 ཀཿཐོག་རིག་འཛིན་ཆེན་པོ་ཚེ་དབང་ནོར་བུའི་གསུང་འབུམ།གླེགས་བམ་དགུ་པ་དགོངས་གཏེར་བསམ་པ་ལྷུན་གྲུབ་མའི་ཆོས་སྐོར་སྨད་ཆ།རིག་འཛིན་ཆེན་པོ་ཚེ་དབང་ནོར་བུ།Nitartha Internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་སྒོ་ནས་གཤིན་པོ་རྗེས་འཛིན་གྱི་ཆོ་ག་བདེ་ཆེན་འཇུག་སྒོ།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་སྒོ་ནས་གཤིན་པོ་རྗེས་འཛིན་གྱི་ཆོ་ག་བདེ་ཆེན་འཇུག་སྒོ་ཞེས་བྱ་བ་བཞུགས་སོ༔ ན་མོ་གུ་རུ་པདྨ་བཛྲ་དྷ་ར་ཡེ༔ སངས་རྒྱས་འཕྲིན་ལས་རྨད་བྱུང་བ༔ གཤིན་པོ་ཐར་ལམ་འདྲེན་པའི་ཐབས༔ བདེ་ཆེན་ཞིང་ཏུ་འཇུག་པའི་སྒོ༔ པདྨའི་མན་ངག་འདི་ན་གསལ༔ ཨེ་མ་དམ་ཚིག་ལྡན་པ་ཡི༔ ཆོ་ག་ཉམས་སུ་ལེན་པ་ལ༔ ཐོག་མར་བསྐྱེད་རིམ་རྣལ་འབྱོར་གྱིས༔ ཏིང་འཛིན་སྔགས་ཀྱིས་ཐུགས་དམ་བསྐུལ༔ དེ་ནས་བུམ་པ་བཅུད་ལྡན་དང་༔ དབང་རྫས་བྱིན་གྱིས་རླབས་པ་ནི༔ ༀ་ཨཱཿཧཱུྃ༔ ཨ༔ བུམ་པ་མི་དམིགས་སྟོང་པར་གྱུར༔ སྟོང་ཆེན་མཐའ་དབུས་བྲལ་བའི་ངང་༔ འོད་གསལ་རྒྱུན་མི་ཆད་པ་ལས༔ ཕྱི་ནི་བུམ་པ་ནང་དཀྱིལ་འཁོར༔ པདྨ་ཞི་ཁྲོའི་ལྷ་ཚོགས་རྣམས༔ བཀྲ་གསལ་བྱིན་འོད་ཐིབ་སེ་ཐིབ༔ གནས་ལྔའི་ཡི་གེ་འབྲུ་ལྔ་ལས༔ འོད་ཀྱིས་རྒྱལ་ཀུན་དབྱིངས་ནས་བསྐུལ༔ སྐུ་དང་ཐིག་ལེ་ཕྱག་མཚན་རྣམས༔ ཆར་བཞིན་བབས་ནས་བུམ་ལྷ་དང་༔ དབང་རྫས་རྣམས་ལ་སིབ་སིབ་ཐིམ༔ བྱིན་བརླབས་རྟགས་ཀྱི་ཕྱག་རྒྱར་བཞེངས༔ རང་སྲོག་སྔགས་ཀྱིས་བསྐུལ་བ་ཡིས༔ སྐུ་གསུང་ཐུགས་ཀྱི་བདུད་རྩི་ཡིས༔ བུམ་པ་ཁེངས་ཤིང་དྲི་འོད་ཀྱིས༔ ཆོས་ཀྱི་དབྱིངས་ཀུན་ཁྱབ་པར་གྱུར༔ ༀ་ཨཱཿ་ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ གཙོ་འཁོར་ཡོངས་སུ་རྫོགས་པ་དང་༔ རྡོ་རྗེའི་ཡིག་འབྲུ་བཅུ་གཉིས་པ༔ རླུང་རིག་བསྲེས་ནས་གཙོ་བོར་བཟླ༔ བུམ་ལྷ་འོད་ཞུ་བདུད་རྩིར་གྱུར༔ དབང་བླང་སྨོན་ལམ་ནན་གྱིས་བཏབ༔ དཀྱིལ་འཁོར་སྤྱི་ཡི་རིམ་པའོ༔ དངོས་གཞི་རྟེན་བསྐྱེད་རྣམ་ཤེས་དགུག༔ བགེགས་དང་སྡིག་པ་སྦྱོང་བ་དང་༔ ཁྲུས་ཀྱིས་བཀྲུ་ཞིང་དུག་དབྱུང་བ༔ སྐྱབས་འགྲོ་དབང་བསྐུར་ཟས་གཏད་པ༔ ལམ་བསྟན་གནས་སྤར་བྱང་བུ་སྲེག༔ སཱཙྪ་བཅས་སྟེ་བཅུ་བཞིའོ༔ བགེག་གཏོར་མིང་བྱང་སྡིག་སྦྱོང་རྫས༔ མེ་ལོང་མར་མེ་ལ་སོགས་བསག༔ དང་པོ་རྟེན་བསྐྱེད་དམིགས་པ་ནི༔ ༀ་ཤུནྱ་ཏ་ཛྙཱ་ན་བཛྲ་སྭབྷཱ་ཝ་ཨཱཏྨ་གོ྅ཧཾ༔ ཨ༔ ཆོས་རྣམས་མི་དམིགས་སྟོང་པའི་ངང་ཉིད་ལས༔ པད་ཟླའི་གདན་ལ་ཚེ་འདས་རྣམ་ཤེས་ནི༔ ནྲྀ་ཡིག་སྔོ་སྐྱ་ཡོངས་གྱུར་ལྷ་བུའི་ཚུལ༔ ཕུང་པོ་ཁམས་དང་སྐྱེ་མཆེད་ཡོངས་སུ་རྫོགས༔ དད་པས་ཐལ་སྦྱར་པུས་བཙུགས་པད་དཀར་འཛིན༔ གུས་པའི་གསོལ་འདེབས་གདམས་པའི་དོན་ལ་ཉན༔ བླ་མ་མཆོག་གསུམ་ཐུགས་རྗེའི་སྲུང་འཁོར་ཏུ༔ འཇིགས་མེད་བག་ཕེབས་ཚུལ་དུ་གནས་པར་གྱུར༔ གཉིས་པ་རྣམ་ཤེས་འགུགས་པ་ནི༔ ན་མོ༔ རྒྱལ་བ་རྒྱ་མཚོའི་ཐུགས་བསྐྱེད་བདེན་པ་དང་༔ སྣང་སྟོང་རྒྱུ་འབྲས་བསླུ་མེད་བདེན་པའི་སྟོབས༔ སྔགས་དང་ཏིང་འཛིན་ཕྱག་རྒྱ་ཆེན་པོས་མཐུས༔ ཚེ་འདས་རྣམ་ཤེས་རིགས་དྲུག་བར་དོའི་ཁམས༔ གང་ན་གནས་ཀྱང་ཐུགས་རྗེའི་ལྕགས་ཀྱུ་ཡིས༔ དམ་དུ་བཟུངས་སྟེ་སྒྲིབ་སྦྱོང་དཀྱིལ་འཁོར་འདིར༔ མྱུར་དུ་ཁུག་ཅིག་མིང་བྱང་སྲོག་ཡིག་ལ༔ ནྲི་བཛྲ་ཨངྐུ་ཤ་ཛཿ ཛཿཧཱུྃ་བྃ་ཧོཿ གསུམ་པ་བགེག་གཏོར་བསྔོ་བ་ནི༔ རྡོ་རྗེ་ཁྲོ་བོའི་སྐུར་བཞེངས་སྟེ༔ བར་ཆད་གསོན་བགེགས་བཀུག་ལ་གཟིར༔ བསང་སྦྱང་བྱས་ལ་དམིགས་པ་ནི༔ སྟོང་པའི་ངང་ལས་བྷྲཱུྃ་ཡིག་ལས༔ གཏོར་སྣོད་རིན་ཆེན་འབར་བ་རུ༔ ༀ་ལས་གཏོར་མ་ཟག་མེད་ཀྱི༔ བདུད་རྩིའི་རྒྱ་མཚོ་ཆེན་པོར་གྱུར༔ ༀཨཱཿཧཱུྃ༔ གཏོར་མ་རྟེན་ལ་གཡས་སུ་བསྐོར༔ ༀ་སརྦ་བིགྷྣཱན་ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་གགན་ཁཾ་སྭཱ་ཧཱ༔ ཏིང་ལོ་ཆངས་བུ་གཡོན་དུ་བསྐོར༔ ༀ་སུམྦྷ་ནི་སུམྦྷ་ནི་ཧཱུྃཿ གྲིཧྣ་གྲིཧྣ་ཧཱུྃཿ གྲིཧྣ་པ་ཡཱ་གྲིཧྣ་པ་ཡཱ་ཧཱུྃཿ ཨ་གྣ་ཡ་ཧོ་བྷ་ག་ཝཱན་བིདྷྱེ་ར་ཛ་ཧཱུྃ་ཕཊ༔ ཞི་དྲག་ཕྱེད་མས་མགྲོན་ལ་བསྔོ༔ བགེགས་ཚོགས་རྣམས་ལ་བཀའ་བགོ་ནི༔ ཧཱུྃ༔ཧཱུྃ༔ དུས་གསུམ་སངས་རྒྱས་བྱིན་རླབས་རྨད་པོ་ཆེ༔ ཡི་དམ་ལྷ་ཚོགས་ཏིང་འཛིན་ཆོ་འཕྲུལ་འབར༔ མཁའ་འགྲོ་དམ་ཅན་མཐུ་རྩལ་དྲག་པོ་ཡིས༔ མཆོག་དང་ཐུན་མོངས་དངོས་གྲུབ་བར་གཅོད་བགེགས༔ བདེན་པའི་སྟོབས་ཀྱིས་རྡུལ་བཞིན་བརླགས་པར་བྱ༔ རྩ་སྔགས་ཁྲོ་བོས་སྔགས་ཀྱིས་བསྐྲད༔ ༀ་སུམྦྷ་ནི་སུམྦྷ་ནི་ཧཱུྃཿ གྲིཧྣ་གྲིཧྣ་ཧཱུྃཿ་གྲིཧྣ་པ་ཡཱ་གྲིཧྣ་པ་ཡཱ་ཧཱུྃཿ ཨ་གྣ་ཡ་ཧོ་བྷ་ག་ཝཱན་བིདྷྱེ་ར་ཛ་ཧཱུྃ་ཕཊ༔ གུ་གུལ་བདུག་ཅིང་ཡུངས་ཀར་བྲབ༔ གཏོར་མ་ཕྱི་རོལ་གནས་སུ་བསྐྱལ༔ སྲུང་འཁོར་བསྒོམ་པ་ནི༔ ཧཱུྃ༔ བདག་ཉིད་རྡོ་རྗེ་འཛིན་རྒྱལ་ཁྲོས་པ་ཡི༔ ཐུགས་ལས་སྤྲུལ་བའི་མཚོན་ཆ་རྡོ་རྗེའི་མེ༔ སྟེང་འོག་ཕྱོགས་མཚམས་མ་ལུས་ཀུན་ཏུ་གཏམ༔ བསྐལ་བ་ལས་ཀྱི་རླུང་ཡང་སྡང་མི་འགྱུར༔ བཛྲ་རཀྵ་ཧཱུྃ་ཕཊ༔ བཞི་བ་སྡིག་པ་སྦྱོང་བ་ནི༔ ཨ༔ ཚེ་ལས་འདས་པའི་གནས་དྲུག་དུ༔ རིགས་དྲུག་ས་བོན་ཐིག་ལེ་ཤར༔ སྤྱི་བོར་ཨ་དཀར་ལྷའི་ས་བོན༔ མགྲིན་པར་སུ་སེར་ལྷ་མིན༔ སྙིང་གར་ནྲྀ་སྔོ་མིའི་ས་བོན༔ ལྟེ་བར་ཏྲི་ལྗང་དུད་འགྲོའི་སྟེ༔ གསང་གནས་པྲེ་སྐྱ་ཡི་དྭགས་ཉིད༔ རྐང་མཐིལ་དུ་ནག་དམྱལ་བའོ༔ བདག་མདུན་ལྷ་ཚོགས་ཐུགས་ཀ་ནས༔ ཡེ་ཤེས་འོད་ཟེར་མེ་ལྟར་མཆེད༔ ཚེ་ལས་འདས་པ་རིགས་དྲུག་ཏུ༔ སྐྱེ་བའི་ས་བོན་མ་ལུས་པ༔ ཉོན་མོངས་སྡིག་སྒྲིབ་བག་ཆགས་བཅས༔ ཐམས་ཅད་བསྲེགས་ཤིང་སྦྱངས་པར་གྱུར༔ རྩ་སྔགས་དང་ནི་ལྷ་སྔགས་མཐར༔ སྡིག་པ་སྦྱོང་བའི་སྔགས་འདི་བཏགས༔ ཨ་སུ་ནྲྀ་ཏྲི་པྲེ་དུཿསརྦ་པཱ་པཾ་ཀླེ་ཤ་ད་ཧ་ན་བྷསྨིཾ་ཀུ་རུ་སྭཱ་ཧཱ༔ གཟུགས་དང་མཚན་བྱང་བྱེ་མས་བྲབ༔ སྡིག་སྒྲིབ་རྡུལ་ལྟར་སྦུར་བར་བསམ༔ ཨ་བྷྱ༔ཏྱ་ཏཾ་ཀེཾ༔ རྒྱ་ཏཾ་བྲིས་པར་བརྟགས། སྐྱེ་སྒོ་གཅོད་པའི་སྔགས་དང་། མ་མཱ་ཀོ་ལིཾ་ས་མནྟ། ངན་སོང་དོང་སྤྲུགས་སྔགས། འཿཨཿཤཿསཿམཿཧཿ རིག་དྲུག་ཀློང་གྲོལ་སྔགས། ལྔ་པ་ཁྲུས་ཀྱིས་སྦྱོང་བ་ནི༔ སྤྲོ་ན་དཀྱིལ་འཁོར་ལྷ་ཁྲུས་བྱ༔ ༀ ཆོས་དབྱིངས་སྤྲོས་བྲལ་བུམ་སྐུའི་དབྱིངས༔ བདེ་ཆེན་ལྷུན་གྲུབ་བདུད་རྩིའི་ཆུ༔ ཐུགས་རྗེས་རོལ་བའི་ཁྲུས་བགྱིའོ༔ ཚེ་འདས་ཤེས་སྒྲིབ་དག་གྱུར་ཅིག༔ རྩ་སྔགས་ཡིག་བརྒྱས་བཀྲུ་བར་བྱ༔ ཚེ་ལས་འདས་ཆྒཻ་མོའི་ལས་དང་ཤེས་བྱའི་སྒྲིབ་པ་བག་ཆགས་དང་བཅས་པ་ཐམས་ཅད་ཤཱིཾནྟ་ཀུ་རུ་སྭཱ་ཧཱ༔ ཀུན་གཞིའི་བག་ཆགས་དག་པར་བསམ༔ ༀ༔ སྐུ་གསུམ་རྒྱལ་བས་ཁྲུས་བགྱིའོ༔ དུག་གསུམ་སྒྲིབ་པ་དག་པར་ཤོག༔ རྒྱལ་བ་རིགས་ལྔས་ཁྲུས་བགྱིའོ༔ དུག་ལྔའི་སྒྲིབ་པ་དག་པར་ཤོག༔ རྩ་སྔགས་ཡིག་བརྒྱས་བཀྲུ་བར་བྱ༔ ཚེ་ལས་འདས་ཆེ་གེ་མོའི་ལས་ཉོན་པ་བག་ཆགས་དང་བཅས་པ་ཐམས་ཅད་ཤཱིཾནྟ་ཀུ་རུ་སྭཱ་ཧཱ༔ཐུབ་པ་དྲུག་གིས་ཁྲུས་བགྱིའོ༔ རིག་དྲུག་བག་ཆགས་དག་པར་ཤོག༔ ཕ་རོལ་ཕྱིན་བཅུས་ཀྲུས་བགྱིའོ༔ རླུང་བཅུའི་དྲི་མ་དག་པར་ཤོག༔ རྩ་སྔགས་ཡིག་བརྒྱས་བཀྲུ་བར་བྱ༔ ཚེ་ལས་འདས་ཆེ་གེ་མོའི་ལས་ལས་ཉོན་བག་ཆགས་དང་བཅས་པ་ཐམས་ཅད་ཤཱིཾནྟ་ཀུ་རུ་སྭཱ་ཧཱ༔ བདུན་པ་དུག་དབྱུང་བྱ་བ་ནི༔ ཀུ་ཤ་རྨ་བྱའི་སྒྲོས་བྱབས་ཤིང་༔ འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ དཀོན་མཆོག་གསུམ་པོ་དུག་མི་མངའ༔ དཀོན་མཆོག་བདེན་པས་དུག་གཞོམ་མོ༔ རྩ་བའི་སྔགས་དང་ཡིག་བརྒྱ་བརྗོད༔ ཚེ་ལས་འདས་པའི་དུག་གསུམ་རྒྱུ་འབྲས་དང་བཅས་པ་ཐམས་ཅད་ཤཱིཾནྟ་ཀུ་རུ་སྭཱ་ཧཱ། འབྱུང་བས་དུག་དབྱུང་བྱ་བ་ནི༔ ས་ནི་དུག་གི་ཕ་དང་མ༔ གནས་དག་ཡུམ་ཆེན་སངས་རྒྱས་སྤྱན༔ ཐུགས་བསྐྱེད་ཆོས་ཉིད་བདེན་པའི་མཐུས༔ ཚེ་འདས་ཕྱི་ནང་དུག་སེལ་ཤོག༔ ཆུ་ནི་དུག་གི་ཕ་དང་མ༔ གནས་དག་ཡུམ་ཆེན་མཱ་མ་ཀཱི༔ ཐུགས་བསྐྱེད་ཆོས་ཉིད་བདེན་པའི་མཐུས༔ ཚེ་འདས་ཕྱི་ནང་དུག་སེལ་ཤོག༔ མེ་ནི་དུག་གི་ཕ་དང་མ༔ གནས་དག་ཡུམ་ཆེན་གོས་དཀར་མོ༔ ཐུགས་བསྐྱེད་ཆོས་ཉིད་བདེན་པའི་མཐུས༔ ཚེ་འདས་ཕྱི་ནང་དུག་སེལ་ཤོག༔ རླུང་ནི་དུག་གི་ཕ་དང་མ༔ གནས་དག་ཡུམ་ཆེན་དམ་ཚིག་སྒྲོལ༔ ཐུགས་བསྐྱེད་ཆོས་ཉིད་བདེན་པའི་མཐུས༔ ཚེ་འདས་ཕྱི་ནང་དུག་སེལ་ཤོག༔ ཚེ་ལས་འདས་པའི་འབྱུང་དང་འབྱུང་བ་ལས་གྱུར་པའི་དུག་ཐམས་ཅད་ཤཱིཾནྟ་ཀུ་རུ་སྭཱ་ཧཱ༔ བརྒྱད་པ་ཚེ་འདས་སྐྱབས་འགྲོར་གཞུག༔ ཉེ་དུ་འབྲེལ་བ་ཐམས་ཅད་ཀྱིས༔ ཚེ་འདས་ལ་སོགས་སྡིག་སྦྱོང་ཕྱིར༔ ལུས་ཀྱིས་བཤགས་འཚལ་བཤགས་སྡོམ་བྱ༔ ཚེ་འདས་ཉིད་ཀྱིས་བླ་མ་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པ་རྩ་གསུམ་ཞི་ཁྲོ་རབ་འབྱམས་ཀྱི་སྤྱན་སྔར་ཕྱག་འཚལ་ཞིང་སྐྱབས་སུ་འགྲོ་བར་མོས༔ ཀྱེ་མ་ཀྱི་ཧུད་ཐུགས་རྗེའི་བདག༔ འགྲོ་མགོན་བླ་མས་བདག་སྐྱོངས་ཤིག༔ ཕྱོགས་བཅུའི་རྒྱལ་བ་སྲས་དང་བཅས༔ ལས་ངན་བདག་ལ་བརྩེ་བས་གཟིགས༔ ཆོས་སྐུའི་སྟོན་པ་ཀུན་ཏུ་བཟང་༔ ལོངས་སྤྱོད་རྫོགས་པ་སྤྱན་རས་གཟིགས༔ སྤྲུལ་བའི་སྐུ་མཆོག་པདྨ་འབྱུང་༔ ཐུགས་རྗེ་མ་ཆུང་བརྩེ་བས་གཟིགས༔ ཉེས་པའི་ཚོགས་ལ་གནོངས་ཤིང་འགྱོད༔ གདུང་ཤུགས་དྲག་པོས་འཐོལ་ཞིང་བཤགས༔ སྒོ་གསུམ་གུས་པས་ཕྱག་འཚལ་ལོ༔ ཐུགས་རྗེས་གཟིགས་ལ་མྱུར་དུ་སྐྱོབས༔ སྙིང་ནས་འགྱོད་ཅིང་བཤགས་པ་བྱ༔ དཀྱིལ་འཁོར་ལྷ་བཤགས་སྤྲོ་བ་ལ༔ ཀྱེ་ཀྱེ་སྐྱབས་གཅིག་གུ་རུ་པདྨ་འབྱུང་༔ གྲངས་མེད་བསྐལ་བའི་སྔོན་ནས་འགྲོ་བའི་དོན༔ གཡེལ་མེད་མཛད་པའི་དམ་བཅའ་ཉེར་དགོངས་ལ༔ བྱིན་རླབས་ནུས་པ་མངོན་སུམ་ཉིད་དུ་སྟོན༔ ཨོ་རྒྱན་ལྷ་སྲིན་སྡེ་བརྒྱད་དཀྱིལ་འཁོར་གཙོ༔ གུ་རུ་དམར་ནག་མེ་ཕྲེང་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ ཞེ་སྡང་འཁྲུགས་པའི་སྒྲིབ་པ་དག་གྱུར་ཅིག ཨོ་རྒྱན་སྨན་གྱི་བླ་མའི་དཀྱིལ་འཁོར་གཙོ༔ དུག་གསུམ་ནད་སེལ་སྨན་གྱི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ གཟུང་འཛིན་ནད་ཀྱི་སྒྲིབ་པ་དག་གྱུར་ཅིག༔ ཨོ་རྒྱན་མཁའ་འགྲོ་ནོར་ལྷའི་དཀྱིལ་འཁོར་གཙོ༔ སྨུག་འཛིན་དྲྭ་བ་སྡོམ་པའི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ ཞེན་ཆགས་སེར་སྣའི་སྒྲིབ་པ་དག་གྱུར་ཅིག༔ ཨོ་རྒྱན་ཡི་དམ་ལྷ་ཡི་དཀྱིལ་འཁོར་གཙོ༔ དཔལ་ཆེན་སྒྲུབ་པ་བཀའ་བརྒྱད་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ འཁྲུལ་བ་ཨ་འཐས་སྒྲིབ་པ་དག་རྒྱུར་ཅིག༔ ཨོ་རྒྱན་གཞི་བདག་གཉན་པོའི་དཀྱིལ་འཁོར་གཙོ༔ ཟིལ་གནོན་དྲག་རྩལ་དཔལ་མགོན་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ ཚོགས་བརྒྱད་རྟག་འཛིན་སྒྲིབ་པ་དག་རྒྱུར་ཅིག༔ ཨོ་རྒྱན་དཔའ་བོའི་གིང་གི་དཀྱིལ་འཁོར་གཙོ༔ གསང་བདག་སེངྒེ་སྒྲ་སྒྲོག་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ འབྲོག་ཆེན་བར་དོའི་འཇིགས་པ་ཞི་བར་མཛོད༔ ཨོ་རྒྱན་འབྱུང་བ་བཞི་བདག་དཀྱིལ་འཁོར་གཙོ༔ བདེ་ཆེན་པདྨ་བཛྲ་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ འབྱུང་བ་འཁྲུགས་པའི་དགྲ་ཀུན་ཞི་བར་མཛོད༔ ཨོ་རྒྱན་ཕྱག་རྒྱ་བཞི་ཡི་དཀྱིལ་འཁོར་གཙོ༔ ཁྲོ་མཆོག་རྟ་མགྲིན་ནག་པོའི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ ཐེ་ཚོམ་རྣམ་རྟོག་བར་ཆད་ཞི་བར་མཛོད༔ ཨོ་རྒྱན་རྡོ་རྗེའི་གུར་གྱི་དཀྱིལ་འཁོར་གཙོ༔ རྡོ་རྗེ་གྲོ་ལོད་ཁྲོ་བཅུའི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ ཉོན་མོངས་མཚོན་གྱི་འཇིགས་པ་ཞི་བར་མཛོད༔ ཨོ་རྒྱན་སྣང་མཐའི་སྤྲུལ་བའི་དཀྱིལ་འཁོར་གཙོ༔ ཐུགས་ཆེན་པདྨ་རྒྱལ་པོའི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ འཕོ་བཅས་རེ་དོགས་འཇིགས་པ་ཞི་བར་མཛོད༔ ཨོ་རྒྱན་དུས་གསུམ་མཁྱེན་པའི་དཀྱིལ་འཁོར་གཙོ༔ སངས་རྒྱས་འོད་དཔག་མེད་པའི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ འཁྲུལ་བ་རྨི་ལམ་འཇིགས་པ་ཞི་བར་མཛོད༔ ཨོ་རྒྱན་བདེ་ཆེན་རྒྱལ་པོའི་དཀྱིལ་འཁོར་གཙོ༔ ཆོས་སྐུ་ཀུན་ཏུ་བཟང་པོའི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ དངོས་ཞེན་འཛིན་པའི་འཇིགས་པ་ཞི་བར་མཛོད༔ ཨོ་རྒྱན་ཐུགས་རྗེ་འགྱུར་མེད་དཀྱིལ་འཁོར་གཙོ༔ ཡིད་བཞིན་ནོར་བུ་བདེ་ཆེན་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ སྙེམས་འཕྲིག་དམ་སེལ་འཇིགས་པ་ཞི་བར་མཛོད༔ ཀུན་བཟང་པདྨ་ཞི་ཁྲོའི་ལྷ་ཚོགས་ལ༔ ཕྱག་འཚལ་སྐྱབས་མཆི་ཚེ་འདས་ཐུགས་རྗེས་ཟུངས༔ སྒྲིབ་གཉིས་བག་ཆགས་མ་ལུས་དྲུང་ཕྱུང་སྟེ༔ གདོད་མའི་སངས་རྒྱས་ས་ལ་དབུགས་དབྱུང་མཛོད༔ དགུ་པ་སློབ་མ་རྗེས་འཛིན་ནི༔ རྒྱས་པར་ལྷ་དབང་གཞུང་བཞིན་བསྐུར༔ བསྡུས་པར་བྱིན་རླབས་དབང་སྐུར་ནི༔ མཎྜལ་ཕུལ་ཞིང་གསོལ་བ་གདབས༔ ཚེ་ལས་འདས་པ་སྐད་ཅིག་གིས་ཨོ་རྒྱན་རྡོ་རྗེ་འཆང་གི་སྐུར་གྱུར་པས་གསོལ་བ་འདེབས་པར་མོས་ལ༔ ཧཱུྃ༔ རྡོ་རྗེ་སློབ་དཔོན་དགོངས་སུ་གསོལ༔ བདག་ཅག་འཁོར་བའི་རྒྱ་མཚོ་ནས༔ བྱང་ཆུབ་སྐམ་སར་སྒྲོལ་བའི་ཕྱིར༔ ཞི་ཁྲོ་ཡོངས་རྫོགས་དབང་སྐུར་ཞུ༔ ཡན་ལག་བདུན་པ་བྱ་བ་ནི༔ ཨོཾ་ཨཱཿཧཱུྃ༔ དངོས་འབྱོར་ཡིད་སྤྲུལ་མཆོད་རྫས་དཔག་མེད་འབུལ༔ ཕྱག་འཚལ་ཐོག་མེད་བསགས་པའི་ཉེས་ལྟུང་བཤགས༔ དགེ་ལ་ཡི་རང་མྱ་ངན་མི་འདའ་བར༔ ཆོས་གསུང་བསྐུལ་བའི་དགེ་ཚོགས་འགྲོ་ལ་བསྔོ༔ སྡོམ་གསུམ་ལེན་ཞིང་བསྲུང་བ་ནི༔ ཧོ༔ རྩ་བ་རྡོ་རྗེ་སློབ་དཔོན་དང་༔ དཀྱིལ་འཁོར་ལྷ་ཚོགས་བདག་ལ་དགོངས༔ བདག་ཅག་སྐལ་ལྡན་རིགས་ཀྱི་བུ༔ བྱང་ཆུབ་སྙིང་པོར་མཆིས་ཀྱི་བར༔ བཀའ་བསྒྲུབ་དབང་ཞུས་དམ་ཚིག་བསྲུང༔ གསང་སྔགས་རྡོ་རྗེར་འཇུག་པར་ཞུ༔ ཡེ་ཤེས་དབབ་པའི་བྱིན་རླབས་ནི༔ མེ་ཏོག་གཏད་ཅིང་མིག་རས་གསོལ༔ ཧཱུྃ༔ ཕུང་ཁམས་སྐྱེ་མཆེད་སྟོང་པའི་ངང༔ པདྨ་ཉི་ཟླ་བརྩེགས་པའི་ཁྲིར༔ སློབ་མའི་ངོ་བོ་པདྨ་འབྱུང༔ དཀར་གསལ་རྡོ་རྗེ་དྲིལ་བུ་འཛིན༔ ལོངས་སྤྱོད་རྫོགས་སྐུའི་ཆ་ལུགས་ཅན༔ དར་དང་རིན་ཆེན་སྣ་ཚོགས་བཀླུབས༔ གནས་གསུམ་ཨོཾ་ཨཱཿཧཱུྃ་གིས་མཚན༔ ཕྱེད་སྐྱིལ་དགྱེས་པའི་གར་སྟབས་རོལ༔ བདག་གི་ཐུགས་ཀའི་ཧཱུྃ་ཡིག་དང༔ སློབ་མའི་སྙིང་གའི་ས་བོན་ལས༔ འོད་ཟེར་སྣ་ཚོགས་ཕྱོགས་བཅུར་འཕྲོས༔ དཔག་མེད་མཐའ་ཀླས་ཞིང་ཁམས་ནས༔ རབ་འབྱམས་རྒྱལ་བ་རྒྱ་མཚོའི་ཚོགས༔ མཚོ་ལ་ཁ་ཆར་འབེབས་པ་ལྟར༔ སློབ་མའི་སྤྱི་བོར་སིབ་སིབ་ཐིམ༔ སྐུ་གསུང་ཐུགས་ཀྱིས་བྱིན་བརླབས་གྱུར༔ ཧཱུྃ༔ ཁྱབ་བརྡལ་བདེ་ཆེན་ཀློང་ཡངས་ནས༔ ཀུན་བཟང་ཡབ་ཡུམ་བྱིན་ཕོབ་ཅིག༔ སྟུག་པོ་བཀོད་པའི་ཞིང་ཁམས་ནས༔ རྡོ་རྗེ་འཆང་ཆེན་བྱིན་ཕོབ་ཅིག༔ ནུབ་ཕྱོགས་བདེ་ཆེན་ཞིང་ཁམས་ནས༔ སྣང་བ་མཐའ་ཡས་བྱིན་ཕོབ་ཅིག༔ རི་བོ་ཏ་ལའི་ཕོ་བྲང་ནས༔ ཐུགས་རྗེ་ཆེན་པོས་བྱིན༴ རྔ་ཡབ་གླིང་གི་ཞིང་ཁམས་ནས༔ པདྨ་འབྱུང་གནས་བྱིན༴ བདེ་སྟོང་སྒྱུ་མའི་ཕོ་བྲང་ནས༔ ཡེ་ཤེས་མཚོ་རྒྱལ་བྱིན༴ རང་བཞིན་གཞལ་ཡས་ཐམས་ཅད་ནས༔ རྒྱལ་བ་རྒྱ་མཚོ་དཔག་མེད་དང༔ བླ་མ་ཡི་དམ་མཁའ་འགྲོའི་ཚོགས༔ གནས་མཆོག་འདི་རུ་བྱིན་ཕོབ་ཅིག༔ ཧཱུྃ༔ རང་བཞིན་དབྱིངས་ལས་མ་གཡོས་ཀྱང༔ ཐབས་མཁས་ཐུགས་རྗེའི་སྤྲུལ་སྒྱུར་འགྱེད༔ ཞི་དང་ཁྲོ་བོའི་སྐུ་གཟུགས་འཆར༔ གནས་མཆོག་འདི་རུ་བྱིན་ཕོབ་ཅིག༔ སྣང་སྲིད་སྐུ་ཡི་བཀོད་པས་ཁྱབ༔ སློབ་མའི་ལུས་ལ་བྱིན་གྱིས་རློབས༔ ཆོས་ཉིད་རང་སྒྲ་འབྲུག་ལྟར་ལྡིར༔ སློབ་མའི་ངག་ལ་བྱིན་གྱིས་རློབས༔ དབྱིངས་རིག་ཐིག་ལེ་སྣ་ཚོགས་འཆར༔ སློབ་མའི་ཡིད་ལ་བྱིན་གྱིས་རློབས༔ སྒྲ་འོད་ཟེར་གསུམ་བསམ་ལས་འདས༔ སློབ་མའི་ཕུང་ཁམས་བྱིན་གྱིས་རློབས༔ ཨོཾ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛ༔ ཧཱུྃ་ཧཱུྃ༔་ཕེཾ་ཕཻ༔ རཱ་རཱ་རཱ་རཱ༔ ཙ་ལཱ་ཡ་ཙ་ལཱ་ཡ༔ དོ་ཤ་ཡ་དོ་ཤ་ཡ༔ ཨཱ་ཝེ་ཤ་ཡ་ཨ་ཨཿ བརྟན་ཕྱིར་སྤྱི་བོར་རྡོ་རྗེ་བཞག༔ དེ་ཝ་ཏིཥྛ་བཛྲ་ཧཱུྃ༔ ཀཱ་ཡ་ཏིཥྛ་བཛྲ་ཧཱུྃ༔ ཝཱ་ཀ་ཏིཥྛ་བཛྲ་ཧཱུྃ༔ ཙིཏྟ་ཏིཥྛ་བཛྲ་ཧཱུྃ༔ གུ་རུ་མཎྜལ་ཏིཥྛ་བཛྲ་ཧཱུྃ༔ མེ་ཏོག་དཀྱིལ་འཁོར་ལྷ་ལ་ཕུལ༔ ༀ་པུཥྤེ་པྲ་ཏཱི་ཙྪ་ཧོ༔ མིག་ཐུར་ཐོགས་ལ་སྤྱན་འབྱེད་བྱ༔ ཨོཾ་བཛྲ་པ་ཤྱ་ཧོ༔ ཙུཀྵ༔པྲ་བེ་ཤ་ཡ་ཕཊ༔ དཀྱིལ་འཁོར་ལྷ་ཞལ་བསྟན་པ་ནི༔ ཧཱུྃ༔ བུ་ཁྱོད་རྩོལ་སེམས་མ་ཆུང་བར༔ དཀྱིལ་འཁོར་བཟང་པོ་འདི་ལ་ལྟོས༔ ད་ནི་དད་པ་རབ་ཏུ་སྐྱེད༔ དངོས་གྲུབ་ཐམས་ཅད་འདིས་ཐོབ་འགྱུར༔ དེ་ནས་ལྷ་དབང་བསྐུར་བ་ནི༔ བླ་མ་པདྨ་འབྱུང་གནས་ཀྱི་སྨིན་མཚམས་ནས་གདན་གསུམ་ཚང་བའི་དཀྱིལ་འཁོར་ནམ་མཁའ་གང་བར་སྤྲོས་ཏེ་རིག་པའི་ལྷ་མོ་རྣམས་ཀྱིས་བྱང་ཆུབ་སེམས་ཀྱི་བདུད་རྩིས་དབང་བསྐུར་བར་གྱུར༔ ཧོཿ བུམ་པ་མཚན་ལྡན་གཞལ་ཡས་ཁང་༔ བུམ་བཅུད་རིགས་ལྔ་ཞི་ཁྲོའི་ལྷ༔ བྱིན་རླབས་བདུད་རྩིས་དབང་བསྐུར་བས༔ སྒྲིབ་གཉིས་བག་ཆགས་དག་གྱུར་ཅིག༔ ཀ་ལ་ཤཱ་ཨ་བྷི་ཥིཉྩཱ་མི ༔ སྐུ་གཟུགས་ཐོགས་ལ་འདི་སྐད་བརྗོད༔ ཧཱུྃ༔ འདི་ནི་པདྨ་འབྱུང་གནས་ཏེ༔ དུས་གསུམ་སངས་རྒྱས་འདུས་པའི་སྐུ༔ སློབ་མ་ཁྱོད་ལ་དབང་བསྐུར་རོ༔ ལུས་སྒྲིབ་དག་ཅིང་སྐུ་དབང་ཐོབ༔ ཀཱ་ཡ་ཨ་བྷི་ཥིཉྩ་ཨོཾ༔ སྔགས་བྱང་ངམ་ཤེལ་ཕྲེང་ཐོགས་ལ་འདི་སྐད་དོ། ཧཱུྃ༔ འདི་ནི་གུ་རུའི་སྙིང་པོ་སྟེ༔ དུས་གསུམ་སངས་རྒྱས་འདུས་པའི་གསུང༔ སློབ་མ་ཁྱོད་ལ་དབང་བསྐུར་རོ༔ ངག་སྒྲིབ་དག་ཅིང་གསུང་དབང་ཐོབ་༔ ཝཱཀ་ཨ་བྷི་ཥིཉྩ་ཨཱཿ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ལན་གསུམ་བརྗོད། མེ་ལོང་ཐོགས་ལ་འདི་སྐད་དོ༔ ཧཱུྃ༔ འདི་ནི་གུ་རུའི་ཡེ་ཤེས་ཏེ༔ དུས་གསུམ་སངས་རྒྱས་འདུས་པའི་ཐུགས༔ སློབ་མ་ཁྱོད་ལ་དབང་བསྐུར་རོ༔ ཡིད་སྒྲིབ་དག་ཅིང་ཐུགས་དབང་ཐོབ༔ ཙིཏྟ་ཨ་བྷི་ཥིཉྩ་ཧཱུྂ༔ དབང་ཐོབ་དམ་ཚིག་བསྒྲགས་པ་ནི༔ ཧོ༔ ད་ནི་དབང་མཆོག་མ་ལུས་ཐོབ༔ གནས་ལུས་ལོངས་སྤྱོད་ཡོན་ཏུ་འབུལ༔ སྒོ་གསུམ་དམ་ཚིག་མི་འདའ་སྲུང་༔ འགྲོ་ཀུན་བདེ་བར་འགོད་ནུས་ཤོག༔ བཅུ་པ་འདོད་ཡོན་བསྔོ་བ་ནི༔ རྃ་ཡྃ་ཁྃ༔ སྟོང་པའི་ངང་ལས་ཏྲྃ་ལས་རིན་པོའི་སྣོད་དུ་ༀ་ལས་འདོད་ཡོན་གྱི་དངོས་པོ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་འཛད་མི་ཤེས་པའི་ནམ་མཁའ་མཛོད་ཀྱི་གཏེར་ཆེན་པོ་གཅིག་ཏུ་གྱུར༔ ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ༔ ༀ་ཨཱཿཧཱུྃ༔ ཞེས་བརྗོད་སྔགས་ཀྱིས་བྱིན་གྱིས་བརླབས༔ ཧོ༔ སྟོང་ཉིད་ངང་ལས་བདེ་ཆེན་གཟུགས་ཀྱི་ཚོགས༔ རབ་འབྱམས་རྒྱ་མཚོ་རྒྱས་པར་བཀང་བྱས་ཏེ༔ རྡོ་རྗེ་འཆང་གི་གནས་ཐོབ་ཁྱོད་ལ་འབུལ༔ ཟག་མེད་དགའ་བདེས་རྟག་ཏུ་ཚིམ་པར་ཤོག༔ ༀ་ཨཱཿ་བཛྲ་རཱུ་པ་ཀཱ་མ་གུ་ཎ་པྲ་ཏཱི་ཙྪ་སྭཱ་ཧཱ༔ ཧོ༔ སྟོང་ཉིད་ངང་ལས་བདེ་ཆེན་སྒྲ་ཡི་ཚོགས༔ རབ་འབྱམས་རྒྱ་མཚོ་རྒྱས་པར་བཀང་བྱས་ཏེ༔ རྡོ་རྗེ་འཆང་གི་གནས་ཐོབ་ཁྱོད་ལ་འབུལ༔ ཟག་མེད་དགའ་བདེས་རྟག་ཏུ་ཚིམ་པར་ཤོག༔ ༀ་ཨཱཿ་བཛྲ་ཤབྟ་ཀཱ་མ་གུ་ཎ་པྲ་ཏཱི་ཙྪ་སྭཱ་ཧཱ༔ ཧོ༔ སྟོང་ཉིད་ངང་ལས་བདེ་ཆེན་དྲི་ཡི་ཚོགས༔ རབ་འབྱམས་རྒྱ་མཚོ་རྒྱས་པར་བཀང་བྱས་ཏེ༔ རྡོ་རྗེ་འཆང་གི་གནས་ཐོབ་ཁྱོད་ལ་འབུལ༔ ཟག་མེད་དགའ་བདེས་རྟག་ཏུ་ཚིམ་པར་ཤོག༔ ༀ་ཨཱཿ་བཛྲ་གནྡྷེ་ཀཱ་མ་གུ་ཎ་པྲ་ཏཱི་ཙྪ་སྭཱ་ཧཱ༔ ཧོ༔ སྟོང་ཉིད་ངང་ལས་བདེ་ཆེན་རོ་ཡི་ཚོགས༔ རབ་འབྱམས་རྒྱ་མཚོ་རྒྱས་པར་བཀང་བྱས་ཏེ༔ རྡོ་རྗེ་འཆང་གི་གནས་ཐོབ་ཁྱོད་ལ་འབུལ༔ ཟག་མེད་དགའ་བདེས་རྟག་ཏུ་ཚིམ་པར་ཤོག༔ ༀ་ཨཱཿ་བཛྲ་རཱ་ས་ཀཱ་མ་གུ་ཎ་པྲ་ཏཱི་ཙྪ་སྭཱ་ཧཱ༔ ཧོ༔ སྟོང་ཉིད་ངང་ལས་བདེ་ཆེན་རེག་བྱའི་ཚོགས༔ རབ་འབྱམས་རྒྱ་མཚོ་རྒྱས་པར་བཀང་བྱས་ཏེ༔ རྡོ་རྗེ་འཆང་གི་གནས་ཐོབ་ཁྱོད་ལ་འབུལ༔ ཟག་མེད་དགའ་བདེས་རྟག་ཏུ་ཚིམ་པར་ཤོག༔ ༀ་ཨཱཿ་བཛྲ་སྥརྴེ་ཀཱ་མ་གུ་ཎ་པྲ་ཏཱི་ཙྪ་སྭཱ་ཧཱ༔ ཧོ༔ ཟབ་གསལ་ཏིང་འཛིན་གསང་བ་སྔགས་ཀྱི་མཐུ༔ བདེན་པའི་ཚིག་གིས་འདོད་ཡོན་རྒྱ་མཚོ་སྤེལ༔ ཚེ་འདས་སྒྲིབ་གཉིས་བྱང་ཞིང་ཚོགས་གཉིས་རྫོགས༔ ཟུང་འཇུག་རྡོ་རྗེ་འཆང་གི་ས་ཐོབ་ཤོག༔ བཅུ་གཅིག་ཐར་ལམ་བསྟན་པ་ནི༔ ཧོ༔ ལེགས་པར་ཉོན་ཅིག་ཚེ་འདས་རིགས་ཀྱི་བུ༔ ཁམས་གསུམ་འཁོར་བ་སྡུག་བསྔལ་རང་བཞིན་ཏེ༔ མི་རྟག་དུཿཁས་གཟིར་བ་ཤེས་པར་གྱིས༔ འཆི་དང་འཕོ་བའི་ངང་ཚུལ་དེ་ལྟར་རོ༔ ལས་འབྲས་བསླུ་བ་མེད་པ་རྒྱལ་བས་གསུངས༔ སྤོང་ལེན་ཚུལ་བཞིན་དགོས་སོ་རིགས་ཀྱི་བུ༔ བདེ་ཆེན་དག་པའི་ཞིང་མཆོག་གཏན་གྱི་གནས༔ འགྲོ་བའི་འདུན་པ་བསྐྱེད་ཅིག་རིགས་ཀྱི་བུ༔ འཇིག་རྟེན་འདི་ཡི་ནུབ་ཕྱོགས་བདེ་བ་ཅན༔ འོད་དཔག་མེད་མགོན་ཐུགས་རྗེ་ལས་གྲུབ་པའི༔ སངས་རྒྱས་བྱང་ཆུབ་སེམས་དཔའི་ཡོངས་གང་པ༔ གང་འདོད་བསམ་བཞིན་འགྲུབ་པ་དག་པའི་ཞིང་༔ པདྨོ་ལས་སྐྱེས་མཚན་དཔེའི་ཆ་ཤས་རྫོགས༔ དབུལ་དང་འཐབ་རྩོད་སྡུག་བསྔལ་མིང་མི་གྲགས༔ སྟོན་པ་སངས་རྒྱས་བསྟན་པ་ཐེག་ཆེན་ཆོས༔ འཁོར་རྣམ་བྱང་སེམས་འགྱུར་མེད་རྟག་པའི་དུས༔ ཐུགས་རྗེའི་བདག་ཉིད་རྒྱལ་བ་འོད་དཔག་མེད༔ རྒྱལ་སྲས་བྱང་ཆུབ་སེམས་དཔའི་ཚོགས་ཀྱིས་བསྐོར༔ སྐུ་ཡི་འོད་ཟེར་སྙན་པའི་གསུང་གི་སྒྲ༔ སྤྲུལ་བས་བུ་ཁྱོད་བསུ་བ་དེར་དེངས་ཤིག༔ སྲིད་ལ་མ་ཆགས་བློ་ཐག་རྦད་ཀྱིས་ཆོད༔ ཡུལ་ལ་མ་གཡེངས་རིག་པ་གཅིག་ཏུ་སྒྲིམ༔ རྩེ་གཅིག་སེམས་ལ་འོད་དཔག་མེད་པ་ཆོངས༔ དད་མོས་བསྐྱེད་ལ་བདེ་བ་ཅན་དུ་སོང་༔ ཁྱོད་ནི་ཡིད་ལུས་ཐོགས་པ་མེད་པ་སྟེ༔ བདེ་ཆེན་ཞིང་མཆོག་ཡིད་ལ་དྲན་ཙམ་གྱིས༔ གནས་དེར་ཕྱིན་ནས་འོད་དཔག་མེད་པ་མཇལ༔ རྫོགས་སངས་རྒྱས་པའི་ལུང་བསྟན་ཐོབ་པར་འགྱུར༔ བཅུ་གཉིས་གནས་ནས་སྤར་པ་ནི༔ ཚེ་འདས་པད་འབྱུང་རྡོ་རྗེ་འཆང་༔ མཐིང་ཀའི་དབུ་མར་རྣམ་ཤེས་གསལ༔ ཐོག་མར་གསོལ་འདེབས་འདི་ལྟར་བྱ༔ ཨེ་མ་ཧོ༔ གཅིག་ཆོག་སེམས་ཀྱི་ནོར་བུ་བླ་མ་དང་༔ བྱིན་རླབས་ཆུ་བོའི་རྒྱུན་འཛིན་བླ་རབས་ཚོགས༔ རྩ་གསུམ་རྒྱལ་བ་རྒྱ་མཚོའི་ཚོགས་དང་བཅས༔ གསོལ་བ་འདེབས་སོ་ཐུགས་རྗེའི་ལྕགས་ཀྱུས་ཟུངས༔ གུ་རུ་དམར་ནག་མེ་ཕྲེང་ལྷ་ཚོགས་ཀྱིས༔ ཞེ་སྡང་འཁྲུགས་པའི་དམག་གི་གཡུལ་ངོ་ཟློགས༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ དུག་གསུམ་ནད་སེལ་སྨན་གྱི་ལྷ་ཚོགས་ཀྱིས༔ གཟུང་འཛིན་ནད་ཀྱིས་གདུང་བ་སེལ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ སྨུག་འཛིན་དྲྭ་བ་སྡོམ་པའི་ལྷ་ཚོགས་ཀྱིས༔ ཞེན་ཆགས་སེར་སྣའི་འཆིང་བ་གྲོལ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ ཡི་དམ་དཔལ་ཆེན་བཀའ་བརྒྱད་ལྷ་ཚོགས་ཀྱིས༔ འཁྲུལ་བ་ཨ་འཐས་རྫུན་ཕུག་རྟོལ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ ཟིལ་གནོན་དྲག་རྩལ་དཔལ་མགོན་ལྷ་ཚོགས་ཀྱིས༔ ཚོགས་བརྒྱད་རྟག་འཛིན་ཁང་བུ་གཏོར་གྱུར་ཅིག༔ གསང་བདག་སེངྒེ་སྒྲ་སྒྲོག་ལྷ་ཚོགས་ཀྱིས༔ འབྲོག་ཆེན་བར་དོའི་གཡང་ས་སྒྲོལ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ བདེ་ཆེན་པདྨ་བཛྲ་ལྷ་ཚོགས་ཀྱིས༔ འབྱུང་བ་འཁྲུགས་པའི་འཇིགས་པ་སྒྲོལ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ ཁྲོ་མཆོག་རྟ་མགྲིན་ནག་པོའི་ལྷ་ཚོགས་ཀྱིས༔ ཐེ་ཚོམ་རྣམ་རྟོག་བར་ཆད་སེལ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ རྡོ་རྗེ་གྲོ་ལོད་ཁྲོ་བཅུའི་ལྷ་ཚོགས་ཀྱིས༔ ཉོན་མོངས་མཚོན་གྱི་འཇིགས་པ་ཟློགས་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ ཐུགས་ཆེན་པདྨ་རྒྱལ་པོའི་ལྷ་ཚོགས་ཀྱིས༔ འཕོ་བཅས་རེ་དོགས་འཇིགས་པ་གཞོམ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ སངས་རྒྱས་འོད་དཔག་མེད་པའི་ལྷ་ཚོགས་ཀྱིས༔ འཁྲུལ་བ་རྨི་ལམ་འཇིགས་པ་གཞིག་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ ཆོས་སྐུ་ཀུན་ཏུ་བཟང་པོའི་ལྷ་ཚོགས་ཀྱིས༔ དངོས་ཞེན་འཛིན་པའི་ཕྲེང་ལས་སྒྲོལ་གྱུར་ཅིག༔ ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ ཡིད་བཞིན་ནོར་བུ་བདེ་ཆེན་ལྷ་ཚོགས་ཀྱིས༔ སྙེམས་འཕྲིག་དམ་སེལ་དྲ་བ་ཆོད་གྱུར་ཅིག ཚེ་འདས་ལུས་ཉོན་བག་ཆགས་ཀུན་སྦྱང་སྟེ༔ བདེ་ཆེན་དག་པའི་ཞིང་དུ་ལམ་སྣ་དྲོངས༔ མཁྱེན་པས་ཚེ་འདས་སྡུག་བསྔལ་གཟིགས་པ་དང་༔ བརྩེ་བས་བདེ་ཆེན་ཞིང་དུ་འདྲེན་པ་དང་༔ ནུས་པས་རླུང་སེམས་འཕོ་བ་འབྱོང་བ་ཡི༔ ཐུགས་བསྐྱེད་བདེན་པ་ད་ལྟ་ཉིད་དུ་སྟོན༔ རྣམ་ཤེས་བཙན་ཐབས་འཕོ་བ་ནི༔ ཚེ་ལས་འདས་པའི་རྣམ་ཤེས་ཧཱུྃ་ཡིག་མཐིང་ཀས་རྣམ་པར་གྱུར༔ རླུང་སེམས་སྤྱི་བོའི་བདེ་ཆེན་ཞིང་དུ་གཏད་པ་ཙམ་གྱིས༔ སྐར་མདའ་འཕང་བ་བཞིན་སྤྱི་བོ་ནས་ཐོན༔ འོག་མིན་བདེ་བ་ཆེན་པོའི་ཞིང་གི་མགོན་པོ་འོད་དཔག་མེད་ཀྱི་ཐུགས་ཀར་འོད་ལམ་མེར་ཐིམ༔ རྒྱལ་བའི་སྲས་སུ་སངས་རྒྱས་པར་གྱུར༔ མཉམ་བཞག་ལྟ་བས་རྒྱས་འདེབས་བྱ༔ བཅུ་གསུམ་བྱང་བུ་བསྲེག་པ་ནི༔ ཧཱུྃ༔ སྐུ་གསུམ་ཐུགས་རྗེ་ལས་བྱུང་མེས༔ ཚེ་འདས་དུག་གསུམ་ཕུང་པོ་བསྲེག༔ ཡུམ་ཆེན་བཞི་ཡི་ཡེ་ཤེས་མེས༔ ཚེ་འདས་འབྱུང་བཞིའི་ཕུང་པོ་བསྲེག༔ རྒྱལ་བ་རིགས་ལྔའི་ཡེ་ཤེས་མེས༔ ཚེ་འདས་དུག་ལྔའི་ཕུང་པོ་བསྲེག༔ སྟོང་ཉིད་ལས་བྱུང་འོད་གསལ་མེས༔ ཚེ་འདས་གཟུངས་འཛིན་ཕུང་པོ་བསྲེག༔ ཕུང་པོ་ཁམས་དང་སྐྱེ་མཆེད་ཀུན༔ ཡེ་ནས་མ་བྱུང་མ་སྐྱེས་པ༔ ཆོས་ཉིད་སྤྲོས་བྲལ་ཡེ་ཤེས་མེས༔ གཉིས་འཛིན་བདག་རྟོག་བུད་ཤིང་བསྲེག༔ གཟུངས་སྔགས་བརྗོད་ཅིང་མེ་ཡིས་བསྲེག༔ གཤིན་རྒབ་བཅད་ཕྱིར་བཀྲ་ཤིས་ནི༔ ༀ༔ མཆོག་གསུམ་རྒྱལ་བས་བདེན་པ་དབྱིངས་ནས་བརྗོད༔ དཔའ་བོ་མཁའ་འགྲོའི་བཀྲ་ཤིས་དབྱངས་སུ་གྱེར༔ གནས་ཡུལ་བསྟན་སྲུང་མེ་ཏོག་ཆར་ཏུ་སྙིལ༔ ཕན་བདེའི་དཔལ་ལ་རོལ་བའི་བཀྲ་ཤིས་ཤོག༔ བཅུ་བཞི་སཱཙྪ་གདབ་པ་ནི༔ རུས་ཐལ་ཁྲུས་ཆུས་ལན་མང་བཀྲུ༔ རུས་བྱང་ཐལ་བ་ས་དང་བསྲེ༔ དམ་རྫས་སྨན་དང་དྲི་ཡིས་གདབ༔ ཆོ་གའི་རྒྱུན་བསྲིངས་བུམ་ཆོག་བྱ༔ ཨ༔ སྟོང་པའི་ངང་ལས་པད་ཟླའི་སྟེང་༔ བྷྲཱུྃ་ལས་རུས་ཐལ་འཇིམ་པ་རྣམས༔ ཐ་མལ་དངོས་འཛིན་ཞི་བ་ལས༔ ཟག་མེད་རིན་ཆེན་ཕུང་པོར་གྱུར༔ རང་ཉིད་ལྷ་ཡི་ཐུགས་ཀ་ནས༔ ཕྱོགས་བཅུའི་བདེ་གཤེགས་སྤྱན་དྲང་གྱུར༔ སྐུ་དང་ཡིག་འབྲུ་ཕྱག་མཚན་དང་༔ འོད་ཟེར་རིན་ཆེན་ཕུང་པོར་ཐིམ༔ གཟུགས་ཕུང་དག་པ་རྣམ་སྣང་མཛད༔ གཟུགས་སྐུ་འདི་ལ་བྱིན་ཆེན་ཕོབས༔ ༀ་ཛི་ན་ཛིཀ྄་སྭཱ་ཧཱ༔ ཉེར་གཅིག་བརྗོད་ཅིང་བྱིན་གྱིས་རླབས༔ ༀ་བཛྲ་ཨ་ཡུ་ཥེ་སྭཱ་ཧཱ༔ ཆེ་ཆུང་རན་པའི་འཇིམ་པ་བཅད༔ ༀ་བཛྲོད་བྷ་ཝ་ཡ་སྭཱ་ཧཱ༔ རིན་ཆེན་འཇིམ་པ་འབི་འབི་བྱ༔ ༀ་ཨ་ར་ཛེ་བི་ར་ཛེ་སྭཱ་ཧཱ༔ བརྐོས་ཕོར་ནང་ལ་སྣུམ་གྱིས་བྱུགས༔ ༀ་དྷརྨ་དྷཱ་ཏུ་གརྦྷེ་སྭཱ་ཧཱ༔ བརྐོས་ཕོར་ནང་ཏུ་འཇིམ་པ་གཞུག༔ ༀ་བཛྲ་མུརྒ་ཏེ་ཨ་ཀོ་ཊ་ཡ་ཧཱུྃ༔ གཏུན་ཤིང་སོགས་ཀྱིས་བརྡུང་བར་བྱ༔ ༀ་སརྦ་བིདྱཱ་སྭཱ་ཧཱ༔ གཟུངས་དང་རྟེན་རྣམས་གཞུག་པར་བྱ༔ ༀ་དྷརྨཱ་ར་ཏེ་སྭཱ་ཧཱ༔ བརྐོས་ཕོར་ནང་ནས་ཕྱིར་རུ་འདོན༔ ༀ་སུ་པྲ་ཏིཥྛ་བཛྲེ་སྭཱ་ཧཱ༔ གཟུགས་སྐུ་རྣམ་པར་སྣང་མཛད་ལ༔ ཆོས་སྐུ་སྤྱན་དྲངས་བསྟིམ་པར་བྱ༔ བཀྲ་ཤིས་བརྗོད་ཅིང་མེ་ཏོག་འཐོར༔ གང་དུ་བཞུགས་པར་བྱིན་ཆགས་འགྱུར༔ དེ་ལྟར་གཤིན་དོན་སྒྲུབ་པའི་ཐབས༔ མཚོ་སྐྱེས་བླ་མའི་བྱིན་རླབས་ལས༔ བྱུང་བའི་མན་ངག་ཟབ་མོ་སྟེ༔ སྐལ་བ་ལྡན་པས་གཅེས་པར་ཟུངས༔ ཅེས་པའང་ལྷ་རིགས་ཀྱི་སྔགས་བཙུན་རྡོ་རྗེ་ཚེ་དབང་ནོར་བུས་ཤིང་སྟག་ལོའི་རྒྱལ་ཟླའི་ཚེས་ཉེར་ལྔ་ལ་དག་པར་ཕབ་པའོ༔ མངྒ་ལཾ༔ ༼ གསུར་བསྔོ།༽ གུ་རུ་པདྨའི་གསོལ་འདེབས་བསམ་པ་ལྷུན་གྲུབ་ལས་ཚེ་དབང་རྡོ་རྗེའི་སྲོག་རྫོང་ཆོག་ཁྲིགས་སུ་བཀོད་པ།༄༅། །གུ་རུ་པདྨའི་གསོལ་འདེབས་བསམ་པ་ལྷུན་གྲུབ་ལས། །ཚེ་དབང་རྡོ་རྗེའི་སྲོག་རྫོང་ཆོག་ཁྲིགས་སུ་བཀོད་པ་བཞུགས་སོ། ། ན་མོ་གུ་ར་ཝེ། །གང་མཚན་གཡུལ་ལས་རྒྱལ་བ་ལྷ་ཡི་རྔ། །རྣ་བར་སོན་པས་བདུད་དང་ལྷ་མིན་ཚོགས། །འཇིགས་པའི་ཀླད་རྒྱ་འཐོར་བའི་གྲགས་པ་ཅན། །བླ་མ་སྣང་སྲིད་ཟིལ་གནོན་དགེ་ལེགས་སྩོལ། །མི་རྟག་འགྱུར་བ་ཆུ་བུར་ལྟ་བུའི་ཚེ། །ཐུགས་བསྐྱེད་བདེན་པ་འཆི་མེད་བདུད་རྩི་ཡིས། །རྡོ་རྗེའི་སྲོག་གི་རྫོང་དུ་གཞུག་པའི་ཐབས། །གསལ་ལ་ཁྱེར་བདེའི་གདམས་པ་འདི་ཏུ་འགོད། དེ་ཡང་དབང་ཐོབ་ཅིང་དམ་ཚིག་ལ་གནས་པས་བསྙེན་སོང་རྡོ་རྗེ་སློབ་དོན་མཚན་ཉིད་དང་ལྡན་པས་དབང་འདི་ཉིད་སྐུར་བར་བྱ་བ་ལ། ཐོག་མར་དཀྱིལ་འཁོར་བཀོད་པ་ལ། རྡུལ་ཚོན་བསམ་པ་ལྷུན་གྲུབ་མ་སྤྱི་ལྟར་རམ། ཚེ་ཡི་ལས་སྒྲུབ་པའི་དཀྱིལ་འཁོར་ནི། གཞུང་ལས། ཚེ་ཡི་དཀྱིལ་འཁོར་བཀོད་པ་ནི༔ ཡི་དམ་བཅུ་གསུམ་སྤྱི་ལྟར་ལ༔ ཁྱད་པར་ཚེ་ཡི་ལས་སྦྱོར་སྐབས༔ ཚེ་བཅུད་འདུས་པའི་དགའ་བ་འཁྱིལ༔ འགྱུར་མེད་རྡོ་རྗེའི་རྒྱ་གྲམ་མཐིང་༔ གཞལ་ཡས་ཁང་བཟང་སྒོ་རྫོགས་པ༔ རྡོ་རྗེ་ལ་སོགས་སྲུང་འཁོར་དྲུག༔ སོ་སོར་རྟོག་པའི་ཡེ་ཤེས་འཕྲུལ༔ རྡུལ་ཚོན་དམར་ཤས་ཆེ་བ་བྱ༔ ཞེས་པ་མན་ངག་ལྟར་རྡུལ་ཚོན་ནམ་རས་བྲིས་གང་རུང་། མ་འབྱོར་ན་ཚོམ་བུ་ཕྱི་ན་བཅུ། ནང་དུ་གསུམ་བཀོད་པས་བཅུ་གསུམ་བྱའོ། ། དབང་རྫས་ནི། གཞུང་ལས། གཏོར་མ་འབྲང་རྒྱས་ཞལ་དཀར་དབུས༔ ཚེ་རིལ་གཡས་ལ་ཚེ་ཆང་གཡོན༔ ཚེ་མདའ་མི་འགྱུར་བྱང་ཏུ་གདབས༔ སྐུ་ཚབས་ཕྲེང་བ་མེ་ལོང་དང་༔ ཚེ་ཡི་བུམ་པ་མདུན་དུ་བཀོད༔ ལས་བུམ་རྟ་མགྲིན་སྐུ་བརྙན་བཞུགས༔ ཞེས་དབུས་དུ་སྒྲུབ་གཏོར་བང་རིམ་གསུམ་པ། པདྨ་ཁ་སྤྲོད་སྟེང་དུ་བླ་གཏོར་དམར་པོ། རྒྱན་ཉི་ཟླ་ནོར་བུ་འཇའ་གུར་བཅས་པའོ། ། དེའི་གཡས་སུ་ལས་བུམ། གཡོན་དུ་རྣམ་བུམ། མདུན་དུ་ཚེ་བུམ། དེའི་གཡས་སུ་ཚེ་རིལ། གཡོན་དུ་ཚེ་ཆང་། སྒྲུབ་གཏོར་རྒྱབ་ཏུ་ཚེ་མདའ། དེ་དང་ལྷན་དུ་སྔགས་ཕྲེང་། མེ་ལོང་། མདུན་གྱི་ཉེ་ལོགས་སུ་དཀར་གཏོར། དམར་གཏོར། དམ་ཅན་སྤྱི་གཏོར། ཚོགས་གཏོང་ན་ཚོགས་གཏོར་བཟའ་བཏུང་། ཆད་མདོ། བརྟན་མ། ཚེ་དབང་ལ་ཚེ་ཀླུད། ཀྲུས་གཞོང་། སྤོས་ཕོར། བགེགས་སྐྲད་དང་བྱིན་འབེབ་ཀྱི་རྫས། བླ་མའི་མདུན་དུ་བཟེད་ཞལ་དུ་འཐོར་ནས། ཡུང་དཀར། ཌཱ་དྲིལ། ནང་མཆོད་སོགས་བཤམ། ཤིན་ཏུ་བསྡུ་ན། ཚེ་བུམ་དང་རྣམ་རྒྱལ་བུམ་པ་གཅིག་ཆོག ཚེ་རིལ་ལ་མར་དཀར་རམ་བག་བྱེའི་རིལ་བུ། ཚེ་ཆང་ལ་ཇའམ་འོ་མ། ཚེ་མདའ་ཙམ་ལ་བརྟེན་པས་ཀྱང་འགྲུབ་པོ། ཆོ་ག་བསམ་པ་ལྷུན་གྲུབ་ཀྱི་སྒྲུབ་ཐབས་ཀྱི་གཞུང་སྲོང་། ཁོལ་སྒྲུབ། དྲིལ་སྒྲུབ། ལུས་དཀྱིལ་གང་ཡིན་ཀྱང་རུང་། མདུན་བསྐྱེད་ཀུན་བཟང་པདྨ་ཞི་ཁྲོ་མན་ངག་བཅུ་གསུམ་ཀྲོང་བསྐྱེད་བྱ། བསྙེན་སྐབས་སུ་གཙོ་བོ་རྡོ་རྗེའི་འབྲུ་བཅུ་གཉིས་པ་དང་ཐོད་ཕྲེང་རྩལ་གྱི་ཛཔྲ་གཙོ་བོར་བཟླ། ཡི་དམ་བཅུ་གསུམ་སྤྱི་ཡི་སྔགས་ཇི་རིགས་པ་བཟླས་པ་དང་། བུམ་པ་བསང་སྦྱང་བྱས་ལ། ཧྲཱི༔ བདག་བདུན་དབྱེར་མེད་གཟུངས་སྔགས་འོད་ཟེར་ཀྱིས༔ ཚེ་འཛིན་བུམ་ལྷའི་ཐུགས་དམ་རྒྱུད་བསྐུལ་ཏེ༔ སྐུ་ལས་འོད་དང་གསུང་གི་སྔགས་ཀྱི་སྒྲ༔ ཐུགས་དམ་འགྱུར་མེད་བདེན་པས་ཚེ་བཅུད་བསྡུས༔ ལྷ་ཚོགས་བདེ་ཆེན་དགའ་བའི་མྱོས་པ་ལས༔ བདུད་རྩིས་རྒྱུན་བབ་བུམ་པ་ཡོངས་སུ་ཁེངས༔ ཟེར་རླངས་འོད་ཟེར་སྒྲུབ་རྫས་རྣམས་ལ་ཐིམ༔ འཆི་མེད་ཚེ་ལྷའི་བྱིན་རླབས་རྫས་མཆོག་གྱུར༔ རྩ་སྔགས་ལྷ་ཚོགས་སྔགས་རྣམས་དང་༔ ཚེ་ཡི་ཛྲབ་དབྱངས་འདི་བཞིན་སྒྲོགས༔ ༀ་ཨཱཿཧཱུྃ་བཛྲ་གུ་རུ་པདྨ་པུཎྱེ་ཛྙཱ་ན་ཨཱ་ཡུར་སིདྡྷི་ཧཱུྃ་བྷྲཱུྃ་ནྲྀ་ཛ༔ ཚེ་ཛཔྲ་བརྒྱ་རྩ་དང་ཚེ་གཟུངས་ཅི་མང་འདོན། འོག་ནས་བྱུང་བའི་ཚེ་འགུགས་བྱ། ཏིང་ངེ་འཛིན་གྱིས་དབང་བླངས། གཞན་དོན་དུ་ཐུགས་དམིགས་བྱའོ ། ༈ ཚེ་དབང་བསྐུར་བ་ལ། དང་པོ་ཚེ་ཁྲུས་ནི། སློབ་མ་གནས་ཁང་གི་ཕྱི་རོལ་ལམ་སྟབས་བདེ་བའི་སར་ཚེ་ཀེགས་སེལ་བའི་ཁྲུས་བྱ་བར། ལས་བུམ་ཐོགས་ལ། ཧྲཱི༔ འཆི་མེད་དཔལ་སྟེར་མགོན་པོ་ཚེ་དཔག་མེད༔ ཚེ་ཡི་རིག་འཛིན་གྲུབ་པ་པདྨ་འབྱུང་༔ ཚེ་ལྷ་རབ་འབྱམས་གསང་གསུམ་བདུད་རྩི་ཡིས༔ ཚེ་གེགས་ནད་གདོན་སྡིག་སྒྲིབ་ཞི་གྱུར་ཅིག༔ དམ་ཉམ་རོ་ཡུག་དམེ་གྲིབ་ཞི་གྱུར་ཅིག༔ བདུད་བཙན་རྒྱལ་པོའི་གནོད་པ་ཞི་གྱུར་ཅིག༔ དམུ་དང་ཐེའུ་རང་གནོད་པ་ཞི་གྱུར་ཅིག༔ ལྷ་ཀླུ་སྡེ་བརྒྱད་འཁོན་གྲིབ་ཞི་གྱུར་ཅིག༔ སྔོན་ལས་འཕྲལ་རྐྱེན་ངན་པ་ལས་བྱུང་བའི༔ འཇིགས་པ་བརྒྱད་དང་བཅུ་དྲུག་ཚེ་ཡི་གེག༔ ཚེ་ལྷ་རྩ་གསུམ་བདེན་པས་ཞི་བ་དང་༔ འཆི་མེད་རྟག་བརྟན་ཚེ་ལ་དབང་གྱུར་ཅིག༔ ཚེ་གཟུངས་དང་ཀྲུས་སྔགས་འདོན་བཞིན་ཁྲུས་བྱ། ཁྲུས་ཆུ་ལན་གསུམ་བཏུང་ཞིང་ཁ་བཤལ་དུ་གཞུག ཁྲུས་ཆུ་ཁར་བཏུང་བའི་ཚེ་བྱིན་རླབས་ཞུགས་པར་མོས། ཁ་བཤལ་ཚེ་བྱིན་རླབས་ཀྱི་སྟོབས་ཀྱིས་སྒོ་གསུམ་གྱིས་སྲོག་གཅོད་སོགས་ལས་ངན་པའི་བག་ཆགས་སྦྱང་ཞིང་དག་པར་བསམ། ལན་གསུམ་བཀྲུས་པས་ཚེ་ལ་གནོད་པའི་ལས་ངན་སྡིག་སྒྲིབ་མ་ལུས་པ་པ་མཁའ་ལ་སྤྲིན་དེངས་ལྟར་གྱུར་བར་མོས། འཆི་སླུ་ཚེ་གླུད་གཏོང་བ་ནི། གཞུང་ལས། དགོད་དང་ན་དང་འཇིགས་པའི་ཚུལ༔ སྐྱེ་མཆེད་ཚང་བའི་གླུད་གཟུགས་གསུམ༔ རང་གི་གོས་རྙིང་སྐྲ་སེན་བཅུག༔ ནམ་མཁའ་ལན་ཆགས་སྒྲོན་མེ་དང་༔ འདོད་པའི་གཟུགས་རིས་སྣ་ཚོགས་བྱ༔ ཤ་དུམ་ཟས་སྣ་གོས་སྣ་སོགས༔ ནམ་མཁའ་མཛོད་ཀྱི་སྔགས་ཀྱིས་རླབས༔ འབྲུ་གསུམ་བརྒྱ་རྩས་སྦྱང་སྤེལ་བསྒྱུར༔ བདེ་གཤེགས་རིན་ཆེན་མང་གཟུགས་མཛེས༔ འཇམ་ཀླས་འཇིགས་ཀུན་བྲལ་བ་བཞིས༔ བདེན་པ་བརྗོད་ཅིང་འདི་ལྟར་བསྔོ༔ ཞེས་གསུངས་པ་ལྟར། ཀླུད་གཟུགས་རྒོད་པ་དང་། ན་བ་དང་། འཇིགས་པས་ནོན་པ་གསུམ་གྱི་རྒྱབ་ཏུ་ནམ་མཁའ་ཁ་དོག་ལྔ་བ། མཐར་ལན་ཆགས། ཤ་དུམ། གོས་རྙིང་། ནད་པའི་སྐྲ་སེན། ཕོ་མདོང་། མོ་མདོང་། ཟས་སྣ་སོགས་འདོད་ཡོན་ཅི་འབྱོར་བ་བཤམ། ནམམཁའ་མཛོད་སྔགས། ཁ་འབར་མའི་སྔགས། འབྲུ་གསུམ་སོགས་བཟླས་དེ་བྱིན་གྱིས་བརླབས། དེ་བཞིན་གཤེགས་པ་བཞིའི་མཚན་ཀྱི་བདེན་པ་བརྗོད། ཀྱེ༔ དུས་གསུམ་སངས་རྒྱས་ཐམས་ཅད་དང་༔ ཕྱོགས་བཅུའི་རྒྱལ་བ་སྲས་དང་བཅས༔ བླ་མ་ཡི་དང་མཁའ་འགྲོ་དང་༔ བསྟན་སྲུང་བདེན་ཚིག་འགྲུབ་རྣམས་ཀྱིས༔ བགེགས་རིགས་མགྲོན་རྣམས་ཐུགས་རྗེས་ཟུངས༔ ཚེ་སྲོག་ནོར་ཀྱི་ལན་ཆགས་པའི༔ སྣང་ཞིང་སྲིད་པའི་ལྷ་འདྲེའི་ཚོགས༔ འབྱུང་བ་ལྔ་ལ་དབང་བྱེད་ཅིང་༔ ཚོགས་བརྒྱད་རང་གཟུགས་སྡེ་བརྒྱད་རྣམས༔ ཉོན་ཅིག་རྒྱལ་བའི་བཀའ་ལ་ཉོན༔ དེ་རིང་ཡོན་གྱི་བདག་པོ་ཡི༔ ཚེ་སྲོག་སླུ་བའི་གླུད་འདི་གཏོང་༔ མི་ལས་ལྷག་པའི་གླུད་གཟུགས་འདིས༔ ལན་ཆགས་བདག་པོ་ཚིམ་པར་མཛོད༔ བཟུང་བ་ཐོང་ལ་བཅིང་བ་ཁྲོལ༔ བསྡམ་ལ་ཀློད་ལ་མནན་པ་འཁྱོག༔ ལན་ཆགས་བུ་ལོན་འཁོར་གྱུར་ཅིག༔ སྐྱེ་བ་མི་ལ་འབྱུང་བ་གླུད༔ ཁྱེར་ཅིག་ཁྱེར་ཅིག་གླུད་བདག་རྣམས༔ ལོ་བདག་སྲོག་བདག་ཞེན་པ་རྣམས༔ དྲན་དང་གཟུང་དང་བསམ་དང་རེག༔ གློད་དང་ཞི་དང་གྲོལ་བར་མཛོད༔ ཨ་ཨ་ཨ༔ ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དག་། རིག་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་རྣམས་ཀྱི་བདེན་པ་དང་། ཆོས་ཉིད་གདོད་ནས་སྟོང་ཀྱང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་ཏུ་ཀུན་བཟང་པདྨ་ཞི་ཁྲོ་ཚེ་དཔག་ཏུ་མེད་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས། དེང་འདིར་རྡོ་རྗེའི་སློབ་མ་རྣམས། དཀྱིལ་འཁོར་དུ་འཇུག་ཅིང་། དབང་བསྐུར་ཟབ་མོ་བསྒྲུབ་པ་ལ་བར་དུ་གཅོད་པའི་བགེགས་ཚོགས་ཐམས་ཅད་གཏོར་མ་འདིས་ཚིམ་པར་གྱིས་ལ། དཔག་ཚད་དང་རྒྱང་གྲགས་སུ་མ་གནས་པར་ཕྱིར་དེངས་ཤིག གལ་ཏེ་མི་འགྲོ་ན་ཁྲོ་བོའི་ཡེ་ཤེས་ཀྱི་རྡོ་རྗེ་རབ་ཏུ་འབར་བ་འདིས། ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ། ཅེས་དང་། གུ་གུལ་གྱི་དུད་པས་བདུག ཡུངས་ཐུན་གྱིས་བྲབ། རོལ་མོའི་སྒྲ་དྲག་ཏུ་བྱ་ཞིང་། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊཿ ཧ་ལ་ཧ་ལ་ཧཱུྃ། ཞེས་དང་། ཧཱུྃ་བཞིའི་སྔགས་ནི། ༀ་སུམྦྷ་ནི་སུམྦྷ་ཧཱུྃ། གྲྀ་ཧྞ་གྲྀ་ཧྞ་ཧཱུྃ། གྲྀ་ཧྞ་པ་ཡ་གྲྀ་ཧྞ་པ་ཡ་ཧཱུྃ། ཨ་ན་ཡ་ཧོ། བྷ་ག་ཝན། བིདྱ་རཱ་ཛ་ཡ་ཧཱུྃ་ཕཊ་ཅེས་སོགས་དྲག་སྔགས་བཟླས་པས་བགེགས་རྣམས་བསྐྲད། གཞུང་རྩ་བ་ལས། དེ་ལྟར་ལན་གཅིག་བྱ་ནུས་ན༔ འཆི་བ་སླུ་ལ་ཚེ་གེགས་སེལ༔ མཐའ་མ་དྲག་པོའི་ཐུན་གྱིས་གདབ༔ གསོན་བདུད་བར་ལག་འགྱེལ་བར་བྱ༔ ཞེས་པའི་བྱ་བའོ། །དབང་སྐུར་སྐབས་མིན་པར་ཚེ་གླུད་རྐྱང་པ་བསྔོ་བ་ལ། རྡོ་རྗེའི་སློབ་མ་འདི་ཉིད་ཀྱི་ཚེ་ནོར་ཆོས་གསུམ་ལ་བར་དུ་གཅོད་པའི་བགེགས་ཚོགས་ཞེས་ཞལ་བསྒྱུར་ཤེས་པར་བྱའོ། ། གསུམ་པ་སྲུང་འཁོར་་སྒོམ་པ་ནི། ཨ༔ ལྷ་འདྲེར་འཛིན་པ་རང་སར་དེང་༔ རྟོག་མེད་ངང་ལས་ཡེ་ཤེས་རྩལ༔ འབྱུང་ལྔ་རྡོ་རྗེ་ཡེ་ཤེས་གུར༔ ཕྱོགས་མཚམས་མེད་པར་ཀུན་ཏུ་གཏམ༔ བཛྲ་ཙཀྲ་རཀྵ་བྷྲཱུྃ༔ སྣང་སྲིད་ལྷ་དང་གཞལ་ཡས་ཁང་༔ རང་ཉིད་དྲག་པོའི་ང་རྒྱལ་བསྐྱེད༔ སྲུང་བྱ་གནམ་ལྕགས་རྡོ་རྗེ་སྒོམ༔ ཐམས་ཅད་ཆོས་སྐུའི་ཀློང་དུ་སྦ༔ ཞེས་སོ། ། བླ་མའི་ཐུགས་ཡེ་ཤེས་ཆེན་པོའི་རང་སྣང་ལས་གྲུབ་པའི་སྟེང་ཐམས་ཅད་རྡོ་རྗེའི་བླ་བྲེ། འོག་ཐམས་ཅད་རྡོ་རྗེའི་ས་གཞི། བར་ཐམས་ཅད་རྗེའི་ར་བ་དྲ་བ། སྲུང་བའི་གུར་ཆེན་པོར་གྱུར་བའི་ནང་དུ་ཚུད་པར་མཛོད། ། སྤྲོ་ན་རྟེན་སྙིང་བརྗོད་ཅིང་བརྟན་པར་བྱའོ། ། ༈ བཞི་བ་ཀུན་སློང་གསལ་འདེབས་དང་དབང་གི་ལོ་རྒྱུས་ནི། འོ་ན་མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་རྒྱལ་བ་ཁྱབ་བདག་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ། དེའི་ཆེད་དུ་པདྨ་ཚེ་དཔག་མེད་ཀྱི་མན་ངག་ཚེ་དབང་རྡོ་རྗེའི་སྲོག་རྫོང་གི་དཀྱིལ་འཁོར་ཆེན་པོ་ལ་ཞུགས་ཏེ། ལམ་རིམ་པ་གཉིས་ཀྱི་རྣལ་འབྱོར་ཉམས་སུ་བླང་བར་བགྱིའོ་སྙམ་པའི་ཐུགས་བསྐྱེད་རྒྱ་ཆེན་པོ་དང་བཅས་པའི་སྒོ་ནས་གསན་པར་ཞུ། དེའང་དལ་བ་བརྒྱད་འབྱོར་བ་བཅུ་དྲུག་དང་ལྡན་པ་འདི་རྙེད་པར་དཀའ་ལ་དོན་ཆེན་པོ་དང་ལྡན་པས། རིན་ཆེན་ལུས་རྟེན་འདི་ལ་བརྟེན་ནས་སངས་རྒྱས་ཐོབ་པར་མ་བྱས་ན། ཚེ་ལ་ནི་ངེས་པ་མེད། བར་ཆད་ཀྱི་རྐྱེན་ནི་འཇུག་སླ། མི་རྟག་འཆི་བ་གློ་བུར་ནམ་འོང་ཆ་མེད་པས་བློ་སྣ་བསྟུང་ལ་དགེ་བློ་དྲོད་མ་ཡལ་བར་དྲན་མ་ཐག་ཏུ་ཐོས་བསམ་བྱེད་པ་གལ་ཆེ་སྟེ། རྒྱལ་པོ་ལ་གདམས་པའི་མདོ་ལས། དུས་ཀྱིས་བསྙན་ནས་རྒྱལ་པོ་འགྲོ་གྱུར་ཏེ། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲངས། །སྐྱེས་བུ་དེ་ནི་གང་དང་གར་འགྲོ་བ། །ལས་ནི་གྲིབ་མ་བཞིན་དུ་ཕྱི་བཞིན་འབྲང་། །ཞེས་གསུངས་པ་ལྟར་འདི་ཕྱི་བདེ་སྡུག་མ་ལུས་པ་ལས་ཀྱི་རྗེས་སུ་འགྲོ་ལྡོག་བྱེད་པས། དལ་འབྱོར་གྱི་མི་ལུས་རྙེད་དཀའ། མཚན་ལྡན་གྱི་བླ་མ་མཇལ་དཀའ། ཟབ་མོའི་གདམས་ངག་ཐོབ་དཀའ་བའི་ཚུལ་ལ་བསམ་ནས་ཐོས་བསམ་སྒོམ་པ་གང་བྱེད་ཀྱང་ཤིན་ཏུ་གཅེས་ཤིང་དཀོན་པའི་འདུ་ཤེས་ཀྱིས་བྱེད་དགོས། དེའང་ལེ་ལོ་དང་རྣམ་གཡེངས་ཀྱི་དབང་དུ་སོང་བས་ཆོས་ཟབ་མོ་ཐོབ་པ་སྙམ་པ་ཙམ་ཀྱིས་མི་འོང་སྟེ། རྒྱུད་ལས། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་དང་ལྡན་པས་ཉོན། །བརྗེད་ངེས་བློ་ལ་རྡོ་རྗེ་སེམས་དཔའ་སོགས། །དུས་གསུམ་རྒྱལ་བ་རྣམས་ཀྱིས་བྱིན་མི་རློབས། །ཅེས་གསུངས་པས་བློ་སྣ་ཆོས་ལ་གཏད་ནས་གསན་དགོས། ཁྱད་པར་ཏུ་གསང་ཆེན་རྡོ་རྗེ་ཐེག་པའི་ཆོས་རྣམས་ཕུན་སུམ་ཚོགས་པ་ལྔ་ལྡན། སྣང་བ་དག་པ་རབ་འབྱམས་ཀྱི་ངང་ནས་ཞུ་དགོས་སྟེ། སྐབས་འདིར་སློབ་དཔོན་ཕུན་སུམ་ཚོགས་པ་འཆི་མེད་པདྨ་འབྱུང་གནས། འཁོར་ཕུན་སུམ་ཚོགས་པ་འཆི་མེད་རིག་འཛིན་རྒྱ་མཚོ། ཆོས་ཕུན་སུམ་ཚོགས་པ་འཆི་མེད་རྡོ་རྗེའི་སྲོག་རྫོང་། གནས་ཕུན་སུམ་ཚོགས་པ་འཆི་མེད་པདྨ་འོད་གླིང་། དུས་ཕུན་སུམ་ཚོགས་པ་འཆི་མེད་འཕོ་འགྱུར་མེད་པ་ཡིན་པ་ལ་ངེས་ཤེས་ཟབ་མོ་བསྐྱེད་ནས་གསན་འཚལ། གང་གསན་པར་བྱ་བའི་ཆོས་ཀྱི་ལོ་རྒྱུས་མདོར་བསྡུས་སུ་བརྗོད་པ་ལ། ཟབ་ཆོས་འདི་ཉིད་གཏེར་ནས་སྤྱན་འདྲེན་པ་པོ་ནི་འགྲོ་འདུལ་གཏེར་ཆེན་བརྒྱ་རྩའི་ཡ་གྱལ། ཀཿཐོག་རིག་འཛིན་ཆེན་པོ་རྡོ་རྗེ་ཚེ་དབང་ནོར་བུ་ཞེས་མཁས་དང་གྲུབ་པའི་དབང་ཕྱུག་དེ་ཉིད་ཡིན་ཏེ། དམ་པ་དེ་ནི། གཏེར་ཆེན་རྡོ་རྗེ་གླིང་པའི་གཏེར་ལུང་ལས། ནམ་སྙིང་ཐུགས་སྤྲུལ་པདྨའི་གསུང་གི་འཕྲུལཿ ནག་པོ་སྤྱོད་པའི་སྐུ་ཡི་སྤྲུལ་བ་ཞིགཿ ཨིནྡྲའི་མཚན་འཆང་སྟག་ལོར་སྤྲུལ་གར་སྒྱུརཿ དུས་འཁྲུགས་བཟློག་ཅིང་བསྟན་པ་ཐབས་ཀྱིས་གསོཿ འབྲེལ་ཚད་བདེ་བ་ཅན་དུ་ཨེ་མ་ཧོཿ ཞེས་དང་རོལ་བའི་རྡོ་རྗེས་གཏེར་ལུང་ལསཿ ནམ་སྙིང་སྤྲུལ་བ་འཕོ་བའི་བག་ཆགས་བཅོམཿ སྟག་ལོ་བརྟུལ་ཞུགས་སྤྱོད་པ་དབང་པོའི་མིངཿ རྟེན་འབྲེལ་ཚོགས་ན་མཆོག་གི་གཏེར་ལྔ་འདྲེནཿ མཐའ་དམག་བཟློག་ཅིང་རྒྱལ་བསྟན་ཉམས་པ་གསོཿ ཞེས་དང་པདྨ་བདེ་ཆེན་གླིང་པའི་གསང་བ་ཡེ་ཤེས་ཀྱི་མཆོག་གི་ཆོས་བདག་ལུང་དུ་བསྟན་པ་ལས། རྒྱལ་སྲས་ཤནྟ་དེ་བ་དངཿ ནག་པོ་སྤྱོད་པའི་སྐུ་ཡི་གརཿ ཙནྡྲ་གོ་མའི་གསུང་གི་བྱིནཿ འཕགས་ཡུལ་གྲུབ་པའི་རིག་འཛིན་བརྒྱདཿ གཅིག་འདུས་པདྨ་ཐོད་ཕྲེང་དངཿ ནམ་མཁའི་སྙིང་པོའི་ཐུགས་ལས་སྤྲུལཿ བཻ་རོ་ཙཱ་ནའི་ཡོན་ཏན་དངཿ ཆོས་རྒྱལ་ཆེན་པོའི་འཕྲིན་ལས་ཉིདཿ ཨ་ཡི་ཐབས་ལ་བཛྲ་ཡུམཿ ཚེ་དབང་མཚན་ཅན་སྟག་གི་ལོཿ གྲུབ་པའི་རྟགས་ནི་ཐོགས་མེད་སྟོནཿ ལུས་ལ་སྨེ་བའི་དོ་ཤལ་ཅནཿ དཔྲལ་བར་དབང་གི་ཆོས་འབྱུང་བཀྲཿ རང་བྱུང་མཁྱེན་རབ་ཁོངས་ནས་རྡོལཿ གསང་ཆེན་བསྟན་པ་ཕྱོགས་བརྒྱར་སྤེལཿ འཕྲིན་ལས་ཉི་ལྟར་གསལ་བ་འབྱུངཿ ཞེས་གསུངས་པའི་གསང་བདག་རིག་འཛིན་ཆེན་པོའི་གཏེར་ཆོས་སྐོར་ལ། ས་གཏེར་ཀོང་པོ་བུ་ཆུའི་གདམས་ཕྲན་སྐོར་བཏོན་པ་དང་། འགྱུར་མེད་གཏན་འཁྱིལ་གྱི་མཚོའི་རོལ་བའི་རྡོ་རྗེའི་གཏེར་མཇུག་བསྐྱངས་པ་དང་། དགོངས་གཏེར་ལ་ཟབ་ལམ་ཨུ་པ་དེ་ཤ་དང་། སྙན་བརྒྱུད་ཌཱཀྐིའི་གན་མཛོད། གསང་ལམ་ཌཱཀྐིའི་སྙིང་ཁྲག་དེ་སྐོར་སོ་གསུམ་བཞུགས་པ་ལས། འདི་ནི་ཡིག་མེད་ཨུ་པ་དེ་ཤའི་རྩ་བར་གྱུར་པ་བསམ་པ་ལྷུན་གྲུབ་དངོས་གྲུབ་མ་ལུས་པ་འབྱུང་བའི་གཏེར་ཁྱིམ་སྟེ། གཏེར་ཆེན་དམ་པ་མཆོག་ལ་ཨོ་རྒྱན་ཆེན་པོས་ཡང་ཡང་གསུངས་པའི་གདམས་པ་རྒྱ་མཚོ་ལྟ་བུའི་སྙིང་པོར་གྱུར་པ་སྟེ། གུ་རུ་མཆོག་གིས་ལན་གྲངས་བདུན་དུ་ཞལ་གཟིགས་བཀའ་གཏད་པས་དགོངས་པའི་གཏེར་མཛོད་ཆེན་པོ་ནས་སྤྱན་དྲངས་པའོ། ། ཟབ་ཁྱད་ཀྱང་། རང་གཞུང་རྩ་བ་རྡོ་རྗེའི་ཚིག་རྐང་ལས། རིགས་དང་དཀྱིལ་འཁོར་ཀུན་གཙོ་ཆེ་བའི་མཆོག༔ བླ་མེད་བླ་མའི་སྒྲུབ་ཐབས་བྱེ་བ་འབུམ༔ ཡང་སྙིང་ཞུན་ཏིག་མོས་གུས་གསོལ་འདེབས་ཉིད༔ དེ་ཡི་མཐར་ཐུག་དགོས་འདོད་ཀུན་འབྱུང་གཏེར༔ གངས་ཅན་ལྷ་གཅིག་སངས་རྒྱས་པད་འབྱུང་གིས༔ བོད་ཡུལ་ཐུན་མོང་སྐུ་དངོས་གདུལ་བྱ་རྣམས༔ བཏུལ་བྱས་རྔ་ཡབ་གཤེགས་སྐབས་གུང་ཐང་ལར༔ རྗེ་འབངས་རྣམས་ལ་ཞལ་ཆེམས་ཚུལ་གསུངས་པའི༔ གསོལ་འདེབས་རྒྱལ་པོ་བསམ་པ་ལྷུན་གྲུབ་ཅེས༔ མན་ངག་བཅུ་གསུམ་བསམ་འཕེལ་དངོས་གྲུབ་མཛོད༔ ཅེས་པའི་གདམས་པ་འདི་ཉིད་ལ་ཀུན་བཟང་པདྨ་ཞི་ཁོ་སྤྱི་དྲིལ། ཁོལ་སྒྲུབ། འཕྲིན་ལས་སྒོས་སྒྲུབ་བཅས་བཞུགས་པ་ལས། འདི་ནི་སྤྱི་སྒྲུབ་མཐའ་རྟེན་ཟབ་མོ་རྡོ་རྗེ་སྲོག་རྫོང་གི་ཚེ་ཡི་དབང་བསྐུར་ཉིད་ཡིན་ཏེ། རང་གཞུང་ལས། ཚེ་དབང་ཟབ་མོ་འདི་ཐོབ་པས༔ དུས་མིན་འཆི་བའི་འཇིགས་པ་ཞི༔ ཚེ་འདིར་རྡོ་རྗེའི་སྐུ་མཆོག་བརྙེས༔ མཐའ་ཡས་འགྲོ་དོན་ལྷུན་གྲུབ་འགྱུར༔ ཅེས་གསུང་པའི་གདམས་པ་འདི་ཉིད་སྣང་སྲིད་ཟིལ་གནོད་པདྨ་འབྱུང་གནས་ནས། སྤྲུལ་བའི་གཏེར་ཆེན་ཚེ་དབང་ནོར་བུ། སྲས་སློབ་རིག་འཛིན་གསེར་རིའི་ཕྲེང་བ་ལྟ་བུ་གཅིག་ནས་གཅིག་ཏུ་ཞལ་ནས་སྙན་དུ་བརྒྱུད་དེ། བདག་ཅག་གི་འདྲེན་པ་རྩ་བའི་བླ་མ་བཀའ་དྲིན་མཚུངས་མེད། རྡོ་རྗེ་འཆང་ཆེན་པོའི་བར་ཏུ། སྟེང་ན་རིག་འཛིན་བརྒྱུད་པའི་གྲལ་མ་ཞིག ས་ལ་དཀྱིལ་འཁོར་བཀོད་པའི་བྱིན་མ་ཉམས། དམ་རྫས་སྨན་རཀ་བདུད་རྩིའི་མཚོ་མ་སྐམ། མ་དང་མཁའ་འགྲོའི་ཞལ་རླངས་དྲོད་མ་ཡལ་བར། བྲེང་ཆགས་སུ་བྱོན་པའི་གདམས་པ་ཟབ་མོ་ལ་སྨིན་གྲོལ་གཉིས་སུ་བཞུགས་པའི་སྔ་མ། རྩ་བ་དང་ཡན་ལག་གཉིས་སུ་བཞུགས་པའི་ཆ་ལག་བཀྲ་ཤིས་ཚེ་དབང་རྡོ་རྗེའི་སྲོག་རྫོང་སྐུར་བ་ལ་སློབ་དཔོན་གྱི་བགྱི་བ་རྣམས་སྔོན་དུ་སོང་བས་ཁྱོད་རང་རྣམས་ཀྱི་དངོས་སྐལ་དུ་གྱུར་བའི་མཎྜལ་ཞིག་འབུལ་བར་ཞུ། ལྔ་བ་དབང་སྐུར་བར་གསོལ་འདེབས་ནི། བཀྲ་ཤིས་ཚེ་དབང་ཟབ་མོ་ཞུ་བའི་དོན་དུ་གསོལ་བ་འདེབས་པ་འདིས་རྗེས་ཟློས་མཛོད། ཨེ་མ་ཧོ༔ སྐྱབས་གནས་རྒྱ་མཚོའི་སྤྱི་དཔལ་བླ་མ་རྗེ༔ ཚེ་དཔག་མེད་མགོན་ཨོ་རྒྱན་པདྨ་འབྱུང་༔ དུས་མིན་འཆི་བྲལ་རྡོ་རྗེའི་སྐུ་སྒྲུབ་ཕྱིར༔ འཆི་མེད་རྡོ་རྗེ་ཚེ་ཡི་དབང་སྐུར་སྩོལ༔ ལན་གསུམ། དྲུག་པ་གནང་བ་སྦྱིན་པ་འདི་ལ་གསན་པས་ཁྱབ་པར་གདའ་སྟེ། ཧོ༔ མཁའ་ཁྱབ་འགྲོ་ཀུན་སྲིད་ལས་སྒྲོལ་བའི་ཕྱིར༔ མྱང་འདས་རྡོ་རྗེའི་སྐུ་མཆོག་སྒྲུབ་པ་ལེགས༔ དུས་མིན་འཆི་བའི་བདུད་ལས་རྒྱལ་བའི་ཐབས༔ རྡོ་རྗེ་ཚེ་ཡི་དབང་མཆོག་ཁྱོད་ལ་སྦྱིན༔ ཞེས་རྡོ་རྗེའི་གསུང་གིས་དབྱུགས་དབྱུང་བར་མོས་མཛོད། བདུན་པ་ཡན་ལག་བདུན་པ་འབུལ་བ་ནི། དེ་ནས་དབང་གནང་བར་ཞལ་ཀྱིས་བཞེས་པ་ལ་དད་མོས་དགའ་བ་ཆེན་པོའི་ངང་ནས། ཀུན་བཟང་པདྨ་ཞི་ཁྲོའི་ལྷ་ཚོགས་སྤྲིན་གཏིབ་པ་ལྟར་བཞུགས་པའི་སྤྱན་སྔར། བསག་སྦྱོང་སྤེལ་གསུམ་གྱི་སྙིང་པོ་བསྡུས་པ། ཡན་ལག་བདུན་པ་ཚུལ་བཞིན་བྱ་བའི་འདུན་པས། སོ་སོའི་དམིགས་པ་ཚིག་དང་རྗེས་སུ་མཐུན་པར་གསལ་ཐོབ་ལ་འདིའི་རྗེས་ཟློས་མཛོད། ཨོཾ་ཨཱཿཧཱུྃ༔ དངོས་འབྱོར་ཡིད་སྤྲུལ་མཆོད་རྫས་དཔག་མེད་འབུལ༔ ཕྱག་འཚལ་ཐོག་མེད་བསགས་པའི་ཉེས་ལྟུང་བཤགས༔ དགེ་ལ་ཡི་རང་མྱ་ངན་མི་འདའ་བར༔ ཆོས་གསུང་བསྐུལ་བའི་དགེ་ཚོགས་འགྲོ་ལ་བསྔོ༔ ལན་གསུམ་སོགས་དུས་དང་བསྟུན། བརྒྱད་པ་སྡོམ་པ་ཁས་ལེན་པ་ནི། བླ་མ་པདྨ་ཞི་ཁྲོ་ཡེ་ཤེས་རིགས་ལྔའི་དཀྱིལ་འཁོར་སྐྱབས་ཡུལ་དཀོན་མཆོག་རྩ་གསུམ་དམ་ཅན་རྒྱ་མཚོའི་སྤྱན་སྔར་རང་རང་གིས་ཐོག་དྲངས་ནམ་མཁའ་དང་མཉམ་པའི་སེམས་ཅན་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་ཞིང་། སངས་རྒྱས་ཀྱི་འབྲས་བུ་ལ་སྨོན་པ་དང་། དེའི་ལམ་དུ་འཇུག་པ་དང་། དོན་དམ་སྤྲོས་བྲལ་འོད་གསལ་ཆེན་པོའི་རང་བཞིན་ཏུ་སེམས་བསྐྱེད་ཅིང་། ཐུན་མོང་དང་ཁྱད་པར་ལྷག་པའི་དམ་ཚིག་རྣམས་ལ་གནས་པར་བགྱིའོ་སྙམ་པས་འདིའི་རྗེས་ཟློས། ཧོ༔ བླ་མ་སངས་རྒྱས་འཁོར་དང་བཅས༔ ཐམས་ཅད་བདག་ལ་དགོངས་སུ་གསོལ༔ བླ་མེད་དཀོན་མཆོག་གསུམ་པོ་ལ༔ བྱང་ཆུབ་སྙིང་པོ་མ་ཐོབ་བར༔ སྐྱབས་ཀྱི་མཆོག་ཏུ་བཟུང་བར་བགྱི༔ སྔོན་ནས་བསགས་པའི་སྡིག་སྒྲིབ་བཤགས༔ འགྲོ་རྣམས་སངས་རྒྱས་ཐོབ་བྱའི་ཕྱིར༔ སྨོན་པའི་བྱང་ཆུབ་སེམས་བསྐྱེད་དོ༔ སེམས་ཅན་ཡོངས་སུ་སྨིན་བྱའི་ཕྱིར༔ གསང་སྔགས་སྤྱོད་ལ་རླབས་ཆེན་སྤྱོད༔ དོན་དམ་སྤྲོས་བྲལ་བྱང་ཆུབ་སེམས༔ རང་བྱུང་མཐའ་བྲལ་གསལ་སྟོང་བསྒོམ༔ ཞེས་ལན་གསུམ་གྱིས་སྡོམ་པ་འབོགས་པར་བྱའོ། ། དགུ་བ་ཡེ་ཤེས་ཚེ་ལྷའི་བྱིན་དབབ་ནི། ༀ་ཨཱཿཧཱུྃ་གིས་མེ་ཏོག་དང་མིག་རས་སྦྱིན། སྤོས་ཀྱིས་བདུག རོལ་མོ་དཀྲོལ། དར་གྱིས་གཡབ། རིག་པ་ཧུར་ཕྱུངས་ལ། ཨ༔ སློབ་མའི་ཕུང་ཁམས་སྐྱེ་མཆེད་ཀུན༔ ཡེ་སྟོང་སྤྲོས་པ་བྲལ་བའི་ངང་༔ སྙིང་པོ་ཧྲཱི༔ཡིག་དམར་པོ་ལས༔ འོད་འཕྲོས་བྱིན་བསྡུས་འོད་ཕུང་གྱུར༔ སྐད་ཅིག་མཁའ་ལ་འཇའ་ཤར་བཞིན༔ སློབ་མ་པདྨ་བདེ་བ་ཆེ༔ ཞལ་གཅིག་ཕྱག་གཉིས་མཉམ་བཞག་ཅན༔ མཚན་དཔེའི་དཔལ་འབར་གཞོན་ནུའི་ཚུལ༔ ཚེ་ཡུམ་ལྷ་ལྕམ་དཀར་མོས་འཁྲིལ༔ ཡབ་ཀྱིས་བྷནྡྷ་ཚེ་བུམ་དང་༔ ཡུམ་ཀྱིས་མདའ་དར་ཚེ་བུམ་བསྣམས༔ ཡབ་ཡུམ་གཉིས་མེད་ལོངས་སྐུའི་ཆས༔ གནས་གསུམ་ཡི་གེ་གསུམ་གྱིས་མཚན༔ འོད་ཟེར་ལྕགས་ཀྱུ་ལྟ་བུ་ཡིས༔ རང་བཞིན་དག་པའི་ཞིང་མཆོག་ནས༔ ཡེ་ཤེས་ལྷ་ཚོགས་སྤྱན་དྲངས་གྱུར༔ ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་ཏུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབས་ཕྱིར་གཤེགས་སུ་གསོལ༔ མ་གཡེལ་མ་གཡེལ་ཐུགས་རྗེ་ཅན༔ བསྐུལ་ལོ་བསྐུལ་ལོ་གནས་འདིར་བྱོན༔ མཛོད་ཅིག་མཛོད་ཅིག་བར་ཆད་སོལ༔ སྩོལ་ཅིག་སྩོལ་ཅིག་བྱིན་ཆེན་ཕོབས༔ འཆི་མེད་ཚེ་ཡི་ལྷ་ཚོགས་ཀྱིས༔ ལུས་ལ་རྡོ་རྗེའི་ཚེ་དབང་སྐུར༔ ངག་ལ་གཞོམ་མེད་སྔགས་རྒྱས་ཐོབ༔ ཡིད་ལ་བདེ་སྟོང་ཡེ་ཤེས་བསྐྱེད༔ དུས་མིན་འཆི་བའི་བར་ཆད་ཟློག༔ འབྱུང་ཁམས་དབང་དུ་བསྒྱུར་བ་དང་༔ འཕོ་མེད་འོད་གསལ་མངོན་ཏུ་གྱུར༔ ཚེ་དང་སྨོན་ལམ་དབང་བཅུ་ཐོབ༔ རྟག་བརྟན་རྡོ་རྗེའི་སྐུ་ཐོབ་ཤོག༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ དེ་ལྟར་གདུང་བའི་དབྱངས་ཀྱིས་བསྐུལ༔ སྐུ་དང་ཡིག་འབྲུ་ཕྱག་མཚན་དང་༔ ཐིག་ལེ་བདུད་རྩི་ཆར་བཞིན་བབས༔ གསང་གསུམ་ཕྱག་རྒྱ་སློབ་མར་བསྟིམ༔ མེ་ཏོག་ཕྱག་ཏུ་ཕུལ་བར་མོས་མཛོད། ༀ་པཥྤེ་པྲ་ཏཱི་ཙྪ་ཧོ༔ སྔར་ཕུལ་བའི་མེ་ཏོག་དེ་ཉིད་བྱིན་གྱིས་རླབས་ཅིང་སྤྱི་བོར་བཞག་པས་དབང་ཀུན་ཀྱི་ཐོག་མ་བཀྲ་ཤིས་པདྨའི་ཅོད་པཎ་དབང་རྟགས་སུ་ཐོབ་པའི་མོས་པ་མཛོད། ༀ་པུཥྤེ་བོ་དྷི་ཙིཏྟ་ཨཱཿཧཱུྃ༔ སློབ་དཔོན་གྱི་ཐུགས་ཀ་ནས་ཡེ་ཤེས་ཀྱི་འོད་ཟེར་རྣོ་ལ་མྱུར་བ་གསེར་གྱི་ཐུར་མ་ལྟ་བུ་བྱུང་། མ་རིག་པའི་སྒྲིབ་པ་མིག་དར་དང་ལྷན་ཅིག་ཏུ་བསལ་ཞིང་ཡེ་ཤེས་ཀྱི་སྤྱན་ཐོབ་པའི་མོས་པ་མཛོད། ཨོཾ་བཛྲ་པ་ཤྱ་ཧོ༔ ཙུཀྵ༔པྲ་བེ་ཤ་ཡ་ཕཊ༔ ཅེས་མིག་དར་བསལ་ལ། བརྟེན་དང་རྟེན་པའི་དཀྱིལ་འཁོར་མངོན་སུམ་དུ་མཇལ་བའི་མོས་པ་མཛོད། ༀ་སརྦ་ཛྙཱ་ན་མཎྜ་ལ་བྷྲཱུྃ་ཕཊ༔ དབྱིངས་ཀྱི་དཀྱིལ་འཁོར་བསྟན། བཅུ་བ་དངོས་གཞི་དབང་བསྐུར་ཟབ་མོ་ཞུ་བའི་ཡོན་ཏུ་མཎྜལ་འབུལ་བར་ཞུ། ཀྱེ༔ འཆི་མེད་སྐུ་རྙེས་ཚེ་ཡི་ལྷ༔ མི་ཤིག་གཞོམ་བྲལ་ཚེ་ཡི་དཔལ༔ འཆི་མེད་ཡེ་ཤེས་ཚེ་ཡི་དབང་༔ ཚེ་ལྡན་བདག་ལ་སྩལ་དུ་གསོལ༔ ཅེས་ལན་གསུམ་གསོལ་བ་བཏབ་པས་བླ་མ་ཚེ་དཔག་མེད་པ་རྗེས་སུ་ཆགས་པས་ཐུགས་རྗེས་གཡོས་ཏེ། སྨིན་མཚམས་མཛོད་སྤུའི་དཀྱིལ་འཁོར་ནས་འོད་ཟེར་འཕོས། གདན་གསུམ་ཚངས་པའི་དབང་ལྷ་སྤྱན་དྲངས། དབང་བསྐུར་བར་གསོལ་བ་བཏབ་པས། ཡབ་རྣམས་ཀྱིས་ཏིང་ངེ་འཛིན་གྱི་དབང་སྐུར་བའི་དགོངས་པར་བཞུགས། ཡུམ་རྣམས་ཀྱིས་རིན་པོ་ཆེའི་བུམ་པ་ཐོགས་ཏེ་དབང་བསྐུར་བའི་བྱ་བ་མཛད། ཁྲོ་བོ་ཁྲོ་མོ་རྣམས་ཀྱིས་བགེགས་སྐྲོད་པའི་སྦྱོར་བ་བྱས། སེམས་དཔའ་སེམས་མ་རྣམས་ཀྱིས་བཀྲ་ཤིས་བརྗོད། གནས་ཡུལ་ཞིང་སྐྱོང་ལྷ་སྲུང་རྣམས་ཀྱིས་མེ་ཏོག་གི་སིལ་མ་ཆར་དུ་སྙིལ་བར་མོས་མཛོད། བཅུ་གཅིག་པ་བུམ་དབང་སྐུར་བ་ནི། བུམ་པ་ཐོགས་ལ། ༀ༔ དབྱིངས་ཀྱི་བུམ་པ་ཟླུམ་པོ་རུ༔ འོད་གསལ་ཚེ་ཡི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ བུམ་དབང་ཡོངས་རྫོགས་ཐོབ་པར་ཤོག༔ ཀཱ་ཡ་ཨ་བྷི་ཥིཉྩ་ཨོཾ༔ དེས་ཕྱི་མཚན་མའི་དཀྱིལ་འཁོར་དུ་བུམ་པའི་དབང་བསྐུར་པ་ཐོབ། ལུས་ཀྱི་སྒོ་ནས་སྲོག་གཅོད་པ་སོགས་བགྱིས་པའི་ཚེ་ཀེགས་སུ་གྱུར་པ་བྱང་། ལུས་རྩ་ཡི་སྒྲིབ་པ་དག ལམ་བསྐྱེད་རིམ་དབྱིབས་ཀྱི་རྣལ་འབྱོར་སྒོམ་པ་ལ་དབང་། ཞི་བའི་ལས་དང་རྣམ་པར་རིག་སྨིན་པའི་རིག་འཛིན་གྱི་འགྲུབ་པའི་སྐལ་བ་རྒྱུད་ལ་བཞག འབྲས་བུ་རྡོ་རྗེ་སྤྲུལ་བའི་སྐུ་འགྲུབ་པའི་ས་བོན་ཐེབས་པ་ཡིན་ནོ། །བཅུ་གཉིས་པ་གསང་དབང་སྐུར་བ་ནི། ཕྲེང་བའམ་སྔགས་བྱང་ཐོག་ལ། ཨཱཿ གྲགས་སྟོང་སྔགས་ཀྱི་ཕྲེང་བ་ལ༔ བརྗོད་མེད་ཚེ་ཡི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ གསང་དབང་ཡོངས་རྫོགས་ཐོབ་པར་ཤོག༔ ཝཱཀ་ཨ་བྷི་ཥིཉྩ་ཨཱཿ བླ་མ་དང་མདུན་བསྐྱེད་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་བྱུང་བ་ཞལ་ནས་ཐོན་ཁྱོད་རང་རྣམས་ཀྱི་སྙིང་ཀའི་སྲོག་ཡིག་གི་མཐར་འཁོད་དེ་དབྱེར་མེད་དུ་འདྲེས་ཤིང་བརྟན་པར་བྱས་པའི་མོས་པ་མཛོད། སྔགས་འདིའི་རྗེས་ཟློས་མཛོད༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ལན་གསུམ་བརྗོད། དེས་གསང་བ་སྔགས་ཀྱི་དཀྱིལ་འཁོར་དུ་གསུང་གི་དབང་ཐོབ། ངག་གི་སྒོ་ནས་སྲོག་གཅོད་པ་སོགས་བགྱིས་པའི་ཚེ་ཡི་ཀེགས་སུ་གྱུར་བ་བྱང་། རླུང་ཐ་མལ་དུ་འཛིན་པའི་ཞེན་རྟོག་དག ལམ་རྫོགས་རིམ་སྒོམ་པ་དབང་། རྒྱས་པའི་ལས་དང་ཚེ་དབང་འཛིན་གྲུབ་པའི་སྐལ་བ་རྒྱུད་ལ་བཞག འབྲས་བུ་ལོངས་སྤྱོད་རྫོགས་པའི་སྐུ་འགྲུབ་པའི་ས་བོན་ཐེབས་པ་ཡིན་ནོ། །བཅུ་གསུམ་པ་ཤེར་དབང་སྐུར་བ་ནི། མེ་ལོང་ཐོགས་ལ། ཧཱུྃ༔ སྐྱེ་མེད་ཡེ་ཤེས་མེ་ལོང་ལ༔ སྤྲོས་མེད་ཚེ་ཡི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ ཤེར་དབང་ཡོངས་རྫོགས་ཐོབ་པར་ཤོག༔ ཙིཏྟ་ཨ་བྷི་ཥིཉྩ་ཧཱུྂ༔ དེས་ཤེས་རབ་ཡེ་ཤེས་དཀྱིལ་འཁོར་དུ་ཐུགས་ཀྱི་དབང་ཐོབ། ཡིད་ཀྱི་་སྒོ་ནས་སྲོག་གཅོད་པ་སོགས་བགྱིས་པའི་ཚེ་ཡི་ཀེགས་སུ་གྱུར་བ་བྱང་། རྟོག་ཚོགས་ཐ་མལ་དུ་འཛིན་པའི་ཞེན་རྟོག་དག ཐབས་ལམ་བདེ་བ་ཆེན་པོ་བསྒོམ་པ་ལ་དབང་། དབང་གི་ལས་དང་ཕྱག་རྒྱ་ཆེན་པོའི་རིག་འཛིན་གྲུབ་པའི་བསྐལ་བ་རྒྱུད་ལ་བཞག འབྲས་བུ་ཆོས་སྐུ་མངོན་དུ་གྱུར་པའི་ས་བོན་ཐེབ་པ་ཡིན་ནོ། ། བཅུ་བཞི་པ་ཚིག་དབང་སྐུར་བ་ནི། མཉམ་པར་བཞག་ཅིང་འདི་ལྟར་བརྗོད། ཧོ༔ མཚོན་དུ་མེད་པའི་ཆོས་དབྱིངས་ལ༔ བསལ་བཞག་བྲལ་བའི་ངང་ནས་ལྟོས༔ ཆོས་སྐུ་ཐིག་ལེ་ཉག་གཅིག་ནི༔ བསམ་དུ་མེད་དོ་ཨ་ལ་ལ༔ དེས་རང་བཞིན་དབྱིངས་ཀྱི་དཀྱིལ་འཁོར་དུ་དབང་ཐམས་ཅད་ཀྱི་མཐར་ཐུག་པ། བསྐུར་བྱ་ལས་འདས་པའི་ཚིག་དབང་རིན་པོ་ཆེ་ཐོབ། སྒོ་གསུམ་ཆ་མཉམ་ཤེས་བྱའི་སྒྲིབ་པ་དག ལམ་དབྱིངས་རིག་དབྱེར་མེད་སྐུ་གསུམ་ལྷུན་གྲུབ་རྫོགས་པ་ཆེན་པོ་བསྒོམ་པ་ལ་དབང་། འཁྲུལ་བའི་གྲོང་ཁྱེར་བཅོམ་པའི་དྲག་པོའི་ལས་དང་ལྷུན་གྲུབ་རིག་འཛིན་གྲུབ་པའི་སྐལ་བ་རྒྱུད་ལ་བཞག རིག་པ་གྲོལ་གཞིར་ཐིམ་སྟེ། འབྲས་བུ་ངོ་བོ་ཉིད་སྐུ་གདོད་མའི་མགོན་པོ་འོད་མི་འགྱུར་བ་མངོན་དུ་བྱེད་པའི་ས་བོན་ཐེབ་པ་ཡིན་ནོ། ། བཅོ་ལྔ་པ་ཚེ་འགུགས་བྱ་བ་ནི། མདའ་དར་ཐོགས་ཏེ། དེ་ནས་དབང་གི་ཡེ་ཤེས་བརྟན་ཅིང་འཕེལ་བར་བྱེད་པ་བཀྲ་ཤིས་ཚེ་ཡི་དབང་མཆོག་སྐུར་བ་ལ། ཐོག་མར་དངོས་གྲུབ་འགུགས་པའི་སླད་དུ་ཐུགས་དམིགས་འདི་ལྟར་མཛད་པར་ཞུ། གཞུང་རྩ་བ་ལས། མདའ་དར་ཕྱོགས་བཞི་དབུས་ལྔར་གཡབ༔ ཚེ་དཔལ་སྦུབས་ཆུ་དྲངས་པ་ལྟར༔ འཇའ་དང་འོད་དུ་ཀྱི་ལི་ལི༔ བསྟིམ་པས་གཟི་བྱིན་ཆེར་འབར་བསམ༔ ཞེས་པའི་དོན་བཞིན། སློབ་དཔོན་དང་མདུན་བསྐྱེད་པདྨ་ཚེ་དཔག་ཏུ་མེད་པ་གསལ་བའི་གནས་ལྔ་ནས་འོད་ཟེར་བསམ་གྱིས་མི་ཁྱབ་པ་འཕྲོས། ལྷ་མོ་མགྱོགས་མའི་སྤྲུལ་བ་ཉི་ཟེར་གྱི་རྡུལ་ལྟར་སྤྲོས་པས། ཁྱོད་རང་རྣམས་ཀྱིས་བླ་ཚེ་ཆད་ཉམས་ཡར་བ་དང་། འབྱུང་བ་བཞིའི་དྭངས་མ། འཁོར་འདས་ཀྱི་བཅུད་དང་དགེ་མཚན་ཐམས་ཅད་ཟངས་སྦུག་ཏུ་ཆུ་འདྲེན་པ་ལྟར་འཆི་མེད་ཚེ་ཡི་བདུད་རྩི་འོད་ཟེར་ཁ་དོག་སྣ་ཚོགས་པའི་རྣམ་པར་སྤྱན་དྲངས། སློབ་མ་ཁྱོད་རང་རྣམས་ཀྱིས་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་འཆི་མེད་ཚེ་ཡི་དངོས་གྲུབ་ཐོབ། མདུན་གྱི་ཚེ་རྫས་རྣམས་ལ་ཐིམ་པས། རྡོ་རྗེ་ཚེ་ཡི་བཅུད་ལེན་དུ་གྱུར་པའི་མོས་པ་མཛོད་ཅིག ། ཚེ་བཅུད་དངོས་གྲུབ་འགུགས་པ་ནི། ཧཱུྃ་ཧྲཱི༔ སྤྲོས་པའི་སྒྲིབ་བྲལ་ཆོས་ཉིད་རྡོ་རྗེའི་ཐུགས༔ བདེ་ཆེན་འགྱུར་བ་མེད་པ་རྡོ་རྗེའི་གསུང་༔ འོད་གསལ་མཚན་དཔེར་ཤར་བ་རྡོ་རྗེའི་སྐུ༔ རྡོ་རྗེ་གསུམ་གྱིས་ཚེ་དཔལ་བྱིན་ཆེན་ཕོབས༔ རྩ་བརྒྱུད་བླ་མ་ཡི་དམ་མཁའ་འགྲོ་དང་༔ བསྟན་སྲུང་ནོར་ལྷ་རྒྱ་མཚོའི་ངོ་བོ་ཉིད༔ ཚེ་དབང་རིག་འཛིན་པདྨ་འབྱུང་གནས་ཀྱིས༔ གསང་གསུམ་ཚེ་དང་ཡེ་ཤེས་བྱིན་ཕོབས་ཅིག༔ རྒྱལ་བ་སྲས་བཅས་དྲང་སྲོང་བྱིན་རླབས་ཁུག༔ ཚངས་དང་བརྒྱ་བྱིན་ཕྱོགས་སྐྱོངས་གཟི་དཔལ་ཁུག༔ འབྱུང་བའི་བཅུད་དང་རིན་ཆེན་ནུས་པ་ཁུག༔ རྡོ་རྗེའི་ཚེ་དབང་བྱིན་རླབས་དངོས་གྲུབ་སྩོལ༔ ཚེ་དཀྱིལ་གནས་ཁང་འདི་ལ་བྱིན་ཆེན་ཕོབས༔ ཚེ་རྫས་དམ་རྫས་འདི་ལ་བཅུད་གཅིག་སྐྱེད༔ ཚེ་རྟེན་མདའ་དར་འདི་ལ་ཚད་གཅིག་སྟོན༔ ཚེ་ལྡན་བདག་ལ་ཚེ་དབང་བྱིན་ཆེན་ཕོབས༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ སྤྲོ་ན་དཀྱིལ་འཁོར་ལྷ་ཚོགས་ཐུགས་དམ་བསྐུལ་བ་ནི། ཧཱུྃ་ཧྲཱི༔ ཚེ་དགྲའི་གཡུལ་བཟློག་དམར་ནག་མེ་ཕྲེང་རྩལ༔ ཨོ་རྒྱན་ལྷ་སྲིན་སྡེ་བརྒྱད་ལྷ་ཚོགས་ཀྱིས༔ ཕྱོགས་སྐྱོང་སྡེ་བརྒྱད་ལག་ནས་ཚེ་གཡང་ཁུག༔ ཞེ་སྡང་འཁྲུགས་པའི་རྐྱེན་ལས་གྱུར་བ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ དུག་གསུམ་ཚེ་ནད་ཀུན་སེལ་མཛད་སྨན་གྱི་ལྷ༔ ཨོ་རྒྱན་སྨན་གྱི་བླ་མའི་ལྷ་ཚོགས་གྱིས༔ དྲང་སྲོང་རིག་འཛིན་ལག་ནས་ཚེ་གཡང་ཁུག༔ སྔོན་ལས་འཕྲལ་རྐྱེན་ངན་པ་ལས་བྱུང་བའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བསོད་རྒྱས་མཛད་ཆུ་དབང་དྲྭ་བ་སྡོམ༔ ཨོ་རྒྱན་མཁའ་འགྲོ་ནོར་ལྷའི་ལྷ་ཚོགས་ཀྱིས༔ གནོད་སྦྱིན་ནོར་བདག་ལག་ནས་ཚེ་གཡང་ཁུག༔ སེར་སྣ་འགྱུར་གེགས་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་སྲི་འདུལ་མཛད་དཔལ་ཆེན་སྒྲུབ་སྡེ་བརྒྱད༔ ཨོ་རྒྱན་ཡི་དམ་ལྷ་ཚོགས་འཁོར་བཅས་ཀྱིས༔ ཚོགས་བརྒྱད་གཟུང་འཛིན་གཞན་དབང་ལས་གྱུར་པའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བདུད་འཇོམས་མཛད་ཟིལ་གནོན་དྲག་པོ་རྩལ༔ ཨོ་རྒྱན་གཞི་བདག་གཉན་པོའི་ལྷ་ཚོགས་ཀྱིས༔ སྣང་སྲིད་ལྷ་འདྲེའི་ལག་ནས་ཚེ་གཡང་ཁུག༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་གདོན་དཔུང་འཇོམས་གསང་བདག་སེངྒེའི་སྒྲ༔ ཨོ་རྒྱན་དཔའ་བོའི་གིང་དང་སྲུང་མའི་ཚོགས༔ འདོད་ཁམས་འཁོར་བའི་གནས་ནས་ཚེ་གཡང་ཁུག༔ རྣམ་གཡེངས་འཕོ་བཅས་རྟོག་པའི་དབང་གྱུར་པའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བཅུད་སྤེལ་མཛད་པདྨ་བཛྲ་རྩལ༔ ཨོ་རྒྱན་འབྱུང་བ་བཞི་བདག་ལྷ་ཚོགས་ཀྱིས༔ སྣོད་བཅུད་འབྱུང་བའི་ཁམས་ཀྱི་ཚེ་ཁུག་ཅིག༔ བྱིང་རྨུག་འཕྲོ་རྒོད་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་རྐུན་སྟོབས་འཕྲོག་ཁྲོ་མཆོག་རྟ་མགྲིན་ནག༔ ཨོ་རྒྱན་ཕྱག་རྒྱ་བཞི་ཡི་ལྷ་ཚོགས་ཀྱིས༔ ས་བདག་ཤ་ཟའི་ལག་ནས་ཚེ་ཁུག་ཅིག༔ ཐེ་ཚོམ་རྣམ་པར་རྟོག་པའི་གཞན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བསེན་མཐར་བྱེད་རྡོ་རྗེ་ཁྲོ་བོ་ལོད༔ ཨོ་རྒྱན་རྡོ་རྗེ་གུར་གྱི་ལྷ་ཚོགས་ཀྱིས༔ མི་དང་མི་མིན་ལག་ནས་ཚེ་གཡང་ཁུག༔ བསམ་སྦྱོར་ངན་པའི་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ ཚེ་བྱུར་སེལ་མཛད་ཐུགས་ཆེན་པདྨ་རྒྱལ༔ ཨོ་རྒྱན་སྣང་མཐའི་སྤྲུལ་བའི་ལྷ་ཚོགས་ཀྱིས༔ འཇིག་རྟེན་ཆེ་རྒུའི་ལག་ནས་ཚེ་ཁུག་ཅིག༔ རེ་དོགས་རྣམ་རྟོག་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་ཟད་བསྲིང་མཛད་སངས་ཚེ་དཔག་མེད༔ ཨོ་རྒྱན་དུས་གསུམ་མཁྱེན་པའི་ལྷ་ཚོགས་ཀྱིས༔ འཕགས་པ་བྱང་སེམས་ཕྱག་ནས་ཚེ་ཁུག་ཅིག༔ རྨི་ལམ་འཁྲུལ་བའི་རྐྱེན་དུ་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བརྟན་འགྱུར་མེད་ཆོས་སྐུ་ཀུན་ཏུ་བཟང་༔ ཨོ་རྒྱན་བདེ་ཆེན་རྒྱལ་པོའི་ལྷ་ཚོགས་ཀྱིས༔ ཕྱོགས་བཅུའི་སངས་རྒྱས་ཞིང་ནས་ཚེ་ཁུག་ཅིག༔ དངོས་ཞེན་འཛིན་པ་དམ་པོའི་རྐྱེན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་འཕེལ་ཡིད་བཞིན་ནོར་བུ་བདེ་བ་ཆེ༔ ཨོ་རྒྱན་ཐུགས་རྗེ་འགྱུར་མེད་ལྷ་ཚོགས་ཀྱིས༔ བརྒྱུད་གསུམ་རིག་འཛིན་ཕྱག་ནས་ཚེ་ཁུག་ཅིག༔ ༔ སྙེམས་འཕྲིག་དམ་སེལ་ངན་པའི་རྐྱེན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ ཚེ་འགུག་རྒྱས་བསྡུས་གང་བྱེད་ཀྱང་མཐར་མགྱོགས་མ་རྣམ་བཞི་བསྐུལ་བ་ནི། ཧཱུྃ་ཧྲཱི༔ ཛ༔ རང་སྣང་དཀྱིལ་འཁོར་ཤར་སྒོ་ནས༔ མགྱོགས་མ་དཀར་མོ་ལྕགས་ཀྱུ་མ༔ དྲི་ཟའི་ལག་ནས་ཚེ་ཁུག་ལ༔ ཁྲག་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ཧཱུྃ༔ རང་སྣང་དཀྱིལ་འཁོར་ལྷོ་སྒོ་ནས༔ མགྱོགས་མ་སེར་མོ་ཞགས་པ་མ༔ གཤིན་རྗེའི་ལག་ནས་ཚེ་ཁུག་ལ༔ ཤ་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ བྃ༔ རང་སྣང་དཀྱིལ་འཁོར་ནུབ་སྒོ་ནས༔ མགྱོགས་མ་དམར་མོ་ལྕགས་སྒྲོག་མ༔ ཀླུ་དབང་ལག་ནས་ཚེ་ཁུག་ལ༔ དྲོད་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ཧོ༔ རང་སྣང་དཀྱིལ་འཁོར་བྱང་སྒོ་ནས༔ མགྱོགས་མ་ལྗང་མོ་དྲིལ་བུ་མ༔ གནོད་སྦྱིན་ལག་ནས་ཚེ་ཁུག་ལ༔ དབུགས་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ སློབ་དཔོན་ལྟ་དགོངས་ལྡན་པས་སློབ་མ་དམ་ཚིག་ལྡན་པ་ལ་ཚེ་འགུགས་འདི་ཉིད་མཛད་པའི་ཕན་ཡོན་ཀྱང་། གཞུང་རྩ་བ་ལས། མཆིལ་མ་མིད་ཅིང་བུམ་ཅན་འཛིན༔ ལྟེ་འོག་རིག་པ་ཕུར་ཚུགས་གཏད༔ འཆི་བདག་གཤིན་རྗེའི་ཁར་ཚུད་ཀྱང་༔ ཞག་བདུན་ཚེ་ནི་བསྲིང་བར་འགྱུར༔ ཚེ་འགུགས་འདི་ཉིད་བརྒྱ་རྩ་བརྒྱད༔ ཉིན་གཅིག་བཏོན་པས་ཚེ་གེགས་སེལ༔ ཞག་རེར་ཚར་གསུམ་མ་ཆད་ན༔ ཚེ་ལོ་བརྒྱ་ལ་ཐེ་ཚོམ་མེད༔ ཅེས་པའི་དོན་ལ་དད་མོས་རྩེ་གཅིག་པས་རླུང་བུམ་པ་ཅན་ཟུངས་ལ་མཉམ་པར་ཞོག་ཅིག བཅུ་དྲུག་པ་ཚེ་དབང་སྐུར་བ་ནི། ཚེ་འབྲང་བུམ་པ་མགོ་ལ་བཞག་ཏེ། ཚེ་འབྲངས་འདི་ཉིད་ཀུན་བཟང་པདྨ་ཞི་ཁྲོ་ཚེ་དཔག་མེད་ཀྱི་ལྷ་ཚོགས་མངོན་སུམ་དུ་གསལ་བའི་སྐུ་ལས་འོད་ཟེར་འཕྲོས། ཁྱོད་རང་རྣམས་ཀྱི་བླ་ཚེ་ཆད་ཉམས་ཡར་བ་དང་། འཁོར་འདས་ཀྱི་ཚེ་བཅུད་དྭངས་མ་ཐམས་ཅད་བསྡུས་ཏེ་ཕྱག་གི་བུམ་པའི་ནང་དུ་ཞུགས། ཁོལ་ཞིང་ལུད་པས་འཆི་བ་མེད་པའི་བདུད་རྩི་རྩ་བ་གསུམ་གྱི་མཁྱེན་རྩེ་ནུས་པའི་ཡོན་ཏན་གྱི་འོད་ཟེར་དང་བཅས་པ་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་། རྡོ་རྗེ་ཚེ་དབང་ཐོབ། དུས་མ་ཡིན་པར་འཆི་བའི་འཇིགས་པ་བག་ཆགས་དང་བཅས་པ་བྱང་ཞིང་དག འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ལུས་པ་ཐོབ་པར་མོས་མཛོད། ཧཱུྃ་ཧྲཱི༔ ཚེ་དཔག་མེད་མགོན་པདྨ་ཐོད་ཕྲེང་རྩལ༔ འཆི་མེད་ཚེ་ལྷ་རྒྱ་མཚོའི་ཡེ་ཤེས་བྱིན༔ ཚེ་ཡི་དཀྱིལ་འཁོར་ཆེན་པོའི་དབང་བསྐུར་བས༔ ཚེ་ལྷའི་གསང་གསུམ་ཡོན་ཏན་རྫོགས་པར་ཤོག༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུར་ཛྙཱ་ན་གུ་ཡ་སིདྡྷི་ཧཱུྃ༔ བཅུ་བདུན་པ་ཚེ་རིལ་གཏད་པ་ནི། འཆི་མེད་ཚེ་རིལ་གཡས་སུ་གཏད་ལ། སྲིད་ཞིའི་དྭངས་མ་འདུས་པའི་ཚེ་རིལ་ཡེ་ཤེས་སེམས་དཔའ་ཚེ་དཔག་མེད་སྐུ་ཆུང་ལ་ཡན་ལག་རྫོགས་པའི་གཟུགས་སམ། སྙིང་པོ་ཧྲཱི༔་ཡིག་འོད་འབར་བའི་རྣམ་པར་ཁྱོད་རང་རྣམས་ཀྱི་ཞལ་དུ་ཞུགས། སྙིང་དབུས་ཉི་ཟླའི་གའུར་མི་ཤིག་པའི་དཔྱིད་དུ་ཞུགས་པས་འཆི་མེད་ཚེ་ཡི་དགོས་གྲུབ་ཐོབ་པར་མོས་མཛོད། ཧཱུྃ་ཧྲཱི༔ སྣང་བའི་ཆོས་ཀུན་འཛིན་ཞེན་བྲལ་བ་ལས༔ འཁོར་འདས་བཅུད་བསྡུས་འཆི་མེད་ཚེ་རིལ་འདི༔ སྐལ་ལྡན་སྐྱེས་བུ་ཁྱོད་ལ་སྦྱིན་པ་ཡིས༔ འཆི་མེད་རྡོ་རྗེའི་ཚེ་ལ་མངའ་བརྙེས་ཤོག༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫྙཱ་ན་གུ་ཡ་སིདྡྷི་ཧཱུྃ༔ བཅོ་བརྒྱད་པ་ཚེ་ཆང་གཏད་པ་ནི། ཚེ་ཆང་བདུད་རྩི་གཡོན་ཏུ་གཏད་ལ། འཁོར་འདས་བརྟན་གཡོའི་དྭངས་བཅུད་གཅིག་ཏུ་འདུས་པའི་འཆི་མེད་བདུད་རྩིས་རྩ་ཁམས་ཐམས་ཅད་ལ་ཁྱབ་སྟེ་ནད་མེད་བདེ་བའི་ལང་ཚོ་རྒྱས། ཤེས་རབ་སྟོང་པ་ཉིད་མཆོག་ཏུ་མི་འགྱུར་པའི་རྡོ་རྗེ་ཚེ་ཡི་དངོས་གྲུབ་ཐོབ་པར་མོས་མཛོད། ཧཱུྃ་ཧྲཱི༔ སྟོང་པའི་ཆོས་ཀུན་དབྱིངས་སུ་ཞུགས་པ་ལས༔ འཕོ་བཅས་རྣམ་རྟོག་གཅོད་པའི་ཚེ་ཆང་འདི༔ སྐལ་ལྡན་སྐྱེས་བུ་ཁྱོད་ལ་སྦྱིན་པ་ཡིས༔ བདེ་སྟོང་རྡོ་རྗེའི་ཚེ་ལ་མངའ་བརྙེས་ཤོག༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ བཅུ་དགུ་པ་བླ་ཚེ་ཆོས་ཀྱི་དབྱིངས་སུ་སྦ་བ་ནི། མདའ་དར་རྒྱ་གྲམ་གནས་ལྔར་བཞག་ལ། ཚེ་མདའ་འདི་ཉིད་སྤྱི་བོར་བཞག་པས་རྐྱེན་ལས་སྣ་ཚོགས་རྡོ་རྗེའི་རྡུལ་གྲངས་མེད་པ་འཕྲོས། ཁྱོད་རང་རྣམས་ཀྱི་ལུས་རྡོ་རྐེའི་གོ་ཁྲབ་ཀྱིས་གཡོགས། རྐྱེན་གང་གིས་ཀྱང་མི་ཚུགས་པའི་རྒྱལ་བ་ཚེ་དཔག་མེད་པའི་ང་རྒྱལ་གྱི་ངང་ནས། ཚེ་ཡི་སྙིང་པོ་ཡི་གེ་ཨ་དཀར་པོའི་རྣམ་པར་གྱུར་བ་དེ་ཉིད་སྙིང་དབུས་ཉི་ཟླ་ཁ་སྦྱོར་གྱི་གའུ་ནང་དུ་ཞུགས། ཡེ་ཤེས་ལྔ་ཡི་འོད་ཀྱིས་རྒྱ་གྲམ་གྱི་ཚུལ་དུ་བསྡམ། མདུད་པའི་སྟེང་ༀ་ཨཱཿཧཱུྃ་སྟེ་རྡོ་རྗེ་གསུམ་གྱི་རྒྱ་ཡིས་བཏབ་པས་ཚེ་སྲོག་ལ་འགྱུར་བ་མེད་པ་ཆོས་དབྱིངས་ཆེན་པོར་སྦས་པས་སྲིད་གསུམ་དགྲ་རུ་ལངས་ཀྱང་འཇིག་པ་མེད་པའི་རྡོ་རྗེའི་སྲོག་འགྲུབ་པའི་མོས་པ་མཛོད། ཧཱུྃ་ཧྲཱི༔ གཅིག་འཛིན་བདག་ལྟའི་ཚེ་ཡི་ཀེགས༔ ཀུན་ཁྱབ་ཡེ་ཤེས་སྟོབས་ཀྱིས་བཅོམ༔ ཆོས་སྐུ་གཅིག་གི་བྱིན་གྱིས་བརླབས༔ ཐིག་ལེ་གཅིག་གི་ཀློང་དུ་སྦ༔ གཉིས་འཛིན་མཚན་མའི་ཚེ་ཡི་ཀེགས༔ གཉིས་མེད་ཡེ་ཤེས་སྟོབས་བཅོམ༔ སྐུ་གཉིས་དག་པས་བྱིན་གྱིས་བརླབས༔ གཉིས་སྣང་བྲལ་བའི་ཀློང་དུ་སྦ༔ དུག་གསུམ་ཆགས་སྡང་ཚེ་ཡི་ཀེགས༔ ཡེ་ཤེས་གསུམ་ལྡན་སྟོབས་ཀྱིས་བཅོམ༔ སྐུ་གསུམ་བདེན་པས་བྱིན་གྱིས་བརླབས༔ ཁམས་གསུམ་ཀློང་གྲོལ་དབྱིངས་སུ་སྦ༔ སྐྱེ་བཞིར་ཨ་འཐས་ཚེ་ཡི་ཀེགས༔ ཡེ་ཤེས་བཞི་སྦྱོར་སྟོབས་ཀྱིས་བཅོམ༔ སྐུ་བཞིའི་བདེན་པས་བྱིན་གྱིས་བརླབས༔ འབྱུང་བཞི་རང་དག་ཀློང་དུ་སྦ༔ དུག་ལྔ་འཁྲུགས་པའི་ཚེ་ཡི་ཀེགས༔ རྒྱལ་བ་རིགས་ལྔས་སྟོབས་ཀྱིས་བཅོམ༔ དབྱིངས་ལྔ་དག་པའི་ཀློང་དུ་སྦ༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫྙཱ་ན་ཏིཥྛ་བྷྲཱུྃ༔ ཉི་ཤུ་པ་དམ་ཚིག་ཁས་ལེན་པ་ནི། དེ་ལྟར་ཚེ་དབང་རྡོ་རྗེའི་སྲོག་རྫོང་གི་དབང་བསྐུར་ཟབ་མོ་ལེགས་པར་གྲུབ་པ་ཡིན་པས། དམ་ཚིག་གི་རིམས་པ་རྣམས་སྤྱི་དང་། བྱེ་བྲག འཆི་ངེས་ཀྱི་སྲོག་སྐྱབས་ཅིང་། འཆི་འགྱུར་གྱི་སྲོག་སླུ་བ། མཆོད་སྦྱིན་རྒྱ་ཆེར་སྤེལ་བ། ཚེ་ཡིག་གཟུངས་བཟླ་བ་སོགས་ལ་འབད་དགོས་ཏེ། གཞུང་རྩ་བ་ལས། མཚན་བཅས་རྟེན་བཞེངས་དགེ་འདུན་མཆོད༔ སྲོག་སླུ་སཱཙྪཱ་གདབ༔ ལམ་འཕྲང་བཅོས་དང་ཟམ་པ་འཛུག༔ ཚེ་གཟུངས་དར་ལྕོག་འཛུག་པ་དང་༔ ཉིན་བཞིན་ཚེ་འགུག་ཚེ་དབང་ལེན༔ མཚན་མེད་བདེ་སྟོང་ཡེ་ཤེས་སྒོམ༔ ཞེས་པའི་སྤང་བླང་གི་དམིགས་ཕྱེད་པ་སློབ་ཅིང་། ཚུལ་བཞིན་སྲུང་སྙམ་པས་འདིའི་རྗེས་ཟློས་མཛོད། ཀྱེ༔ ཚེ་ལྷ་རྒྱལ་བ་སྲས་བཅས་དགོངས༔ གསང་བ་སྤྱི་དང་ཁྱད་པར་ཏུ༔ རྡོ་རྗེ་ཚིག་གི་དམ་ཚིག་ནི༔ ཞེ་སྡང་སྲོག་གཅོད་མི་བྱ་ཞིང་༔ སྲོག་སླུ་སྦྱིན་པ་གཏོང་བ་དང་༔ རྡོ་རྗེའི་བཟླས་པ་བུམ་ཅན་འཛིན༔ རྩ་བ་ཡན་ལག་དམ་ཚིག་ཀུན༔ གཙོ་བོའི་བཀའ་བཞིན་བདག་གིས་སྲུང་༔ ལན་གསུམ་བརྗོད། ཉེར་གཅིག་པ་གཏང་རག་གི་མཎྜལ་འབུལ་བ་ནི། དབང་ཡོངས་རྫོགས་ཐོབ་པའི་བཀའ་དྲིན་གསབ་པའི་ཕྱིར་དུ་འཁོར་འདས་ཀྱི་དངོས་པོ་མ་ལུས་པ་ཀུན་ཏུ་བཟང་པོའི་མཆོད་པའི་སྤྲིན་ཕུང་ཆེན་པོ་སྤྲུལ་ཏེ་གཏང་རག་གི་མཎྜལ་ཕུལ་མཛོད། ཉེར་གཉིས་པ་བྲན་དུ་འབུལ་བ་ནི། ལུས་ལོངས་སྤྱོད་དུས་གསུམ་དགེ་ཚོགས་དང་བསྟན་དང་འགྲོ་བའི་སླད་དུ་རིགས་ཀྱི་བདག་པོ་དཀྱིལ་འཁོར་བའི་ལྷ་ཚོགས་ལ་འབུལ་ན། ཆ་ཤས་ནས་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམ་ཏེ་བདག་བྲན། །ཁྱོད་ལ་བདག་ནི་འབུལ་ལགས་ན། །ཁྱོད་ཀྱི་སློབ་པར་བཟུང་པ་དང་། །ཆ་ཤས་ཀྱང་ནི་སྤྱད་དུ་གསོལ། ལན་གསུམ། ཉེར་གསུམ་པ་བསྔོ་བ་སྨོན་ལམ་གདབ་པ་ནི། དེ་ལྟར་དབང་བསྐུར་ཐོབ་པ་ལས་བྱུང་བའི་དགེ་བའི་རྩ་བ་དང་། རང་གཞན་མཁའ་ཁྱབ་ཀྱི་འགྲོ་བ་མ་ལུས་པའི་དུས་གསུམ་དགེ་བ་གཅིག་ཏུ་བསྡམ་ནས། མི་གནས་བྱང་ཆུབ་ཆེན་པོར་ཡོངས་སུ་བསྔོ་བ་དང་། ཟབ་ཆོས་རྣམས་ཀྱི་སྒོ་ནས་རང་གཞན་གྱི་དོན་ནམ་མཁའ་དང་མཉམ་པ་སྒྲུབ་པར་བྱ་སྙམ་པས་འདིའི་རྗེས་ཟློས་མཛོད། ནམ་མཁའི་ཁྱོན་ཀུན་གང་པའི་རྒྱལ་བ་སྲས་དང་བཅས་པ་རྣམས་ཀྱི། བདེན་པའི་ཚིག་དབྱངས་སུ་ལྡིར་བ་དང་ལྷན་ཅིག ཚེ་དབང་ཡེ་ཤེས་ཀྱི་མེ་ཏོག་རྡོ་རྗེའི་དབྱིབས་ཅན་ཆར་དུ་སྙིལ་བ་ལུས་ལ་ཐིམ་པས། ཁྱོད་རྣམས་ཀྱི་ལུས་རྡོ་རྗེའི་གོ་ཁྲབ་ཀྱིས་ཞུ་ལུགས་གཡོགས། ཅིང་ཀྱང་གཞོམ་གཞིག་དང་བྲལ་བར་མོས་མཛོད། །ཧོ༔ རབ་འབྱམས་འཆི་མེད་ཚེ་ཡི་ལྷ་ཚོགས་ལ༔ གསོལ་བཏབ་དབང་བླང་བསྙེན་པའི་དགེ་ཚོགས་ཀྱི༔ མཐའ་ཡས་འགྲོ་ཀུན་དུས་མིན་འཆི་ལས་གྲོལ༔ ཚེ་དཔག་མེད་པའི་གོ་འཕང་མངོན་གྱུར་ཤོག༔ ལན་གཅིག ཉེར་བཞི་པ་བཀྲ་ཤིས་བརྗོད་པ་ནི། ཧོ༔ བཀྲ་ཤིས་ཚེ་ཡི་དཔལ་སྟེར་ཚེ་དཔག་མེད༔ བདེ་ཆེན་ཚེ་ལ་དབང་བསྒྱུར་པདྨ་རྒྱལ༔ འཆི་མེད་རིག་པ་འཛིན་པ་པདྨ་འབྱུང་༔ སྐུ་གསུམ་ཚེ་ལྷས་བཀྲ་ཤིས་ཚེ་གཡང་སྩོལ༔ བདེ་བ་ཆེན་པོ་པདྨ་བཛྲ་རྩལ༔ སྟོབས་ཀྱི་དབང་ཕྱུག་ཚེ་ལྷ་རྟ་མཆོག་དཔལ༔ ཚེ་ཡི་ཕྱག་རྒྱ་ལྷ་ལྕམ་ཡིད་འཛིན་མ༔ རྩ་གསུམ་ཚེ་ལྷས་བཀྲ་ཤིས་ཚེ་གཡང་སྩོལ༔ སེམས་མཆོག་བསྐྱེད་ཚེ་ལ་བར་ཆད་མེད༔ སྒྲུབ་པའི་དུས་སུ་ཚེ་ལྷས་དངོས་གྲུབ་སྩལ༔ མཐར་ཐུག་འཆི་མེད་རྡོ་རྗེའི་སྐུ་མཆོག་བརྙེས༔ དུས་གསུམ་དགེ་བའི་བཀྲ་ཤིས་ཚེ་གཡང་སྩོལ༔ འགྲོ་རྣམས་མཐོང་ཐོས་ཡིད་ལ་སྨོན་ཙམ་གྱིས༔ ཚེ་ལྷའི་བྱིན་རླབས་འབད་མེད་ཆར་བཞིན་སྙིལ༔ ཚེ་ཡི་ཀེགས་སེལ་དགེ་བའི་དཔལ་གྱིས་འཚོ༔ འཁོར་གསུམ་བཀྲ་ཤིས་ཚེ་གཡང་དཔལ་འབར་ཤོག༔ ཛ་ཡ་ཛ་ཡ་བི་ཛ་ཡ༔ ཛ་ཡནྟུ༔ ཚེ་དབང་ཟབ་མོ་འདི་ཐོབ་པས༔ དུས་མིན་འཆི་བའི་འཇིགས་པ་ཞི༔ ཚེ་འདིར་རྡོ་རྗེའི་སྐུ་མཆོག་བརྙེས༔ མཐའ་ཡས་འགྲོ་དོན་ལྷུན་གྲུབ་འགྱུར༔ ཅེས་གསུངས་སོ། ། སྨྲས་པ། པདྨའི་ཐུགས་བསྐྱེད་ཉི་མའི་འོད་ཟེར་གྱིས། །ལྔ་བདོའི་རྒུད་པའི་རྨག་རུམ་མཐར་བྱས་ཏེ། །སྐལ་བཟང་སྙིང་གི་ཆུ་སྐྱེས་ཕྱེས་པ་ལས། །ཟབ་གཏེར་བསུང་ཞིམ་ཟེ་འབྲུའི་རྡུལ་དམར་ངོམ། །བཀའ་དང་ཟབ་གཏེར་མ་དྲོས་མཚོ་ཆེན་ལས། །སྨིན་གྲོལ་འདོད་འབྱུང་ཡིད་བཞིན་ནོར་བུའི་གཟིངས། །ཉམས་མེད་འདྲེན་པའི་ཐུགས་བསྐྱེད་རླུང་ཤུགས་ཅན། །གསང་བདག་དཔའ་བོ་ཚེ་དབང་ནོར་བུ་ཡིན། །ཉེས་པའི་ཡོངས་གང་ཐ་མལ་ལྕགས་ཀྱི་ཁམས། །མན་ངག་རིན་ཆེན་གསེར་འགྱུར་རྩི་མཆོག་གིས། །འཆི་མེད་རྡོ་རྗེའི་སྐུ་རུ་སྒྲུབ་པའི་ཐབས། །ཟབ་གཏེར་རྒྱ་མཚོའི་བཀྲ་ཤིས་མེ་ཏོག་ཡིན། །ལྷག་བསམ་དྲི་མེད་མེ་ལོང་གཙང་མ་ལ། །རྩ་གསུམ་བྱིན་རླབས་སྣང་བརྙན་འབུམ་བཀྲ་བ། །སྐལ་བཟང་ཐར་འདོད་རྣམས་ལ་གཟིགས་མོ་རུ། །ཕུལ་བས་འཆི་མེད་མགོན་པོ་མྱུར་འགྲུབ་ཤོག ། ཅེས་པའང་གཏེར་གཞུང་ལ་མཚམས་སྦྱོར་ཕྲན་བུ་བརྒྱན་ཏེ་ནག་འགྲོས་སུ་བཀོད་པ་པོ་ནི་ཆོས་རྗེ་ཀཿཐོག་པ་རིག་འཛིན་ཆེན་པོའི་མཚན་གྱི་ཅོད་པཎ་ལ་སྐྱབས་སུ་འགྲོ་བའི་རིག་འཛིན་པདྨ་དབང་ཆེན་དགྱེས་པ་རྩལ་ཏེ། རབ་བྱུང་བཅུ་བདུན་པའི་ལྕགས་འབྲུག་ལོ་ས་ཟླའི་ཚེས་བཟང་ལ་བྲིས་པ་དགེ་ལེགས་འཕེལ། མངྒ་ལཾ། ། ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས་གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ཟབ་མོ་ལུས་དཀྱིལ་ཡེ་ཤེས་རང་ཤར།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ཟབ་མོ་ལུས་དཀྱིལ་ཡེ་ཤེས་རང་ཤར་ཞེས་བྱ་བ་བཞུགས་སོ༔ ན་མོ་པདྨ་གུ་རུ་ཀཱ་ར་ཡེ༔ ཡེ་ནས་གནས་པའི་རྫོགས་སངས་རྒྱས༔ རང་བྱུང་རང་ལ་འཆར་བའི་ཐབས༔ ཀུན་བཟང་དྨ་ཞི་ཁྲོ་ཡི༔ ལུས་ཀྱི་དཀྱིལ་འཁོར་འདི་ལྟར་སྒོམ༔ ཨ༔ གདོད་ནས་དག་པ་ཆོས་སྐུའི་ཀློང་༔ འོད་གསལ་སྒྱུ་འཕྲུལ་དྲ་བའི་སྐུ༔ རང་ཉིད་པདྨ་བདེ་བ་ཆེ༔ དཀར་དམར་ཞི་འཛུམ་མཚན་དཔེ་འབར༔ མཉམ་བཞག་བྷནྡྷ་ནོར་བུ་འཛིན༔ ལྷ་ལྕམ་དཀར་མོ་ཐོད་བུམ་ཐོགས༔ བདེ་མཉེན་འཁྱུགས་པའི་གར་གྱིས་འཁྲིལ༔ བདེ་ཆེན་རྡོ་རྗེའི་ཕུང་པོར་གསལ༔ སྤྱི་བོར་བླ་མ་མེ་ཕྲེང་རྩལ༔ རྡོ་རྗེ་གཡས་ལ་ལྕགས་སྡིག་གཡོན༔ དཔྲལ་བར་གུ་རུ་སྨན་གྱི་བླ༔ ཨ་རུ་གཡས་ལ་སློང་བཟེད་གཡོན༔ མགྲིན་པར་པདྨ་བཛྲ་རྩལ༔ རལ་གྲི་གཡས་ལ་ཚེ་བུམ་གཡོན༔ སྙིང་གར་ཐུགས་ཆེན་པདྨ་རྒྱལ༔ པདྨ་གཡས་ལ་ཕྲེང་བ་གཡོན༔ ལྟེ་བར་མཁའ་འགྲོ་དྲྭ་བ་སྡོམ༔ ནོར་བུ་གཡས་ལ་ནེའུ་ལེ་གཡོན༔ གསང་བར་རྡོ་རྗེ་གཞོན་ནུ་རྒྱལ༔ ཕུར་པ་གཡས་ལ་དུང་ཕོར་གཡོན༔ ལག་གཡས་གྲོ་ལོད་བདུད་ཀྱི་གཤེད༔ རྡོ་རྗེ་གཡས་ལ་ཕུར་པ་གཡོན༔ ལག་གཡོན་ཟིལ་གནོན་དྲག་པོ་རྩལ༔ རྡོ་རྗེ་གཡས་ལ་སྙིང་ཕྲེང་གཡོན༔ རྐང་གཡས་དཔའ་བོ་རྟ་མགྲིན་ནག༔ རྡོ་རྗེ་གཡས་ལ་རྔེའུ་ཆུང་གཡོན༔ རྐང་གཡོན་གསང་བདག་སེངྒེའི་སྒྲ༔ རྡོ་རྗེ་གཡས་ལ་ཞགས་པ་གཡོན༔ ཐམས་ཅད་ཞལ་གཅིག་ཕྱག་གཉིས་པ༔ མཐིང་ནག་རུས་རྒྱན་ཁ་ཊྭཱཾ་ཐོགས༔ ཕུང་ཁམས་སྐྱེ་མཆེད་རྟོག་ཚོགས་ཀུན༔ རིགས་ལྔ་ཡབ་ཡབ་ཡུམ་ཞི་ཁྲོའི་ལྷ༔ ལྷུན་གྲུབ་གདན་གསུམ་ཚང་པའི་དལ༔ འོད་གསལ་རང་བྱུང་རང་ཤར་རོ༔ སྙིང་དབུས་པདྨ་རྒྱལ་པོ་ཡི༔ ཐུགས་ཀློང་འོད་དཔག་མེད་མཉམ་བཞག༔ དེ་ཡི་སྙིང་དབུས་ཀུན་ཏུ་བཟང་༔ ཡབ་ཡུམ་གཉིས་མེད་ཟང་ཐལ་སྐུ༔ ཐུགས་དབུས་འོད་ལྔའི་གའུ་ནང་༔ ཧྲཱི༔་མཐར་བཅུ་གཉིས་རྡོ་རྗེའི་སྔགས༔ ལྷ་ཚོགས་རང་སྲོག་སྔགས་སྒྲ་སྒྲོགས༔ ཡེ་ནས་རང་རིག་དོན་དམ་ལྷ༔ ཞལ་ཕྱག་འཛིན་མེད་མཁའ་ལྟ་བུ༔ ཁྱབ་བརྡལ་ཆེན་པོའི་ཀློང་དུ་འཇོག༔ སྤྲོས་བྲལ་ཡི་གེ་ཨཿགཅིག་པུ༔ སྤྲོས་བཅས་རབ་འབྱམས་དཀྱིལ་འཁོར་བསྙེན༔ ཨོཾ་ཨཱཿཧཱུྃ༔བཛྲ་གུ་རུ་པདྨ་སིདྡྷི་ཧཱུྃ༔ རྡོ་རྗེའི་ཡིག་འབྲུ་བཅུ་གཉིས་བཟླ༔ ཨོཾ་ཨཱཿཧཱུྃ་གུ་རུ་དྷཱ་ཀི་ནཱི་ཛྙཱ་ན་སརྦ་སིདྡྷི་ཕ་ལ་ཧཱུྃ༔ རྩ་གསུམ་བླ་མའི་ཛཔ་ཀྱང་བསྙེན༔ གཙོ་འཁོར་ཡོངས་རྫོགས་སྔགས་ཀྱིས་བསྐུལ༔ གུར་དྲག་ལ། ཨོཾ་ཨཱཿཧཱུྃ༔ ཨ་རྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃཕཊ༔ཕཊ༔ ཨཱཿཧཱུྃ་ཧཱུྃ་ཕཊ་ཕཊ༔ སྨན་བླ་ལ། ན་མོ་བྷ་ག་ཝ་ཏེ་བྷཻ་ཥ་ཛྱཻ་གུ་རུ་བཻཌཱུརྱ་པྲ་བྷཱ་རཱ་ཛཱ་ཡ༔ ཏ་ཐཱ་ག་ཏ་ཡ༔ ཨརྷ་ཏེ་སམྱཀྶཾབུདྡྷཱ་ཡ༔ ཏདྱ་ཐཱ༔ ཨོཾ་བྷཻ་ཥ་ཛྱཻ་བྷཻ་ཥ་ཛྱཻ་མ་ཧཱ་བྷེ་ཥ་ཛྱཻ་རཱ་ཛ་ས་མུཏྒ་ཏེ་སྭཱཧཱ༔ ནོར་ལྷར། ཨོཾ་ཛམྦྷ་ལ་ཛ་ལེནྡྲཱ་ཡ་དྷ་ན་མེ་དྷི་ཧྲཱི༔ཌཱ་ཀི་ནཱི་ཛ་ལ་སམྦྷ་རཾ་སྭཱཧཱ༔ རྡོ་རྗེ་ཕུར་པར། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཨོཾ་ཨཱཿཧཱུྃ་ཧྲཱི༔ བཛྲ་གུ་རུ་དེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ་ཨཱཿ ཟིལ་གནོན་ལ། ཧཱུྃ་ཨ་ཀཱ་ཡ་ཧ་ཨ་མ་ར༔ ཨ་ཡ་མ་དུ་རུ་ཙ་ཤ་ན༔ ཏྲིག་ནན༔ སྤུར་ཐུམ་ཛ་ཛ༔ བྷ་ལོ་ཤ་པུ་ཝ་མ༔ ཨ་རྣྀ་ཏྲི་སིདྡྷི་ཕ་ལ་ཛ་ཛ་ཛ༔ སེང་སྒྲ་ལ། ཨོཾ་བཛྲ་གུ་རུ་སིཧཾ་གཎྜེ་དྒརྨཱ་ངྷཱ་ཏུ་ཧཱུྃ་ཧཱུྃ་ཧཱུྃ༔ ཨོཾ་བཛྲ་ཙཎྜ་སརྦ་དུཥྛཾ་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཨཿཀཿསཿམཿརཿཙཿཤཿདཿརཿསཿམཿརཿཡཿཕཊ༔ པདྨ་བཛྲ་ལ། ཨོཾ་ཨཱཿཧཱུྃ་གུ་རུ་ཤྲཱི་པདྨ་བཛྲ་ཧཱུྃ༔དྷཱུ་མ་གྷ་ཡེ་ཌཱ་ཀི་ནཱི་ན་མ༔སྭཱཧཱ༔ ཨོཾ་ཨཱཿཧཱུྃ་ཧྲཱི༔མ་ཧ་རི་ནི་ས༔ ར་ཙ་ཧྲི་ཡ་ཛ་ཧཱུྃ༔ རྟ་མགྲིན་ལ། ཨོཾ་ཨཱཿཧཱུྃ་གུ་རུ་ཀྲོ་དྷ་ཧ་ཡ་གྲཱི་ཝ་ཀྲོ་ཏ་ཧ་རི་ནི་ས་ས་མ་ཡ་ཛ༔ ཀཱ་ལེ་ཤྭ་ར་སིདྡྷི་ཕ་ལ་ཧཱུྃ༔ རྡོ་རྗེ་གྲོ་ལོད་ལ། ཨོཾ་ཨཱཿཧཱུྃ་མ་ཧཱ་གུ་རུ་བི་རུ་ཀྲོ་དྷ་ལོ་ཀོཏྟ་ར་སརྦ་སིདྡྷི་ཧཱུྃ་ཧཱུྃ་ཧཱུྃ་ཕཊ༔ ཨོཾ་བཛྲ་གུ་རུ་གྲོ་བོ་ལོཏ་ལོ་ཀ་སརྦ་སིདྡྷི་ཧཱུྃ་ཧཱུྃ་ཧཱུྃ༔ པདྨ་རྒྱལ་པོ་ལ། ། ཨོཾ་ཨཱཿཧཱུྃ་ཧྲཱི༔ ཨོཾ་མ་ཎི་པདྨེ་ཧཱུྃ༔ སྣང་མཐའ་ལ། ཨོཾ་ཨ་མི་ཏ་བྷ་ཧྲཱི༔ ན་མ༔སརྦ་ཏ་ཐཱ་ག་ཏ་ཧྲཱྀ་ད་ཡ། ཨ་ནུ་ག་ཏེ། ཨོཾ་ཀུ་རུཾ་ཀི་ནི་སྭཱཧཱ། ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི། རོ་ཙ་ནི། ཏྲོ་ཊ་ནི། ཏྲོ་ཊ་ནི། ཏྲཱ་ས་ནི། ཏྲཱ་ས་ནི། པྲ་ཏི་ཧ་ན། པྲཏི་ཧ་ན། སརྦ་ཀརྨ་པ་རཾ་པ་རཱ་ཎི་མེ་སརྦ་སཏྭ་ནཱ་ཉྩ་སྭཱཧཱ། ཀུན་བཟང་ལ། ཨོཾ་ཨཱཿཧཱུྃ༔ འ་ཨ་ཤ་ས་མ་ཧ༔ ཞེས་གཙོ་འཁོར་ཡོངས་རྫོགས་ཅི་ནུས་བཟླ། རྡོ་རྗེ་ཚེ་ཡི་ཛཔྲ། ༀ་ཨཱཿཧཱུྃ་བཛྲ་གུ་རུ་པདྨ་པུཎྱེ་ཛྙཱ་ན་ཨཱ་ཡུར་སིདྡྷི་ཧཱུྃ་བྷྲཱུྃ་ནྲྀ་ཛ༔ །ཅི་རིགས་པ་བསྒྲང་བར་བྱའོ། ། ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཐོད་ཕྲེང་རྩལ་བསྙེན་ཐུགས་དམ་བསྐུལ༔ ཨོཾ་ཨཱཿཧཱུྃ༔ རྡོ་རྗེ་གསུམ་ལྡན་རླུང་གནད་བསྣུན༔ མི་འགྱུར་ཧཱུྃ་གིས་ལྟ་གདེངས་བསྐྱེད༔ རྩོལ་སྒྲུབ་མེད་པའི་ངང་ནས་བཟླ༔ རང་བྱུང་རང་ཤར་ལྷ་ཞལ་མཇལ༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ སྣང་སྲིད་རྣམ་དག་ཕྱག་རྒྱའི་མཆོད་པ་འབུལ༔ ཡེ་ཤེས་ལྷུན་རྫོགས་ལྷ་ལ་ཕྱག་འཚལ་བསྟོད༔ སྒྲིབ་ཚོགས་ཡེ་དག་རིག་པའི་ཀློང་དུ་བཤགས༔ དགེ་ཚོགས་འཁོར་འདས་ཡོངས་གྲོལ་ཆེན་པོ་བསྔོ༔ རང་ལ་གནས་པའི་ཡེ་ཤེས་པར༔ ཚོགས་དྲུག་རྒྱན་དུ་ཤར་བས་མཆོད༔ སྤང་བླང་མེད་པའི་དོན་དམ་དབང་༔ སྐུར་ཐོབ་མེད་པར་རང་ལ་རྫོགས༔ གཞན་དོན་ཤུགས་ཀྱི་ཐུགས་རྗེ་ནི༔ དད་པའི་རྐྱེན་ལས་རྩོལ་མེད་འབྱུང་༔ འགྲོ་ཀུན་ཕྱམ་གཅིག་གདོད་མའི་ཀློང་༔ ཡེ་གྲོལ་གཞིར་བཞེངས་མངོན་བྱང་ཆུབ༔ སཱ་མ་ཡ༔ རྒྱ་རྒྱ་རྒྱ༔ གུ་རུ་པདྨའི་བཀའ༔ ཡེ་ཤེས་མཁའ་འགྲོའི་ལུང་༔ གར་དབང་བདེ་ཆེན་རོལ་བ་རྩལ་ལམ་རིག་འཛིན་ཚེ་དབང་ནོར་བུས་དག་པར་ཕབ་པ་དགེའོ༔ མངྒ་ལཾ། བསམ་པ་ལྷུན་གྲུབ་མའི་གསང་བ་ལུས་དཀྱིལ་ཉམས་ལེན།༄༅། །བླ་མ་ལ་ཕྱག་འཚལ་ལོ། །བསམ་པ་ལྷུན་གྲུབ་མའི་གསང་བ་ལུས་དཀྱིལ་ཉམས་སུ་ལེན་པ་ལ། ཐོག་མར་ཚིག་བདུན་གསོལ་འདེབས་ཀྱིས་ཐུགས་དམ་བསྐུལ། སྐྱབས་སེམས་ནི། མཆོག་གསུམ་ཀུན་འདུས་བླ་མར་སྐྱབས་སུ་མཆི༔ འགྲོ་ཀུན་སྲིད་ལས་སྒྲོལ་ཕྱིར་བྱང་སེམས་བསྐྱེད༔ ལན་གསུམ། ཡན་ལག་བདུན་པ་འབུལ་བ་ནི། ཨོཾ་ཨཱཿཧཱུྃ༔ དངོས་འབྱོར་ཡིད་སྤྲུལ་མཆོད་རྫས་དཔག་མེད་འབུལ༔ ཕྱག་འཚལ་ཐོག་མེད་བསགས་པའི་ཉེས་ལྟུང་བཤགས༔ དགེ་ལ་ཡི་རང་མྱ་ངན་མི་འདའ་བར༔ ཆོས་གསུང་བསྐུལ་བའི་དགེ་ཚོགས་འགྲོ་ལ་བསྔོ༔ ལན་གསུམ། གུ་རུ་པདྨ་འབྱུང་གནས་ཀྱི་རྣམ་ཐར་དྲན་བཞིན་བསམ་པ་ལྷུན་རྒྱས་བསྡུས་གང་རུང་ཅི་ནུས་འདོན། དེ་ནས་ལུས་དཀྱིལ་བསྙེན་པའི་བར་བཏོན་ཞིང་མཉམ་བཞག་ལ་གཅིག་ཏུ་བརྩོན། ཐུན་མཐར་གསོལ་བ་འདེབས་པ་ནི། ཧྲཱི༔ དུས་གསུམ་གྱི་སངས་རྒྱས་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོར་གྱུར་ཅིང་མཛད་པའི་ཕྲིན་ལས་ལ་ཐ་དད་མི་མངའ་བར་གྱུར་པ་ཨོ་རྒྱན་གྱི་སློབ་དཔོན་ཆེན་པོ་གུ་རུ་པདྨ་འབྱུང་གནས་ལ་ཕྱག་འཚལ་ཞིང་སྐྱབས་སུ་མཆིའོ། །གསོལ་བ་འདེབས་སོ། །ལུས་ངག་ཡིད་གསུམ་སྨིན་པ་དང་གྲོལ་བར་བྱིན་གྱིས་བརླབ་ཏུ་གསོལ། ལན་གསུམ་བརྗོད་ལ། སྤྲོ་ན་བསམ་པ་ལྷུན་གྲུབ་རྒྱས་བསྡུས་ཀྱིས་སླར་ཡང་གསོལ་བ་ནན་ཏན་དུ་འདེབས། བླ་མ་ལྷ་དང་རང་སེམས་དབྱེར་མེད་པའི་གཤིས་ལུགས་མ་བཅོས་པར་བསྐྱངས། རང་གཞུང་མཆོད་བསྟོད་མཐར་བསྔོ་བ་བྱ། དུས་ཀུན་དུ་རྟོག་ཚོགས་དག་པ་ཡེ་ཤེས་ཀྱི་འཁོར་ལོར་ལ་བཟླ་ཞིང་ཚོགས་དྲུག་རང་གྲོལ་གྱི་སྤྱོད་ལམ་ལ་འཇུག་པར་བྱའོ། །ཅེས་པའང་གསང་བདག་རིག་འཛིན་ཆེན་པོ་ཚེ་དབང་ནོར་བུའི་བཀའ་འབངས་སྟག་བླ་བསྟན་འཛིན་རྡོ་རྗེས་སྦྱར་བས། སྐྱེ་བ་ཚེ་རབས་ཀུན་ཏུ་དཔལ་ལྡན་བླ་མས་དགྱེས་བཞིན་རྗེས་སུ་བཟུང་སྟེ་འཕྲིན་ལས་ཀྱི་ཁ་ལོར་བར་འགྱུར་བའི་རྒྱུར་གྱུར་ཅིག ། གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ཚེ་དབང་རྡོ་རྗེའི་སྲོག་རྫོང་།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ཚེ་དབང་རྡོ་རྗེའི་སྲོག་རྫོང་ཞེས་བྱ་བ་བཞུགས་སོ༔ ན་མོ་གུ་རུ་པདྨ་དྷེ་ཝ་ཌཱཀྐཱི་ནི་ཡེ༔ ཚེ་དབང་རིག་འཛིན་པད་འབྱུང་རྗེ༔ སྙིགས་མའི་འགྲོ་ལ་ཐུགས་བརྩེ་བས༔ སྒྲུབ་ཐབས་བསམ་པ་ལྷུན་གྲུབ་ཀྱི༔ ཚེ་དབང་རྡོ་རྗེའི་སྲོག་རྫོང་བསྟན༔ ཚེ་ཟད་རྩ་བའི་རྒྱུ་གསུམ་ནི༔ ཚེ་རྟེན་ཡལ་དང་དྭངས་མ་ཉམས༔ ལས་ཀྱི་འཕེན་པ་རྫོགས་པ་སྟེ༔ ཐམས་ཅད་དེ་ལ་མ་འདུས་མེད༔ ལྷ་འདྲེས་བླ་ཁྱེར་གདོན་གྱིས་བརྐུས༔ སྡེ་བརྒྱད་གདུགས་པས་འཕྲོག་པ་དང་༔ མཐུ་ལྡན་རྣམས་ཀྱིས་གཏོར་བ་དང་༔ གློ་བུར་འཇིགས་པས་གས་པའོ༔ སྡུག་བསྔལ་དྲག་པོས་ནོན་པ་དང་༔ ཁ་ཟས་སྤྱོད་ལམ་སྨན་ལོག་པ༔ འབྱུང་བ་དགྲ་གཤེད་ཉོན་མོངས་འཁྲུགས༔ རིམས་དང་གདོན་གྱིས་ཟིན་པ་དང་༔ མི་རབས་བརྒྱུད་པའི་ཚེ་སྲི་དང་༔ སྲོག་གཅོད་ལས་དང་བསོད་ནམས་ཟད༔ དམ་པའི་ཡུལ་ལ་སྨོད་པ་དང་༔ སྡིག་ཆེན་བསག་པའི་འབྲས་བུ་སྨིན༔ བར་ཆད་སེལ་བའི་ཟླ་མེད་ཐབས༔ ཚོགས་ཆེན་གསོག་དང་བཅུད་ལེན་བརྟེན༔ གཟུངས་སྔགས་བཟླ་དང་རྩ་རླུང་སྦྱང་༔ བྱིན་གྱིས་བརླབས་དང་ཏིང་འཛིན་སྒོམ༔ ས་མཱ་ཡ༔ རྡོ་རྗེའི་ཚེ་དབང་སྐུར་བ་ལ༔ རྫས་བསག་དཀྱིལ་འཁོར་བཞེངས་པ་དང་༔ དབང་སྐུར་མན་ངག་སྒོམ་པ་དང་༔ ཐུན་མཚམས་རྣལ་འབྱོར་བྱ་བའོ༔ དང་པོ་དམ་རྫས་བསོག་པ་ལ༔ འཆི་མེད་ཚེ་རིལ་ཚེ་ཆང་དང་༔ ཚེ་བུམ་ཚེ་རྟེན་ཚེ་སྲུང་ངོ༔ དཀྱིལ་འཁོར་ལ་ནི་ཐིག་རྡུལ་ཚོན༔ བུམ་པ་གཏོར་མ་སྒྲུབ་རྫས་བཤམས༔ ཚེ་དབང་བསྐུར་བའི་སྔོན་འགྲོ་དང་༔ དངོས་གཞི་རྗེས་རིམ་བཀྲ་ཤིས་སོ༔ མན་ངག་བསྐྱེད་རིམ་སྔགས་རིམ་དང་༔ རྫོགས་རིམ་ཚེ་ཡི་ལས་སྦྱོར་རོ༔ ཐུན་མཚམས་གླུད་སོགས་མཆོད་སྦྱིན་དང་༔ རྟེན་བཞེངས་ལམ་བཅོས་ཟམ་པ་འཛུག༔ སཱཙྪཱ་དར་ཅོག་ཕྱར་བའོ༔ འཆི་མེད་ཚེ་ཡི་རིལ་བུ་ནི༔ ཕོ་མོའི་ཐོད་པ་མཚན་ལྡན་འམ༔ ཡང་ན་རིན་ཆེན་བུམ་པ་རུ༔ ཨ་བར་སྐྱུར་གསུམ་དབང་པོ་ལག༔ རྒུན་བྲུམ་ར་མཉེ་ར་མོ་ཤག༔ དཀར་པོ་ཆིག་ཐུབ་སྒ་སེར་དང་༔ ཤུ་དག་ཅོང་ཞི་བྲག་ཞུན་དང་༔ མར་གསར་གླ་རྩི་ག་བུར་བཅས༔ སྦྲང་རྩིས་དྲིལ་ལ་རིལ་བུ་བྱ༔ སྦྱོར་ཚད་དང་པོ་བཞི་བོ་མཉམ༔ གཉིས་པ་བཞི་མཉམ་དང་པོའི་ཕྱེད༔ ཕྱི་མ་བཞི་མཉམ་གཉིས་པའི་ཕྱེད༔ ལྷག་མ་གསུམ་ནི་མཚོན་ཙམ་སྟེ༔ བོང་བསྐྱེད་དུག་མེད་ཟས་སྣ་སྦྱར༔ སྤྲོས་མེད་རྣམས་ལ་དང་པོ་བཞི༔ ཟས་ལ་སྦྱར་བས་འདོད་དོན་འགྲུབ༔ ཨ་རུ་ར་ནས་སྦྲང་རྩིའི་བར༔ སྨན་སྣ་བཅུ་དྲུག་རྡོ་རྗེའི་རྫས༔ དགའ་བ་བཅུ་དྲུག་ལང་ཚོ་རྒྱས༔ ཚེ་འཕེལ་བཅུད་ལེན་རྒས་པ་བྲལ༔ རྡོ་རྗེའི་ཚེ་ལ་དབང་ཐོབ་འགྱུར༔ རྟེན་འབྲེལ་རྫས་ནི་དཀར་གསུམ་དང་༔ འབྲུ་ཡི་བྱེ་མར་མངར་གསུམ་སྦྱར༔ ཡང་ན་མར་གྱི་རིལ་བུ་དྲིལ༔ ཚེ་གཡང་འཕེལ་བའི་རྫས་མཆོག་གོ༔ ས་མཱ་ཡ༔ ཚེ་ཆང་བདུད་རྩི་ལྔ་ཡི་སྐྱོབ༔ ཡང་ན་འབྲུ་སྣ་བསྙལ་བའི་ཆང་༔ དཀར་ཆོལ་མངར་དང་སྐྱུར་བ་༔ མར་དཀར་རིལ་བུ་ཉི་ཟླས་བརྒྱན༔ བདེ་སྐྱོང་སྣོད་དམ་རིན་ཆེན་སྣོད༔ གཙང་ཞིང་བཀྲ་ཤིས་ཡོལ་གོར་བཅུག༔ སྟོང་ཕྱོགས་རྟེན་འབྲེལ་བཅུད་ཆེན་པོ༔ མྱོང་བས་ཚེ་ཡིས་དཔལ་སྟེར་འགྱུར༔ ས་མཱ་ཡ༔ ཚེ་བུམ་གསེར་དངུལ་རིན་པོ་ཆེ༔ ངོས་ལ་བཀྲ་ཤིས་རེ་ཁས་མཚན༔ ཚེ་ཡི་གཟུངས་ཐག་དྲ་བ་འབྲེལ༔ ཁ་རྒྱན་སྨན་གྱི་ལྗོན་པས་མཛེས༔ སྟེང་དུ་རིགས་གྱི་བདག་པོའི་གཟུགས༔ སྲོག་ཡིག་ཕྱག་མཚན་རྡོ་རྗེའི་རྒྱ༔ ནང་དུ་འཆི་མེད་བཅུད་ཀྱིས་གཏམ༔ ཁམས་གསུམ་ཀུན་གྱི་བཅུད་སྡུད་པའི༔ ཚེ་ཡི་བུམ་པ་འཆང་ཙམ་གྱིས༔ ཚེ་དཔལ་ཤུགས་ཀྱིས་འགུགས་པ་ཡི༔ ཚེ་དཔག་མེད་མགོན་ཕྱག་རྒྱའོ༔ ས་མཱ་ཡ༔ ཚེ་ཡི་རྟེན་ནི་མདའ་དར་སྟེ༔ རིན་པོ་ཆེའམ་རྦ་སྨྱུག་ནི༔ མཚན་བཀྲ་ལེགས་པའི་ལག་ནས་འོངས༔ ཚིགས་གསུམ་སྲིད་གསུམ་སྲོག་གི་རྟེན༔ སྟོང་ནི་དམར་པོ་ཟངས་ལ་བྱ༔ སྒྲོ་ནི་ཕོ་རོག་གཤོག་པར་བྱ༔ རྩ་བ་ནག་པོ་ལྕགས་ལས་གྲུབ༔ འགྱུར་མེད་རྡོ་རྗེའི་རྒྱ་མདུད་ལྡན༔ རྣོ་བའི་ངར་ལྡན་མདེའུ་བྱ༔ སྐུ་རྟེན་རྒྱ་མདུད་གསུང་གཡེར་ཁ༔ ཐུགས་རྟེན་མེ་ལོང་གཙང་མ་དང་༔ ཡོན་ཏན་གསེར་གྱི་ཨ་ལོང་བྱ༔ འཕྲིན་ལས་རྣོ་བ་ལྕགས་ཀྱུ་དང་༔ འབྱུང་ལྔ་འགུགས་བྱེད་དར་ལྔ་དཔྱངས༔ ལྷ་ཡི་རྟེན་ནི་དམུ་ཐག་དཀར༔ དཔའ་བོའི་རྟེན་ནི་གཟི་ཡིན་ལ༔ དཔའ་མོའི་རྟེན་ནི་གྲོན་བུ་དང་༔ སྲུང་མའི་རྟེན་ལ་རུ་མཚོན་བཙུགས༔ བྱིས་པའི་ཚེ་རྟེན་མུ་མེན་ལ༔ དར་མའི་ཚེ་རྟེན་དུང་གི་ཤྭ༔ ཕོ་རྟེན་དུང་ལ་མོ་རྟེན་གཡུ༔ རྒན་པོའི་ཚེ་རྟེན་ས་ལེ་སྦྲམ༔ བླ་མའི་ཚེ་རྟེན་སྤོས་ཤེལ་ལོ༔ སྲིད་པའི་བྱང་བུ་མིག་དགུ་བཙུག༔ རབ་གནས་ལྡན་པ་གང་དུ་གནས༔ དེ་ལ་སྲིད་པའི་བླ་ཆགས་ཤིང་༔ དཔའ་བོ་མཁའ་འགྲོ་ཤུགས་ཀྱིས་འདུ༔ ཚེ་དཔལ་བརྟན་ཅིང་འཕེལ་བར་འགྱུར༔ ས་མཱ་ཡ༔ བཀྲ་ཤིས་ཚེ་ཡི་སྲུང་འཁོར་ནི༔ ཕྱི་ནས་མེ་རི་རྡོར་ཕྲེང་དང་༔ མུ་འཁྱུད་པྲེང་བ་རིམ་པ་གསུམ༔ རྡོ་རྗེ་རྒྱ་གྲམ་ལྟེ་བ་རུ༔ མུ་འཁྱུད་གསུམ་དབུས་དགའ་འཁྱིལ་བཀོད༔ སྔགས་ཀྱི་བཀོད་ཚུལ་འདི་ལྟ་སྟེ༔ དགའ་འཁྱིལ་ལ་ནི་ཡི་གེ་གསུམ༔ མུ་འཁྱུད་དང་པོར་ཚེ་དཔག་མེད༔ གཉིས་པ་ཐུགས་རྗེ་ཆེན་པོ་དང་༔ གསུམ་པར་པདྨ་འབྱུང་སྙིང་པོ༔ རྒྱ་གྲམ་རྩིབས་མཆན་བཞི་པོ་ལ༔ བསམ་པ་ལྷུན་གྲུབ་གསོལ་འདེབས་ཚིགས༔ མདུན་ནས་གཡས་སྐོར་ཆ་བཞིར་བགོས༔ དེ་ཕྱིར་མི་འཁྱུད་ཚེ་གཟུངས་དང་༔ དེ་ཕྱིར་ཡི་དམ་བཅུ་གསུམ་སྔགས༔ དེ་ཕྱིར་རྡོ་རྗེའི་གོ་ཁྲབ་སྟེ༔ མུ་འཁྱུད་རིམ་གསུམ་ཁེང་བར་འབྲི༔ སྲུང་རྫས་བཟང་དྲུག་འབྲས་བུ་གསུམ༔ བཙན་དུག་མུ་ཟི་གླ་བའི་རྩི༔ གནས་ཆེན་ས་དང་ཆུ་ཡིས་བྱུགས༔ དཔའ་བོ་དཔའ་མོའི་དབུ་སྐྲ་དང་༔ དམ་རྫས་བདུད་རྩི་ཆོས་སྨན་བཅུག༔ ཚོན་སྐུད་ལྔས་བསྡམ་གོས་དམར་གསོལ༔ རབ་གནས་ལྡན་པའི་སྲུང་འཁོར་དེ༔ གང་དུ་བཞུགས་པའི་ས་ཕྱོགས་སུ༔ ལྷ་ཀླུས་བཀུར་ཞིང་མཆོད་རྟེན་འགྱུར༔ སུ་ཡིས་བཅངས་ལ་རྩ་གསུམ་གྱིས༔ སྲུང་ཞིང་ཚེ་ཡི་བར་ཆད་སེལ༔ ཡང་ན་སྐུད་པ་དམར་པོ་ལ༔ ཚེ་ལྷས་སྔགས་བཏབ་མདུད་པ་བོར༔ དེས་ཀྱང་དུས་མིན་འཆི་ལས་སྐྱོབས༔ ས་མཱ་ཡ༔ ཚེ་ཡི་དཀྱིལ་འཁོར་བཀོད་པ་ནི༔ ཡི་དམ་བཅུ་གསུམ་སྤྱི་ལྟར་ལ༔ ཁྱད་པར་ཚེ་ཡི་ལས་སྦྱོར་སྐབས༔ ཚེ་བཅུད་འདུས་པའི་དགའ་བ་འཁྱིལ༔ འགྱུར་མེད་དོ་རྗེའི་རྒྱ་གྲམ་མཐིང་༔ གཞལ་ཡས་ཁང་བཟང་སྒོ་རྫོགས་པ༔ རྡོ་རྗེ་ལ་སོགས་སྲུང་འཁོར་དྲུག༔ སོ་སོར་རྟོག་པའི་ཡེ་ཤེས་འཕྲུལ༔ རྡུལ་ཚོན་དམར་ཤས་ཆེ་བ་བྱ༔ གཏོར་མ་འབྲང་རྒྱས་ཞལ་དཀར་དབུས༔ ཚེ་རིལ་གཡས་ལ་ཚེ་ཆང་གཡོན༔ ཚེ་མདའ་མི་འགྱུར་བྱང་ཏུ་གདབས༔ སྐུ་ཚབས་ཕྲེང་བ་མེ་ལོང་དང་༔ ཚེ་ཡི་བུམ་པ་མདུན་དུ་བཀོད༔ ལས་བུམ་རྟ་མགྲིན་སྐུ་བརྙན་བཞུགས༔ རྟེན་འབྲེལ་ཟབ་མོའི་ནུས་པ་ཡིས༔ ཚེ་ཡི་དཀྱིལ་འཁོར་བཀོད་ཙམ་གྱིས༔ ཚེ་ལྷས་བྱིན་འཕེབས་བར་ཆད་སེལ༔ ས་མཱ་ཡ༔ དངོས་གཞི་ཚེ་དབང་སྐུར་བ་ལ༔ བུམ་པ་སྒྲུབ་ཅིང་སྐུ་ཁྲུས་གསོལ༔ ཚེ་གླུད་བཏང་ཞིང་སྲུང་འཁོར་སྒོམ༔ གསོལ་འདེབས་བྱིན་དབབ་ཚེ་དབང་བསྐུར༔ ཚེ་བཅུད་བསྡུས་ཤིང་ཚེ་སྦས་ཤིང་༔ དམ་ཚིག་ཁས་ལེན་བཀྲ་ཤིས་བརྗོད༔ དང་པོ་བུམ་པ་སྒྲུབ་པ་ནི༔ ཧྲཱི༔ བདག་བདུན་དབྱེར་མེད་གཟུངས་སྔགས་འོད་ཟེར་ཀྱིས༔ ཚེ་འཛིན་བུམ་ལྷའི་ཐུགས་དམ་རྒྱུད་བསྐུལ་ཏེ༔ སྐུ་ལས་འོད་དང་གསུང་གི་སྔགས་ཀྱི་སྒྲ༔ ཐུགས་དམ་འགྱུར་མེད་བདེན་པས་ཚེ་བཅུད་བསྡུས༔ ལྷ་ཚོགས་བདེ་ཆེན་དགའ་བའི་མྱོས་པ་ལས༔ བདུད་རྩིས་རྒྱུན་བབ་བུམ་པ་ཡོངས་སུ་ཁེངས༔ ཟེར་རླངས་འོད་ཟེར་སྒྲུབ་རྫས་རྣམས་ལ་ཐིམ༔ འཆི་མེད་ཚེ་ལྷའི་བྱིན་རླབས་རྫས་མཆོག་གྱུར༔ རྩ་སྔགས་ལྷ་ཚོགས་སྔགས་རྣམས་དང་༔ ཚེ་ཡི་ཛྲབ་དབྱངས་འདི་བཞིན་སྒྲོགས༔ ༀ་ཨཱཿཧཱུྃ་བཛྲ་གུ་རུ་པདྨ་པུཎྱེ་ཛྙཱ་ན་ཨཱ་ཡུར་སིདྡྷི་ཧཱུྃ་བྷྲཱུྃ་ནྲྀ་ཛ༔ ཚེ་གཟུངས་བཏོན་ཅིང་ཚེ་འགུགས་བྱ༔ ས་མཱ་ཡ༔ ཚེ་ཆུས་ཁྲུས་གསོལ་བྱ་བ་ནི༔ ཧྲཱི༔ འཆི་མེད་དཔལ་སྟེར་མགོན་པོ་ཚེ་དཔག་མེད༔ ཚེ་ཡི་རིག་འཛིན་གྲུབ་པ་པདྨ་འབྱུང་༔ ཚེ་ལྷ་རབ་འབྱམས་གསང་གསུམ་བདུད་རྩི་ཡིས༔ ཚེ་གེགས་ནད་གདོན་སྡིག་སྒྲིབ་ཞི་གྱུར་ཅིག༔ དམ་ཉམ་རོ་ཡུག་དམེ་གྲིབ་ཞི་གྱུར་ཅིག༔ བདུད་བཙན་རྒྱལ་པོའི་གནོད་པ་ཞི་གྱུར་ཅིག༔ དམུ་དང་ཐེའུ་རང་གནོད་པ་ཞི་གྱུར་ཅིག༔ ལྷ་ཀླུ་སྡེ་བརྒྱད་འཁོན་གྲིབ་ཞི་གྱུར་ཅིག༔ སྔོན་ལས་འཕྲལ་རྐྱེན་ངན་པ་ལས་བྱུང་བའི༔ འཇིགས་པ་བརྒྱད་དང་བཅུ་དྲུག་ཚེ་ཡི་གེག༔ ཚེ་ལྷ་རྩ་གསུམ་བདེན་པས་ཞི་བ་དང་༔ འཆི་མེད་རྟག་བརྟན་ཚེ་ལ་དབང་གྱུར་ཅིག༔ ཁྲུས་ཆུ་ལན་གསུམ་བཏུང་ཞིང་བཤལ༔ འཐུང་ཚེ་བྱིན་རླབས་ཞུགས་པ་དང་༔ ཁ་བཤལ་ཚེ་ན་ཐོག་མེད་ནས༔ སྒོ་གསུམ་སྲོག་གཅོད་ལས་ངན་སྦྱང་༔ ཚེ་གཟུངས་བཏོན་ཅིང་ཚེ་ཁྲུས་ཀྱིས༔ ཚེ་ཡི་གནོད་པ་མ་ལུས་པ༔ མཁའ་ལ་སྤྲིན་དེངས་ལྟར་འགྱུར་བའི༔ ཟབ་པའི་གདམས་པ་ཨེ་མ་ཧོ༔ ས་མཱ་ཡ༔ འཆི་སླུ་ཚེ་གླུད་གཏོང་བ་ནི༔ དགོད་དང་ན་དང་འཇིགས་པའི་ཚུལ༔ སྐྱེ་མཆེད་ཚང་བའི་གླུད་གཟུགས་གསུམ༔ རང་གི་གོས་རྙིང་སྐྲ་སེན་བཅུག༔ ནམ་མཁའ་ལན་ཆགས་སྒྲོན་མེ་དང་༔ འདོད་པའི་གཟུགས་རིས་སྣ་ཚོགས་བྱ༔ ཤ་དུམ་ཟས་སྣ་གོས་སྣ་སོགས༔ ནམ་མཁའ་མཛོད་ཀྱི་སྔགས་ཀྱིས་རླབས༔ འབྲུ་གསུམ་བརྒྱ་རྩས་སྦྱང་སྤེལ་བསྒྱུར༔ བདེ་གཤེགས་རིན་ཆེན་མང་གཟུགས་མཛེས༔ འཇམ་ཀླས་འཇིགས་ཀུན་བྲལ་བ་བཞིས༔ བདེན་པ་བརྗོད་ཅིང་འདི་ལྟར་བསྔོ༔ ཀྱེ༔ དུས་གསུམ་སངས་རྒྱས་ཐམས་ཅད་དང་༔ ཕྱོགས་བཅུའི་རྒྱལ་བ་སྲས་དང་བཅས༔ བླ་མ་ཡི་དང་མཁའ་འགྲོ་དང་༔ བསྟན་སྲུང་བདེན་ཚིག་འགྲུབ་རྣམས་ཀྱིས༔ བགེགས་རིགས་མགྲོན་རྣམས་ཐུགས་རྗེས་ཟུངས༔ ཚེ་སྲོག་ནོར་ཀྱི་ལན་ཆགས་པའི༔ སྣང་ཞིང་སྲིད་པའི་ལྷ་འདྲེའི་ཚོགས༔ འབྱུང་བ་ལྔ་ལ་དབང་བྱེད་ཅིང་༔ ཚོགས་བརྒྱད་རང་གཟུགས་སྡེ་བརྒྱད་རྣམས༔ ཉོན་ཅིག་རྒྱལ་བའི་བཀའ་ལ་ཉོན༔ དེ་རིང་ཡོན་གྱི་བདག་པོ་ཡི༔ ཚེ་སྲོག་སླུ་བའི་གླུད་འདི་གཏོང་༔ མི་ལས་ལྷག་པའི་གླུད་གཟུགས་འདིས༔ ལན་ཆགས་བདག་པོ་ཚིམ་པར་མཛོད༔ བཟུང་བ་ཐོང་ལ་བཅིང་བ་ཁྲོལ༔ བསྡམ་ལ་ཀློད་ལ་མནན་པ་འཁྱོག༔ ལན་ཆགས་བུ་ལོན་འཁོར་གྱུར་ཅིག༔ སྐྱེ་བ་མི་ལ་འབྱུང་བ་གླུད༔ ཁྱེར་ཅིག་ཁྱེར་ཅིག་གླུད་བདག་རྣམས༔ ལོ་བདག་སྲོག་བདག་ཞེན་པ་རྣམས༔ དྲན་དང་གཟུང་དང་བསམ་དང་རེག༔ གློད་དང་ཞི་དང་གྲོལ་བར་མཛོད༔ ཨ་ཨ་ཨ༔ དེ་ལྟར་ལན་གཅིག་བྱ་ནུས་ན༔ འཆི་བ་སླུ་ལ་ཚེ་གེགས་སེལ༔ མཐའ་མ་དྲག་པོའི་ཐུན་གྱིས་གདབ༔ གསོན་བདུད་བར་ལག་འགྱེལ་བར་བྱ༔ དེ་ནས་སྲུང་འཁོར་འདི་ལྟར་སྒོམ༔ ཨ༔ ལྷ་འདྲེར་འཛིན་པ་རང་སར་དེང་༔ རྟོག་མེད་ངང་ལས་ཡེ་ཤེས་རྩལ༔ འབྱུང་ལྔ་རྡོ་རྗེ་ཡེ་ཤེས་གུར༔ ཕྱོགས་མཚམས་མེད་པར་ཀུན་ཏུ་གཏམ༔ བཛྲ་ཙཀྲ་རཀྵ་བྷྲཱུྃ༔ སྣང་སྲིད་ལྷ་དང་གཞལ་ཡས་ཁང་༔ རང་ཉིད་དྲག་པོའི་ང་རྒྱལ་བསྐྱེད༔ སྲུང་བྱ་གནམ་ལྕགས་རྡོ་རྗེ་སྒོམ༔ ཐམས་ཅད་ཆོས་སྐུའི་ཀློང་དུ་སྦ༔ ས་མཱ་ཡ༔ ཚེ་དབང་སྐུར་བར་གསོལ་འདེབས་ནི༔ ཨེ་མ་ཧོ༔ སྐྱབས་གནས་རྒྱ་མཚོའི་སྤྱི་དཔལ་བླ་མ་རྗེ༔ ཚེ་དཔག་མེད་མགོན་ཨོ་རྒྱན་པདྨ་འབྱུང་༔ དུས་མིན་འཆི་བྲལ་རྡོ་རྗེའི་སྐུ་སྒྲུབ་ཕྱིར༔ འཆི་མེད་རྡོ་རྗེ་ཚེ་ཡི་དབང་སྐུར་སྩོལ༔ ནན་གྱིས་གསོལ་བ་བཏབ་པའི་པའི་ཚེ༔ བླ་མས་གནང་བ་སྦྱིན་པ་ནི༔ ཧོ༔ མཁའ་ཁྱབ་འགྲོ་ཀུན་སྲིད་ལས་སྒྲོལ་བའི་ཕྱིར༔ མྱང་འདས་རྡོ་རྗེའི་སྐུ་མཆོག་སྒྲུབ་པ་ལེགས༔ དུས་མིན་འཆི་བའི་བདུད་ལས་རྒྱལ་བའི་ཐབས༔ རྡོ་རྗེ་ཚེ་ཡི་དབང་མཆོག་ཁྱོད་ལ་སྦྱིན༔ སློབ་མ་དགའ་བ་ཆེན་པོ་ཡིས༔ དཀྱིལ་འཁོར་ལྷ་ཚོགས་སྤྱན་སྔ་རུ༔ སྒོ་གསུམ་གུས་པ་ཆེན་པོ་ཡིས༔ ཡན་ལག་བདུན་ཀྱི་ཚོགས་གསོག་བྱ༔ ས་མཱ་ཡ༔ ཡེ་ཤེས་ཚེ་ལྷའི་བྱིན་དབབ་ནི༔ ཨ༔ སློབ་མའི་ཕུང་ཁམས་སྐྱེ་མཆེད་ཀུན༔ ཡེ་སྟོང་སྤྲོས་པ་བྲལ་བའི་ངང་༔ སྙིང་པོ་ཧྲཱི༔ཡིག་དམར་པོ་ལས༔ འོད་འཕྲོས་བྱིན་བསྡུས་འོད་ཕུང་གྱུར༔ སྐད་ཅིག་མཁའ་ལ་འཇའ་ཤར་བཞིན༔ སློབ་མ་པདྨ་བདེ་བ་ཆེ༔ ཞལ་གཅིག་ཕྱག་གཉིས་མཉམ་བཞག་ཅན༔ མཚན་དཔེའི་དཔལ་འབར་གཞོན་ནུའི་ཚུལ༔ ཚེ་ཡུམ་ལྷ་ལྕམ་དཀར་མོས་འཁྲིལ༔ ཡབ་ཀྱིས་བྷནྡྷ་ཚེ་བུམ་དང་༔ ཡུམ་ཀྱིས་མདའ་དར་ཚེ་བུམ་བསྣམས༔ ཡབ་ཡུམ་གཉིས་མེད་ལོངས་སྐུའི་ཆས༔ གནས་གསུམ་ཡི་གེ་གསུམ་གྱིས་མཚན༔ འོད་ཟེར་ལྕགས་ཀྱུ་ལྟ་བུ་ཡིས༔ རང་བཞིན་དག་པའི་ཞིང་མཆོག་ནས༔ ཡེ་ཤེས་ལྷ་ཚོགས་སྤྱན་དྲངས་གྱུར༔ ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་ཏུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབས་ཕྱིར་གཤེགས་སུ་གསོལ༔ མ་གཡེལ་མ་གཡེལ་ཐུགས་རྗེ་ཅན༔ བསྐུལ་ལོ་བསྐུལ་ལོ་གནས་འདིར་བྱོན༔ མཛོད་ཅིག་མཛོད་ཅིག་བར་ཆད་སོལ༔ སྩོལ་ཅིག་སྩོལ་ཅིག་བྱིན་ཆེན་ཕོབས༔ འཆི་མེད་ཚེ་ཡི་ལྷ་ཚོགས་ཀྱིས༔ ལུས་ལ་རྡོ་རྗེའི་ཚེ་དབང་སྐུར༔ ངག་ལ་གཞོམ་མེད་སྔགས་རྒྱས་ཐོབ༔ ཡིད་ལ་བདེ་སྟོང་ཡེ་ཤེས་བསྐྱེད༔ དུས་མིན་འཆི་བའི་བར་ཆད་ཟློག༔ འབྱུང་ཁམས་དབང་དུ་བསྒྱུར་བ་དང་༔ འཕོ་མེད་འོད་གསལ་མངོན་ཏུ་གྱུར༔ ཚེ་དང་སྨོན་ལམ་དབང་བཅུ་ཐོབ༔ རྟག་བརྟན་རྡོ་རྗེའི་སྐུ་ཐོབ་ཤོག༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ དེ་ལྟར་གདུང་བའི་དབྱངས་ཀྱིས་བསྐུལ༔ སྐུ་དང་ཡིག་འབྲུ་ཕྱག་མཚན་དང་༔ ཐིག་ལེ་བདུད་རྩི་ཆར་བཞིན་བབས༔ གསང་གསུམ་ཕྱག་རྒྱ་སློབ་མར་བསྟིམ༔ མེ་ཏོག་ཕུལ་ཞིང་མིག་རས་བསལ༔ རང་བྱུང་ཡེ་ཤེས་ལྷ་ཞལ་བསྟན༔ ས་མཱ་ཡ༔ དངོས་གཞི་ཚེ་དབང་བསྐུལ་བ་ལ༔ མཎྜལ་ཕུལ་ཞིང་གསོལ་བ་བཏབ༔ ཀྱེ༔ འཆི་མེད་སྐུ་རྙེས་ཚེ་ཡི་ལྷ༔ མི་ཤིག་གཞོམ་བྲལ་ཚེ་ཡི་དཔལ༔ འཆི་མེད་ཡེ་ཤེས་ཚེ་ཡི་དབང་༔ ཚེ་ལྡན་བདག་ལ་སྩལ་དུ་གསོལ༔ གསོལ་བ་བཏབ་པའི་བྱིན་རླབས་ཀྱིས༔ བླ་མ་ཚེ་དཔག་མེད་པ་ཡི༔ སྨིན་མཚམས་མཛོད་སྤུའི་དཀྱིལ་འཁོར་ནས༔ དབང་ལྷ་སྤྱན་དྲངས་དབང་བསྐུར་གྱུར༔ སྨིན་བྱེད་བུམ་པའི་དབང་སྐུར་ནི༔ ༀ༔ དབྱིངས་ཀྱི་བུམ་པ་ཟླུམ་པོ་རུ༔ འོད་གསལ་ཚེ་ཡི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ བུམ་དབང་ཡོངས་རྫོགས་ཐོབ་པར་ཤོག༔ ཕྲེང་བ་གཏད་ལ་འདི་ལྟར་དམིགས༔ ཨཱཿ གྲགས་སྟོང་སྔགས་ཀྱི་ཕྲེང་བ་ལ༔ བརྗོད་མེད་ཚེ་ཡི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ གསང་དབང་ཡོངས་རྫོགས་ཐོབ་པར་ཤོག༔ མེ་ལོང་ཐོག་ལ་འདི་ལྟར་དམིགས༔ ཧཱུྃ༔ སྐྱེ་མེད་ཡེ་ཤེས་མེ་ལོང་ལ༔ སྤྲོས་མེད་ཚེ་ཡི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ ཤེར་དབང་ཡོངས་རྫོགས་ཐོབ་པར་ཤོག༔ མཉམ་པར་བཞག་ཅིང་འདི་ལྟར་བརྗོད༔ ཧོ༔ མཚོན་དུ་མེད་པའི་ཆོས་དབྱིངས་ལ༔ བསལ་བཞག་བྲལ་བའི་ངང་ནས་ལྟོས༔ ཆོས་སྐུ་ཐིག་ལེ་ཉག་གཅིག་ནི༔ བསམ་དུ་མེད་དོ་ཨ་ལ་ལ༔ དེ་ཡིས་བརྡ་ཡི་དབང་བཞི་ཐོབ༔ ས་མཱ་ཡ༔ བཀྲ་ཤིས་ཚེ་ཡི་དབང་མཆོག་ལ༔ ཚེ་བཅུད་དངོས་གྲུབ་འགུགས་པ་ནི༔ ཧཱུྃ་ཧྲཱི༔ སྤྲོས་པའི་སྒྲིབ་བྲལ་ཆོས་ཉིད་རྡོ་རྗེའི་ཐུགས༔ བདེ་ཆེན་འགྱུར་བ་མེད་པ་རྡོ་རྗེའི་གསུང་༔ འོད་གསལ་མཚན་དཔེར་ཤར་བ་རྡོ་རྗེའི་སྐུ༔ རྡོ་རྗེ་གསུམ་གྱིས་ཚེ་དཔལ་བྱིན་ཆེན་ཕོབས༔ རྩ་བརྒྱུད་བླ་མ་ཡི་དམ་མཁའ་འགྲོ་དང་༔ བསྟན་སྲུང་ནོར་ལྷ་རྒྱ་མཚོའི་ངོ་བོ་ཉིད༔ ཚེ་དབང་རིག་འཛིན་པདྨ་འབྱུང་གནས་ཀྱིས༔ གསང་གསུམ་ཚེ་དང་ཡེ་ཤེས་བྱིན་ཕོབས་ཅིག༔ རྒྱལ་བ་སྲས་བཅས་དྲང་སྲོང་བྱིན་རླབས་ཁུག༔ ཚངས་དང་བརྒྱ་བྱིན་ཕྱོགས་སྐྱོངས་གཟི་དཔལ་ཁུག༔ འབྱུང་བའི་བཅུད་དང་རིན་ཆེན་ནུས་པ་ཁུག༔ རྡོ་རྗེའི་ཚེ་དབང་བྱིན་རླབས་དངོས་གྲུབ་སྩོལ༔ ཚེ་དཀྱིལ་གནས་ཁང་འདི་ལ་བྱིན་ཆེན་ཕོབས༔ ཚེ་རྫས་དམ་རྫས་འདི་ལ་བཅུད་གཅིག་སྐྱེད༔ ཚེ་རྟེན་མདའ་དར་འདི་ལ་ཚད་གཅིག་སྟོན༔ ཚེ་ལྡན་བདག་ལ་ཚེ་དབང་བྱིན་ཆེན་ཕོབས༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ དཀྱིལ་འཁོར་ལྷ་ཚོགས་བསྐུལ་བ་ནི༔ ཧཱུྃ་ཧྲཱི༔ ཚེ་དགྲའི་གཡུལ་བཟློག་དམར་ནག་མེ་ཕྲེང་རྩལ༔ ཨོ་རྒྱན་ལྷ་སྲིན་སྡེ་བརྒྱད་ལྷ་ཚོགས་ཀྱིས༔ ཕྱོགས་སྐྱོང་སྡེ་བརྒྱད་ལག་ནས་ཚེ་གཡང་ཁུག༔ ཞེ་སྡང་འཁྲུགས་པའི་རྐྱེན་ལས་གྱུར་བ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ དུག་གསུམ་ཚེ་ནད་ཀུན་སེལ་མཛད་སྨན་གྱི་ལྷ༔ ཨོ་རྒྱན་སྨན་གྱི་བླ་མའི་ལྷ་ཚོགས་གྱིས༔ དྲང་སྲོང་རིག་འཛིན་ལག་ནས་ཚེ་གཡང་ཁུག༔ སྔོན་ལས་འཕྲལ་རྐྱེན་ངན་པ་ལས་བྱུང་བའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བསོད་རྒྱས་མཛད་ཆུ་དབང་དྲྭ་བ་སྡོམ༔ ཨོ་རྒྱན་མཁའ་འགྲོ་ནོར་ལྷའི་ལྷ་ཚོགས་ཀྱིས༔ གནོད་སྦྱིན་ནོར་བདག་ལག་ནས་ཚེ་གཡང་ཁུག༔ སེར་སྣ་འགྱུར་གེགས་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་སྲི་འདུལ་མཛད་དཔལ་ཆེན་སྒྲུབ་སྡེ་བརྒྱད༔ ཨོ་རྒྱན་ཡི་དམ་ལྷ་ཚོགས་འཁོར་བཅས་ཀྱིས༔ ཚོགས་བརྒྱད་གཟུང་འཛིན་གཞན་དབང་ལས་གྱུར་པའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བདུད་འཇོམས་མཛད་ཟིལ་གནོན་དྲག་པོ་རྩལ༔ ཨོ་རྒྱན་གཞི་བདག་གཉན་པོའི་ལྷ་ཚོགས་ཀྱིས༔ སྣང་སྲིད་ལྷ་འདྲེའི་ལག་ནས་ཚེ་གཡང་ཁུག༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་གདོན་དཔུང་འཇོམས་གསང་བདག་སེངྒེའི་སྒྲ༔ ཨོ་རྒྱན་དཔའ་བོའི་གིང་དང་སྲུང་མའི་ཚོགས༔ འདོད་ཁམས་འཁོར་བའི་གནས་ནས་ཚེ་གཡང་ཁུག༔ རྣམ་གཡེངས་འཕོ་བཅས་རྟོག་པའི་དབང་གྱུར་པའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བཅུད་སྤེལ་མཛད་པདྨ་བཛྲ་རྩལ༔ ཨོ་རྒྱན་འབྱུང་བ་བཞི་བདག་ལྷ་ཚོགས་ཀྱིས༔ སྣོད་བཅུད་འབྱུང་བའི་ཁམས་ཀྱི་ཚེ་ཁུག་ཅིག༔ བྱིང་རྨུག་འཕྲོ་རྒོད་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་རྐུན་སྟོབས་འཕྲོག་ཁྲོ་མཆོག་རྟ་མགྲིན་ནག༔ ཨོ་རྒྱན་ཕྱག་རྒྱ་བཞི་ཡི་ལྷ་ཚོགས་ཀྱིས༔ ས་བདག་ཤ་ཟའི་ལག་ནས་ཚེ་ཁུག་ཅིག༔ ཐེ་ཚོམ་རྣམ་པར་རྟོག་པའི་གཞན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བསེན་མཐར་བྱེད་རྡོ་རྗེ་ཁྲོ་བོ་ལོད༔ ཨོ་རྒྱན་རྡོ་རྗེ་གུར་གྱི་ལྷ་ཚོགས་ཀྱིས༔ མི་དང་མི་མིན་ལག་ནས་ཚེ་གཡང་ཁུག༔ བསམ་སྦྱོར་ངན་པའི་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ ཚེ་བྱུར་སེལ་མཛད་ཐུགས་ཆེན་པདྨ་རྒྱལ༔ ཨོ་རྒྱན་སྣང་མཐའི་སྤྲུལ་བའི་ལྷ་ཚོགས་ཀྱིས༔ འཇིག་རྟེན་ཆེ་རྒུའི་ལག་ནས་ཚེ་ཁུག་ཅིག༔ རེ་དོགས་རྣམ་རྟོག་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་ཟད་བསྲིང་མཛད་སངས་ཚེ་དཔག་མེད༔ ཨོ་རྒྱན་དུས་གསུམ་མཁྱེན་པའི་ལྷ་ཚོགས་ཀྱིས༔ འཕགས་པ་བྱང་སེམས་ཕྱག་ནས་ཚེ་ཁུག་ཅིག༔ རྨི་ལམ་འཁྲུལ་བའི་རྐྱེན་དུ་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བརྟན་འགྱུར་མེད་ཆོས་སྐུ་ཀུན་ཏུ་བཟང་༔ ཨོ་རྒྱན་བདེ་ཆེན་རྒྱལ་པོའི་ལྷ་ཚོགས་ཀྱིས༔ ཕྱོགས་བཅུའི་སངས་རྒྱས་ཞིང་ནས་ཚེ་ཁུག་ཅིག༔ དངོས་ཞེན་འཛིན་པ་དམ་པོའི་རྐྱེན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་འཕེལ་ཡིད་བཞིན་ནོར་བུ་བདེ་བ་ཆེ༔ ཨོ་རྒྱན་ཐུགས་རྗེ་འགྱུར་མེད་ལྷ་ཚོགས་ཀྱིས༔ བརྒྱུད་གསུམ་རིག་འཛིན་ཕྱག་ནས་ཚེ་ཁུག་ཅིག༔ ༔ སྙེམས་འཕྲིག་དམ་སེལ་ངན་པའི་རྐྱེན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ མགྱོགས་མ་རྣམ་བཞི་བསྐུལ་བ་ནི༔ ཧཱུྃ་ཧྲཱི༔ ཛ༔ རང་སྣང་དཀྱིལ་འཁོར་ཤར་སྒོ་ནས༔ མྱོགས་མ་དཀར་མོ་ལྕགས་ཀྱུ་མ༔ དྲི་ཟའི་ལག་ནས་ཚེ་ཁུག་ལ༔ ཁྲག་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ཧཱུྃ༔ རང་སྣང་དཀྱིལ་འཁོར་ལྷོ་སྒོ་ནས༔ མྱོགས་མ་སེར་མོ་ཞགས་པ་མ༔ གཤིན་རྗེའི་ལག་ནས་ཚེ་ཁུག་ལ༔ ཤ་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ བྃ༔ རང་སྣང་དཀྱིལ་འཁོར་ནུབ་སྒོ་ནས༔ མྱོགས་མ་དམར་མོ་ལྕགས་སྒྲོག་མ༔ ཀླུ་དབང་ལག་ནས་ཚེ་ཁུག་ལ༔ དྲོད་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ཧོ༔ རང་སྣང་དཀྱིལ་འཁོར་བྱང་སྒོ་ནས༔ མྱོགས་མ་ལྗང་མོ་དྲིལ་བུ་མ༔ གནོད་སྦྱིན་ལག་ནས་ཚེ་ཁུག་ལ༔ དབུགས་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ མདའ་དར་ཕྱོགས་བཞི་དབུས་ལྔར་གཡབ༔ ཚེ་དཔལ་སྦུབས་ཆུ་དྲངས་པ་ལྟར༔ འཇའ་དང་འོད་དུ་ཀྱི་ལི་ལི༔ བསྟིམ་པས་གཟི་བྱིན་ཆེར་འབར་བསམ༔ མཆིལ་མ་མིད་ཅིང་བུམ་ཅན་འཛིན༔ ལྟེ་འོག་རིག་པ་ཕུར་ཚུགས་གཏད༔ འཆི་བདག་གཤིན་རྗེའི་ཁར་ཚུད་ཀྱང་༔ ཞག་བདུན་ཚེ་ནི་བསྲིང་བར་འགྱུར༔ ཚེ་འགུགས་འདི་ཉིད་བརྒྱ་རྩ་བརྒྱད༔ ཉིན་གཅིག་བཏོན་པས་ཚེ་གེགས་སེལ༔ ཞག་རེར་ཚར་གསུམ་མ་ཆད་ན༔ ཚེ་ལོ་བརྒྱ་ལ་ཐེ་ཚོམ་མེད༔ ས་མཱ་ཡ༔ གུ་ཧྱ༔ ཚེ་འབྲང་བུམ་པ་མགོ་ལ་བཞག༔ ཧཱུྃ་ཧྲཱི༔ ཚེ་དཔག་མེད་མགོན་པདྨ་ཐོད་ཕྲེང་རྩལ༔ འཆི་མེད་ཚེ་ལྷ་རྒྱ་མཚོའི་ཡེ་ཤེས་བྱིན༔ ཚེ་ཡི་དཀྱིལ་འཁོར་ཆེན་པོའི་དབང་བསྐུར་བས༔ ཚེ་ལྷའི་གསང་གསུམ་ཡོན་ཏན་རྫོགས་པར་ཤོག༔ འཆི་མེད་ཚེ་རིལ་གཡས་སུ་གཏད༔ ཧཱུྃ་ཧྲཱི༔ སྣང་བའི་ཆོས་ཀུན་འཛིན་ཞེན་བྲལ་བ་ལས༔ འཁོར་འདས་བཅུད་བསྡུས་འཆི་མེད་ཚེ་རིལ་འདི༔ སྐལ་ལྡན་སྐྱེས་བུ་ཁྱོད་ལ་སྦྱིན་པ་ཡིས༔ འཆི་མེད་རྡོ་རྗེའི་ཚེ་ལ་མངའ་བརྙེས་ཤོག༔ ཚེ་ཆང་བདུད་རྩི་གཡོན་ཏུ་གཏད༔ ཧཱུྃ་ཧྲཱི༔ སྟོང་པའི་ཆོས་ཀུན་དབྱིངས་སུ་ཞུགས་པ་ལས༔ འཕོ་བཅས་རྣམ་རྟོག་གཅོད་པའི་ཚེ་ཆང་འདི༔ སྐལ་ལྡན་སྐྱེས་བུ་ཁྱོད་ལ་སྦྱིན་པ་ཡིས༔ བདེ་སྟོང་རྡོ་རྗེའི་ཚེ་ལ་མངའ་བརྙེས་ཤོག༔ བླ་ཚེ་དབྱིངས་སུ་སྦ་བ་ནི༔ ཚེ་ཡི་སྙིང་པོ་ཨ་དཀར་པོ༔ ཉི་ཟླ་ཁ་སྦྱོར་ནང་དུ་བཅུག༔ ཡེ་ཤེས་ལྔ་ཡི་འོད་ཀྱིས་བསྡམ༔ རྡོ་རྗེ་གསུམ་གྱི་རྒྱ་ཡིས་བཏབ༔ མདའ་དར་རྒྱ་གྲམ་གནས་ལྔར་བཞག༔ ཧཱུྃ་ཧྲཱི༔ གཅིག་འཛིན་བདག་ལྟའི་ཚེ་ཡི་ཀེགས༔ ཀུན་ཁྱབ་ཡེ་ཤེས་སྟོབས་ཀྱིས་བཅོམ༔ ཆོས་སྐུ་གཅིག་གི་བྱིན་གྱིས་བརླབས༔ ཐིག་ལེ་གཅིག་གི་ཀློང་དུ་སྦ༔ གཉིས་འཛིན་མཚན་མའི་ཚེ་ཡི་ཀེགས༔ གཉིས་མེད་ཡེ་ཤེས་སྟོབས་ཀྱིས་བཅོམ༔ སྐུ་གཉིས་དག་པས་བྱིན་གྱིས་བརླབས༔ གཉིས་སྣང་བྲལ་བའི་ཀློང་དུ་སྦ༔ དུག་གསུམ་ཆགས་སྡང་ཚེ་ཡི་ཀེགས༔ ཡེ་ཤེས་གསུམ་ལྡན་སྟོབས་ཀྱིས་བཅོམ༔ སྐུ་གསུམ་བདེན་པས་བྱིན་གྱིས་བརླབས༔ ཁམས་གསུམ་ཀློང་གྲོལ་དབྱིངས་སུ་སྦ༔ སྐྱེ་བཞིར་ཨ་འཐས་ཚེ་ཡི་ཀེགས༔ ཡེ་ཤེས་བཞི་སྦྱོར་སྟོབས་ཀྱིས་བཅོམ༔ སྐུ་བཞིའི་བདེན་པས་བྱིན་གྱིས་བརླབས༔ འབྱུང་བཞི་རང་དག་ཀློང་དུ་སྦ༔ དུག་ལྔ་འཁྲུགས་པའི་ཚེ་ཡི་ཀེགས༔ རྒྱལ་བ་རིགས་ལྔས་སྟོབས་ཀྱིས་བཅོམ༔ དབྱིངས་ལྔ་དག་པའི་ཀློང་དུ་སྦ༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ ཨཱ་ཡུརྫྙཱ་ན་ཏིཥྛ་བྷྲཱུྃ༔ མཐའ་མར་དམ་ཚིག་ཁས་ལེན་ནི༔ ཀྱེ༔ ཚེ་ལྷ་རྒྱལ་བ་སྲས་བཅས་དགོངས༔ གསང་བ་སྤྱི་དང་ཁྱད་པར་ཏུ༔ རྡོ་རྗེ་ཚིག་གི་དམ་ཚིག་ནི༔ ཞེ་སྡང་སྲོག་གཅོད་མི་བྱ་ཞིང་༔ སྲོག་སླུ་སྦྱིན་པ་གཏོང་བ་དང་༔ རྡོ་རྗེའི་བཟླས་པ་བུམ་ཅན་འཛིན༔ རྩ་བ་ཡན་ལག་དམ་ཚིག་ཀུན༔ གཙོ་བོའི་བཀའ་བཞིན་བདག་གིས་སྲུང་༔ གཏང་རག་མཎྜལ་བྲན་དུ་འབུལ༔ འགྲོ་དོན་སྨོན་ལམ་གདབ་པ་ནི༔ ཧོ༔ རབ་འབྱམས་འཆི་མེད་ཚེ་ཡི་ལྷ་ཚོགས་ལ༔ གསོལ་བཏབ་དབང་བླང་བསྙེན་པའི་དགེ་ཚོགས་ཀྱི༔ མཐའ་ཡས་འགྲོ་ཀུན་དུས་མིན་འཆི་ལས་གྲོལ༔ ཚེ་དཔག་མེད་པའི་གོ་འཕང་མངོན་གྱུར་ཤོག༔ བཀྲ་ཤིས་ཚེ་ཡི་ཤིས་བརྗོད་ནི༔ ཧོ༔ བཀྲ་ཤིས་ཚེ་ཡི་དཔལ་སྟེར་ཚེ་དཔག་མེད༔ བདེ་ཆེན་ཚེ་ལ་དབང་བསྒྱུར་པདྨ་རྒྱལ༔ འཆི་མེད་རིག་པ་འཛིན་པ་པདྨ་འབྱུང་༔ སྐུ་གསུམ་ཚེ་ལྷས་བཀྲ་ཤིས་ཚེ་གཡང་སྩོལ༔ བདེ་བ་ཆེན་པོ་པདྨ་བཛྲ་རྩལ༔ སྟོབས་ཀྱི་དབང་ཕྱུག་ཚེ་ལྷ་རྟ་མཆོག་དཔལ༔ ཚེ་ཡི་ཕྱག་རྒྱ་ལྷ་ལྕམ་ཡིད་འཛིན་མ༔ རྩ་གསུམ་ཚེ་ལྷས་བཀྲ་ཤིས་ཚེ་གཡང་སྩོལ༔ སེམས་མཆོག་བསྐྱེད་ཚེ་ལ་བར་ཆད་མེད༔ སྒྲུབ་པའི་དུས་སུ་ཚེ་ལྷས་དངོས་གྲུབ་སྩལ༔ མཐར་ཐུག་འཆི་མེད་རྡོ་རྗེའི་སྐུ་མཆོག་བརྙེས༔ དུས་གསུམ་དགེ་བའི་བཀྲ་ཤིས་ཚེ་གཡང་སྩོལ༔ འགྲོ་རྣམས་མཐོང་ཐོས་ཡིད་ལ་སྨོན་ཙམ་གྱིས༔ ཚེ་ལྷའི་བྱིན་རླབས་འབད་མེད་ཆར་བཞིན་སྙིལ༔ ཚེ་ཡི་ཀེགས་སེལ་དགེ་བའི་དཔལ་གྱིས་འཚོ༔ འཁོར་གསུམ་བཀྲ་ཤིས་ཚེ་གཡང་དཔལ་འབར་ཤོག༔ ཛ་ཡ་ཛ་ཡ་བི་ཛ་ཡ༔ ཛ་ཡནྟུ༔ ཚེ་དབང་ཟབ་མོ་འདི་ཐོབ་པས༔ དུས་མིན་འཆི་བའི་འཇིགས་པ་ཞི༔ ཚེ་འདིར་རྡོ་རྗེའི་སྐུ་མཆོག་བརྙེས༔ མཐའ་ཡས་འགྲོ་དོན་ལྷུན་གྲུབ་འགྱུར༔ ས་མཱ་ཡ༔ བསྐྱེད་པའི་རིམ་པ་བསྒོམ་པ་ལ༔ ལུས་ནི་ཆུ་ཟླ་ལྟ་བུ་ལ༔ ངག་ནི་སྟོང་པ་སྤྲིན་གྱི་སྒྲ༔ སེམས་ནི་ནམ་མཁའ་སྤྲིན་བྲལ་བཞིན༔ མི་རྟོག་ངང་གནས་ལྟ་བུའོ༔ གཟུང་པ་ཡུལ་ལ་འཛིན་པ་སེམས༔ ཐམས་ཅད་མཁའ་ལ་འཇའ་ཡལ་ལྟར༔ དམིགས་བསམ་བརྗོད་བྲལ་ངང་ལ་འཇོག༔ དེ་ཡི་ངང་ལས་སྐད་ཅིག་གིས༔ གཞོམ་མེད་འོད་གསལ་རྡོ་རྗེའི་ཁམས༔ རིག་པ་ཧྲཱི༔ཡིག་དམར་པོར་གསལ༔ ཧྲཱི་ནི་ཡེ་ཤེས་ལྔ་དང་ལྡན༔ དེ་ལས་འོད་འཕྲོས་དོན་གཉིས་བྱས༔ འོད་ཟེར་འཆི་མེད་རྡོ་རྗེའི་སྐུ༔ པདྨ་བདེ་ཆེན་ལོངས་སྤྱོད་རྫོགས༔ ཡབ་ཡུམ་བདེ་བ་ཆེན་པོར་རོལ༔ སྤྱི་བོར་རིགས་བདག་ཚེ་དཔག་མེད༔ པདྨ་ཞི་ཁྲོའི་དཀྱིལ་འཁོར་ལྷ༔ དྭངས་པའི་མཚོ་ལ་ཟླ་གཟུགས་བཞིན༔ སྟོང་གསལ་འགག་མེད་སྐུ་རུ་བཞེངས༔ གསལ་བ་གསུམ་ལྡན་དཀྱིལ་འཁོར་ནི༔ ཡེ་ནས་རང་རིག་ང་ཡི་ཀློང་༔ སྣང་སྲིད་ཀུན་གྱི་སྤྱི་དཔལ་ཆེ༔ སོ་སོར་རྟོག་པའི་ཡེ་ཤེས་ཡིན༔ བརྡ་དོན་རྟགས་རྫོགས་ཆོས་སྐུའི་འཕྲུལ༔ སྒྱུ་མ་ལྟ་བུར་རྩལ་སྦྱང་བས༔ སྲིད་ཞི་གདོད་ནས་ད་སྟེ༔ མཉམ་བརྡལ་རིག་པའི་རང་ས་ཟིན༔ བསྐྱེད་པའི་རིམ་པ་མཐར་ཕྱིན་འགྱུར༔ ས་མཱ་ཡ༔ སྔགས་ཀྱི་རིམ་པ་བསྒོམ་པ་ལ༔ སྒྲ་ཀུན་རྡོ་རྗེ་གསུམ་གྱི་དབྱངས༔ དབུགས་ཀྱི་འབྱུང་འཇུག་གནས་པ་སྦྱར༔ འགྱུར་མེད་ཧཱུྃ་གི་བཟླས་པ་དང་༔ སྐྱེ་མེད་ཨ་ཡི་ཏིང་འཛིན་གྱི༔ འཁོར་འདས་ནཱ་དའི་ཀློང་དུ་རྫོགས༔ ངག་དང་འགོག་པ་ཡིད་བཟླས་ཀྱིས༔ གསུང་གི་བྱིན་རླབས་ངག་ལ་ཞུགས༔ ངག་སྒྲིབ་དག་ཅིང་བདེན་ཚིག་གྲུབ༔ རྡོ་རྗེ་སྔགས་ཀྱི་ཚེ་འགྲུབ་འགྱུར༔ ས་མཱ་ཡ༔ ཐབས་ལམ་རྫོགས་པའི་རིམ་པ་ནི༔ སྟོང་པས་ངང་ལས་རང་གི་ལུས༔ བདེ་ཆེན་རྡོ་རྗེ་ཡབ་ཡུམ་གསལ༔ སྤྱི་བོ་ཧྃ་དང་ལྟེ་བར་རྃ༔ རྔུབ་དགང་གཞིར་དང་འཕེན་པ་ཡིས༔ བུམ་པའི་རླུང་སྦྱོར་སྣ་ཚོགས་སྒོམས༔ རླུང་ལྔ་དབུ་མར་བཅིངས་པ་ཡིས༔ འབྱུང་བ་ལྔ་ལ་རང་བྱན་ཚུད༔ བདེ་ཆེན་རྡོ་རྗེའི་བཟླས་པ་ཡིས༔ འཆི་མེད་རྡོ་རྗེའི་ཚེ་འགྲུབ་འགྱུར༔ ནུས་ན་ཚེ་ལམ་ཕྱག་རྒྱ་ལ༔ འཁྱུད་དང་སྦྱོར་བས་བདེ་ཆེན་འདྲེན༔ སྣང་བ་སྟོང་པའི་དབྱིངས་སུ་ཞུགས༔ སྟོང་པ་འོད་གསལ་བདེ་བར་འཆར༔ ཆོས་ཀུན་བདེ་ཀློང་གཅིག་ཏུ་གྱུར༔ སྒོམ་པ་ནམ་མཁའ་གསུམ་ལ་བྱ༔ འབྲས་བུ་མ་བཙལ་གཞི་ལ་རྫོགས༔ རྫོགས་པ་ཆེན་པོའི་དགོངས་པའོ༔ ས་མཱ་ཡ༔ རྡོ་རྗེ་ཚེ་ཡི་ལས་སྦྱོར་ལ༔ སྲུང་དང་སྤེལ་དང་འཆི་མེད་སྒྲུབ༔ སྲུང་བ་རང་ལུས་རྡོ་རྗེ་བསྒོམས༔ ལྟེ་བར་ཐུགས་སྲོག་ཧྲཱི་དང་ཨ༔ ཡི་དམ་སྲོག་ལ་རང་སེམས་གཞུགས༔ སྣང་སྟོང་དབྱེར་མེད་ངང་དུ་འཇོག༔ མེ་ཡི་ཚྭ་ཚྭ་འོད་ཟེར་གྱིས༔ སྟོང་གསུམ་མ་ལུས་ཁྱབ་པར་བྱས༔ ཚེ་ཡི་གེགས་དང་བར་ཆད་བསྲེག༔ ལྕགས་ཀྱུ་ལྟ་བུའི་འོད་ཟེར་གྱིས༔ ཚེ་བཅུད་བསྡུས་ཏེ་སྙིང་པོར་བསྟིམ༔ ཐུན་མཚམས་སྒྱུ་མའི་ལྷ་སྐུར་ལྡང་༔ གནས་གསུམ་རྡོ་རྗེ་གསུམ་གྱིས་བསྲུང་༔ སྣང་གྲགས་རྟོག་པ་ལྷའི་རོལ་བར༔ བར་ཆད་མེད་དོ་སྲུང་འཁོར་ཆེ༔ ཚེ་སྤེལ་ཐབས་ལ་མཚན་བཅས་དང་༔ མཚན་མེད་སྒྱུ་མའི་རྣལ་འབྱོར་རོ༔ མཚན་བཅས་རྟེན་བཞེངས་དགེ་འདུན་མཆོད༔ སྲོག་སླུ་སཱཙྪཱ་གདབ༔ ལམ་འཕྲང་བཅོས་དང་ཟམ་པ་འཛུག༔ ཚེ་གཟུངས་དར་ལྕོག་འཛུག་པ་དང་༔ ཉིན་བཞིན་ཚེ་འགུག་ཚེ་དབང་ལེན༔ མཚན་མེད་བདེ་སྟོང་ཡེ་ཤེས་སྒོམ༔ འཆི་མེད་སྒྲུབ་པའི་ཐབས་ཟབ་མོ༔ རང་ལུས་ཡིད་དམ་ཡབ་ཡུམ་གསལ༔ ལུས་དབུས་རོ་རྐྱང་དབུ་མ་བསྒོམས༔ གནས་ལྔར་རྒྱལ་བ་སྐུ་ལྔ་བསྒོམས༔ སོ་སོའི་སྲོག་ཡིག་འོད་ཟེར་གྱིས༔ འབྱུང་བ་སོ་སོའི་བཅུད་དྲངས་སྟེ༔ བསྟིམ་དང་བསྲེ་དང་མཉམ་བཞག་པས༔ འབྱུང་བར་དབང་བའི་ཚེ་ཐོབ་འགྱུར༔ ལྟེ་བར་རྃ་དང་སྙིང་གར་ཧཱུྃ༔ ལྕེ་ཆུང་སུྃ་དང་དཔྲལ་བ་ཧྃ༔ འབར་དང་འཛགས་པའི་སྦྱོར་བ་ཡིས༔ བ་སྤུའི་རྩེ་ནས་རུས་པའི་གཏིང་༔ མ་ལུས་བདེ་བ་ཆེན་པོས་ཁྱབ༔ སྣང་ཞིང་སྲིད་པའི་ཆོས་ཐམས་ཅད༔ བདེ་བས་མ་ཁྱབ་གང་ཡང་མེད༔ བདེ་བ་དེ་ཡི་རང་རྩལ་གྱིས༔ ལྕེ་ཆུང་སུྃ་ལས་བདུད་རྩི་འཛགས༔ བུམ་ཅན་གྱི་སྦྱོར་བ་ཡིས༔ སེམས་ཚོར་ཆོས་ཉིད་ཡང་ཡང་བསྲེ༔ རྟོག་མེད་ངང་དུ་ཀློད་དེ་འཇོག༔ བདེ་བ་ཆེན་པོའི་བཅུད་ལེན་ནོ༔ ལྟེ་བར་གསེར་གྱི་སྒོང་ངའི་དབུས༔ ཨ་ཡིག་དཀར་པོ་འོད་འབར་བསམ༔ དེ་ལས་ཨ་ཡིག་མུ་ཏིག་ཕྲེང་༔ སྐར་མ་ལྟ་བུར་མཁའ་ཁྱབ་སྤྲོས༔ རྒྱལ་བ་བྱང་སེམས་འཇིག་རྟེན་སྐྱོང་༔ རིན་ཆེན་འབྱུང་བའི་བཅུད་རྣམས་ནི༔ རང་མདོག་བྱུང་བ་གཅིག་ཏུ་འདྲེས༔ ཐམས་ཅད་འོད་ཟེར་སྔོན་པོར་གྱུར༔ སྤྱི་བོའི་གཙུག་ནས་འཇའ་ཟུག་ལྟར༔ ལྟེ་བའི་ཨ་ལ་སིབ་སིབ་ཐིམ༔ སྣོད་བཅུད་སྟོང་བ་སྔོ་སེང་ངེ་༔ བསིལ་ལ་འཇམ་པ་བདེ་ལྷམ་མེ༔ སྣང་སྟོང་གཞི་མེད་རྩ་བྲལ་ངང་༔ འཇམ་རླུང་འཛིན་ཅིང་རང་ངོར་བལྟ༔ འཕོ་མེད་ནམ་མཁའི་བཅུད་ལེན་ནོ༔ བདེ་དང་སྟོང་པ་དབྱེར་མེད་པ༔ སྤྲོས་བྲལ་ཡེ་ཤེས་རང་ངོ་བསྐྱང་༔ མཚན་མེད་སྒྱུ་མའི་རྣལ་འབྱོར་སྟེ༔ བཅུད་ལེན་ཀུན་གྱི་སྙིང་པོའོ༔ ས་མཱ་ཡ༔ ཐུན་མཚམས་ཚེ་གླུད་སྤྱི་ལྟར་གཏོང་༔ རྟེན་བཞེངས་ཟམ་བཅོས་ཅི་བྱེད་ཀྱང་༔ དད་དང་སེམས་བསྐྱེད་གཙང་མས་བྱ༔ དུས་མིན་འཆི་བ་བཟློག་པའི་ཐབས༔ ཚེ་སྤེལ་སཱཙྪཱ་གདབ་པ་ནི༔ སྟོང་བའི་ངང་ལས་ས་ཆུ་རྣམས༔ པད་ཟླའི་སྟེང་དུ་བྷྲཱུྃ་ཡིག་ལས༔ རིན་པོ་ཆེ་ཡི་ཕུང་པོར་གྱུར༔ རང་ཉིད་ལྷ་ཡི་ཐུགས་ཀ་ནས༔ ལྕགས་ཀྱུ་ལྟ་བའི་འོད་ཟེར་གྱིས༔ བདེ་གཤེགས་རྒྱལ་བའི་བྱིན་མཐུ་བཀུག༔ འཇིམ་པར་ཐིམ་པས་བྱིན་བརླབས་གྱུར༔ ༀ་ཨཱ༔་ཧཱུྃ་སྭཱ་ཧཱ༔ འབྱུང་ལྔ་སྐུ་ལྔས་བྱིན་གྱིས་བརླབས༔ ༀ་བཛྲ་ཨ་ཡུ་ཥེ་སྭཱ་ཧཱ༔ འཇིམ་པ་བཅད་པས་ཚེ་ཀེགས་སེལ༔ ༀ་བཛྲོད་བྷ་ཝ་ཡ་སྭཱ་ཧཱ༔ ས་ལ་རིན་ཆེན་དབྱིབས་བཅོས་བྱ༔ ༀ་ཨ་ར་ཛེ་བི་ར་ཛེ་སྭཱ་ཧཱ༔ སྣུམ་བསྐུས་ཞལ་དཀར་ཚོགས་ཆེན་རྫོགས༔ ༀ་དྷརྨ་དྷཱ་ཏུ་གརྦྷེ་སྭཱ་ཧཱ༔ བརྐོས་ཕོར་ཆོས་སྐུའི་ཀློང་དུ་ཞུགས༔ ༀ་བཛྲ་མུརྒ་ཏེ་ཨ་ཀོ་ཊ་ཡ་ཧཱུྃ༔ བརྡུང་པས་བག་ཆགས་སླར་མི་ལྡོག༔ ༀ་སརྦ་བིདྱཱ་སྭཱ་ཧཱ༔ ཡེ་ཤེས་གཟུངས་སུ་ཞུགས་པར་བསམ༔ ༀ་བཛྲ་ཨཱ་ཡུ་ཥེ་ཧཱུྃ་བྷྲཱུྃ་ནྲྀ་ཛ༔ ཚེ་ལྷ་རབ་འབྱམས་ཐིམ་པར་བསམ༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ དཀྱིལ་འཁོར་ལྷ་ཚོགས་བྱིན་གྱིས་བརླབས༔ ༀ་དྷརྨཱ་ར་ཏེ་སྭཱ་ཧཱ༔ ཆོས་སྐུའི་ངང་ནས་གཟུགས་སྐུར་བཞེངས༔ ༀ་སུ་པྲ་ཏིཥྛ་བཛྲེ་སྭཱ་ཧཱ༔ ཡེ་ཤེས་ལྷ་ཚོགས་བརྟན་ཅིང་བཞུགས༔ གྲོ་གའམ་ནི་ཤིང་ཤུན་དང་༔ དྲི་མེད་ཤོག་བུ་གཙང་མ་ལ༔ གསེར་རམ་གུར་གུམ་དྲི་བཟང་གིས༔ ཕྱི་མའི་སྔགས་ཚན་ལྔ་བོ་འབྲི༔ ཨ་ཡིས་རྒྱས་བཏབ་གཙང་སར་བསྐྱལ༔ དུས་མིན་འདི་ལས་རྣམ་པར་རྒྱལ༔ ས་མཱ་ཡ༔ རྡོ་རྗེའི་ཚེ་དར་སྦྲེང་པ་ནི༔ ཕྱོགས་བཞི་འབྱུང་བཞི་སྟེང་ནོར་བུ༔ འོག་ཏུ་རྡོ་རྗེ་རྒྱ་གྲམ་གདན༔ བཀྲ་ཤིས་རྫས་བརྒྱད་བཀྲམ་པའི་ནང་༔ སྟེང་དུ་རྡོ་རྗེའི་ཚིག་བདུན་དང་༔ བསམ་པ་ལྷུན་གྲུབ་གསོལ་འདེབས་བྱ༔ དཀྱིལ་དུ་བྷནྡྷ་ཚེ་བུམ་ནང་༔ ཨ་ཧྲཱི༔་སྙིང་པོ་འབྲུ་བཅུ་གཉིས༔ གཡས་གཡོན་ཡི་དམ་བཅུ་གསུམ་སྔགས༔ ཚེ་གཟུངས་ཚར་གྲངས་ཅི་མང་བྱ༔ འོག་ཏུ་བསམ་ལྷུན་སྨོན་ལམ་དང་༔ སྦྱིན་བདག་འདི་ཡི་ལོ་པ་སྟེ༔ མིང་དུ་འདི་ཞེས་བྱ་བ་ཡི༔ ཚེ་བསོད་དབང་ཐང་རླུང་རྟ་དར༔ བསམ་པ་ལྷུན་གྱིས་འགྲུབ་གྱུར་ཅིག༔ སྭ་སྟི་སིདྡྷི་ཛ་ཡནྟུ༔ དར་འདི་སྦྲེང་བའི་བསོད་ནམས་ཀྱིས༔ ཕྱོགས་ངན་མི་མཐུན་རྐྱེན་ལས་རྒྱལ༔ ཚེ་ཡི་ཀེགས་སྲི་ངན་པ་དང་༔ སྡེ་བརྒྱད་རྒྱལ་པོའི་གནོད་པ་དང་༔ ཞེ་སྡང་སྡུག་བསྔལ་དྲག་པོ་དང་༔ བསམ་སྦྱོར་ངན་པའི་རྐྱེན་དབང་གིས༔ ཚེ་ཡི་བར་ཆད་གྱུར་པ་ཀུན༔ སེལ་ཞིང་ཚེ་དང་བསོད་ནམ་རྒྱས༔ ལྷ་ཀླུ་དགའ་བས་སྡོང་གྲོགས་བྱེད༔ དཀོན་མཆོག་དགྱེས་པའི་བྱིན་རླབས་འབྱུང་༔ ཉིན་མོ་མི་དང་ཟས་ནོར་འདུ༔ མཚན་མོ་དཔའ་བོ་མཁའ་འགྲོ་འདུ༔ བསམ་དོན་འགྲུབ་པའི་གདམས་པའོ༔ ས་མཱ་ཡ༔ ཅེས་པ་འདི་ནི་གསང་བདག་རིག་འཛིན་ཆེན་པོ་ཚེ་དབང་ནོར་བུའི་བསམ་པ་ལྷུན་གྲུབ་ཀྱི་ཆོས་སྡེ་སྟེ། གནས་ཐ་དད་པར་ཐོར་བུ་ཇི་རྙེད་ཅིག་དཀར་ཤོག་ལ་བཏབ་པའི་ཤོག་བྱང་རྣམས་གཅིག་ཏུ་བསྡུད་པ་པོ་ནི། རྗེ་བླ་མ་རིག་པ་འཛིན་པའི་སྐུ་ཚེ་དེ་ཉིད་དུ་དྲིན་གྱིས་བསྐྱངས་ཤིང་བཀའ་ཡི་སྡུད་པ་པོར་དབྱུགས་དབྱུང་ལུང་དུ་བསྟན་པ་མདོ་ཁམས་པ་སྟག་བླ་བསྟན་འཛིན་རྡོ་རྗེའོ། །བཀྲ་ཤིས་འཕེལ། ༎ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་བདེན་པའི་སྟོབས་བཟློག་གནམ་ཐོག་འབར་བ།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་བདེན་པའི་སྟོབས་བཟློག་གནམ་ཐོག་འབར་བ་ཞེས་བྱ་བ་བཞུགས་སོ༔ ན་མོ་མ་ཧཱ་གུ་རུ་པདྨ་བཛྲ་ཡེ༔ དམར་གྱི་གཏོར་མ་བརྗིད་ལྡན་བཤམས༔ ཇ་ཆང་ཁྲག་གིས་ཕུད་མཆོད་དང་༔ དགྲ་བོའི་མིང་གཟུགས་ཤ་དུམ་དང་༔ སྨན་རཀ་གཏོར་མའི་གྱ་ནོམ་བསྟབས༔ བྷྱོཿབྷྱོ༔བྷྱོ༔ སྐྱེ་མེད་དབྱིངས་ལས་འགགས་མེད་ཡེ་ཤེས་རྩལ༔ ཐོགས་མེད་ཐུགས་རྗེས་དྲག་པོའི་སྐུར་བཞེངས་ལ༔ མགོན་མེད་བདག་སོགས་བར་ཆད་བཟློག་པའི་ཕྱིར༔ དབྱེར་མེད་མཐུ་སྟོབས་ནུས་པའི་བྱིན་ཆེན་ཕོབས༔ འབྲུ་གསུམ་རྡོ་རྗེའི་རྒྱས་བཏབ་དམ་ཉམས་རོ༔ སྲོག་དབུགས་དྲོད་རླངས་མ་ཡལ་དབང་པོ་ཚང་༔ ཕྱི་ནང་གསང་བའི་མཆོད་པ་འདོད་དགུར་འཇོ༔ རྩ་གསུམ་དམ་ཉམས་དགྱེས་པའི་རྫས་སུ་འབུལ༔ ཀུན་ཏུ་བཟང་པོ་སྒྱུ་འཕྲུལ་དྲ་བའི་གར༔ གཅིག་ཏུ་འདུས་པ་བླ་མ་རིན་པོ་ཆེ༔ མངོན་སྤྱོད་མཐུ་ཡི་བཀའ་བབ་བླ་རབས་བཅས༔ ཐུགས་བསྐྱེད་མ་གཡེལ་བཟློག་པའི་འཕྲིན་ལས་མཛོད༔ ༈ གུ་རུ་དམར་ནག་མེ་ཕྲེང་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ བྱམས་དང་བརྩེ་བའི་བྱིན་རླབས་ནུས་མཐུ་སྩོལ༔ ཞེ་སྡང་འཁྲུགས་པའི་དམག་གི་གཡུལ་ངོ་བཟློག༔ ༈ དམོད་པ་ནི༔ རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི༔ སྔོན་ལས་འཕྲལ་རྐྱེན་ཀུན་ཏུ་བརྟགས་པ་ལས༔ གཟུང་འཛིན་གཞན་དབང་མེད་བཞིན་འཁྲུལ་པ་ཡི༔ ནད་གདོན་བགེགས་དང་བར་དུ་གཅོད་པ་ཀུན༔ ཕྱིར་ཟློག་མངོན་སྤྱོད་སྟོབས་ཀྱི་ཕྲིན་ལས་མཛོད༔ ལུས་དང་སྲོག་ལ་འཚེ་བའི་ནད་རིགས་ཟློག༔ ལོག་པའི་ལམ་དུ་འདྲེན་པའི་གདོན་བགེགས་ཟློག༔ གདུག་ཅིང་གཏུམ་པའི་སྡེ་བརྒྱད་འབྱུང་པོ་ཟློག༔ མ་རུངས་རྒྱལ་བསེན་དམ་སྲིའི་གཡོ་འཁྲུགས་ཟློག༔ མེ་ཆུ་དུག་མཚོན་བརྒྱད་གཉིས་འཇིགས་པ་ཟློག༔ གློ་བུར་ཡེ་འདྲོག་ཐན་དང་ལྟས་ངན་ཟློག༔ འབྱུང་བཞི་འཁྲུགས་པས་སྣོད་བཅུད་རྒུད་པ་ཟློག༔ བྱད་ཕུར་རྦོད་གཏོང་ཀེག་བྱུར་ཕུང་སྲི་ཟློག༔ ཕྱི་ནང་འཁྲུགས་རྩོད་མཁའ་འགྲོའི་སུན་མ་ཟློག༔ མཐའ་བཞིའི་དམག་དཔུང་བསྟན་ལ་འཚེ་བ་ཟློག༔ གངས་ཅན་སྐྱེ་འགྲོའི་བདེ་སྐྱིད་འཕྲོག་པ་ཟློག༔ མདོར་ན་མི་མཐུན་མི་འདོད་ཉེར་འཚེ་ཀུན༔ ཟློག་གོ་དྲག་པོ་ཟོར་གྱི་གཏོར་མས་ཟློག༔ བསྒྱུར་རོ་དགྲ་བགེགས་དམ་སྲིའི་སྟེང་དུ་སྒྱུར༔ ཟློག་སྒྱུར་ཡོངས་གྲུབ་འོད་གསལ་ཆེན་པོའི་དབྱིངས༔ མི་ལྡོག་ཕྱག་རྒྱས་འདེབས་པའི་ཕྲིན་ལས་མཛོད༔ ལྷ་ཚོག་ཀུན་ལ་སྦྱར་རོ༔ ༈ གུ་རུ་ནད་སེལ་སྨན་བླའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ དུག་གསུམ་ནད་སེལ་བདུད་རྩིའི་ནུས་མཐུ་སྩོལ༔ ཕུང་ལྔ་བདག་ཏུ་འཛིན་པའི་བར་ཆད་བཟློག༔ གུ་རུ་སྨུག་འཛིན་ནོར་བདག་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ སྣང་སྲིད་གཏེར་དུ་ཤར་བའི་ནུས་མཐུ་སྩོལ༔ ཞེན་ཆགས་སེར་སྣས་གདུང་བའི་བར་ཆད་བཟློག༔ ༈ གུ་རུ་ཡི་དམ་བཀའ་བརྒྱད་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ བདག་མེད་གནས་ལུགས་རྟོགས་པའི་ནུས་མཐུ་སྩོལ༔ འཁྲུལ་བ་ཨ་འཐས་འཆིང་བའི་བར་ཆད་བཟློག༔ ༈ གུ་རུ་ཟིལ་གནོན་དྲག་རྩལ་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ སྣང་བ་ལྷ་སྐུར་ཤར་བའི་ནུས་མཐུ་སྩོལ༔ ཚོགས་བརྒྱད་རང་རྒྱུད་རྟག་འཛིན་བར་ཆད་བཟློག༔ ༈ གུ་རུ་སེངྒེ་སྒྲ་སྒྲོག་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ ཡུལ་ཅན་ཡེ་ཤེས་འཆར་བའི་ནུས་མཐུ་སྩོལ༔ འབྲོག་ཆེན་བར་དོའི་གཡང་སའི་བར་ཆད་བཟློག༔ ༈ གུ་རུ་པདྨ་བཛྲ་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ གང་ཤར་རྒྱན་དུ་འཆར་བའི་ནུས་མཐུ་སྩོལ༔ འབྱུང་བ་གཡོ་འཁྲུགས་འགྱུར་བའི་བར་ཆད་བཟློག༔ གུ་རུ་རྟ་མགྲིན་ནག་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ འགྱུ་རྟོག་རང་སར་གྲོལ་བའི་ནུས་མཐུ་སྩོལ༔ ཐེ་ཚོམ་རྣམ་རྟོག་ཞེན་འཛིན་བར་ཆད་བཟློག༔ ༈ རྡོ་རྗེ་གྲོ་ལོད་ཁྲོ་བཅུའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ དུག་ལྔ་དབྱིངས་སུ་གྲོལ་བའི་ནུས་མཐུ་སྩོལ༔ ཉོན་མོངས་མཚོན་གྱི་འཇིགས་དང་བར་ཆདབཟློག༔ ༈ གུ་རུ་པདྨ་རྒྱལ་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ རྟག་ཁྱབ་ལྷུན་གྲུབ་ཡེ་ཤེས་བྱིན་ཆེན་ཕོབས༔ འཕོ་བཅས་རེ་དོགས་འཛིན་པའི་བར་ཆད་བཟློག༔ ༈ གུ་རུ་འོད་དཔག་མེད་པའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ ཡེ་ཤེས་རང་ངོ་ཤེས་པའི་ནུས་མཐུ་སྩོལ༔ འཁྲུལ་བ་བདེན་འཛིན་རྨི་ལམ་བར་ཆད་བཟློག༔ ༈ ཆོས་སྐུ་ཀུན་ཏུ་བཟང་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ ཀ་དག་གཞི་དབྱིངས་གྲོལ་བའི་ནུས་མཐུ་སྩོལ༔ འཁྲུལ་སྣང་དངོས་ཞེན་འཛིན་པའི་བར་ཆད་བཟློག༔ ༈ གུ་རུ་བདེ་བ་ཆེན་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ ལྷུན་གྲུབ་བདེ་དབྱིངས་གྲོལ་བའི་ནུས་མཐུ་སྩོལ༔ ༈ ཀུན་གྱི་མཐར༔ སྙེམས་འཕྲིག་དམ་སེལ་སྡུག་བསྔལ་བར་ཆད་བཟློག༔ དོ་བདོ་ཕོད་དུ་བཙུག་པའི་དགྲ་བོ་དང་༔ ངན་སྔགས་མཐུ་གཏད་བྱེད་པའི་བྱད་མ་ལ༔ རྩ་གསུམ་དམ་ཅན་སྲུང་མའི་མཐུ་ནུས་སྟོན༔ བསམ་ངན་སྦྱོར་རྩུབས་མཐུ་ནུས་ཕྱིར་བཟློག་བསྒྱུར༔ གཟུང་འཛིན་ལས་རླུང་འཁྲུལ་བ་རྒྱ་འབྱམས་པས༔ བར་ཆད་མཚན་མའི་སྣང་བ་རབ་འབྱམས་པ༔ བཟློག་གོ་དམར་ཆེན་གཏོར་མའི་བདེན་པས་བཟློག༔ བསྒྱུར་རོ་ལྟས་ངན་སྟོང་ཉིད་དབྱིངས་སུ་བསྐྱུར༔ ས་མ་ཡ༔ ཛ་གད་གསོལ་ཞིང་ཁྲག་གིས་བྱུགས༔ སྦར་མོ་གདེང་ཤིང་ཐལ་བ་གཏོར༔ དར་གྱིས་གཡབ་ལ་སྔགས་ཀྱིས་གཟིར༔ འཁོར་ལོ་བསྐོར་ལ་གཏོར་མ་འཕེན༔ ཟོར་ལམ་དགྲ་བོའི་ཕྱོགས་སུ་གཏད༔ དགྲ་བགེགས་བྱད་མ་ལྷ་སྲུང་བཅས༔ བ་མོ་ཉི་ཟེར་ཕོག་བཞིན་གཞོམ༔ ཁ་ཕུང་རྗེས་མེད་བཏང་བར་བསམ༔ རལ་བ་བསིག་ཅིང་ཐལ་མོ་བརྡབ༔ ཕྱི་མིག་མི་བལྟ་རང་གནས་ལོག༔ སྒོ་དྲུང་རྗེས་འབྲངས་དམ་སྲི་མནན༔ ནང་དུ་ལོག་ནས་ཚེ་སྤེལ་ཞིང༔ རྗེས་ཀྱི་ཆོ་ག་སྤྱི་ལྟར་བྱ༔ བན་བོན་སྟོང་གི་ནུས་པ་ཡང་༔ འདི་ཉིད་ལན་དགུ་བརྗོད་པས་བཟློག༔ གཞན་ཡང་ས་གཡོ་དགྲ་གཞོམ་སོགས༔ དངོས་ཉམས་རྨི་ལམ་ནང་དུ་འཆར༔ དེ་ལྟར་ཉམས་སུ་བླངས་པ་ཡིས༔ བྱང་ཆུབ་ལམ་གྱི་བར་ཆད་ཞི༔ མི་མཐུན་བདུད་ཀྱི་གཡུལ་ལས་རྒྱལ༔ ཚེ་བསྲིང་དཔལ་བསྐྱེད་བསམ་ཀུན་འགྲུབ༔ ས་མ་ཡ༔ ཨྠྀི༔ ཆོས་བཞིན་སྒྲུབ་པའི་བར་ཆད་སེལ་བའི་བཟློག་པ་ཟབ་མོ་འདི་གར་དབང་བདེ་ཆེན་རོལ་བ་རྩལ་ལམ་རྡོ་རྗེ་ཚེ་དབང་ནོར་བུར་་གུ་རུ་པདྨས་བསྩལ་བའི་མན་ངག་གོ༔ བསམ་པ་ལྷུན་གྲུབ་གྱི་བཟློག་པ་བདུད་སྡེའི་གཡུལ་འཇོམས།༄༅། །བསམ་པ་ལྷུན་གྲུབ་གྱི་བཟློག་པ་བདུད་སྡེའི་གཡུལ་འཇོམས་ཞེས་བྱ་བ་བཞུགས་སོ༔ བྷྱོ༔ བྷྱོ༔བྷྱོ༔ པདྨ་ལས་འཁྲུངས་སྣང་སྲིད་ཟིལ་གནོན་རྗེའི༔ སྤྲུལ་བའི་རོལ་གར་དཀྱིལ་འཁོར་རྒྱ་མཚོ་སྤྱི༔ ཁྱད་པར་ཡི་དམ་བཅུ་གསུམ་འཁོར་བཅས་ལ༔ དགྲ་བགེགས་ཤ་ཁྲག་བདུད་རྩིའི་མཆོད་པ་འབུལ༔ སྤྲོས་མེད་མཁྱེན་པ་ནམ་མཁའ་ལྟ་བུའི་ཀློང་༔ འགག་མེད་བརྩེ་ཆེན་སྤྲིན་ཕུང་གཡོ་བ་ལས༔ ཐོགས་མེད་ནུས་པའི་གློགས་སྟོང་འགྱུ་བ་ཡིས༔ ཐར་མེད་བདུད་སྡེ་བརླག་པའི་རྩལ་ཕྱུངས་ཤིག༔ ཀུན་བཏགས་འཁྲུལ་བས་བསྐྱེད་པའི་གཏད་མནན་བསྲེག༔ ཕ་རོལ་བན་བོན་བྱད་མའི་ངན་སྔགས་དང་༔ ལོ་ཟླ་ཞག་དུས་འབྱུང་བའི་གཡོ་འཁྲུགས་སོགས༔ ཡོངས་གྲུབ་ཆོས་ཉིད་སྟོང་པའི་ངང་དུ་བཟློག༔ མ་བརྟགས་བདེན་པར་སྣང་བར་འཛིན་པ་ཡིས༔ རྨི་ལམ་མཚན་ལྟས་ཆགས་སྡང་གཏི་མུག་འཐིབ༔ ང་རྒྱལ་ཕྲག་དོག་འཐབ་རྩོད་མྱ་ངན་ཀུན༔ མཉམ་ཉིད་ཞི་བ་ཆོས་ཀྱི་དབྱིངས་སུ་བཟློག༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་ལྟས་ངན་ཐམས་ཅད་དགྲ་ལ་བསྒྱུར༔ སྒྱུ་མའི་འཕྲུལ་འཁོར་སོ་སོར་གྱེས་པ་བཞིན༔ རེ་དོགས་མཐའ་བྲལ་ཆོས་ཀྱི་དབྱིངས་སུ་བཟློག༔ ཨོཾ་ཨཱཿཧཱུྃ༔ ཨ་རྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃཕཊ༔ཕཊ༔ ཨཱཿཧཱུྃ་ཧཱུྃ་ཕཊ་ཕཊ༔ བྷྱོ༔བྷྱོ༔བྷྱོ༔ བཟློག༔ བཟློག༔ བཟློག༔ ཅེས་བརྗོད་མི་མཐུན་རྐྱེན་ངན་ཞི༔ ས་མ་ཡ༔ བསམ་པ་ལྷུན་གྲུབ་བཟློག་པ་གཏོང་སྐབས་གང་ཤར་བཅོས་མེད་དུ་རིག་འཛིན་ཆེན་པོའི་སྐྱེ་མིང་པ་པདྨ་དབང་ཆེན་གྱིས་ཤར་མར་བྲིས། ། གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་མཆོད་ཕྲེང་ཚོགས་ཆེན་མྱུར་རྫོགས།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་མཆོད་ཕྲེང་ཚོགས་ཆེན་མྱུར་རྫོགས་བཞུགས༔ ན་མོ་མ་ཧཱ་གུ་རུ་པདྨ་བཛྲ་ཡེ༔ ཚོགས་ཆེན་མྱུར་དུ་རྫོགས་པ་ལ༔ དངོས་ཡིད་ཕྱག་རྒྱ་ཏིང་འཛིན་གྱིས༔ མཆོད་པའི་སྤྲིན་ཆེན་རབ་སྤྲོས་ཏེ༔ རྩ་གསུམ་དཀྱིལ་འཁོར་རྒྱ་མཚོ་མཆོད༔ རྒྱས་པར་མཆོད་པའི་དཀྱིལ་འཁོར་ལ༔ མཆོད་སྟེགས་དཀྱིལ་འཁོར་ཟུང་མིན་པར༔ དབུས་སུ་བླ་མའི་རྟེན་གསུམ་དང་༔ ཀུན་བཟང་མཆོད་སྤྲིན་གཏོར་ཆེན་བཤམ༔ ཀུན་བཟང་མཆོད་སྤྲིན་གཏོར་མ་ནི༔ དཀར་གཏོར་བརྗིད་ལྡན་ལྟོ་བ་ལྡིར༔ པདྨ་བཞི་བརྒྱད་བཅུ་དྲུག་དང་༔ རིལ་བུ་དེ་མཚུངས་བརྒྱ་རྩས་བསྐོར༔ གདན་ནི་འབྱུང་བ་རིམ་བརྩེགས་ལ༔ འདོད་འཇོའི་བུམ་བཟང་ཐབས་ཤེས་གདན༔ འཇའ་གུར་ཉི་ཟླ་ནོར་ཕྲེང་རྒྱན༔ མཁའ་སྐོར་གདུགས་དང་རྒྱལ་མཚན་འཕན༔ བླ་བྲེ་མེ་ཏོག་ཕྲེང་བ་དང་༔ མདའ་དར་མེ་ལོང་དཀར་དམར་ཕུད༔ སྨན་རཀ་གཏོར་མ་འདོད་རྣམ་སོགས༔ རྒྱ་ཆེ་བཀོད་ལེགས་ཁྱད་འཕགས་བཤམས༔ ཁྲུས་བྱས་གོས་གསར་མཛེས་རྒྱན་བཏགས༔ ཏིང་འཛིན་སྔགས་དང་ཕྱག་རྒྱ་བཅས༔ ཚོགས་ཆེན་མྱུར་རྫོགས་ཆོ་ག་བྱ༔ མཆོད་རྫས་བྱིན་རླབས། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། མཆོད་པའི་ལྷ་མོ་བཅུ་དྲུག །སྨན་རཀ་གཏོར་གསུམ། བདེ་ཆེན་སྦྱོར་བ། དྲག་པོའི་སྒྲོལ་མཆོད། གཉིས་མེད་དོན་མཆོད། མཆོད་རྫས་བྱིན་གྱི་བརླབས་པ་ནི༔ ༀ་ཨཱཿཧཱུྃ༔ དང་ནམ་མཁའ་མཛོད་སྔགས་ལན་གསུམ༔ ཧོ༔ ཆོས་དབྱིངས་རང་བཞིན་སྟོང་པའི་ངང་ལས་ལྷུན་གྲུབ་བདེ་བ་ཆེན་པོའི་ཡེ་ཤེས་ཀྱི་རོལ་བ་ཅིར་ཡང་ཤར་བ་ལས༔ ཞིང་ཁམས་རྒྱ་མཚོ་ཁྱབ་པའི་དཀྱིལ་འཁོར༔ རྒྱལ་སྲིད་རིན་པོ་ཆེ་སྣ་བདུན༔ བཀྲ་ཤིས་པའི་རྟགས་བརྒྱད༔ བྱིན་གྱིས་བརླབས་པའི་རྫས་བརྒྱད༔ འདོད་ཡོན་གྱི་ལྷ་མོ་བཅུ་དྲུག༔ ཉོན་མོངས་སེལ་བའི་སྨན་ཆེན༔ དུག་ལྔ་བསྒྲལ་བའིརཀྟ༔ གཉིས་འཛིན་བཤིག་པའི་གཏོར་མ༔ བདེ་ཆེན་བསྐྱེད་པའི་རིག་མ༔ དྲག་པོའི་སྒྲོལ་བའི་མཆོད་པ་སོགས་ཞིང་ཁམས་ཀུན་ཁྱབ་ཀུན་བཟང་མཆོད་པའི་སྤྲིན་ཆེན་པོ་ནམ་མཁའ་མཛོད་ཀྱི་རང་བཞིན་དུ༔ སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པས་བླ་མ་རྩ་བ་གསུམ་གྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག བཛྲ་སྥ་ར་ན་ཁཾ༔ ཚོགས་ཞིང་སྤྱན་འདྲེན་པ་ནི༔ ཧཱུྃ༔ མ་བཅོས་སྤྲོས་བྲལ་ཆོས་ཀྱི་དབྱིངས་ཉིད་ལས༔ མ་འགགས་ཡེ་ཤེས་ལྔ་ཡི་འོད་ཟེར་འཕྲོ༔ མ་གྱུར་སྐྱེ་དགུའི་མགོན་དུ་སྤྲུལ་སྐུར་བཞེངས༔ མ་ལུས་རྒྱལ་བ་རབ་འབྱམས་གཤེགས་སུ་གསོལ༔ འགྲོ་ཀུན་བསོད་ནམས་ཡེ་ཤེས་ཚོགས་རྫོགས་ཕྱིར༔ ཀུན་བཟང་མཆོད་པའི་སྤྲིན་གྱི་ཕུང་པོ་འདི༔ གུས་པས་འབུལ་ལ་བརྩེ་བའི་དགྱེས་དགོངས་ཏེ༔ མཆོད་སྤྱིན་རྒྱ་མཚོ་བཞེས་ཕྱིར་གཤེགས་སུ་གསོལ༔ གུ་རུ་སརྦ་ཏ་ཐཱ་ག་ཏ་བཛྲ་ས་མཱ་ཡ་ཛ༔ སྒེག་མོ་མའི་ཕྱག་རྒྱ་སྟ་ཟུར་གཡོན་དུ་བཀོད༔ ལུས་ཚུགས་བསིང་༔ ཤེས་པ་ལྷོད༔ ལྟ་གདེང་བསྐྱེད༔ སྣང་སྲིད་ཕྱག་རྒྱའི་དཀྱིལ་འཁོར་ཆེན་པོར་གསལ་བའི་ངང་ནས་འདི་སྐད་དོ༔ ༈ དཀྱིལ་འཁོར་རྒྱན་གྱི་མཆོད་པ༔ ཧོ༔ ཆོས་ཉིད་བསམ་མི་ཁྱབ་པའི་རོལ་བ་ལས༔ རབ་འབྱམས་ཞིང་ཀུན་ཁྱབ་པའི་དཀྱིལ་འཁོར་ནི༔ རྡོ་རྗེ་མེ་རི་འབར་བའི་སྲུང་འཁོར་ནང་༔ ཞི་རྒྱས་དབང་དྲག་རོལ་བའི་གཞལ་མེད་ཁང་༔༡ མི་འཇིགས་ཁྲི་དང་ཐུགས་རྗེའི་བླ་བྲེས་མཛེས༔ འཁོར་བའི་ཚ་གདུང་སེལ་བའི་གདུགས་དཀར་གཡོ༔ བདུད་བཞི་རྩད་གཅོད་རྡོ་རྗེ་ཕུར་པ་གདེང་༔ མ་རིག་གཟུང་འཛིན་འབིག་པར་བྱེད་པའི་མདའ༔ ༢བསྟན་པའི་སྙིང་པོ་ནུབ་མེད་རྒྱལ་མཚན་བཙུག༔ འཁོར་འདས་ཤན་འབྱེད་ཡོལ་བ་རིམ་གསུམ་མཛེས༔ གཡུལ་ལས་རྣམ་རྒྱལ་དར་ལྕེ་གསུམ་པའི་འཕན༔ འཕྲིན་ལས་ཐོགས་མེད་ནོར་བུའི་ཕྲེང་བ་བྲེས༔ སྣང་སྲིད་དག་པ་ཀུན་བཟང་མཆོད་པའི་སྤྲིན༔ རབ་འབྱམས་རྩ་གསུམ་ལྷ་ཚོགས་རྣམས་ལ་འབུལ༔ བདག་སོགས་ཚོགས་ཟུང་འཕེལ་ཞིང་སྒྲིབ་ལས་རོལ༔ དོན་གཉིས་ལྷུན་གྱིས་གྲུབ་པའི་དངོས་གྲུབ་སྩོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་མཎྜ་ལ་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ རིན་ཅེན་སྣ་བདུན་མཆོད་པ༔ ཧོ༔ ཆོས་དབྱིངས་ཡེ་ཤེས་རོལ་བ་ལས་བྱུང་བའི༔ ཞིང་ཁམས་ཀུན་ཁྱབ་འཁོར་ལོ་རིན་པོ་ཆེ༔ སྲིད་པའི་དྲྭ་བ་གཅོད་ཕྱིར་གུས་པས་འབུལ༔ མ་རིག་མུན་སེལ་ཆོས་འཁོར་བསྐོར་དུ་གསོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཙཀྲ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་ཡེ་ཤེས་རོལ་བ་ལས་བྱུང་བའི༔ ཞིང་ཁམས་ཀུན་ཁྱབ་ནོར་བུ་རིན་པོ་ཆེ༔ དབུལ་ཕོང་སྡུག་བསྔལ་སེལ་ཕྱིར་གུས་པས་འབུལ༔ ཕུན་ཚོགས་ཆར་ལྟར་འཇོ་བའི་དངོས་གྲུབ་སྩོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཎི་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་ཡེ་ཤེས་རོལ་བ་ལས་བྱུང་བའི༔ ཞིང་ཁམས་ཀུན་ཁྱབ་བཙུན་མོ་རིན་པོ་ཆེ༔ སྲིད་པའི་རྒུད་པ་གཞོམ་ཕྱིར་གུས་པས་འབུལ༔ ཐབས་ཤེས་འབྲལ་བ་མེད་པའི་དངོས་གྲུབ་སྩོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཝསྟི་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་ཡེ་ཤེས་རོལ་བ་ལས་བྱུང་བའི༔ ཞིང་ཁམས་ཀུན་ཁྱབ་བློན་པོ་རིན་པོ་ཆེ༔ ཐེ་ཚོམ་ཡིད་གཉིས་སེལ་ཕྱིར་གུས་པས་འབུལ༔ བརྟན་རླིང་ཡོན་ཏན་རྫོགས་པའི་དངོས་གྲུབ་སྩོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་སྟི་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་ཡེ་ཤེས་རོལ་བ་ལས་བྱུང་བའི༔ ཞིང་ཁམས་ཀུན་ཁྱབ་གླང་པོ་རིན་པོ་ཆེ༔ ལྟ་ངན་འཇིགས་པ་ཞི་ཕྱིར་གུས་པས་འབུལ༔ ཐེག་མཆོག་སྤོབས་པ་བརྟན་པའི་དངོས་གྲུབ་སྩོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཧསྟི་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་ཡེ་ཤེས་རོལ་བ་ལས་བྱུང་བའི༔ ཞིང་ཁམས་ཀུན་ཁྱབ་རྟ་མཆོག་རིན་པོ་ཆེ༔ ལེ་ལོའི་བར་ཆད་ཞི་ཕྱིར་གུས་པས་འབུལ༔ རྫུ་འཕྲུལ་སྟོབས་དང་ལྡན་པའི་དངོས་གྲུབ་སྩོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཏུ་རཾ་ག་ཨ་ཤྭ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་ཡེ་ཤེས་རོལ་བ་ལས་བྱུང་བའི༔ ཞིང་ཁམས་ཀུན་ཁྱབ་དམག་དཔོན་རིན་པོ་ཆེ༔ བདུད་བཞིའི་དགྲ་དཔུང་གཞོམ་ཕྱིར་གུས་པས་འབུལ༔ གཡུལ་ལས་རྣམ་པར་རྒྱལ་བའི་དངོས་གྲུབ་སྩོལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཁཊྒ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ བཀྲ་ཤིས་རྟགས་བརྒྱད་མཆོད་པ༔ ཧོ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་པདྨ་དཀར་མོ་དཔལ་བེའུ་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་ཤྲཱི་བདྶ་བཱ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་འོད་ལྡན་དམར་མོ་པདྨ་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་པདྨ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་མདངས་ལྡན་སྔོན་མོ་གདུགས་དཀར་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་ཚཱ་ཏྲཾ་ག་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་དྲི་མེད་ལྗང་ཁུ་ཆོས་དུང་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་ཤཾ་ག་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་འཇིགས་བྱེད་དཀར་མོ་འཁོར་ལོ་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་ཙཀྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་གནས་བཅས་སྔོན་མོ་རྒྱལ་མཚན་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་དྷྭ་ཛ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་དཀར་ཤམ་དམར་སྐྱ་བུམ་པ་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་ཀ་ལ་ཤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ སྟོང་ཉིད་དབྱིངས་ལས་བདེ་ཆེན་སྒྱུ་མའི་འཕྲུལ༔ ལྷ་མོ་ཡིད་གཞུང་ལྗང་ཁུ་གསེར་ཉ་འཛིན༔ སྣང་སྲིད་ཀུན་ཁྱབ་ཕྱག་རྒྱའི་མཆོད་པ་འདིས༔ མཁའ་ཁྱབ་དཀྱིལ་འཁོར་རྒྱ་མཚོ་མཉེས་གྱུར་ཅིག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མངྒ་ལཾ་མཏྶྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ རྫས་མཆོག་བརྒྱད་ཀྱི་མཆོད་པ༔ ཧོ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ གཟུགས་མཛེས་འོད་འཆང་ལྷ་མོའི་རྟེན་འབྱུང་ནོར༔ བཀྲ་ཤིས་རྫས་མཆོག་མེ་ལོང་འདི་འབུལ་བས༔ སྒྲིབ་བྲལ་རྣམ་དག་ཡེ་ཤེས་འཆར་བར་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨཱ་དརྴ་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ ས་སྲུང་གླང་པོ་ཆེ་ཡི་རྟེན་འབྱུང་ནོར༔ བཀྲ་ཤིས་རྫས་མཆོག་གྷི་ཝང་འདི་འབུལ་བས༔ ཟུག་རྔུ་ཀུན་བྲལ་མྱང་འདས་དོན་མཐོང་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་གོ་རོ་ཙ་ན་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ མཛང་མ་ལེགས་སྐྱེས་བུ་མོའི་རྟེན་འབྱུང་ནོར༔ བཀྲ་ཤིས་རྫས་མཆོག་ཞོ་གསར་འདི་འབུལ་བས༔ ་རྣམ་དག་ཡེ་ཤེས་སྙིང་པོ་རྟོག་པར་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ད་དྷི་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ རྩྭ་ཚོང་ཁྱེའུ་བཀྲ་ཤིས་རྟེན་འབྱུང་ནོར༔ བཀྲ་ཤིས་རྫས་མཆོག་དུརྦ་འདི་འབུལ་བས༔ སྐྱེ་ཤི་རྒྱུན་ཆད་ཚེ་གཡང་འཕེལ་བར་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་དཱུརྦ་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ ལྷ་ཆེན་ཚངས་པ་ཆེན་པོའི་རྟེན་འབྱུང་ནོར༔ བཀྲ་ཤིས་རྫས་མཆོག་བིལྦ་འདི་འབུལ་བས༔ འབྲས་བུའི་ཆོས་རྣམས་འབད་མེད་ཐོབ་པར་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བིལྦ་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ ལྷ་ཡི་དབང་པོ་བརྒྱ་བྱིན་རྟེན་འབྱུང་ནོར༔ བཀྲ་ཤིས་རྫས་མཆོག་དུང་དཀར་འདི་འབུལ་བས༔ ཐེག་གསུམ་ཆོས་སྒྲ་སྒྲོགས་པའི་མཐུ་ཐོབ་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཤཾ་ཁ་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ བྲམ་ཟེ་སྐར་རྒྱལ་བུ་ཡི་རྟེན་འབྱུང་ནོར༔ བཀྲ་ཤིས་རྫས་མཆོག་ལི་ཁྲི་འདི་འབུལ་བས༔ སྣང་སེམས་ཆོས་རྣམས་དབང་དུ་འདུ་བར་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་སིནྡྷུ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཏིང་འཛིན་ནམ་མཁའི་ཀློང་ལས་རང་ཤར་བའི༔ མཐུ་ཆེན་གསང་བའི་བདག་པོའི་རྟེན་འབྱུང་ནོར༔ བཀྲ་ཤིས་རྫས་མཆོག་ཡུངས་དཀར་འདི་འབུལ་བས༔ གདོན་བགེགས་བར་ཆད་གཞོམ་པའི་མཐུ་ཐོབ་ཤོག༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་སརྴ་པ་དྲ་བྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ དགའ་བ་བཅུ་དྲུག་མཆོད་པ༔ ཧོ༔ ༡ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ སྒེག་མ་དཀར་མོ་རྡོ་རྗེ་དཀུར་བརྟེན་འགྱིང་༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ ལཱ་སྱ་ཧཱུྃ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༢ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ ཕྲེང་མ་སེར་མོ་རིན་ཆེན་དོ་ཤལ་འཛིན༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མཱ་ལྱེ་ཏྲཱྃ་ པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༣ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ གླུ་མ་དཀར་དམར་པི་ཝཾ་གླུ་དབྱངས་གྱེར༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་གཱིརྟི་ཧྲཱི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༤ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ གར་མ་ལྗང་གུ་རྡོ་རྗེ་ཐོགས་པ་རྩེན༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ནཱིརྟི་ཨཱཿཔཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༥ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ མེ་ཏོག་སེར་མོ་པདྨའི་ཆུན་འཕྱངས་བསིལ༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་པུཥྤེ་ཏྲཱྃ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༦ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ སྤོས་མ་སྔོན་པོ་དྲི་ཞིམ་སྤོས་ཕོར་འཛིན༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་དྷུཔེ་ཧཱུྃ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༧ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ སྣང་མ་དམར་སྐྱ་ཉི་ཟླའི་སྒྲོན་མེ་བཏེགས༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨཱ་ལོ་ཀེ་ཧྲཱི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༨ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ དྲི་མ་ལྗང་གུ་དུང་ཆོས་དྲི་བཟང་འཐོར༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་གྷནྡྷེ་ཨཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༩ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ ལྷ་མོ་དཀར་མོ་ནོར་བུའི་མེ་ལོང་ངོམ༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་རཱུ་པ་ༀ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༡༠ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ ལྷ་མོ་དམར་གསལ་ཙནྡན་རྔ་ཟླུམ་རྡུང་༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མྲྀ་ཏཾ་གི་ཧྲཱི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༡༡ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ ལྷ་མོ་མཐིང་ཀ་ནཱི་ལའི་པི་ཝང་སྒྲོགས༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཝི་ནི་ཧཱུྃ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༡༢ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ ལྷ་མོ་སེར་མོ་རྦ་དཀར་གླིང་བུ་འབུད༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཝཾ་སེ་ཏྲཱྃ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༡༣ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ ལྷ་མོ་ལྗང་ཁུ་རིན་ཆེན་རྫ་རྔ་སྒྲོགས༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མུ་རཉྫེ་ཨ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༡༤ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ རེག་བྱའི་ལྷ་མོ་ལྗང་ཀུ་གོས་བཟང་ཐོགས༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་པརྴེ་ཏྲཱྃ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༡༥ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ རོ་ཡི་ལྷ་མོ་དམར་མོ་ཞལ་ཟས་འཛིན༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་རཱ་ས་ཧྲཱི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༡༦ ཐབས་ཤེས་ཟུང་འཇུག་སྒྱུ་མའི་ཕྱག་རྒྱ་ནི༔ ཆོས་ཀྱི་ལྷ་མོ་མཐིང་ཀ་པུསྟི་ཐོགས༔ རང་འདྲའི་མཆོད་སྤྲིན་ཉི་ཟེར་རྡུལ་ལྟར་འཕྲོ༔ སྣང་སྲིད་རྣམ་དག་ནམ་མཁའ་མཛོད་ཀྱིས་མཆོད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ དྷརྨ་དྷ་ཏུ་ཨ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ འཆི་མེད་སྨན་གྱི་མཆོད་པ༔ ཧོ༔ བདེ་སྟོང་མཉམ་སྦྱོར་ཡེ་ཤེས་རོལ་བ་ལས༔ སྒྲོན་མ་ལྕགས་ཀྱུ་ལྔ་ལྡན་རྩ་བ་བརྒྱད༔ ཡན་ལག་སྟོང་རྩ་སྦྱར་བ་ཕྱི་ཡི་སྨན༔ འབུལ་ལོ་མཆོག་ཐུན་དངོས་གྲུབ་རྒྱ་མཚོ་སྐྱིལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་པཉྩ་ཨ་མྲྀ་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ བདེ་སྟོང་མཉམ་སྦྱོར་ཡེ་ཤེས་རོལ་བ་ལས༔ རྡོ་རྗེའི་པདྨའི་བཅུད་བྱུང་བདུད་རྩིའི་རྒྱུན༔ དཀར་དམར་མྱོང་གྲོལ་ཟེག་མས་ཆོས་དབྱིངས་ཁྱབ༔ ནང་གི་སྨན་མཆོག་འབུལ་ལོ་བདེ་ཆེན་བསྐྱེད༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་སུ་ཁ་ཨ་མྲྀ་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ བདེ་སྟོང་མཉམ་སྦྱོར་ཡེ་ཤེས་རོལ་བ་ལས༔ ཀུན་བཏགས་འཁྲུལ་བའི་ལས་རླུང་དབུ་མར་ཞུགས༔ གཞན་དབང་རྣམ་རྟོག་དམིགས་མེད་དབྱིངས་སུ་ཞི༔ ཡོངས་གྲུབ་གསང་མཆོད་འབུལ་ལོ་རྟོགས་པ་སྦོར༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བྷོ་དྷི་ཙིཏྟ་ཨ་མྲྀ་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ བདག་མེད་གཏོར་མའི་མཆོད་པ༔ ཧོ༔ ཀུན་ཁྱབ་འགྱུར་མེད་བདེ་བའི་ཡེ་ཤེས་རྩལ༔ བཟའ་བཅའ་བཏུང་བའི་ཡོ་བྱད་བསམ་མི་ཁྱབ༔ མངར་སྐྱུར་ཁ་སྣུམ་ཚ་དང་སྐ་བའི་རིགས༔ ཕུན་ཚོགས་འབྱོར་བ་ཕྱི་ཡི་གཏོར་མ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་བ་ལིངྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཀུན་ཁྱབ་འགྱུར་མེད་བདེ་བའི་ཡེ་ཤེས་རྩལ༔ ཕུང་ལྔ་དབང་པོ་སྲ་དང་གཤེར་བའི་བཅུད༔ གཅེས་སྲོག་དོན་སྙིང་མ་ཉམས་དབུགས་དང་བཅས༔ དྲོད་མདངས་རབ་རྒྱས་ནང་གི་གཏོར་མ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཏེ་ཛོ་བ་ལིངྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཀུན་ཁྱབ་འགྱུར་མེད་བདེ་བའི་ཡེ་ཤེས་རྩལ༔ ཚོགས་བརྒྱད་སྒྲིབ་པའི་དྲི་མ་ཀུན་གཏོར་བའི༔ མ་ལུས་ཡེ་ཤེས་རྣམ་དག་འཆར་བའི་རྫས༔ རིག་གདངས་འགགས་མེད་གསང་བའི་གཏོར་མ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་གུ་ཧྱ་བ་ལིངྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ ཆགས་བྲལ་རཀྟའི་མཆོད་པ༔ ཧོ༔ གཟུང་འཛིན་ཡུལ་སྣང་སྟོང་པར་ཤར་བའི་རྩལ༔ རྩི་ཤིང་ས་རྡོ་རང་བྱུང་རིན་པོ་ཆེ༔ གདོད་ནས་རྣམ་དག་སྲིད་པ་བདེ་འགྲོའི་ཁྲག༔ ཁམས་གསུམ་དབང་སྡུད་ཕྱི་ཡི་རཀྟ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་རཀྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ གཟུང་འཛིན་ཡུལ་སྣང་སྟོང་པར་ཤར་བའི་རྩལ༔ སྲིད་པའི་རྩ་དང་དབང་པོའི་དངས་མའི་བཅུད༔ པདྨའི་སྦུབས་ལས་བྱུང་བ་བདེ་བའི་རོ༔ རྩ་བ་བརྒྱད་ལྡན་ནང་གི་རཀྟ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མཱུ་ལ་རཀྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ གཟུང་འཛིན་ཡུལ་སྣང་སྟོང་པར་ཤར་བའི་རྩལ༔ གིརྟི་དམར་མོ་འདོད་པས་སྨྱོས་པའི་ཆུ༔ མཁའ་ཀློང་ཡངས་པར་རྟོག་པ་ཀུན་བསྒྲལ་བའི༔ འདོད་ཆགས་གནས་དག་གསང་བའི་རཀྟ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་གུ་ཧྱ་རཀྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ ཧོ༔ རྣམ་ཀུན་མཆོག་ལྡན་བདེ་བ་ཆེན་པོའི་འཕྲུལ༔ ཚོགས་ཡུལ་དབང་པོ་མཉམ་པར་སྦྱོར་བ་ལས༔ སྣང་སྲིད་ཐམས་ཅད་ཕྱག་རྒྱའི་གར་ཏུ་རོལ༔ གདོད་ནས་མཉམ་སྦྱོར་བདེ་བའི་མཆོད་པ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་མུ་དྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ རྣམ་ཀུན་མཆོག་ལྡན་བདེ་བ་ཆེན་པོའི་འཕྲུལ༔ གཟུགས་མཛེས་དྲི་ཞིམ་འདོད་པའི་སྒྱུ་རྩལ་མཁས༔ རབ་འབྱམས་ཞིང་ཁྱབ་ཆགས་ལྡན་བུ་མོའི་ཚོགས༔ དབང་པོ་གཉིས་སྦྱོར་བདེ་བའི་མཆོད་པ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཀཱ་མ་མུ་དྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ རྣམ་ཀུན་མཆོག་ལྡན་བདེ་བ་ཆེན་པོའི་འཕྲུལ༔ འཛིན་རྟོག་འགྱུ་བ་དབུ་མའི་དབྱིངས་ཞུགས་པས༔ དུས་སྦྱོར་བཅུ་གཉིས་དག་པ་དགའ་མའི་ཚུལ༔ དབྱིངས་རིག་ཟུང་སྦྱོར་བདེ་བའི་མཆོད་པ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཛྙཱ་ན་མུ་དྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ ཀུན་རྟོག་བསྒྲལ་བའི་མཆོད་པ་ནི༔ ཧོ༔ དབྱིངས་ལས་མ་གཡོས་རྗེས་ཆགས་ཐུགས་རྗེའི་རྩལ༔ ཤུགས་དྲགས་རྡོ་རྗེ་ཁྲོས་པའི་ཏིང་འཛིན་གྱིས༔ དགྲ་བགེགས་བྱད་མའི་ཤ་ཁྲག་དོན་སྙིང་བཅས༔ དྲོད་རླངས་མ་ཉམས་སྙིང་རྗེའི་བསྒྲལ་མཆོད་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་དུཥྚན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ དབྱིངས་ལས་མ་གཡོས་རྗེས་ཆགས་ཐུགས་རྗེའི་རྩལ༔ ཐབས་ཆེན་རྡོ་རྗེ་སྔགས་ཀྱི་དམ་ཚིག་གིས༔ དུག་ལྔའི་བྱ་བྱེད་རྩ་བ་དོང་སྤྲུགས་པའི༔ ཉོན་མོངས་ལམ་བྱེད་རང་གྲོལ་བསྒྲལ་མཆོད་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་རུ་དྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ དབྱིངས་ལས་མ་གཡོས་རྗེས་ཆགས་ཐུགས་རྗེའི་རྩལ༔ ཀུན་བཏགས་འཁྲུལ་བ་ཡོངས་གྲུབ་དབྱིངས་སུ་བསྒྲལ༔ ཡོངས་གྲུབ་འཛིན་པ་སྤྲོས་བྲལ་ཆེན་པོར་ཞུགས༔ སྒྲིབ་ལས་རྣམ་གྲོལ་ཡོངས་གྲོལ་བསྒྲལ་མཆོད་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་མོ་ཀྵ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ༈ གཉིས་མེད་དོན་གྱི་མཆོད་པ་ནི༔ ༈ ཧོ༔ ཆོས་དབྱིངས་དག་མཉམ་བདེན་པ་ཆེན་པོའི་སྟོབས༔ སྣང་བ་མ་འགགས་ཐབས་ཀྱི་ཆོས་འཕྲུལ་ལ༔ སྟོང་བ་མ་ཆད་ཤེས་རབ་སྒྱུ་མའི་གར༔ སྣང་སྟོང་འགལ་མེད་རྟེན་འབྲེལ་མཆོད་པ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བོ་དྷི་ཙིཏྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་དག་མཉམ་བདེན་པ་ཆེན་པོའི་སྟོབས༔ སྣང་ལུགས་མ་བཅོས་ཡེ་ཤེས་ཤེས་ཉག་གཅིག་ལ༔ གནས་ལུགས་མ་བཅོས་སྤྲོས་བྲལ་ཆེན་པོའི་དལ༔ གནས་སྣང་དབྱེར་མེད་དག་པའི་མཆོད་པ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་དྷ་ཏུ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཆོས་དབྱིངས་དག་མཉམ་བདེན་པ་ཆེན་པོའི་སྟོབས༔ གཞི་དབྱིངས་ཀ་དག་ཟང་ཐལ་ཆེན་པོ་ལ༔ རིག་གདངས་ལྷུན་གྲུབ་ཡེ་ཤེས་རྒྱུན་མི་ཆད༔ དབྱིངས་རིག་དབྱེར་མེད་དོན་གྱི་མཆོད་པ་འབུལ༔ ༀ་ཨཱཿགུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཛྙཱ་ན་དྷ་ཏུ་ པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཅེས་རོལ་མོ་དབྱངས་དང་བཅས་པས་མཆོད་པར་བྱའོ༔ ཨེ་མ་ཧོ༔ ཚོགས་གཉིས་མྱུར་དུ་རྗོགས་པའི་ཐབས༔ མཆོད་པའི་རྒྱུད་ཀྱི་ཕྲེང་བ་འདི༔ ཚིག་ཏུ་བརྗོད་ཅིང་དབྱངས་སུ་གྱེར༔ གླུ་དང་གར་དང་རོལ་མོ་བྱ༔ མཆོད་པ་འབུལ་བའི་བསོད་ནམས་མཐུས༔ ཚེ་རབས་ཀུན་ཏུ་འབྱོར་ལྡན་ཞིང་༔ རིགས་གཟུགས་ལང་ཚོ་ཕུན་སུམ་ཚོགས༔ འགྲོ་བ་ཀུན་གྱིས་མཆོད་པར་འགྱུར༔ དབུལ་བོས་རྟག་ཏུ་ནོར་རྙེད་ཅིང་༔ མཐུ་མེད་རྣམས་ཀྱང་ནུས་ལྡན་འགྱུར༔ བསོད་ནམས་ལྡན་ལ་བསམ་ངན་གྱི༔ མཐུ་བྱད་དམག་གིས་འཇིགས་དང་བྲལ༔ འདི་ཉིད་ལན་གཅིག་ཚུལ་བཞིན་བརྗོད༔ དམ་ཚིག་ཉམས་ཆག་ཀུན་བྱང་སྟེ༔ བསྐལ་བ་བཞི་ཁྲིའི་ཚོགས་རྫོགས་ཤིང་༔ མཐར་ཐུག་མཚན་དཔེའི་སྐུ་ཐོབ་འགྱུར༔ ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་མཆོད་ཕྲེང་རྫོགས་སོ༔ མཆོད་པ་འདི་ཉིད་བླ་མེད་ཀྱི་དཀྱིལ་འཁོར་ཀུན་ལ་སྦྱར་བར་བྱའོ། བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་གསུམ་ལ་སྦྱར་ཚེ་སྨན་རཀ་གཏོར་གསུམ་སྦྱོར་སྒྲོལ་དེ་བཞིན་ཉིད་ཀྱི་མཆོད་པ་རྣམས་མི་དགོས་སོ། །སྤྲོས་བཅས་ལ་མཆོད་སྟེགས་ལོགས་སུ་སྤྲོས་ཏེ་ཞི་ཁྲོའི་ཆས་གང་རུང་དང་ལྡན་པས་གར་བཅས་བྱས་ཀྱང་རུང་ངོ་། །ཕྱག་རྒྱ་དང་རོལ་མོ་རྣམས་མཐོང་བ་བརྒྱུད་པའི་མན་ངག་ལས་ཤེས་པར་བྱའོ། །དབྱངས་རོལ་རྒྱན་ཆས་ཕྱག་རྒྱ་སོགས་རྒྱས་བསྡུས་ནི་གནས་དུས་ཁམས་དབང་དང་བསྟུན་པས་ཆོག་གོ །བཀྲ་ཤིས། ། གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ལྷ་ཚོགས་ལ་བསྟོད་པ་ཀུན་བཟང་དགའ་བའི་རོལ་མོ།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ལྷ་ཚོགས་ལ་བསྟོད་པ་ཀུན་བཟང་དགའ་བའི་རོལ་མོ་བཞུགས་སོ༔ ན་མོ་པདྨ་བཛྲ་ཡེ༔ སྒོ་གསུམ་སྒྲིབ་པ་དག་དང་༔ སྐུ་གསུམ་གོ་འཕང་ལ་སྦྱོར་བའི༔ ཐབས་ཆེན་བསྟོད་པའི་རྒྱལ་པོ་སྟེ༔ སྐལ་བ་ལྡན་པས་དྭངས་སུ་ལོངས༔ འདི་ཉིད་སུ་ཡིས་རོལ་དབྱངས་བཅས༔ ཚིག་དོན་སེམས་ལ་གསལ་བོར་དྲན༔ དད་དང་གུས་པས་བསྟོད་བྱེད་ན༔ བསྐལ་བ་བསག་པའི་སྡིག་སྒྲིབ་དག༔ ཚེ་འདིར་རྙེད་བཀུར་སྙན་གྲགས་རྒྱས༔ བྱད་ཁ་རྦོད་གཏོང་ཁ་མཆུ་ཞི༔ ངག་སྒྲིབ་དག་པས་སྔགས་ནུས་འབྱུང་༔ གཞན་དོན་འཕྲིན་ལས་བསམ་བཞིན་འགྲུབ༔ ཕྱི་མ་བདེ་ཆེན་པདྨའི་ཞིང་༔ དཔའ་བོ་མཁའ་འགྲོས་བསྟོད་དབྱངས་བཅས༔ བསུས་ཏེ་གུ་རུའི་ཞལ་བཟང་མཇལ༔ ཆོས་བསྟན་གཟུངས་ཐོབ་སངས་རྒྱས་བརྙེས༔ ས་མ་ཡ༔ སྤོས་ཀྱིས་དྲིས་མཆོད་དར་གྱིས་གཡབ༔ རྡོ་རྗེའི་གར་དང་སྙན་པའི་དབྱངས༔ ལག་པའི་ཕྱག་རྒྱ་དགའ་བའི་སེམས༔ བརྟུལ་ཞུགས་ཐབས་ཀྱིས་འདི་ལྟར་བརྩམས༔ ཐོག་མར་ཐོད་ཕྲེང་རྩལ་གྱི་སྔགས་ཀྱིས་བསྐུལ་ཞིང་༔ ཧཱུྃ་ཨཱཿༀ༔ ཧོ་ཧོ་ཧོ༔ ༈ ཡེ་ཤེས་དབྱིངས་ལ་བསྟོད་པ་ནི༔ ཨེ་མ་ཧོ༔ དག་པ་གཉིས་ལྡན་ཆོས་དབྱིངས་ཡེ་ཤེས་ལས༔ རང་ཤར་ཆོས་ཀུན་མཁྱེན་པ་མེ་ལོང་ལྟར༔ ཤེས་བྱ་རང་བཞིན་མེད་པ་མཉམ་པ་ཉིད༔ ཇི་སྙེད་སོར་རྟོག་བྱ་བ་གྲུབ་ལ་བསྟོད༔ རྣམ་དག་དབྱིངས་ལ་སྐྱེ་དང་འཇིག་པ་མེད༔ སྟོབས་དང་མི་འཇིགས་མ་འདྲེས་ཆོས་རྣམས་ནི༔ དབྱིངས་ལས་བྱུང་ཞིང་དབྱིངས་སུ་གྱུར་བ་ན༔ སྒྲིབ་ཚོགས་སྤྲིན་བྲལ་མཁའ་ལྟར་དག་ལ་བསྟོད༔ ཀུན་གཞི་གནས་འགྱུར་སྒྲིབ་ལ་གསུམ་དང་བྲལ༔ ཐོག་མཐའ་བར་མེད་དབྱིངས་རིག་གཉིས་སུ་མེད༔ རང་བཞིན་ཉེས་པའི་དྲི་བྲལ་རྣམ་རྟོག་མེད༔ ཆོས་ཀུན་འབྱུང་གནས་ཆོས་དབྱིངས་ཡེ་ཤེས་བསྟོད༔ ཀུན་གཞིའི་རྣམ་ཤེས་གསལ་ཆ་གནས་འགྱུར་བ༔ དམིགས་པའི་གཟུང་དང་འཛིན་པའི་རྟོག་པ་བྲལ༔ ཆོས་རྣམས་ཐམས་ཅད་གཟུགས་བརྙན་ལྟ་བུར་གསལ༔ རྨོངས་པའི་ཡུལ་མེད་མེ་ལོང་ཡེ་ཤེས་བསྟོད༔ ཉོན་ཡིད་གནས་འགྱུར་སྲིད་ཞི་མཉམ་ཉིད་མཁྱེན༔ བདག་གཞན་འཕེལ་གྲིབ་རང་གི་ངང་དུ་མཉམ༔ མི་གནས་མྱ་ངན་འདས་པའི་ཡེ་ཤེས་དབྱིངས༔ རྣམ་དག་མཉམ་པ་ཉིད་ཀྱི་ཡེ་ཤེས་བསྟོད༔ ཡིད་ཀྱི་རྣམ་ཤེས་གནས་འགྱུར་ཇི་སྙེད་མཁྱེན༔ གཟུངས་དང་ཏིང་འཛིན་བསམ་གཏན་ཀུན་གྱི་གཞི༔ ཆོས་ཀུན་འབྱེད་ལ་འཁྲུལ་མེད་ཐོགས་པ་མེད༔ ཤེས་བྱ་ཀུན་རིག་སོར་རྟོག་ཡེ་ཤེས་བསྟོད༔ དབང་ཤེས་གནས་འགྱུར་འགྲོ་བའི་བྱ་བྱེད་རྣམ་པར་དག༔ རྟོག་མེད་མཁྱེན་པ་བསམ་ཡས་སྤྲུལ་བ་ཡིས༔ ཞིང་ཁམས་ཀུན་ཏུ་སེམས་ཅན་དོན་བསྒྲུབ་པ༔ ལས་རབ་བྱ་བ་གྲུབ་པའི་ཡེ་ཤེས་བསྟོད༔ ༈ རྒྱལ་བ་སྐུ་གསུམ་བསྟོད་པ་ནི༔ ཨེ་མ་ཧོ༔ ཀ་དག་ཀློང་དུ་མཚན་མའི་ཆོས་ལས་འདས༔ ལྷུན་གྲུབ་དབྱིངས་ལ་ཡེ་ཤེས་ཡོན་ཏན་རྫོགས༔ ཟུངས་འཇུག་སྤྲུལ་བ་སྒྱུ་འཕྲུལ་དྲ་བའི་གར༔ ཀུན་བཟང་བསམ་མི་ཁྱབ་ལ་ཕྱག་འཚལ་བསྟོད༔ སྒྲིབ་གཉིས་བག་ཆགས་ཡོངས་དག་སྤང་བ་ཆེ༔ ཤེས་བྱའི་དཀྱིལ་འཁོར་ཀུན་མཁྱེན་རྟོགས་པ་ཆེ༔ འགྲོ་དོན་རྟག་ཁྱབ་ལྷུན་གྲུབ་སེམས་དཔའ་ཆེ༔ ཆེ་བ་གསུམ་ལྡན་རྒྱལ་བ་ཁྱོད་ལ་བསྟོད༔ སྤྲོས་པའི་མཚན་འཛིན་མ་ལུས་ཡེ་དག་ཅིང་༔ ཆོས་རྣམ་ཀུན་ཁྱབ་ཀུན་ལ་དབང་བསྒྱུར་བ༔ ཟག་པ་མེད་པའི་རང་བྱུང་ཡོན་ཏན་རྫོགས༔ ཀུན་བཟང་ཆོས་ཀྱི་སྐུ་ལ་ཕྱག་འཚལ་བསྟོད༔ ཆོས་ཀུན་ཆོས་ཀྱི་སྐུ་ལ་མཉམ་པར་བརྡལ༔ སྤྲོས་མེད་སྤྲོས་བཅས་ལས་འདས་ཟབ་ཅིང་ཆེ་༔ དུས་མེད་དུས་གསུམ་མ་འགག་རྟག་པ་དང་༔ དབྱིངས་ཡེ་ཐ་མི་དད་པར་གཅིག་ལ་བསྟོད༔ སྟོར་སྐུར་མཐའ་ལས་འདས་པས་ཡང་དག་པ༔ སྒྲིབ་གསུམ་དྲི་མ་རྣམ་བྲལ་གཙང་བ་དང་༔ རྣམ་པར་མི་རྟོག་དམིགས་མེད་འོད་གསལ་བ༔ ཡོན་ཏན་ཀུན་གཞི་རྫོགས་པའི་རྟེན་ལ་བསྟོད༔ གདོད་ནས་ལྷུན་གྱིས་གྲུབ་པའི་ཡེ་ཤེས་ནི༔ འོད་གསལ་རྒྱུན་མི་ཆད་པ་ལོངས་སྤྱོད་རྫོགས༔ ངེས་པ་ལྔ་ལྡན་ཕུན་སུམ་ཚོགས་པའི་དཔལ༔ ཀུན་བཟང་ལོངས་སྤྱོད་རྫོགས་ལ་ཕྱག་འཚལ་བསྟོད༔ རྣམ་པར་དག་པ་ས་བཅུའི་འཁོར་གྱིས་བསྐོར༔ སྟུག་པོ་བཀོད་པ་འོག་མིན་ལོངས་སྤྱོད་ཞིང་༔ རྣམ་སྣང་རིགས་ལྔ་ལ་སོགས་རྫོགས་སྐུར་སྣང་༔ ངོ་བོ་ངེས་པ་མཚནདཔེས་བརྒྱན་ལ་བསྟོད༔ གང་ལས་བྱུང་བ་བླ་ན་མེད་པའི་ཆོས༔ འཕྲིན་ལས་རྒྱལ་བའི་སྲས་པོར་ལུང་དུ་སྟོན༔ ལྷུན་གྲུབ་མཛད་པ་ཡིད་བཞིན་ནོར་བུ་ལྟར༔ སྣ་ཚོགས་སྣང་ཡང་རང་བཞིན་བྲལ་ལ་བསྟོད༔ ལོངས་སྤྱོད་རྫོགས་ལས་འཕྲིན་ལས་སྤྲིན་སྤྲོ་བ༔ འགྲོ་བའི་རེ་སྐོང་ཆགས་མེད་མཛད་པ་སྟོན༔ ཐུགས་རྗེ་གདུལ་བྱའི་རྗེས་འགྲོ་ཀུན་ལ་ཁྱབ༔ ཀུན་བཟང་སྤྲུལ་བའི་སྐུ་ལ་ཕྱག་འཚལ་བསྟོད༔ ཅི་ལྟར་འཕྲུལ་ཡང་དབྱིངས་ལ་གཡོ་བ་མེད༔ འགྲོ་ལ་ཕན་བཞེད་སྙིང་རྗེ་རྒྱུ་ཡི་ཚུལ༔ དག་དང་མ་དག་ཞིང་དུ་སྤྲུལ་སྒྱུར་ངོམ༔ འཁོར་བ་སྲིད་དུ་མཛད་པ་སྟོན་ལ་བསྟོད༔ རང་བཞིན་བཟོ་དང་སྐྱེ་བ་བྱང་སེམས་གསུམ༔ འཇུག་བྱེད་ཐབས་མཁས་འབྲས་བུ་གསུམ་ལ་སྦྱོར༔ སྨིན་བྱེད་ཐབས་ཟབ་ཚོགས་ཀུན་སྨིན་པར་བྱེད༔ འགྲོ་ཀུན་སྲིད་ལས་གྲོལ་བར་མཛད་ལ་བསྟོད༔ རང་བཞིན་རྣམ་དག་གློ་བུར་དྲི་ཚོགས་དག༔ བག་ཆགས་རྟེན་དུ་མ་གྱུར་གཙང་བ་དང་༔ རྣམ་རྟོག་གཞན་དབང་མ་གྱུར་བདག་དམ་པ༔ སྤྲོས་པའི་ཚོགས་ཀུན་རྣམ་པར་ཞི་ལ་བསྟོད༔ བག་ཆགས་རྒྱུ་བཅས་འགགས་པའི་བདེ་བ་དང་༔ འཁོར་འདས་འཕེལ་གྲིབ་མེད་པའི་སྲིད་ཞི་མཉམ༔ དེ་ཡི་རང་བཞིན་དག་པ་ནམ་མཁའ་ལྟར༔ རྟག་པ་དམ་པའི་ཕ་རོལ་ཕྱིན་ལ་བསྟོད༔ ཆོས་ཀྱི་སྐུ་ནི་དབྱིངས་སུ་ཐ་དད་མེད༔ ལོངས་སྤྱོད་རྫོགས་ནི་དགོངས་པ་ཐ་དད་མེད༔ སྤྲུལ་བའི་སྐུ་ནི་འཕྲིན་ལས་ཐུན་མོང་སྤྱོད༔ སྐུ་གསུམ་མཉམ་པ་ཉིད་ལ་ཕྱག་འཚལ་བསྟོད༔ ཆོས་སྐུ་སྐྱེ་འགག་བྲལ་བའི་རང་བཞིན་ཉིད་ཉིད༔ ལོངས་སྐུ་ཆོས་ཀྱི་ལོངས་སྤྱོད་རྒྱུན་ཆད་མེད༔ སྤྲུལ་སྐུ་འཕྲིན་ལས་བྱ་བྱེད་གཡེལ་བ་མེད༔ སྐུ་གསུམ་རྒྱུན་མི་ཆད་ལ་ཕྱག་འཚལ་བསྟོད༔ ཤེས་བྱའི་སྒྲིབ་བྲལ་དག་པ་ཆོས་སྐུར་སྣང་༔ ཉོན་མོངས་སྒྲིབ་བྲལ་དག་པ་ལོངས་སྐུར་སྣང་༔ ལས་ཀྱི་སྒྲིབ་བྲལ་དག་པ་ལོངས་སྐུར་སྣང་༔ སྐུ་གསུམ་དག་གསལ་སྣང་ལ་ཕྱག་འཚལ་བསྟོད༔ ༈ རྡོ་རྗེ་ལྔ་ཡི་བསྟོད་པ་ནི༔ ཨེ་མ་ཧོ༔ བསམ་ཀྱི་མི་ཁྱབ་སྐུ་གསུང་ཐུགས་ཡོན་ཏན༔ ཚད་མེད་འཕྲིན་ལས་རྡོ་རྗེ་རྣམ་པ་ལྔ༔ དོན་དམ་ཆོས་སྐུ་གདོད་ནས་དྲི་མ་བྲལ༔ གཟུགས་སྐུར་བསྐྱེད་སྨིན་ཡོན་ཏན་རྫོགས་ལ་བསྟོད༔ རྒྱལ་མཆོག་གི་གཟུགས་སྐུའི་ཡོན་ཏན་ནི༔ མཚན་བཟང་སོ་གཉིས་དཔེ་བྱད་བརྒྱད་ཅུ་དང་༔ འཕྲིན་ལས་རང་གཟུགས་ཁྲོ་བོའི་གར་དགུ་སོགས༔ ཐོགས་མེད་སྤྲུལ་བ་སྣ་ཚོགས་སྣང་ལ་བསྟོད༔ དམ་བཅའ་བརྟན་པས་ཞབས་མཐིལ་ལེགས་ཤིང་མཉམ༔ སྦྱིན་པ་དག་པས་ཞབས་མཐིལ་འཁོར་ལོས་མཚན༔ ཁྱད་གསོད་སྤང་བས་ལོང་བུ་མི་མངོན་ཞིང་༔ འཇིགས་ལས་སྐྱབས་པས་སོར་མོ་རིང་ལ་བསྟོད༔ ཕྲ་མ་སྤང་བས་ཕྱག་ཞབས་དྲྭ་བ་འབྲེལ༔ གོས་དང་བཟའ་བཏུང་འདོད་ཡོན་སྦིན་པའི་འབྲས༔ མཐིལ་བཞི་ཕྲག་གོང་ལྟག་པའི་གནས་བདུན་མཐོ༔ དམ་ཆོས་བཟུང་པས་བྱིན་ཕྲ་མཛེས་ལ་བསྟོད༔ གསང་སྲུང་འཁྲིག་སྤངས་གསང་རྩ་སྦུབས་སུ་ནུབ༔ དགེ་ཚོགས་སྤྱད་པས་སྐུ་སྟོད་སེངྒེ་འདྲ༔ ཡང་དག་སྤྱོད་པས་ཐལ་གོང་ཁེངས་ཤིང་རྒྱས༔ མི་འཇིགས་བྱིན་པས་དཔུང་མགོ་ཟླུམ་ལ་བསྟོད༔ གཞན་དོན་སྤྲོ་བས་ཕྱག་མཐིལ་འཇམ་ལ་མཉམ༔ བརྩོན་འགྲུས་ཕྱག་རིང་པུས་མོ་འགེབ་ལ་བསྟོད༔ དགེ་བཅུས་སྐུ་ནི་དྲི་མེད་འོད་དཀྱིལ་ལྡན༔ སྨན་སྦྱིན་མགྲིན་པ་དུང་ལྟར་འཁྱིལ་ལ་བསྟོད༔ དགེ་སྦྱོར་རྫོགས་པས་འགྲམ་པ་རི་དྭགས་འདྲ༔ བསམ་པ་མཉམ་པས་ཐག་བཟང་བཞི་བཅུའི་ཚེམས༔ སྒོ་གསུམ་བསྲུང་བས་མཆེ་བ་རབ་ཏུ་དཀར༔ བདེན་གསུངས་ལྗགས་རིང་བསམ་དུ་མེད་ལ་བསྟོད༔ རོ་བྲོ་སྦྱིན་པས་ལྗགས་ཀྱི་བྲོ་མཆོག་མྱོང་༔ དགའ་བའི་ཚིག་སྨྲས་ཚངས་བའི་དབྱངས་དང་ལྡན༔ བྱམས་པས་བསྲུང་བས་སྤྱན་བཟང་ཨུཏྤལ་འདྲ་༔ གཡོ་མེད་རྫི་མ་བ་གླང་ལྟ་བུར་བསྟོད༔ བསྔགས་འོས་བསྟོད་པས་མཛོད་སྤུ་སུམ་ཅུ་གཉིས༔ བླ་མར་གུས་པས་གཙུག་ཏོར་ལུས་གནས་དྲང་༔ དམ་ཆོས་འཚོལ་བས་པགས་སྲབ་གསེར་གྱིས་མདོག༔ འདུ་འཛི་སྤང་བས་བ་སྤུ་འཇམ་ལ་བསྟོད༔ གདམས་ངག་འཛིན་པས་བ་སྤུ་གཡས་སུ་འཁྱིལ༔ བརྩེ་ཞིང་མཚོན་སྤངས་དབུ་སྐྲ་མཐོན་མཐིང་དག༔ ཏིང་འཛིན་ལ་སྦྱར་སྐུ་དཀྱིལ་ཆུ་ཞེང་གབ༔ ཀུན་ཏུ་བཟང་པོ་སྲེད་མེད་སྟོབས་མངའ་བསྟོད༔ ལམ་གྱི་ཚོགས་གཉིས་འབྲས་བུར་ཤར་བ་ཡི༔ དཔེ་བྱད་བཟང་པོ་ལྟ་བས་མི་ངོམ་པ༔ སེན་མོ་ཟངས་མདོག་ཐུགས་ཀར་གཡུང་དྲུང་འཁྱིལ༔ འགྲོ་བའི་མོས་ངོར་མི་མཐུན་མེད་ལ་བསྟོད༔ ངག་སྒྲིབ་དག་པའི་གསུང་གི་ཡོན་ཏན་ནི༔ སྣང་སྲིད་སྒྲ་ཀུན་སྔགས་སུ་ཤར་བ་ཡི༔ ཡན་ལག་ཅུ་གདུལ་བྱའི་རྗེས་འགྲོ་བའི༔ གང་འདུལ་སྒྲ་གྲགས་ཐོས་གྲོལ་གསུང་ལ་བསྟོད༔ གསུང་བཟང་མཉེན་དང་འཇམ་དང་ཡིད་དུ་འོང་༔ གང་གསུང་ཡིད་དུ་འཐད་ལ་རྣམ་པར་དག༔ དྲི་མེད་རབ་ཏུ་གསལ་དང་སྙན་ཞིང་འཇེབས༔ མཉམ་པར་འོས་ཤིང་མི་ཚུགས་པ་ལ་བསྟོད༔ སྙོན་དང་དུལ་དང་མི་རྩུབས་མི་རླངས་པ༔ རབ་དུལ་རྣ་བར་སྙན་ཞིང་ལུས་ཚིམ་བྱེད༔ སེམས་ཚིམ་སྙིང་དགར་བྱེད་དང་དགའ་བདེ་བསྐྱེད༔ གདུང་བ་མེད་དང་ཀུན་ཤེས་པ་ལ་བསྟོད༔ རྣམ་པར་རིག་པར་བྱ་དང་རྣམ་གསལ་བ༔ དགའ་བར་བྱེད་དང་མངོན་དུ་དགའ་བར་བྱེད༔ ཀུན་ཤེས་བྱེད་དང་རྣམ་པར་རིག་བྱེད་པ༔ རིགས་པ་དང་ནི་རྣམ་པར་འབྲེལ་ལ་བསྟོད༔ ཟློས་སྐྱོན་མེད་དང་སེངྒེའི་སྒྲ་ཡི་ཤུགས༔ གླང་ཆེན་སྒྲ་སྐད་འབྲུག་སྒྲ་ལྟ་བུའི་དབྱངས༔ ཀླུ་དབང་སྒྲ་དང་དྲི་ཟའི་གླུ་ལྟར་སྙན༔ ཀ་ལ་པིངྐ་ཚངས་བའི་དབྱངས་ལ་བསྟོད༔ ཤང་ཤང་ཏེའུ་སྒྲ་དང་དབང་པོའི་དབྱངས༔ རྔ་སྒྲ་ལྟར་སྙན་རྣམ་པར་མི་ཁེངས་པ༔ མི་དམའ་སྒྲ་ཀུན་ཀྱིས་ནི་རྗེས་སུ་ཞུགས༔ ཚིག་ཟུར་མ་ཆག་མ་ཚང་མེད་ལ་བསྟོད༔ སྒྲ་དབྱངས་མ་ཞུམ་པ་དང་མི་ཞན་པ༔ རབ་དགའ་ཁྱབ་དང་ཀུན་ཏུ་ཆུབ་པ་དང་༔ དབྱངས་ཀྱི་རྒྱུན་ཆགས་འབྲེལ་བ་ཀུན་དང་འཚམས༔ སྒྲ་ཀུན་རྫོགས་དང་དབང་པོ་ཚིམ་ལ་བསྟོད༔ རབ་ཏུ་མ་སྨད་པ་དང་མི་འགྱུར་པ༔ མ་བརྟབས་དལ་འགྲོ་འཁོར་ཚོགས་ཡོངས་ལ་གྲགས༔ ཐམས་ཅད་རྣམ་ཀུན་མཆོག་ལྡན་སྟོང་ཉིད་དབྱིངས༔ རྣམ་པ་ཅིར་ཡང་འཆར་བའི་གསུང་ལ་བསྟོད༔ ཐུགས་ནི་ཟག་པ་ཀུན་བྲལ་མཁའ་ལྟ་བུ༔ ཡེ་ཤེས་ཡོན་ཏན་མ་བཅོས་ལྷུན་གྱིས་གྲུབ༔ དོན་དམ་ཆོས་སྐུ་བསམ་མི་ཁྱབ་པའི་གཏེར༔ སྤྲོས་བྲལ་རྣམ་པ་ཀུན་ལྡན་མཆོག་ལ་བསྟོད༔ འཕགས་ལམ་ཡན་ལག་བརྒྱད་ལྡན་ཟག་པ་མེད༔ ཚད་མེད་རྣམ་པ་བཞི་བོ་ཡོངས་སུ་རྫོགས༔ ནང་ཤེས་སྐྱེ་མཆེད་བཞི་དང་རྣམ་ཐར་བརྒྱད༔ སྙོམས་འཇུག་རྣམ་དགུ་ཟག་མེད་མཁྱེན་ལ་བསྟོད༔ འབྱུང་ལྔ་ཁ་དོག་རྣམ་ཤེས་རྣམ་པ་བཅུ༔ ཕྱི་ནང་ཟད་པ་ཟིལ་གནོན་སྐྱེ་མཆེད་བརྒྱད༔ ཕ་རོལ་ཉོན་མོངས་ས་བོན་དྲུག་ནས་འབྱིན༔ གཞན་དོན་སྨོན་འཇུག་ཟག་མེད་མཁྱེན་ལ་བསྟོད༔ ལྷ་ཡི་མིག་སོགས་མངོན་ཤེས་རྗེས་དྲན་དྲུག༔ གང་འདུལ་ཁམས་དབང་སོ་སོར་རིག་པ་བཞི༔ རྟེན་དམིགས་ཐུགས་དང་ཡེ་ཤེས་ཡོངས་དག་བཞི༔ ཚེ་སེམས་དབང་བཅུ་ཟག་མེད་མཁྱེན་ལ་བསྟོད༔ སྟོབས་བཅུ་མི་འཇིགས་བཞི་དང་སྲུང་མེད་གསུམ༔ བདེ་གཤེགས་ཆོས་སྟོན་དྲན་པ་ཉེར་བཞག་གསུམ༔ དུས་ལས་མི་ཡོལ་བསྙེལ་བ་མེད་པའི་གཟུངས༔ སྒྲིབ་གཉིས་ཡང་དག་ཟག་མེད་མཁྱེན་ལ་བསྟོད༔ སྐྱེ་བོ་ཀུན་ལ་ཕན་པའི་ཐུགས་རྗེ་ཆེ༔ གཞན་ལས་ཁྱད་འཕགས་མ་འདྲེས་ཆོས་བཅོ་བརྒྱད༔ རྣམ་པ་ཀུན་མཁྱེན་སྤང་བྱའི་གནས་ལས་གྲོལ༔ ཆོས་སྐུའི་ཟག་མེད་མཁྱེན་པའི་ཡེ་ཤེས་བསྟོད༔ གསང་གསུམ་གཉིས་སུ་མེད་པའི་ཡེ་ཤེས་མཆོག༔ འཕགས་པའི་སྟོབས་བཅུ་མི་འཇིགས་རྣམ་པ་བཞི༔ མ་འདྲེས་བཅོ་བརྒྱད་སྙིང་རྗེ་ཆེན་པོ་སོགས༔ དོན་གཉིས་ལྷུན་གྲུབ་ཡོན་ཏན་རྒྱ་མཚོར་བསྟོད༔ འགྲོ་བ་མ་ལུས་མཐོ་རིས་ཐར་བའི་གནས༔ གང་དུ་འཕེན་པའི་རྒྱུ་དང་འབྲས་བུ་སོགས༔ འཁོར་འདས་རྒྱུ་རྐྱེན་འབྲས་བུར་གང་སྤྱོད་པ༔ གནས་དང་གནས་མིན་མཁྱེན་པའི་སྟོབས་ལ་བསྟོད༔ དགེ་སྡུག་གང་ལས་འབྲས་བུ་གང་འབྱིན་པ༔ ལས་དང་རྣམ་པར་སྨིན་པ་མཁྱེན་པའི་སྟོབས༔ བསམ་གཏན་རྣམ་པར་ཐར་དང་ཏིང་ངེ་འཛིན༔ ཀུན་ནས་རྣམ་བྱང་མཁྱེན་པའི་སྟོབས་ལ་བསྟོད༔ སེམས་ཅན་དབང་པོའི་རབ་དབྱེ་མཐའ་ཡས་པ༔ མཆོག་དང་མཆོག་མ་ཡིན་པ་མཁྱེན་པའི་སྟོབས༔ ཐེག་གསུམ་རིགས་ཅན་དད་པ་རང་བཞིན་དང་༔ མོས་པ་སྣ་ཚོགས་མཁྱེན་པའི་སྟོབས་ལ་བསྟོད༔ རིགས་ཅན་སོ་སོའི་བག་ཆགས་ཆེ་ཆུང་དང་༔ རྒྱས་འགྱུར་རིགས་ཀྱི་ཁམས་རྣམས་མཁྱེན་པའི་སྟོབས༔ འགྲོ་བ་རྒྱུད་ལྔར་སྐྱེ་བའི་ལས་ཉོན་དང་༔ བྱང་ཆུབ་ཐོབ་པའི་ལམ་མཁྱེན་སྟོབས་ལ་བསྟོད༔ དགེ་ཚོགས་ཆུད་མི་གསན་པས་ཚེ་རབས་ཀུན༔ སྔོན་གནས་རྗེས་སུ་དྲན་པ་མཁྱེན་པའི་སྟོབས༔ ཕྱི་མའི་མུ་མཐར་ཐུག་པའི་ཚེ་རབས་ཀུན༔ འཆི་འཕོ་སྐྱེ་བ་མཁྱེན་པའི་སྟོབས་ལ་བསྟོད༔ སྤང་བྱ་ཟད་པས་སླར་ཡང་མི་སྐྱེ་ཞིང་༔ ཟག་པ་ཟད་པ་མཁྱེན་པའི་སྟོབས་དང་ལྡན༔ སྒྲིབ་པ་རྣམས་འཇོམས་སྒྲིབ་པས་མི་ཕྱེད་པའི༔ རྡོ་རྗེ་ལྟ་བུའི་སྟོབས་བཅུ་རྫོགས་ལ་བསྟོད༔ ཆོས་རྣམས་ཐུགས་ཆུད་བྱང་ཆུབ་ལ་མི་འཇིགས༔ རྒོལ་བའི་གནས་མེད་ཟག་ཟད་ལ་མི་འཇིགས༔ བར་གཅོད་རྣམ་གཟིགས་ལུང་སྟོན་ལ་མི་འཇིགས༔ རྣམ་གྲོལ་ལམ་སྟོན་མི་འཇིགས་ཐོབ་ལ་བསྟོད༔ སྤྱོད་པ་རྟོགས་པ་མཛད་པ་མཁྱེན་པ་སྟེ༔ འཇིག་རྟེན་མཐུ་ཆེན་ཉན་རང་དགྲ་བཅོམ་པའི༔ ཡོན་ཏན་ཕལ་བ་རྣམས་ལས་ཁྱད་འཕགས་པའི༔ མ་འདྲེས་བཅོ་བརྒྱད་ཡོངས་སུ་རྫོགས་ལ་བསྟོད༔ བརྡེགས་འཆོས་ལ་སོགས་སྐུ་ལ་འཁྲུལ་བ་མེད༔ སྨོད་པ་ལ་སོགས་གསུང་ལ་ཅ་ཅོ་མེད༔ དུས་ཀུན་རྩོལ་མེད་ཐུགས་ལ་བསྙེལ་བ་མེད༔ རྟག་ཏུ་མི་གཡོ་ཏིང་འཛིན་བརྙེས་ལ་བསྟོད༔ འཁོར་འདས་རང་བཞིན་ཐ་དད་མི་མངའ་གཟིགས༔ འདུལ་བའི་སྐལ་བ་ལྡན་པའི་གང་ཟག་ལ༔ དུས་ལས་མི་ཡོལ་སྙོམ་ལས་གྱུར་པ་མེད༔ སོ་སོར་མ་བརྟགས་བཏང་སྙོམ་མེད་ལ་བསྟོད༔ སེམས་ཅན་དོན་མོས་འདུན་པ་ཉམས་པ་མེད༔ འགྲོ་བའི་དོན་ལ་བརྩོན་འགྲུས་ཉམས་པ་མེད༔ བསམ་སྤྱོད་ཀུན་ཤེས་དྲན་པ་ཉམས་པ་མེད༔ སྤྱོད་མཐུན་ཤེས་རབ་ཉམས་པ་མེད་ལ་བསྟོད༔ ཇི་ལྟར་བརྙེས་པའི་ཏིང་ངེ་འཛིན་གྱི་སྒོ༔ དུས་ཀུན་མཉམ་བཞག་ཏིང་འཛིན་ཉམས་པ་མེད༔ ཕྱོགས་རེ་མ་ཡིན་ཤེས་ཉོན་སྒྲིབ་ཀུན་ལས༔ རྣམ་པར་གྲོལ་བ་ཉམས་པ་མེད་ལ་བསྟོད༔ འདས་པར་ཐོགས་མེད་ཡེ་ཤེས་མཐོང་བ་འཇུག༔ ཐ་མ་མེད་པའི་བསྐལ་བའི་འབྱུང་འགྱུར་སོགས༔ མ་འོངས་དུས་ལ་མ་ཆགས་མཐོང་བ་འཇུག༔ ད་ལྟ་ཕྱོགས་བཅུ་དུས་གཅིག་མཁྱེན་ལ་བསྟོད༔ སྐུ་གསུང་ཐུགས་གསུམ་ཡོངས་སུ་དག་པ་ཡིས༔ ཡེ་ཤེས་ལས་བྱུང་ཡེ་ཤེས་སྔོན་དུ་འགྲོ༔ ཡེ་ཤེས་དབྱིངས་ནས་ཡེ་ཤེས་མཛད་པ་སྟོན༔ ཡེ་ཤེས་རྗེས་འགྲོ་ལྷན་སྐྱེས་ཡེ་ཤེས་བསྟོད༔ རྒྱལ་བའི་འཕྲིན་ལས་ལྷུན་གྲུབ་ཕྱོགས་རེ་མེད༔ སྨོན་ལམ་རྒྱ་ཆེ་སྐྱེ་རྒུའི་རེ་བ་སྐོང་༔ ཐོགས་པ་མེད་པ་དུས་རྣམས་ཀུན་ཏུ་འཇུག༔ ཚད་མེད་ཡེ་ཤེས་འཕྲིན་ལས་སྒྲུབ་ལ་བསྟོད༔ རྣམ་པར་རྟོག་པའི་མཚན་མ་དང་བྲལ་ཡང་༔ སྨོན་ལམ་རྒྱ་ཆེན་དགོངས་པ་ཡོངས་རྫོགས་མཐུས༔ ཡིད་བཞིན་ནོར་ལྟར་འབད་མེད་ཤུགས་འབྱུང་དུ༔ གསང་གསུམ་ཆོས་འཕྲུལ་འཕྲིན་ལས་མཛད་ལ་བསྟོད༔ གདུལ་བྱ་རང་རང་སྐལ་བ་དང་འཚམ་པའི༔ འཕྲིན་ལས་སྣང་བ་ཆུ་དྭངས་ཟླ་བ་ལྟར༔ སྐུ་གསུང་ཐུགས་ཀྱི་མཛད་པ་རིས་མེད་དུ༔ ཅིག་ཆར་འཆར་བའི་འཕྲིན་ལས་མཛད་ལ་བསྟོད༔ སེམས་ཅན་རེ་རེ་འདུལ་ལ་དེར་མཐུན་པའི༔ འཕྲིན་ལས་བསམ་ཡས་འགྱེད་པ་ཉི་འོད་བཞིན༔ འགྲོ་རྒྱུད་པདྨའི་དགའ་ཚལ་དེ་སྙེད་ཀུན༔ དུས་གཅིག་རབ་འབྱེད་འཕྲིན་ལས་མཛད་ལ་བསྟོད༔ ཕྱོགས་བཅུའི་ཞིང་ཁམས་མཐའ་ཡས་ཅི་སྙེད་པར༔ ནམ་མཁའ་བཞིན་དུ་སྐྱེ་འཇིག་དང་བྲལ་ཡང་༔ དུས་ལ་བབ་ན་དེ་ཉིད་དུ་སྣང་ཞིང་༔ མཛད་པ་ནམ་ཡང་རྒྱུན་ཆད་མེད་ལ་བསྟོད༔ ཕྱོགས་མཐས་གཏུག་པའི་འགྲོ་བ་ཅི་སྙེད་པར༔ དུས་གཅིག་སྣ་ཚོགས་སྤྲུལ་བའི་རོལ་བ་ནི༔ སྐྱེ་དང་བྱང་ཆུབ་ཆོས་འཁོར་སྐོར་བ་དང་༔ མྱ་ངན་འདས་སོགས་བསམ་ཡས་སྟོན་ལ་བསྟོད༔ སྐལ་བ་མཆོག་དམན་བར་མའི་འགྲོ་བ་ལ༔ ཁམས་དབང་མཐུན་པའི་འཕྲིན་ལས་ཉི་ཟེར་བཞིན༔ སོ་སོའི་མོས་པར་འཚམས་པའི་འཕྲིན་ལས་མཆོག༔ དམིགས་པ་མེད་པར་ཤུགས་ཀྱིས་འཇུག་ལ་བསྟོད༔ རྒྱལ་བའི་འཕྲིན་ལས་འཇུག་པའི་ཁམས་ཀུན་ཏུ༔ འཚེ་དང་ངན་སོང་ཐབས་མ་ཡིན་པ་དང་༔ ཁམས་གསུམ་སྡུག་བསྔན་དམན་ལས་སྐྱོབས་པ་སྟེ༔ བསམ་ཡས་འཕྲིན་ལས་ལྷུན་གྱིས་གྲུབ་ལ་བསྟོད༔ ༈ ཞི་ཁྲོ་སྤྲུལ་བའི་བསྟོད་པ༔ ཨེ་མ་ཧོ༔ ཐབས་ལ་མ་རྨོངས་གདུལ་བྱ་འདུལ་བ་ཡི༔ རབ་འབྱམས་ཞི་དང་ཁྲོ་བོའི་རྣམ་འགྱུར་ནི༔ མཐོང་ན་མི་མཐུན་མེད་པའི་ཉམས་དགུ་དང་༔ ཁྲོ་བོའི་གར་དགུས་རྣམ་པར་རོལ་ལ་བསྟོད༔ སྐྱེ་དང་ང་རྒྱལ་མ་སྤང་གནས་དག་པས༔ ཡན་ལག་གསེར་ཞུན་ལྟར་བུར་མཉེན་ཆགས་ཤིང་༔ ན་དང་ཞེ་སྡང་མ་སྤང་དག་པས༔ སྐུ་སྐབས་ཕྱེད་ཅིང་འཚམས་པས་ལྕུག་ལ་བསྟོད༔ འཆི་དང་འདོད་ཆགས་མ་སྤང་གནས་སུ་དག་པས༔ གཡུ་ཡི་ལྗང་པ་ལྟར་བུར་འཁྲིལ་བག་ཆགས༔ གཏི་མུག་མ་སྤང་གནས་སུ་དག་པའི་བརྡར༔ སྐུ་རྐེད་དྲང་ཞིང་ལྡེམ་པར་སྣང་ལ་བསྟོད༔ རྒ་དང་ཕྲག་དོག་མ་སྤང་གནས་སུ་དག་པས༔ འཇམ་ཞིང་གཞོན་ཤ་ཆགས་པའི་ངང་ཚུལ་ཅན༔ མ་རིག་དང་བྲལ་མཚན་དཔེའི་མེ་ཏོག་བཀྲ༔ གཙང་ཞིང་ཟླ་ལྟར་ཁ་དོག་གསལ་ལ་བསྟོད༔ ཟད་པར་སྐྱེ་མཆེད་ཆེ་བ་མ་ལུས་རྫོགས༔ རང་བྱུང་ཡོན་ཏན་ལྷུན་གྲུབ་བཀྲག་ཅིང་འཚེར༔ རི་བོ་ལྟར་བརྗིད་ཡིད་འོང་ལྷུན་སྟུག་པ༔ ཟིལ་གནོན་སེངྒེའི་གཟི་བྱིན་ལྡན་ལ་བསྟོད༔ འདོད་ལྟ་ཆགས་ཅན་འདུལ་ཕྱིར་སྒེག་པའི་ཉམས༔ ཞེ་སྡང་བདུད་བཞི་བཅོམ་པ་དཔའ་བའི་ཉམས༔ གཏི་མུག་བགེགས་ཚོགས་འདུལ་བའི་འཇིགས་རུང་ཉམས༔ ཁྲོ་ཆགས་སྐུ་ཡི་རྣམ་འགྱུར་ངོམ་ལ་སྟོད༔ དགོད་པའི་སྒྲ་ཡིས་ཆགས་ཅན་དབང་དུ་བྱེད༔ དྲག་ཤུལ་གཤེ་བས་ཞེ་སྡང་རྟོག་པ་འཆིང་༔ འཇིགས་པའི་ང་རོས་གཏི་མུག་དབྱིངས་སུ་སྡོམ༔ ལོག་འདྲེན་གཞོམ་མཛད་ཁྲོ་བོའི་གསུང་ལ་བསྟོད༔ སྙིང་རྗེ་བརྩེ་བས་ཆགས་ཅན་རྗེས་སུ་འཛིན༔ རྔམ་པ་ཁྲོས་པས་ཞེ་སྡང་བཙན་ཐབས་འདུལ༔ ཞི་བ་དབྱིངས་ལས་མ་གཡོས་དྲག་སྐུར་སྡང་༔ གཏི་མུག་རིག་སྟོང་ཆོས་སྐུར་སྤོར་ལ་བསྟོད༔ བདེ་སྟོང་ཟུང་འཇུག་དབྱིངས་དང་ཡེ་ཤེས་གཅིག༔ ཞི་ལྷག་ཟུང་འཇུག་རྡོ་རྗེ་པདྨར་སྦྱོར༔ སྟོང་ཉིད་སྙིང་རྗེ་མི་འབྲལ་རྩ་སྣ་འབྲེལ༔ ཟག་བྲལ་དགའ་བས་མཆུ་སྒྲོས་གཞིབ་ལ་བསྟོད༔ རྣམ་རྟོག་གཞོམ་མེད་རྡོ་རྗེའི་བྲག་ཆེན་སྟེང་༔ ཉོན་མོངས་སྐྱོན་བྲལ་པདྨ་རྒྱས་པའི་ཁར༔ ཤེས་སྒྲིབ་རྣམ་དག་ཐབས་ཤེས་ཉི་ཟླའི་སྟེང་༔ བདག་མེད་མེ་དཔུང་ཀློང་དུ་འགྱིང་ལ་བསྟོད༔ སྐུ་གསུང་ཐུགས་གསུམ་ཡེ་ཤེས་གཅིག་གི་ངང་༔ ཉིད་ལས་མི་གཞན་རྒྱན་གྱི་འཁོར་ལོ་སྟེ༔ ཟག་མེད་བསམ་གྱིས་མི་ཁྱབ་རོལ་བ་ལས་༔ ཆ་མེད་ཀུན་ཁྱབ་བདེ་བ་ཆེ་ལ་བསྟོད༔ ༄། །གཙོ་བོ་མཚོ་སྐྱེས་རྡོ་རྗེ། སྣང་བ་མཐའ་ཡས་ཡེ་ཤེས་སྒྱུ་མའི་འཕྲུལ༔ དྲི་མེད་མཚོ་ལས་རང་བྱུང་རྡོ་རྗེ་འཆང་༔ རྒྱལ་པོ་སྒྱུ་འཕྲུལ་ཚུལ་འཆང་པདྨ་འབྱུང་༔ སྣང་སྲིད་ཟིལ་གྱིས་གནོན་ལ་ཕྱག་འཚལ་བསྟོད༔ པདྨ་འབྱུང་གནས་སྐུ་མདོག་དཀར་དམར་མདངས༔ ཞི་འཛུམ་ཡིད་ཙམ་ཁྲོ་བའི་རྣམ་པ་ཅན༔ ཕྱག་གཡས་གསེར་རྡོར་རྩེ་ལྔ་ཐུགས་ཀར་བསྣམས་༔ གཡོན་པ་མཉམ་གཞག་ལྟེ་བར་བཀོད་པའི་སྟེང་༔ བདེ་སྐྱོང་སྣོད་མཆོག་ཚེ་བུམ་འཛིན་ལ་བསྟོད༔ གྲུ་མོ་གཡོན་ཏུ་ཁ་ཊྭཱྃ་རྩེ་གསུམ་བསྟེན༔ དབུ་ལ་མཐོང་གྲོལ་པདྨའི་མཉེན་ཞུ་ལ༔ རྩེ་མོར་རྡོ་རྗེ་རྩེ་ལྔ་རྨ་བྱའི་མདོངས༔ གཡས་གཡོན་རྒོད་ཀྱི་ཐེལ་ཆུང་མཛེས་ལ་བསྟོད༔ མེ་ལོང་ཉི་ཟླ་དར་གྱི་ཅོད་པན་སོགས༔ མཐོང་གྲོལ་ཞྭ་ལ་བརྡ་རྟགས་སྣ་ཚོགས་ལྡན༔ ཆོས་གོས་དམར་པོ་གསེར་གྱི་ཧ་རི་ཅན་༔ སྔགས་ཀྱི་ཆ་ལུགས་ན་བཟའ་ཕོད་ཁ་མཐིང་༔ གསང་བ་དྲི་མེད་རྡོ་རྗེའི་འཇམ་གོས་དཀར༔ ཐེག་གསུམ་རྫོགས་པའི་ཆས་ཀྱིས་སྤྲས་ལ་བསྟོད༔ འཁོར་སྒྱུར་ཆ་ལུགས་ཟབ་ཆེན་བེར་སྨུག་དང་༔ རྡོ་རྗེའི་སྐ་རག་རིན་ཆེན་སྟོད་གཡོག་དང་༔ གསེར་གྱི་སྙན་ཆ་ཕྱག་ཞབས་གདུ་བུས་རྒྱན༔ རྡོ་རྗེ་སྐྱིལ་ཀྲུང་མངོན་པར་རྫོགས་ལ་བསྟོད༔ སྐུའི་ཆ་ཤས་རེ་རེར་ཡང་བསྐལ་བའི་བར༔ ཅི་ཙམ་བལྟས་ཀྱང་མི་ངོམས་པ་མི་སྲིད་ཅིང་༔ མཚན་དཔེ་མཆོག་ཏུ་རྒྱས་པའི་གཟི་བརྗིད་ནི༔ ཉི་མ་འབུམ་ཀྱི་འོད་ཟེར་སྤྲོ་ལ་བསྟོད༔ ཡེ་ཤེས་རོལ་བ་བདེ་ཆེན་བསྐྱེད་པའི་ཡུམ༔ རིགས་ལྔའི་མཁའ་འགྲོ་སྒྱུ་མའི་གར་མཁན་མ༔ ཡིད་འཕྲོག་ལངས་ཚོ་སྨིན་པའི་གཟུངས་མ་ལྔ༔ དཔའ་བོ་མཁའ་འགྲོ་འབུམ་སྡེར་བཅས་ལ་བསྟོད༔ དག་པའི་འཁོར་ལྔ་སྙིང་གི་བུ་དགུ་དང་༔ རྗེ་འབངས་ཉེར་ལྔ་རྒྱ་བོད་མཁས་གྲུབ་ཚོགས༔ གྲུབ་པའི་ས་བརྙེས་འགྲོ་བའི་དཔལ་གྱུར་པ༔ རིག་འཛིན་བླ་མའི་ཚོགས་ལ་ཕྱག་འཚལ་བསྟོད༔ ༈ མན་ངག་དང་པོ༔ གུ་རུ་མེ་ཕྲེང་རྩལ༔ སྤྲོས་བྲལ་དབྱིངས་ལས་འོད་གསལ་སྣང་བའི་ཆ༔ ཞི་བར་གནས་ཀྱང་ཁྲོ་ཞིང་གཏུམ་པའི་ཚུལ༔ ཉོན་མོངས་གཡུལ་ངོ་བཟློག་པའི་པདྨ་འབྱུང་༔ དབང་དྲག་ཧེ་རུ་ཀ་ལ་ཕྱག་འཚལ་བསྟོད༔ པདྨ་ཟླ་ཉི་སྲིན་པོ་ཕོ་མོའི་སྟེང་༔ ཆེ་མཆོག་པདྨ་དྲག་པོ་ཞལ་གསུམ་པ༔ གཡས་དཀར་གཡོན་ལྗང་དབུས་དམར་ཞི་ཁྲོ་གཏུམ༔ ཕྱག་དྲུག་མཚོན་ཆ་བསྣམས་ལ་ཕྱག་འཚལ་བསྟོད༔ གཡས་ན་རྡོ་རྗེ་ཐོ་བ་མེ་དཔུང་དང་༔ གཡོན་ན་ཐོད་ཁྲག་ལྕགས་སྡིག་ཕུར་པ་བསྣམས༔ ཞབས་བཞི་གྱད་ཀྱི་འདོར་སྟབས་ཚུལ་དུ་བགྲད༔ དཔལ་དང་དུར་ཁྲོད་ཆས་བརྒྱད་རྫོགས་ལ་བསྟོད༔ ཡུམ་མཆོག་དམར་སྐྱ་གྲི་གུག་ཐོད་པ་འཛིན༔ གཟིགས་ཤམ་རུས་པའི་རྒྱན་ལྔ་མཛེས་པར་སྤྲས༔ སྐུ་ལས་མེ་དཔུང་ཁྲོ་ཚོགས་ལྕགས་སྡིག་འཕྲོ༔ སྤྱི་བོར་ཡེ་ཤེས་བྱ་ཁྱུང་འཕྲོ་ལ་བསྟོད༔ སྣ་ཚོགས་སྤྲུལ་བའི་གར་མཛད་བཅོ་བརྒྱད་ཕྱག༔ རྒྱལ་བསེན་དམ་སྲིའི་གཤེད་གཅིག་ཁྲོ་བའི་ཉམས༔ གཏུམ་དྲག་དམར་ནག་ཞལ་གཅིག་ཕྱག་གཉིས་པ༔ ཞབས་གཉིས་རྒྱལ་བསེན་ཕོ་མོ་གནོན་ལ་བསྟོད༔ ཕྱག་གཡས་རྡོ་རྗེ་རྩེ་དགུ་མེ་འབར་ཕྱར༔ གཡོན་པ་སྡིག་མཛུབ་ལྕགས་སྡིག་མགོ་དགུ་འཛིན༔ མེ་དཔུང་ཀློང་ཏུ་ཧཱུྃ་ཕཊ་དྲག་སྔགས་སྒྲོགས༔ བསྟན་པ་སྲུང་ཞིང་མཐའ་དམག་བཟློག་ལ་བསྟོད༔ པདྨ་དྲག་པོའི་བཀའ་ཡི་གཉེར་བྱང་འཛིན༔ སྔགས་བདག་དྲེགས་པ་དཔལ་མགོན་བདུན་ཅུ་དང་༔ འཇིག་འདས་སྲུང་མའི་ཚོགས་རྣམས་སྤྲིན་ལྟར་གཏིབ༔ མཐུ་ལྡན་བརྒྱུད་གསུམ་དམ་ཅན་ཚོགས་ལ་བསྟོད༔ ༈ མན་ངག་གཉིས་པ༔ གུ་རུ་སྨན་བླ༔ ཤར་ཕྱོགས་བཻཌཱུརྱ་འོད་ཞིང་གི་དཔལ༔ མཚན་ཐོས་ཙམ་གྱིས་དུག་གསུམ་ནད་སེལ་བའི༔ སྨན་གྱི་བླ་མ་སྐུ་མདོག་མཐིང་འོད་འབར༔ མཆོག་སྤྱིན་མཉམ་བཞག་མཛད་ལ་ཕྱག་འཚལ་བསྟོད༔ ཆོས་གོས་རྣམ་གསུམ་གསོལ་ཞིང་དཀྱིལ་ཀྲུང་བཞུགས༔ དབུ་ལ་གཙུག་ཏོར་ཞབས་ལ་འཁོར་ལོས་མཚན༔ ཨ་རུ་རིགས་ལྔ་བདུད་རྩིའི་ལྷུང་བཟེད་འཛིན༔ ནུས་པས་ནད་གདོན་ཞི་ལ་ཕྱག་འཚལ་བསྟོད༔ བདེ་གཤེགས་མཆེད་བརྒྱད་མཚན་དང་དཔེ་བྱད་ལྡན༔ སངས་རྒྱས་སྟོང་དང་བདུད་རྩི་སྨན་གྱི་ལྷ༔ རིགས་དྲུག་དྲང་སྲོང་མངོན་ཤེས་མཐུ་སྟོབས་ཅན༔ ཚེ་ཡི་རིག་བྱེད་བདག་པོ་རྣམས་ལ་བསྟོད༔ གནོད་སྦྱིན་སྡེ་དཔོན་བཅུ་གཉིས་བདུན་འབུམ་འཁོར༔ རྒྱལ་ཆེན་སྡེ་བཞི་གནོད་སྦྱིན་ཞིང་བློན་དང་༔ དཀར་ཕྱོགས་སྐྱོང་བའི་ལྷ་ཀླུ་དགེ་བསྙེན་སོགས༔ བདུད་རྩི་སྨན་གྱི་སྲུང་མ་ཡོངས་ལ་བསྟོད༔ ༈ མན་ངག་གསུམ་པ༔ ཨོ་རྒྱན་ནོར་ལྷ༔ འདོད་འཇོའི་བུམ་བཟང་པདྨ་ཉི་ཟླའི་སྟེང་༔ རྗེས་ཆགས་དབང་གི་ཉམས་ལྡན་ནོར་གྱི་ལྷ༔ གཞོན་ནུ་ལོ་བརྒྱད་ལོན་པའི་ལང་ཚོ་ཅན༔ འདོད་དགུ་ཆར་ཏུ་འབེབ་ལ་ཕྱག་འཚལ་བསྟོད༔ བདེ་རྒྱས་ལྷ་མོ་ཞི་འཛུམ་སྙེམ་པའི་ཚུལ༔ འཇམ་མཉེན་ཕྱག་ན་ནོར་བུ་བདེ་སྐྱོང་སྣོད༔ བརྩེ་ཆེན་ཐུགས་རྗེས་སྐྱེ་འགྲོའི་དབུལ་བ་སེལ༔ གང་སྨོན་རེ་བ་སྐོང་ལ་ཕྱག་འཚལ་བསྟོད༔ ནོར་བདག་མཆེད་བརྒྱད་ཤ་རྒྱས་གསུས་པ་ཆེ༔ ལྷ་མོ་རྣམ་བརྒྱད་གཞོན་ནུ་ཞི་བའི་ཉམས༔ སྣ་ཚོགས་ཚུལ་གྱིས་སྐྱེ་འགྲོའི་རེ་བ་སྐོང་༔ བསོད་ནམས་དབང་ཕྱུག་ནོར་བདག་བརྒྱད་ལ་བསྟོད༔ འབྱུང་བའི་ཁམས་དང་ཕྱོགས་བཅུའི་འཇིག་རྟེན་དང་༔ སྲིད་ན་ཆེ་བའི་འཁོར་ལོའི་བསྒྱུར་བ་སོགས༔ ལྷ་ཀླུ་མི་ཡི་ཕྱྭ་དང་གཡང་འགུགས་པའི༔ གནོད་སྦྱིན་གཏེར་བདག་འཁོར་དང་བཅས་ལ་བསྟོད༔ ༈ མན་ངག་བཞི་བ༔ ཡི་དམ་རྡོ་རྗེ་གཞོན་ནུ་ནི༔ ཀུན་ཏུ་བཟང་པོ་གདུལ་བྱའི་རྗེས་འགྲོ་བས༔ རྣམ་པར་ཁྲོས་པ་བདེ་གཤེགས་འཕྲིན་ལས་བདག༔ བདུད་ཚོགས་ཐལ་བར་འབྱིན་པའི་ཀཱི་ལ་ཡ༔ ཁྲོ་བོའི་རྒྱལ་པོ་རྡོ་རྗེ་གཞོན་ནུར་བསྟོད༔ པདྨ་ཉི་མ་བདུད་བཞི་བསྣོལ་བའི་སྟེང༔ དཔལ་ཆེན་རྡོ་རྗེ་གཞོན་ནུ་སྐུ་མདོག་མཐིང༔ ཞལ་གསུམ་ཕྱག་དྲུག་ཞབས་བཞི་འདོར་སྟབས་བསྒྲད༔ གཡས་དཀར་གཡོན་དམར་དབུས་ཞལ་མཐིང་ལ་བསྟོད༔ གཡས་གཉིས་རྡོ་རྗེ་རྩེ་དགུ་རྩེ་ལྔ་དང༔ གཡོན་གཉིས་ཁ་ཊཱྂ༔བསྐལ་བའི་མེ་དཔུང་འཛིན༔ མཐའ་གཉིས་ཕུར་བུས་དགྲ་བགེགས་སྙིང་ལ་གཟིར༔ བདུད་ཆེན་གཤེད་དུ་གྱུར་ལ་ཕྱག་འཚལ་བསྟོད༔ འཁོར་ལོ་རྒྱས་འདེབས་ཁ་ཊཱཾ་ཐོད་ཁྲག་འཛིན༔ སྔོ་སྐྱ་ཆགས་པའི་ཉམས་ལྡན་ཡབ་ལ་འཁྲིལ༔ རབ་འབྱམས་དཀྱིལ་འཁོར་སྤྲོ་མཛད་འཕྲིན་ལས་བདག༔ བདེ་བའི་བདག་ཉིད་ཤེས་རབ་ཡུམ་ལ་བསྟོད༔ ཚོགས་བརྒྱད་དག་པའི་ཁྲོ་ཆེན་ཧེ་རུ་ཀ༔ དཔལ་ཆེན་སྒྲུབ་སྡེ་བརྒྱད་དུ་ཤར་བའི་ལྷ༔ བསམ་མི་ཁྱབ་པའི་སྐུ་དང་ཡེ་ཤེས་བདག༔ བཀའ་འཁོར་སྲུང་མ་རྒྱ་མཚོའི་ཚོགས་ལ་བསྟོད༔ ༈ མན་ངག་ལྔ་བ༔ པདྨ་ཟིལ་གནོན་དྲག་རྩལ༔ མཚན་བཅས་རྟོག་པ་མཚན་མེད་ངང་དུ་ཞིག༔ དྲེགས་པའི་སྟོང་སྲོག་ཆོས་ཉིད་དབྱིངས་སུ་ལེན༔ སྣང་སེམས་དབྱེར་མེད་སྣང་སྲིད་སྤྱི་རྗེར་གྲུབ༔ པདྨ་ཟིལ་གནོན་དྲག་པོ་རྩལ་ལ་བསྟོད༔ པདྨ་ཉི་མ་སྡེ་བརྒྱད་སྲོག་གཟུགས་སྟེང་༔ སྣང་སྲིད་དྲེགས་པ་ཡོངས་ཀྱི་སྲོག་གི་བདག༔ ཆེ་བའི་ལྷ་མཆོག་ལྷ་སྲིན་སྡེ་བརྒྱད་འདུལ༔ དཀར་དམར་མདངས་ལྡན་ཟིལ་གནོན་དྲག་པོར་བསྟོད༔ ཞལ་གཅིག་ཕྱག་གཉིས་བཞེངས་སྟབས་སྤྱན་གསུམ་པ༔ ཁྲོ་འཛུམ་བེར་ཕོད་ཆོས་གོས་སྐུ་ལ་གསོལ༔ པད་ཞུ་ཁྱུང་ལྡེམ་ཕྱག་གཡས་གནམ་ལྕགས་ཀྱི༔ རྡོ་རྗེ་རྩེ་དགུ་མེ་འབར་ཁ་གདངས་ཕྱར༔ གཡོན་པས་སྡེ་བརྒྱད་སྙིང་ཕྲེང་འདྲེན་ལ་བསྟོད༔ རྒྱལ་ཀུན་ཡེ་ཤེས་ལྔ་ཡི་ནུས་པའི་དཔལ༔ གནས་ལྔའི་ཁྲོ་ཆེན་འབར་བའི་སྐུར་བཞེངས་ཤིང་༔ མི་བཟད་འཁོར་བའི་གཡུལ་ལས་སྒྲོལ་མཛད་པ༔ ལྷ་སྲིན་སྡེ་བརྒྱད་གཉེན་པོར་གྲུབ་ལ་བསྟོད༔ མཐུ་སྟོབས་བདུད་རྩིའི་རོ་ཡིས་བཟི་བ་ཡི༔ པདྨའི་འཕྲིན་ལས་སྐྱོང་ལ་དུང་སེམས་ཆེ༔ ཕུར་སྲུང་དམ་ཅན་བསྟན་སྲུང་དྲེགས་པའི་སྡེ༔ དམ་ཚིག་གཉན་པོའི་སྟངས་འཛིན་ཀུན་ལ་བསྟོད༔ ༈ མན་ངག་དྲུག་པ༔ གསང་བདག་སེདྒེ་སྒྲ་སྒྲོགས༔ མཐུ་རྩལ་ལྷུན་གྲུབ་ཁྲོ་བོ་ཀུན་གྱི་རྗེ༔ ནུས་པར་དབང་འབྱོར་ནུས་པ་གཞན་ལས་ཆེ༔ གསང་བའི་དོན་རྟོགས་གསང་བའི་གཉེར་ཁ་འཛིན༔ སེངྒེའི་ང་རོ་སྒྲོགས་ལ་ཕྱག་འཚལ་བསྟོད༔ པདྨ་ཉི་མའི་གདན་ལ་རྒྱལ་ཀུན་གྱི༔ མཐུ་སྟོབས་གཅིག་བསྡུས་ཐུགས་ཀྱི་རྡོ་རྗེ་འཛིན༔ དཔལ་ཆེན་ཁྲོ་རྒྱལ་གསང་བདག་སེདྒེའི་སྒྲ༔ སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ ཞབས་གཉིས་འདོར་སྟབས་མཛད་ལ་ཕྱག་འཚལ་བསྟོད༔ ཕྱག་གཡས་གནམ་ལྕགས་རྡོ་རྗེ་རྩེ་དགུ་པ༔ མཁའ་དབྱིངས་འཕྱར་བས་སྲིད་གསུམ་ཟིལ་གྱིས་གནོན༔ ཕྱག་གཡོན་སྡིགས་མཛུབ་ཕྱག་རྒྱ་ཐུགས་ཀར་བཀོད༔ ཁྲོ་རྒྱལ་བདུད་དཔུང་འཇོམས་ལ་ཕྱག་འཚལ་བསྟོད༔ ཡུམ་མཆོག་བདུད་འདུལ་དྲག་མོ་སེང་གེའི་གདོང༔ དམར་ནག་ཞལ་གཅིག་ཕྱག་གྲི་ཐོད་འཛིན༔ གཅེར་བུ་རུས་པའི་རྒྱན་ཅན་གཡོན་ནས་འཁྱུད༔ བྱད་མ་གདོན་བགེགས་གདུག་ལ་ཕྱག་འཚལ་བསྟོད༔ སྐྱེ་འགྲོའི་ཤེས་རྒྱུད་འདུལ་ལ་དཔའ་བོའི་སྐུ༔ ལོག་འདྲེན་བསྟན་པར་གཞུག་ལ་སྐྱེན་པའི་གིང་༔ དཔའ་བོ་མཁའ་འགྲོ་ལས་བྱེད་ཀངྐ་ར༔ གསང་བའི་དཀྱིལ་འཁོར་སྐྱོང་མཛད་ཡོངས་ལ་བསྟོད༔ ༈ མན་ངག་བདུན་པ༔ པདྨ་བཛྲ༔ ཧྲཱིཿ བདེ་ཆེན་སོ་སོར་རྟོག་པའི་ཡེ་ཤེས་གར༔ བདེ་སྟོང་འདུ་འབྲལ་མེད་པར་རྟག་རོལ་བའི༔ བདེ་བའི་བདག་ཉིད་པདྨ་རྡོ་རྗེ་རྩལ༔ བདེ་སྐྱོང་བདུད་རྩིས་ངོམ་ལ་ཕྱག་འཚལ་བསྟོད༔ ཐེག་པ་དགུ་རྫོགས་ཆེ་བའི་གདན་གྱི་སྟེང་༔ འོད་དཔག་མེད་མགོན་བདེ་བ་ཆེན་པོའི་སྐུ༔ པདྨ་བཛྲ་ཞལ་གསུམ་ཕྱག་དྲུག་དམར༔ གཡས་དཀར་གཡོན་མཐིང་ཁྲོ་འཛུམ་ཞལ་ལ་བསྟོད༔ གཡས་གསུམ་རྡོ་རྗེ་རལ་གྲི་ཚེ་ཡི་བུམ༔ གཡོན་གསུམ་དྲིལ་བུ་བྷཉྫ་ནམ་མཁའི་དབྱུག༔ ཞབས་གཉིས་བཞེངས་སྟབས་ལྷ་ཆེན་ཕོ་མོ་མནན༔ དགྱེས་བཞད་གར་གྱིས་རོལ་ལ་ཕྱག་འཚལ་བསྟོད༔ ཡུམ་མཆོག་གསང་བ་ཡེ་ཤེས་མནྡཱ་ར༔ དམར་མོ་ཆགས་རྒྱས་ཌཱ་རུ་དྲིལ་བུ་འཛིན༔ བཅུ་དྲུག་ལང་ཚོ་རབ་རྒྱས་ཡིད་འཕྲོག་མ༔ ནུ་འབུར་བྷ་ག་རྒྱས་ལ་ཕྱག་འཚལ་བསྟོད༔ ཐོར་གཙུག་རྩེ་ན་རིགས་བདག་ཚེ་དཔག་མེད༔ ཚེ་བུམ་འཛིན་པ་གོས་དཀར་ཡུམ་དང་འཁྲིལ༔ ཉོན་མོང་རང་གྲོལ་དཔའ་བོ་རྡོ་རྗེ་བརྒྱད༔ རང་རིགས་དཔའ་མོས་འཁྱུད་ལ་ཕྱག་འཚལ་བསྟོད༔ འབྱུང་བའི་དྭངས་མ་གནས་འདྲེན་མཁའ་འགྲོ་མ་༔ ཕྱི་ནང་རྟེན་འབྲེལ་ལེགས་ཉེས་ལམ་དུ་བྱེད༔ སྲིད་པའི་བདེ་སྡུག་སྟངས་འཛིན་ལས་ལ་མཁས༔ མཁའ་འགྲོ་བྱེ་བ་འབུམ་སྡེའི་ཚོགས་ལ་བསྟོད༔ ༈ མན་ངག་བརྒྱད་པ༔ རྟ་མགྲིན་ནག་པོ༔ སྐུ་ལྔ་ལྷུན་གྲུབ་བདེ་བ་ཆེན་པོའི་ངང་༔ གང་འདུལ་ཐབས་ཀྱིས་ཁྲོ་ཆེན་སྐུར་བཞེངས་པ༔ ཁམས་གསུམ་དབང་བྱེད་གནམ་ལྕགས་རལ་བ་ཅན༔ རྟ་མཆོག་འབར་བའི་ཚོགས་ལ་ཕྱག་འཚལ་བསྟོད༔ སྲིད་པའི་ཁྲག་མཚོའི་ཀེང་རུས་ཕོ་མོའི་སྟེང་༔ སྟག་དང་རུ་དྲ་ཉི་མ་དཀྱིལ་ཁར༔ དཔལ་ཆེན་རྟ་མགྲིན་ནག་པོ་ཤིན་ཏུ་ཁྲོས༔ ཞལ་གཅིག་ཕྱག་གཉིས་ཞབས་གཉིས་གེལ་ཚུལ་བཞུགས༔ རྡོ་རྗེས་སེང་ལྡེང་རྒྱལ་རྔ་འཛིན་ལ་བསྟོད༔ སྐུ་ལ་དཔལ་དང་དུར་ཁྲོད་ཆས་ཀྱིས་བརྒྱན༔ དབང་སྡུད་རྟ་མགོ་ལྗང་ཞུར་རྟ་སྐད་འཚེར༔ བསྐལ་བའི་མེ་ཕྲེང་འཁྲིགས་པའི་སྐྲ་འཕྱོ༔ ལྗགས་འདྲིལ་རྣོ་དཀར་མཆེ་བ་གཙིགས་ལ་བསྟོད༔ དབུ་སྐྲ་སྨ་ར་སྨིན་མར་མེ་སྟག་འཚུབས༔ སྤྱན་གསུམ་དམར་ཟླུམ་སྡང་མིག་བགེགས་ལ་གཟིགས༔ ཀེང་རུས་སྙན་ཆ་ཐོད་པའི་དོ་ཤལ་དཔྱང་༔ རུས་རྒྱན་སྟག་ཤམ་ཐབ་གསོལ་ལ་བསྟོད༔ རྡོ་རྗེ་ཁྲོས་མ་སྐུ་མདོག་མཐིང་སྔོན་འབར༔ ཞལ་གཅིག་ཕྱག་གཉིས་གཅེར་བུ་རུས་རྒྱན་ཅན༔ ཆགས་ཁྲོས་གྲི་ཐོད་ཕྱར་བ་མགུལ་ནས་འཁྱུད༔ དགའ་བཞི་ཡེ་ཤེས་མཆོག་ཏུ་སྦྱོར་ལ་བསྟོད༔ རིགས་བདག་པདྨ་ཐོད་ཕྲེང་དམར་ནག་ཞལ༔ གཅིག་ཕྱག་གཉིས་ཐོད་རྔ་དྲིལ་བུ་འཁྲོལ༔ སྟག་ཤམས་ཐོད་སྐམ་རུས་རྒྱན་ཁྲོ་བོའི་ཆས༔ ཕག་མོ་གྲི་ཐོད་འཛིན་པས་འཁྱུད་ལ་སྟོད༔ གསང་ཡེ་སྡེ་བཞི་དགྱེས་འཛུམ་དཔའ་མོའི་ཆས༔ རང་རིགས་དཔའ་བོ་རྡོར་དྲིལ་འཛིན་དང་སྦྱོར༔ ལས་བཞིའི་ལྷ་མོ་རང་རྟགས་ཕྱག་མཚན་འཛིན༔ སྤྲུལ་བ་ཁྲོ་ཚོགས་འཁོར་འདས་ཁྱབ་ལ་བསྟོད༔ ༈ མན་ངག་དགུ་པ༔ རྡོ་རྗེ་གྲོ་ལོད༔ ཆོས་ཉིད་དབྱིངས་ལས་ཡེ་ཤེས་རོལ་བའི་རྩལ༔ དྲག་ཤུལ་སྟོབས་ཀྱིས་བདུད་ཀྱི་དཔུང་ཚོགས་གཞོམ༔ སྲིད་པ་འདི་ན་ཆེ་བཙན་འགྲན་ཟླ་བྲལ༔ ཁྲོ་རྒྱལ་ལོ་ཀ་ཏཱ་རར་ཕྱག་འཚལ་བསྟོད༔ རྡོ་རྗེའི་གུར་ཁང་མེ་དཔུང་འབར་བའི་ཀློང༔ པདྨ་ཉི་མ་རྒྱལ་བསེན་ཕོ་མོའི་དང་༔ དཔའ་རྔམས་སྟག་མོ་གྲུས་མ་འགྱིང་བའི་སྟེང་༔ ཁྲོ་ཆེན་འཇིག་རྟེན་སྒྲོལ་ལ་ཕྱག་འཚལ་བསྟོད༔ རྡོ་རྗེ་གྲོ་ལོད་དམར་སྨུག་འཆོལ་བའི་སྐུ༔ ཞལ་གདངས་མཆེ་གཙིགས་སྤྱན་གསུམ་སྡང་མིག་གཟིར༔ དབུ་སྐྲ་དམར་སེར་གྱེན་བརྫིས་ཐོད་སྐམ་བརྒྱན༔ ཕྱག་གཡས་རྡོ་རྗེ་ཕྱར་ལ་ཕྱག་འཚལ་བསྟོད༔ ཕྱག་གཡོན་གནམ་ལྕགས་ཕུར་བུ་ཐུར་ཏུ་སྡིག༔ ཞབས་གཉིས་གར་སྟབས་ལིང་ལིང་འགྱིང་བག་རོལ༔ ཟ་འོག་བེར་ཕོད་ཆོས་གོས་དམར་པོ་གསོལ༔ ཁྲོ་བོའི་སྤྲིན་དཔུང་སྤྲོ་ལ་ཕྱག་འཚལ་བསྟོད༔ པདྨ་རྒྱལ་པོ་ཞལ་གཅིག་ཕྱག་གཉིས་དམར༔ གཡས་པས་ཌཱ་རུ་ནམ་མཁའི་དབྱིངས་སུ་དཀྲོལ༔ དཔའ་བོ་མཁའ་འགྲོ་མ་ལུས་དབང་དུ་སྡུད༔ གཡོན་པས་ལྕགས་ཀྱུ་འཕེན་ལ་ཕྱག་འཚལ་བསྟོད༔ རྒྱལ་བའི་ཐུགས་རྗེ་ཡུལ་ལ་འཇུག་པ་ལས༔ བདུད་འདུལ་ཁྲོ་བཅུ་གིང་དང་མཁའ་འགྲོའི་ཚོགས༔ ཐབས་ལ་མ་རྨོངས་སྤྲུལ་བ་དཔག་ཡས་འགྱེད༔ སྲུང་བཟློག་འཕྲིན་ལས་མཛད་ལ་ཕྱག་འཚལ་བསྟོད༔ ༈ མན་ངག་བཅུ་པ༔ སྤྱན་རས་གཟིགས་དབང་པདྨ་རྒྱལ་པོ༔ དུས་གསུམ་རྒྱལ་ཀུན་བརྩེ་ཆེན་ཐུགས་རྗེའི་གར༔ མ་ལུས་འགྲོ་བ་སྒྲོལ་བའི་སྐུར་བཞེངས་ཤིང་༔ གང་ལ་གང་འདུལ་འཕྲིན་ལས་བསམ་མི་ཁྱབ༔ ཐུགས་རྗེ་ཆེན་པོ་པདྨ་རྒྱལ་པོར་བསྟོད༔ འཇའ་འོད་པདྨ་ཟླ་བའི་གདན་སྟེང་དུ༔ འགྲོ་འདུལ་སྤྱན་རས་གཟིགས་དབང་གངས་ཆེན་མཚོ༔ པདྨ་རྒྱལ་པོ་ཞལ་གཅིག་ཕྱག་གཉིས་པ༔ ཐལ་སྦྱར་ཨུཏྤལ་དམར་པོ་བསྣམས་ལ་བསྟོད༔ སྐུ་མདོག་དམར་གསལ་དཔའ་བོ་དགྱེས་པའི་ཉམས༔ དར་དང་རིན་ཆེན་རྒྱན་རྫོགས་ལོངས་སྐུའི་ཆས༔ རུས་པའི་རྒྱན་དང་སྟག་གི་ཤམ་ཐབ་གསོལ༔ འཇིག་རྟེན་དབང་ཕྱུག་མཆོག་ལ་ཕྱག་འཚལ་བསྟོད༔ ཡུམ་མཆོག་གསང་པ་ཡེ་ཤེས་ཀྱི་སྐུ་མདོག་དམར༔ ཞལ་གཅིག་ཕྱག་གཉིས་མཛེས་སྡུག་མཚན་དཔེ་འབར༔ ནུ་མ་བྷ་ག་ཆེར་རྒྱས་སྐེད་སྟབས་ཕྲ༔ མཛེས་སྡུག་ཕྱག་གཉིས་གྲི་ཐོད་འཛིན་ལ་བསྟོད༔ རྡོ་རྗེ་གསུམ་བདག་སྣང་མཐའ་རྟ་མགྲིན་རྒྱལ༔ རིགས་འདུས་རྡོ་རྗེ་སེམས་དཔའ་བདེ་བ་ཆེ༔ སྐུ་ལ་མཐའ་ཡས་རྒྱལ་བའི་དཀྱིལ་འཁོར་རྫོགས༔ བདེ་ཆེན་ལམ་བཟང་སྟོན་ལ་ཕྱག་འཚལ་བསྟོད༔ མངོན་སངས་རྒྱས་ཀྱང་རྒྱལ་སྲས་གཞོན་ནུའི་ཚུལ༔ ཐུགས་རྗེའི་སྟོབས་ཀྱིས་འགྲོ་ཀུན་སྒྲོལ་ལ་དཔའ༔ སེམས་ཅན་ཀུན་གྱི་ཡིད་མཁར་རྟག་ཏུ་བཞུགས༔ བྱང་ཆུབ་སེམས་དཔའ་བརྒྱད་ལ་ཕྱག་འཚལ་བསྟོད༔ དུས་གསུམ་བདེ་གཤེགས་བྱང་སེམས་གངྒཱའི་ཀླུང་༔ དག་པའི་སྐུ་ལས་ཡེ་ཤེས་འོད་ཟེར་འཕྲོ༔ དགྱེས་པའི་ཞལ་ལས་བརྩེ་བའི་འཛུམ་མདངས་ངོམས༔ ཞི་བསིལ་ཆོས་ཀྱི་སྒྲ་ཆེན་བསྒྲོགས་ལ་བསྟོད༔ ༈ མན་ངག་བཅུ་གཅིག་པ༔ སྣང་བ་མཐའ་ཡས༔ བདེ་བར་འཛིན་པའི་རྟོག་ཚོགས་དག་པ་ལས༔ བདེ་ཆེན་འགྱུར་མེད་རྒྱལ་བ་འོད་དཔག་མེད༔ བདེ་སྟོང་ཟག་པ་བྲལ་བའི་ཆོས་བསྟན་ཅིང་༔ བདེ་ནས་བདེ་བར་འགོད་མཛད་དེ་ལ་བསྟོད༔ སྡུག་བསྔལ་མིང་སྟོང་བདེ་བ་ཅན་གྱི་ཞིང་༔ བཀོད་པ་གཞལ་མེད་གཞལ་ཡས་ཁང་གི་གཙོ༔ མཚན་ཙམ་ཐོས་པས་འཁོར་བར་མི་ལྟུང་བའི༔ འོད་སྣང་མཐའ་ཡས་རྒྱལ་བ་མཆོག་ལ་བསྟོད༔ འདབ་མ་སྟོང་ལྡན་པདྨ་ཟླ་གདན་སྟེང་༔ ཉི་འོད་འབུམ་ཕྲག་འཕྲོས་འདྲའི་གཟི་བརྗིད་ཅན༔ སྣང་བ་མཐའ་ཡས་ཞལ་གཅིག་ཕྱག་གཉིས་དམར༔ གསང་གསུམ་ཡོན་ཏན་རྫོགས་ལ་ཕྱག་འཚལ་བསྟོད༔ སྐུ་མདོག་སྟོན་ཀའི་ནམ་མཁའ་ལྟ་བུར་སྔོ༔ ས་གནོན་མཉམ་བཞག་སྟེང་ན་རྡོ་རྗེ་འཛིན༔ ཉོན་མོངས་སྐྱོན་གྱིས་བརྫི་བར་མི་ནུས་པའི༔ ཐུགས་རྗེའི་བདག་ཉིད་མི་འཁྲུགས་མགོན་ལ་བསྟོད༔ བདེ་གཤེགས་སངས་རྒྱས་རབ་བདུན་གསེར་གྱི་མདོག༔ ཚོགས་གཉིས་ཡོངས་རྫོགས་མཚན་དཔེའི་ཡོན་ཏན་ལྡན༔ དྲན་པས་ཉོན་མོངས་ཟུག་རྔུ་དྲུང་ནས་འབྱིན༔ ཡང་དག་རྫོགས་པའི་སངས་རྒྱས་རྣམས་ལ་བསྟོད༔ ནམ་མཁའི་ཁྱབ་ཚད་རྒྱལ་བ་སྲས་དང་བཅས༔ སྤང་རྟོགས་ཕུན་ཚོགས་མཁྱེན་བརྩེ་ནུས་པའི་བདག༔ འགྲོ་ཀུན་སྐྱབས་དང་སྐྱོབས་པ་མཆོག་ཏུ་གྲུབ༔ ཕྱོགས་བཅུའི་སངས་རྒྱས་སྲས་དང་བཅས་པར་བསྟོད༔ ༈ མན་ངག་བཅུ་གཉིས་པ༔ བླ་མ་ཀུན་ཏུ་བཟང་པོ༔ ཀ་དག་སྟོང་གསལ་གཞོན་ནུ་བུམ་པའི་སྐུ༔ ལྷུན་གྲུབ་མཚན་དཔེར་ཤར་བའི་ཡེ་ཤེས་བྱིན༔ དབྱིངས་རིག་དབྱེར་མེད་སྟངས་དཔྱལ་རྣམ་པར་བཞེངས༔ རང་རིག་ཀུན་ཏུ་བཟང་པོར་ཕྱག་འཚལ་བསྟོད༔ ཡེ་ཤེས་འོད་ལྔའི་ཐིག་ལེ་གསལ་འཚེར་དབུས༔ ཆོས་ཅན་ཀུན་བཟང་ཡབ་ནི་སྐུ་མདོག་མཐིང་༔ ཆོས་ཉིད་ཀུན་བཟང་ཡུམ་ནི་རྡོར་དྲིལ་ལྗང་༔ སྒྲིབ་བྲལ་གཅེར་བུར་འཁྲིལ་ལ་ཕྱག་འཚལ་བསྟོད༔ ཉག་གཅིག་ཞལ་ལ་ཐབས་ཤེས་ཟུང་འཇུག་ཕྱག༔ འཁོར་འདས་རོ་སྙོམ་མཉམ་གཞག་ཕྱག་རྒྱ་ཅན༔ གཟུང་འཛིན་སྒྲིབ་བྲལ་སྐུ་ནི་གཅེར་བུའི་ཚུལ༔ མཐའ་གཉིས་སྤང་བའི་སྐྱིལ་ཀྲུང་མཛད་ལ་བསྟོད༔ རིགས་ཀུན་འཆར་གཞི་རིགས་རྣམ་ཀུན་གྱི་བདག༔ ཀུན་བཟང་ཐུགས་ལས་བྱུང་བའི་རྡོ་རྗེ་སེམས༔ སྙེམ་མ་ཡུམ་བཅས་མཐིང་ཀ་རྡོར་དྲིལ་འཛིན༔ སྒྱུ་འཕྲུལ་དྲ་བའི་བདག་ཉིད་ཆེན་པོར་བསྟོད༔ ཉོན་མོངས་དུག་ལྔ་མ་སྤང་གནས་སུ་དག༔ རིགས་ཀྱི་ཡབ་ལྔ་བརྗིད་ཅིང་ལྷུན་སྟུགས་པ༔ ཡུལ་ལྔ་གནས་དག་རིགས་ཀྱི་ཡུམ་མཆོག་ལྔ༔ བདེ་བར་རོལ་པས་འཁྱུད་ལ་ཕྱག་འཚལ་བསྟོད༔ ཡེ་ཤེས་རྩལ་ལས་ཤར་བའི་འཁོར་འདས་ཆོས༔ རང་བཞག་ཆོས་སྐུ་དྲི་མ་མེད་པའི་གཤིས༔ མ་བཅོས་རྗེན་པར་ཤར་བའི་ཞི་ཁྲོའི་ལྟ༔ སྒྱུ་འཕྲུལ་དྲྭ་བར་ཤར་ལ་ཕྱག་འཚལ་སྟོད༔ ༈ མན་ངག་བཅུ་གསུམ་པ༔ བླ་མ་བདེ་བ་ཆེན་པོ༔ ཀ་དག་སྤྲོས་བྲལ་བླ་མ་ཆོས་ཀྱི་སྐུ༔ འོད་གསལ་ལྷུན་བླ་མ་ལོངས་སྤྱོད་རྫོགས༔ ཐུགས་རྗེ་ཀུན་ཁྱབ་བླ་མ་སྤྲུལ་བའི་སྐུ༔ གུ་རུ་པདྨ་བདེ་བ་ཆེ་ལ་བསྟོད༔ འདབ་མ་འབུམ་ལྡན་པད་སྡོང་ཉི་ཟླའི་སྟེང་༔ ཁམས་གསུམ་འགྲོ་བ་ཡོངས་ཀྱི་གཉེན་གཅིག་པུ༔ ལྷ་འདྲེ་མི་གསུམ་འདུལ་བའི་མཐུ་སྟོབས་ཅན༔ བྱིན་རླབས་བཙན་ཐབས་འཕོ་བར་མཛད་ལ་བསྟོད༔ གུ་རུ་བདེ་ཆེན་དཀར་ལ་དམར་མདངས་ཆགས༔ སྐུ་ལ་གསང་གོས་མདུང་མ་ཕོད་ཆེན་དང་༔ ཆོས་གོས་དམར་པོ་གསེར་གྱི་རིས་ཅན་གསོལ༔ པདྨ་མཐོང་གྲོལ་དབུ་ཞྭ་མཛེས་ལ་བསྟོད༔ མཚོ་རྒྱལ་སྐུ་མདོག་དཀར་ལ་སྔོ་བའི་མདངས༔ ཞལ་གཅིག་ཕྱག་གཉིས་གྲི་གུག་བདུད་རྩི་སྟོབས༔ མཛེས་ཤིང་ཆགས་པའི་ཉམས་ཅན་གཉིས་མེད་འཁྲིལ༔ ཟག་མེད་བདེ་བ་ཆེན་པོར་རོལ་ལ་བསྟོད༔ རིག་འཛིན་རྣམ་བཞིའི་སར་གནས་དཔའ་བོ་ཆེ༔ འགྲོ་བ་ཀུན་སྒྲོལ་ཐེག་གསུམ་ནབ་བཟས་ཀླུབས༔ བདེ་ཆེན་རབ་རྒྱས་རང་འོད་རིག་མས་འཁྲིལ༔ ཐབས་ཤེས་གཉིས་སུ་མེད་ལ་ཕྱག་འཚལ་བསྟོད༔ སློབ་དཔོན་བཞི་ནི་དགྱེས་ཤིང་བརྩེ་བའི་ཉམས༔ ཚུལ་གནས་མཁྱེན་རབ་ཐོགས་མེད་བརྗིད་ཡེ་རེ༔ ལྷ་ཀླུ་མི་ཡི་རིག་འཛིན་སྤྲུལ་བའི་ཚོགས༔ བརྒྱུད་གསུམ་བླ་མའི་ཚོགས་ལ་ཕྱག་འཚལ་བསྟོད༔ དེ་ལྟར་བསམ་པ་དགེ་ཤིང་སེམས་བསྐྱེད་ཆེ༔ གུས་ཤིང་དང་པའི་བསྟོད་པས་བྱིན་རླབས་ཀྱིས༔ འགྲོ་ཀུན་མི་གནས་མྱ་ངན་འདས་པའི་སར༔ ཐོགས་པ་མེད་པར་གྲོལ་བར་བྱིན་གྱིས་རློབས༔ བསྒྲུབ་པ་པོ་ཡི་སྒོ་གསུམ་དྲི་མའི་ཚོགས༔ འཐོལ་ཞིང་བཤགས་སོ་བྱང་ཞིང་དག་པ་དང་༔ ལྷ་སྔགས་ཏིང་འཛིན་ཡེ་ཤེས་སྟོབས་འབར་ཏེ༔ རིག་འཛིན་རྣམ་བཞིའི་ས་ལམ་མྱུར་བསྒྲོད་ཤོག༔ ཀ་དག་ཀློང་ཡངས་ཆོས་སྐུའི་བཀྲ་ཤིས་ཤོག༔ བདེ་ཆེན་ལྷུན་གྲུབ་ལོངས་སྐུའི་བཀྲ་ཤིས་ཤོག༔ འགྲོ་དོན་ཀུན་ཁྱབ་སྤྲུལ་སྐུའི་བཀྲ་ཤིས་ཤོག༔ པདྨ་འོད་འབར་བླ་མའི་བཀྲ་ཤིས་ཤོག༔ དེ་ལྟར་བསྟོད་ཅིང་གསོལ་བ་གདབ༔ དཀྱིལ་འཁོར་ལྷ་ཚོགས་ཐུགས་རྗེས་འཛིན༔ ཕྱི་ལ་དྲོད་འབར་དྲི་བཟང་འཐུལ༔ ནང་ན་ཉམས་དགའ་བདེ་བ་རྒྱས༔ ལུས་ཀྱི་གཟི་མདངས་རྒྱས་པ་དང་༔ ངག་ལ་ནུས་པ་འབར་བ་དང་༔ སེམས་ལ་ཉམས་དང་རྟོགས་པ་འཆར༔ བསམ་པ་ལྷུན་གྲུབ་ཨེ་མ་ཧོ༔ བསམ་པ་ལྷུན་གྲུབ་ཀྱི་བསྟོད་པ་ལེགས་པར་གྲུབ་པའོ༔ ས་མ་ཡ༔ ཨྠྀི༔ དེ་ལྟར་གུས་པས་བསྟོད་བྱེད་ན༔ སྒྲིབ་གཉིས་དྲི་མ་དག་པ་ལས༔ བསམ་དོན་ལྷུན་གྱིས་འགྲུབ་པ་ཡི༔ དོན་གཉིས་ཕུན་ཚོགས་ཨེ་མ་ཧོ༔ ཨྠྀི༔ ཚེ་དབང་ནོར་བུའི་གཏེར་སྐལ་ལོ༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་ལྷ་སྣང་སྒྲུབ་པའི་གདམས་པ་སྒོམ་ཁོག་ཆེན་མོ།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ ལྷ་སྣང་སྒྲུབ་པའི་གདམས་པ་སྒོམ་ཁོག་ཆེན་མོ་བཞུགས་སོ༔ བཛྲ་གུ་རུ་པདྨ་ཀཱ་ར་ཡེ༔ པདྨའི་ཞལ་གདམས་བཀའ་ཐ་མ༔ ཡིད་བཞིན་ནོར་བུ་ལྟ་བུ་ཡི༔ མན་ངག་བསྒོམ་པའི་རིམ་པ་འདི༔ ལས་ཅན་སྐྱེས་བུའི་དཔལ་དུ་བྱོན༔ ས་མ་ཡ༔ ༀ་ཨཱཿཧཱུྃ་ཧྲཱི༔ གདོད་ནས་ཀ་དག་ཆོས་སྐུ་ཆེན་པོའི་ངང་༔ རང་བྱུང་ལྷུན་གྱིས་གྲུབ་པའི་དཀྱིལ་འཁོར་ཤར༔ འཇིགས་མེད་སྲུང་བའི་གུར་ཁང་ཡངས་བའི་ནང་༔ ཡེ་ཤེས་རོལ་བ་པདྨ་འོད་ཀྱི་ཞིང་༔ བདེ་གཤེགས་སྙིང་པོ་བྱང་ཆུབ་ཀྱི་སེམས་ཀྱི་བརྟེན༔ ཕུང་ཁམས་རྣམ་དག་རྒྱལ་བ་རིགས་ལྔའི་གདན༔ དབང་ཡུལ་དག་པ་སེམས་དཔའ་སེམས་མའི་གདན༔ ཡན་ལག་ཡུལ་བཅས་ཁྲོ་བོ་ཁྲོ་མོའི་གདན༔ ཕུང་ཁམས་ཡེ་ནས་དག་པ་ལྷའི་རང་བཞིན༔ ཞལ་ཕྱག་སྤྲོས་པའི་མཚན་མ་མ་མཆིས་ཀྱང་༔ གང་འདུལ་འགྲོ་བའི་མོས་ངོར་ཚད་མེད་ཀྱི༔ འཕྲིན་ལས་ཀུན་ཁྱབ་འགག་པ་མེད་པའི་ཚུལ༔ ཡེ་ཤེས་གཅིག་ལ་འཆར་ཆ་དཔག་མེད་པ༔ ཞི་ཁྲོ་སྤྲུལ་བའི་མཛད་པ་བློ་ལས་འདས༔ མཁའ་དབྱིངས་བདུད་རྩིའི་རྒྱ་མཚོ་སྔོ་ཞིང་དྭངས༔ རྒྱ་ཁྱོན་གཏིང་མཐའ་འབྱམས་ཀླས་ཆོས་དབྱིངས་ཁྱབ༔ དབུས་སུ་པད་སྡོང་འདབ་མ་འབུམ་བརྡལ་བ༔ ཡལ་ག་ལོ་འབྲས་ཕུན་སུམ་ཚོགས་གེ་སར་མཐོ༔ དེ་སྟེང་ཉི་མ་ཟླ་བའི་གདན་གྱི་དབུས༔ དུས་གསུམ་སངས་རྒྱས་ཀུན་ཀྱི་ངོ་བོ་ཉིད༔ པདྨ་འབྱུང་གནས་སྐུ་མདོག་དཀར་དམར་མདངས༔ ཞི་འཛུམ་ཡིད་ཙམ་ཁྲོ་བའི་རྣམ་པ་ཅན༔ ཕྱག་གཡས་གསེར་རྡོར་རྩེ་ལྔ་ཐུགས་ཀར་བསྣམས་༔ གཡོན་པ་མཉམ་གཞག་ལྟེ་བར་བཀོད་པའི་སྟེང་༔ ཀ་པཱ་ལ་སྣོད་བདུད་རྩིས་གང་བ་དང་༔ ཚེ་བུམ་དཔག་བསམ་ཤིང་གིས་ཁ་རྒྱན་འཛིན༔ གྲུ་མོ་གཡོན་ཏུ་ཁ་ཊྭཱྃ་རྩེ་གསུམ་བསྟེན༔ དབུ་ལ་མཐོང་གྲོལ་པདྨའི་མཉེན་ཞུ་ལ༔ རྩེ་མོར་རྡོ་རྗེ་རྩེ་ལྔ་རྨ་བྱའི་མདོངས༔ གཡས་གཡོན་རྒོད་ཀྱི་ཐེལ་ཆུང་མཛེས་པས་བརྒྱན༔ མེ་ལོང་འོད་འབར་གསེར་གྱི་ཉི་ཟླ་དང་༔ དར་གྱི་ཅོད་པན་གྱིས་རླུང་གིས་བསྐྱོད་པ་སྤྲས༔ སྐུ་ལ་མདོ་དང་མཐུན་པའི་ཆ་ལུགས་ནི༔ ཆོས་གོས་དམར་པོ་གསེར་གྱི་ཧ་རི་ཅན་༔ སྔགས་ཀྱི་ཆ་ལུགས་ན་བཟའ་ཕོད་ཁ་མཐིང་༔ གསང་བ་དྲི་མེད་རྡོ་རྗེའི་འཇམ་་གོས་དཀར༔ འཁོར་ལོས་སྒྱུར་རྒྱལ་ཆ་ལུགས་ཟབ་ཆེན་གྱི༔ བེར་སྨུག་པདྨའ་རིས་ཅན་མཛེས་པར་གསོལ༔ ཞབས་གཉིས་རྡོ་རྗེ་སྐྱིལ་མོ་ཀྲུང་དུ་བཞུགས་༔ སྐུའི་ཆ་ཤས་རེ་རེར་ཡང་བསྐལ་བའི་བར༔ ཅི་ཙམ་བལྟས་ཀྱང་མི་ངོམས་པ་མི་སྲིད་ཀྱང་༔ མཚན་དཔེ་མཆོག་ཏུ་རྒྱས་པའི་གཟི་བརྗིད་ནི༔ ཉི་མ་འབུམ་ཀྱི་འོད་ཟེར་དུས་གཅིག་ཏུ༔ རྣམ་པར་སྤྲོས་ལྟར་མཐོང་ཐོས་དྲན་ཙམ་གྱིས༔ བྱང་ཆུབ་འབྲས་བུ་མྱུར་དུ་འགྲུབ་ནུས་པ༔ བྱིན་ཐིབས་འོད་སྣང་ད་ལེར་བཞུགས་པར་བསྒོམ༔ ཕྱོགས་བཞི་དབུས་ལྔར་ཡེ་ཤེས་ལྔའི་ངོ་བོ༔ གུ་རུའི་ཐུགས་སུ་ཆུད་པའི་གཟུངས་མ་ལྔ༔ མདུན་པདྨ་ཉི་མའི་གདན་སྟེང་དུ༔ ཐུགས་ཀྱི་གཟུངས་མ་ཡེ་ཤེས་མཚོ་རྒྱལ་མཆོག༔ དཀར་དམར་མཛེས་འཛུམ་ཞལ་གཅིག་ཕྱག་གཉིས་པ༔ མཁའ་འགྲོའི་ཆས་རྫོགས་ཕུར་བ་གསང་ཐོད་འཛིན༔ཤར་དུ་ཞི་བའི་གཟུངས་མ་དཀར་ལ་མཛེས༔ ལྷ་ལྕམ་ཡིད་འཛིན་ཞེས་གྲགས་བདེ་བསྐྱེད་ཡུམ༔ ཟ་ཧོར་མནྡཱ་ར་བ་ཤེལ་རྡོ་ཐོགས༔ ཉེས་ཚོགས་མ་ལུས་ཞི་བའི་སྐུ་རུ་གསལ༔ དོན་ཀུན་གྲུབ་མ་ཞེས་གྲགས་པ་བདེ་བསྐྱེད་ཡུམ༔ བལ་མོ་ཤཱཀྱ་དེ་ཝི་སེར་ལ་མཛེས༔ གཡས་ན་གསེར་ཕྲེང་འཛིན་པའི་སྙེམ་ལྡན་མ༔ ལེགས་ཚོགས་རྣམ་པར་སྤེལ་བྱེད་རྒྱས་པའི་ཡུམ༔ གསེར་གྱི་རྣ་ཆ་ཅན་ཞེས་བདེ་བསྐྱེད་ཡུམ༔ མོན་མོ་བཀྲ་ཤིས་ཁྱུ་འདྲེན་དམར་ལ་མཛེས༔ གཡས་ན་གྲི་གུག་འཛིན་པའི་ཡིད་འགུགས་མ༔ ལྷ་སྲིན་ཟིལ་གནོན་བྲན་ཁོལ་དབང་གི་ཡུམཿ གར་བྱེད་ཆེན་མོ་ཞེས་གྲགས་བདེ་བསྐྱེད་ཡུམ༔ བལ་མོ་ཀཱ་ལ་སིདྡྷི་མཐིང་ནག་མཛེས༔ གཡས་ན་རྩེ་གསུམ་འཛིན་པའི་འཇོམས་བྱེད་མ༔ ཕྱི་ནང་བར་ཆད་བཟློག་མཛད་དྲག་པོའི་ཡུམ༔ ཀུན་ཀྱི་སྐུ་ལ་མཁའ་འགྲོ་འབུམ་སྡེ་རྫོགས༔ ནུ་འབུར་བྷ་ག་རྒྱས་ཤིང་ཡན་ལག་ཕྲ༔ མཛེས་སྡུག་ལྟ་བས་མི་ངོམ་ཡིད་དབང་འཕྲོག༔ མཐོང་བ་ཙམ་གྱིས་བདེ་ཆེན་ས་ལ་སྦྱོར༔ དྲན་པས་རྣམ་པར་རྟོག་པ་སྟོང་དབྱིངས་ཞུགས༔ ཡུམ་ལྔའི་ཕྱག་གཡོན་ཐོད་པ་བདུད་རྩིས་གཏམ༔ ཀུན་ཀྱང་ཞི་བའི་རྒྱན་གྱིས་རྣམ་པར་བརྒྱན༔ དད་ལྡན་རྣམས་ལ་མ་ཡིས་བུ་ལྟར་བརྩེ༔ ཐུགས་རྗེ་བརྩེ་བས་འཛུམ་ཞལ་བུ་ལ་སྟོན༔ བྱིན་རླབས་མཆོག་སྟེར་དགྱེས་པས་ལུང་སྟོན་ཞིང་༔ འདི་ཕྱིའི་འདྲེན་པ་མཆོག་ཏུ་ཞལ་བཞེས་གནང་༔ སྟེང་དུ་བླ་རབས་བརྒྱུད་པ་སྤྲིན་བཞིན་འཁྲིགས༔ བར་དུ་ཡི་དམ་ལྷ་ཚོགས་སྐར་ལྟར་བཀྲ༔ མཐའ་མར་མཁའ་འགྲོ་ཆོས་སྐྱོང་འཇའ་ལྟར་ཤར༔ དཔའ་བོའི་གླུ་ལེན་དཔའ་མོའི་བྲོ་གར་འཁྲབས༔ མེ་ཏོག་ཆར་འབེབས་བདུད་རྩིའི་འཇའ་འོད་འཁྱུགས༔ ཆོས་དབྱིངས་ནམ་མཁའི་ཁམས་ཀུན་ཐེམ་མེར་གཏམ༔ ༈ མན་ངག་དང་པོ༔ གུ་རུ་མེ་ཕྲེང་རྩལ༔ ཧཱུྃ༔ ཆོས་དབྱིངས་མཁའ་ལ་རང་འོད་ཡེ་ཤེས་དབུས༔ པདྨ་ཟླ་ཉི་མ་སྲིན་པོ་ཕོ་མོའི་སྟེང་༔ ཆེ་མཆོག་པདྨ་དྲག་པོ་ཞལ་གསུམ་པ༔ གཡས་དཀར་གཡོན་ལྗང་དབུས་དམར་ཞི་ཁྲོ་གཏུམ༔ ཕྱག་དྲུག་གཡས་ན་རྡོ་རྗེ་ཐོ་བ་མེ༔ གཡོན་ན་ཐོད་ཁྲག་ལྕགས་སྡིག་ཕུར་པ་བསྣམས༔ ཞབས་བཞི་གྱད་ཀྱི་འདོར་སྟབས་ཚུལ་དུ་བགྲད༔ དཔལ་ཀྱི་ཆས་བཅུ་དུར་ཁྲོད་ཆས་བརྒྱད་རྫོགས༔ ཡུམ་མཆོག་དམར་སྐྱ་གྲི་ཐོད་འཛིན་མས་འཁྱུད༔ སྐུ་ལས་མེ་དཔུང་ཁྲོ་ཚོགས་ལྕགས་སྡིག་འཕྲོ༔ སྤྱི་བོར་ཡེ་ཤེས་བྱ་ཁྱུང་སྤྲིན་ལྟར་འཕྲོ༔ སྣ་ཚོགས་སྤྲུལ་བའི་གར་མཛད་བཅོ་བརྒྱད་ཕྱག༔ རྒྱལ་བསེན་དམ་སྲིའི་གཤེད་གཅིག་ཁྲོ་བའི་ཉམས༔ གཏུམ་དྲག་དམར་ནག་ཞལ་གཅིག་ཕྱག་གཉིས་པ༔ ཕྱག་གཡས་རྡོ་རྗེ་རྩེ་དགུ་མེ་འབར་ཕྱར༔ གཡོན་པ་སྡིག་མཛུབ་ལྕགས་སྡིག་མགོ་དགུ་འཛིན༔ ཞབས་གཡས་རྒྱལ་པོ་གཡོན་པས་བསེན་མོ་མནན༔ཤར་དུ་གཤིན་རྗེ་ཡ་མ་རཱ་ཛ་ནག༔ སྟག་ལྤགས་བེར་གསོལ་བེ་ཅོན་དབྱུག་ཐོ་བསྣམས༔ ཟ་བྱེད་ནག་མོ་གཡས་ན་འཁོར་ལོ་དང་༔ གཡོན་ན་མཚོན་གྱི་དྲུ་གུ་བསྣམས་པས་འཁྱུད༔ ལྷོ་རུ་བདུད་ནག་རྐོས་རྗེ་དྲང་དཀར་ནག༔ ཕྱག་གཉིས་ཁྲམ་ཤིང་དང་ནི་དགྲ་སྟྭ་བསྣམ༔ བདུད་མོ་རེ་ཏི་མཐིང་ནག་ཁྲམ་ཤིང་དང་༔ ནད་གྱི་རྐྱལ་བ་འཛིན་པ་ཡབ་ལ་འཁྲིལ༔ ནུབ་ཏུ་སྲིན་པོ་གློག་ཕྲེང་ལྗང་ནག་རྔམས༔ ཕྱག་གཡས་ཐོག་དང་གཡོན་པས་སེར་བ་འབེབས༔ ཁྲག་མིག་དམར་ནག་ཁྲག་འཛགས་ཕུར་པ་དང་༔ ཁྲག་ཕོར་སྟོབས་པ་ཡབ་ལ་དགྱེས་པར་འཁྲིལ༔ བྱང་དུ་གནོད་སྦྱིན་ཡཀྴ་མེ་དབལ་དམར༔ ཕྱག་གཡས་རལ་གྲི་གཡོན་ན་རིན་པོ་ཆེ། ནག་མོ་མི་སྲུན་ལྗང་ནག་རལ་གྲི་དང་༔ གཡོན་ན་ལྕགས་ཀྱི་སྤྱང་མོ་འགྱེད་པས་འཁྲིལ༔ ཤར་ལྷོར་གཟའ་བདུད་སྤུ་གྲི་འབར་བ་ནི༔ དུད་ཁ་མདའ་གཞུ་རྒྱལ་མཚན་་སྦྲུལ་ཞགས་བསྣམས༔ གནམ་སྨན་ཐོག་གི་བུ་ཡུག་མ་དམར་མོ༔ གཡས་གཡོན་ཐོག་མདའ་རུས་སྦལ་བསྣམས་པས་འཁྲིལ༔ ལྷོ་ནུབ་ཀླུ་བདུད་ནག་པོ་སྐུ་མདོག་སེར༔ གཡས་ན་སྦྲུལ་ཞགས་གཡོན་པས་ཆུ་སྲིན་འཛིན༔ ཀླུ་མོ་ལྕམ་ཅིག་དམར་མོ་གཡས་ནད་རྐྱལ༔ གཡོན་དུག་གི་སྤུ་གྲི་འཛིན་པས་འཁྲིལ༔ ནུབ་བྱང་ལྷ་ཆེན་དབང་ཕྱུག་ཆེན་པོ་དམར༔ གཡས་ན་རླུང་ཞགས་གཡོན་ན་ལྕགས་ཀྱུ་འདེབས༔ ཨུ་མ་དེ་ཝཱི་དམར་མོ་སྲིད་གསུམ་ཀུན༔ གསལ་བའི་མེ་ལོང་གཏེར་སྒྲོམ་འཛིན་པས་འཁྲིལ༔ བྱང་ཤར་ཁྲག་འཐུང་མ་ཧཱ་ཀཱ་ལ་མཐིང་༔ གཡས་ན་ཟངས་གྲི་གཡོན་ན་ལྕགས་པར་འཛིན༔ དུང་སྐྱོང་མ་ནག་མོ་གནམ་ལྕགས་རལ་གྲི་དང་༔ ནེའུ་ལེའི་རྐྱལ་པ་འཛིན་པས་ཡབ་ལ་འཁྲིལ༔ ཐམས་ཅད་ཞིང་ལྤགས་གོས་ཀྱི་སྟོད་གཡོགས་དང་༔ མི་མགོའི་འཕྱང་འཕྲུལ་མི་སྡུག་ཆས་ཀྱིས་བརྒྱན༔ འཇིགས་གཟུགས་བཟོད་པར་དཀའ་བའི་སྐུ་རུ་བསྒོམ༔ མཐའ་སྐོར་ཕྱི་ནང་གསང་བ་ཡང་གསང་གི༔ སྡེ་བརྒྱད་ཀྱི་མིང་དང་རྣམ་གྲངས་བསམ་མི་ཁྱབ༔ སྔགས་བདག་སྡེ་དཔོན་དཔོན་ཆེན་པོ་སུམ་ཅུ་དང་༔ དཔལ་མགོན་བདུན་ཅུ་རྩ་ལྔ་ལ་སོགས་ཀྱི༔ སྡེ་བརྒྱད་སྡེ་རིགས་གྲངས་ལས་འདས་པ་བསྒོམ༔ ༈ མན་ངག་གཉིས་པ༔ གུ་རུ་སྨན་བླ༔ ཨོཾ༔ ཆོས་དབྱིངས་མཁའ་ལ་གུ་རུ་སྨན་གྱི་བླ༔ བདེ་གཤེགས་བརྒྱད་ཀྱི་ཐུགས་སྨོན་གཅིག་བསྡུས་དཔལ༔ སྨན་གྱི་བླ་མ་སྐུ་མདོག་མཐིང་འོད་འབར༔ ཚངས་བར་སྤྱོད་པ་ཞི་ཞིང་དག་པའི་སྐུ༔ ཞལ་གཅིག་ཕྱག་གཉིས་མཆོག་སྤྱིན་མཉམ་བཞག་མཛད༔ ཨ་རུ་རིགས་ལྔ་བདུད་རྩིའི་ལྷུང་བཟེད་འཛིན༔ དབུ་ལ་གཙུག་ཏོར་ཕྱག་ཞབས་འཁོར་ལོས་མཚན༔ ཞབས་གཉིས་སྲིད་ཞིའི་མཐའ་སྤང་དཀྱིལ་ཀྲུང་བཞུགས༔ འཁོར་དུ་བདེ་གཤེགས་མཆེད་བརྒྱད་ཤར་ནས་རིམ༔ སྒྲ་དབྱངས་རྒྱལ་པོ་སྐུ་མདོག་སེར་འོད་འབར༔ མཛེས་པའི་ཕྱག་གཉིས་མཆོག་སྤྱིན་ཕྱག་རྒྱ་མཛད༔ མྱ་ངན་མེད་མཆོག་སྐུ་མདོག་དམར་འོད་འབར༔ ཕྱག་གཉིས་ཏིང་འཛིན་གཡོ་མེད་མཉམ་བཞག་རྒྱ༔ མཚན་ལེགས་ཡོངས་གྲགས་སྐུ་མདོག་སེར་འོད་འབར༔ ཕྱག་གཡས་སྐྱབས་སྤྱིན་གཡོན་པ་མཉམ་བཞག་མཛད༔ གསེར་བཟང་དྲི་མེད་སྐུ་མདོག་སེར་འོད་འབར༔ ཕྱག་གཉིས་ཆོས་འཆད་ཕྱག་རྒྱས་ཐུགས་གར་བརྒྱན༔ ཆོས་བསྒྲགས་རྒྱལ་པོ་སྐུ་མདོག་དཀར་འོད་འབར༔ ཕྱག་གཉིས་ཆོས་འཆད་ཕྱག་རྒྱས་ཐུགས་གར་བརྒྱན༔ མངོན་མཁྱེན་རྒྱལ་པོ་སྐུ་མདོག་དམར་འོད་འབར༔ ཕྱག་གཡས་མཆོག་སྦྱིན་གཡོན་པ་མཉམ་བཞག་མཛད༔ ཤཱཀྱ་ཐུབ་པ་གསེར་མདོག་འོད་ཟེར་འབར༔ ཕྱག་གཡས་བདུད་འདུལ་གཡོན་པ་མཉམ་བཞག་རྒྱ༔ སངས་རྒྱས་སྟོང་སོགས་ཕྱོགས་བཅུའི་བདེ་གཤེགས་རྣམས༔ ཀུན་ཀྱང་མཚན་དང་དཔེ་བྱད་ཡོངས་རྫོགས་ཤིང༔ གསེར་མདོག་ཚངས་སྤྱོད་ཆོས་གོས་རྣམ་གསུམ་གསོལ༔ བདུད་རྩི་སྨན་གྱི་ལྷ་མོ་སྒེག་ལ་མཛེས༔ བཞི་བརྒྱ་རྩ་བཞིའི་ནད་སེལ་སྨན་སྣོད་ཐོགས༔ རིགས་དྲུག་དྲང་སྲོང་དཀའ་ཐུབ་རྣལ་འབྱོར་ཆས༔ ཚངས་སྐུད་ཐོར་ཅོག་དྲི་མེད་རས་གཟན་གསོལ༔ ལྷ་དང་ལྷ་མོ་མངོན་ཤེས་ལྡན་པའི་ཚོགས༔ མེ་ལོང་མདའ་དར་སྒྲ་སྙན་རོལ་མོ་འཛིན༔ གནོད་སྦྱིན་སྡེ་དཔོན་བཅུ་གཉིས་གཡོག་དང་བཅས༔ གོ་ཁྲབ་བེར་གྱོན་མཚོན་ཆ་སྣ་ཚོགས་ཐོགས༔ ཡུལ་འཁོར་སྲུང་ནི་དཀར་པོ་པུ་ཝཾ་འཐེན༔ འཕགས་སྐྱེས་པོ་ནི་དམར་པོ་སྦྲུལ་ཞགས་འཛིན༔ སྤྱན་མི་བཟང་ནི་ལྗང་ཁུ་རལ་གྲི་ཐོགས༔ རྣམ་ཐོས་སྲས་ནི་སེར་པོ་ནེའུ་ལེ་འཛིན༔ རྒྱལ་པོ་ཆེན་པོ་སྡེ་བཞི་འཁོར་དང་བཅས༔ སྲ་བའི་གོ་གྱོན་འཇིགས་བྱེད་ཕྱག་མཚན་འཛིན༔ སྒྲུབ་པ་པོ་ལ་དངོས་གྲུབ་མཆོག་སྩོལ་བའི༔ སྲུང་སྐྱོབས་འདྲེན་པ་བླ་མེད་སྐུ་རུ་བསྒོམ༔ ༈ མན་ངག་གསུམ་པ༔ ཨོ་རྒྱན་ནོར་ལྷ༔ ཛྂ༔ ཆོས་དབྱིངས་མཁའ་ལ་རང་འོད་ཡེ་ཤེས་དབུས༔ གཏེར་བུམ་ཞབས་སྤྲོད་པད་ཟླ་ཉི་མའི་སྟེང༔ ཛྂ༔བྂ༔རྨུགས་འཛིན་མཁའ་འགྲོའི་དྲྭ་བ་སྡོམས༔ དམར་པོ་བརྗིད་ལྡན་ཆགས་རྒྱས་ཡིད་ཙམ་ཁྲོ༔ གཞོན་ནུ་ལོ་བརྒྱད་ལང་ཚོ་མཆོག་ཏུ་རྒྱས༔ སྙེམ་པའི་ཉམས་ལྡན་ནོར་བུ་ཐུགས་གར་འཛིན༔ གཡོན་པས་ནེའུ་ལེ་དཀུར་བརྟེན་ནོར་བུ་སྐྱུགས༔ རིན་ཆེན་རྒྱན་སྤྲས་གཡས་བརྐྱང་སྟབས་ཀྱིས་བཞུགས༔ ཡུམ་མཆོག་བདེ་རྒྱས་ནོར་བུ་ཐོད་ཁྲག་འཛིན༔ གཞོན་ཚུལ་ཆགས་པའི་ཉམས་དང་ལྡན་པས་འཁྱུད༔ ཤར་ནས་ཕྱོགས་བཞི་མཚམས་བཞི་གཡས་རིམ་དུ༔ ཤར་དུ་ནོར་བཟང་ཟླ་ཤེལ་མ་དང་འཁྲིལ༔ ལྷོ་རུ་གང་བཟང་ཟས་སྤྱིན་མ་དང་འཁྲིལ༔ ནུབ་ཏུ་ནོར་སྤྱིན་བཞིན་བཟང་མ་དང་འཁྲིལ༔ བྱང་དུ་རྣམ་སྲས་ནོར་རྒྱུན་འཕགས་མར་འཁྲིལ༔ ཤར་ལྷོར་རོལ་ཕྲེང་རབ་བཟང་མ་དང་འཁྲིལ༔ ལྷོ་ནུབ་འཇམ་འཁྱིལ་རབ་སྦས་མ་དང་འཁྲིལ༔ ནུབ་བྱང་ཞལ་དབང་ལྷ་མོ་མཆོག་མར་འཁྲིལ༔ བྱང་ཤར་སྤྱོད་དབང་དབྱངས་ཅན་མ་དང་འཁྲིལ༔ ཡབ་ཡུམ་ཁ་སྦྱོར་ཕྱོགས་མཚམས་བརྒྱད་དུ་གནས༔ ཕྱོགས་བཞི་ཕྱོགས་མདོག་མཚམས་བཞི་སྐུ་མདོག་མཐིང་༔ ཡབ་རྣམས་གཡས་པ་ནོར་བུ་གཡོན་ནེའུ་ལེ༔ ཡུམ་རྣམས་གཡས་པས་ནོར་བུའི་ལྕགས་ཀྱུ་དང་༔ གཡོན་པ་གཏེར་གྱི་གཞོང་པར་ཕྱྭ་གཡང་སྡུད༔ གཞན་ཡང་ནོར་ལྷའི་རིགས་གྱུར་བྱེ་བ་བརྒྱ༔ གྲངས་ལས་འདས་པས་རིན་ཆེན་ཆར་འབེབས་ཤིང༔ དགོས་འདོད་དངོས་གྲུབ་ཆེན་པོ་སྤྲིན་དུ་གཏིབས༔ ༈ མན་ངག་བཞི་བ༔ ཡི་དམ་རྡོ་རྗེ་གཞོན་ནུ་ནི༔ ཧཱུྂ༔ ཆོས་དབྱིངས་མཁའ་ལ་རང་འོད་མེ་དཔུང་དབུས༔ པདྨ་ཉི་མ་བདུད་བཞི་བསྣོལ་བའི་སྟེང༔ དཔལ་ཆེན་རྡོ་རྗེ་གཞོན་ནུ་སྐུ་མདོག་མཐིང༔ ཞལ་གསུམ་ཕྱག་དྲུག་ཞབས་བཞི་འདོར་སྟབས་བསྒྲད༔ གཡས་དཀར་གཡོན་དམར་དབུས་ཞལ་མཐིང་འོད་འབར༔ གཡས་གཉིས་རྡོ་རྗེ་རྩེ་དགུ་རྩེ་ལྔ་དང༔ གཡོན་གཉིས་ཁ་ཊཱྂ༔བསྐལ་བའི་མེ་དཔུང་འཛིན༔ མཐའ་གཉིས་ཕུར་བུས་དགྲ་བགེགས་སྙིང་ལ་གཟིར༔ འཁོར་ལོ་རྒྱས་འདེབས་ཁ་ཊཱཾ་ཐོད་ཁྲག་འཛིན༔ སྔོ་སྐྱ་ཆགས་པའི་ཉམས་ལྡན་ཡབ་ལ་འཁྲིལ༔ ཤར་ཕྱོགས་ཡང་དག་ཐུགས་ཀྱི་དཀྱིལ་འཁོར་དུ༔ དཔལ་ཆེན་ཡང་དག་སྔོན་པོ་རྡོར་དྲིལ་འཛིན༔ ལྷོ་མདུན་འཇམ་དཔལ་སྐུའི་དཀྱིལ་འཁོར་དུ༔ གཤིན་རྗེ་གཤེད་པོ་སེར་པོ་དབྱུག་ཏོ་འཛིན༔ ནུབ་ཕྱོགས་པདྨ་གསུང་གི་དཀྱིལ་འཁོར་དུ༔ དབང་ཆེན་རྟ་མགྲིན་དམར་པོ་པདྨ་འཛིན༔ བྱང་ཕྱོགས་འཕྲིན་ལས་ཕུར་བའི་དཀྱིལ་འཁོར་གྱི༔ རྡོ་རྗེ་གཞོན་ནུ་སྔོན་པོ་ཕུར་བ་འདྲིལ༔ ཤར་ལྷོ་མ་མོ་རྦོད་གཏོང་དཀྱིལ་འཁོར་གྱི༔ དཔལ་ཆེན་མངོན་རྫོགས་མཐིང་ནག་ཁྲམ་ཤིང་འཛིན༔ ལྷོ་ནུབ་བདུད་རྩི་ཡོན་ཏན་དཀྱིལ་འཁོར་དུ༔ བདུད་རྩི་འཁྱིལ་བ་ལྗང་ཁུ་བུམ་པ་འཛིན༔ ནུབ་བྱང་འཇིག་རྟེན་མཆོད་བསྟོད་དཀྱིལ་འཁོར་དུ༔ དྲེགས་པ་ཀུན་འདུལ་སྔོན་པོ་དབང་སྙིང་འཛིན༔ བྱང་ཤར་དམོད་པ་དྲག་སྔགས་དཀྱིལ་འཁོར་དུ༔ སྟོབས་ལྡན་ནག་པོ་དམར་ནག་འཁོར་ལོ་འཛིན༔ ལྷ་ཚོགས་ཐམས་ཅད་ཞལ་གཅིག་ཕྱག་གཉིས་པ༔ གཡོན་པས་བདེ་སྐྱོང་སྣོད་དུ་བདུད་རྩི་ཁོལ༔ དེ་དབུས་ཡུམ་སྲོག་བམ་ཡིག་འོད་ཟེར་འབར༔ འོད་ཟེར་སྟོབས་གྱིས་བདེ་ཆེན་ཡེ་ཤེས་སྦར༔ དཔལ་གྱི་ཞབས་ནི་གཡས་བསྐུམ་གཡོན་བསྐྱང་ལ༔ རྡོ་རྗེའི་གཤོག་པ་དུར་ཁྲོད་ཆས་ཀྱིས་བརྒྱན༔ ཡེ་ཤེས་མེ་དཔུང་འབར་བའི་ཀློང་ནས་བཞེངས༔ མཁའ་ཁྱབ་རྡོ་རྗེ་ཁྱུང་གིས་སྤྲུལ་གར་འགྱེད༔གཞན་ཡང་ཡི་དམ་ཐེག་དགུ་རྒྱུད་སྡེ་དྲུག༔ ཞི་བ་ཁྲོ་བོ་ཞི་མ་ཁྲོ་ལ་སོགས༔ རྒྱལ་བའི་དཀྱིལ་འཁོར་རབ་འབྱམས་ཚོམ་བུ་འབུམ༔ གྲངས་མེད་སྤྲིན་དཔུང་གཏིབ་ལྟར་བསྐོར་བར་བསྒོམ༔ ༈ མན་ངག་ལྔ་བ༔ པདྨ་ཟིལ་གནོན་དྲག་རྩལ༔ ཧཱུྂ༔ ཆོས་དབྱིངས་མཁའ་ལ་རང་འོད་མེ་དཔུང་ཀློང༔ པདྨ་ཉི་མ་སྡེ་བརྒྱད་སྲོག་གཟུགས་སྟེང་༔ སྣང་སྲིད་དྲེགས་པ་ཡོངས་ཀྱི་སྲོག་གི་བདག༔ ཆེ་བའི་ལྷ་མཆོག་ལྷ་སྲིན་སྡེ་བརྒྱད་འདུལ༔ པདྨ་ཟིལ་གནོན་དྲག་རྩལ་དཀར་དམར་མདངས༔ ཞལ་གཅིག་ཕྱག་གཉིས་བཞེངས་སྟབས་སྤྱན་གསུམ་པ༔ ཁྲོ་འཛུམ་བེར་ཕོད་ཆོས་གོས་སྐུ་ལ་གསོལ༔ པད་ཞུ་ཁྱུང་ལྡེམ་ཕྱག་གཡས་གནམ་ལྕགས་ཀྱི༔ རྡོ་རྗེ་རྩེ་དགུ་མེ་འབར་ཁ་གདངས་ཕྱར༔ གཡོན་པས་དྲེགས་པ་སྡེ་བརྒྱད་སྙིང་ཕྲེང་འདྲེན༔ ཞབས་གཉིས་འདོར་ཐབས་ལྷ་འདྲེ་མི་གསུམ་གནོན༔ དེ་ཡི་དཔྲལ་བར་ཉི་མའི་དཀྱིལ་འཁོར་ལ༔ འཇམ་དཔལ་རྡོ་རྗེ་རྣོན་པོ་སྐུ་མདོག་སྔོ༔ ཞལ་གཅིག་ཕྱག་གཉིས་སྤྱན་གསུམ་ཁྲོ་གཉེར་བསྡུས༔ ཕྱག་གཡས་རལ་གྲི་མེ་འབར་མཁའ་ལ་ཕྱར༔ གཡོན་པ་མཆོག་གསུམ་དམ་རྒྱ་ཐུགས་གར་བཀོད༔ ཨུཏྤལ་དམར་ནག་སྙན་གཡོན་ཁ་ཕྱེས་པའི༔ དབུས་སུ་རྡོ་རྗེ་རྩེ་ལྔ་མེ་འབར་བསྣམས༔ ཞབས་གཡས་པུས་མོ་སར་བཀོད་འགྱིང་སྟབས་རོལ༔ མགྲིན་པར་ཉི་མའི་གདན་ལ་རྟ་མགྲིན་དམར༔ ཞལ་གཅིག་ཕྱག་གཉིས་རྟ་དབུ་ལྗང་ཞུར་ཅན༔ གཡས་པས་ཐོད་དབྱུག་གཡོན་པས་སྡིག་མཛུབ་ཀྱིས༔ ཞགས་པ་བཟུང་ནས་གདུགས་པ་འཆིང་བར་བྱེད༔ དཔའ་བོ་གྱད་ཀྱི་འདོར་སྟབས་ཅན་དུ་བཞུགས༔ ཐུགས་ཀར་ཉི་མའི་གདན་ལ་གསང་བའི་བདག༔ མཐིང་ཀ་ཞལ་གཅིག་ཕྱག་གཉིས་འདོར་སྟབས་ཅན༔ ཕྱག་གཡས་རྡོ་རྗེ་ཕྱར་ཞིང་གཡོན་སྡིག་མཛུབ༔ སྟག་ཤམ་སྦྲུལ་ཆུན་ཕྱག་ཞབས་རྒྱན་དུ་འཆང་༔ ལྟེ་བར་ཡེ་ཤེས་མགོན་པོ་མཐིང་ནག་མདོག༔ ཞལ་གཅིག་ཕྱག་གཉིས་གྲི་ཐོད་འདོར་སྟབས་བཞུགས༔ རུས་པའི་རྒྱན་གསོལ་འཇིགས་ལ་གཏུམ་པའི་སྐུ༔ བརྒྱུད་གསུམ་སྲུང་མ་འདུས་པའི་ངོ་བོར་གསལ༔ གསང་བར་ཁྱབ་འཇུག་ཆེན་པོ་རཱ་ཧུ་ལ༔ མཐིང་ནག་སྐུ་སྟོད་མི་ལ་སྨད་སྦྲུལ་འཇུག༔ཞལ་དགུ་ཁྲོས་པ་བྱ་རོག་གདོང་དང་བཅུ༔ ཕྱག་བཞིའི་དང་པོས་རྭ་ཡི་མདའ་གཞུ་འགེངས༔ གཡས་འོག་ཆུ་སྲིན་རྒྱལ་མཚན་གཡོན་སྦྲུལ་ཞགས༔ ཉི་ཟླ་གཟའ་སྐར་འབྱུང་བའི་བདག་པོར་བཞེངས༔ འཁོར་དུ་ཤར་ཕྱོགས་ཞིང་སྐྱོང་སེངྒེའི་གདོང་༔ བདུད་པོ་ཁྲོས་པ་མདུང་དང་སྙིང་ཁྲག་འཛིན༔ དགེས་ཡུམ་སི་ན་ར་མ་མི་ལྤགས་གསོལ༔ ཕྱག་མཚན་ཡབ་མཚུངས་གཉིས་ཀ་རྟ་ལ་ཆིབས༔ ལྷོ་རུ་བསེ་ཡི་སྐྱེ་བུ་གདུག་པ་ཅན༔ སྐུ་མདོག་དམར་སེར་ལེབ་བརྒན་བསེ་ཁྲབ་གསོལ༔ ཟངས་ཀྱི་ཕུར་པས་དགྲ་གདོན་བགེགས་ཚོགས་སྒྲོལ༔ བསེ་རྟ་དམར་པོ་བཅིབས་ནས་དགྲ་བགེགས་འདུལ༔ ནུབ་ཏུ་ལྕགས་ཀྱི་སྐྱེས་བུ་དྲག་རྩལ་ཅན༔ སྐུ་མདོག་སྔོན་པོ་དར་ནག་བེར་ཆེན་གསོལ༔ ཤེལ་གྱི་ཕུར་པས་དགྲ་གདོན་བགེགས་ཚོགས་སྒྲོལ༔ ལྕགས་སྤྱང་སྔོན་པོ་བཅིབས་ནས་དགྲ་བགེགས་འདུལ༔ བྱང་དུ་དུང་གི་སྐྱེས་བུ་ཆེན་པོ་མི་བཟད་པ༔ སྐུ་མདོག་དཀར་པོ་དར་དཀར་འཇོལ་བེར་གསོལ༔ དུང་གི་ཕུར་པ་དྲིལ་ཞིང་དགྲ་བགེགས་སྒྲོལ༔ སེང་དཀར་བཅིབས་ནས་དགྲ་བགེགས་ཆམ་ལ་འབེབས༔ ཤར་ལྷོར་དམ་ཅན་སྐྱེས་བུ་རྡོ་རྗེ་ལེགས༔ དམར་ནག་ཞལ་གཅིག་ཕྱག་གཉིས་རྡོ་རྗེ་དང་༔ དགྲ་བགེགས་སྙིང་འཛིན་གོ་ཁྲབ་འཁོར་གསུམ་གསོལ༔ སེངྒེ་དཀར་མོར་ཆིབས་ནས་ནོར་གཡང་སྡུད༔ ལྷོ་ནུབ་རྨ་ཆེན་སྤོམ་ར་སྐུ་མདོག་དཀར༔ གཡས་པ་མདུང་དང་གཡོན་པ་ནོར་གཞོང་འཛིན༔ ལྭ་དཀར་བེར་དམར་གཡང་ལུགས་ཚུལ་དུ་གསོལ༔ ཞྭ་དཀར་རྟ་དཀར་གྱོན་ནས་ཟས་གཡང་འགུགས༔ ནུབ་བྱང་གཉན་ཆེན་ཐང་ལྷ་སྐུ་མདོག་དཀར༔ ཕྱག་གཡས་སྦ་ལྕག་གཡོན་པས་ཤེལ་ཕྲེང་འདྲེན༔ དར་དཀར་ལྭ་འུ་ཟབ་ཆེན་བེར་ཕྱམ་བརྗིད༔ གྲོ་དཀར་རྟ་ལ་ཆིབས་ནས་མི་གཡང་འགུགས༔ བྱང་ཤར་ལྷ་མོ་གཉན་གྱི་རེ་མ་ཏི༔ མཐིང་ནག་རལ་གྲི་ཐོད་པ་ནེའུ་ལེ་འཛིན༔ མི་ལྤག་རེ་ལྡེའི་སྨད་གཡོགས་རོལ་སྟབས་བཞུགས༔ སྲིན་མོའི་ཆས་ཅན་དྲེའུ་དམར་གྭ་ཆིབས༔ མཐའ་སྐོར་དཔལ་མགོན་བདུན་ཅུ་རྩ་ལྔ་དང་༔ སྲིད་པ་ཆགས་པའི་ལྷ་རབས་མཆེད་དགུ་དང་༔ དགེ་བསྙེན་ཉེར་གཅིག་བརྟན་མ་བཅུ་གཉིས་དང་༔ ཆེ་གཉན་བཙན་པོ་རི་དབང་ཡུལ་གྱི་ལྷ༔ རྗེ་ཡི་མགུལ་ལྷ་བཅུ་གསུམ་ལ་སོགས་པ༔ སྲིད་པའི་མཐུ་ཆེན་ལྷ་ཀླུ་དྲེགས་པའི་ཚོགས༔ ཐམས་ཅད་ཞལ་གཅིག་ཕྱག་གཉིས་ཐལ་སྦྱར་འདུད༔ ནོར་མཆོག་སྲོག་དབང་དྭངས་མ་འབུལ་ཚུལ་བཞུགས༔ ༈ མན་ངག་དྲུག་པ༔ གསང་བདག་སེདྒེ་སྒྲ་སྒྲོགས༔ ཧཱུྂ༔ ཆོས་དབྱིངས་མཁའ་ལ་རང་འོད་མེ་དཔུང་དབུས༔ པདྨ་ཉི་མའི་གདན་ལ་རྒྱལ་ཀུན་གྱི༔ མཐུ་སྟོབས་གཅིག་བསྡུས་ཐུགས་ཀྱི་རྡོ་རྗེ་འཛིན༔ དཔལ་ཆེན་ཁྲོ་རྒྱལ་གསང་བདག་སེདྒེའི་སྒྲ༔ སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ ཕྱག་གཡས་གནམ་ལྕགས་རྡོ་རྗེ་རྩེ་དགུ་པ༔ མཁའ་དབྱིངས་འཕྱར་བས་སྲིད་གསུམ་ཟིལ་གྱིས་གནོན༔ ཕྱག་གཡོན་སྡིགས་མཛུབ་ཕྱག་རྒྱ་ཐུགས་ཀར་བཀོད༔ བཀའ་ལས་འདས་མེད་སྤ་ཀོང་བརྒྱལ་བར་བྱེད༔ སེངྒེ་གླང་ཆེན་པགས་པས་སྟོད་གཡོགས་ཤིང་༔ མི་ལྤགས་སྐེད་དཀྲིས་སྟག་ཤམ་རུས་རྒྱན་གསོལ༔ དཔལ་དང་དུར་ཁྲོད་ཆས་རྫོགས་འདོར་སྟབས་བཞུགས༔ ཁྲོ་གཏུམ་འཇིགས་པའི་ཉམས་ཅན་དབུ་སྐྲའི་གསེབ༔ སེང་ཆུང་ཕོ་ཉ་སྐར་མདའ་ལྟ་བུ་འཕྲོ༔ ཡུམ་མཆོག་བདུད་འདུལ་དྲག་མོ་སེང་གེའི་གདོང༔ དམར་ནག་ཞལགཅིག་ཕྱག་གྲི་ཐོད་འཛིན༔ གཅེར་བུ་རུས་པའི་རྒྱན་ཅན་གཡོན་ནས་འཁྱུད༔ བྱད་མ་གདོན་བགེགས་གདུག་པའི་གཉེན་པོར་བསྒོམ༔ ཤར་དུ་རྡོ་རྗེ་དཔའ་བོ་སྐུ་མདོག་མཐིང་༔ ཞལ་གཅིག་ཕྱག་གཉིས་ཞབས་གཉིས་འདོར་སྟབས་ཅན༔ ཕྱག་གཡས་རྡོ་རྗེ་གཡོན་པས་དྲིལ་བུ་འཛིན༔ རྡོ་རྗེ་དཔའ་མོ་སྔོ་སྐྱ་སྒེག་པའི་ཉམས༔ ཕྱག་གཡས་ཌཱ་རུས་མ་རིག་གཉིད་ལས་སློང་༔ ཡབ་ཡུམ་འཁྲིལ་སྦྱོར་བདེ་ཆེན་ཀློང་དུ་རོལ༔ ལྷོ་རུ་རིན་ཆེན་དཔའ་པོ་སྐུ་མདོག་སེར༔ ཞལ་གཅིག་ཕྱག་གཉིས་གཡས་པས་ནོར་བུ་འཛིན༔ རིན་ཆེན་དཔའ་མོ་སེར་སྐྱ་སྙེམ་པའི་ཉམས༔ ཕྱག་གཡས་རིན་ཆེན་ཟར་བུ་འཛིན་པས་འཁྱུད༔ ནུབ་ཏུ་པདྨ་དཔའ་བོ་སྐུ་མདོག་དམར༔ ཞལ་གཅིག་ཕྱག་གཉིས་གཡས་པས་པདྨ་བསྣམས༔ པདྨ་དཔའ་མོ་དམར་སྐྱ་ཆགས་པའི་ཉམས༔ ཕྱག་གཡས་པད་སྡོང་འཛིན་ཞིང་ཡབ་ལ་འཁྱུད༔ བྱང་དུ་ལས་ཀྱི་དཔའ་བོ་སྐུ་མདོག་ལྗང་༔ ཞལ་གཅིག་ཕྱག་གཉིས་གཡས་པས་རྒྱ་གྲམ་འཛིན༔ ལས་ཀྱི་དཔའ་མོ་ལྗང་སྐྱ་ཁྲོ་བའི་ཉམས༔ ཕྱག་གཡས་རལ་གྲི་འཛིན་པས་ཡབ་ལ་འཁྲིལ༔ ཡབ་རྣམས་ཕྱག་གཡོན་དྲིལ་བུ་ཡུམ་ལ་འཁྱུད༔ ཡུམ་རྣམས་ཐོད་པའི་བདུད་རྩི་ཡབ་ལ་སྟོབས༔ དབུ་སྐྲ་སྤྱི་བོར་བཅིངས་ཤིང་ཐུར་དུ་གྲོལ༔ ཀུན་ཀྱང་དར་དང་རིན་ཆེན་རུས་རྒྱན་གསོལ༔ ཐོར་གཙུགས་རིགས་ལྔའི་ཅོད་པཎ་མཛེས་པར་གསོལ༔ བཞེངས་སྟབས་བརྗིད་བག་དཔའ་བའི་ཚུལ་དུ་བཞུགས༔ ཤར་ལྷོར་འགུགས་གིང་མཐིང་ནག་ལྕགས་ཀྱུ་འཛིན༔ ཡུམ་མཆོག་རྡོ་རྗེ་སྔོན་མོ་རྡོ་རྗེ་ཐོགས༔ ལྷོ་ནུབ་འཛིན་གིང་སེར་ནག་རལ་གྲི་འཛིན༔ རིན་ཆེན་སེར་མོ་རིན་ཆེན་ཐོགས་པས་འཁྱུད༔ ནུབ་བྱང་སྟོབ་གིང་དམར་ནག་ཐོད་སྙིང་འཛིན༔ པདྨ་དམར་མོ་པདྨ་ཐོགས་པས་འཁྱུད༔ བྱང་ཤར་རྒྱུག་གིང་ལྗང་ནག་རྒྱུ་ཞགས་འཛིན༔ ཀརྨ་ལྗང་གུ་རྒྱ་གྲམ་ཐོགས་པས་འཁྱུད༔ གིང་མོ་ཐམས་ཅད་ཕྱག་གཡས་ཡབ་ལ་འཁྱུད༔ གཡོན་པས་དྲིལ་བུ་འཁྲོལ་ཞིང་གར་སྟབས་མཛད༔ རུས་པའི་རྒྱན་དང་ཐོད་པའི་དོ་ཤལ་ཅན༔ མི་སྡུག་སྲིན་པོའི་ཉམས་ཅན་སྣ་ཚོགས་བཞུགས༔ གཞན་ཡང་ཀིང་རུས་གཟུགས་སུ་ཁྲོས་པ་དང་༔ བཞད་དང་གླུ་ལེན་གར་སྟབས་བསྒྱུར་བ་ཡི༔ དཔའ་བོ་མཁའ་འགྲོ་གིང་ཕོ་ཀིང་མོའི་ཚོགས༔ བྱེ་བ་དཔག་མེད་ཉི་ཟེར་རྡུལ་བཞིན་འཁྲིགས༔ ཌཱ་རུ་དྲིལ་བུ་རོལ་མོ་སྣ་ཚོགས་འཁྲོལ༔ བཤུགས་པའི་འབོད་བརྡ་ཧཱུྃ་གི་སྣང་གླུ་ལེན༔ སྒྲ་འོད་ཟེར་ཁྱིམ་ཀློང་དུ་དགྱེས་པར་རོལ༔ ༈ མན་ངག་བདུན་པ༔ པདྨ་བཛྲ༔ ཧྲཱིཿ ཆོས་དབྱིངས་མཁའ་ལ་རང་འོད་མེད་དཔུང་ཀློང༔ ཉན་ཐོས་པདྨ་མུ་ཏིག་འབར་པ་བཀྲམ༔ རང་རྒྱལ་ཨསྨ་གརྦྷའི་མགོ་བོ་འཁྲིགས༔ བྱང་སེམས་ནོར་བུ་དཀར་དམར་བྲག་རི་བརྩེགས༔ ཀྲི་ཡའི་རྡོ་རྗེ་རྩེ་གཅིག་བྲག་ཆེན་བརྗིད༔ ཨུ་པའི་རྡོ་རྗེ་རྩེ་གསུམ་བྲག་རྔམས་ཆགས༔ ཡོ་གའི་རྡོ་རྗེ་རྩེ་ལྔའི་བྲག་རི་མཐོ༔ མ་ཧཱའི་རྡོ་རྗེ་རྩེ་དགུའི་ཁྲི་ཆེན་ཡངས༔ ཨ་ནུའི་པདྨ་དམར་པོ་འདབ་མ་བརྒྱད་མཛེས༔ ཨ་ཏིའི་ཉི་ཟླ་ཁ་སྦྱོར་བཞུགས་གདན་གསལ༔ ཐེག་པ་རིམ་དགུ་རྫོགས་པའི་གདན་སྟེང་དུ༔ འོད་དཔག་མེད་མགོན་བདེ་བ་ཆེན་པོའི་སྐུ༔ པདྨ་བཛྲ་ཞལ་གསུམ་ཕྱག་དྲུག་དམར༔ གཡས་དཀར་གཡོན་མཐིང་ཁྲོ་འཛུམ་འགྱིང་བའི་སྐུ༔ གཡས་གསུམ་རྡོ་རྗེ་རལ་གྲི་ཚེ་ཡི་བུམ༔ གཡོན་གསུམ་དྲིལ་བུ་བྷཉྫ་ནམ་མཁའི་དབྱུག༔ ཡུམ་མཆོག་གསང་བ་ཡེ་ཤེས་མནྡཱ་ར༔ དམར་མོ་ཆགས་རྒྱས་ཌཱ་རུ་དྲིལ་བུ་འཛིན༔ བཅུ་དྲུག་ལང་ཚོ་རབ་རྒྱས་ཡིད་འཕྲོག་མ༔ ནུ་མ་ཆེ་ཞིང་བྷ་ག་རབ་ཏུ་རྒྱས༔ སྐེད་སྟབས་ཕྲ་ཞིང་བདེ་བ་ཆེ་ལ་རོལ༔ ཐོར་གཙུག་རྩེ་ན་རིགས་བདག་ཚེ་དཔག་མེད༔ ཚེ་བུམ་འཛིན་པ་གོས་དཀར་ཡུམ་དང་འཁྲིལ༔ ཡབ་ཡུམ་གཉིས་མེད་དཔལ་གྱི་ཆས་བཅུ་དང་༔ གར་དགུའི་ཉམས་ལྡན་རྡོ་རྗེའི་གར་སྟབས་བསྒྱུར༔ གཙོ་བོའི་ཤར་ནས་གཡས་སྐོར་རིམ་པ་བཞིན༔ ཤར་དུ་ཞེ་སྡང་རྡོ་རྗེ་རྡོ་རྗེ་མཐིང་༔ སྐྱོད་བྱེད་དམར་མོ་རྡོ་རྗེ་གྲི་གུག་འཛིན༔ ལྷོར་རུ་ང་རྒྱལ་རྡོ་རྗེ་རིན་ཆེན་སེར༔ གཤིན་རྗེ་འཇོམས་མ་ལྗང་གུ་རིན་ཆེན་ཐོགས༔ ནུབ་ཏུ་འདོད་ཆགས་རྡོ་རྗེ་པདྨ་དམར༔ སྲེག་བྱེད་སྔོན་མོ་པདྨ་གྲི་གུག་འཛིན༔ བྱང་དུ་ཕྲག་དོག་རྡོ་རྗེ་རྒྱ་གྲམ་ལྗང་༔ ཙན་ཏི་ཀ་སེར་རྒྱ་གྲམ་གྲི་གུག་འཛིན༔ ཤར་ལྷོར་གཏི་མུག་རྡོ་རྗེ་འཁོར་ལོ་སྨུག༔ རྨོངས་བྱེད་དཀར་མོ་ཁ་ཊྭཱྃ་འཛིན་པས་འཁྱུད༔ ལྷོ་ནུབ་བདེ་བའི་རྡོ་རྗེ་པད་ཞགས་སེར༔ ལཱ་མ་སྔོན་མོ་ལྕགས་ཀྱུ་འཛིན་པས་འཁྱུད༔ ནུབ་བྱང་མཚོ་སྐྱེས་རྡོ་རྗེ་བུམ་པ་དམར༔ མནྡཱར་བ་པད་སྡོང་དཀར་ལ་སྔོ༔ བྱང་ཤར་ཁྲག་འཐུང་རྡོ་རྗེ་དགྲ་སྟྭ་སྨུག༔ གསོད་བྱེད་སྤུ་གྲི་ལྗང་མོ་ཡབ་ལ་འཁྲིལ༔ ཡབ་རྣམས་ཕྱག་གཡོན་ཤེས་རབ་དྲིལ་བུ་དང་༔ ཡུམ་རྣམས་བྷནྡྷ་བསྣམས་པས་ཡབ་ལ་འཁྲིལ༔ ཐམས་ཅད་སྤྱན་གསུམ་ཁྲོ་འཛུམ་རུས་རྒྱན་དང་༔ རིན་ཆེན་དོ་ཤལ་དར་གྱི་ཅོད་པཎ་གཡོ༔ ཤ་ཁམས་སེང་གདོང་དཀར་མོ་རྡོ་རྗེ་འཛིན༔ དྲོད་ཁམས་འོད་གསལ་གླང་གདོང་རིན་ཆེན་སྔོན༔ ཁྲག་ཁམས་མཉེན་གསལ་སྤྱང་གདོང་པདྨ་སེར༔ དབུགས་ཁམས་ཡང་གསལ་ཁྱུང་གདོང་རྒྱ་གྲམ་ལྗང་༔ ཆོས་ཁམས་བཀྲག་གསལ་འུག་གདོང་རྡོ་རྗེ་མཐིང་༔ ཕྱག་གཡོན་ཐོད་ཁྲག་ཕྱག་རྒྱ་ལྔ་ཡིས་བརྒྱན༔ ཤར་དུ་ཆུ་ཁམས་རྟ་གདོང་ལྕགས་ཀྱུ་དཀར༔ ལྷོར་རུ་ས་ཁམས་ཕག་གདོང་ཞགས་པ་སེར༔ ནུབ་དུ་མེ་ཁམས་སེང་གདོང་ལྕགས་སྒྲོག་དམར༔ བྱང་དུ་རླུང་ཁམས་སྦྲུལ་གདོང་དྲིལ་བུ་ལྗང་༔ དབུས་སུ་མཁའ་ཁམས་ཁྱུང་གདོང་རྡོ་རྗེ་མཐིང་༔ ཡེ་ཤེས་རང་འོད་མེ་རི་ཁ་ཏོག་ལྔ༔ འཁྲིགས་དབུས་ཞི་མ་ཁྲོ་ཚུལ་རང་འོད་འབར༔ གཞན་ཡང་འབྱུང་ལྔའི་མཁའ་འགྲོ་བྱེ་བ་འབུམ༔ གྲངས་མེད་ནམ་མཁའི་ཁམས་ཀུན་ཁྱབ་པར་བསྒོམ༔ ༈ མན་ངག་བརྒྱད་པ༔ རྟ་མགྲིན་ནག་པོ༔ ཧྲཱིཿ ཆོས་དབྱིངས་མཁའ་ལ་རང་འོད་མེ་དཔུང་ཀློང༔ ཁྲག་མཚོའི་དབུས་སུ་ཀེང་རུས་ཕོ་མོའི་གདན༔ དེ་སྟེང་ཁྲོ་གཉེར་གཡོ་བའི་སྟག་ཕོ་མོ༔ དེ་སྟེང་རུ་དྲ་ཕོ་མོ་གུས་ཉམས་ལྡན༔ དེ་སྟེང་ཉི་མའི་དཀྱིལ་འཁོར་ཆ་ཤས་རྫོགས༔ དཔལ་ཆེན་རྟ་མགྲིན་ནག་པོ་ཤིན་ཏུ་ཁྲོས༔ ཞལ་གཅིག་ཕྱག་གཉིས་ཞབས་གཉིས་གེལ་ཚུལ་བཞུགས༔ ཕྱག་གཡས་རྡོ་རྗེ་གཡོན་ན་སེང་ལྡེང་རྔ༔ པུས་མོ་གཡོན་པའི་སྟེང་དུ་དྲག་ཏུ་རྡུང་༔ སྐུ་ལ་དཔལ་དང་དུར་ཁྲོད་ཆས་ཀྱིས་བརྒྱན༔ དབུ་གཙུག་རྟ་མགོ་ལྗང་ཞུར་རྟ་སྐད་འཚེར༔ དབུ་སྐྲ་ཁམ་ནག་གྱེན་བརྫེས་མཁའ་ལ་འཕྱོ༔ ཞལ་གདངས་ལྗགས་འདྲིལ་རྣོ་དཀར་མཆེ་བ་གཙིགས༔ དབུ་སྐྲ་སྨ་ར་སྨིན་མར་མེ་དཔུང་འབར༔ སྤྱན་གསུམ་དམར་ཟླུམ་སྡང་མིག་ཚུལ་དུ་བགྲད༔ ཀེང་རུས་སྙན་ཆ་ཐོད་པའི་དོ་ཤལ་དཔྱང་༔ རུས་པའི་རྒྱན་ལྡན་སྟག་གི་ཤམ་ཐབ་གསོལ༔ ཤིན་ཏུ་དྲག་གཏུམ་གསོད་པའི་ངར་དང་ལྡན༔ པང་དུ་རྡོ་རྗེ་ཁྲོས་མ་སྐུ་མདོག་སྔོན༔ ཞལ་གཅིག་ཕྱག་གཉིས་གཅེར་བུ་རུས་རྒྱན་ཅན༔ གྲི་གུག་ཐོད་པ་འཛིན་པས་མགུལ་ནས་འཁྱུད༔ གཙོ་བོའི་སྤྱི་བོར་པདྨ་ཐོད་ཕྲེང་རྩལ༔ དམར་ནག་ཞལ་གཅིག་ཕྱག་གཉིས་གཡོན་བརྐྱང་སྟབས༔ ཕྱག་གཡས་ཐོད་རྔ་གཡོན་ན་དྲིལ་བུ་འཁྲོལ༔ སྟག་ཤམས་ཐོད་སྐམ་རུས་རྒྱན་ཁྲོ་བོའི་ཆས༔ རྡོ་རྗེ་ཕག་མོ་གྲི་ཐོད་འཛིན་པས་འཁྱུད༔ བདེ་བའི་སྒྲ་སྒྲོགས་བདུད་རྩིའི་ཆར་བ་འབེབས༔ ཕྱོགས་བཞིར་བདེ་ཆེན་བསྐྱེད་པའི་གསང་ཡེ་ཡུམ༔ མཛེས་སྡུག་བཅུ་དྲུག་ལང་ཚོ་རབ་ཏུ་རྒྱས༔ ཤར་ཕྱོགས་ཞི་བྱེད་གསང་བ་ཡེ་ཤེས་དཀར༔ འཇོ་སྒེག་བརྩེ་བའི་འཛུམ་ཞལ་རྣམ་པར་ངོམ༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་དཀར་པོ་རྡོར་དྲིལ་འཛིན་པས་འཁྱུད༔ ལྷོ་ཕྱོགས་རྒྱས་བྱེད་གསང་བ་ཡེ་ཤེས་སེར༔ དགྱེས་བཞད་སྙེམ་པའི་འགྱིང་ཉམས་ཅིར་ཡང་སྟོན༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་སེར་པོ་རྡོར་དྲིལ་འཛིན་པས་འཁྱུད༔ ནུབ་ཕྱོགས་དབང་བྱེད་གསང་བ་ཡེ་ཤེས་དམར༔ རྗེས་ཆགས་བཟི་བས་མིག་བརྡ་སྣ་ཚོགས་བསྒྱུར༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་དམར་པོ་རྡོར་དྲིལ་འཛིན་པས་འཁྱུད༔ བྱང་ཕྱོགས་འཇིགས་བྱེད་གསང་བ་ཡེ་ཤེས་ལྗང་༔ ཁྲོ་འཛུམ་དཔའ་བའི་སྟངས་སྟབས་སྣ་ཚོགས་བསྒྱུར༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་ལྗང་ཁུ་རྡོར་དྲིལ་འཛིན་པས་འཁྱུད༔ རུས་པའི་རྒྱན་ལྡན་དགྱེས་པའི་གར་སྟབས་ཅན༔ ཤར་སྒོར་དཀར་མོ་ལྕགས་ཀྱུ་མེ་ལོང་འཛིན༔ ལྷོ་སྒོར་སེར་མོ་ཞགས་པ་གཏེར་བུམ་འཛིན༔ ནུབ་སྒོར་དམར་མོ་ལྕགས་སྒྲོག་པད་ཕོར་འཛིན༔ བྱང་སྒོར་ལྗང་མོ་དྲིལ་བུ་ཕུར་བུ་འཛིན༔ གཞན་ཡང་ཁྲོ་བོ་ཁྲོ་མོ་གྲངས་མེད་པ༔ བུ་ཡུག་ལྟར་འཚུབས་མེ་ལྕེ་རྡོ་རྗེ་རྂ༔ ཀུན་ཏུ་འཕྲོ་དབུས་འཇིགས་སུ་རུང་བར་བསྐྱེད༔ ༈ མན་ངག་དགུ་པ༔ རྡོ་རྗེ་གྲོ་ལོད༔ ཧཱུྂ༔ ཆོས་དབྱིངས་མཁའ་ལ་རང་འོད་འཇའ་ཟེར་དབུས༔ རྡོ་རྗེའི་གུར་ཁང་མེ་དཔུང་འབར་བའི་ཀློང༔ པདྨ་ཉི་མ་རྒྱལ་བསེན་ཕོ་མོ་དང་༔ དཔའ་རྔམས་སྟག་མོ་གྲུས་མ་འགྱིང་བའི་སྟེང་༔ ཁྲོ་བོ་ཆེན་པོ་འཇིག་རྟེན་གསུམ་ལས་སྒྲོལ༔ རྡོ་རྗེ་གྲོ་ལོད་དམར་སྨུག་འཆོལ་བའི་སྐུ༔ ཞལ་གདངས་མཆེ་གཙིགས་སྤྱན་གསུམ་སྡང་མིག་གཟིར༔ དབུ་སྐྲ་དམར་སེར་གྱེན་བརྫིས་ཐོད་སྐམ་བརྒྱན༔ ཕྱག་གཡས་རྡོ་རྗེ་རྩེ་དགུ་མཁའ་ལ་ཕྱར༔ ཡར་རྩེའི་རྃ་དགུས་བསྐལ་བའི་མེ་ཆེན་འབར༔ མར་རྩེའི་ཧཱུྃ་དགུས་རྡོ་རྗེའི་ཐོག་ཆེན་འབེབ༔ གཡོན་པས་གནམ་ལྕགས་ཕུར་བུ་ཐུར་ཏུ་སྡིག༔ ཞབས་གཉིས་གར་སྟབས་ལིང་ལིང་འགྱིང་བག་རོལ༔ ཟ་འོག་ཐིང་ཀའི་བེར་ཕོད་གཟི་འོད་འབར༔ ཆོས་གོས་དམར་པོ་རྡོ་རྗེའི་རེ་ཁས་མཚན༔ རུས་པའི་རྒྱན་རྫོགས་ཐོད་རློན་དོ་ཤལ་འཕྱང་༔ སྐུ་ལས་ཁྲོ་ཆུང་མེ་ཡི་ཚྭ་ཚྭ་འཕྲོ༔ སྤྱི་བོར་གསུང་གི་དབང་ཕྱུག་སྤྱན་རས་གཟིགས༔ པདྨ་རྒྱལ་པོ་ཞལ་གཅིག་ཕྱག་གཉིས་དམར༔ གཡས་པས་ཌཱ་རུ་ནམ་མཁའི་དབྱིངས་སུ་དཀྲོལ༔ དཔའ་བོ་མཁའ་འགྲོ་མ་ལུས་དབང་དུ་སྡུད༔ གཡོན་པས་མཉེན་ལྕུགས་པདྨའི་ལྕགས་ཀྱུ་འཕེན༔ སྲིད་གསུམ་ཆེ་དགུ་མ་ལུས་བྲན་དུ་བྱེད༔ འཁོར་དུ་བདུད་འདུལ་ཁྲོ་བོ་ཆེན་པོ་བཅུ༔ ཀུན་ཀྱང་ཞལ་གཅིག་ཕྱག་གཉིས་ཁྲོ་བོའི་ཚུལ༔ སྟེང་དུ་ཧཱུྃ་ཀཱ་ར་དང་སྒྲ་འབྱིན་མ༔ དཀར་མོ་འཁོར་ལོ་འཛིན་པས་ཡབ་ལ་འཁྱུད༔ ཤར་དུ་རྣམ་པར་རྒྱལ་བ་མདའ་སྙེམས་མ༔ སྔོ་སྐྱ་རྡོ་རྗེ་འཛིན་པས་ཡབ་ལ་འཁྱུད༔ ལྷོ་རུ་གཤིན་རྗེའི་གཤེད་ཆེན་དུར་བདག་མ༔ སེར་སྐྱ་རལ་གྲི་བསྣམས་པས་ཡབ་ལ་འཁྱུད༔ ནུབ་ཏུ་དབང་ཆེན་རྟ་མགྲིན་ཙཎྜ་ལཱི༔ ལྗང་གུ་དབྱུག་ཏོ་འཛིན་པས་ཡབ་ལ་འཁྱུད༔ བྱང་དུ་བདུད་རྩི་འཁྱིལ་བ་རླུང་འབྱིན་མ༔ སྔོ་སྐྱ་རྔ་ཡབ་ཐོགས་པས་ཡབ་ལ་འཁྱུད༔ ཤར་ལྷོར་དབྱུག་སྔོན་ཅན་དང་རྡོ་རྗེ་སྡེར༔ དམར་སེར་རལ་གྲི་ཕྱར་བས་ཡབ་ལ་འཁྱུད༔ ལྷོ་ནུབ་མི་གཡོ་མགོན་པོ་གཏུན་ཁུང་མ༔ དམར་མོ་ཐོ་བ་གདེངས་པས་ཡབ་ལ་འཁྱུད༔ ནུབ་བྱང་གཞན་གྱིས་མི་ཐུབ་རྡོ་རྗེ་སྙེམས༔ ལྗང་གུ་བུམ་པ་བཏེགས་པས་ཡབ་ལ་འཁྱུད༔ བྱང་ཤར་ཁམས་གསུམ་རྣམ་རྒྱལ་སྐུལ་བྱེད་མ༔ སེར་སྐྱ་རྩེ་གསུམ་འཛིན་པས་ཡབ་ལ་འཁྱུད༔ འོག་ཏུ་སྟོབས་པོ་ཆེ་དང་ཡུམ་གསོད་བྱེད་མ༔ སེར་མོ་དགྲ་སྟྭ་བསྣམས་པས་ཡབ་ལ་འཁྱུད༔ ཡབ་རྣམས་མཐིང་ནག་ཕྱག་གཉིས་ཕུར་བུ་འདྲིལ༔ ཡུམ་རྣམས་རང་མདོག་གཡས་པ་རང་རྟགས་ལ༔ གཡོན་པས་དུང་ཆེན་བདུད་རྩི་ཡབ་ལ་སྟོབས༔ དཔའ་བོ་གིང་ཆེན་སྡེ་བཞི་ལས་མདོག་ཅན༔ གཡས་པས་ཅང་ཏེའུ་གཡོན་ན་ཕུར་བ་འདྲིལ༔ རྡོ་རྗེའི་གར་སྟབས་ནམ་མཁའ་ཁྱབ་པར་སྤྲོ༔ དཔའ་མོ་རྣལ་འབྱོར་མ་བཞི་གཅེར་བུའི་ཉམས༔ ལས་མདོག་དར་དཔྱང་གཡབ་ཅིང་སྣང་གླུ་ལེན༔ རྡོ་རྗེའི་ཁྲོ་ཚོགས་ནམ་མཁའ་ཁྱབ་པར་འཕྲོ༔ ཧ་ཧ་ཧཱུྃ་ཕཊ་དྲག་སྔགས་འབྲུག་ལྟར་སྡིར༔ དགྲ་གདོན་བགེགས་ཚོགས་གཟིར་ཞིང་བཅོམ་པར་བྱེད༔ ཁྲོ་བོའི་དཀྱིལ་འཁོར་འཇིགས་སུ་རུང་བ་བསྐྱེད༔ ༈ མན་ངག་བཅུ་པ༔ སྤྱན་རས་གཟིགས་དབང་པདྨ་རྒྱལ་པོ༔ ཨཿ ཆོས་དབྱིངས་མཁའ་ལ་རང་འོད་ཡེ་ཤེས་དབུས༔ འཇའ་འོད་པདྨ་འདབ་མ་འབུམ་ལྡན་དང་༔ ཟླ་བའི་གདན་ལ་འགྲོ་འདུལ་གངས་ཆེན་མཚོ༔ སྤྱན་རས་གཟིགས་དབང་པདྨ་རྒྱལ་པོ་ནི༔ སྐུ་མདོག་དམར་པོ་ཞལ་གཅིག་ཕྱག་གཉིས་པ༔ ཐལ་སྦྱར་ནང་དུ་རྡོ་རྗེ་ཨུཏྤལ་ནི༔ དམར་པོ་ལོ་འབྲས་ཕུན་ཚོགས་སྡོང་བུ་འཛིན༔ དར་དང་རིན་ཆེན་རྒྱན་རྫོགས་ལོངས་སྐུའི་ཆས༔ རུས་པའི་རྒྱན་དང་སྟག་གི་ཤམ་ཐབ་གསོལ༔ ཞི་འཛུམ་དཔའ་བོ་ཆགས་དང་ཁྲོ་བའི་ཉམས༔ པང་དུ་གསང་པ་ཡེ་ཤེས་སྐུ་མདོག་དམར༔ ཞལ་གཅིག་ཕྱག་གཉིས་མཛེས་སྡུག་མཚན་དཔེ་འབར༔ ནུ་མ་བྷ་ག་ཆེར་རྒྱས་སྐེད་སྟབས་ཕྲ༔ ཡན་ལག་ཕུན་ཚོགས་མཉེན་ལྕུགས་འཁྲིལ་ལ་ལྡེམ༔ གཅེར་བུ་རུས་པའི་ཕྱག་རྒྱ་ལྔ་ཡིས་བརྒྱན༔ བདེ་ཆེན་ཆགས་པས་བཟི་བའི་ཉམས་འགྱུར་ཅན༔ ཞབས་གཉིས་པད་དཀྱིལ་ཡབ་ཀྱི་རྐེད་ནས་འཁྲིལ༔ བདེ་བས་མ་བཟོད་གསང་བའི་དཀྱིལ་འཁོར་སྦྱོར༔ ཕྱག་གཉིས་གྲི་ཐོད་འཛིན་པས་མགུལ་ལ་འཁྱུད༔ གཉིས་ཀ་ཨུཏྤལ་དམར་པོའི་ཅོད་པན་དང་༔ པདྨའི་དོ་ཤལ་པདྨའི་གུར་དུ་བཞུགས༔ སྤྱི་བོར་འོད་དཔག་མེད་པ་སྐུ་མདོག་དམར༔ ཚངས་སྤྱོད་མཉམ་བཞག་བེཌཱུརྱཱ་སྣོད་བསྣམས༔ མགྲིན་པར་རྟ་མགྲིན་ཞལ་གཅིག་ཕྱག་གཉིས་དམར༔ འདོར་སྟབས་རུས་རྒྱན་ཐོད་བྱུག་ཞགས་པ་འཛིན༔ ཐུགས་ཀར་རྡོར་སེམས་ཞལ་གཅིག་ཕྱག་གཉིས་དམར༔ རྡོར་དྲིལ་འཛིན་རོལ་སྟབས་ལོངས་སྐུའི་ཆས༔ འཁོར་དུ་བྱང་སེམས་ཉེ་བའི་སྲས་ཆེན་བརྒྱད༔ ཤར་དུ་ས་སྙིང་རིན་ཆེན་མྱུ་གུ་དཀར༔ ཤར་ལྷོར་ཕྱག་རྡོར་ལྗང་གུ་རྡོ་རྗེ་འཛིན༔ ལྷོར་ནམ་སྙིང་དཀར་པོ་རལ་གྲི་བསྣམས༔ ལྷོ་ནུབ་ཏུ་སྤྱན་རས་གཟིགས་དམར་པདྨ་འཛིན༔ ནུབ་ཏུ་སྒྲིབ་སེལ་ལྗང་གུ་པུ་སྟི་ཐོགས༔ ནུབ་བྱང་ཀུན་བཟང་དམར་པོ་རིན་པོ་ཆེ༔ བྱང་དུ་བྱམས་པ་དཀར་སེར་ཀླུ་ཤིང་ཕྱར༔ བྱང་ཤར་འཇམ་དཔལ་དཀར་ལྗང་ཨུཏྤ་ལ༔ ཀུན་ཀྱང་ཞི་འཛུམ་མཚན་དཔེ་མཆོག་ཏུ་འབར༔ བཅུ་དྲུག་ལོ་ལོན་དྲི་མེད་སྤྱན་རས་ཡངས༔ གཡས་རྣམས་མཆོག་སྦྱིན་གཡོན་པའི་མཆོག་གསུམ་རྒྱས༔ ཨུཏྤལ་སྙིང་པོར་རང་རྟགས་ཕྱམ་མཚན་ངོམ༔ དར་དང་རིན་ཆེན་རྒྱན་རྫོགས་ལོངས་སྐུའི་ཆས༔ བྱང་ཆུབ་སེམས་དཔའི་སྐྱིལ་མོ་ཀྲུང་གིས་བཞུགས༔ གཞན་ཡང་དུས་གསུམ་བཞུགས་པའི་སངས་རྒྱས་དང་༔ བྱང་ཆུབ་སེམས་དཔའ་དཔག་ཏུ་མེད་པའི་འཁོར༔ ཐམས་ཅད་གསེར་མདོག་ལོངས་སྐུའི་ཆ་ལུགས་ཅན༔ ཞལ་གཅིག་ཕྱག་གཡས་མཆོག་སྤྱིན་ཕྱག་རྒྱ་དང་༔ གཡོན་པས་ཐུགས་ཀར་མཆོག་གསུམ་ཆོས་འཁོར་རྒྱས༔ པདྨ་སྡོང་བུ་འཛིན་ཅིང་བཞེངས་སྟབས་ཀྱིས༔ མཇལ་བས་བྱིན་འབེབས་དྲན་པས་ལམ་སྣ་འདྲེན༔ སྲིད་པའི་རྒྱ་མཚོ་སྒྲོལ་བའི་སྟོན་པར་བསྒོམ༔ ༈ མན་ངག་བཅུ་གཅིག་པ༔ སྣང་བ་མཐའ་ཡས༔ ཧྲཱིཿ ཆོས་དབྱིངས་མཁའ་ལ་རང་འོད་ཡེ་ཤེས་ཀློང༔ རྨད་བྱུང་སངས་རྒྱས་ཞིང་ཁམས་བདེ་བ་ཅན༔ ལག་མཐིལ་ལྟར་མཉམ་གསེར་གྱི་ས་གཞི་ལ༔ དབང་སྔོན་རིན་ཆེན་གཅལ་བཀྲམ་མིག་མང་རིས༔ སྙིང་པོར་དཔག་བསམ་ཤིང་མཆོག་རིན་པོ་ཆེ༔ པདྨ་རྣམ་པར་སྣང་བ་ཞེས་བྱ་བ༔ རིན་ཆེན་རང་བཞིན་དཔག་ཚད་སྟོང་དུ་ཁྱབ༔ ལོ་མ་རེ་རེ་ཡང་བཀྲ་ཤིས་པའི༔ རྟགས་མཆོག་བརྒྱད་དང་རྫས་བརྒྱད་འདོད་ཡོན་ལྔ༔ འབྲས་བུ་རེ་རེར་རྒྱལ་སྲིད་སྣ་བདུན་གྱི༔ བཀོད་པ་གཞལ་མེད་མཛེས་པས་ཅི་ཡང་སྤྲུལ༔ ཡེ་ཤེས་རོལ་བའི་བྱ་ཚོགས་ཆུ་ཀླུང་དང་༔ པདྨོ་ཤིང་དང་རླུང་གི་སྒྲ་དབྱངས་ཀྱང་༔ ཐེག་པ་ཆེན་པོའི་ཆོས་སྒྲ་སྣ་ཚོགས་སྒྲོགས༔ རིན་ཆེན་ལས་གྲུབ་དཔག་བསམ་སྡོང་པོ་ནི༔ ལོ་འབྲས་ཕུན་ཚོགས་འོད་ཟེར་སྣ་ཚོགས་འཕྲོ༔ རྒྱལ་བ་རྒྱ་མཚོའི་དཀྱིལ་འཁོར་ཅི་ཡང་འཆར༔ རབ་འབྱམས་ཞིང་ཀུན་བྱང་ཆུབ་ཤིང་ལ་རྫོགས༔ དེ་ལ་སྐུ་རྒྱབ་བརྟེན་པའི་རྫོགས་སངས་རྒྱས༔ བདེ་སྟོང་སོར་རྟོག་ཡེ་ཤེས་འོད་དཔག་མེད༔ འདབ་མ་སྟོང་ལྡན་པདྨ་ཟླ་གདན་སྟེང་༔ གཟི་བརྗིད་དཔག་མེད་ཉི་འོད་འབུམ་ཕྲག་བརྡལ༔ སྣང་བ་མཁའ་ཡས་ཞལ་གཅིག་ཕྱག་གཉིས་དམར༔ མཚན་བཟང་སོ་གཉིས་དཔེ་བྱད་བརྒྱད་ཅུ་རྫོགས༔ ཚངས་སྤྱོད་སྤྲུལ་སྐུ་ཆོས་གོས་རྣམ་གསུམ་གསོལ༔ ཕྱག་གཉིས་མཉམ་བཞག་ཞབས་གཉིས་རྡོར་དཀྱིལ་བཞུགས༔ ཤར་དུ་མི་འཁྲུགས་སྔོན་པོ་ས་གནོན་དང་༔ མཉམ་གཞག་སྟེང་ན་རྡོ་རྗེ་ལང་ཐབས་བསྣམས༔ ཤར་ལྷོར་རྣམ་གཟིགས་ས་གནོན་མཉམ་གཞག་མཛད༔ ལྷོ་རུ་གཙུག་ཏོར་ཅན་མཆོག་མཉམ་གཞག་རྒྱ༔ ལྷོ་ནུབ་ཐམས་ཅད་སྐྱོབ་པ་སྐྱབས་སྦྱིན་དང་༔ གཡོན་པས་མཉམ་གཞག་ཕྱག་རྒྱ་ལྟེ་བར་བཀོད༔ ནུབ་ཏུ་འཁོར་བ་འཇིག་མཆོག་ཏིང་འཛིན་རྒྱ༔ ནུབ་བྱང་གསེར་ཐུབ་ཆོས་འཆད་མཉམ་གཞག་རྒྱ༔ བྱང་དུ་འོད་སྲུངས་ཕྱག་གཡས་མཆོད་སྦྱིན་དང་༔ གཡོན་པས་ཆོས་གོས་རི་དྭགས་རྣ་ལྟར་འཛིན༔ བྱང་ཤར་ཤཱཀྱ་ཐུབ་པ་ཆོས་འཆད་རྒྱ༔ ཀུན་ཀྱང་ཞལ་གཅིག་ཕྱག་གཉིས་གསེར་གྱི་མདོག༔ ཕྱག་ཞབས་འཁོར་ལོའི་མཚན་དང་དཔེ་བྱད་རྫོགས༔ ཆོས་གོས་རྣམ་གསུམ་གསོལ་ཞིང་སྐྱིལ་ཀྲུང་བཞུགས༔ དབུ་ཡི་གཙུག་ཏོར་རྩེ་མོ་བལྟར་མི་མངོན༔ ངན་སོང་གནས་འདྲེན་རྒྱལ་བ་ཐུགས་རྗེ་ཅན༔ དྲན་པ་ཙམ་གྱིས་ཐར་བའི་ས་བོན་འདེབས༔ གསོལ་བ་བཏབ་པའི་བསྐལ་བའི་སྡིག་སྒྲིབ་འདག༔ བསྒོམ་པ་ཙམ་གྱིས་ཡང་དག་དོན་ལ་སྦྱོར༔ གཞན་ཡང་རྫོགས་པའི་སངས་རྒྱས་གང་གཱའི་ཀླུང༔ བྱེ་མའི་གྲངས་དང་མཉམ་པས་མཐའ་བསྐོར་བསམ༔ ༈ མན་ངག་བཅུ་གཉིས་པ༔ བླ་མ་ཀུན་ཏུ་བཟང་པོ༔ ཨཿ མཁའ་ཉིད་འོད་གསལ་རྡོ་རྗེ་སྙིང་པོའི་ཞིང༔ དབུས་སུ་འོད་ལྔའི་ཐིག་ལེ་གསལ་འཚེར་བའི༔ ནང་དུ་པདྨ་ཉི་ཟླ་འོད་གསལ་གདན༔ དེ་སྟེང་ཀུན་བཟང་ཡབ་ནི་སྐུ་མདོག་མཐིང་༔ ཡུམ་མཆོག་ཀུན་བཟང་རླུང་ཁམས་སྐུ་མདོག་ལྗང་༔ སྒྲིབ་བྲལ་སྐུ་ནི་ཞལ་གཅིག་ཕྱག་གཉིས་ཞབས་གཉིས་ཚུལ༔མཐའ་གཉིས་སྤང་བའི་ཞབས་ནི་སྐྱིལ་ཀྲུང་བཞུགས༔ འཁོར་འདས་རོ་སྙོམ་མཉམ་གཞག་ཕྱག་རྒྱ་ཅན༔ གཟུང་འཛིན་སྒྲིབ་བྲལ་སྐུ་ནི་གཅེར་བུའི་ཚུལ༔ ཡུམ་མཆོག་རྡོར་དྲིལ་འཛིན་པས་མགུལ་ནས་འཁྱུད༔ མཐའ་གཉིས་སྤང་བའི་ཞབས་ནི་སྐྱིལ་ཀྲུང་བཞུགས༔ འཁོར་འདས་རོ་སྙོམ་མཉམ་གཞག་ཕྱག་རྒྱ་ཅན༔ གཟུང་འཛིན་སྒྲིབ་བྲལ་སྐུ་ནི་གཅེར་བུའི་ཉམས༔ མདུན་དུ་རྒྱལ་སྲས་རྡོ་རྗེ་སེམས་དཔའ་ནི༔ གླང་ཆེན་རབ་བརྟན་པདྨ་ཟླ་བའི་སྟེང་༔ མཐིང་གསལ་ཞལ་གཅིག་ཕྱག་གཉིས་པ་ཞི་ཞིང་འཛུམ༔ ཕྱག་གཡས་རྡོ་རྗེ་རྩེ་ལྔ་ཐུགས་ཀར་འཛིན༔ གཡོན་པས་ཤེལ་གྱི་དྲིལ་བུ་དཀུ་ལ་བརྟེན༔ ཡུམ་མཆོག་སངས་རྒྱས་སྤྱན་མ་མཐིང་སྐྱའི་ཞལ༔ ཆ་ལུགས་ཕྱག་མཚན་ཡབ་འདྲ་དགྱེས་པར་འཁྲིལ༔ ཤར་དུ་བཅོམ་ལྡན་རྣམ་པར་སྣང་མཛད་ནི༔ སེང་གེ་པདྨ་ཉི་ཟླའི་ཁྲི་སྟེང་དུ༔ དཀར་གསལ་ཞལ་གཅིག་ཕྱག་གཉིས་ལོངས་སྐུའི་ཆས༔ ཕྱག་གཡས་གསེར་གྱི་འཁོར་ལོ་ཐུགས་ཀར་འཛིན༔ ཡུམ་མཆོག་དབྱིངས་ཕྱུག་སྐུ་མདོག་དཀར་དམར་མདངས༔ ཆ་ལུགས་ཕྱག་མཚན་ཡབ་འདྲ་དགྱེས་པར་འཁྲིལ༔ ལྷོ་ཕྱོགས་བཅོམ་ལྡན་རིན་ཆེན་འབྱུང་ལྡན་ནི༔ རྟ་མཆོག་པདྨ་ཉི་ཟླའི་ཁྲི་སྟེང་དུ༔ སེར་གསལ་ཞལ་གཅིག་ཕྱག་གཉིས་ལོངས་སྐུའི་ཆས༔ ཕྱག་གཡས་ཡིད་བཞིན་ནོར་བུ་ཐུགས་ཀར་འཛིན༔ ཡུམ་མཆོག་མ་མ་ཀི་ཡི་སྐུ་སེར་སྐྱ༔ ཆ་ལུགས་ཕྱག་མཚན་ཡབ་འདྲ་དགྱེས་པར་འཁྲིལ༔ ནུབ་ཕྱོགས་བཅོམ་ལྡན་སྣང་བ་མཐའ་ཡས་ནི༔ རྨ་བྱ་པདྨ་ཉི་ཟླའི་ཁྲི་སྟེང་དུ༔ དམར་གསལ་ཞལ་གཅིག་ཕྱག་གཉིས་ལོངས་སྐུའི་ཆས༔ ཕྱག་གཡས་པདྨ་དམར་པོ་ཐུགས་ཀར་འཛིན༔ ཡུམ་མཆོག་གོས་དཀར་མོ་ཡི་སྐུ་དམར་སྐྱ༔ ཆ་ལུགས་ཕྱག་མཚན་ཡབ་འདྲ་དགྱེས་པར་འཁྲིལ༔ བྱང་ཕྱོགས་བཅོམ་ལྡན་དོན་ཡོད་གྲུབ་པ་ནི༔ ཤང་ཤང་པདྨ་ཉི་ཟླའི་ཁྲི་སྟེང་དུ༔ ལྗང་གསལ་ཞལ་གཅིག་ཕྱག་གཉིས་ལོངས་སྐུའི་ཆས༔ ཕྱག་གཡས་རྡོ་རྗེ་རྒྱ་གྲམ་ཐུགས་ཀར་འཛིན༔ ཡུམ་ཆེན་དམ་ཚིག་སྒྲོལ་མ་སྐུ་ལྗང་སྐྱ༔ ཆ་ལུགས་ཕྱག་མཚན་ཡབ་འདྲ་དགྱེས་པར་འཁྲིལ༔ ཐམས་ཅད་མཛེས་བརྗིད་ལོངས་སྤྱོད་རྫོགས་པའི་ཆས༔ ཡབ་རྣམས་དགྱེས་འཛུམ་རྫོགས་པའི་སྐྱིལ་མོ་ཀྲུང་༔ ཡུམ་རྣམས་གཅེར་བུ་རིན་ཆེན་རས་པའི་རྒྱན༔ པདྨའི་སྐྱིལ་ཀྲུང་ཡབ་ཀྱི་རྐེད་ལ་འཁྲིལ༔ ཤར་ལྷོར་ཕུར་པ་རྡོ་རྗེ་གཞོན་ནུ་ནི༔ ཞལ་གཅིག་ཕྱག་གཉིས་མཐིང་ནག་འཇིགས་པའི་གཟུགས༔ ཕྱག་གཡས་ཕུར་བ་གཡོན་པས་སྡིག་མཛུབ་མཛད༔ འཁོར་ལོ་རྒྱས་འདེབས་གྲི་ཐོད་འཛིན་པས་འཁྲིལ༔ ལྷོ་ནུབ་བཛྲ་ཧེ་རུ་ཀ་མཐིང་ནག༔ ཕྱག་གཡས་རྡོ་རྗེ་གཡོན་པས་སྡིག་མཛུབ་མཛད༔ དབྱིངས་ཕྱུག་དཀར་དམར་བྱམས་པའི་ཉམས་དང་ལྡན༔ དགྱེས་པའི་གར་གྱིས་ཁྲོ་བོ་ཆེ་ལ་འཁྲིལ༔ ནུབ་བྱང་རྟ་མགྲིན་མཐིང་ནག་རྟ་དབུ་ལྗང་༔ པདྨའི་དབྱུག་ཏོ་གཡོན་པས་སྡིག་མཛུབ་མཛད༔ པདྨ་གར་དབང་དམར་སྐྱ་ཆགས་པའི་ཉམས༔ འདོད་པའི་ཚུལ་གྱིས་དབང་ཆེན་སྐུ་ལ་འཁྲིལ༔ བྱང་ཤར་བདུད་རྩི་འཁྱིལ་བ་སྐུ་མདོག་མཐིང་༔ ཕྱག་གཡས་སྣ་ཚོགས་རྡོ་རྗེ་གཡོན་སྡིག་མཛུབ༔ རྨེ་བ་བརྩེགས་མ་ལྗང་གུ་གཏུམ་པའི་ཞལ༔ དྲག་ཤུལ་ཚུལ་ཀྱིས་དཔའ་བོའི་སྐུ་ལ་འཁྱུད༔ ཀུན་ཀྱང་དཔའ་བོ་གར་གྱི་འགྱིང་སྟབས་ཅན༔ དཔལ་དང་དུར་ཁྲོད་ཆས་རྣམས་སྐུ་ལ་རྫོགས༔ པད་ཉི་བདུད་བཞིའི་གདན་ལ་བརྗིད་པར་བཞུགས༔ ཏིག་ལེ་ཉག་གཅིག་རིགས་གཅིག་ཡེ་ཤེས་གཅིག༔ མཁྱེན་བརྩེ་ནུས་པའི་སྒྱུ་འཕྲུལ་རིགས་གསུམ་དང་༔ ཡེ་ཤེས་ལྔ་ཡི་རྣམ་པ་རིགས་ལྔ་དང་༔ ཞི་བའི་ལྷ་ཚོགས་བཞི་བཅུ་རྩ་གཉིས་དང་༔ འབར་བ་ལྔ་བཅུ་རྩ་བརྒྱད་སོགས༔ རིགས་བརྒྱ་སྒྱུ་འཕྲུལ་དྲྭ་བའི་རོལ་བ་ནི༔ རབ་འབྱམས་རྒྱ་མཚོའི་ཞིང་ཀུན་ཁྱབ་པར་བསྒོམ༔ ༈ མན་ངག་བཅུ་གསུམ་པ༔ བླ་མ་བདེ་བ་ཆེན་པོ༔ ཨཱ༔ ཆོས་དབྱིངས་མཁའ་ལ་རང་འོད་ཡེ་ཤེས་དབུས༔ འདབ་མ་འབུམ་ལྡན་པད་སྡོང་ཉི་ཟླའི་སྟེང་༔ ཁམས་གསུམ་འགྲོ་བ་ཡོངས་ཀྱི་གཉེན་གཅིག་པུ༔ ལྷ་འདྲེ་མི་གསུམ་འདུལ་བའི་མཐུ་སྟོབས་ཅན༔ བྱིན་རླབས་བཙན་ཐབས་འཇུག་པའི་པདྨ་འབྱུང་༔ བདེ་བ་ཆེན་པོ་ཞལ་གཅིག་ཕྱག་གཉིས་དཀར༔ སྐུ་ལ་གསང་གོས་མདུང་མ་ཕོད་ཆེན་དང་༔ ཆོས་གོས་དམར་པོ་གསེར་གྱི་རིས་ཅན་གསོལ༔ དབུ་ལ་འདབ་ལྡན་པདྨ་མཐོང་གྲོལ་གསོལ༔ ཕྱག་གཉིས་མཉམ་བཞག་སྟེང་ན་རིན་པོ་ཆེ༔ བསམ་འཕེལ་དབང་གི་རྒྱལ་པོ་ཆ་བདུན་བསྣམས༔ མཚོ་རྒྱལ་སྐུ་མདོག་དཀར་ལ་སྔོ་བའི་མདངས༔ ཞལ་གཅིག་ཕྱག་གཉིས་གྲི་གུག་བདུད་རྩི་སྟོབས༔ མཛེས་ཤིང་ཆགས་པའི་ཉམས་ཅན་གཉིས་མེད་འཁྲིལ༔ ཟག་མེད་བདེ་བ་ཆེན་པོའི་ཀློང་ཏུ་རོལ༔ དེ་ཡི་མཐའ་མར་རིག་འཛིན་ཆེན་པོ་བཞི༔ ཞལ་གཅིག་ཕྱག་གཉིས་མཉམ་བཞག་ཕྱག་རྒྱ་ཅན༔ རྣམ་སྨིན་རིག་འཛིན་དཀར་པོ་རྡོ་རྗེ་འཛིན༔ ཚེ་དབང་རིག་འཛིན་སེར་པོ་འཁོར་ལོ་འཛིན༔ ཕྱག་ཆེན་རིག་འཛིན་དམར་པོ་པདྨ་བསྣམས༔ ལྷུན་གྲུབ་རིག་འཛིན་ལྗང་གུ་རྒྱ་གྲམ་འཛིན༔ ཆ་ལུགས་གཙོ་མཐུན་རང་འོད་རིག་མ་བཞི༔ ཅེར་བུ་སྐྲ་འཁྲོལ་འཁྱུགས་ཅིང་སྒེག་པའི་ཉམས༔ བདེ་ཆེན་རབ་རྒྱས་དར་དང་རུས་རྒྱན་ཅན༔ ཕྱག་གཡས་ཌཱ་རུ་གཡོན་པས་བདུད་རྩི་སྟོབས༔ མཚམས་བཞིར་སློབ་དཔོན་བཞི་ནི་དགྱེས་པའི་ཉམས༔ ཚུལ་གནས་མཁྱེན་རབ་ཐོགས་མེད་བརྟན་ཤིག་གེ༔ ཤེས་རབ་རྒྱུད་ཀྱི་སློབ་དཔོན་དཀར་དམར་བཞད༔ ཉམས་ཆགས་སྐོང་བའི་སློབ་དཔོན་དཀར་ལ་དྭངས༔ དམ་ཚིག་དབང་གི་སློབ་དཔོན་དམར་ལ་ཆགས༔ མན་ངག་ལུང་གི་སློབ་དཔོན་མཐིང་དྭངས་གསལ༔ ཀུན་ཀྱང་ཞལ་གཅིག་ཕྱག་གཉིས་མཉམ་བཞག་སྟེང་༔ ཐོད་པ་ཚེ་བུམ་བདུད་རྩིའི་གང་པ་ཡི༔ ཁ་རྒྱན་རིན་ཆེན་སྔོན་པོ་ཟུར་བརྒྱད་བརྒྱན༔ སྐུ་ལ་བེར་ཕོད་ཆོས་གོས་པཎ་ཞུ་གསོལ༔ ལྷ་ཀླུ་མི་ཡི་རིག་འཛིན་ཆེན་པོ་དང་༔ འཕགས་ཡུལ་གྲུབ་པའི་སློབ་དཔོན་ཆེན་པོ་བརྒྱད༔ པདྨའི་ལས་ཅན་དག་པ་རྣམ་ལྔའི་འཁོར༔ བོད་ཡུལ་ལས་ཅན་སྙིང་གི་བུ་མཆོག་དགུ༔ སྤྲུལ་བའི་ལོ་པཎ་རྗེ་འབངས་ཉི་ཤུ་ལྔ༔ གཞན་ཡང་རིག་འཛིན་བྱེ་འབུམ་གཟི་བརྗིད་འབར༔ རྩ་བ་བརྒྱུད་པའི་བླ་མ་སྤྲིན་བཞིན་འཁྲིགས༔ ཕ་རྒྱུད་དཔའ་བོའི་བྱིན་རླབས་ད་ལ་ལ༔ མ་བརྒྱུད་མཁའ་འགྲོའི་གླུ་ལེན་ཀྱུ་རུ་རུ༔ ལས་བྱེད་གིང་ཆེན་ཕཊ་སྒྲ་སེང་སེ་སེང་༔ དཔལ་གྱི་འཁོར་ཚོགས་གར་སྟབས་ཤིག་སེ་ཤིག༔ ལུས་ལ་བདེ་བའི་རང་དྲོད་ཚ་འུར་འུར༔ ངག་ལ་རིག་སྔགས་ནུས་པ་རྣོ་ཁྱུགས་ཁྱུགས༔ ཡིད་ལ་གཏིང་གསལ་ཡེ་ཤེས་རྗེན་ཅེར་ཅེར༔ སྣང་སྲིད་རྣམ་དག་རྡོ་རྗེའི་ཞིང་དུ་སད༔ ས་མ་ཡ༔ དེ་ལྟར་བསྒོམས་པས་ཚེ་འདི་རུ༔ རིག་འཛིན་རྒྱལ་བའི་ཞིང་དུ་གྲོལ༔ པདྨའི་ཐུགས་བཅུད་གཏེར་གྱི་ཆོས༔ ཚེ་དབང་ནོར་བུའི་སྐལ་བར་གྱུར༔ ཨྠྀི༔ རྒྱ་རྒྱ་རྒྱ༔ རྒྱ་རྒྱ་རྒྱ༔ རྒྱ༔ ཅེས་པའང་བུ་ལེ་གངས་ཀྱི་ར་བ་ནས་རྗེ་བླ་མ་རིག་འཛིན་ཚེ་དབང་ནོར་བུ་ལ་བཀའ་བབ་པ་དཀར་ཤོག་ཏུ་བཀོད་ཀྱང་རེ་ཞིག་མཁའ་འགྲོས་བཀས་བསྡམ་ཏེ་མི་སྣང་བར་གྱུར་བ༔ སླར་ཡང་རྗེ་ཉིད་ཀྱི་ཕྱག་དཔེའི་ཁྲོད་ནས་རྡོལ་བ། མཐར་ཆགས་སུ་བཀོད་པ་པོ་རིག་པ་འཛིན་པ་ཆེན་མོ་མཆོག་གིས་བཀའ་ལས་གསུང་ཆོས་ཡོངས་རྫོགས་ཀྱི་བདག་པོར་མངའ་གསོལ་བ་སྟག་བླ་ཨོ་རྒྱན་བསྟན་འཛིན་རྡོ་རྗེའོ། །དགེ་བས་དཔལ་ལྡན་བླ་མའི་ཐུགས་ཀྱི་བཞེད་དོན་མ་ལུས་པ་ཡོངས་སུ་འགྲུབ་པའི་རྒྱུར་གྱུར་ཅིག སརྦ་མངྒ་ལཾ། གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་སྙིང་པོ་སྔགས་ཀྱི་ཛཔྲ་བསྐུལ་བྱིན་རླབས་མཆོག་སྦྱིན།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ སྙིང་པོ་སྔགས་ཀྱི་ཛཔྲ་བསྐུལ་བྱིན་རླབས་མཆོག་སྦྱིན་བཞུགས་སོ༔ ན་མོ་བཛྲ་གུ་རུ་པདྨ་ཀཱ་ར་ཡེ༔ ཡེ་ཤེས་ལྷ་ཚོགས་བསྐུལ་བ་ནི༔ ཧཱུྃ་ཧཱུྃ་ཧཱུྃ༔ ཆོས་དབྱིངས་བརྡལ་བ་ཨེ་ཡི་ཞིང་ཁམས་ནས༔ ཡེ་ཤེས་གཅེར་བུ་ཆོས་སྐུ་ཀུན་ཏུ་བཟང་༔ བརྡ་ཚིག་བློ་འདས་ངང་ནས་གསོལ་བ་འདེབས༔ ཆོས་ཉིད་རྗེན་པར་འཆར་བའི་བྱིན་ཆེན་ཕོབས༔ འོད་གསལ་ལྷུན་གྲུབ་ཝྃ་ཡིག་བདེ་ཆེན་ཀློང་༔ ངེས་པ་ལྔ་ལྡན་ལོངས་སྐུ་རྡོ་རྗེ་སེམས༔ དབྱིངས་སྣང་རང་གསལ་ངང་ནས་གསོལ་བ་འདེབས༔ བདེ་ཆེན་ཆད་མེད་འབྱུང་བར་བྱིན་གྱིས་རློབས༔ སྲིད་པ་མཐའ་གྲོལ་ཆོས་ཉིད་རང་ཤར་དབྱིངས༔ རྒྱལ་པོ་སྒྱུ་འཕྲུལ་རོལ་བ་པདྨ་འབྱུང་༔ སྣ་ཚོགས་རང་གྲོལ་ངང་ནས་གསོལ་བ་འདེབས༔ གང་སྣང་ཡེ་ཤེས་རོལ་བར་བྱིན་གྱིས་རློབས༔ བསྐུལ་ལོ་བསྐུལ་ལོ་ཡེ་ཤེས་ལྷ་ཡི་ཚོགས༔ ཐུགས་བསྐྱེད་དམ་བཅའ་བདེན་པས་གནད་ནས་བསྐུལ༔ བཞེངས་ཤིག་བཞེངས་ཤིག་མཁྱེན་བརྩེ་ནུས་པའི་བདག༔ བསླུ་མེད་ཐུགས་རྗེ་ཆེན་པོས་གནས་འདིར་བྱོན༔ བརྒྱུད་གསུམ་རིག་འཛིན་བླ་མ་བྱིན་རླབས་ཅན༔ཡི་དམ་ཞི་ཁྲོ་རབ་འབྱམས་དངོས་གྲུབ་ཅན༔ གནས་གསུམ་དཔའ་བོ་མཁའ་འགྲོ་མྱུར་མགྱོགས་ཅན༔ ཡེ་ཤེས་ལས་གྲུབ་དམ་ཅན་མཐུ་རྩལ་ཅན༔ མ་གཡེལ་མ་གཡེལ་ཐུགས་བསྐྱེད་དུས་ལ་བབ༔ སྤྲུལ་བའི་གུ་རུ་མཚན་བརྒྱད་བྱིན་རླབས་ཅན༔ བཅུ་གསུམ་དཀྱིལ་འཁོར་རྒྱ་མཚོ་བྱིན་རླབས་ཅན༔ འདྲེན་མཆོག་བླ་རབས་ཆོས་བརྒྱུད་བྱིན་རླབས་ཅན༔ གསོལ་བ་འདེབས་སོ་བྱིན་རླབས་དབྱིངས་ནས་ཕོབས༔ སྣང་སྟོང་སྐུ་ཡི་བྱིན་རླབས་ལུས་ལ་ཕོབས༔ སྒྱུ་ལུས་ཟག་བྲལ་འོད་སྐུར་གྲོལ་བར་ཤོག༔ གྲགས་སྟོང་གསུང་གི་བྱིན་རླབས་ངག་ལ་རྩོལ༔ ལས་རླུང་རྒྱུ་བ་དབུ་མར་གྲོལ་བར་མཛོད༔ རིག་སྟོང་ཐུགས་ཀྱི་ཡེ་ཤེས་སེམས་ལ་འཕོས༔ ཕྲ་རགས་འགྱུ་རྟོག་དབྱིངས་སུ་གྲོལ་བར་མཛོད༔ ལྷ་ཚོགས་སྐུ་ཡི་གར་སྟབས་ཤིགས་སེ་ཤིག༔ ཐོས་གྲོལ་གསུང་གི་བཞད་སྒྲ་ལྷང་སེ་ལྷང་༔ འཛིན་མེད་ཟང་ཐལ་ཡེ་ཤེས་ཐ་ལ་ལ༔ གཟི་བྱིན་འཇའ་འོད་ཟེར་ཕྲེང་ཁྲ་ཆེམ་ཆེམ༔ བྱིན་རླབས་བདུད་རྩིའི་ཆར་རྒྱུན་ཤ་ར་ར༔ སྙིང་པོ་སྔགས་ཀྱི་ཛཔྲ་དབྱངས་དི་རི་རི༔ སྒྲུབ་མཆོག་སྒོ་གསུམ་བྱིན་རླབས་ཐིབ་སེ་ཐིབ༔ རྡོ་རྗེའི་སྔགས་ཀྱིས་ཐུགས་དམ་གནད་ནས་བསྐུལ༔ མ་འགྲུབ་བར་ཏུ་ཏིང་འཛིན་གཟེར་གྱིས་བསྡམ༔ གསང་གསུམ་བྱིན་ཆེན་ད་ལྟ་ཉིད་དུ་སྩོལ༔ གདན་ཐོག་འདི་རུ་རང་སར་གྲོལ་བར་མཛོད༔ ཅེས་ཐོད་ཕྲེང་རྩལ་གྱི་སྔགས་ཀྱིས་བསྐུལ༔ རིག་པ་ཧུར་བསྐྱེད༔ སྣང་བ་རང་གྲོལ་དུ་གཏོང་༔ འཛེམ་མེད་བརྟུལ་སྤྱོད༔ དེ་མ་ཐག་ཡེ་ཤེས་ཀྱི་བྱིན་འབེབས་པར་ཐེ་ཚོམ་མེད་དོ༔ ས་མ་ཡ༔ ཚེ་དབང་ནོར་བུའི་གཏེར་སྐལ་ལོ༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་གསང་བ་སྔགས་ཀྱི་ཛཔྲ་དམིགས་ཚོགས་དྲུག་རང་གྲོལ།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔གསང་བ་སྔགས་ཀྱི་ཛཔྲ་དམིགས་ཚོགས་དྲུག་རང་གྲོལ་བཞུགས༔ རྩ་བ་པདྨ་འབྱུང་གནས་ཀྱི་སྔགས་དམིགས་ནི༔ རང་ཉིད་གུ་རུ་པདྨའི་སྐུར་གསལ་བའི༔ ཐུགས་ཀར་པད་ཟླར་རང་འདྲའི་ཡེ་ཤེས་སེམས༔ དེ་ཐུགས་པད་ཟླར་རྡོ་རྗེ་རྒྱ་གྲམ་ནི༔ ཕྱོགས་བཞིའི་དབུས་མ་རང་རང་ཕྱོགས་ཀྱི་མདོག༔ མཚམས་བཞིའི་རྭ་དང་ལྟེ་དཀྱིལ་མཐིང་དྭངས་གསལ༔ ལྟེ་བར་ཧཱུྃ་ཨཱཿཨཱོཾ་གསུམ་བརྩེགས་མར་གསལ༔ ཧཱུྃ་མཐར་གཡས་སྐོར་རྡོ་རྗེ་གསང་བའི་སྔགས༔ བཛྲ་གུ་རུ་པདྨ་སིདྡྷི་ཧཱུྃ༔ ཐམས་ཅད་གསེར་གྱི་མདོག་ཅན་འོད་ཟེར་དཔག་མེད་འཕྲོ༔ ཡར་འཕྲོས་འཕགས་རྣམས་མཆོད་ཅིང་བྱིན་རླབས་བསྡུས༔ མར་འཕྲོས་འགྲོ་བའི་སྡིག་སྒྲིབ་སྡུག་བསྔལ་བསལ༔ ཐམས་ཅད་བདེ་ཆེན་ཡེ་ཤེས་ས་ལ་བཀོད༔ འཁོར་འདས་དྭངས་བཅུད་འོད་ཟེར་སྣ་ལྔའི་ཚུལ༔ ཏིང་འཛིན་སེམས་དཔའ་སྔགས་ཕྲེང་བཅས་ལ་ཐིམ༔ བྱིན་རླབས་དངོས་གྲུབ་ཐམས་ཅད་ཐོབ་པར་བསམ༔ སྣང་བ་ཐམས་ཅད་པདྨ་འོད་ཀྱི་ཞིང་༔ སྣང་སྟོང་པདྨ་འབྱུང་གནས་སྐུའི་རོལ་པ༔ སྒྲ་གྲགས་ཐམས་ཅད་བཛྲ་གུ་རུའི་དབྱངས༔ གྲགས་སྟོང་སྐྱེ་མེད་པདྨའི་གསུང་རྡོ་རྗེ༔ དྲན་རྟོག་གང་ཤར་གཉིས་འཛིན་རྩིས་གདབ་བྲལ༔ དགོངས་པ་འཁྲུལ་མེད་པདྨའི་ཐུགས་རྡོ་རྗེ༔ སྐུ་གསུང་ཐུགས་གྱི་སྣང་བ་ཐ་མི་དད༔ དབྱེར་མེད་ཟུང་འཇུག་ཡེ་ཤེས་རྡོ་རྗེ་ཤར༔ གང་ཤར་ཆོས་ཉིད་རྒྱན་གྱི་འཁོར་ལོ་སྟེ༔ ཆོས་ཉིད་ཡེ་གྲོལ་ངང་ནས་ཡང་སྙིང་བཟླ༔ ཨོཾ་ཨཱ༔ཧཱུཾ༔བཛྲ་གུ་རུ་པདྨ་སིདྡྷི་ཧཱུཾ༔ ཁྱེད་ཤེས་དད་མོས་རྩིས་གདབ་བྲལ༔ མ་ཡེངས་ངང་ནས་རིག་སྔགས་བཟླ༔ བྱིན་རླབས་ཉམས་འབར་ཡེ་ཤེས་རྒྱས༔ ཀུན་བཟང་དགོངས་པ་རང་གྲོལ་འགྱུར༔ ས་མ་ཡ༔ ༡༽ མན་ངག་དང་པོ༔ གནས་ལྔར་འོད་ཐིག་ཉི་མའི་དཀྱིལ་འཁོར་ལྟེར༔ དཔྲལ་བར་གཤིན་རྗེའི་ངོ་བོ་ཨོཾ་དཀར་པོ༔ མགྲིན་པར་རྟ་མགྲིན་ངོ་བོ་ཨཱ༔དམར་པོ༔ ཐུགས་ཀར་གསང་བདག་ངོ་བོ་ཧཱུྂ༔མཐིང་ཀ༔ ལྟེ་བར་མཁའ་འགྲོའི་ངོ་བོ་བྂ༔ལྗང་ཁུ༔ གསང་བར་ཡཀྵ་མེ་དབལ་ཧྲཱིཿདམར་ནག༔ ཐུགས་ཀའི་ཧཱུྂ༔མཐིང་མགོ་བོ་ཉི་དཀྱིལ་ནང་༔ ཧཱུྂ༔ཡིག་དམར་ནག་ལྕགས་བསྲེག་ལྟ་བུའི་མཐར༔ རྩ་བའི་སྔགས་ཕྲེང་སོལ་མེ་བཞིན་དུ་འབར༔ གཡས་སྐོར་འོད་ཟེར་མེ་ཡི་ཚྭ་ཚྭ་འཕྲོ༔ རྒྱལ་ཀུན་བྱིན་རླབས་མཐུ་སྟོབས་བསྡུས་ཏེ་བསྟིམ༔ སྣང་གསུམ་གྱད་དུ་གྱུར་བས་རིགས་སྔགས་བཟླ༔ ཨོཾ་ཨཱ༔ཧཱུྂ༔ཨརྩེག་ནི་རྩིག་ན་མོ་བྷག་ཝ་ཏེ་ཧཱུྂ༔ཧཱུྂ༔ཕཊ༔ཕཊ༔ ཨཱ༔ཧཱུྂ༔ཧཱུྂ༔ཕཊ༔ རྩ་བའི་སྔགས་འདི་འབད་པས་བསྙེན༔ རིག་པ་ངར་བསྐྱེད་བལྟ་སྟངས་བཅས༔ སྔགས་ཕྲེང་ལས་མེ་ཡི་ཚྭ་ཚྭ་ཕྱོགས་བཅུར་འཕྲོས༔ གསང་བའི་ཧཱུྂ༔ཡིག་ལས་ཁྲོ་བོ་མེ་དབལ་རྡོ་རྗེ་དང་སྡིག་པ་འཛིན་པ་གྲངས་མེད་སྤྲོས༔ ཕྱི་ནང་གསང་བའི་དགྲ་བགེག་མ་ལུས་པ་ལྷག་མེད་དུ་རོལ་བར་བསམ་ཞིང་༔ བཛྲ་ཧཱུྂ༔ ཡཀྴ་ཧཱུྂ་རཀྴ་ཧཱུྂ༔ དྲག་ཏུ་བཟླ༔ སྣོད་བཅུད་མ་ལུས་པ་ཧཱུྂ༔དུ་གྱུར་བར་མོས་ཧཱུྂ༔ཤུབ་བུར་བཟླ༔ ཤམ་བུར་སྡེ་བརྒྱད་གནད་ལ་དབབ་པའི་སྲོག་གི་སྙིང་པོ་བཟླ༔ ཨཿཡ༔མ༔དུ༔རུ༔ཙ༔ཤ༔ན༔ཕཊ༔ སྡེ་བརྒྱད་གང་ལ་དམིགས་པའི་་སྲོག་ཡིག་འོད་ཀྱི་ལྕགས་ཀྱུས་འུབ་ཀྱིས་བསྡུས་ཏེ་སྲོག་ཡིག་གདན་དུ་བཀོད་ཅིང་༔ སྣང་སེམས་ཆོས་ཉིད་གཅིག་ཏུ་སྲོག་བསྲེས་ཤིང་ལྟ་བས་གཟིར༔ དགོས་པ་མཆིས་ཚེ་སྲུང་བཟློག་བསད་གསུམ་གསུམ་གྱི་དམིགས་པ་དང་༔ གཙོ་བོ་གསང་བ་ཧཱུྂ་སྒྲུབ་ལ་ནན་ཏན་ཏུ་འབད༔ དེས་ས་ལམ་གྱི་བར་ཆད་བཞི་ཞིང་ལྷ་སྲིན་དེ་བརྒྱད་ཀྱིས་ལས་བྱེད༔ གཞན་དོན་ལྷུན་གྱིས་འགྲུབ་པར་འགྱུར་རོ༔ ས་མ་ཡ༔ ༢༽ མན་ངག་གཉིས་པ༔ གནས་ལྔ་འོད་ཐིག་ལྔ་དང་ཟླ་གདན་སྟེང་༔ དཔྲལ་བར་སྤྲུལ་སྐུའི་ངོ་བོ་ༀ་དཀར་པོ༔ མགྲིན་པར་ལོངས་སྐུའི་ངོ་བོ་ཨཱཿ་དམར་པོ༔ སྙིང་གར་ལོངས་སྐུའི་ངོ་བོ་ཧཱུྃ་མཐིང་ཀ༔ ལྟེ་བར་རིགས་ལྔའི་ངོ་བོ་ཧྲཱི་ལྔ་ལྡན༔ གསང་བར་སྒྲོལ་མའི་ངོ་བོ་ཏཱྂ༔ཡིག་དཀར་པོ༔ དེ་ཡི་་འོག་ཏུ་སྲུང་མ་ཏྲི༔དམར་ནག༔ ཐུགས་གའི་ཧཱུྂ༔གི་ཉི་མར་ཟླ་གདན་སྟེང་༔ ཨོཾ་མཐིང་མཐའ་མར་སྔགས་འཕྲེང་མུ་ཏིག་ཕྲེང་༔ དཀར་ལ་འཚེར་བ་གཡས་སུ་འཁོར་བ་ལས༔ རྒྱལ་བ་མཆོད་ཅིང་འགྲོ་བའི་ནད་གདོན་བསལ༔ ཆོས་དབྱིངས་ཞིང་གི་རྒྱལ་བའི་བྱིན་རླབས་དང་༔ ལྷ་དང་དྲང་སྲོང་རིག་སྔགས་འཛིན་པའི་མཐུ༔ འབྱུང་ལྔ་རིན་ཆེན་སྨན་གྱི་ནུས་པ་ཀུན༔ འོད་ལྔ་བདུད་རྩིའི་སྤྲིན་གྱི་རྣམས་པར་བསྡུས༔ ཐུགས་སྲོག་ལ་ཐིམ་བདེ་གཤེགས་ཀུན་འདུས་གྱུར༔ གཟུངས་རིང་༔ ཨོཾ་ན་མོ་བྷ་ག་ཝཱ་ཏེ༔ བྷཻ་ཥ་ཛྱཻ་གུ་རུ་བཻཌཱུརྱ་པྲ་བྷ་རཱ་ཛཱ་ཡ༔ ཧ་ཐཱ་ག་ཏཱཡ༔ ཨརྷ་ཏེ་སམྱཀྶཾ་བུདྡྷ་ཡ༔ ཏདྱ་ཐཱ༔ ཨོཾ་བྷཻ་ཥ་ཛྱེ་བྷཻཥ་ཛྱེ་མ་ཧཱ་བྷཻ་ཥ་ཛྱཻ༔ རཱ་ཛ་ས་མུདྒ་ཏེ་སྭཱ་ཧཱ༔ གཟུངས་ཐུང་༔ ཨོཾ་བྷཻ་ཥ་ཛྱེ་བྷཻཥ་ཛྱེ་མ་ཧཱ་བྷཻ་ཥ་ཛྱཻ༔ རཱ་ཛ་ས་མུདྒ་ཏེ་སྭཱ་ཧཱ༔ བདུད་རྩི་བྱིན་རླབས་བྱ་ན༔ སྟོང་ཉིད་ངང་ལས་བུམ་པ་གཞལ་མེད་ཁང་༔ སྨན་དང་ཁྲུས་ཆུ་སྨན་བླ་སྲས་བཅས་ཀྱི༔ གསང་གསུམ་དཀྱིལ་འཁོར་ཆེན་པོར་ཡེ་ནས་གྲུབ༔ ཡེངས་མེད་ངང་ནས་ཡིན་ལུགས་དོན་ལ་བལྟ༔ ཏིང་འཛིན་ལྡན་པས་སྔགས་བཟླ༔ ལྷ་ཚོགས་འོད་ཞུ་སྨན་མཆོག་བདུད་རྩིར་གྱུར༔ དུག་གསུམ་འབྱུང་བའི་ནད་རྣམས་སེལ་བ་དང་༔ ཕྱི་ནང་གདོན་བགེགས་བར་ཆད་ཞི་བ་དང་༔ མཐོང་ཐོས་དྲན་རེག་གྲོལ་བའི་དཔལ་ཐོབ་ཤོག༔ སྨོན་ལམ་བཏབ་ཅིང་མྱང་བར་བྱ༔ ས་མ་ཡ༔ ༣༽ མན་ངག་གསུམ་པ༔ རང་གི་སྙིང་དབུས་རང་འདྲའི་ཡེ་ཤེས་སྐུའི༔ མཐའ་མར་རྡོ་རྗེའི་ཡི་གེ་བཅུ་གཉིས་གསལ༔ གནས་གསུམ་ཟླ་བའི་གདན་ལ་ༀ་ཨཱཿཧཱུྃ༔ ཀླད་གོར་ནང་དུ་པདྨ་ཉི་མའི་སྟེང་༔ ནོར་བདག་སྲོག་སྙིང་ཛྃ་བྃ་ཁ་སྦྱོར་བའི༔ མཐའ་མར་རང་སྔགས་བྱུ་རུའི་ཕྲེང་བ་ལྟར༔ གཡས་སུ་འཁོར་བས་དོན་གཉིས་མཛད་པ་བསྒྲུབས༔ ལྷ་ཀླུ་སྡེ་བརྒྱད་ནོར་གཡང་མ་ལུས་པ༔ རིན་ཆེན་ཆར་དང་གསེར་འོད་རྣམ་པར་བསྡུས༔ ཐུགས་སྲོག་ལ་བསྟིམ་ཚེ་བསོད་ཡེ་ཤེས་རྒྱས༔ རྩ་སྔགས་ནི༔ ཨོཾ་ཛམྦྷ་ལ་ཛ་ལེནྡྲཱ་ཡ་དྷ་ན་མེ་དྷི་ཧྲཱིཿཌཱ་ཀི་ནཱི་ཛྭ་ལ་སམྦྷ་རཾ་སྭཱ་ཧཱ༔ སྙིང་པོ་ནི༔ ཨོཾཛམྦྷ་ལ་ཛ་ལེནྡྲཱ་ཡེ་སྭཱ་ཧཱ༔ རྒྱལ་བ་སྲས་བཅས་འགྲོ་བ་ལྷར་ཤཪ་བ༔ འཁོར་ལོའི་བསྒྱུར་རྒྱལ་རྨུགས་འཛིན་ནོར་ལྷའི་ཚོགས༔ ཐམས་ཅད་འོད་ཞུ་རང་གི་སྙིང་གར་ཐིམ༔ རང་ཉིད་མཐུ་དཔལ་གཟི་བརྗིད་ཆེར་རྒྱས་བསམ༔ ས་མ་ཡ༔ ༤༽ མན་ངག་བཞི་པ༔ སྣོད་ཀྱི་འཇིག་རྟེན་འཇིགས་བྱེད་འབར་བའི་ཞིང་༔ བཅུད་ཀྱི་སེམས་ཅན་རྡོ་རྗེ་གཞོན་ནུའི་ལྷ༔ སྲིད་པའི་གཏོས་དང་མཉམ་པའི་སྙིང་ག་རུ༔ རྡོ་རྗེ་སེམས་དཔའ་རྒྱན་མེད་གཅེར་བུའི་སྐུ༔ དེའི་ཐུགས་ཀར་གནམ་ལྕགས་རྡོ་རྗེ་སྔོ༔ སོར་བཞིའི་ཚད་ཀྱི་ལྟེ་བར་ཉི་གདན་ལ༔ ཧཱུྂ༔ཡིག་སྔོན་པོ་འོད་ཟེར་འབར་བ་གསལ༔ དེ་མཐར་རྩ་བའི་སྔགས་ཕྲེང་གཡས་སུ་འཁོར༔ འོད་ཀྱིས་དོན་གཉིས་བྱས་ཏེ་རང་ལ་ཐིམ༔ ཀཱི་ལ་ཡ་ཡི་སྔགས་སྒྲ་འབྲུག་སྟོང་ལྟར༔ ཆེར་སྡིར་གནམ་ས་རལ་བ་ལྟ་བའི་ངང་༔ ཆེ་བའི་ང་རྒྱལ་བསྐྱེད་དེ་སྔགས་འདི་བཟླ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བྂ་ཧཱུྂ༔ཕཊ༔ ཅི་ནུས་བཟླ༔ མཐར་ཁྲོ་བཅུའི་སྔགས་དང་བཀའ་བརྒྱད་ཀྱི་དྲག་སྔགས་སོ་ལྔ་པ་འདོན༔ རྩ་གསུམ་དྲིལ་སྒྲུབ་ནི༔ རྡོ་རྗེ་གཞོན་ནུའི་དཀྱིལ་འཁོར་དུ་རྒྱལ་བ་རབ་འབྱམས་འདུ་བའི་ངེས་ཤེས་བསྐྱེད་ཅིང་༔ འོག་མིན་ཞིང་ནས་བླ་ཡི་དམ་དང༔ མཁའ་འགྲོ་དཔའ་བོ་བསྟན་སྲུང་རྒྱ་མཚོའི་ཚོགས༔ སྐུ་དང་ཡིག་འབྲུ་ཕྱག་མཚན་རྣམ་པ་རུ༔ ཆར་བཞིན་བབ་ནས་སྒོ་གསུམ་བྱིན་གྱིས་བརླབས༔ ཨོཾ་ཨཱཿཧཱུྂ༔ཧྲཱིཿ བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྂ༔ཨཱཿ རྩ་གསུམ་སྤྱི་དྲིལ་སྙིང་པོ་འདི་ཉིད་བཟླའོ༔ ཧཱུྃ་སྒྲུབ་ནི༔ གསལ་བ་གསུམ་ལྡན་དགོངས་པའི་ཡི་གེ་ཧཱུྂ༔ ཞི་བར་རྐྱང་སྟེ་དྲག་པོ་ཉིས་བརྩེགས་དང༔ དབང་ལ་ལྔ་སྒྲིལ་རྒྱས་པར་བདུན་སྒྲིལ་བཟླ༔ མཐར་ཐུག་དབུགས་ཉིད་ཧཱུྂ༔སྟེ་རྒྱུན་ཆད་མེད༔ གཞན་ནི་རང་གི་ཡི་དམ་ལྷག་པའི་ལྷའི༔ གསང་སྔགས་བཟླ་ཞིང་དམིགས་པའི་གཟེར་གདབ་བྱ༔ ཞི་རྒྱས་དབང་དྲག་ལས་ཀུན་འགྲུབ་པར་འགྱུར༔ ཕུར་བའི་ངེས་དོན་གྱི་བསྒྲུབ་པ་ནི༔ བཞུགས་སྟངས་ཀྱིས་གཅུན༔ ལྟ་སྟངས་ཀྱིས་གཟིར༔ བརྟུལ་ཞུགས་ཀྱིས་དཔའ་བསྐྱེད་ཅིང་༔ ཧོ༔ རིག་པ་ཡེ་ཤེས་ཕུར་བ་དབྱིངས་ལ་བཏབ༔ ཆོས་ཁམས་འཁྲུལ་བའི་སྣང་བ་ཐལ་བར་འབྱིན༔ གསལ་སྟོང་གཉིས་སུ་མེད་པའི་ཏིང་འཛིན་ངང་༔ སྐྱེ་མེད་ཆོས་སྐུར་གྲོལ་བའི་ཆེ་བ་ངོམ༔ བྱང་ཆུབ་སེམས་ཀྱི་ཕུར་བ་མཁའ་ལ་བཏབ༔ མ་དག་རླུང་སེམས་འཛིན་པར་ཐལ་བར་འབྱིན༔ ཡབ་ཡུམ་མཉམ་སྦྱོར་བདེ་བ་ཆེན་པོའི་ངང་༔ ལོངས་སྤྱོད་རྫོགས་སྐུར་གྲོལ་བའི་ཆེ་བ་ངོམ༔ ཚད་མེད་སྙིང་རྗེའི་ཕུར་བ་འགྲོ་ལ་བཏབ༔ རིགས་དྲུག་དོང་སྤྲུགས་ཞེན་འཛིན་ཐལ་བར་འབྱིན༔ མི་གནས་མྱ་ངན་འདས་པའི་གྲོང་ཁྱེར་དུ༔ སྤྲུལ་བའི་སྐུ་རུ་གྲོལ་བའི་ཆེ་བ་ངོམ༔ འདུས་བྱས་རྫས་ཀྱི་ཕུར་བ་དགྲ་ལ་བཏབ༔ མཚན་བཅས་བདུད་བཞིའི་དཔུང་ཚོགས་ཐལ་བར་འབྱིན༔ ཏིང་འཛིན་གསུམ་དང་བསྙེན་སྒྲུབ་བཞི་ཡིས་གཟིར༔ གྲུབ་པའི་དཔའ་རྟགས་གཉིས་འཛིན་དགྲ་ལ་ངོམ༔ ཧཱུྃ་གླུ་ལེན་བཞིན་ལྟ་གདེངས་བསྐྱེད༔ རྡོ་རྗེ་གཞོན་ནུ་འགྲུབ་པར་འགྱུར༔ སྲུང་བའི་སྐབས༔ སྣང་སྲིད་ཕུར་བའི་དཀྱིལ་འཁོར་དུ་གསལ་བའི་རང་གི་ཐུགས་ཀར་རྡོ་རྗེ་རྩེ་དགུ་བའི་མས་སྣ་དགུའི་ནང་དུ་སྲུང་བྱ་འཁོར་བཅས་ཚུད་པ་དང་༔ སྲོག་ཡིག་ལས་ཡི་གེ་དུ་མ་འཕྲོས་ཏེ་སྲུང་བྱ་བྱིན་ཀྱིས་རླབས་ནས་བན་བོན་སྟོང་གི་མཐུ་དང་ལྷ་འདྲེ་སུས་ཀྱང་གླག་མི་རྙེད་པར་བསྒོམས་ཤིང་སྤུ་གྲི་རཀྨོའི་སྔགས་བཟླ༔ བཟློག་པའི་སྐབས་སུ༔ དང་པོ་སྲུང་འཁོར་བརྟན་པར་བྱས་ལ་སྤྱི་བོ་ནས་ཁྱུང་གི་ཚྭ་ཚྭ་དང་ཕུར་བའི་སེར་བ༔ ཧཱུྂ༔གི་རླུང་ནག་སོགས་སྤྲོས་ཏེ་མཐུ་བྱད་ཀྱི་སྤྲིན་ནག་ཕུབ་མ་རླུང་གིས་སྦུར་བ་བཞིན་རང་གཤེད་རང་ལ་བཟློག་པར་བསམ༔ བསད་པ་དང་གདབ་ལས་སྐབས་ཀྱི་གཏོར་ཟོར་དང་ཕུར་ཐུན་སོགས་ཀྱི་དམིགས་པ་གཞན་དུ་ཤེས་པར་བྱའོ༔ ས་མ་ཡ༔ ༥༽ མན་ངག་ལྔ་བ༔ སྙིང་དབུས་ཕྱག་ན་རྡོ་རྗེའི་ཐུགས་ཀ་རུ༔ ཉི་མའི་དཀྱིལ་འཁོར་དབུས་སུ་ཧཱུྂ༔དམར་ནག༔ ཡེ་ཤེས་མེ་ཡི་ཚྭ་ཚྭ་རབ་ཏུ་འཕྲོ༔ མཐར་མར་སྔགས་འཕྲེང་དམར་པོ་གཡས་སུ་འཁོར༔ འོད་འཕྲོས་དོན་གཉིས་བྱས་ཤིང་རང་ལ་ཐིམ༔ རྒྱལ་ཀུན་མཐུ་སྟོབས་ནུས་པའི་དབང་ཆེན་ཐོབ༔ སྣང་སྲིད་རྡོ་རྗེའི་དཀྱིལ་འཁོར་ཆེན་པོ་ཡི༔ ལྷ་རྣམས་ཞལ་དང་རྩ་བའི་རིགས་སྔགས་དང་༔ ཧཱུྂ༔དང་ཕཊ༔སྒྲ་ཆད་པ་མེད་པར་གྲགས༔ ས་གཞི་གཡོས་ཞིང་རི་འགུལ་ཆུ་མཚོ་ཁོལ༔ སྲིད་པའི་ཁམས་ཀྱི་རྒྱལ་པོ་དྲེགས་པ་དང་༔ གནས་བདག་ཡུལ་སྐྱོངས་ཐམས་ཅད་སྲོག་ནས་དྲངས༔ ཀུན་ཀྱང་གུས་ཚུལ་མཆོད་པའི་ཡོད་བྱད་ཐོགས༔ གདན་འོག་འཁོད་ཅིང་སྐྱབས་སོང་སེམས་བསྐྱེད་བླང་༔ བཀའ་ཉན་དམ་ལས་འདའ་བའི་གནས་མེད་བསམ༔ ལྟ་བའི་ངར་བསྐྱེད་དྲག་སྔགས་ཐོག་ལྟར་བཟླ༔ ཧཱུྂ༔ཨ་ཀཱ་ཡ་ཧ་ཨ་མ་ར༔ ཡ་མ་དུ་རུ་ཙ་ཤ་ན༔ ཏྲིག་ནན༔ སྦུར་ཐུམ་ཛ་ཛ༔ དྷ་ལོ་ཤ་བུ་ཝ་མ༔ ཨ་རྣྀ་ཏྲི་སིདྡྷི་ཕ་ལ་ཛ་ཛ་ཛ༔ ཅི་ནུས་བཟླ༔ ལྟ་གདེང་བསྐྱེད་ཅིང་༔ ཧཱུྂ༔བཛྲ་ཕཊ༔ དྲག་ཏུ་བརྗོད༔ ལས་སྦྱོར་ཇག་སྲུང་ནི༔ དགྲ་རྐུན་མང་བའི་ཕྱོགས་སུ་འགྲོ་བ་ལ་གྲི་ལྕགས་ཀྱི་སྤུ་གྲི་སོར་བཞི་བ་རྣོ་ངར་དང་ལྡན་པ་ལ་གོང་གི་སྔགས་དང་ཡོངས་འདུས་ཀྱི་སྔགས་སྦྲེལ་མར་མན་ངག་བཞིན་བྲིས་པ་རབ་གནས་བྱས་ལ་གོང་བར་སྦས་ཤིང་འཆང་བའམ༔ མ་འབྱོར་ན་ས་ལ་མདའ་གཞི་འགེང་བའི་གཟུགས་བྲིས་མདེའུ་རྩ་འགྲོ་ཕྱོགས་ལ་བསྐོར༔ གཞུ་མཆོག་གཉིས་ལ་ལྡོག་པས་མནན་ཏེ༔ མགྲིན་པའི་རྟ་མགྲིན་གྱི་ཐུགས་ལས་ཕག་མོ་དམར་མོ་འཕྲོས་ཏེ་བར་ཆད་ངན་པ་ཐམས་ཅད་བྱ་སྒྲོ་མེས་བྲེག་པ་བཞིན་དུ་སོང་བར་མོས་ལ་རྩ་སྔགས་བརྒྱ་རྩ་དང་༔ ལས་སྔགས་འདི་ཅི་ནུས་བཟླ༔ ཨོཾ་ཨཱཿཧཱུྂ༔ཧྲཱིཿམ་ཧ་རི་ནི་ས་ར་ཙ་ཧྲཱི་ཡ་མ་ཧཱ་ཐ་ན་ཧཱུྂ༔ཕཊ༔ སྣང་བ་དགའ་ཡལ་ལེ༔ ནམ་མཁའི་སྤྲིན་དང་༔ སེར་བུ་འགྲོ་ཕྱོགས་སུ་ལྡོག་པ༔ མཁའ་འགྲོས་ལུང་བསྟན་སོགས་འགྲུབ་པའི་རྟག་ཤར་བ་དང་ས་རིས་ལྡོག་པས་བཤིག་ལ་འགྲོ་ཕྱོགས་སུ་གཏོར༔ རང་མདུན་དུ་ཕག་མོ་སྡེ་ལྔ་གསལ་བའི་ང་རྒྱལ་གྱིས་འགྲོ༔ སྒྲིབ་ཤིང་གི་ལས་སྦྱོར་ནི༔ གཡུལ་འཁྲུགས་སོགས་ཀྱི་སྐབས་སུ་ལུས་སྒྲིབ་པར་འདོད་ན༔ སྐྱེས་པ་གྲིར་ཤི་བའི་ཤ་པགས་བསྲེགས་པའི་ཐལ་བར་བུར་ནག་བསྲེས་ཤིང་རྭ་ནང་དུ་བཅུག་ནས་དཀར་འོད་ཆ་ཙམ་མེད་པའི་མུན་པའི་ནང་ནས་སྔགས་འདི་བཟླ༔ ཨོཾ་ན་མོ་རུ་ཏྲི་ཡ་ན་མོ་ཧི་རི་མི་རི་སྭཱཧཱ༔ ཞག་ཉེར་གཅིག་བར་གཡོ་བ་མེད་པར་བཟླས་ལ༔ དངོས་ཉམས་སོགས་འགྲུབ་པའི་རྟགས་བྱུང་བ་དང་སྨིན་ཕྲག་ཏུ་ཐིག་ལེ་བྱས་ཏེ་མེ་ལོང་ནང་དུ་བལྟས་ཚེ་རང་གཟུགས་མི་མཐོང་ན་མཆོག་སྟེ༔ འགྲུབ་པ་ཡིན་ནོ༔ ས་མ་ཡ༔ ༦༽ མན་ངག་དྲུག་པ༔ རང་གི་སྙིང་དབུས་དབུ་མའི་ནང་དབྱིངས་སུ༔ ཡེ་ཤེས་སེམས་དཔའ་རྡོ་རྗེ་རྩེ་དགུ་པ༔ མཐིང་ནག་གྱེན་འགྲེང་མེ་འོད་འཕྲོ་བའི་ལྟེར༔ ཉི་མའི་གདན་ལ་ཧཱུྂ་མཐིང་ནམ་མཁའི་མདོག༔ མཐའ་མར་སྔགས་ཕྲེང་མེ་འབར་གཡས་སུ་འཁོར༔ དེ་ལས་འོད་འཕྲོས་འཇིག་རྟེན་ཐམས་ཅད་གང་༔ མ་དག་དངོས་འཛིན་ལྷག་མ་མེད་པར་བསྲེག༔ ཕྱི་ཡི་བར་ཆད་གདུག་པའི་གཅན་གཟན་དང༔ ནང་གི་མ་རུང་ཕྲ་མེད་གནོད་པའི་ཚོགས༔ གསང་བ་བྱད་ཁ་རྦོད་གཏོང་ངན་པ་རྣམས༔ རང་གཤེད་རང་དབབ་ཐལ་བའི་རྡུལ་བརླག་བསམ༔ འོད་ཟེར་ཚུར་འདུས་རྡོ་རྗེའི་སྲུང་འཁོར་གྱུར༔ ནང་བཅུད་མ་ལུས་གསང་བདག་སེངྒེའི་སྒྲ༔ སྒྲ་གྲགས་གཞོམ་བྲལ་འགྱུར་མེད་ཧཱུྃ་གི་གདངས༔ དྲན་རྟོག་རང་ཟད་ཀ་དག་ཆོས་ཉིད་དབྱིངས༔ གསལ་བརྟན་ཏིང་འཛིན་ངང་ནས་གསང་སྔགས་བཟླ༔ ཨོཾ་བཛྲ་གུ་རུ་སེདྷ་གཎྜེ་དྷཱརྨཱ་དྷཱ་ཏུ་ཧཱུྂ་ཧཱུྂ་ཧཱུྂ༔ ལས་སྔགས༔ ཨོཾ་བཛྲ་ཙཎྜ་སརྦ་དུཥྛཾ་ཏ་ཀ་ཧ་ན་ད་ཧ་པ་ཙ་ཧཱུྂ་ཕཊ༔ ཡུམ་སྔགས༔ ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ མང་དུ་བཟླ༔ འགྲུབ་པའི་རྟགས་ནི་༔ གསང་བདག་སེང་གེ་སྒྲ་དང་ཡུམ་བདུད་འདུལ་དྲག་མོ་སེང་གེའི་གདོང་བ་ཅན་དང་ཁྲོ་བོ་ཡོངས་འདུས་ཀྱི་བསྙེན་པ་ཕྱི་ནང་གསང་བའི་རྟགས་རྫོགས་བར་དུ་བཟླས་པས་གདུག་པའི་སེམས་ཅན་ཀྱི་གནོད་པ་ཞི་བ་དང་༔ བྱད་ཕུར་རྦོད་གཏོང་ངན་པ་བཟློག་པ༔ ལྷ་ཀླུ་སྡེ་བརྒྱདཀྱི་གནོད་པ་སེལ་བ༔ གཟའ་སྐར་འཕྲོད་སྦྱོར་དང་ལྟས་ངན་པ་དགེ་བར་བསྒྱུར་བ་དང་༔ གཤིན་པོ་གཤེད་དང་བྲལ་བ༔ རྟག་ཏུ་གཡོ་བའི་སེམས་བརྟན་པ༔ རྩ་རླུང་ཐིག་ལེའི་གེགས་སེལ་བ༔ ལྷ་མི་ཀུན་གྱིས་བཀུར་བ༔ སྐྱེ་འཆི་ལ་རང་དབང་ཐོབ་ནས་མཁའ་སྤྱོད་ཀྱི་ཞིང་དུ་བསྒྲོད་པར་འགྱུར་རོ༔ གཅན་གཟན་ཀྱི་གནོད་པ་སྲུང་བ་ལ༔ རང་གི་སྤྱི་བོ་ནས་སེདྒེ་འཇིགས་སུ་རུང་བ་མང་པོ་འཕྲོས་ཏེ་འགྲོ་བའི་གནས་ཀྱི་སེམས་ཅན་གདུག་པ་ཅན་ཕྱོགས་སོ་སོར་བྲོས་པར་བསམ་ལ་སྔགས་བཟླས་ན་གཅན་གཟན་དང་མི་འཕྲད་དོ༔ གཞན་སྟག་གཟིག་དོམ་དྲེད་སོགས་ལ་ཡུངས་དཀར་ལ་བསྔགས་ནས་གཏོར་བ་དང་༔ རི་དྭགས་ལ་བ་བླ༔ དུག་སྦྲུལ་ལ་གླ་རྩི༔ སྤྱང་ཀིར་སྤྱང་བྲུན་ནམ་སྤང་སྤོས་ཀྱི་དུད་པ་བདུག༔ བྱི་བར་ནས་སམ་ཡུངས་དཀར༔ ཁྱི་ལ་རང་གི་རྐང་འོག་གི་སའམ་བྱེ་མ་ལ་བསྔགས་ནས་གཏོར་བས་ཐུབ་པོ༔ གནོད་བྱེད་ཐམས་ཅད་གཞོམ་པའི་སྲུང་མདུད་ཟབ་མོ་ནི༔ སྐུད་པ་སྐུ་གསུམ་མམ་ཡེ་ཤེས་ལྔ་མཚོན་པའི་ཁ་དོག་ཅན་ལ་མདུད་པ་གསུམ་དང་དགུ་གཅིག་སོགས་དུས་དང་བསྟུན་པར་བརྒྱབ་ལ༔ རྩ་བའི་སྔགས་བརྒྱ་རྩའི་གཤམ་དུ་ཨོཾ་ཨཱཿཧཱུྂ༔མ་ནུ་སརྦ་ཀཱ་ཡ་ཝཱཀ་ཙིཏྟ་རཀྵ༔ ཞེས་ལན་ཉེར་གཅིག་བརྗོད་ལ་ཕུས་གདབ་ནད་གདོན་སྤྱིར་སྨན་བླ་དང་སྲོག་ཡིག རྒྱལ་འགོངས་ལ་རྟ་མགྲིན་སོགས་ཡི་དམ་ཀྱི་སྐུ༔ ས་བདག་ཀླུ་གཉན་ལ་ཁྱུང་༔ སྡིག་པ༔ ཁྲོ་ཆུ་ཁོལ་མ༔ མེ་དཔུང་༔ ནམ་མཁའ་སྟོང་པ༔ ཀེང་རུས་མེ་འབར་སོགས་བསྒོམ་པས་ཐུབ་པོ༔ ས་མ་ཡ༔ ༧༽ མན་ངག་བདུན་པ༔ ཐུགས་ཀར་རབ་ཏུ་གསལ་བ་ཉི་ཟླའི་གདན༔ སྟེང་དུ་གསེར་གྱི་རྡོ་རྗེ་རྩེ་ལྔ་བ༔ ལྟེ་བར་པདྨ་དམར་པོ་འདབ་བརྒྱད་པ༔ དབུས་སུ་ཚེ་དཔག་མེད་པ་གཅེར་བུའི་སྐུ༔ མཉམ་བཞག་ཕྱག་གི་ནང་དུ་ཚེ་བུམ་ཀྱི་༔ ཁ་རྒྱན་པདྨའི་དབུས་སུ་རྡོ་རྗེ་གསུམ༔ རང་མདོག་ལ་དམིགས་ཆོས་ཉིད་དོན་ལ་བལྟ༔ ༀ་ཨཱཿཧཱུྃ༔ སྒྲ་བཅས་ཤུབ་བུ་འགོག་བཟླས་ཀྱི༔ མཉམ་བཞག་རྒྱུན་སྐྱོང་རང་ངོར་བཞག༔ ཡེ་ཤེས་སེམས་དཔའི་ཐུགས་ཀར་པད་ཉིའི་སྟེང་༔ ཧྲཱིཿཡིག་དམར་པོ་པདྨ་རཱ་གའི་མདོག༔ དེ་མཐར་རྩ་བའི་སྔགས་ཕྲེང་གཡས་སུ་འཁོར༔ འོད་འཕྲོས་དོན་གཉིས་བྱས་ཏེ་ཚུར་འདུས་པས༔ ཀུན་ལ་བདེ་ཆེན་ཡེ་ཤེས་ཐོབ་པར་དམིགས༔ ཏིང་ངེ་འཛིན་གྱིས་གེགས་སེལ་བྱིན་རླབས་ཉམས་རྩལ་འབར༔ ཅི་མཛད་རང་བྱུང་བདེ་བའི་དོན་ལ་བལྟ༔ ཡབ་ཡུམ་གཉིས་མེད་རྩ་སྔགས་ནི༔ ཨོཾ་ཨཱ༔ཧཱུྂ་གུ་རུ་ཤྲཱི་པདྨ་བཛྲ་ཧྲཱིཿ དྷུ་མ་གྷ་ཡེ་ཌཱ་ཀི་ནཱི་ན་མཿསྭཱ་ཧཱ༔ མཁའ་འགྲོ་ཡབ་ཡུམ་སྔགས༔ ཨོཾ་ཨཱཿཧཱུྂ་ཧྲཱིཿམ་ཧ་རི་ནི་ས༔ ར་ཙ་ཧྲཱི་ཡ་ཛ༔ཧཱུྂ༔ རྩ་གསུམ་སྤྱི་དྲིལ་སྔགས༔ ཨོཾ་ཨཱཿཧཱུྂ༔གུ་རུ་དྷེ་ཝ་ཌཱ་ཀི་ནཱི་སྭཱ་ཧཱ༔ ལས་སྔགས༔ ཧྲཱིཿམ་ཧ་རི་ནི་ས༔ ར་ཙ་ཧྲཱི་ཡ་ཨརྣི་ཏྲི་ཛ༔ སརྦ་ཨཾ་གུ་ཤ་ཛ༔ ཙིཏྟ་ཧྲཱིཾ་ཧྲཱིཾ་སརྦ་བ་སུ་སིདྡྷི་ཀུ་རུ་སྭཱ་ཧཱ༔ ལས་སྦྱོར་ནི༔ ས་གཡོ་བ་ལ༔ སཙྪཱ་སེར་པོའི་ནང་དུ་གནས་ཆེན་རྣམས་ཀྱི་ས་དང་༔ གཙོ་འཁོར་ཡོངས་རྫོགས་ཀྱི་སྔགས་འདོད་གསོལ་བཅས་བྲིས་ཏེ་རང་སྡོད་སའི་ཕྱོགས་བཞིར་འཇོག་པ་དང་༔ སྐྱེར་བའི་ཕུར་བུ་ལྔའི་དལ་ལ་གཙོ་འཁོར་ཡོངས་རྫོགས་ཀྱི་སྔགས་བཀོད་ལ་གྲི་ཁྲག་སོགས་ཁྲག་སྣ་བྱུགས་བྱིན་གྱིས་བརླབས་ཤིང་ཕྱོགས་བཞི་དབུས་ལྔར་བཏབ་པས་ཐུབ་པོ༔ ཆུ་དགྲ་ལ༔ གླ་རྩི་གུ་གུལ་མི་ཚིལ། མི་ཁྱི་ཕག་བྱིའི་བྲུན་རྒྱ་སྣག་དང་སྦྱར༔ ཡུག་ས་ཐེངས་དགུར་བུད་པའི་གོས་ལ་སྔགས་ཡོངས་རྫོགས་བྲིས་ཤིང་ཕུར་བའི་དབལ་དུ་བཅུག་ཏེ་ཆུ་ཡོང་བའི་ཕྱོགས་སུ་བཏབ་པས་ཐུབ་པོ༔ མེ་དགྲ་ལ༔ བུམ་པའི་ནང་དུ་སྔགས་ཡོངས་རྫོགས་དང་གཡུ་ལ་བཾ་དང་ཆུ་ཤེལ་ལ་ཁཾ་བྲིས་པ་དང་ཚྭ་སྣ་ཐོབ་ཚད་བཅུག་ལ་རྩ་སྔགས་སྟོང་ཕྲག་གིས་བྱིན་གྱིས་བརླབས་པས་ཐུབ་པོ༔ རླུང་དགྲ་ལ༔ གྲི་ལྕགས་ཀྱི་རལ་གྲིའི་རྩེ་མོར་མེ་རི་དང་རྩ་བར་རྡོ་རྗེ་རྒྱ་གྲམ་དང་ཤྭ་ཁྲག་བྱུགས་རྩ་སྔགས་སོགས་མན་ངག་བཞིན་བྲིས་བ་རབ་གནས་ལེགས་པར་བགྱིས་ལ་ཏིང་འཛིན་ལྡན་པའི་ངང་རླུང་འབྱུང་བའི་ཕྱོགས་བཏབ་པས་ཐུབ་པོ༔ ཏིང་ངེ་འཛིན་གྱི་གེགས་གཙོ་བོ་བྱིང་རྒོད་སྲུང་བའི་རྫས་དང་འཁོར་ལོ་ནི༔ བྱིང་བའི་ཚེ་ཤུགས་པས་བདུག༔ དམ་སེལ་མེད་པའི་ཆོས་སྨན་བཏུང་༔ གནས་གསུམ་ག་བུར་གྱི་ཐིག་ལེ་བྱས་ལ་རྩ་སྔགས་མཐར༔ ཨོཾ་ཙི་སུམ་ཙི་སུམ་སྭཱ་ཧཱ༔ ཞེས་བརྒྱ་རྩ་བརྒྱད་ཀྱི་ཆུ་གཙང་བྱིན་གྱིས་རླབས་ལ་འཐོར་འཐུང་དང་ཁྲུས་བྱས་ན་བྱིང་བ་དང་གཉིད་ཆེ་བ་སོགས་སེལ་ལོ༔ རྒོད་པ་ལ་མཁའ་འགྲོའི་རིགས་ཅན་ཀྱི་དབུ་སྐྲས་རང་གི་སྲིན་ལག་གཡས་གཡོན་བསྡམ་ལ་རླུང་དལ་བུར་བཏང་༔ རྒལ་ཚིག་དྲང་པོར་བསྲིང་ཞབས་རྡོ་རྗེའི་སྐྱིལ་ཀྲུང་བཅའ༔ གསང་གནས་སུ་ཐིག་ལེ་ནག་པོའི་ནང་དུ་སྲོག་ཡིག་བསྒོམ་ལ་རྩ་སྔགས་གཤམ་ས་མ་དྷི་ཏིཥྛ་བཛྲ་ཞེས་བརྒྱ་རྩ་བཟླས་པས་སེལ་ལོ༔ ཐབས་གྲོགས་འགུགས་པ་ལ༔ གཟུགས་ཅན་དང་གཟུགས་མེད་ཀྱི་དཔའ་བོ་དང་མཁའ་འགྲོ་སུ་ཡང་རུང་༔ མིང་གཟུགས་བྲིས་པ་དམིགས་པས་འགུགས་པ་དང་༔ རྩ་སྔགས་དང་དཔའ་བོ་ཡབ་ཡུམ་སྲོག་སྔགས་མཐར༔ ཨཱ་བེ་ཤ་ཡ་ཨཱ་ར་ལི་ཧོ་བཛྲ་ས་མ་ཡ་ཕེཾ་ཕེཾ༔ཧྲཱིཾ༔ཧྲཱིཾ༔ཛ༔ཧཱུྂ༔བྂ༔ཧོ༔ ཞེས་སྟོང་རྩ་བཟླས་ལ་སིནྡྷུ་ར་དང་ཅུ་གང་ལ་བསྔགས་ནས་སྨིན་མཚམས་སུ་ཐིག་ལེ་འགོད་པའམ་རོལ་མོའི་ནང་དུ་བྲིས་ནས་དཀྲོལ་ན་དཔའ་བོ་དཔའ་མོ་ཐམས་ཅད་རང་དབང་མེད་པར་འདུས་ནས་དངོས་གྲུབ་སྟེར་བར་བྱེད་དོ༔ ས་མ་ཡ༔ ༨༽ མན་ངག་བརྒྱད་པ༔ གནས་གསུམ་འོད་ལྔའི་དལ་དུ་ཡིག་འབྲུ་གསུམ༔ ཐུགས་ཀར་ཧཱུྃ་ཡིག་ཀླད་གོར་ཉི་དཀྱིལ་སྟེང་༔ པདྨ་གསུང་གི་སྙིང་པོ་ཧྲཱིཿདམར་ནག༔ མཐའ་མར་སྔགས་ཕྲེང་རང་སྒྲ་ལྡིར་བཞིན་འཁོར༔ ཡི་གེར་མེ་རླུང་འཁྲིལ་ཞིང་གཡོ་བ་ཡི༔ འོད་ཀྱིས་འཕགས་པ་མཆོག་ཅིང་འགྲོ་སྒྲིབ་སྦྱང་༔ འོད་ཟེར་ཚུར་འདུས་དཔལ་ཆེན་སྐུ་གསུང་ཐུགས༔ ངོ་བོ་ཧྲཱི་ཡིག་མེ་འོད་འབར་བ་ཡིས༔ བ་སྤུའི་བུ་ག་གོ་མཚམས་མེད་པར་གཏམ༔ དབང་ཆེན་དགྱེས་པའི་རྟ་སྐད་ལན་གསུམ་བཏོན༔ དང་པོས་བསྟན་སྲུང་གཟུགས་ཅན་གཟུགས་མེད་སྡེ༔ ལྷ་འདྲེ་མི་གསུམ་སྲོག་འགུལ་གནས་ནས་བསྐྱོད༔ གཉིས་པས་ཤ་རུལ་སྦྲང་མ་བཞིན་དུ་བསྡུས། གསུམ་པས་བཀའ་ཉན་གསུང་བསྟོད་དམ་ལ་བཞག༔ ཕོ་རྒྱུད་ཐམས་ཅད་དཔའ་བོ་རྟ་མགྲིན་ལྔ༔ མོ་རྒྱུད་ཐམས་ཅད་ཕག་མོ་ལྷ་ལྔར་གསལ༔ སྣང་སྲིད་དག་པ་དབང་གི་དཀྱིལ་འཁོར་ཆེ༔ སྔགས་ཀྱི་སྒྲ་དབྱངས་འཁོར་འདས་ཀུན་ཏུ་ཁྱབ༔ ཨོཾ་ཨཱཿཧཱུྂ༔གུ་རུ་ཀྲོ་དྷ་ཧ་ཡ་གྲཱི་ཝ་ཀྲོ་དྷ་ཧ་རི་ནི་ས་ས་མ་ཡ་ཛ༔ ཀཱ་ལེ་ཤྭ་ར་སིདྡྷི་ཕ་ལ་ཧཱུྂ༔ ཅི་ནུས་བཟླ༔ དགྲ་འཆིང་བའི་གདམས་པ་ནི༔ བྱ་རྒོད་ཀྱི་རྒྱུས་པ་ཤ་དང་བྲལ་བ་རིང་ཚད་རང་སོར་དགུ་ཙམ་གཙང་མ་བཟོས་ལ་རྩ་སྔགས་མཐར༔ ཨོཾ་མ་ཏུ་ར༔ ཀ་ཏུ་ར༔ ནི་ར་ནི་ར༔ རྩ་ཆིངས་རྩ་སྡོམས༔ ཡིད་ཆིངས༔ ཞེས་སྟོང་བཟླས་ཤིང་རྒྱུས་པ་ཇག་རྐུན་གྱི་ཡན་ལག་སུ་མོས་ལ་མདུད་པ་གསུམ་བརྒྱབ་ནས་རྒྱུས་སྣེ་མེ་ལ་བསྲེག་པ་དར་དམར་གྱི་ཁུག་མར་བཅུག་ལ་ལྷམ་གྱི་ནང་ངམ་གདན་འོག་སོགས་མི་ཡིས་མི་མཐོང་སར་སྦས་པས་དགྲ་བོའི་ཡན་ལག་འཆིངས་ཤིང་བྲན་དུ་འགྱུར་རོ༔ དཀྲོལ་བའི་ཚེ་རྩ་སྔགས་གཤམ་ཨེ་ཡྂ་རྂ་ལྂ་བྂ་ཤུདྷེ་ཤུདྷེ་སིག་སིག་ཤད་སིག་ཤད་ཧོ༔ ལན་བདུན་བཟླས་ཤིང་རང་གི་དྲི་ཆུ་ལ་བསྔགས་ཤིང་རྒྱུས་སྣེ་བརླན་པར་བྱས་པས་གྲུབ་པོ༔ གཟའ་དང་གདོང་ཐུག་སོགས་སྲུང་བ་ལ༔ མེ་ལོང་གི་ངོས་ལ་རྩ་སྔགས་གཡོན་སྐོར་དུ་བྲིས་པ་མགུལ་བར་ཁ་ཕྱིར་བསྟན་དུ་འདོགས་པའམ་དགོས་དབང་དང་བསྟུན་པར་བཞག་ལ་རང་ཉིད་རྟ་མགྲིན་གསལ་བའི་དཔྲལ་བའི་སྤྱན་ལས་འོད་ཟེར་སྣ་ཚོགས་སྤྲོས་ཏེ་གཟའ་ཀླུ་སྡེ་བརྒྱད་ཐམས་ཅད་དབང་དུ་བསྡུས་པར་མོས་ཏེ་རྩ་སྔགས་མང་དུ་བཟླས་པས་ཐུབ་པོ༔ གཞན་ཡང་རྩ་སྔགས་ཀྱིས་གཟི་དང་ཆུ་མིག་ཅན་གྱི་སྲུང་རྐུད་བྱིན་གྱིས་བརླབས་པ་དང་རྩ་སྔགས་རྒྱ་ཤོག་ལ་བྲིས་པ་སྤྲ་ཚིལ་གྱིས་གཡོག་ཏེ་སྟེང་དུ་མིག་གསུམ་དགུ་སོགས་བསྐོས་པ་ལུས་ལ་འཆངས་པས་ཀྱང་ཐུབ་ངེས་སོ༔ གསང་བ་རྣམ་རྟོག་ཐད་ཀར་གཅོད་པར་བྱེད་པ་ནི་རྣམ་རྟོག་ཐམས་ཅད་ཀྱི་རང་གཟུགས་རླུང་ནག་པོ་རང་ལུས་ཙམ་མདུན་དུ་གསལ་བ་ལ་ཁྲོ་བོའི་ཕྱག་གི་ཐོད་དབྱུག་བསྣུན་པས་སིལ་བུར་གཏོར༔ ཡབ་ཀྱི་སྨིན་མཚམས་ནས་མེ་འཕྲོས་པས་ཐམས་ཅད་གཞོབ་ཏུ་བསྲེག༔ ཡུམ་གྱིས་གསང་བ་ནས་ཆུ་བྱུང་པས་དག་པར་བཀྲུས༔ ཡབ་ཡུམ་གཉིས་མེད་ཀྱི་ཤངས་ནས་རླུང་བྱུང་བས་སྟོང་པར་སྦྱངས་བར་བསམ་ལ་རྣམ་རྟོག་སྐྱེ་ཚེ་སེམས་སྔགས་སྒྲ་ལ་གཏད་ཅིང་དྲག་ཏུ་བཟླ༔ སེམས་ཅུང་ཟད་གནས་ཚེ་སྔགས་མཚམས་བཞག་ཏེ་སྒོམ་ལ་འཇུག་དེ་ལྟར་བཟློས་པས་རྣམ་རྟོག་ཐམས་ཅད་སེལ་བར་འགྱུར་རོ༔ ས་མ་ཡ༔ ༩༽ མན་ངག་དགུ་པ༔ གནས་གསུམ་འོད་ཐིག་རྡོ་རྗེ་གསུམ་གྱིས་མཚན༔ ཧཱུྃ་ཡིག་ཀླད་གོར་ཆོས་དབྱིངས་བརྡལ་བའི་ནང་༔ ཡེ་ཤེས་སེམས་དཔའ་ཕྱག་རྡོར་ཐུགས་ཀ་རུ༔ གསེར་གྱི་རྡོ་རྗེ་རྩེ་ལྔ་གྱེན་ལངས་ལྟེར༔ ཉི་མའི་སྟེང་དུ་ཧཱུྂ༔ཡིག་དམར་ནག་གསལ༔ མེ་ཟེར་འཁྱུགས་པའི་སྔགས་ཕྲེང་གཡས་སུ་འཁོར༔ ཕྱོགས་བཅུ་རབ་འབྱམས་རྒྱལ་བར་མཉེས་མཆོད་ཕུལ༔ བྱིན་རླབས་མཐུ་སྟོབས་འོད་ཐིག་རྣམ་པར་བསྡུས༔ འོད་ཟེར་སླར་འཕྲོས་འགྲོ་བའི་ནད་གདོན་དང་༔ སྡིག་སྒྲིབ་བག་ཆགས་བཅས་པ་སྟོང་པར་སྦྱང་༔ གནོད་སེམས་འཆང་བའི་མི་དང་མི་མིན་དང་༔ འབྱུང་པོ་རྣམས་ཀྱི་གདུག་རྩུབ་བསམ་སྦྱོར་ངན༔ སྔོན་ལས་འཕྲལ་རྐྱེན་བར་ཆད་མ་ལུས་སེལ༔ ཚེ་བསོད་ཉམས་དང་རྟོགས་པའི་ཡེ་ཤེས་རྒྱས༔ ཁམས་གསུམ་ལྷ་འདྲེ་མི་གསུམ་དབང་དུ་བསྡུས༔ ལྷ་སྲིན་སྡེ་བརྒྱད་དྲེགས་པས་བཀའ་ལ་ཉན༔ ཅི་བཅོལ་འཕྲིན་ལས་སྤྲོ་བཞིན་བསྒྲུབ་པར་བསམ༔ སྣང་རྡོ་རྗེ་ཁྲོ་ལོད་གསལ་བ་ཡི༔ ལྷ་སྔགས་ཆོས་ཉིད་རོལ་བའི་ངང་ཉིད་ལས༔ རིག་རྩལ་སྔགས་ཀྱི་སྒྲ་དབྱངས་དིར་དིར་སྒྲོགས༔ རྩ་སྔགས་འདི་བཟླ༔ ཨོཾ་ཨཱཿཧཱུྂ་མ་ཧཱ་གུ་རུ་བི་རུ་ཀྲོ་དྷ་ལོ་ཀོཏྟ་ར་སརྦ་སིདྡྷི་ཧཱུྂ༔ཧཱུྂ༔ཧཱུྂ༔ཕཊ༔ ཅི་མང་བཟླ༔ སྤྱི་དྲིལ་སྔགས༔ ཨོཾ་ཨཱ༔ཧཱུྂ༔ཨརྩིག་ནིརྩིག་ན་་མོ་བྷ་ག་ཝ་ཏེ་ཧཱུྂ༔ཧཱུྂ༔ཕཊ༔ཕཊ༔ ཨཱ༔ཧཱུྂ༔ཧཱུྂ༔ཕཊ༔ ཟུར་ཆག་སྔགས༔ ཨོཾ་བཛྲ་གུ་རུ་ཀྲོ་བོ་ལོད་ལོ་ཀ་སརྦ་སིདྡྷི་ཧཱུྂ་ཧཱུྂ་ཧཱུྂ༔ འདི་གསུམ་རང་གི་བློ་ལ་གང་མོས་བཟླ༔ སྐབས་སུ་རྩ་སྔགས་ཤམ་བུར་ཧཱུྂ༔ཕཊ༔ཅེས༔ ངར་ལྡན་མང་བཟླས་སྣང་བའི་ཡུལ་རྣམས་ལ༔ ཐོགས་རྡུགས་མེད་པ་རིག་པའི་རྩལ་ཡང་སྦྱང༔ དེ་ལྟར་གྲོ་ལོད་རྩ་སྔགས་གང་མོས་པ༔ བཟླ་ཞིང་ནུས་པ་ཐོན་ན་ལས་ལ་སྦྱོར༔ དེ་ཡང་མཚོན་བཟློག་རིག་སྔགས་རྒྱལ་པོ་འདི༔ དམིགས་པའི་ཁ་བསྒྱུར་ཏིང་འཛིན་ངར་དང་བཅས༔ ཨོཾ་རྣོར་སོད་བཟློག་ཆུཾ་དྲིལ་སྭཱ་ཧཱ༔ བཟླ་ཞིང་རྟེན་འབྲེལ་རྫས་འཁོར་སྲུང་བ་ཡང༔ བྱས་པས་མཚོན་གྱི་གནོད་པ་བཟློག་པར་བྱེད༔ མི་སྣང་བ་བསྒྲུབ་པ༔ སྐྱེས་པ་གྲིར་ཤི་བའི་པགས་པ་ཤ་དང་རོ་བསྲེགས་པའི་སྤུར་ནག་གཉིས་རྩི་བཞིན་བཏགས་ཏེ༔ རྭ་ནང་དུ་སྔགས་འདིས་ཞག་ཉི་ཤུ་རྩ་གཅིག་ཏུ་བསྒྲུབ་པར་བྱ་སྟེ༔ ཨཱོཾ་ན་མོ་རུ་ཏྲི་ཡ་ན་ཧོ༔ ཧི་རི་མི་རི་སྭཱཧཱ༔ ནམ་དགོས་པའི་སུས་སྨིན་ཕྲག་ལ་བྱུགས་པས་སུས་ཀྱང་མི་མཐོང་སྟེ། སླར་ཕར་འཇོམས་ནུས་པར་ཐེ་ཚོམ་མེད་དོ༔ བཟློག་པའི་ཕུར་བུ་བསྒྲུབ་པ་ནི༔ གྲི་ལྕགས་གི་ཕུར་བའི་དབལ་གྱི་ནང་དུ་རྩ་སྔགས་དང་རྩེ་མོ་གསུམ་ལ་ཧཱུྂ༔གསུམ་འབྲི༔ ལྕུམ་ཞོག་གི་ནང་དུ་རྩ་སྔགས་ལས་སྔགས་ཡོངས་རྫོགས་དང་དྲག་སྔགས་སོ་ལྔ་བ་དང་རྟེན་འབྲེལ་སྙིང་པོས་མཐའ་བརྒྱན་པ་དྲིལ་བ་ནང་གཞུགས་བྱ༔ རྫས་ནི་ཡུང་ནག༔ ཏིལ་ནག༔ མུ་ཟི་ནག་པོ༔ གུ་གུལ་ནག་པོ༔ ཚྭ༔ སྒོག་པ༔ གཡེར་མ༔ ཁྱི་ནག་སྤུ༔ གསང་བའི་རྫས་གཅིག་ནི་ཡུག་ས་ཐེངས་དགུ་མའི་གོས་སམ་སྐྲ་བཅས་བཅུག་ལ་རབ་ཏུ་གནས༔ དགོས་པའི་དུས་སུ་ཟུར་རྩེ་དགྲ་ལ་གཏད་ཅིང་རྩ་སྔགས་མཐར་ཁ་བསྒྱུར་བཅས་བྷྱོ་བྷྱོ་ཟློག་ཟློག༔ བརྗོད་པས་སྙིགས་དུས་ཀྱི་བསམ་སྦྱོར་ནག་པའི་བན་བོན་སོགས་ཀྱིས་མཐུ་གཏོང་པ་བཟློག་པ་དང་༔ སེར་བ་ཁ་བསྒྱུར་བ། ནོར་ཕྱུགས་རྗེས་ཀྱི་འགོང་པོ་བཟློག་པ་སོགས་དང་༔ རྐུན་མ་ལ་རྐང་རྗེས་སུ་ཕུར་བ་བཏབ་ལ་རྩ་སྔགས་གཤམ་དུ། ཛ་ཧཱུྂ་བྃ་ཧོ་རྐུན་མ་མྱུར་དུ་ཁུག ཅེས་པས་ཐུབ་པོ༔ ཞེ་སྡང་ཞི་བར་བྱེད་པ་ལ་ཁྱི་འཐབ་པའི་རྡུལ་གྱིས་དམིགས་བྱའི་གཟུགས་བརྙན་བཅོས་ལ་རྩ་སྔགས་མཐར་ཁྲོས་པ་ཞི་བར་གྱུར་ཅིག༔ ཅེས་བརྗོད་ཅིང་ཡུངས་དཀར་ལ་བསྔགས་པ་གཏོར་བས་ཐུབ་ལ༔ རང་ཉིད་ལ་སྙིང་དབུས་སུ་ཁྲོ་ལོད་ཐེ་བོང་ཙམ་ཞིག་གསལ་ལ་དེའི་སྐུ་ལས་བདུད་རྩིའི་རྒྱུན་བབས་པས་ཞེ་སྡང་ཁྲག་དམར་པོའི་རྣམ་པར་སོང་བར་མོས་ལ་སྔགས་གོང་བཞིན་བཟླ་བའམ༔ རྫས་ལག་མཐིལ་གཡས་སུ་བྱུགས་ལ་ཞེ་སྡང་ཐམས་ཅད་དེར་འདུས་པར་བསམ་ཞིང་སྔགས་ཆུས་མཐར་བཀྲུ་བར་བྱའོ༔ ས་མ་ཡ༔ ༡༠༽ མན་ངག་བཅུ་པ༔ དཔྲལ་མགྲིན་སྙིང་གར་འོད་ལྔའི་གོང་བུ་རུ༔ ཁ་དོག་གསུམ་ལྡན་ཡི་གེ་འབྲུ་གསུམ་བཀོད༔ ཐུགས་ཀར་ཧཱུྃ་གི་ཐིག་ལེར་རྡོ་རྗེ་སེམས༔ དཀར་གསལ་རྒྱན་མེད་རྡོར་དྲིལ་ཕྱེད་དཀྱིལ་རོལ༔ དེའི་ཐུགས་ཀར་པདྨ་ཉི་ཟླ་ཡི༔ དཀྱིལ་དབུས་ཧྲཱིཿདང་གཡས་སུ་ཨཱོཾ་ཡིག་དང་༔ གཡོན་དུ་ཨཱཿཡིག་མདུན་དུ་ཧཱུྃ་ཡིག་གསལ༔ མཐའ་བསྐོར་ཡིག་དྲུག་སྔགས་ཕྲེང་དམར་སྒོ་རེ༔ འཁོར་ལས་འོད་ཟེར་རྒྱལ་བའི་ཞིང་ཀུན་ཁྱབ༔ མཆོད་པས་མཉེས་ཤིང་མཁྱེན་བརྩེ་ནུས་པ་ཡི༔ བྱིན་རླབས་མ་ལུས་འོད་ལྔའི་རྣམ་པར་བཀུགས༔ འོད་ཟེར་སླར་འཕྲོས་རིགས་དྲུག་གནས་ཀུན་ཁྱབ༔ ལས་ཉོན་འབྲས་བུ་སྡུག་བསྔལ་རྒྱུ་བཅས་སྦྱང་༔ བར་དོར་གནས་པའི་འགྲོ་བར་དབྱུགས་དབྱུང་ཞིང་༔ བྱང་ཆུབ་སེམས་མཆོག་རིན་ཆེན་སྐྱེས་པར་བསམ༔ སྣང་གྲགས་རྟོགས་གསུམ་འཕགས་པའི་སྐུ་གསུང་ཐུགས༔ དོན་དམ་སྐྱེ་མེད་ངང་ནས་སྔགས་སྒྲ་སྒྲོགས༔ ཨོཾ་ཨཱ༔ཧཱུཾ༔ཧྲཱིཿཨོཾ་མ་ཎི་པདྨེ་ཧཱུཾ༔ ཅི་ནུས་བཟླ༔ སྡིག་པ་ཞི་བའི་ཐབས་ལ༔ གསུང་རྟེན་མཚན་སྔགས་མཆོད་པ་སྟེ༔ རྒྱུ་ནི་ནད་གདོན་སྡིག་སྒྲིབ་ཞི་བ་ལ་དུང་༔ བྱང་ཆུབ་ཤིང་༔ ཙནྡན་དཀར་པོ༔ ཚེ་བསོད་ཡེ་ཤེས་རྒྱས་པ་ལ༔ གསེར༔ ར་གན༔ སྐྱེར་བའི་ཤིང་༔ མི་དང་མི་མིན་སོགས་སྣང་སེམས་དབང་དུ་བསྡུ་བ་ལ་བྱུར་དམར༔ ཟངས༔ སེང་ལྡེང་༔ ཤུག་དམར༔ དགྲ་བགེགས་ཉོན་མོངས་གསོད་པ་ལ་ལྕགས༔ ཆུ་ཤིང་༔ སེ་བའི་ཤིང་༔ དེ་དག་མ་རྙེད་ན་རས་བྱང་ཤོག་བུར་བྱས་ཀྱང་རུང་༔ ངོས་གཙང་མར་རྩ་སྔགས་མཐར་གཤམ་གང་འདོད་དེ་་བྲིས་ལ་མཆོད་པ་རྣམས་ལྔ་བཤམས་ཤིང་དད་མོས་རྣམ་པར་དག་པས་ཉི་མ་ནུབ་པ་དང་དུས་མཉམ་པར་རིག་སྔགས་རྩེ་གཅིག་ཏུ་ནམ་ལངས་བར་བཟླས་ན་ལས་གང་འདོད་དེ་འགྲུབ་པ་དང་༔ རྟག་དུ་མཆོད་ན་བསོད་ནམས་ཀྱི་ཚོགས་རྫོགས་ཤིང་ཚེ་རབས་ཀུན་ཏུ་སྤྱན་རས་གཟིགས་ཀྱིས་བཤེས་གཉེན་མཛད་པ་ཡིན་ནོ༔ ལས་ཐམས་ཅད་འགྲུབ་པའི་སྦ་ལྕག་ནི༔ སྦ་སྙུག་ཚིགས་གསུམ་པའི་ནང་དུ་རྩ་སྔགས་མཐར་སརྦ་སིདྡྷི་སྭཱ་ཧཱ༔ཞེས་དང་རིགས་ལྔ་ཡབ་ཡུམ་གྱི་སྔགས་མཐར་ལས་བཞིའི་སྔགས་དང་དབྱངས་གསལ་ཡིག་བརྒྱ་རྟེན་སྙིང་བཅས་བྲིས་ལ༔ བཟང་པོ་དྲུག་དང་རིན་ཆེན་སྣ་ཚོགས་ཀྱི་བྱེ་མ༔ མཁའ་འགྲོའི་རིགས་ཅན་གྱི་དབུ་སྐྲ༔ སྔགས་པ་ནུས་ལྡན་གྱིས་དབུ་སྐྲ༔ དགེ་སློང་ཁྲིམས་ལྡན་གྱི་དབུ་སྐྲ་བཅས་བཅུག་ལ་མགོ་མཇུག་ཟངས་ཀྱིས་བཏུམ༔ མགོ་རྣ་ལོང་གི་གཡས་སུ་ལྕགས་ཀྱུ་དང་གཡོན་དུ་ཨ་ལོང་ཆུང་ངུ་བཏགས༔ རྣ་ལོང་ནང་དུ་དར་སྣ་ལྔའི་ཐག་པ་རང་གི་གྲུ་གང་བ་བྱས་ལ་རབ་དུ་གནས༔ དེ་སྤྱན་རས་གཟིགས་ཀྱི་དཀྱིལ་འཁོར་ཡིན་པས་མཆོད་པས་སྡིག་པ་དག་ཚོགས་རྫོགས་འབྱོར་བ་ཕུན་སུམ་ཚོགས༔ དགོས་པའི་དུས་སུ་ཀླད་ལ་བསྐོར་བ་འམ་ཕྱོགས་དེར་དམིགས་ཏེ་བཙུགས་པ༔ བྲབས་པ༔ ལག་ཏུ་འཆང་པ་སོགས་བྱས་པས་ཁ་བ་གཅོད༔ སེར་བ་བསྒྱུར༔ རླུང་ངན་བཟློག༔ གཞན་དགྲ་འོང་བ༔ ཆགས་ཆེ་བ༔ འདྲེར་འཕྲད་པ༔ ནད་རིམས་མཆེད་པ་སོགས་ཞི་བ་དང་༔ ལས་མགོ་རྩོམ་པ༔ གཟའ་སྐར་ངན་པར་འཕྲད་པ༔ ནད་ངན་མཆེད་པ་སོགས་སེལ་ལོ༔ སྔགས་ཆུ་བྱིན་གྱིས་རློབས་ཚེ༔ རྩ་སྔགས་མཐར༔ ཏདྱ་ཐཱ༔ ཨ་ལོ་ཀ་ལོ་ཨཱ་ལི་ཀཱ་ལི་མུན་ཙི་ཏི་སྭཱ་ཧཱ༔ ཞེས་ཉི་མར་ཁ་བལྟས་ཏེ་བརྒྱ་རྩ་བརྒྱད་བརྗོད་ནས་འཐོར་འཐུང་བྱས་པས་དགབ་འདྲེ་བར་ཆད་ནད་ཀུན་སེལ་བ་དང་༔ བདག་གཞན་ཐམས་ཅད་སྲུང་བར་འགྱུར་རོ༔ འཕོ་བ་འགྲུབ་པའི་རིལ་བུ་ནི༔ རྒྱ་འགྲོན་སྦྲུམ་མ་བསྲེགས་ཐལ་དང་༔ སྦྲང་རྒོད༔ རྡོ་ཁབ་ལེན༔ རྒྱ་ཚྭ༔ ལྕེ་ཚའི་མེ་ཏོག་སྦྱར་ལ་རྩ་སྔགས་གཤམ༔ ཛྙཱ་ན་ཌཱ་ཀི་ནཱི་བྂ་པྲ་བེ་ཤ་ཡ་ཕཊ༔ ཅེས་འབུམ་ཕྲག་གིས་བྱིན་གྱིས་བརླབས་པ་སྤྱི་བོར་བྱུགས་པས་འབྱོངས་ངོ་༔ ས་མ་ཡ༔ ༡༡༽ མན་ངག་བཅུ་གཅིག་པ༔ སྤྱི་བོར་འཁོར་ལོ་དཀར་པོ་ཨོཾ་གྱིས་མཚན༔ མགྲིན་པར་པདྨ་དམར་པོར་ཨཱ༔ཡིས་བརྒྱན༔ ཐུགས་གར་རྡོ་རྗེ་རྒྱ་གྲམ་ཧཱུྂ༔སྔོན་གསལ༔ ལྟེ་བར་གོས་དཀར་ཡུམ་སྲོག་ནི༔དམར་སྐྱ༔ གསང་བར་ཆོས་སྐྱོང་ཀུན་འདུས་ཏྲི་དམར་ནག༔ ཧཱུྃ་གི་ཐིག་ལེའི་ནང་དུ་ཟླ་གདན་ལ༔ ཧྲཱིཿཡིག་དམར་པོ་འོད་ཟེར་རབ་ཏུ་འབར༔ དེ་མཐར་རྩ་སྔགས་བྱུ་རུའི་ཕྲེང་བ་ལྟར༔ གཡས་སུ་འཁོར་ལས་འོད་འཕྲོས་དོན་གཉིས༔ སྣོད་བཅུད་མ་ལུས་བདེ་ཆེན་དག་པའི་ཞིང་༔ སྒྲ་གྲགས་ཐམས་ཅད་ཨ་མི་ཏ་བྷའི་དབྱངས༔ ཀུན་རྟོག་དྲི་མེད་བྱང་ཆུབ་སེམས་ཀྱི་ངང་༔ ཞེན་འཛིན་ཡིད་དཔྱོད་བྲལ་བའི་ངང་ནས་བཟླ༔ ཨོཾ་ཨ་མི་ཏ་བྷཱ་ཧྲཱིཿ ཡང་སྐབས་སུ༔ རང་ཉིད་འོད་དཔག་མེད་ཀྱི་སྐུར་གྱུར་པའི་རང་འདྲ་ཡེ་སེམས་ཀྱི་ཐུགས་ཀར་རྡོ་རྗེ་ཧྲཱིཿདང་བཅས་པའི་ཐ་མར༔ ཨཱོཾ་ཨ་མི་ཏ་བྷཱ་ཧྲཱིཿཞེས་པས་བསྐོར་བ་ལས་འོད་ཟེར་འཕྲོས་འཕགས་པ་མཆོད་ཅིང་དགྱེས་པ་བསྐངས༔ སྲིད་པ་བདུན་གྱི་སེམས་ཅན་ཐམས་ཅད་ལ་ཕོག་པས་དེ་ཐམས་ཅད་སངས་རྒྱས་འོད་དཔག་མེད་ཀྱི་སྐུར་གྱུར་པར་བསམས་ལ་གོང་གི་སྔགས་དང་མཚན་བརྒྱ་རྩ་བརྒྱད་པ་བཀླགས་པར་བྱའོ༔ སངས་རྒྱས་རབ་བདུན་གྱི་སྔགས་ནི༔ ན་མཿསརྦ་ཏ་ཐཱ་ག་ཏ་ཧྲྀ་ད་ཡ༔ ཨ་ནུ་ག་ཏེ༔ ཨཱོཾ་ཀུ་རུཾ་གི་ནི་སྭཱ་ཧཱ༔ འདི་ནི་དེ་བཞིན་གཤེགས་པ་སྤྱིའི་སྔགས་ཞེས་ཀྱང་བྱ༔ བདེ་གཤེགས་རབ་བདུན་གྱི་སྔགས་ཞེས་ཀྱང་བྱ༔ ལས་སྒྲིབ་རྒྱུན་གཅོད་པའི་སྔགས་ཞེས་ཀྱང་བྱ༔ འཁོར་ཀུན་སྒྲོལ་གྱི་སྔགས་ཞེས་ཀྱང་བྱའོ༔ མི་འཁྲུགས་པའི་སྔགས་ནི༔ ན་མོ་རཏྣ་ཏྲ་ཡཱ་ཡ༔ ཨོཾ་ཀཾ་ཀ་ནི་ཀཾ་ཀ་ནི༔ རོ་ཙ་ནི་རོ་ཙ་ནི༔ ཏྲོ་ཊ་ནི་ཏྲོ་ཊ་ནི༔ ཏྲཱས་ནི་ཏྲཱ་ས་ནི༔ པྲ་ཏི་ཧ་ན༔ པྲ་ཏི་ཧ་ན༔ སརྦ་ཀརྨ་པ་རཾ་པ་རཱ་ཎི་མེ་སརྦ་ས་ཏྭ་ནཱཉྩ་སྭཱ་ཧཱ༔ སྣང་བ་མཐའ་ཡས་རྗེས་སུ་དྲན་པའི་གཟུངས་ནི༔ ན་མོ་བྷ་ག་བ་ཏེ་ཨ་མི་ཏ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་ཨ་མི་ཏེ། ཨ་མི་ཏོདྦྷ་བེ། ས་མི་ཏ་སཾ་བྷ་བེ༔ ཨ་མི་ཏ་བིདྲཱནྟེ། ཨམེ་ཏེ་ག་མི་ནི་ག་ག་ན་ཀཱིརྟི་ཀ་རེ་སརྦ་ཀླེ་ཤ་ཀྵ་ཡཾ་ཀ་རི་སྭཱ་ཧཱ༔ སྔགས་འདི་བརྗོད་པས་འོད་དཔག་མེད་པའི་ཕན་ཡོན་ཇི་སྙེད་པ་གཟུང་བར་འགྱུར་རོ༔ སྒྲུབ་པ་པོ་ལ་ནད་བྱུང་བའི་ཚེ༔ ཆུ་གཙང་རྩ་སྔགས་གཤམ༔ བཛྲ་བི་ཤ་ཧཱུྂ༔ཕཊ༔ ཅེས་བརྒྱ་རྩ་བརྗོད་ཅིང་ཆུའི་རྡུལ་ཕྲ་རབ་ཧྲཱིཿཡིག་དུ་གྱུར་བས་ལུས་ཀྱི་ན་ཚ་ཐམས་ཅད་སེལ་བར་བསམ་ལ་ཁོང་དུ་བཏང་བས་ནད་གང་ཡིན་ཡང་ཕན་པ་རྒྱ་ཆེར་འབྱུང་ངོ་༔ བློ་རྣོ་བར་འདོད་པ་ལ༔ ན་མོ་བི་ན་པྲ་ཛྙེ་སྭཱ་ཧཱ༔ ཞེས་བརྒྱ་རྩ་བརྗོད་ལ་ཤུ་དག་དཀར་པོ་དང་ཆུ་གཙང་ལ་བསྔགས་ནས་རྒྱུན་དུ་ཉུང་ངུ་རོལ་བ་དང་ཁྱད་པར་ཚེས་བཅོ་ལྔའི་ཟླ་གཟས་ཟིན་པའི་ཚེ་ནམ་ལང་བར་བཟླས་ཏེ་འཐུང་ན་ཤེས་རབ་མེ་ལྟར་འབར་བར་འགྱུར་རོ༔ རྨི་ལམ་གསལ་བར་འདོད་ན༔ རྩ་སྔགས་མཐར་ཙད་ཏྲ་དེ་བ་སིདྡྷི་ཕུ་ར་མི་ཡ༔ ཞེས་པ་ཚེས་བཅོ་ལྔ་གསུམ་ལ་བསྙེན་གནས་བསྲུངས་ཤིང་སྒོ་གསུམ་གྱི་མཚམས་མ་རལ་བར་བྱས་ཏེ་བཟླས་ལ་བཟང་དྲུག་མཚོན་ཙམ་བཏབ་པའི་ཆུ་གཙང་ལ་བསྔགས༔ ཉལ་བའི་ཚེ་འདོད་པའི་དོན་ལ་གསོལ་བ་བཏབ་ཅིང་ངག་བཅད་བྱས་ཏེ་དོན་གཞན་ཡིད་ལ་མ་བྱས་པར་ཉལ་བས་སེམས་ལ་སྡིག་པ་དག་པའི་མཚན་མ་དང་༔ སངས་རྒྱས་ཀྱི་ཞལ་ལ་བལྟ་བ་སོགས་གང་བསམ་པ་དེ་རྨི་ལམ་དུ་མཐོང་བར་འགྱུར་རོ༔ ས་མ་ཡ༔ ༡༢༽ མན་ངག་བཅུ་གཉིས་པ༔ ཡབ་ཡུམ་གཉིས་མེད་ཐུགས་ཀར་པད་ཟླའི་སྟེང་༔ ཡེ་ཤེས་འོད་ལྔའི་ཐིག་ལེ་འཁྱིལ་བའི་དབུས༔ འབྲུ་དགུ་རྡོ་རྗེའི་སྙིང་པོ་བརྩེགས་མར་གསལ༔ དེ་ལས་འོད་འཕྲོས་སྣང་སྲིད་ཆོས་སྐུའི་ཞིང་༔ ཀུན་བཟང་དགོངས་པ་རང་གྲོལ་ཏིང་འཛིན་ངང་༔ ཡེ་གྲོལ་གདོད་ནས་དག་པའི་གཤིས་སུ་བལྟ༔ ཨཱོཾ་ཨཱཿཧཱུྃ། འ་ཨ་ཤ་ས་མ་ཧ༔ ཆོས་ཉིད་དོན་ལ་མཉམ་པར་བཞག་ནས་བཟླ༔ སྐབས་སུ༔ ཐུགས་གར་ཡེ་ཤེས་ཐིག་ལེ་ལྔ་ལྡན་གྱི༔ སྙིང་པོ་མཐིང་གསལ་དབུས་སུ་ཨ་དཀར་པོ༔ དེ་མཐར་ཀློང་གྲོལ་རྡོ་རྗེའི་ཡི་གེ་དྲུག༔ འོད་ལྔའི་ཟེར་ཐག་འོག་མིན་ཞིང་ཀུན་ཁྱབ༔ རྒྱལ་བ་རབ་འབྱམས་མཁྱེན་བརྩེ་ནུས་སྟོབས་བསྡུས༔ སླར་ཡང་འོད་འཕྲོས་རིགས་དྲུག་གནས་ཀུན་ཁྱབ༔ སྐྱེ་འགྲོའི་ལས་ཉོན་བག་ཆགས་འཁྲུལ་བ་སྦྱང་༔ ངེས་པའི་དོན་མཐོང་འཁོར་བ་དོང་ནས་སྤྲུགས༔ འཿཨཿཤཿསཿམཿཧཿ ཞེས་བཟླ༔ སྲོག་གི་སྙིང་པོ་ལ་རིག་པ་གཏད་ཅིང་སྣང་བ་རྣམ་རྟོག་ཐམས་ཅད་དེར་ཐིམ་ཐིམ་བར་མཉམ་པར་བཞག༔ སླར་ཡང་འཕྲོ་འདུ་སྔར་བཞིན་བྱས་ཏེ་སེམས་ཅན་ཐམས་ཅད་ཀུན་བཟང་དུ་གྱུར་བ་རྣམས་ཀྱིས་ཀྱང་སྔགས་ཀྱི་རང་སྒྲ་དི་རི་རི་སྒྲོགས་པར་བསམ་ཞིང་རིགས་དྲུག་ཀློང་གྲོལ་ཡི་གེ་དྲུག་པ་འབད་པས་བཟླ་བར་བྱའོ༔ དབྱངས་སུ་གྱེར་དང་དྲག་ཏུ་བཟླ་བ་དང་༔ ཤུབ་བུར་འདྲེན་ཅིང་རླུང་དང་བསྦྲགས་པ༔ མཉམ་པར་བཞག་ནས་དོན་ལ་ལྟ་བ་སོགས་སྐབས་དང་བསྟུན་ནས་བཟླའོ༔ ས་མ་ཡ༔ ༡༣༽ མན་ངག་བཅུ་གསུམ་པ༔ བླ་མ་ཡབ་ཡུམ་སྤྱི་བོའི་དབུ་མ་ནས༔ མར་བྱོན་སྙིང་དབུས་པདྨའི་ལྟེ་བ་རུ༔ ཉི་ཟླའི་སྟེང་དུ་བག་དྲོ་ལྷམ་མེར་བཞུགས༔ རང་མདངས་འོད་འབར་མཚོན་གང་གཟི་བྱིན་འབར༔ དེའི་ཐུགས་ཀར་པདྨ་ཉི་ཟླའི་སྟེང་༔ རྡོ་རྗེ་རྩེ་ལྔ་ནས་འབྲུ་ཙམ་གྱི་ལྟེར༔ འོད་ལྔའི་ཐིག་ལེའི་དབུས་སུ་ཡི་གེ་ཨཱཿ མཐའ་བསྐོར་འོད་ལྔ་ལུ་གུ་རྒྱུད་འཁྱུགས༔ ཡེ་ཤེས་ཐིག་ལེ་རེ་རེའི་སྙིང་པོ་རུ༔ བླ་མའི་སྲོགས་སྔགས་གཟི་བྱིན་ལམ་མེར་གསལ༔ མ་ཡེངས་རང་ཤར་རིག་པའི་ངོ་བོར་བལྟ༔ ཨཱོཾ་ཨཱཿཧཱུྃ་གུ་རུ་ཛྙཱ་ན་ཌཱ་ཀི་ནཱི་སིདྡྷི་ཕ་ལ་ཧཱུྃ༔ ཞེས་པའི་ཡིག་འབྲུ་རེ་རེ་གནས་པ་ལུ་གུ་རྒྱུད་དུ་འཁོར་བའི་འཕྲོ་འདུ་སྔར་བཞིན་གྱི་དམིགས་པ་དང་བཅས་དེ་ལ་རིག་པ་རྩེ་གཅིག་ཏུ་གཞིར་ནས་སྔགས་ཅི་འགྲུབ་ཡིད་བཟླས་བྱ༔ སྐབས་སུ་སྲས་བཅས་རྒྱལ་བའི་ཡེ་ཤེས་བྱིན༔ འཇའ་ལྟར་ཤར་ཞིང་སྤྲིན་ལྟར་གཡོ་བ་དང་༔ ཆར་ལྟར་བབ་པས་སྒོ་གསུམ་བྱིན་བརླབས་ཏེ༔ ཉམས་དགའ་བག་དྲོ་རིག་རྩལ་ཤེས་རབ་རྒྱས༔ ཡེ་ཤེས་རང་གསལ་རླུང་གི་དོན་ལ་བལྟ༔ རླུང་བུམ་ཅན་བཟུང་ཞིང་སྔགས་བསྙེན༔ སྐབས་སུ་གནས་གསུམ་རྡོ་རྗེའི་འབྲུ་གསུམ་གསལ༔ ཧཱུྂ་གི་ཀླད་གོར་དབུས་སུ་འོད་ལྔའི་སྦུབས༔ རང་འདྲའི་བླ་མ་སྣང་སྟོང་འོད་ཀྱི་སྐུ༔ ཐུགས་གར་ཡེ་ཤེས་ལྔ་ཡི་འོད་ཀློང་དུ༔ གསེར་གྱི་རྡོ་རྗེ་རྩེ་ལྔའི་ལྟེ་བ་ལ༔ ཆོས་སྐུ་འགྱུར་མེད་རང་མདངས་འོད་མཐིང་དལ༔ སྲོག་གི་དྭངས་མ་ཨཱ༔དཀར་འོད་ཟེར་འཕྲོ༔ མཐའ་མར་སྔགས་ཕྲེང་དཀར་པོ་གཡས་སུ་འཁོར༔ འོད་འཕྲོས་འཁོར་འདས་བདེ་ཆེན་པདྨ་བཀོད༔ འགྲོ་ཀུན་བདེ་ཆེན་ཡུམ་གྱི་ངོ་བོར་གྱུར༔ སྙན་འཇེབས་སྒྲ་དབྱངས་རྒྱུན་མི་ཆད་པར་སྒྲོག༔ ཨོཾ་ཨཱ༔ཧཱུྂ༔གུ་རུ་དྷཱ་ཀི་ནཱི་ཛྙཱ་ན་སརྦ་སིདྡྷི་ཕ་ལ་ཧཱུྂ༔ ཅི་ནུས་བཟླ༔ ཡང་སྐབས་སུ༔ བཟླས་པས་ལྷ་ཚོགས་ཆར་བཞིན་བབ་པ་ཡི༔ ཡབ་རྣམས་རང་དང་ཡུམ་རྣམས་ཡུམ་ལ་ཐིམ༔ ཐམས་ཅད་དབྱེར་མེད་ཡེ་ཤེས་ཉག་གཅིག་ཏུ༔ ཐག་ཆོད་ངེས་པའི་ངང་ནས་ཐུགས་རྒྱུད་བསྐུལ༔ ཚིག་བདུན་གསོལ་འདེབས་ཀྱིས་བྱིན་འབེབས་པར་བྱ༔ ཧཱུཾ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུཾ༔ ཞེས་དད་གདུང་དྲག་པོས་བླ་མའི་མོས་གུས་གནད་དུ་བསྣུན་ནོ༔ དྲན་པ་ཙམ་གྱིས་ཀྱང་འགལ་རྐྱེན་སྡུག་བསྔལ་ཐམས་ཅད་འཇོམས་ཤིང་ དགའ་བདེ་གནམ་ས་འཐབས་པ་ལྟ་བུའི་བྱིན་རླབས་དང་དངོས་གྲུབ་ཆར་བཞིན་འབེབ་པར་བྱེད་པའི་རྡོ་རྗེའི་ལྗགས་ཀྱིས་བསྔགས་པའི་གསོལ་འདེབས་ལ་འབད༔ རྩ་བ་དག་བརྒྱུད་པའི་བླ་མའི་མཚན་ཡང་གདུང་བ་དྲག་པོས་འབོད་པར་བྱ༔ སྲོག་གི་སྙིང་པོ་ཐོད་ཕྲེང་རྩལ་གྱི་སྔགས༔ ཨོཾ་ཨཱ༔ཧཱུྂ༔བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔སིདྡྷི་ཕ་ལ་ཧཱུྂ༔ཨཱཿ ཞེས་བདུན་ནམ་ཉེར་གཅིག་སོགས་དབྱངས་དང་གར་འཆམས་སྟངས་སྟབས་བཅས་པས་བཟླ༔ བསྙེན་སྒྲུབ་སྐབས་སུ་དབྱངས་བཅས་ལན་གསུམ་སོགས་ཅི་ནུས་བྱའོ༔ བླ་མའི་ཡོན་ཏན་དྲན༔ རྒྱུད་གྱི་དམ་ཚིག་གཙང་༔ ཕྱི་ཡི་རྫས་ཚོགས༔ ནང་གི་དད་མོས་འཕེལ་བའི་དུས་ཐུགས་དམ་བསྐུལ་ཞིང་བྱིན་གྱི་རློབ་པའི་དུས་ཡིན་པས༔ རྒྱལ་བ་རྣམས་ལ་སློབ་པ་ལམ་གྱི་དམ་བཅའ་དུས་སུ་སྨིན་པར་གསོལ་བ་བཏབ༔ སྒྲུབ་པའི་གནས་ཁང་༔ དམ་རྫས༔ སྟོན་འཁོར༔ རྡོ་རྗེའི་ལུས་དང་ཤེས་རྒྱུད་བྱིན་གྱིས་བརླབས་པར་གསོལ་བ་ཤུགས་དྲག་ཏུ་བཏབ་པས༔ འགལ་རྐྱེན་བསལ༔ བྱིན་གྱིས་རླབས༔ དབང་བཞི་སྐུར༔ ཤེས་རྒྱུད་སྨིན༔ དངོས་གྲུབ་ཐོབ་པར་འགྱུར་ཏེ༔ ཐུན་མོང་གི་དངོས་གྲུབ་བརྒྱད༔ མཆོག་གི་དངོས་གྲུབ་རིག་འཛིན་རྣམ་པ་བཞི༔ མཐར་ཐུག་གི་དངོས་གྲུབ་སྐུ་དང་ཡེ་ཤེས་རྒྱ་མཚོ་ལྷུན་གྱི་གྲུབ་པའི་དངོས་གྲུབ་ཐམས་ཅད་བླ་མ་ལ་བརྟེན་ནས་འགྲུབ་པ་ཡིན་ནོ༔ ལས་བཞི་གང་སྒྲུབ་ཀྱང་བླ་མའི་སྐུ་ལས་རང་མདོག་ཀྱི་འོད་ཟེར་འཕྲོས་པས་མ་ལུས་པ་འགྲུབ༔ འདོད་དོན་གང་བཅོལ་ཡང་བླ་མའི་ཕྱག་གི་ནོར་བུའི་འོད་ཀྱིས་སྒྲུབ༔ འདོད་ཆགས་ཞི་བ་ལ༔ སྙིང་དབུས་སུ་བྂ༔ཡིག་མཐིང་ཀ་ལས་བདུད་རྩི་དཀར་དམར་གྱི་རྒྱུན་གྲང་ངར་དང་ལྡན་པ་བབ་པས་ལུས་ཐམས་ཅད་བདེ་བས་ཁྱབ་པར་བསམ་ལ་སྙིང་པོ་བཟླས་པས་སེལ༔ ཞེ་སྡང་སོགས་ཉོན་མོངས་གང་ཞི་བར་བྱེད་པ་དེའི་ངོ་བོ་སྟོང་པ་བླ་མའི་ཐུགས་ཆོས་སྐུ་དང་བསྲེ༔ རང་བཞིན་གསལ་བ་བླ་མའི་གསུང་ལོངས་སྐུ་ལ་སྦྱོར༔ ཀུན་ཏུ་ཁྱབ་པ་བླ་མའི་སྐུ་སྤྲུལ་སྐུའི་རོལ་བར་ཤེས་པའི་ངང་༔ སྔོན་བསུ་རྗེས་དཔྱོད་མེད་པར་༔ མི་སྤྲོ༔ མི་བསྡུ༔ རང་སར་ཀློད་ལ་སྙིང་པོ་བཟླས་པས་སེལ༔ བྱིང་རྨུག་ཆེ་བའི་དུས༔ རང་སེམས་དང་བླ་མ་དབྱེར་མེད་དུ་བསྲེས་ལ་ནམ་མཁའ་སྔོ་ཐིང་བའི་དབུས་སུ་འཕུར་ནས་འགྲོ་བར་བསྒོམ་ལ་བཟླ༔ རྒོད་པའི་དུས༔ བླ་མ་དང་རང་སེམས་དབྱེར་མེད་དུ་བསྲེས་པ་ཐིག་ལེ་མཐིང་ནག་གི་རྣམ་པར་བསྡུས་པ་གསང་བའི་གནས་སུ་བསྒོམ་ནས་རིམ་བཞིན་ཇེ་ཆུང་སོང་ཞིང་མཐར་དམིགས་པ་མེད་པའི་ངང་དུ་འཇོག༔ ས་མ་ཡ༔ ཨྠྀིཿ རྒྱ་རྒྱ་རྒྱ༔ ཛཔྲ་དམིགས་རྫོགས་སོ༔ ཚེ་དབང་ནོར་བུའི་གཏེར་སྐལ་ལོ༔ མངྒ་ལཾ༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་བཤགས་སྦྱོང་ཟབ་མོ་བག་ཆགས་རང་གྲོལ།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ བཤགས་སྦྱོང་ཟབ་མོ་བག་ཆགས་རང་གྲོལ་བཞུགས་སོ༔ ན་མོ་མ་ཧཱ་གུ་རུ་པདྨ་བཛྲ་ཡེ༔ གྲངས་མེད་བསྐལ་བར་བསགས་པའི་སྒྲིབ་པའི་ཚོགས༔ ཤེལ་བུམ་ཆུ་ཡིས་བཀྲུས་བཞིན་དག་པའི་ཐབས༔ པདྨ་འབྱུང་གནས་བརྩེ་བས་འགྲོ་ལ་གདམས༔ ཉམས་སུ་ལོངས་ཤིག་ཕྱི་རབས་དད་ལྡན་རྣམས༔ རྩ་བ་གསུམ་གྱི་དཀྱིལ་འཁོར་དུ་མཆོད་པའི་ཚོགས་རྒྱས་པར་བཤམས༔ ཚོགས་ཞིང་གསལ་བཏབ༔ དད་མོས་རྩེ་གཅིག་ཏུ་བསྒྲིལ༔ སྙིང་ནས་འགྱོད་ཅིང་བཤགས་པའི་བློས༔ འདི་ལྟར་གསོལ་བ་གདབ་པར་བྱའོ༔ ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ སྣང་བ་མཐའ་ཡས་ཐུགས་རྗེའི་བྱིན་རླབས་གཡོས༔ སྤྲུལ་སྐུ་པདྨ་འབྱུང་གནས་བྱིན་བརླབས་པས༔ འཛམ་གླིང་བོད་ཀྱི་སེམས་ཅན་དོན་ལ་དགོངས༔ འགྲོ་དོན་རྒྱུན་ཆད་མེད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་མཚོ་སྐྱེས་རྡོ་རྗེའི་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ གཞི་ཡི་རྟོག་མེད་འཐིབ་པོའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྒྱལ་པོ་ཁྲི་སྲོང་ལྡེའུ་བཙན་མན་ཆད་ནས༔ ཆོས་རྒྱལ་གདུང་བརྒྱུད་མཐའ་ནས་མ་སྟོངས་པར༔ དུས་གསུམ་རྒྱུན་ཆད་མེད་པར་བྱིན་གྱིས་རློབས༔ ཆོས་བཞིན་སྤྱོད་པ་ཡོངས་ཀྱི་གཉེན་གཅིག་པོ༔ རྒྱལ་པོ་ཆོས་སྤྱོད་སྐྱོང་བའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་པདྨ་རྒྱལ་པོའི་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ ཀུན་རྟོག་ལས་རླུང་གཡོ་བའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྐུ་ནི་ལྷོ་ནུབ་སྲིན་པོའི་ཁ་གནོན་མཛད༔ ཐུགས་རྗེས་བོད་ཀྱི་སེམས་ཅན་དོན་ལ་དགོངས༔ མ་རིག་ལོག་པའི་སེམས་ཅན་འདྲེན་པའི་དཔལ༔ ཉོན་མོངས་གདུལ་དཀའི་སེམས་ཅན་ཐབས་ཀྱིས་འདུལ༔ བརྩེ་གདུང་རྒྱུན་ཆད་མེད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་བློ་ལྡན་མཆོག་སྲེད་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ གཞི་སྣང་གཉིས་སུ་འཛིན་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ དུས་ངན་སྙིགས་མའི་མཐའ་ལ་ཐུག་པའི་ཚེ༔ ནངས་རེ་དགོང་རེ་འགྲོ་བའི་དོན་ལ་བྱོན༔ ཉི་ཟེར་འཆར་སྡུད་མདངས་ལ་བཅིབས་ཏེ་བྱོན༔ ཡར་ངོའི་ཚེས་བཅུའི་དུས་སུ་དངོས་སུ་འབྱོན༔ འགྲོ་དོན་སྟོབས་ཆེན་མཛད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཉི་མ་འོད་ཟེར་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ གཞན་སེམས་སླུས་འདོད་ལོག་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྔ་བརྒྱའི་ཐ་མ་རྩོད་དུས་སྙིགས་མ་ལ༔ སེམས་ཅན་ཐམས་ཅད་ཉོན་མོངས་དུག་ལྔ་རགས༔ ཉོན་མོངས་འཆོལ་ཉོག་དུག་ལྔ་རང་རྒྱུད་སྤྱོད༔ དེ་འདྲའི་དུས་ན་ཨོ་རྒྱན་ཐུགས་རྗེས་བསྐྱེད༔ དད་ལྡན་མཐོ་རིས་འདྲེན་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཤཱཀྱ་སེངྒེའི་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ འཁོར་འདས་སྡེ་གཉིས་གྱེས་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནག་ཕྱོགས་འཇིགས་པའི་དམག་གིས་མཐའ་བསྐོར་ནས༔ ཆོས་འཁོར་གཉན་པོ་འཇིག་ལ་ཐུག་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ལྷ་སྲིན་སྡེ་བརྒྱད་འཁོར་དང་བཅས༔ དམག་དཔུང་ཧུར་ཐུམ་བཟློག་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་དམར་ནག་མེ་ཕྲེང་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ ཞེ་སྡང་འཁྲུལ་བས་བསྐྱེད་པའི་སྡིག་སྒྲིབ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སེམས་ཅན་སྒྱུ་ལུས་འཇིག་པའི་ནད་བྱུང་ནས༔ མི་བཟོད་སྡུག་བསྔལ་ཆེན་པོས་ནོན་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་སྨན་གྱི་བླ་དང་དབྱེར་མེད་པས༔ ཚེ་ཟད་མ་ཡིན་བར་ཆད་ངེས་པར་སེལ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སྨན་གྱི་བླ་མའི་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ ལུས་སྲོག་གཅེས་འཛིན་པར་འཛིན་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འབྱུང་བ་དགྲར་ལངས་ས་བཅུད་ཉམས་པའི་ཚེ༔ སེམས་ཅན་མུ་གེའི་ནད་ཀྱིས་གཟིར་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་མཁའ་འགྲོ་ནོར་ལྷའི་ཚོགས་དང་བཅས༔ དབུལ་ཕོངས་བཀྲེས་སྐོམ་སེལ་བར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་དྲྭ་བ་སྡོམ་པའི་ལྷ་ཚོགས་ཀྱི༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ སེར་སྣ་འཇུག་ཀེག་དམ་པོའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལས་ཅན་འགྲོ་བའི་དོན་དུ་གཏེར་འདོན་ན༔ དམ་ཚིག་ཟོལ་ཟོག་མེད་པའི་དཔའ་གདེང་གིས༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཡི་དམ་ལྷ་ཡི་ཚོགས་དང་བཅས༔ ཕ་ནོར་བུ་ཡིས་ལོན་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་དཔལ་ཆེན་བཀའ་བརྒྱད་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ གཏི་མུག་རྟག་འཛིན་ཨ་འཐས་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྦས་ཡུལ་ནགས་རོང་དབེན་ས་སྙོགས་པའི་ཚེ༔ ཁ་ཆར་བུ་ཡུག་འཚུབས་ཤིང་ལམ་འགགས་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་གཞི་བདག་གཉན་པོའི་འཁོར་དང་བཅས༔ ཆོས་མཛད་ལམ་སྣ་འདྲེན་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཟིལ་གནོན་དྲག་རྩལ་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ འཁྲུལ་སྣང་བདེན་པར་ཞེན་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྟག་གཟིག་དོམ་དྲེད་དུག་སྦྲུལ་མཆེ་བ་ཅན༔ འབྲོག་ཆེན་འཇིགས་པའི་འཕྲང་ལ་འགྲིམས་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་དཔའ་བོ་གིང་དང་སྲུང་མར་བཅས༔ གདུག་པའི་སེམས་ཅན་སྐྲོད་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སེངྒེ་སྒྲ་སྒྲོགས་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ འཕོ་བཅས་རྟོག་པས་འཁྱམ་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ས་ཆུ་མེ་རླུང་འབྱུང་བའི་བར་ཆད་ཀྱིས༔ སྒྱུ་ལུས་ཉེན་ཅིང་འཇིག་པའི་དུས་བྱུང་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་འབྱུང་བ་བཞི་ཡི་ལྷ་མོར་བཅས༔ འབྱུང་བ་རང་སར་ཞི་བར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་པདྨ་བཛྲ་ལྷ་ཚོགས་ཀྱི༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ རྩ་རླུང་ཐིག་ལེའི་བག་ཆགས་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལམ་འཕྲང་འཇིགས་པའི་འཕྲང་ལ་འགྲིམས་པའི་ཚེ༔ བསད་ཁྱེར་ཇག་པ་ཆོམ་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཕྱག་རྒྱ་བཞི་ཡི་དགོངས་པར་ལྡན༔ ཙོ་ར་མི་རྒོད་རྔམ་སེམས་བརླག་པར་བྱེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་རྟ་མཆོག་རོལ་བའི་ལྷ་ཚོགས་ཀྱིས༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ ཚོགས་དྲུག་ཡུལ་ལ་ཞེན་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གང་ཞིག་གཤེད་མའི་དམག་གིས་མཐའ་བསྐོར་ནས༔ མཚོན་ཆ་རྣོན་པོས་འདེབས་ཤིང་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་རྡོ་རྗེའི་གུར་དང་ལྡན་པ་ཡིས༔ གཤེད་མ་དྲེད་ཅིང་མཚོན་ཆ་འཐོར་བར་འགྱུར༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་རྡོ་རྗེ་གྲོ་ལོད་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ ཉོན་མོང་རང་ཁར་སྤྱད་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནམ་ཞིག་ཚེ་ཟད་འཆི་བའི་དུས་བྱུང་ཚེ༔ གནད་གཅོད་སྡུག་བསྔལ་དྲག་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་ཐོབ༔ ཨོ་རྒྱན་སྣང་བ་མཐའ་ཡས་སྤྲུལ་བ་སྟེ༔ བདེ་བ་ཅན་གྱི་ཞིང་དུ་ངེས་པར་སྐྱེ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སྤྱན་རས་གཟིགས་དབང་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ རླུང་སེམས་དབང་མེད་འཕོ་བའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྒྱུ་ལུས་གཡར་པོ་ཞིག་པའི་བར་དོ་རུ༔ འཁྲུལ་སྣང་ཉིང་འཁྲུལ་ཆེན་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་དུས་གསུམ་མཁྱེན་པའི་ཐུགས་རྗེ་ཡིས༔ འཁྲུལ་སྣང་རང་གྲོལ་སྟོན་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སྣང་བ་མཐའ་ཡས་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ རྨི་ལམ་འཁྲུལ་བར་ཞེན་པའི་སྒྲིབ་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གཞན་ཡང་ལས་དང་རྐྱེན་གྱི་དབང་གྱུར་ཏེ༔ འཁྲུལ་སྣང་དངོས་པོར་ཞེན་ཅིང་སྡུག་བསྔལ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་བདེ་ཆེན་རྒྱལ་པོའི་ངོ་བོ་སྟེ༔ འཁྲུལ་སྣང་སྡུག་བསྔལ་རྩད་ནས་གཞིག་པར་བྱེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཀུན་ཏུ་བཟང་པོའི་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ དངོས་ཞེན་འཛིན་པ་དམ་པོའི་སྒྲི་པ་དག༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འགྲོ་དྲུག་སྡུག་བསྔལ་ཆེན་པོས་ཉེན་པ་དང༔ ཁྱད་པར་བདག་སོགས་འགྲོ་བ་སྡུག་བསྔལ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ དད་གུས་མོས་པས་གདུང་བས་གསོལ་འདེབས་ན༔ ཨོ་རྒྱན་ཐུགས་རྗེས་འཕོ་འགྱུར་མེད་པར་གཟིགས༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་བདེ་བ་ཆེན་པོའི་ལྷ་ཚོགས་ལ༔ ཕྱག་འཚལ་མཆོད་འབུལ་སྡིག་ལྟུང་སྙིང་ནས་བཤགས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཨྠྀི༔ ས་མ་ཡ༔ ལྷ་ཚོགས་རྣམས་ཀྱི་སྐུ་ལས་འོད་ཟེར་བདུད་རྩིའི་རང་བཞིན་ཅན་བྱུང་༔ རང་གི་མ་དག་པའི་ཕུང་ཁམས་ལྦི་བ་ཆུར་ཞི་བ་ལྟར་དག༔ ཡང་དག་པའི་ལྟ་བའི་ཀློང་དུ་སྡིག་སྒྲིབ་བག་ཆགས་ཐམས་ཅད་མིང་མེད་གཞི་གྲོལ་ཆེན་པོར་སངས་ཀྱིས་སོང་བར་དམིགས་ལ༔ མཉམ་པར་འཇོག༔ དེས་ཐོག་མེད་བསགས་པའི་ལས་ཉོན་བག་ཆག་མ་ལུས་པ་དག་ཅིང་རྒྱལ་བ་སྐུ་གསུམ་གྱི་ཡེ་ཤེས་འཆར་བསླུ་བ་མེད་པའི་ཐ་ཚིག་གོ༔ རྡོ་རྗེ་ཚེ་དབང་ནོར་བུའི་གཏེར་སྐལ་ལོ༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་བཀྲ་ཤིས་འདོད་དོན་ལྷུན་གྲུབ་རྡོ་རྗེའི་རོལ་དབྱངས།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔བཀྲ་ཤིས་འདོད་དོན་ལྷུན་གྲུབ་རྡོ་རྗེའི་རོལ་དབྱངས་བཞུགས་སོ༔ ༀ་སྭ་སྟི་སིདྡྷི་བི་ཛ་ཡནྟུ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ སྣང་བ་མཐའ་ཡས་ཐུགས་རྗེའི་བྱིན་རླབས་གཡོས༔ གུ་རུ་མཚོ་སྐྱེས་རྡོ་རྗེའི་ལྷ་ཚོགས་ཀྱིས༔ གང་སྨོན་ལྷུན་གྱིས་གྲུབ་པའི་བཀྲ་ཤིས་ཤོག༔ རྒྱལ་པོ་ཁྲི་སྲོང་ལྡེའུ་བཙན་མན་ཆད་ནས༔ དུས་གསུམ་རྒྱུན་ཆད་མེད་པར་བྱིན་གྱིས་རློབས༔ གུ་རུ་པདྨ་རྒྱལ་པོའི་ལྷ་ཚོགས་ཀྱིས༔ ཆོས་དང་རིགས་བརྒྱུད་དར་བའི་བཀྲ་ཤིས་ཤོག༔ སྐུ་ནི་ལྷོ་ནུབ་སྲིན་པོའི་ཁ་གནོན་མཛད༔ ཉོན་མོངས་གདུལ་དཀའི་སེམས་ཅན་ཐབས་ཀྱིས་འདུལ༔ གུ་རུ་བློ་ལྡན་མཆོག་སྲེད་ལྷ་ཚོགས་ཀྱིས༔ ཤེས་རབ་རྣམ་གསུམ་འཕེལ་བའི་བཀྲ་ཤིས་ཤོག༔ དུས་ངན་སྙིགས་མའི་མཐའ་ལ་ཐུག་པའི་ཚེ༔ འགྲོ་དོན་སྟོབས་ཆེན་མཛད་པའི་ཐུགས་རྗེ་ཅན༔ གུ་རུ་ཉི་མ་འོད་ཟེར་ལྷ་ཚོགས་ཀྱིས༔ འཆད་རྩོད་སྤོབས་པ་རྒྱས་པའི་བཀྲ་ཤིས་ཤོག༔ ལྔ་བརྒྱའི་ཐ་མ་རྩོད་དུས་སྙིགས་མ་ལ༔ དད་ལྡན་མཐོ་རིས་འདྲེན་པའི་ཐུགས་རྗེ་ཅན༔ གུ་རུ་ཤཱཀྱ་སེངྒེའི་ལྷ་ཚོགས་ཀྱིས༔ བཤད་སྒྲུབ་འཕྲིན་ལས་རྒྱས་པའི་བཀྲ་ཤིས་ཤོག༔ ནག་ཕྱོགས་འཇིགས་པའི་དམག་གིས་གཉེན་པོ་ཆེ༔ ཨོ་རྒྱན་ལྷ་སྲིན་སྡེ་བརྒྱད་འཁོར་བཅས་ཀྱིས༔ དམག་དཔུང་མ་ལུས་ཧུར་ཐུམ་བཟློག་དང་༔ བསྟན་དང་དེ་འཛིན་སྲུང་བའི་བཀྲ་ཤིས་ཤོག༔ སེམས་ཅན་སྒྱུ་ལུས་འཇིག་པའི་ནད་བྱུང་ནས༔ མི་བཟོད་སྡུག་བསྔལ་ཆེན་པོས་ནོན་པའི་ཚེ༔ གུ་རུ་སྨན་གྱི་བླ་མའི་ལྷ་ཚོགས་ཀྱིས༔ ནད་གདོན་བར་ཆད་སེལ་བའི་བཀྲ་ཤིས་ཤོག༔ འབྱུང་བ་དགྲར་ལངས་ས་བཅུད་ཉམས་པའི་ཚེ༔ སེམས་ཅན་མུ་གེའི་ནད་ཀྱིས་གཟིར་པ་ན༔ གུ་རུ་དྲྭ་བ་སྡོམ་པའི་ལྷ་ཚོགས་ཀྱིས༔ བསོད་ནམས་ལོངས་སྤྱོད་རྒྱས་པའི་བཀྲ་ཤིས་ཤོག༔ ལས་ཅན་འགྲོ་བའི་དོན་དུ་གཏེར་འདོན་ན༔ དམ་ཚིག་ཟོལ་ཟོག་མེད་པའི་དཔའ་གདེང་བསྐྱེད༔ གུ་རུ་དཔལ་ཆེན་བཀའ་བརྒྱད་ལྷ་ཚོགས་ཀྱིས༔ འདོད་དགུའི་གཏེར་ཆེན་འབྱེད་པའི་བཀྲ་ཤིས་ཤོག༔ སྦས་ཡུལ་ནགས་རོང་དབེན་ས་སྙོགས་པའི་ཚེ༔ ཁ་ཆར་བུ་ཡུག་འཚུབས་ཤིང་ལམ་འགགས་ན༔ གུ་རུ་ཟིལ་གནོན་དྲག་རྩལ་ལྷ་ཚོགས་ཀྱིས༔ སྡེ་བརྒྱད་དབང་དུ་བྱེད་པའི་བཀྲ་ཤིས་ཤོག༔ སྟག་གཟིག་དོམ་དྲེད་དུག་སྦྲུལ་མཆེ་བ་ཅན༔ འབྲོག་ཆེན་འཇིགས་པའི་འཕྲང་ལ་འགྲིམས་པའི་ཚེ༔ གུ་རུ་སེངྒེ་སྒྲ་སྒྲོགས་ལྷ་ཚོགས་ཀྱིས༔ སྣང་སྲིད་དབང་དུ་བསྒྱུར་བའི་བཀྲ་ཤིས་ཤོག༔ ས་ཆུ་མེ་རླུང་འབྱུང་བའི་བར་ཆད་ཀྱིས༔ སྒྱུ་ལུས་ཉེན་ཅིང་འཇིག་པའི་དུས་བྱུང་ཚེ༔ གུ་རུ་པདྨ་བཛྲ་ལྷ་ཚོགས་ཀྱིས༔ འབྱུང་བཞིའི་དྭངས་བཅུད་འཕེལ་བའི་བཀྲ་ཤིས་ཤོག༔ ལམ་འཕྲང་འཇིགས་པའི་འཕྲང་ལ་འགྲིམས་པའི་ཚེ༔ བསད་ཁྱེར་ཇག་པ་ཆོམ་པོས་ཉེན་པ་ན༔ གུ་རུ་རྟ་མཆོག་རོལ་བའི་ལྷ་ཚོགས་ཀྱིས༔ སྟོབས་ལྡན་འཇིགས་པ་བྲལ་བའི་བཀྲ་ཤིས་ཤོག༔ གང་ཞིག་གཤེད་མའི་དམག་གིས་མཐའ་བསྐོར་ནས༔ མཚོན་ཆ་རྣོན་པོས་འདེབས་ཤིང་ཉེན་པ་ན༔ གུ་རུ་རྡོ་རྗེ་གྲོ་ལོད་ལྷ་ཚོགས་ཀྱིས༔ གཡུལ་ལས་རྣམ་པར་རྒྱལ་བའི་བཀྲ་ཤིས་ཤོག༔ ནམ་ཞིག་ཚེ་ཟད་འཆི་བའི་དུས་བྱུང་ཚེ༔ གནད་གཅོད་སྡུག་བསྔལ་དྲག་པོས་ཉེན་པ་ན༔ གུ་རུ་སྤྱན་རས་གཟིགས་དབང་ལྷ་ཚོགས་ཀྱིས༔ དུས་མཐའི་མཚམས་སྦྱོར་ལེགས་པའི་བཀྲ་ཤིས་ཤོག༔ སྒྱུ་ལུས་གཡར་པོ་ཞིག་པའི་བར་དོ་རུ༔ འཁྲུལ་སྣང་ཉིང་འཁྲུལ་ཆེན་པོས་ཉེན་པ་ན༔ གུ་རུ་སྣང་བ་མཐའ་ཡས་ལྷ་ཚོགས་ཀྱིས༔ སྲིད་ལས་རྣམ་པར་གྲོལ་བའི་བཀྲ་ཤིས་ཤོག༔ གཞན་ཡང་ལས་དང་རྐྱེན་གྱི་དབང་གྱུར་ཏེ༔ འཁྲུལ་སྣང་དངོས་པོར་ཞེན་ཅིང་སྡུག་བསྔལ་ན༔ གུ་རུ་ཀུན་ཏུ་བཟང་པོའི་ལྷ་ཚོགས་ཀྱིས༔ ཚོགས་དྲུག་རང་གྲོལ་མཆོག་གི་བཀྲ་ཤིས་ཤོག༔ འགྲོ་དྲུག་སྡུག་བསྔལ་ཆེན་པོས་ཉེན་པ་དང༔ ཁྱད་པར་བདག་སོགས་འགྲོ་བ་སྡུག་བསྔལ་ཚེ༔ གུ་རུ་བདེ་བ་ཆེན་པོའི་ལྷ་ཚོགས་ཀྱིས༔ དགོངས་བརྒྱུད་བྱིན་རླབས་འཕོ་བའི་བཀྲ་ཤིས་ཤོག༔ ས་མ་ཡ༔ དེ་ལྟར་བཀྲ་ཤིས་བརྗོད་པ་ཡིས༔ རིགས་གཟུགས་ལོངས་སྤྱོད་མངའ་ཐང་དང་༔ སྙན་གྲགས་འཁོར་དང་ཆོས་བརྒྱུད་ཀུན༔ ཉི་ལྟར་གསལ་ཞིང་མཚོ་ལྟར་རྒྱས༔ བཀྲ་ཤིས་ཀུན་གྱི་དང་པོ་ལ༔ ཀུན་རུ་པདྨའི་བཀྲ་ཤིས་བཟང་༔ བར་ཆད་སྤྲིན་པ་བཞིན་དུ་དེང་༔ མཐུན་རྐྱེན་རྩི་ཤིང་བཞིན་དུ་རྒྱས༔ མི་ཡི་ཆོས་ལ་དོན་འགྲུབ་ཅིང་༔ ལྷ་ཡི་ཆོས་ལ་བཀྲ་ཤིས་པ༔ བྱ་བ་ཀུན་ལ་ཁ་ལས་དགེ༔ བསམ་ལ་ལྷུན་གྲུབ་ཨེ་མ་ཧོ༔ ཨྠྀི༔ ཚེ་དབང་ནོར་བུའི་གཏེར་སྐལ་ལོ༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་ཨ་བྷི་ཙརྱཱའི་འཕྲིན་ལས་བདུད་དཔུང་བྱེ་མར་བརླག་བྱེད་འཇིགས་མེད་རྡོ་རྗེའི་འཁྲུལ་འཁོར།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ ཨ་བྷི་ཙརྱཱའི་འཕྲིན་ལས་བདུད་དཔུང་བྱེ་མར་བརླག་བྱེད་འཇིགས་མེད་རྡོ་རྗེའི་འཁྲུལ་འཁོར་ཞེས་བྱ་བ་བཞུགས་སོ༔ སྨད་ལས་སོ༔ ན་མོ་མ་ཧཱ་གུ་རུ་པདྨ་བཛྲ་ཡེ༔ དབང་ཐོབ་དམ་ཚིག་ལྡན་པ་ཡི༔ ལྟ་བ་ཆོས་ཉིད་སྤྲོས་བྲལ་དབྱིངས༔ གཉིས་འཛིན་བྲལ་བར་ཐག་ཆོད་པས༔ དགྲ་དང་བགེགས་ཀྱི་བདེན་འཛིན་ཞིག༔ ཆོས་རྣམས་སྒྱུ་མའི་ཡོ་ལངས་ལ༔ རྒྱུ་འབྲས་རྟེན་འབྲེལ་ཀུན་རྫོབ་གྲུབ༔ སྙིང་རྗེས་སྒྲོལ་བའི་དམ་ཚིག་གིས༔ མངོན་སྤྱོད་དྲག་པོའི་ལས་བརྩམས་བྱ༔ དཀྱིལ་འཁོར་ཆེན་པོའི་ལྷོ་ནུབ་ཏུ༔ དྲག་པོའི་དཀྱིལ་འཁོར་གྲུ་གསུམ་སྟེང་༔ དམར་གྱི་གཏོར་མ་བརྒྱན་ལྡན་དང་༔ མངོན་སྤྱོད་ཆས་རྣམས་བརྗིད་པར་བཤམ༔ དམིགས་བྱའི་དྲི་མས་སྦགས་པའི་གཟུགས༔ མིང་རུས་གནད་དབབ་རྟགས་ཀྱིས་བརྒྱན༔ བྲུབ་ཁུང་མེ་རི་འབར་ལ༔ དྲག་པོ་རྩང་དམར་ཁྲམ་གྱིས་བསྐོར༔ ཐུན་དང་མཚོན་ཆ་དག་གིས་དཀྱིལ༔ དམིགས་བྱའི་རོ་གཟུགས་གན་རྐྱལ་བཞག༔ སྙིང་གར་དགྲ་སྲོག་གཅོད་པ་ཡི༔ སྤུ་གྲིའི་འཁོར་ལོ་རྩིབས་དྲུག་པ༔ དུག་ཁྲག་སྦགས་པས་མནན་པ་ཡིས༔ ཐར་མེད་གཤིན་རྗེས་ཁྲམ་ཏུ་བཏབ༔ ༈ གཏོར་སྒྲུབ་དམིགས་པ་ནི༔ རང་གཞུང་འཕྲིན་ལས་ཀྱི་བསྙེན་པ་གྲུབ་པ་དང་༔ བདག་ཉིད་ཧེ་རུ་འཁོར་དང་བཅས་པའི་ཐུགས་ཀར་ཉི་མ་ལ་གནས་པའི་འཁོར་ལོ་རྩིབས་བཅུ་དྲུག་པ་ལྟེ་བར་རྡོ་རྗེས་མཚན་ཅིང་མེ་འབར་བར་བསམ་ལ༔ ལྷ་སོ་སོའི་རྩ་སྔགས་མཐར༔ མ་ཧཱ་ཤཱ་རི་རཾ་སརྦ་དུཥྚཱན་པྲ་ཏྱཾ་གི་ར་བྷྱོ་བྷྱོ་ཟློག་ཟློག་བྷྱོ་ཟློག་ཅིག༔ ཅེས་མང་དུ་བཟླ༔ ཕུར་བའི་ལྷ་ཚོགས་ལ་ཆེད་དུ་གཏོར་འབུལ་བྱས་ཤིང་འཕྲིན་ལས་བཅོལ༔ གཙོ་བོའི་འཁོར་ལོ་ལས་བྱུང་བའི་འོད་ཟེར་འཁོར་རྣམས་ཀྱི་ཐུགས་ཀར་ཐིམ་པས་རྒྱུད་བསྐུལ་ནས་སླར་འདུས་རྡོ་རྗེ་གསུམ་གྱི་སྲོག་ཐོབ་པར་བསམ་པ་ཡེ་ཤེས་སེམས་དཔའི་ཐུགས་དམ་བསྐུལ་བའི་འཁོར་ལོ་དང་༔ འཁོར་ལོ་དེ་དམ་ཅན་རྣམས་ཀྱི་སྙིང་ནང་དུ་ཐོག་ལྟར་བབས་ནས་འཁོར་བ་ལ་དམིགས་ཏེ་བཟླས་པས༔ ཕོ་ཉ་ཐམས་ཅད་དགྲ་བོའི་སྟེང་དུ་རུབ་ནས་ལས་བྱེད་པར་བསམ་པ་ནི་དམ་ཅན་གནད་འབེབ་ཀྱི་འཁོར་ལོ་སྟེ༔ གནད་གསུམ་པོ་འདི་ནི་ལས་སྦྱོར་གྱི་སྔགས་དྲུག་ལ་སོགས་པའི་སྐབས་ཐམས་ཅད་དུ་ཤེས་པར་བྱ་བ་ཡིན་ནོ༔ མཆོད་བསྟོད་ཚོགས་ལྷག་བར་བཏང་ཞིང་བསོད་ནམས་ཀྱིས་དཔུང་བསྐྱེད༔ དངོས་གཞི་མངོན་སྤྱོད་ཀྱི་རིམ་པ་ལ༔ ༈ ཐུགས་དམ་བསྐུལ་བ་ནི༔ གཏོར་མ་ལ་རཀྟ་བྲན༔ གོས་ནག་གྱོན༔ དར་ནག་ཕྱར༔ ཕུར་ནག་བརྡབ༔ རལ་བ་བསིག༔ བཤུག་པས་འབོད༔ རྔ་རོལ་འཇིགས་ཟིལ་ཆགས་པ་དཀྲོལ༔ གདུང་པའི་དབྱངས་བཅས་ཐུགས་དམ་བསྐུལ་བ་ནི༔ ཧཱུྃ་བྷྱོཿ དང་པོ་བྱང་ཆུབ་མཆོག་ཏུ་སེམས་བསྐྱེད་ཅིང་༔ འགྲོ་ཀུན་བདེ་བར་སྦྱོར་བའི་ཁུར་ཁྱེར་བའི༔ རིག་འཛིན་སྔགས་ཀྱི་བརྟུལ་ཞུགས་སྤྱད་པ་ལ༔ འཁུ་བར་བྱེད་ལ་ཡེ་ཤེས་སྤྱན་ཀྱིས་གཟིགས༔ སྐྱེ་མེད་དབྱིངས་ལས་འགགས་མེད་ཡེ་ཤེས་རྩལ༔ ཐོགས་མེད་ཐུགས་རྗེས་དྲག་པོའི་སྐུར་བཞེངས་ལ༔ མགོན་མེད་བདག་སོགས་སྐྱོབས་ཕྱིར་དབྱིངས་ནས་བསྐུལ༔ དབྱེར་མེད་མཐུ་སྟོབས་ནུས་པའི་བྱིན་ཆེན་ཕོབས༔ འབྲུ་གསུམ་རྡོ་རྗེའི་རྒྱས་བཏབ་དམ་ཉམས་རོ༔ སྲོག་དབུགས་དྲོད་རླངས་མ་ཡལ་དབང་པོ་ཚང་༔ ཕྱི་ནང་གསང་བའི་མཆོད་པ་འདོད་དགུར་འཇོ༔ རྩ་གསུམ་དམ་ཉམས་དགྱེས་པའི་རྫས་སུ་འབུལ༔ ཀུན་ཏུ་བཟང་པོ་སྒྱུ་འཕྲུལ་དྲ་བའི་གར༔ གཅིག་ཏུ་འདུས་པ་བླ་མ་རིན་པོ་ཆེ༔ མངོན་སྤྱོད་མཐུ་ཡི་བཀའ་བབ་བླ་རབས་བཅས༔ ཐུགས་དམ་གནད་ནས་བསྐུལ་ལོ་དབྱིངས་ནས་བཞེངས༔ གུ་རུ་དམར་ནག་མེ་ཕྲེང་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ བསྟན་འགྲོར་མཐའ་དམག་སྡང་པ་ཐུགས་ཀྱིས་དགོངས༔ ཞེ་སྡང་གཡུལ་ངོ་གཞོམ་པའི་མཐུ་དཔུང་བསྐྱེད༔ གུ་རུ་ནད་སེལ་སྨན་བླའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ དུག་གསུམ་ནད་ཀྱིས་གཟིར་བ་ཐུགས་ཀྱིས་དགོངས༔ བདག་འཛིན་གདོན་ཆེན་གཞོམ་པའི་མཐུ་དཔུང་བསྐྱེད༔ གུ་རུ་སྨུག་འཛིན་ནོར་བདག་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ དབུལ་ཕོང་མུ་གེས་སྡང་བ་ཐུགས་ཀྱིས་དགོངས༔ སེར་སྣའི་དགྲ་སྡེ་གཞོམ་པའི་མཐུ་དཔུང་བསྐྱེད༔ གུ་རུ་ཡི་དམ་བཀའ་བརྒྱད་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ ཟབ་གཏེར་འགལ་རྐྱེན་སྡང་བ་ཐུགས་ཀྱིས་དགོངས༔ གསང་ཆེན་བསྟན་དགྲ་སྒྲོལ་བའི་མཐུ་དཔུང་བསྐྱེད༔ གུ་རུ་ཟིལ་གནོན་དྲག་རྩལ་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ གསར་སྐྱེས་འབྱུང་པོ་དར་བ་ཐུགས་ཀྱིས་དགོངས༔ སྡེ་བརྒྱད་འཁྲུལ་སྣང་གཞིག་པའི་མཐུ་དཔུང་བསྐྱེད༔ གུ་རུ་སེངྒེ་སྒྲ་སྒྲོག་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ འབྲོག་ཆེན་བར་དོར་འཁྱམས་པ་ཐུགས་ཀྱིས་དགོངས༔ དུད་འགྲོའི་དུག་རླངས་གཞིལ་བའི་མཐུ་དཔུང་བསྐྱེད༔ གུ་རུ་པདྨ་བཛྲ་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ འབྱུང་བ་གཡོ་འཁྲུགས་འགྱུར་བ་ཐུགས་ཀྱིས་དགོངས༔ ས་བདག་ཀླུ་གཉན་འདུལ་བའི་མཐུ་དཔུང་བསྐྱེད༔ གུ་རུ་རྟ་མགྲིན་ནག་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ ཐེ་ཚོམ་རྣམ་རྟོག་འཇིགས་སྐྲག་ཐུགས་ཀྱིས་དགོངས༔ ཆོམ་རྐུན་ཇག་ཚོགས་སྒྲོལ་བའི་མཐུ་དཔུང་བསྐྱེད༔ རྡོ་རྗེ་གྲོ་ལོད་ཁྲོ་བཅུའི་ལྷ་ཚོགས་ཀྱིས༔ དུག་ལྔ་ཁོངས་ནས་འཁྲུགས་པ་ཐུགས་ཀྱིས་དགོངས༔ གཤེད་མའི་མཚོན་ཆ་གཞོམ་པའི་མཐུ་དཔུང་བསྐྱེད༔ གུ་རུ་པདྨ་རྒྱལ་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ ཚེ་ཟད་འཆི་བར་གཏུག་པ་ཐུགས་ཀྱིས་དགོངས༔ སྲོག་གཅོད་གཤེད་མ་བརླག་པའི་མཐུ་དཔུང་བསྐྱེད༔ གུ་རུ་འོད་དཔག་མེད་པའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ སྒྱུ་ལུས་གཡར་པོ་འཇིག་པ་ཐུགས་ཀྱིས་དགོངས༔ འཁྲུལ་སྣང་ཉིང་འཁྲུལ་གཞོམ་པའི་མཐུ་དཔུང་བསྐྱེད༔ ཆོས་སྐུ་ཀུན་ཏུ་བཟང་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ འཁྲུལ་སྣང་དངོས་པོར་ཞེན་པར་ཐུགས་ཀྱིས་དགོངས༔ སྔོན་ལས་འཕྲལ་རྐྱེན་ཞི་བའི་མཐུ་དཔུང་བསྐྱེད༔ གུ་རུ་བདེ་བ་ཆེན་པོའི་ལྷ་ཚོགས་ཀྱིས༔ གཟུང་འཛིན་དགྲ་བགེགས་ཤ་ཁྲག་གཏོར་མ་བཞེས༔ སྙེམས་འཕྲིག་དམ་སེལ་བྱུང་བ་ཐུགས་ཀྱིས་དགོངས༔ དམ་སྲི་རྩད་ནས་གཅོད་པའི་མཐུ་དཔུང་བསྐྱེད༔ དོ་བདོ་ཕོད་དུ་བཙུག་པའི་དགྲ་བོ་དང་༔ ངན་སྔགས་མཐུ་གཏད་བྱེད་པའི་བྱད་མ་ལ༔ རྩ་གསུམ་དམ་ཅན་སྲུང་མའི་མཐུ་ནུས་སྟོན༔ བྱད་མ་ལྷ་སྲུང་བདུན་བརྒྱུད་རྩད་ནས་ཆོད༔ ཛ་ཛ་ཛ་ཨ་མུ་ཀ་མ་ར་ཡ་རྦད་རྦད༔ ཅེས་སྙིང་ནས་བསྐུལ་ཞིང་༔ ༈ གསེར་སྐྱེམས་ནི༔ ༀ་ཨཱཿཧཱུྃ༔ བདེ་ཆེན་དྲོད་འཁྱིལ་བྱིན་རླབས་སྤྲིན་འཁྲིགས་ཀློང་༔ ཨོ་རྒྱན་ཐུགས་རྗེ་འགྱུར་མེད་དཀྱིལ་འཁོར་གཙོ༔ བདེ་བ་ཆེན་པོ་བརྒྱུད་གསུམ་བླ་མའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ ཡེ་ཤེས་ལྔ་ལྡན་འོད་གསལ་ཐིག་ལེའི་ཀློང་༔ ཨོ་རྒྱན་བདེ་ཆེན་རྒྱལ་པོའི་དཀྱིལ་འཁོར་གཙོ༔ ཀུན་བཟང་ཡབ་ཡུམ་རིགས་ལྔ་ཞི་ཁྲོའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ བཀོད་པ་རབ་རྫོགས་བདེ་ཆེན་དག་པའི་ཀློང་༔ ཨོ་རྒྱན་དུས་གསུམ་མཁྱེན་པའི་དཀྱིལ་འཁོར་གཙོ༔ སྣང་མཐའ་རབ་བདུན་ཕྱོགས་བཅུའི་སངས་རྒྱས་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ ཐུགས་རྗེའི་ཡེ་ཤེས་ཀུན་ཏུ་ཁྱབ་པའི་ཀློང་༔ ཨོ་རྒྱན་སྣང་མཐའི་སྤྲུལ་བའི་དཀྱིལ་འཁོར་གཙོ༔ སྤྱན་རས་གཟིགས་དབང་སྲས་བརྒྱད་བྱང་སེམས་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ བདུད་སྲིན་གཅལ་བཀྲམ་དབང་དྲག་འབར་བའི་ཀློང་༔ ཨོ་རྒྱན་ལྷ་སྲིན་སྡེ་བརྒྱད་དཀྱིལ་འཁོར་གཙོ༔ པདྨ་དྲག་པོ་དྲེགས་པ་སྡེ་བརྒྱད་ཚོགས། གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ ལྟ་ན་སྡུག་པ་འཆི་མེད་བདུད་རྩིའི་ཀློང་༔ ཨོ་རྒྱན་སྨན་གྱི་བླ་མའི་དཀྱིལ་འཁོར་གཙོ༔ སྨན་བླ་མཆེད་བརྒྱད་སངས་རྒྱས་གྲུབ་རིག་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ དཔལ་འབྱོར་ཕུན་ཚོགས་རིན་ཆེན་གཏེར་གྱི་ཀློང་༔ ཨོ་རྒྱན་མཁའ་འགྲོ་ནོར་ལྷའི་དཀྱིལ་འཁོར་གཙོ༔ རྨུགས་འཛིན་དམར་པོ་འཇིག་འདས་ནོར་ལྷའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ བདུད་བཞི་གདན་བཏིང་བསྐལ་མེ་འབར་བའི་ཀློང་༔ ཨོ་རྒྱན་ཡི་དམ་ལྷ་ཡི་དཀྱིལ་འཁོར་གཙོ༔ རྡོ་རྗེ་གཞོན་ནུ་དཔལ་དགུ་སྤྲུལ་བའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ སྣང་སྲིད་དབང་སྡུད་གཟི་བརྗིད་འབར་བའི་ཀློང་༔ ཨོ་རྒྱན་གཞི་བདག་གཉན་པོའི་དཀྱིལ་འཁོར་གཙོ༔ ཟིལ་གནོན་དྲག་རྩལ་སྡེ་དཔོན་སུམ་ཅུའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ མུ་སྟེགས་ཚར་གཅོད་མཐུ་སྟོབས་དཔལ་འབར་ཀློང་༔ ཨོ་རྒྱན་དཔའ་བོ་གིང་གི་དཀྱིལ་འཁོར་གཙོ༔ སེངྒེ་སྒྲ་སྒྲོགས་དཔའ་བོ་འབུམ་སྡེའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ བདེ་ཆེན་རབ་འབར་བདུད་རྩིའི་སྤྲིན་ཆེན་ཀློང་༔ ཨོ་རྒྱན་འབྱུང་བ་བཞི་བདག་དཀྱིལ་འཁོར་གཙོ༔ པདྨ་བཛྲ་བདེ་གཤེགས་བརྒྱད་ཀྱི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ རུ་དྲ་བརྩེགས་པ་མཐིང་ནག་ཨེ་ཡི་ཀློང་༔ ཨོ་རྒྱན་ཕྱག་རྒྱ་བཞི་ཡི་དཀྱིལ་འཁོར་གཙོ༔ རྟ་མགྲིན་ནག་པོ་གསང་ཡེ་སྡེ་དཔའ་བོའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ རྒྱལ་བསེན་སྲོག་འཕྲོག་རྔམ་བརྗིད་འབར་བའི་ཀློང་༔ ཨོ་རྒྱན་རྡོ་རྗེ་གུར་གྱི་དཀྱིལ་འཁོར་གཙོ༔ རྡོ་རྗེ་གྲོ་ལོད་ཁྲོ་བཅུ་སྤྲུལ་བའི་ཚོགས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད༔ ཅེས་གསེར་སྐྱེམས་ཀྱིས་མཆོད༔ ༈ གཟུ་དཔང་ནི༔ ཧཱུྃ༔ དཀྱིལ་འཁོར་ཀུན་བདག་མཆོག་གསུམ་བླ་མ་དང་༔ ཡི་དམ་ཞི་ཁྲོ་རབ་འབྱམས་མཁའ་འགྲོའི་ཚོགས༔ ཁྱད་པར་པདྨ་ཞི་ཁྲོའི་ལྷ་ཚོགས་རྣམས༔ འཁོར་བཅས་བདག་ལ་དགོངས་ཤིང་གསན་དུ་གསོལ༔ སྣང་སྲིད་གདོད་ནས་ཆོས་སྐུར་རོ་གཅིག་ལ༔ མ་རྟོགས་སྒྲིབ་བསལ་འགྲོ་ཀུན་བསྒྲལ་སེམས་ཀྱང་། དམ་ཉམས་དགྲ་བོས་བྱེད་དུ་མ་སྟེར་རོ༔ རྩ་བརྒྱུད་བླ་མས་གཟུ་དང་དཔང་མཛོད་ཅིག༔ སྨིན་གྲོལ་ལམ་ཞུགས་བསྐྱེད་རྫོགས་ཟབ་མོའི་དོན༔ ཚུལ་བཞིན་ཉམས་བླངས་དངོས་གྲུབ་བླང་སེམས་ཀྱང་༔ དམ་ཉམས་དགྲ་བོས་བྱེད་དུ་མ་སྟེར་རོ༔ ཡི་དམ་ལྷ་ཚོགས་གཟུ་དང་དཔང་མཛོད་ཅིག༔ བླ་མེད་བྱང་ཆུབ་མཆོག་ཏུ་སེམས་བསྐྱེད་ནས༔ འགྲོ་ལ་ཕན་བདེའི་དགའ་སྟོན་སྤེལ་སེམས་ཀྱང་༔ དམ་ཉམས་དགྲ་བོས་བྱེད་དུ་མ་སྟེར་རོ༔ དཔའ་བོ་མཁའ་འགྲོས་གཟུ་དང་དཔང་མཛོད་ཅིག༔ ཚེ་འདི་བློས་བཏང་དབེན་པའི་གནས་རྣམས་སུ༔ བདེ་ཆེན་བྱང་ཆུབ་སྒྲུབ་པར་སེམས་ན་ཡང་༔ དམ་ཉམས་དགྲ་བོས་བྱེད་དུ་མ་སྟེར་རོ༔ དམ་ཅན་ཆོས་སྐྱོང་གཟུ་དང་དཔང་མཛོད་ཅིག༔ མ་ཉེས་མ་ལན་ཡེ་ཤེས་ལྷ་ཡི་ཚོགས༔ སྡིག་ཅན་ལས་ངན་བསྟན་པའི་སྤྱི་དགྲ་འདིས༔ སངས་རྒྱས་བསྟན་བཤིགས་དཀོན་མཆོག་དབུ་འཕང་དམད༔ བླ་མའི་ཐུགས་དཀྲུགས་དགེ་འདུན་སྡེ་ལ་བརྙས༔ ཁྱད་པར་རྣལ་འབྱོར་བདག་ཅག་འཁོར་བཅས་ལ༔ རི་ལྟར་བརྗིད་ཅིང་རྩང་ལྟར་འཛུགས་པ་དང་༔ མདུན་ནས་སྒུག་ཅིང་རྒྱབ་འདེད་ཟུར་ནས་གསོད༔ ལུས་ཀྱིས་རྡུང་རྡེག་དཀོར་རྫས་རྐུ་ཞིང་འཕྲོག༔ ངག་གི་ཡ་གས་གཞན་གྱི་ནུས་མཐུ་བསྒུལ༔ ཡིད་ཀྱིས་བསམ་ངན་དུག་ལྟར་གཡོ་བྱེད་པས༔ སྔ་དགྲ་ལག་བདར་ཕྱི་དགྲ་ཡིད་སེམས་དང་༔ ད་དགྲ་བདོ་བའི་དགྲ་བགེགས་གར་གནས་ཀྱང་༔ དཔལ་ཆེན་ཕུར་བུའི་བཀའ་ཉན་འཁོར་བཅས་ཀྱིས༔ སྐད་ཅིག་འདིར་ཁུག་མངོན་སྤྱོད་ལས་མཛོད་ཅིག༔ ཅེས་བདེན་པ་བརྗོད་དོ༔ ༈ བྲུབ་ཁུང་གསལ་བ་ནི༔ སྟོང་པའི་ངང་ལས་ཨེ་ལས་ལྕགས་བསྲེགས་ཀྱི་ཁང་སྒྲོམ་གྲུ་གསུམ་བང་རིམ་དགུ་པ༔ ཁ་ཁྱེར་དོག་ཅིང་གཏིང་ཟབ་པ༔ འོག་ན་འདོད་ཆགས་ཀྱི་ཁྲག་མཚོ་ཁོལ་བ༔ ལོགས་ལ་ཞེ་སྡང་གི་མེ་རླུང་འཚུབ་པ༔ སྟེང་ན་གཏི་མུག་གི་མུན་པ་གཏིབ་པ༔ མཚོན་ཆའི་ཆར་འབེབས་ཤིང་ནད་དང་དུག་གི་རླངས་པ་འཕྱོ་བ༔ ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་མི་བཟད་པར་འཁྲུགས་པ༔ ལས་བྱེད་གཤིན་རྗེའི་དམག་ཚོགས་སེང་གེ་ལྟར་རྔམས་པ༔ སྟག་ལྟར་འཕྱོ་བ། སྲིན་པོ་ལྟར་ཁྲོས་པ༔ ཤ་ཟ་ལྟར་རྒྱུག་པ༔ རྒྱོབ་རྒྱོབ་དང་སོད་སོད་ཀྱི་སྒྲ་འབྲུག་ལྟར་སྒྲོག་པས་གང་བ༔ སྲིད་པ་ལས་ཀྱི་བཙོན་ཁང་དྲག་པོ་དེའི་ནང་དུ་ནྲྀ་དུད་ཁ་ཡོངས་སུ་གྱུར་པ་ལས༔ དགྲ་བོ་དེ་ཉིད་ལུས་གཅེར་བུ་རིད་པ༔ མདོག་ནག་ཅིང་དྲན་པ་ཉམས་པ༔ མྱ་ངན་གྱི་ཕྱག་རྒྱ་ཅན་བུ་ག་དགུ་ནས་རྣག་ཁྲག་འཛག་པ༔ གནོད་བྱེད་ཐམས་ཅད་འདུས་པའི་ངོ་བོར་གྱུར༔ ལྕགས་ཀྱུའི་ཕྱག་རྒྱ་བཅས༔ ན་མོ རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་༔ སངས་རྒྱས་ཀྱི་བཀའ་བདེན་པ་དང་༔ ཆོས་ཀྱི་བཀའ་བདེན་པ་དང་༔ དགེ་འདུན་གྱི་བཀའ་བདེན་པ་དང་༔ གསང་སྔགས་དང་རིགས་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་༔ ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་༔ ཁྱད་པར་བཅོམ་ལྡན་འདས་དཔལ་ཆེན་སྣང་སྲིད་ཟིལ་གནོན་ཀུན་བཟང་པདྨ་ཞི་ཁྲོ་བཅུ་གསུམ་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་༔ བདེན་པ་ཆེན་པོའི་མཐུ་ལ་བརྟེན་ནས༔ བསྟན་དང་འགྲོ་བའི་སྤྱི་དགྲ༔ ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ༔ ཕྱི་དགྲ་ཡིད་ལ་སེམས་པ༔ ད་དགྲ་ཐད་དུ་འཛུགས་པའི་གཟུགས་ཅན་སྡང་བའི་དགྲ་དང་༔ གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག༔ དགྲ་བགེགས་གནོད་བྱེད་མ་ལུས་པ་ཛཿཧཱུྃ་བཾ་ཧོཿ ཅེས་ལན་གསུམ་སོགས་ཀྱིས་དགུག༔ ༈ ཕོ་ཉ་གཏང་བ་ནི༔ ཛཿ དཔལ་ཆེན་བཀའ་སྡོད་ལས་ཀྱི་ཕོ་ཉ་མོ༔ ལོག་འདྲེན་འགུགས་པར་བྱེད་པའི་ལྕགས་ཀྱུ་ཐོགས༔ འཁོར་བཅས་ཁྱོད་ཀྱིས་དགྲ་བོའི་བླ་སྲོག་རྣམས༔ ཁུག་ཅིག་བཛྲ་ཨཾ་ཀུ་ཤ་ཡ་ཛ༔ བཛྲ་ཧ་ཡ་མུ་ཁཱི་སརྦ་དུཥྚཱན་ནྲྀ་ཏྲི་ཨཾ་གུ་ཤ་ཛ༔ ཧཱུྃ༔ དཔལ་ཆེན་བཀའ་སྡོད་ལས་ཀྱི་ཕོ་ཉ་མོ༔ ལོག་འདྲེན་འཆིང་བར་བྱེད་པའི་ཞགས་པ་ཐོགས༔ འཁོར་བཅས་ཁྱོད་ཀྱིས་དགྲ་བོའི་ཡན་ལག་རྣམས༔ བྱད་དུ་ཆིངས་ཤིག་བཛྲ་པཱ་ཤ་ཧཱུྃ༔བཛྲ་སུ་ཀ་ར་མུ་ཁཱི་སརྦ་དུཥྚཱན་ནྲྀ་ཏྲི་པཱ་ཤ་ཧཱུྃ༔ བཾ༔ དཔལ་ཆེན་བཀའ་སྡོད་ལས་ཀྱི་ཕོ་ཉ་མོ༔ ལོག་འདྲེན་སྡོམ་པར་བྱེད་པའི་ལྕགས་སྒྲོག་ཐོགས༔ འཁོར་བཅས་ཁྱོད་ཀྱིས་དགྲ་བོའི་དབང་པོ་རྣམས༔ དམ་པར་སྡོམས་ཤིག་བཛྲ་ཕོ་ཊ་བཾ༔ བཛྲ་སིཾ་ཧ་མུ་ཁཱི་སརྦ་དུཥྚཱན་ནྲྀ་ཏྲི་སྥོཊ་བཾ༔ ཧོ༔ དཔལ་ཆེན་བཀའ་སྡོད་ལས་ཀྱི་ཕོ་ཉ་མོ༔ ལོག་འདྲེན་མྱོས་པར་བྱེད་པའི་དྲིལ་བུ་ཐོགས༔ འཁོར་བཅས་ཁྱོད་ཀྱིས་དགྲ་བོའི་རྣམ་ཤེས་ཡིད༔ མྱོས་སུ་ཆུགས་ཤིག་བཛྲ་གཎྜེ་ཧོ༔ བཛྲ་ནཱ་ག་མུ་ཁཱི་སརྦ་དུཥྚཱན་ནྲྀ་ཏྲི་གཎྜེ་ཧོ༔ ཨཱ༔ དཔལ་ཆེན་བཀའ་སྡོད་ལས་ཀྱི་ཕོ་ཉ་མོ༔ དགྲ་བོ་གནད་ལ་འབེབས་བྱེད་ཁྲག་ཐུན་ཐོགས༔ འཁོར་བཅས་ཁྱོད་ཀྱིས་དགྲ་བོའི་རྣམ་ཤེས་གཟུགས༔ ཉམས་པར་མཛོད་ཅིག་ཨ་བེ་ཤ༔ བཛྲ་རཀྴ་སཱི་སརྦ་དུཥྚཱན་ནྲྀ་ཏྲི་ཨཱ་བེ་ཤ་ཡ་ཨ་ཨཱ༔ དགུག་འཆིང་སྡོམ་མྱོས་ཀྱིས་དགྲ་བོ་ཐར་བ་མེད་པར་བསམ་ལ༔ ༈ བསྒྲལ་ལས་ནི༔ རིག་པ་མཆོག་གི་རྒྱུད་ལས། ལྷ་ཕྲལ་གཟུགས་ལ་དབབ་པ་དང་༔ བྱད་དུ་གཞུག་དང་སྨྱོ་རུ་གཞུག༔ རྡུལ་དུ་བརླག་དང་ཞལ་དུ་བསྟབ༔ དེ་ལ་ཕོ་ཉ་འཕྱོང་སྔགས་རྫས༔ ཏིང་འཛིན་དམོད་པས་ལས་རྫོགས་བྱ༔ ཞེས་གསུངས་པ་ལྟར་ཉམས་སུ་ལེན་པ་ལ༔ ཀུན་བཟང་པདྨ་ཞི་ཁྲོའི་ལྷ་ཚོགས་གང་ཡིན་ཀྱང་སྒྲོལ་བྱེད་ཕུར་བའི་ལས་སྦྱོར་གྱི་ཟེར་ཀ་གདབ་པས་མཆོག་ཏུ་འགྱུར་ཏེ༔ དཔལ་ཆེན་པོ་རྡོ་རྗེ་གཞོན་ནུ་ནི་རྒྱལ་བ་མ་ལུས་པའི་འཕྲིན་ལས་ཀྱི་བྱེད་པོ་གཅིག་ཏུ་ཆེ་ཞིང་༔ དྲག་པོ་མངོན་སྤྱོད་ཀྱི་ལས་ལ་མཆོག་ཏུ་བསྔགས་པས༔ དམིགས་པ་ནི༔ རང་ཉིད་སྐད་ཅིག་གིས་དཔལ་ཆེན་པོ་རྡོ་རྗེ་གཞོན་ནུར་གནས་འགྱུར་ཞིང་༔ ཐུགས་ཀ་ནས་སངས་རྒྱས་ཐམས་ཅད་ཀྱི་འཕྲིན་ལས་ཀྱི་བྱེད་པོ་སྒྲོལ་བྱེད་ཕུར་བའི་དཀྱིལ་འཁོར་སྤྲོས་པས་ཀཱི་ལ་ཡའི་སྒྲ་འབྲུག་སྟོང་དུས་གཅིག་ཏུ་སྡིར་བ་ལྟར་བསམ་ལ༔ ཕུར་བའི་རྩ་སྔགས་བརྒྱ་རྩ༔ དྲག་སྔགས་མེ་དཔུང་མ༔ སྤུ་གྲི་རཀྨོ་བཅས་དྲག་ཏུ་རྔ་རོལ་བཅས་པས་ཐུགས་དམ་བསྐུལ༔ ༈ དང་པོ་ལྷ་དང་ཕྲལ་བ་ནི༔ གུ་གུལ་སོགས་དབྱེ་རྫས་ཀྱིས་བདུག་ཅིང་བྱ་རོག་དང་འུག་པའི་དང་རུས་ཕྱིར་འབྱེད་པའི་ཚུལ་བྱ༔ དཀྱིལ་འཁོར་གྱི་ལྷ་ཚོགས་དང་རྡོ་རྗེ་ལེགས་པ་འགོང་པོ་འཁོར་བཅས་ཀྱིས་བསྒྲུབ་བྱ་སྲུང་སྐྱོབ་བྱེད་པའི་ལྷ་དང་ཕྲལ་ནས་བྱ་སྤུ་རླུང་གིས་གཏོར་བ་ལྟར་བྱེར་བར་བསམ་ལ༔ ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ གཏོགས་ཤིག་གྲོགས་དང་བྲལ་བར་གྱིས༔ ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་ཧ་ས་ཡ་ར་ཧ་ས་ཡ་ར་ཧྲཱིཿདཎྜ་ཧཱུྃ་ཕཊཿ དགྲ་དང་དགྲ་སྐྱོབ་པའི་ལྷ་གཉིས་བྲལ་བར་གྱུར་ཅིག༔ ༈ གཉིས་པ་གཟུགས་ལ་དབབ་པ་ནི༔ ཡུངས་དཀར་རྫས་ཀྱིས་བྲབ་ཅིང་ཐལ་མོ་གཉིས་སྦུབ་ལ་འབེབ་པའི་ཚུལ་བྱ༔ དཀྱིལ་འཁོར་གསུམ་གྱི་ལྷ་ཚོགས་ལས་སྤྲུལ་པ་ཡང་སྤྲུལ་ལྕགས་ཀྱུ་ཐོགས་པ་མང་པོ་དང་ཀླུ་ཆེན་འཇོག་པོ་འཁོར་བཅས་ཀྱིས་དགྲ་བོའི་རྣམ་ཤེས་བཀུག་ནས་ལིངྒ་ལ་བསྟིམས་པར་བསམ་ལ༔ ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ ཕོབ་ཅིག་རྣམ་པར་གཟིར་བར་གྱིས༔ ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་ཨཱ་ཝེ་ཤ་ཡ་ཨཱ་ཝེ་ཤ་ཡ་ཧཱུྃ་ཕཊཿ ཆེ་གེའི་རྣམ་ཤེས་ལིངྒ་ལ་ཐིམ་པར་གྱུར་ཅིག༔ ༈ གསུམ་པ་བྱད་དུ་གཞུག་པ་ནི༔ རྫས་ཚོན་སྣ་ལྔའི་སྐུད་པ་དང་ཡུགས་སའི་སྐྲ་སྐུད་ཀྱིས་ཡན་ལག་རྣམས་འཆིང་བའི་ཚུལ་བྱ༔ དཀྱིལ་འཁོར་གསུམ་གྱི་ལྷ་ཚོགས་ཡང་སྤྲུལ་དང་བཅས་པ་རྣམས་དང་སྲོག་བདག་སྒྲོལ་གིང་འཁོར་བཅས་ལྕགས་ཀྱུ་ཞགས་པ་ལྕགས་སྒྲོག་ཐོགས་པ་རྣམས་ཀྱིས་དགྲ་བོ་རི་དྭགས་རྒྱར་ཚུད་པ་ལྟར་བཅིངས་པར་བསམ་ལ༔ ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ ཟུངས་ཤིག་རྒྱོབ་ཅིག་རྣམ་པར་ཆིངས༔ ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་ཛཿཧཱུྃ་བཾ་ཧོཿ ཤཱི་གྷྲཾ་ཨཱ་ན་ཡ་ཧཱུྃ་ཕཊཿ དགྲ་བགེགས་གནོད་བྱེད་འདི་གྲུ་གུ་ཐུལ་དུ་ཆིངས་ཤིག་སྡོམས་ཤིག༔ ༈ བཞི་པ་སྨྱོ་རུ་གཞུག་པ་ནི༔ དུག་རྫས་སྣ་ཚོགས་དང་དྷ་དུ་རའི་ཁུ་བས་བྲབ༔ དཀྱིལ་འཁོར་གསུམ་ཡང་སྤྲུལ་དང་བཅས་པ་དང་གནམ་ཐེ་འཁོར་བཅས་ཀྱིས་སྨྱོ་དུག་གི་ཆར་ཕབ་པས་དམིགས་བྱ་མྱོས་རྨོངས་དྲན་མེད་མུ་འཆོལ་དུ་སྨྲ་བར་བསམ་ལ༔ ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ རིངས་པར་ཁུག་ལ་སྨྱོ་རུ་ཆུགས༔ ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་ཛྭ་ལ་པ་ཡ་ཛྭ་ལ་པ་ཡ་ཧཱུྃ་ཕཊ༔ ཆེ་གེ་སྨྱོ་རུ་ཆུགས་འབོག་ཏུ་ཆུགས་དྲན་པ་ཉམས་པར་གྱུར་ཅིག༔ ༈ ལྔ་པ་རྡུལ་དུ་བརླག་པ་ནི༔ དེ་ཡང་བདག་དཔལ་ཆེན་པོར་གསལ་བའི་ཐལ་མོ་གཉིས་ཐབས་ཤེས་ཀྱི་རང་བཞིན་ཉི་ཟླས་མཚན་པའི་བར་དུ་བསྙེན་ཕུར་ཡཀྴ་ཀྲོ་དྷ་དུས་མེའི་ཚྭ་ཚྭ་འཕྲོ་བར་མོས་ལ་བྱིན་གྱིས་བརླབ་སྟེ༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཅེས་ཉེར་གཅིག་གི་མཐར༔ ཨོཾ་ལཾ་ཧཱུྃ་ལཾ་སཏྭམྦྷ་ཡ་ནཱན༔ མོ་ཧཱ་གྷ་ཏ་ཡ༔ བྷ་ག་ཝཱན༔ ཧྲཱིཿཥྚིཿབི་ཀྲིཏ་ཤྲཱི་བཛྲ་ཧཱུྃ་ཀཱ་ར་ཧཱུྃ་ཧཱུྃ་ཕཊ་ཕཊ༔ བཛྲ་ཀཱི་ལི་ཀཱི་ལ་ཡ༔ ཛཿཧཱུྃ་བཾ་ཧོ༔ སརྦ་བིགྷྣཱན༔ བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ བཛྲ་ཧཱུྃ་ཀཱ་ར་ཧཱུྃ་ཕཊ། ཧཱུྃ་ཀཱ་ར་ཧཱུྃ་ཨ་ཕཊ༔ སྤུ་གྲིའི་གདབ་སྔགས་བརྗོད་བཞིན་དུ༔ དམིགས་བྱའི་སྙིང་དཀར་ནག་མཚམས་སུ་བསྒྲིལ་ཞིང་གདབ་པས་ཁོའི་གཟུགས་ཕུང་གི་འབྱུང་བཞིའི་དྭངས་མ་རིམ་བཞིན་འདུས་ནས་ཡལ༔ སྙིང་གར་ཚེའི་རྟེན་ཨ་དཀར་པོ་འོད་ཀྱི་ཐིག་ལེའི་དབུས་སུ་ཀུན་གཞི་ནྲྀ་དུད་ཁའི་གཟུགས་སུ་འདུས་པར༔ ཕུར་རྩེ་ཧཱུྃ་ལྡན་བཏབ་པས་ནྲྀ་ཐིག་ལེ་ཨར་བཅས་བསྡུས་ནས་རང་ལ་བསྟན་པས་ཨ་དཀར་པོ་འོད་ཀྱི་གོང་བུ་ཅན་དེ་བདག་གི་སྙིང་གར་ཐིམ༔ ཚེ་དཔལ་གཟི་བརྗིད་འབར༔ སླར་ཡང་ཧཱུྃ་ལས་འཕྲོས་པའི་འོད་ཀྱི་རྩེ་ལས་གཟས་པོའི་རྣམ་ཤེས་ཨ་ཡིག་གི་གཟུགས་ཀྱིས་འོག་མིན་དུ་ཕཊ་ཕཊ་ཕཊ༔ ཅེས་གནས་སྤར་པས་རྡོར་སེམས་ཡབ་ཡུམ་གྱི་སྦྱོར་མཚམས་སུ་ཞུགས༔ ཀཱི་ལ་ཡ་བརྗོད་པས་རྡོར་སེམས་ཀྱི་སྲས་སུ་སྐྱེས་པར་བསམ་པ་ནི་ཐུགས་རྗེ་རྗེས་འཛིན་གྱི་ཕུར་བུ་ཞེས་བྱ་སྟེ༔ ལས་ངན་རྣམ་སྨིན་གྱི་སྐྱེ་སྒོ་བཅད་ནས་སྐྱེ་མེད་ཀྱི་དབྱིངས་སུ་སྦྱོར་བར་བྱེད་དོ༔ ཕྱིར་མི་ལྡོག་པའི་ཕྱིར་ཁྲོ་བོ་བཅུའི་ཕུར་བུས་རིམ་པ་བཞིན་གདབ་སྟེ༔ སྤྱི་བོར་ཧཱུྃ་མཛད༔ དཔྲལ་བར་རྣམ་རྒྱལ༔ ལྟེ་བར་གཤིན་རྗེ༔ མགྲིན་པར་རྟ་མགྲིན༔ སྙིང་གར་འཁྱིལ་བ༔ དཔུང་གཡས་དབྱུག་སྔོན༔ དཔྱི་གཡོན་མི་གཡོ་བ༔ དཔྱི་གཡས་འདོད་རྒྱལ༔ དཔུང་གཡས་སུམ་རྒྱལ༔ ལྟེ་བར་སྟོབས་ཆེན་རྣམས་ཕུར་བུ་རང་རང་གི་སྔགས་ཀྱིས་གདབ་བོ༔ སྤྲོས་པ་ཆུང་བ་ལ་ཕུར་བའམ་རྩང་གཅིག་སྔར་གྱི་གདབ་ཤུལ་ཏུ་བཙུག་ཏེ་དམིགས་པ་བྱའོ༔ ༈ རྡུལ་དུ་བརླག་པ་དངོས་ནི༔ རྡོ་རྗེ་ཐོ་བས་གཏུན་ཁུང་གྲུ་གསུམ་ནང་དུ་བརྡུང་བཞིན༔ དཀྱིལ་འཁོར་གསུམ་གྱི་ལྷ་ཡང་སྤྲུལ་དང་བཅས་པ་དང་ལྷ་བདུད་རྣམ་རོལ་འཁོར་དང་བཅས་པས་རྡོ་རྗེ་རི་རབ་ཀྱི་ཐོ་བ་ཐོགས་ནས་དམིགས་བྱ་རྡུལ་དུ་བརླག་པར་བསམ་ལ༔ ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ ལུས་ངག་རྡུལ་ཕྲན་བཞིན་དུ་རློགས༔ ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་ད་དྷ་ཡ་ད་དྷ་ཡ་ཧཱུྃ་ཕཊཿ དགྲ་བགེགས་གནོད་བྱེད་ཐལ་བའི་རྡུལ་དུ་རློགས་ཤིག༔ ཅེས་བརྗོད་བཞིན་ལན་གསུམ་དགུ་སོགས་བརྡུང་ངོ་༔ ༈ དྲུག་པ་ཞལ་དུ་བསྟབ་པ་ནི༔ ཧོམ་གཟར་དུ་སྙིགས་མའི་ཤ་ཁྲག་སྟོབ་ཅིང་༔ དཀྱིལ་འཁོར་གསུམ་གྱི་ལྷ་ཚོགས་རྣམས་ཀྱི་ཞལ་དུ་རེ་མ་ཏིས་གྲོགས་བྱས་ཤིང་སྟོབས་པས་དགྱེས་པའི་སྐན་སྒྲ་དང་བཅས་རོལ་བར་བསམ་ལ༔ ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་པོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ ཤ་རུས་ལྷག་མེད་ཞལ་དུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་བྷིནྡྷ་ཡ་བྷིནྡྷ་ཡ་ཧཱུྃ་ཕཊཿ དགྲ་བགེགས་ཀྱི་ཤ་ཁྲག་ལྷག་མ་མེད་པར་རོལ་ཅིག༔ ཅེས་ཞལ་དུ་གསོལ༔ ཕུར་པ་ལ་རཀྟ་མཆོད་ཅིང་༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཞེས་ལན་གསུམ་བརྗོད་པས་ཕུར་བའི་ལྷ་ཚོགས་མཉེས་ཤིང་སྐུ་ལ་གཟི་མདངས་རྒྱས༔ གསུང་གི་ང་རོ་སྲིད་པ་གསུམ་དུ་གྲགས་པར་བསམ༔ སྣང་སྲིད་ཕུར་བའི་དཀྱིལ་འཁོར་དུ་བསམ་ཞིང་ཅུང་ཟད་མཉམ་པར་བཞག༔ ལིང་རོ་ལྷག་མ་རྣམས་བདུད་རྩིར་སྦར་བ་ཞལ་དུ་སྟོབ་པ་ནི༔ ཧཱུྃ༔ པདྨ་ཞི་ཁྲོའི་ལྷ་ཚོགས་ཞལ་ཕྱེས་ཤིག༔ དགྲ་བགེགས་འབྱུང་པོ་བསྒྲལ་པའི་ཤ་ཁྲག་རུས༔ བདེ་ཆེན་རྡོ་རྗེའི་ལོངས་སྤྱོད་ཆེན་པོར་བཞེས༔ དུག་གསུམ་རྩད་ནས་གཅོད་པའི་ཕྲིན་ལས་མཛོད༔ དུག་གསུམ་དགྲ་བགེགས་བསྒྲལ་པའི་ཤ་ཁྲག་རུས༔ སྲིད་གསུམ་ཞིང་ཀུན་གང་བའི་ལོངས་སྤྱོད་འདི༔ སྐུ་གསུམ་རོལ་པ་ཁྲག་འཐུང་ཞལ་དུ་སྟོབ༔ ཁམས་གསུམ་ཡོངས་སྒྲོལ་དངོས་གྲུབ་བསྩལ་དུ་གསོལ༔ སརྦ་ཤ་ཏྲཱུན་བིགྷྣཱན་མ་ཧཱ་མཱཾ་ས་རཀྟ་ཀིཾ་ནི་རི་ཏི་ཁ་ཁ་ཁཱ་ཧི་ཁཱ་ཧི༔ ཞེས་ཕུལ་བས་ལྷ་ཐམས་ཅད་མཉེས་ཏེ་ཧ་ཧ་ཞེས་བཞད༔ ཧཱུྃ་ཧཱུྃ་ཞེས་དངོས་གྲུབ་བསྩལ༔ ཕཊ་ཕཊ་ཀྱིས་དགྲ་བགེགས་དབྱིངས་སུ་བསྒྲལ་བར་བསམ་མོ༔ རྫོགས་པའི་བྱང་ཆུབ་སྒྲུབ་པ་ལ༔ ཕྱི་དང་ནང་གི་འཚེ་བ་ཡི༔ བར་ཏུ་གཅོད་པ་ཐམས་ཅད་ཀུན༔ ཉེ་བར་ཞི་བར་མཛད་དུ་གསོལ༔ ཅེས་བསྟན་འགྲོའི་དོན་ཏུ་བསྔོ་སྨོན་བྱ༔ ཚོགས་ལ་རོལ་ཞིང་ལྷག་མ་བསྔོ༔ བཀའ་སྲུང་རྣམས་ལ་གཏོར་མ་འབུལ༔ སྲུང་བཟློག་མནན་དང་བསྲེག་པའི་ལས༔ གཏོར་ཟོར་ལ་སོགས་ལས་སྦྱོར་བརྩམས༔ ཚེ་གཡང་འགུག་ཅིག་བཀྲ་ཤིས་བརྗོད༔ ས་མ་ཡ༔ བསྟན་དགྲ་རྡུལ་བཞིན་རློག་པའི་ཐབས༔ པདྨ་ཀཱ་རའི་མན་ངག་འདི༔ རྗེས་འཇུག་ཀུན་གྱི་སྙིང་གི་ནོར༔ གཅེས་པར་སྲུང་མཛོད་དམ་ཚིག་ཅན༔ དབུ་ལ་རལ་བ་བརྗིད་རེ་ཆགས༔ ཕྱག་ན་ཕུར་བུ་ཟིལ་རེ་ཆེ༔ བསད་ནས་འདྲེན་པའི་ཐབས་ལམ་དེ༔ པདྨའི་གདུང་གིས་སྒོས་ཆོས་ཡིན༔ མཐུ་སྟོབས་བཀའ་བབ་རིག་པ་འཛིན༔ ལས་སུ་མཐུ་སྒྲུབ་སྔགས་ལ་འབུངས༔ སུ་ལ་མེད་པའི་གདམས་པ་དེ༔ ཡལ་བར་མ་འདོར་ཐུབ་པར་མཛོད༔ ས་མ་ཡ༔ རྒྱ་རྒྱ་རྒྱ༔ གུ་རུ་པདྨའི་མན་ངག་གཏེར་གནས་དུ་མ་ནས་བྱུང་བ་རིག་འཛིན་ཚེ་དབང་ནོར་བུ་ལ་དངོས་གྲུབ་ཏུ་ཐོབ་པའོ༔ ཛ་ཡནྟུ། ། གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་རླུང་རྟ་བསྐྱེད་པའི་གསོལ་འདེབས།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་རླུང་རྟ་བསྐྱེད་པའི་གསོལ་འདེབས་བཞུགས༔ ན་མོ་གུ་རུ་པདྨ་བཛྲ་ཡེ༔ བསོད་ནམས་ཡེ་ཤེས་ཚོགས་གསོག་ཐབས༔ རླུང་ནི་སྟོབས་ལ་རྟ་ནི་རྒྱུ༔ གེགས་མེད་སྟོབས་ཀྱི་རྒྱུ་བ་ལ༔ བརྡ་ཐབས་ཚུལ་གྱིས་རླུང་རྟར་བརྗོད༔ གསོལ་བ་འདེབས་པ་ནི༔ ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ སྣང་བ་མཐའ་ཡས་ཐུགས་རྗེའི་བྱིན་རླབས་གཡོས༔ སྤྲུལ་སྐུ་པདྨ་འབྱུང་གནས་བྱིན་བརླབས་པས༔ འཛམ་གླིང་བོད་ཀྱི་སེམས་ཅན་དོན་ལ་དགོངས༔ འགྲོ་དོན་རྒྱུན་ཆད་མེད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་མཚོ་སྐྱེས་རྡོ་རྗེའི་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ སྨོན་པ་ཀུན་འགྲུབ་རླུང་རྟ་ཡར་ལ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྒྱལ་པོ་ཁྲི་སྲོང་ལྡེའུ་བཙན་མན་ཆད་ནས༔ ཆོས་རྒྱལ་གདུང་བརྒྱུད་མཐའ་ནས་མ་སྟོངས་པར༔ དུས་གསུམ་རྒྱུན་ཆད་མེད་པར་བྱིན་གྱིས་རློབས༔ ཆོས་བཞིན་སྤྱོད་པ་ཡོངས་ཀྱི་གཉེན་གཅིག་པོ༔ རྒྱལ་པོ་ཆོས་སྤྱོད་སྐྱོང་བའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་པདྨ་རྒྱལ་པོའི་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ རིགས་བརྒྱུད་དར་བའི་རླུང་རྟ་ཡར་ལ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྐུ་ནི་ལྷོ་ནུབ་སྲིན་པོའི་ཁ་གནོན་མཛད༔ ཐུགས་རྗེས་བོད་ཀྱི་སེམས་ཅན་དོན་ལ་དགོངས༔ མ་རིག་ལོག་པའི་སེམས་ཅན་འདྲེན་པའི་དཔལ༔ ཉོན་མོངས་གདུལ་དཀའི་སེམས་ཅན་ཐབས་ཀྱིས་འདུལ༔ བརྩེ་གདུང་རྒྱུན་ཆད་མེད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་བློ་ལྡན་མཆོག་སྲེད་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ ཤེས་རབ་འཕེལ་བའི་རླུང་རྟ་ཡར་ལ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ དུས་ངན་སྙིགས་མའི་མཐའ་ལ་ཐུག་པའི་ཚེ༔ ནངས་རེ་དགོང་རེ་འགྲོ་བའི་དོན་ལ་བྱོན༔ ཉི་ཟེར་འཆར་སྡུད་མདངས་ལ་བཅིབས་ཏེ་བྱོན༔ ཡར་ངོའི་ཚེས་བཅུའི་དུས་སུ་དངོས་སུ་འབྱོན༔ འགྲོ་དོན་སྟོབས་ཆེན་མཛད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཉི་མ་འོད་ཟེར་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ སྤོབས་པ་རྒྱས་པའི་རླུང་རྟ་ཡར་ལ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྔ་བརྒྱའི་ཐ་མ་རྩོད་དུས་སྙིགས་མ་ལ༔ སེམས་ཅན་ཐམས་ཅད་ཉོན་མོངས་དུག་ལྔ་རགས༔ ཉོན་མོངས་འཆོལ་ཉོག་དུག་ལྔ་རང་རྒྱུད་སྤྱོད༔ དེ་འདྲའི་དུས་ན་ཨོ་རྒྱན་ཐུགས་རྗེས་བསྐྱེད༔ དད་ལྡན་མཐོ་རིས་འདྲེན་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཤཱཀྱ་སེངྒེའི་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ འཕྲིན་ལས་རྒྱས་པའི་རླུང་རྟ་ཡར་ལ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནག་ཕྱོགས་འཇིགས་པའི་དམག་གིས་མཐའ་བསྐོར་ནས༔ ཆོས་འཁོར་གཉན་པོ་འཇིག་ལ་ཐུག་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ལྷ་སྲིན་སྡེ་བརྒྱད་འཁོར་དང་བཅས༔ དམག་དཔུང་ཧུར་ཐུམ་བཟློག་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་དམར་ནག་མེ་ཕྲེང་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ བསྟན་དང་དེ་འཛིན་སྲུང་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སེམས་ཅན་སྒྱུ་ལུས་འཇིག་པའི་ནད་བྱུང་ནས༔ མི་བཟོད་སྡུག་བསྔལ་ཆེན་པོས་ནོན་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་སྨན་གྱི་བླ་དང་དབྱེར་མེད་པས༔ ཚེ་ཟད་མ་ཡིན་བར་ཆད་ངེས་པར་སེལ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སྨན་གྱི་བླ་མའི་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ ནད་གདོན་བར་ཆད་སེལ་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འབྱུང་བ་དགྲར་ལངས་ས་བཅུད་ཉམས་པའི་ཚེ༔ སེམས་ཅན་མུ་གེའི་ནད་ཀྱིས་གཟིར་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་མཁའ་འགྲོ་ནོར་ལྷའི་ཚོགས་དང་བཅས༔ དབུལ་ཕོངས་བཀྲེས་སྐོམ་སེལ་བར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔གུ་རུ་དྲྭ་བ་སྡོམ་པའི་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ བསོད་ནམས་ལོངས་སྤྱོད་རྒྱས་པའི་རླུང་རྟ་བསྐྱེད༔ བསམ་པ་ལྷུན་གྱིས་འགྲབ་པར་བྱིན་གྱིས་རློབས༔ ལས་ཅན་འགྲོ་བའི་དོན་དུ་གཏེར་འདོན་ན༔ དམ་ཚིག་ཟོལ་ཟོག་མེད་པའི་དཔའ་གདེང་གིས༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཡི་དམ་ལྷ་ཡི་ཚོགས་དང་བཅས༔ ཕ་ནོར་བུ་ཡིས་ལོན་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་དཔལ་ཆེན་བཀའ་བརྒྱད་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ འདོད་དགུའི་གཏེར་ཆེན་འབྱེད་པའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྦས་ཡུལ་ནགས་རོང་དབེན་ས་སྙོགས་པའི་ཚེ༔ ཁ་ཆར་བུ་ཡུག་འཚུབས་ཤིང་ལམ་འགགས་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་གཞི་བདག་གཉན་པོའི་འཁོར་དང་བཅས༔ ཆོས་མཛད་ལམ་སྣ་འདྲེན་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཟིལ་གནོན་དྲག་རྩལ་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ སྡེ་བརྒྱད་དབང་དུ་བྱེད་པའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྟག་གཟིག་དོམ་དྲེད་དུག་སྦྲུལ་མཆེ་བ་ཅན༔ འབྲོག་ཆེན་འཇིགས་པའི་འཕྲང་ལ་འགྲིམས་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་དཔའ་བོ་གིང་དང་སྲུང་མར་བཅས༔ གདུག་པའི་སེམས་ཅན་སྐྲོད་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སེངྒེ་སྒྲ་སྒྲོགས་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ སྣང་སྲིད་འཁོར་ལོས་བསྒྱུར་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ས་ཆུ་མེ་རླུང་འབྱུང་བའི་བར་ཆད་ཀྱིས༔ སྒྱུ་ལུས་ཉེན་ཅིང་འཇིག་པའི་དུས་བྱུང་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་འབྱུང་བ་བཞི་ཡི་ལྷ་མོར་བཅས༔ འབྱུང་བ་རང་སར་ཞི་བར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་པདྨ་བཛྲ་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ འབྱུང་བཞིའི་དྭངས་བཅུད་འཕེལ་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལམ་འཕྲང་འཇིགས་པའི་འཕྲང་ལ་འགྲིམས་པའི་ཚེ༔ བསད་ཁྱེར་ཇག་པ་ཆོམ་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཕྱག་རྒྱ་བཞི་ཡི་དགོངས་པར་ལྡན༔ ཙོ་ར་མི་རྒོད་རྔམ་སེམས་བརླག་པར་བྱེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་རྟ་མཆོག་རོལ་བའི་ལྷ་ཚོགས་ཀྱིས༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ སྟོབས་ལྡན་འཇིགས་པ་བྲལ་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གང་ཞིག་གཤེད་མའི་དམག་གིས་མཐའ་བསྐོར་ནས༔ མཚོན་ཆ་རྣོན་པོས་འདེབས་ཤིང་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་རྡོ་རྗེའི་གུར་དང་ལྡན་པ་ཡིས༔ གཤེད་མ་དྲེད་ཅིང་མཚོན་ཆ་འཐོར་བར་འགྱུར༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་རྡོ་རྗེ་གྲོ་ལོད་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ གཡུལ་ལས་རྣམ་པར་རྒྱལ་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནམ་ཞིག་ཚེ་ཟད་འཆི་བའི་དུས་བྱུང་ཚེ༔ གནད་གཅོད་སྡུག་བསྔལ་དྲག་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་ཐོབ༔ ཨོ་རྒྱན་སྣང་བ་མཐའ་ཡས་སྤྲུལ་བ་སྟེ༔ བདེ་བ་ཅན་གྱི་ཞིང་དུ་ངེས་པར་སྐྱེ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སྤྱན་རས་གཟིགས་དབང་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ དུས་མཐའི་མཚམས་སྦྱོར་ལེགས་པའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྒྱུ་ལུས་གཡར་པོ་ཞིག་པའི་བར་དོ་རུ༔ འཁྲུལ་སྣང་ཉིང་འཁྲུལ་ཆེན་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་དུས་གསུམ་མཁྱེན་པའི་ཐུགས་རྗེ་ཡིས༔ འཁྲུལ་སྣང་རང་གྲོལ་སྟོན་པར་ཐེ་ཚོམ་མེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་སྣང་བ་མཐའ་ཡས་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ སྲིད་ལས་རྣམ་པར་གྲོལ་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གཞན་ཡང་ལས་དང་རྐྱེན་གྱི་དབང་གྱུར་ཏེ༔ འཁྲུལ་སྣང་དངོས་པོར་ཞེན་ཅིང་སྡུག་བསྔལ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་བདེ་ཆེན་རྒྱལ་པོའི་ངོ་བོ་སྟེ༔ འཁྲུལ་སྣང་སྡུག་བསྔལ་རྩད་ནས་གཞིག་པར་བྱེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་ཀུན་ཏུ་བཟང་པོའི་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ ཚོགས་དྲུག་རང་གྲོལ་མཆོག་གི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འགྲོ་དྲུག་སྡུག་བསྔལ་ཆེན་པོས་ཉེན་པ་དང༔ ཁྱད་པར་བདག་སོགས་འགྲོ་བ་སྡུག་བསྔལ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ དད་གུས་མོས་པས་གདུང་བས་གསོལ་འདེབས་ན༔ ཨོ་རྒྱན་ཐུགས་རྗེས་འཕོ་འགྱུར་མེད་པར་གཟིགས༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ གུ་རུ་བདེ་བ་ཆེན་པོའི་ལྷ་ཚོགས་ཀྱི༔ སྔགས་དང་ཏིང་འཛིན་ཐུགས་བསྐྱེད་བདེན་པའི་མཐུས༔ དགོངས་བརྒྱུད་བྱིན་རླབས་འཕོ་བའི་རླུང་རྟ་བསྐྱེད༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ས་མཱ་ཡ༔ ཅེས་བརྗོད་པདྨས་ཐུགས་རྗེས་སྐྱོབས༔ བསོད་ནམས་སྟོབས་རྒྱས་བསམ་དོན་འགྲུབ༔ རང་གཞན་དོན་གཉིས་ལྷུན་གྲུབ་པའི༔ ཡིད་བཞིན་ནོར་བུའི་མན་ངག་གོ༔ ཨྠྀི༔ ༈ རླུང་རྟ་བསྐྱེད་པའི་ལས་ཚོགས་བཞུགས་སོ༔ སྐུ་རྟེན་གུ་རུའི་ལྷ་ཚོགས་ལ༔ ཞལ་གསེར་འབུལ་དང་ན་བཟའ་སྒྲོན༔ མཆོད་པ་འབུལ་ཞིང་གསོལ་འདེབས་དང་༔ མཐོང་གྲོལ་སྐུ་བརྙན་རི་རྩེར་བཞེངས༔ གསུང་རྟེན་ལྷ་ཚོགས་གསང་སྔགས་བསྙེན༔ ཐོས་གྲོལ་ཆོ་ག་གཞུང་བཞིན་བཏང་༔ གསོལ་འདེབས་སྙིང་པོའི་དར་ཅོག་སྒྲོན༔ འབྱུང་བ་བཞི་བསྐྱེད་ཙཱཀྲ་གདགས༔ ཐུགས་རྟེན་མཆོད་རྟེན་སཙྪཱ་གཏབ༔ རིན་ཆེན་མེ་ལོང་མདའ་དར་དང་༔ རྡོ་རྗེའི་མདུད་པ་འབྲལ་མེད་བཅིང་༔ ཤེས་པ་ཧུར་བྱུང་ཏིང་འཛིན་བསྐྱེད༔ ཡོན་ཏན་རིན་ཆེན་གཏེར་བུམ་མཆོད༔ ཕོ་བྲང་ཕྱོགས་མཚམས་དབུས་གླིང་ལྔར༔ སྔགས་དང་སྤེལ་ཚིག་བཅས་པ་ཡི༔ ཕྱོགས་ལས་རྣམ་རྒྱལ་བ་དན་སྦྲེངས༔ འཕྲིན་ལས་རྟ་མཆོག་རླུང་ལ་སྐྱོན༔ རྟ་ནི་ཅང་ཤེས་ཆས་ལྡན་པ༔ འཕྲུལ་གྱི་གཤོག་པ་མཁའ་ལ་རྩེ༔ བཀྲ་ཤིས་རྫས་རྟགས་འདོད་ཡོན་བཅས༔ རླུང་གི་ལྷར་བཅོལ་ཞིང་སར་འབུལ༔ དེ་ལྟར་བྱས་ཚེ་བསོད་ནམས༔ དབང་ཐང་ཉམས་པ་སོར་ཆུད་འགྱུར༔ ཆོས་བྱར་གེགས་མེད་ཐར་ལམ་ཟིན༔ འཇིག་རྟེན་ཡང་དག་ལམ་དུ་འགྲོ༔ ས་མ་ཡ༔ དེ་ལྟར་བསྟན་པའི་དོན་ནི་འདི་ལྟ་སྟེ༔ སྐུ་བརྙན་ལ་བརྟེན་ནས་རླུང་རྟ་བསྐྱེད་པའམ་བསོད་ནམས་རྒྱས་པའི་ཐབས་ནི༔ སྤྲོས་མེད་ལ་གུ་རུའི་སྐུ་བརྙན་གང་རུག་གི་སྤྱན་སྔར་ཚོགས་མཆོད་ཅི་ནུས་སུ་བཤམས་ཤིང་གསོལ་བ་གདབ༔ ནུས་ན་རི་བོ་ཆེན་པོའི་རྩེ༔ ཆུ་བོའི་གཞུང་༔ རྒྱ་མཚོའི་ནང་༔ ལུང་གསུམ་མདོ༔ ཚོང་འདུས་ཆེན་པོ་སོགས་སུ་གུ་རུ་ཟ་བེར་ཆོས་གོས་མཐོང་གྲོལ་པད་ཞྭ་གསོལ་བ༔ ཕྱག་གཡས་སྡིག་མཛུབ་མཁའ་ལ་ཕྱར་ཞིང་གཡོན་ཐོད་བུམ་བདུད་རྩིའི་གང་བ་བསྣམས་པ་བཞེངས༔ དེའི་སྤྱན་སྔར་མཆོད་པ་བརྒྱ་རྩ་སྤྲོས་བཅས་ཅན་བཤམས་ལ་ཆོ་ག་བཏང་༔ རླུང་རྟའི་གསོལ་འདེབས་འདི་ཉིད་བརྒྱ་རྩ་བརྒྱད་བརྗོད་པས་གུ་རུའི་སྐུའི་སྟོབས་དང་གཟི་བརྗིད་བྱིན་རླབས་ལུས་ལ་ཞུགས་ནས༔ མཐོང་བ་ཙམ་གྱིས་ལྷ་འདྲེ་མི་གསུམ་ཟིལ་གྱིས་གནོན་ཅིང་མཐོང་ཚད་ལ་ཐར་བའི་ས་བོན་ཐེབས་པར་འགྱུར་རོ༔ གསུང་ལ་བརྟེན་པ་ནི༔ ཆོ་ག་གཞུང་བཞིན་བཏང་ཞིང་བསྙེན་པ་དང་༔ དར་ཅོག་ལ་དཀྱིལ་འཁོར་ཡོངས་རྫོགས་ཀྱི་ལྷ་སྔགས་དང་༔ གསོལ་འདེབས་བསམ་པ་ལྷུན་གྲུབ་མ་བཀོད་ནས་དར་ཅོག་བྱ་བ་དང་༔ འབྱུང་བཞི་བསྐྱེད་པའི་ཙཀྲ་ནི༔ དཀྱིལ་དུ་རྡོ་རྗེ་རྒྱ་གྲམ་དབུས་འཁོར་ལོ་རྩིབས་བཞི་པའི་ལྟེ་བར་ཡི་གེ་ཧྲཱི༔ དེའི་མཐར་ༀ་ཨ་མ་ར་ཎ་ཛི་ཝན་ཏི་འཆང་བ་པོའི་ཚེ་དང་ཡེ་ཤེས་ཝརྡྷ་ན་སྭཱཧཱ༔ དེ་ཕྱིར་རྩིབས་མཆན་བཞིའི་དབུས༔ སངས་རྒྱས་སྤྱན་མ་ལ༔ ཧ་ཡིག་མཐར་ ༀ་ལཾ་ལཾ་བུདྷ་ལོ་ཙཱ་ནི་ས་ཡི་ཁམས་ནས་ཚེ་བསོད་དབང་ཐང་བསྐྱེད་སྭཱ་ཧཱ༔ བདག་མ་ལ༔ རི་ཡིག་མཐར་བཛྲ་ༀ་བཾ་བཾ་བཛྲ་མཱ་མ་ཀཱི་ཆུ་ཡི་ཁམས་ནས་ཚེ་བསོད་དབང་ཐང་བསྐྱེདསྭཱ་ཧཱ༔ གོས་དཀར་མོ་ལ༔ ནི་ཡིག་མཐར་ༀ་རཾ་རཾ་བཛྲ་པཎྜ་ར་དེ་ཧི་དེ་ཧི་མེ་ཡི་ཁམས་ནས་ཚེ་བསོད་དབང་ཐང་བསྐྱེད་སྭཱ་ཧཱ་༔ སྒྲོལ་མ་ལ༔ ས་ཡིག་མཐར་ༀ་ཡཾ་ཡཾ་བཛྲ་ཏཱ་རེ་ཏུཏྟཱ་རེ་རླུང་གི་ཁམས་ནས་ཚེ་བསོད་དབང་ཐང་བསྐྱེད་སྭཱ་ཧཱ༔ མཚམས་བཞི་སྲོག་ཆག་བཞིའི་ལྟོ་བ་པདྨ་འདབ་བརྒྱད་ལ་རིམ་པར་༔ བྱང་ཤར་ལུས་བསྐྱེད་པར་རྨ་བྱའི་ལྟོ་བར༔ ནང་དུ་བྷྲཱུྃ་འཆང་པ་པོའི་ལུས་བསྐྱེད༔ བར་འདབས་བརྒྱད་ལ༔ ༀ༔ཡེར༔ཡེར༔ཧོ་ཕན༔ཡེར༔ཡེར་ཡེ༔སྭཱཧཱ༔ ཕྱིའི་མུ་འཁྱུད་ལ༔ ༀ་བཛྲ་གུ་རུ་རཏྣ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛ༔ ལུས་བསྐྱེད་སྭཱ་ཧཱ༔ ནུབ་བྱང་སྲོག་བསྐྱེད་པར་མཁའ་ལྡིང་གི་ལྟོ་བར༔ ནང་དུ་བྷྲཱུྃ་འཆང་པ་པོའི་སྲོག་བསྐྱེད༔ བར་འདབས་བརྒྱད་ལ༔ༀ་སལ༔སལ༔ཧོ་ཕན༔སལ༔སལ༔ཡེ༔སྭཱ་ཧཱ༔ ཕྱིའི་མུ་འཁྱུད་ལ༔ ༀ་བཛྲ་གུ་རུ་རྡོ་རྗེ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛ༔ སྲོག་བསྐྱེད་སྭཱ་ཧཱ༔ ལྷོ་ནུབ་དབང་ཐང་བསྐྱེད་པར་གླང་པོའི་ལྟོ་བར༔ ནང་དུ་བྷྲཱུྃ་འཆང་པ་པོའི་དབང་ཐང་བསྐྱེད༔ བར་འདབས་བརྒྱད་ལ༔ ༀ་མེར༔མེར༔ཧོ་ཕན༔མེར༔མེར༔ཡེ༔སྭཱཧཱ༔ ཕྱི འི་མུ་འཁྱུད་ལ༔ ཕྱིའི་མུ་འཁྱུད་ལ༔ༀ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛ༔ དབང་ཐང་བསྐྱེད་སྭཱ་ཧཱ༔ ཤར་ལྷོ་རླུང་རྟ་བསྐྱེད་པར་རྟ་མཆོག་གི་ལྟོ་བར༔ ནང་དུ་བྷྲཱུྃ་འཆང་པ་པོའི་རླུང་རྟ་བསྐྱེད༔ བར་འདབས་བརྒྱད་ལ༔ ༀ༔ལཾ༔ལཾ༔ཧོ་ཕན༔ལཾ༔ལཾ༔ཡེ་སྭཱ་ཧཱ༔ ཕྱིའི་མུ་འཁྱུད་ལ༔ ཕྱིའི་མུ་འཁྱུད་ལ༔ༀ་བཛྲ་གུ་རུ་ཀརྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛ༔ རླུང་རྟ་བསྐྱེད་སྭཱ་ཧཱ༔ སྲོག་ཆག་བཞི་ཀ་ཞལ་ཕྱི་ལ་བལྟ་བའོ༔ བར་མཚསམ་རྣམས་སུ་བཀྲ་ཤིས་པའི་རི་མོ་སྣ་ཚོགས་ཀྱིས་གཏམ་པར་བྱའོ༔ མཐའི་མུ་འཁྱུད་ལ༔ ༀ་སརྦ་ཏ་ཐཱ་ག་ཏ་ཨཱ་ཡུ་པུཥྚཾ་ཀུ་རུ་སྭཱ་ཧཱ༔ འཆང་བ་པོའི་སྲོག་ལུས་དབང་ཐང་རླུང་རྟ་ཐམས་ཅད་ཝརྡྷ་ན་བི་ཝརྡྷ་ན་སྭཱཧཱ༔ མཐའ་སྐོར་དུ་དབྱངས་དང་གསལ་བྱེད་རྟེན་འབྲེལ་སྙིང་པོས་བསྐོར་བ་བྱའོ༔ རྫས་ནི་བདུད་རྩི་དཀར་དམར༔ ཕོ་ལ་དཔའ་བོའི་སྐྲ༔ མོ་ལ་དཔའ་མོའི་སྐྲ༔ བཟང་པོ་དྲུག་དང་རིན་ཆེན་རྣམ་ལྔའོ༔ ཕན་ཡོན་ལུས་ལ་ནད་མེད༔ སྲོག་ལ་འཚེ་བ་མེད༔ དབང་ཐང་རྒྱས༔ རླུང་རྟ་དར་བར་འགྱུར་རོ༔ ༈ ཐུགས་རྟེན་རིན་ཆེན་མེ་ལོང་ནི༔ བྱང་སེམས་དཀར་དམར་མཚོན་པའི་ཟངས་དང་དངུལ་བསྲེས་པའི་མེ་ལོང་ལ༔ དབུས་སུ་རྡོ་རྗེའི་ལྟེ་བར་ཨ༔ དེའི་མཐར་རྡརྨ་དྷ་ཏུ་ཨཱ༔ དེའི་མཐར༔ ཡེངས་མེད་ཆོས་ཉིད་དོན་ལ་བལྟ༔ གནས་ལུགས་དྲི་མེད་རྟོག་གྱུར་ཅིག༔ ཅེས་འབྲི༔ དེའི་དོན་ལ་དྲན་ཤེས་ཀྱིས་བསྐྱངས་པས་རྒྱལ་བ་ཀུན་གྱི་དགོངས་པ་རྟོགས་པར་འགྱུར་རོ༔ ༈ ཡོན་ཏན་གཏེར་བུམ་ནི༔ བུམ་པ་ཚད་ལྡན་གཡང་རྫས་སྣ་ཚོགས་དང་༔ བཀྲ་ཤིས་རྟགས་བརྒྱད་ཀྱི་འཁོར་ལོ་ནོར་བུའི་པ་ཏྲ་ཕྲེང་བས་བསྐོར་བ་མུ་འཁྱུད་གསུམ་པ་ལ༔ དབུས་སུ་བྷྲཱུྃ་དེའི་མཐར་མུ་འཁྱུད་ནང་མ་ལ༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛ༔ སྲོག་ལུས་དབང་ཐང་རླུང་རྟ་སརྦ་པུཥྚཾ་ཀུ་རུ་ཡེ་སྭཱཧཱ༔ དེའི་མཐར་མུ་འཁྱུད་བར་མ་ལ་བཀྲ་ཤིས་རྟགས་བརྒྱད༔ དེའི་མཐར་མུ་འཁྱུད་ཐ་མ་ལ་རྟེན་འབྲེལ་སྙིང་པོ༔ མཐའ་བར་མེ་རི་པ་ཏྲས་མཛེས་པར་བྱ༔ རབ་གནས་འཐོར༔ བུམ་པར་བཞུགས་སུ་གསོལ་བས་རླུང་རྟ་དར༔ ཆོས་གཡང་ནོར་གཡང་རྩོལ་བ་མེད་པར་འདུ་བར་འགྱུར་རོ༔ ༈ ཕྱོགས་ལས་རྣམ་རྒྱལ་བ་དན་ནི༔ དབུས་མུ་འཁྱུད་དང་པོ་གླིང་ལྔ་སྤྱིའི་གསོལ་འདེབས་ཚན་ལྔ་རླུང་རྟའི་འདོད་གསོལ་དང་བཅས་པའོ༔ དེའི་ཕྱིར་དཀྱིལ་འཁོར་བརྒྱད་ལ༔ ཨོ་རྒྱན་ལྷ་སྲིན་སྡེ་བརྒྱད་ནས་ཨོ་རྒྱན་ཕྱག་རྒྱ་བཞི་ལྡན་བར༔ དཀྱིལ་འཁོར་གྱི་སྒོ་ཁང་བཞི་ལ་འགྲོ་བ་གནས་འདྲེན་གུ་རུའི་རྣམ་འགྱུར་བཞི་སྟེ༔ ཨོ་རྒྱན་རྡོ་རྗེའི་གུར༔ ཨོ་རྒྱན་དུས་གསུམ་མཁྱེན་པ༔ ཨོ་རྒྱན་སྣང་མཐའི་སྒྱུ་འཕྲུལ༔ ཨོ་རྒྱན་ བདེ་ཆེན་རྒྱལ་པོ་བཞི་ཤར་ནས་རིམ་པར་འགོད༔ སྟེང་གི་རྒྱལ་མཚན་ལ༔ ཐུགས་རྗེ་འགྱུར་མེད་སྟེ༔ འགྲོ་དྲུག་སྡུག་བསྔལ་ཆེན་པོའི་ཉེན་པ་ན༔ སོགས་ཀྱི་སྨོན་ལམ་བྱ༔ མཚམས་རྣམས་སུ་བཀྲ་ཤིས་པའི་རྟགས་བརྒྱད༔ ཕྱོགས་བཞིར་སྟག་སེང་ཁྱུང་འབྲུག་བཞི་འགོད་པར་བྱའོ༔ དེས་སྐུ་ཚེ་བརྟན༔ སྙན་གྲགས་འབར༔ འདུ་བ་རྒྱས༔ མི་མཐུན་པའི་ཕྱོགས་ལས་རྣམ་པར་རྒྱལ་ལེགས་ཚོགས་ཆར་དུས་ཀྱི་རྒྱ་མཚོ་བཞིན་འཕེལ་བར་འགྱུར་རོ༔ ༈ འཕྲིན་ལས་བཀྲ་ཤིས་རླུང་རྟ་ནི༔ ཅང་ཤེས་འཕྲུལ་གྱི་གཤོག་པ་ཅན༔ མདོག་དང་ཡན་ལག་དབང་པོ་རབ་ཏུ་དར་བ༔ རིན་པོ་ཆེའི་རྒྱན་ཆས་སྤྲས་པ༔ རྒྱབ་ཏུ་ནོར་བུ་རིན་པོ་ཆེའི་ལྟོ་བར༔ ༀ་ཀུན་འདུས་སརྦ་འདུ་འདུ་ཧོ༔ བསམ་པ་ལྷུན་གྲུབ་རླུང་རྟ་བསྐྱེད༔ ཞེས་བྲིས་པ༔ མཐའ་སྐོར་བཀྲ་ཤིས་པའི་འདོད་ཡོན་དང་མཆོད་རྫས་སྣ་ཚོགས་ཀྱི་གང་བ༔ མཚམས་བཞིར་སྟག་སེང་ཁྱུང་འབྲུག་བཞི་བརྩེ་བ༔ རླུང་རྟའི་གསོལ་འདེབས་དང་བཅས་རླུང་གི་ལྷ་མོ་ལ་བཅོལ་ནས་བླ་མ་རྒྱལ་བ་སྲས་བཅས་ལ་འབུལ་བར་བྱའོ༔ དེས་བསམ་དོན་ལྷུན་གྱིས་འགྲུབ་པར་འགྱུར་རོ༔ ས་མ་ཡ༔ ཨྠྀི༔ ༈ གསོལ་འདེབས་བསྡུས་པ་བྱ་ན༔ ཧོ༔ བླ་མ་པདྨ་འབྱུང་གནས་ཞི་ཁྲོའི་ལྷ༔ གནས་གསུམ་མཁའ་འགྲོ་དམ་ཅན་སྲུང་མ་ལ༔ འདོད་ཡོན་རྨད་བྱུང་རླུང་རྟ་འདི་འབུལ་ལོ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ས་མ་ཡ༔ མངྒ་ལཾ། ། གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔དབང་གི་བཀོལ་བྱང་ཆེན་མོ།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔དབང་གི་བཀོལ་བྱང་ཆེན་མོ་བཞུགས་སོ༔ ན་མོ་མ་ཧཱ་གུ་རུ་པདྨ་བཛྲ་ཡེ༔ སྤྲོས་བཅས་ལྷ་དབང་སྐུར་བ་ལ༔ སྐུ་འབག་དམ་ཚིག་རྟེན་རྣམས་ནི༔ རྩ་གསུམ་སྔགས་ཀྱི་བྱིན་གྱིས་རླབས༔ མཐོང་ཐོས་རེག་པ་དོན་ལྡན་འགྱུར༔ གཙོ་བོ་རྣམས་ལ་རྩ་བའི་སྔགས༔ འཁོར་ལ་རང་གི་ཡང་སྙིང་དང་༔ རྩ་གསུམ་དྲིལ་སྒྲུབ་གསང་སྔགས་སམ༔ ཐོད་ཕྲེང་རྩལ་གྱིས་གཏད་པར་བྱ༔ བླ་སློབ་དགོངས་པ་དབྱིངས་སུ་གཏད༔ སྣང་བ་དག་པ་རབ་འབྱམས་ངང་༔ བརྡ་དོན་རྟགས་གསུམ་ཅི་བཤད་ཀྱང་༔ ཆོས་ཉིད་དབྱིངས་ལས་རྒྱན་དུ་ཤར༔ ནམ་མཁའ་ལ་ནི་ནམ་མཁའ་བཞིན༔ ཡེ་ཤེས་དབྱིངས་ལས་སྤྲུལ་བའི་ལྷ༔ རིག་པའི་ངོ་བོར་ཆོས་ཉིད་ལྷ༔ རང་ཤར་རང་བཞག་ཀློང་དུ་ཀློད༔ ས་མ་ཡ༔ ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ སྣང་བ་མཐའ་ཡས་ཐུགས་རྗེའི་བྱིན་རླབས་གཡོས༔ སྤྲུལ་སྐུ་པདྨ་འབྱུང་གནས་བྱིན་བརླབས་པས༔ འཛམ་གླིང་བོད་ཀྱི་སེམས་ཅན་དོན་ལ་དགོངས༔ འགྲོ་དོན་རྒྱུན་ཆད་མེད་པའི་ཐུགས་རྗེ་ཅན༔ གུ་རུ་མཚོ་སྐྱེས་རྡོ་རྗེའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྒྱལ་པོ་ཁྲི་སྲོང་ལྡེའུ་བཙན་མན་ཆད་ནས༔ ཆོས་རྒྱལ་གདུང་བརྒྱུད་མཐའ་ནས་མ་སྟོངས་པར༔ དུས་གསུམ་རྒྱུན་ཆད་མེད་པར་བྱིན་གྱིས་རློབས༔ ཆོས་བཞིན་སྤྱོད་པ་ཡོངས་ཀྱི་གཉེན་གཅིག་པོ༔ རྒྱལ་པོ་ཆོས་སྤྱོད་སྐྱོང་བའི་ཐུགས་རྗེ་ཅན༔ གུ་རུ་པདྨ་རྒྱལ་པོའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྐུ་ནི་ལྷོ་ནུབ་སྲིན་པོའི་ཁ་གནོན་མཛད༔ ཐུགས་རྗེས་བོད་ཀྱི་སེམས་ཅན་དོན་ལ་དགོངས༔ མ་རིག་ལོག་པའི་སེམས་ཅན་འདྲེན་པའི་དཔལ༔ ཉོན་མོངས་གདུལ་དཀའི་སེམས་ཅན་ཐབས་ཀྱིས་འདུལ༔ བརྩེ་གདུང་རྒྱུན་ཆད་མེད་པའི་ཐུགས་རྗེ་ཅན༔ གུ་རུ་བློ་ལྡན་མཆོག་སྲེད་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ དུས་ངན་སྙིགས་མའི་མཐའ་ལ་ཐུག་པའི་ཚེ༔ ནངས་རེ་དགོང་རེ་འགྲོ་བའི་དོན་ལ་བྱོན༔ ཉི་ཟེར་འཆར་སྡུད་མདངས་ལ་བཅིབས་ཏེ་བྱོན༔ ཡར་ངོའི་ཚེས་བཅུའི་དུས་སུ་དངོས་སུ་འབྱོན༔ འགྲོ་དོན་སྟོབས་ཆེན་མཛད་པའི་ཐུགས་རྗེ་ཅན༔ གུ་རུ་ཉི་མ་འོད་ཟེར་ལྷ་ཚོགས་ལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྔ་བརྒྱའི་ཐ་མ་རྩོད་དུས་སྙིགས་མ་ལ༔ སེམས་ཅན་ཐམས་ཅད་ཉོན་མོངས་དུག་ལྔ་རགས༔ ཉོན་མོངས་འཆོལ་ཉོག་དུག་ལྔ་རང་རྒྱུད་སྤྱོད༔ དེ་འདྲའི་དུས་ན་ཨོ་རྒྱན་ཐུགས་རྗེས་བསྐྱེད༔ དད་ལྡན་མཐོ་རིས་འདྲེན་པའི་ཐུགས་རྗེ་ཅན༔ གུ་རུ་ཤཱཀྱ་སེངྒེའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཕུར་བའི་གྲུབ་ཐོབ་མི་བརྗེད་གཟུངས་མཆོག་ཐོབ༔ ཐུགས་ཀྱི་གཟུངས་མ་ཡེ་ཤེས་མཚོ་རྒྱལ་གྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཚེ་ལ་དབང་བརྙེས་ཞི་བའི་གཟུངས་མ་མཆོག༔ ཟ་ཧོར་ལྷ་ལྕམ་མནྡཱ་ར་བ་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཀུན་གྲུབ་མ་ཞེས་གྲགས་པ་རྒྱས་པའི་ཡུམ༔ བལ་བོའི་མཁའ་འགྲོ་ཤཱཀྱ་དེ་ཝི་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གསེར་གྱི་རྣ་ཆ་ཅན་ཞེས་དབང་གི་ཡུམ༔ མོན་གྱི་མཁའ་འགྲོ་བཀྲ་ཤིས་ཁྱུ་འདྲེན་མས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གར་བྱེད་ཆེན་མོ་ཞེས་གྲགས་དྲག་པོའི་ཡུམ༔ དཔའ་མོ་ཆེན་མོ་ཀཱ་ལ་སིདྡྷི་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༡༽ནག་ཕྱོགས་འཇིགས་པའི་དམག་གིས་མཐའ་བསྐོར་ནས༔ ཆོས་འཁོར་གཉན་པོ་འཇིག་ལ་ཐུག་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ལྷ་སྲིན་སྡེ་བརྒྱད་འཁོར་དང་བཅས༔ དམག་དཔུང་ཧུར་ཐུམ་བཟློག་པར་ཐེ་ཚོམ་མེད༔ གུ་རུ་དམར་ནག་མེ་ཕྲེང་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གུ་རུ་དྲག་པོའི་ཡུམ་མཆོག་རྣལ་འབྱོར་མ༔ བསྟན་དགྲའི་དཔུང་བཅོམ་བདེ་ཆེན་ཡེ་ཤེས་བསྐྱེད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་དུ་གཤིན་རྗེ་ཡ་མ་རཱ་ཛ་ནག༔ སྟག་ལྤགས་བེར་གསོལ་བེ་ཅོན་དབྱུག་ཐོ་བསྣམས༔ ཟ་བྱེད་ནག་མོ་གཡས་ན་འཁོར་ལོ་དང་༔ གཡོན་ན་མཚོན་གྱི་དྲུ་གུ་བསྣམས་པས་འཁྱུད༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་རུ་བདུད་ནག་རྐོས་རྗེ་དྲང་དཀར་ནག༔ ཕྱག་གཉིས་ཁྲམ་ཤིང་དང་ནི་དགྲ་སྟྭ་བསྣམ༔ བདུད་མོ་རེ་ཏི་མཐིང་ནག་ཁྲམ་ཤིང་དང་༔ ནད་གྱི་རྐྱལ་བ་འཛིན་པ་ཡབ་ལ་འཁྲིལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཏུ་སྲིན་པོ་གློག་ཕྲེང་ལྗང་ནག་རྔམས༔ ཕྱག་གཡས་ཐོག་དང་གཡོན་པས་སེར་བ་འབེབས༔ ཁྲག་མིག་དམར་ནག་ཁྲག་འཛགས་ཕུར་པ་དང་༔ ཁྲག་ཕོར་སྟོབས་པ་ཡབ་ལ་དགྱེས་པར་འཁྲིལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་དུ་གནོད་སྦྱིན་ཡཀྴ་མེ་དབལ་དམར༔ ཕྱག་གཡས་རལ་གྲི་གཡོན་ན་རིན་པོ་ཆེ། ནག་མོ་མི་སྲུན་ལྗང་ནག་རལ་གྲི་དང་༔ གཡོན་ན་ལྕགས་ཀྱི་སྤྱང་མོ་འགྱེད་པས་འཁྲིལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོར་གཟའ་བདུད་སྤུ་གྲི་འབར་བ་ནི༔ དུད་ཁ་མདའ་གཞུ་རྒྱལ་མཚན་་སྦྲུལ་ཞགས་བསྣམས༔ གནམ་སྨན་ཐོག་གི་བུ་ཡུག་མ་དམར་མོ༔ གཡས་གཡོན་ཐོག་མདའ་རུས་སྦལ་བསྣམས་པས་འཁྲིལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་ཀླུ་བདུད་ནག་པོ་སྐུ་མདོག་སེར༔ གཡས་ན་སྦྲུལ་ཞགས་གཡོན་པས་ཆུ་སྲིན་འཛིན༔ ཀླུ་མོ་ལྕམ་ཅིག་དམར་མོ་གཡས་ནད་རྐྱལ༔ གཡོན་དུག་གི་སྤུ་གྲི་འཛིན་པས་འཁྲིལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་ལྷ་ཆེན་དབང་ཕྱུག་ཆེན་པོ་དམར༔ གཡས་ན་རླུང་ཞགས་གཡོན་ན་ལྕགས་ཀྱུ་འདེབས༔ ཨུ་མ་དེ་ཝཱི་དམར་མོ་སྲིད་གསུམ་ཀུན༔ གསལ་བའི་མེ་ལོང་གཏེར་སྒྲོམ་འཛིན་པས་འཁྲིལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་ཁྲག་འཐུང་མ་ཧཱ་ཀཱ་ལ་མཐིང་༔ གཡས་ན་ཟངས་གྲི་གཡོན་ན་ལྕགས་པར་འཛིན༔ དུང་སྐྱོང་མ་ནག་མོ་གནམ་ལྕགས་རལ་གྲི་དང་༔ ནེའུ་ལེའི་རྐྱལ་པ་འཛིན་པས་ཡབ་ལ་འཁྲིལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྡེ་བརྒྱད་ཀྱི་སྲོག་འཁོར་ཐོགས་ལ༔གུ་རུ་དམར་ནག་མེ་ཕྲེང་བཀའ་ཉན་པ༔ སྔགས་བདག་སྡེ་དཔོན་དཔོན་ཆེན་པོ་སུམ་ཅུ་དང་༔ དཔལ་གྱི་མགོན་པོ་བདུན་ཅུ་རྩ་ལྔ་ལ་སོགས༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༢༽སེམས་ཅན་སྒྱུ་ལུས་འཇིག་པའི་ནད་བྱུང་ནས༔ མི་བཟོད་སྡུག་བསྔལ་ཆེན་པོས་ནོན་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་སྨན་གྱི་བླ་དང་དབྱེར་མེད་པས༔ ཚེ་ཟད་མ་ཡིན་བར་ཆད་ངེས་པར་སེལ༔ གུ་རུ་སྨན་གྱི་བླ་མའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྒྲ་དབྱངས་རྒྱལ་པོ་སྐུ་མདོག་སེར་འོད་འབར༔ མཛེས་པའི་ཕྱག་གཉིས་མཆོག་སྤྱིན་ཕྱག་རྒྱ་མཛད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མྱ་ངན་མེད་མཆོག་སྐུ་མདོག་དམར་འོད་འབར༔ ཕྱག་གཉིས་ཏིང་འཛིན་གཡོ་མེད་མཉམ་བཞག་རྒྱ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མཚན་ལེགས་ཡོངས་གྲགས་སྐུ་མདོག་སེར་འོད་འབར༔ ཕྱག་གཡས་སྐྱབས་སྤྱིན་གཡོན་པ་མཉམ་བཞག་མཛད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གསེར་བཟང་དྲི་མེད་སྐུ་མདོག་སེར་འོད་འབར༔ ཕྱག་གཉིས་ཆོས་འཆད་ཕྱག་རྒྱས་ཐུགས་གར་བརྒྱན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཆོས་བསྒྲགས་རྒྱལ་པོ་སྐུ་མདོག་དཀར་འོད་འབར༔ ཕྱག་གཉིས་ཆོས་འཆད་ཕྱག་རྒྱས་ཐུགས་གར་བརྒྱན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མངོན་མཁྱེན་རྒྱལ་པོ་སྐུ་མདོག་དམར་འོད་འབར༔ ཕྱག་གཡས་མཆོག་སྦྱིན་གཡོན་པ་མཉམ་བཞག་མཛད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤཱཀྱ་ཐུབ་པ་གསེར་མདོག་འོད་ཟེར་འབར༔ ཕྱག་གཡས་བདུད་འདུལ་གཡོན་པ་མཉམ་བཞག་རྒྱ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སངས་རྒྱས་སྟོང་སོགས་ཕྱོགས་བཅུའི་བདེ་གཤེགས་རྣམས༔ ཀུན་ཀྱང་མཚན་དཔེ་ཡོངས་རྫོགས་ཚངས་སྤྱོད་ཆས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བདུད་རྩི་སྨན་གྱི་ལྷ་མོ་སྒེག་ལ་མཛེས༔ བཞི་བརྒྱ་རྩ་བཞིའི་ནད་སེལ་སྨན་སྣོད་ཐོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རིགས་དྲུག་དྲང་སྲོང་དཀའ་ཐུབ་རྣལ་འབྱོར་ཆས༔ ཚངས་སྐུད་ཐོར་ཅོག་དྲི་མེད་རས་གཟན་གསོལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གནོད་སྦྱིན་སྡེ་དཔོན་བཅུ་གཉིས་གཡོག་དང་བཅས༔ གོ་ཁྲབ་བེར་གྱོན་མཚོན་ཆ་སྣ་ཚོགས་ཐོགས༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྒྱལ་པོ་སྡེ་བཞི་རང་རྟགས་ཕྱག་མཚན་བསྣམས༔ སྒྲུབ་པ་པོ་ལ་ལུས་དག་གྲིབ་བཞིན་འགྲོགས༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༣༽འབྱུང་བ་དགྲར་ལངས་ས་བཅུད་ཉམས་པའི་ཚེ༔ སེམས་ཅན་མུ་གེའི་ནད་ཀྱིས་གཟིར་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་མཁའ་འགྲོ་ནོར་ལྷའི་ཚོགས་དང་བཅས༔ དབུལ་ཕོངས་བཀྲེས་སྐོམ་སེལ་བར་ཐེ་ཚོམ་མེད༔ གུ་རུ་དྲྭ་བ་སྡོམ་པའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་གྱི་ཕྱོགས་ནས་ནོར་གཡང་སྡུད་མཛད་པ༔ ནོར་བུ་བཟང་པོ་དཔལ་ལྡན་ཟླ་ཤེལ་མ་༔ ལྷོ་ཡི་ཕྱོགས་ནས་ནོར་གཡང་སྡུད་མཛད་པ༔ གང་བ་བཟང་པོ་དཔལ་ལྡན་ཟས་སྤྱིན་མ་༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཀྱི་ཕྱོགས་ནས་ནོར་གཡང་སྡུད་མཛད་པ༔་ནོར་མཆོག་སྤྱིན་མཛད་དཔལ་ལྡན་བཞིན་བཟང་མ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་གི་ཕྱོགས་ནས་ནོར་གཡང་སྡུད་མཛད་པ༔ རྣམ་མང་ཐོས་སྲས་དཔལ་ལྡན་ནོར་རྒྱུན་མ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོའི་ཕྱོགས་ནས་ནོར་གཡང་སྡུད་མཛད་པ༔ རོལ་བའི་ཕྲེང་ཅན་དཔལ་ལྡན་རབ་བཟང་མ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་ཕྱོགས་ནས་ནོར་གཡང་སྡུད་མཛད་པ༔ ནོར་བདག་འཇམ་འཁྱིལ་དཔལ་ལྡན་རབ་སྦས་མ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་ཕྱོགས་ནས་ནོར་གཡང་སྡུད་མཛད་པ༔ ཞལ་གྱི་དབང་ཕྱུག་དཔལ་ལྡན་ལྷ་མཆོག༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་ཕྱོགས་ནས་ནོར་གཡང་སྡུད་མཛད་པ༔ སྤྱོད་པའི་དབང་པོ་དཔལ་ལྡན་དབྱངས་ཅན་མ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནོར་ལྷའི་རིགས་གྱུར་བྱེ་བ་ཕྲག་བརྒྱ་སོགས་༔ དགོས་འདོད་རིན་ཆེན་ཆར་བ་འབེབས་མཛད་པ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༤༽ལས་ཅན་འགྲོ་བའི་དོན་དུ་གཏེར་འདོན་ན༔ དམ་ཚིག་ཟོལ་ཟོག་མེད་པའི་དཔའ་གདེང་གིས༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཡི་དམ་ལྷ་ཡི་ཚོགས་དང་བཅས༔ ཕ་ནོར་བུ་ཡིས་ལོན་པར་ཐེ་ཚོམ་མེད༔ གུ་རུ་དཔལ་ཆེན་བཀའ་བརྒྱད་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ཕྱོགས་ཡང་དག་ཐུགས་ཀྱི་དཀྱིལ་འཁོར་དུ༔ དཔལ་ཆེན་ཡང་དག་སྔོན་པོ་རྡོར་དྲིལ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་མདུན་འཇམ་དཔལ་སྐུའི་དཀྱིལ་འཁོར་དུ༔ གཤིན་རྗེ་གཤེད་པོ་སེར་པོ་དབྱུག་ཏོ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཕྱོགས་པདྨ་གསུང་གི་དཀྱིལ་འཁོར་དུ༔ དབང་ཆེན་རྟ་མགྲིན་དམར་པོ་པདྨ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཕྱོགས་འཕྲིན་ལས་ཕུར་བའི་དཀྱིལ་འཁོར་གྱི༔ རྡོ་རྗེ་གཞོན་ནུ་སྔོན་པོ་ཕུར་བ་འདྲིལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོ་མ་མོ་རྦོད་གཏོང་དཀྱིལ་འཁོར་གྱི༔ དཔལ་ཆེན་མངོན་རྫོགས་མཐིང་ནག་ཁྲམ་ཤིང་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་བདུད་རྩི་ཡོན་ཏན་དཀྱིལ་འཁོར་དུ༔ བདུད་རྩི་འཁྱིལ་བ་ལྗང་ཁུ་བུམ་པ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་འཇིག་རྟེན་མཆོད་བསྟོད་དཀྱིལ་འཁོར་དུ༔ དྲེགས་པ་ཀུན་འདུལ་སྔོན་པོ་དབང་སྙིང་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་དམོད་པ་དྲག་སྔགས་དཀྱིལ་འཁོར་དུ༔ སྟོབས་ལྡན་ནག་པོ་དམར་ནག་འཁོར་ལོ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཡེ་ཤེས་མེ་དཔུང་འབར་བའི་ཀློང་ཡངས་ནས༔ མཁའ་ཁྱབ་རྡོ་རྗེ་ཁྱུང་གིས་སྤྲུལ་གར་འགྱེད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གཞན་ཡང་ཡི་དམ་ཐེག་དགུ་རྒྱུད་སྡེ་དྲུག༔ རྒྱལ་བའི་དཀྱིལ་འཁོར་རབ་འབྱམས་ཚོམ་བུ་འབུམ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༥༽ སྦས་ཡུལ་ནགས་རོང་དབེན་ས་སྙོགས་པའི་ཚེ༔ ཁ་ཆར་བུ་ཡུག་འཚུབས་ཤིང་ལམ་འགགས་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་གཞི་བདག་གཉན་པོའི་འཁོར་དང་བཅས༔ ཆོས་མཛད་ལམ་སྣ་འདྲེན་པར་ཐེ་ཚོམ་མེད༔ གུ་རུ་ཟིལ་གནོན་དྲག་རྩལ་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འཇམ་དཔལ་རྡོ་རྗེ་རྣོན་པོ་སྐུ་མདོག་སྔོ༔ ཕྱག་གཡས་རལ་གྲི་མེ་འབར་མཁའ་ལ་ཕྱར༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མགྲིན་པར་ཉི་མའི་གདན་ལ་རྟ་མགྲིན་དམར༔ གཡས་པས་ཐོད་དབྱུག་གཡོན་པས་སྡིག་མཛུབ་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གསང་བའི་བདག་པོ་མཐིང་ཀ་ཞལ་གཅིག་པ་༔ ཕྱག་གཉིས་རྡོ་རྗེ་ཕྱར་ཞིང་གཡོན་སྡིག་མཛུབ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཡེ་ཤེས་མགོན་པོ་མཐིང་ནག་ཞལ་གཅིག་པ༔ ཕྱག་གཉིས་གྲི་གུག་ཐོད་ཁྲག་འདོར་སྟབས་ཅན༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གཟའ་བདུད་ཁྱབ་འཇུག་ཆེན་པོ་རཱ་ཧུ་ལ༔ ཉི་ཟླ་གཟའ་སྐར་འབྱུང་བའི་བདག་པོར་བཞེངས༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འཁོར་དུ་ཤར་ཕྱོགས་ཞིང་སྐྱོང་སེངྒེའི་གདོང་༔ དགེས་ཡུམ་སི་ན་ར་མ་མི་ལྤགས་གསོལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་རུ་བསེ་ཡི་སྐྱེ་བུ་གདུག་པ་ཅན༔ ཟངས་ཀྱི་ཕུར་པས་དགྲ་གདོན་བགེགས་ཚོགས་སྒྲོལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཏུ་ལྕགས་ཀྱི་སྐྱེས་བུ་དྲག་རྩལ་ཅན༔ ཤེལ་གྱི་ཕུར་པས་དགྲ་གདོན་བགེགས་ཚོགས་སྒྲོལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་དུ་དུང་གི་སྐྱེས་བུ་ཆེན་པོ་མི་བཟད་པ༔ དུང་གི་ཕུར་པ་དྲིལ་ཞིང་དགྲ་བགེགས་སྒྲོལ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོར་དམ་ཅན་སྐྱེས་བུ་རྡོ་རྗེ་ལེགས༔ དམར་ནག་ཕྱག་གཉིས་རྡོ་རྗེ་དགྲ་སྙིང་འཛིན༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་རྨ་ཆེན་སྤོམ་ར་སྐུ་མདོག་དཀར༔ གཡས་པ་མདུང་དང་གཡོན་པ་ནོར་གཞོང་འཛིན༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་གཉན་ཆེན་ཐང་ལྷ་སྐུ་མདོག་དཀར༔ ཕྱག་གཡས་སྦ་ལྕག་གཡོན་པས་ཤེལ་ཕྲེང་འདྲེན༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་ལྷ་མོ་གཉན་གྱི་རེ་མ་ཏི༔ མཐིང་ནག་རལ་གྲི་ཐོད་པ་ནེའུ་ལེ་འཛིན༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྲིད་པ་ཆགས་པའི་ལྷ་རབས་མཆེད་དགུ་དང་༔ དགེ་བསྙེན་ཉེར་གཅིག་བརྟན་མ་བཅུ་གཉིས་དང་༔ ཆེ་གཉན་བཙན་པོ་རི་དབང་ཡུལ་གྱི་ལྷ༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྗེ་ཡི་མགུལ་ལྷ་བཅུ་གསུམ་ལ་སོགས་པ༔ སྲིད་པའི་མཐུ་ཆེན་ལྷ་ཀླུ་དྲེགས་པའི་ཚོགས༔ སྐལ་ལྡན་འདི་ལ་སྲུང་སྐྱོབས་མཐུ་དབང་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༦༽སྟག་གཟིག་དོམ་དྲེད་དུག་སྦྲུལ་མཆེ་བ་ཅན༔ འབྲོག་ཆེན་འཇིགས་པའི་འཕྲང་ལ་འགྲིམས་པའི་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་དཔའ་བོ་གིང་དང་སྲུང་མར་བཅས༔ གདུག་པའི་སེམས་ཅན་སྐྲོད་པར་ཐེ་ཚོམ་མེད༔ གུ་རུ་སེངྒེ་སྒྲ་སྒྲོགས་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཡུམ་མཆོག་བདུད་འདུལ་དྲག་མོ་སེང་གེའི་གདོང༔ དམར་ནག་ཞལགཅིག་ཕྱག་གྲི་ཐོད་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་དུ་རྡོ་རྗེ་དཔའ་བོ་སྐུ་མདོག་མཐིང་༔ རྡོ་རྗེ་དཔའ་མོ་སྔོ་སྐྱ་སྒེག་པའི་ཉམས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་རུ་རིན་ཆེན་དཔའ་པོ་སྐུ་མདོག་སེར༔ རིན་ཆེན་དཔའ་མོ་སེར་སྐྱ་སྙེམ་པའི་ཉམས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཏུ་པདྨ་དཔའ་བོ་སྐུ་མདོག་དམར༔ པདྨ་དཔའ་མོ་དམར་སྐྱ་ཆགས་པའི་ཉམས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་དུ་ལས་ཀྱི་དཔའ་བོ་སྐུ་མདོག་ལྗང་༔ ལས་ཀྱི་དཔའ་མོ་ལྗང་སྐྱ་ཁྲོ་བའི་ཉམས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོར་འགུགས་གིང་མཐིང་ནག་ལྕགས་ཀྱུ་འཛིན༔ ཡུམ་མཆོག་རྡོ་རྗེ་སྔོན་མོ་རྡོ་རྗེ་ཐོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་འཛིན་གིང་སེར་ནག་རལ་གྲི་འཛིན༔ རིན་ཆེན་སེར་མོ་རིན་ཆེན་ཐོགས་པས་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་སྟོབ་གིང་དམར་ནག་ཐོད་སྙིང་འཛིན༔ པདྨ་དམར་མོ་པདྨ་ཐོགས་པས་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་རྒྱུག་གིང་ལྗང་ནག་རྒྱུ་ཞགས་འཛིན༔ ཀརྨ་ལྗང་གུ་རྒྱ་གྲམ་ཐོགས་པས་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ དཔའ་བོ་མཁའ་འགྲོ་གིང་ཕོ་ཀིང་མོའི་ཚོགས༔ བྱེ་བ་དཔག་མེད་ཉི་ཟེར་རྡུལ་བཞིན་འཁྲིགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༧༽ས་ཆུ་མེ་རླུང་འབྱུང་བའི་བར་ཆད་ཀྱིས༔ སྒྱུ་ལུས་ཉེན་ཅིང་འཇིག་པའི་དུས་བྱུང་ཚེ༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་འབྱུང་བ་བཞི་ཡི་ལྷ་མོར་བཅས༔ འབྱུང་བ་རང་སར་ཞི་བར་ཐེ་ཚོམ་མེད༔ གུ་རུ་པདྨ་བཛྲ་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རིགས་ཀྱི་བདག་པོ་བཅོམ་ལྡན་བདག་ཚེ་དཔག་མེད༔ ཚེ་བུམ་འཛིན་པ་གོས་དཀར་ཡུམ་དང་འཁྲིལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་དུ་ཞེ་སྡང་རྡོ་རྗེ་རྡོ་རྗེ་མཐིང་༔ སྐྱོད་བྱེད་དམར་མོ་རྡོ་རྗེ་གྲི་གུག་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོར་རུ་ང་རྒྱལ་རྡོ་རྗེ་རིན་ཆེན་སེར༔ གཤིན་རྗེ་འཇོམས་མ་ལྗང་གུ་རིན་ཆེན་ཐོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཏུ་འདོད་ཆགས་རྡོ་རྗེ་པདྨ་དམར༔ སྲེག་བྱེད་སྔོན་མོ་པདྨ་གྲི་གུག་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་དུ་ཕྲག་དོག་རྡོ་རྗེ་རྒྱ་གྲམ་ལྗང་༔ ཙན་ཏི་ཀ་སེར་རྒྱ་གྲམ་གྲི་གུག་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོར་གཏི་མུག་རྡོ་རྗེ་འཁོར་ལོ་སྨུག༔ རྨོངས་བྱེད་དཀར་མོ་ཁ་ཊྭཱྃ་འཛིན་པས་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་བདེ་བའི་རྡོ་རྗེ་པད་ཞགས་སེར༔ ལཱ་མ་སྔོན་མོ་ལྕགས་ཀྱུ་འཛིན་པས་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་མཚོ་སྐྱེས་རྡོ་རྗེ་བུམ་པ་དམར༔ མནྡཱར་བ་པད་སྡོང་དཀར་ལ་སྔོ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་ཁྲག་འཐུང་རྡོ་རྗེ་དགྲ་སྟྭ་སྨུག༔ གསོད་བྱེད་སྤུ་གྲི་ལྗང་མོ་ཡབ་ལ་འཁྲིལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤ་ཁམས་སེང་གདོང་དཀར་མོ་རྡོ་རྗེ་འཛིན༔ དྲོད་ཁམས་འོད་གསལ་གླང་གདོང་རིན་ཆེན་སྔོན༔ ཁྲག་ཁམས་མཉེན་གསལ་སྤྱང་གདོང་པདྨ་སེར༔ དབུགས་ཁམས་ཡང་གསལ་ཁྱུང་གདོང་རྒྱ་གྲམ་ལྗང་༔ ཆོས་ཁམས་བཀྲག་གསལ་འུག་གདོང་རྡོ་རྗེ་མཐིང་༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་དུ་ཆུ་ཁམས་རྟ་གདོང་ལྕགས་ཀྱུ་དཀར༔ ལྷོར་རུ་ས་ཁམས་ཕག་གདོང་ཞགས་པ་སེར༔ ནུབ་དུ་མེ་ཁམས་སེང་གདོང་ལྕགས་སྒྲོག་དམར༔ བྱང་དུ་རླུང་ཁམས་སྦྲུལ་གདོང་དྲིལ་བུ་ལྗང་༔ དབུས་སུ་མཁའ་ཁམས་ཁྱུང་གདོང་རྡོ་རྗེ་མཐིང་༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བདེ་ཆེན་ལམ་ནས་བདེ་བ་མཆོག་ལ་སྦྱོར༔ གཞན་ཡང་འབྱུང་ལྔའི་མཁའ་འགྲོ་བྱེ་བ་འབུམ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༨༽ལམ་འཕྲང་འཇིགས་པའི་འཕྲང་ལ་འགྲིམས་པའི་ཚེ༔ བསད་ཁྱེར་ཇག་པ་ཆོམ་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་ཕྱག་རྒྱ་བཞི་ཡི་དགོངས་པར་ལྡན༔ ཙོ་ར་མི་རྒོད་རྔམ་སེམས་བརླག་པར་བྱེད༔ གུ་རུ་རྟ་མཆོག་རོལ་བའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གཙུག་གི་རྒྱན་གཅིག་པདྨ་ཐོད་ཕྲེང་རྩལ༔ གསང་བའི་ཡུམ་མཆོག་རྡོ་རྗེ་ཕག་མོ་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ཕྱོགས་ཞི་བྱེད་གསང་བ་ཡེ་ཤེས་དཀར༔ འཇོ་སྒེག་བརྩེ་བའི་འཛུམ་ཞལ་རྣམ་པར་ངོམ༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་དཀར་པོ་རྡོར་དྲིལ་འཛིན་པའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ཕྱོགས་རྒྱས་བྱེད་གསང་བ་ཡེ་ཤེས་སེར༔ དགྱེས་བཞད་སྙེམ་པའི་འགྱིང་ཉམས་ཅིར་ཡང་སྟོན༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་སེར་པོ་རྡོར་དྲིལ་འཛིན་པའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཕྱོགས་དབང་བྱེད་གསང་བ་ཡེ་ཤེས་དམར༔ རྗེས་ཆགས་བཟི་བས་མིག་བརྡ་སྣ་ཚོགས་བསྒྱུར༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་དམར་པོ་རྡོར་དྲིལ་འཛིན་པའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཕྱོགས་འཇིགས་བྱེད་གསང་བ་ཡེ་ཤེས་ལྗང་༔ ཁྲོ་འཛུམ་དཔའ་བའི་སྟངས་སྟབས་སྣ་ཚོགས་བསྒྱུར༔ ཕྱག་གཡས་ཅིང་ཏེའུ་གཡོན་པས་དྲིལ་བུ་འཁྲོལ༔ དཔའ་བོ་ལྗང་ཁུ་རྡོར་དྲིལ་འཛིན་པའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་སྒོར་དཀར་མོ་ལྕགས་ཀྱུ་མེ་ལོང་འཛིན༔ ལྷོ་སྒོར་སེར་མོ་ཞགས་པ་གཏེར་བུམ་འཛིན༔ ནུབ་སྒོར་དམར་མོ་ལྕགས་སྒྲོག་པད་ཕོར་འཛིན༔ བྱང་སྒོར་ལྗང་མོ་དྲིལ་བུ་ཕུར་བུ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༩༽གང་ཞིག་གཤེད་མའི་དམག་གིས་མཐའ་བསྐོར་ནས༔ མཚོན་ཆ་རྣོན་པོས་འདེབས་ཤིང་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་རྡོ་རྗེའི་གུར་དང་ལྡན་པ་ཡིས༔ གཤེད་མ་དྲེད་ཅིང་མཚོན་ཆ་འཐོར་བར་འགྱུར༔ གུ་རུ་རྡོ་རྗེ་གྲོ་ལོད་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གསུང་གི་དབང་ཕྱུག་འཕགས་པ་སྤྱན་རས་གཟིགས༔ པདྨ་རྒྱལ་པོ་ཞལ་གཅིག་ཕྱག་གཉིས་དམར༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྟེང་དུ་ཧཱུྃ་ཀཱ་ར་དང་སྒྲ་འབྱིན་མ༔ དཀར་མོ་འཁོར་ལོ་འཛིན་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་དུ་རྣམ་པར་རྒྱལ་བ་མདའ་སྙེམས་མ༔ སྔོ་སྐྱ་རྡོ་རྗེ་འཛིན་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་རུ་གཤིན་རྗེའི་གཤེད་ཆེན་དུར་བདག་མ༔ སེར་སྐྱ་རལ་གྲི་བསྣམས་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཏུ་དབང་ཆེན་རྟ་མགྲིན་ཙཎྜ་ལཱི༔ ལྗང་གུ་དབྱུག་ཏོ་འཛིན་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་དུ་བདུད་རྩི་འཁྱིལ་བ་རླུང་འབྱིན་མ༔ སྔོ་སྐྱ་རྔ་ཡབ་ཐོགས་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོར་དབྱུག་སྔོན་ཅན་དང་རྡོ་རྗེ་སྡེར༔ དམར་སེར་རལ་གྲི་ཕྱར་བས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་མི་གཡོ་མགོན་པོ་གཏུན་ཁུང་མ༔ དམར་མོ་ཐོ་བ་གདེངས་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་གཞན་གྱིས་མི་ཐུབ་རྡོ་རྗེ་སྙེམས༔ ལྗང་གུ་བུམ་པ་བཏེགས་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་ཁམས་གསུམ་རྣམ་རྒྱལ་སྐུལ་བྱེད་མ༔ སེར་སྐྱ་རྩེ་གསུམ་འཛིན་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ འོག་ཏུ་སྟོབས་པོ་ཆེ་དང་ཡུམ་གསོད་བྱེད་མ༔ སེར་མོ་དགྲ་སྟྭ་བསྣམས་པས་ཡབ་ལ་འཁྱུད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ དཔའ་བོ་གིང་ཆེན་སྡེ་བཞི་ལས་མདོག་ཅན༔ དཔའ་མོ་རྣལ་འབྱོར་མ་བཞི་གཅེར་བུའི་ཉམས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྡོ་རྗེའི་ཁྲོ་ཚོགས་ནམ་མཁའ་ཁྱབ་པར་འཕྲོ༔ ཧ་ཧ་ཧཱུྃ་ཕཊ་དྲག་སྔགས་འབྲུག་ལྟར་སྡིར༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༡༠༽ནམ་ཞིག་ཚེ་ཟད་འཆི་བའི་དུས་བྱུང་ཚེ༔ གནད་གཅོད་སྡུག་བསྔལ་དྲག་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་ཐོབ༔ ཨོ་རྒྱན་སྣང་བ་མཐའ་ཡས་སྤྲུལ་བ་སྟེ༔ བདེ་བ་ཅན་གྱི་ཞིང་དུ་ངེས་པར་སྐྱེ༔ གུ་རུ་སྤྱན་རས་གཟིགས་དབང་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རིགས་བདག་འོད་དཔག་མེད་པ་སྐུ་མདོག་དམར༔ ཚངས་སྤྱོད་མཉམ་བཞག་བེཌཱུརྱཱ་སྣོད་བསྣམས༔ དབང་ཆེན་རྟ་མགྲིན་ཞལ་གཅིག་ཕྱག་གཉིས་དམར༔ འདོར་སྟབས་རུས་རྒྱན་ཐོད་བྱུག་ཞགས་པ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རྡོ་རྗེ་སེམས་དཔའ་ཞལ་གཅིག་ཕྱག་གཉིས་དམར༔ རྡོར་དྲིལ་འཛིན་རོལ་སྟབས་ལོངས་སྐུའི་ཆས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ ཤར་དུ་ས་སྙིང་རིན་ཆེན་མྱུ་གུ་དཀར༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ ཤར་ལྷོར་ཕྱག་རྡོར་ལྗང་གུ་རྡོ་རྗེ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ ལྷོར་ནམ་སྙིང་དཀར་པོ་རལ་གྲི་བསྣམས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ ལྷོ་ནུབ་སྤྱན་རས་གཟིགས་དམར་པདྨ་འཛིན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ ནུབ་ཏུ་སྒྲིབ་སེལ་ལྗང་གུ་པུ་སྟི་ཐོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ ནུབ་བྱང་ཀུན་བཟང་དམར་པོ་རིན་པོ་ཆེ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ བྱང་དུ་བྱམས་པ་དཀར་སེར་ཀླུ་ཤིང་ཕྱར༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྙིང་རྗེ་ཆེན་པོས་སྙིགས་དུས་འགྲོ་བ་འདུལ༔ བྱང་ཤར་འཇམ་དཔལ་དཀར་ལྗང་ཨུཏྤ་ལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཆུབ་སེམས་དཔའ་དཔག་ཏུ་མེད་པའི་འཁོར༔ ཐམས་ཅད་གསེར་མདོག་ལོངས་སྐུའི་ཆ་ལུགས་ཅན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ༡༡༽སྒྱུ་ལུས་གཡར་པོ་ཞིག་པའི་བར་དོ་རུ༔ འཁྲུལ་སྣང་ཉིང་འཁྲུལ་ཆེན་པོས་ཉེན་པ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་དུས་གསུམ་མཁྱེན་པའི་ཐུགས་རྗེ་ཡིས༔ འཁྲུལ་སྣང་རང་གྲོལ་སྟོན་པར་ཐེ་ཚོམ་མེད༔ གུ་རུ་སྣང་བ་མཐའ་ཡས་ལྷ་ཚོགས་ལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ ཤར་ལྷོའི་རྫོགས་པའི་སངས་རྒྱས་རྣམ་པར་གཟིགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ལྷོ་ཕྱོགས་རྫོགས་པའི་སངས་རྒྱས་གཙུག་ཏོར་ཅན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ ལྷོ་ནུབ་རྫོགས་པའི་སངས་རྒྱས་ཐམས་ཅད་སྐྱོབ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ ནུབ་ཕྱོགས་རྫོགས་པའི་སངས་རྒྱས་འཁོར་བ་འཇིག༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ ནུབ་བྱང་རྫོགས་པའི་སངས་རྒྱས་གསེར་ཐུབ་མཚན༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ བྱང་རྫོགས་པའི་སངས་རྒྱས་འོད་སྲུང་ཞབས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ བྱང་ཤར་རྫོགས་པའི་སངས་རྒྱས་ཤཱཀྱའི་དབང་༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ སྤང་རྟོགས་མཐར་ཕྱིན་གཞན་དོན་ལྷུན་གྱིས་གྲུབ༔ ངན་སོང་གནས་འདྲེན་རྒྱལ་བ་ཐུགས་རྗེ་ཅན༔ རྫོགས་པའི་སངས་རྒྱས་གང་གཱའི་ཀླུང་གྲངས་མཉམ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ དུས་གསུམ་སངས་རྒྱས་ཀྱི་སྐུས་དབང་སྐུར་བར་བྱའོ༔ ༡༢༽ གཞན་ཡང་ལས་དང་རྐྱེན་གྱིས་དབང་གྱུར་ཏེ༔ འཁྲུལ་སྣང་དངོས་པོར་ཞེན་ཅིང་སྡུག་བསྔལ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ ཨོ་རྒྱན་བདེ་ཆེན་རྒྱལ་པོའི་ངོ་བོ་སྟེ༔ འཁྲུལ་སྣང་སྡུག་བསྔལ་རྩད་ནས་གཞིག་པར་བྱེད༔ གུ་རུ་ཀུན་ཏུ་བཟང་པོའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མདུན་དུ་རྒྱལ་སྲས་རྡོ་རྗེ་སེམས་དཔའ་ནི༔ མཐིང་གསལ་ཞལ་གཅིག་ཕྱག་གཉིས་རྡོར་དྲིལ་འཛིན༔ ཡུམ་མཆོག་སངས་རྒྱས་སྤྱན་མ་མཐིང་སྐྱའི་ཞལ༔ རིགས་འདུས་དཔའ་བོ་ཆེན་པོ་ཡབ་ཡུམ་གྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་དུ་བཅོམ་ལྡན་རྣམ་པར་སྣང་མཛད་ནི༔ དཀར་གསལ་ཞལ་གཅིག་ཕྱག་གཉིས་འཁོར་ལོ་འཛིན༔ ཡུམ་མཆོག་དབྱིངས་ཕྱུག་སྐུ་མདོག་དཀར་དམར་མདངས༔ རྡོ་རྗེའི་རིགས་ཀྱི་དཔའ་བོ་མཁའ་འགྲོའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ཕྱོགས་བཅོམ་ལྡན་རིན་ཆེན་འབྱུང་ལྡན་ནི༔ སེར་གསལ་ཞལ་གཅིག་ཕྱག་གཉིས་ནོར་བུ་འཛིན༔ ཡུམ་མཆོག་མ་མ་ཀི་ཡི་སྐུ་སེར་སྐྱ༔ རིན་ཆེན་རིགས་ཀྱི་དཔའ་བོ་མཁའ་འགྲོའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་ཕྱོགས་བཅོམ་ལྡན་སྣང་བ་མཐའ་ཡས་ནི༔ རྨ་བྱ་པདྨ་ཉི་ཟླའི་ཁྲི་སྟེང་དུ༔ དམར་གསལ་ཞལ་གཅིག་ཕྱག་གཉིས་པདྨ་འཛིན༔ ཡུམ་མཆོག་གོས་དཀར་མོ་སྐུ་མདོག་དམར་སྐྱ་མཛེས༔ པདྨའི་རིགས་ཀྱི་དཔའ་བོ་མཁའ་འགྲོའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཕྱོགས་བཅོམ་ལྡན་དོན་ཡོད་གྲུབ་པ་ནི༔ ཤང་ཤང་པདྨ་ཉི་ཟླའི་ཁྲི་སྟེང་དུ༔ ལྗང་གསལ་ཞལ་གཅིག་ཕྱག་གཉིས་རྒྱ་གྲམ་འཛིན༔ ཡུམ་ཆེན་དམ་ཚིག་སྒྲོལ་མ་སྐུ་ལྗང་སྐྱ༔ ལས་ཀྱི་རིགས་ཀྱི་དཔའ་བོ་མཁའ་འགྲོའི་ཚོགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཤར་ལྷོར་ཕུར་པ་རྡོ་རྗེ་གཞོན་ནུ་ནི༔ ཞལ་གཅིག་ཕྱག་གཉིས་མཐིང་ནག་འཇིགས་པའི་གཟུགས༔ ཕྱག་གཡས་ཕུར་བ་གཡོན་པས་སྡིག་མཛུབ་མཛད༔ འཁོར་ལོ་རྒྱས་འདེབས་གྲི་ཐོད་འཛིན་པ་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལྷོ་ནུབ་བཛྲ་ཧེ་རུ་ཀ་མཐིང་ནག༔ ཕྱག་གཡས་རྡོ་རྗེ་གཡོན་པས་སྡིག་མཛུབ་མཛད༔ དབྱིངས་ཕྱུག་དཀར་དམར་བྱམས་པའི་ཉམས་དང་ལྡན༔ དགྱེས་པའི་གར་གྱིས་འཁྱུད་པའི་ཡུམ་ཆེན་བཅས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ནུབ་བྱང་རྟ་མགྲིན་མཐིང་ནག་རྟ་དབུ་ལྗང་༔ པདྨའི་དབྱུག་ཏོ་གཡོན་པས་སྡིག་མཛུབ་མཛད༔ པདྨ་གར་དབང་དམར་སྐྱ་ཆགས་པའི་ཉམས༔ འདོད་པའི་ཚུལ་གྱིས་འཁྱུད་པའི་ཡུམ་ཆེན་བཅས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བྱང་ཤར་བདུད་རྩི་འཁྱིལ་བ་སྐུ་མདོག་མཐིང་༔ ཕྱག་གཡས་སྣ་ཚོགས་རྡོ་རྗེ་གཡོན་སྡིག་མཛུབ༔ རྨེ་བ་བརྩེགས་མ་ལྗང་གུ་གཏུམ་པའི་ཞལ༔ དྲག་ཤུལ་ཚུལ་ཀྱིས་འཁྱུད་པའི་ཡུམ་ཆེན་བཅས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཐབས་མཁས་ཐུགས་རྗེས་འཁོར་བ་དོང་ནས་སྤྲུགས༔ མཁྱེན་བརྩེ་ནུས་པའི་སྤྲུལ་བ་བསམ་མི་ཁྱབ༔ སྒྱུ་འཕྲུལ་དྲྭ་བ་ཆེན་པོའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཚིག་རྐང་བཞི་པ་ཞལ་བསྒྱུར་བས་ཞི་ཁྲོ་བཀའ་བརྒྱད་ཡོངས་སུ་རྫོགས་ཀྱིས་དབང་སྐུར་རོ༔ ༡༣༽འགྲོ་དྲུག་སྡུག་བསྔལ་ཆེན་པོས་ཉེན་པ་དང༔ ཁྱད་པར་བདག་སོགས་འགྲོ་བ་སྡུག་བསྔལ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ དད་གུས་མོས་པས་གདུང་བས་གསོལ་འདེབས་ན༔ ཨོ་རྒྱན་ཐུགས་རྗེས་འཕོ་འགྱུར་མེད་པར་གཟིགས༔ གུ་རུ་བདེ་བ་ཆེན་པོའི་ལྷ་ཚོགས་ཀྱིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བདེ་མྱུར་ཁྱད་པར་མཆོག་གིས་གྲུབ་པ་བརྙེས༔ རྣམ་སྨིན་རིག་འཛིན་དཀར་པོ་རྡོ་རྗེ་འཛིན༔ རྨད་བྱུང་བདེ་ཆེན་བསྐྱེད་པའི་རིག་མ་དང་༔ རིག་འཛིན་དཔའ་བོ་མཁའ་འགྲོ་འབུམ་སྡེ་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བདེ་མྱུར་ཁྱད་པར་མཆོག་གིས་གྲུབ་པ་བརྙེས༔ ཚེ་དབང་རིག་འཛིན་སེར་པོ་འཁོར་ལོ་འཛིན༔ རྨད་བྱུང་བདེ་ཆེན་བསྐྱེད་པའི་རིག་མ་དང་༔ རིག་འཛིན་དཔའ་བོ་མཁའ་འགྲོ་འབུམ་སྡེ་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བདེ་མྱུར་ཁྱད་པར་མཆོག་གིས་གྲུབ་པ་བརྙེས༔ ཕྱག་ཆེན་རིག་འཛིན་དམར་པོ་པདྨ་བསྣམས༔ རྨད་བྱུང་བདེ་ཆེན་བསྐྱེད་པའི་རིག་མ་དང་༔ རིག་འཛིན་དཔའ་བོ་མཁའ་འགྲོ་འབུམ་སྡེ་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བདེ་མྱུར་ཁྱད་པར་མཆོག་གིས་གྲུབ་པ་བརྙེས༔ ལྷུན་གྲུབ་རིག་འཛིན་ལྗང་གུ་རྒྱ་གྲམ་འཛིན༔ རྨད་བྱུང་བདེ་ཆེན་བསྐྱེད་པའི་རིག་མ་དང་༔ རིག་འཛིན་དཔའ་བོ་མཁའ་འགྲོ་འབུམ་སྡེ་ཡིས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མཁྱེན་རབ་ཐོགས་མེད་ཐུགས་རྗེས་གདུལ་བྱ་སྐྱོང་༔ ཤེས་རབ་རྒྱུད་ཀྱི་སློབ་དཔོན་དཀར་དམར་བཞད༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མཁྱེན་རབ་ཐོགས་མེད་ཐུགས་རྗེས་གདུལ་བྱ་སྐྱོང་༔ ཉམས་ཆགས་སྐོང་བའི་སློབ་དཔོན་དཀར་ལ་དྭངས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མཁྱེན་རབ་ཐོགས་མེད་ཐུགས་རྗེས་གདུལ་བྱ་སྐྱོང་༔ དམ་ཚིག་དབང་གི་སློབ་དཔོན་དམར་ལ་ཆགས༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ མཁྱེན་རབ་ཐོགས་མེད་ཐུགས་རྗེས་གདུལ་བྱ་སྐྱོང་༔ མན་ངག་ལུང་གི་སློབ་དཔོན་མཐིང་དྭངས་གསལ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རབ་འབྱམས་རྒྱུད་རྡེ་རྒྱ་མཚོའི་བཀའ་བབ་པའི༔ ལྷ་ཀླུ་མི་ཡི་རིག་འཛིན་ཆེན་པོ་དང་༔ འཕགས་ཡུལ་གྲུབ་པའི་སློབ་དཔོན་ཆེན་པོ་བརྒྱད༔ བརྩེ་བའི་སྤྱན་གྱིས་རྗེས་འཇུག་རྣམས་ལ་གཟིགས༔ དག་པའི་ས་བརྙེས་གསང་ཆེན་བསྟན་པ་འཛིན༔ པདྨའི་ལས་ཅན་དག་པ་རྣམ་ལྔའི་འཁོར༔ བོད་ཡུལ་ལས་ཅན་སྙིང་གི་བུ་མཆོག་དགུ༔ སྤྲུལ་བའི་ལོ་པཎ་རྗེ་འབངས་ཉི་ཤུ་ལྔ༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ རིག་འཛིན་བྱེ་བ་འབུམ་སྡེ་གཟི་བརྗིད་འབར༔ རྩ་བ་བརྒྱུད་པའི་བླ་མ་སྤྲིན་བཞིན་འཁྲིགས༔ ཕ་རྒྱུད་དཔའ་བོའི་བྱིན་རླབས་ད་ལ་ལ༔ མ་བརྒྱུད་མཁའ་འགྲོའི་གླུ་ལེན་ཀྱུ་རུ་རུ༔ ལས་བྱེད་གིང་ཆེན་ཕཊ་སྒྲ་སེང་སེ་སེང་༔ དཔལ་གྱི་འཁོར་ཚོགས་གར་སྟབས་ཤིག་སེ་ཤིག༔ སྐལ་ལྡན་འདི་ལ་དབང་སྐུར་བྱིན་ཀྱིས་རློབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ལུས་ལ་བདེ་བའི་རང་དྲོད་ཚ་འུར་འུར༔ ངག་ལ་རིག་སྔགས་ནུས་པ་རྣོ་ཁྱུགས་ཁྱུགས༔ ཡིད་ལ་གཏིང་གསལ་ཡེ་ཤེས་རྗེན་ཅེར་ཅེར༔ ཀ་དག་གཞི་ཐོག་ཕེབས་པར་བྱིན་གྱིས་རློབས༔ གདོད་མའི་རྒྱལ་སར་ཕྱིན་པར་བྱིན་གྱིས་རློབས༔ ཨོཾ་ཨཱ༔ཧཱུྂ༔བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔སིདྡྷི་ཕ་ལ་ཧཱུྂ༔ཨཱཿ གུ་རུའི་སྐུ་ཚབས་ཀྱིས་དབང་བསྐུར་བར་བྱའོ༔ ཨྠྀི༔ ས་མ་ཡ༔ ཞེས་པས་དབང་སྐུར་སྒྲིབ་པ་དག༔ རྒྱལ་བ་རབས་འབྱམས་བདེན་སྟོབས་ཀྱིས༔ སྒོ་གསུམ་རྡོ་རྗེ་གསུམ་དུ་འགྲུབ༔ པདྨ་འབྱུང་དང་བསྐལ་བ་མཉམ༔ རྡོ་རྗེ་ཚེ་དབང་ནོར་བུའི་གཏེར་སྐལ་ལོ༔ ཤུ་བྷཾ། གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ།༄༅། ། ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ་བཞུགས་སོ༔ ན་མོ་པདྨ་བཛྲ་ཡེ༔ འགྲོ་བ་ཡང་དག་སངས་རྒྱས་ལམ༔ སྣ་ཚོགས་ཚུལ་གྱིས་སྟོན་མཛད་པ༔ རང་བྱུང་རང་གྲོལ་སྤྲུལ་བའི་སྐུ༔ སངས་རྒྱས་པདྨ་ལ་ཕྱག་འཚལ༔ ནང་སྒྲུབ་ཡིད་བཞིན་ནོར་བུ་མཆོག༔ ཉམས་ལེན་སྐལ་ལྡན་སྐྱེས་བུ་ཡིས༔ སྒྲུབ་པའི་གནས་སུ་དམ་རྫས་བསག༔ སྐུ་རྟེན་བདེ་བ་ཆེན་པོ་མཆོག༔ གསུང་རྟེན་གསང་སྔགས་གསེར་གྱིས་བྱས༔ ཐུགས་རྟེན་ཤེལ་རྡོ་མེ་ལོང་དང་༔ ཕྱི་ནང་གསང་མཆོད་རྒྱས་པར་བཀྲམ༔ དམ་ཚིག་གཙང་ལ་ལྟ་གདེང་བསྐྱེད༔ ཨ༔ ཀ་དག་དབྱིངས་ལས་ཡེ་ཤེས་རོལ་བའི་རྩལ༔ འོད་གསལ་ལྷུན་གྲུབ་རྒྱན་གྱི་འཁོར་ལོ་ལས༔ སྣང་སྲིད་རྣམ་དག་པདྨོ་བཀོད་པའི་ཞིང་༔ ཟག་མེད་འདོད་ཡོན་ཆོས་དབྱིངས་ཁྱོན་ཀུན་འགེངས༔ སྙོག་བྲལ་མཚོ་དབུས་དྲི་མེད་པདྨའི་སྟེང་༔ ཐོལ་སྐྱེས་རང་བྱུང་བླ་མ་པདྨ་འབྱུང་༔ སྐུ་མདོག་དཀར་དམར་ཞལ་གཅིག་ཕྱག་གཉིས་པ༔ ཞབས་གཉིས་བཞེངས་སྟབས་ཐབས་ཀྱིས་འགྲོ་བ་འདུལ༔ ཕྱག་གཡས་རྡོ་རྗེས་དཔའ་བོ་དབང་སྡུད༔ གཡོན་པའི་ཐོད་པས་མ་ཚོགས་མཁའ་འགྲོ་འགུགས༔ ཞལ་འཛུམ་སྤྱན་གདང་སྤྱན་རྩ་ཉི་ལྟར་འཁྱིལ༔ ཤངས་ཀྱི་གཟེངས་མཐོ་ཚེམས་དཀར་སྙན་ཤལ་རིང་༔ སྨིན་མ་གནག་སྣུམ་ཁྱུང་ཆེན་གཤོག་པ་འདྲ༔ དབུ་ལ་མཐོང་གྲོལ་པདྨའི་ཅོད་པཎ་མཛེས༔ གསང་བའི་གོས་དཀར་ཕོད་ཀ་མཐིང་ཀའི་སྟེང་༔ ཆོས་གོས་དམར་པོ་རིན་ཆེན་སྟོད་གཡོགས་གསོལ༔ ཁྲོ་ཆགས་སྒེག་པས་འགྲོ་བློ་དབང་དུ་སྡུད༔ ཧུར་བག་བརྩེ་བའི་སྤྱན་གྱིས་བདག་ལ་གཟིགས༔ འབྱུང་ལྔ་རྣམ་པར་དག་པའི་མཁའ་འགྲོ་ལྔ༔ ཚོགས་བརྒྱད་རང་སར་དག་པའི་མཚན་མཆོག་བརྒྱད༔ འགྲོ་བའི་རེ་སྐོང་བསམ་པ་ལྷུན་གྲུབ་པའི༔ མ་ངེས་རྣམ་འགྱུར་མཁའ་ལ་འཇའ་ལྟར་ཤར༔ སྐུ་ཡི་མཚན་དཔེས་སྣང་སྲིད་ཟིལ་གྱིས་གནོན༔ གསུང་དབྱངས་སྙན་པས་ལྷ་འདྲེ་མི་གསུམ་འདུལ༔ ཐུགས་ཀྱི་བརྩེ་བས་དད་ལྡན་རྗེས་སུ་འཛིན༔ མཐོང་ཐོས་དྲན་པས་བྱིན་རླབས་གཟི་བྱིན་འབར༔ ཁྱོད་སྐུ་རྡོ་རྗེ་གསུམ་གྱི་དཀྱིལ་འཁོར་ལས༔ ཆོས་ཉིད་སྐུ་དང་ལོངས་སྤྱོད་རྫོགས་པའི་གཏེར༔ ཞི་ཁྲོ་རབ་འབྱམས་བསམ་མི་ཁྱབ་པའི་འཕྲུལ༔ མ་ལུས་རྒྱལ་བའི་ཞིང་ཀུན་ཐེམ་མེར་གཏམ༔ རང་གི་སྙིང་དབུས་ཆོས་ཀྱི་འཁོར་ལོའི་དབྱིངས༔ དད་དམ་འགྱུར་མེད་མི་ཤིག་རྡོ་རྗེའི་ལྟེར༔ མཐིང་གསལ་ཧཱུྃ་གི་ནཱ་དའི་འོད་ཟེར་གྱིས༔ རྒྱལ་ཀུན་རྒྱུད་བསྐུལ་དབྱིངས་ནས་སྤྱན་དྲངས་གྱུར༔ སྤྱན་འདྲེན་པ་ནི༔ ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་ཏུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབས་ཕྱིར་གཤེགས་སུ་གསོལ༔ བུ་ངས་གདུང་བའི་དབྱངས་ཀྱིས་བསྐུལ༔ ཕ་གཅིག་ཐུགས་རྗེ་མ་གཡེལ་བྱོན༔ སྐུ་ཡི་གར་སྟབས་ཤིག་སེ་ཤིག༔ གསུང་གི་བརྡ་གླུ་གྱུ་རུ་རུ༔ ཐུགས་ཀྱི་བྱིན་རླབས་ད་ལ་ལ༔ བརྩེ་ཆེན་སྤྱན་གྱིས་ད་ལྟ་གཟིགས༔ ལུས་ལ་རྡོ་རྗེའི་ཚེ་དབང་སྐུར༔ ངག་ལ་གཞོམ་མེད་སྔགས་རྒྱས་ཐོབ༔ ཡིད་ལ་བདེ་སྟོང་ཡེ་ཤེས་བསྐྱེད༔ དུས་མིན་འཆི་བའི་བར་ཆད་ཟློག༔ འབྱུང་ཁམས་དབང་དུ་བསྒྱུར་བ་དང་༔ འཕོ་མེད་འོད་གསལ་མངོན་ཏུ་གྱུར༔ ཚེ་དང་སྨོན་ལམ་དབང་བཅུ་ཐོབ༔ རྟག་བརྟན་རྡོ་རྗེའི་སྐུ་ཐོབ་ཤོག༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ ཧཱུྃ་གིས་ཐུགས་དམ་བསྐུལ་ལོ་པདྨ་འབྱུང་༔ རྟོགས་སྒྲིབ་བག་ཆགས་སོལ་ཅིག་ཐུགས་རྗེའི་བདག༔ ཁྱོད་ཐུགས་ཟག་པ་ཀུན་བྲལ་མཁའ་ལྟར་བརྡལ༔ བདག་ཡིད་གཅིག་འདྲེས་རང་གྲོལ་དོན་ལ་བལྟ༔ རྩ་སྙིང་ནི༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ དབྱངས་སུ་གྱེར་ཞིང་གསོལ་བ་འདེབས༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ མོས་གུས་རྩེ་གཅིག་ཏུ་བསྐྱེད༔ བླ་མ་ལས་བསམ་རྒྱུ་མེད་པ༔ དད་པ་ལས་བློ་སྣ་མེད་པ༔ སྣང་སྲིད་བླ་མར་ཤར་བའི་ངང་དུ་ལྟ་བའི་གདེང་བསྐྱེད་ལ༔ གསོལ་བ་ཕུར་ཚུགས་སུ་བཏབ་པས༔ དེ་མ་ཐག་ཏུ་བྱིན་རླབས་ཐོབ༔ བརྒྱུད་གསུམ་རིག་འཛིན་བླ་མའི་བྱིན་རླབས་སྙིང་ལ་ཞུགས་ནས་རང་གཞན་གྱི་དོན་རྒྱ་ཆེན་པོ་འགྲུབ་པར་འགྱུར་རོ༔ ཐོད་ཕྲེང་རྩལ་གྱིས་ཛཔྲ་ཀྱིས་བསྐུལ༔ མཉམ་པར་བཞག༔ ཐུགས་དམ་གནད་ནས་བསྐུལ་བ་སོགས་ཉམས་དང་བསྟུན༔ བདུད་རྩི་བྱིན་རླབས་བྱ་འདོད་ན༔ བུམ་པ་གཞལ་ཡས་ཁང་གི་ནང་དུ༔ བུམ་ལྷ་གུ་རུ་པདྨ་འབྱུང་གནས་ཀྱི་ལྷ་ཚོགས་སྤྲིན་འཐིབ་པ་ལྟར་གསལ་བཏབ༔ གནས་གསུམ་ཡི་གེ་གསུམ་ལས་བྱུང་བའི་སྐུ་གསུང་ཐུགས་ཀྱི་བདུད་རྩི་དོན་གཉིས་སྒྲུབ་པའི་ནུས་ལྡན་དུ་དམིགས༔ ཨ་ལས་ཆོས་དབྱིངས་བུམ་པ་རུ༔ བདུད་རྩི་བདེ་ཆེན་དྲོད་རླངས་འཐིལ༔ ཨོཾ་ཨཱ༔ཧཱུྃ་གིས་བྱིན་རླབས་པས༔ མྱོང་གྲོལ་ཡེ་ཤེས་མཆོག་ཏུ་གྱུར༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་དང་༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཐོད་ཕྲེང་རྩལ་གྱི་ཛཔྲ་དབྱངས་བྱ༔ བདུད་རྩི་མྱོང་བས་རྩ་ཁམས་ཀྱི་དཔའ་བོ་མཁའ་འགྲོ་མཉེས་ཤིང་ཚིམ༔ རང་ལུས་རྡུལ་ཕྲ་རབ་ཀྱི་ཆ་རེ་རེ་ནས་པདྨ་འབྱུང་གནས་འཇའ་ལུས་དྭངས་མའི་སྐུ་འགུལ་འགུལ༔ ཤིག་ཤིག༔ འོད་ཆེམ་ཆེམ་དུ་གྱུར་བའི་ངང་ལ་མཉམ་པར་འཇོག༔ གཞན་དོན་ཁྲུས་དང་དབང་བསྐུར་བྱིན་རླབས་བྱས་པས་ཀྱང་དོན་འགྲུབ་པོ༔ ཐུན་སྐབས་སུ༔ ཨ༔ མཁའ་དབྱིངས་རྒྱལ་བ་རབ་འབྱམས་གཙོ་བོར་འདུས༔ གཙོ་བོ་འཇའ་ལུས་ཟུང་འཇུག་རྡོ་རྗེའི་སྐུ༔ འཐེབ་སོར་ཙམ་ཞིག་གཙུག་ནས་སྙིང་དབུས་བབ༔ བྱིན་རླབས་དབང་དང་དངོས་གྲུབ་མཆོག་ཐོབ་དམིགས༔ ཨ་ཨ་ཨ༔ བླ་མའི་ཐུགས་དང་རང་སེམས་དབྱེར་མེད་པ་ངེས་པའི་དོན་ལ་མཉམ་པར་འཇོག༔ སླར་ཡང་སྣང་གྲགས་རྟོག་ཚོགས་བླ་མའི་སྐུ༔ རྩོལ་མེད་མ་བཅོས་རིག་པའི་ངོ་བོར་བཞུགས༔ དགེ་བ་འདི་ཡིས་འགྲོ་བ་མ་ལུས་པ༔ ཡེ་ཤེས་བླ་མའི་ས་མཆོག་མྱུར་ཐོབ་ཤོག༔ ཨ་ཧོ༔ པདྨ་འབྱུང་གནས་ཐུགས་ཐིག་འདི༔ སྐལ་བ་ལྡན་པའི་དཔལ་དུ་ཤོག༔ གར་དབང་བདེ་ཆེན་རོལ་བ་ཡིས༔ ཡེ་ཤེས་ཟབ་མོ་དགོངས་གཏེར་རོ༔ ས་མ་ཡ༔ ཞེས་པའང་རྡོ་རྗེ་ཚེ་དབང་ནོར་བུའི་གཏེར་སྐལ་ལོ༔ བཀྲ་ཤིས་དགེ༎ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་མན་ངག་བརྒྱད་པ་དབང་ཆེན་རྟ་མཆོག་ནག་པོའི་ལས་ཚོགས།༈ ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ མན་ངག་བརྒྱད་པ་དབང་ཆེན་རྟ་མཆོག་ནག་པོའི་ལས་ཚོགས་ལ། སྡེ་བརྒྱད་དབང་དུ་བསྡུ་བ། དྲེགས་པ་ལས་ལ་གཅུན་པ། དགྲ་བོ་ཀླུ་ལ་གཏད་པ། ཇག་ཚོགས་སྒོ་གསུམ་འཆིང་བ། ནད་གདོན་བར་ཆད་ཞི་བ་བཅས་ཡོད་པ་ལས། སྐབས་འདིར་ནད་གདོན་བར་ཆད་ཞི་བའི་ལས་ཚོགས་ལ། བྱུགས་པ། ཁྲུས། བདུག་པ། སྲུང་མདུད། འཁོར་ལོ། རིལ་བུ་བཅས་ཀྱིས་སྒོ་ནས་འགྲོ་བ་ཉེར་འཚེ་ལས་སྐྱོབས་པར་བྱེད་པའི་ཡན་ལག་གི་རྫས་བྱིན་གྱིས་བརླབས་པའི་ཆོ་གའོ། །དང་པོ་དབང་ཐོབ་ཅིང་དམ་ཚིག་དག་པ་གཞིར་བྱས། སྔོན་འགྲོ་བདག་མདུན་བསྐྱེད་པ་བཅས་ལེགས་པར་འགྲུབ་པ་དང༌། ལས་བུམ་སྒྲུབ་པ་ནི། ཨཿ ཆོས་ཀུན་སྟོང་བ་བརྗོད་བྲལ་ངང་༔ མཐིང་ནག་གྲུ་གསུམ་འབར་བའི་དལཿ བྷྲཱུཾ་ལས་བུམ་པ་གཞལ་ཡས་ཁང་༔ ནང་དུ་ཧཱུྂ་ལས་རྟ་མགྲིན་ནགཿ མཐིང་ནག་རལ་གྲི་ཞགས་པ་འཛིནཿ དཔལ་དང་དུར་ཁྲོད་ཆས་ཀྱིས་བརྒྱནཿ ཐུགས་དབུས་ཧཱུྂ་ལ་སྔགས་ཀྱིས་བསྐོརཿ འོད་འཕྲོས་རྒྱལ་ཀུན་བྱིན་རླབས་བསྡུསཿ གནས་གསུམ་བདུད་རྩིའི་རྒྱུན་བབས་པསཿ བུམ་པ་ཡོངས་སུ་ཁེང་བར་གྱུརཿ ཨོཾ་བཛྲ་ཀྲོ་དྷ་ཧ་ཡ་གྲཱྀ་ཝ་ཧཱུྂ་ཕཊཿ ཨོཾ་ཨེ་ཧོ་ཤུདྡྷེ་ཤུདྡྷེཿ ཡྂ་ཧོ་ཤུདྡྷེ་ཤུདྡྷེཿ རྂ་ཧོ་ཤུདྡྷེ་ཤུདྡྷེཿ བྂ་ཧོ་ཤུདྡྷེ་ཤུདྡྷེཿ ལྂ་ཧོ་ཤུདྡྷེ་ཤུདྡྷེཿ ཨ་ཨ་ཨ་སྭཱཧཱཿ ཅེས་བཟླས་བདུད་རྩིས་རྒྱུན་བབས་པསཿ ནད་གདོན་སྡིག་སྒྲིབ་མ་ལུས་པཿ དག་པར་མོས་ལ་ཆབ་ཀྱིས་བྲནཿ འདི་ཡིས་མི་གཙང་ཀུན་ཞི་འགྱུརཿ རྫས་བྱིན་གྱིས་བརླབས་པ་ནི༔ ཨ་ལས་དབྱིངས་ཀྱི་བྷནྡྷ་རྒྱ་རེ་ཆེཿ ཨོཾ་ལས་མ་དག་འཛིན་རྟོགས་བསྲེག་གཏོར་བཀྲུསཿ ཨཱཿལས་ཟག་པ་ཀུན་བྲལ་བདུད་རྩི་ནིཿ ཧཱུྂ་ལས་འདོད་དགུར་འཆར་བའི་ཡེ་ཤེས་འཕྲུལཿ ཧ་ལས་གཞོམ་མེད་རྡོ་རྗེའི་རང་བཞིན་སྟེཿ ཧོ་ལས་ངོ་མཚར་ཆོས་ཉིད་དག་པའི་རྩལཿ ཧྲཱིཿལས་ཁྲོ་རྒྱལ་རྡོ་རྗེ་གསུམ་གྱི་དངོསཿ ཕཊ་ཀྱིས་སྣང་བའི་རྒྱ་རལ་དབྱིངས་སུ་བསྲེཿ ཨོཾ་ཨཱཿཧཱུྂ་ཧ་ཧོ་ཧྲཱིཿཕཊཿ ཨཿ ཆོས་སྐུ་ཞི་བ་ཆེན་པོའི་ངང་ཉིད་ལསཿ རོལ་བ་མ་འགགས་ལོངས་སྤྱོད་རྫོགས་པའི་རྩལཿ སྤྲུལ་སྐུ་འཇིགས་བྱེད་ཁྲོ་བོའི་དཀྱིལ་འཁོར་ནིཿ ཧྲཱིཿ ཆོས་དབྱིངས་མཁའ་ལ་རང་འོད་མེ་དཔུང་ཀློང༔ ཁྲག་མཚོའི་དབུས་སུ་ཀེང་རུས་ཕོ་མོའི་གདན༔ དེ་སྟེང་ཁྲོ་གཉེར་གཡོ་བའི་སྟག་ཕོ་མོ༔ དེ་སྟེང་རུ་དྲ་ཕོ་མོ་གུས་ཉམས་ལྡན༔ དེ་སྟེང་ཉི་མའི་དཀྱིལ་འཁོར་ཆ་ཤས་རྫོགས༔ དཔལ་ཆེན་རྟ་མགྲིན་ནག་པོ་ཤིན་ཏུ་ཁྲོས༔ ཞལ་གཅིག་ཕྱག་གཉིས་ཞབས་གཉིས་གེལ་ཚུལ་བཞུགས༔ ཕྱག་གཡས་རྡོ་རྗེ་གཡོན་ན་སེང་ལྡེང་རྔ༔ པུས་མོ་གཡོན་པའི་སྟེང་དུ་དྲག་ཏུ་རྡུང་༔ སྐུ་ལ་དཔལ་དང་དུར་ཁྲོད་ཆས་ཀྱིས་བརྒྱན༔ དབུ་གཙུག་རྟ་མགོ་ལྗང་ཞུར་རྟ་སྐད་འཚེར༔ དབུ་སྐྲ་ཁམ་ནག་གྱེན་བརྫེས་མཁའ་ལ་འཕྱོ༔ ཞལ་གདངས་ལྗགས་འདྲིལ་རྣོ་དཀར་མཆེ་བ་གཙིགས༔ དབུ་སྐྲ་སྨ་ར་སྨིན་མར་མེ་དཔུང་འབར༔ སྤྱན་གསུམ་དམར་ཟླུམ་སྡང་མིག་ཚུལ་དུ་བགྲད༔ ཀེང་རུས་སྙན་ཆ་ཐོད་པའི་དོ་ཤལ་དཔྱང་༔ རུས་པའི་རྒྱན་ལྡན་སྟག་གི་ཤམ་ཐབ་གསོལ༔ ཤིན་ཏུ་དྲག་གཏུམ་གསོད་པའི་ངར་དང་ལྡན༔ པང་དུ་རྡོ་རྗེ་ཁྲོས་མ་སྐུ་མདོག་སྔོན༔ ཞལ་གཅིག་ཕྱག་གཉིས་གཅེར་བུ་རུས་རྒྱན་ཅན༔ གྲི་གུག་ཐོད་པ་འཛིན་པས་མགུལ་ནས་འཁྱུད༔ གཙོ་བོའི་སྤྱི་བོར་པདྨ་ཐོད་ཕྲེང་རྩལ༔ དམར་ནག་ཞལ་གཅིག་ཕྱག་གཉིས་གཡོན་བརྐྱང་སྟབས༔ ཕྱག་གཡས་ཐོད་རྔ་གཡོན་ན་དྲིལ་བུ་འཁྲོལ༔ སྟག་ཤམས་ཐོད་སྐམ་རུས་རྒྱན་ཁྲོ་བོའི་ཆས༔ རྡོ་རྗེ་ཕག་མོ་གྲི་ཐོད་འཛིན་པས་འཁྱུད༔ བདེ་བའི་སྒྲ་སྒྲོགས་བདུད་རྩིའི་ཆར་བ་འབེབས༔ ཕྱོགས་བཞིར་གསང་ཡེ་སྡེ་བཞི་དཔའ་མོའི་ཆས༔ དཀར་སེར་དམར་ལྗང་རིན་ཆེན་རུས་རྒྱན་གསོལ༔ གཡས་རྣམས་ཅང་ཏེའུ་གཡོན་ན་དྲིལ་བུ་འཁྲོལ༔ རང་རིགས་དཔའ་བོ་རྡོར་དྲིལ་འཛིན་དང་སྦྱོར༔ ཤར་སྒོར་དཀར་མོ་ལྕགས་ཀྱུ་མེ་ལོང་འཛིན༔ ལྷོ་སྒོར་སེར་མོ་ཞགས་པ་གཏེར་བུམ་འཛིན༔ ནུབ་སྒོར་དམར་མོ་ལྕགས་སྒྲོག་པད་ཕོར་འཛིན༔ བྱང་སྒོར་ལྗང་མོ་དྲིལ་བུ་ཕུར་བུ་འཛིན༔ གཞན་ཡང་ཁྲོ་བོ་ཁྲོ་མོ་གྲངས་མེད་པ༔ བུ་ཡུག་ལྟར་འཚུབས་མེ་ལྕེ་རྡོ་རྗེ་རྂ༔ ཀུན་ཏུ་འཕྲོ་དབུས་འཇིགས་སུ་རུང་བར་བསྐྱེད༔ རྡོ་རྗེའི་ཚིག་བདུན་གྱིས་སྤྱན་འདྲེན་ནི། ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃ༔ ལན་གསུམ་བརྗོད། ཧཱུྃ༔ ཕྱོགས་བཅུ་དུས་གསུམ་བདེ་གཤེགས་བཅོམ་ལྡན་འདས༔ སྐྱབས་གནས་དཀོན་མཆོག་མ་ལུས་སྐུར་བཞེངས་ཤིག༔ རང་བཞིན་ཆོས་ཀྱི་དབྱིངས་ལས་མ་གཡོས་ཀྱང༔ རང་མདངས་རོལ་བའི་ཆོ་འཕྲུལ་ཞི་ཁྲོའི་ཚོགས༔ འགྲོ་བའི་དོན་དུ་སོ་སོའི་སྐུར་སྤྲུལ་ནས༔ ཡབ་ཡུམ་སྲས་དང་བཅས་ཏེ་གཤེགས་སུ་གསོལ༔ རྩ་སྔགས་མཐར། ཨོཾ་ཨཱཿཧཱུྃ༔གུ་རུ་དེ་ཝ་ཌཱ་ཀི་ནཱི་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛ༔ ཧཱུྃ༔ཧཱུྃ༔ཕེཾ་ཕེཾ༔ རཱ་རཱ་རཱ་རཱཿ ཙ་ལཱ་ཡ་ཙ་ལཱ་ཡ༔ དོ་ཤཱ་ཡ་དོ་ཤཱ་ཡ༔ ཨཱ་བེ་ཤ་ཡ་ཨ་ཨཿ སྤོས་དང་རོལ་ཆེན་གྱིས་སྤྱན་དྲངས༔ བཞུགས་གསོལ་ནི༔ ཧཱུྂ༔ བླ་མ་སྐུ་གསུམ་ཞི་ཁྲོའི་ལྷ་ཚོགས་རྣམས༔ རིན་ཆེན་ཁྲི་རྐང་ཐབས་ཤེས་ཉི་ཟླའི་ཁྲིར༔ བརྟན་པར་བཞུགས་ལ་མཆོག་དང་ཐུན་མོང་གི༔ དངོས་གྲུབ་མ་ལུས་འབད་མེད་སྩོལ་བར་མཛོད༔ ས་མ་ཡ་སྟྭཾ༔ ཕྱག་འཚལ་བ་ནི༔ ཧོ༔ སྒོ་གསུམ་དད་པས་ལུས་འདི་ཞིང་རྡུལ་དུ༔ སྤྲུལ་ཏེ་ཕྱག་འཚལ་སྒྲིབ་པ་དག་པ་དང༔ དམ་ཚིག་ཉམས་ཆགས་མ་ལུས་བྱང་དུ་གསོལ༔ ཨ་ཏི་པུ་ཧོ༔ པྲ་ཏིཙྪ་ཧོ༔ ཕྱི་མཆོད་འབུལ་བ་ནི༔ ཨོཾ་ཨཱཿཧཱུྂ༔ འདོད་ཡོན་བརྒྱད་དང་རྒྱལ་སྲིད་ཆེན་བདུན༔ བཀྲ་ཤིས་རྫས་མཆོག་བརྒྱད་དང་རྟགས་མཆོག་བརྒྱད༔ འཁོར་བསྒྱུར་མངའ་ཐང་ལོངས་སྤྱོད་རྫོགས་པའི་དཔལ༔ ཏིང་འཛིན་སྔགས་དང་རྒྱའི་མཆོད་པ་འབུལ༔ ཨོཾ་ཨཱཿཧཱུྂ༔ བཛྲ་གུ་རུ་ས་པ་རི་ཝཱ་ར་ཨརྒཾ་སོགས་ཀྱིས་མཆོད༔ ནང་མཆོད་འབུལ་བ་ནི༔ ཧོ༔ གཟུགས་སྒྲ་དྲི་རོ་རེག་བྱ་ཆོས་ལ་སོགས༔ སྣོད་བཅུད་རྣམ་དག་ཡེ་ཤེས་ཕྱག་རྒྱའི་འཕྲུལ༔ འཛད་མེད་ནམ་མཁའ་མཛོད་ཀྱི་གཏེར་ཆེན་པོ༔ འབུལ་ལོ་ཚོགས་དྲུག་རང་སར་གྲོལ་བར་ཤོག༔ ཨོཾ་ཨཱཿརཱུ་པ་ཤབྡ་གནྡྷེ་རཱ་ས་སྤརྴེ་པཱུ་ཛ་ཧོ༔ གསང་མཆོད་འབུལ་བ་ནི༔ ཧོ༔ ཡབ་ཡུམ་མཉམ་སྤྱོར་བདེ་བ་ལས་བྱུང་བའི༔ ཐབས་དང་ཤེས་རབ་གཉིས་སུ་མེད་པ་སྟེ༔ མཐོང་དང་དྲན་པའི་ཡིད་བདེས་སིམ་བྱེད་པ༔ སྣང་སྲིད་རང་གྲོལ་རིག་མའི་མཆོད་པ་འབུལ༔ ཨོཾ་ཨཱཿཔཉྩ་མུ་དྲ་མ་ཧཱ་པཱུ་ཛ་ཧོ༔ སྨན་མཆོད་པ་ནི༔ ཧོ༔ དཔའ་བོ་རིགས་ལྔ་ཡབ་ཡུམ་སྦྱོར་བ་ལས༔ རང་བྱུང་རྩ་བརྒྱད་སྟོང་སྦྱར་བདུད་རྩིའི་རྒྱུན༔ འཐེབ་སྲིན་རྩེ་སྦྱར་ཉི་ཟླའི་གའུ་ཡིས༔ བླང་དོར་མེད་པར་རྟོགས་པས་མཆོད་པ་འབུལ༔ སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ རཀྟ་མཆོད་པ་ནི༔ ཧོ༔ ཁམས་གསུམ་ཁྲག་ཏུ་རོལ་བའི་རྒྱ་མཚོ་རུ༔ རྟེན་འབྲེལ་གིརྟི་དམར་མོའི་གསང་བའི་བཅུད༔ རྒྱུ་དྲུག་དབྱིངས་སྒྲོལ་སྡུག་བསྔལ་སེལ་བའི་རྫས༔ ཆགས་བྲལ་གསང་བའི་ཁྲག་ཆེན་བཞེས་སུ་གསོལ༔ མ་ཧཱ་རཀྟ་ལ་ཁ་རཾ་ཁཱ་ཧི༔ གཏོར་མ་འབུལ་བ་ནི༔ ཧོ༔ ཕྱི་སྣོད་གཏོར་གཞུང་ནང་བཅུད་གཏོར་མ་སྟེ༔ གསང་བ་བདག་འཛིན་རཱུ་ཏྲ་བསྒྲལ་བའི་ཤ༔ འདོད་ཡོན་སྣ་ཚོགས་ཅིར་ཡང་འཆར་བ་འདི༔ འབུལ་ལོ་ཞེན་འཛིན་རི་བོ་གཏོར་བར་ཤོག༔ མ་ཧཱ་བ་ལིཾ་ཏ་ལ་ཁ་རཾ་ཁཱ་ཧི༔ བསྟོད་པ་ནི༔ ཧཱུྂ༔ སྐུ་ནི་ཟང་ཐལ་ཕྱོགས་ཆའི་སྤྲོས་ལས་འདས༔ གསུང་ནི་བརྗོད་བྲལ་ནཱ་ད་སྲིད་ཞིར་ཁྱབ༔ ཐུགས་ནི་དམིགས་མེད་མཁྱེན་བརྩེའི་ཡེ་ཤེས་ངང༔ ཆོས་སྐུ་ཀ་དག་ཆེན་པོར་ཕྱག་འཚལ་བསྟོད༔ ལྷུན་གྲུབ་ཡེ་ཤེས་སྐུ་དང་རྒྱན་འཁོར་རྫོགས༔ ཟུང་འཇུག་ཁ་སྦྱོར་བདེ་ཆེན་རང་བཞིན་མེད༔ སྙིང་རྗེས་གང་དང་རྒྱུན་མི་ཆད་འགོག་མེད༔ ལོངས་སྐུ་རང་གསལ་ཆེན་པོར་ཕྱག་འཚལ་བསྟོད༔ ཐུགས་རྗེ་རོལ་བ་རྟག་ཁྱབ་ལུ་གུ་རྒྱུད༔ དག་དང་མ་དག་སྐྱེ་བ་སྤྲུལ་བའི་སྐུ༔ ཆོས་ཉིད་གཅིག་ལས་འཆར་ཆ་དུ་མར་འཕྲུལ༔ སྤྲུལ་སྐུ་རང་ཤར་ཆེན་པོར་ཕྱག་འཚལ་བསྟོད༔ ཐུགས་རྗེའི་ཡེ་ཤེས་རང་རྩལ་ཤུགས་འབྱུང་དུ༔ ཉིད་ལས་མི་གཞན་ཞི་དང་ཁྲོ་བོའི་སྐུ༔ སྣ་ཚོགས་ཐབས་ཀྱིས་གདུལ་བྱ་འདུལ་མཛད་པ༔ རབ་འབྱམས་དཀྱིལ་འཁོར་རྒྱ་མཚོའི་ཚོགས་ལ་བསྟོད༔ སྐུ་ལྔ་ལྷུན་གྲུབ་བདེ་བ་ཆེན་པོའི་ངང་༔ གང་འདུལ་ཐབས་ཀྱིས་ཁྲོ་ཆེན་སྐུར་བཞེངས་པ༔ ཁམས་གསུམ་དབང་བྱེད་གནམ་ལྕགས་རལ་བ་ཅན༔ རྟ་མཆོག་འབར་བའི་ཚོགས་ལ་ཕྱག་འཚལ་བསྟོད༔ སྲིད་པའི་ཁྲག་མཚོའི་ཀེང་རུས་ཕོ་མོའི་སྟེང་༔ སྟག་དང་རུ་དྲ་ཉི་མ་དཀྱིལ་ཁར༔ དཔལ་ཆེན་རྟ་མགྲིན་ནག་པོ་ཤིན་ཏུ་ཁྲོས༔ ཞལ་གཅིག་ཕྱག་གཉིས་ཞབས་གཉིས་གེལ་ཚུལ་བཞུགས༔ རྡོ་རྗེས་སེང་ལྡེང་རྒྱལ་རྔ་འཛིན་ལ་བསྟོད༔ སྐུ་ལ་དཔལ་དང་དུར་ཁྲོད་ཆས་ཀྱིས་བརྒྱན༔ དབང་སྡུད་རྟ་མགོ་ལྗང་ཞུར་རྟ་སྐད་འཚེར༔ བསྐལ་བའི་མེ་ཕྲེང་འཁྲིགས་པའི་སྐྲ་འཕྱོ༔ ལྗགས་འདྲིལ་རྣོ་དཀར་མཆེ་བ་གཙིགས་ལ་བསྟོད༔ དབུ་སྐྲ་སྨ་ར་སྨིན་མར་མེ་སྟག་འཚུབས༔ སྤྱན་གསུམ་དམར་ཟླུམ་སྡང་མིག་བགེགས་ལ་གཟིགས༔ ཀེང་རུས་སྙན་ཆ་ཐོད་པའི་དོ་ཤལ་དཔྱང་༔ རུས་རྒྱན་སྟག་ཤམ་ཐབ་གསོལ་ལ་བསྟོད༔ རྡོ་རྗེ་ཁྲོས་མ་སྐུ་མདོག་མཐིང་སྔོན་འབར༔ ཞལ་གཅིག་ཕྱག་གཉིས་གཅེར་བུ་རུས་རྒྱན་ཅན༔ ཆགས་ཁྲོས་གྲི་ཐོད་ཕྱར་བ་མགུལ་ནས་འཁྱུད༔ དགའ་བཞི་ཡེ་ཤེས་མཆོག་ཏུ་སྦྱོར་ལ་བསྟོད༔ རིགས་བདག་པདྨ་ཐོད་ཕྲེང་དམར་ནག་ཞལ༔ གཅིག་ཕྱག་གཉིས་ཐོད་རྔ་དྲིལ་བུ་འཁྲོལ༔ སྟག་ཤམས་ཐོད་སྐམ་རུས་རྒྱན་ཁྲོ་བོའི་ཆས༔ ཕག་མོ་གྲི་ཐོད་འཛིན་པས་འཁྱུད་ལ་སྟོད༔ གསང་ཡེ་སྡེ་བཞི་དགྱེས་འཛུམ་དཔའ་མོའི་ཆས༔ རང་རིགས་དཔའ་བོ་རྡོར་དྲིལ་འཛིན་དང་སྦྱོར༔ ལས་བཞིའི་ལྷ་མོ་རང་རྟགས་ཕྱག་མཚན་འཛིན༔ སྤྲུལ་བ་ཁྲོ་ཚོགས་འཁོར་འདས་ཁྱབ་ལ་བསྟོད༔ དེ་ལྟར་མཆོད་ཅིང་བསྟོད་པའི་བྱིན་རླབས་ཀྱིས༔ ཐོག་མེད་བསག་པའི་སྡིག་ལྟུང་ཉམས་ཆགས་བཤགས༔ སྐྱེ་གནས་བཞི་ཡི་སྒྲིབ་དག་ལྷ་སྐུར་ཤར༔ སྣང་གསུམ་འཕོ་བའི་བག་ཆགས་དག་པར་ཤོག༔དམིགས་པ་ནི༔ དམ་རྫས་མ་ལུས་རྟ་མཆོག་རོལ་བའི་སྐུཿ ཐུགས་གར་ཉི་གདན་སྔགས་ཀྱི་ཕྲེང་བ་ནིཿ ཡབ་རྣམས་གཡས་སྐོར་ཡུམ་རྣམས་གཡོན་དུ་འཁོརཿ འབྲུག་སྟོང་དུས་གཅིག་གྲགས་པའི་སྒྲ་དབྱངས་དང་ཿ ཉི་མ་འབུམ་ཕྲག་ཤར་འདྲའི་སྔགས་འོད་ཀྱིསཿ རྒྱལ་ཀུན་གསང་གསུམ་བྱིན་རླབས་མ་ལུས་པཿ སྐུ་དང་ཡིག་འབྲུ་ཕྱག་མཚན་ཚུལ་དུ་བསྡུསཿ སྣང་གྲགས་རིག་གསུམ་འཁོར་ལོ་གསུམ་དུ་གྱུརཿ ཨོཾ་ཧྲཱིཿབཛྲ་ཀྲོ་དྷ་ཧ་ཡ་གྲཱི་ཝ་ཧཱུྂ་ཕཊཿ ཡ་མ་ར་ཙ་དུ་ཏྲི་ཕུ་ཏི་ཧྲཱིཿ་ཧཱུྂཿཕཊཿ བདག་མདུན་གཙོ་འཁོར་ཐམས་ཅད་ཀྱིཿ དཔལ་གྱི་རྟ་སྐད་ཐེང་གསུམ་གྱིསཿ སྣང་སྲིད་དྲེགས་པ་སྡེ་བརྒྱད་ཚོགསཿ དབང་བསྡུས་བཀའ་ལ་ཉན་པར་བསམཿ ཐུན་མཐར་དྲེགས་པ་གནད་གཟིར་ནཿ བསྙེན་སྒྲུབ་ལས་གསུམ་སྦྲེལ་བའི་སྔགསཿ དྲག་སྔགས་རྡོ་རྗེའི་མེ་དཔུང་ནིཿ བཀླགས་པ་ཙམ་གྱིས་བྱིན་རླབས་འཇུགཿ ཨོཾ་ཧྲཱི་བཛྲ་ཀྲོ་དྷ་ཧ་ཡ་གྲཱྀ་ཝ་ཧཱུྂ་ཕཊཿ རྩ་སྔགས་བྱིན་རླབས་ཆུ་བོའོཿ ཡཀྵ་ནག་པོ་ནྲྀ་ཏྲི་ཧུར་ཐཾ་ཛ༔ ལས་སྔགས་གནམ་ལྕགས་སྤུ་གྲི་དང་༔ འགུགས་སྔགས་ལྕགས་ཀྱུ་རྣོན་པོའོཿ གནོད་བྱེད་མཱ་ར་ཡཿ སྲོག་ལ་རྦད་རྦདཿ སྙིང་ལ་རྦད་རྦདཿ རྩ་ལ་རྦད་རྦདཿ ཁྲག་ལ་རྦད་རྦདཿ ཤ་ལ་རྦད་རྦདཿ རུས་ལ་རྦད་རྦདཿ ཀླད་པ་ལ་རྦད་རྦདཿ ཡིད་ལ་རྦད་རྦདཿ བསད་སྔགས་སྲོག་གི་འཁོར་ལོའོཿ ཙིཏྟ་ཟུང་ཟུང་༔ ཙིཏྟ་རྨུགས་རྨུགསཿ ཙིཏྟ་ཕྱུངས་ཕྱུངསཿ ཙིཏྟ་གཏུབས་གཏུབསཿ ཙིཏྟ་མྱོག་མྱོགཿ ཙིཏྟ་ཐུཾ་རིལཿ ཡ་ཡ་བྷྱོ་བྷྱོཿ རྦད་སྔགས་ཐོག་རྒོད་ངར་མའོཿ སྲོག་རྩ་ཆོད་ཆོདཿ སྙིང་ཕྱུངས་ཕྱུངསཿ ཁཾ་ཁཾཿ ལཾ་ལཾཿ ཚལ་པར་རྦད་རྦདཿ དུམ་བུར་རྦད་རྦདཿ ཐུམ་རྨྱོག་བཾ་རིལ་མཱ་ར་ཡ་རྦད་སོདཿ བསད་སྔགས་གློག་གི་འཕྲུལ་འཁོར་རོཿ རཾ་རཾ་ཛྭ་ལ་རཾ་ཨུ་ཙ་ཏ་ཡ་ཕཊཿ བསྲེག་སྔགས་བསྐལ་བའི་མེ་དཔུང་ངོཿ བྱམས་སྙིང་རྗེ་ལྡན་པ་ཡིསཿ གསང་བས་འདི་ཉིད་ཉམས་སུ་བླང་ཿ མ་གསང་རང་གི་སྲོག་ལ་གཟནཿ སྔགས་པ་དམྱལ་བའི་གནས་སུ་སྐྱེཿ ཟབ་མོའི་སྔགས་རྒོད་འདི་སྒྲུབ་ནཿ སྡེ་བརྒྱད་མ་ལུས་དབང་དུ་འདུཿ དགྲ་བགེགས་འབྱུང་བོ་མ་ལུས་སྒྲོལཿ ནད་དང་གནོད་པ་འདི་ཡིས་ཞིཿ རྐྱེན་ངན་བར་ཆད་འདི་ཡིས་བཟློགཿ ཚེ་འདིར་རྟ་འགྲིན་སྐུ་འགྲུབ་ཅིང་༔ ཕྱི་མ་མེད་པར་སངས་རྒྱའོཿ སྐབས་སུ་ཐུགས་རྒྱུད་བསྐུལ་ཞིང་བྱིན་འབེབས་བྱ་བ་ནིཿ ཧཱུྂ་ཧཱུྂ་ཧཱུྂ་ཧྲཱིཿ སྣང་བ་མཐའ་ཡས་ལོངས་སྤྱོད་རྫོགསཿ པདྨ་འོད་ཕྲེང་སྐུར་བཞེངས་ཤིགཿ རྒྱལ་ཀུན་གསང་གསུམ་ནུས་པ་ཡིཿ བྱིན་ཆེན་ཕོབ་ལ་དབང་ཆེན་སྐུརཿ དབྱིངས་ཀྱི་ཡུམ་ཆེན་གོས་དཀར་མོཿ གསང་བ་ཡེ་ཤེས་དབྱིངས་ནས་བཞེངསཿ གནས་གསུམ་མཁའ་འགྲོའི་ཡེ་ཤེས་རྩལཿ བྱིན་ཆེན་ཕོབ་ལ་དབང་ཆེན་སྐུརཿ ཁྲོ་བོའི་རྒྱལ་པོ་རྟ་མཆོག་དཔལཿ དཔའ་བོ་དབང་སྡུད་བྱིན་ཆེན་ཕོབསཿ མཁའ་སྤྱོད་གཙོ་བོ་ཁྲོས་མ་ནགཿ མཁའ་འགྲོ་དབང་སྡུད་བྱིན་ཆེན་ཕོབསཿ མཐུ་སྟོབས་བདག་ཉིད་ཁྲོ་བོ་བཞིསཿ དྲེགས་པ་འདུལ་བའི་བྱིན་ཆེན་ཕོབསཿ བདེ་ཆེན་བསྐྱེད་པའི་མཁའ་འགྲོ་བཞིསཿ སྣང་བ་དབང་སྡུད་བྱིན་ཆེན་ཕོབསཿ མཁའ་མཉམ་སྤྲུལ་བཡང་སྤྲུལ་གྱིསཿ ཁམས་གསུམ་དབང་སྡུད་བྱིན་ཆེན་ཕོབསཿ བླ་མའི་ཧཱུྂ་སྒྲ་ལྡི་རི་རིཿ ཡི་དམ་ཕཊ་སྒྲ་སེང་སེ་སེངཿ དཔའ་བོའི་བྲོ་བརྡུང་ཐག་སེ་ཐགཿ དཔའ་མོའི་བཞད་སྒྲ་ལྷང་སེ་ལྷང་ཿ དྲི་ཞིམ་སྤོས་དྲི་ཐུ་ལུ་ལུཿ འཇའ་དང་འོད་ཟེར་ལམ་སེ་ལམཿ དབུ་སྐྲའི་ཟར་བུ་ད་ལ་ལཿ རིན་ཆེན་རུས་རྒྱན་ཉི་ལུ་ལུཿ དར་གདུག་ཅོད་པཎ་པུ་རུ་རུཿ ཕྱག་རྒྱ་གར་སྟབས་ཤིག་སེ་ཤིགཿ དམ་ཚིག་རྫས་ལ་བྱིན་ཆེན་ཕོབསཿ མཐོང་ཐོས་རེག་ཚད་གྲོལ་བར་མཛོདཿ སྲུང་བའི་རྫས་ལ་བྱིན་ཆེན་ཕོབསཿ ཐེབ་ཚད་མི་མཐུན་ལས་གྲོལ་མཛོདཿརྣལ་འབྱོར་ལུས་ལ་བྱིན་གྱིས་རློབསཿ གདན་གསུམ་ཚང་བའི་འཁོར་ལོར་བསྒྱུརཿ རྣལ་འབྱོར་ངག་ལ་བྱིན་གྱིས་རློབསཿ ལོངས་སྤྱོད་འཁོར་ལོ་རང་གྲོལ་མཛོདཿ རྣལ་འབྱོར་ཡིད་ལ་བྱིན་གྱིས་རློབསཿ ཆོས་ཉིད་ཡེ་གྲོལ་རང་ཞལ་སྟོནཿ ཨོཾ་ཧྲཱིཿབཛྲ་ཀྲོ་དྷ་ཧ་ཡ་གྲཱི་ཝ་ཧཱུྂ་ཕཊཿ ཛྙཱ་ན་ས་ཏྭ་ཨ་ཝེ་ཤ་ཡ་ཨ་ཨཿ ཧཱུྂ་ཧཱུྂ་ཧཱུྂཿ འདི་ཡིས་བྱིན་རླབས་མངོན་སུམ་ཐོབཿ ཐོས་ཚད་རྒྱུད་ལ་ཡེ་ཤེས་འཇུགཿ ཐུན་མཐར་མཆོད་ཅིང་བསྟོད་པ་དང་ཿ གཞན་དོན་བསྔོ་བས་རྒྱས་འདེབས་བྱཿ དངོས་གྲུབ་ལེན་པོ་ནིཿ བྱིན་འདེབས་སྔོན་དུ་འགྲོ་བ་ཡིསཿ དམ་ཚིག་གི་རྫས་ཀྱི་ལྷ་རྣམས་འོད་དུ་ཞུ་ནས་དངོས་གྲུབ་གྱི་རྫས་སུ་གྱུར་བར་མོས་ལཿ ཨཿ ངོ་བོ་ཡེ་ཤེས་རྣམ་པ་དམ་ཚིག་རྫསཿ དཀྱིལ་འཁོར་ཕྱག་མཚན་སྲུང་བའི་འཁོར་ལོ་དང་ཿ བྱུགས་པ་བདུག་པ་རིལ་བུ་སྲུང་མདུད་སོགསཿ ཡེ་ནས་ཆོས་ཉིད་ལྷ་ཡི་ངོ་བོར་བཞུགསཿ དམ་ཚིག་རྫས་སུ་ཤར་བའི་ཆ་ཤེས་རེའིཿ རྡུལ་ཕྲན་རེ་ལ་རྡུལ་སྙེད་དཀྱིལ་འཁོར་རྫོགསཿ དད་དང་མོས་པ་དམ་ཚིག་རྗེས་འགྲོ་བའིཿ འདོད་དགུར་འཆར་བའི་བྱིན་རླབས་རྟེན་དུ་གྱུརཿ སྣང་སྲིད་དག་པ་ལྷ་ཡི་དཀྱིལ་འཁོར་ལཿ སྲུང་བྱ་སྲུང་བྱེད་ཡེ་ནས་རོ་གཅིག་ཀྱང་ཿ གདུལ་བྱའི་ཁམས་དང་སྣང་ཆ་རྟེན་འབྲེལ་དུཿ ཀུན་རྫོབ་མཚན་མ་རྟགས་ཀྱི་ཕྱག་རྒྱ་ཆེཿ ལྷ་དང་གཉིས་སུ་མེད་པའི་ཡེ་ཤེས་རྫསཿ མཐོང་ཐོས་དྲན་རེག་འགྲོ་བ་མ་ལུས་པའིཿ རྒྱུད་ལ་ཐར་བའི་ས་བོན་བསྐྲུན་ནུས་པའིཿ ལས་བཞི་ལྷུན་གྲུབ་དངོས་གྲུབ་ད་ལྟ་སྩོལཿ ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྂཿ ཅེས་བརྗོད་ཅིང་དམ་ཚིག་གི་རྫས་གནས་གསུམ་དུ་གཏུག་ཅིང་མྱང་བར་བྱའོཿ ཅེས་པའང་རིག་འཛིན་རྗེའི་གཏེར་ཆོས་བསམ་པ་ལྷུན་གྲུབ་མཆོག་ཐུན་མོང་དངོས་གྲུབ་མ་ལུས་འབྱུང་བའི་གཏེར་ཁྱིམ་གྱི་གསང་བའི་མན་ངག་ལས་ཚོགས་ལས་ཁོལ་དུ་བྱུང་བའོ། ། གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་རྟ་མགྲིན་ནག་པོའི་སྒོ་ནས་གཏོར་དབང་བར་ཆད་གཡུལ་འཇོམས་བསྐུར་ཚུལ་ནག་འགྲོས་སུ་བཀོད་པ།༄༅། ། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ རྟ་མགྲིན་ནག་པོའི་སྒོ་ནས་གཏོར་དབང་བར་ཆད་གཡུལ་འཇོམས་བསྐུར་ཚུལ་ནག་འགྲོས་སུ་བཀོད་པ་བཞུགས་སོ། ། ན་མོ་གུ་རུ་ཧྱ་གྷྲི་ཝ་ཡེ། །ལྷ་མཆོག་རྟ་མགྲིན་ནག་པོའི་སྒོ་ནས་བར་ཆད་རྐྱེན་སེལ་གཏོར་མའི་དབང་བསྐུར་བར་བྱེད་པ་ལ། ཐོག་མར་ནགས་དབེན་པར་དད་ལྡན་གྱི་སློབ་མ་ལ་སྔོན་འགྲོ་ཆོས་བཤད་བྱས་ཤིང༌། དུས་ལ་བབས་པ་ན། སྟེགས་བུའི་ཁར་ཆོས་འབྱུང་མཐིང་ནག་མེ་རི་འབར་བའི་དཀྱིལ་འཁོར་རམ་ཚོམ་བུའི་སྟེང་དུ་ཐོད་པ་འབྲུའི་ཁེངས་པའམ་ཟངས་ལྕགས་ཀྱི་སྣོད་གཙང་མར་གྲུ་གསུམ་བསྣོལ་མའི་གདན་ལ་དྲག་གཏོར་ཐོག་གི་མདེའུ་ལྟ་བུ་མེ་རི་འབར་བ་རྟ་མགོས་མཚན་པ་བཤམས། ཕྱི་ནང་གི་ཉེར་སྤྱོད་འདུ་བར་བྱས། གཞན་ཡང་དཀྱིལ་འཁོར་བཅུ་གསུམ་སོ་སོའི་སྒོས་དབང་བྱེད་པར་སྤྲོ་བས་དཀྱིལ་འཁོར་དང་ལྷ་སྔགས་ཀྱི་འཕྲུལ་ལ་བྱང་ཆུབ་པར་བྱའོ། །བདག་མདུན་བུམ་པ་བཅས་གྲུབ་པ་དང༌། ཁྲུས་བྱས། བགེགས་བསྐྲད་སྲུང་འཁོར་བསྒོམ། ཆོས་བཤད་ལ་མཎྜལ་འབུལ་བཅུག གསོལ་བ་འདེབས་པ་ནི། ཀྱེ་ཁྲོ་བོ་རོལ་བ་འདུས་པའི་རྗེཿ བླ་མ་རྟ་མཆོག་ཧེ་རུ་ཀའིཿ སྐུ་གསུང་ཐུགས་དང་ཡོན་ཏན་གྱིཿ དབང་མཆོག་མ་ལུས་བསྩལ་དུ་གསོལཿ ལན་གསུམ། བླ་མས། ལྡོག་མེད་དད་དང་དམ་ཚིག་ཅནཿ གསང་བའི་གནས་འདིར་ཞུགས་པ་ལེགསཿ བཟང་ངན་བརྟུལ་ཞུགས་སྤྱོད་པ་ཡིསཿ རྡོ་རྗེའི་དམ་ཚིག་ཁྱོད་ཀྱིས་ལོངསཿ ཞེས་བཀའ་བགོས། ཐོག་མར་སྒྲིབ་པ་བསལ་བ་ནི། མེ་ཐབ་བཤམ་ལ། དེ་ནས་དཀྱིལ་འཁོར་གཉན་པོར་འཇུག་པའི་སྒྲིབ་པ་བསལ་བའི་ཕྱིར་ཏུ། མདུན་དུ་དྲག་པོའི་ཐབས་ཁུང་གྲུ་གསུམ་དུ་མེ་སྦར། ཏིལ་ནག་ལ་སྡིག་པའི་དབྱིབས་བཅོས། གཡས་ནས་ཞེ་སྡང་གི་རླུང་དཀར་པོ། གཡོན་ནས་འདོད་ཆགས་ཀྱི་རླུང་དམར་པོ། མཉམ་དུ་གཏི་མུག་གི་རླུང་ནག་པོ་སོགས་ཐོག་མེད་ནས་བསག་པའི་སྡིག་པ་དང་སྒྲིབ་པ་ཐམས་ཅད་ཏིལ་ལ་སིབ་ཀྱིས་ཐིམ་པ་ཤ་དང་ཁྲག་གི་རྒྱ་མཚོ་ཟགས་མེད་བདུད་རྩིའི་རང་བཞིན་དུ་གྱུར་ཏེ་མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་ནང་གི་དཔལ་རྟ་མགྲིན་ནག་པོའི་ཞལ་ཏུ་དམར་ལྕིབ་ལྕིབ་གསོལ་བས་ཚོགས་གཉིས་རྫོགས། སྒྲིབ་གཉིས་དག བར་ཆད་མ་ལུས་པ་ཆོས་དབྱིངས་བདེ་བ་ཆེན་པོའི་ངང་དུ་རྗེས་མེད་དུ་ཞི་བར་བསམ། ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ས་པ་རི་ཝཱ་ར་སརྦ་པཱུ་ཛ་ཁ་ཧིཿ ཞེས་ལན་བདུན་དང༌། ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ཧཱུྂ་ཕཊཿ དྲག་ཏུ་བརྗོད་དེ་ཏིལ་ནག་ཐབ་ཏུ་ཕུལ། རྫོགས་པའི་བྱང་ཆུབ་སྒྲུབ་པ་ལ། །ཕྱི་དང་ནང་གི་སོགས་སྨོན་ལམ་བྱ། ད་ཁྱེད་རྣམས་དཀྱིལ་འཁོར་དུ་འཇུག་པའི་དོན་དུ་ཐོག་མར་གསོལ་པ་གདབ་པ་འདིའི་རྗེས་ཟློས་མཛོད༔ ཧོ༔ ཁྱབ་བདག་སྟོན་པ་རིན་པོ་ཆེ༔ རྡོ་རྗེ་སློབ་དཔོན་དགོངས་སུ་གསོལ༔ བདག་ཅག་སྐལ་ལྡན་སྨིན་གྲོལ་མཛོད༔ རྡོ་རྗེའི་དམ་ཚིག་དུས་འདིར་སྩོལ༔ ལན་གསུམ། དེ་ནས་རྒྱུན་བཤགས་འདིའི་རྗེས་ཟློས་མཛོད༔ ཧོ༔ དགོངས་ཤིག་རྡོ་རྗེ་སློབ་དཔོན་དགོངས༔ བདག་ཅག་མ་རིག་དབང་གྱུར་པས༔ སོ་སོར་ཐར་པའི་སྡོམ་པ་ཉམས༔ བྱང་ཆུབ་སེམས་དཔའི་སེམས་བསྐྱེད་འཁྲུལ༔ རྡོ་རྗེ་ཐེག་པའི་དབང་བསྐུར་གྱི༔ རྩ་བ་ཡན་ལག་དམ་ཚིག་ཆག༔ ཕྱག་རྒྱ་ཆེན་པོར་གོ་བ་ལོག༔ རིམ་པ་གཉིས་ཀྱི་གསང་ཚིག་བསྒྲགས༔ མདོར་ན་ཚོར་དང་མ་ཚོར་བའི༔ ཐུགས་དང་འགལ་བ་ཅི་མཆིས་པ༔ གནོང་འགྱོད་དྲག་པོས་མཐོལ་ལོ་བཤགས༔ ཚངས་དབང་མཆོག་གི་དངོས་གྲུབ་སྩོལ༔ ཅེས་ལན་གསུམ། བྱང་ཆུབ་སེམས་བསྐྱེད་ཉམས་པ་སླར་གསོ་དང་གོང་དུ་འཕེལ་བའི་ཆེད་དུ་འདིའི་ལད་མོ་མཛོད། ཧོ༔ དུས་གསུམ་སངས་རྒྱས་བྱང་སེམས་ཀྱིས༔ སེམས་ཅན་རྣམས་ཀྱི་དོན་བསྒྲུབ་ཕྱིར༔ བྱང་ཆུབ་མཆོག་གི་སེམས་བསྐྱེད་ལྟར༔ དེང་འདིར་བདག་གིས་སེམས་བསྐྱེད་དོ༔ ལན་གསུམ། ༈ །དཀྱིལ་འཁོར་གྱི་ལྷ་དང་མཇལ་བའི་ཕྱག་རྟེན་ཏུ་རིན་པོ་ཆེ་རིན་ཐང་མེད་པའི་མེ་ཏོག་གི་ཕྲེང་བ་ཡངས་ཤིང་མ་ཉམས་པ་རེ་ཕྱག་ཏུ་སྤྲད་པར་མོས་ཤིག །ཨོཾ་ཨཱཿཧཱུྃ། ཞེས་མེ་ཏོག་གི་ཅོད་པན་གཏད། ཁྱེད་རྣམས་སྔོན་ཆད་གསང་ཆེན་བླ་ན་མེད་བའི་དལ་དུ་མ་ཞུགས་པའམ། ཞུགས་ཀྱང་བསྐྱར་ཏེ་འཇུག་བ་ལ་གསང་སྒྲོག་གི་ཉེས་པ་མི་འབྱུང་བའི་ཕྱིར་གདོང་གཡོགས་དམར་པོ་བཅིངས་པའི་མོས་པ་མཛོད། ཨོཾ་ཙཀྵུབྷནྡྷ་བྷནྡྷ་སྭཱཧཱ༔ མིག་དར་གཏད། ཡེ་ཤེས་དབབ་པ་ནི། ལུས་གཅུན། རླུང་བཟུང་། སེམས་དམིགས་པ་ལས་མ་ཡེངས་བར་བྱ། གུ་རུ་རྟ་མགྲིན་ནག་པོའི་དབང་གི་དོན་དུ་མདུན་བསྐྱེད་དང་སློབ་དཔོན་འདི་ལྟར་གསལ་ཐོབ། མདུན་གྱི་ནམ་མཁར་རྒྱ་མཚོ་ཆེན་པོ་སྔོ་ལ་དྭངས་པའི་དཀྱིལ་དུ་མེ་དཔུང་འབར་བ། དེ་སྟེང་ཀེང་རུས་སྟག་དང་རུ་དྲ་ཕོ་མོ་བརྩེགས་པའི་གདན་དང་ཉི་མའི་དཀྱིལ་འཁོར་གྱི་སྟེང་དུ་ངོ་བོ་གུ་རུ་པདྨ་ལ་རྣམ་པ་དཔལ་ཆེན་རྟ་མགྲིན་སྐུ་མདོག་ནག་པོ་ཞལ་གཅིག་ཕྱག་གཉིས་ཀྱིས་སེང་ལྡེང་གི་རྔ་པུས་མོ་གཡོན་པའི་སྟེང་དུ་བརྡུངས་པ། ཞབས་གཉིས་མིའུ་ཐུང་གེལ་པའི་ཚུལ་གྱིས་བཞུགས་པ། ཀེང་རུས་ཀྱི་སྙན་ཆ་དང་། རལ་པའི་གསེབ་ནས་རྟ་མགོ་ལྗང་ཞུར་མཚེར་བ། །ཡུམ་རྡོ་རྗེ་གསང་ཁྲོས་མ་སྔོན་མོ་གྲི་ཐོད་ཅན་གྱིས་འཁྱུད་པ། དཔལ་དང་ནུར་ཁྲོད་ཀྱི་ཆས་རྣམས་རྫོགས་ཤིང་། སྤྱི་བོར་པདྨ་ཐོད་ཕྲེང་དམར་ནག ཌཱ་དྲིལ་འཛིན་པས། ཡུམ་རྡོ་རྗེ་ཕག་མོར་ཁྱུད་པའི། འཁོར་མཁའ་འགྲོ་སྡེ་བཞིས་བསྐོར་བ། ཕྱོགས་བཞིར་ཕྱག་རྒྱ་རྣམ་བཞི་འཛིན་པའི་མཁའ་འགྲོ་བཞི་སོགས་ཁྲོ་བོ་ཁྲོ་མོའི་ཚོགས་ཀྱིས་བསྐོར་བར་སྒོམ་ལ་འདིའི་རྗེས་ཟློས་མཛོད། ལམ་སྲང་འཇིགས་པའི༴ བསད་ཁྱེར༴ ཡིད་གཉིས༴ ཨོ་རྒྱན་ཕྱག༴ ཙོ་ར༴ ཨོ་རྒྱན༔ བདག་ལ་དབང་སྐུར་རྡོ་རྗེའི་ཡེ་ཤེས་སྐྱེད༔ བསམ་པ༴ ལན་གསུམ་བརྗོད། དེ་ལྟར་སྙིང་ཁུང་རུས་པའི་གཏིང་ནས་གསོལ་བ་ཤུགས་དྲག་ཏུ་བཏབ་པས་རྐྱེན་གྱིས་བླ་མ་དང་མདུན་བསྐྱེད་ཀྱི་ཐུགས་ཀ་ནས་ཡེ་ཤེས་ཀྱི་འོད་ཟེར་སྤྲོས། སློབ་མའི་སྙིང་གར་རེག་པས་མ་དག་པའི་ཕུང་ཁམས་སྐྱེ་མཆེད་སྟོང་པར་སྦྱང་། སྟོང་པའི་ངང་ལས་གཉུག་མའི་སེམས་ཉིད་མདུན་བསྐྱེད་ཇི་ལྟ་བར་གསལ་བར་གྱུར། ཁྱོད་རང་དང་མདུན་བསྐྱེད་བླ་མ་བཅས་པའི་གནས་གསུམ་ཡི་གེ་གསུམ་ལས་འོད་ཟེར་འཕྲོས་པས་ཕྱོགས་བཅུའི་རྒྱལ་བ་སྲས་དང་བཙུན་མོར་བཅས་པའི་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པ་ཆར་ལྟར་བབས་ནས་ཁྱོད་ཀྱི་སྒོ་གསུམ་ལ་སིབ་སིབ་ཐིམ་པའི་མོས་པ་མཛོད། རྩ་སྔགས་མཐར། ཨོཾ་ཨཱཿཧཱུྃ༔གུ་རུ་དེ་ཝ་ཌཱ་ཀི་ནཱི་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛ༔ ཧཱུྃ༔ཧཱུྃ༔ཕེཾ་ཕེཾ༔ རཱ་རཱ་རཱ་རཱ༔ ཙ་ལཱ་ཡ་ཙ་ལཱ་ཡ༔ དོ་ཤཱ་ཡ་དོ་ཤཱ་ཡ༔ ཨཱ་བེ་ཤ་ཡ་ཨ་ཨཿ ཞེས་རོལ་མོ་བཅས་ཡེ་ཤེས་དབབ། ༀ་ཨཱཿ་ཧཱུྃ་གིས་མེ་ཏོག་ཕུལ། མིག་དར་བསལ། དང་པོ་བུམ་པའི་དབང་ནི། སློབ་མའི་བྱ་བ་ནི་བཤགས་པ་དང་དབང་ཐོབ་པའི་དམིགས་པ་སྟེ། བླ་མ་རྩ་བ་གསུམ་གྱི་སྤྱན་སྔར་སྲོག་གཅོད་མ་སྦྱིན་ལེན་དང་མི་ཚང་སྤྱོད་པ་དང༌། ལུས་ཀྱི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། གཏོར་གཞུང་དུར་ཁྲོད་རོལ་བའི་གཞལ་མེད་ཁང་མཚན་ཉིད་ཡོངས་སུ་རྫོགས་པའི་ནང་དུ། གཏོར་པ་དཔལ་རྟ་མཆོག་པོའི་དཀྱིལ་འཁོར། རྩེ་མོ་ན་རྩ་བ་དང་བརྒྱུད་པར་བཅས་པའི་བླ་མ། བར་ན་ཡི་དམ་གྱི་དཀྱིལ་འཁོར། མཐའ་སྐོར་ན་དཔལ་བོ་མཁའ་འགྲོ། སྲུང་མ་ལས་བྱེད་ཉི་ཟེར་གྱི་རྡུལ་ལམ་ནམ་མཁའ་ལ་སྤྲིན་འཁྲིགས་པ་ལྟར་བཞུགས་པར་སྒོམས་ཤིག བདག་དང་མདུན་བསྐྱེད་གཏོར་མའི་གནས་གསུམ་ལས་འོད་ཟེར་འཕྲོས་པས་དབང་གི་ལྷ་རྣམས་སྤྱན་དྲངས། བཛྲ་ས་མ་ཡ་ཛཿ དབང་བསྐུར་བའི་གསོལ་བ་བཏབ་པས་རིག་ལྔ་འཁོར་བཅས་ཀྱི་ལས་སོ་སོའི་བུམ་པ་ཐོགས་སྟེ། ཨོཾ་སརྦ་ཏཐཱ་ག་ཏ་ཨ་བྷི་ཥི་ག་ཏེ་ས་མ་ཡ་ཤྲཱི་ཡེ་ཧཱུྂ། ལྷ་རྣམས་འོད་དུ་ཞུ་ནས་སློབ་མ་ལ་ཐིམ། ཛ་ཧཱུྂ་བྂ་ཧོཿ རིགས་བདག་འོད་དཔག་མེད་ཀྱིས་དབུ་བརྒྱན་པར་གྱུར། སླར་ཡང་གཏོར་མ་ཁྲོ་མཆོག་རྟ་མགྲིན་དཔལ་དང་གཉིས་སུ་མེད་པའི་བླ་མའི་སྤྱི་བོའི་དཔལ་རྟ་མགྲིན་དཀར་པོའི་སྐུ་ལས་རང་འདྲ་འཕྲོས། འཁོར་རྣམས་ཀྱི་སྐུ་ལུས་ཀྱང་དེ་བཞིན་འཕྲོས། སློབ་མའི་སྨིན་མཚམས་ཀྱི་རྟ་མཆོག་རོལ་བ་དཀར་པོ་ལ་ཐིམ་པར་མོས་ལ། ཨོཾཿ རྒྱལ་བ་རབ་འབྱམས་སྐུ་ཡི་དབང་༔ དེ་རིང་བུ་ལ་སྦྱིན་པར་བྱཿ མཐོང་ཚད་ཁྲོ་བོའི་དཀྱིལ་འཁོར་རྫོགསཿ བུམ་དབང་ཡོངས་རྫོགས་ཐོབ་པར་ཤོགཿ ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུྂ། བུམ་པ་ཡོད་ན་བདུད་རྩི་བླུད་མེད་ན་དམིགས་པ་བྱས་པས་འགྲུབ། དེ་ལྟར་དབང་བསྐུར་བས། ལུས་ཀྱི་སྒྲིབ་དག བསྐྱེད་རིམ་བསྒོམ་པ་ལ་དབང༌། སྤྲུལ་སྐུའི་གོ་འཕང་ཐོབ་པའི་བསྐལ་བ་ཅན་དུ་བྱས། ༈ གསང་དབང་ནི། སློབ་མའི་བྱ་བ་ཁ་བསྒྱུར་བ་ལ། བླ་མ་རྩ་བ་གསུམ་གྱི་སྤྱན་སྔར་ངག་གི་སྒོ་ནས་བསག་པའི་རྫུན་དང་ཕྲ་མ། ཚིག་རྩུབ་ངག་འཆལ་དང༌། ངག་གི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། བླ་མ་དང་མདུན་བསྐྱེད་ཀྱི་མགྲིན་པའི་རྟ་མགྲིན་དམར་པོའི་མགྲིན་པའི་ཨཱ་ལས་དབྱངས་དང་གསལ་བྱེད་སོགས་ཡི་གེའི་སྤྲིན་འཕྲོས་ཏེ། མཚོ་ཆེན་ལ་ཁ་བ་བབས་པ་བཞིན་སློབ་མ་ལ་ཐིམ་པར་མོས་ལ། ཨཱཿ བརྗོད་པ་བྲལ་བ་ནཱ་དའི་དབྱངསཿ སྒྲ་རུ་ཤར་བ་ཡི་གེའི་ཚོགསཿ སྐལ་ལྡན་ཁྱོད་ལ་སྦྱིན་པ་ཡིཿ གསང་བའི་དབང་མཆོག་ཐོབ་པར་ཤོགཿ ཨཱ་ཝཱཀྐ་ཨ་བྷི་ཥིཉྩ་ཧཱུྂ། ཡང་མདུན་བསྐྱེད་ཡབ་ཡུམ་སྦྱོར་བའི་བདུད་རྩི་འཛགས་པ་ལྕེ་ལ་བཞག་པས་བདེ་སྟོང་གི་ཡེ་ཤེས་རྒྱུད་ལ་སྐྱེས་པར་མོས། རྩ་སྔགས་བཟླ། བདུད་རྩི་ཡོད་ན་བྱིན། དམིགས་པ་བྱས་ཀྱང་རུང༌། དེས་ངག་གི་སྒྲིབ་པ་དག རང་ལུས་ཐབས་ལྡན་གྱི་རྫོགས་རིམ་བསྒོམ་པ་ལ་དབང༌། ལོངས་སྐུ་ཐོབ་པའི་བསྐལ་བ་རྒྱུད་ལ་བཞག བཟླས་ལུང་ནི། སླར་ཡང་དཀྱིལ་འཁོར་ལྷ་ཚོགས་ཀྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཆད། ཞལ་ནས་ཐོན་སློབ་མའི་ཞལ་དུ་ཐོན། ཐུགས་ཀའི་སྔགས་འཁོར་ལ་ཐིམ་པས་སྔགས་ཀྱི་བྱིན་རླབས་ཞུགས་པར་དམིགས་ལ། རྩ་སྔགས་ལས་སྔགས། ཆོ་ག་བཅས་ཀྱི་ལུང་སྦྱིན། ༈ ཤེས་རབ་ཡེ་ཤེས་ཀྱི་དབང་ནི། སློབ་མའི་བྱ་བ་ཁ་བསྒྱུར་བ་ནི། བླ་མ་རྩ་བ་གསུམ་གྱི་སྤྱན་སྔར་ཡིད་ཀྱི་སྒོ་ནས་བསག་པའི་བརྣབ་སེམས། གནོད་སེམས། ལོག་ལྟ་དང༌། ཡིད་ཀྱི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། སློབ་མས་སྣང་སྲིད་ཕྱག་རྒྱར་ཤར་བའི་མཆོད་པ་འབུལ་བར་མོས་ལ། ཧོཿ བདེ་ཆེན་བསྐྱེད་པའི་རིག་མ་ཡིཿ གསང་བའི་མཎྜལ་ཁྱོད་ལ་འབུལཿ བླ་མས་བྱིན་གྱིས་བརླབས་ཤིང་གནང་བར་བསམ་ལ། ཀྱེ་བུ་ཁྱོད་དམ་ཚིག་གནས་ཤེས་སམཿ གཉིས་མེད་རྣལ་འབྱོར་སྤྱོད་འདོད་དམཿ སྨྲས་པའི་ལན་དུ། གཙང་རྨེ་བྲལ་བ་བདག་གིས་སྤྱོདཿ བདེ་ཆེན་དམ་ཚིག་ལ་གནས་བྱ༔ ཞེས་བླ་མ་དང་བདུན་བསྐྱེད་ཀྱི་ཐུགས་ཀ་ནས་རིགས་དང་ལང་ཚོ་ལྡན་པའི་ཕྱག་རྒྱ་མ་སྤྲོས་ཏེ་སློབ་མ་ལ་གཏད་པར་མོས། བླ་མསཿ ཧོཿ རྨད་བྱུང་བདེ་ཆེན་ཕྱག་རྒྱ་ཆེཿ བདེ་བ་ཐམས་ཅད་འབྱུང་བའི་གནསཿ ཐར་བའི་ལམ་དུ་འཁྲིད་པ་མོཿ གཉིས་མེད་ཡེ་ཤེས་ཁྱོད་ཀྱིས་ཟུངསཿ སློབ་མ་རྟ་མགྲིན་དུ་གསལ་བའི་ཡུམ་ཕག་མོ་དང་གཉིས་སུ་མེད་པར་གྱུར། སྙོམ་འཇུག་གི་བདེ་བ་ཉམས་སུ་མྱོང་པས། ཡིད་ཀྱི་ལས་དང་ཐུགས་ལེའི་སྒྲིབ་པ་དང༌། གཞན་ལུས་ཐབས་ལྡན་གྱི་རྫོགས་རིམ་བསྒོམ་པ་ལ་དབང༌། ཆོས་སྐུའི་གོ་འཕང་ཐོབ་པའི་སྐལ་བ་ཅན་དུ་བྱས་སོ། ། ༈ ཀ་དག་ཚིག་གི་དབང་ནི། བླ་མ་རྩ་བ་གསུམ་གྱི་སྤྱན་སྔར་ཀུན་གཞིའི་ཁམས་ཀྱི་བག་ལ་ཉལ་བའི་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། བླ་མ་དང་མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་ནས་ཡེ་ཤེས་ལྔ་ལྡན་གྱི་འཇའ་དང་འོད་ཀོར་ཕྱག་མཚན་ལྕགས་ཀྱུ། ཞགས་པ། པདྨ། དབྱུག་ཏོ། གྲི་གུག ཐོད་པ། རྡོ་རྗེ། རྔེའུ་ཆུང། དཔག་ཏུ་མེད་པ་སྤྲོས་ཏེ་སློབ་པའི་སྙིང་གར་ཐིམ་པར་མོས། ཨཿ སྣང་བར་ཤར་བའི་ཆོས་ཐམས་ཅདཿ དོན་ལ་རང་སྣང་སྟོང་པའི་གཟུགསཿ དབང་ཆེན་འབར་བའི་ཡེ་ཤེས་བྱིནཿ གཞན་ན་མེད་དེ་ཆོས་ཀྱི་དབྱིངསཿ ཨ་ཨ་ཨ་ཕཊཿ དེས་མཆོག་གི་ཡོན་ཏན་བསྐྱེད་པའི་དབང་ཐོབ། ཀུན་གཞིའི་ལས་དང་ཤེས་བྱའི་སྒྲིབ་པ་དག ལམ་རྫོགས་པ་ཆེན་པོ་བསྒོམ་པའི་སྣོད་དུ་གྱུར། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། ། ༈ འགྲོ་འདུལ་འཕྲིན་ལས་ཀྱི་དབང་ནི། བླ་མ་དང་མདུན་བསྐྱེད་ཀྱི་མགྲིན་པ་གསུང་གི་འཁོར་ལོ་ལས་འོད་དམར་པོ་འཕྲོས། སློབ་མ་རྟ་མགྲིན་གསལ་པའི་མགྲིན་པར་ཞུགས། གསུང་བསྒྲགས་པ་ཙམ་གྱིས་ཁམས་གསུམ་དབང་དུ་འདུ་བ་དང༌། གསུང་རྟ་མཆོག་རོལ་བའི་འཕྲིན་ལས་དང་དངོས་གྲུབ་ཐམས་ཅད་ཐོབ་པར་བསམ། །དཔལ་གྱི་རྟ་སྐད་དང་པོ་བསྒྲགས་པས། སྣང་སྲིད་ཆོས་ཐམས་ཅད་བཅོས་བསྒྱུར་མེད་པ་རང་བྱུང་ཡེ་ཤེས་ཀྱི་ངང་དུ་ལྷུན་གྱིས་གྲུབ་པར་བསམ། རྩ་སྔགས་དབྱངས་སུ་གྱེར་ཞིང་རྐང་གླིང་དང་རོལ་མོ་བྱ། དཔལ་གྱི་རྟ་སྐད་གཉིས་པ་བསྒྲགས་པས། ཁམས་གསུམ་ཀྱི་ཆོས་ཐམས་ཅད་ཤ་རི། ཁྲག་མཚོ། རུས་པའི་ཕུང་པོར་གྱུར་བར་མ་མོ་མཁའ་འགྲོ་ཐམས་ཅད་འདུས་ཤིང་ལོངས་སྤྱོད་པར་བསམ། སྔགས་རོལ་གོང་ལྟར། དཔལ་གྱི་རྟ་སྐད་གསུམ་པ་བསྒྲགས་པས་མ་མོ་མཁའ་འགྲོ་སྡེ་བརྒྱད་དྲེགས་ཚོགས་མ་ལུས་པ་དབང་དུ་བསྡུས་ཤིང་བཀའ་ལ་ཉན། འཕྲིན་ལས་བཞི་སྒྲུབ་པར་བསམ་ལ་རྟ་སྐད་སྒྲོགས། སྔགས་རོལ་གོང་ལྟར། བླ་མ་བརྒྱུད་པའི་གསོལ་འདེབས་བཏོན་ཞིང་གཏོར་མའི་བཀའ་བསྒོ་བྱ། མཐར་སློབ་མ་དམ་ལྡན་ཡིན་ན་གཏོར་མའི་ལྷ་བསྟིམ། སྤྱི་ལ་གཏོར་མའི་ལྷ་ཆོས་ཀྱི་དབྱིངས་སུ་ཐིམ། བདག་དང་སྣང་བ་ཐམས་ཅད་རིམ་བཞིན་སྙིང་ཀའི་སྔགས་འཁོར། དེ་ཐུགས་སྲོག། དེ་ནཱ་ད། རིམ་པར་ཆོས་ཀྱི་དབྱིངས་སུ་ཐིམ་པར་བསམ། སླར་ཡང་སྔགས་སྒྲ་ཕྲ་བ་ནས་ཆེན་པོར་བསྒྲགས་པས་སྣོད་བཅུད་ཐམས་ཅད་དཀྱིལ་འཁོར་ཆེན་པོ་གསུམ་དུ་གྱུར་བར་བསམ། རྟ་སྐད་སྒྲོགས། དམ་ཚིག་ཁས་ལེན། གཙོ་བོའི་ཅི་ལྟར། མཎྜལ། དེང་ནས་བརྩམས་ཏེ་སོགས་ལུས་འབུལ། བསོད་ནམས་འདི་ཡིས་སོགས་བསྔོ་བ་དང་སྨོན་ལམ་གྱིས་མཐའ་བརྒྱན་པར་བྱ། །ཅེས་པའང་གསང་བདག་རིག་འཛིན་ཆེན་པོ་ཚེ་དབང་ནོར་བུའི་གཏེར་ཆོས་བསམ་པ་ལྷུན་གྲུབ་ཀྱི་ལས་ཚོགས་ཀྱི་སྐོར། མན་ངག་བརྒྱད་པ་རྟ་མགྲིན་ནག་པོའི་ལས་ཚོགས་འདི་ཉིད་རྗེ་བཙུན་བླ་མའི་ཞབས་དྲུང་དུ་མི་ལོ་བཞི་བཅུ་ཙམ་དུ་སྐུའི་གྲིབ་མ་ལྟར་འབྲལ་མེད་དུ་འགྲོགས་པའི་སྐལ་བཟང་ཅན་མཆོད་དཔོན་བསྟན་འཛིན་རྡོ་རྗེས་བྲིས་པ་དགེ། བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ་ཁྲིགས་སུ་བཀོད་པ།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ་ཁྲིགས་སུ་བཀོད་པ་བཞུགས་སོ། ། ན་མོ་པདྨ་བཛྲ་ཡེ༔ འགྲོ་བ་ཡང་དག་སངས་རྒྱས་ལམ༔ སྣ་ཚོགས་ཚུལ་གྱིས་སྟོན་མཛད་པ༔ རང་བྱུང་རང་གྲོལ་སྤྲུལ་བའི་སྐུ༔ སངས་རྒྱས་པདྨ་ལ་ཕྱག་འཚལ༔ ནང་སྒྲུབ་ཡིད་བཞིན་ནོར་བུ་མཆོག༔ ཉམས་ལེན་སྐལ་ལྡན་སྐྱེས་བུ་ཡིས༔ སྒྲུབ་པའི་གནས་སུ་དམ་རྫས་བསག༔ སྐུ་རྟེན་བདེ་བ་ཆེན་པོ་མཆོག༔ གསུང་རྟེན་གསང་སྔགས་གསེར་གྱིས་བྱས༔ ཐུགས་རྟེན་ཤེལ་རྡོ་མེ་ལོང་དང་༔ ཕྱི་ནང་གསང་མཆོད་རྒྱས་པར་བཀྲམ༔ དམ་ཚིག་གཙང་ལ་ལྟ་གདེང་བསྐྱེད༔ ཐོག་མར་སྐྱབས་སུ་འགྲོ་བ་ནི༔ ན་མོ༔ རང་བྱུང་ལྷུན་གྲུབ་བླ་མ་པདྨ་འབྱུང་༔ སྐྱབས་ཀུན་འདུས་ངོ་བོར་ཐག་ཆོད་དོ༔ སྐྱོང་པའི་ཕ་དང་བརྩེ་བའི་མ་ཁྱོད་ཡིན༔ མཁྱེན་བརྩེ་ནུས་པས་འགྲོ་ཀུན་སྐྱབས་ཏུ་གསོལ༔ སེམས་བསྐྱེད་པ་ནི༔ ཀྱེ་མ༔ དབང་མེད་ལས་ཀྱིས་འཁོར་བའི་འགྲོ་བ་རྣམས༔ སྲིད་ལས་ཡོངས་གྲོལ་བདེ་ཆེན་སར་འགོད་ཕྱིར༔ གསང་མཆོག་རྡོ་རྗེའི་ཟབ་ལམ་ལ་ཞུགས་ནས༔ ཁམས་གསུམ་འཁོར་བ་དོང་སྤྲུགས་སེམས་བསྐྱེད་དོ༔ ཡན་ལག་བདུན་པ་ནི༔ ཨོཾ་ཨཱཿཧཱུྃ༔ མཁའ་ཁྱབ་དཀྱིལ་འཁོར་རྒྱ་མཚོར་བརྡ་ཕྱག་འཚལ་༔ སྣང་སྲིད་རྣམ་དག་ཕྱག་རྒྱའི་མཆོད་པ་འབུལ༔ རྟོག་སྒྲིབ་བག་ཆགས་ཆོས་ཉིད་ཀློང་དུ་བཤགས༔ གཉིས་འཛིན་རང་གྲོལ་ངང་ནས་རྗེས་ཡི་རང་༔ མི་འགག་རྡོ་རྗེའི་ཆོས་འཁོར་བསྐོར་བར་བསྐུལ༔ འཕོ་མེད་རྟག་ཁྱབ་ཀློང་དུ་བཞུགས་སུ་གསོལ༔ འཁོར་གསུམ་ཡོངས་དག་དམིགས་མེད་དབྱིངས་སུ་བསྔོ༔ འགྲོ་ཀུན་དགོངས་པ་རང་གྲོལ་བྱང་ཆུབ་ཤོག༔ ལྷ་བསྐྱེད་པ་ནི༔ ཨ༔ ཀ་དག་དབྱིངས་ལས་ཡེ་ཤེས་རོལ་བའི་རྩལ༔ འོད་གསལ་ལྷུན་གྲུབ་རྒྱན་གྱི་འཁོར་ལོ་ལས༔ སྣང་སྲིད་རྣམ་དག་པདྨོ་བཀོད་པའི་ཞིང་༔ ཟག་མེད་འདོད་ཡོན་ཆོས་དབྱིངས་ཁྱོན་ཀུན་འགེངས༔ སྙོག་བྲལ་མཚོ་དབུས་དྲི་མེད་པདྨའི་སྟེང་༔ ཐོལ་སྐྱེས་རང་བྱུང་བླ་མ་པདྨ་འབྱུང་༔ སྐུ་མདོག་དཀར་དམར་ཞལ་གཅིག་ཕྱག་གཉིས་པ༔ ཞབས་གཉིས་བཞེངས་སྟབས་ཐབས་ཀྱིས་འགྲོ་བ་འདུལ༔ ཕྱག་གཡས་རྡོ་རྗེས་དཔའ་བོ་དབང་སྡུད༔ གཡོན་པའི་ཐོད་པས་མ་ཚོགས་མཁའ་འགྲོ་འགུགས༔ ཞལ་འཛུམ་སྤྱན་གདང་སྤྱན་རྩ་ཉི་ལྟར་འཁྱིལ༔ ཤངས་ཀྱི་གཟེངས་མཐོ་ཚེམས་དཀར་སྙན་ཤལ་རིང་༔ སྨིན་མ་གནག་སྣུམ་ཁྱུང་ཆེན་གཤོག་པ་འདྲ༔ དབུ་ལ་མཐོང་གྲོལ་པདྨའི་ཅོད་པཎ་མཛེས༔ གསང་བའི་གོས་དཀར་ཕོད་ཀ་མཐིང་ཀའི་སྟེང་༔ ཆོས་གོས་དམར་པོ་རིན་ཆེན་སྟོད་གཡོགས་གསོལ༔ ཁྲོ་ཆགས་སྒེག་པས་འགྲོ་བློ་དབང་དུ་སྡུད༔ ཧུར་བག་བརྩེ་བའི་སྤྱན་གྱིས་བདག་ལ་གཟིགས༔ འབྱུང་ལྔ་རྣམ་པར་དག་པའི་མཁའ་འགྲོ་ལྔ༔ ཚོགས་བརྒྱད་རང་སར་དག་པའི་མཚན་མཆོག་བརྒྱད༔ འགྲོ་བའི་རེ་སྐོང་བསམ་པ་ལྷུན་གྲུབ་པའི༔ མ་ངེས་རྣམ་འགྱུར་མཁའ་ལ་འཇའ་ལྟར་ཤར༔ སྐུ་ཡི་མཚན་དཔེས་སྣང་སྲིད་ཟིལ་གྱིས་གནོན༔ གསུང་དབྱངས་སྙན་པས་ལྷ་འདྲེ་མི་གསུམ་འདུལ༔ ཐུགས་ཀྱི་བརྩེ་བས་དད་ལྡན་རྗེས་སུ་འཛིན༔ མཐོང་ཐོས་དྲན་པས་བྱིན་རླབས་གཟི་བྱིན་འབར༔ ཁྱོད་སྐུ་རྡོ་རྗེ་གསུམ་གྱི་དཀྱིལ་འཁོར་ལས༔ ཆོས་ཉིད་སྐུ་དང་ལོངས་སྤྱོད་རྫོགས་པའི་གཏེར༔ ཞི་ཁྲོ་རབ་འབྱམས་བསམ་མི་ཁྱབ་པའི་འཕྲུལ༔ མ་ལུས་རྒྱལ་བའི་ཞིང་ཀུན་ཐེམ་མེར་གཏམ༔ རང་གི་སྙིང་དབུས་ཆོས་ཀྱི་འཁོར་ལོའི་དབྱིངས༔ དད་དམ་འགྱུར་མེད་མི་ཤིག་རྡོ་རྗེའི་ལྟེར༔ མཐིང་གསལ་ཧཱུྃ་གི་ནཱ་དའི་འོད་ཟེར་གྱིས༔ རྒྱལ་ཀུན་རྒྱུད་བསྐུལ་དབྱིངས་ནས་སྤྱན་དྲངས་གྱུར༔ སྤྱན་འདྲེན་པ་ནི༔ ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་ཏུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབས་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃཿ བུ་ངས་གདུང་བའི་དབྱངས་ཀྱིས་བསྐུལ༔ ཕ་གཅིག་ཐུགས་རྗེ་མ་གཡེལ་བྱོན༔ སྐུ་ཡི་གར་སྟབས་ཤིག་སེ་ཤིག༔ གསུང་གི་བརྡ་གླུ་གྱུ་རུ་རུ༔ ཐུགས་ཀྱི་བྱིན་རླབས་ད་ལ་ལ༔ བརྩེ་ཆེན་སྤྱན་གྱིས་ད་ལྟ་གཟིགས༔ ལུས་ལ་རྡོ་རྗེའི་ཚེ་དབང་སྐུར༔ ངག་ལ་གཞོམ་མེད་སྔགས་རྒྱས་ཐོབ༔ ཡིད་ལ་བདེ་སྟོང་ཡེ་ཤེས་བསྐྱེད༔ དུས་མིན་འཆི་བའི་བར་ཆད་ཟློག༔ འབྱུང་ཁམས་དབང་དུ་བསྒྱུར་བ་དང་༔ འཕོ་མེད་འོད་གསལ་མངོན་ཏུ་གྱུར༔ ཚེ་དང་སྨོན་ལམ་དབང་བཅུ་ཐོབ༔ རྟག་བརྟན་རྡོ་རྗེའི་སྐུ་ཐོབ་ཤོག༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ བཞུགས་གསོལ་ནི༔ ཧོ༔ གདོད་ནས་ཡེ་ཤེས་གཅིག་གི་རོལ་པ་ལ༔ བསྐྱེད་ཅིང་སྤྱན་འདྲེན་བཞུགས་པ་མི་འཚལ་ཡང་༔ གཉིས་སྣང་འཛིན་པའི་རྫུན་ཕུག་རྟོལ་བའི་ཕྱིར༔ གཤེགས་བཞུགས་བྲལ་བའི་ཆོས་དབྱིངས་ངང་དུ་བཞུགས༔ ཕྱག་འཚལ་བ་ནི༔ ན་མོ༔ ཕྱག་ཡུལ་གདོད་ནས་དག་པ་སེམས་ཀྱི་འཕྲུལ༔ སེམས་ཉིད་འོད་གསལ་བསམ་མི་ཁྱབ་པའི་གཏེར༔ ཐ་དད་འཛིན་པ་ཡེ་དག་མཉམ་པ་ཉིད༔ གཉིས་འཛིན་རང་སར་གྲོལ་བས་ཕྱག་བགྱིའོ༔ མཆོད་པ་ནི༔ ༀ་ཨཱཿ་ཧཱུྃ༔ བདེ་ཆེན་ཕྱག་རྒྱ་ཆེན་པོའི་མཆོད་པ་ནི༔ ཡུལ་དང་དབང་པོ་དགའ་བས་མཉམ་སྦྱོར་བ༔ སྣང་གྲགས་རྟོག་ཚོགས་མཆོད་པའི་སྤྲིན་ཆེན་པོ༔ གདོད་ནས་ལྷུན་གྲུབ་ཡེ་ཤེས་མཆོད་པར་རོལ༔ ཨོཾ་བཛྲ་ཨརྒྷཾ་པཱ་དྱཾ་པུཥྤེ་དྷཱུཔེ་ཨཱ་ལོ་ཀེ་གནྡྷེ་ནཻ་ཝི་དྱཱ་ཤཔྟ་རཱུ་པ་ཤབྟ་གནྡྷེ་རཱ་ས་སྥརྴེ་སརྦ་པཉྩ་ཨ་མྲྀ་ཏ་རཀྟ་བ་ལིངྟ་རཱུ་ཏྲ་མ་ཧ་སུ་ཁཱ་དྷརྨ་དྷ་ཏུ་པཱུ་ཛ་ཧོ༔ བསྟོད་པ་ནི༔ ༀ་ནི་ཐུགས་རྗེ་རེ་སྐོང་སྤྲུལ་བའི་སྐུ༔ ཨཱཿ་ནི་ངེས་པ་ལྔ་ལྡན་ལོངས་སྐུའི་གསུངས༔ ཧཱུྃ་ནི་ཡེ་ཤེས་འགྱུར་མེད་ཆོས་སྐུའི་ཐུགས༔ སྐུ་གསུམ་རིགས་འདུས་པདྨ་རྒྱལ་པོར་བསྟོད༔ བཛྲ་ཆོས་དབྱིངས་འགྱུར་མེད་ངོ་བོ་ཉིད༔ གུ་རུ་སྤངས་རྟོགས་ཕུན་ཚོགས་ཡོན་ཏན་གཏེར༔ པདྨ་སྐྱོན་བྲལ་འཕྲིན་ལས་མཐའ་ཡས་བདག༔ སིདྡྷིས་འཁོར་འདས་དངོས་གྲུབ་རྩོལ་ལ་བསྟོད༔ ཧཱུྃ་གིས་ཐུགས་དམ་བསྐུལ་ལོ་པདྨ་འབྱུང་༔ རྟོགས་སྒྲིབ་བག་ཆགས་སོལ་ཅིག་ཐུགས་རྗེའི་བདག༔ ཁྱོད་ཐུགས་ཟག་པ་ཀུན་བྲལ་མཁའ་ལྟར་བརྡལ༔ བདག་ཡིད་གཅིག་འདྲེས་རང་གྲོལ་དོན་ལ་བལྟ༔ རྩ་སྙིང་ནི༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ དབྱངས་སུ་གྱེར་ཞིང་གསོལ་བ་འདེབས༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཡེ་ཤེས་ཆིག་རྫོགས་དབང་སྐུར་ཞུ༔ ས་མ་ཡ༔ ནང་སྒྲུབ་རྫོགས་སོ༔ ཐུགས་དམ་གནད་བསྐུལ་ནི༔ ཧཱུྃ་ཧཱུྃ་ཧཱུྃ༔ ཆོས་དབྱིངས་ཀློང་ན་རང་རིག་ཆོས་ཀྱི་སྐུ༔ འོག་མིན་གནས་སུ་མཚོ་སྐྱེས་རྡོ་རྗེ་འཆང་༔ རྔ་ཡབ་དཔལ་རིར་རིག་འཛིན་སྤྲུལ་བའི་སྐུ༔ བདག་གི་ཕ་གཅིག་གུ་རུ་པདྨ་འབྱུང་༔ བྱིན་རླབས་གཏེར་ཆེན་བླ་མ་པདྨ་འབྱུང་༔ དངོས་གྲུབ་འབྱུང་གནས་ཡི་དམ་པདྨ་འབྱུང་༔ འཕྲིན་ལས་མྱུར་སྒྲུབ་མཁའ་འགྲོ་པདྨ་འབྱུང་༔ ལས་བཞིར་ཐོགས་མེད་ཆོས་སྐྱོང་པདྨ་འབྱུང་༔ འདོད་རྒུའི་ཆར་འབེབ་ནོར་ལྷ་པདྨ་འབྱུང་༔ བླ་རབས་ཆོས་རྒྱུན་མགོན་པོ་པདྨ་འབྱུང་༔ མི་རབས་རིགས་བརྒྱུད་བླ་མ་པདྨ་འབྱུང་༔ སྐྱབས་གནས་དགུ་སྤྲུགས་ངོ་བོར་གསོལ་བ་འདེབས༔ ཤཱཀྱའི་དབང་པོ་ཁྱོད་ཡིན་བསྟན་པ་གཏོད༔ འོད་དཔག་མེད་མགོན་ཁྱོད་ཡིན་ཞིང་ཁམས་སྟོན༔ སྤྱན་རས་གཟིགས་དབང་ཁྱོད་ཡིན་ཐུགས་རྗེས་ཟུངས༔ ཟག་མེད་དགོངས་པ་ནམ་མཁའི་ཀློང་ཡངས་ལས༔ ཐུགས་རྗེ་ཉི་ལྟར་བརྡལ་བའི་ཡིད་བཞིན་ནོར༔ དཔའ་བོའི་ཚོགས་རྗེ་མ་ཚོགས་མཁའ་འགྲོའི་གྲོགས༔ གཅིག་ཆོག་སྐྱབས་གནས་འབོད་དོ་མཐུ་རྩལ་ཕྱུངས༔ བདག་ནི་གུ་རུ་ཁྱོད་ཀྱི་བུ་གཅིག་སྟེ༔ སྔོན་ཚེ་པདྨ་ཁྱོད་དང་སྨོན་ལམ་གཅིག༔ ད་ལྟ་དད་པ་འགྱུར་མེད་སྒྲུབ་པ་པོ༔ རྩེ་གཅིག་གདུང་བས་བསྐུལ་ལོ་ཕྱག་སྐྱོངས་ཤིག༔ བརྩེ་བའི་ཕ་གཅིག་ཁྱོད་ཡིན་ཐུགས་རྗེའི་བདག༔ གཅེས་པའི་བུ་གཅིག་ང་ཡིན་དམ་ཚིག་གཙང་༔ གསོལ་ཕ་ལ་མི་འདེབས་སུ་ལ་འདེབས༔ བྱིན་རླབས་བུ་ལ་མི་སྩོལ་སུ་ལ་སྩོལ༔ རྟག་ཏུ་ཕ་གཅིག་ཁྱོད་ཉིད་ཁོ་ན་དྲན༔ རྒྱུན་དུ་གསོལ་འདེབས་བྱིན་རླབས་ཁྱོད་ལ་ཞུ༔ སྐྱབས་གནས་གཞན་ན་མེད་དོ་ཕ་ཡིས་དགོངས༔ རེ་ལྟོས་སུ་ལ་མི་བྱ་ཁྱོད་ལ་བཅོལ༔ མཐུ་སྟོབས་རྫུ་འཕྲུལ་སྟོན་ཅིག་པདྨ་འབྱུང་༔ འཁོར་བའི་མཚོ་ལ་ཡུན་རིང་སྡུག་མྱོང་ཡང་༔ ད་དུང་ཇི་མི་སྙམ་པར་ལས་བསག་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ སྐྱོ་ཤས་སྣང་བ་སྐྱེ་བར་ཕ་ཁྱོད་མཁྱེན༔ ཆོས་སྤང་ལས་ཀྱིས་ཆོས་མིན་ལ་ཞེན་ཅིང་༔ འཇིག་རྟེན་ཡང་དག་ལམ་དང་ཁ་གྱེས་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ དད་མོས་ཤུགས་ཀྱིས་སྐྱེ་བར་ཕ་ཁྱོད་མཁྱེན༔ ཆོས་ལམ་ཞུགས་ཀྱང་བཤེས་ཀྱིས་མ་ཟིན་ཅིང་༔ དོན་མེད་གཡེངས་པས་དལ་འབྱོར་ཆུད་ཟོས་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ མཚན་ལྡན་བཤེས་དང་སྤྲོད་པར་ཕ་ཁྱོད་མཁྱེན༔ ས་སྟེང་འདི་ན་མ་ཤི་ལུས་པ་མེད༔ འཆི་བ་ཐོག་ཏུ་འབབ་པ་ཐག་ཆོད་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ འཆི་ཁའི་མཚམས་སྦྱོར་ལེགས་པར་ཕ་ཁྱོད་མཁྱེན༔ ཕ་མར་མ་གྱུར་འགྲོ་བ་གཅིག་ཀྱང་མེད༔ འགྲོ་བ་འདི་དག་དྲིན་ཆེན་ཤ་སྟག་ཡིན༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བྱམས་དང་སྙིང་རྗེ་སྐྱེ་བར་ཕ་ཁྱོད་མཁྱེན༔ སེར་སྣ་དབང་བཙན་ལོངས་སྤྱོད་གཏོང་སྒོ་དམ༔ གསོག་སྲུང་ཁོ་ནས་ཡི་དྭགས་རྒྱུ་བསྒྲུབ་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ མཆོད་སྦྱིན་རླབས་ཆེན་ནུས་པར་ཕ་ཁྱོད་མཁྱེན༔ འདོད་པས་སྨྱོས་ཏེ་མཁན་སློབ་དམ་སྡོམ་བརྗེད༔ སྒོ་གསུམ་ཁྲིམས་འཆལ་ལས་ངན་སྤྱོད་པའི་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བག་ཡོད་སྲུང་སེམས་སྐྱེ་བར་ཕ་ཁྱོད་མཁྱེན༔ ཚིག་ངན་མཚང་བྲུ་ཙམ་གྱིས་སྙིང་རྗེ་བརྗེད༔ གཞན་སྐྱོན་ཁར་ལུད་ཁོངས་ནས་ཁྲོ་བའི་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བཟོད་པའི་གོ་ཆ་བཙན་པར་ཕ་ཁྱོད་མཁྱེན༔ འཇིག་རྟེན་ཁ་སྟབས་ལ་ཞེན་གཏན་འདུན་བརྗེད༔ དམ་ཆོས་ཕྱི་བཤོལ་ལེ་ལོས་གཡེངས་པའི་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བརྩོན་འགྲུས་སྙིང་ནས་སྐྱེ་བར་ཕ་ཁྱོད་མཁྱེན༔ ལུས་སེམས་ཡ་བྲལ་ཆོས་ལ་སེམས་མི་འདྲེས༔ ཅི་ཙམ་སྒྲུབ་ཀྱང་ཉོན་མོངས་མི་བྲི་བས༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བསམ་གཏན་ཏིང་འཛིན་བརྟན་པར་ཕ་ཁྱོད་མཁྱེན༔ མི་དགེའི་ལས་ལ་ཁམས་དང་དབང་པོ་གསལ༔ མི་རུང་བྱ་བར་མཐུན་རྐྱེན་ཚོགས་པའི་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ ཤན་འབྱེད་ཤེས་རབ་སྐྱེ་བར་ཕ་ཁྱོད་མཁྱེན༔ ཟས་གོས་ནོར་དང་གཉེན་ལ་ཆགས་པ་ཆེ༔ འདོད་པས་བཅིང་ནས་འཁོར་བར་ཐར་དུས་མེད༔ གསོལ་བ་འདེབས་སོ་སངས་རྒྱས་པདྨ་སྐྱེས༔ དགོས་མེད་བློ་སྣ་སྐྱེ་བར་ཕ་ཁྱོད་མཁྱེན༔ བྱམས་པའི་སེམས་བོར་ཆོས་པའི་གཟུགས་བརྙན་གྱིས༔ གཅེས་པའི་ཕ་མ་དགྲ་རུ་ལྟ་བའི་དུས༔ གསོལ་བ་འདེབས་སོ་སངས་རྒྱས་པདྨ་སྐྱེས༔ ཞེ་སྡང་གདོང་ནས་བཟློག་པར་ཕ་ཁྱོད་མཁྱེན༔ ཆོས་པར་རློམ་ནས་ཆོས་བརྒྱད་འུར་ཆེ་ཡང་༔ རྒྱུ་འབྲས་མི་ཤེས་རང་གཞན་མགོ་འཁོར་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ གཏི་མུག་གཏིང་ནས་སྤྲུགས་པར་ཕ་ཁྱོད་མཁྱེན༔ འགྲན་སེམས་སློབ་མི་དགོས་པར་ལྷང་ངེར་ཤེས༔ གཞན་གྱི་ལེགས་བྱས་ཀུན་ལ་སྐྱོན་མཚང་བྲུ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ ཕྲག་དོག་རྩད་ནས་གཅོད་པར་ཕ་ཁྱོད་མཁྱེན༔ ལས་འབྲས་མིག་གིས་མཐོང་ཡང་མངོན་སུམ་སྙོན༔ སངས་རྒྱས་དངོས་སུ་མཇལ་ཡང་དག་སྣང་མེད༔ གསོལ་བ་འདེབས་སོ་སངས་རྒྱས་པདྨ་སྐྱེས༔ ལོག་ལྟ་རྨིང་ནས་སྐེམ་པར་ཕ་ཁྱོད་མཁྱེན༔ བླ་མ་བསྟེན་བཞིན་དད་དང་མོས་གུས་འགྲིབ༔ མཆེད་དང་འགྲོགས་བཞིན་བརྩེ་གདུང་དམ་ཚིག་ཉམས༔ གསོལ་བ་འདེབས་སོ་སངས་རྒྱས་པདྨ་སྐྱེས༔ དམ་ཚིག་སྤོང་ལེན་ནུས་པར་ཕ་ཁྱོད་མཁྱེན༔ ལུས་ལ་ནད་དང་སེམས་ལ་གདོན་གྱིས་ཟིན༔ མི་འདོད་སྡུག་བསྔལ་ཐོག་ཏུ་བབ་པའི་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ རྐྱེན་ངན་ལམ་དུ་སློང་བར་ཕ་ཁྱོད་མཁྱེན༔ བླ་མས་བཀའ་སྐྱོན་མཆེད་ཀྱིས་བརྙས་པ་དང་༔ མི་ནག་སྐྱེ་བོས་ཁ་བྱད་ཟུག་པའི་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བཅོས་མིན་དད་མོས་བརྟན་པར་ཕ་ཁྱོད་མཁྱེན༔ མི་རྣམས་སྡང་ཞིང་ལྷ་འདྲེའི་བར་ཆད་བརྩམ༔ ཅི་ཙམ་བསྒྲུབ་ཀྱང་འགྲུབ་རྟགས་མེད་པའི་དུས༔ གསོལ་བ་འདེབས་སོ་སངས་རྒྱས་པདྨ་སྐྱེས༔ གཉེན་པོས་རང་ཚུག་ཐུབ་པར་ཕ་ཁྱོད་མཁྱེན༔ གདམས་ངག་ཟབ་མོ་ཐོབ་ཀྱང་བཏང་སྙོམ་ལུས༔ འཆི་བ་ཕྱིར་ནུར་མ་ནུས་གློ་བུར་སླེབས༔ གསོལ་བ་འདེབས་སོ་སངས་རྒྱས་པདྨ་སྐྱེས༔ ཟབ་ལམ་འཕོ་བ་འབྱོང་བར་ཕ་ཁྱོད་མཁྱེན༔ ཚེ་འདིར་མ་གྲོལ་བར་དོའི་ཁམས་སུ་འཁྱམས༔ འཇིག་པའི་སྒྲས་གཟིར་གཡང་ས་གསུམ་འགྲིམ་ཚེ༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བར་དོར་ལོངས་སྐུར་གྲོལ་བར་ཕ་ཁྱོད་མཁྱེན༔ འཁྲུལ་སྣང་འཇིགས་སྐྲག་དུ་མ་མྱོང་མྱོང་མཐར༔ རྣམ་དཀར་སྟོབས་ཀྱིས་སྐྱབས་ཡུལ་དྲན་ནུས་ཞིག༔ གསོལ་བ་འདེབས་སོ་སངས་རྒྱས་པདྨ་སྐྱེས༔ སྐྱེ་བ་སྤྲུལ་སྐུ་འབྱོང་བར་ཕ་ཁྱོད་མཁྱེན༔ དུས་ངན་དབང་བཙན་ལས་ངན་མཚོ་ཆེན་རྡོལ༔ ཆོས་པའི་གཟུགས་ཀྱིས་ཆོས་མིན་སྤྱོད་པའི་དུས༔ གསོལ་བ་འདེབས་སོ་སངས་རྒྱས་པདྨ་སྐྱེས༔ འཁོར་བའི་གདོས་ཐག་ཆོད་པར་ཕ་ཁྱོད་མཁྱེན༔ དམིགས་པ་གང་གཏད་དག་པར་ཤར་བ་དང་༔ རིག་སྔགས་གང་བཟླས་མཐུ་དང་ལྡན་པ་ཞིག༔ གསོལ་བ་འདེབས་སོ་སངས་རྒྱས་པདྨ་སྐྱེས༔ བསྐྱེད་རིམ་ཏིང་འཛིན་འབྱོང་བར་ཕ་ཁྱོད་མཁྱེན༔ རྩ་རླུང་དག་པས་འགུལ་བསྐྱོད་བདེ་བར་ཤར༔ གཏུམ་མོ་འབར་བས་གཟུང་འཛིན་འཇོམས་ནུས་ཞིག༔ གསོལ་བ་འདེབས་སོ་སངས་རྒྱས་པདྨ་སྐྱེས༔ རྫོགས་རིམ་རང་དབང་ཐོབ་བར་ཕ་ཁྱོད་མཁྱེན༔ གཉིས་འཛིན་རྩ་བ་ཀ་དག་སྲིད་རྩ་སྟོང་༔ འོད་གསལ་ལྷུན་གྲུབ་འཇའ་ལུས་འབྱོང་བ་ཞིག༔ གསོལ་བ་འདེབས་སོ་སངས་རྒྱས་པདྨ་སྐྱེས༔ རྫོགས་ཆེན་ལྟ་དགོངས་རྟོགས་པར་ཕ་ཁྱོད་མཁྱེན༔ ད་ལྟ་ཉིད་དུ་ཐུགས་རྗེས་གཟིགས་ཏུ་གསོལ༔ གདན་ཐོག་འདི་རུ་དབང་བཞི་སྐུར་དུ་གསོལ༔ འདུག་ས་འདི་རུ་བྱིན་གྱིས་བརླབས་ཏུ་གསོལ༔ དུས་ལས་མི་འདའ་མྱུར་དུ་སྐྱབས་ཏུ་གསོལ༔ རེ་ས་གཞན་ན་མེད་དོ་པདྨ་འབྱུང་༔ ཐུགས་རྗེའི་མཐུ་དཔུང་བསྐྱེད་ཅིག་བཀའ་དྲིན་ཅན༔ གསང་གསུམ་རྡོ་རྗེའི་བྱིན་རླབས་སྙིང་ལ་ཕོབ༔ འཁྲུལ་བ་རང་ཞིག་འཇའ་ལུས་འགྲུབ་པར་ཤོག༔ ཅེས་སྒོ་གསུམ་གཅིག་ཏུ་སྒྲིལ༔ མོས་གུས་རྩེ་གཅིག་ཏུ་བསྐྱེད༔ བླ་མ་ལས་བསམ་རྒྱུ་མེད་པ༔ དད་པ་ལས་བློ་སྣ་མེད་པ༔ སྣང་སྲིད་བླ་མར་ཤར་བའི་ངང་དུ་ལྟ་བའི་གདེང་བསྐྱེད་ལ༔ གསོལ་བ་ཕུར་ཚུགས་སུ་བཏབ་པས༔ དེ་མ་ཐག་ཏུ་བྱིན་རླབས་ཐོབ༔ བརྒྱུད་གསུམ་རིག་འཛིན་བླ་མའི་བྱིན་རླབས་སྙིང་ལ་ཞུགས་ནས་རང་གཞན་གྱི་དོན་རྒྱ་ཆེན་པོ་འགྲུབ་པར་འགྱུར་རོ༔ ཐོད་ཕྲེང་རྩལ་གྱིས་ཛཔྲ་ཀྱིས་བསྐུལ༔ མཉམ་པར་བཞག༔ ཐུགས་དམ་གནད་ནས་བསྐུལ་བ་སོགས་ཉམས་དང་བསྟུན༔ ས་མ་ཡ༔ ཨྀ་ཐི༔ ༈ བདུད་རྩི་བྱིན་རླབས་བྱ་འདོད་ན༔ བུམ་པ་གཞལ་ཡས་ཁང་གི་ནང་དུ༔ བུམ་ལྷ་གུ་རུ་པདྨ་འབྱུང་གནས་ཀྱི་ལྷ་ཚོགས་སྤྲིན་འཐིབ་པ་ལྟར་གསལ་བཏབ༔ གནས་གསུམ་ཡི་གེ་གསུམ་ལས་བྱུང་བའི་སྐུ་གསུང་ཐུགས་ཀྱི་བདུད་རྩི་དོན་གཉིས་སྒྲུབ་པའི་ནུས་ལྡན་དུ་དམིགས༔ ཨ་ལས་ཆོས་དབྱིངས་བུམ་པ་རུ༔ བདུད་རྩི་བདེ་ཆེན་དྲོད་རླངས་འཐིལ༔ ཨོཾ་ཨཱ༔ཧཱུྃ་གིས་བྱིན་རླབས་པས༔ མྱོང་གྲོལ་ཡེ་ཤེས་མཆོག་ཏུ་གྱུར༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་དང་༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཐོད་ཕྲེང་རྩལ་གྱི་ཛཔྲ་དབྱངས་བྱ༔ བདུད་རྩི་མྱོང་བས་རྩ་ཁམས་ཀྱི་དཔའ་བོ་མཁའ་འགྲོ་མཉེས་ཤིང་ཚིམ༔ རང་ལུས་རྡུལ་ཕྲ་རབ་ཀྱི་ཆ་རེ་རེ་ནས་པདྨ་འབྱུང་གནས་འཇའ་ལུས་དྭངས་མའི་སྐུ་འགུལ་འགུལ༔ ཤིག་ཤིག༔ འོད་ཆེམ་ཆེམ་དུ་གྱུར་བའི་ངང་ལ་མཉམ་པར་འཇོག༔ གཞན་དོན་ཁྲུས་དང་དབང་བསྐུར་བྱིན་རླབས་ཀྱང་འདི་ཡི་བྱས་པས་དོན་འགྲུབ་པོ༔ ས་མ་ཡ༔ ཨྠྀི༔ ཐུན་སྐབས་སུ༔ བླ་མ་སྙིང་ཞུགས་གདམས་པ་ནི༔ ཨ༔ མཁའ་དབྱིངས་རྒྱལ་བ་རབ་འབྱམས་གཙོ་བོར་འདུས༔ གཙོ་བོ་འཇའ་ལུས་ཟུང་འཇུག་རྡོ་རྗེའི་སྐུ༔ འཐེབ་སོར་ཙམ་ཞིག་གཙུག་ནས་སྙིང་དབུས་བབ༔ བྱིན་རླབས་དབང་དང་དངོས་གྲུབ་མཆོག་ཐོབ་དམིགས༔ ཨ་ཨ་ཨ༔ བླ་མའི་ཐུགས་དང་རང་སེམས་དབྱེར་མེད་པ་ངེས་པའི་དོན་ལ་མཉམ་པར་འཇོག༔ སླར་ཡང་སྣང་གྲགས་རྟོག་ཚོགས་བླ་མའི་སྐུ༔ རྩོལ་མེད་མ་བཅོས་རིག་པའི་ངོ་བོར་བཞུགས༔ དགེ་བ་འདི་ཡིས་འགྲོ་བ་མ་ལུས་པ༔ ཡེ་ཤེས་བླ་མའི་ས་མཆོག་མྱུར་ཐོབ་ཤོག༔ ཨ་ཧོ༔ པདྨ་འབྱུང་གནས་ཐུགས་ཐིག་འདི༔ སྐལ་བ་ལྡན་པའི་དཔལ་དུ་ཤོག༔ གར་དབང་བདེ་ཆེན་རོལ་བ་ཡིས༔ ཡེ་ཤེས་ཟབ་མོ་དགོངས་གཏེར་རོ༔ ས་མ་ཡ༔ ཞེས་པའང་རྡོ་རྗེ་ཚེ་དབང་ནོར་བུའི་གཏེར་སྐལ་ལོ༔ རྒྱ་རྒྱ་རྒྱ༔ ཨྠྀི༔ དེ་ཡང་ནང་སྒྲུབ་ཀྱི་ཆོ་ཀ་ཆ་ཚང་བར་དཀྱུས་གཅིག་ཏུ་བཀོད་པ་པོ་རིག་འཛིན་ཆེན་པོའི་མཚན་གྱི་བྱིན་གྱིས་བརླབས་པའི་སྐྱེ་མིང་པ་པདྨ་དབང་ཆེན་དགྱེས་པའི་རྡོ་རྗེའོ། །དགེ་བས་འགྲོ་ཀུན་ཁྱབ་བདག་མཚོ་སྐྱེས་བླ་མའི་གོ་འཕང་ཐོབ་པའི་འགོད་པར་གྱུར་ཅིག སརྦ་མངྒ་ལཾ། ། བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ་དབང་ཆོག་་བདེ་ཆེན་ཡེ་ཤེས་རབ་འཕེལ།༄༅། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུ་དབང་ཆོག་་བདེ་ཆེན་ཡེ་ཤེས་རབ་འཕེལ་བཞུགས་སོ། ། ན་མོ་མ་ཧཱ་གུ་རུ་པདྨ་བཛྲ་ཡེ། །མཆོག་ཏུ་མི་འགྱུར་དགའ་བའི་ཡེ་ཤེས་ཆེ། །རང་ངོ་སྤྲོད་མཛད་ཟླ་མེད་སྐྱབས་ཀྱི་མཆོག །ཚེ་དབང་རིག་འཛིན་པདྨར་དབྱེར་མེད་པ། །གཅིག་ཆོག་སྙིང་གི་ནོར་བུར་གཙུག་ཏུ་མཆོད། །དེ་ལ་གུ་རུ་པདྨའི་བཀའ་སྲོལ། ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་གྱི་ནང་དབང་ཟབ་མོ་སྐུར་བ་ལ། སྤྲོ་ན་ས་ཕྱོགས་གཙང་མ་དམ་སེལ་མེད་པར་དཀྱིལ་འཁོར་དབུས་སུ། གཏོར་མ་དང་། སྐུ་ཚབས་ཡིད་བཞིན་ནོར་བུ། ཐོད་བུམ། ཚེ་རིལ། ཚེ་ཆང་། ཚེ་མདའ། ཕྱི་ནང་གི་མཆོད་པ་བཀོད་ལེགས་པ་བཤམ། སྤྲོས་མེད་ལ་སྐུ་ཚབས་ཡིད་བཞིན་ནོར་བུ་ཁོ་ན་ལ་བརྟེན་པས་འགྲུབ་པ་གཞུང་གི་དགོངས་པ་དྲི་མ་མེད་པའོ། །གང་ལྟར་ཡང་སྔོན་འགྲོ་ནས་རྩ་བའི་ལས་བྱང་བཞིན་བདག་མདུན་དབྱེར་མེད་དུ་བསྒྲུབ། ཐོད་བུམ་ཡོད་ན། གཞུང་ལས། བདུད་རྩི་བྱིན་རླབས་བྱ་འདོད་ན༔ བུམ་པ་གཞལ་ཡས་ཁང་གི་ནང་དུ༔ བུམ་ལྷ་གུ་རུ་པདྨ་འབྱུང་གནས་ཀྱི་ལྷ་ཚོགས་སྤྲིན་འཐིབ་པ་ལྟར་གསལ་བཏབ༔ གནས་གསུམ་ཡི་གེ་གསུམ་ལས་བྱུང་བའི་སྐུ་གསུང་ཐུགས་ཀྱི་བདུད་རྩི་དོན་གཉིས་སྒྲུབ་པའི་ནུས་ལྡན་དུ་དམིགས༔ ཨ་ལས་ཆོས་དབྱིངས་བུམ་པ་རུ༔ བདུད་རྩི་བདེ་ཆེན་དྲོད་རླངས་འཐིལ༔ ཨོཾ་ཨཱ༔ཧཱུྃ་གིས་བྱིན་རླབས་པས༔ མྱོང་གྲོལ་ཡེ་ཤེས་མཆོག་ཏུ་གྱུར༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་དང་༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ༔ ཐོད་ཕྲེང་རྩལ་གྱི་ཛཔྲ་དབྱངས་བྱ༔ བདུད་རྩི་མྱོང་བས་རྩ་ཁམས་ཀྱི་དཔའ་བོ་མཁའ་འགྲོ་མཉེས་ཤིང་ཚིམ༔ རང་ལུས་རྡུལ་ཕྲ་རབ་ཀྱི་ཆ་རེ་རེ་ནས་པདྨ་འབྱུང་གནས་འཇའ་ལུས་དྭངས་མའི་སྐུ་འགུལ་འགུལ༔ ཤིག་ཤིག༔ འོད་ཆེམ་ཆེམ་དུ་གྱུར་བའི་ངང་ལ་མཉམ་པར་འཇོག༔ གཞན་དོན་ཁྲུས་དང་དབང་བསྐུར་བྱིན་རླབས་ཀྱང་འདི་ཡི་བྱས་པས་དོན་འགྲུབ་པོ༔ ཞེས་པར་ལྟར་བསྒྲུབ། ལས་བུམ་རྟ་མགྲིན་ལྟ་བུ་བསྐྱེད་ལ་སྔགས་ཀྱི་བྱིན་གྱིས་བརླབས། ཚོགས་ཕུད་ཕུལ། བསྐང་བ་བྱ། རྩ་གསུམ་སྲུང་མར་གཏོར་འབུལ་བྱས་ཤིང་འཕྲིན་ལས་བཅོལ། བསྡུ་ན་བསམ་པ་ལྷུན་གྱི་གྲུབ་གྱི་ནང་སྒྲུབ་རྐྱང་པའམ་ལས་དཀྱིལ་ཙམ་བརྟེན་ཀྱང་རུང་། གསོལ་འདེབས་རྒྱས་བསྡུས་བཏོན། གདུང་འབོད་སྣང་བ་འགྱུར་ངེས་བྱ། མཎྜལ་ལན་དགུ་སྤྲུགས་སུ་ཕུལ། ཏིང་ངེ་འཛིན་གྱིས་དབང་བླང་། རྗེ་རིག་པ་འཛིན་པས། བདག་འཇུག་བླང་བ་ནི་སྤྱིར་སྔགས་སྡོམ་གསོ་བའི་ཡན་ལག་ཏུ་ངེས་པར་དགོས་གལ་ཆེ་བས་སློབ་མར་དབང་བསྐུར་སྐབས་ཁོ་ན་ཙམ་མ་ཡིན་པར་ཚེས་བཅུ་སོགས་དུས་བཟང་ཁྱད་པར་ཅན་རྣམས་སུ་ངེས་པར་ཇི་ནུས་དགོས་ཞེས་ཡང་ཡང་བཀའ་བསྩལ་ཞིང་། རྗེ་ཉིད་ཀྱིས་ཀྱང་སྐུ་ཚེ་གང་བོར་ཐུགས་ཉམས་སུ་བཞེས་པའི་ཕྱག་སྲོལ་བཟང་པོ་ཉམས་པ་མེད་པར་བྱས་ལ། སློབ་པ་རྣམས་ཁྲུས་སུ་ཕྱུང་། བགེགས་ལ་གཏོར་མ་བྱིན་ཏེ་བཀའ་བསྒོ་མཚམས་བཅད། བསྲུང་པའི་འཁོར་ལོ་བསྒོམ། ལས་ཀྱི་རྡོ་རྗེས་མེ་ཏོག་བཀྱེ་བསྡུ་བྱ། སློབ་དཔོན་གྱི་འདི་སྐད། ཅེས་བརྗོད་དེ། འོ་ན། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེ་ཡི་ཆེད་དུ་ཀུན་བཟང་པདྨ་ཞི་ཁྲོ་བསམ་པ་ལྷུན་གྲུབ་ཀྱི་ནང་སྒྲུབ་ཡིད་བཞིན་ནོར་བུའི་དབང་བསྐུར་ཞུ་སྙམ་པའི་རྟོག་པ་བསྡུས་ཏེ་ཡིད་རྩེ་གཅིག་མོས་པ་བརྟན་པོས་གསན་པར་ཞུ། དེ་ཡང་བདག་ཅག་གི་སྟོན་པ་རྫོགས་པའི་སངས་རྒྱས་ཐབས་མཁས་ཤིང་ཐུགས་རྗེ་ཆེན་པོ་དང་ལྡན་པ་དེས་གདུལ་བྱའི་བློ་དང་འཚམས་པར་ཐར་པའི་འཇུག་སྒོ་དམ་པའི་ཆོས་ཚུལ་ཇི་སྙེད་གསུང་པ་ལ་མཆོག་ཏུ་གྱུར་པ་འབྲས་བུ་གསང་སྔགས་རྣལ་འབྱོར་བླ་ན་མེད་པ་སྟེ། དེ་ཡང་སྤྱིར་བྱིན་རླབས་ཀྱི་འཇུག་སྒོ་རྨད་དུ་བྱུང་ཞིང་ཁྱད་པར་དཀྱིལ་འཁོར་ཐམས་ཅད་ཀྱི་གཙོ་མཆོག་བདེ་བར་གཤེགས་པ་ཡོངས་སུ་འདུས་པའི་ངོ་བོ་ཆིག་དྲིལ་ལམ་ཟབ་མོ་བླ་མའི་སྒྲུབ་པ་ཁོ་ན་ཡིན་ལ། དེ་ཡང་། བདུད་རྩི་འབྱུང་བའི་རྒྱུད་ལས༔ ལྷ་སྐུ་འབུམ་ཕྲག་བསྒོམ་པ་བས༔ བླ་མ་གཅིག་པུ་སྒོམ་པ་མཆོག༔ ཅེས་དང་༔ རྒྱུད་ཆེན་དྲ་བ་ལས། བླ་མ་སངས་རྒྱས་ཀུན་གྱི་རྗེ༔ རྒྱལ་བའི་མན་ངག་གསང་ཆེན་རྣམས༔ སྟོན་པ་རྡོ་རྗེའི་ཐུགས་ལ་གནས༔ གཙོ་རུ་བླ་མ་རྡོར་འཛིན་སྒོམ༔ ཅེས་དང་༔ སངས་རྒྱས་འདུས་པ་ལས༔ གང་གི་གདུལ་བྱའི་ཡིད་བཞིན་དུ༔ བླ་མ་སྒྲུབ་པའི་ཐབས་བརྩམས་ཏེ༔ དེ་ཉིད་དོན་དུ་སུས་གཉེར་བ༔ ཐེག་ཆེན་བླ་མའི་ས་ཡིན་ནོ༔ ཀུན་གྱི་བདག་ཉིད་ཆེན་པོར་འགྱུར༔ ཅེས་གསུངས༔ ནམ་མཁའ་ཆེའི་རྒྱུད་ལས༔ ཚོགས་གཉིས་མྱུར་རྫོགས་སྙིང་པོ་ཡི༔ དོན་རྟོག་འདོད་ན་བླ་མ་སྒྲུབ༔ ཅེས་སོགས་ལུང་འབྱམས་ཀླས་པར་འབྱུང་བ་བཞིན་བླ་མའི་སྒྲུབ་ཐབས་ནི་མཆོག་དང་གཙོ་བོར་གྱུར་པ་སྟེ། དེ་ཡི་སྒྲུབ་ཐབས་ཀྱི་སྒོ་བསམ་གྱིས་མི་ཁྱབ་པ་ལས་འདིར་རྒྱལ་བ་ཐམས་ཅད་ཀྱི་མཁྱེན་བརྩེ་ནུས་གསུམ་གཅིག་ཏུ་འདུས་པའི་རང་གཟུགས་གདོད་མ་ཉིད་ནས་ཆོས་སྐུ་ཀུན་ཏུ་བཟང་པོར་མངོན་པར་བྱང་ཆུབ་པ་ཉིད་པདྨ་རྣམ་པར་བཀོད་པའི་ཞིང་དུ་འོད་སྣང་དཔག་མེད་གངས་ཅན་མཚོ་སོགས་ལོངས་སྤྱོད་རྫོགས་པའི་སྐུ་དང་ཐུགས་རྗེའི་གདུལ་ཞིང་འབྱམས་ཀླས་པར་སྤྲུལ་པའི་བཀོད་པ་བསམ་གྱིས་མི་ཁྱབ་པ་ལས་མི་མཇེད་འཇིག་རྟེན་འདིར་ཡང་བསྐལ་པ་བཟང་པོའི་སངས་རྒྱས་སྟོང་ལ་དབང་བསྐུར་ནས་ལུང་སྟོན་པར་བྱེད་པ་པོ་སངས་རྒྱས་ནུས་ལྡན་རྡོ་རྗེར་གྱུར་ཞིང་བསྐལ་བཟང་སངས་རྒྱས་རེ་རེ་བཞིན་དེ་ཡི་ཕྲིན་ལས་མཐའ་དག་གི་བྱེད་པོ་རྒྱལ་བའི་བསྟན་ལ་སྟོན་པ་གཉིས་པ་ལྟ་བུར་རྟག་ཏུ་སྤྲུལ་བཞིན་བདག་ཅག་གི་སྟོན་པ་ཐུབ་པའི་དབང་པོའི་བསྟན་པ་ལ་ཡང་སྲིད་པ་གསུམ་དང་འཛམ་གླིང་འགྲོ་བ་རྣམས་ལ་རྒྱལ་བ་ཉིད་དང་རྣམ་དབྱེར་མེད་པའི་འཕྲིན་ལས་བཞིའི་སེམས་ཅན་གྱི་དོན་མཛད་པ་ཡིད་བཞིན་ནོར་བུ་རིན་པོ་ཆེ་ལྟ་བུའི་གུ་རུ་པདྨ་འབྱུང་གནས་ཀྱི་སྒྲུབ་ཐབས་ཏེ། རྒྱལ་བ་དེ་ཉིད་ལ་གངས་ཅན་གྱི་རྗེ་འབངས་སྐལ་ལྡན་ལས་ཅན་རྣམས་ཀྱི་གསོལ་བ་བཏབ་པར་བརྟེན་ཟབ་རྒྱས་ཀྱི་ཆོས་ཚུལ་ཇི་སྙེད་གསུངས་ཤིང་སྙིགས་མའི་དོན་དུ་ཟབ་མོའི་གཏེར་དུ་བཙས་པར་མཛད་པ་ལས། འདིར་ནི་རང་གཞུང་རྩ་བ་རྡོ་རྗེའི་ཚིག་རྐང་ལས། རིགས་དང་དཀྱིལ་འཁོར་ཀུན་གཙོ་ཆེ་བའི་མཆོག༔ བླ་མེད་བླ་མའི་སྒྲུབ་ཐབས་བྱེ་བ་འབུམ༔ ཡང་སྙིང་ཞུན་ཏིག་མོས་གུས་གསོལ་འདེབས་ཉིད༔ དེ་ཡི་མཐར་ཐུག་དགོས་འདོད་ཀུན་འབྱུང་གཏེར༔ གངས་ཅན་ལྷ་གཅིག་སངས་རྒྱས་པད་འབྱུང་གིས༔ བོད་ཡུལ་ཐུན་མོང་སྐུ་དངོས་གདུལ་བྱ་རྣམས༔ བཏུལ་བྱས་རྔ་ཡབ་གཤེགས་སྐབས་གུང་ཐང་ལར༔ རྗེ་འབངས་རྣམས་ལ་ཞལ་ཆེམས་ཚུལ་གསུངས་པའི༔ གསོལ་འདེབས་རྒྱལ་པོ་བསམ་པ་ལྷུན་གྲུབ་ཅེས༔ མན་ངག་བཅུ་གསུམ་བསམ་འཕེལ་དངོས་གྲུབ་མཛོད༔ ཅེས་པའི་གདམས་པ་འདི་ཉིད་ནི། གཏེར་ཆེན་རྡོ་རྗེ་གླིང་པའི་གཏེར་ལུང་ལས། ནམ་སྙིང་ཐུགས་སྤྲུལ་པདྨའི་གསུང་གི་འཕྲུལ༔ ནག་པོ་སྤྱོད་པའི་སྐུ་ཡི་སྤྲུལ་བ་ཞིག༔ ཨིནྡྲའི་མཚན་འཆང་སྟག་ལོར་སྤྲུལ་གར་སྒྱུར༔ དུས་འཁྲུགས་བཟློག་ཅིང་བསྟན་པ་ཐབས་ཀྱིས་གསོ༔ འབྲེལ་ཚད་བདེ་བ་ཅན་དུ་ཨེ་མ་ཧོ༔ ཞེས་དང་རོལ་བའི་རྡོ་རྗེས་གཏེར་ལུང་ལས༔ ནམ་སྙིང་སྤྲུལ་བ་འཕོ་བའི་བག་ཆགས་བཅོམ༔ སྟག་ལོ་བརྟུལ་ཞུགས་སྤྱོད་པ་དབང་པོའི་མིང༔ རྟེན་འབྲེལ་ཚོགས་ན་མཆོག་གི་གཏེར་ལྔ་འདྲེན༔ མཐའ་དམག་བཟློག་ཅིང་རྒྱལ་བསྟན་ཉམས་པ་གསོ༔ ཞེས་དང་པདྨ་བདེ་ཆེན་གླིང་པའི་གསང་བ་ཡེ་ཤེས་ཀྱི་མཆོག་གི་ཆོས་བདག་ལུང་དུ་བསྟན་པ་ལས། རྒྱལ་སྲས་ཤནྟ་དེ་བ་དང༔ ནག་པོ་སྤྱོད་པའི་སྐུ་ཡི་གར༔ ཙནྡྲ་གོ་མའི་གསུང་གི་བྱིན༔ འཕགས་ཡུལ་གྲུབ་པའི་རིག་འཛིན་བརྒྱད༔ གཅིག་འདུས་པདྨ་ཐོད་ཕྲེང་དང༔ ནམ་མཁའི་སྙིང་པོའི་ཐུགས་ལས་སྤྲུལ༔ བཻ་རོ་ཙཱ་ནའི་ཡོན་ཏན་དང༔ ཆོས་རྒྱལ་ཆེན་པོའི་འཕྲིན་ལས་ཉིད༔ ཨ་ཡི་ཐབས་ལ་བཛྲ་ཡུམ༔ ཚེ་དབང་མཚན་ཅན་སྟག་གི་ལོ༔ གྲུབ་པའི་རྟགས་ནི་ཐོགས་མེད་སྟོན༔ ལུས་ལ་སྨེ་བའི་དོ་ཤལ་ཅན༔ དཔྲལ་བར་དབང་གི་ཆོས་འབྱུང་བཀྲ༔ རང་བྱུང་མཁྱེན་རབ་ཁོངས་ནས་རྡོལ༔ གསང་ཆེན་བསྟན་པ་ཕྱོགས་བརྒྱར་སྤེལ༔ འཕྲིན་ལས་ཉི་ལྟར་གསལ་བ་འབྱུང༔ ཞེས་དང་། སྟག་ཚང་རྡོ་རྗེ་གྲོ་ལོད་ནས་བྱོན་པའི་ཐུགས་གཏེར་གསང་བའི་ལུང་བྱང་ལས། པདྨ་ང་སྤྲུལ་ནག་པོས་བྱིན་རླབས་ཅིང༔ ནམ་སྙིང་ཐུགས་ཀྱི་འོད་ཟེར་ཞུགས་གྱུར་པ༔ ཀཿཐོག་ལྷོ་ཕྱོགས་བཙན་རིའི་ཉེ་འདབས་སུ༔ མཆོག་དམན་སྤངས་པ་བར་མ་དག་གི་རིགས༔ མགོན་དང་མཚོ་ཞེས་བྱ་བ་གཉིས་ཀྱི་བུ༔ དབང་ངམ་ནོར་བུའི་མིང་ཅན་སྙིང་སྟོབས་ཅན༔ མི་ཆེ་མི་ཆུང་སྒེག་པ་རྡོ་རྗེའི་ལུས༔ རྩ་རླུང་ཐིག་ལེ་སྐྱོན་མེད་མཁའ་འགྲོ་འདུ༔ སྤྱོད་པ་མ་ངེས་བྱིས་པའི་ཚུལ་དུ་སྤྱོད༔ ཁ་དོག་ཉིན་རེ་ལ་ཡང་ངེས་མེད་འགྱུར༔ ལྟ་བའི་གདེངས་ལྡན་རྒྱུ་འབྲས་ཤན་འབྱེད་མཁས༔ རིག་པ་ངར་ཐོབ་གྱོང་ཚིག་ཏལ་མར་སྨྲ༔ ཤེས་བྱ་ཁོག་ཡངས་གདུལ་བྱ་དཀྲི་ལ་མཁས༔ ཏིང་འཛིན་གསལ་ཐེབས་གཞན་སྣང་ཟིལ་གྱིས་གནོན༔ སྦྱངས་པ་སྔོན་སོང་མདོ་རྒྱུད་དགོངས་དོན་གྲོལ༔ བློ་གྲོས་མཐུ་ལྡན་ཆོས་དང་ཆོས་མིན་འབྱེད༔ འཕྲལ་དུ་བརྟག་ན་མི་ཤེས་གླེན་པའི་ཚུལ༔ ཡུན་དུ་འགྲོགས་ཚེ་མཁས་ཀུན་སྙེམས་པ་འཕྲོག༔ ཡོན་ཏན་ལྡན་པ་སྦས་ཚུལ་རྣལ་མར་སྤྱོད༔ རེས་ནི་མི་རྟག་སྐྱོ་ཤས་འཆི་མ་འཁྲུག༔ རེས་ནི་གང་ལའང་མི་འཇིགས་དཔའ་སྐད་འདོན༔ རེས་ནི་ང་རྒྱལ་རེས་ནི་དམན་པའི་ཚུལ༔ རེས་ནི་ཉོན་མོངས་དྲག་ཏུ་ཞེན་པ་ལྟར༔ རེས་ནི་བྱང་སེམས་ཞི་དུལ་བརྩེ་བའི་ཉམས༔ རེས་ནི་ནོར་ལ་སྐམ་ཆགས་ཞེན་པོའི་ཚུལ༔ རེས་ནི་གསེར་དང་ས་རྡོ་སྙོམ་བཞིན་སྤྱོད༔ དེ་སོགས་ཅི་བདེར་སྒྱུ་མ་ལྟར་སྤྱོད་ཅིང༔ སྣ་ཚོགས་ཐབས་ཀྱི་འགྲོ་བ་འདུལ་བྱེད་པ༔ མ་ངེས་འཁོར་འདུ་བུད་མེད་ཁྱུ་དང་བཅས༔ ཚངས་སྤྱོད་ཚུལ་གྱིས་རྒྱལ་བའི་བསྟན་སྲོག་འཛིན༔ མཐོང་ཐོས་དྲན་རེག་ཐར་པའི་ལམ་ལ་སྦྱོར༔ སྐྱེ་བ་དམན་ཅིང་རིགས་ངན་བུད་མེད་ཀྱང༔ དེ་ཡི་གསང་བའི་གྲོགས་འབྲེལ་ཐར་ལམ་ཟིན༔ ལན་བདུན་སྟེན་པས་མཚམས་མེད་སྤྱད་པ་ཡང༔ དམ་ཚིག་མ་ཉམས་བདེ་འགྲོ་ངེས་པར་ཐོབ༔ གཞན་གྱི་གདུལ་དཀའ་བདུད་ཀྱང་སུན་དབྱུང་བའི༔ དཔའ་བོའི་ངར་དང་བརྟུལ་ཞུགས་ནུས་མཐུ་ལྡན༔ མང་པོའི་སེབ་ན་ལྷག་པར་གཟི་བརྗིད་ཆེ༔ ང་སྲས་སྐྱེས་བུ་དེ་ལྟ་བུ་ཞིག་འབྱུང༔ ཞེས་དང༔ སྒྲོལ་མ་མི་མཐུན་ཀུན་སེལ་ཀྱི་གསང་བའི་ལུང་བྱང་ལས༔ ཐུགས་ཀྱི་གྲུབ་ཆེན་ནམ་སྙིང་ཡང་སྤྲུལ་ཞིག༔ མདོ་ཁམས་བུ་འབོར་ཉེ་བའི་ཕྱོགས་སུ་འབྱུང༔ མ་ཎི་བཛྲ་འགྲོ་འདུལ་སྙིང་སྟོབས་ལྡན༔ རྟེན་འབྲེལ་མ་འཆུགས་མཆོག་གི་གཏེར་ལྔ་སྤྱོད༔ འཛམ་གླིང་འགྲོ་བ་འདྲེན་པའི་སྒྲོན་མེ་འདྲ༔ འོན་ཀྱང་སྔོན་ཕྲལ་རྟེན་འབྲེལ་འགའ་ཞིག་གིས༔ དེ་ལྟ་ཇི་བཞིན་འགྲིག་པར་མ་གྱུར་ཚེ༔ དགོངས་གཏེར་བཀའ་བབས་བཀའ་དང་གཏེར་རྙིང་སྐྱོངས༔ དུས་དེར་ཕན་པའི་ས་བཅོས་ལུང་བྱང་དང༔ ཆོས་ཟབ་གདམས་ཕྲན་ཁ་ཡར་འདོན་པར་འགྱུར༔ ཅེས་གསུང་པའི་སྤྲུལ་བའི་གཏེར་ཆེན་གང་གི་ཆོས་སྐལ་མཆོག་གི་གཏེར་ལྔ་རྟེན་འབྲེལ་གྱིས་འགྲོ་བའི་བསོད་ནམས་ཀྱི་དཔལ་དུ་མ་གྱུར་ཀྱང་། ས་གཏེར་ཀོང་པོ་བུ་ཆུའི་གདམས་ཕྲན་སྐོར་བཏོན་པ་དང་། འགྱུར་མེད་གཏན་འཁྱིལ་གྱི་མཚོའི་རོལ་བའི་རྡོ་རྗེའི་གཏེར་མཇུག་བསྐྱངས་པ་དང་། དགོངས་གཏེར་ལ་ཟབ་ལམ་ཨུ་པ་དེ་ཤ་དང་སྙན་བརྒྱུད་ཌཱཀྐིའི་གན་མཛོད། གསང་ལམ་ཌཱཀྐིའི་སྙིང་ཁྲག་དེ་སྐོར་སོ་གསུམ་བཞུགས་པ་ལས། འདི་ནི་ཡིག་མེད་ཨུ་པ་དེ་ཤའི་རྩ་བར་གྱུར་པ་དམ་པ་མཆོག་ལ་ཨོ་རྒྱན་ཆེན་པོས་ཡང་ཡང་གསུངས་པའི་གདམས་པ་རྒྱ་མཚོ་ལྟ་བུའི་སྙིང་པོ་འདི་ནི་གུ་རུ་མཆོག་གིས་ལན་གྲངས་བདུན་དུ་ཞལ་གཟིགས་ཤིང་དགོངས་པའི་གཏེར་མཛོད་ཆེན་པོ་ནས་སྤྱན་དྲངས་ཏེ་སྲས་སློབ་རིག་འཛིན་བར་མ་ཆད་པའི་བརྒྱུད་པ་བྲེང་ཆགས་སུ་བྱོན་པའི་གདམས་པ་ཟབ་མོ་ལ་སྨིན་གྲོལ་གཉིས་སུ་བཞུགས་པའི་སྔ་མ། རྒྱས་བསྡུས་གཉིས་སུ་བཞུགས་པའི་བསྡུས་པ་དོན་དབང་། ཐུན་མོང་དང་ཐུན་མིན་གཉིས་སུ་བཞུགས་པས་ཐུན་མིན་ནོ། །བླ་བསྒྲུབ་ཐམས་ཅད་ཀྱི་དྭངས་མ་ཀུན་འདུས་ཡིད་བཞིན་ནོར་བུའི་དབང་བསྐུར་སྒྲུབ་པར་བྱེད་པ་ལ་སློབ་དཔོན་གྱི་བྱ་བ་རྣམས་སྔོན་དུ་སོང་། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་བྱིན་རླབས་དབང་བསྐུར་ཟབ་མོ་ཞུ་བའི་ཡོན་ཏུ་མཎྜལ་འབུལ་བ་ཞུ་ཞེས་བརྗོད། སློབ་མས་ཀྱང་མཎྜལ་འབུལ། གསོལ་བ་གདབ་པ་ལ་དམིགས་པ་འདི་བཞིན་དུ་མཛོད། རང་རེ་རྣམས་ཀྱི་གནས་འདི་ཐ་མལ་པ་མ་ཡིན་པ་དག་པའི་ཞིང་ཁམས་འོག་མིན་པདྨ་འོད་ཀྱི་གཞལ་ཡས་ཁང་ཆེན་པོ་དང་། སློབ་དཔོན་སངས་རྒྱས་ཀུན་འདུས་ཀྱི་སྤྱི་དཔལ་ཀུན་བཟང་པདྨ་ཀཱ་ར་དངོས་སུ་གསལ་ཐོབ་ལ། དད་པའི་གདུང་ཤུགས་ཆེན་པོས་གསོལ་བ་འདེབས་པ་འདིའི་རྗེས་ཟློས་མཛོད། ། ཀྱེ༔ གཏན་གྱི་སྐྱབས་གཅིག་གུ་རུ་པདྨ་འབྱུང་༔ སྙིང་ནས་གསོལ་བ་འདེབས་སོ་བརྩེ་བས་གཟིགས༔ འགྲོ་ཀུན་སྲིད་ལས་སྒྲོལ་བའི་མཐུ་སྩོལ་ཅིག༔ གསང་གསུམ་རྡོ་རྗེའི་དབང་ཆེན་བདག་ལ་སྐུར༔ ལན་གསུམ་བརྗོད། གནང་བ་སྦྱིན་ཅིང་དམ་ལ་བཞག་པ་ནི། དེ་ལྟར་ཡིན་ན་ཧེ་རུ་ཀའི༔ དལ་དུ་སུ་ཞུགས་སྨིན་པར་བྱའོ༔ བླ་མེད་ཡང་གསང་བྱིན་རླབས་འདི༔ གནས་ཁང་འདི་ཡི་ཕྱི་རོལ་དུ༔ དམ་མེད་པ་ལ་སྨྲ་མི་རུང༔ དེ་ཕྱིར་སྙིང་ནས་བྲོ་བོར་ཅིག༔ ཞེས་རྡོ་རྗེ་སྤྱི་བོར་བཞག་སྙིང་ཁར་རེག་ལ། བཛྲ་རཀྵ་སི་ཧཱུྃ་ས་མ་ཡ་ཨི་དཾ་ན་ར་ཀན༔ ཞེས་རྗེས་ཟློས་ཀྱི་སློབ་མས་བྲོ་བོར་རོ། ། དེ་ནས་སྐྱབས་སུ་འགྲོ་བ་དང་སེམས་བསྐྱེད་པ་ནི། ཁྱེད་རང་རྣམས་ཀྱི་མདུན་གྱི་བླ་མ་དང་དཀྱིལ་འཁོར་གྱི་གཙོ་བོ་གུ་རུ་པདྨ་ཡིད་བཞིན་ནོར་བུ་དབྱེར་མེད་པ་ལ་འཁོར་བརྒྱུད་པའི་བླ་མ་ཡི་དམ་ཞི་ཁྲོ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་བསྲུང་མའི་ཚོགས་དང་བཅས་མངོན་སུམ་དུ་བཞུགས་པ་ལ་སྐྱབས་སུ་འགྲོ་ཞིང་ནམ་མཁའི་མཐའ་ཀླས་པའི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ཏེ་སངས་རྒྱས་ཀྱི་ས་ལ་བཀོད་པར་བྱ། དེའི་ཆེད་དུ་ཡང་ཟབ་བླ་མའི་དཀྱིལ་འཁོར་དུ་འཇུག་ཅིང་བསྒྲུབ་པར་བྱ་སྙམ་པས་འདིའི་རྗེས་བཟློས་མཛོད། ན་མོ༔ རང་བྱུང་ལྷུན་གྲུབ་བླ་མ་པདྨ་འབྱུང་༔ སྐྱབས་ཀུན་འདུས་ངོ་བོར་ཐག་ཆོད་དོ༔ སྐྱོང་པའི་ཕ་དང་བརྩེ་བའི་མ་ཁྱོད་ཡིན༔ མཁྱེན་བརྩེ་ནུས་པས་འགྲོ་ཀུན་སྐྱབས་ཏུ་གསོལ༔ ལན་གསུམ་བརྗོད། སེམས་བསྐྱེད་པ་ནི༔ ཀྱེ་མ༔ དབང་མེད་ལས་ཀྱིས་འཁོར་བའི་འགྲོ་བ་རྣམས༔ སྲིད་ལས་ཡོངས་གྲོལ་བདེ་ཆེན་སར་འགོད་ཕྱིར༔ གསང་མཆོག་རྡོ་རྗེའི་ཟབ་ལམ་ལ་ཞུགས་ནས༔ ཁམས་གསུམ་འཁོར་བ་དོང་སྤྲུགས་སེམས་བསྐྱེད་དོ༔ ལན་གསུམ་བརྗོད། ཡན་ལག་བདུན་པ་ནི། སྐྱབས་ཡུལ་དེ་རྣམས་ཀྱི་སྤྱན་སྔར་ཐབས་ཁྱད་པར་ཅན་ཡན་ལག་བདུན་ལྡན་གྱི་སྒོ་ནས་ཚོགས་བསགས་པར་བྱ་སྙམ་པས་འདིའི་རྗེས་ཟློས་མཛོད། ཨོཾ་ཨཱཿཧཱུྃ༔ མཁའ་ཁྱབ་དཀྱིལ་འཁོར་རྒྱ་མཚོར་བརྡ་ཕྱག་འཚལ་༔ སྣང་སྲིད་རྣམ་དག་ཕྱག་རྒྱའི་མཆོད་པ་འབུལ༔ རྟོག་སྒྲིབ་བག་ཆགས་ཆོས་ཉིད་ཀློང་དུ་བཤགས༔ གཉིས་འཛིན་རང་གྲོལ་ངང་ནས་རྗེས་ཡི་རང་༔ མི་འགག་རྡོ་རྗེའི་ཆོས་འཁོར་བསྐོར་བར་བསྐུལ༔ འཕོ་མེད་རྟག་ཁྱབ་ཀློང་དུ་བཞུགས་སུ་གསོལ༔ འཁོར་གསུམ་ཡོངས་དག་དམིགས་མེད་དབྱིངས་སུ་བསྔོ༔ འགྲོ་ཀུན་དགོངས་པ་རང་གྲོལ་བྱང་ཆུབ་ཤོག༔ ཞེས་ལན་གསུམ། ཡེ་ཤེས་དབབ་པ་ལ། མདུན་བསྐྱེད་དང་བླ་མ་འདི་ལྟར་གསལ་མཛོད་ཅིག། མདུན་གྱི་ནམ་མཁར་རྒྱ་མཚོ་སྔོ་ལ་དྭངས་པ། འཇའ་འོད་ཀྱི་གུར་ཆེན་ཕུབ་ཅིང་། མེ་ཏོག་གི་ཆར་འབེབ་པ། དཔའ་བོའི་མཁའ་འགྲོས་ལྟ་བའི་གླུ་ལེན་ཞིང་རྡོ་རྗེའི་གར་བསྒྱུར་བའི་དབུས་སུ། དཔལ་ལྡན་སངས་རྒྱས་པདྨ་ལས་སྐྱེས་པ། སྐུ་མདོག་དཀར་ལ་དམར་བའི་མདངས་ཆགས་པ། །ཞལ་གཅིག་ཕྱག་གཉིས་ཞབས་གཉིས་དཔའ་བོའི་བཞེངས་སྟབས་མཛད་པ། ཕྱག་གཡས་ཡེ་ཤེས་ལྔ་ལྡན་གྱི་རྡོ་རྗེ་རྩེ་ལྔ་བ་ནམ་མཁའི་དབྱིངས་སུ་ཕྱར་བས་ཕོ་རྒྱུད་དཔའ་བོའི་ཚོགས་རྣམས་དབང་དུ་སྡུད་པ། ཕྱག་གཡོན་ཀཱ་པ་ལ་བདུད་རྩིས་གང་བར་ཚེ་བུམ་དཔག་བསམ་ཤིང་གིས་ཁ་རྒྱན་པ་སྟ་ཟུར་གཡན་དུ་འཆང་བའི་འོད་ཟེར་གྱིས་མ་ཚོགས་མཁའ་འགྲོ་རྒྱ་མཚོའི་སྙིང་ནས་བསྐུལ་ཞིང་བདེ་བ་ཆེན་པོས་རོལ་རྩེད་བྱེད་པ། ཞལ་འཛུམ་པས་འགྲོ་བའི་གདུང་བ་སེལ་ཞིང་། སྤྱན་གདངས་བ་ཉི་ཟླ་ལྟར་འཁྱིལ་བས་ཇི་སྙེད་པའི་ཆོས་ཀུན་ཇི་ལྟ་བར་གཟིགས་པར་སྟོན་པ་དང་། ཤངས་ཀྱི་གཟེངས་མཐོ་བས་ཡེ་ཤེས་ཀྱི་རླུང་འགོགས་པ་མེད་པར་རྒྱུ་བ། བཞི་བཅུའི་ཚེམས་དཀར་བས་ཅི་ལྟར་གསུངས་པ་དེ་ལྟར་བདེན་པ། སྙན་ཤལ་རིང་ཞིང་རྒྱན་རྒྱན་མཛེས་པས་སྒྲ་གྲགས་གསུང་གི་འཁོར་ལོར་གོ་བ། དབུ་སྐྲ་གནག་ལ་སྣུམས་པ་སིལ་བུར་འཁྲོལ་བས་སྒྲུབ་མཆོག་རྗེས་སུ་འཛིན་པ། མཐོང་གྲོལ་པད་ཞྭའི་ཅོད་པན་དབུ་ལ་གསོལ་བས་སྣང་བ་ཟིལ་གྱིལ་གྱིས་གནོན་པ། རྡོ་རྗེའི་གསང་གོས་དཀར་པོ། སྔགས་ཀྱི་ཕོད་ཆེན་མཐིང་ཀ རབ་བྱུང་གི་ཆོས་གོས་དམར་པོ། ལོངས་སྤྱོད་རྫོགས་པའི་རིན་ཆེན་གྱི་སྟོད་གཡོག་དང་མགུལ་རྒྱན་གསོལ་བ། ཁྲོ་ཆགས་སྒེག་པས་འགྲོ་བློ་དབང་དུ་སྡུད་ཅིང་། ཧུར་བག་བརྩེ་བའི་སྤྱན་གྱིས་འགྲོ་ལ་གཟིགས་པ། སྐུ་མཐོང་བ་ཙམ་གྱིས་སྣང་བ་དབང་དུ་འདུ་ཞིང་། གསུང་ཐོས་པ་ཙམ་གྱིས་ཡེ་ཤེས་ཀྱི་བྱིན་ཆེན་འབེབ་པ། ཐུགས་དྲན་པ་ཙམ་གྱིས་འཕོ་བའི་དབང་ཆེན་སྐུར་བའི་རྩ་གསུམ་རྒྱལ་བ་མ་ལུས་འདུས་པའི་སྤྱི་དཔལ་ཆེན་པོ། དཔའ་བོ་མཁའ་འགྲོའི་སྤྲིན་ཚོགས་སྤྲོ་ཞིང་བསྡུ་བའི་བདག་ཉིད་གཅིག་པུར་བཞུགས་པར་མོས་མཛོད། བླ་མས་གསོལ་འདེབས་དབྱངས་སུ་གྱེར་བའི་ཚིག་རིས་དང་མཐུན་པར་ཡིད་ཀྱིས་གསོལ་བ་དྲག་ཏུ་ཐོབ་ཅིག ཐོད་ཕྲེང་རྩལ་གྱི་སྔགས། ཚིག་བདུན་སྤྱན་འདྲེན། གདུང་འབོད་དང་། ཐུགས་དམ་གནད་བསྐུལ། གསོལ་འདེབས་རྒྱས་བསྡུས་སྣ་ཚོགས་རྗེས་བཟློས་སམ་ལྷན་གཅིག་ཏུ་འདོན། མོས་གུས་ཀྱིས་རྐྱེན་གྱིས་བླ་མ་དཀྱིལ་འཁོར་བའི་ལྷ་ཚོགས་ཀྱི་སྐུ་ལས་འོད་ཟེར་འཕྲོས་པ་ཁྱོད་རང་རྣམས་ལ་ཕོག་པས་ཁྱོད་རང་རྣམ་ཀྱི་ཕུང་ཁམས་སྐྱེ་མཆེད་སོགས་གཟུང་འཛིན་གཉིས་བསྡུས་ཀྱི་ཆོས་ཐམས་ཅད་མེ་ལོང་ལ་ཧ་བཏབ་པ་ཡལ་བ་ལྟར་ནས་སྟོང་པ་ཉིད་དུ་གྱུར་བར་མོས་མཛོད། སློབ་མ་ལ་ལས་བུམ་གྱི་ཆུས་བསངས་གཏོར་ལ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ༔ ཨོཾ་མ་ཧཱ་ཤུ་ནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ སློབས་མ་རྣམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས། སྐད་ཅིག་གིས་པདྨ་འདབ་མ་སྟོང་དང་ལྡན་པའི་ལྟེ་བར་ཉི་ཟླའི་གདན་ལ། ཁྱེད་རང་རྣམས་རང་སེམས་རིག་པའི་ངོ་བོ་ལྷུག་པར་གནས་པ་དེ་ཉིད་མདུན་བསྐྱེད་ཀྱི་གུ་རུ་ཡིད་བཞིན་ནོར་དུ་ཅི་ལྟ་བར་རྒྱན་ཆ་ལུགས་མ་འདྲེས་ཡོངས་སུ་པར་གྱུར་སོང་སྙམ་པས་གསལ་ཐོབ་ཅིག དེ་ལྟར་གསལ་བའི་སྤྱི་བོར་ཨོཾ་མགྲིན་པར་ཨཱ༔ཐུགས་ཀར་ཧཱུྃ། སློབ་དཔོན་དང་གུ་རུ་པདྨ་ཡིད་བཞིན་ནོར་བུ་དབྱེར་མ་མཆིས་པའི་ཐུགས་ཀའི་འོད་ཟེར་གྱི་ནནམ་མཁའི་ཁམས་ཁེངས་དུས་གསུམ་གྱི་བླ་མ་ཡི་དམ་སངས་རྒྱས་བྱང་སེམས་མ་ལུས་ཤིང་ལུས་པ་མེད་པར་སྤྱན་དྲངས། དེ་ཐམས་ཅད་གུ་རུ་པདྨའི་སྐུ་གསུང་ཐུགས་ཀྱི་རྣམ་པར་འོད་ཟེར་དང་བཅས་ཤིང་། དེ་ཡང་སྐུའི་བྱིན་རླབས་ཐམས་ཅད་པདྨ་འབྱུང་གནས་ཀྱི་སྐུའི་རྣམ་པ་ཆེ་བ་རི་རབ་ཙམ། ཆུང་བ་ཡུངས་འབྲུ་དང་ཏིལ་འབྲུ་ཙམ། གསུང་གི་བྱིན་རླབས་ཐམས་ཅད་རྒྱ་ཡིག་ཨཱ་ལི་ཀཱ་ལི་བོད་ཡིག་དབྱངས་གསལ་སོགས་ཁ་དོག་སྣ་ཚོགས་དང་། ཐུགས་ཀྱི་བྱིན་རླབས་ཐམས་ཅད་རྡོ་རྗེའི་དྲིལ་བུ་དང་། པདྨ་རིན་ཆེན་ཁ་ཊྭཱཾ་དབྱུག་ཐོ་ལ་སོགས་པ་སྟེང་འོག་བར་གསུམ་ཐེ་མེར་ནེ་མེར་ཏིལ་གྱི་གང་བུ་ལྟར་གང་ཞིང་ཉི་ཟེར་གྱི་རྡུལ་འཁྲིགས་པ་ལྟར་འབྱོན་ནས་ཁྱེད་རང་རྣམས་ལ་སིབ་སིབ་ཐིམ་པའི་མོས་འདུན་དྲག་པོ་མཛོད་ཅིག ཧྲཱིཿ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཅིང་༔ བྱིན་གྱིས་རླབས་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ བསྒྲུབ་མཆོག་བདག་ལ་དབང་ཅིག་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿ ཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ སིདྡྷི་ཕ་ལ་ཧཱུྃཿ ཨ་ཝེ་ཤ་ཡ་ཨ་ཨཿ ཞེས་ཡེ་ཤེས་ཕབ་པའི་རྟགས་མ་བྱུང་བར་བསྐྱར་ནས་འབེབ། ཡང་བཞེངས་བསྐུལ་མ་བཏོན་ལ། སྤྲོ་ན་གར་ཁྲབ་དབྱངས་དང་བཅས་ཏེ་བྱའོ། ། ཨོཾ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛ༔ ཧཱུྃ་ཧཱུྃ༔་ཕེཾ་ཕཻ༔ རཱ་རཱ་རཱ་རཱ༔ ཙ་ལཱ་ཡ་ཙ་ལཱ་ཡ༔ དོ་ཤ་ཡ་དོ་ཤ་ཡ༔ ཨཱ་ཝེ་ཤ་ཡ་ཨ་ཨཿ དེ་ནས་སྙིང་པོ་བཟླས་ནས་ནི༔ བྱིན་འབེབས་བྱེད་ཅིང་དམིགས་པ་གསལ་གདབ༔ རྔུལ་དང་བདེ་དྲོད་འབར་པ་དང༔ བ་སྤུ་གཡོ་བ་འབེབས་རྟགས་ཡིན༔ བརྟན་ཕྱིར་སྤྱི་བོར་རྡོ་རྗེ་བཞག༔ དེ་ཝ་ཏིཥྛ་བཛྲ་ཧཱུྃ༔ ཀཱ་ཡ་ཏིཥྛ་བཛྲ་ཧཱུྃ༔ ཝཱ་ཀ་ཏིཥྛ་བཛྲ་ཧཱུྃ༔ ཙིཏྟ་ཏིཥྛ་བཛྲ་ཧཱུྃ༔ གུ་རུ་མཎྜལ་ཏིཥྛ་བཛྲ་ཧཱུྃ༔ དེ་ལྟར་ཡེ་ཤེས་དབབ་པ་ནི་ཤིན་ཏུ་གལ་ཆེ་བ་དབང་གི་རྩ་བ་ལ། རྫས་དབང་ཕལ་ཆེ་བ་དེ་བརྟན་བྱེད་དུ་བསྒྲུབ་པ་ཡིན་ནོ། ། པུཥྤེ་པྲ་ཏི་ཙྪ་ཧོ། ཞེས་མེ་ཏོག་ཕུལ། མེ་ཏོག་སྤྱི་བོར་བཞག སྤྱན་དབྱེ་བ་ལ། ཐུར་མ་ཐོགས་ལ། མ་རིག་པའི་སྒྲིབ་བྱེད་མིག་དར་དང་ལྷན་ཅིག་ཏུ་བསལ་བར་མོས་ཤིག །ཧཱུྃ༔ ཇི་ལྟར་མིག་མཁན་རྒྱལ་པོ་ཡིས༔ ཐུར་མས་ལིང་ཏོག་བསལ་བ་ལྟར༔ མ་རིག་ལོང་བའི་ལིང་ཏོག་རྣམས༔ རྒྱལ་པའི་དགོངས་པས་བསལ་བར་བྱའོ༔ ཨོཾ་བཛྲ་པ་ཤྱ་ཧོ༔ ཙུཀྵ༔པྲ་བེ་ཤ་ཡ་ཕཊ༔ ཅེས་མིག་དར་དང་དཀྱིལ་འཁོར་གྱི་ཡོལ་བ་བསལ་ལ། ཧཱུྃ༔ བུ་ཁྱོད་རྩོལ་སེམས་མ་ཆུང་བར༔ དཀྱིལ་འཁོར་བཟང་པོ་འདི་ལ་ལྟོས༔ ད་ནི་དད་པ་རབ་ཏུ་སྐྱེད༔ དངོས་གྲུབ་ཐམས་ཅད་འདིས་ཐོབ་འགྱུར༔ འདི་ལྟར་གསང་བ་བླ་ན་མེད་པའི་དཀྱིལ་འཁོར་མཐོང་བའམ་ལྷ་རྣམས་ཀྱི་མཚན་ཐོས་པ་ཙམ་གྱིས་ཀྱང་ཐོག་མ་མེད་པ་ནས་བསགས་པའི་སྡིག་སྒྲིབ་དག་ཅིང་རིག་འཛིན་རྒྱལ་བའི་ཞིང་དུ་དབུགས་འབྱིན་པར་གསུངས་པས་དད་མོས་སྤྲོ་བ་རྒྱ་ཆེན་པོ་སྐྱེད་འཚལ། དཀྱིལ་འཁོར་གྱི་ལྷ་ངོ་སྤྲད་པ་ནི། ཧཱུྃ༔ རང་སེམས་ཅིར་ཡང་མ་གྲུབ་པ༔ ཆོས་སྐུ་ཀུན་ཏུ་བཟང་པོ་ཡིན༔ སྟོང་པ་ཕྱལ་ཆད་མ་སོང་བ༔ བདེ་སྟོང་ཀུན་ཏུ་བཟང་མོ་ཡིན༔ ངོ་བོ་སྟོང་ལ་རང་བཞིན་གསལ༔ འགག་མེད་རིག་རྩལ་སྣ་ཚོགས་ཤར༔ སྐུ་གསུམ་བླ་མའི་དཀྱིལ་འཁོར་ཡིན༔ རྒྱལ་བའི་དཀྱིལ་འཁོར་གཞན་ན་མེད༔ གུ་རུ་མཎྜལ་བྷྲཱུྃ༔ ཅེས་མཉམ་པར་བཞག །དེ་ནས་དབང་དངོས་གཞི་ཞུ་བར་སྐབས་ཕྱེད་པའི་ཕྱིར་དུ་མཎྜལ་འབུལ་དུ་བཞུག་ལ། དབང་བཞི་རིམ་པས་བསྐུལ་བ་ཡི་དང་པོ་ཐུན་མོང་བུམ་པའི་དབང་ལ། དབང་སྐུར་མཁན་གྱི་བླ་མ་ནི་གུ་རུ་ཐོད་ཕྲེང་སྡེ་ལྔ་ཡིན། དབང་བསྐུར་བས། ཕུང་ལྔ་རིགས་ལྔ། ཡུལ་ལྔ་ཡུམ་ལྔ་། དུག་ལྔ་ཡེ་ཤེས་ལྔར་ངོ་སྤྲོད་པ་ཡིན་པས་འདི་ལྟར་མཛོད། ཧཱུྃ༔ ཕྲིན་ལས་རྡུལ་ཚོན་དཀྱིལ་འཁོར་འདིར༔ བླ་མ་སྤྲུལ་སྐུ་འཇའ་ལྟར་ཤར༔ སྣང་སྲིད་འཁོར་འདས་སྐུ་ཡིས་གང༔ འོད་ཟེར་རྣམ་ལྔ་་ཕྱོགས་མཐར་ཁྱབ༔ ཧཱུྃ༔ ང་ནི་རིགས་ལྔ་ཐོད་ཕྲེང་རྩལ༔ བདུད་རྩི་ལྔ་ཡིས་དབང་སྐུར་བས། དུག་ལྔ་ཡེ་ཤེས་ལྔ་རུ་གྲོལ༔ རྒྱལ་བ་རིགས་ལྔའི་དབང་ཐོབ་ཤོག༔ ཧཱུྃ༔ ཁྲོ་བོ་རྣམས་ཀྱིས་ལོག་འདྲེན་བཅོམ༔ བྱང་ཆུབ་སེམས་དཔས་བཀྲ་ཤིས་བརྗོད༔ རྡོ་རྗེ་མ་ཡིས་གླུ་དབྱངས་ལེན༔ ལྷ་མོ་རྣམས་ཀྱིས་མཆོད་པ་འབུལ༔ ཨོཾ་ཨཱཿཧཱུྃ་གུ་རུ་དེ་ཝཌཱ་ཀི་ནི་ༀ་ཧཱུྃ་ཏྲཱྃ་ཧྲཱི་ཨཱ་ཨ་བྷི་ཥིཉྩ་ཧཱུྃ་ཧཱུྃ་ཧཱུྃ༔ ཞེས་དབང་བསྐུར་བཀྲ་ཤིས་བརྗོད༔ རྣམ་བཞིས་གཞན་དོན་བསྒྲུབ་པའི་ཕྱིར༔ རྒྱ་གྲམ་ཐོགས་ལ་འདི་སྐད་དོ༔ ཧཱུྃ༔ འདི་ནི་རྡོ་རྗེ་རྒྱ་གྲམ་སྟེ༔ ཞི་རྒྱས་དབང་དྲག་ལྷུན་གྱིས་གྲུབ༔ སློབ་མ་ཁྱོད་ལ་དབང་སྐུར་བས༔ ཕྲིན་ལས་རྣམ་བཞིས་འགྲོ་དོན་གྱིས༔ ཨོཾ་ཨཱཿཧཱུྃ་གུ་རུ་དེ་ཝཌཱ་ཀི་ནཱི་སརྦ་ཀརྨ་ཨ་བྷི་ཥིཉྩ་ཨཱཿ ཞེས་བསྐུར༔ དེ་ལྟར་རིགས་པའི་དབང་ལྔ་བསྐུར་བས། ཉོན་མོངས་པ་ལྔ་དག །ཕུང་པོ་ལྔ་གནས་གྱུར། ཡེ་ཤེས་ལྔ་མངོན་དུ་གྱུར། ཐོད་ཕྲེང་རྩལ་ལྔའི་གོ་འཕང་ཐོབ། ཕྲིན་ལས་རྣམ་བཞིར་དབང་བསྒྱུར་བའི་སྐལ་བ་དང་ལྡན་པར་བྱས་སོ། །ནང་སྒྲུབ་ཐུན་མོང་མ་ཡིན་པའི་དབང་སྐུ་ཚབས་ཡིད་བཞིན་ནོར་བུ་ལ་བརྟེན་ནས་དབང་བཞི་སྐུར་བ་ནི། ༡༽སྐུ་བུམ་དབང་ལ། སྐུ་ཚབས་བསྟན་ལ། དེ་ཡང་བསྐུར་མཁན་གྱི་བླ་མ་ནི་པདྨ་འབྱུང་གནས་སྤྲུལ་པའི་སྐུའི་བདག་ཉིད། བསྐུར་བའི་གནས་ནི་ཁྱེད་རང་རྣམས་ཀྱི་སྤྱི་བོ། ཇི་ལྟར་བསྐུར་བའི་ཚུལ་ནི། བླ་མ་གུ་རུ་པདྨ་འབྱུང་གནས་ཀྱི་སྤྱི་བོ་ནས་རང་འདྲ་བའི་སྐུ་སོར་བཞི་བ་དཀར་པོ་འོད་དང་འོད་ཟེར་འཕྲོ་བ་སྐར་མདའ་ཆད་པ་ལྟར་འཕྲོས། ཁྱེད་རང་གི་དཔྲལ་བར་ཐིམ་པས་ལུས་སྣང་སྟོང་པདྨ་འབྱུང་གནས་ཀྱི་སྐུ་དང་དབྱེར་མེད་དུ་གྱུར་པའི་མོས་པ་བྱེད་པ་རྩ་བ་དང་། དེ་བཞིན་དུ་མགྲིན་པ་ནས་དམར་པོ། ཐུགས་ཀ་ནས་མཐིང་ཀ ལྟེ་བ་ནས་སེར་པོ། གསང་བ་ནས་ལྗང་ཀུ་སྤྲོས་ཏེ་གནས་སོར་ཐིམ་པར་མོས་ཤིག ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་ཏུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབས་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃཿ བུ་ངས་གདུང་བའི་དབྱངས་ཀྱིས་བསྐུལ༔ ཕ་གཅིག་ཐུགས་རྗེ་མ་གཡེལ་བྱོན༔ སྐུ་ཡི་གར་སྟབས་ཤིག་སེ་ཤིག༔ གསུང་གི་བརྡ་གླུ་གྱུ་རུ་རུ༔ ཐུགས་ཀྱི་བྱིན་རླབས་ད་ལ་ལ༔ བརྩེ་ཆེན་སྤྱན་གྱིས་ད་ལྟ་གཟིགས༔ ལུས་ལ་རྡོ་རྗེའི་ཚེ་དབང་སྐུར༔ ངག་ལ་གཞོམ་མེད་སྔགས་རྒྱས་ཐོབ༔ ཡིད་ལ་བདེ་སྟོང་ཡེ་ཤེས་བསྐྱེད༔ དུས་མིན་འཆི་བའི་བར་ཆད་ཟློག༔ འབྱུང་ཁམས་དབང་དུ་བསྒྱུར་བ་དང་༔ འཕོ་མེད་འོད་གསལ་མངོན་ཏུ་གྱུར༔ ཚེ་དང་སྨོན་ལམ་དབང་བཅུ་ཐོབ༔ རྟག་བརྟན་རྡོ་རྗེའི་སྐུ་ཐོབ་ཤོག༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ སྤོས་རོལ་བཅས་སྐུ་ཚབས་ཡིད་བཞིན་ནོར་བུའི་ཞལ་ལ་བལྟ་བར་བྱ། དེ་ལྟར་བུམ་པའི་དབང་ཐོབ། ལུས་ཀྱི་སྒྲིབ་པ་དག །ས་བརྒྱད་པ་མི་གཡོ་བ་ནོན། འབྲས་བུ་སྐུ་ཐོབ་པའི་སྐལ་བ་ཅན་དུ་གྱུར། ལམ་དུས་བསྐྱེད་རིམ་མ་ཧཱ་ཡོ་གའི་རྣལ་འབྱོར་བསྒོམ་པ་ལ་དབང་བ་ཡིན་ནོ། ། ༢༽གསུང་གསང་དབང་ལ། བསྐུར་བ་པོ་བླ་མ་ནི་པདྨ་འབྱུང་གནས་ལོངས་སྤྱོད་རྫོགས་སྐུར་ཤེས་པས། བསྐུར་བའི་གནས་ཁྱེད་རང་རྣམས་ཀྱི་མགྲིན་པ། ཇི་ལྟར་བསྐུར་བའི་ཚུལ་ནི། གུ་རུའི་ལྗགས་སྟེང་གི་ཨཱཿ དམར་པོ་ལས་འོད་ཟེར་དམར་པོ་མར་མེའི་རྩེ་མོ་ལྟ་བུ་བྱུང་། ཁྱེད་རང་གི་མགྲིན་པར་ཐིམ་པས་ངག་གྲགས་སྟོང་གུ་རུ་པདྨའི་གསུང་དང་དབྱེར་མེད་དུ་གྱུར་པའི་མོས་པ་དང་། སྔགས་ཕྲེང་ལྔ་སྤྲོས་ཏེ་ཐིམ་པར་མཛོད། ༀ་ནི་ཐུགས་རྗེ་རེ་སྐོང་སྤྲུལ་བའི་སྐུ༔ ཨཱཿ་ནི་ངེས་པ་ལྔ་ལྡན་ལོངས་སྐུའི་གསུངས༔ ཧཱུྃ་ནི་ཡེ་ཤེས་འགྱུར་མེད་ཆོས་སྐུའི་ཐུགས༔ སྐུ་གསུམ་རིགས་འདུས་པདྨ་རྒྱལ་པོར་འདུད༔ བཛྲ་ཆོས་དབྱིངས་འགྱུར་མེད་ངོ་བོ་ཉིད༔ གུ་རུ་སྤངས་རྟོགས་ཕུན་ཚོགས་ཡོན་ཏན་གཏེར༔ པདྨ་སྐྱོན་བྲལ་འཕྲིན་ལས་མཐའ་ཡས་བདག༔ སིདྡྷིས་འཁོར་འདས་དངོས་གྲུབ་རྩོལ་ལ་འདུད༔ ཧཱུྃ་གིས་ཐུགས་དམ་བསྐུལ་ལོ་པདྨ་འབྱུང་༔ རྟོགས་སྒྲིབ་བག་ཆགས་སོལ་ཅིག་ཐུགས་རྗེའི་བདག༔ ཁྱོད་ཐུགས་ཟག་པ་ཀུན་བྲལ་མཁའ་ལྟར་བརྡལ༔ བདག་ཡིད་གཅིག་འདྲེས་རང་གྲོལ་དོན་ལ་བལྟ༔ སྔགས་འདིས་རྗེས་བཟློས་གནང་བར་ཞུ༔ ༀ་ཨཱཿ་ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཞེས་སྙིང་པོའི་ལུང་སྦྱིན། དེ་ལྟར་གསང་བའི་དབང་ཐོབ། ངག་གི་སྒྲིབ་པ་དག །ས་དགུ་པ་ལེགས་པའི་བློ་གྲོས་ནོན། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་གྱུར། ལམ་དུས་རྫོགས་རིམ་ཨ་ནུ་ཡོ་ག་སྟེ་རང་བྱིན་གྱིས་བརླབ་པ་བསྒོམ་པ་ལ་དབང་བ་ཡིན་ནོ། ། ༣༽ཐུགས་ཤེར་དབང་ལ། ཐོད་པ་ལས་བདུད་རྩི་གནས་ལྔའི་ཁ་དོག་དང་མཐུན་པ་ལྔ་འཕྲོས། དེས་གནས་སོ་སོ་ནས་བདེ་བ་བསྐྱེད། སྣོད་བཅུད་བདེ་བས་ཁྱབ་པའི་ངང་ནས། དབང་བསྐུར་བ་པོ་བླ་མ་པདྨ་འབྱུང་གནས་ཆོས་སྐུ་སྤྲོས་བྲལ་གྱི་བདག་ཉིད་ཅན་དུ་ངེས་པ། བསྐུར་བའི་གནས་ཁྱེད་རང་རྣམས་ཀྱི་སྙིང་ག ཇི་ལྟར་བསྐུར་བའི་ཚུལ་ནི། གུ་རུའི་ཐུགས་ཀའི་ཧཱུྃ་ཡིག་སྔོན་པོ་ལས་འོད་ཟེར་སྔོན་པོ་སྤོས་རེང་གི་དུ་བ་ལྟ་བུ་བྱུང་། ཁྱེད་རང་གི་སྙིང་གར་ཐིམ་པས་ཡིད་གསལ་སྟོང་པདྨ་འབྱུང་གནས་ཀྱི་ཐུགས་དང་དབྱེར་མེད་དུ་གྱུར་པའི་མོས་པ་རྩ་བ་དང་། མཚོན་བྱེད་དུ་རྫས་ཀྱི་རྣམ་པ་ཐོད་པའི་བདུད་རྩིར་དམིགས་པ་འདི་ལྟར་བྱ་སྟེ། བླ་མ་དཀྱིལ་འཁོར་གྱི་གཙོ་བོ་པདྨ་འབྱུང་གནས་ཀྱི་ཁ་ཊྭཱཾ་ཀ་ཡུམ་ཡེ་ཤེས་མཁའ་འགྲོ་མར་གྱུར་པ་དང་སྙོམས་པར་བཞུགས་པའི་བདེ་སྒྲ་དང་འོད་ཟེར་གྱི་རྒྱལ་བ་སྲས་དང་བཅས་པ་སྤྱན་དྲངས། ཞལ་དུ་ཞུགས། སྐུའི་རྩ་གནས་རྣམས་རྒྱུད། རྗེས་སུ་ཆགས་པའི་མེས་ཞུ་དཀར་དམར་བྱང་སེམས་བདུད་རྩིའི་རང་བཞིན་དུ་མཁའ་གསང་ལས་བབས། ཐོད་པའི་བདུད་རྩི་དང་རོ་གཅིག་པ་ཨོཾ་ཨཱཿཧཱུྃ་གིས་བྱིན་གྱིས་བརླབས་པ་དེ་ལྕེ་སྟེང་དུ་མྱོང་བས་དབང་བསྐུར་ཐོབ་པའི་འདུན་པ་མཛོད་ཅིག་བྱས་ལ་ཐོད་པའི་བདུད་རྩི་ཐོགས་ཏེ། ཨ༔ བདེ་བའི་སྣོད་དུ་བདེ་ཆེན་བདུད་རྩིའི་རྒྱུན༔ བདེ་བའི་དྲོད་འབར་ངད་ལྡན་འོད་རླངས་འཕྲོ༔ བདེ་བ་དོན་གཉེར་བུ་ལ་དབང་བསྐུར་བས༔ བདེ་ཆེན་ལྷན་སྐྱེས་རང་བྱུང་འབར་བར་ཤོག༔ ཨ་ཧོ་མ་ཧཱ་སུ་ཁཱ༔ ཞེས་མྱང་བར་བྱའོ། །དེ་ལྟར་ཤེས་རབ་ཡེ་ཤེས་ཀྱི་དབང་ཐོབ་ཡིད་ཀྱི་སྒྲིབ་པ་དག ས་བཅུ་པ་ཆོས་ཀྱི་སྤྲིན་ནོན། འབྲས་བུ་ཆོས་ཀྱི་སྐུ་ཐོབ་པའི་སྐལ་བ་ཅན་དུ་གྱུར། ལམ་དུས་སུ་ཨ་ཏི་ཡོ་ག་སྟེ་བྱང་ཆུབ་སེམས་ཀྱི་དཀྱིལ་འཁོར་འཁོར་ལོ་བསྒོམ་པ་ལ་དབང་པ་ཡིན་ནོ། །དབང་རྫས་མི་འགྱེད་ན་སྐུ་ཚབས་ཕྱག་གི་བདུད་རྩི་སྤྲོ་བར་དམིགས་པས་འགྲུབ་པོ། ། ༤༽ཡོན་ཏན་གྱི་དབང་ལ་ཚིག་དབང་ལ། གུ་རུ་ཡིད་བཞིན་ནོར་བུའི་གནས་ལྔ་ནས་རྡོ་རྗེ་ལྔ་བ་རེ་རེ་ནས་ལྔ་ཕྲོས། སློབ་མའི་གནས་ལྔ་ལ་ཐིམ། སྤྱི་བོར་ཞེ་སྡང་། མགྲིན་པར་འདོད་ཆགས། སྙིང་གར་གཏི་མུག ལྟེ་བར་ང་རྒྱལ། གསང་བ་ཕྲག་དོག་སྟེ་དུག་ལྔ་སྐྱེ་བའི་ཡུལ་ལྔ་སྙིང་ཁོངས་སུ་བཅུག་པ་ལ་ཕོག དེར་བདག་ཏུ་འཛིན་པ་ཧྲང་ངེ་བ་རེ་ཡོད་པ་གཏོར་བར་བསམ་ལ། ཕཊ་ལྔ་བྱ། རྡོ་རྗེ་སེམས་དཔའི་མེ་ལོང་ཐོགས་ལ། དེ་ཡང་དབང་བསྐུར་བ་པོ་བླ་མ་པདྨ་འབྱུང་གནས་སྐུ་གསུམ་དབྱེར་མེད་ངོ་བོ་ཉིད་སྐུའི་བདག་ཉིད་ཅན། བསྐུར་བའི་གནས་ལྔ་ནི་ཁྱེད་རང་རྣམས་ཀྱི་ལྟེ་བ་སོགས་གནས་ལྔ། ཇི་ལྟར་བསྐུར་བའི་ཚུལ་གུ་རུའི་ལྟེ་བ་ལ་སོགས་གནས་ལྔ་ནས་འོད་ཟེར་ཆུ་ལ་འཇའ་ཚོན་ཤར་བ་ལྟ་བུ་བྱུང་། ཁྱེད་རང་གི་གནས་དེ་དག་ཏུ་ཐིམ་པས་སྐུ་གསུང་ཐུགས་ཡོན་ཏན་འཕྲིན་ལས་ཡོངས་རྫོགས་ཀྱི་དབང་ཐོབ་པར་མོས་པ་རྩ་བ་དང་། མཚོན་བྱེད་ཀྱི་རྫས་ཀྱི་རྣམ་པ་ཤེལ་རྡོ་འདི་ཡི་བརྡ་ལ་བརྟེན་ནས་ངོ་སྤྲད་པས་བརྡའ་དོན་ཐབས་ཤེས་ཟུང་འཇུག་གཉིས་མེད་ཡེ་ཤེས་ཚིག་ལས་འདས་པ་ཆོས་ཀྱི་སྐུ་རུ་ངོ་ཤེས་པར་བྱེད་པ་དབང་བཞི་རྩལ་རྫོགས་སུ་ཐོབ་པར་བྱས་བྱུང་སྙམ་པའི་མོས་འདུན་མཛོད་ཅིག མཉམ་པར་བཞག་ཅིང་འདི་ལྟར་བརྗོད༔ ཧོ༔ མཚོན་དུ་མེད་པའི་ཆོས་དབྱིངས་ལ༔ བསལ་བཞག་བྲལ་བའི་ངང་ནས་ལྟོས༔ ཆོས་སྐུ་ཐིག་ལེ་ཉག་གཅིག་ནི༔ བསམ་དུ་མེད་དོ་ཨ་ལ་ལ༔ དེ་ལྟར་དབང་བསྐུར་བས་སྒོ་གསུམ་གྱི་སྒྲིབ་པ་དག ཐོབ་བྱ་བཅུ་གཅིག་ཀུན་ཏུ་འོད་ཀྱི་ས་དང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས། ལམ་དུས་སུ་ཨ་ཏི་ཡང་གསང་རྡོ་རྗེ་སྙིང་པོ་རྫོགས་ཆེན་བྱ་རྩོལ་བྲལ་བའི་དོན་ཀ་དག་ལྷུན་གྲུབ་ཀྱི་ཡེ་ཤེས་བསྒོམ་པ་ལ་དབང་བ་ཡིན་ནོ། ། ༥༽འཕྲིན་ལས་བཀྲ་ཤིས་ཚེ་ཡི་དབང་ལ། གུ་རུ་ཡིད་བཞིན་ནོར་བུའི་ཕྱག་གི་ཚེ་བུམ་ལས་རིགས་ཀྱི་ཡུམ་ལྔ་འཕྲོས། སྤྱི་བོ་ནས་རྡོ་རྗེ་མཁའ་འགྲོ་དཀར་མོ། མགྲིན་པ་ནས་པདྨ་མཁའ་འགྲོ་དམར་མོ། སྙིང་ཀ་ནས་སངས་རྒྱས་མཁའ་འགྲོ་མཐིང་ཀ ལྟེ་བ་ནས་རིན་ཆེན་མཁའ་འགྲོ་སེར་མོ། གསང་བ་ནས་ལས་ཀྱི་མཁའ་འགྲོ་ལྗང་གུ་ལྔ་ཕྲོས། གནས་ལྔར་ཐིམ་པར་བསམ། ཆུ། མེ། ནམ་མཁའ། ས། རླུང་ལྔ་། ཁྲག དྲོད། རྣམ་ཤེས། རུས་པ། དབུགས་གསོས་ཤིང་དེས་སྒོ་ནས་འགྲོ་དོན་བྱེད་ནུས་པའི་དབང་མཆོག་ཐོབ་པར་དམིགས་ལ། ཚེ་བཅུད་དངོས་གྲུབ་འགུགས་པ་ནི༔ ཧཱུྃ་ཧྲཱི༔ སྤྲོས་པའི་སྒྲིབ་བྲལ་ཆོས་ཉིད་རྡོ་རྗེའི་ཐུགས༔ བདེ་ཆེན་འགྱུར་བ་མེད་པ་རྡོ་རྗེའི་གསུང་༔ འོད་གསལ་མཚན་དཔེར་ཤར་བ་རྡོ་རྗེའི་སྐུ༔ རྡོ་རྗེ་གསུམ་གྱིས་ཚེ་དཔལ་བྱིན་ཆེན་ཕོབས༔ རྩ་བརྒྱུད་བླ་མ་ཡི་དམ་མཁའ་འགྲོ་དང་༔ བསྟན་སྲུང་ནོར་ལྷ་རྒྱ་མཚོའི་ངོ་བོ་ཉིད༔ ཚེ་དབང་རིག་འཛིན་པདྨ་འབྱུང་གནས་ཀྱིས༔ གསང་གསུམ་ཚེ་དང་ཡེ་ཤེས་བྱིན་ཕོབས་ཅིག༔ རྒྱལ་བ་སྲས་བཅས་དྲང་སྲོང་བྱིན་རླབས་ཁུག༔ ཚངས་དང་བརྒྱ་བྱིན་ཕྱོགས་སྐྱོངས་གཟི་དཔལ་ཁུག༔ འབྱུང་བའི་བཅུད་དང་རིན་ཆེན་ནུས་པ་ཁུག༔ རྡོ་རྗེའི་ཚེ་དབང་བྱིན་རླབས་དངོས་གྲུབ་སྩོལ༔ ཚེ་དཀྱིལ་གནས་ཁང་འདི་ལ་བྱིན་ཆེན་ཕོབས༔ ཚེ་རྫས་དམ་རྫས་འདི་ལ་བཅུད་གཅིག་སྐྱེད༔ ཚེ་རྟེན་མདའ་དར་འདི་ལ་ཚད་གཅིག་སྟོན༔ ཚེ་ལྡན་རྣམས་ལ་ཚེ་དབང་བྱིན་ཆེན་ཕོབས༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ བསྡུ་ན་དེ་ཙམ་གྱིས་འགྲུབ་པོ། །སྤྲོ་ན་དཀྱིལ་འཁོར་ལྷ་ཚོགས་བསྐུལ་བ་ནི༔ ཧཱུྃ་ཧྲཱི༔ ཚེ་དགྲའི་གཡུལ་བཟློག་དམར་ནག་མེ་ཕྲེང་རྩལ༔ ཨོ་རྒྱན་ལྷ་སྲིན་སྡེ་བརྒྱད་ལྷ་ཚོགས་ཀྱིས༔ ཕྱོགས་སྐྱོང་སྡེ་བརྒྱད་ལག་ནས་ཚེ་གཡང་ཁུག༔ ཞེ་སྡང་འཁྲུགས་པའི་རྐྱེན་ལས་གྱུར་བ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ དུག་གསུམ་ཚེ་ནད་ཀུན་སེལ་མཛད་སྨན་གྱི་ལྷ༔ ཨོ་རྒྱན་སྨན་གྱི་བླ་མའི་ལྷ་ཚོགས་གྱིས༔ དྲང་སྲོང་རིག་འཛིན་ལག་ནས་ཚེ་གཡང་ཁུག༔ སྔོན་ལས་འཕྲལ་རྐྱེན་ངན་པ་ལས་བྱུང་བའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བསོད་རྒྱས་མཛད་ཆུ་དབང་དྲྭ་བ་སྡོམ༔ ཨོ་རྒྱན་མཁའ་འགྲོ་ནོར་ལྷའི་ལྷ་ཚོགས་ཀྱིས༔ གནོད་སྦྱིན་ནོར་བདག་ལག་ནས་ཚེ་གཡང་ཁུག༔ སེར་སྣ་འགྱུར་གེགས་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་སྲི་འདུལ་མཛད་དཔལ་ཆེན་སྒྲུབ་སྡེ་བརྒྱད༔ ཨོ་རྒྱན་ཡི་དམ་ལྷ་ཚོགས་འཁོར་བཅས་ཀྱིས༔ ཚོགས་བརྒྱད་གཟུང་འཛིན་གཞན་དབང་ལས་གྱུར་པའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བདུད་འཇོམས་མཛད་ཟིལ་གནོན་དྲག་པོ་རྩལ༔ ཨོ་རྒྱན་གཞི་བདག་གཉན་པོའི་ལྷ་ཚོགས་ཀྱིས༔ སྣང་སྲིད་ལྷ་འདྲེའི་ལག་ནས་ཚེ་གཡང་ཁུག༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་གདོན་དཔུང་འཇོམས་གསང་བདག་སེངྒེའི་སྒྲ༔ ཨོ་རྒྱན་དཔའ་བོའི་གིང་དང་སྲུང་མའི་ཚོགས༔ འདོད་ཁམས་འཁོར་བའི་གནས་ནས་ཚེ་གཡང་ཁུག༔ རྣམ་གཡེངས་འཕོ་བཅས་རྟོག་པའི་དབང་གྱུར་པའི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བཅུད་སྤེལ་མཛད་པདྨ་བཛྲ་རྩལ༔ ཨོ་རྒྱན་འབྱུང་བ་བཞི་བདག་ལྷ་ཚོགས་ཀྱིས༔ སྣོད་བཅུད་འབྱུང་བའི་ཁམས་ཀྱི་ཚེ་ཁུག་ཅིག༔ བྱིང་རྨུག་འཕྲོ་རྒོད་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་རྐུན་སྟོབས་འཕྲོག་ཁྲོ་མཆོག་རྟ་མགྲིན་ནག༔ ཨོ་རྒྱན་ཕྱག་རྒྱ་བཞི་ཡི་ལྷ་ཚོགས་ཀྱིས༔ ས་བདག་ཤ་ཟའི་ལག་ནས་ཚེ་ཁུག་ཅིག༔ ཐེ་ཚོམ་རྣམ་པར་རྟོག་པའི་གཞན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བསེན་མཐར་བྱེད་རྡོ་རྗེ་ཁྲོ་བོ་ལོད༔ ཨོ་རྒྱན་རྡོ་རྗེ་གུར་གྱི་ལྷ་ཚོགས་ཀྱིས༔ མི་དང་མི་མིན་ལག་ནས་ཚེ་གཡང་ཁུག༔ བསམ་སྦྱོར་ངན་པའི་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ ཚེ་བྱུར་སེལ་མཛད་ཐུགས་ཆེན་པདྨ་རྒྱལ༔ ཨོ་རྒྱན་སྣང་མཐའི་སྤྲུལ་བའི་ལྷ་ཚོགས་ཀྱིས༔ འཇིག་རྟེན་ཆེ་རྒུའི་ལག་ནས་ཚེ་ཁུག་ཅིག༔ རེ་དོགས་རྣམ་རྟོག་རྐྱེན་ལས་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་ཟད་བསྲིང་མཛད་སངས་ཚེ་དཔག་མེད༔ ཨོ་རྒྱན་དུས་གསུམ་མཁྱེན་པའི་ལྷ་ཚོགས་ཀྱིས༔ འཕགས་པ་བྱང་སེམས་ཕྱག་ནས་ཚེ་ཁུག་ཅིག༔ རྨི་ལམ་འཁྲུལ་བའི་རྐྱེན་དུ་གྱུར་པ་ཡི༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་བརྟན་འགྱུར་མེད་ཆོས་སྐུ་ཀུན་ཏུ་བཟང་༔ ཨོ་རྒྱན་བདེ་ཆེན་རྒྱལ་པོའི་ལྷ་ཚོགས་ཀྱིས༔ ཕྱོགས་བཅུའི་སངས་རྒྱས་ཞིང་ནས་ཚེ་ཁུག་ཅིག༔ དངོས་ཞེན་འཛིན་པ་དམ་པོའི་རྐྱེན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ཚེ་འཕེལ་ཡིད་བཞིན་ནོར་བུ་བདེ་བ་ཆེ༔ ཨོ་རྒྱན་ཐུགས་རྗེ་འགྱུར་མེད་ལྷ་ཚོགས་ཀྱིས༔ བརྒྱུད་གསུམ་རིག་འཛིན་ཕྱག་ནས་ཚེ་ཁུག་ཅིག༔ ༔ སྙེམས་འཕྲིག་དམ་སེལ་ངན་པའི་རྐྱེན་དབང་གིས༔ དུས་མིན་འཆི་སོགས་ཚེ་ཡི་བར་ཆད་སོལ༔ བྱིན་རླབས་ཚེ་བསོད་ཡེ་ཤེས་དངོས་གྲུབ་སྩོལ༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ མགྱོགས་མ་རྣམ་བཞི་བསྐུལ་བ་ནི༔ ཧཱུྃ་ཧྲཱི༔ ཛ༔ རང་སྣང་དཀྱིལ་འཁོར་ཤར་སྒོ་ནས༔ མྱོགས་མ་དཀར་མོ་ལྕགས་ཀྱུ་མ༔ དྲི་ཟའི་ལག་ནས་ཚེ་ཁུག་ལ༔ ཁྲག་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ཧཱུྃ༔ རང་སྣང་དཀྱིལ་འཁོར་ལྷོ་སྒོ་ནས༔ མྱོགས་མ་སེར་མོ་ཞགས་པ་མ༔ གཤིན་རྗེའི་ལག་ནས་ཚེ་ཁུག་ལ༔ ཤ་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ བྃ༔ རང་སྣང་དཀྱིལ་འཁོར་ནུབ་སྒོ་ནས༔ མྱོགས་མ་དམར་མོ་ལྕགས་སྒྲོག་མ༔ ཀླུ་དབང་ལག་ནས་ཚེ་ཁུག་ལ༔ དྲོད་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ཧོ༔ རང་སྣང་དཀྱིལ་འཁོར་བྱང་སྒོ་ནས༔ མྱོགས་མ་ལྗང་མོ་དྲིལ་བུ་མ༔ གནོད་སྦྱིན་ལག་ནས་ཚེ་ཁུག་ལ༔ དབུགས་ཁམས་བླ་ཚེ་བརྟན་པར་གསོལ༔ བླ་ཚེ་འཁྱམ་པ་ཁུག་ལ་བསྟིམ༔ ཆད་པ་མཐུད་ལ་ཉམས་པ་གསོས༔ ཡར་བ་བསྡུས་ལ་གས་པ་སྦྱོར༔ འཆི་མེད་ཚེ་དབང་བྱིན་ཆེན་ཕོབས༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ མདའ་དར་ཕྱོགས་བཞི་དབུས་ལྔར་གཡབ༔ ཚེ་དཔལ་སྦུབས་ཆུ་དྲངས་པ་ལྟར༔ འཇའ་དང་འོད་དུ་ཀྱི་ལི་ལི༔ བསྟིམ་པས་གཟི་བྱིན་ཆེར་འབར་བསམ༔ མཆིལ་མ་མིད་ཅིང་བུམ་ཅན་འཛིན༔ ལྟེ་འོག་རིག་པ་ཕུར་ཚུགས་གཏད༔ འཆི་བདག་གཤིན་རྗེའི་ཁར་ཚུད་ཀྱང་༔ ཞག་བདུན་ཚེ་ནི་བསྲིང་བར་འགྱུར༔ ཚེ་འགུགས་འདི་ཉིད་བརྒྱ་རྩ་བརྒྱད༔ ཉིན་གཅིག་བཏོན་པས་ཚེ་གེགས་སེལ༔ ཞག་རེར་ཚར་གསུམ་མ་ཆད་ན༔ ཚེ་ལོ་བརྒྱ་ལ་ཐེ་ཚོམ་མེད༔ ཅེས་པ་ཚེ་འགུགས་རྒྱས་པ་བསྡུས་ཅི་བྱས་ཀྱང་མཐར། ཚེ་འབྲང་བུམ་པ་མགོ་ལ་བཞག༔ ཧཱུྃ་ཧྲཱི༔ ཚེ་དཔག་མེད་མགོན་པདྨ་ཐོད་ཕྲེང་རྩལ༔ འཆི་མེད་ཚེ་ལྷ་རྒྱ་མཚོའི་ཡེ་ཤེས་བྱིན༔ ཚེ་ཡི་དཀྱིལ་འཁོར་ཆེན་པོའི་དབང་བསྐུར་བས༔ ཚེ་ལྷའི་གསང་གསུམ་ཡོན་ཏན་རྫོགས་པར་ཤོག༔ འཆི་མེད་ཚེ་རིལ་གཡས་སུ་གཏད༔ ཧཱུྃ་ཧྲཱི༔ སྣང་བའི་ཆོས་ཀུན་འཛིན་ཞེན་བྲལ་བ་ལས༔ འཁོར་འདས་བཅུད་བསྡུས་འཆི་མེད་ཚེ་རིལ་འདི༔ སྐལ་ལྡན་སྐྱེས་བུ་ཁྱོད་ལ་སྦྱིན་པ་ཡིས༔ འཆི་མེད་རྡོ་རྗེའི་ཚེ་ལ་མངའ་བརྙེས་ཤོག༔ ཚེ་ཆང་བདུད་རྩི་གཡོན་ཏུ་གཏད༔ ཧཱུྃ་ཧྲཱི༔ སྟོང་པའི་ཆོས་ཀུན་དབྱིངས་སུ་ཞུགས་པ་ལས༔ འཕོ་བཅས་རྣམ་རྟོག་གཅོད་པའི་ཚེ་ཆང་འདི༔ སྐལ་ལྡན་སྐྱེས་བུ་ཁྱོད་ལ་སྦྱིན་པ་ཡིས༔ བདེ་སྟོང་རྡོ་རྗེའི་ཚེ་ལ་མངའ་བརྙེས་ཤོག༔ སྤྲོས་མེད་ལ་ཚེ་འགུགས་དང་དམིགས་པ་ཙམ་གྱིས་འགྲུབ་པས་ཚེ་རྫས་སོགས་མ་གཏད་ཀྱང་རུང་ངོ། ། ༦༽བླ་མ་སྙིང་ཞུགས་ཀྱི་དབང་ནི། ཨ༔ མཁའ་དབྱིངས་རྒྱལ་བ་རབ་འབྱམས་གཙོ་བོར་འདུས༔ གཙོ་བོ་འཇའ་ལུས་ཟུང་འཇུག་རྡོ་རྗེའི་སྐུ༔ འཐེབ་སོར་ཙམ་ཞིག་གཙུག་ནས་སྙིང་དབུས་བབ༔ བྱིན་རླབས་དབང་དང་དངོས་གྲུབ་མཆོག་ཐོབ་དམིགས༔ ཨ་ཨ་ཨ༔ བླ་མའི་ཐུགས་དང་རང་སེམས་དབྱེར་མེད་པ་ངེས་པའི་དོན་ལ་མཉམ་པར་འཇོག༔ སླར་ཡང་སྣང་གྲགས་རྟོག་ཚོགས་བླ་མའི་སྐུ༔ རྩོལ་མེད་མ་བཅོས་རིག་པའི་ངོ་བོར་བཞུགས༔ དགེ་བ་འདི་ཡིས་འགྲོ་བ་མ་ལུས་པ༔ ཡེ་ཤེས་བླ་མའི་ས་མཆོག་མྱུར་ཐོབ་ཤོག༔ སླར་ཡང་དཀྱིལ་འཁོར་རྒྱ་མཚོ་གཞིར་བཞེང་སུ་གསལ་བ་ལས་ཚེ་མི་འགྱུར་བར་རྒྱས་འདེབས་པར་བསམ། བླ་ཚེ་དབྱིངས་སུ་སྦ་བ་ནི༔ ཚེ་ཡི་སྙིང་པོ་ཨ་དཀར་པོ༔ ཉི་ཟླ་ཁ་སྦྱོར་ནང་དུ་བཅུག༔ ཡེ་ཤེས་ལྔ་ཡི་འོད་ཀྱིས་བསྡམ༔ རྡོ་རྗེ་གསུམ་གྱི་རྒྱ་ཡིས་བཏབ༔ མདའ་དར་རྒྱ་གྲམ་གནས་ལྔར་བཞག༔ ཧཱུྃ་ཧྲཱི༔ གཅིག་འཛིན་བདག་ལྟའི་ཚེ་ཡི་ཀེགས༔ ཀུན་ཁྱབ་ཡེ་ཤེས་སྟོབས་ཀྱིས་བཅོམ༔ ཆོས་སྐུ་གཅིག་གི་བྱིན་གྱིས་བརླབས༔ ཐིག་ལེ་གཅིག་གི་ཀློང་དུ་སྦ༔ གཉིས་འཛིན་མཚན་མའི་ཚེ་ཡི་ཀེགས༔ གཉིས་མེད་ཡེ་ཤེས་སྟོབས་ཀྱིས་བཅོམ༔ སྐུ་གཉིས་དག་པས་བྱིན་གྱིས་བརླབས༔ གཉིས་སྣང་བྲལ་བའི་ཀློང་དུ་སྦ༔ དུག་གསུམ་ཆགས་སྡང་ཚེ་ཡི་ཀེགས༔ ཡེ་ཤེས་གསུམ་ལྡན་སྟོབས་ཀྱིས་བཅོམ༔ སྐུ་གསུམ་བདེན་པས་བྱིན་གྱིས་བརླབས༔ ཁམས་གསུམ་ཀློང་གྲོལ་དབྱིངས་སུ་སྦ༔ སྐྱེ་བཞིར་ཨ་འཐས་ཚེ་ཡི་ཀེགས༔ ཡེ་ཤེས་བཞི་སྦྱོར་སྟོབས་ཀྱིས་བཅོམ༔ སྐུ་བཞིའི་བདེན་པས་བྱིན་གྱིས་བརླབས༔ འབྱུང་བཞི་རང་དག་ཀློང་དུ་སྦ༔ དུག་ལྔ་འཁྲུགས་པའི་ཚེ་ཡི་ཀེགས༔ རྒྱལ་བ་རིགས་ལྔས་སྟོབས་ཀྱིས་བཅོམ༔ དབྱིངས་ལྔ་དག་པའི་ཀློང་དུ་སྦ༔ ༀ་ཨཱཿཧཱུྃ་བཛྲ་གུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ་སིདྡྷི་ཕ་ལ་ཧཱུྃ་ཨཱ༔ ཨཱ་ཡུརྫཱ་ན་གུ་ཡ་སིདྡྷི་ཧཱུྃ༔ ཨཱ་ཡུརྫྙཱ་ན་ཏིཥྛ་བྷྲཱུྃ༔ རྗེས་དབང་གི་དམ་ཚིག་བསྒྲགས་པ་ནི། དེ་ལྟར་གུ་རུའི་གསོལ་འདེབས་བསམ་པ་ལྷུན་གྱི་ཟབ་མོ་ནང་བསྒྲུབ་གུ་རུ་ཡིད་བཞིན་ནོར་བུའི་སྐུ་ཚབས་ཡིད་བཞིན་ནོར་བུ་ལ་བརྟེན་པའི་དབང་བཞི་མཐའ་བརྟེན་བཀྲ་ཤིས་ཚེ་ཡི་དབང་བསྐུར་དང་བཅས་པ་ལེགས་པར་གྲུབ་པ་ཡིན་ནོ། གཞན་ཡང་ཤིས་བརྗོད་ཇི་ལྟར་འོས་པ་བྱའོ། དེ་ཡང་གསང་སྔགས་ཀྱི་རྩ་བ་དབང་། དབང་གི་རྩ་བ་དམ་ཚིག་སྟེ། དེ་ཡང་རྒྱས་པར་དབྱེ་ན་ས་མ་ཡ་འབུམ་སྡེར་གསུངས་པའི་བསྡུས་དོན་རྡོ་རྗེ་ཐེག་པ་ལས་རིགས་ལྔ་སྤྱིའི་དམ་ཚིག་དང་། རྩ་བའི་ལྟུང་བ་བཅུ་བཞི། གལ་མདོར་གྱུར་པ་སྐུ་གསུང་ཐུགས་ཀྱི་དམ་ཚིག་སྟེ། བླ་མ་སངས་རྒྱས་སུ་ལྟ་བའི་མོས་གུས་ནི་ཀུན་གྱི་སྙིང་བོར་གྱུར་པར། གཞུང་རྩ་བ་རྡོ་རྗེའི་ཚིག་རྐང་ལས། ཇི་ཕྱིར་ཡི་དམ་བསྒྲུབ་ཀྱང་བྱིན་རླབས་སྒོ༔ བླ་མ་ལས་གཞན་མ་ཡིན་ཆོས་ཐམས་ཅད༔ བླ་མའི་མོས་གུས་ལྟེམ་རྐྱང་མེད་ལ་འདུ༔ ཁྱད་པར་རྡོ་རྗེ་ཐེག་པའི་སྲོག་སྙིང་སྟེ༔ འདི་ཡོད་སྲོག་ཡོད་འདི་མེད་སྲོག་མེད་འགྱུར༔ དེས་ན་དཀའ་སླ་སྐྱིད་སྡུག་ཅི་བྱུང་ཡང༔ བླ་མའི་མོས་གུས་དམ་ཚིག་འབྲལ་མི་རུང༔ རང་ལ་བཀའ་དྲིན་ཆེ་བའི་བླ་མ་དེ༔ སངས་རྒྱས་ཀུན་འདུས་པད་འབྱུང་ངོ་བོར་བསམ༔ ཞེས་གསུངས་ཕྱིར་བསྲུང་སྡོམ་མཐའ་དག་གི་རྩ་བ་བླ་མའི་དམ་ཚིག་སྲོག་ལྟར་གཅེས་པས་གཞིར་བྱས། བསམ་སྦྱོར་འགྲོ་བའི་དོན་དུ་གང་འགྱུར་བྱ་ཞིང་སྔགས་ཀྱི་ལམ་དུ་ཞུགས་ན་རྡོ་རྗེ་འཛིན་པའི་གོ་འཕང་ཚེ་གཅིག་ལུས་གཅིག་ལ་ཐོབ་པ་གསང་སྔགས་ཟབ་མོའི་ཁྱད་ཆོས་ཡིན་པས། རྡོ་རྗེའི་སློབ་མ་ཁྱེད་རྣམས་ཀྱིས་དེང་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་གུ་རུ་པདྨ་འབྱུང་གནས་ལྷ་དང་བླ་མ་དབྱེར་མེད་དུ་བཟུང་ཞིང་གསོལ་འདེབས་བྱ། སྙིང་པོ་བསྙེན། སྔགས་བཟླ། ཁྱད་པར་ཚེས་བཅུའི་དུས་མཆོད་སོགས་ངེས་པར་དང་ལེན་སྤྲོ་བའི་སྒོ་ནས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། དེ་ལྟར་ཨོ་རྒྱན་ཆེན་པོའི་ཐུགས་ཏིག་ལམ་ཟབ་བླ་མའི་བྱིན་རླབས་དབང་བཞི་རྫོགས་པར་ཐོབ་པའི་བཀའ་དྲིན་བསབ་ཕྱིར་གཏང་རག་གི་ཡོན་ཏུ། དངོས་འབྱོར་ཡིད་སྤྲུལ་ཀུན་ཏུ་བཟང་པོའི་མཆོད་སྤྲིན་ཆེན་པོ། རབ་འབྱམས་རྒྱ་མཚོའི་ཞིང་ཀུན་རྒྱས་པར་བཀང་བའི་མཎྜལ་ཕུལ་མཛོད། མཎྜལ་ཕུལ། སླར་ཡང་ལུས་ལོངས་སྤྱོད་དུས་གསུམ་དགེ་ཚོགས་དང་བཅས་པ་ཟག་པ་མེད་པའི་མཆོད་སྤྲིན་ཏུ་སྤྲུལ་ཏེ་འབུལ་ན། ཐུགས་རྗེས་མི་གཏོང་བར་ཆ་ཤས་ནས་ལོངས་སྤྱོད་དུ་གསོལ་སྙམ་པས། དེང་ནས་བརྩམས་ཏེ། ཞེས་བརྗོད། དེ་ལྟར་གསང་ཆེན་མན་ངག་རྒྱ་མཚོའི་སྙིང་པོ་བླ་མ་རིག་འཛིན་ལྷ་ཚོགས་ཀྱི་བསྙེན་སྒྲུབ་དང་སྨིན་གྲོལ་འཆད་སྤེལ་སོགས་ཀྱི་སྒོ་ནས་རང་གཞན་གྱི་དོན་རྒྱ་ཆེན་པོ་བྱེད་པའི་གནང་བ་བྱིན་པ་ཡིན་པས་དེ་ལྟར་ཐུགས་བསྐྱེད་ཟབ་མོ་མཛད་པ་དང་། དབང་བསྐུར་ཐོབ་པ་ལས་བྱུང་བའི་དགེ་བའི་རྩ་བ་རྣམ་མཁྱེན་ཆོས་དབྱིངས་ཆེན་པོར་བསྔོས་པའི་མཐུས། མདོ་སྔགས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། དེ་འཛིན་གྱི་སྐྱེས་བུ་དམ་པ་རྣམས་སྐུ་ཚེ་བརྟན་ཅིང་ཕྲིན་ལས་རྒྱས་པ། འགྲོ་བ་མ་ལུས་མི་གནས་པའི་མྱ་ངན་ལས་འདས་པའི་གོ་འཕང་ཆེན་པོར་གྱུར་ཅིག་སྙམ་པས། བསོད་ནམས་འདི་ཡིས༴ རྒྱལ་བའི་བསྟན་པ་དར༴ སྐྱབས་གནས་བསླུ་མེད༴་སོགས་ཀྱིས་བསྔོ་སྨོན་བྱའོ། ། དེ་ནས་ཚོགས་ལ་རོལ་ཞིང་། ལྷག་མ་དང་། མཆོད་བསྟོད་རྗེས་ཆོག་གཞུང་བཞིན་བྱའོ། །ཞེས་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་ལ་ཕྱི་ནང་གསང་བ་ཡང་གསང་དེ་ཁོ་ན་ཉིད་ཀྱི་སྐོར་རྒྱ་ཆེན་པོ་བཞུགས་པ་ལས། གསང་བདག་རིག་འཛིན་ཆེན་པོ་ཐམས་ཅད་བཀའ་བབ་པ་ཡིན་ཀྱང་། དཀར་ཤོག་ཏུ་ཆ་ཚང་བ་ཞིག་གདུལ་བྱའི་བསོད་ནམས་ཀྱི་ཕབ་གྲུབ་པ་མ་བྱུང་ཡང་། ཁོང་གིས་སྐབས་དང་སྐབས་སུ་ཐོར་བུར་བསྩལ་བ་རྣམས་ཡིད་བཞིན་གྱི་ནོར་བུ་དབང་གི་རྒྱལ་པོ་ལྟར་གཙུག་ཏུ་མཆོད་པར། རྗེ་བླ་མ་རིག་པ་འཛིན་པས་སྤེལ་ཅིག་ཅེས་བཀའ་གནང་དང་། བཀའ་བསྡུ་ནུས་སོ་ཅོག་ལ་ཁོང་གིས་བྱིན་གྱིས་རློབས་ཅེས་བཟླུ་མེད་རྡོ་རྗེའི་གསུང་གིས་དབུགས་དབྱུང་བས། འབྲེལ་ཐོགས་མ་ལུས་གུ་རུ་པདྨས་ཐུགས་རྗེས་འཛིན་ངེས་པ་ཡིན་ནོ། ། ཅེས་མདོ་ཁམས་སྟག་བླའི་གདུང་དུ་ལུས་རྟེན་རྙེད་ཅིང་། རྗེ་རིག་པ་འཛིན་པ་ཆེན་པོ་རྡོ་རྗེ་ཚེ་དབང་ནོར་བུའི་ཞབས་འབྲངས་སུ་གྱུར་པ། བསྟན་འཛིན་རྡོ་རྗེས་གཏེར་འབྱིན་ཆོས་ཀྱི་རྒྱལ་པོ་ཚེ་དབང་ནོར་བུའི་ཕྱག་བྲིས་ཐོར་བུ་རྣམས་ལྷན་ཅིག་ཏུ་ཚིག་གི་སྦྱོར་བ་བྱས་པས་འབྲེལ་ཚད་དཔལ་རི་པདྨ་འོད་དུ་སྐྱེ་བའི་རྒྱུར་གྱུར་ཅིག ། གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས་གཏོར་དབང་བྱིན་རླབས་ཆར་འབེབས།༄། །ཡང་ཟབ་ཡིད་བཞིན་ནོར་བུ་ཨུ་པ་དེ་ཤ་ལས༔ གུ་རུའི་སྒྲུབ་ཐབས་བསམ་པ་ལྷུན་གྲུབ་དངོས་གྲུབ་གཏེར་ཁྱིམ་ལས༔ གཏོར་དབང་བྱིན་རླབས་ཆར་འབེབས་བཞུགས་སོ༔ ན་མོ་མ་ཧཱ་གུ་རུ་པདྨ་བཛྲ་ཡེ༔ སྤྲོས་པ་མེད་པའི་བླ་མ་ཡིས༔ དད་པ་ལྡན་པའི་སློབ་མ་ལ༔ བྱིན་རླབས་ཅིག་ཆར་འཕོ་བའི་ཐབས༔ གཏོར་དབང་བྱིན་རླབས་ཆར་འབེབ་བསྟན༔ རིན་ཆེན་སྣོད་དུ་གཏོར་མ་བཤམ༔ མཆོད་པས་དུ་མས་མཐའ་ནས་བསྐོར༔ གུ་རུ་ཡིད་བཞིན་ནོར་བུ་ལ༔ གསོལ་བ་བཏབ་ལ་དབང་བཞི་བླངས༔ ཁྲུས་བྱས་བགེགས་བསྐྲད་སྲུང་འཁོར་སྒོམས༔ ཆོས་བཤད་ཡོན་ཕུལ་གསོལ་བ་བཏབ༔ ༈ ལོ་རྒྱུས་བརྗོད་པ་ནི༔ འོ་ན། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེ་ཡི་ཆེད་དུ་ཀུན་བཟང་པདྨ་ཞི་ཁྲོ་བསམ་པ་ལྷུན་གྲུབ་ཀྱི་གུ་རུ་པདྨ་ཡིད་བཞིན་ནོར་བུའི་གཏོར་དབང་བྱིན་རླབས་ཆར་འབེབས་ཞུ་སྙམ་པའི་རྟོག་པ་བསྡུས་ཏེ་ཡིད་རྩེ་གཅིག་མོས་པ་བརྟན་པོས་གསན་པར་ཞུ། དེ་ཡང་བདག་ཅག་གི་སྟོན་པ་རྫོགས་པའི་སངས་རྒྱས་ཐབས་མཁས་ཤིང་ཐུགས་རྗེ་ཆེན་པོ་དང་ལྡན་པ་དེས་གདུལ་བྱའི་བློ་དང་འཚམས་པར་ཐར་པའི་འཇུག་སྒོ་དམ་པའི་ཆོས་ཚུལ་ཇི་སྙེད་གསུང་པ་ལ་མཆོག་ཏུ་གྱུར་པ་འབྲས་བུ་གསང་སྔགས་རྣལ་འབྱོར་བླ་ན་མེད་པ་སྟེ། དེ་ཡང་སྤྱིར་བྱིན་རླབས་ཀྱི་འཇུག་སྒོ་རྨད་དུ་བྱུང་ཞིང་ཁྱད་པར་དཀྱིལ་འཁོར་ཐམས་ཅད་ཀྱི་གཙོ་མཆོག་བདེ་བར་གཤེགས་པ་ཡོངས་སུ་འདུས་པའི་ངོ་བོ་ཆིག་དྲིལ་ལམ་ཟབ་མོ་བླ་མའི་སྒྲུབ་པ་ཁོ་ན་ཡིན་ལ། དེ་ཡང་། བདུད་རྩི་འབྱུང་བའི་རྒྱུད་ལས༔ ལྷ་སྐུ་འབུམ་ཕྲག་བསྒོམ་པ་བས༔ བླ་མ་གཅིག་པུ་སྒོམ་པ་མཆོག༔ ཅེས་དང་༔ རྒྱུད་ཆེན་དྲ་བ་ལས། བླ་མ་སངས་རྒྱས་ཀུན་གྱི་རྗེ༔ རྒྱལ་བའི་མན་ངག་གསང་ཆེན་རྣམས༔ སྟོན་པ་རྡོ་རྗེའི་ཐུགས་ལ་གནས༔ གཙོ་རུ་བླ་མ་རྡོར་འཛིན་སྒོམ༔ ཅེས་དང་༔ སངས་རྒྱས་འདུས་པ་ལས༔ གང་གི་གདུལ་བྱའི་ཡིད་བཞིན་དུ༔ བླ་མ་སྒྲུབ་པའི་ཐབས་བརྩམས་ཏེ༔ དེ་ཉིད་དོན་དུ་སུས་གཉེར་བ༔ ཐེག་ཆེན་བླ་མའི་ས་ཡིན་ནོ༔ ཀུན་གྱི་བདག་ཉིད་ཆེན་པོར་འགྱུར༔ ཅེས་གསུངས༔ ནམ་མཁའ་ཆེའི་རྒྱུད་ལས༔ ཚོགས་གཉིས་མྱུར་རྫོགས་སྙིང་པོ་ཡི༔ དོན་རྟོག་འདོད་ན་བླ་མ་སྒྲུབ༔ ཅེས་སོགས་ལུང་འབྱམས་ཀླས་པར་འབྱུང་བ་བཞིན་བླ་མའི་སྒྲུབ་ཐབས་ནི་མཆོག་དང་གཙོ་བོར་གྱུར་པ་སྟེ། དེ་ཡི་སྒྲུབ་ཐབས་ཀྱི་སྒོ་བསམ་གྱིས་མི་ཁྱབ་པ་ལས་འདིར་རྒྱལ་བ་ཐམས་ཅད་ཀྱི་མཁྱེན་བརྩེ་ནུས་གསུམ་གཅིག་ཏུ་འདུས་པའི་རང་གཟུགས་གདོད་མ་ཉིད་ནས་ཆོས་སྐུ་ཀུན་ཏུ་བཟང་པོར་མངོན་པར་བྱང་ཆུབ་པ་ཉིད་པདྨ་རྣམ་པར་བཀོད་པའི་ཞིང་དུ་འོད་སྣང་དཔག་མེད་གངས་ཅན་མཚོ་སོགས་ལོངས་སྤྱོད་རྫོགས་པའི་སྐུ་དང་ཐུགས་རྗེའི་གདུལ་ཞིང་འབྱམས་ཀླས་པར་སྤྲུལ་པའི་བཀོད་པ་བསམ་གྱིས་མི་ཁྱབ་པ་ལས་མི་མཇེད་འཇིག་རྟེན་འདིར་ཡང་བསྐལ་པ་བཟང་པོའི་སངས་རྒྱས་སྟོང་ལ་དབང་བསྐུར་ནས་ལུང་སྟོན་པར་བྱེད་པ་པོ་སངས་རྒྱས་ནུས་ལྡན་རྡོ་རྗེར་གྱུར་ཞིང་བསྐལ་བཟང་སངས་རྒྱས་རེ་རེ་བཞིན་དེ་ཡི་ཕྲིན་ལས་མཐའ་དག་གི་བྱེད་པོ་རྒྱལ་བའི་བསྟན་ལ་སྟོན་པ་གཉིས་པ་ལྟ་བུར་རྟག་ཏུ་སྤྲུལ་བཞིན་བདག་ཅག་གི་སྟོན་པ་ཐུབ་པའི་དབང་པོའི་བསྟན་པ་ལ་ཡང་སྲིད་པ་གསུམ་དང་འཛམ་གླིང་འགྲོ་བ་རྣམས་ལ་རྒྱལ་བ་ཉིད་དང་རྣམ་དབྱེར་མེད་པའི་འཕྲིན་ལས་བཞིའི་སེམས་ཅན་གྱི་དོན་མཛད་པ་ཡིད་བཞིན་ནོར་བུ་རིན་པོ་ཆེ་ལྟ་བུའི་གུ་རུ་པདྨ་འབྱུང་གནས་ཀྱི་སྒྲུབ་ཐབས་ཏེ། རྒྱལ་བ་དེ་ཉིད་ལ་གངས་ཅན་གྱི་རྗེ་འབངས་སྐལ་ལྡན་ལས་ཅན་རྣམས་ཀྱི་གསོལ་བ་བཏབ་པར་བརྟེན་ཟབ་རྒྱས་ཀྱི་ཆོས་ཚུལ་ཇི་སྙེད་གསུངས་ཤིང་སྙིགས་མའི་དོན་དུ་ཟབ་མོའི་གཏེར་དུ་བཙས་པར་མཛད་པ་ལས། འདིར་ནི་རང་གཞུང་རྩ་བ་རྡོ་རྗེའི་ཚིག་རྐང་ལས། རིགས་དང་དཀྱིལ་འཁོར་ཀུན་གཙོ་ཆེ་བའི་མཆོག༔ བླ་མེད་བླ་མའི་སྒྲུབ་ཐབས་བྱེ་བ་འབུམ༔ ཡང་སྙིང་ཞུན་ཏིག་མོས་གུས་གསོལ་འདེབས་ཉིད༔ དེ་ཡི་མཐར་ཐུག་དགོས་འདོད་ཀུན་འབྱུང་གཏེར༔ གངས་ཅན་ལྷ་གཅིག་སངས་རྒྱས་པད་འབྱུང་གིས༔ བོད་ཡུལ་ཐུན་མོང་སྐུ་དངོས་གདུལ་བྱ་རྣམས༔ བཏུལ་བྱས་རྔ་ཡབ་གཤེགས་སྐབས་གུང་ཐང་ལར༔ རྗེ་འབངས་རྣམས་ལ་ཞལ་ཆེམས་ཚུལ་གསུངས་པའི༔ གསོལ་འདེབས་རྒྱལ་པོ་བསམ་པ་ལྷུན་གྲུབ་ཅེས༔ མན་ངག་བཅུ་གསུམ་བསམ་འཕེལ་དངོས་གྲུབ་མཛོད༔ ཅེས་པའི་གདམས་པ་འདི་ཉིད་ནི། གཏེར་ཆེན་རྡོ་རྗེ་གླིང་པའི་གཏེར་ལུང་ལས། ནམ་སྙིང་ཐུགས་སྤྲུལ་པདྨའི་གསུང་གི་འཕྲུལ༔ ནག་པོ་སྤྱོད་པའི་སྐུ་ཡི་སྤྲུལ་བ་ཞིག༔ ཨིནྡྲའི་མཚན་འཆང་སྟག་ལོར་སྤྲུལ་གར་སྒྱུར༔ དུས་འཁྲུགས་བཟློག་ཅིང་བསྟན་པ་ཐབས་ཀྱིས་གསོ༔ འབྲེལ་ཚད་བདེ་བ་ཅན་དུ་ཨེ་མ་ཧོ༔ ཞེས་དང་རོལ་བའི་རྡོ་རྗེས་གཏེར་ལུང་ལས༔ ནམ་སྙིང་སྤྲུལ་བ་འཕོ་བའི་བག་ཆགས་བཅོམ༔ སྟག་ལོ་བརྟུལ་ཞུགས་སྤྱོད་པ་དབང་པོའི་མིང༔ རྟེན་འབྲེལ་ཚོགས་ན་མཆོག་གི་གཏེར་ལྔ་འདྲེན༔ མཐའ་དམག་བཟློག་ཅིང་རྒྱལ་བསྟན་ཉམས་པ་གསོ༔ ཞེས་དང་པདྨ་བདེ་ཆེན་གླིང་པའི་གསང་བ་ཡེ་ཤེས་ཀྱི་མཆོག་གི་ཆོས་བདག་ལུང་དུ་བསྟན་པ་ལས། རྒྱལ་སྲས་ཤནྟ་དེ་བ་དང༔ ནག་པོ་སྤྱོད་པའི་སྐུ་ཡི་གར༔ ཙནྡྲ་གོ་མའི་གསུང་གི་བྱིན༔ འཕགས་ཡུལ་གྲུབ་པའི་རིག་འཛིན་བརྒྱད༔ གཅིག་འདུས་པདྨ་ཐོད་ཕྲེང་དང༔ ནམ་མཁའི་སྙིང་པོའི་ཐུགས་ལས་སྤྲུལ༔ བཻ་རོ་ཙཱ་ནའི་ཡོན་ཏན་དང༔ ཆོས་རྒྱལ་ཆེན་པོའི་འཕྲིན་ལས་ཉིད༔ ཨ་ཡི་ཐབས་ལ་བཛྲ་ཡུམ༔ ཚེ་དབང་མཚན་ཅན་སྟག་གི་ལོ༔ གྲུབ་པའི་རྟགས་ནི་ཐོགས་མེད་སྟོན༔ ལུས་ལ་སྨེ་བའི་དོ་ཤལ་ཅན༔ དཔྲལ་བར་དབང་གི་ཆོས་འབྱུང་བཀྲ༔ རང་བྱུང་མཁྱེན་རབ་ཁོངས་ནས་རྡོལ༔ གསང་ཆེན་བསྟན་པ་ཕྱོགས་བརྒྱར་སྤེལ༔ འཕྲིན་ལས་ཉི་ལྟར་གསལ་བ་འབྱུང༔ ཞེས་གསུང་པའི་སྤྲུལ་བའི་གཏེར་ཆེན་གང་གི་ཆོས་སྐལ་མཆོག་གི་གཏེར་ལྔ་རྟེན་འབྲེལ་གྱིས་འགྲོ་བའི་བསོད་ནམས་ཀྱི་དཔལ་དུ་མ་གྱུར་ཀྱང་། ས་གཏེར་ཀོང་པོ་བུ་ཆུའི་གདམས་ཕྲན་སྐོར་བཏོན་པ་དང་། འགྱུར་མེད་གཏན་འཁྱིལ་གྱི་མཚོའི་རོལ་བའི་རྡོ་རྗེའི་གཏེར་མཇུག་བསྐྱངས་པ་དང་། དགོངས་གཏེར་ལ་ཟབ་ལམ་ཨུ་པ་དེ་ཤ་དང་སྙན་བརྒྱུད་ཌཱཀྐིའི་གན་མཛོད། གསང་ལམ་ཌཱཀྐིའི་སྙིང་ཁྲག་དེ་སྐོར་སོ་གསུམ་བཞུགས་པ་ལས། འདི་ནི་ཡིག་མེད་ཨུ་པ་དེ་ཤའི་རྩ་བར་གྱུར་པ་དམ་པ་མཆོག་ལ་ཨོ་རྒྱན་ཆེན་པོས་ཡང་ཡང་གསུངས་པའི་གདམས་པ་རྒྱ་མཚོ་ལྟ་བུའི་སྙིང་པོ་འདི་ནི་གུ་རུ་མཆོག་གིས་ལན་གྲངས་བདུན་དུ་ཞལ་གཟིགས་ཤིང་དགོངས་པའི་གཏེར་མཛོད་ཆེན་པོ་ནས་སྤྱན་དྲངས་ཏེ་སྲས་སློབ་རིག་འཛིན་བར་མ་ཆད་པའི་བརྒྱུད་པ་བྲེང་ཆགས་སུ་བྱོན་པའི་གདམས་པ་ཟབ་མོ་ལ་སྨིན་གྲོལ་གཉིས་སུ་བཞུགས་པའི་སྔ་མ། རྒྱས་བསྡུས་གཉིས་སུ་བཞུགས་པའི་ཤིན་ཏུ་བསྡུས་པ་བྱིན་རླབས་ཆིག་རྫོགས་སུ་འཕོ་བའི་གཏོར་དབང་བྱིན་རླབས་ཆར་འབེབ་ཡིན་ནོ། དེ་ལ་བླ་བསྒྲུབ་ཐམས་ཅད་ཀྱི་དྭངས་མ་ཀུན་འདུས་ཡིད་བཞིན་ནོར་བུའི་དབང་བསྐུར་སྒྲུབ་པར་བྱེད་པ་ལ་སློབ་དཔོན་གྱི་བྱ་བ་རྣམས་སྔོན་དུ་སོང་། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་བྱིན་རླབས་དབང་བསྐུར་ཟབ་མོ་ཞུ་བའི་ཡོན་ཏུ་མཎྜལ་འབུལ་བ་ཞུ་ཞེས་བརྗོད། སློབ་མས་ཀྱང་མཎྜལ་འབུལ། བླ་མ་དང་དཀྱིལ་འཁོར་གཙོ་མཆོག་གུ་རུ་ཡིད་བཞིན་ནོར་བུ་ཐ་མི་དད་པའི་སྤྱན་སྔར་དབང་སྐུར་ཟབ་མོ་ཞུ་བའི་དོན་ཏུ་གསོལ་བ་འདེབས་པ་འདིའི་རྗེས་ཟློས་མཛོད། ཀྱེ་ཞི་ཁྲོ་འདུས་པའི་བླ་མ་རྗེཿ གུ་རུ་ཡིད་བཞིན་ནོར་བུ་ཡི༔ སྐུ་གསུང་ཐུགས་ཀྱི་ཡེ་ཤེས་བྱིན༔ དབང་མཆོག་མ་ལུས་བསྩལ་དུ་གསོལ༔ ལན་གསུམ། བླ་མས། ལྡོག་མེད་དད་དང་དམ་ཚིག་ཅནཿ གསང་བའི་གནས་འདིར་ཞུགས་པ་ལེགསཿ བཟང་ངན་བརྟུལ་ཞུགས་སྤྱོད་པ་ཡིསཿ རྡོ་རྗེའི་དམ་ཚིག་ཁྱོད་ཀྱིས་ལོངསཿ ཞེས་བཀའ་བགོས། ཐོག་མར་སྒྲིབ་པ་བསལ་བ་ནི། མེ་ཐབ་བཤམ་ལ། དེ་ནས་དཀྱིལ་འཁོར་གཉན་པོར་འཇུག་པའི་སྒྲིབ་པ་བསལ་བའི་ཕྱིར་ཏུ། མདུན་དུ་དྲག་པོའི་ཐབས་ཁུང་གྲུ་གསུམ་དུ་མེ་སྦར། ཏིལ་ནག་ལ་སྡིག་པའི་དབྱིབས་བཅོས། གཡས་ནས་ཞེ་སྡང་གི་རླུང་དཀར་པོ། གཡོན་ནས་འདོད་ཆགས་ཀྱི་རླུང་དམར་པོ། མཉམ་དུ་གཏི་མུག་གི་རླུང་ནག་པོ་སོགས་ཐོག་མེད་ནས་བསག་པའི་སྡིག་པ་དང་སྒྲིབ་པ་ཐམས་ཅད་ཏིལ་ལ་སིབ་ཀྱིས་ཐིམ་པ་ཤ་དང་ཁྲག་གི་རྒྱ་མཚོ་ཟགས་མེད་བདུད་རྩིའི་རང་བཞིན་དུ་གྱུར་ཏེ་མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་ནང་གི་དཔལ་རྟ་མགྲིན་ནག་པོའི་ཞལ་ཏུ་དམར་ལྕིབ་ལྕིབ་གསོལ་བས་ཚོགས་གཉིས་རྫོགས། སྒྲིབ་གཉིས་དག བར་ཆད་མ་ལུས་པ་ཆོས་དབྱིངས་བདེ་བ་ཆེན་པོའི་ངང་དུ་རྗེས་མེད་དུ་ཞི་བར་བསམ། ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ས་པ་རི་ཝཱ་ར་སརྦ་པཱུ་ཛ་ཁ་ཧིཿ ཞེས་ལན་བདུན་དང༌། ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ཧཱུྂ་ཕཊཿ དྲག་ཏུ་བརྗོད་དེ་ཏིལ་ནག་ཐབ་ཏུ་ཕུལ། རྫོགས་པའི་བྱང་ཆུབ་སྒྲུབ་པ་ལ། །ཕྱི་དང་ནང་གི་སོགས་སྨོན་ལམ་བྱ། ད་ཁྱེད་རྣམས་དཀྱིལ་འཁོར་དུ་འཇུག་པའི་དོན་དུ་ཐོག་མར་གསོལ་པ་གདབ་པ་འདིའི་རྗེས་ཟློས་མཛོད༔ ཧོ༔ ཁྱབ་བདག་སྟོན་པ་རིན་པོ་ཆེ༔ རྡོ་རྗེ་སློབ་དཔོན་དགོངས་སུ་གསོལ༔ བདག་ཅག་སྐལ་ལྡན་སྨིན་གྲོལ་མཛོད༔ རྡོ་རྗེའི་དམ་ཚིག་དུས་འདིར་སྩོལ༔ ལན་གསུམ། དེ་ནས་རྒྱུན་བཤགས་འདིའི་རྗེས་ཟློས་མཛོད༔ ཧོ༔ དགོངས་ཤིག་རྡོ་རྗེ་སློབ་དཔོན་དགོངས༔ བདག་ཅག་མ་རིག་དབང་གྱུར་པས༔ སོ་སོར་ཐར་པའི་སྡོམ་པ་ཉམས༔ བྱང་ཆུབ་སེམས་དཔའི་སེམས་བསྐྱེད་འཁྲུལ༔ རྡོ་རྗེ་ཐེག་པའི་དབང་བསྐུར་གྱི༔ རྩ་བ་ཡན་ལག་དམ་ཚིག་ཆག༔ ཕྱག་རྒྱ་ཆེན་པོར་གོ་བ་ལོག༔ རིམ་པ་གཉིས་ཀྱི་གསང་ཚིག་བསྒྲགས༔ མདོར་ན་ཚོར་དང་མ་ཚོར་བའི༔ ཐུགས་དང་འགལ་བ་ཅི་མཆིས་པ༔ གནོང་འགྱོད་དྲག་པོས་མཐོལ་ལོ་བཤགས༔ ཚངས་དབང་མཆོག་གི་དངོས་གྲུབ་སྩོལ༔ ཅེས་ལན་གསུམ། སྡོམ་པ་གསུམ་མ་ཐོབ་པ་དང་། ཐོབ་ཀྱང་ཉམས་པ་སླར་གསོ་དང་གོང་དུ་འཕེལ་བའི་ཆེད་དུ་འདིའི་ལད་མོ་མཛོད། ཧོ༔ དཀོན་མཆོག་གསུམ་ལ་སྐྱབས་སུ་མཆི༔ སོ་སོར་ཐར་དང་བྱང་ཆུབ་སེམས༔ རིག་འཛིན་ནང་གི་སྡོམ་པ་རྣམས༔ མ་ལུས་བདག་གིས་གཟུང་བར་བགྱི༔ ལན་གསུམ། ༈ །དཀྱིལ་འཁོར་གྱི་ལྷ་དང་མཇལ་བའི་ཕྱག་རྟེན་ཏུ་རིན་པོ་ཆེ་རིན་ཐང་མེད་པའི་མེ་ཏོག་གི་ཕྲེང་བ་ཡངས་ཤིང་མ་ཉམས་པ་རེ་ཕྱག་ཏུ་སྤྲད་པར་མོས་ཤིག །ཨོཾ་ཨཱཿཧཱུྃ། ཞེས་མེ་ཏོག་གི་ཅོད་པན་གཏད། ཁྱེད་རྣམས་སྔོན་ཆད་གསང་ཆེན་བླ་ན་མེད་བའི་དལ་དུ་མ་ཞུགས་པའམ། ཞུགས་ཀྱང་བསྐྱར་ཏེ་འཇུག་བ་ལ་གསང་སྒྲོག་གི་ཉེས་པ་མི་འབྱུང་བའི་ཕྱིར་གདོང་གཡོགས་དམར་པོ་བཅིངས་པའི་མོས་པ་མཛོད། ཨོཾ་ཙཀྵུབྷནྡྷ་བྷནྡྷ་སྭཱཧཱ༔ མིག་དར་གཏད། ཡེ་ཤེས་དབབ་པ་ནི། ལུས་གཅུན། རླུང་བཟུང་། སེམས་དམིགས་པ་ལས་མ་ཡེངས་བར་བྱ། གུ་རུ་པདྨ་ཡིད་བཞིན་ནོར་བུའི་དབང་གི་དོན་དུ་མདུན་བསྐྱེད་དང་སློབ་དཔོན་འདི་ལྟར་གསལ་ཐོབ། མདུན་གྱི་ནམ་མཁར་རྒྱ་མཚོ་སྔོ་ལ་དྭངས་པ། འཇའ་འོད་ཀྱི་གུར་ཆེན་ཕུབ་ཅིང་། མེ་ཏོག་གི་ཆར་འབེབ་པ། དཔའ་བོའི་མཁའ་འགྲོས་ལྟ་བའི་གླུ་ལེན་ཞིང་རྡོ་རྗེའི་གར་བསྒྱུར་བའི་དབུས་སུ། དཔལ་ལྡན་སངས་རྒྱས་པདྨ་ལས་སྐྱེས་པ། སྐུ་མདོག་དཀར་ལ་དམར་བའི་མདངས་ཆགས་པ། །ཞལ་གཅིག་ཕྱག་གཉིས་ཞབས་གཉིས་དཔའ་བོའི་བཞེངས་སྟབས་མཛད་པ། ཕྱག་གཡས་ཡེ་ཤེས་ལྔ་ལྡན་གྱི་རྡོ་རྗེ་རྩེ་ལྔ་བ་ནམ་མཁའི་དབྱིངས་སུ་ཕྱར་བས་ཕོ་རྒྱུད་དཔའ་བོའི་ཚོགས་རྣམས་དབང་དུ་སྡུད་པ། ཕྱག་གཡོན་ཀཱ་པ་ལ་བདུད་རྩིས་གང་བར་ཚེ་བུམ་དཔག་བསམ་ཤིང་གིས་ཁ་རྒྱན་པ་སྟ་ཟུར་གཡན་དུ་འཆང་བའི་འོད་ཟེར་གྱིས་མ་ཚོགས་མཁའ་འགྲོ་རྒྱ་མཚོའི་སྙིང་ནས་བསྐུལ་ཞིང་བདེ་བ་ཆེན་པོས་རོལ་རྩེད་བྱེད་པ། ཞལ་འཛུམ་པས་འགྲོ་བའི་གདུང་བ་སེལ་ཞིང་། སྤྱན་གདངས་བ་ཉི་ཟླ་ལྟར་འཁྱིལ་བས་ཇི་སྙེད་པའི་ཆོས་ཀུན་ཇི་ལྟ་བར་གཟིགས་པར་སྟོན་པ་དང་། ཤངས་ཀྱི་གཟེངས་མཐོ་བས་ཡེ་ཤེས་ཀྱི་རླུང་འགོགས་པ་མེད་པར་རྒྱུ་བ། བཞི་བཅུའི་ཚེམས་དཀར་བས་ཅི་ལྟར་གསུངས་པ་དེ་ལྟར་བདེན་པ། སྙན་ཤལ་རིང་ཞིང་རྒྱན་རྒྱན་མཛེས་པས་སྒྲ་གྲགས་གསུང་གི་འཁོར་ལོར་གོ་བ། དབུ་སྐྲ་གནག་ལ་སྣུམས་པ་སིལ་བུར་འཁྲོལ་བས་སྒྲུབ་མཆོག་རྗེས་སུ་འཛིན་པ། མཐོང་གྲོལ་པད་ཞྭའི་ཅོད་པན་དབུ་ལ་གསོལ་བས་སྣང་བ་ཟིལ་གྱིལ་གྱིས་གནོན་པ། རྡོ་རྗེའི་གསང་གོས་དཀར་པོ། སྔགས་ཀྱི་ཕོད་ཆེན་མཐིང་ཀ རབ་བྱུང་གི་ཆོས་གོས་དམར་པོ། ལོངས་སྤྱོད་རྫོགས་པའི་རིན་ཆེན་གྱི་སྟོད་གཡོག་དང་མགུལ་རྒྱན་གསོལ་བ། ཁྲོ་ཆགས་སྒེག་པས་འགྲོ་བློ་དབང་དུ་སྡུད་ཅིང་། ཧུར་བག་བརྩེ་བའི་སྤྱན་གྱིས་འགྲོ་ལ་གཟིགས་པ། སྐུ་མཐོང་བ་ཙམ་གྱིས་སྣང་བ་དབང་དུ་འདུ་ཞིང་། གསུང་ཐོས་པ་ཙམ་གྱིས་ཡེ་ཤེས་ཀྱི་བྱིན་ཆེན་འབེབ་པ། ཐུགས་དྲན་པ་ཙམ་གྱིས་འཕོ་བའི་དབང་ཆེན་སྐུར་བའི་རྩ་གསུམ་རྒྱལ་བ་མ་ལུས་འདུས་པའི་སྤྱི་དཔལ་ཆེན་པོ། དཔའ་བོ་མཁའ་འགྲོའི་སྤྲིན་ཚོགས་སྤྲོ་ཞིང་བསྡུ་བའི་བདག་ཉིད་གཅིག་པུར་བཞུགས་པར་མོས་མཛོད། བླ་མས་གསོལ་འདེབས་དབྱངས་སུ་གྱེར་བའི་ཚིག་རིས་དང་མཐུན་པར་ཡིད་ཀྱིས་གསོལ་བ་དྲག་ཏུ་ཐོབ་ཅིག ཐོད་ཕྲེང་རྩལ་གྱི་སྔགས། ཚིག་བདུན་སྤྱན་འདྲེན། གདུང་འབོད་དང་། ཐུགས་དམ་གནད་བསྐུལ། གསོལ་འདེབས་རྒྱས་བསྡུས་སྣ་ཚོགས་རྗེས་བཟློས་སམ་ལྷན་གཅིག་ཏུ་འདོན། མོས་གུས་ཀྱིས་རྐྱེན་གྱིས་བླ་མ་དཀྱིལ་འཁོར་བའི་ལྷ་ཚོགས་ཀྱི་སྐུ་ལས་འོད་ཟེར་འཕྲོས་པ་ཁྱོད་རང་རྣམས་ལ་ཕོག་པས་ཁྱོད་རང་རྣམ་ཀྱི་ཕུང་ཁམས་སྐྱེ་མཆེད་སོགས་གཟུང་འཛིན་གཉིས་བསྡུས་ཀྱི་ཆོས་ཐམས་ཅད་མེ་ལོང་ལ་ཧ་བཏབ་པ་ཡལ་བ་ལྟར་ནས་སྟོང་པ་ཉིད་དུ་གྱུར་བར་མོས་མཛོད། སློབ་མ་ལ་ལས་བུམ་གྱི་ཆུས་བསངས་གཏོར་ལ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ༔ ཨོཾ་མ་ཧཱ་ཤུ་ནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ སློབས་མ་རྣམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས། སྐད་ཅིག་གིས་པདྨ་འདབ་མ་སྟོང་དང་ལྡན་པའི་ལྟེ་བར་ཉི་ཟླའི་གདན་ལ། ཁྱེད་རང་རྣམས་རང་སེམས་རིག་པའི་ངོ་བོ་ལྷུག་པར་གནས་པ་དེ་ཉིད་མདུན་བསྐྱེད་ཀྱི་གུ་རུ་ཡིད་བཞིན་ནོར་དུ་ཅི་ལྟ་བར་རྒྱན་ཆ་ལུགས་མ་འདྲེས་ཡོངས་སུ་པར་གྱུར་སོང་སྙམ་པས་གསལ་ཐོབ་ཅིག དེ་ལྟར་གསལ་བའི་སྤྱི་བོར་ཨོཾ་མགྲིན་པར་ཨཱ༔ཐུགས་ཀར་ཧཱུྃ། སློབ་དཔོན་དང་གུ་རུ་པདྨ་ཡིད་བཞིན་ནོར་བུ་དབྱེར་མ་མཆིས་པའི་ཐུགས་ཀའི་འོད་ཟེར་གྱི་ནནམ་མཁའི་ཁམས་ཁེངས་དུས་གསུམ་གྱི་བླ་མ་ཡི་དམ་སངས་རྒྱས་བྱང་སེམས་མ་ལུས་ཤིང་ལུས་པ་མེད་པར་སྤྱན་དྲངས། དེ་ཐམས་ཅད་གུ་རུ་པདྨའི་སྐུ་གསུང་ཐུགས་ཀྱི་རྣམ་པར་འོད་ཟེར་དང་བཅས་ཤིང་། དེ་ཡང་སྐུའི་བྱིན་རླབས་ཐམས་ཅད་པདྨ་འབྱུང་གནས་ཀྱི་སྐུའི་རྣམ་པ་ཆེ་བ་རི་རབ་ཙམ། ཆུང་བ་ཡུངས་འབྲུ་དང་ཏིལ་འབྲུ་ཙམ། གསུང་གི་བྱིན་རླབས་ཐམས་ཅད་རྒྱ་ཡིག་ཨཱ་ལི་ཀཱ་ལི་བོད་ཡིག་དབྱངས་གསལ་སོགས་ཁ་དོག་སྣ་ཚོགས་དང་། ཐུགས་ཀྱི་བྱིན་རླབས་ཐམས་ཅད་རྡོ་རྗེའི་དྲིལ་བུ་དང་། པདྨ་རིན་ཆེན་ཁ་ཊྭཱཾ་དབྱུག་ཐོ་ལ་སོགས་པ་སྟེང་འོག་བར་གསུམ་ཐེ་མེར་ནེ་མེར་ཏིལ་གྱི་གང་བུ་ལྟར་གང་ཞིང་ཉི་ཟེར་གྱི་རྡུལ་འཁྲིགས་པ་ལྟར་འབྱོན་ནས་ཁྱེད་རང་རྣམས་ལ་སིབ་སིབ་ཐིམ་པའི་མོས་འདུན་དྲག་པོ་མཛོད་ཅིག ཧྲཱིཿ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཅིང་༔ བྱིན་གྱིས་རླབས་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ བསྒྲུབ་མཆོག་བདག་ལ་དབང་ཅིག་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿ ཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ སིདྡྷི་ཕ་ལ་ཧཱུྃཿ ཨ་ཝེ་ཤ་ཡ་ཨ་ཨཿ ཞེས་ཡེ་ཤེས་ཕབ་པའི་རྟགས་མ་བྱུང་བར་བསྐྱར་ནས་འབེབ། ཡང་བཞེངས་བསྐུལ་མ་བཏོན་ལ། སྤྲོ་ན་གར་ཁྲབ་དབྱངས་དང་བཅས་ཏེ་བྱའོ། ། ཨོཾ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛ༔ ཧཱུྃ་ཧཱུྃ༔་ཕེཾ་ཕཻ༔ རཱ་རཱ་རཱ་རཱ༔ ཙ་ལཱ་ཡ་ཙ་ལཱ་ཡ༔ དོ་ཤ་ཡ་དོ་ཤ་ཡ༔ ཨཱ་ཝེ་ཤ་ཡ་ཨ་ཨཿ དེ་ནས་སྙིང་པོ་བཟླས་ནས་བྱིན་དབབ༔ བརྟན་ཕྱིར་སྤྱི་བོར་རྡོ་རྗེ་བཞག༔ གུ་རུ་མཎྜལ་ཏིཥྛ་བཛྲ་ཧཱུྃ༔ ༀ་ཨཱཿཧཱུྃ། མེ་ཏོག་ཕུལ། མིག་དར་བསལ། དང་པོ་བུམ་པའི་དབང་ནི། སློབ་མའི་བྱ་བ་ནི་བཤགས་པ་དང་དབང་ཐོབ་པའི་དམིགས་པ་སྟེ། བླ་མ་རྩ་བ་གསུམ་གྱི་སྤྱན་སྔར་སྲོག་གཅོད་མ་སྦྱིན་ལེན་དང་མི་ཚངས་སྤྱོད་པ་དང༌། ལུས་ཀྱི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། གཏོར་གཞུང་དུར་ཁྲོད་རོལ་བའི་གཞལ་མེད་ཁང་མཚན་ཉིད་ཡོངས་སུ་རྫོགས་པའི་ནང་དུ། གཏོར་མ་འདི་གུ་རུ་པདྨ་ཡིད་བཞིན་ནོར་བུའི་དཀྱིལ་འཁོར་ཆེན་པོ་གསལ་བའི། རྩེ་མོ་ན་རྩ་བ་དང་བརྒྱུད་པར་བཅས་པའི་བླ་མ། བར་ན་ཡི་དམ་གྱི་དཀྱིལ་འཁོར། མཐའ་སྐོར་ན་དཔལ་བོ་མཁའ་འགྲོ། སྲུང་མ་ལས་བྱེད་ཉི་ཟེར་གྱི་རྡུལ་ལམ་ནམ་མཁའ་ལ་སྤྲིན་འཁྲིགས་པ་ལྟར་བཞུགས་པར་སྒོམས་ཤིག བདག་དང་མདུན་བསྐྱེད་གཏོར་མའི་གནས་གསུམ་ལས་འོད་ཟེར་འཕྲོས་པས་དབང་གི་ལྷ་རྣམས་སྤྱན་དྲངས། བཛྲ་ས་མ་ཡ་ཛཿ དབང་བསྐུར་བའི་གསོལ་བ་བཏབ་པས་རིག་ལྔ་འཁོར་བཅས་ཀྱི་ལས་སོ་སོའི་བུམ་པ་ཐོགས་སྟེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ག་ཏེ་ས་མ་ཡ་ཤྲཱི་ཡེ་ཧཱུྂ། ལྷ་རྣམས་འོད་དུ་ཞུ་ནས་སློབ་མ་ལ་ཐིམ། ཛ་ཧཱུྂ་བྂ་ཧོཿ རིགས་བདག་འོད་དཔག་མེད་ཀྱིས་དབུ་བརྒྱན་པར་གྱུར། སླར་ཡང་གཏོར་མ་གུ་རུ་པདྨ་ཡིད་བཞིན་ནོར་བུ་དང་གཉིས་སུ་མེད་པའི་བླ་མའི་སྤྱི་བོའི་གུ་རུ་པདྨ་ཡིད་བཞིན་ནོར་བུ་དཀར་པོའི་སྐུ་ལས་རང་འདྲ་འཕྲོས། འཁོར་རྣམས་ཀྱི་སྐུ་ལུས་ཀྱང་དེ་བཞིན་འཕྲོས། སློབ་མའི་སྨིན་མཚམས་ཀྱི་གུ་རུ་པདྨ་ཡིད་བཞིན་ནོར་བུ་དཀར་པོ་ལ་ཐིམ་པར་མོས་ལ། ཨོཾཿ རྒྱལ་བ་རབ་འབྱམས་སྐུ་ཡི་དབང་༔ དེ་རིང་བུ་ལ་སྦྱིན་པར་བྱཿ མཐོང་ཚད་ཁྲོ་བོའི་དཀྱིལ་འཁོར་རྫོགསཿ བུམ་དབང་ཡོངས་རྫོགས་ཐོབ་པར་ཤོགཿ ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུྂ། བུམ་པ་ཡོད་ན་བདུད་རྩི་བླུད་མེད་ན་དམིགས་པ་བྱས་པས་འགྲུབ། དེ་ལྟར་དབང་བསྐུར་བས། སྐུ་ཡི་སྒྲིབ་དག བསྐྱེད་རིམ་བསྒོམ་པ་ལ་དབང༌། སྤྲུལ་སྐུའི་གོ་འཕང་ཐོབ་པའི་བསྐལ་བ་ཅན་དུ་བྱས། ༈ གསང་དབང་ནི། སློབ་མའི་བྱ་བ་ཁ་བསྒྱུར་བ་ལ། བླ་མ་རྩ་བ་གསུམ་གྱི་སྤྱན་སྔར་ངག་གི་སྒོ་ནས་བསག་པའི་རྫུན་དང་ཕྲ་མ། ཚིག་རྩུབ་ངག་འཆལ་དང༌། ངག་གི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། གཏོར་གཞུང་དུར་ཁྲོད་རོལ་བའི་གཞལ་མེད་ཁང་མཚན་ཉིད་ཡོངས་སུ་རྫོགས་པའི་ནང་དུ། བླ་མ་དང་མདུན་བསྐྱེད་ཀྱི་མགྲིན་པའི་གུ་རུ་པདྨ་ཡིད་བཞིན་ནོར་བུ་དམར་པོའི་མགྲིན་པའི་ཨཱ་ལས་དབྱངས་དང་གསལ་བྱེད་སོགས་ཡི་གེའི་སྤྲིན་འཕྲོས་ཏེ། མཚོ་ཆེན་ལ་ཁ་བ་བབས་པ་བཞིན་སློབ་མ་ལ་ཐིམ་པར་མོས་ལ། ཨཱཿ བརྗོད་པ་བྲལ་བ་ནཱ་དའི་དབྱངསཿ སྒྲ་རུ་ཤར་བ་ཡི་གེའི་ཚོགསཿ སྐལ་ལྡན་ཁྱོད་ལ་སྦྱིན་པ་ཡིཿ གསང་བའི་དབང་མཆོག་ཐོབ་པར་ཤོགཿ ཨཱ་ཝཱཀྐ་ཨ་བྷི་ཥིཉྩ་ཧཱུྂ། ཡང་མདུན་བསྐྱེད་ཡབ་ཡུམ་སྦྱོར་བའི་བདུད་རྩི་འཛགས་པ་ལྕེ་ལ་བཞག་པས་བདེ་སྟོང་གི་ཡེ་ཤེས་རྒྱུད་ལ་སྐྱེས་པར་མོས། རྩ་སྔགས་བཟླ། བདུད་རྩི་ཡོད་ན་བྱིན། དམིགས་པ་བྱས་ཀྱང་རུང༌། དེས་ངག་གི་སྒྲིབ་པ་དག རང་ལུས་ཐབས་ལྡན་གྱི་རྫོགས་རིམ་བསྒོམ་པ་ལ་དབང༌། ལོངས་སྐུ་ཐོབ་པའི་བསྐལ་བ་རྒྱུད་ལ་བཞག བཟླས་ལུང་ནི། སླར་ཡང་དཀྱིལ་འཁོར་ལྷ་ཚོགས་ཀྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཆད། ཞལ་ནས་ཐོན་སློབ་མའི་ཞལ་དུ་ཐོན། ཐུགས་ཀའི་སྔགས་འཁོར་ལ་ཐིམ་པས་སྔགས་ཀྱི་བྱིན་རླབས་ཞུགས་པར་དམིགས་ལ། རྩ་སྔགས་ལས་སྔགས། ཆོ་ག་བཅས་ཀྱི་ལུང་སྦྱིན། ༈ ཤེས་རབ་ཡེ་ཤེས་ཀྱི་དབང་ནི། སློབ་མའི་བྱ་བ་ཁ་བསྒྱུར་བ་ནི། བླ་མ་རྩ་བ་གསུམ་གྱི་སྤྱན་སྔར་ཡིད་ཀྱི་སྒོ་ནས་བསག་པའི་བརྣབ་སེམས། གནོད་སེམས། ལོག་ལྟ་དང༌། ཡིད་ཀྱི་སྒོ་ནས་བསག་པའི་སྡོམ་པ་གསུམ་གྱི་མི་མཐུན་ཕྱོགས་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ། གཏོར་གཞུང་དུར་ཁྲོད་རོལ་བའི་གཞལ་མེད་ཁང་མཚན་ཉིད་ཡོངས་སུ་རྫོགས་པའི་ནང་དུ། བླ་མ་དང་བདུན་བསྐྱེད་ཀྱི་ཐུགས་ཀ་ནས་རིགས་དང་ལང་ཚོ་ལྡན་པའི་ཕྱག་རྒྱ་མ་སྤྲོས་ཏེ་སློབ་མ་ལ་གཏད་པར་མོས། བླ་མསཿ ཧོཿ རྨད་བྱུང་བདེ་ཆེན་ཕྱག་རྒྱ་ཆེཿ བདེ་བ་ཐམས་ཅད་འབྱུང་བའི་གནསཿ ཐར་བའི་ལམ་དུ་འཁྲིད་པ་མོཿ གཉིས་མེད་ཡེ་ཤེས་ཁྱོད་ཀྱིས་ཟུངསཿ སློབ་མ་རྟ་མགྲིན་དུ་གསལ་བའི་ཡུམ་ཕག་མོ་དང་གཉིས་སུ་མེད་པར་གྱུར། སྙོམ་འཇུག་གི་བདེ་བ་ཉམས་སུ་མྱོང་པས། ཡིད་ཀྱི་ལས་དང་ཐུགས་ལེའི་སྒྲིབ་པ་དང༌། གཞན་ལུས་ཐབས་ལྡན་གྱི་རྫོགས་རིམ་བསྒོམ་པ་ལ་དབང༌། ཆོས་སྐུའི་གོ་འཕང་ཐོབ་པའི་སྐལ་བ་ཅན་དུ་བྱས་སོ། ། ༈ ཀ་དག་ཚིག་གི་དབང་ནི། བླ་མ་རྩ་བ་གསུམ་གྱི་སྤྱན་སྔར་ཀུན་གཞིའི་ཁམས་ཀྱི་བག་ལ་ཉལ་བའི་སྡིག་པ་དང་སྒྲིབ་པ་དེས་བསྐྱེད་པའི་རྐྱེན་ངན་བར་ཆད་ཞི་བའི་ཆེད་དུ་སྙིང་ནས་གསོལ་བ་བཏབ་པས། བླ་མ་དང་མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་ནས་ཡེ་ཤེས་ལྔ་ལྡན་གྱི་འཇའ་དང་འོད་ཀོར་ཕྱག་མཚན་ལྕགས་ཀྱུ། རྡོ་རྗེ་དྲིལ་བུ། ཐོད་ཚེ་བུམ། ཁ་ཊྭཱཾ་པདྨ་སོགས་དཔག་ཏུ་མེད་པ་སྤྲོས་ཏེ་སློབ་པའི་སྙིང་གར་ཐིམ་པར་མོས། ཨཿ སྣང་བར་ཤར་བའི་ཆོས་ཐམས་ཅདཿ དོན་ལ་རང་སྣང་སྟོང་པའི་གཟུགསཿ དབང་ཆེན་འབར་བའི་ཡེ་ཤེས་བྱིནཿ གཞན་ན་མེད་དེ་ཆོས་ཀྱི་དབྱིངསཿ ཨ་ཨ་ཨ་ཕཊཿ དེས་མཆོག་གི་ཡོན་ཏན་བསྐྱེད་པའི་དབང་ཐོབ། ཀུན་གཞིའི་ལས་དང་ཤེས་བྱའི་སྒྲིབ་པ་དག ལམ་རྫོགས་པ་ཆེན་པོ་བསྒོམ་པའི་སྣོད་དུ་གྱུར། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། ། བླ་མ་བརྒྱུད་པའི་གསོལ་འདེབས་བཏོན་ཞིང་གཏོར་མའི་བཀའ་བསྒོ་བྱ། མཐར་སློབ་མ་དམ་ལྡན་ཡིན་ན་གཏོར་མའི་ལྷ་བསྟིམ། སྤྱི་ལ། གཏོར་མའི་ལྷ་ཆོས་ཀྱི་དབྱིངས་སུ་ཐིམ། བདག་དང་སྣང་བ་ཐམས་ཅད་རིམ་བཞིན་སྙིང་ཀའི་སྔགས་འཁོར། དེ་ཐུགས་སྲོག། དེ་ནཱ་ད། རིམ་པར་ཆོས་ཀྱི་དབྱིངས་སུ་ཐིམ་པར་བསམ། སླར་ཡང་སྔགས་སྒྲ་ཕྲ་བ་ནས་ཆེན་པོར་བསྒྲགས་པས་སྣོད་བཅུད་ཐམས་ཅད་དཀྱིལ་འཁོར་ཆེན་པོ་གསུམ་དུ་གྱུར་བར་བསམ། དམ་ཚིག་ཁས་ལེན་པ་ནི། གཙོ་བོའི་ཇི་ལྟར། མཎྜལ། དེང་ནས་བརྩམས་ཏེ། བསོད་ནམས་འདི་ཡིས་སོགས་བསྔོ་བ་དང་སྨོན་ལམ་གྱིས་མཐའ་བརྒྱན་པར་བྱའོ། །ཅེས་པའང་གསང་བདག་རིག་འཛིན་ཆེན་པོ་ཚེ་དབང་ནོར་བུའི་གཏེར་ཆོས་བསམ་པ་ལྷུན་གྲུབ་ཀྱི་ལས་ཚོགས་སྐོར་གྱི་གཏོར་དབང་ལ་ཁ་གསལ་ཕྲན་བས་བརྒྱན་པ་འདི་ནི་སྟག་བུའི་དབོན་བརྒྱུད་བསྟན་འཛིན་རྡོ་རྗེས་སོ། །མངྒ་ལཾ༎ |