སྤྱི་དོན་གསུམ་པ། བསྟན་པ་རིན་པོ་ཆེ་རྒྱ་གར་དུ་རྒྱས་ཚུལ།
སྤྱི་དོན་གསུམ་པ་བསྟན་པ་རིན་པོ་ཆེ་རྒྱ་གར་དུ་རྒྱས་ཚུལ་ལ་གཉིས་ཏེ། མཚན་ཉིད་རྒྱུའི་ཐེག་པ་དང། གསང་སྔགས་བུའི་ཐེག་པའོ། །མཚན་ཉིད་རྒྱུའི་ཐེག་པ། དང་པོ་ལ་གསུམ་སྟེ། དགྲ་བཅོམ་པ་ཆོས་ཀྱི་སྤྱན་ལྡན་རྣམས་ཀྱིས་བཀའ་བསྡུ་བ་མཛད་ཚུལ་དང། མཁས་པ་པཎྜི་ཏ་རྣམས་ཀྱིས་བསྟན་བཅོས་བརྩམས་ཚུལ། ཐེག་པ་གོང་འོག་གི་ཤན་དབྱེ་ཞིང་དེ་དག་གི་ཁྱད་པར་བསྟན་པའོ། །དང་པོ། དགྲ་བཅོམ་པ་ཆོས་ཀྱི་སྤྱན་ལྡན་རྣམས་ཀྱིས་བཀའ་བསྡུ་བ་མཛད་ཚུལ། དང་པོ་བཀའ་བསྡུ་བ་མཛད་ཚུལ་ནི། དེ་ཡང་བཀའ་ཞེས་བྱ་བ་ནི། གོང་གང་གི་ཡང་མ་ཆོད་ཅིང། མཐོ་ལ་གཉན་པས། སངས་རྒྱས་ཀྱིས་འཁོར་རྣམས་ལ་མར་བཀའ་གསལ་དུ་གསུངས་པའི་ཕྱིར་ན། །བཀའ་ཞེས་བྱ་སྟེ། གང་ཟག་ཆེན་པོ་ཞིག་གིས་གསུངས་པའི་ཕྱིར་ན། བཀའ་ཞེས་བྱ་སྟེ། གང་ཟག་ཆེན་པོ་ཞིག་གིས་གསུངས་པ་ཡིན་ནོ། །བཀའ་ལ་དབྱེ་ན་གསུམ་སྟེ། ཞལ་ནས་གསུངས་པའི་བཀའ། རྗེས་སུ་གནང་བའི་བཀའ། བྱིན་གྱིས་བརླབས་པའི་བཀའོ། །དང་པོ་ཞལ་ནས་གསུངས་
པའི་བཀའ་ནི། སྡུད་པའམ། མཚན་བརྗོད་ལྟ་བུའོ། །རྗེས་སུ་གནང་བའི་བཀའ། སངས་རྒྱས་སྐུ་ཡོངས་སུ་མྱ་ངན་ལས་འདའ་ཁར། ཀུན་དགའ་བོས་ཞུ་བ་བཞི་དྲིས་པའི་དུས་སུ། བཀའ་བསྡུ་བ་བྱེད་པའི་དུས་སུ། །འགོར་འདི་སྐད་བདག་གིས་ཐོས་པའི་དུས་གཅིག་ན་དང། བར་དུ་དྲིས་ལན་དང། ཐ་མར་རྗེས་སུ་ཡིད་རངས་བ་བྲིས་ཤིག་གསུངས་པ་ལྟ་བུའོ། །བྱིན་གྱིས་བརླབས་པའི་བཀའ་གསུམ་སྟེ། སྐུ་དང་གསུང་དང་ཐུགས་ཀྱི་བྱིན་གྱིས་བརླབས་པའི་བཀའོ། །དེ་ལ་སྐུས་གྱིས་བརླབས་པའི་བཀའ་ནི། བྱང་ཆུབ་སེམས་དཔའ་རྡོ་རྗེ་སྙིང་པོའི་སྤྱི་བོར་སངས་རྒྱས་ཀྱི་ཕྱག་བཞག་པས། རྣམ་གྲོལ་ཟླ་བ་མདོ་སྡེ་ས་བཅུ་པ་བཤད་ནུས་པ་ལྟ་བུའོ། །གསུང་ནི་སངས་རྒྱས་ཀྱིས། རབ་འབྱོར་ཁྱེད་ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྤོབས་པར་བྱོས་ཤིག་ཅེས་པས། འཆད་ནུས་པའམ། དངོས་སུ་མཚོན་ན་སངས་རྒྱས་ཀྱིས་མོའུ་འགལ་གྱི་བུ་ལ། ཤཱཀྱའི་རིགས་རྒྱུད་ཤོད་ཅིག་ཅེས་གསུངས་པས། མདོ་སྡེ་མངོན་པར་འཡྦུང་བ་བཤད་ནུས་པ་ལྟ་བུའོ། །ཐུགས་ཀྱི་བྱིན་གྱིས་བརླབས་པ་ནི། དེ་བཞིན་གཤེགས་པ་ཏིང་ངེ་འཛིན་ལ་སྙོམས་པར་ཞུགས་ནས། སྤྱན་རས་གཟིགས་བཤད་པ་པོར་བྱིན་གྱིས་བརླབས། ཤཱ་རིའི་བུ་ཐན་པ་པོར་བྱིན་གྱིས་བརླབས་ནས། ཤེས་རབ་སྙིང་པོ་བཤད་པ་ལྟ་བུའོ། །དེ་ལྟར་སྟོན་པ་མྱ་ངན་ལས་འདས་ཙམ་ན། སྡེ་སྣོད་གསུམ་དུ་བསྡུས་པ་དང། གཞུང་ཚིག་དང་ཡི་གེར་བཀོད་པ་མེད་དེ། ཐེག་པ་ཆེན་པོའི་ཆོས་བྱིན་གྱིས་བརླབས་ནས་བཤད་པ་ཡིན་ནོ། །དེ་ནས་མྱ་ངན་ལས་འདའ་ཁར་ཀུན་དགའ་བོ་བོས་ནས། ཀུན་དགའ་བོ་ང་མྱ་ངན་ལས་འདས་ནས། ཆོས་ཐམས་ཅད་སྡེ་
སྣོད་གསུམ་དུ་སྡུས་ཤིག་ཅེས་གསུངས་ཏེ། འོ་ན་ཀུན་དགའ་བོ་ལ་དེ་སྐད་གསུངས་པ་ཅི་ཞེ་ན། ཀུན་དགའ་བོ་ཐོས་པ་འཛིན་པའི་ཉེ་གནས་ཡིན་ཏེ། དེ་ཡང་སངས་རྒྱས་དགུང་ལོ་ལྔ་བཅུ་བཞེས་ནས་ཉེ་གནས་གཅིག་འདོད་ནས་ཡོད་པ་ལ། མོའུ་འགལ་གྱི་བུ་ལ་སོགས་པས། ཉེ་གནས་བདག་ཅིག་གིས་བྱའམ་ཞུས་པས་མ་གནང་སྟེ། ཀུན་དགའ་བོ་ལ་སྤྱན་ཀྱིས་གཟིགས་པས། དེར་ཐམས་ཅད་ཀྱིས་ཀུན་དགའ་བོ་ལ་ཉེ་གནས་གྱིས་བྱས་པས། བྱེ་མ་བཏུབ། ནན་ཏན་དུ་སྨྲས་ནས། རྩི་གསུམ་བཟུང་སྟེ་ཟས་ལྷག་མི་ཟ་བ། གོས་ལྷག་མི་གྱོན་པ་དང། ཅི་དྲིས་པའི་ལན་སྟེར་བ་དང་གསུམ་རྩིས་སུ་བཟུང་ནས། ཉེ་གནས་ལོ་ཉིས་ཤུ་རྩ་གཉིས་བྱས་པའི་ཕྱིར་རོ། །བཀའ་བསྡུ་བ་དང་པོ་མཛད་ཚུལ། དེ་ལས་ཁྱད་པར་རམ། བྱེ་བྲག་ཏུ་བསྡུ་ཚུལ་བསྟན་པ་ནི། བཀའ་བསྡུ་བ་རྣམ་པ་གསུམ་ལས། བསྡུ་བ་དང་པོ་ནི། སངས་རྒྱས་འདས་བའི་ཕྱིར། བཀའ་ཡི་བསྡུ་བ་དང་པོ་མཛད་དོ། །གནས་གང་དུ་བསྡུ་ཞེས་བགྲོས་པ་ལས། དེར་ཁ་ཅིག་ན་་རེ་རྩ་མཆོག་ཏུ་བྱ་ཟེར་བ་ལ། དེར་སྔོན་སངས་རྒྱས་འདས་པའི་ཤུལ་ཡིན་ཏེ། འདས་པ་རྒྱུས་མེད་པ་ཀུན་གྱིས་དེ་ཡི་ལོ་རྒྱུས་ཐོས་ན་དེ་དག་མྱ་ངན་བྱེད་པ་དང། སེམས་གཡེང་བ་དང་སྙིང་མི་དགའ་ཟེར། ཡང་ཁ་ཅིག་ན་རེ་རྡོ་རྗེ་གདན་གྱི་ཙ་ན་ཡུལ་ཉམས་དགའ་བྱ་བ་ཡོད་དོ། །དེ་ནི་སྟོན་པ་ཆོས་ཀྱི་སྐུ་བརྙེས་པ་དང། བཀྲ་
ཤིས་པའི་གནས་ཡིན་པས་དེར་བྱའམ། རུང་པ་དག་རྒྱལ་པོ་གསང་བའི་བྲག་ཕུག་ཏུ་རུང་པ་ཡིན་ཏེ། དེ་ན་ཡོད་བདག་མེད་བྱས་པས། འོ་ན་ཡུལ་མ་ག་དྷའི་ཐུབ་པ་ལུས་འཕགས་མོའི་གླིང་ན། སངས་རྒྱ་ཀྱི་བསྟན་པ་ལ་དད་པའི་རྒྱལ་པོ་མ་སྐྱེས་དགྲ་བྱ་བ་ཡོད་པས། དེ་ལ་སྦྱིན་བདག་བཅོལ་ལ་བཀའ་བསྡུ་བ་བྱའོ་བྱ་བ་ཡོད་པས། དེ་ལ་སྦྱིན་བདག་བཅོལ་ལ་བཀའ་བསྡུ་བ་བྱའོ་ཞེས་ཟེར་ནས། ཀུན་དགའ་བོས་ལྗོངས་རྒྱུ་བཞིན་བཞུད། འོད་སྲུངས་ཀྱིས་ལམ་དྲང་པོར་བཞུད་པས། རྒྱལ་པོ་མ་སྐྱེས་དགྲ་དང་འཕྲད་ནས། གར་འགྲོ་དྲིས་པ་དང། སངས་རྒྱས་ནི་འདས། ད་ཆོས་ཀྱི་བསྡུ་བ་བྱེད་པ་ཡིན་ཞེས་སྨྲས་པས། དེར་རྒྱལ་པོ་གླང་པོ་ཆེའི་ཁ་ནས་ལྷུང་སྟེ་བརྒྱལ་ལོ། །དེ་ནས་བརྒྱལ་སངས་པ་དང་མ་འགགས་པས་སེམས་གསོས་ནས། སངས་རྒྱས་མྱ་ངན་ལས་འདས་བྱ་བ་མེད་དེ། ཉན་ཐོས་ལ་སོགས་པའི་སྣང་ངོ་ལ་འདའ་བའི་ཚུལ་བསྟནཔ་ཡིན་བྱས་པས། འོ་ན་འོ་སྐོལ་རྣམས་ལ་མཆོག་པའི་གནས་སམ། རྟེན་མེད་པས་ཇི་ལྟར་བྱ་ཞེས་དྲིས་པ་དང། དེ་དེའི་བཀའ་བགྲོས་བསྡུ་བ་ཙམ་ཞིག་བྱེད་པ་ཡིན་པས། དེ་ལ་རྩ་མཆོག་ཏུ་ཡང་མ་རུང། འོད་མའི་ཚལ་དུ་བྱ་སྙམ་པས་ཀྱང། སྔོན་སྟོན་པས་ཆོས་གསུངས་པའི་གནས་ཡིན་པས་དེར་ཡང་སྙིང་མ་དགའ། རུང་པ་དག་ནི་ནྱ་གྲོལ་དྷ་ཞེས་པ་རྒྱལ་པོའི་ཁབ་གསང་བའི་བྲག་ཀྱང་ཟེར་ལ། ལྷ་མ་ཡིན་གྱི་ཕུག་ཀྱང་ཟེར་བ་དེར་འོས་ལ་རུང་པ་ཡིན་ཏེ། དེ་ན་ཚུལ་སྦྱོར་མཁན་མེད་པས། ད་ཡུལ་མཉམ་ཀར་འགྲོའམ་སྙམ་བྱས་པས། མ་སྐྱེས་དགྲ་ན་རེ། འོ་ན་གསང་བའི་བྲག་ཕུག་ཏུ་འདེང་ངོ༌། །ཚུལ་སྦྱོར་བའི་ཡོན་བདག་བདག་གིས་བྱ་ལ། དབྱར་ཟླ་བ་གསུམ་གྱི་འཚོ་བ་དང་གནས་མལ་སྦྱར་གྱིས་དེར་གཤེགས་པར་
ཞུའོ། །ལར་སངས་རྒྱས་དང། ཤཱ་རིའི་བུས་ཀྱང་ང་ལ་དྲིས་པར་མྱ་ངན་ལས་འདས། འཕགས་པ་འོད་སྲུངས་ལ་སོགས་པ་ཁྱེད་རྣམས་ཀྱང། མྱ་ངན་ལས་མི་འདའ་བའི་དབང་ཡོད་པ་ཡིན་པས། རྒྱ་ལ་འདའ་མ་ཡང་ང་ལ་མ་དྲིས་པར་མི་འདའ་བར་ཞུའོ་ཞེས་པ་དང། འདོ་སྲུངས་ཀྱིས་དེ་ལྟར་ཞལ་གྱིས་བཞེས་ཏེ། ད་རུང་སྐུ་མ་འདས་པར་རི་བོ་བཞིའི་བར་ན་ཏིང་ངེ་འཛིན་ལ་བཞུགས་ཏེ། ལན་ཅིག་བྱམས་པ་བྱོན་ཙ་ན་ཆོས་གོས་ལ་སོཊ་པ་གསོལ་ནས། སྔར་གྱི་ཚུལ་བཞིན་དུ་བཞེངས་ནས་སེམས་ཅན་གྱི་དོན་ཡང་བྱེད་པ་ཡིན་ནོ། །དེ་ནས་བ་ལང་བདག་གྲོངས་པས་དགྲ་བཅོམ་པ་ལྔ་བརྒྱ་ཡང་མ་ཐེམས་ནས། ཡང་གྲོས་བྱས་པས། སངས་རྒྱས་ཞལ་བཞུགས་ཙ་ན་ཀུན་དགའ་བོ་ལ་སྡུད་པ་པོ་གཏད་པས། ཀུན་དགའ་བོ་འོས་སམ་ཞེས་བགྲོས་པ་དང། ཀུན་དགའ་བོ་ནི་བསླབ་པ་རྒྱུན་དུ་ཞུགས་པ་ཡིན་པས། དགྲ་བཅོམ་པ་ཡང་མ་ཐོབ་བམ་སྙམ་ཡོད་ཙ་ནས། ཁོ་ནི་འདིར་འོང་ཡང་མི་འོང་ལ་བྱུང་ཡང་ཆོས་ཀྱི་བསྡུ་བ་མི་མཛད་པར་གཟིགས་ཏེ། དེ་ཐམས་གང་གིས་འབྲས་བུ་ཐོབ་ཏུ་གཞུག་སྙམ་ནས་མངོན་ཤེས་ཀྱིས་གཟིགས་པས་ཁོ་ལ་གསོལ་བ་བཏབ་པས་མི་ཕན་ཏེ། རྒྱ་གད་བྱས་པས་ཕན་པར་གཟིགས་ནས། འོང་སྲུངས་ལ་དེ་སྐད་ཞེས་སྨྲས་པ་དང། དེ་ལ་འོད་སྲུངས་ཀྱིས་སྤྱོ་བ་བརྒྱད་གསུངས་པ། རྙོག་ཅན་ཆུ་བླུད་བཟའ་རྡོག་གིས་བརྫིས། ལན་ལོག་བཏབ་དང་སྐུ་བསྟན་དང། གསང་བ་བསྟན་དང་བསྙེན་རྫོགས་ཞུས། །བཞུགས་ཞེས་གསོལ་བ་མ་བཏབ་དང། །བག་ཡངས་མ་ཞུས་སྤྱོ་བ་བརྒྱད། །ཀུན་དགའ་བོ་ནི་ཁྱོད་ཀྱིས་ཉེས། །ཞེས་
དང༌། ཉོན་མོངས་པ་ཅུང་ཟད་ཀྱང་མ་སྤངས་པའི་ཀུན་དགའ་བོ་ཁྱོད། རང་མཆོག་འདུས་པའི་ནང་དུ་མ་འདུག་པར་ལོངས་ཤིག ཅེས་དྲག་ཏུ་སླར་མ་སྨྲས་པས། དེ་ནས་མ་འགགས་པས་འོད་སྲུངས་མ་སྨྲས་པ། ཀུན་དགའ་བོ་མེད་ན། བདག་ཅག་གིས་མདོའི་དོན་ཡང་ཇི་ལྟར་འདོན། འོད་སྲུངས་ན་ཏེ། འདི་རྒྱ་ལ་མདོའི་དོན་ཤེས་པའི་ཡོན་ཏན་དང། ལྡན་དུ་ཟིན་ཡག་འདི་ནི་འདོད་ཆགས་མ་སྤངས་པས་བསླབ་པ་རྒྱུན་དུ་ཞུགས་པ་སྟེ། སྲིད་པར་མི་འོས་སོ་ཞེས་སྨྲས་པ་དང། དེ་ནས་ཀུན་དགའ་བོ་དགེ་འདུན་གྱི་གསེབ་ནས་མེ་དགའ་བཞིན་ཕྱིར་འགྲོ་བ་ལ། མ་འགགས་པས་སྨྲས་པ། ཚེ་དང་ལྡན་པ་ཁྱོད་ཀྱིས་ཉོན་མོངས་པ་སྤོངས་དང། ཕྱིས་འབྲས་བུ་ཐོབ་ནས་བདག་ཅག་གི་དཔོན་དུ་བྱའོ་ཞེས་སྤྲོ་བ་བསྐྱེད་ནས་ནས་བཏང་ངོ་། །དེ་ནས་ཚེ་དང་ལྡན་པ་ཀུན་དགའ་བོས་ཡུལ་བྷྲི་རྫི་ཞེས་པའི་ས་ཕྱོགས་སུ་ཕྱིན་ཏེ། ཁྱིམ་བདག་སྤོང་བྱེད་ཕ་སྤད་རབ་ཏུ་བྱུང་ནས་ཆོས་བསྟནཔས། སྤོང་བྱེད་ཀྱང་དགྲ་བཅོམ་པའི་འབྲས་བུ་ཐོབ་པ་དང། སྤོང་བྱེད་ཀྱང་མཁན་པོ་ལ་རྟོག་པ་ཞུགས་ཏེ། བདག་ཅག་གི་སྟོན་པར་ཆོས་བསྟན་སྙམ་ནས་ཏིང་ངེ་འཛིན་ལ་མཉམ་པར་བཞག་ནས་བལྟས་པས། ཉོན་མོངས་པ་མ་སྤངས་པར་འདུག་ནས། མཁན་པོ་ལ་ཞལ་ཏ་སྨྲས་པ། མཁན་པོ་ཁྱོད་ཀྱང་བག་མེད་མ་མཛད་པར། །ཤིང་འབྲུ་མཐིབས་པོ་སྟན་ན་མྱ་ངན་འདའ། །ཐུགས་ལ་ཞོཊ་ལ་བསམ་གཏན་མཛོད་ཅིག་དང༌། །ཡུན་མི་རིང་པར་ཞི་བའི་གནས་ཐོབ་འགྱུར། །ཞེས་སྨྲས་པ་དང། དེར་འགྱོད་དེ་ད་ནི་རང་གི་སློབ་མ་ཚུན་ཆོས་ཀྱིས་ཀྱང་འདི་སྐད་དུ་སྨྲ་བ་དེ་
བས་ན། འོད་སྲུངས་ཀྱིས་ཟེར་བ་དེ་ཡང་ཤིན་དུ་བདེན་སྙམ་ནས། སྤོང་ཁང་དུ་ཞུགས་ནས་སྤོང་ཐག་བཅིངས་ནས། ཞག་བདུན་དུ་བསམ་གཏན་མཛད་པས་དེ་ཉིད་དུ་འབྲས་བུ་ཐོབ་སྐད། དེའང་སྔོན་དུ་སྟོན་པའི་ཞབས་འབྲིང་ཡུན་རིང་པོ་བྱས་པ་དང ཐོས་པ་མང་པོས་རྒྱུད་གྲོལ་བ་དང༌། མཆེད་གྲོགས་རྣམས་ཀྱིས་སྤྱོས་པས་དུས་དེར་འགྱོད་པ་དྲག་པོ་སྐྱེས་པ་དང། བསམ་གཏན་དྲག་པོ་རྩེ་གཅིག་ཏུ་བསྒོམ་པ་རྣམས་ཀྱིས་ཞག་བདུན་ལ་འབྲས་བུ་ཐོས་པའོ། །དེར་འོད་སྲུངས་འདི་བདག་དགེ་འདུན་ནང་ནས་འབྱིན་པ་དེ། །སྡང་སེམས་སམ་འོན་ཏེ་བྱམས་པའི་སེམས་ཀྱིས་ཕྱུང་སྙམ་ནས། ས་མ་ཏིས་བལྟས་པས། སེམས་བརྩེ་སེམས་སུ་འདུག་ནས། འོད་སྲུངས་ལ་ཡང་དད་འདུན་སྐྱེས་སོ། །དེ་ལྟར་འབྲས་བུ་ཐོབ་ནས། སངས་བའི་བྲག་ཏུ་ཕྱིན་ནས་སྒོ་ཕྱེ་ཞེས་སྨྲས་པ་དང༌། ནང་དུ་འོང་བའི་རྫུ་འཕྲུལ་ཅན་ཡིན་ན་ནང་དུ་ཤོག སྒོ་དབྱེ་ཅི་འཚལ། རྫུ་འཕྲུལ་ཅན་མ་ཡིན་པ་ན་ནང་དུ་མི་གཏོང་ཞེས་པ་དང། རྫུ་འཕྲུལ་གྱིས་ནང་དུ་འོངས་པས། ཐམས་ཅད་ཀྱིས་ཀུན་དགའ་བོ་ཡིན་པ་ཁོང་དུ་མ་ཆུད་པས་ངོ་མ་ཤེས་ཏེ་རྟོག་པ་གསུམ་ཞུགས་སྐད། དེ་ཡང་སྟོན་པ་སུ་ཡིན་སྙམ་པ་དང། བདུད་ལ་སོགས་པའི་བར་ཆད་མ་ཡིན་ནམ་སྙམ་པ་དང། གལ་ཏེ་ཀུན་དགའ་པོ་རང་ཡིན་ནམ་སྙམ་པ་སྟེ་རྟོག་པར་གསུམ་སྐྱེས་པ་དང། དེར་བར་སྣང་གི་ལྷ་རྣམས་ཀྱིས་ཚིགས་སུ་བཅད་དེ་སྐད་སྨྲས་པ། གང་ལ་ཆོས་རྣམས་ཡང་དག་གནས། །འཇིག་རྟེན་གསུམ་པོས་རྟག་ཏུ་མཆོད། །འཕགས་པ་འདི་ནི་དོགས་མེད་པར། །སེདྒེ་བཞིན་དུ་ཆོས་རྣམས་སྒྲོགས། །ཀྱི་མ་ཞི་བ་དེ་བཤད་པས། །ཁྱེད་རྣམས་བདེ་བར་
འདོད་པ་ཡི། །ངེས་པའི་སྙིང་པོ་སྙིང་པོ་མཆོག །དེ་ཉིད་ལ་ནི་གུས་པས་ཉོན། །ཞེས་པ་དང། དགེ་སློང་རྣམས་ཀྱིས་སེདྒེ་ཁྲི་ལ་བླ་གོས་ལྔ་བརྒྱ་གཡོགས་ནས་བཞག་པ་དང། དེའི་སྟེང་དུ་བྱོན་ཏེ། འདི་སྐད་བདག་གིས་ཐོས་པ་ཞེས་པ་ན་གང་ཟག་གཅིག་མ་རྟོགས་པ་ནི་བདག་ཚེ་དང་ལྡན་པ་ཀུན་དགའ་བོ་ཞེས་པ་དང་ངོ་ཤེས་ཏེ། དེ་ནས་འོད་སྲུངས་ལ་སོགས་པས་གསོལ་བ་བཏབ་ནས་ཆོས་རྣམས་བསྡུས་པའོ། །དེ་ལྟར་ན་བསྡུ་བའི་གནས་གང་དུ་བསྡུས་ན་གསང་བའི་བྲག་ཏུ་བསྡུས་པའོ། །སྡུད་པ་པོ་ནི། ཉེ་བ་འཁོར་དང་ཀུན་དགའ་པོ་ལ་འོད་སྲུངས་ཀྱིས་གསོལ་བ་བཏབ་པ། སྟོན་པ་འཇིག་རྟེན་ཕན་བཞེད་པས། །རྒྱལ་བས་གསུངས་པའི་ཆོས་རྣམས་ཀྱིས། །རྣམ་པ་མཆོག་ནི་གང་བསྟན་པས། །རྒྱལ་བས་གསུངས་པའི་ཆོས་རྣམས་ཀྱིས། །རྣམ་པ་མཆོག་ནི་གང་བསྟན་པ། །ཚེ་དང་ལྡནཔས་འདུལ་བ་གསུངས། །ཞེས་ཞུས་སོ། །དེ་བཞིན་དུ་ཀུན་དགའ་བོ་ལ་མདོ་སྡེ་གསུངས་ཞེས་ཞུས་སོ། །ཆོས་སྡེ་སྣོད་གསུམ་གང་ཟག་གི་བློ་ལ་བསྡུས་ཏེ་གསུངས་ཞེས་ཞུས་སོ། །ཆོས་སྡེ་སྣོད་གསུམ་གང་ཟག་གི་བློ་ལ་བསྡུས་ཏེ་གཞུང་དུ་མ་བཀོད་དོ། །ཡོན་བདག་རྒྱལ་པོ་མ་སྐྱེས་དགྲས་བྱས་སོ། །འདུས་པ་དགྲ་བཅོམ་པ་ལྔ་བརྒྱའོ། །བཀའ་བསྡུ་བ་གཉིས་པ་མཛད་ཚུལ། དེ་ནས་བསྡུ་བ་གཉིས་པ་ནི། སངས་རྒྱས་འདས་ནས་ལོ་བརྒྱ་དང་བཅུ་ལོན་པ་བྱའི་ལོ། །ཡུལ་ཡངས་པ་ཅན་གྱི་རྩྭ་ཅན་གྱི་ལྗོངས། གྲོང་ཁྱེར་སྐུ་སྨ་རིའི་གཙུག་ལག་ཁང་དུ། སྡེ་པ་བཅོ་བརྒྱད་པོ་ལྟ་སྤྱོད་མ་མཐུན་པའི་དོན་གཏན་ལ་དབབ་པའི་ཆེད་དུ། དགྲ་བཅོམ་པ་ཟླ་བ་རྒུར་པོ་དང། གྲགས་པ་སོགས་མི་དགུས་མཛད་དོ། །གསོལ་བ་
འདེབས་པ་ཚེ་དང་ལྡན་པ་གྲགས་པ་ཞེས་བྱ་སྟེ་ཉེར་སྦས་སོ། །གང་བསྡུས་པའི་ཆོས་ནི་སྡེ་སྣོད་གསུམ་པོ་ཉིད་དོ་ཟེར་ཡང། བཙུན་པ་ལྷ་ཆེན་པོས་གསུངས་པའི་མི་རུང་པ་བཞི་བཅུ་བོར་ནས། རྩ་བ་སྡེ་བཞིར་བསྡུས་ཏེ་དེ་ཡང་ལྷ་ཆེན་པོའམ། ཡངས་པ་ཅན་གྱི་དགེ་སློག་རྒན་གཞོན་མེད་པ་ན་རེ། ཧུ་ལུ་ཧུ་ལུ་ཡི་རངས་དང། །ཀུན་སྤྱོད་གནོད་དང་ལན་ཚྭ་དང། །ལམ་དང་སོར་གཉིས་དཀྲུག་དང་གདིང། གསེར་གྱི་རུང་པ་བྱས་པ་ནི། །འདི་ནི་མི་རུང་བཞི་བཅུ་ཡིན། །ཞེས་པས་ལོག་པ་དེ་དག་བསལ་ནས། ཐམས་ཅད་ཡོད་པར་སྨྲ་བ་དང། མང་པོས་བཀུར་བ་དང། གནས་བརྟན་པ་དང། ཕལ་ཆེན་པའི་སྡེ་པའོ། །འདུས་པའི་ཚད་ནི་དགྲ་བཅོམ་པ་བདུན་བརྒྱ་སྟེ། དེ་ཡང་གཅིག་མ་ཚང་པ་ནི་ཟླ་རྒུར་གྱིས་གསོས་སོ། །ལུང་ཕྲན་ཚེགས་ལས་ཟླ་རྒུར་གྱིས་མ་ཚོར་བ་དང་དད་པའི་ལྷས་སྦྲན་ཏེ། ཁོས་རྫུ་འཕྲུལ་གྱིས་འོངས་ནས་སྒོ་བརྡུངས་པ་དང། སུ་ཡིན་ཞེས་པས་དེའི་ལན་དུ། གང་དག་སྤར་བུ་ཅན་ནས་འོངས་པ་ཡི། །དགེ་སློང་མང་དུ་ཐོས་པའི་འདུལ་བ་འཛིན། །དེ་དག་ལས་ནི་གང་ཞིག་འདིར་འོངས་ཏེ། །དབང་པོ་ཞེ་ཞེས་བྱ་བ་སྒོ་ན་སྡོད། །ཅེས་པ་དང། ནང་པས་གང་ཡིན་ངོ་མ་ཤེས་ནང་གི་མཚན་སྟོན་པ། །ཅེས་པ་དང། ནང་པས་གང་ཡིན་ངོ་མ་ཤེས་ནང་གི་མཚན་སྟོན་པ། གང་དག་སྤར་བྱ་བ་སྒོ་སྲུང་པ་མཛད་དེ་སྡོད་ཅེས་སྨྲས་པས་ངོ་ཤེས་ཏེ་འབྲས་བུ་ཐོབ་པར་ཤེས་ནས་ནང་དུ་བཏང་བས་བདུན་བརྒྱར་ཐེམས་ཏེ། དེའི་དུས་སུ་ཡང་ཐམས་ཅད་ལྷག་ཆད་མེད་པར་སྨྲ་བ་འདུག་ནས། གཞུང་དུ་མ་བཀོད་དེ་བློ་ལ་བསྡུས་སོ། །དེ་ལྟར་དགྲ་བཅོམ་པ་བདུན་བརྒྱ་ཚོགས་པའི་སྦྱིན་བདག་རྒྱལ་པོ་དྷ་རྨ་ཨ་ཤོ་ཀ་ཞེས་ཀྱང་བྱ།
མདོ་མཛངས་བླུན་དང། སྙིང་རྗེ་པདྨ་དཀར་པོ་ལས། ཆོས་རྒྱལ་མྱ་ངན་མེད་ཅེས་ལུང་བསྟན་པ་དེས་མཛད་ནས། ཆོས་ཐམས་ཅད་དུ་མ་རོ་གཅིག་ཏུ་དོན་བསྡུས་ཤིང་གཏན་པ་ཕབ་པ་ཡིན་ནོ། །བཀའ་བསྡུ་བ་གསུམ་པ་མཛད་ཚུལ། དེ་ནས་བསྡུ་བ་གསུམ་པ་ནི། སྟོན་པ་མྱ་ངན་ལས་འདས་ནས་ལོ་སུམ་བརྒྱ་ལོན་པ་ལུག་གི་ལོ་ལ། ཁ་ཆེའི་ཡུལ་བྱ་ལག་གི་ཀུན་དགའ་ར་བའི་གྲོང་ཁྱེར་ཛ་ལན་དྷ་རའི་དགོན་པ་སྟེ། དེའི་གྲོང་གི་བྱེ་བྲག་ཀུ་ན་བི་ནར་རོ། །སྡུད་པ་པོ་ནི། སྐྱེ་བོ་ཐ་མལ་གྱི་བྱང་ཆུབ་སེམས་དཔའ་བཱ་སུ་མི་ཏྲ་དང། དགེ་འདུན་འདུས་པའི་ཚད་ནི། བྱམས་མའི་བུ་གང་པོ་ལ་སོགས་པ་བྱང་ཆུབ་སེམས་དཔའ་ལྔ་བརྒྱ། པུར་ཎི་ཀ་ལ་སོགས་པ་དགྲ་བཅོམ་པ་ལྔ་བརྒྱ། སོ་སོ་སྐྱེ་བོའི་པཎྜི་ཏ་ཉིས་བརྒྱ་ལྔ་བཅུའམ། ཁྲི་དྲུག་སྟོང། ཚུལ་སྦྱོར་བའི་ཡོན་བདག་དང་གསོལ་བ་འདེབས་པ་གཉིས་ཀ་ཛ་ལན་དྷ་རའི་དྲྭ་བ་འཛིན་རྒྱལ་པོ་ཀ་ནི་ཀས་གསེར་ཅན་བྱས་ཏེ། དེས་དབྱར་ཟླ་གསུམ་དུ་འཚོ་བ་དང་གནས་མལ་སྦྱར། རྒྱལ་པོ་དེ་ཡང་བློ་དང་ཤེས་རབ་དང་ལྡན་པ་དད་པ་ཆེ་བ། ཆོས་ལ་མོས་པ་ཞིག་སྟེ། དེས་སངས་རྒྱས་ཀྱི་ཆོས་བཀའ་འདི་རྣམས་ལ་ལྷད་ཞུགས་སམ་མ་ཞུགས་གཟིགས་པས་སྔ་མ་བས་གཞུང་ཉམས་པར་མཐོང་ནས། བསྡུ་བ་བྱས་པས། སོ་སོའི་སྐྱེ་བོ་མི་བརྗེད་པའི་གཟུངས་མ་ཐོབ་པ་རྣམས་ལྷག་ཆད་དུ་འདོན་པར་འདུག་ནས། དུས་དེར་སངས་རྒྱས་ཀྱི་བསྟན་པ་ཡུན་རིང་དུ་གནས་པར་བྱ་བ་དང། མ་འོངས་པའི་སེམས་ཅན་རྣམས་
ལ་ཕན་གདགས་པའི་ཕྱིར། བཀའ་སྡེ་སྣོད་རྣམས་གཞུང་ཚིག་ཡི་གེར་བསྡུས་ཏེ། པོ་ཏི་དང་གླེགས་བམ་དུ་བྲིས་པས། དེ་ལ་པོད་ཀྱི་གླང་པོ་ཆེའི་ཁལ་ལྔ་བརྒྱ་བྱུང་ནས་དེ་དག་ལ་རབ་གནས་བྱས་ནས་བཞག་གོ །དེའི་དུས་སུ་བསྡུས་པའི་ཆོས་ནི་གྱེས་པའི་སྡེ་པ་བཅོ་བརྒྱད། རྩ་བའི་སྡེ་བཞིར་བསྡུས་ཏེ། དེ་ཡང༌། ཡུལ་དུས་སློབ་དཔོན་བྱེ་བྲག་གི །ཐ་དད་རྣམས་ལ་བཅོ་བརྒྱད་འདོད། །སྟོན་པ་ཐ་དད་ཡོད་མ་ཡིན། །ཞེས་པ་དང། ཡང་དེ་སྐད་དུའང། ཤཱཀྱ་སེདྒེའི་བསྟན་པ་འདི། །དེ་ལྟར་རྣམ་པ་བཅོ་བརྒྱད་དུ། །གྱུར་ཏེ་འགྲོ་བའི་བླ་མ་དེའི། །སྔོན་གྱི་འཕྲིན་ལས་དབང་གིས་ན། །ཞེས་ཏེ། རྩ་བ་བཞི་ལས་དང་པོ་ཐམས་ཅད་ཡོད་པར་སྨྲ་བ་ལས། བདུན་དུ་གྱེས་ཏེ། གཞི་ཐམས་ཅད་ཡོད་པར་སྨྲ་བ་དང། འོད་སྲུངས་སྡེ། ཆོས་སྲུངས་སྡེ། མང་ཐོས་སྡེ། གོས་དམར་ཅན་གྱི་སྡེ། རྣམ་པར་འབྱེད་དེ་སྨྲ་བའི་སྡེ། གོས་དམར་ཅན་གྱི་སྡེ། རྣམ་པར་འབྱེད་དེ་སྨྲ་བའི་སྡེ། ས་སྲུངས་ཀྱི་སྡེའོ། །དགེ་འདུན་ཕལ་ཆེན་པའི་སྡེ་ལྔ་ནི། ཤར་གྱི་རི་བོའི་སྡེ། ནུབ་ཀྱི་རི་བོའི་སྡེ། གངས་རིར་གནས་པའི་སྡེ། འཇིག་རྟེན་འདས་པར་སྨྲ་བའི་སྡེ། རྟག་པར་སྨྲ་བའི་སྡེའོ། །དགེ་འདུན་གནས་བརྟན་པའི་སྡེ་གསུམ་སྟེ། རྒྱལ་བྱེད་ཚལ་གནས་སྡེ། འཇིག་མེད་རི་གནས་སྡེ། གཙུག་ལས་ཁང་གནས་སྡེའོ། །དགེ་འདུན་མང་པོས་བཀུར་བའི་སྡེ་གསུམ་སྟེ། ས་སྒྲོགས་རིགས་ཀྱི་སྡེ། སྲུངས་བའི་སྡེ། གནས་མ་བུའི་སྡེའོ། །དེ་ལྟར་བཅོ་བརྒྱད་པོ་དེ་སྡེ་བཞིར་བསྡུས་པའོ། །དགྲ་བཅོམ་པ་སེདྒེའི་གདོང་ཅན་བྱ་བས། ཡི་གེའམ་གླེགས་བམ་དུ་བཀོད་ནས་གང་ཟག་ཐ་དད་ལ་གཉེར་དུ་གཏད་དེ། འབུམ་ཞལ་
ཆེམས་ཡིན་པས་ཀླུ་ལ་གཏད། ཉིས་ཁྲི་ལྔ་སྟོང་པ་བརྒྱ་བྱིན་ལ། ཁྲི་བརྒྱད་སྟོང་པ་དང་ཁྲི་པ་ལ་སོགསཔའི་ཤེས་རབ་ཕྲ་འདུས་རྣམས་བྱམས་པའི་ཕ་ལྷ་ལག་བརྒྱད་པོ་ལ་གཏད། བརྒྱད་སྟོང་པ་དང། སྡུད་པ་རྣམ་ཐོས་སྲས་ལ་གཏད། གསང་སྔགས་ཐམས་ཅད་མཁའ་འགྲོ་མ་ལ་གཏད། མདོ་ཕྱོགས་ལ་སོགས་པའི་གསུང་རབ་ཕལ་ཆེར་རྡོ་རྗེ་གདན་གྱི་གེའུ་ཚང་དུ་བཞུགས། དེ་ཙ་ན་མི་རྣམས་དད་པ་དང་བརྩོན་འགྲུས་དང་རྫུ་འཕྲུལ་ཆུང་བས་གླེགས་བམ་མ་ཐོབ་སྟེ། འོན་ཀྱང་རྒྱལ་པོ་མ་སྐྱེས་དགྲས་གླང་པོ་ཆེའི་རྒྱབ་ཁལ་གཅིག་ཙམ་གདན་དྲངས་ཞེས་གྲགས། དར་ཅིག་མི་ཡུལ་དུ་ཆོས་གཅིག་ཀྱང་མ་ཐོབ་སྟེ། ཆོས་ནུབ་པ་ཙམ་དུ་གྱུར་ཀྱང་ཟེར་རོ། །དེ་ནི་ཁྱད་པར་རམ་ཐེག་ཆུང་གིས་བསྡུ་ལུགས་སོ། །ཐེག་ཆེན་དང་ཐུན་མོང་གི་བཞེད་ཚུལ། ཐེག་ཆེན་གྱི་བཞེད་པས། མདོ་སྡེ་ཕྱག་རྡོར་གྱིས་བསྡུས། འདུལ་བ་བྱམས་པས་བསྡུས། མངོན་པ་འཇམ་དཔལ་གྱིས་བསྡུས་ཟེར་རོ། །ཐེག་པ་ཐུན་མོང་གི་བཞེད་པས་གསང་བའི་བྲག་ཕུག་ཏུ་ཚོགས་པའི་དུས་སུ། ཀུན་དགའ་བོ་ལ་གསོལ་བ་བཏབ་སྟེ། ཚེ་དང་ལྡན་པ་མདོ་སྡེ་གསུངས་ཞེས་ཞུས་པས། སྔ་གྲོ་མདོ་སྡེ་བསྡུས། ཉེ་བར་འཁོར་ལ་གསོལ་བ་བཏབ་ནས། ཚེ་དང་ལྡ་པ་འདུལ་བ་གསུངས། ཞེས་ཞུས་པས། ཉི་མ་ཕྱེད་ལ་འདུལ་བ་བསྡུས། ཡང་འོད་སྲུངས་ལ་གསོལ་བ་བཏབ་ནས། ཚེ་དང་ལྡན་པ་མངོན་པ་གསུངས་ཞེས་ཞུས་པས། འོད་སྲུངས་ཀྱིས་དགོང་ཁ་མངོན་པ་བསྡུད་ཞེས་གྲགས་སོ། །དེ་ཡང་འདི་སྐད་དུ། རྒྱལ་བའི་བཀའ་ལུང་འཁོར་ལོ་རྣམ་གསུམ་ལ། །བསྡུ་བ་
རྣམ་གསུམ་མཛད་པ་དེ་ཡི་ཚུལ། །སངས་རྒྱས་འདས་པ་དེ་ཡི་ཕྱི་དེའི་དབྱར། །ཨ་སུ་ར་བཅུད་མེད་ཞེས་གསང་བའི་བྲག་ཕུག་ཏུ། །སྦྱིན་བདག་རྒྱལ་པོ་མ་སྐྱེས་དགྲ་ཡིས་བྱས། །དགྲ་བཅོམ་ལྔ་བརྒྱས་བསྡུས་བ་དང་པོ་མཛད། །མདོ་སྡེ་ཐམས་ཅད་ཀུན་དགའ་བོ་ཡིས་བསྡུས། །འདུལ་བ་ཐམས་ཅད་ཉེ་བར་འཁོར་གྱིས་བསྡུས། མངོན་པ་ཐམས་ཅད་འོད་སྲུངས་ཆེན་པོས་བསྡུས། །སངས་རྒྱས་འདས་ནས་ལོ་བརྒྱ་དང་བཅུ་ན། །ཡངས་པ་ཅན་གྱི་རྩྭ་གནས་ལྗོངས་མཆོག་ཏུ། གྲགས་པ་དང་ནི་ཟླ་རྒུར་ལ་སོགས་པའི། །དགྲ་བཅོམ་བདུན་བརྒྱས་བསྡུ་བ་གཉིས་པ་མཛད། །སངས་རྒྱས་འདས་ནས་ལོ་ནི་སུམ་བརྒྱ་ན། །ཁ་ཆེའི་བྱ་ལག་ཀུན་དགའ་ར་བ་རུ། །དགྲ་བཅོམ་ལྔ་བརྒྱ་བྲང་སེམས་ལྔ་བརྒྱ་དང། །སོ་སོ་སྐྱེ་བོ་ཁྲི་དང་དྲུག་སྟོང་ཚོགས། །དེ་དུས་བསྡུ་བ་གསུམ་པ་མཛད་པ་ཡིན། །ཅེས་གསུངས་སོ། །གཉིས་པ། བཀའི་དགོངས་འགྲེལ་ལ་མཁས་པ་པཎྞི་ཏ་རྣམས་ཀྱིས་བསྟན་བཅོས་བརྩམས་ཚུལ། གཉིས་པ་བཀའི་དགོངས་འགྲེལ་མཁས་པ་པཎྜི་ཏ་རྣམས་ཀྱིས་བསྟན་བཅོས་བརྩམས་ཚུལ་ནི། དེ་ལྟར་བསྟན་པ་རང་བཞིན་གྱིས་རྒྱན་དང་ལྡན་ཡང། ཕལ་གྱིས་རྟོགས་པར་དཀའ་བ་ལ། གཟུགས་མཛེས་པའི་སྐྱེས་བུ་ལ་མེ་ལོང་བསྟན་པ་ལྟ་བུ། དེ་དག་གསལ་བར་བྱེད་པའི་བསྟན་བཅོས་བརྩམས་ཚུལ་བརྗོད་དོ། །
བདེན་བཞིའི་ཆོས་ཀྱི་འཁོར་ལོ་གསལ་བར་བྱེད་པའི་བསྟན་བཅོས། དང་པོ་བདེན་པ་བཞིའི་ཆོས་ཀྱི་འཁོར་ལོ་གསལ་བར་བྱེད་པའི་བསྟན་བཅོས་ནི། སྟོན་པ་མྱ་ངན་ལས་འདས་པའི་ལོའི་ཕྱིས་ཏེ་དབྱར་བྱའི་ལོ་ལ། གསང་བའི་བྲག་ཕུག་ཏུ་དགྲ་བཅོམ་པ་ལྔ་བརྒྱས་བཀའ་བསྡུ་བ་ལ་ཚོགས་པས། བཀའ་བསྡུ་མ་དགོས་ཏེ་གཞུང་དུ་མ་བཀོད། བཀའ་རྣམས་ཀྱིས་དོན་འགྲེལ་པའི་ཚུལ་དུ། བསྟན་བཅོས་འགའ་བརྩམས་པ་ནི། ཚེ་དང་ལྡན་པ་ཀུན་དགའ་བོ་དང། འོད་སྲུངས་དང། ཉེ་བ་འཁོར་དང། ཀ་ཏ་ཡན་ལ་སོགས་པའི་དགྲ་བཅོམ་པ་ཐམས་ཅད་དགོངས་པ་བསྡུར་ནས། བྱེ་བྲག་ཏུ་བཤད་པ་མཛོད་ཆེན་མོ་ཞེས་བྱ་བ། རྩ་བའི་སྡེ་བཞི་ཡན་ལག་དང་བཅས་པ་མཛད། དེ་ནས་དགྲ་བཅོམ་པ་བདུན་གྱིས་དེའི་དོན་འགྲེལ་ལམ། མངོན་པའི་ཕྱོགས་སུ་འགྲོ་བའི་མངོན་པ་སྡེ་བདུན་མཛད་དེ། ཇི་སྐད་དུ། ཆོས་ཀྱི་པུང་པོ་ཤཱ་རིའི་བུས། གདགས་པའི་བསྟན་བཅོས་མིའུ་འགལ་བུས། །ཁམས་ཀྱི་ཚོགས་ནི་གང་པོས་བྱས། །རྣམ་ཤེས་ཚོགས་ནི་ལྷ་སྐྱིད་ཀྱིས། །ཡེ་ཤེས་ལ་འཇུག་ཀ་དྷའི་བུས། །རབ་ཏུ་བྱེད་པ་དབྱིག་ཤེས་ཀྱིས། །ཡང་དག་འགྲོ་བའི་རྣམ་གྲངས་ནི། གསུང་པོ་ཆེ་ཡིས་བྱས་ཞེས་གྲགས། །ཞེས་པ་ལྟར་རོ། །སྟོན་པ་འདས་ནས་ལོ་སུམ་བརྒྱ་ན། ཡུལ་དབུས་ཀྱི་རྒྱལ་པོ་དྷརྨ་ཨ་ཤོ་ཀའི་ཆོས་རྒྱལ་མྱ་ངན་མེད་སྐུ་དྲིན་ལ། སློབ་དཔོན་བྷུ་བ་ཀ་བྱོན་ནས། སྒྲའི་བསྟན་བཅོས་སྒྲ་པཱ་ཎི་བྱ་བ་བརྩམས། བྲམ་
ཟེ་ཧོ་ཧ་ནས་སྒྲ་ཚིག་གི་སྒྲོན་མ་བྱ་བ་བརྩམས། སློབ་དཔོན་ཙནྡྲ་གོ་མིས་བྱཱ་ཀ་ར་ཎ་བརྡ་སྤྲོད་པ་སྡེ་བརྒྱད་བརྩམ། དགྲ་བཅོམ་པ་ཆོས་སྐྱབས་ཀྱིས་དཀོན་མཆོག་བརྩེགས་པ་ལ་བརྟེན་ནས་མངོན་སུམ་གྱི་ཚད་མ་བཞི་དང། རྗེས་དཔག་གི་ཚད་མ་གསུམ་མཛད། དེ་ནས་སློབ་དཔོན་ཕྱོགས་ཀྱི་གླང་པོས་དམིགས་པ་ལ་བརྟགས་པ་ལ་སོགས་པ་རབ་ཏུ་བྱེད་པ་བརྒྱ་ཐམ་པ་སྔར་བརྩམས་པས་བག་ཙམ་འཐོར་ཏེ་མ་འདུས་པར་མཁྱེན་ནས། ཆོས་སྐྱབས་ཀྱི་ལུང་ལ་བརྟེན་ནས། ལུང་བརྒྱ་དང་ལྡན་པའི་ཚད་མ་ཀུན་ལས་བཏུས་པ་བརྩམས། དེས་དབང་ཕྱུག་སྡེ་ལ་གོང་མ་བཤད་དེ། དབང་ཕྱུག་སྡེས་དོན་དེ་དྷརྨ་ཀཱིར་ཏི་ཆོས་ཀྱི་གྲགས་པ་ལ་བཤད། དྷརྨ་ཀཱིར་ཏིས་གདམས་པ་དེ་ལ་བརྟེན་ནས་ཚད་མ་སྡེ་བདུན་བརྩམས་ཏེ། རྩ་བའི་རབ་ཏུ་བྱེད་པ་གསུམ་དང། ཡན་ལག་གི་རབ་ཏུ་བྱེད་པ་བཞི་མཛད། དེ་ལ་རྩ་བའི་གསུམ་ནི། དབང་པོ་རབ་ཀྱི་དོན་དུ་རིགས་ཐིགས་ལེའུ་གསུམ་གྱི་བདག་ཉིད་ཅན་བརྩམས། འདི་ཡི་འགྲེལ་པ་རུ་སློབ་དཔོན་ཆོས་མཆོག་གིས་ཆོས་མཆོག་ཆེན་མོ་མཛད། འབྲིང་གི་དོན་དུ་རྣམ་ངེས་ལེའུ་གསུམ་གྱི་བདག་ཉིད་བརྩམས། འདིའི་འགྲེལ་གི་དོན་དུ་རྣམ་ངེས་ལེའུ་གསུམ་གྱི་བདག་ཉིད་བརྩམས། འདིའི་འགྲེལ་པ་རུ་ཤེས་རབ་འབྱུང་གནས་སྦས་པས་ཚད་མ་རྒྱན་མཛད། དབང་པ་ཐ་མའི་དོན་དུ་རྣམ་འགྲེལ་ལེའུ་བཞི་པ་བརྩམས་སོ། །ཡན་ལག་གི་བཞི་ལ། གཏན་ཚིག་དཀའ་བར་དགོངས་ནས་གཏན་ཚིགས་ཀྱི་ཐིགས་པ། འགྲེལ་པ་དཀའ་བར་དགོངས་ནས་འགྱེལ་པ་བརྟགས་པ། རིག་བྱེད་གསང་བར་སྨྲ་བ་སུན་འབྱིན་པ་ལ་རྒྱུད་གཞན་སྒྲུབ་པ། རྩོད་པ་དཀའ་བར་དགོངས་ནས་རྩོད་པའི་རིགས་པ་མཛད། ཕྱིས་དབྱིག་གཉེན་གྱིས་
ཚད་མ་སྨྲ་བ་སྒྲོན་མ་མཛད། དེ་ཚད་མའི་བསྟན་བཅོས་བརྩམས་ཚུལ་ལོ། །དེ་ནས་འདུལ་བའི་བསྟན་བཅོས་བརྩམས་ཚུལ་ནི། འདུལ་བ་ལུང་སྡེ་བཞི་ལ་བརྟེན་ནས། སློབ་དཔོན་ཡོན་ཏན་འོད་ཀྱིས་མདོ་རྩ་བ་བམ་པོ་དགུ་པ་མཛད། ལས་ཀྱི་གཞིའི་ལག་ལེན་ཀརྨ་ཤ་ཏམ་བམ་པོ་དགུ་པ་བརྩམས། མདོ་རྩ་བའི་འགྲེལ་པ་བམ་པོ་བཅུ་བདུན་པ་བརྩམས། སློབ་དཔོན་ཤཱཀྱ་འོད་ཀྱིས་དགེ་ཚུལ་གྱི་དོན་དུ་ཤློ་ཀ་སུམ་བརྒྱ་པ་དང། དེའི་འགྲེལ་པ་འོད་ལྡན་བམ་པོ་བརྒྱད་པ་བརྩམས། ཁ་ཆེ་དགེ་འདུན་བཟང་པོས་ཀཱ་རི་ཀ་ལྔ་བཅུ་པ་དང། དགེ་སློང་དང་དགེ་འདུན་གྱི་ལོ་དྲི་བ་ཡང་མཛད་དོ། །སྟོན་པ་འདས་ན་སུམ་བརྒྱ་དང་བཅུ་ན་བཙུན་པ་ལྷ་ཆེན་པོ་ཞེས་བྱ་བ་བྱུང་སྟེ། དེས་འཁོར་རྣམས་ལ་ཆོས་ལོག་ཚིགས་བཅད་སྨྲ་པ། ལྷ་རྣམས་མ་རིག་པ་ཡིས་བསླུས། །ལས་ནི་སྒྲ་ཡི་རྒྱུན་ལས་བྱུང། ལྷ་རྣམས་མ་རིག་པ་ཡིས་བསླུས། །ལས་ནི་སྒྲ་ཡི་རྒྱུན་ལས་བྱུང། །ཐེ་ཚོམ་ཅན་རྣམས་གཞན་གྱི་འཇུག །འདི་ནི་སངས་རྒྱས་བསྟན་པ་འོ། །ཞེས་ཆོས་མ་ཡིན་པ་ལྔ་གླེངས་པས། གནས་དེ་ན་ཐོས་པ་དང་ཤེས་རབ་ཏན་ཡོད་པས། དེ་རྣམས་ཀྱིས་ཚིག་དེ་ལ་བརྟགས་པས། ཚིག་དེ་བཀའ་ལས་ཀྱང་འགལ། དོན་ལས་ཀྱང་མཛེས་པར་མི་སྣང་ནས་སྨྲས་པ། ལྷ་ཆེན་པོ་ཁྱེད་ཀྱི་ཚིག་འདི་ལྟ་བུ་ཕྱིས་མ་སྨྲ་ཞིག་འདི་ནི་སངས་རྒྱས་ཀྱི་བསྟན་པ་འདུལ་བའི་ཆོས་མ་ཡིན་ནོ་ཞེས་སྨྲས་པས། དེར་ཚིག་དེ་ལ་གླེང་ལངས་ནས་ཚན་མཐོག་ཐག་རྩོད་དེ། རྒྱལ་བློན་ལ་སོགསཔ་བསྡུམས་ཀྱང་མ་བསྡུམས་ཏེ། སྔོན་སངས་རྒྱས་ཀྱི་རྩོད་པ་ཞི་བའི་ཆོས་འགའ་ཡང་མ་གསུངས་སམ་ཟེར་བས། ཁ་ཅིག་ན་རེ་དེ་
ནི་གསུངས་སོ་ཟེར་ན། འོ་ན་གནས་བརྟན་པ་ལྟར་མེད་ཟེར་བ་རྣམས་ཕྱོགས་གཅིག་ཏུ་འཁོད། ལྷ་ཆེན་པོ་ལྟར་མེད་ཟེར་བ་ཡག་ཕྱོགས་གཅིག་ཏུ་འཁོད་དེ། ལྷ་ཆེན་པོའི་ཕྱོགས་སུ་གཞོན་ཕྱོགས་དྲན་པ་ཅན་མང། གནས་བརྟན་པའི་ཕྱོགས་སུ་རྒན་རིགས་ཉུང་ཤས་ལུས་ཏེ་རིགས་གཉིས་སུ་འཆད་དོ། །དེ་ལྟར་ལོ་སུམ་བརྒྱ་ནས་བཞི་བརྒྱའི་བར་ཚུན་ཆད་དུ་ཆོས་ཀྱི་ལྟ་བུ་ལ་མ་མཐུན་ཞིང། རྩོད་པའང་ལན་བདུན་དུ་བྱུང་ངོ༌། །དགེ་འདུན་ཡང་གོང་བཞིན་དུ་རྩ་བ་དང་ཡན་ལག་ཏུ་བཅས་ནས་བཅོ་བརྒྱད་དམ་ཉིས་ཤུ་རྩ་གཉིས་སུ་གྱེས་ཏེ། སོ་སོར་སྡེ་བའི་སློབ་དཔོན་རྣམས་ཀྱིས་བསྟན་བཅོས་ཀྱང་མང་དུ་མཛད་དོ། །ཚུལ་ཇི་ལྟར་མཛད་པའི་ཚུལ་ཡང། མུ་སྟེགས་ཀུན་བརྟག་པའི་བློ་ཅན་ལ་གང་ཟག་བདག་མེད་པ་ལ་སོགས་འདི་དག་ཀྱང་མེད་པ་མ་ཡིན་ཏེ། ཡོད་པར་བསྟནཔས་གང་ཟག་རྣམས་ཀྱང། ཅུད་ཟད་ཡོད་པར་ལྟ་བ་ཤས་ཆེ་བར་གྱུར་ཏོ། །དེ་སྐད་དུ་ཡང་ལང་ཀར་གཤེགས་པ་ལས། བཅོ་བརྒྱད་དམ་ནི་ཉིས་ཤུ་གཉིས། །ཐམས་ཅད་ཐེག་པ་གཅིག་ལས་བྱུང། །ཡོད་པ་མ་ཡིན་མེད་པ་མིན། །མ་འོངས་འབྱུང་བར་ང་སྨྲ་འོ། །ཞེས་གསུངས་པས། རྒྱས་པར་ནི་རྟོག་གེ་འབར་བ་ནས་འབྱུང་བར་ཤེས་པར་བྱའོ། །འདི་རྣམས་ཀྱིས་ལྟ་བ་དང་འདོད་ལུགས། སློབ་དཔོན་དུལ་བའི་ལྷས་མཛད་པའི་གཞུང་ལུགས་ཀྱི་བསྟན་བཅོས། ལྟ་བུ་གསུམ་པ་ཞེས་བྱ་བ་ནས་ཀྱང་བཅོམ་པ་གོ་མི་ཏྲ་ཞེས་པས་ཀྱང་འདུལ་བའི་བསྟན་བཅོས་བརྩམས་པ་ཡོད་
དོ། །དེ་དག་གིས་བཀའ་འཁོར་ལོ་དང་པོ་བདེན་པ་བཞིའི་ཆོས་ཀྱི་འཁོར་ལོ་གཏན་ལ་འབེབས་པ་དབག་པོ་ཐ་མའི་དོན་དུ་བརྩམས་པའོ། །མཚན་ཉིད་མེད་པའི་ཆོས་ཀྱི་འཁོར་ལོ་གསལ་བར་བྱེད་པའི་བསྟན་བཅོས། བཀའ་གཉིས་པ་མཚན་ཉིད་མེད་པའི་ཆོས་ཀྱི་འཁོར་ལོ་གསལ་བར་བྱེད་པའི་བསྟན་བཅོས་ནི། སངས་རྒྱས་འདས་ནས་ལོ་བཞི་བརྒྱ་ལོན་པ་ན་འཕགས་པ་ཀླུ་སྒྲུབ་བྱོན་པ་ཡིན་ཏེ། མདོ་སྡེ་སྤྲིན་ཆེན་པོ་ལས་འདི་སྐད་དུ། ཀུན་དགའ་བོ་ལི་ཙཱ་བྱི་གཞོན་ནུ་སེམས་ཅན་རྣམས་ཀྱིས་མཐོང་ན་དགའ་བ་འདི། ང་མྱ་ངན་ལས་འདས་ནས་ལོ་བཞི་བརྒྱ་ན། ཀླུ་ཞེས་བྱ་བ་དགེ་སློང་དུ་གྱུར་ནས། ངའི་བསྟན་པ་རྒྱས་པར་བྱེད་དེ། མཐར་དེ་བཞིན་གཤེགས་པ་ཡེ་ཤེས་འབྱུང་ནས་འོད་ཅེས་བྱ་བར་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་ལུང་བསྟན་པར་གྱུར་པ་དེ་བྱོན་ནས། ཡུམ་ཆེན་མོའི་གླེགས་བམ་ཡག་ཀླུའི་ཡུལ་ནས་ཡུལ་དབུས་མ་ག་དྷར་སྤྱན་དྲངས། བདག་མེད་སེདྒེའི་ང་རོས་ཤེས་བྱ་ཐམས་ཅད་ཚུལ་གཅིག་ཏུ་སྟོན་པའི་བསྟན་བཅོས་དབུ་མ་རིགས་པའི་ཚོགས་དྲུག་ལ་སོགས་པ་བརྩམས་ཏེ། དབུ་མ་རྩ་བའི་ཤེས་རབ། རིགས་པ་དྲུག་ཅུ་པ། རྩོད་པ་བཟློག་པ། ཞིབ་མོ་རྣམ་པར་འཐག་པ། རིན་པོ་ཆེའི་འཕྲེང་བ། གང་ལ་འཇིགས་མེད་ལ་སོགས་པ་མཛད། ཨཱརྱ་དེ་བས་བཞི་བརྒྱ་པ་མཛད། ཟླ་གྲགས་ཀྱིས་རྩ་བ་ཤེས་རབ་ཀྱི་པ་དབུ་མ་ཚིག་གསལ་
ཞེས་རྩ་ཤེའི་འགྲེལ་པ་བཞི་བརྒྱ་པའི་ཊཱིཀ་དང་འཇུག་པའི་འགྲེལ་པ་རིཊ་པ་དྲུག་ཅུ་པ། སྟོང་ཉིད་བདུན་ཅུ་པ། རིན་པོ་ཆེའི་འཕྲེང་བ། དེ་རྣམས་ཀྱི་འགྲེལ་པ་མཛད། སངས་རྒྱས་ཡེ་ཤེས་ཞབས་ཀྱིས་ཀྱང་རྩ་ཤེའི་འགྲེལ་པ་མཛད། བྷ་བྱས་ཀྱང་རྩ་ཤེའི་འགྲེལ་པ་ཤེས་རབ་སྒྲོན་མ་མཛད། དེའི་འགྲེལ་པ་སྤྱན་རས་གཟིགས་ཀྱི་བརྟུལ་ཞུགས་མཛད། བྷ་བྱས་རྟོག་གེ་འབར་བ་མཛད་དེ། དེ་རྣམས་ནི་རིགས་པའི་ཚོགས་སམ། གཞུང་ཕྱི་མོ་ཞེས་བྱའོ། །དེ་ནས་བྷ་བྱའི་རྗེས་སུ་འབྲངས་པའི་ཡེ་ཤེས་སྙིང་པོས་བདེན་གཉིས་མཛད། ཐོགས་མེད་ཀྱི་རྗེས་སུ་འབྲངས་པའི་ཞི་བ་འཚོས་དབུ་མ་རྒྱན་མཛད། ཀཱ་མ་ལ་ཤཱི་ལས་དབུ་མ་སྣང་བ་མཛད་དེ། དེ་གསུམ་ལ་དབུ་མ་ཤར་པ་གསུམ་ཞེས་བྱ་སྟེ། རང་རྒྱུད་པ་ཞེས་བྱའོ། །དེ་རྣམས་ནི་ཕར་ཕྱིན་དང་ལྟ་བ་མཐུན་པས་དབུ་མའི་བསྟན་བཅོས་སོ། །ཁྱད་པར་དུ་ཤེས་རབ་ཀྱི་ཕ་རོལ་ཏུ་ཕྱིན་པ་གཞུང་ཆེ་ཕྲ་ཉིས་ཤུ་ལ་དགོངས་འགྲེལ་གྱི་བསྟན་བཅོས་མཛད་པ། ནག་ཁྲིད་བཅུ་དགུ་ལ་སློབ་དཔོན་དིཥྟ་སེ་ནས་འབུམ་ཊཱིཀ་མཛད། ཕྱོགས་ཀྱི་གླང་པོས་དོན་བསྡུས་བྱམས་པས་མངོན་རྟོགས་རྒྱན་མཛད། ཐོགས་མེད་ཀྱིས་བྱེབྲག་བཤད་པ་དང་སྐབས་བསྡུས། ཀླུ་སྒྲུབ་ཀྱིས་དོན་བསྡུས། ཨཱརྱ་དེ་བས་ཀྱང་དོན་བསྡུས། དབྱིག་གཉེན་གྱིས་ཉིས་ཁྲི་གཞུང་འགྲེལ། འཕགས་པ་རྣམ་གྲོལ་སྡེས་ཉིས་ཁྲི་སྣང་བ། སོ་སོ་སྐྱེ་བོ་རྣམ་གྲོལ་སྡེས་སྙིང་པོ་མཆོག་སེདྒེ་བཟང་པོས་འགྲེལ་པ་དོན་གསལ་དེ་ཉིད་སྣང་བ། བརྒྱད་སྟོང་འགྲེལ་ཆེན། འགྲེལ་ཆུང། ཤཱདྟི་པས་དག་ལྡན། ཡེ་ཤེས་ཞབས་ཀྱིས་པན་ཙིག །ཀཱ་མ་ལ་ཤཱི་ལས་ཡེ་ཤེས་སྙིང་ལ་འགྲེལ་ཆུང། བཱི་མ་ལ་
མི་ཏྲས་ཤེར་སྙིང་ལ་རྒྱ་ཆེར་འགྲེལ། ཁ་ཆེ་ཛྙན་ཤྲཱིས་ཀྱང་མངོན་རྟོགས་རྒྱན་ལ་འགྲེལ་པ་མཛད། གཞན་ཡང་ཀླུ་སྒྲུབ་ཀྱིས་བཟོ་རིག་པའི་བསྟན་བཅོས་བཟོའི་གནས་སུམ་ཅུ་པ་ལ་སོགས་པའམ། བློན་པོའི་དོན་དུ་ཤེས་རབ་བརྒྱ་པའམ། བཙུན་མོའི་དོན་དུ་སྤོས་ཡིག་ལ་སོགས་པ་མཛད། གསོ་བ་རིག་པའི་བསྟན་བཅོས་ཀྱང་སོ་མ་རྭ་ཙ་དང། འཚོ་བའི་མདོ་དང་ཡན་ལག་བརྒྱད་པ་དང། འདྲ་བ་ཏའི་རྩ་འགྲེལ་ལ་སོགས་པ་མཛད་དེ། དེ་དག་ནི་བསྟན་བཅོས་ཤིང་རྟ་ཆེན་པོའི་སྲོལ་གཅིག་གོ །དོན་དམ་རྣམ་པར་ངེས་པའི་ཆོས་ཀྱི་འཁོར་ལོ་གསལ་བར་བྱེད་པའི་བསྟན་བཅོས། བཀའ་གསུམ་པ་དོན་དམ་རྣམ་པར་ངེས་པའི་ཆོས་ཀྱི་འཁོར་ལོ་གསལ་བར་བྱེད་པའི་བསྟན་བཅོས་ནི། སྟོན་པ་ཞི་བར་གཤེགས་ནས་ལོ་དགུ་བརྒྱ་ལྷག་ཙམ་སྟོང་དུ་ཉེ་བ་ན། སངས་རྒྱས་ཀྱི་བསྟན་པ་ལ་སྤྲང་པོ་ཉི་མའི་དངོས་གྲུབ་ལ་སོགས་པ་དགྲ་ལན་གསུམ་བྱུང་སྟེ། དང་པོ་ནོི་མུ་སྟེགས་ཀྱི་རྒན་མོ་ཞིག་ན་རེ། ནང་པའི་གཎྜིའི་སྒྲ་མ། འགེམས་ཞེས་པ་ཞིག་སྣང་སྟེ། འོ་སྐོལ་ལ་གནོད་མི་གནོད་བརྟག་པར་རིགས་སོ་ཞེས་ཟེར་ནས་བརྟགས་པས། འོ་སྐོལ་ལ་གནོད་མི་གནོད་བརྟག་པར་རིགས་སོ་ཞེས་ཟེར་ནས་བརྟགས་པས། ལྷ་དང་ཀླུ་དང་གནོད་སྦྱིན་གྱི་མཆོད་པའི། །དཀོན་མཆོག་གསུམ་གྱི་ཏོག་སྡེ་འདི་བརྡུངས་པས། །མུ་སྟེགས་འཆལ་པའི་ཀླད་པ་རྣམ་པར་འགེམས། །ཞེས་པར་རིགས་ནས་དམག་དྲངས་ནས་བསྣུབས་སོ། །དེ་ནས་ཅུང་ཙད་འཕེལ་ནས་ཡོད་པའི་ཚེ། དབུས་ཀྱི་རྒྱལ་པོས། སྟག་གཟིག་གི་རྒྱལ་པོ་ལ་རས་ཀྱི་ན་བཟའ་སྲུབས་མེད་པ་
ཞིག་སྐྱེས་སུ་བསྐུར་ཏེ་དེའི་སྙིང་ཁར་རྐང་རྗེས་འདྲ་བ་ཞིག་ཡོད་པས། ངན་སྔགས་བྱས་སོ་ཟེར་ནས་དམག་དྲངས་ཏེ་བསྣུབས་སོ། །དེ་ནས་ཀྱང་ཅུང་ཟད་པའི་འཕེལ་ནས་ཡོད་པའི་ཚེ། ནང་པའི་གཙུག་ལག་ཁང་ཞི་ཏུ། ཕྱི་པའི་སྤྲང་པོ་གཉིས་སློང་དུ་འོངས་པ་ལ་བཀྲུས་ཆུ་གཏོར་བས་ཁྲོས་ཏེ། ཉི་མ་བསྒྲུབས་ནས་ནང་པའི་གཙུག་ལག་ཁང་དང་གསུང་རབ་མང་པོ་བསྲེགས་ནས་བསྣུབས་སོ། །དེ་ལྟར་བསྟན་པ་ཉམས་དམས་པའི་དུས་སུ། བྲམ་ཟེ་མོ་གསལ་བའི་ཚུལ་ཁྲིམས་ཞེས་བྱ་བ་དགེ་སློང་མ་ཞིག་ཡོད་པ་ལ། དེའི་རྨི་ལམ་དུ། ཚུལ་ཁྲིམས་སྲུང་པ་ལས་ཁྱིམ་ཐབ་བྱས་ན་སངས་རྒྱས་ཀྱི་བསྟན་པ་དར་ཞིང་སེམས་ཅན་ལ་ཕན་པ་ཡོད་དེ་ཟེར་བ་ཞིག་བྱུང་ནས། བྲམ་ཟེར་མོ་དེས་རྒྱལ་བོ་གཅིག་དང་ཁྱིམ་ཐབ་བྱས་པ་ལས། འཕགས་པ་ཐོགས་མེད་བྱོན། དེ་ནས་བྲམ་ཟེར་གཅིག་དང་ཁྱིམ་ཐབས་བྱས་པ་ལས། སློབ་དཔོན་དབྱིག་གཉེན་བྱོན་ནས། གཅེན་པོས་མགོན་པོ་བྱམས་པ་བསྒྲུབས་ཏེ། གྲུབ་པ་དང་རྫུ་འཕྲུལ་གཞན་སྟོན་མཛད་ནས། དགའ་ལྡན་དུ་བྱོན་ནས་བྱམས་པ་དངོས་ལ་མི་ལོ་ལྔ་བཅུའི་བར་དུ་ཆོས་གསན་ནས། ཕྱིས་མི་ཡུལ་དུ་བྱོན་ཏེ། བྱམས་པའི་ཆོས་ལྔ་མཛད་དེ། རྒྱན་རྣམ་གཉིས། འབྱེད་རྣམ་གཉིས། ཐེག་པ་ཆེན་པོ་རྒྱུད་བླ་མ་དག་ལྔའོ། །དེ་ལྟ་བུའི་ཆོས་ལྔ་པོ་འདིས་ཀྱང་སྡེ་སྣོད་གསུམ་གཏན་ལ་དབབ་པའི་ཕྱིར་གསུངས་ཏེ། མདོ་སྡེའི་སྡེ་སྣོད་གཏན་ལ་དབབ་པའི་དབང་དུ་བྱས་ནས། མདོ་སྡེ་རྒྱན་དང། རྒྱུད་བླ་མ་མཛད། འདུལ་བའི་སྡེ་སྣོད་གཏན་ལ་འབེབས་པ་ལ། མངོན་རྟོགས་རྒྱན། མངོན་པ་ལ་ཆོས་དང་ཆོས་ཉིད་དབུ་མ་དང་མཐའ་གཉིས་མཛད། དེ་ལྟ་བུའི་ཆོས་ལྔ་པོ་
དེ་བྱམས་པས་ཐོགས་མེད་ལ་གནང་སྟེ། ཐོགས་མེད་ཀྱིས་ཀྱང་སྡེ་སྣོད་མཐའ་དག་གི་དོན་གསལ་བར་བྱ་བའི་ཕྱིར། རྣལ་འབྱོར་སྤྱོད་པའི་ས་སྡེ་ལྔ་དང། སྡོམ་རྣམ་པ་གཉིས་མཛད་དེ། དེ་ལ་སའི་དངོས་གཞི་ནི་རྦ་བ་ལྟ་བུ་ཡིན་ལ། རྣམ་པར་གཏན་ལ་དབབ་པ་བསྡུ་བ་ནི། དེའི་ཚིག་གི་འགྲེལ་པ་ཡིན་ཞིང། གཞི་བསྡུ་བ་ནི་དེའི་དོན་གྱི་ཆ་སྡེ། དེ་བསྟནཔར་བྱ་བ་རྣམས་སྤྱོད་པར་བསྡུ་བས། དེའི་དོན་སློབ་མ་ལ་ཇི་ལྟར་བཤད་ཐམས་སྟོན་པར་བརྩིས་པའོ། །དེ་ཡག་ལྔ་པོ་བསྡུས་པས་ས་བཅུ་བདུན་དུ་བཞག་སྟེ། དང་པོ་དགུ་ནི་འཁོར་བར་འཇུག་ཕྱོགས་ཀྱི་ས་ལ་འཁོར་བ་ལས་ལྡོག་པའི་ཕྱོགས་ནས་འོག་མ་བརྒྱད་བཞག་གོ །སྡོམ་པ་རྣམས་གཉིས་ནི། ཐེག་པ་ཐུན་མོང་གི་སྡོམ་པ་མངོན་པ་ཀུན་ལས་བཏུས་པ་དང། ཐུན་མོང་མ་ཡིན་པའི་སྡོམ་པ་ཐེག་པ་བསྡུས་པའོ། །དེ་ཡང་མངོན་པ་ཀུན་ལས་བཏུས་པ་ཕུང་པོ་ལྔའི་རང་བཞིན་དུ་བཞག་ཅིང། ཐེག་པ་བསྡུས་པ་ནི་ཤེས་བྱའི་གནས་ལ་སོག་སཔ་བཅུས་ཐེག་པ་ཆེན་པོ་མཐའ་དག་གི་དོན་བསྡུས་པར་བརྩམས་སོ། །དེ་ནས་སློབ་དཔོན་དབྱིག་གཉེན་གྱིས་ཁ་ཆེ་འདུལ་བ་བཟང་པོ་ལ་སོགས་པོ་པཎྜི་ཏ་ཆེན་པོ་མི་ཡི་བླ་མ་མཉེས་པར་མཛད་ནས་སྡེ་སྣོད་མང་པོ་གསན་ཅིང། ཁོ་རང་ཡང་སྐྱེ་བ་མཉེས་པར་མཛད་ནས་སྡེ་སྣོད་མང་པོ་གསན་ཅིང། ཁོ་རང་ཡག་སྐྱེ་བ་ལྔ་བརྒྱར་པཎྜི་ཏར་བརྒྱུད་ནས་སྐུ་འཁྲུངས་པ་ཡིན་པས། བསྟན་བཅོས་རྩོམ་པའི་སྤོབས་པ་ཐོགས་པ་མི་མངའ་བ་དང་ལྡན་པ་ཡིན་པས། བསྟན་བཅོས་རྩོམ་པའི་སྤོབས་པ་ཐོགས་པ་མི་མངའ་བ་དང་ལྡན་པས། མངོན་པ་མཛོད་རྩ་འགྲེལ་དང་བཅས་པ་མཛད་པ་ཡིན་ཏེ། གཅེན་ལ་གསན་ནས། ཐེག་པ་ཆེན་པོ་སེམས་ཅན་གྱི་དོན་གསལ་བར་བྱ་བའི་ཕྱིར། རབ་
ཏུ་བྱེད་པ་པྲ་ཀ་ར་ན་སྡེ་བརྒྱད་མཛད་དེ། འདི་ལྟར་ཕུང་པོ་ལྔའི་བ་ཏུ་བྱེད་པ་དང། ཉིས་ཤུ་པ་དང། སུམ་ཅུ་པ་དང། ལས་གྲུབ་པ། རྣམ་བཤད་རིགས་པ། དབུས་མཐའི་འགྲེལ་བ། མདོ་སྡེ་རྒྱན་གྱི་འགྲེལ་པ། རྟེན་འབྲེལ་ཆེན་པོའི་ཊཱིཀ་རྣམས་བརྩམས། དབྱིག་གཉེན་གྱིས་ཚེ་རབས་སུ་ཁམས་བརྟས་པར་བྱས་པ། བློ་གྲོས་བསྟན་པས་ཀྱང་ཕུང་པོ་ལྔའི་འགྲེལ་པ་བྱེ་བྲག་བཤད་པ་དང། སུམ་ཅུ་པའི་རྣམ་བཤད་དང། དབུས་མཐའི་འགྲེལ་བཤད་དག་མཛད། བྲམ་ཟེའི་བཙུན་པོ་ཡོན་ཏན་འོད་ཀྱིས་ཕུང་པོ་ལྔའི་རབ་བྱེད་ཀྱི་འགྲེལ་པ་མཛད། དགེ་བསྙེན་བཙུན་པ་ངོ་བོ་ཉིད་མེད་པར་སྨྲ་བས་ཀྱང་མདོ་སྡེ་རྒྱན་གྱི་འགྲེལ་བཤད་དང། །དེ་ལྟར་ཐོགས་མེད་མཆེད་གཉིས་སློབ་བརྒྱུད་དང་བཅས་པས་བསྟན་བཅོས་མང་དུ་མཛད་དེ། དམ་པའི་ཆོས་མངོན་པ་ལ་དྒ་ལན་གསུམ་དུ་དར་ནས་ནུབ་པ་དེ་དར་བར་བྱས་སོ། །དེ་རྣམས་ཀྱང་ཤིང་རྟའི་སྲོལ་གཅིག་ཡིན་ནོ། །གསང་སྔགས་འཁོར་ལོ་གསུམ་པར་བྱས་པའི་རྒྱུད་སྡེ་རྣམས་གསལ་བར་བྱེད་པའི་བསྟན་བཅོས། གསང་སྔགས་འཁོར་གསུམ་པར་བྱས་པའི་རྒྱུད་སྡེ་རྣམས་གསལ་བར་བྱེད་པའི་བསྟན་བཅོས་བརྩམས་ཚུལ་ནི། གསང་འདུས་འགྲེལ་བྱེད་འཕགས་པ་ཡབ་སྲས་དང། པདྨ་ཀུ་ལ་ལ་སོགས་པས་མཛད་དེ་སློབ་དཔོན་ཀླུ་སྒྲུབ་ཀྱིས་མ་སྨིན་པ་རྣམས་སྨིན་པར་བྱེད་པའི་ཆོ་ག་ཉིས་ཤུ་པ།
དེ་གྲོལ་བར་བྱེད་པའི་བསྐྱེད་རིམ་ལ་མདོར་བྱས་དང་མདོར་བསྲེས་གཉིས། རྫོགས་རིམ་ལ་ལམ་རིམ་པ་ལྔ་དང། བྱང་ཆུབ་སེམས་འགྲེལ་ལ་སོགས་པ་མཛད། དེ་ལ་རྒྱ་དང་བསྟུན་པ་ཕྱག་རྒྱ་བཞི་མཛད། །ཨཱརྱ་དེ་བས་དེའི་དོན་འགྲེལ་བའི་ཆེད་དུ་སྤྱོད་བསྡུས། བག་ཆགས་སྦྱོང་པ་ལ་སེམས་ཀྱི་སྒྲིབ་སྦྱོང། སྒྱུ་ལུས་ཕལ་པ་དག་པར་བྱེད་པ་རང་བྱིན་གྱིས་བརླབས་པ་མཛད། ཟླ་གྲགས་ཀྱིས་སྒྲོན་གསལ་དང། རྡོ་རྗེ་སེམས་དཔའི་སྒྲུབ་ཐབས་མཛད། ཕྱིས་སློབ་དཔོན་གྱིས་སྒྲ་སྦྱང་དད་པ་དང། སྦྱོར་བ་ཡན་ལག་དྲུག་དང་བདུད་རྩི་གསང་བའི་སྒྲུབ་ཐབས་མཛད། ཤཱཀྱ་བཤེས་གཉིན་གྱིས་རིམ་པ་གཉིས་པ་དང། སེམས་དམིགས་མཛད། ནཱག་བོ་དྷེས་རྣམ་བཞག་དང། མངོན་པར་བྱང་ཆུབ་པ་དང། རིམ་པ་ཁོངས་སུ་བསྡུས་པ་དང། རྡོ་རྗེ་སེམས་དཔའི་མཆོད་ཐབས་མཛད། སློབ་དཔོན་གཞན་གྱིས་ཀྱང་གསང་འདུས་ལ་བརྟེན་པ་ཨནྡྲི་བྷཱུ་ཏིས་ཡེ་ཤེས་གྲུབ་པ། པདྨ་བཛྲས་གསང་བ་སྒྲུབ་པ། ལེགས་སྨིན་ཀཱ་རས་གཉིས་མེད་གྲུབ་པ། ཡན་ལག་མེད་པའི་རྡོ་རྗེས་ཐབས་ཤེས་རབ་གཏན་ལ་དབབ་པ་གྲུབ་པ་མཛད། སློབ་དཔོན་སངས་རྒྱས་ཡེ་ཤེས་ཞབས་ཀྱིས་འཇིག་རྟེན་སྣང་བྱེད་ཀྱི་དལ་དང། སྒྲུབ་ཐབས་ཀུན་ཏུ་བཟང་པོ་མཛད། དེའི་སློབ་མ་བཞི་ལ་ཐ་ཁ་ནས་ཁ་ཆེ་ཆུང། ཛ་ཡན་དད་ཏས་ཛ་ཡ་ཛྙཱ་ན། ཤང་ཀར་ན་ནས་ཀུན་ཏུ་བཟང་པོའི་འགྲེལ་པ་རྡོ་རྗེ་ནོར་བུ། དྲི་མེད་འབྱུང་ནས་གནས་ཀྱིས་ལེའུ་བཅུ་བདུན་གྱི་འགྲེལ་པ་རྒྱན་མཛད། ཤཱིདྟི་པས་སྙིམ་པའི་མེ་ཏོག་མཛད། ངག་དབང་གྲགས་པས་གཞི་སྣང་ཡན་ལག་བདུནཔ་མཛད། གཞན་ཡང་ཀུན་དགའ་སྙིང་པོ་དང༌། བཱི་
མི་ཏྲ་དང། ཤཱཀྱ་མི་ཏྲ་དང། བཞད་པའི་རྡོ་རྗེ། ཆོས་ཀྱི་མྱུ་གུ །མགྲིན་པ་གསུམ་པ། དབྱངས་སྙན་བྷུདྡྷ། བྷ་ལིང་ཏ་ལ་སོགས་པས་གསང་བ་འདུས་ཀྱི་བསྟན་བཅོས་མང་དུ་མཛད། དེ་ཉིད་འདུས་པ་སློབ་དཔོན་གསུམ་གྱི་གཞུང་ཞེས་པ་ཤཱཀྱ་བཤེས་གཉེན་གྱིས་འགྲེལ་པ་ཀ་ས་ལ་མཛད། སངས་རྒྱས་གསང་བ་དང་ཀུན་དགའ་སྙིང་པོ་སྟོད་འགྲེལ་སྨད་འགྲེལ་སྒྲུབ་ཐབས་གསུམ། བཤད་རྒྱུད་བཞི་དང་ངན་སོང་སྦྱོང་པ་ལ་སོགས་པའི་འགྲེལ་པ་མང་དུ་མཛད། ཕ་རྒྱུད་འགྲེལ་བྱེད་དེ་སོགས་ཞེས་པ་ནི། གཤིན་རྗེ་དམར་ནག་འཇིག་བྱེད་གསུམ་གྱི་རྒྱུད་ལ་དཔལ་འཛིན་དང། ནི་ལ་བཛྲ་མི་ཕྱེད་གྲགས་པ། ནག་པོ་ཞབས། མར་མེ་མཛད་དང། ཀུ་མཱ་ར་ཙནྡྲ་དང། ཤཱནྟི་པས་ཀྱང་འགྲེལ་པ་མཛད། མའི་རྒྱུད་སྡེ་བཅུ་བཞིའི་དོན་འགྲེལ་ཞེས་པ། གུར་ལས་མ་རྒྱུད་བཅུ་བཞིར་བཞག་སྟེ། དེ་དག་གི་སྒྲུབ་འགྲེལ་ལས། བདེ་མཆོག་ལ་ཕྱག་ན་རྡོ་རྗེའི་སྟོད་འགྲེལ་དང། ཀ་མ་ལའི་འགྲེལ་པ་དང། ཀོང་ཀ་ནའི་འགྲེལ་པ་དང། ལུ་ཧི་པ་དང་ནག་པོ་རྡོ་རྗེ་ལ་རྡོ་རྗེ་སྙིང་པོའི་འགྲེལ་པ་དང། མཚོ་སྐྱེས་ཀྱི་སྒྲུབ་ཐབས་དང་འགྲེལ་པ་མཚོ་སྐྱེས་མ། མི་ཐུབ་ཟླ་བས་ཡན་ལག་དྲུག་པ་དང་འགྲེལ་པ་ཀུ་མུ་ཏ། ཤཱདྟི་པས་སྒྲུབ་ཐབས་འཁྲིལ་སྤོང་དང་འགྲེལ་པ་མུ་ཏིག་འཕྲེང་བ། སློབ་དཔོན་ནག་པོ་བས་དེ་ཉིད་གསལ་བའི་སྒྲུབ་ཐབས་དང་ནག་པོ་པའི་དགོངས་འགྲེལ། ཌོམ་བྷི་ཧེ་རུ་ཀས་བདག་མེད་མ་གསལ་བ་དང། ལྷ་མོ་བཅོ་ལྔ་མ་མཛད་གཞན་ཡང་མཻ་ཏྲི་པས་ཀྱང་མཛད་པ་ཡོད་དོ། །མ་ཧཱ་མ་ཡ་ལ་ཀུ་ཀུ་རི།
དང། རྒྱན་པ་དང། ཤཱནྟི་པ་དང། ནག་པོའི་གཞུང་ལ་སོགས་པའོ། །ནག་པོ་པ་ལ་སོགས་པའི་འགྲེལ་སྒྲུབ་མང་དུ་ཡོད་དོ། །གདན་བཞི་ལ་འཕགས་པའི་ལྷའི་གཞུག་ལ་སོགས་པའོ། །རྒྱུད་ཐམས་ཀྱི། ཐུན་མོང་ངམ་ཁྱད་པར་གྱུར་པ་དང་པོའི་སངས་རྒྱས་ཀྱི་རྒྱུད་དཔལ་དུས་ཀྱི་འཁོར་ལོ་ལ་ཡང་བྱང་ཆུབ་སེམས་དཔའ་སྤྱན་རས་གཟིགས་ཀྱི་གཞུང་ལ་སོགས་པ་མང་དུ་ཡོད་དོ། །དེ་བཞིན་བྱ་སྤྱོད་ལ་སོགས་པའི་རྟོག་པ་ཕྲ་མོ་རྣམས་ལ་ཡང་སློབ་དཔོན་ནཱ་ག་རྫུ་ནའི་ཀླུ་སྒྲུབ་རྒྱུད་ཀུན་ལས་བཏུས་པ་དང། རིག་པ་འཛིན་པའི་སྡེ་སྣོད་ལ་སོགས་པ་གཞུང་དུ་མ་བརྩམས་སོ། །གཞན་ཡང་བྲམ་ཟེ་ཆེན་པོ་ས་ར་ཧ་པས་ཕྱག་རྒྱ་ཆེན་པོ་དོ་ཧ་ཆེ་འབྲིང་རྣམས་དང། སྔགས་དང་མཚན་ཉིད་ཀྱི་བསྟན་བཅོས་འགའ་ཟུང་བརྩམས། སློབ་དཔོན་གཞན་དག་གིས་མཛད་པའང་དུ་མ་ཞིག་བཞུགས་སོ། །གསུམ་པ། ཐེག་པའི་ཁྱད་པར་བསྟན་པ། གསུམ་པ་ཐེག་པའི་ཁྱད་པར་བསྟན་པ་ནི། རྒྱུ་མཚན་ཉིད་ལུགས་ཀྱི་བཀའ་དང་བསྟན་བཅོས་དེ་རྣམས་ཀྱང་ཉན་རང་ཐེག་ཆུང་དང། བྱང་སེམས་ཐེག་ཆེན་གཉིས་སུ་འདུས་པར་གསུངས། དེ་གཉིས་ཀྱི་ཁྱད་པར་ཡང་ཤེས་རབ་དང་སྙིང་རྗེ་ཆེ་བ་ལ་ཐེག་ཆེན། ཤེས་རབ་དང་སྙིང་རྗེ་ཆུང་བ་ལ་ཐེག་ཆུང་ངོ་། །དེ་སྐད་དུ་ཡང། ཡེ་ཤེས་རྣམཔར་བཀོད་པའི་རྒྱུད་ལས། སྙིང་རྗེས་སེམས་ཅན་ལ་དམིགས་ཤིང། །ཤེས་རབ་ཆོས་ཀྱི་དབྱིངས་སུ་ཁྱབ། །ཐེག་པ་ཆེན་པོ་ཞེས་བྱར་བཤད། །ཐེག་
ཆུང་དེ་ལས་ལྡོག་པའོ། །ཞེས་པས། དེ་གཉིས་ཀྱི་ཁྱད་པར་ལ་བརྒྱད་དོ། །རང་གི་ངོ་བོའི་སྒོ་ནས་ཤེས་རབ་དང་སྙིང་རྗེ་ཆེ་ཆུང་གི་ཁྱད་པར་དང། འཇུག་སྒོའི་སྒོ་ནས་བདེན་པ་མང་ཉུང་གི་ཁྱད་པར་དང། ལྟ་བའི་སྒོ་ནས་རྟོགས་པ་ཆེ་ཆུང་གི་ཁྱད་པར་དང། བསྲུང་མཚམས་ཀྱི་སྒོ་ནས་གནད་བཀག་ཡོད་མེད་ཀྱི་ཁྱད་པར་དང། སྒོམ་པའི་སྒོ་ནས་དམིགས་པ་དང་བཅས་པ་དང་དམིགས་པ་མེད་པའི་ཁྱད་པར་དང། སྤྱོད་པའི་སྒོ་ནས་གཞན་དོན་བྱེད་པ་དང་མི་བྱེད་པའི་ཁྱད་པར་དང། སྒྲུབ་པའི་སྒོ་ནས་ཐབས་དང་ཤེས་རབ་བྲལ་མ་བྲལ་གྱི་ཁྱད་པར་དང། འབྲས་བུའི་སྒོ་ནས་སེམས་ཅན་ལ་ཐུགས་རྗེ་འབྱུང་བ་དང་མི་འབྱུང་བའི་ཁྱད་པར་དང་བརྒྱད་དོ། །དང་པོ་ཐེག་པའི་ཁྱད་པར་གྱི་དང་པོ་རང་གི་ངོ་བོའི་ཁྱད་པར་ནི། ནང་པ་སངས་རྒྱས་པའི་ཐེག་པ་མཚན་ཉིད་དང་ལྡན་པ་ལ། ཤེས་རབ་དང་སྙིང་རྗེ་ཆུང་བ་ཞིག་ཐེག་པ་ཆུང་དུ། དེ་ལ་ཤེས་རབ་བྱུང་སྟེ་བདག་མེད་གཉིས་ཀྱི་དོན་མ་རྟོགས། ཉན་ཐོས་ཀྱི་གང་ཟག་གིས་བདག་མེད་ཙམ། རང་རྒྱལ་གྱིས་ཆོས་ཀྱི་བདག་མེད་ཙམ་ལས་མ་རྟོགས་པའོ། །དེ་ཡང་སྡུད་པ་ལས། སེམས་བསྐྱེད་དེས་ནི་ཕས་པས་ཀྱང་ཤིན་ཏུ་ལྕི། །ཞེས་སོ། །ནང་པ་སངས་རྒྱས་པའི་ཐེག་པ་མཚན་ཉིད་དང་ལྡན་པ་ལ། ཤེས་རབ་དང་སྙིང་རྗེ་ཆུང་བ་ཞིག་ཐེག་པ་ཆུང་དུ། དེ་ལ་ཤེས་རབ་བྱུང་སྟེ་བདག་མེད་གཉིས་ཀྱི་དོན་མ་རྟོགས། ཉན་ཐོས་ཀྱི་གང་ཟག་གིས་བདག་མེད་ཙམ། རང་རྒྱལ་གྱིས་ཆོས་ཀྱི་བདག་མེད་ཙམ་ལས་མ་རྟོགས་པའོ། །དེ་ཡང་སྡུད་པ་ལས། སེམས་བསྐྱེད་དེས་ནི་ཕས་ཕམ་པས་ཀྱང་ཤིན་ཏུ་ལྕི། །ཞེས་སོ། །ནང་པ་སངས་རྒྱས་ཐེག་པ་མཚན་ཉིད་དང་ལྡ་པ་ལ། ཤེས་རབ་དང་སྙིང་རྗེ་དང་ལྡན་པ་ཞིག་ཐེག་པ་ཆེན་པོ་སྟེ། དེ་ལ་ཤེས་རབ་ཆེ་སྟེ། བདག་མེད་གཉིས་ལེགས་པར་རྟོགས་ཏེ། སྡུད་པ་ལས་ཤེས་རབ་ལྡན་པ་མཁའ་ལ་བྱ་བཞིན་རྣམ་པར་རྒྱུ། །ཞེས་པ་དང། ཡང༌། ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། །ཞེས་པས་སོ། །
སྙིང་རྗེ་ཆེ་སྟེ་རང་དོན་ཡལ་བར་དོར་ནས་གཞན་དོན་གཙོར་བྱེད་པའོ། །དེ་སྐད་དུ་ཡང། ཐབས་མེད་ཤེས་རབ་དམན་པས་གཞཉ་དོན་བྱེད་མི་ནུས། གཞན་དོན་གཙོར་བྱེད་ཐེག་པ་ཆེན་པོའི་ལམ། །ཞེས་པ་དང། མཚན་བརྗོད་ལས། སྙིང་རྗེ་ཡི་ནི་ཡ་ལད་བགོས། །ཞེས་དང། སྡུད་པ་ལས། མིའི་འཇིག་རྟེན་འབྱུང་པོའི་གདོན་དང་ནད་མང་བ། ཕན་དང་སྙིང་རྗེར་ལྡན་པའི་བྱིན་གྱིས་བརླབས་ཀྱིས་ཞི། ཞེས་སོ། །གཉིས་པ་འཇུག་སྒོའི་ཁྱད་པར་ནི། དང་པོ་ཐེག་པ་ཆུང་དུ་པ་རྒྱུ་བདེན་པ་བཞིའམ་རྟེན་ཅིང་འབྲེལ་པའི་སྒོ་ནས་འཇུག །དེ་ཡང་མཚན་བརྗོད་ལས། བདེན་བཞིའི་ཚུལ་གྱི་རྣམ་པ་ཅན། །ཞེས་པ་དང། ཡན་ལག་བཅུ་གཉིས་སྲིད་རྩ་སྟོན། །ཞེས་སོ། །གཉིས་པ་ཐེག་པ་ཆེན་པོ་ནི། རྒྱུ་བདེན་པ་གཉིས་ཀྱི་སྒོ་ནས་འཇུག །ཐེག་ཆུང་བཞིན་སྤང་བྱ་སྤོང་བྱེད། རྟེན་འབྲེལ་གྱི་རྟོག་སྤྱོད་བྱ་མི་དགོས། དོན་དམ་པའི་བདེན་པ་སྟོང་ཞིང་སྤྲོས་པ་དང་བྲལ་བའི་སྒོ་ནས་འཇུག །ཀུན་རྫོབ་ཀྱི་བདེན་པ་སྙིང་རྗེ་ཆེན་པོ་སྒྱུ་མ་ལྟ་བུའི་སྒོ་ནས་འཇུག་གོ །དེ་ཡང་མཚན་བརྗོད་ལས། བདེན་པ་གཉིས་ཀྱི་ཚུལ་ལ་གནས། །བདེན་པ་གཉིས་ཀྱི་ཚུལ་གྱི་མཆོག །ཅེས་སོ། །གསུམ་པ་ལྟ་བའི་ཁྱད་པར་ནི། དང་པོ་ཐེག་པ་ཆུང་བས་བདག་མེད་གཉིས་ཀ་མ་རྟོགས་ཏེ། ཆོས་ལ་བདག་ཏུ་འཛིན་པའོ། །དེའང་གསང་སྙིང་ལས། བདག་དང་བདག་གིར་སོ་སོར་འཛིན། །ཞེས་པ་དང། སྡུད་པ་ལས། བདག་ཏུ་གནས་པ་ལེ་ལོར་གྱུར་འཛིན་དང། སྡུད་པ་ལས། བདག་ཏུ་གནས་པ་ལེ་ལོར་གྱུར་པ་སྟེ། །བྱིས་པ་བདག་ཉིད་ཀྱིས་ནི་མཁའ་ལ་མདུད་པ་བོར། །ཞེས་སོ། །གཉིས་
ཐེག་པ་ཆེན་པོའི་ལྟ་བ་བདག་མེད་པ་གཉིས་མེད་ཀྱི་དོན་རྟོགས་པའོ། །དེ་ཡང་མཚན་བརྗོད་ལས། བདག་མེད་སེདྒེའི་སྒྲ་དག་ལྡན། །ཞེས་པ་དང། སྡུད་པ་ལས། བདག་དང་བདག་གིར་མི་དམིགས་དུས་གསུམ་དག་པ་སྟེ། །ཞེས་སོ། །བཞི་པ་བསྲུང་མཚམས་ཀྱི་ཁྱད་པར་ནི། ཉན་ཐོས་པ་གནོད་པ་བཞི་དང་བཅས་པ་ལུས་དང་སྲོག་ལ་བབ་ཀྱག་བསྲུང་བ་ལ་རློམ་སེམས་སུ་མི་བྱེད་དོ། །སྡུད་པ་ལས། བདག་ནི་ཚུལ་ཁྲིམས་ལྡན་པ་གཞན་ནི་ཚུལ་ཁྲིམས་འཆལ། །ཞེས་སོ། །ཚུལ་ཁྲིམས་བསྲུང་ཞིང་ཡོངས་དག་དེ་ལ་ཚུལ་ཁྲིམས་མེད། །ཅེས་སོ། །ཐེག་པ་ཆེན་པོ་ནི་གཞན་ལ་ཕན་པ་བཞི་དང་བཅས་པ་སྒྲུབ་སྟེ། དེད་དཔོན་སྙིང་རྗེ་ཆེན་པོས་ཚོང་པ་ལ་བ་ནག་པོ་བསད་པའམ། ལྷ་ལུང་དཔལ་གྱི་རྡོ་རྗེས་བཙན་པོ་གླང་དར་མ་བསད་པ་ལྟ་བུའོ། །དེ་ཡང་སྡུད་པ་ལས། བྱང་ཆུབ་སེམས་དཔའ་འདོད་པའི་ཡོན་ཏན་ལྔ་སྤྱོད་ཀྱང། །སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ། །སངས་རྒྱས་བསྒྲུབ་བྱ་སྙམ་དུ་ཀུན་མཁྱེན་ཡིད་བྱེད་ན། །མཁས་པས་བརྩོན་འགྲུས་ཕ་རོལ་ཕྱིན་གནས་རིག་པར་བྱ། །ཞེས་དང། སྤྱོད་འཇུག་ལས། མི་གང་བྱང་ཆུབ་སེམས་བཏང་ཡང། །དེ་དག་ཐར་པར་བྱེད་འདོད་པས། །དེ་ནི་ཕན་ཡོན་དཔག་མེད་དག །བྱམས་མགོན་བློ་དང་ལྡན་པ་ཡིས། །ནོར་བཟང་དག་ལ་དེ་ལྟར་བཤད། །ཅེས་སོ། །ལྔ་པ་སྒོམ་པའི་ཁྱད་པར་ནི། དང་པོ་ཐེག་ཆུང་པ་དམིགས་པ།
དང་བཅས་པའི་བ་མ་གཏན། ཉན་ཐོས་ཀྱི་སྙོམ་འཇུག་གསུམ། རང་རྒྱལ་ལུགས་འགག་གམ་ཤེས་པ་སྐད་ཅིག་མ་དམིགས་པས་སྒོམ་པའོ། །དེ་ཡག་སྡུད་པ་ལས། དཔེར་ན། དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་རྒྱལ་བས་དེ་འདྲར་གསུངས། །ཞེས་སོ། །གཉིས་པ་ཐེག་པ་ཆེན་པོ་ནི། ཆོས་ཐམས་ཅད་མི་དམིགས་པའི་ཚུལ་གྱིས་སྒོམ་པའོ། །དེ་ཡང་སྡུད་པ་ལས། བྱང་ཆུབ་སེམས་དཔའ་མི་དམིགས་བྱང་ཆུབ་སེམས་མི་དམིགས། །ཞེས་སོ། །དྲུག་པ་སྤྱོད་པའི་ཁྱད་པར་ནི། དང་པོ་ཐེག་པ་ཆུང་བ་ནི། བསྐལ་པ་བྱེ་བར་དགེ་བའི་ལས་སྤྱོད་ཀྱག་རང་འཁོར་བ་ལས་ཐར་བར་བྱ་བའི་དོན་དུ་སྤྱོད་པའོ། །དེ་ཡང་སྡུད་པ་ལས། བསྐལ་པ་བྱེ་བར་དགེ་བའི་ལས་བཅུ་སྤྱད་གྱུར་ཀྱང། །རང་སངས་རྒྱས་དང་དགྲ་བཅོམ་ཉིད་ལ་འདོད་བསྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་པས་ཀྱང་ཤིན་ཏུ་ལྕི། །ཞེས་སོ། །གཉིས་པ་ཐེག་པ་ཆེན་པོ་ནི། ལྷག་པའི་བསམ་པ་རྣམ་པར་དག་པས་ལུས་ལོངས་སྤྱོད་དགེ་བའི་རྩ་བ་ཐམས་ཅད་སེམས་ཅན་གྱི་དོན་དུ་སྤྱོད་པའོ། །དེ་ཡང་སྡུད་པ་ལས། འགྲོ་དོན་མངོན་དོན་དུ་སྤྱོད་པའོ། །དེ་ཡང་སྡུད་པ་ལས། འགྲོ་དོན་མངོན་ཞུགས་ངེས་པའི་ཤེས་རབ་ཕ་རོལ་ཕྱིན། །ཞེས་པ་དང། དེ་ཡང། དཔའ་རྣམས་སེམས་ཅན་ཐམས་ཅད་ཀུན་གྱི་དབང་གིས་འགྲོ། །ཞེས་སོ། །བདུན་པ་སྒྲུབ་པའི་ཁྱད་པར་ནི། དང་པོ་ཐེག་ཆུང་པ་ཐབས་དང་ཤེས་རབ་པ་བྲལ་བས། མཚན་མ་ཕྱོགས་གཅིག་ཏུ་སྒྲུབ་པའོ། །དེ་ཡང་སྡུད་པ་ལས། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྟང༌།
ཞེས་སོ། །གཉིས་པ་ཐེག་པ་ཆེན་པོ་ནི། ཐབས་ཤེས་རབ་གཉིས་སུ་མེད་པས་སྒྲུབ་པའོ། །དེ་ཡང་སྡུད་པ་ལས། ཐབས་དང་ཤེས་རབ་གཉིས་ཀྱི་གདུགས་ནི་ཡོངས་བཟུང་ནས། །ས་གཉིས་མི་གནས་བླ་མེད་བྱང་ཆུབ་མཆོག་རེག་འགྱུར། །ཞེས་སོ། །བརྒྱདཔ་འབྲས་བུ་ཐོབ་པའི་ཁྱད་པར་ནི། དང་པོ་ཐེག་པ་ཆུང་བ་ཕུག་པོ་ལྷག་བཅས་ལྷག་མེད་ཀྱི་མྱ་ངན་ལས་འདས་པ་དགྲ་བཅོམ་པ་དང། བསེ་རུ་ལྟ་བུའི་ཡེ་ཤེས་ཞི་བ་ཆོས་ཀྱི་སྐུ་ལ་གཞན་དོན་དུ་ཐུགས་རྗེ་འབྱུང་མི་སྲིད་དོ། །དེ་ཡང་སྡུད་པ་ལས། དགྲ་བཅོམ་པ་དག་རྐྱེན་གྱི་སངས་རྒྱས་ཡེ་ཤེས་དང། །ཁམས་གསུམ་དག་ནི་རྨི་ལམ་དག་ན་མི་འདོད་བཞིན། །ཞེས་སོ། །གཉིས་པ་ཐེག་པ་ཆེན་པོ་ནི། མི་གནས་པ་མྱ་ངན་ལས་འདས་ཐོབ་སྟེ། ཤེས་རབ་ཆེན་པོ་ས་འཁོར་བའི་མཐའ་ལ་མི་གནས་པ་ཆོས་ཀྱི་སྐུའོ། །ཐམས་ཅད་མཁྱེན་པའི་ཡེ་ཤེས་ཐོབ་བོ། །དེ་ཡང་དུ་སྡུད་པ་ལས། གནས་མེད་གནས་མིན་འདི་ནི་རྒྱལ་བས་གནས་པར་གསུངས། །ཞེས་པ་དང། མཚན་བརྗོད་ལས། ཐམས་ཅད་མཁྱེན་པའི་ཡེ་ཤེས་མཚོ། །ཞེས་སོ། །སྙིང་རྗེ་ཆེན་པོ་མྱ་ངན་ལས་འདས་པའི་མཐའ་ལ་མི་གནས་ཏེ། གཟུགས་སྐུ་གཉིས་ཀྱིས་ལ་དག་པ་དང་མ་དག་པ་སྣ་ཚོགས་ཀྱི་དོན་བྱེད་པའོ། །དེ་ཡང་མཚན་བརྗོད་ལས། ལོངས་སྦྱོད་རྫོགས་སྐུ་སྐུ་ཡི་རྒྱལ། །སངས་རྒྱས་སྤྲུལ་པ་སྣ་ཚོགས་བགྱིད། །ཇི་བཞི་འགྲོ་བའི་དོན་བྱེད་པ། །ཞེས་སོ། །གསང་སྔགས་འབྲས་བུའི་ཐེག་པ། གཉིས་པ་གསང་སྔགས་འབྲས་བུའི་ཐེག་པ་ལ་གཉིས་ཏེ། རྒྱ་མཚན་
ཉིད་ཀྱི་ཐེག་པ་དང་འབྲས་བུ་སྔགས་ཀྱི་ཐེག་པའི་ཁྱད་པར་བཤད་དང། སྔགས་ཀྱི་ཐེག་པ་བྱུང་ཚུལ་དངོས་སོ། །དང་པོ། རྒྱུ་མཚན་ཉིད་ཀྱི་ཐེག་པ་དང། འབྲས་བུ་སྔགས་ཀྱི་ཐེག་པའི་ཁྱད་པར་བཤད་པ། དང་པོ་ནི་སེམས་ཉིད་སངས་རྒྱས་ཀྱི་རྒྱུ་རུ་འདོད་ཅིང། དོན་དམ་བསྒྲུབ་བྱ་བྱས་ནས། ཀུན་རྫོབ་སྤང་བྱ་བྱེད་པ་ནི་རྒྱུ་མཚན་ཉིད་ཀྱི་ཐེག་པ། སེམས་ཉིད་སངས་རྒྱས་ཀྱི་འབྲས་བུར་འདོད་ཅིང། ཀུན་རྫོབ་ཀྱང་མི་སྤོང་པར་ལམ་དུ་བྱེད་པ་ནི། འབྲས་བུ་སྔགས་ཀྱི་ཐེག་པའོ། །དེ་དག་གི་ཁྱད་པར་བྱེ་བྲག་ཏུ་བཤད་ན་དགུ་སྟེ། རང་གི་ངོ་བོའི་ཁྱད་པར་དང། ལམ་དུ་འཁྱེར་ལུགས་ཀྱི་ཁྱད་པར་དང། འཇུག་སྒོའི་ཁྱད་པར་དང། རྟོགས་པའི་ཁྱད་པར་དང། སྤྱོད་པའི་འཕྲིན་ལས་ཀྱི་ཁྱད་པར་དང། སྒྲུབ་ཐབས་ཀྱི་ཁྱད་པར་དང། འབྲས་བུའི་ཁྱད་པར་དང་དགུའོ། །དེ་ལ་རང་གི་ངོ་བོའི་ཁྱད་པར་ནི་ལྔ་སྟེ། དང་པོ་ནི་ཀྲྀ་ཡ་སི་ཏི་ཀ་ར་ལས། དོན་གཅིག་ན་ཡང་མ་རྨོངས་དང། །ཐབས་མང་དཀའ་བ་མེད་པ་དང། །དབང་པོ་རྣོན་པའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་པས། དོན་གཅིག་ཅེས་པ། མཚན་ཉིད་པ་ནི་དོན་དམ་པ་དེ་ལྟ་བུའི་སྤྱོད་ཡུལ་མིན། འཕགས་པ་ས་ལ་གནས་པའི་སྤྱོད་ཡུལ་ཡིན་ཟེར་ཏེ། དོན་གཅིག་ལ་རྨོངས་པའོ། །གསང་
སྔགས་ལ་ནི་དོན་དམ་པའི་བདེན་པ། བླ་མ་དམ་པའི་གདམས་ངག་ལ་བརྟེན་ནས་ད་ལྟར་གྱི་དུས་སྐད་ཅིག་མ་ལས་རྟོགས་པར་བྱེད་དེ། དོན་གཅིག་ལ་མ་རྨོངས་པའོ། །གཉིས་པ་ཐབས་མང་ཉུང་གི་ཁྱད་པར་ནི་མཚན་ཉིད་པ་ནི་སེམས་ཅན་འཁོར་བ་ལས་སྒྲོལ་བའི་ཐབས་ཉུང་སྟེ། ཕ་རོལ་ཏུ་ཕྱིན་པ་བཞི་ལས་མེད་པའོ། །གསངས་སྔགས་པ་ནི་ཐབས་མང་སྟེ། ཐབས་བསམ་གྱིས་མི་ཁྱབ་པ་སྣ་ཚོགས་ཀྱིས་སེམས་ཅན་སྒྲོལ་བའོ། །དེ་ཡང་མཚན་བརྗོད་ལས། ནམ་མཁའི་བདག་པོས་སྣ་ཚོགས་སྟོན། །དེ་ཡང་མཚན་བརྗོད་ལས། ནམ་མཁའི་བདག་པོས་སྣ་ཚོགས་སྟོན། །ཞེས་སོ། །གསུམ་པ་ཐབས་དཀའ་སླའི་ཁྱད་པར་ནི། མཚན་ནིད་པ་སངས་རྒྱས་པའི་ཐབས་དཀའ་སླའི་ཁྱད་པར་ནི། མཚན་ཉིད་པ་སངས་རྒྱས་པའི་ཐབས་དཀའ་བ་སྟེ། དཀའ་ཐུབ་དང། སྡོམ་པ་ལ་སངས་རྒྱས་པའི་ཐབས་དཀའ་བ་སྟེ། དཀའ་ཐུབ་དང། སྡོམ་པ་ལ་བརྟེན་དགོས་པའོ། །གསང་སྔགས་པ་ནི་དཀའ་ཐུབ་དང། ཚུལ་ཁྲིམས་ལ་བརྟེན་མི་དགོས་པ་སྟེ། མཚན་བརྗོད་ལས། མཁས་པ་ཆེན་ཆེན་པོ་ཐབས་ཆེ་བ། །ཞེས་པ་དང། འཇ།་དཔལ་བཤད་རྒྱུད་ལས། ཐབས་མང་བ་དང་ཐབས་ཆེ་བ། །དེ་བཞིན་སླ་དང་མྱུར་བ་ཡི། །སྔགས་ཀྱི་ཐེག་པ་ཁྱད་པར་འཕགས། །ཞེས་སོ། །བཞི་པ་དབང་པོ་རྣོ་རྟུལ་གྱི་ཁྱད་པར་ནི། མཚན་ཉིད་པ་དབང་པོ་རྟུལ་པོ་ཡིན་ལ། གསང་སྔགས་པ་དབང་པོ་རྣོན་པོ་ཡིན་ཏེ། མཚན་བརྗོད་ལས། ཤེས་རབ་མཚོན་ཆེན་འཆང་བ་པོ། །ཞེས་སོ། །ལྔ་པ་དབང་གི་ཁྱད་པར་ནི། །མཚན་ཉིད་པ་ལ་མ་སྨིན་པ་སྨིན་པར་བྱེད་པ་དབང་གི་ལམ་དཀྱིལ་འཁོར་མཆོག་དང་བཅས་པ་མེད་པའོ། །གསང་སྔགས་པ་ནི་དབང་དམ་པ་ཐོབ་པས་དོན་པོ་དང་ལྡན་པའོ། །མཚན་བརྗོད་ལས། དབང་གི་དམ་པ་མཆོག་གི་གནས། །ཞེས་པ་དང། གསང་སྙིང་ལས། སློབ་དཔོན་
མཉེས་པར་མ་བྱས་ཤིང། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་བརྩོན་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་སོ། །དེ་རྣམས་ཀྱི་རང་གི་ངོ་བོའི་ཁྱད་པར་རོ། །གཉིས་པ་ལམ་དུ་འཁྱེར་ལུགས་ཀྱི་ཁྱད་པར་ནི། དང་པོ་རྒྱུ་མཚན་ཉིད་ཀྱི་ཐེག་པ་ཞེས་པ། དེ་ལ་རྒྱུ་ནི་རྒྱུ་ཚོགས་གནིས་བསོག་པའམ། བདེ་སྡུག་གི་རྒྱུ་མི་དགེ་བ་སྤོང། དགེ་བ་སྒྲུབ་པ་ལམ་དུ་བྱེད་པའོ། །རྩ་རྒྱུད་ལས། དགེ་སྡིག་ལས་ཀྱི་སྒོར་ཞུགས་ནས། །འབྲས་བུ་བདེ་དང་སྡུག་བསྔལ་མྱོང། །མཚན་ཉིད་ཡུ་ཡང་མཚོན་པའི་ཕྱིར། །མཚན་ཉིད་རྒྱུ་ཞེས་བཤད་པ་ཡིན། །ཞེས་སོ། །པདྨ་དཀར་པོ་ལས། རྒྱུ་ལ་སྦྱོར་བ་རྒྱུ་ཡི་ཆོས། །འཁོར་ལོ་བཞིན་དུ་བསྐོར་བྱས་ནས། །འབྲས་བུ་ཐེག་པའི་ཉེ་ལམ་ཞིག །དུས་མཚན་ཕྱི་མ་མྱོང་བར་འགྱུར། །ཞེས་སོ། །མཚན་ཉདི་ཅེས་པ་ནི། མཚན་གཞི་དུ་མ་ལ། མཚོན་བྱ་དུ་མས་མཚན་ཉིད་དུ་མར་མཚོན་པའོ། །གཉིས་པ་འབྲས་བུ་གསང་སྔགས་ཀྱི་ཐེག་པ་ནི། འབྲས་བུ་ཉིད་ལ་ངེས་པའི་ལམ་དུ་བྱེད་པའི། །ཞེས་སོ། །ཡང་བང་མཛོད་ལས། ཕྱག་རྒྱའི་དཀྱིལ་འཁོར་གསལ་བཀོད་ནས། །དབྱེར་མེད་རྡོ་རྗེ་སྒོམ་པའི་ཕྱིར། །འབྲས་བུ་ལམ་དུ་གྱུར་པས་ནས། །འབྲས་བུ་རྡོ་རྗེ་ཐེག་པ་འོ། །ཞེས་སོ། །དེ་ཡང་འབྲས་བུ་ཞེས་བྱ་བ་ནི། །རྒྱུ་ཚོགས་གཉིས་བསགས་པའི་འབྲས་བུ་སྒྲིབ་པ་གཉིས་ཟད། དོན་དམ་ཀུན་རྫོབ་དབྱེར་མེད་པ་དེ། བླ་མ་དམ་པའི་གདམས་ངག་གིས་རང་
ལ་རྗེན་ཆེར་གྱིས་བསྟན་ནས་ལམ་དུ་བྱེད་པའོ། །དེ་ལ་འབྲས་བུ་མཚན་ཉིད་དང་ལྡན་པ་ཞིག་ལམ་དུ་བྱེད་དམ། མི་ལྡན་པ་ཞིག་ལམ་དུ་བྱེད་ཅེ་ན། འབྲས་བུ་མཚན་ཉིད་ནར་སོན་པ་ཞིག་ལམ་དུ་བྱེད་པའོ། །དེ་ལམ་དུ་བྱས་པ་ལ་དགོས་པ་མེད་དོ་ཞེ་ན། །འབྲས་བུ་རང་གི་ངོ་བོ་ལ་ཁྱད་མེད་ཀྱང། གསལ་བ་གོང་ནས་གོང་དུ་བསྐྱེད་འདོན་པའི་དགོས་པ་ཡོད་དོ། །དེ་ཡང་རིམ་དྲུག་ལས། རང་བཞིན་རྐྱེན་གྱིས་མངོན་བྱས་པས། །འབྲས་བུ་རྒྱུ་ལ་མིང་བཏགས་ཀྱང། གསལ་ཞིང་གསལ་བ་གསུམ་དུ་འགྱུར། །ཞེས་སོ། །འོ་ན་འབྲས་བུ་ཐུག་པ་མེད་པར་འགྱུར་རོ་ཞེ་ན། བུ་ཆུང་འདི་མི་ཡི་མཚན་ཉིད་ནར་སོན་པ་ཡིན་ནམ་མིན་བྱའོ། །དེ་ལམ་དུ་བྱེད་ལུགས་ཀྱི་ཁྱད་པར་རོ། །གསུམ་པ་འཇུག་སྒོའི་ཁྱད་པར་ནི། མཚན་ཉིད་པ་བདེན་པ་གཉིས་ཡ་བྲལ་དུ་འཇུག་སྟེ། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །གསང་སྔགས་པ་ནི་བདེན་པ་དབྱེར་མེད་ཀྱི་སྒོ་ནས་འཇགུ་སྟེ། དོན་དམ་ཀུན་རྫོབ་དབྱེར་མེད་པ། །ཞེས་སོ། །བཞི་པ་ལྟ་བའི་ཁྱད་པར་ནི། མཚན་ཉིད་པས་དོན་སྤྱིའི་མཚན་ཉིད་ལས་མ་རྟོགས། གསང་སྔགས་པས་དོན་རང་གི་མཚན་ཉིད་རྟོགས་པའོ། །དེ་ཡང། རང་བཞིན་གྱིས་ནི་རྟོགས་གྱུར་པ། །ཞེས་སོ། །ལྔ་པ་བསྲུང་མཚམས་ཀྱི་ཁྱད་པར་ནི། །མཚན་ཉིད་པ་ནི། ཉན་ཐོས་ཀྱི་འདུལ་ཁྲིམས་སྒོ་ང་གྲུམ་པའམ། རྫའི་བེའུ་ཆག་པ་དང་འདྲ། བྱང་ཆུབ་སེམས་དཔའི་སྡོམ་པ་ནི། རྫ་ཆག་པ་དག་འདྲ་སྟེ། སླར་གསོ་བར་དཀའོ། །གསང་སྔགས་ཀྱི་དམ་ཚིག་ནི། གསེར་དངུལ་ཞོམ་
དང་འདྲ་སྟེ་སླར་གསོ་བ་སླའོ། །དྲུག་པ་སྒོམ་པའི་ཁྱད་པར་ནི། མཚན་ཉིད་པ་བདེན་པ་འབྲས་བུ་ཡ་བྲལ་དུ་སྒོམ་ལ། གསང་སྔགས་པ་བསྐྱེད་རྫོགས་གཉིས་བདེན་པ་དབྱེར་མེད་དུ་སྒོམ་པའོ། །བདུན་པ་སྤྱོད་པའི་འཕྲིན་ལས་ཀྱི་ཁྱད་པར་ནི། མཚན་ཉིད་པ་ལུས་དང་སྲོག་ལ་བབས་ཀྱང། སྙིང་རྗེ་ཆེན་པོས་འགྲོ་བའི་དོན་བྱེད་པའོ། །དེ་ཡང་སྡུད་པ་ལས། མགོ་དང་རྐང་ལག་གཏོང་ཞིང་རྟག་ཏུ་ཞུམ་བའི་སེམས་ཀྱང་མེད། །ཅེས་སོ། །གསང་སྔགས་པས་འཕྲིན་ལས་རྣམ་པར་བཞིས་སེམས་ཅན་གྱི་དོན་བྱེད་དོ། །དེ་ཡང་མཚན་བརྗོད་ལས། སངས་རྒྱས་འཕྲིན་ལས་བྱེད་པའི་མགོན། །ཞེས་སོ། །བརྒྱད་པ་སྒྲུབ་པའི་ཁྱད་པར་ནི། མཚན་ཉིད་པ་ཐབས་རྐྱང་པས་སྒྲུབ་སྟེ། སྒྲུབ་ཐག་རིང་བའོ། །གསང་སྔགས་པ་ནི་ཐབས་ཤེས་རབ་ཟུང་དུ་སྦྲེལ་ནས་སྒྲུབ་སྟེ། སྒྲུབ་ཐག་ཉེ་བའོ། །ནོར་བ་ཐབས་ཅད་རྣམ་པར་སྤངས། །དོན་གསུམ་ཐེ་ཚོམ་མེད་འི་བློ། །ཞེས་སོ། །དགུ་པ་འབྲས་བུའི་ཁྱད་པར་ནི། དུས་ཉེ་རིང་དང་སྐུ་མང་ཉུང་གི་ཁྱད་པར་རོ། །མཚན་ཉིད་པ་དུས་བསྐལ་པ་གྲངས་མེད་པ་གསུམ་ནས་བཅུ་གཅིག་པ་ཀུན་ཏུ་འོད་ཀྱི་ས་ཐོབ་ལ། གསང་སྔགས་པ་ནི་དུས་བསྐལ་པ་གྲངས་མེད་པར་སྒྲུབ་མི་དགོས་ཏེ། མི་ཚེ་བདུན་ནམ། མི་ཚེ་ལྔའམ། མི་ཚེ་གསུམ་མམ། མི་ཚེ་གཉིས་སམ། སྐད་ཅིག་མ་གཅིག་གིས་རྡོ་རྗེ་འཛིན་པའམ། སྟུག་པོ་བཀོད་པའམ། པདྨ་ཅན་ནམ། རྡོ་
རྗེ་སེམས་དཔའི་མཚན་ཡོངས་སུ་རྫོགས་པའམ། ཡི་གེ་འཁོར་ལོ་རྫོགས་ཆེན་གྱི་ས་ཐོབ་པའོ། །སྐུ་མང་ཉུང་གི་ཁྱད་པར་ནི། མཚན་ཉིད་པ་སྐུ་གསུམ་ལ། གསང་སྔགས་པ་སྐུ་ལྔ་ཡེ་ཤེས་ལྔ་དང་ལྡན་པར་འདོད་དེ། སྐུ་ལྔ་ནི་ཆོས་ཀྱི་སྐུ་དང། ལོངས་སྤྱོད་རྫོགས་པའ་སྐུ་དང། སྤྲུལ་པའི་སྐུ་དང། དབྱེར་མེད་རྡོ་རྗེའི་སྐུ་དང། མངོན་པར་བྱང་ཆུབ་པའི་སྐུ་དང་ལྔའོ། །ཡེ་ཤེས་ལྔ་ནི། ཆོས་ཀྱི་དབྱིངས་ཀྱི་ཡེ་ཤེས་དང། མེ་ལོང་ལྟ་བུའི་ཡེ་ཤེས་དང། མཉམ་པ་ཉིད་ཀྱི་ཡེ་ཤེས་དང། སོ་སོར་རྟོག་པའི་ཡེ་ཤེས་དང། བྱ་བ་གྲུབ་པའི་ཡེ་ཤེས་སོ། །དེ་ཡང་མཚན་བརྗོད་ལས། སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །ཅེས་སོ། །དེ་རྣམས་ཀྱིས་རྒྱུ་མཚན་ཉིད་ཀྱི་ཐེག་པ་དང། འབྲས་བུ་གསང་སྔགས་ཀྱི་ཁྱད་པར་རྣམ་པར་བཤད་པའོ། །གཉིས་པ། འབྲས་བུ་གསང་སྔགས་ཀྱི་ཐེག་པའི་བྱུང་ཚུལ་དངོས་བཤད་པ། གཉིས་པ་འབྲས་བུ་གསང་སྔགས་ཀྱི་ཐེག་པ་བྱུང་ཚུལ་དངོས་ལ་གཉིས་ཏེ། ཕྱི་ཐུབ་པ་རྒྱུད་ཀྱི་ཐེག་ཀྲྀ་ཡོག་སྡེ་གསུམ་དང། ནང་པ་དབང་བསྒྱུར་ཐབས་ཀྱི་ཐེག་པའོ། །ཕྱི་ཐུབ་པ་རྒྱུད་ཀྱི་ཐེག་པ་ཀྲྀ་ཡོག་སྡེ་གསུམ། དང་པོ་ལ་གསུམ་སྟེ། བྱ་རྒྱུད་ཀྲྀ་ཡ་དང། སྤྱོད་རྒྱུད་ཨུ་པ་ཡ་དང། གཉིས་མེད་ཡོ་ག་གསུམ་མོ། །དང་པོ་ཀྲྀ་ཡའི་ཅོས་ཐབས་ཅད་གྲོང་ཁྱེར་ཝཱ་ར་ཎཱ་སིར་བྲམ་ཟེའི་
རིགས་ལ་བཀའ་བབས་པ་ཡིན་ནོ། །དེར་འབབ་པའི་རྒྱུ་མཚན་ནི། གྲོང་ཁྱེར་དེ་ན་མི་རིགས་ཀྱང་བྲམ་ཟེའི་རིགས་ཁྲུས་དང་གཙང་སྦྲ་ལ་གནས་པ། ཟས་དཀར་གསུམ་དག་མངར་གསུམ་ཟ་བ། རས་ཁ་ཚར་མ་ཉམས་པ་དང་བཅས་པ་གོས་གྱོན་པ་ཡོད་དེ། ཆོས་ཀྱང་དེ་བཞིན་དུ་བབས་པ་ཡིན་ནོ། །ཀྲྀ་ཡའི་སྟོན་པ་ནི་དེ་བ་ཞལ། འཁོར་ནི་འདོད་ཁམས་ཀྱི་ལྷ་དང་ཀླུ་རྣམས་སོ། །གནས་ནི་འདོད་ཁམས། སྡུད་པ་པོ་ནི་སྤྱན་རས་གཟིགས་ཀྱིས་བསྡུས། ཞེས་འབྱུང་ངོ་། །ཆོས་སྡེ་ངོས་བཟུང་པ་ནི། ཀྲྀ་ཡ་ལ་རྒྱུད་སྡེ་ཆེན་པོ་སུམ་བརྒྱ་ཡོད་པར་བཞེད་པ་ལ། འདོད་ཁམས་ཀྱི་ལྷའི་ཡུལ་དུ་ལུས་ནས། མི་ཡུལ་དུ་དར་བ་དྲུག་ལ། ཐམས་ཅད་འབྱུང་བའི་རྒྱུད། འབྱུང་བ་ཆེན་པོའི་རྒྱུད། འདུས་པ་འབྱུང་བའི་རྒྱུད། སུ་སི་ཏི་ཀ་ར་ན་སྒྲུབ་པའི་རྒྱུད། ཕྱག་ན་རྡོ་རྗེས་དབང་བསྐུར་བའྀ་རྒྱུད། ཀྲྀ་ཡ་དཔུང་བཟང་གི་རྒྱུད་དོ། །ཀྲྀ་ཡ་སྤྲུལ་པའི་རྒྱུད་བདུན་ལ། རྡོ་རྗེ་འཆང་གི་སྤྱི་བོའི་གཙུག་ནས་རྡོ་རྗེ་རྣམ་པར་རྒྱལ་བའི་རྒྱུད། ཞལ་ནས་ཨ་མོ་གྷ་པ་ཤའི་རྒྱུད། དཔུང་པ་གཡས་ནས་དཔུང་བཟང་གི་རྒྱུད། གཡོན་པ་ནས་ཕྱག་ན་རྡོ་རྗེ་དབང་བསྐུར་བའི་རྒྱུད། ཐུགས་ཀ་ནས་རིག་པ་མཆོག་གི་རྒྱུད། ལྟེ་པ་ནས་རྩ་བ་བྱེ་བྲག་གི་རྒྱུད། །བོལ་གོང་ནས་ཀྲྀ་ཡ་བཟང་པོའི་རྒྱུད་དོ། །གཉིས་པ་ཨུ་པ་ཡའི་ཆོས་ཐམས་ཅད་རི་རབ་ཁོང་གསེང་འདུས་པའི་རྩེ་མོར། བློན་པོའི་རིགས་ལ་བཀའ་བབས་ཡིན་ནོ། །དེར་བབས་པའི་རྒྱུ་མཚན་ནི། རི་དེའི་རྩེ་མོ་འདུས་པས་ཁོང་གསེང་དུ་ཡོད་པ། རྩེ་མོ་འདུས་པ་ན་ཆོས་ཀྱང་དེ་བཞིན་དུ་བབས་པ་ཡིན་ནོ། །སྟོན་པ་ནི་ཨུ་
ཡ་ཡི་དེ་བ་ཞལ་ཆེན་པོ། འཁོར་ནི་གཟུགས་ཁམས་ཀྱི་ལྷ་དང་ཀླུ་རྣམས་སོ། །གནས་ནི་གཟུགས་ཁམས་སོ། །སྡུད་པ་པོ་དཔལ་རྟ་མགྲིན་གྱིས་བསྡུས་ཞེས་གྲགས་སོ། །ཆོས་སྡེ་ངོས་བཟུང་བ་ནི། ཨུ་པ་ཡ་ལ་རྒྱུད་སྡེ་བདུན་ཡོད་པ་ལས། བཞི་གཟུགས་ཁམས་ལྟ་ཡུལ་དུ་ལུས་ནས། མི་ཡུལ་དུ་དར་བ་གསུམ་ལ། དཔལ་ཉི་མ་གཟི་བརྗིད། རིག་འཛིན་གྱི་སྡེ་སྣོད། བསམ་གཏན་ཕྱི་མ་རིམ་པར་ཕྱེ་བའི་སྒྲོན་མེ་དང་གསུམ་མོ། །གསུམ་པ་རྣལ་འབྱོར་ཡོ་གའི་ཆོས་ཐམས་ཅད་ནི། མེ་རི་འབར་བའི་རྩེ་མོར་རྗེ་རིགས་ལ་བཀའ་བབས་པ་ཡིན་ནོ། །དེར་བབས་པའི་རྒྱུ་མཚན་ནི། རི་དེ་ཤིན་ཏུ་ཚན་ཆེ་བ། མཐུག་གྲག་པ། ལྷུན་སྟུག་པ། བག་དྲོ་བ་དང་ལྡན་པས་ན་ཆོས་ཀྱང་དེ་ལྟ་བཞིན་དུ་བབས་པ་ཡིན་ནོ། །རྣལ་འབྱོར་ཡོ་གའི་སྟོན་པ་ནི། དེ་བ་ཞལ་ཆེན་པོའོ། །འཁོར་ནི་ཁམས་གསུམ་གྱི་ལྷ་དང་ཀླུ་རྣམས་སོ། །གནས་ནི་ཁམས་གསུམ་ཀར་ངོ་། །སྡུད་པ་པོ་ནི་གསང་བདག་ཕྱག་ན་རྡོ་རྗེས་བསྡུས་ཞེས་གྲགས་སོ། །ཡོ་གའི་ཆོས་སྡེ་ངོས་པ་ལ། ཁམས་གསུམ་ཀའི་ལྟ་ཡུལ་དུ་ལུས། མི་ཡུལ་དུ་དར་བ་དྲུག་ལས། ཀ་ས་མུ་ཏ་རྟོགས་པ་ཡོངས་སུ་རྒྱས་པའི་རྒྱུད། བཛྲ་རྡོ་རྗེ་ཤ་ཀ་རའི་རྒྱུད་དང། འདུས་པ་ཤ་ཀ་རའི་རྒྱུད། ཏ་ཐ་སང་ཏྲ་ཧའི་རྒྱུད། ངཉ་སོང་སྦྱོང་བའི་རྒྱུད། འཁོར་ལོ་བརྩེགས་པའི་རྒྱུད་དང་དྲུག་གོ །དེ་ལྟར་གསང་སྔགས་ཕྱི་རྒྱུད་སྡེ་གསུམ་པོ་དེ་ཉིད་ནི། སྟོན་པ་
སྤྲུལ་པའི་སྐུ་ཉིད་ཀྱིས་དངོས་སུ་གསུངས་པའང་མང་དུ་ཡོད་ལ། གཞན་ཡང་དཔལ་ཀུན་རིག་རྣམ་པར་སྣང་མཛད་ལ་སོགས་པ་སྟོན་པ་ལོངས་སྤྱོད་རྫོགས་པའི་སྐུས་གསུངས་པ་དང། གསང་བའི་བདག་པོ་ལ་སོགས་བྱང་ཆུབ་སེམས་དཔའི་ཆ་ལུགས་འཛིན་པ་ཀུན་གྱིས་གསུངས་པ་སྟོན་པ་མྱ་ངན་ལས་ལ་འདས་ཀྱི་གོང་རོལ་ཏུ་མི་ཡུལ་དུ་བྱུང་བ་དང། སྔ་ཕྱིའི་རིམ་པ་མང་དུ་བྱུང་བས། དུས་འདི་ཙམ་ཞིག་ན་བྱུང་བྱ་བའི་དུས་ཚིགས་ཀྱི་ངེས་པ་བཞག་ཐུ་མེད་དོ། །ནང་པ་དབང་སྒྱུར་ཐབས་ཀྱི་ཐེག་པ། གཉིས་པ་ནང་པ་དབང་བསྒྱུར་ཐབས་ཀྱི་ཐེག་པ་བྱུང་ཚུལ་ལ་གཉིས་ཏེ། གསང་སྔགས་ཕྱི་ནང་གི་ཁྱད་པར་བསྟནཔ་དང། བྱུང་ཚུལ་དངོས་སོ། །གསང་སྔགས་ཕྱི་ནང་གི་ཁྱད་པར་བསྟན་པ། དང་པོ་གསང་སྔགས་ཕྱི་པ་གསུམ་གྱི་ནི། ལྟ་བས་ཕྱིར་གྱུར་ཏེ། ཆོས་ཐམས་ཅད་ཀྱི་རང་བཞིན་རང་བྱུང་གི་ཡེ་ཤེས་སུ་སྨྲ་མ་ནུས། སྒོམ་པས་ཕྱིར་གྱུར་ཏེ། བདག་དམ་ཚིག་པ་དང། ཡེ་ཤེས་པ་བཟང་དུ་སྒོམ་པའོ། །སྤྱོད་པས་པྱིར་གྱུར་ཏེ། དམ་རྫས་ཤ་ལྔ་བདུད་རྩི་ལྔ་ལ་སྤྱོད་མ་ནུས། དབང་གིས་པྱིར་གྱུར་ཏེ། ཟབ་མོའི་དོན་གྱི་དབང་གསུམ་པ་སྟོན་མི་ནུས་པའོ། །དེ་དག་གི་ཁྱད་པར། རྒྱས་པར་བསད་ན་བདུན་ཏེ། འཇུག་སྒོའི་སྒོ་ནས་ཐབས་དང་ཤེས་རབ་ཡ་བྲལ་མ་བྲལ་གྱི་ཁྱད་པར་དང། ལྟ་བའི་སྒོ་ནས་བདེན་པ་དབྱེར་མེད་དུ་རྟོགས་མ་རྟོགས་ཀྱི་ཁྱད་
པར་དང། བསྲུང་མཚམས་ཀྱི་སྒོ་ནས་སྤང་བླང་དགག་སྒྲུབ་ཡོད་མེད་ཀྱི་ཁྱད་པར་དང། སྒོམ་པའི་སྒོ་ནས་ཏིང་ངེ་འཛིན་ལ་བློ་སྦྱོང་ཚབས་ཆེ་ཆུང་གི་ཁྱད་པར་དང། སྤྱོད་པའི་སྒོ་ནས་དམ་རྫས་བདུད་རྩི་ལྔ་ལ་སྤྱོད་ནུས་མི་ནུས་ཀྱི་ཁྱད་པར་དང། སྒྲུབ་པའི་སྒོ་ནས་བདག་དམ་ཚིག་སེམས་དཔའ་དང་ལྷ་ཡེ་ཤེས་དཔའ་གཉིས་མེད་གཅིག་ཏུ་ཤེས་མི་ཤེས་ཀྱི་ཁྱད་པར་དང། འབྲས་བུའི་སྒོ་ནས་ནས་དུས་ཉེ་རིང་དང། སྐུ་གསུང་ཐུགས་ཕྱག་རྒྱ་ཆེན་པོར་སྟོན་མི་སྟོན་གྱི་ཁྱད་པར་རོ། །དེ་ལ་དག་པོ་ནི། ཀྲྀ་ཡ་ཁྲུས་དང་གཙང་སྦྲའི་སྒོ་ནས་འཇུག་ཡོ་ག་བྱང་ཆུབ་ལྔའི་སྒོ་ནས་འཇུག་སྟེ། ཐབས་ཤེས་རབ་ཟུང་དུ་མ་འབྲེལ་བའོ། །གསང་སྔགས་ནང་པ་ནི་ཐབས་ཤེས་རབ་གཉིས་སུ་མེད་པའི་སྒོ་ནས་འཇུག་སྟེ། གསང་སྙིང་ལས། སྒྲུ་འཕྲུལ་དྲྭ་བས་མངོན་རྫོགས་པའི། །ཐབས་དང་ཤེས་རབས་ལྡན་གྱུར་ཏེ། །ཞེས་པ་དང་ཡང། ཐབས་དང་ཤེས་རབ་མཉམ་སྦྱར་ནས། །ཞེས་སོ། །གཉིས་པ་ནི་གསང་སྔགས་ཕྱི་པ་ལྟ་བ་བདེན་པ་དབྱེར་མེད་དུ་མ་རྟོགས། དོན་དམ་པཇའི་བདེན་པ་སྟོང་པ་ཉིད་དག་པའི་མཐའ་བཞིའམ་མམ། རིགས་བཞིའམ། རིགས་ལྔ་འདོད་པའོ། །གསང་སྔགས་ནང་པ་ནི་དོན་དམ་རང་རིག་སྤྲོས་པའི་མཐའ་ཐམས་ཅད་དང་བྲལ་བ། ཀུན་རྡོབ་ཀྱི་བདེན་པ་རྟོག་ཚོགས་ཐམས་ཅད་སྐུ་དང་ཤེས་སུ་སྣང་ལ། དེ་གཉིས་ཀྱང། སེམས་ཀྱི་སྟེང་ན་དབྱེར་མེད་པར་འདོད་དེ། སྔགས་ཞེས་རབ་ཏུ་གྲགས་པ་ནི། །དོན་དམ་ཀུན་རྫོབ་དབྱེར་མེད་པ། །ཞེས་
སོ། །གསུམ་པ་གསང་སྔགས་ཕྱི་པའི་དམ་ཚིག་ཀྱང་སླར་དགག་སྒྲུབ་ཅན་དུ་བསྲུང་ཞི་སྒྲུབ། གསང་སྔགས་ནང་པ་ནི། དམ་ཚིག་སྤང་བླང་དགག་སྒྲུབ་མེད་པ་བསྲུང་བའོ། །དེ་ཡང་གསལ་བཀྲ་ལས། འདོད་ཆགས་ཞེ་སྡང་གཏི་མུག་དང། །ང་རྒྱལ་ཕྲག་དོམ་མི་སྤོང་ངོ༌། །ཞེས་པའོ། །བཞི་པ་སྒོམ་པ་ནི། གསང་སྔགས་པྱི་པ་ཏིང་ངེ་འཛིན་ལ་བློ་སྦྱོར་ཚབས་ཆུང་སྟེ། བྱང་ཆུབ་ལྔ་སྒོམ་པའོ། །གསང་སྔགས་ནང་པ་ནི་ཏིང་ངེ་འཛིན་རྣམ་པ་གསུམ་དང། གསང་ཆེན་རིགས་གཅིག་དང། དེ་ཉིད་རིགས་གཅིག་དང། དམ་པ་རིགས་བརྒྱད་དང། སངས་རྒྱས་སྟོང་གི་དཀྱིལ་འཁོར་དང། སྣང་བ་རྣམ་པར་འབྱེད་པའི་ཏིང་ངེ་འཛིན་སྒོམ་པའོ། །ལྔ་པ་སྤྱོད་པ་ནི། གསང་སྔགས་ཕྱི་པ་དམ་རྫས་བདུད་རྩི་ལྔ་ལ་སྤྱོད་མི་ནུས་ལ། གསང་སྔགས་ནང་པ་ནི་དམ་རྫས་བདུད་རྩི་ལྔ་ལ་སྤྱོད་པའོ། །དེ་ཡང། བདུད་རྩི་རྣམ་པ་ལྔ་ཡི་ལོངས་སྤྱོད་དང། །ཞེས་སོ། །དྲུག་པ་སྒྲུབ་པ་ནི། གསང་སྔགས་ཕྱི་པ་ཕྱིའི་མཆོད་པ་རྣམ་པ་ལྔས། བདག་དམ་ཚིག་སེམས་དཔའ་དང། ལྷ་ཡི་ཤེས་སེམས་དཔའ་གཉིས་ཐ་དད་དུ་སྒྲུབ་སྟེ། ཀྲྀ་ཡ་བ་རིགས་གསུམ་དམ་ཚིག་པ་ཆོ་ག་ཡན་ལག་བཅུ་གཅི་གིས་བསྐྱེད་དེ། ཡེ་ཤེས་པ་ཅི་འདྲ་བ་འོག་མིན་ནས་སྤྱན་དྲངས། མཆོད་པ་འབུལ་ཏེ། ལྷ་དང་བདག་རྗེ་འབངས་
གསལ་གྱིས་ས་བཅུ་གཉིས་པ་ནོན། ཟུང་འཇུག་གིས་ས་བཅུ་གསུམ་པ་རྡོ་རྗེ་འཛིན་པའི་ས་ནོན་པའོ། །དེ་སྐད་དུ་ཡང། གསང་འདུས་ལས། དང་པོ་ལས་ཀྱི་སྦྱོར་བ་ཡིས། །ས་བརྒྱད་པ་ནི་ཐོབ་པར་འགྱུར། །སྣང་བ་གསུམ་པ་མཐོང་བ་ནི། །ས་བཅུ་ལ་ནི་རབ་ཏུ་གནས། །མངོན་པར་བྱང་ཆུབ་རྣམ་ལྔ་ཞེས། གཙང་མའི་ས་ནོན་དེ་ནས་ནི། །སངས་རྒྱས་ས་ལ་གནས་པར་འགྱུར། །ཚེ་འདི་ལ་ནི་ཐམས་ཅད་མཁྱེན། །ཞེས་པ་དང། དུས་འཁོར་ལས་ཀྱང། རྡོ་རྗེ་ཐེག་པའི་འབྲས་བུ་ནི། །སངས་རྒྱས་དྲུག་པ་རྡོ་རྗེ་འཆང། །ཉོན་མོངས་ལྔ་དང་ཡེ་ཤེས་ལྔ། །ཚེ་འདི་ལ་ནི་མཉམ་སྦྱོར་བས། །དེ་གཉིས་གཉིས་སུ་མི་ཤེས་པས། །ཡང་དག་རྫོགས་པའི་བྱང་ཆུབ་ཐོབ། །ཅེས་པ་དང། དུས་འཁོར་ཞབས་ཀྱིས། དེས་ན་སྤྱོད་པ་གསུམ་བྱས་པས། །དག་པའི་སྐུ་བཞི་ཡེ་ཤེས་དྲུག །སྟོབས་སོགས་ཡོན་ཏན་ཀུན་རྫོགས་པ། །ཚེ་འདིར་ངེས་པར་ཐོབ་པར་འགྱུར། །ཞེས་སོ། །ཚེ་འདི་ལ་གནས་སྐབས་ཀྱི་འབྲས་བུ། རིག་འཛིན་གྱི་ས་ཐོབ་ནས། འཛམ་བུའིགླིང་བྱེ་བ་ཕྲག་ལྔ་བརྒྱར། སྤྲུལ་པ་བྱེ་བ་ཕྲག་ལྔ་བརྒྱར་བཀྱེ་ནས། སེམས་ཅན་ཀྱི་དོན་བྱེད་ནུས་པའོ། །དེ་ཡག་གསང་བ་སྙིང་པོ་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་སོ། །མཐར་ཐུག་ལ་སྐུ་གསུང་ཐུགས་ཡོན་ཏན་འཕྲིན་ལས་ཉིས་ཤུ་རྩ་ལྔར་ཤར་ནས། སེམས་ཅན་ཐམས་ཅད་ལ་མཐའ་མེད་པའི་དོན་བྱེད་པའོ། །དེ་རྣམས་ཀྱིས་གསང་སྔགས་ཕྱི་ནང་གི་ཁྱད་པར་བཤད་པའོ། །
ནང་པ་དབང་སྒྱུར་ཐབས་ཀྱི་ཐེག་པ་བྱུང་ཚུལ་དངོས། གཉིས་པ་ནང་པ་དབང་བསྒྱུར་ཐབས་ཀྱི་ཐེག་པ་བྱུང་ཚུལ་དངོས་ནི། བསྟན་པ་ཐམས་ཅད་ཀྱི་སྙིང་པོ། ཐེག་པ་ཐམས་ཅད་ཀྱི་ཡང་རྩེ། །ཐབས་ཤེས་རབ་བཟང་མོའི་ལམ་ལ་བརྟེན་ནས། གང་ཟག་གི་རྒྱུད་ལ་འབྲས་བུ་དངོས་སུ་སྟོན་པར་བྱེད་པའི་ཆོས། ནང་པ་བསྐྱེད་རྫོགས་གསུམ་གྱི་ཐེག་པ་ནི། སྟོན་པར་བྱེད་པའི་ཆོས། ནང་པ་བསྐྱེད་རྫོགས་གསུམ་གྱི་ཐེག་པ་ནི། སྟོན་པ་མྱ་ངན་ལས་འདས་པའི་འོག་རོལ་ཏུ་འབྱུང་བར་ལུང་བསྟན་པ་ཡིན་ཏེ། དེ་ཡང། ལོ་དུས་ཅི་ཙམ་ཞིག་ནས་བྱུང་བ་ཡིན་ཞེ་ན། མདོ་སྒྱུ་འཕྲུལ་གཉིས་ཀྱི་ཐེག་པ་ནི། ཐུབ་པའི་དབང་པོ་མྱ་ངན་ལས་འདས་ནས་ལོ་ཉིས་ཤུ་རྩ་བརྒྱད་ན་འབྱུང་བར་གསུངས་ཏེ། དེ་ཡང་འདི་ལྟར་ཐུབ་པའི་དབང་པོ་མྱ་ངན་ལས་འདའ་བར་གསུངས་ཏེ། དེ་ཡང་འདི་ལྟར་ཐུབ་པའི་དབང་པོ་མྱ་ངན་ལས་འདའ་བར་བཞེད་པའི་ཚེ། འཁོར་རྣམས་ཀྱི་ནང་ནས་རྫུ་འཕྲུལ་ཆེར་སྤྱོད་པའི་མོའུ་འགལ་གྱི་བུ་ལ། ཁྱོད་ཀྱི་འཁོར་རྣམས་སྡུས་ཤིག །ང་ལ་ངེས་པ་བཞག་རྒྱུ་ཡོད་དོ། །གསུངས་ནས་དེར་མོའུ་འགལ་གྱི་བུས་ཀྱང་རྫུ་འཕྲུལ་འདུ་བྱ་བ་ཤེས་པའི་མངོན་པར་ཤེས་པས། འཁོར་རྣམས་སྐད་ཅིག་ལ་བསྡུས་ནས། སྟོན་པའི་ཞབས་དྲུང་དུ་འཁོད་པ་དང། འཁོར་རྣམས་ལ་སྟོན་པའི་ཞལ་ནས། ངས་འགྲོ་བ་རྣམས་འཁོར་བའི་རྒྱ་མཚོ་ལས་སྒྲོལ་བའི་ཟམ་པ་དང་སྟེགས་ནི་བཙུགས། ལམ་དང་སྲོལ་ག་ནི་བཏོད། །ཆོས་ཀྱི་འཁོར་ལོ་ནི་ལེགས་པར་བསྐོར། སེམས་ཅན་མ་སྨིན་པ་རྣམས་སྨིན་པར་བྱས། མ་གྲོལ་བ་དག་ནི་གྲོལ་བར་བྱས། དེ་ལྟར་མཛད་པ་ཐམས་ད་ཡོངས་སུ་རྫོགས་པར་བྱས་པ་ཡིན་པས། ད་ང་ནི་དགོངས་པ་ཡོངས་སུ་མྱ་ངན་ལས་འདའ་བ་ཡིན་པས། ཁྱེད་རང་རྣམས་ཐེ་ཚོམ་མ་ཆོད་
པའི་དྲི་བ་ལྷག་མ་དག་ཡོད་ན་ད་ལྟ་དྲིས་ཤིག དེ་ནས་ང་མེད་པ་ལ་མྱ་ངན་མ་བྱེད་ཅིག །ངས་འདུས་བྱས་ཐམས་ཅད་མི་རྟག་པར་བསྟན་པ་ཡིན་ནོ། །དངོས་པོ་ཐམས་ཅད་ནི་ངེས་པར་འཇིག་པ་ཡིན་ནོ། །འབྱོར་པ་ཐམས་ཅད་རྒུད་པ་ཡིན་ནོ། །དངོས་པོ་ཐམས་ད་ནི་ངེས་པར་འཇིག་པ་ཡིན་ནོ། །འབྱོར་པ་ཐམས་ཅད་རྒུད་པ་ཡིན་ནོ། །གང་ཟག་ཀུན་གྱི་སྲོག་གི་དབང་པོ་ལ་སྐྱེ་ཤི་ཡོད་པའི་ཕྱིར་འགགས་པ་ཡིན་ནོ། །ཞེས་ཡང་དང་ཡང་དུ་བསྟན་པ་ཡིན་ནོ། །ཞེས་གསུངས་པ་དང། འཁོར་རྣམས་ཀྱིས་སྟོན་པ་མྱ་ངན་ལས་འདའ་བར་རིག་ནས། ཡིད་རབ་ཏུ་མ་དགའ་སྟེ། མྱ་ངན་གྱི་གདུང་བ་ནོན་ནས་མིག་མཆི་མས་འགགས་ཤིང། དྲི་བའི་སྤོབས་པ་མ་བྱུང་བ་ལས། དེ་རྣམས་ཀྱི་ནང་ནས་རིག་འཛིན་གྱི་རྒྱལ་པོ་ཀུན་ཛ་རས་སྟན་ལས་ལངས་ཏེ། སྟོན་པའི་མདུན་དུ་སེདྒེའི་ལྟ་སྟངས་ཀྱིས་མིག་མི་འཛུམ་པར་བལྟ་ཞིང། འདི་སྐད་ཅེས་གསོལ་ཏོ། །མཉམ་ཉིད་བླང་དོར་མེད་སྤྱོད་ཅིང། །ཐབས་མཆོག་དཔག་གིས་མི་ལང་ཡང། །བྱང་ཆུབ་གཞན་ནས་མི་འཚོལ་བའི། །ངེས་པའི་ཐེག་ཆེན་ཡོངས་མ་གསུངས། །ཞེས་དྲིས་ཏེ། དོན་བཅོམ་ལྡན་འདས་ཀྱི་མཛད་པ་ཐམས་ཅད་ཡོངས་སུ་རྫོགས་བར་བྱས་སོ་གསུངས་མོད་ཀྱང། བསྟན་པའི་སྙིང་པོ་ཟབ་མོའི་ལམ་གསང་བ་བླ་ན་མེད་པའི་ཐེག་པ་དག་མ་གསུངས་པར་ཞེས་དྲིས་པ་ཡིན་ནོ། །དེའི་ལན་དུ་འདི་སྐད་ལུང་བསྟན་པ་ཡིན་ཏེ། །ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམཔ་ཞིག །འཛམ་གླིང་ཤར་གྱི་ཕྱོགས་སུ། །མི་ལས་སྐལ་ལྡན་དྲ་མ་ཆེ། །རྒྱལ་པོ་ཛ་ཞེས་བྱ་བ་ལ། །སྔོན་དུ་ལྟས་རྣམས་སྣང་གྱུར་ཏེ། །དྲག་ཤུལ་
ཅན་ཞེས་བྱ་བའི་རྩེར། །གྲོགས་ཀྱི་སེམས་དཔའ་དམན་པའི་ལུས། །ལང་ཀའི་བདག་པོ་ལ་སོགས་པ། །ལག་ན་རྡོ་རྗེས་སྟོན་པར་འགྱུར། །ཞེས་མདོ་སྡེ་གདམས་ངག་འབོགས་པའི་རྒྱལ་པོར་གསུངས་པ་དང། གསང་བ་ལུང་བསྟན་པ་ལས་ཀྱང། རྒྱུ་ལ་སྦྱོར་བ་རྒྱུ་ཡི་ཆོས། །འཁོར་ལོ་ཤིན་ཏུ་བསྐོར་བྱས་ནས། །འབྲས་བུའི་ཐེག་པ་ཉེ་ལམ་ཞིག །མ་འོངས་པ་ན་འབྱུང་བར་འགྱུར། །ཞེས་པ་དང། དཔལ་སྡོམ་པ་འབྱུང་བའི་རྒྱུད་ཕྱི་མ་ལས། བདེ་བར་གཤེགས་པ་ཁྱོད་ཀྱི་བསྟན་པ་འདི་ཁོ་ནར་འདུས་སམ་ཞེས་པའི་ལན་དུ། ང་ནི་མྱ་ངན་འདས་འོག་ཏུ། །ལོ་ནི་བརྒྱ་དང་བཅུ་གཉིས་ནས། །བསྟན་པའི་སྙིང་པོ་དམ་པ་ཞིག །ལྷ་གསན་གསུམ་དུ་གྲགས་པ་དེ། །འཛམ་གླིང་ཤར་ལྷོའི་ཕྱོགས་མཚམས་ཀྱི། །དཔལ་ཞེས་བྱ་བའི་རི་བོ་ལ། །ལག་ན་རྡོ་རྗེ་མཐུ་ལྡན་འགྱུར། །མི་ལས་སྐལ་ལྡན་དམ་པ་ཞིག །ཐེག་ཆེན་གསང་སྔགས་རྒྱས་པར་བྱེད། །དེ་ལ་རིམ་གྲོ་རྟག་ཏུ་གྱིས། །ཐེག་ཆེན་གསང་སྔགས་རྒྱས་པར་བྱེད། །དེ་ལ་རིམ་གྲོ་རྟག་ཏུ་གྱིས། །ཞེས་སོ། །དེ་ལྟར་ལུང་བསྟན་པ་རྣམས་དང། རྗེས་སུ་མཐུན་པར་དབང་བསྒྱུར་ཐབས་ཀྱི་ཐེག་པ་མདོ་སྒྱུ་འཕྲུལ་གཉིས་བྱུང་ཚུལ་ནི། རྒྱལ་བ་རིག་འཛིན་གང་ཟག་གསུམ། །དགོངས་པ་རིག་པ་རྣ་བར་བརྒྱུད། གང་ལ་ཐུག་གི་བར་དུའོ། །ཞེས་པས་གསུམ་སྟེ། རྒྱལ་བ་དགོངས་པར་བརྒྱུད་པ་ནི་རྒྱལ་བ་ཀུན་ཏུ་བཟང་པོས་རྒྱལ་ཚབ་རིགས་ལྔ་ལ་བརྒྱུད། རིགས་ལྔས་རྒྱལ་སྲས་སེམས་དཔའ་ལ་སོག་སཔ་ལྷན་ཅིག་པའི་འཁོར་ལ་བརྒྱུད་པའོ། །རིག་འཛིན་རིག་པར་བརྒྱུད་པ་ནི། མི་མ་ཡིན་པ་ལ་རྒྱུད་པ་དང། མི་དང་མི་མ་ཡིན་པ་གཉིས་ཀ་ལ་བརྒྱུད་པའོ། །
དང་པོ་ནི། ཐུབ་བའི་དབང་པོ་འདས་ནས་ལོ་ཉིས་ཤུ་རྩ་བརྒྱད་ཀྱི་བར་དུ། རྒྱལ་བ་རིགས་གསུམ་གྱིས་བརྒྱུད་པ། འཇམ་དཔལ་གྱིས་ལྟ་བ། སྤྱན་རས་གཟིགས་ཀྱིས་སྒྲུབ་པ་དང། ཕྱག་རྡོར་གྱིས་སྤྱོད་པ་བསྟན་ཟེར་ཀྱང། གསང་སྔགས་ཀྱི་ལྟ་སྤྱོད་སྒྲུབ་པ་གསུམ་ཀའི་དོན། འཇམ་དཔལ་གཞོན་ནུ་མཛེས་པའི་སྐུ་དག་ལྡན་པ་དེས། ལྷ་རྣམས་ཀྱིས་ལུས་དང་བསམཔ་དང་མཐུན་པར་ཆོས་བསྟན་ཏེ། འཇམ་དཔལ་རྡོ་རྗེ་རྣོན་པོས་ལྷ་གྲགས་ལྡན་མཆོག་སྐྱོང་ལ་བཤད། དེས་རིན་པོ་ཆེ་འོད་འབར་བ་ལ་བཤད། དེས་སྐྱེ་དགུའི་བདག་པ་ཚངས་པ་ལ་བཤད། དེས་ཚངས་པ་ཀུན་གྲོལ་ལ་བཤད། དེས་ཚངས་པ་གཙུག་ཕུད་འཛིན་ལ་བཤད། དེས་དབང་པོ་བརྒྱ་བྱིན་ལ་བཤད། དེས་ལྷ་རིག་འཛིན་ལ་ཚོམ་བུ་འབུམ་སྡེ་ལའོ། །དེ་ལྟར་གྱུར་བའི་ལྷ་རྣམས་ཀྱི་གདུང་གསབ་པར་གྱུར་ཏོ། །སྤྱན་རས་གཟིགས་བདུད་རྩི་སྨན་གྱི་སྐུ་དང་ལྡན་པ་དེས། ཀླུ་གདུག་ཅན་རྣམས་ཀྱི་ལུས་དང་བསམ་པ་དང་མཐུན་པར། ཀླུ་རྒྱལ་གྷྲི་ཧ་ནག་པོ་ལ་བཤད། དེས་ཀླུ་མོ་ཁ་འདུལ་མ་ལ། དེ་ཀླུ་ཡིད་འོང་དགའ་བ་ལ། དེས་འཇོག་པོ་ལ། དེས་ཀླུ་མོ་འདུལ་ཚངས་མ་ལ། དེས་ཀླུ་ཚོམ་བུ་འབུམ་སྡེ་ལ། དེ་ལྟར་ཀླུ་རྣམས་ཀྱང་གོང་ལྟར་དུ་གྱུར་པའོ། །ཕྱག་ན་རྡོ་རྗེ་འཇིགས་ཚུལ་སྡིགས་པའི་སྐུ་དང་ལྡན་པ་དེས། གནོད་སྦྱིན་རྣམས་ཀྱི་ལུས་དང་བསམ་པ་དང་མཐུན་པར། གནོད་སྦྱིན་གྲགས་ལྡན་མཆོག་སྐྱོང་ལ་བཤད། དེས་གནོད་སྦྱིན་ཀུན་ཏུ་བཟང་པོ་ལ་བཤད། དེས་གནོད་སྦྱིན་ལག་ན་རྡོ་རྗེ་ལ། དེས་གནོད་
སྦྱིན་སྐར་མདའ་གདོང་ལ། དེས་གནོད་སྦྱིན་ཚོམ་བུ་འབུམ་སྡེ་ལ། དེ་ལྟར་གནོད་སྦྱིན་རྣམས་ཀྱང་གོང་ལྟར་གྱུར་ཏོ། །མ་དང་མི་མ་ཡིན་པ་གཉིས་ཀ་ལ་བརྒྱུད་པ་ནི། གསང་བའི་བདག་པོས། ལྷ་གྲགས་ལྡན་མཆོག་སྐྱོང། དེས་ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང། སྲིན་པོ་ལང་ཀ་མགྲིན་བཅུ། མི་ལས་སྐལ་ལྡན་ལི་ཙ་བྱི་དྲི་མ་མེད་པར་གྲགས་པ་ལ་སོགས་པ་རིག་པ་འཛིན་པ་འདུས་པའི་འཁོར་ལ་མ་ལ་ཡའི་རྩེར་གསུངས་ཤིང་བརྒྱུད་དོ། །གང་ཟག་རྣ་བར་བརྒྱུད་པ་ནི། ཐུབ་པ་འདས་ནས་ལོ་ཉིས་ཤུ་རྩ་བརྒྱད་ན་ཤར་ཕྱོགས་ཟ་ཧོར་གྱི་ཡུལ་དུ་རྒྱལ་པོ་ཛ་ཞེས་བྱ་བ་བྱོན་ཏེ། དེས་ཨ་སུ་ར་གསང་བའི་བྲག་ཕུག་ཏུ་སྒྲུབ་པ་མཛད་པ་ལ། རྨིས་ལྟས་བདུན་ཤར་ཞིང། དངོས་སུ་པོ་ཏི་དང་གླེགས་བམ་གིཡ་ཆར་བབས་ནས། ཕྱག་ན་རྡོ་རྗེས་གསུངས་པའོ། །དེ་ལ་རི་མ་ལ་ཡ་ནི། སངས་རྒྱས་ཐམས་ཅད་ཀྱིས་གསང་སྔགས་སྟོན་པའི་གནས་ཡིན་ཏེ། རི་དེ་ནི་ཤིན་ཏུ་བཀྲ་ཤིས་ཤིང་བྱིན་ཆེ་བ་མཐོང་སྣང་དུ་མ་ཡོད་དེ། དག་པ་ལ་ལས་རིན་པ་ཆེ་སྣ་ཚོགས་ལས་གྲུབ་པར་མཐོང་ལ། ལ་ལས་ནི་བྲག་རི་ཤིན་ཏུ་ན་ཞིང་གཟེངས་མཐོ་བར་མཐོང་བ་དང། ལ་ལས་ནི་གནམ་ལྕགས་འབར་བ་གང་གིས་ཀྱང་བགྲོད་མི་ནུས་པར་སྣང་བའོ། །རི་དེའི་ཤར་ལྷོ་ན། ཏྲི་ཤི་ཨ་སུ་རའི་བྲག་ཕུག་ཅེས་བྱ་བ། ཕུག་རིན་པོ་ཆེ་ཟུར་བརྒྱད་དུ་ཡོད་པ། ལོགས་ལ་ངོ་མཚར་བའི་རི་མོ་རང་བྱུང་པ། ལོགས་བྲག་སེདྒེ་དཀར་པོ་ཁྱི་ཚུགས་ལྟ་བུ་ཡོད་པ། མཁར་ཡང་ཐོག་སུམ་རིམ་དང་བཅས་པ།
སྟེང་ན་བྱ་ཀ་ལན་ཏ་ཀའི་ཚང་བཅས་ནས་ཆོས་ཐམས་ཅད་ཐིག་ལེ་ཉག་ཅིག་ཏུ་སྒྲ་སྒྲོགས་པ་ཡོད་དོ། །རྩ་བ་ན་བདུད་རྩིའི་ཆུ་མིག་རང་རྡོལ་དུ་ཡོད་པ། མདུན་ན་མེ་ཏོག་གི་སྣམ་བུ་ཡོད་པ། ཤིང་ཡལ་ག་ཕྱོགས་བཞིར་གྱེས་པས་དུས་བཞིའི་དགྲ་ལས་སྐྱོབ་པ་ལྟར་དུ་ཡོད་པ། ཤིང་དེའི་མེ་ཏོག་དང་འབྲས་བུ་ཐམས་ཅད་སྨན་དུ་གྱུར་ཏེ། ཟོས་པས་ནད་སྣ་ཚོགས་སེལ་བ། དེ་ལྟ་བུའི་ཉམས་དགའ་བའི་གནས་དེར། ལས་དང་སྐལ་བར་ལྡན་པ་རྣམས་ཀྱི་ནི་བགྲོད་དུ་ཐར་ལ། ལས་དང་སྐལ་བར་མི་དན་པ་རྣམས་ཀྱིས་ནི་མི་ཐར་བའི་བར་ཁང་ན་སྐལ་ལྡན་རྒྱལ་པོ་ཛ་གསང་སྔགས་ཕྱི་རྒྱུད་ལ་སྒྲུབ་པ་མདད་ཀྱིན་བཞུགས་པ་ལས། རྨི་ལྟས་བདུན་ཞག་རེ་རེ་ལ་རྨིས་ཀྱང་སྐད། ཞག་གཅིག་ལ་རྨིས་ཀྱང་སྐད། རྨི་ལྟས་དང་པོ་ནི། གསང་བདག་ཕྱག་ན་རྡོ་རྗེ་མདུན་གྱི་ནམ་མཁའ་ལ་བྱོན་ཏེ། སྐུའི་གནས་ནས་འོད་ཟེར་འཕྲོས་ཏེ་གདུལ་བྱ་ཐམས་ཅད་ཀྱི་རྟོག་སྒྲིབ་སྦྱངས། གསུང་གི་གནས་ནས་བསྟན་པ་དང་ཐེག་པའི་སྒྲ་བསྒྲགས་པས་གདུལ་བྱ་ཐམས་ཅད་ཀྱིས་གོ་བར་མཛད། ཐུགས་ཀྱི་གནས་ནས་རྡོ་རཇེ་འོད་འབར་བ་བྱུང་ནས་རྒྱལ་པོའི་ཐུགས་ཀར་ཐིམ། སྤྱི་བོའི་གཙུག་ནས་ཉི་མ་བྱུང་ནས་རྒྱལ་པོའི་སྤྱི་གཙུག་ཏུ་ཐིམ་པ་རྨིས་སོ། །དེ་ཡང་དགོངས་འདུས་ཀྱི་འགྲེལ་པ་ལུང་བསྟན་རྡོ་རྗེ་ལས། སྐུ་གསུང་ཐུགས་རྟགས་ཐིམ་པ་དང། །ཞེས་པའི་དོན་ནོ། །རྨི་ལྟས་གཉིས་པ་ལ། དུས་གསུམ་གྱི་བདེ་བར་གཤེགས་པ་ཐམས་ཅད་ཉི་མ་དང་ཟླ་བ་ལ་ཆིབས། ཕྱག་ན་གསེར་གྱི་འཁོར་ལོ་རྩིབས་སྟོང་དང་ལྡན་པ་བསྣམས་ནས། སེམས་ཅན་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་རྨིས་སོ། །དེ་ཡང་
ཆོས་ཀྱི་བགྲོ་བ་མཛད་པ་དང། །ཞེས་བའི་དོན་ནོ། །རྨི་ལྟས་གསུམ་པ་ལ། ནམ་མཁའ་ལ་སྤྲིན་གསེར་གྱི་ཁ་དོག་ཅན་ནི་ཆགས། སྣང་སྲིད་གསལ་བའི་གློག་འཁྱུག ཆོ་འཕྲུལ་གྱི་འབྲུག་སྒྲ་དམ་པ་ཆོས་ཀྱི་སྒྲ་འུར་དི་རི་རི་སྒྲོག་པ་རྨིས་ཏེ། དེ་ཡང། ཆོས་སྒྲ་ཆེན་པོ་སྒྲོག་པ་དང། ཞེས་པའི་དོན་ནོ། །རྨི་ལྟས་བཞི་པ། ནམ་མཁའི་སྤྲིན་གསེབ་ནས་བདུད་རྩིའི་ཆུ་རྒྱུན་བབས་ཏེ། ས་ཕྱོགས་ཐམས་ཅད་ཆག་ཆག་བཏབ། གདུལ་བྱ་ཐམས་ཅད་ཀྱི་རྟོག་སྒྲིབ་སྦྱངས་ནས། ཀུན་ཀྱང་རྡོ་རྗེ་རྣལ་འབྱོར་ཞེས། སྔགས་གྱི་སྒྲ་དི་རི་རི་སྒྲོ་པ་ཞིག་རྨིས་སོ། །དེ་ཡང། བདུ་རྩིའི་ཆོས་ཆར་བབས་པ་དང། །ཞེས་པའི་དོན་ནོ། །རྨི་ལྟས་ལྔ་པ་ལ། ནམ་མཁའི་སྤྲིན་གསེབ་ནས་རིན་པོ་ཆེའི་སྒྲོམ་གྱི་ནང་ན་རིན་པོ་ཆེ་མཐིང་གི་ཤོག་བུ་ལ་གསེར་གྱིས་རྒྱ་རང་མནན་དུ་བྲིས་པའི་པོ་ཏི་དང་གླེགས་བམ་སྐར་མདའ་ཐང་ལ་བབས་པ་ཙམ་དུ་ལྷུང་བ་རྨིས་སོ། །དེ་ཡང། རིན་ཆེན་ཆར་དུ་བབས་པ་དང། །ཞེས་བའི་དོན་ནོ། །རྨི་ལྟས་དྲུག་པ་ལ། པོ་ཏི་གླེགས་བམ་དེ་རྣམས་ལ་རིག་འཛིན་དང་བྱང་ཆུབ་སེམས་དཔའ་རྣམས་ལ་ལ་ནི་མཆོད་པ་འབུལ། ལ་ལ་ནི་སྐོར་བ་བྱེ། ལ་ལ་ནི་བསྟོད་པ་བྱེད་བའི་སྒྲ་སྒྲོག་པ་ཞིག་རྨིས་སོ། །དེ་ཡང། མཆོད་པ་རྒྱ་ཆེན་བྱས་པ་དང། །ཞེས་པའི་དོན་ནོ། །རྨི་ལྟས་བདུན་པ་ལ། ནམ་མཁའི་མཐོངས་ནས་གཟུགས་སུ་མ་གྲུབ་པའི་ལུང་སྟོན་པའི་སྒྲ། ལས་དང་སྐལ་བ་རབ་ལྡན་ཞིང། །བསོད་ནམས་ཆེན་པོའི་དྲ་མ་ཁྱོད། །སྤྲུལ་པས་ཇི་ལྟ་ལུག་བསྟན་ཞིང། །རྒྱལ་བས་འབྱུང་བར་ལུང་བསྟན་པའི། །བསྟན་པའི་སྙིང་པོ་དམ་པ་ཞིག །སྐལ་ལྡན་ཁྱེད་
ལ་སྒྲོག་པར་བྱའོ། །ཞེས་པ་རྨིས་པས་དེར་རྒྱལ་པོ་མནལ་སད་དེ། མཁར་གྱི་ཡང་ཐོག་ཏུ་སྐུ་འཆག་ཏུ་བྱོན་པས། གསང་བདག་ཕྱག་ན་རྡོ་རྗེའི་སྐུ་རྒྱུ་རིན་པོ་ཆེ་སྨུག་པོ་ལས་གྲུབ་པ་ཁྲུ་གང་པ་ཞིག་བཞུགས་ཀྱིན་གདའ་སྐད། དེ་ལ་ཕྱག་ལན་གསུམ་བཙལ། བསྐོར་བ་ལན་གསུམ་བྱས། ཞབས་སྤྱི་བོའི་གཙུག་ཏུ་བླངས་ཏེ། ཨེ་མ་ངོ་མཚར་མཆོག་གི་སྐུ། །འདྲེན་པ་མཆོག་གི་དཔལ་ལེགས་གང། །མོས་པའི་ཡིད་ཡིས་ལྷ་མཆོག་ཁྱོད། །སྔོན་ཚེ་གོང་ནས་བསྒྲུབས་པ་ཡི །ལས་འབྲེལ་ལྷ་མཆོག་ཁྱོད་ཉིད་ནི། །བསྐལ་པ་བརྒྱར་ཡང་མི་གཏོང་ངོ་། །གསུངས་ཏེ་ཡིད་དམ་གྱི་ལྟར་བཟུང་ནས་ཟླ་བ་བདུན་དུ་སྒྲུབ་པ་མཛད་པས། པོ་ཏི་དང་གླེགས་བམ་རྨི་ལམ་དུ་བྱུང་བ་དེ་རྣམས་མངོན་སུམ་དུ་བབས་ཤིང་དེའི་བྱིན་གྱིས་བརླབས་ཀྱིས་སྣང་བ་ཐམས་ཅད་དཔེ་ཆར་ཤར་བ་ཡིན་སྐད། དེར་རྒྱལ་པོས་པོ་ཏི་དང་གླེགས་བམ་དེ་རྣམས་ལ་བརྟགས་པས་རྟོགས་པར་འདུག་ཀྱང། གདུལ་བྱ་གཟུ་ལུམ་ཅན་དང་རས་གཅོད་ཅན་རྣམས་དགག་པར་བྱ་བའི་ཕྱིར་དུ་མ་རྟོགས་པ་ལྟར་གནང་ནས། འཇིག་རྟེན་གྱི་ཁམས་ན་མཁྱེན་པ་སུ་ཞེས་དྲིས་པས། ཟ་ཧོར་གྱི་ཡུལ་ན་སིང་ང་ཨུ་པ་རཱ་ཛ་ཞེས་བྱ་བ་མཁྱེན་པ་རྒྱ་ཆེའོ་ཞེས་ཟེར་ཏེ། སྤྱན་འདྲེན་དུ་བཏག་བས། ཁོང་ཉིད་ཀྱིས་ཀྱང་རྒྱལ་པོའི་ཐུགས་ཀྱི་རྟོག་པ་མ་སེལ་གྱི་དོགས་ནས་འབྱོན་དུ་མ་བཞེད་སྐད། པོ་ཏི་དང་གླེགས་བམ་རྣམས་རྟ་དང་ཀླང་པོ་ལ་ཁོལ་ལ་ཐོངས་ཤིག ངས་བརྟག་གི་གསུངས་ནས། པོ་ཏི་དང་གླང་པོ་ལ་ཁོལ་ལ་ཐོངས་ཤིག ངས་བརྟག་གི་གསུངས་ནས། པོ་ཏི་དང་གླེགས་བམ་རྣམས་སྟག་སྒྲོ་དང་གཟིག་སྒྲོའི་ནང་དུ་བཅུག་ནས། ཨ་ཀ་རུ་དང་དུ་རུ་ཀ་ལ་སོགས་པའི་སྤོས་སྣ་ཚོགས་དང། གདུགས་དང་
རྒྱལ་མཚན་ལ་སོགས་པའི་མཆོད་པ་སྣ་ཚོགས་དང་བཅས་པས་སྤྱན་དྲངས་ཏེ། ཁོང་གིས་བརྟགས་པས་ཚིག་གཅིག་ཀྱང་བརྡའ་མ་མཇལ་སྐད། སློབ་དཔོན་གྱི་སྔོན་གྱི་མཚན་རྟགས་དང་སྦྱར་ན། རྒྱལ་པོ་ཉིད་རང་གི་རྟོགས་པར་འགྱུར་རོ་གསུངས་ནས། ཚུར་སྤྱན་དྲངས་སྐད་དོ། །ཡང་རྒྱལ་པོ་ཉིད་ཀྱིས་བརྟགས་པས་རྟོགས་པར་འདུག་ཀྱང། མ་རྟོགས་པ་ལྟར་གནང་ནས། ཡང་འཇིག་རྟེན་གྱི་ཁམས་ན་མཁྱེན་པ་སུ་ཆེ་ཞེས་དྲིས་པས། སངས་རྒྱས་རིན་ཆེན་མང་གི་སྤྲུལ་པ་དགེ་སློང་ཀུ་ཀུ་རཱ་ཛ་ཞེས་བྱ་བ་མཁྱེན་པ་རྒྱ་ཆེའོ་ཟེར་ནས་སྤྱན་འདྲེན་དུ་བཏང་པས། རྒྱལ་པོའི་ཐུཊ་ཀྱི་རྟོག་པ་མ་ཆོད་ཀྱི་དོཊ་ནས་འབྱོན་དུ་མ་གནང་པར། པོ་ཏི་དང་གླེཊ་བམ་སྟག་སྒྲོ་དང་གཟིག་སྒྲོའི་ནང་དུ་བཅུག་ནས། ཨ་ཀ་རུ་དང་དུ་རུ་ཀ་ལ་སོགས་སྤོས་སྣ་ཚོགས་དང། གདུགས་དང་རྒྱལ་མཙན་ལ་སོགས་མཆོད་པའི་བྱེ་བྲག་སྣ་ཚོགས་དང་བཅས་པས་སྤྱན་དྲངས་ཏེ། དགེ་སློང་ཀུན་ཀུ་རཱ་ཛ་ཉིད་ཀྱིས་བརྟག་པས། སྒྱུ་འཕྲུལ་དྲྭ་བ་ལེའུ་སྟོང་ཕྲག་བརྒྱ་པའི་རྒྱུད་བྱ་བ་དེའི་ནང་ནས། རྡོ་རྗེ་སེམས་དཔའ་ཐུགས་ཀྱི་སྒྲུབ་པའ་ལེའུའམ་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས་ཏེ། ཟླ་བ་བདུན་དུ་སྒྲུབ་པ་མཛད་པས། རྡོ་རྗེ་སེམས་དཔའ་ཏིང་ངེ་འཛིན་གྱི་ངང་ལ་ཡེར་གྱིས་བྱོན་ཏེ་རིགས་ཀྱི་བུ་དངོས་གྲུབ་ཅི་འདོད་གསུངས་པ་ལས། སློབ་དཔོན་གྱིས་བསྟན་པ་དང་ཐེག་པ་མཐའ་དག་རྟོགས་པའི་དངོས་གྲུབ་ཞུའོ་ཞེས་ཞུས་པས། ཕྱག་ན་རྡོ་རྗེས་ལུང་སྟོན་པར་འགྱུར་གྱི་གསུངས་ན་མི་སྣང་བར་སོང་སྐད། ཡང་ཟླ་བ་བདུན་སྒྲུབ་པ་མཛད་པས་ཕྱག་ན་རྡོ་རྗེ་མངོན་སུམ་དུ་བྱོན་ནས་རྡོ་རྗེ་ལན་གསུམ་སྤར་ཏེ། སྤོང་ལེན་བརྟུལ་ཞུགས་སྤྱོད་
པའི་དབང། །དགེ་བས་བསྐུར་ནས་སྡིག་པ་མེད། །ཅེས་གསུངས་ནས་རྩོལ་དང་བཅས་པའི་མཚན་ཉིད་ཀྱི་ཐེག་པ་སྤངས་ཏེ། རྩོལ་བ་མེད་པ་གསང་སྔགས་ཀྱི་ཐེག་པ་ཉམས་སུ་ལེན་པ་ཁྱོད་ལ། དོན་གྱི་བསྟན་པ་དང་ཐེག་པ་ཐམས་ཅད་རྫོགས་པར་དབང་བསྐུར་རོ། །ཚིག་གིས་བསྟན་པ་དེ་དག་དགེ་བསྙེན་ལི་ཙ་དྲི་མ་མེད་པ་ལ་ཞུས་ཤེག ཅེས་ལུང་བསྟན་ནོ། །ཀུ་ཀ་རཱ་ཛས་གསང་བའི་བདག་པོའི་བཀའ་བཞིན་བསྒྲུབས་ཤིང། སྒྱུ་འཕྲུལ་དྲཱ་བ་སྟོག་ཕྲག་བརྒྱ་བའི་རྒྱུད་ལ། ཏན་ཏྲ་ཆེན་པོ་སྡེ་བཅོ་བརྒྱད་དུ་ཕྱེས་ནས། སྐལ་ལྡན་རྒྱལ་པོ་ཛ་ལ་གསུངས། ཏན་ཏྲ་ཆེན་པོ་སྡེ་བཅོ་བརྒྱད་དུ་ཕྱེས་ནས། སྐལ་ལྡན་རྒྱལ་པོ་ཛ་ལ་གསུངས། ཏན་ཏྲ་ཆེན་པོ་སྡེ་བཅོ་བརྒྱད་དུ་ཕྱེས་ནས། སྐལ་ལྡན་རྒྱལ་པོ་ཛ་ལ་གསུངས། ཏན་ཏྲ་སྡེ་ཆེན་པོ་བཅོ་བརྒྱད་གང་ཞེ་ན་སྐུའི་རྒྱུད་གསུམ་ནི། སངས་རྒྱས་མཉམ་སྦྱོར། གླང་པོ་ཆེ་རབ་འབོག གླང་པོ་ཆེ་ཆུར་ཞུགས་སོ། །གསུང་གི་རྒྱུད་གསུམ་ནི། ཟླ་གསང་ཐིག་ལེ། གཅིག་ལས་འཕྲོས་པ། དུ་མ་འཕྲོས་པའོ། །ཐུགས་ཀྱི་རྒྱུད་གསུམ་ནི། གསང་བ་འདུས་པ། རི་བོ་བརྩེགས་པ། རྩེ་གཅིག་འདུས་པའོ། །ཡོན་ཏན་གྱི་རྒྱུད་གསུམ་ནི། དཔལ་མཆོག་དང་པོ། བདུད་རྩི་མཆོག་དང་པོ། ཡིད་བཞིན་ནོར་བུའི་རྒྱུད་དོ། །འཕྲིན་ལས་ཀྱི་རྒྱུད་གསུམ་ནི། སྐར་མ་མ་ལེ། སྒོན་མ་འབར་བ། ཀཱི་ལ་ཡ་ཡིག་འབྲུ་བཅུ་གཉིས་ཀྱི་་རྒྱུད་དོ། །སྤྱིའི་རྒྱུད་གསུམ་ནི། དེ་ཐམས་ཅད་ཀྱི་རྒྱུད་སྒྱུ་འཕྲུལ་དྲཱ་བའི་རྒྱུད། དམ་ཚིག་ས་མ་ཡ་འབུམ་སྡེ་བཀོད་པའི་རྒྱུད། རྡོ་རྗེ་ཐབས་ཀྱི་ཞགས་པའི་རྒྱུ་དོ། །དེ་ལྟར་ཏན་ཏྲ་ཆེན་པོ་སྡེ་བཅོ་བརྒྱད། རྒྱལ་པོ་ཛས་སིང་ང་རཱ་ཛ་ལ། དེས་སྲས་མོ་ག་མ་ས་ལ། དེས་རྒྱལ་པོ་ཀུ་ཀུ་རཱ་ཛ་ལ། དེས་རོ་ལངས་བདེ་བའི་དངོས་གྲུབ། དེས་རྡོ་རྗེ་བཞད་པ་ལ། དེས་ཟ་ཧོར་གྱི་རྒྱལ་པོ་་ཕྲ་ཧ་ཏི། དེས་སློབ་
དཔོན་སངས་རྒྱས་གསང་བ་ལ། དེས་སློབ་དཔོན་བཱི་མ་ལ་མི་ཏྲི་ལ་སོགས་པ་པཎྜི་ཏ་ལྔ་བརྒྱ་ལགསུངས། དེ་སྐད་དུ་ལམ་རིམ་ཆེན་པོ་ལས གསང་བའི་བདག་པོ་མགོན་གཤེགས་ནས། །ལྷ་ཀླུ་གནོད་སྦྱིན་སྲིན་པོ་དང། །མི་ལས་སྐལ་ལྡན་འདུས་པ་ལ། །དབང་པོས་ཇི་ལྟར་ལུང་བསྟན་དུས། །རྒྱལ་པོའི་རིགས་ཅན་ལྟས་ཤར་བ། །འབྲེལ་པས་སྣང་ལ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་འགྲུབ། །བསྟན་པའི་དངོས་གྲུབ་དེ་དེ་ནས་ཟོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་རུ་འགྲུབ། །སྨོན་པའི་ལྷ་དང་དེ་རུ་མཇལ། །ཞེས་སོ། །དེ་ནས་དེའི་རྗེས་སུ་ཞུགས་པའི་དགེ་སློང་ཀུ་ཀུ་རཱ་ཛ་དང། རྒྱལ་པོ་ཨིནྡྲ་བྷཱུ་ཏི་དང། ཟ་བོར་གྱི་རྒྱལ་པོ་སིང་ཧ་ཨུ་པ་རཱ་ཛ་དང། སྲས་མོ་གོ་མ་དེ་ལ་སོགས་པས། ཚོགས་ཀྱི་དཀྱིལ་འཁོར་སྒྲུབ་པ་ལ་བརྟེན་ནས་རིམ་པ་བཞིན་དུ་ཚེམ་བུ་འབུམ་དང། ཁྲི་དང། སྟོང་དང། བརྒྱ་དང་ཅས་ཏེ་རིག་འཛིན་གྱི་ས་ལ་དངོས་སུ་གཤེགས་པ་བསམ་གྱིས་མི་ཁྱབ་པ་བྱུང་ཞིང། གསང་སྔགས་ཀྱི་བསྟནཔ་རྒྱསཔར་གྱུར་པ་ཡིན་ནོ། །དེ་སྐད་དུ་ཡང། ལམ་རིམ་ལ། དེ་ནས་རྡོ་རྗེ་གདན་སྟེངས་ཀྱི། །འཛམ་གླིང་ཤར་གྱི་ཕྱོགས་མཚམས་ཀྱིས། །ཕོ་བྲང་དམ་པ་རིན་ཆེན་ན། །བཀྲ་ཤིས་དམ་པའི་ཁང་བུ་རུ། །ཀུ་ཀུ་རཱ་ཛ་ཤིནྡྲ་བྷཱུ་ཏི་དག། །སིང་ཧ་ཨུ་པ་རཱ་ཛ་དང། །སྲས་མོ་གོ་མ་ས་ལ་སོགས་སྒྱུ་འཕྲུལ་དྲཱ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །ཞེས་སོ། །གཉིས་པ་ལུང་ཨ་ནུ་ཡོ་ག་ནི། སྟོན་པ་ཐུབ་པའི་དབང་པོ་འདས་
པའི་དུས། དེའི་ཉེས་པས་ཕྱི་སྣོད་ཀྱི་འཇིག་རྟེན་ཡིད་དུ་མི་འོང་པར་གྱུར། ནང་བཅུད་ཀྱི་སེམས་ཅན་རྣམས་ནི་བཞིན་གྱི་དཀྱིལ་འཁོར་མོག་མོག་པོར་གྱུར། ནང་པ་སངས་རྒྱས་པའི་བསྟན་པ་ནི་ཤི་ལ་ཐུག་པར་གྱུར། ཕྱི་རོལ་མུ་སྟེགས་པ་རྣམས་ནི་ཅལ་ཀའི་སྒྲ་སྒོགས་ཏེ། གོའུ་ཏ་མའི་བསྟན་པ་ནི་མེ་ཤི་བའི་དུད་པ་བཞིན་དུ་སོང་ཟེར་བའི་ཚེ། དམ་པའི་རིགས་ཅན་དྲ་མ་ལྔས་ཏིང་ངེ་འཛིན་ལ་སྙོམ་པར་ཞུགས་ནས་སྟོན་པ་མྱ་ངན་ལས་འདས་པ་མ་ཚོར་རོ། །དེ་ནས་ལོ་ཉིས་ཤུ་རྩ་བརྒྱད་ནས་ཏིང་ངེ་འཛིན་ལ་ཞུགས་པ་དེ་ལས་ལངས་པ་དང། སྟོན་པ་འདས་པའི་ཉེས་པ་བཞི་པོ་མཐོང་ནས་རང་གི་གནས་སུ་ཐག་ཆད་པར་དུ་ཏེ། རྫུ་འཕྲུལ་གྱི་བྱ་བ་ཤེས་པའི་མངོནཔར་ཤེས་པས། དྲག་ཤུལ་ཅན་ཞེས་བྱ་བའི་རི་མ་ལ་ཡ་གནམ་ལྕགས་ཡོད་སའི་རྩེར་འདུས་ཏེ། དུས་གསུམ་གྱི་སངས་རྒྱས་ཐམས་ཅད་ཡིད་ལ་བྱས་ཏེ། ཀྱེ་མ་ཀྱེ་ཧུད་ཀྱི་མ་ཀློང། །སྟོན་པ་སྒྲོན་མེའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་པ་ལ་སོགས་ཀྱི་གདུང་ཚིག་ཉིས་ཤུ་རྩ་གསུམ་བཏོན་པས། དུས་གསུམ་གྱི་སངས་རྒྱས་ཐམས་ཅད་ཀྱིས་གསན་ནས་ལྕང་ལོ་ཅན་གྱི་གནས་སུ་འདུས་ཏེ། གསང་བའི་བདག་པོ་ལ་ཁྱོད་ཀྱིས་མི་མཇེད་འཇིག་རྟེན་གྱི་གདུང་བ་སེལ་ཅིག་པར་བསྐུལ་བས། གསང་བདག་རབ་ཏུ་དགྱེས་ཏེ་རང་གི་སྟན་ལས་ལངས་ཏེ་འཁོར་ལུང་བསྟན་པ་ཡག་མཛད་ནས། དམ་པའི་རིགས་ཅན་དྲ་མ་ལྔའི་དྲུང་དུ་མངོན་གསུམ་དུ་བྱོན་པས། ངོ་མ་ཤེས་ཏེ། ཨེ་མ་ཧོ། སྐྱེས་བུ་ཁྱེད་སུ་ཞིག གང་ནས་བྱོན། གང་དུ་བཞུད། དོན་གྱི་ཆེད་ཀ་ཅི་ཞིག་ཅེས་དྲིས་པས། ང་ནི་ཅིས་ཀྱང་མི་བསྐྱོད་དེ། །མི་
འཁྲུག་རྡོ་རྗེ་སེམས་དཔའ་ཡིན། །སྙིང་རྗེས་གཡོ་ཞིང་བསྐྱོད་པ་ན། །སྲིད་པ་གསུམ་གྱི་གཉེན་གཅིག་པོ། །ཞེས་གསུངས་པས་ན་ངོས་ཏེ། དགའ་མགུ་རངས་པའི་བསམ་པས་ཞུས་ནས། རི་མ་ལ་ཡ་གནམ་ལྕགས་ཡོད་པའི་རྩེ་མོར། དམ་པའི་རིགས་ཅན་དྲ་མ་ལྔ་ལ་མདོ་དགོངས་པ་འདུས་པ་སོགསཔ་ལུང་ཨ་ནུ་ཡོ་གའི་ཆོས་སྡེ་རྣམས་དང། གཞན་ཡང་ཕུར་པ་དང་མ་མོ་ལ་སོགས་པ་སྒྲུབ་སྡེ་འགའ་ནི། དུར་ཁྲོད་ཆེན་མོ་བསིལ་བའི་ཚུལ་དུ་བབས་པ་ཡིན་ལ། ཨ་ནུ་ཡོ་ག་བབས་ལུགས་སྤྱིའི་རྣམ་བཞག་དེ་ལྟར་ཡིན་ཅིང། ཁྱད་པར་ཆོས་ཚན་སྒྲུབ་གཞུང་རེ་ལ་ལོ་རྒྱུས་བབས་ཚུལ་རེ་འདུག་པ་ཡི་གེ་མངས་བས་རང་གཞུང་ལོ་རྒྱུས་རྣམས་ན་གསལ་ལོ། །གསུམ་པ་གསང་བ་ལས་ཀྱང་ཆེས་གསང་བ་ཡང་གསང་རྨད་དུ་བྱུང་བ། རྡོ་རྗེ་ཐེག་པ་ལྟ་བའི་ཞེ་ཕུགས། དུས་གསུམ་སངས་རྒྱས་ཐབས་ཅད་ཀྱི་ཐུགས་ཀྱི་ཉིང་ཁུ། དངོས་པོའི་གནས་ལུགས་རང་གྲོལ་མངོན་སུམ་ཆིག་ཆོད་དུ་སྟོན་པ། རྩོལ་མེད་རྫོགས་པ་ཆེནཔོའི་བསྟན་བའི་བྱུང་ཚུལ་ནི། རྒྱལ་བ་དགོངས་པས་བརྒྱུད་པ་དང། རིག་འཛིན་རིག་པས་བརྒྱུད་པ་དག། གང་ཟག་སྙན་ཁུང་བརྒྱུད་པ་དང། ལྷ་དང་མིའི་ཡུལ་དུ་ཇི་ལྟར་གྲགས་ཚུལ་ལོ། །དང་པོ་རྒྱལ་བ་དགོངས་པས་བརྒྱུད་པ་ནི། འོག་མིན་ལ་སོགས་པར་རྒྱལ་བ་སྐུ་བཞིའི་བསྟནཔ་བྱུང་ཚུལ་ནི། སྟོན་པ་ངོ་བོ་ཉིད་ཀྱི་སྐུས་རང་གསལ་ངོ་བོ་ཉིད་ཀྱིས་གསུངས་ཚུལ་དང། སྟོན་པ་ངོ་ཉིད་ཀྱི་སྐུས་རང་གསལ་ངོ་བོ་ཉིད་ཀྱིས་རང་གྲོལ་མངོན་སུམ་དུ་གསུངས་ཚུལ་དང། ལོངས་
སྤྱོད་རྫོགས་པའི་སྐུས་རང་གི་ངོ་བོས་གསུངས་ཚུལ་དང། གསང་བའི་སྐུས་བདེ་ཆེན་ཐབས་ཀྱིས་གསུངས་པ་དེ་རྣམས་སོ། །སྟོན་པ་གསང་བའི་བདག་པོས་སྤྲུལ་སྐུ་དགའ་རབ་རྡོ་རྗེ་ལ་བསྟན་པའི་བདག་པོར་དབང་བསྐུར་ནས། ལྷ་དང་མིའི་ཡུལ་དུ་གྲགས་པ་ཡིན་ཏེ། དེ་ཡང་སྤྲུལ་སྐུ་དགའ་རབ་རྡོ་རྗེ་ཚིག་སྡེབ་སྦྱོར་ལེགས་པས་བཤད་པ་དང། དེ་ཇི་ལྟར་གྲགས་ཤིང་བརྒྱུད་པའི་ལོ་རྒྱུས་ནི་རྒྱས་པར་འདྲ་འབག་ཆེན་མོ་ན་གསལ་ཏེ། དེ་ཡང་དང་པོ་གསང་སྔགས་འབྱུང་བའི་དུས་དྲུག་ལ་བབ་པའི་ཚེ། རྩོལ་མེད་ཨ་ཏིའི་བསྟན་པ་བྱུང་བ་ཡིན་ཏེ། ཉོན་མོངས་རྒྱུད་དྲག་མོས་མཐུ་ཞན། །ལས་ཀྱི་ཚེ་ཐུང་བཀའ་དོན་སྟོར། །བསྟན་སྙིགས་གྲུབ་མཐའ་ངན་པས་བསྒྱུར། གཉེན་པོས་མི་ནོན་སྒྲུབ་རྩོལ་ཞན། །དེ་ཚེ་རིག་པའི་རྣམ་རྟོག་ཤར། །ཞེས་པས། ཉོན་མོངས་པ་རྒྱུད་དྲག་པོའི་དུས་དང། དད་པ་མེད་ཅིང་མོས་མཐུ་ཞན་པའི་དུས་དང། ལས་ཀྱི་ཚེ་ཐུང་བའི་དུས་དང། བཀའི་དོན་ཚིག་ཙམ་ལ་དོན་དུ་འཛིན་པའི་དུས་དང། །བསྟན་པའི་སྙིགས་མ་གྲུབ་མཐའ་ངན་པའི་དུས་དང། གཉེན་པོས་མི་ནོན་རྩོལ་སྒྲུབ་ཞན་པའི་དུས་སུ། ཤན་འབྱེད་ལ་ཟླ་རང་གྲོལ་མངོན་སུམ་དུ་སྟོན་པ་ཨ་ཏི་འབྱུང་བའི་དུས་སུ། ཤན་འབྱེད་ལ་ཟླ་རང་གྲོལ་མངོན་སུམ་དུ་སྟོན་པ་ཨ་ཏི་འབྱུང་བའི་དུས་ཡིན་ཏེ། དུས་དེ་ཙ་ན་སུམ་ཅུ་རྩ་གསུམ་ལྷའི་གནས་ན་ལྷ་བདེ་བ་བཟང་སྐྱོང་ལ་བུ་ལྔ་བརྒྱ་རྩ་གཅིག་ཡོད་པའི་གཅེན་པོ་ཀུན་དགའ་སྙིང་པོ་ཞེས་བྱ་བ། སྐྱེས་ཟླ་ན་ཚོད་གཞན་བས་སྒྱུ་རྩལ་དང་བློ་གྲོས་ཁྱད་པར་འཕགས་པ་ཞིག་བྱུང། ལྷའི་བུ་གཞན་རྣམས་ནི་དགའ་བའི་ཚལ་ལ་སོགས་ན་གླུ་གར་དང། རོལ་མོ་དང། །རྩེད་འཇོ་དང། ཁྲུས་དང། ཚིགས་སུ་བཅད་པ་ལ་དགའ་བ་ལས།
ཀུན་དགའ་སྙིང་པོ་ནི། བསམ་གཏན་གྱི་འབུར་ཁང་ན་གཅིག་པུར་སྡོད་ཅིང། རྡོ་རྗེའི་བཟླས་པ་ལ་དགའ་བས། ལྷའི་དབག་པོས་མིག་ཡང་སེམས་ལྷག་ཅན་ཞེས་བྱ་བར་བཏགས་སོ། །ལྷའི་བུ་དེ་ལ་ཆུ་མོ་གླང་གི་ལོ་ཆོ་འཕྲུལ་ཆེན་མོའི་ཟླ་བ་ལ། རྨི་ལྟས་བཞི་རྨིས་ཏེ། དང་པོ་ནི། །སངས་རྒྱས་ཐམས་ཅད་ལས་འོད་ཟེར་ཕྱོགས་བཅུར་འཕྲོས་ཏེ། ཐུབ་པ་དྲུག་གིས་སེམས་ལྷག་ཅན་ལ་བསྐོར་བ་བྱས་ནས་དབུའི་གཙུག་ཏུ་ཐིམ་པ་ཞིག་རྨིས་སོ། །གཉིས་པ་ལ་ཚངས་པ་དང་ཁྱབ་འཇུག་དང་གུ་ལང་གསུམ་ཁྱུར་མིད་དུ་ཟོས་པ་རྨིས་སོ། །གསུམ་པ་ནི་ནམ་མཁའ་ལ་ཉི་ཟླ་གཉིས་ཤར་ནས། ཉི་ཟླ་སེམས་ལྷག་ཅན་གྱི་ལག་ཏུ་བྱུང་ནས། འཇིག་རྟེན་གྱི་ཁམས་ཐམས་ཅད་འོད་ཀྱི་སྣང་བར་བྱས་པ་ཞིག་རྨིས་སོ། །བཟི་པ་ནམ་མཁའ་སྤྲིན་གྱི་ཁ་དོག་ཅན་ལས་བདུད་རྩིའི་ཆར་བབས་པས་རྩི་ཐོག་དང་ནགས་ཚལ་ཐམས་ཅད་རྒྱས་ནས་རིན་པོ་ཆེའི་མྱུ་གུ་དང། མེ་ཏོག་དང་འབྲས་བུ་ཐམས་ཅད་དུས་གཅིག་ཏུ་རྒྱས་པ་རྨིས་སོ། །དེ་རྣམས་རྨིས་པ་དང་ནང་པར་ལྷའི་དབང་པོ་ལ་བཟླས་པས། རབ་ཏུ་དགྱེས་ནས་ལྷའི་དབང་པོས་བསྟོད་པ། ཨེ་མ་ཧོ། བསྟན་པའི་སྙིང་པོ་རྣལ་མ་འབྱུང་བའི་དུས། །ཡང་སྤྲུལ་གནང་དུས་གསུམ་བྱང་ཆུབ་རྫོགས། །འཇིག་རྟེན་མུན་སེལ་དུས་མཐའི་ནོན་པའ། །ཐུགས་སྲས་འཛམ་གླིང་དཔལ་གྱུར་ངོ་མཚར་ཨང། །ཞེས་གསུངས་ནས་ཁྱེད་ཀྱི་དང་པོའི་རྨི་ལྟས་དེ་སངསར་གཡས་ཀྱི་དགོངས་པ་ཐུགས་སུ་ལོན་ནས། སངས་རྒྱས་ཐམས་ཅད་ཀྱི་རྒྱལ་ཚབ་བྱེད་པའི་རྟགས་ཡིན། གཉིས་པ་བདུད་ཐམས་ཅད་དབང་དུ་བསྡུས་ཤིང་དུག་གསུམ་མ་སྤངས་པར་རྩད་ནས་བཅད་དེ། མངོན་པར་
རྫོགས་པར་སངས་རྒྱ་བའི་རྟགས་ཡིན། གསུམ་པ་དེ་འབྲས་ལས་འདས་པའི་ཐེག་པས་གདུལ་བྱའི་མུན་པ་སེལ་ཞིང། བསྟན་པའི་སྒྲོན་མེ་བྱེད་པའི་རྟགས་ཡིན། བཞི་པ་ནི། མན་ངག་རང་བྱུང་བདུད་རྩིའི་ཆུས། ཉོན་མོངས་པའི་གདུང་བ་གཏན་ནས་བསལ་ཏེ། རྩོལ་མེད་ཀྱི་འབྲས་བུ་ལྷུན་གྱིས་གྲུབ་པའི་རྟགས་ཡིན་གསུངས་ནས་ཤིན་ཏུ་དགྱེས་ཏེ། ཞལ་ཕྱོགས་བཞིར་གཟིགས་ནས་དུས་གསུམ་གྱི་རྒྱལ་བ་ཐམས་ཅད་ལ་བསྐུལ་བ། གསུང་གི་མངའ་བདག་ཐམས་ཅད་ཀྱིས། །རྩོལ་པའི་ཐེག་པ་མཐའ་སྟོན་ནས། །སྩོལ་མེད་ཐེག་པ་མི་གསུངས་པར། །ཐུགས་རྗེ་ཆེན་པོ་ཡལ་ལམ་ཅི། །སྐལ་ལྡན་གདུལ་བྱ་མཆིས་པ་ན། །ལྷུན་གྲུབ་ཐེག་པ་གསུང་དུ་གསོལ། །ཞེས་གསོལ་བ་བཏབ་པས། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ནམ་མཁའ་ལ་སྤྲིན་བཞིན་དུ་འདུས་ནས། སངས་རྒྱས་ཐམས་ཅད་མགྲིན་གཅིག་ཏུ་རྡོ་རྗེ་སེམས་དཔའ་ལ་འདི་སྐད་ཅེས་བསྐུལ་ལོ། །དུས་གསུམ་སངས་རྒྱས་ཐམས་ཅད་ཀྱི། །ཐུགས་རྗེའི་རང་བཞིན་ཁྱོད་ཡིན་པས། །སངས་རྒྱས་ཀུན་གྱི་མཛད་པར་ཤར། གསུང་གི་མངའ་བདག་ཐམས་ཅད་ཀྱི། །ཡེ་ཤེས་རང་བཞིན་ཁྱོད་ཡིན་པས། །ཐམས་ཅད་བྱང་ཆུབ་སེམས་སུ་གསལ། །བདེ་གཤེགས་མ་ལུས་ཐམས་ཅད་ཀྱི། །སྐུ་ཡི་ངོ་བོ་དང་ལྡན་པས། །རྨད་བྱུང་རོལ་པའི་སྐུ་རུ་ཤར། །ཚིག་གཅིག་དོན་མང་ཚོགས་པའི་བདག །ཞེས་སྐུ་གསུང་ཐུགས་ཐོན་ཏན་འཕྲིན་ལས་ལྔའི་སྒོ་ནས་བསྟོད་དེ་བསྐུལ་བའོ། །དེ་ཡང་བློ་དང་མཐུན་པའི་སྒོ་ནས། རྩོལ་མེད་ཀྱི་ཐེག་པ་བསྟན་དུ་གསོལ། ཞེས་བསྐུལ་
བ། རིན་ཆེན་འཕྲུལ་གྱི་ཐབས་ལྡན་པས། གང་འདོད་མཐུན་པའི་སྒོ་དེ་ནས། །རྩོལ་མེད་དབྱིག་དང་འཕྲད་པར་གྱིས། །ཞེས་བསྐུལ་བས། བཅོམ་ལྡན་འདས་རྡོ་རྗེ་སེམས་དཔའ་ཕྱག་ན་རྡོ་རྗེ་ཉིད་ཀྱི་ཐུགས་ཀ་ནས་ཕྱུང་ནས། རིན་པོ་ཆེ་རང་འབར་གྱི་འཀོར་ལོ་ལག་ཏུ་གཏད་དེ། འདི་སྐད་ཅེས་བསྐུལ་ལོ། །གཉིས་མེད་ཡེ་ཤེས་གསང་བའི་དོན། །དབྱེར་མེད་རྩོལ་མེད་ཡེ་སངས་རྒྱས། །དབུ་མ་ཆེན་པོ་དྲང་བའི་ལམ། །འདུས་པའི་ཚོཊ་ལ་བསྟནཔར་གྱིས། །ཞེས་བསྐུལ་བས། སེམས་དཔའ་རྡོ་རྗེས་བཤད་པར་ཞལ་གྱིས་བཞེས་པ་འདི་སྐད་ཅེས་ཞུས་སོ། །རྡོ་རྗེ་སེམས་དཔའ་ནམ་མཁའ་ཆེ། །ཚིག་གི་སྤྱོད་ཡུལ་མ་ཡིན་པས། །བདག་གི་བགྲོ་བར་ཤིན་ཏུ་དཀའ། །མ་རྟོགས་པ་ལ་ཚིག་སྒོ་ནས། །མཚོན་ནས་རྟོགས་པར་བྱ་བའི་ཕྱིར། །ཅི་རིགས་པ་ལ་ཚིག་སྒོ་ནས། །མཚོན་ནས་རྟོགས་པར་བྱ་བའི་ཕྱིར། །ཅི་རིགས་པར་ནི་རྣམ་པར་བགྲོད། །ཅེས་གསུངས་པར་ཁས་བླངས་ནས། ཕྱག་ན་རྡོ་རྗེས་དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་དང་མི་འགལ་བར་བྱ་བའི་ཕྱིར་དུས་གསུམ་གྱི་སངས་རྒྱས་ཐམས་ཅད་རིགས་ལྔའི་ངོ་བོར་བཞུགས་པ་ལས། གཞི་འབྲས་ཀྱི་དོན་འདི་ཐེ་ཚོམ་བཅད་དེ་དོན་འདི་ཞུས་སོ། །ཤར་ཕྱོགས་རྡོ་རྗེ་རྣམ་པར་གནོན་པའི་ཞིང་ཁམས་ནས། དེ་བཞིན་གཤེགས་པ་རྡོ་རྗེ་གསང་བ་ཞེས་བྱ་བ་མི་ཕྱེད་འཁོར་དང་བཅས་པ་ལ། འདི་སྐད་ཅེས་གསོལ་ཏོ། །སེམས་ཉིད་རྡོ་རྗེ་ལྟ་བུ་ལ། །སྐྱེ་འགག་འབྱུང་བ་ཇི་ལྟར་ལགས། །ཞེས་གསོལ་པ་དང། དེ་ནས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་རྡོ་རྗེ་གསང་བས་བཀའ་སྩལ་པ། སེམས་ཉིད་མི་འགྱུར་རྡོ་རྗེ་ལ། །སྐྱེ་དང་འགག་པ་ཡོད་མ་ཡིན། །རྣམ་རྟོག་བློ་ལ་སྐྱེ་འགག་བྱུང།
ཞེས་གསུངས་སོ། །དེ་ནས་ལྷོ་ཕྱོགས་ལོ་གའི་ཁམས་རཏྣ་སྣང་བ་ཞེས་བྱ་བ་ན། དེ་བཞིན་གཤེགས་པ་རཏྣ་ཞབས་ཞེས་བྱ་བ། རིན་པོ་ཆེ་རང་འབར་སྣང་བའི་ཁྲི་ལ་བཞུགས་ཏེ། ཉིད་ཀྱི་འཁོར་ལ་གསང་སྔགས་ཀྱི་དེ་ཁོ་ན་ཉིད་སྟོན་ཅིང་བཞུགས་པ་ལས། སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །བྱང་ཆུབ་སེམས་ཀྱི་རང་བཞིན་ལ། །རྒྱུ་རྐྱེན་རྩོལ་བས་མ་བསྒྲུབས་པར། །ཡོན་ཏན་འབྲས་བུ་ཇི་ལྟར་འཆར། །ཞེས་གསོལ་པ་དང། དེ་བཞིན་གཤེགས་པ་རིན་ཆེན་ཞབས་ཀྱིས་བཀའ་སྩལ་པ། དག་ཤ་ཀ་ཡི་རྒྱན་བཞིན་དུ། །རྒྱུ་འབྲས་མཐར་ཕྱིན་ཏེ་ནས་རྫོགས། །ཐམས་ཅད་རང་བཞིན་སྙིང་པོ་མཆོག གསང་བ་ཐམས་ཀྱིས་རྟོགས་གྱུར་ན། །ཉི་མའི་འོད་ལྟར་འབྲས་བུ་འཆར། །ཞེས་གསུངས་སོ། །དེ་ནས་ཡང། ནུབ་ཕྱོགས་པདྨ་བརྩེགས་པ་ཞེས་བྱ་བའི་ཞིང་ཁམས་ན། བཅོམ་ལྡན་འདས་པདྨའི་འོད་ཅེས་བྱ་བ་དྲི་མ་མེད་པདྨའི་གདན་ལ་བཞུགས་ཏེ། ཉིད་ཀྱི་འཁོར་ལ་གསང་སྔགས་ཀྱི་དེ་ཁོ་ན་ཉིད་སྟོན་ཅིང་བཞུགས་ཏེ། སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །སེམས་ཉིད་པདྨ་ལྟར་དག་ལ། གཟུང་འཛིན་དྲི་མ་ཇི་ལྟར་བྱུང་།ཞེས་གསོལ་པས། བཅོམ་ལྡན་འདས་པདྨའི་འོད་ཀྱིས་འདི་སྐད་བཀའ་སྩལ་པ། པདྨ་འདམ་ན་གནས་བཞིན་དུ། །འདམ་གྱི་སྐྱོན་གྱིས་འགོས་པ་མེད། །བྱང་ཆུབ་སེམས་ཀྱི་ངོ་བོ་ནི། །འཁོར་བའི་རྟོག་པར་མི་འགྱུར་ཏེ། །རྣམ་རྟོག་བློ་ལས་འཁོར་བ་བྱུང། །འཁོར་བའི་རྟོག་པར་མི་འགྱུར་ཏེ། །རྣམ་རྟོག་བློ་ལས་འཁོར་བ་བྱུང། །ཞེས་གསུངས་སོ། །དེ་ནས་བྱང་ཕྱོགས་རྣམ་དག་གྲུབ་པ་ཞེས་བྱ་བའི་འཇིག་རྟེན་ན། དེ་བཞིན་གཤེགས་པ་གྲུབ་པར་སྣང་བ་ཞེས་བྱ་བ་གདན་ལ་བཞུགས་ཏེ། ཉིད་ཀྱི་འཁོར་ལ་གསང་སྔགས་ཀྱི་དེ་ཁོ་
ན་ཉིད་སྟོན་ཅིང་བཞུགས་པ་ལ། སེམས་དཔའ་རྡོ་རྗེས་འདི་སྐད་ཅེས་གསོལ་ཏོ། །རྩོལ་མེད་སེམས་ཀྱི་རང་བཞིན་ལ། །འགྲོ་དོན་མཛད་པ་ཇི་ལྟར་འབྱུང། །ཞེས་གསོལ་བ་དང། དེ་བཞིན་གཤེགས་པ་གྲུབ་པར་སྣང་བས་བཀའ་སྩལ་པ། རང་བྱུང་ཡེ་ཤེས་རྟོགས་གྱུར་ན། །མཛད་པའི་བྱིན་བརླབས་རང་ལ་འཆར། །ཞེས་གསུངས་སོ། །དེ་ནས་དབུས་ཕྱོགས་མཐའ་དང་བྲལ་བའི་ཞིང་ཁམས། དེ་བཞིན་གཤེགས་པ་རྣམ་པར་སྣང་མཛད་ཀྱིས། ཕྱག་ན་རྡོ་རྗེ་མདུན་དུ་འཁོད་མ་ཐག །སྟོན་པས་མདུན་བསུས་ཏེ་གསུངས་པ། འདུས་པའི་འཁོར་ཚོགས་ཁྱེད་ཀྱིས་ནི། །རྒྱལ་བ་ཀུན་གྱི་ཐུགས་ཀྱི་བཅུད། །ཡེ་ཤེས་གསང་དོན་ཁྱེད་ཀྱིས་ནི། །རྒྱལ་བ་ཀུན་གྱི་ཐུགས་ཀྱི་བཅུད། །ཡེ་ཤེས་གསང་དོན་རྟོགས་པར་གྱིས། །ཞེས་གསུངས་པ་དང། ཕྱག་ན་རྡོ་རྗེ་ཉིད་རང་གི་སྟན་ལས་ལངས་ཏེ། དེ་བཞིན་གཤེགས་པ་རྣམ་པར་སྣང་མཛད་ལ་འདི་སྐད་ཅེས་ཞུས་སོ། །ཁྱེད་ནི་གསུང་གི་སེདྒེ་སྟེ། །ཡེ་ཤེས་གསང་བ་བསྟན་དུ་གསོལ། །ཞེས་ཞུས་པས། རྣམ་པར་སྣང་མཛད་ཀྱིས་བཀའ་སྩལ་པ། སེམས་དཔའ་རྡོ་རྗེ་དེ་ཉོན་ཅིག །ཡེ་སེས་གསང་བའི་རང་བཞིན་ནི། །སངས་རྒྱས་སེམས་ཅན་གཉིས་སུ་མེད། །ནམ་མཁའ་བཞིན་དུ་ཀུན་ལ་ཁྱབ། །མ་རིག་ཡེ་ཤེས་ཐ་དད་མེད། །མ་རྟོགས་རྟོགས་པའི་ལམ་དུ་གཅིག །ཡེས་ཤེས་གསང་བའི་མཚན་ཉིད་ནི། །རང་རིག་འོད་གསལ་རྣམ་པར་པར་དག །རྣམ་རྟོག་ཡེ་ཤེས་ཉིད་དུ་གནས། གཞི་བཞག་རག་ལུགས་རིན་ཆེན་མཛོད། །རང་བྱུང་མ་བཙལ་གདོད་ནས་དག །ཡེ་ཤེས་གསང་བའི་རྣམ་པ་ནི། སྣ་ཚོགས་སྣང་ལ་ངོས་བཟུང་མེད། །མི་དམིགས་སྒྱུ་མ་ལྷུན་གྲུབ་ནི། །རྟག་ཏུ་གསལ་ན་ལྟ་བ་ཡིན། །ཞེས་གསུངས་སོ། །
དེ་བཞིན་དུ་རྨད་བྱུང་བསྟན་པའི་སྙིག་པོ་རྩོལ་མེད་ཨ་ཏི་རང་བྱུང་གིས་དགོངས་པ། རྒྱུ་འབྲས་ལས་འདས་པའི་ཆོས། ཨ་ཏི་ཡོ་གའི་ཆོས་རྣམས་བྷུ་དྡྷ་ཐམས་ཅད་ལ་དགོངས་པའི་བཅུད་བླངས་ནས། སུམ་བཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟང་གི་དབུ་རྩེ་སྲོག་ཤིང་གི་རྡོ་རྗེ་དགུ་པ་དང་བཅས་པའི་འབུར་ཁང་ན། ལྷའི་བུ་སེམས་ལྷག་ཅན་ཡོད་པའི་དྲུང་དུ་བྱོན། དེར་སྲོག་ཤིང་རྡོ་རྗེ་རྩེ་དགུ་པའི་སྟེང་དུ། རིན་པོ་ཆེ་འབར་བའི་ཁྲི་བཤམས་རཏྣ་ཚོགས་ལས་གྲུབ་པའི་གདུགས་ཕུབ། །དེར་ཕྱག་ན་རྡོ་རྗེ་བཞུགས་ནས་སེམས་ལྷག་ཅན་ལ་རྒྱལ་ཐབས་སྤྱི་བླུགས་རྫོགས་པའི་དབང་བསྐུར་ནས། མན་ངག་འཕྲུལ་གྱི་ལུང་བཅུ་ཕོག་ལྷུན་གྲུབ་གསུམ་གྱི་དབང་བསྐུར་ནས་སྐུ་གསུམ་ཐུགས་ཕྲད་ཀྱི་མན་ངག་བྱིན། ཐིག་ལེ་ཆེན་པོའི་དབང་བསྐུར་ནས་སེམས་ཉིད་འགྱུར་མེད་ཀྱི་མན་ངག་བྱིན། མི་འགྱུར་བརྟན་པའི་དབང་བསྐུར་ནས། སྤྱོད་ལམ་རིག་པའི་མན་ངག་བྱིན། རིག་པ་སྤྱི་བླུགས་ཀྱི་དབང་བསྐུར་ནས། ཡེ་ཤེས་ངོས་འཛིན་གྱི་མན་ངག་བྱིན། གཉིས་མེད་འདྲེས་པའི་དབང་བསྐུར་ནས། ཕྱག་རྒྱ་ཆེན་པོའི་མན་ངག་བྱིན། རྡོ་རྗེ་ལུང་གི་དབང་བསྐུར་ནས། རྒྱལ་ཚབ་སྒོམ་པའི་མན་ངག་བྱིན། གཞན་ཡང་དབང་དང་མན་ངག་རྒྱུད་སྡེ་མང་པོ་དུས་མཐའི་སྐད་ཅིག་ལ་རྫོགས་པར་གཏད་ནས་རྒྱལ་ཚབ་ཏུ་དབང་བསྐུར་རོ། །དེ་ཡང། རྨད་བྱུང་བསྟན་པའི་སྙིང་པོ་འདི། །ལྷ་གནས་གསུམ་དུ་གྲགས་གྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་བྱོས། །ཞེས་གསུངས་ཏེ། བསྟན་པ་ལྷ་གནས་གསུམ་དུ་རྒྱས་པར་མཛད་དོ། །
དེ་ནས་རྩོལ་མེད་ཀྱི་བསྟན་པ་མི་ཡུལ་དུ་བྱུང་བའི་ལོ་རྒྱུས་ནི། སྙིཊ་མ་རྩོད་ལྡན་གྱི་དུས་འདིར་ཤཱཀྱ་ཐུབ་པ་བྱོན་ཏེ། དེ་ལ་སྐུ་ཡིས་འདུལ་བ། གསང་གིས་འདུལ་བ། ཐུགས་ཀྱིས་འདུལ་བ་ལས། སྐུ་ནི་བཅོམ་ལྡན་འདས་ཉིད་བཞུགས་པའི་དུས་ཉིད་ལ། གསུང་ནི་ཀུན་དགའ་བོ་ལ་སོགས་པས་ཚིག་དང་ཡི་གེར་བྲིས་པ་ཡིན་ལ། ཐུགས་ནི་སྟོན་པ་ཡོངས་སུ་མྱ་ངན་ལས་འདས་ནས་ལོ་བརྒྱ་ལཧག་ཙམ་ན་རྩོལ་མེད་ཨ་ཏི་ཡོ་གའི་བསྟན་པ་བྱུང་བར་མངོན་ཏེ། དེ་ཉིད་ཅིའི་ཕྱིར་ཞེ་ན། སྤྲུལ་པའི་སྟོན་པ་དགའ་རབ་རྡོ་རྗེ་མ་བྱོན་པའི་སྔོན་རོལ་ཏུ་མན་ངག་རྫོགས་པ་ཆེན་པའི་ཆོས་ཀྱང་མིའི་ཡུལ་དུ་བྱུང་བ་མེད་ལ། སློབ་དཔོན་དགའ་རབ་རྡོ་རྗེའི་ཡུལ་ཡང་རྒྱལ་པོ་དྷརམའཨ་ཤོ་ཀའི་སྲས་མོ་ཡིན་ཞིང། རྒྱལ་པོ་དྷརམའཨ་ཤཽ་ཀ་ནི་སྟོན་པ་འདས་ནས་ལོ་བརྒྱ་དང་བཅུ་ན། རྒུར་པོ་དང། ཞི་ལྡན་ལ་སོགས་པ་དགྲ་བཅོམཔ་བདུན་བརྒྱ་ཚོགས་ནས་བཀའ་བསྡུ་བ་གཉིས་པ་མཛད། དུས་དེར་ཆོས་ཐམས་ཅད་ཚིག་དང་ཡི་གེར་ཡང་བཀོད་པ་ཡིན་ལ། དེ་དག་གི་ཡོན་བདག་རྒྱལཻཾ་་དེས་མཛད་པ་ཡིན་པའི་ཕྱིར་དང། མདོ་སྡེ་ལས་ཀྱང། རྒྱལ་པོ་འདི་ནི་ཆོས་རྒྱལ་མྱ་ངན་མེད་ཅེས་བྱ་བ་སྟོན་པ་འདས་ནས་ལོ་བརྒྱ་ནས་འབྱུང་བར། མཛངས་བླུན་དང། སྙིང་རྗེ་པདྨ་དཀར་པོའི་མདོ་གཉིས་ལས་ལུང་བསྟན་པའི་ཕྱིར་རོ། །དེ་ཡང། སློབ་དཔོན་དགའ་རབ་རྡོ་རྗེ་ཇི་ལྟར་བྱོན་པའི་ཚུལ་ནི། རྒྱ་གར་ནུབ་ཕྱོཊ་ཨུ་རྒྱན་གྱི་ཡུལ་དྷ་ན་ཀོ་ཤའི་སྦྱིན་པའི་མཛོ་གླིང། མཚོ་ཀུ་ཀྲའི་འགྲམ། རྡོ་རྗེ་གླིང་ཕུག་གི་གི་གནས་སུ་ཡོན་ཏན་ལག་ན་འཆར་བའི་རིཊ། ཡབ་རྒྱལ་པོ་དྷ་ཧེ་ན་ཏ་ལོ་ཡིན། སྲས་ཐུ་བོ་རཱ་ཛ་ཧ་ཧི་ཏི་ཡིན། རྒྱལ་པོ་
ལ་སྲས་མོ་པར་ནི་ཞེས་བྱ་བ་ཤིན་ཏུ་མཚན་དང་ལྡན་པ། དགེ་བའི་སེམས་དང་བྱང་ཆུབ་ཀྱི་སེམས་ལྷག་པར་ཆེ་བ་སྐྱོན་བྲལ་གཡོ་སྒྱུ་སྤངས་ཏེ། རབ་ཏུ་བྱུང་ནས་དགེ་སློང་མའི་ཁྲིམས་རྣམ་པར་དག་པ་བསྲུངས་བ། འཁོར་སྐྱེས་པ་ཕོ་སྤངས་ཏེ། དགེ་སློང་མ་ལྔ་བརྒྱས་བསྐོར་ཏེ་གནས་པ་ལས། ཤིང་མོ་གླང་གི་ལོ་དབྱར་ཟླ་ར་བའི་ཚེས་བརྒྱད་ཐོ་རངས་ཀྱི་རྨི་ལམ་ན། དེ་བཞིན་གཤེགས་པ་ཐམས་ཅད་ལས་འོད་ཟེར་འཕྲོས་ཏེ་ཉི་ཟླ་གཉིས་སུ་འགྱུར་ནས། ཉི་མ་སྤྱི་བོ་ནས་མར་ཐིམ་ཞིང། ཟླ་བ་རྐང་མཐིལ་ནས་ཡར་ཐིམ་པ་རྨིས་སོ། །ནང་པར་རྟོགས་པ་སྐྱེས་ཏེ། མཚོ་ཀུ་ཏྲའི་འགྲམ་དུ་ཁྲུས་བྱས་ཏེ་ཁ་ཤར་དུ་བལྟས་ནས་ཡོད་པ་ལ། ཕྱག་ན་རྡོ་རྗེས་བྱ་ཡི་རྒྱལ་པོ་གསེར་གྱི་ངང་པ་གཅིག་ཏུ་སྤྲུལ་ནས། སེམས་ལྷག་ཅན་ཡི་གེ་ཧཱུཾ་གཅིག་ཏུ་བསྡུས་ཏེ་སྤྲུལ་པའི་བྱང་ངང་པ་བཞི་དང་བཅས་ཏེ་བྱ་ལྔ་པོ་ནམ་མཁའ་ལས་བབས་ཏེ་ཁྲུས་བྱས་སྤྲུལ་པ་བཞི་ནམ་མཁའ་ལ་འཕུར། གསང་བདག་སྤྲུལ་པའི་བྱ་སྲས་མོའི་ཐུགས་ཀར་ཆགས་ཏེ། མཆུ་ལན་གསུམ་དུ་གཏུགས་ནས་ཧཱུཾ་འོད་འརབ་བ་གཅིག་བསྟིམས་ཏེ་འཕུར་ནས་སོང་ངོ་། །དེར་སྲས་མོ་ཡ་མཚན་སྐྱེས་ཏེ། ཡབ་དང་འཁོར་རྣམས་ལ་རྨི་ལམ་དང། བྱ་ངང་པའི་ལོ་རྒྱུས་བསྙད་པས། ཡབ་ཡ་མཚན་ནས་དགྱེས་ཏེ། སངས་རྒྱས་ཀྱི་སྤྲུལ་པ་ཞིག་འབྱུང་ངེས་གསུངས་ནས་བྱ་དགའ་དང་རིམ་གྲོ་ཡང་མང་དུ་མཛད་དོ། །ལོ་དུས་ནས་སྲས་མོའི་ཐུག་ཀ་ནས་རིན་པོ་ཆེ་སྣ་ཚོགས་ལས་གྲུབ་པའི་རྡོ་རྗེ་རྩེ་དགུ་པ་ཞིག་བྱུང་བ་ལས་ཐམས་ཅད་ཡ་མཚན་དུ་གྱུ་ཏོ། །དེར་རྡོ་རྗེ་དེ་རང་ཞིག་པ་ལས་ཁྱེའུ་ཆུང་མཚན་དཔེས་བརྒྱན་པ་ཕྱག་གཡས་པ་ན་རྡོ་རྗེ་ཐོགས་པ། གཡོན་པ་
ན་རཏྣའི་ཕྱག་ཤིང་ཐོགས་པ། རྡོ་རྗེ་སེམས་དཔའ་ནམ་མཁའ་ཆེ་ལ་སོགས་པའི་ཞལ་ཏོན་འདོན་དུ་མཛད་པ་ཞིག་བྱུང་ངོ་། །དེར་ཐམས་ཅད་དགྱེས་ཏེ་བྲམ་ཟེ་མཚན་མཁན་ལ་མཚན་བསྟན་པས་བྲམ་ཟེ་ཤིན་ཏུ་ངོ་མཚར་ཏེ། སྤྲུལ་པའི་སྐུ་ཐེག་པ་མཆོག་གི་བསྟན་པའི་བདག་པོ་ཞིག་འབྱུང་བར་འདུག་གོ་གསུངས་ཏེ། མཚན་ཡང་དགའ་རབ་རྡོ་རྗེར་བཏགས་སོ། །དེ་གཞོན་ནུ་ནས་རོལ་རྩེད་ལ་སོགས་པ་ཐམས་ཅད་མཆོག་ཏུ་གྱུར་པ། མཛད་པ་ཐམས་ཅད་རྫོགས་ཏེ་རྒྱལ་སྲིད་བཟུང་བ་ལ། དེར་ཕྱག་ན་རྡོ་རྗེ་སྐུ་མངོན་སུམ་དུ་བྱོན་ནས། རྒྱལ་ཐབས་སྤྱི་བླུགས་ལ་སོགས་པའི་དབང་རྣམས་རྫོགས་པར་བསྐུར། ལྷོ་ནུབ་འདམ་ཤོད་གླིང་གི་དུར་ཁྲོད་ནས། པུ་ཏྲ་རྣམ་པ་གསུམ་བཀུག་དབང་བསྐུར་དམ་ལ་བཏགས་ནས། ཀློང་དགུ་བམ་པོ་ཉིས་ཁྲི་ལ་སོགས་པ་རྒྱུད། དབང༌། མན་ངག་ལ་སོགས་དུས་མཐའི་སྐད་ཅིག་ཉིད་ལ་རྫོགས་པར་གཏད་དོ། །དགའ་རབ་ཉིད་བསྟན་པའི་སྒྲོན་མེར་དབང་བསྐུར། དམ་ཅན་རྣམས་ནི་རྣལ་འབྱོར་གྱི་གྲོགས་མཛད་ཅིང་བསྟནཔ་བསྲུང་བར་གཉེར་གཏད་དོ། །དེར་སྤྲུལ་པའི་སྐུ་དགའ་རབ་རྡོ་རྗེ་ཉིད་དུས་མཐའི་སྐད་ཅིག་ཉིད་ལ་རྩོལ་མེད་རྫོཊ་པ་ཆེན་པོའི་ས་ལ་མངོན་པར་རྫོགས་པར་སངས་རྒྱས་ཏེ། དུས་གསུམ་གྱི་སངས་རྒྱས་ཐམས་ཅད་དང་དགོངས་པ་གཅིག་ཏུ་གྱུར་ནས། སྤྱིར་རྒྱུ་འབྲས་ཀྱི་བསྟན་པ་ཐམས་ཅད་ལྷག་མ་མེད་པར་ཐུགས་སུ་ཆུད། ཁྱད་པར་དུ་རྩོལ་མེད་རྫོགས་ཅད་ལྷག་མེད་པར་ཐུགས་སུ་ཆུད། ཀུན་བཟང་གིས་གསུངས་པ་ཀློང་དགུ་བམ་པོ་ཉིས་ཁྲི། ཡན་ལག་གི་རྒྱུད་རྒྱལ་བ་རིགས་ལྔ་དང་གསང་བདག་གིས་གསུངས་པ། བཤད་པའི་རྒྱུད་དང་ཡན་ལག་
སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བ་ཡོད་ཀྱི། དེ་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ། རྩོལ་བ་མེད་པར་སྐད་ཅིག་ལ་སངས་རྒྱ་བ་ཡོད་པས། དེ་ལོང་ལ་སྤྲུལ་པའི་སྡུད་པ་པོ་གྱིས་ཤིག་པར་ལུང་བསྟན་ནོ། ། །པཎྜི་ཏ་གཞན་རྣམས་ནི་རྒྱུ་འབྲས་ཀྱི་ཆོས་འདི་ལས་ལྷག་པ་ཡོད་དོ་ཞེས་ཟེར་བ་ནི་ཤིན་ཏུ་མི་རིགས་པས་སུན་དབྱུང་བར་གྲོས་སོ། །དེར་བྲམ་ཟེ་སྙིང་པོ་གྲུབ་པས་ཀྱང་མཀྱེན་བཞིན་དུ་སྤྲུལ་པའི་བ་འདོན་པའི་ཕྱིར་སུན་དབྱུང་དུ་འགྲོ་བགྲོས་སོ། །དེ་ནས་པཎྜི་ཏ་རྣམས་ཀྱིས་སུ་འགྲོ་ཞེས་བཀའ་བགྲོས་པས། ཨུ་རྒྱན་གྱི་ཡུལ་ཐག་རིང་པ་དང་བགྲོད་པར་དཀའ་བས། གཞན་རྣམས་ཀྱིས་མི་བགྲོད་པས་སྙིང་པོ་གྲུབ་པ་དང། ཐུ་བོ་རཱ་ཛ་ཧས་ཏི་ལ་སོགས་པ་བདུན་བཏག་ངོ་། །བདུན་པོས་རྡོ་རྗེ་གླིང་ཕུག་ཏུ་ཕྱིན་ནས་སྤྲུལ་པའི་སྐུ་དགའ་རབ་རྡོ་རྗེ་དང་མཇལ་ཏེ། ཉམས་སད་པའི་ཕྱིར་དུ་རྒྱུ་འབྲས་ཀྱི་ཐེག་པའི་ཆེ་བ་བརྗོད་དེ་ཆོས་ཀྱི་བགྲོ་བ་གྱ་པས། དང་པོར་རྒྱུའི་ཆོས་སྡེ་སྣོད་གསུམ་ལ་བགྲོ་པར་བྱས་པས་ཀྱང་དགའ་རབ་མ་ཐུབ། འབྲས་བུའི་ཆོས་སྔགས་ཕྱི་ནང་གཉིས་ལ་བགྲོ་བ་བྱས་ཀྱང་མ་ཐུབ། དེར་པཎྜི་ཏ་རྣམས་ཀྱིས་རྒྱུ་འབྲས་ཀྱི་ཐེག་པའི་ཕྱོགས་བཟུང། སྤྲུལ་པའི་དགའ་རབ་རྡོ་རྗེ་རྒྱུ་འབྲས་ལས་འདས་པ་ཨ་ཏིའི་ཕྱོགས་བཟུང་ནས་ཆོས་ཀྱི་བགྲོ་བ་མཛད་པས། པཎྜི་ཏ་བདུན་གྱིས་མ་ཐུབ་སྟེ། བདེ་མཆོག་སྙིང་པོ་ནི་མཁྱེན་བཞིན་དུ་སྤྲུལ་པའ་སྐུ་དགའ་རབ་རྡོ་རྗེ་ལ་རྒྱུ་འབྲས་ལས་འདས་པའི་ཆོས་ཤིག་ཞུའམ་མི་ཞུ་ཞེས་པཎྜི་ཏ་གཞན་རྣམས་ལ་གྲོས་བྱེད་པའི་ཚུལ་བསྟན་ནོ། །པཎྜི་ཏ་ལ་ལ་ནི་འོ་ཅག་རྣམས་ནི་ཉེས་པར་གྱུར་ཏོ་ཟེར། ཐུ་བོ་རཱ་ཛ་ཧས་ཏི་ལ་སོགས་
ནི་ཞུ་བར་དགོངས་ཀྱང། འོ་ཅག་རྣམས་ཀྱིས་བརྙས་པ་བྱས་པས་ཞུ་བར་མི་སྤོབས་ཟེར་རོ། །དེར་སྤྲུལ་པའི་སྐུ་དགའ་རབ་ལ་བདེ་མཆོག་ཤིང་པོ་ལ་སོགས་པས་བཤགས་པ་བྱ་བར་གྲོས་བྱས་ཏེ། ལ་ལས་ཕྱག་དང་བསྐོར་བ་བྱས། ལ་ལས་དུས་ནས་མཆི་མ་ཕྱུང། འཇམ་དཔལ་བཤེས་གཉེན་གྱིས་ཕྱག་བཙལ་མཆི་མ་ཕྱུང་སྟེ། རང་གི་ལྕེ་བཅད་ལ་བཤགས་པ་བྱ་བར་དགོངས་ལ། སྤྲུལ་པའི་སྐུ་དགའ་རབ་ཀྱིས་མཁྱེན་ཏེ། ཚངས་པའི་དབྱངས་སུ་ཚིག་འདི་སྐད་གསུངས་སོ། །ཨེ་མ་ཧོ། མཉམ་ཉིད་ཕྱོགས་བྲལ་ལྷུན་རྫོགས་བདེ་བ་ཆེ། །ཆོས་རྣམས་ཐམས་ཅད་བྱང་ཆུབ་སྙིང་པོ་ལ། །འགྲོ་དྲུག་རང་ལ་ཡུལ་ཟུང་ཞེན་པས་བཅིངས། །མུ་སྟེགས་མཐར་འཛིན་རྟག་ཆད་ལོག་པར་ཞུགས། །ཐེག་བརྒྱད་རང་ལ་གཉིས་བཟུང་ཡིན་མིན་གྱི། །ཞེན་འདོད་ཕྱོགས་རིས་རང་འདོད་དབྱིངས་ལ་ཞེན། །མཉམ་པའི་དོན་ལ་ཕྱོགས་དང་རིས་སུ་བཅད། །རང་ལ་ཡོད་བཞག་མེད་པ་གཞཉ་དུ་འཚོལ། །ལྷུན་གནས་བདེ་བར་རྩོལ་བ་དང་དུ་ལེན། །རང་སེམས་སངས་རྒྱས་ནམ་ཞིག་དུས་ལ་ལྟོས། །མཉམ་ཉིད་མ་རྟོགས་ཞེ་འདོད་ཕྱོགས་ལྟ་ལ། །འདི་ཡིན་ཐང་ཆད་ཡུས་རྒྱལ་སྙིང་རེ་རྗེ། །དེ་བས་ཕྱོགས་འཛིན་ཞེན་པའི་རཱ་ཆོག་ལ། །མཉམ་ཉིད་ཕྱོགས་བྲལ་བདེ་བའི་ལམ་ལ་ཞུགས། །ཞེས་གསུངས་ནས། སྙིང་པོ་གྲུབ་པ་ལ་ཁྱོད་ཀྱི་ལྕེ་བཅད་པས་སྡིག་པ་མི་འདག་པས། རྒྱུ་འབྲས་ཀྱི་ཆོས་ལས་ཁྱད་པར་དུ་འཕགས་པའི་ཆོས་རྩོམས་ཤིག དེས་འདག་པར་འགྱུར་རོ། །ཞེས་གསུངས་སོ། །དེར་ལས་དང་སྐལ་བར་མི་ལྡན་པ་དག་ནི་ལོག་གོ །འཇམ་དཔལ་བཤེས་གཉེན་ནི་བརྡའ་བསྟན་པ་ཙམ་ལ་སྐད་ཅིག་མ་ལ་
རྟོགས་པ་ཁོང་དུ་ཆུད་དོ། །དེར་རྟོགས་པ་ཁོང་དུ་ཆུད་ཀྱང། བསྟན་པ་ཡོངས་སུ་རྫོགས་པར་བྱ་བའི་ཕྱིར་རྒྱལ་ཐབས་སྤྱི་བླུགས་ཀྱི་དབག་བསྐུར། ཀློང་དགུ་བམ་པོ་ཉིས་ཁྲི་ལ་སོགས་པ་རྒྱུད་དང་མན་ངག་ཐམས་ཅད་རྫོཊ་པར་གཏད་ནས། འཇམ་དཔལ་བཤེས་གཉེན་ཞེས་བྱ་བར་མིང་མཏགས་སོ། །དེར་དགའ་རབ་ཀྱིས་དོན་ནས་ཚངས་པའི་དབྱངས་སུ་གསུངས་པ། སེམས་ཀྱི་རང་བཞིན་ཡེ་ནས་སངས་རྒྱས་ཏེ། །ཞེས་གདམས་སོ། །དེར་འཇམ་དཔལ་བཤེས་གཉེན་གྱིས་རྟོགས་པའི་དོན་དུ་ཁོང་དུ་ཆུད། བསྟན་པའི་སྙིང་པོ་རྫོགས་ནས་རྟོགས་པ་བརྗོད་པ། བདག་ནི་འཇམ་དཔལ་བཤེས་གཉེན་ཏེ། གཤིན་རྗེའི་གཤེད་ཀྱི་དངོས་གྲུབ་ཐོབ། །འཁོར་འདས་མཉམ་པ་ཆེན་པོར་རྟོགས། །ཐམས་ཅད་མཁྱེན་པའི་ཡེ་ཤེས་ཤར། །ཞེས་གསུངས་ནས། བྱང་སེམས་རྡོ་རྗེ་ལ་གསེར་ཞུན་བཤགས་པར་བརྩམས་ཏེ་སྡུད་པ་པོ་མཛད། རྒྱལ་པོ་དྷ་ཧེ་ན་ཏ་ལོ་དང། སྲས་ཐུ་བོ་རཱ་ཛ་ཧས་ཏི་དང། སྲས་མོ་པ་ར་ནི་དང། ཀླུ་རྒྱལ་པོ་དང། གནོད་སྦྱིན་མོ་བྱང་ཆུབ་དང། ཀུ་ཀུ་རཱ་ཛ་སྔ་མ་ལ་སོགས་པ་རྣམས་ནི། དགའ་རབ་རྡོ་རྗེའི་ཞལ་མཐོང་གསུང་ཐོས་ནས་ཉེ་བར་འཁོར་ན་འཁོད་དོ། །འཇམ་དཔལ་བཤེས་གཉེན་དང། རྒྱལ་པོ་དྷ་ཧེ་ན་ལོ་དང། །སངས་རྒྱས་གསང་བ་དང། ཤྲཱི་སིདྷ་དང། པདྨ་འབྱུང་གནས་དང། སྒེག་པ་རྡོ་རྗེ་དང། བཱི་མ་ལ་ཡན་ཆད་དུ་གདུང་རབས་ཉིས་ཤུ་རྩ་ལྔ་ལ་བརྒྱུད་པ་དང། རྩ་གསུམ་ལ་བརྒྱུད་པ་དང། རྩ་གཅིག་ལ་བརྒྱུད་པ་
དང། ཐུགས་སྲས་བདུན་ལ་བརྒྱུད་པ་དང། ལྔ་ལ་བརྒྱུད་པ་དང། གསུམ་ལ་བརྒྱུད་པ་དང། གཅིག་ལ་བརྒྱུད་པ་ལ་སོགས་པ་མང་དུ་ཡོད་ཅིང། གདུང་རབས་ཚོ་ལ་གོ་རིམ་ངེས་པ་མེད་དེ། བརྒྱུད་པའི་བཀའ་བབས་རེ་ལ་བརྒྱུད་ལུགས་རེ་ཡོད་དོ། །དེ་ནས་བོད་དུ་འགྱུར་ནས་ད་ལྟ་ཡན་ཆོད་དུ་སོ་སོ་རང་རང་གི་བརྒྱུད་ཚུལ་མང་དུ་ཡོད་དེ། དེ་དག་ཀྱང་བརྒྱུད་པ་གསུམ་དང་བཤད་ཚུལ་བཞི་ཡིན་ནོ། །དེ་ལ་བརྒྱུད་པ་གསུམ་ནི་རྒྱལ་བ་དགོངས་པའི་བརྒྱུད་པ་དང། རིག་འཛིན་རིག་པའི་བརྒྱུད་པ། གང་ཟག་སྙན་ཁུང་གི་བརྒྱུད་པའོ། །དེ་དག་གི་བཤད་སྲོལ་གསུམ་ནི། བྱིན་གྱིས་བརླབས་ཀྱིས་བཤད་པ་དང། རང་གི་ངོ་བོས་བཤད་པ་དང། ཚིག་སྡེབ་སྦྱོར་ལེགས་པས་བཤད་པ་དང་གསུམ་ལས། བྱིན་གྱིས་བརླབས་ཀྱིས་བརྒྱུད་པ། བརྡའི་བརྒྱུད་པ། དོན་གྱི་བརྒྱུད་པ། ཚིག་གི་བརྒྱུད་པ་དང་བཞི་ཡིན་ཅིང། དེ་ལྟར་བརྒྱུད་པ་བཞི་ལྡན་གྱིས་བབས་ཏེ། ད་ལྟ་ཡན་ཆད་དུ་ཟམ་མ་ཆད་པར་ཆུ་བོའི་གཞུང་དང་འདྲ་བ་ཡིན་ནོ། །དེ་ཡན་ཆད་ནི་རྒྱ་གར་གྱིབརྒྱུད་ཚུལ་ལམ། བབས་ལུགས་ཟུར་ཙམ་སྨོས་པ་ཡིན་ནོ། །