིང་པ་༽འགྱུར་བ་དང་། །སེམས་སྟོབས་ལྡན་པར་༼འཇིགས་པ་མེད་པར་༽གྱུར་པ་དང་། །རྟག་ཏུ་༼གྲོགས་གཞན་པས་༽ཁྲུས་ལ་དགའ་བ་དང་། །མང་དུ་སྨྲ་བར་མི་བྱེད་ཅིང་། །ཁྱིམ་དུ་རྡོ་རྗེ་༼བྲིས་ནས་དེ་ལ་༽འབྲི་བ་དང་། ༼ རྣམ་སྣང་གི་རིགས་ཡིན་གསུང་༽ །རྟག་ཏུ་དགེ་བས་མཆོད་བྱེད་པ་༼དགེ་བ་དགའ་བ་རྡོ་རྗེའི་རིགས་༽། །རྡོ་རྗེ་ཕག་མོའི་རིགས་བྱུང་པ། །༼འཁོར་ ཐུན་མོང་པ་བུད་མེད་དམ་མཐོང་བའི་འཁོར་༽སྟོང་ཕྲག་༼ཌ་ཀི་ནིའིཁོར་༽བཅྭ་ལྔ་ལྡན་པ་ཡིན། །༼ལས་ཀྱི་རིགས་ཀྱི་མཁའ་འགྲོ་མ་༽སེར་ཞིང་གསེར་གྱི་མདོག་འདྲ་སྣང་། །༼སུ་ཡང་རུང་བ་ལ་༽མིག་མི་༼ཧ་རེ་ལྟ་བ་༽གཡོ་༼བར་བལྟ་༽ཞིང་བ་སྤུ་མང་། །༼རྩེ་༡་པའི་རི་མོ་༽རྡོ་རྗེ་གང་གི་དཔྲལ་བ་འམ། །ལག་པར་༼རྩེ་༡་པའི་རི་མོ་༽ཡང་ནི་སྣང་འགྱུར་བ། །གདུག་པའི་ལས་༼གསོད་པ་༽ལ་ངེས་པར་དགའ། །རྟག་ཏུ་རྒྱལ་སྲིད་༼ཀྱི་ལོངས་སྤྱོད་༽དག་ལ་གནས། །༼ང་རྒྱལ་ཆེ་བ་༽སྙེམས་ཤིང་བདེན་པར་སྨྲ་བ་དང་། །མ་ལ་ཀི་ཡི་དྲི་འབྱུང་ཞིང་། །གང་གི་ཁྱིམ་དུ་རྡོ་རྗེ་ནི། །རྟག་པར་འབྲི་ཞིང་༼དེ་ལ་༽ཆེར་མཆོད་པ། །ཁཎྜ་རོ་ཧའི་རིགས་༼ལས་ཀྱི་རིགས་༽ལས་བྱུང་། ༼ འདི་ཡང་རྡོ་རྗེ་སེམས་དཔའི་རིགས་ཡིན་གསུང་། བསོད་ནམ་ཆེ་བའི་སྒོ་ནས་མིང་བཏགས་པ་ཡིན་གསུང་༽ །རྣལ་འབྱོར་མ་ཡི་དབང་ཕྱུག་མཆོག །གང་ཞིག་རྟག་པར་༼གསོད་པའི་ལས་ལ་དག་ཟེར་བ་ཡང་ཡོད་༽ཤ་ལ་དགའ། །༼ཤ་༽སྐེམ་ཞིང་མིག་སྨན་༼ཁ་དོག་༽ནག་པོའི་མདོག །དཔྲལ་བར་༼རི་མོ་༢་༽མདུང་རྩེ་ལྟ་བུ་ཡོད། །གང་ཞིག་༼གསོད་པ་ལ་༽གདུག་པའི་ལས་ལ་དགའ། །༼འཇིགས་པ་མེད་པ་༽རྟག་ཏུ་དུར་ཁྲོད་དག་ཏུ་འགྲོ། །༼རོ་ལ་སོགས་པ་ལ་ཕྱག་བྱེད་པ་བག་མེད་པས་སོ་ མི་མ་ཡིན་གྱིས་༽འཇིགས་པ་མེད་ཅིང་གཙང་མེད་དེ། །གང་གི་དཔྲལ་བའི་ཐིག་ལེ་༼བྲིས་ནས་དེ་ལ་མཆོད་༽དང་། །༼ཡང་ན་༽ཁྱིམ་དུ་ཐོད་པ་འབྲི་ཞིང་༼དེ་ལ་༽མཆོད། །དཔལ་ལྡན་ཧེ་རུ་ཀ་དེ་ཡི། །མཁའ་འགྲོའི་རིགས་ལས་བྱུང་བ་ཡིན། །སྤྲིན་གྱི་མདོག་༼སྔོ་ནག་༽འདྲའི་བུད་མེད་གང་།༼ འདིར་ཡང་རད་ནའི་རིགས་ཀྱི་ཌ་ཀི་ནི་༽ །སོ་ནི་༼རིང་ཐུང་༽མི་མཉམ་པར་གནས་ཤིང་། །རྟག་ཏུ་གདུག་པའི་ལས་༼གསོད་པ་༽ལ་དགའ། །གཡོན་གྱི་མཆེ་བ་༼ཕྱིར་ནར་གྱིས་བྱུང་བ་༽གཙིགས་པ་དང་། །དེ་ཡི་ཁྱིམ་དུ་དགྲ་སྟ་ནི། །འབྲི་ཞིང་རྟག་ཏུ་མཆོད་བྱེད་པའི། །རྣམ་པར་འདྲེན་པའི་རིགས་༼རྡོ་རྗེ་སེམས་དཔས་བྱིན་གྱིས་རླབས་པའི་རད་ནའོ་༽བྱུང་པའི། །མཁའ་འགྲོ་མར་ནི་ཐེ་ཚོམ་མེད། །མཁའ་འགྲོ་མ་ཡི་ཚོགས་འདི་དག་༼ཕྱིའི་རིགས་རྡོ་རྗེའི་རིགས་ལས་བྱུང་པ་༽། ཤྲཱི་ཧེ་རུ་ཀའི་རིགས་བྱུང་པ། །བསྒྲུབ་པ་པོ་ལ་༼མཆོད་ན་དངོས་གྲུབ་གསོལ་པས་༽ཕན་པའི་ཕྱིར། །གསང་བའི་མཚན་ཉིད་བཤད་པ་༼གཏས་དང་མཚན་ཉིད་མི་འདྲ་བ་སྣཏད་མ་ཡིན་པ་ལ་མི་བཤད་༽ཡིན། །ཧེ་རུ་ཀ་མངོན་པར་བརྗཏད་པ་ཞེས་བྱ་བ་ལས། རྣལ་འབྱོར་མ་ཐམས་ཅད་ཀྱི་ཁ་དཏག་གི་མཚན་ཉིད་༼མཚན་མ་སཏ་སཏ་དགའ་བའི་ཡུལ་སཏགས་༽དང་། །༼ཐཏད་པ་སཏགས་གཉེར་མ་ལ་སོགས་པའཏ་༽མཚན་མའི་ཆཏ་གའི་ལེའུ་སྟེ་བཅྭ་བརྒྱད་པའོ། །དེ་ནས་གཞན་ཡང་བཤད་བྱ་བ།༼འདི་ཡང་ཙུམ་བི་ཀས་བསྡུས་པའི་མཚན་ཉིད། དབྱེ་བ་རིགས་ལྔར་དབྱེ་བ་བསྟན༽ །༼འདས་པའི་༽བསྒྲུབ་པ་པོ་ཡིས་ལཱ་མ་ཡི་༼ལས་ཀྱི་རིགས་ཀྱི་༽། །མཚན་ཉིད་ཀྱི་ནི་ཁྱད་པར་༼ནང་ཚན་གྱིས་ལྔར་དབྱེ་བ་༽དང་། །ཡན་ལག་༼དབྱེ་བ་༽ཚོགས་ནི་༼སྔར་༽ཤེས་བྱའོ། །༼བུད་མེད་༽གང་གི་གཞིན་གྱི་དཀྱིལ་འཁོར་ནི། །ཀུན་ནས་ཟླུམ་པོར་སྣང་གྱུར་ཞིང་། །ཁ་ཡི་སྨ་ར་༼སྐྱེས་པ་༤ན་༽རྟག་པར་ཡོད། །༼བ་༽སྤུ་དང་སྨིན་མ་རིང་བ་དང་། །གོས་བཟང་༼པོ་དང་༽གཙང་༼པ་ལ་དགའ་༽ཞིང་༼སྒྱུར་༽ཞི་བ་དང་། །༼སྤྱོད་པ་༽མི་གཡོ་བདེན་པར་སྨྲ་བ་དང་། །རྟག་ཏུ་དམ་པའི་ཆོས་ལ་དགའ། ༼ འདི་རང་ནའི་ལ་མ་གསུང་༽ །དཔའ་བོའི་སྲིང་མོར་དེ་ཤེས་བྱ། །པད་མའི་༼སྐོར་༽ཕྱག་རྒྱ་༼ལག་པ་༢་སྙིམ་པ་ཕྱེ་བར་བྱ་སྟེ་འཇུག་མ་ཅུང་བཀུག་པའོ་༽སྦྱིན་པར་བྱ། །ཡང་ན་༼གཡས་པས་གུང་མོ་ཅུང་ཟད་བརྐྱང་སྟེ་ལྷག་མ་ཁུ་ཚུར་བྱས་པ་༽རུས་སྦལ་ཕྱག་རྒྱ་བྱ་༼གཡོན་པའི་སྟེང་དུ་གཡས་པ་གཞག་ཏེ་༢་ཀའི་སོར་མོ་ཀུམ་མེ་བྱ་བར་གསུང་༽། །༼སྤགས་པ་ཟེར་༽རྒྱལ་བའི་༼གཡོན་ཆོས་གོས་གྱོན་པའི་ཚུལ་དུ་བྱ་༽བུམ་པ་སྤྱི་བླུགས་ཉིད། །ཕྱག་རྒྱའི་༼བུམ་པ་ཐོགས་པའི་ཚུལ་དུ་བྱ་༽ལན་དུ་ཤེས་པར་བྱ། །དེ་ནི་ཚེས་བཅུའི་རེས་དག་ལ། །ཁྱིམ་དུ་པད་མ་འབྲི་བར་འགྱུར་༼བྲིས་ནས་དེ་ལ་མཆོད་༽། །ལཱ་མ་ཡི་ནི་བུད་མེད་ཀྱི། །མཚན་ཉིད་གྱུར་པ་འདི་ཉིད་ཡིན། །མཆུ་ནི་འཕྱང་ཞིང་༼འདི་པད་མའི་ལ་མ་༽མིག་དཀྱུས་རིང་། །མིག་ནི་དམར་ཞིང་སེར་སྐྱར་གནས། །༼ནོར་༽ཕྱུག་ཅིང་༼ཁྱོ་༽བསྐལ་བཟང་༼བུ་ཡོད་པ་༽དཔལ་ཡོན་ཅན། །སེར་ཞིང་ཙམ་པ་༼དྲི་ཞིམ་པ་༽ལྟ་བུར་སྣང་། །མཆེ་བ་རིང་མིན་ཐུང་བ་མིན། །༼ཁ་དོག་༽སྣ་ཚོགས་པ་ཡི་གོས་ལ་དགའ། །༼དར་དཔྱངས་ལྟ་བུ་༽དཔྲལ་བར་རི་མོ་༼འགྲོང་བུ་༣་གསུང་༽གསུམ་ཡོད་ཅིང་། །མཚམས་ནི་གྱེན་དུ་༼དཔྲལ་བའི་རི་མོ་གྱེན་ལ་བལྟ་བ་གསུང་༽བལྟས་པས་གནས། །རྒོད་ཅིང་དགའ་བ་ཉིད་དག་དང་། །༼སྐྱེས་བུ་ལམ་དུ་འགྲོ་བའི་ལམ་འགྱོགས་པ་༽ལམ་ནི་རྣམ་པར་གནོན་ཅིང་གནས། །གཡུལ་དུ་འཆི་བ་རྣམས་ཀྱི་ནི། །གཏམ་དག་ལ་ནི་༼ཇི་ལྟར་འཐབ་པ་ཇི་ལྟར་གསད་པ་ལ་སོགས་པའི་གཏམ་ལ་དགའ་བ་༽རྟག་ཏུ་དགའ། །དེ་ལྟར་༼ང་རྒྱལ་ཆེ་བ་༽རབ་དྲེགས་མཐོང་ནས་ནི། །མདུང་གི་ཕྱག་རྒྱ་༼གཡས་པའི་འཛུབ་མོ་མདུང་ལྟར་བྱས་པ་ལ་གསུང་ན་ཡང་གཡོན་པ་ལ་ཡང་གསུང་༽བསྟན་པར་བྱ། །རྐང་པ་གཡོན་པ་བསྐུམ་པ་ཡི། །༼གཡས་བརྐྱང་པས་༽གར་ཉིད་ཀྱང་ནི་༼ ཕང་༽བསྟན་པར་གྱི། །༼བསྒྲུབ་པ་པོས་༽གཡོན་པ་དག་ནི་༼གཡོན་བརྐྱང་གཡས་བསྐུམ་ནས་༽ཡོངས་བཟློག་པ། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་དང་ནི་ཚེས་བརྒྱད་༼ཡར་མར་༢་ཀའི་༽ནི། །དེ་ཡི་དུས་ཚིགས་༼ལ་མཆོད་པ་༽ཡིན་པར་བཤད། །༼དུས་དེར་༽ཁྱིམ་དུ་མདུང་རྩེ་གསུམ་པ་ཡང་། །བྲིས་ནས་དེ་ནི་རྟག་ཏུ་མཆོད། །༼སྣང་བ་མཐའ་ཡས་ཀྱི་༽འཇིག་རྟེན་དབང་ཕྱུག་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །༼འདི་ཏ་ཐཱའི་རིགས་ཀྱི་ལ་མ་༽གང་གི་ཁུར་ཚོས་དག་ཏུ་ནི། །ཁུང་བུར་གྱུར་པ་༼ཅུང་ཟད་སྐྱོང་པ་༽གནས་གྱུར་ཅིང་། །དེ་བཞིན་རྟག་ཏུ་དམར་ཞིང་སེར། །མིག་ནི་ལྗང་སེར་དག་ཏུ་སྣང་། །སྐྲ་ནི་དེ་བཞིན་འཁྱིལ་བ་དང་། །མགོ་དང་དཔྲལ་བར་༼རང་རྟག་དུ་༽དར་བཅིངས་སྣང་། །༼དཔྲལ་བར་གྱེན་ལ་༽རི་མོ་གཅིག་པར་རབ་ཏུ་གནས། །དེ་བཞིན་མགྲིན་པ་རིང་བ་དང་། །རྟག་ཏུ་གོས་དམར་ལ་དགའ་ཞིང་། །རྒོད་ཅིང་གླུ་ནི་ལེན་པ་ཉིད། །ལན་འགའ་ཞིག་ན་༼བར་བར་དུ་༽ཁྲོ་བ་དང་། །༼ཆགས་པ་སྐྱེས་པའི་སྟོབས་ཀྱིས་༽སེམས་ནི་རྣམ་པར་གཡོ་བ་དང་། ༼རེས་གང་ལ་དགའ་རེས་གང་ལ་དགའ་བ་དང་༽ །རྒོད་པ་ལ་ནི་དགའ་བ་སྟེ། །༼ང་རྒྱལ་ཆེ་བ་༽འདི་འདྲའི་རབ་དྲེགས་༼གོས་ཡོ་བར་གོན་པ་༽མཐོང་ན་ནི། ༼ལག་པ་༢་མདུང་འཛིན་པའི་ཚུལ་དུ་བྱ་གསུང་། ཡང་ན་གཡས་པའི་འཛུབ་མོ་མདུང་ལྟར་དུ་བྱ་གསུང་༽ །མདུང་གི་ཕྱག་རྒྱ་བསྟན་པར་བྱ། །༼ལན་༽གཉིས་པ་ཉིད་ནི་འབད་པ་ཡིས། །༼ལག་པ་༢་ཀྱི་སོར་མོ་རྣམས་མཐུར་ལ་དཔྱངས་ཏེ་སྨད་ཆེ་བའི་ཚུལ་དུ་བྱས་ལ་གསུང་༽དྲིལ་བུའི་ཕྱག་རྒྱ་རབ་བསྟན་བྱ། །གཡོན་གྱི་ཕྱོགས་སུ་ལྡོག་པ་ནི་༼ལན་བྱེད་ཙ་ན་༽། །ཕྱག་རྒྱའི་ལན་ནི་ཡིན་པར་བཤད།༼ མི་མི་བསྐྱོད་པའི་ལ་མ་༽ །ཐུང་ཞིང་བྱིན་པ་སྦོམ་པ་དང་། །རྟག་ཏུ་གོས་སེར་ལ་དགའ་ཞིང་། །ཕྲག་པ་དག་ལ་༼གོས་ཡོ་བར་གོན་པ་༽གོས་ཀྱང་འཕྱང་། །དེ་འདྲའི་བུད་མེད་མཐོང་ན་ནི། །༼ལག་པ་༢་རྒྱབ་སྤྲད་དེ་སོར་མོ་བསྣོལ་བའམ་ཡང་ན་སོར་མོ་རྣམས་ཀྱི་རྩེ་མོ་སྦྱར་བར་དུ་ན་༽འཁོར་ལོའི་ཕྱག་རྒྱ་བསྟན་བྱ་ཞིང་། །འབད་པ་ཡིས་ནི་གཉིས་པ་ཡང་།༼ཐལ་མོ་སྦྱར་བའི་འཛུབ་མོ་༢་བཀུག་པ་ལ་མཐེ་བོང་གཉིས་སྦྱར་བ་ཡང་གསུང་༽ །དུང་གི་ཕྱག་རྒྱ་༼གཡས་པའི་གུང་འཛུབ་གཉིས་བརྐྱང་སྟེ་མཐེ་བོས་སྲིན་ལག་དང་མཐེ་ཆུང་མནན་ཏེ་གནམ་ལ་བསྟན་ནས་དུང་ཆོས་ལྟར་བྱས་པ་༽བསྟན་པར་བྱ། །གཡོན་ནས་ཡོངས་སུ་བཟློག་པ་ནི། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་༼ཡར་མར་གཉིས་ཀའི་༽དེ་ཡི་དུས་ཡིན་ཏེ། །དེ་ཡི་ཁྱིམ་དུ་རྡོ་རྗེ་འབྲི་༼ས་ནས་མཆོད་པ་༽། །ཤྲཱི་ཧེ་རུ་ཀ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། ༼ལས་ཀྱི་རིགས་ལ་མ་༽ །ལུས་ཀུན་ལ་ནི་བ་སྤུ་ཡོད། །མིག་ནི་གནག་ཅིང་སེར་བ་དང་། །༼ལུས་༽སྤོམ་ཞིང་༼བཞིན་༽རྣམ་འགྱུར་མི་ཟད་པ། །གཞིན་འཕེལ་ཆེ་༼རྒྱས་༽ཞིང་ཁ་ཆེ་ལ། །མཆུ་ནི་སློ་ཞིང་ཁ་དོག་གནག །མིག་ཟླུམ་སྣ་ནི་ཉམས་པ་དང་། །རྟག་ཏུ་གླུ་ལ་མཁས་པ་དང་། །སྤྲིན་གྱི་མདོག་ཅན་ཡིད་འཕྲོག་མ། །འདི་འདྲའི་༼ང་རྒྱལ་ཆེ་བ་༽རབ་དྲེགས་མཐོང་ན་ནི། །༼ལག་པ་གཡས་པའི་སོར་མོ་རྣམས་སྦྲུལ་མགོ་གདེངས་ཀ་ལྟར་བྱས་ལ་མཐེ་བོང་ལག་མཐིལ་དུ་མགོ་བོ་ལྟར་བྱས་ལ་༽ཀླུ་ཡི་ཕྱག་རྒྱ་རབ་བསྟན་བྱ། །གཉིས་པ་ཡང་ནི་འབད་པ་ཡི། །༼མདུང་འཛིན་པ་ལྟར་༽མདུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་སུ་བཟློག་པ་ནི། །ཕྱག་རྒྱའི་ལན་ནི་ཡིན་པར་བཤད། །༼ཡར་མར་༢་ཀྱི་༽ཚེས་གྲངས་བཅུ་གཅིག་དེ་ཡི་དུས། །ཁྱིམ་དུ་མཆེ་བ་༼བྲིས་ནས་མཆོད་པ་བྱེད་༽འབྲི་བར་བྱེད། །རྡོ་རྗེ་ཕག་མོ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །དཔལ་འཁོར་ལོ་སྡོམ་པ་ལས་༼ལ་མས་བསྡུས་པའི་༽རྣལ་འབྱོར་མ་ཐམས་ཅད་ཀྱི་༼སོ་སོའི་མཚན་ཉིད་ཤེས་ནས་༽ཕྱག་རྒྱ་དང་། ཕྱག་རྒྱའི་ལན་བསྟན་པའི་ལེའུ་སྟེ་བཅུ་དགུ་པའོ། །༼དེ་ལྟ་བུའི་རྣམས་ངོ་ཤེས་པར་བྱས་ནས་དེ་ནས་བརྡ་དང་བརྡའི་ལན་བྱས་པས་དཔའ་བོ་དེ་སྲིང་མོར་ཤེས་པར་བྱའོ།དེ་ལྟར་བྱས་པས་མཉེས་ལ་མཉེས་པས་བྱིན་གྱིས་བརློབ་པར་འགྱུར་རོ་༽དེ་ནས་༼དེ་བས་ན་འདིས་ལག་པའི་བརྡའ་གཙོ་བོར་བྱས་ནས་སྟོན་ནོ༽གཞན་ཡང་བཤད་བྱ་བ་༼ལེའུ་བཅོ་ལྔ་པའི་༽། །༼འདི་གོང་གི་ཡི་གེའི་བརྡའ་དང་འབྲེལ་གསུང་༽མཁའ་འགྲོའི་ལག་པའི་བརྡ་རྣམས་ཏེ། །༼བརྡའི་དགོས་པ་༽གང་གི་སྤུན་དང་༼དཔའ་བོས་ཤེས་ན་༽སྲིང་མོ༼ས་ཤེས་ན་༽རུ། །ཡང་དག་ཤེས་པར་འགྱུར་བའོ། །༼སྔར་མཁའ་འགྲོ་མར་ངོ་ཤེས་ཀྱང་སྲིང་མོར་ངོ་མ་ཤེས།ཡང་སྲིང་མོར་ཤེས་པར་བྱས་ལ་དེ་བསྟེན་པ་ལ་བརྡའ་དགོས་པས་བརྡའ་བསྟན་བརྡ་དང་བརྡའི་ལན་༽གང་ཞིག་༼སྐྱེས་པའམ་བུད་མེད་ཀྱི་༽ལག་གཡོན་༼སྐྱབས་སྦྱིན་ལྟར་༽སྟོན་པ་ནི། །༼དང་པོ་སྐུ་འཁམས་འདྲི་བ་༽གསོང་པོར་སྨྲ་བ་བསྟེན་པ་ཡིན་༼ནོ་བར་༽། །གང་ཞིག་སྲིན་ལག་སྟོན་པ་ནི། །གསོང་པོར་སྨྲ་བའི་ལན་གྱུར་ཡིན་༼དེ་ལྟར་ཡིན་ནོ་བར་༽། །གང་ཞིག་ལྟོ་བ་༼མ་རེག་པ་༽རྡེབས་པ་ནི། །བདག་ནི་བཀྲེས་པར་༼ལ་རེག་པ་༽སྟོན་པ་ཡིན། །གང་ཞིག་དཔྲལ་བ་སྟོན་པ་ནི། །༼རྫུ་འཕྲུལ་གྱི་མཐུའི་ནུས་པའམ་སྤྱོད་པས་ནམ་མཁའ་ལས་འོང་བའོ་༽ནམ་མཁའ་ལ་ནི་འོངས་༼སོ་༽ཞེས་པའོ། །གང་ཞིག་ཁར་ནི་སོར་མོ་༼བཅུ་ཀ་༽འཇུག །༼ཚོགས་ཀྱི་ཟས་༽ཟོས་ཟིན་ཞེས་ནི་སྨྲ་བ་ཡིན། །གང་ཞིག་ལྕེ་ནི་༼རི་ལི་ལི་༽བསྐྱོད་པ་དག །ཟའོ་ཞེས་ནི་སྨྲ་བ་ཡིན། །གང་ཞིག་སྤུས་མོ་ལ་༼གཡོན་པས་༽རེག་པ། །ངལ་ལོ་ཞེས་ནི་སྟོན་པ་ཡིན། །གང་ཞིག་སོར་མོ་༼ལག་པ་གཅིག་གི་འཛུབ་མོས་༡་ལ་༽རྩེ་ལ་རེག །ངལ་བསོས་ཞེས་ནི་སྨྲ་བ་ཡིན། །གང་ཞིག་སོ་ནི་འཆའ་བྱེད་པ། །ཤ་ཟའ་ཞེས་ནི་སྨྲ་བ་ཡིན། ༼ཚིག་གཉིས་པོ་འདི་འབའ་ཏན་ཏའི་རྒྱ་དཔེ་ལས་འབྱུང་གཞན་ལ་མེད་གསུང་༽ །གང་ཞིག་པ་ཏི་ས་སྟོན་པ་༼ཐོད་པ་འཆིང་བའི་ཚུལ་༽། །དེ་ལྟར་གྱིས་ཞེས་༼གང་བྱེད་པ་དེ་ལ་༽སྟོན་པ་ཡིན། །གང་ཞིག་༼བཞིན་༽ཁྲོ་གཉེར་སྟོན་པ་ནི། །༼ཡན་ལག་༽བཅིངས་སོ་ཞེས་ནི་སྟོན་པ་ཡིན་༼ཁྱོད་ཡོད་དོ་བར་སྟོན་པ་ཡོད་༽། །གང་ཞིག་མཁའ་ལྡིང་༼ལག་པ་གཤོག་པ་ལྟར་དེང་ངེ་བྱ་གསུང་༽སྟོན་པ་ནི། །༼ཡན་ལག་བཅིངས་པ་ལས་སླར་༽གྲོལ་ལེ་ཞེས་ནི་སྟོན་པ་ཡིན་༼ཁྱོད་མེད་དོ་བར་སྟོན་པ་གསུང་༽། །གང་ཞིག་ཁུ་ཚུར་སྟོན་པ་ནི་༼དེ་དག་ནི་དོན་གོ་བར་བྱ་བ་ཙམ་མོ། འདི་ན་མར་ནི་བརྡ་དང་བརྡའི་ལན་དང་བཅས་པ་འགའ་ཞིག་སྟོན༽། །དེ་ལ་པ་ཏི་ས་༼ཐོད་༽བསྟན་བྱ། །གང་ཞིག་སྐྲ་ནི་༼འཕྱར་བའམ་འཛིན་པའི་ཚུལ་དུ་༽སྟོན་པ་ལ། །ཁ་ཊཾ་ཀ་ནི་༼འཛུབ་མོ་རྩེ་གསུམ་དུ་བསྟན་༽དེ་ལ་བསྟན། །གང་ཞིག་ཡན་ལག་བསྐྱོད་པ་དག །དེ་ལ་མཆེ་བ་༼ལག་པ་གཉིས་ཁུ་ཚུར་བཅངས་ལ་མཐེ་ཆུང་གཉིས་མཆེ་བའི་ཚུལ་དུ་ཁའི་ཐད་ཀར་གཟུང་༽བསྟན་པར་བྱ། །གང་ཞིག་ལག་པས་ལག་པ་༼གཅིག་ལ་༡་༽རྡེབས། །གཏོར་མ་ཟ་ཞེས་སྨྲ་བ་ཡིན། །གང་ཞིག་ལག་པ་གཡས་པ་སྟོན། །དེ་ལྟར་གྱིས་ཞེས་སྨྲ་བ་ཡིན། །གང་ཞིག་རྣ་བ་ལ་རེག་པ། །གནས་པར་བྱ་ཞེས་༼གང་ཡང་རུང་པ་དེར་དེ་ལྟར་༽སྟོན་པ་ཡིན། །གང་ཞིག་སེན་མོས་སེན་མོ་རེག་༼ལག་པ་གཡས་གཡོན་གྱི་སེན་མོ་༢་གཅིག་ལ་༡་འདར་བ༽། །ཤི་བར་ངེས་ཤེས་སྨྲ་བ་ཡིན། །མཐེ་བོང་གཡོན་བས་ས་༼ལ་རི་མོ་ཟླུམ་པོ་༽འབྲི་བ། །དཀྱིལ་འཁོར་༼མཆོག་བསྒྲུབ་ན་འགྲུབ་༽འདི་རུ་འཚོག་ཅེས་སྨྲ། །གང་ཞིག་ཀོ་སྐོ་ལ་རེག་པ། །བདག་ནི་བུ་༼ཆེ་འོ་བ་༽ཡིས་སྲུངས་ཞེས་སྨྲ། །༼གང་རུང་༽གང་ཞིག་འཐེབ་༼བོ་༽གཡོན་༼པས་༽ས་ལ་༼རི་མོ་༽འབྲི། །བླ་མའི་སྐྱེ་བོས་སྲུངས་ཞེས་༼བདག་ལ་ཁྱོད་ཞེས་པ་༽བཤད། །གང་ཞིག་མིག་ནི་༼ཡང་རྩུམ་ཡང་འབྱེད་༽ཕྱེ་བ་ནི། །དེ་ལྟར་བྱ་ཞེས་༼བསྲུང་གིས་༽སྟོན་པ་ཡིན། །གང་ཞིག་༼ཡན་ལག་གི་༽ཚིགས་ལ་རེག་པ་ནི། །༼གཉིས་འདུས་ལ་༽བདེ་བར་ཉལ་ཞེས་སྨྲ་བ་ཡིན། །ཕོ་ཉ་མོ་ནི་༼དངོས་གྲུབ་བསྒྲུབ་པ་ལ་ཉེ་བས་༽གང་ཡང་རུང་། །དེ་དག་ཀུན་གྱི་༼བརྡ་དང་བརྡའི་ལན་༽ཡང་དག་སྦྱད། །དཔལ་འཁོར་ལོ་སྡོམ་པ་ལས། རྣལ་འབྱོར་མ་ཐམས་ཅད་ཀྱི་ལག་པའི་ཕྱག་རྒྱའི་བརྡའི་ཆོ་གའི་ལེའུ་སྟེ་ཉི་ཤུ་པའོ་༼མ་རྒྱུད་ཀྱི་དེའི་ཤུགས་ལ་རྡོར་རྒྱུད་ཀྱི་ཡང་བསྟན༽། །དེ་ནས་༼དེར་བསྟན་པའི་ལག་པའི་བརྡའ་དེ་གཞན་ལ་སྟོན་པ་གཙོར་བྱ་ནས་ལེའུ་འདིས་བསྟན་༽ཡན་ལག་ཕྱག་རྒྱ་ཡི། །༼གཞན་ལ་ཕྱག་རྒྱ་༽བསྟན་པའི་མཚན་ཉིད་ངས་བཤད་བྱ། །བུད་༼བུད་མེད་༽གང་སྤྱི་གཙུག་རེག་བྱེད་པ། །༼རང་གི་༽མགོ་བོ་དེ་ལ་བསྟན་པར་བྱ། །གང་ཞིག་དཔྲལ་བ་སྟོན་པ་ནི། །དེ་ལ་ཁུ་ཚུར་བསྟན་པར་བྱ། །གང་ཞིག་སོ་ནི་སྟོན་པ་ལ། །དེ་ལ་ལྕེ་ནི་བསྟན་པར་བྱ། །གང་ཞིག་མཆུ་ནི་སྟོན་བྱེད་པ། །དེ་ལ་ཀོསྐོ་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །དེ་ལ་ལྟོ་བ་བསྟན་པར་བྱ། །གང་ཞིག་ལག་པ་སྟོན་བྱེད་པ། །དེ་ལ་༼སྐྱེས་པའམ་བུད་མེད་ཀྱི་༽དཔུང་པ་༼གཡོན་པ་༽བསྟན་པར་བྱ། །གང་ཞིག་རྐེད་པ་སྟོན་བྱེད་པ། །དེ་ལ་རྒྱབ་ནི་བསྟན་པར་བྱ། །གང་ཞིག་ནུ་མ་སྟོན་བྱེད་པ། །དེ་ལ་ཀོསྐོ་བསྟན་པར་བྱ། །གང་ཞིག་ལྟོ་བ་སྟོན་བྱེད་པ། །དེ་ལ་ལྟེ་བ་བསྟན་པར་བྱ། །གང་ཞིག་གསང་བ་སྟོན་བྱེད་པ། །དེ་ལ་ལིང་ཀ་བསྟན་པར་བྱ། །གང་ཞིག་བརླ་ནི་སྟོན་བྱེད་པ། །དེ་ལ་མགོ་ནི་༼གཤང་ལམ་ཡང་ཟེར་༽བསྟན་པར་བྱ། །གང་ཞིག་སྤུས་མོ་སྟོན་བྱེད་པ། །དེ་ལ་བྱིན་པ་བསྟན་པར་བྱ། །གང་ཞིག་རྐང་པ་སྟོན་བྱེད་པ། །དེ་ལ་རྐང་མཐིལ་བསྟན་པར་བྱ། །གང་ཞིག་སོར་ཚིགས་སྟོན་བྱེད་པ། །དེ་ལ་སོར་མོ་བསྟན་པར་བྱ། །གང་ཞིག་ས་༼གཞི་༽ནི་སྟོན་བྱེད་པ། །དེ་ལ་ནམ་མཁའ་བསྟན་པར་བྱ། །གང་ཞིག་ནམ་མཁའ་སྟོན་བྱེད་པ། །དེ་ལ་ཉི་མ་བསྟན་པར་བྱ་༼ནམ་མཁའ་ལ་རི་མོ་ཟླུམ་པོར་འདྲི་བ་༽། །གང་ཞིག་ཆུ་བོ་༼ལག་པ་༢་ཆུ་བོ་ལྟར་ན་ར་རར་༽སྟོན་བྱེད་པ། །དེ་ལ་རྒྱ་མཚོ་༼ལག་པ་༢་མདུན་དུ་རླབས་བསྐྱེད་པ་ལྟར་བྱ་༽བསྟན་པར་བྱ། །དཔལ་འཁོར་ལོ་སྡོམ་པ་ལས་ཕྱག་རྒྱའི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གཅིག་པའོ། ། ༼ལག་བརྡ་འབའ་ཞིག་དུ་མ་ཟད་འདིས་ཡན་ལག་དུ་མའི་བརྡའ་གཙོ་བོར་བྱས་ནས་བསྟན༽ །དེ་ནས་གཞན་ཡང་རབ་བཤད་པ། །ཡན་ལག་ཇི་བཞིན་ཕྱག་རྒྱ་མཆོག །གང་ཞིག་༼སྐྱེས་པས་དཔུན་དང་སྲིང་མོར་བུད་མེད་ཀྱིས་དཔུན་དང་མིང་པོར་ཤེས་པས་༽ཤེས་པས་སྤུན་ནམ་ནི། །སྲིང་མོར་ཐེ་ཚོམ་མེད་པར་འགྱུར། །༼སྐྱེས་པའམ་བུད་མེད་ཀྱིས་༽སོར་མོ་༼ གཡོན་པ་༽གཅིག་ནི་སྟོན་པ་ཡིས། །ལེགས་པར་འོངས་ཞེས་སྨྲ་བ་ཡིན། །སོར་མོ་གཉིས་ནི་བསྟན་པ་ཡིས། །ལེགས་འོངས་ལན་ནི་སྨྲ་བ་ཡིན། །འདིར་ནི་རྣལ་འབྱོར་མ་ཀུན་གྱི། །ཡན་ལག་ཕྱག་རྒྱར་རབ་ཏུ་བཤད། །༼སྐྱེས་པས་གཡས་བུད་མེད་ཀྱིས་གཡོན་གྱི་༽འཐེབ་འཛུབ་གཉིས་བཀུག་༼སྟེ་༽མིག་གི་རྒྱ་༼ལྟར་བྱས་ལ༽། །སྔགས་པར་གང་ལ་དེ་བསྟན་པ། །དེ་མོད་༼ལ་༽ཇི་སྲིད་འཚོ་བའི་བར། །དབང་༼པོ་༽འགྱུར་༼ཞིང་༽གསང་བར་༼གདམས་པ་༽ཐེ་ཚོམ་མེད། །གང་ཞིག་གུང་མོ་སྟོན་བྱེད་པ། །དེ་ལ་འཛུབ་མོ་བསྟན་པར་བྱ། །གང་ཞིག་སྲིན་ལག་སྟོན་བྱེད་པ། །དེ་ལ་ལྕེ་ནི་བསྟན་པར་བྱ། །གང་ཞིག་པ་ཏི་ས་༼ཐོད་པ་༽སྟོན་པ། །དེ་ལ་མདུང་ནི་༼འཕོངས་སུ་༽བསྟན་པར་བྱ། །གང་ཞིག་སྤྱི་བོ་སྟོན་བྱེད་པ། །དེ་ལ་༼སྐྲ་མཚམས་༽འཚམས་ཀྱི་མཐའ་བསྟན་བྱ། །གང་ཞིག་ས་ནི་སྟོན་བྱེད་པ། །དེ་ལ་ཁ་ནི་བསྟན་པར་བྱ། །གང་ཞིག་ཁྲོ་གཉེར་སྟོན་བྱེད་པ། །དེ་ལ་འཚམས་ནི་བསྟན་པར་བྱ། །གང་ཞིག་༼སོ་སོའི་སྐྱེ་བོ་དང་ཉན་ཐོས་༽སོ་ནི་སྟོན་བྱེད་པ། །དེ་ལ་མཆུ་ནི་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །དེ་ལ་ཁ་ནི་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་བལྟ་བ་བསྟན་པར་བྱ། །འདི་ནི་རྣལ་འབྱོར་མ་ཀུན་གྱི། །རིམ་བཞིན་ཡན་ལག་༼དུ་མ་༽ཕྱག་རྒྱ་ཡིན། །༼དཔའ་བོ་དང་རྣལ་འབྱོར་མའི་རྟགས་སུ་༽འདི་དག་རྟགས་བསྟན་༼གཞན་ལ་༽གསང་བ་ལ། །༼དཔའ་བོ་དང་རྣལ་འབྱོར་མར་ངོ་ཤེས་པར་༽ཡང་དག་ལྟ་བ་༼འགྱུར་ཟེར་༽འགྲོ་བ་ཡིན། །དཔལ་འཁོར་ལོ་སྡོམ་པ་ལས་ཁྱད་པར་གྱི་༼ཡན་ལག་དུ་མ་༽མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གཉིས་པའོ། །༼དེ་ལྟར་བསྟན་པས་རྣལ་འབྱོར་མས་ངོ་ཤེས་དང་རྣལ་འབྱོར་མ་དང་ཆགས་པར་བྱས་ནས་མ་མཆོད་ན་བྱིན་གྱིས་མི་རློབས་པས་ཆགས་པར་བྱ་བ་དང་ཆགས་པར་བྱ་བའི་རྟགས་བརྡ་བསྟན་བསྒྲུབ་པ་པོ་བདག་ལ་ཆགས་པའི་༽ །དེ་ནས་༼ཆགས་པར་བྱ་བའི་བརྡ་༽གཞན་ཡང་བཤད་བྱ་བ། །༼༡་ལ་གཅིག་ཆགས་པའི་༽མཁའ་འགྲོ་མ་ཡི་རྣམ་༼པར་༽རོལ་༼པ་༽ནི། །༼ཛོ་ཀ་༽གང་གིས་རིང་ནས་༼མཐོང་པ་ནས་༽དཔའ་བོ་ཡི། །དཔའ་བོས་སྲིང་མོར་ཤེས་འགྱུར་༼རྣལ་འབྱོར་མས་མིང་པོར་ངོ་ཤེས་༽བའོ། །དམ་ཚིག་ཅན་གང་༼ལ་༽རྗེས་༼སུ་༽ཆགས་པ། །༼ སུ་ཀའི་སྤྱད་ཅིང་བརྟེན་༽དཔའ་བོའི་ལོངས་སྤྱོད་ས་གཞི་༼ཡིན་ཟེར་༽བཞིན། །གཞིར་ནི་ས་གཞི་བྱས་ནས་ནི། །རྣལ་འབྱོར་པ་ཡི་༼དབང་བསྐུར་ཐོབ་ལ་དམ་ཚིག་མ་ཉམས་པ་༽སྡོམ་པ་མཆོད། །༼ཆགས་པ་སྐྱེས་པའི་སྟོབས་ཀྱིས་ལྟ་སྙིང་འདོད་པ་ལ་བལྟ་མི་ཕོད་པ་༽གོ་བཟློག་པ་ཡིས་༼ཆགས་པའི་རྟགས་དངོས་བལྟ་བ་༽ལྟ་བ་༼ཟུར་མིག་༽ནི། །༼བརྟན་ཐབས་འདི་རྣམས་ཐབས་ཀྱིས་རྣལ་འབྱོར་མ་ལ་བརྟགས་པ་གཙོ་བོར་བྱས་པ་གསུང་༽གཞིན་ནི་རྣམ་པར་འགྱུར་བ་༼ སྐར་མ་ལ་སོགས་པ་ལས་དམར་བ་༽ཉིད། །རྟག་ཏུ་བདེ་བས་༼ཆགས་པས་༽སྨིན་མ་གཡོ་༼རེ་མོས་འདོགས་པ་༽། །༼སྤྱོད་པ་༽སྣ་ཚོགས་མྱུར་དུ་༼སོ་དང་སེན་མོ་དང་འཁྱུད་པ་ལ་སོགས་པ་༽ཤེས་བྱ་བ། །དེ་བཞིན་མཁའ་འགྲོ་༼མ་༽ལས་བྱུང་བའི། །རྣམ་འགྱུར་བསྐོར་བ་ཤེས་བྱ་སྟེ། །རི་མོ་གསུམ་པོ་༼ལྟེ་བའི་སྟེང་དུ་ཟླ་གམ་ལྟ་བུ་ཡོད་པ་༽ཡོངས་སུ་ཟླུམ། །མཁའ་འགྲོ་མ་རྣམས་༼སུ་༽ངེས་༼པར་ཤེས་པར་བྱ་གསུང་༽འགྲོ་བའི། །༼དེ་ལ་བརྟེན་པ་བདེ་བའི་ཡེ་ཤེས་ཤེས་པར་བྱ་གསུང་༽དེ་ཡི་མཚན་མ་ཤེས་པར་བྱ། །གློ་བུར་དུ་ནི་༼ཆགས་པ་སྐྱེས་པས་གཟུགས་དང་བཞིན་འགྱུར་བ་༽་ལྡོག་འགྱུར་བ། །༼ཚིག་སྔ་མ་ལས་ཕྱི་མ་འགྱུར་ཞིང་སྨྲ་བས་སུ་༽སྔར་བཤད་ཚིག་ནི་ཉམས་པ་ཉིད། །དེ་ཡི་གདོང་ནི་འཇིག་འགྱུར་བ། །རྡོ་རྗེ་ལྟ་བུར་༼རྟོགས་པས་མི་ཕྱེད་པས་༽གསལ་བ་ཡིན། །སྒྲ་ནི་ཁུ་བྱུག་སྐད་༼རང་བྱུང་གི་ཆགས་པའི་སྒྲ་ཧ་ཧ་ཅེས་པ་ལ་སོགས་པའོ་༽ལྟ་བུ། །གསོལ་བར་དེ་ནི་རྟག་ཏུ་འགྱུར་༼དེ་དག་ཕོ་ཉའི་ལམ་པའི་དབང་དུ་བྱས་༽། །༼དེ་ལྟར་དང་པོར་མཚོན་ནས་ཕྱིས་ཕྲ་མོ་དང་ཐིག་ལེ་ལ་བརྟེན་ནས་བདེ་བ་མྱོང་བར་བྱེད་པ་སྟེ་དེ་ལས་པོར་རེག་བྱ་བདེ་བ་བསྐྱེད་དེ་གོམས་པ་ལ་ཆོས་སྐུ་་་་་་་་༽འདི་ཡི་མཚན་མ་ཁྱིམ་དུ་ནི། །༼དེ་ལ་བརྟེན་ནས་དཔེའི་ཡེ་ཤེས་བདེ་ལ་མི་རྟོག་པ་ཉམས་སུ་མྱོང་རྣལ་འབྱོར་གྱི་ལམ་བསྟན། ཉི་མའི་བར་དུ་མི་བསྐྱོད་པ་ལ་རྡོ་རྗེ་བསྒོམ། དེ་ལ་དམིགས་ཏེ་བདེ་བ་བསྒོམ་དེས་འགྲེ་༼༼ མཚན་མཉི་མ་ཁ་སྦྱོར་དུ་དབང་བསྐུར་བྱེད་པའི་དུས་སུ་ཕྱག་རྒྱ་མ་བརྟེན་ནས་བྱུང་བའི་བདེ་བ་དེ་བསྒྲུབ་པ་པོའམ་ལམ་དུ་ཉམས་སུ་ལེན་ཙ་ན་ཡབ་ཀྱི་རྡོ་རྗེའམ་ཡུམ་གྱི་པད་མར་ཉི་མ་ཁ་སྦྱར་གྱི་བར་དུ་རིགས་ལྔ་གང་རུང་པའི་ཕྱག་མཚན་བསྒོམ་པ་ལ་དེ་ལ་དམིགས་ནས་དབང་གི་དུས་སུ་ཕྱག་རྒྱ་ལ་བརྟེན་ནས་བྱུང་པའི་བདེ་བ་དེ་བསྒོམས་པས་ཆོས་སྐུའི་དེ་ལས་སྤྲུལ་སྐུ་འབྱུང་སྤྲུལ་སྐུས་སེམས་ཅན་གྱི་དོན་བྱེད་དོ་གསུང་༽རྡོ་རྗེ་ལྟ་བུའི་༼མཚན་མ་ཕྲ་མོ་ཉི་མ་ཁ་སྦྱོར་བར་དུ་༽མེ་ལོང་བཅས། །༼དོན་གྲུབ་༽རལ་གྲི་འདྲ་བའི་མེ་ལོང་བཅས། །རྒྱལ་མཚན་༼གྱི་མཚན་མ་༽རྟག་ཏུ་བྱུང་ལས་༼ཉི་མའི་བར་དུ་སོགས་ཟེར་༽ཤེས་༼དགྲ་སྟ་ལ་སོགས་པའི་མཚན་མར་འོང་བར་རིགས་ན་འདིར་ཏ་ཐའི་མཚན་མ་ལ་སེམས་བཟུང་སྟེ་བསླབ་པ་དང་པོའི་གདམས་པ་ཡིན་གསུང་༽། །ཁ་སྦྱོར་མེ་ལོང་ལས་ཤེས་བྱ། །༼རྡོ་རྗེ་ལ་སོགས་པ་༽མཚན་མ་དང་ནི་༼དེ་ལྟ་བུའི་༽གཟུགས་སུ་བྱ། །༼ཕྲ་བ་བསྒོམ་པའི་༽མཚན་ཉིད་འདི་དག་དང་ལྡན་པ། །དེ་ནི་མཁ་འ་འགྲོ་མ་རྣམས་ཀྱི་༼ནི་༽། །༼དང་པོའི་དཔེའི་ཡེ་ཤེས་སྐྱེ་དེ་ལས་རིམས་ཀྱིས་གོམས་པས་ལས་མཐའ་མར་མ་ཧ་མུ་ཏྲ་རྟོགས་པས་ཌ་ཀི་རྣམས་ཀྱང་༽མཆོག་ནི་ཡིན་པར་ཤེས་པར་བྱ། །དཔལ་འཁོར་ལོ་སྡོམ་པ་ལས་མཁའ་འགྲོ་མའི་མཚན་མའི་ཕྱག་རྒྱའི་མཚན་ཉིད་ཀྱི་༼ཆགས་པའི་རྟགས་ཡིན་པས་༽ཆོ་གའི་ལེའུ་སྟེ་ཉི་ཤུ་གསུམ་པའོ། ། ༼ལེའུ་བཅོ་ལྔ་པ་དང་འདིར་འབྲེལ་གསུང་༽ །དེ་ནས་ཚིག་གཞན་གྱིས་སྒྲུབ་པའི་༼རེ་རེ་ལ་འདུས་པ་༽། །༼ཡི་གེ་འདུས་པའི་༽བརྡ་ནི་རབ་ཏུ་༼རྣལ་འབྱོར་མ་ཙམ་དུ་ངོ་ཤེས་པའི་༽བཤད་བྱ་སྟེ། །སྤུན་དང་སྲིང་མོར་ངེས་པ་ནི། །གང་གིས་༼ལག་པ་གཡོན་པས་གཡས་པས་བཤལ་ནས་བཟུང་པ་དེ་ ཡན་ལག་དྲུག་པ་སུ་ཏིས་ཕྱག་རྒྱའི་ལན་ནོ་༽ཤེས་པར་འགྱུར་བའོ། ༼ སྐྱེས་པའི་དཔུ་རྒྱན་དང་སྲིང་མོར་བུད་མེད་ཀྱིས་དཔུ་རྒྱན་དང་མིང་པོར་ཤེས།འདི་དག་ལ་ཕར་སྨྲ་བའམ་ཚུར་སྨྲ་བ་༢་ཀ་ལ་དོན་ཤེས་པར་བྱའོ། ལག་པའི་བཤལ་ནས་བཟུང་པ་བྱ་བ་རེས་སུ་གཡས་པས་གཡོན་པ་༽ །པོ་ཏཱང་གྷི་ཞེས་བྱ་བ་ནི་གསོང་པོར་སྨྲ་བའོ། །པྲ་ཏི་པོ་ཏངགྷི་ཞེས་བྱ་བ་ནི། །གསོང་བོར་སྨྲ་བའི་ལན་ནོ།གྷ་མུ་ཞེས་པ་ནི་འགྲོའོ་༼ འི་སྤྱིར་དཀྲུགས་ཏེ་བསྟན་པ་ རིམ་པས་ཐོད་པ་དང་བདེ་བ་མྱོང་བར་བྱེད་པ་སྟེ་དེ་ལས་དང་པོ་རེག་བྱ་བདེ་བ་ བསྐྱེད་དེ་་་་་་་་་ ་་་་ ༡༤་་༼སྲིབ་༧༽ཞེས་བྱ་བ་ཡིན་ནོ། །ལུམ་པ་ཞེས་བྱ་བ་ནི་འོངས་སོ་ཞེས་བྱ་བ་ཡིན་ནོ། །དེ་ཧི་ཞེས་བྱ་བ་ན་ཟོས་ཞེས་སྨྲ་བ་ཡིན་ནོ། །གྲི་ཧ་ན་ཞེས་བྱ་བ་ནི་ལེན་ཞེས་བྱ་བ་ཡིན་ནོ། །བཱི་རཱ་ནཱམ་ཞེས་བྱ་བ་ནི་སྙིང་པོའོ། །མར་ན་ཞེས་བྱ་བ་ནི་༼འཆི་འཕོ་བའི་༽སྒྲ་ངན་པའོ། །ཀར་ནི་ཀ་ཞེས་བྱ་བ་ནི་གྷན་ཏའོ་༼གྷན་དྷ་ཞེས་བྱ་བ་ནི་ཀ་ནི་ཀ་ཟེར་དྲིལ་བུ་༽། །ཤི་རོ་ནི་རྫུན་ནོ་༼གྲོལ་ལོ་༽། །ཀཱ་ར་ནཱ་སྐྲའོ་༼ཡིན་ན་ཅེའོ༽། །བཱ་ར་ནི་༼ཡིན་ན་་ ་མཚན་མ་ཉི་མ་ཁ་སྦྱོར་བར་དུ་༽ཕག་གི་སྒྲའོ།༼༡༤སྲིབ་གཤམ་དུ་རྟགས་༢་རྟགས་ཅན་ལ་བཙུད་ས་མ་རྙེད༽༢་ནི་༼དམར་བ་དང་རྔུལ་དང་མཆུ་གས་པ་ལ་སོགས་པ་གསུང་༽༼བརྟེན་པ་ལ་བརྟེན་ནས་བདེ་བའི་ཡེ་ཤེས་ཉམས་སུ་མྱོང་བ་དེ་གསུང་༽ཞེས་པ་འདི་༢་ཡིན༽༽ །ཤྲ་མ་ནོ་ནི་རྣ་བའོ། །མན་ཏ་ན་ནི་༼ཨ་མྲི་ཏ་བྷ་ག་ཟེར་༽བདུད་རྩིའི་གནས་སོ། །ནར་ནི་མཉམ་པར་འདུས་པའོ། །ཏ་ལི་ཀ་ནི་མཁའ་འགྲོ་མའོ། ༼༢་ན་ར་ར་ཡོད་༽ །ཀ་མན་དྷ་ལུ་ནི་དཀྱིལ་འཁོར་རོ། །ཨ་མོ་ཀ་ནི་དུར་ཁྲོད་དོ། །ཀམ་པི་ལ་ནི་སྒོའོ། །ཤྭ་ར་ཤ་ནི་བྲམ་ཟེའི་རིགས་སོ། །པ་རི་ཏཱ་ི་ནི་རྒྱལ་རིགས་སོ། །པི་ར་ཏི་ནི་རྗེའུ་རིགས་སོ། །ཀྲཱུར་ཏ་ནི་དམངས་རིགས་སོ། །ཨན་དྷ་ནི་༼ཤན་པ་༽རྨེ་ཤ་ཅན་ནོ། །ཤུ་ལི་ཀ་ནི་ཁྱིམ་མོ། །ཨ་ལི་ཀ་ནི་ཕྱུགས་སོ། །ཌ་ཀི་ན་ནི་སྲིང་མོའོ། །མེ་རུ་ཀ་ནི་ཆུའོ། །གྲི་ཧེ་ར་ནི་ཕྱག་རྒྱས་བཏབ་པའོ༼་རང་ལ་ཁྱོ་དོ་བ་༽། །༼དན་ཏ་པར་ཤ་ན་ནི་༽ལྕེ་སོ་ལ་རེག་པ་ནི་བདག་ལྟོགས་པར་སྟོན་པའོ། །ཏྲི་ཤྲཱར་ནི་དྲིས་༼ལུས་ལ་༽བསྒོ་པའོ། །ཀུ་ཏ་ནི་གང་ནས་འོངས་ཞེས་པའོ། །ཨ་མུ་ཀསྡྱ་ན་ནི་གནས་ཆེ་གེ་མོ་ནས་འོངས་སོ་ཞེས་བྱ་བ་བའོ། །ཀི་ར་ནི་མེ་ཏོག་གོ །ཏུ་མུ་ལ་ནི་རྒོད་པའོ། །དན་ཏཾ་ནི་ཆར་དབབ་པའོ། །དྲི་པ་ཏྲི་ནི་ཞུ་པའོ། དྷུརྻ་ནི་ཕྱིའོ། །དུ་མ་པྲི་ཡ་ནི་སྤྲིན་ནོ། བྷ་ཧེར་ནི་ལུས་སོ། །ས་བུ་ནི་རིའོ་༼བདུན་༽། །ས་རི་ཏྲ་ནི་ཆུའོ་༼བོ་བཞི་༽། །ཨཾ་གུ་ལི་ནི་༼སོར་མོའི་༽ཆ་ཤས་སོ། །བ་དན་ནི་གདོང་ངོ། །ཛ་རི་ཀ་ནི་ལྕེའོ། །ཨན་དན་ནི་སོའོ། །པ་ཀ་ཏི་ནི་རྒྱལ་མཚན་ནོ། །པ་ཞེས་བྱ་བ་འགའ་ཞིག་ཏུ་༼རྒྱན་གྱི་༽རྣམ་གྲངས་སོ། །ཙན་དྷོ་ནི་ཕྲེང་བའོ། །ཙ་ལ་ནི་རླུང་ངོ། །པ་ཤུ་ནི་རི་དགས་སོ། །༼ཨན་ཏི་ཟེར་༽ཡ་ཏི་ནི་དཀྱིལ་འཁོར་རོ། །སྭ་སཾ་ནི་བཞི་མདོའོ། །ཕལ་ཀུ་ཤཾ་ནི་སྐྱེ་བའོ། །མ་ཧ་གཥ་རམ་ནི་ཕྱུགས་ཆེན་པོའོ་༼གླང་པོ་ཆེ་ལ་སོགས་པ༽། །གཱ་ནི་ར་སྐྱེས་སོ། །ན་ནི་མིའོ། །གོ་ནི་ཁྱུ་མཆོག་གོ །མ་ནི་མ་ཧེའོ། བྷ་ནི་བཟའ་བའོ། །ཧོ་ནི་༼བཟའ་བའི་༽རྣམ་གྲངས་སོ། །ཨ་བྱ་ཀ་ཞེས་བྱ་བ་ནི་རྒྱལ་པོའོ་༼ཕོ་ཉ་༽སྐྱེས་བུའོ། །རེག་ཞེས་བྱ་བ་ནི་ནགས་ལ་གནས་པའོ། །༼ལག་པ་༽ཁ་ལ་རེག་པ་ནི་ཟོས་ཞེས་པའོ། །ལྕེ་ལ་རེག་པ་ནི་ངོམས་སོ་ཞེས་པའོ། །ན་སྟི་ནི་༼ཅི་ཡང་བྱར་མེད་ཅེས་༽སྟོང་པའོ། །ཧྲི་ནི་ངོ་ཚ་བའོ། །སྟོང་པ་ལ་རེག་པ་ནི་༼ཤུ་ནཡ་ཡར་ཤུ་ནཡ་ཡིན་༽མེ་ཐུན་གྱིས་ཤིག་པའོ། །བླ་ལ་རེག་པ་ནི་༼ངའི་སྟེང་དུ་ཁྱོད་འདུག་ཅིག་པའོ་༽སྟེང་ཉིད་སྟེ་འོག་ན་མེད་པའོ། །ཕྱག་རྒྱ་༼སྔ་མ་༽དང་ཕྱག་རྒྱའི་༼ཕྱི་མ་༽ལན་གསང་བའི་བརྡ་ཅན་དཔའ་བོའི་བཙུན་མོ་དང་། །༼ཁ་དོག་དབྱིབས་ལུས་ཀྱི་བརྡ་གང་གི་བརྡའ། བྱིན་གྱིས་རློབས་བྱེད་ནི། གཟུགས་ཀྱི་སྡེ་ཚན་ནི་ཌ་ཀི་ནི་ལས་མའི་ སྡེ་གཉིས་ལག་པའི་མུ་ཏྲའི་སྟེང་གི་བརྡའི་སྡེ་བཞི་གསུང་༽སྡེ་ཚན་བཞི་རྣམས་ཀྱི་མཚན་ཉིད་དོ། །དཔལ་འཁོར་ལོ་སྡོམ་པ་ལས་སྡེ་ཚན་བཞིའི་མཚན་ཉིད་ཅན་གྱི་བརྡའི་ཚིག་གི་བརྡར་བཏགས་པའི་ཆོ་གའི་ལེའུ་སྟེ་ཉི་ཤུ་རྩ་བཞི་པའོ། །དེ་ནས་༼འདོད་པའི་དོན་ཐམས་ཅད་༽ཀུན་དོན་འདོད་པ་ཡི། །སྦ་བྱ་༼རྐང་བ་བརྒྱད་ཀྱི་ཧཱུཾ་ཧཱུཾ་ཕཊ་༽བརྒྱད་མཐར་སྦྱར་བྱས་ཏེ་༼མཆོད་པའི་ལ་ཧཱུཾ་ཕཊ་སྦྱར། བཟླས་པ་ལ་མི་སྦྱར་གསུང་༽། །མོས་པ་དམན་པའི་༼བླ་མའི་གདམ་ངག་དང་སྦྱར་བ་༽སེམས་ཅན་དང་། །༼གདམ་ངག་ལ་༽རྨོངས་ཤིང་མི་ཤེས་སེམས་ལྡན་པའོ། །དེ་ལ་དཔའ་བོ་དང་རྣལ་འབྱོར་མ་རྣམས་གྱིས་གསོལ་བར་གསུངས་པའི་སྔགས་ནི་འདི་ཡིན་ཏེ། ༼ཨོཾ་དང་ཧཱུཾ་ཕཊ་ཀུན་ལ་གཞུག་༽ །ཨོཾ་ན་མོ་བྷ་ག་ཝ་ཏེ་ཝི་རེ་ཤཱ་ཡ།༼ཧཱུཾ་ཧཱུཾ་ཕཊ་རྐང་བ་བརྒྱད་ཅར་ལ་སྦྱར་༽ ༼ཨོཾ་༽ །མ་ཧཱ་ཀལྤ་ཨགྣི་སཾ་ནི་བྷཱ་ཡ། །ཛ་ཊཱ་མ་ཀུ་ཊ་ད་ཀ་ཊཱ་ཡ། །དཾཥཊ་ཀ་ར་ལོ་ཀྲ་བྷཱི་ཥ་ཎ་མུ་ཁ་ཡ། །ས་ཧ་སྲ་བྷུ་ཛ་བྷཱ་སུ་རཱ་ཡ། །པ་ར་ཤུ་པཱ་ཤོ་དྱ་ཏ་ཤུ་ལ་ཁྭ་ཊྭཱཾ་ཀ་དྷཱ་རི་ཎེ། །བྱཱ་གྷ་་ཛི་ནཱ་ཨཾ་བྷ་དྷ་རཱ་ཡ། །མ་ཧཱ་དྷུམྤྲ་ཨན་དྷ་ཀཱརཝ་པུཥཱ་ཡ། །ཀ་ར་ཀ་ར་༼མཛོད་༢་༽ ། ཀུ་རུ་ཀུ་རུ་། བྷན་དྷ་བྷན་དྷ་༼ཆིངས་༢་༽ ། ཏྲ་ས་ཡ་ཏྲ་ས་ཡ་༼ཁོས་༡་༢་༽ ། ཀྴོ་བྷ་ཡ་ཀྴོ་བྷ་ཡ་༼དཀྲུགས་༡་༢་༽། །ཧྲཱོཾ་ཧྲཱོཾ་༼སྔགས་དོན་ནི་ཧི་༽། །ཧྲ་ཧྲ་། ཕེཾ་ཕེཾ། །ཕཊ་ཕཊ། །ད་ཧ་ད་ཧ། །པ་ཙ་པ་ཙ། །བྷཀྴ་བྷཀྴ་༼གསོལ་༡་༽ ། ༼གང་ལ་ན། ཞག ཁྲག གར་གྱིས་ན། སྒྱུ་མའི་ཕྲེང་བ་འཆང་བ་༽ །བ་སུ་རུ་ཏི་ར་ཨན་ཏྲ་མ་ལཱ་བ་ལཾ་བི་ཎ། གྷྲིཧྣ་གྷྲིཧྣ་༼ཟུང་༢་༽ །༼ས་འོག་རིམ་པ་བདུན་ཕུག་པ་༽ །སཔྟ་པ་ཏ་ལ་ག་ཏ་བུ་ཛཾ་གཾ་སརྦཾ་༼ལྟོ་འཕྱེ་སྦྲུལ་༽བཱ་ཏརྫ་ཡ་ཏརྫ་ཡ་༼རྟོགས་༽ ། ཨ་ཀཊྚེ། ཨ་ཀཊྚེ་ཧྲཱིཾ་ཧྲཱིཾ་། ཛྙོཾ་ཛྙོཾ་། ཀྴཾམཀྴཾམ། ཧཾ་ཧཾ། ཧིཾ་ཧིཾ་། ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུཾ་ཧཱུཾ་ཕཊ། །དཔལ་འཁོར་ལོ་སྡོམ་པ་ལས་རྩ་བའི་སྔགས་ཐམས་ཅད་ཀྱི་སྦས་པའི་ཆོ་གའི་ལེའུ་སྟེ་ཉི་ཤུ་ལྔ་པའོ། ། ༼གོང་དུ་བསྟན་པའི་ཚུལ་གྱིས་རིགས་མ་ངོ་ཤེས་ནས་ཆགས་པར་བྱ་བ་བསྟན་ནས་འདི་ནས་དེ་དག་བསྟེན་པའི་ཐབས་བསྟན་ཏོ།ཡང་འདིས་ལམ་གྱི་གསང་བ་བསྒྲུབ་པའི་གྲོགས་བསྲུང་བའི་དམ་ཚིག་ཐུན་མོང་མ་ཡིན་པ་བརྒྱད་བསྟན་ཏོ།༽ །དེ་ནས་གཞན་ཡང་འཇིག་རྟེན་ནི། །གསུམ་པོ་དག་ནི་ཡོད་མིན༼་ཤིན་ཏུ་རྙེད་དཀའ་བས༽་པའི། །ཤྲཱི་ཧེ་རུ་ཀའི་༼རྩ་༽སྔགས་༼ལ་སོགས་པ་༽ཤེས་ན། །གསང་སྔགས་༼གཞན་༽ཐམས་ཅད་ཡོངས་༼སུ་༽འདོར་བྱ། །རིམ་དང་༼ལུགས་དང་༽རིམ་ལས་བཟློག་པ་ཡིས་༼སྔགས་ཟློག་པ་ནི་ཡར་ཟློས་མར་བཟློས་སོ། སྔགས་དང་ལྷ་གཡོན་པར་བསྒོམ་པ་བཟློག་པ་ཡང་ཤེས་པར་བྱའོ༽། །༼དཀྱིལ་འཁོར་པའི་ལྷ་རྣམས་༽ཕོ་ཉ་རྣམས་ནི་༼སྔགས་ལས་སྐྱེས་པ་ལ་བྱ་༽ཡང་དག་གནས། །༼ཞིང་སྐྱེས་༽འོག་དང་༼ལྷན་༡་སྐྱེས་མ་༽སྟེང་གྲུབ་༼སི་ཏི་༽རྟག་ཏུ་སྟེར། །༼སྔགས་ལས་སྐྱེས་མ་༽བདག་གི་ཕོ་ཉ་མ་ཀུན་འགྲོ། །༼སྔགས་ལས་སྐྱེས་མས་རིམས་ཀྱིས་བསྐུལ་བས་༽ཕོ་ཉ་མ་དེ་ཀུན་༼དེ་ཡན་ཆོད་ཕོ་ཉ་མ་༣་ཀ་ལོ་ཉི་ཤུ་ཡར་མར་༽གྲུབ་སྟེར། ༼འདི་མན་ཆད་སྔགས་སྐྱེས་༽ །༼སྐར་ཁུང་ལ་སོགས་པ་ནས་བལྟ་ཞིང་༽མཐོང་བ་དང་ནི་༼ རླུང་སྦྱོར་ཞིང་་་་་༣་དུ་ལུས་ལ་་་་་་སྐྱེས་མ་དེ་ཚུན་་་་་་ཇི་ལྟར་བསྟེན་་་་་བྱ་ཞེ་ན་༽རེག་པ་དང་། །༼འོ་བྱ་བ་ཞག་གསུམ་དུ་འོ་༽ཙུམ་པ་ན་དང་རྟག་པར་༼ཞག་གསུམ་དུ་ལུས་ལ་༽མཁྱུད། །རྣལ་འབྱོར་གནས་ནི་༼ཏེ་རྡོ་རྗེ་དང་པད་མ་སྦྱོར། བདེ་བ་མྱོང་པར་ཞག་༣༽་ཁྱད་པར་ཉིད་༼དེ་ལྟར་དཔེའི་ཡེ་ཤེས་ཀྱིས་བདེ་བ་ཉམས་སུ་མྱོང་བར་བྱས་པས་དེར་དོན་གྱི་ཡེ་ཤེས་༤་བ་རྟོགས་པར་འགྱུར་རོ༽ ། ༼དེ་ལྟ་བུའི་ཚུལ་གྱིས་སྔགས་ལས་སྐྱེས་པ་བསྟན་པ་༽།ཇི་སྲིད་རྣལ་འབྱོར་མ་ཡི་ཚོགས་༼ཀྱིས་༽། །ཐམས་ཅད་༼ཐུན་མོང་དང་མཆོག་མ་ཧ་མུ་ཏྲ་མཆོག་༽དངོས་གྲུབ་བྱེད་པར་བཤད། །༼དེ་ལྟ་བུའི་ཐབས་དེ་གང་ཟག་དམ་ཚིག་ཅན་ལ་སྦྱིན་པར་བྱ་བ་ཡིན་པས་༽བདེ་ཅན་ཀུན་ལ་སྦྱིན་བྱ་ཡི། །གཞན་དུ་༼དམ་ཚིག་མེད་པ་ལ་སྦྱིན་པར་མི་བྱ་བ་༽ནམ་ཡང་མ་ཡིན་ནོ། །༼ཕན་བྱེད་པ་༽མ་དང་༼བརྩེ་བས་༽སྲིང་མོ་༼ངག་ཉན་པས་༽བུ་མོ་དང་། །༼བདེ་བ་བསྐྱེད་པར་བྱེད་པས་༽ཆུང་མ་ཕོ་ཉ་༼སྔ་མའི་སྟེང་དུ་ཕོ་ཉ་མོ་རྟེན་པ་དེ་ཡང་སེམས་བརྟན་པ་ཐོབ་པས་དངོས་སུ་ལྔ་དང་མ་ལ་སོགས་པ། འདི་ལོ་ཀའི་རྟོག་པ་སྤང་བའི་ཕྱིར་ལྔ་ཅར་བརྟེན་པའམ། ལས་དང་པོ་པས་༡་ལ་ཡང་ཡོན་ཏན་ལྔ་ཚང་བའི་ཕྱག་རྒྱ་༡་བརྟེན་པའོ་༽ཀུན་གནས་པའོ་༼ཛོ་ཀིའི་བྱ་བ་བྱེད་པས། མ་གནས་ལ་ཟེར་༽ །༼དེ་ལྟར་བརྟེན་་་་ཕོ་ཉ་དེ་ཡང་་་་་གིས་དབང་བསྐུར་དམ་ཚིག་སྡོམ་པ་དང་སྤོད་པ་ལ་གོམས་པར་བསླབ་པ་༽གང་ཞིག་རྟག་ཏུ་སྔགས་སྦྱིན་པ། །དེ་ཡི་དེ་ཉིད་༼བརྟེན་པའི་ཕོ་ཉར་༽ཆོ་གར་བཤད། །དེ་ནས་༼བསྲུང་བའི་དམ་ཚིག་༽རྣལ་འབྱོར་༼མའི་༽རྒྱུད་དུ་ནི། །རྙེད་དཀའ་དམ་ཚིག་༼བསྲུང་བའི་དམ་ཚིག་འཐུན་མོང་མིན་པ་༽ང་ཡིས་བསྟན་༼བཤད༽། །སྐྱེས་བུ་བུད་མེད་གཡོན་ནས་འགྲོ། ༼རང་གིས་འདི་ལྟར་གཡོན་གྱི་ཀུན་ཏུ་སྤྱོད་པ་བྱ་བ་དང་། གཞན་འདི་ལྟར་བྱ་བ་ཡང་བསྟན། དེ་ལྟར་བྱ་ཞིང་རྣལ་འབྱོར་མ་བརྟེན་པ་༽ །འདོད་པའི་དངོས་གྲུབ་༼དངོས་གྲུབ་ཐམས་ཅད་འགྲུབ་པ་ཡུལ་ཉི་ཤུ་རྩ་༤་ལ་སོགས་པར་གནས་པའི་མཁའ་འགྲོ་མས་བྱིན་གྱིས་དེ་ལ་བརློབ༽སྟེར་བར་བྱེད། །ཁྱིམ་དང་ཞིང་དུ་རྣམ་གནས་པའི། ༼གཡོན་གྱི་ཀུན་ཏུ་སྤྱོད་པ་བྱེད་པ་དེ་རྣམས་རྣལ་འབྱོར་པ་དང་རྣལ་འབྱོར་མ་༽ །ཤིན་ཏུ་རིང་ཡང་ཤེས་པར་འགྱུར། །ཧེ་རུ་ཀ་ལས་༼རྣལ་འབྱོར་མ་སྲེས་ན་སྦྱོར་བ་ལས་༽སྦྱོར་གཞན་མེད་༼ཏེ་ཧེ་རུ་ཀ་ཡང་དེ་ཡིན་༽། །སློབ་དཔོན་༼ལ་༽རྣལ་འབྱོར་མ་༼དེ་༽ཉིད་༼རང་༽ཡིན། །རྒྱུད་འདི་རུ་ནི་བསྒྲུབ་པ་པོ། ༼དེ་ལྟར་བྱ་ཞིང་རྣལ་འབྱོར་མ་བརྟེན་ལ་༽ །ལེགས་པར་འགྱུར་བ་༼དངོས་གྲུབ་ཐམས་ཅད་འགྲུབ་པ་༽ཉིད་ཡིན་ཏེ། །༼རྣལ་འབྱོར་མ་ལ་༽བརྙས་མི་བྱ་ཞིང་༼གཡོན་གྱི་ཀུན་སྤྱོད་ལས་འདའ་བར་མི་བྱ་བ་༽སྤང་མི་བྱ། །ཅི་ནུས་པ་ཡིས་༼བརྟེན་པས་ཟས་སྙོམས་འཇུག་སོགས༽་མཆོད་པ་བྱ། ༼གཞན་ཡང་གདུལ་བྱའི་དོན་དུ་ཁྭ་གདོང་ལ་སོགས་པ་ བརྒྱད་བྱུང་བས་༽ །ཁྭ་གདོང་ལ་སོགས་བརྒྱད་འདི་དག་༼པོས་མཚོན་ནས་དུད་འགྲོ་མ་ཆགས་ཐམས་ཅད་ལ་བརྙས་པ་དང་བརྡེག་པ་ལ་སོགས་པ་མི་བྱ་ཞིང་དེ་དག་ལ་༽ །མོས་༼པ་༽དང་དད་པ་འཕེལ་༼བར་༽བྱེད་པ༼ར་བྱ་སྟེ་དེས་ནི༽། །རྟག་པར་དངོས་གྲུབ་༼༣་གྱི་༽རྣམས་ཀྱི་རྒྱུ། །༼དེ་ལྟ་བུའི་༽དམ་ཚིག་རྣམས་ཀྱང་སྐྱོང་བའོ། ༼དེ་ཡན་ཆད་ཀྱིས་གཡོན་གྱི་སྤྱོད་པ་གཙོ་བོར་བྱས་སྟེ་བསྲུང་བའི་དམ་ཚིག་སྤྱིར་བསྟན་ནས། འདི་ན་མར་ཐུན་མོང་མ་ཡིན་པ་བརྒྱད་བསྟན་ཏོ་༽ །ལྷ་མོ་༼རང་གི་རིགས་བརྟག་ཅིང་སྦྱང་བ་བོར་ནས་གཞན་བྲམ་ཟེ་ལ་སོགས་པ་ལྟ་བུ་ལ་སྤྱད་ན་ཉམས་པས་བསྲུང་༽གཞན་དང་ཀུན་སྦྱོར་བ་༼འོ་བྱེད་པ་༽། །༼ཐ་མལ་བའི་༽འདོད་༼ཆགས་༽ལ་༼བྲམ་ཟེ་ལ་སོགས་པའི་མུ་ཏྲ་དེ་ལ་༽ཆགས་པར་འགྱུར་འགྲོ་བ། །མི་གཡོ་བདག་གཞན་གཉིས་༼སུ་༽མེད་༼ ༣་༽པ། །༼རིགས་བཟང་ངན་གཡུང་མོ་ལྟ་བུ་བོར་ནས་རིགས་བཟང་བ་ལ་དགའ་བར་བྱས་ན་༽གཉིས་སུ་མེད་༼པ་༽དང་༼བཟང་ངན་ལ་༽ཐོགས་པ་མེད་༼པར་བྱས་ལ་བསྟེན༽། །༼དོན་གྱི་དབང་བཞི་བོ་རྟོགས་པར་བྱ་བའི་བསམ་པས་བསྟེན་པ་ལས་ད་དེ་བྲལ་ན་ ཉམས་པའོ༽དམ་ཚིག་༼གི་༤་བ་༽སྤྱོད་པ༼འི་༽སྤྱད་པ༼འི་བསམ་པ་སོགས༽་དང་། །༼གོང་དུ་བསྟན་པའི་མ་ལ་སོགས་པའི་ཡོན་ཏན་དང་ལྡན་པ་དང་ཡོན་ཏན་གཞན་པ་སོགས་ལྡན་པ་ལས་༽བུད་མེད་དབང་ཕྱུག་ཤིན་ཏུ་སྦྱོར། །༼བྱང་སེམས་བཟུང་སྟེ་བསྟེན་པ་༽ཚངས་སྤྱོད་དེ་བཞིན་༼འབའ་དན་དེའི་སྟེང་དུ་ཡང་རིམ་པ་༢་ལ་སེམས་གནས་པར་བྱ་གསུང་༽བསམ་གཏན་གནས། །ཁྲོ་༼བ་༽མེད་༼པར་༽རྒྱུན་༼དུ་སྤྱོད་པ་༽གྱིས་ཀུན་ཏུ་སྤྱོད་༼པ་དང་ལྡན་པའོ་༽། །འདི་བརྒྱད་༼བསྲུང་བའི་༽དམ་ཚིག་༼ཐུན་མོང་མིན་པའི་༽ཀུན་སྤྱོད་ཡིན། །བསྒྲུབ་པ་༼པོས་བསྲུང་པ་༽ལ་ནི་གནས་པ་ཡི། །བསྒྲུབ་པ་པོ་ཡི་༼དམ་ཚིག་མི་ཉམས་པར་བསྲུང་པར་༽རྟག་ཤེས་བྱ། །རྒྱུད་༼གཞན་གྱིས་ཡང་དམ་ཚིག་རྣམས་བསྲུང་བའོ་༽ཀུན་གྱི་༼མ་བླ་ན་མེད་པའི་༽ནི་ཐུན་མོང་སྟེ།༼དམ་ཚིག་ཉི་ཤུ་རྩ་གཉིས་འདིར་ཐུན་མོང་མ་ཡིན་པ་བརྒྱ་གསུམ་བཅུ་ཐམ་པའོ༽ །༼དོན་མེད་པར་༽ཉམས་པར་མི་བྱ༼འོ་༽རྒྱུ་མེད་༼དུ་ཉམས་པའམ་བཏང་བའི་དགོས་པ་མེད་པས་༽པ། །༼དམ་ཚིག་དེ་རྣམས་བསམ་པས་༽དད་པ་ཉིད་ཀྱིས་བླང་བྱ་ཡི་༼སྤང་བྱ་དང་བསྟེན་བྱའི་དམ་ཚིག་ཐ་དད་པ་དང་བཅས་པའི་སེམས་ཀྱིས་ཞུ་དག་བྱ་སྟེ་བསྲུང་ཞེས་པའི་དོན་གསུང་༽། །མིག་༼གིས་བལྟ་བ་དང་༽དང་ལག་པས་༼བཟུང་དུ་ཡོད་པ་མ་ཡིན་པས་དད་པས་བླང་ངོ་༽མ་ཡིན་ནོ། །༼དབང་མ་ཐོབ་པ་ལ་དམ་ཚིག་སྡོམ་པ་མི་བསྟན་༽གསང་བ་འདི་ནི་མི་བསྟན་ཅིང་། །རབ་ཏུ་འབད་དེ་སྦ་བར་བྱ། ༼གསང་དང་སྟོན་ནུས་པའི་ཕྱག་རྒྱ་མོ་དགོས་གསུང་༽ །བློ་ལྡན་༼ཕོ་ཉ་མོ་བསྟེན་པའི་དུས་སུ་༽འཐེའུ་ཆུང་༼འབའ་ཏན་ད་བཤད་པ་བླ་ལྷག་ཏུ་མཐེའུ་ཆུང་ཅེས་པས་སྐྱེས་མ་བསྟེན་པ་ལ་སྦྱོར་སྔགས་སྤྱོད་ཡིན་དཔྱད་པས་ཆོག་སྟེ་སོར་མོ་གོང་མ་རྣམས་ཀྱིས་ཞིང་སྐྱེས་དང་ལྷན་སྐྱེས་མཚོན་པའོ་གསུང་ན་དེ་མི་དགོས་གསུང་ངོ་༽བསྐྱོད་པ་༼སྟེ་ག་ཆུ་ག་ཏེ་གུང་འཛུབ་སེན་མོ་མེད་པར་བྱས་ལ་རྩ་བྲུད་པ་གསུང་༽ནི། །ཕོ་ཉ་མོ་༼སྔགས་སྐྱེས་༽རྣམས་༼ཕོ་ཉ་བསྟེན་པའི་བསྒྲུབ་པོ་དུ་ཞེ་ན་༽ཡང་དག་གནས། །༼རྫོགས་པ་བསྒོམ་༽དག་དང་༼བསྐྱེད་པ་བསྒོམ་པ་༽མ་དག་༼རིམ་པ་གཉིས་ཀ་བསྒོམ་མོ་༽འདྲེས་པ་སྟེ། །བསྒྲུབ་པ་པོ་ནི་གསུམ་དུ་གནས། །༼ལྷ་མཉེས་པར་བྱེད་པ་སྐྱེད་རིམ་བསྒོམ་པ་ བཞུགས་པའི་ གདམ་ངག་༽མཉེས་བྱེད་༼ཐ་མལ་པའི་ཕུང་པོ་ལྷར་བསྒོམས་པས་ལྷ་དེ་ཡེ་ཤེས་སུ་རྟོགས་པས་༽རྣམ་པར་དག་པ་དང་། །༼དེ་ལྷར་རིམ་གཉིས་ལ་བརྟེན་ནས་སེམས་གསལ་བའི་ཏིང་ངེ་འཛིན་ནི་སྐྱེས་པའོ་༽གསལ་བྱེད་༼ད་འདི་ཆོག་གསུང་༽ཡོན་ཏན་༼རྫོགས་རིམ་བསམ་མི་ཁྱབ་དང་༽ལྡན་པའི་མི། །དཔལ་འཁོར་ལོ་སྡོམ་པ་ལས། ༼བསྒྲུབ་པ་པོས་༽སློབ་མ་ཡོངས་སུ་བརྟག་པ་དང་སྡོམ་པའི་༼དམ་ཚིག་བརྒྱད་༽ཆོ་གའི་ལེའུ་སྟེ་ཉི་ཤུ་དྲུག་པའོ། །༼ལེའུ་དང་པོའི་བདེ་བས་ཀྱང་ནི་འགྲུབ་པར་འགྱུར་གྱིས་རྒྱས་པར་བཤད་པའོ་༽ །དེ་ནས་སྤྱོད་༼པ་རྡོ་རྗེ་ཐེག་པ་ལ་འཇུག་པའི་གདམ་ངག་གསུམ་དང་བཞུགས་པའི་གདམ་ངག་༣་ཡིན་ལ་འདི་༣་ནི་ཐེག་པ་༣་ཡིན་ཏེ་པར་རྒྱུད་སྦྱངས་མ་སྦྱངས་ཀྱང་ཅུང་ཟད་ཉམས་པའོ་༽དང་༼ཐ་མལ་བའི་སྤྱོད་པ་བརྟུལ་ནས་རྣལ་འབྱོར་པའི་སྤྱོད་པ་ལ་ཞུགས་པ་༽བརྟུལ་ཞུགས་༼ལ་གནས་པའོ་༽དཔའ་༼ཅེས་པའོ༽། །༼ཐ་མལ་བའི་༽ཕོ་ཉ་མོ་༼དོན་༤་ལས་དང་པོ་ཕོ་ཉ་བསྒྲུབ་པའོ་༽རྣམས་རབ་སྒྲུབ་བྱེད་༼མའི་བུ་མོ་ལ་མཁའ་འགྲོ་མས་རྒྱས་པའི་ཕོ་བཙལ༽ ། ༼ཅི་སྟེ་ཞེ་ན་༽ །མྱུར་དུ་སྒྲུབ་༼པར་དངོས་གྲུབ་ཐམས་ཅད་མྱུར་དུ་༽བྱེད་འཇུག་པར་༼ཕོ་ཉ་མོ་ཡིན་པས་༽འགྱུར། །༼ཕོ་ཉའི་༽མཚན་ཉིད་ཐམས་ཅད་༼སྔར་བཤད་པའི་རིགས་དྲུག་ལ་སོགས་པའི་༽ཤེས་པར་བྱ། །༼ཐ་མལ་༽ཡུལ་དང་༼དོན་༢་པ་ཕོ་ཉ་ཡུལ་ ཕོ་ཉ་མོ་བཙལ་བའི་ཕྱིར་ཡུལ་ཉི་ཤུ་རྩ་བཞི་ལ་སོགས་པར་པད་མ་བཛྲས་གསང་བ་འགྲུབ་པ་ན་བཤད་པ་ལྟར་འགྲོ་སྟེ་༽ཡུལ་དུ་འགྲོ་བ་༼ཡུལ་ནས་བཙལ་བ་༽ཡིན། །ཕོ་ཉའི་གཟུགས་ནི་མཚོན་པ་ཡི་༼ཞིབ་བཙལ་༽། །༼ཐིག་ལེ་འཛིན་ནུས་མི་ནུས་༽ཕོ་ཉ་རལ་གྲི་སོ་འདྲ་ཞིང་༼ཕོ་ཉ་གཉིས་ལས་ཐ་མལ་བའི་མིན་པ། གྲུབ་པའི་ཕོ་ཉ་མོ་ནི་དམ་ཚིག་དང་ལྡན་པས་མཉེས་པར་བྱས་པས་དངོས་གྲུབ་སྟེར་ལ། དམ་ཚིག་དང་མི་ལྡན་ཞིང་མཉེས་པར་མ་བྱས་པས་བསྒྲུབ་པ་པོ་རང་གསོད་རལ་གྲིས་ཡང་ན་གཞན་གཅོད། ཡང་ན་རང་ལ་གཅོད་པ་དང་འདྲ། ཡང་ན་ཐ་མལ་པའི་བདེ་བ་ལ་ཆགས་པས་ཕྱག་རྒྱ་བསྟེན་ན་རྣམ་རྟོག་སྐྱེད་པའམ་ངན་འགྲོ་སྐྱེད་པ་ཡང་གསུང་༽། །༼མཉེས་པར་བྱས་ནས་སྡིག་པ་༽དག་བྱེད་བསོད་ནམས་༼དངོས་གྲུབ་སྟེར་༽འཕེལ་བྱེད་ཡིན། ༼དོན་གསུམ་པ་ཕོ་ཉ་བཙལ་བ་དེ་སྟོན་པའི་ཐབས།དེ་བཞིན་ཕོ་ཉ་༼༣་དབྱེར་མེད་དུ་ཤེས་པ་བསྟན་ཏེ་༽ལེགས་༼དེ་ཡང་བསྟེན་པ་ན་སྔགས་ལ་ཞིང་སྐྱེས་སུ་མོས་པ་བྱེད་པས་བསྟེན་ཏོ་༽འདྲེས་པ༼ར་བྱེད་པས་ཕོ་ཉ་དེའི་གསང་གནས་བྱིན་གྱིས་བརླབ་པ་དང་གནས་རྣམས་སུ་རྩ་སྔགས་ལ་སོགས་པ་དགོད་པ་དང་གནས་༣་དང་གནས་ལྔ་བྱིན་གྱིས་བརླབས་ལ་སྙོམས་བྱས་ཏེ་མཆོད་པས་༽། །བསྒྲུབ་པ་པོ་ཡིས་༼སྔགས་སྐྱེས་མ་བསྟེན་ཏེ་དེ་ཡང་དང་པོ་དཔའ་བོ་ཡིས་དངོས་སུ་མྱོང་བ་དོན་གྱི་ཡེ་ཤེས་རྟོགས་པར་བྱས་ན་ཕན་ཡོན་༽དངོས་གྲུབ་འཐོབ། །༼ཕྱིའི་༽བཟླས་བརྗོད་༼ མཆོད་པས་ཕོ་ཉ་མཉེས་པས་༽བསམ་གཏན་༼ལྷ་བསྒོམ་པ་ལ་སོགས་པ་༽མེད་པར་ཡང་༼ཡང་ཞེས་བྱ་བ་སྡུད་ཚིག་སྟེ། མཆོག་ཐུན་མོང་སི་ཏི་རྣམས་སྔགས་བཟླས་བསམ་གཏན་གྱིས་འགྲུབ་པས་ཡང་དེ་དག་མེད་པར་ཕོ་ཉ་ལ་བསྟེན་ཏེ་དོན་གྱི་ཡེ་ཤེས་རྟོགས་པས་ཀྱང་འགྲུབ་ཅེས་པའོ༽། །༼བསམ་པ་ལ་སོགས་པའི་ཁྱད་པར་རོ་༽མྱུར་བ་ཉིད་དུ་༼དངོས་གྲུབ་༣་༽འགྲུབ་པར་འགྱུར། ཕོ་ཉ་བསྟེན་ལུགས་བསྒྲུབ་པ་པོ་༽ །སྔགས་དང་ཕྱག་རྒྱ་༼དང་༽བསྒྲུབ་པ་པོས་༼སྙོམས་འཇུག་གིས་༽། །མཆོད་པ་ཉིད་༼ཕོ་ཉ་བསྟེན་པ་རང་༽ལ་རབ་ཏུ་འཇུག ༼འདི་ན་མཐོང་མི་ཐུབ་པའི་མཆན་ཞིག་བཙུད་མེད༽ །འདི་ལས་གཞན་པའི་མཆོག་མེད་དེ། །བསྟན་བཅོས་ཉིད་དུ་༼ཕོ་ཉ་བསྟེན་པའི་ལམ་འདི་ཐེ་ཚོམ་མེད་༽ངེས་པ་ཡིན་༼པས་༽། །ཕོ་ཉ༼་བསྟེན་པ༽འི་ལམ་ལ་དགའ་བ་དང་། །བསྒྲུབ་པ་པོ་ནི་དངོས་གྲུབ་༼བསྒྲུབ་པ་ལ་བརྩོན་༽༼དོན་བཞི་བ་ཕོ་ཉ་བསྟེན་པའི་དུས་སུ་ཟས་ཀྱི་རྣལ་འབྱོར་ཕོ་ཉ་བསྟེན་པ་ལ་ལུས་བཟུངས་རྒྱས་པ་ཅིག་དགོས། ལུས་ཟུངས་རྒྱས་པ་ལ་ཁ་ཟས་བཟང་པོ་བཟའ་དགོས་པས་ཁ་ཟས་བསྟེན་པ་བསྟན༽་བརྩོན་༼པར་བྱ་༽ ། ༼ཨོཾ་ཨཱ་ཧཱུཾ་༽ །རིགས་སྔགས་༼འདི་ལ་བརྟེན་ནས་ལག་མཆོད་ཟིན་གསུང་། ཚེས་བཅུའི་དུས་སུ་པུ་ཙ་ཡང་ཟིན་གསུང་། ཐེབ་སྲིན་སྦྱང་བ་སྟེ་འཐེ་བོང་ལ་ཟླ་བ་ལ་ཧཱུཾ་བསམས་ལ་གསེར་གྱི་ས་གཞིར་བསམ། འཛུབ་མོ་ལ་ཟླ་བ་ལ་སུཾ་བསམ་ལ་རི་རབ་ཏུ་བསམ། ཆང་རྒྱ་མཚོར་བསམ་ལ་བསྲུབས་པར་བསམ། དེ་ལས་བདུད་རྩིར་བསམས་ལ་ཟ༽་ཕྱག་རྒྱར་ཡང་དག་ལྡན། །༼ལྷ་མཆོད་པའི་བསམ་པས་༽ཟས་ལ་རྟག་ཏུ་སྤྱད་པ་བྱ། །རྣལ་འབྱོར་༼ལྷ་༣་བཅུ་རྩ་༧་གྱི་དཀྱིལ་འཁོར་རྫོགས་པ་ལ་བྱ་༽ཀུན་ལ་འཇུག་པ་ཡིས། །བསྒྲུབ་པོ་༼ཕྱི་ནང་གི་ལྷའི་དཀྱིལ་འཁོར་རྫོགས་པ་ལ་༽ལེགས་པར་མཉམ་བཞག་བྱ། །༼སྤྱོད་པ་བྱེད་པའི་དུས་སུ་༽རིགས་རྣམས་༼སྤྲོས་མེད་ཀྱང་ཟུར་ཙམ་ཟིན་གསུང་༽ཀུན་ལ་༼གཡུང་མོ་དང་བྲམ་ཟེ་ལ་སོགས་པ་བཟང་ངན་མེད་པར་༽སྤྱད་བྱ་ཞིང་། །༼བདུད་རྩི་ལྔ་ལ་སོགས་པར་དང་ཆང་ལ་སོགས་པ་མཉམ་པོར་༽བཟའ་མིན་པར་ནི་མི་བརྟག་གོ །༼དེ་བཞིན་ཟེར་༽དེ་ཉིད་དུ་༼ཆོས་ཉིད་དེ་བཞིན་ཉིད་དུ་རོ་༡་པས་རིགས་བཟང་ངན་དུ་༽ནི་དེ་དབྱེར་མེད། ༼ཞིང་སྐྱེས་མ་དང་ལྷན་སྐྱེས་མ་བསྒྲུབ་པ་ཡང་སྔགས་སྐྱེས་བསྐུལ་ནས་འགྲུབ་ཅེས་སོ་༽ །ཕོ་ཉ་མོ་ཡི་བསྒྲུབ་པ་གཉིས། །༼སྔགས་སྐྱེས་མ་བསྟེན་པ་༽དངོས་གྲུབ་ཆོ་ག་ལ་སྤྱོད་ཚེ། །༼སི་ཏི་བསྒྲུབ་པའི་ཚེ་སྔགས་སྐྱེས་མ་བསྟེན་པ་༽ཕོ་ཉ་གཅིག་པ་ཁོ་ན་ཡིན། །རབ་༼མཆོག་༽དགའ་ཉིད་༼བུ་དང་བུ་མོའི་༽དང་དངོས་གྲུབ་ནི༼ཐུན་མོང་དངོས་གྲུབ་༽ ། ༼འདི་ན་རྐང་བ་དུ་མར་དོའི་འགྱུར་ན་མེད་དེ་མེད་པ་ལེགས་༽ །ཞིང་རྣམས་གནས་སུ་༼རང་བཞིན་གྱིས་འགྲུབ་པའི་ཡུལ་ཉི་ཤུ་རྩ་བཞི་ན་༽གྲུབ་པ་ཡི། །མཁའ་འགྲོ་མ་དག་རྣམ་པར་གནས་༼པས་གྲུབ་པོས་སྔགས་སྐྱེས་གྲུབ་ཙ་ན་ཞིང་གྲུབ་པོ་༽། །དེར་༼བསྒྲུབ་པ་པོ་དེར་ཕྱིན་བསྐྱེད་རྫོགས་གཉིས་པ་༽གནས་པ་ཡི་༼སྔགས་སྐྱེས་བསྟེན་ཅིང་༽བཟླས་པ་བྱ་༼ཅེས་པ་ཕོ་ཉ་བསྟན་པ་ཉིད་དགོས་གསུང་༽། །ཟས་རྙེད་པ་༼སྔགས་སྐྱེས་དངོས་སུ་རྙེད་པ་༽ནི་གཉིས་པའོ། །དེ་ནི་༼སྔགས་སྐྱེས་དངོས་སུ་རྙེད་ནས་བསྟེན་པ་༽རོལ་པར་ཡང་དག་༼ཕོ་ཉ་བསྟེན་པ་༽གནས། །བསྒྲུབ་པ་༼དངོས་གྲུབ་༽དག་དང་ཉེ་བའོ། །༼སྔགས་སྐྱེས་དངོས་སུ་བསྟེན་པས་ཞིང་སྐྱེས་བསྐུལ་དེ་ལྷན་སྐྱེས་བསྐུལ་བས་༽ཕོ་ཉ་རྣམས་ནི་ཡང་དག་བསྐུལ། །༼དེ་ལྟར་སྔགས་སྐྱེས་བསྟེན་པས་སི་ཏི་ཐོབ་པ་དེ་ཡང་༽བླ་མ༼འི་གདམས་ངག་༽་བརྒྱུད་པའི་རིམ་༼པ་ལས་༽ཐོབ་པའི། །༼དང་པོ་ཕོ་ཉ་དེ་༽དབང་བསྐུར་༼བྱ་༽བས་ནི་སྔགས་ལེགས་ལྡན་༼ལྷ་བསྒོམ་པ་དང་ལྡན་པར་བྱ་༽། །༼བཞི་པའི་དེ་ལྟར་བྱས་པའི་༽ཕོ་ཉ་རྣམས་སུ་༼བསྟེན་པར་༽ཡང་དག་བཤད། །༼དེ་ནས་༽ཕྱག་རྒྱ་༼བསྟེན་པ་ཡང་ཁབ་དེབ་ལྟ་བུ་དང་སྤྱང་ཐག་ལྟ་བུ་ལ་སོགས་པ་བསྟེན་པའོ་༽ལེགས་སྦྱོར་ངང་ཚུལ་༼རྡོ་རྗེ་མཁའ་འགྲོ་མས་རི་དྭགས་མིག་དང་གླང་པོའི་སྣ་ལ་སོགས་པའི་མཚན་ཉིད་དང་ལྡན་པའོ་༽དང་། །༼མིའི་མཚན་ཉིད་དང་ལྡན་པའི་སྟེང་དུ་ཡང་ཕོ་ཉ་དེའི་མཚན་ཉིད་༽ཆགས་༼པ་༽མེད་གཏོང་དང་༼རང་གི་དམ་ཚིག་བསྲུང་༽ཚུལ་ཁྲིམས་ལྡན། །༼དང་པོར་དེའི་ཡེ་ཤེས་དེ་ལས་དོན་གྱི་ཡེ་ཤེས་དེ་རྟོགས་པ་སྐྱེ་ལ་དེ་ལས་འབྲས་བུ་ཆོས་སྐུའི་ཡེ་ཤེས་སྐྱེའོ་༽ཡེ་ཤེས་རྒྱུ་སྐྱེས་༼རིམ་གྱིས་འབུ་ཏར་༽ཡང་དག་རྫོགས། །བསམ་པའི་བདག་ཉིད་༼བུ་མོ་འོད་གསལ་སྟོང་པ་ལ་ཉལ་བས་༽ནང་པར་ལངས། །ལུས་ཀྱི་༼སྤོགས་ཀྱི་བསྡུ་བ་ཚངས་པ་ལ་སོགས་པ་བསྐྱེད་རིམ་རྫོགས་པར་བསྒོམས་པའི་༽བྱ་བ་ཀུན་བྱ་སྟེ། །༼གང་ཞེ་ན་ཐ་མལ་བའི་ལུས་ཀྱི་ ཆོ་ག་གཉིས་༽ཡན་ལག་ལས་འདས་མཚོན་ཆ་ནི། །༼ལྷའི་ང་རྒྱལ་དུ་བྱ་བ་གསུམ་བཅུ་རྩ་བདུན་གྱི་༽ལུས་ལ་༼ལྷ་རྣམས་རྫོགས་པར་དགོད་པ་ལ་སོགས་པ་༽གནས་པར་ཀུན་ཏུ་སྤྱད། །༼ལུས་ལྷར་༽དག་༼པར་༽བྱེད་བྱས་པའི་ལུས་དང་ནི། །༼༣་པ་སྤྱོད་ལམ་གྱི་ཁྱད་པར་དུ་༽རྟག་ཏུ་སྔགས་ནི་༼ཨོཾ་ཨཱ་ཧཱུཾ་སརྦྦ་བི་ར་ཡོ་གི་ནི་ལ་སོགས་པས་ལུས་ཀྱི་དཀྱིལ་འཁོར་བསྟན་པར་བྱེད་པས་༽བརྗོད་པར་བྱ། །རྟག་ཏུ་སྔགས་ནི་༼སུམ་བྷ་ནི་༽བརྗོད་ནས་སུ། །རྣལ་འབྱོར་གནས་རྣམས་༼པུ་ཛ་ལ་སོགས་པ་ལུས་ཀྱི་གནས་རྣམས་༽་ངེས་བསྟན་ཞིང་༼ཧེ་རུ་ཀ་བསྒོམ་༽། །༼ལུས་ལ་ལྷ་ཚང་མར་དགོད་པ་གོ་ཆ་ལ་སོགས་པ་༽མཚོན་ཆ་རྣམས་ནི་བསྒོམ་མི་བྱ་། །༼བཞི་བ་དམ་ཚིག་གི་ཁྱད་པར་༽དམ་ཚིག་ཅན་༼རྡོ་རྗེ་སྤུན་ལ་སོགས་པ་ལ་སྤྱིར་བུད་མེད་ཐམས་ཅད་ལ་༽མི་ཁྲོ་མི་བྱ། །དབང་བསྐུར་པ་ལས་༼སེམས་ཉིད་ཁོ་ན་རྟོགས་པ་ལ་དབང་བཞི་པའི་དོན་རྟོགས་པར་བྱ་ལས་༽འདའ་མི་བྱ། །༼བཞི་བའི་རྟོགས་པ་རྒྱུན་དུ་༽དེ་དང་༼དབང་ཟེར་༽ལྷན་ཅིག་༼མི་འབྲལ་བར་བྱའོ་༽བདེ་བར་བྱ་༼དབང་བཞི་པའི་དོན་རྟོགས་པས་༽། །༼རང་༽གྲོལ་བའི་དོན་༼རང་དོན་སི་ཏི་ཐོབ་གཞན་དོན་དུ་ལས་བཞི་ལ་སོགས་པ་འགྲུབ་༽དེ་དོན་དུ་༼ལྔ་དགོས་པ་གོང་གི་བསམ་པ་དང་ཡུལ་གྱི་ཁྱད་པར་རང་ལ་དགོས་པ་ཅི་ཡོད་ཅེ་ན་༽། །དམ་ཚིག་སྤྱོད་པ་ཉིད་དུ་༼ཕོ་ཉ་བསྟེན་པ་ཉིད་དུ་༽བྱ། །༼འབའ་ཏན་ཏ་༽རྨོངས་པས་༼ཐ་མལ་པའི་༽འཁྲུལ་བ་རྣམ་པར་སྤང་། །༼དྲུག་པ་ཁ་དོག་དང་གོས་ལ་སོགས་པའི་ཁྱད་པར་༽མཚན་མོ་རྟག་པར་༼གཅེར་བུ་མོ་༽ནམ་མཁའི་གོས་༼ཅན་བྱས་པར་༽། །ཡང་ན་གོས་དང་།སུམ་བྷ་ར་ཧིར། དམར་ནག་དུ་བ་འདིར་༽གནག་དང་དམར་བར་རྟག་འགྱུར་བ། ༼ཞེས་བྱ་བ་ལ་སོགས་པ་ཚིག་རྐང་བཅུ་འགྱུར་སྙིང་ལ་ཡོད་ཏེ་འབའ་ཏན་ཏའི་དང་༽ །སྲོག་ཆགས་༼བླ་དཔེ་ལ་མེད་༽ལས་བྱུང་༼སྟག་སྤགས་ལ་སོགས་པ་༽ཡན་ལག་གྱོན། །༼ཅི་དགར་༽བདེ་བ་༼བསྐྱེད་༽སྤྱོད་པས་༼ཕྱག་རྒྱ་ཆེན་པོ་༽བདེ་ཐོབ་འགྱུར།་༼ཞེས་པ་རྟོགས་པ་ཁྱད་པར་ཅན་སྐྱེ་བ་ལ་བྱའོ༽། །མཆོད་ཕྱིར་ཐོགས་ནི་༼གསེར་ལ་སོགས་པ་ལས་བྱས་པའི་རྒྱན་བདུན་༽ཡོངས་སྤངས་གཙང་། ༼བར་བྱས་པས་ལྷའི་རྒྱན་གྱིས་བརྒྱན་༽ཤྲཱི་ཧེ་རུ་ཀར༼འི་ང་རྒྱལ་དུ་༽བྱིན་གྱིས་བརླབས། །༼རུས་པའི་༽ཕྱག་རྒྱ་ལྔ་དང་༼འབྲས་བུ་ཆེ་བ་ལ་ལ་ལས་འདིར་འབྲས་བུ་ཆུང་ལྷན་༡་སྤྱོད་བྱ་ཟེར་༽ཡང་དག་ལྡན། །དུས་ཀུན་ཏུ་ནི་ཡང་དག་སྤྱད། །༼དེ་རྒྱས་པར་༽མགུལ་རྒྱན་གདུ་བུ་རྣ་རྒྱན་དང་།༼ཕས་དྲུག་དང་སྦྱར། ཡང་ན་རིས་དྲུག་དུ་སྦྱར་༽ །༼བརྒྱད་པ་ཞར་ལ་གསང་པའི་སྤྱོད་པ་དང་གསང་བར་བྱ་བ་དང་གཙང་སྒྲ་ལ་སོགས་པའི་ཁྱད་པར་༽སྤྱི་བོ་ནོར་བུས་རྣམ་པར་བརྒྱན། །མཆོད་ཕྱིར་ཐོགས་དང་ཐལ་བ་དང་། །དུས་ཀུན་དུ་ནི་རྣམ་པར་གནས་༼རུས་པའི་རྒྱན་ལ་སོགས་པ་གདགས་པ་དང་༽། །༼གཅེར་བུ་ལ་སོགས་པའི་སྤྱོད་པས་སྤྱོད་པ་དང་བསྒོམ་བཟླས་ལ་སོགས་པ་ཐམས་ཅད་༽མཚན་མོ་རྟག་ཏུ་གསལ་བྱ་ཞིང་༼ཞེས་བྱུང་༽། །ཉིན་པར་གསང་བ་ཉིད་དུ་བྱ། །བྱེད་པའི་ཡེ་ཤེས་ཤིན་ཏུ་སྦ། །རབ་ཏུ་ཞི་ཞིང་ངལ་བ་ཐུལ། །༼གཙང་སྒྲ་དངོས་དེ་མདོར་བསྟན་པ་༽ གཙང་སྒྲ་གསུམ་དུ་ཤེས་བྱ་ཞིང་། །༼སྤྱོད་པ་མ་བཅོས་པ་རྣལ་མ་༽རང་གི་རྒྱུན་བཞིན་རྣམ་པར་གནས། །༼བྲམ་ཟེ་སོགས་༽རིགས་དང་༼གཡུང་མོ་སོགས་༽རིགས་མིན་༼གཉིས་པ་བཟང་ངན་དུ་༽ངོར་མི་ལྟ། །༼སྐྲ་ལྟག་པར་༽སྤྱི་གཙུག་ལ་སོགས་༼མེ་ཏོག་འཕྲེང་བ་རྟགས་སོགས་༽བཅིང་བ་སྤང་། །༼དབང་པོ་རབ་དེ་ཁོ་ན་ཉིད་གོམས་པར་བྱེད་པའི་༽ཕོ་ཉ་༼གཙང་སྤྲ་རྒྱས་པར་བཤད་པའོ༽གཙང་སྦྲ་དང་པོ་ཡིན། །གཉིས་པ་༼འབྲིང་བདུད་རྩི་ལྔ་ ཕག་ཏུ་རྟོག་མེད་སྟོན་ཅིང་དེ་ཁོ་ན་ཉིད་གོམས་པར་བྱེད་པ་༽ཟླ་བ་ཡིན་པར་འདོད། །༼དབང་པོ་ཐ་མ་ཚོགས་ཀྱི་འཁོར་ལོ་ལ་སོགས་པའི་དུས་སུ་སྣོད་༡་ཏུ་ཟ་བ་ཟས་གཅིག་ཏུ་སྤྱོད་པ་༽ཟས་གཅིག་ཏུ་ནི་༼བྲམ་ཟེ་སོགས་རིགས་ཐམས་ཅད་༽ཟ་བ་ཉིད། །གཙང་སྦྲ་གསུམ་པ་༼གཙང་སྦྲ་ནི་རྟོག་པའི་དྲི་མ་དག་པར་བྱེད་པའོ་༽ཡིན་པར་བཤད།༼སྤྱི་དོན་༣་པ་སྤྱོད་པའི་ཕན་ཡོན་ ས་མིན་ཏན་རྡ་འམ་ཡང་ན་སཾ་བྷ་ར་རང་གི་བཤད་རྒྱུད་གསུང་༽ །རྣལ་འབྱོར་པས་ནི་རྟག་ཉིད་དུ། །གཙང་སྦྲ་འདི་དག་རབ་བསྐྱངས་པས།༼ གསུམ་པོ་ཐུན་མོང་ཞི་སོགས་དང་མཆོག་དང་ཕྱག་རྒྱ་ཆེན་པོ་མཆོག་གྲུབ་ཆེན་རྣམས་བུ་ཏའི་རིམ་པས་སོ་༽ །གཙང་མ་དག་པའི་རིམ་ཐོབ་ནས། །དངོས་གྲུབ་༼གཞན་༽གང་ལས་༼ཀྱང་༽འབྱུང་༼པར་༽མི་འགྱུར་༼དེ་འདི་ཁ་ནས་བྱུང་ཅེས་པའོ༽། །དེ་ཉིད་བསྡུས་པར་༼བཟླས་པ་ལ་སོགས་པས་འགྲུབ་པར་༽གང་གསུང་དང་། །དེ་བཞིན་བདེ་མཆོག་ལས་གང་གསུང་༼དེ་ལྟ་བུའི་དོན་འདི་ལས་བསྟན་པས་རྒྱུད་ཀྱི་ཆེ་བ་བསྟན་༽། །གསང་བའི་༼འདུས་པ་༽རྒྱུད་ལས་༼ཡང་ན་ཐམས་ཅད་ནས་རྒྱུད་གསུང་༽ཡང་དག་བཤད། །དེ་བཞིན་དཔལ་མཆོག་དང་པོ་དང་། །རྡོ་རྗེ་འཇིགས་བྱེད་ཉིད་ལས་གསུངས། །༼དེ་རྣམས་སུ་བཟླས་པ་དང་འཁྲུལ་འཁོར་ལ་སོགས་པས་ལས་འགྲུབ་པར་གསུང་པ་དེ་༽བཟླས་དང་བརྟུལ་ཤུགས་སོགས་པས་༼དངོས་༽འགྲུབ་༼གྲུབ་པར་གསུངས་པ་དང་༽། །དེ་༼བདེ་མཆོག་ཉུང་ངུ་འང་༽འདིར་༼གོང་གི་འཁྲུལ་འཁོར་ལ་སོགས་པ་ལ་མི་ལྟོས་པར་བསམ་གཏན་ཁོ་ནས་འགྲུབ་ཅེས་པའོ་༽བསམ་གཏན་ཙམ་གྱིས་ནི། །༼ཕོ་ཉ་ཕྱིས་གོམས་པའི་༽སྔགས་པས་སྐད་ཅིག་གིས་༼ཕྱག་རྒྱ་ཆེན་པོའི་དངོས་གྲུབ་༽འགྲུབ་འགྱུར། །༼ཕོ་ཉ་དངོས་སུ་མིན་པའམ་ཡང་ན་ཕོ་ཉ་དངོས་སུ་བསྟེན་པར་མི་འདོད་ན།ཕོ་ཉ་མ་ཡིན་པར་ཕག་མོ་ལ་སོགས་པ་ཡིད་ཀྱིས་སྤྲུལ་པའི་རིག་མ་༽རྣལ་འབྱོར་ལམ་ལ་དགའ་བས་ཀྱང་། །༼ཐ་མ་སྣོད་གཅིག་ཏུ་བཟའ་བ་གསུང་༽གཙང་སྦྲ་འདི་ནི་ཡང་དག་སྤྱད། །བསོད་ནམས་༼སམ་དངོས་གྲུབ་༽གཙང་སྦྲ་ལས་༼གསུམ་འམ་ཐ་མ་ལས་གསུང་༽ལས་བྱུང་གང་། །བསྒྲུབ་པོའི་ཡོན་ཏན་རྒྱ་ཆེན་པོ།༼ ཚོགས་ཀྱི་འཁོར་ལོ་དང་གསང་བའི་པུ་ཙ་གཉིས་ལ་གནས་པའི་༽ །སྟོང་ཕྲག་གཅིག་པའི་༼ལ་ཝེ་བརྒྱ་བརྒྱ་ཡོད་པས་བརྗོད་པ་༽གདོང་མིན་པར། །ཁ་ཅིག་༼དང་ཝེ་གཅིག་༽གིས་ནི་༼ཚོགས་ཀྱི་ཕན་ཡོན་༽བརྗོད་༼པར་༽མི་ནུས། ༼དེ་ལྟ་བུ་འབྱུང་བ་ཡང་གང་གི་མཐུ་ཡིན་ན་༽ །དཔལ་ལྡན་ཁྲག་འཐུང་༼ང་རྒྱལ་གྱིས་ཕོ་ཉ་བསྟེན་པའི་འོ་༽ཡེ་ཤེས་ཆེ༼ན་པོ་༽། །རྣམ་དག་མཚན་ཉིད་ཀུན་བསྒྲུབ་པའོ་༼འི་མཐུའོ་༽། །༼ཕོ་ཉ་བསྟེན་པའི་བདེ་བ་༽བདེ་བའི་༼བུ་༽བསོད་ནམས་༼ཚོགས་ཀྱི་ཕན་ཡོན་༽ཆུ་༼ཆང་༽འཐུང་བ། །༼དེའི་སྒྲིབ་པ་༽དག་བྱེད་སྡིག་པ་འཇིགས་བྱེད་ཡིན། །༼རྣལ་འབྱོར་པའི་གྷ་ནའི་ཡོན་ཏན་ལྟ་ཞོག་གི་གཞན་ ཚོགས་དེ་ལ་༽རེག་པ་དང་ནི་སྨྲ་བས་ཀྱང་༼གྷ་ན་དེའི་དུས་སུ་༽། །སྡིག་པ་ཀུན་ལས་རྣམ་གྲོལ་ཞིང་། །༼ལས་དང་པོ་པས་མི་དགེ་བ་བཅུ་བསྡམས་སྟེ་༽ལུས་ངག་སྐྱོན་ནི་མེད་པ་ཡི། །གང་ཞིག་སྤྱོད་པ་བྱེད་པ་ཡི། །༼གཙོ་བོས་ཚོགས་ཀྱི་དུས་སུ་༽མི་མཆོག་སྡིག་པ་ཐམས་ཅད་ནི། །རྣམ་༼པར་༽དག་༼ནས་༽བདག་ཉིད་བདེ་གཤེགས་ཀྱི་༼ས་བཅུ་རིམས་ཀྱིས་བགྲོད༽། །ས་རྣམས་ཀྱང་ནི་་་་་་་་འབྲས་བུ་ཕྱག་རྒྱ་ཆེན་པོ་་་་་ཐོབ་པར་འགྱུར། །སྐྱེ་ཞིང་་་་་བུདདྷ་མ་ཐོབ་ཀྱི་བར་ཡང་་་་སྐྱེ་་་་སྐྱེ་བ་ནས་སྐྱེ་བ་དྲན་་་་་བར་་་་་དེ་བཞིན་གཤེགས་་་་པའི་བྱང་ཆུབ་སེམས་དཔའ་སེམས་བསྐྱེད་པ་དང་རིགས་ལ་གནས་པ་ལ་སོགས་པར་འགྱུར་་་། །རིགས་་་་་་སུ་་་་་འགྱུར་ཆོས་ལྡན་རྒྱལ་་་་དེ་མ་ཐོབ་བར་དུ་ཡང་་་་་པོར་འགྱུར་་་་་་འཁོར་ལོ་བསྒྱུར་བ་་་་། །དེ་ལྟར་་་་་སྤྱི་དོན་བཞི་བ་་་་་རྟག་ཏུ་་་་་་་་སངས་རྒྱས་ལ་ཚོགས་ཀྱི་་་་་་་མཆོད་བྱས་ནས། །་་་་ཞིང་སྐྱོང་རྣམས་ལ་་་་་་་དད་པ་ཡིས་ནི་༼བྱ་བ་གཉིས་པ་དམ་ཚིག་ཅན་གཏོར་མ་སྦྱིན་པ་་་་་་གཏོར་མ་སྦྱིན། །༼དཀྱིལ་འཁོར་ཆོ་ག་སྒྲུབ་ཐབས་ནས་བྱུང་བ་བཞིན་དུ་བསྒོམ་པ་སྔོན་སོང་ནས་༽ཇི་བཞིན་ཆོ་གའི་སྦྱོར་བ་ཡིས། །༼འགྲོ་ན་རང་ཡང༽དད་པས་ཅི་འདོད་སྦྱིན་པར་བྱ༼ཏེ་མི་མོས་ན་བཟློག་པ་ལ་སོགས་ནུས་པ་ཐོབ་པས་བྱ་འོ༽། །མར་གྱི་ངོ་ཡི་ཚེས་བཅུ་དང་་་་་ཚེས་བཅུ་གཉིས་ལ་། །ཟླ་བ་ཡར་ངོར་གང་གྱུར་དང་། །༼གྷ་ན་དང་གཏོར་མ་ལ་༽མྱུར་དུ་འབད་པས་མཆོད་བྱ་སྟེ། །༼ཡུལ་གང་ལ་མཆོད་ན་འཇིག་རྟེན་གྱི་དེ་བ་ལོ་ཀ་ལས་འདས་པ༽རྡོ་རྗེ་ལྷ་མོ་༼རྒྱུ་གང་གིས་མཆོད་ན་༽མྱོས་བྱེད་༼ཆང་དང་༽ཤས། །སྐྱེ་བོ་༼བསྒྲུབ་པ་པོ་དུས་མཆོད་ན་༽དད་པས་མཆོད་བྱ་ཞིང་། །ཧེ་རུ་ཀ་དཔལ་མངོན་དགའ་ཞིང་། །མགུ་བའི་སེམས་མཆོག་དག་དང་ནི། །༼ལོ་ཀ་དང་ལོ་ཀ་ལས་འདས་པའི་མཐིལ་ན་གནས་པའི་དཔལ་༽དེ་རྣམས་༼ཀྱིས་༽ལག་ནས་མཆོག་སྟེར་བྱེད། །༼ཟླ་བའི་དུས་ཚེས་བཅུ་རྣམ་པ་གཉིས་ཡིན་པ་ཉིན་ཞག་གི་དུས་ནི་༽མཚན་མོ་བརྟུལ་ཞུགས་ཅན་གཏོར་མ། །༼ཆ་ལུགས་༽སྐྲ་གྲོལ་གཅེར་བུར་གྱུར་བས་སྦྱིན། །ཤྲཱི་ཧེ་རུ་ཀའི་བདག་ཉིད་༼་ཀྱི་ང་རྒྱལ་༽ཤེས༼པའི་ལ་ལ་ངན་ཏི༽། །༼ཞིང་སྐྱེས་སྔགས་སྐྱེས། ཞིང་སྐྱེས་ལ་སོགས་དུར་ཁྲོད་ཀྱི་བདག་པོ་བརྒྱད། དཔའ་བོ་དཔའ་མོ་གཞི་གཅིག་ལ་ལྡན་པ༽སྦྱོར་བས་མ་མོ་རྣམས་མཉེས་འགྱུར། དཔལ་འཁོར་ལོ་སྡོམ་པ་ལས། ༼མ་སྲིང་ལ་སོགས་པའི་ཡོན་ཏན་དང་ལྡན་པ་ལ་སྤྱོད་པའི༽ །སྤྱོད་པ་༼སྤྲོས་བཅས་༽་དང་བརྟུལ་ཞུགས་༼དགོས་པ་གང་གི་ཆེད་དུ་རུས་པའི་རྒྱན་དྲུག་ལ་སོགས་པ་བཏགས་ནས་སྤྱོད་པ་བྱེད་པ་༽དང་༼ཚོགས་ཀྱི་༽མཆོད་པ་དང་༼ལོ་ཀ་ལས་འདས་པའི་བུ་ཏ་ལ་༽གཏོར་མའི་ཆོ་གའི་ལེའུ་སྟེ་ཉི་ཤུ་བདུན་པའོ། །༼མཚམས་འདི་ནས་མཐུད་ན་སྐྱོན་འབྱུང་༽།༼གོང་དུ་བསྟན་པའི་སྤྲོས་བཅས་ཀྱི་སྤྱོད་པ་བྱེད་པའི་ག་གེ་བྱ་བ་དང་བྱ་བ་མ་ཡིན་པ་བསྟན༽དེ་༼དང་པོ་བདག་གཞན་གཉིས་མཆོད་པའི་བྱེ་བྲག་བསྟན༽ནས་༼བཟའ་བ་དང་བཏུང་བ་ལ་སོགས་པ་༽མཆོད་པ་རྣམ་༼་པར་༽དག་༼པའི་༽བདག་༼ཉིད༽། །༼པཱུ་ཙའི་དགོས་པ་༽མྱ་ངན་འདས་༼ཐམས་ཅད་མཁྱེན་པར་འགྲོ༽་པར་ངེས་༼པར༽འགྲོ་དཔའ༼བར་གྱུར་བའོ༽། །༼གཉིས་པ་པུ་ཙའི་ཡུལ་དང་པོ༽དེ་བཞིན་བདག་ཉིད་མཆོད་པ་དང་། །༼གཞན་ཡང་མཆོད་པའི་དབང་དུ་བྱས་སྟེ།_ཡབ་ཡུམ་གཉིས༽སངས་རྒྱས་ཀུན་སོགས་སྲས་༼ཏེ་བོར་་པར་དངོས་དང་ཉམས་ལ་སོགས་པ་ ་ལྷག་པའི་ལྷར་བྲེས་པར་བྱ་༽བཅས་དང་། །༼ཡུལ་གསུམ་པོ་༽དཔའ་བོ་༼སྐྱེས་པ་རང་དཔའ་པོར་མོས༽ཀུན་དང་རྣལ་འབྱོར་མ། །༼རྟེན་གཞལ་ཡས་ཁང་༽བརྟན་པ་དག་དང་གཡོ་༼པར་བཅས་པ་མཆོད་༽བ་དང་། །༼ཡུལ་བཞི་བ་ལོ་ཀ་པའི་འབྲེལ་བ༽སྤུན་དང་༼ཆོས་ཀྱི་འབྲེལ་བའི་དབང་དུ་བྱས་ན་སྤུན་རྡོ་རྗེ་ཤུགས་བརྩེ་སེམས་ཆེ་བའོ༽་བསྔགས་པ་༼དམ་ཚིག་ཅན་ལ་བཟའ་བ་ལ་སོགས་པ༽མཆོད་པ་སྟེ། །༼རྣལ་འབྱོར་མ་རྣམས་ལེགས་པར་ཇི་ལྟར་མཆོད་ན།ཐབས་དང་ཤེས་རབ་སྙོམས་པར་ཞུགས་པའི་བདེ་བས་མཆོད༽ལེགས་གནས་ཟླ་བ་འདུས་པ་ལའོ། །་་་༼འཇིག་རྟེན་པའི་འབྲེལ་བ་ལ་ཇི་ལྟར་བྱ་ན་༽་་་་སྤུན་དང་བུ་དང་ལྷན་གཅིག་ཏུ། །༼ཟས་ལ་སོགས་པ་ལ་ལྷན་གཅིག་ཏུ་སྦྱར༽བདེ་དང་སྡུག་བསྔལ་༼བདེ་བར་སྤྱད༽ཀུན་༼དེ་དག་དང་ལྷན་ཅིག་ཏུ་སྤྱད་པར་བྱའོ༽འབྱུང་ཡིན། །སྔགས་༼དེ་དང་ལྡན་པ་རུ་གང་མི་བྱ་ན༽དང་དེ་བཞིན་༼ཨོཾ་ཨཱཿཧཱུཾ་སྩོགས་ཀྱིས་༽ཕྱག་རྒྱ་དང་། །༼ལོ་ཀ་བའི་འགྲེལ་བ་ལ། རྫོགས་རིམ་དེ་ཁོ་ནའི་དོན༽ །ཡེ་ཤེས་དེར་ནི་བསྟན་མི་བྱ། །༼དེ་ཅིའི་ཕྱིར་ཞེ་ན།དེ་བསྙེས་པས་བླ་མ་ལ༽མ་དད་ཐམས་ཅད་༼སྐྱེད་པ་དང་།བླ་མ་ལ་༽སུན་འབྱིན་༼པར༽བྱེད༼པའི༽། །༼རྟོག་པ་དག་པར་བྱེད་པ་བདུད་རྩི་ལྔ་ལྕེ་ལ་འཇོག་པ་ཨ་ཏྲོ་རེས་འགྲོ་སྟེ་བདུད་རྩི་ལྔ་རིགས་ལྔའི་ངོ་བོར་བྲེས་པར་བྱ་བས་ན་༽དག་བྱེད་ཟས་ལ་སྤྱོད་པ་ནི། །རྟག་ཏུ་དམ་ཚིག་སྤྱད་བྱས་འགྱུར། །༼གཞན་སགས༽གསང་སྔགས་༼རྩ་བའི་སྔགས་ལ་སོགས༽སུ་ལའང་སྦྱིན་མི་བྱ། །༼དབང་མ་རྫོགས་པ་ལ་བཞི་བའི་དེ་ཁོ་ན་ལ་སོགས་མི་བསྟན༽མན་ངག་རྣམ་པར་ཉམས་མི་བྱ། །༼དབང་རྫོགས་པ་ལ་བཞི་བའི་དེ་ཁོ་ན་བསྟན༽དམ་ཚིག་གནས་ལ་ཅི་རིགས་པར། །༼བཞི་བའི༽མན་ངག་རྣམས་ཀྱང་སྦྱིན་པར་བྱ། །༼རང་གི་དམ་ཚིག་ལ་སོགས་པ་བསླབས་པའི་རང་གི་ཕྱག་རྒྱ་ཊོཾ་བྷི་སོགས་མ་གཏོགས་པ་ཐ་མལ་པའི་བུད་མེད་༽ཕོ་ཉ་མ་གཏོགས་གཞན་དག་ལ། །འདོད་༼པ་ལ་ཆགས་པའི་ཏ་མལ་བའི་འདོད་ཆགས་༽ལ་རྨོངས་པས་འགྲོ་༼བགྲོད་པར༽མི་བྱེད། །༼ཅིའི་ཕྱིར་ན་༽ཕོ་ཉ་མོ་༼ས༽ཞེས་རྟག་༼ཏུ༽ཐར་བ་བས་ཏེ། །༼གཉིས་པ་་་་་་བྱེ་བྲག་བཟའ་པའི་དམ་ཚིག་བདུད་རྩི་ལྔ་ལ་ལོངས་སྤྱོད་པར་བསྟན།དེ་ཉིད་བདུད་རྩི་ལྔ་རིགས་ལྔའི་ངོ་བོ་ཡིན་པས་བསྲུང་བའི་དམ་ཚིག་ལ་ཡང་༽འབད་༼བདལ་ཟེར༽པ་ཡིས་༼རྩོལ་བ་དྲག་པོས་༽ཀྱང་ལོངས་སྤྱོད་༼བརྟེན་པར་༽བྱ། །༼དེ་ཡང་གདོལ་བ་མོ་ལྟ་བུ་༽སྐྱེ་གནས་དམན་ལ༼བསྙེན་བསྐུར་དང་བརྟེན་པ་ལ༽་མི་གནས་༼པ་ནི་རིགས་བཟང་པོས་སྟེ་དེ་ཁོ་ན་ལ༽་ལ། །༼དོན་གྱི་སྔགས་གདོལ་བ་མོ་ལ་བརྟེན་ན་དེ་ཉིད་ལ་བསྙེན་བསྐུར་བྱ་ཡི།བྲམ་ཟེ་མོ་ལ་སོགས་པ་བཟང་པོར་མི་བཟུང་ཅེས་པའོ༽བསྙེན་བསྐུར་ཉིད་ནི་བྱ་བ་མིན། །༼ཡོན་ཏན་སྐྱེད༽མ་དང་སྲིང་མོ་༼བརྟེན་པའི་ཕོ་ཉའི་ཡོན་ཏན་གྱི་བྱེ་བྲག་༽བུ་མོ་༼ངག་སྙན་༽དང་། །༼བདེ་བསྐྱེད་༽ཆུང་མ་ཕོ་ཉ་མོ་ཉིད༼དངོས་གྲུབ་ཀྱི་བྱ་བ་བྱེད་པས༽་གནས། །༼དེ་ལྟ་བུའི་ཕོ་ཉ་ལ་ཡོན་ཏན་ལྡན་པས་བརྟེན་པའམ་ལྔ་ཆར་བརྟེན་ཡང་ལོ་ཀ་གཅིག་ཏུ་བརྟེན་ན་ནུས་ཐོན་པས་སྟེ་དགོས་པས།སྔར་དཀྱིལ༽འཁོར་ལོས་དེ་བཞིན་གྲུབ་པ་ལ། །༼ནུས་པ་ཡོད་ན་བརྟེན་གྱིས༽གཞན་དུ་༼ནུས་པ་མ་ཐོན་པས༽བྱ་བ་མ་ཡིན་ནོ། །༼ནུས་པ་མ་ཐོན་པར་བྱས་ཏེ་བརྟེན་ན་༽དཀའ་ཐུབ་༼སྡོམ་པ་ཡོད་པ་དེ༽ངེས་པར་༼ཟད་པའི་ཚུལ་གསུམ། གསང་བ་བསྒྲགས་པའི་རྩ་ལྟུང་དང་ལྔ༽ཟད་པར་འགྱུར། །༼ལྷན་ཅིག༽མཆོག་དབུས་༼ཞིང་སྐྱེས།སྔགས་སྐྱེས།༽ཐ་མ་ལྷན་གཅིག་༼སྔགས་སྐྱེས་ལ་ཞིང་སྐྱེས་སུ་ཞེན་པ་བྱས་པ་ལ་སོགས་པས་ལྷན་སྐྱེས་ལ་བསྐུལ་བས་ཆོས་སྐུ་རྟོགས་པ་འབྱུང་བས༽འགུགས༼པས་ན༽། །དེ་ལྟར་༼ཕོ་ཉ་མོའི་༽རྫས་ནི་༼སི་ཏི་འགྲུབ་པར་༽རྣམ་ངེས་ཡིན། །༼བཞི་བ་སྤྱོད་ལམ་དང་ཕྱག་རྒྱ་གཉིས་ལས། དང་པོ་སྤྱོད་ལམ་གྱི་བྱེ་བྲག་བསྟན༽འཇིག་རྟེན་ན་རྟག་༼རྒྱུ་བས་ན༽གཡོན་ནས་སྤྱོད༼གང་དུ་འགྲོ་བ་ལ་སོགས་པ་བྱེད་པ་དང་༽། །རྐང་བ་གཡོན་པ་སྔོན་ལ་འདོར། །༼ལག་པ་བྱ་བ་གང་བྱེད་དང་༽ལག་པ་གཡོན་པ་སྔོན་དུ་འགྱུར། །གཡོན་གྱི་སྤྱོད་པས་རབ་མཆོད་བྱེད། །༼གོས་ལ་སོགས་པ་གྱོན་པ་ན་ཡང་༽ལུས་ཀྱི་གཡོན་ནི་རྣམ་པར་འཁྲི༼འཇིག་རྟེན་པ་གཡོན་གྱི་བྱ་བ་ལ་མི་གཙང་པར་བྱེད་དེ། དེ་ལས་གོ་བཟློག་པས་དཔྱད་པའི་དགོས་པའོ༽། །༼ཟས་ལ་ལོངས་སྤྱོད་པ་ན་ཡང་༽གཡོན་པ་ཡིས་ནི་ཚིམ་པར་བཟའ༼ལག་པ་གཡོན་པས་ནི་བུད་མེད་མཚོན་ལ་བུད་མེད་ཀྱིས་ཤེས་རབ་མཚོན་པ་ཡིན་ལ་ཤེས་རབ་ཀྱིས་ཆོས་ཐམས་ཅད་སྟོང་པ་ཉིད་ལས་ཆོས་ཐམས་ཅད་འབྱུང་བ་ཡིན་པར་མཚོན་པའོ༽། །བརྟུལ་ཞུགས་མ་ཉམས་བརྟུལ་ཞུགས་རྫོགས། །༼ལས་དང་པོ་དང་སྤྱོད་པའི་དུས་གཉིས་ཀར༽བསྒྲུབ་པོ་དེ་ནི་དམ་ཚིག་བརྩོན། །དམ་ཚིག་༼ཅན་གྱི་རིགས་ལ་རིགས་སུ་བྱེད་པས་༽རིགས་ལ་༼དམ་ཚིག་ཅན་གྱི་༽སྤྱོད་པ་ཡིས། །༼པར་བྱ་བ་ཡིན་གྱི་ཐ་མལ་བའི་རྒྱལ་རིགས་ལ་སོགས་པ་ལ་རིགས་སུ་མི་བྱེད་པ་༽ལྷན་ཅིག་༼ཏུ་༽ཟས་ལ་༼ལོངས་༽སྤྱོད་པར་བྱེད་༼པས༽། །༼འདི་ཉིད་ཀྱི་གཉིས་པ་ཕྱག་རྒྱ་ནི་༽རིགས་ལྔ་རྒྱལ་རིགས་བྲམ་ཟེ་རྗེ་རིགས་དམངས་རིགས་མཐར་སྐྱེས་སམ་གདོལ་པ་མོ་དང་ལྔ་༽ལ་ནི་ཀུན་སྤྱོད་པའི། །༼ལོ་ཀ་ལ་གྲགས་ཚད་༽རིགས་ནི་རྣམ་པ་༼མཐར་སྐྱེས་སམ་གདོལ་པ་མོ་དང་དམངས་རིགས་སུ་བྱས་པས་༽བཞི་རུ་གྲགས། །༼ཡང་རྒྱལ་རིགས་བྲམ་ཟེ་གཅིག་ཏུ་བྱས་ཏེ་གསུམ་དུ་ཡང་བྱ་སྟེ་གསུམ་ཡང་རྡོ་རྗེ་སེམས་དཔའི་རིགས་སུ་བྱས་པས། རེག་མིན་གཡུང་མོ་སྟེ་ཐམས་ཅད་ལ་རིགས་བཟང་ངན་མེད་པའོ༽རིགས་གཅིག་ལ་ནི་ཀུན་སྤྱོད་པ། །རྣལ་འབྱོར་༼པས་དངོས་གྲུབ་ཀྱི་ལྷའི་རྣལ་འབྱོར་བསྟན་པས་༽གྲུབ་དོན་༼སྙོམས་པར་ཞུགས་པས་དོན་ལྔ་ལ་སྦྱིན་བསྲེག་གི་བྱ་བའི་བྱེ་བྲག་གསུམ་བསྟན་པ་ལས་ཕྱིའི་༽རབ་ཏུ་མཆོད། །༼སྤྱོད་པའི་དུས་ཀྱི་ཁྱད་པར་ནི་རོ་མ་པའོ༽བ་ལང་ཤ་དང་རྟ་ཤ་དང་། །ཁྱི་ཤ་དག་དང་༼ཁྱི་བྱ་ལ་སོགས་པ་བྱ་སྣ་ཚོགས་པའི་ཤ་༽སྣ་ཚོགས་པས། །༼དེ་ཡང་རྡོ་རྗེའི་བྱེ་དང་ལྕགས་བྱེ་ལ་སོགས་པ་བསྲེས་ཏེ་༽དཀྱིལ་འཁོར་གྲུ་གསུམ་༼དུ་སྐྱེད་ནས་དེའི་ནང་དུ་བཅོམ་ལྡན་འདས་གཙོ་བོ་སྐྱེད་ལ་དེ་ནས་ཡི་གེ་བདུན་པའི་ཤ་བུར་མ་ར་ཡ་ལ་སོགས་པའི་སྔགས་བཏགས་རྫས་བསྲེག་༽བྱས་ནས་ནི། །༼རྫས་དེ་རྣམས་ཀྱིས་དྲག་པོའི་སྦྱིན་བསྲེག་བྱས་ནས་༽སངས་རྒྱས་རྣམས་ཀྱང་ངེས་པར་འཇིག་༼ན་ཐ་མལ་པའི་མི་བུ་ལ་སྨོས་ཅི་དགོས༽། །དེ་བཞིན་༼ནང་གི་སྦྱིན་བསྲེག་༽དཔའ་བོ་༼དང་རྣལ་འབྱོར་མ་༽རྣམས་ཀྱི་ཟས་༼ཡར་གྱི་ཚེས་བཅུ་དང་མར་གྱི་ཚེས་བཅུ་ལ་མཆོད་༽། །༼ཨོཾ་ཨཱཿཧཱུཾ་ལ་སོགས་པ་༽སྔགས་དང་༼འཐེབ་སྲིན་སྦྱར་བ་༽ཕྱག་རྒྱར་ལྡན་པའི་སྨན༼བདུད་རྩིར་བྱས་པས་༽། །༼དཀྱིལ་འཁོར་སྙིང་ཁར་༽ཤྲཱི་ཧེ་རུ་ཀའི་སྤྲུལ་བ་༼བསམ་ལ་ཟས་ལ་༽ནི། །ཉེར་༼བར་༽སྤྱོད་༼པ་འདི།ཕ་རོལ་དུ་ཕྱིན་པའི་༽བསྟན་བཅོས་ཀུན་ལས་སྤངས༼ཡང་ན་ལྟེ་བ་ལ་མེ་སྦར་དེ་སྙིང་ཁར་མེ་བསམ་པ་ལ།མེ་ཏེ་མི་ཤེས༽། །༼རྣལ་འབྱོར་རྒྱུན་མ་ཆད།རྒྱུན་དུ་བྱ་བའི་རྣལ་འབྱོར་ཁོ་མཉམ་པར་བཞག་པའི་རྣལ་འབྱོར་ལ་སོགས་་་་ ་ ༽རྣལ་འབྱོར་༼ཁ་ཟས་ཀྱི་སྣོད་དུ་མ་ཟད་༽རྟག་ཏུ་སྲུང་བ་དང་། །༼དེ་ལ་གནས་ན་༽ལས་རྣམས་དག་ནི་༼ཞི་བ་ལ་སོགས་པ་བསྒྲུབ་པའི༽ཐམས་ཅད་ལ། །༼ཕྱིའི་ཧོམ་ལ་བར་ཆད་འབྱུང་གི་ནང་གི་ཧོམ་བར་ཆད་མི་འབྱུང་གསུང་༽བགེགས་མེད་༼པར་ལྟ་བ་༽ཇི་བཞིན་༼སི་ཏི་གཉིས༽འགྲུབ་༼པར༽འགྱུར་བར། །༼སྐབས་༽འདིར་ནི་གཞན་དུ་༼མི་འགྲུབ་ལ་དོར་༽རྟོགས་མ་ཡིན། །༼དྲུག་པ་ཕོ་ཉ་བསྟེན་པའི་ཕན་ཡོན་དཔེ་དང་དོན་གྱི་ལྷན་ཅིག་སྐྱེས་པ་མངོན་དུ་འགྱུར་བ་༽འདི་ནི་ཕོ་ཉ་༼འདི་བླ་ན་མེད་པའི་སྦྱིན་བསྲེག་ཡོད་༽མཆོག་༼དབང་བསྐུར་བཞི་བའི་དམ་ཚིག་བསླབ་པ་༽བཟང་པོ། །༼དེ་སྟོན་པ་ལ་༽བརྩོན་ཞིང་ལྷན་ཅིག་ལྡན་པ་ཡིན། །ཆགས་པས་༼རྡོ་རྗེར་བརྟེན་ན། ཟླ་བ་ཕྱེད་དུ་འཇམ་རླུང་ལ་བསྒྲུབ་པ་བྱའོ་༽དགའ་བའི་ལོངས་སྤྱོད་༼དེས་ཡེ་ཤེས་ཀྱི་བདེ་བ་༽རྫོགས་༼པར་བྱ་༽། །༼དེ་གང་ཞེ་ན་༽རྣལ་འབྱོར་རྫས་ནི་རྣམ་འབྱེད་ཉིད། །བླ་མའི་མན་ངག་༼ལས་དོན་གྱི་བཞི་བའི་རྟོགས་པ་སྐྱེ་བས། དགའ་བ་ལ་སོགས་པ་གསུམ་སྔོན་དུ་ལྷན་སྐྱེས་རྟོགས་པར་བྱས་པས།དོན་གྱི་བཞི་བ་གོམས་པ་ལས་མཐར་ཆོས་སྐུ་རྟོགས་པ་དེ་ལས། རྒྱུ་སྐུ་ལ་ཅི་དང་ཅི་འདོད་པ་འབྱུང་བ་༽ལ་༼ས་༽དགའ་ཞིང་། །དེ་ནི་སྦྱིན་བདག་༼ཛཾ་བྷ་ལ་དང་འདྲ་ཅེས་པ་གསུང་༽མཆོག་༼ཏུ་༽གསུངས་པའོ།དཔལ་འཁོར་ལོ་སྡོམ་པ་ལས་༼ཕྱིའི་ཧོམ་དང་བླ་ན་མེད་པའི་ཧོམ་ཡང་ཡོད་༽ནང་གི་སྦྱིན་བསྲེག་དང་༼སྤྲོས་བཅས་ཀྱི་སྤྱོད་པ་གང་གི་ཕོ་ཉ་བརྟེན་པའི་ཐབས།༽རིགས་ལྡན་མའི་ཆོ་གའི་ལེའུ་སྟེ་ཉི་ཤུ་རྩ་བརྒྱད་པའོ། །༼གོང་དུ་བསྟན་པའི་ཚུལ་གྱིས་ཕོ་ཉ་མོ་བསྟན་པ་ལས་ལྷན་ཅིག་སྐྱེས་པའི་ཡེ་ཤེས་སྐྱེ་བས་དེའི་སྐྱེད་པའི་རྐྱེན་ཕོ་ཉ་མོའི་མཚན་ཉིད་བསྟན། ལས་དང་པོ་པས་གསང་བ་བསྟེན་པ་ནུས་པ་ཐོབ་པ་མངོན་དུ་བརྟེན་པ་ནུས་པ་མ་ཐོབ་པར་སྔོན་དུ་བརྟེན་པའི་ཉེས་པ་སཾ་བྷ་རའི་ཛོ་ཀིའི་ཆེ་བ་སྟེ་བཞི་སྟོན་ནོ། སྦྱོར་བའི་རྒྱན་བསྟན་པའི་ཕྱིར་༽དེ་ལས་གཞན་ཡང་༼སྔར་ལས་ཚུལ་གཞན་གྱི་༽བསྟན་པ་ནི། །༼སྤྲོ་༽ས་བཅས་༽ཕོ་ཉའི་༼གསང་རྩ་ཁྱད་པར་ཅན་གྱི་༽མཚན་ཉིད་ཤེས་བྱ་བ། །༼དབང་དང་༽དམ་ཚིག་ལ་༼ཐ་མལ་བའི་བུད་མེད་གནས་༼པའི་༽མཁའ་འགྲོ་མར། །གང་གིས་ཡང་དག་ཤེས་༼རིགས་ཀྱི་རྟགས་དང་ལུས་ཀྱི་བརྡའ་དང་ངག་བརྡའ་ལ་སོགས་པས་ངོ་ཤེས་པའི་རྣལ་འབྱོར་མ་དེ་རྣམས་ཀྱིས་ཀྱང་བསྒྲུབ་པ་པོ་མཐོང་ན་འདི་ལྟ་བུར་ཤེས་ཞིང་ཡིད་དུ་འོང་བར༽འགྱུར་པའོ། །༼ཡོན་ཏན་སྐྱེད་པའི་༽མིང་པོའམ་ཡང་ན་ཕ་དངནི།༼གོང་དུ་བསྒྲུབ་པ་པོ་ལ་ཕྱག་རྒྱ་གཅིག་ལ་ཡང་མ་ལ་སོགས་པའི་ཡོན་ཏན་དང་ལྡན་པར་ཤེས་པས་བརྟེན་པ་ལྟར་ཕྱག་རྒྱས་ཀྱང་བསྒྲུབ་པ་པོ་ལ་སོགས་པའི་ཡོན་ཏན་དང་ལྡན་པར་ཤེས་དགོས་པ་གསུང་༽ །༼ཁྱོ་རུ་བདེ་བ་སྐྱེད་པ་དང་༽བདག་པོ་ཉིད་དུ་སྐད་ཅིག་༼བྱ་བ་བྱེད་པའི་ཕོ་ཉ་རུ་མཐོང་ངག་སྙན་པས་བར་༽མཐོང་། །༼རིགས་༽ལྕེ་༼རིང་བ་སྨིན་ཕྲག་ཏུ་སླེབ་པ་༼འདི་ལ་གསང་རྩ་ཁྱད་པར་ཡོད་གསུང་༽སྦོམ་༼པ་དང་༽མིག་ནི་དམར་སེར་ལ། །༼སྤུ་༽རྩུབ་ཀྱང་སྤུ་ནི་དམར་སེར་ཡིན། །དངོས་གྲུབ་༼ཀྱི་རྒྱུ་༽ཀུན་གྱི་ཐུན་མོང་དུ། །༼རྒྱུད་སྦྱངས་པའི་མཚན་ཉིད་༽བཟླས་༼པ་༽དང་བརྟུལ་ཞུགས་ལ་རྟག་དགའ། །དྲན་པ་དང་ནི་ཡང་དག་ལྡན། །ཕོ་ཉ་མ་སོགས་༼སྔགས་སྐྱེས་ལ་སོགས་པ་ཡང་ཞིང་སྐྱེས་ཉི་ཤུ་བཞི་བོ་དེ་༽གནས་དང་བཅས། །༼དེ་གང་ཞེ་ན་༽མཁའ་འགྲོ་མ་མཆོག་ཉི་ཤུ་བཞི༼ར་མོས་༽། །སྤྱོད་དང་གྲོལ་བའི་༼མཆོག་སྔགས་སྐྱེས་བརྟེན་པ་ཡང་ཞིང་སྐྱེས་སུ་ཞེན་བརྟེན་༽འབྲས་བུ་སྟེར། །འདོད་པའི་དོན་ཀུན་༼ཐུག་པར་༽གྲུབ་བྱེད་པའི༼ཝི་རེ་ཤ་ཡ་༽། །༼ཐ་མལ་བའི་རྩ་སྔགས་སམ་ལྷན་གཅིག་སྐྱེས་པའི་ཡེ་ཤེས་དང་ནང་དུ་མི་འབྲལ་བ་ཐ་མལ་པ་ལ་ཝི་རེ་ཤ་བའམ་༽རྩ་བའི་སྔགས་ནི་རྟག་ཏུ་ཟློས། །བདུད་༼དང་བར་ཆད་༽ཀུན་རབ་ཏུ་ཞི་བར་བྱེད། །རྒྱུ་དང་མི་རྒྱུ་འཇིག་རྟེན་གསུམ༼དུ༽། །རྣལ་འབྱོར་རོལ་བའི་༼རྩ་སྔགས་བཟླས་ན༽འབྲས་བུ་༼འམ་ལྷན་སྐྱེས་ཀྱི་༽སྟེར། །༼ཐ་མལ་པ་དང་ལྷན་སྐྱེས་༽གསང་སྔགས་འདི་ལས་བྱུང་བ་༼དང་ཞིང་སྐྱེས་གཉིས་ཀར་ཚང་༽ཡིན། །༼དང་པོ་ཨོཾ་ཨཱཿཧཱུཾ་ལ་སོགས་པ་ཡང་གསུང་༽སྔགས་དང་༼རེ་སྦྱོར་བར་གསུང་༽ཕྱག་རྒྱ་ཡང་དག་༼རྫོགས་པ་ལས་སོ་སོའི་ལས་ཀྱི་ཕྱག་རྒྱ་༽༼འབྲིང་ལ་༽ལྡན། །༼དང་པོ་གསུང་༽སྒྲུབ་བྱེད་༼རབ་ལ་༽བསྒྲུབ་༼ ན་དྷརྨ་མི་ཏྲ་གོམས་པར་བྱེད་པ་གསུང་༼ལས་ཀྱི་ཕྱག་རྒྱ་ལས་དཔེའི་ཡེ་ཤེས་རྟོགས་པར་བྱེད་དོན་༼ལས་དང་པོ་པས་གསང་སྟེ་ཕོ་ཉ་བརྟེན་པ་དང་བྲལ་ན་གསུང་ཡང་ནུས་པ་མ་ཐོབ་པས་ལོ་ཀ་པའི་སྔོན་དུ་བརྟེན་ན་གསུང་༽ལ་རབ་བརྩོན་༼དབང་པོ་རབ་ལ་༽དང་། །༼ལས་དང་པོ་པ་དབང་བོ་ཐ་མ་ལས་མ་མཚོན་ན་ནི་དཔེའི་ལྷན་སྐྱེས་རྟོགས་པར་མི་ནུས་པས། དབངཔོ་ཐ་མ་་ལ་གསུང་༽ཕྱག་རྒྱ་དང་བྲལ་༼ན་ལྷན་སྐྱེས་༽གསང་སྔགས་ནི། །༼བསྒྲུབ་པ་པོ་དབང་བོ་དམན་པ་༽ལུས་ཅན་རྣམས་ལ་༼འདི་ཡན་ཆད་ལས་དང་པོ་པས་ཆགས་པ་ལ་བརྟེན་པའོ་༽བྱིན་༼གྱི་༽མི་རློབ་༼པ་མེད་པའི་ཐབས་མེད་པས་རྟེན་དགོས་པ་དེའོ༽། །ཇི་ལྟར་དྲོ་བའི་བྱ་བ་དག༼ཅེས་པ་གཞན་མི་དད་པ་བཟློག་པའི་ནུས་པ་བདག་ལ་ཡོད་མེད། མི་མོས་པ་བཟློག་ནུས་པའི་བྱ་བ་དག་དེ་ལྟར་ལས་དང་པོ་པས་ཕོ་ཉའམ་ཕྱག་རྒྱ་ལ་བརྟེན་རྩལ་ནུས་པ་ཐོབ་པས་སྨྱོན་པའི་བརྟུལ་ཞུགས་ལ་སོགས་པའི་དུས་སུ་ལོ་ཀ་བའི་སྔོན་དུ་བརྟེན་པར་སྟོན༽ །མངོན་པར་འབད་པས་རྟོགས་པར་བྱ་༼བ་ལ་དེ་ནས་ཕྱག་རྒྱ་དངོས་སུ་བརྟེན། ལུས་ཀྱི་བ་སྤུ་ལ་སྦྲང་མ་མང་པོ་འདུ་བ་འོང་སྟེ་འདི་གླང་པོ་ཅན་ཡིན་མིན་གསུང་། གླང་པོ་མ་དང་པད་མ་ཅན་དང་། རི་དྭགས་ཅན་དང་། དུང་ཅན་དང་། སྣ་ཚོགས་ཅན་མ་དང་ལྔ་ལས་འདིར་དང་པོ་སྦྱོར་ཐབས་༤་ལས་འདི་ཁབ་རྩེ་ལྟ་བུ་དང་སྦྱར་གཞན་ཡང་ཧེ་བཛྲ་ལྟར༽། །འདོད་པའི་དོན་ཀུན་སྒྲུབ་བྱེད་པའི༼གལ་ཏེ་ནུས་པ་མ་ཐོབ་པར་བརྟེན་ཅིང་ལོ་ཀ་བའི་གང་དུ་དཔྱད་ན་༽། །རྣལ་འབྱོར་ཆེ༼ན་པོ་དེ་ལ་ལོ་ཀ་པ་མི་མོས་པ་སྐྱེད་པས༽་ལ་གང་ཞིག་སྡང་༼སྡང་སྟེ་གཞན་སྨོད་པའམ་ཡང་ན་གཞན་མ་དད་པའི་རྒྱུས༽། །ཁྱི་ཡི་སྐྱེ་བ་བརྒྱར་སྐྱེས་ཏེ། །༼ཤན་པ་༽སྨེ་ཤ་ཅན་དུ་སྐྱེ་བར་འགྱུར། །དཔེར་ན་ལ་ལ་མར་འདོད་པས། །འབད་པས་ཆུ་ནི་སྲུབས་གྱུར་ཀྱང་། །མར་གསལ་འབྱུང་བར་མི་འགྱུར་ཞིང་། །༼དེ་བཞིན་དུ་ལས་དང་པོ་པ་མུ་ཏྲ་དང་བྲལ་བའམ།ནུས་པ་མ་ཐོབ་པར་མུ་་་་་་་་་་་་་་་་་མངོན་དུ་བརྟེན་ཀྱང་་་་་་་་་མི་ཐོབ་པོ༽ལུས་ཉོན་མོངས་པར་ཁོ་ནར་ཟད༼དེ་འབྲས་བུ་མི་འབྱུང་བཞིན་དུ༽། །༼རྣལ་འབྱོར་པའི་རྟགས་དང་ཕྱག་རྒྱ༽འཛིན་ཅིང་མཆོད་པར་༼བརྟེན་རྣལ་འབྱོར་བཞི་་་་་་་་་བསྒྲུབ་པ་པོ་གནས་ཡོད་པར་དཔལ་ཧེ་རུ་ཀ་སཾ་བྷ་ར་ཉིད་༽བྱེད་པ་ནི། །༼ལོ་ཀ་བས་རྣལ་འབྱོར་་་་་་་་་སོགས་ལ་སྟེར་བའི་༽འཚོ་བའི་ཐབས་ཀྱི་རྒྱུ་ཕྱིར་རོ། །རྣལ་འབྱོར་གཞན་ལ་བརྟེན་པ་ལ། །བཟང་པོ་༼ཞེས་བོས་གསུང་༽གཞན་ནི་༼ཆོས་ཀྱི་མུ་ཏྲ་དང་ཕྱག་རྒྱ་ཆེན་པོ་ལ་སོགས་པ་༽དོན་མེད་འགྱུར། །རྣལ་འབྱོར་༼རབ་འབྲིང་གསུམ་གང་ལ་ཡང་༽ཆེ་མཆོག་དཔའ་པོ་ནི། །ཡུལ་ཕྱོགས་གང་ན་གནས་གྱུར་པའི། །རིགས་ངན་ཀླ་ཀློ་༼འི་ཡུལ་༽ཡིན་ན་ཡང་། །ཡུལ་དེ་ཡོངས་སུ་བརྟགས་པ་ཡིན། །༼བསྒྲུབ་པ་པོ་༽སེམས་ཅན་རྗེས་སུ་བཟུང་བའི་རྒྱུར། །དེ་རུ་ང་ནི་རྟག་པར་གནས། །དཔལ་འཁོར་ལོ་སྡོམ་པ་ལས་ཕོ་ཉ་མོའི་མཚན་ཉིད་དང་༼ཛོ་གིས་གྲོལ་བ་སོགས་པ་༽ནུས་པའི་སྐབས་ཀྱི་ལེའུ་སྟེ་ཉི་ཤུ་རྩ་དགུ་པའོ། །༼ལེའུ་ལྔ་དང་བདུན་པ་ལ་སོགས་པར་བསྟན་པའི་རྩ་བའི་སྔགས་ལ་སོགས་པའི་དངོས་གྲུབ་ཐམས་ཅད་མྱུར་དུ་འགྲུབ་ཅིང་བར་ཆད་མེད་པར་བྱ་བའི་ཕྱིར་གནོད་མཛེས་ཀྱི་སྔགས་་་་་་་་ལ་དེ་ཡང་་་་་་་་་ཏིའི་གྲོགས་་་འགྱུར་བ་་་་་་་ཀུན་གྱི་་་་་བཏུ་བ་བར་༽་དེ་ནས་གཞན་ཡང་བཤད་བྱ་བ། །༼བསྲུང་བའི་མཆོག་ཏུ་གྱུར་བའི་སྔགས་འདི༽ཤིན་ཏུ་རྙེད་དཀའི་༼ཧྱ་༽དགོད་པ་སྟེ། །༼སུཾ་བྷ་ནི་༽གང་ཞིག་ཤེས་པ་ཙམ་གྱིས་ནི། །༼བར་ཆད་བསལ་བས་༽མྱུར་དུ་དངོས་གྲུབ་གྲུབ་བྱེད་པའོ། །༼སྔགས་བཏུ་བའི་གཞི་གཡམ་པའམ་སྤང་ལེབ་གཅེ་མའམ་དེ་མེད་ན་༽ས་ཡི་ཆ་ནི་མཉམ་ཡིད་འོང་། །༼་་་་་་་བྲི་བའི་གཞི་དང་སྔགས་བཏུ་བའི་གཞི་་་་་་་་༽ཙན་དན་གྱིས་ནི་ཉེ་བར་བསྐུ། །༼བཏུ་གཞིའི༽དྲི་བཟང་དྲི་ལྡན་ས་ལ་ནི། །༼ཉེ་འཁོར་དུ་༽མེ་ཏོག་སིལ་མ་བཅལ་བཀྲམ་ཞིང་། །སྤོས་ཀྱི་དྲི་ཡིས་ཉམས་དགར་བྱས། །༼བདག་ཉིད་སྐད་ཅིག་གིས་རྣལ་འབྱོར་ལ་སོགས་པས་ལྷག་བསམ་ལ་༽བདག་གིས་བྱ་བ་ཀུན་བྱས་ཤིང་། །༼བཏུ་བའི་སྔོན་དུ་༽ཕྱོགས་བཅིང་བ་ནི་བྱས་ནས་སུ། །དེ་ནས་༼བླ་མ་དང་སློབ་མ་རྣམས་འགྲུབ་ཞལ་བཞི་པས་བསྲུང་བ་བྱས་ལ༽ཁ་བཞི་བ་བྲི༽རྫ་རྔ་བྱས་ནས་ནི། །༼ཕྱིའི་ཟླུམ་པོ་ནང་དུ་བསྐྱེད་གསུང་༽ཟླུམ་པོ་རི་མོ་༼རྫ་རྔའི་ལུང་བདུན་ཁ་སྟེང་གཉིས་ཏེ་དགུ་ཡིན་་་་་་་རེས་གསུང་༽དགུ་བྱ་སྟེ། །༼རི་མོ་དང་སྔགས་མ་འདྲེས་པར་བྲིས་༽ཤིན་ཏུ་མཉམ་༼པར་༽བཞག་༼པས༽་སོ་སོ་རུ། །ཡི་གེའི་ཕྱི་མོ་༼དབྱངས་དང་གསལ་བྱེད་༽དགོད་པར་བྱ། །དེར་གནས་པ་ལ་༼གནོད་མཛེས་༽དཔའ་བོ་ནི། །༼རིན་ཆེན་བཞི་གྲུབ་པ་ལ་སུཾ་བྷ་ནི་དགོས་པས་ན་སུཾ་བྷ་ནི་བཏུ་བ་བསྟན་༽འདོད་པའི་དོན་ཀུན་སྒྲུབ་བྱེད་བཏུ། །རིམ་བཞིན་འབྱུང་དང་རིམ་མིན་༼གསལ་བྱེད་ཧ་ཤ་གཡོན་སྐོར་༽པས། །དབྱངས་དང་ཡི་གེ་༼གསལ་བྱེད་༽བསྒྲུབ་པ་པོས། །ཐུབ་པས་དེ་ལྟའི་གྲངས་འགྱུར་ལས། །རེ་མིག་སུམ་ཅུ་གཉིས་པ་བླང་༼ཀ་ནས་བགྲངས་པའི་དབུས་ཀྱི་ཧ་ཀ་ནས་བགྲངས་པའི༽། །ལྔ་པ་༼དབྱངས་ཨུ་༽ཡིས་ནི་ཁྱད་པར་བྱ། །བརྒྱ་ཕྱེད་ཕྱེད་པ་༼ལྔ་བཅུ་པ་ཀ་ནས་བགྲངས་པའི་ཉི་ཤུ་རྩ་ལྔ་པ་མ་༽ཡང་དག་བླང་། །ཉི་ཤུ་རྩ་བཞི་པ་༼བྷ་༽ཡིས་ཕྱེ༼བས་བྷ་༽། །༼ཨ་ནས་བགྲངས་པའི་ན༽་རེའུ་མིག་སུམ་ཅུ་དྲུག་པ་བླང་། །༼དབྱངས་༽གསུམ་པ་༼ཨི་༽ཡིས་ནི་ཁྱད་པར་དབྱེ། །དེ་ནས་༼ཀ་ནས་བགྲངས་པའི་༽སུམ་བཅུ་༼ས་༽གཉིས་པ་བླང་། །ལྔ་བ་༼ཨུ་༽ཡིས་ནི་ཁྱད་པར་བྱ། །དེ་ནས་ཉི་ཤུ་ལྔ་བ་༼ཀ་ནས་མ༽བླང་། །ཉི་ཤུ་བཞི་བ་༼ཀ་ནས་བགྲངས་པའི་བྷ་་་་པ་་མྦྷ་༽དག་དང་སྦྱར། །སུམ་ཅུ་རྩ་གསུམ་པ་་ཧ་་་ཡང་བླང་། །རེའུ་མིག་བཅྭོ་ལྔ་པ་༼ཨཾ༽ཡིར་ལྡན། །ལྔ་བ་དག་༼་་་་་ན་༽དང་༼ཨུ་བྱུང༽ཡང་དག་ལྡན། །༼སྔགས་ཀྱི་ཆེ་བ་༽མཛེས་པའི་མཆོག་ནི་༼ཧཱུཾ་གཉིས་སུ་མ་བཏུས་༽ཡིན་པར་འདོད། །ཉི་ཤུ་རྩ་གཉིས་པ་༼ཀ་ནས་བགྲངས་པའི་ཕ་༽དང་ལྡན། །༼ཆེ་བ་༽བཅུ་གཅིག་པ་༼༤༽ཡིས་མཚན་པའོ། །ཚིག་གི་དང་པོ་༼སྔགས་མཚན་བཞི་ཞལ་དང་པོའི་སྔགས་༽ཡིན་པར་འདོད། །༼ཨ་ལི་ནས་བགྲངས་པའི་༽རེའུ་མིག་ནི་བཅུ་དགུ་པ། །མེ་ཡི་བུ་དང་༼༨༽ཡང་དག་ལྡན། །རེའུ་མིག་གསུམ་པས་༼ཨི་ཐུང་༽རྣམ་པར་ཕྱེ། །ཡ་ཚན་བརྒྱད་པའི་ས་བོན་ནི། །༼ཨ་ཨ་ནས་༽རེའུ་མིག་སུམ་ཅུ་དྲུག་པ་དང་། །༼ཧྣ༽ཡང་དག་ལྡན་པའི་ཡི་གེར་གྱུར། །སླར་ཡང་ཡི་གེ་༼འབྲི་ཧ་མནན་པས་༽དེ་དག་ཉིད༼འདི་རི་ལུ་བྱ་བ་ཡིན་གསུང་༽། །འདོད་པའི་དོན་ཀུན་སྒྲུབ་བྱེད་ཡིན། །དེ་ནས་རང་འབྱུང་༼སྤྱི་བོ་ན་གནས་པའི་ཧ་རང་བྱུང་པས་༽བླངས་ནས་༼ཧ་༽ནི། །རེའུ་མིག་ལས་ནི་ལྔ་པར་༼ཨུ་༽སྦྱར། །སྤྱི་བོར་ཐིག་ལེ་༼ཧཱུཾ་༽དག་དང་སྦྱར། །དོན་ཀུན་བསྒྲུབ་ཅེས་བྱ་བ་ཡི། །ཚིག་ནི་གཉིས་པ་༼རྐང་བ་གཉིས་པ་་་་་་འདི་༣་་་་་་་ཕཊ་མ་བཏུས་འོག་ཏུ་ཀུན་ལ་སྦྱར་བར་བཤད་༽ཡིན་པར་བཤད། །རེའུ་མིག་བཅུ་དགུ་པ་ཉིད་ལ། །ཉི་ཤུ་རྩ་བདུན་པ་ཡིས་ཕྱེ། །གསུམ་པ་༼ཨི་༽དག་དང་ཡང་དག་ལྡན། །སུམ་ཅུ་གསུམ་པ་༼ཀ་ནས་བགྲངས་བའི་དབུས་ཀྱི། ཧ༽རྟགས་བླངས་ཏེ། །རེའུ་མིག་གི་ནི་གཉིས་པ་སྦྱར་༼ཧཱ་རིང་པོར༽། །༼ཀ་ནས་༽ཉི་ཤུ་པ་༼ན་༽དང་ཡང་དག་ལྡན། །མཛེས་པའི་མཆོག་ནི་༼ཧྣཱ་༽ཡིན་པར་འདོད། །དེ་བཞིན་ཉི་ཤུ་གཅིག་པ་ཉིད། །དེ་བཞིན་ཉི་ཤུ་དྲུག་པ་༼ཡ་༽ཉིད། །ལན་གཅིག་བཟླས་པའི་ཚིག་ཏུ་ནི། །ཤིན་ཏུ་མཉམ་པར་བཞག་སྟེ་བཏུ། །དེ་ནས་གོ་རིམ་བཟློག་པ་བཏུ། །རེའུ་མིག་ལས་ནི་དང་པོ་ཉིད་༼དབུས་མ་ཉིད་ཀྱི་ཧ་དགོད་པའི་དང་པོ་གསུང་༽། །བཞི་བའི་མཐའ་༼ལྔ་བ་ལ་ཨུ་ཐུང་༽དང་ཡང་དག་ལྡན། །དེ་བཞིན་༼ཨོཾ། ཧཱུཾ་༽བཅྭོ་ལྔ་པ་དང་བཅས༼ལྡན༽། །ཆོས་༼དགོས་པ་༽དོན་འདོད་དང་ཐར་བ་ཡི། །ཚིག་ནི་གསུམ་པ་ཡིན་པར་༼རྐང་བ་གསུམ་པ་༽བཤད། །རེའུ་མིག་གཉིས་པའི་ས་བོན་༼ཨཱ་༽དང་། །རེའུ་མིག་སུམ་བཅུ་དྲུག་པ་༼ཨ་ལི་ནས་བགྲངས་པའི། ན་༽ཉིད། །དེ་བཞིན་༼ཀ་ནས་༽ཉི་ཤུ་དྲུག་པ་༼ཡ་༽དང་། །སུམ་བཅུ་གསུམ་པ་ཡང་དག་ལྡན། །རེའུ་མིག་བཅུ་གསུམ་པ་༼ཨོ་༽རུ་ལྡན། །རེའུ་མིག་ལས་ནི་བཅུ་བ་༼དབུས་ཀྱི་ཧ་ནས་མས་ཞར་བགྲངས་པའི་བྷ་༽ཉིད། །གོ་རིམ་བཟློག་པས་བསྒྲུབ་པོས་བླང་། །རེའུ་མིག་ལས་ནི་བཅུ་དགུ་པ༼ཨ་ལི་ནས། ག༽། །རེའུ་མིག་ཉི་ཤུ་གསུམ་པ་༼བ་༽ལ། །གཉིས་པ་ཨཱ་དང་ནི་ཡང་དག་ལྡན། །སྟེང་དུ་ཐིག་ལེས་བརྒྱན་པར་བྱ་༼བཱཾ་དུ་གྱུར༽། །དེ་ནས་ཆུ་བོའི་ས་བོན་བཟུང་། །བརྒྱད་པ་ཡང་ནི་༼ཀ་ནས་བགྲངས་པའི་༽དེ་བཞིན་ཏེ། །མེ་ཡི་བུ་ཡིས་ཁྱད་པར་༼༨་འོག་ཏུ་༽དབྱེ། །༼སྔགས་རྐང་བ་བཞི་བའི་ཡང་༽ཡི་གེ་ཧཱུྃ་གིས་མཐའ་རུ་སྦྱར། །འདི་ནི་ཁམས་གསུམ་རྒྱལ་ཞེས་བྱའི། །༼ཞལ་བཞི་ཡུམ་བཞི་བརྒྱད་བཅས་པའི་བསྒྲུབས་༽སྔགས་ཚིག་བཞི་ཡིས་རྣམ་བརྒྱན་པའོ། །༼སྔགས་རྐང་རེ་རེ་ལ་ཡང་༽ཨོཾ་ནི་ཀུན་ལ་གསལ་བྱེད་ཡིན༼སུཾ་བྷ་ནིའི་སྔགས་བཏུས་པའི་གཏིང་ལ་ཡང་དག་བཟོད་ཨོཾ་འདི་འགོར་བྲི་གཤམ་དུ་ཧཱུཾ་ཕཊ་བྲིའོ༽། །༼གོང་དུ་ཧཱུྃ་བཏུས་པ་ལ་འདི་བསྣན་པས་ཧཱུྃ་གཉིས་སུ་འགྲོ་གསུང་རིས་བཏུ་བ་ཧཱུྃ་རེ་རེ་ཀ་ལ་མེད་གསུང་༽ཧཱུྃ་དང་ཕཊ་ནི་༼ཀུན་གྱི་༽མཐའ་རུ་སྦྱར། །༼ཆེ་བ་༽རིགས་རྒྱལ་འཁོར་ལོ་བསྒྱུར་བའི་སྔགས༼བཅོམ་ལྡན་ཞལ་བཞི་བའི་སྔགས་༽། །འདི་ནི་མ་བྱུང་༼རྒྱུད་གཞན་དུ་༽འབྱུང་མི་འགྱུར། །དེ་ཉིད་བསྡུས་དང་དཔལ་མཆོག་དང་། །༼ནམ་མཁའ་དང་མཉམ་པ་༽བདེ་མཆོག་རྡོ་རྗེ་འཇིགས་བྱེད་དུ། །ཁྲོ་བོ་བཞི་དང་༼གནོད་མཛེས་ཡང་ན་ཁ་ཎྚ་རོ་ཧ་༽ཡང་དག་ལྡན་༼ཨ་བྷི་དྷ་ན་ལྟར་ན་ལྷ་བསྒྲུབ་ཐབས་སུ་ཡང་འགྲོ་གསུང་། ཡང་འདིའི་བསྒྲུབ་ཐབས་ཨ་བྷི་དྷ་ན་རྐང་་་་་་་་་་༽། །སྐུ་བརྒྱད་དང་ནི་བཅས་པ་རུ་༼ཊ་ཀི་མ་་་་་་་་་་་་་པར་གསལ༽། །དཀྱིལ་འཁོར་བསྲུང་བའི་དོན་དུ་ནི། །གདུག་པ་ཀུན་ལ་ཁྱད་པར་དུ། །༼བརྗོད་ཅིང་སེ་གོལ་གཏོག་༽འདི་ནི་བརྗོད་པ་ཙམ་གྱིས་ཀྱང་། །༼གྲུབ་མ་གྲུབ་༽བརྟག་མི་དགོས་པར་༼བགེགས་རྣམས་གསང་སྔགས་ཙམ་གྱིས་༽འཆིང་བར་འགྱུར། །འཁོར་ལོའི་སྦྱོར་བ་བརྗོད་པ་ནི༼བཅུ་ལོང་པ། ༼དུ་མ་ནི་བཛྲ་ཊ་ཀི་ནི་དང་མཁའ་འགྲོ་རྒྱ་མཚོ་ལས་བྲེས་པར་བྱའོ༽། །དངོས་གྲུབ་ཀུན་གྱི་འབྲས་བསྐྱེད་པའོ། །ཨོཾ་སུཾ་༼གནོད་མཛེས་༽བྷ་ནི་སུཾ་བྷ་༼ངེས་པ་གནོད་མཛེས༽ཧཱུྃ་ཧཱུྃ་ཕཊ་༼གཉིས་པོ་འདི་བཏུ་བའི་དུས་ན་འབྲི་དགོས་སཾ་སེམས་ཕྱག་་་་་་་་་་་་་་༽། །༼ཟུང་གཉིས་༽ཨོཾ་གྲིཧྣ་གྲིཧྣ་ཧཱུྃ་ཧཱུྃ་ཕཊ། །ཨོཾ་གྲིཧྣ་པ་ཡ་གྲིཧྣ་པ་ཡ་ཧཱུྃ་ཧཱུྃ་ཕཊ། ཨོཾ་ཨ་ན་ཡ་ཧོ་༼ཚུར་ཁུག་གཉིས་༽བྷ་ག་ཝན་བཛྲ་༼བཅོམ་ལྡན་འདས་རྡོ་རྗེ་རྒྱལ་པོའི་བཀའ༽ཧཱུྃ་ཧཱུྃ་ཕཊ༼་འཇོམས་པར་བྱེད་པའི་ལུང་སྦྱིན་སྒྲ་བསྒྱུར་ཆེན་པོར་མཛད ༽། །དཔལ་འཁོར་ལོ་སྡོམ་པ་ལས་རྫ་རྔ་བཅིང་བའི་སྔགས་བཏུ་བའི་ཆོ་གའི་ལེའུ་སྟེ་སུམ་བཅུ་པའོ། །༼ལེའུ་ཉི་ཤུ་རྩ་དྲུག་པར་བསྲུང་བའི་དམ་ཚིག་བསྟན་པ་འདིར་ལེའུ་གསུམ་གྱིས་བཟའ་བའི་དམ་ཚིག་བསྟན་ནོ།འདི་ནས་མར་ལེའུ་གསུམ་གྱི་ལེའུ་དང་པོར་ལམ་གྱི་གསང་བ་བསྒྲུབ་པ་རིགས་ལྡན་མ་མཆོད་པའི་རྫས་བ་མ་དབུགས་འབྱུང་ཞེས་བྱ་བ་ལ་སོགས་པས་བསྟན་པའི་བཟའ་བའི་དམ་ཚིག་བསྟན་པའི་རྒྱས་བཤད་སྟོན་ཏོ༽ །དེ་ནས་༼བཟའ་བའི་དམ་ཚིག་ལག་མཆོད་དེ་ལ་གསུམ་ལས་དང་པོ་རྫས་༽ཤ་ཆེན་༼ཤུགས་ལ་ཤ་ལྔ་ཅར་ཤེས་པར་བྱ་༽དག་གིས་༼ བདུད་རྩི་ལྔ་ཡེ་ཤེས་ལྔར་མོས། སྡིག་པོ་ཆེ་བླ་ན་མེད་པའི་གནས་སུ་བསྒྲལ་གསུང་༽ཀུན། །༼མི་ཐུན་པའི་ཕྱོགས་རྣམས་༽འཇིག་བྱེད་རྡོ་རྗེ་སྐྱེས་ཡིན་༼ཐུན་པའི་ཕྱོགས་རྣམས་འཕེལ་ཞིང་རྟན་པར་བྱེད་༽བཤད། །འདི་ནི་༼ཇི་ལྟར་མི་ཐུན་པའི་འཇིགས་པར་བྱེད་ན༽གདུག་པ་ཐམས་ཅད་ཀྱི། །འཇིག་བྱེད་མི་བཟད་པར་བཤད་དོ། །དེ་བཞིན་༼ལོ་ག་བས་མི་གཙང་བར་བྱེད་པའི་༽ཁྱི་དང་ཕག་གི་ཤ། །༼ཁྱིམ་བྱ་༽ཟངས་ཀྱི་གཙུག་པད་ཅན་དེ་བཞིན། །༼བདུད་རྩིར་བྱ་སྟེ་༽བཟའ་༼བ་བརྟེན་པའི་ལུག་གཉིས་༽དང་༼ཕྱིའི་༽སྦྱིན་བསྲེག་༼གི་རྫས་དང་༽གཏོར་མ་ཡི་༼རྫས་དང་༽། །༼མི་གཙང་བར་བྱས་ནས་མི་བརྟེན་པ་༽རྣམ་པར་༼བྱ། དེ་ཡང་༽མ་དཔྱད་ཀྱིས་༼མི་གཙང་བར་རྟོག་པ་མེད་པར་༽བྱའོ། །གང་ཕྱིར་ཐེ་ཚོམ་མེད་བྱས་ནས། །མ་ལུས་ལུས་པ་མེད་༼ལོ་ཀ་གསུམ་ན་གནས་པའི་དངོས་གྲུབ་༽འགྲུབ་ཅིང་། །༼ལོ་ཀ་འདིར་༽རྒྱལ་སྲིད་ཐམས་ཅད་༼ཀྱང་༽རབ་འགྲུབ་༼དབང་དུ་༽འགྱུར༼གཉིས་པོ་རེའི་བཟའ་བའི་སྣོད་ལ་བརྩོད་པ་སྤངས་པ༽། །༼ན་༽དུང་དང་༼ཐོད་པ་གཙང་སྒྲ་ཡིན་པ་བཞིན་༽མུ་ཏིག་ཉ་ཕྱིས་ཏེ། །གསུམ་ཅར་༼སེམས་ཅན་ལ་༽རྒྱུ་མཚན་བྱུང་༼པ་༽ཡིན་༼པའི་ཕྱིར་ཞེ་ན་༽ན། །༼མི་འདྲ་སྟེ་༽ཆོས་ཀྱི་སྐུ་ཡི་༼དངོས་སམ་ཉེ་བའི་རྒྱུའི་མིའི་མིང་ནི་བསོད་ནམས་བསགས་པའི་ལུས་ཡིན་པས་༽ལུས་ཅན་གྱི། །ཐོད་པ་ལ་ནི་སུ་ཞིག་སྨོད། །༼དེ་རིགས་པའི་ཚུལ་དུ་འདི་ལུང་གི་ཚུལ་དུ་གསུང་ཧེ་རུ་ཀ་ལ་ཡང་མིའི་ཐོད་པ་མགོ་བོ་ལ་རྒྱན་དང་རུས་པའི་རྒྱན་གྱིས་བརྒྱན་པའོ་༽དཔའ་བོ་ཐོད་པའི་ཕྲེང་བ་འཆང་། །༼མིའི་རུས་པའི་༽ཟླ་བ་ཕྱེད་པས་༼དབུ་སྐྲ་ལ་༽རྒྱན་དུ་བྱས། །དཔའ་བོའི་དབང་ཕྱུག་༼གི་རྒྱན་དང་སྣོད་གཉིས་ཀ་༽ཡིན་པར་བཤད༼རྣལ་འབྱོར་པས་ཀྱང་དེ་ལྟར་བྱེད་༽། །བརྡ་ནི་༼ཚོགས་ཀྱི་དུས་སུ་ལག་མཆོད་བྱ་བའི་རིམ་པ་བསྟན་༽ལྔ་བོ་བསྟན་པ་དག །༼གསུམ་པ་སྤྲོས་བཅས་ཀྱི་སྤྱོད་པའི་བྱེ་བྲག་ལག་མཆོད་དངོས་བསྟན་༽བསྒྲུབ་པ་པོ་ཡི་ལག་གཡོན་གྱིས། །འདི་ནི་དཔའ་བོའི་༼དང་རྣལ་འབྱོར་མ་རྣམས་ཀྱི་༽རིགས་ལྔའི་བརྡ་སོར་མོ་ལྔ་སྤྲོས་བཅས་ཀྱི་སྤྱོད་པའི་བྱེ་བྲག་་་་་་མཛབ་་བ་་་་འདུས་པ་སྟེ། ལག་པའི་མཆོད་པ་སྟོན། སོར་མོས་དེ་བཞིན་གཤེགས་པ་རྣམས་ཀྱི་༽གནས་ཡིན་ཏེ། །བརྡ་རྣམས་ལ་ནི་རབ་འཇུག་པའོ། །ཁམས་གསུམ་རྒྱུ་དང་མི་རྒྱུ་དང་། །འགྲོ་ཀུན་གཡོན་༼པའམ་ཤེས་རབ་སྟོང་པ་ཉིད་ལས་༽ལས་བྱུང་བ་ཡིན་༼པའི་ཕྱིར༽། །༼ལག་མཆོད་དུས་སུ་སོར་མོ་རྣམས་གང་དང་གང་ཡིན་པ་བསྟན་འདི་རྣམས་རང་བཞིན་གྱི་༽རྡོ་རྗེ་སེམས་དཔའ་མཐེ་བོར་གནས། །འཛུབ་མོ་དེ་བཞིན་རྣམ་སྣང་མཛད། །གུང་མོར་པད་མ་གར་དབང་བཞུགས། །སྲིན་ལག་དངོས་གྲུབ་ཐམས་ཅད་ནི། །རབ་ཏུ་སྩོལ་བའི་དཔའ་བོ་༼ཧེ་རུ་ཀ་༽བཞུགས། །ཐ་མ་ལ་ནི་མཁའ་སྙིང་པོ། །༼རིགས་ལྔའི་དབྱིབས་དང་ཁ་དོག་དུ་མོས་༽མི་བཟད་༼གཙོ་བོ་རིན་འབྱུང་དུ་མོས་༽གཟུགས་དང་ལྡན་པ་ཡིན། །༼ལྔ་ཅར་གྱི་༽སེན་མོའི་ངོས་ལ་༼དོན་གྲུབ་༽རྟ་མགྲིན་གྱི། །༼རང་བཞིན་གྱིས་༽༼དཔའ་བོ་དྲུག་༽གནས་སུ་གྱུར་བར་བཤད་པ་ཡིན། །འདི་དག་དཔའ་བོ་༼དྲུག་གནས་༽ཐམས་ཅད་ཀྱི༼གནས༽། །༼ལག་པ་༽གཡོན་པ་༼མཆོད་བྱ་ལག་པ་གཡོན་པ་མཆོད་བྱེད་གཡས་པའོ་གསུང་༽ལས་བྱུང་རྒྱུ་ཡིན་ནོ། །ལག་པ་གཡོན་པའི་མཐིལ་༼དུ་ཨོཾ་བཾ་ལ་སོགས་དང་དྲུག་ལས་དཔའ་མོ་དྲུག་སྐྱེད་པ་༽ཤྲི་ནི་ཧེ་རུ་ཀའི། །༼བཾ་ཕག་མོ་༽ཕག་མོ་ཀུན་འདུས་དགའ་བྱེད་ཡིན་ལག་པའི་དབུས་ཀྱི་ལྟེ་བ་ལ་ལྷ་མོ་ལ་སོགས་པ་ལྔ་སྐོར་མ་ལྔ་། །༼ལག་པའི་༽རྒྱབ་ཏུ་རྡོ་རྗེ་མཁའ་འགྲོ་༼འབའ་ར་ཧི་༽མ། །འདི་ནི་༼ལག་པ་གཡོན་པ་ལ༽ལག་ཏུ་དགོད་པ་སྟེ། །༼ལྷ་༣་བཅུ་རྩ་༧་༽མཛའ་བ་ཐམས་ཅད་༼ལག་པ་ལ་༽འདུས་པ་ཡིན། །༼སོར་མོ་དང་ལག་མཐིལ་དུ་གོ་ཆའི་ལྷ་རྣམས་རྒྱབ་ཏུ་དཀྱིལ་འཁོར་རྫོགས་ནས་༽དེ་ལྟར་ཆོ་གའི་སྦྱོར་བ་ཡིས། །དཔའ་བོ་ཐམས་ཅད་༼ལག་པའི་༽མཆོད་༼པས་མཆོད་༽པར་བྱ། །ས་ནི་སྤྱན་ཞེས་བྱ་བར་བཤད། །ཆུ་ཡི་ཁམས་ནི་མ་མ་ཀི་ལག་པ་ལ་གནས་པའི་འབྱུང་པ་བཞི་ངོ་བོའི་ལྷ་མོ་བཞིར་གནས་པ་འདི་དག་མོས་པ་ཙམ་ལས་རྣམ་པ་གསལ་བ་མི་དགོས་གསུང་། །མེ་ནི་གོས་དཀར་མོར་བཤད་དེ། །རླུང་ནི་སྒྲོལ་མར་རབ་ཏུ་བཤད། །༼དེ་དག་གི་་་་མཆན་འདི་བཙུད་མེད་་་་༽ཙུམ་བུ་ཀ་ནི་༼ཕག་མོའི་རྣམ་གྲངས་༽སྟོང་བ་སྟེ། །དེ་བཞིན་༼ཤེས་རབ་༽ཕ་རོལ་ཕྱིན་པ་ཡིན། །༼ལག་པ་རྒྱབ་ཀྱི་༽དབུས་སུ་༼དཀྱིལ་འཁོར་རྫོགས་པ་ནི་༽དཔའ་བོ་༼ཉི་ཤུ་༤་པོ་༽ཀུན་གྱི་གནས། །༼ལུས་ཐམས་ཅད་ལ་བྱུགས་པ།ལག་པའི་མཆོད་པ་ཟིན་ནས་ཐལ་མོ་སྤྱི་བོར་སྦྱོར།གཡོན་པའི་ལྷ་རྣམས་སྤྱི་བོ་ནས་ལུས་ལ་ཐིམ་པར་གཤེགས་སུ་གསོལ་ལོ་༽མཁས་པས་རྒྱབ་ཏུ་གཤེགས་སུ་གསོལ། །༼ལག་མཆོད་༽གསང་བ་འདི་ནི་༼དབང་མ་ཐོབ་པ་ལ་༽མི་བཤད་ཅིང་༼སྣོད་དང་མི་ལྡན་པས་མཐོང་དུ་མི་རུང་ལ་༽། །༼གསང་བ་ལ་༽རབ་ཏུ་འབད་དེ་སྦ་བར་བྱ། །དེ་ལྟར་ལག་པའི་སོར་མོའི་བརྡ་ཡི་དཔའ་བོ་༼དང་རྣལ་འབྱོར་མ་༽རྣམས༼དང་པ་བསྟེན༽། །ལྷན་ཅིག་ཟས་ལ་༼ལོང་༽སྤྱོད་པ་༼ཁུ་བ་དང་གོང་བུའི་རྫས་ཀྱིས་༽རྩོམ། །དཔའ་བོ་༼དང་རྣལ་འབྱོར་མ་༽ཐམས་ཅད་མཉམ་སྦྱར་བ། །༼གང་དང་སྦྱོར་ན་༽མཁའ་འགྲོ་དྲྭ་བའི་༼ཐམས་ཅད་ཐམས་ཅད་སྦྱོར་༽བདེ་མཆོག་༼གཉིས་སུ་མེད་པར་སྦྱོར་བ་ནི་༽ཡིན། དཔལ་འཁོར་ལོ་སྡོམ་པ་ལས་༼ཤ་ལ་སོགས་པ་༣་པོའང་༽བཟའ་བ་དང་༼ཕྱིའི་༽སྦྱིན་བསྲེག་དང་གཏོར་མའི་བྱ་བ་ལས་ལྷག་པའི་བརྡའ་ཆོ་གའི་ལེའུ་སྟེ་སུམ་ཅུ་རྩ་གཅིག་པའོ། །༼ཕྱིན་ཅི་མ་ལོག་པ་༽༼དང་པོ་གཏོར་མའི་ལས་ཀྱི་བྱ་བས་ནི་་་་་་་རི་བསྒྲུབ༽དེ་ནས་༼འདས་མ་ཐག་པའི་བཟའ་བའི་དམ་ཚིག་གི་ཁྱད་པར་བསྟན་པ་དེ་ལ་༣་ལས། དང་པོ་རྫས་ཀྱི་ཁྱད་པར་ཕན་ཡོན་དང་བཅས་པ་༽ཡང་དག་བཤད་བྱ་བ། །༼བདུད་རྩི་ལྔ་༽བཟའ་དང་སྟོན་མོ་༼ཚོགས་ལ་སོགས་པའི་དུས་སུ་༽འདུས་པ་སྟེ། །ཡང་དག་༼གཏོར་མའི་རྫས་ཐམས་ཅད་འོག་ནས་འབྱུང་སྟེ་གཏོར་མ་བྱིན་གྱིས་བརླབ་པ་གཏོར་བཞིན་དུ་བྱས་ལ་མཆོད་དོ་༽ཆོ་ག་གང་གིས་ཤེས། །༼དེ་ཉིད་རྩོམས་པ་ཙམ་གྱིས་༽དངོས་གྲུབ་༼༣་པའང་༽མྱུར་དུ་ཐོབ་འགྱུར་པའོ། །བསྒྲུབ་པོས་སྔར་བསྟན་རིམ་པ་༼སྔར་ལེའུ་གོང་མ་རྣམས་སུ་བྱའི་ཤ་ལ་སོགས་པ་དུ་མ་བསྟན་ལ་༽ཡིས། །ཕྱུགས་རྣམས་ཀྱི་ནི་དགུག་༼ཤ་བསྒྲུབ་ཅིང་བརྟེན༽པ་ཉིད། །ཕྱུགས་རྣམས་དག་༼ནི་ཤ་༽ནི་དེ་བཞིན་ལྔ། །༼དེ་གང་ཞེ་ན། ལུས་ཀྱི་སྟོབས་སྐྱེད་པར་བྱེད་པས་༽མི་དང་རུས་སྦལ་རྔ་མོ་དང་། །ལྕེ་སྦྱང་༼བྱ་ལ་སོགས་པ་གཞན་ཡང་གསུང་༽རྟ་ལ་སོགས་རྣམས་ཀྱི། །དངོས་གྲུབ་༼གཙོ་བོ་ཐུན་མོང་གི་དངོས་གྲུབ་༽བསྒྲུབ་པའི་༼སཾ་བྷ་ར་༽དཀྱིལ་འཁོར་དུ། །༼ལུས་ཟུང་རྒྱས་པར་བྱེད་པ་༽ཕྱུགས་འདི་དག་༼གི་ཤ་༽ནི་འགྲུབ་༼པའི་༽ཡན་ལག༼་ཡིན།༽ །རིགས་རྣམས་ལ་ནི་ཕྱུགས་༼ཧེ་བཛྲའི་་་་་་ཧེ་བྲཾ་ཟེའི་རིགས་ཀྱི་ཤ་ལ་བརྡ་སྐད་མིའི་ཤ་ལས་བྲཾ་ཟེའི་ཤ་དེ་༽མཆོག་གོ རྐང་བཞི་རྣམས་ལས་༼འཁོར་ལོར་སྟོབས་སྐྱེད་པ་ལ་སོགས་པ་བྱེད་པས་༽གླང་བོ་༼ཆེའི་ཤ་༽དང་། །འདབ་ཆགས་རྣམས་ལས་ངང་བ་དང་༼བི་ཤ་མཆོག༽། །དུད་འགྲོ་རྣམས་ལས་ཕྱུགས་༼བ་ལང་གི་ཤ་མཆོག་༽ཡིན་ནོ། །༼ཞིང་སྐྱེས་མ་༽ལྷ་རྣམས་ཞལ་ནི་གཡོ་བྱེད་པ། །དངོས་གྲུབ་བསྒྲུབ་༼པར་༽བྱའི་དཀྱིལ་འཁོར་དུ། །ཕྱུགས་ནི་འདི་རྣམས་༼ཀྱི་དངོས་གྲུབ་ཀྱི་རྒྱུར་༽རྣམ་པར་བཤད། །༼དེར་མ་ཟད་དེ་གཞན་ཡང་༽ཁྭ་དང་ཆུ་སྐྱར་༼ནེ་ཙོ་དེ་དང་པོ་དུད་འགྲོ། ཕྱིས་མི་སྐད་༽བཞད་དང་ནི། །༼འགྲོས་པ་བར་འགྲོ་བ་ཤི་པ་ལ་ན་ཡོད་གསུང་༽ལྕེ་སྦྱང་སྐྱེ་གཉིས་༼ཧཱུཾ་ཞེས་པའི་འུག་པ་སྒྲ་སྒྲོགས་པས་༽སྔགས་ཆེན་པོ། །ཁྲུང་ཁྲུང་རི་སྐེགས་༼བྱ་རྣམས་ཀྱི་ཤ་༽ཀ་དམ་པ༼བྱ་རྣ་བ་ཆེ་བ་༡་ཡོད་གསུང་༽། །༼ཤ་དེ་ཐམས་ཅད་༽བཟའ་༼བ་༽དང་༼བདུད་རྩིར་བརླབས་ཏེ་༽གཏོར་མ་༼དང་༽སྦྱིན་བསྲེག་༼གི་སྲེག་རྫས་༽བྱ། །༼འདི་རྣམས་ཀྱི་ཤ་ལས་གཏོར་མ་གཏོང་སྟེ། གཏོར་མའི་ལས་ཀྱི་བྱ་བ་སི་ཏི་བསྒྲུབ་པའོ༽འདོད་པའི་དོན་ནི་འགྲུབ་པར་འགྱུར། །ཀྲིཥཎ་ཤྭ་༼ནག་པོ་མ་་་་་གྱི་མོ་་་་་རོ་ལངས་བསྒྲུབ་པ། རོ་ལངས་ཀྱི་ཧོ་མས་སི་ཏི་བསྒྲུབ་པ་བསྟན་ཏོ༽ནི་ཐུག་པ་༼ཁྱི་ནག་མོའི་འོ་མ་ལས་ཐུག་པ་བྱ་བ། ཁྱི་མོ་ནག་མོའི་ཁྱི་མོ་སྐྱེས་པ་དེ་ཉིན་མོ་བཏང་ནུབ་མོ་ཨ་མ་དང་ཕྲལ་གྱིན་བཞོས་པའི་འོ་མའོ་༽དང་། །༼སྤང་ལེབ་༽མ་ཤ་འབྲས་ནི་ནག་པོར་ལྡན། །༼འབྲས་བཙོས་པ་དང་འོ་མ་༢་བསྲེས་པའི་བསྲེག་རྫས་བཤཾས་ལ། འདི་རྩ་བའི་སྔགས་ཀྱི་བསྐྱེད་པ་ལ་བརྟེན་པས། ལས་རེ་སྔོན་དུ་སྙེན་པ་འབྲུ་འབུམ་༡་ནས་བཞི་ལ་སོགས་པ་སྐྱལ་ཏེ། རྨ་མེད་པ་རིམས་ལ་སོགས་པས་མ་ཤི་བ། ལས་ཀྱི་སྦྱོར་བ་ལ་རོ་མ་རུལ་བ་མ་མྱགས་པ་གཙང་མ་བླངས་ལ་དེ་གན་རྐྱལ་དུ་བཞག་ནས། ལྟེ་བའི་སྟེང་དུ་ཁྲི་བརྩིགས་ལ་སློབ་དཔོན་བསྡད། དེའི་ཁའི་སྟེང་ཏུ་སྦྱིན་བསྲེག་གི་ཐབ་བྱ་སྟེ་ཐབ་ཀྱི་ཟག་ཁུང་ཁའི་ནང་དུ་འོང་བར་བྱ། རང་ལྷའི་ཛོ་གི་བསྒོམས། གྲོགས་གཅིག་གིས་རལ་གྲི་བཟུང་སྟེ་སུཾ་བྷ་ནི་བཟླས་ལ་བར་ཆད་བསྲུང་། བསྲེག་རྫས་རྣམས་བསྲེག་ཅིང་རྩ་སྔགས་ཀྱི་མཐར་རོ་ལངས་ཀྱི་དངོས་གྲུབ་གསོལ་བ་བྱ་བས་བསྐུལ་ཅིང་བསྲེག་གོཿ རྩ་སྔགསཿབརྒྱ་རྩ་བརྒྱད་ནི་བསྲེག་བླུགས་ཀྱི་གྲངས་སོ། འོག་གི་རལ་གྲི་ལ་སོགས་པ་གང་འདོད་པ་ན་གསོལ་གཅིག་པ་དང་སྦྲེལ་གསུང་།༽འཛེམ་པ་མེད་པར་རོ་ཡི་ཁར་༼འདག་པས་ཐབ་བྱས་ལ། དྲག་པོའི་གསུང་༽། །སྦྱིན་བསྲེག་བརྒྱ་རྩ་བརྒྱད་པར་༼ལ་སོགས་པར་༽བྱ། །དེ་ནས་རོ་དེ་ལངས་༼བྱུང་བ་ན་འཇིགས་པ་མེད་པར་བྱ་བ་དང་༽ནས་ནི། །ཅི་བགྱི་ཞེས་ནི་༼ཅི་འདོད་སི་ཏི་གང་འདོད་ཞེས་སྨྲར་འོང་གསུང་༽སྨྲ་བར་འགྱུར། །༼དེ་ནས་དངོས་གྲུབ་བླངས་པ་༽ས་འོག་༼དང་༽སྟེང་༼མཁའ་སྤྱོད་༽འགྲོ་རལ་གྲི་འམ་༼མཁའ་སྤྱོད་༽། །༼ལྕེ་༢་འོང་་ཝེ་་་་རལ་གྲིར་སོང་་་་་གསུང་། རྒྱལ་པོ་ལ་སོགས་པ་༽ཚར་གཅོད་༼པ་དང་། སླར་༽ཕན་འདོགས་༼པ་༽ཉིད་དང་ནི། །༼མི་སྣང་བའི་་་་་་ཝེ་་་་་་སྟེང་དུ་འོང་གསུང་༽རི་ལུ་༼ལོ་ཀ་གསུམ་སྣང་བར་བྱེད་པ་༽མིག་སྨན་༼གྱི་དངོས་གྲུབ་༽གཏེར་རྣམས་སམ། །རྐང་མགྱོགས་དག་གམ་༼ཚེ་རིང་བ་ལ་སོགས་པ་༽བཅུད་ཀྱིས་ལེན། །༼དེ་རྣམས་ཀྱི་ནང་ནས་འདིའི་མཚམས་ན་མི་གསལ་་མི་སྟེར་༽གཅིག་གཅིག་སྦྱིན་པར་བྱེད་ནས་ནི། །འགྲོ་བར་༼རོ་དེ་གར་སོང་། རོ་དེ་བསྒྲུབ་གཡོག་ལ་སྟེར་ཏེ་དེས་གཡོག་བྱེད་པའམ་ཡང་ན་དེ་གསེར་འགྱུར་པས་ལོངས་སྤྱོད་དུ་འགྱུར་རོ་གསུང་། ཡང་ན་རོ་དེ་གསེར་དུ་འགྱུར་གསུང་རྩ་སྔགས་བཟླས་ཀྱིན་༽འགྱུར་གྱི་གཞན་དུ་མིན། །སྟེང་༼མཁའ་སྤྱོད་༽དང་འོག་༼ས་འོག་༽ཏུ་༼བསྒྲུབ་པ་པོ་ལ་༽ཕོ་ཉ་འགྲུབ། །རྒྱུད་འདིར་ཐེ་ཚོམ་མེད་པ་ཡིན། །༼བརྡ་སྐད། ལེའུ་དང་པོར་ལཾ་གྱི་གསང་བ་བཤད་པ་མཆོག་ཅེས་བྱ་བ་ལས་གསང་བའི་རྒྱས་བཤད་༽བ་ལང་ལྷས་ཀྱི་མི་འབྱིང་དང་། །༼ཚིག་ཕྲད་༽ལྷག་མ་༼ས་དང་ཆུའི་གཏིང་ལ་མེ་ལོང་བས་ན་ཚིག་ཕྲད་ཅེས་བྱའོ། མེ་༽སྐེམ་བྱེད་རྩ་གནས་སོ༼རླུང་༽། །༼གསེར་གྱི་ས་གཞི། དུུང་ཆེན་ཟེར་༽བྲག་ཆེན་པོ་ཡི་ངོ་བོ་རུ། །༼རྫུས་སྐྱེས་ཀྱི་རིམ་པ་འདི་ལྟར་མ་ལས་སྐྱེས་པ་ནི་འགྱུར་བས་དང་། དང་པོ་རླུང་ལས་འོང་༽ཡང་ན་རུས་སྦལ་དག་གིས་སོ། །མྱུར་དུ་དངོས་གྲུབ་༼དངོས་གྲུབ་གསུམ་༽སྨིན་འགྱུར་༼རྟེན་སྐྱེད་པ་༽ཡིན། །༼རྟེན་པ་༽ཕྱག་བཞི་པ་དང་༼ཕྱག་འབུཾ་གྱི་བར་དུ་ཡང་གསུང་༽ཞལ་བཞི་པ། །ཇི་སྲིད་ཕྱག་ནི་འབུམ་གྱི་བར་༼ཕྱག་མཚན་ཅི་འཛིན་ན་གྲགས་པ་དང་ཡོད་པའི་མཚོན་ཆ་རྣམས་བསྣམས་པ་༽། །སྐུ་མདོག་དཀར་པོ་ཁྲོ་བོ་ཆེ། །རྡོ་རྗེ་ཕག་མོ་༼དཀར་པོ་ཡང་ན་དམར་མོ་༽དེ་ཡི་ནི་། །སྐུ་མདོག་མཚོན་ཆ་འཆང་ལ་༼སྒོང་སྐྱེས་ལ་རྒྱུ་འབྲས་ཁྱད་པར་མེད་དོ་༽གཟིགས། །དཔའ་བོ་༼འབྲས་བུ་རྡོ་རྗེ་འཛིན་༽ཐོད་པའི་ཕྲེང་བ་ཅན། །སྐུ་ལ་ཐལ་བས་ཉེ་བར་བྱུགས་༼དྲུག་པ། མདོག་ནག་པོ་ལ་ཐལ་བས་བྱུགས་པས་སྔོ་སྐྱའོ་༽། །ཕྱག་རྒྱ་༼ལྔ་༽ཡིས་ནི་སྐུ་ལ་བརྒྱན། །རལ་བའི་༼སྤྱི་བོའི་རུས་པའི་ཙཀྲ་ལ། རུས་པ་ནས་ཙམ་པ་ཙར་ཙར་བ་ཡོད་པ་རལ་བའི་རྩེ་མོ་རྣོ་བས་༽ཅོད་པན་མདུང་དང་ལྡན། །༼དངོས་གྲུབ་ཀྱི་རྒྱུ་རྟེན་དང་རྟེན་པ་༽ཞལ་གྱི་མཆེ་བ་ཅུང་ཟད་གཙིགས། །ཡི་དྭགས་ཆེན་པོ་༼འཇིགས་བྱེད་དུས་མཚན་༽གདན་དུ་བྱས། །དེ་ནས་རྟག་ཏུ་བསྒྲུབ་པ་པོས། །༼དཀྱིལ་འཁོར་རྫོགས་པ་རྫུས་སྐྱེས་སམ་མངལ་སྐྱེས་ཀྱི་༽སྔགས་ཀྱི་ལྷ་ནི་༼དབུ་རྒྱན་གྱི་ལྷའི་བར་དུ་༽ཤེས་ནས་བསྒོམ། །༼མངལ་སྐྱེས་ཀྱི་དབང་དུ་བྱས་ཏེ་རྒྱུ་རྡོ་རྗེ་འཛིན་ཉམས་སུ་བླངས་པའི་༽དེ་ལྟའི་ཡོན་ཏན་ཁྱད་པར་གྱིས། །བསྒྲུབ་པ་པོས་ནི་འགྲུབ་པར་འགྱུར། དཔལ་འཁོར་ལོ་སྡོམ་པ་ལས་དུད་འགྲོ་ཕྱུགས་༼ཤ་རྣམས་༽དང་རོ་ལངས་བསྒྲུབ་པ་དང་བསྐྱེད་པའི་རིམ་པའི་ཆོ་གའི་ལེའུ་སྟེ་སུམ་ཅུ་རྩ་གཉིས་པའོ། །དེ་ནས་བསྒྲུབ་པ་པོ་རྣམས་ཀྱིས། །སྦྱོར་བ་༼བཟའ་བའི་དམ་ཚིག་བརྟེན་པའམ་ཐབས་་་་་་དང་་་་་གཞན་༽ཀུན་ལ་མེད་པར་༼ཁྱད་པར་དུ་འཕགས་ཅེས་པའོ༽བཤད། །༼རྫས་བསྟན་༽བཟའ་དང་༼བདུད་རྩིར་བྱས་ལ་དེ་ལ་ལོངས་སྤྱད་༽སྤྱད་དང་དཔའ་བོ་སོགས། །ཅི་ནུས་པ་དང་༼འདིར་མང་དུ་བཤད་ཀྱང་ཇི་སྙེད་༽རྣམ་པར་བྱ། །༼ཀུན་ནམ་དངོས་སུ་བདུད་རྩི་དངོས་སུ་༽མེད་པར་གྱུར་ཀྱང་བཟའ་བ་༼གང་ཡང་རུང་བ་༽ནི། །༼དགོས་མཆོད་རྣམ་རྟོག་རིམས་ཀྱིས་ཞི་བར་བྱ་བའི་ཕྱིར་༽ལྔ་བོ་༼ཤ་ལྔ་བདུད་རྩི་ལྔ་༽ཉིད་དུ་བྱ་བ་༼བྱིན་གྱི་བརླབ་༽ཡིན། །༼དང་པོ་༽བཟའ་༼བའི་དམ་ཚིག་༽དང་བཅའ་བ་རྒྱ་ཆེ་༼བྱིན་རླབས་ལ་སྦྱོར་༽བ་༼དེའི་དུས་སུ་༽། །༼དུས་བསྟན་་་་་ཉིན་མོ་ལོ་ཀ་མི་མོ་་་་་་ས་སྐྱེ་བསུ་༽མཚན་མོའི་དུས་ནི་ཉིད་དུ་བྱ། །༼ཚོགས་བསོག་པའི་དུས་གཞན་ལ་༽དེ་ནས་ཕོ་ཉ་༼གཉིས་པ་ཕོ་ཉ་བརྟེན་ཅིང་མཆོད་པ་༽རབ་༼ཏུ་༽སྦྱིན་ཞིང་༼བརྟེན་༽། །༼འཕོ་བ་༽གཡོན་ཕྱོགས་༼སུ་ཕྱག་རྒྱའི་བསྒྲུབ་པ་པོའི་༽མགོ་བོ་བསྟན་ནས་ནི། །༼རིམས་ཀྱིས་ཡིད་ཚིམ་པ་༽རང་གི་མགོ་བོ་༼ཕྱག་རྒྱའི་༽བང་༼དུ་༽བཞག་༼དུས་རེས་འགའ་༽སྟེ། །༼དེ་ནས་༽དཔའ་བོ་༼དང་ཕོ་ཉ་མཐར་༽གཉིས་སུ་མེད་པས་མཆོད། །༼བྱིན་གྱིས་བརླབས་པ་དེ་༽༼མ་བརྟགས་ཀྱང་སྙོམས་པར་འཇུག་པའི་བདེ་བ། ཕོ་ཉའི་མཚན་ཉིད་སྔར་བསྟན་པ་ལྟར་ན་གིས་མཆོད་པའི་མཆོད་གསུང་༽ཡང་ན་༼རྟག་ས་༽མའམ་སྲིང་མོ་འམ། །བུ་མོ་འམ་ཡང་ཆུང་མར་ནི། །འདི་འདྲའི་ཆོ་གའི་སྦྱོར་བ་༼དེ་ཡང་ཡོ་མ་སྐུར། དེ་ནས་སྔགས་དང་རྒྱུད་ལ་སོགས་པས་རྒྱུད་སྦྱངས་ཏེ་བརྟེན་པ་༽ཡིས། །༼བརྟེན་ན་འཁོར་བ་༽བཅིངས་༼པ་༽ལས་༼ཉོན་མོངས་པ་ལ་སོགས་༽གྲོལ་བ་ཉིད་དུ་བྱ། །དེ་ནས་༼ལྷའི་དེ་ཁོ་ན་ཉིད་༽སྔགས་ནི་འགྲུབ་འགྱུར་ཏེ། །ཇི་སྲིད་འབྱུང་བ་ཡོད་པར་དུ་༼དང་པོ་ལྷར་སྐྱེད་པ་ནས་བཟླས་བསྒོམ་རྫོགས་ཀྱི་བར་དུ་བྱས་ལ་༽། །༼བདག་ཉིད་༽སློབ་དཔོན་ལུས་༼ཀྱི་དཀྱིལ་འཁོར་ལས་༽སུ་གནས་༼བསྒོམ་༽ནས་སུ། །༼དེ་ལྟ་བུ་ལ་མཉམ་པར་བཞག་པས་༽བསྒྲུབ་པ་པོ་ཡི་མཆོད་པ་བླང་༼ཕོ་ཉ་༽། །༼དེ་ལྟར་བྱས་ནས་བརྟེན་ན་༽དཔའ་བོ་རྣམས་ཀྱི་༼དཔའ་བོའི་སྙོམས་འཇུག་གི་ཏན་མུ་ཏྲའི་ཆོས་འབྱུང་ཡིན་༽སྟན་དག་དང་། །ཕྱག་རྒྱ་ཉིད་དུ་༼བྱིན་གྱིས་བརླབས་པ་དེ་༽ཐེ་ཚོམ་མེད། །༼དེ་ལྟ་བུས་མུ་ཏྲ་བརྟེན་པའི་དུས་རེས་འགའ་སྐྱོ་བ་གསང་བའི་ཕྱིར་༽བསྒྲུབ་པོ་ཤིན་ཏུ་མཉམ་བཞག་པས་༼ལྷའི་རྣལ་འབྱོར་ལ་༽། །༼བསྒྲུབ་པ་པོས་ཐབས་ཀྱིས་ཟིན་ན་ཕྱག་རྒྱ་དང་ལྷན་གཅིག་ཏུ་༽གླུ་དང་གར་ལ་སོགས་པ་བྱ། །༼བསྒྲུབ་པ་པོ་༽ལུས་ཅན་ཐམས་ཅད་ཇི་སྲིད་དུ། །རྣལ་འབྱོར་ཡེ་ཤེས་ལ་མ་ཞེན་༼དེ་ཐ་མལ་པའི་ཆགས་པ་ལ་ཞེ་ན་རིམ་གྱིས་རིམ་གྱིས་ཉོན་མོངས་པ་ལ་སོགས་པ་འཕེལ་ནས་༽། །༼ཉེས་་་་་་་་་་་་༽དེ་སྲིད་༼དེ་ཁོ་ན་མ་གཏོགས་པས་༽འཁོར་བར་འཁོར་འགྱུར་ཞིང་། །༼འཁོར་བའི་སྐྱོན་༽མྱ་ངན་སྡུག་བསྔལ་གྱིས་གཡེང་འདིར་༼སྐྱེ་༽། །༼དེ་བས་ན་༽དངོས་པོ་༼ལུས་ངག་ཡིད་གསུམ་༽ཀུན་ནས་བསྒྲུབ་པ་པོས། །ཕྱ་རྒྱ་༼ལྷ་ལ་མཉམ་པར་བཞག་པས་དང་ཕྱག་རྒྱ་་་་་་་་་་རྟོགས་པར་བྱ་བའི་བསམ་པས་༽ཐམས་ཅད་མཆོད་པར་བྱ་༼སྙོམས་འཇུག་བྱ༽། །མཆོད་པ་དེ་ནི་མཆོག་གྱུར་ཏེ། མཉམ་པར་བཞག་པས་ཕྱག་རྒྱ་བརྟེན་ན་བརྙས་པ་བྱས་ན་ཡིས་ནི་ངེས་པར་༼གཞན་ལ་༽བསྲེག་༼ངན་སོང་དུ་འགྲོ༽ །རྣལ་འབྱོར་མ་ཡི་རྒྱུད་རྣམས་ཀྱིས། །༼འདོད་པའི་བསམ་པས་༽ཕྱག་རྒྱ་ཆེན་པོ་༼འམ་གཙོ་བོར་སྤྲོས་པ་དཀྱིལ་འཁོར་ཐམས་ཅད་་་ཡབ་ཡུམ་སྙོམས་པར་ཞུགས་པ་ལས་བྱུང་བའི་ཐིག་ལེ་བདེ་བའི་རང་བཞིན་ཅན་དེ་ཨ་ལི་བརྗོད་ཅིང་སྦྱོར་བའི་བར་ནས་འདུ་ཏི་ནས་དྲངས་པ་དང་དེ་ནས་་་་་་་་་་སྣ་བུག་ནས་བདེ་བའི་དལ་ཐ་མས་ཅད་ལ་བདེ་བ་ཁྱབ་པར་བྱས་ཚུལ་བསྡུ་བའོ་༽དང་པོར་བསྒྲུབ། །དེ་བཞིན་༼མཉམ་པར་བཞག་པས་ཕོ་ཉ་བརྟེན་པ་ལ་༽རབ་ཏུ་འབད་པ་དང་། །༼་་་་་སྟོན་བདེ་ལ་་་་་་་་་༽ཀུན་ནས་དང་བས་༼སྙོམས་འཇུག་གིས་༽མཆོད་པར་བྱ། །དེ་ཡི་འོག་ཏུ་དཔའ་བོ་ཡིས། །དཔའ་བོ་༼ཕོ་ཉ་དང་༽ཀུན་ཏུ་སྤྱད་པར་བྱ༼༣་པ་ཕོ་ཉ་བརྟེན་པའི་ཕན་ཡོན་༽། །༼སྔགས་སྐྱེས་མངལ་སྐྱེས་ཞིང་སྐྱེས་མའམ་ལྷན་སྐྱེས་མར་ཞེན་ནས་བརྟེན་པའི་ཕན་ཡོན་འདི་དག་འབྱུང་ངོ་༽དེ་ལྟར་མཆོད་བྱས་དེ་ནས་ནི། །༼ཐུན་མོང་གི་དངོས་གྲུབ་༽སྟེང་༼མཁའ་སྤྱོད་༽འོག་༼ས་འོག་༽འགྲོ་བ་བསྒྲུབ་པ་༼ཕོ་ཉ་ན་ལ་ཉི་ཤུ་ཡོན་ཏན་འབྱུང་བ་༽དང་། །ཞི་དང་༼ལག་པའི་དངོས་གྲུབ་༽རྒྱས་དང་དབང་དང་དགུག །བསད་དང་བསྐྲད་པ་ལ་སོགས་དང་། །རྨོངས་དང་རེངས་སོགས་ལ་སྦྱར་ཞིང་། །དབྱེ་༼མཛའ་བ་༽དང་དེ་བཞིན་༼བསྐྲད་པ་གསུང་༽ཚར་བཅད་དང་། །༼དུས་རིང་མོར་འགོར་བ་༽ལས་རྣམས་གང་ཅིའང་རུང་བ་ལ། །༼རྨོངས་ཟེར་༽སྨྱོན་མི་དགོས་པར་༼རེ་རེ་ནི་བསྟན་པའི་ན་་་་་་ཀས་་་༽བསྒྲུབ་པ་པོས། །འགྲུབ་པར་འགྱུར་བར་གདོད་མི་ཟ། དཔལ་འཁོར་ལོ་སྡོམ་པ་ལས་གསང་བའི་མཆོད་པ་དང་༼ལྷ་དང་སྔགས་༽བསྙེན་བསྐུར་གྱི་ཆོ་གའི་ལེའུ་སྟེ་སུམ་ཅུ་རྩ་གསུམ་བའོ། །དེ་ནས་༼སྦྱིན་སྲེག་དང་རྫོགས་པའི་རིམ་པ་གཉིས་ཀའི་སྔོན་དུ་སྐྱེད་རིམ་འགྲོ་བས་དང་པོ་སྐྱེད་པའི་བསྟ་་་་་་་་རྫོགས་པ་ནི་བདེ་་་་་་་་་སྔོན་དུ་བི་་་་་་་སྟོང་པ་་་་་་་༽མཁའ་འགྲོ་མ་དྲ་བའི། །༼ལུ་ཨི་པའམ་ནག་པོ་ལྟར་ལྷ་སུམ་བཅུ་རྩ་བདུན་ཚང་བར་མངལ་སྐྱེས་སྒོང་སྐྱེས་གཉིས་ཀ་གསུང་༽འཁོར་ལོ་ཆོ་ག་རྒྱས་པ་སྟེ། །ལས་གང་ལས་ནི་༼འདི་ཡན་ཆད་གྲང་དོན་དང་ངེས་དོན་༢་ཐུན་མོང་༽ཀུན་བརྗོད་པས། །༼ལས་རྣམས་༽འགྲུབ་པར་ཐེ་ཚོམ་མེད་པའོ། །དཔའ་བོ་༼ཉི་ཤུ་རྩ་ལྔ་་་་ལོ་ཀ་ལས་འདས་པའི་མེ་ལྷ་མངོན་པར་བསྟན་༽ཀུན་༼ཡབ་ཐབས་༽དང་༼ཡུམ་ཤེས་རབ་༽རྣལ་འབྱོར་མའི། །༼དང་པོ། ཤུ་ལོ་༡་གི་ཕྱིའི་ཞི་བ་ལ་སོགས་པའི་ལས་རྫོགས་པ་བསྒོམ་པའི་ལས་གཉིས་ཀའི་དོན་དུ་འགྲོ་བ་སྐྱེད་རིམ་ཡིན་པས།ཀུན་ཏུ་སྤྱོད་པ་ལྟར་གནས་ལྔར་ཡི་གེ་འབྲུ་ལྔ་བཀོད། ལོ་ཀའི་མེ་ལྷ་འབར་བར་མ་ཐིམ་ན་དེའི་ཁོང་པའི་པད་མའི་ལྟེ་བར་འདས་པའི་ལྷ་རྣམས་སྐྱེད་པ།འབར་བར་ཐིམ་ན་ཐབ་ཀྱི་པད་མ།༽་པད་མའི་ལྟེ་བར་ངེས་པར་སྦྱར། །ཨ་བ་དྷུ་ཏི་གནས་༼གནས་ནས་མར་འདས་པའི་དཀྱིལ་འཁོར་གཞུགས་སྟེ་ལྟེ་བ་ན་མོའི་དམ་ཚིག་པའི་དཀྱིལ་འཁོར་བསྐྱེད་པ་ལ་སྟིམ་མོ་༽དེ་བཞིན། །༼དེ་ནས་དཀྱིལ་འཁོར་ཐམས་ཅད་བདེ་བས་ཁྱབ་པར་བྱ་སྟེ་ཚུལ། ༽སྨིན་མའི་བར་དུ་༼ལོ་ཀ་བའི་མེ་ལྷའི་སྨིན་འཚམས་ནས་མར་ལ་ཡེ་ཤེས་པ་སྟིམ་མོ༽་ངེས་པར་བཞག །དཔའ་བོ་རྨེ་བརྩེགས་༼ཡབ་ཡུམ་ཞུ་བའི་དང་པོའི་ཐིག་ལེ་དཀར་དམར་བདེ་བ་ཆེན་པོའི་ཐིག་ལེ་ལ་༽ཆགས་བྱས་ལ༼ལོ་ཀ་པས་འདས་པའི་མེ་ལྷ་གསལ་བར་དམིགས་པ་ཡང་ལོ་ཀ་ལས་འདས་པའི་མེ་ལྷ་བསྲེག་རྫས་ལ་ཆགས་པར་དམིགས་པར་གསུང་༽། །དེ་ནས་མེས་བསྲེག་༼བསྲེག་རྫས་མི་རྟོག་པའི་ཐབ་ཁུང་དུ་རྟོག་པར་བྱ་བའི་བསྲེག་པར་བྱ་༽གཞན་དུ་མིན། །༼བསྲེག་རྫས་བསྟན་པ་ལ་ཤ་༽གོ་མཾ་ས་དང་༼དེའི་ཁྲག་༽རུ་ཏིར་བཅས༼་འདིར་ཐུན་མོང་མ་ཡིན་པའི་ཐུན་མོང་བ་ཤུགས་ལ་བྲེས༽། །འབད་པས་རྫོགས་པ་ལྟར་ན་ཕུང་པོ་ལྔའི་རྟོག་པ་བསྲེག་བསྲེག་བྱ་་༼བསྲེག་རྫས་བསྡུས་པ་ནི་འདི་ཡང་སྐྱེད་པའི་བདུད་རྩི་ལྔ་༽ལྔ་དག་བྱ། །༼བསྲེག་རྫས་རྒྱས་པར་བསྟན་ཏོ་༽དེ་ནས་འབར་བའི་མེ་ལ་ནི། །བསྲེག་བྱ་ཕུང་པོ་ལྔ་དང་འབྱུང་བ་བཞིའི་རྟོག་པའམ་རྟོག་པ་རབ་འབྲིང་དགུ་དགུ་ནི་འདི་སྒྱེད་པའི་ཤ་ལྔ་བདུད་རྩི་ལྔ་ལས་ཤ་ཆེན་གཉིས་གཅིག་ཏུ་བྱས་པ་ལ་དགུ་བྱ་བ་ཡིན། །༼འདི་མན་ཆད་ཕྱིའི་དཀྱིལ་འཁོར་དང་སྣོད་བཅུད་ལ་་་་བ་ཆེན་པོ་སྤྲོ་བའི་གཞུང་དུ་གསུང་༽དེ་ནས་༼འདིར་་་་བདེ་བ་དང་མི་རྟོག་པ་ལས་སེམས་གཡེངས་ནས་དཀྱིལ་འཁོར་རྒྱས་པ་ལ་སེམས་སྤྲོ་བ་༽འབར་ཕྲེང་རྒྱ་མཚོར་ནི། །ཀུན་ནས་༼རྟེན་གཞལ་ཡས་ཁང་བརྩེགས་མ་༽སྒོ་ཡི་འཁོར་ལོར་བསམ། །དཔའ་བོའི་དབང་པོ་ཞལ་བཞི་པ། །༼བརྟེན་པ་༽དཔའ་བོའི་གནས་ཀྱི་འདབ་མ་ལ། །ཕོ་ཉ་མོ་ནི་བཞི་བོ་དག །༼དཔའ་བོ་དང་དཔའ་མོ་ཉི་ཤུ་བཞི་༽དཔའ་ཀུན་གཉིས་སུ་མེད་བདེ་བ། །༼ཞི་རྒྱས་ལ་སོགས་པའི་༽ཆོ་གའི་རིམ་པ་༼ཞི་བའི་སིཏི་ལ་འདོད་ན་ཉི་མ་ཉམས་སུ་བླང་དེས་འདྲེ་༽ཇི་བཞིན་དུ། །ཁཎྜ་རོ་ཧ་༼ལ་སོགས་པ་ནད་པ་ལ་ཉི་མ་ལ་སོགས་པའི་ལས་བདག་གི་སྙིང་ཁ་ནས་ཁན་ཊ་རོ་ཧ་བཞི་སྤྲོས་ལ་ཞི་བར་བྱ་རྒྱུ་ལ་སོགས་པའི་བསྒྲུབ་བྱ་བཀུག་ལ་དེ་ནས་ཡང་ཁཎྜ་རོ་ཧ་ན་སྣ་བུག་ནས་བཅུག་པས་དེའི་ནད་ཞི་བ་ལ་སོགས་པ་ཐམས་ཅད་ཞི་བར་བསམ་དེ་བཞིན་ཏུ་དབང་དུ་བྱ་བ་དང་རྒྱས་པར་བྱ་བ་ཡང་བསམ། དེས་འདྲེའོ༽ཕྱི་རོལ་༼ཕྱི་རོལ་གྱི་དཀྱིལ་འཁོར་དང་སྣོད་བཅུད་ཐམས་ཅད་བདེ་བ་ཆེན་པོར་༽སྦྱོར། །༼ཐིག་ལེ་བདེ་བ་ལ་༽རང་གི་གཟུགས་སུ་༼ནི་བདེ་བ་སྟེ་༢་ཕྱི་རོལ་༽མངོན་ཞེན་པ་༼པར་བྱ་བའམ་སྤྲོས་པས་སམ༽། །འཁོར་ལོའི་དབུས་སུ་བསྟན་པར་བྱ་༼ནད་པ་དེ་རང་གི་གཡོན་དཀྱིལ་འཁོར་གྱི་ལྷའི་གཡས་སུ་བཞག་ལ་ལས་གོང་མ་བྱ་གསུང་༽། །༼དེ་ལྟར་དཀྱིལ་འཁོར་གྱི་༽འཁོར་ལོ་༼དཀྱིལ་འཁོར་རྫོགས་པ་༽འདི་དག་༼ཐམས་ཅད་བདེ་བ་ཆེན་པོར་པོ་༽བསྟན་པ་ནི༼དེ་ལྟ་བུ་གང་ལས་གསུངས་ན༽། །དངོས་གྲུབ་༼༣༽རིམ་བཞིན་གསལ་བྱེད་ཡིན༼ཐིག་ལེ་བདེ་བས་ལྷ་ཐམས་ཅད་ཀྱང་བདེ་བ་མི་རྟོག་པས་ཁྱབ་པར་བསྒོམ་མོ༽། །༼ཐིག་ལེ་བདེ་བས་ལྷ་ཐམས་ཅད་ཀྱང་མི་རྟོག་པས་ཁྱབ་པར་བསྒོམ་མོ་༽རིག་པའི་རྒྱ་མཚོ་ལས་དཔའ་བོ། །༼འདིར་༽མདོར་བསྡུས་ནས་༼ཐབས་འདི་༽ནི་གསུངས་པ་ཡིན། །༼དེ་ཡང་༽ཕོ་ཉ་༼འོད་རིག་གམ་ཕོ་ཉ་དངོས་དང་༽གཉིས་༼སུ་༽མེད་༼པར་༽སྦྱོར་བའི་བདག༼གིས་༽ །འགྲུབ་འགྱུར་འདི་ལ་ཐེ་ཚོམ་མེད།དཔལ་འཁོར་ལོ་སྡོམ་པ་ལས་ཕོ་ཉ་མོའི་གཉིས་སུ་མེད་པའི་སྦྱིན་བསྲེག་དང་ལས་ཀྱི་ཆོ་གའི་ལེའུ་སྟེ་སུམ་ཅུ་རྩ་བཞི་པའོ། །༼ལེའུ་འདིས་དྲང་དོན་དུ་ལས་བཞིའི་སྔགས་ཀྱི་བཟླས་པ་བསྟན།ངེས་དོན་ཆོས་ཀྱི་ཕྱག་རྒྱའི་རིམ་པ་བཞིན་བསྟན་༽དེ་ནས་༼རིམ་པ་༤༽ལས་ཀྱི་༼ཞི་བ་ལ་སོགས་པ་༽མཆོག་རབ་ནི། །༼ལུ་ཨི་པའམ་ནག་པོ་ལྟར་དང་པོ་ལྷར་སྐྱེད་ནས་དེ་ནས་བཟླས་པ་༽ཇི་བཞིན་༼ཆོས་ཀྱི་མུ་ཏྲས་བླ་མའི་གདམས་ངག་གི་རིམ་པ་༽རིམས་ཀྱིས་མཚོན་བྱ་སྟེ། །༼ཚོགས་བསགས་ན་་་་་་་དབང་བསྐུར་་་་་གདམས་པ་་་་་་་གསང་བའི་་་་ ་་་་་པའི་བར་དུ་བྱ་་་་་་ ་་་ནས་བཟླས་པ་ལ་འཇུག་པས་༽མཆོད་པ་གཉིས་མེད་སྦྱོར་བདག་ཉིད། །༼རིམ་པ་བཞི་བསྒོམ་པ་སོ་སོར་སྦྱོར་བའོ། ཞི་བ་ལ་སོགས་པ་ལས་བཞིའི་ཁ་དོག་ལ་སོགས་པ་༽ལས་ནི་སོ་སོར་སྦྱར་བར་བྱ། །༼རིམ་པ་༤་ལས་རྒྱུད་ཀྱི་རིམ་པ་སྟོན། དྲང་དོན་དུ་དེ་ལྟར་ཡབ་ཡུམ་གྱི་རྣལ་འབྱོར་ལ་གནས་པ་སྙོམས་པར་ཞུགས་པ་ལས་བྷ་གར་ཐིག་ལེ་ལས་སྔགས་བཞི་བོ་གང་རུང་དུ་བསྐྱེད་པའོ༽གང་ཡང་རབ་ཏུ་གྲགས་པའི་སྔགས། །༼དེ་ཡང་དང་པོ་སྤྲུལ་བ་ནས་གསལ་བར་བྱ་༽ དེ་ཡི་དབྱེ་བ་རིམ་༥༦༦༧༧༨༨་ཇི་བཞིན། །༼བཟླས་པའིདུས་སུ་དཔའ་བོ་༽ཁ་དོག་༼དཔའ་བོས་མཚན་པ་ཀ་ལི་༽ཕོ་ཉ་ལ་སོགས་སྔགས༼དཔའ་མོའི་སྔགས་་་་་་པ་་་ཨ་ལི་་་་་པུང་་་་་་་ཏེ་རྩ་གཡས་གཡོན་གཉིས་སུ་གསལ་བར་བསམ་པའོ་༽་ཀྱང་གསལ་བར་་་་ ་་དམིགས་ཏེ༽། །༼མྱུར་བར་༽མདའ་ཡི་༼འདི་མན་ཆད་ཀྱིས་རྒྱུད་རིམ་བསྟན་ངེས་དོན་དུ་༽ཤུགས་བཞིན་༼དེ་ཡང་རླུང་འབྱུང་འཇུག་གི་ སྟོབས་ཀྱིས་དཀྱིལ་འཁོར་བསྡུ་བ་དང་ཙཀྲ་གསལ་བར་དམིགས་པ་ལ་སོགས་པ་བྱེད་པས་༽ཡོངས་སུ་འཁོར། །༼ཡབ་ཀྱི་ལ་ཡུམ་གྱི་༽ཕན་ཚུན་མདུད་པའི་གསང་སྔགས་ནི། །༼ཞི་བ་ལ་སོགས་པའི་༽ཡུལ་ཉིད་ཀྱིས་ནི་༼ཙཀྲ་བཞི་དང་རྩ་གསུམ་གྱིས་༽ཕྱེ་བ་ཡིན། །ཞི་བ་ལ་ནི་༼དལ་བུས་༽ལྷོད་པ་སྟེ། །༼སྤྱིར་སྔགས་ལ་ཞི་དྲག་གཉིས་ལས་འདིས་སྔོན་ལ་ཞི་བ་གཙོ་བོར་བསྟན་༽དྲག་ཅིང་རྩུབ་པ་མ་ཡིན་ནོ་༼འདི་བབའ་ཏན་ཏའི་་་་རེས་ལ་མེར་་་སྒྲེས་པོ་རྣམས་ཀྱི་ལ་ཡེད་་་་་དེ་ཡན་ཆད་ཞི་བའི༽། །༼དྲག་པོ་ལ་༽ས་བོན་ཕྲེང་བ་༼སྔགས་དང་བསྒྲུབ་བྱའི་མིང་སྤེལ་བ་༽དེ་ནས་འཛིན། །ཧཱུཾ་ནི་༼སྙིང་གི་ཧཱུཾ་གི་༽མཐའ་རུ་༼ཧཱུཾ་ནས་མར་སོང་ནས་དད་ན་བཞི་བོ་གང་རུང་གི་མཐར་ཧཱུཾ་ཆེ་གེ་མོ་མ་ར་ཡ་ཧཱུཾ་ཅེས་པ་་་་ནི་ལྟེ་བར་དེ་དེའི་བར་དུ་སོང་བའོ༽གནས་པ་༼ལ་དེ་ནས་ ཨཾ་ལས་རླུང་སྟིམ་་་་དེ་མནན་པ་ལས་ལས་ཀྱི་རླུང་རིམས་ཀྱིས་དྲང་དོན་ངེས་དོན་༢་ཀ་འགགས་པ་ནི་༽ཡིན། །༼རླུང་༽བསྒྲུབ་བྱ་༼སྲོག ༽་་་འགོག་པར་གྱུར་ནས་ནི། །༼མྱུར་བར་འཆི་བ་༽གོམ་པ་༼རླུང་དབང་དུ་འདུས་པ་ལས་རླུང་ཕྱིར་མི་འགྲོ་བ་༽གཅིག་ཀྱང་མི་འགྲོ་འོ། །༼སྔགས་ཀྱི་རིམས་པ་བསྟན་ཏོ་༽ཁ་སྦྱོར་༼ཏ་ཐའི་རྒྱུད་བདག་གི་རྒྱུད་གཉིས་རླུང་གི་འགྲོ་འོང་བྱེད་པས་༽སྦྱོར་བར་གྱུར་བ་༼བཟླས་པ་ཡབ་ཡུམ་ཁ་སྦྱར་ལ་འཁོར་བ་༽དང་། །༼ཨ་ལི་དང་ཀ་ལི་ལས་བྱུང་བའི༽རྡོ་རྗེ་ལུ་གུ་རྒྱུད་༼དེ་ལྟར་གཏུམ་མོ་སྟོབས་སུ་གྱུར་པས་ཀྱང་༽བཅིངས་བས། །༼འོད་༽རྡོ་རྗེས་༼སྨིན་མཚམས་༽ཕྱེ་བ་ཉིད་དང་ནི། །དེ་བཞིན་༼འོད་ཀྱི་ཏ་ཐའི་ཙཀྲ་བཞིའི་བདུད་རྩི་་་་་༽་སྦྲང་བུའི་ཆུན་པོས་༼རབ་ཏུ་༽བསྐོར༼འོད་ཟེར་བསྒྲུབ་བྱའི་ཤེས་པ་འགུག་པ་འདིས་སྒྲོའི་ཆུན་་པོ་ལྟར་བུངས་ཆེ་བ་སྦྱར་བ་སྟེ་རྒྱས་པའི་མུར་ཡང་ཏ་ཐའི་ཡེ་ཤེས་ཀྱིས་བདུད་རྩི་་་་་་་བའི་ཕྱིར་འཁོར་་་་་་་ཐའི་ཤངས་བུ་་་་་་་གཡས་ནས་ཞུགས་༽། །༼ཨ་ལི་དང་ཀ་ལི་བྱུང་བའི་༽ལྕགས་ཀྱུ་༼ལྟ་བུའི་འོད་ཀྱིས་༽ཉིད་ཀྱིས་༼འདིས་ཀྱང་དབང་ཟིན་དུ་རླུང་གཟུང་ངོ་༽འགུག་པ་དང་། །༼སྔགས་ལས་བྱུང་བའི་འོད་ཀྱིས་གཏུན་ཤིང་ལྟར་བསྒྲུབ་བྱའི་སྙིང་བརྡུངས་པར་བསམ་༽གཏུན་ཤིང་གིས་ནི་༼འོད་ཀྱིས་ཙཀྲའི་ཤ་བུ་༽དཀྲུག་པ་དང་། །༼སྔགས་ལས་བྱུང་བའི་རྡོ་རྗེ་ལྟ་བུའི་འོད་ཀྱིས་དེའི་སྙིང་་་་་་་འི་ལག་པས་ཟེར་༽རྡོ་རྗེ་ཁ་ཡིས་༼འོད་ཀྱིས་བདུད་རྩི་བཀུག་སྟེ་༽བཟའ་བར་བྱ། །༼རེངས་པ་སྟེ་དབང་དུ་གྱུར་པ་འོད་མཎྚལ་ལྟ་བུས་སྙིང་དཀར་ནག་ལ་ཕོག་ལ་༽དབུག་པ་མདའ་ཡིས་སྦྱར་བར་བྱ༼ཚར་བཅད་པ༽། །༼འཁོར་རྗེས་སུ་བཟུང་བ་རྩ་བའི་རླུང་བྱང་སེམས་ལས་རྒྱ་ལ་ཡིན་ན་ཡིད་ཀྱིས་སྙོམས་འཇུག་བྱ་༽དུས་མིན་འཆི་ལས་རྒྱལ་བ་ཉིད། །༼ལུས་ལ་་་་་་བསྒྲུབ་བྱའི་སྤྱི་བོ་༽ཡན་ལག་༼སྤྱི་བོར་ཁཊྭཾ་ཀ་བསྒོམས་ལ་ཕྱོགས་བཅུའི་་་་བུད་དྷ་་་་་དང་པོ་དེས་ཏ་ཐ་ཐམས་ཅད་སྤྱན་དྲངས་ཏེ་དེ་ལ་ཐིམ་པས་་་་ཝི་དང་ལྡན་པར་གྱུར་ནས་མེར་གྱིས་ཞུ་སྟེ་ཚངས་བུག་ན་མར་ཐིམ་པས་ལུས་ཐམས་ཅད་བྱང་སེམས་ཀྱིས་མེར་གྱིས་ཁེངས་པར་བསམས་པ་་་་བས་དཔག་བསོ་བའམ་འཆི་བ་བསླུས་པར་འགྱུར་རོ་ཐོད་པའི་ལ་ཡང་དམིགས་རབ་དེ་བཞིན་ནོ་༽ ཁཊྭཾ་ཀ་དང་སྦྱར། །༼ཡང་ན། འབྲུ་་་་གསང་བའི་རིམ་པ་༽ཐོད་པའི་༼བདག་གི་རྒྱུད་ལ་བྱ་༽མཆོད་ཡོན་སྣོད་དུ་ནི་༼ཏེ་གཉིས་༡་དུ་སྦྱོར༽། །༼བདའ་་་སྐྱེད་པའི་བསྒྲུབ༽ཞལ་དུ་༼རྩ་དབུ་མ་༽མཚོན་ཆ་ངེས་པར་སྦྱར༼བས་སླར་འཚོ༽ ། དཔལ་འཁོར་ལོ་སྡོམ་པ་ལས་གཉིས་སུ་མེད་པའི་༼དྲང་དོན་དུ་སྔགས་དང་བསྒྲུབ་བྱའི་མིང་།ངེས་དོན་དུ་བདག་གི་རྒྱུད་དང་ཏ་ཐའི་རྒྱུད་༽གནས་དང་དུས་མ་ཡིན་པར་༼ངེས་དོན་དུ་འཁོར་བ་ལས་རྒྱལ་བ་བསད་པ་གསོ་བ་༽འཆི་བ་བསླུ་བའི་ཆོ་གའི་ལེའུ་སྟེ་སུམ་ཅུ་རྩ་ལྔ་པའོ། །དེ་ནས་༼ལེའུ་འདིས་འོག་རིགས་ལ་བརྟེན་པ་ཕྱག་རྒྱ་དང་ལས་རྒྱ་གཉིས་བསྟན་༽ཕྱག་རྒྱ་མཆོད་ཆེན་དང་། །༼ཀུན་སྤྱོད་ལྟར་གཉིས་ཀའི་གནས་ལྔ་བརླབ་པ་༽སྔགས་ཀྱི་དགོད་པ་རབ་ཏུ་གྲགས༼འོད་རིག་དང་དངོས་གཉིས་ཡིན་ན་ཡིད་ཀྱིས་སྙོམས་འཇུག་བྱ༽། །༼དངོས་མིན་ན་༽ཕྱག་རྒྱའི་༼སྙོམས་འཇུག་གི་བདེ་བ་དེ་ཁོ་ནའི་མཆོད་པའི་བར་གྱིས་༽མཆོད་པ་འདི་དག་གིས། །༼ཆེ་བ་དངོས་གྲུབ་དཔེའི་ཡེ་ཤེས་ཀྱིས་དོན་གྱི་ཡེ་ཤེས་རྟོགས་པས་༽མྱུར་དུ་འགྲུབ་པར་ཐེ་ཚོམ་མེད། །༼འོད་རིག་མ་ལས་རྒྱ་མ་གང་རུང་དང་བསྒྲུབ་པ་པོའི་མཁའ་གསང་ཀུན་སྤྱོད་ལྟར་བསླབ་པ་༽མཚན་མ་གཉིས་ལ་སྔགས་སྦྱོར་བས། །༼ལས་ཀྱི་མུ་ཏྲ་ཝ་ར་ཧིར་སྐྱེད་༽མཁའ་འགྲོ་༼སྙོམས་འཇུག་མུ་ཏྲ་ཝ་ར་ཧིར་སྐྱེད་ཧེ་རུ་ཀ་༽དཔའ་བོ་གཉིས་མེད་པའི། །༼ཡུམ་གྱི་མཁའ་བྱིན་གྱིས་བརླབས་པས་༽༼འདི་དག་་་་་་ཏུ་་་མ་ཀིར་ཏིའི་དཔེ་ལ་མེད་༽པད་མའི་འོད་ནི་དྲི་མེད་པ་༼རྡོ་རྗེ་འོད་ནི་དྲི་མ་མེད་ཅེས་པས་ཡབ་ཀྱི་མཁའ་གསང་བྱིན་གྱིས་བརླབ་པ་ཤུགས་ལ་འོང་༽ །༼འོད་རིག་མ་རྐྱང་མ་དང་པོ་་ སྙོམས་འཇུག་༽རྣལ་འབྱོར་མ་ལ་༼ཐིག་ལེ་འཛིན་པ་དང་གསང་གནས་རྨབ་ནུས་པས་༽མཁས་པས་མཆོད། །༼ལས་རྒྱ་ཡིན་ན་དངོས་སུ་ཁ་ནས་བརློབ་པ་༽ཕྱག་རྒྱ་༼ཁ་་་་པང་གཞི་ལ་སོགས་པ་རྨབ་་་་་་་༽གནོན་པའི་༼རེངས་པ་སྟེ་དབང་དུ་གྱུར་བ་༽ལས་རྣམས་ནི། །དེ་བཞིན་མཚོན་ཆ་ཉིད་དང་༼རྡོ་རྗེ་དང་པད་མ་དངོས་སུ་སྦྱར་བའམ་ཡིད་ཀྱིས་༽སྦྱར། །སྔགས་པས་༼དཔའ་མོས་་་་་་ལས་རྒྱའམ་འོད་ཀྱི་མུ་ཏྲ་ཝ་ར་ཧི་དང་༽མཁའ་འགྲོ་མ་སྦྱོར་ལ། །སྙིང་པོ་༼རྩ་སྔགས་ལ་སོགས་པའི་སྔགས་རྣམས་གནས་གསུམ་སུ་སྙིང་པོ་དྲུག་པ་ལ་སོགས་པ་ཡུམ་གྱི་གནས་ལྔ་བརླབ་པ་༽རྣམས་ཀྱིས་དེ་བཞིན་བྱ། །བསྲུབ་པ་༼དངོས་སམ་རིམས་ཀྱིས་འོད་རིག་ལ་བསྐྱོད་པ་༽མཁའ་འགྲོ་༼མ་དང་༽བློ་༼མ་དང་༽ལྡན་མ་༼ཧེ་རུ་ཀ་དེ་ང་རྒྱལ་གྱིས༽། །༼སྤྱིར་་འགྲོ་གསུང་༽དག་པའི་ལུས་ཀྱིས་༼ལུས་ལྷར་བསམ་་་་་ལུས་ཀྱིས་་་་་་པར་འཇུག་༽དེ་བཞིན་བྱ། །༼འདི་མན་ཆད་དམ་རྒྱ་ལྟར་སྔགས་ཀྱིས་ལས་བཞི་བསྒྲུབ། ལས་རྒྱ་ལྟར་དགའ་བ་བཞི་བསྒོམ་པ་སོར་སོར་སྦྱར་བར་བྱའོ་༽དཔའ་བོ་༼ལས་རྒྱ་རྐྱང་མ་དང་སྦྱོར་བས། འདི་ན་རེ་རེ་ལ་མར་སོ་སོར་སྦྱོར་༽མཆོད་པའི་ཆོ་ག་ཤེས་༼དམ་རྒྱ་དང་སྙོམས་འཇུག་བྱས་པ༽ །༼དེ་ལྟར་དེ་ཁོ་ནའི་པུ་ཙའི་བར་བྱས་ནས་སྔགས་འཁོར་བར་བསམ་༽ལས་༼ལས་ཀྱི་རྒྱ་ལྟར་ན་དངོས་སུ་སྙོམས་འཇུག་གི་སྦྱོར་བ་༽ནི་༼རྡེས་ན་འདི་སྔགས་ཀྱི་ཁ་རུ་དེ་དང་སྦྱོར་བ་ལས་བྱུང་བའི་བྱང་སེམས་ཐིག་ལེར་བསམས་ལ་དེ་ལས་སྔགས་སུ་བསམ་པའམ་གསུང་༽འབད་པ་ཉིད་ཀྱིས་བྱ། །༼ལས་བཞིའི་སྔགས་ཀྱི་དབྱེ་བ་ལ་དགའ་༤འི་༽རྣམ་དབྱེ་༼ཁབ་རྩེའི་ཀ་ར་ན་ལས་དཔེས་སྦྱོར་བ་ཤེས་པར་བྱ་གསུང་༽རང་དགར་སྔགས་པ་ནི། །༼འོད་རིག་དང་སྦྱོར་བ་ལས་ཐིག་ལེ་སྔགས་ཀྱི་ཕྲེང་བ་གྱེན་ལ་དྲང་། རྐྱང་མ་དངོས་དང་སྦྱར་བ་ལས་བྱང་སེམས་གྱེན་ལ་དྲང་བ་༽ཕྱིན་ཅི་ལོག་ཏུ་ངེས་པར་༼ཡང་ན་དྲག་པོའི་སྔགས་ཀྱིས་སྦྱར་༽སྦྱར། ༼དགའ་བྲལ། གདུག་པ་རྣམས། དྲག་པོའི་སྔགས་ཀྱིས་༽ཚར་བཅད་པ་དང་ཕན་གདགས་༼མཆོག་དགའ་སྟེ་ལྷན་སྐྱེས་ལ་ཕན་འདོགས་པས་༽ཕྱིར། །༼སྔགས་ཀྱི་ལས་༤་༽ལས་ཀྱི་དངོས་པོ་༼དགའ་བ་ལ་མངོན་དུ་མཆོག་དགའ་དང་བར་དུ་དགའ་བྲལ་ཐ་མར་འབྱུང་བར་ཤེས་པས་སོ་༽རྣམས་པར་བསྒོམ། །༼དགའ་བ་༤་༽དེ་ཉིད་དབྱེ་བས་ཕྱེ་ནས་༼དགའ་བ་བཅུ་དྲུག་གི་དབྱེ་བ་ཡང་གསུང་ལས་བཞིའི་སྔགས་ཀྱིས་༽ནི། །༼དམ་རྒྱའི་ཐིག་ལེ། རྩ་དབུ་མར་རོ་༡་པར་སྦྱར་བར་བྱ་༽རྩ་ཡི་ལམ་དུ་སྦྱར་བར་བྱ་༼སྔགས་ཀྱི་ཕྲེང་བ་ཡར་དྲངས་པ། དབུ་མ་ནས་ཡར་དྲངས་པ་ལས་དགའ་བ་བཞི་སྐྱེའོ༽། །སྦྱོར་༼པའི་དུས་སུ་སྙོམས་འཇུག་གི་དགའ་བ་༽བ་རབ་ཏུ་བསྒྲུབ་རྣམས་ལ༼འབྲས་བུ་དམ་རྒྱ་དང་ལས་རྒྱ་༢་ཀ་ཐུན་མོང་དུ་བསྟན་པའོ། འདིས་མཚོན་ནས་ཐུན་མོང་གི་དངོས་གྲུབ་ཐམས་ཅད་དང་མཆོག་ལ་སོགས་པ་འགྲུབ་པར་ཤུགས་ཀྱིས་ཤེས་པར་བྱ༽། །༼སྙོམས་འཇུག སྔགས་༽འདི་ཡིས་རབ་ཏུ་བསྒྲུབ་བྱ་སྟེ། །ལྷ་དང་ལྷ་མིན་རྣམས་དང་ནི། །མི་དང་བཅས་པ་མྱུར་འགྲུབ་འགྱུར། དཔལ་འཁོར་ལོ་སྡོམ་པ་ལས་༼སྙོམས་འཇུག་གི་བདེ་བ་༽དེ་ཁོ་ན་ཉིད་ཀྱི་མཆོད་པ་དང་༼ཐིག་ལེ་ལས་བྱུང་བའི་སྔགས་ཁ་དོག་བཞི་ལས་བཞི་བཞི་བསྒྲུབ་པ་༽ལས་ཀྱི་ཆོ་གའི་ལེའུ་སྟེ་སུམ་ཅུ་རྩ་དྲུག་པའོ། །༼ལེའུ་འདིས་གོང་དུ་བསྟན་པའི་རྐང་པ་བདེ་བླག་ཏུ་མ་རྙེད་ན་དབང་དུ་བྱ་བའི་ཐབས་བསྟན་༽དེ་ནས་གཞན་ཡང་བཤད་པར་བྱ༼རྩ་བའི་སྔགས་བསྙེན་པ་སྔོན་དུ་སོང་བས་དོན་༣་ལས་དོན་དང་པོ་ཁ་ཟས་ཀྱི་ལས་ཀྱི་ཕྱག་རྒྱ་མ་དབང་དུ་བྱ་བ་བསྟན༽། །༼རྐྱང་མ་དབང་དུ་བྱ་བའི་ཆོ་ག་རྩ་བའི་སྔགས་ཀྱི་ལས་༽གཟུགས་ནི་གནོན་པའི་ཆོ་ག་སྟེ། །༼ཡུམ་གྱི་རྩ་བའི་སྔགས་གཉིས་སུ་མེད་པ་༽ཕན་ཚུན་སྦྱོར་བའི་གསང་སྔགས་ནི། །༼རྐང་པ་༽མཁའ་འགྲོ་མ་དང་༼མིང་ཤམ་དུ་སྤེལ་ལ་བཟླས་༽གཅིག་ཏུ་སྦྱར། །ཆང་དང་ཤ་དང་བདུད་རྩི་ལྔ་བསྲེས་ཏེ་ཟོས་པ་ཟོས་ནས་མིད་པའི་རྫས་ལ་༼ལྟོ་བ་འཇུ་བའི་བར་ལ་སྔགས་བཟླས་ན་༽ནི། །༼རྩ་བའི་སྔགས་སྤེལ་ཚིག་དང་བཅས་པ་༽བཟླས་པའི་མཐར་ནི་སྐྱུག་པར་བྱ། །༼སྐྱུགས་པ་དེ་ཡང་ཐོད་པར་བླུག་ལ་སྲིན་ལག་གཡོན་པས་གཉེ་ཞིང་བཟླས་ལ་༽མཚན་མོ་བདུན་ནི་རྫོགས་པ་དང་། །༼ཞག་བདུན་དུ་བྱས་ལ་དེ་ནས་༽བཟའ་བ་༼དང་་་་་་་༽བཏུང་བ་དག་ལ་སྦྱར༼ལ་དེ་བྱིན་ནས་ཟ་རུ་བཅུག་པས༽། །འདི་ཡིས་ཇི་སྲིད་འཚོ་ཡི་བར། །༼རྐྱང་མ་དེ་༽དབང་དུ་འགྱུར་བར་གདོད་མི་ཟ་༼གཞན་ཡང་༽། །༼བ་༽སེར་སྐྱ་མར་ནི་༼བཞུ་སྟེ་༽འཐུངས་ནས་སུ། །དེ་ནས་བཟླས་༼པའི་༽མཐར་༼མར་དེ་༽སྐྱུག་པར་བྱ། །༼བསྒྲུབ་པ་པོའི་ནུབ་བདུན་རྫོགས་པ་དང་༽དེ་ཡི་རང་གི་གདོང་བཀྲུས་ནས། །གལ་ཏེ་༼སྔགས་བདག་ལ་༽རྟག་ཏུ་ཁྲོས་༼པར་༽གྱུར་བ༼དེ་༡་ཡིན་ཡང་༽། །༼བསྒྲུབ་པ་པོ་༽མཐོང་བ་ཙམ་གྱིས་དབང་དུ་འགྱུར། །༼གཞན་ཡང་༽ཏིལ་མར་༼གྱིས་དང་པོ་ལུས་ཐམས་ཅད་ཁྱབ་པར་བྱུགས་ལ་དེ་ནས་འབྲས་༽ས་ལུ་༼འབྲས་ཆན་གྱིས་༽བཏགས་པ་དང་༼ས་ལུས་དྲིས་ལ༽། །ལྡན་པའི་ལུས་ནི་བསྐུས་༼དྲིལ་༽འགྱུར་ཞིང་། །༼དྲིལ་བའི་འབྲས་ཟན་དེ་ཏིལ་མར་གྱིས་བཙོས་པ་༽སྣུམ་ཁུར་སྔགས་པ་བྱས་ནས་ནི༼དེ་ཚ་ཟར་གཞུག་པ༽། །བཟའ་བ་ལ་ནི་རབ་ཏུ་སྦྱར། །གལ་ཏེ་ལས་ནི་མ་བཏང་ན་༼ཟོས་པ་དང་རྗེས་སུ་བཟུང་བ་མ་བྱས་ན། བཟའ་བས་རྐྱང་མ་དབང་དུ་བྱ་བ༽། །ཇི་སྲིད་འཚོ་བར་དབང་དུ་འགྱུར། །༼གཉིས་པ་བྱུག་པས་རྐྱང་མ་དབང་དུ་བྱ་བ་༽ཏིལ་ནག་༼ག་༽དང་༼སྐྱེ་ཚེ། དེ་བལྟས་༽ནི་ཟོས་ནས་སུ། །སྐེ་ཚེར་བཅས་པ་སྐྱུག་པ་དང་༼དེའི་སྲིན་ལག་ཁར་བཅུག་སྟེ༽། །རུ་རྟ༼འི་ཕྱེ་མ་དང་བསྲེས་བ་༽་དག་དང་ལྡན་པར་ནི། །༼དེ་ནས་རང་གི་སེན་མོ་༽ལག་སྐྱེས་༼དང་༽བཤང་ལམ་༼ནས་༽འབྱུང་༼བའི་༽སྲིན་བུ༼དང་༽། །རང་གི་༼སྲིན་ལག་གཡོན་པའི་༽ཁྲག་དང་བརྟགས་ནས་ནི། །༼རང་༽སྭ་༼བྱེངས་༽ཤུག་ཀྲ་ནི་ཉིད་དག་༼དང་སྦྱར་ཟེར་༽དང་། །བཟའ་བཏུང་༼དུ་བྱ་བའི་བསྒྲུབ་བྱའི་༽མིག་སྨན་༼དུ་བྱས་ཏེ་བསྐུ་༽གོས་ལ་ནི། །༼བསྒྲུབ་བྱ་རྐྱང་མ་ལ་༽བྱུག་པ་ཉིད་དུ་རབ་ཏུ་སྦྱར། །༼བྱུག་པ་༽འདི་ཡིས་ཇི་སྲིད་འཚོ་ཡི་བར། །༼རྐྱང་མ་༽དབང་དུ་འགྱུར་བར་གདོད་མི་ཟ་༼བྱུག་པས་དབང་དུ་བྱ་བའོ༽། །༼༣་པ་སྦྱིན་བསྲེག་གི་དབང་དུ་བྱས་ན་༽བ་གླང་ཤ་བསྲེག་༼པ་དེས་༽སྦྱིན་བསྲེག་༼བྱེ་བ་༽དང་། །༼དེ་ཡང་བ་གླང་གི་༽ཁྲག་གིས་བསྐུས་༼ཀྱིན་སྦྱིན་བསྲེག་བྱས་༽ནས་ལྷ་རྣམས་༼བུ་མོ་ལ་སོགས་༽ནི། །དེ་ཡི་མོད་ལ་དབང་འགྱུར་བའམ། །གལ་ཏེ་མ་འོངས་༼དབང་མ་གྱུར་ན་ལྷ་དེ་༽འཆི་བར་འགྱུར། །༼བསྒྲུབ་བྱ་དངོས་སུ་༽ཤ་ཉིད་དེ་ཡི་མདུན་དུའམ། །༼ཡང་ན་བསྒྲུབ་བྱ་ཡིད་ཀྱིས་མདུན་དུ་༽བསྒོམས་ནས་མཁས་པས་༼བ་ལང་ཤའི་༽སྦྱིན་བསྲེག་བྱ། །༼བུ་མོ་༽སྦྱི་བསྲེག་༼གྲུབ་པ་བསྟན་པས་༽མཐར་ནི་༼བ་ལང་ཤའི་༽གཏོར་མ་བྱ། །༼བུ་མོ་༽ཁམས་གསུམ་༼ན་ཡོད་ཀྱང་༽སྐད་ཅིག་གིས་འགུགས་༼ཤིང་དབང་དུ་༽འགྱུར། །༼བར་མ་ཆད་པར་༽མཚན་བདུན་གྱིས་ནི་༼ཉིན་མོ་གསུང་༽འགྲུབ་པར་འགྱུར། །༼དེ་ལྟ་བུའི་ཐབས་དེ་གཞན་ལ་སྦ་བ་བསྟན་༽འཇིག་རྟེན་གསུམ་ན་རྙེད་དཀའ་བའི༼རྒྱུད་ཀྱི་ཆེ་བ་ཕན་ཡོན་མང་གསུང་༽། །༼རྐྱང་མ་དབང་དུ་བྱ་བའི་ཐབས་བསྟན་པ་༽དམ་ཚིག་སྤྱོད་པའི་མཚན་ཉིད་ནི༼ཐམས་ཅད་ལས་རྩ་བའི་སྔགས་བཟླས་པ་དང་བཅས་པ་ལས་སྒྲུབ་པ་གོ་བར་བྱའོ༽། །རྟག་ཏུ་རང་སྔགས་༼རྩ་བའི་སྔགས་༽སྦས་པ་ཡིན། །༼དམ་ཚིག་པ་ལ་རྩ་སྔགས་དང་རྐྱང་མ་ལ་སོགས་པ་༽རབ་ཏུ་འབད་དེ་གསང་བར་བྱ། །༼རྩ་སྔགས་ལ་བརྟེན་པའི་དབང་དུ་ཐབས་གཞན་ནས། དམ་ཚིག་ལ་སོགས་པ་མ་ཐོབ་པ་ལ་དབང་གི་དམ་ཚིག་བྱིན་ཀྱང་༽སྦས་དོན་རྙེད་པར་མི་འགྱུར་ཞིང་། །སྐལ་བ་དམན་པས་འགྲུབ་མི་འགྱུར། །༼སྔར་༽བསོད་ནམས་ཆུང་བའི་བསྒྲུབ་པོས་ཀྱང་། །༼དམ་ཚིག་བསྲུངས་ཤིང་༽ང་མཉེས་བྱས་པས་འགྲུབ་པར་འགྱུར། དཔལ་འཁོར་ལོ་སྡོམ་པ་ལས་༼རྐྱང་མ་དེ་ལ་བརྟེན་ཏེ་གྲུབ་ཉེ་བས་ན་༽ནང་གི་བདག་ཉིད་ཀྱི་དབང་དུ་བྱ་བའི་༼སྦྱིན་བསྲེག་༽ཁྱད་པར་དུ་བྱ་བའི་ལེའུ་སྟེ་སུམ་ཅུ་རྩ་བདུན་པའོ། །དེ་ནས་༼ལུས་ཀྱི་བརྡ་ལ་སོགས་པ། རང་དོན་གྱི་སྤྱོད་པ་༣་ལས་སྤྲོས་བཅས་ཀྱི་སྤྱོད་པའི་བྱ་བ་དང་བྱ་བ་མ་ཡིན་པའི་ཆ་བསྟན་༽བརྡ་རྣམས་༼ཀྱིས་བསྟན་པའི་༽མཁའ་འགྲོ་མའི། །༼གཡོན་གྱི་ཀུན་ཏུ་སྤྱོད་པའི་༽ལུས་ཀྱི་མཚན་ཉིད་༼ གཡོན་གྱི་ཀུན་སྤྱོད་སྦ་བ་ལ་སོགས་པ་བྱ་བ་དང་བྱ་བ་མ་ཡིན་པའི་ཆ་རྣམས་༽གང་ཡིན་དང་། །དཔའ་བོའི་ཡན་ལག་དབྱེ་བ་ནི། །དེ་བཞིན་དུ་ནི་བཤད་པར་བྱ། །༼ཉིན་མོ་དམ་ཚིག་མེད་པའི་ཐད་དུ་༽དཔའ་བོའི་༼ཧེ་རུ་ཀའི་༽དབང་ཕྱུག་༼བྲིས་སྐུ་ལ་སོགས་པ་གཞན་གྱིས་མཐོང་བར་༽མི་བྲི་ཞིང་། །༼དམ་ཚིག་མེད་པ་དང་དབང་མ་ཐོབ་པ་ལ་༽གང་གི་༼པོ་ཏི་ལ་སོགས་པ་༽ཐད་དུའང་མི་༼དེ་གླག་པའམ་གདོན་པར་མི་བྱ་༽གདོན་ནོ། །༼དམན་པའི་འགྲོ་བས་མི་ཚོར་བར་༽གཡོན་པའི་ཀུན་སྤྱོད་༼དང་༽ལེགས་༼པར་༽སྦས་པ། །༼གཞན་ཡང་སྣོད་མིན་ལ་༽གསང་བའི་མཚན་ཉིད་མཁའ་འགྲོ་ཡི། །༼རྩ་བའི་སྔགས་ལ་སོགས་པ་༽སྔགས་ནི་བག་མེད་པས་༼སུ་རུང་རུང་གི་གམ་དུ་༽འདོན་ན། །དེ་ལ་ང་ནི་མི་ལྟ་སྟེ། །༼ཧེ་རུ་ཀས་མ་བསླབས་པས་༽མཁའ་འགྲོ་༼ལས་ཀྱི་མཁའ་འགྲོ་༽སྟོང་ཕྲག་དུ་མ་༼ལོ་ཀ་པའི་༽ཡིས། །༼འདིའི་ཉེས་པ་༽ངན་པའི་བདག་ཉིད་ཅན་དེ་ཟ། །༼གཞན་ཡང་སྐྱོན། ཉམས་པ་དེ་མན་ཏྲའི་གཞུང་ལས་འགལ་བར་སྤྱོད་པ་༽དམ་ཚིག་འཛོམས་ཞིང་༼བླ་མ་ལ་སོགས་པ་༽ངན་སྤྱོད་པ༼་ལ༽། །༼ཕ་རོལ་གྱི།འཇིག་རྟེན་པ་་་་་མི་དང་དེའི་ནང་ནས་་་་དང་བྲམ་ཟེ་༽བྲམ་ཟེ་གསོད་༼པ་དང་འདྲ་བར་༽པ་ཐེ་ཚོམ་མེད། །༼དེ་ལྟ་བུར་༽སྡིག་སྤྱོད་༼སྡིག་ཆེ་བས་དེ་བཞིན་དུ་དམ་ཚིག་མི་བསྲུང་བའི་༽རྨོངས་པའི་བདག་ཉིད་ཅན། །བསླུས་འགྱུར་༼བླ་མའི་བཀའ་༽ངན་བའི་བདག་ཉིད་དེ། །མཁའ་འགྲོ་མ་ཡིས་ཟོས་གྱུར་ཀྱང་། །དེ་ལ་ང་ནི་སྐྱོབ་མི་བྱེད། །༼འགྲོ་བ་རིགས་དྲུག་གསུང་༽གསང་བ་ཡི་ནི་ནང་ན་ནི། །བསྒྲུབ་པོ་དེ་ནི་༼མཁའ་འགྲོ་མ་རྣམས་ཀྱི་གྲོང་རྒྱུར་མཐོང་བས་༽ཕྱུགས་དང་འདྲ། །༼བྱ་བ་དང་བྱ་བའི་ཆ་བསྟན་པ་༽བླ་མ་ལ་འཁུས་༼པ་དང་༽དམ་ཚིག་ཉམས་༼པ་དེ་༽། །༼དངོས་གྲུབ་མི་ཐོབ་པ་ལྟ་ཞོག་གི་༽མཐོ་རིས་འཇིག་རྟེན་ལས་དེ་༼མི་ལུས་ལས་ངན་སོང་དུ་ལྷུང་༽ལྟུང་༼སྟེ་དམྱལ་བར་སྐྱེ༽། །ཧེ་རུ་ཀ་དཔལ་༼གྱི་སྔགས་ལ་༽འཇིགས་༼པའི་༽སྔགས་༼སུ་རང་གི་སྲོག་ལྟར་༽བལྟ། །གང་ཞིག་༼གསང་༽བསྲུང་བར་བྱེད་པ་ནི། །མཁའ་འགྲོ་མར་༼དཔའ་བོ་དང་༽བཅས་དགེ་༼བའི་བསམ་པ་དང་ལྡན་པའི་༽བསྡོང་དང་། །དེ་ལ་༼ཧེ་རུ་ཀ་༽ང་ནི་༼བསྲུང་ཞིང་བྱིན་གྱིས་བརློབ་༽ཕན་འདོགས་སོ། །བླ་མས་ཀྱང་ནི་༼བྱིན་གྱིས་བརློབ་༽དགོངས་པ་སྟེ། །༼སྔགས་ལེགས་པར་བསྒྲུབ་པ་པོ་༽གསང་བར་བྱེད་ཚེ་བསྒྲུབ་པ་པོ། །༼དམ་ཚིག་ལ་གནས་པ་༽མཁའ་འགྲོ་མ་ལ་རྟག་དགའ་བ་༼ཡིན་པས༽། །དེ་ལ་དངོས་གྲུབ་༼༢་ཀ་༽འབྱུང་བར་འགྱུར། །བསྒྲུབ་པ་པོ་༼ཚད་མའི་སྐྱེས་བུ་ཡིད་ཆེས་པའི་གནས་སུ་༽དབང་ཉིད་༼ཀུན་ལ་བསྟན་ལ་ཡིད་ཆེས་སུ་མི་འགྱུར་ཏེ་རེ་རེ་ཙམ་ལ་༽འགྱུར། །ཁམས་གསུམ་མཁའ་ལ་རྒྱུ་བའི་བདག་༼ ཉིད་རྣམས་ཀྱི་༽ །བསྒྲུབ་པོ་དཔའ་བོ་ཉིད་འདོད་པ་༼གསང་པ་ལ་གནས་པའི༽། །ཐམས་ཅད་དུ་ནི་༼བསྒྲུབ་པ་པོ་དེ་ལ་༽མཆོད་༼པ་བྱེད་༽པར་འགྱུར། །དེ་ནི་རྣལ་འབྱོར་ལ་༼གཉིས་ལ་འཇུག་པས་༽འཇུག་དགའ། །༼དེ་༽ཡང་དག་སྦྱིན་པའང་རིག་པར་༼བླ་མས་གདམས་པ་གནང་ཞིང་གོ་བར་༽འགྱུར། །༼ང་རྒྱལ་བརྟན་པའི་༽ཧེ་རུ་ཀ་ཡི་བརྟུལ་ཤུགས་འཛིན། །སློབ་དཔོན་དཔའ་བོ་མཐོང་གྱུར་ན་༼དགའ་བར་བྱ་༽། །བསྒྲུབ་པ་པོས་ནི་སྔགས་འདི་དག་༼ལྷག་པའི་ལྷ་༽ །མཐོང་ཞིང་མཐོང་ཞིང་༼ལྷག་པའི་ལྷ་མཐོང་པ་དང་འདྲ་བར་བླ་མ་ལ་༽ཀུན་ཏུ་དགའ་༼བར་བྱེད༽། །རྩ་བའི་སྔགས་ཀྱི་༼ནི་མཆོག་ཡིན་ལ། དེ་བས་དང་༽གསང་སྔགས་མཆོག་༼ཏུ་གྱུར་པ༽ །དཔའ་བོ་ཡི་གེ་བདུན་པ་ནི། །༼གཞན་ལ་གསང་བའི་ཚུལ་གྱིས་༽འཛིན་པར་གང་ཞིག་བྱེད་པ་ནི། །༼ཧྲི་ད་ཧ་ལ་༽ཨོཾ་དང་ཧཱུཾ་གིས་ཁྱད་པར་དབྱེ། །དེ་རྣམས་༼དེ་རྣམས་བླ་མ་དང་སྔགས་ལ་སོགས་པ་ལ་༽འབད་དེ་༼སཾབྷ་རའི་རྣལ་འབྱོར་༽ཕྱག་བྱ་ཞིང་། །སངས་རྒྱས་ཐམས་ཅད་ལ་སོགས་མཆོད༼་པ་དང་འདྲ༽། །༼༣་པ་ཕན་ཡོན་དངོས། ཡང་ན་ཤིན་ཏུ་སྤྲོས་མེད་སྟོན་༽རྟག་ཏུ་དཔའ་བོ་ཆེན་པོ་༼ཧེ་རུ་ཀ་༽དང་། །རོལ་བར་༼བྱིན་གྱིས་བརློབ་པར་༽ལྡན་བར་༼གོ་འཕང་ཐོབ་པ་༽ཐེ་ཚོམ་མེད། །༼ཧེ་རུ་ཀ གཞན་ཡང་༽དེ་ཡི་ཐུགས་ཁ་ནས་ཕག་མོ༼དང་༽། །དཔའ་བོ་༼རྣམས་ཉི་ཤུ་རྩ་་་་་༽དང་ནི་རྣལ་འབྱོར་མ་༼གསུམ་བཅུ་བདུན༽། །ཕོ་ཉ་རྣམས་དང་ལྷན་ཅིག་བཅས༼་པས་བྱིན་གྱིས་བརློབ༽། །དེ་ཡིས་གང་ཞིག་ལེགས་སྐྱེས་པ། །༼བསྒྲུབ་པ་དེ་གཞན་གྱིས་མཐོང་ནས་མཐོང་བ་དེ་ལ་་་་སུ་་་འགྱུར་༽སྲོག་ཆགས་༼ཀྱིས་མཐོང་བ་ལ་སོགས་པས་ཀྱང་༽བསོད་ནམས་༼་་་་་་༽མཐོང་བ་ཡིན། །༼གཞན་ཡང་༽ཆུ་བོ་རྒྱ་མཚོ་རྫིང་བུ་དང་། །རི་བོ་དང་ནི་བཞི་མདོ་༼སྟེགས་དང་ཟེར་༽དང་། །ལྟེང་ཀ་དང་༼ཙཀྲ་ལ་བརྟེན་པ་ཙཀྲའོ་ནི་ཁ་ལྔ་པའི་དང་འདྲ་གསུང་སྟེ་མི་གཙོ་༽ནི་ཁྲོན་པ་དང་། །ཁང་སྟོང་དང་ནི་༼གཞི་མདོ་ཟེར་༽ལམ་སྲང་དང་། །༼གནས་དེ་རྣམས་༽ཐམས་ཅད་དུ་༼བསྒྲུབ་པ་པོ་གནས་ཀྱང་༽ནི་༼དེ་གནས་ཀྱང་༽མཁའ་འགྲོ་མ། །༼དེ་དག་བསྒྲུབ་པ་པོ་ལ། ཐུན་བསང་དང་མཆོག་གི་དངོས་གྲུབ་གཉིས་ཀ་འཇིགས་མེད་ལ་སྟེར་༽ཀུན་ཏུ་ཞན་པར་ལྟ་ལ་གནས། །༼གཞན་ཡང་༽འཇིགས་པ་ཆེན་༼བསྒྲུབ་པ་པོ་ལ་ཆགས་པས་གསུང་༽པོའི་དུར་ཁྲོད་དང་། །མཁའ་འགྲོ་༼སྟེང་དུ་འགྲོ་བ་༽དེ་བཞིན་ས་འོག་དང་༼དེར་རྒྱུ་ལ་༽། །རོ་ལངས་ཀྱི་ནི་དུ་མ་༼གཟུགས་༽ཞིག །འཇིགས་པའི་གཟུགས་དང་སྟོབས་ཆེན་པོས། །དེ་༼དག་༽དང་ལྷན་ཅིག་དཔའ་བོ་ཆེ། །༼བསྒྲུབ་པ་པོ་༽ཅི་བདེ་བར་ནི་༼འཇིགས་པའམ་ཉམ་ང་བག་ཚ་མེད་པར་༽རོལ་བར་མཛད། །རི་སུལ་ཚང་ཚིང་༼དུ་གནས་ཀྱང་༽གསང་བ་དང་༼དཔའ་བོ༽། །༼རྣལ་འབྱོར་མ་༽གསང་བའི་མི་མོ་རྣལ་འབྱོར་མ། །ཕྱོགས་ནི་༼གང་དུ་༽དེ་དང་དེ་དག་ཏུ་༼གནས་པའི་ཆེ་བ༽། །བསྒྲུབ་པ་པོ་དང་༼ལྷ་༢་བྱིན་གྱིས་བརློབ་༽ས་སྟེང་རོལ། དཔལ་འཁོར་ལོ་སྡོམ་པ་ལས་རྣལ་འབྱོར་མའི་ས་དང་གསང་བའི་དཔའ་བོ་སྔགས་ཀྱི་ཆོ་གའི་ལེའུ་སྟེ་སུམ་ཅུ་རྩ་བརྒྱད་པའོ། །༼ཧ་བརྒྱད་དང་ལྡན་པས་དུར་ཁྲོད་ལ་སོགས་པར་འཇིགས་པ་མེད་པར་གནས་པ་ལ་ཐུན་མོང་པའི་སི་ཏི་འགྲུབ་སྐུ་གསུམ་འགྲུབ་པར་བཤད་༽༼ལཾ་གྱི་གསང་བའི་རིམ་པ་གཉིས་ལ་གནས་པའི་རྟགས་སམ་མཚན་མ་བསྟན་པ་གསུང་༽༼སི་ཏི་དེའི་མཚན་མ་ལེའུ་སོ་དགུ་པ་ནས་ཞེ་གཉིས་པའི་བར་གྱིས་བསྟན། དེ་ལས་དང་པོ་བསྟན་པ་ཐོབ་པའི་ཛོ་གིའི་དུར་ཁྲོད་ལ་སོགས་པར་རྒྱུ་བའི་དུས་སུ་ཊ་ཀི་རྣམས་བསྐུལ་བའི་ཕྱིར་ཧ་ཧོ་སྔགས་བརྒྱད་བརྗོད་པས་བསྐུལ་ནས་ཊ་ཀི་རྣམས་དང་། དེས་མི་འཇིགས་ན་བྱིན་གྱིས་བརློབ་ ་དེ་ལྟ་བུ་དེ་ཚད་མའི་སྐྱེས་བུའམ་གང་ཟག་མཆོག་ཡིན་པས་༽དེ་ནས་བསྒྲུབ་པའི་རྣལ་འབྱོར་ཆེ། །སྔགས་ནི་རྣམ་པ་བརྒྱད་པོ་༼བཞད་པ་རྣམས་པ་བརྒྱད་པའི་སྔགས་༽དགོད་༼བརྗོད་པས་༽། །དེ་ནས་༼རྣལ་འབྱོར་པ་༽འདི་ལ་༼མཁའ་འགྲོ་རྣམས་ཀྱི། ཧེ་རུ་ཀར་༽ཡང་དག་མཐོང་། །༼མཁའ་སྤྱོད་མ་ལ་སོགས་པར། དང་པོ་ ཏྲིས་འདིའི་ལས་ཀྱི་ཚོགས་ཙཀྲ་བརྟེན་པའོ། བར་དུ་བྲིས་པས་འདི་ལས་བཞི་གང་འདོད་བསྒྲུབ་གསུང་ཕྱིས་འཁོར་ལོ་ལས་བསྒྲུབ་པ་མི་འོང་ཞེས་ ཏྲིས་པས་གསུང་༽གསོལ་བར་འགྱུར་བར་གདོད་མི་ཟ། །འཇིགས་པའི་༼བསྒྲུབ་པ་པོ་ཡིས་དུར་ཁྲོད་དུ་ཧ་ཧ་ལ་སོགས་པའི་སྒྲ་སྒྲགས་ན༽སྒྲ་ནི་རྣམ་མང་པོ་༼ས༽། །མི་བཟད་༼ཧ་ཧའི་སྒྲས་༽མཁའ་འགྲོ་༼མ་ཐམས་ཅད་༽འཇིགས་༼པར་༽བྱེད་༼པ༽་པ། །༼ཧ་ཧ་ལ་སོགས་པའི་སྔགས་ཀྱིས་༽ཤིན་ཏུ་འཇིགས་པའི་༼བསྒྲུབ་པ་པོ་༽དཔའ་བོ་ནི་༼རྗོད་པས༽། །༼མཁའ་འགྲོ་རྣམས་༽སྐྲག་ཅིང་རྣམ་པར་འབྱེར་བར་༼བྲོས་ནས་འགྲོ་༽བྱེད། །གལ་ཏེ་དཔའ་བོ་༼ལས་ཀྱི་མཁའ་འགྲོ་ལ་སོགས་པ་འཇིགས་པའི་སྒྲས་༽མི་འཇིགས་ན། །༼བསྒྲུབ་པ་པོའི་༽ལག་པ་གཡོན་པས་བཟུང་ནས་ནི། །རང་གི་གནས་སུ་༼མཁའ་སྤྱོད་ལ་སོགས་པར་༽ཁྱེར་བར་བྱེད། །༼བསྒྲུབ་པ་པོ་༽མི་རྣམས་མཁའ་འགྲོ་༼ཞིང་སྐྱེས་༽དེ་དག་དང་། །རྟག་ཏུ་༼ནམ་མཁའ་ལ་འགྲོ་བར་༽མངོན་པར་རྩེ་བྱེད་དེ། །༼བ་ར་པས༽བདེ་བ་ཅན་གྱི་༼ཚེ་རིང་བར་འགྱུར་༽གནས་འདྲར་འགྱུར། །ཧེ་རུ་ཀ་དཔལ་གནས་༼སམ་གོ་འཕང་༽འདོད་པས། །མཁའ་ལ་འགྲོ་བའི་གནས་སུ་༼རེས་ཤིག་༽ཁྱེར༼དེ་ཡན་ཆད་ཐུན་མོང་༽། །བསྒྲུབ་པ་པོ་ནི་སྔགས་ལུས་ཅན་༼ལྷར་བསྒོམ་པ་༽། །༼མཆོག་སྐུ་༣་༽འཁོར་བའི་རྒ་༼པ་པ་ མཚོན་བ་དང་འཆི་བ༽དང་སྐྱེ་བ་མེད་༼དེར་མ་ཟད་ཆོས་ཀྱི་སྐུ་ཡང་ཐོ་བ་པོ་༽། །༼དེ་ནས་ རྒྱུ་བའི་སྐུ་བྱུང་སྟེ་༽འགྲོ་བ་ཐམས་ཅད་སྡུད་པར་འགྱུར་༼བདུད་རྩི་ལྔ།དོན་བྱེད༽།དཔལ་འཁོར་ལོ་སྡོམ་པ་ལས་ཧ་༼ པ་ལ་སོགས་པ་༽ཧ་ཞེས་རྒོད་པའི་ལེའུ་སྟེ་༼་་ རབ་བསམ་གཏན་འབྲིང་སྔགས་དང་༢་ཐ་མ་ལ་རྫས་སམ་འཁྲུལ་འཁོར་དང་༣་གྱིས་ཀྱང་རྐྱང་མ་དབང་དུ་བྱ་བ་བསྟན་༽སུམ་ཅུ་རྩ་དགུ་པའོ། ། ༼ལེའུ་འདིས་སྔར་མ་ འདིས་ལམ་གྱི་གསང་བའི་ལམ་བརྟེན་པའི་དབང་དུ་བྱེད་་་སེམས་བསྟན་པས་ལས་སྦྱར་བ་ཙམ་་་་་གྱི་དབང་དུ་བྱ་བ་བསྟན། སྔ་ཕྱིའི་འབྲེལ་ཡིན་མིན་བྱས་པའི་རྐྱང་མ་དབང་དུ་བྱ་བ་བསྟན། ཤ་ལྔ་ལ་སོགས་པའི་སྦྱིན་བསྲེག་གིས་རིགས་ལྔའི་བུ་མོ་དབང་དུ་བྱ་བ་བསྟན༽ །དེ་ནས་ད་ནི་བཤད་བྱ་བ། །གང་གིས་མི་རྣམས་༼་་་དང་རྐྱང་མ་ལས་ལ་སྦྱར་བ་ཙམ་གྱིས་༽དབང་དུ་འགྱུར། །རྣལ་འབྱོར་༼བདེ་བ་ཅན་ལྟ་བུའི་༽སྔགས་ཀྱི་ཆོ་གར་གནས། །༼ ༣་མ་ལ་ན་མེད་༽ས་ལ་གནས་པ་༼པའི་རྐྱང་མ་རྣམས་༽གང་ཡིན་པ། །དཔའ་བོ་བཟླས་༼པ་ལ་སོགས་པ་ཡིས་༽པས་༼རྐྱང་མ་དབང་དུ་༽འགྲུབ་པར་འགྱུར། །༼སྦྱིན་བསྲེག་གིས་རྐྱང་མ་དབང་དུ་བྱ་བ་བསྟན་ཏེ།ཤ་ལྔ་ཆང་ཁྲག་བསྲེག་རྫས་ཉ་སོགས་ཟེར་༽སྒྲོན་མ་མྱོས་བྱེད་བཅས་པ་དང་། །ཉ་ཡི་ཤ་དང་ལྡན་པར་ནི། །དཔའ་༼བོའི་༽དབང་༼པོས་༽གནས་སྐབས་ཐམས་ཅད་དུ་༼ ཐུན་༣་འམ་༤༨་ཧོ་མ་བྱ་སྟེ་་་ལས་ཀྱི་ཕྱག་རྒྱ་༽། །ཉི་མ་བདུན་གྱིས་སྒྲུབ་བྱེད་པ། །༼དེ་ཡང་དུས་༽མཚན་མོ་སྦྱིན་བསྲེག་བྱེད་ལ་༼ཕྱིའི་དང་ནང་གི་སྦྱིན་བསྲེག་བཟའ་བ་དང་༢་ཀ་༽གཞོལ། །དངོས་གྲུབ་༼རྐྱང་མ་དབང་དུ་བྱ་བའི་༽རྒྱ་ཆེན་༼ལས་ལ་སྦྱར་བ་ཙམ་གྱིས་༽གསོལ་བར་འགྱུར། །བརྒྱ་དང་རྩ་བརྒྱད་ལྡན་ཉིད་ཀྱིས།༼སྦྱིན་བསྲེག་གཞན་ཡང་སྔར་གྱི་རྫས་ཀྱི་སྟེང་དུ་སྒྲུབ་བྱའི་སྐྲ་སེན་དང་རྐང་དྲེག་གྱི་རྡུལ་ ་་པས་སྦྱིན་སྲེག་བྱས་ན་སྦྱིན་སྲེག་སྔ་གྲོ་ཕྱི་གྲོ་དགོངས་ཀ་༣་དུ་༽ །ཐུན་གསུམ་དུ་ནི་སྒྲུབ་བྱེད་ན། །༼འདི་དག་རྒྱལ་རིགས་ལ་སོགས་པའི་བུ་མོ་དབང་དུ་བྱ་བའི་གཞུང་དུ་མཛད་དེ་སེམས་བརྟན་པ་ཐོབ་པས་རྒྱལ་པོ་དང་བློན་པོ་ལ་སོགས་པ་དབང་དུ་བྱ་བའི་གཞུང་དུའང་མངོན་༽རྒྱལ་པོ་དཔུང་དང་བྲམ་ཟེ་ལ་སོགས་པ་བཅས་པ་ནི། །ཞག་བདུན་གྱིས་ནི་དབང་དུ་འགྱུར། །ཕྱེད་ཀྱི་༼སྦྱིན་སྲེག་ལྔ་བཅུ་བཞི་༽དཔའ་བོ་ཆེན་པོ་༼སྔགས་པ་དབང་དུ་འགྱུར་༽སྟེ། །དེ་ཡི་ཕྱེད་ཀྱིས་༼ཉི་ཤུ་༧་༽བློན་པོ་འོ། །རྒྱལ་ཕྲན་ལ་ནི་སུམ་ཅུ་གཉིས། །༼བུད་མེད་དབང་དུ་བྱ་བའི་ཞོར་ལ་ཐམས་ཅད་དབང་དུ་བྱ་བ་བསྟན་༽བསྲེག་པའི་རིམ་གྱིས་སྦྱིན་བསྲེག་བྱ་༼འི་རིགས་ཀྱི་བུ་མོ་འོག་མ་འང་སྦྱར་རོ༽། །ཉི་ཤུ་བྲམ་ཟེ་ཉིད་ལ་ནི། །༼དེ་ཡང་༽ཉི་མ་བདུན་གྱི་སྦྱིན་བསྲེག་བྱ། །༼ར་ཛའི་རིགས་སུ་གྱུར་བ་ཙམ་༽དེ་བཞིན་རྒྱལ་རིགས་དག་ལ་༼སྦྱིན་བསྲེག་༽བདུན། །སྦྱིན་བསྲེག་ལྔ་བོ་༼འདི་དག་བུ་མོ་༽རྗེ་རིགས་ལ། །དམངས་རིགས་ལ་ནི་སྦྱིན་བསྲེག་གསུམ། །ཐ་མ་ལ་ནི་སྦྱིན་བསྲེག་༼གདོལ་བའི་རིགས་སམ་མཐར་སྐྱེས་མ་༽གཅིག །དེ་ལྟར་དཔའ་བོ་༼ས་༽རིགས་༼ལྔའི་༽རིམ་གྱིས། །༼སྔོན་དུ་སྙེན་པ་༽ཟླ་བ་༼ ཨོ་རྒྱན་སྣ་རྩ་ཁ་རང་ནི། རྗེ་ངར་གཏུམ་མོའི་རིགས་སུ་བྲིས། ཁོ་བོའི་ སྡོམ་མོང་ཐམས་ཅད་ལ། རྟགས་དང་མཐེ་བོ་པུས་མོ་དང་། ལྟེ་བ་རྡོ་རྗེ་ཕག་མོ་ཡིན། སྤྱི་བོ་སྤྱི་གཙུག་སོར་མོ་དང་། བོལ་གོང་གཤིན་རྗེ་མ་ཡིན་ནོ། མཆན་ཁུང་ནུ་མ་འགྲིན་པ་དང་། བརླ་ནི་རྨོངས་བྱེད་མའི་རིགས། སྨིན་འཚམས་མིག་དང་སྙིང་ཁ་དང་། འདོམས་བར་སྐྱེད་བྱེད་མིའི་རིགས། ལྟག་པ་སྣ་གཡོན་དཔུང་པ་དང་། ཤཾ་ལམ་སྐྲག་བྱེད་མའི་རིགས ༽གཅིག་ནས་ཡང་དག་སྡུད་༼ དུས་ཀྱི་སྙེན་པ་བྱས་ནས་སྦྱིན་བསྲེག༽། །སྔགས་དང་ལྡན་པའི་བསྒྲུབ་པ་པོས། །༼ འདི་སྦྱར་བ་ཙམ་གྱིས ལས་སྦྱོར་ཙམ་གྱིས་༽འགྲོ་བ་ཐམས་ཅད་༼ཁྱད་པར་དུ་རྐྱང་མ་༽དགུག་པར་བྱ། །༼དེ་དབང་དུ་གྱུར་བའི་རྐྱང་མ་དེ་༽དཔའ་བོ་ཆོ་ག་འདི་༼ ཧོ་མ་ཡི་༽ཡིས་ནི། །༼སྙོམས་འཇུག་བྱས་ན་༽འདོད་པ་བསྟེན་༼ཆོ་ག་༽ན་༼སི་ཏི་༽འགྲུབ་པར་འགྱུར། །༼མ་ཧ་དེ་བ་ལ་ཨུ་མ་ལ་སོགས་པའི་བཙུན་མོ་དུ་མ་ཡོད་པ་དབང་དུ་འདུས་པ་བཞིན་༽ས་སྟེང་འདོད་པའི་དབང་ཕྱུག་བཞིན། །༼རང་༽དཔལ་ལྡན་སྐལ་བ་བཟང་པོར་༼རྐྱང་མ་དུ་མ་དབང་དུ་༽འགྱུར། །༼ ལས་བཅུ་གཉིས་བསྒྲུབ་པ་བསྟན་༽བསྒྲུབ་པོ་མཁའ་འགྲོ་མ་༼རྐྱང་མ་༽རྣམས་ཀྱི། །ཡིད་འོང་འགྱུར་བར་གདོད་མི་ཟ། དཔལ་འཁོར་ལོ་སྡོམ་པ་ལས་རིགས་ལྔ་བོ་དབང་དུ་བྱ་བ་དང་ཕྱག་རྒྱ་ཆེན་པོ་༼སྐུ་གསུམ་ལམ་གྱི་བདེ་བ་༽བསྟེན་བའི་ལེའུ་སྟེ་བཞི་བཅུ་བའོ། ། ༼ ལེའུ་འདིས་སུཾ་་བྷ་ནིས་ལས་བསྒྲུབ་པ་དངོས་གྲུབ་ཀྱི་མཚན་མ་བསྟན་སུཾ་་བྷ་ནི་ལ་བརྟེན་པའི་ལས་སུཾ་བྷ་ནི། སུཾ་བྷ་ནིས་བསྲུང་ཐབས་བར་ཆ་བསྲུན་པ་༽ །དེ་ནས་ལས་ཀྱི་རབ་མཆོག་ནི། །༼གང་ཞིག་ཟེར་༽གང་གིས་ཤེས་ན་བསྒྲུབ་པ་པོས་༼སྙེན་པ་སྔོན་དུ་སོང་བས༽། །དབང་དང་དགུག་དང་དབྱེ་བ་དང་། །བསད་དང་བསྐྲད་པ་༼ཞི་རྒྱས་ཀྱང་བསྡུ་གསུང་༽ལ་སོགས་དང་། །༼སེམས་རྨོངས་པ་ཙམ་༽རྨུགས་དང་རེངས་བར་བྱ་བ་དང་། །༼འདི་ཡང་སེམས་མི་གསལ་བ་༽རྨོངས་དང་དེ་བཞིན་ཕུར་བུས་གདབ། །ཚིག་འཕྲོག་ལྐུགས་པར་འགྱུར་བ་དང་། །འོན་དང་༼བཅུ་༽དེ་བཞིན་ལོང་བ་དང་། །༼བཅུ་༡་༽མ་ནིང་ཉིད་དུ་བྱ་བ་དང་། །༼བཅུ་གཉིས་པོ་༽གཟུགས་ནི་༼དུ་མར་བསྒྱུར་བ་༽ཡོངས་སུ་༼མི་རྣམས་དུད་འགྲོར་བྱ་བ་ལ་སོགས་པ་༽བརྗེ་བ་སྟེ། །༼ གཙོ་བོར་བར་ཆད་མེད་པ་ཙཀྲ་རེ་རེ་ལ་༣་༣་༽ལས་ཆེན་བཅུ་གཉིས་འདི་དག་ནི། །དངོས་གྲུབ་བསྒྲུབ་པ་པོ་ལ་ནི། །དྲན་པས་༼དབང་པོ་རབ་སེམས་བརྟན་པ་ཐོབ་པའི་དབང་དུ་བྱས་པ་༽འགྲུབ་འགྱུར་གདོད་མི་ཟ་༼འདི་མན་ཆད་ལས་ཆེན་བཅུ་གཉིས་བསྒྲུབ་པར་བསྟན་ཏོ། དབང་པོ་འབྲིང་ལ་སོགས་པ་ལ་སྔགས་ཀྱི་ཆེ་བ་ཙམ་མོ༽། །༼དེ་ལྟར་ལས་ཆེན་བཅུ་གཉིས་བསྒྲུབ་པའི་སྔོན་དུ་ལྷའི་རྣལ་འབྱོར་བསྒོམ་པ་བསྟན་༽ཤར་དང་བྱང་གི་གནས་ལ་༼མཚོན་ཆ་ཙམ་སྟེ་སྐུ་གསུང་ཐུགས་ཀྱི་ཙཀྲ་༣་ཀ་ལ་གདོད་ནས་གྲུབ་པའི་དུར་ཁྲོད་འདི་ལྟ་བུའི་དངོས་གྲུབ་དེ་ཡང་མཁའ་འགྲོ་མར་གསོལ་བས་མཁའ་འགྲོ་མར་བསྟན་༽སོགས། །༼གཙོ་བོ་བཞི་༽མཁའ་འགྲོ་མ་ནི་ཐམས་ཅད་དང་༼གནས༽། །༼ཆོས་ཀྱི་སྐུ་ལས་བྱུང་བས་༽ཡེ་ཤེས་ལྡན་པའི་༼ལོང་སྐུ་ལྷན་ཅིག་སྐྱེས་མ།སྤྲུལ་བ་མཆོག་གི་ཞིང་སྐྱེས་མ།མཆོག་གཅིག་ཡིན་པས་སྔགས་སྐྱེས་མ་སུམ་བཅུ་བདུན་གྱི་ཕག་མོས་བསྡུས་པས་ལས་ཆེན་བཅུ་གཉིས་རྩོལ་བའི་ལྷན་ཅིག་སྐྱེས་མ་ལ་སོགས་པ་༣་༽རང་སྐྱེ་གནས། །ཡུལ་དང་ཡུལ་དུ་མངོན་པར་སྐྱེ། །རྡོ་རྗེ་དཀྱིལ་འཁོར་༼གྱི་༽གཙོ་མོ་སྟེ། །༼དེ་ཕན་ཆད་མཁའ་འགྲོ་མ་༣་སྤྱིར་བསྟན་༽དེ་ནི་མཁའ་འགྲོ་མ་རྣམས་བཤད། །༼བར་འདི་ནས་མར་སོ་སོར་བཤད་༽ཀུ་ལུ་ཏ་དང་༼ཞིང་སྐྱེས་བསྟན།མྱ་ངན་༽དགོན་པ་༼མར་ངོ་༽དང་༼འདི་ནས་མར་བཞི་སྐུའི་ཙཀྲའི་འཚམས་མ་༤་མས་རིམ་པར་བསྟན༽། །སིན་དྷུའི་ཡུལ་༼ན་ག་རར་༽དང་གྲོང་ཁྱེར་དང་། །༼སུ་ཝརྞ་༽གསེར་གྱི་གླིང་དང་༼སྐུའི་ཙཀྲ་ཕྱོགས་བཞི་ལས་རིམ་པས་ཞིང་སྐྱེས་སྤྲུལ་བའི་སྐུ་སོ་སོར་བསྟན་༽སོའུ་ར་ཥཊ། །༼ གྲི་ཧ་དེ་བ་༽དེ་བཞིན་ཁྱིམ་གྱི་ལྷ་དང་ནི། །༼པྲེ་ཏ་པུ་ར། གསུང་གི་ཙཀྲའི་འཚམས་མ་བཞི་ལས་རིམ་་་༽ཡི་དྭགས་གོང་དང་ཁ་བའི་གནས། །ཀན་ཙི་ལམ་པ་ཀ་ཡི་ཡུལ། །ཀ་ལིང་ཀ་དང་ཀོ་ས་ལ༼གསུང་གི་ཕྱོགས་བཞི་ལས༽། །ཏྲི་ཤ་ཀུ་ནེ་ཨོ་ཊེ་དང་། །ཀ་མ་རུ་པ་མ་ལ་བ། །ལྷ་མོའི་མཁར་དང་ར་མི་༼ཤ་ར་༽དབང་། །གོ་ཏ་༼ཝ་༽པཪྻཾ་ཨར་པུ་ཏྱ། །ཨུ་རྒྱན་ཛ་ལན་དྷ་ར་དང་། །པུ་ལུ་ར་མ་ཡ་ལ་སོགས། །ཡུལ་འདི་དག་གི་བུ་མོ་གང་། །༼ཉི་ཤུ་བཞི་༽དཔའ་བོ་༼དང་༽གཉིས་མེད་རྣལ་འབྱོར་མ། །དེ་ཀུན་༼གདུལ་བྱ་བསམ་པ་དང་བསྟུན་ནས་་རྒྱུ་བ་དང་སྤྱོད་ལམ་དུ་མ་བསྟན་ཏོ་༽འདོད་པའི་གཟུགས་ཅན་ཏེ། །ཡིད་ཀྱི་ཤུགས་ཀྱིས་འཇུག་པ་ཡིན། །༼དེ་དག་གི་བསྡུ་བྱ་བཟློག་སྟེ་བསྟན་པ་༽རྣལ་འབྱོར་མ་དྲུག་ཀུ་ལུ་ཏ་༼ར་གང་གིས་ན་བསྡུས་པ་སྟོན༽། །༼མ་ རོར་༽མྱ་ངན་ཡུལ་ན་༼འཁོར་ལོ་བསྒྱུར་མ་༽མ་མོ་རྣམས་༼རྡོ་རྗེ་ཕག་མོའི༽། །སིན་དྷ་༼སིན་དྷུ་དང་ནི་ན་ག་ར་གང་ཞིག་རིགས་ཀྱི་སྐུའི་འཚམས་བཞི་པོ་འདི་དྲུག་གི་ནང་ན་ལ་མས་བསྡུས་༽ཉིད་དུ་ལ་མ་སྟེ། །རིགས་ཀྱི་གཙོ་མོ་༼ཤིན་ཏུ་དཔའ་མོ་༽ན་ག་རར། །༼རྨོངས་བྱེད་མ། གསེར་གླིང་དུའོ་༽ལམ་བ་༼ལཾ་པ་ཀ་དང་སོ་ར་ཥར་གང་ཞིག་རིགས་ཀྱི་ལྷ་ཉིད་༽དང་༼སྐུའི་༽ནི་སོའུ་༼ཤོནྜི་ན་༽རཥཊ་༼འཁོར་ལོའི་གོ་ཆ་མ༽། །རིགས་༼ཁྱིམ་གྱི་༽ཀྱི་ལྷ་མོ་༼ཁཎྚ་རོ་ཧ་༽རྣམས་༼འདི་འཚམས་སྦྱོར་ཡིན་གསུང་༽ཡིན་ཏེ། །ཡི་དྭགས་༼གཙོ་མོའོ་༽གྲོང་དུ་ནག་ཆེན་མོ་༼ཡ་མི་ནི༽། །མཁའ་འགྲོ་མར་བཅས་རུ་པི་ནི་༼་སྟེ་སྐུའི་འཁོར་ལོ་ཕྱོགས་བཞི་བོ་དེ་ གཟུགས་ཅན་མས་བསྡུས༽། །༼ཁྱིམ་གྱི་ལྷར་ནི་བུ་མོ་གང་༽ཁ་བའི་རི་དང་ཀན་ཙི་༼རྟ་རྣ་མ་༽དང་། །༼སྐྱེད་བྱེད་མ་གཉིས་མ་ལ་བའོ། ལཾ་པ་ཀ་ཡིན་༽པན་ཙ་ལ་ཡི་ཡུལ་དག་དང་། །༼ཤིན་ཏུ་བཟང་མིན་ ཤིང་གྲིབ་མ་༢་སྐྲག་བྱེད་མ་གྲི་ཧ་དེ་བ་ ལྷ་མོ་ཤ་མ་དེ་ཝི་༽ཁྱིམ་གྱི་ལྷ་མོ་ཀ་ལིང་ཀར། །༼ཀ་ལིང་ཀ་དང་ཀོ་ས་ལར་བརྟུལ་ཞུགས་འཛིན་མ་ཤ་ཟ་མ། ཡོངས་གྱུར་མའི་མིང་གི་རྣམ་གྲངས་༽བརྟུལ་ཞུགས་འཛིན་པ་༼མ་དང་ཤ་ཟ་མ་གཉིས་ཀ་ལྟུང་བྱེད་མའོ་༽རྣམས་༼ཡོངས་གྱུར་མས་གསུང་གི་འཚམས་བཞི་བསྡུས་༽ཡིན་ནོ། །༼གསུང་གི་ཕྱོགས་༽ཀོ་ས་ལར་ནི་༼ཆང་འཐུང་མ་༽ཤ་ཟ་བ། །༼འཁོར་ལོ་ཤུགས་ཅན་མོ་༽ཡི་དྭགས་གྲོང་དུ་གྱུར་བ་རུ་༼བ་ར་ཧི། པྲེ་ཏ་པུ་རི་ཡིན་ནོ། ཡི་དྭགས་ཏྲི་ཤ། ཀུ་ན་གྲོང་དང་དེ་༣་དུ༽། །༼འཇིགས་བྱེད་ཆེན་མོ་གསུང་༽རྡོ་རྗེ་མཁའ་འགྲོ་༼རླུང་ཤུགས་ཅན་མ་ཨོ་དེར་ཨེ་ར་བ་ཏི་གསུང་༽སྦོམ་དབང་ཕྱུག །༼ཨེ་ར་བ་ཏི༽ཏྲི་ཤ་ཀུ་ནི་༼རིམ་བཞིན་ལྟར་ན་འདི་འཇིགས་བྱེད་ཆེན་མོ་གསུང་༽ཁཎཊ་རོ་ཧུ་༼བྱིས་བཅས་མོས་གསུང་གི་ཕྱོགས་བཞི་བསྡུས་༽། །༼འདི་ལ་འདོད་ལྡན་མ་ཞེས་ཀྱང་བྱ་འདི་ཕྱོགས་དང་པོ་རང་ནས་སྨོས་༽དེ་བཞིན་༼འདི་དག་གིས་མཚོན་ནས་མི་ལྡོག་མ་དང་ཨེ་ཧི་ཀ་ལྷ་མོ་༢་ཀྱིས་ཐུགས་ཀྱི་འཚམས་བཞི་དང་ཕྱོགས་༤་སྡུས་པར་བྲེས་པར་བྱ་སྟེ་དེ་ཡང་དེ་བཞི་ ན་གཤེགས་པ་འདིས་ཤེས་གསུང་༽བུ་ལི་ར་མ་ལ། ༼ གསེར་གླིང་དུ་ནི་ཅི་གསུང་དང་། དེ་༤ན་དུ་ནི་ཨུ་རྒྱན་ཉིད ཡུལ་འདི་རྣམས་ཀྱི་བུད་མེད་གང་། དཔའ་མོ་དང་ནི་གཉིས་མེད་ཁྱབ། སྤྱིར་མཁའ་འགྲོ་མ་དཔག་དུ་མེད་པ་ཡོད་པ་ལས་མདོར་བསྡུས་ནས་འཛཾ་བུའི་གླིང་ན་ཞིང་སྐྱེས་ ཆ་ལུགས་ལྷོད་པར་གྱུར་བ་སྟེ་དེ་ལྟར་ཐུན་མོང་མ་ཡིན་པ་བཞིའོ་༽༼ ཛ་ལན་དྷ་ར་ཨུ་རྒྱན་ཏེ་དེ་གཉིས་གཏུམ་བྱེད་མའི་རིགས༽ །གསེར་གླིང་རྨེ་ཤ་ཅན་བུད་མེད། །༼ཊ་ཀི་ཀ༢་ལྟར་ན་རེ་རེ་ལ་འཁོར་སྟོང་ཕྲག་གཉིས་སེམ་གསུང་༽སྟོང་ཕྲག་ཉི་ཤུ་རྩ་༼བཞི་ཟེར་༽གཅིག་ཡིན། ༼ཉི་ཤུ་རྩ་༤་ལས་ལྷག་བཅུ་གཉིས་ཡིན་ན་ཡང་ཙུམ་བི་ཀ་མ་སྨོས་པས་དེས་མཁའ་འགྲོ་མ་སྙིང་པོའི་བཞི་བསྡུས་ལ། སྒོ་འཚམས་མ་བརྒྱད་ཧེ་རུ་ཀའི་ཕྱག་རྒྱ་དཾ་བམ་སྡུད་པ་མོས་བསྡུས་པའོ༽ །༼ཉི་ཤུ་་་་་་པོ་༽དེ་ལས་ལྷག་པ་༼བཅུ་གཉིས་སམ་ཕྱིའི་བརྒྱད་༽ཇི་རྙེད་པ། །དཔལ་ལྡན་ཧེ་རུ་ཀ་ཡི་ནི། །༼སྙིང་པོའི་རྣལ་འབྱོར་མ་༤་༽འཁོར་ལོ་རྣལ་འབྱོར་མ་༼བྷ་ར་ཧིས་བསྡུས་པ་༽ཡིན་ནོ། །ཤྲི་ཧེ་རུ་ཀའི་སྲུབ་པ་ཆེ༼ཡུམ་བྷ་ར་ཧི༽། །དེ་ཡི་དཀྱིལ་འཁོར་༼ཧེ་རུ་ཀ་༽གཙོ་མོ་༼བྷ་ར་ཧི་༽ཡིན། །༼དྲུག་གི་བླ་མས་བསྡུས་པས་༽མཁའ་འགྲོ་ཉི་ཤུ་རྩ་བཞི་འདིས། །རྒྱུ་༼བ་ལྟར་༽དང་མི་རྒྱུའི་འཇིག་རྟེན་༼ཐམས་ཅད་གཞལ་ཡས་ཁང་དུ་་་་་་སྤྱི་བཅུ་གཅིག་ཛ་ལན་དྷ་ར་༽གསུམ། །༼རྟེན་དང་རྟེན་པའི་ལྷས་གཅེར་བུ་རྒྱན་བཏགས་སྟེ་གང་བྱས་ན་༽འགྲོ་བ་ཐམས་ཅད་འདི་ཡིས་ཁྱབ། །༼བསྒྲུབ་པ་པོ་ལ་མཁའ་འགྲོ་མས་བྱིན་གྱིས་བརློབ་པ་ཡང་༽མཁའ་འགྲོ་མ་འདིའི་དམ་ཚིག་ནི། །སྤྲུལ་བའི་༼སྐུ་༽བསྒོམ་པ་༼མཆོག་གིས་བསྡུས་༽ཉིད་ཡིན་ཏེ། །བསམ་གཏན་༼སྔགས་སྐྱེས་ཞིང་སྐྱེས་ལ་སོགས་པར་ཞེན་ཏེ་བསྒོམས་པས་༽ལ་སོགས་༼བཟླས་པ་སོགས་༽གང་ཅིའང་རུང་༼ལ་གནས་པས༽། །ས་སྟེང་ན་༼ཡོད་པའི་དངོས་གྲུབ་རྣམས་༽ནི་རྫོགས་འགྱུར་རོ། །སྔགས་པས་རྟག་ཏུ་༼རྣལ་འབྱོར་བཞི་ལ་༽མཉམ་བཞག་པས། །༼དུས་༽མཚན་མོ་ནམ་མཁའི་གོས་ཅན་༼གསང་བར་བྱ་བ་ཡིན་པས་གཅེར་བུའམ་དུར་ཁྲོད་་་་༽བྱ་༼པ་པོ༽། །༼དཔའ་བོ་༽སྐྱེས་པའམ་༼དཔའ་མོ་༽གལ་ཏེ་གཡོན་པ་ཀུན། ༼རླུང་འཛིན་ནུས་པས་དྲངས་པ་ འཛིན་མི་ནུས་པས་ཝེས་བླང་མུ་ཏྲ་༢་བཅར་ལུས་བཟུངས་རྒྱས་པར་བྱའོ༽ །རྣལ་འབྱོར་མ་དང་དཔའ་བོ་དགེས། །ཕྱག་རྒྱ་༼པད་སྐོར་༽གར་༼དང་ཧྲི་ཧ་ཧ་སོགས་ཀྱིས་༽གྱིས་མཆོད་པ་ཡིས། །༼སྔགས་སྐྱེས་ལ་ལྷན་སྐྱེས་ལས་་་་་་་་་ཞེན་ནས་་ཕོ་ཉ་བསྲེས་ལ་༽རང་བྱུང་རྟག་ཏུ་མཆོད་ན་ནི། །མ་ལུས་ལུས་པ་༼སི་ཏི་༽མེད་འགྲུབ་༼པ་ལས་བྱུང་བའི་རྟགས་༽ཅིང་། །གཡོན་པས་མཆོད་ལ་རབ་ཏུ་འཇུག དཔལ་འཁོར་ལོ་སྡོམ་པ་ལས་༼པཱུ་ཛ་སྭོ་༽ཡི་གེ་ཉི་ཤུ་རྩ་བཞིའི་དཀྱིལ་འཁོར་༼ལ་རྣལ་འབྱོར་མ་ཉི་ཤུ་རྩ་བཞི་༽དགོད་པའི་ཆོ་གའི་ལེའུ་སྟེ་བཞི་བཅུ་རྩ་གཅིག་པའོ། །༼སྔ་ཕྱིའི་བྲེལ་ལོ་་་་སྔགས་སྐྱེས་ལ་མཆོད་པས་ཞིང་སྐྱེས་མཆོད་པར་འགྱུར།དེས་ལྷན་སྐྱེས་མཆོད་པར་འགྱུར། ལེའུ་འདིས་རྣལ་འབྱོར་མ་བརྟེན་པའི་ཐབས་བསྟན་༽དེ་ནས་༼རྟགས་ཉི་ཤུ་ཚང་ན་ལྷན་སྐྱེས་རྟོགས་པ་མཆོག་གི་དངོས་གྲུབ་ཀྱི་རྒྱུའོ་༽དཔའ་བོ་མེ་ཏོག་ཆུ། །འཐུངས་ནས་སྔགས་འདི་༼ཐ་མལ་བའི་ཁ་ཟས་བདུད་རྩིར་བྱིན་གྱིས་བརླབས་ནས་ལོངས་སྤྱོད་༽རྗེས་དྲན་བྱ༼འབྲ་བུ་ཟ༽། །ཕྱག་རྒྱ་༼༢་ཅར་ལུས་ཟུངས་རྒྱས་པར་བྱ་༽ལྷན་ཅིག་༼བུད་མེད་སྔོ་བསང་མ་རྟེན་ལ་དེའི་་་་་ལ་དྲོད་མ་ཡལ་བ་དེ་བདག་གིས་མཐུངས་ན་བདེ་བ་འབྱུང་སྟེ་བསྒྲུབ་པོ་ཉིད་ལུས་རྒྱས་ནས་མདངས་བཟང་བའི་བྱུང་བ་ཡིན་གསུང་༽བསྒྲུབ་པ་པོས། །༼གསང་བ་ཡིན་པས་བྱང་སེམས་རྒྱས་བར་བྱ་བའི་ཕྱིར་༽མཚན་མོ་རྟག་ཏུ་༼མི་ཤ་ལ་སོགས་པ་༽ཤ་༼ཆེ་བ་༽བཟའ་བྱ༼ཆང་ཡང་བཏུང༽། །སྔགས་གསུམ་བྱ་བ་༼ཟས་ཀྱི་ཐ་མལ་པའི་དུག་གཞོམ་པར་བྱ་བའི་ཕྱིར་མེ་གསུམ་གྱིས་བདུད་རྩིར་༽འདི་ཉིད་ཀྱིས། །གྲུབ་པའི་༼མཐར་ཆོས་སྐུ་༽བདེ་བ་ཐོབ་པར་འགྱུར། །༼བྱང་སེམས་ཤ་ཆེན་༽འཐུང་དང་དེ་བཞིན་༼ཕྱག་རྒྱ་མ་༽སྦྱིན་པ་དང་། །༼འདི་ལ་ལ་ན་མེད། སྐྱེ་༽ཐོག་མ་༼་་་་་་་བ་དང་པོར་དཔེའི་ཡེ་ཤེས་སྐྱེ་ལ་དེ་ལས་དོན་གྱི་མི་རྟོག་པའི རྒྱུད་ལ་སྦྱོར་བ་༽ཐ་མ་༼མི་རྟོག་པ་དང་༽དབུས་མེད་པ། །འཁོར་ལོ་༼ལྷན་སྐྱེས་ཀྱི་མིང་༽བསྒྱུར་བའང་དེ་བཞིན་ནོ། །༼ཕྱག་རྒྱ་བརྟེན་པའི་ཐབས་རྒྱས་པར་སྟོན་༽རེག་༼བསྒྲུབ་པ་པོས་༽དང་ལྷན་ཅིག་༼རེག་པར་བྱ། གང་དང་རེག་ན་རྐྱང་མ་ཕག་མོར་བྱིན་གྱིས་བརླབ་པ་དང་༽གཙོ་མོ་ཆེ། །བདེན་༼དང་།བྱང་སེམས་མི་འཆོར་༽པར་ཚངས་པར་སྤྱོད་པ་༼ཞེས་བྱའི་༽དང་། །ཐོག་༼རྐྱང་མ་དང་སྙོམ་པར་འཇུག་པའི་༽ཐོག་༼སྔོན། ཐ་མ་༽མཐའ་བཞད་༼པར་༽པའི་༼སྙོམ་འཇུག་དུས་སུ་ཐོག་མཐར་ཧ་ཧ་ལ་སོགས་པ་་་་་་་་་བརྒྱད་བརྗོད་པས་མཉེས་པར་བྱ་བ་བསྟན་ཏོ་༽ཕྱག་རྒྱ་བྱ༼ཧ་ཧ་ལ་སོགས་པ་ཐུང་ངུ་རྒྱད་བརྗོད༽། །༼མིག་ཐམས་ཅད་༽ལྟ་བའི་སྙེམས་༼སྦྱེག་པའི་ཉམས་༽པ་གྲགས་༼ཧ་ཧ་ལ་སོགས་པ་སྒྲ་ཆེར་༽ལྡན་པ་༼ལ་སོགས་པས་མཉེས་པའི་ཐབས༽། །༼དུས་༽མཚན་མོའམ་དེ་བཞིན་ཉིན་མོ་ནི། །༼ཐུང་ངུ་བརྒྱད་པོ་༽འདིས་ནི་བཞད་པ་དག་ཏུ་བྱ༼དེ་ཡན་ཆད་ཁ་ཟས་ལ་རྟེན་པས་ལུང་ཟུང་རྒྱས་པར་བྱའོ༽། །༼ཕྱིའི་༽གཟུགས་དང་༼ནང་གི ཀྱི་གསང་རྩའི ༽ལས་ཀྱི་གསང་བ་གང་། ཤོག་སྡེབ་༢༣་ངོ་ནས་རྟགས་ཅན་མང་པོ་ཞིག་ལ་བཙུད་རྒྱུ་མ་རྙེད །༼ཡུམ་གཉིས་ལ་ཕྱི་ནང་གཉིས་ཀྱི་གསང་བ་༽ཇི་ལྟར་གནས་པ་དཔའ་བོ་ཉོན༼ཕྱག་ན་རྡོ་རྗེ་ལ་བོས་པ༽། །རྟག་༼ཏུ་མི་གསང་ནིར་ཏེ་༽ཏུ་དེ་ཡི་མཆི་མ་འབྱུང་། །༼ནང་དུ་དགའ་བ་སྐྱེས་པ་༽དད་པས་དེ་ཡི་བ་སྤུ་༼གྱེན་ལ་༽ལྡང་། །རྡོ་རྗེ་ལས་ནི་འགོམ་མི་བྱེད། །དེ་བཞིན་ཕྱོགས་གོས་གྱུར་བ་མཆོད། །གཡོན་པའི་༼རྐྱང་མ་༽དབང་ཕྱུག་ཐམས་ཅད་༼དཔའ་༽ཀྱི། །འདི་ནི་༼འོག་གི་བཞད་པ་བརྒྱད་དང་ལྔར་༽ཕྱག་རྒྱའི་ཚོགས་ཀྱི་རིམ་༼པ་བསྟན༽། །༼བསྒྲུབ་པ་པོའི་ནང་གི་གསང་བ་ལྔ་ནི། རླུང་དབང་དུ་གྱུར་བས་ཅི་ཙམ་བསྡམ་ཡང་ཐུབ་ལ་དབུགས་དྲོ་ན་ཡང་བདེ་བ་བོང་དུ་བཏུབ་པས་༽དབུགས་འབྱིན་༼ལས་ཀྱི་གསང་བ་རྒྱས་བཤད་༽བསྐྱོད་དང་རྒོད་པ་༼དལ་བར་སྐྱོད་པ་དང་དབུགས་གནན་ཅིང་བསྐྱོད་པ་དང་དབུགས་རྔུབ་ཅིང་བསྐྱོད་པའོ་༽དང་། །༼སྔོན་དུ་༽སྒེག་དང་༼གླང་པོ་མ་ལྟ་བུ་ཡིན་ན་ཁབ་རྩེའི་ཀ་ར་ན་ལ་སོགས་པ་བྱ་༽གར་གྱི་ངོ་མཚར་དང་། །སྣ་ཚོགས་མདུན་དུ་བྱས་ནས་༼སོ་དང་སེན་མོ་གདབ་པ་ལ་སོགས་པ་༽ནི། །༼ཕྱོགས་གོས་གྱུར་བ་ནང་ལ་ཡང་ཡོད་༽ཕྱག་རྒྱ་༼དང་བཅས་པའི་བསྒྲུབ་པ་པོས་ཧ་བརྒྱད་ཀྱིས་རྒོད་པའི་འདོད་་་ན་་སུ་་བྱ་ཐུན་མོང་གི་གསང་བ་འདི་ལྔ་རྐྱང་མ་ལ་ཡང་བྲེས་པར་བྱའོ་༽སྔགས་ནི་རྗེས་དྲན་བྱ། །ཧ་ཧ་ཧེ་ཧེ་རྣམ་པ་བརྒྱད། །རྒོད་དང་སྣ་ཚོགས་དབང་མཆོག་དགའ། །ཧ་ཧའི་རྣམ་པ་ཉེ་བར་༼དེ་ལྟར་བསྒྲུབ་པ་པོའི་རྟགས་བཅུའོ་༽བརྟག །༼གཟུགས་ཀྱི་ཕྱག་རྒྱའི་༽ངུ་བར་༼ཕྱིའི་རྒྱུ་བའི་གསང་བ་ལྔ་ནི་༽བྱེད་པ་རྟག་ཏུ་༼རྐྱང་མ་ལ་ནང་དུ་བདེ་བ་སྐྱེ་བས།རྐྱང་མ་ལ་ལྔ་སྦྱར་བ༽བསྔགས། །དེ་ཉིད་ཀྱིས་དེ་དགའ་འགྱུར་ཞིང་༼བསྒྲུབ་པ་པོ་སྙོམས་པར་ཞུགས་པ་ལས་ནང་དུ་བདེ་བ་སྐྱེ་བས༽། །༼ཧ་ཧ་སོགས་༽སྔགས་དང་༼ནང་དུ་དགའ་བ་སྐྱེ་བས་༽བསམ་གཏན་ལེགས་སྦྱོར་བ༼སོ་དང་སེན་མོ་གདབ་པ་ལ་སོགས་པ༽། །གཙོ་མོ་༼བསྒྲུབ་པ་པོ་༽རྣམས་དང་༼འདི་རྣམས་༡་དུ་བགྲང་གསུང་སྟེ་ཐུན་མོང་བ་༽དཔའ་བོ་ཡི། །སྤུ་ལྡང་ལྷན་ཅིག་འབྱུང་བདེ་བ་༼གཏང་དང་བྲལ་བ་བསྣན་པས༽། ༼ གསང་རྩ་ལས་མི་འདའ་རྐྱང་མ་དང་བྱང་སེམས་སྡོམ་པ་༽ །རྡོ་རྗེ་བགོམ་པར་མི་བྱ་བ། །༼བུད་མེད་ཀྱི་བརྡའ་༽གཡོན་པས་ཡོངས་སུ་བརྟག་པ་ཡིན་༼ཅེས་ཕྱོགས་གོས་གྱུར་པ་དང་བཞི་ཧ་བརྒྱད་ཀྱི་དགོད་པ་དང་ལྔའོ༽ ། དཔལ་འཁོར་ལོ་སྡོམ་པ་ལས་མཁའ་འགྲོ་མའི་གཟུགས་༼ཀྱི་ལས་ཀྱི་གསང་བ་༢་༽ཡོངས་སུ་བརྗེ་བ་དང་༼ཐུན་མོང་གི་ཧ་ཧ་སོགས་བརྒྱད་༽རྒོད་པའི་སྔགས་ཀྱི་ཆོ་གའི་ལེའུ་སྟེ་བཞི་བཅུ་རྩ་གཉིས་པའོ། །༼ཡི་གེ་བདུན་པའི་ལས་ཀྱི་ཚོགས་རྣམས་བསྟན་ཏེ་འབྲས་བུའི་གསང་བ་བསྟན༽དེ་ནས་༼ཡི་གེ་བདུན་པ་ལ་བརྟེན་པ་འབྲུ་ མ་གཅིག་གམ་བཞི་སྔོན་དུ་བྱ་སྟེ། དེ་ནས་ཉེ་བའི་སྙེན་པ་ཁྲི་ཕྲག་༤་འམ་༡་བྱས་ལ་ལས་སྦྱོར་བྱའོ། ཌ་ཀིའི་སྤྱན་གྱིས་༽གཟིགས་པ་༼འགྲུབ་ངེས་པས་༽བཤད་པ་སྟེ། །༼གང་ལ་གཟིགས་ན། ཧེ་རུ་ཀ་དང་༽དཔའ་བོ་དང་ནི་གཉིས་༼སུ་༽མེད་༼པར་བསྒོམ་པའི་༽མི། །གནས་ཀྱི་དབྱེ་བའི་༼ཕྱི་ནང་སྟེ་ནང་དུ་བསྒོམ་པར་༽ཆོ་ག་༼དེའི་གནས་མདོར་ན་དུར་ཁྲོད་ལ་སོགས་པ་༽ཤེས། ༼ སྤྱན་གྱིས་གཟིགས་པའི་རྒྱུ་བྱིན་གྱིས་བརླབ་པའོ༽ །བསྒོམ་ལ་རྟག་ཏུ་མངོན་དགའ་བའོ་༼བསྒྲུབ་པ་པོ་ལ༽། །༼གནས་ནང་ན་བཞུགས་པས་བྱིན་གྱིས་བརློབ་ན་༽ལམ་༼ཅུང་ཟད་བསྟན་ནས་༽གྱི་བཞི་མདོའམ་ཁྱིམ་དག་གམ། །༼དུར་ཁྲོད་༽དཔའ་བོའི་གནས་༼རོ་གནས་པའི་ས་༽ཀྱི་རི་བོར་ནི། །མཁའ་འགྲོ་མ་༼དང་དཔའ་བོ་༽ཡི་༼དམ་བཅས་པ་ལས་མི་འདའ་བས་༽དམ་ཚིག་གནས་༼བྱིན་གྱིས་བརློབ་པས༽། །༼ཡུལ་གཞན་ན་བཞུགས་ཀྱང་༽རིང་པོ་ནས་༼སྐུ་དངོས་སུ་བྱོན་མི་དགོས་༽ཀྱང་གཟིགས་༼བྱིན་གྱིས་བརློབ་སྤྱན་གྱིས་གཟིགས་༽པར་འགྱུར། །༼ཆ་ལུགས་བསྟན་༽ཕྱག་རྒྱ་༼ཕྱག་རྒྱ་དང་གཉིས་ཀར་༽གཅེར་བུར་༼བྱས་ཏེ་༽མཆོད་པ་༼ སུ་ཀས་༽ཡི། །༼ འདུས་གསུམ་༽ལས་ཉིད་ཀྱིས་ནི་ཡོངས་སུ་གྲོལ། །༼ཐ་མལ་པའི་ཕྱག་རྒྱའི་རྒྱུ་ལ་སོགས་པ་སྟགས་པགས་དང་རུས་རྒྱན་གསུང་༽གོས་༼ལས་༽གཞན་༼པ་༽དག་གིས་བཀབ་ནས་ནི། །༼ཐ་མལ་བའི་བདེ་བ་ལ་མ་ཆགས་སེམ༽་འདོད་པ་རྣམས་ཀྱིས་༼ཐ་མལ་པའི་གོས་ལ་སོགས་པའི་༽རེག་མི་བྱ། །དེ་བཞིན་སྐྲ་ནི་གྲོལ་འགྱུར་བ། །ལས་རྣམས་ཐམས་ཅད་༼བསྒྲུབ་པ་པོ་༽བརྩམས་པ་ལ། །རྩ་བའི་༼བསྙེན་པ་ཡི་གེ་བདུན་པ་ལ་སྐྱལ་ཀྱང་༽སྔགས་༼བཟླས་པ་༽དང་དེ་བཞིན་སྡིགས་༼སུཾ་བྷ་ནི་བརྗོད་པས་བསྲུང་ལ༽༼བར་ཆད་སེལ་བ་ལ ༽། །༼ར་བ་དང་དྲ་བ་དང་གུར་དང་བླ་རེ་དང་ས་གཞི་ལ་སོགས་པ་ཡང་བྱ༽ཕྱོགས་བཅིང་བར་ནི་འཇུག་པ་དང་། །༼དེ་ལྟར་བྱ་པས་བསྲུང་བའི་འཁོར་ལོའི་སྟོབས་ཀྱིས་༽ལྷ་དང་ལྷ་མིན་ཚོགས་ཀྱིས་ཀྱང་། །༼ཁ་ཅིག་གིས་མཐོང་ཡང་བར་ཆ་མི་ནུས་༽མ་མཐོང་པར་ནི་མཆོད་༼ གཡེང་བའི་ཉེས་པ་ཞི་བས་་་བསྒྲུབ་༽པར་གྱིས། །༼ཡི་གེ་བདུན་པ་ལ་སྙེན་པ་སོང་བས་མི་སྣང་བའི་དངོས་གྲུབ་བསྒྲུབ་པ་༽སྙིམ་པ་མེ་ཏོག་གིས་བཀང་སྟེ། །མཁའ་ལ་སྤྱོད་པ་གྱེན་དུ་འཐོར༼བས༽། །༼མེ་ཏོག་དམར་པོ་ལ་ཉེ་སྙིང་བཟླས་ཏེ་ཆུ་ལ་གཏོར་བས་ཆུ་དེ་ཡང་ཁྱིལ་ཁྱིལ་ནས་མེ་ཏོག་དང་བཅས་པར་སྙིམ་པར་ཆུ་བཅུས་ལ་མེ་ཏོག་ལ་སོ་མ་བཏབ་པར་ཁྱུར་མིད་བྱས་ན་མི་སྣང་བ་འགྲུབ༽མེ་ཏོག་དག་ནི་ས་གཞི་ལ་༼མར༽། །གལ་ཏེ་༼བཟླས་ཀྱི་བར་དུ་༽ལྟུང་བར་མ་གྱུར་ན། །དེ་ཉིད་དུ་ནི་མི་སྣང་འགྱུར།༼ བར་སོགས་ལས་གྲུབ་པའི་རྟགས་སོ་སོའི་་་ མེ་ཏོག་དེ་འདོད་ན་གཞན་ཡང་འགྲུབ༽ །༼ ངག་དབང་བསྒྲུབ་པ་བསྟན་གཞན་ཡང་༽གནས་ཀྱི་ཁྱད་པར་༼ཡུལ་ཉི་ཤུ་རྩ་བཞི་ལ་སོགས་པ་༽ལ་གནས་ན།༼ལྷན་སྐྱེས་མ་དང་ཞིང་སྐྱེས་མ་ལ་སོགས་པ་ ༽ །མཁའ་ལ་འགྲོ་བར་སྟོང་ཕྲག་ནི། །༼འདོད་ན་ དེ་དག་དང་ལྷན་ཅིག་སྐལ་བ་མཉམ་པར་མྱོང་་་བསོད་༽གནས་ལ་དབང་ནི་བྱེད་པར་འགྱུར། །༼ཡང་༽ངག་གི་དབང་ཕྱུག་༼རྣལ་འབྱོར་མ་༽མ་༼ཞིང་སྐྱེས་༽རྣམས་དང་། །གསུང་གི་དབང་ཕྱུག་༼འགྲུབ་༽འགུགས་པར་འགྱུར།༼ བཟའ་ཕུར་བུ་པ་ཕྱི་རོལ་པའི་སྒྲ་བརྩམས་པ་དེ་ཡང་བྲིས༽ །༼བསྒྲུབ་པ་པོ་དེ་ལྟར་གྱུར་པས་༽ལྷ་དང་ལྷ་མོའི་༼མ་བསླབ་པར་སཾ་ཀྲི་ཏའི་༽གཏམ་༼འདོད་པ་༽ཤེས་ཤིང་། །ས་འོག་ལ་སོགས་གང་ཡོད་༼་པ་ཐམས་ཅད་བྲིས༽དང་། །སྐར་མ་རྒྱུ་བར་༼ ལ་སོགས་པའི་དུས་ཐམས་ཅད་པ་་་་་་་་མདོར་ན་མངོན་པར་འདོད་པ་ཐམས་ཅད་འཐོབ་ཐོས་པས་༽ཤེས་པར་འགྱུར། །༼ཉུང་བ་བསྟན་ཏེ་གནས་༽ཡུལ་༼མི་སྣང་བསྒྲུབ་པ་༽ ཡུལ་དེ་བཞིན་དགོན་པ་དང་། །གྲོང་ཁྱེར་དང་ནི་བཞི་མདོ་དང་། །ཤིང་གཅིག་དང་ནི་དཔའ་བོའི་ཁྱིམ། །རི་རྩེ་དང་ནི་མཚན་༼མ་༡་པ་༽དྲུང་དུ། ༼ སྔོན་དུ་འབྲུ་འབུམ་་་་སོང་བས་དེ་ནས་མི་སྣང་བར་གྱིས་༡་པའི་སྤེལ་ཚིག་དང་བཅས་པས་བཟླས་ན་༽ །རྟག་ཏུ་སྙིང་པོ་༼དང་༽ཉེ་སྙིང་འདོན་༼པར༽། །༼བར་ཅད་བྱ་བའི་བསམ་་པ་དང་ལྡན་པ་རྣམས་ཀྱིས་༽ལྷ་དང་མི་ཡིས་མཐོང་མི་འགྱུར། །དེ་བས་ཡུལ་ཕྱོགས་༼དེ་༽འདི་དག་ཏུ། །༼དེ་སྣང་མི་སྣང་བསྒྲུབ་པ་པོའམ་༽བསྒྲུབ་པ་པོ་ནི་༼སུས་ཀྱང་མི་མཐོང་བར་༽རྟག་ཏུ་གནས། ༼འདི་ཡང་སྔོན་དུ་སྙེན་པ་འབྲུ་འབུམ་༡་དེ་ནས་ཁྲི་ཕྲག་༡་བཟླས་པས༽ །ཤིང་རྩེར་༼ ལྷུང་པའི་ལ་སོགས་་་་མཐོན་པོ་༽༼འདི་ཡན་ཆད་ལྡེབ་གྲངས་༢༣་གི་རྒྱབ་ལོག་ནས་རྟགས་དང་རྟགས་ཅན་ཁ་ཤས་གསལ་ཁ་ཡོང་མེད་པས་ཞིབ་སྡུར་བྱེད་རོགས༽ཁ་དོག་དམར་༼ཨ་ཤོ་ཀའི་སྡོང་པོ་ཆེན་པོ་ཤིང་གི་རྩེ་མོ་ལ་་་ སྔགས་རི་རབ་ལྟ་བུར་བསམ་སྟེ་དེའི་་་གཙོ་མོ་གནོན་པར་བསམ་ཞིང་མེ་ཏོག་ལ་སོགས་པ་ ལ་སྔགས་སྟེ་གཏོར་ན་༽བསམ་ནས། །༼ལོ་ཀ་ལ་ནུས་པ་བསྟན་པའི་ཕྱིར་༽ཡི་གེ་བདུན་གྱི་བདག་ཉིད་ཅན། །༼ཤིང་དང་སྔགས་༽མི་ཕྱེད་པར་འགྱུར་ཕམ་པར་༼ཤིང་ལྷུང་སྟེ་ཆགས་ན་༽ནི། །༼རི་རབ་ཀྱང་ལྷུང་བས་༽ས་འཛིན་རྣམས་ཀྱང་གཞན་དུ་༼མི་ལྷུང་བ་༽མིན།༼མི་མོས་པ་བཟློག་ལ་གསང་སྔགས་ཐེག་པ་ཆེན་པོ་ལ་འཇུག༽ ༼ འདི་ཡང་སྔོན་དུ་སྙེན་པ་འབྲུ་འབུམ་གཅིག་ལ་སོགས་པ་སོང་བས་བྱ་ ཡི་གེ་བདུན་པའི་ཙཀྲ་བྲིས་ཏེ་བཏགས་ལ༽ །༼རྨི་ལམ་རྟག་པ་༽བདག་གི་ལུས་ལ་རྣམ་དགོད་དེ། །ས་ལ་ཀུ་ཤའི་སྟན་དུ་༼བདུད་རྩི་ལྔ་གཏོར་ཏེ་གདན་དུ་གཏིང་ལ་༽ཉལ། །༼ངག་ཏུ་ཡང་༽ཡི་གེ་བདུན་གྱི་བདག་ཉིད་གནས། །༼འདིས་མཚོན་པ་ཙམ་སྟེ་སྟོང་ལ་སོགས་པ་བཟླས་པ་ཡོད་༽བརྒྱ་རྩ་བརྒྱད་ནི་ཉིད་དུ་༼ཡིད་ལ་གཏོད་པ་རྨིས་ལ་༽བཟླས། །རྨི་ལམ་དུ་ནི་༼དགེ་མི་དགེ་༽བྱ་བ་ཀུན། །ཡིད་ལ་འདོད་པ་སྟོན་པར་འགྱུར། །༼དེ་ཉིད་བསྟན་པ་༽དུས་མིན་འཆི་དང་༼རྫས་དང་༽བཅོམ་དང་༼འོན་པ་དང་ལོང་ང་ལ་སོགས་ཀྱིས་༽ཉམས། །བྱ་བ་ཀུན་ཏུ་༼སྒྱུར་བསམ་པའི་ལས་༽གང་གྱུར་བ་༼པ་དང་༽། །༼ཉེས་པ་ཅི་བྱུང་ཡང་བསལ་ཐབས་༽རྣམ་པ་སྣ་ཚོགས་གཞན་དང་གཞན། །༼ངན་ན་བཟློག་ནུས་པ་༽ཐམས་ཅད་རྨི་ལམ་དག་ཏུ་སྟོན། །༼པྲ་སེ་ན་བསྒྲུབ་པ་བསྟན་༽དེ་བཞིན་སྔགས་བཟླས་༼འདི་ཡང་སྔོན་དུ་སྙེན་པ་འབྲུ་འབུམ་གཅིག་སོང་བས་དེ་ནས་ཡང་ཁྲི་ཕྲག་གཅིག་བཟླས་པས་པྲ་དབབ་པར་བྱས་པ་༽རལ་གྲི་ཆུ་༼ཕུ་ཆུ་མི་ཁྱིས་མ་འབགས་པ་ལ་རྩ་བམ་ལ་བལྟ༽ ། ༼དང་པོ་བགེགས་ལ་སོགས་པ་སྦྱངས་དེ་ཡང་བཀྲག་དང་ལྡན་པར་སྦྱངས་དེ་ནས་ཡི་གེ་བདུན་པ་བཟླས་ཤིང་བདུད་རྩི་ལྔས་ཐིག་ལེ་བདུན་བྱ། དེ་ནས་ཁྱེའུ་གཞོན་ནུ་མ་དང་གཞོན་ནུ་མས་ཁྲུས་བྱས་ལ་བཀུག་ལ་དེའི་ཡིས་ཀྱང་ཡི་གེ་༧་པ་བཟླས་བུས་ ལྟར་གཞུགས་པ་འདི་ཐམས་ཅད་ལ་འདྲའོ༽ །མཐེ་བོང་མར་མེ་མེ་ལོང་དང་༼གཉིས་ལ་ཡང་བགེགས་སྦྱང་ལ་སོགས་པ་བྱས་ལ་ བལྡབ་བསྲེའོ༽། །སྔགས་བཟླས་ཉིད་རྟག་༼ཏུ་གནས་པའི་༽རྣལ་འབྱོར་པ་༼ལ༽། །པྲ་སེ་ན་༼དེའི་ནང་དུ་འཇའ་ཚོན་ལྟ་བུའི་ལུས་མཐོང་༽ན་ནི་༼རྟེན་འབྲེལ་གྱིས་མཐུས་སུ་མཐོང་བའི་་་་་་་་༽འབེབ་པར་འགྱུར། ༼རལ་གྲིའི་གཞུང་ནས་མར་་་་་་་རིཏྲིའི་་་་ཐིག་ལེ་བདུན་བྱ། དེ་ལ་ཡི་གེ་བདུན་པོ་བཀོད་ལ་སྔགས་བཟླས་ལ་ལྟར་བཅུག་ན་མཐོང་གསུང་། ཡང་ན་ཆུ་གཙང་མ་འམ་མཐེ་བོང་ངམ་མར་མེ་འམ་མེ་ལོང་ནང་་་་་རུང་་་་སྦྱངས་སྟེ་བལྟས་ན་མཐོང་གསུང་༽ །༼ལྷར་༽བསྒོམས་དང་ལེན་བདུན་༼ཡི་གེ་བདུན་པ་༽བཟླས་བཀོད་པས་༼ཙཀྲ་བྲིས་སྟེ་བཅིངས༽། །དགེ་༼དངོས་སུ་མཐོང་༽དང་མི་དགེ་སྟོན་པར་འགྱུར་༼ནད་ཞི་བར་བྱ་བ་བསྟན༽། །དེ་ནས་དཔའ་བོ་ཡི་གེ་བདུན། །༼བསྒྲུབ་པ་པོ་ནད་བསོ་བ་ལག་པ་གཡོན་པ་ལ་ཡི་གེ་བདུན་པའི་ཙཀྲ་བྲིའོ༽སྔགས་དགོད་པ་ཡི་དབྱེ་བ་ཉིད། །༼ལག་མཐིལ་དུ་༽ཉི་མའི་དབུས་སུ་༼འཁོར་ལོ་དེ་༽བསམ་ནས་ནི། །༼ཡི་གེ་བདུན་པ་སྔགས་སྤེལ་ཚིག་དང་བཅས་པ་༽སྟོང་གི་བར་དུ་༼བཟླས་ན་ལས་སྦྱོར་དུས་སུ་༽བཟླས་ནས་སུ།༼དེ་ནས་ཙཀྲ་ལས་འོད་ཟེར་དཀར་པོ་བྱུང་སྟེ་ནད་པའི་ལུས་ལ་ཕོག་པས་ནད་བསལ་བསམས་ལ་ལག་པས་བྱོབ༽ །༼ནད་པ་དེ་ནད་དང་བྲལ་ཏེ་༽ཤེལ་གྱི་རྣམ་པ་ལྟ་བུ་ནི། །ནད་ཀྱིས་གདུངས་པ་༼དེ་ལ་སེམས་དང་་་་ ལག་པས་༽བལྟ་བར་བྱ། །མཐེ་བོང་༼སེ་གོལ་གཏོགས་པ་༽ཙམ་གྱིས་༼སྔགས་ཀྱི་ཆེ་བ་༽སྐད་ཅིག་གིས། །ནད་རྣམས་སེལ་བར་ཐེ་ཚོམ་མེད། །ནད་ལས་རྣམ་པར་གྲོལ་གྱུར་ན། །སྟོན་ཀ་ཡི་ནི་ཟླ་འདྲ་བ༼ར་འགྱུར་རོ༽། །༼ལག་པ་ལ་༽ཟླ་བའི་དབུས་སུ་རྣམ་དགོད་ཅིང་། ༼ དུག་ལ་སོགས་པ་ཞི་བར་བྱ་བ་བསྟན་༽ ༼ལག་པར་ཙཀྲ་བྲི་བའམ་བསམས་ཏེ༽ །ལག་པ་གཡོན་པར་འཁོར་ལོ་བྱེད༼འཁོར་ལོ་འདི་གོང་མ་ཀུན་ལ་འདྲེ༽། །༼ཙཀྲ་ལ་༽ཡི་གེ་ཤེལ་གྱི་མདོག་ལྟར་སྣང་༼བ་དེ་ལ༽། །༼འོད་ཟེར་ཁ་དོག་༽གཟུགས་ལྔ་རུ་ནི་བལྟ་བར་བྱ་༼དགོད་ཟེར༽། །༼གཟུགས་ལྔ་རུ་ནི་ཟེར་༽ནད་རྣམས་ཀུན་ལ་དགོད་པར་བྱ། ༼ དེའི་འོད་ཀྱིས་དུག་ལ་སོགས་པ་ཞི་བར་བསམ༽ །རིམས་དང་གདོན་དང་བརྗེ་བྱེད་དང་། །གཟེར་སོགས་ཀུན་དང་མཛེ་ཅན་དང་། །དུག་གིས་ཟིན་པའི་ནད་རྣམས་དང་། །གང་གི་ནད་ཀྱི་སྡུག་བསྔལ་བ། །ཟླ་གཟུགས་ཡེ་གེ་༼ཐིག་ལེ་བསམས་ནས་ནི་དེའི་འོད་ཀྱིས་ཕོག་སྟེ་བསལ་བར་བསམ་ལ་༽བསམས་ནས་ནི། །ཕྱོགས་བཅུར་རྣམ་པར་༼ནད་པ་ལ་ནད་གུད་དུ་༽འབྱེར་བར་འགྱུར། །༼དུས་༽མཚན་མོ་༼འཁོར་ལོ་དང་ལྡན་པས་བྱས་ན་མྱུར་དུ་འགྲུབ། ཧོ་མས་ནོར་བསྒྲུབ་པ་དང་༽གསང་བ་ལ་གནས་ཏེ། །༼བ་ལང་ཤ་༽གོ་མཾ་ས་ནི་མངར་གསུམ་༼ཀ་ར་བུ་རཾ་སྦྲང་༽བརྟག ༼ སྔོན་དུ་སྙེན་པ་འབྲུ་འབུམ་༡་བྱས་པས་སྦྱིན་བྱ་པས་རྒྱས་པ་ལ་སོགས་པའི་ལས་བསྒྲུབ་པ་བསྟན་ཏོ༽ །ཡིག་བདུན་གསང་སྔགས་ཤེས་པ་དང་། །༼སྐལ་བ་རབ་ཀྱི་བསྲེག་ལུགས་༽སྟོང་རྩ་བརྒྱད་དུ་སྦྱིན་བསྲེག་བྱས། །༼མཚན་གཅིག་གིས་༽སྔགས་པས་ནང་བར་དུས་སུ་ནི། །༼སྔགས་སྤེལ་ཚིག་དང་བཅས་པའི་སྦྱིན་སྲེག་༽གསེར་སྲང་སྟོང་ནི་རྙེད་པར་འགྱུར། །༼གཞན་ཡང་རྫས་སྔགས་སྔ་མ་༽སྦྱིན་བསྲེག་སྟོང་ཕྲག་བཅུ་ཡིས་ནི། །༼རྒྱལ་ཕྲན་༽ཡུལ་འཁོར་དམ་པ་རྙེད་པར་འགྱུར། །ཡང་ན་གསང་སྔགས་རྒྱལ་པོ་༼ཡི་གེ་བདུན་༽ནི། །གནས་ནི་གང་དུ་བསམས་པ་དག །དེ་དང་དེར་ནི་དེ་ཡི་ཚེ། །༼འཆི་བའི་དུས་ན་༽སྐྱེ་བར་འགྱུར་བར་ཐེ་ཚོམ་མེད། །༼སྤྱིར་བསྟན་ས་གཞི་༽དཀར་པོ་ཡིས་ནི་ཞི་བར་འགྱུར། །༼དུར་ཁྲོད་སོལ་བས་བྱུགས་ལ་༽ནག་པོས་སྐད་ཅིག་དག་གིས་༼ རྡ་དུ་ར་བསྲེག་༽གསོད། །༼དུར་ཁྲོད་ཀྱི་སོ་ཕག་གིས་༽དམར་པོས་དབང་དུ་འགྱུར་བ་སྟེ།༼མངར་༣་བསྲེག༽ །འཕྲལ་དུ་ངེས་པར་འགུགས་པར་འགྱུར། །༼ལྡོང་རོས་སམ་བ་བླས་༽སེར་པོ་ཐམས་ཅད་༼དཔུང་པ་ལ་སོགས་པ་རེངས་པ་༽གནོན་པ་སྟེ༼གཟུགས་བསྙན་བསྲེག༽། །༼རྒྱུད་འདིར་ངེས་པ་༽འདི་ནི་བསྟན་བཅོས་༼སུ་༽ངེས་པ་ཡིན། །༼ས་གཉིས་༽སེར་པོས་དཔུང་ནི་གནོན་པ་དང་། །གྲུ་དང་འཁྲུལ་འཁོར་༼ཐམས་ཅད་མི་འགུལ་༽གླང་པོ་གནོན། །དཀར་པོ་བསམས་པ་ཙམ་གྱིས་ནི། ༼དེར་མ་ཟད་གྲུ་བ་ལ་སོགས་པ་ཡང་འགྲོ་༽ །འཆི་བ་ངེས་པར་སློང་པར་འགྱུར། སྦྲུལ་ཆེན་བརྒྱ་ཡིས་ཟིན་ནས་ནི། །འཆི་བ་༼རང་འགྱུར་བ་དེ་ཡང་༽མྱུར་དུ་སློང་བར་འགྱུར་༼ལག་པས་རེག་པ་དང་འཁོར་ལོ་བཀྲུས་པའི་ཆུ་འཐུང་ན༽། །དུག་གིས་བརྒྱལ་བར་གྱུར་བ་དག །གསལ་བར་བྱས་ན་ཟད་པར་འགྱུར། །རིམས་༼རིམས་ཞི་བར་བྱ་བ་༽དང་གདོན་༼ལ་སོགས་པ་ཞི་བར་བྱ་བ་༽དང་བརྗེ་བྱེད་ནི། །༼འཁོར་ལོ་དང་ལྡན་པའི་༽ལག་པ་མཐོང་བ༼འམ་རེག་པ༽ས་འཇིགས་༼བདུད་དུ་འགྲོ་༽པར་འགྱུར། །༼རྒྱན་རྒྱལ་བར་བྱ་བ་༽རྒྱན་པོར་༼ནོར་ལ་རྒྱལ་པོ་དགེ་བ་༽ཁུ་ཚུར་བཅིངས་ནས་ནི། །༼ཡི་གེ་བདུན་༽ཡིད་ལ་རྟག་ཏུ་ཟློས་བྱེད་ན། །ཇི་སྲིད་ཁུ་ཚུར་མ་བཀྲོལ་བར། །༼བྱ་བ་ཟེར་ རྫས་༽རེངས་པ་ཐམས་ཅད་༼རྒྱན་རྒྱལ་བར་འགྱུར་༽འགྲུབ་པར་འགྱུར་༼བདག་དགྲ་ལས་རྒྱལ་བར་བྱ་ སྔགས་ཀྱི་བཟླས་པ་༢་ཀྱིས་༽། །༼རྒྱན་དང་དོ་བྲལ་ཐོབ་ ཡང་༽དགྲ་བོ་༼ལས་རྒྱལ་བར་བྱ་༽གལ་ཏེ་ལག་ན་ནི། །མཚོན་ཆ་སྣ་ཚོགས་འཕྱར་བ་ཡང་། །ཇི་སྲིད་༼ལག་པ་གཡོན་པ་ཙཀྲ་དང་ལྡན་པའི་ལག་པ་དེ་༽ཁུ་ཚུར་མ་བཀྲོལ་བར། །༼ཕ་རོལ་པོས་༽མཚོན་ཆ་གཏོང་བར་མི་ནུས་སོ། །༼མང་པོ་བརྗོད་མི་དགོས་ཏེ་མདོར་ན་༽ཡང་ན་༼ཅི་འདོད་པའི་༽བྱ་བ་ཐམས་ཅད་ནི། །༼ཡི་གེ་བདུན་པ་དང་དེའི་འཁོར་ལོས་༽ཇི་བཞིན་ཉིད་དུ་སྒྲུབ་པར་བྱེད། །༼ཤིང་གི་ཟས་སོགས་ཅི་བདེར་བསྒྲུབ་པ་༽འབྲས་བུ་༼དང་༽མེ་ག་༼དང་༽འདབ་མ་དང་། །སོ་རྩི་༼དང་༽དེ་བཞིན་ཟས་རྣམས་ལ། །༼འདོད་ན་ཐོད་པའི་སྣོད་དུ་དྷ་ཟས་གང་འདོད་པའི་བག་ཙམ་བཞག་སྟེ་དེ་ནས་ལྷའི་རྣལ་འབྱོར་དང་ལྡན་པས་དེ་དག་འོངས་པར་བསྒྲུབས་ན་འགྲུབ་༽ལུས་ཀྱི་སྦྱོར་བ་༼རབ་༽དང་པོ་སྟེ། །དེ་བཞིན་གཉིས་པ་༼འབྲིང་༽ནུས་པ་ཡིན། །གསུམ་པ་༼ཐ་མ་༽དག་ནི་ཕྱི་ཡི་ཉིད། །བཞི་བ་༼རབ་འབྲིང་ཐ་མ་༣་ ཐ་མ་འཁྲུལ་འཁོར་དང་༣་བཅས་སྟེ་སྤེལ་ཚིག་དང་བཅས་པ་བཀོད་པས་ ན་གཾ་༢་སམ་༣་གྱིས་ངེས་པ་མེད་པར་འགྲུབ་པ་༽ཡི་ནི་དམིགས་པ་མེད། །༼བདུན་པ་༽སྔགས་ཀྱི་རྒྱལ་པོ་འགྲུབ་པར་འགྱུར། །ས་གཞི་ཤིང་དང་བཅས་པ་དང་། །༼ཡང་སྔགས་བཟླས་ཤིང་སྔགས་ཀྱི་རྡུལ་ཕྲ་རབ་ཀྱིས་རྒྱ་མཚོ་ཁྱབ་པར་བསམས་ན་༽རྒྱ་མཚོ་༼ཅེས་ནི་རྒྱ་མཚོའི་སྟེང་་་་་་་་་་བར་མི་འབྱིང་བར་འགྲོ་བའོ་༽སྐྱེ་རགས་བཏགས་པ་ཡང་༼མི་འཕྱོང་པར་ལམ་་་་བྲོང་གིས་འོང༽། །དེ་ལ་ངེས་པར་༼ཇི་ལྟར་འདོད་པ་ལྟར་༽འགྲུབ་པ་ནི། །འགྱུར་བར་འདི་ནི་ཐེ་ཚོམ་མེད། །ཁམས་གསུམ་༼སེམས་ཅན་༽རྒྱུ་དང་༼ཤིང་ལ་སོགས་པ་༽མི་རྒྱུ་བ། །སྨོད་འདེབས་༼འཆི་བའམ་འཆག་པ་ལ་སོགས་པར་སླར་འཚོ་བ་དང་འབྲས་བུ་དང་ལྡན་པ་ལ་སོགས་པར་༽ཕན་འདོགས་ནུས་པ་ཡིན། དཔལ་འཁོར་ལོ་སྡོམ་པ་ལས་ཉེ་བའི་སྙིང་པོའི་༼རྩ་སྔགས་དང་སུཾ་བྷ་ནིའི་སྔགས་ཀྱིས་བསྲུང་བ་སྔོན་དུ་སོང་བས་༽ལས་བསྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་གསུམ་པའོ། །༼བསྲུང་བའི་བུའི་གསང་བ་དངོས་གོ་ཆ་དང་ཡི་གེ་བདུན་པ་གཉིས་ཀྱི་ལས་བསྒྲུབ་པ་བསྟན་༽དེ་ནས་ཕོ་ཉ་རྙེད་ན་ནི། །ཡི་གེ་༼གོང་དུ་བསྟན་པ་ལྟ་བུའི་རྐྱང་མ་སྙེན་པ་ཡི་གེ་བདུན་པ་་་་་་་་་་བྱས་པ་ སླར་བསོ་བ་རྗེས་སུ་བཟུང་བ་སྟེ་ལག་པ་ལ་ཙན་དན་དཀར་པོ་དང་གུར་གུཾ་དང་གི་ཝཾ་ལ་སོགས་པ་ལ་ཙཀྲ་བྲིས་སྟེ་སྔགས་བཟློས་ཤིང་དེའི་ལུས་ལ་རེག་ན་ སྔོན་དུ་སྙེན་པ་སོང་བས་ལག་པ་གཡོན་པར་ཙན་དན་ལ་སོགས་པས་ཙཀྲ་བྲིས་ཏེ་སྔགས་སྤེལ་ཚིག་དང་བཅས་པ་བྲིས་བཀོད་ནས་ཕར་བ་མ་ཕྱེ་བར་བྱ་༽བདུན་པར་ལྡན་༼དོན་དྲུག་ལས་དང་པོ་ཙཀྲ་༽བསྒྲུབ་པ། །གང་དུ་ལས་ནི་ཡང་དག་རྩོམ། །དེ་ཡི་ལས་ནི་༼རྟེན་འབྲེལ་གྱི་མཐུས་༽མྱུར་འགྲུབ་༼གཡོན་པ་༽བཤད། །༼འཁོར་ལོའི་ཕྱིའི་རྩིས་་་་་ལ་༽དེ་བཞིན་དུ་ནི་ཡི་གེ་བདུན། །༼བྲི་བའི་གཞི་ དགུ་རྩེགས་ཀྱི་དབུས་སུ་རྒྱ་སྐེག་ལ་སོགས་ཀྱིས་༽ལག་པའི་དབུས་སུ་༼སྣ་ཚོགས་་་་་་་་སོན་རྩི་༽རྣམ་པར་དགོད། །རྣལ་འབྱོར་མ་༼སྙེན་པ་ཡི་གེ་བདུན་པ་་་་་སོང་ནས་༽ནི་དྲུག་༼ནང་གི་འདབ་མ་ལྔ་ལྟེ་བ་དང་དྲུག་ལ་༽ཡང་དག་༼གི་སྔགས་༽ །༼ཕྱི་རོལ་དུ་༽རྩིབས་དྲུག་འཁོར་ལོར་ཡང་དག་གནས༼ཨོཾ་བཾ་ལ་བསྐོར་་་ཉེ་སྙིང༽། །གཡོན་པའི་འཁོར་ལོ་༼དབུས་སུ་བསྒྲུབ་བྱའི་མིང་བསྐུལ་ཚིག་དང་བཅས་པ་༽བསྐུལ་༼ཨོཾ་བཾ་གི་མཐའ་མ་ནས་ཆེ་གེ་མོ་ཨ་ཀར་ཥ་ཡ་ཛ་ཅེས་པ་བྲི་༽དང་གནས། །༼གཉིས་པ་ཙཀྲ་དགུག་པ་༽གང་གི་༼དགུག་རྒྱུ་༽གཟུགས་འཛིན་བསམ་ནས་ནི༼རྐང་རྗེས་ཀྱི་རྡུལ་ལ་སོགས་པ་ལས་ལང་ཀ་བྱས་ལ༽། །ཁ་ནས་༼ཡི་གེ་༧་ལ་སྙེན་པ་སོང་ནས་༽གསང་སྔགས་རྒྱལ་བོ་༼དཔའ་བོ་གོ་ཆའི་སྔགས་༽ཟློས། །འགུག་རྒྱུ་གང་ལ་ལག་པ་དེ་བསྟན་ན།༼ འཁོར་ལོའི་ཕྱིར་འདབ་མ་དྲུག་ལ་་་་་་་་གསུམ་ཕྲུགས་སུ་སྦྱར་བ་འགུགས་པ་འཁོར་ལོ་དང་ལྡན་པའི༽ །དེས་ནི་༼ཐེ་ཚོམ་མེད་པར་༽ངེས་པར་༼ལྷའི་བུ་མོ་ལ་སོགས་པ་༽འགུགས་པར་འགྱུར། །༼གཞན་ཡང་༣་པ་སྦྱིན་སྲེག་གིས་ས་བདག་ནོར་བཅས་འགུག་པ་༽ཙན་དན་དམར་པོའི་རྡུལ་དང་༼ཙཀྲ་དང་ལྡན་པའི་ལག་པས་༽ནི་༼བསྲེག་རྫས༽། །སྐྱེ་ཚེ་དེ་བཞིན་ལན་ཚྭ་དང་། །བསྒྲུབ་པར་བྱ་བའི་རྐང་རྗེས་ས། །༼རྫས་༤་བོ་༽གཅིག་ཏུ་བསྡུས་ནས་༼བསྲེག་རྫས་སུ་༽བཏག་པར་༼རྫས་ཚང་བར་་་པ་༽བྱ། །ལག་པ་གཉིས་ཀྱིས་༼ལག་པ་གཉིས་ལ་ཙཀྲ་གོང་མ་བཀོད་༽མཉེས་ནས་ནི། ༼དྲུག་གི་སྔགས་ཀྱིས་སྤེལ་ཚིག་དང་བཅས་པ་༽ །རྣལ་འབྱོར་མ་ཡི་སྦྱིན་བསྲེག་བྱ། །༼དུས་༽མཚན་མོ་༼ཐབ་ཟླ་གམ་མམ་ལྕགས་སྐྱུ་ལྟ་བུ་བྲིས་ལ་བསྲེགས་པའི་ཆོག་གསུང་༽སྨེ་ཤ་ཅན་༼ཤན་པའི་༽མེའམ། །དུར་ཁྲོད་༼སྔར་གྱི་༽མེ་ལ་ཕྱེ་མ་༼བསྲེག་རྫས་༽བསྲེག །༼དབང་དུ་བྱ་རྒྱུ་ཆོ་གའི་ཁྱད་པར་༽བསྒྲུབ་པར་བྱ་ལ་མངོན་བསྲེས་ཏེ། །༼ནང་ན་གནས་པའི་ཕྱོགས་སུ་ཁ་བལྟས་ཏེ་དགུག་པའི་ལས་༽སྦྱོར་བ་༼དབང་པོ་ཐ་ཤལ་གྱིས་བསམ་གཏན་ལ་སོགས་པ་བཞིའི་་ས་འགྲུབ་པའོ༽འདི་ནི་བརྩམ་པར་བྱ། །༼བསྲེག་ལུགས་ཀྱི་གྲངས་གོ་ཆའི་སྔགས་སྔོན་དུ་སྙེན་པ་སོང་བའི་དབང་དུ་བྱས་པ་༽ཇི་སྲིད་བརྒྱ་ཡི་བར་དུ་བཟླས་༼ཏེ་སྦྱིན་སྲེག་བྱས་ན༽། །དེ་ནི་ངེས་པར་འགུགས་པར་འགྱུར་༼ཏེ༽། །༼ར་ཛའི་༽ས་ཡི་བདག་པོ་བདག་ཉིད་དང་། །༼དེའི་༽ནོར་ཡང་དབང་དུ་འགྱུར་བ་ཡིན། །སྦྱོར་བ་འདི་ནི་འགྲུབ་པར་༼འགྱུར་ཏེ་ཟེར་༽བསྐྱེད། །གཞན་དག་ཏུ་༼མི་འགྲུབ་པར་༽ནི་ང་མི་སྨྲ། ༼བཞི་བ་མནན་པའི་ལས་ཀྱི་གསང་བའི་ལས་ཙན་དན་དམར་པོ་རྡུལ་ལ་སོགས་པ་བཞི་༽ །རྡུལ་༼ལས་གཞན་སྡ་པའི་ལས་བསྟན་༽དེ་ཉིད་ནི་བླང་ནས་སུ། །ལྕགས་ཕྱེ་དང་ནི་རྣམ་པར་བསྲེ་༼དེ༽། །༼བསྒྲུབ་པ་པོས་དབུགས་ཕྱིར་མ་ཤོར་བར་༽དུར་ཁྲོད་རས་ལ་༼འཁོར་དང་ལྡན་པས་༽བཏུམས་ནས་ནི། །༼གོ་ཆའི་སྔགས་མ་ར་ཡ་དང་བཅས་པ་༽ལན་བདུན་བཟླས་ནས་༼ལམ་གྱི་༽བཞི་མདོ་རུ། །སོར་བརྒྱད་ཙམ་དུ་བརྐོས་ནས་ནི། །༼ལིང་ཀ་བྲིས་པ་དེ་ཡང་འདིར་བཅུག་ལ་༽དགྲ་ཡི་མིང་དང་བཅས་པ་ནི༼སྟཾ་པ་ཡ༽། །གང་གི་མིང་སྨོས་༼གཞན་པའི་ལས་༽སྦས་འགྱུར་བ། །༼དངོས་ལུས་རེངས་བུས་ ༽དེ་ནི་མྱུར་དུ་༼འདི་འཆི་བར་འགྱུར་གསུང་༽གནོན་པར་འགྱུར་༼རྗེས་བཟུང་གི་ལས་ལྔ་བའམ༽། །ཕྱེ་མ་ཉིད་ནི་བདས་ནས་ནི། །༼དག་པའམ་གཙང་བ་བྱ་བའམ་མི་གཙང་བ་མི་ཟ་བ་༽འབད་དེ་བ་ཡི་འོ་མ་༼གཙང་ཟེར༽་དང་། ༼ཙན་དན་དམར་པོ་ལ་སོགས་པ་སྔར་གྱི་བཞི་བོ་ལྤགས་ཕྱེ་དང་བཅས་བཏུམས་པའི་ས་གཏོར་ཞིང་སྔགས་བཟླས་པས༽ །དེར་ནི་སླར་ཡང་༼མནན་པ་དེ་སྟོན་ཏེ་༽གསོས་གྱུར་ན་༼པའི་བསམ་པས༽། །འགྲུབ་པ་ཉིད་དུ་ཐེ་ཚོམ་མེད། ༼དྲུག་པ་སྨྱོ་བ་རྗེས་བཟུང་དང་བཅས་པ་༽ །༼རྫས་བཞི་པོ་༽ཕྱེ་མ་དེ་ནི་བླངས་ནས་ནི༼གཞན་སྨྱོ་བའི་ལས་༽། །མྱོས་བྱེད་ལྔ་དང་༼དབྱུག་ ་་ཡང་ན་་་་་རྩ་བ་་འདབ་མ་ཤུན་པ་མེ་ཏོག་འབྲས་བུ་ལྔ་༽ལྡན་པས་སུ༼བསྲེས་སྟེ༽ ། ༼དབུགས་ཕྱིར་མ་ཤོར་བར་༽ །དེ་ནི་དུར་ཁྲོད་རས་ཀྱིས་བཅིངས། ༼ བྱང་ད་ལིང་ཀ་ཡང་བྱས་ལ་གསུང༽ །༼ཙཀྲ་དང་ལྡན་པའི་དགྲ་ལག་པས་༽དགྲ་ཡི་མིང་ཡང་༼ཆེ་གེ་མོ་སྨྱོ་བར་གྱུར་ཅིག༽་བཅིང་བར་བྱ། །༼སྙེན་པ་སོང་བས་གོ་ཆའི་སྔགས་སྤེལ་ཚིག་དང་བཅས་པས་༽བཟླས་བརྗོད་ལན་བརྒྱ་བྱས་ནས་ནི། །དུར་ཁྲོད་དུ་ནི་མྱུར་སྦས་ན། །འཕྲལ་དུ་སྨྱོ་བ་ཉིད་དུ་འགྱུར། །༼རྗེས་བཟུང་༽བཏོན་པ་ཉིད་ཀྱིས་༼མནན་པ་ལས་༽ཐར་བར་འགྱུར་༼ཏེ༽། །༼དུར་ཁྲོ་རས་ལ་བཏུམས་པ་དེ་གཏོར་ན་༽བཏོན་ནས་གོས་དང་ཕྲལ་ནས་ནི། །འབད་དེ་བ་ཡི་འོ་མ་དང་། ༼ ས་གཏོར་ཞིང་སྔགས་བཟླས་ན༽ །སླར་ཡང་གསོ་བར་བྱེད་པ་དང་། །འགྲུབ་པར་འདི་ལ་ཐེ་ཚོམ་མེད། དཔལ་འཁོར་ལོ་སྡོམ་པ་ལས་༼ལས་སྦྱོར་གྱི་དུས་སུ་མེ་ཏོག་མང་བ་ཡོད་ཀྱང་༽རྣལ་འབྱོར་མ་དྲུག་དང་ཡིག་བདུན་གྱི་ལས་ཀྱི་ཆོ་གའི་ལེའུ་སྟེ་བཞི་བཅུ་རྩ་བཞི་པའོ། །༼འདི་ཡང་གོ་ཆ་མའི་རྣལ་འབྱོར་མའི་ལས་དང་པོ་བསྒྲུབ་པའོ༽་དེ་ནས་ལས་ཀྱི་རབ་མཆོག་ནི། །༼ཚིག་བཅད་རྩོམ་པའི་༽ངག་གི་དངོས་གྲུབ་༼ སྤྱིར་ངག་གི་དབང་ཕྱུག་ཆེ་འབྲིང་གསུམ་ལས་ཆེན་པོ་ནི་ལོ་ཀ་འདི་ སྟོང་ཤིག་བྱས་ན་སྟོངས། ཆགས་ཤིག་བྱས་ན་ཆགས་པའོ། འབྲིང་པོ་ནི་བདག་ཉིད་ཀྱི་འདོད་པའི་དོན་གང་ཡིན་པ་ངག་ཏུ་བརྗོད་པ་ཙམ་གྱིས་འགྲུབ་པའོ། ཆུང་ངུ་ནི་ཤེས་རབ་ཆེན་པོར་འགྱུར་བའོ་གསུང་༽སྒྲུབ་བྱེད་པའོ། །ཀ་ར་བི་རའི་མེ་ཏོག་དམར་༼དམར་པོའོ༽། །བརྒྱ་རྩ་བརྒྱད་༼ལ་སོགས་པ་༽ནི་བླངས་ནས་སུ། །༼བརྒྱ་རྩ་བརྒྱད་བཟླས་ཏེ་༽འབད་དེ་༼དེ་ནས་་་་་་དེ་༽བ་ཡི་འོ་མས་བཀྲུ༼་ཞིང་བའི་འོ་མའི་ནང་ནས་གདོན༽། །༼གོ་ཆའི་སྔགས་བཟླས་ཟིན་པའི་གཏིང་ལ་ཡང་༽བཟླས་བརྗོད་༼འོ་མས་ཁྲུད་པའི་བར་ལ་སྔགས་བརྒྱ་རྩ་བརྒྱད་བཟློས་པར་སེམ་༽བརྒྱ་དང་བྱ་བ་ཡིན། །༼དེ་ནས་ཞག་བདུན་ཐུན་དུ་གཅོད་བཟླས་པ་ཡང་ན་ཞག་གཅིག་༽ལན་བདུན་༼ཞག་བདུན་དུ་༽བཟླས་པའི་མེ་ཏོག་གིས། །ལིང་ཀའི་སྤྱི་བོར་༼དབང་ཕྱུག་ཆེན་པོའི་ལྷ་བརྟེན་དབང་ཕྱུག་ཆེན་པོའི་ཕོ་མཚན་གྱིས་༽བསྣུན་པར་༼རྟེན་འབྲེལ་གྱི་སྨན་མར་གཏོང་པ་༽བྱ། །དེ་ལྟར་ཤིན་ཏུ་༼ལྷའི་རྣལ་འབྱོར་ལ་༽མཉམ་བཞག་པས། །ཉི་མ་བདུན་དུ་བྱ་བ་ཡིན་༼དེ་ནས་མེ་ཏོག་དེ་དག་བ་གཙང་མའི་འོ་མས་བཀྲུས་ཏེ་ཞག་གསུམ་དུ་ཚོགས་ཀྱི་འཁོར་ལོ་བྱ་དེ་ལྟར་ཞག་བཅུ༽། །དེ་ལྟར་ཉིན་ཞག་བཅུ་གཅིག་༼གི་ཚེ་ལས་སྦྱོར་བ་བྱ་སྟེ་༽ལ། །མེ་ཏོག་དག་ནི་བླངས་ནས་སུ། །༼དལ་བར་འབབ་པ་ན་༽ཆུ་བོ་ཆེན་པོར་སོང་ནས་ནི། །༼མེ་ཏོག་༽རེ་རེ་ནས་༼ཨོཾ་བཾ་སོགས་བཟླས་ཀྱིན་༽ནི་ཆུ་ལ་དོར། །དེ་ནས་ཐམས་ཅད་རིམ་བཞིན་དུ། །༼དེའི་དུས་སུ་བསྒྲུབ་གཡོག་གིས་རལ་གྲི་ཐོགས་སུཾ་བྷ་ནི་བཟློས་ཤིང་བར་ཆད་བསྲུང་ངོ་༽ལན་རེ་༼ཨོཾ་བཾ་ལ་སོགས་པ་༽བཟླས་ནས་༼དོར་༽རབ་ཏུ་སྦྱར། །ཆུ་བོར་མེ་ཏོག་༼དོར་བ་དང་༽མཐའ་མར་༼འདི་དུས་སུ་ནི་༽ནི། །རྒྱུན་ལས་༼ཡར་གྱེན་ལ་༽བཟློག་ཏེ་རབ་འབབ་ན། །ཆུ་དང་བཅས་པར་༼ལན་༣་པ་གཉིས་ལོ་ཀ་ན་སྔོན་མ་ལ་ངག་གི་སི་ཏི་ཆེན་པོ་བར་མ་ལ་འབྲིང་ཐ་མ་ལ་ཆུང་ངུའོ་གསུང་གྱེན་ལ་ལག་པའི་རྩེ་སྙིམ་པས་མེ་ཏོག་༽བླངས་ནས་ནི། །སོས་༼མེ་ཏོག་ལ་༽མ་རེག་པར་༼ཆུ་ཉིན་མཚན་གཉིས་ཀ་ལ་༽དེ་འཐུངས་ན། །༼ནམ་མཁའ་དང་མཉམ་པའི་༽གསང་བའི་རྒྱུད་ལས་འབྱུང་བ་ཡི༼་དེ་དག་གིས་ཀྱང་༽། །བསྒྲུབ་པོའི་ཚིག་༼ངག་གི་སི་ཏི་༽ནི་འགྲུབ་པར་འགྱུར། །དེ་ནས་༼གཞན་གཉིས་པ་ཡང་འགུགས་པ་འདིར་ཡང་སྙེན་པ་སྔོན་དུ་སོང་བས་བྱ་༽སྐྱེ་གནས་༼གྲོ་ག་ལ་སོགས་པ་ལ་དུར་ཁྲོད་ཀྱི་་་་ན་ཙི་ལ་སོགས་པས་རྣལ་འབྱོར་མ་དྲུག་འབའ་ཞིག་པའི་འཁོར་ལོར་བྲིས་ཏེ་རབ་གནས་ཀྱང་བྱས་ལ་དེ་ནས་བསྒྲུབ་བྱའི་རྐང་རྗེས་ཀྱི་ས་ལས་ལིང་ཀ་བྱས་ལ་འཁོར་ལོར་སྙིང་ཁར་བཅུག་སྟེ་དེ་ནས་དེའི་སྐྱེ་གནས་ནས་སྐུད་པ་དམར་པོ་གཅིག་གཏོན་ལ་དེ་རང་གིས་མཐེ་ཆུང་ལ་དཀྲིས་སྟེ་བསྐུལ་ཞིང་སྔགས་བཟླས་༽བརྒྱ་༼བསྒྲུབ་བྱ་དུ་མ་༽བཅིངས་ལ་༼ལིང་ཀའི་སྐྱེ་གནས་སྐུད་པས་བཅིངས་ལ༽། །སྔགས་པས་༼བསྒྲུབ་པའི་ལིང་ཀ་ལ་༽བསྒྲུབ་བྱར་མངོན་ཕྱོགས་ན། །༼དཔའ་བོའི་གོ་ཆ་སྤེལ་ཚིག་དང་བཅས་པ་བསྐུལ་ཞིང་སྔགས་བཟླས་༽བརྒྱ་རྩ་བརྒྱད་དུ་བཟླས་ནས་ནི། །བསྒྲུབ་པར་བྱ་བའི་ལྟོ་བར་གནས་༼འཁོར་ལོ་གནས་སོ༽། །དེ་ནས་ཡིད་ནི་གནས་བཞིན་དུ་༼མཉམ་པར་བཞག་པ༽། །བློ་ལྡན་ཐུན་གསུམ་མཐེ་ཆུང་༼ལ་སྐུད་པའི་སྣེ་དཀྲིས་སྟེ་༽བསྐྱོད། །༼སྔར་༽བྲམ་ཟེ་གསོད་པའང་ཞག་བདུན་གྱིས། ༼ ཆོས་དང་ལྡན་པ་སྨོས་ཅི་དགོས་༽ །བརྒྱ་བྱིན་ཡང་ནི་ངེས་པར་འགུགས། །༼ཡང་ཡང་འགུགས་པ་༣་པ་༽ཙན་དན་དམར་པོ༼་དང་བསྒྲུབ་བྱའི་རྐང་རྗེས་ལ་༽འི་རྡུལ་ལས་ནི། །༼འགུགས་པར་བྱ་རྒྱུ་དེ་༽བསྒྲུབ་པར་བྱ་བའི་གཟུགས་བྱས་ལ། །༼སྒ་པི་པི་ལིཾ་ཕོ་བ་རིས་༽ཚ་བ་གསུམ་གྱིས་ལུས་ལ་བསྐུ། །༼དེའི་སྟེང་དུ་༽སྤྲ་ཚིལ་གྱིས་ནི་རབ་ཏུ་བྱུག་༼གཡོག༽ །བསྒྲུབ་པ་པོ་ཡི་༼ཡང་ན་མཚན་མ་དང་ལིང་ཀའི་དེའི་སྙིང་ཁར་གསུང་༽གསང་གནས་སུ། །༼འཁོར་ལོ་སྙིང་ཀར་གཞུག་༽ཟངས་མའི་ཁབ་ཀྱིས་ཕུག་ནས་སུ། །སེང་ལྡེང་མདག་མ་དུ་མེད་ལ། །ལན་བརྒྱ་བཟླས་ཏེ་༼དཔའ་བོའི་གོ་ཆ་སྤེལ་ཚིག་དང་བཅས་པ་ཤ་ཚིལ་ཞུ་ཞུ་རུ་༽སྲོས་ནས་སུ། །རྒྱ་པོ་བློན་པོ་༼རྒྱལ་པོའི་༽མདུན་ན་འདོན་༼དང་བྲཾ་ཟེ་ཤིས་པ་འདོན་པ༽། །༼གཞན་ཡང་༽ཆུང་མ་འཁོར་དང་བཅས་པ་རྣམས། །མྱུར་དུ་འགུགས་༼ནས་ལ་བྱེད་དུ་འཇུག་༽པར་བྱེད་པ་ཡིན། ༼རྒྱལ་པོ་་གཞན་ཡང་དགུག་པ་བཞི་བ་༽ །མི་ཡི་བདག་པོ་འཁོར་༼དང་༽བཅས་༼པ་༽ནི། །གྲོ་གའི་འདབ་མར་༼དཔའ་མོའི་གོ་ཆའི་འཁོར་ལོའི་ལྟེ་བར་སྤེལ་ཚིག་དང་བཅས་པ་བྲིས་སྟེ་༽བྲིས་པའམ། །༼སྣག་ཚ་༽དུར་ཁྲོད་རས་ལ་སེན་རྩི་༼རྒྱ་སྐེག་དང༽་དང་། གྷི་ཧཾ་དག་གིས་བྲིས་ནས་ནི། ༼རྐང་རྗེས་རྡུལ་ལ་ལིང་ཀ་བྱས་ལ་དེའི་སྙིང་ཁར་ཙཀྲ་བཅུག་ལ་ལིང་ཀ་དེ་ཡང་་སྲ་ཚིལ་གྱིས་གཡོག༽ །མིང་དང་སྤེལ་ནས་གང་ལ་ནི། ༼བསྒྲུབ་བྱ་གང་ན་གནས་པར༽ །མངོན་པར་ཕྱོགས་ཏེ་༼དཔའ་མོའི་གོ་ཆ་༽བརྒྱ་བཟླས་ནས། །དུར་ཁྲོད་མེ་ལ་༼སྲ་ཚིལ་ཞུ་ཞུ་ཙམ་༽དེ་གདུངས་ན། །༼དགུག་པ་༽དུར་ཁྲོད་མེ་དེ་འགྲུབ་ཕྱིར་༼དེ་ལ་གདུང་པར་༽བཤད། །ཇི་སྲིད་སྤྲ་ཚིལ་མ་༼མ་ཐིགས་པར་༽ཞུ་བར། །བསྲོས་པར་གྱུར་ན་རྒྱལ་བོ་ནི། །འཁོར་ལོ་བསྒྱུར་དང་བཅས་པ་ཡང་། །ངེས་པར་འགུགས་པར་འགྱུར་བ་ཡིན། །༼གཞན་ཡང་༽བསྒྲུབ་པར་བྱ་བའི་༼ལྔ་བ་སྦྱིན་སྲེག་གི་ལས་བསྒྲུབ་པ་༽རྐང་རྗེས་ས། །ཙན་དན་དམར་པོ་ཉིད་དང་ནི། །དུར་ཁྲོད་ཐལ་བར་བསྲེས་པ་རྣམས། །བསྒྲུབ་པ་པོ་ཡིས་གཅིག་བསྡུས་༼པ་ཙམ་ལས་ལིང་ཀ་བྱ་མི་དགོས་༽ལ། །སེང་ལྡེང་མེ་ནི་དུ་མེད་ལ། །རྡུལ་དེ་༼ཙཀྲ་དང་ལྡན་པའི་ལག་པ་༢་༽ལག་པ་གཉིས་ཀྱིས་ནི། །མཉེས་ལ་སྦྱིན་བསྲེག་བྱས་ནས་ནི། །ཇི་སྲིད་༼ཕྱེ་མ་༽ཐམས་ཅད་བསྲེགས་པས་འགྲུབ། ༼ ཐབ་དང་མེ་ལྷ་ལ་སོགས་པ་ཐམས་ཅད་སྦྱིན་སྲེག་གི་ཆོ་ག་ལས་ཤེས་པར་བྱ་༽ །༼ཕྱེ་མ་དེ་རྣམས་བླང་ལ། ཞི་བ་ལ་སོགས་པའི་ལས་ཐམས་ཅད་གོ་ཆའི་སྔགས་བརྗོད་ཅིང་བསྲེག་པ་ཉིད་ཀྱིས༽༼ལ་ལ་མེ་གསུང་༽རྡུལ་དེ་བླངས་ནས་མ་ཡེངས་པར། །དབུགས་མ་འབྱིན་པར་སྦས་ནས་ནི། །བརྒྱལ་ཞིང་སེམས་ནི་བྲལ་འདྲ་ལ། །རྨོངས་ཤིང་སེམས་ནི་ཉོན་མོངས་ལ། །རླུང་གི་ཤུགས་ཀྱིས་འོངས་ནས་ནི། །བསྒྲུབ་པ་པོ་ཡི་སྟེང་དུ་ལྷུང་༼སྟེ་སྟེང་ངམ་གམ་དུ་འདི་ཡང་ལྷ་ཡབ་ཡུམ་གྱི་ང་རྒྱལ་དང་ལྡན་པས་སྔོན་དུ་སྙེན་པ་སོང་བ་༡་གིས༽། །༼སྐྱེས་པ་༽ཕྱུགས་སམ་ཡང་ན་ཕོ་ཉ་མོ༼རྐྱང་མ༽། །དེ་ནས་ལས་ཀྱི་ཕོ་ཉ་མོར་༼དབང་དུ་བྱ་བ༽། །བྱ་བ་འདི་ནི་འཛིན་པར་འགྱུར། །༼དྲུག་པ་མནན་པའི་ལས་ཀྱིས་དབང་དུ་བྱ་བའམ་དགུག་པ་༽ཀ་ར་བི་རའི་ལྕུག་མ་ནི། །རླན་བཅས་༼སྦོམ་ཕྲའི་ཚད་༽དཔུང་བའི་ཚད་མཉམ་བླངས། ༼དེ་ལ་དཔའ་མོའི་གོ་ཆའི་སྔགས་ཚར་༣་བྲིས་ལ་དེ་དག་བཟའ་མི་དུས་༡་ཤི་བའི་རོ་བསྲེགས་པའི་མེ་ལ་བསྲོ། དེ་ནས་༽ །འབར་གྱུར་རོ་བསྲེག་མེ་ལ་དོར། །ཇི་སྲིད་དེ་ནི་མ་ཚིག་པར། །མྱུར་དུ་སོང་ཏེ་དེ་བླངས་ནས། །༼དཔའ་མོའི་གོ་ཆ་༽རིག་པ་ལན་བདུན་༼སྔགས་སྤེལ་ཚིག་དང་བཅས་པ་༽བཟླས་ནས་ནི། །གང་ཞིག་བཟླས་ཏེ་༼ལག་པ་༽བསྐོར་ན་ནི། །དེ་ནི་དེ་ཡི་སྐད་ཅིག་ལ། །བུད་མེད་དང་ནི་སྐྱེས་པ་དག ༼བདུན་པ་དབང་དུ་བྱ་བའི་སྦྱོར་བ་གཞན་༽ །རླུང་གི་ཤུགས་ཀྱིས་༼ལག་པས་སྐོར་བ་ཙམ་གྱིས་༽འོངས་པར་འགྱུར།༼སྦྱོར་བ་གཞན་གདབ་དབང་་་་པ་ལས་བརྒྱད་སྙེན་པ་སྔོན་དུ་སོང་བ་ལ་སོགས་པ་ཐམས་ཅད་ལ་འདྲའོ༽ །ཀ་ར་བི་རའི་མེ་ཏོག་དམར་༼བ་ལ༽ །༼གནག་གི་དབང་ཕྱུག་ཆེན་པོ་སྟེ་བརྗོད་པ་ཙམ་གྱིས་འགྲུབ་པར་གསུང་༽ །༼དཔའ་མོའི་གོ་ཆ་༽བརྒྱ་བཟླས་༼སྐར་མ་༽རྒྱལ་གྱི་སྦྱོར་བ་ལས། །བསྒྲུབ་པོས་གྷིཧཾ་༼གིས་༽གོས་བྱུགས་ལ། །༼ བུ་ཞིག་ཞེས་བྱ་བ་ལ་སོགས་པ་༽མེ་ཏོག་༼ཀ་ར་བི་རའི་མེ་ཏོག་གཏོར་ཏེ་༽ཆུ་ལ་གནས་པ་དག།༼ཀ་ར་བི་རའི་མེ་ཏོག་གཏོར་བའི་༽ཆུ་བོ་ཆེན་པོ༼འི་ནང་དུ་༽ར་ཞུགས་ནས་ནི། །ལྟེ་བ་ནུབ་༼ཙམ་དུ་འདུག་༽པའི་བར་དུ་༼འདུག་ལ་༽ནི། །༼ཀ་ར་བི་རའི་མེ་ཏོག་ཆུ་ལ་བཞག་པ་དེ་༽ལག་པའི་སྦྱོར་བས་དབུས་༼སུ་བཞག་ལ་༽གནས་ལ། །༼དཔའ་མོའི་གོ་ཆ་སྤེལ་ཚིག་དང་བཅས་པ་༽རིག་པ་སྟོང་དུ་བཟླས་ནས་ནི། །ལག་པ་༼འཁོར་ལོ་དཔལ་ལྡན་པ་༽གཉིས་ཀྱིས་༼མེ་ཏོག་དེ་༽ཕྱེར་༤༤་་་་༧་་ སྤགས་ཏེ། །ཆུ་དང་བཅས་པ་བཏུང་བར་བྱ། །དེ་༼དེ་ཕྱིན་ཆད་༽ནས་བསྒྲུབ་པ་པོ་དེ་ཡིས། །ཚིག་༼ངག་གི་དབང་ཕྱུག་༽གི་དངོས་གྲུབ་ཐོབ་པར་འགྱུར། །༼ཇི་ལྟ་བུའི་ངག་འགྲུབ་ན༽རྒྱལ་པོའམ་རྒྱལ་པོའི་ཆུང་མ་ནི། །ཡིད་ཀྱིས་ངེས་པར་༼ཁུག་པ་ཞེས་བརྗོད་པས་དྲན་བས་༽འགུགས་པར་འགྱུར། །ལྷར་བཅས་ལྷ་མིན་མི་རྣམས་ནི། །མྱུར་དུ་༼སེམས་ལ་དབང་དུ་བྱེད་པར་འགྱུར་༽དབང་དུ་བྱེད་པར་འགྱུར། །༼སེམས་༽ཁྲོས་པས་ཚིག་གིས་༼སོང་ཞེས་པ་ཙམ་གྱིས་༽གསོད་པར་འགྱུར། །དབྱེ་དང་བསྐྲད་པ་ཉིད་ཀྱང་བྱེད། །བསྒྲུབ་པ་པོ་ཡི་༼སེམས་ལ་འདོད་ཅིང་༽ཚིག་ཉིད་ཀྱིས། །ཚར་གཅོད་པ་ཉིད་བྱེད་པར་འགྱུར། །༼གྱེན་ལ་བཟློག་ན་ཅེས་པ་༽ཚིག་ཙམ་གྱིས་ནི་ཆུ་བོ་དང་། །ཤིང་རྟ་༼འཆག་༽འཁྲུལ་འཁོར་༼འཆག་༽རྒྱ་མཚོ་༼སྐྱེམས་༽དང་། །གླང་པོ་རྟ་༼འཆི་༽དང་དེ་བཞིན་སྤྲིན་༼ཡང་འཐོར་༽། །སྐྱེས་བུ༼་རེངས་ནས་འགྲོ་བུད་མེད་ཀྱང་རེངས་ནས་འགྱུར་གསུང་༽འམ་ཡང་ན་བྱ་བ་གནོན་༼གཞན་གྱིས་གནོད་པར་སེམས༽། །ཡིད་ལ་གང་དང་གང་འདོད་པ་༼དང༽། །༼བརྗོད་པ་ཙམ་གྱིས་༽ཚིག་གིས་ཐམས་ཅད་༼འགྲུབ་༽བྱེད་པར་འགྱུར། །༼གཞན་ཡང་༽དེ་ནས་གཞན་གྱི་ལས་བཤད་པ། །དཔའ་བོ་ཆེན་པོ་༼ཞེས་བསྡུད་པ་པོས་གསུངས་པ་༽རང་ཉིད་གསུངས། །དགུག་པ་ཡི་ནི་སྦྱོར་བ་དག།༼ཤེས་པ་ཆགས་པའི་སྟོབས་ཀྱིས་༽བུད་མེད་ཐམས་ཅད་རྨོངས་བྱེད་པ། །༼ཉི་ཟླ་གཟས་ཟིན་པའི་དུས་སུ་བྱ་་་་ ཙན་ཏིའི་རྒྱུ་ཕྱག་༤་བ་བྱས་ལ་༽ཀ་ར་༼རྫས་༽བི་རའི་མེ་ཏོག་ནི། །དམར་པོ་ཡང་དག་བླངས་ནས་སུ། །རིག་པ་༼དཔའ་མོའི་གོ་ཆ་༽ལན་བདུན་བཟླས་པ་༼འི་ཀ་ར་བི་རའི་མེ་ཏོག་༽་དག །སྐྱེ་གནས་དབུས་སུ་༼ཙན་ཏི་ཀའི་རུ་པ་བྱས་པའི་མེ་ཏོག་གཉིས་ཀ་ར་བི་རའི་མེ་ཏོག་གཉིས་༽གཞུག་༼བཞག་༽པར་བྱ། །མེ་ཏོག་༼༢་པོ་༽དེ་ནི་༼༢་༽ཁ་སྦྱར་བྱས། །༼ཙན་ཏི་ཀའི་༽གསང་བའི་གནས་སུ་ངེས་པར་སྦྱར། །གཉིས་མེད་ཡེ་ཤེས་༼ལྷའི་རྣལ་འབྱོར་ལ་གནས་པའི་༽རྣལ་འབྱོར་ལྡན། །སྔགས་པས་བརྒྱ་ཕྲག་གཅིག་ཏུ་༼གོ་ཆའི་སྔགས་༽བཟླས། །སྐྱེ་གནས་དབུས་ནས་མེ་ཏོག་དེ་༼བཏོན་ཏེ༽། །བསྒྲུབ་པ་པོ་ཡིས་གཅིག་བླངས་ནས། །༼སྤེལ་ཚིག་དང་བཅས་པས་ཙན་ཏིའི་སྤྱི་བོར་བསྣུན་༽མེ་ཏོག་གིས་ནི་༼༡་བཅངས་པ་༽གང་བསྣུན་༼ཀྱང་༡་གིས་༽པ། །དེ་ཡི་མོད་ལ་དབང་དུ་འགྱུར། །༼ཆགས་པའི་དབང་གིས་༽བརྒྱལ་ཞིང་སེམས་དང་བྲལ་བ་དང་། །ཡན་ལག་ཚིགས་ཀུན་༼བསྒྲུབ་པ་པོ་༽གཞན་དབང་སྟེ། །༼བསྒྲུབ་པ་པོ་ལ་འཕྲལ་དུ་༽ཡིད་ཆེས་སེམས་ནི་འཇུག་པ་རུ་༼གྲུབ་པ་ཉེ་བ་ལ་དགོངས་པ༽། །སྐད་ཅིག་གིས་ནི་དབང་དུ་བྱེད། །འདི་ནི་༼ངེས་པར་༽མངོན་དུ་འགྲུབ་པ་སྟེ། །དོན་ཡོད་དབང་དུ་བྱེད་པ་ཡིན།དཔལ་འཁོར་ལོ་སྡོམ་པ་ལས་རྣལ་འབྱོར་མ་དྲུག་གི་ཚིག་གི་དངོས་གྲུབ་དང་དགུག་པའི་ཆོ་གའི་ལེའུ་སྟེ་བཞི་བཅུ་རྩ་ལྔ་པའོ། ། ༼འདི་ཡང་ལྷ་ཡབ་ཡུམ་གྱི་རྣལ་འབྱོར་ལ་གནས་ནས་བསྒྲུབ༽ །དེ་ནས་ཡི་གེ་༼ལས་སྦྱོར་དུས་སུ་འདི་བཟླས་༽ཧ་ལྔ་ནི་༼འདི་ཡང་་ བཞི་གང་རུང་ལ་བསྙེན་པ་བསྐྱལ། ཁྱད་པར་གྱི་བསྙེན་པ་ཧ་ལྔ་བཟླས་པ་བྱ་བ༽། །ལས་རྣམས་ཐམས་ཅད་འགྲུབ་༼ཁྲག་འགུག་པ་ལས་སོ༽་བྱེད་པ། །གང་ཞིག་༼སྔགས་ཀྱི་ཆེ་བ་༽ཤེས་པ་ཙམ་གྱིས་ནི། །མྱུར་དུ་དངོས་གྲུབ་༼ཐ་མ་༽ཐོབ་པར་བཤད། །༼མདུན་མ་༽ཧཱེ་༼བྱང་ནུབ་ལྷོ་༽ཧཱོ་ཧཱུཾ་ཧཾ་ཧ༔༼དབུས་༽ཡི་གེ་ལྔ་བོ་དང་། ༼གཞི་༽ །ལག་པ་༼ལག་གཉིས་ཕན་ཚུན་༽མཉེས་པས་བསྐུལ་ཚིག་༼སྔགས་༽བཅས་༼པ་བཟླས་་ཁྲག་སྐྱུག་གི་པར་༡་པ༽། །ཁ་ནས་ཀྱང་ནི་ཁྲག་འཛག་ཅིང་། །དགྲ་བོ་དེ་ཡི་མོད་ལ་འཆི་༼བསད་པའོ༽ ། ༼གཞན་ཡང་༽ །ཤིན་ཏུ་མཛེས་པའི་ཐོད་༼པ་ལ་འཁོར་ལོ་བྲིས་ལ་་་་ཡང་་་པ་ཅང་ལོ་ཅན་ལ་བྲིའོ༽གནས་པ། །༼རང་གི་༽སྲིན་ལག་༼གི་༽ཁྲག་གིས་༼ཙཀྲ་དེ་༽བསྙེ་བར་བྱ། །ཇི་སྲིད་༼ཁྲག་བདག་གི་ཐོད་པར་དངོས་སུ་འབྱུང་༽སྐམས་ཀྱི་བར་དུ་སྟེ། །༼བསྒྲུབ་བྱའི་ཁྲག་ཟད་པས་༽དེས་ནི་བསྒྲུབ་བྱ་རྣམ་པར་འཇིག་༼འཆི༽ ། ༼གཞན་ཡང་༽ །གལ་ཏེ་༼བསམ་རྒྱུད་༽ཁྲོ་བ་འབར་བ་དང་། ༼ལག་ལ་ཙཀྲ་བྲིས་ལ་རབ་གནས་ཇི་ལྟ་བ་༤ན་བྱས་ལ་༽ །༼དུག་མ་་་པས་ལག་པ་༢་འཁོར་ལོར་བྲིས་ལ་༽མིག་དམར་གྱུར་བས་༼ཧ་ལྔ་ལ་སྤེལ་ཚིག་དང་བཅས་པ་༽བཟླས་ན་ནི། ༼ཙཀྲ་དང་ལྡན་པའི་ལག་པ་དེ་བསྟན་ན་༽ །དཔུང་ཚོགས་བཞོན་པར་བྱས་པ་ཡི། །རྒྱལ་པོ་མྱུར་དུ་བརླག་༼རེངས་ཞིང་འཆི་༽པར་བྱེད། ༼དམ་ཚིག་ཅན་ལ་གཏོར་མ་སྦྱིན་པའི་ཕྱིར་༽ །བྱི་ལ་དང་ནི་ནེའུ་ལེ་དང་། ༼འདི་རྣམས་ཀྱི་ཤ་༽ །ཁྱི་ཁྭ་ཝ་དང་ཆུ་སྐྱལ་༼རྣམས་ཀྱིས་༽དང་༼ ནི ༽ ། ༼ ལས་དེ་དག་བསྒྲུབ་པའི་དུས་སུ་གཏོར་མ་དང་སྦྱིན་སྲེག་བྱ་བའི་ཤ་བསྟན་༽ །མཁའ་འགྲོ་མ་ལ་གཏོར་༼མ་དང་སྦྱིན་༽བསྲེག་བྱ། །༼སྔར་གྱི་ལས་རྣམས་༽འདི་དག་མྱུར་དུ་འགྲུབ་ཡིན་པ། །རྒྱུད་འདི་ལ་ནི་ཐེ་ཚོམ་མེད། །རི་བོང་ལ་སོགས་སྤུ་ལས་ནི། །སྲད་བུ་བྱས་ཏེ་ལན་སྟོང་བཟླས། ༼སྲད་བུ་དེ་༽ །གང་གི་༼བསྒྲུབ་བྱ་་་མེ་ཏོག་དང་ཙཀྲ་ལྡན་པའི་ལག་པ་དེས་༽མགུལ་དུ་བཅིངས་གྱུར་བ། །དེ་ནི་དེ་དང་འདྲ་བར་༼གང་བཏགས་པ་དེའི་གཟུགས་སུ་༽འགྱུར། ༼གཞན་ཡང་ལག་པ་ལ་ཙཀྲ་སྤེལ་ཚིག་དང་བཅས་པ་བྲིས་པ་དེ་༽ །ལག་པ་བཟླས་བརྗོད་སྟོང་བྱ་སྟེ། །ཀ་ར་བི་རའི་མེ་ཏོག་དང་། །༼མེ་ཏོག་རེ་རེ་ལ་༽ཡི་གེ་༼ཧ་ལྔ་༽རེ་རེས་མངོན་བཟླས་ཏེ། །སྦྲུམ་མ་ལ་ནི་རེག་གྱུར་ན། ༼བུ་ལས་བུ་མོའམ་བུ་མོ་བུའམ་མི་ལས་དུད་འགྲོ་ལ་སོགས་པ་༽ །མངལ་ནི་རྣམ་པར་འཕོ་འགྱུར་ཏེ། ༼ཤ་བ་དང་རྣ་བ་ལ་སོགས་པ་གཞན་ཡང་གཟུགས་བསྒྱུར་བའི་ལས་ཀྱི་ཚོགས་མངལ་སླར་སོས་པར་གྱུར་༡་པའི་སྤེལ་ཚིག་དང་བཅས་པ་བཟླས་ན་སླར་འཚོ་བར་འགྱུར་རོ༽ །བཏང་ན་ཐར་བར་འགྱུར་བ་ཡིན། །གང་ལ་༼འཁོར་ལོ་ལྡན་པའི་ལག་པས་༽སྡིགས་མཛུབ་བྱས་ཏེ་འཆི། །སླར་ཡང་༼ལག་པའི་ཙཀྲ་བཀྲུས་ཏེ་ཆུས་གཏོར་ཞིང་སྔགས་བཟླས་ན་༽འཚོ་བར་བྱེད་པ་ཡིན། དཔལ་འཁོར་ལོ་སྡོམ་པ་ལས་༼བྷ་ག་ཅན་བསྐྱེད་པའི་ས་བོན་༽ཡི་གེ་ཧ་ལྔའི་ལས་ཀྱི་ཆོ་གའི་ལེའུ་སྟེ་བཞི་བཅུ་རྩ་དྲུག་པའོ། །༼ལེའུ་བཞི་བཅུ་རྩ་བདུན་པ་ནས་རྩ་དགུ་པའི་བར་གྱིས་ཡུམ་གྱི་ཉེ་སྙིང་ཉི་ཤུ་རྩ་༡་པས་འཁྲུལ་འཁོར་ལ་སོགས་པའི་ལས་དང་སྐྱེ་བ་བདུན་པ་བརྟག་པ་བསྟན་ཏེ་དེའང་ལེའུ་༤་བཅུ་བདུན་པ་དང་བརྒྱད་པས་ཙཀྲ་ལ་སོགས་པ་ལ་བརྟེན་པའི་ལས་བསྟན་ལ་རྩ་དགུ་པས་སྐྱེ་བ་བདུན་པ་བསྒྲུབ་པ་བསྟན་ཏོ༽ །༼རྗེ་བཙུན་མའི་ཉེ་བའི་སྙིང་པོ་ནས་བསྟོན།ཉེ་སྙིང་འབུམ་ཕྲག་བཞི་སྔོན་དུ་སོང་པས་ལེའུ་༣་པོ་འདིའི་ལས་བསྒྲུབ་པ་ནི་ལས་སྦྱོར་དུས་སུ་སྦྱར་ནས་༽དེ་ནས་༼ཡང་དག་ཡིན་ཟེར་༽གཞན་ཡང་བཤད་བྱ་བ་༼བཅུ་༢་པར་ཁ་སྐོང་༽། །མཁའ་འགྲོ་ཀུན་གྱི་སྙིང་པོ་སྟེ།༼ སརྦ་བྷུ་ཏ་ཌ་ཀི་ནི་ལ་སོགས་པའི་བཟླས་པའི་ཕན་ཡོན་དང་དབང་པོ་རབ་ཀྱི་ལས་བསྟན་༽ །འདི་ནི་བརྗོད་པ་ཙམ་གྱིས་ཀྱང་༼དབང་པོ་རབ་ལ་བཟླས་པ་དང་དྲན་པ་ཙམ་གྱིས་འགྲུབ་པར་བསྟན༽། །དངོས་གྲུབ་༼གང་འདོད་༽ཐམས་ཅད་བསྐྱེད་བྱེད་ཡིན། དེ་ལ་མཁའ་འགྲོ་མའི་༼ཉེ་སྙིང་སྤེལ་ཚིག་དང་བཅས་པས་༽རིག་པ་ཆེན་པོ་བཟླས་ན་༼རྒྱལ་རིགས་ལ་སོགས་པ་༽རིགས་ཐམས་ཅད་དབང་དུ་བྱེད་པར་འགྱུར་རོ། ༼དུས་༽རྟག་ཏུ་༼ཉེ་སྙིང་ལ་འདི་འབའ་ཞིག་ལ་རྩེ་༡་ཏུ་༽བཟླས་བརྗོད་བྱས་པས་ནི་༼བསོད་ནམས་ཁྱད་པར་གྱི་ལས་༽དཔལ་ཆེན་པོ་བསྐྱེད་པར་འགྱུར་རོ༼སྔོན་དུ་བསྙེན་པ་འབུམ་ལ་སོགས་པ་སྔོན་དུ་སོང་པས་ལས་ཀྱི་སྦྱོར་བ་གསང་པ་བསྒྲུབ་པ༽ ། ༼དྲག་པོའི་ལས་༽མི་རུས་ཀྱི་༼རྗེ་ངར་ལས་༽རྒྱུ་ལས་ཕུར་བུ་སོར་དྲུག་པ་༼སྟོད་རྡོ་རྗེ་རྩེ་ལྔ་པ་ལ་སོགས་པ་སྨད་ཟུར་༣་པར་བྱས་ལ་སརྦ་བུད་དྷ་ཌ་ཀི་ནི་ལ་སོགས་པའི་སྔགས་རྫོགས་པ་བྲིའོ༽བྱས་ལ་བརྒྱ་རྩ་བརྒྱད་མངོན་པར་བཟླས་ནས་གང་གི་སྒོར་སྦས་པ་དེའི་རིགས་རྒྱུད་རྣམས་༼རྩ་བ་ནས་༽གཅོད་པར་འགྱུར་རོ། ༼མི་སྐྱེ་བར་འདོད་ན་ཞིང་སྐྱིལ་དུ་སྦ་༽ཞིང་དང་ར་བ༼ར་སྦས་ན་ཕྱུགས་རྣམས་འཆི་༽དང་མ་ཧེ༼འི་ར་བ་༽དང་གླང་བོ་ཆེ༼འི་ར་བ་༽དང་། རྟའི་གནས་སུ་༼ར་བ་༽བརྐོས་ཏེ་༼ཕུར་བ་༽སྦས་ན། ༼ཞིང་དང་ཕྱུགས་ལ་སོགས་པ་༽ཐམས་ཅད་བརླག་པར་འགྱུར་རོ། ༼གཞན་ཡང་༽དེ་ནས་རྒྱལ་བོའམ་རྒྱལ་བོའི་བློན་པོ་དབང་དུ་བྱ་བར་འདོད་ན། ༼ཕག་མོའི་ཉེ་སྙིང་ཕ་དང་ཊ་ཕྱེ་བས་ཡི་གེ་ཉི་ཤུ་རྩ་༡་པའི་ཙཀྲ་བྲིས་ལ་རབ་གནས་ལ་སོགས་པ་བྱས་ཏེ་ལིང་ཀའི་སྙིང་ཀར་བཅུག་ལ་༽རྒྱལ་པོའི་སྒོར་ས་ལས་བྱས་པའི་༼རྫ་མཁན་གྱི་ལག་པ་ཕྱིས་པའི་ས་ལ་༽གཟུགས་བརྙེན་སོར་བརྒྱད་པར་བྱས་ལ། ༼དབང་དུ་བྱ་བ་ལ་༽མཁས་པས་༼རང་གི་མདུན་དུ་ལིང་ཀ་༽བཞག་ནས་༼མར་གྱི་ཉི་ཤུ་ལྔ་ལ་༽ཉིན་དང་པོ་ལ་༼ཤིང་༽མ་དུ་ལུང་ཀའི་འབྲས་བུ་དང་མེ་ཏོག་༼ལོ་མ་དང་༽བསྲེས་ཏེ། ༼སྤེལ་ཚིག་དང་བཅས་པ་༽སྦྱིན་བསྲེག་༼ལམ་གྱི་གཞི་མདོ་ལ་སོགས་པར་༽བརྒྱ་སྟོང་བྱས་༼ལིང་ཀ་དེ་མནན་པ་བྱས་ན་༽ན་དེ་དབང་དུ་འགྱུར་རོ།༼གཞན་ཡང་ སརྦ་བུ་དའི་༽སྔགས་༼སྔར་༤ན་དུ་ཙཀྲ་བྲིས་ཏེ་སྣག་ཚ་སྐྱེད་པས་བྱ་ཁྲག་དགུག་པ་ལ་སོགས་པར་གང་འདོད་པ་དེའི་རྐང་རྗེས་དང་རྫ་མཁན་གྱི་ལག་པ་ཕྱིས་པའི་ས་ལ་ལིང་ཀ་བྱས་ལ་ཁོག་པར་འཁོར་ལོར་བཅུག་ལ་རྫས་་་་་་མས་་་་་་་བྱས་ལ་མནན་ན་༽འདི་ཉིད་ཀྱིས་དགུག་པ་༼སྤེལ་ཚིག་སྤོས་ ༽དང་། གནོན་པ་༼རེངས་པ་༽དང་། རྨོངས་༼དྲན་པ་ཤན་༽པ་དང་། ༼ཁྲག་༽སྐེམས་པ་དང་། ༼སེམས་༽རྨུགས་༼འདི་དག་གི་ཉམས་བླང་ཞིབ་མོར་སྔར་དང་འདྲ་༽པ་དང་༼ཅུང་ཟད་དྲན་པ་དང་བྲལ་བ༽ ། ཚིག་༼སྨྲ་མི་ཤེས་པ་༽འཕྲོག་པ་དང་། ལོང་པར་བྱེད་པ་དང་། ༼སླར་ཡང་སོས་པར་གྱུར་ཅིག་པའི་སྤེལ་ཚིག་དང་། ལིང་ཀའི་སྙིང་ཁ་ནས་འཁོར་ལོ་བཏབ་ནས་ཙན་དན་དཀར་པོའི་ཆུས་བཀྲུས་ནས་༽སླར་གཏོང་བར་བྱེད་དོ། དེ་ནས་༼གཞན་ཡང་༽སྐྱེས་པ་བུད་མེད་དུ་བྱ་བར་འདོད་ན། ༼རོ་དང་དུས་༡བསྐྱལ་བའི་༽རོའི་མེ་ཏོག་དང་། ཀ་ཀ་ཨན་ཏྲི་ཀའི་འབྲས་བུ་༼ནག་པོ་ཆེན་པོ་བྱ་ཁྭའི་མཆུ་འདྲ་བསྐྱུལ་བ་༽དང་། བཀྲེས་པའི་༼བྱ་རོག་༽སེན་མོ་དང་། ༼དེའི་༽རྐང་བའི་འོག་གི་སྤགས་པ་ཆ་མཉམ་པར་བྱས་ལ། རི་བོང་གི་ཁྲག་དང་བཏགས་ཏེ། རི་ལུ་བཅུ་གཅིག་བྱས་ལ་གྲིམ་མ་ལ་བསམ་མོ། དེ་བཞིན་དུ་༼བསྒྲུབ་བྱའི་སྐྱེས་པའི་ཉིན་ཞག་དྲིས་ལ་དེ་ཤེས་ན་ཉིན་ཞག་གང་ཡང་སྐྱེས་པ་དེའི་ཉི་མ་དང་ཚེས་གང་ལ་བཟླས་པའི་རི་ལུ་མ་ནོར་བས་བསྒྲུབ་་་་་་དངོས་སམ་རྒྱུ་བ་ལ་བསྟུན་གསུང་༽ཞག་བཟང་པོ་ལ་ལག་པ་ལ་བཅིངས་ཏེ། ༼རི་ལུ་ ཚེས་བཅུ་གཅིག་པ་ལ་་་་་་་་་་པ་ཡིན་ན་བཅུ་གཅིག་པའི་བར་གྱི་སྔགས་བཟླས་པ་རྫོགས་ནས་བཅུ་གཉིས་པ་སྐྱེས་པའི་ཉིན་ཞག་ཤེས་པར་བྱས་ལ་༽ཉི་མ་གཅུ་གཉིས་༼བསྒྲུབ་བྱ་ཚེས་བཅུ་གཉིས་ལ་སྐྱེས་པ་དེའི་ཉི་མ་དང་ཚེས་༢་པའི་རི་ལུས་བཅུ་༣་པ་ཡིས་དེའི་འདྲེས་ཀྱིས་ཡར་ངོ་མར་ངོ་༢་ཀ་སྦྱར་གསུང་༽པ་ལ་༼རི་ལུ་༽གང་གི་ཕྱེ་མ་༼དངོས་སུ་༽མགོ་ལ་བཞག་པ་དེ་བུད་མེད་དུ་འགྱུར་རོ། ༼གཞན་ཡང་༽དེ་ནས་སྐྱེས་པ་ཁྱིར་བྱ་བར་འདོད་ན།༼ལྕགས་རྡོའི་བྱེ་བྲག་༡་ཡོད་གསུང་དེའི་ཕྱེ་མ་༽རྒྱ་ལྕགས་༼ཟད་པ་༽ནེའུ་ལེའི་༼དྲེ་མོ་༽སྤྱི་བོར་བཞག་ལ། མཚན་མོ་བདུན་གྱི་བར་དུ་༼ཐུན་རེ་རེ་ལ་ཉེ་སྙིང་༽བརྒྱ་སྟོང་བཟླས་ལ། ཉིན་ཞག་བརྒྱད་པ་ལ་༼དེ་༽གུར་གུམ་༼ལྕགས་ཕྱེ་དང་༽དང་མཉམ་པོར་བྱས་ཏེ། ལན་བརྒྱ་རྩ་བརྒྱད་བཟླས་ལ་༼ལྕགས་༽ཕྱེ་མའི་སྦྱིན་བསྲེག་༼བརྒྱ་རྩ་བརྒྱད་༽བྱས་ན། ༼དེའི་ཐལ་བ་༽གང་གི་སྤྱི་བོར་བཞག་པ་དེ་ཁྱིར་འགྱུར་རོ། ༼རྗེས་བཟུང་༽སླར་གསོ་བ་མི་མཚན་མོའི་དུས་སུ་མཁའ་འགྲོ་མ་རྣམས་ལ་༼ཤ་དང་ཆང་གི་༽མཆོད་པ་ཆེན་པོ་བྱས་ཏེ། གཏོར་མ་བྱིན་ན་༼སྤྱི་བོའི་རྫས་ཀྱིས་ཕྱིས་ཏེ་སླར་སོས་པར་གྱུར་༡་པའི་སྤེལ་ཚིག་དང་བཅས་པའི་སྔགས་བཟླས་ན་༽དེའི་འོག་ཏུ་རྣལ་མར་འགྱུར་རོ། རྫས་རྫས་མ་ཡིན་པར་འདོད་ན།༼གསེར་གསེར་མ་ཡིན་པར་འགྲོ༽ གསེར་ཤིང་གི་༼ལང་ཏང་པས་༽འབྲས་བུས་སྦྱིན་བསྲེག་༼སྤེལ་ཚིག་དང་བཅས་པའི་སྔགས་ཀྱིས་ཚོགས་འཁོར་༽བརྒྱ་༼ཐབ་དུ་༽བྱས་༼ལས་ཐམས་ཅད་པའི་ཐབ་ཁུང་བྱས་ཏེ་བྱ་༽ན། རྫས་རྫས་མ་ཡིན་པར་༼གསེར་ར་གཞན་ལ་སོགས་པ་༽འགྱུར་རོ། ༼གྲངས་བརྒྱ་འདྲ་༽ཨ་རུ་རའི་སྦྱི་བསྲེག་བྱས་ན་རྣལ་མར་འགྱུར་རོ། ༼གཞན་ཡང་༽དེ་ནས་གློ་བུར་བ་རྣམས་༼སེར་བ་དང་ཐོག་ལ་སོགས་པ་༽བསྐྱེད་པར་འདོད་ན། བྱ་ཆེན་པོའི་གནས་ཀྱི་༼འུག་པའི་ཚང་གི་ཤིང་ལ་ཤན་པའི་བུ་མོའི་སྐྲས་་་་་་་་་་་་་་་་༽སྦྱིན་བསྲེག་༼བསྲེག་ལུགས་བརྒྱ་༽བྱས་ན། ༼ཐུན་རེ་ལ་བརྒྱ་རྩ་རེ་༽ཞག་བདུན་གྱིས་གློ་བུར་བ་༼གཟེར་དང་ཐོག་ལ་སོགས་པ་༽འབྱུང་བར་འགྱུར་རོ། སླར་བཟློག་པ་ནི་༼ཀུ་ཤའི་༽འབྲས་ཕུབ་ཀྱི་སྦྱིན་བསྲེག་༼སྲེག་བླུགས་བརྒྱ་རྩ་༽བྱས་ན་ཞི་བར་འགྱུར་རོ། །བྱི་ལའི་སྤུ་ཟླ་བ་གཟས་ཟིན་པའི་ཚེ་བསྡུས་ནས་གང་གི་མིང་ནས་༼ཉེ་སྙིང་མཐར་ཆེ་གེ་མོ་བྱི་ལར་གྱུར་༡་པ་དང་བཟླས་ཏེ་བཟླས་བ་་་་༽བརྗོད་ནས་སྦྱིན་བསྲེག་བྱས་པ་དེའི་ཐལ་བ་བླངས་ཏེ། ༼གང་གི་༽མགོ་བོར་བྱིན་ན་བྱི་ལར་འགྱུར་རོ། སླར་བཟློག་ན་༼སྤྱི་བོའི་ཐལ་བ་ཕྱིས་ཏེ་སྤེལ་ཚིག་སླར་སོས་པར་གྱུར་ཅིག་པ་དང་བཅས་ཏེ་བཟླས་ན་༽རྣལ་མར་འགྱུར་རོ། ༼གཞན་ཡང་༽བྱ་རོག་གི་རྒྱུས་པ་ལ་སྲད་བུ་བྱས་ལ། ༼ཉེ་སྙིང་༽བརྒྱ་རྩ་བརྒྱད་མངོན་པར་བཟླས་ཏེ། ༼རང་གཞན་༽གང་གི་མགུལ་དུ་བཅིངས་པ་དེ་ཁྭར་འགྱུར་རོ། ༼གཞན་ཡང་༽སེམས་ཅན་གང་ལ་གང་གི་རྒྱུས་པ་སྲད་བུ་བླངས་ལ་༼སྤེལ་ཚིག་དང་བཅས་པས་༽མངོན་པར་བཟླས་ཏེ། ༼སྲད་བུ་དེ་མགུལ་དུ་༽བཅིངས་པ་དེ་དང་དེ་འདྲ་བར་འགྱུར་རོ། དེ་བཞིན་དུ་ཁྭ་དང་། ཐ་བ་དང་། རྨ་བྱ་དང་། ཆུ་སྐྱར་དང་། འུག་པ་དང་། ཁྲ་དང་། བྱ་རྒོད་ཀྱི་གཟུགས་༼སྐྱེར་བཅིངས་ན་༽འཛིན་པར་འགྱུར་རོ།༼འདི་དག་ཐམས་ཅད་སྔོན་དུ་བསྙེན་པ་སོང་པའི་ལས༽ ༼གཞན་ཡང་༽བ་གླང་གི་སྤུ་ལས་སྲད་བུ་བྱས་ལ། ༼ལས་སྦྱོར་དུས་སུ་༽ལན་བརྒྱད་བརྒྱ་བཟླས་བརྗོད་བྱས་ཏེ་མགུལ་དུ་བཅིངས་ན་བ་གླང་དུ་འགྱུར་རོ། གང་དང་གང་རྐང་བ་བཞི་བ་དེའི་༼སྤུ་ལས་༽སྲད་བུ་བྱས་ལ། ༼ཙཀྲ་དང་ལྡན་པས་་་སྤེལ་ཚིག་དང་བཅས་པས་འདི་དག་གི་རྒྱུས་པ་ལ་སྔགས་བཟླས་ཏེ་མགུལ་དུ་བཏགས་པའི་སྦྱོར་བས་༽མངོན་པར་བསྔགས་པས་མགུལ་དུ་བཏགས་ན་དེ་དང་དེའི་༼དུད་འགྲོ་རྐང་༤་བའི་༽གཟུགས་སུ་འགྱུར་རོ། ༼སྤེལ་ཚིག་དང་བཅས་པས་སྲད་བུ་བཀྲོལ་ན་༽བཀྲོལ་ན་ཐར་བར་༼རྗེས་བཟུང་༽འགྱུར་རོ། ༼༡་བུར་གང་ལ་སརྦ་བུ་ཊ་ལ་སོགས་པ་སྤེལ་ཚིག་དང་བཅས་པ་༽འབྲུ་ལ་བཟླས་ནས་ནོར་གྱི་བདག་པོའི་ཁྱིམ་དུ་བཅུག་ན། ༼བཟླས་པའི་འབྲུ་ཡང་ན་འབྲུ་དེ་ཕྱེད་བསྒྲུབ་བྱའི་སྣོད་དུ་བླུགས་ཕྱེད་རང་གི་སྣོད་དུ་བླུགས་༽ལྷག་མས་བདག་ཉིད་༼སྤྱི་བོར་བླུགས་ན་༽དབང་བསྐུར་ན། ༼དེ་ནས་ཡང་༽མཚན་མོ་བདུན་གྱིས་འབྲུ་ཐམས་ཅད་༼རང་གི་ཁྱིམ་དུ་༽འགུགས་པར་འགྱུར་རོ། དཔལ་འཁོར་ལོ་སྡོམ་པ་ལས་སངས་རྒྱས་ཐམས་ཅད་ཀྱི་མཁའ་འགྲོ་མའི་སྔགས་ཀྱི་ལས་ཐམས་ཅད་པའི་ཆོ་གའི་ལེའུ་སྟེ་བཞི་བཅུ་རྩ་བདུན་བའོ། །༼འཚམས་སྦྱར་བའི་སྒོ་ནས་སྔར་བཤད་པའི་ལས་ཀྱི་ཚོགས་ཀྱི་སྔགས་དངོས་བཤད་དངོས་འདི་ཡང་ཉེ་སྙིང་གི་ལས་ཡིན་༽།དེ་ནས་གཞན་ཡང་བཤད་བྱ་བ། །མཁའ་འགྲོ་ཀུན་༼སུམ་ཅུ་བདུན་༽གྱི་བདེ་བའི་མཆོག་༼གི༽ །༼ཉེ་སྙིང་༽སྙིང་པོ་རྣལ་འབྱོར་མ་ཀུན་གྱི། །འདོད་པའི་ལས་ཀུན་༼ལེའུ་༤་བཅུ་བདུན་པར་བསྟན་པ་རྣམས་༽བསྒྲུབ་པ་པོ། །༼སྔགས་ཀྱི་ཆེ་བ་༽གང་ཞིག་༼དབང་པོ་རབ་ཀྱིས་སྦྱི་བསྲེག་ལ་སོགས་པ་རྫས་ཀྱི་སྦྱོར་བ་ཅུང་ཟད་ལ་བརྟེན་དེ་༽དྲན་པ་ཙམ་གྱིས་ནི། །འཇིག་རྟེན་གསུམ་པོ་གཡོ་བྱེད་ཅིང་། །རྗེས་སུ་དྲན་པ་ཙམ་གྱིས་ཀྱང་། །༼མི་བསླུ་བས་༽ཡང་དག་དངོས་གྲུབ་༼རྣམས་༽རིམ་གྱིས་གོེར། །༼ཨོཾ་ནས་རིམ་པས་གློག་༽ཧཱ་སྭཱ་ཊཕ་ཧཱུཾ་ཧཱུཾ་ཡེ་ནི་རྞ་ཝ་ཛྲབ་ཡེ་ནི་ཀི་ཊཱ་དྷབུ་རྦས་ཨོཾ། །སྔགས་༼ཀྱི་ཆེ་བ་བསྟན་པ་དང་པོ་༽འདི་བཟླས་པས་འགྲུབ་པ་སྟེ། །ལས་༼དངོས་གྲུབ་༣་༽རྣམས་ཀུན་བྱེད་དགེ་བ་ཡིན། ༼བསྟན་པ༽ །མཁའ་འགྲོ་རྣལ་འབྱོར་མ་༼བཤད་པ་༽རྣམས་དང་། ༼སོ་སོར་བཤད་པ་༽ །ཁཎྜ་རོ་ཧ་ལཱ་མ་༼བསྡུས་པ་༽སོགས། ༼སུམ་བཅུ་རྩ་བདུན་༽ །མཁའ་འགྲོ་མ་ནི་ཐམས་ཅད་ཀྱི། །༼འདི་བཟླས་པས་ཐམས་ཅད་བཟླས་པར་༏གྱུར་བས་༽སྔགས་ནི་འདི་ཉིད་ཡིན་པར་བཤད། །༼འཇིག་རྟེན་གྱི་ཁམས་༽ས་འོག་ཡང་ན་མཐོ་རིས་སམ། །དེ་བཞིན་མི་ཡུལ་དག་ཏུ་ཡང་། །ལས་ནི་གང་དག་ཡོད་པ་༼༢་གྲགས་པ་༽རྣམས། །ཀླགས་པས་དེ་དག་ཐམས་ཅད་༼ཆེ་བ་འགྲུབ་ངེས་པ་ལ་དགོངས་༽འགྲུབ། །༼ཉེ་སྙིང་༽འདི་ལས་ཤིན་ཏུ་མཆོག་གྱུར་གང་། །འཇིག་རྟེན་གསུམ་ན་༼སྔགས་༽ཅིའང་མེད། །གང་ཕྱིར་༼འགྲུབ་པ་ཉེ་བའི་༽འདི་ནི་༼༢་༢་པ་༽བླ་མེད་པ། །ལས་རྣམས་ཐམས་ཅད་སྒྲུབ་བྱེད་ཡིན། །མཁའ་འགྲོ་མ་ནི་ཀུན་གྱི་གནས་༼ཀྱང་ཡིན་པས་༽། །མདོ༼ར་བསྡུ་ན༽་བཤད་༼འདི་དངོས་གྲུབ་ཐམས་ཅད་འགྲུབ་པ་༽རྒྱས་པར་མ་ཡིན་ནོ།༼འདིས་དང་པོ་གནས་བསྟན་༽ །མེ་ཏོག་འབྲས་བུ་སྣ་ཚོགས་ཀྱི༼ས་བརྒྱན་པ་༽། །རི་བོ་བཟང་པོ་བི་བར་བ་༼ནག་པོ་མངོན་རྟོགས་ལྟར་རམ་ལུའི་པའི་འགྲེལ་བ་ལྟར་རམ་ཀླུའི་པའི་རྩ་རྐྱང་ལྟར་བསྒོམ་སྟེ་ཀླུའི་པ་རྩ་རྐྱང་ལྟར་བསྒོམ་ན་ཚངས་པའི་གནས་༤་ནས་འབྱུང་པ་རིམ་བརྩེག་གི་བར་བསྒོམས་ལ་དེ་ནས་རྩ་་་་་པར་ལས་བསྟན་འདིར་སྔགས་ལ་སོགས་པ་བསྟན༽ །༼ ༢་པ་དངོས་གྲུབ་དེ་དག་ཀྱང་བསྐྱེད་པའི་རིམ་པ་ལ་གནས་པས་་་འགྲུབ་པས་བསྐྱེད་པའི་རིམ་པ་བསྟན་ ་ཞལ་༤་དང་འབྲེལ་བའི་ཐོད་པ་བཞི་༽༼བསྒྲུབ་པ་པོ་ལ་གནས་པ་༽ །དེ་ཡི་སྟེང་དུ་རྟག་བསྒོམ་པ། ༼བསྒོམ་བྱའི་ལྷ་བསྟན་ཏེ་ཕྱིའི་དལ་དང་ལུས་ཀྱི་༢་ཀ་ཐུན་མོང་དུ་བསྟན་༽ །མཁའ་འགྲོ་༼གཙོ་བོས་་་་་དང་སྒོ་འཚ་་་་་་་མ་གོང་དུ་་་་་ཟིན་ནས་༽དེ་བཞིན་ལཱ་མ་དང་། །ཁཎྜ་རོ་ཧ་རྣལ་འབྱོར་མ་༼གཟུགས་ཅན་མ༽། །༼གཙོ་བོ་ཧེ་རུ་ཀ་༽དཔའ་བོ་རྣམས་ཀྱི་དཔའ་བོ་མཆོག ༼འདི་འཚམས་ཀྱི་ཐོད་པ་༽ །ཧ་ཧ་ཧོ་ཧོ་ཞེས་བྱ་བ་༼དེ་ཚོས་བདེ་ཆེན༽། །དཔའ་བོ་ཉི་ཤུ་རྩ་བཞི་ཡི། །མཁའ་འགྲོའི་དྲ་བ་བདེ་མཆོག་ཡིན། །༼ལྷ་རྣམས་བཟློག་ཏེ་དགོད་པ་བསྟན་གནས་རྣམས་ཀྱང་བཟློག་པར་འདོད་༽རྡོ་རྗེ་སེམས་དཔའ་རྣམ་སྣང་མཛད། །དེ་བཞིན་པད་མ་གར་དབང་དང་། །ཤྲཱི་ཧེ་རུ་ཀ་ཉིད་དང་ནི། །ནམ་མཁའི་མཁའ་སྙིང་དང་ནི་རྟ་མགྲིན་ཉིད། །རིན་ཆེན་རྡོ་རྗེ་སྟོབས་པོ་ཆེ༼དེ་མན་ཆད་སྐུའི་བརྒྱད་དོ༽། །མིག་མི་བཟང་དང་འཇིགས་བྱེད་༼ཆེན་པོ་༽དང་། །རྡོ་རྗེ་བཟང་༼པོ་༽དང་རབ་༼ཏུ་༽བཟང་༼པོ་༽དང་། །རྡོ་རྗེ་ཧཱུཾ་མཛད་དཔའ་ཆེན་པོ། །དེ་བཞིན་རྡོ་རྗེ་རལ་བ་ཅན། །༼དེ་ཡན་ཆད་གསུང་གི་བརྒྱད་དོ་༽མྱུ་གུ་ཅན་དང་རྡོ་རྗེའི་ལུས། །རྡོ་རྗེའི་འདི་ནི་ཉིད་དག་དང་། །འོད་དཔག་མེད་༼པ་༽དང་ལྷ་ཡི་སྒྲ། །དེ་བཞིན་མཆེ་བ་རྣམ་གཙིགས་དང་། །ཀེང་རུས་ཀེང་རུས་ཆེན་པོ་དང་། །ཐོད་པའི་དུམ་བུ་༼དེ་ཡན་ཆད་ཐུགས་ཀྱི་བརྒྱད་༽ལ་སོགས་པ་༼ཡུལ་ཨུ་པ་སི་ལ་པ་ལ་སོགས་པ་དང་སྒོ་འཚམས་མ་བརྒྱད་བསྡུའོ༽། །དཔའ་བོ་ཉི་ཤུ་རྩ་བཞི་ཡིས། །འགྲོ་བ་འདི་དག་ཐམས་ཅད་ཁྱབ། །དཔའ་བོ་རྣམས་དང་མཁའ་འགྲོ་ཉིད། ༼ཤུགས་ཀྱིས་བསྟན་པ་སྟེ་གོ་རིམ་མ་བཟློག་པར་བསྟན༽ །རྣམ་འབྱོར་མ་ནི་རབ་༼ཏུ་༽གཏུམ་༼མོ་ལ་༽སོགས་༼པ་༣་ཀ༽ །༼བྱ་བ་ཟེར་༽ །ལུས་༼ཀྱི་དཀྱིལ་འཁོར་བསྟན་༽རྣམས་ཀུན་ལ་བསྒྲུབ་པ་པོས། ༼ལུས་ལ་གནས་པ་ལྟར་བསྒོམ་དགོས་པས་༽ །འཁོར་ལོར་ཞུགས་པར་བལྟ་བར་བྱ། ༼རྩེ་༡་པའི་ཡིད་ཀྱིས་ཉམས་རྗེས་མེད་ཐུན་དཔྱད་པ་མེད་པ་༽ །གྲུབ་དོན་ཤིན་ཏུ་མཉམ་བཞག་པས། ༼ཧེ་བཛྲའོ་ལྷ་སུམ་ཅུ་རྩ་བདུན་རྫོགས་པ་༽ །འཁོར་ལོའི་བདག་ཉིད་རྟག་ཏུ་བསྒོམ། །སྔར་བཤད་པ་ཡི་ཆོ་ག་ཡིས་༼ལྷར་བསྐྱེད་པ་ནས་ལེའུ་དང་པོར་སྒྲ་ཚུལ་ལས་བྱུང་གིས་༽། །མཁའ་འགྲོ་དྲ་བ་བདེ་མཆོག་མཆོད་མངལ་སྐྱེས་དང་བསྟན་སྔགས་ཀྱི་མཆོད་པ་འཕྲོ་བ་སྔར་བཤད་པས་ཀྱང་གསུངས།༼དཀྱིལ་འཁོར་ཆེན་པོ་ཅིའི་ཕྱིར་མཆོད་ཞེ་ན་༽ །འཁོར་ལོ་༼ལྷ་རྫོགས་པ་ལ་དངོས་གྲུབ་༽ཆེན་པོ་གྲུབ་ཀུན་གནས་༼སྔགས་སྐྱེས་ཞིང་སྐྱེས་ལྷན་༡་ཏུ་གནས་ ལ་ལྷ་རྐྱང་པ་ལ་ལས་༡་ཚར་བ་རེ་རེ་ཙམ་ལས་མི་གནས་པས་དལ་ཆེན་པོ་བསྒོམ་ཞིང་མཆོད་པའོ༽། །༼རྒྱས་པ་༽འདི་ནི་སངས་རྒྱས་བྱེ་བ་དང་། །དཔའ་བོ་བྱེ་བས་རབ་ཏུ་གསུངས། ༼ལྷ་ཚངས་པས་ལས་གྲུབ་པར་བསྟན་པའོ་༡་པས་ལས་མ་གྲུབ་པར་བསྟན་སུམ་བཅུ་རྩ་བདུན་ཚང་བར་བསྒོམ་ན་་ལྷ་སུམ་བཅུ་བདུན་གྱིས་བྱིན་གྱིས་བརླབས་པར་མ་ཟད་༽ །མཁའ་འགྲོ་མ་ནི་རེ་རེ་ཡི། །འཁོར་ནི་བྱེ་བ་དག་ཏུ་འགྱུར༼བས་ཀྱང་བྱིན་གྱིས་བརློབ༽ ། ༼མཁའ་འགྲོ་མ་རང་ནང་དག་ཡིན་ཞེ་ན་༽ །རྣལ་འབྱོར་མ་ནི་མཁའ་འགྲོ་ཉིད། །གཟུགས་ཅན་མ་དང་དུམ་སྐྱེས་མ། །དེ་བཞིན་ལཱ་མ་ལ་སོགས་ནི། ༼དེ་དག་གིས་བྱིན་གྱིས་བརླབ་པོ་༽ །དངོས་གྲུབ་ཀུན་བྱེད་༼ཐམས་ཅད་ཙང་པས་༽དགེ་བ་ཡིན། དཔལ་འཁོར་ལོ་སྡོམ་པ་ལས་དཔའ་བོ་དང་མཁའ་འགྲོ་མའི་གནས་ཀྱི་གསང་བའི་༼ལུས་ཀྱི་དལ་གཙོ་༽དཀྱིལ་འཁོར་༼ཆེན་པོའི་༽གྱི་ཆོ་གའི་ལེའུ་སྟེ་བཞི་བཅུ་རྩ་བརྒྱད་པའོ། །དེ་ནས་༼ལེའུ་བཅུ་༡་པས་སྐྱེ་བ་བདུན་པའི་མཚན་ཉིད་ལ་སོགས་པ་མདོར་བསྟན་བཅུ་༤་པས་རྒྱས་པར་བཤད་འདིར་མིའམ་ཕྱུགས་ཀྱི་སྐྱེ་བ་བདུན་པ་བསྒྲུབ་པ་སོ་སོར་བཤད་༽གཞན་ཡང་བཤད་བྱ་བ། ༼འོག་ནས་འབྱུང་བ་༽ །ཕྱུགས་ལས་དེ་བཞིན་ཆོ་ག་སྟེ། ༼སྐྱེ་བ་བདུན་པ་༽ །གང་ཞིག་༼མེ་ལོང་ལས་སྐྱེ་བ་གང་ཡིན་པའི་རྣམ་པ་འཆར་ དེ་ཉིད་ལ་བརྟེན་ནས་སྐྱེ་བ་བདུན་པ་བསྒྲུབ་པ་བསྟན་སྐྱེ་བ་བདུན་པའི་བར་གསུང་༽ཤེས་པ་ཙམ་གྱིས་ནི།༼ མིའི་གཙོ་བོ་ཕྱུགས་ཀྱི་་་་་་་ ད་བྱས་ལ་དེ་ལ་བསྙེན་བསྐུར་བྱ་བས་ལུས་དོར་བཟོས་པ་ལ་སོགས་པའོ༽ །མྱུར་དུ་དངོས་གྲུབ་ཐོབ་འགྱུར་བའི༼་ལྷའི་ལུས་སུ་འགྱུར་བ་ལ་སོགས་པའི་་་་དེ་དག་གིས་སྤྱིར་མདོར་བསྟན༽ ། ༼དེ་ནས་དཔྲལ་བར་༽ །ས་ལུ་༼བསྒྲུབ་པའི་ཚུལ་རྒྱས་པར་བཤད༽བཏགས་པ་སྔགས་པ་ཡིས། ༼བོང་བུ་༽ །ཕྱུགས་ཀྱི་གཟུགས་བྱས་༼པས་༽རིམ་༼པ་༽ཇི་བཞིན། ༼འདི་དག་གིས་སྐྱེ་བ་བདུན་པ་མཐོང་ངོ་༽ །རུས་སྦལ་རྔ་མོ་ཕག་དང་ཝ། །ཁྭ་དང་འུག་པ་བྱ་རྒོད་དང་། །ཁྲུང་ཁྲུང་ཁྭ་དང་ས་ར་ས་༼བཞད་ཆེན་པོ་༽། །དེ་རྣམས་ལས་༼སྐྱེ་བ་བདུན་པ་གང་ཡིན་པ་བརྟག་པ་༽ནི་བཤད་བྱ་སྟེ། །དེ་ཡི་མཚན་ཉིད་བསྟན་པར་བྱ༼ ༽ ། ༼སྐྱེ་བ་གཅིག་ལས་མེ་ལོང་གི་ནང་དུ་་་རུས་པ་༡་འབྱུང་༢་པ་ལ་སོགས་པ་འགྲོ་༽ །སྐྱེ་བ་གཅིག་དང་སྐྱེ་བ་གཉིས། །གསུམ་དང་བཞི་དང་ལྔ་ཉིད་སྟེ། ༼དེ་ཡན་ཆད་མཆོད་པ་ཙམ་ལས་ནུས་པ་མེད་༽ །སྐྱེ་བ་དྲུག་དང་བདུན་དུ་ཡང་། ༼མེ་ལོང་ལ་གཟུགས་བརྙན་དུ་བྱུང་པ་སྟེ་༽ །སྐྱེ་བ་བརྒྱུད་པར་༼བར་མ་ཆད་པའོ༽གདོན་མི་ཟ༼འདི་ཡན་ཆད་བྱོལ་སོང་གི་སྐྱེ་བ་བདུན་པ་བསྒྲུབ་པའོ༽ ། ༼གཞན་ཡང་དུད་འགྲོ་ཡིན་ན་ཁ་༡་རྫས་སྦྱོར་བའི་དགོས་པ་༽ །གང་གི་༼སྐྱེ་བ་བདུན་པའི་མཚན་ཉིད་༽ཁ་ཡི་དྲི་ཞིམ་ཞིང་། ༼དེ་དག་གི་རྗེས་སུ་འབྲངས་ནས་ལུས་འདོད་གཞན་གྱི་བྱེད་ཙུགས་ཀྱི་བར་དུ་༽ །མིག་མི་འཛུམས་པར་རྣམ་པར་བལྟ། །བདེན་པར་སྨྲ་ཞིང་༼གཞན་གྱིས་དེ་༽མཐོང་ན་དགའ། །རྟག་ཏུ་དམ་ཆོས་༼དད་པ་ཆེ་བས་༽དགའ་འགྱུར་ཞིང་། །༼སྔར་གྱི་༽རང་གི་སྐྱེ་བ་ཤེས་པ་དང་། ༼རྔུལ་ལ་༽ །ལུས་ཀྱི་དྲི་ནི་རྟག་ཏུ་ཞིམ། །མཚན་ཉིད་འདི་དང་ལྡན་པ་ནི། །སྐྱེ་བ་བདུན་དུ་འབྱུང་བ་ཡིན། ༼ཞི་བར་འདོད་ན་ཚན་དན་དཀར་པོ་དང་བསྲེགས་ལ་སྦྱང་བ་རང་འབར་བ་དང་རྟོགས་པར་བྱས་པས་དུག་མེད་པར་བྱས་ཏེ་བཟས་གསུང་།དབང་ལས་ལ་སོགས་པ་ཡང་བསྒྲེས་དེ་ལ་གུར་ སུམ་རྒྱས་གྷི་ཝཾ་དང་སྐེ་ཚེ་སྲེག་པར་བྱའོ་འདོད་འདིར་ཡང་སྔོན་དུ་བསྙེན་པ་སོང་པས་དེ་ནས་ཡུམ་གྱི་ཉེ་སྙིང་གི་འཁོར་ལོ་བྲིས་ལ་ཙཀྲའི་ལྟེ་བ་ལ་མི་འམ་ཕྱུགས་ཀྱི་སྐྱེ་བ་བདུན་གང་རྡོག་པར་འདོད་པ་དེ་བྲིས་བར་གྱིས་བྲིས་པ་སྤེལ་ཚིག་དང་བཅས་པ་བྲིས་ལ་རབ་གནས་ལ་སོགས་པ་བྱས་ལ་འབྲས་ཟན་ལ་བོང་བུའི་རྒྱུ་བ་བྱས་ལ་དེའི་སྙིང་ཀར་ཙཀྲ་བཅུག་ལ་བསྒྲུབ་པ་པོ་ཡང་ནང་དུ་ཞུགས་ཏེ་སྐྱེ་བ་བདུན་གྱི་མེ་ལོང་ལ་མི་ཚིལ་ལསོགས་པས་ཕྱིས་ཏེ་སྦྱང་ལ་ལྟས་ན་སྐྱེ་བ་དུ་བླངས་པ་དེའི་གཟུགས་་་་་་མཐོང་བ་འོང་ངོ༽ །དེ་ནི་ཟོས་པ་ཙམ་གྱིས་ནི༼་དེ་ལྟར་ཤེས་ནས་དེ་ལ་བསྙེན་བསྐུར་བྱས་པས་དེ་མངོན་ཤེས་ཅན་་་་་་་་༢༨་་་ ་ཡིན་པས་ལུས་འདོར་གསུང་། འབའ་དན་ཏ་འཕོ་བའི་སྦྱོར་བ་བྱ་དགོས་གསུང་༽། །༼གཞན་ལྟར་༽ལྷ་ཡི་གཟུགས་ནི་འཛིན་པར་འགྱུར། །༼དེའི་ཤའམ་གོ་རོ་ཙ་ན་༽བསྣམས་པའམ་རེག་པ་ཙམ་གྱིས་ནི། །༼གོ་རོ་ཙ་ན་༽གང་ཞིག་༼མ་ཟོས་པར་༽ཐིག་ལེ་བྱས་པ་དེ། །མོད་ལ་༼མཁའ་ལ་སྤྱོད་༽འགྲུབ་པར་འགྱུར་བ་སྟེ། །༼གང་འགྲུབ་ན་༽འདི་ནི་༼དུད་འགྲོ་གང་འདོད་པའི་༽རང་དགའི་གཟུགས་འཆང་འགྱུར།༼ བཟའ་བར་མ་ཟད་ཐིག་ལེའི་སྦྱོར་བས་དང་སི་ཏི་འགྲུབ་༽ །དེ་ཡི་སྙིང་ཁའི་༼ ་་གི་ཝང་གི་བྱེ་བྲག་༽རོ་ཙ་ན་༼དབུས་ན་གོ་རོ་ཙ་ན་སེར་པོ་མཐོ་བ་ཙམ་ཡོད་པ་དེ་༽ ། ༼གོང་གི་སྐྱེ་བ་བདུན་པ་རྟོགས་པར་ལ་༽ །མཁས་པ་ཡིས་ནི་བསླངས་ནས་ནི། ༼སྤྱི་དོན་༢་པ་འཕོ་བ་བྱེད་ན་མི་ལ་གདན་དང་པའམ་སཾ་བུ་ཏ་༤ན་དུད་འགྲོ་ཡིན་ན་་་་་བི་ད་ན་བཞིན་ནོ་དེ་དག་ཁ་བསྐང་ངོ། ༢་པ་ལྟར་་་་་་་་་་་དུད་འགྲོ་གང་ཡིན་གྱི་རུས་པ་བྱས་ལ་སྔར་གྱི་སྤེལ་ཚིག་ཅན་གྱི་ཙཀྲ་སྙིང་ཁར་བཅུག་ལ་བདག་གིས་སྔར་བཟླས་པའི་སྙིང་པོ་ག་ནས་་་་་་་་་ ་་་་་༢༨་་་སྙིང་ཀར་ཙཀྲ་ལ་བཞུག་དེའི་འོད་ཀྱི་སྐྱེ་བ་བདུན་གྱི་རྣམ་ཤེས་ཧཱུཾ་གི་རྣམ་པར་བླངས་ལ་གཟུགས་བསྙན་ལ་བཞུག་གོ་༽ །སྙིང་པོའི་སྔགས་ནི་བཟླས་ནས་སུ༼ལག་གི་ རྒྱུ་བར་བྱ་བར་འདོད་པ་དེར་གྱུར་༡་པ་བཏགས་ནས་༽། །དེ་ཡི་༼དཔྲལ་བར་༽ཐིག་ལེ་བྱ་བ་ཡིན། །སེམས་ཅན་གང་དང་གང་གི་ནི། ༼བདུན་པའི་ཤ་རུས་པ་ལྤགས་པ་སེན་མོ་ལྔ་༽ །གཟུགས་སུ་བྱེད་པར་འདོད་པ་ན། །དེ་དང་དེ་ཡི་གཟུགས་སུ་ནི། །༼འདོད་པ་ཙམ་གྱིས་༽ཐིག་ལེས་༼ཐིག་ལེ་བྱས་པ་ཙམ་གྱིས་༽འགྱུར་བར་ཐེ་ཚོམ་མེད། །མཁས་པས་༼ཡོངས་འདུ་བྱ་བ་མེ་ཏོག་དམར་པོ་ཡོད་༽ཤིང་ལོའི་ཁུ་བ་ནི། །རོ་ཙ་ནར་༼དང་༽བཅས་༼པ་༽བླངས་ནས་སུ། །དཔྲལ་བར་ཐིག་ལེ་བྱས་ནས་ནི། །༼འབྲིང་གི་༽དེ་གཟུགས་འཛིན་པར་ཐེ་ཚོམ་མེད། ༼གཞན་ཡང་༽ །ཕྱུགས་ཉིད་ཀྱི་ནི་བ་སྤུ་དག་༼དང་སྐྱེ་བ་བདུན་པའི་གོ་རོ་ཙ་ན་བསྲེས་ཏེ་དེ་ལས་ཐག་པ་བྱས་ཏེ་༽ །ལག་པའམ་སྤྱི་བོར་བཅིང་བར་བྱ་༼དེས་ཀྱང་འདོད་པའི་རྒྱུ་བ་འཛིན་པར་འགྱུར་རོ༽། །དེ་ཡི་ཡན་ལག་ལྔ་ལྡན་ཅིང་། ༼གང་གི་རྒྱུ་བཔར་བྱེད་པར་འདོད་པའི་ཕྱུགས་ཀྱི་སྤུ་ལ་ཐ་གུ་བྱས་པ་༽ །དེ་ཡི་སྤུ་དང་རྣམ་བསྲེས་ལ། །ལག་དང་སྤྱི་བོར་བཅིངས་ནས་ནི། ༼སྐུད་པ་གང་བྱས་དེའི་༽ །དེ་ཡི་གཟུགས་འགྱུར་ཐེ་ཚོམ་མེད། ༼བསྒྲུབ་པའི་ཛོ་གའམ་བསྟན་ཏེ་གང་རུང་རུང་གིས་མི་འགྲུབ་མཆོག་གིས་འགྲུབ་པའོ་༽ །རྣལ་འབྱོར་པ་ནི་༼ཡུམ་གྱི་ཉེ་སྙིང་༽བསྒོམ་ཞིང་བཟློས། ༼ལྷའི་རྣལ་འབྱོར་འཁོར་ལོ་རྒྱས་པ་ཡང་ན་དེ་བསྒྲལ་བར་༽ །མི་རྣམས་ནུས་པར་༼སྐྱེ་བ་བདུན་པ་བརྟག་པ་༽ལྡན་ཡིན་ཡང་། ༼དེ་བསྒྲལ་བ་ལ་སོགས་པ་༽ །དཀའ་ཞིང་སྡིག་ལ་མངོན་དགའ་རྣམས།༼༢༨་འདིའི་ངོ་ནས་རྟགས་གཉིས་རྟགས་ཅན་ལ་བསྒྱར་ས་མ་རྙེད་༽ །དངོས་གྲུབ་ལམ་ནི་འགོག་པ་ཡིན། །གླང་པོ་རྟ་དང་བོང་བུ་དང་། །རུས་སྦལ་རྔ་མོ་ཕག་དང་ཝ། །ཁྭ་དང་འུག་པ་བྱ་རྒོད་དང་། །ཁྲུང་ཁྲུང་ཁྲ་དང་ས་ར་ས་༼བཞད་ཆེན་པོ༽ ། ༼དེ་ལྟ་བུའི་༽ །གཟུགས་བཟང་བ་དང་གཟུགས་ངན་པ་༼རྣམས་ཀྱང་༽ ། ༼མཁའ་སྤྱོད་ལ་སོགས་པར་འགྱུར་ནུས་གསུང་༽ །ལྷ་ཡི་གཟུགས་སུ་དེ་འགྱུར་རོ། ༼དེའི་ཟ་བ་ལ་སོགས་པ་༽ །རྣལ་འབྱོར་དཔའ་ཆེན་རང་དགའི་༼གང་འདོད་པར་༽གཟུགས་༼སུ༽། །༼འདི་ཉིད་ལ་༽སྐྱེ་འགྱུར་དེ་ནི་ཐེ་ཚོམ་མེད། ༼ཐབས་༽ །དེ་ལས་ཤིན་ཏུ་མཆོག་གྱུར་བ། །༼དམན་པ་དང་འབྲིང་ལ་དད་ན་དེ་ལས་༽འཇིག་རྟེན་གསུམ་ན་ཡོད་མ་ཡིན། དཔལ་འཁོར་ལོ་སྡོམ་པ་ལས་སྐྱེ་བ་བདུན་དུ་བསྒྲུབ་པར་བྱ་བའི་གཟུགས་ཡོངས་སུ་བརྗེ་བའི་ཆོ་གའི་ལེའུ་སྟེ་བཞི་བཅུ་རྩ་དགུ་པའོ། །༼དེ་ལྟར་ལེའུ་གསུམ་གྱིས་སྐྱེ་བ་བདུན་པ་བསྟན་༽ །༼འདི་རྗེ་བཙུན་མའི་སྙིང་པོས་ལས་བསྒྲུབ་པས་འབྲ་བུའི་གསང་པ་ལ་་་ སྐྱེ་བ་བདུན་པའི་ཕན་ཡོན་ནི་དུད་འགྲོ་རྣམས་ཀྱིས་མི་སྐྱེ་བ་བདུན་གྱི་ཤ་ཟོས་ན་མཁའ་སྤྱོད་ལ་སོགས་པར་ལྷའི་ལུས་དང་འདྲ་བར་འགྱུར་བ་ལ་སོགས་པའོ། དེས་ན་གོང་གི་རུས་པ་ལ་ཅེས་པ་སོགས་ཀྱང་དོན་འདི་ལ་དགོངས་ཀྱི་དུད་འགྲོ་སྐྱེ་བ་བདུན་པ་བརྟག་པ་མིན་ནམ་སེམས་གསུང་༽དེ་ནས་སྦྱིན་བསྲེག་ཆོ་ག་ནི། །ངེས་པར་༼མཚོན་པ་༽དབང་དུ་བྱེད་འགྱུར་བ། ༼སྐུ་གསུམ་གྱི་དལ་རྒྱས་པའམ་ཨ་བི་ད་ན་ལས་བྱུང་བ་ལྟར་ཡི་གེ་༣་པའི་བསྐྱེད་རིམས་སྔོན་དུ་སོང་པས་བསྲེག་རྫས་་་འཇུག་པ་བསྟན་༽ །༼བཛྲ་བེ་རོ་ཙ་ན་བསྙེན་པ་རསཙཀྲ་དང་བཅས་པ་སྔོན་དུ་སོང་པས་སྦྱིན་བསྲེག་སོགས་བྱའོ་༽གང་ཞིག་ཤེས་པ་༼ཆེ་བ་༽ཙམ་གྱིས་༼འཁོར་ལོ་རྒྱས་པའི་རྣལ་འབྱོར་༽ནི། །མྱུར་དུ་༼དབང་༽དངོས་གྲུབ་ཐོབ་འགྱུར་བཤད། །༼སྔོན་དུ་བསྙེན་པ་སོང་པས་ཡི་གེ་བཅུ་༣་པའི་འཁོར་ལོ་ཇི་ལྟ་༤ན་བྲིས་ཏེ་རབ་གན་ལ་སོགས་པ་བྱས་ཏེ་དེ་དང་ལྡན་བས་ལག་པའི་སྦྱིན་བསྲེག་བྱ་་ བ་ལང་ཤ་༽༼སྔོན་དུ་བསྙེན་པ་སོང་པས་ཡི་གེ་བཅུ་༣་པའི་འཁོར་ལོ་ཇི་ལྟ་༤ན་བྲིས་ཏེ་རབ་གནས་ལ་སོགས་བྱས་ཏེ་དེ་དང་ལྡན་པས་ལག་པའི་སྦྱིན་བསྲེག་བྱ་༽གོ་མཾ་ས་དང་མྱོས་བྱེད་བསྲེ། །ལག་པ་གཡོན་པས་སྦྱིན་བསྲེག་བྱ། ༼འདི་རྣམས་འགྲུབ་ངེས་པ་༽ །སངས་རྒྱས་ཀྱང་ནི་༼མཚོན་པ་ཙམ་༽དབང་འགྱུར་ན། །ཕྲན་ཚེགས་མི་ནི་སྨོས་ཅི་དགོས། །༼ཤ་ལྔ་བཅུད་ལོན་ལྔ་ པ་པར་ཟོས་ནས་༽སྐྱུགས་པ་༼དང་༽སོ་ཤིང་༼བྲུད་ནས་༽དོར་བ་དང་། ༼ བག་ཟན་གྱི་དྲི་མ་བྲལ་བ་༽ །དེ་བཞིན་རང་གི་ལུས་མཉེས་པ། །༼བསྒྲུབ་བྱའི་༽མིང་༼དང་༽ནི་མྱོས་བྱེད་༼ཆང་རྫས་ལྔ་༽བཏགས་བསྲེས་པས། །ཁམས་གསུམ་དག་ནི་༼གང་འདོད་པ་རྣམས་༽དབང་དུ་འགྱུར། ༼གཞན་ཡང་༽ །ཟླ་མཚན་གྱི་ནི་ཁྲག་དང་ནི། །༼སྔར་གྱི་རྫས་བཅུ་བོ་༽ཟོས་ནས་ཟློན་པའི་ཟས་དག་དང་། །༼གང་རུང་གི་༽མི་ཡི་སྐྲ་དང་༼ཕྱེ་མ་བྱས་པ་༽ལྡན་པ་ཡིས། །༼གང་འདོད་༽མོད་ལ་༼སྦྱིན་བསྲེག་བྱས་པས་༽འགུགས་པར་འགྱུར་བ་ཡིན། །༼བག་ཟན་གྱི་དྲི་མ་བྲིལ་བ་སྔ་དང་འདྲ་༽རང་གི་ལུས་བྱུང་སྐྱུགས་པ་དང་༼གཞན་ཡང་དབྱེ་བ་༽། །མཁས་པས་རང་གི་སྐྲ་༼ཕྱེ་མར་བྱས་པ་དང་༽དང་ནི། །ནིམ་པའི་ཤིང་༼གི་མེ་ལ་སྦྱིན་སྲེག་༽ལ་རབ་སྦྱོར་ན། ༼སྤེལ་ཚིག་དང་བཅས་པ་༽ །མོད་ལ་དབྱེ་བར་འགྱུར་བ་ཡིན། །༼གཞན་ཡང་བསྐྲད་པའི་ལྷའི་སྦྱོར་ལ་༽རབ་མཉམ་བཞག་པས་ད་དུའི༼འི་༽་མེར་༼ར་ལ་༽། །ཁྭ་ཡི་གཤོག་པས་༼དང་༽ཉུུངས་མར་ལ་༼པལ་ཀའི་མར་ཁུ་༽། །༼སྤེལ་ཚིག་དང་བཅས་པ་༽བསྲེས་པའི་སྦྱིན་བསྲེག་བྱས་གྱུར་ན། །འཕྲལ་དུ་འཆི་བའམ་སྐྲོད་པར་འགྱུར། ༼གཞན་ཡང་དག་༽ །གཉིད་ལོག་༼པའམ་༽མ་ལོག་༼པའི་༽ལངས་པའམ། །ཟས་ལ་སྤྱོད་སོགས་མེ་ཐུན་ནམ་༼སྙོམས་འཇུག་བྱེད་པ་༽། །སྔགས་པས་རྟག་ཏུ་ཟློས་བྱེད་དེ། ༼དབང་དུ་བྱ་བ་འགྲུབ་པ་ལ་བར་ཆད་༽ །དེ་ལ་བདུད་ནི་ཡོད་མ་ཡིན། ༼གཞན་ཡང་རྒྱས་པ་༽ །ལྕེ་སྦྱང་གི་ནི་བསྲེག་བླུགས་བྱ། ༼དེ་ལྟ་བུའི་ཐུན་གསུམ་༽ །ཡང་དག་སྦྱིན་བླུགས་བྱེད་པའི་མི། །དེ་ཡི་ཟླ་བ་གསུམ་རྗེས་ལ། །རིགས་ཀྱི་དབུལ་བ་འཇིག་པར་༼སྔར་བུ་མེད་པ་ལ་བུ་མང་པོ་འབྱུང་་༽འགྱུར། ༼གཞན་ཡང་༽ །ཤ་ཆེན་དག་གིས་ལ་ལ་ཞིག །༼ཆང་༽མྱོས་བྱེད་ལྡན་པ་སྦྱིན་བསྲེག་བྱེད། ༼ཐུན་རེ་ལ་གོང་མ་ཀུན་ལ་སྦྱར་གསུང་༽ །༼ སྔོན་དུ་བསྙེན་པ་སོང་པས་ཤ་ མེད་པར་ཆང་མ་ བསགས་པས་ནོ་མ་ཟླ་བ་དྲུག་བྱས་བར་མཁའ་སྤྱོད་དུ་འགྲོ་གསུང་༽ འདི་ཡང་ཀུན་ལ་སྦྱར་གསུང་༽་བརྒྱ་རྩ་བརྒྱད་ཀྱི་བར་དུ་ནི། །༼ཀུན་ལ་སྦྱར་༽བསྒྲུབ་པ་པོ་ནི་ཐུན་གསུམ་དུ༼དུ་བྱེད་༽། །མ་ལུས་ས་རྣམས་སྤྱོད་པ༼འི་མི་༽ནི། །ཟླ་བ་དྲུག་གིས་༼མཁའ་སྤྱོད་དུ་གཞན་ཡང་རྒྱས་པ་སྤེལ་ཚིག་དང་བཅས་པའི་སྦྱིན་སྲེག་གིས་༽དབང་དུ་འགྱུར། །དགེས་པར་གྱུར་ན་༼སྦྱིན་སྲེག་གི་མཉེས་ནས་༽མཁའ་འགྲོ་མ། །རྒྱལ་སྲིད་སྟེར་བར་གདོད་མི་ཟ། ༼ལས་དེ་ཐམས་ཅད་ལ་ལྷའི་རྣལ་འབྱོར་བསྒོམ་དགོས་པར་བསྟན་༽ །ལྷ་རྣམས་ཐམས་ཅད་བསྒོམས་ནས་ནི༼ དཔའ་བོ་༡་པས་མི་ཕན་པར་གསུང་༽ ། ༼སྔ་གྲོའམ་དགོངས་ཀ་ལྟ་བུ་༽ །ཐུན་གཉིས་བར་དུ་༼ཤ་ཆེན་དང་མྱོས་བྱེད་གྱིས་༽སྦྱིན་བསྲེག་བྱ། །རང་གི་ལུས་ནི་༼མ་ཤིའི་བར་༽དེ་ཉིད་ཀྱིས། །༼གོང་གི་ཤ་ཆེན་གྱི་ནོ་མ་ཟླ་བ་དྲུག་གི་༽མཁའ་ལ་སྤྱོད་པ་ཉིད་ཐོབ་འགྱུར། ༼གཞན་ཡང་༽ །གོ་མ་སྐྱ་དང་༼ལྕེ་སྤྱང་ཆང་༽མྱོས་བྱེད་ཀྱིས། །སྦྱིན་བསྲེག་ཕྱི་ནང་༼དང་༽བྱ་བ་༼བཟའ་བ་༽བྱས། །དེ་ཡི་ལག་ཏུ་མྱུར་འགྲུབ་སྟེ། །དངོས་གྲུབ་༼དབང་ལ་སོགས་པ་༽ཐམས་ཅད་དུ་༼སྔ་མ་ཐམས་ཅད་༽འགྱུར་བ། །སྔགས་ཀྱི་བཟླས་བརྗོད་མཚན་མོ་བཟླས༼གསང་བ་ཡིན་པས་ཡུམ་གྱི་་་་་་་ནས་ཕྱི་ནསྔ་གི་སྦྱིན་སྲེག་སྔར་ལྟར་བྱ་༽། །༼མཚན་གཅིག་གིས་༽ཡུལ་འཁོར་གཅིག་ནི་༼དབང་དུ་འགྱུར་༽འཇིག་པར་བྱེད། །དེ་ལྟར་ཉིན་རེ་༼སྔགས་བཟླས་པ་སྔོན་དུ་སོང་བས་སྦྱིན་སྲེག་བྱ་༽བྱས་ནས་ནི། །རྒྱལ་པོ་ཉིད་དུ་དེ་བྱེད་འགྱུར། །འདི་ལས་རབ་མཆོག་གཞན་དག་ནི། །འཇིག་རྟེན་གསུམ་ན་ཡོད་མ་ཡིན། །༼གཞན་ཡང་ཁྱད་པར་གྱི་ཆེ་བ་རྒྱུན་དུ་བཟླས་ན་ གནར་གཅོད་པའི་སྡུག་བསྔལ་ཉམས་སུ་མི་མྱོང་༽རྣལ་འབྱོར་ཆེན་པོ་རང་དགར་འཆི། །སྣ་ཚོགས་༼གང་འདོད་པ་འདི་དང་ཕ་རོལ་གཉིས་ཀ་ལ་༽གཟུགས་ནི་འཛིན་ཅིང་རོལ། །༼གཞན་ཡང་༽བིལ་བ་༼ཤིང་་་་་༽དེ་བཞིན་པ་ལ་ཤ༼འི་འབྲས་བུ་༽། །ཨུ་དུམ་བཱ་ར་ཉིད་དག་ནི་༼༣་གྱི་༽ ། ༼ཐབ་༡་ལ་ཐུན་ངེས་ཎ་པར་༽ །སྦྱིན་བསྲེག་འབུམ་བྱས་༼བསྲེག་ལུགས་༽མྱུར་དུ་ནི། །ནོར་གྱི་བདག་པོ་ཆེན་པོར་༼གནམ་ཐོ་སྲས་ལྟ་བུར་༽འགྱུར། ༼གཞན་ཡང་༽ །གོ་མཾ་ས་དང་མྱོས་བྱེད་༼བ་ལང་ཤ་དང་ཆང་༽བསྲེ། །རྒྱལ་སྲིད་འདོད་ཅིང་༼སྤེལ་ཚིག་དང་བཅས་པས་༽སྦྱིན་བསྲེག་བྱེད། །༼ཧེ་རུ་ཀ་༽རྣལ་འབྱོར་དབང་ཕྱུག་མཉེས་བྱས་ན། །དབུལ་པོ་ཉིད་དུ་ག་ལ་༼སྟེ་ཕྱུག་པོར་༽འགྱུར། ༼གཞན་ཡང་༽ །གོ་མཾ་ས་ནི་བསྲེགས་པའི་རྒྱུས། ༼གཅོ་གཡང་ཤ་འབའ་ཞིག་གིས་་བར་ཆད་མེད་པར་༽ །ཅི་བདེ་བ་ནི་༼ནོར་ལ་སོགས་པ་༽འགྲུབ་པར་འགྱུར། ༼ གཅོ་གཡང་ཤས་༽ །གོ་མཾ་ས་ཡི་སྦྱིན་བསྲེག་གིས། །མྱུར་དུ་ནོར་༼གྱི་༽བདག་༼པོ་གནམ་ཐོ་སྲས་དང་༽མཉམ་པར་འགྱུར། ༼དཀའ་ཐུབ་༽ །བརྟུལ་ཞུགས་གཙང་སྦྲ་མེད་ན་ཡང་། །༼བཟླས་བསྒོམ་གཉིས་ལ་གནས་ན་༽གནང་བས་དངོས་གྲུབ་༼མཆོག་གི་དངོས་གྲུབ་ཀྱང་༽ཐོབ་པར་འགྱུར། ༼གཞན་ཡང་དུར་བ་འབའ་ཞིག་བསྲེགས་ན་༽ །ལྷག་པའི་ཚེ་འགྱུར་གུ་༼འདི་མན་ཆད་དུད་འགྲོ་ཁ་འཆིང་ཡང་༽སྨན་དྷ། །༼ཡོད་༽མུད་ག་མ་ཤ་ཙ་ན་ཀ།༼རི་ལུ་ཁ་ཚ་༡་་་ན་ལེབ་་་་སྲན་ཆུང་༽ །སྦྲང་རྩིའི་རྩིགས་མ་༼རོ་ཁ་བ་༽སྐེ་ཚེ་དང་། ༼སྒྲེས་པོ་རྣམས་བ་ཤ་ཀའི་ལོ་མ་ཟེར་༽ །ཏ་མ་ལ་ཡི་འདབ་༼ལ་ལ་དུ་མ་གནམ་ལ་༤་ཕྱང་ཟེར་༽བླངས་ཏེ༼འདི་དག་གི་སྦྱིན་སྲེག་བྱས་ན་༽། །གང་ཞིག་༼དུད་འགྲོ་གདུག་པ་ཅན་གང་ཡང་རུང་བ་༽ཁ་ནི་འཆིང་བྱ་བ། །རྣལ་འབྱོར་ཅི་འདོད་གྱུར་བ་ཡི། །༼གང་གི་ཁ་འཆིང་བར་འདོད་པ་སྟེ་༽གང་དུ་དགའ་བ་དེར་འགྱུར་རོ། །༼དེ་ལྟ་བུའི་དངོས་གྲུབ་རྣམས་བསྒྲུབ་པ་ལ་འཁོར་ལོ་ཆེན་པོ་བསྐོར་དགོས་པས་ལྷ་རྣམས་ཀྱི་གནས་ཕྱི་ནང་གི་བཅུ་བསྟན་༽༼ ་་་་་གནས་ལ་སོགས་པ་བཅུའི་ལྷ་དགོད་པ་ཕྱིའི་རང་ལུས་ཀྱི་གཉིས་ཐུན་མོང་དུ་བསྟན་ལ་དེས་ས་བཅུ་ཐོབ་པར་འགྱུར་བའོ་༽དེ་ནས་གཞན་ཡང་བཤད་བྱ་བ། །གནས་༼ས་བཅུ་ལ་༽ལ་སོགས་པའི་རྣལ་འབྱོར་མ་༼དང་༽། །ཧེ་རུ་ཀ་དཔལ་༼དང་༽སྐུའི་ཡན་ལག ༼དཔའ་བོ་ཉི་ཤུ་༤་༽ །ཀུན་ཏུ་བརྟེན་༼ཕྱི་དལ་ནང་གི་དལ་༽གཡོའི་བདག་ཉིད་ཅན། ༼ཕྱིའི་དཀྱིལ་འཁོར་མཆོད་ཅིང་བསྒོམ་པ་དང་ནང་གི་རྩ་སྟེ་རྫོགས་པ་བསྒོམ་པ་གཉིས་ཀས་༽ །གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། ༼ཡོན་ཏན་སྐྱེད་༽ །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་བ། ༼སྒྲིབ་པ་དག་པ་༽ །ཚན་དྷོ་ཧ་ནི་མངོན་གྱུར་ཡིན། །ཨུ་པ་༼དེ་དང་ཉེ་བའི་༽ཚན་དྷོ་སྦྱང་དཀའ་བ། །འདུ་བ་རིང་དུ་སོང་བ་ཡིན། །ཉེ་བའི་འདུ་བ་མི་གཡོ་བ། ༼རྣམ་རྟོག་ནུས་པ་ལ་༽ །དུར་ཁྲོད་ལེགས་པའི་བློ་གྲོས་ཡིན། །ཉེ་བའི་དུར་ཁྲོད་ཆོས་ཀྱི་སྤྲིན། །ཤྲཱི་ཧེ་རུ་ཀའི་༼ལུས་ཀྱི་གནས་གསུམ་བཅུ་༤འམ་ཉི་ཤུ་བཞིར་༽ཡུལ་དུ་སྤྱོད། །འདི་ནི་ནང་གི་༼ལུས་ཀྱི་གནས་ཉི་ཤུ་༤འམ་ལུས་ཀྱི་རྩ་ཉིཤུ་༤འི་རྩ་གཉིས་པོ་དེས་ས་བཅུར་འདུས་པའོ་༽བདག་ཉིད་ས། །ཕ་རོལ་ཕྱིན་བཅུའི་ས་༼ ཡར་བ་ས་སྡུད་པ་ཕ་རོལ་དུ་ཕྱིན་་པའི་ཕྱིའི་སྒྲོ་འདོགས་ནང་དུ་དཔྱོད་པ་༽རྣམས་ནི། །༼འདིར་༽རྣལ་འབྱོར་མ་ཡི་༼པུ་ཛ་ལ་སོགས་པ་ཡུལ་རྣམས་བསྟན་པའོ་༽བརྡ་ཡི་སྐད་༼དུ་བརྟགས་པ་་་ཐུགས་གསུང་༽། །མཐོ་རིས་ས་སྟེང་ས་འོག་ཏུ།༼ པོའི་དཔའ་བོ་དང་རྣལ་འབྱོར་མ་རྣམས་ལ་ཚོགས་བསག་ཅིང་སྒྲིབ་པ་སྦྱངས་པས་དེས་ཐམས་ཅད་ལ་འདྲེའོ་༽ །༼ཉི་ཤུ་ལྔ་༽དཔའ་བོ་ཡན་ལག་བརྟན་གཡོའི་བདག༼སརྦའི༽ །པུ་ལ་སོགས་པ་གང་བསྟན་པ། ༼འཛཾ་བུའི་གླིང་དུ་སྐྱེས་༽ །ཕྱི་ནང་༼ལུས་༽བདག་ཉིད་༼དང་༽ཅན་དུ་གནས་༼རྒོང་ང་༽ ། །༼དེ་ཐམས་ཅད་རྣལ་འབྱོར་མ་སུམ་ཅུ་༧་གསུང་༽དཔལ་ལྡན་ཁྲག་འཐུང་རྒྱལ་པོ་ཆེ། །འདོད་པ་ཀུན་གྱི་དབང་ཕྱུག་གཙོ། །༼ཕྱིའི་དབང་དུ་བྱས་ན་ལྷ་རྣམས་༽ཀུན་ཏུ་ཕྱག་༼༡༢་༽དང་ཞབས་༼༢་༽ལྡན་པ།༼ཕྱིའི་ལྷ་ཞལ་གྱི་རྣམ་པ་ཅན་༽ །ཀུན་ཏུ་མིག་དང་མགོ་བོའི་ཞལ། །ཀུན་ཏུ་ཐོས་ལྡན་༼སྙན་མངའ་བ་༽འཇིག་རྟེན་ན།༼རིགས་དྲུག་གི་སེམས་ཅན་ཐམས་ཅད་ལ་ཁྱབ་ལ་དེ་ལྟ་བུའི་ཚུལ་གྱིས་ཁྱབ་པར་༽ །ཐམས་ཅད་གཡོགས་པར་༼ནང་དུ་ནི་རྩའི་རྒྱུ་པ་༽རྣམ་པར་བཞུགས་༼སོ་༽ །༼ གནས་བརྩོགས་པ་བཅུ་ལ་བརྡས་བཏགས་ན་ ༽ །དེ་བས་༼གནས་པ་བསྒོ་བ་ཡིན་༽དངོས་གྲུབ་༼སྔར་གྱི་རྣམས་༽བསྒྲུབ་བྱའི་ཕྱིར།༼རིམ་པ་༢་ལ་༽ །བསམ་གཏན་ལྡན་པའི་སེམས་ཀྱིས་ཏེ།༼སྔར་གྱི་དངོས་གྲུབ་ཐམས་ཅད་འདོད་པ་༽ །སྒྲུབ་པ་པོ་ལ་ཕན་པའི་ཕྱིར།༼སྐྱེད་རྫོགས་གཉིས་༽ །གསང་བའི་དེ་ཉིད་གསུངས་པ་ཡིན།དཔལ་འཁོར་ལོ་སྡོམ་པ་ལས་དབང་གི་༼ཕྱི་ནང་གཉིས་ཀྱི་༽སྦྱིན་བསྲེག་དང་གནས་༼ཕྱི་དང་ནང་ལ་སྦྱར་བ་གཉིས་སུ་༽ལ་སོགས་པའི་ས་༼དངོས་གྲུབ་ཀྱི་རྒྱུ་༽བསྟན་པའི་ཆོ་གའི་ལེའུ་སྟེ་ལྔ་བཅུ་པའོ། །༼བཞི་བཅུ་ཞེ་་་འི་དོན་མདོར་བསྟན་ནས་བཤད་པར་བྱ་བ་སྤྱི་དོན་༣་ལས་དང་པོ་དེ་ཁོ་ན་སྟོང་ཉིད་བཅུ་བཞིར་བསྡུས་པའི་ཚུལ་གྱིས་བཤད་པར་དམ་བཅའ་བའོ་༽དེ་ནས་གཞན་ཡང་བཤད་བྱ་བ། །༼རྒྱུད་རྒྱས་པ་ན་མེད་པས་༽མན་ངག་ཤིན་ཏུ་༼དེ་ཁོ་ན་ཉིད་བཅུ་བཞི་༽རྙེད་དཀའ་སྟེ།༼གསང་བར་བྱ་བ་ཡིན་པས་༽ །དཔའ་བོའི་བརྡ་ཡི་སྐད་དུ་ནི།༼རང་དགར་འཇུག་པ་སྤང་བའི་དོན་དུ་༽ །ང་ཡིས་རྒྱུད་དུ་སྦས་པ་ཡིན། །གོས་དང་ཕྱག་རྒྱ་ལྔ་ལ་སོགས།འདིའི་སྐོར་གྱི་མཆན་ཡང་བཙུད་མེད༽༼༥༢་་་་༡་་་་རབ་ཡན་ལག་་་་་་་་། ༽༼སྣང་ངོ་ལ་འདི་༢་ཀ་༡་ཏུ་༽ །ཨ་ལི་ཀ་ལི་ཞེས་བརྗོད་པ་༼རྐང་པ་འདི་གཉིས་ལ་༣་༽། །༼བསོད་ནམས་སྒོ་ཡེ་ཤེས་ཚོགས་༽རྒྱུ་སོགས་སྟོང་པ་སྔོན་འགྲོ་བ།ཧེ་རུ་ཀའི་ཡི་གེ་བརྒྱ་བ་གསུང་།ཧེ་རུ་ཀ་ཞེས་པ་ནི་༢་སུ་ཎ་པའི་ཡེ་ཤེས་ནམ་ཐར་༣་གྱི་བདག་ཉིད་ཡིན་པའོ། །འཇུག་པ་༼ཟླ་སྟེང་དུ་ཧཱུཾ་ལས་འོད་ཕྲོས་པ་བྱ་གྲུབ་ཟླ་གདན་རྡོ་རྗེ་པདྨ་་་་། ཟླ་སྟེང་དུ་ཧཱུཾ་ལས་འོད་བྱུང་པ་ལ་སོགས་པའི་རིམས་ཀྱིས་རྟེན་དང་བརྟེན་པ་རྫོགས་པར་བྱེད་པའོ་འབྲས་བུ་སྤྱི་ལ་དམིགས་པ་དང་་་་་་་་་་་་་་་་་་༽སྒྲ་ལ་སོགས་པ་༼མ་ལ་༽ནས། །ཇི་སྲིད་བསྡུས་པའི་སྦྱར་ལྡན་ཞིང་།༼མྱང་བ་སྒོམ་་་་དེ་འོད་དུ་ཞུ་་ མ་ལ་ བས་༽ །བདུད་རྩི་ཚིམ་བྱེད་༼འོད་བསྡུས་ནས་ད་དུ་གྱུར་བ་ལས་རྒྱུ་རྡོ་རྗེ་འཆང་དུ་གྱུར་པ་་དྷར་མ་དྷ་དུ་༽མྱ་ངན་འདས། །དམ་རྒྱ་སོགས་ཕྱག་རྒྱ་བཞི་དང་རྡོ་རྗེ་སེམས་དཔའ་བསྡུ་བ་ལ་སོགས་པ་རྫོགས་རིམ་སྒོམ་ལག་པའི་མཆོད་པ་དབང་བསྐུར་བ་༼ཁྲུས་ནང་དུ་སྣང་ངོ་༽ །༼ཡི་གེ་ཉི་ཤུ་༤་༽ །གོ་ཆ་ཆེན་པོ་༼བཞི་བོ་འདི་སྒོང་སྐྱེས་ལྟར་་་་་་་ས་སྤྱོད་འབའ་ཞིག་དུ་རྩིའོ་༽ཡབ་ཡུམ་གཉིས་སུ་མེད་པས་༽ཡང་དག་བསྲུངས།༼༡༤བོ༽ །སྔགས་རྣམས་ཀུན་གྱི་མཆོད་པ་ཡིན། །དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན་ཆོ་གའི་མན་ངག་མི་བསླུ་བར་ལམ་གྱི་གསང་བ་དེ་གོམས་པས་ཕན་ཡོན་གྱི་ཚུལ་གྱིས་འབྲས་བུའི་གསང་བ་ལ་འཇུག་པ་བསྡུས་ཏེ་བསྟན་ཏོ། །མི་མཆོག་གང་ཞིག་ཀུན་སྤྱོད་པ། །སྡིག་པ་ཐམས་ཅད་རྣམ་དག་བདག་དངོས་སུ་སྤང་བའི་དོན། །དེ་བཞིན་གཤེགས་པའི་ས་ཐོབ་ཅིང་ཐོབ་བྱ་ཐོབ་པའི་ཕན་ཡོན་བསྟན་དེས་འདྲེ། །སྐྱེ་ཞིང་དང་སྐྱེ་གནས་བདེ་གཤེགས་ཀྱི། །འབྲས་བུ་མཆོག་དེ་མ་ཐོབ་བར་དུ་ཡང་ལམ་དུ་དེ་ཁོ་ན་ཉིད་བཅུ་བཞི་གོམས་ལས་རིགས་སུ་སྐྱེས་ཆོས་ལྡན་རྒྱལ་པོར་འགྱུར་དེ་མ་ཐོབ་བར་དུ་གསུང་འཁོར་ལོས་བསྒྱུར་བ་ལ་སོགས། །ཇི་སྲིད་མངོན་བསགས་སྡིག་པ་ཡི། །བག་ཆགས་ཀུན་ཟད་མཚན་ཉིད་ཡིན། །དེ་ཉིད་བཅུ་བཞི་གང་ཞིག་འདི་ནི་རྟག་བསྒོམ་པ། །ཁམས་ཀྱི་རྒྱལ་ཕྲན་དུ་འགྱུར་ས་ལ་འདོད་པ་ཀུན་དབང་ཕྱུག་ཆེན་པོར་འགྱུར། །སྡིག་པ་ཟད་པའི་དཔེ་དཔེར་ན་མར་གྱིས་གང་བའི་སྣོད། །མེ་ཡི་དབུས་སུ་བཞག་ན་ནི། །མར་གསར་ཞུ་ཞིང་ཞུ་འགྱུར་ཞིང་། །སྣོད་ཀྱི་དྲི་མ་ཡང་རིམ་པས་དག་པར་འགྱུར། །དེ་ཉིན་༡༤དེ་བཞིན་ཤྲཱི་ནི་ཧེ་རུ་ཀའི། །མཚན་གྱིས་སྡིག་པ་འཇིག་པར།མཚན་གྱིས་སྡིག་པ་དག་པར་འགྱུར།འགྱུར། །རིམ་པ་གཉིས་པའི་བསམ་གཏན་མཉམ་རྗེས་གཉིས་ཀ་ལའང་་་་་་་་་་་་ མངོན་པར་རྫོགས་་་་་་་་་་པ་མཉམ་རྗེས་གཉིས་པོ་་་་་་་འདིའི་འབྲས་བུ་་་་་་་་ལ་མི་བསླུ་བ་བསམ་གཏན་སེམས་དཔའ་ཙམ་གྱིས་སམ། །པི་ཏི་ལ་སོགས་པ་ཀློག་ཅིང་བསྒོམ་པ་མིན་པ་འདོན་དང་བྲིས་པ་ཡིས། །ལ་ཀུའི་སི་ཏི་ལ་སོགས་པ་ལས་ཤེས་མཐོ་རིས་གཟུགས་མེད་པ་དང་གཟུགས་ཀྱི་ལྷ་དང་འདོད་པའི་ལྷ་རྣམས་ཀྱི་ལོངས་སྤྱོད་ཐོབ་པར་འགྱུར་ལོངས་སྤྱོད་ཐོབ་འགྱུར་བའམ། །ཡང་ན་མིའི་ནང་དུ་སྐྱེས་ན་སངས་རྒྱས་མ་ཐོབ་བར་དུ་འཁོར་ལོ་བསྒྱུར་བ་ཐོབ། །གཞན་ཡང་རྣལ་འབྱོར་པ་རྣམས་འདི་རང་གི་མཐར་ཀུན་རྫོབ་དུ་འཕོ་བའི་འཆི་བའི་ཚེ། །གཙོ་བོ་དཔལ་ལྡན་ཁྲག་འཐུང་སོགས་མཁའ་འགྲོ་གསུམ་བཅུ་བདུན། །ལག་ན་མེ་ཏོག་བསྡུ་བའི་ཕྱིར་སྣ་ཚོགས་ཐོག །རྒྱལ་མཚན་བ་དན་སྣ་ཚོགས་དང་། །རོལ་མོའི་སྒྲ་ནི་སྣ་ཚོགས་དང་། །སྣ་ཚོགས་གླུ་ཡི་མཆོད་པས་མཆོད། །འཇིག་རྟེན་ལྷ་དག་བྱུང་ནས་འཆི་བ་འཆི་བ་ཞེས་བྱ་བའི་རྣམ་རྟོག་འདི། །རྣལ་འབྱོར་པ་ལ་དེར་བསམ་པ་གཉིས་ཞལ་མཐོང་བ་དང་ཆོས་ཉན་པ་ལ་སོགས་པ་རིམས་ཀྱིས་བར་ཐོབ་བསྒྲུབ་པ་ཉམས་སུ་ལེན་པ་དཀའ་བས་མཁའ་ལ་འགྲོ་བའི་གནས་སུ་ཁྱེར། །དེ་འདྲའི་དཔལ་ཆེན་སྐྱེས་པའམ་རྣལ་འབྱོར་མ་བུད་མེད། །དེ་འདྲའི་ཛོ་ཀི་དེ་ས་སྟེང་ན་ནི་སྲིད་པ་ཙམ་བསྒྲུབ་པ་ཉམས་སུ་ལེན་པར་དཀའ་བས་རྙེད་པར་དཀའ། །དཔལ་ལྡན་ཧེ་རུ་ཀ་སྡོམ་པའི་སྒོ་ནས་བསྟན་རྒྱུད་ཆེན། །བཞི་བ་ཕན་ཡོན་དང་འབྲས་བུའི་ལམ་ལ་་་་་་པའི་ཉེས་དམིགས་འབུམ་གང་གིས་ཤེས་ནས་སྤྱིར་དེ་ལ་མ་དད་པ། །དེ་ཟད་པར་་་་་དབུལ་བ་སྡུག་བསྔལ་གྱིས་གདུངས་པ། །ལམ་གྱི་ཁྱད་པར་བསྟན་དེ་ལ་རྟག་ཏུ་འབྱུང་བར་འགྱུར། །སྔར་སྐྱེད་པའི་ལྷ་མོའི་རྣམ་པ་གསལ་བར་བསྟན་་་་་་་མགུལ་རྒྱན་གདུ་བུ་དཔུང་རྒྱན་དང་། །རྣ་ཆ་ཚངས་པའི་སྐུད་པ་དང་། །དོ་ཤལ་མགོ་བོའི་ལྔ་བཅུའི་་འཕྲེང་བ་དང་། །་་་ལྟར་སྐྱེད་པའི་་་་་་ད་འདྲ་བའི་ཚོགས་པ་་་་་་ཀུན་དང་མ་བགྲང་སྐེ་རགས་སིལ་སིལ་སྒྲ་སྒྲོགས་པ། །དལ་གྱི་རི་སྟེངས་མཉམ་བཞག་སྐྱེད་རིམ་འམ་སྣ་ཚོགས་པད་མ་ཡི། །ལྟེ་བར་ཨ་ལི་ཀ་ལི་ར་གྱུར་པ་ལས་་་་་་་་སྐྱེས། །དབུ་མའི་དངོས་པོ་རྣམ་པར་་་་་བདག་པོ་རྣམ་གནོན་ཅིང་། །རྡོ་རྗེ་དྲིལ་བུས་དངོས་གྲུབ་རྣམས་ཀྱི་རྒྱུ་ཕྱག་མཚན་གྱིས་མཚོན་པ་ཙམ་་་སྐུ་ལ་མཁྱུད། །ཉི་ཤུ་རྩ་བཞི་ཕྱེད་ལྡན་པའི། །དཔའ་བོ་རྣལ་འབྱོར་མ་༼སུམ་བཅུ་རྩ་དྲུག་གི་༽ཚོགས་༼ཉི་ཤུ་རྩ་བཞི་༽བསྐོར་༼བའི་༽ །༼དེ་ལྟ་བུའི་༽ །ཤྲཱི་ཧེ་རུ་ཀ་རྒྱལ་༼ཙཀྲ་རྫོགས་པ་༽ཆེན་པོ། །གོ་འཕང་མཆོག་༼ཏུ་གྱུར་པ་༽ནི་བསྒོམ་པར་བྱ།༼ བསྒྲུབ་པ་པོ་དེ་ལྟར་བསྒོམས་པ་དང་དལ་ཡང་ཚེས་བཅུ་མཆོད་པ་ལ་སོགས་པ་རྣམས་ཀྱིས་ཀྱང་༽ །དཔའ་བོ་ཀུན་དང་རྣལ་འབྱོར་མའི། །༼མིའི་རུས་པ་ལ་སོགས་༽འཁོར་བཅས་དབུས་སུ་འབྱོར་ལྡན་པ།༼བསྒྲུབ་པ་པོ་དེ་ལྟར་བསྒོམ་པ་དང་ཡང་ཚེས་བཅུའི་མཆོད་པ་ལ་སོགས་པ་རྣམས་ཀྱིས་ཀྱང་གསུང་༽ །ཐམས་ཅད་༼དཀྱིལ་འཁོར་༽དགེས་ཤིང་གཉིས་མེད་×པ་སྣ་ཚོགས་སྟོན་མཛད་དེ། །སྣ་ཚོགས་ཚུལ་གྱི་གདུལ་བྱ་ལ་༼ཉམས་དགུ་སོགས་༽། །༼རྣམ་རྟོག་རིམས་ཀྱིས་ཟད་པ་ཡིན་པའི་ཕྱིར་༽ཐབས་ནི་སྣ་ཚོགས་སྟོན་པ་ཡིན།༼ལྔ་པ་༽བསམ་གྱིས་མི་ཁྱབ་པའི་དོན་ཡིན་པས་གང་ལ་ཡང་མི་སྨད་པ་བསྟན་༽ །ཟབ་མོའི་ཆོས་ནི་སྟོན་པ་ལ། །༼སྐལ་མེད་༽གལ་ཏེ་མོས་པར་མ་གྱུར་ཀྱང་།༼དེ་ལ་བསྒྲུབ་པ་པོ་ལ་༽ །སྨད་པ་དག་ཏུ་མི་བྱ་སྟེ།༼ཆོས་མིན་བྱ་བའི་ཐེ་ཚོམ་ཟ་བ་པོ་་དཔེར་ན་སྒྱུ་མ་མཁན་ནམ་གར་མཁན་ནམ་རི་མོ་མཁན་དང་འདྲ་སྟེ་ཆོས་ཉིད་བསམ་མི་ཁྱབ་པས་༽ །ཆོས་ཉིད་བསམ་༼གྱིས་༽མི་ཁྱབ་༼གདུལ་བྱ་སྣ་ཚོགས་སུ་༽དྲན་བྱ་༼པ་ཡིན་པས་རྟོགས་པར་དཀའ་༽། །གང་གིས་༼ན་༽འདི་བད×་སྲས་ནི། །བདག་ཉིད་ཆེན་པོ་རྣམས་ཀྱིས་མཁྱེན། ༼སྔར་༽ །སངས་རྒྱས་རྣམས་ནི་༼སྔར་༽འབྱུང་འགྱུར་ཏམ། ༼ཕྱིས་༽ །མ་བྱུང་ན་ཡང་རྣམ་ཀུན་ཏུ། །བསམ་མི་ཁྱབ་པའི་ཆོས་ཉིད་ནི། ༼སྐྱེ་འགག་༽ །འཕེལ་འགྲིབ་སྤངས་པས་གནས་པ་ཡིན། ༼མི་རྗེད་པར་དྲན་པ་ན་༽ །དེ་ལྟར་རྣམ་པར་བཞག་ནས་ཀྱང་།×་་་་འགྲོ་བ་བསམ་ཡས་ཤིང་།༼ ཕན་ཡོན་གྱི་སྒོ་ནས་མཆོག་གི་སྒོ་ནས་བསྟན།དེ་ནས་ཕན་ཡོན་གྱི་སྒོ་ནས་བསྟན་གང་ཟག་གི་རིམ་པས་རྒྱུད་ཀྱི་རིམ་པ་བསྟན་པ་༽ །སངས་རྒྱས་རོལ་བ་བསམ་མི་ཁྱབ། །ཇི་སྲིད་༼མདོ་ཕ་རོལ་ཕྱིན་པ་༽མདོ་བྱ་༼བའི་རྒྱུད་༽སྤྱོད་པ༼འི་རྒྱུད་༽་ནི། །རྣལ་འབྱོར་༼གྱི་རྒྱུད་༽གསང་༼པ་བླ་ན་མེད་པའི་རྒྱུད་༽མཐའི་དབྱེ་བ་༼མས་བླ་ན་མེད་པ་༽ཉིད། ༼མཐའི་དབྱེ་བ་མའི་བླ་ན་མེད་པ་སཾ་པ་ར་༽ །སེམས་ཅན་མོས་པས་འཇུག་པ་རྣམས། །༼རྒྱུད་ཀྱི་མཚན་༽དེ་དང་དེ་ལ་དགའ་བ་ཡིན།༼མ་བླ་ན་མེད་པ་མནད་དྲང་བའི་དོན་ཡིན་པས་མའི་ཡང་བླ་ན་མེད་ངེས་པའི་དོན་ཡིན་ནོ་བྱ་བ་༽དཔལ་ཧེ་རུ་ཀ་ཞེས་བྱ་བའི་རྒྱུད་ཀྱི་རྒྱ×བསྟན་ཆོས་ཐམས་ཅད་༼ཉོན་མོངས་འཇོམས་པ་༽དཔལ་༼རྗོད་བྱེད་དོན་གྱི་་་་་་་་་་༽ཧེ་རུ་ཀ་༼བསྒྲུབ་ཉེ་བ་༽དཔའ་བོ་ཆེན་པོ༼འི་ཟེར་༽ས་ཀླགས་པས་འགྲུབ་པ་༼མིང་གི་རྣམ་གྲངས་༽ཐམས་ཅད་མཁྱེན་པ་གཞན་གྱིས་མི་ཐུབ་པ་འདོད་ན་གྲུབ་པའི་༼ཆེ་བ་ས་བཅུ་༣་པ་རྡོ་རྗེ་འཛིན་པ་ཡེ་ཤེས་དེ་གཞན་ལས་ཁྱད་པར་དུ་བསམ་༽མཆོག་གི་མཆོག་༼རྡོ་རྗེ་འཛིན་པ་ཡེ་ཤེས་དེ་༽ དཔལ་འཁོར་ལོ་སྡོམ་པ་ཞེས་བྱ་བའི་རྣལ་འབྱོར་ཆེན་པོའི་རྒྱུད་ཀྱི་རྒྱལ་པོ་༼སྒོ་དྲུག་ལས་༽ལས་ལེའུ་ལྔ་×ར་ཝརྨ་དང་། ཞུ་ཆེན་གྱི་ལོ་ཙཱ་བ་བནདྷེ་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ། སླད་ཀྱི་པཎྜི་ཏ་ཆེན་པོ་སུ་མ་ཏི་ཀིརྟི་དང་། ལོ་ཙཱ་བ་མལ་བནདྷེ་བློ་གྲོས་གྲགས་ཀྱིས་ཞུས་ཏེ་གཏན་ལ་ཕབ་པའོ།༼བཀའ་མཆན་ལ་སྣ་བསྲིངས་པ་ཚན་ཅིག་སྣང་སྟེ་གོང་དུ་བསྲིངས་པ་རྣམས་ལ་གོང་དུ་དང་གྱོག་བྱས་པ་ལ་མཚམས་བཅུག་ཡོད།བཤམ་དུ་བསྲིངས་པ་རྣམས་ལ་དང་གྱོག་རེས་མཚམས་བྱས་ཡོད། སྟེང་ན་ཞ་བྲིས་ཡོད་ཟིན་མཆན་དུ་སྣང་། སྦྲུལ་ཤད་ཅན་རྣམས་སུ་ན་ལ་གྲ་ཡིས་བཏབ་པར་སྣང་། འགྱུར་ཆན་གོང་ན་སྦྲུལ་ཤད་ཅན།༽ |