cover

ཀློང་ཆེན་པའི་གསུང་འབུམ། བ༽

གླེགས་བམ་བཅོ་ལྔ་པ།

ཀུན་མཁྱེན་ཀློང་ཆེན་རབས་འབྱམས་དྲི་མེད་འོད་ཟེར།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

པདྨ་ལས་འབྲེལ་རྩལ་གྱི་སྐྱེས་རབས་དང་༔ ལུང་བསྟན།

༄༅༔ པདྨ་ལས་འབྲེལ་རྩལ་གྱི་སྐྱེས་རབས་དང་༔ ལུང་བསྟན་བཞུགས་ལགས་པས་གཟིགས་པར་ཞུའོ༔༄༅༔ སློབ་དཔོན་པདྨ་འབྱུང་གནས་ལ་ཕྱག་འཚལ་ལོ༔ རྒྱལ་པོ་ཁྲི་སྲོང་ལྡེའུ་བཙན་གྱིས༔ གླང་གི་ལོ་ལ་བསམ་ཡས་བཞེངས་པའི་སེམས་སྐྱེས་ཏེ༔ གཡའ་རི་གོང་གི་བྲག་ཕུག་ནས་སློབ་དཔོན་པདྨ་སྤྱན་དྲངས་ཏེ་ས་གཞི་བྱིན་གྱིས་བརླབས་ཏེ༔ འབྲུག་ལོ་ལ་འབྱོངས་ཏེ་སློབ་དཔོན་དང་རྒྱལ་པོ་ཡབ་ཡུམ་སྲས་དང་བཅས་པས་མཆིམས་ཕུར་ཚོགས་འཁོར་བརྒྱ་རྩ་བརྒྱད་མཛད་པའི་དུས་སུ༔ རྒྱལ་པོའི་སྲས་མོ་ལྷ་གཅིག་པདྨ་གསལ་བྱ་བ༔ དགུང་ལོ་བརྒྱད་ལོན་པ་གཅིག་མཆིམས་ཕུར་ཤི་བས༔ རྒྱལ་པོ་ཤིན་ཏུ་ཐུགས་མ་བདེ་སྟེ་ལྷ་གཅིག་གི་རོ་ལ་སྤྱན་གཟིགས་ཤིང་བཤུམས་སོ༔ དོག་ས་ལ་འགྱེལ་ཏེ་བརྒྱལ་ལོ༔ དེར་མཚོ་རྒྱལ་གྱིས་རྒྱལ་པོའི་དབུ་དར་དཀར་གྱི་སླེའུས་བསླངས་ཏེ༔ ཐུགས་གསོས་སོ༔ དེར་རྒྱལ་པོ་བརྒྱལ་སངས་པ་དང་༔ སློབ་དཔོན་གྱིས་རྒྱལ་པོ་ལ་བཀའ་བསྩལ་པ༔

ཀྱེ་མ་མངའ་བདག་རྗེ༔ སྤྱིར་འཇིག་རྟེན་གྱི་བྱ་བ་རྨི་ལམ་འདྲ༔ འདུས་བྱས་ཀྱི་མཚན་ཉིད་སྒྱུ་མ་ཡིན༔ རྒྱལ་སྲིད་མདང་གི་རྨི་ལམ་འདྲ༔ ནོར་འབངས་རྩྭ་ཁའི་ཟིལ་པ་འདྲ༔ ཚེ་འདི་མི་རྟག་ཆུ་ཡི་ལྦུ་བ་འདྲ༔ འདུས་བྱས་རྐྱེན་གྱིས་འཇིག་པ་ཡིན༔ འདུས་བྱས་ཐམས་ཅད་འདི་དང་འདྲ༔ རྟག་ཅིང་གནས་པ་གཅིག་ཀྱང་མེད༔ མི་རྟག་རྟག་པར་མ་འཛིན་ཅིག༔ སྐྱེ་མེད་ཆོས་སྐུའི་དོན་ལ་སྦྱོངས༔ ཞེས་གསུངས་སོ༔ དེར་རྒྱལ་པོ་བཞེངས་ཏེ་ཕྱག་དབུ་ཐོད་བུད་བུད་དུ་བཙལ་ལོ༔ གསེར་སྐྱོགས་གཡུ་ཡིས་བཀང་བ་སློབ་དཔོན་ལ་ཕུལ་ནས༔ ཀྱཻ་སློབ་དཔོན་ཆེན་པོ་ལགས༔ འདུས་བྱས་ཀྱི་མཚན་ཉིད་མི་རྟག་ན༔ ངའི་གཙུག་ལག་ཁང་འདི་ཇི་ཙམ་ན་འཇིག༔ སངས་རྒྱས་བསྟན་པ་ནམ་(༡༩༠)འཇིག༔ དམ་ཆོས་གང་གིས་སྣུབ༔ རྐྱེན་གང་གིས་བྱེད༔ ངའི་བུ་མོ་འདི་ཚེའི་དུས་བྱེད་པའི་རྒྱུ་ཅི་ལགས༔ འདིར་ཕ་མ་ལས་ཀྱི་འབྲེལ་བ་ཅི་ལས་བྱུང་༔ ཕྱི་མ་སྐྱེ་བ་གང་དུ་ལེན༔ མཐར་བྱང་ཆུབ་པའི་སྐལ་བ་མཆིས་སམ་ཞེས་ཞུས་པས༔ སློབ་དཔོན་གྱིས་བཀའ་བསྩལ་པ༔

ཀྱཻ་རྒྱལ་པོ་གསོན་ཅིག༔ རྒྱལ་པོའི་གཙུག་ལག་ཁང་འདི་ལ་འཇིག་རལ་མང་དུ་འབྱུང་༔ དྲུག་ཅུ་རྩ་གཅིག་གླང་གི་ལོ་ལ་རྒྱལ་པོ་མི་རྟག་མྱ་ངན་འདའ༔ རྒྱལ་ཁྲིམས་ཧོར་གྱི་དམག་གིས་འཇིག༔ ཐ་མ་དུ་རུ་ཀ་ཡིས་འཛིན༔ སངས་རྒྱས་ཀྱི་བསྟན་པ་ཡུན་དུ་གནས་ཏེ་དར་གུད་མང་དུ་འབྱུང་༔ རྒྱལ་པོའི་གདུང་རྒྱུད་བཅོ་ལྔ་སོང་ཙ་ན༔ སངས་རྒྱས་ཀྱི་བསྟན་པ་ཉམས་དམའ་བར་འགྱུར༔ བསམ་ཡས་མངའ་ཐང་ཉམས༔ བཙུན་པས་ཁྲིམས་མི་ཐུབ༔ སྔགས་པས་དམ་ཚིག་མི་ཐུབ༔ སྡེ་འཁྲུག་ནང་དམེ་བྱེད༔ སྐྱེ་བོས་མནའ་ཟ༔ ཁྲེལ་མེད་ཕ་མ་གསོད༔ བུད་མེད་ཀྱིས་ལུས་མི་ཐུབ༔ ལན་ཆགས་བྱིས་པ་གསོད༔ ཆོས་པ་རྣམས་ཀྱིས་ཆོས་གཞུང་བཞིན་མི་བྱེད༔ བཀའ་ལ་རས་ཆོད་བྱེད་ཅིང་མཆན་ཏིག་ལ་སོགས་པས་བཀའ་འཆལ་དུ་འཇུག༔ སློབ་དཔོན་དམོད་ཅིང་རང་གི་ཆེ་བ་འདོན་ཅིང་དམ་ཚིག་ཆུ་ལ་ཕོ་ནས་ཆོས་ལ་ཐོང་བྱས་ནས་ནོར་དང་ཡིག་སྣ་བསོག༔ འདུལ་ཁྲིམས་མེ་ལ་བསྲེག༔ སེམས་བསྐྱེད་རླུང་ལ་བསྐུར༔ མི་ཚེར་ཆོས་སུ་རློམ་ནས་ང་རྒྱལ་ལམ་ཁྱེར་བྱེད༔ ཏིང་འཛིན་དུ་ཕྲག་དོག་བསྒོམས་ནས་འབད་པ་ནོར་ལ་བྱེད༔ ཆོས་ལོག་དང་བསད་བཅད་ལ་དགའ༔ གྲུབ་ཐོབ་ཚོང་དུས་འགྲིམས༔ སྒོམ་ཆེན་གྲི་འཁྲུག་བྱེད༔ བཙུན་པས་ལུས་སྲུང་མཚོན་ལ་བྱེད༔ མི་དཔོན་སྤྲང་པོས་བྱེད༔ དགེ་བཤེས་ཀྱིས་ཡུལ་གཙོ་བྱེད༔ ལྷར་འགོང་བོ་དར༔ འདྲེ་སྲིན་མཆོད༔ སྨྱོན་པས་བསོད་ནམས་སྡུད༔ གཙོ་བོར་མོ་དང་བོན་ལ་འདུན་མ་གཏོད༔ བྱང་ཆུབ་སེམས་དཔའི་ཐུགས་དཀྲུག་ཅིང་དཀོན་མཆོག་དགྲར་ལེན༔ ནོར་དུམ་རེ་ལ་མནའ་ཟ༔ སྡིག་པ་ལ་སུས་ཐོབ་བྱེད༔ རྗེའི་བཀའ་ལ་འབངས་མི་ཉན༔ དཔོན་ལ་གཡོག་མི་ཉན༔ ཕ་ལ་བུ་མི་ཉན༔ མ་ལ་བུ་མོ་མི་ཉན༔ བློ་རྐུན་དང་ངན་ཤོམ་དང་དུག་སྦྱོར་དར༔ རྒྱལ་རིགས་དམངས་སུ་འབབ༔ (༡༩༡)བརྐུ་གསོད་བརྡེག་ཕྲོག་སྣ་ཚོགས་བྱེད༔ མགོ་མཐོ་ཐབས་ཀྱིས་སྨད༔ ལས་ཀ་སྡིག་ལ་བྱེད༔ ཁྲེལ་མེད་ཕ་མ་གསོད༔ ལོག་འཚོ་སྣ་ཚོགས་དར༔ རིགས་ངན་གྱིས་ཁ་དྲག་རློམ༔ ཆང་ཕོར་རེ་ལ་བལྟས་ནས་གསང་སྔགས་ཁྲོམ་དུ་ཀློག༔ གསེར་ཡ་མ་རེ་ལ་བལྟས་ནས་མགྲོན་པོ་ལ་ཡང་དབང་བསྐུར༔ ནོར་ལ་བལྟས་ནས་ལུང་མེད་ཀྱི་རྫུན་དབང་བསྐུར༔ ལྟ་བ་ཉ་མས་གཏམ༔ བུད་མེད་ཀྱིས་ཆོ་ག་འདོན༔ ཕས་བུ་ལ་ཡང་བློ་མི་ཁེལ་བའི་དུས་ཤིག་འབྱུང་༔ དེའི་དུས་སུ་བདུད་ཀྱི་རྒྱལ་པོ་གཅིག་གིས་ཆོས་པའི་ལུས་བླངས་ནས་བློན་འབངས་རྒྱས་པར་འགྱུར་རོ༔ དེའི་དུས་སུ་ཧོར་དམག་བོད་ན་འབྱུང་ངོ་༔ དེ་འབྱུང་བའི་སྔ་ལྟས་ནི་སད་སེར༔ མུ་གེ་དང་༔ ནད་དང་མཚོན་དང་༔ ས་གཡོས་དང་མི་བདེ་བ་སྣ་ཚོགས་ཀྱིས་སྡུག་བསྔལ་ཏེ༔ དེའི་དུས་སུ་ཕལ་ཆེར་བདུད་དབང་དུ་སོང་སྟེ་ངན་སོང་དུ་ལྟུང་༔ ཆོས་བྱེད་རྣམས་བསོད་ནམས་ཆུང་༔ སྐུ་ཚེ་ཐུང་ལ་བདུད་ཀྱི་དབང་གིས་ཀུན་གྱིས་གཤེ་བ་འབྱུང་༔ སངས་རྒྱས་ཀྱི་བསྟན་པ་ཉམས་དམའ་ཞིང་བོད་འབངས་བོད་ཁྲིམས་ཧོར་གྱིས་འཇིག༔ ལུང་པ་ཁྲག་མཚོར་འགྲོའོ༔ ས་གཞི་ཀེང་རུས་སུ་འགྲོ༔ ལས་ཅན་ཆོས་བྱེད་ཐམས་ཅད་མཐར་འབྲོས་པས་རྒྱལ་པོ་ཉིད་ཀྱང་གཏེར་ཆོས་རྣམས་མཐར་སྦས་ན་འགྲོ་དོན་ཆེ༔ དེ་ཙ་ན་དུས་ངན་པས་བཀའ་མ་རྣམས་བཀའ་འཆལ་ནས་བྱིན་རླབས་ཀྱང་ཆུང་དུ་འགྲོ༔ གྲུབ་པ་ཐོབ་པ་ཡང་ཉུང་༔ དེ་དུས་སུ་གཏེར་མ་འདི་བཀའ་མ་འཕྱུགས་པས་བྱིན་རླབས་ཆེ༔ ལས་ཅན་གཅིག་གིས་གཏེར་སྒོ་ཕྱེ་ནས་མཐར་དར་བར་འགྱུར་རོ་གསུངས་སོ༔ རྒྱལ་པོས་ཡང་སློབ་དཔོན་ལ་ཞུས་པ༔ དེ་ལྟ་བུ་དེ་འོང་བའི་རྒྱུ་དེ་ཅི༔ ལོ་གང་ལ་ཡོང་༔ དེ་རྣམས་བཟློག་པའི་ཐབས་ཞུ་འཚལ་ཞེས་ཞུས་པས༔ སློབ་དཔོན་གྱིས་གསུངས་པ༔

ཀྱཻ་རྒྱལ་པོ་དེ་ཡོང་བ་ནི༔ སྔོན་བཅོམ་ལྡན་འདས་དང་བདུད་ནུས་པ་འགྲན་པའི་དུས་སུ༔ བདུད་ཕམ་པས་བདུད་ཀྱིས་ཤཱཀྱའི་བསྟན་པའི་ཐ་མ་ལ་ངས་ཐམས་ཅད་དབང་དུ་བསྒྱུར་བར་ཤོག་ཅིག་ཅེས་སྨོན་ལམ་བཏབ་པས༔ ད་ལྟ་དུས་ཀྱི་ཐ་མའི་ཚེ༔ ཕལ་ཆེར་བདུད་ཀྱིས་བྱིན་གྱིས་བརླབས་ཀྱིས་ཆོས་དང་ནོར་རྫས་ལ་ཆེ་འགྲན་བྱེད༔ ཕ་སྤུན་དང་ཡུལ་(༡༩༢)འཁྲུག་བྱེད༔ བཙུན་པས་འདུལ་ཁྲིམས་མི་བསྲུང་རྒྱན་ཆ་ལ་དགའ༔ སྔགས་པས་དམ་ཚིག་མི་བསྲུང་བསྙེན་སྒྲུབ་དོར༔ བུད་མེད་ཀྱིས་ལུས་མ་ཐུབ༔ སྐྱེ་བོ་ངོ་ཚ་བྲལ༔ བཙན་པོས་རྒྱལ་ཁྲིམས་མི་སྐྱོང་མི་དགེ་སྐྱོང་༔ ཆོས་མེད་ཆོས་སྐོར་སྐྱོང་ཞིང་རྡོ་རྗེ་ནང་དམེ་བྱེད༔ ཞེ་སྡང་མེ་འབར་འདོད་ཆགས་ཆུ་ལྟར་ཁོལ༔ ཆོས་སྐྱོང་འདྲེར་ལྡང་སྨྱོ་འདྲེ་དར་བའི་དུས༔ བདུད་ཀྱིས་བྱིན་གྱིས་སྔགས་བཙུན་སྲིའུ་གསོ༔ མཁས་བཙུན་འདྲེ་བརྡུང་ལྟ་བ་ཆད་ལྟ་སྟོན༔ གསང་སྔགས་ཁ་ཚིག་ཁྲོམ་དུ་ཀློག་པའི་དུས༔ བདུད་ཀྱི་བསྟན་པ་དར་བའི་དུས་ཚོད་དེར༔ ཧོར་དམག་ལྕགས་ཕོ་ཁྱིའི་ལོ་ལ་གཡུལ་འགོ་འཚོལ༔ ཆུ་ཕོ་རྟ་ལ་རྟ་བཞིན་རྒྱུག༔ མེ་མོ་གླང་ལ་གདུག་རྩུབ་བྱེད༔ ཤིང་མོ་གླང་ལ་ཐང་ཅིག་ཟློག༔ དེ་ནི་བཟློག་ཐབས་ཡུལ་ཁྲིམས་བཟང་པོ་དང་༔ རི་རྒྱ་ཀླུང་རྒྱ་ཆོས་ཁྲིམས་དང་༔ སྲོག་བསླུ་མི་དགེ་ཐ་དག་སྤང་༔ དགེ་བཅུ་སྤྱོད་ཅིང་ཚུལ་ཁྲིམས་སྔགས་ཁྲིམས་བྱ༔ གསུང་རབ་འདོན་ཅིང་གཙུག་ལག་གསོ༔ མཆོད་རྟེན་གསོ་ཞིང་ས་དགྲ་མནན༔ ནོར་གཏེར་མི་འདོན་ས་ལ་གསེར་མི་བརྐོ༔ ཁྲོ་རྒྱལ་སྒྲུབ་པ་བྱ་ཞིང་མ་སྲིང་ལས་ལ་བཀོལ༔ ཚོགས་དང་མཆོད་གཏོར་བྱ་ཞིང་ལྷ་འདྲེ་མདོས་ཀྱིས་བསྐང་༔ ཆོས་ཁྲིམས་ཡུལ་ཁྲིམས་མནའ་ཁྲིམས་བྱ༔ རྨང་ནས་བཟློག་པ་མ་ཡིན་ཏེ༔ ཐེངས་ཅིག་བཟློག་པར་འགྱུར་བ་ཡིན༔ ལར་ལྔ་བརྒྱ་དུས་ཀྱི་ཐ་མ་ལ༔ སྤྱོད་ངན་བྱས་ནས་དུས་ངན་ཟེར༔ ཡུལ་ལ་ཞག་མེད་འཇགས་སྐྱ་འཕྱོ༔ ཚེ་ལ་ལོངས་མེད་སྐར་མདའ་འདྲ༔ ལེགས་པའི་ལེན་ནི་ཉེས་པས་བླན༔ དེ་ཚོ་ཕྱི་དམག་བོད་ཡུལ་འཇོམས༔ མི་རྣམས་མ་ལུས་གསོད་ལས་ཆེ༔ སྡུག་བསྔལ་ཁྲག་མཚོ་རྡོལ་ལས་ཆེ༔ རང་སྡུག་རང་གིས་ཉོ་ལས་ཆེ༔ སྙིང་རེ་རྗེ་སྟེ་བྱ་ཐབས་མེད༔ ཅེས་སོ༔ སློབ་དཔོན་གྱིས་ཡང་གསུངས་པ༔

ཀྱེ་རྒྱལ་པོ་ཆེན་པོ་ཁྱེད་ཀྱི་ལྷ་ལྕམ་འདི་ཚེའི་དུས་བྱེད་པ་ནི༔ སྐྱེ་བ་འདིའི་གོང་དུ་རྒྱ་གར་གྱི་ཡུལ་དུ་ཀ་མ་ཀྲི་ཏིའི་གྲོང་ཁྱེར་དུ༔ རྒྱལ་པོ་འབོ་ལ་ཀུ་ཏྲའི་བཙུན་མོར་སྐྱེས་ཏེ༔ བཙུན་མོ་གཉིས་ཡོད་པ་ལས་མོ་ལ་བུ་མེད་གཞན་དེ་ལ་བུ་ཡོད་པས༔ ཕྲག་དོག་བྱས་ནས་བསད་(༡༩༣)པའི་རྣམ་སྨིན་གྱིས་འདིར་ཚེ་མཐར་མ་ཕྱིན་པར་ཚེའི་དུས་བྱས་པ་ཡིན་ནོ༔ འདིར་ལས་ཀྱི་འབྲེལ་བ་ནི་སྐྱེ་བ་འདིའི་ཡང་སྔ་ལ་པདྨ་བདག་དང་མངའ་བདག་རྒྱལ་པོ་དང་༔ བོ་དྷི་ས་ཏྭ་དང་འོ་སྐོལ་གསུམ་གྱིས་མ་གུ་ཏའི་ཡུལ་དུ་མཆོད་རྟེན་བཞེངས་ཏེ་སྨོན་ལམ་བཏབ་པ་དེ་སྦྲང་བུ་ཏྲེ་མའི་ལུས་སུ་ཡོད་པ་དེས་ཐོས་པ་ལས་བྱུང་བའོ༔ ཕྱི་མ་ནི་ལོ་སྟོང་དུ་དུཿཁ་སྤྱོད་དེ་བཤད་ན་རྒྱལ་པོ་ཐུགས་ཁྲེལ་དུ་འགྲོ་གསུང་༔ རྒྱལ་པོ་དགྱེས་པའི་དོན་དུ་བཤད་ན་ལྷ་ལྕམ་འདི་ནི་སྐྱེ་བ་བདུན་གྱི་གོང་དུ་རྒྱ་གར་གྱི་ཡུལ་ཀོ་ཏའི་གཙུག་ལག་ཁང་དུ་བྲམ་ཟེའི་བུ་བྱ་ཏ་ལ་ཞེས་བྱ་བར་སྐྱེས་ཏེ་དགེ་སློང་བྱས་པས༔ གཙུག་ལག་ཁང་དེའི་མེ་ཏོག་གི་ལྡུམ་རར་ཀུ་ཀུ་གཉིས་ཀྱིས་ཆགས་པ་སྤྱད་པ་མཐོང་བས་ཆགས་པ་སྐྱེས་ནས༔ རིགས་ངན་གྱི་བུ་མོ་ལ་སྤྱད་པས་བསླབ་པ་ཉམས༔ བསླབ་པ་ཉམས་པས་ཀུ་ཀུ་ར་ལ་ཞེ་སྡང་སྐྱེས་ཏེ༔ རིགས་ངན་མོའི་འབྲས་རྡུང་བའི་ཐོ་བས་ཀུ་ཀུའི་རྡོ་རྗེ་བརྡུངས་པས་ཀུ་ཀུ་ཤིའོ༔ དེའི་ཉེས་པས་བྱོལ་སོང་གི་སྐྱེ་བ་མོ་ལུས་ལོ་བརྒྱ་ལེན་ཅིང་དུཿཁ་སྤྱོད་པར་འགྱུར་རོ༔ ཡང་དེའི་གཙུག་ལག་ཁང་དེའི་ཨཱ་ལོ་ཀེ་རྒྱུའི་ཏིལ་མར་བདུན་ཟོས༔ དེའི་ཉེས་པས་ཡི་དྭགས་ཀྱི་སྐྱེ་བ་ལོ་བརྒྱ་ལེན་ནོ༔ ཀུ་ཀུ་དེའི་སྲོག་བཅད་པས་དམྱལ་བའི་སྐྱེ་བ་ལོ་བརྒྱ་ལེན་ནོ༔ ཡང་ཀོ་ཏའི་གཙུག་ལག་ཁང་གི་དགེ་འདུན་ལ་ཏ་ལའི་ཚིག་རྩུབ་གཅིག་བརྗོད་པའི་ཉེས་པས་ལྷ་མ་ཡིན་གྱི་སྐྱེ་བ་ལོ་བརྒྱ་ལེན་ནོ༔ དེ་ནས་གཙུག་ལག་ཁང་དེའི་ལྷ་ལ་མེ་ཏོག་གཏོར་བའི་ལས་ཀྱིས་ལྷའི་སྐྱེ་བ་ལོ་བརྒྱ་ལེན་ནོ༔ དེ་ནས་བསམ་ཡས་སུ་ཁྱི་མོ་ལོང་མའི་སྐྱེ་བ་བདུན་ལེན་ནོ༔ དུཿཁ་ལ་སྤྱོད་པར་འགྱུར་རོ༔ དེ་ནས་ཡར་ལུང་གི་སྟོད་དུ་བུད་མེད་མི་སྡུག་པའི་གཟུགས་ཅན་བསོད་ནམས་ཆུང་བ་སྤྲང་མོའི་རིགས་ཀྱི་སྐྱེ་བ་བཅུ་ལེན་ཅིང་ལོ་ལྔ་བརྒྱ་དང་བཅུ་བདུན་དུ་དུཿཁ་སྤྱོད་པར་འགྱུར་རོ༔ མཐར་ནི་པདྨ་བདག་དང་ཕྲད་ཅིང་བྱིན་གྱིས་རློབ་ཅིང་མི་ལུས་ཐོབ་ཅིང་སངས་རྒྱའོ༔ ཞེས་གསུངས་སོ༔ ཡང་རྒྱལ་པོས་ཞུས་པ༔ མི་ལུས་ནམ་ཐོབ༔ ཆོས་གང་ལ་སྤྱོད༔ སྐྱེ་བ་དུ་ལ་སངས་རྒྱ༔ ཞིང་གང་དུ་འདུག་ཅེས་ཞུས་པས༔ སློབ་(༡༩༤)དཔོན་གྱིས་བཀའ་བསྩལ་པ༔

ལས་ངན་དེ་རྣམས་བྱང་ནས༔ སྒྲགས་གྲོང་གསར་དུ་བུད་མེད་གཅིག་གི་ལུས་ཐོབ་ནས་དབང་པོ་ཚང་བར་སྐྱེ༔ ངའི་གདམས་པ་འབྲེལ་པ་ཐོགས་པ་ཙམ་འབྱུང་༔ དེ་ནས་འཕོས་ནས་ལྷོ་བྲག་གི་ལ་ཡག་ཏུ་སྐྱེ༔ བུ་མོ་སྤྲེལ་ལོ་མ་ཤེས་རབ་ཆེ་བ་ཅིག་ཏུ་སྐྱེ༔ ངའི་སྤྲུལ་པ་གཅིག་གིས་ཟིན་ཏེ་ལམ་སྣ་ཟིན་པར་འགྱུར་རོ༔ དེ་ནས་འཕོས་ནས་གཡས་རུ་གྲོང་དམར་བྱ་བར་སྐྱེས་པའི་ལུས་ཐོབ་སྟེ་སྔར་གྱི་ཀོ་ཏའི་གཙུག་ལག་ཏུ་རབ་ཏུ་བྱུང་བའི་བག་ཆགས་ཀྱིས་རབ་ཏུ་འབྱུང་བར་འགྱུར་རོ༔ དེ་ནས་ངའི་སྤྲུལ་པ་གཅིག་དང་འཕྲད་ནས་གདམས་པ་བྱིན་པས་རིག་པའི་ངོ་བོ་མཐོང་སྟེ༔ ཌཱཀྐིས་རྗེས་སུ་འཛིན་པར་འགྱུར་རོ༔ སྐྱེ་བ་དེའི་འོག་ཏུ་རྡོ་དང་བོད་ཀྱི་མཚམས་སུ་འབྲི་ལྡང་ཞེས་བྱ་བར་སྐྱེ་སྟེ༔ སྔ་མའི་བག་ཆགས་ཀྱིས་རབ་ཏུ་འབྱུང་བར་འགྱུར་རོ༔ ཌཱཀྐི་མ་ཐམས་ཅད་ཀྱིས་བར་ཆད་བསྲུངས་ཏེ་ངའི་ཟབ་གཏེར་དང་འཕྲད་དེ་གཏེར་སྒོ་གསུམ་འབྱེད་པར་འགྱུར་རོ༔ དེའི་དུས་སུ་འགྲོ་དོན་མི་འབྱུང་སྟེ་སྦས་པའི་ཚུལ་དུ་ཉམས་སུ་ལེན་པའི་དུས་ཡིན༔ ངའི་ཟབ་ཆོས་ཀྱི་བདག་པོར་འགྱུར་རོ༔ འོན་ཀྱང་ཆོས་ཀྱི་འབྲེལ་བ་བདུན་ཅུ་འབྱུང་ངོ་༔ ཌཱཀྐིས་ཡིད་བསྐུལ་ཟབ་མོའི་གནད་ཀྱི་འབྲེལ་པ་བདུན་གསུམ་འབྱུང་ངོ་༔ ཟབ་གཏེར་འདིའི་བདག་པོ་སྒྲགས་ཟུར་ཁང་དུ་བུ་མོ་སྤྲེལ་ལོ་མ་ལུས་ཕྲ་ལ་རྣམ་བཞག་ཆེ་བ་ཤེས་རབ་ཆེ་ལ་ཆོས་ལ་མོས་པ་ཡིད་དུ་འོང་ཞིང་སོ་ཞོ་ཡོད་པ་སྨིན་མཚམས་སུ་སྨེ་བ་པདྨ་འདྲ་བ་ཡོད་པ་མཚོ་རྒྱལ་གྱི་བྱིན་གྱིས་བརླབས་པ་ཞིག་འབྱུང་༔ དེ་ལ་གདམས་པ་བྱིན་ན་ཁ་རག་གི་ཕུར་ལྷག་མེད་ལ་སངས་རྒྱའོ༔ དར་ཆ་ཡང་འགའ་ཙམ་འབྱུང་ངོ་༔ དེ་མིན་འགྲོ་དོན་མི་འབྱུང་ཞིང་ཐམས་ཅད་བདུད་ཀྱིས་བསམ་པ་བསྒྱུར་བས་དེ་ལ་མོས་པ་ཤིན་ཏུ་ཉུང་ངོ་༔ དེ་དང་འཕྲད་པ་ཡང་དོན་ཆེན་དུ་འགྱུར་རོ༔ དེ་ནི་ལོ་ལྔ་བཅུ་ང་དགུ་ལ་སྐྱེ་བ་འཕོས་ཏེ་དེའི་གོང་དུ་འདའ་བའང་སྲིད༔ ཚེ་སྒྲུབ་བྱས་ན་བག་གཅིག་བཞུགས་སོ༔ དེ་ནས་འཕོས་ནས་བུམ་ཐང་དུ་སྐྱེ་བར་འགྱུར་རོ༔ བུམ་ཐང་སྨད་ཀྱི་བྲག་སེང་གེ་འདྲ་བ་ལ་ཀློང་(༡༩༥)གསལ་ཉི་མའི་རྒྱུད་དང་༔ སྙིང་ཏིག་གི་རྒྱུད་བཅུ་བདུན་མན་ངག་དང་བཅས་པ་ཐོན་པར་འགྱུར་རོ༔ ལྷོ་བྲག་མཁར་ཆུ་ལ་རྫོགས་ཆེན་གྱི་བསྟན་པ་དར་ཞིང་རྒྱས་པར་འགྱུར་རོ༔ ཟབ་མོ་གནད་ཀྱིས་ཐེབ་པ་བརྒྱ་རྩ་བརྒྱད་འབྱུང་ངོ་༔ ཆོས་ཀྱི་འབྲེལ་པ་སྟོང་རྩ་བརྒྱད་འབྱུང་ངོ་༔ འགྲོ་དོན་ནུས་པ་སུམ་ཅུ་འབྱུང་ངོ་༔ ལྷོ་བྲག་གི་བྲག་སེང་གེའི་གདོང་པ་ཅན་ནས་སེམས་ཕྱོགས་ཀྱི་ཆོས་སྡེ་ཐམས་ཅད་ཐོན་པར་འགྱུར་རོ༔ མོན་མཁར་སྟེང་ནས་བདག་གི་ངན་སྔགས་ཟབ་མོ་ཐོན་པར་འགྱུར་རོ༔ མཆིམས་ཕུ་འདི་ཉིད་དུ་སྦས་པའི་ལྷ་ལྕམ་མོ་རང་གི་ཟབ་དོར་ཟབ་བེར་སྲུབ་མེད་དང་གཡུ་གུང་རི་ཁད་མར་འདི་དང་༔ གཟི་མཆོང་གསེར་གཡུའི་ལན་ཚར་འདི་དང་༔ དངུལ་དཀར་གྱི་མེ་ལོང་རྒྱངས་གསལ་འདི་དང་༔ ཨོ་རྒྱན་བདག་གི་ཆོས་གོས་གསེར་གྱི་ཧ་རིས་ཅན་འདི་དང་༔ ཐོད་པ་སྨུག་འཁྲིགས་པ་འོད་ཁ་འདིའི་ནང་དུ་ཚེ་གཅིག་ལ་སངས་རྒྱ་བའི་དབང་བཞིའི་གདམས་པ་རྒྱུད་དང་བཅས་པ་སྦེད་པས་འདི་རྣམས་མོ་རང་སྐྱེ་བ་འཕོས་ཏེ་ཕོ་ལུས་བླངས་ནས་ཐོན་པར་འགྱུར་རོ༔ འགྲོ་དོན་དཔག་མེད་བྱས་ཏེ་སྐྱེ་བ་དེར་མངོན་པར་རྫོགས་པར་སངས་རྒྱས་ཏེ་ཟངས་མདོག་དཔལ་རིར་རྒྱལ་པོ་དང་མཚོ་རྒྱལ་དང་ལྷ་ལྕམ་དང་༔ པདྨ་འོ་སྐོལ་ཞལ་མཇལ་ལོ་གསུངས༔ དེར་རྒྱལ་པོ་དགྱེས་ཏེ་ཕྱག་དང་སྐོར་བ་ཡང་བྱས༔ སློབ་དཔོན་གྱིས་རྒྱལ་པོ་ལ་གདམས་པ་དཔག་ཏུ་མེད་པ་གསུངས༔ དེར་ལྷ་ལྕམ་གྱི་ལུས་གོས་གདམས་པ་དང་བཅས་པ་བསེ་སྒྲོམ་སྨུག་པོར་བཅུག་སྟེ་གཏེར་དུ་སྦས་ཏེ༔ ལྷ་ལྕམ་ཉིད་དང་འཕྲད་པར་སྨོན་ལམ་བཏབ་བོ༔

དེ་ནས་སློབ་དཔོན་གྱིས་ལྷ་ལྕམ་གྱི་སྙིང་ཁར་ཤེས་རབ་མཚལ་གྱིས་ཡི་གེ་ནྲ྇ཿགཅིག་བྲིས་ཏེ་རྣམ་པར་ཤེས་པ་བཀུག་པས་དབུགས་བྱུང་སྟེ་ལབ་ཤེས་པ་བྱུང་ངོ་༔ དེར་དབང་བསྐུར་ཏེ་གསང་མཚན་པདྨ་ལས་འབྲེལ་རྩལ་དུ་བཏགས་སོ༔ ཚེ་སྔོན་གྱི་ལས་ངན་ཟད་པ་དང་སངས་རྒྱས་ཏེ་ཡབ་སྲས་དཔོན་སློབ་དང་བཅས་པ་མཇལ་ལོ༔ ཞེས་མོ་ལ་ལུང་ཡང་བསྟན་ནོ༔ དེ་ནས་པུར་དེ་བསྲེག་པའི་ཚུལ་བསྟན་པ་དང་སློབ་དཔོན་གྱིས་སྐད་ཅིག་ལ་ཨོ་རྒྱན་ཡུལ་དུ་ཚོགས་འཁོར་མཛད་དོ༔ སློབ་དཔོན་གྱིས་གསུངས་པ༔ མཚོ་རྒྱལ་(༡༩༦)གྱིས་འདི་རྣམས་དཀར་ཆག་ལ་ཐོབ་ཅིག༔ ངའི་ཟབ་གཏེར་ལ་སྦེད་དེ་ཕྱི་མར་ལྷ་ལྕམ་སྐྱེ་བ་འཕོས་པའི་དུས་སུ་ངའི་ཟབ་གཏེར་དང་འཕྲད་པས་ཡིད་ཆེས་པའི་དོན་དུ༔ དེའི་ཟླ་ལ་སྦེད་དོ་གསུངས་ཏེ་མཚོ་རྒྱལ་གྱིས་ཡི་གེར་བཏབ་པོ༔ ཕྱི་མ་ལ་ལྷ་ལྕམ་མོ་རང་དང་འཕྲད་པའི་དུས་སུ་ཡང་ཁ་བྱང་འདི་ཉིད་སུ་ལ་ཡང་མ་བསྟན༔ གདམས་པ་ནི་སྨོས་ཀྱང་ཅི་འཚལ་ཏེ་རང་ཉམས་སུ་ལོངས་ཤིག༔ ཚེའི་དུས་མ་བྱས་པའི་གོང་དུ་གདམས་པ་རྣམས་དང་ཁ་བྱང་གི་ཤོག་སེར་འདི་རྣམས་བུམ་ཐང་སྨད་ཀྱི་བྲག་སེང་གེ་འདྲ་བའི་སྟེང་ན་ཤིང་བེ་རྐང་གཅིག་ཡོད་དོ༔ ཐག་པ་བཏགས་ནས་དཔྱངས་ལ་ཕྱིན་པ་ན་ཕྱི་ནས་མི་གསལ་བའི་ཕུག་པ་གཅིག་ཡོད་པས་དེའི་ཕུག་ན་ཀློང་གསལ་གྱི་རྒྱུད་དང་བཅས་བདུན་རྒྱུད་གདམས་པ་དང་བཅས་པ་ཡོད་པས་དེའི་ཟླ་ལ་སྐྱོལ༔ སྐྱེ་བ་དེའི་ཕྱི་མ་ལ་དེ་དང་འཕྲད་པར་ཐེ་ཚོམ་མེད་པར་ཡིད་ཆེས་པ་འབྱུང་༔ གདམས་པ་འདི་མཚོ་རྒྱལ་གྱིས་བྱིན་གྱིས་བརླབས་པ་དེ་མིན་པ་སུ་ལ་ཡང་ཚིག་ཙམ་ཡང་མ་ཟག་པར་གཏེར་དུ་སྦོས་སོ༔ སྐྱེ་བ་འདིར་སྤེལ་ཡང་མི་འཕེལ་ཏེ་ཡིད་མི་ཆེས་ཤིང་གཤེ་སྐུར་གྱི་གནས་སུ་འགྲོ༔ ལས་ཅན་གདུལ་བྱ་དུས་ལ་མ་བབ་པས་ཟོག་ཏུ་མཐོང་ཡོང་༔ ཌཱཀྐི་མའི་བཀའ་ཆད་ཀྱང་འབྱུང་ངེས་པས་རླུང་ཕྱོགས་ཙམ་དུ་ཡང་མ་བརྗོད༔ ཉམས་སུ་བླངས་ཏེ་སྦ་བར་བྱའོ༔ ཞེས་ཡི་གེར་བཏབ་བོ༔ ས་མ་ཡཱ༔ རྒྱ་རྒྱ་རྒྱ༔

བདག་འདྲ་པདྨ་འབྱུང་གནས་ཀྱིས༔ ཡང་ཅིག་གཏེར་གྱི་ཁ་བྱང་བསྟན༔ བྱར་ཞེས་བྱ་བའི་ལུང་ཕུ་ན༔ ལྷ་རི་གཟིགས་པོ་ཞེས་བྱའི་རི༔ འབྲུ་ཕུང་སྤུངས་པ་ལྟ་བུའི་རྩེ༔ ཡིད་ཙམ་ལྷོ་རུ་ཉེ་བ་ན༔ མན་ཤེལ་དག་ལས་གྲུབ་པ་ཡི༔ རྡོ་རྗེ་སེམས་དཔའི་སྐུ་ནི་ཁྲུ་གང་བ༔ དེ་ཡི་ནང་དུ་བལྟས་པ་ཡིས༔ ཞི་ཁྲོ་ལོངས་སྐུའི་ལྷ་ཚོགས་ནི༔ ཡུལ་ཁམས་ཙམ་དུ་འཆར་བ་ཡོད༔ དེ་ཡི་ཟླ་ལ་རྡོ་རྗེ་སེམས་དཔའ་ཡི༔ ངོ་སྤྲོད་གནད་ཀྱི་མན་ངག་བཅུ་དྲུག་ཡོད༔ གསེར་གཡུ་རིན་ཆེན་བྲེ་གང་ཡོད༔ རྒྱ་རྒྱ༔ ཙཱ་རི་དག་གི་ལ་སོ་ན༔ རྟ་གདོང་འདྲ་བའི་བྲག་གཅིག་ཡོད༔ དེ་ཡི་རྩེ་མོ་བས་ནི་དམའ་ས་ན༔ རྟ་མགྲིན་དབང་གི་སྒྲུབ་རྒྱུད་ནི༔ ཟངས་ཀྱི་རྟ་མགོ་གང་ཡོད་དོ༔ རྒྱ་རྒྱ༔ བོས་ན་རྡོ་བ་མཚན་མ་འདྲ་བ་ཡི༔ ཕ་འོང་འོག་ན་ཙཱ་རིའི་(༡༩༧)གཏེར་ཡིག་དང་༔ ཌཱཀྐིའི་སྒྲུབ་སྐོར་བརྒྱ་དང་རྩ་བརྒྱད་ཡོད༔ དབང་སྡུད་མན་ངག་ཁྲིད་དང་བདུན་གསུམ་ཡོད༔ ཙཱ་རི་དག་གི་རྣམ་དག་དང་༔ རྔམ་པ་སྒྲ་སྒྲོགས་བསིལ་བ་ཚལ་གྱི་ལམ་ཡིག་ཡོད༔ རྒྱ་རྒྱ༔ བྱར་གྱི་ཕུ་ན་ཤམ་མདའ་ཞེས་བྱའི་ཡུལ༔ བྲག་ནི་སྟག་མོ་གནམ་དུ་མཆོངས་འདྲ་ལ༔ བཀའ་བརྒྱད་ཕུར་པ་གཤིན་རྗེའི་ངན་སྔགས་སྐོར༔ གྲངས་ལས་འདས་ཏེ་ཤོག་སེར་ཁུར་ཅིག་ཡོད༔ རྒྱ་རྒྱ༔ དྭགས་ཀྱི་ཡུལ་གྱི་སྒམ་པོ་ཟངས་ལུང་ཞེས་བྱ་ལ༔ བྲག་རི་རལ་པ་གནམ་དུ་བརྫེས་པ་འདྲ་བ་ལ༔ བྲམ་ཟེ་སྐྱེ་བ་བདུན་པའི་ཀེང་རུས་ཤ་རྣམས་དང་༔ དེ་ཡི་མགོ་ལ་ཕག་མོ་ལྷ་ལྔ་བྱོན་པ་ཡོད༔ རྒྱ་རྒྱ༔ དེ་ཡི་ཤར་གྱི་ཀོང་པོ་ང་ལ་ན༔ ཕ་བོང་དམར་པོ་སྙིང་གི་གཟུགས་འདྲ་ལ༔ དེ་ཡི་འོག་ན་དར་ཟབ་རིན་ཆེན་སྣ་ལྔའི་གཏེར་ཡོད་དོ༔ རྒྱ་རྒྱ༔ བུ་ཆུ་ལྷ་ཁང་ཞེས་བྱའི་གཙུག་ལག་ལ༔ མ་ཐེམ་དག་གི་གཡས་ན་ནི༔ རེས་བཞི་དག་ལ་བྲུས་པ་ན༔ གསེར་ཕྱེ་ཕུལ་གང་ཡོད་དོ༔ རྒྱ་རྒྱ༔ ཀོང་པོ་བ་ཡོ་ཞེས་པའི་ལ་གཅིག་བརྒལ་བ་ན༔ མཚོ་ཡི་དཀྱིལ་ན་བོ་དོ་གཅིག་ལ་ནི༔ འཆི་མེད་ཚེ་ཆུའི་གཏེར་ཡོད་དོ༔ རྒྱ་རྒྱ༔ ཡང་བྱར་སྨད་ཨ་ཤུ་བྲག་མདུན་ན༔ མཆོད་རྟེན་དག་གི་བུམ་པ་ན༔ ཚེ་སྒྲུབ་སྨན་གྱི་བཅོས་ཁ་མང་དུ་ཡོད༔ རྒྱ་རྒྱ༔ འདི་རྣམས་ཀྱི་ལྡེ་མིག་ཟངས་ཡག་བྲག་ལ་ཡོད༔ ཀུན་ལ་མི་བསྟན་གསང་བ་གཅེས༔ རྫོགས་སོ༔ དང་ལུང་ལྡང་ལྷའི་བྲག་མདུན་ནས། །སྤྲུལ་སྐུ་ཉང་བན་ཚུལ་བློ་ཡིས། །ཁྱད་པར་མཁའ་འགྲོ་སྙིང་ཏིག་སྐོར། །གདན་དྲངས་ཤོ་བན་ལེགས་ལྡན་ལ། །ཐུགས་ཀྱི་སྲས་སུ་གཟིགས་ནས་གནང་། །སྐུ་དྲིན་ཆེའོ་བརྗེད་པ་མེད། །ཆོས་རྗེ་བྱང་སེམས་ལེགས་ལྡན་པས། །བྱ་བྲལ་དགོན་རིན་བདག་ལ་གནང་། །ཡེ་ཤེས་མཚོ་རྒྱལ་གྱི་ཕྱག་བྲིས་ཤོག་སེར་སྔོ་སྐྱ་ལས་བཤུས་སོ། །དགེའོ།། །།

གཏེར་གྱི་ཁ་བྱང་།

༄༅༔ གཏེར་གྱི་ཁ་བྱང་བཞུགས་པའོ༔ མངྒ་ལམ༔

༄༅༔ བདག་འདྲ་པད་མ་འབྱུང་གནས་ཀྱིས༔ ཡང་ཅིག་གཏེར་གྱི་ཁ་བྱང་བསྟན༔ བྱར་ཞེས་བྱ་བའི་ལུང་ཕུ་ན༔ ལྷ་རི་བཟིས་པོ་ཞེས་བྱའི་རི༔ འབྲུ་ཕུང་སྤུངས་པ་ལྟ་བུའི་རྩེ༔ ཡིད་ཙམ་ལྷོ་རུ་ཉེ་བ་ན༔ མན་ཤེལ་དག་ལས་གྲུབ་པ་ཡི༔ རྡོར་སེམས་སྐུ་ནི་ཁྲུ་(༡༩༨)གང་ལ༔ དེ་ཡི་ནང་དུ་བལྟས་པ་ཡིས༔ ཞི་ཁྲོ་ལོངས་སྐུའི་ལྷ་ཚོགས་ནི༔ ཡུལ་ཁམས་ཙམ་དུ་འཆར་བ་ཡོད༔ དེ་ཡི་ཟླ་ལ་རྡོ་རྗེ་སེམས་དཔའ་ཡི༔ ངོ་སྤྲོད་གནད་ཀྱི་མན་ངག་བཅུ་དྲུག་ཡོད༔ གསེར་གཡུ་རིན་ཆེན་བྲེ་གང་ཡོད༔ ས་མ་ཡ༔ རྒྱ་རྒྱ་རྒྱ༔ རྩ་རི་དག་གི་ལ་སོ་ན༔ རྟ་གདོང་འདྲ་བའི་བྲག་ཅིག་ཡོད༔ དེ་ཡི་རྩེ་བས་དམའ་བ་ན༔ རྟ་མགྲིན་དབང་གི་སྒྲུབ་རྒྱུད་ནི༔ ཟངས་ཀྱི་རྟ་མགོ་གང་ཙམ་ཡོད༔ རྒྱ་རྒྱ་རྒྱ༔ བོས་ཀྱི་རྡོ་མཚན་འདྲ་བའི་འོག༔ ཌཱཀྐི་དག་གི་སྒྲུབ་སྐོར་ནི༔ རིགས་མི་འདྲ་བ་བརྒྱ་རྩ་ཡོད༔ དབང་སྡུད་མན་ངག་ཁྲི་དང་བདུན་གསུམ་ཡོད༔ ཙཱ་རིའི་ལམ་ཡིག་རྣམ་བདུན་དང་༔ རྔམ་པ་སྒྲ་སྒྲོགས་ལམ་ཡིག་དང་༔ བསིལ་བ་ཚལ་གྱི་ལམ་ཡིག་ཡོད༔ རྒྱ་རྒྱ་རྒྱ༔ བྱར་ཕུ་ཤམ་མདའ་ཞེས་བྱའི་ཡུལ༔ བྲག་ནི་སྟག་མོ་གནམ་དུ་མཆོངས་འདྲ་ལ༔ བཀའ་བརྒྱད་ཕུར་པ་གཤིན་རྗེའི་མན་ངག་སྐོར༔ གྲངས་ལས་འདས་ཏེ་ཤོག་སེར་ཁུར་ཅིག་ཡོད༔ རྒྱ་རྒྱ་རྒྱ༔ དྭགས་ཀྱི་སྒམ་པོ་ཟངས་ལུང་ན༔ བྲག་ནི་རལ་པ་གནམ་དུ་བརྫེས་འདྲ་ལ༔ བྲམ་ཟེ་སྐྱེ་བདུན་རྐང་རུས་ཤ་རྣམས་དང་༔ དེའི་དབུ་ལ་ཕག་མོ་ལྷ་ལྔ་བྱོན་པ་ཡོད༔ རྒྱ་རྒྱ་རྒྱ༔ དེའི་ཤར་གྱི་ཀོང་པོ་ང་ལ་ན༔ ཕ་བོང་དམར་པོ་སྙིང་གི་གཟུགས་འདྲ་ལ༔ དེའི་འོག་ན་དར་ཟབ་རིན་ཆེན་སྣ་ལྔའི་གཏེར་ཡོད༔ རྒྱ་རྒྱ་རྒྱ༔ ༼ཀོང་པོའི་༽བུ་ཆུ་ལྷ་ཁང་ཞེས་བྱའི་གཙུག་ལག་ན༔ མ་ཐེམ་དག་གི་གཡས་དག་ན༔ རེས་བཞི་དག་ལ་བྲུས་པ་ན༔ གསེར་གྱི་ཕྱེ་མ་ཕུལ་གང་ཡོད༔ རྒྱ་རྒྱ་རྒྱ༔ ཀོང་པོ་བ་ཡོ་ཞེས་བྱའི་ལ་བརྒལ་བ་ན༔ མཚོ་དཀྱིལ་བོ་དོ་གཅིག་ལ་ནི༔ འཆི་མེད་ཚེ་ཆུའི་གཏེར་ཡོད་དོ༔ རྒྱ་རྒྱ་རྒྱ༔ གཞན་ཡང་༔ བྱར་སྨད་ཨ་ཤུའི་མདུན་ན་ནི༔ མཆོད་རྟེན་དག་གི་བུམ་པ་ན༔ ཚེ་སྒྲུབ་སྨན་གྱི་བཅོས་ཀ་མང་དུ་ཡོད༔ འདི་རྣམས་ཀྱི་ལྡེ་མིག་ཟངས་ཡག་བྲག་ལ་ཡོད༔ ཀུན་ལ་མི་བསྟན་གསང་ཞིང་སྦ་བར་བྱའོ༔ ས་མ་ཡ༔ རྒྱ་རྒྱ་རྒྱ༔ ཁ་ཐམ༔ རྒྱ་རྒྱ་རྒྱ༔

རྒྱལ་སྲས་ལེགས་པའི་ལུང་བསྟན།

༄༅༔ རྒྱལ་སྲས་ལེགས་པའི་ལུང་བསྟན་ནོ༔

༄༅༔ དྲི་མེད་ཤེལ་དཀར་མགོན་སྐྱིད་ཁྱོད༔ འཁྲུལ་ནས་བཟང་ངན་རྟོག་དཔྱོད་ཀྱང་༔ ཐེག་ཆེན་ལམ་ལ་གུས་པས་ཞུགས༔ འདི་ནས་སྐྱེ་བ་བཅུ་བདུན་ན༔ ཚེ་ལོ་ལྔ་བཅུ་ཁ་རལ་དུས༔ ཁ་བ་ཅན་གྱི་དབུས་ཀྱི་ཆ༔ དཀར་པོ་(༡༩༩)གླིང་ཕྲན་གཉལ་གྱི་ཡུལ༔ གསེར་གྱི་སྡིག་པ་གབ་འདྲ་ཡི༔ ལུང་པ་ཆུ་དཀར་ཤར་ལྷོར་བལྟ༔ གསད་གསོ་སྔགས་ཀྱི་རྒྱུད་འཛིན་བུ༔ རྡོ་རྗེའི་རིགས་ལྡན་ཡུམ་ལ་བལྟམས༔ པདྨའི་རིགས་ཡིན་དོན་བློ་ལྡན༔ འཁོར་བའི་ཆ་འཛིན་དེས་མ་གོས༔ ཨོ་རྒྱན་ཆོས་ཀྱིས་རང་རྒྱུད་གྲོལ༔ དེ་ཕྱིར་འཁོར་བ་གཅིག་ཆོད་སོགས༔ སེམས་ཅན་ཀུན་དོན་དེ་ལ་གཏོད༔ གསང་སྔགས་སྙིང་པོའི་མཐར་ཐུག་འདི༔ བཀྲག་ཆུང་རྡོ་རྗེ་བྲག་ལ་སྦེད༔ གཏེར་སྲུང་མཁའ་འགྲོ་ནག་མོས་ཀྱིས༔ གཏེར་འདི་ཀླུ་བཙན་ཁྱོད་ལ་གཏད༔ ལས་ལྡན་སྙིང་གི་བུ་ལ་གཏོད༔ ལས་མེད་བྱུང་ན་མ་སྦྱིན་ཅིག༔ ཅེས་པ་འདི་རྫོགས་ཆེན་འཁོར་བ་གཅིག་ཆོད་ཀྱི་གཤམ་ན་འདུག་གོ༔

༈ ཡང་ཟབ་མཁའ་འགྲོ་སྙིང་ཐིག་འདི༔ ཀུན་ལ་མ་སྤེལ་ཉམས་སུ་ལོངས༔ སྤེལ་དྲགས་སྣོད་མིན་དམ་སེལ་བྱེད༔ དེ་ཡི་སྐུ་ཚེ་ཚད་མི་ཕྱིན༔ བརྒྱུད་འཛིན་ཉེར་གཅིག་ལྔ་བཤད་པ༔ གཅིག་གིས་ཚུལ་དང་ལྡན་པས་སྤེལ༔ ཤེལ་དཀར་སྐྱེ་བ་བཅུ་བདུན་ན༔ ཤམ་པོ་གངས་ཀྱི་ཤར་ལྷོ་ངོས༔ རིགས་ལྡན་ཆུ་ཁམས་སྟག་ལོ་པ༔ སྦས་ཚུལ་འཁོར་བའི་ཆ་འཛིན་ཅིང་༔ ཞེན་པ་ཆུང་ཞིང་ངང་རྒྱུད་རིང་༔ སྙིང་སྡར་ཚེ་རིང་ལོངས་སྤྱོད་ཆུང་༔ སྙིང་ཐིག་ཐབས་ཀྱི་ཆ་ཡིན་པས༔ བརླ་གཡས་པ་ཡི་ནང་ལོགས་ལ༔ ཤ་སྨེ་མཁའ་འགྲོའི་སྤྱན་འདྲ་ཡོད༔ སྐྱེས་བུ་དམ་ལྡན་ལེགས་པ་ཞེས༔ ཟབ་མོ་ཆོས་ཀྱི་བསྟན་པ་སྤེལ༔ སྐྱེས་མཐའི་བྱང་སེམས་མིན་རེ་ཀན༔ འདི་ཡིས་འགྲོ་དོན་སྤེལ་བ་ཡོང་༔ ས་ལ་གནས་པའི་བྱང་སེམས་ཀྱིས༔ རྒྱ་གར་རྒྱ་ནག་སིང་ག་དང་༔ བོད་ཡུལ་ཀུན་ཏུ་འཕེལ་བར་འགྱུར༔ གཞན་ཡང་བཤེས་གཉེན་དམ་པ་དང་༔ ལམ་བསྒོམ་ཐེག་ཆེན་རིགས་རྣམས་མོས༔ ཕལ་པའི་འགྲོ་བ་མོས་འདུད་ཉུང་༔ འདི་དང་འཕྲད་ཚད་དོན་ཆེན་འགྱུར༔ ཞེས་པ་མཁའ་འགྲོ་སྙིང་ཐིག་གི་ནང་ན་འདུག་གོ༔

ཞལ་གདམས་གནད་ཀྱི་ཕྲེང་བ།

༄༅༔ ཞལ་གདམས་གནད་ཀྱི་ཕྲེང་བ་བཞུགས་སོ༔

༄༅༔ ཀཐ།གམཏ།།༔ རིགས་ཀྱི་ཌཱཀྐི་ལྔ་ལ་ཕྱག་འཚལ་ལོ༔ ཌཱཀྐིའི་སྙིང་གི་ཏི་ཀ་ལས༔ ཞལ་གྱི་གདམས་པ་བྲི་བར་བྱ༔ དེ་ལ་འདིར་ཐེག་པ་ཆེན་པོ་གསང་སྔགས་ཀྱི་ཆོས༔ ཐེག་པ་ཆུང་ངུ་དང་མ་འདྲེས་པ༔ ཚེ་གཅིག་གིས་སངས་རྒྱ་བ༔ འཕྲལ་བདེ་ལ་ལམ་མྱུར་བའི་གདམས་པ་ལ་བཞི་སྟེ༔ (༢༠༠)དང་པོ་ཕྱག་རྒྱ་མ་སྤང་བྱ་དང་བསྒྲུབ་བྱའི་མཚན་ཉིད་དང་༔ རྒྱུའི་ཐིག་ལེ་སྤང་བྱ་དང་བསྒྲུབ་བྱའི་མཚན་ཉིད་གཉིས་ཏེ་བཞིའོ༔ དེ་ལ་ཕྱག་རྒྱ་མ་སྤང་བར་བྱ་བའི་མཚན་ཉིད་ནི༔ ཀུན་ཏུ་བཟང་མོ་ཀློང་གསལ་ཉི་མའི་རྒྱུད་ལས༔ རྩ་ཞིག་རྩ་ཞ་རྩ་རྒུད་གསུམ༔ བདེ་བ་མེད་པས་སྤང་བར་བྱ༔ ཞེས་པས༔ རྩ་ཞིག་པ་ནི་བུ་ཚ་སྐྱེས་པ་ལ་ཟེར་ཏེ༔ བྱིས་པ་སྐྱེས་པ་ལན་རེ་ལ་རུས་ཚིགས་ཐམས་ཅད་ཤིགས་ཀྱིས་སོང་བས༔ རྩ་ཐམས་ཅད་གློད་ཀྱིས་སོང་བས་རྩ་ལ་གྲིམས་མེད་པས་བདེ་བའི་གནས་མེད་དོ༔ དཔེར་ན་དྲུ་བུ་གྲིམས་པོ་བརྐྱངས་པས་ལྷོད་ཀྱིས་འགྲོ་བ་དང་འདྲའོ༔ བདེ་བའི་བོགས་ཆུང་བས་སྤང་ངོ་༔ རྩ་ཞ་བ་ནི༔ གཅོང་ལ་སོགས་པ་ནད་བུ་ཡུན་རིང་གིས་ཟིན་པའི་ཤེས་རབ་མ་ནི༔ ནད་དང་གཏར་བ་དང་བསྲེག་པ་དང་བཤལ་ལ་སོགས་པ་བྱས་པས༔ ལུས་ཀྱི་ལྷ་བ་དང་སྟོབས་ཉམས་ཤིང་༔ བདེ་བ་བྱང་སེམས་ཀྱི་འགྱུ་ལམ་ཆད་ཅིང་འགག་པས༔ བདེ་བའི་བོགས་མེད་པས་སྤང་༔ དཔེར་ན་མི་རྒས་པའི་ལུས་ལ་ཤ་དང་སྟོབས་མེད་པ་དང་འདྲ༔ རྩ་རྒུད་པ་ནི་ལས་ཆེན་པོ་བྱས་པ་དང་༔ མྱ་ངན་དྲག་པོ་བྱུང་བ་དང་༔ ཟས་བཅུད་མེད་ཟོས་པས་རྩ་རྒུད་དེ༔ བདེ་བའི་བོགས་མེད་པས་སྤང་༔ དཔེར་ན་སྤྲང་མོ་ལ་བདེ་བ་མི་སྐྱེ་བ་ནི༔ ནང་ན་བདེ་བའི་རྒྱུ་མེད་པས་ཕྱིར་ཡིད་དུ་མི་འོང་བའོ༔ ནང་ན་བདེ་བའི་རྒྱུ་ཡོད་ན༔ ཕྱིར་ཡིད་དུ་འོང་ཞིང་མཛེས་པའོ༔ ཕྱག་རྒྱ་མ་བསྒྲུབས་པར་བྱ་བའི་མཚན་ཉིད་ནི༔ རྟགས་གསུམ་དང་ལྡན་པ་ཞིག་དགོས་ཏེ༔ ཕྱི་ལུས་ཀྱི་རྟགས་ཚང་བ་དང་༔ ནང་རྩའི་རྟགས་ཚང་བ་དང་༔ གསང་བ་སེམས་ཀྱི་རྟགས་ཚང་བའོ༔ དེ་ཡང་ཀློང་གསལ་ལས༔ ཕྱི་ནང་གསང་བའི་རྟགས་ཚང་ཞིང་༔ དྲི་ཞིམ་སྐད་སྙན་ཡིད་འོང་མཛེས༔ བདེ་བའི་མདངས་ལྡན་ཆོས་ལ་མོས༔ གསང་ཐུབ་ཤེས་རབ་ཆེ་བའོ༔ ཞེས་སོ༔ ཕྱི་ལུས་ཀྱི་རྟགས་ནི༔ ལང་ཚོ་དར་ལ་བབ་པ༔ ལོ་བཅུ་དྲུག་ནས་ཉི་ཤུ་རྩ་བརྒྱད་ཀྱི་བར་དུ་གོང་གི་སྐྱོན་གྱིས་མ་གོས་པ་དེ་ཡིན༔ དེའི་ཡོན་ཏན་ལུས་རྒྱས་པས་རྩ་རྒྱས༔ རྩ་རྒྱས་པས་རླུང་རྒྱས་རླུང་རྒྱས་པས་ཐིག་ལེ་རྒྱས༔ ཐིག་ལེ་རྒྱས་པས་བདེ་བ་རྒྱས་པར་འོང་༔ བདེ་བ་རྒྱས་པས་རྣལ་འབྱོར་པའི་ཐིག་ལེ་འཕེལ་བས༔ ཐུན་མོང་དུ་(༢༠༡)ཡོན་ཏན་མང་པོ་སྐྱེ༔ མཆོག་ཏུ་བདེ་སྟོང་གི་ལྷན་ཅིག་སྐྱེས་པའི་ཡེ་ཤེས་གསལ་ལ་མ་འགགས་པར་ལྷག་གི་མཐོང་བའོ༔ དེ་ཡང་ཕྱག་རྒྱ་མའི་ནང་གི་བདེ་བའི་སྟོབས་ཕྱིར་ཤར་བས་མཛེས་ཤིང་ཡིད་དུ་འོང་བས༔ སྐྱེས་པ་ཐམས་ཅད་ཡིད་ཆགས་པས་བདེ་བ་ཁྱད་པར་ཅན་སྐྱེ་བའི་ཡོན་ཏན་ཡོད་དོ༔ དེ་ཡང་སྐྲ་ལི་སོ་ལེགས་པ་ཡན་ལག་རྒྱས༔ ཆོས་ལ་མོས་པ་ནི་རྡོ་རྗེ་རིགས་ཀྱི་ཌཱཀྐི་ཡིན་པས༔ ཡུལ་ཕྱོགས་དང་རྣལ་འབྱོར་པ་ལ་བཀྲ་ཤིས་པའི་དགོས་པ་ཡོད་དོ༔ དྲི་ཞིམ་པས་བདེ་བ་ཡུན་རིང་ཞིང་སྤྲོ་བའི་ཡོན་ཏན་ཡོད༔ སྐད་སྙན་པས་བདེ་བ་ལ་ཡིད་འཇུག་པའི་དགོས་པ་ཡོད༔ རྐེད་པ་ཕྲ་བས་མཉེན་ཏེ་བདེ་བ་རྒྱུན་མི་འཆད་པའི་དགོས་པ་ཡོད༔ སྨད་ཀྱི་ཞིང་རྒྱས་པ་བྷ་ག་རུབ་པས་བདེ་བ་བཙལ་སླ་བའི་དགོས་པ་ཡོད༔ ཆགས་པའི་མདངས་དང་ལྡན་པས་བདེ་བ་རང་དབང་མེད་པར་སྐྱེ་བའི་དགོས་པ་ཡོད༔

ནང་གི་རྟགས་ནི༔ གསང་ཐུབ་པས་གསང་སྤྱོད་གཞན་ལ་མི་སྨྲ་བའི་དགོས་པ་ཡོད༔ བདེ་བའི་སྐད་འབྱིན་པས་བདེ་བ་ཁ་གསོ་བའི་ཡོན་ཏན་ཡོད༔ བྷ་གའི་ནང་ན་རྩ་སྣ་རྩེ་མོ་རིང་བ་དང་དེ་ལ་རྡོ་རྗེ་རེག་པ་ཙམ་གྱིས་སྐད་འོང་བ་སྟེ༔ བདེ་བ་མི་བཟོད་པ་སྐྱེ་བའི་ཡོན་ཏན་ཡོད༔ གསང་བའི་རྟགས་ནི༔ གཞི་དད་པ་ཆེ་ཞིང་ཆོས་ལ་མོས་པས་ལོག་པའི་ལམ་དུ་མི་འགྲོ་བའི་ཡོན་ཏན་ཡོད༔ ཤེས་རབ་ཆེ་བས་བླ་མའི་བརྡ་དང་གསུང་སྒྲོས་གོ་བའི་དགོས་པ་ཡོད༔ དབང་ཐོབ་དམ་ཚིག་བསྲུང་བས་བྱིན་རླབས་འཇུག་ཅིང་སྔགས་སྤྱོད་ལ་སྐུར་པ་མི་འདེབས་པའི་དགོས་པ་ཡོད༔ དེ་ལྟར་རྟགས་དང་ལྡན་པ་བསྟེན་ཞིང་༔ རྟགས་དང་མི་ལྡན་པ་སྤང་བར་བྱའོ༔ དེ་ཡང་ཀློང་གསལ་ལེའུ་བརྒྱད་པ་ནས༔ སྐྱོན་སྤང་ཡོན་ཏན་ལྡན་པ་བསྟེན༔ འབྲས་བུ་གནས་སྐབས་མཐར་ཐུག་གོ༔ ཞེས་སོ༔ དེ་ལྟ་བུའི་ཕྱག་རྒྱ་མ་དེ་བསྟེན་པར་བྱ་བ་ལ་དོན་ལྔ་སྟེ༔ བདེ་བ་དབབ་པ༔ བསྐྱིལ་བ༔ བཟློག་པ༔ དགྲམ་པ༔ སྐྱོན་ཡོན་གྱི་གནད་དོ༔ དང་པོ་བདེ་བ་བྱང་ཆུབ་ཀྱི་སེམས་དེ༔ ལས་རྒྱ་དང་སྦྱོར་བ་བྱས་པས་རྩ་ཐམས་ཅད་ནས་གཡོ་ཞིང་འབབ་སྟེ༔ བདེ་བ་རྒྱས་པའི་དུས་སུ་བསྐྱིལ་དགོས་ཏེ༔ མ་བསྐྱིལ་བར་ཤོར་ན་བདེ་བ་ཡུན་ཐུང་ཞིང་ཉམས་པ་དང་༔ འཁོར་བ་འཕེལ་ཞིང་ཐ་མལ་པ་ཁྱི་(༢༠༢)ཕག་དང་འདྲའོ༔ དེ་བསྐྱིལ་བ་ན༔ འོག་རླུང་ཐུབ་ཚད་དུ་བསྡམ་ཞིང་༔ སྤྱན་གཉིས་སྟེང་དུ་བསྒྲད་ལ༔ དམིགས་པ་བདེ་ཆེན་འཁོར་ལོའི་གཤིས་ལ་བཞག་གོ༔ བཟློག་པ་ཡང་དེ་ཉིད་ཀྱིས་བཟློག་གོ༔ བདེ་བ་འགོ་མ་ཉམས་ནས༔ ཡང་དབབ་བཟུང་བཟློག་པ་སྔར་བཞིན་བྱའོ༔ དེ་ལྟར་ཉམས་སུ་བླངས་པས་སྐྱོན་ཡོན་གྱི་གནད་ནི༔ ཀློང་གསལ་ལས༔ ཕོ་ཉ་ཐག་རིང་ཇག་པ་འདྲ༔ ཞེས་པས༔ གནད་ཤེས་ན་འདི་ཕྱིའི་བདེ་སྐྱིད་ཐམས་ཅད་འབྱུང་ལ༔ མ་ཤེས་ན་འདི་ཕྱིའི་སྡུག་བསྔལ་དང་སྐྱོན་ཐམས་ཅད་འབྱུང་བས་ཁེ་ཉེན་ཆེའོ༔ དེ་ཡང་བླ་མའི་གདམས་པ་དང་རང་གནད་ཁྲོལ་བའི་གང་ཟག་གིས༔ ཕྱག་རྒྱ་མཚན་དང་ལྡན་པ་ལ༔ བདེ་བ་བསྐུལ་ཞིང་ཉམས་སུ་བླངས་པས༔ འཕྲལ་བདེ་ཞིང་སྐྱིད༔ ལམ་མྱུར་བ་འོང་༔ བདེ་བ་ཡུམ་ལ་བསྐུལ་བས་ཀུན་རྫོབ་རྒྱུའི་ཐིག་ལེ་རྒྱས་ཤིང་འཕེལ་བ་སྟེ༔ དེ་ལ་དུག་ལྔ་དང་མ་འདྲེས་པར༔ བསྐྱེད་རྫོགས་དབྱེར་མེད་ལྷན་ཅིག་སྐྱེས་པ་བདེ་སྟོང་ཆོས་སྐུར་མ་ཡེངས་པར༔ གསལ་ལྷག་པའི་སྒོ་ནས་སྤྱད་པས༔ འདོད་ཆགས་ཀྱིས་གདུངས་པའི་སྡུག་བསྔལ་མ་སྤངས་གནས་སུ་དག་ནས༔ བདེ་སྟོང་ཆོས་ཀྱི་སྐུར་གྲོལ་ནས་སངས་རྒྱའོ༔ ཐུན་མོང་དུ་ཡོན་ཏན་ཕུན་སུམ་ཚོགས་པ་གང་འདོད་འབྱུང་ངོ་༔ དཔེར་ན་སྨན་པ་མཁས་པས་དུག་སྨན་དུ་བསྒྱུར་ཏེ༔ བཞི་པརྒྱ་རྩ་བཞིའི་ནད་འཇོམས་པ་དང་འདྲའོ༔ ཡང་བདེ་བ་བསྐུལ་ཞིང་སྟོབས་རྒྱས་པའི་དུས་ན༔ དུག་ལྔའི་བསམ་པ་གང་དང་ཡང་མ་འདྲེས་ཏེ༔ ཚེ་འདི་ཕྱི་གཉིས་ལ་སྨིན་ནོ༔ དེ་ཡང་སྦྱོར་བ་བྱེད་པས་ཐམས་ཅད་འདོད་ཆགས་ཀྱི་བསམ་པ་རང་ག་མ་ཤས་ཆེ་བས༔ དེའི་ཉེར་ལེན་ད་ལྟའི་འགྲོ་བ་ཐམས་ཅད༔ ཕོ་མོ་གང་ཡང་འདོད་ཆགས་ཆེ་བ་ཁོ་ན་མང་ངོ་༔ ལར་དུག་ལྔ་གང་ཤས་ཆེ་བ་དེ༔ ཐིག་ལེ་གཉིས་བདོ་བའི་དུས་ན་ཡིད་ལ་རང་གར་འགྱུས་པ་ལས་འབྱུང་ངོ་༔ དཔེར་ན་སྨན་པ་མ་མཁས་པས་སྨན་དུག་ཏུ་སོང་བ་དང་འདྲའོ༔ ཐིག་ལེ་གཉིས་པོ་འདི་འཁོར་འདས་བདེ་སྡུག་ཐམས་ཅད་ཀྱི་གཞི་ཡིན་ཏེ༔ བདེ་བ་སྟོབས་བདོ་བའི་དུས་སུ་དོན་དམ་གྱི་ཐིག་ལེ་རང་གི་རིག་པ་འདི༔ ཇི་ལྟར་བདེ་བའི་ངོ་བོ་སྟོངས་པར་རྟོགས་པས༔ སངས་རྒྱས་ཟིན་པ་ཡིན༔ དགའ་བ་ཐ་མལ་རང་ག་མ༔ (༢༠༣)རིག་པ་དུག་ལྔར་འགྱུས་ན་འཁོར་བ་ཡིན་ཏེ་སྡུག་བསྔལ་དངོས་ཡིན༔ ཐིག་ལེ་མ་ཤོར་ཡང་རླིག་པ་བཅད་པ་དང་འདྲ་སྟེ་མི་གྲོལ༔ སངས་རྒྱས་དང་སེམས་ཅན་གཉིས་ཀྱི་བར་ན་བདེ་སྡུག་གཉིས་ལས་མེད༔ བདེ་བ་ཆོས་སྐུར་ཤར་བ་ལ་སངས་རྒྱས་ཟེར་བ་ཡིན༔ བདེ་བ་ངོ་མ་ཤེས་དངོས་འཛིན་དུ་འཁྲུལ་པ་ལ་སྡུག་བསྔལ་ཟེར་བ་ཡིན༔ ལུས་ངག་ཡིད་གསུམ་དགའ་བདེ་སྐྱེད་པའི་ངང་ནས༔ མཁན་པོ་བདེ་སྟོང་ཆོས་སྐུར་ཤར་བ་ལ༔ སངས་རྒྱས་ཟེར་བ་ཡིན༔ སྡུག་ཅིང་བསྔལ་བ་དཀའ་ཐུབ་སྡུག་སྒུར་བྱེད་པས་སངས་རྒྱས་སུ་འདོད་ན༔ ཡི་དྭགས་དང་དམྱལ་བ་ཡང་སངས་རྒྱས་ཏེ༔ བདེ་བ་དང་མ་ལྡན་སྡུག་བསྔལ་དང་མ་བྲལ་ན་སངས་མི་རྒྱ་ངེས་སོ༔ དེ་ལྟར་གནད་ཤེས་པ་གལ་ཆེའོ༔ ས་མ་ཡ༔ རྒྱ་རྒྱ་རྒྱ༔ དགེའོ།། །།

ལོ་རྒྱུས་རྒྱལ་བ་གཡུང་གིས་མཛད་པ།

༄༅། །ལོ་རྒྱུས་རྒྱལ་བ་གཡུང་གིས་མཛད་པ་བཞུགས་སོ། །

༄༅། །ན་མོ་གུ་རུ། ཆོས་སྐུ་ཀུན་བཟང་ལོངས་སྐུ་ཞི་ཁྲོའི་ཚོགས། །སྤྲུལ་སྐུ་རྡོ་རྗེ་འཆང་ཆེན་དགོངས་པ་བརྒྱུད། །རིག་འཛིན་བརྡ་བརྒྱུད་དགའ་རབ་རྡོ་རྗེ་དང་། །ཤྲཱི་སིང་ཧ་ཨོ་རྒྱན་ཡབ་ཡུམ་དང་། །ཆོས་ཀྱི་རྒྱལ་པོ་རང་བྱུང་རྡོ་རྗེ་ལ། །བདག་ཅག་གང་ཟག་གུས་པས་གསོལ་བ་འདེབས། །འདིར་ཐེག་པ་ཐམས་ཅད་ཀྱི་ཡང་རྩེ། མན་ངག་ཐམས་ཅད་ཀྱི་ཉིང་ཁུ། མངོན་སུམ་རང་ཐོག་ཏུ་གཏན་ལ་འབེབས་པའི་གནད། ཟབ་པ་ལས་ཆེས་ཟབ་པ། མཁའ་འགྲོ་མ་ཐམས་ཅད་ཀྱི་སྙིང་ཁྲག་གཅིག་ཏུ་དྲིལ་བ་མཁའ་འགྲོ་སྙིང་ཐིག་ཅེས་བྱ་བ། ཐུན་མོང་མ་ཡིན་པའི་མན་ངག་ཁྱད་པར་ཅན་གྱི་ཆོས་འདིའི་ལོ་རྒྱུས་ནི། མཁའ་ཀློང་རྣམ་པར་དག་པ་འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ་བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་ཆོས་ཀྱི་སྐུ་དྲི་མ་དང་བྲལ་བ། ཅིའི་ངོ་བོར་ཡང་མ་གྲུབ་པ་ལས། སྐུ་ཞལ་ཕྱག་གི་རྣམ་པར་བཞེངས་ནས། ཆོས་སྐུ་སྤྲོས་པ་དང་བྲལ་བའི་ངང་ནས་འོག་མིན་གྱི་གནས་སུ་དཔལ་རྡོ་རྗེ་སེམས་དཔའ་ལ་རང་བཞིན་གྱི་བྱིན་གྱིས་རླབས་ཀྱིས་བཤད་དོ། །ལོངས་སྐུ་མཚན་དང་དཔེ་བྱད་ཀྱིས་བརྒྱན་པ་དཔལ་རྡོ་རྗེ་སེམས་དཔའ་དུར་ཁྲོད་མེ་རི་འབར་བའི་གཞལ་ཡས་ཁང་དུ། བཞུགས་པ་དེ་མིའི་ཡུལ་དུ་བཞུགས་ཀྱང་དགོངས་པ་སངས་རྒྱས་དང་མཉམ་པའི་སྤྲུལ་པ་པོ་དགའ་རབ་རྡོ་རྗེ་ལ་ཚིག་ཙམ་དུ་བཤད། དེས་སློབ་དཔོན་(༢༠༤)ཤྲཱི་སིང་ཧ་ལ་རྩུབ་འགྱུར་ཚལ་གྱི་དུར་ཁྲོད་ཆེན་པོར་མངོན་སུམ་རང་ཐོག་ཏུ་ཕབ་ནས་བསྟན། དེས་རིག་འཛིན་ཆེན་པོ་པདྨ་ཐོད་འཕྲེང་རྩལ་ཞེས་བྱ་བ་རྡོ་རྗེ་ལྟ་བུའི་སྐུ་འདས་གྲོངས་དང་བྲལ་བ་དེ་ལ་དུར་ཁྲོད་ཆེན་པོ་སོ་སའི་གླིང་དུ་གནས་ལུགས་ཡིད་དཔྱོད་དང་བྲལ་བར་བསྟན། དེ་ཡང་ཀུན་ཏུ་བཟང་མོ་ཀློང་གསལ་ཉི་མའི་རྒྱུད་དང་། རིག་པ་རང་ཤར་གྱི་རྒྱུད་དང་། སྙིང་གི་མེ་ལོང་གི་རྒྱུད། ཡི་གེ་མེད་པའི་རྒྱུད། སྒྲོན་མ་འབར་བའི་རྒྱུད། ནོར་བུ་ཕྲ་བཀོད་ཀྱི་རྒྱུད། ཉི་ཟླ་ཁ་སྦྱོར་གྱི་རྒྱུད། ངོ་སྤྲོད་སྤྲས་པའི་རྒྱུད། མུ་ཏིག་ཕྲེང་བའི་རྒྱུད། རིག་པ་རང་གྲོལ་གྱི་རྒྱུད། རྫོགས་པ་རང་བྱུང་གི་རྒྱུད། ཀློང་ཆེན་དྲུག་པའི་རྒྱུད། སྐུ་གདུང་འབར་བའི་རྒྱུད། རིན་ཆེན་སྤུངས་པའི་རྒྱུད་དང་བཅུ་བདུན་དང་། གཞན་ཡང་སྟོང་གསལ་དྲི་མེད་རྒྱུད། གཅིག་ཤེས་ཀུན་གྲོལ་གྱི་རྒྱུད། ཡང་ཏི་གསེར་འབྲུ་གཅིག་པའི་རྒྱུད། སངས་རྒྱས་སྲས་གཅིག་གི་རྒྱུད། རང་བྱུང་རིག་པའི་རྒྱུད། ཡོངས་རྫོགས་ཆེན་པོའི་རྒྱུད། དེ་ལྟར་བཏགས་པས་གྲོལ་བའི་རྒྱུད་དྲུག སངས་རྒྱས་དང་རིག་འཛིན་གྱི་འདས་རྗེས། བཏགས་གྲོལ་སྙིང་པོའི་དོན་ཁྲིད་དང་བཅས་པ་རྣམས་གཏད་ནས་མངོན་སུམ་རང་ཐོག་ཏུ་གཏན་ལ་ཕབ་བོ། །

སློབ་དཔོན་ཆེན་པོ་པདྨ་འབྱུང་གནས་ཀྱིས་གཡའ་རི་གོང་གི་བྲག་ཕུག་ཏུ་གནང་བ་བཞིན་མངོན་དུ་གྱུར་ནས་རྒྱུད་ཀྱི་དགོངས་པ་ཕྱི་རབས་ཀྱི་དོན་དུ་མན་ངག་ཏུ་བཀོད་པ་འདི་རྣམས་ནི། དབང་པོ་ཐ་མའི་རྟེན་གྱི་གང་ཟག་ཀྱང་ལོ་བདུན་དང་ཟླ་བ་བཅུ་གཅིག་ལ་ཕུང་པོ་ལྷག་མ་མེད་པར་སངས་རྒྱ་བའི་གདམས་པ་ཡིན་ནོ། །དེ་ནས་སློབ་དཔོན་ཆེན་པོ་དེ་འཕོ་བ་ཆེན་པོའི་ལུས་ཀྱིས་བོད་ཡུལ་དུ་བྱོན་ནས། ལྷ་སྲིན་གདུག་པ་ཅན་ཐམས་ཅད་བཏུལ་ཞིང་དམ་ལ་བཏགས། རྒྱལ་པོ་ཁྲི་སྲོང་ལྡེ་བཙན་ལ་སོགས་པ་ལས་ཅན་གྱི་སློབ་མ་དཔག་ཏུ་མེད་པ་སྨིན་པར་མཛད། མ་འོངས་པའི་གདུལ་བྱ་རྣམས་ཀྱི་དོན་དུ་ཐུགས་གཏེར་བསམ་གྱིས་མི་ཁྱབ་པ་སྦས་ཡོད་ཀྱི། རྫོགས་པ་ཆེན་པོ་སྙིང་ཏིག་གི་གདུལ་བྱ་རྣམས་བི་མ་ལ་མི་ཏྲ་བྱོན་ནས་འདུལ་བར་དགོངས་ཏེ་དར་བར་མ་མཛད་དོ། །གཞོ་སྟོད་ཏི་སྒྲོའི་བྲག་ལ་བཞུགས་པའི་དུས་སུ་ཇོ་མོ་མཚོ་རྒྱལ་གྱིས་ཞབས་ཏོག་བགྱིས་ཤིང་དབང་དང་གདམས་ངག་ཐམས་ཅད་རྫོགས་ཤིང་ཡི་གེར་བཏབ་ནས་གུ་རུ་ལ་ཞུས་པ། ཆོས་འདི་(༢༠༥)རྣམས་སྤེལ་ལམ་སྦེད། གདུལ་བྱ་ལ་ཕན་ཇི་ལྟར་ཐོགས་གང་གིས་སྤྱོད་ཞུས་པས། གུ་རུའི་ཞལ་ནས། ད་ལྟ་སྤེལ་བའི་དུས་ལ་མ་བབ་གཏེར་དུ་སྦེད་དགོས། མངའ་བདག་གི་སྲས་མོ་ལྷ་ལྕམ་པདྨ་གསལ་གྱིས་སྙིང་ཏིག་གི་དཔེ་སྒྲོམ་སྤྱི་བོར་བླངས་ནས་སྨོན་ལམ་བཏབ་པས་མོའི་ཆོས་སྐལ་ཡིན། མོ་ཚེའི་དུས་བྱས་ནས་སྐྱེ་བ་འགའ་ཞིག་བརྒྱུད་པའི་ཐ་མ་ལ་ཆོས་འདི་དང་འཕྲད། དེའི་ཕྱིར་སྦེད་དགོས། སྙིང་ཏིག་གི་བསྟན་པ་བི་མ་ལས་སྐྱོང་། ཁོང་གི་གདུལ་བྱ་དུས་ལ་བབས་པ་ཡིན། བདག་གི་སྙིང་ཏིག་གི་བསྟན་པ་ནི། སྙིང་ཏིག་སྔ་འགྱུར་འཆལ་ཏེ་ནུབ་ཏུ་ཉེ་བའི་དུས་ན་བསྟན་པ་ནུབ་ཁར་གསལ་ཏེ། རྒྱས་ལ་དར་དྲགས་པ་ཡུན་ཐུང་བར་འགྱུར། དུས་ཀྱི་ཐ་མ་མི་ལོ་ལྔ་བཅུ་ཁ་རལ་གྱི་དུས་སུ་ལྷ་ལྕམ་འདི་མི་ལུས་ལེན། དེ་མངའ་བདག་གི་སྤྲུལ་པས་རྗེས་སུ་འཛིན། མངའ་བདག་སྐྱེ་བ་མཐའ་མའི་དུས་སུ་ཆོས་འབྲེལ་ཐོགས་པ་ཙམ་ཡིན། སྐྱེ་བ་དེའི་ཕྱི་མ་ལ་སྙིང་ཏིག་མན་ངག་གི་གཏེར་དང་འཕྲད། དེའི་དུས་སུ་འགྲོ་དོན་མི་འབྱུང་ཉམས་སུ་ལེན་པའི་དུས་ཡིན། ཚེ་ཚད་ལྔ་བཅུ་ང་དགུ་བཞུགས། ལས་དང་ལྡན་པ་དང་མི་ལྡན་པའི་འབྲེལ་པ་ཁ་ཡར་འོང་། དེ་རྣམས་ལ་ལ་བདེ་བ་ཅན་དུ་འགྲོ་སྟེ་ཁོང་གི་གདུལ་བྱར་འགྱུར། ལ་ལ་ངན་སོང་དུ་སྐྱེ། དེ་ནས་དམ་སེལ་གྱིས་གཤེགས་ཚུལ་སྟོན་ཏེ། ལྔ་བཅུའི་གོང་དུ་འདའ་ཡང་སྲིད། དམ་སེལ་ལ་འཛེམ་ལ་བཤགས་པ་ལ་འབུངས། དེ་ལྟར་བྱས་ན་དགུང་ལོ་ཚད་དུ་བཞུགས་སོ། །

དེའི་དུས་སུ་ཌཱཀྐི་སྡེ་ལྔས་བྱིན་གྱིས་བརླབས་པའི་བུད་མེད་གཅིག་འབྱུང་སྲིད་དེ། དེའི་གདུལ་བྱ་ཡིན་ནོ། །དེ་བྱུང་ན་དེས་ཕྱག་རྒྱ་མ་བྱས་ནས་ཚེ་ལ་གསོས་ཐེབས་ན་ལྔ་བཅུ་ལས་མི་ཚད་པ་ཡང་བཞུགས་སྲིད་དོ། །གདུལ་བྱ་ལས་ལྡན་གྱི་བུ་དེ་ཤ་སྨེའི་རྟགས་ཅན་ཞིག་འོངས་པས། དེ་ལ་གདམས་པ་མ་ལུས་པ་བྱིན་ན་འགྲོ་དོན་ཡང་བག་ཙམ་ཞིག་ནུས་སོ། །དེ་ལ་མ་བྱུང་ན་ཕྱི་མའི་གདུལ་བྱར་འོང་ངེས་ཏེ་ཁ་རག་གི་ཕུར་ལྷག་མེད་འཚང་རྒྱའོ། །གདམས་པ་འདི་རྣམས་བུམ་ཐང་སྨད་དུ་མ་འཁྱོལ་ན་སྔར་གྱི་གཏེར་ཤུལ་ལམ་ལྷ་འདྲེ་མི་འཕོ་བའི་བྲག་ལ་སྦས་ན་སྐྱེ་བ་ཕྱི་མ་ལ་ཐོན་པར་འགྱུར་རོ། །སྐྱེ་བ་འདི་འདས་ནས་ལོངས་སྐུའི་ཞིང་ཁམས་དར་ཅིག་ཉུལ་ལོ། །དེ་ནས་བུམ་ཐང་ཐར་པ་གླིང་དུ་སྐྱེ། བཅོ་ལྔ་ལོན་ནས་འགྲོ་དོན་བྱེད། (༢༠༦)གཏེར་སྒོ་མང་བར་འབྱེད། རྫུ་འཕྲུལ་ཡ་མ་ཟུང་སྟོན་ཏེ་དགུང་ལོ་བཅུ་བདུན་བཞུགས། བུད་མེད་ཀྱི་ལུས་བཟུང་བའི་ཌཱཀྐི་སྡེ་ལྔས་ཡུམ་བྱས་ཏེ་འགྲོ་དོན་འུར་བ་འབྱུང་། སྲས་ཟླ་བ་གྲགས་པ་བྱ་བ་རྟ་མགྲིན་གྱི་སྤྲུལ་པ་གཅིག་འཁྲུངས། དེས་ཀྱང་འགྲོ་དོན་བྱེད་དེ་བསྟན་པ་མི་ལོ་དགུ་བཅུ་སྐྱོང་ངོ་། །དེའི་ཆོས་སྐལ་ཡིན་པས་གཏེར་དུ་སྦེད། ཅེས་གསུངས་ནས་བུམ་ཐང་སེང་གེའི་བྲག་ཕུག་ཏུ་རྒྱུད་བཅོ་བརྒྱད་ཀྱི་གླེགས་བམ་སྦས་ཏེ་བཞུགས་སོ། །རྒྱུད་དེ་རྣམས་ཀྱི་དགོངས་པ་གཅིག་ཏུ་གནད་ཀྱི་མན་ངག་ཏུ་དྲིལ་བ། ཀུ་སུ་ལུའི་སྐོར་ཟབ་པ་ལས་ཆེས་པ་འདི་རྣམས་དྭགས་པོ་དང་ལུང་གི་ཁྲ་མོ་བྲག་ལ་གཏེར་དུ་སྦས་ནས་ལྡང་ལྷ་ལ་གཏེར་བདག་བཅོལ་ཏེ། འདིའི་ཆོས་སྐོར་གྱི་གྲངས་ལ། བཏགས་གྲོལ་གྱི་རྒྱུད་དྲུག་དང་། དེའི་འགྲེལ་པ་དྲུག་པ་དང་། ལོ་རྒྱུས་དང་། རྩལ་དབང་དང་། རྒྱུད་ཀྱི་བཅང་ཐབས་དང་། གཞན་དོན་རྟགས་བསྟན་དང་། ཡོན་ཏན་དང་འབྱུང་ཚུལ་ལམ་ཆེ་བ། འདས་རྗེས་གསུམ་དང་། བཏགས་གྲོལ་དོན་ཁྲིད་དང་ཉི་ཤུ་རྩ་གསུམ་པོ་དེ་བཏགས་གྲོལ་གྱི་སྐོར་རོ། །ཡང་རིགས་ལྔ་ཕྱི་སྒྲུབ་དང་ནང་སྒྲུབ་དང་། སྤྲོས་བཅས་བུམ་དབང་དང་། ཌཱཀྐི་མངོན་རྟོགས་དང་། དབང་གསུམ་པ་དང་། གསུམ་པའི་ལག་ལེན་དང་། དབང་གི་རྒྱབ་ཡིག་དང་། ཁྱད་པར་དབང་ལྔ་དང་། ཕྱི་སྒྲུབ་ནང་སྒྲུབ་ཀྱི་ལས་བྱང་ཐུན་མོང་དང་། གསང་སྒྲུབ་ཀྱི་ལས་བྱང་རྩར་འཕྲེང་དང་། དབང་སྒྲུབ་དང་། བུམ་སྒྲུབ་དང་། དལ་གྱི་རྣམ་དག་དང་། ཕྱི་ནང་གི་ཚོགས་མཆོད་དང་། གཏོར་མའི་ཆོ་ག་དང་། གསང་སྒྲུབ་ཀྱི་ཚོགས་མཆོད་དང་། དབང་གསུམ་ཐོ་ཡིག་དང་། གསང་དབང་གི་ལྷན་ཐབས་དང་། ཤེས་རབ་ཡེ་ཤེས་ཀྱི་ལྷན་ཐབས་དང་། མཁའ་འགྲོ་སྙིང་ཏིག་གི་མན་ངག་དང་། སྤྱི་གནད་དང་། བླ་རྡོ་དང་། ཌཱཀྐིའི་ནོར་སྒྲུབ་དང་། ཉི་ཤུ་རྩ་གསུམ་པོ་དེ་དབང་དང་། ལག་ལེན་གྱི་ཆོས་སྐོར་རོ། །ཡང་ཐོད་རྒལ་དོན་ཁྲིད་ནོར་བུའི་སྙིང་པོ་དང་། དེའི་ཏི་ཀ་གསལ་བྱེད་སྒྲོན་མ་དང་། ཁྲིད་རྒྱབ་ལུང་གི་ཕྲེང་བ་དང་། བརྟགས་ཡིག་དང་། ཚད་ཡིག་དང་། ལྔ་པོ་དེ་ཁྲིད་ཀྱི་སྐོར་རོ། །དེ་དག་གི་རྒྱབ་ཆོས་སུ། སྙིང་ཏིག་ཆེན་མོ་དང་། དོན་གསལ་མེ་ལོང་དང་། ངོ་སྤྲོད་ལམ་འབྲས་དང་། ཞལ་གདམས་གནད་ཐིགས་དང་། རྡོ་རྗེ་ཆུ་འཐུང་དང་། (༢༠༧)དགུ་པོ་དེ་རྒྱབ་ཆོས་ཀྱི་སྐོར་རོ། །ཡང་ཞི་བ་བར་དོ་ལམ་གྱི་མཚན་ཉིད་དང་། ཁྲོ་བོ་དང་། ཁྲོ་བོ་བར་དོ་དང་། བར་དོའི་ཞལ་གདམས་གཉིས་དང་། བར་དོ་བཞིའི་བསྐུལ་རྐྱེན་གྱི་མན་ངག་དང་། ལྔ་པོ་དེ་བར་དོའི་གདམས་སྐོར་རོ། །ཡང་ལྟོ་གོས་ཀྱི་ཞེན་པ་གཅོད་པ་ལ་རྡོལ་འཆའ་དང་། གཏུམ་མོ་གཉིས་དང་། ལམ་གྱི་བར་ཆད་བསྲུང་བ་ལ་བཀའ་སྲུང་སྲོག་སྒྲུབ་ནག་མོའི་རྒྱུད་དང་། གདམས་པ་དང་རྒྱུ་དུས་ཐུན་དྲུག །བླ་རྡོ། ཆོ་འཕྲུལ། མན་ངག་ལ་སོགས་ཏེ་ཆ་ལག་གི་སྐོར་རོ། །དེ་ཡང་བཏགས་གྲོལ་རྒྱུད་དྲུག་ལ་ནི། ཀུན་ཏུ་བཟང་པོ་ནས་ཨོ་རྒྱན་པདྨའི་བར་དུ་དགོངས་པར་བརྒྱུད་ནས། སློབ་དཔོན་གྱིས་གསུངས་ཤིང་མཚོ་རྒྱལ་གྱིས་བསྡུས་ནས་འགྲེལ་པ་དྲུག་པོ་མཁར་ཆེན་མས་མཛད་དོ། །བཏགས་གྲོལ་སྙིང་པོའི་དོན་ཁྲིད་ནི་དགའ་རབ་རྡོ་རྗེས་མཛད་ནས་ཤྲཱི་སིང་ཧས་འདས་རྗེས་དང་བཅས་པ་སློབ་དཔོན་པདྨ་ལ་གསུངས་སོ། །དེ་ལས་གཞན་པའི་མན་ངག་རྒྱུད་བཅོ་བརྒྱད་ཀྱི་དགོངས་པ་བཞིན་དུ་གཡའ་རི་གོང་གི་བྲག་ཕུག་ཏུ་སློབ་དཔོན་པདྨས་མཛད་ལ། ཁྲིད་ཀྱི་ལག་ལེན་ཏི་ཀ་དོན་ཁྲིད་ནི་མཁར་ཆེན་མས་མཛད་དོ། །མཁའ་འགྲོ་ཞུས་ལེན་ནི་གོལ་ས་དང་ཐེ་ཚོམ་བཅད་པའི་ཕྱིར་མཚོ་རྒྱལ་གྱིས་སློབ་དཔོན་ལ་ཞུས་ནས་ཡི་གེར་བཏབ་བོ། །བསྟན་སྲུང་སྲོག་སྒྲུབ་ནག་མོའི་རྒྱུད་གདམས་པ་དང་བཅས་པ་ནི་ཤ་ཟའི་མཁའ་འགྲོ་མ་རྣམས་ཀྱིས་རྡོ་རྗེ་གདན་གྱི་བྱང་དུ་དབང་ཕྱུག་ཆེན་པོའི་རྟེན་གྱི་ནང་དུ་སྦས་པ་མུ་སྟེགས་གུ་ཡ་ཤྲཱིས་བཏོན་ནོ། །དེ་ལ་སློབ་དཔོན་པདྨས་གསེར་སྲང་སྟོང་ཕུལ་ནས་ཞུས་ཏེ། མཁའ་འགྲོ་སྙིང་ཏིག་གི་བཀའ་སྲུང་དུ་བསྐོས་སོ། །དཀར་ཆག་ཐེམ་དུ་མ་ཐེབས་པའི་གཏེར་ཁ་ལྷན་ཅིག་ནས་བྱུང་བ་ནི། ཚེ་སྒྲུབ་གཅིག །ཛམ་ནག །ལྷ་ལྕམ་པདྨ་གསལ་གྱི་ལོ་རྒྱུས་དང་ཐེམ་ཡིག་རྣམས་བྱུང་ངོ་། །ཆོས་སྐོར་འདི་རྣམས་སློབ་དཔོན་པདྨ་ཡབ་ཡུམ་གྱིས་ཁྲ་མོ་བྲག་ཏུ་སྦས་པ་ལས། དུས་ཕྱིས་འབྲིལ་ལྡང་ཆོས་འབྱུང་དུ་སྐུ་འཁྲུངས་པའི་ལྷ་ལྕམ་པདྨ་གསལ་སྐུ་སྐྱེ་བ་བཞེས་པ། བརླ་གཡས་པའི་ནང་ན་ཤ་མཚན་མཁའ་འགྲོ་མའི་སྤྱན་འདྲ་བ་ཡོད་པ། ཁམས་ཆུ། དགུང་སྙིང་ཡོས་བུ། མཚན་ཚུལ་རྡོར་ཞེས་བྱ་བ། སྦྱངས་པའི་ལས་སད་པ། འཁོར་འདས་ཀྱི་ཆོས་ཐམས་ཅད་སེམས་སུ་རྟོགས་པ་དེས། གཞི་བདག་དང་མཁའ་(༢༠༨)འགྲོས་ལུང་བསྟན་པ་དང་། ཁ་བྱང་ལྡེ་མིག་ཀྱང་ལག་ཏུ་བྱོན་ནས་ཆུ་མོ་གླང་གི་ལོ། སྟོན་ཟླ་ཐ་ཆུང་གི་ཉི་ཤུ་བདུན་གྱི་ཉིན། བླ་མ་ཡི་དམ་མཁའ་འགྲོ་ཆོས་སྐྱོང་གཏེར་བདག་རྣམས་ལ་ཚོགས་མཆོད་ཕུལ་ནས་གསོལ་བ་བཏབ་སྟེ་གཏེར་ནས་གདན་དྲངས་སོ། །གཏེར་གཡོག་རྣམས་ལོ་སྟོན་རྡོ་རྗེ་འབུམ་གྱིས་བྱས་སོ། །

དེ་ནས་རིན་པོ་ཆེ་ཚུལ་རྡོར་ནི། གུ་རུ་རིན་པོ་ཆེས་ལུང་བསྟན་པ་ལས། ཆོས་འདི་རྣམས་གསང་ཞིང་ཉམས་སུ་བླངས་ཏེ་གཏེར་དཔེ་རྣམས་སྔར་གྱི་གཏེར་ཤུལ་ལམ། བུམ་ཐང་ངམ། ལྷ་འདྲེ་མི་འཕོ་བའི་བྲག་ལ་སྦས་ན་སྐྱེ་བ་ཕྱི་མ་ཐོན་ནས་འགྲོ་དོན་དཔག་ཏུ་མེད་པ་འབྱུང་། དེ་ལྟར་མ་བྱས་ན་དམ་སེལ་གྱིས་སྐུ་ཚེའི་བར་ཆད་དུ་འགྱུར་ཞེས་ལུང་བསྟན་པ་ལས། ལུང་བསྟན་ཕྱི་མའི་དབང་དུ་གྱུར་ནས་གཤེགས་སོ། །

ཤོག་སེར་རྣམས་ལོ་སྟོན་རྡོ་རྗེ་འབུམ་གྱི་ཕྱག་ན་ཡོད་པས། ཆོས་རྗེ་རང་བྱུང་རྡོ་རྗེས་ཞུས་སོ། །ལྕགས་མོ་ལུག་གི་ལོ་བྲེའི་ཟླ་བའི་ཚེས་བརྒྱད་ལ་ཀོང་པོ་ཙཱ་རི་གསར་རྙིང་གི་མཚམས། ལ་རྒྱབ་ཀྱི་རི་ཁྲོད་དུ་ཁ་རག་པ་གྲགས་པ་དབང་ཕྱུག་ལ་སོགས་པས་ཤོག་སེར་ལས་ཞལ་བཤུས་སོ། །མཁའ་འགྲོ་ཞུས་ལེན་གྱི་ཤོག་སེར་རྩེ་སོར་གསུམ་ལ་ཡིག་ཕྲེང་ཉི་ཤུ་རྩ་གཉིས་རེ་བྱས་པ་གཅིག་གཞན་ཡིད་ཆེས་པའི་ཕྱིར་ཆོས་རྗེ་པས་བསྣམས་ནས་བྱོན་ནོ། །རྨོངས་པ་ལ་ལ་དག་གཏེར་མ་ལ་དབང་བཀའ་ཆད་པར་འགྱུར་རོ་སྙམ་དུ་དོགས་ན། སློབ་དཔོན་པདྨས་བཞེད་པ་འདི་ལྟར་གསུངས་སོ། །ཤོག་སེར་མཐོང་བས་སློབ་དཔོན་པདྨའི་སྐུ་དང་མཇལ། བརྡ་འཕྲད་པས་གསུང་དང་མཇལ། དོན་འཕྲད་པས་ཐུགས་དང་མཇལ་ལོ། །མདོར་ན་ཆོས་རྣམས་ལ་བརྒྱུད་ཚུལ་དྲུག་ཡོད་པ་འདི་གང་རུང་ཅིག་དང་ལྡན་ན་བརྒྱུད་པ་མ་ཆད་པར་འགྱུར་ཏེ། དྲུག་གང་ཞེ་ན། རྒྱལ་བ་དགོངས་པའི་བརྒྱུད་པ་དང་། རིག་འཛིན་བརྡའི་བརྒྱུད་པ་དང་། གང་ཟག་སྙན་ཁུང་བརྒྱུད་པ་དང་། ཐུགས་རྗེ་བྱིན་རླབས་བརྒྱུད་པ་དང་། མཁའ་འགྲོ་གཏད་རྒྱའི་བརྒྱུད་པ་དང་། སྨོན་ལམ་དབང་གི་བརྒྱུད་པའོ། །དེ་དག་ལས། འདི་ལ་དྲུག་ཁ་ཚང་སྟེ། རྒྱལ་བ་དགོངས་པའི་བརྒྱུད་པ་ནི། རྒྱལ་བ་རིགས་ལྔས་རིམ་པ་བཞིན་དུ་སྣོད་ལ་དགོངས་པ་ཙམ་གྱིས་རིག་པའི་རྩལ་དབང་ཐོབ། དེ་བཞིན་དུ་བདག་འདྲ་པདྨས་ཀྱང་མ་འོངས་པར་འགྲོ་བ་ལ་དགོངས་ནས་ཟབ་གཏེར་དབང་བཀའ་(༢༠༩)དང་བཅས་པ་སྦས་པས། སུ་ཡིས་ཐོན་པ་ལ་དགོངས་བརྒྱུད་ཀྱི་དབང་བཀའ་ཡོད་དོ་ཞེས་བཞེད་དོ། །རིག་འཛིན་བརྡ་བརྒྱུད་ཀྱང་འདི་ལ་ཚང་སྟེ། ཀུན་ཏུ་བཟང་པོ་ནས་རིགས་ལྔའི་བར་དུ་བརྒྱུད་པ་ཐམས་ཅད་བརྡའི་ཕྱག་རྒྱ་བསྟན་པ་ཙམ་གྱིས་དབང་ཐོབ་ལ། བདག་འདྲ་པདྨས་ཀྱང་མ་འོངས་པའི་སྣོད་ལྡན་ལ་དབང་བསྐུར་བ་འདི་ལྟར་གྱིས་ཤིག་ཅེས་པའི་གཏེར་དཔེ་བཞག་སྟེ། སློབ་བུས་དེ་བཞིན་དུ་དབང་བསྐུར་བས་བྱིན་རླབས་དང་དངོས་གྲུབ་ཐོབ་པའི་ཕྱིར་དབང་བཀའ་ཡོད་དོ་ཞེས་བཞེད་དོ། །

རིག་པ་བདུན་པའི་རྒྱུད་ལས། བརྡ་དང་བརྡས་མཚོན་གོ་བ་ནི། །དབང་གི་ནང་ནས་དབང་བཀའ་འོ། །ཞེས་སོ། །སྙན་ཁུང་དུ་བརྒྱུད་ཚུལ་ཡང་། མ་འོངས་པའི་དུས་སུ་སྤྲུལ་སྐུ་ཡི་གེའི་གཟུགས་སུ་འབྱུང་བར་མདོ་དུ་མ་ནས་གསུངས་ལ། སྙིང་རྗེ་པདྨ་དཀར་པོའི་མདོ་ལས། རི་དང་རྡེའུ་ཤིང་བུ་དང་། །རྔ་བོ་ཆེ་དང་དཔག་བསམ་ཤིང་། །དེ་དག་ལས་ནི་སྒྲ་འབྱུང་བ། །རྒྱལ་བས་བྱིན་གྱིས་བརླབས་པ་སྟེ། །འདི་དག་བཀའ་ཞེས་བྱ་བར་འདོད། །ཅེས་གསུངས་ཤིང་། སློབ་དཔོན་པདྨས་བཞེད་པའི་གཏེར་དཔེ་བཞིན་མ་ནོར་བར་ཉམས་སུ་བླངས་པས། བླ་མ་དང་། སངས་རྒྱས་དང་། རང་སེམས་དབྱེར་མེད་དུ་གྱུར་པའི་སྙན་བརྒྱུད་དམ་པར་བཞེད་དེ། གཏེར་ལུང་ལས། ཆོས་སྐུ་ཀུན་ཏུ་བཟང་པོ་ལ། །བླ་མ་བྱ་བ་ཡོད་མིན་ཏེ། །དབང་བསྐུར་ཆོས་བཤད་བྱེད་མཁན་མེད། །རང་སེམས་ཆོས་སྐུར་ཤེས་ཙ་ན། །དུས་གསུམ་རྒྱལ་བའི་དབང་ལུང་ཐོབ། །བརྒྱུད་པར་འཛིན་པ་རྟོག་པ་ཡིན། །ཞེས་སོ། །ཐུགས་རྗེ་བྱིན་རླབས་ཀྱི་བརྒྱུད་པ་ཡང་འདི་ལ་ཚང་སྟེ། ཀུན་ཏུ་བཟང་པོ་ནས་རིམ་པ་བཞིན་དུ་བྱིན་གྱིས་བརླབས་པ་ཙམ་ལ། རིག་པའི་རྩལ་དབང་ཐོབ་ལ། བདག་འདྲ་པདྨས་ཀྱང་། མ་འོངས་པའི་དོན་དུ་ཟབ་གཏེར་སྦས་པ་དེ་སུས་ཐོན་པ་དང་མཐོང་བ་ལ་བྱིན་རླབས་ཞུགས་ཏེ། རིག་པའི་རྩལ་དབང་ཐོབ་བོ་ཞེས་བཤད་དོ། །མཁའ་འགྲོ་གཏད་རྒྱའི་བརྒྱུད་པ་ཡང་འདི་ལ་ཚང་སྟེ། ཀུན་ཏུ་བཟང་པོ་ནས་རིམ་བཞིན་དུ་སྐལ་ལྡན་དང་མ་ཕྲད་ཀྱི་བར་དུ་མཁའ་འགྲོ་མ་ལ་གཏད་ནས། གཏེར་སྲུང་རྣམས་ཀྱིས་ཀྱང་སྣོད་ལྡན་ལ་གཏོད་པའི་ལུང་ཐོབ་པ་ཡིན་ནོ། །ཞེས་བཞེད་དོ། །སྨོན་ལམ་དབང་བསྐུར་གྱི་བརྒྱུད་པ་ཡང་འདི་(༢༡༠)ལ་ཚང་སྟེ། ཐམས་ཅད་སྨོན་ལམ་གྱིས་མཐའ་སྒྱུར་བ་ལས་སྨོན་ལམ་ནི་སངས་རྒྱས་ཀྱི་བདེན་པའི་བཀའ་ཡིན་ལ། བཀའ་ནི་མི་བསླུ་བའི་མཆོག་དམ་པ་ཡིན་ཏེ། བདག་འདྲ་པདྨས་ཀྱང་མ་འོངས་ལས་ཅན་གཅིག་དང་ཕྲད་པར་ཤོག་ཅེས་སྨོན་ལམ་བཏབ་པས། དེའི་མཐུ་ཡིས་ལས་ཅན་དང་འཕྲད་པ་ཡིན་ཏེ། དབང་ཐམས་ཅད་ཀྱི་དམ་པ་སྨོན་ལམ་ཡིན་ནོ་ཞེས་བཞེད་དོ། །

མདོར་ན་སློབ་དཔོན་པདྨས་བཞེད་པའི་ཤོག་སེར་མཐོང་བ་ཙམ་ཞལ་མཐོང་གི་འཁོར་ཡིན་ལ་དགོངས་པ་ཕྱིན་ཅི་མ་ལོག་པར་ལོངས་པ་ནི་ཐུགས་ཀྱི་སྲས་ཏེ། དབང་ཐམས་ཅད་ཡོངས་སུ་རྫོགས་པར་བཞེད་དོ། །དེ་ལྟར་བརྒྱུད་པ་དྲུག་དང་ལྡན་པར་དབང་ལུང་དཔེ་རྣམས་རྗེ་རིན་པོ་ཆེའི་དྲུང་དུ་བྱོན་པ་ཡིན་ལ། ཐུན་མོང་མ་ཡིན་པའི་བརྒྱུད་པ་ནི་ཆོས་རྗེ་རང་བྱུང་རྡོ་རྗེ་ཉིད་སངས་རྒྱས་དང་བྱང་ཆུབ་སེམས་དཔའ་མང་པོ་དང་དངོས་སུ་མཇལ་ཞིང་བྱིན་གྱིས་བརླབས་ཚུལ་དང་ཆོས་ཀྱི་རྒྱལ་པོར་དབང་བསྐུར་བའི་ཚུལ་དུ་མ་རྣམ་ཐར་ཚིགས་བཅད་མར་ལྟའོ། །ཆོས་འདིའི་ཁྱད་པར་གྱི་བརྒྱུད་པ་ནི། ཆོས་རྗེ་རིན་པོ་ཆེས་ཇོ་མོ་གངས་ལ་དབེན་པ་མཛད་པའི་ཚེ། ཨོ་རྒྱན་པདྨ་འབྱུང་གནས་མདུན་གྱི་ནམ་མཁའ་ལ་གསལ་བར་སྣང་ཞིང་། དངོས་སུ་དབང་བསྐུར། བྱིན་གྱིས་བརླབས་པའི་སྣང་བ་དང་། ཇོ་མོ་ཁ་རག་གི་ཤར་ཕྱོགས་ཀྱི་རི་ཁྲོད་དུ་དབེན་པ་མཛད་པའི་སྟོན་ཟླ་ར་བའི་ཉའི་དུས་ཚིགས་ལ་མནལ་ལམ་དུ་གུ་རུས་བྱིན་བརླབས་དབང་བསྐུར་མཛད་དོ། །ཡང་སྙིང་པདྨ་ཕུག་ཏུ་ཚོགས་ཀྱི་འཁོར་ལོ་བསྐོར་བའི་དུས་མཁའ་འགྲོ་མས་དབང་བསྐུར་བྱིན་བརླབས་པའི་དག་སྣང་ལ་མགུར་མང་པོ་གསུངས་ཤིང་། སློབ་དཔོན་པདྨའི་གདམས་པ་སྔར་མཇལ་བ་རྣམས་ཀྱི་མཐར་ཐུག་ཏུ་གྱུར་པ་ཟབ་པ་ལས་ཀྱང་ཆེས་ཟབ་པ་ཅིག་དང་མྱུར་དུ་མཇལ་ལོ་སྙམ་ཐུགས་ཀྱིས་དགོངས་པ་ལས། རིང་པོར་མ་ཐོགས་པར་སློབ་དཔོན་པདྨ་ཡབ་ཡུམ་གྱིས་རྫོགས་པ་ཆེན་པོ་ཡང་གསང་བླ་ན་མེད་པ་ཀུ་སུ་ལུའི་སྐོར་རྣམས་དྭགས་པོ་དང་ལུང་ཁྲ་མོ་བྲག་ལ་སྦས་པའི་གཏེར། ལྷ་ལྕམ་པདྨ་གསལ་གྱི་སྐྱེ་བ་སྦས་པའི་རྣལ་འབྱོར་ཚུལ་རྡོར་གྱིས་བཏོན་ནས་ཁོང་གི་གཏེར་གཡོག་པ་ལོ་སྟོན་རྡོ་རྗེ་འབུམ་ལ་གནང་བ་དེ་ལོ་སྟོན་གྱིས་ཆོས་རྗེའི་དྲུང་དུ་དབུལ་ལོ། །རིན་པོ་(༢༡༡)ཆེ་དགྱེས་ཤིང་། སྔར་གུ་རུ་དང་མཁའ་འགྲོས་དབང་བསྐུར་བྱིན་གྱིས་བརླབས་པའི་དོན་མངོན་དུ་གྱུར་ཏོ། །ཆོས་རྗེ་རིན་པོ་ཆེས་རྗེས་སུ་བཟུང་ནས་ཆུ་ཕོ་སྤྲེའུའི་ལོ་ཟླ་བ་དང་པོ་ལ་མཚུར་ཕུ་བདེ་ཆེན་གྱི་དབེན་གནས་སུ་ཉེ་གནས་ཆེན་པོ་སློབ་དཔོན་ཡེ་ཤེས་རྒྱལ་མཚན་གྱིས་གསོལ་བ་བཏབ་པ་ལ་བརྟེན་ནས། འབྲོང་རུ་བ་མཁན་པོ་རྒྱལ་མཚན། རྟོགས་ལྡན་ཡེ་རྒྱལ། སྤྲུལ་སྐུ་དབོན་པོ་སྨན་ལུང་པ། བདག་གཡུང་སྟོན་སྨྱོན་པ་དང་ལྔ་ལ་བཀའི་གཉེར་གཏད་ཅིང་། གཞན་ཡང་མཆོད་གཡོག་པ་དང་། གསོལ་ཇ་བ་ལ་སོགས་པ་བདུན་ཙམ་དང་བཅས་པ་ལ་དབང་ལྔ་ཡོངས་སུ་རྫོགས་པར་བསྐུར་ནས་གདམས་པ་ཐམས་ཅད་ལྷག་མ་མེད་པར་གནང་ངོ་། །ལོ་རྒྱུས་འདི་དང་དབང་ལྔའི་དབང་བྱང་ཕྱག་ལེན་ལྷན་ཐབས་སུ་བསྒྲིགས་པ་འདི་དང་། མཁའ་འགྲོ་ཕྱི་ནང་གི་ལས་བྱང་དང་། གསང་སྒྲུབ་རྟ་ཕག་ཞལ་སྦྱོར་གྱི་ལས་བྱང་བསྟོད་པ་དང་བཅས་པ་འདི་རྣམས་སློབ་དཔོན་པདྨའི་ཡིག་ཆ་རྣམས་དང་། ཆོས་རྗེ་པའི་གསུང་བཞིན་ལག་ཏུ་བླང་བདེ་བར་ཁྲིགས་སུ་བཀོད་པ་འདི་ཤཱཀྱའི་དགེ་སློང་རྡོ་རྗེ་དཔལ་བཟང་པོས་བཀོད་པ་ཡིན་མོད་ཀྱི། སློབ་དཔོན་པདྨས་མཛད་པའི་མངོན་རྟོགས། མཆོད་འབུལ་ཚོགས་མཆོད་ཀྱི་ཡིག་ཆ་རྣམས་གུང་བསྒྲིགས་ན་འགལ་བ་ཅུང་ཟད་ཀྱང་མེད་དོ། །

རྒྱལ་བའི་གསུང་རབ་མཁའ་ཀློང་ཡངས་པ་ནས། །ཡང་གསང་སྙིང་ཏིག་ཉིན་མོར་བྱེད་པར་བྱས། །མངོན་སུམ་རང་གནད་ཚ་ཟེར་ཕྱོགས་བཅུར་རྒྱས། །བརྒྱུད་པ་གསུམ་གྱིས་མ་རིག་མུན་པ་སངས། །བདག་བློ་ཆུ་སྐྱེས་ཟུམ་པ་ཅུང་ཟད་བྱེ། །ཉམས་མྱོང་རྟོགས་པའི་གེ་སར་རབ་འཕེལ་ནས། །ཡང་ཟབ་གནད་ཀྱི་མན་ངག་དྲི་བསུང་གིས། །རྗེས་འཇུག་ལས་ཅན་བུང་བའི་ཚོགས་ཚིམ་ཞིང་། །ཡིད་དཔྱོད་འཛིན་པའི་གར་ཕྱིན་དང་བྲལ་དང་། །མངོན་སུམ་རིག་པའི་འདབ་གཤོག་རབ་འཕེལ་ཏེ། །ཆོས་ཉིད་ཟད་པའི་ནམ་མཁར་གར་བྱེད་ཅིང་། །བདག་མེད་ཆོས་ཀྱི་སྒྲ་སྐད་ཀུན་སྒྲོག་ཤོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །དགེའོ། །མངྒ་ལཾ།། །།

གཡུང་སྟོན་པས་གསུངས་པའི་ཕྱག་འཚལ།

༄༅། །གཡུང་སྟོན་པས་གསུངས་པའི་ཕྱག་འཚལ་བཞུགས་སོ། །

༄༅། །བླ་མ་དམ་པ་གཡུང་སྟོན་པ་ལ་གུ་རུ་ཀུན་མཁྱེན་ཤཱཀྱ་མགོན་(༢༡༢)པོས་ཞུས་པ། དེ་ཡང་དང་པོར་ཆོས་རྗེའི་དྲུང་ནས་སྤྲུལ་སྐུ་སྨན་ལུང་པ་ལ་གནང་། དེས་རིན་པོ་ཆེ་མྱུར་སྡིངས་པ་ལ་གནང་། དེས་བླ་མ་ཤཱཀྱ་མགོན་པོ་ལ་ཞུས་པས་དབང་རྫོགས་ལུང་དང་བཅས་པར་ཞུས་ཏེ། ཁྲིད་ལ་ཉན་ཁྲིད་དུ་ཞུས་པས་ཐེ་ཚོམ་ཅུང་མ་ཆོད་ནས་བླ་མ་གཡུང་སྟོན་པ་ལ་ཡོངས་སུ་རྫོགས་པར་མྱོང་ཁྲིད་ཉམས་མྱོང་རང་ཐོག་ཏུ་ཁེལ་བར་བསྐྱངས་ཏེ་རྩ་རླུང་ཐིག་ལེའི་གེགས་འཕྲང་ལས་ཐར་ཏེ་མྱོང་བ་རྫོགས་པར་གསུངས་སོ། །མེ་ཕོ་ཁྱིའི་ལོ་ལ་གཏེར་ནས་བྱོན་ནས་ལོ་སོ་གསུམ་ལོན་པའི་ཚེ་ན་ཞུས་ནས་ལོ་སྒྲུབ་ཀྱི་མེ་ཏོག་དང་གསེར་ཞོ་གང་གི་མཎྜལ་ཕུལ་ནས་ཞུས། བླ་མ་ཤཱཀྱ་མགོན་པོའི་དྲུང་དུ་སྤྲང་འཁྱམས་བཛྲ་རཏྣས་ཞུས་ཏེ་ས་མོ་གླང་གི་ལོར་དགུན་པོ་གྲོ་མ་སྟོད་པ་དཀར་པོ་ཆུ་མིག་རྫོང་ཁའི་དགོན་པར་དཔྱིད་ཟླ་ར་བ་རྟ་པ་ཟླ་བའི་ཚེས་གསུམ་ལ་དབང་ལྔ་ཡོངས་སུ་རྫོགས་པར་ཞུས་ནས་ཉམས་ཁྲིད་ལག་ཁྲིད་དུ་རྫོགས་པར་ཞུས་ཏེ་རྟགས་ཚད་ཀྱི་ཡི་གེས་གཏན་ལ་ཕབ་ནས་ཉམས་གོང་འཕེལ་གྱི་སྣང་བ་རྫོགས་པར་བསྐྱངས་ཤིང་། རྩ་རླུང་ཐིག་ལེ་ལ་སོགས་པ་རྫོགས་པར་ལག་ཁྲིད་དུ་ཞུས་ཏེ་གསང་དབང་། ཤེས་རབ་ཡེ་ཤེས། ཚིག་དབང་། ཁྱད་པར་དབང་ལྔ་རྩལ་དབང་རྣམས་བསྐྱར་ཞིང་ཞུས་ཏེ་དབང་རྫོགས། བཀའ་རྫོགས། དཔེ་རྫོགས་ལུང་ཡོངས་སུ་རྫོགས་པར་ཞུས་ཏེ། དགྱེས་བཞིན་དུ་གནང་ནས་གཞན་དོན་གྱིས་ཤིག་པའི་རྗེས་གནང་ཡང་ཐོབ་ཅིང་། ས་གས་ཉ་བའི་ཟླ་ཚེས་བཅོ་ལྔ་ཡར་བཅད་ཟླ་བ་ཕྱེད་དང་བཞིར་གདམས་པ་རྫོགས་ནས་དབྱར་ར་བའི་ཉིན་སྔ་དྲོ་བརྒྱུད་ཡིག་དང་བཏགས་གྲོལ་འདོགས་བཀའ་གཏད་པའི་དུས་སུ་ཆོས་སྐོར་འདིའི་བདག་པོར་གཏད་དོ། །སྤྲང་བན་རྡོ་རྗེ་རིན་ཆེན་གྱིས་ཇི་ལྟར་ཞུས་པའི་ཚུལ་གྱི་བརྒྱུད་ཡིག་བཀོད་པའོ། །།། །།

༄༅། །ཨེ་མ་ཧོ། རྒྱལ་བ་སྐུ་གསུམ་སར་གནས་རིག་འཛིན་དང་། །ངོ་མཚར་རྨད་བྱུང་ཨོ་རྒྱན་ཡབ་ཡུམ་གཉིས། །ལུང་བསྟན་གཏེར་སྟོན་ཐུགས་སྲས་སྤྲུལ་པའི་སྐུ། །མཚུངས་མེད་ཆོས་ཀྱི་རྒྱལ་པོ་ཀརྨ་པ། །ཆོས་རྗེའི་ཐུགས་སྲས་མཉམ་མེད་བྱ་བྲལ་བ། །བརྒྱུད་པའི་བཅུད་འདུས་མཁྱེན་ལྡན་ཤཱཀྱ་མགོན། །རྩ་བརྒྱུད་བླ་མ་རྣམས་ལ་ཕྱག་འཚལ་ལོ། །ཐོག་མེད་དུས་ནས་འཁོར་བའི་རྒྱུན་གྲོལ་དུ། །ལས་(༢༡༣)རླུང་ཤུགས་ཀྱིས་དུས་མཐར་སྐྱེས་པ་ཡི། །དབུལ་རྨོངས་གླེན་སྟོང་བློ་ཆུང་ཀུ་སུ་ལུ། །བས་མཐའི་གནས་ན་ཡིད་བྲེལ་སྙམ་ཆུང་བ། །རིག་པ་ཅོལ་ཆུང་རྐང་འཁྱམས་སྤྲང་པོ་བདག །བླ་མ་ཡི་དམ་མཁའ་འགྲོའི་ཐུགས་རྗེ་ཡིས། །དམ་པས་རྗེས་སུ་བཟུང་ཞིང་རྒྱུད་བཀྲོལ་ནས། །རྒྱལ་བ་ཀུན་གྱི་དགོངས་པའི་མཐར་ཐུག་ཉིད། །ཐེག་པའི་ཡང་རྩེ་རྫོགས་ཆེན་སྙིང་པོ་འདི། །གྲུབ་ཐོབ་རིམ་པར་བརྒྱུད་ནས་བདག་ལ་སྨིན། །ཟབ་ལམ་འདི་དང་མཇལ་བ་བདག་སྐལ་བཟང་། །ཨོ་རྒྱན་ཐུགས་རྗེས་མ་འོངས་འགྲོ་དོན་དུ། །མཁའ་འགྲོ་སྙིང་ཏིག་ཟབ་མོ་གཏེར་དུ་སྦས། །ལུང་བསྟན་སྤྲུལ་སྐུ་མཁས་བཙུན་ཚུལ་རྡོར་གྱིས། །ཆུ་མོ་གླང་ལ་ཟབ་མོའི་གཏེར་སྒོ་ཕྱེས། །དེ་ནས་སོ་བདུན་ལོན་པའི་ས་མོ་གླིང་གི་ལོ། །ལོ་གསར་རྟ་པ་ཉ་ཡི་གྲུབ་ཉི་ཚེས་གསུམ་ལ། །སྤྲོས་བཅས་སྤྲོས་མེད་ཁྱད་པར་དབང་ལྔ་རིག་པའི་རྩལ་དབང་དང་། །བཏགས་གྲོལ་རྒྱུད་འགྲེལ་མན་ངག་ལག་ལེན་བཅས། །དོན་ཁྲིད་ཁྲེགས་ཆོད་ཐོད་རྒལ་ངོ་སྤྲོད་གནད། །རྒྱབ་ཆོས་ལུང་བསྟན་མན་ངག་གནད་དང་བཅས། །རྩ་རླུང་ཐིག་ལེ་གཏུམ་མོ་དཀའ་ཐུབ་དང་། །འདའ་ཁའི་ལམ་ཁྱེར་འཆི་བྲོད་བར་དོའི་གནད། །དབང་སྒྲུབ་མཆོད་གཞུང་ལས་བྱང་སྒོམ་ཁྲིད་དང་། །ཐུན་མོང་ལས་མདེའུ་ཁ་ཚར་བསྟན་སྲུང་དང་། །ཡིད་ཆེས་ལོ་རྒྱུས་འཕྱུགས་མེད་ཐེམ་ཡིག་བཅས། །དབང་རྫོགས་བཀའ་རྫོགས་དཔེ་རྫོགས་ལུང་རྫོགས་སུ། །ཡོངས་རྫོགས་བཀའ་གཏད་གནང་བ་དེ་སྐུ་དྲིན། །སྣོད་ལྡན་སྣོད་མེད་ཀུན་ལ་གནང་བཀག་མཛད། །བཀའ་གཏད་གཉེར་གནང་ཐོབ་པ་བདག་སྐལ་བཟང་། །ཆོ་འཕྲུལ་རྟ་པའི་ཚེས་གསུམ་ནས་བརྩམས་ཏེ། །དབྱར་ར་ས་གས་ཉ་བའི་ཟླ་རྒྱས་པར། །དགུང་ཟླ་ཕྱེད་དང་བཞི་ལ་དོན་ཆེན་འགྲུབ། །སོམ་ཉི་མེད་པའི་གདིང་རྙེད་དེ་སྐུ་དྲིན། །རྟོགས་པའི་ངང་དུ་གོམས་པའི་སྟོབས་བརྟན་ནས། །རིག་པ་རང་གྲོལ་ཕྱོགས་ལྷུང་མེད་པ་ཡི། །མཐའ་བྲལ་རྩོལ་མེད་ལྷུན་གྲུབ་གནས་ལུགས་གཤིས། །སྙིང་པོ་རྣམ་དག་མངོན་དུ་འགྱུར་བར་ཤོག། །།

གཡུང་གི་ལོ་རྒྱུས།

༄༅། །གཡུང་གི་ལོ་རྒྱུས་བཞུགས་སོ། །

༄༅། །ཨེ་མ་ཧོ། རབ་དཀར་ལས་དང་སྨོན་ལམ་བཟང་པོས་འཕངས། །ཀུན་མཁྱེན་རྗེ་ཡིས་མ་ནོར་ལམ་བསྟན་པའི། །ཟབ་ལམ་(༢༡༤)སྙིང་པོ་འདི་ལ་བསྒྲོད་ཚུལ་ནི། །བླ་མེད་བླ་མ་མཆོག་ལ་རབ་གུས་ཏེ། །བདག་གཞན་ཐར་ལམ་ཆེན་པོར་འདུན་པ་འཕངས། །སྤྱི་མཐུན་གྲུབ་པའི་ལམ་དུ་མངོན་སུམ་ནས། །སྣང་ཞིང་སྲིད་པར་འཛིན་པ་འཁོར་བའི་ཆོས། །མ་སྤངས་གནས་སུ་དག་པ་རུ་ཤན་ཕྱེད། །སྟོང་ཉིད་ཕུ་ཐག་ཆོད་པ་རྩ་བྲལ་གཤིས། །ཇི་བཞིན་མངོན་དུ་གྱུར་པར་རྣལ་དུ་དབབ། །རིག་པ་གཅེར་བུ་ལྷིངས་ལ་རྟེན་མེད་དུ། །གཟོ་མེད་ཞིང་བྲལ་གསལ་སྟོང་རང་སོར་བཞག །གང་ཤར་གཟོ་མེད་རང་གྲོལ་ཁྲེགས་ཆོད་ཀྱི། །དོན་ཁྲིད་མཉམ་ཉིད་རོ་གཅིག་དེ་ལྟར་བསྐྱངས། །རང་རིག་གསལ་སྟོང་མངོན་སུམ་རྗེན་པ་ལ། །ཡེངས་མེད་བློ་བྲལ་ཐོད་རྒལ་དོན་ཁྲིད་བསྐྱངས། །སྐྱེ་མེད་སྟོང་པ་གཤིས་ཀྱི་ཕུ་ཐག་ཆོད། །རང་རིག་གསལ་སྟོང་མངོན་སུམ་ཐིལ་དུ་ཕེབས། །གང་སར་སྤྲོས་བྲལ་རྗེན་པའི་རང་ཞལ་བལྟས། །འབྲལ་མེད་ཆོས་ཉིད་རོལ་པར་དྲན་པས་ཆོག །གཟུང་འཛིན་རྩིས་གདབ་ཞེན་ཡུལ་མཐའ་དང་བྲལ། །བར་སྣང་ནང་དུ་ནམ་མཁའ་བསྒོམ་པ་ལ། །ཡང་དག་དྲན་པས་རང་སོར་སོ་མར་བཞག །།

༄༅། །རྡོ་རྗེ་ཐེག་པའི་དགོངས་པ་ཡིས། །རིན་ཆེན་སེམས་ཉིད་མངོན་དུ་བསྟན། །ཡང་དག་ཡེ་ཤེས་བདེ་བའི་མཆོག །ལྷུན་གྲུབ་ངང་དུ་གུས་པས་འདུད། །མཁའ་དབྱིངས་ཕྱོགས་མེད་མཐའ་བྲལ་དུ། །འགྲོ་བ་རང་རྩལ་འགག་མེད་པ། །སྙིང་པོ་རྣམས་ལ་མངོན་གྱུར་ནི། །ཐིག་ལེ་སྤྲོས་མེད་ངང་དུ་རྟོགས། །དེའི་ལུང་བླ་མ་དམ་པ་ལས། །བདག་ཅག་སྤྲང་བོ་རི་པ་ཡིས། །དབེན་གནས་བྲག་ནག་ཕོ་བྲང་དུ། །ལྕགས་བྱི་ཟླ་བ་གསུམ་པ་སྟེ། །གཏེར་ནས་བྱོན་ལོ་ཞེ་བརྒྱད་ལ། །དབང་ཁྲིད་ལུང་དཔེ་མན་ངག་རྫོགས། །བཏགས་སྒོམ་དྲན་པས་གྲོལ་བའི་ཆོས། །ཡོངས་རྫོགས་ཞུས་ནས་རང་གཞན་དོན། །གཉིས་ཀ་གྱིས་ཀྱི་རྗེས་གནང་ཐོབ། །གཞན་ཡང་གནས་མཆོག་ཙཱ་རི་ཡི། །ཡོན་བདག་རྒྱལ་པོ་སྨོན་ལམ་གྱིས། །སྔར་འདས་ལོ་ནི་བཅོ་ལྔའི་གོང་། །གཏེར་སྟོན་ཞལ་སློབ་ཤོ་བན་གྱི། །ཕྱག་དཔེ་དད་པའི་ཤུགས་ཀྱིས་ཕུལ། །ཨོ་རྒྱན་རྗེ་དང་གདམས་པ་ལ། །སྔོན་གྱི་ལས་འབྲེལ་བཟང་པོ་ཡི། །ནུས་པ་ཡོད་ངེས་སྙམ་པ་ཡིས། །དགའ་དང་སྤྲོ་བ་ཚད་མེད་སྐྱེས། །དེང་སང་བདག་པོར་ངེས་པ་ན། །དད་བརྩོན་འདུན་པ་ཆེར་བསྐྱེད་དེ། །(༢༡༥)ཀ་དག་ལྷུན་གྲུབ་འདུས་མ་བྱས། །རང་བཞིན་སྟོང་གསལ་འགག་པ་མེད། །ཀུན་ཁྱབ་དབྱེ་བ་མེད་པའི་དོན། །རྩོལ་བྲལ་ཐེག་མཆོག་རྫོགས་ཆེན་དང་། །ཁྲེགས་ཆོད་ཐོད་རྒལ་ཟུང་འཇུག་དང་། །བཏགས་གྲོལ་ཐབས་ཆ་ལ་སོགས་པས། །འདི་ཕྱི་འཆི་ཁ་བར་དོ་རུ། །རང་བློ་ནུས་པའི་རིམ་སྟོབས་ཀྱིས། །འཕྱུགས་མེད་སྐུ་གསུམ་རང་ཆས་སུ། །ཐོབ་པ་ལུང་རིགས་མྱོང་བས་གསལ། །ཨེ་མ་དེ་ཡང་རྗེ་ཡི་དྲིན། །དྲིན་ལན་བསབ་པའི་མཆོད་པ་འབུལ། །ཕུལ་བའི་འབྲས་བུས་འགྲོ་རྣམས་སེམས། །སེམས་ཉིད་རྣལ་མ་བློ་བྲལ་དོན། །དོན་དམ་ཇི་བཞིན་རྟོགས་པ་ལ། །ལ་བཟླ་བ་འདི་འདའ་བ་མེད། །ཤེས་བྱའི་གནས་ལུགས་ཇི་བཞིན་སྣང་བ་ལ། །འགག་མེད་རང་གྲོལ་རྟོགས་པ་རྗེ་ཡི་དྲིན། །སྟོན་འཁོར་གཅིག་ཏུ་འདྲེས་པའི་ཡུལ་ལས་འདས། །མ་བཅོས་ལྷུན་གྱིས་གྲུབ་པ་གཉུག་མའི་ངང་། །རྩོལ་བྲལ་བྱ་བྱེད་མེད་པ་སོ་མའི་དོན། །ཅིས་ཀྱང་ཆོག་པ་འདུག་པས་བློ་རེ་བདེའོ། །

དཔལ་ལྡན་བླ་མ་དམ་པ་ཤེས་རབ་ཚུལ་ཁྲིམས་དེ་ཉིད་ལ་དབེན་གནས་བྲག་ནག་ཏུ་དམ་པ་ཆོས་ཉིད་ཤེས་རབ་ཀྱིས་དབང་དང་ཆོས་སྐོར་ཐམས་ཅད་ཡོངས་སུ་རྫོགས་པར་ཐུགས་ཉམས་སུ་བཞེས་ཤིང་ཁྱད་པར་ཁྲིད་ཀྱི་དོན་ཁྲེགས་ཆོད་ཀྱིས་ཡིན་ལུགས་མངོན་དུ་གྱུར་པར་མཛད་ནས། ཐོད་རྒལ་གྱིས་འཕྱུགས་མེད་གནད་ཀྱིས་མངོན་སུམ་རང་ཐོག་ཏུ་གཏན་ལ་ཕབ་ནས་དུས་དེ་ཉིད་དུ་ཀུན་ཏུ་བཟང་པོའི་དགོངས་པ་མངོན་དུ་མཛད་པའོ། །དམ་པ་པྲཛྙཱ་ཤྲཱི་དེ་ཉིད་ལས་དབེན་གནས་བྲག་ནག་གི་ཕོ་བྲང་དུ་བདག་ནམ་མཁའ་གྲགས་ཀྱིས་དབང་དང་ལུང་རྣམས་ཡོངས་སུ་རྫོགས་པར་ཞུས་ཀྱང་། ཁྲིད་ཀྱི་ངེས་པ་མ་རྙེད་པ་ལ། དུས་ཕྱིས་སྤྲུལ་སྐུ་རིག་འཛིན་རྒོད་ཀྱི་ལྡེམ་འཕྲུ་ཅན་དང་མཇལ་དུས་ཆོས་ཀྱི་ཆེ་བ་དང་། ཁྲིད་ཀྱི་ཟབ་པའི་གནད་ལུང་བསྟན་པའི་བཀའ་དྲིན་ལ་བརྟེན་ནས། དཔལ་ལྡན་བླ་མ་ཆོས་ཉིད་མཚན་ཅན་དེ་ཉིད་དབེན་གནས་བྲག་ནག་ཕོ་བྲང་དུ་སྤྱན་དྲངས་ཤིང་ཤིང་མོ་བྱ་ལོའི་སྟོན་ཟླ་འབྲིང་པོ་དང་ར་བ་གཉིས་ལ་དབང་ལྔ་ཡོངས་སུ་རྫོགས་པ་ལུང་རྣམས་དང་བཅས་པ་བསྐྱངས་ནས་ཞུས་ཏེ། ཁྱད་པར་ཁྲིད་ཀྱི་སྐོར་ཁྲེགས་ཆོད་ཐོད་རྒལ་རྣམས་ཉམས་ཁྲིད་ལག་ཁྲིད་དུ་རྫོགས་པར་ཞུས་ཤིང་། ཉམས་གོང་འཕེལ་གྱི་སྣང་བ་ཅུང་(༢༡༦)ཟད་སྐྱེས་པ་དང་། སྣང་བཞིའི་འཆར་ཚུལ་རྣམས་གོ་ཡུལ་དུ་གསལ་ཞིང་། ཟབ་མོའི་ཆོས་ལ་ངེས་པའི་ཤེས་པ་དང་། བརྒྱུད་པ་གསུམ་གྱི་བླ་མ་ལ་མི་ཕྱེད་པའི་དད་པ་ཐོབ་དུས། དབང་རྫོགས། བཀའ་རྫོགས་དཔེ་རྫོགས་ལུང་རྣམས་ཡོངས་སུ་རྫོགས་པར་གནང་སྟེ་རང་གཞན་གྱི་དོན་གཉིས་ཀ་གྱིས་ཤིག་པའི་རྗེས་སུ་གནང་བ་ཐོབ་སྟེ་ས་དང་པོའི་དགའ་བ་ལྟ་བུར་གྱུར་ཏོ།། །།

འཕོ་བ།

༄༅༔ འཕོ་བ་བཞུགས་སོ༔

༄༅༔ ཧྱཀཐདྱ།ཿཉབ༨༔ བདག་འདྲ་པདྨ་འབྱུང་གནས་ཀྱིས༔ རྣལ་འབྱོར་ལེ་ལོ་ཅན་དོན་དུ༔ འཕོ་བའི་གདམས་པ་བསྟན་པར་བྱ༔ ཚེ་འདིར་ལྷག་མེད་མ་གྲུབ་ན༔ ཚེ་འཕོས་མཁའ་སྤྱོད་བསྒྲུབ་འདོད་པས༔ སྦྱོང་དང་ལས་ལ་སྦྱར་བའོ༔ ཐོག་མར་སྦྱང་བར་བྱ་བ་ནི༔ ཤིན་ཏུ་དབེན་པའི་གནས་སོང་སྟེ༔ མཁའ་འགྲོ་མཆོད་པའི་ཡོ་བྱད་བཤམ༔ ཕྱི་ནང་མཚམས་བཅད་གཙང་དག་བྱ༔ བདེ་བའི་སྟན་ལ་སྐྱིལ་ཀྲུང་བསྡད༔ སྐྱབས་འགྲོ་སེམས་བསྐྱེད་སྔོན་འགྲོ་གཏོང་༔ སྟོང་པའི་ངང་ལས་ཆོས་འབྱུང་དབུས༔ པདྨ་རོ་དང་ཉི་སྟེང་དུ༔ བདག་ཉིད་མཁའ་འགྲོ་དམར་མོ་ནི༔ ཞལ་གཅིག་ཕྱག་གཉིས་གྲི་ཐོད་འཛིན༔ མཁའ་འགྲོ་སྡེ་བཞིས་བསྐོར་བར་བསྐྱེད༔ མདུན་དུ་མཁའ་འགྲོ་ཕག་མོར་བཅས༔ རང་བཞིན་གནས་དང་དབྱེར་མེད་པར༔ དུར་ཁྲོད་ཕོ་བྲང་ལྟ་བུ་ལ༔ སྤྱན་དྲངས་མཆོད་བསྟོད་རྒྱས་པར་བྱ༔ གསོལ་བ་བཏབ་ལ་མོས་གུས་བསྐྱེད༔ འབྱུང་པོའི་ཚོགས་ལ་གཏོར་མ་སྦྱིན༔ དེ་ནི་སྔོན་དུ་འགྲོ་བའོ༔ དེ་ནས་སྦྱོང་བ་དངོས་གཞི་ནི༔ ཙོག་བུ་སྐྱིལ་ཀྲུང་ཁྲུ་ཁྱུད་བྱ༔ རླུང་རོ་དབྱུང་ལ་བར་ཆད་སྦྱང་༔ སྐད་ཅིག་ཆོས་འབྱུང་དམར་པོའི་ནང་༔ པད་ཉི་རོ་ཡི་གདན་སྟེང་དུ༔ ཧྲཱི༔ལས་རྡོ་རྗེ་ཕག་མོར་བསྐྱེད༔ གྲི་གུག་ཐོད་ཁྲག་སྐྱིལ་ཀྲུང་བྱས༔ རིན་ཆེན་རྒྱན་གྱིས་སྤྲས་པར་བསམ༔ དེ་དབུས་དབུ་མ་སྔོན་པོ་ནི༔ དྲང་བཤན་ཟངས་དུང་ལྟ་བུ་ཡི༔ མར་སྣ་སུམ་མདོའི་ཉི་སྟེང་དུ༔ རྡོ་རྗེ་ཕག་མོ་རྒྱ་གྲམ་ལ༔ ལྟེ་བར་ཨ་ཐུང་དམར་པོ་སྟེ༔ འོད་ཟེར་ལྡན་པ་བསྐྱེད་པར་བྱ༔ ཡར་སྣ་ཚངས་པར་ཟླ་སྟེང་དུ༔ ཀུན་བཟང་དམར་པོ་གཟི་བརྗིད་ལྡན༔ རྡོ་རྗེ་དྲིལ་བུ་འཛིན་པ་ལ༔ རིན་ཆེན་རྒྱན་གྱིས་བརྒྱན་པར་བསྐྱེད༔ ཞབས་གཉིས་རྡོ་རྗེ་སྐྱིལ་ཀྲུང་བཅས༔ ཐུགས་ཁར་ཧཱུྃ་བསམ་འོད་དང་(༢༡༧)ལྡན༔ ཤེས་པ་རྩེ་གཅིག་ལ་གཏད་དེ༔ དེ་ནས་རླུང་གི་སྦྱོར་བ་ནི༔ སྟེང་མནན་འོག་འཐེན་བར་དུ་བྱ༔ སྦྱོར་བ་འདི་དང་ལྡན་པའི་ཚེ༔ ལྟེ་བའི་ཨ་ལས་ཐིག་ལེ་ནི༔ དམར་པོ་ཡུངས་ཀར་འཚེར་བ་ཙམ༔ རྒྱུན་མ་ཆད་པར་འཕྲོས་པ་ནི༔ བར་མཚམས་མེད་པར་འགྲོ་བྱས་ནས༔ བླ་མའི་ཐུགས་ཀར་ཧཱུྃ་ལ་ཐིམ༔ རིམ་རིམ་ཉིད་ནི་བསྟིམ་པར་བྱ༔ ཐིག་ལེ་འབར་འཕྲོ་བཅད་པར་བྱ༔ ཡང་ནི་སླར་ཡང་རླུང་བཟུང་བསྟིམ༔ འདི་ལ་དྲག་ཏུ་གོམས་པ་ན༔ སྤྱི་བོ་ཟ་དང་ཆུ་བུར་དང་༔ ཚག་ཚག་བྱུང་ན་ཚད་ཡིན་ཏེ༔ ཚངས་པའི་སྒོ་ནི་བྱང་བར་འགྱུར༔ དེ་ཚེ་བླ་མ་ཨ་ལ་བསྟིམ༔ གཉིས་སུ་མེད་པར་མཉམ་པར་བཞག༔ མཐར་ཐུག་ལས་ལ་སྦྱར་བ་ནི༔ འབྱུང་བ་འདུ་འབྲལ་ཐིམ་སྡུད་དང་༔ དུས་ཀྱི་ཐ་མ་འཆི་བའི་ཚེ༔ དཀོན་མཆོག་མཆོད་བཤམས་གསོལ་བ་བཏབ༔ རང་ལུས་ཙོག་པུ་སྐྱིལ་ཀྲུང་ངམ༔ ཡང་ན་སེང་གེའི་ཉལ་སྟབས་སུ༔ མཁའ་འགྲོའི་དཀྱིལ་འཁོར་གསལ་བར་བསྐྱེད༔ དབུ་མ་སུམ་མདོར་རྒྱ་གྲམ་བཅའ༔ ཨ་ལས་ཐིག་ལེ་འཕྲོས་བྱས་ཏེ༔ སྤྱི་བོར་ཀུན་བཟང་སྔར་ལྟར་བསྟིམ༔ འོད་ཟེར་ལྔ་དང་ལྡན་པ་བསྐྱེད༔ ཤེས་པ་དེ་ལ་མ་ཡེངས་གཏད༔ མཆོད་པས་མཆོད་ལ་མོས་གུས་བསྐྱེད༔ གསོལ་བ་སྙིང་གི་དཀྱིལ་ནས་བཏབ༔ ཉེར་གཅིག་བར་དུ་ཐིག་ལེ་བསྟིམ༔ དེ་ནས་སུམ་མདོར་མཁའ་འགྲོ་མ༔ འོད་ཕུང་ཐ་མའི་ལམ་ལ་བསྟིམ༔ སྤྱི་བོར་ཀུན་བཟང་དབྱེར་མེད་བཞུགས༔ བླ་མ་འོད་ཟེར་ལྔའི་རང་བཞིན༔ མཁའ་ལ་འདོམ་གང་ཙམ་དུ་འཕར༔ རབ་ཀྱིས་འོད་གསལ་ཆོས་སྐུར་བསྟིམ༔ འབྲིང་གིས་འཇའ་ལུས་ལོངས་སྐུར་བསྟིམ༔ ཐ་མས་སྣ་ཚོགས་སྤྲུལ་སྐུར་བསྟིམ༔ རབ་ཀྱིས་འོད་གསལ་བསྟིམ་པ་ནི༔ མཐའ་བྲལ་རྣམ་དག་ཀུན་བཟང་ཀློང་༔ མི་གཡོ་མཉམ་ཉིད་ཆེན་པོར་བསྟིམ༔ འབྲིང་གིས་ལོངས་སྐུར་བསྟིམ་པ་ནི༔ རྣལ་འབྱོར་རྩལ་དང་ལྡན་པ་ཡིས༔ སྐུ་གསུམ་རིམ་བཞིན་བསྲེ་བས་བསྲེ༔ ཞི་ཁྲོའི་སྐུ་དང་ཞིང་ཁམས་ལ༔ ཡེ་ཤེས་རོ་གཅིག་རོལ་པར་བསྲེ༔ ཐ་མས་སྤྲུལ་སྐུར་བསྟིམ་པ་ནི༔ སྣང་ཡུལ་སྐུ་ལ་འཇུག་པར་བྱ༔ རྣལ་འབྱོར་རྩལ་དང་ལྡན་པ་ཡིས༔ སྐུ་གསུམ་རིམ་གྱིས་བསྲེ་བ་སྟེ༔ ཆོས་སྐུ་སྐྱེ་མེད་ཞག་(༢༡༨)བདུན་ལ༔ ལོངས་སྐུ་ཞི་ཁྲོར་ཞག་བདུན་གནས༔ སྤྲུལ་པའི་སྐུ་ལ་ཞག་བདུན་གནས༔ བདུན་གསུམ་ཉི་ཤུ་རྩ་གཅིག་རྫོགས་པ་ན༔ འདོད་པའི་ལུས་ལ་རབ་ཏུ་འཇུག༔ ཤིན་ཏུ་ཐ་མར་གྱུར་པ་རྣམས༔ བླ་མ་ཀུན་བཟང་མཁའ་འགྲོའི་ཚོགས༔ མཁར་བསྟིམ་འཇའ་ལུས་ཆོས་ཉིད་དབྱིངས༔ དབྱེ་བ་མེད་པར་མོས་གུས་བྱ༔ དེ་ཡང་བར་དོ་དག་པར་འགྱུར༔ སྒྱུ་ལུས་འཕོ་ཚེ་འདུན་པ་གཅེས༔ གོམས་ཤུགས་དྲག་རྩལ་གྱིས་འཕང་ངོ་༔ མན་ངག་གནད་ཀྱི་གདམས་པ་ཡིན༔ གྲོང་ཁྱེར་འཕོ་བའི་གདམས་པ་འདི༔ ཡེ་ཤེས་མཚོ་རྒྱལ་ཉིད་ལ་གཏད༔ ལས་ཅན་ཅིག་དང་འཕྲད་པར་ཤོག༔ སྐུ་གསུང་ཐུགས་ཀྱི་རྒྱ་ཡོད་དོ༔ ས་མ་ཡ༔ རྒྱ་རྒྱ་རྒྱ༔

གཏེར་སྲུང་ལྡང་ལྷའི་སྒྲུབ་ཐབས།

༄༅༔ གཏེར་སྲུང་ལྡང་ལྷའི་སྒྲུབ་ཐབས་བཞུགས་སོ༔

༄༅༔ དཔལ་ཕྱག་ན་རྡོ་རྗེ་ལ་ཕྱག་འཚལ་ལོ༔ བདག་འདྲ་པདྨ་འབྱུང་གནས་ངས༔ རྒྱལ་པོའི་བཀའ་བྱུང་བོད་འདིར་འོངས༔ ལྷ་སྲིན་གདུག་པ་ཐམས་ཅད་བཏུལ༔ གཏེར་བདག་བཀའ་ཡི་སྲུང་མར་བསྐོས༔ མཆིམས་ཡུལ་སྟོད་འདིར་གཏེར་ཕྲན་སྦས༔ གཏེར་བདག་བཙན་གྱི་ལྡང་ལྷ་ཡི༔ སྲོག་སྙིང་འཕྲོག་སྟེ་དམ་ལ་བཏགས༔ ཕྱི་རབས་དོན་དུ་གཏེར་དུ་སྦས༔ ལས་ཅན་གཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ

ས།རྒྱཐ།ཅཱ།༔ འདི་ལ་སྲོག་དང་ཆོ་འཕྲུལ་གཉིས༔ སྲོག་ཏུ་སྒྲུབ་པ་བྱེད་འདོད་ན༔ གཡའ་རི་གངས་བྲག་དབེན་པའི་སར༔ སྟེགས་བུ་༼ར་ཁྲག་གིས་བྱུགས་༽ཁྲུ་གང་གྲུ་བཞིའི་དབུས༔ ཟངས་གཞོང་ནང་དུ་བཤོས་བུ་བཤམ༔ མཐའ་མ་མཐེབ་སྐྱུ་༼ར་ཁྲག་གིས་བྱུགས་༽བདུན་གྱིས་བསྐོར༔ ཤིང་ལ་དགྲ་བོའི་མིང་རུས་བྲིས༔ གང་འདོད་ཁྲག་གིས་བྱུགས་ནས་བྱ༔ གཏོར་མའི་ནང་དུ་སྤྱི་ཚུགས་༼མགོ་མཇུག་ལྡོག་༽གཞུག༔ གཏོར་མ་ར་ཡི་ཤ་ཁྲག་བཤམ༔ ལས་ཁུང་གཅིག་ཏུ་ལིང་ག་གཅིག༔ གོང་ལྟར་སྤྱི་ཚུགས་དག་ཏུ་གཞུག༔ ཡུངས་ཀར་སྔགས་ལ་མིང་རུས་བྲབ༔ སྲོག་གི་སྙིང་པོ་འདི་ཡིས་འབོད༔ བ་རི་བ་རི་གིང་ཀ་ར་ཛཿཛཿ ཆེ་གེ་མོའི་ཤ་ལ་བཾ་བཾ༔ ཞེས་པ་ཞག་གསུམ་བཟླས་པ་ཡིས༔ སྒྲ་དང་འོད་ནི་དངོས་སུ་འོང་༔ དེ་ནས་རྦད་བསད་ལས་བྱ་བ༔ དགྲ་བོ་ཁྲག་སྐྱུགས་ནད་ཀྱིས་གསོད་འདོད་ན༔ ཙ་མུན་རག་མུན༔ ཐུཾ་པ་དྷུ་རག༔ མཚོན་གྱིས་(༢༡༩)གསོད་ན་སྔགས་འདིའོ༔ རད་ཕྱི་གྷ་དྷ་རི་སཱ་དྷུ་ཤིག༔ སྦོས་གྲིས་གསོད་ན་སྔགས་འདིའོ༔ ཕུད་མང་ཆོད༔ ཕུས་གསོད༔ རུ་དམ་པ་ཡར་གཏོར་ཤིག༔ ཅེས་པའི་ལས་སྔགས་ཞག་གསུམ་བཟླས༔ སོ་སོའི་གནད་ཁྲག་ཐུན་གྱིས་བྲབ༔ ཞེ་སྡང་བསྐྱེད་ལ་ལས་ལ་བསྐུལ༔ ཧཱུྃ༔ ལྷ་ཡི་དགེ་བསྙེན་ཆེན་པོ་དྲག་པོ་རྩལ༔ སྐུ་ལ་དར་དཀར་རལ་ཁ་གསོལ༔ བཙན་རྒོད་བྱ་ར་སྟོང་གིས་བསྐོར༔ ཁྱོད་ཀྱི་ཐུགས་དམ་དུས་ལ་བབས༔ བསྟན་པ་འཇིག་པའི་དགྲ་བོ་འདི༔ ཁྲག་སྐྱུགས་ནད་ཀྱིས་སོད་ལ་ཤོག༔ མཚོན་གྲི་སྦོས་གྲི་གླང་ཐབས་སོད༔ ད་ལྟ་མྱུར་དུ་སོད་ལ་ཤོག༔ ན་གེ་ནའུ་ཀྱིན་བུ་ཧཱུྃ༔ ཤོད་ཤོད་སྟི་ཏ་རྦད་ཐུཾ་རི་ལི་ལི་ས་མ་ཡ་རྦད༔ ཅེས་པས་དྲག་ཏུ་རྦད་པར་བྱ༔ བུད་མེད་ཞག་གསུམ་དག་གིས་སོད༔ སྐྱེ་བོ་དྲུག་གིས་སོད་པར་ངེས༔ བསོད་ནམས་ཅན་ལ་ཞག་བདུན་ནོ༔ ནང་འགྲས་བྱེད་ན་བཅུ་བཞིའོ༔ རྦད་རྟགས་བསད་རྟགས་སྤྱི་དང་འདྲ༔ ལས་སྦྱོར་གཏོར་མ་ལིང་གར་བཅས༔ བཙན་རྒོད་རྒྱུ་བའི་སྲང་ལ་མནན༔ ལས་ཁུང་ལིངྒ་འགུག་གདབ་སྲེག༔ ཀླུ་ཡོད་ས་རུ་མནན་པར་བྱ༔ རྩ་དུཾ་ཡ་དུཾ་མོད་ལ་ཁྲག་ཤ་རྦད༔ ཅེས་པས༔ ཀླུ་དང་བཙན་ལ་བཅོལ་གཏད་བྱའོ༔ ལས་འགྱངས་ན་ལན་གསུམ་བསྐྱར་རོ༔ གང་ཡིན་དགྲ་བོ་མོད་ལ་འཆི༔ གནོད་སྦྱིན་ལྷ་ཡི་རེག་ཆོད་འདི༔ ཅོག་རྡུང་ལྷ་ཡི་སྤུ་གྲི་ཡིན༔ གཏེར་བདག་སྲོག་རྩའི་སྙིང་འབྱིན་ཡིན༔ ལས་ཅན་གཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔

བདག་འདྲ་པདྨ་འབྱུང་གནས་ཀྱིས༔ ལྷ་སྲིན་སྲོག་གི་ཤན་པ་ལས༔ ཆོ་འཕྲུལ་གཏང་བའི་ལས་བཤད་པ༔ སྟེགས་བུ་ཁྲུ་གང་གྲུ་བཞིའི་སྟེང་༔ འདྲེ་ཅན་གནས་པའི་ལྡེར་བཟོའི་ས༔ ཀླུ་གནས་ས་དང་ས་འགྱུའི་ས༔ ས་ནག་གསུམ་པོ་སྤར་རེ་དང་༔ ཞིབ་བཙགས་ཕུག་རོན་སྒོ་ང་གང་༔ ཁམ་ས་ཅིག་པོ་དག་དང་བསྲེས༔ ཨ་ཙ་ར་གཉིས་སྤྲེལ་༼སྤྲེའུ་སྤུ་ཚོམ་གཅིག་གཟུགས་༽གཟུགས་གཅིག༔ སྤྲེལ་ལ་ཐི་གུ་དཀར་ནག་གདགས༔ དཀར་པོ་༼ཨ་ཙ་ར་༽གཡས་ལ་ནག་པོ་གཡོན༔ དབུས་སུ་སྤྲེའུ་བཞག་པར་བྱ༔ ཐི་གུ་ཨ་ཙ་ར་༼དཀར་ནག་པོ་༽ཡིས་བཟུང་༔ རང་ལ་མདུན་བསྟན་སྔགས་འདིས་(༢༢༠)འབོད༔ ཏྲིའུ་ཏྲིའུ་༼འབོད་པ་༽མ་མ་ཤོད་ཛ༔ མ་རུ་མ་རུ་༼རྦད་པ་ཡིན་༽རྒྱུགས་རྒྱུགས༔ ཁ་ཕུར་ཁ་ཕུར་ཆྒཻ་ལ་བྷྱོ་བྷྱོ༔ ཞག་ལྔ་བཟླས་པས་ནང་རྟགས་ནི༔ ཨ་ཙ་ར་དང་མི་རེངས་དང་༔ སྤྲེའུའི་དམག་འོང་སོ་སྒྲ་དང་༔ སྨྲ་སྙིང་འདོད་དང་ཤེས་པ་འཁྲུགས༔ དེ་ལྟར་རྨི་ལམ་དག་ཏུ་འོང་༔ སྤྲེའུ་དངོས་སུ་མ་བྱུང་བར་དུ་བསྒྲུབ༔ དེ་ནས་གོང་གི་རྫས་གསུམ་པོ༔ དགྲ་བོའི་ཕྱོགས་སུ་ཁ་བསྟན་ཏེ༔ ཨ་ཙར་ནག་པོས་སྔོན་མ་བྱ༔ དཀར་པོ་ཕྱི་ལ་གཞག་པར་བྱ༔ གོང་མའི་སྔགས་ཤམ་འདི་བཏགས་ལ༔ ཧེ་ཙ་དུ་ན་ཕབ་ཡཱ༔ ཞེས་ཞག་བདུན་བཟླས་ཏེ༔ དཀར་པོ་ཐིག་གུར་བཅས་པ་བཞག༔ དེ་མིན་གཉིས་པོ་དགྲ་ཡི་ཁང་པར་བསྐྱལ༔ སྤྲེའུ་དངོས་སུ་ས་གཏོར་འོང་༔ དཀར་པོ་དཔོན་ལ་ནག་པོ་གཡོག༔ སྤྲེའུ་ལས་མཁན་དག་ཡིན་ནོ༔ ལྷ་བཙན་གིང་གི་ཆོ་འཕྲུལ་ལོ༔ ཤིན་ཏུ་ཟབ་ཕྱིར་གཏེར་དུ་སྦས༔ ལས་ཅན་གཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ལྡང་ལུང་ཁྲ་མོ་བྲག་ནས་སྤྲུལ་སྐུ་རིན་ཆེན་ཚུལ་རྡོར་གྱི་ཆུ་མོ་གླིང་གི་ལོ་ལ་བཏོན་པའོ༔

ཟབ་གསང་མཁའ་འགྲོ་སྙིང་ཐིག་གི་གསོལ་འདེབས།

༄༅། །ཟབ་གསང་མཁའ་འགྲོ་སྙིང་ཐིག་གི་གསོལ་འདེབས་བཞུགས་སོ། །

༄༅། །ན་མོ་གུ་རུ། དངོས་མེད་མཐའ་བྲལ་ཀ་དག་ཆོས་ཀྱི་སྐུ། །རང་རིག་གསལ་དྭངས་ལྷུན་གྲུབ་ལོངས་སྤྱོད་རྫོགས། །ཀུན་ཁྱབ་སྣ་ཚོགས་ཤར་གྲོལ་སྤྲུལ་པའི་སྐུ། །དུས་གསུམ་རང་རིག་བླ་མ་རྣམས་ལ་འདུད། །དམིགས་མེད་ཆོས་དབྱིངས་དག་པའི་ཕོ་བྲང་དུ། །ཀུན་བཟང་ཡབ་ཡུམ་གཉིས་ལ་གསོལ་བ་འདེབས། །ངོ་བོ་ཀ་ནས་དག་པར་བྱིན་གྱིས་རློབས། །ལྷུན་གྲུབ་ཆོས་དབྱིངས་དག་པའི་ཕོ་བྲང་དུ། །ལོངས་སྐུ་ཞི་ཁྲོའི་ཚོགས་ལ་གསོལ་བ་འདེབས། །རིག་པ་སྐུ་རུ་སྨིན་པར་བྱིན་གྱིས་རློབས། །ཐུགས་རྗེ་ཕྱོགས་རིས་བྲལ་བའི་ཕོ་བྲང་དུ། །སྤྲུལ་སྐུ་རྡོ་རྗེ་འཆང་ལ་གསོལ་བ་འདེབས། །སྣང་སེམས་འཛིན་པ་སྟོངས་པར་བྱིན་གྱིས་རློབས། །དུར་ཁྲོད་མེ་རི་འབར་བའི་ཕོ་བྲང་དུ། །དགའ་རབ་རྡོ་རྗེ་ཉིད་ལ་གསོལ་བ་འདེབས། །ཆོས་ཉིད་དོན་དང་མཇལ་བར་བྱིན་གྱིས་རློབས། །དུར་ཁྲོད་སོ་ས་གླིང་གི་ཕོ་བྲང་དུ། །ཤྲཱི་སིང་ཧ་ཉིད་ལ་གསོལ་བ་འདེབས། །བདེ་ཆེན་འདུ་འབྲལ་མེད་པར་བྱིན་གྱིས་རློབས། །(༢༢༡)པདྨ་འོད་ཀྱི་ཕོ་བྲང་གཞལ་ཡས་སུ། །ཨོ་རྒྱན་པདྨ་ཡབ་ཡུམ་ལ་གསོལ་བ་འདེབས། །འབྲལ་མེད་གཞན་དོན་འབྱུང་བར་བྱིན་གྱིས་རློབས། །རིག་འཛིན་མཁའ་སྤྱོད་དག་པའི་ཕོ་བྲང་དུ། །པདྨ་ལས་འབྲེལ་རྩལ་ལ་གསོལ་བ་འདེབས། །ཆོས་བཀའ་མ་ལུས་ཚང་བར་བྱིན་གྱིས་རློབས། །བྱར་སྨད་གྲོ་ས་དཔལ་གྱི་ཕོ་བྲང་དུ། །སྤྲུལ་སྐུ་ལེགས་པའི་དཔལ་ལ་གསོལ་བ་འདེབས། །རིག་འཛིན་གདུང་སོབ་ནུས་པར་བྱིན་གྱིས་རློབས། །བསམ་ཡས་མཆིམས་ཕུ་ངོ་མཚར་ཕོ་བྲང་དུ། །ཆོས་རྗེ་ཀློང་ཆེན་རབ་འབྱམས་ལ་གསོལ་བ་འདེབས། །བཀའ་བབས་བསྟན་པའི་བདག་པོར་བྱིན་གྱིས་རློབས། །བསམ་གཏན་གླིང་གི་དབེན་གནས་ཕོ་བྲང་དུ། །འཇམ་དབྱངས་ཁྱབ་བརྡལ་ལྷུན་གྲུབ་ལ་གསོལ་བ་འདེབས། །ཕྱི་ནང་འཁྲུལ་པ་ཞིག་པར་བྱིན་གྱིས་རློབས། །ཕྱོགས་མེད་རི་ཁྲོད་དབེན་གནས་ཕོ་བྲང་དུ། །སྤྲུལ་སྐུ་གྲགས་པ་འོད་ཟེར་ལ་གསོལ་བ་འདེབས། །རླབས་ཆེན་དོན་གཉིས་འགྲུབ་པར་བྱིན་གྱིས་རློབས།། །།

བརྒྱུད་འཛིན་གྱི་སློབ་བུའི་ལུང་བསྟན།

༄༅༔ བརྒྱུད་འཛིན་གྱི་སློབ་བུའི་ལུང་བསྟན་ནོ༔

༄༅༔ ཐཐ།ཐནཊརྩ།ཐ༔ ཨེ་མ་ཤེས་རབ་སྙིང་རྗེ་ཅན༔ ཁྱོད་ཉིད་ང་ཡི་གཏེར་སྒོ་ཕྱེ་ནས་ཚེའི་དུས་མ་བྱས་ཀྱི་བར་དུ་བརྒྱུད་འཛིན་གྱི་སློབ་བུ་རིགས་མི་འདྲ་བ་བདུན་གསུམ་འབྱུང་སྟེ༔ སྐྱེས་པའི་སློབ་བུ་བཅུ་བཞི་འབྱུང་༔ བུད་མེད་ཌཱཀྐིའི་རིགས་ཆོས་སུམ་ལུས་ཀྱིས་འབྲེལ་པ་བདུན་འབྱུང་སྟེ༔ དང་པོ་རིགས་གཅིག་ནི༔ སྐྱེ་བ་བཟང་བ༔ དད་པ་ཆེ་བ༔ ཡོན་ཏན་ཨེན་རེ་ཤེས་པ༔ ཐེག་པ་ཆེན་པོ་ལ་མོས་པ༔ ཤེས་རབ་ཆེ་བ༔ བློ་སྲབ་པ༔ ཚ་རུས་ཆེ་བ༔ རང་འདོད་ཆེ༔ གཞན་ཡང་བློ་མི་མཐུན་པ༔ ཀུན་གྱིས་གཤེ་བ་ཅིག་འོང་༔ དེ་ཀརྨ་ཌཱཀྐིའི་རིགས་ཏེ༔ དེ་ལ་བྱིན་རླབས་འཇུག་རྐྱེན་ཚེ་ལོ་འབྲིང་ཐུབ༔ གདམས་པ་གནད་དུ་ཚུད་དེ་བར་དོ་དང་པོར་གྲོལ་ལོ༔ རིགས་གཅིག་ནི༔ དམ་ཚིག་བསྲུངས༔ བརྒྱུད་འཛིན་ཞེན༔ ཤེས་རབ་ཆུང་༔ སྙིང་རུས་འབྲིང་༔ བློ་མི་རྒོད༔ དད་པ་མི་འབྱུང་བ་ཅིག་ཡོང་སྟེ༔ ཚེ་འབྲིང་ཐུབ༔ སྐྱེ་བ་ཕྱི་མ་ལ་ལྷག་མེད་དུ་འཚང་རྒྱ༔ རིགས་གཅིག་ནི་སྙིང་རུས་ཆེ༔ ཤེས་རབ་ཆེ༔ འཁྲི་བ་ཆོད༔ རི་ཁྲོད་(༢༢༢)འགྲིམ་ནུས༔ བླ་མའི་ཅི་གསུང་སྒྲུབ༔ དག་སྣང་ཆུང་བ་ཅིག་འོང་༔ དེ་རཏྣ་དཔའ་བོའི་རིགས་ཏེ༔ དེ་ཡང་ཚེ་ལོ་འབྲིང་ཐུབ༔ ཚེ་འདིར་ས་ཟིན་ཏེ་སྐྱེ་བ་བདུན་གྱིས་འཇུག་མི་སྲིད་དོ༔ གཅིག་ནི་བློ་རྒོད་གཏོང་ཆོད་ཆེ༔ རྒྱུ་འབྲས་ཕྲ་མོ་ལ་མི་འཛེམ༔ ཆོས་ཕྱོགས་སུ་གཏོང་ནུས༔ རང་འདོད་ཆེ༔ ཚེ་འདི་པ་གཅིག་འོང་༔ དེས་ཆོས་འབྲེལ་ཐོགས་པ་ཙམ་སྟེ༔ སྐྱེ་བ་བཅུ་བཞི་ན་ལོངས་སྤྱོད་དང་ལྡན་པར་འཚང་རྒྱའོ༔ ཚེ་ཡང་འབྲིང་ཐུབ༔ རིགས་གཅིག་ནི༔ ང་རྒྱལ་ཆེ༔ ཁྱོད་ལ་མོས་གུས་མེད་པར་ཆོས་ཐོབ་ནས་གདོང་མི་རྟག༔ རང་ཆེར་འགྱིང་ཞིང་ཕྱག་ལ་སྐྲག༔ བྱིན་རླབས་མི་ཐོབ་སྟེ༔ ཆོས་ཀྱི་ལས་མེད་པས་དེའི་རིགས་ཀྱི་རྩ་བ་ཆོད༔ གཅིག་ནི་ཁ་གསོང་༔ སྙིང་སྡར༔ གཡོ་སྒྱུ་ཆུང་༔ ཤེས་རབ་ཅན་ཅིག་འོང་སྟེ་གསོལ་ལམ་དཔའ་བོའི་རིགས་ཏེ༔ ཚེ་རིང་༔ ནད་ཉུང་༔ འབྱོར་པ་ཆུང་༔ སྐྱེ་བ་འདི་ལ་འཚང་རྒྱའོ༔ གཅིག་ནི་འདོད་པ་ཆུང་༔ བཀའ་དྲང་༔ བློ་བརྟན༔ ཁ་ཉུང་༔ སྒོམ་བསྲན་ཆེ༔ ཤ་མདོག་དམར༔ ཆགས་པ་ཆེ༔ དེ་པདྨ་དཔའ་བོའི་རིགས་ཏེ༔ ཚེ་རིང་སྐྱེ་བ་འདི་ལ་འཚང་རྒྱའོ༔ གཅིག་ནི་འཚང་ཆེ༔ དད་པ་ཆུང་༔ ཆོས་ལ་མི་མོས༔ སྡིག་ལ་དགའ༔ དེ་ནི་སྐྱེ་བ་བཅུ་བཞི་ན་འཚང་རྒྱ་བ་ཙམ་མོ༔ གཅིག་ནི༔ ཆོས་མཁས༔ ཕྲག་དོག་ཆེ༔ བསོད་ནམས་ཆེ༔ འཁོར་སྐྱོང་བ་ལ་ལྟ་བ་མཐོ༔ རབ་ཏུ་བྱུང་ན་བཤེས་གཉེན་གཅིག་གིས་གསང་ནས་ཉམས་སུ་ལེན༔ དེ་རཏྣ་དཔའ་བོའི་རིགས་ཏེ༔ སྐྱེ་བ་འདི་ལ་འཚང་རྒྱའོ༔ གཅིག་ནི༔ སྙིང་རྗེ་དང་བྱང་སེམས་ཆེ༔ ནོར་སྒྲུབ་སྨན་གྱི་ལས་འཕྲོ་ཡོད་དེ༔ གཞན་ལ་ཕན་ཐོགས༔ ལོ་ཀ་དཔའ་བོའི་རིགས་ཏེ་བར་དོ་གཉིས་ལ་གྲོལ་ལོ༔ གཅིག་ནི༔ ཆོས་ཞུ་བ་རེམ༔ ཉམས་སུ་མི་ལེན་འཁོར་ཨེན་རེ་སྐྱོང་༔ ཤེས་རབ་ཆེ་བས་ཆོས་རྣམས་ལ་ཅོ་ལྟ་མང་དུ་བྱེད༔ དེ་ནི་དམ་ཚིག་མི་གཙང་སྟེ༔ དམ་ལས་འགལ་ཏེ་སྐྱེ་བ་ཕྱི་མ་ལ་དུཿཁ་སྤྱོད༔ ལོ་བདུན་ན་གྲོལ༔ ཀརྨ་ཌཱཀྐི་ཤུགས་འགྲོ་དཔའ་བོའི་རིགས་ཡིན༔ ཚེ་ཐུང་༔ གཅིག་ནི༔ སྡོད་མི་ཚུགས༔ བློ་སྣ་མང་༔ དགེ་སྦྱོར་རེམ༔ ཚེ་ཐུང་ཕྱི་མ་ལ་འཚང་རྒྱ༔ གཅིག་ནི་ཁ་འཇམ༔ ཞེ་ངན༔ ཁ་གསག་ཆེ༔ སྙིང་སྡར༔ དམ་ལ་མི་གནས༔ དེས་ནི་གདམས་ངག་གཏོང་༔ སློབ་དཔོན་དང་(༢༢༣)འཁོན་ཉེན་ཡོད་པས་སྤང་བར་བྱའོ༔ རྟོགས་པ་མངོན་དུ་གྱུར་པ་སྐྱེས་པ་ལ་བཞི་འབྱུང་ངོ་༔ བུད་མེད་ཀྱི་སློབ་མ་བདུན་ནི༔ དང་པོ་རིགས་གཅིག་ནི༔ ལུས་ཕྲ༔ རྣམ་གཞག་ཚ༔ ཡིད་དུ་འོང་༔ ལུས་དམར༔ དད་པ་མི་འགྱུར༔ བློ་བརྟན་པ་ཅིག་འོང་སྟེ༔ རིགས་ཀྱང་པདྨ་ཌཱཀྐིའི་རིགས༔ ཚེ་རིང་སྐྱེ་བ་འདི་ལ་ལྷག་མེད་དུ་འཚང་རྒྱའོ༔ གཅིག་ནི་ཆགས་པ་ཆེ༔ སྤྲོ་ཐུང་ཤེས་རབ་ཆུང་༔ ལུས་སྔོ༔ གཟུགས་འབྲིང་༔ དེ་ནི་ལས་ཀྱི་ཌཱཀྐིའི་རིགས་ཏེ༔ ཁྱེད་ལ་སེམས་པས་ཆགས་པ་སྤྱོད༔ བདེ་སྟོང་གི་ཏིང་འཛིན་སྟེར་བར་བྱེད༔ ཟབ་མོ་གནད་ཀྱི་འབྲེལ་མེད་དེ༔ སྐྱེ་བ་གཉིས་ན་ཁྱེད་ཀྱི་གདུལ་བྱར་གྱུར་ནས་འཚང་རྒྱའོ༔ ཚེ་འབྲིང་ཐུབ༔ གཅིག་ནི་བློ་བརྟན་ཆོས་ལ་མོས༔ སྙིང་རྗེ་ཆེ༔ དེ་ཡང་ཟབ་མོ་གནད་ཀྱིས་འབྲེལ་ནས་འཚང་རྒྱའོ༔ ཚེ་ཡང་རིང་༔ པདྨ་ཤུགས་འགྲོའི་རིགས་སོ༔ གཅིག་ནི༔ ཆོས་ལ་མི་མོས་བདེ་བ་ཆེ༔ ལུས་རྒྱས༔ བཞིན་སྡུག༔ བློ་ཤོ་རྒོད༔ སྐད་སྙན༔ དེ་ནི་སྔོན་གྱི་འབྲེལ་པས་གུས་ཤིང་འདུད༔ གཟུགས་ཐ་མལ་འཛིན་ཏེ༔ ཆགས་པ་སྤྱོད༔ རྩ་སྒོ་འབྱེད༔ ཐུན་མོང་གི་སིངྔྷི་སྟེར༔ རྡོ་རྗེ་ཤུགས་འགྲོའི་རིགས་ཏེ་ལུས་ཀྱི་འབྲེལ་པ་ལས༔ ཆོས་ཀྱི་འབྲེལ་བ་མེད༔ སྐྱེ་བ་ཕྱི་མ་ལ་སྤྲོད༔ ལས་རྒྱ་བྱས་ཏེ་འཚང་རྒྱའོ༔ གཅིག་ནི་དད་པ་ཆེ༔ ཤ་མདོག་སེར་ལ་ཡིད་དུ་འོང་༔ ཁ་ཉུང་༔ བློ་བརྟན༔ བྱ་བ་འོལ་ཆེ༔ ལུས་ཐུང་ལ་རྒྱས༔ དེས་ཀྱང་ཁྱེད་ལ་དད་ཅིང་ལུས་འབྲེལ་བྱེད་དོ༔ བསོད་ནམས་སྤེལ༔ རིགས་ཀྱང་རིན་ཆེན་རིགས༔ ཚེ་རིང་ངོ་༔ གཅིག་ནི༔ ཁ་མང་༔ མདོག་ནག༔ རྩབ་རྩུབ་མང་༔ བློ་རྒོད༔ ངས་བྱས་ཆེ༔ འགྲོ་ས་དྲག༔ གློ་སྟེབ༔ ངུ་དད་ཆེ༔ དབུགས་ཐུང་༔ སྤྲོ་ཐུང་༔ སྙིང་ཆུང་ངོ་༔ གལ་ཏེ་འབྲེལ་བ་རྣམས་མ་རྫོགས་པར་འདའ་མི་སྲིད་དེ༔ སྐྱེ་བ་ཕྱི་མའི་གདུལ་བྱར་འོང་ངེས་སོ༔ ཁྱོད་ཚད་དུ་བཞུགས་ན་ཚེ་འདི་ཉིད་ཀྱི་གདུལ་བྱ་ཡིན་ནོ༔ བརྒྱུད་འཛིན་སློབ་བུའི་ལུང་བསྟན་ནི༔ ཚེ་སྒྲུབ་འོད་ཕྲེང་གི་གཏེར་ཁ་ནས་བྱུང་བ་ཡིན་ནོ༔ སྤྲུལ་སྐུ་ཉིད་ལོ་གྲོ་སར་མགོན་རིན་གྱིས་ཞུས་ཟེར་བའི་ཕྱི་མོ་ལས་བཤུས་སོ༔

མཁའ་འགྲོ་སྙིང་ཐིག་གི་ཆ་རྐྱེན༔ ལྷ་མོ་ལྔའི་ཚེ་སྒྲུབ།

༄༅༔ མཁའ་འགྲོ་སྙིང་ཐིག་གི་ཆ་རྐྱེན༔ ལྷ་མོ་ལྔའི་ཚེ་སྒྲུབ་བཞུགས་སོ༔

༄༅༔ ཐགཐྲ།མའལ།༔ རིགས་ཀྱི་མ་མོ་མཁའ་འགྲོ་ཚེ་ཡི་བདག༔ ལྷ་མོ་བདེ་བ་འབྱུང་ལ་ཕྱག་འཚལ་ལོ༔ ཀློང་གསལ་ཉི་མའི་རྒྱུད་དག་ལས༔ འབྱུང་བ་འདུས་པའི་ཕུང་པོ་ལ༔ ཕ་མའི་དྭངས་མ་རྣམ་ཤེས་རྟེན༔ ལས་དང་རྐྱེན་གྱིས་འགྱུར་བ་ཡིན༔ འབྱུང་འཁྲུགས་དྭངས་མའི་གནད་འཕྱུགས་པས༔ ལུས་དང་སེམས་གཉིས་འབྲལ་བར་འགྱུར༔ དེ་ལ་ལྷ་མོའི་ཚེ་སྒྲུབ་བྱ༔ ཞེས་པས༔ དེ་ལ་དམ་ཆོས་སྒྲུབ་པ་པོས༔ ཚེ་ཡི་བར་ཆད་བསྲུང་བའི་ཕྱིར༔ འཆི་བ་བརྟག་ཅིང་བསླུ་བ་ནི༔ བརྟག་པ་གཞན་དུ་ཤེས་པར་བྱ༔ བསླུ་ཐབས་མང་དུ་བཤད་ན་ཡང་༔ ལྷ་མོའི་ཚེ་སྒྲུབ་ཁྱད་པར་འཕགས༔ འདི་ལ་སྦྱོར་དངོས་རྗེས་དང་གསུམ༔ སྦྱོར་བ་སྔོན་དུ་འགྲོ་བ་ནི༔ སྐྱབས་འགྲོ་སེམས་བསྐྱེད་སྔོན་སོང་བས༔ གཙང་མའི་གནས་སུ་སྟེགས་བུ་བྱ༔ དྲི་བཟང་བདུད་རྩི་ཆག་ཆག་གདབ༔ ནས་ཀྱི་ཚོམ་བུ་ལྔ་བཀོད་དེ༔ བུམ་པའི་ནང་དུ་ཆང་བླུགས་ལ༔ མར་གྱི་རིལ་བུ་ལྔ་ཡང་གཞུག༔ འབྲུ་སྣ་སྨན་སྣ་རཏྣ་བླུག༔ འབྲས་བུ་ཅན་གྱི་ཁ་རྒྱན་གཟུགས༔ དར་སྣའི་མགུལ་ཆིངས་གཟུངས་ཐག་བཏགས༔ བགེགས་གཏོར་བྱིན་ལ་མཚམས་ཀྱང་བཅད༔ བླ་མ་ཡི་དམ་མཁའ་འགྲོ་ལ༔ སྤྱན་དྲང་མཆོད་གཏོར་གཏོར་ཚོགས་དབུལ༔ དེ་ནས་དངོས་གཞིའི་རིམ་པ་ནི༔ སྤྱི་གཙུག་ཉི་ཟླའི་གདན་སྟེང་དུ༔ ཚེ་ཡི་ལྷ་མོ་སྐུ་མདོག་དཀར༔ རིན་པོ་ཆེ་ཡི་རྒྱན་གྱིས་མཛེས༔ ཕྱག་ན་ཚེ་ཡི་བུམ་པ་བསྣམས༔ སྐུ་གསུང་ཐུགས་ནས་འོད་འཕྲོས་པས༔ བདག་གི་ལུས་ངག་ཡིད་ལ་ཕོག༔ སྒྲིབ་པ་གསུམ་པོ་དག་ནས་ཀྱང་༔ ལུས་ནི་ཤེལ་སྒོང་བཞིན་དུ་བསམ༔ དེ་ནས་ལྷ་མོ་བདག་ལ་ཐིམ༔ གོང་གི་ལྷ་མོར་བདག་བསྐྱེད་ལ༔ སྔགས་བཟླས་འོད་ཟེར་བུམ་པར་འཕྲོས༔ བུམ་པའི་ནང་ནས་ཕྱོགས་བཅུ་ཡི༔ བླ་མ་ཡི་དམ་མཁའ་འགྲོ་དང་༔ སངས་རྒྱས་བྱང་སེམས་ཌཱཀྐིའི་ཚོགས༔ ཆོས་སྐྱོང་ལ་སོགས་མཐུ་ཆེན་གྱི༔ ཚེ་དང་བསོད་ནམས་ཀུན་བསྡུས་ཏེ༔ བུམ་པའི་ནང་དུ་ཐིམ་ཞིང་འཁྱིལ༔ དེ་ལས་མཁའ་འགྲོ་ལྔར་གྱུར་ཏེ༔ སྐུ་གསུང་ཐུགས་ཀྱི་བདུད་རྩི་ཡི༔ རྒྱུན་བབ་བསམ་ལ་སྔགས་འདི་བཟླས༔ ༀ་གུ་རུ་དེ་ཝ་ཌཱཀྐི་ནི་ཧ་རི་ནི་ས༔ ༀ་ཨཱ་(༢༢༥)ཡུཿཤེ་སིདྡྷི་ཧཱུྃ༔ ༀ་སུ་པ་ཏེ་ན་ཏེ༔ སུ་པ་ཏེ་ན་ཏེ་ཡེ་སྭཱ་ཧཱ༔ རྫོགས་རིམ་བདག་དང་ལྷ་མོ་གཉིས༔ དབྱེར་མེད་ངང་ལ་གཞག་པར་བྱ༔ དེ་ནས་མཇུག་གི་རིམ་པ་ནི༔ རྩ་བའི་བསྙེན་པ་འབུམ་དང་ཁྲི༔ སྟོང་ལ་སོགས་པ་བཟླས་བྱས་ནས༔ གྲུབ་པའི་རྟགས་ནི་འདི་ལྟར་འབྱུང་༔ ལུས་ལ་གོ་ཆ་གོན་པ་དང་༔ ཆུ་ལས་བརྒལ་བ་རྨི་བ་དང་༔ ཉི་མ་ཤར་དང་གྱེན་ལ་འཛེག༔ འབྲུ་དང་ལོངས་སྤྱོད་རྨི་བ་དང་༔ བདུད་རྩིའི་ཆུ་རྒྱུན་འཐུང་བ་རྨི༔ དེ་ལྟར་རྟགས་རྣམས་བྱུང་བ་དང་༔ བུམ་པ་རང་གི་སྤྱི་གཙུག་བཞག༔ བུམ་པའི་ནང་ནས་སྙིང་དཀྱིལ་བབ༔ སྙིང་པད་འདབ་བཞི་དབུས་དང་ལྔར༔ མི་འགྱུར་རྟག་ཏུ་བཞུགས་པར་བསྒོམ༔ དེ་ནས་བུམ་ཆུ་བཏུང་ཞིང་བཀྲུ༔ བུམ་པའི་མར་རྣམས་རང་ཉིད་བཟའ༔ ལྕེ་ཡི་༼ཡར་རྐན་ལ་ཟེར་བའང་འདུག་༽དཀྱིལ་དུ་ཧཱུྃ་བསྒོམས་ཏེ༔ ཀཱ་ཡ་སིདྡྷི་ༀ༔ ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ བཟླས་པས་སྐུ་གསུང་ཐུགས་ཐོབ་བསམ༔ འཆི་མེད་ཡེ་ཤེས་བདུད་རྩི་འདི༔ བཞག་པ་ལྕེ་ཡི་དཀྱིལ་དུ་བཞག༔ བབ་པ་ཙིཏྟའི་དཀྱིལ་དུ་བབས༔ དཀར་ཞིང་འཚེར་ལ་སྣུམ་ཞིང་འདྲིལ༔ བདུད་རྩི་འཆི་མེད་དངོས་གྲུབ་མཆོག༔ ཡེ་ཤེས་ལྷ་མོ་ཨ་ལ་ལ་ཧོ༔ ནད་བཞི་པརྒྱ་རྩ་བཞི༔ རྐྱེན་ཉི་ཁྲི་ཆིག་སྟོང་༔ ཡེ་འདྲོག་སུམ་བརྒྱ་དྲུག་ཅུ༔ བགེགས་རིགས་སྟོང་ཕྲག་བརྒྱད་ཅུ༔ བྱང་ཞིང་དག་པར་གྱུར་ཅིག༔ ཅེས་དངོས་གྲུབ་བླང་བར་བྱའོ༔ ཚེ་སྒྲུབ་འདི་ཡི་ཡོན་ཏན་ནི༔ ཚེ་ཟད་པ་ཡི་རྣལ་འབྱོར་ཡང་༔ ཚངས་པའི་ཚེ་དང་ལྡན་པར་འགྱུར༔ ལས་འཕྲོ་ལྡན་ན་ཉི་ཟླའི་ཚེ༔ འཆི་མེད་རྡོ་རྗེ་ལྟ་བུའོ༔ འདི་ལ་སྒོམ་སྒྲུབ་སུས་བྱས་པ༔ དུས་མིན་འཆི་བ་བརྒྱད་མི་འབྱུང་༔ གློ་བུར་ནད་དང་གདོན་རྣམས་ཀྱིས༔ དེ་ལ་ཚུགས་པར་མི་འགྱུར་རོ༔ ཚེ་འཕོས་མཁའ་སྤྱོད་གནས་སུ་འགྲོ༔ འཆི་བ་བརྟག་དང་བསླུ་བ་ལ༔ བསླུ་ཐབས་མང་དུ་བཤད་ན་ཡང་༔ ལྷ་མོ་ལྔ་ཡི་ཚེ་སྒྲུབ་འདི༔ པདྨ་འབྱུང་གནས་བདག་ཉིད་ཀྱིས༔ ཟབ་ཕྱིར་ཀློང་གསལ་རྒྱུད་ལས་བཏུས༔ གཞན་ལ་མ་སྤེལ་གཏེར་དུ་སྦས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ དཔལ་ལྡན་ཚུར་པའི་དཔེ་ལས་བཤུས༔

སྤྲུལ་སྐུ་ལེགས་པ་ལུང་བསྟན་པ།

༄༅༔ སྤྲུལ་སྐུ་ལེགས་པ་ལུང་བསྟན་པ༔

༄༅༔ ཨེ་མ་ཧོ༔ ཡང་ཟབ་མཁའ་འགྲོ་སྙིང་ཐིག་འདི༔ ཀུན་ལ་མ་སྤེལ་ཉམས་སུ་ལོངས༔ སྤེལ་དྲགས་སྣོད་མིན་དམ་སེལ་བྱེད༔ དེ་ཡི་སྐུ་ཚེ་ཚད་མི་ཕྱིན༔ བརྒྱུད་འཛིན་ཉེར་གཅིག་ལྔ་བཤད་པ༔ གཅིག་གིས་ཚུལ་དང་མཐུན་པར་སྤེལ༔ ཤེལ་དཀར་སྐྱེ་བ་བཅུ་བདུན་པ༔ ཤམ་པོ་གངས་ཀྱི་ཤར་ལྷོ་ཕྱོགས༔ རིགས་ལྡན་ཆུ་ཁམས་སྟག་ལོ་པ༔ སྦས་ཚུལ་འཁོར་བའི་ཆ་འཛིན་ཅིང་༔ སྐྱེ་བ་རྒྱུན་ཁྱེར་དོན་བློ་ལྡན༔ ཞེན་པ་ཆུང་ཞིང་ངང་རྒྱུད་རིང་༔ སྙིང་སྡར་ཚེ་རིང་ལོངས་སྤྱོད་ཆུང་༔ སྙིང་ཏིག་ཐབས་ཀྱི་ཆ་ཡིན་པས༔ བརླ་གཡས་པ་ཡི་ནང་ལོགས་ལ༔ ཤ་སྨེ་མཁའ་འགྲོའི་སྤྱན་འདྲ་ཡོད༔ སྐྱེས་བུ་དམ་ལྡན་ལེགས་པ་ཞེས༔ ཟབ་མོ་ཆོས་ཀྱི་བསྟན་པ་སྤེལ༔ སྐྱེ་མཐའི་བྱང་སེམས་མིན་རེ་ཀན༔ འདི་ཡིས་འགྲོ་དོན་སྤེལ་བ་ཡོང་༔ ས་ལ་གནས་པའི་བྱང་སེམས་ཀྱིས༔ རྒྱ་གར་རྒྱ་ནག་སིང་ག་དང་༔ བོད་ཀྱི་ཡུལ་དུ་འཕེལ་བར་འགྱུར༔ གཞན་ཡང་བཤེས་གཉེན་དམ་པ་དང་༔ ལམ་སྒོམ་ཐེག་ཆེན་རིགས་རྣམས་མོས༔ ཕལ་པའི་འགྲོ་བ་མོས་འདུད་ཉུང་༔ འདི་དང་འཕྲད་ཚད་དོན་ཆེན་འགྱུར༔ ས་མ་ཡ༔ རྒྱ་རྒྱ་རྒྱ༔

མཁའ་འགྲོ་སྙིང་ཐིག་ལས་སྲག་སྒྲུབ་ནག་མོའི་གཏོར་དབང་།

༄༅༔ མཁའ་འགྲོ་སྙིང་ཐིག་ལས་སྲོག་སྒྲུབ་ནག་མོའི་གཏོར་དབང་བཞུགས་སོ༔

༄༅༔ རིགས་ཀྱི་ཌཱཀྐི་ཡབ་ཡུམ་ལྔ་ལ་ཕྱག་འཚལ་ལོ༔ དཔོན་སློབ་བར་ཆད་མི་འབྱུང་ཕྱིར༔ ད་ལ་ས་ཆོག་གྲུབ་པ་ཡི༔ ཤན་པ་ནག་མོའི་སྲོག་དབང་བསྐུར༔ དེ་ནས་དཔོན་སློབ་ཐམས་ཅད་ཀྱིས༔ མདུན་གྱི་ནམ་མཁའི་དཀྱིལ་དག་ཏུ༔ འོན་ཕུང་འབར་བ་མཐའ་ཡས་དཀྱིལ༔ བླ་མ་ཡི་དམ་ཌཱཀྐི་དམ་ཅན་ཚོགས༔ སྤྲིན་ཕུང་བཞིན་དུ་གཏིབས་པར་བསྒོམས་པའི་མདུན༔ ཤན་པ་ནག་མོ་འཁོར་བཅས་བསྐྱེད༔ རྒྱལ་བ་རིག་འཛིན་བསྒོམ་བཞིན་དུ༔ དེ་རིང་ལས་རྣམས་སྒྲུབ་པར་བསམ༔ ཚོགས་གཏོར་མཆོད་པ་རྒྱ་ཆེན་འབུལ༔ གཙོ་བོ་བཞི་ཡི་གཏོར་དབང་བསྐུར༔ བྷྱོ༔ མཁའ་འགྲོ་ནག་མོ་མི་བསྲུན་མ༔ ཤ་ཟ་ཁྲག་མིག་སྲིན་པོའི་གདོང་༔ འཇིགས་པའི་གཟུགས་ཅན་མཁའ་འགྲོའི་གཙོ༔ ནག་མོ་སྲིད་པའི་མཚོན་ཆ་ཐོགས༔ བ་སྤུ་མཚོན་ཆ་བསྐལ་པའི་མེ༔ རླུང་ནག་ཞོན་ནས་རལ་པ་སྤྲུག༔ སྲིད་པའི་ཤུ་སྟ་མི་ལྤགས་གྱོན༔ སྟོང་གསུམ་སྒྲོལ་བྱེད་སྙིང་དམར་༼ཞལ་དུ་༽འཛུད༔ ཞལ་ནས་ཁྲག་འཛག་ཀྱུ་རུ་རུ༔ (༢༢༧)སྤྱན་གསུམ་ཁྲོ་གཉེར་མཆེ་བ་གཙིགས༔ ཨག་ཚོམ་མེ་འབར་འཚུབ་མའི་མཚོན་ཆ་འགྱེད༔ མི་མགོའི་དོ་ཤལ་གསོད་བྱེད་རྒྱ་མཚོས་བསྐོར༔ ཨོ་རྒྱན་བཀའ་དང་རིག་འཛིན་བླ་མའི་བཀའ༔ ཁྱད་པར་མཁའ་འགྲོ་དམ་བཏགས་རྗེས་འབྲངས་ལ༔ དབང་དང་བཀའ་ལུང་བཀའ་ཡི་བསྟན་པ་སྲུངས༔ ༀ་ཁྱི་ལ་ལེ་ནག་མོས་སོད༔ སྲོག་མ་ཏྲི་སོད༔ སྙིང་ཁ་ཁ་ཐམ་ཡ་ཡ་སོད༔ རྩ་བ་བི་རི་མུ་སོད༔ གྷ་ཡ་སོད༔ ནྲི་ཡ་སོད༔ རག་མོ་ཙིཏྟ་རྦུད༔ དམ་ཚིག་མ་བསྲུངས་ན་ཆད་པ་ཆོད་ཅིག༔ བསྲུངས་ན་སྟོང་གྲོགས་མཛོད་ཅིག༔ གཡས་ཀྱི་གསོད་བྱེད་ཀྱི་གཏོར་མ་བཞག་ལ༔ བྷྱོ༔ ཤ་ཟ་དམར་མོ་ཅེ་སྤྱང་གདོང་༔ རོ་ཞོན་སྙིང་ཁྲག་ཞལ་དུ་གསོལ༔ གཡས་ཀྱི་ཤ་ཟ་ལས་མཛོད་ཅིག༔ གཡོན་གྱི་གཏོར་མ་བཞག་ལ༔ བྷྱོ༔ ནག་མོ་ཝ་གདོང་རྔམས་པའི་གཟུགས༔ བ་སྤུ་མཚོན་ཆ་སྤུ་གྲིས་གཏམས༔ རེག་པས་སྟོང་གསུམ་སྒྲོལ་བྱེད་མ༔ ཞགས་པ་སྤུ་གྲིས་གློ་མཆིན་གཅོད༔ ཤ་ཟ་ཁྲག་འཐུང་ཀེང་རུས་མུར༔ བཀའ་ལུང་རྗེས་འབྲངས་ལས་མཛོད་ཅིག༔ མདུན་གྱི་གཏོར་མ་བཞག་ལ༔ བྷྱོ༔ མདུན་གྱི་སྲོག་གཅོད་ཤ་ཟ་མོ༔ ནག་མོ་འུག་གདོང་གནམ་ལྕགས་སྡེར༔ ཁྲག་རལ་མཚོན་སྟོང་དགྲ་སྙིང་འདེབས༔ གནམ་ལྕགས་མཆུ་སྡེར་སྲོག་རྩ་གཅོད༔ སྐད་ཅིག་སྟོང་གསུམ་ཉུལ་བྱེད་མ༔ རྐན་རྡེབ་སྟོང་གསུམ་སྙིང་ཁྲག་འབྲུ༔ སྟོང་གསུམ་ཟས་ཟ་སྲིད་གསུམ་སྐོམ་དུ་འཐུང་༔ གསོད་བྱེད་ལྷ་མོ་མཁའ་བཅས་ལ༔ ཤ་ཟ་ཁྲག་འཐུང་འབུམ་གྱིས་བསྐོར༔ དཔོན་གཡོག་འཁོར་བཅས་ལས་མཛོད་ཅིག༔ དབང་དང་བཀའ་ལུང་གདམས་པའི་སྒོ་ཕྱེས་ལ༔ དམ་ལ་གནས་པའི་རྣལ་འབྱོར་བཀའ་ཆད་སྲུངས༔ ཞེས་དབང་དང་རྗེས་གནང་བྱ༔ རོལ་མོ་སྒྲོག༔ དུས་ཉི་ཤར་རམ༔ ཕྱེད་ཡོལ༔ ས་སྲོས༔ ནམ་ཕྱེད་ཤིས༔ དེ་དུས་ཚོགས་གཏོར་བཟང་བ་གལ་ཆེའོ༔ ཨོ་རྒྱན་བཀའ་ལུང་༔ ཡེ་ཤེས་མཚོ་རྒྱལ་ཞལ་གདམས༔ ཕྱག་ལེན་མེད་ཐབས་མེད་པ་རྫོགས་སོ༔ ཤན་པ་འཁོར་བཅས་བཀའི་བྱ་ར་མཛོད་ལ་ལུང་འདི་ཁྲོལ༔ འདི་ཡི་ཆོས་སྐྱོང་ཁོ་ལ་གཏད་དོ༔ རང་བཟོ་མ་བྱེད་གནང་བཞིན་མཛོད༔ ས་མ་ཡ༔ ཟབ་རྒྱ༔ སྦས་རྒྱ༔ གཏད་རྒྱ༔ པདྨ་ལས་འབྲེལ་རྩལ་གྱི་གཏེར་མའོ༔

མཁའ་འགྲོ་ཡང་ཏིག་གི་དབང་བསྐུར་བའི་ལག་ལེན། མཁའ་འགྲོ་སྙིང་ཐིག་གི་དཀྱིལ་འཁོར་བྲི་ཚུལ།

༄༅། །མཁའ་འགྲོ་ཡང་ཏིག་གི་དབང་བསྐུར་བའི་ལག་ལེན། མཁའ་འགྲོ་སྙིང་ཐིག་གི་དཀྱིལ་འཁོར་བྲི་ཚུལ་རྣམས་བཞུགས་སོ། །

༄༅། །ན་མོ་གུ་རུ། མཁྱེན་སྟོབས་བཻ་ཌཱུར་གསར་བའི་བུམ་བཟང་ནས། །སྨིན་བྱེད་དབང་བཞིའི་འཆི་མེད་བདུད་རྩིའི་རྒྱུན། །བདག་བློའི་ཟ་མ་ཏོག་ཏུ་བསྩལ་མཁས་པ། །རྡོ་རྗེ་འཆང་དབང་བླ་མའི་ཞབས་ལ་འདུད། །

རྫོགས་པ་ཆེན་པོ་མཁའ་འགྲོ་སྙིང་ཐིག་གི་དབང་བསྐུར་བའི་ཚུལ་ལ། སྙིང་ཐིག་རྩ་བའི་དབང་ཆོག་མ་བུ་དུམ་བུར་བཅད་པ་རྣམས་གོ་རིམ་རྒྱུ་རུ་ལུགས་སུ་བཀོད་པ་དང་། དེར་མ་ཚང་བ་འགའ་ཞིག་ཨོ་རྒྱན་ཡབ་ཡུམ་གྱིས་གདམས་པའི་གནད་བཀྲོལ་ཏེ་མངོན་སུམ་བསྩལ་བ་ལ་བརྟེན་ནས་ཆོས་རྗེ་ཀུན་མཁྱེན་ཆེན་པོས་རྩ་བ་གཏེར་བྱོན་གྱི་དགོངས་པ་ཟབ་ཅིང་བརླིངས་པ་རྣམས་གསལ་པོར་བཀྲལ་བ་མཁའ་འགྲོ་ཡང་ཏིག་ཏུ་གྲགས་པའི་གཞུང་གཞན་དང་མ་འདྲེས་ཤིང་རང་རྐང་ཚུགས་པ་མཛད་པའི་དེ་ཉིད་ཀྱི་ནང་ཚན་རིན་པོ་ཆེ་དབང་གི་ཕྲེང་བ་ཉིད་བཀླག་ཆོག་ནག་འགྲོས་སུ་བཀོད་པ་ཡིན་འདུག་ནའང་རྡུལ་ཚོན་བཞེངས་པ་གཞིར་བཞག་སྒྲུབ་ཆེན་དང་འདྲེས་པས་ཅུང་ཟད་དབྱེ་དཀའ་བས། ད་ལྟ་ཡུལ་དུས་དང་འཚམས་པའི་ཕྱག་ལེན་ཕལ་ཆེ་བ་ཞིག་རས་བྲིས་ལ་བརྟེན་པ་མང་བས་དེའི་ཚུལ་ནི། ཐོག་མར་ས་ཆོག་ནི་གྲུབ་ན་ལེགས་ཀྱང་རས་བྲིས་ཀྱི་ཕྱོགས་ལ་མི་དགོས་པས་གོང་དུ་དཀྱིལ་འཁོར་བཤམས་པའི་ས་གཞི་ཁོད་སྙོམས་པའི་མཎྜལ་ལ་དྲིའི་ཐིག་ལེ་ལ་མེ་ཏོག་གི་ཚོམ་བུ་སློབ་དཔོན་གྱིས་ལྷ་སོ་སོའི་སྔགས་བརྗོད་བཞིན་དུ་བཀོད། རྣམ་རྒྱལ་བུམ་པ་བཅུའམ་ལྔ། མ་འབྱོར་ན་གཅིག་གིས་ཀྱང་རུང་སྟེ། ལས་བུམ་བཅས་པ་རྣམས་སོ་སོའི་ཆས་སུ་བྱས་པ་རྒྱུན་འབབ་ཀྱི་ཆུས་སུམ་གཉིས་བཀང་བ་ལ་རྫས་ཉེར་ལྔས་སྦགས་པ་གཙང་མའི་སྟེགས་ལ་བཀོད། མཐའ་བསྐོར་གྱི་མདུན་དུ་མཆོད་གཏོར་སྨན་རཀ་ཅན་དང་། ཆུ་གཉིས་སྔོན་འགྲོའི་ཉེར་སྤྱོད་ལྔ་གཡས་བསྐོར་དུ་བཤམ། རྡོ་དྲིལ། ཀུ་ཤ །སྲུང་སྐུད། ཁྱོར་ཆུ། བདུད་རྩི་ལྔའི་རིལ་བུ། སོ་ཤིང་རྣམས་འདུ་བྱ། དེ་ནས་སྟ་གོན་གྱི་ཆོ་ག་བྱེད་ཚུལ་དབང་ཆོག་ལྟར་ལས་ཕྱག་བཞེས་སྤྱི་ཙམ་ལ་སྦྱིན་སྲེག་མ་གྲུབ་ཀྱང་ཆོག །གསོལ་གདབ་ཀྱི་གོང་དུ་སློབ་མ་ཁྲུས་དང་ཕྱག་བྱས་གྲལ་ལ་འཁོད་ཅིང་བགེགས་བསྐྲད། (༢༢༩)སྟ་གོན་གྱི་སྔོན་དུ་བཤད་པའི་བླ་མའི་རྣལ་འབྱོར། ཉམས་ཆག་སྐོང་བ་གསོལ་གདབ་ཀྱི་ལེ་ཚན་རྣམས་སྐབས་འདིར་བྱ། དེ་ནས་སློབ་མའི་བློ་བཅོས་པའི་ཆོས་བཤད་ཅི་རིགས་སྐབས་སྦྱར་གྱི་སྔོན་དུ་བཏང་ནས། སྟ་གོན་དངོས་གཞི་རྨི་ལམ་བརྟགས་པའི་བར་དཀྱུས་བཞིན་བྱས་ཏེ་༼དེ་ནས་སློབ་མ་རང་གནས་སུ་བཏང་དཀྱིལ་འཁོར་གྱི་ལྷར་གསོལ་གདབ་དང་རྗེས་ཆོག་བྱ༽། ཉིན་དང་པོའི་ཆོ་གའོ།། །།

༈ དེ་ནས་དབང་ཆོག་དངོས་གཞི་ལ་ཡོ་བྱད་བཤམ་པ་ནི། རས་བྲིས་ཀྱི་ཁར་མཉྫི་སོ་སོའི་སྟེང་དུ་རྣམ་རྒྱལ་བུམ་པ་རྣམས་ཀྱི་ཁ་རྒྱན་གྱི་གསེབ་ཏུ་ཤེལ་དང་རྨ་བྱ་མེ་ལོང་རྣམས་བཙུགས་པ་བཀོད། ཕྱོགས་ཅི་བདེར་རིགས་ལྔའི་སྐུ་འབག །དབུ་རྒྱན། རྡོ་རྗེ། དྲིལ་བུ། མདུན་གཡས་སུ་རྟ་མགྲིན་གྱི་གཏོར་མ། བར་དུ་མཆོད་གཏོར་སྨན་རཀ་ཅན་གཡོན་དུ་སྲོག་སྒྲུབ་དང་། ཕྱོགས་ཅི་བདེར་རིག་འཛིན་གྱི་གཏོར་མ། གཟའ་བདུད་ཤན་པ་དམར་ནག །གཡུ་སྒྲོན་མ་རྣམས་སོ་སོའི་གཏོར་མ་སྐུ་འབག་ཅན། གཡས་སུ་གསང་དབང་གི་དཀྱིལ་འཁོར་ཕྱག་ལེན་བཞིན་བྲིས་པའི་ཁར་ཐོད་པ་བདུད་རྩིས་བཀང་བ། རྒྱབ་ཏུ་རིག་མའི་ཙ་ཀ་ལི། གཡོན་དུ་དབང་བཞི་པའི་བཅས་ཤོམ། ཕྱོགས་ཅི་བདེར་ཀ་དག་རྩལ་དབང་། ཐོད་རྒལ་རྩལ་དབང་། མཁའ་འགྲོའི་དོན་དབང་གསུམ་པད་འདབ་འོད་ར་ཐོད་པ་བཅུད་ལྡན་གྱི་བཅས་གཅིག་གིས་འཐུས། སློབ་མ་མཆོག་ལ་བཀའ་གཏད་བྱེད་པར་སྤྲོ་ཡང་ཤོམ་ཟུར་པ་མེད། དཀྱིལ་འཁོར་རྒྱན་བཀོད་ཞིབ་པར་དབང་ཆོག་ལྟར་དང་། བསྡུ་ན་དེ་དག་གི་མཐའ་སྐོར་དུ་ཆུ་གཉིས་སྔོན་འགྲོའི་ཉེར་སྤྱོད། སྤོས། མར་མེ། ལྷ་བཤོས། ཚོགས་མཆོད་རྣམས་ཟབ་རྒྱས་སུ་བཤམས། ཕྱག་ལེན་རྒྱས་པའི་ལུགས་སུ་དབང་རྣམས་དུམ་བུར་ཞག་དྲངས་ཀྱིས་ཆོད་པར་བསྐུར་ན་བཤམ་བཀོད་འདོར་ལེན་གྱི་སྐབས་ཕྱེད་པར་བྱའོ། །

དེ་ནས་དཀྱིལ་འཁོར་སྒྲུབ་པ་ནི། དབང་ཆོག་ལས། སྟ་གོན་དུ་བྱ་བའི་སྐབས་བཞིན་བྱས་ལ་མཆོད་བསྟོད་བཀྲ་ཤིས་བརྗོད། ཅེས་གསུངས་ཤིང་། དེའི་དོན་ནི་རང་ཉིད་གཞིའི་ཀུན་བཟང་དུ་གསལ་བཏབ། མདུན་གྱི་བུམ་པ་བསྐྱེད་བཟླས་འོད་ཞུའི་བར་བྱ། རས་བྲིས་ཀྱི་དཀྱིལ་འཁོར་ལྷ་བསྐྱེད་ནས་བསྟོད་པའི་བར་དཀྱུས་བཞིན་བྱ། བདག་མདུན་ལ་བཟླས་པ་བྱེད་དགོས་པའི་གསལ་ཁ་མ་བྱུང་(༢༣༠)ཞིང་། རང་བཞིན་རྫོགས་པ་ཆེན་པོ་ལྟར་ན་བདེན་གཉིས་དབྱེར་མེད་སྣོད་བཅུད་དག་མཉམ་ཆེན་པོར་ཡེ་ནས་གནས་པའི་གཞི་རྒྱུད་བདེ་གཤེགས་སྙིང་པོ་སྐྱེ་འགགས་གནས་གསུམ་དང་བྲལ་བའི་རྩལ་སྣང་ལྷ་སྐུར་ཤར་བ་ལས་བློས་གསར་དུ་སྒྲོ་བཏགས་པ་མ་ཡིན་པའི་ངེས་ཤེས་རྙེད་ཅིང་རླུང་འགྲོ་འོང་གཞོམ་མེད་སྔགས་ཀྱི་རང་བཞིན་དུ་གནས་པར་ཤེས་པ་ནི་དོན་དམ་གྱི་བཟླས་པ་ཡིན་པས་བར་བཀབ་མ་བྱས་ཀྱང་ཆོག །ཡང་དཀྱིལ་འཁོར་སྒྲུབ་པ་ལས། བཟླས་པའི་རིམ་པ་སྐབས་ལྟར་བྱ། །ཞེས་པས། རིགས་ལྔའི་སྒྲུབ་ཐབས་ལྟར་བཟླས་པ་བྱས་ཀྱང་ལེགས་སོ། །ཡང་དབང་གི་བྱེད་ལས་བུམ་པ་གཙོ་བས་བུམ་བཟླས་བྱས་པས་ཁྱབ་ཅེས་བླ་མས་གསུངས། ཚུལ་འདི་ནི་སྙིང་ཐིག་རྩ་བའི་དབང་ཆོག་ལས། རིགས་ལྔ་ནང་སྒྲུབ་བདག་བསྐྱེད། ཕྱི་སྒྲུབ་མདུན་བསྐྱེད། ཅེས་གསུངས་པས་གོང་གི་བདག་བསྐྱེད་གཞིའི་ཀུན་བཟང་ཉིད་རིགས་ལྔ་ནང་སྒྲུབ་ལུས་དཀྱིལ་གྱི་སྒོམ་གཞི་ཡིན་པ་དང་། ཕྱི་སྒྲུབ་མདུན་བསྐྱེད་དང་ལྷ་གྲངས་རྒྱས་བསྡུས་ལས་འོད་ཟེར་འཕྲོས་པའི་བསྐྱེད་པ་ལ་སོགས་མངོན་རྟོགས་ལྟར་བྱའོ། །

ཞེས་སོགས་གསུངས་པས་གསལ་བར་བསྟན་ནོ། །དེས་ནི་བུམ་དབང་གི་སྒྲུབ་མཆོད་སོང་ནས། དབང་ཆོག་ལས། བདག་འཇུག་དགོས་པར་གསུངས་པ་གྲུབ་ན་ལེགས་ཤིང་། པདྨ་ཀློང་ཡངས་ལྟར་བྱ། དེ་ལྟའི་ཕྱག་ལེན་དུ། དམ་ཡེ་དབྱེར་མེད་དུ་རྟོགས་པ་བདག་འཇུག་གི་ངོ་བོ་ཡིན་པའི་གསལ་འདེབས་སུ་རིག་པའི་མེ་ཏོག་དོར་བས་གོ་བཅད་པ་གཞན་ལ་བསྐུར་ཐབས་རྒྱས་བསྡུས་འཚམས་པས་ཤིན་ཏུ་ལེགས་སོ། །དེ་ནས་དཀྱིལ་འཁོར་གྱི་ལྷ་ལ་སློབ་མ་བཅུག་པའི་གནང་བ་ཞུས་ནས། ཁྲུས་དང་བགེགས་བསྐྲད་ནས་སྲུང་འཁོར་གསལ་བཏབ། ཆོས་བཤད་རྒྱས་བསྡུས་སྐབས་སྦྱར་གྱི་མཐར། འདི་ཉིད་ཀྱི་ལོ་རྒྱུས་རྒྱས་པར་བཤད་ནས། བུམ་དབང་ནས་གཏད་རྒྱའི་བར་དབང་ཆོག་གཞུང་ཉིད་ལ་འཕྲི་བསྣན་བྱ་རྒྱུ་མེད་ཀྱང་། དབང་གོང་མ་གསུམ་དུས་བདག་བསྐྱེད་རྟ་མགྲིན་ཡབ་ཡུམ་དུ་བསྒོམ་དགོས་པ་དབང་བཞི་སྟན་ཐོག་གཅིག་ཏུ་བསྐུར་བ་ཡིན་ན། སློབ་དཔོན་གྱིས་ཆོ་ག་ལ་མ་ལྟོས་པར་དམིགས་པ་འཕྲལ་དུ་བསྒྱུར་བ་གནས་བསྒྱུར་གྱི་ལུགས་དབང་ཆོག་གཞུང་དུ་ཡོད་པ་དེ་ཀ་ལྟར་བྱས་པས་ཁྱབ། (༢༣༡)དབང་རྣམས་དུས་སོ་སོར་བསྐུར་ན། དབང་གི་འགྲེལ་པ་ལས། གསང་དབང་མན་ཆད་གསང་སྒྲུབ་དྷཱཀྐི་ལྔས་བསྐུར་བ་ཡིན་ཏེ། ཞེས་གསུངས་པས་རིགས་ལྔ་གསང་སྒྲུབ་རྟ་ཕག་གི་ལུས་དཀྱིལ་ལ་བརྟེན་པའི་སྒོམ་བཟླས་བྱས་ཀྱང་ལེགས་སོ། །

དབང་བཞི་པ་རིག་པ་ཅེར་མཐོང་དུ་ངོ་སྤྲད་པ་ལྷ་བསྐྱེད་ཆེད་དུ་བཅོས་མི་དགོས་ཏེ། རྒྱལ་བ་ཞི་ཁྲོ་ཐམས་ཅད་བཞི་ཆ་གསུམ་བྲལ་གྱི་རིག་པ་ཆོས་སྐུའི་ངོ་བོ་ལས་མ་འདས་པའི་ཕྱིར་རོ། །དེ་ཡང་སྔ་མ་ལས་རང་རིག་ཅེར་མཐོང་དུ་ངོ་སྤྲོད་པ་ནི་ཡང་གསང་གི་སྒྲུབ་པའོ། །ཞེས་པས་ཤེས་སོ། །དབང་ཆོག་ལས་མཆོག་དབང་གི་བདག་བསྐྱེད་ཁ་བསྒྱུར་སྐད་ཅིག་ཀྲོང་བསྐྱེད་ཀྱིས་གོ་མི་ཆོད་སྙམ་པའི་རྟོག་གེའི་ངན་རྟོག་གིས་བསླད་པར་མི་བྱ་སྟེ། དེ་བཞིན་གཤེགས་པ་རྣམས་ནི་གང་འདུལ་གྱི་མོས་ངོར་འཆར་བ་སྒྱུ་མ་ལྟ་བུའི་རྣམ་འཕྲུལ་ལ་མངའ་བརྙེས་པ་ཡིན་ལ། རྣམ་པ་ལམ་བྱེད་ཀྱི་དུས་སུ་ཡང་རྟེན་འབྲེལ་གྱི་རོལ་པ་མ་འགགས་པའི་ཚུལ་དུ་གང་དགོས་སྐབས་དང་སྦྱར་ནས་གནས་འགྱུར་བ་ནི། གཉུག་མའི་སེམས་ཉིད་ལྷན་སྐྱེས་ཉིད་ལམ་དང་འབྲས་བུའི་ཆོས་ཐམས་ཅད་ཀྱི་འཆར་གཞི་ཡིན་པས་གཞི་འབྲས་གཉིས་སུ་མེད་པའི་གནད་གལ་པོ་ཆེའོ། །གསར་མ་བ་ཁ་ཅིག་ལྟར་ལྷ་སྐུ་མཚན་འཛིན་གྱི་རྟོག་པར་ཨ་འཐས་པར་ནི་རྫོགས་པ་ཆེན་པོའི་ལུགས་ལས་གཞན་དུ་གྱུར་པའོ། །ཚོགས་མཆོད་ལས་བྱང་ཟུར་བཀོལ་ལྟར་དབང་གྲོལ་ནས་བཏང་ན་བདེ་ཞིང་དེ་སྐབས་ཀྱང་ལྷ་བསྐྱེད་དགོས་པ་ཡང་གཅིག་ཤུགས་གཅིག་འགགས་ཀྱི་ཆུ་ལས་ཉ་ལྡང་བའི་ཚུལ་དུ་བསྒོམ་ཞིང་། སྲུང་བའི་གཏོར་ཆོག་དང་དབང་གི་རྗེས་ཆོག་བཟོད་གཤེགས། ཉེར་བསྡུ་བསྔོ་སྨོན་ཤིས་བརྗོད་རྣམས་ཚོགས་མཆོད་ལས་འབྱུང་བ་བཞིན་བྱས་པས་འཐུས་སོ། །དེ་སྐད་བཤེས་གཉེན་མཆོག་དེའི་བཞེད་སྐོང་དུ། །རྗེ་བཙུན་བླ་མས་བཀའ་བསྩལ་ཇི་བཞིན་དུ། །འགྱུར་མེད་བསྟན་འཕེལ་བདག་གིས་བཀོད་པའི་དགེས། །མཁའ་མཉམ་འགྲོ་རྣམས་སྨིན་ཅིང་གྲོལ་བར་ཤོག། །།

༈ མཁའ་འགྲོ་སྙིང་ཐིག་གི་དཀྱིལ་འཁོར་བྲི་ཚུལ་ནི། ཕྱི་ནས་རིམ་བཞིན་མེ་རི་རྡོ་ར་དུར་ཁྲོད་པད་ཕྲེང་རྣམས་ནི་སྤྱི་དང་འདྲ། དུར་ཁྲོད་ཀྱི་བཀོད་པ་གཞན་སྤྱི་དང་འདྲ་ཞིང་རྙིང་མ་ལ་རཱུ་ཏྲའི་རྫས་བརྒྱད་བཀོད་ལུགས་ཐང་རྙིང་ཕལ་(༢༣༢)ཆེར་ན་ལྷོའི་དུར་ཁྲོད་ཀྱི་དབུས་སུ་རཱུ་ཏྲའི་མགོ་སོང་བར་འདུག་ཀྱང་དེང་སང་ཕྱག་ལེན་ལ་ལྷོའི་དུར་ཁྲོད་ཀྱི་ཟུར་དུ་བཀོད། ༼ལྷོ་ནུབ་ཕྱོགས་སུ་༽གཞན་རྣམས་ཀྱང་དུར་ཁྲོད་སོ་སོའི་ཟུར་དུ་བྲི། ༼གཡས་སྐོར་དུ་༽འདི་ལྟར་ལྷོ་ནུབ་ཏུ་ལག་གཡོན། ནུབ་ཏུ་སྙིང་། ནུབ་བྱང་དུ་རྐང་གཡོན། བྱང་དུ་གསང་རྡོར། བྱང་ཤར་དུ་རྐང་གཡས། ཤར་དུ་གློ་བ། ཤར་ལྷོར་ལག་གཡས་ཏེ་ཐམས་ཅད་འཕྲུལ་ཤེས་དགོས། པད་འདབ་མཛེས་ཚོན་མཚན་སོ་གཉིས་ཀྱི་བརྡར་འདབ་མ་སོ་གཉིས་སོ། །ཟེའུ་འབྲུ་སེར། ལྟེ་བ་ལྗང་གུ་པ་ཏྲ་རིས། དཀྱིལ་འཁོར་དངོས་གཞི་ལ་རྟ་བབས་སྣམ་བུ་བཞི་ལ་སྣམ་བུ་བཞི་པོ་འོག་ནས་རིམ་བཞིན་དམར་སྔོ་ལྗང་སེར་བྱ། རྩིག་པ་ལ་ནང་ནས་རིམ་བཞིན་སྔོ་དཀར་སེར་དམར་ལྗང་བའོ། །

ལྷ་གནས་དང་སྒོའི་བར་གྱི་ཁྱམས་རྣམས་ནི་ཕྱོགས་མདོག་པ་ཏྲ་རིས། ལྷ་གནས་ལ་ལྟེ་བ་ལ་ལི་ཁྲི། དེའི་ཕྱི་༼ཆ་སྲན་གཅིག་ཙམ་༽མུ་ཁྱུད་སྔོ་སྐྱ། དེའི་ཕྱི་མུ་ཁྱུད་དེ་ལས་ཉིས་འགྱུར་སེར་པོ། དེའི་ཕྱིར་པད་འདབ་བཞི་ཕྱོགས་མདོག །དེའི་ཕྱིར་རྡོར། དེའི་ཕྱིར་པད་ཕྲེང་དམར་པོ། དེའི་ཕྱིར་འཁོར་ལོའི་རྩིབས་འདི་ལྟར་དཀར་པོ། ལྷ་བཀོད་ཚུལ་ནི་ལྟེ་བར་རྣམ་སྣང་མཐིང་ག་འཁོར་དྲིལ་༼འཁོར་ལོའི་ཡུ་བ་ཅན་༽འཛིན་པ། ཡུམ་སྔོ་སྐྱ། འདབ་མ་བཞི་ལ་ཤར་ནས་རིམ་པ་བཞིན། གཞི་དཀར་པོ་ལ་རྒྱ་སྐྱེགས་ཀྱི་རི་ས་འདི་ལྟར་བཅད་འདུག་རིགས་བཞི་ཡབ་ཡུམ་༼ཕྱོགས་མདོག་༽ཡབ་རྣམས་གཡས་རང་རྟགས་ཕྱག་རྒྱ་དང་གཡོན་དེས་ཡུ་བ་བྱས་པའི་དྲིལ་བུ་ཡུམ་རྣམས་རྡོ་དྲིལ་འཛིན་ནས་ཡབ་མགུལ་འཁྱུད་པ། ཡང་ཏིག་ཏུ་ཡུམ་རྣམས་གྲི་ཐོད་འཛིན་པ་བྱས་འདུག །སྒོ་བཞིའི་ནང་དུ་སྒོ་བ་ཡབ་ཡུམ་རྣམས་ཕྱོགས་༼བྱང་སྒོའི་གཡས་རྒྱ་གྲམ་གཡོན་དྲིལ་བུ་འདུག་༽མདོག་ཡབ་རྣམས་གཡས་རང་རྟགས་ཕྱག་རྒྱ་ཡུམ་རྣམས་ཀྱང་གཡས་རང་རྟགས་ཡབ་དང་མཚུངས་སོ། །ཁྲོ་བོའི་ཆས་ཅན་ནོ། །རས་གཞིའི་ཕྱིའི་ས་སྟོང་ལུས་པ་རྣམས་སྔོན་པོའམ་ལྗང་གུ་ལ་པ་ཏྲ་རིས་ལ་མུ་རན་དམར་པོ་བྱས་པ་སོགས། གཞན་རྣམས་སྤྱི་དང་འདྲའོ། །

གསང་དབང་ལ་ཕྱི་རོལ་མེ་རི། དེའི་ནང་ས་སྟོང་དང་མཚམས་སུ་མུ་རན་ནག་པོ་ལྟེ་བའི་གཞི་ལྗང་གུ་པ་ཏྲ་(༢༣༣)རིས། དེ་ནང་ཆོས་འབྱུང་བསྣོལ་༼ཕྱི་མ་ལོགས་མདུན་བསྟན་ནང་མ་ཟུར་མདུན་༽མ་ཕྱི་དམར་སྐྱ་ནང་དམར་པོ། དེ་ནང་མེ་ལོང་སིན་དྷུ་རས་བྱུགས་པ་མཚོན་བྱེད་ཟླུམ་པོ་མདོག་རང་ས་དེ་ལྟེ་བར་གྲི་ཐོད་ཀྱིས་མཚན་པའོ།། །།

༈ སྲོག་སྒྲུབ་མ་ལ་ཕྱི་རོལ་མེ་རི། དེ་ནང་ཐོད་སྐམ་ཁ་ཕྱིར་བསྟན་གྱི་ཕྲེང་བ། དེ་ནང་ཁྲག་མཚོ། དེ་ནང་ཆོས་འབྱུང་ཟུར་མདུན་བསྟན་གྱི་དབུས་སུ་ཆུ་གྲི་དང་ཟུར་གསུམ་དུ་ཆུ་གྲི་གསུམ་རྒྱབ་ཡོལ་ནང་དམར་ཕྱི་པ་ཏྲ་རིས་སུ་བྲིས་པ། ཟུར་གསུམ་དུའང་འདི་འདྲ་བ་གསུམ་བྲིའོ། །འདི་རྣམས་ནི་རབ་རྡུལ་ཚོན། འབྲིང་རས་བྲིས་ལ་བྲི་དགོས་རྒྱུ་ཡིན། ༼༧གཏེར་ཆེན་བླ་མའི་དཀྱིལ་ཐང་ལ་ཇི་ལྟར་འདུག་པ་བཞིན་ཡིན། ཀུན་མཁྱེན་ཆེན་པོའི་ཕྱག་ལེན་མ་འཕྱུགས་པ་ཡིན་གསུངས།༽ དགེའོ།། །།

མཁའ་འགྲོ་སྙིང་ཐིག་གི་ལོ་རྒྱུས་རིན་པོ་ཆེའི་ཕྲེང་བ།

༄༅། །མཁའ་འགྲོ་སྙིང་ཐིག་གི་ལོ་རྒྱུས་རིན་པོ་ཆེའི་ཕྲེང་བ་བཞུགས་སོ། །

༄༅། །མཁའ་འགྲོ་སྙིང་ཐིག་གི་ལོ་རྒྱུས་རིན་པོ་ཆེའི་ཕྲེང་བ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཆོས་སྐུའི་མཁའ་ལ་ལོངས་སྐུའི་དཀྱིལ་འཁོར་རྒྱས། །སྤྲུལ་སྐུའི་ཟེར་གྱིས་འགྲོ་བློའི་མུན་པ་སེལ། །རིམ་གསུམ་བླ་མའི་ཞབས་ལ་ཕྱག་འཚལ་ཏེ། །ལོ་རྒྱུས་རིན་ཆེན་ཕྲེང་བ་འབྲི་བར་བྱ། འདིར་བཀའ་ཐམས་ཅད་ཀྱི་རྒྱལ་པོ། མན་ངག་ཐམས་ཅད་ཀྱི་སྙིང་པོ། ལུང་ཐམས་ཅད་ཀྱི་ཕྱི་མོ། ཐེག་པ་ཐམས་ཅད་ཀྱི་ཡང་རྩེ། འོད་གསལ་རྡོ་རྗེ་སྙིང་པོ། མཁའ་འགྲོ་སྙིང་ཐིག་གི་ལོ་རྒྱུས་ལ་གསུམ་སྟེ། རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུང་དུ་བརྒྱུད་པའོ། །

དང་པོ་ནི་བདག་ཅག་གི་སྟོན་པ་བཅོམ་ལྡན་འདས་དཔལ་ཀུན་ཏུ་བཟང་པོ་ཉིད་གཞི་གདོད་མའི་གནས་ལུགས་སུ་མངོན་པར་བྱང་ཆུབ་སྟེ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལས་མི་གཡོ་བར་བཞུགས་པའི་ཚུལ་ལ། ནང་འོད་གསལ་ཆོས་ཀྱི་སྐུའི་གནས་སྐབས་ནི། ངོ་བོ་རང་བཞིན་ཐུགས་རྗེ་གསུམ་དུ་གནས་པས་རྣམ་པ་ཡུལ་ལ་མི་སྤྱོད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ངང་གིས་འོད་གསལ་བའོ། །དེའི་ཚེ་གནས་ཕུན་སུམ་ཚོགས་པ་ཆོས་ཀྱི་སྐུའི་ཞིང་ན། སྟོན་པ་ཕུན་སུམ་ཚོགས་པ་དཔལ་ཀུན་ཏུ་བཟང་པོ། འཁོར་ཕུན་སུམ་ཚོགས་པ་ཡེ་ཤེས་རྒྱ་མཚོའི་ཚོགས་ལ། དུས་ཕུན་སུམ་ཚོགས་པ་ཆོས་ཉིད་འཕོ་(༢༣༤)འགྱུར་མེད་པའི་ཚེ། ཆོས་ཕུན་སུམ་ཚོགས་པ་རང་བཞིན་རྫོགས་པ་ཆེན་པོ་རང་ཆས་ལྷུན་གྱིས་གྲུབ་པའི་ངང་དུ་འོད་གསལ་བའོ། །དེ་ནས་དེ་ཉིད་ཀྱི་ངང་ལས་མ་གཡོས་བཞིན་དུ་རང་སྣང་ལོངས་སྤྱོད་རྫོགས་པའི་སྐུ་རང་བྱུང་བ་ནི། རང་བཞིན་གྱི་སྣང་ཆ་ལས་རྣམ་དག་སྡུག་པོ་བཀོད་པ་བདེ་བའི་ཞིང་ཐམས་ཅད་ཀྱང་ཡེ་ཤེས་ལྔའི་རང་མདངས་ལས་བྱུང་བ། སྟེང་དང་འོག་དང་ཕྱོགས་མཚམས་མ་ཡིན་ཞིང་འོད་ཁྱིམ་རིན་པོ་ཆེའི་ཁང་བུ་བཀོད་ལེགས་པ་ན། རིགས་ལྔའི་སངས་རྒྱས་སོ་སོའི་དཀྱིལ་འཁོར་གྱི་ཚོམ་བུ་འབུམ་ཕྲག་བརྗོད་ལས་འདས་པས་བསྐོར་བ་རྣམས་ཀྱང་། གདུལ་བྱ་དང་འདུལ་བྱེད་མ་ཡིན་ཞིང་རང་སྣང་ལྷུན་གྱིས་གྲུབ་པའི་མངའ་དབང་དུ་རང་བྱུང་བའོ། །དེ་ཉིད་ཀྱི་སྣང་ཆ་ལས་རིགས་ལྔའི་སངས་རྒྱས་གྲངས་མེད་བསམ་གྱིས་མི་ཁྱབ་པ་འཕྲོ་ཞིང་སྣང་བ་ཐམས་ཅད་ཀྱང་། ཟ་འོག་གི་བེར་ཁྱིམ་བཀྲམ་པ་ལྟར་བཀོད་ལེགས་ཤིང་ཁ་དོག་ལྔར་འོད་འབར་བ་ནི། ཞལ་དང་ལྗགས་ཀྱི་དཀྱིལ་འཁོར་ལས་ཡི་གེ་དྲུག་གི་འོད་ཟེར་མུ་མེད་པ་འཕྲོས་པ་ལས་རང་བྱུང་བའོ། །དེའི་ཚེ་གནས་ཕུན་སུམ་ཚོགས་པ་རང་སྣང་སྡུག་པོ་བཀོད་པར། སྟོན་པ་ཕུན་སུམ་ཚོགས་པ་རིགས་ལྔའི་སངས་རྒྱས། འཁོར་ཕུན་སུམ་ཚོགས་པ་སངས་རྒྱས་ཀྱི་དཀྱིལ་འཁོར་ཚད་མེད་པས་བསྐོར་བ་ལ། ཆོས་ཕུན་སུམ་ཚོགས་པ་ཡེ་ཤེས་འོད་གསལ་བའི་དགོངས་པ། དུས་ཕུན་སུམ་ཚོགས་པ་ཆོས་ཉིད་བསམ་གྱིས་མི་ཁྱབ་པའི་ཚེ་རང་ཆས་སུ་རང་གིས་འོད་གསལ་བའི་དགོངས་པ་བརྗོད་པ་མེད་པར་སྟོན་ཏོ། །དེ་ཉིད་ཀྱི་ངང་ལས་སྤྲུལ་པ་མངོན་པར་འཕྲོ་བ་ནི། གདུལ་བྱའི་དབང་ལས་རང་སྣང་བ་ཆུའི་ཟླ་བ་ལྟ་བུས་ཏེ། འདིའི་དུས་སུ་སྟེང་འོག་ཕྱོགས་མཚམས་ཀྱི་འགྲོ་བ་རིགས་དྲུག་སོ་སོའི་འཁྲུལ་པའི་དབང་གིས་རང་རང་གི་གནས་དང་བདེ་སྡུག་གི་སྣང་བ་དུ་མ་ལ་སྤྱོད་པའི་སེམས་ཀྱི་འཁྲུལ་པ་ལ་ཞེན་པའི་ཚེ། ས་དང་པོ་ནས་བཅུ་པའི་བར་གྱི་སེམས་དཔའ་རྣམས་ལ་ཕྱོགས་བཅུའི་ཞིང་དུ། རང་བཞིན་སྤྲུལ་པའི་རིགས་ལྔ་སོ་སོར་སྣང་བས་དོན་མཛད་ཅིང་འགྲོ་བ་དྲུག་གི་གནས་སུ་ཐུབ་པ་བཅོམ་ལྡན་འདས་གྲངས་མེད་པས་ཆོས་ཀྱི་འཁོར་བསྐོར་ཞིང་དོན་མཛད་པ་ལས། རེ་ཞིག་མི་མཇེད་འདིར་སྤྲུལ་པའི་འཕྲོ་ཚུལ་ནི། དེ་ལྟར་(༢༣༥)རང་སྣང་སྡུག་པོ་བཀོད་པའི་ཞིང་ནས་སྤྲུལ་པ་ཆེན་པོ་གཉིས་སྣང་བ་ལས། བྱིན་རླབས་མཆོག་གི་སྤྲུལ་པ་ནི་གསུམ་སྟེ། རིན་པོ་ཆེ་བརྒྱ་རྩ་གཅིག་གི་རྒྱུ་ལས་བྱུང་བར་རང་སྣང་བའི་སྐུ་གཟུགས་འགྲོ་བ་གང་གི་ཚེ་ལོའི་ལུས་བོངས་དང་མཉམ་པ་ལས། ཆོ་འཕྲུལ་དུ་མ་འབྱུང་བས་འགྲོ་བ་གྲོལ་བར་བྱེད་པ་དང་། རིན་པོ་ཆེ་ལས་རང་བྱུང་བར་སྣང་བའི་ཡི་གེ་ཆེན་པོ་བསྟན་པ་བུ་གཅིག་ལས་ཆོས་ཀྱི་རྣམ་གྲངས་བརྗོད་དུ་མེད་པ་རང་སྒྲ་སྒྲོགས་པས་དོན་བྱེད་པ་དང་། ཆོས་ཉིད་རྡོ་རྗེ་ཚེ་ལོ་དེ་པའི་མི་རྣམས་ཀྱི་ཆག་གང་པ་ལས་གང་ལ་གང་འདོད་ཀྱི་ཆོས་དང་ཡོ་བྱད་ཀྱི་ཆར་འབབ་ཅིང་གྲོལ་བར་བྱེད་པ་གསུམ་སྟེ། ཡི་གེ་ཡང་སྐད་རིགས་མི་གཅིག་པ་གང་གི་སྒྲ་སྐད་དེར་གྲགས་པའོ། །དེ་དག་གི་འཇིག་རྟེན་དྲུག་གི་ཕྱོགས་བཅུ་ཀུན་ཏུ་འོད་ཟེར་འགྱེད་ཅིང་འགྲོ་བ་དཔག་ཏུ་མེད་པ་རང་བཞིན་གྱིས་འབད་པ་མེད་པར་གྲོལ་བའི་ཕྲིན་ལས་མཛད་དེ། སྐུ་གསུང་ཐུགས་ལས་རང་བྱུང་བའི་སྤྲུལ་པ་ཆེན་པོ་ཞེས་བྱའོ། །ཡེ་ཤེས་དམ་པའི་སྤྲུལ་པ་ནི་འགྲོ་བ་གང་དང་གང་གི་གཙོ་བོ་ལ་སོགས་པར་སྣང་བས་དོན་མཛད་པ་སྟེ། དེ་ཡང་རང་སྣང་ལྷུན་གྲུབ་སྡུག་པོ་བཀོད་པའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལས་རང་བྱུང་བ། སྤྲུལ་པའི་སྐུ་རྡོ་རྗེ་འཆང་ཆེན་པོས་ལོངས་སྤྱོད་རྫོགས་པའི་ཆ་བྱད་དུ་ཞིང་འདིའི་བསྐལ་པ་དང་པོ་དགའ་ལྡན་བརྩེགས་པ་ཞེས་བྱ་བར་པདྨའི་སྟེང་དུ་རང་བྱོན་ནས་རྡོ་རྗེ་སེམས་དཔའ་དང་ཕྱག་ན་རྡོ་རྗེ་ལ་རང་བཞིན་རྫོགས་པ་ཆེན་པོའི་ཆོས་ཚིག་དང་ཡི་གེ་ལས་འདས་པ་དགོངས་པས་རང་སྣང་དུ་གོ་བར་མཛད་དོ། །དེའི་ཚེ་རྡོ་རྗེ་འཆང་ཉིད་ཁྱེའུ་སྣང་བ་བསམ་གྱིས་མི་ཁྱབ་པ་ཞེས་བྱ་བའི་སྟོན་པ་ཕུན་སུམ་ཚོགས་པར་རང་བྱོན་ནས་འཁོར་ཕུན་སུམ་ཚོགས་པ་བསྐལ་པ་བཟང་པོའི་སངས་རྒྱས་སྟོང་ལ། ཆོས་ཕུན་སུམ་ཚོགས་པ་སྒྲ་ཐལ་འགྱུར་རྩ་བའི་རྒྱུད་ལ་སོགས་པ་ཡང་གསང་འོད་གསལ་གྱི་རྒྱུད་བཅུ་བདུན། ཀློང་གསལ་ཉི་མའི་རྒྱུད་དང་བཅོ་བརྒྱད། དུས་ཕུན་སུམ་ཚོགས་པ་ཡེ་ཤེས་རང་སྣང་བའི་ཚེ་རང་ཤར་དུ་གསུངས་སོ། །དེའང་སྟོན་པ་དང་། འཁོར་ཐ་དད་མེད་ཀྱང་འགྲོ་བ་འདུལ་བ་ལ་དགོངས་ནས་སོ་སོར་སྣང་བའོ། །ཇི་ལྟར་ཞེ་ན། བསྐལ་པ་(༢༣༦)འདི་ལ་སངས་རྒྱས་ཀྱི་མཚན་ཐ་དད། དུས་ཐ་དད། ཆོས་ཐ་དད་པས་འདུལ་བར་དགོངས་ནས་རིམ་པ་དང་ཐ་དད་པར་བྱོན་པའོ། །སྐབས་འདིར་རྡོ་རྗེ་འཆང་གིས་རྡོ་རྗེ་སེམས་དཔའ་དང་ཕྱག་ན་རྡོ་རྗེ་ལ་གསུངས་པ་ནས་བརྒྱུད་པར་བགྲང་ངོ་། །དེ་ནས་སྤྲུལ་སྐུ་མཆེད་ཚུལ་བསྐལ་པ་དང་པོར་དགའ་ལྡན་བརྩེགས་པར་སྟོན་པ་ཁྱེའུ་སྣང་བ་དམ་པ་བྱོན་པའི་འོག་ཏུ་གནས་འཇིག་རྟེན་མི་མཇེད་དུ་སྟོན་པ་ཁྱེའུ་འོད་མི་འཁྲུགས་པ་བྱོན་ནོ། །དེ་ནས་གནས་འོད་ཀྱི་ཕུང་པོར་སྟོན་པ་འཇིགས་པ་སྐྱོབ་པ་དང་། གནས་ཆགས་འབྱུང་མངལ་དུ་སྣང་བར་སྟོན་པ་གཞོན་ནུ་རོལ་པས་རྣམ་པར་རྩེ་བ་དང་། གནས་རི་རབ་ཀྱི་ལྷོ་ཕྱོགས་འཚོ་བྱེད་གཞོན་ནུའི་ལྡུམ་རར་སྟོན་པ་རྡོ་རྗེ་འཆང་དང་། གསང་ཆེན་རོལ་པའི་དུར་ཁྲོད་དུ་སྟོན་པ་གཞོན་ནུ་དཔའ་བོ་སྟོབས་ལྡན་དང་། གནས་སྲིན་པོ་རུ་ལུའི་སྒྲ་དང་ལྡན་པར་སྟོན་པ་དྲང་སྲོང་ཁྲོས་པའི་རྒྱལ་པོ་དང་། བྱ་རྒོད་ཕུང་པོ་ལ་སྟོན་པ་གསེར་འོད་དམ་པ་དང་། སོག་པོ་གཡུའི་སྨིན་མ་ཅན་གྱི་གནས་སུ་སྟོན་པ་བརྩེ་བས་རོལ་པའི་བློ་གྲོས་དང་། བྱ་རྒོད་ཕུང་པོར་སྟོན་པ་འོད་སྲུང་བགྲེས་པོ་དང་། རྡོ་རྗེ་གདན་དུ་སྟོན་པ་མངོན་རྫོགས་རྒྱལ་པོ་དང་། སེར་སྐྱའི་གནས་སུ་སྟོན་པ་ཤཱཀྱ་ཐུབ་པའི་བར་དུ་བྱོན་ཏེ། ཚེ་ལོ་དཔག་ཏུ་མེད་པ་ནས་བརྒྱ་པའི་བར་དུ་འགྲོ་བ་རྣམས་ཀྱི་དེད་དཔོན་དམ་པར་བྱོན་པའོ། །དེ་བཞིན་དུ་མ་འོངས་པ་ན་བྱམས་པ་འབྱུང་བ་ནས་བཟུང་སྟེ། ཐ་མ་སངས་རྒྱས་མོས་པའི་བར་དུ་འགྲོ་བ་རྣམས་ཀྱི་ཁ་ལོ་སྒྱུར་བ་རིམ་པར་འབྱུང་བ་ཡིན་ནོ། །དེ་ལྟར་བྱོན་པའི་རྒྱལ་བ་རྣམས་ཀྱང་ཀུན་ཏུ་བཟང་པོ་གཅིག་གི་ངོ་བོ་ལས། དུས་དེ་དང་དེ་དག་ཏུ་རང་འབྱུང་བའི་ཕྱིར་དགོངས་པ་ཆོས་ཉིད་ལས་མི་གཡོ་བར་རིམ་པར་བྱུང་བ་ལྟར་སྣང་བས་རྒྱལ་བ་དགོངས་པའི་བརྒྱུད་པ་ཞེས་བྱའོ།། །།

༈ དོན་གཉིས་པ་རིག་འཛིན་བརྡའི་བརྒྱུད་པ་ནི། བཅོམ་ལྡན་འདས་ཕྱག་ན་རྡོ་རྗེས་རི་རབ་ཀྱི་བྱང་ཕྱོགས་དུར་ཁྲོད་མེ་རི་འབར་བའི་གནས་ན། མཁའ་འགྲོ་མ་དང་གྲུབ་པ་དང་། རིག་པ་འཛིན་པ་རྣམས་ལ་ཆོས་སྟོན་པ་ན། རྡོ་རྗེ་གདན་གྱི་ནུབ་ཕྱོགས་ཨོ་རྒྱན་ཐོར་ཅོག་ཅན་གྱི་ཡུལ་ན་རྒྱལ་པོ་ཨུ་པ་རཱ་ཙ་དང་། བཙུན་མོ་སྣང་བ་གསལ་བའི་འོད་ལྡན་མ་གཉིས་ཀྱི་སྲས་མོ་སུ་དྷརྨཱ་ཞེས་བྱ་བའི་དགེ་སློང་མ་ཞིག་རྒྱ་མཚོའི་གླིང་དུ་(༢༣༧)དཀའ་ཐུབ་ལ་བཞུགས་པའི་རྨི་ལམ་དུ་ཤེལ་གྱི་མི་དཀར་པོ་གཅིག་གིས་རིན་པོ་ཆེའི་བུམ་པ་སྤྱི་བོར་བཞག་པ་རྨིས་ཏེ། ཟླ་བ་བཅུ་ནས་ཁྱེའུ་ཞིག་བཙས་པ་ལས་ཡུམ་བྲེད་དེ། ཕ་མེད་བུ་འདི་འཇིག་རྟེན་འདྲེ་ལས་གཞན་པ་སུ། །གལ་ཏེ་ལྷ་དང་ལྷ་མིན་སྣ་ཚོགས་གཟུགས། །འདི་ལྟར་བྱུང་བའི་དཔེ་ནི་སུས་མཐོང་མེད། །འདི་ནི་ལོག་སྲེད་འགྲོ་བས་དཔྱས་གྱུར་སྡིག་རེ་ཆེ། །ཞེས་སྨྲས་ཏེ་ཐལ་བའི་ཁུང་དུ་སྦས་པ་དང་། མཁའ་འགྲོ་མ་དང་། ལྷ་དང་ཀླུ་ཐམས་ཅད་ཀྱིས་མཆོད་པ་བྱེད་པར་མཐོང་སྟེ་སླར་བཟོད་པར་གསོལ་ནས་རོ་ལངས་བདེ་བ་ཞེས་མཚན་གསོལ་ཏེ་གསོས་པ་ལས། ལོ་བདུན་ནས་སངས་རྒྱས་ཀྱི་ཆོས་མང་པོ་ཐུགས་ལ་རང་ཤར་ཏེ་ཡུམ་ལ་ཞུས་ནས། ཨུ་རྒྱན་གྱི་ཡུལ་དུ་རྒྱལ་པོའི་མཆོད་གནས་པཎྜི་ཏ་ལྔ་བརྒྱ་དང་རྩོད་པ་ལས། སློབ་དཔོན་རྒྱལ་ནས་པྲད་ཉ་བྷ་བར་མཚན་གསོལ་དུས། རྒྱལ་པོ་དགྱེས་ནས་དགའ་རབ་རྡོ་རྗེ་ཞེས་མཚན་གསོལ། མཁའ་འགྲོ་མ་རྣམས་ཀྱིས་རོ་ལངས་ཐལ་མདོག་ཅེས་མཚན་གསོལ་ལོ། །དེ་ནས་རི་བོ་ཉི་མ་སྣང་བྱེད་ལ་སྐུ་མཉམ་པར་བཞག་ནས། སླར་ཡང་དུར་ཁྲོད་མེ་རི་འབར་བར་ཕྱག་ན་རྡོ་རྗེ་ལས་རང་བཞིན་རྫོགས་པ་ཆེན་པོའི་ཆོས་ཐམས་ཅད་གསན་ནས་མ་ལ་ཡ་བསྟན་པའི་ལས་རྒྱས་པའི་རྩེར་བྱོན་ཏེ། རྒྱུད་ལུང་རྣམས་གླེགས་བམ་དུ་བཀོད་ནས་མཁའ་འགྲོ་མ་རྣམས་ལ་གཏད་ནས། སློབ་དཔོན་ཉིད་དུར་ཁྲོད་ཆེན་པོ་བསིལ་བའི་ཚལ་དུ་བཞུགས་སོ། །

༈ དེའི་ཚེ་རྒྱ་ནག་པོའི་ཡུལ་གྲོང་ཁྱེར་ཤོ་འཁྱམས་ནག་པོ་ཞེས་བྱ་བ་ན། ཁྱིམ་བདག་དགེ་བ་དང་ལྡན་པའི་ཡིད་ཅན་དང་། ཡུམ་སྣང་བ་རབ་ཏུ་མཁྱེན་ལྡན་མ་ཞེས་བྱ་བའི་སྲས། སློབ་དཔོན་ཆེན་པོ་ཤྲཱི་སིང་ཧ་ཞེས་བྱ་བ་སྦྱངས་པའི་ཡོན་ཏན་དུ་མ་དང་ལྡན་པ་ཞིག་གྲོང་ཁྱེར་དེ་ནས་ནུབ་ཕྱོགས་ཀྱི་གྲོང་ཁྱེར་གསེར་གླིང་ཞེས་བྱ་བར་འགྲོ་བའི་བར་གྱི་ཐང་སྟོང་ཞིག་གི་ནམ་མཁའ་ལས། འཕགས་པ་སྤྱན་རས་གཟིགས་དབང་པོས་ལུང་བསྟན་པ། ཀྱེ་སྐལ་ལྡན་འབྲས་བུ་ཚེ་གཅིག་གིས་ངེས་པར་ཐོབ་པ་འདོད་ན། རྒྱ་གར་གྱི་རྡོ་རྗེ་གདན་གྱི་ནུབ་ཕྱོགས་ན་དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་ཡོད་ཀྱི་དེར་སོང་ཞིག་ཅེས་པ་དང་། རི་བོ་རྩེ་ལྔའི་ཤར་ཕྱོགས་ཀྱི་ཁྲུས་ཀྱི་རྫིང་བུའི་ནང་དུའང་དེ་ཁོ་ན་བཞིན་དུ་ལུང་བསྟན་པ་ལ་བརྟེན་ནས། རྐང་(༢༣༨)མགྱོགས་ཀྱི་རྫུ་འཕྲུལ་བསྒྲུབས་ནས་བྱོན་པ་ཞག་དགུ་ན་དུར་ཁྲོད་བསིལ་ཚལ་དུ་ཕྱིན་ཏེ། སློབ་དཔོན་ཆེན་པོ་དགའ་རབ་རྡོ་རྗེ་དང་ཞལ་མཇལ་ནས་རྗེས་སུ་གཟུང་བར་ཞུས་པས་གནང་སྟེ། གསང་བ་བླ་ན་མེད་པ་མཁའ་འགྲོ་སྙིང་ཏིག་གི་དབང་ཁྲིད་རྒྱུད་མན་ངག་དང་བཅས་པ་རྫོགས་པར་གནང་ཞིང་སྒྲུབ་པ་མཛད་པས། འོད་གསལ་ཆུའི་ཟླ་བ་ལྟ་བུའི་ལུས་ཐོབ་ནས་མཆོག་ཐུན་མོང་གི་དངོས་གྲུབ་བརྙེས་སོ། །དེའི་ཚེ་མ་མོ་དང་མཁའ་འགྲོ་རྣམས་ཀྱིས་རང་རང་གི་སྙིང་པོ་ཕུལ་ཞིང་བསྟན་པ་སྐྱོང་བར་ཁས་བླངས་ཏེ་མཆོད་པའི་སྤྲིན་ཕུང་ཆེན་པོ་གཏིབས་སོ། །དེ་ནས་སློབ་དཔོན་ཆེན་པོ་ཤྲཱི་སིང་ཧ་ཉིད། དུར་ཁྲོད་དེ་ལས་དཔག་ཚད་གསུམ་འདས་པ་ན། དུར་ཁྲོད་ཆེན་པོ་རྩུབ་འགྱུར་ཚལ་ཞེས་བྱ་བ། ཉིན་བཞིན་དུ་རླུང་འཚུབས་ཤིང་། མཚན་བཞིན་དུ་མེ་འབར་བ་ན། མ་མོ་དང་། མཁའ་འགྲོ་མ་མང་པོ་རྒྱུ་བ། དག་བྱེད་ཀྱི་མཚོ་དང་། བདེ་བྱེད་ཀྱི་མཆོད་རྟེན་དང་། འཇིག་རྟེན་པའི་ལྷ་དགའ་བྱེད་དབང་ཕྱུག་གནས་པར་བྱོན་ཏེ། བརྟུལ་ཞུགས་ཀྱི་སྤྱོད་པ་མཛད་ཅིང་མ་མོ་མཁའ་འགྲོ་མ་རྣམས་ལ་ཆོས་སྟོན་པའི་ཕྱིར་བཞུགས་སོ། །དེའི་ཚེ་དཔལ་ཨུ་རྒྱན་གྱི་ཡུལ་དུ། རིན་པོ་ཆེ་འབར་བའི་གྲོང་ཁྱེར་ན། བཻ་ཌཱུརྱའི་ཕོ་བྲང་ཕྱི་ནང་ཐམས་ཅད་ཤིན་ཏུ་རྣམ་པར་དག་པ་ནོར་བུ་སྒྲོན་མེའི་སྣང་བས་ཁྱབ་པ་ན་རྒྱལ་པོ་ཨིནྡྲ་བྷོ་དྷི་བཙུན་མོ་བརྒྱ་རྩ་བརྒྱད་དང་ལྷན་ཅིག་ཕྱི་ནང་གི་བློན་པོས་བསྐོར་ནས་བཞུགས་པ་ལས། སྲས་རྒྱལ་བུ་མི་མངའ་ནས། དབྱར་ཟླ་ར་བའི་ཚེས་བཅོ་ལྔ་ནས་དཀོན་མཆོག་མཆོད་དེ། ཆོས་ཀྱི་སྤྲིན་ཞེས་བྱ་བའི་མདོ་སྡེ་བཏོན་ནས། སྦྱིན་གཏོང་གི་ཁང་པ་ཆེན་པོ་བརྩེགས་ཏེ་སྐྱེ་དགུ་མང་པོ་ལ་སྦྱིན་པ་རླབས་པོ་ཆེ་བཏང་ནས་ལོ་མང་ཞིག་སོང་བ་ན། དཀོར་མཛོད་ཐམས་ཅད་ཟད་ཅིང་སྟོངས་སུ་ཉེ་ཡང་སློང་མོ་བའི་འཕྲོ་མ་ཆད་ནས། ལས་སུ་བསྐོས་པའི་མི་ད་ནི་བང་མཛོད་ཐམས་ཅད་ཟད་ཅིང་སྟོང་པས་ཁྱེད་ཅག་ལ་སྦྱིན་རྒྱུ་མེད་དོ་སྨྲས་པ་དང་། གློ་བུར་དུ་ལྷགས་པ་ཁ་ཅིག་ན་རེ། བདག་ཅག་ལ་མ་བྱིན་ན་སྔར་སྦྱིན་པ་ཐམས་ཅད་དོན་མེད་དོ། །ཞེས་སྨྲས་པ་གསན་ནས། རྒྱས་པོས་ལོངས་སྤྱོད་ཟད་མི་ཤེས་པའི་ཐབས་དྲིས་པས། རྒྱ་མཚོའི་གླིང་ན་ཀླུ་ཡི་བུ་མོ་མཛེས་ལྡན་མའི་ལག་ན་ཡིད་བཞིན་ནོར་བུ་དགོས་འདོད་ཀུན་འབྱུང་ཡོད་དེ། (༢༣༩)བྱང་ཆུབ་སེམས་དཔའ་སེམས་ཅན་ལ་སྙིང་རྗེས་ལྷགས་པས་བསླང་ན་སྟེར་བར་འགྱུར་རོ། །ཞེས་གསོལ་བས། རྒྱ་མཚོའི་གླིང་ལས་ནོར་བུ་ལན་མང་དུ་བླངས་པའི་དེད་དཔོན་ཞིག་ཡོད་པ་ལ་བཀའ་བསྒོ་བ། ཁོ་བོ་ནི་རྒྱ་མཚོའི་གླིང་ལས་ནོར་བུ་ལེན་པར་འདོད་ཀྱི་ཁྱེད་ཀྱིས་ལམ་བསྟན་པར་རིགས་སོ། །ཞེས་གསུངས་པས། དེས་ཀྱང་དེ་ལྟར་བགྱིའོ་ལེགས་སོ་ཞེས་གསོལ་ནས་རྒྱ་མཚོར་དགོས་པའི་ཡོ་བྱད་རྣམས་སྟ་གོན་དུ་བྱས་སོ། །དེའི་ཚེ་བློན་པོ་རྣམས་ཀྱིས་མི་བཞུད་པར་གསོལ་ཀྱང་མ་གནང་སྟེ། ལེགས་པར་གྲུབ་པའི་ཉི་མ་ལ། གཟིངས་ཀྱི་ནང་དུ་ཚོང་པ་ལྔ་བརྒྱའི་འཁོར་དང་ལྷན་ཅིག་གཤེགས་སོ། །དེ་ནས་གཟིངས་ཀྱི་ཕྱོགས་བཞིར་དར་པོ་ཆེ་བཞི་ཕྱར་ཏེ་མཐུན་པའི་རླུང་གི་ཚེ་འགྲོ་བ་དང་། མཚམས་བཞིར་ཞ་ནེའི་ཕ་ཝང་ཆེན་པོ་བཞི་འཕྱང་དུ་བཅུག་སྟེ་མི་མཐུན་པའི་རླུང་གི་ཚེ་སྡོད་པ་དང་། བྱ་རོག་དང་དུང་དང་ཕུག་རོན་རྣམས་ནི། རི་དང་ཆུ་སྲིན་བརྟགས་ནས་བསད་པ་དང་། རང་གི་ཡུལ་ཕྱོགས་ངོས་བཟུང་བའི་ཕྱིར་ཁྱེར་ཏེ། མཐུན་པའི་རླུང་དང་སྦྱར་ནས་གཟིངས་ཀྱི་ཉལ་ཐག་བཅད་དེ། ངང་པའི་རྒྱལ་པོ་ནམ་མཁའ་ལ་འགྲོ་བ་བཞིན་དུ་སོང་སོང་བ་ལས། ཉིན་ཞག་མང་ཞིག་ན། རིན་པོ་ཆེའི་གླིང་ནོར་བུ་སྣ་ཚོགས་ཀྱི་བྱེ་མ་བརྡལ་བ་ཞིག་ཏུ་ཕྱིན་པ་དང་། འཁོར་རྣམས་དེ་ཉིད་དུ་བཞག་ནས། རྒྱལ་པོ་དང་དེད་དཔོན་གཉིས་གྲུ་ཆུང་ངུ་ཞིག་ཏུ་ཞུགས་ཏེ་དེ་ལས་ཀྱང་འདས་ཏེ་སོང་བ་ན། ཉིན་ཞག་འགའ་ཞིག་ན་རི་དཀར་པོ་ཞིག་མཐོང་ནས་རྒྱལ་པོས་དྲིས་པས་དངུལ་གྱི་རི་ཡིན་ཟེར་རོ། །ཡང་དེ་ལས་ཀྱང་འདས་ཏེ་སོང་བ་ན། རི་སྔོན་པོ་ཞིག་མཐོང་ནས་དྲིས་པས་བཻ་ཌཱུརྱའི་རི་ཡིན་ཟེར་རོ། །ཡང་དེ་ལས་ཀྱང་འདས་ཏེ་སོང་བ་ན། རི་སེར་པོ་ཞིག་མཐོང་ནས་དྲིས་པས་གསེར་གྱི་རི་ཡིན་ཏེ་བདག་ཅག་དེང་བའི་གནས་ལགས་སོ་ཞེས་སྨྲས་ཏེ་སོང་བ་ན། རི་དེའི་འདབས་གསེར་གྱི་བྱེ་མ་བརྡལ་བའི་ས་གཞིའི་མཚམས་སུ་སླེབས་པ་དང་། དེད་དཔོན་གྱིས་རྒྱལ་པོ་ལ་བསྒོ་བ། རི་འདིའི་སྟེང་ན་རིན་པོ་ཆེ་སྣ་ཚོགས་ཀྱི་ཁང་བུ་ཞིག་ཡོད་དེ། དེའི་མདུན་ན་རྡོ་རྗེའི་གཏུན་བུ་ཞིག་ཡོད་ཀྱི་དེས་སྒོ་རྡུངས་ལ་སེམས་ཅན་ལ་ཕན་པའི་དོན་དུ་ནོར་བུ་རིན་པོ་ཆེ་འདོད་དོ་ཞེས་བརྡ་སྦྱོར་ལ་ཅི་ཡང་མ་སྨྲ་བར་བཞུགས་ཤིག་དང་། (༢༤༠)ཀླུའི་བུ་མོ་མང་པོས་ནོར་བུ་འབུལ་དུ་འོང་གི་དེ་དག་ལ་ཅི་ཡང་མ་སྨྲ་ཞིག །དེར་ཀླུའི་བུ་མོ་མཛེས་ལྡན་མས་ནོར་བུ་རིན་པོ་ཆེ་འབུལ་དུ་ཡོང་གི་མྱུར་དུ་ལོངས་ལ་གོས་ཀྱིས་གྲིལ་སྤྱི་བོར་བསྣམས་ལ་བྱོན་ཅིག་ཅེས་ལེགས་པར་གདམས་པ་བཞིན། རིན་པོ་ཆེའི་ཁང་བུའི་སྒོ་བརྡུངས་པས་ཐོག་མར་ཀླུའི་བུ་མོ་བརྒྱས་ནོར་བུ་ཕུལ་ཡང་མ་བླངས་པར་ད་དུང་སྒོ་བརྡུངས་པས། རྟིང་ལ་ཀླུའི་བུ་མོ་མཛེས་ལྡན་མ་སྔོན་མོ་ཤིན་ཏུ་མཛེས་ཤིང་ལྟ་བས་མི་ངོམས་པ་ཞིག་ཕྱིར་བྱུང་ནས་སྤྱི་གཙུག་གི་ནོར་བུ་ཕུལ་བ་དང་། མྱུར་བར་ལོགས་ཏེ་དེད་དཔོན་དང་ལྷན་ཅིག་རང་གི་འཁོར་རྣམས་གནས་པའི་གླིང་དེར་ནོར་བུའི་བྱིན་རླབས་ཀྱིས་ནམ་མཁར་ལས་བྱོན་པ་ན། ཐམས་ཅད་ཡ་མཚན་སྐྱེས་ཏེ་ཕྱག་བྱས་སོ། །དེ་ནས་དེད་དཔོན་གྱིས་ལེགས་པར་བརྟགས་པས་རིན་པོ་ཆེ་སྣ་བདུན་གཟིངས་སུ་ཡང་ལྗི་རན་པར་བརྫོང་སྟེ། གཟིངས་ཀྱི་ཁ་ལོ་སྒྱུར་ནས་འོངས་པ་ན། རྒྱ་མཚོའི་གླིང་གཅིག་ན། པདྨའི་སྡོང་པོ་ཤིན་ཏུ་མཛེས་པའི་སྟེང་ན། ཁྱེའུ་ལོ་བརྒྱད་ལོན་པའི་ན་ཚོད་ཅན། ཤིན་ཏུ་མཛེས་ཤིང་ལྟ་བས་མི་ངོམས་པ་མཚན་དང་དཔེ་བྱད་ཀྱིས་བརྒྱན་པ་ཞིག་མཐོང་ནས། དེའི་དྲུང་དུ་སོང་སྟེ་རྒྱལ་པོས་སྨྲས་པ། ཁྱེའུ་ཁྱོད་ཀྱི་ཕ་ནི་གང་། མ་ནི་གང་། རིགས་ནི་གང་། མིང་ནི་གང་། ཡུལ་ནི་གང་། ཟས་ནི་གང་། འདིར་དོན་ཅི་བྱེད་དྲིས་པས། ཁྱེའུས་གསུངས་པ། ཕ་ནི་རང་རིག་ཀུན་ཏུ་བཟང་། །མ་ནི་ཆོས་དབྱིངས་ཀུན་བཟང་མོ། །རིགས་ནི་དབྱིངས་རིག་གཉིས་སུ་མེད། །མིང་ནི་པདྨ་འབྱུང་གནས་དཔལ། །ཡུལ་ནི་ཆོས་དབྱིངས་སྐྱེ་བ་མེད། །ཟས་ནི་གཉིས་སྣང་རྟོག་པ་ཟ། །དུས་གསུམ་རྒྱལ་བའི་སྤྱོད་པ་བྱེད། །ཅེས་གསུངས་པས་རྒྱལ་པོ་ངོ་མཚར་སྐྱེས་ཏེ། སྤྲུལ་པའི་སྐུ་ཞིག་འཁྲུངས་འདུག་པས་བདག་གི་བུར་གསོལ་བ་གདབ་སྙམ་ནས་སྨྲས་པ། བདག་གི་མཆོད་གནས་དང་སྲས་སུ་གཤེགས་པར་ཅི་གནང་ཞེས་ཞུས་པས། དེ་ལྟར་བགྱིའོ་གསུངས་ནས་གནང་བ་དང་། པདྨའི་སྡོང་པོ་བཅད་དེ། ཁྱེའུ་དེ་ཉིད་དང་ནོར་བུ་དང་བཅས་པ་རང་གི་འཁོར་རྣམས་ཀྱིས་བསྐོར་ཏེ། ཨུ་རྒྱན་གྱི་ཡུལ་དུ་ཕྱིན་པ་ན། ཕོ་བྲང་འཁོར་གྱི་མི་ཐམས་ཅད་ཀྱིས་བསུ་བ་ཆེན་པོ་བྱས་ཏེ། བཻ་ཌཱུརྱའི་ཕོ་བྲང་དུ་གཤེགས་པ་ལས། རྒྱལ་པོས་སྨོན་པ། ངས་རྙེད་པའི་(༢༤༡)ནོར་བུ་འདི་ཡང་དག་པ་ཡིན་ན། ཁྱེའུ་འདི་བཞུགས་པའི་རིན་པོ་ཆེའི་ཁྲི་དང་གདུགས་རང་བྱུང་བར་གྱུར་ཅིག་ཅེས་བརྗོད་མ་ཐག་ཏུ་བྱུང་ངོ་། །དེ་ལ་ཁྱེའུ་བཞུགས་ཏེ་རྒྱལ་སྲིད་ལ་མངའ་གསོལ་ནས་མཚན་པདྨ་རྒྱལ་པོ་ཞེས་གྲགས་སོ། །

ཡང་རྒྱལ་པོས་སྨོན་པ། ངའི་ཕོ་བྲང་འཁོར་དུ་ཞག་བདུན་དུ་རིན་པོ་ཆེའི་ཆར་བབ་བང་མཛོད་སྟོང་པ་རྣམས་སྔོན་བས་གང་བར་གྱུར་ཅིག་ཅེས་བརྗོད་མ་ཐག་ཏུ་དེ་བཞིན་དུ་བྱུང་ངོ་། །དེའི་ཚེ་རྔ་བོ་ཆེ་བརྡུངས་ནས་ཕྱོགས་ཐམས་ཅད་དུ་བསྒྲག་པ། རྒྱལ་པོ་ཨིནྡྲ་བྷོ་དྷིའི་ཡིད་བཞིན་གྱི་ནོར་བུ་ལས་དགོས་འདོད་ཀྱི་ཆར་འབེབས་པས་སུ་ཅི་འདོད་པ་གང་ལ་གང་འདོད་པ་ལོངས་ཤིག་ཅེས་བརྗོད་ནས། ནོར་བུ་རིན་པོ་ཆེ་རྒྱལ་མཚན་གྱི་རྩེ་མོར་བཏགས་ཤིང་མཆོད་ནས་ཁྲུས་ཆབ་གསོལ་ཏེ། རྒྱལ་པོས་སྨོན་ལམ་བཏབ་པ། ངས་རྙེད་པའི་ནོར་བུ་རིན་པོ་ཆེ་འདི་ཡང་དག་པ་ཡིན་ངེས་ན། སེམས་ཅན་ཐམས་ཅད་ལ་ཅི་འདོད་པའི་ཆར་ཕོབ་ཅིག་ཅེས་བརྗོད་མ་ཐག་ཏུ་ཁ་ཟས་དང་། གོས་དང་ལོངས་སྤྱོད་ཀྱི་ཆར་ཆེན་པོ་བབ་ཅིང་། རྒྱལ་འབངས་ཐམས་ཅད་དབུལ་ཕོངས་དང་བྲལ་བར་བྱས་སོ། །དེ་ནས་རྒྱལ་པོས་བཀའ་བསྒོ་བ། ད་ནི་ཁྱེད་ཐམས་ཅད་ཐེག་པ་ཆེན་པོའི་ཆོས་ལ་སྤྱོད་ཅིག་ཅེས་གསུངས་ཏེ། བྱང་ཆུབ་མཆོག་ཏུ་སེམས་བསྐྱེད་དུ་བཅུག་པས། ཐམས་ཅད་ཀྱིས་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པའི་འབྲས་བུ་ཐོབ་བོ། །དེ་ནས་སློབ་དཔོན་ཆེན་པོ་ཉིད་རྒྱལ་སྲིད་ནི་ཆོས་དང་མི་མཐུན་ཞིང་སེམས་ཅན་གྱི་དོན་ཡང་མི་འོང་བར་དགོངས་ནས། རྒྱལ་པོ་དང་བློན་པོ་རྣམས་སུན་དབྱུང་བའི་ཕྱིར། བརྟུལ་ཞུགས་ཀྱི་སྤྱོད་པ་མཛད་དེ། སྐུ་གཅེར་བུ་ལ་རུས་པའི་རྒྱན་གསོལ། ཁ་ཊྭཱཾ་ག་ཕྱག་ན་བསྣམས་ཏེ་གར་མཛད་པས། ཕོ་བྲང་གི་རྩེར་གར་ལ་ལྟ་བའི་མི་མང་པོ་ཚོགས་པ་ལས། ཁ་ཊྭཱཾ་ག་ཕྱག་ནས་ཤོར་བ་ལྟར་མཛད་དེ། བློན་པོ་དབང་པོ་ཆེ་ཀ་མ་ཏའི་བུའི་མགོ་ལ་བསྣུན་ནས་ཤིའོ། །རྒྱལ་ཁྲིམས་ལ་གང་གིས་འདས་ཀྱང་ཆད་པའི་ལས་གཅོད་པས། བློན་པོ་ཀུན་ཚོགས་ཏེ། རྒྱལ་པོ་ལ་ཞུས་པས། རྒྱལ་བུར་མངའ་གསོལ་ཡང་ཚུལ་མ་ཡིན་པ་སྤྱོད་པས། བློན་པོའི་བུ་ཉེས་པ་མེད་པར་བསད་པས། ད་ནི་གསལ་ཤིང་གི་རྩེ་ལ་བསྐྱོན་ནས་ཆད་པ་གཅད་འཚལ་ཞེས་ཞུས་པས། རྒྱལ་(༢༤༢)པོས་གལ་གྱིས་གཅུས་ཀྱང་མ་ཉན་པར། འོ་ན་སྤྱུགས་པར་བྱའོ། །ཞེས་གསུངས་པས་ལེགས་སོ་ཞེས་བརྗོད་དེ། དེ་ནས་རྒྱལ་པོ་ཐུགས་མ་བདེ་བཞིན་དུ་སློབ་དཔོན་ལ་གསུངས་པ། རིན་ཆེན་མཚོ་དཀྱིལ་པདྨའི་སྡོང་པོ་ལས། །ཁྱེའུ་ཕ་དང་མ་མེད་སྤྲུལ་པའི་སྐུ། །བརྟུལ་ཞུགས་སྤྱོད་པས་བློན་པོའི་ཕྲུ་གུ་བཀུམས། །བློན་པོ་རྣམས་ཀྱིས་རྒྱལ་ཁྲིམས་ཆད་པ་གཅོད། །གསོད་ལས་སྤྱུགས་པར་སྣང་བས་གང་དགར་བཞུད། །ཅེས་སྨྲས་པ་དང་། སློབ་དཔོན་གྱིས་གསུངས་པ། འཇིག་རྟེན་འདི་ན་ཕ་དང་མ་དཀོན་ཡང་། །ཡབ་དང་ཡུམ་དུ་བགྱིས་ནས་རྒྱལ་སར་ཕྱུང་། །ལས་ཀྱི་ལན་ཆགས་བློན་པོའི་ཕྲུ་གུ་བསད། །ཡུལ་ལ་ཞེན་པ་མེད་པས་སྤྲུགས་ཀྱང་འཇིགས་པ་མེད། །སྐྱེ་འཆི་གཉིས་སུ་མེད་པས་བསད་ཀྱང་འཇིགས་པ་མེད། །རྒྱལ་ཁྲིམས་གཉན་པས་སྤྱུགས་པ་ཤིན་ཏུ་ལེགས། །ཡབ་ཡུམ་དག་ཀྱང་ཡུན་དུ་བདེ་བར་བཞུགས། །ལས་ཀྱི་འབྲེལ་བས་ཕྱི་ནས་མཇལ་བར་ངེས། །ཞེས་གསུངས་ཏེ་ཕྱག་མཛད་ནས་བྱོན་པ་ན། བློན་པོ་རྣམས་ཀྱིས་དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་ཤིན་ཏུ་འཇིགས་ཤིང་སྐྱི་བུང་བའི་གནས་སུ་བསྐྱལ་ཏོ། །དེར་རོ་ཟས་དང་རོ་གོས་ལ་ལོངས་སྤྱོད་ཅིང་བཞུགས་པས་མཁའ་འགྲོ་མ་ཐམས་ཅད་དབང་དུ་འདུས་ཏེ་མཚན་ཡང་པདྨ་ཐོད་ཕྲེང་རྩལ་ཞེས་གྲགས་སོ། །དེ་ནས་དུར་ཁྲོད་ཆེན་པོ་དགའ་བ་ཚལ་དང་། སོ་ས་གླིང་དང་། རྒྱ་མཚོའི་གླིང་ལ་སོགས་པ་རྣམས་སུ་བྱོན་ཏེ། བརྟུལ་ཞུགས་ཀྱི་སྤྱོད་པ་མཛད་པས། གསང་ཆེན་རྡོ་རྗེ་ཕག་མོ་ལ་སོགས་ཡེ་ཤེས་ཀྱི་མཁའ་འགྲོ་མ་མང་པོས་དབང་བསྐུར་ཞིང་མངོན་པར་བསྟོད་དོ། །

གཞན་ཡང་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་དཔག་ཏུ་མེད་པ་གྲུབ་ཅིང་། དབང་དུ་འདུས་པས་མཚན་མཚོ་སྐྱེས་རྡོ་རྗེ་དྲག་པོ་རྩལ་ཞེས་གྲགས་ཤིང་། མཆོག་ཐུན་མོང་གི་དངོས་གྲུབ་རྙེད་དོ། །དེ་ལྟར་ཆོས་ཐམས་ཅད་ལ་མངའ་བརྙེས་ཤིང་རང་བཞིན་སྤྲུལ་པའི་སྐུ་ཆེན་པོར་བཞུགས་ཀྱང་འགྲོ་བའི་ཁམས་དང་མོས་པ་སྣ་ཚོགས་པས་དེ་དག་གི་མི་དད་པ་བཟློག་པའི་ཕྱིར། རྒྱ་གར་གྱི་བླ་མ་མཁས་གྲུབ་རྣམས་ལས་ཐོས་བསམ་མཛད་དེ། སློབ་དཔོན་པྲ་བྷ་ཧ་སྟིའི་དྲུང་དུ་རབ་ཏུ་བྱུང་ནས་ཤཱཀྱ་སེང་གེ་ཞེས་མཚན་གསོལ། (༢༤༣)སློབ་དཔོན་ཀླུ་སྒྲུབ་སྙིང་པོ་དང་། འཇམ་དཔལ་བཤེས་གཉེན་དང་། དགེ་སློང་མ་ཀུན་དགའ་མོ་ལ་སོགས་པ་ལས། རྒྱུ་མཚན་ཉིད་ཀྱི་ཐེག་པ་དང་། འབྲས་བུ་རྡོ་རྗེ་ཐེག་པ་མཐའ་དག་གསན་ནས་མཁྱེན་པར་མཛད་ཅིང་། ཡི་དམ་དཀྱིལ་འཁོར་གྱི་ལྷ་དཔག་ཏུ་མེད་པས་ཞལ་གཟིགས་སོ། །མུ་སྟེགས་པ་དང་རྩོད་པ་མཛད་པས་མུ་སྟེགས་ཕམ་པར་བྱས་ནས། སངས་རྒྱས་ཀྱི་བསྟན་པ་ལ་བཙུད་པས་མཚན་སེང་གེ་སྒྲ་སྒྲོག་ཅེས་གྲགས་སོ། །དེ་ནས་སློབ་དཔོན་ཆེན་པོ་ཤྲཱི་སིང་ཧའི་དྲུང་དུ། ནམ་མཁའ་དང་མཉམ་པའི་རྒྱུད་ལ་སོགས་པ་རྫོགས་པ་ཆེན་པོ་སེམས་ཀློང་མན་ངག་གི་སྐོར་རྣམས་རྫོགས་པར་ཞུས་ཤིང་། ཁྱད་པར་དུ་ཐིག་ལེ་ཕྱི་ནང་གསང་བའི་སྐོར་རྣམས་གསན་དུས། ཡང་ཞུས་པ། སློབ་དཔོན་ཆེན་པོ་ལགས། ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་ལོངས་སྤྱོད་རྫོགས་པའི་སྐུའི་ཞིང་ཁམས་མཐོང་ཞིང་། ཆོས་ཀྱི་སྐུའི་ཞིང་དུ་སངས་རྒྱ་བའི་གདམས་པ་ཞིག་གནང་འཚལ་ཞེས་ཞུས་པས། སློབ་དཔོན་ཆེན་པོ་ཤྲཱི་སིང་ཧའི་གསུང་གིས། རིགས་ཀྱི་བུ་ཁྱོད་ཀྱིས་ཞུས་པ་དེ་ཤིན་ཏུ་ལེགས་ཀྱི། ཐེག་པ་ཐམས་ཅད་ཀྱི་ཡང་རྩེ། ལྟ་བ་ཐམས་ཅད་ཀྱི་ཞེ་ཕུགས། མཁའ་འགྲོ་ཐམས་ཅད་ཀྱི་སྙིང་ཐིག །གསང་བ་བས་ཀྱང་ཆེས་ཤིན་ཏུ་གསང་བའི་དོན། ཚེ་འདི་ཉིད་ལ་གདོས་བཅས་ཤ་ཁྲག་གི་ཕུང་པོ་འོད་གསལ་ལོངས་སྤྱོད་རྫོགས་པའི་སྐུར་གྲོལ་ནས་མྱུར་དུ་སངས་རྒྱས་ཀྱི་བྱང་ཆུབ་འགྲུབ་པའི་གདམས་པ་ཞིག་ཡོད་ཀྱི་བསྟན་པར་བྱའོ་གསུངས་ནས། གསང་བ་མཁའ་འགྲོ་སྙིང་ཏིག་གི་དབང་ཁྲིད་མན་ངག་དང་བཅས་པ་གནང་ནས་ལོ་གསུམ་བསྒྲུབས་པས། སྐྱེ་ཤི་གཉིས་སྤངས་རྡོ་རྗེའི་སྐུ་ཐོབ་སྟེ་སྤྲུལ་པས་ཡུལ་སྣ་ཚོགས་སུ་མི་དང་མི་མ་ཡིན་པས་མང་པོ་ལ་ཕན་པ་མཛད་ཅིང་། ཁྱད་པར་དུ་རྒྱ་གར་གྱི་རྒྱལ་པོ་དྷརྨཱ་ཕ་ལའི་མཆོད་གནས་སུ་ཉིན་པར་བཞུགས་ཤིང་། མཚན་མོ་དུར་ཁྲོད་ཆེན་པོ་བརྒྱད་ལ་སོགས་པར། མཁའ་འགྲོ་འབར་བའི་སྤྲིན་ཕུང་དང་ལྷན་ཅིག་གསང་སྔགས་ཀྱི་ཀུན་ཏུ་སྤྱོད་པས་གནས་པར་མཛད་དོ། །དེའི་ཚེ་འཕགས་པ་འཇམ་དཔལ་གྱི་སྤྲུལ་པ་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་བསམ་ཡས་ཀྱི་ས་གཞི་འདུལ་བའི་དོན་དུ་སྤྱན་དྲངས་པས། སྔོན་གྱི་སྨོན་ལམ་དང་ཐུགས་རྗེའི་དབང་(༢༤༤)གིས་བོད་ཀྱི་ཡུལ་དུ་བྱོན་ཏེ། ས་གཞི་བཏུལ་ཞིང་ལྷ་སྲིན་གདུག་པ་ཅན་ཐམས་ཅད་དམ་ལ་བཏགས་ནས། གཙུག་ལག་ཁང་བཞེངས་སུ་གསོལ་བས། དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་ཉི་འོག་གི་རྒྱལ་ཁམས་ནས་འགྲན་ཟླ་དང་བྲལ་བར་གྲུབ་ཅིང་། རབ་ཏུ་གནས་པ། དགའ་སྟོན་ཆེན་པོ་དང་བཅས་པ་མཛད་དོ། །དེ་ནས་སློབ་དཔོན་ཆེན་པོ་ཕོ་བྲང་རིམ་ཁང་དུ་སྤྱན་དྲངས་ཏེ་གསོལ་ཟས་སྣ་ཚོགས་ཀྱི་ཚོགས་ཀྱི་འཁོར་ལོས་མཆོད་དེ། འཇིག་རྟེན་གྱི་སྤྱན་གཟིགས་མང་པོ་དང་། དགྱེས་པའི་བཙུན་མོ་ཕུལ་ནས་གསང་སྔགས་རྡོ་རྗེ་ཐེག་པའི་ཆོས་བསྒྱུར་བར་ཞུས་པས་གནང་སྟེ། སྒྲ་བསྒྱུར་རྒྱ་གར་གྱི་གླིང་དུ་སློབ་དཔོན་ཉིད་དང་། སྤྲུལ་པའི་ལོ་ཙཱ་བ་བཻ་རོ་ཙ་ན་དང་། གཉགས་ཀུ་མ་ར་ལ་སོགས་པས་རྒྱུད་དཔག་ཏུ་མེད་པ་བསྒྱུར་ཞིང་། དེ་དག་གི་སྒྲུབ་ཐབས་ཀྱི་རིམ་པ་མཛད་དེ། སོ་སོར་བསྒྲུབས་པས། གྲུབ་ཐོབ་ཉི་ཤུ་རྩ་ལྔ་ལ་སོགས་པ་གྲུབ་པ་ཐོབ་པ་མང་དུ་བྱུང་ཞིང་། བོད་འབངས་ཐམས་ཅད་བདེ་བ་ལ་བཀོད་དོ། །དེ་ནས་སློབ་དཔོན་གྱིས་ཕྱི་རབས་ཀྱི་འགྲོ་བ་ལ་ཕན་གདགས་པའི་ཕྱིར། རྒྱུད་ལུང་མན་ངག་རྣམས་ཡི་གེར་བྲིས་ཏེ་སོ་སོར་སྨོན་ལམ་གྱི་རྒྱ་དང་བཅས་ནས་གཏེར་དུ་སྦས་སོ། །དེ་ལྟར་འགྲོ་བ་མི་རྣམས་ཀྱི་དོན་མཛད་ཚེ། བོད་དང་ལྷོ་མོན་གྱི་མི་མ་ཡིན་རྣམས་ཀྱིས་བདག་ཅག་རྣམས་ལ་ཡང་དབང་བསྐུར་ཞིང་བྱིན་གྱིས་བརླབ་ཏུ་གསོལ། ཞེས་ཞུས་པས་གནང་སྟེ། དེ་དག་གིས་སྤྱན་དྲངས་བྱིན་གྱིས་བརླབས་པའི་གནས་ནི། སྤ་གྲོ་སྟག་ཚང་སེང་གེ་ཕུག །ལྷོ་བྲག་མཁར་ཆུ། ཁ་རག་རིན་ཆེན་ཕུག །ཤངས་ཀྱི་ཟབ་བུ་ལུང་། ཏི་སྤྲོ་བྲག་དཀར། ཙཱ་རི་ཙཱ་ཁང་། རྔམས་པ་སྒྲ་སྒྲོགས་ལ་སོགས་པ་རྣམས་སོ། །གཞན་ཡང་ལོ་དང་། ཟླ་བ་དང་། ཞག་དང་། དྲོས་སྐད་རེ་ཙམ་བཞུགས་པའི་གནས་ནི་བསམ་གྱིས་མི་ཁྱབ་བོ། །

༈ དེའི་ཚེ་ཅོག་རོ་འབྲིང་མཚམས་ཀྱི་ཡུལ་ན། མང་རྗེ་ཐོད་དཀར་ལེགས་དང་། རུ་བཟང་རྒྱལ་མོ་མཚོ་འདུས་ཏེ་ཁྱིམ་འཛིན་པ་ལས། རྒྱལ་མོ་མཚོའི་རྨི་ལམ་ན། ནམ་མཁའི་དཀྱིལ་ནས་བུད་མེད་སྔོན་མོ་གཅིག་གིས་འོད་ཀྱི་སྐར་མ་ཞིག་འཕངས་པ་ཁོང་པའི་ནང་དུ་སོང་བ་རྨིས་ནས། ཟླ་བ་དགུ་ངོ་བཅུ་ན། བུ་མོ་ཤིན་ཏུ་མཛེས་(༢༤༥)པ། དཔྲལ་བ་ལ་རྡོ་རྗེ་རྒྱ་གྲམ་གྱི་རི་མོ་ཡོད་པ་ཨུཏྤ་ལའི་དྲི་དང་ལྡན་པ་ཞིག་བཙས་པ་ལས། མཚོ་རྒྱལ་ཞེས་བཏགས་ཏེ་ཆེར་སྐྱེས་པ་ལས། རྒྱལ་པོའི་བཙུན་མོར་བླངས་པ་ན། སློབ་དཔོན་ལ་ཤིན་ཏུ་དད་ཅིང་། འཁོར་བའི་ཆོས་ལ་ཤིན་ཏུ་སྐྱོ་ནས། རྒྱལ་པོ་ལ་ཆོས་བྱེད་པར་ཞུས་པས། གནང་སྟེ་སློབ་དཔོན་ལ་ཕུལ་ལོ། །དེ་ནས་སློབ་དཔོན་གྱིས་ལས་རྒྱ་བགྱིས་ཏེ་གང་དུ་བྱོན་པ་ཐམས་ཅད་དུ་བྱོན་ནས། བསྙེན་བཀུར་དང་ཞབས་ཏོག་མཛད་ཅིང་སྒྲུབ་པ་རྩེ་གཅིག་ཏུ་མཛད་པས་གྲུབ་པ་ཐོབ་སྟེ་མཆོག་ཐུན་མོང་གི་དངོས་གྲུབ་བརྙེས་སོ། །དེ་ནས་སློབ་དཔོན་ཡབ་ཡུམ་གཞོ་སྟོད་ཏི་སྒྲོ་བྲག་ལ་སྒྲུབ་པ་མཛད་པའི་དུས་སུ། ཡེ་ཤེས་ཀྱི་མཁའ་འགྲོ་མ་མང་པོས་ཇོ་མོ་ལ་བསྐུལ་བ། སློབ་དཔོན་སྤྲུལ་པའི་སྐུའི་ཐུགས་ལ་ཚེ་འདི་ཉིད་ལ་གདོས་བཅས་ཀྱི་ཕུང་པོ་དག་ནས་སངས་རྒྱ་བའི་གདམས་པ། མངོན་སུམ་སྙིང་ཏིག་གི་མན་ངག་ཟབ་མོ་བཞུགས་པས་གསོལ་བ་ཐོབ་ཅིག་ཅེས་བསྐུལ་བ་དང་། དེའི་ཚེ་ཇོ་མོས་ཚོགས་ཀྱི་འཁོར་ལོས་མཆོད་ཅིང་ཕྱག་དང་བསྐོར་བ་བྱས་ཏེ་ཞུས་པ། སློབ་དཔོན་ཆེན་པོ་ལགས། ཚེ་འདི་ཉིད་ལ་གདོས་བཅས་ཀྱི་ཕུང་པོ་དག་ནས་སངས་རྒྱ་བའི་གདམས་པ་མངོན་སུམ་སྙིང་ཐིག་གི་མན་ངག་གནང་འཚལ། ཞེས་ཞུས་པས། སློབ་དཔོན་ཆེན་པོའི་ཞལ་ནས། མཚོ་རྒྱལ་ཁྱོད་ཀྱིས་ཞུས་པ་དེ་ཤིན་ཏུ་ལེགས་ཤིང་ཚེ་འདི་ཉིད་ལ་གདོས་བཅས་ཤ་ཁྲག་གི་ཕུང་པོ་འོད་གསལ་ལོངས་སྤྱོད་རྫོགས་སྐུའི་ཞིང་ཁམས་སུ་དག་ནས། ཆོས་སྐུ་ལྷུན་གྲུབ་ཏུ་རིན་པོ་ཆེའི་སྦུབས་སུ་གཏན་སྲིད་ཟིན་པར་བྱེད་པའི་གདམས་པ་ཟབ་མོ་ཞིག་ཡོད་ཀྱི་བསྟན་པར་བྱའོ། །གསུངས་ནས། ཚོགས་ཁང་ཆེན་མོར་ཞི་ཁྲོ་དོན་གྱི་དཀྱིལ་འཁོར་ཞལ་ཕྱེས་ནས། ཇོ་མོ་མཁར་ཆེན་བཟས་ཐོག་དྲངས་ཡེ་ཤེས་ཀྱི་མཁའ་འགྲོ་མ་འབུམ་ཕྲག་གཅིག་ལ་དབང་བསྐུར་ནས་ཁྲིད་དུ་མཛད་དེ། རྒྱུད་བཅུ་བདུན་ཀློང་གསལ་དང་བཅོ་བརྒྱད། དེ་དག་གི་མན་ངག་ཡི་གེ་རབ་ཏུ་མང་པོ་དང་བཅས་པ་རྣམས་གསུངས་སོ། །དེ་ནས་དེ་རྣམས་ལས་རྒྱུད་རབ་ཏུ་རྒྱས་པའི་མན་ངག་རྣམས་ཕྱོགས་གཅིག་ཏུ་ཕྱེས། སློབ་དཔོན་ཉིད་ཀྱིས་མཛད་པའི་(༢༤༦)ཟབ་འདུས་ཀུ་སུ་ལུའི་སྐོར་རྣམས་ཕྱོགས་གཅིག་ཏུ་ཕྱེས་ཏེ། སློབ་དཔོན་དང་མཚོ་རྒྱལ་གྱིས་སོ་སོར་ཡི་གེ་བྲིས་ཏེ་དཀར་ཆག་ལ་མནན་ནོ། །དེའི་ཚེ་རྒྱལ་པོས་གདན་དྲངས་ཏེ། མཆིམས་ཕུར་སློབ་དཔོན་དང་། རྒྱལ་པོ་ཡབ་སྲས་གཤེགས་ཏེ་ཚོགས་ཀྱི་འཁོར་ལོ་བརྒྱ་རྩ་མཛད་པ་ལས། བཙུན་མོ་དམ་པ་འབྲོམ་བཟའ་བྱང་ཆུབ་སྨན་ལས་འཁྲུངས་པའི་སྲས་མོ་ལྷ་ལྕམ་པད་མ་གསལ་ཞེས་བྱ་བ་དགུང་ལོ་བརྒྱད་ལོན་པ་ཞིག་ཤི་བས། ལྷ་སྲས་བུ་མོའི་རོ་ལ་གཟིགས་ཤིང་བཤུམས་ཏེ་མྱ་ངན་མཛད་པས། སློབ་དཔོན་ཆེན་པོས་བཀའ་བསྩལ་པ།

ཀྱེ་མངའ་བདག་རྗེ། སྤྱིར་འཇིག་རྟེན་གྱི་སྣང་བ་རྨི་ལམ་དང་འདྲ། །འདུས་བྱས་ཀྱི་མཚན་ཉིད་སྒྱུ་མ་ཡིན། །རྒྱལ་སྲིད་མདང་གི་རྨི་ལམ་དང་འདྲ། །ཚེ་མི་རྟག་ཆུའི་ཝུ་བ་དང་འདྲ། །འདུས་པ་ཐམས་ཅད་བྲལ་བ་ཡིན། །འདུས་བྱས་ཐམས་ཅད་འདི་དང་འདྲ། །མི་རྟག་རྟག་པར་མ་འཛིན་པར། །སྐྱེ་མེད་ཆོས་སྐུའི་དོན་ལ་སྦྱོངས། །ཞེས་གསུངས་ཤིང་། ཡང་རྒྱལ་པོས་ཞུས་པའི་དོན་དུ། གཙུག་ལག་ཁང་དང་བསྟན་པའི་དར་གུད་འབྱུང་ཚུལ། ལྷ་ལྕམ་གྱི་སྐྱེས་རབས་དང་བཅས་པ་རྒྱས་པར་གསུངས་ནས། མ་འོངས་པའི་དུས་སུ་ཟངས་མདོག་དཔལ་རིར་རྒྱལ་པོ་དང་། མཚོ་རྒྱལ་ལྷ་ལྕམ་པད་མ་གསལ་དང་འོ་སྐོལ་ཞལ་མཇལ་ལོ་གསུངས་པས། རྒྱལ་པོ་དགྱེས་པས་ཕྱག་དང་སྐོར་བ་མང་དུ་མཛད་དོ། །དེ་ནས་ལྷ་ལྕམ་གྱི་རོའི་སྙིང་ཁར་ཤེས་རབ་མཚལ་གྱི་ཡི་གེ་ཎི་གཅིག་བྲིས་ཏེ་རྣམ་ཤེས་བཀུག་པས་དབུགས་བྱུང་སྟེ་སྨྲ་ཤེས་པ་བྱུང་ངོ་། །དེའི་ཚེ་གསང་བ་མཁའ་འགྲོ་སྙིང་ཏིག་གི་དབང་བསྐུར་ནས་གསང་མཚན་པདྨ་ལས་འབྲེལ་རྩལ་དུ་བཏགས་ཤིང་། བུ་མོའི་སྤྱི་བོར་དཔེ་སྒྲོམ་བཞག་ནས། མ་འོངས་པའི་དུས་སུ་ཆོས་འདི་དང་འཕྲད་ནས་སེམས་ཅན་ལ་ཕན་ཐོགས་པར་ཤོག་ཅིག །ཅེས་སྨོན་ལམ་བཏབ་བོ། །དེ་ནས་སླར་རྣམ་ཤེས་དོན་པ་དང་། རོ་དེ་ཉིད་སྲེག་པའི་ཚུལ་བསྟན་ཞིང་མོའི་སྒྲིབ་པ་སྦྱོང་བའི་དོན་དུ། སློབ་དཔོན་གྱིས་རྫུ་འཕྲུལ་མཛད་དེ་སྐད་ཅིག་ལ་ཨུ་རྒྱན་དུ་ཚོགས་ཀྱི་འཁོར་ལོ་མཛད་དོ། །ཡང་སློབ་དཔོན་གྱིས་གསུངས་པ། ཇི་ལྟར་བྱུང་བ་འདི་དག་ཡི་གེར་ཐོབ་(༢༤༧)ཅིག །ལྷ་ལྕམ་མོ་རང་གི་སྐྱེ་བ་དང་འཕྲད་པའི་དུས་སུ་ཡིད་ཆེས་པའི་དགོས་པ་ཡོད་དོ། །ཞེས་གསུང་ཡི་གེར་བཏབ་བོ། །དེ་ནས་ཇོ་མོས་ཞུས་པ། སྙིང་ཐིག་ཟབ་མོའི་གདམས་པ་སྤེལ་ལམ་སྦ་བར་བྱ། །ཞེས་ཞུས་པས། སློབ་དཔོན་ཆེན་པོས་གསུངས་པ། འདི་ད་ལྟ་སྤེལ་བའི་དུས་ལ་མ་བབ་པས་གཏེར་དུ་སྦེད་དགོས། ལྷ་ལྕམ་གྱིས་སྨོན་ལམ་བཏབ་པས་མོའི་ཆོས་སྐལ་ཡིན་ཞིང་། མ་འོངས་པའི་དུས་སུ་སྙིང་ཐིག་སྔ་འགྱུར་འཆལ་ཏེ་ཅུང་ཟད་ནུབ་ཏུ་ཉེ་བ་ན། ཆོས་འདིས་ཕན་ཐོགས་པར་འགྱུར་བས་གཏེར་དུ་སྦེད་དགོས་གསུངས་ནས། རྒྱུད་རབ་ཏུ་རྒྱས་པའི་མན་ངག་དང་བཅས་པ་རྣམས་བུམ་ཐང་སྨད་ཀྱི་བྲག་སེང་གེ་འདྲ་བ་ལ་གཏེར་དུ་སྦས་ཤིང་། ཟབ་འདུས་ཀུ་སུ་ལུའི་སྐོར་རྣམས་དྭགས་པོ་དང་ལུང་ཁྲ་མོ་བྲག་ལ་གཏེར་དུ་སྦས་ནས། གཟའ་དང་མ་མོ་དང་གཏེར་བདག་གི་མཁའ་འགྲོ་མང་པོ་ལ་གཉེར་དུ་གཏད་ནས། མ་འོངས་པའི་དུས་སུ་སྐལ་ལྡན་ལས་ཅན་དེ་ལ་གཏོད་ཅིག་ཅེས་བཀའ་བསྒོ་བར་མཛད་དོ། །གཞན་ཡང་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་གཏེར་ཁ་མང་དུ་སྦས་སོ། །དེ་ལྟར་རྒྱལ་པོ་ཁྲི་སྲོང་ལྡེའུ་བཙན་གྱིས། དཔལ་བསམ་ཡས་ཀྱི་གཙུག་ལག་ཁང་ཆེན་པོ་བཞེངས། སློབ་དཔོན་ཆེན་པོ་པདྨ་འབྱུང་གནས་ལ་སོགས་པ་པཎྜི་ཏ་མང་པོ་སྤྱན་དྲངས། དམ་པའི་ཆོས་མང་པོ་བསྒྱུར་ནས་སངས་རྒྱས་ཀྱི་བསྟན་པ་དར་རྒྱས་སུ་མཛད་དོ། །དེ་ནས་དྲུག་ཅུ་རྩ་གཅིག་གླང་གི་ལོ་ལ་རྒྱལ་པོ་དགུང་ལ་གཤེགས་ཏེ། སློབ་དཔོན་ཉིད་ཀྱང་དངོས་ཀྱི་གདུལ་བྱ་དེ་ལས་མེད་པར་དགོངས་ནས་ལྷ་སྲས་མུ་ནེ་བཙན་པོས་བཞུགས་པར་ཞུས་ཀྱང་མ་གནང་སྟེ་གཤེགས་པའི་ཚེ། མང་ཡུལ་བྱེ་མའི་ལ་སོ་ལ་ཐུག་པར་བསྐྱལ་ནས། ཕྱག་དབུ་ཐོད་བུད་བུད་དུ་འཚལ་ཞིང་སྐོར་བ་མཛད་དེ། ངེད་བོད་ལ་ཐུགས་རྗེས་གཟིགས་པར་ཞུ་གསུངས་ནས་སྤྱན་ཆབ་མང་པོ་བཏོན་པས། སློབ་དཔོན་ཆེན་པོའི་ཞལ་ནས། ལྷ་སྲས་བཙན་པོ། འཇིག་རྟེན་གྱི་སྣང་བ་སྒྱུ་མ་དང་འདྲ་བས་སྐྱེ་མེད་ཆོས་སྐུའི་རྩལ་སྦྱོང་མཛོད་ཅིག །འདུས་བྱས་ཆུའི་ལྦུ་བ་དང་འདྲ་བས་འཇིགས་མེད་ཐར་པའི་ལམ་སྣ་ཟུང་ཞིག །མི་རྟག་རྩྭ་ཁའི་ཟིལ་པ་དང་(༢༤༨)འདྲ་བས་སེམས་ཉིད་གཉུག་མའི་གཏན་སྲིད་ཟུང་ཞིག །འདུས་པ་ཚོང་ཁང་གི་མགྲོན་པོ་དང་འདྲ་བས་འབྲལ་མེད་བདེ་ཆེན་གྱི་གྲོགས་དང་འགྲོགས་ཤིག །འདི་ཕྱིར་ཕན་པ་དམ་པའི་ཆོས་ལས་མེད་པས་རྗེ་འབངས་ཐམས་ཅད་དམ་པའི་ལྷ་ཆོས་མཛོད་ཅིག །སྤྲེའུ་ལོ་སྤྲེའུ་ཟླ་བའི་ཚེས་བཅུ་ལ་ང་ཡང་བོད་ཀྱི་ཡུལ་དུ་ལན་རེ་འོང་ཞིང་། ལས་ཅན་རྣམས་ལ་རྒྱུན་དུ་སྣང་བས་ཐུགས་ངལ་མི་མཛད་པར་ཅི་བདེར་བཞུགས་འཚལ་ལོ། །ཞེས་གསུངས་ནས། སློབ་དཔོན་པདྨ་འབྱུང་གནས་དང་། ཇོ་མོ་མཁར་ཆེན་མཚོ་རྒྱལ་གཉིས། ནམ་མཁའི་དབྱིངས་ན་ཕར་འོད་ཟེར་གྱི་ཕུང་པོ་དང་བཅས་ཏེ་ལྷོ་ནུབ་ལྔ་ཡབ་ཀྱི་གླིང་དུ་བུན་གྱིས་གཤེགས་སོ། །དེ་ལྟར་རིམ་གྱིས་བྱོན་པའི་བླ་མ་བཞི་པོ་དེ་ཡང་། ཀུན་ཏུ་བཟང་པོ་ཡབ་ཡུམ་དང་། རྡོ་རྗེ་སེམས་དཔའ་ཉིད་ཀྱི་རྣམ་པར་འཕྲུལ་པ་ལས། འགྲོ་བ་རང་རྒྱུད་པ་འགས་བསྒྲུབས་པས་གྲུབ་པ་ཐོབ་པ་ནི་མ་ཡིན་ནོ། །དེའི་ཕྱིར་གདུལ་བྱའི་སྣང་བ་དང་བསྟུན་ནས་དེ་ལྟར་བྱོན་པའོ།། །།

༈ དོན་གསུམ་པ་གང་ཟག་སྙན་ཁུང་དུ་བརྒྱུད་པ་ནི། དེ་ལྟར་ཨུ་རྒྱན་ཆེན་པོས་ལུང་བསྟན་པ་བཞིན། ལྷ་ལྕམ་པད་མ་གསལ་སྐྱེ་བ་རིམ་གྱིས་བརྒྱུད་པ་ལས། ཚེ་ལོ་ལྔ་བཅུ་ཁ་རལ་གྱི་ཚེ། གསལ་རྗེ་གོང་གི་ཤར་ཕྱོགས་འབྲི་ཐང་ཞེས་བྱ་བའི་ས་ཆར་སྐུ་འཁྲུངས་ཏེ། ཆུང་ངུའི་དུས་ནས་ཆོས་ལ་མོས་པས་རབ་ཏུ་བྱུང་སྟེ་མཚན་ཚུལ་ཁྲིམས་རྡོ་རྗེ་ཞེས་གྲགས་སོ། །དེའི་ཚེ་གཏེར་གྱི་ཁ་བྱང་དང་ལྡེ་མིག་ཕྱག་ཏུ་བྱུང་ཞིང་། གཏེར་བདག་གི་མཁའ་འགྲོ་རྣམས་ཀྱིས་ཡང་ཡང་བསྐུལ་བ་ལ་བརྟེན་ནས་དགུང་ལོ་ཉི་ཤུ་གསུམ་གྱི་སྟེང་དུ། ཟབ་མོ་མཁའ་འགྲོ་སྙིང་ཏིག་གི་གཏེར་ཁ་དྭགས་པོ་དང་ལུང་ཁྲ་མོ་བྲག་ནས་གདན་དྲངས་ནས་ཅུང་ཟད་སྤེལ་བར་མཛད་ཅིང་ཁྱད་པར་དུ་ལས་ཅན་གྱི་སློབ་མ་སྤྲུལ་སྐུ་ལེགས་ལྡན་ལ་བཀའ་ལུང་ཤོག་སེར་དང་བཅས་པ་གཏད་ནས་འཛིན་ཞེན་མེད་པའི་སྤྱོད་པས་གནས་ངེས་མེད་དུ་འབྱོན་པ་ལས། བྱར་སྨད་ཕྱིང་དཀར་ཞེས་བྱ་བའི་ས་ཆར་སྐུ་གཤེགས་ཏེ་པུར་སྦྱངས་པ་ལས། གདུང་རུས་ལ་རྡོ་རྗེ་ཕག་མོ་ཚོན་གང་བའི་སྐུ་དང་། རིང་བསྲེལ་མང་དུ་བྱོན་ཞིང་ཞག་བདུན་དུ་ལུང་བ་འཇའ་འོད་ཀྱིས་གང་(༢༤༩)བས་འགྲོ་བ་རྣམས་ངོ་མཚར་གྱི་ས་ལ་བཀོད་དོ། །དེ་ལྟ་བུའི་བླ་མ་ཟབ་གཏེར་གྱི་བདག་པོ་དེ་ཉིད་ལས། སྤྲུལ་སྐུ་ལེགས་ལྡན་པས་བཀའ་ལུང་མན་ངག་རྫོགས་པར་ཞུས་ཏེ། དེའང་དཔལ་ལྡན་བླ་མ་དམ་པ་སྤྲུལ་སྐུ་ལེགས་ལྡན་གྱི་འཁྲུངས་ཡུལ་ནི། དམྱལ་སྨད་ཆོས་གྲོ་སེ་བ་ལུང་ཞེས་བྱ་བའི་གནས་སུ། སྔགས་བརྒྱུད་ཁྱད་པར་ཅན་གྱི་རིགས་སློབ་དཔོན་དབང་ཕྱུག་རྒྱལ་དང་། གྲུ་མོ་རྡོ་རྗེ་དགོས་གཉིས་ཀྱི་སྲས་སུ་འཁྲུངས་ཏེ། སྐུ་ཆུང་ངུའི་དུས་ནས་སྔོན་གྱི་སྐྱེ་བ་མང་པོ་དྲན་པ་དང་ཡི་གེ་འབྲི་ཀློག་བསླབ་མ་དགོས་པར་མཁྱེན་པ་དང་། ཐུགས་རབ་ཆེན་པོ་མངའོ། །གྲུབ་ཐོབ་ཨུ་རྒྱན་པ་དང་རྟོགས་ལྡན་མགོན་པོ་ཡེ་ཤེས་ཀྱིས་ཀྱང་སེམས་ཅན་ལ་ཕན་ཐོགས་པའི་སྐྱེས་བུ་ཞིག་འོང་བར་འདུག་གསུངས་ནས་ལུང་བསྟན། དགུང་ལོ་བརྒྱད་ལོན་དུས་ཡེ་ཤེས་ཀྱི་མཁའ་འགྲོ་མས་དངོས་སུ་ལུང་བསྟན་ཞིང་ཡབ་མེས་ཀྱི་ཟབ་ཆོས་རྣམས་ཀྱི་བདག་པོར་བྱིན་གྱིས་བརླབས་སོ། །དེ་ནས་གསུང་རབ་ཀྱི་གནས་ལ་ཐོས་བསམ་མཛད་པའི་ཚུལ་ནི། ཡབ་ལས་རིག་པ་བཀླག་པ་སྒྲའི་བསྟན་བཅོས། རྣམ་གཞག་ཞིབ་མོ་གངྒའི་ཆུ་རྒྱུན། སྐྱེ་བོ་གསོ་བའི་ཐིག་པ་རྩ་འགྲེལ་དང་བཅས་པ་དང་། རྟ་མགྲིན་དང་ཐུགས་རྗེ་ཆེན་པོ་དང་། སྒྲོལ་མའི་རྒྱུད་སྒྲུབ་ཐབས་དང་བཅས་པ་དང་། མ་མགོན་གྱི་རྒྱུད་མན་ངག་དང་བཅས་པ་རྣམས་གསན་ནས་མཁྱེན་པར་མཛད་ཅིང་། བླ་མ་ཐམས་ཅད་མཁྱེན་པ་ཞེས་བྱ་བ་ལས། ཞི་བྱེད་བརྒྱུད་པ་ཕྱི་མའི་དབང་དང་གདམས་པ་རྣམས་གསན་ནོ། །ཁུ་བོ་བླ་མ་རྒྱལ་སྲས་བརྩོན་དབང་པའི་དྲུང་དུ་སློབ་གཉེར་ལ་བྱོན་དུས་བླ་མའི་གསུང་གི་རྨིས་ལྟས་ཤིན་ཏུ་བཟང་སེམས་ཅན་ལ་ཕན་ལེགས་པར་ཐོགས་པ་ཞིག་འོང་བར་འདུག་པས། ཁྱེད་ཀྱི་མིང་རྒྱལ་སྲས་ལེགས་ལྡན་ཐོགས་ཤིག་གསུངས་སོ། །དེའི་ཚེ་དཔལ་གསང་བ་སྙིང་པོའི་རྒྱུད་དང་། བརྟག་གཉིས་གསན་ནས་ནན་ཆགས་མཛད་དེ། བཤད་པ་མཛད་ཅིང་། གཞན་ཡང་འཇམ་དཔལ་ཁ་ཐུན་གྱི་རྒྱུད་དང་། འཇམ་དཔལ་ཚེ་བདག་ཁྲོ་བོ་འདུས་པའི་སྐོར་དང་། བདེ་མཆོག་མན་ངག་དང་བཅས་པ་དང་། ཁྲོ་ཕུའི་ལོ་ཙཱ་ནས་བརྒྱུད་པའི་ཆོས་སྐོར་(༢༥༠)རྣམས་དང་། འཇིག་རྟེན་མགོན་པོ་ཆོས་རྗེ་འབྲི་གུང་པའི་ཆོས་སྐོར་ལ་སོགས་པ་གདམས་པ་མང་དུ་ཞུས་སོ། །སློབ་དཔོན་སངས་རྒྱས་དཔོན་གཞོན་ལས། རོ་སྙོམས་སྐོར་དྲུག་ལ་སོགས་པ་འབྲུག་པའི་ཆོས་སྐོར་རྣམས་གསན་ཞིང་། བླ་མ་ཆོས་རྒྱལ་རྫམ་པ་ལས། ཕར་ཕྱིན་ཤེས་རབ་སྒྲོན་མེ་དང་། དཔལ་གསང་བ་འདུས་པ་དང་། དགྱེས་རྡོར་རྔོག་ལུགས་དང་། སངས་རྒྱས་ཐོད་པ་དང་། ཕག་མོ་དཔྱལ་གྱི་ཆོས་དྲུག་ལ་སོགས་པ་ཞུས་སོ། །བོན་སྒོམ་སྣང་བ་རྒྱ་ཡན་ལས་དོ་ཧ་སྐོར་གསུམ་འགྲེལ་པ་བལ་ལུགས་པར་ལུགས་དང་བཅས་པ་ཞུས་ཤིང་། སློབ་དཔོན་གླན་ལས་མངའ་བདག་ཉང་རལ་གྱི་གཏེར་ཁ་བདེ་གཤེགས་འདུས་པའི་བཀའ་ལུང་དང་། རྟ་མགྲིན་གྱི་རྒྱུད་ལྔ་སྒྲུབ་ཐབས་དང་བཅས་པ་དང་། ཐུགས་རྗེ་ཆེན་པོ་འགྲོ་འདུལ་གྱི་ཆོས་སྐོར་དང་། མཁའ་འགྲོ་ཡིད་བཞིན་ནོར་བུའི་སྒྲུབ་སྐོར་ལ་སོགས་པ་ཞུས་སོ། །གུ་རུའི་བརྒྱུད་འཛིན་ཉི་མ་འོད་ཟེར་ལས། བླ་མ་གསང་འདུས་སངས་རྒྱས་མཉམ་སྦྱོར། ཐུགས་རྗེ་ཆེན་པོ་ཡང་སྙིང་འདུས་པ་ལ་སོགས་པ་ཞུས་ཤིང་རི་ཁྲོད་རས་པ་ལས། གཟེར་ལྔ་དང་ལམ་མཆོག་མཐར་ཐུག་ལ་སོགས་པ་ཞང་འཚལ་བའི་གདམས་སྐོར་རྣམས་གསན་ནོ། །ཞིག་པོའི་འཇིགས་མེད་སྦས་པ་ལས། བི་མ་ལའི་སྙིང་ཏིག་གི་དབང་ཁྲིད་ཟབ་པ་པོད་བཞི། རྒྱུད་བཅུ་བདུན་དང་བཅས་པ་ཞུས་ཤིང་། རྣལ་འབྱོར་པ་ཨཱ་ཧཱུྃ་རྡོ་རྗེ་ལས་སྒྲགས་ཡང་རྫོང་མའི་གཏེར་ཁའི་ཆོས་སྐོར་རྣམས་གསན་ནོ། །འཇམ་དབྱངས་ཤེས་རབ་རིན་ཆེན་ལས་ལྔ་བསྡུས་ཀྱི་རྩིས་དང་། གསོ་བ་སྨན་དཔྱད་ཀྱི་སྐོར་དང་ཕན་བྱེད་ཀྱི་ལས་ཚོགས་མང་དུ་ཞུས་ཏེ་མཁྱེན་པར་མཛད་དོ། །ཁྱད་པར་དུ་གཏེར་སྟོན་པད་མ་ལས་འབྲེལ་རྩལ་ལས་ཟབ་མོ་མཁའ་འགྲོ་སྙིང་ཏིག་གི་དབང་ཁྲིད་གདམས་པ་དང་བཅས་པ་རྫོགས་པར་ཞུ་དུས། བླ་མའི་གསུང་གིས་ཆོས་འདིའི་བདག་པོ་ཁྱེད་ཡིན་པར་ལུང་བསྟན་ན་འདུག་པས་རང་གཞན་གྱི་དོན་རྒྱ་ཆེན་པོ་མཛོད་ཅིག །གསུངས་ནས་ཤོག་སེར་རྣམས་ཀྱང་ཕྱག་ཏུ་གཏད་དོ། །དེ་ནས་ཟབ་གཏེར་(༢༥༡)འདི་ཉིད་ལོ་བཅུ་གཉིས་ཀྱི་བར་དུ་གང་ལ་ཡང་མ་སྤེལ་བར་སྒྲུབ་པ་རྩེ་གཅིག་ཏུ་མཛད་པའི་ཚེ་མནལ་ལམ་དུ། ཟངས་མདོག་དཔལ་རིར་ཨུ་རྒྱན་པད་མ་དང་ཞལ་མཇལ་བ་དང་། གནུབས་ནམ་མཁའི་སྙིང་པོས་སིང་ལྡིང་གི་རྔ་གཏད་ནས་ལས་ཅན་གྱི་སློབ་མར་ལུང་བསྟན་པ་ལ་སོགས་མཚན་ལྟས་བཟང་པོ་མང་དུ་བྱུང་ཞིང་། ཉམས་རྟོགས་ཀྱི་ནུས་པ་ཕུན་སུམ་ཚོགས་པ་མངའ་བས་སྨིན་གྲོལ་གྱི་ནུས་པ་དང་ལྡན་པར་བཞུགས་པ་ལས། ཆོས་རྗེ་ཀརྨ་པ་རང་བྱུང་རྡོ་རྗེས་ཀོང་པོར་གདན་དྲངས་ཏེ་ཟབ་གཏེར་མཁའ་འགྲོ་སྙིང་ཏིག་གི་ཁྲིད་གདམས་པ་དང་བཅས་པ་རྫོགས་པར་གསན་ཏེ། དགྱེས་ཚོར་ཆེན་པོ་མཛད་ཅིང་ཆོས་བཀའ་བཀྲོལ་ནས་རྒྱ་ཆེར་སྤེལ་བར་མཛད་དོ། །དེའི་ཚེ་ཆོས་རྗེ་པ་ལས་ཀྱང་། དུས་འཁོར་གྱི་རྒྱུད་འགྲེལ་པ་དྲི་མེད་འོད་དང་། མདོ་སྡེ་སྐྱེས་རབས་ཀྱི་ལུང་དང་། སྦྱོར་དྲུག་ཆོས་དྲུག །ཡང་དགོན་པའི་རི་ཆོས་སྐོར་གསུམ་ལ་སོགས་པ་གདམས་པ་མང་དུ་གསན་ནོ། །

དེ་ལྟར་ངོ་མཚར་མཆོག་གིས་བརྒྱན་པའི་བླ་མ་དམ་པ་དེ་ཉིད་ནི། ཨོ་རྒྱན་ཆེན་པོས་ཟབ་གཏེར་འདི་ཉིད་ཚུལ་དང་མཐུན་པར་སྤེལ་བའི་ལས་ཅན་གྱི་སློབ་མར་ལུང་བསྟན་ཞིང་། ཞི་རྒྱས་དབང་དྲག་གི་ནུས་པ་ཆེན་པོ་མངའ་བ་དང་། གཏེར་ཡིག་ནས་ལུང་བསྟན་པ་ལྟར་སྐུ་ཚེ་མཐར་ཕྱིན་ཞིང་གདུལ་བྱའི་ཕྲིན་ལས་རྣམས་སྨིན་གྲོལ་ལ་བཀོད་དེ། དགུང་ལོ་བདུན་ཅུ་རྩ་བརྒྱད་ཀྱི་བར་དུ་བཞུགས་ནས། སྦྲུལ་ལོ་རྒྱལ་གྱི་ཟླ་བའི་ཚེས་བཅུ་ལ་འགྲོ་བ་རྣམས་ངོ་མཚར་གྱི་ས་ལ་བཀོད་ནས། གཤེགས་པའི་ཚུལ་བསྟན་པའི་ཚེ་ལྷ་སྐུ་རིང་བསྲེལ་ལ་སོགས་མང་དུ་བྱོན་ཞིང་། ལུང་པ་འཇའ་ཡིས་ཁེངས་པ་ལ་སོགས་ངོ་མཚར་བའི་ལྟས་དཔག་ཏུ་མེད་པ་དང་བཅས་ཏེ་འདའ་ཚུལ་བསྟན་ནོ། །བླ་མ་དམ་པ་དེ་ཉིད་ལས། བདག་གིས་ཟབ་གཏེར་གྱི་གདམས་པ་ལེགས་པར་ཞུས་ཏེ། དེའང་བདག་ཅག་གི་ཕ་ཡུལ་ཁམས་ཀྱི་ས་ཆ་ལ་གོང་ཞེས་བྱ་བ་ཡིན་ཞིང་། ལྡོང་ཀླུ་འཕེལ་ཞེས་བྱ་བ་དང་། མར་ཚ་བཟའ་ཨ་འདོ་གཉིས་ཀྱི་བུར་སྐྱེས་ཏེ། བྱིས་པ་ལོ་བདུན་བརྒྱད་ཀྱི་དུས་ནས། ཆོས་ཀྱི་བག་ཆགས་དུམ་པ་ཡོད་པ་འདྲ་(༢༥༢)བས། ཆོས་བྱེད་པར་མོས་པ་དང་། བླ་མ་དགེ་འདུན་གྱི་རིགས་དང་། ལྷ་རྟེན་གསུང་རབ་ལ་སོགས་མཐོང་དུས་དགའ་ཚོར་ཆེན་པོ་སྐྱེ་བ་ཅིག་ཡོད་ལ། སྤྲང་པོ་ལ་སོགས་མ་ནུས་པ་མཐོང་དུས། རང་གི་གོས་རྙིང་དང་། བཟའ་བཏུང་ཅུང་ཟད་སྟེར་བར་ནུས་པ་དང་། བྱམས་པ་ཞིག་ཡོད་ཅིང་ལོ་བཅོ་ལྔ་ལོན་དུས་འབྲི་གུང་དུ་སྤྱན་སྔ་བཛྲ་རཱ་ཙ་བཞུགས་དུས་དགེ་ཚུལ་བྱས་ནས་ཡིག་བརྒྱའི་ཁྲིད་ལྔ་ལྡན་གྱི་ངོ་སྤྲོད་ཐོབ་ཅིང་། དེ་ནས་ནང་སོར་ལོ་ཤས་བསྡད་དུས་ཀྱང་། སྡིག་པ་ཆེར་མ་འབགས་ཤིང་། སྤྲང་ལོང་ལ་བྱམས་པས་བཟའ་བཏུང་སྟེར་བ་དང་མ་ཎི་བསྐུལ། རང་ཡང་མ་ཎི་མང་པོ་འདྲེན་པ་ལས། ལོ་ཉི་ཤུ་རྩ་གཅིག་ལོན་པའི་སྐབས་སུ། མཚན་གཅིག་གི་རྨི་ལམ་ན། བུད་མེད་རྒྱན་མང་པོས་བརྒྱན་པ་འཁོར་མང་རབས་ཀྱིས་བསྐོར་བ་ཞིག་ཕྱོགས་གཞན་ཞིག་ཏུ་འགྲོ་བའི་ལམ་ཞོར་ལ་བདག་ལ་འདི་སྐད་ཟེར་ཏེ། ཁྱོད་ཆོས་མ་བྱས་ན་ལོ་ཉི་ཤུ་རྩ་ལྔའི་སྟེང་དུ་འཆི་བས་ཆོས་རང་གྱིས་ཤིག་ཐོས་སོ། །དེ་ནས་བཟུང་སྟེ། མྱུར་དུ་འཆི་དོགས་པའི་སྡུག་བསྔལ་དང་། འཇིག་རྟེན་གྱི་བྱ་བ་ལ་དགོས་པ་ཅི་ཡང་མི་འདུག །འདི་ལྟར་མི་ཐམས་ཅད་ཚེ་ཡུད་ཙམ་འདི་ལ་ཆགས་སྡང་རྨོངས་གསུམ་སྡིག་པ་མི་བྱེད་ཐང་བ་ལ། ད་ནི་གང་གིས་ཀྱང་དགོས་པ་མི་གདའ་ཆོས་རང་བསམ་པའི་སྐྱོ་ཤས་དང་མི་རྟག་པ་གཞན་བསྐུལ་མ་དགོས་པ་དུང་དུང་བ་བྱུང་བ་ལ། ཡང་ལོ་ཤས་དགེ་སྦྱོར་ལ་མ་ཚུད་དེ་ནས་ལོ་ཉི་ཤུ་རྩ་ལྔའི་སྟེང་དུ་བསྙེན་རྫོགས་བྱས་ཏེ། དཔལ་ཀུན་ཏུ་བཟང་པོའི་རྣམ་པར་འཕྲུལ་པ་དྲིན་ཆེན་རིན་པོ་ཆེ་རྒྱལ་སྲས་དྲི་མེད་འོད་ཟེར་གྱི་དྲུང་དུ་མཇལ་བས་ཐུགས་རྗེས་བཟུང་སྟེ། གསང་བ་སྙིང་ཏིག་དབང་ཁྲིད། ཟབ་པ་པོད་བཞི་རྒྱབ་ཡིག་དང་བཅས་པ། མན་ངག་སྐོར་མང་རབས་དང་། རྒྱུད་བཅུ་བདུན། དེའི་དོན་འགྲེལ་ཐེག་མཆོག་མཛོད། ཟབ་མོ་ཡང་ཏིག །ངལ་གསོ་སྐོར་གསུམ་གྱི་རྩ་འགྲེལ། ཡིད་བཞིན་རིན་པོ་ཆེའི་མཛོད་ལ་སོགས་པ་དང་། མཁའ་འགྲོ་སྙིང་ཏིག་གི་ཁྲིད། ཡང་ཏིག་དང་བཅས་པ་དང་། གསང་སྐོར་གྱི་དབང་ཁྲིད་རྒྱུད་མན་ངག་དང་བཅས་པ་དང་། ཀུན་བྱེད་རྒྱལ་པོ་བང་མཛོད་འཕྲུལ་གྱི་ལྡེ་མིག །བཻ་རོ་ཙ་ནའི་འདྲ་འབག་ལ་སོགས་པ་དང་། གུ་རུ་ཞི་དྲག་གི་སྒྲུབ་སྐོར་དབང་བྱིན་རླབས་དང་བཅས་པ་དང་། མཁའ་འགྲོ་ཡིད་བཞིན་ནོར་བུའི་སྒྲུབ་སྐོར་དང་བཅས་པ་ཞུས་ཤིང་ཤིན་ཏུ་ཐུགས་མཉེས་པར་མཛད་(༢༥༣)དོ། །གཙུག་གི་རྒྱན་གཅིག་མཛད་པས་བཀའ་དྲིན་ཆེ་བར་བདོག་གོ། །གཞན་ཡང་བླ་མ་བློ་བཟང་བ་ལས། སེམས་བསྐྱེད་དབུ་མའི་ལུགས་དང་ཕྱག་རྒྱ་ཆེན་པོ་ཐོག་བབ་དང་། ཡི་གེ་བཞི་པའི་ངོ་སྤྲོད་དང་སྒྲོལ་མ་དཀར་སྔོན་གྱི་རྗེས་གནང་སྒྲུབ་ཐབས་ལ་སོགས་པ་ཞུས་སོ། །བླ་མ་རྒྱལ་རོང་བ་ལས་ལྷན་ཅིག་སྐྱེས་སྦྱོར་གྱི་གདམས་པ་ལ་སོགས་ཞུས་ཤིང་། བླ་མ་ཙཱ་རི་བ་ལས་ཐུགས་རྗེ་ཆེན་པོའི་དམར་ཁྲིད་དང་མལ་སྤྱོད་ལ་སོགས་ཞུས་སོ། །བླ་མ་ཡོན་ཏན་རྒྱ་མཚོ་ལས་སྦྱོར་དྲུག་གི་ཁྲིད་དང་རོ་སྙོམས་སྒང་དྲིལ་ལ་སོགས་གདམས་ཕྲན་མང་དུ་ཞུས་སོ། །ཆོས་རྗེ་ཀུན་མཁྱེན་པ་ལས། སྦྱོར་དྲུག་གི་ངོ་སྤྲོད། ཁོང་རང་གིས་མཛད་པའི་མན་ངག་ངོ་སྤྲོད་དང་འཕོ་བ་ཁྱད་འཕགས་ལ་སོགས་པ་དང་། འཇམ་དཔལ་ཕན་ཡོན་དང་བཅས་པའི་ལུང་ཞུས་སོ། །ཆོས་རྗེ་པཎ་ཆེན་པ་ལས། དུས་འཁོར་གྱི་རྒྱུད་འགྲེལ་པ་དྲི་མེད་འོད་དང་། མདོ་སྡེ་སྐྱེས་རབས་བརྒྱ་རྩ་དང་། དོ་ཧ་སྐོར་གསུམ་པར་བུའི་འགྲེལ་པ་དང་བཅས་པ་ལ་སོགས་གདམས་པ་མང་དུ་ཞུས་སོ། །བླ་མ་ལྷ་ཁང་པ་ལས་དབང་རྡོར་ཕྲེང་དང་སྒྲུབ་ཐབས་ཀྱི་སྐོར་འགའ་རེ་ཞུས་ཤིང་། ཆོས་རྒྱལ་རིན་ཆེན་གླིང་པ་ལས། མཁའ་འགྲོ་སྙིང་ཏིག་གི་(༢༥༣)དབང་ཁྲིད་དང་། རྫོགས་ཆེན་ཆིག་ཆོད་ཀུན་གྲོལ། ཕྱག་རྒྱ་ཆེན་པོ་མ་རིག་མུན་སེལ། བླ་མ་ཡིད་བཞིན་ནོར་བུའི་སྐོར། གུ་རུ་ཞི་དྲག །ཚེ་དཔག་མེད་ལ་སོགས་གདམས་པ་མང་དུ་ཞུས། ཁྱད་པར་དུ་ཙཱ་རིར་ལོ་གཅིག་གཉིས་སྒྲུབ་པ་བྱེད་པའི་ཞར་ལ། བླ་མ་དམ་པ་སྤྲུལ་སྐུ་ལེགས་ལྡན་པ་བྱར་གྱི་ལུང་ཆུང་ཙཱ་རི་ནས་ཉིན་གཅིག་སླེབས་པའི་རྩ་ནས་གྲོ་ས་དགོན་པ་ཞེས་བྱ་བར་བཞུགས་པ་ལ་མཇལ་ཏེ། གསང་བ་བླ་ན་མེད་པ་མཁའ་འགྲོ་སྙིང་ཏིག་གི་དབང་ཁྲིད་གདམས་པ་དང་བཅས་པ་ལན་གསུམ་གྱི་བར་ལ་ཞུས་ཏེ་ཞུན་ཐར་བཅད་ཅིང་། གཞན་ཡང་ཁྲོ་ཕུ་ལོ་ཙཱའི་ཆོས་སྐོར་དང་། པཎ་ཆེན་ཤཱཀྱ་ཤྲཱིའི་གདམས་པ་དང་ཆོས་རྗེ་འབྲི་གུང་པའི་ཟབ་ཆོས་ལ་སོགས་པ་གདམས་པ་མང་དུ་གནང་ཞིང་། ཐུགས་དགྱེས་པ་ཆེན་པོ་དང་བཅས་པས་གཞན་དོན་གྱིས་ཤིག་པའི་རྗེས་གནང་དང་བཅས་པ་མཛད་དོ། །

དེ་ལྟར་བླ་མ་དམ་པ་མཚན་ཉིད་དང་ལྡན་པ་རྣམས་ལས་ཟབ་མོའི་གདམས་པ་མང་དུ་ཐོས་པ་དང་། ཁྱད་པར་དུ་སྙིང་ཏིག་ཟབ་མོའི་གདམས་པ་ཉིད་ལ། ཡིད་ཆེས་དང་ལྡན་པས་སྒྲུབ་པ་ཅི་ནུས་སུ་བྱེད་པས་བླ་མ་ལ་གསོལ་བ་འདེབས་ཤིང་བསམ་པ་བཟང་པོས་སྣོད་ལྡན་རེ་རེ་གཉིས་གཉིས་ལ་ཟབ་མོའི་གདམས་པ་ཅུང་ཟད་སྤེལ་བར་བྱེད་པ་ལགས་སོ། །བདག་མ་གཏོགས་པའི་བླ་མ་གོང་མ་རྣམས་ནི་འཕགས་པའི་བླ་མ་ངོ་མཚར་ཅན་ཤ་སྟག་བྱོན་ཅིང་། དེང་སང་གི་བར་དུ་དམ་ཚིག་ཤིན་ཏུ་གཙང་བས། དབང་གི་ཆུ་བོ་ཡི་ཟམ་མ་ཆད། བྱིན་རླབས་ཀྱི་ན་བུན་དྲོད་མ་ཡལ། བཤད་པའི་སྒྲོན་མེའི་འོད་མ་ནུབ་པའི་ཚུལ་དུ་ཡོད་པས། ཕྱི་རབས་རྗེས་འཇུག་འདི་ནས་བརྒྱུད་པ་རྣམས་ཀྱང་ཆོས་དང་མཐུན་ཞིང་དམ་ཚིག་གཙང་བས་ཚེ་འདིའི་རྣམ་གཡེང་བསྐྱུངས་ཏེ་རང་གཞན་གྱི་དོན་ཕུན་སུམ་ཚོགས་པར་མཛོད་ཅིག །དེ་ལྟར་ངོ་མཚར་མཆོག་ཚོགས་བླ་མ་ཡི། །ལོ་རྒྱུས་གསལ་བར་བཀོད་པའི་དགེ་བ་དེས། །ནམ་མཁའི་མཐའ་ཀླས་གྱུར་པའི་འགྲོ་བ་ཀུན། །ཀུན་བཟང་ཆོས་རྗེ་བླ་མའི་ས་ཐོབ་ཤོག །མཁའ་འགྲོ་སྙིང་ཏིག་གི་བླ་མ་བརྒྱུད་པའི་ལོ་རྒྱུས། རིན་པོ་ཆེའི་ཕྲེང་བ་ཞེས་བྱ་བ་བྱ་བྲལ་བ་བཟོད་པས། དད་ལྡན་སློབ་མས་བསྐུལ་བའི་ངོར། ཉུང་བསྡུས་ཡི་གེར་བཀོད་པ་རྫོགས་སོ། །མངྒ་ལཾ། བྷ་ཝནྟུ།། །།

ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མཧཱ་ཤྲ་མ་ཎཿཡེ་སྭཱ་ཧཱ།། །།

རྫོགས་པ་ཆེན་པོ་མཁའ་འགྲོ་སྙིང་ཐིག་གི་ཁྲིད་ཡིག་ཟབ་ལམ་གསལ་བྱེད་ཅེས་བྱ་བ།

༄༅། །རྫོགས་པ་ཆེན་པོ་མཁའ་འགྲོ་སྙིང་ཐིག་གི་ཁྲིད་ཡིག་ཟབ་ལམ་གསལ་བྱེད་ཅེས་བྱ་བ་བཞུགས་སོ། །

༄༅། །ༀ་སྭསྟི། རྫོགས་པ་ཆེན་པོ་མཁའ་འགྲོ་སྙིང་ཐིག་གི་ཁྲིད་ཡིག་ཟབ་ལམ་གསལ་བྱེད་ཅེས་བྱ་བ། དཔལ་ལྡན་བླ་མ་རྡོ་རྗེ་སེམས་དཔའི་ངོ་བོ་ཉིད་ལ་གུས་པས་ཕྱག་འཚལ་ལོ། །དཀྱིལ་འཁོར་རྒྱ་མཚོའི་ཁྱབ་བདག་ཀུན་ཏུ་བཟང༌། །ཐུན་མོང་འགྲོ་ངོར་མི་ཡི་ཚུལ་བཟུང་ནས། །རྣམ་མང་གདུལ་དཀའ་འདུལ་བའི་ཕྲིན་ལས་ཅན། །བཀའ་དྲིན་མཉམ་མེད་རྩ་བའི་བླ་མར་འདུད། །ཟབ་མོའི་ལམ་གྱི་སྨིན་གྲོལ་བདུད་རྩིའི་རྒྱུན། །རིམ་པར་བརྒྱུད་ནས་སྐལ་བཟང་(༢)གདུལ་བྱ་ལ། །སྩོལ་མཛད་དྲུག་ལྡན་བརྒྱུད་པའི་ཁྱད་པར་སོགས། །སངས་རྒྱས་ཉག་གཅིག་ཕྲེང་བར་བྱོན་རྣམས་རྒྱལ། །སེམས་ཉིད་ཀ་ནས་དག་པའི་གཞི་དབྱིངས་སུ། །རང་བཞིན་ཡོན་ཏན་ལྷུན་གྱིས་གྲུབ་པའི་རྩལ། །དབྱེར་མེད་ཟུང་འཇུག་སྤྲོས་བྲལ་འདུས་མ་བྱས། །རང་རིག་གདོད་མའི་མགོན་པོ་རྒྱལ་གྱུར་ཅིག །ཐེག་དགུའི་རྩེ་རྒྱལ་བཀའ་གསང་རྫོགས་པ་ཆེ། །མཁའ་འགྲོའི་སྙིང་ཐིག་ཡང་ཟབ་སྙིང་པོའི་ལམ། །གྲུབ་མཆོག་བྱེ་བའི་གཤེགས་ཤུལ་དོ་ཟླ་མེད། །སྐལ་བཟང་མགྲོན་པོ་རྣམས་ལ་འདིར་གསལ་བྱ། །

འདིར་དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་གྱི་མཐར་ཐུག །ཐེག་པ་ཐམས་ཅད་ཀྱི་ཡང་སྙིང་བླ་ན་མེད་པ་ཨ་ཏི་རྫོགས་ཆེན་པོ་མན་ངག་གི་སྡེའི་ཡང་རྩེ། ཚེ་གཅིག་ལུས་གཅིག་ལ་སྐུ་བཞིའི་འབྲས་བུ་ཐོབ་པར་ནུས་པའི་མྱུར་ལམ་ཁྱད་པར་ཅན་དཔལ་མཁའ་འགྲོ་སྙིང་ཐིག་ཅེས་ཡོངས་སུ་གྲགས་པའི་གདམས་ངག་སྟོན་པ་ལ་གཉིས་ཏེ། འཆད་ཡུལ་སློབ་མ་བརྟག་ཅིང་མཐུན་རྐྱེན་གྱི་གཞི་བཟུང་བ་དང༌། འཆད་བྱ་གདམས་ངག་གིས་ཁྲིད་ཚུལ་སྟོན་པ་གཉིས། དང་པོ་ནི། རྒྱུད་དང་མན་ངག་གི་གཞུང་ཐམས་ཅད་ནས་གསུངས་ཀྱང་མདོར་བསྡུ་ན། རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །(༣)ཞེས་གསུངས་པས། བླ་མ་དང་གདམས་ངག་ལ་ཡིད་རབ་ཏུ་སྤྲོ་ཞིང་དོན་དུ་གཉེར་བ་དང་བའི་དད་པ། བསྒྲུབ་བྱའི་འབྲས་བུ་ལ་ཆེས་དུངས་པ་འདོད་པའི་དད་པ། དེའི་རྒྱུ་དང་འབྲས་བུ་ལ་ཐེ་ཚོམ་མེད་པ་ཡིད་ཆེས་ཀྱི་དད་པ། ཉི་ཚེའི་རྐྱེན་གྱིས་མི་འཕྲོག་པས་མཐར་ཐུག་པའི་དད་པ་སྟེ་བྱིན་རླབས་མྱུར་དུ་འཇུག་པའི་རྒྱུ་ཚང་བ་བླ་ན་མེད་པའི་བྱང་ཆུབ་སྒྲུབ་པ་ལ་ཞུམ་པ་མེད་པའི་བློ་སྟོབས་ཆེ་ཞིང༌། ཕྱི་བཤོལ་དང་ཐང་ལྷོད་མེད་པའི་བརྩོན་འགྲུས་ཀྱི་དམ་བཅའ་བརྟན་པས་ཉམས་རྟོགས་སྐྱེ་སླ་བ། གནས་ལུགས་ཟབ་མོའི་དོན་ལ་དཔྱོད་པའི་ཤེས་རབ་གསལ་བས་གོལ་ས་ཆོད་པ། ཟས་གོས་སོགས་སྲིད་པའི་བདེ་བ་ལ་འཛིན་ཆགས་ཀྱི་ཞེན་པ་ལོག་པས་ཚེ་འདིའི་འཁྲི་བ་ཆོད་པ། བླ་མ་དང་ལྷ་ལ་བློ་རྩེ་གཅིག་པའི་ཕུ་དུད་ཆེ་བས་བྱིན་རླབས་ངང་གིས་འཇུག་པ། གསང་སྔགས་ཀྱི་ལམ་ལ་ཐེ་ཚོམ་གྱི་སྒྲོ་འདོགས་ཆོད་པས་ཟབ་མོའི་སྤྱོད་པ་ལ་འཇུག་པ། ཆགས་སྡང་སོགས་ཐ་མལ་གྱི་རྣམ་པར་རྟོག་པ་ལ་མི་འཇུག་པས་སེམས་གཡེང་བ་མེད་པར་བརྟན་པ། རྩ་བ་དང་ཡན་ལག་གི་དམ་ཚིག་གཉེར་དུ་བླངས་པ་ལས་མི་འདའ་བའི་སྡོམ་པ་དང་ལྡན་པ། གནས་ལུགས་ཀྱི་དོན་སྒོམ་ཞིང་སྒྲུབ་པ་ལ་སྐྱོ་དུབ་མེད་པའི་བརྩོན་པ་དང་ལྡན་པ་སྟེ། ཡོན་ཏན་དེ་དག་དང་ལྡན་པ་ནི་ཟབ་མོའི་ལམ་འདིའི་སྣོད་དུ་གསུངས་པའི་ཕྱིར། དེ་ལྟ་བུའི་མཚན་ཉིད་དང་ལྡན་པ་ཉིད། འཆད་ཡུལ་དུ་བཟུང་ངོ༌་། །

མཚན་ཉིད་དེ་ལྡན་གྱི་སློབ་མ་དེས་གང་དུ་སྒྲུབ་པའི་གནས་ནི། ཀློང་གསལ་ལས། གངས་ཁྲོད་ལུང་སྟོང་རི་རྩེ་དུར་ཁྲོད་དམ། །ཤིན་ཏུ་དབེན་པ་དྭངས་ཤིང་མཐོ་བའི་སར། །སྐལ་ལྡན་སྐྱེས་བུ་ཉམས་ལེན་བྱ་བའི་གནས། །ཞེས་གསུངས་པས་གནས་རང་བཞིན་གྱིས་ཤིས་ཤིང་སྐྱེ་བོའི་རྒྱུ་འགྲུལ་དང་ཅ་ཅོ་ཉུང་བ། དགྲ་རྐུན་གྱི་འཇིགས་པ་སོགས་མེད་ཅིང་ས་ཆུ་འཕྲོད་པས་བསམ་གཏན་ངང་གིས་འཕེལ་བ་བསྟེན་པར་བྱའོ། །གང་གི་ཚེ་བྱ་བའི་དུས་ནི། (༤)དེ་ཉིད་ལས། དབྱར་མ་སྟོན་དང་དགུན་ཆུང་དཔྱིད་ཀྱི་དུས། །ཟེར་གཉིས་དུས་ནི་མཆོག་ཏུ་བཤད་པ་ཡིན། །ཞེས་གསུངས་པས་དུས་དེར་བསིལ་དྲོད་སྙོམས་པས་བྱིང་རྨུགས་ཀྱི་རྐྱེན་ཉུང་ཞིང་མངོན་སུམ་གྱི་ཡེ་ཤེས་འཆར་སླ་བ་དང་ངོ་སྤྲོད་བདེ་བའི་དབང་དུ་བྱས་པའོ། །བརྟེན་པའི་གྲོགས་ནི། དེ་ཉིད་ལས། དམ་ཚིག་གཙང་ལྡན་དག་པའི་སྣང་བ་ཆེ། །དུག་ལྔའི་ཤུགས་ཆུང་བློ་བརྟན་ཁོག་ཡངས་པ། །ངང་རྒྱུད་རིང་ཞིང་བརྩེ་བའི་གྲོགས་དང་འགྲོགས། །ཞེས་གསུངས་པས་ཟབ་ལམ་གྱི་སྒོམ་ཉམས་ཅན་ནམ། མིན་ནའང་ཞི་དུལ་ལྡན་ཞིང་དམ་ཚིག་གཙང་བ། དག་སྣང་འབྱོངས་ཤིང་ཉོན་མོངས་པ་ཤས་ཆུང་བ། བརྩེ་སེམས་དང་ལྡན་པས་མཐུན་པའི་རྐྱེན་སྦྱོར་བ་ལ་སྐྱོ་ངལ་མེད་པ་བརྟེན་ནོ། །ཡོ་བྱད་ཀྱི་ཁྱད་པར་ནི། དེ་ཉིད་ལས། མེ་ཏོག་དབང་ཡོན་ཚོགས་འཁོར་གཏོར་ཚོགས་རྒྱུ། །ཉམས་ལེན་དུས་སུ་ཁམས་ཀྱི་རྟེན་སོ་བཙལ། །མཐུན་པའི་ཡོ་བྱད་ཀུན་དང་ལྡན་པར་བྱ། །ཞེས་གསུངས་པས། བླ་མ་ལ་འབུལ་རྒྱུའི་དབང་ཡོན། མཁའ་འགྲོ་མཆོད་པའི་གཏོར་ཚོགས་ཀྱི་རྒྱུ་ཁམས་དང་མཐུན་པའི་བཟའ་བཏུང་གི་རྫས་སོགས་ཁ་ན་མ་ཐོ་བ་མེད་ཅིང་དེ་དག་གི་ཆེད་དུ་བྲེལ་མི་དགོས་པ་ཚོགས་པར་བྱའོ། །

༈ གཉིས་པ་འཆད་པར་བྱ་བ་གདམས་ངག་གིས་ཁྲིད་ཚུལ་བསྟན་པ་ལ་བཞི་སྟེ། ལོ་རྒྱུས་ཀྱི་སྒོ་ནས་ངེས་ཤེས་བསྐྱེད་པ། དབང་གི་སྒོ་ནས་སྨིན་པར་བྱ་བ། གདམས་ངག་གི་སྒོ་ནས་ཉམས་ལེན་བསྟན་པ། རྩིས་ཆེ་བ་བཀའ་རྒྱས་བཏབ་པའོ། །དང་པོ་ནི། ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་དང༌། ཀློང་གསལ་ལས། སྐལ་ལྡན་ངེས་ཤེས་བསྐྱེད་པའི་ཕྱིར། །བརྒྱུད་པའི་ལོ་རྒྱུས་བཤད་པར་བྱ། །ཞེས་གསུངས་ཤིང༌། ཇི་ལྟར་འཆད་ན། བཏགས་གྲོལ་སྙིང་པོ་ལས། སྟོན་པ་ཀུན་བཟང་ཡབ་ཡུམ་གྱིས། །ཉིད་ལས་མི་གཞན་སེམས་དཔའི་སྣོད། །བྱིན་(༥)གྱིས་བརླབས་ཀྱིས་བདག་ཉིད་ལ། །བཏགས་པས་གཅིག་ཤེས་ཀུན་གྲོལ་ལོ། །བཅིངས་དང་གྲོལ་བའི་མཐའ་ལས་འདས། །རྡོ་རྗེ་སེམས་དཔའི་བྱིན་རླབས་ཀྱིས། །རང་བྱུང་དགའ་རབ་ཐུགས་ལ་ཤར། །སིངྷ་ཉིད་ལ་རྒྱུད་གཏད་པ། །འབྲས་བུ་ཡོངས་རྫོགས་བཏགས་གྲོལ་རྒྱུད། །ཨོ་རྒྱན་པདྨ་ཉིད་ལ་གཏད། །ལྔ་ལྡན་བུ་ལ་འདི་སྟོན་ཅིག །ཅེས་གསུངས་པས། དེ་ཡང་གདོད་མའི་དབྱིངས་སུ་ཆོས་ཐམས་ཅད་ཀྱི་ཆོས་ཉིད་ཀ་དག་སྤྲོས་པ་དང་བྲལ་བའི་ངང་ནས་བཅོམ་ལྡན་འདས་དཔལ་ཀུན་ཏུ་བཟང་པོ་ལྷུན་གྲུབ་ཡེ་ཤེས་ཀྱི་སྐུར་བཞེངས་ཏེ། རྡོ་རྗེ་སེམས་དཔའ་ལ་སོགས་པ་རང་རྩལ་ཞི་ཁྲོའི་དཀྱིལ་འཁོར་གྲངས་མེད་པ་ལ་རྫོགས་པ་ཆེན་པོ་སྒྲ་ཚིག་བྱ་རྩོལ་ལས་འདས་པ་དུས་གསུམ་མཉམ་ཉིད་ཆེན་པོར་གསུངས་སོ། །དེ་ནས་རྡོ་རྗེ་སེམས་དཔས་འོག་མིན་གྱི་ཞིང་མཐའ་དབུས་མེད་པར་རིག་པ་འཛིན་པ་དང་མཁའ་འགྲོ་རང་གི་རྣམ་པར་འཕྲུལ་པ་ལས་རང་སྣང་བ་བསམ་གྱིས་མི་ཁྱབ་པ་ལ་སྐུ་དང་ཡེ་ཤེས་འདུ་འབྲལ་མེད་པའི་དོན་འགག་མེད་རང་ཤར་སྒྲ་བརྙན་ལྟ་བུར་གསུངས་པ་ནི་རྒྱལ་བ་ཉིད་ཀྱིས་ཉིད་ལ་བརྒྱུད་པའི་དབང་དུ་བྱས་པས་དགོངས་བརྒྱུད་དེ། དེ་ལྟར་རྡོ་རྗེ་སེམས་དཔའ་ཉིད་ཀྱིས་དུར་ཁྲོད་ཆེན་པོ་མེ་རི་འབར་བར་སྤྲུལ་པའི་སྐུ་དགའ་རབ་རྡོ་རྗེ་ལ་ཆོས་ཉིད་བྱ་རྩོལ་ལས་འདས་པ་ཚིག་སྡེབ་སྦྱོར་ལེགས་པས་བཤད་ཅིང་བཀའི་བསྡུ་བ་པོ་ཡང་དེའོ། །དེ་ནས་རྩུབ་འགྱུར་ཚལ་གྱི་དུར་ཁྲོད་དུ་རིག་འཛིན་ཤྲཱི་སིཾ་ཧ་ལ་མངོན་སུམ་རང་ཐོག་ཏུ་ཕབ་ནས་བཤད། དེས་དུར་ཁྲོད་ཆེན་པོ་སོ་ས་གླིང་དུ་སློབ་དཔོན་པདྨ་འབྱུང་གནས་ལ་གནས་ལུགས་ཡིད་དཔྱོད་དང་བྲལ་བ་བརྡ་དང་བརྡའི་སྒོ་ནས་བསྟན་པ་ནི་བརྡའ་བརྒྱུད་དོ། །དེ་ཉིད་ཀྱི་གཞོ་སྟོད་ཏི་སྒྲོའི་བྲག་དཀར་དུ་མཁར་ཆེན་བཟའ་མཚོ་རྒྱལ་ལ་ལྔ་ལྡན་ཡེ་ཤེས་སྙིང་པོ་རང་གསལ་མངོན་སུམ་དུ་གཏན་ལ་ཕབ་ནས་གསུངས་ཤིང་སློབ་དཔོན་ཡབ་ཡུམ་གྱི་ཐུགས་ཀྱི་དགོངས་པ་ཟབ་གསལ་མཚོན་བྱ་དོན་གྱི་ཡེ་ཤེས་(༦)སྐལ་ལྡན་ཆོས་ཀྱི་བདག་པོ་ལ་བྱིན་རླབས་འཕོ་བ་སྨོན་ལམ་དབང་བསྐུར་གྱིས་རྒྱས་བཏབ། མཚོན་བྱེད་བརྡའི་ཚིག་བརྒྱུད་ཡི་གེར་བཀོད་དེ་མཁའ་འགྲོ་གཏེར་བདག་རྣམས་ལ་གཉེར་དུ་གཏད་ནས་དྭགས་ལུང་ཁྲ་མོའི་བྲག་ལ་གཏེར་དུ་སྦས་པ། དུས་ཕྱིས་ལྔ་བཅུ་ཁ་རལ་གྱི་ཚེ་སྨོན་ལམ་ལས་ཀྱི་འཕྲོ་སད་པ་སྐལ་ལྡན་པདྨ་ལས་འབྲེལ་རྩལ་གྱིས་གཏེར་ནས་བཏོན་པ་མཁའ་འགྲོ་སྙིང་ཐིག་རྩ་བའི་སྐོར་རྣམས་ཤོའི་རྒྱལ་སྲས་ལེགས་པ་དང་ཆོས་རྒྱལ་རིན་ཆེན་གླིང་པ་སོགས་ལ་བཀའ་བབས་པ་དང༌། གཏེར་ལུང་ལྟར་གཏེར་སྟོན་ཉིད་བར་ཆད་རྐྱེན་དབང་གིས་དངོས་ཀྱི་འགྲོ་དོན་འཕྲོ་ཅན་དུ་གྱུར་པ་ལས། དེའི་ཕྱི་མ་ལོངས་སྐུའི་ཞིང་ཉུལ་བར་ལུང་བསྟན་པ་ལྟར་ཡེ་ཤེས་ཀྱི་སྐུ་ཅན་ཀུན་མཁྱེན་དྲི་མེད་འོད་ཟེར་ལ་འཆིམས་ཕུ་རི་མོ་ཅན་དུ་ཨོ་རྒྱན་ཡབ་ཡུམ་གྱིས་དངོས་སུ་བྱིན་གྱིས་བརླབས་ནས་གསུངས་པའི་དོན་ཡང་ཐིག་ཡིད་བཞིན་ནོར་བུ་ཞེས་སྙིང་ཐིག་རྩ་བའི་ཟབ་གནད་གསལ་བྱེད་མན་ངག་ཏུ་སྡེབས་པ་གུ་རུ་ཡེ་ཤེས་རབ་འབྱམས་དང་བདེ་ལེགས་རྒྱ་མཚོ་སོགས་ལ་བཀའ་བབས་པ་སྟེ། བརྒྱུད་པའི་ཁྱད་པར་དྲུག་ལས་འོངས་པའི་ཆོས་ཚུལ་འདི་ནི། སྤྱིར་རྡོ་རྗེ་ཐེག་པའི་རྒྱུད་སྡེ་གཞན་རྣམས་སུ་རྡོ་རྗེའི་ཚིག་གིས་སྦས་པའི་དོན། རྒྱུད་བཅུ་བདུན་དགོངས་འགྲེལ་དང་བཅས་པ་རྣམས་ཀྱིས་གསལ་པོར་བསྟན་ཅིང༌། ཁྱད་པར་བཏགས་གྲོལ་སྙིང་པོའི་རྒྱུད་དྲུག་དང་སངས་རྒྱས་ཀྱི་འདས་རྗེས་གསུམ། དེའི་མན་ངག་ཨོ་རྒྱན་ཆེན་པོ་ཡབ་ཡུམ་གྱིས་མཛད་པ་རྣམས་ཀྱིས་སངས་རྒྱས་ཐམས་ཅད་ཀྱི་དགོངས་པའི་ཞེ་ཕུགས་ཚིག་གཅིག་དང་དབྱངས་གཅིག་གིས་བསྟན་པའི་ལམ་མཆོག་ཕུལ་དུ་གྱུར་པ་རྫོགས་པ་ཆེན་པོ་ཟབ་གསང་མཁའ་འགྲོ་སྙིང་ཐིག་ཅེས་བྱ་བ་མཚོན་བྱེད་ཀྱི་བརྡའ་ལ་བརྟེན་ནས་མཚོན་བྱ་དོན་གྱི་གནས་ལུགས་བདེ་བླག་ཏུ་རྟོགས་པར་བྱེད་པ་སྐལ་བཟང་ལས་འཕྲོ་ཅན་རྣམས་ཀྱི་མཇུག་ངོགས་བླ་ན་མེད་པའོ། །དེ་ལྟར་ཡང་སྒྲོན་མ་རྣམ་པར་བཀོད་པའི་རྒྱུད་ལས། དགོངས་པ་བརྡ་དང་(༧)སྙན་བརྒྱུད་ནས། །གསང་སྔགས་དོན་གྱི་ཚད་མ་འབྱུང༌། །དཔེ་ལ་བརྟེན་ནས་དོན་ངོ་ཤེས། །རྟགས་ལ་བརྟེན་ནས་ཡིད་ཆེས་འགྱུར། །དོན་གྱི་སྙིང་པོ་ཐག་ཆོད་པས། །གཞི་ལ་གྲུབ་པའི་ཤེས་རབ་གསུམ། །ས་བོན་ཚུལ་དུ་གནས་པ་དེ། །རྐྱེན་ལས་བྱུང་བའི་ཤེས་རབ་ཀྱིས། །འབྲུ་ཡི་ཚུལ་དུ་སྨིན་པ་ཡིས། །མ་རིག་པ་ཡི་མུན་པ་སངས། །ཤེས་བྱའི་སྒྲིབ་པ་རང་དག་པས། །མ་བཙལ་འབྲས་བུ་རང་གིས་མཐོང༌། །ཞེས་གསུངས་པ་བཞིན་ནོ། །

གཉིས་པ་དབང་གི་སྒོ་ནས་སྨིན་པར་བྱེད་པ་ལ་དབང་དངོས་དང་དམ་ཚིག་བསྟན་པའོ། །

དང་པོ་ནི། ཐལ་འགྱུར་ལས། དབང་ནི་རྣམ་པ་བཞི་ཡིས་ཀྱང༌། །སྐལ་བ་ལྡན་པར་སྨིན་པར་བྱ། །སྤྲོས་བཅས་ཉིད་དང་སྤྲོས་པ་མེད། །ཤིན་ཏུ་སྤྲོས་པ་མེད་པ་དང༌། །དེ་བཞིན་རབ་ཏུ་སྤྲོས་པ་མེད། །དབྱེ་བ་བཞི་ཡི་ཚུལ་གྱིས་ནི། །དད་ལྡན་རང་རྒྱུད་སྨིན་པར་བྱ། །ཞེས་དང༌། དེ་ནས་རིག་པའི་རྩལ་དབང་བསྐུར། །ཞེས་གསུངས་པས་སེམས་ཅན་གྱི་ཁམས་བདེ་བར་གཤེགས་པའི་སྙིང་པོ་ལ་རྫོགས་སངས་རྒྱས་ཀྱི་ཆོས་གཟུགས་ཀྱི་སྐུ་དང་ཡེ་ཤེས་སྒྲུབ་པ་ལ། རྒྱུའི་ཐེག་པར་དཀའ་སྤྱད་སོགས་ཐབས་བུལ་ཞིང་ཚེགས་ཆེ་བ་བརྩོན་པ་ཆེན་པོས་སྒྲུབ་དགོས་པ་དེ་ཉིད། འདིར་དུས་དང་དཀའ་སྤྱད་ལ་མ་ལྟོས་པར་ཐབས་མྱུར་ཞིང་ཚེགས་ཆུང་ངུས་འགྲུབ་པར་འགྱུར་བ་དང༌། དེ་ཡང་རྣམ་སྨིན་འཁོར་བའི་སྒོ་གསུམ་ཡེ་ཤེས་ཀྱི་ཁམས་བཞི་ལ་རྡོ་རྗེ་བཞིའི་རིགས་གནས་པ་དེ་སྐུ་བཞིའི་བདག་ཉིད་དུ་སྒྲུབ་པ་ལ་དབང་བསྐུར་བའི་བྱེད་པས། ཚེ་འདི་ཉིད་ལ་སོགས་པར་རྫོགས་སངས་རྒྱས་ཀྱི་འབྲས་བུ་ཐོབ་པར་བྱེད་པའི་ཕྱིར་རོ། །དེ་ཡང་སློབ་མའི་ལུས་སོགས་རྒྱུ་རྣམ་སྨིན་གྱི་ཁམས་བཞི་པོ་དེ་ཉིད་ལ། འབྲས་བུ་རྡོ་རྗེ་བཞིར་དབང་བསྐུར་ཞིང་བྱིན་གྱིས་བརླབས་པས་གཉུག་མའི་ཁམས་བཞིའི་ཡོན་ཏན་སད་པར་བྱས་པ་ལས་རྒྱུའི་རིགས་འདྲ་མ་བོར་བར་སངས་རྒྱས་ཀྱི་རྡོ་རྗེ་བཞིར་མངོན་དུ་བྱེད་པར་འགྱུར་སྟེ། འབྲས་བུ་ཉིད་ཀྱི་རྒྱུ་ལ་རྒྱས་བཏབ་པས་འབྲས་བུར་བྱས་པ་(༨)དང༌། རྒྱུ་ཉིད་ཀྱང་རྒྱུའི་ངོ་བོ་མ་གཏང་བར་འབྲས་བུ་སད་པར་བྱེད་པའི་ཕྱིར་སྨིན་བྱེད་ཅེས་བྱའོ། །ཁྱད་པར་འདིར་ནི་སྣང་སྲིད་ཡེ་དག་ཆོས་ཉིད་བྱང་ཆུབ་སེམས་ཀྱི་དཀྱིལ་འཁོར་དུ་རང་རིག་སྤྲོས་བྲལ་རྫོགས་པ་ཆེན་པོར་དབང་བསྐུར་བས་དེའི་དོན་གཅེར་མཐོང་རང་གྲོལ་དུ་ངོ་འཕྲོད་པས་རིག་པའི་རྩལ་དབང་ཞེས་བྱའོ། །དེ་ཡང་རྡོ་རྗེ་སློབ་དཔོན་དཀྱིལ་འཁོར་གྱི་བདག་པོའི་གནས་ལ་གནས་པས་སློབ་མ་སྐལ་བ་དང་དབང་པོ་དང་ལམ་གྱི་འཇུག་པ་དང་འཚམས་པར་ཐུན་མོང་དང་ཐུན་མོང་མིན་པའི་དཀྱིལ་འཁོར་དུ་བཅུག་ནས་ལམ་འབྲས་བུའི་གོ་འཕང་གི་ཆོས་རྒྱུད་ལ་འཇོག་པའི་ལས་ཀྱི་བྱང་ཆུབ་ཀྱི་མྱུ་གུ་མངོན་དུ་བསྐྱེད་པའམ་སྐྱེ་བའི་ནུས་རུང་དུ་སྨིན་པར་བྱེད་པ་ནི་སྨིན་བྱེད་ཀྱི་དབང་ངམ་རྒྱུའི་དབང་དུ་གྲགས་པའོ། །དེ་ཐོབ་ནས་ས་དང་ལམ་གྱིས་མཚོན་པའི་ཡོན་ཏན་རྣམས་གོང་ནས་གོང་དུ་ན་འཕར་བར་བྱེད་པའི་ཆེད་དུ་དབང་བསྐུར་བ་ནི་ལམ་གྱི་དབང་ངམ་གྲོལ་བྱེད་ཀྱི་ཐབས་སུ་འཇོག་པ་ཡིན་ནོ། །

གཉིས་པ་ནི། ཐལ་འགྱུར་ལས། དབང་བརྟེན་པ་ཡི་དམ་ཚིག་བཤད། །བྱེ་བྲག་བརྗོད་ཀྱིས་མི་ལང་ཡང༌། །མདོར་བསྡུས་སྐུ་གསུང་ཐུགས་ཉིད་བསྲུང༌། །ཞེས་པས་བསྲུང་བྱའི་དོན་ལས་མི་འདའ་བར་སྡོམ་པའི་སེམས་པ་ས་བོན་དང་བཅས་པ་སྟེ་དབྱེ་ན་རྩ་བ་དང་ཡན་ལག་གི་དམ་ཚིག་ཇི་སྙེད་པ་རྣམས་དང༌། ཁྱད་པར་སྐུ་གསུང་ཐུགས་ཀྱི་དམ་ཚིག་ལས་འདའ་བར་མི་སྤྱོད་པ་ཉིད་ཡིན་ཅིང༌། མདོར་ན་བསྲུང་བྱའི་གྲངས་དང་དམིགས་སུ་མ་གྲུབ་པ་ཡེ་བསྲུང་བཅིང་སྡོམ་མེད་པ་ནི་དམ་ཚིག་གི་དམ་པ་སྟེ། ཡེ་ནས་བསྲུང་མེད་ཆེན་པོ་ལ། །བསྲུང་མཚམས་རིམ་པར་བཀོད་པ་མེད། །ཅེས་དང༌། བསྲུང་མཚམས་ཀུན་ལས་རྒྱལ་བས་ན། །དམ་ཚིག་ཀུན་གྱི་རྩེ་མོར་བཤད། །ཅེས་གསུངས་པ་བཞིན་ནོ། །

གསུམ་པ་གདམས་ངག་གི་སྒོ་ནས་ཉམས་སུ་ལེན་པ་ལ། བརྩོན་འགྲུས་རབ་ཚེ་འདིར་འཚང་རྒྱ་བ། འབྲིང་བར་དོར་འཚང་རྒྱ་བ། ཐ་མ་རང་བཞིན་(༩)སྤྲུལ་སྐུའི་ཞིང་དུ་འཚང་རྒྱ་བར་བསྟན་པ་དང་གསུམ་ལས། དང་པོ་ལ་ཟབ་ལམ་བསྒོམ་པའི་སྣོད་རུང་དུ་སྒྲུབ་པ་སྔོན་འགྲོའི་ཁྲིད། ཟབ་ལམ་བསྒོམ་པ་དངོས་ལ་འཇུག་པ་དངོས་གཞིའི་ཁྲིད་གཉིས་ཀྱི་དང་པོ་ལ་ཡང་། ཐུན་མོང་གི་སྔོན་འགྲོས་རྒྱུད་སྦྱོང་བ་དང༌། ཐུན་མོང་མ་ཡིན་པའི་སྔོན་འགྲོས་གནས་ལུགས་གཏན་ལ་དབབ་པའོ། །དང་པོ་ལའང་སྔོན་འགྲོའི་ཆིངས་སྤྱིར་བཤད་པ་དང༌། དམིགས་རིམ་སྒོམ་ཚུལ་བྱེ་བྲག་ཏུ་བཤད་པའོ། །

དང་པོ་ནི། འདས་རྗེས་ལས། མི་རྟག་སྙིང་རྗེ་བྱང་སེམས་སྦྱང༌་ཞེས་དང༌། རྒྱུད་ལས། མི་རྟག་སྙིང་རྗེ་བྱང་སེམས་ཀྱིས། །ཆོས་འཇུག་ཐེག་ཆེན་ལམ་དུ་འགྲོ། །ཞེས་གསུངས་པས། མི་རྟག་པ་དང་སྙིང་རྗེ་བྱང་ཆུབ་ཀྱི་སེམས་བསྒོམ་པ་གསུམ་དངོས་བསྟན་དུ་གསུངས་པ་ནི་གཙོ་ཆེ་བའི་དབང་དུ་དགོངས་ཀྱི། དེ་ཡང་ཐེག་ཆེན་གྱི་འཇུག་སྒོ་ནི་བྱང་ཆུབ་ཀྱི་སེམས་ཉིད་ཡིན་ཅིང༌། དེ་རྒྱུད་ལ་སྐྱེས་ན་ཐེག་ཆེན་པ་རྣལ་མར་འགྱུར་བས་དེའི་མི་མཐུན་ཕྱོགས་བསལ་ནས་མཐུན་ཕྱོགས་སྒྲུབ་པ་ལ་ཐོག་མར་ཚེ་འདིའི་མངོན་ཞེན་འགོག་པ་གལ་ཆེ་བས། ཚེ་རིང་དུ་མི་གནས་པའི་འཆི་བ་དྲན་པ་དང༌། ཤི་བའི་འོག་ཏུ་ངན་འགྲོར་སྐྱེ་བའི་ཉེས་དམིགས་བསམས་ནས་སྲིད་པའི་ཕུན་ཚོགས་ལ་སྲེད་པའི་བློ་ཡང་འཁོར་བ་མཐའ་དག་གི་ཉེས་དམིགས་ཤེས་པས་སྤངས་ཏེ་ཐར་པ་ལ་ཡིད་ཕྱོགས་པར་བྱ་ཞིང༌། དེ་ནས་རང་ཉིད་ཞི་བདེ་དོན་གཉེར་གྱི་བློ་ཡང་སྤངས་ནས་བྱམས་སྙིང་རྗེ་བྱང་ཆུབ་ཀྱི་སེམས་སྦྱང་བ་ལ་རིམ་པ་བཞིན་བསླབ་པར་བྱ་དགོས་ཏེ་ཐེག་ཆེན་ཐུན་མོང་གི་ལམ་ཡིན་པའི་ཕྱིར་རོ། །དེ་ཡང་བླ་མ་སོ་སོའི་ཕྱག་བཞེས་ཁྲིད་ཚུལ་མི་འདྲ་བའི་དབང་གིས། མི་རྟག་པ་བསྒོམ་པ་ནས་མགོ་བཟུང་སྟེ་དངོས་བསྟན་ལྟར་རྐང་གྲངས་གསུམ་དུ་བསྡུ་བ་དང༌། འགའ་ཞིག་དལ་འབྱོར་རྙེད་དཀའ་ནས་མགོ་འཛིན་པ་སོགས་ཡོད་ཀྱང་དོན་གྱི་གནད་གཅིག་སྟེ། དེ་ཁ་མི་རྟག་པ་བསྒོམ་པའི་གཞི་ཡིན་པ་དང༌། མི་རྟག་པ་བསྒོམས་པས་འཁོར་བའི་ཉེས་(༡༠)དམིགས་ཤེས་པ་དང༌། དེ་ཤེས་པས་ལས་འབྲས་ཀྱི་བླང་དོར་ལ་མཁས་པ་དང༌། རྒྱུ་དེ་དག་ལས་སྐྱབས་འགྲོ་དང་སེམས་བསྐྱེད་ཡང་དག་པ་སྐྱེ་བར་འགྱུར་བའི་ཕྱིར་ལས་དང་པོ་པ་རྣམས་ལ་འཁྲིད་ཚུལ་དེ་ལྟར་བྱས་ན་ལམ་གྱི་གོ་རིམ་རྣམ་པ་གསལ་བ་དང་ཐེག་ཆེན་གྱི་ཁྲིད་ཚུལ་སྤྱི་ཁྱབ་དང་མཐུན་ཅིང་རྩ་བའི་དགོངས་པ་ལས་ཀྱང་མི་འདའ་བའི་ཕྱིར་ལེགས་པར་ཡང་འགྱུར་མོད། དེ་ལྟར་བྱེད་ན་ཁྲིད་ཡིག་ནང་མཐུན་གཞན་ནས་ལེན་པའམ་སྤྱི་ཁྱབ་སྔོན་འགྲོའི་ཆོས་བཤད་ཟུར་དུ་བཀོད་པ་ལས་ཀྱང་ཤེས་པར་བྱའོ། །

གཉིས་པ། དམིགས་རིམ་བྱེ་བྲག་ཏུ་བསྒོམ་པའི་ཚུལ་ལ་དྲུག་ལས། དང་པོ་ཐུན་གྱི་སྔོན་འགྲོ་ནི། དབེན་པའི་གནས་སུ་བདེ་བའི་སྟན་ལ་ལུས་གནད་དྲང་པོར་བསྲང་ཞིང་སེམས་རྣལ་དུ་ཕབ་ནས། ངག་གནད་རླུང་རོ་ལན་གསུམ་ཕྱིར་བསལ་བས་ནད་གདོན་སྡིག་སྒྲིབ་ཐམས་ཅད་སྦྱངས་པར་བསམ། སེམས་གནད་སེམས་ཅན་ཐམས་ཅད་ཀྱི་དོན་དུ་ལམ་ཟབ་མོ་ཉམས་སུ་བླང་བར་བྱ་སྙམ་པས་སྤྱི་བོར་བླ་མ་བསྒོམས་ནས་མོས་གུས་ཚད་མེད་པས། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དྲིན་ཅན་རྩ་བའི་བླ་མ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་རློབ་ཏུ་གསོལ། ཞེས་འདོད་པའི་དོན་ལ་གསོལ་བ་རྩེ་གཅིག་ཏུ་གདབ། དེ་ནི་ཐུན་ཐམས་ཅད་ཀྱི་མགོར་བྱ་སྟེ། གཞུང་གི་རྩིས་མགོས་མ་བསྡུས་ཀྱང་བླ་མ་རྣམས་ཀྱི་ཕྱག་ལེན་ཡིན་ནོ། །

གཉིས་པ་མི་རྟག་པ་སྒོམ་ཚུལ་ནི། དེ་ཡང་འོ་སྐོལ་རྣམས་ཀྱིས་ཐོག་མ་མེད་པ་ནས་ད་ལྟའི་བར་དུ་སྤྱིར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་བསམ་གྱི་མི་ཁྱབ་པ་ཞིག་མྱོང་དུ་ཟིན་ཀྱང༌། ད་དུང་སྡུག་བསྔལ་གྱི་མཐའ་རྟོགས་པ་དཀའ་བར་འདུག །དེས་ན་ད་རེས་དལ་འབྱོར་བཅོ་བརྒྱད་ཚང་བའི་མི་ལུས་ཤིན་ཏུ་རྙེད་པར་དཀའ་ཞིང་རྙེད་ན་དོན་ཆེ་བའི་རྟེན་ཁྱད་པར་ཅན་ཐོབ་པའི་དུས་འདིར་གཏན་གྱི་འདུན་མ་འགྲུབ་པ་ཞིག་ཅི་ནས་བྱ་དགོས། དེ་ཡང་སང་བྱ་གནང་བྱ་སྙམ་པའི་ལེ་ལོས་ཕྱི་བཤོལ་དུ་འཇོགས་མི་ཁོམ་མི་ལུས་ཐོབ་ཀྱང་མི་རྟག་པར་མྱུར་དུ་འཇིག་སྟེ། ངེས་(༡༡)པར་འཆི་བ་ལ་ཐེ་ཚོམ་མེད་པ་མངོན་སུམ་གྱིས་གྲུབ། ནམ་འཆིའི་ཆ་མེད་དེ་འཆི་བ་གློ་བུར་བཅར་འཕོག་ཏུ་འོང༌། འཆི་བའི་རྐྱེན་མང་ནད་གདོན་འདིས་མི་འཆི་བྱ་བ་མེད། འཆི་བ་ལ་ཕན་པ་དམ་པའི་ཆོས་མ་གཏོགས་གཞན་མེད། དེས་ན་བརྩེགས་པའི་ཁང་ཁྱིམ། བསགས་པའི་ལོངས་སྤྱོད། མཛའ་བའི་གཉེན་གྲོགས་སོགས་གང་གིས་ཀྱང་མི་སྟོངས་པར་ལས་ཁོ་ན་བདག་གིར་བྱས་ནས་འགྲོ་དགོས། དེའི་ཕྱིར་ཕྱི་ནམ་ཟླ་དུས་བཞིའི་འགྱུར་བ་དབྱར་དགུན་སྟོན་དཔྱིད་ལོ་ཟླ་ཞག་དང་ཟ་མ་སྐད་ཅིག་ཡུད་ཙམ་གྱིས་ཀྱང་མི་རྟག་པར་འགྱུར་བ་བཞིན་དུ་རང་ཉིད་ཀྱང་འཆི་བ་ལ་ཇེ་ཉེར་སོང་ཞིང་ངེས་པར་འཆི་བར་ཐག་ཆོད། ནང་སྐྱེ་འགྲོའི་འགྱུར་བ་ཡང་དགྲ་གཉེན་བར་མའི་འགྲོ་བ་བསམ་གྱིས་མི་ཁྱབ་པ་དེ་ཙམ་ཞིག་ཤི་བ་མཐོང་ཞིང་ཐོས་པས་ཀྱང་རང་ཉིད་ནམ་འཆིའི་ཆ་མེད་པར་གཏན་ལ་ཕེབས། གསང་བ་རང་ཉིད་སྐྱེས་ནས་ད་ལྟའི་བར་གྱི་ལུས་ཀྱི་འགྱུར་བ་སེམས་ཀྱི་འཆར་སྒོ་བྱ་བྱེད་སྤྱོད་ལམ་ཐམས་ཅད་ཀྱང་སྐད་ཅིག་གིས་མི་རྟག་པར་འགྱུར་བའི་རྣམ་འགྱུར་ཐམས་ཅད་དྲན་པར་བྱ་སྟེ། རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །ཉེ་བར་ལེན་པའི་ལུས་འདི་འཇིག་ཅིང་བྲལ། །དུས་བཞི་མི་རྟག་འགྱུར་ཞིང་སྙིང་པོ་མེད། །རྒས་ཤིང་རྒུད་ལ་འཆི་བའི་ཆོས་ཅན་ཏེ། །ཐང་གཅིག་ཡུད་ཙམ་སྐད་ཅིག་གནས་པ་མེད། །སྐྱེས་བུའི་ཚེ་འགྲོ་རི་གཟར་འབབ་ཆུ་འདྲ། །ཞེས་པའི་ཚུལ་བསམས་ནས་སང་གི་བྱ་བ་དང་ཚེ་ཕྱི་མ་གང་སྔ་མི་ཤེས་པར་འདུག །དེས་ན་ད་ལྟ་རང་དབང་ཡོད་དུས་ཕྱི་བཤོལ་མེད་པར་ཆོས་ལ་འབད་པར་བྱ་དགོས་ཏེ། ཀླུ་སྒྲུབ་ཀྱིས། མགོའམ་གོས་ལ་གློ་བུར་མེ་ཤོར་ན། །དེ་དག་ལྡོག་སླད་བགྱི་བ་བཏང་ནས་ཀྱང༌། །ཡང་སྲིད་མེད་པར་བགྱིད་སླད་འབད་འཚལ་ཏེ། །དེ་ལས་ཆེས་མཆོག་དགོས་པ་གཞན་མ་མཆིས། །ཞེས་གསུངས་པ་ལྟར་ཚེ་འདིའི་ཕུན་ཚོགས་ཐམས་ཅད་གཉིད་ཐུན་གཅིག་གི་རྨི་ལམ་གྱི་བདེ་བ་ལྟར་ཤེས་པས་(༡༢)ཡིད་ཕྱུངས་ཏེ། དེ་རིང་ཉིད་ནས་འཆི་ཚིགས་ཚགས་སུ་ཆུག་པ་བྱ་དགོས། ཤི་ནས་སྐྱེ་བ་མི་ལེན་ན་དེར་ཟད་དེ། སྐྱེ་བ་ལེན་དགོས། དེ་ཡང་ངན་འགྲོ་དང་བདེ་འགྲོ་གཉིས་ལས་མ་འདས། གལ་ཏེ་ངན་འགྲོར་སྐྱེས་ན་ངན་སོང་གསུམ་ནི་བཟོད་དཀའི་སྡུག་བསྔལ་དོས་དྲག་ཅིང་གཉུག་རིང༌། བདེ་འགྲོར་སྐྱེས་ན་སྡུག་བསྔལ་གྱི་སྡུག་བསྔལ་དང༌། འགྱུར་བའི་སྡུག་བསྔལ་དང༌། འདུ་བྱེད་ཀྱི་སྡུག་བསྔལ་རྣམས་ཀྱིས་བར་མེད་དུ་མནར་བས་འཁོར་བའི་གནས་མཐོ་དམའ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་ཏེ། དྲན་པ་ཉེར་གཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་ཕོངས་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཐུང་བས་ཉམས། །ལྷ་མིན་འཐབ་ཅིང་རྩོད་པས་ཉམས། །ལྷ་རྣམས་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་པས་སྡུག་བསྔལ་ཅན་གྱི་འཁོར་བ་དེ་ལས་ནག་ཅན་བཙོན་དོང་ནས་འབྲོས་པ་ལྟར་བྱེད་དགོས། དེ་ལས་ཐར་བར་བྱེད་པའི་ཐབས་ཀྱང་ལས་འབྲས་ཀྱི་བླང་དོར་མ་ནོར་བ་ལ་རག་ལུས་ཏེ། རྒྱུ་དགེ་སྡིག་གཉིས་ལས་འབྲས་བུ་བདེ་བ་དང་སྡུག་བསྔལ་སོ་སོར་སྨིན་པར་ངེས་པས་མི་དགེ་བ་བཅུ་སོགས་མི་དགེ་བ་ཕྲ་མོ་ཙམ་ཡང་སྲོག་དང་བདོས་ནས་སྤོང་ཞིང༌། དགེ་བ་བཅུ་སོགས་དགེ་བའི་ལས་ཕྲ་མོ་ཡང་ཅི་ནུས་སུ་སྒྲུབ་པ་དང༌། ལུང་མ་བསྟན་གྱི་བྱ་བ་ཐམས་ཅད་ཀྱང་དགེ་བའི་ལམ་སྲོལ་དུ་ཅི་ཆུག་ལ་འབད་པར་བྱ་སྟེ། རིན་ཆེན་ཕྲེང་བ་ལས། མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་བ་ཐམས་ཅད་དང༌། །རྣམ་པ་ཀུན་ཏུ་དགེ་བ་དག །ཅེས་གསུངས་པ་ལྟར་ཤེས་པར་བྱའོ། །

གསུམ་པ་དེ་དང་རྗེས་འབྲེལ་སྐྱབས་འགྲོ་ནི། དཔེར་ན་ནག་ཅན་བཙོན་དོང་དུ་ཆུག་པ་ཆད་ལས་སྣ་ཚོགས་ཀྱིས་(༡༣)བར་མེད་དུ་བཅད་པས་ཉམ་ཐག་ཅིང་མཐར་གསོད་པར་ཡང་ཉིན་རེ་བཞིན་ཇེ་ཉེ་ཇེ་ཉེར་སོང་བས་འཇིགས་སྐྲག་གི་སྡུག་བསྔལ་བཟོད་དཀའ་བས་ཉེན་པ་ན། དེ་ལས་སྐྱོབ་ནུས་པའི་རམ་ཟླ་ཅི་རྙེད་ཕ་འབོད་མ་འབོད་བྱེད་པ་བཞིན་དུ། རང་ཅག་རྣམས་ཀྱང་མི་དགེ་བཅུ་སྤོང་གི་ཚུལ་ཁྲིམས་སོགས་དགེ་བའི་ལས་འབྲས་ཀྱིས་རེ་ཞིག་བདེ་འགྲོར་སྐྱེས་ཀྱང་སྡུག་བསྔལ་ཐམས་ཅད་སྤངས་པའི་ཐར་པའི་གོ་འཕང་མ་ཐོབ་ན་སྔར་བྱས་ཀྱི་དགེ་བའི་འཕེན་པ་ཟད་ནས་སླར་ཡང་ངན་སོང་དུ་ལྷུངས་ཏེ་ཡུན་རིང་ལ་དོས་དྲག་པའི་སྡུག་བསྔལ་མི་བཟོད་པ་སྣ་ཚོགས་མྱོང་དགོས་པར་འདུག །སྡུག་བསྔལ་དེ་ལས་སྐྱོབ་ནུས་པ་ནི་དཀོན་མཆོག་རིན་པོ་ཆེ་རྣམ་པ་གསུམ་མ་གཏོགས་གཞན་སུ་ཡང་མེད་ཅིང༌། དེ་ཡང་རང་ལ་དངོས་སུ་སྣང་བའི་སངས་རྒྱས་ནི་བླ་མ་ཡིན་ཏེ། སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་དབྱེར་མེད་པའི་ཕྱིར། དེས་ན་སྐྱབས་གནས་དཀོན་མཆོག་རིན་པོ་ཆེ་རྣམ་པ་གསུམ་ཁོ་ན་ལ་སྐྱབས་དང་རམ་ཟླ་ཞུ་སྙམ་དུ་ཞེ་ཐག་པ་ནས་བསམས་ཏེ། ལུས་སེམས་རྣལ་དུ་ཕབ་ནས་རང་ཉིད་གང་དུ་གནས་པའི་ས་ཕྱོགས་འདི་ཉིད་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་མཛེས་ཤིང་ཡིད་དུ་འོང་བའི་དབུས་སུ་དཔག་བསམ་གྱི་སྡོང་པོ་ཡལ་ག་ལྔ་པ་ལོ་འདབ་དང་མེ་ཏོག་འབྲས་བུ་ཕུན་སུམ་ཚོགས་པས་ནམ་མཁའི་དབྱིངས་ཁྱབ་པའི་དབུས་སུ་སེང་གེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཉི་ཟླ་བརྩེགས་པའི་གདན་ལ་རྩ་བའི་བླ་མ་ཨོ་རྒྱན་རྡོ་རྗེ་འཆང་ཡུམ་དང་བཅས་པའི་རྣམ་པ་ཅན་ལ་བརྒྱུད་པའི་བླ་མ་རྣམས་དང་ཡི་དམ་ཞི་ཁྲོའི་ཚོགས་ཀྱིས་བསྐོར་བ། མདུན་གྱི་ཡལ་གའི་དབུས་སུ་སངས་རྒྱས་ཤཱཀྱ་ཐུབ་པ་ལ་ཕྱོགས་བཅུ་དུས་གསུམ་གྱི་སངས་རྒྱས་མཆོག་གི་སྤྲུལ་པའི་སྐུ་རྣམས་དང༌། གཡས་ཀྱི་ཡལ་གར་འཇམ་དཔལ་ལ་སོགས་པ་བྱང་ཆུབ་སེམས་དཔའི་དགེ་འདུན་རྣམས་དང༌། གཡོན་གྱི་ཡལ་གར་ཤཱ་རིའི་བུ་ལ་སོགས་པ་ཉན་ཐོས་ཀྱི་དགེ་འདུན་(༡༤)འཕགས་པའི་ཚོགས་རྣམས་དང༌། རྒྱབ་ཀྱི་ཡལ་གར་ཆོས་དཀོན་མཆོག་རྣམས་གླེགས་བམ་བརྩེགས་པའི་རྣམ་པ་ཅན་དང༌། དེ་རྣམས་ཀྱི་བར་མཚམས་ཐམས་ཅད་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པས་བར་མེད་དུ་གང་བ་ཐམས་ཅད་ཀྱང་རང་ཉིད་ལ་དགྱེས་ཤིང་བརྩེ་བའི་ཚུལ་དུ་བཞུགས་པར་བསམ་ཞིང༌། དེ་ནས་རང་དང་ལྷན་ཅིག་ཏུ་མཁའ་མཉམ་གྱི་སེམས་ཅན་ཐམས་ཅད་སྐྱབས་ཡུལ་རྣམས་ཀྱི་ཡོན་ཏན་དང་ཐུགས་རྗེ་དྲན་པའི་མོས་གུས་ཀྱི་གདུང་ཤུགས་དྲག་པོས་མ་གྱུར་སེམས་ཅན་ཐམས་ཅད་འཁོར་བ་སྡུག་བསྔལ་གྱི་འཇིགས་པ་དྲག་པོ་ལས་སྐྱོབ་ཏུ་གསོལ་སྙམ་པའི་བསམ་པ་རྩེ་གཅིག་པས་ངག་ཏུ། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང༌། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་དྲུག་གུས་པས་སྐྱབས་སུ་མཆི། །ཞེས་སྐྱབས་འགྲོ་ཅི་ནུས་སུ་བྱས་ནས་ཐུན་འཇོག་ཁར་སྐྱབས་ཡུལ་རྣམས་ཀྱི་སྐུ་ལས་འོད་ཟེར་བྱུང་བས་སེམས་ཅན་ཐམས་ཅད་དག་པའི་ཞིང་དུ་དྲངས། མཐར་སྐྱབས་ཡུལ་རྣམས་འོད་ཀྱི་རྣམ་པར་བསྡུས་ནས་རང་ལ་ཐིམ་པར་བསམ་ཞིང༌། རང་བཞིན་དག་པའི་དགེ་བ་འདིས། །འཁོར་བ་ངན་སོང་དོང་སྤྲུགས་ནས། །སྲིད་ན་འགའ་ཡང་མི་གནས་པ། །ཐམས་ཅད་སངས་རྒྱས་མྱུར་ཐོབ་ཤོག །ཅེས་དགེ་བ་བསྔོ། ཉལ་བའི་ཚེ་སྐྱབས་ཡུལ་མ་བསྡུས་པ་དེ་ཉིད་ལ་མགོ་ཕྱོགས་ནས་མོས་གུས་རྩེ་གཅིག་པ་གཉིད་དང་བསྲེ་བར་བྱ་ཞིང༌། སྐྱབས་འགྲོའི་ཕན་ཡོན་དང་བསླབ་བྱ་གོ་དོན་རྣམས་ཀྱང་ཉན་པ་པོའི་བློ་དང་འཚམས་པར་ཅི་རིགས་པ་བཤད་དོ། །

བཞི་པ་སྙིང་རྗེ་བྱང་སེམས་བསྒོམ་པ་ནི། རྟེན་སྙིང་རྗེ་དང༌། བརྟེན་པ་བྱང་ཆུབ་ཀྱི་སེམས་ལས། དང་པོ་ནི། ཕྱོགས་བཅུའི་ནམ་མཁའ་ཇི་ལྟར་གཞལ་ཡང་མཐའ་མེད་པ་ལྟར་འཇིག་རྟེན་གྱི་ཁམས་ལའང་མཐའ་མེད། དེ་ཐམས་ཅད་རིགས་དྲུག་(༡༥)གི་སེམས་ཅན་གྱིས་གོ་མཚམས་མེད་པར་ཁྱབ། སེམས་ཅན་དེ་རྣམས་ཀྱིས་བདག་གི་མ་མ་བྱས་པ་ནི་གཅིག་ཀྱང་མེད་དེ། བདག་གི་སྐྱེ་བ་ལ་གྲངས་མེད་པ་བཞིན་དུ་སེམས་ཅན་རྣམས་ཀྱིས་བདག་གི་མ་བྱས་པ་ལ་ཡང་གྲངས་དང་མཐའ་མེད། མ་བྱས་རེས་བཞིན་ཚེ་འདིའི་མས་ཇི་ལྟར་བསྐྱངས་པ་བཞིན་དུ་གནོད་པ་ཐམས་ཅད་ལས་བསྐྱབས། བརྩེ་བའི་སེམས་ཀྱིས་ནི་བཟུང༌། བྱམས་པའི་སྤྱོད་ལམ་གྱིས་བསྐྱངས་ནས་མཐའ་དང་ཚད་མེད་པའི་ཕན་པ་སྒོ་དུ་མ་ནས་བཏགས་པའི་དྲིན་ཅན་གྱི་མ་ཤ་སྟག་ཡིན་པ་ལ། ད་ལྟའི་མ་དང་སྐྱེ་བ་གཞན་གྱི་མ་ཞེས་ཉེ་རིང་རིགས་སུ་གཅོད་པ་ཅི་ལ་རིགས། དེ་ཐམས་ཅད་འདོད་པ་བདེ་བ་འདོད་ཀྱང་རྨོངས་ཤིང་ཐབས་ལ་མི་མཁས་པ་སྡུག་བསྔལ་གྱི་རྒྱུ་དང་འབྲས་བུ་ཅི་རིགས་པ་ལ་རྟག་ཏུ་སྤྱོད་ཅིང་མནར་བས་ཉམ་ཐག་པར་གྱུར་པའི་རྣམ་འགྱུར་ཡིད་ལ་དྲན་པས་བཟོད་དུ་མེད་པའི་སྙིང་རྗེ་མཆི་མ་འཁྲུག་པ་ཙམ་གྱིས་བློ་བསྐུལ་ནས། གཉིས་པ་ནི། ཐོག་མ་མེད་པ་ནས་དྲིན་གྱིས་བསྐྱངས་པའི་མ་འདི་དག་མ་རིག་པའི་མུན་པས་ནི་འཐོམས། ཉོན་མོངས་པས་ཡིད་དཀྲུགས་པས་སྨྱོ། བླང་དོར་ལ་ལྟ་བའི་མིག་དང་བྲལ། དགེ་བའི་བཤེས་ཀྱི་ལོང་འཁྲིད་ནི་མེད། ཉེས་སྤྱོད་ཀྱིས་རྡེག་འཆོས་པས་འཁོར་བ་དང་ངན་སོང་གི་གཡང་སར་ལྷུངས་པ་འདི་རྣམས་ཡལ་བར་བོར་ན་དེ་ལས་ཁྲེལ་ཆུང་བ་སུ་ཞིག་ཡོད། དེས་ན་འདི་དག་འཁོར་བའི་སྡུག་བསྔལ་ལས་བསྒྲལ་ནས་ཐར་བའི་བདེ་བ་ལ་འགོད་དགོས། དེའི་ནུས་པ་ད་ལྟ་བདག་ལ་མི་འདུག་པས་བདག་གིས་འགྲོ་ཀུན་སྒྲོལ་ནུས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་བྱ། དེའི་ཆེད་དུ་ཟབ་མོའི་ལམ་འདི་ཉིད་ཉམས་སུ་བླང་བར་བགྱིའོ། སྙམ་པའི་ལྷག་བསམ་རྩེ་གཅིག་པས། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་(༡༦)བསྐྱེད་དོ། །ཞེས་བརྗོད་ཅིང་དོན་བསམ་པ་ནན་ཏན་དུ་བྱས་པའི་མཐར། དོན་དམ་བྱང་སེམས་ཀྱི་མཚན་ཉིད་སེམས་བསྐྱེད་ཡུལ་སྐྱེད་པ་པོ་བསྐྱེད་པའི་ཀུན་སློང་གསུམ་ཀ་འཁོར་གསུམ་མི་རྟོག་པའི་ཤེས་རབ་ཀྱིས་རྒྱས་བཏབ་ནས་དགེ་བ་བསྔོ་ཞིང༌། འདིར་ཡང་བསླབ་བྱ་ཕན་ཡོན་གོ་དོན་སོགས་སྐབས་དང་སྦྱར་ཏེ་བཤད་དོ། །

ལྔ་པ་རྡོར་སེམས་སྒོམ་བཟླས་ནི། ཟབ་མོའི་ལམ་གྱི་ཉམས་རྟོགས་ཁྱད་པར་ཅན་སྐྱེ་བ་ལ་བར་དུ་གཅོད་པའི་འགལ་རྐྱེན་སྡིག་སྒྲིབ་ཡིན་པས་དེ་ཉིད་སྦྱོང་དགོས། དེ་སྦྱོང་བའི་མཆོག་ནི་རྡོ་རྗེ་སེམས་དཔའི་སྒོམ་བཟླས་ལ་རྣལ་འབྱོར་དུ་བྱ་བ་ཡིན་ཏེ། དེ་ཡང་བྱང་ཆུབ་ཀྱི་སེམས་གཉིས་སྔར་བཞིན་དྲན་པའི་ངང་ལས་རང་གི་སྤྱི་བོར་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཡིག་དཀར་པོ་གསལ་ཞིང་འཚེར་བ། དེ་ཡོངས་སུ་གྱུར་པ་ལས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་ཞི་ཞིང་འཛུམ་པའི་ཉམས་ཅན་རྡོ་རྗེ་དང་དྲིལ་བུ་འཛིན་པ་དར་དང་རིན་པོ་ཆེའི་རྒྱན་ཅན་ཡུམ་རྡོ་རྗེ་སྙེམས་མ་དཀར་དམར་གྲི་ཐོད་འཛིན་པ་དང་སྙོམས་པར་འཇུག་པ། ཡབ་ཀྱི་ཐུགས་ཀར་ཟླ་བའི་སྟེང་དུ་ཧཱུྃ་ཡིག་དཀར་པོ་ཡི་གེ་བརྒྱ་པའི་ཕྲེང་བས་བསྐོར་བར་བསམས་ལ། དཀོན་མཆོག་སྐྱབས་སུ་བཟུང་ནས་བྱང་ཆུབ་ཀྱི་སེམས་དང་ལྡན་པ་རྟེན་གྱི་སྟོབས། སྡིག་པ་མི་དགེ་བའི་ལས་ཐམས་ཅད་ལ་འགྱོད་སེམས་བྱེད་པ་སུན་འབྱིན་པའི་སྟོབས། ཕྱིན་ཆད་སྲོག་ལ་བབས་ཀྱང་མི་བགྱིད་སྙམ་པའི་སྡོམ་སེམས་ཉེས་པ་ལས་ལྡོག་པའི་སྟོབས། སྔར་བྱས་ཀྱི་གཉེན་པོར་རྡོ་རྗེ་སེམས་དཔའི་སྒོམ་བཟླས་བྱེད་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། སྟོབས་བཞི་པོ་ཚང་བའི་བསམ་སྦྱོར་དང་ལྡན་པའི་ངང་ནས་ཐུགས་ཀའི་སྔགས་ཕྲེང་ལ་དམིགས་པ་གཏད་དེ། བཅོམ་ལྡན་འདས་རྡོ་རྗེ་སེམས་དཔའ་མཁྱེན་སྙམ་པའི་མོས་གུས་མཆི་མ་འཁྲུག་པ་ཙམ་དུ་བསྐྱེད་ནས་ཡི་གེ་བརྒྱ་པ་དང༌། ༀ་བཛྲ་(༡༧)སཏྭ་ཧཱུྃ། ཞེས་བཟླས་པས་ཐུགས་ཀའི་ཧཱུྃ་ཡིག་སྔགས་ཕྲེང་དང་བཅས་པ་ལས་ཡེ་ཤེས་ཀྱི་བདུད་རྩི་འོ་རྒྱུན་ལྟ་བུ་བབས། སྐུའི་དབྱིབས་བརྒྱུད་སྦྱོར་མཚམས་ནས། བདག་གི་ཚངས་བུག་ཏུ་ཞུགས་པས་སྡིག་སྒྲིབ་ཐམས་ཅད་རྣག་ཁྲག་དང་དུད་ཁུ་ལ་སོགས་པའི་རྣམ་པས་དབང་པོའི་སྒོ་དང༌། བ་སྤུའི་བུ་ག་ཐམས་ཅད་ནས་ཐོན་པར་བསམ་ཞིང་སྔགས་བརྒྱ་སྟོང་ལ་སོགས་པ་ཅི་ནུས་སུ་བཟླས་པའི་མཐར། མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་མཐོལ་ཞིང་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས་ལུས་ཀྱི་ནང་འཁོར་ལོ་བཞིའི་གནས་རྣམས་བྱང་ཆུབ་སེམས་ཀྱི་བདུད་རྩིས་སྐྱ་མེར་གྱིས་ཁེངས། སྡིག་སྒྲིབ་ཐམས་ཅད་སངས་ཀྱིས་དག་ལུས་སེམས་ཟག་མེད་ཀྱི་བདེ་བས་མྱོས་པར་བསམ་ཞིང༌། རྡོ་རྗེ་སེམས་དཔའ་དགྱེས་ཤིང་འཛུམ་པར་མཛད་དེ། རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ། །ཞེས་གནང་བ་བྱིན་ཏེ་འོད་དུ་ཞུ་བ་རང་ལ་བསྟིམ། རང་ཉིད་རྡོ་རྗེ་སེམས་དཔའ་སྣང་སྟོང་མེ་ལོང་གི་གཟུགས་བརྙན་ལྟར་གསལ་བ་ལ་བློ་བཞག་ནས། མཐར་བདེ་སྟོང་བརྗོད་བྲལ་གྱི་ངང་ལ་མཉམ་པར་བཞག །དེ་ཡང་སྦྱང་བྱའི་སྡིག་སྒྲིབ། སྦྱོང་བྱེད་ཐབས། སྦྱོང་མཁན་སྒྲུབ་པ་པོ་མ་གྲུབ་པ་སྟེ་འཁོར་གསུམ་མི་རྟོག་པའི་ཤེས་རབ་ཀྱིས་རྒྱས་འདེབས་པ་ནི་སྡིག་སྦྱོང་གི་མཆོག་གོ། །མཐར་དགེ་བ་བསྔོ། འདི་ཉིད་སྡིག་པ་དག་པའི་མཚན་མ་མ་མཐོང་གི་བར་དུ་བྱའོ། །

དྲུག་པ་བླ་མའི་རྣལ་འབྱོར་ནི། ཟབ་མོའི་ལམ་གྱི་མཐུན་རྐྱེན་བསོད་ནམས་དང་ཡེ་ཤེས་ཀྱི་(༡༨)ཚོགས་སྟོབས་སུ་བྱ་བའི་ཐབས་མཆོག་ཏུ་གྱུར་པ་ཡིན་ཏེ། ལམ་འདིའི་རྟེན་འབྲེལ་གྱི་གནད་ཐམས་ཅད་འདི་ནས་སྒྲིག་དགོས་པའི་ཕྱིར་རོ། །དེ་ལ་ཚོགས་བསགས་པ་དང་གསོལ་བ་གདབ་པ་གཉིས་ལས། དང་པོ་ནི། མདུན་གྱི་ནམ་མཁའ་སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཉི་ཟླའི་གདན་ལ་རྩ་བའི་བླ་མ་བརྒྱུད་པའི་བླ་མ་ཀུན་འདུས་ཀྱི་ངོ་བོ་དེ་ཉིད་རྣམ་པ་རྡོ་རྗེ་འཆང་ཆེན་པོ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ། ཡུམ་ཕག་མོ་དམར་མོ་གྲི་ཐོད་འཛིན་པ་དང་མཉམ་པར་སྦྱོར་བ། གཉིས་ཀའང་དར་གྱི་ན་བཟའ་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ་ཡབ་རྡོ་རྗེའི་སྐྱིལ་ཀྲུང་དང་ཡུམ་པདྨའི་སྐྱིལ་ཀྲུང་གིས་རོལ་པ་སྐུ་ལ་བདེ་གཤེགས་ཞི་ཁྲོའི་དཀྱིལ་འཁོར་རྫོགས་ཤིང་མཁའ་འགྲོའི་སྤྲིན་ཕུང་འཕྲོ་བ། འོད་ཟེར་རྣམ་ལྔ་རབ་ཏུ་འབར་བའི་ཀློང་ན་བཞུགས་པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས། བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད་སྤྱན་དྲངས་ནས་གཉིས་སུ་མེད་པར་ཐིམ་སྟེ་སྔར་བས་ཀྱང་གཟི་མདངས་འབར་བར་བསམས་ཏེ། བླ་མ་བདེ་གཤེགས་འདུས་པའི་སྐུ། །དཀོན་མཆོག་གསུམ་གྱི་རང་བཞིན་ཉིད། །ཅེས་དང༌། སྡོམ་འབྱུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཉིད། །ཅེས་གསུངས་པ་ལྟར་སྐྱབས་གནས་ཀུན་འདུས་ཀྱི་ངོ་བོར་ངེས་ཤེས་བསྐྱེད་ནས་དེ་ཉིད་ཚོགས་ཞིང་དུ་བྱས་ཏེ་སྐུ་གསུམ་གྱི་མཎྜལ་འབུལ་བ་ལས། དང་པོ་ནི། རིན་པོ་ཆེ་ལ་སོགས་པའི་མཎྜལ་བཟུང་སྟེ། བ་བྱུང་དང་དྲི་བཟང་གི་ཆུས་བྱུག་ཅིང༌། མེ་ཏོག་དང་བཅས་པས་གཡོན་དུ་བསྐོར་ལ། ༀ་བཛྲ་བྷཱུ་མི་ཨཱཿཧཱུྃ། ཞེས་བརྗོད་པས་གསེར་གྱི་ས་གཞིར་བསམ། ༀ་བཛྲ་རེ་ཁེ་ཨཱཿཧཱུྃ། ཞེས་པས་ལྕགས་རི་མུ་ཁྱུད། མེ་ཏོག་གི་ཚོམ་བུ་རིམ་བཞིན་(༡༩)དགོད་པས། དབུས་སུ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང༌། ནུབ་བ་ལང་སྤྱོད། བྱང་སྒྲ་མི་སྙན། ཤར་གྱི་གཡས་གཡོན་དུ་ལུས་དང་ལུས་འཕགས་སོགས་གླིང་ཕྲན་རྣམས་དང༌། གླིང་རྣམས་ཀྱི་ནང་གི་ཤར་སོགས་ཕྱོགས་བཞིར། གླང་པོ། བློན་པོ། རྟ་མཆོག །བཙུན་མོ་རྣམས་དང༌། མེ་སོགས་མཚམས་བཞིར། དམག་དཔོན། འཁོར་ལོ། ནོར་བུ། གཏེར་ཆེན་པོ་རྣམས་དང༌། རི་རབ་ཀྱི་ཤར་དུ་ཉི་མ། ནུབ་ཏུ་ཟླ་བ་རྣམས་ཀྱི་ཚོམ་བུ་བཀོད་པ་སོ་སོའི་རྣམ་པ་གསལ་བ་ལྷ་མིའི་འདོད་ཡོན་མ་ཚང་བ་མེད་པས་གང་བ་དང༌། བདག་གི་ལུས་ལོངས་སྤྱོད་དུས་གསུམ་བསགས་ཡོད་ཀྱི་དགེ་ཚོགས་ཐམས་ཅད་ཕུལ་བར་བསམ་ཞིང༌། རིན་ཆེན་མཎྜལ་ཡིད་འོང་མཆོད་པའི་སྤྲིན། །འདོད་དགུའི་འབྱོར་ཚོགས་དཔག་མེད་དང་ལྡན་པ། །དཔག་ཡས་ནམ་མཁའི་རྒྱན་གྱུར་འདི་ཕུལ་བས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་བརྗོད་ཅིང་ཚོམ་བུ་གསོ་བ་དང་སེམས་ཀྱིས་གསལ་འདེབས་པ་རྣམས་སུམ་ཕྲུགས་སུ་བྱའོ། །དེ་ལྟར་ཚོམ་བུ་ཉེར་གསུམ་མའི་ལུགས་སུ་བྱས་པ་ནི་མཎྜལ་སྟོན་བྱེད་ཀྱི་རྩ་བའི་གཞུང་རྣམས་ཀྱི་རྗེས་སུ་འབྲངས་པ་ཡིན་ལ། ཚོམ་བུ་སོ་བདུན་མ་དེང་སང་ཡོངས་གྲགས་ཀྱི་ལག་ལེན་ལྟར་བྱས་ཀྱང་འགལ་བར་མི་སེམས་སོ། །གཉིས་པ་ནི། ཚོམ་བུ་དགུ་བཀོད་ལ། འོག་མིན་རྣམ་དག་སྟུག་པོ་བཀོད་པའི་ཞིང་ཁམས་ཡེ་ཤེས་རིན་པོ་ཆེའི་གཞལ་ཡས་ཁང་སྒེག་སོགས་འདོད་ཡོན་གྱི་ལྷ་མོ་མཆོད་པའི་སྤྲིན་ཕུང་ནམ་མཁའ་གང་བར་སྤྲོ་བར་དམིགས་ཏེ། འོག་མིན་བདེ་ཆེན་རིན་ཆེན་གཞལ་ཡས་ཁང༌། །སྣ་ཚོགས་མཆོད་པའི་སྤྲིན་གྱི་བླ་རེ་ཅན། །ནམ་མཁའ་གང་བར་དམིགས་ཏེ་ཕུལ་བ་ཡིས། །འགྲོ་ཀུན་ལོངས་སྐུའི་ཞིང་ལ་སྤྱོད་པར་ཤོག །ཅེས་སྔར་བཞིན་སུམ་ཕྲུགས་སུ་འབུལ་ལོ། །གསུམ་པ་ནི། ཚོམ་བུ་ལྔ་བཀོད་ལ། ཆོས་ཉིད་འོད་གསལ་གྱི་ཞིང་ཁམས་རང་(༢༠)བཞིན་རྣམ་པར་དག་ཅིང་ལྷུན་གྱིས་གྲུབ་པའི་ཡོན་ཏན་གྱི་སྣང་ཆ་ཡེ་ཤེས་ཀྱི་རང་འོད་དུ་འཚེར་བ་འཁོར་འདས་རོ་མཉམ་ཆོས་ཀྱི་དབྱིངས་སུ་འབྱམས་ཀླས་པའི་དགོངས་པ་བསྐྱང་ཞིང༌། འོད་གསལ་ལྷུན་གྲུབ་ཡེ་ཤེས་རིགས་ལྔའི་ཞིང༌། །སྐུ་དང་ཐིག་ལེས་ཡེ་ནས་བརྒྱན་པ་འདི། །རང་སྣང་དག་པས་ལེགས་པར་ཕུལ་བ་ཡིས། །ཀུན་བཟང་ཆོས་སྐུའི་ཞིང་ལ་སྤྱོད་པར་ཤོག །ཅེས་འཁོར་གསུམ་དམིགས་པ་མེད་པའི་ཤེས་རབ་ཀྱིས་ཟིན་པར་བྱས་ཏེ་འབུལ་ལོ། །སྤྲོ་ཞིང་ནུས་ན་ཕྱི་ནང་གསང་བའི་མཆོད་པའི་ཁྱད་པར་ཇི་སྙེད་པས་ཀྱང་མཆོད་པར་བྱའོ། །

གཉིས་པ་གསོལ་བ་གདབ་པ་ནི། བླ་མ་དེ་ཉིད་དཀོན་མཆོག་ཀུན་འདུས་ཀྱི་ངོ་བོར་ངེས་ཤེས་བསྐྱེད་ནས། སྐྱོན་རྟོག་གི་བློ་ངན་སྤངས་ཏེ་ཡོན་ཏན་རྗེས་སུ་དྲན་པས་དད་པའི་བློ་སྣ་དྲངས་ཏེ་ཚད་མེད་པའི་དད་པ་དང་མོས་གུས་མཆི་མ་འཁྲུག་པ་ཙམ་དུ་བསྐྱེད་ནས་བླ་བརྒྱུད་ཀྱི་གསོལ་འདེབས་ལོགས་ན་ཡོད་པ་ལྟར་བྱ་ཞིང༌། བསྡུ་ན་བླ་མ་སྐུ་བཞིའི་གསོལ་འདེབས་ཙམ་དང༌། ཁྱད་པར་ༀ་བཛྲ་གུ་རུ་པདྨ་སིདྡྷི་ཧྲཱིཿམ་ཧ་རི་ནི་ས་ར་ཙ་ཧྲི་ཡ་སིདྡྷི་ཕ་ལ་ཨཱཿཧཱུྃ། ཞེས་ཅི་ནུས་སུ་བཟླ་ཞིང༌། ཕྱི་སྣོད་གཞལ་ཡས་ཁང༌། ནང་བཅུད་བླ་མའི་རང་བཞིན། སྒྲ་གྲག་སྔགས་ཀྱི་རང་སྒྲ། དྲན་རྟོག་ཆོས་ཉིད་ཀྱི་འཁོར་ལོ་ལས་མི་འདའ་བར་བྱས་ནས་མཐར་དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐུ་བཞིའི་བདག་ཉིད་དཔལ་ལྡན་བླ་མ་དམ་པ་ལ་གསོལ་བ་འདེབས་སོ། །བདག་ལ་དབང་བསྐུར་བྱིན་གྱིས་རློབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་རློབ་ཏུ་གསོལ། ཀ་དག་གནས་ལུགས་ཀྱི་ལྟ་བ་རྟོགས་པར་བྱིན་གྱིས་རློབ་ཏུ་གསོལ། ལྷུན་གྲུབ་སྣང་བཞིའི་ཡེ་ཤེས་མཐར་ཕྱིན་པར་བྱིན་གྱིས་རློབ་ཏུ་གསོལ། ཞེས་གསོལ་བ་བཏབ་པས་བླ་མ་དགྱེས་ཤིང་འཛུམ་པའི་གནས་གསུམ་གྱི་ཡི་གེ་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། རང་གི་གནས་གསུམ་དུ་རིམ་པར་(༢༡)ཞུགས་ཤིང་ཐིམ་པས་ལུས་ཀྱི་ནང་ཐམས་ཅད་གང་སྒོ་གསུམ་གྱི་དྲི་མ་སྦྱངས། དབང་བཞི་ཐོབ། སྐུ་བཞི་མངོན་དུ་བྱས་པར་བསམ་ཞིང༌། སླར་ཡང་མོས་གུས་གདུང་ཤུགས་དྲག་པོས་གསོལ་བ་བཏབ་པས་བླ་མ་སྤྱི་བོར་བྱོན་ཚད་མེད་པའི་ཐུགས་རྗེས་འོད་དུ་ཞུ་ནས་རང་གི་སྤྱི་བོ་ནས་ཐིམ་པས། རང་གི་སྒོ་གསུམ་དང་བླ་མའི་རྡོ་རྗེ་གསུམ་དབྱེར་མི་ཕྱེད་པ་བདེ་སྟོང་ཟུང་འཇུག་གི་ངང་ལ་ཅི་ནུས་སུ་མཉམ་བཞག་བྱ་ཞིང་དགེ་བ་བསྔོ། དེ་ལྟར་བྱིན་རླབས་ཀྱི་ནུས་པ་ཐོབ་པའི་རྟགས་མ་བྱུང་གི་བར་དུ་འབད་པར་བྱའོ། །དེ་དག་ནི་མདོ་དང་སྔགས་གཉིས་ཀའི་སྔོན་འགྲོ་ཐུན་མོང་བའི་དབང་དུ་བྱས་པའོ། །

གཉིས་པ་ཐུན་མོང་མ་ཡིན་པའི་སྔོན་འགྲོའི་གནས་ལུགས་གཏན་ལ་དབབ་པ་ལ་གསུམ་སྟེ། འཁོར་འདས་རུ་ཤན་དབྱེ་བ། སྒོ་གསུམ་གྱི་སྔོན་འགྲོ། རྣལ་དུ་དབབ་པའོ། །དང་པོ་ལ་རུ་ཤན་དབྱེ་བར་བསྟན་པ་དང༌། ཇི་ལྟར་དབྱེ་བའི་ཚུལ་ལོ། །

དང་པོ་ནི། ཐལ་གྱུར་ལས། འཁོར་འདས་རུ་ཤན་མ་ཕྱེ་ན། །ཁམས་གསུམ་ལུས་ངག་ཡིད་ཀྱིས་ཀྱང༌། །འབྲེལ་པ་ཆོད་པར་མི་འགྱུར་བས། །འཁོར་འདས་རུ་ཤན་དབྱེ་བར་བྱ། །ཞེས་གསུངས་པས། སེམས་ཅན་རྣམས་ཀྱི་ལུས་ངག་ཡིད་གསུམ་གྱི་ཆོས་ཉིད་ཡེ་ནས་རང་བཞིན་གྱིས་རྣམ་པར་དག་ཀྱང་གནས་སྐབས་གློ་བུར་འཁྲུལ་པའི་སྣང་ཞེན་གྱིས་བསྒྲིབས་པས་ཐོག་མ་མེད་པ་ནས་ད་ལྟ་ཡན་ཆད་རིགས་དྲུག་གི་གནས་སུ་བར་མེད་དུ་འཁོར་ཞིང་རིགས་དྲུག་སོ་སོའི་ལུས་ཀྱི་རྣམ་འགྱུར་ངག་གི་སྨྲ་བརྗོད། སེམས་ཀྱི་རྟོག་དཔྱོད། སྡུག་བསྔལ་གྱི་མྱོང་ཚུལ་གྲངས་ཀྱིས་མི་ཆོད་པ་ཞིག་བྱས་ཀྱང་དོན་མེད་པ་འབའ་ཞིག་ཏུ་སོང་མོད། ད་དུང་ཟིན་མེད་ཀྱི་ལས་ལ་ཞེན་ཅིང་ཆགས་པས་ཅི་ཞིག་བྱ། དེས་ན་ད་རེས་འཁོར་འདས་རུ་ཤན་ཕྱེད་པར་བྱས་ཏེ་ཕྱིན་ཆད་འཁོར་བར་སྐྱེ་བའི་གཞི་རྩ་ཆོད་པ་ཞིག་བྱ་དགོས་ཏེ། ཇི་ལྟར་དབྱེ་ན། (༢༢)འཁོར་བའི་ལས་སྣང་དང་རྣམ་པ་མཐུན་པར་ལམ་དུ་བྱས་པས་ལས་ངན་གྱི་མཚང་རྟོགས་ནས་ཕྱིན་ཆད་འཛིན་ཞེན་ལས་གྲོལ་བར་འགྱུར་བའི་ཕྱིར། གསང་སྔགས་ཐུན་མོང་བ་ལས་ཀྱང༌། །རྣམ་རྟོག་ལས་ནི་རྣམ་རྟོག་དང༌། །སྲིད་པ་ཉིད་ཀྱིས་སྲིད་པ་དག །ཇི་ལྟར་རྣ་བར་ཆུ་ཞུགས་པ། །ཆུ་གཞན་གྱིས་ནི་དགུག་པར་བྱ། །དེ་བཞིན་དངོས་པོའི་རྣམ་རྟོག་ཀྱང༌། །རྣམ་པར་ངེས་པར་སྦྱང་བར་བྱ། །ཞེས་སོགས་གསུངས་པ་དང་གནད་གཅིག་གོ། །

གཉིས་པ་ལ་ཕྱི་ནང་གཉིས་ལས། དང་པོ་ཕྱི་ལྟར་དབྱེ་བ་ནི། འདས་རྗེས་ལས། ལུས་ཀྱི་སྔོན་འགྲོ་བྱ་བའི་ཕྱིར། །རིགས་དྲུག་སྤྱོད་པ་སྣ་ཚོགས་སྦྱང༌། །དཀོན་མཆོག་གསུམ་གྱི་སྤྱོད་པའང་སྤྱད། །ཅེས་སོགས་གསུངས་པ་ལྟར། རི་ངོགས་ལུང་སྟོང་སོགས་མིའི་འགྲོ་འོང་མེད་པའི་གནས་དབེན་པར་སོང་ཏེ། གཞི་བདག་ལ་གཏོར་མ་བྱིན་ནས། ད་ནི་སེམས་ཅན་གྱི་དོན་དུ་འཁོར་འདས་རུ་ཤན་ཕྱེ་ལ་ཕྱིན་ཆད་འཁོར་བར་མི་ལྡོག་པར་བྱའོ་སྙམ་དུ་སེམས་བསྐྱེད་ནས། དམྱལ་བ་ལ་ཚ་གྲང༌། ཡི་དྭགས་ལ་བཀྲེས་སྐོམ། དུད་འགྲོ་ལ་བཀོལ་སྤྱོད། མི་ལ་སྐྱེ་རྒ་ན་འཆི། ལྷ་མིན་ལ་འཐབ་རྩོད། ལྷ་ལ་འཕོ་ལྟུང་སོགས་རིགས་དྲུག་གི་བདེ་སྡུག་སྤྱོད་ཚུལ་ཐམས་ཅད་སེམས་ཀྱིས་རང་རྒྱུད་ལ་མྱོང་བར་བསམ་ཞིང༌། ལུས་ཀྱིས་འཕྱོང་རྒྱུག་འགྲོ་འདུག་སོགས་རྣམ་འགྱུར་ཐམས་ཅད་བྱ། ངག་གིས་དེ་དང་དེའི་སྒྲ་སྐད་སྣ་ཚོགས་བརྗོད་པ་སོགས་ཤུགས་འབྱུང་འགག་མེད་དུ་སྤྱད་པས་ངལ་དུབ་འགྱུ་བ་སྤུན་དག་ཏུ་མ་གྱུར་གྱི་བར་དུ་བྱས་ནས་རྗེས་ཤེས་ཀྱི་རང་ངོ་ལ་ལྟ་ཞིང་ངལ་གསོ། ཡང་ལུས་ཀྱིས་བདེ་བར་གཤེགས་པ་ཞི་ཁྲོའི་སྐུའི་རྣམ་འགྱུར་དང༌། ངག་གསང་སྔགས་ཀྱི་སྒྲ་སྐད་ཡིད་དེ་དག་གི་རྣམ་པ་གསལ་བ་དང་ངར་འཛིན་ཅི་ནུས་བྱས་ལ་རྗེས་ཤེས་ཀྱི་རང་ངོ་བསྐྱང་ངོ༌། །དེ་ལྟར་བྱས་པས་ལུས་ལ་ཚ་གྲང་བཀྲེས་སྐོམ་ཆགས་ཞེན་དགག་སྒྲུབ་མེད་པ་དང་ངག་བླ་མའི་གདམས་ངག་གི་ཚིག་དོན་ལ་སྒོམ་(༢༣)བྱུང་གི་ཤེས་རབ་འཆར་བ་དང༌། སེམས་གསལ་སྟོང་འགག་མེད་བདེ་བའི་ཉམས་རྩོལ་མེད་དུ་འཆར་བ་རྣམས་མ་བྱུང་གི་བར་དུ་སྦྱང་ངོ༌། །དེ་དག་གི་དགོས་པ་ནི། ལུས་ངག་ཡིད་གསུམ་གྱི་སྡིག་པ་འདག །བར་ཆད་ཞི། མངོན་ཞེན་ལྡོག །སྐུ་གསུང་ཐུགས་རྡོ་རྗེར་འཚང་རྒྱ་བར་བྱེད་པའོ། །གཞུང་རྩ་བར་ལུས་ངག་ཡིད་གསུམ་རུ་ཤན་སོ་སོར་དབྱེ་བ་དང་སྒོ་གསུམ་གྱི་སྔོན་འགྲོ་སྤེལ་ནས་བྱེད་པར་གསུངས་ཀྱང་རུ་ཤན་དབྱེ་བ་ཁོ་ན་སུམ་ཕྲུགས་སུ་བྱས་ན་ཉམས་ལེན་གནད་འདྲིལ་ཞིང་ཆུན་ཆེ་བར་དགོངས་ནས་བཤད་མ་ཐག་པ་ཉིད་བླ་མ་རྣམས་ཀྱི་ཕྱག་ལེན་ལ་མཛད་དོ། །

གཉིས་པ་ནང་ལྟར་རུ་ཤན་དབྱེ་བ་ལ་དབྱེར་བར་བསྟན་པ་དང༌། ཇི་ལྟར་དབྱེ་བའི་ཚུལ་ལོ། །

དང་པོ་ནི། ཀློང་གསལ་ལས། ནང་གི་འཁྲུལ་རྒྱུ་ཟད་པའི་ཕྱིར། །འཁོར་འདས་རུ་ཤན་ནང་ལྟར་བྱེད། །ཞེས་གསུངས་པས། ཕྱི་ལྟར་རུ་ཤན་དབྱེ་བས་ཕྱི་འཁྲུལ་པའི་རྐྱེན་སྣང་ཟད་ཀྱང༌། ནང་འཁྲུལ་པའི་རྒྱུ་དང་ས་བོན་མ་ཟད་ན་ཞེ་སྡང་སོགས་ཉོན་མོངས་པའི་ཀུན་སློང་གིས་མི་དགེ་བའི་བག་ཆགས་ས་བོན་སོ་སོ་ལ་བཞག་པས་དེ་དང་དེའི་ནུས་པ་སད་པར་བྱས་ཏེ་འབྲས་བུ་རིགས་དྲུག་གི་འཁོར་རྒྱུད་ཆོད་པར་མི་འགྱུར་བས་དེ་ཆོད་པར་བྱ་བའི་ཕྱིར་རོ། །གཉིས་པ་ནི། འདས་རྗེས་ལས། ལུས་འདི་མ་རིག་རྒྱུས་བསྐྱེད་ཕྱིར། །རིགས་དྲུག་ས་བོན་ཉིད་དུ་གནས། །རིག་པ་སྐུ་གསུམ་དངོས་ཡིན་ཕྱིར། །སྐུ་གསུམ་ཡི་གེ་འབྲུ་གསུམ་ཤར། །ཡི་གེ་རྩལ་སྦྱང་རུ་ཤན་དབྱེ། །ཞེས་གསུངས་པ་དང༌། ས་བོན་གནས་ཚུལ་ནི། ཀློང་གསལ་ལས། སྤྱི་བོ་མགྲིན་པ་སྙིང་ག་དང༌། །ལྟེ་བ་གསང་གནས་རྐང་མཐིལ་དུ། །ཨ་སུ་ནྲི་ཏྲི་པྲེ་དུ་གནས། །ཞེས་པས་སྦྱང་གཞི་འགྲོ་བ་རྣམས་ཀྱི་ལུས་ཀྱི་གནས་དྲུག་ཏུ། སྦྱང་བྱ་སྤྱི་བོར་ལྷའི་ས་བོན་ཨ་དཀར་པོ། མགྲིན་པར་ལྷ་མིན་གྱི་ས་བོན་སུ་ལྗང་སེར། སྙིང་གར་མིའི་ས་བོན་ནྲིཿསྔོ་སྐྱ། ལྟེ་བར་དུད་འགྲོའི་ས་(༢༤)བོན་ཏྲི་དམར་ནག །གསང་བར་ཡི་དྭགས་ཀྱི་ས་བོན་པྲེ་དམར་ནག །རྐང་མཐིལ་དུ་དམྱལ་བའི་ས་བོན་དུ་དུད་ཁ་རྣམས་ལ་འགྲོ་བ་དྲུག་གི་བག་ཆགས་རྣམས་ལྷན་སྐྱེས་སུ་གནས་པ་རྣམ་པ་སོལ་དོང་དུ་དུ་བ་འཕྱུར་བ་ལྟར་བསམ་ཞིང༌། སྦྱོང་བྱེད་རིག་པའི་ཡེ་ཤེས་རྡོ་རྗེ་གསུམ་རྣམ་པ་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་མཐིང་ག་རྣམས་བཀྲག་མདངས་འོད་ཟེར་འབར་བར་བསམས་ལ། ཡི་གེ་གསུམ་བཟླས་པའི་རྐྱེན་གྱིས་དེ་ལས་ཡེ་ཤེས་ཀྱི་མེ་རང་འོད་དུ་འབར་བས་ཡི་གེ་དྲུག་བག་ཆགས་དང་བཅས་པ་ཐམས་ཅད་དངོས་མེད་དུ་བསྲེགས། འཁོར་བ་དང་ངན་སོང་གི་རྒྱུ་འབྲས་ཐམས་ཅད་སྦྱངས་ནས་རང་ལུས་དྭངས་གསལ་ཤེལ་གོང་ཕྱིས་པ་ལྟར་བསམ་ཞིང༌། ༀ་ཨཱཿཧཱུྃ་འབུམ་ཚོ་བདུན་དབྱངས་སྙན་པོས་བཟླའོ། །དེས་སྡིག་པ་དག་པའི་རྟགས་དངོས་སམ་རྨི་ལམ་ཅི་རིགས་པར་འབྱུང་ཞིང་ལུས་ངག་ཡིད་གསུམ་ཐ་མལ་གྱི་འཛིན་ཞེན་དག །ལུས་བདེ་ངག་དག་སེམས་གསལ་སྟོང་མི་རྟོག་པའི་ཉམས་མ་ཤར་གྱི་བར་དུ་འབད་པར་བྱ་སྟེ། ཀློང་གསལ་ལས། རུ་ཤན་ནང་ལྟར་སུས་ཕྱེ་བ། །འཁྲུལ་རྒྱུ་འཁོར་བའི་ས་བོན་སྟོངས། །གསུམ་པོ་འཁོར་བར་ལྡོག་པ་མེད། །ཅེས་དང༌། དེ་ལྟར་ས་བོན་མ་ཟད་ན། །འཁོར་བའི་འབྲེལ་ཐག་ཆོད་མི་འགྱུར། །ཞེས་གསུངས་པས་རྒྱུ་ས་བོན་ཟད་ན་དེས་བསྐྱེད་ཀྱི་འབྲས་བུ་མི་འབྱུང་བ་བཞིན་ནོ། །

གཉིས་པ་སྒོ་གསུམ་གྱི་སྔོན་འགྲོ་ལ་གསུམ་ལས། དང་པོ་ལུས་ཀྱི་སྔོན་འགྲོ་ནི། ཐལ་འགྱུར་ལས། རྡོ་རྗེ་སྐྱིལ་མོ་ཀྲུང་བཅས་ཏེ། །ལུས་སྦྱངས་སེམས་ལ་ཕན་པ་འོ། །ཞེས་གསུངས་པས། དེ་ཡང་ལུས་ལ་གནད་དུ་བསྣུན་ན་སེམས་ཀྱི་དྭངས་སྙིགས་ཕྱེད་པར་འགྱུར་བའི་ཕྱིར། རྐང་མཐིལ་གཉིས་སྦྱར་སོར་མོ་བཅུ་ས་ལ་བཙུགས་པུས་མོ་ཕྱིར་བརྒྱངས་སྒལ་ཚིགས་དྲང་པོར་བསྲང༌། ལག་པ་གཉིས་སྤྱི་བོར་མ་རེག་པར་ཐལ་མོ་(༢༥)སྦྱར། གྲུ་མོ་གཉིས་ཐད་སོར་ཕྱིར་བརྒྱང༌། མགྲིན་པ་ཨོལ་མདུད་ནོན་པར་བྱས། ཉ་བཞི་ཤུགས་ཕྱུངས་ནས་བསྒྲིམས་ཏེ་རྡོ་རྗེའི་འདུག་སྟངས་བྱས་པ་བཞིན་དུ་རྡོ་རྗེ་སྔོན་པོ་རྩེ་གསུམ་པ་མེ་འབར་བ་ཞིག་ཏུ་བསྒོམ། དེས་ལུས་ཁོལ་བུར་ན་ཞིང་ཚུགས་མི་ཐུབ་པ་དང་དྲོད་སྐྱེ་ཞིང་སེམས་རྟོག་མེད་དུ་གནས་པར་འགྱུར་རོ། །དེའི་ཚེ་ལུས་རང་བབས་སུ་ཁྲེས་སེ་བསྐྱུར་ལ་སེམས་རྟོག་མེད་ཀྱི་རང་ངོ་བསྐྱང་ངོ༌། །དེ་ཡང་རྡོ་རྗེའི་ཡར་རྩེ་གསུམ་གྱིས་ངོ་བོར་རང་བཞིན་ཐུགས་རྗེ་གསུམ་དང་མར་རྩེ་སྐུ་གསུམ། སྐེད་པ་གཅིག་ཏུ་འདྲིལ་བ་ལམ་དབྱེར་མི་ཕྱེད་པ་མཚོན་པའོ། །དེའི་དགོས་པ་ནི་གསུམ་སྟེ། ཐུན་མོང་དུ་ལུས་ཀྱི་སྡིག་པ་འདག་ཅིང་བར་ཆད་ཞི། ཁྱད་པར་ལུས་ཀྱི་མངོན་ཞེན་ལྡོག་པས་འཁོར་བར་མི་ལྟུང༌། མཐར་ཐུག་སྐུ་རྡོ་རྗེ་སྤྲུལ་པའི་སྐུར་གཉིས་སུ་མེད་པར་འགྱུར་རོ། །

གཉིས་པ་ངག་གི་སྔོན་འགྲོ་ལ་བཞི་སྟེ། ཐལ་འགྱུར་ལས། ངག་ནི་ཧཱུྃ་ཞེས་གནས་པ་ལ། །རྒྱས་གདབ་པ་དང་རྩལ་སྦྱང་ཉིད། །གཉེན་བཙལ་ལམ་དུ་གཞུག་པ་ཡིས། །ཞེས་གསུངས་པའི་དང་པོ་ལ་གཉིས་ཀྱི་ཕྱི་སྣང་བ་ལ་རྒྱས་གདབ་པ་ནི། དབེན་པར་ལུས་གནད་ཆོས་བདུན་བཅས་ཏེ། སྙིང་གར་ཧཱུྃ་སྔོན་པོ་ཞིག་བསྒོམས་པ་གསལ་སྣང་ཐོན་པར་བྱས་ནས་སོ་དང་མཆུ་མ་རེག་ཙམ་དུ་རླུང་དང་ཤེས་པ་ཧཱུྃ་གསུམ་གཅིག་ཏུ་བསྲེས་ནས་ཧཱུྃ་གི་གླུ་སྙན་ལ་རིང་བར་བླངས་པས་སྙིང་གའི་ཧཱུྃ་ལས་ཧཱུྃ་ཡིག་མང་པོ་ཐོལ་ཐོལ་བྱུང༌། སྣ་བུག་གཡས་ནས་ཐོན། ཕྱིའི་སྣང་བ་ཐམས་ཅད་ཧཱུྃ་གིས་མེ་རེ་རེ་ཁེངས་པས་སྣང་བ་ཐམས་ཅད་ཧཱུྃ་གི་རང་བཞིན་དུ་འཆར་བ་ནི་རྒྱས་ཐེབས་པའོ། །དེས་ནི་སྣང་བར་རང་བཞིན་མེད་པར་གྲོལ་བའི་དགོས་པ་ཡོད་དོ། །ཡང༌། ནང་ཕུང་པོ་ལ་རྒྱས་གདབ་པ་ནི། ཡང་ཧཱུྃ་སྔར་ལྟར་བརྗོད་པས་ཕྱི་རོལ་གྱི་ཧཱུྃ་རྣམས་རྣ་བུག་གཡོན་ནས་ཐོགས་པ་མེད་པར་ཞུགས་ལུས་ཀྱི་ནང་ཐམས་ཅད་མེ་རེ་རེ་གང་བར་བསམ་ཞིང་རླུང་བཟུང༌། ལུས་ཧཱུྃ་གིས་གང་བར་རྩོལ་མེད་དུ་འཆར་ཞིང་(༢༦)མི་བདེ་བ་སྙམ་བྱེད་པ་ནི་རྒྱས་ཐེབས་པའོ། །དེས་ནི་ཕུང་པོ་རང་བཞིན་མེད་པར་གྲོལ་བའི་དགོས་པ་ཡོད་དོ། །

གཉིས་པ་ལ་གཉིས་ཀྱི་ཕྱི་སྣང་བ་ལ་རྩལ་སྦྱང་བ་ནི། སྙིང་གའི་ཧཱུྃ་ཡིག་སྔར་ལྟར་གསལ་བ་ལས་ཧཱུྃ་དྲག་པོ་ངར་དང་ལྡན་པར་བརྗོད་པས་སྙིང་གའི་ཧཱུྃ་ལས་ཧཱུྃ་མཐིང་ནག་དྲག་ལ་རྩུབ་པ་རྣོ་ཞིང་མྱུར་བའི་ཤུགས་དང་ལྡན་པ་ཡུལ་ཆེ་ཆུང་གང་ལ་སྤྲོ་བ་དེ་དང་འཚམས་པ་མང་པོ་ཐོལ་ཐོལ་བྱུང་བས་ཕྱི་རོལ་གྱི་སྣང་བ་ཐམས་ཅད་ཐལ་བྱུང་དུ་ཕུག་ནས་ཁྲལ་ཁྲོལ་དུ་སོང་བར་བསམ་ཞིང༌། སྣང་བ་ཐམས་ཅད་ཧཱུྃ་གི་རང་བཞིན་ལས་སང་སེང་དངོས་མེད་དུ་དག་པར་འཆར་བ་ནི་རྩལ་འབྱོངས་པའོ། །དེས་ནི་སྣང་བ་བདེན་མེད་འོད་གསལ་དུ་གྲོལ་བའི་དགོས་པ་ཡོད་དོ། །ནང་ཕུང་པོ་ལ་རྩལ་སྦྱང་བ་ནི། སྔར་ལྟར་ཧཱུྃ་བརྗོད་པས་ཧཱུྃ་ཡིག་མཚན་ཉིད་བཞི་ལྡན་དེས་རང་གི་ལུས་རྒྱབ་མདུན་སྟོད་སྨད་ཐམས་ཅད་ནས་ཐོགས་པ་མེད་པར་ཐལ་བྱུང་དུ་ཕུག་པས་སང་སེང་ཁྲལ་ཁྲོལ་དུ་སོང་བར་བསམ་ཞིང༌། ལུས་ཀྱི་ཤ་ཁོལ་བུར་འཕར་ཞིང་ན་བ་དང༌། ལུས་ཆུ་ཟླ་ལྟར་རང་བཞིན་མེད་པའི་ཉམས་འཆར་ན་འབྱོངས་པའོ། །དེས་ནི་ཕུང་པོ་འཇའ་ལུས་འོད་གསལ་དུ་གྲོལ་བའི་དགོས་པ་ཡོད་དོ། །

གསུམ་པ་མཉེན་བཙལ་བ་ནི། མདུན་དུ་ཤིང་བུ་ལྟ་བུའི་དམིགས་རྟེན་བཙུགས་ཏེ། ངག་གི་ཧཱུྃ་སྙན་ཅིང་རིང་པོར་བརྗོད་པས་སྙིང་གའི་ཧཱུྃ་ལས་ཧཱུྃ་གི་ཕྲེང་བ་བར་མ་ཆད་དུ་བྱུང་དམིགས་རྟེན་གྱི་རྩ་བ་ནས་རིམ་པར་དཀྲིས་ཏེ་རྩེ་མོར་སླེབ་པ་དང་དར་ཅིག་གློད་ལ་ངལ་གསོ། ཡང་རིམ་བཞིན་བཤིག་ནས་ནང་དུ་བསྡུས་ཏེ་སྙིང་གའི་ཧཱུྃ་ལ་རྫོགས་པར་བསྟིམ་ནས་ངལ་གསོ། དེ་ལྟར་རླུང་སེམས་ཧཱུྃ་གསུམ་གཅིག་ཏུ་བྱས་ནས་ཕྱི་ནང་དུ་འགྲོ་ལྡོག་ལ་སྦྱངས་པ་བཞིན་ལམ་དུ་ལོངས་པས་རྣམ་རྟོག་གི་ངར་ཞི་ནས་སེམས་ཤིན་སྦྱངས་ཐོབ་སྟེ་དམིགས་པ་གང་དུའང་བསྒྱུར་ཐུབ་པ་ནི་མཉེན་བཙལ་བའི་དོན་ནོ། །

བཞི་(༢༧)པ་ལམ་དུ་འཇུག་པ་ནི། རང་གི་ལུས་དང་རླུང་སེམས་གཅིག་དྲིལ་ཧཱུྃ་ཡིག་སྔོན་པོའི་རྣམ་པ་ཅན་དུ་བྱས་ལ་མདུན་ན་ཕར་སྲིན་འགྲོས་ལྟ་བུའི་ལམ་ལ་ཞུགས་ནས་སོང་སྟེ་འཁྱོག་མཚམས་སུ་ཅུང་ཟད་ངལ་བསོ་ཞིང༌། རྒྱང་རིང་པོའི་མཐའ་ཚད་མེད་པའི་ཕ་རོལ་དུ་སོང་བར་བསམ་ཞིང་ཧཱུྃ་རིང་པོར་བརྗོད་ལ་རང་བབས་སུ་ངལ་གསོ། ཡང་སྔར་བཞིན་ཚུར་ལོག་ནས་རང་སོར་གནས་པ་ལ་ངལ་གསོ། དེས་ཐོག་མར་དགའ་བ་དང་སྐྱོ་བ་ལ་སོགས་པའི་ཉམས་མཐོ་དམའ་ཅན་དུ་སྐྱེ་ཞིང༌། མཐར་ལུས་སེམས་ཟག་མེད་ཀྱི་བདེ་བས་ཁྱབ་པ་འཆར་རོ། །དེས་ནི་ལུས་ངག་ཡིད་གསུམ་ཡང་དག་པའི་ལམ་སྲོལ་དུ་ཆུག་པས་རྣམ་རྟོག་རང་ཤུགས་སུ་ཆོད་ཅིང་བདེ་གསལ་མི་རྟོག་པའི་ཉམས་བོགས་ཆེད་དུ་སྐྱེ་བས་དེའི་རང་ངོ་བསྐྱང༌། དེ་དག་གི་དགོས་པ་ནི་གསུམ་སྟེ། ཐུན་མོང་དུ་ངག་གི་སྡིག་པ་འདག་ཅིང་བར་ཆད་ཞི། ཁྱད་པར་ངག་གི་མངོན་ཞེན་ལྡོག་པས་འཁོར་བར་མི་ལྟུང༌། མཐར་ཐུག་གསུང་རྡོ་རྗེ་ལོངས་སྤྱོད་རྫོགས་པའི་སྐུར་གཉིས་སུ་མེད་པར་འགྱུར་རོ། །

གསུམ་པ་སེམས་ཀྱི་སྔོན་འགྲོ་ལ་གསུམ་སྟེ། ཐལ་འགྱུར་ལས། སེམས་ནི་དང་པོ་བྱུང་ས་དང༌། །བར་དུ་གནས་དང་ཐ་མར་འགྲོ། །དེ་ལྟར་གསུམ་ལ་བརྟག་དཔྱད་ན། །སེམས་སྦྱངས་སེམས་ཀྱི་གནས་ལུགས་ཤེས། །ཞེས་གསུངས་པས། དང་པོ་བྱུང་ས་ལ་བརྟག་པ་ནི། སེམས་ཞེས་བདེ་སྡུག་ཐམས་ཅད་མྱོང་བ་པོ་རིག་རིག་འགྱུར་འགྱུར་བ་འདི་ཕྱི་ནང་སྣོད་བཅུད་སོགས་གང་ལས་བྱུང༌། ཕྱི་འབྱུང་བཞིའི་དངོས་པོ་གང་རུང་ལས་བྱུང་ངམ་སྙམ་ན། དེ་རེ་རེ་ནས་རྡུལ་ཕྲན་དུ་བཤིག་ནས་བཙལ་བས་ཨེ་རྙེད། ནང་རང་ལུས་ལས་བྱུང་ངམ་སྙམ་ན། དེ་ཡང་ཆ་ཤས་ནས་བཙལ་ནས་རྙེད་དམ། གལ་ཏེ་སྟོང་པ་ལས་བྱུང་ངམ་སྙམ་ན་བྱུང་བའི་ཡུལ་ཨེ་གྲུབ། སྣང་བ་ལས་བྱུང་ངམ་སྙམ་ན་དེའི་དམིགས་ས་ཨེ་རྙེད། (༢༨)མདོར་ན་བཙལ་བྱའི་སེམས་ལ་ཕར་དཔྱད། ཚོལ་མཁན་གྱི་སེམས་ལ་ཚུར་བལྟས་པས་ངོ་བོ་ངོས་བཟུང་ཐམས་ཅད་དང་བྲལ་བའི་རང་ངོ་མ་མཐོང་གི་བར་དུ་བརྩད་བཅད་ཅིང་བསྐྱར་རོ། །

གཉིས་པ་གནས་ས་ལ་བརྟག་པ་ནི། སྔར་བཞིན་ཕྱི་ནང་སྣོད་བཅུད་ལུས་ཀྱི་ཆ་ཤས་སོགས་གང་ལ་གནས། དབྱིབས་དང་ཁ་དོག་བྱེད་ལས་ངོ་བོ་གང་གི་མཚོན་བརྟགས་ཤིང་དཔྱད་པས་དེ་དག་གང་དུ་ཡང་མ་གྲུབ་ན། རྟོགས་བྱེད་ཀྱི་ཤེས་པ་ལ་ཚུར་བལྟས་པས་ཤེས་པ་གསལ་ཞིང་སྣང་ཡང་རང་བཞིན་མ་གྲུབ་པས་གཞི་མེད་རྩ་བྲལ་དུ་གཏན་ལ་མ་ཕེབས་ཀྱི་བར་དུ་བསྐྱར་རོ། །

གསུམ་པ་འགྲོ་ས་ལ་བརྟག་པ་ནི། སེམས་ཝལ་གྱིས་ཤར་ནས་ཡལ་གྱིས་སོང་སྙམ་བྱེད་པ་འདི་གང་དུ་འགྲོ་བརྟགས་པས་ཕྱི་ནང་སྣོད་བཅུད་སྣང་སྟོང་ཡོད་མེད་སོགས་གང་དུ་ཡང་འགྲོ་བའི་ཡུལ་མེད། ཡུལ་ཅན་གྱི་སེམས་ཉིད་ཀྱང་འདི་ཞེས་ངོ་བོ་ངོས་བཟུང་ཐམས་ཅད་དང་བྲལ་བས་འགྲོ་བའི་ཡུལ་དང་འགྲོ་མཁན་གྱི་སེམས་ཞེས་མ་གྲུབ་པས་རིག་སྟོང་འགྲོ་འོང་དང་བྲལ་བར་གཏན་ལ་མ་ཕེབས་ཀྱི་བར་དུ་བསྐྱར་རོ། །

དེ་དག་གི་དགོས་པ་ནི་གསུམ་སྟེ། ཐུན་མོང་དུ་ཡིད་ཀྱི་སྡིག་པ་འདག་ཅིང་བར་ཆད་ཞི། ཁྱད་པར་ཡིད་ཀྱི་མངོན་ཞེན་ལྡོག་པས་འཁོར་བར་མི་ལྟུང༌། མཐར་ཐུག་ཐུགས་རྡོ་རྗེ་ཆོས་ཀྱི་སྐུར་གཉིས་སུ་མེད་པར་འགྱུར་བའོ། །དེ་ལྟར་ཡང་ཀློང་གསལ་ལས། ལུས་ངག་ཡིད་གསུམ་སྔོན་འགྲོ་ནི། །ཐུན་མོང་ཁྱད་པར་མཐར་ཐུག་གི། །དགོས་པ་གསུམ་དུ་ཤེས་པར་བྱ། །ཞེས་གསུངས་པ་ལྟར་དང༌། ཡང་བཤད་མ་ཐག་པའི་དགོས་པ་སྔ་མ་གཉིས་ཐུན་མོང་དང༌། ཕྱི་མ་མཆོག་ཏུ་བྱས་ནས་གཉིས་སུ་ཡང་བཤད་དེ། ཐལ་འགྱུར་ལས། འདི་ལ་དགོས་པ་རྣམ་པ་གཉིས། །ཐུན་མོང་མཆོག་གི་དབྱེ་བས་བརྟག །ཅེས་གསུངས་པ་བཞིན་ནོ། །

གསུམ་པ་རྣལ་དུ་དབབ་པ་ལ་གཉིས། རྣལ་(༢༩)དབབ་དངོས་དང༌། སོར་འཇུག་པའོ། །དང་པོ་ལ་རྣལ་དུ་དབབ་དགོས་པར་བསྟན་པ་དང༌། ཇི་ལྟར་དབབ་པའི་ཚུལ་ལོ། །དང་པོ་ནི། ཀློང་གསལ་ལས། ལུས་ངག་ཡིད་ཀྱི་འབྱུང་འཁྲུགས་པ། །དེ་དག་གྲོལ་ཕྱིར་རྣལ་དུ་དབབ། །ཅེས་གསུངས་པས། དེ་ཡང་འཁོར་བའི་ཆོས་སྤང་བྱའི་རྣམ་རྟོག་དང༌། གཉེན་པོའི་ཆོས་དགེ་བའི་རྣམ་རྟོག་གང་ཤར་ཡང་རྣམ་པ་གང་གསལ་བ་དེ་ལ་ཤེས་པ་རྩེ་གཅིག་ཏུ་གཏད་ནས་བསྒོམས་པས་རྣམ་པར་རྟོག་པ་གནས་འགྱུར་ནས་རྣམ་པར་མི་རྟོག་པར་འགྱུར་ཏེ། དཔེར་ན་ཆུ་རྙོག་མ་ཅན་དེ་ཉིད་གཡོ་མེད་དུ་བཞག་པས་དྭངས་པར་འགྱུར་བ་བཞིན་ནོ། །དེ་ཡང་ཐོག་མར་རྟོག་པ་ནན་གྱིས་བཀག་ན་སེམས་མི་གནས་པའི་ཁར་སླར་གེགས་སུ་འགྲོ་ཞིང་ཏིང་ངེ་འཛིན་སྐྱེད་དཀའ་བར་དགོངས་ནས། མདོ་སྡེའི་རྒྱན་ལས་ཀྱང༌། གང་ཕྱིར་ཆགས་སོགས་དེ་ཉིད་ལ། །ཚུལ་བཞིན་འཇུག་པ་དེ་ཡི་ཕྱིར། །དེ་ཡིས་རྣམ་གྲོལ་འགྱུར་དེས་ན། །དེ་ཡིས་དེ་དག་ལས་ངེས་འབྱུང༌། །ཞེས་དང༌། བརྟག་གཉིས་ལས། ཆགས་པས་འཇིག་རྟེན་འཆིང་གྱུར་ན། །འདོད་ཆགས་ཉིད་ཀྱིས་རྣམ་གྲོལ་འགྱུར། །ཞེས་ཐབས་ལ་མཁས་པར་གསུངས་པ་དང༌། དམིགས་པ་ལ་ནི་བརྟེན་ནས་སུ། །མི་དམིགས་པ་ནི་རབ་ཏུ་སྐྱེ། །མི་དམིགས་པ་ལ་བརྟེན་ནས་སུ། །མི་དམིགས་པ་ནི་རབ་ཏུ་སྐྱེ། །དེ་ཡི་ཕྱིར་ན་དམིགས་པ་ནི། །མི་དམིགས་ངོ་བོ་ཉིད་དུ་འགྲུབ། །དེ་ལྟ་བས་ན་དམིགས་པ་དང༌། །མི་དམིགས་མཉམ་པར་ཤེས་པར་བྱ། །ཞེས་དབུས་མཐའ་ལས་ཀྱང་གསུངས་པ་བཞིན་ཏེ། དེ་ལྟར་སྔར་བཤད་པའི་འཁོར་འདས་རུ་ཤན་དབྱེ་བ་སོགས་ཐ་མལ་གྱི་སྣང་བ་བག་ཆགས་ཀྱི་ཞེན་སྣང་རགས་པ་བློ་ལ་འཆར་བདོ་བ་རྣམས་དང༌། དེ་ནས་ནང་གི་ཤན་འབྱེད་དང་རྒྱས་གདབ་རྩལ་སྦྱོང་སོགས་ཕྲ་བ་རྣམས་ལ་རིམ་གྱིས་བསྡུས་པས་དབང་ཤེས་གཞན་དུ་མི་གཡེང་(༣༠)བར་འཆིང་ཞིང༌། དེས་ཡིད་ཤེས་ཚོགས་དྲུག་གཅིག་ཏུ་འདུ་ཞིང་ཡུལ་གཞན་ལ་འཕྲོ་བའི་སེམས་ཉེ་བར་ཞི་བར་བྱེད། དེ་ནས་ཆོས་འདུས་མ་བྱས་པ་དང་འབྲེལ་བ་ཡུལ་དྲུག་དམིགས་པའི་རྟེན་དེ་ཡང་ཡིད་ལ་མི་བྱེད་པར་རང་ལུགས་སུ་སྣང་བ་དང་སྟོང་པ་དང་སྤང་བྱ་དང་གཉེན་པོའི་མཚན་མ་གང་ལ་ཡང་མི་རྟོག་པར་འཇོག་པ་སྟེ། རྣལ་མ་ནི་མ་བཅོས་པའི་དོན་དང༌། དབབ་པ་ནི་དེ་ལ་རང་བབས་སུ་འཇོག་པའི་ཕྱིར་རྣལ་དུ་དབབ་པའོ། །

གཉིས་པ་ནི། ཐལ་འགྱུར་ལས། འདི་དུས་ལུས་ངག་སེམས་ཀྱི་གནད། །རྣལ་འབྱོར་ལྡན་པས་རྣལ་དབབ་བྱ། །ཞེས་དང༌། འདས་རྗེས་ལས། དེ་ནས་ལུས་ངག་ཡིད་གསུམ་པོ། །རྣལ་དུ་དབབ་ལ་མཁས་པར་བྱ། །ཞེས་གསུངས་པས་བདེ་བའི་མལ་དུ་ལུས་སེམས་སྐྱིལ་ལམ། ཙོག་པུ་སོགས་གང་བདེ་རང་བབས་སུ་བསྒུལ་བསྐྱོད་མེད་པར་བཞག །ངག་སྨྲ་བརྗོད་ལྟ་ཅི་རླུང་ལ་ཡང་བཟོ་བཅོས་མེད་པར་བཞག །སེམས་མི་དགེ་བ་དང་ལུང་མ་བསྟན་དུ་མ་ཟད་དགེ་བའི་རྣམ་པར་རྟོག་པ་ཙམ་ཡང་བཏང་ནས་རང་བབས་སུ་འཇོག་སྟེ་ཆུ་མ་རྙོགས་ན་དྭངས་པ་ལྟར་སྒོ་གསུམ་གཞི་ཐོག་ཏུ་དྭངས་པར་འགྱུར་བས་བསམ་གཏན་དང་ཞི་གནས་ཀྱི་རྒྱུ་ཕུན་སུམ་ཚོགས་པ་འགྲུབ་པ་ཡིན་ནོ། །དེ་ལྟར་ཡང་ཤེར་ཕྱིན་ལས། ཤེས་རབ་ཀྱི་ཕ་རོལ་དུ་ཕྱིན་པ་ལ་རྣལ་འབྱོར་དུ་བྱེད་པ་ནི་ནམ་མཁའ་ལ་རྣལ་འབྱོར་དུ་བྱེད་པའོ། །ཞེས་གསུངས་པ་དང་ཡང་གནད་གཅིག་གོ། །དེས་ནི་གནས་སྐབས་སུ་སྒོ་གསུམ་རྣལ་དུ་ཕེབས་པས་འབྱུང་བ་མི་འཁྲུག་ཅིང་ནད་རྐྱེན་མི་འབྱུང་བ་དང་རང་བཞིན་གྱི་བསམ་གཏན་ལ་གནས། མཐར་ཐུག་སྒོ་གསུམ་གྱི་འཛིན་པ་རང་དག་ཏུ་གྲོལ་བར་འགྱུར་རོ། །

གཉིས་པ་ལ་སོར་གཞུག་པར་བསྟན་པ་དང༌། གཞུག་པའི་ཚུལ་ལོ། །དང་པོ་ནི། ཀློང་གསལ་ལས། ཀ་དག་དོན་ནི་རྟོགས་བྱའི་ཕྱིར། །རྣལ་དུ་ཕབ་ནས་སོར་ནི་འཇུག །ཅེས་གསུངས་པས། སྔར་རྣལ་(༣༡)དུ་ཕབ་པའི་སེམས་ཉིད་གསལ་ལ་མི་རྟོག་པར་གནས་པ་དེ་ཉིད་སྤྱོད་ལམ་ཞི་བ་དང་བར་མ་དང་རྩུབ་མོའི་རྐྱེན་གྱིས་རིམ་བཞིན་ཁྲིད་ནས་གོམས་པ་ལ་བསླབ་པར་བྱ་བ་ཡིན་ཏེ། རལ་གྲིའི་འཁྲུལ་འཁོར་ཤེས་པར་འདོད་པས་དང་པོར་ཤིང་གི་རལ་གྲི་ལ་བསླབ་པ་བཞིན་ནོ། །

གཉིས་པ་ནི། འདས་རྗེས་ལས། ཉན་ཐོས་བྱང་སེམས་ཁྲོ་བོ་ཡི། །ལྟ་སྟངས་ཉིད་ཀྱིས་སོར་ཡང་གཞུག །ཅེས་གསུངས་པས། དང་པོ་ཉན་ཐོས་ཀྱི་ལྟ་སྟངས་ལུས་གནད་ཆོས་བདུན་ལྡན་གྱིས་མི་གཡོ། ངག་མི་སྨྲ་བས་རླུང་གི་འགྲོ་འོང་རང་ཤུགས་སུ་དལ་བར་བཞག །མིག་སྣ་རྩེའི་ནམ་མཁའ་ལ་ཧྲིག་གེ་གཏད་ནས། ཚོགས་དྲུག་གི་ཤེས་པ་ཇི་ལྟར་ཤར་བ་ལས་མི་སྤྲོ་མི་སྡུད་པར་རང་སོར་བཞག་པས་རྐྱེན་སྣང་རང་གི་ངོ་བོས་གསལ་ཡང་མི་རྟོག་པའི་ངང་མ་ཤོར་བ་ཉིད་ལ་བསླབ་པར་བྱ་སྟེ། ཀློང་གསལ་ལས། ཉན་ཐོས་ཞི་བའི་ལྟ་སྟངས་ཀྱིས། །ལུས་ངག་ཡིད་གསུམ་རྣལ་དུ་ཕེབས། །ཞེས་གསུངས་པ་ལྟར་རོ། །གཉིས་པ་བྱང་སེམས་ཀྱི་ལྟ་སྟངས་ནི། གཞན་སྔར་ལྟར་ལས་མིག་བར་སྣང་ལ་ཧྲིག་གིས་བསྒྱུར་ནས་ཧད་པོར་བལྟས་པས་རྐྱེན་དེས་བསྐྱེད་པའི་ཤེས་པ་སྐད་ཅིག་མ་དེ་ཡང་གསལ་ལ་མ་འགགས་པར་ཤར། ཤར་ཙམ་ཉིད་ནས་རང་ཉིད་རང་བཞིན་གྱིས་མ་གྲུབ་པ་སྣང་སྟོང་དབྱེར་མེད་ཆུ་ཟླ་ལྟར་རྟོགས་པར་བྱ་སྟེ། བོ་དྷི་ས་ཏྭའི་ལྟ་སྟངས་ཀྱིས། །རྣལ་ཕེབས་བདེ་བ་ཉིད་ཐོབ་འགྱུར། །ཞེས་གསུངས་པ་ལྟར་རོ། །གསུམ་པ་ཁྲོ་བོའི་ལྟ་སྟངས་ནི། བསམ་གཏན་གྱི་ངང་མ་ཤོར་བ་ཉིད་ལས་ལངས་ཏེ་གོམ་པ་གྱ་ཚོམས་སུ་དོར། མིག་གཡོ་ཞིང་བལྟ། ངག་ཏུ་ཧ་ཧ་ཧི་ཧི་ཞེས་སོགས་བརྗོད་ཅིང་རིག་པ་ཧུར་ཕྱུངས་ཏེ་རྩལ་སྦྱངས་པས་རང་བྱུང་རང་ཤར་སྤྲོས་བྲལ་བསལ་བཞག་མེད་པ་ཆུ་རླབས་རྒྱ་མཚོར་ཐིམ་པ་ལྟར་རྟོགས་པ་ལ་བསླབ་པར་བྱ་སྟེ། དེས་ནི་སྣང་རྐྱེན་ཇི་ཙམ་མང་བ་ཙམ་དུ་(༣༢)སྟོང་ཉིད་ཀྱི་ཡེ་ཤེས་ཀྱང་འཕེལ་བར་འགྱུར་ཏེ་བུད་ཤིང་མང་ན་མེ་ལྕེ་མང་བ་བཞིན་ནོ། །དེ་ལྟར་ཡང༌། ཁྲོ་བོ་ཉིད་ཀྱི་ལྟ་སྟངས་ཀྱིས། །རྣལ་ཕེབས་ཡོན་ཏན་གསུམ་ཡང་འགྲུབ། །ཅེས་གསུངས་པས། ཉན་ཐོས་ཀྱིས་སྒོ་གསུམ་རང་བཞིན་དུ་གནས་པར་བྱེད། བྱང་སེམས་ཀྱིས་གནས་པ་བརྟན་པར་བྱེད། ཁྲོ་བོས་བརྟན་པ་མཐར་ཕྱིན་ནས་གྲོལ་བར་བྱེད་ཅིང༌། དེ་དག་ལས་གནས་སྐབས་སུ་བདེ་གསལ་མི་རྟོག་པའི་ཉམས་དང་ལྡན་པའི་ཞི་གནས་ཁྱད་པར་ཅན་སྐྱེ་བས་སྡུག་བསྔལ་དང་ཉོན་མོངས་རགས་པ་གནོན། མཐར་ཐུག་ལྷག་མཐོང་ཀ་དག་གི་དོན་རྟོགས་པས་ཉོན་མོངས་རགས་པ་རྣམས་འཇོམས་ཤིང་ཡང་དག་པའི་ལམ་ལ་སྲོལ་དུ་འཇུག་པ་ཡིན་ནོ། །འདས་རྗེས་དོན་ཁྲིད་ལས་སྔོན་འགྲོ་གཞན་རྣམས་སྔར་ལྟར་བྱས་ནས། རྣལ་དབབ་སོར་གཞུག་དངོས་གཞིའི་ཁོངས་སུ་བསྡུས་ཏེ་གསུངས་པ་ནི་སེམས་བཞག་ཐབས་ཀྱི་རྩ་བ་ལྟ་བུ་ཡིན་པས་སྐབས་སུ་བབས་པར་འགྱུར་མོད། འདིར་ནི་ཁྲིད་གཞུང་གཞན་རྣམས་དང་མཚུངས་པར་བྱས་སོ། །དེ་ལྟར་སྒོམ་པའི་ཚེ་ཡིད་སྤྲོ་ཞིང་འཇུག་ན་གེགས་ཆུང་ལ་བོགས་ཆེ་བས་བསྒོམ། སུན་ཅིང་མི་སྤྲོ་ན་བསྒོམས་ཀྱང་གེགས་སུ་འགྱུར་ཏེ། རྟ་གདོང་འགྲོགས་ཅན་བཞིན་ཕྱིས་སྒོམ་གྱིས་སྣ་སུན་ནས་ངན་ལང་དུ་འགྲོ་ནས་ཅུང་ཟད་ངལ་གསོས་ནས་རིམ་གྱིས་གོམས་པ་ལ་འཇུག་པར་བྱའོ། །

དོན་གཉིས་པ་ཟབ་ལམ་སྒོམ་པ་དངོས་གཞིའི་ཁྲིད་ལ། ཀ་དག་གི་གནས་ལུགས་སྤྲོས་བྲལ་དུ་སྟོན་པ་ཁྲེགས་ཆོད་ཀྱི་ལམ་དང༌། ལྷུན་གྲུབ་ཀྱི་ཡེ་ཤེས་མངོན་སུམ་དུ་སྟོན་པ་ཐོད་རྒལ་གྱི་ལམ་གཉིས། དང་པོ་གནས་ལུགས་གཏན་ལ་འབེབས་པ་དང༌། རིག་པའི་རང་ངོ་སྤྲད་པའོ། །དང་པོ་ལ་གསུམ་སྟེ། འདས་རྗེས་དོན་ཁྲིད་ལས། དང་པོར་རྟོག་པ་རྩད་བཅད། དེ་ནས་སེམས་ཀྱི་མཚང་བཙལ། (༣༣)དེ་ནས་བྱུང་གནས་འགྲོ་གསུམ་ལ་བརྟག །ཅེས་གསུངས་པས། དང་པོ་རྩད་བཅད་པ་ནི། བྱ་བྱེད་ཐམས་ཅད་ཀྱི་གཞི་ལུས་ངག་ཡིད་གསུམ་པོ་ལས་འཁོར་བར་འཁྱམས་མཁན་དང་སངས་རྒྱས་སུ་འགྱུར་བ་པོ་དེ་གང༌། བདེ་སྡུག་གི་རྟེན་དང་དགག་སྒྲུབ་བྱེད་པ་པོ་དེ་སུ། སྐྱེ་བ་སྔ་ཕྱི་རྒྱུད་འཕེན་དང་འཁོར་མཁན་དེ་ལུས་ངག་ཡིད་གསུམ་སོ་སོ་བས་སམ། ཚོགས་པ་གཅིག་པས་བྱེད་བརྟགས་ཤིང་དཔྱད་པས། དེ་ཐམས་ཅད་ཀྱི་རྩ་བ་སེམས་སུ་ཐག་ཆོད་པ་ནི་རྐུན་པོ་ངོས་ཟིན་པ་ལྟ་བུ་སྟེ། ཀློང་གསལ་ལས། ཉག་གཅིག་འཁོར་འདས་ཀུན་གྱི་གཞི། །ཞེས་དང༌། གསང་བའི་སྙིང་པོ་ལས། གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །ཞེས་དང༌། དོ་ཧ་ལས་ཀྱང༌། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལས་སྲིད་དང་མྱ་ངན་འདས་འགྲོ་བ། །ཞེས་སོགས་གསུངས་པའང་དོན་འདི་ལ་དགོངས་པའོ། །

གཉིས་པ་མཚང་བཙལ་བ་ནི། དེ་ལྟར་འཁོར་འདས་ཐམས་ཅད་ཀྱི་རྩ་བ་སེམས་འདིས་ཡུལ་ཐམས་ཅད་ལ་བདག་ཏུ་འཛིན་ཅིང༌། ང་ཞེས་ཞེན་པར་བྱེད་ན། དེ་དང་འབྲེལ་བ་ཅན་གྱིས་ལུས་དང་ངག་གཉིས་པོའང་གཅིག་གམ། ཐ་དད། གཅིག་ན་ལུས་ངག་མཐོང་ཐོས་སུ་གྲུབ་པ་བཞིན་སེམས་ཀྱང་མཐོང་ཐོས་སུ་ཅིར་མི་འགྱུར། སེམས་མཐོང་ཐོས་སུ་མ་དམིགས་པ་བཞིན་ལུས་ངག་ཀྱང་མཐོང་ཐོས་སུ་མི་རུང་མོད། དེ་དག་སོ་སོར་ཐ་དད་ན། ལུས་རྡུལ་ཕྲན་ཆ་མེད། ངག་རྗེས་མེད་རང་ཡལ། སེམས་བྱ་ལམ་རྗེས་མེད་དུ་སོང་རྗེས། གཅིག་དང་ཐ་དད་གང་དུ་ཡང་གྲུབ་པ་མེད་པའི་མཚང་རིག་པ་སྟེ། དེ་ཡང་ཡུལ་དང་ཡུལ་ཅན་སྐྱེ་འགག་དང་རྟག་ཆད་ལ་སོགས་པ་གང་གི་ཡང་ཕྱོགས་སུ་མ་ལྷུང་བ། ཅི་ཡང་མ་ཡིན་པའི་རིག་པ་གསལ་དྭངས་ཧྲིག་གེ་བ། ཇི་ལྟ་བ་བཞིན་བརྗོད་པའི་ཡུལ་ལས་འདས་པ་ཉིད་འཁྲུལ་མ་འཁྲུལ་(༣༤)གྱི་མཚན་མ་ལས་གདོད་ནས་གྲོལ་བའི་ཕྱིར། མུ་ཏིག་ཕྲེང་བ་ལས། ཐོག་མ་ཉིད་ཀྱི་ཀ་དག་ལ། །འཁྲུལ་ཞེས་ཙམ་དུ་བརྗོད་དུ་མེད། །དེ་བཞིན་མ་འཁྲུལ་པ་ཡང་ཅི། །དེ་ཕྱིར་འཁྲུལ་པ་གདོད་ནས་དག །ཅེས་གསུངས་པ་ལྟར་རོ། །

གསུམ་པ་གནས་ལུགས་ལ་བརྟག་པ་ནི། དེ་ལྟར་གཞིའི་མཚང་མ་རྙེད་ཀྱང་བདག་མེད་པ་ལ་བདག་ཏུ་འཛིན་པའི་སེམས་ཀྱི་ངོ་བོ་འདི་དང་པོ་གང་ནས་བྱུང༌། བར་དུ་གང་ན་གནས། མཐར་གང་དུ་འགྲོ། དེ་ཡང་ཇི་ལྟར་བྱུང༌། ཇི་ལྟར་གནས། ཇི་ལྟར་འགག་སོགས་ལ་བརྟགས་ཤིང་དཔྱད་པས། དེ་དག་གང་དུ་ཡང་མ་གྲུབ་པས་ལྟ་བྱེད་ཀྱི་གཉེན་པོས་སླེབ་ཚེ་བལྟ་བྱའི་ཡུལ་ཉིད་རང་བཞིན་སྟོང་པ་རྩ་བྲལ་དུ་དག་པས་སྡོང་པོ་རྩ་བ་བཅད་ན་ལོ་འདབ་ངང་གིས་བསྐམ་པ་བཞིན། ལྟ་བྱེད་ཀྱི་རིག་པ་ཉིད་ཀྱང་འདི་ཞེས་མི་མཚོན་པ་སོ་སོར་རང་རིག་གི་ངོ་བོ་གདོད་ནས་དག་ཅིང་ལྷུན་གྱིས་གྲུབ་པའི་ཡེ་ཤེས་སུ་རང་ཤར། དེའི་ཚེ་གནས་ན་གནས་པའི་ངོ་བོ་ལ་བལྟ་ཞིང༌། འཕྲོ་ན་འཕྲོ་བའི་ངོ་བོ་ལ་བལྟས་པས་རིག་བྱ་རིག་བྱེད་དང་བྲལ་བའི་རང་རྩལ་འགག་མེད་ཀྱི་རིག་པ་རང་བབས་བསྐྱངས་པས་ཡེ་སྟོང་ཀ་དག་གི་གནས་ལུགས་མངོན་དུ་གྱུར་པ་སྟེ། བཏགས་གྲོལ་ལས། ཕྱི་ནང་ཀུན་བརྟགས་ཡེ་སྟོང་གྲོལ། །ཞེས་དང༌། གཞན་ཡང༌། ཀུན་གཞི་རྣམ་པར་དག་ཤེས་ན། །གཞི་དོན་མངོན་གྱུར་རང་སར་གྲོལ། །ཞེས་གསུངས་པ་བཞིན་ནོ། །འོ་ན་བྱུང་གནས་འགྲོ་གསུམ་ལ་བརྟག་པ་སྔར་ཡང་བྱུང་བས་སོ་སྙམ་ན། སྔ་མ་ནི། ཡུལ་ལ་བརྟགས་ནས་མ་གྲུབ་པར་གཏན་ལ་འབེབས་བྱེད་ཡིན་ལ། འདི་ནི་ཡུལ་ཅན་ལ་བརྟགས་ནས་ངོ་བོའི་ཐོག་ཏུ་འབེབས་པ་ཡིན་ནོ་ཞེས་ཆོས་རྗེ་ཀུན་མཁྱེན་ཆེན་པོས་གསུངས་པ་ལྟར་སྔ་མ་ནི་སེམས་གཞི་མེད་རྩ་བྲལ་དུ་གཏན་ལ་འབེབས་པ་དང༌། ཕྱི་མ་ནི་ཕབ་པའི་དོན་ལ་མཉམ་པར་འཇོག་པའི་གནས་ལུགས་སྟོན་པ་ཡིན་ནོ། །(༣༥)

གཉིས་པ་རིག་པའི་རང་ངོ་སྤྲད་པ་ལ། བྱིན་རླབས་འཕོ་བའི་ཐབས་ཀྱིས་ངོ་སྤྲོད་པ། གནས་ལུགས་ལྟ་བའི་ཐོག་ཏུ་ངོ་སྤྲོད་པ། ཉམས་མྱོང་སྒོམ་པའི་ཐོག་ཏུ་ངོ་སྤྲོད་པ་དང་གསུམ་མོ། །དང་པོ་ནི། ཚོགས་གཏོར་རྒྱ་ཆེར་བཤམས་པས་མཆོད་ཅིང་གསོལ་བ་བཏབ། སློབ་མ་རྣམས་ཀྱིས་མཎྜལ་ཕུལ་ལ་ལུས་གནད་བཅས་ཏེ། ངོ་སྤྲོད་འདེབས་པ་པོ་བསྒོམ་གཞི་བྱས་ནས། སྔར་བླ་མའི་རྣལ་འབྱོར་དུ་བཤད་པའི་དམིགས་རིམ་ཕོག་ལ། དེ་ཡང༌། སྐྱོན་ཀུན་ཟད། ཡོན་ཏན་ཀུན་རྫོགས། དགོས་འདོད་ཀུན་སྩོལ། དཀོན་མཆོག་ཀུན་འདུས་ཀྱི་ངོ་བོར་ངེས་ཤེས་བསྐྱེད་ནས་ཅི་མཛད་ཁྱེད་ཤེས་ཀྱི་བློ་གཏད་ལིངས་བསྐྱུར་ཏེ། རྩ་བརྒྱུད་ཀྱི་བླ་མ་དམ་པ་རྣམས་ཀྱིས་ཚད་མེད་པའི་ཐུགས་རྗེས་དགོངས་ནས་བདག་གི་རྒྱུད་བྱིན་གྱིས་རློབས་ཤིག །ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ་སྙམ་དུ་བཟོད་མེད་མོས་གུས་ཀྱི་གདུང་ཤུགས་མཆི་མ་འཁྲུག་པ་ཙམ་དུ་བསྐྱེད་ཅིག་བྱས་ལ་བླ་མས། ཆོས་སྐུ་ཀུན་ཏུ་བཟང་པོ་ལ་གསོལ་བ་འདེབས་སོ། །ཟབ་ལམ་གྱི་ཉམས་རྟོགས་རྒྱུད་ལ་སྐྱེ་བར་བྱིན་གྱིས་རློབས་ཤིག །ཅེས་སོགས་བརྒྱུད་པའི་བར་ཤར་འདེབས་ཀྱིས་བྱིན་ཕབ་པའི་རྗེས་ལ། བླ་མ་ཉིད་ཚད་མེད་པའི་ཐུགས་རྗེས་འོད་དུ་ཞུ། སློབ་མའི་སྤྱི་བོ་ནས་ཐིམ་པས་སློབ་མའི་སྒོ་གསུམ་དང་བླ་མའི་རྡོ་རྗེ་གསུམ་དབྱེར་མེད་སྤྲོས་བྲལ་གྱི་ངང་ལ་ཤེས་པ་གློད་ནས་འཇོག་ཏུ་བཅུག་པས་བྱིན་རླབས་ཀྱི་འུར་ལངས། སྒོ་གསུམ་གྱི་སྣང་བ་བླ་མར་འདྲེས། རྣམ་རྟོག་མོས་གུས་སུ་ཤར། དེའི་ངང་ལ་ལྷོད་ཀྱིས་གློད་པས་རིག་མདངས་མོས་གུས་སུ་ལམ་མེ། གཤིས་འཛིན་མེད་དུ་ཁྲོལ་ལེར་ཤར་བས་མོས་གུས་རང་རིག་ཏུ་གྲོལ། རང་རིག་སྐྱེ་མེད་ཀ་དག་གི་དབྱིངས་སུ་གྲོལ་བ་ཞེས་བྱ་སྟེ། དེའི་ངང་ལ་བསལ་བཞག་མེད་པར་རང་བབས་སུ་བསྐྱང་དུ་གཞུག་གོ། །འདི་ནི་རྩ་བའི་དངོས་བསྟན་ལ་མེད་ཀྱང་བླ་མ་རྣམས་ཀྱི་ཕྱག་བཞེས་ཉམས་མྱོང་བོགས་ཆོད་དུ་སྐྱེ་བ་(༣༦)ལ་བྱིན་རླབས་ཤིན་ཏུ་ཆེ་བ་ཡིན་ནོ། །

གཉིས་པ་གནས་ལུགས་ལྟ་བའི་ཐོག་ཏུ་ངོ་སྤྲད་པ་ནི། དོན་ཁྲིད་ལས། དེ་ནས་རྣམ་རྟོག་སེམས་སུ་ངོ་སྤྲད། སེམས་སྟོང་པར། སྟོང་པ་སྣང་བར། སྣང་སྟོང་གཉིས་མེད་དུ། གཉིས་མེད་རང་གྲོལ་དུ། དུག་ལྔ་རང་གྲོལ་དུ། ཚོགས་དྲུག་རང་གྲོལ་དུ་ངོ་སྤྲོད་དོ། །ཞེས་རྣམ་གྲངས་བདུན་དུ་གསུངས་པ་ལས། དང་པོ་ནི། སྒོ་གསུམ་རང་བབས་སུ་བཞག་པ་ལས། སྣང་གྲག་གི་ཆོས་གང་ཡང་རུང་བ་ཞིག་ཡིད་ལ་ཝལ་གྱིས་འཆར་དུ་བཅུག་ནས་འདི་ལྟར་སྣ་ཚོགས་སུ་སྣང་བའི་ཆོས་ཐམས་ཅད་རྨི་ལམ་གྱི་སྣང་བ་ལྟར་རང་གི་རྣམ་པར་རྟོག་པའི་འཁྲུལ་ངོ་ཙམ་ལས་ཕྱི་རོལ་ན་བདེན་པར་གྲུབ་པ་རྡུལ་ཙམ་ཡང་མེད་དེ། གཞི་གཅིག་ལའང་རིགས་དྲུག་སོགས་ལས་མི་མཐུན་པའི་འགྲོ་བ་སོ་སོ་ལ་སྣང་བ་རིས་མེད་ཐ་དད་དུ་སྣང་བ་དང༌། སྐྱེས་བུ་གཅིག་ཉིད་ཀྱང་རྣམ་རྟོག་ཐ་དད་པས་དགྲ་གཉེན་དུ་མར་ངེས་པའི་ཕྱིར་སེམས་ལས་རྣམ་རྟོག་ཇི་ལྟར་ཤར་ཡང་སེམས་ཉིད་ལས་མི་གཡོ་ཞིང་ཡུལ་དང་ཡུལ་ཅན་གཉིས་སུ་མེད་པའི་ཕྱིར་རྣམ་རྟོག་སེམས་སུ་ཐག་ཆོད་པ་སྟེ། དེ་ཡང་སེམས་ཀྱི་ངོ་བོ་ནི་སངས་རྒྱས་ཀྱིས་ཀྱང་མ་གཟིགས་མི་གཟིགས། གཟིགས་པར་མི་འགྱུར་ན་མཚན་ཉིད་མཚོན་པར་བྱེད་པ་རྣམ་རྟོག་ལམ་མེར་འཆར་བ་འདི་ལས་ཅི་ཞིག །ཀློང་གསལ་ལས། སེམས་ཀྱི་དྲན་བསམ་རིག་པའི་རྩལ། །སྣང་ཤེས་དག་ཏུ་གྱུར་པ་ཀུན། །རིག་པ་དག་ལས་ལོགས་པ་མེད། །ཅེས་དང༌། གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་གསུངས་པ་ལྟར་རོ། །

གཉིས་པ་ནི། སེམས་དེ་ཡང༌། ཡོད་མེད་སྐྱེ་འགག་རྟག་ཆད་ལ་སོགས་པ་གང་དུ་ཡང་མ་གྲུབ་ཅིང༌། སྤྲོས་པ་ཐམས་ཅད་དང་བྲལ་བས་འདི་ཞེས་མཚོན་དུ་མེད་པའི་ཕྱིར་སྟོང་པ་ཉིད་དུ་ཐག་ཆོད་པ་སྟེ། རྒྱུད་ལས། འགྱུ་བྱེད་ཉིད་ལ་ཚུར་བལྟས་པས། །མ་སྤངས་རང་གྲོལ་བསིར་བུ་འདྲ། །ཞེས་དང༌། བདེ་བ་(༣༧)རབ་འབྱམས་ལས། རྩ་བ་མེད་པའི་སེམས་ཉིད་ནི། །བཙལ་བས་མི་རྙེད་ངོས་བཟུང་མེད། །ཇི་བཞིན་ཡེ་བཞིན་སྟོང་པའི་ངང༌། །བརྗོད་བྲལ་རང་བྱུང་ཡེ་ཤེས་སོ། །ཞེས་གསུངས་པ་ལྟར་རོ། །

གསུམ་པ་ནི། ངོ་བོ་སྟོང་པ་ཉིད་ལས་འགྱུར་བ་མེད་ཀྱང༌། རང་རྩལ་མ་འགགས་པའི་འཆར་སྒོ་ཅིར་ཡང་སྣང་བའི་ཕྱིར། རྒྱུད་ལས། འགག་མེད་རྩལ་ནི་ཅིར་ཡང་འཆར། །སྟོང་གསལ་རིག་ཅིང་འགྱུར་བ་མེད་ཅེས་དང༌། སྟོང་པའི་རང་བཞིན་ཅིར་ཡང་སྣང༌། །སྣང་བའི་མཚན་ཉིད་སྐྱེ་བ་མེད། །ཅེས་གསུངས་པ་ལྟར་རོ། །

བཞི་པ་ནི། དེ་ལྟར་སྣང་བ་ཡང་རྒྱུ་རྐྱེན་གཞན་མེད་དེ། སྟོང་ཉིད་ཀྱི་རང་རྩལ་ཆུ་ནང་ཟླ་གཟུགས་བཞིན་སྣང་སྟོང་གཉིས་མེད་སོ་སོ་རང་རིག་གི་ངོ་བོར་གནས་པ་སྟེ། ཉི་ཟླ་ཁ་སྦྱོར་ལས། དམིགས་པས་སྣང་བའི་ཡུལ་རྣམས་ལ། །རང་བཞིན་མེད་པར་སུས་རྟོགས་པ། །འདི་ལ་སྣང་སྟོང་གཉིས་སུ་མེད། །ཅེས་གསུངས་པ་ལྟར་རོ། །

ལྔ་པ་ནི། དེ་ལྟར་སྣང་སྟོང་གཉིས་མེད་རང་བྱུང་གི་རིག་པ་རང་གསལ་ཧྲིག་གེ་བ་སྤྲོས་བྲལ་འདུས་མ་བྱས་ཤིང་ལྷུན་གྱིས་གྲུབ་པས་ན་སྐུ་གསུམ་གྱི་དབྱིངས་སུ་རང་གྲོལ་བ་སྟེ། ཕྲ་བཀོད་ལས། རྫོགས་སངས་རྒྱས་ནི་རང་རིག་ཉིད། །ངོ་བོ་དུས་གསུམ་འགྱུར་བ་མེད། །ཅེས་གསུངས་པ་ལྟར་རོ། །

དྲུག་པ་ནི། ཞེ་སྡང་ལ་སོགས་པ་དུག་ལྔའི་རྣམ་པར་རྟོག་པ་གང་ཤར་ཡང་དེ་ཉིད་ཀྱི་ངོ་བོ་ཅེར་གྱིས་བལྟས་ནས་ཆམ་གྱིས་བཞག་པ་ཞེ་སྡང་མ་སྤངས་གསལ་སྟོང་ཡེ་ཤེས་སུ་རང་གྲོལ། དེ་བཞིན་དུ་འདོད་ཆགས་བདེ་སྟོང་དང༌། གཏི་མུག་མི་རྟོག་པ། ང་རྒྱལ་དང་ཕྲག་དོག་རང་གསལ་གཉུག་མའི་ངོ་བོ་རྣམས་སུ་འཆར་ཞིང་ཡེ་ཤེས་ལྔའི་ངང་དུ་གྲོལ། དེས་མཚོན་ནས། རྩ་ཉོན་དང༌། ཉེ་ཉོན་ཉི་ཤུ་སོགས་མི་དགེ་བའི་རྟོག་པ་གང་སྐྱེས་ཀྱང་ཐམས་ཅད་རང་ཤར་རང་གྲོལ་དུ་ཤེས་པར་བྱ་སྟེ། ཀློང་གསལ་ལས། ཉག་གཅིག་འཁོར་འདས་ཀུན་གྱི་གཞི། །རང་(༣༨)བྱུང་ཡེ་ཤེས་རང་ལས་བྱུང༌། །དེ་ཤེས་ཡེ་ཤེས་ཙམ་དུ་བརྗོད། །ཅེས་གསུངས་པ་ལྟར་རོ། །

བདུན་པ་ནི། དེ་བཞིན་དུ་གཟུགས་ལ་སོགས་པ་ཚོགས་དྲུག་གིས་བསྡུས་པའི་ཡུལ་དང་ཡུལ་ཅན་གྱི་སྣང་བ་དང་རྟོག་པ་ཕྲ་རགས་གང་ཤར་ལ་བལྟས་པས་རང་བཞིན་མེད་པ་ཡེ་སྟོང་རྩ་བྲལ་ཆེན་པོར་རང་གྲོལ་བ་སྟེ། ཉི་ཟླ་ཁ་སྦྱོར་ལས། དམིགས་པས་སྣང་བའི་ཡུལ་རྣམས་ལ། །རང་བཞིན་མེད་པར་སུས་རྟོགས་པ། །འདི་ལ་སྣང་སྟོང་གཉིས་སུ་མེད། །ཅེས་གསུངས་པ་ལྟར་རོ། །མདོར་ན་གང་ཤར་གྱི་རིག་པ་བཅིང་གྲོལ་ལས་འདས་པའི་རང་བཞིན་སྤྲོས་བྲལ་ཀ་དག་གི་དབྱིངས་སུ་རང་གྲོལ་བས། བསྒོམ་བྱ་སྒོམ་བྱེད་ལས་འདས་པའི་གནས་ལུགས་མཐར་ཕྱིན་པ་སྟེ། ཐལ་འགྱུར་ལས། རང་རིག་རྟོག་པ་ཀུན་བྲལ་བས། །གྲོལ་ལུགས་ཆེན་པོ་བཞི་དང་བཅས། །ཡེ་ནས་གྲོལ་བས་བསྐྱར་གཞི་མེད། །རང་གིས་གྲོལ་བས་གཉེན་པོ་མེད། །ཅེར་གྱིས་གྲོལ་བས་མཐོང་སར་ཡལ། །ཡོངས་སུ་གྲོལ་བས་འབད་རྩོལ་མེད། །ཅེས་གསུངས་པ་བཞིན་ནོ། །དེ་ཡང་སྐྱེ་མེད་དུ་རྩད་བཅད་ནས་ངོ་རང་ཐོག་ཏུ་སྤྲོད་པ་དང༌། འགག་མེད་དུ་གཏན་ལ་ཕབ་ནས་ཐག་གཅིག་ཐོག་ཏུ་བཅད་པ། གཉིས་མེད་དུ་ཐག་བཅད་ནས་རྩལ་གྲོལ་ཐོག་ཏུ་སྦྱང་བ་ཞེས་གསུངས་པ་རྣམས་ཀྱང་བཤད་མ་ཐག་པའི་དོན་ལས་གཞན་མེད་དོ། །

གསུམ་པ་ཉམས་མྱོང་སྒོམ་པའི་ཐོག་ཏུ་ངོ་སྤྲད་པ་ལ། རང་གནས་བསམ་གཏན་གྱི་ངང་ལ་ངོ་སྤྲད་པ་དང༌། རང་མདངས་ཡེ་ཤེས་ཀྱི་རོལ་པ་ལ་ངོ་སྤྲད་པའོ། །དང་པོ་ནི། རིན་ཆེན་སྒྲོན་མ་ལས། ཅོག་གཞག་གསུམ་གྱི་རང་བཞིན་ལས། །ཀ་དག་དོན་ཉིད་མངོན་དུ་འགྱུར། །ཞེས་གསུངས་པས། རི་བོ་ཅོག་གཞག་ལུས་རྣམ་སྣང་གི་ཆོས་བདུན་མི་གཡོ་བར་འཆིང༌། རྒྱ་མཚོ་ཅོག་གཞག་མིག་མདའ་གང་ཙམ་གྱི་ཐད་ཀར་མིག་འབྲས་མི་འགུལ་བར་ཧྲིག་གེ་བལྟ། རིག་པ་ཅོག་གཞག་སེམས་(༣༩)དུས་གསུམ་གྱི་རྣམ་པར་རྟོག་པ་གང་གིས་ཀྱང་མ་བསླད་པ་ད་ལྟའི་ཤེས་པ་གསལ་ལ་ངོས་གཟུང་མེད་པ་རང་བབས་ཆོས་ཉིད་ཀྱི་ངང་ལ་བསལ་བཞག་མེད་པར་འཇོག་ཏུ་བཅུག་ལ། ཀྱཻ་སྐལ་ལྡན་རྣམས་ད་ལྟའི་རིག་པ་རང་གསལ་རྗེན་པ་འདི་ལ་མ་ཡེངས་པར་ལྟོས་ཤིག །དྲི་མེད་དག་པའི་སངས་རྒྱས་ནི། །རང་རིག་ཆོས་སྐུ་འགྱུར་བ་མེད། །སལ་ལེ་སིང་ངེ་ཝལ་ལེ་བ། །སྤྲིན་མེད་སྟོན་ཀའི་ནམ་མཁའ་བཞིན། །མི་འགྱུར་བརྟན་པ་རི་བོ་བཞིན་དུ་ཞོག །མི་གཡོ་དྭངས་པ་རྒྱ་མཚོ་བཞིན་དུ་ཞོག །ཡངས་དོག་བྲལ་བ་ནམ་མཁའ་བཞིན་དུ་ཞོག །གང་ལྟར་གནས་ཀྱང་རིག་པའི་ངང་ཡིན་ཞོག །གང་ལྟར་ཤར་ཡང་རིག་པའི་མདངས་ཡིན་ཞོག །འཕྲོ་གནས་རང་རིག་དྭངས་སངས་ཕྱེད་པར་ཞོག །ཇི་ལྟར་བྱ་རྣམས་གང་དུ་འཕུར་ན་ཡང༌། །མཁའ་ལས་མ་འདས་དེ་བཞིན་རིག་པའི་ངང༌། །ཆོས་རྣམས་རང་གསལ་གཡོ་བ་མེད་པར་ཞོག །ཅེས་པས་སེམས་གསལ་དྭངས་ཀྱི་ངང་ལ་གནས་པ་དེ་ཉིད། ཕཊ་ཅེས་ཡེངས་ལ་བོར་བའི་རྐྱེན་གྱིས་སྔར་གྱི་མི་རྟོག་པའི་དྭངས་དེ་ཞིག་ཀྱང་བྱུང་ཚོར་གྱི་རྟོག་པ་དང་དེར་འཛིན་གྱི་གཉེན་པོ་མེད་པའི་ཤེས་པ་རང་གསལ་རྒྱ་ཡན་གཞི་ཆལ་བ་ཅིག་འཆར་ཏེ། འདི་ཉིད་རིག་པ་རང་གནས་ཀྱི་བསམ་གཏན་ཡིན་པས་ངོ་ཤེས་པར་གྱིས་ཤིག །འདི་ངོས་ཟིན་ཕན་ཆད་ཤེས་པ་གནས་འགྱུ་དགག་སྒྲུབ་བཟང་རྟོག་ངན་རྟོག་གི་དུས་སུ་ཡང་རང་རིག་རང་བབས་ལ་ཅེར་གྱིས་བལྟས་པས་འཛིན་མེད་རང་གནས་ཀྱི་བསམ་གཏན་རྗེན་སངས་ཀྱིས་འཆར་ཏེ་འདི་ཁོ་ན་རྩོལ་མེད་ལྷུན་གྲུབ་ཀྱི་སྒོམ་པ་ཆུ་བོ་ལྟ་བུ་ཡིན་ནོ། །དེ་ལ་ཅུང་ཟད་བརྟན་པ་ཐོབ་ནས་སྤྱོད་ལམ་འཇམ་རྩུབ་བར་མ་རང་ཉམས་དང་སྦྱར་བའི་རྐྱེན་གྱིས་བསམ་གཏན་དང་བསྲེས་པས་བྱ་བརྗོད་དྲན་རྟོག་ཐམས་ཅད་ཆོས་ཉིད་ཀྱི་རོལ་པར་ཤར་ཏེ་མཉམ་རྗེས་ཀྱི་རིས་མེད། ཉིན་མཚན་གྱི་བར་མེད། བླང་དོར་གྱི་ཆོས་མེད། བསྒོམ་(༤༠)བྱ་སྒོམ་བྱེད་ཀྱི་རྩིས་མེད་པར་ཐམས་ཅད་རིག་པའི་རང་མདངས་ཆོས་ཟད་ཀ་དག་གི་དགོངས་པར་ལ་བཟླས་པའོ། །དེ་ལྟར་ཡང་ཐལ་འགྱུར་ལས། ངོ་བོ་ཀ་དག་ཡེ་ཤེས་ལ། །མ་རིག་པ་ཞེས་སྲིད་མེད་པས། །གཅིག་དང་གཉིས་ཞེས་གྲངས་མེད་དེ། །ཡེ་ཤེས་ཙམ་དུའང་གྲུབ་པ་མེད། །ཅེས་གསུངས་པ་བཞིན་ནོ། །

གཉིས་པ་རང་མདངས་ཡེ་ཤེས་ཀྱི་རོལ་པར་ངོ་སྤྲད་པ་ལ་གསུམ་ལས། དང་པོ་གནས་པ་སེམས་ཀྱི་རྒྱན་དུ་ངོ་སྤྲོད་པ་ནི། སྒོ་གསུམ་རང་བབས་སུ་ལྷུག་པར་བཞག་ལ། དགག་སྒྲུབ་ཀྱི་རྟོག་པ་སྣ་ཚོགས་སྤྲོས་ནས་ཆམ་གྱིས་བཞག་པས་རྣམ་རྟོག་གི་སྤྲོས་པ་ཐམས་ཅད་ཉེ་བར་ཞི་བ་གསལ་སྟོང་ལྷན་ཅིག་སྐྱེས་པའི་ཡེ་ཤེས་གདོད་མའི་གནས་ལུགས་ལ་རང་སོར་གནས་པ་རྒྱ་མཚོ་ལ་རླབས་ཞི་བ་དྭངས་ལ་མི་གཡོ་བར་གནས་པ་བཞིན་ཏེ། རང་ཤར་ལས། རྟག་ཆད་གཉིས་ཀྱི་མཐའ་ལས་འདས། །མཐའ་བཞིའི་དྲི་མ་རང་སངས་ཉིད། །ཅེས་གསུངས་ཤིང༌། དེའི་ཚེ་སེམས་སྤྲོས་པ་དང་བྲལ་བ་ཆོས་སྐུ། གསལ་ལ་འཛིན་པ་མེད་པ་ལོངས་སྐུ། སྣ་ཚོགས་འཆར་གཞི་མ་འགགས་པ་སྤྲུལ་པའི་སྐུ་སྟེ་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་ཕྱིར། ནོར་བུ་ཕྲ་བཀོད་ལས། རྫོགས་སངས་རྒྱས་ནི་རང་རིག་ཉིད། །ངོ་བོ་དུས་གསུམ་འགྱུར་བ་མེད། །རང་བཞིན་རྟག་ཏུ་འགག་པ་མེད། །ཐུགས་རྗེ་ཀུན་ལ་རབ་སྣང་ཞིང༌། །ཞེས་དང༌། ཐལ་འགྱུར་ལས། ཡེ་ཤེས་རང་སོར་གནས་པ་ལ། །གསུམ་གྱི་ཚུལ་དུ་དབྱེར་མེད་པའོ། །ཞེས་གསུངས་པ་བཞིན་ནོ། །

གཉིས་པ་འཕྲོ་བ་སེམས་ཀྱི་རོལ་པར་ངོ་སྤྲད་པ་ནི། སེམས་གསལ་ལ་མི་རྟོག་པའི་ངང་ལས་མ་འགགས་པའི་རྩལ་གང་ཤར་གྱི་སྣང་བའི་སྟེང་དུ་དགག་སྒྲུབ་བླང་དོར་མེད་པར་རང་བབས་སུ་བསྐྱངས་པས་རྒྱ་མཚོར་རླབས་ཇི་ལྟར་ཤར་ཡང་རྒྱ་མཚོའི་ངང་ལས་མ་གཡོས་པ་ལྟར་གང་ཤར་གྱི་རྟོག་པ་ཐམས་ཅད་ཆོས་ཉིད་ཀྱི་རོལ་པ་(༤༡)ལས་མི་གཡོ་བ་སྟེ། ཕྲ་བཀོད་ལས། འགག་མེད་རྩལ་ནི་ཅིར་ཡང་འཆར། །ཤར་བ་ཉིད་ནས་རང་སར་གྲོལ། །གྲོལ་ཞེས་ཙམ་དུ་བརྗོད་དུ་མེད། །དེ་ཕྱིར་མ་གྲོལ་བ་ཡང་ཅི། །ཞེས་པ་དང༌། ཤར་དུས་ཉིད་ནས་གཉེན་པོ་ལ་མ་ལྟོས་པར་རང་གྲོལ་བ་སྦྲུལ་མདུད་བཞིན་ཏེ། ཐལ་འགྱུར་ལས། ཇི་ལྟར་ཤར་བའི་རིག་པ་ནི། །སྦྲུལ་མདུད་བཞིན་དུ་རང་གྲོལ་ལོ། །ཞེས་གསུངས་བཞིན་ནོ། །

གསུམ་པ་འཕྲོ་གནས་གཉིས་མེད་དུ་ངོ་སྤྲད་པ་ནི། སེམས་ཉིད་མི་རྟོག་པའི་ངང་ལས་མ་འགགས་པའི་རྣམ་རྟོག་སྣ་ཚོགས་སུ་ཤར་ཡང་དགག་སྒྲུབ་བླང་དོར་མེད་པར་རང་བབས་སུ་བཞག་པས་ཆོས་ཉིད་ཀྱི་ངང་དུ་མི་གཡོ་བར་གནས་པའི་རང་རྩལ་འགག་མེད་དུ་འཕྲོ་བའི་ཕྱིར་འཕྲོ་བ་དང་གནས་པའི་རང་བཞིན་གཉིས་སུ་མེད་པ་རྒྱ་མཚོ་ལས་རླབས་ཇི་ལྟར་ཤར་ཡང་རྒྱ་མཚོའི་ངང་དུ་ཞི་ཞིང་དབྱེར་མི་ཕྱེད་པ་ལྟར། རྣམ་རྟོག་ཇི་ལྟར་ཤར་ཡང་ཐོལ་སྐྱེས་ཐོལ་ནུབ་ཆོས་ཉིད་ཀྱི་ངང་ལས་མི་འདའ་བའི་ཕྱིར་དེ་ལྟར་ཤེས་པར་བྱ་སྟེ། རྨད་བྱུང་ལས། ཇི་ལྟར་རྒྱ་མཚོའི་རྦ་རླབས་ལྟར། །སེམས་ཀྱི་རྦ་རླབས་གཡོ་བ་ཀུན། །གདོད་མ་གཞི་ཡི་རྒྱ་མཚོར་ཐིམ། །ཞེས་དང༌། དོ་ཧ་ལས་ཀྱང༌། ཇི་སྲིད་སེམས་ལས་རྣམ་འཕྲོ་བ། །དེ་ཉིད་མགོན་པོའི་བདག་ཉིད་དེ། །ཆུ་དང་རླབས་དག་གཞན་ཡིན་ནམ། །ཞེས་གསུངས་པ་བཞིན་ཏེ། དེ་ལྟར་ཡང་སེམས་གནས་ན་གདོད་མའི་ངང་དུ་གནས། འཕྲོ་ན་ཡེ་ཤེས་ཀྱི་རོལ་པར་འཆར། མཉམ་ན་གཉིས་མེད་ཀྱི་ངང་དུ་ཡན་པས་ཇི་ལྟར་བྱས་ཀྱང་ཆོས་ཉིད་ཀྱི་རོལ་པ་ལས་མི་འདའ་བའི་ཕྱིར་གནས་པ་མི་བསང༌། འཕྲོ་བ་མི་དགག །མཉམ་པ་མི་སྒྲུབ་སྟེ། ཇི་ལྟར་ཤར་ཡང་དེ་ལྟར་མི་འཛིན་པས་དགག་སྒྲུབ་བླང་དོར་ལས་འདས་པའི་ཆོས་ཉིད་རང་བཞིན་རྫོགས་པ་ཆེན་པོའི་དགོངས་པ་ལ་ངོ་སྤྲད་པའོ། །ཞེས་ངོ་འཕྲོད་པར་གདབ་ཅིང༌། (༤༢)དེ་ཡང༌། སྔར་སྐབས་དེ་དང་དེར་བསྒོམ་བྱའི་དོན་ལ་རིག་ཐོག་ཏུ་ཉམས་མྱོང་སྐྱེས་པ་དེ་ཉིད་ངོ་སྤྲོད་བཏབ་པས་གནས་ལུགས་ཀྱི་ཐོག་ཏུ་སྒྲོ་འདོགས་ཆོད་ན་དེའི་རྒྱུན་མ་ཉམས་པར་བསྐྱངས་པས་རིམ་གྱིས་བརྟན་པ་ཐོབ་པར་འགྱུར་ཤིང༌། ཡང་དུས་དེར་སྒོམ་དོན་ལ་མྱོང་བ་མ་སྐྱེས་པར་གོ་ཡུལ་དུ་སོང་ན་སྐབས་འདིར་ངོ་སྤྲོད་བཏབ་ཀྱང་བྱ་ཤོར་དུ་འགྲོ་བས། སྔར་བཤད་པའི་དམིགས་རིམ་རྣམས་སླར་ཡང་འབད་པས་སྒོམ་ཞིང༌། ཕྱིས་ཉམས་མྱོང་སྐྱེ་ཚུལ་གྱི་ཐོག་ཏུ་ངོ་སྤྲོད་སྦྱར་ནས་བསྟན་ཅིང་ཉམས་སུ་བླངས་པས་རིམ་གྱིས་དོན་ལ་མྱོང་བའི་སྣེ་ཟིན་པར་འགྱུར་རོ། །གཞན་ཡང་སྐབས་འདིར་ཤེས་པར་བྱ་བ་ནི། དེ་ལྟར་ལམ་ཉམས་སུ་ལེན་པའི་ཚེ་སྤྱིར་བསམ་གཏན་གྱི་གེགས་ནི། ཇི་སྐད་དུ། ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང༌། །འདུ་མི་བྱེད་དང་འདུ་བྱེད་དེ། །དེ་དག་ཉེས་པ་ལྔ་ཡིན་ནོ། །ཞེས་དང༌། དེའི་གཉེན་པོ་ནི། དེ་སྤོང་འདུ་བྱེད་རྣམ་པ་བརྒྱད། །གནས་དང་དེ་ལ་གནས་པ་དང༌། །རྒྱུ་དང་འབྲས་བུ་ཉིད་དུ་འོ། །དམིགས་པ་བརྗེད་པར་མ་གྱུར་དང༌། །བྱིང་དང་རྒོད་དང་རྟོག་པ་དང༌། །དེ་སྤང་མངོན་པར་འདུ་བྱེད་དང༌། །ཞི་ཚེ་རྣལ་དུ་འདུག་པའོ། །ཞེས་རྗེ་བཙུན་བྱམས་པས་གསུངས་པ་ཉིད་འདིར་ཡང་ཤེས་པར་བྱ་བ་ཡིན། དེ་ཡང༌། གང་ལ་མཉམ་པར་བཞག་པའི་ཚེ་སྔར་ལས་རྣམ་རྟོག་མང་དུ་སོང་བ་ལྟ་བུ་དང༌། ཡང༌། རེས་འགའ་ཧ་ཕྱད་དེ་བ་ལ་གནས་ཤིང༌། རེས་མི་གནས་པ་དང༌། གནས་ཀྱང་གཏིང་ན་ཡིད་བྱེད་ཕྲ་མོ་མི་ཁེགས་པ་ཞིག་འབྱུང་བས། དེ་གསུམ་ག་ཡང་གནས་པར་རྩོམ་པ་ཡིན་ཞིང༌། འོན་ཀྱང་རྟོག་པ་འཕྲོ་བ་བཀག་པས་མི་ཁེགས་པས། དེ་ལ་ཤེས་པ་མཐའ་མེད་དུ་སྤྲོས་ནས་(༤༣)ཨར་ལ་གཏད་པས་མཐར་རྟོག་པ་མཐུ་རྡུགས་ནས་གནས་པའི་རང་སོ་ཟིན་པ་ཞིག་འོང་བས་དེའི་ངང་ལ་འཇོག་པ་སྟེ། ཇི་ལྟར་རྫིངས་ལས་འཕུར་བའི་བྱ་རོག་བཞིན། །བསྐོར་ཞིང་བསྐོར་ཞིང་སླར་ཡང་དེ་རུ་འབབ། །ཅེས་པ་ལྟར་རོ། །དེ་ཡང་གནས་འགྱུ་ལྟོས་བཞག་ཅན་མ་ཡིན་པ་ཕྱི་ཚོགས་དྲུག་དང་ནང་ཤེས་པ་གཉིས་ཀའི་ཕྱོགས་སུ་མ་ལྷུང་ཞིང་སྐྱེ་འགག་རྟག་ཆད་ལས་འདས་པའི་ཤེས་པ་རང་རིག་རང་གསལ་གྱི་ངོ་བོ་རྩལ་མདངས་འགག་མེད་ཀྱི་སྣང་བ་གུ་ཡངས་ཕྱད་དེ་བ། གསལ་ཧྲིག་སྨྲ་བརྗོད་ཀྱི་ཡུལ་ལས་འདས་པ་དེའི་རང་སོ་ཡེངས་མེད་དུ་བསྐྱངས་པ་ལས་གནས་ལུགས་ཀྱི་རྟོགས་པ་ཇེ་འཕེལ་ཇེ་བརྟན་དུ་འགྱུར་རོ། །ཡང་བྱིང་བ་ཤས་ཆེ་ན་རླུང་རོ་བསལ། ལུས་གནད་སྒྲིམ་ཞིང་ལྟ་སྟངས་གཏོང༌། ཤེས་པ་ལ་ངར་བཏགས། རིག་པ་ཧུར་བཏོན་པས་ཨར་ལ་གཏད། འཕྲོ་ཞིང་རྒོད་ན་ལྟ་སྟངས་དམད། ལུས་གནད་ལྷོད་ཆ་འཚོལ། མིག་ཕབ། ཞེ་གཏིང་ནས་གློད་ལ་རང་བབས་སུ་འཇུག་གོ། །ཡང་སྐབས་རེར་ནམ་མཁའ་དྭངས་ཤིང་སྤྲིན་མེད་པའི་ཚེ། ཉི་མ་ལ་རྒྱབ་ཕྱོགས་པས་ནམ་མཁའི་མཐོངས་སུ་ལྟ་སྟངས་བཅུན་ནས་བལྟས་པས། དཔེ་ཕྱིའི་ནམ་མཁའི་སྟོང་མདངས་ཀྱིས་གོ་ཕྱེ་ནས། དཔེ་ཅན་ནང་ཤེས་པའི་ནམ་མཁའ་རྣམ་པར་དག་པ་ལས། གསང་བ་འོད་གསལ་སྙིང་པོ་ནམ་མཁའ་གསལ་སྟོང་མཐའ་དབུས་ཐམས་ཅད་ལས་འདས་པའི་ཆོས་ཉིད་སྐད་ཅིག་ལ་འཆར་རོ། །དེ་ཡང་ལྟེངས་ན་ཞི་ལྷག་སོ་སོར་རྩལ་སྦྱང༌། བྱིང་ན་གསེང༌། རྒོད་ན་དབབ། སྤྱོད་ལམ་ཀུན་དང་བསྲེ་རྩལ་སྦྱོང་བོགས་འདོན་གྱི་གནད་ཡིན་ནོ་ཞེས་ཆོས་རྗེ་ཀུན་མཁྱེན་ཆེན་པོའི་གསུང་ལས་སོ།། །།

དོན་གཉིས་པ་ལྷུན་གྲུབ་ཀྱི་ཡེ་ཤེས་མངོན་སུམ་དུ་སྟོན་པ་ལ་གསུམ་སྟེ། སྔོན་འགྲོ་སྒོ་གསུམ་གྱི་བྱ་བ་བཏང་བ། དངོས་གཞི་ཟག་མེད་ཀྱི་ཡེ་ཤེས་རྒྱུད་ལ་བརྟེན་པ། རྗེས་སྣང་ཉམས་(༤༤)ཀྱི་འཆར་ཚུལ་བསྟན་པའོ། །དང་པོ་སྒོ་གསུམ་བྱ་བ་གཏོང་བ་ནི། ཀློང་གསལ་ལས། མངོན་སུམ་གནད་དུ་དབབ་པའི་ཕྱིར། །ཕྱི་ནང་གསང་བའི་བྱ་བ་ནི། །ལུས་ངག་ཡིད་ཀྱིས་དགུ་ཕྲུགས་བཏང༌། །ཞེས་གསུངས་པ་ལས། དང་པོ་ལུས་ཀྱི་གསུམ་ནི། ཕྱི་འཇིག་རྟེན་འཁྲུལ་པའི་བྱ་བྱེད་དང་རྣམ་གཡེང་ཐམས་ཅད། ནང་ཕྱག་དང་སྐོར་བ་སོགས་དམན་པའི་དགེ་བ་རྣམས། གསང་བ་རྣམ་གཡེང་སྒུལ་བསྐྱོད་ཐམས་ཅད་སྤངས་ཏེ་གཅིག་པུར་འདུག་པའོ། །གཉིས་པ་ངག་གི་གསུམ་ནི། ཕྱི་འཇིག་རྟེན་གྱི་འཁྲུལ་གཏམ་སྣ་ཚོགས། ནང་ཁ་ཏོན་དང་བཟླས་བརྗོད་ལ་སོགས་པ། གསང་བ་སྨྲ་བརྗོད་ཐམས་ཅད་སྤངས་ཏེ་མི་སྨྲ་བར་གནས་པར་བྱའོ། །གསུམ་པ་ཡིད་ཀྱི་གསུམ་ནི། ཕྱི་འཇིག་རྟེན་གྱི་འཁྲུལ་རྟོག་ཐམས་ཅད། ནང་བསྐྱེད་རྫོགས་ཀྱི་སེམས་འཛིན་སྣ་ཚོགས། གསང་བ་རྣམ་རྟོག་གི་འཕྲོ་འདུ་ཐམས་ཅད་སྤངས་ནས་རྟོག་མེད་ཀྱི་ངག་ལ་གནས་པར་བྱ་ཞིང་དེས་ནི་སྒོ་གསུམ་གནས་པ་དང༌། བརྟན་པ་དང༌། གྲོལ་བར་འགྱུར་བ་སྟེ། འདས་རྗེས་ལས། གནས་བརྟན་གྲོལ་བའི་གདེངས་ཐོབ་ནས། །ཕྱི་ནང་བྱ་བ་ཀུན་བཏང་སྟེ། །ཞེས་གསུངས་པ་ལྟར་རོ། །

གཉིས་པ་དངོས་གཞི་ཟག་མེད་ཀྱི་ཡེ་ཤེས་རྒྱུད་ལ་བརྟེན་པ་ལ་གསུམ་སྟེ། སྒོ་གསུམ་གྱི་གནད་གཟིར་བ། གནད་བཞིས་མངོན་སུམ་རང་ཐོག་ཏུ་དབབ་པ། དབབ་པའི་དོན་ངོ་སྤྲད་པའོ། །དང་པོ་སྒོ་གསུམ་གྱི་གནད་གཟིར་བ་ནི། ཀློང་གསལ་ལས། མངོན་སུམ་གནད་ནི་ལུས་ངག་སེམས། །སོ་སོའི་གནད་རྣམས་ལེགས་པར་བསྟུན། །ཞེས་གསུངས་པས། དང་པོ་ལུས་ཀྱི་གསུམ་ནི། སྔ་མ་ལས། དེ་ཡང་ལུས་ནི་སྐུ་གསུམ་ལས། །རྒྱུན་དུ་འདའ་བར་མི་བྱ་འོ། །ཞེས་གསུངས་ཤིང༌། དེ་ཡང་མུ་ཏིག་ཕྲེང་བ་ལས། སེང་གེའི་ཚུལ་དང་གླང་ཆེན་དང༌། །དྲང་སྲོང་ལྟ་བུར་གནས་པར་བྱ། །ཞེས་པས། ཆོས་སྐུའི་(༤༥)བཞུགས་སྟངས་སེང་གེ་ལྟ་བུ་ནི། ཙོག་པུར་རྐང་མཐིལ་སྤྲད་པུས་མོ་ཕྱིར་གྱེད་ལག་མཐིལ་སར་བཙུགས་ནས་རོ་སྟོད་བསྲང་མཇིང་པ་ཡིད་ཙམ་གྱེན་དུ་གཏོད། མིག་སྨིན་ཕྲག་གི་སྟེང་གི་ནམ་མཁའ་ལ་ཧར་པོར་མི་འགུལ་བར་བལྟ་བའོ། །ལོངས་སྐུའི་བཞུགས་སྟངས་གླང་ཆེན་ལྟ་བུ་ནི། ཁ་སྦུབ་ཏུ་པུས་བྲང་སྦྱར་གྲུ་མོ་ས་ལ་བཙུགས་ཏེ། ལག་མཐིལ་གྱིས་ཨོལ་ཀོ་བསྟེན་པའི་སོར་མོ་འགྲམ་པ་ལ་སྦྱར། སྒལ་ཚིགས་དྲང་པོར་བསྲངས་ནས་ཐད་ཀའི་ནམ་མཁའ་ལ་ཟུར་གྱིས་ཧྲིག་པོར་བལྟ་བའོ། །སྤྲུལ་སྐུའི་བཞུགས་སྟངས་དྲང་སྲོང་ལྟ་བུ་ནི། ཙོག་པུར་འདུག་པའི་རྐང་པའི་ལོང་བུ་གཤིབས། ལག་པ་གཉིས་མཁལ་ཁུང་ངམ་པུས་མོ་ལ་བསྐོར། སྒལ་ཚིགས་དྲང་པོར་བསྲངས་ཏེ་མིག་ཅུང་ཟད་ཕབ་ལ་ཟིམ་བུར་བར་སྣང་ལ་གཏད་དོ། །དེ་ལྟར་བྱས་པས་གནས་སྐབས་སུ་བཞུགས་སྟངས་དང་པོས་འབྱུང་བར་རང་སར་དག །གཉིས་པས་གཡོ་བྱེད་ཀྱི་རླུང་ཟིན། གསུམ་པས་དྲོད་བསྐྱེད་ཅིང་འབྱུང་བ་སྙོམས་པར་བྱེད། མཐར་ཐུག་སྐུ་གསུམ་དུ་གྲོལ་ཏེ་མྱ་ངན་ལས་འདའ་བར་འགྱུར་ཏེ། ཐལ་འགྱུར་ལས། ཆོས་སྐུའི་གཟིགས་སྟངས་སེང་གེ་ཡིས། །འཁྲུལ་པའི་འཇིགས་པ་ཀུན་བྲལ་ནས། །རྡོ་རྗེའི་མིག་གིས་མཐོང་བར་འགྱུར། །ལོངས་སྤྱོད་རྫོགས་སྐུའི་བཞུགས་སྟངས་ནི། །གླང་ཆེན་ཉལ་བ་ལ་བརྟེན་ནས། །ཆོས་ཉིད་དོན་ལ་ལོངས་སྤྱོད་དེ། །པདྨའི་སྤྱན་གྱིས་མཐོང་བར་འགྱུར། །སྤྲུལ་པ་སྐུ་ཡི་བཞུགས་སྟངས་ནི། །དྲང་སྲོང་ཙོག་པུ་ལ་བརྟེན་ནས། །ཆོས་ཉིད་སྣང་བ་རང་སྤྲུལ་ནས། །ཆོས་ཀྱི་མིག་གིས་མཐོང་བར་འགྱུར། །ཞེས་གསུངས་པས་རིག་པའི་ཡེ་ཤེས་ལུས་ལ་གནས་ཀྱང༌། ཐབས་ལུས་གནད་ཀྱིས་མ་གཟིར་ན་དབང་པོའི་མངོན་སུམ་དུ་སྣང་མི་ནུས་ཏེ། སྦྲུལ་ལ་ཡན་ལག་ཡོད་ཀྱང་མ་གཅུས་ན་མི་གསལ་བ་བཞིན་ནོ། །

གཉིས་པ་ངག་གི་གསུམ་ནི། འདས་རྗེས་ལས། ངག་ནི་བསླབ་བྱའི་(༤༦)རིམ་པ་དང༌། །གནས་པ་བརྟན་ཅིང་ལ་ཡང་བཟླ། །ཞེས་གསུངས་པས། དང་པོ་ནི། འཁྲུལ་པའི་གཏམ་བཀག་ནས་སྨྲ་བཅད་ཡུན་ཐུང་བ་ལ་བསླབ། གཉིས་པ་ནི། ཁ་ཏོན་བཟླས་བརྗོད་ཅུང་ཟད་ཙམ་ལས་གཞན་མི་སྨྲ་བར་གནས། །གསུམ་པ་ནི། ལག་གི་བརྡའ་ཙམ་ལས་ཅུང་ཟད་ཀྱང་མི་སྨྲ་བར་ལ་བཟླའོ། །དེ་ལྟར་བྱས་པས་གནས་སྐབས་སུ་འཁྲུལ་པའི་གཏམ་འགགས་པས་ཉོན་མོངས་མི་འཕེལ། མཐར་ཐུག་བརྗོད་མེད་ཀྱི་དོན་ལ་རེག་ཅིང་སངས་རྒྱས་ཀྱི་གསུང་རྡོ་རྗེའི་ཀློང་དུ་མྱ་ངན་ལས་འདའ་བར་འགྱུར་རོ། །

གསུམ་པ་སེམས་ཀྱི་གསུམ་ནི། ཐལ་འགྱུར་ལས། སེམས་ནི་དབྱིངས་ལ་གཏད་པས་འགྲུབ། །ཅེས་དང༌། འདས་རྗེས་ལས། སེམས་ནི་སྨིན་ཕྲག་མཁའ་ལ་གཏད། །སྐུ་གསུམ་རིག་པ་སྟོང་པར་འཆར། །ཞེས་གསུངས་པས་རྐྱེན་དང་བྲལ་བའི་ཕྱིའི་ནམ་མཁའ་སྟོང་སང་ངེ་བ་དེ་ལ་དབང་པོ་མི་འགྱུར་པ་མདུང་ཚུགས་སུ་གཏད་ནས་ནམ་མཁའི་དབུས་སུ་སེམས་ཐིམ་འགྲོ་བ་ལྟ་བུའི་ཤེས་པས་དྲག་ཏུ་བཅུན་པས་ནང་གི་དབྱིངས་རྣམ་དག་སྒྲོན་མ་རིག་པ་སྟོང་གསལ་དུ་ལྷག་གིས་འཆར་བར་འགྱུར་རོ། །དེ་ལྟར་ཡང༌། ཀློང་གསལ་ལས། དེ་ལྟར་སེམས་ཀྱི་གནད་གཟིར་བས། །སྐུ་གསུམ་རིག་པ་སྟོང་པར་འཆར། །ཞེས་གསུངས་ཤིང་དེས་ནི་གནས་སྐབས་སུ་རིག་པའི་ཡེ་ཤེས་མངོན་སུམ་དུ་མཐོང་ཞིང༌། མཐར་ཐུག་ལྷག་མེད་དུ་འཚང་རྒྱ་བར་འགྱུར་རོ། །

གཉིས་པ་གནད་བཞིས་མངོན་སུམ་རང་ཐོག་ཏུ་དབབ་པ་ནི། ཐལ་འགྱུར་ལས། གནད་གསུམ་མན་ངག་འབྲལ་མི་བྱ། །དེ་ཡང་སྒོ་དང་ཡུལ་ཉིད་དང༌། །རླུང་དང་རིག་པའི་གནད་ཉིད་བསྟུན། །ཞེས་དང༌། འདས་རྗེས་ལས། སྒོ་ཡུལ་རླུང་གི་གནད་བསྟུན་པས། །ཡུལ་ལ་ཡེ་ཤེས་མངོན་དུ་སྣང༌། །ཞེས་པས་གནད་བཞིའམ་རླུང་རིག་གཉིས་དབྱེར་མེད་དུ་བྱས་པས་གསུམ་དུ་ཡང་བཤད་མོད། ས་བཅད་ནི་བཤད་པའི་(༤༧)དབྱེ་བ་སྤུ་ཙམ་ལས་དོན་གྱི་གནད་གཅིག་པ་ལས། དང་པོ་འཆར་བྱེད་སྒོའི་གནད་ནི། ཐལ་འགྱུར་ལས། སྒོ་ནི་སྐུ་གསུམ་མིག་གིས་བལྟ། ཞེས་དང༌། ཇི་ལྟར་ན། སྒོ་གནད་ལྡོག་ཕབ་ཟུར་གྱིས་བལྟ། །ཞེས་གསུངས་པས། དེ་ཡང་རིག་པའི་ཡེ་ཤེས་སྙིང་དབུས་ན་བུམ་ནང་གི་མར་མེ་ལྟར་གནས་པའི་ཟེར་གདངས་སྙིང་ནས་མིག་ཏུ་འབྲེལ་པའི་རྩ་དར་དཀར་གྱི་སྐུད་པ་ལྟ་བུའི་ནང་ནས་མིག་གི་སྒོར་འོད་རྩའི་ལམ་ནས་འཆར་བས་ཆོས་སྐུའི་གཟིགས་སྟངས་གྱེན་དུ་གཙུག་ཏོར་གྱི་རྣམ་པར་བལྟ་བ། ལོངས་སྐུའི་གཟིགས་སྟངས་གཡས་གཡོན་དུ་ཟུར་འཁྲིད་སྨྱུག་མ་བསྲང་བ་ལྟ་བུ། སྤྲུལ་སྐུའི་གཟིགས་སྟངས་ཕྱེད་པ་ཙམ་ཅུང་ཟད་ཐུར་ལ་ཕབ་པ་དྲང་སྲོང་བསམ་གཏན་བསྒོམ་པ་ལྟ་བུ་བྱ་སྟེ། དེ་ལྟར་ཡང༌། ཙཀྵུ་ཟིམ་བུས་སཱུརྱ་བལྟ། །ཤར་གྱི་རྒྱ་དཀར་བཞིན་དུ་གསལ། །ཞེས་པས་ཕྱིའི་ནམ་མཁའ་ལ་དབང་པོ་མདུང་ཚུགས་སུ་བལྟས་པས་ཕྱིའི་དབྱིངས་མཐོང༌། གཡས་གཡོན་གྱི་ཟུར་རམ་ཟིམ་བུས་ཉི་མ་ལ་བལྟས་ན་ནང་གི་དབྱིངས་རིག་མཐོང༌། དེས་དབང་པོ་བར་སྣང་ལ་འཁྲིད་ཅིང་འཁྲུལ་སྣང་ཞིང་ཁམས་སུ་འཆར་རོ། །དེ་ཡང་ལྟ་སྟངས་གསུམ་པོ་གང་རུང་གིས་བལྟ་བ་ལ་བསླབས་པས། མིག་ཡུལ་ལ་ཇི་ཙམ་གཏད་ཀྱང་ཚུགས་ནུས་པར་འགྱུར་རོ། །

གཉིས་པ་འཆར་གཞི་ཡུལ་གྱི་གནད་ནི། ཡུལ་སྤྲིན་དང་བསིར་བུའི་རྐྱེན་དང་བྲལ་བའི་ནམ་མཁའ་དྭངས་ཤིང་གསལ་བ་ཉིད་ལ། སྔ་དྲོ་ནུབ་དང་ཕྱི་དྲོ་ཤར་དུ་བལྟ་བའམ། འོད་གསལ་འཆར་སླ་བའི་ཆེད་དུ་ཟེར་གཉིས་དང་སྦྱར་ནས་སྔ་དྲོ་ཤར་དང་ཕྱི་དྲོ་ནུབ་ཏུ་བལྟ་ཞིང༌། །དེ་ཡང༌། ཉི་མ་ལས་འོག་ཏུ་ཁྲུ་གང་ཙམ་གྱི་ནམ་མཁའ་སྟོང་སང་ངེ་བ་དེར་བལྟའོ། །དེ་ལྟར་ཡང༌། ཐལ་འགྱུར་ལས། ཡུལ་ནི་སྒྲིབ་བྱེད་བྲལ་བ་ལ། །ཞེས་དང༌། འདས་རྗེས་ལས། ཡུལ་གནད་ནམ་མཁའ་རྐྱེན་བྲལ་ལ། །ཞེས་དང༌། ཀློང་(༤༨)གསལ་ལས། རྐྱེན་བྲལ་གསུམ་ལ་གསལ་བར་འགྱུར། །ཞེས་གསུངས་པས། ཡུལ་རྐྱེན་བྲལ་ནམ་མཁའ་སྟོང་པ། དབང་པོ་རྐྱེན་བྲལ་ཆུའི་སྒྲོན་མ། གནས་རྐྱེན་བྲལ་དྭངས་ཤིང་མཐོ་བའི་དབེན་པའོ། །

གསུམ་པ་རླུང་གི་གནད་ནི། འདས་རྗེས་ལས། རླུང་གནད་ཤིན་ཏུ་དལ་ལ་བསླབ། །ཅེས་གསུངས་པས། རླུང་དལ་བ་མ་བརྟེན་ན། རླུང་གིས་རིག་པ་སྤུར་ནས་མི་ཟིན་པས། རླུང་སྣ་ནས་མི་གཏོང་བར་མཆུ་སོ་གཉིས་མ་རེག་ཙམ་དུ་ཁ་ནས་དལ་བུས་ཕྱི་ནང་དུ་རྒྱུ་བ་སྙོམས་པ་ལས་ཕྱིར་འཛིན་ཅུང་ཟད་ཙམ་བྱ་སྟེ། ཕྱི་ནང་རླུང་ནི་དལ་ཞིང་མཉམ། །ཡིད་ཙམ་ཕྱི་རུ་འདུར་བ་ཡིས། །རླུང་གི་འགྲོ་འོང་ཆད་པར་འགྱུར། །ཞེས་གསུངས་པས། རླུང་གི་འགྲོ་འོང་ཟད་པས་རྟོག་པའི་འཕྲོ་འདུ་ཟད་དེ་དབྱིངས་རིག་གཡོ་འགུལ་མེད་པར་སྡོད་པའོ། །

བཞི་པ་རིག་པའི་གནད་ནི། ཀློང་གསལ་ལས། རིག་གནད་ལུག་རྒྱུད་བཙོན་དུ་བཟུང༌། །དངོས་སྣང་དལ་བ་ཉིད་ཀྱིས་བརྟེན། །ཞེས་དང༌། འདས་རྗེས་ལས། ལུག་རྒྱུད་རིག་པ་བཙོན་དུ་བཟུང༌། །ཞེས་གསུངས་པས། ཕྱིའི་དབྱིངས་ནམ་མཁའ་སྟོང་པ་མེ་ལོང་དང་འདྲ་བས་སྣང་བའི་གོ་ཕྱེ་ནས། ནང་གི་དབྱིངས་རྣམ་དག་སྒྲོན་མ་བདག་པོའི་བྱད་དང་འདྲ་བ་དེ་ཉིད། ཐོག་མར་སྨིན་མཚམས་ནས་མཐིང་ག་ཁྱབ་པ་ཆེན་པོའི་འོད་ལས་རིམ་གྱིས་མཆེད་ནས་ནམ་མཁའི་འཇའ་ཚོན་ལྟ་བུ་འོད་ལྔའི་མུ་ཁྱུད་ཐིག་ཕྲན་དང་བཅས་པའི་ནང་དུ་ཐིག་ལེ་སྟོང་པའི་སྒྲོན་མ་རྫིང་བུར་རྡོ་བོར་བའི་རི་མོ་ལྟར་འལ་འོལ་ལས་མཐར་ཐིག་ལེ་དམར་ཟླུམ་གསལ་དྭངས་ཅན་དུ་འཆར་ཏེ། སྒྲོན་མ་འབར་བ་ལས། མཐིང་ག་མི་འགྱུར་སྣང་བ་ལས། །ཁ་དོག་གསལ་བའི་འོད་ལྔར་ཡང༌། །འདི་ཉིད་རབ་ཏུ་གསལ་འགྱུར་ཞིང༌། །ཞེས་གསུངས་པ་ལྟར་དང༌། དེའི་ནང་དུ་རིག་པ་རྡོ་རྗེ་ལུ་གུ་རྒྱུད་བདག་པོའི་སེམས་དང་འདྲ་བ་དེ་ལྷག་གིས་འཆར་ཞིང༌། (༤༩)དེ་ཡང༌། ཐོག་མར་རྟ་རྔ་ལ་མདུད་པ་བཏབ་པ་ལྟ་བུའམ། གསེར་སྐུད་དང༌། མུ་ཏིག་གི་ཕྲེང་བ་དང༌། མེ་ཏོག་གི་ཆུན་པོ་ལྟ་བུ་སྟེ། ཐོག་མར་སྨིག་རྒྱུ་ལྟར་འལ་འོལ་མི་གསལ་བ་འགུལ་འཕྲིག་ཅན་དུ་འཆར་བས། དེ་ཉིད་ལྟ་སྟངས་ཀྱིས་ཁྲིད་ནས་དབྱིངས་ཀྱི་ར་བར་བཅུག་པ་ལ་ཅེ་རེ་གཏད་ནས་ཡིན་མིན་གྱི་དཔྱད་པ་སོགས་རྣམ་རྟོག་གིས་མ་བསླད་པར་ལྟ་མཁན་གྱི་རིག་པ་དེས། རིག་པ་རང་གི་ངོ་བོ་བལྟ་ཤེས་ཙམ་ལས་མི་གཡོ་བར་བྱ་ཞིང༌། ཅི་སྟེ་འོད་གསལ་གྱི་སྣང་བ་མི་གསལ་བའམ། གཡས་གཡོན་སྟེང་འོག་སོགས་སུ་ཡལ་ཡོལ་བྱེད་ན་དེའི་རྗེས་སུ་མིག་དང་སེམས་བཅར་ཕོག་ཏུ་མི་འབྲང་བར་ལྟ་སྟངས་ཀྱིས་མི་གཟུར་ནས་དལ་བུར་ཁྲིད་པས་སྔར་བཞིན་ཤར་བ་ལ་སེམས་གཡོ་མེད་དུ་ཅེ་རེ་གཏད། བློས་བྱས་ཀྱི་བཅོས་བསྒྱུར་མི་བྱ་བར་དབྱིངས་རིག་གི་རང་ངོ་ལ་བལྟས་པས་ཕྱི་སྣང་བ་མ་འགགས་ཤིང༌། ནང་འཛིན་པས་མ་བསླད་པ། བརྗོད་མེད་སྤྲོས་པ་དང་བྲལ་བའི་རང་སོ་བཟུང་བས་ཡུལ་དང་ཡུལ་ཅན་དབྱེར་མེད་དུ་འདྲེས་པས་འོད་གསལ་གྱི་སྣང་བ་སྨིན་མཚམས་ནས་བྲལ་སྟེ་གསལ་འགྲིབ་མེད་པར་འཆར་བ་སོགས་སྣང་བཞིའི་སྣང་ཤེས་ཀྱི་ཉམས་རྣམས་རིམ་གྱིས་སྐྱེ་བར་འགྱུར་རོ། །དེས་ནི་གནས་སྐབས་སུ་རིག་པའི་ཡེ་ཤེས་མངོན་སུམ་དུ་གསལ་བས་མ་རིག་པ་དང་བྲལ། ཚེའི་དུས་བྱས་ཀྱང་སྤྲུལ་པའི་སྐུར་གྲོལ། མཐར་ཐུག་སྣང་བཞི་མཐར་ཕྱིན་ནས་ལྷག་མེད་དུ་གྲུབ་པའོ། །

གསུམ་པ་དེ་ཉིད་ངོ་སྤྲད་པ་ལ། ངོ་སྤྲོད་དངོས་དང༌། སྤྲོ་བ་བསྐྱེད་པ། རྣལ་འབྱོར་བཞིས་ཉམས་སུ་བླང་བ་དང་གསུམ་ལས། དང་པོ་ནི། ངོ་སྤྲོད་ཀྱི་ཁང་པ་ཕྱོགས་ཕྱེད་པར་སྔ་དྲོ་ཉི་མའི་ཟེར་དང་ལྡན་པའི་དུས་སུ། ཚོགས་གཏོར་བཤམས་པས། མཆོད་ཅིང་གསོལ་བ་གདབ་པ་དང་བྱིན་འབེབས་རྣམས་སྔར་ལྟར་བྱས་ནས། སློབ་མ་སྒོ་གསུམ་གྱི་གནད་འཆིང་དུ་བཅུག །སྔར་བཞིན་འོད་གསལ་གྱི་སྣང་བ་རྣམས་མཚོན་པར་(༥༠)བྱས་ནས་རྡོ་རྗེ་སེམས་དཔའི་མེ་ལོང་བསྟན་ལ། ཀྱཻ་སྐལ་ལྡན་རྣམས་འདི་ལྟར་ཤེས་པར་གྱིས་ཤིག །དེ་ཡང༌། སྔར་ཆོས་ཐམས་ཅད་ཀྱི་ཆོས་ཉིད་ཀ་ནས་དག་ཅིང་སྤྲོས་པ་དང་བྲལ་བའི་ཡེ་ཤེས་ཁྲེགས་ཆོད་ཀྱི་ལམ་གྱིས་མཚོན་པར་བྱས་པ་དེ་ཡིན། འདིར་ནི་ལྷུན་གྲུབ་ཀྱི་ཡེ་ཤེས་མངོན་སུམ་གྱི་ལམ་གྱིས་མཚོན་པར་བྱེད་པ་ཡིན་ལ། དེ་ཡང༌། ངོ་སྤྲད་བྱ་ནི། ཆོས་གཞན་ནས་བདེ་གཤེགས་སྙིང་པོ་དང༌། རྒྱུའི་རྒྱུད་སོགས་སུ་བཤད་པ་དེ། འདིར་ནི་སངས་རྒྱས་ཐམས་ཅད་དང་དབྱེར་མེད་པའི་རིག་པའི་ཡེ་ཤེས་འདུས་མ་བྱས་ཤིང་ལྷུན་གྱིས་གྲུབ་པ། གཞོན་ནུ་བུམ་པ་སྐུའི་བདག་ཉིད་ཅན་དུ་ཡེ་ནས་གསལ་འགྲིབ་མེད་པར་བཞུགས་པ་དེ་ཉིད་སྒོ་གསུམ་གྱི་གནད་ཀྱིས་གཞི་བཟུང༌། གནད་རྣམ་པ་བཞིས་མཚོན་པར་བྱས་པས། སྙིང་ནང་གི་དབྱིངས་རྣམ་པར་དག་པའི་སྒྲོན་མ་འོད་ལྔ་ལྷུན་གྲུབ་ཏུ་ཡོད་པ་དེ་ཉིད། མིག་ནི་ནམ་མཁའི་ཁམས་སུ་བལྟ། །ཞེས་ཡི་གེ་མེད་པ་ལས་གསུངས་པ་ལྟར། རྒྱང་ཞགས་ཆུའི་སྒྲོན་མའི་ལམ་ནས་གསལ་བའི་སྣང་བ། ཕྱིའི་དབྱིངས་ནམ་མཁའ་སྟོང་པ་མེ་ལོང་ལྟ་བུ་ལ། ནང་གི་ནམ་མཁའ་རྣམ་དག་སྒྲོན་མའི་གདངས་བྱད་བཞིན་དུ་ཤར་བ་ནི་ནམ་མཁའི་འཇའ་ཚོན་ལྟ་བུའི་འོད་ཁྱིམ་དུ་སྣང་བ་འདིའོ། །དེའི་ནང་དུ་ཐིག་ལེ་སྟོང་པའི་སྒྲོན་མའི་རྟགས་འོད་ཀྱི་འཁོར་ལོར་གསལ་ཞིང་དྭངས་པར་སྣང་བ་འདིའོ། །དེའི་ནང་དུ་རིག་པའི་སྒྲ་ཡོད་པའི་རྟགས་སུ་རྡོ་རྗེ་ལུ་གུ་རྒྱུད་དུ་སྣང་བ་འདིའོ། །དེ་ཡང་དབྱིངས་རིག་འདུ་འབྲལ་མེད་པ་ནི་ཉི་མ་དང་འོད་ཟེར་གྱི་ཚུལ་དུ་གནས་པའོ། །ཐུགས་རྗེ་རང་བྱུང་གི་ཡེ་ཤེས་རང་གསལ་ཆེན་པོ་ཤེས་རབ་རང་བྱུང་གི་སྒྲོན་མའི་རྟགས་སུ་འོད་གསལ་གྱི་སྣང་བ་འདི་དག་ལྟོས་ལ་མཉམ་པར་ཞོག་ཅིག །དེ་ནི་ཤེས་པ་རང་གསལ་སྣང་སྟོང་འཛིན་མེད་དུ་སྣང་བ་འདི་རང་ཡིན་ནོ། །དེ་ཡང༌། ངོ་བོའི་རྟགས་སུ་སྐྱེ་མེད་སྤྲོས་པ་དང་བྲལ་བ། རང་བཞིན་གྱི་རྟགས་སུ་འོད་སྣ་(༥༡)ཚོགས་སུ་གསལ་བ། ཐུགས་རྗེའི་རྟགས་སུ་ཤེས་པ་གསལ་སྟོང་དུ་འཆར་བ་འདི་ཁོ་ན་གདོད་མའི་མགོན་པོ་ཀུན་བཟང་འོད་མི་འགྱུར་བ་ཉིད་སྙིང་དབུས་ན་སྐུ་གསུམ་འདུ་འབྲལ་མེད་པའི་དགོངས་པ་ལ་བཞུགས་པ་ཤེས་པར་གྱིས་ཤིག །དེ་ཡང༌། ཀློང་གསལ་ལས། རིག་པ་རྡོ་རྗེ་ལུ་གུ་རྒྱུད། །མཐོང་བ་ཙམ་གྱིས་ཤེས་པ་དང༌། །ཤེས་པ་ཙམ་གྱིས་རྟོགས་པ་དང༌། །རྟོགས་པ་ཙམ་གྱིས་གྲོལ་བར་འགྱུར། །ཞེས་དང༌། ཐལ་འགྱུར་ལས། རང་གི་རང་བཞིན་གཤིས་ཀྱི་གནད། །བརྗོད་པའི་ཚིག་གིས་མ་ཡིན་པར། །དབང་པོའི་ཡུལ་ལ་གསལ་སྣང་བས། །གཅེར་མཐོང་གྲོལ་བའི་བདག་ཉིད་དོ། །ཞེས་གསུངས་པ་བཞིན་ནོ། །འདིར་རིག་པའི་ཡེ་ཤེས་ལྔ་ཚན་བདུན་གྱི་ངོ་སྤྲོད་བྱེད་པར་སྤྲོ་ན་གསེར་ཕྲེང་ལས་བྱུང་བ་བཞིན་ཤེས་པར་བྱའོ། །མདོར་ན་དབྱིངས་སྟོང་གསལ་འདུས་མ་བྱས་པ་ནི་ཤེས་རབ་ཀྱི་ངོ་བོ་ཀ་ནས་དག་པ་ཁྲེགས་ཆོད་ཀྱི་དོན་ནོ། །རིག་པའི་རང་བཞིན་འོད་གསལ་གྱི་སྣང་བ་ནི་ཐབས་ལྷུན་གྲུབ་ཀྱི་ངོ་བོ་སྣང་སྟོང་འདུ་འབྲལ་མེད་པ་ཡིན་ཏེ། ནོར་བུ་ཕྲ་བཀོད་ལས། དབྱིངས་ཀྱི་རང་བཞིན་ཤེས་རབ་སྐུ། །རིག་པའི་རང་བཞིན་ཐབས་ཀྱི་སྐུ། །འདུ་འབྲལ་མེད་པའི་ཚུལ་དུ་གནས། །ཞེས་པ་དང༌། དེ་ལྟར་སྣང་བ་དེ་ཡང༌། ཀུན་རྫོབ་སྣང་ཚུལ་འཇིག་པའི་ཆོས་སུ་མེད་དེ། དོན་དམ་འདུས་མ་བྱས་པ་ཆོས་ཉིད་འགྱུར་བ་མེད་པའི་གནས་ལུགས་ཉིད་ཡིན་ཏེ། ཐལ་འགྱུར་ལས། རིག་པའི་ངོ་བོ་ལུ་གུ་རྒྱུད། །འདས་དང་མ་འོངས་ད་ལྟར་གྱིས། །སུས་ཀྱང་བྱས་པ་མ་ཡིན་པས། །དེས་ན་འདུས་མ་བྱས་པ་ཉིད། །ལུ་གུ་རྒྱུད་ཀྱི་རང་བཞིན་ནོ། །རྣམ་པར་རྟོག་པ་ཀུན་དག་པས། །མ་འཁྲུལ་གཞི་ཡི་སངས་རྒྱས་སོ། །མངོན་སུམ་བརྟེན་པའི་སྐལ་ལྡན་ལ། །ཁམས་གསུམ་འཁོར་བའི་མིང་མེད་པས། །སྲིད་གསུམ་བརྡར་ཤ་ཆོད་པ་འོ། །ཞེས་དང༌། སྒྲོན་མ་སྣང་བྱེད་ལས། དེ་ལྟར་སྣ་ཚོགས་(༥༢)ཤར་བ་དེ། །བྱས་ཤིང་བསྒོམས་པས་བྱུང་བ་མིན། །ཡེ་ཉིད་ནས་ནི་གཞིར་གནས་པའོ། །ཞེས་གསུངས་པས། ཡེ་ནས་མ་བྱས་ཤིང་རང་བྱུང་རང་ཤར་སྐུ་གསུམ་འདུ་འབྲལ་མེད་པ་འོད་གསལ་གྱི་དཀྱིལ་འཁོར་ཞལ་མཐོང་བ་ཡིན་པས་སྒོམ་པ་ལ་བརྩོན་པར་གྱིས་ཤིག །ཅེས་བརྗོད་དོ། །

གཉིས་པ་སྤྲོ་བ་བསྐྱེད་པ་ནི། འོ། རིགས་ཀྱི་བུ། འདི་ལྟར་མཐོང་བ་འདི་རང་བྱུང་གི་རིག་པ་ཐིག་ལེ་ཉག་གཅིག་ཆོས་ཉིད་མངོན་སུམ་གྱི་སྣང་བ་ཞེས་བྱ་བ་ཡིན་ནོ། །སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་ཌཱཀྐི་ཐམས་ཅད་ཀྱི་ཞལ་མངོན་སུམ་དུ་མཇལ་བ་ཞེས་བྱའོ། །སྐུ་གསུམ་ཡེ་ཤེས་ལྔ་མངོན་དུ་གྱུར་པ་ཞེས་བྱའོ། །ལས་དང་བག་ཆགས་སྡིག་སྒྲིབ་མ་རིག་པ་ཐམས་ཅད་དག་པ་ཞེས་བྱའོ། །ཉོན་མོངས་པ་ཆོས་ཉིད་དུ་ཤར་བ་ཞེས་བྱའོ། །ལས་དང་སྐལ་བ་ལྡན་པ་ཞེས་བྱའོ། །བསོད་ནམས་ཀྱི་ཚོགས་རྫོགས་པ་ཞེས་བྱའོ། །སངས་རྒྱས་ཐམས་ཅད་ཀྱི་དབང་དུས་གཅིག་ལ་ཐོབ་པ་ཞེས་བྱའོ། །རིག་པ་རྩལ་གྱི་དབང་ཐོབ་པ་ཞེས་བྱའོ། །དུས་དེ་རིང་ནས་སངས་རྒྱས་ཀུན་ཏུ་བཟང་པོ་རིགས་ལྔའི་སངས་རྒྱས་དང་ཁྱོད་ལ་ཁྱད་པར་རྡུལ་ཙམ་ཡང་མེད་དོ། །ཞེས་བསྔགས་པ་བརྗོད་ལ་སྤྲོ་བ་བསྐྱེད་དོ། །

གསུམ་པ་རྣལ་འབྱོར་བཞིས་ཉམས་སུ་བླང་བ་ལ། ལྟ་སྒོམ་སྤྱོད་འབྲས་བཞི་ལས། དང་པོ་ནི། འོད་གསལ་གྱི་ངོ་བོ་སྟོང་ཉིད། རང་བཞིན་གསལ་བ། ཐུགས་རྗེ་འགག་མེད་དུ་འཆར་བ་ནི་མཉམ་གཞག་གི་ལྟ་བ། སྣང་སྲིད་སྣ་ཚོགས་སུ་སྣང་བ་འདི་དག་སྣང་ལ་རང་བཞིན་མེད་པ་ཆུ་ཟླ་ལྟར་རྟོགས་པ་ནི་རྗེས་ཐོབ་ཀྱི་ལྟ་བའོ། །གཉིས་པ་ནི། ལྟ་བ་དེ་ལས་མ་གཡོས་པས་མཉམ་གཞག་ཏུ་གསལ་སྟོང་འཛིན་པ་མེད་པའི་རྣལ་འབྱོར་དང༌། རྗེས་ཐོབ་རྨི་ལམ་སྒྱུ་མ་ལྟ་བུར་ཉམས་སུ་ལེན་པ་ནི་སྒོམ་པའོ། །གསུམ་པ་ནི། བདེ་སྡུག་ཅི་ཤར་ཡང་རང་ཤར་རང་གྲོལ་དུ་ཤེས་ཤིང༌། དབང་པོའི་རིམ་པ་དང་འཚམས་པའི་སྤྱོད་པས་ལྟ་(༥༣)སྒོམ་གྱི་བོགས་འདོན་པ་ནི་སྤྱོད་པའོ། །བཞི་པ་ནི། གོམས་པ་ཀློང་དུ་གྱུར་པས་སྣང་སྟོང་འོད་གསལ་གྱི་འཆར་ཚུལ་ལ་དགག་སྒྲུབ་རེ་དོགས་དང་བྲལ་བའི་གནས་ལུགས་གདིངས་སུ་གྱུར་པ་ནི་འབྲས་བུའོ། །དེ་དག་གི་དོན་ཡང༌། སྒྲོན་མ་སྣང་བྱེད་ལས། རི་བོ་ཅོག་གཞག་ལྟ་བའི་ཚད། །རྒྱ་མཚོ་ཅོག་གཞག་སྒོམ་པའི་ཚད། །སྣང་བ་ཅོག་བཞག་སྤྱོད་པའི་ཚད། །རིག་པ་ཅོག་གཞག་འབྲས་བུའི་ཚད། །ཚད་བཞི་ལྡན་པའི་རྣལ་འབྱོར་དེ། །ངེས་པའི་དོན་ལ་བློ་འདྲེས་པའོ། །ཞེས་གསུངས་པའོ། །དེ་ལྟར་ངོ་སྤྲད་པས་གནས་སྐབས་སུ་ཆོས་ཉིད་ཡིད་དཔྱོད་དུ་མ་ལུས་པར་མངོན་སུམ་དུ་མཐོང་ཞིང༌། མཐར་ཐུག་མངོན་སུམ་མཐོང་བའི་གནད་ཀྱིས་ཚེའི་བར་ཆོད་ཀྱང་རང་བཞིན་སྤྲུལ་སྐུའི་ཞིང་དུ་འཚང་རྒྱ་བར་འགྱུར་རོ། །

གསུམ་པ་རྗེས་སྣང་ཉམས་ཀྱི་འཆར་ཚུལ་བསྟན་པ་ལ་གསུམ་སྟེ། སྣང་བཞིའི་འཆར་སྒོ་ངོས་བཟུང༌། མཐའ་བརྟེན་བཞིའི་གོམས་ཚུལ་བཤད། འབྲས་བུའི་གྲོལ་ཚུལ་བསྟན་པའོ། །དང་པོ་ལ་བཞི་སྟེ། ཀློང་གསལ་ལས། སྣང་བཞིའི་འཆར་ཚུལ་མ་ཤེས་ན། །ས་ཟིན་མེད་པའི་སྐྱོན་ཉིད་འབྱུང༌། །སྣང་བ་བཞི་རུ་ཤེས་པར་བྱ། །ཞེས་གསུངས་པས། དང་པོ་ཆོས་ཉིད་མངོན་སུམ་གྱི་སྣང་བ་ནི། གོང་དུ་བསྟན་པ་བཞིན་ལུས་ངག་ཡིད་ཀྱི་འཁྲུལ་འཁོར་དང༌། སྒོ་ཡུལ་རླུང་རིག་གི་གནད་བཞིས་བཅུན་པས། རྒྱང་ཞགས་ཆུའི་སྒྲོན་མ་ལས། དབྱིངས་རྣམ་པར་དག་པའི་སྒྲོན་མ་འཇའ་གུར་རམ། རྨ་བྱའི་མདོངས་ལྟ་བུའི་ནང་དུ། ཐིག་ལེ་སྟོང་པའི་སྒྲོན་མ་འོད་ཟླུམ་ཐིག་ཕྲན་ཅན་ཤར་བའི་དབུས་སུ་རིག་པ་རྡོ་རྗེ་ལུ་གུ་རྒྱུད་གསལ་ལ་མ་ཡེངས་པར་བཅིངས་ཏེ་བལྟས་པས་གསལ་སྟོང་རྣམ་པར་མི་རྟོག་པའི་ཡེ་ཤེས་ལྷག་གིས་སྐྱེས་པའི་ངང་ལ་མི་གཡོ་བར་བཞག་པའི་ཤེས་པ་གསལ་ལ་དྭངས་པ་ཀ་དག་ལྷུན་གྲུབ་དབྱེར་མེད་ཀྱི་ངོ་བོ་ཤེས་རབ་རང་བྱུང་གི་སྒྲོན་མ་ཞེས་བྱ་སྟེ་གདོད་མའི་གཞི་ལ་ད་ལྟར་གྱི་སྣང་(༥༤)སེམས་གྲོལ་བར་བྱེད་པ་སྟེ། རིག་པ་དབྱིངས་ཀྱི་ར་བར་ཚུད་པས་ཐིག་ལེ་སུམ་འབྲེལ་གྱི་སྣང་བ་དབང་པོའི་མངོན་སུམ་དུ་མཐོང་བ་ཚུན་ཆད་ཆོས་ཉིད་མངོན་སུམ་གྱི་སྣང་བའོ། །དེ་ཡང་ཙིཏྟ་རིན་པོ་ཆེའི་སྦུབས་འོད་ལྔ་འདུས་པའི་ཕོ་བྲང་ན། གདོད་མའི་མགོན་པོ་འོད་མི་འགྱུར་བ། ངོ་བོ་སྟོང་པ། རང་བཞིན་གསལ་བ། ཐུགས་རྗེ་རིག་པའི་སྙིང་པོ་ཅན་ནང་གསལ་དུ་བཞུགས་པའི་གདངས་སྐུ་དང་ཞིང་ཁམས་ཚད་མེད་པའི་སྣང་བ་ལ་དབང་འབྱོར་པས་འོག་མིན་ཆེན་པོར་སངས་རྒྱས་པ་ཞེས་བྱ་སྟེ། དེ་ཡང༌། དབྱིངས་ཀྱི་རྟགས་སུ་འོད་ཁྱིམ། ཡེ་ཤེས་ཀྱི་རྟགས་སུ་ཐིག་ལེ། སྐུའི་རྟགས་སུ་ལུ་གུ་རྒྱུད། ཐུགས་རྗེའི་རྟགས་རང་གསལ། ངོ་བོའི་རྟགས་མི་རྟོག་པའི་ཡེ་ཤེས་དུས་གསུམ་འཕོ་འགྱུར་མེད་པའི་དགོངས་པ་མཉམ་ཉིད་གཞི་རྫོགས་སུ་གྱུར་པ་སྟེ། འདས་རྗེས་ལས། མངོན་སུམ་གནད་འདི་སུས་མཐོང་བ། ཁམས་གསུམ་ལྡོག་པ་མ་ཡིན་ནོ། །ཞེས་སོ། །དེ་ལྟར་མཐོང་བས་གནས་སྐབས་ཆོས་ཉིད་ཡིད་དཔྱོད་དང་བྲལ། མཐར་ཐུག་གདོད་མའི་ཟད་སར་གྲོལ་བར་འགྱུར་རོ། །

གཉིས་པ་ཉམས་གོང་འཕེལ་གྱི་སྣང་བ་ནི། ཤེས་ཉམས་ནི་བློའི་འཛིན་ཆ་ཡིན་པས་མི་བརྟན་ཏེ། ཀློང་གསལ་ལས། བློ་ནི་ཀུན་རྫོབ་ཡིན་པར་བཤད། །ཅེས་གསུངས། ནང་དུ་རིག་པ་གྲོལ་བའི་ལམ་རྟགས་ཀྱི་སྣང་ཉམས་ཤར་བ་ནི་བརྟན་ཅིང་མི་བསླུ་བ་སྟེ། དེ་ཡང་གོང་བཞིན་ཉམས་སུ་བླངས་པས་དབྱིངས་རིག་རེས་གསལ་རེས་མི་གསལ་བ་ལས། རིམ་གྱི་གོམས་པས་དབྱིངས་རིག་སྨིན་མཚམས་དང་བྲལ་ཏེ་དབང་པོའི་མངོན་སུམ་དུ་གསལ་ཞིང༌། དབྱིངས་སྣང་འོད་ཀྱི་རང་བཞིན་དེ་ཡང༌། གྱེན་སྒྲེང༌། རྩིབས་ཤར། དྲ་བ། དྲ་ཕྱེད། པདྨ་དང༌། མིག་མང་རིས། ཉི་ཟླ་མཁར་ཐབས་ལྟ་བུ་སོགས་ཞིང་ཁམས་ཐམས་ཅད་གང་བའི་བར་དུ་འཆར་ཞིང༌། ཐིག་ལེ་ཡང༌། སྲན་མ་ཙམ་དང༌། མེ་ལོང་དང༌། ཁམ་(༥༥)ཕོར་དང༌། བསེ་ཕུབ་ཙམ་གྱི་བར་ཇེ་ཆེ་ཇེ་ཆེ་དང༌། རིག་པ་ལུ་གུ་རྒྱུད་ཀྱང་སྐར་མདའ་འཕྲོ་བ་ཙམ་དང༌། འདབ་ཆགས་འཕུར་སྐྱེན་པ་དང༌། རི་དྭགས་རྩིབས་ལ་རྒྱུག་པ་དང༌། ཤ་ར་ཎ་དལ་གྱིས་རྒྱུག་པ་དང༌། བུང་བ་བཅུད་ལ་འཁོར་བ་ལྟ་བུའི་བར་ཇེ་འཕེལ་ཇེ་གསལ་ཇེ་བརྟན་དུ་གྱུར་པ་ལས། ཐིག་ལེ་ནང་དུ་རྡོ་རྗེ་སེམས་དཔའ་ལ་སོགས་པའི་ཕྱེད་སྐུའམ། སྐུ་རྐྱང་པ་རེ་ཙམ་ཤར་ནས་འགུལ་འཕྲིག་མེད་པར་ཤར་བ་ནི། ཉམས་གོང་འཕེལ་གྱི་སྣང་བ་སྟེ། ཀློང་གསལ་ལས། སྐུ་ཤར་ཉམས་ཀྱི་འཕེལ་རྫོགས་ན། །བར་དོའི་སྣང་བ་འདིར་ཆོད་པས། །ལོངས་སྤྱོད་ངོས་ཟིན་བར་དོ་སྟོངས། །ཞེས་གསུངས་སོ། །དེ་ལ་སློབ་དཔོན་བི་མ་ལ་མི་ཏྲ་ནི། དབྱིངས་སྣང་ཟླུམ་འཁྲེགས་ཀྱི་ནང་དུ་པད་འདབ་བཞི་པཞིས་བསྐོར་བ་ལྟ་བུའི་ཚོམ་བུ་འཆར་བ་ཚུན་ཆད་ཉམས་གོང་འཕེལ་གྱི་མཐོང་སྣང་དུ་མཛད་ནས། ལྷ་སྐུ་ཤར་བ་ཕན་ཆད་རིག་པ་ཚད་ཕེབས་སུ་བཞེད་ནའང༌། འདི་ནི་སློབ་དཔོན་ཆེན་པོ་པདྨའི་དགོངས་པ་སྟེ། བཏགས་གྲོལ་དོན་ཁྲིད་ལས། དབྱིངས་རྣམ་པར་དག་པའི་སྒྲོན་མ་རང་གི་སྨིན་མཚམས་ལས་བྲལ་བའི་དུས་ནས་ཐིག་ལེའི་ནང་དུ་སེམས་དཔའི་སྐུ་རྐྱང་པ་རེ་སྨིན་པ་ཚུན་ཆད་ཉམས་གོང་འཕེལ་གྱི་སྣང་བའོ། །ཞེས་གསུངས་སོ། །དེ་ཡང་འདིར་འོད་སྣང་གྱེན་སྒྲེང་གི་ཚེ་མིག་ཐུར་དང༌། གྲུ་བཞི་ལ་གཡས། ཟླུམ་པོ་ལ་གཡོན། ཟླ་གམ་ལ་སྟེང་དང༌། གྲུ་གསུམ་ཐུར་དུ་བཅུན་པར་ཡང་བཤད་དོ། །དེ་ལྟར་གོང་འཕེལ་གྱི་སྣང་བ་མཐོང་བས། གནས་སྐབས་ཉམས་སྣང་གི་ཡོན་ཏན་རྣམས་ཐོབ། མཐར་ཐུག་བར་དོའི་སྣང་བ་རང་སར་གྲོལ་བའི་དགོས་པ་ཡོད་དོ། །

གསུམ་པ་རིག་པ་ཚད་ཕེབས་ཀྱི་སྣང་བ་ནི། དབྱིངས་ཀྱི་སྣང་བས་ཐམས་ཅད་ལ་རྒྱས་ཐེབས་པས་ས་ཆུ་མེ་རླུང་གི་སྣང་བ་རང་དག་སྟེ། འོད་གསལ་ཆེན་པོའི་སྣང་བ་འབྱམས་ཀླས་པའི་དབྱིངས། ཐིག་ལེ་རེ་རེའི་ནང་དུ་ཡང་རྣམ་སྣང་ལ་སོགས་པ་རིགས་ཀྱི་ཡབ་ལྔ་དང༌། དབྱིངས་(༥༦)ཕྱུག་མ་སོགས་རིགས་ཀྱི་ཡུམ་ལྔ་སྟེ་རིགས་ལྔའི་ཚོམ་བུ་ལྔ་ཚན་གྱི་དཀྱིལ་འཁོར་ཚད་མེད་པ་ནམ་མཁའ་གང་བར་འཆར་ཞིང༌། དེ་དག་ལས་འོད་ཟེར་གྱི་སྣང་བ་རང་ལུས་དང་འབྲེལ་བར་སྣང་བས། དེ་ནས་མ་བསྒོམས་ཀྱང་ཚད་ལ་ཕེབས་པས་འགྱུར་བ་མེད་ཅིང༌། ཕྱིའི་སྣང་བ་འོད་གསལ་དུ་གྲོལ་བས་གདོས་བཅས་ཀྱི་སྣང་བ་ནུབ། ནང་སྒྱུ་ལུས་འོད་གསལ་དུ་གྲོལ་བས་ཟག་བཅས་ཀྱི་འཛིན་པ་དག །གསང་བ་སེམས་ཉིད་འོད་གསལ་དུ་ཐིམ་པས་འཁྲུལ་པའི་སྣང་བ་ནུབ་པས་ལས་དང་བག་ཆགས་ཀྱི་འབྲེལ་ཆད་པ་སྟེ། ཀློང་གསལ་ལས། རིག་པ་ཚད་ཕེབས་སྣང་བ་ཡིས། །ཕྱི་ནང་བཟུང་འཛིན་གདོས་བཅས་གྲོལ། །ཞེས་སོ། །དེ་ལྟར་ཚད་ལ་ཕེབས་པར་གནས་སྐབས་སུ་མ་བསྒོམས་ཀྱང་ཆོག་ལ། མཐར་ཐུག་ལོངས་སྤྱོད་རྫོགས་པའི་སྐུ་ངོས་ཟིན་པས་ལོངས་སྐུའི་ཞིང་ན་སྤྱོད་པར་འགྱུར་རོ། །

བཞི་པ་ཆོས་ཉིད་ཟད་པའི་སྣང་བ་ནི། ཕྱི་ཉམས་སྣང་གི་འཕེལ་ཟད། ནང་སྒྱུ་ལུས་ཀྱི་ཆོས་ཟད། གསང་བ་རྟོག་ཚོགས་ཀྱི་སེམས་ཟད་པས་འཁྲུལ་པའི་སྣང་བ་ཐམས་ཅད་རང་དག་པས་སྣང་དང་མི་སྣང་དུ་འཛིན་པའི་བློ་ཟད་ནས་འོད་ཀྱི་ནང་ན་སོར་མོ་ཙམ་སྣང་བ་ལས་འཁོར་འདས་ཀྱི་འདུ་ཤེས་བྲལ། སྣང་བ་ཅིའི་ངོ་བོར་ཡང་མ་གྲུབ་པས་འབྱུང་བའི་དགྲས་མི་ཚུགས། འགྲོ་འདུག་གི་སྣང་བ་དག །མངོན་ཤེས་ལ་ཐོགས་པ་མེད། ཐུགས་རྗེའི་ཆ་ལས་ཡེ་ཤེས་ཀྱི་སྣང་བ་མ་འགགས་པར་གསལ་ཞིང་ཕུང་པོའི་ཟག་པ་ཕྱིར་མི་ལྡང་བར་སངས་རྒྱས་ནས་འཕོ་བ་ཆེན་པོའི་སྐུ་ཆུ་ཟླ་ལྟ་བུས་འགྲོ་བའི་དོན་བྱེད་པ་སྟེ། ཐལ་འགྱུར་ལས། དེ་ལྟར་ལུས་འབྱུང་རྒྱུན་ཆད་ནས། །ཟག་བཅས་ཕུང་པོ་མི་སྣང་བར། །འདི་ལ་མངོན་པར་འཚང་རྒྱའོ། །ཞེས་གསུངས་པས། གནས་སྐབས་སུ་སྣང་བཞིའི་ཚད་ཟིན་པས་ས་མཚམས་ཕྱེད། མཐར་ཐུག་ཆོས་ཟད་ཀྱི་སྣང་བ་མཐོང་ནས་ལྷག་མེད་དུ་འཚང་རྒྱ་བར་འགྱུར་རོ། །

གཉིས་པ་མཐའ་རྟེན་བཞིའི་གོམས་ཚུལ་ནི། ཀློང་གསལ་ལས། (༥༧)མཐའ་རྟེན་མན་ངག་རྣམ་པ་བཞི། །གོང་མའི་རྒྱབ་ཏུ་མེད་ཐབས་མེད། །ཅེས་གསུངས་པས། མི་འགུལ་བ་གསུམ་ལ་གཞི་བཅའ་བ། སྡོད་པ་གསུམ་གྱིས་ཚད་བཟུང་བ། ཐོབ་པ་གསུམ་གྱི་གཟེར་གདབ་པ། གདེངས་བཞིའི་གྲོལ་ཚད་བསྟན་པའོ། །དང་པོ་ནི་ཐལ་འགྱུར་ལས། དེ་ལ་མཐའ་རྟེན་ཡིད་ཆེས་བྱ། །མི་འགུལ་གསུམ་ལ་གཞི་བཅས་པས། །རླུང་སེམས་གནད་ལ་ཕེབས་པའོ། །ཞེས་པས། ལུས་བཞུགས་སྟངས་གསུམ་ལས་མི་འགུལ་བར་བྱ་སྟེ། དེ་ཡང་། ལུས་མི་འགུལ་བས་རྩ་མི་འགུལ། རྩ་མི་འགུལ་བས་མིག་མི་འགུལ། མིག་མ་འགུལ་བས་རླུང་མི་འགུལ། རླུང་མ་འགུལ་བས་སེམས་མི་འགུལ། དེས་འགྱུ་བྱེད་ཀྱི་རྟོག་པ་རྒྱུན་ཆད་ནས་རིག་པ་གཡོ་མེད་དུ་གནས་པའོ། །མིག་གཟིགས་སྟངས་གསུམ་ལས་མི་འགུལ་བར་བྱ་སྟེ། དེ་ཡང་རིག་པའི་གནད་རྩ་རྩའི་གནད་སྒོ། སྒོའི་གནད་སྒྲོན་མའོ། །རྩ་མ་འགུལ་བས་མིག །མིག་མ་འགུལ་བས་སྒྲོན་མ། དེས་སེམས་མ་འགུལ་བས་རྣམ་རྟོག་མི་འབྱུང་ཞིང་དབྱིངས་རིག་འདུ་འབྲལ་མེད་པའི་དགོས་པ་ཡོད་དོ། །རིག་པ་ནི་འོད་གསལ་གྱི་སྣང་བ་མངོན་སུམ་དུ་མཐོང་བ་ལས་མི་འགུལ་བར་བྱའོ། །དེ་ཡང་། ཐུགས་རྗེའི་རིག་པ་ཕྱིར་གསལ་མེ་ལོང་ལྟ་བུ་ལ་འོད་གསལ་གྱི་སྣང་བ་འགག་མེད་དུ་ཤར་བ་བཟུང་འཛིན་གྱིས་མ་བསླད་པར་རང་ཤར་རང་གྲོལ་དུ་བསྐྱངས་པས་སྣང་བཞིའི་འཆར་སྒོ་ཇེ་གསལ་ཇེ་བརྟན་དུ་འཆར་བར་འགྱུར་རོ། །

གཉིས་པ་སྡོད་པ་གསུམ་ཀྱིས་ཚད་བཟུང་བ་ནི། སྔ་མ་ལས། སྡོད་པ་གསུམ་གྱི་ཚད་བཟུང་བས། །རྨི་ལམ་ལྡོག་དང་ལུས་ངག་ཡིད། །རྟགས་དང་ཚད་ནི་ངེས་བཟུང་བའོ། །ཞེས་པས། དབྱིངས་རིག་མི་གཡོ་བར་གནས་པས་བརྟན་པའི་ཚད་སྡོད་པ་གསུམ་འབྱུང་སྟེ། ཕྱི་སྣང་བ་བསྐྱོད་བྱེད་ཀྱི་རླུང་ཟད་པས་དབྱིངས་རིག་འགྲོ་འོང་མེད་པར་སྡོད། ནང་ཕུང་པོ་བསྐྱོད་བྱེད་ཀྱི་རླུང་ཟད་པས་(༥༨)ལུས་གཡོ་འགུལ་མེད་པར་སྡོད། གསང་བ་རྟོག་པ་བསྐྱོད་བྱེད་ཀྱི་རླུང་ཟད་པས་རྣམ་རྟོག་འགྱུ་མི་སྲིད་པར་སྡོད་པའོ། །སྐབས་འདིར་ཚད་རྨི་ལམ་གྱིས་བཟུང་བ་དང་། རྟགས་ལུས་ངག་ཡིད་གསུམ་ལ་འཆར་བ་གཉིས་འབྱུང་སྟེ། བརྩོན་འགྲུས་རབ་ལ་རྨི་ལམ་དབྱིངས་སུ་ཐིམ་ནས་རྒྱུན་ཆད། འབྲིང་ལ་རྨི་ལམ་འོད་གསལ་དུ་འཆར། ཐ་མ་ལ་རྨི་ལམ་རྨི་ལམ་དུ་ཤེས་པའོ། །རྟགས་སྒོ་གསུམ་ལ་འཆར་བ་ནི། སྣང་བ་བཞིར་རེ་རེ་ལ་གསུམ་གསུམ་སྟེ་བཅུ་གཉིས་ལས། དང་པོ་ཆོས་ཉིད་མངོན་སུམ་གྱི་རྟགས་གསུམ་ནི། ལུས་རུས་སྦལ་མཁར་གཞོང་དུ་བཅུག་པ་ལྟར་བྱ་བྱེད་གཡོ་འགུལ་མེད། ངག་ལྐུགས་པ་ལྟར་སྨྲ་སྙིང་མི་འདོད། སེམས་མཁའ་འགྲོ་རྙིས་ཟིན་པ་བཞིན་འཕྲོ་བ་ལྟར་སྣང་ཡང་གར་གཏད་དུ་ཟིན་པའོ། །གཉིས་པ་ཉམས་གོང་འཕེལ་གྱི་རྟགས་གསུམ་ནི། ལུས་སྐྱེས་བུ་ནད་ཀྱིས་གདུངས་པ་ལྟར་བྱི་དོར་དང་རྒྱན་གྱི་སྒེག་ཆོས་བྲལ། ངག་སྨྱོན་པ་ལྟར་ཟུངས་མེད་ཅལ་ཅོལ་དུ་སྨྲ། སེམས་སྐྱེས་བུ་རྩི་དུག་གིས་ཐེབས་པ་ལྟར་འཁོར་བར་མི་ལྡོག་པར་ཐག་ཆོད་པའོ། །གསུམ་པ་རིག་པ་ཚད་ཕེབས་ཀྱི་རྟགས་གསུམ་ནི། ལུས་གླང་པོ་ཆེ་འདམ་དུ་ཚུད་པ་སྐད་ཅིག་ལ་ཐོན་པ་ལྟར་འབྱུང་བ་ལྔ་ལ་ཐོགས་པ་མེད་པར་འགྲོ། ངག་གྲུལ་བུམ་གྱི་ཕྲུ་གུ་ལྟར་ཅི་སྨྲས་གཞན་ལ་ཕན་ཅིང་དད་པར་བྱེད། སེམས་སྐྱེས་བུ་འབྲུམ་ནད་བྱང་བ་ལྟར་ཁམས་གསུམ་དུ་མི་ལྡོག་པར་གདེངས་ཐོབ་པའོ། །བཞི་པ་ཆོས་ཉིད་ཟད་པའི་རྟགས་གསུམ་ནི། ལུས་དུར་ཁྲོད་ཀྱི་རོ་ལྟར་གཤེད་མ་བརྒྱས་བསྐོར་ཀྱང་ཡ་ང་བ་དང་བག་ཚ་བ་མེད། ངག་བྲག་ཆ་ལྟར་གཏམ་གྱི་ཟུངས་ཟད་དེ་གཞན་གྱི་རྗེས་སུ་ཟློ། སེམས་བར་སྣང་གི་ན་བུན་སྐད་ཅིག་ལ་ཡལ་འགྲོ་བ་ལྟར་བག་ཆགས་ཀྱི་ཕུང་པོ་མི་སྣང་བར་འཚང་རྒྱ་བའོ། །

གསུམ་པ་ཐོབ་པ་གསུམ་གྱི་གཟེར་གདབ་པ་ནི། ཀློང་གསལ་ལས། ཐོབ་པ་གསུམ་(༥༩)གྱི་གཟེར་བཏབ་པས། ཟག་བཅས་ཕུང་པོ་མི་སྣང་བའོ། །ཞེས་པས། དང་པོ་སྐྱེ་བ་ལ་རང་དབང་ཐོབ་པ་ནི་ཕུང་པོའི་སྣང་བ་འགགས་ནས་གདོས་བཅས་སུ་མི་སྣང་བས། སེམས་ཅན་གྱི་དོན་བྱེད་ན་རང་གི་ལག་སོར་ལ་རིག་པ་གཏད་པས་སྣང་བ་དེ་ཀུན་རང་ལོག་སྟེ། སྣང་བྱེད་ཆུ་ཟླ་ལྟ་བུས་སེམས་ཅན་གྱི་དོན་བྱེད་པས་མི་སོགས་སེམས་ཅན་ལ་རིག་པ་བཅུག་ན་མཚམས་མེད་པ་ལྔ་བྱས་པ་ཡང་འདི་ཉིད་ལ་འབྱུང་བ་རང་སར་དག་ནས་འཚང་རྒྱ་སྟེ། དེ་ཡང་རིག་པ་རང་བྱུང་གི་ཡེ་ཤེས་གཞི་ལ་གནས་པའི་གནད་ཀྱིས་སོ། །དེའི་ཚེ་བེམས་པོ་ལ་རིག་པ་བཅུག་ཀྱང་འགུལ་ཞིང་སྐད་འབྱིན་ནུས་པ་འོང་ངོ༌་། །གཉིས་པ་འཇུག་པ་ལ་རང་དབང་ཐོབ་པ་ནི། སོར་མོ་ལ་རིག་པ་གཏད་ནས་རང་ལུགས་སུ་བཞག་པས་དེ་ཉིད་ལ་ནི་མི་སྣང་བར་འཚང་རྒྱའོ། །གསུམ་པ་རླུང་སེམས་ལ་རང་དབང་ཐོབ་པ་ནི། རླུང་སེམས་ལས་སུ་རུང་བས་རླུང་གི་ཡོན་ཏན་ཐམས་ཅད་འབྱུང༌། སེམས་ཅན་གཞན་ཚེ་འཕོ་བའི་ཚེ་དེ་ལ་རིག་པ་བཅུག་པས་མཚམས་མེད་ལྔ་བྱས་པ་ཡང་རང་དང་མཉམ་དུ་འཚང་རྒྱ་སྟེ་ལས་ལ་བཟང་ངན་མེད་པའི་གནད་ཀྱིས་སོ། །བེམས་པོ་ལའང་ཐོགས་མེད་ཟང་ཐལ་དུ་འགྲོ་ཞིང་མངོན་པར་ཤེས་པ་ཐོགས་མེད་དུ་འཆར་རོ། །

བཞི་པ་གདིངས་བཞིས་གྲོལ་ཚད་བསྟན་པ་ནི། མུ་ཏིག་ཕྲེང་བ་ལས། ཚད་ནི་གདིངས་བཞིའི་རྣལ་འབྱོར་ཉིད། །ཅེས་པ་དང༌། རིན་ཆེན་སྤུངས་པ་ལས། མི་འགྱུར་ལྟ་བའི་གདིངས་ཆེན་བཞིས། །མི་ལྡོག་ཡེ་ཤེས་ཚད་ཀྱང་བཟུང༌། །ཞེས་པས། ཡར་གྱི་གདེངས་གཉིས་ནི། དཀོན་མཆོག་གསུམ་གྱི་ཡོན་ཏན་ཐོས་ཀྱང་ཐོབ་ཏུ་རེ་བ་དང༌། མ་ཐོབ་ཀྱི་དོགས་པ་མེད་དེ་རང་རིག་ལས་གཞན་པའི་སངས་རྒྱས་མེད་པར་རྟོགས་པའི་ཕྱིར་རོ། །མར་གྱི་གདིངས་གཉིས་ནི། འགྲོ་དྲུག་གི་སྡུག་བསྔལ་དང་ཚེ་ཚད་ཐོས་ཀྱང་འཁོར་བར་མི་ལྷུང་དུ་རེ་བ་དང༌། ལྟུང་གིས་དོགས་པ་མེད་དེ། རང་རིག་ཡེ་ནས་འཁྲུལ་(༦༠)པ་མེད་པར་ཤེས་པས་འཁོར་བར་འཁྱམས་མཁན་མ་གྲུབ་པར་ཐག་ཆོད་པའི་ཕྱིར་རོ། །དེ་དག་གི་དགོས་པ་ནི། གནས་སྐབས་སུ་ཐད་སོའི་དོན་རྣམས་འགྲུབ་ཅིང༌། མཐར་ཐུག་གོང་མའི་རྟོགས་པ་མཐར་ཕྱིན་པར་འགྱུར་བའོ། །དེ་ལྟར་ཡང༌། ཀློང་གསལ་ལས། མཐའ་རྟེན་དག་གི་མན་ངག་གིས། །གོང་གི་ཡོན་ཏན་མཐའ་རུ་ཕྱིན། །ཞེས་གསུངས་པ་ལྟར་རོ། །

གསུམ་པ་འབྲས་བུའི་གྲོལ་ཚུལ་བསྟན་པ་ལ་གཉིས་ཏེ། ཐུན་མོང་དང་ཁྱད་པར་གྱི་གྲོལ་ཚུལ་ལོ། །དང་པོ་ནི། ཀློང་གསལ་ལས། བདེན་པ་མཐོང་བའི་གང་ཟག་གིས། །དང་པོའི་ས་ནས་བཅུ་དྲུག་བར། །རིམ་པར་ཉམས་སུ་བླངས་པས་འབྱུང༌། །གཞན་དང་སྒོ་བསྟུན་གནས་སྐབས་ཀྱི། །ཡོན་ཏན་འབྲས་བུའི་ཐོབ་ཚུལ་ལོ། །ཞེས་པ་ལྟར། ས་རྣམས་རིམ་གྱིས་བགྲོད་ནས་གདོས་བཅས་ཀྱི་ཕུང་པོ་ལྷག་མ་དང་བཅས་པ་བོར་ནས་འཚང་རྒྱ་བར་འགྱུར་ཏེ། སྙིང་གི་མེ་ལོང་ལས། མངོན་པར་རྫོགས་པར་སངས་རྒྱས་པ་ནི་འོད་དང་སྒྲ་དང་སྐུ་དང་གདུང་དང་ས་གཡོ་བ་ལ་སོགས་པ་འབྱུང་ངོ༌་། །ཞེས་གསུངས་པ་ལྟར་རོ། །གཉིས་པ་ནི། དེ་ཉིད་ལས། ཡང་དག་པར་རྫོགས་པར་སངས་རྒྱས་པ་ནི། ཕུང་པོ་ལྷག་མ་མེད་པར་སངས་རྒྱས་པའོ། །ཞེས་པས། ཉོན་མོངས་པ་ཕྲ་རགས་དང༌། འབྱུང་ལུས་ཀྱི་གདོས་པ་ཐམས་ཅད་དག་ནས་ངོ་བོ་སྐུ་རུ་རྒྱས་པས་སྐུ་གསུམ་འདུ་འབྲལ་མེད། རང་བཞིན་མཁྱེན་པའི་ཡེ་ཤེས་སུ་རྒྱས་པས་ཡེ་ཤེས་འདུ་འབྲལ་མེད། ཐུགས་རྗེ་མཛད་པའི་ཕྲིན་ལས་སུ་རྒྱས་པས་ཐུགས་རྗེ་ལ་རྒྱུན་ཆད་མེད་པ་སྟེ། ཀློང་གསལ་ལས། ངོ་བོ་སྟོང་གསལ་ཡེ་ཤེས་སྐུ། །རང་བཞིན་ཐུགས་རྗེ་ཕྱོགས་རིས་མེད། །དབྱེར་མེད་ཆེན་པོར་ཡེ་སངས་རྒྱས། །ཞེས་དང༌། མཚན་མར་འཛིན་པའི་འཁོར་བ་སངས། །ཡེ་ཤེས་སྐུ་ཉིད་དོན་ལ་རྒྱས། །སངས་རྒྱས་ཞེས་ཀྱང་དེ་ལ་བྱ། །ཞེས་གསུངས་པ་ལྟར་རོ། །(༦༡)སྒྱུ་འཕྲུལ་ལམ་རིམ་ལས། ལྷག་བཅས་ལྷག་མེད་ལྡོག་ཏུ་བཤད་པ་ནི། རྣམ་སྨིན་གྱི་ལུས་རྟེན་བོར་ནས་ཟག་མེད་ཀྱི་སྐུ་འགྲུབ་པས་འབྱུང་ལུས་ཀྱི་ལྷག་མ་མེད་པ་ལྷག་མེད་དང༌། ལྷག་བཅས་ནི། འབྱུང་ལུས་ཟག་མེད་ཡེ་ཤེས་ཀྱི་སྐུ་གནས་གྱུར་པས་འབྱུང་ལུས་ཀྱི་ལྷག་མ་དང་བཅས་པས་ན་དེ་སྐད་དུ་གྲགས་པའོ། །

དོན་གཉིས་པ་བརྩོན་འགྲུས་འབྲིང་བར་དོར་འཚང་རྒྱ་བའི་མན་ངག་ལ་བཞི་སྟེ། དང་པོ་བར་དོའི་ངོ་བོ་ནི། གཞི་དབྱིངས་ཀ་དག་ལས་གཞན་དུ་སྣང་བ་ཐམས་ཅད་བར་དོའི་གནས་སྐབས་ཡིན་ཏེ། གཞི་སྣང་ཡེ་ཤེས་སུ་ཤར་བའི་སྣང་ཆ་ནི་དག་པ་ཆོས་ཉིད་ཀྱི་བར་དོ་དང༌། འཁྲུལ་སྣང་འགྲོ་དྲུག་གིས་བསྡུས་པའི་ཆོས་སོ་ཅོག་ནི་མ་དག་པ་འཁྲུལ་པའི་བར་དོ་ཡིན་ཏེ། དེ་ཡང་དབྱིངས་ཀ་དག་ལས་ཤར་ཞིང་འཆར་གཞིའི་དབྱིངས་སུ་མ་རྫོགས་བར་གྱི་སེམས་དཔའ་ས་བོན་དང་བཅས་པ་ནི་བར་དོའོ། །གཉིས་པ་དབྱེ་བ་ནི་ཐལ་འགྱུར་ལས། དབྱེ་ན་རྣམ་པ་བཞི་དག་ལས། །ཞེས་གསུངས་པས། སྐྱེ་འཆི་འམ་རང་བཞིན་གྱི་བར་དོ་དང༌། འཆི་ཁའི་བར་དོ་དང༌། ཆོས་ཉིད་ཀྱི་བར་དོ་དང༌། སྲིད་པའི་བར་དོ་དང་བཞིའོ། དང་པོ་ནི། མའི་མངལ་དུ་སྐྱེ་བ་གྲུབ་པ་ནས་འཆི་ནད་ཀྱིས་བཏབ་པ་ཚུན་ཆད་དོ། །གཉིས་པ་ནི། འཆི་བ་ལ་ཕྱོགས་པ་ནས་ནང་དབུགས་ཆད་པ་ཚུན་ཆད་དོ། །གསུམ་པ་ནི། ནང་དབུགས་ཆད་དེ་འོད་གསལ་གྱི་སྣང་བ་ཤར་ནས་ལྷུན་གྲུབ་ཀྱི་སྣང་བ་ཐིམ་པ་ཚུན་ཆད་དོ། བཞི་པ་ནི། ལྷུན་གྲུབ་ཀྱི་སྣང་བ་ཐིམ་ནས་ཕྱི་མའི་སྐྱེ་སྲིད་གྲུབ་པ་ཚུན་ཆད་དོ། །གསུམ་པ་སོ་སོའི་ལམ་ཁྱེར་ནི། དཔེ་དོན་གཉིས་ཀྱིས་སྟོན་པ་སྟེ། དཔེ་སྐྱེ་གནས་ཀྱི་བར་དོ་ལ་སྒྲོ་འདོགས་ཆོད་པ་རྒྱ་ཁྲ་ཚང་དུ་འཇུག་པ་ལྟ་བུ། དོན་བླ་མ་དམ་པ་ལ་བསྟེན་ནས། དེས་བསྟན་པའི་གདམས་ངག་གི་དོན་ཐོས་བསམ་སྒོམ་པས་ནན་ཏན་ལྷུར་བྱས་ཏེ་སྒྲོ་འདོགས་ཆོད་པར་བྱའོ། །དེ་བཞིན་དུ། འཆི་ཁའི་བར་དོ་ལ་གསལ་གདབ་པ་སྒེག་མོ་མེ་ལོང་ལ་ལྟ་བ་ལྟ་བུ་ནི་སྔར་གོམས་པའི་གདམས་པ་རྣམས་(༦༢)སྐབས་འདིར་བློ་ལ་གསལ་ཐེབས་པའོ། །ཆོས་ཉིད་ཀྱི་བར་དོར་རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུ་ནི། གདམས་ངག་གི་དོན་ཉམས་འོག་ཏུ་ཆུད་པས་ཆོས་ཉིད་ཀྱི་སྣང་ཆ་ཇི་ལྟར་ཤར་ཡང་འཇིགས་པ་མེད་པར་རང་སྣང་ཡེ་ཤེས་ཀྱི་རོལ་པར་གདིངས་ཆུད་པའོ། །སྲིད་པའི་བར་དོ་ལ་ལས་ཀྱི་འཕྲོ་མཐུད་པ་ཡུར་བ་རྐོང་ཆད་པ་ལ་ཝ་འཛུགས་པ་ལྟ་བུ་ནི། འཁྲུལ་སྣང་འཇིགས་སྐྲག་ཇི་ལྟར་ཤར་ཡང་སྔར་གོམས་པ་དང་འདི་ལྟར་འཆད་པར་འགྱུར་བའི་གདམས་པའི་གནད་ཀྱིས་དག་པའི་སྐྱེ་སྲིད་ལམ་དུ་འཇུག་པའོ། །དེ་དག་ཀྱང་དབང་པོའི་རིམ་པས་གྲོལ་ཚད་ཀྱང་མུ་གསུམ་དུ་གསུངས་པ་སྟེ་རྒྱས་པར་གཞན་དུ་བཤད་པ་ལས་ཤེས་པར་བྱའོ། །

དོན་གསུམ་པ་བརྩོན་འགྲུས་ཐ་མ་རང་བཞིན་སྤྲུལ་སྐུའི་ཞིང་དུ་དབུགས་དབྱུང་སྟེ་འཚང་རྒྱ་བའི་མན་ངག་ནི། རང་ཤར་ལས། བདེན་པ་མཐོང་བའི་གང་ཟག་ནི། །རྟོགས་པ་རྒྱུད་ལ་མ་སྐྱེས་ཀྱང༌། །ཕྱོགས་བཅུ་སྤྲུལ་པའི་ཞིང་རྣམས་སུ། །གནས་ནས་མཐར་ཕྱིན་གྲོལ་བར་འགྱུར། །ཞེས་གསུངས་པས། འདིར་མངོན་སུམ་གྱི་དོན་མཐོང་ཡང་བརྟན་པ་མ་ཐོབ་པར་སྒོམ་པ་འཕྲོ་ཅན་དུ་གྱུར་ཏེ་བར་དོའི་གྲོལ་ཚད་དང་མི་ལྡན་པ་རྣམས་ཆོས་ཉིད་ཀྱི་བར་དོ་ཤར་ཡང་ངོས་མ་ཟིན་པར་སྲིད་པའི་བར་དོ་རྨི་ལམ་གྱི་འཁྲུལ་ངོ་ཙམ་དུ་ཤར་བ་ལས། ཆོས་ཉིད་བདེན་པའི་བྱིན་རླབས་དང༌། རིག་འཛིན་བརྒྱུད་པའི་ཐུགས་རྗེས་རྨི་ལམ་སད་པའི་ཆ་ཙམ་ལ་མངོན་པར་དགའ་བ་ལ་སོགས་པ་དག་པའི་ཞིང་དུ་སྐྱེ་བ་བླངས་ནས། དེ་བཞིན་གཤེགས་པ་རྣམས་ཀྱི་ཞལ་མཐོང༌། གསུང་ཐོས་དབང་བསྐུར་བ་དང་ལུང་ནོད། དབུགས་དབྱུང་བ་ཐོབ་པས་ཉོན་མོངས་པའི་འཆིང་བ་ལས་གྲོལ་ཏེ་གདོད་མའི་ཞིང་ལ་སྐད་ཅིག་གིས་གྲོལ་བ་ཐོབ། ནང་གསལ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་དུས་གསུམ་འཕོ་འགྱུར་མེད་པའི་དབྱིངས་ལས་མ་གཡོས་བཞིན་དུ་ཕྱོགས་བཅུའི་ཞིང་ཁམས་རྒྱ་མཚོར་ལོངས་སྤྱོད་རྫོགས་པ་(༦༣)དང་སྤྲུལ་པའི་ཟླ་བ་ལ་ཆུ་ཟླ་ལྟར་འགྲོ་བའི་དོན་འཁོར་བ་ཇི་སྲིད་པ་དེ་སྲིད་དུ་མཛད་པ་ནི་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་ལྟར་འབད་མེད་ལྷུན་གྲུབ་ཏུ་འབྱུང་ཞིང་རྒྱུན་མི་ཆད་པ་ཡིན་ནོ། །

བཞི་པ་སྨོན་ལམ་གྱི་མཇུག་བསྡུ་ལ་བརྟེན་ནས་རྩིས་ཆེ་བའི་བཀའ་རྒྱས་བཏབ་པ་ནི། འདས་རྗེས་དོན་ཁྲིད་ལས། ཡང་གསང་སྙིང་ཐིག་མངོན་སུམ་མན་ངག་འདི། །གང་གིས་རེག་པ་མྱང་འདས་དངོས་ལ་སྦྱོར། །ཐེག་བརྒྱད་ཨ་ཏི་ཐིག་ལེ་སྐོར་གསུམ་གྱིས། །འདི་ཉིད་དོན་ལ་རེག་པ་མ་ཡིན་ནོ། །ཞེས་གསུངས་པ་ལྟར་འདི་ལྟ་བུའི་གདམས་པ་ཡིད་བཞིན་གྱི་ནོར་བུ་དབང་གི་རྒྱལ་པོ་བས་ཀྱང་ཆེས་ཤིན་ཏུ་དཀོན་པས། སྐལ་བ་དང་ལྡན་པའི་སློབ་མ་ཐུན་མོང་མ་ཡིན་པ་དག་ལ་ཤིན་ཏུ་གསང་བའི་བཀའ་རྒྱ་དང་བཅས་ཏེ་སྤེལ་ཞིང༌། དེས་ཀྱང་ཉམས་ལེན་ལ་གོམས་འདྲིས་གདིངས་སུ་གྱུར་ནས་གཞན་ཕན་གྱི་ཕྲིན་ལས་སྐྱོ་ངལ་མེད་ཅིང་སྤྲོ་བས་སྒྲུབ་པར་གྱིས་ཤིག །ཅེས་དམ་ཚིག་གི་བཀའ་རྒྱ་དང་སྲུང་མ་ལ་གཉེར་དུ་བཅོལ་ནས་རྩིས་ཀྱི་རྒྱས་གདབ་པར་བྱའོ། །བསྐྱེད་རྫོགས་ཀྱི་ལམ་ཡོངས་རྫོགས་སྨིན་སློབ་ཏུ་འཁྲིད་པར་འདོད་ན། ཐོག་མར་སྔོན་འགྲོ་རྣམས་ཀྱིས་རྒྱུད་སྦྱངས་ནས། བུམ་དབང་བསྐུར་ཏེ་རིགས་ལྔ་ཕྱི་ནང་གི་སྒྲུབ་པའི་བསྐྱེད་རིམ་རྣམས་སྟོན། དེ་ནས་གསང་དབང་བསྐུར་ཏེ་གཏུམ་མོའི་ལམ་རྣམས་སྟོན། དེ་ནས་ཤེས་རབ་ཡེ་ཤེས་ཀྱི་དབང་བསྐུར་ཏེ་ཕོ་ཉའི་ལམ་རྣམས་སྟོན། དེ་ནས་ཚིག་དབང་བསྐུར་ཏེ་ཀ་དག་ཁྲེགས་ཆོད་ཀྱི་ལམ་རྣམས་སྟོན། དེ་ནས་རིག་པའི་རྩལ་དབང་བསྐུར་ཏེ་ཐོད་རྒལ་གྱི་ལམ་རྣམས་རིམ་བཞིན་སྟོན། ཡང་ན་དབང་ལྔ་ཀ་གཅིག་ཏུ་རྫོགས་པར་བསྐུར་ནས་བསྐྱེད་རྫོགས་ཀྱི་ཁྲིད་རྣམས་སྔར་གྱི་རིམ་པ་བཞིན་འཆད། གང་གི་ཚེ་ཡང་ལམ་དེ་དང་འབྲེལ་བའི་གཞུང་ཕྲན་རྒྱབ་ཆོས་དང་བཅས་པ་རྣམས་སོ་སོའི་སྐབས་སུ་འབྲེལ་སྡེབས་ཏེ་བསྐྱེད་རྫོགས་ཀྱི་འགྲོས་གཅིག་ཏུ་དྲིལ་ནས་འཆད་པར་འདོད་ན་གཏེར་གཞུང་གི་མན་ངག་རྩ་བ་རྣམས་(༦༤)དང༌། དགོངས་འགྲེལ་ཡང་ཐིག་ཡིད་བཞིན་ནོར་བུའི་ལེགས་པར་བཤད་པ་རྣམས་ཀྱི་ཟབ་དོན་རིག་འཛིན་བརྒྱུད་པའི་ཕྱག་བཞེས་སྨར་ཁྲིད་ཀྱི་དབྱེ་བསྡུའི་གནས་རྣམས་ལ་འདྲིས་པར་བྱའོ། །

རྒྱལ་བ་ཀུན་གྱི་བགྲོད་པ་གཅིག་པའི་ལམ། །ཟབ་རྒྱས་ཆོས་ཀྱི་སྙིང་པོ་ཨ་ཏི་ཞེས། །གྲུབ་མཆོག་བྱེ་བའི་གཤེགས་ཤུལ་མན་ངག་གི། །མཆོག་གསང་རྩེ་མོ་མཁའ་འགྲོ་སྙིང་ཐིག་ཉིད། །དགོངས་པ་བརྡ་དང་སྙན་བརྒྱུད་ཟབ་མོའི་ལམ། །མཚོན་བྱེད་ཡི་གེས་མཚོན་བྱ་རང་བྱུང་གི། །ཡེ་ཤེས་བྱིན་རླབས་གཏད་རྒྱས་སྐད་ཅིག་ལ། །འགྲུབ་བྱེད་ཟབ་གཏེར་གསང་བ་བླ་ན་མེད། །གང་གིས་ཟབ་དོན་རྟོགས་དཀའ་གསང་བའི་གནས། །འཕགས་མཆོག་ཁོ་ནའི་ཡེ་ཤེས་སྤྱོད་ཡུལ་ལས། །བློ་རྨོངས་སོ་སྐྱེའི་རྟོག་པས་མཚོན་མིན་ཡང༌། །སྐལ་མཉམ་འགྲོ་ལ་ཕན་པར་སྲིད་ན་སྙམ། །དེ་ཕྱིར་རིག་འཛིན་ཌཱཀྐིའི་ཐུགས་ཀྱི་མཚོར། །སྦས་པའི་ཟབ་དོན་ཡིད་བཞིན་དབང་གི་རྒྱལ། །ཆ་ཙམ་མཚོན་པའི་སྣང་བ་ཕྲ་མོས་ཀྱང༌། །ཐར་འདོད་ཡིད་ཀྱི་རེ་བ་སྐོང་མིན་ནམ། །ཁྱད་པར་གསང་མཆོག་མཁའ་འགྲོའི་སྙིང་ཐིག་གི། །ཟབ་ལམ་གསལ་བྱེད་རིན་ཆེན་སྒྲོན་མེ་འདིས། །རྣམ་གྲོལ་སྐུ་གསུམ་ཞིང་ཁམས་མཚོན་ནས་དེར། །འགྲོ་ཀུན་མྱུར་བདེར་འཁྲིད་པ་ཉིད་གྱུར་ཅིག །དེ་ལས་འགྲོ་འདིའི་རང་རྒྱུད་ཀ་དག་གི། །གནས་ལུགས་ནང་གསལ་གཞོན་ནུ་བུམ་སྐུའི་གདངས། །ལྷུན་གྲུབ་སྣང་བཞི་ཆོས་ཟད་འབྲས་བུའི་རྩེར། །ཁམས་གསུམ་འོད་སྐུར་གྲོལ་བའི་བཀྲ་ཤིས་ཤོག །

ཅེས་རྫོགས་པ་ཆེན་པོ་མཁའ་འགྲོ་སྙིང་ཐིག་གི་ཁྲིད་ཡིག་ཟབ་ལམ་གསལ་བྱེད་ཅེས་བྱ་བ་འདི་ནི། གསང་ཆེན་རྫོགས་པ་ཆེན་པོའི་རྣལ་འབྱོར་པ་མེ་རག་ཆོས་རྗེ་པདྨ་ཕྲིན་ལས་དབང་ཕྱུག་གིས་གསེར་གྱི་མེ་ཏོག་དང་བཅས་པའི་གསུང་གིས་རིང་མོ་ནས་བསྐུལ་བ་དང༌། ཉེ་བར་ལམ་འདི་ལ་སྨོན་ལམ་གྱི་མཐུ་གྲུབ་པའི་དད་འདུན་བློ་གྲོས་ཀྱི་ནོར་ལྡན་རིན་ཆེན་བཀྲ་ཤིས་ཀྱིས་ཕུལ་(༦༥)དུ་བྱུང་བའི་སྐྱེས་ཀྱི་མཎྜལ་དང་བཅས་ཏེ་ནན་ཏན་ཆེན་པོའི་གསུང་གིས་བསྐུལ་བ་དོན་ཡོད་པར་བྱ་བའི་ཆེད་དུ། བཀའ་གསང་རྫོགས་པ་ཆེན་པོ་ལ་མོས་པ་ལམ་དུ་བྱེད་པའི་རྣལ་འབྱོར་པ་འགྱུར་མེད་རྡོ་རྗེས་ཨོ་རྒྱན་སྨིན་གླིང་གི་དགེ་གནས་སུ་སྦྱར་བའོ།། །།

༈ ༀ་སྭསྟི། སྔ་འགྱུར་ཤིང་རྟ་ཨོ་རྒྱན་གཏེར་བདག་གླིང་། །གང་གི་ཞལ་ལུང་ཁྲིད་ཡིག་འདུས་གསལ་འདི། །སྤར་དུ་བསྒྲུབ་དགེས་བསྟན་འཛིན་ཞབས་པད་བརྟན། །སྙིང་པོའི་བསྟན་པ་དར་ཞིང་རྒྱས་པ་དང་། །སྙིགས་དུས་རྒུད་པ་མ་ལུས་ཀུན་སེལ་ནས། །སྐྱེ་འགྲོའི་བདེ་སྐྱིད་གོང་ནས་གོང་འཕེལ་ཏེ། །ཀུན་ཀྱང་ཐེག་མཆོག་ལམ་འདིའི་སྣོད་གྱུར་ནས། །ཀུན་བཟང་གདོད་མའི་རྒྱལ་སྲིད་ཟིན་གྱུར་ཅིག །ཅེས་པའང་རྣམ་དཀར་སྒྲུབ་པ་པོ་པདྨ་ཤེས་རབ་བཟང་པོའམ། ལས་རབ་རྡོ་རྗེས་བྲིས་པ་དགེའོ། །དགེའོ། །དགེའོ།། །།

མཁའ་འགྲོ་སྙིང་ཐིག་པར་དུ་བསྒྲུབས་ཚུལ་གྱི་དཀར་ཆག་ཉིན་མོའི་སྣང་བ།

༄༅། །མཁའ་འགྲོ་སྙིང་ཐིག་པར་དུ་བསྒྲུབས་ཚུལ་གྱི་དཀར་ཆག་ཉིན་མོའི་སྣང་བ་བཞུགས་སོ། །

༄༅། །ན་མོ་པདྨཱ་ཀ་རཱ་ཡ།

༄༅། །ཡ སྱ སཱ བྷཱ ཝཱ ཙྪ ཀཱུ ཊ སྠ ས ཏྶུ ཁཱ ཀྵ ར དྷ རྨཱ ཎཱཾ ཀཱ ཡ།

༄༅། །གང་གི་རང་བཞིན་མཁའ་ལྟར་རྣམ་དག་འགྱུར་བ་ཀུན་སྤངས་གཙང་རྟག་བདེ་དམ་ཆོས་ཀྱི་སྐུ། །

༄༅། །བཻ ཀཱ ར ས པྟཱ ངྒ ནོ རུ དྡྷ བཱི པྲ ཀཱ མ ནི རཱ བྷོ གཾ ཀཱ ཡ།

༄༅། །འགགས་མེད་རྣམ་འགྱུར་ཉི་དང་ཟེར་བཞིན་ཁ་སྦྱོར་ཡན་ལག་བདུན་ལྡན་ལོངས་སྤྱོད་རྫོགས་སྐུའི་དཔལ། །

༄༅། །ཤྲེ ཎི རྫ ནཱུ དྒྷེ ན ལོ ཀཱ ཧི ཏཻ རྦ ཧྭ སྟི ཧི ནི རྨཱ ཎཾ ཀཱ ཡ།

༄༅། །འགྲོ་བློའི་རྫིང་བུར་བརྒྱ་ཕྲག་གཟུགས་བརྙན་བཟོ་སྐྱེ་མཆོག་གི་སྤྲུལ་སྐུའི་རོལ་པ་མཐའ་ཀླས་ཅན། །

༄༅། །ཛི ཀྶ རྦ སཱ རྡྷ ཏྭ པ དྨཱ ཀ རཻཿ ཤུ བྷ ནྟུ ཤ ར ཎྱཾ དྷཱ རེ ཥུ།

༄༅། །རྒྱལ་ཀུན་སྤྱི་གཟུགས་པདྨ་འབྱུང་གནས་ཚེ་རབས་གཏན་གྱི་སྐྱབས་སུ་བསྟེན་ནོ་ཤིས་པར་སྐྱོངས། །

འགྲོ་ཀུན་ཡེ་ནས་བདེ་གཤེགས་སྙིང་པོ་ཁྱབ་པར་གདལ་གཞི་ཀུན་བརྟགས་འཁོར་བའི་རྣམ་པ་ཅན། །བག་ཆགས་སྟུག་པོའི་གཞན་དབང་ལ་འཆེལ་ཀུན་རྫོབ་བདེན་དོན་བརྟན་གཡོར་སྣང་ཀུན་རིམ་གཉིས་ཀྱི། །ལམ་ལ་རབ་གོམས་ཡོངས་གྲུབ་དོན་དམ་བདེན་དངོས་ལྷ་ཡི་ཕྱག་རྒྱར་འབྲས་བུའི་ཚུལ་ཤར་བ། །ཀུན་བཟང་ཡབ་ཡུམ་རྡོ་རྗེ་སེམས་དཔའ་ཞི་ཁྲོ་རབ་འབྱམས་ཡི་དམ་དཀྱིལ་འཁོར་ཚོགས་ལ་གུས། །གསང་ཆེན་ཐེག་མཆོག་སྤྲིན་གྱི་བླ་རེ་ནི། །སྣང་བཞིའི་ལམ་གྱི་ཆུ་ཁུར་ལྕི་བའི་འཛུམ། །སྐུ་བཞིའི་གྲུ་ཆར་འཇོ་བའི་གླུ་དབང་གཟུགས། །དགའ་རབ་རྡོ་རྗེ་བསྟན་འགྲོའི་དཔལ་དུ་ཤར། །གདོས་བཅས་སྒྱུ་ལུས་ཟག་མེད་དྭངས་མའི་སྐུར། །ཡོངས་སྨིན་ཤྲཱི་སེང་ཛྙ་ན་སཱུ་ཏྲ་དང་། །བི་མ་ལ་སོགས་དགོངས་བརྡའ་སྙན་བརྒྱུད་ཀྱི། །དྲུག་ལྡན་རྒྱ་བོད་རིག་འཛིན་ཚོགས་ཀུན་རྒྱལ། །གངས་ཅན་མུན་ལྗོངས་ཕན་བདེའི་ཟླ་སྣང་གིས། །དཀར་པོར་བསྒྱུར་མཛད་མཁན་སློབ་ཆོས་གསུམ་དང་། །ལོ་པཎ་སྐྱེ་འཕགས་བྱང་སེམས་གྲུབ་རིགས་ཚོགས། །སྐུ་དྲིན་དྲན་པས་དད་སྤྲོའི་གུས་ཕྱག་བརྩེགས། །ཁྱད་པར་ཐེག་རྩེའི་ཆོས་ཀྱི་ཉིན་མོར་བྱེད། །ཡིད་དཔྱོད་ནམ་མཁའི་གླང་པོས་སྨ་དབབ་པ། །ཉམས་མྱོང་རྟོགས་པའི་རླུང་གཞོན་གྱིས་བསྐྲད་པས། །གྲུབ་པའི་ཉི་གཞོན་གསར་ངོམས་ཀློང་ཆེན་པ། །གཞན་ཡང་ཚེ་གཅིག་གྲོལ་བྱེད་བསམ་འཕེལ་ནོར། །ཡིད་བཞིན་མཆིང་བུར་འགྲམ་ཆུ་མི་ལྡང་བར། །ཕ་རྗེས་བུས་སླེབས་སྔ་འགྱུར་བསྟན་པའི་སྲོལ། །འཛིན་ཀུན་རྒྱལ་བསྟན་མཛེས་པའི་རྒྱན་ཏུ་བསྔགས། །རྒྱལ་བསྟན་ནོར་འཛིན་བུ་མོ་སྙིང་སྟོབས་ཅན། །རྣམ་དཔྱོད་ཕྲག་པར་ཁྱེར་བའི་ལྷག་མ་ཅན། །གནའ་བོའི་ཆོས་རྒྱལ་མེས་དབོན་སྤྱོད་ཚུལ་ལ། །འགྲན་ནུས་ས་སྐྱོང་སྡེ་དགེ་ལས་གཞན་སུ། །དེ་ཕྱིར་རྒྱལ་རབས་ཉིན་མོར་བྱེད་པའི་གཟིས། །མདོ་སྔགས་བསྟན་པའི་པད་ཚལ་པར་གྱི་འཕྲུལ། །དུ་མར་ཕྱེས་པའི་ཆོས་ཆར་གཤིན་པོ་ཡིས། །འགྲོ་རྒྱུད་སྐུ་བཞིའི་ས་བོན་སྨིན་འདི་མཚར། །

དེ་ལྟར་མཆོད་པར་བརྗོད་པ་ཅུང་ཟད་སྔོན་དུ་བཏང་ནས་འདིར་གླེང་བར་བྱ་བ་ནི། སྤྱིར་རྒྱལ་བས་གདུལ་འགྲོའི་ཁམས་དབང་བསམ་པ་དང་མཐུན་པའི་ཆོས་ཇི་སྙེད་ཅིག་གསུངས་པ་དེ་ཀུན་ལུང་རྟོགས་ཀྱི་བསྟན་པ་གཉིས་སུ་འདུས་པ་ལས་རྟོགས་པ་དམ་པའི་ཆོས་ནི་བརྗོད་བྱ་ཡིན། དེ་རྗོད་བྱེད་ལུང་གི་ཆོས་ལ་དབྱེ་སྒོ་མང་ཡང་རྒྱ་མ་ལས་ཀྱི་ལུང་དང་། ཡེ་ཤེས་ལྷ་ཡི་ལུང་། བྱ་བྲལ་རྫོགས་པའི་ལུང་གསུམ་དུ་ཕྱེས་ན་དང་པོ་བློ་དམན་རྣམས་ལ་དགོངས། ཕྱི་མ་གཉིས་དབང་པོ་འབྲིང་དང་། མཆོག་གི་དོན་ཏུ་གསུངས་པའི་མཆོག་དེ་ལ་ཡང་བསྐྱེད་རྫོགས་གཉིས་མེད་གསུམ་ལས་འདིར་ཕྱི་མ་སྟེ། སྤྱིར་རྒྱ་གར་འཕགས་པའི་ཡུལ་དུ་བདག་ཅག་གི་སྟོན་པའི་རྗེས་སུ་འཇུག་པ་རྣམས་ཀྱི་སྡེ་སྣོད་གསུམ་ལ་ཉམས་ལེན་གཙོ་བོར་མཛད་པས་མདོ་ལྟར་གྲགས་ཆེ་ཞིང་། སྔགས་ནི་སྐལ་ལྡན་དབང་པོ་ཡང་རབ་རྣམས་ཀྱིས་གསང་ནས་ཉམས་སུ་ལེན་པས་སླར་གྲུབ་པ་ཐོབ་ནས་གདུལ་བྱ་རྗེས་སུ་འཛིན་ནུས་པ་འདི་སྔགས་འཆང་རྡོ་རྗེ་འཛིན་པ་ཆེན་པོ་ཞིག་གི་ཞེས་ཡོངས་གྲགས་སུ་བརྗོད་པ་ཞིག་ཡིན། ཁྱད་པར་རྫོགས་པ་ཆེན་པོའི་ཆོས་སྐོར་རྣམས་ནི་ཤིན་ཏུ་བཀའ་གཉན་པས་སྐལ་བ་ལྡན་པ་རེ་ཟུང་ལས་ཕལ་ཆེར་གྱིས་སྤྱོད་ཡུལ་དུ་མ་གྱུར།

བོད་གངས་ཅན་ལྗོངས་འདིར་མཁན་སློབ་ཆོས་གསུམ་གདན་འཛོམ་པས་མདོ་སྔགས་གཉིས་ཀ་རྒྱས་ཆེ་ཞིང་། ཁྱད་པར་རྗེ་འབངས་ཉེར་ལྔ་སོགས་སྔགས་ལ་གྲུབ་རྟགས་ཐོན་པ་ཡང་མང་། དེ་ཚུལ་རྒྱུན་མ་ཆད་པ་ལ་གསང་སྔགས་གསར་རྙིང་ཞེས་ལོ་ཙཱ་བས་འགྱུར་སྔ་ཕྱིའི་མིང་ཙམ་གྱི་དབྱེ་གཞི་མང་པོ་བྱུང་ཞིང་། རྙིང་མ་ལའང་བཀའ་གཏེར་དག་སྣང་སོགས་ཀྱི་བརྒྱུད་པའི་ཟམ་མ་ཆད་པའི་སྙན་བརྒྱུད་ཚད་མ་བཞི་ལྡན་སྩལ་ཡོད་པ་ལས། པཎྜི་ཏ་ཆེན་པོ་བི་མ་མི་ཏྲ་དང་། ལོ་ཙཱ་བ་སྐ་བ་དཔལ་བརྩེགས་ཀྱིས་བསྒྱུར་ཞིང་། ཕྱི་རབས་ཀྱི་དོན་དུ་དབུ་རུ་ཞྭའི་ལྷ་ཁང་དུ་གཏེར་དུ་སྦས་པ་གནས་བརྟན་ལྡང་མ་ལྷུན་རྒྱལ་གྱིས་བཏོན་པའི་བི་མ་སྙིང་ཐིག་དང་། ཨོ་རྒྱན་གྱི་སློབ་དཔོན་པདྨ་འབྱུང་གནས་ཀྱིས་རྫོགས་པ་ཆེན་པོའི་གནད་རྣམས་མཁའ་འགྲོ་སྙིང་ཐིག་ཏུ་དྲིལ་ནས་བྲག་དཀར་ཏེ་སྒྲོ་མཁའ་འགྲོའི་ཚོགས་ཁང་དུ་ཌཱཀྐིའི་གཙོ་མོ་ཡེ་ཤེས་མཚོ་རྒྱལ་ལ་གནང་བ་དང་མཆིམས་ཕུར་ལྷ་ལྕམ་པདྨ་གསལ་ལ་སྨོན་ལམ་གཏད་རྒྱ་དང་བཅས་གཏེར་དུ་སྦས་པར་ལྷ་ལྕམ་གྱི་རྣམ་སྤྲུལ་པདྨ་ལས་འབྲེལ་རྩལ་གྱིས་དྭགས་པོ་དང་ལུང་ཁྲ་མོ་བྲག་ནས་བཏོན་པ་གཉིས་སྙིང་ཐིག་མ་གཉིས་སུ་གྲགས་པ་དང་། སྔ་མའི་དོན་སྙིང་པོར་དྲིལ་བ་བླ་མ་ཡང་ཏིག་དང་། རྗེས་མ་རྒྱས་པར་བཀྲལ་བ་མཁའ་འགྲོ་ཡང་ཏིག་དང་། བི་མ་སྙིང་ཐིག་མ་བུ་ཟུང་གི་དོན་གསལ་བར་བཀོད་པ་ཟབ་མོ་ཡང་ཏིག་བཅས་གླེགས་བམ་ཆེ་བ་ལྔར་ལོངས་པར་བཞུགས་པ་ནི་མདོ་སྔགས་ཆོས་ཚུལ་ཀུན་གྱི་སྙིང་པོའི་བཅུད་དམ་པ་སྤྱིར་ཐེག་པ་ཐམས་ཅད་ལམ་བདེན་ཁོ་ན་ཡིན་ཡང་། རྫོགས་པ་ཆེན་པོ་ཨ་ཏི་ཡོ་ག་ནི་དེ་ཐམས་ཅད་ཀྱི་རྩེ་མོར་ཕྱིན་པས་ཡེ་ཤེས་བཅར་ཕོག་ཏུ་ངོས་འཕྲོད་ཕྱིར་ལམ་བདེན་གྱི་རེ་དོགས་སངས་པའི་འབྲས་བུ་དངོས་ཡིན་ཕྱིར་འཇམ་མགོན་ས་སྐྱ་པཎ་ཆེན་གྱིས་ཀྱང་། ཨ་ཏི་ཡོ་གའི་ལྟ་བ་ནི། །ཡེ་ཤེས་ཡིན་གྱི་ཐེག་པ་མིན། །ཞེས་གསུངས། སྤྱིར་སྔགས་ཕྱོགས་ཐམས་ཅད་མཁའ་འགྲོ་མའི་ཚོགས་ལ་གཉེར་དུ་གཏད་པ་ཤས་ཆེ་ཞིང་རྒྱས་པའི་མཐུན་འགྱུར་ཡང་ཞིང་སྔགས་ལྷན་སྐྱེས་ཀྱི་མཁའ་འགྲོ་མས་མཛད་ཕྱིར་རྒྱལ་ཁབ་འདིའི་མངའ་འོག་ཏུ་ཡང་དར་རྒྱས་ཆེ་ཞིང་ཉམས་སུ་ལེན་པས་སྔ་ཕྱིར་གྲུབ་པ་ཐོབ་པ་ཡང་རྒྱུན་མ་ཆད་ཙམ་དེང་སང་གི་བར་དུ་བྱུང་བ་བཅས། སྔ་མ་ས་སྐྱོང་ཆོས་ཀྱི་རྒྱལ་པོ་སྡེ་དགེ་བླ་མ་མཁས་དང་གྲུབ་པའི་བདག་ཉིད་ཤེས་བྱའི་རྩལ་ཆེན་རྫོགས་པ་བྱམས་པ་ཀུན་དགའ་སངས་རྒྱས་བསྟན་པའི་རྒྱལ་མཚན་སྲིད་སྐྱོང་གི་ཁྲིར་ཕེབས་པའི་སྐབས་བསྟན་འགྲོའི་ཕན་བདེ་སྤེལ་བ་དང་ཆབ་སྲིད་མངའ་ཐང་རྒྱས་ཤིང་། སྐུ་ཚེ་གདུང་བརྒྱུད་བཅས་གོང་འཕེལ་འབྱུང་བའི་ཆེད་དུ། ཚེ་དབང་ལྷ་མོས་སྙིང་ཐིག་མ་བུ་གསེར་བྲིས་མཛད་པ་དང་། པར་དུ་བསྐྲུན་པའི་བླ་མ་ཡང་ཏིག་དང་མཁའ་འགྲོ་ཡང་ཏིག་བཅས་གྲུབ་འདུག་ཅིང་། དེའི་འཕྲོ་མཐུད་ནི། ཇི་སྐད་དུ། སྐྱེས་རབས་དཔག་བསམ་འཁྲི་ཤིང་ལས། གང་ཕྱིར་སྲོག་ཆགས་ཐམས་ཅད་ཀྱི། །སྐྱེ་བ་སྔར་གོམས་བག་ཆགས་ནི། །རྒྱུན་དུ་དགའ་བའི་སྐུད་པ་ཡིས། །རྟགས་པར་བརྩེམས་འདི་མེད་མི་འགྱུར། །ཞེས་གསུངས་པ་བཞིན་ས་སྐྱོང་ཆོས་ཀྱི་རྒྱལ་པོའི་ལྷ་སྲས་དམ་ཚིག་རྡོ་རྗེ་འམ་འཇིགས་མེད་ཀུན་དགའ་ཆེ་མཆོག་ཕྱོགས་ལས་རྣམ་པར་རྒྱལ་བའི་སྡེ་ཞེས་གྲགས་པས་སྐྱེ་བར་རྒྱལ་བསྟན་རིན་པོ་ཆེར་སྐྱེས་སྦྱངས་ཀྱི་ཤེས་རབ་ལ་མཐུ་ཕུལ་བྱུང་ཐོབ་པའི་རང་རྟགས་འདིར་ཡང་གསལ་བས་མཁའ་འགྲོ་སྙིང་ཐིག་འདི་ཉིད་པར་དུ་བསྒྲུབས་པར་གནང་བ་སྟེ། དེ་ཡང་སྤྱིར་གོང་སྨོས་ལྟར་ཆོས་རྒྱལ་ཁྲི་སྲོང་གི་ཐུགས་བསྐྱེད་དང་སྔོན་སྨོན་དུས་སུ་བབས་པས་ཨོ་ཌི་ཡཱ་ནའི་སློབ་དཔོན་ཆེན་པོ་ལྗོངས་འདིར་གདན་ཕེབས་ཤིང་བསྟན་པ་སྔ་དར་ལ་གསང་སྔགས་བོད་འདིར་རྒྱས་པ་ཙམ་རྒྱ་གར་འཕགས་པའི་ཡུལ་དུའང་མ་བྱུང་ཞེས་ཇོ་བོ་རྗེ་དཔལ་ལྡན་ཨ་ཏི་ཤས་གསུངས་བཞིན་ལ། ཁྱད་པར་རྫོགས་པ་ཆེན་པོ་ནི། པད་འབྱུང་དང་བི་མ་ལ། ལོ་ཆེན་བཻ་རོ་ཆོས་རྒྱལ་སོགས་ཀྱི་ཐུགས་ཀྱི་ཉིང་ཁུ་ཁྱད་པར་དུ་འཕགས་པས་འཕགས་ཡུལ་དུ་མ་ཟད་བོད་ལྗོངས་འདིར་ཡང་ཕུང་པོ་འོད་སྐུར་ཡལ་བ་མང་ཞིང་། ས་དགེ་དཀར་འབྲུག་སོགས་ཀྱི་སྐྱེས་ཆེན་གྲུབ་པའི་སར་བཞུགས་པ་དུ་མ་ཞིག་གིས་ཀྱང་མིང་གི་ཁྱད་པར་ཙམ་ལས་དངོས་དང་བརྒྱུད་ནས་ཉམས་བཞེས་མཛད་པ་སོ་སོའི་རྣམ་ཐར་དུ་འབྱུང་གཤིས་མཁྱེན་རབ་ཀྱི་བདག་ཉིད་རྣམས་ནས་དགོངས་མངའ་ལྟར་ལགས་ཤིང་། ཆོས་འདི་རྒྱས་པའི་མཐུན་རྐྱེན་ཆོས་བདག་གཏེར་སྟོན་པདྨ་ལས་འབྲེལ་རྩལ་གྱི་སྐྱེ་བ་དེ་མ་ཐག་པ་རྒྱལ་བའི་དབང་པོ་ཀློང་ཆེན་རབ་འབྱམས་བཟང་པོས་མཛད་དེ། དེ་རྒྱུན་མ་ཉམས་པ། བྱང་བ་ཡབ་སྲས་དང་། ཀུན་མཁྱེན་རྒྱལ་བའི་དབང་པོ་ངག་དབང་བློ་བཟང་རྒྱ་མཚོ། རྡོ་རྗེ་བྲག་ཞབས་དྲུང་གོང་འོག་སྨིན་གླིང་གཏེར་ཆེན་སྐུ་མཆེད། བཻ་རོའི་རྣམ་འཕྲུལ་ཀུན་མཁྱེན་ཤེས་རབ་འོད་ཟེར་སོགས་ཀྱིས་གྲུབ་མཐའ་རྐང་ཚུགས་ཀྱི་ཉམས་བཞེས་དང་འཆད་སྤེལ་རྒྱ་ཆེར་གནང་ཞིང་། ཁམས་ཕྱོགས་འདིར་ཡོངས་རྫོགས་བསྟན་པའི་མངའ་བདག་ཀ༔ཐོག་པ་དམ་གཙང་བྱམས་གསུམ་སོགས་ནས་དེང་གི་བར་གདན་རབས་སློབ་རྒྱུན་བཅས་དང་། ཁྱད་པར་གྲུབ་པའི་དབང་ཕྱུག་ཁམས་རྫོགས་ཆེན་པ་ཞེས་ཆོས་མིང་གང་ཟག་ལ་ཐོགས་པ་སྐྱེ་ཕྲེང་རིམ་བྱོན། ཐུགས་སྲས་ཉི་ཟླ་སྐར་གསུམ་སོགས་ཀྱིས་རྫོགས་པ་ཆེན་པོའི་རིང་ལུགས་རྒྱ་ཆེར་སྤེལ་ཞིང་རྒྱུན་མི་ཉམས་པར་དབང་ལུང་མན་ངག་ཐམས་ཅད་བུམ་པ་གང་བྱོའི་ཚུལ་དུ་བླ་མས་སློབ་མ་རྗེས་སུ་འཛིན་ནུས་པར་བཞུགས་བཞིན་པ་འདིའོ། །

དེ་ལྟ་བུའི་གདམས་པ་ཁྱད་པར་དུ་འཕགས་པ་མཁའ་འགྲོ་སྙིང་ཐིག་ཏུ་གྲགས་པ་འདིར་སྤྱིར་ཐེམ་བྱང་ལ་ཇི་ལྟར་འཁོད་པ་དེ་ལས་མ་འདས་ཀྱང་འདིར་པར་ཡིག་སོ་སོར་འཚོལ་བདེ་བ་དང་ཆོས་ཚན་ཇི་ལྟར་བཞུགས་ཚུལ་ཤེས་སླ་བ་སོགས་ཀྱི་ཆེད་དུ་དཔེ་ཚན་ཀ་ཐོར་བསྒྲིགས་ནས་བཀོད་པ་ལ། ཀ་པར་མཁའ་འགྲོ་སྙིང་ཐིག་གི་ཁ་བྱང་། ཁ་པར་བླ་མ་བརྒྱུད་པའི་ལོ་རྒྱུས། ག་པར་བཏགས་གྲོལ་རྒྱུད་དྲུག །ང་པར་བཏགས་གྲོལ་རྒྱུད་དྲུག་གི་ཏི་ཀ་ལ། ཅ་པར་མཁའ་འགྲོ་སྙིང་ཐིག་གི་ལོ་རྒྱུས། ཆ་པར་བཏགས་གྲོལ་སྙིང་པོའི་རྒྱུད་དྲི་མེད་སྙིང་པོའི་ཊིཀ་གསལ་བའི་སྒྲོན་མེ། ཇ་པར་སངས་རྒྱས་ཀྱི་འདས་རྗེས་གསུམ་པ། ཉ་པར་བཏགས་གྲོལ་དོན་ཁྲིད། ཏ་པར་བདེ་གཤེགས་རིགས་ལྔའི་ཕྱི་སྒྲུབ་དང་ནང་སྒྲུབ། ཐ་པར་སྨིན་བྱེད་དོན་གསལ་སྒྲོན་མེ། ད་པར་དབང་ཁྲིད་ནོར་བུ་སྒྲོན་གསལ། ན་པར་དབང་གོང་མ་གསུམ་གྱི་ས་མ་འགྲེལ། པ་པར་ཌཱཀྐི་ལྔའི་མངོན་རྟོགས་དབང་གི་རྒྱབ་ཡིག །ཕ་པར་རིགས་ལྔའི་མཆོད་འབུལ། བ་པར་མཁའ་འགྲོའི་ལས་བྱང་རྩར་ཕྲེང་། མ་པར་དབང་སྒྲུབ་དང་བུམ་སྒྲུབ་དཀྱིལ་འཁོར་རྣམ་དག་བཅས། ཙ་པར་དབང་དོན་གསལ་བའི་རྒྱབ་ཡིག །ཚ་པར་དབང་བཞིའི་གོ་རིམ་དང་ཁྲིད་དུ་བསྐུར་ལུགས། ཛ་པར་ཏི་ཀ་རིག་པའི་སྒྲོན་མ། ཝ་པར་ཐོད་རྒལ་དབང་ལྔ། ཞ་པར་ཌཱཀྐིའི་གཏོར་མའི་རིམ་པ། ཟ་པར་ཌཱཀྐིའི་ཚོགས་མཆོད། འ་པར་དབང་གི་རྒྱབ་ཡིག །ཡ་པར་དབང་གི་ཐོ་ཡིག །ར་པར་གསང་དབང་ལྷན་ཐབས། ལ་པར་ཤེར་དབང་ལྷན་ཐབས། ཤ་པར་ཌཱཀྐིའི་སྲོག་ཏིག །ས་པར་ཌཱཀྐིའི་དུས་གནད་དང་གནད་འབེབས་ཤིས་བླ་རྡོ་བཅས། ཧ་པར་ནོར་སྒྲུབ་གཏེར་གྱི་བུམ་པ། ཨ་པར་ཐོག་རྒལ་དོན་ཁྲིད། ཀི་པར་སྙིང་པོ་གསལ་བའི་མེ་ལོང་ཁྲིད། ཀུ་པར་ཁྲིད་རྒྱབ་ལུང་ཕྲེང་། ཀེ་པར་ལག་ཁྲིད་གནད་ཀྱི་མན་ངག །ཀོ་པར་རྟགས་ཡིག་ཚད་ཡིག །ཁི་པར་སྙིང་ཐིག་ཆེན་མོའི་རྩ་བ། ཁུ་པར་སྙིང་ཐིག་གསང་བའི་ཡང་བཅུད་མེ་ལོང་། ཁེ་པར་ལྟ་བའི་རྣལ་འབྱོར། ཁོ་པར་སྒོམ་པའི་རྣལ་འབྱོར། གི་པར་སྤྱོད་པའི་དང་འབྲས་བུའི་རྣལ་འབྱོར། གུ་པར་ཞུས་ལན་བདུད་རྩི་གསེར་ཕྲེང་། གེ་པར་ཞལ་གདམས་གསང་དམ། གོ་པར་གནད་གདམས་ལྔ་པ། ངི་པར་ཌཱཀྐིའི་ལམ་འབྲས་སྐོར། ངུ་པར་ཞལ་གདམས་གནད་འཕྲེང་། ངེ་པར་ཌཱཀྐིའི་གནད་ཐིག །ངོ་པར་རྡོ་རྗེ་ཆུ་འཐུང་། ཅི་པར་ཞི་བ་བར་དོ། ལམ་གྱི་མཚན་ཉིད། ཅུ་པར་ཁྲོ་བོ་བར་དོ་གནད་སྒྲོན། ཅེ་པར་བར་དོ་འབྱུང་འདུས་རྟགས་རིམ། ཅོ་པར་འཆི་ཁ་བར་དོའི་གནད་དུ་མ་དང་ཆོས་ཉིད་བར་དོའི་ཡོན་ཏན། ཆི་པར་གཏུམ་མོ་ཁྱད་པར་ཅན། ཆུ་པར་རྡོའི་བཅུད་ལེན། ཆེ་པར་སྲོག་ལེན་སྤུ་གྲིའི་རྒྱུད། ཆོ་པར་སྲོག་སྒྲུབ་ནག་མོའི་སྒྲུབ་ཐབས། ཇི་པར་བླ་མའི་རྣལ་འབྱོར། ཇུ་པར་བླ་མའི་རྣལ་འབྱོར་གྱི་ཕྱི་ནང་གསང་གསུམ། ཇེ་པར་ཁྲེགས་ཆོད་ངོ་སྤྲོད་མཐའ་གྲོལ་ཀློང་ཡངས། ཇོ་པར་རྩལ་དབང་། ཉི་པར་ཐིག་ལེ་དྭངས་སྙིགས་འབྱེད་པ་དང་རིགས་བརྒྱུད་བཞག་ཐབས། ཉུ་པར་བར་དོའི་ངོ་སྤྲོད་དང་མངོན་གསུམ་ངོ་སྤྲོད། ཉེ་པར་བར་དོའི་མཚན་ཉིད་བཤད་པ་དང་སྐྱེ་གནས་རྣམས་ཀྱི་རྒྱུ་བསྟན་པ། ཉོ་པར་བཏགས་གྲོལ་ཕྲན་དྲུག་གི་ཏི་ཀ །ཏི་པར་རྟ་མགྲིན་ལུས་དཀྱིལ། ཏུ་པར་ཌཱཀྐིའི་རྐྱང་སྒྲུབ། ཏེ་པར་མཁའ་འགྲོ་སྔགས་ཀྱི་ལྡེ་མིག །ཏོ་པར་བདུད་རྩི་ཕྱག་མཆོད། ཐི་པར་རྟགས་ཚད་ཡི་གེ། ཐུ་པར་ཌཱཀྐིའི་དྲིལ་སྒྲུབ་གསང་བ་སྙིང་དུམ། ཐེ་པར་ཌཱཀྐིའི་ལུས་དཀྱིལ་ཆེན་མོ། ཐོ་པར་པདྨ་ལས་འབྲེལ་རྩལ་གྱི་སྐྱེས་རབས་དང་ལུང་བསྟན། དི་པར་གཏེར་གྱི་ཁ་བྱང་དང་ལུང་བསྟན། དུ་པར་སྙིང་གི་ལག་འགྲིག །དེ་པར་ལོ་རྒྱུས་རྒྱལ་བ་གཡུང་གིས་མཛད་པ། དོ་པར་གཡུང་སྟོན་གསུང་ཕྱག་འཚལ་སོགས། ནི་པར་གཡུང་གི་ལོ་རྒྱུས། ནུ་པར་འཕོ་བ། ནེ་པར་ལྡང་ལྷའི་སྒྲུབ་ཐབས། ནོ་པར་གསོལ་འདེབས། པི་པར་བརྒྱུད་འཛིན་སློབ་བུ་ལུང་བསྟན། པུ་པར་ལྷ་མོ་ལྔའི་ཚེ་སྒྲུབ། པེ་པར་སྤྲུལ་སྐུ་ལེགས་པའི་ལུང་བསྟན། པོ་པར་སྲོག་སྒྲུབ་ནག་མོའི་གཏོར་དབང་། ཕི་པར་མཁའ་འགྲོ་ཡང་ཏིག་གི་དབང་བསྐུར་བའི་ལག་ལེན་དང་མཁའ་འགྲོ་སྙིང་གི་དཀྱིལ་འཁོར་བྲི་ཚུལ། ཕུ་པར་ལོ་རྒྱུས་རིན་པོ་ཆེའི་ཕྲེང་བ། དེ་ལྟ་བུའི་ཆོས་ཚུལ་ཡིད་བཞིན་ནོར་བུ་འདི་དག་པར་དུ་བཞེངས་པའི་བྱ་བ་ལ་བརྩོན་པ་ནི་ཕན་ཡོན་ཆེ་སྟེ། སྟོན་པས། དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱི་ནན་ཏན་ཏུ། །བསྐལ་པ་བྱེ་བར་བརྗོད་མོད་ཀྱང་། །མཐའ་མར་ཕྱིན་པར་འགྱུར་མ་ལགས། །ཞེས་གསུངས། དེ་ལྟ་བུའི་དགེ་བ་རྫོགས་བྱང་དུ་བསྔོ་བ་ནི།

སྭསྟི་ཤྲི་ཡཱམ་སིདྡྷིརྦྷ་བ་ཏུ། གདོད་ནས་བྱང་ཆུབ་སྙིང་པོར་མཛའ་བའི་གཏམ། །སྲིད་ཞིའི་བླ་ན་གྲགས་པའི་དབྱར་གྱི་དུས། །ཐར་པའི་གྲུ་ཆར་བསྐུལ་བའི་སྤྲིན་ཕུང་ནི། །དཀོན་མཆོག་གསུམ་གྱི་ཀླུ་དབང་ཁོ་ནར་བའི། ༡ །ཐེ་ཚོམ་མུན་པས་རབ་བཏང་ཤེས་རབ་སྤྱན། །ཆོས་ཀུན་གནས་ལུགས་རྟོགས་པའི་ཐབས་ལ་མཁས། །སྔོན་བྱོན་རྒྱ་བོད་པཎ་གྲུབ་གཤེགས་པའི་ཤུལ། །ལམ་བཟང་འདི་ལ་གཅེས་སྤྲས་ཅིས་མི་བྱེད། ༢ །སྲིད་འདིར་སྣང་བ་སྟེར་བ་མང་མོད་ཀྱིས། །སྣང་བའི་མཛོད་ལ་འགྲན་མིན་ཐེག་ཚུལ་ཀུན། །མཧཱ་སནྡྷིར་གཞལ་ཚེ་གནས་སྐབས་ཀྱི། །གྲོལ་བ་ཙམ་ལས་དངོས་ལ་རེག་པ་ཉུང་། ༣ །དེ་ཕྱིར་འགྲོ་རྒྱུད་ལྕགས་ཁམས་མན་ངག་སྡེའི། །འགྱུར་རྩིས་ས་ལེ་སྦྲམ་གྱི་རང་གཟུགས་ངོམ། །གཞི་འབྲས་ལྟོ་འབྱོར་གྲུབ་པའི་མིང་སྙན་ཙམ། །མ་ཡིན་རང་ལུས་དྭངས་མར་འགྱུར་འདི་དྲན། ༤ །ད་ལྟའི་ལམ་བཟང་བསམ་འཕེལ་དབང་གི་རྒྱལ། །པར་གྱི་འདུ་བྱེད་རྒྱལ་མཚན་ཏོག་ཏུ་བཀུར། །དབང་རྣོན་ཆོས་རྗེས་འབྲང་ལ་དོན་གཉིས་ཀྱི། །དངོས་གྲུབ་ཆར་དུ་འབེབས་ལ་སོམ་ཉི་ཅི། ༥ །ལུང་རྟོགས་ཆོས་ཚུལ་རིན་ཆེན་བརྩེགས་པའི་ངོས། །སྙིང་པོ་འབོད་སྒྲོགས་མཁྱེན་པའི་ཤེས་པ་ཅན། །ཧ་ནུ་མནྠ་ས་མ་ཡ་བཛྲ། །གཟུར་གནས་དགའ་བསྐྱེད་དཔལ་དུ་དུས་འདིར་བྱུང་། ༦ །རྒྱུ་འདིས་འགྲོ་སེམས་རྨུ་རྒོད་མ་དུལ་རྟ། །ཞི་གནས་བྲེས་སུ་རབ་བཅུག་ལྷག་མཐོང་འགྲོས། །ཐར་པའི་གྲོང་དུ་མྱུར་བར་ཕྱིན་པའི་སྟོབས། །ས་ལམ་བསྒྲོད་པའི་གྲོགས་སུ་ཁུག་པར་ཤོག ༧ །སྒྱུ་འཕྲུལ་སྲས་པོའི་ཆོས་ཀྱི་ཉི་མའི་འོད། །སོ་སོའི་བློ་གྲོས་བུག་པར་དྲངས་པོ་ཀུན། །ཐ་དད་མིང་གིས་ཕྱེས་པའི་གྲུབ་མཐའི་རྫོང་། །ཞིག་ནས་སྣང་བ་རྒྱ་ཆེན་ཐོབ་པར་ཤོག ༨ །སྲིད་པའི་སྟོབས་འབྱོར་ཉི་ཚེར་མི་ཞེན་པར། །ལུགས་བརྒྱའི་རྣམ་དཔྱོད་མཁའ་ལྟར་རབ་ཏུ་ཡངས། །ཁྱད་པར་ཐེག་མཆོག་སྙིང་པོ་བླ་ནས་བླར། །འདེགས་བྱེད་ས་སྐྱོང་ཆོས་སྲིད་འཕེལ་གྱུར་ཅིག ༩ །མདོ་སྔགས་བསྟན་པའི་པད་ཚལ་འབྱེད་པ་ལ། །འཆད་རྩོད་རྩོམ་པའི་འོད་བརྒྱ་སྦྱིན་པའི་ཉི། །བསྟན་འཛིན་སྐྱེས་བུ་བསྟན་འགྲོའི་ལྷ་ལམ་ལ། །ཇི་སྲིད་བསྐལ་བརྒྱར་མི་ནུབ་འཆར་གྱུར་ཅིག ༡༠ །བྲི་བརྐོ་མཐུན་སྦྱོར་ཆོས་འདིར་འབྲེལ་ཐོབ་དང་། །དཔྱད་པ་གསུམ་གྱིས་ཞུས་དག་བགྱིས་པ་སོགས། །ལམ་བཟང་འདི་འབྲས་ཡིད་སྨོན་མ་ཡིན་པར། །ལག་ཏུ་ཐོབ་པའི་རྩེ་དགས་དུས་འདས་ཤོག ༡༡ །འཇིག་རྟེན་ཁམས་འདིར་ལྔ་བརྒྱའི་རྒུད་པ་ཞི། །བདེ་སྐྱིད་རྫོགས་ལྡན་གསར་པའི་ཡ་མཚན་ངོམ། །ཆོས་རྒྱལ་ཡབ་སྲས་ཐུགས་བཞེད་བསམ་དགུ་འགྲུབ། །བཀྲ་ཤིས་དགེ་མཚན་གཡང་དུ་འབོད་པར་ཤོག ༡༢ །མདོར་ན་དཀོན་མཆོག་གསུམ་གྱི་བདེན་པ་དང་། །ཆོས་དབྱིངས་རང་བཞིན་འགྱུར་མེད་དོན་དམ་པའི། །གནས་ལུགས་བསླུ་བ་མེད་དགེས་སྨོན་པ་བཞིན། །རབ་ཏུ་གྲུབ་སྟེ་བསྟན་འགྲོའི་གསོས་སུ་ཤོག ༡༣ །ཅེས་རྫོགས་པ་ཆེན་པོ་མཁའ་འགྲོ་སྙིང་ཐིག་འདི་ཉིད་ས་ཆེན་ཆོས་བཞིན་སྐྱོང་བའི་མངའ་བདག་ལྷ་སྲས་རིན་པོ་ཆེ་ནས་ཐུགས་བསྐྱེད་རྒྱ་ཆེས་པར་དུ་བཞེངས་པར་གནང་བའི་ཚེ། ཞུས་དག་དང་དཀར་ཆག་ཞབས་ཕྱི་སྒྲུབ་དགོས་བཀའ་སྩལ་གསེར་གྱི་ཅོད་པན་སྤྱི་བོར་ཕེབས་བཞིན་སྔ་འགྱུར་བསྟན་པའི་རྗེས་སུ་ཞུགས་ལོ་ཙམ་གྱི་གྱི་ན་བ་འཇིགས་མེད་བློ་གསལ་འོད་ཟེར་དུ་བོད་པས་རང་གནས་ཞེ་ཆེན་བསྟན་གཉིས་དར་རྒྱས་གླིང་གི་ཆོས་སྡེའི་གྲལ་གྱི་ཤག་ཆུང་དུ་སྤེལ་བ་སརྦ་མངྒ་ལམ།། །།

ཟབ་ཆོས་མཁའ་འགྲོ་ཡང་ཏིག་གི་པུསྟ་ཀ་པར་དུ་བསྒྲུབས་ཚུལ་དཀར་ཆག་ཉུང་ངུ་ཨུཏྤ་ལའི་ཕྲེང་བ་ཞེས་བྱ་བ།

༄༅། །ཟབ་ཆོས་མཁའ་འགྲོ་ཡང་ཏིག་གི་པུསྟ་ཀ་པར་དུ་བསྒྲུབས་ཚུལ་དཀར་ཆག་ཉུང་ངུ་ཨུཏྤ་ལའི་ཕྲེང་བ་ཞེས་བྱ་བ་བཞུགས།

༄༅། །ༀ་སྭསྟི་སིདྡྷཾ། བགྲང་ཡས་སྲས་བཅས་རྒྱལ་ཀུན་མཁྱེན་ནུས་བརྩེ། །གསང་གསུམ་ཡོན་ཏན་ཕུང་པོ་ཅིག་ཅར་དུ། །མཚོ་དབུས་པད་སྦུབས་སྙིང་པོར་སྨིན་པའི་དཔྱིད། །མཚོ་སྐྱེས་རྡོ་རྗེ་འགྲོ་བའི་བླ་མར་འདུད། །རྒྱལ་སྲས་བྱེ་བས་བསྡུ་བར་མ་ནུས་པའི། །སངས་རྒྱས་གཉིས་པའི་གསང་ཆེན་བཀའི་བསྡུ་མཛད། །མཁའ་སྤྱོད་བདེ་ཆེན་ཌཱཀྐི་ཡོངས་ཀྱི་གཙོ། །མ་གཅིག་ཡེ་ཤེས་མཚོ་རྒྱལ་དེར་ཕྱག་འཚལ། །གཞུང་ལུགས་འབུམ་ཕྲག་ཡངས་པའི་ནམ་མཁའ་ལ། །ཐོགས་མེད་སྤྱོད་པའི་བློ་གྲོས་འོད་སྟོང་ཅན། །སྙིང་ཏིག་བསྟན་པའི་པད་ཚལ་བཞད་པའི་གཉེན། །ཀུན་མཁྱེན་དྲི་མེད་འོད་ཟེར་བསམ་གྱིན་གུས། །གང་གི་མཁྱེན་དཔྱོད་ཡངས་པའི་གྲུ་གཟིངས་ཀྱིས། །རྒྱལ་བའི་ཆོས་ཚུལ་རྒྱ་མཚོ་བརྒལ་བ་ལས། །ཉེ་བར་ཐོབ་པའི་ཡང་ཏིག་ཡིད་བཞིན་ནོར། །ཟབ་ཆོས་རིན་ཆེན་འདི་མཚུངས་གཞན་ཡོད་མིན། །དེ་ཕྱིར་ཆོས་ཀྱི་དེད་དཔོན་ཀློང་ཆེན་པས། །ལེགས་བཤད་བྱི་དོར་གྱིས་གཙང་པུསྟ་ཀར། །ཆོས་ཚན་བཞུགས་གྲངས་དཀར་ཆག་ཨུཏྤལ་ཕྲེང་། །དཔྱོད་ལྡན་མགྲིན་པའི་རྒྱན་དུ་འདི་ན་སྤེལ། །ཅེས་མཆོད་པར་བརྗོད་པ་ཅུང་ཟད་ཀྱིས་མདུན་བསུས་ནས། འདིར་རྒྱལ་བ་གཉིས་པ་ཨོ་རྒྱན་དུས་གསུམ་མཁྱེན་པའི་ཐུགས་བཅུད་ཟབ་ཆོས་མཁའ་འགྲོ་སྙིང་ཏིག་ལས་འཇམ་མགོན་ཀློང་ཆེན་པས་ཟབ་མོའི་གནད་རྣམས་ལེགས་པར་བཀྲལ་བའི་དགོངས་གཏེར་བསྟན་བཅོས་མཁའ་འགྲོ་ཡང་ཏིག་ཏུ་གྲགས་པའི་ཟབ་ཆོས་ཀྱི་པུསྟཀཿའདི་ཉིད་པར་དུ་བསྒྲུབས་པའི་ཚུལ་ལས་བརྩམ་སྟེ་ལོ་རྒྱུས་གླེང་བ་ཅུང་ཟད་གཅིག་བརྗོད་ན།

འདི་ལ་གསུམ་ཏེ་གང་ལས་བྱུང་བའི་ལོ་རྒྱུས། པར་དུ་བསྒྲུབས་པའི་ཚུལ། ཆོས་ཚན་བཞུགས་བྱང་ཡོངས་བསྔོ་དང་བཅས་པ་ལས། དང་པོ་ནི། རྒྱལ་བ་ཀུན་གྱི་འཕྲིན་ལས་པ་ཨོ་རྒྱན་དུས་གསུམ་མཁྱེན་པ་དེ་ཉིད་ཀྱིས་འཛམ་བུའི་གླིང་ཀུན་ཏུ་བསྟན་འགྲོའི་ཕན་བདེ་སྤེལ་བའི་འཕྲིན་ལས་ནི་མཐའ་ཡས་ལ། ཁྱད་པར་དུ་གངས་ཅན་བོད་ཀྱི་ཡུལ་འདིར་ལྷ་འདྲེ་གདུག་པ་ཅན་ཐམས་ཅད་དམ་ལ་བཏགས་ཤིང་བསམ་ཡས་ལ་སོགས་པའི་གཙུག་ལག་ཁང་མང་པོར་རབ་ཏུ་གནས་པར་མཛད་པ་དང་། མདོ་སྔགས་ཀྱི་ཆོས་མང་པོ་བསྒྱུར་ནས་རྒྱལ་བའི་བསྟན་པ་རིན་པོ་ཆེ་ཉི་མ་ཤར་བ་ལྟར་མཛད་པས། བོད་ཡུལ་འདིར་རྒྱལ་བའི་ཕྲིན་ལས་འདྲེན་པའི་ཤིང་རྟ་གཅིག་པུ་པ་སྟེ་ལྗོངས་འདིར་ཐུབ་བསྟན་ཐོག་མར་སྣང་བར་གྱུར་པ་ནི་སློབ་དཔོན་རིན་པོ་ཆེ་འདི་ཁོ་ནའི་བཀའ་དྲིན་ལས་གཞན་དུ་མ་དམིགས་སོ། །གཞན་ཡང་བོད་ཡུལ་མཐའ་དབུས་མེད་པར་ས་གཞི་རྟ་མིག་གང་ཡན་ཆད་ཞབས་ཀྱིས་བཅགས་ཤིང་བཀྲ་ཤིས་པར་མཛད། རི་བྲག་མང་པོ་སྒྲུབ་པའི་གནས་སུ་བྱིན་གྱིས་བརླབས་ནས་ཟབ་མོའི་གཏེར་ཁ་བསམ་གྱིས་མི་ཁྱབ་པ་སྦ་བར་མཛད་དེ། དེ་ལྟ་བུའི་ཨོ་རྒྱན་དུས་གསུམ་མཁྱེན་པ་དེ་ཉིད་གཞུ་སྟོད་གཏེར་སྒྲོམ་བྲག་ན་བཞུགས་པའི་དུས་སུ་མཁའ་འགྲོ་སྙིང་ཏིག་གི་ཆོས་སྐོར་རྣམས་བཀའ་རྒྱ་བཀྲོལ་ནས་ཡེ་ཤེས་མཚོ་རྒྱལ་དང་མཁའ་འགྲོ་མ་འབུམ་ཕྲག་གཅིག་ལ་དབང་བསྐུར་ནས་རྒྱ་ཆེན་སྤེལ་བའི་ཚེ། རྒྱལ་པོ་ཁྲི་སྲོང་ལྡེའུ་བཙན་གྱིས་མཆིམས་ཕུར་སྤྱན་དྲངས་ནས་ཚོགས་འཁོར་བརྒྱ་རྩ་མཛད་པའི་དུས་སུ་རྒྱལ་པོའི་སྲས་མོ་ལྷ་ལྕམ་པདྨ་གསལ་གྲོངས་པས། མོའི་རོ་ལ་སློབ་དཔོན་གྱིས་རྣམ་ཤེས་བཀུགས་པས་སྨྲ་ཞིང་འགྲོ་ནུས་པར་བྱུང་བའི་ཚེ་དབང་བསྐུར་ཞིང་གདམས་པའི་བེ་བུམ་སྤྱི་བོར་བཞག་ནས་བཀའ་གཏད་མཛད་ཅིང་མོ་རང་གི་ཆོས་སྐལ་དུ་དྭགས་པོའི་དང་ལུང་ཁྲ་མོ་བྲག་ལ་གཏེར་དུ་སྦས་སོ། །

དེ་ནས་ལྔ་བཅུ་ཁ་རལ་གྱི་དུས་སུ་སྦ་སྒང་པ་སྤྲུལ་སྐུ་རིན་ཆེན་ཚུལ་ཁྲིམས་རྡོ་རྗེ་ཞེས་པར་སྐུ་འཁྲུངས་ཤིང་། ཁྲ་མོ་བྲག་ནས་མཁའ་འགྲོ་སྙིང་ཏིག་གི་ཆོས་སྐོར་རྣམས་སྤྱན་དྲངས་ཀྱང་། གཏེར་སྟོན་ཉིད་རྟེན་འབྲེལ་གཞན་དབང་དུ་གྱུར་པས་སྐུ་གཤེགས། སྐུ་འཕོས་མ་ཐག་གི་སྐྱེ་བ་ནི་ཀུན་མཁྱེན་ཆེན་པོ་འདི་ཡིན་ཏེ། དེ་ཡང་གཡོ་རུ་གྲྭ་ཡི་ཕུར་རྒྱལ་བ་མཆོག་དབྱངས་ཀྱི་གདུང་རབས་ཉེར་ལྔ་པར་སྐུ་འཁྲུངས། ནམ་གྲུ་རེ་མ་ཏི་ལུས་དང་གྲིབ་མ་བཞིན་དུ་འགྲོག་ཅིང་བསྲུང་བ་ཀུན་གྱིས་མཐོང་། ལོ་ལྔ་ནས་འབྲི་ཀློག་པར་མཁྱེན། བཅུ་གསུམ་པ་ལ་རབ་ཏུ་བྱུང་བའི་མཚན་ཚུལ་ཁྲིམས་བློ་གྲོས་སུ་འབོད། ཤེས་བྱ་རིག་པའི་གནས་བཟོ་གསོ། སྒྲ་ཚད། སྙན་ངག །མངོན་བརྗོད། སྡེབས་སྦྱོར། སྐར་རྩིས་སོགས་མི་མཁྱེན་པ་མེད་ཅིང་། ཁྱད་པར་དུ་དབུ་མ། ཕར་ཕྱིན། འདུལ་མངོན་ཐམས་ཅད་མཁས་པར་མཁྱེན། གཞན་ཡང་གསང་འདུས། བདེ་མཆོག །ལམ་འབྲས། སྦྱོར་དྲུག །ཞི་བྱེད་གཅོད་ཡུལ་རྫོགས་ཆེན་སེམས་ཕྱོགས་སོགས་གསན་ཅིང་། མདོར་ན་མདོ་རྒྱུད་ལུང་རིགས་མན་ངག་རྒྱ་མཚོའི་ཕ་རོལ་དུ་གཤེགས་པའི་མཁས་པ་ཆེན་པོར་གྱུར། ཁྱད་པར་དུ་བླ་མ་ཀུ་མ་རཱ་ཛ་ལ་རྫོགས་པ་ཆེན་པོ་གསང་བ་སྙིང་ཏིག་གི་ཆོས་སྐོར་མ་ལུས་པ་གསན་པས་བླ་མས་ཀྱང་ཆོས་ཀྱི་བདག་པོར་ལུང་བསྟན་ཅིང་མངའ་གསོལ་ནས་བསྟན་པ་གཏད། གཞན་ཡང་ཡི་དམ་གྱི་ལྷ་དུ་མའི་ཞལ་གཟིགས་ཤིང་། ཁྱད་པར་དུ་དབྱངས་ཅན་མས་ཕྱག་མཐིལ་དུ་པ་ཞག་ནས་གླིང་བཞི་རི་རབ་དང་བཅས་པ་ཞག་བདུན་དུ་གཟིགས། རྗེ་བཙུན་སྒྲོལ་མས་རིན་པོ་ཆེའི་པྲོག་ཞུ་དབུ་ལ་བཅིངས་ནས་བྱིན་གྱིས་བརླབས་པའི་གནང་བ་བྱིན། མགོན་པོ་བྱམས་པས་སྐྱེ་བ་གཉིས་ནས་རྒྱལ་བ་རི་རབ་མར་མེའི་རྒྱལ་མཚན་དུ་སངས་རྒྱས་པར་འགྱུར་བའི་ལུང་བསྟན་གནང་། མཁའ་འགྲོ་མ་རྣམས་དང་ཆོས་ཀྱི་བགྲོ་བ་མི་དང་མི་ལབ་པ་ལྟར་མཛད་ཅིང་། སྔགས་བདག་གཟའ་དང་དམ་ཅན་རྣམས་མི་དང་མི་འགྲོགས་པ་བཞིན་དུ་བྲན་དང་གཡོག་ཏུ་འཁོལ་བ་སོགས་མངའ་ལ། གཞན་ཡང་མདོ་སྔགས་རིག་ལམ་དང་བཅས་པའི་བསྟན་བཅོས་མང་པོ་དང་། ཁྱད་པར་དུ་རྫོགས་པ་ཆེན་པོའི་ལམ་སྲོལ་ཇི་ལྟ་བ་བཞིན་སྟོན་པའི་བསྟན་བཅོས་མང་དུ་མཛད། ས་སྐྱ་པ་བླ་མ་དམ་པ་དང་གསང་ཕུ་བ་གྲགས་བཟང་སོགས་མཁས་པ་མང་པོས་དངོས་དང་ཕྲིན་ཡིག་གི་ལམ་ནས་རྫོགས་པ་ཆེན་པོའི་ལྟ་གྲུབ་ལ་དྲི་བ་བྱུང་བ་རྣམས་ལ་ཐེ་ཚོམ་སེལ་བའི་ལན་དགྱེས་པར་ཕུལ། མཁས་པར་རློམས་པའི་རྒོལ་ངན་གཉིས་འཐུང་གི་ཀླད་པ་ལུང་རིགས་གནམ་ལྕགས་སྡེར་མོས་འགེམས་པར་མ་བཟོད་ནས་ཀུན་གྱིས་ཞབས་ལ་བཏུད་ཅིང་། དུས་དེ་ཙ་ན་ལུང་རིགས་སྨྲ་བའི་ཁྱུ་མཆོག་ཏུ་གྱུར་ཏེ་སུས་ཀྱང་འགྲན་དུ་མ་བཟོད་པས། དོན་དང་མཐུན་པའི་མཚན་ཀུན་མཁྱེན་བསམ་ཡས་པ་ངག་གི་དབང་པོ་ལུང་མང་པར་གྲགས་སོ། །

དེ་ལྟ་བུའི་རྣམ་པར་ཐར་པ་བསམ་བརྗོད་ཀྱི་ཡུལ་ལས་འདས་པའི་ཀུན་མཁྱེན་ཆེན་པོ་དེ་ཉིད་མཆིམས་ཕུར་གསང་བ་སྙིང་ཏིག་གི་ཁྲིད་འཆད་པའི་སྐབས་སུ་མཁའ་འགྲོ་མ་རྣམས་དང་བཀའ་སྲུང་རྣམས་ཀྱིས་ཡང་ཡང་བསྐུལ་བས། མཁའ་འགྲོ་སྙིང་ཏིག་གི་ཆོས་བཀའ་འབྱེད་པར་མཛད་པས། དེའི་ཚེ་མཁའ་འགྲོའི་འདུ་བ་མང་པོ་དང་། བྱིན་རླབས་ཀྱི་རང་སྒྲ་དང་། ནམ་མཁའ་འཇས་ཁེངས་པ་དང་། རྣལ་འབྱོར་པ་ཕོ་མོ་རྣམས་ལ་བདེ་གསལ་མི་རྟོག་པའི་ཉམས་དང་འོད་གསལ་གྱི་ངང་ལ་ཉིན་མཚན་འཁོར་ཡུག་ཏུ་འབྱམས་པ་ཟླ་བ་གཅིག་གི་བར་དུ་བྱུང་ཞིང་། ཁྱད་པར་དུ་ཨོ་རྒྱན་ཆེན་པོའི་ཞལ་ཡང་ཡང་གཟིགས་ཤིང་བྱིན་གྱིས་བརླབས་པ་དང་། ཡེ་ཤེས་ཀྱི་མཁའ་འགྲོས་སྙིང་ཏིག་གི་ཟབ་གནད་རྣམས་མངོན་སུམ་དུ་བཀའ་བཀྲོལ་ནས་གནང་སྟེ། གཅིག་པུར་བསྒོམ་ན་འོད་ལུས་འགྲུབ་ཀྱང་། གཞན་ལ་ཕན་ཕྱིར་འགྲོ་དོན་ལ་བརྩོན་དགོས་པར་རྗེས་སུ་བསྐུལ་བའི་ཚུལ་དང་བཅས་གནང་ཞིང་། དེ་ནས་གངས་རི་ཐོད་དཀར་དུ་མཁའ་འགྲོ་ཡང་ཏིག་གི་ཆོས་བཀའ་རྣམས་ཡི་གེ་བཀོད་པའི་དུས་སུའང་བྱིན་རླབས་ཀྱི་མཚན་མ་རྒྱུན་མི་ཆད་པ་སྔ་མ་ལྟར་བྱུང་ཞིང་། དེ་ལྟ་བུའི་མཁའ་འགྲོ་ཡང་ཏིག་ཡིད་བཞིན་ནོར་བུའི་ཆོས་སྡེ་འདི་སྙིང་ཏིག་གི་ཟབ་གནད་རྣམས་ཡེ་ཤེས་ཀྱི་མཁའ་འགྲོའི་མངོན་སུམ་དུ་བཀྲལ་བའི་དགོངས་གཏེར་ཟབ་མོ་གཞན་གྱི་སྤྱོད་ཡུལ་དུ་མ་གྱུར་པའི་ཟབ་ཁྱད་དུ་མས་ཁྱད་པར་དུ་འཕགས་ཚུལ་གྱི་སྔགས་བརྗོད་རྒྱ་ཆེར་མཛད་པའི་ཆོས་ཚུལ་འདི་ཉིད་དེང་སང་གི་བར་དུ་ཉམས་པ་མེད་པར་རྒྱ་ཆེར་འཕེལ་ཞིང་ཆོས་བརྒྱུད་འཛིན་པའང་མང་དུ་བྱོན་པར་སྣང་ཞིང་། ཁྱད་པར་དུ་ཕྱོགས་འདིར་དར་བའི་བདག་རྐྱེན་གྱི་གྲུབ་པའི་དབང་ཕྱུག་རྫོགས་ཆེན་པ་ཆེན་པོའི་བཀའ་དྲིན་ཏེ། གྲུབ་དབང་རིན་པོ་ཆེ་ཉིད་ལ་མཁའ་འགྲོ་སྙིང་ཏིག་ཡང་ཡིག་དང་བཅས་པའི་བཀའ་བབས་ཤིང་ཆོས་ཀྱི་བདག་པོར་གྱུར་ཏེ། གྲུབ་དབང་རིན་པོ་ཆེ་ཉིད་ཀྱིས་ཆོས་འདི་ལ་བརྟེན་ནས་འོད་གསལ་སྣང་བཞིའི་རྟོགས་པ་མཐར་ཕྱིན་ནས་གྲུབ་པའི་ས་ལ་གཤེགས་ཤིང་རྗེས་འཇུག་སློབ་ཚོགས་རྣམས་ཀྱང་ཆོས་འདིའི་སྒོ་ནས་སྨིན་གྲོལ་ལ་བཀོད་ཅིང་དར་རྒྱས་སུ་མཛད་པ་ཡིན་ལ། དེ་ནས་གདན་རབས་རིམ་བྱོན་ཞལ་སློབ་ཆོས་བརྒྱུད་དང་བཅས་པ་རྣམས་ཀྱིས་ཀྱང་མཁའ་འགྲོ་སྙིང་ཏིག་གི་ཁྲིད་དང་ཀུན་མཁྱེན་ཆེན་པོའི་གསུང་རབ་ལ་འཆད་ཉན་རྩལ་དུ་འདོན་ཞིང་ཐོས་བསམ་བསྒོམ་སྒྲུབ་ཀྱི་སྒོ་ནས་བསྟན་པ་ལ་བྱ་བ་རྒྱ་ཆེར་མཛད་པ་ཤ་སྟག་བྱོན་པ་འདི་ཡིན་ནོ། །

གཉིས་པ་ཇི་ལྟར་པར་དུ་བསྒྲུབས་པའི་ཚུལ་ནི། སྤྱིར་རྒྱལ་བསྟན་རིན་པོ་ཆེའི་བསྟན་པའི་རྩ་ལག་ནི་ས་ཆེན་ཆོས་བཞིན་དུ་སྐྱོང་བའི་རྒྱལ་པོ་ཆེན་པོ་རྣམས་ཡིན་ལ། ཁྱད་པར་བོད་ཆེན་པོའི་ལྗོངས་འདིར་ལས་ཤུགས་བཙན་པོའི་སྟོབས་ཀྱི་དཔུང་པས་སའི་དཀྱིལ་འཁོར་མཐའ་དག་རང་གིས་མཛད་ཅིང་། རིས་སུ་མ་ཆད་པའི་རྒྱལ་བསྟན་རིན་པོ་ཆེ་སྲི་ཞུས་མཆོད་པ་དང་། ཆོས་དང་མཐུན་པའི་མཛད་པས་ཡངས་པའི་མངའ་རིས་བྱམས་བརྩེས་སྐྱོངས་ཤིང་། བསྟན་པའི་བཙས་སུ་གཙུག་ལག་ཁང་དུ་མ་དང་རྟེན་གསུམ་སྤྱི་དང་བྱེ་བྲག་ཆོས་སྦྱིན་པར་གྱི་རྒྱུན་བསམ་གྱིས་མི་ཁྱབ་པ་འཛད་པ་མེད་པར་སྤེལ་བས། སྔོན་གྱི་ཆོས་རྒྱལ་མེས་དཔོན་རྣམས་ཀྱི་མཛད་པའང་ཕྲ་མོར་བྱེད་པའི་ཆོས་ཀྱི་རྒྱལ་པོ་རིམ་པར་བྱོན་པའི་རྒྱལ་ཁབ་ཆེན་པོ་འདི་ཉིད་དུ། སྟོབས་ཀྱི་འཁོར་ལོས་སྒྱུར་བ་མི་དབང་ཡུམ་སྲས་ཀྱིས་སྔོན་གྱི་གདུང་རབས་གོང་མ་རྣམས་ལ་ཅོ་འདྲི་བར་ནུས་པའི་ཆོས་སྦྱིན་རྒྱ་ཆེར་སྤེལ་ཞིང་། ཁྱད་པར་དུ་ས་སྐྱོང་མ་ཡུམ་ཆེན་མོ་ཚེ་དབང་ལྷ་མོ་ཉིད་ཀྱིས་ཐུགས་ཀྱི་ལྷག་བསམ་སྟོན་ཟླ་ལྟར་དཀར་བས་བསྟན་འགྲོའི་ཕན་བདེ་སྤེལ་བ་དང་། ཆབ་སྲིད་མངའ་ཐང་རྒྱས་ཤིང་། སྐུ་ཚེ་གདུང་རྒྱུད་བཅས་གོང་འཕེལ་འབྱུང་བའི་ཆེད་དང་། ཁྱད་པར་དུ་ཆོས་ཚུལ་འདི་ཉིད་མི་ནུབ་ཅིང་གསང་ཆེན་སྙིང་པོའི་བསྟན་པའི་བཙས་སུ་དགོངས་ནས་པར་དུ་བཀོད་པར་གནང་སྟེ། དེ་ཡང་འཆད་ཉན་སྒོམ་གསུམ་གང་ལའང་ཡི་གེ་ལ་མི་བརྟེན་པའི་ཐབས་མེད་ཅིང་། དེ་ཉིད་ཀྱང་དག་མ་དག་ལ་ཤིན་ཏུ་ལྟོས་དགོས་པར་མཁྱེན་དཔྱོད་རྣམ་པར་ཡངས་པས་ལེགས་པར་གཟིགས་ནས་ཆོས་སྦྱིན་རླབས་པོ་ཆེའི་རྒྱུན་སྤེལ་བའི་ཚེ་ཁོ་བོ་ལ་ཞུས་དག་བྱེད་དགོས་ཚུལ་གྱི་བཀའ་སྩལ་གཙུག་གི་ཅོད་པན་དུ་གུས་པས་མཆོད་ནས་ཡི་གེ་ཕྱི་མོ་དག་པ་འགའ་ཞིག་སྒོ་བསྟུན་ནས་དག་པར་བྱས་པ་ལས། སླར་ཡང་སྡེབས་ནོར་བཅོས་བསླད་ལྟ་བུའི་རིགས་རྣམས་རང་བློས་གང་དཔོག་དཔྱད་པས་དག་པར་བགྱིས་ཤིང་། བརྡ་རྙིང་རེ་ཟུང་སྣང་བ་དང་སྔགས་རྣམས་ལེགས་སྦྱར་ཁོ་ནར་མ་ངེས་པས་འགའ་ཞིག་བརྡ་སྤྲོད་པའི་ལུགས་དང་བསྟུན་པར་དཀའ་བར་སྣང་ཡང་ལེགས་སྦྱར་དང་མཐུན་པ་རྣམས་ལེགས་སྦྱར་དང་བསྟུན་ཞིང་མི་མཐུན་པ་རྣམས་ཡིག་རྙིང་སོར་བཞག་ལས་འོལ་ཚོད་མ་སྤོབས་པས་དཔྱད་འོས་མ་མཆིས་ཤིང་། གཞན་བབ་བཅོལ་མེད་པར་དཔྱད་གཞིར་འོས་པ་རྣམས་བཏང་སྙོམས་སུ་མ་སོང་བར་ཡང་ཡང་ཞུས་དག་གྲུབ་པ་ཡིན་ལ། དེའི་ཚེ་སྔོན་གྱི་ཆོས་རྒྱལ་ཆེན་པོའི་ཆོས་སྦྱིན་གྱི་ལུགས་སྲོལ་ཉམས་པ་མེད་པའི་རྒྱུན་བཞིན་གྱི་བྲིས་བརྐོས་སོ་སོའི་ཡོན་སྦྱོར་ཕུན་སུམ་ཚོགས་པ་དང་བཅས། རབ་བྱུང་བཅུ་བཞི་པའི་ཐོག་མར་སླེབ་པའི་མེ་མོ་ཡོས་ཀྱི་ལོ་མཛེས་སྡུག་དབྱར་གྱི་དཔལ་མོས་རྣམ་བཀྲ་མེ་ཏོག་སྣ་ཚོགས་ཀྱི་རྒྱན་ཕྲེང་དང་ལོ་འདབ་སར་པའི་གོས་བཟང་གིས་ཀླུབས་པའི་ཕུན་ཚོགས་ལང་ཚོའི་མཛེས་པ་ངོམ་པའི་དུས་ཚེས་དགེ་བ་ནས་དབུ་བརྩམས་ཏེ། རྣམ་བྱུང་ཞེས་པ་ས་ཕོ་འབྲུག་གི་ལོའི་སྟོན་གསུམ་དུས་ཀྱི་རྒྱལ་མོས་འབྲས་བུ་དང་ལོ་ཏོག་དུ་མ་བཅུད་དུ་སྨིན་པའི་ཁུར་གྱིས་ལྕི་བའི་འདོད་དགུའི་འབྱོར་པ་ངོམ་པའི་དུས་བཟང་པོར་ལེགས་པར་གྲུབ་པ་ཡིན་ནོ། །

གསུམ་པ་ཆོས་ཚན་བཞུགས་གྲངས་སྨོས་ཤིང་དགེ་བ་བྱང་ཆུབ་ཏུ་བསྔོ་བ་ལ། ཀ་པ་ལ་ཐེམ་བྱང་རིན་ཆེན་ལྗོན་ཤིང་། ཁ་པ་ལ་གཏེར་འབྱུང་རིན་པོ་ཆེའི་ལོ་རྒྱུས། ག་པ་ལ་རིན་པོ་ཆེ་དབང་གི་ཕྲེང་བ། ང་པ་ལ་བདག་འཇུག་པདྨ་ཀློང་ཡངས། ཅ་པ་ལ་ཚོགས་མཆོད་རྒྱ་མཚོའི་སྤྲིན། ཆ་པ་ལ་ཕྱག་འཚལ་དྲི་མེད་ཟླ་རྒྱས། ཇ་པ་ལ་གསོལ་འདེབས་བདུད་རྩིའི་ཆུ་རྒྱུན། ཉ་པ་ལ་ཁྲིད་ཡིག་ནོར་བུ་ལུགས། ཏ་པ་ལ་ཁྲིད་ཡིག་ཉི་ཟླ་གཟའ་སྐར། ཐ་པ་ལ་ཟབ་མོ་རབ་འབྱེད། ད་པ་ལ་ཁྲིད་ཡིག་རིན་པོ་ཆེ་གསེར་གྱི་ཕྲེང་བ། ན་པ་ལ་ནམ་མཁའ་རབ་འབྱམས། པ་པ་ལ་ནམ་མཁའ་ཀློང་ཡངས། ཕ་པ་ལ་ནམ་མཁའ་དྲི་མེད། བ་པ་ལ་མན་ངག་རིན་པོ་ཆེ་གསེར་གྱི་སྒྲོམ་བུ། མ་པ་ལ་ཚིག་དོན་རིན་པོ་ཆེའི་བང་མཛོད། ཙ་པ་ལ་ཟབ་དོན་རྒྱ་མཚོའི་སྤྲིན་དང་དེའི་ས་བཅད་བསྡུས་དོན། ཚ་པ་ལ་གསང་སྤྱོད་རྡོ་རྗེའི་ལམ་བསྟན། ཛ་པ་ལ་ངེས་དོན་སྙིང་པོ། ཝ་པ་ལ་བྱིན་རླབས་ཐུགས་སྒྲུབ། ཞ་པ་ལ་རིག་འཛིན་མཆོག་སྒྲུབ། ཟ་པ་ལ་མཁའ་འགྲོ་བདེ་ཆེན་རྒྱ་མཚོ། འ་པ་ལ་རླུང་སྦྱོར་ཡེ་ཤེས་དྲ་བ། ཡ་པ་ལ་ཟབ་ལམ་བདེ་ཆེན་རྒྱ་མཚོ། ར་པ་ལ་འོད་གསལ་འཁོར་ལོ། ལ་པ་ལ་གཞི་སྣང་ངོ་སྤྲོད། ཤ་པ་ལ་འོད་གསལ་སྦུབ་འཇུག །ས་པ་ལ་སྒྲོལ་མ་བཞི་སྐོར། ཧ་པ་ལ་འཁྲུལ་སྣང་གཞི་གྲོལ། ཨ་པ་ལ་རྨི་ལམ་སྦུབ་འཇུག །ཀི་པ་ལ་དབྱིངས་སྣང་ངོ་སྤྲོད། ཁི་པ་ལ་ཟབ་དོན་གནད་ཀྱི་ལྡེ་མིག །གི་པ་ལ་འོད་གསལ་པྲ་ཁྲིད། ངི་པ་ལ་གསང་ལམ་རིན་པོ་ཆེའི་ངོ་སྤྲོད། ཅི་པ་ལ་ཟབ་དོན་སྙིང་པོ། ཆི་པ་ལ་ཀུན་འདུས་རིན་པོ་ཆེའི་ངོ་སྤྲོད། ཇི་པ་ལ་བར་དོ་སྦུབས་འཇུག །ཉི་པ་ལ་བར་དོ་གནད་ཀྱི་སྒྲོན་མེ། ཏི་པ་ལ་གནད་གསུམ་སྒྲོན་མེ། ཐི་པ་ལ་མཐོང་སྣང་རིན་པོ་ཆེ་འོད་ཀྱི་དྲ་བ། དི་པ་ལ་ཞལ་ཆེམ་དྲི་མ་མེད་པའི་འོད། ནི་པ་ལ་ཞལ་ཆེམ་མཐར་ཐུག་གཅིག་མ་དང་གནད་ཀྱི་མེ་ལོང་། པི་པ་ལ་བདེ་གཤེགས་རིགས་ལྔའི་སྒྲུབ་ཐབས་པདྨ་སྟོང་ལྡན། །ཕི་པ་ལ་རིགས་ལྔའི་བཅུད་ལེན་བདུད་རྩི་ཐིགས་པ། བི་པ་ལ་བདུད་རྩི་སྤྲིན་ཕུང་། མི་པ་ལ་འཆི་བ་བརྟག་བསླུའི་མན་ངག་ཉི་ཟླ་གཟའ་བྲལ། ཙི་པ་ལ་བཏགས་གྲོལ་རྒྱུད་ཀྱི་མན་ངག་རིན་ཆེན་སྙིང་པོ། ཚི་པ་ལ་སྲེག་སྦྱོར་འོད་ཀྱི་སྙེ་མ། ཛི་པ་ལ་གཞན་ཕན་འོད་ཀྱི་འཁོར་ལོ། ཝི་པ་ལ་ཕྱག་རྒྱ་བཞི་མཆོད་འོད་ཀྱི་འཁོར་ལོའི་གནད་ཡིག །ཞི་པ་ལ་མཆོད་རྟེན་རབ་གནས་རིན་ཆེན་དྲ་བ། ཟི་པ་ལ་རབ་ཏུ་གནས་པའི་ཆོ་ག་ཡེ་ཤེས་དྲི་མེད། འི་པ་ལ་མཐོང་སྣང་རིན་ཆེན་གསེར་གྱི་དྲ་བ། ཡི་པ་ལ་རྡོ་རྗེ་གཡུ་སྒྲོན་མའི་སྒྲུབ་ཐབས་ཟླ་བ་འདོད་འཇོ། རི་པ་ལ་གཟའ་བདུད་གསང་སྒྲུབ། ལི་པ་ལ་གནོད་སྦྱིན་དམར་ནག་གི་སྒྲུབ་པ་མེ་རླུང་འཁྱིལ་པ། ཤི་པ་ལ་ཤན་པ་སྲོག་སྒྲུབ་ནག་མོའི་གསང་སྒྲུབ། སི་པ་ལ་ཐེམ་བྱང་དཔག་བསམ་ལྗོན་ཤིང་སྟེ། དེ་ལྟར་གཞུང་གི་ཁ་བྱང་ལ་ཇི་ལྟར་བཞུགས་པའི་ཆོས་ཚན་མ་ཚང་བ་མེད་པ་པར་དུ་བཞུགས་པ་ཡིན་ལ། དགེ་བ་རྫོགས་བྱང་དུ་བསྔོ་བ་ཡང་། དེ་ལྟའི་ལེགས་བྱས་རླབས་ཆེན་སྤྱོད་པའི་དགེ། །རྨོངས་དང་ཐ་བའི་སེམས་ཀྱིས་མ་བཀག་པར། །རྒྱལ་སྲས་ཐུ་བོ་ཀུན་ཏུ་བཟང་པོ་ཡི། །ཡོངས་བསྔོ་ཇི་བཞིན་བྱང་ཆེན་མཆོག་རྒྱུར་བསྔོ། །ཞེས་སོ། །

སླར་ཡང་སྨྲས་པ། མགོན་ཁྱོད་རང་སྣང་ལོངས་སྐུའི་ཞིང་ཉུལ་ཡང་། །ཐ་མལ་སྣང་ངོར་མཐའ་ཡས་ཆོས་ཀུན་གྱི། །ཤེས་བྱ་ཀུན་གཟིགས་འཇམ་དབྱངས་པཎྜི་ཏ། །ཀུན་མཁྱེན་ཆེ་དེ་སླར་ཡང་སྙིང་ནས་དྲན། །གང་བློ་རྣམ་དཔྱོད་ཡངས་པའི་གྲྭ་གཅིག་ན། །མཐའ་ཡས་ཤེས་བྱའི་གཞུང་ལུགས་སྲིད་དོ་འཚལ། །དོག་པ་མེད་པར་ཆུད་པའི་མཁྱེན་རབ་མཐའ། །ཀུན་གསལ་ཡངས་པའི་ཕ་མཐས་ག་ལ་འཆིང་། །ལོངས་སྤྱོད་འཁོར་ལོའི་ཆུ་སྐྱེས་འདབ་སྟོང་ལ། །དགའ་བས་རྗེས་ཆགས་ཚངས་པའི་བུ་མོ་དེ། །རྣམ་པར་རྩེན་པས་མཐའ་ཡས་ཆོས་སོ་ཅོག །ལེགས་བཤད་གླུ་རུ་ལེན་ལ་རིངས་པ་བཞིན། །དེ་ཕྱིར་མོས་པའི་ཡོལ་གོ་དང་འཚམས་པའི། །ཆོས་ཚུལ་ཅི་འདོད་འཇོ་ལས་སྐལ་བཟང་འགྲོའི། །ལེགས་སྤྱད་རིན་ཆེན་གྱིས་ཐོབ་རྙེད་དཀའི་ནོར། །ལག་རྩེར་སོན་འདིའང་མགོན་ཁྱོད་ཁོ་ནའི་དྲིན། །དེ་ལྟའི་ཆོས་ཚུལ་འཆི་མེད་རྟག་པའི་དབྱངས། །སྲིད་མཐའི་བར་དུ་ནུབ་མེད་གླུར་འཇོ་ཕྱིར། །ཡི་གེའི་སྒྱུ་འཕྲུལ་འགོག་མེད་ཟླ་གཟུགས་སྟོང་། །ཅིག་ཆར་འཆར་བའི་ཆོས་སྦྱིན་པར་གྱི་རྫིང་། །ཚུལ་འདི་བོད་ཆེན་ནོར་འཛིན་མཛེས་པའི་རྒྱན། །བྱམས་ལྡན་ལྷ་སྲས་ལྕམ་དྲལ་རྒྱལ་ཡུམ་བཅས། །འགྲོ་འདིའི་ལེགས་བྱས་དཔུང་པས་ཚོགས་གཉིས་མཚོ། །བསྲུབས་ལས་བསོད་ནམས་མགྲོན་དུ་སྐྱེས་པ་བཞིན། །ཁྱད་པར་དད་པའི་ལང་ཚོ་གཏོང་ཕོད་ཀྱི། །རྒྱན་ཕྲེང་གིས་མཛེས་ས་སྐྱོང་ཆེན་མོ་ཡིས། །སྙིང་པོའི་བསྟན་ལ་རི་མོར་བགྱི་བའི་སླད། །ཆོས་སྦྱིན་སྐལ་ལྡན་ཤིང་རྟའི་མཆེད་པོར་བསྐྲུན། །གངྒཱའི་བྱེ་སྙེད་གསེར་གྱིས་ཡོངས་བསྐངས་ནས། །སྦྱིན་པ་བས་ཀྱང་ཚིགས་བཅད་གཅིག་བརྗོད་པའི། །ཕན་འདོགས་ལྷག་ཅེས་གསུངས་ན་འཛད་མེད་ཀྱི། །ཆོས་སྦྱིན་འདི་ལྟའི་བསོད་ནམས་གཞལ་དུ་ཅི། །འདིས་མཚོན་བསྐལ་མང་ལེགས་སྤྱོད་འཛམ་བུའི་འབྲས། །དམིགས་པའི་དུག་བྲལ་བྱང་ཆེན་ཆུ་གཏེར་དུ། །ལྷུང་བྱས་སྐུ་གསུམ་གྲུབ་པའི་ཀཱཉྩ་ནའི། །དོན་གཉིས་ཕུན་ཚོགས་འབྱོར་པས་ཕྱུག་པར་ཤོག །སྙིགས་མའི་བརླང་སྤྱོད་རྩུབ་མོས་བོས་པའི་མགྲོན། །དུས་མིན་འཚོ་བྲལ་སྐལ་ངན་འཐིབ་བུའི་སྨག །དཀོན་མཆོག་ཐུགས་རྗེའི་ཉི་གཞོན་གྱིས་གཞིལ་ནས། །ཕན་བདེའི་ལེགས་ལམ་སྣང་བས་རྟག་བསྲུང་ཤོག །ལྷ་མིའི་དབང་ཕྱུག་ཡུམ་སྲས་སྐུའི་འཚོ་གཞེས། །གཞོམ་གཞིག་དང་བྲལ་མངའ་ཐང་གདུང་རྒྱུད་འཕེལ། །ཆབ་འབངས་བྱམས་པའི་སྤྱན་རས་ཀྱིས་འཚོ་ཞིང་། །ལུས་ཅན་བདེ་སྐྱིད་དཔལ་གྱིས་འབྱོར་པར་ཤོག །རྒྱལ་བསྟན་དྲི་མེད་འོད་དཀར་སྲིད་པའི་བླར། །ནུབ་མེད་འཆར་བའི་དགེ་ལེགས་ཟིལ་མངར་གྱིས། །འཁོར་བའི་ཉེས་སྤྱོད་ཚ་གདུང་ཡོངས་བཅིལ་ཞིང་། །དེ་འཛིན་ཚོགས་ཀྱང་བསྐལ་བརྒྱར་འཚོ་གཞེས་ཤོག །མདོར་ན་གནས་སྐབས་མཐར་ཐུག་བཞེད་དགུ་ཀུན། །བསམ་བཞིན་འགྲུབ་པ་བསླུ་མེད་མཆོག་གསུམ་གྱིས། །བྱིན་རླབས་བདུད་རྩིའི་ཆབ་ཀྱིས་བྲན་པ་ཡིས། །འདོད་དོན་འདབ་བརྒྱ་བཞད་པའི་བཀྲ་ཤིས་སྩོལ། །

ཅེས་དཀར་ཆག་ཉུང་ངུ་འདི་ནི་མིའི་དབང་པོ་ཡུམ་སྲས་ཀྱིས་ཆོས་ཚུལ་འདི་ཉིད་པར་དུ་བཞེངས་པའི་ཚེ་ས་སྐྱོང་མ་ཡུམ་ཆེན་མོ་ཉིད་ཀྱི་བཀས་བསྐུལ་བ་གུས་པས་གཙུག་ཏུ་མཆོད་ནས་གུས་ཞབས་རྨོངས་རྟུལ་དཱ་རི་ཏྲ་པ་ངག་དབང་བློ་གྲོས་ཀྱིས་ལྷུན་གྲུབ་སྟེང་གི་རྒྱལ་ཁབ་ཆེན་པོ་ནས་སྤེལ་བ་བི་ཛ་ཡནྟུ།། །།

ཐེམ་བྱང་རིན་ཆེན་ལྗོན་ཤིང་།

༄༅། །ཐེམ་བྱང་རིན་ཆེན་ལྗོན་ཤིང་བཞུགས་སོ། །དགེའོ། །དགེའོ། །དགེའོ། །

༄༅། །མཁའ་འགྲོ་ཡང་ཏིག་གི་ཁ་བྱང་རིན་ཆེན་ལྗོན་ཤིང་ཞེས་བྱ་བ། དཔལ་དོན་ཡོད་གྲུབ་པ་ལ་ཕྱག་འཚལ་ལོ། །ཟབ་ཅིང་རྒྱ་ཆེའི་མཁྱེན་རབ་དཔག་བསམ་ཤིང་། །ཕན་བདེའི་རང་བཞིན་མེ་ཏོག་འབྲས་མང་ལྡན། །ཐུགས་རྗེའི་གྲིབ་བསིལ་ཤིན་ཏུ་རྒྱ་ཆེ་བས། །འགྲོ་བློའི་གདུང་སྐྱོབས་མཛད་ལ་ཕྱག་འཚལ་ལོ། །དག་པའི་མཁའ་ལ་བདུད་རྩིའི་སྤྲིན་འཁྲིགས་པས། །བྱམས་པའི་འབྲུག་སྒྲ་སྙིང་རྗེའི་གློག་ཕྲེང་ཅན། །ཞི་བདེའི་ཆོས་ཆར་ཤིན་ཏུ་རྨད་བྱུང་བས། །དགེ་ལེགས་བསམ་འཕེལ་མཛད་ལ་ཕྱག་འཚལ་ལོ། །དཔག་མེད་དུས་ནས་སྲིད་པའི་སེམས་ཅན་ལ། །ཞི་བའི་དོན་སྟོན་ཐར་པར་འདྲེན་པའི་ལྷ། །བདེ་གཤེགས་རིག་འཛིན་པདྨ་ཐོད་ཕྲེང་རྩལ། །ཡེ་ཤེས་མཚོ་རྒྱལ་ཞབས་ལ་གུས་ཕྱག་འཚལ། །བདག་བློའི་པད་མཚོ་(༢)ཤིན་ཏུ་རྒྱ་ཆེ་བར། །མཁའ་འགྲོ་སྙིང་ཐིག་འོད་སྟོང་ཤར་བའི་མཐུས། །སྔོན་མེད་ཆོས་ཚུལ་བདུད་རྩིས་རབ་གང་སྟེ། །སྙིང་པོའི་འདབ་སྟོང་ཕྱོགས་བཅུར་རབ་ཏུ་རྒྱས། །དཔལ་ལྡན་གངས་རིའི་ཚལ་ན་དགའ་བའི་བློ། །ཤིན་ཏུ་རྨད་བྱུང་གཙུག་གི་ནོར་བུའི་གདུགས། །སྲིད་ལས་རྣམ་གྲོལ་ལྷ་ཡི་དཔག་བསམ་ཤིང་། །ཡིད་མཁའི་ཚལ་དུ་ལེགས་འོངས་བཟང་དགུས་བརྒྱན། །འདིར་ནི་སྐལ་ལྡན་སྲིད་མཚོ་བརྒལ་འདོད་རྣམས། །ངེས་དོན་སྙིང་པོའི་ཆོས་ཚུལ་རིན་ཆེན་གྲུ། །ཚེ་གཅིག་ཐར་གླིང་བསྒྲོད་འདིར་བརྟེན་མཛོད་ལ། །ཇི་སྐད་གསུང་བཞིན་བརྩོན་པས་གནས་པར་རིགས། །གང་གི་བྱིན་རླབས་རི་བོང་འཛིན་གཟུགས་ཅན། །ཚིག་དོན་རྣམ་བཀྲའི་རྒྱུ་སྐར་ཕྲེང་བ་འདི། །བདག་བློའི་ཡིད་མཁར་དེངས་སང་ཤར་བའི་ཚེ། །སྲིད་པའི་མཚན་མོའི་མ་རིག་མུན་བསལ་ནས། །ཡེ་ཤེས་སྣང་བས་བདེ་ཆེན་ཐོབ་བྱའི་ཕྱིར། །ཟབ་མོའི་གནད་བསྡུས་སྙིང་པོའི་བཅུད་ཕྱུང་ནས། །སྐལ་བཟང་བློ་ཡི་ཀུན་ད་རྒྱས་བྱའི་ཕྱིར། །མཁའ་འགྲོ་སྙིང་ཏིག་གསལ་བར་རབ་ཕྱེ་ནས། །དུམ་དང་མ་བུའི་དཀར་ཆག་ཆིག་དྲིལ་ཏེ། །ལུས་སུ་གྲུབ་པའི་རང་བཞིན་བརྩམས་པ་ནི། །དབང་གི་སྡོང་པོ་ཁྲིད་ཀྱི་ཡལ་གས་བརྗིད། །རྒྱབ་ཆོས་འདབ་མ་མེ་ཏོག་འབྲས་མང་ལྡན། །རིན་ཆེན་ལྗོན་ཤིང་བཟང་པོར་གྲུབ་པ་འདི། །སྐལ་ལྡན་སྐྱེ་བོའི་བྱ་ཚོགས་དགའ་བར་མཛོད། །གསང་སྔགས་དབང་གི་ཆུ་བོ་རྒྱ་མཚོ་ཡིས། །རང་གཞན་རྒྱུད་རྣམས་ལེགས་པར་སྦྱངས་པ་འདི། །ཐ་བ་སྲ་བ་རླན་གྱིས་བངས་པ་བཞིན། །དབང་གིས་སྦྱང་ཕྱིར་མ་བུའི་གྲངས་བསྟན་པ། །དབང་གི་སྔོན་འགྲོ་གཏེར་འབྱུང་ལོ་རྒྱུས་དང་། །དམ་ཚིག་སྐོང་དང་མཁའ་འགྲོའི་བརྡ་དབང་དང་། །དབང་བཞིའི་རིམ་པ་བྱིན་རླབས་བླ་མའི་དབང་། །རིག་པའི་རྩལ་དབང་མཁའ་འགྲོའི་དོན་དབང་དང་། །གཞན་བཀའ་གཏད་རྒྱ་བཀའ་སྲུང་བཀའ་བསྒོ་སྟེ། །མ་དགུ་བུ་བཞིས་རིན་ཆེན་(༣)དབང་ཕྲེང་འགྲུབ། །དེ་དག་རྣམས་ནི་ཟབ་ཅིང་རྒྱ་ཆེ་བས། །རིན་ཆེན་དཀར་ཤོག་ངོས་ལ་ལེགས་པར་མནན། །སྨིན་ཅིང་གྲོལ་བར་བྱེད་པའི་གདམས་པ་སྟེ། །དེ་ཡི་ལག་ལེན་མ་བུའི་གྲངས་བསྟན་པ། །བླ་མའི་གསོལ་འདེབས་དྲི་མེད་ཟླ་རྒྱས་དང་། །བདུད་རྩིའི་ཆུ་རྒྱུན་ཁྲིད་ཡིག་ནོར་བུ་ལུགས། །ཉི་ཟླ་གཟའ་སྐར་ཟབ་མོ་རབ་འབྱེད་དང་། །རིན་ཆེན་གསེར་ཕྲེང་མ་བུ་རྣམ་པ་དྲུག །ཡང་ཟབ་གནད་དེ་རབ་ཏུ་དཀོན་པས་ན། །རིན་ཆེན་ཤོག་འདྲའི་ངོས་ལ་ལེགས་པར་བཀོད། །དེ་དག་རྣམས་ཀྱི་རྒྱབ་ཆོས་བསྟན་པ་ནི། །ཁྲེགས་ཆོད་ཐོད་རྒལ་ཟབ་དོན་སྣ་ཚོགས་པ། །སོ་སོར་ཕྱེ་ནས་གོ་རིམ་ངེས་པའི་དོན། །དུམ་དང་མ་བུའི་གྲངས་ནི་འདི་དག་གོ། །ཁྲེགས་ཆོད་རྒྱབ་ཡིག་ནམ་མཁའ་སྐོར་གསུམ་ལ། །ནམ་མཁའ་རབ་འབྱམས་ལྟ་བ་བྱ་རྩོལ་མེད། །ནམ་མཁའ་ཀློང་ཡངས་སྒོམ་པ་བློ་ལས་འདས། །ནམ་མཁའ་དྲི་མེད་སྤྱོད་པ་བླང་དོར་མེད། །གདོད་མའི་ངང་དུ་གཉིས་མེད་ལ་ཟླའོ། །ཐོད་རྒལ་རྒྱབ་ཡིག་འོད་གསལ་སྐོར་གསུམ་ལ། །མན་ངག་རིན་ཆེན་གསེར་གྱི་སྒྲོམ་བུ་ཡིས། །ཟབ་མོའི་གནད་རྣམས་མདོར་བསྡུས་གཅིག་ཏུ་དྲིལ། །ཚིག་དོན་རིན་ཆེན་བང་མཛོད་བཟང་པོ་ཡིས། །དེ་དག་དོན་རྣམས་སོ་སོར་ཕྱེ་སྟེ་བཤད། །ཟབ་དོན་རྒྱ་མཚོའི་སྤྲིན་གྱི་སྙིང་པོ་ཡིས། །ཤིན་ཏུ་རྒྱ་ཆེའི་རྣམ་གྲངས་དཔག་མེད་བཀོད། །གཉིས་ཀའི་དོན་བསྡུ་བོགས་འབྱིན་ཆིག་དྲིལ་བ། །གསང་སྤྱོད་རྡོ་རྗེ་ལམ་བསྟན་སྙིང་པོར་བསྟན། །དེ་དག་རྣམས་ནི་རིན་ཆེན་ཤོག་སྐྱར་བཀོད། །ཟབ་དོན་སྣ་ཚོགས་གབ་པའི་བཅུད་ཕྱུང་བ། །བདུད་རྩིའི་ཐིགས་པ་སྙིང་གི་སྙིང་པོ་ནི། །གང་དང་མི་འདྲ་བསྟན་པར་ཕངས་ན་ཡང་། །ཕྱི་རབས་སྐལ་ལྡན་བརྩེ་བའི་སེམས་བཟུང་སྟེ། །སྙིང་ཕྱུང་ལག་མཐིལ་དག་ཏུ་བཀོད་པ་འདི། །ཤིན་ཏུ་ཟབ་པའི་ཡང་ཟབ་ཤོག་སེར་ཅན། །སྙིང་དང་འདྲ་བས་མ་སྤེལ་སེམས་ལ་སྦོས། །དེ་ཡི་དུམ་དང་མ་བུའི་གྲངས་བསྟན་པ། །རིག་འཛིན་མཆོག་སྒྲུབ་ཚེ་གཅིག་རིག་འཛིན་འགྲུབ། །ཡང་གསང་མཁའ་འགྲོ་བདེ་ཆེན་རྒྱ་མཚོ་ལ། །བསྐྱེད་པའི་རིམ་པ་ཡིད་བཞིན་ནོར་བུ་དང་། །རྫོགས་པའི་རིམ་པ་ཡེ་ཤེས་འཁོར་ལོ་དང་། །རླུང་དྲུག་རྡོ་རྗེའི་ཆིངས་(༤)ཏེ་གསུམ་གྱིས་ཚང་། །དེ་ཡིས་དངོས་གྲུབ་གང་འདོད་ལྷུན་གྱིས་གྲུབ། །རླུང་སྦྱོར་ཡེ་ཤེས་དྲ་བས་དེ་ཉིད་མཐོང་། །ཟབ་ལམ་བདེ་ཆེན་རྒྱ་མཚོས་ཏིང་འཛིན་འགྲུབ། །འོད་གསལ་འཁོར་ལོས་ཚེ་འདིར་འོད་ལུས་འགྲུབ། །གཞི་སྣང་ངོ་སྤྲོད་གྲོལ་བཞིའི་སྣང་བ་ཤེས། །འོད་གསལ་སྦུབས་འཇུག་མཚན་མོའི་འོད་གསལ་འགྲུབ། །སྒྲོན་མ་བཞི་སྐོར་ཡེ་ཤེས་རང་གནས་ཤེས། །དེ་ལྟར་མ་བུ་རྣམ་གྲངས་རྣམ་དགུ་ཡང་། །ཆོས་སྡེའི་རང་བཞིན་རྣམ་བདུན་དག་ཏུ་བསྡུས། །དེ་དག་རྣམས་ནི་ཡང་ཟབ་བླ་ན་མེད། །མཁའ་འགྲོའི་ཞལ་གདམས་ཤོག་སེར་ངོས་ལ་བཀོད། །རིགས་ལྔའི་གསང་སྒྲུབ་པདྨ་སྟོང་ལྡན་ལ། །ཕྱི་ནང་གསང་བ་ཡང་གསང་རྣམ་བཞིས་ཚང་། །དེ་ཡིས་གཙོ་བོར་རང་བཞིན་སྤྲུལ་སྐུ་ཐོབ། །རིགས་ལྔའི་བཅུད་ལེན་བདུད་རྩི་ཐིགས་པ་ལ། །ས་ཡི་བཅུད་ལེན་བདུད་རྩི་ཡང་ཞུན་དང་། །ཆུ་ཡི་བཅུད་ལེན་བདེ་ཆེན་རྒྱ་མཚོ་དང་། །མེ་ཡི་བཅུད་ལེན་བདེ་དྲོད་རང་འབར་དང་། །རླུང་གི་བཅུད་ལེན་དཔག་བསམ་ལྗོན་ཤིང་དང་། །ནམ་མཁའི་བཅུད་ལེན་ཡེ་ཤེས་གསང་སྐོར་ཏེ། །མཆོག་དང་ཐུན་མོང་དངོས་གྲུབ་མྱུར་དུ་འགྲུབ། །གེགས་སེལ་ནད་འདོན་བདུད་རྩི་སྤྲིན་ཕུང་ལ། །འཁོར་ལོ་ལྔ་སྟེ་ཕྱི་ནང་བར་ཆད་སེལ། །འཆི་བ་བརྟག་བསླུ་ཉི་ཟླ་གཟའ་བྲལ་ལ། །དུམ་བུ་གཉིས་ཏེ་རྣལ་འབྱོར་དོན་ཆེན་འགྲུབ། །བཏགས་གྲོལ་མན་ངག་རིན་ཆེན་སྙིང་པོ་ཡིས། །དེ་ཉིད་དོན་ཤེས་རང་གཞན་ཕན་པ་འགྲུབ། །འདི་དག་རིན་ཆེན་ཤོག་འདྲའི་ངོས་ལ་བཀོད། །སྲེག་སྦྱོང་ཆོ་ག་འོད་ཀྱི་སྙེ་མ་ཡིས། །ཚེ་འདས་སྐུ་གདུང་ཇི་ལྟར་བཞུ་བ་བསྟན། །གཞན་ཕན་འོད་ཀྱི་འཁོར་ལོ་བཟང་པོ་ཡིས། །བར་དོའི་འགྲོ་བ་རྣམས་ལ་ཕན་བཏགས་བཤད། །མཆོད་རྟེན་རབ་གནས་རིན་ཆེན་དྲ་བ་ཡིས། །ཚྭ་ཚྭའི་སྒོ་ནས་ཚོགས་བསགས་སྒྲིབ་སྦྱོང་བསྟན། །རབ་གནས་ཆོ་ག་ཡེ་ཤེས་དྲི་མེད་ཀྱིས། །སྐུ་གསུང་ཐུགས་རྟེན་རབ་ཏུ་གནས་པར་བཤད། །མཐོང་སྣང་རིན་ཆེན་གསེར་གྱི་དྲྭ་བ་ཡིས། །ཉམས་སུ་བླངས་པའི་རྟགས་ཚད་འབྲས་བུ་བསྟན། །འདི་དག་རྣམས་ཀྱང་ཟབ་ཅིང་རྒྱ་ཆེ་བས། །རིན་ཆེན་དཀར་ཤོག་བཟང་པོའི་ངོས་ལ་མནན། །དེ་ལྟར་ཟབ་ཆོས་བསྟན་པ་བསྲུང་བའི་ཕྱིར། །བཀའ་སྲུང་སྒྲུབ་སྡེ་རྒྱ་མཚོའི་སྙིང་པོ་ལས། །ཤིན་ཏུ་ཡང་ཟབ་རིན་ཆེན་(༥)རྣམ་གསུམ་ལས། །གཡུ་སྒྲོན་སྒྲུབ་ཐབས་ཟླ་བ་འདོད་འཇོ་ཡིས། །ཅི་བསམ་འགྲུབ་ཅིང་རྐྱེན་ངན་བར་ཆད་སེལ། །ཡིད་བཞིན་ནོར་བུ་དབང་གི་རྒྱལ་པོ་འདྲ། །གཟའ་བདུད་གསང་སྒྲུབ་དུག་གི་སྤུ་གྲི་ཡིས། །གནོད་བྱེད་སྲོག་རྩ་སྐད་ཅིག་གཅོད་པས་ན། །འཇིགས་པའི་གནམ་ལྕགས་འཁོར་ལོ་བསྐོར་བ་འདྲ། །སྲོག་སྒྲུབ་གསང་སྒྲུབ་དུག་མདའ་ནག་པོ་ཡིས། །དགྲ་བགེགས་ཐལ་བའི་རྡུལ་དུ་རློག་པས་ན། །འཇིགས་པའི་སེར་སྤྲིན་མེ་ལྟར་འབར་བ་འདྲ། །འདི་དག་མཁའ་འགྲོ་སྙིང་ཏིག་རྣལ་འབྱོར་པའི། །ཉམས་ལེན་གསང་བའི་རྒྱབ་རྟེན་ཡང་གསང་དུ། །ཇི་ལྟར་གསུང་བཞིན་བདག་གིས་ཤོག་འདྲར་བཀོད། །ཟབ་མོའི་གནད་བསྡུས་བདག་གིས་ཚད་ཕབ་པས། །ཤིན་ཏུ་གསང་སྟེ་སྙིང་གི་ཚུལ་དུ་བཅངས། །ཕྱི་རབས་དད་བརྩོན་སྙིང་གི་བུ་གཅིག་ལ། །ལྷག་ཆད་མེད་པར་བྱིན་ནས་བཀའ་རྒྱས་ཐོབ། །དེས་ཀྱང་བསྟན་པའི་བཙས་སུ་བྱེད་པར་ཤོག །དེ་ལྟར་གསང་བའི་མན་ངག་སྙིང་པོའི་གྲངས། །དོན་རྣམས་བསྡུས་ཏེ་གཅིག་ཏུ་དྲིལ་བ་ནི། །དབང་གི་མ་བུའི་སྐོར་ལ་མ་བཅུ་གསུམ། །ཁྲིད་ཀྱི་སྐོར་ལ་མ་བུ་རྣམ་པ་དྲུག །རྒྱབ་ཆོས་སྐོར་ལ་མ་བུ་ལྔ་བཅུ་གཅིག །དེ་ལྟར་དྲིལ་བས་བདུན་ཅུ་ཐམ་པ་ནི། །ཆ་ཤས་དབྱེ་བས་རྒྱ་ཆེར་བཀོད་པ་ཡིན། །སྡེ་ཚན་དབྱེ་བས་གྲངས་སུ་མདོར་བསྡུ་ན། །རིན་ཆེན་ཤོག་སྐྱ་ཤོག་སེར་ཤོག་འདྲ་གསུམ། །ཤོག་སྐྱའི་སྡེ་ཚན་ལ་ནི་བཅུ་བཞི་དང་། །ཤོག་སེར་བཅོ་ལྔ་རིན་ཆེན་ཤོག་འདྲ་ལ། །སྡེ་ཚན་བཅུ་བཞིས་ལེགས་པར་གཏན་ལ་ཕབ། །སྡེ་ཚན་དབྱེ་ན་བཞི་པཅུ་རྩ་གསུམ་གྱིས། །མཁའ་འགྲོ་སྙིང་ཏིག་གསང་བའི་སྙིང་པོ་ཚང་། །དེ་ལས་མང་ཉུང་བྱུང་ན་གདམས་པ་འཆལ། །དེ་ཡི་ཕྱིར་ན་གསང་བའི་ཁ་བྱང་གཅེས། །

ཨེ་མ་ཧོ། གངས་རིའི་ཁྲོད་འདིར་རྒྱལ་སྲས་པདྨ་ཡིས། །ཕྱོགས་བཞིར་ཟབ་གཏེར་སྦས་པའི་རིམ་པ་ལ། །ལྷོ་རུ་བསྐྱེད་རྫོགས་དྲིལ་བ་སྡོང་པོའི་སྐོར། །ནུབ་ཏུ་གསལ་བ་མེ་ཏོག་ཁ་བྱེ་འདྲ། །བྱང་དུ་རྒྱས་པ་ཡལ་འདབ་ཆེན་པོ་ལ། །ཤར་དུ་ལེགས་སྨིན་འབྲས་བུ་བཅུད་དུ་འདྲིལ། །དེ་ཡི་ནང་ནས་ཡང་ཟབ་འབྲས་བུའི་སྐོར། །རྡོ་རྗེ་སྙིང་པོའི་ཐེག་པ་མཐར་ཐུག་འདི། །ཀུན་གྱི་ཡང་རྩེ་ཡང་རབ་འགའ་ཡི་ཕུལ། །མཁའ་(༦)འགྲོ་སྙིང་ཏིག་གསང་བའི་མཛོད་དུ་སྦས། །དེང་སང་ཚེ་ལོ་ལྔ་བཅུ་ཁ་རལ་ལ། །ཟབ་མོའི་དགོངས་གཏེར་མི་ཡུལ་སྣང་བ་ནི། །ཆུ་མོ་གླང་ལ་ཤོག་སེར་སྒོ་ཕྱེས་ནས། །རྗོད་བྱེད་ཚིག་ལ་དབང་བའི་ཆ་ཙམ་ལས། །ཟབ་མོའི་དེ་ཉིད་རྟོགས་པའི་མཐུ་མེད་དོ། །དེང་སང་ཤིང་ཡོས་དཔྱིད་ཟླ་གསུམ་དག་ལ། །བླ་མ་མཁའ་འགྲོའི་བྱིན་རླབས་ལུང་བསྟན་ལས། །བརྗོད་བྱའི་དོན་རྣམས་བདག་གི་སྙིང་ལ་བབས། །མངོན་སུམ་ཉིད་དུ་མཁའ་འགྲོས་གནད་བསྟན་ནས། །ཚིག་དོན་མ་ལུས་རྟོགས་པའི་ཉི་ཤར་བས། །བདག་བློའི་པད་ཁ་རབ་ཏུ་རྒྱས་པར་བྱས། །དེ་དོན་མན་ངག་ཡང་ཟབ་སྙིང་པོའི་དོན། །ཇི་ལྟར་རྟོགས་བཞིན་འཁྲུལ་པ་མེད་པའི་བློས། །གབ་ཅིང་གཅུས་ཏེ་སྦས་པའི་གནད་རྣམས་ཀུན། །ཕྱི་རབས་དོན་དུ་མ་སྦས་གསལ་བར་བཀོད། །དོན་འདིར་བློ་དག་འཁྲུལ་པ་མེད་པས་ན། །རིག་འཛིན་གོང་མའི་མན་ངག་རྣམས་དང་འདྲ། །ཐེ་ཚོམ་མི་དགོས་ནོར་བའི་དྲི་མ་མེད། །ཕྱི་རབས་སྐལ་ལྡན་རབ་ཏུ་དགའ་བར་མཛོད། །ཟབ་མོའི་གནད་རྣམས་འདིར་བཀོད་དགེ་བ་དེས། །འགྲོ་ཀུན་ཐེག་མཆོག་རིན་ཆེན་འདིར་ཞུགས་ཏེ། །ཚེ་གཅིག་སངས་རྒྱས་འོད་ལུས་འདིར་འགྲུབ་ནས། །སྲིད་པའི་ཞིང་འདིར་འགྲོ་བའི་དོན་བྱེད་ཤོག །མ་ལུས་བདེ་གཤེགས་སྙིང་པོ་འགྲོ་བ་ཀུན། །མེད་སྣང་འཁྲུལ་པའི་འཁོར་བ་ལས་བརྒལ་ཏེ། །ཐམས་ཅད་ཕྱམ་གཅིག་གདོད་མའི་སར་ཕྱིན་ནས། །སྐུ་ལྔ་ཡེ་ཤེས་འདུ་འབྲལ་མེད་པར་ཤོག །མཁའ་འགྲོ་སྙིང་ཏིག་ལྷ་ཡི་དཔག་བསམ་ཤིང་། །བདག་བློའི་སྐྱེད་ཚལ་ར་བར་ལེགས་འཁྲུངས་པས། །དེ་དོན་མན་ངག་མེ་ཏོག་འབྲས་མང་འདིས། །འགྲོ་ཀུན་བྱ་ཚོགས་རབ་ཏུ་དགའ་བར་ཤོག །ཆོས་ཚུལ་འདི་ནི་དྲི་མེད་འོད་ཟེར་གྱིས། །སྟོན་གསུམ་མེ་ཏོག་འབྲས་བུ་སྨིན་པའི་ཚེ། །གངས་རི་ཐོད་དཀར་རིན་ཆེན་སྙིང་པོའི་མགུལ། །ཨོ་རྒྱན་རྫོང་ཞེས་བྱ་བའི་གནས་སུ་བཀོད། །སྙིང་ཏིག་རྒྱུད་དོན་མན་ངག་རྒྱ་མཚོ་ལས། །ཟབ་དོན་རིན་ཆེན་སྙིང་པོ་འདི་བླངས་ཏེ། །ཚིག་དོན་སྣ་ཚོགས་འདོད་དགུའི་ཆར་ཕབ་པས། །འགྲོ་བའི་དོན་གཉིས་ལྷུན་གྱིས་གྲུབ་པར་ཤོག །

མཁའ་འགྲོ་སྙིང་ཏིག་གི་ཐེམ་བྱང་རིན་ཆེན་ལྗོན་ཤིང་ཞེས་བྱ་བ། དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་(༧)གནས་ཀྱི་ཐུགས་ཀྱི་འོད་ཟེར་གྱིས་བློའི་པདྨོ་རབ་ཏུ་རྒྱས་པའི་རྣལ་འབྱོར་པ་དྲི་མེད་འོད་ཟེར་གྱིས། རང་གི་རྟོགས་པའི་དོན་ཇི་ལྟ་བ་བཞིན་ཕྱི་རབས་ཀྱི་སྐྱེ་བོ་དཔག་ཏུ་མེད་པས་རྟོགས་པར་བྱ་བའི་ཕྱིར་སྐལ་བཟང་གི་སློབ་མ་འོད་ཟེར་གོ་ཆས་གསོལ་བ་བཏབ་པའི་ངོར། སྟོན་གསུམ་མེ་ཏོག་དང་འབྲས་བུ་སྨིན་པའི་ཚེ། གངས་རི་ཐོད་དཀར་གྱི་མགུལ་དུ་མཛད་པ་རྫོགས་སོ། །དགེ་ལེགས་སུ་གྱུར་ཅིག །འདི་ཉིད་ཕྱི་རབས་ཀྱི་ཚེ་སྐལ་བཟང་གི་རྣལ་འབྱོར་པ་རྣམས་ཀྱིས་དབང་ཁྲིད་གདམས་པ་དང་བཅས་པ་རིམ་པས་བཏབ་ནས། སྣོད་ལེགས་པར་བརྟགས་ཏེ་རང་གཞན་གྱི་དོན་གྲུབ་ངོ་ཤེས་པའི་སློབ་མ་གཅིག་ལ་ཐེམ་བྱང་གཏད་པས་འགྲོ་དོན་འགྲུབ་ཅིང་ཕན་ཐོགས་པས་དེ་ལྟར་བྱའོ། །གཞན་དག་ལ་ཐེམ་བྱང་རབ་ཏུ་སྦ་ཞིང་གསང་བར་བྱའོ། །གཟའ་བདུད་ཆེན་པོ་རཱ་ཧུ་ལ་དང་། གཤན་པ་སྲོག་སྒྲུབ་ནག་མོ་དང་། རྡོ་རྗེ་གཡུ་སྒྲོན་མ་གསུམ་ལ་བཀའ་འདི་གཏད་པ་ཡིན་པས་ཐུབ་པར་སྲུངས་ཤིག །ལས་མེད་ཀྱི་ལག་ཏུ་འགྲིམ་དུ་མ་འཇུག་ཅིག །ལས་ཅན་གྱི་ལག་ཏུ་སྤྲོད་ཅིག །འདྲ་མིན་དང་བཅོས་བསླད་བྱེད་པ་བྱུང་ན་སྙིང་ཁྲག་གཏིང་ནས་དྲོངས་ཤིག །ས་མ་ཡ། ས་མ་ཡ། ས་མ་ཡ། ཁྠཾ། དགེའོ།། །།

གཏེར་འབྱུང་རིན་པོ་ཆེའི་ལོ་རྒྱུས་ཞེས་བྱ་བ།

༄༅། །གཏེར་འབྱུང་རིན་པོ་ཆེའི་ལོ་རྒྱུས་ཞེས་བྱ་བ་བཞུགས་སོ། །

༄༅། །རྒྱ་གར་སྐད་དུ། རཏྣ་མ་དྷུ་ར་བྷ་ས་ལི་ནཱ་མ། བོད་སྐད་དུ། གཏེར་འབྱུང་རིན་པོ་ཆེའི་ལོ་རྒྱུས་ཞེས་བྱ་བ། ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ལ་ཕྱག་འཚལ་ལོ། །དཔལ་ལྡན་ཚོགས་གཉིས་སྣ་ཚོགས་ཁམས་ཅན་ཡེ་ཤེས་དུ་མའི་གངས་ཆེན་མཚོ། །མཁྱེན་བརྩེའི་རང་བཞིན་གཏིང་མཐའ་དཔག་ཡས་རྣམ་གྲོལ་ཡིད་བཞིན་མཆོག་གི་གཏེར། །ཐུགས་རྗེའི་དུས་རླབས་རྒྱ་ཆེ་དང་ལྡན་སྔོན་མེད་ཆུ་སྲིན་འཛིན་ཁྲིའི་གནས། །སྐུ་གསུམ་ཕྲིན་ལས་(༢)ལྷུན་གྱིས་གྲུབ་དེ་ཀུན་ནས་དགའ་བའི་གཙུག་གིས་མཆོད། །རང་བཞིན་སྔོན་ནས་གོམས་པའི་ཐུགས་རྗེ་དང་། །སྣ་ཚོགས་ཐབས་ཚུལ་དཔག་མེད་སྟོབས་མངའ་བས། །ནམ་མཁའི་མཐའ་ཀླས་གྱུར་པའི་སེམས་ཅན་ལ། །མཐའ་ཡས་ཕན་པ་མཛད་དེ་ཀུན་ཏུ་རྒྱལ། །གང་ཞིག་ཐོས་ནས་དད་པའི་སྟོབས་གཡོ་བས། །ལས་དང་ཉོན་མོངས་འཁོར་བ་ཕྱིར་བསྙིལ་ཞིང་། །མྱ་ངན་འདས་པ་མཆོག་ཏུ་ཞིར་འགྲོ་བའི། །རིན་ཆེན་ལོ་རྒྱུས་རྣ་བའི་བདུད་རྩི་ཉོན། །

དེ་ལ་གདོད་མའི་གཞི་འཁོར་བ་དང་མྱ་ངན་ལས་འདས་པ་གང་དུའང་རྒྱ་ཆད་ཕྱོགས་ལྷུང་མེད་པའི་སྔོན་རོལ་ན། ཡུལ་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་སྟོང་ལ་གོ་འབྱེད་པ། ནམ་མཁའ་ཡངས་པའི་དཀྱིལ་ལྟ་བུ། དྭངས་ལ་མི་གཡོ་བ་རྒྱ་མཚོ་དྭངས་པའི་གཏིང་ལྟ་བུ། གསལ་ལ་སྒྲིབ་པ་མེད་པ་མེ་ལོང་གཡའ་དག་པའི་ངོས་ལྟ་བུ། ངོ་བོ་སྟོང་། རང་བཞིན་གསལ། ཐུགས་རྗེའི་གདངས། འགགས་པ་མེད་པར་བཞུགས་པ་ནི་གདོད་མའི་གནས་ལུགས་སོ། །དེའི་ངང་ལ་ཤེས་རབ་སྲོག་ཏུ་གྱུར་པའི་རླུང་ཡན་ལག་བཞིས་རྟ་བྱས་ཏེ། ཐུགས་རྗེ་རིག་པའི་སྙིང་པོ་ཕྱིར་གསལ་དུ་གཡོས་པ་ལས་ངོ་བོའི་ཆ་ལས་གོ་འབྱེད་པའི་ཡུལ་ལ། རང་བཞིན་གྱི་ཆེས་ལྷུན་གྲུབ་ཡེ་ཤེས་ཀྱི་སྣང་བ་ཤར་དུས། ཐུགས་རྗེའི་ཆས་ཡུལ་འབྱེད་པའི་ཤེས་རབ་དཔྱོད་བྱེད་དུ་སྐྱེས་པའི་སྐད་ཅིག་ལ་རང་ཤར་དུ་ཤེས་པས་རང་ངོ་ཤེས་ཏེ་གདོད་མའི་གཞི་ཐོག་དེ་ཉིད་དུ་རང་གྲོལ་དུ་གྲོལ་བ་ནི་ཀུན་ཏུ་བཟང་པོ་གཞི་ཐོག་ནས་མངོན་པར་བྱང་ཆུབ་པའོ། །

འདིའི་དུས་ན་ནང་གསལ་ཐམས་ཅད་མཁྱེན་པའི་ཡེ་ཤེས་སྤྲོས་པའི་མཐའ་ཐམས་ཅད་(༣)དང་བྲལ་བ་ཆོས་ཀྱི་སྐུའི་ཞིང་ཁམས་ལྷུན་གྲུབ་རིན་པོ་ཆེའི་སྦུབས་ན་རང་རིག་པའི་ཡེ་ཤེས་ཤིན་ཏུ་ཕྲ་བའི་བདག་ཉིད་དུ་བཞུགས་པས་མཚན་མ་རིས་ཅན་གྱི་རྣམ་པའི་ཞལ་ཕྱག་གྲུབ་པ་ནི་མེད་དེ་འཆར་བའི་གཞིའི་གདངས་མ་འགགས་པ་ལས་རང་བཞིན་དང་ཐུགས་རྗེའི་སྣང་བ་འདུ་འབྲལ་མེད་པ་ཙམ་དུ་གནས་སོ། །དེའི་ཚེ་སྟོན་པ་ཕུན་སུམ་ཚོགས་པ་རང་ཤེས་རིག་པའི་རྒྱལ་པོ་ཀུན་ཏུ་བཟང་པོ་དང་། ཆོས་ཉིད་མཉམ་པ་ཉིད་ཀྱི་ཡེ་ཤེས་དུས་བཞིའི་འཕོ་འགྱུར་མེད་པའི་རང་བཞིན་ཀུན་ཏུ་བཟང་མོའི་བདག་ཉིད་གཉིས་སུ་མེད་པ་ཉིད་གཞོན་ནུ་བུམ་པ་སྐུའི་ཞིང་ཁམས་ཆོས་ཀྱི་དབྱིངས་ཀྱི་ཕོ་བྲང་ཆེན་པོ་ན་འཁོར་ཡེ་ཤེས་རྒྱ་མཚོའི་ཚོགས་ལ་སྐུ་གསུང་ཐུགས་བྱས་པ་མེད་པའི་བསྟན་པ་རིན་པོ་ཆེ་འཕོ་འགྱུར་མེད་པའི་ངང་ལས་མི་གཡོ། མི་འབྱུང་། མི་གནས། མི་ལེན། མི་འདོར། མི་བསྐྱོད་པ་ཉིད་དུ་བཞུགས་སོ། །འདིའི་དུས་ན་སྐུ་ཕྱིའི་མཛད་པ་བཞི་ནི། མི་འགྱུར་བ་དང་། མི་འོངས་པ་དང་། མི་འགྲོ་བ་དང་། མི་གནས་པ་ཉིད་དོ། །ནང་གི་བཞི་ནི། མི་སྣང་བ་དང་། མི་མཛད་པ་དང་། མི་འཕྲོ་བ་དང་། མི་འདུ་བའོ། །གསང་བའི་བཞི་ནི། མ་བྱས་པ་དང་། མི་བྱེད་པ་དང་། ནམ་མཁའ་ལྟ་བུ་དང་། མཉམ་རྫོགས་ཆེན་པོའོ། །གསུང་གི་ཕྱིའི་མཛད་པ་བཞི་ནི། བརྗོད་དུ་མེད་པ་དང་། བསྟན་དུ་མེད་པ་དང་། བལྟར་མེད་པ་དང་། ཅུང་ཟད་མེད་པའོ། །ནང་གི་བཞི་ནི། རང་བཞིན་དུ་དང་། གྱིན་འདའ་དང་། ཡུལ་ཅན་མ་ཡིན་པ་དང་། དུ་མ་མེད་པའོ། །གསང་བའི་བཞི་ནི། སོ་མ་དང་། གཉུག་མ་དང་། རྣལ་མ་དང་། མ་བཅོས་པའོ། །ཐུགས་ཀྱི་ཕྱིའི་མཛད་པ་བཞི་ནི། དྲི་མ་མེད་པ་དང་། སེངྒེ་རྣམ་པར་བསྒྱིངས་པ་དང་། དཔའ་བར་འགྲོ་བ་དང་། ཡིད་བཞིན་གྱི་ནོར་བུའི་ཏོག་གི་ཏིང་ངེ་འཛིན་ནོ། །ནང་གི་བཞི་ནི། རྒྱལ་མཚན་གྱི་རྩེ་མོ་རྣམ་པར་རོལ་པ་དང་། གློག་གི་ཕྲེང་བ་དང་། འཁོར་ལོ་ཆེན་པོ་དང་། འོད་འབར་བའི་ཏིང་ངེ་འཛིན་ནོ། །གསང་བའི་བཞི་ནི། ཕྱག་རྒྱ་ཟིལ་གྱིས་གནོན་པ་དང་། འབར་ཆེན་མཉམ་པ་དང་། ཆོས་ཉིད་སྣ་ཚོགས་པ་དང་། རྣམ་པར་བཀོད་པ་རང་སྣང་རོལ་པ་ཞེས་བྱ་བའི་ཏིང་ངེ་འཛིན་ཏེ། དེ་དག་ཀྱང་སེམས་དང་ཡིད་དང་རྣམ་པར་ཤེས་པ་དང་ཡང་བྲལ་ལ། ཏིང་ངེ་འཛིན་གྱི་གནས་ཀྱང་མི་འདོར་བ་སྟེ་དེ་བཞིན་གཤེགས་པའི་ཐུགས་ཀྱི་གསང་བ་བསམ་གྱིས་མི་ཁྱབ་པའོ། །དེ་དག་ཀྱང་ངོ་བོའི་གནས་པ་ཙམ་ལས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་འཆར་གཞི་མེ་ལོང་ལྟ་བུའི་དབྱིངས་སུ་གནས་པས་མཛད་པ་ཞེས་བརྗོད་དོ། །དེ་ནས་བསྐལ་པ་ཆེན་པོ་གཅིག་ན་ཡང་སྔ་མ་ལྟ་བུའི་གཞི་ལས་ལྷུན་གྲུབ་ཡུལ་ལ་ཤར་བ་རང་ངོ་མ་ཤེས་པས། དཔྱོད་བྱེད་ཡུལ་ལ་ཤར་བའི་ཤེས་པ་འཕྲོ་མཐུད་དེ་གཟུང་འཛིན་གྱི་རྟོག་པར་འཁྲུལ་པས་ཐོག་མར་སྲིད་པའི་རྩེ་མོ་ནས་བཟུང་སྟེ་གཟུགས་མེད་ནས་ཤེས་པ་རགས་སུ་སོང་བས་གཟུགས་དང་། འདོད་པའི་བར་དུ་འཁྲུལ་པའི་སེམས་ཅན་རྣམས་བྱུང་ངོ་། །

དེ་ནས་ལྷུན་གྲུབ་ཀྱི་ངང་ཆོས་ཀྱི་སྤྲོས་གཞི་མཐའ་གང་དུའང་མ་ལྷུང་བ་ལས། ཐུགས་རང་བྱུང་གི་ཡེ་ཤེས་ཆེན་པོ་ཉིད་རྣམ་པར་གཡོས་ཏེ། ཕྱིར་གསལ་དུ་བཞེངས་པ་ཉིད་ཆོས་བྱ་བ་མོ་ཀུན་ཏུ་བཟང་མོ་དང་། ཡིད་བྱེད་པ་པོ་ཀུན་ཏུ་བཟང་པོ་ཞེས་བྱ་སྟེ་གདུལ་བྱའི་ཡུལ་དུ་འདུལ་བྱེད་ཀྱི་ཐུགས་གཡོས་པའོ། །དེའི་ཚེ་སྟོན་པ་ཀུན་ཏུ་བཟང་པོ་ཡབ་ཡུམ་ཆོས་སྐུ་སྤྲོས་པ་དང་བྲལ་བའི་ངང་ནས་ཞལ་ཕྱག་གི་རྣམ་པར་བཞེངས་ཏེ། རྣམ་དག་སྟུག་པོ་བཀོད་པ་བདེ་བའི་ཞིང་འོད་ཁྱིམ་རྣམ་པར་དག་པ་ཤིན་ཏུ་བཀོད་ལེགས་པའི་ཁང་བུ་བརྩེགས་པར་གདུལ་བྱ་མ་ཡིན་འདུལ་བྱེད་རིན་པོ་ཆེ་མཛེས་པའི་འཁོར་ལོ་དཔལ་རྡོ་རྗེ་སེམས་དཔའ་ལ་སོགས་པ་ཞི་བ་དང་། ཁྲོ་བོའི་དཀྱིལ་འཁོར་ཚོམ་བུ་འབུམ་ཕྲག་གྲངས་མེད་པ་ལ། བསྟན་པ་ཕུན་སུམ་ཚོགས་པ་རང་བཞིན་རྫོགས་པ་ཆེན་པོ་སུས་ཀྱང་བྱས་པ་མེད་པའི་རང་བཞིན་མངོན་པར་འདུ་མི་བྱེད་པའི་དགོངས་པ་ལ། མི་གཡོ་མི་ལེན་མི་འདོར་བའི་ཚུལ་གྱིས་བྱིན་གྱིས་བརླབས་ཀྱིས་རང་བཤད་དོ། །

འདིའི་དུས་ན་ཐུགས་རང་བྱུང་གི་ཡེ་ཤེས་སུ་རང་བྱུང་བས་འོད་ཟེར་གྱི་འཕྲོ་འདུ་ལས་མཛད་པ་སུམ་ཅུ་རྩ་དྲུག་གི་རྒྱུད་རང་བྱུང་། གནས་པ་འོད་ཀྱི་ཐིག་ལེ་ལས་གནས་ཕུན་སུམ་ཚོགས་པ་དྲུག་ཅུ་ཐམ་པར་རང་གནས། དེ་ཉིད་ཀྱིས་བྱིན་གྱིས་བརླབས་དང་སྣང་ཆ་ལས་སངས་རྒྱས་ཀྱི་སྐུ་འབུམ་ཕྲག་ཁྲག་ཁྲིག་དཔག་ཏུ་མེད་ཅིང་བརྗོད་ཀྱིས་མི་ལང་བ་རྣམས་མཐོང་བ་རྣམ་པར་དག་པའི་སྤྱན་གྱིས་དཀྱིལ་འཁོར་ལ་རང་སྣང་། དེའི་ཚེ་ལོངས་སྤྱོད་རྫོགས་པའི་སྐུ་རྣམས་ཀྱི་ལྗགས་ཀྱི་དབང་པོ་ལས་འོད་ཟེར་དཔག་ཏུ་མེད་པ་འཕྲོས་པའི་རྩེ་མོ་ལས་ཡི་གེ་དྲུག་གི་སྒྲ་རང་བྱུང་སྟེ་འཇིག་རྟེན་དྲུག་གི་ཕྱོགས་བཅུ་མ་ལུས་པར་ཁྱབ་པར་བྱས་ཏེ་(༥)སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་པར་བྱའོ་ཞེས་ལན་གསུམ་དུ་བྱུང་བ་ཉིད་ཀྱིས་རང་བྱུང་གི་ཡེ་ཤེས་ཀུན་ཏུ་བཟང་པོའི་རང་བཞིན་འཛད་པ་མེད་པའི་ཐུགས་རྗེ་ཆེན་པོ་ཕྱོགས་བཅུར་འཕྲོས་སོ། །འདི་དག་བསོད་ནམས་རྣམ་པར་དག་པས་སྐུ་སྣང་ལ་རང་བཞིན་མེད་པ། ཞལ་ཕྱོགས་ཀུན་ཏུ་ཐལ་ལེ་བ། འོད་ཟེར་མཐའ་ཡས་པས་ནམ་མཁའི་ཁམས་ཀུན་ཏུ་ཁྱབ་པར་སྣང་ཞིང་། ལས་ཀྱི་བསགས་པ་རྣམ་པར་དག་པས་ཐུགས་ཀྱི་ཤེས་རབ་ཆེན་པོ་ཀློང་རྡོལ་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ལ་ལོངས་སྤྱོད་པའོ། །འདིའི་དུས་ན་སྐུ་ཕྱིའི་མཛད་པ་བཞི་ནི། སྐུ་སྣང་ལ་རང་བཞིན་མེད་པ་དང་། འོད་ཀྱི་ཞལ་ཕྱག་རྫོགས་པ་དང་། མཚན་མའི་དངོས་པོ་ལས་འདས་པ་དང་། ཡེ་ཤེས་ཀྱི་རྣམ་པར་སྣང་བའོ། །ནང་གི་བཞི་ནི། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། འོད་ཟེར་མཐའ་ཡས་པ་དང་། ཞལ་ཕྱོགས་ཀུན་ཏུ་ཐལ་ལེ་བའོ། །གསང་བའི་བཞི་ནི། སྐུ་མདུན་དང་རྒྱབ་མེད་པ་དང་། ཕྱི་ནང་ཀུན་ཏུ་ཟང་ཐལ་བ་དང་། རྩེ་མོ་ཕྱོགས་ཀུན་ཏུ་འཁྱིལ་པ་དང་། གསལ་ལ་མ་འདྲེས་པར་སྣང་བའོ། །གསུང་གི་ཕྱིའི་མཛད་པ་བཞི་ནི། ཡི་གེ་དྲུག་གི་འཁོར་ལོ་འཕྲོ་བ་དང་། དེ་ཉིད་ཡབ་ཀྱི་ཞལ་དུ་ཞུགས་པ་དང་། ཡུམ་གྱི་མཁའ་ལས་ཐོན་པ་དང་། འཕྲོ་ཞིང་འདུ་བར་བྱེད་པའོ། །ནང་གི་བཞི་ནི། རང་གི་ངོ་བོས་བཤད་པ་དང་། ཚིག་གི་བརྗོད་པ་ལས་འདས་པ་དང་། མངོན་པར་འདུ་མི་བྱེད་པ་དང་། ཁ་དོག་དཔག་ཏུ་མེད་པའི་འོད་ཟེར་ཞལ་གྱི་དཀྱིལ་འཁོར་ལ་འཕྲོས་པས་མཚན་མ་ཉེ་བར་ཞི་བའི་ཆོས་གོ་བར་མཛད་པའོ། །གསང་བའི་བཞི་ནི། སྐུ་དང་། གསུང་དང་། ཐུགས་དང་། ཞལ་གྱི་སྦྱོར་བ་རྣམ་པར་དག་པས་ཐམས་ཅད་མཁྱེན་པའི་ཆོས་ལ་ལོངས་སྤྱོད་པའོ། །ཐུགས་ཀྱི་ཕྱིའི་མཛད་པ་བཞི་ནི། མངོན་པར་འདུ་མི་བྱེད་པ་དང་། ཡེ་ཤེས་ཀྱི་མཐོང་བ་རྣམ་པར་དག་པ་དང་། ཆོས་ཉིད་རྣམ་པར་སྣང་བ་དང་། ཟག་པ་ཟད་པའི་ཏིང་ངེ་འཛིན་ནོ། །ནང་གི་བཞི་ནི། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོགས་པ་དང་། བྱ་བ་ནན་ཏན་གྱི་ཡེ་ཤེས་ལ་ལོངས་སྤྱོད་པའོ། །གསང་བའི་བཞི་ནི། གསལ་སྟོང་དང་། ཡུལ་ཤེས་དང་། སྣང་སྟོང་དང་། འཁོར་འདས་དབྱེར་མི་ཕྱེད་པའི་ཆོས་ཉིད་ལ་འཕོ་འགྱུར་མེད་པར་བཞུགས་པའོ། །འདི་དག་ཀྱང་ཡུལ་དང་ཡུལ་ཅན་གྱི་མཛད་པ་ལྟར་ནི་མ་ཡིན་ལ། (༦)རང་སྣང་རྣམ་པར་དག་པའི་ཞིང་ན་སྣང་ཆའི་མཛད་པ་རྫོགས་པའི་ཆ་ཙམ་དུ་གནས་པར་བརྗོད་དོ། །

དེ་ནས་རྒྱལ་བ་རྡོ་རྗེ་སེམས་དཔའ་ཡིས་འོག་མིན་གྱི་གནས་མཐའ་དང་དབུས་མེད་པར་ལོངས་སྐུའི་གཞིར་གནས་ཐུགས་རྗེ་རང་བྱུང་གི་ཡེ་ཤེས་སྐུ་གསུམ་འདུ་འབྲལ་མེད་པའི་དགོངས་པ་ལ་བཞུགས་ནས། རིག་འཛིན་དང་མཁའ་འགྲོ་མ་དང་འཁོར་གྱི་རིག་པ་འཛིན་པའི་ཚོགས་འཇིག་རྟེན་ལས་འདས་པ་དང་། མཆོག་གི་འཁོར་རང་གི་རྣམ་པར་འཕྲུལ་པ་ལས་བསྐྱེད་པ་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ། བསྟན་པ་ཕུན་སུམ་ཚོགས་པ་རང་བཞིན་རྫོགས་པ་ཆེན་པོ་སྐུ་དང་ཡེ་ཤེས་འདུ་འབྲལ་མེད་པའི་དོན་ཚིག་སྡེབ་སྦྱོར་ལེགས་པའི་སྒོ་ནས་སྒྲ་བརྙན་བཞིན་དུ་རང་གི་སྣང་བ་ལ་སྟོན་པས་གསུང་བར་སྣང་ངོ་། །འདིའི་དུས་ན་སྐུའི་ཕྱིའི་མཛད་པ་བཞི་ནི། ཀུན་ཏུ་སྣང་བ་དང་། བལྟ་བས་མི་ངོམ་པ་དང་། རྣམ་པར་འཕྲུལ་པ་དང་། ནམ་མཁའ་མཐའ་ཀླས་པའོ། །ནང་གི་བཞི་ནི། གསལ་བ་དང་། འཚེར་བ་དང་། ལྷུན་སྡུག་པ་དང་། འོད་ཟེར་འཕྲོ་བའོ། །གསང་བའི་བཞི་ནི། ལྷན་ནེ་བ་དང་། ལྷག་གེ་བ་དང་། ཐལ་ལེ་བ་དང་། ཟང་ཐལ་ལེ་བའོ། །གསུང་གི་ཕྱིའི་མཛད་པ་བཞི་ནི། དབྱངས་མཐའ་ཡས་པ་དང་། མོས་པ་འཚམས་པར་འབྱུང་བ་དང་། གསལ་བ་དང་། འཚེར་བའོ། །ནང་གི་བཞི་ནི། ཡིད་དུ་འོང་བ་དང་། ཟད་མི་ཤེས་པ་དང་། གྲངས་མེད་པ་དང་། རྒྱུན་མི་འཆད་པའོ། །གསང་བའི་བཞི་ནི། བསམ་གྱིས་མི་ཁྱབ་པ་དང་། དུས་ཐམས་ཅད་པ་དང་། རང་བཞིན་གྱིས་དག་པ་དང་། དཔེ་ལས་འདས་པའོ། །ཐུགས་ཀྱི་ཕྱིའི་མཛད་པ་བཞི་ནི། མི་གཡོ་བ་དང་། མི་བསམ་པ་དང་། ཇི་བཞིན་པ་དང་། ངང་གི་འོད་གསལ་བའོ། །ནང་གི་བཞི་ནི། མ་བྱས་པ་དང་། མི་བྱེད་པ་དང་། བྱེད་པ་མེད་པ་དང་། བྱ་བའི་ཡུལ་ལས་འདས་པའོ། །གསང་བའི་བཞི་ནི། ཐམས་ཅད་གཟིགས་པ་དང་། གང་དུའང་མི་དམིགས་པ་དང་། ལྷུན་གྱིས་གྲུབ་པ་དང་། མཉམ་རྫོགས་ཆེན་པོའི་ངང་ལས་དུས་ཐམས་ཅད་དུ་མི་གཡོ་ཞིང་འཕོ་འགྱུར་མེད་པའོ། །འདི་དག་ནི་ཐུགས་རྗེ་མཐའ་ཡས་པས་རྣམ་པར་དག་པའི་འགྲོ་བ་ལ་སྐུ་མངོན་པར་སྣང་བ་ས་བཅུའི་བྱང་ཆུབ་སེམས་དཔའ་ལ་མེ་ལོང་ལྟ་བུའི་རང་བཞིན་གྱི་ཆོས་སྣང་བ་འཇིག་རྟེན་ལས་འདས་པའི་སྤྱོད་ཡུལ་རྣམ་པར་དག་པའོ། །(༧)དེ་ལྟར་སྣང་བའི་སྟོན་པ་དང་འཁོར་ནི་རྒྱལ་བ་ཉིད་ཀྱིས་རྒྱལ་བ་ཉིད་ལ་ཆེད་དུ་གླེང་བ་བཞིན་དུ་དགོངས་པས་བརྒྱུད་དེ་གསུངས་ཀྱི། གང་ཟག་ཐ་དད་པའི་རིམ་པ་ལྟར་དཔོན་སློབ་སོ་སོར་སྣང་བ་ནི་མ་ཡིན་ནོ། །རྡོ་རྗེ་སེམས་དཔའ་ནས་འགྲོ་བ་ལ་མངོན་པར་སྣང་བའི་ཐོག་མ་ཡིན་པས་མོས་པ་དང་བློ་ཡི་རིམ་པས་ཆོས་ཀྱང་ཐ་དད་པའོ། །འོན་ཀྱང་རིག་འཛིན་གྱི་བརྒྱུད་པ་ནི་རང་གི་སྤྲུལ་པ་ཉིད་ལས་གཞན་མ་ཡིན་ནོ། །མཁའ་འགྲོ་མ་ལ་སོགས་པའི་འཁོར་གཞན་རྣམས་ནི་ཅི་རིགས་སུ་སྣང་བའོ། །རྒྱལ་བ་དགོངས་པས་བརྒྱུད་པའི་ལོ་རྒྱུས་བཤད་ཟིན་ཏོ། །

དེ་ནས་རིག་འཛིན་བརྡའི་བརྒྱུད་པ་ནི། རྒྱ་གར་ཆོས་ཀྱི་འབྱུང་གནས་རྡོ་རྗེ་གདན་གྱི་ནུབ་བྱང་ཨོ་རྒྱན་ཐོར་ཚུགས་ཅན་གྱི་ཡུལ་དྷ་ན་ཀོ་ཤའི་གླིང་ཞེས་བྱ་བ་ན་བཀྲ་ཤིས་བདེ་བྱེད་བརྩེགས་པ་ཞེས་བྱ་བའི་གཙུག་ལག་ཁང་ལ་གཙུག་ལག་ཁང་ཕྲ་མོ་སྟོང་ཕྲག་དྲུག་བརྒྱ་དང་བརྒྱད་ཀྱིས་བསྐོར་བའི་བར་ན། གསེར་གྱི་ཐག་པ་ལ་དྲིལ་བུ་དང་གཡེར་ཁའི་དྲ་བས་སྤྲས་ཤིང་མི་ཁྱིམ་འབུམ་ཕྲག་སུམ་ཅུ་རྩ་གཉིས་དང་ལྡན་པ་ན་རྒྱལ་པོ་ཨུ་པ་རཱ་ཛ་དང་བཙུན་མོ་འོད་ལྡན་མ་གཉིས་ཀྱི་སྲས་མོ་སུ་དྷརྨ་ཞེས་བྱ་བའི་དགེ་སློང་མ་ཞིག་དེ་ལས་དཔག་ཚད་གཅིག་འདས་པའི་ནུབ་ཕྱོགས་གསེར་གྱི་བྱེ་མ་བརྡལ་བའི་རྒྱ་མཚོའི་གླིང་ན་གདན་ལ་བཞུགས་པའི་རྨི་ལམ་ན་ཤེལ་ལས་གྲུབ་པའི་མི་དཀར་པོ་ཞིག་གིས་ཤེལ་གྱི་བུམ་པ་བདུད་རྩིས་གང་བ་ཞིག་སྤྱི་བོར་བཞག་ནས་དབང་བསྐུར་བས་སྟོང་གསུམ་གྱི་འཇིག་རྟེན་འོད་དུ་གསལ་བ་དུས་གཅིག་ལ་མཐོང་བ་རྨིས་སོ། །དེ་ཉིད་གཡོག་མོ་ལ་གསུངས་པས་ཉིད་ལ་སངས་རྒྱས་ཀྱི་སྲས་ཞིག་འཁྲུངས་པའི་ལྟས་ལགས་ཟེར་རོ། །དེ་ནས་ཟླ་བ་དགུ་ངོ་དང་བཅུ་ན་རྩིབས་མ་གཡས་པའི་གོ་བར་ནས་ཁྱེའུ་མཚན་དང་དཔེ་བྱད་ཀྱིས་བརྒྱན་པ་ཞིག་བལྟམས་པ་དང་། ཡུམ་གྱིས་སྨྲས་པ། ཕ་མེད་བུ་འདི་འཇིག་རྟེན་འདྲེ་ལས་གཞན་པ་སུ། །གལ་ཏེ་ལྷ་དང་ལྷ་མིན་སྣ་ཚོགས་གཟུགས། །འདི་ལྟར་བྱུང་བའི་དཔེ་ནི་སུས་མཐོང་མེད། །འདི་ནི་ལོག་སྲེད་འགྲོ་བས་དཔྱས་གྱུར་སྡིག་རེ་ཆེ། །ཞེས་བརྗོད་ནས་ཐལ་བའི་ཁུང་བུར་བོར་བ་ལས་བར་སྣང་ལས་ལྷ་རྣམས་ཀྱིས་སྐུ་ཁྲུས་གསོལ་ཞིང་། མགོན་པོ་ཆེན་པོ་བཅོམ་ལྡན་འདས། །རང་བཞིན་སྣང་མཛད་འཇིག་རྟེན་མགོན། །བདག་ཀྱང་རབ་ཏུ་སྐྱབས་པ་དང་། །ནམ་མཁའི་རྡོ་རྗེ་དེང་བདག་གསོལ། །ཞེས་བཀྲ་ཤིས་བརྗོད་ཅིང་མཁའ་འགྲོ་མ་རྣམས་ཀྱིས་(༨)མཆོད་པའི་སྤྲིན་གཏིབས་ཏེ་ལྷ་དང་ཀླུ་དང་གནོད་སྦྱིན་ལ་སོགས་པས་ཙནྡན་དང་གུར་གུམ་གྱི་ཆར་འབེབས་པ་དང་། འཇིག་རྟེན་སྐྱོང་བ་རྣམས་ཀྱིས་རྔ་བོ་ཆེ་བརྡུངས་པ་དང་། དུང་འབུད་པ་དང་། རྒྱལ་མཚན་འཛིན་པ་དང་། བ་དན་སློང་བ་དང་། དྲང་སྲོང་གི་རྒྱལ་པོ་རྣམས་ཀྱིས་ཀྱང་སྨན་དང་སྤོས་སྣ་ཚོགས་ཀྱི་སྤྲིན་ཕུང་གཏིབས་པ་མཐོང་ནས་སླར་བླངས་ནས་བཟོད་པར་གསོལ་ཏེ་སྤོས་ཆུ་དང་འོ་མས་བཀྲུས་ཏེ་གསོས་པས་མཚོ་ཆེན་པོ་ལ་གནས་པའི་པདྨ་ལྟར་ཆེར་བསྐྱེད་དོ། །དེ་ནས་ལོ་བདུན་ན་ཆོས་ཐམས་ཅད་ཀྱི་ཚིག་དོན་མ་བསླབས་པར་ཐུགས་སུ་འཁྲུངས་ཏེ། ཡུམ་ལ་པཎྜི་ཏའི་གནས་སུ་ཆོས་ཀྱི་གཏམ་གླེང་དུ་འགྲོ་བའི་སྐབས་དབྱེ་བར་ཞུས་པས་གནང་སྟེ། རྒྱལ་པོ་ཨུ་པ་རཱ་ཛའི་དྲུང་དུ་བྱོན་ནས་པཎྜི་ཏ་རྣམས་དང་མཇལ་བར་ཞུས་ཏེ་བྱོན་དུས་ཕན་ཚུན་གྱི་ཕྱི་ནང་གི་ཆོས་ཐམས་ཅད་གཏན་ལ་ཕབ་པས་པཎྜི་ཏ་རྣམས་ཀྱིས་ཕྱག་འཚལ་ཏེ་ཞབས་སྤྱི་བོར་བླང་ནས་སློབ་དཔོན་ཆེན་པོ་པྲཛྙཱ་བྷ་ཝ་ཞེས་བྱ་བར་མཚན་གསོལ་ཏོ། །རྒྱལ་པོ་ཡང་ཤིན་ཏུ་དགྱེས་ཏེ་སློབ་དཔོན་ཆེན་པོ་དགའ་རབ་རྡོ་རྗེར་མཚན་གསོལ་ཏོ། །ཡུམ་གྱིས་ཐལ་བའི་ཁུང་བུར་བོར་ཡང་མ་གཤེགས་པས་སློབ་དཔོན་ཆེན་པོ་རོ་ལངས་ཐལ་མདོག་ཅེས་མཚན་གསོལ་ཏོ། །ཡུལ་མི་རྣམས་ཀྱིས་ཡུམ་གྱིས་བཀྲོངས་ཀྱང་མ་གཤེགས་པས་ངོ་མཚར་ཆེ་ཞེས་བརྗོད་ནས་སློབ་དཔོན་ཆེན་པོ་རོ་ལངས་བདེ་བར་མཚན་གསོལ་ཏོ། །དེ་ནས་བྱང་ཕྱོགས་རི་བོ་ཉི་མ་རབ་ཏུ་སྣང་བྱེད་ལ་ལོ་སུམ་ཅུ་རྩ་གཉིས་ཀྱི་བར་ཏིང་ངེ་འཛིན་ལ་བཞུགས་པའི་ཚུལ་བསྟན་ནས་འོག་མིན་དུ་དཔལ་རྡོ་རྗེ་སེམས་དཔའ་ལས་རང་བཞིན་རྫོགས་པ་ཆེན་པོའི་དབང་ཡང་གསང་བླ་ན་མེད་པའི་གདམས་པ་དང་བཅས་པ་ཡོངས་སུ་རྫོགས་པར་ཞུས་ཏེ་གནས་པ་ལས། རི་བོ་དེ་ཉིད་ལ་མེ་ཏོག་གི་ཆར་འབེབས་ཤིང་མུ་སྟེགས་ཀྱི་བསྟན་པ་ཉམས་པར་བྱས་སོ། །ཞེས་པའི་སྒྲ་སྐབས་སུ་བྱུང་བར་དེ་དང་ཧ་ཅང་ཡང་མི་རིང་བ་ན་མུ་སྟེགས་ཀྱི་རྒྱལ་པོས་འདིའི་རྒྱུ་ཅི་ཡིན་གྲོང་ཁྱེར་ཀུན་ཏུ་དྲིས་པས་བ་གླང་རྫི་ཞིག་ན་རེ། བྲག་རིའི་དྲུང་ནས་དྲང་སྲོང་ཞིག་མཉམ་པར་བཞག་པའི་འཁོར་ཡུག་ཏུ་མེ་ཏོག་གི་ཆར་འབབ་ཅིང་རྣ་བར་རྭ་དུང་བུས་ཀྱང་མི་སད་པ་ཞིག་འདུག །དེ་ཡིན་ལས་ཆེ་ཟེར་རོ། །

དེའི་ཚེ་རྒྱལ་པོས་གཤེད་མ་ལ་བསྒོས་ནས་སློབ་དཔོན་གྱི་(༩)དྲུང་དུ་འོངས་པ་དང་རེངས་ཏེ། སློབ་དཔོན་ཡང་ཏིང་ངེ་འཛིན་ལས་བཞེངས་ནས་སྤྲིན་པའི་གསེབ་ལ་ལམ་ཕྱུང་སྟེ་གཤེགས་པར་མཐོང་ནས་ཐམས་ཅད་དད་དེ་རྒྱལ་པོ་འཁོར་དང་བཅས་པས་བཟོད་པར་གསོལ། ལྟ་བ་ལོག་པ་དོར་ནས་སངས་རྒྱས་ཀྱི་བསྟན་པ་ལ་བཀོད་དོ། །དེ་ནས་སྔར་གྱི་སངས་རྒྱས་ཀྱིས་གསུངས་པའི་སྡེ་སྣོད་དང་ཁྱད་པར་དུ་རང་བཞིན་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་རྣམས་རི་བོ་མ་ལ་ཡ་རིན་པོ་ཆེ་རྣམ་པར་སྤུངས་པའི་རྩེ་མོར་རྡོ་རྗེ་དབྱིངས་ཀྱི་མཁའ་འགྲོ་མ་བདེ་བའི་རོ་ལྡན་མ་དང་། བདེ་བྱེད་སེར་མོ་ཡོན་ཏན་མཐའ་ཡས་པའི་མཁའ་འགྲོ་མ་གཉིས་ཀྱིས་ཞུས་ཏེ་ལོ་གསུམ་དུ་ཡི་གེར་བཀོད་ནས་མཁའ་འགྲོ་མ་རྣམ་པར་འདུ་བའི་ཕུག་ཏུ་བཞུགས་སོ། །དེ་ནས་རྡོ་རྗེ་གདན་གྱི་བྱང་ཤར་དུར་ཁྲོད་ཆེན་པོ་བསིལ་བའི་ཚལ་འཇིག་རྟེན་དང་ལས་ལས་གྲུབ་པའི་མཁའ་འགྲོ་མི་བསྲུན་པ་སྣ་ཚོགས་ཀྱིས་གང་ཤིང་། གསེར་གྱི་མཆོད་རྟེན་ཁྲི་འཕང་ལྔ་པ་དྲིལ་བུ་འཕྱར་སྣའི་སྒྲ་སྒྲོགས་ཤིང་དབུས་ན་དག་བྱེད་ཀྱི་མཚོ་ཡོད་པར་སློབ་དཔོན་ཆེན་པོ་དགའ་རབ་རྡོ་རྗེ་ཉིད་དགོངས་པ་མཛད་ཅིང་བཞུགས་སོ། །དེའི་ཚེ་རྒྱ་ནག་པོའི་ཡུལ་གྲོང་ཁྱེར་ཤོ་འཁྱམས་ནག་པོ་ན་ཁྱིམ་བདག་དགེ་ལྡན་བཟང་པོ་དང་ཡུམ་སྣང་གསལ་ལྡན་མའི་སྲས་ཤྲཱ྇་སེངྷ་ཞེས་བྱ་བ་འཁྲུངས་ཏེ། ལོ་བཅོ་ལྔ་ན་སློབ་དཔོན་ཧ་སྟི་བྷ་ལའི་དྲུང་དུ་སྒྲ་དང་ཚད་མ་དང་རྩིས་ལ་སོགས་པ་རིག་པའི་གནས་ལྔ་ལ་ཤིན་ཏུ་མཁས་པར་བསླབས་ནས་གྲོང་ཁྱེར་གསེར་ལྡན་དུ་འགྲོ་བའི་ལམ་ཁར་ནམ་མཁའི་དཀྱིལ་ནས་འཕགས་པ་སྤྱན་རས་གཟིགས་བྱོན་ནས་ལུང་བསྟན་པ། ཀྱེ་སྐལ་ལྡན་ཚེ་གཅིག་གིས་འབྲས་བུ་ངེས་པར་འདོད་ན་དུར་ཁྲོད་ཆེན་པོ་བསིལ་བའི་ཚལ་དུ་སོང་ཞིག་ཅེས་གསུངས་ནས་མི་སྣང་བར་གྱུར་ཏོ། །

དེ་ནས་འབྲས་བུ་གསང་སྔགས་ཉིད་མྱུར་དུ་རྟོགས་པར་བྱ་བའི་ཕྱིར་ལོ་བདུན་དུ་སྔགས་ཕྱི་ནང་གི་དོན་ལ་ཐོས་པ་བྱའོ་སྙམ་ནས་རི་བོ་རྩེ་ལྔའི་ཤར་ཕྱོགས་ན་གདོལ་པའི་སློབ་དཔོན་བྷེ་ལ་ཀིརྟི་ལས་སྔགས་ཕྱི་ནང་གི་རྒྱུད་ལུང་མན་ངག་ཐམས་ཅད་རྫོགས་པར་བསླབས་ཏེ་རེ་ཞིག་སྔ་དྲོའི་ཚེ་ཁྲུས་ཀྱི་རྫིང་བུར་ཞུགས་པ་ན་ཐུགས་རྗེ་ཆེན་པོས་ཡང་སྔ་མ་བཞིན་དུ་ལུང་བསྟན་ནས་མི་སྣང་བ་ན་རྒྱ་གར་ནི་ཤིན་ཏུ་བགྲོད་པར་དཀའ། རྐང་མགྱོགས་བསྒྲུབ་ལ་འགྲོ་སྙམ་ནས་ལོ་(༡༠)གསུམ་བསྒྲུབས་པས་གྲུབ་པའི་འོག་ཏུ་རྐང་མགྱོགས་ཀྱི་རྫུ་འཕྲུལ་གྱིས་ས་ལ་ཁྲུ་གང་གིས་མ་རེག་པར་བྱོན་ཏེ་ཉིན་མཚན་དགུས་དུར་ཁྲོད་ཆེན་པོ་བསིལ་བའི་ཚལ་དུ་སློབ་དཔོན་ཆེན་པོ་དགའ་རབ་རྡོ་རྗེ་དང་མཇལ་ནས་ཕྱག་འཚལ་ཏེ་ཞབས་སྤྱི་བོར་བླངས་ཤིང་བདག་རྗེས་སུ་འཛིན་པར་ཞུས་པས་གནང་སྟེ་ལོ་ཉི་ཤུ་རྩ་ལྔར་ཐིག་ལེ་མཆོག་གི་རྒྱུད་ལུང་མན་ངག་དང་བཅས་པའི་དབང་ཁྲིད་ཞུས་ནས་ཉམས་སུ་བླངས་པས་འོད་གསལ་ཆུ་ཡི་ཟླ་བ་ལྟ་བུའི་ལུས་ཐོབ་ནས་མཆོག་གི་དངོས་གྲུབ་བརྙེས་པར་གྱུར་ཏོ། །དེའི་ཚེ་དུར་ཁྲོད་ན་གནས་པའི་མཁའ་འགྲོ་མ་རྣམས་དང་ཞིང་སྐྱོང་བའི་ལང་ཀ་ཆེན་པོ་རྣམས་ཀྱིས་རང་རང་གི་སྲོག་གི་སྙིང་པོ་ཕུལ་ཞིང་བསྟན་པ་སྐྱོང་བར་ཁས་བླངས་ནས་གདུགས་དང་རྒྱལ་མཚན་དང་བ་དན་ལ་སོགས་པའི་མཆོད་པའི་སྤྲིན་ཕུང་ཆེན་པོ་བསམ་གྱིས་མི་ཁྱབ་པས་གཏིབས་སོ། །དེ་ནས་སློབ་དཔོན་ཆེན་པོ་དཔལ་གྱི་སེངྒེ་ཉིད་དུར་ཁྲོད་དེ་ལས་ནུབ་བྱང་དུ་དཔག་ཚད་གསུམ་འདས་པ་ན་དུར་ཁྲོད་ཆེན་པོ་རྩུབ་འགྱུར་གྱི་ཚལ་ཞེས་བྱ་བ་ཉིན་བཞིན་དུ་རླུང་འཚུབས་ལ་མཚན་བཞིན་དུ་མེ་འབར་བ་འཇིག་རྟེན་གྱི་མ་མོ་དང་མཁའ་འགྲོ་མང་པོ་རྣམ་པར་རྒྱུ་བ་དག་བྱེད་ཀྱི་མཚོ་དང་བདེ་བྱེད་ཀྱི་མཆོད་རྟེན་དང་། འཇིག་རྟེན་པའི་ལྷ་དགའ་བྱེད་དབང་ཕྱུག་གི་གནས་ཡོད་སར་བྱོན་ཏེ་བརྟུལ་ཞུགས་ཀྱི་སྤྱོད་པ་མཛད་ཅིང་མཁའ་འགྲོ་མ་རྣམས་ལ་ཆོས་སྟོན་པའི་ཕྱིར་བཞུགས་སོ། །

དེའི་ཚེ་དཔལ་ཨོ་རྒྱན་གྱི་ཡུལ་རིན་པོ་ཆེ་འབར་བའི་གྲོང་ཁྱེར་ན་བཻ་ཌཱུརྱའི་ཕོ་བྲང་ཕྱི་ནང་ཤིན་ཏུ་རྣམ་པར་དག་པ་ནོར་བུ་སྒྲོན་མེའི་སྣང་བས་ཁྱབ་པ་ན། རྒྱལ་པོ་ཨིནྡྲ་བོ་དྷི་དེ་བཙུན་མོ་བརྒྱ་རྩ་བརྒྱད་དང་ལྷན་ཅིག་ཕྱི་ནང་གི་བློན་པོས་བསྐོར་ཏེ་བཞུགས་པ་ལ། སྲས་མི་མངའ་ནས་དབྱར་ཟླ་ར་བའི་ཚེས་བཅོ་ལྔ་ལ་དཀོན་མཆོག་མཆོད་དེ་ཆོས་ཀྱི་སྤྲིན་ཞེས་བྱ་བའི་མདོ་སྡེ་བཏོན་ནས་སྦྱིན་གཏོང་གི་ཁང་པ་བརྩིགས་ཏེ་སྐྱེ་བོ་ཐམས་ཅད་ལ་སྦྱིན་པ་རླབས་པོ་ཆེ་བཏང་ནས་ལོ་མང་ཞིག་ལོན་པ་ན་དཀོར་མཛོད་ཐམས་ཅད་ཟད་ཀྱང་སློང་མོ་བ་རྒྱུན་མ་ཆད་ནས་ལས་སུ་བསྐོས་པའི་མིས་ད་ནི་མཛོད་ཁང་ཐམས་ཅད་ཟད་པས་ཁྱེད་ཅག་ལ་སྦྱིན་དུ་མེད་དོ་ཞེས་སྨྲས་པ་དང་། གློ་བུར་ལྷགས་པ་ཁ་ཅིག་གིས་སྨྲས་པ། བདག་ཅག་རྣམས་ལ་མ་སྦྱིན་ན་སྔར་བྱིན་པ་ཐམས་ཅད་དོན་མེད་དོ་ཞེས་བརྗོད་པ་གསན་ནས་རྒྱལ་པོས་ལོངས་སྤྱོད་ཟད་མི་ཤེས་པའི་ཐབས་དྲིས་(༡༡)པས་ཕྱི་ཡི་རྒྱ་མཚོའི་གླིང་ན་ཀླུའི་བུ་མོ་མཛེས་ལྡན་མའི་གཙུག་ན་ནོར་བུ་རིན་པོ་ཆེ་དགོས་འདོད་ཐམས་ཅད་འབྱུང་བ་ཡོད་དེ་བྱང་ཆུབ་སེམས་དཔའ་སེམས་ཅན་ལ་སྙིང་རྗེ་ལྡན་པས་བསླང་ན་སྟེར་བར་འགྱུར་རོ་ཞེས་ཐོས་ནས་ཕྱི་ཡི་རྒྱ་མཚོ་ལས་ནོར་བུ་ལན་མང་དུ་བླངས་པའི་དེད་དཔོན་ཞིག་ཡོད་པ་ལ་བཀའ་བསྒོ་བ། ཁོ་བོ་ནི་རྒྱ་མཚོའི་གླིང་ལས་ནོར་བུ་ལེན་པར་འདོད་ཀྱིས་ལམ་བསྟན་པར་རིགས་སོ་ཞེས་གསུངས་པས་དེས་ཀྱང་ལེགས་སོ་ཞེས་གསོལ་ཏེ་རྒྱ་མཚོར་དགོས་པའི་ཡོ་བྱད་སྟ་གོན་དུ་བྱས་སོ། །བློན་པོ་རྣམས་ཀྱིས་མི་བཞུད་པར་གསོལ་ཀྱང་མ་གནང་སྟེ་ལེགས་པར་གྲུབ་པའི་ཉི་མ་ལ་གཟིངས་ཀྱི་ནང་དུ་ཚོང་པ་ལྔ་བརྒྱའི་འཁོར་དང་ལྷན་ཅིག་གཤེགས་སོ། །

དེའི་ཚེ་ཕྱོགས་བཞིར་དར་པོ་ཆེ་བཞི་ཕྱར་བས་མཐུན་པའི་རླུང་གིས་བསྐྱོད་པའི་ཚེ་འགྲོ། མཚམས་བཞིར་ཞ་ཉེའི་ཕ་ཝང་བཞི་འཕྱངས་པས་མི་མཐུན་པའི་རླུང་གི་ཚེ་སྡོད། དུང་དང་ཕུག་རོན་དང་བྱ་རོག་རྣམས་ནི་རི་དང་ཆུ་སྲིན་བརྟགས་ནས་བསད་པ་དང་། རང་གི་ཡུལ་ཕྱོགས་ངོས་བཟུང་བའི་ཕྱིར་ཁྱེར་ཏེ་གཟིངས་ཀྱི་ཉག་ཐག་བཅད་ནས་དུས་དང་མཐུན་པའི་རླུང་གིས་བསྐྱོད་པའི་བ་དན་མཛེས་པས་ངང་པའི་རྒྱལ་པོ་མཁའ་ལ་འགྲོ་བ་བཞིན་དུ་སོང་སོང་བ་ལས་ཉིན་ཞག་འགའ་ན་རིན་པོ་ཆེའི་གླིང་ཐམས་ཅད་ཀྱང་ནོར་བུ་སྣ་ཚོགས་ཀྱི་བྱེ་མ་བརྡལ་བར་ཕྱིན་ཏོ། །དེ་ཉིད་དུ་འཁོར་གཞན་རྣམས་བཞག་སྟེ་རྒྱལ་པོ་དང་དེད་དཔོན་གཉིས་པོ་གྲུ་ཆུང་ངུར་ཞུགས་ནས་ཉིན་ཞག་འགར་སོང་བ་ལས། རི་དཀར་པོ་གཅིག་སྣང་ནས་དྲིས་པ་དང་དངུལ་གྱི་རི་ཡིན་ཟེར་རོ། །ཡང་དེ་ལས་ཀྱང་འདས་ཏེ་སོང་བ་ལས་རི་སྔོན་པོ་ནམ་མཁའ་དྭངས་པའི་མདོག་འདྲ་བ་ཞིག་མཐོང་ནས་དྲིས་པས་བཻ་ཌཱུརྱའི་རི་ཡིན་ཟེར་རོ། །དེ་ལས་ཀྱང་འདས་ཏེ་སོང་བའི་མཚམས་ན་རི་སེར་པོ་ཞིག་སྣང་ནས་དྲིས་པས་འདི་ནི་གསེར་གྱི་རི་ཡིན་ཏེ་བདག་ཅག་དོང་བའི་གནས་ལགས་སོ་ཞེས་སྨྲས་ཏེ་སོང་བ་ལས། རི་དེའི་དྲུང་ན་གསེར་གྱི་བྱེ་མ་བརྡལ་བའི་ས་གཞིའི་མཚམས་སུ་སླེབས་པ་དང་དེད་དཔོན་གྱིས་སྨྲས་པ། རིའི་སྟེང་ན་རིན་པོ་ཆེ་སྣ་བདུན་གྱི་ཁང་བུ་བརྩེགས་པ་ཞིག་ཡོད་དོ། །དེའི་སྒོ་དྲུང་ན་རྡོ་རྗེའི་གཏུན་ཅིག་ཡོད་ཀྱིས་དེ་ཡིས་སྒོ་དེ་བརྡུང་ལ་སེམས་ཅན་ལ་ཕན་པའི་ཕྱིར་ནོར་བུ་འདོད་དོ་ཞེས་བརྡ་སྦྱར་ནས་ཅི་ཡང་མི་སྨྲ་བར་བཞུགས་ཤིག་དང་ཀླུའི་བུ་མོ་བརྒྱས་(༡༢)ནོར་བུ་འབུལ་དུ་འོང་གིས་དེ་དག་ལ་ཅི་ཡང་མ་སྨྲ་ཞིག །དེ་ནས་ཀླུའི་བུ་མོ་མཛེས་ལྡན་མས་ནོར་བུ་འབུལ་དུ་འོང་གིས་དེ་ཉིད་མྱུར་དུ་ལོང་ལ་མ་ཤོར་བར་གོས་ཀྱིས་གྲིལ་ཏེ་སྤྱི་བོར་བསྣམས་ལ་བྱོན་ཅིག་ཅེས་ལེགས་པར་གདམས་པ་བཞིན་རིན་པོ་ཆེའི་སྒོ་དྲུང་དུ་ཕྱིན་ནས་སྒོ་བརྡུངས་པས་ཐོག་མར་ཀླུ་མོ་བརྒྱས་རིན་པོ་ཆེ་ཕུལ་ཡང་མ་བླངས་པར་ད་དུང་སྒོ་བརྡུངས་པས་ཀླུའི་བུ་མོ་མཛེས་ལྡན་མ་སྔོན་མོ་ཤིན་ཏུ་མཛེས་ཤིང་ལྟ་བས་མི་ངོམས་པ་ཞིག་ཕྱིར་བྱུང་ནས་སྤྱི་གཙུག་གི་ནོར་བུ་ཕུལ་བ་དང་། མྱུར་བར་ལོག་སྟེ་དེད་དཔོན་དང་ལྷན་ཅིག་རང་གི་འཁོར་གྱི་གླིང་དེར་ནོར་བུའི་བྱིན་རླབས་ཀྱིས་ནམ་མཁའ་ལ་ཕྱིན་པས་ན་ཐམས་ཅད་ཡ་མཚན་སྐྱེས་ཏེ་ཕྱག་བྱས་པ་དང་དེད་དཔོན་གྱིས་ལེགས་པར་བརྟགས་པས་རིན་པོ་ཆེ་སྣ་བདུན་གཟེངས་སུ་ཡང་ལྕི་རན་པར་བརྫངས་ཏེ་ཁ་ལོ་བསྒྱུར་ནས་འོངས་པ་དང་། རྒྱ་མཚོའི་གླིང་ཞིག་ན་པདྨའི་སྡོང་པོ་ཤིན་ཏུ་མཛེས་པའི་སྟེང་ན། ཁྱེའུ་ལོ་བརྒྱད་ལོན་པའི་ན་ཚོད་ཅན་ཤིན་ཏུ་མཛེས་ཤིང་ལྟ་བས་མི་ངོམས་པ་མཚན་དང་དཔེ་བྱད་ཀྱིས་བརྒྱན་པ་ཞིག་མཐོང་ནས་དེའི་དྲུང་དུ་སོང་ནས་རྒྱལ་པོས་སྨྲས་པ། ཁྱེའུ་ཁྱོད་ཀྱི་ཕ་ནི་གང་། མ་ནི་གང་། རིགས་ནི་གང་། མིང་ནི་གང་། ཡུལ་ནི་གང་། ཟས་ནི་གང་། འདིར་དོན་ཅི་སྤྱོད་དྲིས་པས། ཁྱེའུ་དེས་སྨྲས་པ། ཕ་ནི་རང་རིག་ཀུན་ཏུ་བཟང་། །མ་ནི་ཆོས་དབྱིངས་ཀུན་བཟང་མོ། །རིགས་ནི་དབྱིངས་རིག་གཉིས་སུ་མེད། །མིང་ནི་པདྨ་འབྱུང་གནས་དཔལ། །ཡུལ་ནི་ཆོས་དབྱིངས་སྐྱེ་བ་མེད། །ཟས་ནི་གཉིས་སྣང་རྟོག་པ་ཟ། །དུས་གསུམ་རྒྱལ་པོ་སྤྱོད་པ་བྱེད། །ཅེས་གསུངས་པས་རྒྱལ་པོ་ངོ་མཚར་སྐྱེས་ནས་སྤྲུལ་པའི་སྐུ་ཞིག་འཁྲུངས་པས་བདག་གི་བུར་གསོལ་བ་གདབ་པོ་སྙམ་ནས་སྨྲས་པ། བདག་གི་མཆོད་གནས་དང་སྲས་སུ་གཤེགས་པར་ཅི་གནང་ཞུས་པས་དེ་ལྟར་བགྱིའོ་ཞེས་གནང་བ་དང་པདྨའི་སྡོང་པོ་བཅད་དེ་ཁྱེའུ་དེ་ཉིད་ནོར་བུ་རིན་པོ་ཆེ་དང་བཅས་པ་རང་གི་འཁོར་གྱིས་བསྐོར་ཏེ་ཨོ་རྒྱན་གྱི་ཡུལ་དུ་ཕྱིན་པ་དང་། ཕོ་བྲང་འཁོར་གྱི་སྐྱེ་བོ་ཐམས་ཅད་ཀྱིས་བསུ་བ་རྒྱ་ཆེན་པོ་བྱས་ཏེ་བཻ་ཌཱུརྱའི་ཕོ་བྲང་དུ་གཤེགས་ནས་རྒྱལ་པོས་སྨོན་ལམ་བཏབ་པ། ངས་རྙེད་པའི་ནོར་བུ་འདི་ཡིད་བཞིན་གྱི་ནོར་བུ་བསམ་འཕེལ་ཆེན་པོ་ཡིན་ན་ཕོ་བྲང་འདིར་ཁྱེའུ་འདི་བཞུགས་པའི་རིན་པོ་ཆེ་སྣ་བདུན་གྱི་ཁྲི་དང་གདུགས་ཀྱང་ཡོད་པར་ཤོག་(༡༡༣)ཅིག །ཅེས་བརྗོད་མ་ཐག་ཏུ་དེ་ཉིད་བྱུང་བར་གྱུར་ཏོ། །དེ་ལ་རྒྱལ་བུ་བཞུགས་ཏེ་རྒྱལ་སྲིད་ལ་མངའ་གསོལ་བས་པདྨ་རྒྱལ་པོ་ཞེས་གྲགས་སོ། །དེའང་འདི་ཉིད་རྒྱ་མཚོའི་གླིང་གི་པདྨ་ལས་འཁྲུངས་ཤིང་རྒྱལ་སྲིད་ལ་མངའ་གསོལ་བའི་སླད་ཀྱིས་སོ། །དེ་ནས་རྒྱལ་པོས་སྨོན་ལམ་བཏབ་པ་ངའི་ཕོ་བྲང་འཁོར་དུ་ཞག་བདུན་དུ་རིན་པོ་ཆེའི་ཆར་འབབ་ཅིང་བང་མཛོད་རྣམས་ཀྱང་སྔོན་བས་གང་བར་ཤོག་ཅིག་ཅེས་བརྗོད་མ་ཐག་ཏུ་དེ་བཞིན་དུ་གྱུར་ཏོ། །

དེའི་ཚེ་རྔ་བོ་ཆེ་བརྡུངས་ནས་ཕྱོགས་ཐམས་ཅད་དུ་བསྒྲགས་པ། རྒྱལ་པོ་ཨིནྡྲ་བོ་དྷི་ངས་ནོར་བུ་ལས་དགོས་འདོད་ཀྱི་ཆར་ཆེན་པོ་འབེབས་ཀྱིས་སུ་ཅི་འདོད་པ་གང་ལ་གང་འདོད་པ་ཐམས་ཅད་ལོངས་ཤིག་ཅེས་བརྗོད་ནས་ནོར་བུ་རིན་པོ་ཆེ་རྒྱལ་མཚན་གྱི་རྩེར་བཏགས་ཏེ་མཆོད་པས་མཆོད་ནས་རྒྱལ་པོས་ཁྲུས་བྱས་ཕྱག་བཙལ་ཐལ་མོ་སྦྱར་ནས་འདི་སྐད་ཅེས་གསོལ་བ་བཏབ་བོ། །ངས་རྙེད་པའི་ནོར་བུ་འདི་ཡང་དག་པ་ཡིན་ངེས་ན་སེམས་ཅན་རྣམས་ལ་གང་འདོད་པ་དེའི་ཆར་ཕོབ་ཅིག་ཅེས་བརྗོད་མ་ཐག་ཏུ་ཕྱོགས་བཞི་ནས་རླུང་ལངས་ཏེ་ཡུལ་མཁར་གྱི་མི་གཙང་བ་ཐམས་ཅད་ཕྱགས་ཏེ་ཆར་ཟིམ་བུར་བབས་པས་རྡུལ་ཕྲན་ཐམས་ཅད་མི་ལྡང་བར་མནན་ཏེ་དང་པོར་ཁ་ཟས་རོ་བརྒྱ་པའི་ཆར་བབས་པས་བཀྲེས་ཤིང་སྐོམ་པ་ཐམས་ཅད་ཚིམས་པར་བྱས། དེ་ནས་གོས་ཀྱི་ཆར་བབས་པས་འཁྱགས་ཤིང་སྦྲེབས་པ་ཐམས་ཅད་བགོ་བ་དང་ལྡན། དེ་ནས་ནོར་གྱི་ཆར་བབས་པས་གང་ལ་ཅི་འདོད་པའི་རེ་བ་ཐམས་ཅད་ཡིད་བཞིན་དུ་གྲུབ་ནས་རྒྱལ་འབངས་ཐམས་ཅད་དབུལ་ཕོངས་དང་བྲལ་བ་ན་རྒྱལ་པོས་བཀའ་བསྒོ་བ། ཁྱེད་རྣམས་མི་དགེ་བ་ཐམས་ཅད་སྤོངས་ལ་རྟག་ཏུ་དམ་པའི་ཆོས་ལ་སྤྱོད་ཅིག་ཅེས་གསུངས་ནས་བྱང་ཆུབ་མཆོག་ཏུ་སེམས་བསྐྱེད་དུ་བཅུག་པས་ཐམས་ཅད་ཀྱིས་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པའི་འབྲས་བུ་ཐོབ་བོ། །དེ་ནས་སློབ་དཔོན་གྱིས་རྒྱལ་སྲིད་ནི་ཐར་བའི་ཆོས་དང་མི་མཐུན་ཞིང་སེམས་ཅན་གྱི་དོན་ཡང་མི་འབྱུང་བར་དགོངས་ནས་རྒྱལ་པོ་དང་བློན་པོ་རྣམས་སུན་དབྱུང་བའི་ཕྱིར་བརྟུལ་ཞུགས་ཀྱི་སྤྱོད་པ་མཛད་དེ་གཅེར་བུ་རུས་པའི་རྒྱན་དང་ལྡན་པ་ཁ་ཊྭཱྃ་ཀ་རྩེ་གསུམ་པ་ཞིག་བཟུང་ནས་གར་མཛད་པས་ཕོ་བྲང་གི་རྩེར་གར་ལ་བལྟ་བའི་མི་མང་པོ་ཚོགས་པ་ལ་ཁ་ཊྭཱྃ་ཀ་ཕྱག་ནས་ཤོར་བ་ལྟར་མཛད་ནས། དེ་ནང་བློན་ཆེན་པོ་ཀ་མ་ཏིའི་བུའི་མགོ་ལ་བསྣུན་ནས་(༡༤)ཤི་བར་གྱུར་པ་དང་། རྒྱལ་པོའི་ཁྲིམས་ལས་སུས་འདས་ཀྱང་ཆད་པའི་ལས་ལ་སྤྱོད་པས་བློན་པོ་ཀུན་ཚོགས་ཏེ་རྒྱལ་པོ་ལ་གསོལ་བ། ལྷ་རྒྱལ་བུར་མངའ་གསོལ་ཡང་བློན་པོའི་བུ་ཉེས་པ་མེད་པར་བསད་པས་གསལ་ཤིང་གི་རྩེ་ལ་བཞག་ནས་ཆད་པས་བཅད་འཚལ་ཞུས་པས་རྒྱས་པོས་གལ་གྱིས་གཅུས་ཀྱང་མ་ཉན་ནས་འོ་ན་སྤྱུགས་པར་བྱའོ། །ཞེས་གསུངས་པས་ལེགས་སོ་ཞེས་བསྟོད་དོ། །

དེ་ནས་རྒྱལ་པོ་ཐུགས་མ་བདེ་བཞིན་དུ་སློབ་དཔོན་ལ་གསུངས་པ། རིན་ཆེན་མཚོ་དཀྱིལ་པདྨའི་སྡོང་པོ་ལས། །ཕ་དང་མ་མེད་རང་བྱུང་སྤྲུལ་པའི་སྐུ། །བརྟུལ་ཞུགས་སྤྱོད་པས་བློན་པོའི་ཕྲུག་གུ་བསྐུམས། །བློན་པོ་རྣམས་ཀྱིས་རྒྱལ་ཁྲིམས་ཆད་པས་གཅོད། །གསོད་ལས་སྤྱུགས་པར་གདམས་པ་གང་དགར་བཞུད། །ཅེས་བརྗོད་པ་དང་སློབ་དཔོན་གྱིས་གསུངས་པ། འཇིག་རྟེན་འདི་ན་ཕ་དང་མ་དཀོན་པར། །ཡབ་དང་ཡུམ་གྱིས་རྒྱལ་སྲིད་ཉིད་ལ་བཀོད། །ཡུལ་ལ་ཞེན་མེད་སྤྱུགས་ཀྱང་འཇིགས་པ་མེད། །སྐྱེ་ཤི་གཉིས་མེད་བསད་ཀྱང་འཇིགས་པ་མེད། །རྒྱལ་སྲིད་གཉན་པས་སྤྱུགས་ཀྱང་ཤིན་ཏུ་ལེགས། །ཡབ་ཡུམ་དག་ཀྱང་ཡུན་དུ་བདེ་བར་བཞུགས། །ལས་ཀྱིས་འབྲེལ་བས་ཕྱིས་ནས་མཇལ་བར་ངེས། །ཞེས་བརྗོད་ནས་ཕྱག་འཚལ་ཏེ་སོང་བ་ལས། བློན་པོ་རྣམས་ཀྱིས་ཨོ་རྒྱན་ཡུལ་གྱི་ལྷོ་ཕྱོགས་དུར་ཁྲོད་ཆེན་པོ་བསིལ་བའི་ཚལ་མི་མ་ཡིན་དང་གཅན་གཟན་མ་རུངས་པ་རྣམས་ཀྱིས་གང་བ་འཇིགས་ཤིང་སྐྱི་བུང་བའི་ནང་དུ་བསྐྱལ་ལོ། །ཡུལ་དེའི་མི་ཤི་ཚད་དེར་སྐྱེལ་བས་རོ་ཟས་དང་རོ་གོས་ལ་ལོངས་སྤྱོད་ཅིང་བརྟུལ་ཞུགས་མཛད་པས་མཁའ་འགྲོ་མ་ཐམས་ཅད་དབང་དུ་འདུས་ཏེ་པདྨ་ཐོད་ཕྲེང་རྩལ་ཞེས་མཚན་གསོལ་ཏོ། །དེ་ནས་དུར་ཁྲོད་ཆེན་པོ་དགའ་བའི་ཚལ་དུ་སྤྱོད་པ་མཛད་པས་ཡེ་ཤེས་ཀྱི་མཁའ་འགྲོ་མ་བདུད་འདུལ་མས་དབང་བསྐུར་ཞིང་བྱིན་གྱིས་བརླབས། སོ་སའི་གླིང་དུ་ཞི་བ་འཚོས་དབང་བསྐུར་ཞིང་མཁའ་འགྲོ་མ་ཐམས་ཅད་ཀྱིས་བསྟོད་དོ། །དེ་ནས་སྔར་པདྨ་ལས་འཁྲུངས་པའི་གླིང་དེར་བྱོན་ནས་རྒྱ་མཚོའི་གླིང་གི་མཁའ་འགྲོ་མ་བཞི་དབང་དུ་མཛད། རྡོ་རྗེ་ཕག་མོས་དབང་བསྐུར་ཞིང་རྒྱུད་དང་གདམས་པ་མཐའ་དག་གསུངས། རྒྱ་མཚོའི་ཀླུ་དང་། བར་སྣང་གི་གཟའ་དང་། ལྷ་མ་སྲིན་སྡེ་བརྒྱད་དང་། ཞིང་སྐྱོང་དང་། ལས་བྱེད་དང་། ཤུགས་འགྲོ་མ་ལ་སོགས་པ་འཇིག་རྟེན་པ་དང་། འཇིག་རྟེན་ལས་འདས་པའི་མཁའ་འགྲོ་ཐམས་ཅད་གྲུབ་ཅིང་དབང་དུ་མཛད་ནས་(༡༥)རྡོ་རྗེ་དྲག་པོ་རྩལ་ཏེ་མཚོ་སྐྱེས་རྡོ་རྗེ་ཞེས་མཚན་གསོལ་ཞིང་མཆོག་དང་ཐུན་མོང་གི་དངོས་གྲུབ་ཆེན་པོ་བརྙེས་སོ། །

དེ་ལྟར་གྲུབ་པ་ཐོབ་ཅིང་ཆོས་ཐམས་ཅད་ལ་མངའ་བརྙེས་ཏེ་རང་བཞིན་སྤྲུལ་པའི་སྐུ་ཆེན་པོར་བཞུགས་ཀྱང་འགྲོ་བའི་ཁམས་དང་མོས་པ་སྣ་ཚོགས་པས་དེ་དག་སློབ་དཔོན་མེད་པས་མི་དད་པ་བཟློག་པའི་ཕྱིར་རྒྱ་གར་གྱི་མཁས་གྲུབ་རྣམས་ལ་ཐོས་བསམ་མཛད་པའི་ཚུལ་ནི། དེ་ནས་ཟ་ཧོར་གྱི་སློབ་དཔོན་ཆེན་པོ་པྲ་བྷ་ཧ་སྟིའི་དྲུང་དུ་རབ་ཏུ་བྱུང་སྟེ་ཤཱཀྱ་སེངྒེར་མཚན་གསོལ་ནས་ཕྱི་ནང་གི་ཆོས་མཐའ་དག་དང་། ཁྱད་པར་དུ་རྣལ་འབྱོར་གྱི་རྒྱུད་ཡོ་ག་ཛ་མུན་ཏ་ཡཱ་དང་། ཏ་ཐཱ་སཾ་གྲ་ཧ་དང་། ཡོ་ག་ཙརྱ་ལ་སོགས་པ་མ་ལུས་པར་མཁྱེན་པར་མཛད་ཅིང་རྡོ་རྗེ་དབྱིངས་ཀྱི་དཀྱིལ་འཁོར་ཞལ་གཟིགས་ཏེ་ཡོ་ག་ཚེ་ཡི་རིག་འཛིན་ལ་མངའ་བརྙེས་སོ། །དེ་ནས་རྒྱ་གར་ལྷོ་ཕྱོགས་ཀྱི་རྒྱུད་དུ་སློབ་དཔོན་ཆེན་པོ་ཀླུ་སྒྲུབ་སྙིང་པོ་ལས་སྒྲ་དང་། ཚད་མ་དང་། ནང་གི་དེ་ཁོ་ན་ཉིད་ངེས་པའི་གྲུབ་པའི་མཐའ་དབུ་མ་ཆེན་པོ་ལ་སོགས་པ་རྒྱུ་མཚན་ཉིད་ཀྱི་ཐེག་པ་མཐའ་དག་དང་། འབྲས་བུ་རྡོ་རྗེ་ཐེག་པ་མ་ལུས་པ་གསན་ནས་མཁྱེན་པར་མཛད་ཅིང་རྣལ་འབྱོར་ཆེན་པོའི་དཀྱིལ་འཁོར་དཔག་ཏུ་མེད་པའི་ཞལ་གཟིགས་སོ། །དེ་ནས་མུ་སྟེགས་པ་དང་རྩོད་པ་མཛད་པས་གྲུབ་པའི་མཐའ་དང་རྫུ་འཕྲུལ་འགྲན་པས་མུ་སྟེགས་པ་ཕམ་ནས་ནགས་ཚལ་དུ་མཐུ་བྱས་པས་རྫུ་འཕྲུལ་གྱིས་ནགས་ལ་མེ་སྦར་ཏེ་སངས་རྒྱས་ཀྱི་བསྟན་པ་ལ་བཀོད་པས་སློབ་དཔོན་ཆེན་པོ་སེངྒེ་སྒྲ་སྒྲོགས་ཞེས་མཚན་གསོལ་ཏོ། །དེ་ནས་དགེ་སློང་མ་ཀུན་དགའ་མོའི་དྲུང་དུ་ཐུགས་རྗེ་ཆེན་པོ་ཡིད་བཞིན་འཁོར་ལོ་ལ་སོགས་པ་པདྨ་གསུང་གི་སྒྲུབ་སྡེ་གསན་ཅིང་གྲུབ་པ་བརྙེས། སློབ་དཔོན་ཆེན་པོ་འཇམ་དཔལ་བཤེས་གཉེན་གྱི་སྤྱན་སྔར་འཇམ་དཔལ་སྒྱུ་འཕྲུལ་དྲྭ་བ་ལ་སོགས་པ་གསང་སྔགས་བླ་ན་མེད་པའི་རྒྱུད་ལུང་མན་ངག་ཐམས་ཅད་གསན་ཅིང་འཇམ་དཔལ་ཞི་ཁྲོའི་དཀྱིལ་འཁོར་ཞལ་གཟིགས། སློབ་དཔོན་ཧཱུྃ་ཀ་རའི་སྤྱན་སྔར་ཧེ་རུ་ཀ་གལ་པོའི་རྒྱུད་ལ་སོགས་པ་ཡང་དག་ཐུགས་ཀྱི་རྒྱུད་ལུང་མཐའ་དག་གསན་ཅིང་དངོས་གྲུབ་བརྙེས། སློབ་དཔོན་པྲ་བྷ་ཧ་སྟིའི་དྲུང་དུ་ཀཱི་ལ་ཡ་མངོན་འབྱུང་གི་རྒྱུད་ལ་སོགས་པ་རྡོ་རྗེ་ཕུར་པའི་ཆོས་སྡེ་མཐའ་དག་གསན་ནས་རྡོ་རྗེ་གཞོན་ནུའི་ཞལ་གཟིགས། སློབ་དཔོན་སངས་རྒྱས་གསང་བའི་དྲུང་དུ་གསང་བའི་སྙིང་པོ་ལ་སོགས་པ་ཞི་ཁྲོ་སྒྱུ་འཕྲུལ་གྱི་རྒྱུད་སྡེ་མཐའ་(༡༦)དག་གསན་ཅིང་། སློབ་དཔོན་རྡོ་རྗེ་མི་འགྱུར་ལས་བདུད་རྩི་ཡོན་ཏན་གྱི་རྒྱུད་སྡེ་ཐམས་ཅད་གསན་ཅིང་། སློབ་དཔོན་དྷ་ན་སཾ་སྐྲི་ཏ་ལས་སྲིད་པ་མ་མོའི་རྒྱུད་སྡེ་མཐའ་དག་གསན། སློབ་དཔོན་རམྦུ་གུ་ཡ་དྷེ་བའི་སྤྱན་སྔར་དམོད་པ་དྲག་སྔགས་ཀྱི་རྒྱུད་དང་། འཇིག་རྟེན་མཆོད་བསྟོད་ཀྱི་རིམ་པ་མཐའ་དག་མཁྱེན་པར་མཛད་པས་སློབ་དཔོན་ཆེན་པོ་བློ་ལྡན་མཆོག་སྲེད་དུ་མཚན་གསོལ་ཏེ། འཛམ་བུའི་གླིང་ན་ཇི་སྙེད་བཞུགས་པའི་ཆོས་སོ་ཅོག་མ་ལུས་པ་མཁྱེན་པར་མཛད་ནས་སའི་སྟེང་ན་འགྲན་པའི་ཟླ་མེད་ཅིང་རྒྱན་དུ་གྱུར་ཏེ་མཁས་ཤིང་གྲུབ་པ་བརྙེས་པར་གྲགས་སོ། །

རྒྱ་གར་ཤར་ནུབ་ལ་སོགས་པའི་ཕྱོགས་གང་དང་གང་དུ་བཞུགས་པ་ཐམས་ཅད་དུ་ཉི་མའི་ཟེར་ལ་ཆིབས་ནས་གཤེགས་པས་སློབ་དཔོན་ཆེན་པོ་ཉི་མ་འོད་ཟེར་ཞེས་མཚན་གསོལ་ཞིང་། ཟ་ཧོར་རྒྱལ་པོ་གཙུག་ལག་འཛིན་གྱི་བུ་མོ་མེ་ཏོག་མནྡྷཱ་ར་བ་དབང་དུ་མཛད་ནས་ནགས་ལ་བཞུགས་པ་ལས་འགྲོ་བ་འདུལ་བའི་དུས་ལ་བབས་ནས་ཡབ་ཡུམ་གཉིས་གྲོང་ཁྱེར་དུ་བསོད་སྙོམས་ལ་གཤེགས་པས་མི་རྣམས་མ་དད་དེ་དགེ་སྦྱོང་གི་གཟུགས་ཅན་འདིས་རྒྱལ་པོའི་རིགས་བསླད་ཅིང་སངས་རྒྱས་ཀྱི་བསྟན་པ་ལ་རྨ་ཕྱུང་བས། དུར་ཁྲོད་དུ་སྲེགས་ཤིག་ཟེར་ནས་ཐམས་ཅད་ཀྱིས་ཙནྡན་གྱི་ཤིང་ཁུར་རེ་དང་ཏིལ་མར་ཁལ་རེ། རོ་རས་ཡུག་རེས་གྲིལ་ནས་བསྲེགས་པས་ཞག་དགུར་དུ་བ་མ་ཆད་ནས་བལྟས་པས་མེ་ལྕེ་ཕྱིར་འབར་ནས་རྒྱལ་པོའི་ཕོ་བྲང་འཁོར་རྣམས་ཚིག་ཅིང་། ཏིལ་མར་རྒྱ་མཚོར་འཁྱིལ་པའི་དབུས་ན་པདྨའི་སྡོང་པོ་ལ་ཡབ་ཡུམ་གཉིས་བཞུགས་པ་མཐོང་ནས་འགྱོད་དེ་བཤགས་པ་བྱས་ནས་རྗེས་སུ་གཟུང་བར་ཞུས་པས་གྲོང་ཁྱེར་གྱི་མེ་ཞི་ཞིང་ཆོས་གསུངས་པས་ཐམས་ཅད་ཀྱིས་ཆོས་ཀྱི་མིག་རྡུལ་དང་བྲལ་བ་རྙེད་ནས་པདྨ་འབྱུང་གནས་ཞེས་བསྟོད་ཅིང་འདུན་ཏོ། །

དེ་ནས་ཨོ་རྒྱན་གྱི་ཡུལ་དུ་བྱོན་པ་ན་སྔར་གྱི་མི་ཀུན་གྱིས་ངོ་ཤེས་ཏེ་བློན་པོའི་བུ་གསོད་པ་དེ་གནོད་པ་སྐྱེལ་དུ་བྱུང་གིས་སྲེགས་ཤིག་ཅེས་བསྒྲགས་ཏེ་སྔ་མ་བཞིན་བསྲེགས་པས་ཞག་ཉི་ཤུ་རྩ་གཅིག་ཏུ་དུ་བ་མ་ཆད་ནས་བལྟས་པས་སྔ་མ་ལྟར་འདུག་པ་མཐོང་ནས་བཟོད་པར་གསོལ་ནས་པདྨ་ཐོད་ཕྲེང་རྩལ་ཞེས་བསྟོད་ཅིང་རྗེས་སུ་གཟུང་བར་ཞུས་པས་ལོ་བརྒྱད་བཞུགས་ཏེ་གསང་སྔགས་ཀྱི་དཀྱིལ་འཁོར་དུ་དབང་བསྐུར་ཞིང་ཆོས་གསུངས་པས་ཨོ་རྒྱན་གྱི་ཡུལ་ཁམས་ཐམས་ཅད་ཆོས་ལ་བཀོད། རྒྱལ་པོ་ཨིནྡྲ་བོ་དྷི་འཁོར་ཚོམ་བུ་དང་བཅས་པས་གྲུབ་པ་(༡༧)ཐོབ་ནས་མཁའ་སྤྱོད་དུ་གཤེགས་སོ། །དེ་ནས་རྡོ་རྗེ་ཕག་མོས་ལུང་བསྟན་པ། སྐལ་ལྡན་འབྲས་བུ་ཚེ་གཅིག་ངེས་པའི་ལུང་། །གང་དང་མི་འདྲ་ཀུན་གྱིས་མ་རྟོགས་པ། །ཤྲཱི་སིངྷ་རྡོ་རྗེའི་ཐུགས་ལ་གནས། །རྩུབ་འགྱུར་ཚལ་དུ་དགོངས་པ་རྙེད་པར་འགྱུར། །ཞེས་གསུངས་པ་དང་སྐད་ཅིག་གིས་རྩུབ་འགྱུར་ཚལ་གྱི་དུར་ཁྲོད་ཆེན་པོར་རྫུ་འཕྲུལ་གྱིས་བྱོན་ཏེ་སློབ་དཔོན་ཆེན་པོ་ཤྲཱི་སིངྷ་ལ་ཕྱག་དང་བསྐོར་བ་མཛད་ནས་རྗེས་སུ་གཟུང་བར་ཞུས་པས་གནང་སྟེ། རྫོགས་པ་ཆེན་པོ་ནམ་མཁའ་དང་མཉམ་པའི་རྒྱུད་ལ་སོགས་པ་སེམས་ཀློང་མན་ངག་གི་སྐོར་མཐའ་དག་གསུངས་ཤིང་། ཁྱད་པར་དུ་ཐིག་ལེ་ཕྱི་ནང་གསང་བའི་སྐོར་མ་ལུས་པ་གསན་དུས་ཡང་ཞུས་པ། སློབ་དཔོན་ཆེན་པོ་ལགས། ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་ལོངས་སྤྱོད་རྫོགས་པ་སྐུའི་ཞིང་ཁམས་མཐོང་ཞིང་། ཆོས་ཀྱི་སྐུའི་ཞིང་ཁམས་སུ་སངས་རྒྱས་པའི་གདམས་ངག་ཅིག་གནང་བར་ཞུ་འཚལ་ཞེས་གསོལ་པ་དང་། ཤྲཱི་སིངྷས་གསུངས་པ། རིགས་ཀྱི་བུ་ཤིན་ཏུ་ལེགས་ཀྱི་ཆོས་ཐམས་ཅད་ཀྱི་ཡང་རྩེ། ལྟ་བ་ཐམས་ཅད་ཀྱི་ཞེ་ཕུགས། ཐེག་པ་ཐམས་ཅད་ལས་འདས་ཤིང་། མཁའ་འགྲོ་ཐམས་ཅད་ཀྱི་སྙིང་ཏིག །གསང་བ་བས་ཀྱང་ཆེས་ཤིན་ཏུ་གསང་བའི་དོན། འོད་གསལ་རྡོ་རྗེ་སྙིང་པོའི་ཐེག་པ་ཆེན་པོ། སེམས་ལས་འདས་པ། ཡིད་དང་བྲལ་བ། རྣམ་པར་ཤེས་པ་ཐམས་ཅད་ཀྱི་སྤྱོད་ཡུལ་དུ་མ་གྱུར་པ། ཡིན་མིན་གྱི་མཐའ་ལ་མི་གནས་ཤིང་ལྟ་སྒོམ་བསྐྱེད་རྫོགས་ཀྱི་ཡུལ་ལས་འདས་པ། དུས་གསུམ་རྒྱལ་བ་ཐམས་ཅད་ཀྱི་ཡུམ། རིག་འཛིན་ཆེན་པོ་རྣམས་ཀྱི་ཉེ་ལམ། མཐར་ཐུག་པའི་མན་ངག་བླ་ན་མེད་པ། ལོ་གསུམ་གྱིས་སངས་རྒྱས་ཀྱི་བྱང་ཆུབ་འགྲུབ་པའི་གདམས་པ་ཞིག་ཡོད་ཀྱིས་བསྟན་པར་བྱའོ་གསུངས་ནས། རྫོགས་པ་ཆེན་པོ་མཁའ་འགྲོ་སྙིང་ཏིག་གི་དབང་དང་། དེའི་ཉམས་ལེན་མན་ངག་གི་ཡི་གེ་རབ་ཏུ་མང་པོ་དང་། དེའི་རྒྱབ་རྟེན་དུ་སྒྲ་ཐལ་འགྱུར་རྩ་བའི་རྒྱུད། ཡི་གེ་མེད་པ་གཞིའི་རྒྱུད། སྐུ་གདུང་འབར་བ་རྟགས་ཀྱི་རྒྱུད། རྫོགས་པ་རང་བྱུང་དབང་གི་རྒྱུད། ངོ་སྤྲོད་སྤྲོས་པའི་རྒྱུད། སྒྲོན་མེ་འབར་བའི་རྒྱུད། རིག་པ་རང་ཤར་གྱི་རྒྱུད། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད། རིན་པོ་ཆེ་སྤུངས་པའི་རྒྱུད། ཉི་ཟླ་ཁ་སྦྱོར་གྱི་རྒྱུད། ནོར་བུ་ཕྲ་བཀོད་ཀྱི་རྒྱུད། རིག་པ་རང་གྲོལ་གྱི་རྒྱུད། མུ་ཏིག་ཕྲེང་བའི་རྒྱུད། ཀུན་ཏུ་བཟང་པོ་ཐུགས་(༡༨)ཀྱི་མེ་ལོང་གི་རྒྱུད། བཀྲ་ཤིས་མཛེས་ལྡན་གྱི་རྒྱུད། སེང་གེ་རྩལ་རྫོགས་ཀྱི་རྒྱུད། ཀློང་དྲུག་པའི་རྒྱུད། ཀུན་ཏུ་བཟང་མོ་ཀློང་གསལ་ཉི་མའི་རྒྱུད་དང་བཅོ་བརྒྱད་ཡོངས་སུ་རྫོགས་པར་གསུངས་ཤིང་བསྟན་པ་གཏད་དེ་ལོ་ཉི་ཤུ་རྩ་ལྔའི་བར་དུ་གདམས་པའི་ཐོས་བསམ་མཛད་ཅིང་བཞུགས་སོ། །དེ་ནས་དུར་ཁྲོད་ཆེན་པོ་སོ་སའི་གླིང་དུ་བྱོན། ལོ་གསུམ་ཉམས་སུ་བླངས་པས་སྐྱེ་ཤི་གཉིས་སྤངས་ཆུའི་ཟླ་བ་ལྟ་བུའི་སྐུ་གྲུབ་ནས། རྫུ་འཕྲུལ་གྱིས་གནས་རྣམ་པ་སྣ་ཚོགས་སུ་མི་དང་མི་མ་ཡིན་པའི་འགྲོ་བ་རབ་ཏུ་མང་པོ་ལ་ཕན་པ་མཛད་ཅིང་། ཁྱད་པར་རྒྱ་གར་གྱི་རྒྱལ་པོ་དྷརྨཱ་ཕ་ལའི་མཆོད་གནས་སུ་ཉིན་པར་བཞུགས་ཤིང་། མཚན་མོ་དུར་ཁྲོད་ཆེན་པོ་བསིལ་བའི་ཚལ་དང་། སོ་ས་གླིང་དང་། རབ་ཏུ་སྣང་བྱེད་དང་། དགའ་བྱེད་དང་། བྷ་སིང་དང་། ཐ་ཆུང་དང་། འཇིགས་བྱེད་ལ་སོགས་པར་བྱོན་ཏེ། མཁའ་འགྲོ་འབར་བའི་སྤྲིན་ཕུང་དང་ལྷན་ཅིག་གསང་སྔགས་ཀྱི་ཀུན་ཏུ་སྤྱོད་པས་གནས་པར་མཛད་དོ།། །།

༈ དེའི་ཚེ་བོད་ཀྱི་ཡུལ་གངས་རིའི་ར་བས་བརྒྱན་པའི་ནང་བྲག་དམར་མཚོ་མོའི་མགུལ་དང་ཉེ་བ་ན། བསིལ་ཁང་གི་ཕོ་བྲང་འོག་གཞི་པདྨའི་དྲྭ་བ་ལྟར་བཀོད་ལེགས་པའི་སྟེང་ཙནྡན་སྦྲུལ་གྱི་སྙིང་པོ་དང་། རིན་པོ་ཆེ་སྣ་ཚོགས་ཀྱིས་བརྒྱན་པའི་ལྡིང་ཁང་ན། རྒྱལ་པོ་ཁྲི་ལྡེ་གཙུག་བརྟན་དང་བཙུན་མོ་གྱིམ་ཤང་ཀོང་ཇོ་གཉིས་རིན་པོ་ཆེའི་ཁྲི་ལ་གཟིམ་པའི་རྨི་ལམ་དུ་རྒྱ་ནག་པོའི་རི་བོ་རྩེ་ལྔ་ནས་འོད་ཉི་མ་ཤར་བ་ལྟ་བུའི་རྩེ་ལས་ཁྱེའུ་ཞིག་བྱུང་ནས་བཙུན་མོའི་ལྷུམས་སུ་ཞུགས་པ་རྨིས་ཏེ་རྒྱལ་པོ་ལ་བཤད་པས་ཧྭ་ཤང་མངོན་ཤེས་མཁན་ཞིག་བཞུགས་པ་ལ་དྲིས་པས། སྲས་བྱང་ཆུབ་སེམས་དཔའ་འཇམ་དཔལ་གྱི་སྤྲུལ་པ་ཞིག་འཁྲུངས་པའི་ལྟས་ལེགས་པས་རིམ་གྲོ་ཆེར་བསྐྱེད་ཅིག་ཅེས་ཟེར་རོ། །དེ་ནས་ཟླ་བ་དགུ་ངོ་དང་བཅུ་ན་ཁྱེའུ་ཤིན་ཏུ་མཛེས་པ་མིའི་བུ་མི་འདྲ་བ་ལྷའི་སྲས་འདྲ་བ་གཅིག་བལྟམས་སོ། །དེའི་ཚེ་ཕོ་བྲང་གི་བྱང་ཤར་དུ་ཚེ་དཔག་ཏུ་མེད་པའི་མཆོད་རྟེན་བརྒྱ་རྩ་བརྒྱད་བཞེངས་པའི་འཇིམ་པ་ལྷག་མ་ལས་མཆོད་རྟེན་གཅིག་བརྩིགས་པས་གཟུག་མ་ཐུབ་ནས་བྲེས་ཐག་གིས་བསྡམས་པས་གླེད་པོར་ཤོར་ཞེས་ཐམས་ཅད་བཞད་གད་དིར་དིར་བྱུང་བས་དེའི་མིང་མཆོད་རྟེན་གླེད་པོ་བྲེས་ཐག་ཅན་ཞེས་གྲགས་ཤིང་རྒྱལ་པོ་སྐུ་ཚེ་རིང་བར་རྟོགས་སོ། །རྟའི་ལོའི་དཔྱིད་ཟླ་ར་བའི་སྐར་མ་རྒྱལ་གྱི་ཉིན་པར་སྐུ་བལྟམས་པའི་བཙས་སྟོན་རྒྱ་ཆེན་པོ་མཛད་ནས་མཚོ་ཆེན་པོའི་པདྨ་ལྟར་ཆེར་(༡༩)བསྐྱེད་པ་ལས་ལོ་དུས་སུ་ཞབས་འཛུགས་པ་དང་མཚན་གསོལ་བའི་དགའ་སྟོན་གྱི་ཚེ་མིང་ཅི་གདགས་བཀའ་བགྲོས་ལ་ལས་རྒྱལ་བུ་ཉིད་བཞེངས་ནས་གནམ་ལྷ་བབས་ཀྱི་རྒྱལ་པོ། ས་ལྷུན་གྲུབ་ཀྱི་མངའ་བདག །མགོ་ནག་ཡོངས་ཀྱི་སྤྱི་རྗེ། སྤྲུལ་པའི་རྒྱལ་པོ་ཁྲི་སྲོང་ལྡེའུ་བཙན་ལགས་སོ་ཞེས་གསུངས་པས། བོད་འབངས་ཐམས་ཅད་ཡ་མཚན་སྐྱེས་ནས་ཕྱག་འཚལ་ཞིང་འདུན་ནོ། །

དེ་ནས་དགུང་ལོ་བཅུ་གསུམ་ལ་ཡབ་དགུང་དུ་གཤེགས་ནས་རྒྱལ་སྲིད་ལ་མངའ་གསོལ་ཞིང་བཞུགས་པ་ལས། བློན་པོ་ཆེན་པོ་མ་ཞང་གྲོམ་པ་སྐྱེས་དབང་ཆེ་ནས་ཆོས་དར་དུ་མ་བཏུབ། ཐམས་ཅད་བོན་ལ་བཀོད་ནས་ཆབ་སྲིད་འཛིན་པའི་ཚེ་རྒྱལ་པོ་ཐུགས་མ་བདེ་ནས། བློན་པོ་ཆེན་པོ་འགོས་ལ་བོད་ཐམས་ཅད་དམ་པའི་ཆོས་ལ་འགོད་པའི་ཐབས་དྲིས་པས། འགོས་ཀྱི་མཆིད་ནས་དེ་ཤིན་ཏུ་ལེགས་པས་རྒྱལ་པོ་སྐུ་ཆག་ཆེ་བའི་གླུད་དུ་བློན་པོ་ཆེན་པོ་གཉིས་ལོ་གསུམ་མཆོད་པར་བཅུག་ན་ཕན་ཞེས་སྒྲོག་ཏུ་གཞུག་གིས། དེ་དུས་དེ་ལྟར་མཛད་པར་ཞུ་ཞེས་གླེང་ནས་མོ་རྩིས་པ་རྣམས་ལ་བརྔན་པ་བྱིན་ནས་སྒྲོག་ཏུ་བཅུག་པས་རྒྱལ་ཁམས་ཐམས་ཅད་དུ་བསྒྲགས་པའི་ཚེ་རྒྱལ་པོས་བློན་འཁོར་ཀུན་བསགས་ནས་ངའི་གླུད་ལ་འགྲོ་ནུས་པ་སུ་ཡོད་དྲིས་པས། འགོས་རྒན་པོ་ལངས་ཏེ་ངས་གཅིག་འགྲོ་བར་ཞུ་ཟེར་བ་དང་། མ་ཞང་ཡང་འགྲན་པས་ལངས་ཏེ་ངས་ཀྱང་འགྲོ་བར་ཞུ་ཟེར་རོ། །དེ་ནས་སྟོད་ལུང་བྲང་མདར་མཆད་པ་བརྩིགས་ཏེ་ལོ་གསུམ་གྱི་ཡོ་བྱད་དང་བློན་ཆེན་པོ་གཉིས་བཅུག་དུས། གྱད་ཀྱི་སྐུ་བློན་ཏ་ར་ཀླུ་གོང་ལ་རྒྱལ་པོས་འགོས་རྒན་ཐོན་ཅིག་གསུངས་པས། ཏ་ར་ཀླུ་གོང་གིས་མཆད་པའི་སྒོ་ཕ་བོང་ཆེན་པོས་གཅོད་དུས། འགོས་ཀྱིས་བྱ་རྒོད་ཀྱི་ལྷམ་དང་ཐུལ་པ་གྱོན་ནས། ཕབ་གོལ་གོལ་ཐོགས་ཏེ་བུག་སྒོར་འོངས་པའི་ཕྱི་བཞིན་མ་ཞང་ཀྱང་འབྲངས་པས། ཐལ་མོ་བརྡབས་ནས་ཕན་ཞེས་ལགས་པ་དེང་བྱས་པས། ཏ་ར་ཀླུ་གོང་གིས་ཡར་ཐེན་པ་ལ་མ་ཞང་གིས་འཇུས་པས་རྒོད་སྤུ་སྤར་གང་ཐོབ་ནས་ལུས་སོ། །དེ་ནས་ཀླུ་གོང་གི་སྒོ་བཅད་དེ་མཆད་པ་སྲུང་མི་བཞག་ནས་ཚུར་འོངས་ཏེ། རྒྱ་ཚ་ལྷས་སྣང་བྱང་མི་མེད་ལུང་སྟོང་དུ་གནག་རྟ་འཚོ་བ་ལ་སྙད་བཏགས་ནས་སྤྱུགས། སྦལ་རྒྱལ་ཏོ་རི་འཛུམ་ལྟག་དགྱེད་ཀྱིས་ཤི་བས་ཆོས་ལ་མི་དགའ་བའི་བློན་པོ་གཅིག་ཀྱང་མེད་པའི་ཚེ། སྦ་སངས་(༢༠)ཤི་ལ་གསེར་ཕྱེ་བྲེ་གང་རྫོངས་ནས་པཎྜི་ཏ་གདན་འདྲེན་པར་མངགས་སོ། །

དེ་ནས་འགོས་ཀྱིས་རྒྱལ་པོ་ལ་གསོལ་པ། བོད་ཀྱི་བློན་འཁོར་ནི་ཆོས་ལ་དད་པ་ཉུང་བས་དང་པོ་ནས་གཙུག་ལག་ཁང་བཞེངས་པར་བྱས་ན་མི་དགའ་བས་ཐབས་བྱེད་དགོས་སོ། །ཐམས་ཅད་ཚོགས་པ་ན་སྔོན་གྱི་ཡབ་མེས་རྣམས་ཀྱིས་ཕྱག་རིས་དང་མངའ་ཐང་རྒྱ་ཆེར་མཛད་པའི་རྗེས་སུ་འཇུག་དགོས་པས། ཤངས་རི་མི་འགྱུར་རིན་པོ་ཆེའི་རྩེ་ལ་ཤེལ་གྱི་མཁར་ཐོག་སྟོང་དང་ལྡན་པ་ཤར་ཕྱོགས་སུ་ཞང་པོ་རྒྱ་ཡི་ཡུལ་མཐོང་བ་གཅིག་བརྩིགས་གམ། ཁས་པུ་རི་སངས་ཀྱི་སྦུབས་སུ་འཐུམ་མམ། ཝ་ལུང་གྲོག་པོ་གསེར་ཕྱེས་འགེངས་སམ། ག་ཆུའི་ཐང་ལ་ཁྲོན་པ་འདོམ་དགུ་བརྒྱ་དང་དགུ་བཅུ་རྩ་དགུ་ཡོད་པ་ཞིག་འདྲུའམ། གཙུག་ལག་ཁང་བྲེའི་ཞབས་ཙམ་ཞིག་བཞེང་། གང་བྱེད་དྲིས་ཤིག་ཅེས་ཞུས་ནས། ལོ་གསར་རྒྱལ་གྱི་ཟླ་བ་ལ་ཐམས་ཅད་ཚོགས་པའི་ཚེ་རྒྱལ་པོས་དེ་སྐད་བཀའ་སྩལ་པ་དང་། ཐམས་ཅད་ལན་མ་ཐེབས་པར་ཁ་རོག་ལུས་པ་ལས་འགོས་ཀྱིས་ལངས་ཏེ། རྗེ་གཅིག་ལགས་ཤངས་རིའི་སྟེང་དུ་ཤེལ་གྱི་མཁར་ཞང་པོ་རྒྱ་ཡི་ཡུལ་མཐོང་བ་སུས་ཀྱང་མི་འབྱོངས། འབྱོངས་ཀྱང་དེ་ལ་དགོས་པ་ཆུང་། བོད་ཀྱི་ཕྲུ་བ་དང་གཟར་བུ་ཡན་ཆོད་ཟངས་སུ་སོང་ཀྱང་ཁས་པུ་རི་མི་ཐུམ། ཝ་ལུང་གྲོག་པོ་རྩང་འགྲམ་གྱི་བྱེ་མས་ཀྱང་མི་ཁེངས་ན་གསེར་ཕྱེས་ག་ན་ཁེངས། ག་ཆུའི་ཐང་ལ་ཁྲོན་པ་འདོམ་གང་འདྲུས་པ་དང་ཆུས་ཁེངས་ནས་འདྲུས་མེད་ན་དགུ་བརྒྱ་དང་དགུ་བཅུ་རྩ་དགུ་ཇི་ལྟར་འདྲུ། དེ་བས་ཀྱང་གཙུག་ལག་ཁང་བྲེ་ཞབས་ཙམ་ཞིག་བཞེང་ན་ཚེ་འདི་ཕྱི་གཉིས་ཀར་བདེ་ཞིང་མཐར་ཐུག་སངས་རྒྱས་ཀྱི་གོ་འཕང་ཐོབ་པ་ཞིག་འབྱུང་བས་དེ་མི་འཐད་ལགས་སམ་ཞེས་ཞུས་པས། བོད་འབངས་ཀྱི་བློན་འཁོར་ཐམས་ཅད་དགའ་སྟེ་འཐད་དི་རིང་བྱུང་ངོ་། །དེའི་ཚེ་སངས་ཤིས་བལ་ཡུལ་དུ་ཕྱིན་ཏེ་པཎྜི་ཏ་སུ་མཁས་དྲིས་པས། ཤཱནྟ་རཀྵི་ཏ་མཁས་པར་ཐོས་ནས་བཙལ་བས་བལ་བོ་ལྷ་མངས་ཀྱི་གཙུག་ལག་ཁང་ན་བཞུགས་པའི་དྲུང་དུ་གསེར་ཕྱེ་ཕུལ་ནས་ཞུས་པས། མཁན་པོ་ཞི་བ་འཚོའི་ཞལ་ནས་ངས་ལོ་དགུ་བརྒྱ་སྒུག་པ་ལས་ཁྱེད་ཀྱི་རྒྱལ་པོ་དེ་ད་དུང་མ་བྱུང་། རེ་འཕྱི་རྒྱལ་པོ་བཙས་དུས་ངའི་སོ་མེད་པ་ལས་གཅིག་པོ་འདི་ཕྱིས་སྐྱེས་སོ་ཞེས་གསུངས་ཏེ་བོད་ཡུལ་དུ་བྱོན་ནས་རྗེ་བློན་(༢༡)ཀུན་གྱིས་བསུ་བ་མཛད་དེ་གཙུག་ལག་ཁང་བརྩིག་པའི་བཀའ་བགྲོས་པ་ལས་རྒྱལ་པོའི་ཞལ་ནས་སྔར་གྱི་ཡབ་མེས་ཀྱིས་བཞེངས་པའི་ལྷ་ཁང་ལས་ཆེས་ལྷག་པ་འཛམ་བུའི་གླིང་ན་འགྲན་གྱིས་དོ་ཟླ་དང་བྲལ་བ་ཞིག་བཞེངས་པས་བཀོད་པ་མཛད་པར་ཞུ་གསུངས་པ་དང་། མཁན་པོ་བོ་དྷི་སཏྭའི་ཞལ་ནས་འོ་ན་སྔོན་རྣལ་འབྱོར་པ་ཞིག་གིས་མི་རོ་གསེར་དུ་བསྒྲུབས་པའི་ལྕེ་ལས་མཁའ་སྤྱོད་དུ་འགྲོ་བའི་རྫུ་འཕྲུལ་ཕལ་ཆེར་གྲུབ་ནས། དགེ་ཚུལ་གཅིག་རོའི་ལྕེ་གཅོད་དུ་བཅུག་པའི་རལ་གྲི་བཟུང་བས་སུམ་ཅུ་རྩ་གསུམ་གྱི་ཡུལ་ནས་གླིང་བཞི་རི་རབ་དང་བཅས་པའི་བཀོད་པ་མཐོང་སྟེ། ཕྱིར་ལོག་ནས་རལ་གྲི་རྣལ་འབྱོར་པ་ལ་གཏད་པའི་བརྔན་པར་རོ་ཉིད་ཇི་ལྟར་བཅད་ཀྱང་གསེར་དུ་སོང་བ་ལས་གཞི་བླངས་ནས། རྒྱ་གར་ཤར་ཕྱོགས་ན་ཨོ་ཏ་ན་ཏ་གཙུག་གི་ནོར་བུའི་གཙུག་ལག་ཁང་ཞེས་བྱ་བ་ཡོད་པས་དེ་ལ་དཔེ་བླངས་ཏེ་བཞེངས་པར་བྱའོ་གསུངས་ནས་ས་གཞི་བྱིན་གྱིས་བརླབས་ཏེ་རྒྱལ་པོས་གསེར་གྱི་འཇོར་བསྣམས་ནས་བསྐོས་པས་འབྲས་ཕུལ་བདུན་དང་། རིན་པོ་ཆེ་སྣ་བདུན་གྱིས་སིལ་མ་ཕུལ་གང་བྱུང་དུས་མཁན་པོའི་ཞལ་ནས། སི་ཏི་སི་ཏི། ཕལ་ཕལ་གསུངས་པས་ཅི་གསུང་དྲིས་པ་ན། ལོ་ཙཱ་བ་ན་རེ་འགྲུབ་པོ་འགྲུབ་པོ་བཟང་བཟང་ཞེས་གསུངས་པ་ཡིན་ཟེར་རོ། །དེ་ནས་རྨང་བཏིང་ནས་བརྩིགས་པས་བྲག་དམར་གྱི་ཕུའི་རི་རྔ་མོ་འདྲ་བའི་རྩེ་ལ་བོད་ཀྱི་ལྷ་འདྲེ་ཀུན་ཚོགས་ནས་ལྷ་འདྲེའི་དམག་གིས་ཉིན་བརྩིགས་པ་ཀུན་མཚན་བཤིག་ནས་བརྩིག་ཏུ་མ་སྟེར་རོ། །

དེའི་ཚེ་རྒྱལ་པོ་དང་བློན་པོ་ཆེན་པོ་འགོས་པདྨ་གུང་བཙན་གཉིས་ཀྱིས་པཎྜི་ཏ་ལ་ཞུས་པ། སྔར་མི་རྣམས་ཀྱིས་བར་ཆད་བྱས། ད་ནི་མི་མ་ཡིན་རྣམས་ཀྱིས་བར་ཆད་བྱས་པས་ཇི་ལྟར་བྱས་ཀྱང་དམ་པའི་ཆོས་དར་དུ་མི་སྟེར་བ་ལགས་སམ་ཇི་ལྟར་བགྱི་ཞེས་བརྗོད་དུས་མཁན་པོས་གསུངས་པ། བོད་ཀྱི་ཡུལ་ལྷ་མ་སྲིན་མ་བྱེ་བའི་ས་འདི་གདུལ་ཤིན་ཏུ་དཀའ་ཡང་ཐབས་མཆིས་ཏེ། སྔོན་རྒྱ་གར་གྱི་ཡུལ་མ་ག་ཏའི་གྲོང་ཁྱེར་ན་བྱ་རྫི་མོ་བདེ་མཆོག་ཅེས་བྱ་བ་ལ་བུ་གསུམ་ཡོད་པ་ལས། མ་ཚེའི་དུས་བྱས་པ་ན་བུ་རྣམས་ཀྱིས་དེའི་དགེ་རྩར་མཆོད་རྟེན་བྱ་རུང་ཁ་ཤོར་ཞེས་བྱ་བ་ཤིན་ཏུ་ཆེ་བ་གཅིག་བཞེངས་ནས་ཕུ་བོས་སྨོན་ལམ་བཏབ་པ། མ་འོངས་པའི་ཚེ་མཐའ་འཁོབ་ཆོས་མེད་པ་མུན་པའི་སྨག་རུམ་(༢༢)དང་འདྲ་བར་བདག་གིས་དམ་པའི་ཆོས་དར་ཞིང་རྒྱས་པར་བྱེད་པའི་རྒྱལ་པོར་གྱུར་ཅིག་ཅེས་བརྗོད་པ་དང་། གཉིས་པ་དེས་སྨོན་པ། དེའི་ཚེ་སངས་རྒྱས་ཀྱི་བསྟན་པ་དགོས་པས་རབ་ཏུ་བྱུང་བའི་མཁན་པོར་གྱུར་ཅིག་ཅེས་བརྗོད་པ་དང་། ཐ་ཆུང་དེས་སྨོན་པ། དེའི་ཚེ་ཆོས་ལ་བར་དུ་གཅོད་པ་ཐམས་ཅད་བསྲུང་བའི་སྔགས་མཁན་མཐུ་སྟོབས་དང་ལྡན་པར་གྱུར་ཅིག་ཅེས་བརྗོད་པ་དང་། ས་རྡོ་བསྐྱེལ་བའི་བོང་བུ་དེས་སྨོན་པ། དེའི་ཚེ་ཆོས་ལ་མི་དགའ་བའི་བློན་པོ་དབང་པོ་ཆེ་ཞིག་ཏུ་གྱུར་ཅིག་ཅེས་བརྗོད་པ་དང་། བྲན་གཡོག་གཅིག་གིས་ཐོས་ནས་དེ་ཉིད་ལས་བཟློག་པར་སེམས་བསྐྱེད་དོ། །དེའི་ཚེ་དེའི་དུས་ཀྱི་ཕུ་བོ་ནི་རྒྱལ་པོའོ། །བར་མ་ནི་ཁོ་བོའོ། །གསུམ་པ་ནི་རྒྱ་གར་ཡུལ་ན་རྒྱལ་པོ་དྷརྨཱ་ཕ་ལའི་མཆོད་གནས་སུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཞེས་བྱ་བ་མཁས་ཤིང་གྲུབ་པ་བརྙེས་པ། མཐུ་དང་རྫུ་འཕྲུལ་ཐོགས་པ་མེད་པ་ཞིག་བཞུགས་པ་དེ་ཡིན་ནོ། །བོང་བུ་ནི་མ་ཞང་གྲོམ་པ་སྐྱེས་སོ། །བྲན་གཡོག་ནི་འགོས་པདྨ་གུང་བཙན་ནོ། །དེ་བས་ན་སློབ་དཔོན་ཆེན་པོ་པདྨ་སཾ་བྷ་ཝ་སྤྱན་དྲོངས་ཤིག་གསུངས་སོ། །

དེ་ནས་སྦས་མང་པོ་རྗེ་གསལ་སྣང་དང་། སེང་མགོ་ཀླུ་དཔལ་གཉིས་ལ་གསེར་ཕྱེ་བྲེ་གསུམ་དང་གཡོག་གསུམ་རྫོངས་ཏེ་མི་ལྔ་རྒྱ་གར་དུ་ཆས་པ་སློབ་དཔོན་གྱིས་མཁྱེན་ཏེ། རྒྱ་གར་ཡུལ་ནས་རྫུ་འཕྲུལ་གྱིས་མང་ཡུལ་རྫ་ཡི་ར་བར་གཡའ་རི་གོང་གི་བྲག་ཕུག་ཏུ་བྱོན་ཏེ་ཟླ་བ་གསུམ་དུ་བཞུགས་པའི་འོག་ཏུ་བང་ཆེན་པ་མི་ལྔ་དང་མཇལ་ཏེ་མཁྱེན་བཞིན་དུ་གར་འགྲོ་གསུངས་པས། དེ་རྣམས་ཀྱིས་ངེད་བོད་ཀྱི་རྒྱལ་པོས་སློབ་དཔོན་ཆེན་པོ་པདྨ་གདན་འདྲེན་དུ་གཏོང་བས་རྒྱ་གར་དུ་འགྲོ་ཞེས་ཞུས་པ་དང་། སློབ་དཔོན་ཞབས་ས་ལ་མ་རེག་པར་བཞུགས་ཏེ་དེ་ནི་ང་ཡིན་ཏེ་ཁྱེད་རྣམས་རེ་འཕྱི། ཟླ་བ་གསུམ་དུ་འདིར་བསྡད་པ་ཡིན་གསུངས་པས་ཐམས་ཅད་དད་པ་སྐྱེས་ཏེ་ཐུགས་རྗེ་རེ་ཆེ་ཟེར་ནས་ཕྱག་འཚལ་བསྐོར་བ་བྱས་ནས་གསེར་རྣམས་ཕུལ་བས་ད་དུང་ཕུལ་ཅིག་གསུངས་པའི་ཚེ་རང་རང་གི་གོས་ལྷམ་ཡང་ཕུལ་དུས་ད་དུང་ཕུལ་ཅིག་གསུངས་པས་རང་རང་བརྐྱང་ཕྱག་འཚལ་ཏེ་ལུས་ཕུལ་བས་ཤིན་ཏུ་མཉེས་ཏེ་གསུངས་པ། བོད་ཀྱི་དད་པ་ལ་གཡོ་ཟོག་ཨེ་འདུག་བལྟས་པ་ཡིན་གྱིས་གསེར་གྱིས་ཅི་བྱེད། འདོད་ན་སྣང་སྲིད་ཐམས་ཅད་གསེར་དུ་ཡོད་གསུངས་ནས་ཕུལ་(༢༣)བའི་གསེར་རྣམས་གཏོར་བས། བང་ཆེན་པ་རྣམས་སེམས་ཕོངས་ཅུང་ཟད་སྐྱེས་པ་ལ་ཐུ་བར་བྱེ་མ་བླུགས་ཏེ་དར་ཅིག་ན་གསེར་དུ་སོང་བས་ངོ་མཚར་སྐྱེས་སོ། །དེ་ནས་མང་ཡུལ་གྱི་གཡས་ཀྱི་རི་རྣམས་གཡོན་དུ་སྤོས། གཡོན་གྱི་རི་རྣམས་གཡས་སུ་བཞག་པས་དད་པ་ལྷག་པར་སྐྱེས་ནས་བརྐྱང་ཕྱག་བྱས་ཏེ་གཤེགས་པར་ཞུས་ནས་བྱོན་དུས། ཞང་ཞུང་གི་བརྟན་མ་མུ་ཛ་མེད་ཀྱིས་རི་གཉིས་སུ་བརྫུས་ནས་དེའི་བར་དུ་དཔོན་སློབ་ཀུན་བཙིར་བ་ན། ཁ་ཊྭཱཾ་ཀའི་ཡུ་བས་གཅིག་ཕར་བསྒྱེལ། གཅིག་ཚུར་བསྒྱེལ་ནས་སྡིགས་མཛུབ་མཛད་པས་མོ་དངངས་ཤིང་བྲེད་ནས་སྲོག་སྙིང་ཕུལ་ཏེ་སྲུང་མར་ཁས་བླངས་པས་གསང་མཚན་གངས་ཀྱི་ཡུམ་ཆེན་རྡོ་རྗེ་གཡུ་བུན་མར་བཏགས་སོ། །དེ་ནས་བྱང་གནམ་ཐང་ལ་བྱོན་པས་གནམ་སྨན་དཀར་མོས་ཐོག་ཕབ་པ་སློབ་དཔོན་གྱི་ཕྱག་གི་མཐིལ་དུ་ཆུ་མེ་ལོང་གང་བསྣམས་པར་བབས་པས་ཁྲག་སྲན་མའི་གའུ་ཙམ་བདུན་དུ་སོང་བས་ངོ་མཚར་སྐྱེས་ནས་ཕྱག་འཚལ་ཏེ་དཔལ་མོ་དཔལ་མཚོར་བྲོས་པ་ལས་སློབ་དཔོན་གྱིས་རྡོ་རྗེ་གཅིག་བརྒྱབ་པས་མཚོ་ཁོལ་ཞིང་མིག་ཡ་གཅིག་ཞར་ནས་ཤ་རུས་བྱེ་སྟེ་ཀེང་རུས་ཀྱི་རྣམ་པར་བྱས་ནས་བཟོད་པར་གསོལ་ཏེ་སྲོག་སྙིང་ཕུལ་བས། མིང་ཡང་ཤ་མེད་གངས་དཀར་རྡོ་རྗེ་སྤྱན་གཅིག་མར་བཏགས་སོ། །

དེ་ནས་འོ་ཡུག་ན་མར་བྱོན་དུས་བོད་ཀྱི་བརྟན་མ་བཅུ་གཉིས་ཀྱིས་རི་ཡི་བར་དུ་བཙིར་བའི་རྫུ་འཕྲུལ་བསྟན་པས་ཕྱག་མཁར་གྱིས་སོ་སོར་བོར་ཏེ། གཡའ་རི་གངས་རི་སྨན་རི་ལ་སོགས་པ་བརྟན་མའི་གནས་ཕལ་ཆེར་བཤིག །ཁ་རག་ཚལ་པ་གཉིས་སུ་མཛད་པས་ཤིན་ཏུ་བྲེད་དེ་སྲོག་སྙིང་ཕུལ་ནས་བཀའ་ཡི་སྲུང་མ་དང་བོད་དུ་མུ་སྟེགས་མི་འཇུག་པའི་དམ་ཚིག་ཁས་བླངས་སོ། །དེ་ནས་ལྕེ་ཡུལ་ཤ་བོ་ལུང་དུ་ཆགས་ཕེབས་དུས་ཤམ་པོས་གཡག་ཆེན་པོ་རི་དང་མཉམ་པར་བརྫུས་ནས་བར་ཆད་བརྩམས་པས། སྡིགས་མཛུབ་ཅིག་མཛད་དུས་བྱིས་པ་ཟུར་ཕུད་ལྔ་པ་གཅིག་ཏུ་སོང་ཏེ་སྲོག་སྙིང་ཕུལ་ནས་དམ་ལ་བཏགས་སོ། །དེ་ནས་སྐུ་ལྷ་ཐང་ལྷའི་རྩར་བྱོན་པ་ན་ཐང་ལྷས་གནོད་སྦྱིན་སྟོབས་པོ་ཆེར་སྤྲུལ་ཏེ་ཟ་བྱེད་ཀྱི་མཆེ་བ་གཙིགས་པ་ན་སྡིགས་མཛུབ་མཛད་པ་ཙམ་གྱིས་བྱིས་པ་ལོ་བརྒྱད་པའི་ཚུལ་ཙམ་དུ་སོང་ནས་བཟོད་པར་གསོལ་ཏེ་སྲོག་གི་སྙིང་པོ་ཕུལ་ནས་སློབ་དཔོན་དཔོན་སློབ་ལ་དྲོ་དྲངས་ཏེ། (༢༤)ཁ་ཟས་དང་སྤྱན་གཟིགས་དཔག་ཏུ་མེད་པས་མཆོད་དོ། །དེ་ནས་བྱང་ལམ་ལས་འཕན་ཡུལ་དུ་གཤེགས་པའི་ལམ་དུ་བྱང་གི་ཏིང་ཏིང་ཏིང་ལོ་སྨན་དང་། སྟག་སྨན་གྱི་སྡོང་དང་། བྱང་ཕུག་གནམ་སྨན་གསུམ་གྱིས་བྱང་ཐུན་གསུམ་གྱི་ལྷགས་པ་ཐམས་ཅད་དུས་གཅིག་ཏུ་བསྡུས་ནས་སློབ་དཔོན་འཁོར་དང་བཅས་པ་ལ་བརྒྱབ་པས། ཐམས་ཅད་མེ་ཕུང་གཅིག་ཏུ་སྒོམ་དུས་སྨན་གྱི་གནས་ཐམས་ཅད་ཚིག་ཅིང་བཟོད་པར་གསོལ་ཏེ་གནོད་སྦྱིན་མིང་སྲིང་མ་ལུས་པ་དམ་ལ་བཏགས་སོ། །

དེའི་ཚེ་འཕན་ཡུལ་ལུང་པ་གཟིགས་པས་རྟ་རོ་དམར་པོ་ཁ་ཕྱེ་བ་འདྲ་བའི་ལུང་པ་ལ་མི་འགྲོ་གསུངས་ནས་སྟོད་ལུང་དུ་བྱོན་ཏེ། གྲམ་བུ་ཚལ་དུ་གུང་ཅིག་བཞུགས་ཏེ་བཙན་ཐམས་ཅད་དམ་ལ་བཏགས་ནས་ལམ་བར་བྱོན་དུས་བདུད་ཐམས་ཅད་དམ་ལ་བཏགས་ཤིང་། གཡའ་རི་གོང་དུ་རྒྱལ་པོ་ཐམས་ཅད་དམ་ལ་བཏགས་ནས། གཞོང་བར་ཆགས་ཕེབས་དུས་དྲོལ་བབས་ནས་ཆུ་མེད་པ་ལ་ཁ་ཊྭཱཾ་གའི་ཡུ་བ་ལན་བདུན་ས་ལ་བརྡུངས་པའི་ཤུལ་ནས་ཡར་ལ་ཆུ་ཡན་ལག་བརྒྱད་དང་ལྡན་པ་རྐ་བདུན་བྱུང་བ་ལ་གཞོང་པའི་ལྷ་ཆུ་རྐ་བདུན་ཞེས་གྲགས་སོ། །དེ་ནས་ཟུང་མཁར་ལ་བྱོན་དུས་རྒྱལ་བློན་ཀུན་གྱིས་བསུ་བ་ཆེན་པོ་མཛད་དུས། རྒྱལ་པོའི་ཐུགས་དགོངས་ལ་ང་ཆོས་སྐྱོང་བའི་རྒྱལ་པོ་ཡིན་པས་ཐོག་མར་ང་ལ་ཕྱག་བྱེད་དམ་སྙམ་པ་སློབ་དཔོན་གྱིས་མཁྱེན་ནས་ཆིབས་ལྕགས་བྲག་ཁར་ཚུགས་ཤིག་གསུངས་ཏེ། ཕྱག་ཡ་གཅིག་དེངས་མཛད་པས་བྲག་འབྱུང་པོའི་སྙིང་དང་འདྲ་བ་ཚལ་པ་གསུམ་དུ་གས་ཤིང་། འཇོལ་བེར་གྱི་མཐའ་ཆག་ལ་མེ་རམ་རམ་བྱུང་བས་འཇིགས་ཤིང་ངོ་མཚར་སྐྱེས་ནས་ཕྱག་དབུ་ཐོད་བུད་བུད་བཙལ་བསྐོར་བ་བྱས་ནས་ཕོ་བྲང་དུ་སྤྱན་དྲངས་པས་ཐོག་མར་རི་འདིའི་སྟེང་དུ་འགྲོ་གསུངས་ནས་ཁས་པུ་རིའི་རྩེ་ལ་གཤེགས་ཏེ་རྡོ་ལ་སྦྱིན་སྲེག་མཛད་པས་རང་བཞིན་གྱིས་མེ་འབར་ཏེ་བོད་ཀྱི་ལྷ་འདྲེ་ཐམས་ཅད་དམ་ལ་བཏགས་ནས་ཕོ་བྲང་དུ་སྤྱན་དྲངས་ཏེ་གསེར་གྱི་སེངྒེའི་ཁྲི་སུམ་བརྩེགས་ལ་བཞུགས་དུས། ཞལ་ཟས་དང་འཇིག་རྟེན་གྱི་སྤྱན་གཟིགས་སྣ་ཚོགས་བཤམས། གསེར་གྱི་མཎྜལ་ལ་གཡུ་ཡི་ཚོམ་བུ་བཀྲམ་པ་ཕུལ་ནས་ས་གཞི་འདུལ་བར་ཞུས་པས་སློབ་དཔོན་གྱི་ཞལ་ནས། བོད་ཀྱི་ཡུལ་འདི་ལྷ་མ་སྲིན་སྡེ་བརྒྱད་ཀྱིས་བདག་བྱས་ཤིང་། ཁྱད་པར་ཀླུ་ཡིས་(༢༥)དབང་བྱས་པར་འདུག་པས་ལམ་དུ་ཡང་མང་པོ་བཏུལ་ནས་མཆིས། བྱང་ཤར་གྱི་ཡུལ་ཕ་གི་ན་བོད་ཡུལ་དབུས་ལ་དབང་བྱེད་པའི་ཀླུ་ཞིག་འདུག་པས། དེར་ཀླུ་གཏེར་གཞུག་པར་བྱའོ་གསུངས་ནས་མལ་གྲོར་བྱོན་ཏེ་ཀླུའི་རྒྱལ་པོ་མལ་གྲོ་གཟི་བྱིན་ལས་ས་བསླངས་ཤིང་ཀླུ་གཏེར་རིན་པོ་ཆེ་སྣ་ཚོགས་བཅུག་ནས། མལ་གྲོའི་མདར་བྱོན་དུས་སྐམ་འཕྲང་ན་ཉི་ཚེ་བའི་དམྱལ་བ་མང་པོ་གཟིགས་ནས། དེ་དག་གི་དོན་དུ་ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་ཆོ་ག་དང་། ཡོ་ག་ངན་སོང་སྦྱོང་བའི་ཆོ་ག་མཛད་པས། ཉི་ཚེ་བའི་དམྱལ་བ་རྣམས་སུམ་ཅུ་རྩ་གསུམ་གྱི་ལྷར་སྐྱེས་ནས་མེ་ཏོག་གི་ཆར་བབས་སོ། །དེང་སང་ནི་མལ་གྲོ་སྐམ་འཕྲང་གི་རྡོ་བ་རྣམས་མིག་ཚགས་ལྟར་སྣང་ཞིང་། ས་ཕྱོགས་དེ་ཟབས་རིང་བའི་རྟགས་སུ་སྡིང་སྡིང་ཞེས་གྲགས་སོ། །

དེ་ནས་ཧས་པོ་རིར་བྱོན་ནས་ཀླུ་སྨན་དང་ས་བདག་ལ་ཆུ་གཏོར་བྱིན་ནས་དམ་ལ་བཏགས་དུས། ཁམས་ཀྱི་རྨ་ཆེན་པོར་འོང་དུ་མ་གཏུབ་ནས་ལྕགས་ཀྱུའི་ཕྱག་རྒྱས་བཀུག་པས། རྐང་པ་ཡ་གཅིག་གཡེར་མོ་ཐང་ལ་བཞག །ཡ་གཅིག་ཧས་པོ་རི་ལ་བཞག་ནས་བདག་ནི་བཙན་ཞིང་ཆེ་བ་ཞིག་ལགས་ན་ཅི་བགྱི་ཟེར་དུས། རྒྱལ་པོའི་དགོངས་པ་ཐམས་ཅད་རྫོགས་པར་སྒྲུབས་ཤིག་ཅེས་བཀའ་བསྒོའོ། །དེའི་ཚེ་སྣང་སྲིད་ཀྱི་ལྷ་མ་སྲིན་སྡེ་བརྒྱད་དབང་དུ་བསྡུས་ཤིང་དམ་ལ་བཏགས་ནས་གཙུག་ལག་ཁང་བརྩིགས་པའི་གྲོགས་དང་། ཆོས་དར་བའི་དམ་ཚིག་ཁས་ལེན་དུ་བཅུག་སྟེ། ས་འདུལ་བར་དགོངས་ནས་ཇི་ཙམ་ཞིག་གི་རྒྱ་ཁྱོན་དང་མཉམ་པའི་ལྷ་ཁང་བཞེངས་དྲིས་པས། རྒྱལ་པོ་ཉིད་ཀྱི་མདའ་རྒྱང་དང་མཉམ་པའི་གཙུག་ལག་ཁང་བརྩིགས་པར་དམ་བཅས་པས། བློན་པོ་འཕྲུལ་གྱི་དགོངས་པ་མངའ་བ་རྣམས་ཀྱིས་བགྲོས་པ། རྒྱལ་པོའི་མདའ་རྒྱང་ནི་ཕལ་བའི་རྩལ་པོ་ཆེ་གསུམ་ལས་རིང་བས་དེ་ཙམ་ནི་བཞེང་ཡང་མི་ཟིན། ཟིན་ཀྱང་ཕྱི་རབས་ཀྱི་ཚེ་བསྐྱང་བར་དཀའ་བས། མདའ་བློན་པོའི་མདའ་ལ་མཛད་པར་གསོལ་ནས་འཕེན་དུ་འཇུག་དགོས། བཀའ་སྩལ་པ་ལས་འགལ་ནའང་མི་རུང་ངོ་ཟེར་ནས་རྒྱལ་པོ་ལ་གསོལ་པས་དེ་ལྟར་བགྱིའོ་གསུངས་པའི་ཚེ། མདའི་སྨྱུག་མར་དངུལ་ཆུས་བཀང་ནས་མི་མངོན་པར་བྱས་ཏེ་ཕུལ་བ་ཉིད་འཕངས་པས། སྔོན་ལས་ཕྱེད་ཙམ་གྱིས་རྒྱང་ཐུང་བར་ལུས་པས་འདི་བས་རིང་བར་འགྲོ་སྙམ་ནས་མདའ་ལ་གཟིགས་པས་བློན་པོའི་འཕྲུལ་དུ་ཤེས་ཏེ་བོད་འབངས་ཀྱི་བསོད་ནམས་ལ་དེ་ལས་མ་ཤོང་། རྒྱལ་པོ་སྨྲ་བ་ལན་གཅིག་ཡིན་པས་ས་འདི་ཙམ་ཞིག་ལ་བརྩིགས་པས་འདུལ་བར་ཞུ་གསུངས་སོ། །ད་ལྟ་ནི་ཕལ་པའི་མདའ་རྒྱང་ཕྱེད་དང་གཉིས་ལྕགས་རི་མུ་ཁྱུད་ཀྱི་ཤར་ནུབ་དང་ལྷོ་བྱང་གི་ཚད་དུ་སྣང་ངོ་། །དེ་ནས་སློབ་དཔོན་གྱིས་ཧེ་རུ་ཀའི་གར་དང་རྡོ་རྗེའི་འགྲོས་ཀྱིས་ས་བཏུལ་བའི་ཕྱི་བཞིན་རྨང་བཏིང་བས། ཕྱི་ལྕགས་རི་མུ་ཁྱུད་རྡོ་རྗེའི་འགྲོས་ཟུང་མིག་མངས་རིས་སུ་བྱུང་ངོ་། །དེའི་ཚེ་ལས་དཔོན་ཆེན་པོ་བཞི་པསྐོས་ཏེ་ཕྱོགས་བགོས་ནས་རྒྱ་དཀར་ནག །ཞང་ཞུང་། སུམ་པ། ལྷོ་བལ་གར་ལོག །ལི་མང་ཡུལ་ལ་སོགས་པའི་བཟོ་བོ་མཁས་པ་མང་པོས་ཉིན་པར་བཞེངས་ཤིང་། མཚན་མོ་ལྷ་མ་སྲིན་སྡེ་བརྒྱད་ཀྱིས་ལས་དཔོན་བྱས་ཏེ་མི་མ་ཡིན་པ་རྣམས་ཀྱིས་བཞེངས་པས། ཉིན་བརྩིགས་པ་བས་ནུབ་བརྩིགས་པས་མཐོ་ཞིང་། རི་མོ་དང་། ཤིང་བཟོ་དང་། ལྡེར་ཚོ་ཡང་མཚན་མོས་ལེགས་པ་བྱུང་ངོ་། །

དེ་ལྟར་བཞེངས་པའི་ཚེ་དབུ་རྩེ་ཆེན་པོར་ཤར་ཕྱོགས་མཆོད་རྟེན་སྔོན་པོ་དང་ཤར་གྱི་གླིང་གསུམ་ལྕགས་རི་དང་བཅས་པའི་ལས་དཔོན་ནི་མཆིམས་རྡོ་རྗེ་སྤྲེའུ་ཆུང་གིས་བྱས་ཏེ་ཤར་བྱ་བཀྲས་བརྩིགས་སོ། །རིགས་གསུམ་གྱི་ལྷོ་ངོས་མཆོད་རྟེན་དཀར་པོ་ལྷོའི་གླིང་གསུམ་ལྕགས་རི་དང་བཅས་པའི་ལས་དཔོན་ཤུད་པུ་དཔལ་གྱི་སེངྒེས་བྱས་ནས་ལྷོ་ཤུད་པུས་བརྩིགས་སོ། །དབུ་རྩེ་ནུབ་ངོས་མཆོད་རྟེན་དམར་པོ་ནུབ་ཀྱི་གླིང་གསུམ་ལྕགས་རི་དང་བཅས་པའི་ལས་དཔོན་ཞང་རྒྱ་ཚ་ལྷས་སྣང་བྱང་ནས་བོས་ཏེ་བཅོལ་བས། ནུབ་སྣ་ནམ་པས་བརྩིགས་པས་ཅུང་ཟད་མི་ལེགས་པར་མངོན་པར་དེ་ཡིན་ནོ། །བྱང་ངོས་མཆོད་རྟེན་ནག་པོ་བྱང་གི་གླིང་གསུམ་ལྕགས་རི་དང་བཅས་པའི་ལས་དཔོན་སྦས་མང་པོ་རྗེས་བྱས་ནས་བྱང་སྦས་ནོན་གྱིས་བརྩིགས་སོ། །དེའི་ཚེ་ཉིན་མཚན་དུ་མི་དང་མ་མ་ཡིན་གྱིས་ས་རྡོ་དང་འཇིམ་གཟུགས་བྱེད་པའི་བསྭོ་སྒྲ་དང་འུར་སྒྲ་དཔག་ཏུ་མེད་པ་བྱུང་ངོ་། །དེའི་ཚེ་སློབ་དཔོན་གྱིས་མི་མ་ཡིན་རྣམས་དམ་ལ་འདུས་མ་འདུས་དགོངས་པ་ལ་བཞུགས་ཏེ་གཟིགས་པས་ཀླུ་ཡི་རྒྱལ་པོ་ལས་གཞན་རྣམས་བཀའ་ཉན་ཅིང་འདུས་ལ་ཀླུ་དེའི་ལུས་དམ་ལ་ཐོགས་པས་རྩིགས་གྲོགས་(༢༧)བྱེད། ངག་དམ་ལ་ཐོགས་པས་བཀའ་ཉན་ཟེར་གྱིན་འདུག་ཀྱང་ཡིད་དམ་ལ་མ་ཐོགས་པས་གནོད་སེམས་འཆང་བ་གཟིགས་ནས་མཆིམས་ཕུར་གཤེགས་ཏེ་ཀླུ་གཟིར་བའི་ཆོ་ག་ཞག་བདུན་མཛད་པར་བཞེད་ནས་ཞག་ལྔ་སོང་དུས་ཀླུས་ཤིང་ཐམས་ཅད་མི་སྣང་བར་སྦས་པས་ཤིང་བཟོ་བ་ཀུན་སྟིའུ་ཀླད་ལ་བསྐོར་ཞིང་ཤིང་གན་ཡོད་ཟེར་དུས་རྒྱལ་པོའི་སྤྱན་སྔར་ཁྱེའུ་ལོ་བརྒྱད་ལོན་པའི་ན་ཚོད་ཅིག་བྱུང་ནས། སའི་སྟེང་ན་མིའི་རྒྱལ་པོ་ཁྱེད་ལས་ཆེ་བ་མེད། སའི་འོག་ན་ཀླུའི་རྒྱལ་པོ་ང་ལས་ཆེ་བ་མེད་པས་གྲོགས་པོ་བྱའོ། །ཁྱེད་ཀྱི་གཙུག་ལག་ཁང་གི་ཤིང་ཐམས་ཅད་ངས་ཀླུའི་ཡུལ་ནས་དབུལ་ལོ། །ང་ལ་ཞུ་བ་ཅིག་ཡོད་པས་ཐུགས་ལ་འདོགས་པར་ཞུ་ཟེར་བ་ལ་རབ་ཏུ་དགྱེས་ཆེ་ནས་དེ་བཞིན་བགྱིའོ་གསུངས་པ་དང་། ཀླུའི་རྒྱལ་པོ་མ་ལ་གྲོ་རྒྱུ་དལ་གྱིས་རྒྱ་མཚོའི་གླིང་ལས་ཙནྡན་སྣ་ཚོགས་དང་། གླ་བ་དང་། གསོམ་དང་ཐང་ཤིང་ལ་སོགས་པ་ལ་རྡོ་རྗེའི་འདམ་བྱུགས་ནས་འཇིག་འཁྲུལ་མེད་པར་བྱས་ཏེ། མེ་ཡར་གྱི་མཚོ་ལ་དྲངས་པ་མི་རྣམས་ཀྱིས་བླངས་སོ། །དེ་ནས་ཀླུས་རྒྱལ་པོ་ལ་ད་ངའི་ཞུ་བ་དེ་ཐུགས་ལ་འདོགས་པར་ཞུ་ཞེས་བརྗོད་པས་ཅི་ཡིན་དྲིས་པའི་ལན་དུ། མཆིམས་ཕུ་ན་སློབ་དཔོན་པདྨ་ལ་དགོངས་པ་གློད་པར་ཞུས་ཤིག་ཟེར་རོ། །དེར་རྒྱལ་པོས་སློབ་དཔོན་ལ་ཅིས་ཀྱང་དགོངས་པ་གློད་པར་ཞུས་པས། སློབ་དཔོན་གྱིས་ཞལ་ནས་ཤིང་ལ་མི་ཐེགས་པ་ཡིན་ཏེ་བཀའ་ནན་ཆེ་བས་དེ་ལྟར་བགྱིའོ། །སླད་མའི་ཚེ་བོད་ཀྱི་ཡུལ་དུ་ས་བདག་ཀླུ་གཉན་གྱི་ནད་མི་འབྱུང་བ་ཞིག་བྱ་སྙམ་པ་ཡིན་ཏེ་ཕན་མེད། ཕྱི་མའི་དུས་ན་མཛེ་རིགས་བཅོ་བརྒྱད་དར་བས་སེམས་ཅན་ལ་གནོད་ཅིང་མི་ཡུལ་ཁ་ཅིག་ཆུས་གང་ནས་འཇིག་པ་འོང་གསུངས་སོ། །

དེ་ལྟར་གླང་གི་ལོ་ལ་རྨང་བཏིང་ནས་འབྲུག་གི་ལོ་ལ་འབྱོངས་ཏེ། དབུས་སུ་རི་རྒྱལ་ལྷུན་པོ་ལ་དཔེ་བླངས་ཏེ་དབུ་རྩེ་རིགས་གསུམ་ཡང་ཁང་ལྕོགས་བཞི་དང་། གསེར་གྱི་རི་དང་རོལ་པའི་མཚོས་བསྐོར་བ་ལྟར་འཁོར་ས་རིམ་པ་གསུམ་ལས་ཟུར་དུ་ཡཀྴ་ལྟག་འོག་ཉི་ཟླའི་ལྷ་ཁང་དང་བཅས་པ་བཞེངས། ཤར་གྱི་གླིང་གསུམ་ལྟར་མཁྱེན་རབ་འཇམ་དཔལ་གྱི་གླིང་ལ་རྣམ་དག་ཁྲིམས་ཁང་གླིང་དང་ཚང་མང་ཀེ་འུའི་གླིང་གཉིས་ཀྱིས་བརྟེན་པ། ལྷོའི་གླིང་གསུམ་ལྟར་ཨཱརྱ་པ་ལོའི་གླིང་ལ་བདུད་འདུལ་སྔགས་པའི་གླིང་དང་སྒྲ་བསྒྱུར་རྒྱ་གར་གྱི་གླིང་གིས་བརྟེན་པ། ནུབ་(༢༨)ཀྱི་གླིང་གསུམ་ལྟར་དགའ་ལྡན་བྱམས་པའི་གླིང་ལ་བཻ་རོ་ཙ་ནའི་གླིང་དང་མི་གཡོ་བསམ་གཏན་གླིང་གིས་བརྟེན་པ། བྱང་གི་གླིང་གསུམ་ལྟར་བྱང་ཆུབ་སེམས་བསྐྱེད་ཀྱི་གླིང་ལ་རིན་ཆེན་སྣ་ཚོགས་གླིང་དང་དཀོར་མཛོད་དཔེ་དཀར་གྱི་གླིང་གིས་བརྟེན་པ། ཟུར་བཞིར་འབྱུང་བ་བཞིའི་ཁ་ནོན་ལ་མེ་བཙའ་ཆེན་པོ་བཞིའི་མཆོད་རྟེན་བཞི། ཕྱོགས་མཚམས་བརྒྱད་དུ་ཕྱི་ནང་གི་གནོད་པ་ཞི་བའི་དོན་དུ་གཏེར་ཁ་བརྒྱད་ཀྱི་ཁྲོན་པ་ཙན་དན་གྱི་སྙིང་པོ་ཅན་བརྒྱད། མཐུ་རྩལ་ཀླུའི་གླིང་དུ་གཙུག་ལག་ཁང་ཡུན་རིང་དུ་གནས་པའི་ཕྱིར་ཀླུ་ཆེན་པོ་བརྒྱད་ཀྱི་ཁང་པ་རིན་པོ་ཆེ་སྤྲིན་གྱི་སྙིང་པོ་ཅན། དེ་ཐམས་ཅད་ཀྱི་ལོགས་དང་མཐིལ་རྒྱ་མཚོ་ཆུ་གཉེར་གྱི་ཞལ་བས་བྱུགས་པའི་མཐར་ལྕགས་རི་མུ་ཁྱུད་ལ་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་བྱེ་བས་བརྒྱན་པའི་ཕྱོགས་བཞིར་སྒོ་བཞི་དང་གཡས་གཡོན་དུ་མགོན་ཁང་གཉིས་གཉིས་ཏེ་བརྒྱད་ཀྱིས་མཛེས་པ་ནི་ཉི་འོག་གི་རྒྱལ་ཁམས་ན་འགྲན་ཟླ་དང་བྲལ་བར་གྲུབ་བོ། །དེ་དང་མཉམ་དུ་རྒྱལ་པོའི་བཙུན་མོ་ཚེ་སྤོང་བཟའ་མེ་ཏོག་སྒྲོན་གྱིས་ཁམས་གསུམ་ཟང་ཁང་གླིང་མེ་ཏོག་སྒྲོན་གྱི་ལྷ་ཁང་དང་། ཕོ་གྱོང་བཟའ་རྒྱལ་མོ་བཙུན་གྱིས་དབུ་ཚལ་གསེར་ཁང་གླིང་དགའ་ལྡན་བྱམས་སྒྲོལ་གྱི་ལྷ་ཁང་དང་། འབྲོ་བཟའ་བྱང་ཆུབ་སྨན་གྱིས་དགེ་རྒྱས་བྱེ་མའི་གླིང་དགེ་བ་མཐའ་རྒྱས་ཀྱི་ལྷ་ཁང་སོ་ཕག་ཁྲོ་ཆུས་སྦྱར་བ་ཙནྡན་སྦྲུལ་གྱི་སྙིང་པོའི་ཤིང་གིས་ཐོག་ཕུབ་པ་ན་དེ་བཞིན་གཤེགས་པ་འོད་སྲུངས་ཀྱིས་རབ་ཏུ་གནས་པ་བཞུགས་པའི་སྣང་བ་མཐའ་ཡས་གཙོ་འཁོར་བདུན་གྱི་སྨིན་མཚམས་ན་ནོར་བུ་ཉི་མའི་སྙིང་པོ་ལས་འོད་བྱུང་བས་སྒྲོན་མེའི་བྱ་བ་བྱེད་པ། ཙནྡན་གྱི་ཆུས་གང་བའི་ཁྲོན་པ་ཡོན་ཆབ་ཀྱི་ཚུལ་དུ་ཕུལ་བ་བུ་མོའི་དགེ་བའི་རྩ་བ་ལ་བཞེངས་སུ་གསོལ་ལོ། །དེ་ནས་སློབ་དཔོན་གྱིས་རབ་ཏུ་གནས་པ་མཛད་དུས་གཙུག་ལག་ཁང་རྣམས་ནས་ལྷ་ཐམས་ཅད་ཕྱིར་རང་བྱོན་པ་ལ་ལྷའི་བུ་རྣམས་ཀྱིས་སྤྲིན་གྱི་གསེབ་ནས་མེ་ཏོག་གི་ཆར་འབེབས་པ་ཐམས་ཅད་ཀྱིས་མཐོང་ཞིང་། ཨཱརྱ་པ་ལོའི་གླིང་གི་རྟ་མགྲིན་གྱིས་རྟ་སྐད་ཐེངས་གསུམ་བཏོན་པས་འཛམ་བུའི་གླིང་སུམ་གཉིས་སུ་ཐོས་པ་དང་། འོད་ཟེར་གྱི་དྲྭ་བས་བྲག་དམར་གྱི་ནམ་མཁའ་ཁྱབ་པ་ལ་སོགས་པ་ལྟས་བཟང་པོ་མང་པོ་བོད་འབངས་ཀུན་(༢༩)གྱིས་མཐོང་བ་བྱུང་ངོ་། །རབ་ཏུ་གནས་པའི་ལྟད་མོ་ལོ་བཅུ་གསུམ་དུ་བགྱིས་ཏེ་སྒྱུ་མ་མཁན་གྱི་རོལ་མོ་དང་། ཐག་རྩེད་དང་། ཤིང་རྩེད་དང་། གྲི་རྩེད་དང་། བྲོ་དང་ཤོན་ལ་སོགས་པ་རྣམ་གྲངས་དུ་མ་ཡུལ་ཐ་དད་པ་ནས་ལྷགས་པའི་མི་རྣམས་ཀྱིས་བགྱིས་ཏེ་བདེ་སྐྱིད་ཀྱི་ཉི་མ་ཤར་རོ། །དེ་ནས་གཙུག་ལག་ཁང་གི་སྲུང་མ་བསྐོ་བར་ཞུས་པས། སློབ་དཔོན་གྱི་ཞལ་ནས་ད་སྟེ་དུས་ཀྱི་ཐ་མ་ལ། བོད་ཡུལ་ཐམས་ཅད་ཧོར་གྱིས་འཛིན་པས་ན་དེ་དུས་གཙུག་ལག་ཁང་ལ་མཆོད་པ་དང་བོད་འབངས་ལ་བཀྲ་ཤིས་པར་བྱ་བའི་ཕྱིར་དཔེ་དཀར་རྒྱལ་པོ་བསྐོ་བར་བགྱིའོ་གསུངས་ནས། བོད་ཀྱི་དམག་གིས་བྷ་ཏ་ཧོར་གྱི་སྒོམ་གྲྭ་བཅོམ་སྟེ། འབའ་ཏི་དང་རྔ་བོ་ཆེས་བསུ་བ་བྱས་ནས་དཀོར་མཛོད་དཔེ་དཀར་གླིང་དུ་མངའ་གསོལ། དམ་ལ་བཏགས་ཏེ་ཆོས་འཁོར་མ་བུ་སྟོད་སྨད་ཀྱི་སྲུང་མར་བསྐོས་སོ། །

དེ་ནས་སློབ་དཔོན་ཆེན་པོ་ཕོ་བྲང་གི་རིམ་ཁང་དུ་སྤྱན་དྲངས་ཏེ་འཇིག་རྟེན་གྱི་སྤྱན་གཟིགས་སྣ་ཚོགས་ཀྱིས་མཆོད། དགྱེས་པའི་བཙུན་མོ་ཕུལ་ཏེ་འབྲས་བུ་གསང་སྔགས་ཀྱི་ཆོས་བསྒྱུར་བར་ཞུས་པས་གནང་སྟེ་སྒྲ་བསྒྱུར་རྒྱ་གར་གྱི་གླིང་དུ་ཨུ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་དང་། སྤྲུལ་པའི་ལོ་ཙཱ་བཻ་རོ་ཙ་ན་དང་། གཉགས་ཛྙཱ་ན་ཀུ་མཱ་ར། རྨ་རིན་ཆེན་མཆོག །ཨཱ་ཙརྱ་ཡེ་ཤེས་དབྱངས། ལི་བྱི་ཀྱི་ཆུས་རྣམས་ཀྱིས་བསྒྱུར་ཞིང་། ལྡན་མ་རྩེ་མང་། འགོས་འུམ་གྲུ་བྱིན་པདྨ་རྩེ་མོ་ལ་སོགས་པས་ཡི་གེ་པ་བགྱིས་ཏེ་གཏན་ལ་ཕབ་པ་ལ་ཐོག་མར་ཐུབ་པ་རྒྱུད་ཀྱི་ཐེག་པ་རྣམས་བསྒྱུར་ཏེ། ཀྲཱ྇་ཡ་སྤྱིའི་རྒྱུད་དྲུག་ལ་རིག་སྔགས་ཐམས་ཅད་ཀྱི་ཁོག་དབུབ་པ་དཔུང་པ་བཟང་པོའི་རྒྱུད། རིག་སྔགས་ཐམས་ཅད་ཀྱི་དབང་བསྐུར་བ་ལག་ན་རྡོ་རྗེ་དབང་གི་རྒྱུད། རིག་སྔགས་ཐམས་ཅད་ཀྱི་གསང་བ་རིག་པ་མཆོག་གི་རྒྱུད། རིག་སྔགས་ཐམས་ཅད་ཀྱི་འདུལ་བ་སུ་སིདྡྷི་ཀ་ར་ལེགས་པར་གྲུབ་པའི་རྒྱུད། རིག་སྔགས་ཐམས་ཅད་ཀྱི་ཕྲིན་ལས་ཁམས་གསུམ་རྣམ་པར་རྒྱལ་བའི་རྒྱུད། རིག་སྔགས་ཐམས་ཅད་ཀྱི་དགོངས་པ་བསམ་གཏན་ཕྱི་མའི་རྒྱུད་དོ། །བྱེ་བྲག་གི་རྒྱུད་རིགས་གསུམ་སྤྱི། སྤྱན་རས་གཟིགས་ཀྱི་སྐོར་ལ། པདྨ་རྩེ་མོ་སྔགས་ཀྱི་རྒྱུད། པདྨ་ཅོད་པན་གྱི་རྒྱུད། ཆོ་ག་སྔགས་ཀྱི་རྒྱུད། ཡིད་བཞིན་ནོར་བུའི་རྒྱུད། ཨ་མོ་གྷ་པཱ་ཤའི་རྒྱུད་ལ་སོགས་པ་དང་། འཇམ་དཔལ་གྱི་སྐོར་(༣༠)ལ། འཇམ་དཔལ་ཡེ་ཤེས་སེམས་དཔའ་དྲི་མ་མེད་པའི་རྒྱུད། འཇམ་དཔལ་རྣོན་པོ་སྒྲིབ་པ་མེད་པའི་རྒྱུད། འཇམ་དཔལ་དྲྭ་བ་སྤྱོད་པའི་རྒྱུད། མཚན་ཡང་དག་པར་བརྗོད་པ་གླུའི་རྒྱུད་ལ་སོགས་པ་དང་། ཕྱག་ན་རྡོ་རྗེའི་སྐོར་ལ། ཕྱག་ན་རྡོ་རྗེ་དབང་གི་རྒྱུད། རྡོ་རྗེ་ས་འོག་གི་རྒྱུད། རྡོ་རྗེ་བེ་ཅོན་གྱི་རྒྱུད། རྡོ་རྗེ་རྣོན་པོའི་རྒྱུད་ལ་སོགས་པ་དང་། གཟུངས་གྲྭ་ལྔ་ལ་སོགས་པ་བྱ་བའི་རྒྱུད་ཀྱི་ཁོངས་སུ་གཏོགས་པའི་གཟུངས་ཕྲན་བརྒྱ་དྲུག་ཅུ་བསྒྱུར་ཏོ། །

ཨུ་པ་ཡའི་རྒྱུད་ལ། རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད། མེ་ལོང་འབར་བའི་རྒྱུད། དབང་བསྐུར་བའི་རྒྱུད། རྣམ་པར་མི་རྟོག་པའི་རྒྱུད་ལ་སོགས་པའོ། །ཡོ་གའི་རྒྱུད་ལ། རྡོ་རྗེ་དབྱིངས་རྩ་བའི་རྒྱུད། པ་ཤ་པ་ཀ་ཡ་རྡོ་རྗེ་རྩེ་མོའི་རྒྱུད། པདྨ་ཀ་ར་དཔལ་མཆོག་དང་པོའི་རྒྱུད། ས་མུན་ཛ་རྟོག་པ་བསྡུས་པའི་རྒྱུད་དེ་གཞུང་ཆེན་པོ་བཞི་དང་། ངན་སོང་སྦྱོང་བ་དཀྱིལ་འཁོར་ཆེན་པོ་བཅུ་གཉིས་ཀྱི་རྒྱུད། དཔལ་མཆོག་བསྡུས་པ་དེ་ཁོ་ན་ཉིད་ཀྱི་རྒྱུད་ལ་སོགས་པ་བསྒྱུར་ཏོ། །ནང་པ་སྔགས་ཀྱི་ཐེག་པ་ལ་སྒྲུབ་པ་རྩ་བའི་རྒྱུད་དང་གདམས་པ་མན་ངག་གི་རྒྱུད་ལས། རྩ་བའི་རྒྱུད་ལ་བསྐྱེད་པ་མཧཱ་ཡོ་ག་ཐབས་གཙོ་བོར་སྟོན་པ་གསང་བ་འདུས་པ་ནམ་མཁའ་དང་མཉམ་པའི་རྒྱུད། རི་རབ་ཟོམ་རྒྱ་མཚོ་དང་མཉམ་པའི་རྒྱུད། ཡེ་ཤེས་རྒྱས་པ་ས་གཞི་དང་མཉམ་པའི་རྒྱུད་ལ་སོགས་པའོ། །ལུང་ཨ་ནུ་ཡོ་ག་ཤེས་རབ་གཙོ་བོར་སྟོན་པ་ལ་ཐིག་ལེ་འདུས་པའི་རྒྱུད། སྒྱུ་མ་ཆེན་པོའི་རྒྱུད། ཟླ་གསང་ཐིག་ལེའི་རྒྱུད། རྡོ་རྗེ་གདན་བཞིའི་རྒྱུད་ལ་སོགས་པའོ། །

ཨ་ཏི་ཡོ་གའི་རྒྱུད་ལ་ཀུན་འདུས་རིན་པོ་ཆེའི་མདོ། རྔམ་པ་གློག་གི་འཁོར་ལོའི་མདོ། དུར་ཁྲོད་ཁུ་བྱུག་རོལ་པའི་མདོ། སེམས་ལུང་ཆེན་མོའི་མདོ། དགོངས་པ་འདུས་པའི་མདོ་ལ་སོགས་པའོ། །གདམས་པ་མན་ངག་གི་རྒྱུད་ལ། བསྐྱེད་རྫོགས་ཐུན་མོང་དུ་བསྟན་པ་དང་། རྫོགས་པ་ཆེན་པོ་བྱེ་བྲག་ཏུ་བསྟན་པ་གཉིས་ལས། བསྐྱེད་པ་མཧཱ་ཡོ་ག་ཐབས་ཀྱི་རིམ་པ་དང་། དེ་དང་འབྲེལ་བའི་རྫོགས་རིམ་ལུང་ཨ་ནུ་ཡོ་ག་དྲིལ་ནས་གཅིག་ཏུ་བསྟན་པའི་རྒྱུད་ལ། སྒྲུབ་པའི་བར་ཆད་བསྲུང་བའི་ཕྱིར་གཟི་ལྡན་འབར་བ་མཚམས་ཀྱི་རྒྱུད་དང་། ཕུང་པོ་ལྷར་གསལ་བ་ཞི་བ་ལྷའི་རྒྱུད་དང་། གདུག་པ་ཚར་བཅད་པ་དྲག་པོ་སྔགས་ཀྱི་རྒྱུད་ལ། (༣༡)སྐུའི་རྒྱུད་མེ་ལྟར་འབར་བ། གསུང་གི་རྒྱུད་དབང་ཆེན་འདུས་པ། ཐུགས་ཀྱི་རྒྱུད་པུནྜ་རཱི་ཀ །ཡོན་ཏན་གྱི་རྒྱུད་ལྷ་མོ་གསང་བ། ཕྲིན་ལས་ཀྱི་རྒྱུད་རིག་འཛིན་འདུས་པ། རིགས་སྔགས་སྤྱིའི་སྒྲུབ་པ། ཧེ་རུ་ཀའི་ཏནྟྲ། བྱེ་བྲག་གི་སྒྲུབ་པ་ལ། འཇམ་དཔལ་སྐུའི་རྒྱུད་ཟླ་གསང་ནག་པོ། པདྨ་གསུང་གི་རྒྱུད་རྟ་མཆོག་རོལ་པ། ཡང་དག་ཐུགས་ཀྱི་རྒྱུད་ཧེ་རུ་ཀ་གལ་པོ་ཆེ། ཕུར་པ་ཕྲིན་ལས་ཀྱི་རྒྱུད་བྱི་ཏོ་ཏ་མ་ལ་འབུམ་སྡེ། བདུད་རྩི་ཡོན་ཏན་གྱི་རྒྱུད་བདུད་རྩི་རོལ་པ་ཆེ་ཆུང་། མ་མོ་རྦོད་གཏོང་གི་རྒྱུད་མ་མོ་ཀུན་འདུས་རྣམས་སོ། །སྒྲུབ་པ་སྡེ་དྲུག་ལས་ཁ་ཚར་བསྟན་པའི་རྒྱུད་ལ། ཕྲིན་ལས་ཁ་སྐོང་བ་ཆོས་ཉིད་གཏོར་མའི་རྒྱུད། ལས་རྒྱ་མཚོ་ཇི་ལྟར་བྱས་པ་ཀརྨ་མཱ་ལེ་ཕྲིན་ལས་ཀྱི་རྒྱུད། བསོད་ནམས་དང་ཡེ་ཤེས་ཀྱི་ཚོགས་བསགས་པ་ཚོགས་རྒྱུད་ཆེ་ཆུང་། མཆོད་པ་མི་ཟད་པའི་གཏེར་དུ་བྱིན་གྱིས་བརླབས་པ་ནམ་མཁའ་མཛོད་ཀྱི་རྒྱུད། སྒྲོལ་བ་གནས་སུ་དག་པ་སྟོབས་པོ་ཆེ་ཡོངས་སུ་སྒྲོལ་བའི་རྒྱུད། སྦྱོར་བ་གནས་སུ་དག་པ་ཐིག་ལེ་ཀློང་གི་རྒྱུད། བརྟུལ་ཞུགས་དྲག་པོའི་ཀུན་ཏུ་སྤྱོད་པ་གླང་པོ་ཆེ་རབ་འབོགས་ཀྱི་རྒྱུད། ལས་བཞི་མཐར་ཕྱིན་ཅིང་བཀྲ་ཤིས་པ་ཟ་བྱེད་རོལ་པ་སྦྱིན་སྲེག་གི་རྒྱུད། ལས་ཐམས་ཅད་ཀྱི་སྔོན་དུ་འགྲོ་བ་གཏོར་རྒྱུད་ཆེ་ཆུང་། བཀའི་འཁོར་ལྷག་མས་བསྐངས་ནས་ལས་ལ་བསྐུལ་བ་དཔལ་འབར་ཁྲོ་མོའི་རྒྱུད། གདུག་པ་ཅན་གཟིར་མནན་གྱིས་ཚར་བཅད་པ་ཞིང་བཅུ་རོལ་པའི་རྒྱུད་རྣམས་བསྒྱུར་རོ། །དབང་པོ་ཡང་རབ་ལ་ཤིན་ཏུ་སྤྲོས་པ་དང་བྲལ་བ་རྫོགས་པ་ཆེན་པོ་བྱེ་བྲག་ཏུ་བསྟན་པའི་རྒྱུད་ལ་སེམས་ཉིད་བྱ་རྩོལ་ལས་འདས་པ་ནམ་མཁའ་ཆེ་རྩ་བའི་རྒྱུད། དེ་ཉིད་ཉམས་སུ་བླང་བ་ནམ་མཁའ་ཆེ་ཕྱི་མའི་རྒྱུད། དེ་ཉིད་ཡོངས་སུ་རྫོགས་པའི་འབྲས་བུ་ནམ་མཁའ་ཆེ་ཕྱི་མའི་ཕྱི་མའི་རྒྱུད་ཡོངས་སུ་གྲོལ་བ། སེམས་ཉིད་འཕོ་འགྱུར་མེད་པ་ཆོས་ཉིད་རྒྱལ་པོའི་རྒྱུད། སེམས་ཉིད་ཐིག་ལེ་ཉག་གཅིག་བྱང་ཆུབ་ཀྱི་སེམས་ཐིག་ལེའི་རྒྱུད། སེམས་ཉིད་རང་བྱུང་གི་ཡེ་ཤེས་སུ་བསྟན་པ་ཡེ་ཤེས་ཐིག་ལེའི་རྒྱུད། སེམས་ཉིད་ཐམས་ཅད་ཀྱི་རྩ་བར་བསྟན་པ་མན་ངག་ཕྲེང་བའི་རྒྱུད། སེམས་ཉིད་ཀུན་ཁྱབ་ཆེན་པོར་བསྟན་པ་གསང་བ་རྒྱལ་པོའི་རྒྱུད། སེམས་ཉིད་རང་གི་རིག་པར་བསྟན་པ་ཡེ་ཤེས་ཐིག་ལེའི་རྒྱུད། སེམས་ཉིད་ཀུན་ཏུ་བཟང་པོའི་(༣༢)རོལ་པར་བསྟན་པ་མཁའ་དབྱིངས་རྣམ་དག་གི་རྒྱུད། སེམས་ཉིད་ཀུན་གྱི་སྙིང་པོར་བསྟན་པ་མན་ངག་སྙིང་པོའི་རྒྱུད། སེམས་ཉིད་རང་གི་རིག་པས་ཡིད་ཆེས་པ་སྙིང་པོ་གསང་བའི་རྒྱུད། སེམས་ཉིད་དོན་གྱི་རྩ་བ་ནམ་མཁའ་ཆེ་རྩ་བ་ཅན་གྱི་རྒྱུད། སེམས་ཉིད་གཅིག་ཏུ་འདུས་པ་ཉག་གཅིག་དགོངས་པའི་རྒྱུད། སེམས་ཉིད་ཇི་བཞིན་པར་བཞག་པ་བསམ་གཏན་གཅིག་པུའི་རྒྱུད། སེམས་ཉིད་རྒྱུན་ཆགས་སུ་གོམས་པ་བསམ་གཏན་རྒྱུན་ཆགས་ཀྱི་རྒྱུད། སེམས་ཉིད་ཐམས་ཅད་ལས་གསུངས་པ་སྒོ་མང་མདོའི་རྒྱུད། སེམས་ཉིད་དབང་དང་སྦྱར་བ་ནམ་མཁའ་ཆེ་དབང་གི་རྒྱུད། སེམས་ཉིད་སྒྲ་ཚིག་ལས་འདས་པ་ནམ་མཁའ་ཆེ་ཡི་གེ་མེད་པའི་རྒྱུད། སེམས་ཉིད་གདོད་མའི་གནས་ལུགས་སུ་བསྟན་པ་ནམ་མཁའ་ཆེ་གཞིའི་རྒྱུད། སེམས་ཉིད་འོད་གསལ་བར་བསྟན་པ་རིན་པོ་ཆེ་འབར་བའི་རྒྱུད། སེམས་ཉིད་ཡོན་ཏན་ལྷུན་གྲུབ་ཏུ་བསྟན་པ་རིན་པོ་ཆེ་ཕྲེང་བའི་རྒྱུད། སེམས་ཉིད་ཁམས་གསུམ་དུ་གསལ་བ་ཁམས་གསུམ་སྒྲོན་མེའི་རྒྱུད། སེམས་ཉིད་སྤང་བླང་ལས་འདུས་པ་ངེས་པ་སྙིང་པོའི་རྒྱུད། སེམས་ཉིད་མི་འགྱུར་བ་རྡོ་རྗེ་གསང་བའི་རྒྱུད། སེམས་ཉིད་དུས་ཐམས་ཅད་དུ་སངས་རྒྱས་སུ་བསྟན་པ་ཡེ་ཤེས་རྒྱས་པའི་རྒྱུད་དེ་ཉི་ཤུ་རྩ་ལྔ་དང་། ལུང་བམ་པོ་བཅོ་བརྒྱད་ལ་ཐམས་ཅད་བྱང་ཆུབ་སེམས་ལས་བྱུང་བ་རིག་པའི་ཁུ་བྱུག །རྩོལ་སྒྲུབ་ཐམས་ཅད་ཟིལ་གྱིས་གནོན་པ་རྩལ་ཆེན་སྤྲུགས་པ། སེམས་ཉིད་དབྱིངས་སུ་རྫོགས་པ་ཁྱུང་ཆེན་རྫོགས་པ། ཆོས་ཉིད་ཡེ་གནས་ཀྱི་སྒོམ་པ་རྡོ་ལ་གསེར་ཞུན། སེམས་ཉིད་ལྷུན་གྱིས་གྲུབ་པ་མི་ནུབ་རྒྱལ་མཚན་ནམ་མཁའ་ཆེ། སེམས་ཉིད་ཡེ་ནས་སྟོང་པ་རྨད་བྱུང་རྒྱལ་པོ། སེམས་ཉིད་ཆོས་སྐུར་བསྟན་པ་ཡེ་ཤེས་དམ་པ། སེམས་ཉིད་ཐིག་ལེ་ཉག་གཅིག་ཏུ་བསྟན་པ་ཡང་ཏི་རྒྱལ་པོ། སེམས་ཉིད་སྐྱེ་ཤི་མེད་པ་སྲོག་གི་འཁོར་ལོ། སེམས་ཉིད་འདོད་དགུ་འབྱུང་བ་ཡིད་བཞིན་ནོར་བུ། སེམས་ཉིད་མཉམ་རྫོགས་ཆེན་པོ་ཐིག་ལེ་ཀུན་འདུས། སེམས་ཉིད་ཐེག་པ་ཀུན་རྫོགས་པ་ནམ་མཁའ་ཆེ་རྒྱལ་པོ། སེམས་ཉིད་ཀུན་གྱི་ཡང་རྩེར་བསྟན་པ་རྩེ་མོ་བྱུང་རྒྱལ། སེམས་ཉིད་སྤྲོས་པ་དང་བྲལ་བས་ཡེ་གནས་བདེ་བ་རབ་འབྱམས། སེམས་ཉིད་ཉོན་མོངས་པ་ལས་འདས་ཤིང་(༣༣)ཟག་པ་མེད་པས་བདེ་བ་ཕྲ་བཀོད། སེམས་ཉིད་དུ་འཁོར་འདས་ཐམས་ཅད་རྫོགས་པས་གཏེར་ཆེན་ཡོངས་རྫོགས། སེམས་ཉིད་ཐེག་པ་ཀུན་གྱི་ཆིངས་སུ་བསྟན་པ་རྫོགས་པ་ཆེན་པོ་ལྷུན་རྫོགས་སྤྱི་ཆིངས། སེམས་ཉིད་རྒྱ་ཆད་ཕྱོགས་ལྷུང་དང་བྲལ་བར་བསྟན་པ་ནམ་མཁའ་མཐའ་དབུས་རྣམས་རྒྱ་གར་གྱི་སྐད་ལས་བོད་ཀྱི་སྐད་དུ་བསྒྱུར་ཞིང་བྲིས་ཏེ། བོད་དཔེའི་སྟེང་ནས་རྒྱའི་སྐད་དུ་ཕར་ཞུས་ཤིང་མ་དག་པ་རྣམས་བཅོས་ཏེ། ཡང་རྒྱ་དཔེ་ལ་བསྒྱུར་བ། བོད་དཔེའི་སྟེང་དུ་གཏན་ལ་ཕབ་ནས་ཚིག་དོན་ཕྱིན་ཅི་མ་ལོག་པར་མཛད་དོ། །

དེ་ནས་སློབ་དཔོན་མཆིམས་ཕུར་གཤེགས་ཏེ་བྲེ་གུ་དགེ་འུར་དགོངས་པ་ལ་བཞུགས་དུས་རྗེ་བློན་ཀུན་གྱིས་ཚོགས་ཀྱི་འཁོར་ལོ་བཤམས་ཏེ། རྒྱུད་རྣམས་ལ་ཉམས་སུ་བླང་བདེ་བའི་སྒྲུབ་ཐབས་ཞུས་པས་གནང་སྟེ་མཛད་པ་ལ། གཤིན་རྗེ་རོལ་པ་རྩ་བའི་རྒྱུད་དང་། གཤིན་རྗེ་དམར་ནག་གི་རྒྱུད་ལ་བརྟེན་ནས་འཇམ་དཔལ་སྐུའི་སྒྲུབ་ཐབས་རྣམས་མཛད། རྟ་མཆོག་རོལ་པ་རྩ་བའི་རྒྱུད་དང་པདྨ་དབང་ཆེན་གྱི་རྒྱུད་ལ་བརྟེན་ནས་པདྨ་གསུང་གི་སྒྲུབ་ཐབས་རྣམས་མཛད། ཧེ་རུ་ཀ་གལ་པོའི་རྒྱུད་དང་ཡེ་ཤེས་གསང་བའི་རྒྱུད་ལ་བརྟེན་ནས་ཡང་དག་ཐུགས་ཀྱི་སྒྲུབ་ཐབས་རྣམས་མཛད། ཕུར་པ་རོལ་པ་རྩ་བའི་རྒྱུད་དང་ཀཱི་ལ་ཡ་བཅུ་གཉིས་ཀྱི་རྒྱུད་ལ་བརྟེན་ནས་ཕུར་པ་ཕྲིན་ལས་ཀྱི་སྒྲུབ་ཐབས་རྣམས་མཛད། མ་མོ་རོལ་པ་རྩ་བའི་རྒྱུད་དང་མ་མོ་ཀུན་འདུས་ཀྱི་རྒྱུད་ལ་བརྟེན་ནས་མ་མོ་རྦོད་གཏོང་གི་སྒྲུབ་ཐབས་རྣམས་མཛད། བདུད་རྩི་རོལ་པ་རྩ་བའི་རྒྱུད་ཆེ་ཆུང་ལ་བརྟེན་ནས་བདུད་རྩི་ཡོན་ཏན་གྱི་སྒྲུབ་ཐབས་རྣམས་མཛད། རིག་འཛིན་རོལ་པ་རྩ་བའི་རྒྱུད་ལ་བརྟེན་ནས་རིག་འཛིན་སློབ་དཔོན་གྱི་སྒྲུབ་ཐབས་རྣམས་མཛད། དྲེགས་པ་འདུལ་བྱེད་ཀྱི་རྒྱུད་ལ་བརྟེན་ནས་འཇིག་རྟེན་མཆོད་བསྟོད་ཀྱི་སྒྲུབ་ཐབས་རྣམས་མཛད། དྲག་པོ་སྔགས་ཀྱི་རྒྱུད་ལ་བརྟེན་ནས་དམོད་པ་དྲག་སྔགས་ཀྱི་སྒྲུབ་ཐབས་རྣམས་མཛད། དེ་དག་གི་ནང་ནས་གཤིན་རྗེའི་འཁོར་ལོ་ཤེས་དཀའ་བས་འཁྲུལ་འཁོར་ལྡེ་མིག་གི་ཡི་གེ་བསྡུ་བ་དང་། ཕུར་པ་འགྲུབ་དཀའ་བས་ཀཱི་ལ་ཡ་གཞི་ཡང་སྙིང་གཅིག་ཏུ་དྲིལ་བ་དང་། མ་མོ་གྲུབ་ཀྱང་ལས་འགྱངས་པས་ཤི་ས་བསྟན་པའི་འཁོར་ལོ་དང་། ཕོ་རྒྱུད་འཁུ་ལྡོག་ཆེ་བས་ཆིངས་དང་ལོག་ནོན་གྱི་འཁོར་ལོ་རྣམས་མཛད་དོ། །ཡང་བདེ་གཤེགས་འདུས་(༣༤)པ་རྩ་བའི་རྒྱུད། དེ་ལ་ཕན་པ་ཕྱི་མའི་རྒྱུད། ཕྱི་མའི་ཕྱི་མ་སྔགས་ཀྱི་རྒྱུད། མ་ཚང་བ་ཁ་སྐོང་བའི་རྒྱུད། འབྱེད་པར་བྱེད་པ་ལྡེ་མིག་གི་རྒྱུད་དང་ལྔ་ལ་བརྟེན་ནས་ཞི་བ་རིགས་བརྒྱ་དང་། བཞི་པཅུ་རྩ་གཉིས་དང་། དེ་ཉིད་རིགས་ལྔ་དང་། གསང་ཆེན་རིགས་གཅིག་དང་། འཇིགས་བྱེད་ཆེན་པོ་དང་། རྡོ་རྗེ་འཇིགས་བྱེད་ཀྱི་སྒྲུབ་ཐབས་རྣམས་མཛད་དེ། ཞི་ཁྲོ་ཀུན་འདུས་ཀྱི་དཀྱིལ་འཁོར་ཞལ་ཕྱེ་ནས་རྒྱལ་པོ་ཉིད་དང་། བཻ་རོ་ཙ་ན་དང་། གནུབས་ནམ་མཁའི་སྙིང་པོ་དང་། ངན་ལམ་རྒྱལ་བ་མཆོག་དབྱངས་དང་། གནུབས་སངས་རྒྱས་ཡེ་ཤེས་རིན་པོ་ཆེ་དང་། ཇོ་མོ་ཡེ་ཤེས་མཚོ་རྒྱལ་དང་། འབྲོག་མི་དཔལ་གྱི་ཡེ་ཤེས་དང་། རླངས་དཔལ་གྱི་སེང་གེ་དང་། ཉང་ཏིང་འཛིན་བཟང་པོ་ལ་སོགས་པ་ཉི་ཤུ་རྩ་ལྔ་ལ་དབང་བསྐུར་ནས་སྒྲུབ་ཐབས་སོ་སོའི་ལུང་མཛད་དེ་བསྒྲུབས་པས་རྒྱལ་པོའི་སྐུ་ཚེ་ལོ་བཅུ་གསུམ་གྱིས་ཕྱིར་བསྣུར། བཻ་རོ་ཙ་ན་ལྷག་མེད་དུ་སངས་རྒྱས། ནམ་མཁའི་སྙིང་པོས་ཉི་མ་བརྟོད་ལ་ནོན། སངས་རྒྱས་ཡེ་ཤེས་རིག་འཛིན་གྱི་ས་ཐོབ། རྒྱལ་བ་མཆོག་དབྱངས་རྟ་མགྲིན་གྱི་གྲུབ་པ་ཐོབ། དཔལ་གྱི་ཡེ་ཤེས་ལྷ་སྲིན་བྲན་དུ་འཁོལ་བ་ལ་སོགས་པ་གྲུབ་རྟགས་ཐོན་པ་རེ་བྱུང་བས་མཆིམས་ཕུའི་གྲུབ་ཐོབ་ཉི་ཤུ་རྩ་ལྔར་གྲགས་སོ། །

དེ་ནས་སློབ་དཔོན་གྱིས་ཕྱི་རབས་ཀྱི་འགྲོ་བ་ལ་ཕན་གདགས་པའི་ཕྱིར་རྒྱུད་ལུང་མན་ངག་རྣམས་ཡི་གེ་མཁས་པའི་མཆོག་ལེགས་སྦྱིན་ཉི་མ་དང་། སྐྱེན་པའི་ཕུལ་ཕྱིན་ལྡན་མ་རྩེ་མང་དང་། དག་པའི་རབ་ཨཱ་ཙརྱ་ཡེ་ཤེས་དབྱངས་ལ་སོགས་པས་ཤོག་སེར་དང་ཤོག་སྐྱ་དང་ཤོག་སྔོན་དང་ཤོག་སྨུག་རྣམས་སུ་བཀོད་དེ་སོ་སོར་སྦས་པ་ལ་ཆོས་གཏེར་བརྒྱ་དང་རྩ་བརྒྱད། འཚོ་བྱེད་སྨན་གྱི་གཏེར་དང་། འཕུང་བྱེད་ངན་སྔགས་ཀྱི་གཏེར་དང་། འབྱོར་བྱེད་ནོར་གྱི་གཏེར་ལ་སོགས་པ་གཏེར་ཕྲན་བྱེ་བ་གཅིག་ཡོད་དེ། ལས་ཅན་རེས་ཐོན་པར་སྨོན་ལམ་དང་བཀའ་བསྒོ་མཛད་ནས་བཞག་པ་ནི། མཆིམས་ཕུའི་དགེའུ་ལ་སོགས་པར་ཆོས་ཀྱི་གཏེར་མཛོད་ཆེན་པོ་ལྔ། ཡང་མཛོད་སུམ་ཅུ་རྩ་གཉིས་སྦས། ལྷོ་བྲག་སྐྱེར་ཆུའི་ལྷ་ཁང་དུ་སྡེ་སྣོད་ཀུན་འདུས་ལ་སོགས་པའི་རྒྱུད་བདུན་མན་ངག་དང་བཅས་པ་སྦས། མོན་ཁ་སཻངྒ་རྫོང་དུ་པདྨ་དབང་ཆེན་ལ་སོགས་པ་སྒྲུབ་པ་སྡེ་དྲུག་སྦས། བུམ་ཐང་དགེ་གནས་སུ་མ་མོ་ཀུན་(༣༥)འདུས་ལ་སོགས་པ་དྲེགས་པ་མོ་རྒྱུད་རྣམས་སྦས། བུམ་ཐང་རྩི་ལུང་དུ་སེམས་ཕྱོགས་རྒྱུད་ལུང་རྣམས་སྦས། གཙང་འགྲམ་ལྷ་ཁང་དང་། པྲ་དུན་རྩེ་དང་སྐྱོ་དུན་རྩེར་དབང་ཕྱུག་ཆེན་པོའི་སྒྲུབ་ཐབས་དང་ངན་སྔགས་བརྒྱ་རྩ་བརྒྱད་སྦས། ཉང་རོ་རྩིས་ཀྱི་ལྷ་ཁང་དུ་སྨན་དང་རིན་པོ་ཆེ་ལ་སོགས་པ་སྦས། ཁམས་ཀྱི་ཀློང་ཐང་སྒྲོལ་མར་ལྷ་མོའི་རྒྱུད་བཅུ་གསུམ་སྤུ་གྲི་མཆེད་གསུམ་དང་བཅས་པ་སྦས། ཤར་ཀོང་པོ་བུ་ཆུ་མཐར་ལེགས་ཀྱི་ལྷ་ཁང་དུ་མཐུ་དང་རྫུ་འཕྲུལ་མང་པོ་སྦས། བུ་ཆུ་རྫོང་ཁར་ཕྱི་ནང་གི་སྒྲུབ་ཐབས་རིན་ཆེན་བཟོའི་སྐོར་རྣམས་སྦས། གཡུ་རུ་ཁྲ་འབྲུག་ཏུ་དྲག་སྔགས་བཅུ་གསུམ་སྦས། ལྷོ་བྲག་མཁོ་མཐིང་དུ་བདེ་གཤེགས་འདུས་པ་རྒྱུད་ལུང་མན་ངག་དང་བཅས་པ་སྦས། སྤ་གྲོ་སྟག་ཚང་སེངྒེ་ཕུག་ཏུ་ཚེ་གཅིག་གིས་སངས་རྒྱས་པའི་ཆོས་མང་པོ་སྦས། མོན་ཁ་ནེ་རིང་དུ་སྤྱི་ཏི་ཡོ་ག་དང་རེག་ཆོད་བཞི་སྦས། སྒྲགས་ཡང་རྫོང་ཤེལ་གྱི་ཕུག་པར་ཕུར་པ་དང་གཤིན་རྗེ་རྣམས་སྦས། སྤ་གྲོ་ཕུག་རྫོང་དང་སེངྒེ་ཕུག་ཏུ་ངན་སྔགས་ཟབ་དགུ་རྣམས་སྦས། ཕོ་མོའི་རྫོང་དུ་བསེ་ཡི་ལྷ་མོའི་སྒྲུབ་ཐབས་རྣམས་སྦས། ལ་ལ་ཕུག་མོ་ཆེར་ཐུགས་རྗེ་ཆེན་པོ་འཁོར་བ་དོང་སྤྲུགས་དང་ཡིད་བཞིན་ནོར་བུ་སྦས། ལྷ་རིང་བྲག་དང་ཟངས་ཡག་བྲག་ལ་ཆོས་དང་ནོར་དང་སྨན་ལ་སོགས་པའི་གཏེར་ཁ་བརྒྱ་རྩ་བརྒྱད་སྦས། བྲག་དམར་ནམ་མཁའི་རྫོང་ལ་བོད་དུ་འགྱུར་ཚད་ཀྱི་ཕྱི་མོ་དང་སྒྲུབ་ཐབས་རྣམས་སྦས། བསམ་ཡས་ལྷུན་གྱིས་གྲུབ་པའི་གཙུག་ལག་ཁང་གླིང་ཕྲན་མཆོད་རྟེན་དང་བཅས་པར་ཆོས་དང་སྨན་དང་དྲག་སྔགས་དང་ནོར་བུ་ལ་སོགས་པ་བརྒྱ་རྩ་བརྒྱད་སྦས། གཞན་ཡང་བྲག་རི་གཡའ་རི་རྫ་རི་ལ་སོགས་པར་རྫུ་འཕྲུལ་གྱིས་བྱོན་ནས་ཆོས་དང་ནོར་དང་སྨན་ལ་སོགས་པ་ཕྱི་རབས་ཀྱི་འགྲོ་བ་རྣམས་ལ་གང་ལ་གང་ཕན་གྱི་ཚུལ་གྱིས་གཏེར་ཁ་དཔག་ཏུ་མེད་པ་སྦས་སོ། །

གཏེར་འབྱུང་བའི་དུས་ནི། ཟས་ངན་ལྕི་བ་ཟ། གོས་ངན་རེ་བ་གོན། གཏམ་ངན་ཁྲེལ་མེད་སྨྲ། བཀའ་ལ་ཉོ་ཚོང་བྱེད། ཆོས་འཁོར་འཐབ་ར་བྱེད། སྔགས་པ་མཐུ་རྒྱས་བྱེད། ལས་སུ་སྡིག་པ་སྤྱོད། བཙུན་པས་ཁྲིམས་མི་ཐུབ། བུད་མེད་ཀྱིས་ལུས་མི་ཐུབ། སྔགས་པས་དམ་ཚིག་མི་ཐུབ། སད་སེར་དང་ལོ་ཉེས་འོང་། ནད་དང་མུ་གེས་ཉེན་པའི་ཚེ། ཐམས་ཅད་ཀྱི་སྙིང་དུ་རྒྱལ་བསེན་(༣༦)ཞུགས་ཏེ་ཆོས་མ་ཡིན་པ་སྣ་ཚོགས་སུ་སྤྱོད་པ་ན་སས་གཏེར་མི་ཐུབ་སྟེ་གསེར་དངུལ་རིན་པོ་ཆེའི་གཏེར་རྣམས་རང་བརྡོལ། ཆོས་ཀྱི་གཏེར་རྣམས་མཁའ་འགྲོ་དང་གཏེར་བདག་གིས་ལུང་བསྟན་ཏེ་སྐལ་ལྡན་རེས་བཏོན་ནས་མི་ཡུལ་དུ་དར་ཞིང་རྒྱས་པར་འགྱུར་རོ། །དེ་དུས་པདྨ་ངའི་གཏེར་ཆོས་ལ་སྤྱོད་པ་ཐམས་ཅད་བདེ་བ་ཅན་གྱི་ཞིང་དུ་སྐྱེས་ནས་མངོན་པར་རྫོགས་པར་སངས་རྒྱའོ་ཞེས་གསུངས་སོ། །

དེ་ལྟར་མི་རྣམས་ཀྱི་དོན་མཛད་དུས་བོད་དང་ལྷོ་མོན་ལ་སོགས་པའི་མི་མ་ཡིན་རྣམས་ཀྱིས་བདག་ཅག་རྣམས་ལ་ཡང་དབང་བསྐུར་བྱིན་གྱིས་བརླབ་ཏུ་གསོལ་ཞེས་ཞུས་པས་གནང་སྟེ་མི་མ་ཡིན་པ་རྣམས་ཀྱིས་སོ་སོའི་གནས་སུ་སྤྱན་དྲངས་ཤིང་མཆོད་ནས་དབང་བསྐུར་ཞིང་བྱིན་གྱིས་བརླབས་པའི་གནས་ལ་མོན་པ་མིང་སྲིང་བདུན་གྱིས་ཐོག་དྲངས་ལྷོ་མོན་གྱི་མི་མ་ཡིན་གྱིས་སྤྱན་དྲངས་ཤིང་བཞུགས་པའི་གནས་མོན་བུམ་ཐང་སེངྒེ་རྫོང་དང་། མོན་ཁ་རིན་ཆེན་རྫོང་དང་། སྤ་གྲོ་སེངྒེ་ཕུག་དང་། ལྷོ་བྲག་མཁར་ཆུ་ལ་སོགས་པའི་བྲག་ཕུག་དང་ནགས་རོང་རྣམས་སོ། །བསྟན་མ་བཅུ་གཉིས་ཀྱིས་གདན་དྲངས་ཤིང་བཞུགས་པ་ལ་ཁ་རག་རིན་ཆེན་ཕུག་དང་། ཇོ་མོ་ནགས་རྒྱལ་དང་། ཤངས་ཀྱི་ཟམ་བུ་ལུང་ལ་སོགས་པའོ། །མ་མོ་དང་ཕྲ་མེན་མ་རྣམས་ཀྱིས་སྤྱན་དྲངས་པ་ལ་ཏེ་སྒྲོ་བྲག་དཀར་དང་། རྔམ་པ་སྒྲ་སྒྲོགས་དང་། ལྷ་རི་ཟིལ་པ་དང་། བུ་ཆུ་རྫོང་ཁ་དང་། ཙཱ་རི་ཙཱ་གོང་དང་། གསལ་རྗེ་གངས་བཟང་ལ་སོགས་པའོ། །གཞན་ཡང་གནམ་སྨན་དང་མཚོ་སྨན་དང་གཟའ་བཙན་ལ་སོགས་པས་སྤྱན་དྲངས་ཏེ་ལོ་དང་ཟླ་བ་དང་ཞག་དང་དྲོ་སྐད་རེ་བཞུགས་པ་ལ་བསམ་གྱིས་མི་ཁྱབ་བོ། །དེའི་ཚེ་ལྕོག་འབྲི་མཚམས་ན་མང་རྗེ་ཐོད་དཀར་ལེགས་དང་། རུ་གཟའ་རྒྱལ་མོ་མཚོ་འདུས་ཏེ་ཁྱིམ་འཛིན་པ་ལས་རྒྱལ་མོ་མཚོའི་རྨི་ལམ་ན་ནམ་མཁའི་དཀྱིལ་ན་བུད་མེད་སྔོན་མོ་གཅིག་གིས་འོད་ཀྱི་སྐར་མ་གཅིག་འཕངས་པ་ཁོང་པའི་ནང་དུ་སོང་བ་རྨིས་ནས་ཟླ་བ་དགུ་ངོ་དང་བཅུ་ནས་བུ་མོ་ཤིན་ཏུ་མཛེས་པ་དཔྲལ་བ་ན་རྡོ་རྗེ་རྒྱ་གྲམ་གྱི་རི་མོ་ཅན་ཨུད་པ་ལའི་དྲི་ངད་དང་ལྡན་པ་གཅིག་བཙས་ཏེ་མཚོ་རྒྱལ་དུ་བཏགས་ནས་ཆེར་སྐྱེས་པ་ལས་རྒྱལ་པོའི་བཙུན་མོར་བླངས་པ་ན་སློབ་དཔོན་ལ་ཤིན་ཏུ་དད་ཅིང་འཁོར་བའི་ཆོས་ལ་སྐྱོ་ནས་རྒྱལ་པོ་ལ་ཆོས་བྱེད་པར་ཞུས་པས་(༣༧)གནང་སྟེ་སློབ་དཔོན་ལ་ཕུལ་ལོ། །

དེ་ནས་སློབ་དཔོན་གྱིས་ལས་རྒྱ་བགྱིས་ཏེ་གང་དུ་གཤེགས་པ་ཐམས་ཅད་དུ་བྱོན་ནས་བསྙེན་བཀུར་དང་། ཞབས་ཏོག་མཛད་ཅིང་སྒྲུབ་པ་རྩེ་གཅིག་ཏུ་བྱས་པས་གྲུབ་པ་ཐོབ་སྟེ་མཆོག་དང་ཐུན་མོང་གི་དངོས་གྲུབ་བརྙེས་སོ། །དེ་ནས་སློབ་དཔོན་ཡབ་ཡུམ་གཞོ་སྟོད་ཏེ་སྒྲོ་བྲག་ཏུ་སྒྲུབ་པ་མཛད་པའི་ཚེ། ཡེ་ཤེས་ཀྱི་མཁའ་འགྲོ་རྣམས་ཀྱིས་ཇོ་མོ་ལ་བསྐུལ་བ། སློབ་དཔོན་ཆེན་པོ་སྤྲུལ་པའི་སྐུའི་ཐུགས་ལ་ཚེ་འདི་ཉིད་ལ་རྡོས་བཅས་ཀྱི་ཕུང་པོ་མི་སྣང་བར་ལོ་གསུམ་གྱིས་འཚང་རྒྱ་བའི་གདམས་པ་མངོན་སུམ་སྙིང་ཏིག་གི་མན་ངག་ཟབ་མོ་བཞུགས་པས་གསོལ་བ་ཐོབ་ཅིག་ཅེས་ལུང་བསྟན་ཏོ། །དེའི་ཚེ་ཚོགས་ཀྱི་འཁོར་ལོ་རྒྱ་ཆེན་པོས་མཆོད་དེ་ཞུས་པ། སློབ་དཔོན་ཆེན་པོ་ལགས་ཚེ་འདི་ཉིད་ལ་ཕུང་པོ་མི་སྣང་བར་འཚང་རྒྱ་བའི་གདམས་པ་མངོན་སུམ་སྙིང་ཏིག་གི་མན་ངག་དམ་པ་གནང་བར་ཞུ་འཚལ་ཞེས་གསོལ་བ་བཏབ་སྟེ་ཕྱག་དང་བསྐོར་བ་གྲངས་མེད་པ་མཛད་དུས་སློབ་དཔོན་ཆེན་པོས་གསུངས་པ་མཚོ་རྒྱལ་ཁྱོད་ཀྱིས་ཞུས་པ་དེ་ཤིན་ཏུ་ལེགས། སྔར་དང་མི་འདྲ་བའི་གདམས་པ་ཐེག་པ་རིམ་དགུ་ཀུན་ལས་འདས་པའི་རྩེ་མོ། གནད་མཐོང་བས་བློས་བྱས་ཀྱི་ལྟ་སྒོམ་འཇིག་པ། འབད་མི་དགོས་པར་ས་ལམ་རྫོགས་པ། བཅོས་བསྒྱུར་དང་གཉེན་པོ་མི་དགོས་པར་ཉོན་མོངས་པ་རང་སར་གྲོལ་བ། རྒྱུས་མ་བསྐྱེད་པར་འབྲས་བུ་རང་ལ་རྫོགས་པ། ལྷུན་གྱིས་གྲུབ་པའི་དགོངས་པ་སྐད་ཅིག་ལ་འཆར་བ། རྡོས་བཅས་ཤ་ཁྲག་གི་ཕུང་པོ་ཚེ་འདི་ཉིད་ལ་འོད་གསལ་ལོངས་སྤྱོད་རྫོགས་པའི་སྐུར་གྲོལ་བ། འོག་མིན་གྱི་གནས་སུ་ལོ་གསུམ་གྱིས་བགྲོད་ནས་ཆོས་སྐུ་ལྷུན་གྲུབ་རིན་པོ་ཆེའི་ཞིང་དུ་གཏན་སྲིད་ཟིན་པར་བྱེད་པའི་གདམས་པ་ཡོད་ཀྱིས་བསྟན་པར་བྱའོ་གསུངས་ནས་ཚོགས་ཁང་ཆེན་མོར་ཞི་ཁྲོ་དོན་གྱི་དཀྱིལ་འཁོར་ཞལ་ཕྱེ་ནས་ཇོ་མོ་མཁར་ཆེན་བཟས་ཐོག་དྲངས་ཡེ་ཤེས་ཀྱི་མཁའ་འགྲོ་འབུམ་ཕྲག་གཅིག་ལ་དབང་བསྐུར་ནས་ཁྲིད་རྫོགས་པར་མཛད་ནས་རྒྱུད་བཅུ་བདུན་ཀློང་གསལ་ཉི་མའི་རྒྱུད་དང་བཅོ་བརྒྱད། དེའི་མན་ངག་རབ་ཏུ་མང་པོ་དང་བཅས་པ་རྣམས་གསུངས་སོ། །དེ་ནས་དེ་རྣམས་ལས་རྒྱུད་རབ་ཏུ་རྒྱས་པའི་མན་ངག་རྣམས་གཅིག་ཏུ་ཕྱེ། སློབ་དཔོན་ཉིད་ཀྱིས་མཛད་པ་ཀུ་སུ་ལུའི་སྐོར་རྣམས་གཅིག་ཏུ་ཕྱེས་ཏེ་སོ་སོར་སློབ་(༣༨)དཔོན་དང་མཚོ་རྒྱལ་གཉིས་ཀྱིས་ཡི་གེར་བྲིས་ཏེ་དཀར་ཆག་ལ་མནན་ནོ། །

དེའི་ཚེ་རྒྱལ་པོས་སྤྱན་དྲངས་ནས་སློབ་དཔོན་དང་རྒྱལ་པོ་ཡབ་ཡུམ་སྲས་རྣམས་མཆིམས་ཕུར་གཤེགས་ཏེ་ཚོགས་ཀྱི་འཁོར་ལོ་བརྒྱ་རྩ་བརྒྱད་མཛད་པའི་དུས་སུ་བཙུན་མོ་དམ་པ་འབྲོ་བཟའ་བྱང་ཆུབ་སྨན་ལས་འཁྲུངས་པའི་སྲས་མོ་ལྷ་གཅིག་པདྨ་གསལ་ཞེས་བྱ་བ་དགུང་ལོ་བརྒྱད་ལོན་པ་ཞིག་ཤི་བས་ལྷ་སྲས་བུ་མོའི་རོ་ལ་གཟིགས་ཤིང་བཤུམས་ཏེ་དོག་ས་ལ་འགྱེལ་བ་དང་། མཚོ་རྒྱལ་གྱིས་དར་དཀར་གྱི་སླེའུས་བསླངས་ཏེ་ཙན་དན་གྱི་ཆུས་གཏོར་བ་དང་བརྒྱལ་སངས་ཏེ་སློབ་དཔོན་གྱིས་བཀའ་སྩལ་པ། ཀྱེ་མངའ་བདག་རྗེ་སྤྱིར་འཇིག་རྟེན་གྱི་བྱ་བ་རྨི་ལམ་དང་འདྲ། འདུས་བྱས་ཀྱི་མཚན་ཉིད་སྒྱུ་མ་ཡིན། རྒྱལ་སྲིད་མདང་གི་རྨི་ལམ་འདྲ། །ནོར་འབངས་རྩྭ་ཁའི་ཟིལ་པ་འདྲ། །ཚེ་མི་རྟག་ཆུ་ཡི་ལྦུ་བ་འདྲ། །འདུས་བྱས་ཐམས་ཅད་འཇིག་པ་ཡིན། །འདུས་པའི་ཐ་མ་འབྲལ་བས་ན། །འདུས་བྱས་ཐམས་ཅད་འདི་དང་འདྲ། །རྟག་ཅིང་བརྟན་པ་གཅིག་ཀྱང་མེད། །མི་རྟག་རྟག་པར་མ་འཛིན་པར། །སྐྱེ་མེད་ཆོས་སྐུའི་དོན་ལ་སྦྱོངས། །ཞེས་གསུངས་སོ། །དེར་རྒྱལ་པོ་བཞེངས་ཏེ་ཕྱག་དབུ་ཐོད་བུད་བུད་བཙལ་ནས་གསེར་སྐྱོགས་གཡུས་བཀང་བ་སློབ་དཔོན་ལ་ཕུལ་ཏེ་ཞུས་པ། ཀྱེ་སློབ་དཔོན་ཆེན་པོ་ལགས། འདུས་བྱས་ཀྱི་མཚན་ཉིད་མི་རྟག་ན་ངའི་གཙུག་ལག་ཁང་འདི་ཇི་ཙམ་ན་འཇིག །སངས་རྒྱས་ཀྱི་བསྟན་པ་ནམ་འཇིག །དམ་ཆོས་གང་གི་ནུབ་པའི་རྐྱེན་བྱེད། བུ་མོ་འདི་ཚེའི་དུས་བྱེད་པའི་རྒྱུ་རྐྱེན་ཅི་ལགས། འདིར་ལས་ཀྱིས་འབྲེལ་པ་ཅི་ལས་བྱུང་། ཕྱི་མ་སྐྱེ་བ་གང་དུ་ལེན། མཐར་བྱང་ཆུབ་པའི་སྐལ་བ་མཆིས་སམ་ཞེས་ཞུས་པས་སློབ་དཔོན་གྱིས་བཀའ་སྩལ་པ།

ཀྱེ་རྒྱལ་པོ་གསོན་ཅིག །རྒྱལ་པོའི་གཙུག་ལག་ཁང་འདི་ལ་ཞིག་རལ་མང་དུ་འབྱུང་ངོ་། །དྲུག་ཅུ་རྩ་གཅིག་གླང་གི་ལོར། །རྒྱལ་པོ་མི་རྟག་མྱ་ངན་འདའ། །རྒྱལ་ཁྲིམས་ཧོར་གྱིས་དམག་གིས་འཇིག །ཐ་མ་དུ་རུ་ཀ་ཡིས་འཛིན། །སངས་རྒྱས་ཀྱི་བསྟན་པ་ཡུན་རིང་དུ་གནས་ཏེ་དར་གུད་མང་དུ་འབྱུང་ངོ་། །དེའང་རྒྱལ་པོ་ཉིད་ནས་གདུང་རབས་ལྔ་ན་སངས་རྒྱས་ཀྱི་བསྟན་པ་ཉམས་དམའ་བར་འགྱུར་རོ། །དེ་ནས་བོད་ཡུལ་མངའ་ཐང་ཉམས་ཏེ་བཙུན་པས་འདུལ་ཁྲིམས་མི་ཐུབ། སྔགས་པས་དམ་ཚིག་མི་ཐུབ། སྡེ་འཁྲུགས་(༣༩)དང་ནང་དམེ་བྱེད། སྐྱེ་བོས་མནའ་ཟ་ཁྲེལ་མེད་ཕ་མ་གསོད། བུད་མེད་ཀྱིས་ལུས་མི་ཐུབ་ལན་ཆགས་བྱིས་པ་གསོད། ཆོས་པ་རྣམས་ཀྱང་ཆོས་གཞུང་བཞིན་མི་བྱེད། བཀའ་ལ་རས་ཆོས་བྱེད་ཅིང་མཆན་ཏིག་ལ་སོགས་པས་བཀའ་འཆལ་དུ་འཇུག །སློབ་དཔོན་སྨོད་ཅིང་རང་གི་ཆེ་བ་འདོན། །དམ་ཚིག་ཆུ་ལ་ཕོ་ནས་དངོས་གྲུབ་སྤྲིན་བཞིན་དེངས། །ཆོས་ལ་ལྟོ་ཟོང་བྱས་ནས་ནོར་དང་ཡིག་སྣ་གསོག །འདུལ་ཁྲིམས་མེ་ལ་བསྲེགས་ནས་སེམས་བསྐྱེད་རླུང་ལ་བསྐུར། །མི་ཚེ་ཆོས་ལ་བསླབས་ནས་ལམ་དུ་ང་རྒྱལ་འཁྱེར། །རྟག་ཏུ་བསྒོམས་བསྒྲུབས་བྱས་ནས་སེམས་ཉིད་དོན་མ་མཐོང་། །ལྟ་བར་ཆད་ལྟ་བཟུང་ནས་དགེ་སྡིག་འཆོལ་བར་སྤྱོད། །ཏིང་འཛིན་ཕྲག་དོག་བསྒོམས་ནས་འབད་པ་ནོར་ལ་བྱེད། །ཆོས་ལོག་དང་གསར་ངེས་ལ་དགའ། བཙུན་པའི་ལུས་སྲུང་མཚོན་ལ་བྱེད། གྲུབ་ཐོབ་ཚོང་འདུས་འགྲིམ། སྒོམ་མེད་རི་འཁྲུགས་བྱེད། མི་དཔོན་སྤྲང་པོས་བྱེད། དགེ་བཤེས་དབུ་གཙོ་བྱེད། སྨྱོན་པས་བསོད་ནམས་སྡུད། ལྷ་རུ་འདྲེ་སྲིན་དང་འགོང་པོ་མཆོད། གཙོ་བོར་མོ་དང་བོན་ལ་འདུན་མ་གཏད། བྱང་ཆུབ་སེམས་དཔའི་ཐུགས་དཀྲུགས་ཤིང་དཀོན་མཆོག་དགྲར་ལེན། ནོར་དུམ་རེ་ལ་མནའ་ཟ། སྡིག་པ་ལ་སུས་ཐོབ་བྱེད། རྗེ་ལ་འབངས་མི་ཉན། དཔོན་ལ་གཡོག་མི་ཉན། ཕ་ལ་བུ་མི་ཉན། མ་ལ་བུ་མོ་མི་ཉན། བློ་བརྐུ་དང་ནང་ངན་གཤོམ། མཐུ་སེར་དང་དུག་སྦྱོར་དར། རྒྱལ་རིགས་དམངས་སུ་འབེབས། མགོ་མཐོ་ཐབས་ཀྱིས་སྨོད། བརྐུ་གསོད་དང་བརྡེག་འཕྲོག་བྱེད། ལོག་འཚོ་སྣ་ཚོགས་དར། རིགས་ངན་གྱིས་ཁ་དྲག་རློམ། ཆང་ཕོར་རེ་ལ་བལྟས་ནས་གསང་སྔགས་ཁྲོམ་དུ་ཀློག །གསེར་ཡ་མ་བརླ་རེ་ལ་བལྟས་ནས་འགྲོན་པོ་ལ་ཡང་དབང་བསྐུར། ནོར་ལ་ལྟས་ནས་ལུང་མེད་ཀྱི་རྫུན་དབང་བྱེད། ལྟ་བ་ཉམས་གཏོང་། བུད་མེད་ཀྱིས་སྐྱེས་པ་འདེད། ཕས་བུ་ལ་ཡང་བློས་མི་ཁེལ་བའི་དུས་ཤིག་འབྱུང་། དེའི་དུས་སུ་བདུད་ཀྱིས་ཆོས་པའི་ལུས་བླངས་ནས་ཆོས་ལོག་དང་སློབ་འབངས་རྒྱས་པར་འགྱུར་རོ། །དེའི་དུས་སུ་ཧོར་དམག་བོད་དུ་འབྱུང་ངོ་། །དེའི་ཚེ་སད་སེར་དང་མུ་གེ་དང་ནད་དང་མཚོན་དང་ས་གཡོ་བ་དང་མི་བདེ་བ་སྣ་ཚོགས་འབྱུང་ཞིང་། མི་རྣམས་ཕལ་ཆེར་བདུད་ཀྱི་དབང་དུ་སོང་བས་ངན་སོང་དུ་སྐྱེའོ། །(༤༠)ཆོས་བྱེད་རྣམས་བསོད་ནམས་ཆུང་ཞིང་ཚེ་ཐུང་སྟེ་བདུད་ཀྱི་དབང་གིས་ཀུན་གྱིས་གཤེ་སྐུར་འདེབས་སོ། །དེ་དུས་སངས་རྒྱས་ཀྱི་བསྟན་པ་ཉམས་དམའ་ཞིང་བོད་ཁྲིམས་ཧོར་གྱིས་འཇིག །ལུང་པ་ཁྲག་མཚོར་འགྲོ། ས་གཞི་ཀེང་རུས་ཀྱིས་ཁྱབ། ལས་ཅན་དང་ཆོས་བྱེད་ཐམས་ཅད་ས་མཐར་འབྲོས་པས་རྒྱལ་པོ་ཉིད་ཀྱང་ཕྱག་དཔེ་རྣམས་སྦས་ན་མཐར་འགྲོ་དོན་ཆེ། དེ་དུས་བཀའ་མ་རྣམས་བཀའ་འཆལ་ཏེ་བྱིན་རླབས་ཆུང་བས་གྲུབ་པ་ཐོབ་པ་ཡང་ཉུང་ངོ་། །དུས་འདིར་གཏེར་མ་འདི་བཀའ་མ་འཆལ་བས་བྱིན་རླབས་ཆེ། ལས་ཅན་རྣམས་ཀྱིས་གཏེར་སྒོ་ཕྱེ་ནས་དར་བར་འགྱུར་རོ། །ཞེས་གསུངས་པ་དང་། ཡང་རྒྱལ་པོས་ཞུས་པ། སློབ་དཔོན་ཆེན་པོ་ལགས་དེ་ལྟ་བུ་དེ་འོངས་པའི་རྒྱུ་གང་ལགས། ལོ་གང་ལ་འབྱུང་། དེ་ནམ་བཟློག་པར་འགྱུར། བཟློག་པའི་ཐབས་ཞུ་འཚལ་ཞེས་ཞུས་པས། སློབ་དཔོན་གྱིས་གསུངས་པ། ཀྱེ་རྒྱལ་པོ་དེ་འབྱུང་བའི་རྒྱུ་ནི་སྔོན་བཅོམ་ལྡན་འདས་དང་བདུད་ནུས་པ་འགྲན་པས་བདུད་ཕམ་ནས་དེའི་ཚེ་བདུད་ཀྱིས་ཤཱཀྱའི་བསྟན་པ་མཐའ་མ་ལ་ཐམས་ཅད་བདག་གི་དབང་དུ་གྱུར་ཅིག་ཅེས་སྨོན་ལམ་བཏབ་པས་དུས་ཀྱི་མཐའ་མ་ལ་ཕལ་ཆེར་བདུད་ཀྱིས་བྱིན་གྱིས་བརླབས་པས་ཆོས་དང་ནོར་ལ་ཆེ་འགྲན་བྱེད། ཕ་སྤད་དང་སྤུན་དུ་མི་འཆམས་ཡུལ་འཁྲུགས་བྱེད། བཙུན་པས་རྒྱན་འདོགས། སྔགས་པས་བསྙེན་སྒྲུབ་དོར། སྐྱེ་བོ་ངོ་ཚ་བྲལ། བཙད་པོ་སྡིག་བྱེད། ཆོས་མེད་ཆོས་འཁོར་སྐྱོང་། ཞེ་སྡང་མེ་ལྟར་འབར། འདོད་ཆགས་ཆུ་བཞིན་ཁོལ། ཆོས་སྐྱོང་འདྲེར་ལྡང་སྨྱོ་འདྲེ་དར་བའི་དུས། །བདུད་ཀྱིས་བྱིན་རླབས་སྔགས་བཙུན་སྲིའུ་གསོ། །མཁས་བཙུན་འདྲེར་བརྡུང་ལྟ་བ་ཆད་ལྟ་སྟོན། །གསང་སྔགས་ཀྱི་ཁ་ཚིག་ཁྲོམ་དུ་ཀློག་པའི་དུས། །བདུད་ཀྱི་བསྟན་པ་དར་བའི་དུས་ཚོད་དེར། །ཧོར་དམག་བོད་ཀྱི་ཡུལ་དུ་ལྷགས། །ལྕགས་ཕོ་ཁྱི་ལ་གཡུལ་མགོ་འཚོལ། །ཆུ་ཕོ་རྟ་ལ་རྟ་བཞིན་རྒྱུག །མེ་མོ་གླང་ལ་གདུག་རྩུབ་ཆེ། །ཤིང་མོ་ལུག་ལ་ཐེབས་གཅིག་བཟློག །དེ་ཡི་བཟློག་ཐབས་ཡུལ་ཁྲིམས་བཟང་པོ་དང་། །རི་རྒྱ་ཀླུང་རྒྱ་ཆོས་ཁྲིམས་རྒྱལ་ཁྲིམས་དང་། །འཆི་ངེས་སྲོག་བསླུ་མི་དགེ་མཐའ་དག་སྤང་། །དགེ་བཅུ་སྤྱད་ཅིང་བཙུན་ཁྲིམས་སྔགས་ཁྲིམས་བྱ། །(༤༡)གསུང་རབ་འདོན་ཞིང་གཙུག་ལག་ཉམས་པ་གསོ། །མཆོད་རྟེན་གསོ་ཞིང་ས་དགྲ་མནན་པ་དང་། །ནོར་གཏེར་མི་འདོན་ས་གཏེར་བརྐོ་མི་བྱ། །ཁྲོ་རྒྱལ་བསྒྲུབ་ཅིང་མ་སྲིང་ལས་ལ་བཀོལ། །ཚོགས་གཏོར་མཆོད་ཅིང་ལྷ་འདྲེ་མདོས་ཀྱིས་བསྐང་། །དེ་ལྟར་བྱས་ན་ཐེབས་གཅིག་བཟློག་པར་ངེས། །ཀུན་གྱི་ལས་ཡིན་རྨང་ནས་བཟློག་པ་ཡིན། །ལྔ་བརྒྱ་དུས་ཀྱི་ཐ་མ་ལ། །སྤྱོད་ངན་བྱས་ནས་དུས་ངན་ཟེར། །ཡུལ་ལ་ཞག་མེད་འཇག་སྐྱ་འཕྱོ། །ཚེ་ལ་ལོང་མེད་སྐར་མདའ་འདྲ། །ལེགས་པའི་ལན་ནི་ཉེས་ཀྱིས་གློན། །དེ་ཚེ་ཕྱི་དམག་བོད་ཡུལ་འཇོམས། །མི་རྣམས་མ་ལུས་གསོད་ལས་ཆེ། །སྡུག་བསྔལ་ཁྲག་གི་མཚོ་རྡོལ་ཚེ། །རང་སྡུག་རང་གིས་ཤོམ་པ་ལ། །སྙིང་རེ་རྗེ་སྟེ་བྱ་ཐབས་མེད། །ཅེས་གསུངས་སོ། །ཡང་གསུངས་པ། ཀྱེ་རྒྱལ་པོ་ཁྱོད་ཀྱི་ལྷ་ལྕམ་འདི་ཚེ་དུས་བྱེད་པའི་རྒྱུ་ནི། སྐྱེ་བ་འདིའི་གོང་རོལ་དུ་རྒྱ་གར་གྱི་ཡུལ་ཀ་ལ་ཀི་ཏྲའི་གྲོང་ཁྱེར་དུ་རྒྱལ་པོ་བྷི་ལ་ཀུ་ཏྲའི་བཙུན་མོར་སྐྱེས་ཏེ། བཙུན་མོ་གཉིས་ཡོད་པ་ལས་མོ་ལ་བུ་མེད། གཞན་དེ་ལ་བུ་ཡོད་པས་ཕྲག་དོག་གིས་བུ་བརྐུས་ནས་བསད་པའི་རྣམ་སྨིན་གྱིས་འདིར་ཚེ་མཐར་མ་ཕྱིན་པར་ཤི་བ་ཡིན་ནོ། །འདིར་ལས་ཀྱིས་འབྲེལ་པ་ནི་སྐྱེ་བ་འདིའི་ཡང་སྔ་ལ་པདྨ་བདག་དང་རྒྱལ་པོ་དང་བྷོ་དྷི་ས་ཏྭ་གསུམ་གྱིས་མ་ག་ཏའི་ཡུལ་དུ་མའི་དགེ་བར་མཆོད་རྟེན་བཞེངས་དུས་སྨོན་ལམ་བཏབ་པ་ན་བུ་མོ་འདི་སྦྲང་བུ་ཏྲེ་མ་བུ་གའི་ལུས་སུ་ཡོད་པ་དེས་ཐོས་པ་ལས་བྱུང་བའོ། །ཕྱི་མ་ནི་ལོ་མང་དུ་སྡུག་བསྔལ་སྤྱོད་པར་འདུག་སྟེ། བཤད་ན་རྒྱལ་པོའི་ཐུགས་ཁྲལ་དུ་འགྲོ་གསུངས་པ་དང་། ཡང་ཞུས་པས། སློབ་དཔོན་གྱི་ཞལ་ནས། རྒྱལ་པོ་དགྱེས་པའི་དོན་དུ་བཤད་ན་ལྷ་ལྕམ་འདི་སྐྱེ་བ་འདི་ཉིད་ཀྱི་གོང་རོལ་དུ་རྒྱ་གར་གྱི་ཡུལ་ཀོ་ཏ་ལའི་གཙུག་ལག་ཁང་དུ་བྲམ་ཟེའི་བུ་བཱ་ཡ་ཏ་ལ་ཞེས་བྱ་བར་སྐྱེས་ནས་དགེ་སློང་བྱེད་དོ། །གཙུག་ལག་ཁང་དེའི་མེ་ཏོག་ལྡུམ་རར་ཀུ་ཀུ་ར་ཆགས་པ་སྤྱོད་པ་མཐོང་བས་ཉོན་མོངས་པ་སྐྱེས་ཏེ་རིགས་ངན་གྱི་བུ་མོ་ལ་སྤྱད་པས་བསླབ་པ་ཉམས་པས་འགྱོད་དེ་ཀུ་ཀུ་ར་ལ་ཞེ་སྡང་སྐྱེས་ནས་འབྲས་སྦྲུ་བའི་ཐོ་བས་ཀུ་ཀུ་རའི་མཚན་མ་བརྡུངས་ཏེ་ཤིའོ། །དེའི་ཚེ་མར་མེའི་རྒྱུ་ཏིལ་མར་སྲང་(༤༢)བདུན་ཟོས་ཤིང་དགེ་སློང་གུབ་ཏ་ལ་ཚིག་རྩུབ་ཀྱང་བརྗོད་དོ། །ཡང་ལྷ་ལ་མེ་ཏོག་གིས་མཆོད་ནས་ཚེའི་དུས་བྱས་པའི་འོག་ཏུ་ཀུ་ཀུ་རའི་རྡོ་རྗེ་བརྡུངས་པའི་ལས་ཀྱི་རྣམ་པར་སྨིན་པས་དུད་འགྲོ་མོའི་ལུས་བརྩེགས་མར་ལེན་ཅིང་སྲོག་བཅད་པས་ཉི་ཚེ་བའི་དམྱལ་བར་སྐྱེའོ། །དེ་ནས་ཏིལ་མར་ཟོས་པའི་ལས་ཀྱིས་ཡི་དྭགས་སུ་སྐྱེའོ། །དེ་ནས་ཚིག་རྩུབ་བརྗོད་པའི་ལས་ཀྱིས་ལྷ་མ་ཡིན་དུ་སྐྱེས་པའི་འོག་ཏུ་མེ་ཏོག་ཕུལ་བའི་ལས་ཀྱིས་ལྷའི་སྐྱེ་བ་བཟུང་ནས། ཡང་ལས་སྔ་མའི་ལྷག་མས་བསམ་ཡས་འདི་ཉིད་དུ་ཁྱིའི་སྐྱེ་བ་བདུན་ལེན་ནོ། །དེ་ནས་ཡར་ལུང་སྟོད་དུ་བུད་མེད་གཟུགས་མི་སྡུག་ཅིང་བསོད་ནམས་ཆུང་བ་གསུམ་དུ་བརྒྱུད་པའི་མཐར། པདྨ་བདག་དང་འཕྲད་ཅིང་བྱིན་གྱིས་བརླབས་པས་ལས་ཟད་དེ་མི་ལུས་ཁྱད་པར་ཅན་བླངས་ནས་སངས་རྒྱའོ། །ཞེས་གསུངས་པ་དང་། ཡང་རྒྱལ་པོས་ཞུས་པ་སློབ་དཔོན་ཆེན་པོ་ལགས། མི་ལུས་ནམ་ཐོབ། ཆོས་གང་ལ་སྤྱོད། དེ་ནས་སྐྱེ་བ་དུ་ན་འཚང་རྒྱ། འགྲོ་དོན་གང་དུ་སྤྱོད་ཅེས་ཞུས་སོ། །སློབ་དཔོན་གྱིས་གསུངས་པ། ཡང་རྒྱལ་པོ་གསོན་ཅིག །ལས་ངན་དེ་རྣམས་བྱང་ནས་སྒྲགས་གྲོང་གསར་དུ་བུད་མེད་དབང་པོ་ཚང་ལ་དད་པ་དང་ལྡན་པར་སྐྱེས་ནས་ངའི་གདམས་པ་དང་ལས་འབྲེལ་ཐོགས་པ་ཙམ་འབྱུང་ངོ་། །

དེ་ནས་ལྷོ་ལ་ཡག་ཏུ་བུ་མོ་སྤྲེའུ་ལོ་མ་ཤེས་རབ་ཆེ་བ་ཞིག་ཏུ་སྐྱེས་ནས་མངའ་བདག་གསུང་གི་སྤྲུལ་པ་ཉང་རལ་གྱིས་རྗེས་སུ་བཟུང་ནས་ལམ་སྣ་ཟིན་པར་འགྱུར་རོ། །དེ་ནས་གཡས་རུ་གྲོང་དམར་དུ་སྐྱེས་པའི་ལུས་ཐོབ་སྟེ་སྔར་རབ་ཏུ་བྱུང་བའི་བག་ཆགས་ཀྱིས་དེར་ཡང་རབ་ཏུ་འབྱུང་སྟེ་ངའི་སྤྲུལ་པ་ཆོས་དབང་དང་འཕྲད་ནས་གདམས་པ་བྱིན་པས་རིག་པའི་ངོ་བོ་མཐོང་སྟེ་མཁའ་འགྲོས་རྗེས་སུ་འཛིན་པར་འགྱུར་རོ། །སྐྱེ་བ་དེའི་འོག་ཏུ་རྡོ་དང་མོན་བོད་ཀྱི་མཚམས་འབྲིན་ཐང་ཞེས་བྱ་བར་སྐྱེས་ཏེ་སྔ་མའི་བག་ཆགས་ཀྱིས་རབ་ཏུ་འབྱུང་བར་འགྱུར་རོ། །དེའི་ཚེ་མཁའ་འགྲོ་མ་རྣམས་ཀྱིས་བར་ཆད་བསྲུང་ཞིང་ལུང་བསྟན་ནས་ངའི་ཟབ་གཏེར་དང་འཕྲད་ཏེ་གཏེར་སྒོ་གསུམ་འབྱེད་པར་འགྱུར་རོ། །དེའི་དུས་སུ་སྙིང་ཏིག་མའི་གདམས་ངག་དང་འཕྲད་ཀྱང་འགྲོ་དོན་མི་འབྱུང་སྟེ་སྦས་པའི་ཚུལ་གྱིས་ཉམས་སུ་ལེན་པའི་དུས་ཡིན་ནོ། །དེའི་ཚེ་ངའི་ཟབ་ཆོས་ཀྱི་བདག་(༤༣)པོར་གྱུར་ནས་ལས་དང་ལྡན་པ་དང་མི་ལྡན་པའི་སློབ་མ་བདུན་ཅུ་འབྱུང་སྟེ་དེ་རྣམས་ལས་གདུལ་བྱ་ལས་ཅན་རྣམས་བདེ་བ་ཅན་དུ་སྐྱེ་ཞིང་ལས་མེད་ལ་ལ་ངན་སོང་དུ་སྐྱེའོ། །དེ་དུས་མཁའ་འགྲོས་ལུང་བསྟན་ཞིང་མཚན་དང་ལྡན་པའི་སློབ་མ་ཉི་ཤུ་རྩ་གཅིག་འབྱུང་། ཁྱད་པར་དུ་ཟབ་མོ་སྙིང་ཏིག་གསང་བའི་གཏེར་འདིའི་བདག་པོ་སྒྲགས་ཟུང་མཁར་གྱི་བུ་མོ་སྤྲེའུ་ལོ་མ་ལུས་ཕྲ་ལ་རྣམ་གཞག་ཚང་བ། ཤེས་རབ་ཆེ་ལ་ཆོས་ལ་མོས་པ། ཡིད་དུ་འོང་ཞིང་སོ་ཞོ་ཡོད་པ། སྨིན་མཚམས་ན་སྨེ་བ་པདྨ་འདྲ་བ་ཡོད་པ། མཚོ་རྒྱལ་གྱིས་བྱིན་གྱིས་བརླབས་པ་ཞིག་འབྱུང་བས་དེ་ལ་གདམས་པ་རྣམས་བྱིན་ན་ཁ་རག་གི་ཕུར་ལྷག་མེད་ལ་འཚང་རྒྱ་ཞིང་དར་ཆ་ཡང་བག་ཙམ་འབྱུང་ངོ་། །དེ་མིན་འགྲོ་དོན་མི་འབྱུང་ཞིང་ཐམས་ཅད་བདུད་ཀྱིས་བསམ་པ་བསྒྱུར་བས་དེ་ལ་མོས་པ་ཤིན་ཏུ་ཉུང་ངོ་། །དེ་དང་འབྲེལ་ཚད་དོན་དང་ལྡན་པས་ཐར་པའི་ལམ་སྣ་ཟིན་པར་འགྱུར་རོ། །དེའི་ཚེ་ཚད་དགུང་ལོ་ལྔ་བཅུ་རྩ་དགུ་སྟེ་ཚེའི་སྒྲུབ་པ་བྱས་ན་དར་ཅིག་ཕྱིར་བསྣུར་ཞིང་གཞན་དུ་བར་ཆད་ཀྱིས་ལྔ་བཅུ་རྩ་དགུའི་གོང་དུ་འདའ་བར་ཡང་སྲིད། དེ་ནས་དམ་སེལ་གྱིས་འདའ་བའི་ཚུལ་སྟོན་པས་དམ་སེལ་བཤགས་པ་ལ་འབུངས། དེ་ལྟར་བྱས་ན་དགུང་ལོ་ཚད་དུ་བཞུགས་པས་དེའི་དུས་སུ་མཁའ་འགྲོ་སྡེ་ལྔས་བྱིན་གྱིས་བརླབས་པའི་བུད་མེད་གཅིག་འབྱུང་སྟེ་དེས་ཕྱག་རྒྱ་བྱས་པས་ཚེ་ལ་གསོས་ཐེབས་ཏེ་ཚེ་ཚད་ལས་ལྷག་པར་བཞུགས་སོ། །དེ་དུས་ཟབ་གཏེར་རྣམས་བུམ་ཐང་སྨད་དུ་བསྐྱལ་ལོ། །གལ་ཏེ་མ་འཁྱོལ་ན་སྔར་གྱི་གཏེར་ཤུལ་ལམ་ལྷ་འདྲེ་མི་འཕོ་བའི་བྲག་ལ་སྦས་ན་ཕྱི་མ་ལ་ཐོན་པར་འགྱུར་རོ། །སྐྱེ་བ་དེ་འདས་ནས་ལོངས་སྐུའི་ཞིང་ཁམས་དར་ཅིག་ཉུལ་ལོ། །

དེ་ནས་བུམ་ཐང་ཐར་པ་གླིང་དུ་སྐྱེས་ནས་ལོ་བཅོ་ལྔ་ན་བུམ་ཐང་སྨད་ཀྱི་བྲག་སེང་གེ་དང་འདྲ་བ་ལས་སྙིང་ཏིག་གི་རྒྱུད་མན་ངག་དང་བཅས་པ་ཐོན་ནས་འགྲོ་དོན་བྱེད་དོ། །དེ་ནས་སྒོ་མང་བར་འབྱེད་ཅིང་རྫུ་འཕྲུལ་ཡ་མ་ཟུང་སྟོན་ཏེ་བུད་མེད་ཀྱི་ལུས་བཟུང་བའི་མཁའ་འགྲོ་ལྔས་ཡུམ་བྱས་ནས་འགྲོ་དོན་འུར་བར་འགྱུར་རོ། །དྲི་མེད་འོད་ཟེར་ཞེས་གྲགས་ཏེ་རྟ་མགྲིན་གྱི་སྤྲུལ་པའི་སྲས་ཟླ་བ་གྲགས་པ་ཞེས་བྱ་བ་ཞིག་ཀྱང་འཁྲུངས་ཤིང་། སློབ་མའང་ཟབ་མོ་གནད་ཀྱིས་ཐེབས་པ་བརྒྱ་རྩ་བརྒྱད། (༤༤)ཆོས་ཀྱིས་འབྲེལ་པ་སྟོང་རྩ་བརྒྱད། འགྲོ་དོན་ནུས་པ་སུམ་ཅུ་འབྱུང་ངོ་། །སྦྱིན་བདག་ལ་སོགས་པ་ཟས་ནོར་གྱིས་འབྲེལ་པ་ནི་ཤིན་ཏུ་མང་ངོ་། །དེའང་ལྷོ་བྲག་དང་མཁར་ཆུ་ལ་རྫོགས་ཆེན་གྱི་བསྟན་པ་དར་ཞིང་རྒྱས་པར་བྱེད་དོ། །དེ་དུས་ལྷོ་བྲག་གི་སེངྒེའི་གདོང་པ་ཅན་ནས་སེམས་ཕྱོགས་ཀྱི་ཆོས་སྡེ་ཐམས་ཅད་ཐོན་པར་འགྱུར་རོ། །མོན་མཁར་སྟེང་ནས་བདག་གི་ངན་སྔགས་ཟབ་མོ་ཚོ་ཐོན་ཞིང་། མཆིམས་ཕུ་འདི་ཉིད་དུ་སྦས་པའི་ལྷ་ལྕམ་མོ་རང་གི་ཟབ་བེར་སྲུབས་མེད་དང་། གཡུ་གུང་རི་ཁ་དམར་དང་གཟི་མཆོང་སྤེལ་མའི་ལན་ཚར་དང་དངུལ་དཀར་གྱི་མེ་ལོང་རྒྱང་གསལ་དང་། ཨུ་རྒྱན་བདག་གི་ཆོས་གོས་གསེར་གྱི་ཧ་རིས་ཅན་དང་། ཐོད་པ་སྨུག་མཁྲེགས་ལེ་ཁ་བའི་ནང་དུ་ཚེ་གཅིག་གིས་འཚང་རྒྱ་བའི་ཆོས་དབང་བཞིའི་གདམས་པ་རྒྱུད་དང་བཅས་པ་སྦེད་པས་འདི་རྣམས་ལྷ་ལྕམ་སྐྱེ་བ་འཕོས་ཏེ་བུམ་ཐང་དུ་སྐྱེས་པའི་དུས་སུ་ཐོན་ནས་འགྲོ་དོན་དཔག་ཏུ་མེད་པ་བྱས་ཏེ་སྐྱེ་བ་དེ་ལ་མངོན་པར་རྫོགས་པར་འཚང་རྒྱས་ནས་ལོངས་སྐུའི་ཞིང་དུ་འགྲོ་དོན་བྱེད་ཅིང་སྐྱེ་བ་མི་ལེན་ནོ། །ཟངས་མདོག་དཔལ་རིར་རྒྱལ་པོ་ཉིད་དང་མཚོ་རྒྱལ་དང་། ལྷ་ལྕམ་དང་། པདྨ་འོ་སྐོལ་ཞལ་མཇལ་ལོ། །གསུངས་སོ། །དེར་རྒྱལ་པོ་དགྱེས་ཏེ་ཕྱག་དང་བསྐོར་བ་མང་པོ་མཛད་ནས་སློབ་དཔོན་ཆེན་པོ་ལགས། འཁོར་བའི་ཆོས་ལ་སྙིང་པོ་མི་གདའ་བས་ཚེ་འདིར་བདེ་ཞིང་ཕྱི་མར་སྐྱིད་ལ་ནམ་ཕུགས་སངས་རྒྱ་བའི་གདམས་ངག་ཅིག་ཞུ་འཚལ་ཞུས་པས། སློབ་དཔོན་གྱིས་རྒྱལ་པོ་ལ་ཡང་གསུངས་པ།

ཨེ་མ་ཧོ། མངའ་བདག་རྒྱལ་པོ་ཆེན་པོ་ཡང་གསོན་ཅིག །འཇིག་རྟེན་ཆོས་ལ་སྙིང་པོ་མེད་པས་ན། །མུ་མཐར་འཁོར་ཞིང་ཡང་ཡང་སྡུག་བསྔལ་བས། །ཆོས་སྐུ་རྒྱལ་པོའི་གཏན་སྲིད་ཟིན་པར་མཛོད། །ཡུལ་གྱི་སྙིང་པོ་ཆོས་དབྱིངས་སྐྱེ་མེད་ཟུང་། །གནས་ཀྱི་སྙིང་པོ་ནགས་ཁྲོད་དབེན་པ་བརྟེན། །དགོན་པའི་སྙིང་པོ་ཆོས་ཉིད་སྟོང་གསལ་ལྟོས། །ཁང་པའི་སྙིང་པོ་སེམས་ཉིད་གཉུག་མར་ཞོག །ཚང་མང་སྙིང་པོ་ཤེས་བཞིན་དྲན་པས་ཟུང་། །མཛོད་ཀྱི་སྙིང་པོ་བྱང་ཆུབ་སེམས་གཉིས་བསྐྱེད། །ནོར་གྱི་སྙིང་པོ་ཚོགས་གཉིས་བརྟེན་པར་མཛོད། །སོ་ནམས་སྙིང་པོ་ཆོས་སྤྱོད་དགེ་བཅུར་འབོད། །ཕ་ཡི་སྙིང་པོ་སྙིང་རྗེས་འགྲོ་(༤༥)བ་ཟུང་། །མ་ཡི་སྙིང་པོ་སྟོང་པའི་གནས་ལུགས་སྐྱོངས། །བུ་ཡི་སྙིང་པོ་བསྐྱེད་རྫོགས་དབྱེར་མེད་བརྟེན། །ཆུང་མའི་སྙིང་པོ་བདེ་གསལ་མི་རྟོག་སྒོམས། །གྲོགས་ཀྱི་སྙིང་པོ་བདེ་གཤེགས་བཀའ་ལུང་ལྟོས། །ཞིང་གི་སྙིང་པོ་མི་ཕྱེད་དད་པ་བསྐྱེད། །ཟས་ཀྱི་སྙིང་པོ་སྐྱེ་མེད་བདུད་རྩི་ཟོ། །སྐོམ་གྱི་སྙིང་པོ་གདམས་ངག་བདུད་རྩི་འཐུང་། །གོས་ཀྱི་སྙིང་པོ་ངོ་ཚ་ཁྲེལ་ཡོད་གྱོན། །འཁོར་གྱི་སྙིང་པོ་མ་སྲིང་དམ་ཅན་བརྟེན། །ལོངས་སྤྱོད་སྙིང་པོ་ཆོས་སྤྱོད་སྒྲུབ་པ་མཛོད། །ལྟད་མོའི་སྙིང་པོ་རང་གི་སེམས་ལ་ལྟོས། །འདུ་འཛིའི་སྙིང་པོ་སྤྲོས་བཅས་དགེ་བ་མཛོད། །རྣམ་གཡེངས་སྙིང་པོ་བསྐྱེད་རིམ་འཕྲོ་འདུ་སྒོམས། །མཛའ་བཤེས་སྙིང་པོ་དབང་དང་དམ་ཚིག་བརྟེན། །ཆགས་སྡང་སྙིང་པོ་དུག་ལྔའི་རྩལ་སྦྱོང་གྱིས། །རྒྱན་གྱི་སྙིང་པོ་ཐོས་བསམ་ཕྱོགས་མེད་བརྟེན། །ལས་ཀྱི་སྙིང་པོ་ཟབ་མོའི་དཔེ་ཆ་བྲིས། །མགྲོན་གྱི་སྙིང་པོ་སྦྱིན་པ་ཕྱོགས་མེད་ཐོང་། །འདུན་མའི་སྙིང་པོ་བློ་ཕུགས་ཆོས་ལ་གཏོད། །མཆོད་གནས་སྙིང་པོ་དཀོན་མཆོག་གསུམ་པོ་མཆོད། །སྲི་ཞུའི་སྙིང་པོ་ཕ་མ་གུས་པས་མཆོད། །བསྐུར་སྟིའི་སྙིང་པོ་རྡོ་རྗེ་སློབ་དཔོན་བསྟེན། །དམ་ཚིག་སྙིང་པོ་རང་སེམས་ཟོལ་མེད་གྱིས། །སྡོམ་པའི་སྙིང་པོ་སྡིག་པ་མཐའ་དག་སྤོང་། །ལྷ་ཁང་སྙིང་པོ་སྡོམ་གསུམ་གཙང་མ་བརྟེན། །དཀྱིལ་འཁོར་སྙིང་པོ་འོད་གསལ་འགྱུར་མེད་ལྟོས། །གདམས་པའི་སྙིང་པོ་རང་རྒྱུད་འདུལ་བར་མཛོད། །ལྟ་བའི་སྙིང་པོ་སྟོང་གསལ་འགྱུར་མེད་ལྟོས། །སྒོམ་པའི་སྙིང་པོ་སེམས་ཉིད་ཇི་བཞིན་ཞོག །སྤྱོད་པའི་སྙིང་པོ་གཉིས་འཛིན་འཁྲུལ་པ་གཞིག །འབྲས་བུའི་སྙིང་པོ་མ་བཙལ་ལྷུན་གྱིས་གྲུབ། །དེ་ལྟར་མཛད་ན་འདིར་བདེ་ཕྱི་མར་སྐྱིད། །མྱུར་དུ་རྫོགས་པའི་སངས་རྒྱས་འཐོབ་པར་འགྱུར། །ཞེས་གསུངས་པས་རྒྱལ་པོ་དགྱེས་ཏེ་ཕྱག་དང་བསྐོར་བ་མང་དུ་མཛད་དོ། །དེ་ནས་ལྷ་ལྕམ་གྱིས་ཟབ་བེར་གདམས་ངག་དང་བཅས་པ་བསེ་སྒྲོམ་བ་གམ་སྨུག་པོར་བཅུག་སྟེ་གཏེར་དུ་སྦས་ནས་ལྷ་ལྕམ་ཉིད་དང་འཕྲད་པར་སྨོན་ལམ་བཏབ་ནས་སློབ་དཔོན་གྱིས་ལྷ་ལྕམ་གྱི་རོའི་སྙིང་ཁར་ཤེས་རབ་མཚལ་གྱི་ནྲ྇་ཅིག་བྲིས་ཏེ་རྣམ་ཤེས་བཀུག་པས་དབུགས་ཕྱུང་སྟེ་སྨྲ་ཤེས་པ་བྱུང་ངོ་། །

དེ་ནས་མཁའ་(༤༦)འགྲོ་སྙིང་ཏིག་གི་དབང་བསྐུར་ཏེ་གསང་མཚན་པདྨ་ལས་འབྲེལ་རྩལ་དུ་བཏགས་ཤིང་བུ་མོས་དཔེ་སྒྲོམ་སྤྱི་བོར་བཟུང་ནས་མ་འོངས་པའི་དུས་སུ་ཆོས་འདི་དང་འཕྲད་དེ་སེམས་ཅན་ལ་ཕན་པར་ཤོག་ཅིག་ཅེས་སྨོན་ལམ་བཏབ་བོ། །དེ་ནས་སློབ་དཔོན་གྱིས་ལྷ་ལྕམ་ལ་ཚེ་སྔོན་གྱི་ལས་སད་པ་དང་ཡབ་སྲས་སློབ་དཔོན་དང་བཅས་ཏེ་འཕྲད་དོ་ཞེས་གསུངས་ནས་སླར་རྣམ་ཤེས་དོན་པ་དང་རོ་དེ་ཉིད་དུ་བསྲེགས་པའི་ཚུལ་བསྟན་ཞིང་མོའི་སྒྲིབ་པ་སྦྱང་བའི་ཕྱིར་སློབ་དཔོན་གྱིས་བསྣམས་ཏེ་སྐད་ཅིག་ལ་ཨུ་རྒྱན་དུ་གཤེགས་ནས་ཚོགས་ཀྱི་འཁོར་ལོ་མཛད་དོ། །ཡང་སྐད་ཅིག་ལ་བྱོན་ཏེ་གསུངས་པ། མཚོ་རྒྱལ་ཇི་ལྟར་བྱུང་བ་འདི་རྣམས་དཀར་ཆག་ལ་ཐོབ་ཅིག །ཟབ་གཏེར་གྱི་ཟླ་ལ་སྦས་པས་ཕྱིས་མོ་རང་དང་འཕྲད་དུས་ཡིད་ཆེས་པའི་དགོས་པ་ཡོད་དོ་གསུངས་དུས་ཇོ་མོས་ཡི་གེར་བཏབ་བོ། །དེ་ནས་ཇོ་མོས་སློབ་དཔོན་ལ་ཞུས་པ། སྙིང་ཏིག་གསང་བའི་གདམས་པ་འདི་རྣམས་སྤེལ་ལམ་སྦེད་པར་བྱ་ཞུས་པས་སློབ་དཔོན་གྱི་ཞལ་ནས་འདི་རྣམས་ད་ལྟ་སྤེལ་བའི་དུས་ལ་མ་བབས་པས་གཏེར་དུ་སྦེད་དགོས། ལྷ་ལྕམ་གྱིས་དཔེ་སྒྲོམ་སྤྱི་བོར་བཞག་ནས་སྨོན་ལམ་བཏབ་པས་མོའི་ཆོས་སྐལ་ཡིན་མོད། ད་སྟེ་ལོ་འགའ་ན་སློབ་དཔོན་ཆེན་པོ་བི་མ་ལ་མི་ཏྲ་འབྱོན་པས་ཁོང་གིས་གདུལ་བྱ་དུས་ལ་བབས་ཏེ་སྙིང་ཏིག་གི་བསྟན་པ་རྒྱས་པར་འགྱུར་རོ། །བདག་གི་མཁའ་འགྲོ་སྙིང་ཏིག་གི་བསྟན་པ་འདི་སྙིང་ཏིག་སྔ་འགྱུར་འཆལ་ཏེ་ནུབ་ཏུ་ཉེ་བའི་དུས་སུ་བསྟན་པ་ནུབ་ཁར་གསལ་ཏེ་རྒྱས་ལ་དྲག་པ་ཡུན་ཐུང་བ་མར་མེ་འཆི་ཁར་གསལ་བ་ལྟ་བུ་འབྱུང་ངོ་། །དེའང་སྤྱིར་རྙིང་མའི་བསྟན་པ་རྒྱས་ལ་ཡུན་ཐུང་། དེའི་ནང་ནས་གཏེར་གྱི་བསྟན་པ་ལྷག་པར་གཏེར་སྒོ་ཕྱེད་པ་དང་རྒྱས་པ་མཉམ་ཞིང་། སྐལ་ལྡན་གཏེར་གྱི་བདག་པོ་མི་བཞུགས་པ་ན་ཕལ་ཆེར་འགྲིབ་པ་ཡིན་ནོ། །དེའི་ཕྱིར་སྦ་བར་བྱའོ་གསུངས་ནས་ཀུ་སུ་ལུའི་སྐོར་རྣམས་དྭགས་པོ་དང་ལུང་ཁྲ་མོ་བྲག་གི་བྲག་བྱ་སྐྱིབས་ཅན་ལ་སྦས་ཤིང་། རྒྱུད་དང་མན་ངག་རྒྱ་ཆེ་བ་མཁས་པ་པཎྜི་ཏའི་སྐོར་རྣམས་བུམ་ཐང་སྨད་ཀྱི་བྲག་སེངྒེ་འདྲ་བ་ལ་སྦས་ནས་གཟའ་དང་མ་མོ་དང་བདུད་དང་གཏེར་བདག་གི་མཁའ་འགྲོ་མང་པོ་ལ་གཏད་ནས་མི་ལོ་ལྔ་བཅུ་ཁ་རལ་ན་སྐལ་ལྡན་ལས་ཅན་དེ་ལ་གཏོད་ཅིག་ཅེས་བཀའ་བསྒོས་སོ། །དེའི་དུས་སུ་ཤིན་ཏུ་ཟབ་པའི་ཡང་གཏེར་ཆེན་པོ་ལྔ། སྦས་པ་ལ་དབུས་སུ་ཟུག་པ་རྩ་བའི་སྐོར་ལ་ཞི་ཁྲོ་བསྐྱེད་རྫོགས་སུ་འབྲེལ་བ་མཆིམས་ཕུར་སྦས་ཏེ་སྐུ་ཡི་གཏེར་རོ། །ལྷོ་ཕྱོགས་སུ་འདྲིལ་བ་སྡོང་པོའི་སྐོར་ལ་བདེ་གཤེགས་འདུས་པ་ལ་སོགས་པ་རྒྱས་པའི་ལས་གཙོ་བོར་གྱུར་པ་མཁའ་ཆུར་སྦས་ཏེ་ཡོན་ཏན་གྱི་གཏེར་རོ། །སྨན་ལ་སོགས་པ་ཡོན་ཏན་དུ་གྲགས་པ་ནི་ཕལ་པོ་སྟེ་མཆོག་གི་ཡོན་ཏན་གྱི་གཏེར་ལ་མ་རེག་གོ། །ནུབ་ཕྱོགས་སུ་གསལ་བ་མེ་ཏོག་གི་སྐོར་ལ་རིག་འཛིན་དང་མཁའ་འགྲོའི་ཆོས་སྡེ་ཟབ་མོ་གཙོ་བོར་དབང་དང་འབྲེལ་པ་ལྷ་རིང་བྲག་ཏུ་སྦས་ཏེ་གསུང་གི་གཏེར་རོ། །བྱང་ཕྱོགས་སུ་གྱེས་པ་ཡལ་གའི་སྐོར་ལ་ཡང་ཕུར་རྟ་ཕག་དང་བཅས་པ་དྲག་སྔགས་ཕྲིན་སྒྲུབ་དང་འབྲེལ་བ་ཕྲིན་ལས་གཙོ་བོར་གྱུར་པ་ཟངས་ཡག་ནམ་མཁའ་རྫོང་དང་ཏི་སྒྲོ་བྲག་ལ་སྦས་ཏེ་ཕྲིན་ལས་ཀྱི་གཏེར་རོ། །ཤར་ཕྱོགས་སུ་སྨིན་པ་འབྲས་བུའི་སྐོར་ལ་ཞི་བ་མཆོག་གི་སྒྲུབ་པ་མངོན་སུམ་འོད་གསལ་གྱི་གདམས་པ་ཡེ་ཤེས་གཙོ་བོར་གྱུར་པ་མཁའ་འགྲོ་སྙིང་ཏིག་དེའི་ལེ་ལག་དང་བཅས་པ་དང་ལུང་ཁྲ་མོ་བྲག་དང་བུམ་ཐང་ལ་སྦས་ཏེ་ཞི་བ་ཐུགས་གཏེར་ཆེན་པོའོ། །

དེ་ནས་དྲུག་ཅུ་རྩ་གཅིག་གླང་གི་ལོ་ལ་རྒྱལ་པོ་དགུང་དུ་གཤེགས་དུས་སློབ་དཔོན་ཉིད་ཀྱང་དངོས་ཀྱི་གདུལ་བྱ་དེ་ལས་མེད་པར་དགོངས་ནས་རྒྱལ་སྲས་མུ་ཏིག་བཙན་པོས་བཞུགས་པར་ཞུས་ཀྱང་མ་གནང་བར་གཤེགས་པའི་ཚེ་མང་ཡུལ་བྱེ་མའི་ལ་སོ་ལ་ཐུགས་པར་བསྐྱལ་ནས་ཕྱག་དབུ་ཐོད་བུད་བུད་བཙལ་བསྐོར་བ་མང་པོ་བྱས་ཏེ། ངེད་བོད་ལ་ཐུགས་རྗེས་གཟུང་བར་ཞུས་ནས་སྤྱན་ཆབ་མང་པོ་བཏོན་པས། སློབ་དཔོན་ཆེན་པོའི་ཞལ་ནས། ལྷ་སྲས་བཙན་པོ་འཇིག་རྟེན་གྱི་སྣང་བ་སྒྱུ་མ་དང་འདྲ་བས་རྟག་ཏུ་ཆོས་སྐུའི་རྩལ་སྦྱོང་མཛོད་ཅིག །འདུས་བྱས་ཆུའི་ལྦུ་བ་དང་འདྲ་བས་འཇིག་མེད་ཐར་པའི་ལམ་སྣ་ཟུངས་ཤིག །མི་རྟག་པ་རྩྭ་ཁའི་ཟིལ་པ་དང་འདྲ་བས། སེམས་ཉིད་གཉུག་མའི་གཏན་སྲིད་ཟུང་ཞིག །འདུས་བྱས་ཚོང་ཁང་གི་འགྲོན་པོ་དང་འདྲ་བས། འབྲལ་མེད་བདེ་ཆེན་གྱི་གྲོགས་དང་འགྲོགས་ཤིག །འདི་ཕྱིར་ཕན་པ་དམ་པའི་ཆོས་ལས་མེད་པས། རྗེ་འབངས་ཐམས་ཅད་དམ་པའི་ལྷ་ཆོས་མཛོད་ཅིག །སྤྲེལ་ལོ་སྤྲེལ་ཟླ་བའི་ཚེས་བཅུ་ལ་ང་ཡང་བོད་ཀྱི་ཡུལ་དུ་ལན་རེ་འོང་ཞིང་། ལས་ཅན་རྣམས་ལ་རྒྱུན་ཏུ་སྣང་བས་ཐུགས་ངལ་མ་མཛད་པར་ཡུན་རིང་དུ་ཅི་བདེར་(༤༨)བཞུགས་འཚལ་ལོ། །ཞེས་གསུངས་ནས་སློབ་དཔོན་ཆེན་པོ་དང་། ཇོ་མོ་མཁར་ཆེན་བཟའ་མཚོ་རྒྱལ་གཉིས་ནམ་མཁའི་དཀྱིལ་ན་ཕར་འོད་ཟེར་དང་བཅས་ཏེ་ལྷོ་ནུབ་རྔ་ཡབ་ཀྱི་གླིང་ཕྲན་དུ་བུན་གྱིས་བཞུད་དོ། །དེ་ལྟར་རིམ་གྱིས་བྱོན་པའི་བླ་མ་བཞི་པོ་ཡང་དཔལ་ཀུན་ཏུ་བཟང་པོ་ཡབ་ཡུམ་དང་། རྡོ་རྗེ་སེམས་དཔའི་རྣམ་པར་འཕྲུལ་པ་ཉིད་ལས། འགྲོ་བ་རང་རྒྱུད་པ་འགས་བསྒྲུབས་པས་གྲུབ་པ་ཐོབ་པ་ནི་མ་ཡིན་ནོ། །དེའི་ཕྱིར་གདུལ་བྱའི་སྣང་བ་དང་བསྟུན་ནས་དེ་ལྟར་བྱོན་པའོ། །རིག་འཛིན་བརྡས་བརྒྱུད་པའི་ལོ་རྒྱུས་བཤད་ཟིན་ཏོ།། །།

༈ དེ་ནས་གང་ཟག་སྙན་ཁུང་བརྒྱུད་པ་ནི། དེ་ལྟར་སློབ་དཔོན་ཆེན་པོས་ལུང་བསྟན་པ་བཞིན་ལྷ་ལྕམ་པདྨ་གསལ་ཉིད་རིམ་གྱིས་སྐྱེ་བ་བརྒྱུད་པ་ལས། ཚེ་ལོ་ལྔ་བཅུ་ཁ་རལ་ཏེ་མི་རྣམས་ཕལ་གྱིས་བཞི་པཅུ་རྩ་ཤས་ལས་མི་ཐུབ་པའི་དུས་ན། གསལ་རྗེ་གངས་ཀྱི་ཤར་ཕྱོགས་ལྕགས་སྒྲོམ་འབར་བ་ལྟ་བུའི་ཡུལ་དུ་སྤ་སྒང་པ་རིན་ཆེན་རྡོ་རྗེ་ཞེས་བྱ་བར་སྐྱེས་ཏེ་དྭགས་པོ་དང་ལུང་ཁྲ་མོ་བྲག་ནས་ཟབ་གཏེར་རྣམས་གླང་གི་ལོ་ལ་གདན་དྲངས་ཏེ་གནས་པ་ལས་དེ་དུས་ཉམས་སུ་མ་བླངས་པར་འཁྱམས་པས་མཁའ་འགྲོའི་བཀའ་ཆད་ཀྱིས་ཚེའི་ཚད་མཐར་མ་འཁྱོལ་བར་གཤེགས་སོ། །དེའང་ཞུས་ལན་གསེར་ཕྲེང་ལས། སྐྱེ་བ་དེ་འདས་ནས་ལོངས་སྐུའི་ཞིང་ཁམས་དར་ཅིག་ཉུལ་ཞེས་གསུངས་པའི་དོན་ཐོག་ཏུ་བབས་ཏེ་མངོན་སུམ་འོད་གསལ་གྱི་སྣང་བ་ལྔ་ལྡན་འོད་ཀྱི་དཀྱིལ་འཁོར་སྒོམ་པའི་རྣལ་འབྱོར་པ་རྣམས་ལ་མ་སྣང་བའི་འོག་མིན་དུ་གནས་པའོ། །དེ་ནས་གཡོ་རུ་གྲྭའི་ཕུ་སྟོད་གྲོང་ཞེས་བྱ་བར་ཡབ་སློབ་དཔོན་བསྟན་པ་སྲུང་བ་དང་། ཡུམ་འབྲོ་བཟའ་མོ་བསོད་ནམས་རྒྱན་གཉིས་ཀྱི་སྲས་སུ་འཁྲུངས་ཏེ། ལོ་བདུན་ནས་ཀློག་བྱང་བར་ཤེས་ཏེ། བདེ་གཤེགས་འདུས་པ་དང་ཕུར་པ་དང་། གུ་རུའི་ལས་བྱང་ཕྲིན་སྒྲུབ་དང་བཅས་པ་ལ་སྦྱངས་པས་ལོ་བཅུ་ན་ཤེས་པར་གྱུར་ཅིང་རྩིས་དང་མདོས་ལ་སོགས་པ་ཡང་བསླབས་སོ། །དེ་ནས་ལོ་བཅུ་གསུམ་ན་རབ་ཏུ་བྱུང་སྟེ། མཁན་པོ་བསམ་འགྲུབ་རིན་ཆེན་གྱི་དྲུང་དུ་དམ་པའི་ཆོས་འདུལ་བ་ལ་སྦྱངས་ཤིང་། འདུལ་བ་ལུང་དང་། སོ་སོར་ཐར་པའི་མདོ་དང་འོད་ལྡན་ལ་སོགས་པ་ཕྲན་ཚེགས་རྣམས་ལ་གསན་པར་མཛད་དོ། །དེ་ནས་དཔལ་གསང་ཕུ་ནེའུ་ཐོག་ཏུ་སློབ་དཔོན་(༤༩)ཆེན་པོ་བླ་བྲང་པ་ལ་སོགས་པ་ལས་བྱམས་པའི་ཆོས་དང་རྟོག་གེའི་ཚུལ་ལ་སོགས་པ་ལ་ཐོས་པ་མཛད་དོ། །དེ་ནས་སློབ་དཔོན་གཞོན་ནུ་རྒྱལ་པོ་ལ་སོགས་པ་ལས་དབུ་མ་ཚིག་གསལ་དང་། འཇུག་པ་ལ་སོགས་པ་དབུ་མའི་གཞུང་དང་མན་ངག་རྣམས་ལ་ལེགས་པར་སྦྱངས་སོ། །དེ་ནས་སློབ་དཔོན་གཞོན་ནུ་དོན་འགྲུབ་ལ་སོགས་པ་ལས་གསང་བ་འདུས་པ་དང་། གསང་ལྡན་དང་། གཙུག་དགུ་དང་། སྦྱོང་རྒྱུད་ལ་སོགས་པ་དང་། མདོ་རྒྱུད་ལུང་སེམས་ཕྱོགས་ཀྱི་རྒྱུད་ལུང་མན་ངག་དང་བཅས་པ་ལེགས་པར་གསན་ནོ། །དེ་ནས་སློབ་དཔོན་བཀྲ་ཤིས་རིན་ཆེན་ལ་སོགས་པ་ལས་བདེ་མཆོག་དང་། ལམ་འབྲས་དང་། སྦྱོར་དྲུག་དང་། ཞི་བྱེད་དང་། རྫོགས་ཆེན་སེམས་ཕྱོགས་ལ་སོགས་པ་མན་ངག་དུ་མ་དང་རྒྱུད་ལུང་ལ་སྦྱངས་སོ། །དེ་ནས་སློབ་དཔོན་གཞོན་ནུ་རྡོ་རྗེ་ལ་སོགས་པ་ལས་སྤྱོད་འཇུག་དང་བསླབ་བཏུས་དང་། བསྟན་རིམ་དང་། ལམ་རིམ་ལ་སོགས་པ་ཇོ་བོའི་ཆོས་སྐོར་བཀའ་གདམས་ལུགས་རྣམས་དང་། དོ་ཧ་དང་། ཕྱག་ཆེན་དང་། གཅོད་ཡུལ་ལ་སོགས་པའི་མན་ངག་དུ་མ་གསན་ནོ། །སློབ་དཔོན་དུ་མ་ལས་ཐུན་མོང་གི་སྒྲུབ་སྡེ་སྣ་ཚོགས་པ་གསན་ཞིང་མཁྱེན་པར་མཛད་དོ། །

དེ་ནས་བླ་མ་དམ་པ་ཀུ་མ་རཱ་ཛའི་དྲུང་དུ་རྫོགས་པ་ཆེན་པོ་གསང་བ་སྙིང་ཏིག་གི་དབང་ཁྲིད་རྒྱུད་ལུང་མན་ངག་དང་བཅས་པ་དུ་མ་དང་། གུ་རུའི་གཏེར་ལུང་ཕྲན་ཚེགས་མང་པོའི་དོན་གསན་ཅིང་ཐུགས་ཉམས་སུ་བཞེས་སོ། །དེ་ནས་ཤིང་མོ་ཡོས་ཀྱི་ལོའི་དགུན་གཅིག་མཆིམས་ཕུའི་རི་ལ་སྒྲུབ་པ་མཛད་ཅིང་རི་མོ་ཅན་གྱི་གནས་སུ་སྐལ་ལྡན་ཕོ་མོ་བརྒྱད་ལ་གསང་བ་སྙིང་ཏིག་གི་དབང་ཁྲིད་བྱེད་དུས་གློ་བུར་དུ་མཁའ་འགྲོ་དང་། བཀའ་སྲུང་མང་པོ་བབས་ཏེ་མཁའ་འགྲོ་སྙིང་ཏིག་གི་ཆོས་བཀའ་འབྱེད་པར་བསྐུལ་ནས། རྣལ་འབྱོར་པ་འོད་ཟེར་གོ་ཆ་དཔེ་ལེན་དུ་བཏང་སྟེ་འཁོར་དུས། མཁའ་འགྲོའི་འདུ་བ་དཔག་ཏུ་མེད་པ་དེ་ན་ཡོད་པའི་རྣལ་འབྱོར་པ་ཀུན་གྱིས་མཐོང་ཞིང་། མཚན་མོ་ཕྱོགས་ཀུན་ཏུ་མཁའ་འགྲོའི་རང་སྒྲ་དི་རི་རི་བ་དང་། རོལ་མོའི་སྒྲ་མང་པོ་ཡང་ཐོས་ཤིང་། རྣལ་འབྱོར་ཕོ་མོ་ཀུན་གཉིད་དུ་སོང་བྱས་པས་རྨི་ལམ་མེད་ཅིང་། མ་སོང་བྱས་པས་སད་རྒྱུ་ཡང་བྱུང་སྟེ། བདེ་གསལ་རྣམ་པར་མི་རྟོག་པའི་ཡེ་ཤེས་ལ་ཉིན་(༥༠)མཚན་འཁོར་མོར་གནས་པ་ཟླ་བ་གཅིག་ཏུ་བྱུང་ཞིང་། ངོ་སྤྲོད་ཀྱི་དུས་སུ་མཐིང་ག་ཁྱབ་པ་ཆེན་པོའི་འོད་དང་། ལྔ་ལྡན་ཡེ་ཤེས་ཀྱི་འོད་ཀྱང་ཀུན་གྱིས་མཐོང་ཞིང་། ཁྲིད་དུས་དང་རྒྱབ་ཆོས་ཐམས་ཅད་ཀྱི་ཚེ་ནམ་མཁའ་འཇས་ཁེངས་པ་ཟླ་བ་གཅིག་ཏུ་བྱུང་ངོ་། །དེ་ནས་གངས་རི་ཐོད་དཀར་དུ་འོངས་དུས་ཀྱང་མཁའ་འགྲོའི་འདུ་བ་མང་པོ་དང་། རང་སྒྲ་དང་སིལ་སྙན་སྒྲོགས་པ་སྐབས་སུ་བྱུང་ཞིང་། ཁྱད་པར་དུ་སྟོན་སོར་འདིའི་ཡིག་ཆ་འཇོག་པར་འོད་ཟེར་གོ་ཆས་བསྐུལ་ཏེ། བསྟན་བཅོས་ལུས་གྲུབ་ཀྱི་འགོ་བརྩམས་པ་ནས་ཡོངས་སུ་རྫོགས་ཀྱི་བར་དུ་མཁའ་འགྲོའི་གནང་བ་དང་། བྱིན་རླབས་དང་། རང་སྒྲ་དང་། བྱིན་གྱིས་བརླབས་པའི་མཚན་མ་བཟང་པོ་སྣ་ཚོགས་སུ་བྱུང་ངོ་། །དེའི་ཕྱིར་ཆོས་འདི་ནི་ཤིན་ཏུ་གཉན་ཞིང་བྱིན་རླབས་ཀྱི་སྤྲིན་ཕུང་འདུ་བས། ཚེ་འདི་ཉིད་ལ་གྲོལ་བའི་གནད་དཔག་ཏུ་མེད་པ་ཡོད་དོ། །འདིའི་ངོ་མཚར་དང་ལྟས་ཀྱི་རིམ་པ་བྱུང་བ་དེ་ལྟ་བུ་གཏེར་ཁ་གཞན་ལ་བྱང་བ་མ་ཐོས་ཤིང་། མི་སྣང་སྟེ་ཆོས་ཀྱི་གནད་དང་ཟབ་དོན་མི་གཅིག་པའི་ཕྱིར་རོ། །ངོ་མཚར་བའི་ལོ་རྒྱུས་ཞིབ་ཏུ་བཤད་ན་དཔག་ཏུ་མེད་དེ། དེང་སང་དུས་སྙིགས་པ་དང་། མི་རྣམས་ཕལ་ཆེར་བདུད་ཀྱི་ཕྱོགས་ལ་དད་པས། སྐུར་པ་འདེབས་ཤིང་ཟོག་ཏུ་མཐོང་བ་ཙམ་ལས་མེད་པས་མི་སྤྲོ་ཞིང་། ཡེ་ཤེས་དང་ལས་ལས་གྲུབ་པའི་མི་མ་ཡིན་པ་ཉིད་བདག་གི་དཔང་པོར་བཞུགས་པས་དེས་ཆོག་གོ། །

ད་ནི་ཕྱི་རབས་ཀྱི་དད་ལྡན་རྣམས་ལ་རྗེས་སུ་གདམས་པ། ལས་སྨོན་དག་པས་འབྲེལ་བའི་སློབ་མ་དང་། །དད་ལྡན་སྐྱེ་བོ་རྣམས་ལ་བསྐུལ་བའི་ཚིག །རྣ་བའི་བདུད་རྩི་སེམས་ཀྱི་སྨན་འདི་ཉིད། །སྙན་པའི་བཀའ་མཆིད་ལགས་ཀྱིས་གསན་པར་མཛོད། །ཚེ་འདི་མི་རྟག་སྟོན་ཀའི་སྤྲིན་དང་འདྲ། །ལང་ཚོ་མི་རྟག་སོ་ཀའི་མེ་ཏོག་འདྲ། །ལུས་ནི་མི་རྟག་གཞན་གྱི་གཡར་པོ་འདྲ། །ནོར་རྣམས་མི་རྟག་རྩྭ་ཁའི་ཟིལ་པ་འདྲ། །མཛའ་བཤེས་མི་རྟག་ཚོང་ཁང་མགྲོན་པོ་འདྲ། །འདུས་ཀྱང་འབྲལ་བས་ལམ་མཐུན་གྲོགས་དང་འདྲ། །འཆི་བདག་མི་སྡོད་ནུབ་རིའི་གྲིབ་མ་འདྲ། །འཇིག་རྟེན་ཕྱི་མ་སོ་ཁའི་ཉ་རྡོས་འདྲ། །ཚེ་འདིའི་སྣང་བ་མདང་སུམ་རྨི་ལམ་འདྲ། །འདོད་ཡོན་རྣམས་ནི་སྒེག་མོ་གཡོན་ཅན་འདྲ། །ནམ་ཡང་མི་ངོམས་སྲེད་པས་ཆང་འཐུང་འདྲ། །དོན་མེད་བྱ་བ་ཆུ་བོའི་གཉེར་མ་འདྲ། །འཁོར་བའི་སྡུག་བསྔལ་རྒྱ་(༥༡)མཚོའི་དབའ་རླབས་འདྲ། །གཅིག་ལས་གཅིག་བརྒྱུད་མེ་ཏོག་ཕྲེང་བརྒྱུས་འདྲ། །འགྲོ་དྲུག་འཁོར་བ་ཤིང་རྟའི་འཕང་ལོ་འདྲ། །གཅིག་ནས་གཅིག་བརྒྱུད་ཟོ་ཆུའི་འཁྱུད་མོ་འདྲ། །དལ་འབྱོར་རྙེད་དཀའ་རིན་ཆེན་གྲུ་བོ་འདྲ། །ནམ་འཇིག་མི་ཤེས་ཆུ་ཡི་ལྦུ་བ་འདྲ། །ངན་སོང་གནས་གསུམ་ཐེམ་རྩྭའི་གད་གཡང་འདྲ། །ལྷུངས་ནས་མི་ཐར་འཆི་བདག་ཁ་ནང་འདྲ། །ལས་དང་ཉོན་མོངས་མཚན་མོའི་མུན་རུམ་འདྲ། །གར་འགྲོ་ཆ་མེད་འགྲོན་པོ་ལམ་འཁྱམས་འདྲ། །རང་སེམས་དགེ་བ་སྤྲིན་རུམ་གློག་དང་འདྲ། །ཐར་ལམ་སྣང་བ་རིན་ཆེན་སྒྲོན་མེ་འདྲ། །དམ་པའི་བླ་མ་དེད་དཔོན་སྨན་པ་འདྲ། །གཅིག་ཏུ་ཕན་བརྩོན་བདེ་གཤེགས་དབང་པོ་འདྲ། །གདམས་པ་སྨན་འདྲ་ལེགས་པར་མཁྱེན་མཛོད་ལ། །ད་རེས་ཚེ་འདིའི་ཐར་ལམ་ཟིན་པར་མཛོད། །འདི་ཕྱིར་ཕན་པ་དམ་པའི་ཆོས་ཡིན་ལ། །དེ་ཉིད་སྤྱད་པས་འཁོར་བའི་ཕ་རོལ་འགྲོ། །འཆི་བ་བས་ཀྱང་སྐྱེ་བ་ཉམ་ང་ཞིང་། །གང་དུ་སྐྱེས་ཀྱང་སྲིད་ན་བདེ་བ་མེད། །མེ་ཆེན་འོབས་དང་འདྲ་བར་རྒྱལ་བས་གསུངས། །དམ་པའི་བླ་མ་རྣམས་དང་འཕྲད་གྱུར་ཅིང་། །ཟབ་མོའི་གདམས་པ་ལེགས་པར་ཐོབ་བཞིན་དུ། །བརྩོན་པའི་སྟོབས་ཀྱིས་སྒྲུབ་པར་མི་བྱེད་ན། །དེ་ལས་བསླུས་པ་བདག་ལ་གང་ཞིག་ཡོད། །ཐོས་པ་ཙམ་གྱིས་སྡུག་བསྔལ་མི་གྲོལ་ཏེ། །སྨན་དཔྱད་ཐོས་པས་ནད་ལས་གྲོལ་ནུས་སམ། །དང་པོར་ཐོས་པས་མ་ནོར་ཐག་གཅད་ནས། །བསམས་པས་ཐེ་ཚོམ་སྒྲོ་འདོགས་ཀུན་བཅད་དེ། །བསྒོམས་ཤིང་ཉམས་སུ་བླངས་པས་སྡུག་བསྔལ་གྲོལ། །དེ་ཕྱིར་མ་ནོར་ཟབ་མོའི་དོན་ཤེས་ནས། །གཅིག་པུར་ནགས་སུ་སྒྲུབ་པ་མཆོག་ཏུ་གཅེས། །དེང་སང་ཚེ་ལོ་ལྔ་བཅུ་ཁ་རལ་ཏེ། །ཚད་དུ་ཐུབ་ཀྱང་ཕྱེད་ཙམ་གཏི་མུག་གཉིད། །ཕྱེད་ལའང་སུམ་གཉིས་རྣམ་གཡེང་འདུ་འཛི་སྟེ། །སུམ་ཆ་གཅིག་ལའང་དབང་པོའི་ཆོམ་རྐུན་མང་། །དེ་ལྟར་དཔྱད་ནས་ཆོས་ལ་ངས་སྦྱངས་ཤེས། །ཡུན་དུ་སྒོམ་ཞིང་སྒྲུབ་པའང་ཡི་མུག་སྐྱེ། །འགྲོ་བ་གཞན་རྣམས་སྨོས་ཀྱང་ཅི་ཞིག་དགོས། །ཉོན་མོངས་རྣམས་ནི་ཐོག་མ་མེད་དུས་ནས། །སེམས་ལ་གོམས་ཤིང་བག་ཆགས་རྒྱུན་མི་འཆད། །དེ་ཡི་དབང་གིས་འཁྲུལ་སྣང་འཁོར་བར་འཁྱམས། །འདི་ཙམ་དུས་ན་ཐར་ཞེས་ཚད་གཟུང་མེད། །འཆི་བའི་དུས་ན་དྲན་ཡང་རབ་ཏུ་འཕྱིས། །མགོ་བོ་བཅད་ལ་གསོས་སྨན་ཕན་ཅི་ཡོད། །འཁོར་བའི་གྲོང་ན་འགྲོ་ཀུན་ཉམ་རེ་ཐག །རྒྱལ་པོའི་བཙོན་རར་བཅིངས་པའི་མི་(༥༢)བཞིན་དུ། །ནམ་ཡང་བདེ་མེད་སྡུག་བསྔལ་རྒྱུན་རེ་རིང་། །སྲིད་ནས་ཐར་པའི་ཐབས་ལ་བརྩོན་པར་མཛོད། །སྟོན་པ་འཇིག་རྟེན་སྒྲོན་མེ་བྱོན་གྱུར་ཅིང་། །དམ་ཆོས་ཉི་མ་དམ་པའང་མ་ནུབ་ལ། །ཐར་པའི་ལམ་བཟང་ཕྱོགས་ནི་ཤེས་དུས་འདིར། །སྙིང་ནས་ཆོས་ཀྱི་ལམ་ལ་འབད་པར་མཛོད། །དལ་ཞིང་འབྱོར་པས་བརྒྱན་པའི་ལུས་འདི་ཡང་། །ནམ་འཇིག་མི་ཤེས་འཇིམ་པའི་བུམ་པ་འདྲ། །སང་དང་འཇིག་རྟེན་ཕྱི་མའི་སྣང་བ་གཉིས། །སྔོན་ལ་གང་འབྱུང་ངེས་པ་མེད་པས་ན། །དེ་རིང་ཉིད་ནས་དམ་པའི་ཆོས་མཛོད་ཅིག །ཚེ་འདིའི་བྱ་བ་ཤི་ཤིར་ཟིན་པ་མེད། །ནམ་གཞག་ཚེ་ན་ཟིན་པ་ཆོས་ཉིད་ཡིན། །ཆོས་ལ་དད་པའི་བསམ་པ་འབྱུང་དཀའ་བས། །ནམ་དྲན་ཚེ་ན་ཆོས་ལ་སྒྲུབ་པ་མཛོད། །འཁོར་དང་ལོངས་སྤྱོད་བསོད་ནམས་རྣམ་གཡེང་རྣམས། །བདུད་ཀྱིས་ཆོས་ལ་བར་ཆད་སྤྲུལ་པས་ན། །རྙེད་དང་བཀུར་སྟིས་བློ་བྲིད་ཤེས་བྱས་ཏེ། །ཆོག་ཤེས་ལྡན་པས་དབེན་པའི་ནགས་སུ་སོང་། །མདོར་ན་སྐྱེས་པའི་ཐ་མ་འཆི་བ་སྟེ། །འདུས་པའི་ཐ་མ་དེ་བཞིན་འབྲལ་བ་ཡིན། །བསགས་པ་འཛད་ཅིང་འབྱོར་པ་རྒུད་པས་ན། །འཁོར་བའི་ཆོས་ལ་སྡུག་བསྔལ་ཤེས་བྱས་ལ། །ཞི་བའི་ལམ་ལ་ཡང་དག་འཛེགས་པ་དང་། །བྱམས་དང་སྙིང་རྗེས་འགྲོ་བའི་དོན་བྱེད་ཅིང་། །སྟོང་ཉིད་སྙིང་རྗེས་ཉིན་མཚན་འདའ་བར་མཛོད། །དམན་སར་འགྲོ་བ་དམ་པའི་ལམ་མིན་ཞིང་། །གཞན་དག་འདྲེན་པ་ཤིང་རྟ་ཆེན་པོའི་སྲོལ། །བྱང་ཆུབ་སེམས་ཀྱིས་ཆོས་ཀུན་ཟིན་པར་མཛོད། །ལྟ་བའི་རྒྱལ་པོར་རང་བྱུང་ཡེ་ཤེས་ལྟོས། །སྒོམ་པའི་རྒྱལ་པོར་འོད་གསལ་ལྷུན་གྲུབ་བསྒོམས། །སྤྱོད་པའི་རྒྱལ་པོར་སྣང་སྲིད་སྒྱུ་མར་སྦྱོངས། །འབྲས་བུའི་རྒྱལ་པོར་གདོད་མའི་ཟད་སར་སྐྱོལ། །ལྷུན་གྲུབ་ས་ལ་ཀུན་ཏུ་བཟང་པོར་འགྱུར། །འདི་ནི་གཞི་རྫོགས་རང་བཞིན་གཉུག་མའི་དོན། །ཕན་པའི་གདམས་ངག་ལགས་ཀྱིས་ཐུགས་ལ་ཞོག །ཕྱི་དུས་མངོན་རྫོགས་རྒྱལ་པོའི་ཞིང་ཁམས་སུ། །བདག་དང་དད་ལྡན་འགྲོ་ཀུན་མཇལ་བར་སྨོན། །ཞེས་ལེགས་པར་གསུངས་སོ། །དེ་དག་ཀྱང་རང་གི་ཆེ་བའི་ཡོན་ཏན་མངོན་པར་རློམ་པ་མ་ཡིན་གྱིས། ཇི་ལྟར་གནས་པའི་དོན་བརྗོད་པས་ཕྱི་རབས་ཀྱི་དད་ལྡན་རྗེས་སུ་འཛིན་པའི་དགོས་པ་ཡོད་དོ། །གང་ཟག་སྙན་ཁུང་དུ་བརྒྱུད་པའི་ལོ་རྒྱུས་བཤད་ཟིན་ཏོ།། །།

༈ ཇི་ལྟར་ལེགས་(༥༣)བཤད་སྤྲིན་གྱི་གཞོན་པའི་བླ་རེ་ལས། །ཚིག་དོན་རྣམ་བཀྲའི་ཆར་གྱི་སྣང་བ་རབ་བསིལ་བས། །མ་ལུས་འགྲོ་ཀུན་དད་བརྒྱའི་ལོ་ཐོག་ལེགས་བསྐྲུན་ཏེ། །ཀུན་ཀྱང་བདེ་ཆེན་ཀུན་ཏུ་བཟང་པོའི་རང་བཞིན་ཤོག །དེང་ནས་ལུས་ཅན་ཐར་པའི་ལམ་ལ་བདག་གིས་མ་ལུས་རབ་བཀོད་དེ། །སྲིད་པའི་གྲོང་ལས་ཐམས་ཅད་ཞི་དབྱིངས་བདེ་གཤེགས་དབང་པོའི་སར་གཞོལ་ནས། །འཁོར་བའི་རྒྱ་མཚོ་མཐའ་དག་ཡོངས་སྟོངས་ཕྱམ་ཅིག་མྱ་ངན་འདས་པ་ཡི། །རྒྱལ་བའི་ཕོ་བྲང་མ་ལུས་ཡོངས་གང་མཁའ་དབྱིངས་པདྨོ་འཁྱིལ་པར་ཤོག །རིག་དང་གྲོལ་བའི་རྟ་བདུན་གྱིས་བསྐྱོད་བློ་གྲོས་ཡངས་པའི་ནམ་མཁའ་ལ། །དྲི་མེད་འོད་ཟེར་ཀུན་ནས་རྒྱས་པའི་ཉི་མའི་སྙིང་པོ་ཤར་བ་ཡིས། །གཏི་མུག་མུན་པ་རྨད་བྱུང་སེལ་ཞིང་ཉེས་པའི་ཆུ་གཏེར་ཡོངས་བསྐམས་ཏེ། །འགྲོ་ཀུན་ཐར་པའི་ལམ་བཟང་སྣང་ཞིང་སྐལ་བཟང་པདྨ་འཛུམ་པར་ཤོག །མ་ལུས་མི་ལུས་ལུས་པ་མེད་པའི་སྐྱབས་དང་དཔུང་གཉེན་མཆོག་གཅིག་པུ། །ཇི་ལྟར་ཇི་སྙེད་ཇི་བཞིན་གཟིགས་པས་འགྲོ་ཀུན་འདྲེན་པའི་གཉེན་གཅིག་པུ། །སྲིད་ནས་སྲིད་འགྲོ་སྲིད་ལས་རྣམ་གྲོལ་དེད་དཔོན་བླ་ན་མེད་གཅིག་པུ། །ཆོས་དབྱིངས་ཆོས་ཉིད་ཆོས་སྐུ་མངོན་གྱུར་རང་བྱུང་པདྨས་འཛིན་པར་ཤོག །རིན་ཆེན་གྲུ་བོ་ཀུན་ནས་མཛེས་འདྲ་སྲིད་པའི་མཚོ་ཆེན་སྒྲོལ་བའི་གྲུ། །མཁའ་འགྲོ་སྙིང་ཏིག་ཆོས་ཚུལ་ཟབ་མོ་སྙིང་གི་པདྨོ་ལ་རེག་ཅིང་། །དྲི་མེད་ལྷ་ཡི་དཔག་བསམ་ཤིང་འདྲ་འདོད་དགུའི་རེ་བ་ཡོངས་སྐོང་བ། །རྡོ་རྗེ་ཕག་མོ་མཁའ་འགྲོའི་ཚོགས་བཅས་སྤྲིན་བཞིན་འདུ་བས་བསྐྱང་བར་ཤོག །ཆོས་ཚུལ་འདི་ཡང་ནམ་མཁའ་ཇི་བཞིན་སེམས་ཅན་དབྱིངས་མཐའ་ཀུན་ཁྱབ་ཅིང་། །རྒྱ་མཚོ་ཇི་བཞིན་གཏིང་མཐའ་དཔག་ཡས་སྐལ་ལྡན་སྐྱེ་བོས་རྟོགས་པ་དང་། །ལྷུན་པོ་ཇི་བཞིན་འཕོ་འགྱུར་མེད་པས་མི་ནུབ་རྒྱལ་མཚན་ཡོངས་བཟུང་སྟེ། །ཉི་ཟླ་ཇི་བཞིན་ཀུན་ཏུ་སྣང་བས་ཕྱོགས་བཅུར་འཕྲོ་ཞིང་རྒྱས་པར་ཤོག །གཏེར་འབྱུང་རིན་པོ་ཆེའི་ལོ་རྒྱུས་ཞེས་བྱ་བ། དཔལ་ཨོ་རྒྱན་གྱི་མཁས་གྲུབ་ཆེན་པོ་མཚོ་སྐྱེས་རྡོ་རྗེའི་སྲས་དྲི་མེད་འོད་ཟེར་གྱིས། གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།

དགེ་ལེགས། ཤུ་བྷཾ། བྷ་ཝནྟུ།། །།

རིན་པོ་ཆེ་དབང་གི་ཕྲེང་བ།

༄༅། །རིན་པོ་ཆེ་དབང་གི་ཕྲེང་བ་བཞུགས་པ་ལེགས་སོ། །རིན་ཆེན་ཤོག་སྐྱའི་སྐོར།

༄༅། །རྒྱ་གར་སྐད་དུ། རཏྣ་ཨ་བྷི་ཥིཉྩ་མ་ལེ་ནཱ་མ། བོད་སྐད་དུ། རིན་པོ་ཆེ་དབང་གི་ཕྲེང་བ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་དཔལ་རིགས་ལྔའི་གཙོ། །དགའ་རབ་རྡོ་རྗེ་ཤྲཱི་སིངྷ་དང་། །ཨོ་རྒྱན་ཡབ་ཡུམ་གཉིས་ལ་ཕྱག་འཚལ་ལོ། །མཁའ་འགྲོ་སྙིང་ཏིག་གསང་བའི་སྙིང་པོ་ལས། །གཞི་ཉིད་འབྲས་བུར་སྨིན་བྱེད་ཟབ་མོའི་ལམ། །རྒྱལ་བའི་ཡོན་ཏན་མ་ལུས་སྒྲུབ་བྱེད་པ། །རིན་ཆེན་དབང་གི་ཕྲེང་བ་བཤད་པར་བྱ། །

དེ་ལ་བཅུད་ཁྱད་པར་ཅན་སྒྲུབ་པ་ལ་སྣོད་དྲི་མ་མེད་པ་དགོས་པས། ཨཱཿཐོག་མར་དེ་བསྒྲུབ་པའི་ཕྱིར་དབེན་ཞིང་ཡིད་དང་མཐུན་པའི་གནས་སུ་ཞི་ཁྲོའི་ཐང་ཀ་ལ་སོགས་པ་དཀོན་མཆོག་གི་རྟེན་བཀྲམ་པའི་མདུན་དུ། མཎྜལ་གྱི་དབུས་མར་མེ་ཆེ་བ་གཅིག་གི་མཐར་སྣང་གསལ་གྱི་ཕྲེང་བ་ཅི་ཙམ་འབྱོར་པས་བསྐོར་བའི་མཐར་ཕྱི་ནང་གི་མཆོད་པ་ཚོགས་དང་བཅས་པ་ལེགས་པར་བཤམས་ལ། ཐམས་ཅད་ཁྲུས་བྱས་ཏེ་གྲལ་ལ་འཁོད་པ་ན། བླ་མས་རྣལ་འབྱོར་པ་རྣམས་ལ། རྡོ་རྗེ་སེམས་དཔའི་སྒོམ་བཟླས་ཕོག་ནས་ཡི་གེ་བརྒྱ་པ་བརྗོད་པའི་ཚེ། བླ་མ་ཉིད་སྐད་ཅིག་གིས་སློབ་དཔོན་པདྨ་ཐོད་ཕྲེང་རྩལ་མཐིང་ནག་རྡོ་རྗེ་དང་དྲིལ་བུ་འཛིན་པའི་པང་དུ་མཁར་ཆེན་བཟའ་འཚོ་རྒྱལ་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། གཉིས་ཀ་རིན་པོ་ཆེ་དང་རུས་པས་བརྒྱན་པ། རྡོ་རྗེའི་སྐྱིལ་མོ་ཀྲུང་དུ་བཞུགས་པ་ལ། མཁའ་འགྲོ་དཔག་ཏུ་མེད་པས་བསྐོར་བར་བསམ་པའི་འོད་ཀྱིས། ནུབ་ཕྱོགས་ཨོ་རྒྱན་ནས་དེ་ཁོ་ན་འདྲ་བའི་ཡེ་ཤེས་པ་སྤྱན་དྲངས་ལ་མཆོད་པས་མཆོད་དེ། བདག་ལ་ཐིམ་པར་བསམ། ཨོཾ་བཛྲ་གུ་རུ་པདྨ་ཐོད་ཕྲེང་རྩལ་ཨཱཿཧཱུྃ། ཞེས་ཅི་འགྲུབ་བཟླས་ཏེ། སྣང་སྲིད་ཐམས་ཅད་སྟོང་པའི་ངང་ལས་འོག་མིན་གྱི་ཞིང་ཁམས་འོད་ཟེར་ལྔའི་རང་བཞིན་དུ་གསལ་བའི་དབུས་ན། གཞལ་ཡས་ཁང་སྒོ་རྟ་བབས་དྲྭ་བ་དང་དྲྭ་བ་ཕྱེད་པ་ལ་སོགས་པས་མཛེས་པ། འོག་ཞི་བ་ལ་སྟེང་ཁྲོ་བོའི་དཀྱིལ་འཁོར་དུ་གསལ་བཏབ་ལ། རྡོ་རྗེ་དྲིལ་བུ་འཛིན་པས་དབྱངས་དང་བཅས་ཏེ། ཧཱུྃ་མ་ལུས་སེམས་ཅན་ཀུན་གྱི་མགོན་གྱུར་(༥༥)ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་གཟིགས་གྱུར་པའི། །ཞི་ཁྲོ་རབ་འབྱམས་འཁོར་བཅས་གནས་འདིར་གཤེགས། །ཞེས་པས། སྟེང་གི་ནམ་མཁར་བྱོན་པ་ལ་མཆོད་ཅིང་བསྟོད་ནས། ཛཿཧཱུྃ་བྃ་ཧོཿས་དམ་ཚིག་པ་དང་གཉིས་སུ་མེད་པར་བསམ་ལ། ཉམས་ཆག་བསྐང་བ་སྣང་གསལ་གྱི་མཆོད་པ་ཐོག་མར་དབུལ་ཏེ། སྤྲིན་མེད་མཁའ་ལ་ཉི་ཤར་ཇི་བཞིན་དུ། །དྲི་མེད་འོད་གསལ་གདོད་ནས་དག་པའི་ཆོས། །ཤེས་རབ་གཟི་ལྡན་དཔལ་གྱི་སྒྲོན་མེ་འདི། །ཞི་ཁྲོ་རབ་འབྱམས་དཀྱིལ་འཁོར་ལྷ་ལ་འབུལ། །ཉམས་དང་སྒྲིབ་པའི་རང་བཞིན་ཅི་མཆིས་པ། །མ་ལུས་སྦྱང་ཕྱིར་ཐུགས་རྗེས་བཞེས་མཛོད་ལ། །གཉིས་མེད་དོན་གྱི་ཡེ་ཤེས་ཆེན་པོ་ཡིས། །ཚངས་པ་ཆེན་པོའི་དངོས་གྲུབ་སྩལ་དུ་གསོལ། །ཨོཾ་བཛྲ་བཱ་རཱ་ཧཱི་ཨཱ་ལོ་ཀེ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་བརྗོད་ནས། དམ་ཚིག་སྐོང་བ་ཕྱིའི་མཆོད་པ་ནི། འཇིག་རྟེན་འདི་འམ་གཞན་དག་ན། །མེ་ཏོག་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །ཞི་ཁྲོ་རབ་འབྱམས་ཚོགས་ལ་འབུལ། །ཨོཾ་བཛྲ་བཱ་རཱ་ཧཱི་པུཥྤེ། དེ་བཞིན་དུ། བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་རྣམས་ཀྱང་སོ་སོའི་སྔགས་དང་ཕྱག་རྒྱས་དབུལ་ལོ། །དེ་ནས་སོར་ཆུད་པ་ནང་གི་མཆོད་པ་ནི། དུང་ཆེན་ཡེ་ཤེས་ལྔ་ཡི་གཞལ་ཡས་སུ། །རྩ་བརྒྱད་སྟོང་ལ་སྦྱར་བའི་ཨ་མྲྀ་ཏ། །དུས་གསུམ་རྒྱལ་བ་རྒྱ་མཚོ་མཉེས་མཛད་འདིས། །ཞི་ཁྲོ་རབ་འབྱམས་དཀྱིལ་འཁོར་མཉེས་གྱུར་ཅིག །ཨོཾ་བཛྲ་བཱ་རཱ་ཧཱི་ཨ་མྲྀ་ཏ་ཨཱཿཧཱུྃ། ཡེ་ནས་རྣམ་དག་རྒྱལ་བ་མཉེས་མཛད་མ། །མེ་ཏོག་བདུག་སྤོས་སྣང་གསལ་སྣ་ཚོགས་དྲི། །སྒེག་མོ་ཕྲེང་ཐོགས་གླུ་གར་ཡིད་འོང་མ། །ཞི་ཁྲོ་རབ་འབྱམས་དཀྱིལ་འཁོར་མཉེས་གྱུར་ཅིག །ཨོཾ་བཛྲ་བཱ་རཱ་ཧཱི་ཧཱུྃ་ཏྲཱྃ་ཧྲཱི་ཨཱཿཧཱུྃ། ཞེས་པས་མཆོད་ནས། སྐུ་གསུང་ཐུགས་ཉིད་མི་འགྱུར་ཀུན་ཏུ་བཟང་། །བདེ་གཤེགས་བླ་མ་རྣམས་ལ་ཕྱག་འཚལ་བསྟོད། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །ལོངས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །མ་སྐྱེས་ཆོས་ཉིད་དག་པའི་ཕོ་བྲང་ནས། །ཞི་དང་ཁྲོ་ཚུལ་ཐབས་མཁས་ཐུགས་རྗེའི་ལྷ། །ཐུགས་(༥༦)རྗེ་ཆེན་པོས་འགྲོ་བའི་དོན་མཛད་པ། །ཞི་ཁྲོ་རབ་འབྱམས་ཚོགས་ལ་ཕྱག་འཚལ་བསྟོད། །ཅེས་པས་བསྟོད་དེ། ངང་ཉིད་ཡེ་ནས་སྤྲོས་དང་བྲལ་བ་ལ། །བཤགས་དང་བཤགས་པར་བྱ་བ་མི་དམིགས་ཀྱང་། །ཀུན་རྫོབ་སྒྱུ་མ་ཙམ་དུ་བཤགས་པར་བགྱི། །ཚངས་པ་ཆེན་པོའི་དངོས་གྲུབ་སྩལ་དུ་གསོལ། །ཅེས་པ་དང་། ཡེ་ཤེས་སྐུ་མཆོག་ཚར་གཅིག་གཉིས་གསུམ་བརྗོད་པའི་རྗེས་ལ། རྣལ་འབྱོར་པ་རྣམས་ལངས་ཏེ་ལུས་ངག་ཡིད་གསུམ་གྱི་འགྱོད་ཚངས་ཐམས་ཅད་འཕྲལ་དག་པར་བསམ་ཞིང་། བརྐྱངས་ཕྱག་འཚལ་བས། ན་རག་གི་སྐོང་བ་རྒྱས་པ་ཚར་གཅིག །འབྲིང་བདུན། ཆུང་བ་ཡིན་ན་ཉི་ཤུ་རྩ་གཅིག་གི་བར་དུ་བརྗོད་ནས་བཤགས་པ་བྱས་པས། སྒྲིབ་པ་དང་ཉམས་ཆག་མ་བསྐང་བའི་ཕྱོགས་ནས་མར་མེ་མི་གསལ་ཞིང་ངན་ལ། བསྐངས་པ་དང་དམ་ཚིག་གཙང་བའི་ངོས་ཀྱི་མར་མེ་གསལ་བས་ཐམས་ཅད་མ་བསྐངས་ཀྱི་བར་དུ་འགྱོད་ཚངས་ཀྱི་བཤགས་པ་བྱའོ། །དེ་ནས་ཐམས་ཅད་ཀྱིས་ཡེ་ཤེས་སྐུ་མཆོག་ཚར་གསུམ་བརྗོད་ལ། ཕྱི་ནང་གི་མཆོད་པ་དང་བསྟོད་པ་བྱས་ཏེ། ཚོགས་ཀྱི་དགའ་སྟོན་ཆེར་བྱའོ། །དེས་ནི་དམ་ཚིག་གི་ཉམས་ཆག་དང་སྡིག་སྒྲིབ་ཐམས་ཅད་དག་པར་བྱེད་པའི་སྤྱི་ཁྲུས་ཆེན་མོ་ཡིན་པས་ཕན་ཡོན་དཔག་ཏུ་མེད་དོ། །རྗེས་ལ་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད་པ་སྟེ་སྣོད་ཁྱད་པར་ཅན་དུ་སྒྲུབ་པའོ། །

ཨཱཿགཉིས་པ་བཅུད་ཁྱད་པར་དུ་བསྒྲུབ་པའི་ཕྱིར། དབང་དངོས་བསྟན་པ་ལ་བརྒྱད་ལས། དང་པོ་བྱིན་རླབས་ཀྱི་སྒོ་དབྱེ་བ་མཁའ་འགྲོ་བརྡའི་དབང་ལ་གསུམ་ལས། སྔོན་འགྲོ་ནི། ཚོགས་གཏོར་རྒྱ་ཆེར་བཤམས་ཏེ། བདུད་རྩིའི་ཆུས་ཁྲུས་བྱས་ཏེ་གྲལ་འཁོད་པ་ལ་བགེགས་བསྐྲད་དེ་དྲིའི་ཐིག་ལེ་གནས་གསུམ་དུ་བཀོད་ནས། དངོས་གཞི་ནི་བླ་མས་རང་ཉིད་བླ་མ་ཡབ་ཡུམ་དུ་གསལ་བཏབ་སྟེ། སློབ་མ་རྣམས་པད་ཟླའི་སྟེང་ན་གཡུང་དྲུང་འཁྱིལ་པའི་སྟེང་ན་ཧྲཱིཿལས་རྡོ་རྗེ་ཕག་མོ་གཅེར་བུ་གྲི་གུག་དང་ཐོད་པ་འཛིན་པ་གཡོན་བརྐྱངས་གཡས་བསྐུམས་པའི་རྟིང་པ་བྷ་ག་ལ་གཏད་པ་ནམ་མཁའི་དཀྱིལ་ན་ཡོད་པར་སྒོམ་དུ་བཅུག་པའི་རྗེས་ལ། བླ་མས་སྟེང་གི་ནམ་མཁའ་ནས་རྡོ་རྗེ་ཕག་མོ་མཁའ་འགྲོ་དཔག་ཏུ་མེད་པས་བསྐོར་བ་སྤྱན་དྲངས་ལ། དམིགས་པ་དཔོད་དེ་སློབ་མའི་སྙིང་གར་ཐིམ་པར་བསམ་ཞིང་། གཡུང་དྲུང་འཁྱིལ་པ་འཁོར་བ་ལ་(༥༧)དམིགས་པ་འཛིན་དུ་གཞུག་གོ། །ཡང་ཤར་དང་། ལྷོ་དང་། ནུབ་དང་། བྱང་ནས་རྡོ་རྗེ་མཁའ་འགྲོ་དང་། རིན་ཆེན་མཁའ་འགྲོ་དང་། པདྨ་མཁའ་འགྲོ་དང་། ལས་ཀྱི་མཁའ་འགྲོ་རྣམས་བྱོན་པ། སྤྱི་བོ་དང་། མགྲིན་པ་དང་། ལྟེ་བ་དང་། གསང་བར་ཐིམ་པར་བསམ་ཞིང་། གཡུང་དྲུང་འཁྱིལ་པ་འཁོར་བས་ནམ་མཁའ་ན་ཕར་བུན་བུན་ཡོད་པ་ལ་དམིགས་པ་འཛིན་དུ་འཇུག །ཨོཾ་བྷུདྡྷ་ཌཱ་ཀི་ནི་ཧ་རི་ནི་ས། ས་མ་ཡ་ཛ་ཛ། བཛྲ་པྲ་ཝེ་ཤ་ཧོཿདེ་བཞིན་དུ། བཛྲ་རཏྣ་པདྨ་ཀརྨ་ས་མ་ཡ་ཌཱ་ཀི་ནི་ཧ་རི་ནི་ས་ས་མ་ཡ་ཛ་ཛཿཔྲ་ཝེ་ཤ་ཧོཿཔྲ་ཝེ་ཤ་ཧོཿཞེས་དྲག་ཏུ་བརྗོད་ཅིང་རོལ་མོའི་སྒྲ་ཆེར་བསྒྲག་ཅིང་ཚིལ་ཆེན་གྱི་དུད་པས་བདུག་གོ། །དེས་ན་འཁྲབ་པ་དང་། ངུ་བ་དང་། འདར་བ་ལ་སོགས་པ་ཡེ་ཤེས་ཕེབས་པའི་རྟགས་འོང་ངེས་སོ། །དེ་རྗེས་ཚོགས་ལ་རོལ་ཞིང་དགའ་སྟོན་དང་བཀྲ་ཤིས་བྱའོ། །དེས་ནི་མཁའ་འགྲོའི་བྱིན་རླབས་འཇུག་ཅིང་དབང་གི་སྒོ་ཕྱེ་བས་བར་ཆད་མེད་ཅིང་དངོས་གྲུབ་ཕུན་སུམ་ཚོགས་པར་འབྱུང་ངོ་། །

གཉིས་པ་ལུས་ཀྱི་སྒྲིབ་པ་སྦྱང་ཞིང་སྤྲུལ་པའི་སྐུར་གྲོལ་བར་བྱེད་པ་སྤྲོས་བཅས་བུམ་པའི་དབང་ལ་གསུམ་ལས། སྔོན་འགྲོ་ཐུན་མོང་བ་དང་། ཐུན་མོང་མ་ཡིན་པ་གཉིས་ལས། དང་པོ་ནི་མཁའ་འགྲོ་བརྡ་དབང་གི་རྗེས་ཉིད་ལ་གསོལ་བ་གདབ་པ་ནི། སློབ་མས་མེ་ཏོག་དོར་ལ་ཕྱག་འཚལ་ཏེ་མགྲིན་གཅིག་ཏུ། ཀྱེ་ཀུན་བཟང་རྡོ་རྗེ་འཛིན་པ་ཆེ། །ཡེ་ཤེས་ལྔ་ནི་ཐོབ་བྱའི་ཕྱིར། །རིགས་ལྔའི་དབང་མཆོག་བཤད་དུ་གསོལ། །ཅེས་པ་གསུམ་གྱི་རྗེས་ལ་བླ་མས། ཀྱེ་རིགས་ཀྱི་བུ་མཆོག་ཁྱེད་རྣམས་ཀྱིས། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་དང་ནི་རྡོ་རྗེའི་སྤུན། །ཚོགས་མཆོད་ཡོན་གྱིས་མཉེས་ནུས་སམ། །ཞེས་དྲིས་པའི་ལན་དུ་སློབ་མས། ཀྱེ་ཇི་ལྟར་ཐུགས་ཀྱིས་དགོངས་མཛད་པ། །བདག་གིས་མ་ལུས་བསྒྲུབ་ལགས་པས། །དཔའ་བོས་བདག་ལ་གནང་དུ་གསོལ། །ཞེས་ཞུའོ། །དེ་ནས་སློབ་མ་རྣམས་ཡི་གེ་བརྒྱ་པའི་བསྒོམ་བཟླས་ཅུང་ཟད་རེ་བྱེད་དུ་བཅུག་ནས། བླ་མའི་ཐུགས་ཀའི་ཧཱུྃ་ལས་འོད་འཕྲོས་པས་སློབ་མའི་སྙིང་གར་ཕོག་པས་ལུས་ཐམས་ཅད་རྡོ་རྗེའི་གོ་ཁྲབ་ཀྱིས་གཡོགས་པར་བསྒོམ་དུ་བཅུག་ལ། དཔོན་སློབ་ཀུན་ཧཱུྃ་གི་སྒྲ་སྐད་དི་རི་རི་བཟླས་པས། སྟེང་འོག་ཐམས་ཅད་རྡོ་རྗེའི་རྭ་བ་གུར་བླ་རེ་མདའི་ར་བ་ཡེ་ཤེས་ཀྱི་མེ་རི་མེ་དཔུང་འབར་བའི་སྲུང་འཁོར་དར་ཅིག་བསྒོམས་ནས། དམ་ཚིག་སྦྱིན་པ་ནི་བླ་མས། ཀྱེ་མ་རིགས་ཀྱི་བུ་ཁྱོད་ཀྱིས། །དམ་ཚིག་རྒྱུད་(༥༨)ལ་གནས་འདོད་ན། །ཐབས་ཤེས་གཉིས་ཀྱི་དམ་ཚིག་ཏུ། །མཚན་མ་ལ་ནི་མི་འགོངས་དང་། །རྡོ་རྗེ་སློབ་དཔོན་མལ་ཆ་དང་། །རྡོ་རྗེ་སྤུན་ལ་རྩོད་མི་བྱ། །དེ་ལྟར་བསྲུང་བར་ནུས་གྱུར་ཏམ། །ཞེས་པའི་ལན་དུ་སློབ་མས། ཀྱེ་སངས་རྒྱས་ཐམས་ཅད་འདུས་པ་ཡི། །རྡོ་རྗེ་འཛིན་པའི་བཀའ་བཞིན་དུ། །བདག་ཅག་རྣམས་ནི་བསྲུང་བར་འཚལ། །ཞེས་བརྗོད་དོ། །དེ་ནས་དགའ་སྟོན་བྱའོ། །

གཉིས་པ་ཐུན་མོང་མ་ཡིན་པའི་སྔོན་འགྲོ་ལ་སའི་ཆོ་ག །ལེགས་པར་བཤམ་པ། སྟ་གོན་བྱ་བ་དང་གསུམ་ལས། དང་པོ་ནི་གཞི་བདག་ལ་གཏོར་མ་སྦྱིན་ལ་ས་བསླངས་ཏེ། མཎྜལ་པདྨ་འདབ་མ་བཞི་པ་ལ་དྲིའི་ཐིག་ལེ་དང་མེ་ཏོག་གི་ཚོམ་བུ་པྲི་ཐི་ཝི་དེ་ཝཱི་ཧྲཱིཿཞེས་པ་བཀོད་ལ། ཆུ་གཉིས་སྔོན་དུ་འགྲོ་བས་མཆོད་པ་ལྔ་དང་གཏོར་མ་གསུམ་བཤམས་ཏེ། རང་ཉིད་ས་གནོན་བྱས་པའི་སྲིན་ལག་ལས་འོད་ཟེར་འཕྲོས་པས་འོག་ཏུ་སོང་བས་སའི་ལྷ་མོ་བརྟན་མ་སེར་མོ་རིན་པོ་ཆེའི་བུམ་པ་ཐུགས་ཀར་འཛིན་པ། ཕག་རྒོད་ལ་ཆིབས་པ་ལ་ས་བདག་ཀླུ་གཉན་གྱིས་བསྐོར་བ་སྤྱན་དྲངས་ཏེ་བཞུགས་པར་བསམས་ལ། ལྷ་མོ་ཆེན་མོ་ས་བདག་འཇིག་རྟེན་ཡུལ། །རིན་ཆེན་རྫོགས་དབང་མཆོག་གི་རྒྱན་གྱིས་བརྒྱན། །དོ་ཤལ་རྐང་གདུབ་སྒྲ་སྒྲོགས་སེམས་དཔས་མཆོད། །མཆོད་ཡོན་འདི་བཞེས་འདི་རུ་བྱིན་བརླབ་མཛོད། །ཨཱ་པྲི་ཐི་ཝཱི་དེ་ཝཱི་ས་མ་ཡ་ཛཿཧཱུྃ་བྃ་ཧོཿ དྲི་མེད་ཡིད་དུ་འོང་བ་ཡི། །ལྷ་རྫས་དམ་པའི་མཆོད་ཡོན་འདི། །ལྷ་མོ་ལ་ནི་འབུལ་བར་བགྱི། །ས་འདི་བདག་ལ་གནང་དུ་གསོལ། །ཨཱ་པྲི་ཐི་ཝི་དེ་ཝཱི་ཨརྒྷཾ་པྲ་ཏཱིཙྪ་ཡེ་སྭཱ་ཧཱ། ཞེས་པ་ནས། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་རྣམས། པུཥྤེ། དྷཱུ་པེ། ཨཱ་ལོ་ཀེ། གྷནྡྷེ། ནཻ་ཝི་ཏེ། ཤཔྟ་པྲ་ཏཱིཙྪ་ཡེ་སྭཱ་ཧཱས་མཆོད་ལ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེངྒེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །བདག་རྡོ་རྗེ་འཛིན་པ་ཆེ་གེ་མོ་ཞེས་བྱ་བས་སའི་ཕྱོགས་འདིར་སེམས་ཅན་གྱི་དོན་དུ་དཀྱིལ་འཁོར་ཆེན་པོ་བཞེང་གིས། ལྷ་མོ་ཁྱོད་ཀྱིས་སའི་ཕྱོགས་འདི་བདག་ལ་གནང་བར་མཛོད་ཅིག །ཅེས་བརྗོད་པས། དེས་ཀྱང་རིག་པ་འཛིན་པ་ཁྱོད་ཀྱིས་ཅི་དགའ་བར་སྤྱོད་ཅིག །ཅེས་གསུངས་པར་(༥༩)བསམས་ལ། གཏོར་མ་གཅིག་ཨ་ཀཱ་རོས་ལྷ་མོ་ལ་འབུལ། གཅིག་དཀར་པོའི་ཕྱོགས་ལ་བྱིན་ནས། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བགྱི། །དཀྱིལ་འཁོར་དོན་དུ་སྩལ་དུ་གསོལ། །དཀྱིལ་འཁོར་ཆེན་པོའི་བྱ་བ་མཐར་ཕྱིན་པའི་གྲོགས་རྒྱ་ཆེན་པོ་མཛད་དུ་གསོལ། ཞེས་བརྗོད་དོ། །གཅིག་ནག་པོའི་ཕྱོགས་ལ་བྱིན་ནས། ས་ཕྱོགས་འདི་ནི་སློབ་དཔོན་བདག །དཀྱིལ་འཁོར་རྒྱལ་པོ་སྒྱུ་འཕྲུལ་ནི། །བཞེང་གིས་ས་འདིར་གནས་པའི་བགེགས། །འདི་རུ་མ་འདུག་གཞན་དུ་དེངས། །ཨོཾ་སུཾ་བྷ་ནི་སུཾ་བྷ་ཧཱུྃ། གྷྲི་ཧྣ་གྷྲི་ཧྣ་ཧཱུྃ། གྷྲི་ཧྣ་པ་ཡ་གྷྲི་ཧྣ་པ་ཡ་ཧཱུྃ། ༀ་ཨཱ་ན་ཡ་ཧོ། བྷ་ག་ཝཱན། བཱིདྱ་རཱ་ཛ་ཧཱུྃ་ཕཊ། ཅེས་བརྗོད་ལ། ཨོཾ་བཛྲ་མུས། ལྷ་མོ་འཁོར་བཅས་གཤེགས། བགེགས་བསྐྲད་ནས། གྱོ་མོ་དང་རུས་པ་ལ་སོགས་པ་བསལ་ནས་ས་མཉེན་བཟང་པོའི་སྟེགས་བུ་འདོམ་གང་པ་ལ་སོགས་པ་ཇི་ལྟར་འོས་པ་མེ་ལོང་གི་ངོས་ལྟར་སྙོམས་པ་ལ་ཤར་དང་བྱང་ཅུང་ཟད་གཞོལ་བའི་སྟེང་དང་འཁོར་ཡུག་ཏུ། ལག་མཐིལ་གཡས་པས་བསྐོར་ཞིང་། ཨོཾ་ཧ་ན་ཧ་ན་ཧཱུྃ་ཕཊ། ཅེས་བརྗོད་པས། ལག་པ་ལས་འོད་ཟེར་བྱུང་ནས་མ་དག་པ་སྦྱངས། ཨཱ་བྷུ་ཁཾ་ཞེས་བརྗོད་པས་ཕྱོགས་ཐམས་ཅད་ནམ་མཁར་གྱུར། ཨཱ་མེ་དྷི་ནི་བཛྲི་བྷ་ཝ་བྷནྡྷ་ཧཱུྃ་ཧཱུྃ་ཕཊ་ཀྱིས་ས་ཕྱོགས་ཐམས་ཅད་རྡོ་རྗེའི་རང་བཞིན་དུ་གྱུར། ཨོཾ་བཛྲ་རཀྵ་རཀྵ་ཧཱུྃ་གིས་བསྲུང་ཞིང་བརྟན་པར་བྱའོ། །དེ་ནས་རྡོ་རྗེ་དང་དྲིལ་བུ་འཛིན་པས། ཧཱུྃ་གི་གླུ་བླང་ཞིང་། རྡོ་རྗེའི་གར་བསྒྱུར་བས་རྐང་པ་གཡས་བསྐུམ་གཡོན་བརྐྱང་བ་དང་དོར་སྟབས་སུ་དཀྱིལ་འཁོར་ལ་བསྐོར་ཞིང་ཁྲོ་བོའི་དམིགས་པ་གསལ། རྡོ་རྗེ་དྲིལ་བུ་དཔུང་མགོར་ཐོད་དབྱུག་གདེངས་པ་ལྟར་བྱ་བ་དང་། འཁོར་ལོ་ལྟར་བསྐོར་བ་དང་། མདའ་ལྟར་འཕངས་པ་དང་། ལྕགས་ཀྱུ་ལྟར་བཀུག་པ་དང་། ཞགས་པ་ལྟར་འཕངས་པ་དང་། གཙོ་བོ་ལྔ་དང་སྒོམ་བཞིའི་སྔགས་སུམ་བྷ་ནི་དང་བཅས་པ་བརྗོད་དོ། །སའི་ཆོ་གའོ། །དེ་ཡང་བ་གླང་ལྷས་དང་ཁང་པ་དང་། གཙུག་ལག་ཁང་ལ་སོགས་པ་སྔར་ནས་ས་དུལ་བ་རྣམས་སུ་ནི་མི་དགོས་ལ། མ་དུལ་བ་རྣམས་སུ་བྱའོ། །

གཉིས་པ་ལེགས་པར་བཤམས་པ་ནི་མཎྜལ་གྱི་སྟེང་དུ་དྲིའི་ཐིག་ལེ་དང་མེ་ཏོག་གི་ཚོམ་བུ་ལྷའི་གྲངས་དང་མཉམ་པ་དགོད་ཅིང་ལྷ་སོ་སོའི་ས་བོན་ནམ་རྩ་སྔགས་བརྗོད། བླ་བྲེ་དང་ཡོལ་བ་ལ་སོགས་པས་བརྒྱན་ཅིང་། རིན་པོ་ཆེ་(༦༠)འམ། རྫའི་བུམ་པ་ཡིན་ན་ལྔ་ནི་དབང་བསྐུར་བ་རྣམ་པར་རྒྱལ་བའི་བུམ་པ་ཡིན་པས་རིགས་ལྔའི་ཁ་དོག་ཏུ་བསྒྱུར་བ་ལ་སོ་སོའི་ཕྱག་མཚན་ནམ། ས་བོན་གྱི་ཡི་གེའི་མཚན་མ་གདབ། ལས་བུམ་དཀར་པོ་བྱ། དེ་རྣམས་ལ་བགེགས་བསྐྲད། གུ་གུལ་གྱིས་བདུག་ཅིང་ཉུང་ཀར་གྱིས་བྲབ་ལ་ཆུ་གཙང་མས་སུམ་གཉིས་ཙམ་བཀང་ལ། འབྲུ་ལྔ། བདུད་རྩི་ལྔ། རིན་པོ་ཆེ་ལྔ། སྨན་ལྔ། དྲི་ལྔ་སྟེ་ལྔ་ལྔ་ཉི་ཤུ་རྩ་ལྔའི་བུམ་རྫས་བླུགས། དར་རམ་རས་དམར་པོས་མགུལ་བཅིངས། དཔག་བསམ་གྱི་ཤིང་གིས་ཁ་བརྒྱན། རྡོ་རྗེ་གཟུངས་ཐག་དང་བཅས་པས་བརྒྱན་པ་སྟེགས་མཐོ་བའི་སྟེང་དུ་བཞག །སྟེགས་བུའི་མཐའ་སྐོར་དུ་ཕྱི་ནང་གི་མཆོད་པ་རྣམས་རྒྱ་ཆེར་བཤམས། གཞན་ཡང་རྡོ་རྗེ་དང་། དྲིལ་བུ་དང་། ཀུ་ཤ་དང་། སྲུང་སྐུད་དང་། བདུད་རྩི་ལྔའི་རིལ་བུ་དང་། སོ་ཤིང་ལ་སོགས་པ་འདིར་དགོས་པའི་ཡོ་བྱད་རྣམས་ཚོགས་པར་བྱའོ། །

གསུམ་པ་སྟ་གོན་དུ་བྱ་བ་ལ་གསུམ་ལས། དང་པོ་བུམ་པ་སྟ་གོན་ནི། རང་ཉིད་སྐད་ཅིག་གིས་རང་བཞིན་གཞི་ཡི་ཀུན་ཏུ་བཟང་པོ་ཡབ་ཡུམ་མཐིང་ག་རྡོ་རྗེ་དང་དྲིལ་བུ་འཛིན་པར་བསམས་ལ། ཀུ་ཤས་ཐོད་པ་ནས་བདུད་རྩིའི་བསང་ཆུ་གཏོར་ལ། ཨོཾ་བཛྲ་ཨ་མྲི་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཅེས་ལན་གསུམ་བརྗོད་ནས། ཨོཾ་སྭ་བྷ་ཝ་ཤུདྡྷོཿསརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། ཕྱི་དང་ནང་གིས་བསྡུས་པའི་ཆོས་ཐམས་ཅད་སྟོང་པ་ཆེན་པོ། སྟོང་པའི་ངང་ལས་པྃ་ལས་པདྨ་དང་རཾ་ལས་ཉི་མ་དང་ཨ་ལས་ཟླ་བའི་སྟེང་དུ། བྷཱུྃ་ྃ་ཡོངས་སུ་གྱུར་པ་ལས་རྣམ་པར་རྒྱལ་བའི་བུམ་པ་ལྔ། ལས་ཐམས་ཅད་པའི་བུམ་པ་དང་བཅས་པ། རིན་པོ་ཆེ་སྣ་ཚོགས་ཀྱི་རང་བཞིན་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མཆུ་འཕྱངས་པ། མགྲིན་པ་ཕྲ་བ། ལྷའི་གོས་པཉྩ་ལི་ཀའི་མགྲིན་པ་དཀྲིས་ཤིང་དཔག་བསམ་གྱི་ཤིང་གིས་ཁ་བརྒྱན་པ། མཐིང་ག་དང་། དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོའི་རང་བཞིན་ཐམས་ཅད་ཀྱང་ཕྱི་བུམ་པའི་དབྱིབས་ཅན་ལ་ནང་ལྷའི་གཞལ་ཡས་ཁང་ཆེན་པོ། འོད་ཟེར་རབ་ཏུ་འཕྲོ་བའི་ནང་རྣམས་ན། སེང་གེ་དང་། གླང་པོ་དང་། རྟ་མཆོག་དང་། རྨ་བྱ་དང་། ཤང་ཤང་དང་རིན་པོ་ཆེའི་ཁྲི་སྟེགས་རྣམས་སུ། པྃ་ལས་པདྨ། ཨ་ལས་ཟླ་བ། རྃ་ལས་ཉི་མའི་སྟེང་དུ། ཨོཾ་ཧཱུྃ་ཏྲཱྃ་ཧྲཱིཿཨཱཿཧཱུྃ། ཨེ་པཾ་ལཾ་རཾ་ཡཾ་བཾ་ལས། རྣམ་པར་སྣང་མཛད་དབྱིངས་ཀྱི་དབང་ཕྱུག་མ། །མི་བསྐྱོད་པ་དང་སངས་རྒྱས་སྤྱན་མ་དང་། །རིན་ཆེན་འབྱུང་ལྡན་རྡོ་རྗེ་མཱ་མ་ཀཱི། །འོད་དཔག་མེད་དང་རྡོ་རྗེ་(༦༡)གོས་དཀར་མོ། །དོན་ཡོད་གྲུབ་པ་དམ་ཚིག་སྒྲོལ་མ་དང་། །རྡོ་རྗེ་སེམས་དཔའ་རྡོ་རྗེ་སྙེམས་མ་སྟེ། །ཀུན་ཀྱང་ཞལ་སྦྱོར་སྐྱིལ་ཀྲུང་རིན་ཆེན་བརྒྱན། །ཡབ་རྣམས་ཕྱག་གཡས་འཁོར་ལོ་རྡོ་རྗེ་དང་། །རིན་ཆེན་པདྨ་རྒྱ་གྲམ་རྡོ་རྗེ་དང་། །གཡོན་རྣམས་དྲིལ་བུ་ཡུམ་ལ་འཁྱུད་པ་སྟེ། །ཡུམ་རྣམས་གྲི་གུག་ཐོད་པས་ཡབ་ལ་འཁྱུད། །སྣང་ལ་རང་བཞིན་མེད་པའི་ཆུ་ཟླ་འདྲ། །སྟེང་གི་ནམ་མཁའ་ལས་དེ་བཞིན་གཤེགས་པ་རིགས་ལྔ་རྡོ་རྗེ་སེམས་དཔའ་དང་བཅས་པ་ཡབ་ཡུམ་བྱོན་པ་ལ། ཨརྒྷཾ་པ་ཏྱཾ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནེ་ཝི་ཏྱ་ཤཔྟ་ཨཱཿཧཱུྃ། ཛཿཧཱུྃ་བྃ་ཧོ། ལྷ་སོ་སོའི་བུམ་པའི་ལྷ་དང་གཉིས་སུ་མེད་པར་ཐིམ། དེ་ཐམས་ཅད་ཀྱི་སྤྱི་བོར་ཨཱ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཧཱུྃ་ཧཱུྃ་གིས་རྡོ་རྗེའི་གོ་ཞུབས་དང་ལྡན། ཨོཾ་ཧཱུྃ་ཏྲཱྃ་ཧྲཱི་ཨཱ། དེ་བཞིན་གཤེགས་པ་ལྔ་སྟེང་གི་ནམ་མཁའ་ལས་རང་བྱོན་ཏེ་རིན་པོ་ཆེའི་བུམ་པ་བདུད་རྩིའི་ཆུས་དབང་བསྐུར་བར་གྱུར། རང་གི་སྙིང་ག་ནས་འོད་ཟེར་བྱུང་བས་གཟུངས་ཐག་ལ་འཁྲིལ་ཏེ་སོང་བས། བུམ་ནང་གི་ལྷ་སོ་སོའི་སྐུ་ལ་ཕོག །ཐུགས་དམ་གྱི་རྒྱུད་བསྐུལ། སྦྱོར་མཚམས་ནས་བདུད་རྩི་དཀར་དམར་གྱི་རྒྱུན་བབས་པས་བུམ་པའི་ནང་ཁེངས་པར་གྱུར། ཨོཾ་ཛི་ན་ཛིཀ་ལཾ་དེ་ཤྭ་ར་ཏི་སྟྭྃ། ཧཱུྃ་བཛྲ་དྷྲ྇ཀ་མུཾ་དྷརྟུ་ཤྭ་རི་ཏི་སྟྭྃ། སྭཱ་རཏྣ་དྷྲ྇ཀ་མཾ་མོ་ཧ་ར་ཏི་སྟྭྃ། ཨཱྃ་ཨ་རོ་ལིག་པཱཾ་ར་ག་ར་ཏི་སྟྭཾཿ ཧཱ་པྲཛྙཱ་དྷྲ྇ཀ་ཏཾ་བཛྲ་ར་ཏི་སྟྭཾ། ཞེས་རྣམ་རྒྱལ་དང་། ཨོཾ་བཛྲ་སཏྭ་ཧཱུྃ་བཾ་ཞེས་ལས་བུམ་ལ་དམིགས་ཏེ་ཅི་འགྲུབ་བཟླས་ཏེ། འཇིག་རྟེན་འདི་འམ་གཞན་དག་ན། །མཆོད་ཡོན་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་རྣམས། །རིགས་ལྔ་ཡབ་ཡུམ་རྣམས་ལ་འབུལ། །ཨོཾ་སརྦ་ཏ་ཐཱ་ག་ཏ། ཨརྒྷཾ། པཏྱཾ། པུཥྤེ། དྷཱུ་པེ། ཨཱ་ལོ་ཀཻ། གྷནྡྷེ། ནཻ་ཝི་ཏེ། ཤཔྟ་ཨཱཿཧཱུྃ། ཕུང་པོ་གནས་འགྱུར་ཉོན་མོངས་ལྔ་དག་ཅིང་། །སྐུ་ལྔ་ཡེ་ཤེས་ལྷུན་གྱིས་གྲུབ་པའི་སྐུ། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །རྡོ་རྗེ་སེམས་དཔའ་སངས་རྒྱས་ཀུན་གྱི་གཙོ། །ཡེ་ཤེས་ཡུམ་གྱུར་རྡོ་རྗེ་སྙེམས་མ་ལ། །རང་བཞིན་ལྷུན་གྱིས་གྲུབ་པས་ཕྱག་འཚལ་བསྟོད། །ཅེས་བསྟོད་ནས། བཛྲ་མུས་ཡེ་ཤེས་པ་གཤེགས། ཨོཾ་ཨཱཿཧཱུྃ་གིས་དམ་ཚིག་པ་ཆུར་ཞུ་བ་ལས་བྱུང་བའི་བདུད་རྩིས་བུམ་པ་ཁེངས་པར་བསམ་མོ། །

གཉིས་པ་ལྷ་སྟ་གོན་ནི། ལས་བུམ་ནས་མེ་ཏོག་ཚོམ་བུ་ལ་བསངས་ཆུ་གཏོར་ཞིང་། ཨ་མྲྀ་ཏ་ལན་གསུམ་བརྗོད་ནས། (༦༢)ཨོཾ་ཡོ་ག་ཤུདྡྷོ་སརྦ་དྷརྨ་ཡོ་ག་ཤུདྡྷོ་སྭཱ་བྷཱ་ཝ་བཛྲ་ཨཱཏྨ་ཀོ྅ཧཾ། ཕྱི་དང་ནང་གི་ཆོས་ཐམས་ཅད་སྟོང་པ། ཨོཾ་སྭཱ་བྷཱ་ཝས་སྟོང་པའི་ངང་ལས་འབྱུང་བ་བཞི་རི་རབ་དང་བཅས་པ་ཡོངས་སུ་གྱུར་པ་ལས། པྃ་ལས་པདྨ་ཨ་ལས་ཟླ་བ། རྃ་ལས་ཉི་མའི་སྟེང་དུ་བྷྲཱུྃ་ལས་ཐར་པ་ཆེན་པོའི་གཞལ་ཡས་ཁང་པ། སྒོ་བཞི། གྲུ་བཞི་རྩིགས་པ་ལྔ་དང་ལྡན་པ་རྣམས་ཀྱང་ནང་ནས་རིམ་པ་བཞིན་མཐིང་ག །དཀར་པོ། དམར་པོ། སེར་པོ། ལྗང་གུ་རྣམས་ཀྱི་སྟེང་ན་རིན་པོ་ཆེའི་ཕ་གུ་སེར་པོ་ལ་དྲྭ་བ་དང་དྲྭ་བ་ཕྱེད་པ་འཕྱངས་པ། དེའི་སྟེང་ན་རྡོ་ཀརྨ་ཤི་ཤ་ལས་གྲུབ་པའི་མདའ་ཡབ་དང་། རིན་པོ་ཆེའི་དྲྭ་མིག་གསེང་མས་བསྐོར་བའི་པུ་ཤུས་མཛེས་པའི་སྟེང་གཙང་ཁང་ཕྱུར་བུའི་རྩེ་མོ་རྡོ་རྗེ་དང་ནོར་བུ་རིན་པོ་ཆེའི་ཏོག་གིས་མཛེས་ཤིང་། ཕྱོགས་བཞིའི་རྟ་བབས་བང་རིམ་བཞི་པཞི་དང་ལྡན་པ་རྣམས་ལ་རིན་པོ་ཆེའི་གདུགས། ཤིན་ཏུ་མཛེས་པའི་རི་དྭགས། ལྷའི་གོས། རྣམ་པར་རྒྱལ་བའི་རྒྱལ་མཚན། ཡིད་དུ་འོང་བའི་འཕན། ཟླ་བ་རླུང་གིས་བསྐྱོད་པ། རྔ་ཡབ་ནོར་བུའི་ཡུ་བ་ཅན་ལ་སོགས་པ་གཞལ་ཡས་ཁང་མཛེས་པར་བྱེད་པའི་རྒྱན་དུ་མས་བརྒྱན་པ། ཕྱི་རོལ་ན་འདོད་ཡོན་གྱི་སྣམ་བུ་ལ་ལྷ་མོ་བཅུ་དྲུག་གིས་མཆོད་རྫས་དུ་མ་ཐོགས་ནས་གཞལ་ཡས་པའི་ལྷ་རྣམས་ལ་མཆོད་པར་བྱེད་པའི་ཕྱི་རོལ་དུ་དུར་ཁྲོད་ཆེན་པོ་བརྒྱད་དང་། སྲུང་བའི་འཁོར་ལོས་བརྒྱན་པ། ནང་ཀ་བ་ཆེན་པོ་བརྒྱད་ཀྱིས་བཏེག་ཅིང་རྡོ་རྗེའི་གདུང་བཞིས་མིག་མངས་རིས་སུ་མཛེས་པར་ཕུབ་པའི། དབུས་སུ་སེང་གེའི་ཁྲི། ཤར་དུ་གླང་པོ་ཆེ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་ཤང་ཤང་། རིན་པོ་ཆེའི་ཁྲི་རྣམས་ཀྱི་སྟེང་དུ་པདྨ་དང་ཟླ་བ་དང་། ཉི་མའི་དབུས་སུ་དེ་བཞིན་གཤེགས་པ་རིགས་རྣམ་པ་ལྔ་སྟེ། ཨཱ་ཨེ་ལས་རྣམ་པར་སྣང་མཛད་དང་། ཀུན་ཏུ་བཟང་མོ་མཐིང་ག་རིན་པོ་ཆེའི་རྒྱན་སྣ་ཚོགས་པས་སྤྲས་ཤིང་། ཧཱུྃ་བྃ་ལས་མདུན་དུ་མི་བསྐྱོད་པ་དང་མཱ་མ་ཀི་དཀར་མོ། ཏྲཱྃ་ལྃ་ལས་གཡས་སུ་རིན་ཆེན་འབྱུང་ལྡན་དང་། སངས་རྒྱས་སྤྱན་མ་སེར་མོ། ཧྲཱིཿརཾ་ལས་རྒྱབ་ཏུ་འོད་དཔག་མེད་དང་གོས་དཀར་མོ། ཨཱཿཡྃ་ལས་གཡོན་དུ་དོན་ཡོད་གྲུབ་པ་དང་དམ་ཚིག་སྒྲོལ་མ་ལྗང་གུ་མཉམ་པར་སྦྱོར་བ། ཡབ་རྣམས་ཀྱི་ཕྱག་གཡས་པ་རྣམས་ན། འཁོར་ལོ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། རྒྱ་གྲམ་རྣམས་བསྣམས་ཤིང་དེ་རྣམས་ཀྱིས་ཡུ་བ་བྱས་པའི་གཡོན་པ་རྣམས་ན་དྲིལ་བུ་འཛིན་པས་ཡུམ་ལ་འཁྱུད་པ། (༦༣)ཡུམ་རྣམས་གྲི་གུག་དང་ཐོད་པ་འཛིན་པས་ཡབ་ལ་འཁྲིལ་བ་དེ་ཐམས་ཅད་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་། ལོངས་སྤྱོད་རྫོགས་པ་སྐུའི་ཆ་ལུགས་ཅན་ནོ། །དེའི་ཕྱི་རོལ་དང་ནང་གི་མཚམས་ཀྱི་གྲ་བཞིར་པདྨ་དང་ཟླ་བ་དང་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུྃ་ཏྲཱྃ་ཧྲཱིཿཨཱཿགཉིས་གཉིས་ཡོངས་སུ་གྱུར་པ་ལས། མེར་ནམ་མཁའི་སྙིང་པོ་དཀར་པོ་གཡས་གཡོན་རལ་གྲི་དང་དྲིལ་བུ་འཛིན་པས་སྒེག་མོ་དཀར་མོ་མེ་ལོང་བསྣམས་པ་དང་མཉམ་པར་སྦྱོར་བ། སྲིན་པོར་ས་ཡི་སྙིང་པོ་སེར་པོ་གཡས་གཡོན་རིན་པོ་ཆེའི་མྱུ་གུ་དང་དྲིལ་བུ་འཛིན་པས་ཕྲེང་བ་མ་སེར་མོ་རིན་པོ་ཆེའི་ཕྲེང་བ་འཛིན་པ་དང་མཉམ་པར་སྦྱོར་བ། རླུང་དུ་སྤྱན་རས་གཟིགས་དམར་པོ་པདྨ་དང་དྲིལ་བུ་འཛིན་པས་གླུ་མ་དམར་སེར་པི་ཝང་འཛིན་པ་དང་མཉམ་པར་སྦྱོར་བ། དབང་ལྡན་དུ་ཀུན་ཏུ་བཟང་པོ་ལྗང་སྐྱ་གཡས་གཡོན་རིན་པོ་ཆེའི་སྙེ་མ་དང་དྲིལ་བུ་འཛིན་པས་གར་མ་ལྗང་གུ་རྡོ་རྗེ་རྩེ་གསུམ་འཛིན་པ་དང་མཉམ་པར་སྦྱོར་བའོ། །ཡང་ཕྱི་རིམ་གྱི་གྲ་བཞིར་པདྨ་དང་ཉི་མའི་སྟེང་དུ་ཧཱུྃ་ཏྲཱྃ་ཧྲཱིཿཨཱཿགཉིས་གཉིས་ཡོངས་སུ་གྱུར་པ་ལས། ཤར་ལྷོར་བྱམས་པ་དཀར་པོ་གཡས་གཡོན་ཀླུ་ཤིང་དང་དྲིལ་བུ་འཛིན་པས་བདུག་སྤོས་མ་དཀར་སེར་བདུག་སྤོས་ཀྱི་གའུ་འཛིན་པ་དང་མཉམ་པར་སྦྱོར་བ། ལྷོ་ནུབ་ཏུ་སྒྲིབ་པ་རྣམ་སེལ་དམར་སེར་གཡས་གཡོན་པུ་ཏི་དང་དྲིལ་བུ་འཛིན་པས་མེ་ཏོག་མ་སེར་མོ་མེ་ཏོག་འཛིན་པ་དང་མཉམ་པར་སྦྱོར་བ། ནུབ་བྱང་དུ་འཇམ་དཔལ་དམར་པོ་གཡས་གཡོན་རལ་གྲི་དང་དྲིལ་བུ་འཛིན་པས་སྣང་གསལ་མ་དམར་མོ་སྣང་གསལ་འཛིན་པ་དང་མཉམ་པར་སྦྱོར་བ། བྱང་ཤར་དུ་ལག་ན་རྡོ་རྗེ་ལྗང་སྐྱ་གཡས་གཡོན་རྡོ་རྗེ་དང་དྲིལ་བུ་འཛིན་པས་དྲི་ཆབ་མ་ལྗང་གུ་དྲིའི་དུང་ཕོར་བསྣམས་པ་དང་སྦྱོར་བའོ། །དེ་ཐམས་ཅད་ཀྱང་སེམས་དཔའི་སྐྱིལ་མོ་ཀྲུང་གིས་བཞུགས་པའི་སྐུ་ལ་དར་དང་རིན་པོ་ཆེའི་རྒྱན་སྣ་ཚོགས་པས་བརྒྱན་པའོ། །དེ་ཐམས་ཅད་ཀྱི་སྒོ་བཞིར་པདྨ་དང་ཉི་མའི་སྟེང་དུ་ཛཿཧཱུྃ་བྃ་ཧོཿགཉིས་གཉིས་ཡོངས་སུ་གྱུར་པ་ལས། ཤར་སྒོར་ཁྲོ་བོ་རྣམ་པར་རྒྱལ་བ་དཀར་པོ་ལྕགས་ཀྱུ་དང་དྲིལ་བུ་འཛིན་པས་སྒོ་མ་ལྕགས་ཀྱུ་མ་དཀར་མོ་དང་སྦྱོར་བ། ལྷོ་སྒོར་ཁྲོ་བོ་གཤིན་རྗེ་གཤེད་སེར་པོ་དབྱུག་ཏོ་དང་ཞགས་པ་འཛིན་པས་སྒོ་མ་ཞགས་པ་མ་སེར་མོ་དང་སྦྱོར་བ་དང་། ནུབ་སྒོར་ཁྲོ་བོ་རྟ་མགྲིན་རྒྱལ་པོ་དམར་པོ་ལྕགས་སྒྲོག་དང་སྡིགས་མཛུབ་མཛད་(༦༤)པས་སྒོ་མ་ལྕགས་སྒྲོག་མ་དམར་མོ་དང་སྦྱོར་བ། བྱང་སྒོར་ཁྲོ་བོ་བདུད་རྩི་འཁྱིལ་པ་ལྗང་གུ་རྒྱ་གྲམ་དང་དྲིལ་བུ་འཛིན་པས་སྒོ་མ་དྲིལ་བུ་མ་ལྗང་གུ་དང་མཉམ་པར་སྦྱོར་བ་དེ་ཐམས་ཅད་ཀྱང་མེ་རི་འབར་བའི་ཀློང་ན་ཁྲོ་བོའི་རྒྱན་ཐམས་ཅད་ཀྱིས་བརྒྱན་པས་གཡས་བསྐུམ་གཡོན་བརྐྱང་དུ་བཞུགས་པའོ། །དེ་དག་གི་གདངས་ལས་ཐུབ་པ་དྲུག་ལ་སྟེང་ན་བརྒྱ་བྱིན་དཀར་པོ་པི་ཝང་བསྣམས་པ། ཤར་དུ་ཐགས་བཟང་རིས་མཐིང་ག་གོ་ཆ་འཛིན་པ། ལྷོར་ཤཱཀྱ་ཐུབ་པ་སེར་པོ་ལྷུང་བཟེད་དང་འཁར་གསིལ་བསྣམས་པ། ནུབ་ཏུ་སེང་གེ་རབ་བརྟན་མཐིང་ག་པུ་ཏི་འཛིན་པ། བྱང་དུ་ཁ་འབར་དེ་བ་དམར་པོ་རིན་པོ་ཆེའི་སྒྲོམ་བུ་བསྣམས་པ། འོག་ན་ཨ་བ་གླང་མགོ་མེ་ཆུ་བསྣམས་པའོ། །དེ་དག་གི་སྐུའི་གདངས་ལས་ཁྲག་འཐུང་གི་ལྷ་ཚོགས་རྣམས་ཀྱང་སྟེང་གི་ནམ་མཁའ་ལ་མེ་རི་མེ་དཔུང་གི་ནང་ན་བཞུགས་པ་ནི། དབུས་ན་ཧེ་རུ་ཀ་རིགས་ལྔ་ལ་གནས་ཀྱི་ཀེའུ་རི་མ་བརྒྱད་ཀྱིས་བསྐོར་བའི་ཕྱི་རོལ་ན་ཡུལ་གྱི་ཕྲ་མེན་མ་བརྒྱད་དང་། སྒོ་མ་བཞི་དང་། དབང་ཕྱུག་མ་ཉི་ཤུ་རྩ་བརྒྱད་དེ་ཁྲག་འཐུང་ལྔ་བཅུ་རྩ་བརྒྱད་རང་རང་གི་སྐུ་མདོག་དང་ཕྱག་མཚན་ཡོངས་སུ་རྫོགས་པའི་ཚུལ་གྱིས་བཞུགས་ཤིང་། ཕོ་བྲང་གི་ཕྱི་ཡི་དུར་ཁྲོད་རྣམས་སུ། བླ་མ་དང་། ཡི་དམ་དང་། མཁའ་འགྲོ་ཆོས་སྐྱོང་རྣམས་སྤྲིན་ཕུང་གཏིབས་པ་ཙམ་དུ་མོས་པ་བྱས་ལ།

རྡོ་རྗེ་བསྡུ་བའི་ཕྱག་རྒྱས་སེ་གོལ་གཉིས་བསྣོལ་ཏེ་དཔུང་པར་བརྡབ་ལ་སྤྱན་དྲངས་པ་ནི། ཧཱུྃ་དུས་གསུམ་བླ་མ་ཀུན་བཟང་ཆོས་ཀྱི་སྐུ། །ཉོན་མོངས་ལྔ་དག་ཕུང་པོ་གནས་འགྱུར་བའི། །སྐུ་གསུམ་ལྔ་ལྡན་རིགས་ལྔ་ཡབ་ཡུམ་ཚོགས། །འགྲོ་བའི་དོན་ཕྱིར་གནས་འདིར་གཤེགས་སུ་གསོལ། །ཨོཾ་གུ་རུ་བཛྲ་ཧཱུྃ་ཏྲཱཾ་ཧྲཱིཿཨཱཿབཛྲ་ཨཾ་ཀུ་ཤ་ས་མ་ཡ་ཛ་ཛཿཞེས་པས་བླ་མ་དང་དཀྱིལ་འཁོར་གྱི་ལྷ་ཚོགས་ཐམས་ཅད་ཐིབས་ཀྱིས་བྱོན་པར་བསམ་ལ། ཧཱུྃ་སྒྱུ་མ་ཆུ་ཟླ་ཡེ་ཤེས་གཞལ་ཡས་ཁང་། །སྐྱོན་བྲལ་པདྨ་ཉི་ཟླའི་གདན་ལ་བཞུགས། །ཨོཾ་པདྨ་སཱུརྱ་ཙནྡྲ་ཀ་མ་ལ་ཡེ་སྟྭྃ། ཨོཾ་བཛྲ་པུཥྤེ། དྷཱུ་པེ། ཨཱ་ལོ་ཀཻ། གྷནྡྷེ། ནཻ་ཝི་ཏྱ། ཤཔྟ་ཨཱཿཧཱུྃ། སྐུ་གསུང་ཐུགས་ཉིད་ཡེ་ནས་ཀུན་ཏུ་བཟང་། །སྐུ་ལྔ་ཡེ་ཤེས་འདུ་འབྲལ་མེད་པའི་ལྷ། །ཐབས་མཁས་ཐུགས་རྗེས་འགྲོ་བའི་དོན་མཛད་པའི། །བླ་མ་ཀུན་བཟང་རིགས་ལྔའི་ཚོགས་ལ་བསྟོད། །ཛཿཧཱུྃ་བྃ་ཧོཿས་དམ་ཚིག་པ་དང་གཉིས་སུ་མེད་(༦༥)པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཨོཾ་ཧཱུྃ་ཏྲཱྃ་ཧྲཱིཿཨཱཿས་དེ་བཞིན་གཤེགས་པ་ལྔས་དབང་བསྐུར་བའི་ཆུ་ལྷག་མ་ཡར་ལུད་པ་ལས་དབུས་ཕྱོགས་པ་ལ་རྣམ་པར་སྣང་མཛད། ཤར་ལ་སོགས་པའི་ཕྱོགས་བཞི་ལ་མི་བསྐྱོད་པ་ལ་སོགས་པས་དབུ་བརྒྱན། མཆོད་པ་བསངས་སྦྱངས་བྱས་ལ། ཧཱུྃ་སྲིད་པར་གཏོགས་པའི་མེ་ཏོག་སྣ་ཚོགས་རིགས། །དཀར་སེར་དམར་ལྗང་མཐིང་གའི་མདངས་ལྡན་པའི། །མཛེས་ལྡན་དྲི་ཞིམ་མེ་ཏོག་ཇི་སྙེད་རྣམས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཨོཾ་བཛྲ་པུཥྤེ་ཨཱཿཧཱུྃ། སྲིད་པར་གཏོགས་པའི་བདུག་སྤོས་སྣ་ཚོགས་རིགས། །དུ་རུ་ཀ་དང་ཨ་ཀ་རུ་ལ་སོགས། །དྲི་ཞིམ་བསུང་ལྡན་སྤོས་མཆོག་ཇི་སྙེད་རྣམས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཨོཾ་བཛྲ་དྷཱུ་པེ་ཨཱཿཧཱུྃ། སྲིད་པར་གཏོགས་པའི་སྣང་གསལ་སྣ་ཚོགས་རིགས། །འབྲུ་མར་རྩི་དང་རྩྭ་ཤིང་འོད་ཀྱི་གདངས། །དམར་གསལ་མདངས་ཆེན་སྣང་གསལ་ཇི་སྙེད་རྣམས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཨོཾ་བཛྲ་ཨཱ་ལོ་ཀེ་ཨཱཿཧཱུྃ། སྲིད་པར་གཏོགས་པའི་དྲི་ཆབ་སྣ་ཚོགས་རིགས། །ཙནྡན་གུར་ཀུམ་སི་ཧཱའི་ལྡེ་གུ་སོགས། །རང་བྱུང་སྦྱར་བའི་བྱུག་པ་བདེ་བྱེད་རྣམས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཨོཾ་བཛྲ་གྷནྡྷེ་ཨཱཿཧཱུྃ། སྲིད་པར་གཏོགས་པའི་ཞལ་ཟས་སྣ་ཚོགས་རིགས། །རང་བྱུང་ལྷན་ཅིག་སྐྱེས་དང་སྦྱར་བའི་ཟས། །སྣ་ཚོགས་གཡོས་མཆོག་གཙང་མའི་ཞལ་ཟས་རྣམས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཨོཾ་བཛྲ་ནཻ་ཝི་ཏྱ་ཨཱཿཧཱུྃ། སྲིད་པར་གཏོགས་པའི་རོལ་མོ་སྣ་ཚོགས་རིགས། །རྔ་ཏིང་གཡེར་ཁ་དྲིལ་བུ་རྫ་རྔ་དང་། །འབྱུང་བའི་རང་སྒྲ་གླུ་གར་རོལ་མོའི་དབྱངས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ༀ་བཛྲ་ཤཔྟ་ཨཱཿཧཱུྃ། དེ་ནས་ནང་མཆོད་ནི། ཧཱུྃ་སྣོད་བཅུད་སྣང་སྲིད་སྣ་ཚོགས་ཡིད་འོང་གཟུགས། །རྡོ་རྗེ་གཟུགས་མའི་ཚོགས་སུ་ཀུན་སྤྲུལ་ཏེ། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་རཱུ་པ་པྲ་ཏཱིཙྪ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་ཡིད་འོང་སྒྲ། །རྡོ་རྗེ་སྒྲ་མའི་ཚོགས་སུ་ཀུན་སྤྲུལ་ཏེ། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་ཤཔྟ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་(༦༦)དྲི་ཞིམ་སྤོས། །རྡོ་རྗེ་དྲི་མའི་ཚོགས་སུ་ཀུན་སྤྲུལ་ཏེ། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་གྷནྡྷེ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་རོ་ལྡན་ཟས། །རྡོ་རྗེ་རོ་མའི་ཚོགས་སུ་ཀུན་སྤྲུལ་ཏེ། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་ནཻ་ཝི་ཏྱ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་བདེ་བའི་རེག །རྡོ་རྗེ་རེག་མའི་ཚོགས་སུ་ཀུན་སྤྲུལ་ཏེ། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་སྤར་ཤེ་ཨཱཿཧཱུྃ།

དེ་ནས་གསང་མཆོད་ནི། ཧཱུྃ་གསང་མཆོག་བདེ་ཆེན་སྐུ་ཡི་རིག་མ་ནི། །སྐུ་མདོག་དཀར་མཛེས་མེ་ལོང་པདྨ་བསྣམས། །ཤིན་ཏུ་ཡིད་འོང་བདེ་གཤེགས་མཉེས་མཛད་མ། །གསང་མཆོག་བདེ་བའི་མཆོད་པ་བཞེས་སུ་གསོལ། །ཨོཾ་བཛྲ་དར་ཤེ་ཨཱཿཧཱུྃ། ཧཱུྃ་གསང་མཆོག་གསུང་གི་བདེ་ཆེན་རིག་མ་ནི། །སྐུ་མདོག་དམར་མཛེས་རྔ་ཟླུམ་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་མཉེས་མཛད་མ། །གསང་མཆོག་བདེ་བའི་མཆོད་པ་བཞེས་སུ་གསོལ། །ཨོཾ་བཛྲ་མུ་རཉྫ་ཨཱཿཧཱུྃ། ཧཱུྃ་གསང་མཆོག་ཐུགས་ཀྱི་བདེ་ཆེན་རིག་མ་ནི། །སྐུ་མདོག་མཐིང་མཛེས་པི་ཝཾ་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་མཉེས་མཛད་མ། །གསང་མཆོག་བདེ་བའི་མཆོད་པ་བཞེས་སུ་གསོལ། །ཨོཾ་བཛྲ་ཝི་ནི་ཨཱཿཧཱུྃ། ཧཱུྃ་གསང་མཆོག་ཡོན་ཏན་བདེ་ཆེན་རིག་མ་ནི། །སྐུ་མདོག་སེར་མཛེས་གླིང་བུའི་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་མཉེས་མཛད་མ། །གསང་མཆོག་བདེ་བའི་མཆོད་པ་བཞེས་སུ་གསོལ། །ཨོཾ་བཛྲ་བཾ་སེ་ཨཱཿཧཱུྃ། ཧཱུྃ་གསང་མཆོག་ཕྲིན་ལས་བདེ་ཆེན་རིག་མ་ནི། །སྐུ་མདོག་ལྗང་མཛེས་རྫ་རྔའི་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་མཉེས་མཛད་མ། །གསང་མཆོག་བདེ་བའི་མཆོད་པ་བཞེས་སུ་གསོལ། །ཨོཾ་བཛྲ་མེ་དྷེ་ཨཱཿཧཱུྃ། ཞེས་པས་མཆོད་ལ།

བསྟོད་པ་ནི། བླ་མ་ཀུན་བཟང་ཐིག་ལེའི་སྐུ། །ཉག་ཅིག་མཐའ་བྲལ་ལུ་གུ་རྒྱུད། །དབྱིངས་རིག་འདུ་འབྲལ་མེད་པ་ཡི། །ཅིར་མི་དགོངས་ལ་ཕྱག་འཚལ་བསྟོད། །ཧཱུྃ་ཞེ་སྡང་རྣམ་ཤེས་རང་གྲོལ་དབྱིངས། །མེ་ལོང་ཡེ་ཤེས་དཀར་གསལ་སྐུ། །ཆུ་ཁམས་རྣམ་དག་ཡབ་ཡུམ་རོལ། །མི་བསྐྱོད་ཡབ་ཡུམ་ཕྱག་འཚལ་བསྟོད། །ཧཱུྃ་འདོད་ཆགས་འདུ་ཤེས་(༦༧)རྣམ་དག་དབྱིངས། །སོར་རྟོགས་ཡེ་ཤེས་དམར་གསལ་སྐུ། །མེ་ཁམས་རྣམ་དག་ཡབ་ཡུམ་རོལ། །སྣང་མཐའ་ཡབ་ཡུམ་ཕྱག་འཚལ་བསྟོད། །ཧཱུྃ་གཏི་མུག་གཟུགས་ཁམས་རང་གྲོལ་དབྱིངས། །ཆོས་དབྱིངས་ཡེ་ཤེས་མཐིང་གསལ་སྐུ། །ནམ་མཁའ་རྣམ་དག་ཡབ་ཡུམ་རོལ། །རྣམ་སྣང་ཡབ་ཡུམ་ཕྱག་འཚལ་བསྟོད། །ཧཱུྃ་ང་རྒྱལ་ཚོར་བ་རྣམ་དག་དབྱིངས། །མཉམ་ཉིད་ཡེ་ཤེས་སེར་གསལ་སྐུ། །ས་ཁམས་རྣམ་དག་ཡབ་ཡུམ་རོལ། །རིན་འབྱུང་ཡབ་ཡུམ་ཕྱག་འཚལ་བསྟོད། །ཧཱུྃ་ཕྲག་དོག་འདུ་བྱེད་རྣམ་དག་དབྱིངས། །བྱ་གྲུབ་ཡེ་ཤེས་ལྗང་གསལ་སྐུ། །རླུང་ཁམས་རྣམ་དག་ཡབ་ཡུམ་རོལ། །དོན་གྲུབ་ཡབ་ཡུམ་ཕྱག་འཚལ་བསྟོད། །ཧཱུྃ་རྣམ་ཤེས་ཚོགས་བརྒྱད་སེམས་དཔའ་བརྒྱད། །ཉོན་མོངས་དྲུག་དག་ཐུབ་པ་དྲུག །མ་འགག་རིག་རྩལ་སྒོ་བ་བཞི། །ཕྲིན་ལས་མཛད་ལ་ཕྱག་འཚལ་བསྟོད། །ཧཱུྃ་རིགས་ལྔ་ཡེ་ཤེས་ལྔ་ཡི་གདངས། །དུག་ལྔ་རྣམ་དག་ཁྲོ་བོའི་སྐུ། །ལྔ་བཅུ་རྩ་བརྒྱད་འབར་བའི་ཚུལ། །འཇིགས་གཟུགས་སྟོན་ལ་ཕྱག་འཚལ་བསྟོད། །ཅེས་པའི་འོག་ཏུ་གསོལ་བ་གདབ་པ་ནི་ཐལ་མོ་སྦྱར་ལ། ཧོ་དགོངས་སུ་གསོལ། རྒྱལ་བ་རིགས་ལྔ་ཡབ་ཡུམ་འཁོར་དང་བཅས། །སེམས་དཔའ་སེམས་མ་མ་ལུས་བདག་ལ་དགོངས། །རྒྱལ་བ་སྲས་བཅས་མཆོད་པ་དང་། །སློབ་བུ་ཁྱེད་ཀྱི་རྗེས་གཞུག་ཕྱིར། །བདག་ཉིད་ཆེ་གེ་ཞེས་བགྱི་བས། །ནངས་པར་རྒྱལ་བའི་དཀྱིལ་འཁོར་བྲི། །ཁྱེད་ཀྱི་ཐུགས་རྗེས་དགོངས་མཛོད་ལ། །བྱིན་གྱིས་བརླབ་པར་མཛད་དུ་གསོལ་ཞེས་བརྗོད་ནས། མཎྜལ་གྱི་ཤར་ཕྱོགས་སུ་སྟེགས་བུ་མདའ་གང་བའི་སྟེང་དུ་ཟླུམ་བསྐོར་བཞིའི་ནང་མ་ལ་པད་འདབ་བཞི། གཉིས་པ་ལ་སེམས་དཔའ་ཡབ་ཡུམ་བརྒྱད་ཀྱི་མཚན་མ་དང་ཐུབ་པ་དྲུག །གསུམ་པ་ལ་སྒོ་མ་བཞིའི་ཕྱག་མཚན་ནམ་བརྡ། བཞི་པ་ལ་བླ་མ་དང་དཔའ་བོ་ཆོས་སྐྱོང་དང་བཅས་པའི་མཚན་མ་བཀོད་ལ། དཀར་པོ་བྱས་ཏེ་ཞི་བའི་ཤིང་ཟླུམ་པོར་བརྩེགས་ལ་མེ་སྤར་བའི་ནང་དུ་མེ་ལྷ་དཀར་པོ་ར་སྐྱེས་ཀྱི་སྟེང་ན། ཞལ་གཅིག་ཕྱག་གཉིས་གྷནྡྷེ་དང་མེ་ཐབ་བསྣམས་པ་བསྐྱེད་ལ། ཧཱུྃ་གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྦྱིན་མཛད་ཅིང་། །གེགས་སེལ་དངོས་གྲུབ་སྩོལ་བའི་ལྷ། །འདིར་གཤེགས་མཆོད་ཡོན་བཞེས་སུ་གསོལ། །ཨོཾ་ཨགྣེ་ཡེ་ས་མ་ཡ་ཛ་ཛ། ཞེས་པས་(༦༨)མེ་ལྷའི་ཕྱག་རྒྱ་རྣ་དྲུང་དུ་གཡབ་པས། ཤར་ལྷོ་ནས་མེ་ལྷ་དེ་འདྲ་བ་བྱོན་ཏེ་ཐབ་ཀྱི་དམ་ཚིག་པ་ལ་ཐིམ་པར་བསམ་ལ། ཨོཾ་ཨགྣེ་ཡེ་ཆེ་གེ་མོ་འཁོར་དང་བཅས་པའི་སྡིག་པ་དང་སྒྲིབ་པ་བགེགས་དང་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། མར་ཁུ་དགང་བླུགས་བདུན་གྱིས་བྱོན་ཟན་ཕུལ། ཨརྒྷཾ་པ་ཏྱཾ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏྱ་ཤཔྟ་ཨཱཿཧཱུྃ་གིས་མཆོད་ལ། སྔར་གྱི་སྔགས་དེ་ཉིད་ཀྱིས། ཡམ་ཤིང་དང་། མར་དང་། འབྲས་དང་། སོ་བ་དང་། ཏིལ་དང་། ནས་དང་། གྲོ་དང་། སྲན་མ་དང་། ཞོ་ཟན་དང་། དྲི་དང་། བདུག་པ་དང་། དཱུར་བ་རྣམས་སོ་སོའམ། སྣོད་གཅིག་ཏུ་བསྲེས་ལ་འབུལ་ལོ། །དེ་ལྟར་ཉི་ཤུ་རྩ་གཅིག་སོང་བ་དང་། མེ་ལྷའི་སྟེང་གི་ཆ་ལ་བླ་མ་དང་དཀོན་མཆོག་གསུམ་སྤྱན་དྲངས་ཏེ། བྱོན་ཟན་དང་མཆོད་པ་ཕུལ་ནས། ན་མོ་གུ་རུ་བྷྱ། ན་མོ་བུདྡྷ་ཡ། ན་མོ་དྷརྨཱ་ཡ། ན་མོ་སང་གྷ་ཡ། ཨ་མྲྀ་ཏ་ཛྭ་ལ་རཾ། ཞེས་སྲེག་རྫས་ཕུལ་ཏེ། སངས་རྒྱས་ཐམས་ཅད་འདུས་པ་དང་། མགོན་པོ་ཐུགས་རྗེ་ཆེར་ལྡན་གྱིས་བསྟོད་ནས། གུ་རུ་སྤྱན་དྲངས་ཏེ། ཨོཾ་མཧཱ་གུ་རུ་པདྨ་སིདྡྷི་ཧོས་སྲེག་རྫས་ཕུལ་ལ་མཆོད་བསྟོད་བྱའོ། །མེ་ལྷའི་ལྟོ་བར་དཀྱིལ་འཁོར་བསྐྱེད་ཅིང་བསྟིམ་ལ། བྱོན་ཟན་བདུན་དང་། མཆོད་བསྟོད་མདོར་བསྡུས་བྱས་ནས། ཨོཾ་ཧཱུྃ་ཏྲཱྃ་ཧྲཱིཿཨཿཛཿཧཱུྃ་བྃ་ཧོཿབདག་ཅག་འཁོར་དང་བཅས་པའི་ནད་གདོན་སྡིག་སྒྲིབ་བགེགས་དང་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་པས་སྲེག་རྫས་རྣམས་བརྒྱའམ་སྟོང་ལ་སོགས་པ་ཕུལ་ལ། སླར་ཡང་མཆོད་ཅིང་བསྟོད་ནས། གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་གྱུར་གང་། །གང་ཕྱིར་ལུས་ཅན་སྐྱབས་གྱུར་པ། །དེ་ཀུན་མགོན་པོས་བཟོད་པར་མཛོད། །ཨོཾ་བཛྲ་མུཿས་ཡེ་ཤེས་པ་གཤེགས། དམ་ཚིག་པ་བདག་ལ་བསྡུས་ལ། ནོར་ལྷ་དང་། ཆོས་སྐྱོང་དང་། གཞི་བདག་དང་། འབྱུང་པོ་ཐམས་ཅད་པའི་མགྲོན་རྣམས་སྐད་ཅིག་མས་ཡིད་ཀྱིས་སྤྱན་དྲངས་ལ། རང་རང་གི་སྔགས་སམ། ན་མཿསརྦ་ཏ་ཐཱ་ག་ཏ་བྷྱོ། བི་ཤྭ་མུ་ཁེ་བྷྱེ། སརྦ་ཏད་ཁཾ་ཨུངྒ་ཏེ། སྥ་ར་ཎ་ཧི་མཾ་ག་ག་ན་ཁཾ་གིས་ཕུལ་ལ། རང་རང་གི་གནས་སུ་སོང་བའི་རྗེས་ལ། མེ་ལྷ་གསལ་བཏབ་ནས་སྔར་གྱི་སྔགས་དེ་ཉིད་ཀྱིས་བརྒྱ་རྩ་བརྒྱད་ལ་སོགས་པ་ཕུལ་ལ། འཇིག་རྟེན་དབང་ཕྱུག་ཚངས་དབང་མཆོག་གི་སྲས། །མེ་ལྷའི་རྒྱལ་པོ་ཌཱ་ཀིས་(༦༩)དབང་བསྐུར་བས། །དངོས་གྲུབ་མ་ལུས་སྩོལ་བར་མཛད་པ་ཡི། །མེ་ལྷའི་རྒྱལ་པོ་འཁོར་དང་བཅས་ལ་འདུད། །ཅེས་པས་བཏུད་དེ་བཟོད་པར་གསོལ། མེ་ལྷའི་ཕྱག་རྒྱ་སླར་བཀྲོལ་ཏེ། ཨོཾ་ཨགྣེ་ཡེ་གཙྪ་ཞེས་བརྗོད་པས་ཡེ་ཤེས་པ་གཤེགས་པར་བསམ་ལ། བསྔོ་བ་དང་བཀྲ་ཤིས་བརྗོད་པར་བྱའོ། །

གསུམ་པ་སློབ་མ་སྟ་གོན་ནི། དེ་ནས་བླ་མས་འདི་སྐད་ཅེས་བཤད། འདིར་ཐེག་པ་ཆེན་པོའི་ཆོས་ལ་འཇུག་པ་ཤིན་ཏུ་ལེགས། དེ་ཡང་སྐྱེ་བར་དཀའ་བ་འཛམ་བུའི་གླིང་དུ་སྐྱེས། ཐོབ་པར་དཀའ་བ་དལ་འབྱོར་གྱི་མི་ལུས་རིན་པོ་ཆེ་ཐོབ་པའི་རྟེན་འདི་ལ་འཁོར་བ་སྡུག་བསྔལ་གྱི་ཆུ་བོ་ལས་ཐར་པའི་ཐབས་ལ་མ་འབད་ན། ཚེ་མི་རྟག་པ་རི་གཟར་གྱི་འབབ་ཆུ་དང་འདྲ་བ་འདི་ནམ་འདོར་མི་ཤེས་པས་བརྩོན་དགོས། དེའང་ཐེག་པ་ཆེ་ཆུང་གཉིས་ལས་འདིར་ཐེག་པ་ཆེན་པོ་གསང་སྔགས་ཀྱི་ལམ་ཟབ་མོ་ཉམས་སུ་ལེན་པ་ལ་འཇུག་པའི་སྤྲོ་དགའ་དང་བཅས་པས་དབང་ཞུ་བའི་རྗེས་ཟློས་མཛོད་ཅིག །

ཀྱེ་མ་དུས་གསུམ་རྒྱལ་བ་ཀུན་ཏུ་བཟང་། །རིགས་ལྔའི་སངས་རྒྱས་དགོངས་སུ་གསོལ། །བདག་ཅག་ཁྱེད་ཀྱི་རྗེས་སུ་འཇུག །དཀོན་མཆོག་གསུམ་ལ་སྐྱབས་འགྲོ་དང་། །སོ་ཐར་བྱང་སེམས་དམ་ཚིག་རྣམས། །ཐར་པའི་གྲོང་དུ་འཇུག་བྱའི་ཕྱིར། །མགོན་པོས་བདག་ལ་གནང་དུ་གསོལ། །ཞེས་ལན་གསུམ་བརྗོད་ནས། བླ་མས། ཀྱེ་མ་སྣོད་དང་ལྡན་པའི་བུ། །གསང་སྔགས་ཆོ་ག་ཁྱེད་ལ་བསྟན། །འདས་དང་མ་བྱོན་ད་ལྟར་གྱི། །སངས་རྒྱས་མ་ལུས་ཐམས་ཅད་ཀྱང་། །གསང་སྔགས་ཆོ་ག་འདི་མཁྱེན་པས། །ཀུན་ཀྱང་སངས་རྒྱས་ཐོབ་པ་ཡིན། །ཀུན་བཟང་རྒྱལ་བ་རིགས་ལྔ་ཡིས། །བདུད་ཀྱི་དཔུང་ཡང་འདི་ཡིས་བཅོམ། །དེ་ལྟར་ཁྱེད་ཀྱིས་ཐོབ་བྱའི་ཕྱིར། །འདི་ཡི་རྗེས་སུ་ཀུན་ཞུགས་མཛོད། །ཅེས་གནང་བ་བྱིན། མེ་ཏོག་དོར་ཏེ་ཐལ་མོ་སྦྱར་ལ། ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་། །བླ་མ་ཡི་དམ་མཁའ་འགྲོའི་ཚོགས་རྣམས་དགོངས། །རྐང་གཉིས་གཙོ་བོ་ཕྱོགས་བཅུའི་སངས་རྒྱས་དང་། །ཞི་བ་ཆགས་བྲལ་དམ་པའི་ཆོས་རྣམས་དང་། །ཚོགས་མཆོག་འཕགས་པའི་དགེ་འདུན་ཐམས་ཅད་ལ། །བདག་ནི་གུས་པས་སྐྱབས་སུ་ཉེ་བར་མཆི། །ཞེས་པ་གསུམ་དང་ཡང་། ཀུན་བཟང་རིགས་ལྔའི་ལྷ་ཚོགས་ལ། །འདི་བཟུང་བླ་མེད་བྱང་ཆུབ་བར། །གུས་པ་ཡིས་ནི་སྐྱབས་སུ་མཆི། །ཞེས་པ་གསུམ་དང་ཡང་། དཔའ་བོ་དཔའ་མོ་(༧༠)ཆོས་སྐྱོང་བཅས། །བྱང་ཆུབ་སེམས་དཔའ་སློབ་དཔོན་ལ། །བདག་ནི་གུས་པས་སྐྱབས་སུ་མཆི། །ཞེས་པ་གསུམ་དང་ཡང་། བླ་མ་ཀུན་བཟང་སྤྱན་སྔ་རུ། །ལུས་ངག་ཡིད་ཀྱིས་གཞན་རྣམས་ལ། །གནོད་པ་ལས་བཟློག་བདེ་བ་བསྒྲུབ། །དགེ་ཚུལ་དགེ་སློང་བྱང་ཆུབ་སེམས། །སོ་སོར་ཐར་པའི་སྡོམ་པ་ལ། །བདག་ནི་རྒྱུན་དུ་གནས་ཤིང་བསྲུང་། །ཞེས་པ་གསུམ་དང་ཡང་། ཧོ་བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །འགྲོ་དྲུག་སེམས་ཅན་ཐམས་ཅད་ལ། །མ་དང་བུ་ཡི་འདུ་ཤེས་ཀྱིས། །མ་བསྒྲལ་བ་རྣམས་བསྒྲལ་བ་དང་། །མ་གྲོལ་དགྲོལ་དང་དབུགས་དབྱུང་ཕྱིར། །སྨོན་པའི་བྱང་ཆུབ་སེམས་བསྐྱེད་དོ། །ཞེས་པ་གསུམ་དང་ཡང་། སྔོན་གྱི་རྒྱལ་བ་ཐམས་ཅད་ཀྱང་། །སྡོམ་པ་ལ་ནི་གནས་པ་ལྟར། །འདི་བཟུང་འཁོར་བ་མ་སྟོང་བར། །བླ་མེད་འཇུག་པའི་བྱང་ཆུབ་སེམས། །བདག་ཅག་རྣམས་ཀྱིས་བསྐྱེད་པར་བགྱི། །ཕ་རོལ་ཕྱིན་དྲུག་སློབ་ཅིང་བསྒྲུབ། །བརྩོན་འགྲུས་དག་གིས་ཐམས་ཅད་བསྒྲལ། །ཀུན་དོན་ཚུལ་ཁྲིམས་གསུམ་དག་གཟུང་། །བདག་གིས་སེམས་བསྐྱེད་སྡོམ་བཟུང་ནས། །མ་གྲོལ་དགྲོལ་དང་མ་བསྒྲལ་བསྒྲལ། །དབུགས་དབྱུང་མྱ་ངན་འདས་ལ་འགོད། །ཅེས་པ་གསུམ་དང་ཡང་། དཀོན་མཆོག་གསུམ་ནི་མི་གཏང་ངོ་། །རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་དང་། །བྱང་ཆུབ་སེམས་ནི་སྤང་མི་བྱ། །རྡོ་རྗེ་རིགས་ཀྱི་དམ་ཚིག་ཡིན། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་དུས་རྣམས་རྟག་ཏུ་བཏང་། །རིན་ཆེན་རིགས་ཀྱི་དམ་ཚིག་ཡིན། །པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་རྣམས་བཤད། །པདྨ་རིགས་ཀྱི་སྡོམ་པ་ཡིན། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །ལས་ཀྱི་རིགས་ཀྱི་སྡོམ་པ་ཡིན། །ཞེས་སྡོམ་པ་བྱིན་ནས་ཡང་། ཡར་མཆོད་གུས་ཤིང་མར་ལ་བརྩེ། །རྩ་བ་ཡན་ལག་དམ་ཚིག་བསྲུང་། །རྩ་བ་བཞི་ལས་འདའ་མི་བྱ། །ཞེས་པ་གསུམ་གྱིས་དམ་ཚིག་སྦྱིན་ལ། སློབ་མ་རྣམས་རྡོ་རྗེ་སེམས་དཔར་བསྐྱེད་པའི་གནས་གསུམ་དུ་དྲིའི་ཐིག་ལེས་བྱུག་ཅིང་། ཨོཾ་ཨཱཿཧཱུྃ་བཟླས་ལ། ཨོཾ་བཛྲ་པྲ་ཝེ་ཤ་ཧོཿ། ཞེས་པ་གྲངས་མེད་པ་བརྗོད་ཅིང་། རོལ་མོ་བཀྲོལ་ལ། རིགས་ལྔའི་སངས་རྒྱས་དང་བླ་མ་ཡི་དམ་ཆར་བཞིན་བབས་པས་སློབ་མའི་སྤྱི་བོ་ནས་མར་ཐིམ་ཞིང་ཨོཾ་ཧཱུྃ་ཏྲཱི་ཧྲཱིཿཨཱཿཛཿཧཱུྃ་བྃ་ཧོཿས་རིགས་ལྔའི་སངས་(༧༡)རྒྱས་དཔག་ཏུ་མེད་པ་བྱོན་ནས་དབང་བསྐུར་བར་བསམ་ལ་དར་ཅིག་རོལ་མོ་དཀྲོལ་ནས། བདུད་རྩི་ལྕེ་ཐོག་ཏུ་བཞག་གོ། །དེ་ནས་དཀྱིལ་འཁོར་དེའི་ལྷོ་ཤར་དུ་རྡོ་རྗེ་རྒྱ་གྲམ་གྱི་ལྟེ་བར་མེ་ཏོག་གི་ཚོམ་བུ་བཀོད་ལ། སོ་ཤིང་མཐོ་གང་བའི་རྩེ་ལ་དར་གྱི་ཅོད་པཎ་ཡོད་པ་སློབ་མའི་ལག་པ་གཉིས་ཀྱི་སྙིམ་པའི་རྩེས་ཁའི་ཐད་དུ་བཟུང་ལ། སངས་རྒྱས་དང་བྱང་ཆུབ་སེམས་དཔའ་དང་དཔའ་བོ་མཁའ་འགྲོའི་ཚོགས་དང་། སྲུང་མ་ཐམས་ཅད་ཀྱིས་བདག་ལ་དངོས་གྲུབ་བསྟན་དུ་གསོལ། ཞེས་སོས་བཟུང་ལ་མིག་བཙུམ་ནས། ཚོམ་བུའི་སྟེང་དུ་བསྒྱུར་རོ། །ཕྱོགས་བཞི་དབུས་དང་ལྔར་བྱུང་ན་རིགས་དེའི་དངོས་གྲུབ་ཐོབ་ཅིང་། མཚམས་བཞིར་དངོས་གྲུབ་ཕྲན་ཚེགས་འགྲུབ། སྟེང་དུ་བྱུང་ན་མཆོག་གི་དངོས་གྲུབ་འགྲུབ། རྩ་བ་རང་ལ་བསྟན་ན་སྐལ་བ་ཞན་པས་བལྡབ་ལ་བསྐྱུར་རོ། །དེ་ནས་ཆོས་བཤད་པ་ནི། ཀྱེ་རིགས་ཀྱི་བུ་རྣམས་གསོན་ཅིག །འདི་ལྟ་བུའི་དཀྱིལ་འཁོར་མཐོང་བ་ནི་ཨུ་དུམ་ཝཱ་རའི་མེ་ཏོག་དང་འདྲ་བར་དཀོན་ཞིང་། ཐེག་པ་ཆེན་པོ་གསང་སྔགས་ལ་དད་པས་འཇུག་པ་ཡང་ཤིན་ཏུ་དཀོན་ལ། སྔགས་ལ་སྤྱོད་པ་ཡང་དཀོན་ན་དོ་ནུབ་དཀྱིལ་འཁོར་ཆེན་པོར་འཇུག་ཅིང་གསང་སྔགས་རྡོ་རྗེ་ཐེག་པ་ལ་སྤྱོད་པ་ནི་སྐལ་བ་བཟང་སྟེ། རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་གང་བྱས་པ། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །འཇིག་རྟེན་ཐམས་ཅད་མཁྱེན་པ་ཡི། །གོ་འཕང་བླ་ན་མེད་པར་འགྱུར། །གང་གི་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །གང་ཞིག་སྡུག་བསྔལ་ཀུན་འབྱུང་བའི། །ངན་འགྲོ་དེ་ཡིས་གཅོད་པར་འགྱུར། །དེ་ཕྱིར་ཁྱེད་རྣམས་ཐེག་ཆེན་དུ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་(༧༢)རྣམས་དེར་ནི་དོང་བས་ན། །རང་བྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །གོ་འཕང་བླ་མེད་འཐོབ་པར་འགྱུར། །ཞེས་གསུངས་སོ། །དེ་ནས་སྲུང་སྐུད་དམར་པོ་ལྔ་སྒྲིལ་ལ་རྩ་བའི་སྔགས་བཟླས་ཏེ་སྐྱེས་པ་ལ་དཔུང་པ་གཡོན། བུད་མེད་ལ་གཡས་སུ་བཅིངས་ནས། ཀུ་ཤ་ཚན་པ་གཉིས་ཨོཾ་ཨཱཿཧཱུྃ་གིས་སྔས་དང་སྟན་དུ་བྱིན་ལ་སེང་གེའི་ཉལ་སྟབས་ཀྱིས། རྨི་ལམ་བརྟག་ཏུ་གཞུག་གོ། །བླ་མ་དང་རིགས་ལྔའི་ལྷ་ཚོགས་ཀྱིས་དགེ་བ་དང་མི་དགེ་བའི་རྨི་ལམ་བསྟན་དུ་གསོལ། ཞེས་གསོལ་བ་བཏབ་ལ། ཚོགས་གཏོར་རྒྱ་ཆེར་བཏང་ནས་ཉལ་ལོ། །ནངས་པར་སློབ་དཔོན་ལ་རྨི་ལམ་བརྗོད་དེ་ངན་ན་ཚོགས་གཏོར་གྱིས་བཟློག་པར་བྱའོ། །དབང་གི་སྔོན་འགྲོ་བསྟན་ཟིན་ཏོ། །

གཉིས་པ་དངོས་གཞི་ལ། དཀྱིལ་འཁོར་བྲི་ཞིང་རྒྱན་བཀྲམ་པ། དཀྱིལ་འཁོར་བསྒྲུབ་ཅིང་བདག་འཇུག་བླང་བ། ཆོ་ག་དངོས་གཞི་ཇི་ལྟར་བྱ་བ་དང་གསུམ་ལས། དང་པོ་ཐིག་དང་ཚོན་གྱིས་བྲི་བ་གཉིས་ལས། དང་པོ་ལ་གཉིས་ལས། ཡེ་ཤེས་ཀྱི་ཐིག་གདབ་པ་ནི། ཐིག་སྐུད་ལྔ་སྒྲིལ་དཀྱིལ་འཁོར་གྱི་ཉིས་འགྱུར་ཡོད་པ། ཨོཾ་ཨཱཿཧཱུྃ་ཏྲཱྃ་ཧྲཱིཿལས་རིགས་ལྔ་ཡབ་ཡུམ་དུ་བསམས་ལ་ཡེ་ཤེས་པ་ཡིད་ཀྱིས་བསྟིམས་ནས་མཆོད་བསྟོད་མདོར་བསྡུས་བྱས་ལ། རྡོ་རྗེ་དང་དྲིལ་བུ་འཛིན་པས་དབྱངས་དང་བཅས་ཏེ། སུམ་བྷ་ནི་དང་། ཧཱུྃ་གིས་ཕྱོགས་མཚམས་བརྒྱད་བསྐོར་ཞི་བའི་དཀྱིལ་འཁོར་ལ་དམིགས་ཤིང་། ཨོཾ་བཛྲ་ལ་སྱ། མཱ་ལེ་གིརྟི་ནིརྟི་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏྱ་ཤཔྟ་ཨཱཿཧཱུྃ་གིས་གླུ་དབྱངས་ཕྱག་རྒྱ་དང་བཅས་པའི་གར་དང་། ཨོཾ་བཛྲ་ས་མ་ཡེ་ཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿས་རིགས་ལྔའི་ཕྱག་རྒྱ་དང་། ཨོཾ་སུ་པྲ་ཏིཥྛ་ཧཱུྃ་གིས་བཀྲ་ཤིས་ཀྱི་བྱིན་ཕབ་ལ། སློབ་དཔོན་ཤར་དུ་གཟིགས་ཤིང་སློབ་མས་ནུབ་ཏུ་བལྟ་བས་དཀྱིལ་འཁོར་གྱི་སྟེང་དུ་ཐིག་སྐུད་བཟུང་ལ། ཨེ་མ་རིགས་ལྔའི་སངས་རྒྱས་གཙོ། །འགྲོ་དོན་དུས་ནི་འདི་ལགས་པས། །ཀུན་ཏུ་བཟང་པོའི་ཐིག་གདབ་མཛོད། །ཅེས་བརྗོད་ནས། ཡི་གེ་ལྔའམ་རྩ་སྔགས་བཟླས་ཤིང་ཡེ་ཤེས་ཀྱི་ཚངས་ཐིག་བཞིའམ་བརྒྱད་དམ་བཅུ་དྲུག་བཏབ་པའི་སྒྲས་བསྐུལ་ནས་རིགས་ལྔའི་དཀྱིལ་འཁོར་སྐད་ཅིག་གིས་བསྐྱེད་པ་ལས་འོད་ཟེར་འཕྲོས་པས་ཕྱོགས་བཅུའི་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་བྱོན་ཏེ་སྟེང་གི་ནམ་མཁའ་ལ་བཞུགས་པར་བསམས་ལ། (༧༣)མཆོད་བསྟོད་ཅི་རིགས་སུ་བྱས་ཏེ། དཀྱིལ་འཁོར་མི་གཤེགས་པར་བཞུགས། དམ་ཚིག་གི་ཐིག་མཐོང་བ་བརྒྱུད་པ་ལྟར་ཆ་ཆེན་བཅུ་དྲུག་བཏབ་ལ། དང་པོ་ཕྱེད་གདབ་ཕྱི་མ་གདབ། །གཉིས་པ་ཆ་བཞིར་བགོ་བར་བྱ། །གསུམ་པ་བཞི་པ་མི་གདབ་བཞག །ལྔ་པ་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །བདུན་པ་ཆ་བཞིར་བགོ་བྱ་སྟེ། །བརྒྱད་པ་དབུས་དོར་མཐའ་གཉིས་གདབ། །དེ་ནས་ཚོན་གྱི་ཆོ་ག་ནི། ཕྱོགས་བཞི་དབུས་དང་ལྔར། རིགས་ལྔའི་ཁ་དོག་བཞིན་བཀོད་ལ། སོ་སོའི་ས་བོན་བྲིས་ཏེ་དམ་ཚིག་པ་བསྐྱེད། ཡེ་ཤེས་པ་བསྟིམ། མཆོད་བསྟོད་བྱས་ནས། ཨོཾ་ཧཱུྃ་ཏྲཱྃ་ཧྲཱིཿཨཱཿབདུན་བརྗོད་པས། ལྷ་རྣམས་འོད་དུ་ཞུ་བ་ལས་བྱུང་བའི་ཚོན་དུ་བསམ་ལ། རྡོ་རྗེ་སློབ་དཔོན་གྱིས་ཤར་ནས་ཚོན་ཐོགས་ཏེ། སངས་རྒྱས་རིགས་ལྔ་ཡེ་ཤེས་གཙོ། །ཀུན་གྱི་དོན་རིག་བྱ་བའི་ཕྱིར། །ཡེ་ཤེས་ལྔ་ཡི་ཚོན་བཀྱེའོ། །ཞེས་བརྗོད་ལ་རེ་ཁཱ་སྦོམ་ཕྲ་སྙོམས་ལ་གཞི་ཚོན་སྲབ་མཐུག་སྙོམས་པར་བཀྱེའོ། །དེ་ཡང་དབུས་ནས་ཕྱོགས་བཞིའི་ཆ་ཆེན་རེ་རེའི་སར་ལྟེ་བ་བསྐོར། དེ་ནས་ཆ་ཆེན་གཉིས་སུ་བསྐོར་བའི་ནང་དུ་པདྨ་འདབ་བཞི་ཟུར་གྱི་པདྨར་ཁྱེའུ་བཞི་དང་འདས་པ་བྲིས་པའི་མཐར་མུ་ཁྱུད་བསྐོར་ལ་རིགས་ལྔའི་ཕྱོགས་ཚོན་བཀྱེ། དེ་ནས་ཟུར་ཆོད་བཞིར་ནང་སྒེག་བཞི་སེམས་དཔའ་བཞི་དང་བཅས་པའི་མཚན་མ་གཉིས་གཉིས། དེའི་ཕྱི་རིམ་ལྷ་སྣམ་གྱི་གྲྭ་བཞིར་ཕྱི་སྒེག་བཞི་དང་སེམས་དཔའ་བཞི་ཕྱོགས་བཞིར་ཐུབ་པ་དྲུག་དང་། གཞིའི་ཀུན་བཟང་ཡབ་ཡུམ་གྱི་བརྡ་མཚོན་གཉིས་གཉིས་བྱ། སྒོ་བཞིར་སྒོ་བ་ཡབ་ཡུམ་གྱི་བརྡ་བྱ། རྩིག་པ་ལྔ་ནང་ནས་མཐིང་ག་དཀར་དམར་སེར་ལྗང་གིས་བྲིས་ལ། འདོད་ཡོན་དམར། ཕ་གུ་སེར། དྲྭ་ཕྱེད་སྔོ། མདའ་ཡབ་དམར། པུ་ཤུ་མཛེས་ཚོན། རྟ་བབས་དེ་དང་འདྲ། རྡོ་རྗེའི་ར་ཕྱོགས་མདོག་ཅན། ཞིང་ཁམས་ལྗང་། དུར་ཁྲོད་བརྒྱད་ཀྱི་ཕྱོགས་བཞི་ཕྱོགས་མདོག་མཚམས་བཞི་མཛེས་ཚོན། ཉི་མ་དམར་ཟླ་བ་དཀར། པདྨའི་རྭ་བ་སྣ་ཚོགས་མདོག །རྡོ་རྗེའི་རྭ་བ་དེ་དང་འདྲ། །མེ་རི་ཡེ་ཤེས་ལྔ་ཡི་མདོག །གསལ་ཞིང་སྙོམས་པར་བྲི་བར་བྱ། །དེ་ནས་རྒྱན་བཀྲམ་པ་ནི། དཀྱིལ་འཁོར་དེའི་དབུས་དང་ཕྱོགས་བཞིར་མཉྫིའི་སྟེང་དུ་སྔར་ལྟར་གྱི་རྣམ་རྒྱལ་བུམ་པ་ལྔ་མ་ནོར་བར་བཞག་ལ། གཟུངས་ཐག་ཕྱོགས་བཞིའི་ཕུར་པ་བཞི་ལ་སྦྲེལ། ཕྱོགས་བཞི་དང་མཚམས་(༧༤)བཞིར་སྒོ་བ་བཞི་དང་ཡུམ་བཞིའི་ཕུར་པ་མཐོ་དོ་དོ་ཡོད་པ་རེ་བཙུགས་ལ་ཡེ་ཤེས་ལྔའི་གྲུ་གུས་དྲྭ་བ་རིས་སུ་སྦྲེལ། མཐའ་ཆག་གི་མེ་རི་ལ་མེ་རིའི་ཤོག་བསྐོར་གཏང་། མཐའ་བསྐོར་དུ་ཕྱི་ནང་གི་མཆོད་པ་ལེགས་པར་བཤམས། དེའང་གཡས་སུ་ཕྱི་མཆོད་ལ། གཡོན་ནས་ནང་མཆོད་བཤམས་པའམ། སྦྲག་མར་བཤམས། སྟེང་དུ་རྨ་བྱའི་གདུགས་དང་། ཟུར་བཞིར་རྒྱལ་མཚན་བཞི། ཕྱོགས་བཞིར་འཕན་བཞི། བུམ་པའི་ཁ་རྒྱན་གསེབ་ཏུ་ཤེལ་དང་རྨ་བྱ་མེ་ལོང་གཟུག །དེའི་སྟེང་དུ་བླ་བྲེས་ཕུག་ཅིང་དཀྱིལ་འཁོར་ལ་ཡོལ་བ་གྲུ་བཞིར་བྲེ། ས་གཞི་མཆོད་རྫས་ཀྱིས་བརྒྱན་ཞིང་གཏོར་ཚོགས་ཤིན་ཏུ་བཟང་བར་བཤམ་མོ། །

གཉིས་པ་ལ་གཉིས་ལས། དཀྱིལ་འཁོར་བསྒྲུབ་པ་ནི། སྟ་གོན་དུ་བྱ་བའི་སྐབས་བཞིན་བྱས་ལ། མཆོད་བསྟོད་དང་བཀྲ་ཤིས་བརྗོད། བདག་འཇུག་བླང་བ་ནི། འདི་མན་ཆད་ཀྱི་ཆོ་ག་འདོན་པ་བསྒྱུར་ལ། སློབ་མའི་གནས་སུ་རང་གིས་མིང་བཞུག་སྟེ། དཀྱིལ་འཁོར་གྱི་གཙོ་བོས་དབང་བསྐུར་བར་བསམས་ལ། དབང་བཞི་རིམ་པས་བླང་ངོ་། །འདི་ཉིད་སློབ་དཔོན་གྱིས་དགོངས་པ་སྟེ་གལ་པོ་ཆེའི་གནད་ཡོད་དོ། །

གསུམ་པ་ཆོ་ག་དངོས་ཇི་ལྟར་བྱ་བ་ནི། ལས་ཀྱི་སློབ་དཔོན་གྱིས་ལས་བུམ་ཐོགས་ཏེ། སློབ་མ་རྣམས་ཁྲུས་བྱས་ལ་གདོང་གཡོགས་བཅིངས་ཏེ། ཐམས་ཅད་ལག་པ་སྦྲེལ་ནས་ལས་ཀྱི་སློབ་དཔོན་གྱི་ཕྱག་གི་རྡོ་རྗེ་ལ་སྔ་མ་དེས་བཟུང་ནས། དཀྱིལ་འཁོར་ཡོལ་བས་བྲེས་པ་དེ་ཡི་ཕྱི་རོལ་ནས་བསྐོར་བ་ལན་གསུམ་བྱས་ཏེ། ཕྱི་སྒོ་བཅད་པའི་དྲུང་ནས་གསོལ་བ་གདབ་པ་ནི། ཀྱེ་ཁྲོ་བོ་མི་བཟད་འཇིགས་པའི་སྐུ། །མཚོན་ཆ་སྣ་ཚོགས་ཕྱག་ན་བསྣམས། །བདག་ཅག་འཁོར་བ་ལས་བསྒྲལ་ཕྱིར། །ཁྱེད་ཀྱིས་གནང་སྟེ་གཏང་དུ་གསོལ། །ཞེས་པ་གསུམ་གྱིས་ཞུས་པ་དང་། ནང་ནས་བླ་མས། ཁྱེད་སུ་ཡིན་ཅི་བྱེད་ཅེས་ལན་གསུམ་དྲིས་པའི་ལན་དུ། ཕྱི་ནས་བདག་ནི་སྐལ་ལྡན་རིགས་ཀྱི་བུ་ཡིན། དཔལ་རིགས་ཀྱི་བདག་པོ་ལ་དབང་ཞུ་ཞེས་པ་གསུམ་གྱིས་ལན་གདབ་བོ། །དེ་ནས་གུ་གུལ་གྱིས་བདུག་ཅིང་རོལ་མོའི་སྒྲ་དང་སུམ་བྷ་ནིས། སློབ་མའི་བགེགས་བསྐྲད་ལ་ཡི་གེ་བརྒྱ་པ་རེ་ཟློས་སུ་བཅུག་ལ་བླ་མས་ཕྱོགས་མཚམས་སྟེང་འོག་ཐམས་ཅད་རྡོ་རྗེའི་རྭ་བ་གུར་བླ་བྲེ་ཡེ་ཤེས་ཀྱི་མེ་རི་འབར་བས་མཚམས་བཅད་ལ་བགེགས་ཀྱིས་བསྐལ་པའི་(༧༥)བར་དུ་མི་ཐར་བར་བསམས་ལ། སློབ་མས་ཕྱི་ནས་མཎྜལ་ལན་ལྔ་ཕུལ་ནས་མེ་ཏོག་བཟུང་སྟེ་གསོལ་བ་གདབ་པ་ནི། ཀྱེ་མ་རིགས་ལྔ་བདེ་བར་གཤེགས་པ་དང་། །བླ་མ་ཡི་དམ་ཌཱ་ཀི་དགོངས། །སྒོ་བ་ཆེན་པོ་ཁྱེད་རྣམས་ཀྱིས། །སྒོ་ཕྱེ་ཐར་པའི་གྲོང་བསྟན་འཚལ། །ཞེས་ལན་གསུམ་གྱིས། ཡོལ་བའི་སྒོ་ཕྱེ་ནས་ནང་དུ་བཏང་། དཀྱིལ་འཁོར་གྱི་ལྷ་ཐམས་ཅད་ཀྱིས་གཟིགས་པར་བསམས་ལ། ཕྱག་འཚལ་ཏེ་མེ་ཏོག་གཏོར་ནས། ཡང་གཙོ་བོ་ལ་ཕྱག་དང་ཐལ་མོ་སྦྱར་ཏེ། ཀྱེ་བླ་མ་རྡོ་རྗེ་འཛིན་པ་དང་། །དཀྱིལ་འཁོར་ལྷ་ཚོགས་སྤང་ན་ནི། །སྐྱོབ་པ་གཞན་ན་མི་མངའ་བས། །ཁྱེད་ཀྱི་ཐུགས་རྗེས་བདག་ལ་སྩོལ། །ཞེས་པ་གསུམ་གྱིས་མེ་ཏོག་གཏོར་ནས་བླ་མས། ཀྱེ་མ་ཁྱོད་ནི་སྣོད་མཆོག་དམ་པ་སྟེ། །ཁྱོད་འདོད་པ་ནི་བདག་གིས་སྦྱིན། །ཞེས་པ་དང་། སློབ་མས། བདག་ནི་འབྲས་བུ་གསང་སྔགས་ཀྱི། །དངོས་གྲུབ་བདུད་རྩིའི་ཆུ་རྒྱུན་གྱིས། །སྨིན་ཅིང་གྲོལ་བར་འདོད་པས་ན། །ཐུགས་རྗེས་བདག་ལ་གནང་བར་མཛོད། །ཅེས་པ་གསུམ་བརྗོད་པ་དང་། བླ་མས། ཨེ་མ་ཨེ་མ་རིགས་ཀྱི་བུ། །ཁྱོད་ནི་ལས་ཟད་འཁྲུལ་པ་ཞིག །རིགས་ཀྱི་བུ་མཆོག་ཁྱེད་ཡིན་པས། །ངས་ཁྱེད་ཀུན་བཟང་རིགས་ལྔ་ཡི། །དཀྱིལ་འཁོར་འཇུག་ཅིང་ཡེ་ཤེས་དབབ། །དངོས་གྲུབ་ཐམས་ཅད་ཁྱོད་ཀྱིས་ཐོབ། །དངོས་གྲུབ་དཀྱིལ་འཁོར་འདི་དག་ནི། །མ་མཐོང་བ་ལ་སྨྲས་པས་ན། །དམ་ཚིག་ཉམས་ཏེ་དམྱལ་བར་ལྟུང་། །རིགས་ལྔ་ཡེ་ཤེས་རྣམ་པ་ལྔ། །ཁྱེད་ཀྱི་ཐུགས་ལ་ཞུགས་པ་སྟེ། །འདི་སྨྲས་ཡེ་ཤེས་ལྷ་དང་བྲལ། །ཞེས་པ་དང་། བདུད་རྩི་ལྕེ་ལ་བཞག་ནས། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་ཉམས་ན་བསྲེག་པར་བྱེད། །བསྲུང་ན་དངོས་གྲུབ་ཐམས་ཅད་ཐོབ། །དམ་ཚིག་བདུད་རྩིའི་ཆུ་འདི་འཐུང་། །ཨོཾ་ཨ་མྲྀ་ཏ་དམ་ལས་མ་འདའ་སྭཱ་ཧཱ། འོ་ཁྱོད་ཀྱི་སྟོན་པ་རིགས་ལྔའི་སངས་རྒྱས་ང་ཡིན་པས། ངས་བཀའ་བསྒོ་བ་ལས་མ་འདའ་ཞིག །འདས་ན་མྱུར་དུ་རྡོ་རྗེ་དམྱལ་བར་སྐྱེས་ནས་ཐོན་པའི་དུས་མེད་དོ་ཞེས་བསྒྲག་གོ། །ཡེ་ཤེས་དབབ་པ་ནི་སློབ་མ་རྣམ་སྣང་གི་ཆོས་བདུན་དང་ལྡན་པའི་སྙིང་གི་ནང་དུ་གཡུང་དྲུང་འཁྱིལ་པ་དམར་པོ་གཅིག་གི་ནང་དུ་ཟླ་བའི་དཀྱིལ་འཁོར་གཅིག་ལ་ཡཾ་གཅིག་བསམ། གཡུང་དྲུང་གི་ཡན་ལག་བཞི་ལ་ཧ་རི་ནི་ས་བསམས་ལ། ཡཾ་ལས་རླུང་བྱུང་བས་གཡུང་དྲུང་འཁྱིལ་པ་སྙིང་དང་བཅས་པ་གཡོན་དུ་འཁོར་བ་ལ་དམིགས་པ་འཛིན་དུ་བཅུག་ལ། བྱི་ལའི་བྲུན་(༧༦)རཀྟ། ཤ་ཆེན། གུ་གུལ་ནག་པོ། གླང་ཆེན། བདུད་རྩི་ལྔ། རའི་རྐང་ལག་བཞིའི་ཉ་ཤ །རང་རང་གི་སྐྲ་རྣམས་སྦྱར་བ་སོལ་མེ་ལ་བསྲེག་ཅིང་། རོལ་མོའི་སྒྲ་དང་རྩ་སྔགས་དྲག་ཏུ་བཟླས་ཤིང་ཐུགས་ཀའི་ས་བོན་ལས་འོད་འཕྲོས་པས་རིགས་ལྔའི་སངས་རྒྱས་དང་། བྱང་ཆུབ་སེམས་དཔའ་དང་། རིག་འཛིན་ཆེན་པོ་རྣམས་དང་། མཁའ་འགྲོ་དཔག་ཏུ་མེད་པ་སྤྲིན་ཕུང་གཏིབས་པ་བཞིན་བྱོན་ནས་སློབ་མའི་སྙིང་ནང་དུ་སིབ་སིབ་ཐིམ་ནས་འཁྲབ་ཅིང་གར་བྱེད་པར་བསམས་པས་ཡེ་ཤེས་པ་ཕེབས་པའི་རྟགས་སུ་ལུས་འཕར་འཁྲབ་འདར་སྤུ་ཟིང་ཟིང་པ་དང་། ངག་སྨྲ་བརྗོད་དུ་གླུ་ལེན་པ་དང་། སེམས་བདེ་གསལ་མི་རྟོག་པ་ཁྱད་པར་ཅན་སྐྱེའོ། །དེ་ནས་དཀྱིལ་འཁོར་གྱི་ཤར་སྒོར་སློབ་མ་ཁྲིད་དེ་ཕྱག་འཚལ་ལ། ཀྱེ་ཤར་སྒོ་བསྲུང་བའི་སྒོ་མ་ལྕགས་ཀྱུ་མ། །ཤར་གྱི་སྒོ་འདི་ཕྱེས་ལ་ནི། །བདག་ཅག་ཡི་དམ་ལྷ་དང་སྤྲོད། །ཅེས་པ་དང་། ལྷོ་སྒོར་ཕྱིན་ལ། ཀྱེ་ལྷོ་སྒོ་བསྲུང་བའི་སྒོ་མ་ཞགས་པ་མ། །ལྷོ་ཡི་སྒོ་འདི་ཕྱེས་ལ་ནི། །བདག་ཅག་ཡི་དམ་ལྷ་དང་སྤྲོད། །ཅེས་པ་དང་། ནུབ་སྒོར། ཀྱེ་ནུབ་སྒོ་བསྲུང་བའི་སྒོ་མ་ལྕགས་སྒྲོག་མ། །ནུབ་ཀྱི་སྒོ་འདི་ཕྱེས་ལ་ནི། །བདག་ཅག་ཡི་དམ་ལྷ་དང་སྤྲོད། །ཅེས་པ་དང་། བྱང་སྒོར། ཀྱེ་བྱང་སྒོ་བསྲུང་བའི་སྒོ་མ་དྲིལ་བུ་མ། །བྱང་གི་སྒོ་འདི་ཕྱེས་ལ་ནི། །བདག་ཅག་ཡི་དམ་ལྷ་དང་སྤྲོད། །ཅེས་བརྗོད་ནས་མེ་ཏོག་ཐོགས་ལ། ཀྱེ་བདེ་གཤེགས་རིགས་ལྔའི་ཕོ་བྲང་དུ། །འབྲེལ་བའི་མེ་ཏོག་འདི་བོར་བས། །འབྲེལ་པ་གང་ཡོད་ལྷ་དང་བདག་འཕྲད་ཤོག །པུཥྤེ་སི་ཏི་སྟྭཾ་ཞེས་པས་མེ་ཏོག་དོར་བས། མེ་ཏོག་གང་ལ་ཕོག་པའི་ལྷ་དང་རང་ངོ་སྤྲད་དེ་ལྷ་དེའི་རིགས་ཙམ་ཞིག་བཤད་དོ། །གདོང་གཡོགས་བཀྲོལ་བ་ནི། སྟོན་པ་རིགས་ལྔའི་སངས་རྒྱས་ཀྱིས། །ཁྱེད་ཀྱི་མ་རིག་འཁོར་བའི་མིག །ཡེ་ཤེས་སྤྱན་དུ་དབྱེ་བར་བྱ། །དེ་བཞིན་ཁྱོད་ཀྱིས་འགྲོ་བ་རྣམས། །ཡེ་ཤེས་སྤྱན་དུ་དབྱེ་བར་ཤོག །ཨོཾ་ཙཀྵུ་སྭཱ་ཧཱ། ཨོཾ་ཞེས་པས་དཀྲོལ་ལོ། །ཡང་བླ་མས། ཀྱེ་མ་རིགས་ཀྱི་བུ་རྣམས་ཀུན། །ཁྱེད་རྣམས་སྡིག་པ་ཀུན་ལས་གྲོལ། །དཀྱིལ་འཁོར་ཆེན་པོ་འདི་ལ་ལྟོས། །ལུས་ངག་ཡིད་ཀྱི་དད་པ་བསྐྱེད། །སྔགས་དང་ཕྱག་རྒྱས་བྱིན་གྱིས་བརླབས། །དངོས་གྲུབ་ཐམས་ཅད་ཁྱེད་ཀྱིས་ཐོབ། །དམ་ཚིག་སྔགས་ལ་བརྩོན་པར་གྱིས། །ཞེས་བརྗོད་ནས།

དཀྱིལ་འཁོར་དང་ལྷའི་རྣམ་དག་བཤད་པ་ནི། འོ་རིགས་ཀྱི་བུ་དཀྱིལ་འཁོར་འདི་ལ་ལྟོས་ཤིག །དེ་ཡང་སེམས་ཅན་དང་སངས་རྒྱས་(༧༧)གཞི་གཅིག་པའི་རྟགས་སུ་དཀྱིལ་འཁོར་འཇམ་ཞིང་སྲུབ་མེད་པའོ། །ཕྱིན་ཅི་ལོག་གི་བདུད་རྣམས་སྲེག་པའི་རྟགས་སུ་མེའི་འོད་ཀྱི་ཕྲེང་བའོ། །ཟབ་མོའི་ཆོས་ཀྱི་འཁོར་ལོ་བསྐོར་བའི་རྟགས་སུ་རྡོ་རྗེའི་ཕྲེང་བའོ། །འགྲོ་བའི་ཡིད་བཞིན་དུ་དོན་བྱེད་པའི་རྟགས་སུ་པདྨའི་ཕྲེང་བའོ། །ཐབས་དང་ཤེས་རབ་གཉིས་སུ་མེད་པའི་རྟགས་སུ་ཉི་ཟླའི་གདན་ནོ། །རྣམ་པར་ཤེས་པའི་ཚོགས་བརྒྱད་རང་སར་དག་པའི་རྟགས་སུ་དུར་ཁྲོད་བརྒྱད་དོ། །གདོད་མ་ནས་རང་བཞིན་གྱིས་རྣམ་པར་དག་པའི་བྱམས་པ་ཆེན་པོ་མངའ་བའི་རྟགས་སུ་གདུགས་ཀྱིས་ཕུབ་པའོ། །སེམས་ཅན་ལ་ཐེག་པ་གསུམ་གྱི་ཆོས་ཀྱི་འཁོར་ལོ་བསྐོར་བའི་རྟགས་སུ་ཆོས་ཀྱི་འཁོར་ལོའོ། །ཕྱིར་རྒོལ་བ་དང་རྣམ་རྟོག་གིས་དབེན་པའི་རྟགས་སུ་རི་དྭགས་སོ། །ཚད་མེད་པ་བཞི་པསྒོམས་པའི་རྟགས་སུ་རྟ་བབས་བང་རིམ་བཞིའོ། །མཐར་ཕྱིན་པའི་ཡོན་ཏན་བརྙེས་པའི་རྟགས་སུ་རྩེ་མོའི་རིམ་པའོ། །ཆགས་པ་མེད་པའི་ཐུགས་རྗེས་འགྲོ་བའི་དོན་བྱེད་པའི་རྟགས་སུ་མདའ་ཡབ་བོ། །བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་རྣམ་པར་དག་པའི་རྟགས་སུ་དྲྭ་བ་དང་དྲྭ་ཕྱེད་དོ། །ཆེ་བའི་ཡོན་ཏན་དུ་མ་དང་ལྡན་པའི་རྟགས་སུ་རིན་པོ་ཆེའི་ཕ་གུའོ། །འདོད་ཡོན་ལྔ་མི་སྤངས་པའི་རྟགས་སུ་འདོད་ཡོན་གྱི་ལྷ་མོ་བཅུ་དྲུག་གོ། །རིགས་ལྔའི་དགོངས་པ་ལམ་དུ་ཁྱེར་བའི་རྟགས་སུ་པཉྩ་ར་གའི་རྩིགས་པ་ལྔའོ། །རྣམ་པར་ཐར་པའི་ས་ནས་སྐྱེ་བ་མེད་པའི་སར་འགྲོ་བའི་རྟགས་སུ་སྒོ་བཞིའོ། །འཕགས་པའི་ཡོན་ཏན་མཆོག་ལ་མངའ་བརྙེས་པའི་རྟགས་སུ་ལྷའི་སྣམ་བུའོ། །ཕྲིན་ལས་བཞི་མཐར་ཕྱིན་པའི་རྟགས་སུ་གྲུ་ཆད་བཞིའོ། །སྐུ་གསུམ་འདུ་འབྲལ་མེད་པའི་རྟགས་སུ་མུ་ཁྱུད་གསུམ་མོ། །རིགས་ལྔའི་ཁ་དོག་སོ་སོར་མཚོན་པའི་རྟགས་སུ་པདྨ་བཞིའོ། །ཡབ་ཡུམ་གཉིས་སུ་མེད་པའི་རྟགས་སུ་མཚམས་བཞི་མཛེས་ཚོན་ནོ། །རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོན་གྲུབ་པ་དང་ལྔར་བྱུང་བ་འདི་ཡང་། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་ལྔ་གནས་གྱུར་ནས་སྐུ་ལྔ་དང་ཡེ་ཤེས་ལྔ་ལྷུན་གྱིས་གྲུབ་པའི་རྟགས་ཡིན་ནོ། །ཡུམ་བཞིར་བྱུང་བ་འདི་འབྱུང་བ་བཞི་རྣམ་པར་དག་ཅིང་ཕྲིན་ལས་བཞིས་འགྲོ་བའི་དོན་བྱེད་པའི་རྟགས་སོ། །སེམས་དཔའ་ཡབ་ཡུམ་དུ་སྣང་བ་འདི་ཡང་རྣམ་(༧༨)པར་ཤེས་པའི་ཚོགས་བརྒྱད་ཀྱི་ཡུལ་རྣམ་པར་དག་པའི་རྟགས་སོ། །ཐུབ་པ་དྲུག་ཀྱང་ཉོན་མོངས་པ་དྲུག་རྣམ་པར་དག་ཅིང་ཕ་རོལ་ཏུ་ཕྱིན་པ་དྲུག་རྣམ་པར་དག་པའི་རྟགས་སོ། །ཀུན་བཟང་ཡབ་ཡུམ་གཉིས་སུ་སྣང་བ་ཡང་ཀ་དག་དང་ལྷུན་གྲུབ་གཉིས་སུ་མེད་པས་ཐབས་དང་ཤེས་རབ་སྣང་སྟོང་རྣམ་པར་དག་པའི་རྟགས་ཡིན་ནོ། །སྒོ་བ་བཞི་ཡང་ཚད་མེད་པ་བཞིས་འགྲོ་བའི་དོན་བྱེད་པའི་རྟགས་སོ། །བུམ་པ་ལྔ་ཟླུམ་པོར་བྱུང་བ་འདི་ཡང་གདོད་མའི་ཆོས་སྐུ་ཀ་དག་ཆེན་པོ་མཐའ་དབུས་དང་བྲལ་བ་གཞོན་ནུ་བུམ་པའི་སྐུར་བཞུགས་པའི་རྟགས་སོ། །ཁ་དོག་ལྔར་བྱུང་བ་འདི་ཡང་ཡེ་ཤེས་ལྔ་དང་ལྡན་པའི་རྟགས་སོ། །ཁ་རྒྱན་ཕུན་སུམ་ཚོགས་པ་འདི་ཞི་ཁྲོ་འོད་ཟེར་གྱི་ཚུལ་དུ་ཡོད་པའི་རྟགས་སོ། །དེའི་གསེབ་ཀྱི་རྡོ་རྗེ་འདི་རང་རིག་ལས་འགྱུར་བ་མེད་པའི་རྟགས་སོ། །མགུལ་ཆིངས་ལྔ་དང་ལྡན་པ་འདི་ཡང་ཉོན་མོངས་པ་ལྔ་སྣང་ཡུལ་དུ་དག་པའི་རྟགས་སོ། །གཟུངས་ཐག་ལྔ་སྦྲེལ་བཏགས་པ་འདི་ཡང་ཐུགས་རྗེ་ཀུན་ཏུ་ཡོད་པའི་རྟགས་སོ། །ཤེལ་དཀར་དང་མེ་ལོང་གཉིས་ནི་རིག་པ་ལ་དྲི་མ་མེད་ཅིང་སྟོང་གསལ་མ་འགག་པར་ཡོད་པའི་རྟགས་སོ། །རྨ་བྱའི་གདུགས་འདི་ནི་སྒྲོན་མ་བཞི་དབྱིངས་སུ་འཁྱིལ་པ་གསལ་བའི་རྟགས་སོ། །རྒྱལ་མཚན་བཞི་ཟུར་བཞིར་མཛེས་པ་འདི་ནི་སངས་རྒྱས་ཀྱི་བསྟན་པ་མི་ནུབ་པར་བྱེད་པའི་རྟགས་སོ། །འཕན་དར་བཞི་ཕྱོགས་བཞིར་མཛེས་པ་འདི་ནི་སྙན་པའི་བ་དན་ཕྱོགས་བཅུར་སྒྲོགས་པའི་རྟགས་སོ། །མཆོད་ཚོགས་དང་གཏོར་ཚོགས་རྒྱ་ཆེར་བཤམས་པ་འདི་ཡང་བླ་མ་ཡི་དམ་མཁའ་འགྲོ་མཉེས་པར་བྱེད་དགོས་པའི་རྟགས་སོ། །གཞན་ཡང་བཀོད་པའི་བྱེ་བྲག་རྒྱན་དང་བཅས་པ་འདི་ཡང་དབང་བསྐུར་བ་ལ་ཕུན་སུམ་ཚོགས་པ་ལྔ་ལྡན་ཚང་དགོས་པའི་རྟགས་སོ། །རྡོ་རྗེ་སློབ་དཔོན་རྒྱན་དང་ལྡན་པ་འདི་ཡང་དབང་བསྐུར་བའི་ཚེ་བྱིན་རླབས་ཆེན་པོ་རང་བཞིན་གྱིས་འབེབས་པའི་རྟགས་སོ། །ཞེས་གསེར་གྱི་ཐུར་མས་སློབ་མ་ལ་ལྷ་ངོ་བསྟན་ནོ། །དེ་དག་ནི་དངོས་གཞིའི་སྦྱོར་བའོ། །

ད་ནི་དབང་བསྐུར་བ་དངོས་ལ། སློབ་མས་མཎྜལ་ཕུལ་ནས། ཀུན་བཟང་ཡབ་ཡུམ་ཡེ་ཤེས་དབང་། །བདག་ཅག་རྣམས་ལ་བསྐུར་དུ་གསོལ། །ཞེས་པ་གསུམ་གྱིས་འགྲེངས་ཏེ་ཐལ་མོ་རེ་སྦྱར་ཞིང་ཕྱག་རེ་བཙལ་ནས། ཤར་སྒོར་སེང་གེའི་ཁྲི་བརྩིགས་པའམ་བྲིས་པ་ལམ་གྱིས་བསྒོམས་པ་ལ་སློབ་མ་རྣམས་བཞག་ནས་མེ་ཏོག་གང་ལ་ཕོག་པའི་ལྷ་དེ་བསྒོམ་དུ་(༧༩)བཅུག་ལ། དཀྱིལ་འཁོར་གྱི་སྟེང་ནས་མེ་ཏོག་བླང་ནས་མགོའམ་མཐོངས་ཁ་གཡོན་ལ་བཏགས་ཏེ། སློབ་དཔོན་གྱིས། མེ་ཏོག་གང་ལ་ཕོག་པ་འདི། །སྔོན་ནས་ཁྱེད་ཀྱི་ཡི་དམ་ལྷ། །རྟག་ཏུ་བསྒོམ་དང་བསྒྲུབ་པ་གྱིས། །ཨོཾ་བཛྲ་པུཥྤེ་སི་ཏི་སྟྭྃ། འོ་ཁྱོད་ཀྱི་ཡི་དམ་ལྷ་འདི་ཡིན་པས་དུས་རྒྱུན་དུ་སྒོམས་ལ་བསྐྱེད་རྫོགས་ཀྱི་དོན་ལ་གནས་པར་གྱིས་ཤིག །རིགས་ལྔའི་བསྐྱེད་རྫོགས་ཀྱི་ལུང་གང་མཁོ་བ་སློབ་མ་རེ་རེ་ལ་དཔོག་གོ། །དེ་ནི་དབང་ལ་སྔ་བ་ལྷ་དང་འབྲེལ་བའི་དབང་ངོ་། །དེ་ནས་རིགས་ལྔའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དབང་བསྐུར་ཏེ། དང་པོ་སྐུ་ཡི་དབང་ནི་སློབ་མ་རྣམས་རྡོ་རྗེ་སེམས་དཔའ་དཀར་པོ་གཡས་རྡོ་རྗེ་རྩེ་ལྔ་པ་རྟོད་དེ་ཐུགས་ཀར་འཛིན་ཅིང་། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་པའི་སྤྱི་བོར་པད་ཟླའི་སྟེང་དུ་ཨཱ་དཀར་པོ་གཅིག་བསྒོམ་དུ་གཞུག་ཅིང་། བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་རྡོ་རྗེ་སེམས་དཔའི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང་། བླ་མ་དང་རྡོ་རྗེ་སེམས་དཔའ་དབྱེར་མེད་དུ་སློབ་མའི་སྤྱི་བོར་ཞུགས་པ་ལ་དམིགས་པ་འཛིན་དུ་བཅུག་ལ། བླ་མས་དབུས་ཀྱི་བུམ་པ་དེ་བླངས་ནས་ཐོགས་ཏེ། སློབ་མའི་སྤྱི་བོར་བཞག་ལ་དབྱངས་དང་བཅས་པས། ཧཱུྃ་གཟུགས་ཀྱི་ཕུང་པོ་རྣམ་དག་ཅིང་། །ཉོན་མོངས་ཞེ་སྡང་སྦྱོང་བྱེད་པའི། །མེ་ལོང་ལྟ་བུའི་ཡེ་ཤེས་ཀྱིས། །དཔལ་ལྡན་སྐུ་ཡི་དབང་བསྐུར་རོ། །ཨོཾ་བཛྲ་ཨ་བྷི་ཥིཉྩ་ཧཱུྃ། ཞེས་བརྗོད་ནས། བུམ་ཆུ་དེ་འཐུང་བ་དང་ཁྲུས་བྱེད་དུ་བཅུག་ལ། འོ་རིགས་ཀྱི་བུ་ཁྱོད་ཀྱིས་ཆུ་འདི་འཐུངས་ཤིང་ཁྲུས་བྱས་པ་ཙམ་གྱིས་ལུས་ཀྱི་སྒྲིབ་པ་ཐམས་ཅད་བྱང་ནས་འདི་ཉིད་དུ་སངས་རྒྱས་ཐམས་ཅད་ཀྱི་སྐུའི་དབང་ཐོབ་པ་ཡིན་ནོ། །ཁྱོད་ཀྱི་གཟུགས་ཀྱི་ཕུང་པོ་འདི་རྡོ་རྗེ་སེམས་དཔའ་ཉིད་དུ་སངས་རྒྱས་ཏེ། ཆུའི་ཁམས་མཱ་མ་ཀཱིའི་རང་བཞིན་དུ་གནས་འགྱུར། ཞེ་སྡང་མེ་ལོང་ལྟ་བུའི་ཡེ་ཤེས་སུ་གྲོལ་ཏེ། སངས་རྒྱས་རྡོ་རྗེའི་རིགས་ཀྱི་སྐུ་འགྱུར་བ་མེད་པ་ཐོབ་ནས་འགྲོ་བ་ཐམས་ཅད་ཀྱི་དོན་བྱེད་པར་འགྱུར་རོ། །ཞེས་བརྗོད་དོ། །

དེ་ནས་གསུང་གི་དབང་ནི། སློབ་མའི་མགྲིན་པར་པདྨ་དམར་པོ་དང་ཟླ་བའི་སྟེང་དུ་ཨཱཿདམར་པོ་བསམ་ཞིང་། དེ་ཉིད་སྣང་བ་མཐའ་ཡས་དམར་པོ་གཡས་པདྨ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ་ལ་སོགས་པའི་དམིགས་པ་སྔ་མ་བཞིན་བསམས་ཏེ། རྡོ་རྗེ་མགྲིན་པར་བཟུང་ནས། ཧཱུྃ་འདུ་ཤེས་ཕུང་པོ་རྣམ་དག་ཅིང་། །ཉོན་(༨༠)མོངས་འདོད་ཆགས་སྦྱོང་བྱེད་པའི། །སོ་སོར་རྟོགས་པའི་ཡེ་ཤེས་ཀྱིས། །དཔལ་ལྡན་གསུང་གི་དབང་བསྐུར་རོ། །ཨོཾ་པདྨ་ཨ་བྷི་ཥིཉྩ་ཧྲཱིཿཞེས་པས་རྡོ་རྗེ་ལག་ཏུ་གཏད་ལ། འོ་རིགས་ཀྱི་བུ་ཁྱོད་ཀྱི་ལག་ཏུ་རྡོ་རྗེ་འདི་གཏད་པ་ཙམ་གྱིས་འདིར་ངག་གི་སྒྲིབ་པ་དག་ནས་སངས་རྒྱས་ཐམས་ཅད་ཀྱི་གསུང་གི་དབང་ཐོབ་པ་ཡིན་ནོ། །འདུ་ཤེས་ཀྱི་ཕུང་པོ་སྣང་བ་མཐའ་ཡས་ཉིད་དུ་སངས་རྒྱས་ཏེ་མེའི་ཁམས་ཀྱང་གོས་དཀར་མོའི་རང་བཞིན་ཉིད་དུ་དག་ནས། འདོད་ཆགས་སོ་སོར་རྟོགས་པའི་ཡེ་ཤེས་ཉིད་དུ་གྲོལ་ཏེ། སངས་རྒྱས་པདྨའི་རིགས་ཀྱི་གསུང་འགག་པ་མེད་པའི་ཆོས་ཀྱི་སྒྲ་དབྱངས་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །

དེ་ནས་ཐུགས་ཀྱི་དབང་བསྐུར་བ་ནི། སློབ་མ་རྣམ་སྣང་མཐིང་ག་ཕྱག་ན་འཁོར་ལོ་འཛིན་པའི་ཐུགས་ཀར་ཟླ་བའི་སྟེང་དུ་ཧཱུྃ་མཐིང་ག་ལས་དམིགས་པ་གོང་དང་འདྲ་བས། ཧཱུྃ་རྣམ་ཤེས་ཕུང་པོ་རྣམ་དག་ཅིང་། །ཉོན་མོངས་གཏི་མུག་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་ཐུགས་ཀྱི་དབང་བསྐུར་རོ། །ཨོཾ་བུདྡྷ་ཨ་བྷི་ཥིཉྩ་ཨཱ། ཞེས་བརྗོད་ནས། མེ་ཏོག་གང་ལ་ཕོག་པའི་ལྷའི་མིང་བཏགས་ཏེ། འོ་རིགས་ཀྱི་བུ་ཁྱོད་ལ་མིང་ཆེ་གེ་མོ་ཞེས་བཏགས་པ་ཙམ་གྱིས་འདིར་ཡིད་ཀྱི་སྒྲིབ་པ་ཐམས་ཅད་དག་ནས་སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ་པ་ཡིན་ནོ། །རྣམ་པར་ཤེས་པའི་ཕུང་པོ་ཡང་རྣམ་པར་སྣང་མཛད་དུ་སངས་རྒྱས་ཏེ། ནམ་མཁའི་ཁམས་ཀྱང་ཆོས་ཀྱི་དབྱིངས་ཀྱི་དབང་ཕྱུག་མར་དག་ནས། གཏི་མུག་ཆོས་ཀྱི་དབྱིངས་ཀྱི་ཡེ་ཤེས་སུ་གྲོལ་ཏེ། སངས་རྒྱས་དེ་བཞིན་གཤེགས་པའི་རིགས་ཀྱི་ཐུགས་འཁྲུལ་པ་མེད་པ་ཆོས་ཀྱི་སྐུ་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །དེའང་སྐྱེས་པ་རྣམས་ལ་མེ་ཏོག་ཤར་དུ་བབ་པ་ལ། རྡོ་རྗེ་སེམས་དཔའ་དང་། རྡོ་རྗེ་ལེགས་པ་དང་། རྡོ་རྗེ་རྒྱལ་པོ་དང་། རྡོ་རྗེ་ཆགས་པ་ལ་སོགས་པའི་མིང་བཏགས་ཤིང་། བུད་མེད་ལ་རྡོ་རྗེ་མཱ་མ་ཀཱི་དང་། དབྱིངས་ཕྱུག་མ་ལ་སོགས་པའོ། །ལྷོར་རྡོ་རྗེ་རིན་ཆེན་དང་། རྡོ་རྗེ་གཟི་བརྗིད་དང་། རྡོ་རྗེ་རྒྱལ་མཚན་དང་། རྡོ་རྗེ་བཞད་པ་ལ་སོགས་པ་དང་། བུད་མེད་ལ་སངས་རྒྱས་སྤྱན་དང་། རིན་ཆེན་དབྱིངས་ཕྱུག་མ་ལ་སོགས་པའོ། །ནུབ་ཏུ་སྐྱེས་པ་ལ། རྡོ་རྗེ་ཆོས་དང་། རྡོ་རྗེ་རྣོན་པོ་དང་། རྡོ་རྗེ་རྒྱུ་དང་། རྡོ་རྗེ་སྨྲ་བ་ལ་སོགས་པ་དང་། བུད་མེད་ལ་རྡོ་རྗེ་གོས་དཀར་མོ་དང་། (༨༡)པདྨ་དབྱིངས་ཕྱུག་མ་ལ་སོགས་པའོ། །བྱང་དུ་སྐྱེས་པ་ལ་རྡོ་རྗེ་ལས་དང་། རྡོ་རྗེ་སྲུང་བ་དང་། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་ལ་སོགས་པ་དང་། བུད་མེད་ལ་རྡོ་རྗེ་སྒྲོལ་མ་དང་། ལས་ཀྱི་དབྱིངས་ཕྱུག་མ་ལ་སོགས་པའོ། །

དེ་ནས་ཡོན་ཏན་གྱི་དབང་བསྐུར་བ་ནི། སློབ་མ་རིན་ཆེན་འབྱུང་ལྡན་ཡབ་ཡུམ་སེར་པོ་ཕྱག་ན་རིན་པོ་ཆེ་བསྣམས་པའི་ལྟེ་བར་པད་ཟླའི་སྟེང་དུ་ཏྲཱྃ་སེར་པོ་ལ་སོགས་པའི་དམིགས་པ་སྔ་མ་བཞིན་བསྒོམས་ལ་དབུ་རྒྱན་བསྐོན་ཏེ། ཧཱུྃ་ཚོར་བའི་ཕུང་པོ་རྣམ་དག་ཅིང་། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱིས། །དཔལ་ལྡན་ཡོན་ཏན་དབང་བསྐུར་རོ། །ཨོཾ་རཏྣ་ཨ་བྷི་ཥིཉྩ་ཏྲཱྃ། རིགས་ཀྱི་བུ་ཁྱོད་ལ་དབུ་རྒྱན་འདི་བསྐོན་པ་ཙམ་གྱིས་འདིར་ལུས་ངག་ཡིད་གསུམ་གྱི་སྒྲིབ་པ་དག་ནས་སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ་པ་ཡིན་ནོ། །ཚོར་བའི་ཕུང་པོ་རིན་ཆེན་འབྱུང་ལྡན་དུ་སངས་རྒྱས་ཏེ། སའི་ཁམས་ཀྱང་སངས་རྒྱས་སྤྱན་དུ་དག་ནས་ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ། སངས་རྒྱས་རིན་ཆེན་རིགས་ཀྱི་ཡོན་ཏན་ཐམས་ཅད་མཁྱེན་པ་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །

དེ་ནས་ཕྲིན་ལས་ཀྱི་དབང་ནི། སློབ་མ་དོན་ཡོད་གྲུབ་པ་རལ་གྲི་བསྣམས་པའི་གསང་བར་པད་ཟླའི་སྟེང་དུ་ཨཱཿལྗང་གུ་ལས་དམིགས་པ་སྔ་མ་བཞིན་བསྒོམས་ཏེ། དྲིལ་བུ་སྤྱི་བོར་བཞག་ལ། ཧཱུྃ་འདུ་བྱེད་ཕུང་པོ་རྣམ་དག་ཅིང་། །ཉོན་མོངས་ཕྲག་དོག་སྦྱོང་བྱེད་པའི། །བྱ་བ་གྲུབ་པའི་ཡེ་ཤེས་ཀྱིས། །དཔལ་ལྡན་ཕྲིན་ལས་དབང་བསྐུར་རོ། །ཨོཾ་ཀརྨ་ཨ་བྷི་ཥིཉྩ་ཨཱཿ། ཞེས་བརྗོད་དོ། །དྲིལ་བུའམ། རལ་གྲི་ལག་ཏུ་གཏད་དེ། རིགས་ཀྱི་བུ་ཁྱོད་ལ་དྲིལ་བུ་འདི་ལག་ཏུ་གཏད་པ་ཙམ་གྱིས་འདིར་ལུས་ངག་ཡིད་གསུམ་གྱི་སྒྲིབ་པ་མ་ལུས་པ་དག་ནས་སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ་པ་ཡིན་ནོ། །འདུ་བྱེད་ཀྱི་ཕུང་པོ་ཡང་དོན་ཡོད་གྲུབ་པར་སངས་རྒྱས་ཏེ། རླུང་གི་ཁམས་ཀྱང་དམ་ཚིག་སྒྲོལ་མར་དག་ནས། ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ། སངས་རྒྱས་དོན་ཡོད་གྲུབ་པའི་ཕྲིན་ལས་ཐོགས་པ་མེད་པར་འགྲུབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །བདག་པོའི་དབང་ལྔའོ། །

དེ་ནས་ཀུན་ཏུ་བཟང་པོའི་དབང་ནི། སློབ་མ་ཀུན་ཏུ་བཟང་པོ་རྡོ་རྗེ་དང་དྲིལ་བུ་འཛིན་པར་བསམས་ལ། བླ་མའི་རྟོགས་པ་སློབ་མའི་རྒྱུད་ལ་འཕོ་བར་དམིགས་པ་འཛིན་དུ་(༨༢)བཅུག་ནས། ལག་ཏུ་རྡོ་རྗེ་དང་དྲིལ་བུ་གཏད་ལ། ཨོཾ་ཨཱཿཧཱུྃ་ཐབས་དང་ཤེས་རབ་དབྱེར་མེད་ཅིང་། །སྣང་སྟོང་དབྱེར་མེད་འདི་ཟུང་ལ། །སྟོང་ཉིད་སྙིང་རྗེའི་སྙིང་པོ་ཡིས། །ཀུན་བཟང་རྡོ་རྗེ་འཛིན་ཁྱོད་ཀྱིས། །འགྲོ་ཀུན་རྗེས་སུ་གཟུང་བར་གྱིས། །རིགས་ཀྱི་བུ་ཁྱོད་ལ་རྡོ་རྗེ་དང་དྲིལ་བུ་འདི་གཏད་པ་ཙམ་གྱིས་ཐམས་ཅད་མཁྱེན་པའི་ས་བོན་ཐེབས་ནས། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རང་བཞིན་ཀུན་ཏུ་བཟང་པོ་རིག་པའི་རྩལ་དབང་ཐོབ་པ་ཡིན་ནོ། །རང་གི་སེམས་སྐྱེ་བ་མེད་པ་ཆོས་ཀྱི་སྐུར་སངས་རྒྱས་ཏེ། འདི་ལྟར་སྣང་བ་ཐམས་ཅད་མ་སྤང་གནས་སུ་དག་ནས། སྐུ་གསུམ་འདུ་འབྲལ་མེད་པས་འགྲོ་བའི་དོན་དཔག་ཏུ་མེད་པ་འགྲུབ་པར་འགྱུར་རོ། །ཞེས་བརྗོད་དོ། །

དེ་ནས་ཆུའི་དབང་ནི་བུམ་པ་ལྔའི་ཆུ་གཙོ་བོའི་བུམ་པར་བསྡུས་པའམ། བུམ་པ་ལྔ་རེ་རེ་བཞིན་མ་ནོར་བར་སློབ་མའི་སྤྱི་བོར་དབང་བསྐུར་བས། ལྷ་ཐམས་ཅད་འོད་དུ་ཞུ་བ་ལས་བྱུང་བའི་བདུད་རྩིའི་ཆུ་སྤྱི་བོ་ནས་བབས་པས་ལུས་ཐམས་ཅད་བདུད་རྩིས་གང་ནས་རྒྱལ་བ་རིགས་ལྔའི་ངོ་བོར་གྱུར། ནང་གི་ཁམས་དང་སྐྱེ་མཆེད་ཐམས་ཅད་ལྷ་དང་ལྷ་མོའི་རང་བཞིན་དུ་གསལ་བའི་དམིགས་པ་དང་། ཡང་འོད་ཟེར་ཕྱིར་འཕྲོས་པས་ཕྱི་སྣོད་ལྷའི་གཞལ་ཡས་ཁང་། ནང་བཅུད་ཀྱི་སེམས་ཅན་ལྷ་དང་ལྷ་མོའི་རང་བཞིན་དུ་སྒོམས་ཤིག་བྱས་ལ། ཧཱུྃ་རྡོ་རྗེ་སེམས་དཔའ་བཅོམ་ལྡན་འདས། །མཱ་མ་ཀཱི་ཡི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཨོཾ་ཨཱཿཧཱུྃ་གུ་རུ་ཌཱ་ཀི་ནི་སིདྡྷི་ཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿ ཧ་རི་ནི་ས་ཨ་བྷི་ཥིཉྩ་ྃ་སིདྡྷི་ཕ་ལ་ཧཱུྃ་ཨཱཿ ཧཱུྃ་སྣང་བ་མཐའ་ཡས་བཅོམ་ལྡན་འདས། །གོས་དཀར་མོ་ཡི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཨོཾ་ཨཱཿཧཱུྃ་གུ་རུ་ཌཱ་ཀི་ནི་སིདྡྷི་ཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿ ཧ་རི་ནི་ས་ཨ་བྷི་ཥིཉྩ་ྃ་སིདྡྷི་ཕ་ལ་ཧཱུྃ་ཨཱཿ ཧཱུྃ་རྣམ་པར་སྣང་མཛད་བཅོམ་ལྡན་འདས། །ཀུན་ཏུ་བཟང་མོའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱིས་ཆུས། །རིགས་ཀྱི་བུ་ལ་དབང་བསྐུར་རོ། །ཨོཾ་ཨཱཿཧཱུྃ་གུ་རུ་ཌཱ་ཀི་ནི་སིདྡྷི་ཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿ ཧ་རི་ནི་ས་ཨ་བྷི་ཥིཉྩ་ྃ་སིདྡྷི་ཕ་ལ་ཧཱུྃ་ཨཱཿ ཧཱུྃ་རིན་ཆེན་འབྱུང་ལྡན་བཅོམ་ལྡན་འདས། །སངས་རྒྱས་སྤྱན་གྱི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཨོཾ་ཨཱཿཧཱུྃ་གུ་རུ་ཌཱ་ཀི་ནི་སིདྡྷི་ཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿ ཧ་(༨༣)རི་ནི་ས་ཨ་བྷི་ཥིཉྩ་ྃ་སིདྡྷི་ཕ་ལ་ཧཱུྃ་ཨཱཿ ཧཱུྃ་དོན་ཡོད་གྲུབ་པ་བཅོམ་ལྡན་འདས། །དམ་ཚིག་སྒྲོལ་མའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཨོཾ་ཨཱཿཧཱུྃ་གུ་རུ་ཌཱ་ཀི་ནི་སིདྡྷི་ཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿ ཧ་རི་ནི་ས་ས་མ་ཡ་ཨ་བྷི་ཥིཉྩ་ྃ་སིདྡྷི་ཕ་ལ་ཧཱུྃ་ཨཱཿཞེས་བརྗོད། རིགས་ཀྱི་བུ་ཁྱོད་ལ་དབང་ཐམས་ཅད་བརྟན་པར་བྱེད་པ་བུམ་པའི་དབང་འདི་བསྐུར་བ་ཙམ་གྱིས་སྣོད་བཅུད་ཐམས་ཅད་ལྷ་དང་གཞལ་ཡས་ཁང་གི་རང་བཞིན། ཕུང་པོ་ཁམས་དང་སྐྱེ་མཆེད་ཐམས་ཅད་ལྷ་དང་ལྷ་མོར་གྱུར་པ་ཡིན་པས། ཕྱི་ནང་ཐམས་ཅད་ལ་བརྙས་པ་བྱས་ན་ལྟུང་བར་འགྱུར་བས་དག་སྣང་དང་མོས་པ་གྱིས་ལ། མཆོད་པ་དང་བསྟོད་པ་ལ་དགའ་བ་དང་ངོ་ཤེས་པར་གྱིས་ཤིག །ཅེས་བརྗོད་ལ། བུམ་ཆུ་ཁོང་དུ་བཏང་བས་ཟག་མེད་ཀྱི་ཡེ་ཤེས་སྐྱེས་པར་བསམ་ཞིང་ལྷག་མས་ཁྲུས་བྱའོ། །

དེ་ནས་བརྡའི་དབང་ནི་རིགས་ལྔའི་སྐུ་བསྟན་ལ། རིགས་ཀྱི་བུ་ཁྱེད་ལ་རིགས་ལྔའི་སྐུ་འདི་བསྟན་པ་ཙམ་གྱིས་ཡེ་ཤེས་ལྔའི་ངོ་བོར་སངས་རྒྱས་པ་ཡིན་གྱིས། དེ་ཡང་རྡོ་རྗེ་སེམས་དཔའ་སྐུ་མདོག་དཀར་པོར་བྱུང་བ་འདི་ཡང་ཉོན་མོངས་པ་ཞེ་སྡང་མི་མངའ་ཞིང་མེ་ལོང་ཡེ་ཤེས་དཀར་པོར་ཡོད་པའི་བརྡ་ཡིན་ནོ། །སྣང་བ་མཐའ་ཡས་སྐུ་མདོག་དམར་པོར་བྱུང་བ་འདི་ཡང་སངས་རྒྱས་ཐམས་ཅད་ཀྱི་གསུང་གི་དགོངས་པ་འདུས་ཤིང་ཉོན་མོངས་པ་འདོད་ཆགས་མི་མངའ་ཞིང་སོ་སོར་རྟོགས་པའི་ཡེ་ཤེས་འོད་དམར་པོ་ཡོད་པའི་བརྡ་ཡིན་ནོ། །རྣམ་པར་སྣང་མཛད་སྐུ་མདོག་མཐིང་གར་བྱུང་བ་འདི་ཡང་སངས་རྒྱས་ཐམས་ཅད་ཀྱི་ཐུགས་ཀྱི་དགོངས་པ་འདུས་ཤིང་ཉོན་མོངས་པ་གཏི་མུག་མི་མངའ་ཞིང་ཆོས་ཀྱི་དབྱིངས་ཀྱི་ཡེ་ཤེས་འོད་མཐིང་གར་ཡོད་པའི་བརྡ་ཡིན་ནོ། །རིན་ཆེན་འབྱུང་ལྡན་སྐུ་མདོག་སེར་པོར་བྱུང་བ་འདི་ཡང་སངས་རྒྱས་ཐམས་ཅད་ཀྱི་ཡོན་ཏན་གྱི་དགོངས་པ་འདུས་ཤིང་ཉོན་མོངས་པ་ང་རྒྱལ་མི་མངའ་ཞིང་མཉམ་པ་ཉིད་ཀྱི་ཡེ་ཤེས་འོད་སེར་པོར་ཡོད་པའི་བརྡ་ཡིན་ནོ། །དོན་ཡོན་གྲུབ་པ་སྐུ་མདོག་ལྗང་གུར་བྱུང་བ་འདི་ཡང་སངས་རྒྱས་ཐམས་ཅད་ཀྱི་ཕྲིན་ལས་ཀྱི་དགོངས་པ་འདུས་ཤིང་ཉོན་མོངས་པ་ཕྲག་དོག་མི་མངའ་ཞིང་བྱ་བ་གྲུབ་པའི་ཡེ་ཤེས་འོད་ལྗང་གུར་ཡོད་པའི་བརྡ་ཡིན་ནོ། །སོ་སོའི་ཡོན་ཏན་ཕུན་སུམ་ཚོགས་པ་འདི་ཡང་འཁོར་བ་ཐམས་ཅད་ཟིལ་གྱིས་ནོན་ཅིང་སྐྱོན་གྱིས་མ་གོས་པའི་བརྡ་ཡིན་ནོ། །ཞབས་ཐམས་ཅད་རྡོ་རྗེའི་སྐྱིལ་མོ་ཀྲུང་དུ་བཞུགས་པ་(༨༤)འདི་ཡང་བདུད་ཀྱི་དམག་ཐམས་ཅད་ཀྱིས་མི་གཡོས་ཤིང་ཡང་དག་པར་སངས་རྒྱས་པའི་བརྡ་ཡིན་ནོ། །རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་ནི་དགོས་འདོད་ཐམས་ཅད་རང་ལས་འབྱུང་ཞིང་སྐུ་གསུམ་འདུ་འབྲལ་མེད་པའི་བརྡ་ཡིན་ནོ། །དེ་ཡང་རྡོ་རྗེ་སེམས་དཔའི་ཕྱག་མཚན་རྡོ་རྗེ་དང་རྡོ་རྗེས་ཡུ་བ་བྱས་པའི་དྲིལ་བུ་བསྣམས་པ་འདི་ཡང་གསལ་སྟོང་གཉིས་སུ་མེད་པའི་བརྡ་ཡིན་ནོ། །སྣང་བ་མཐའ་ཡས་ཀྱི་ཕྱག་མཚན་པདྨ་དང་དེས་ཡུ་བ་བྱས་པའི་དྲིལ་བུ་བསྣམས་པ་འདི་ཡང་བདེ་སྟོང་གཉིས་སུ་མེད་པའི་བརྡ་ཡིན་ནོ། །རྣམ་པར་སྣང་མཛད་ཀྱི་ཕྱག་མཚན་འཁོར་ལོ་དང་དེས་ཡུ་བ་བྱས་པའི་དྲིལ་བུ་བསྣམས་པ་འདི་ཡང་རིག་སྟོང་གཉིས་སུ་མེད་པའི་བརྡ་ཡིན་ནོ། །རིན་ཆེན་འབྱུང་ལྡན་གྱི་ཕྱག་མཚན་རིན་པོ་ཆེ་དང་དེས་ཡུ་བ་བྱས་པའི་དྲིལ་བུ་བསྣམས་པ་འདི་ཡང་ཤར་སྟོང་གཉིས་སུ་མེད་པའི་བརྡ་ཡིན་ནོ། །དོན་ཡོད་གྲུབ་པའི་ཕྱག་མཚན་རལ་གྲི་དང་དེས་ཡུ་བ་བྱས་པའི་དྲིལ་བུ་བསྣམས་པ་འདི་ཡང་སྣང་སྟོང་གཉིས་སུ་མེད་པའི་བརྡ་ཡིན་ནོ། །རིགས་ལྔ་ཡབ་ཡུམ་དུ་སྣང་བ་འདི་ཡང་ཐབས་དང་ཤེས་རབ་ཟུང་དུ་འབྲེལ་བའི་བརྡ་ཡིན་ནོ། །སེམས་དཔའ་སེམས་མ་བརྒྱད་དུ་སྣང་བ་འདི་ཡང་རྣམ་པར་ཤེས་པའི་ཚོགས་བརྒྱད་རང་སར་དག་པའི་བརྡ་ཡིན་ནོ། །ཐུབ་པ་དྲུག་ཏུ་སྣང་བ་འདི་ཡང་ཉོན་མོངས་པ་དྲུག་དག་ནས་ཕ་རོལ་ཏུ་ཕྱིན་པ་དྲུག་རྫོགས་པའི་བརྡ་ཡིན་ནོ། །སྒོ་བ་བཞིར་སྣང་བ་འདི་ཡང་ཚད་མེད་པ་བཞིས་སེམས་ཅན་གྱི་དོན་བྱེད་པའི་བརྡ་ཡིན་ནོ། །ཞེས་བཤད་དོ། །

དོན་གྱི་དབང་ནི། རིགས་ཀྱི་བུ་འདས་མ་འོངས་ད་ལྟར་བཞུགས་པའི་སངས་རྒྱས་ཐམས་ཅད་ཀྱང་རིགས་ལྔར་མ་འདུས་པ་མེད་ཅིང་། མཐོ་སྲིད་པའི་རྩེ་མོ་ནས་དམའ་དམྱལ་བའི་གནས་ཡན་ཆད་དུ་འཁོར་འདས་སུ་སྣང་བ་ཐམས་ཅད་རིགས་ལྔ་ལས་མ་གྱེས་ཤིང་མ་འདུས་པ་རྡུལ་ཕྲ་རབ་ཙམ་ཡང་མེད་ལ། རིགས་ལྔ་ཡེ་ཤེས་ལྔ་རང་རང་གི་ལུས་སེམས་ལས་ལོགས་ན་ཡོད་པ་མ་ཡིན་ཏེ། ལུས་འབྱུང་བ་ལྔ་ལས་གྲུབ་པ་འདི་ཉིད་རིགས་ལྔ་ཡབ་ཡུམ་ཡེ་ཤེས་ལྔའི་རང་གདངས་ཡིན་ཏེ། གདོད་མ་ནས་ཡེ་ཤེས་ཀྱི་རང་རྩལ་འབྱུང་བ་ལྔར་གྲུབ་དུས་ན་ས་ལས་ཤ་བྱུང་བས་སངས་རྒྱས་སྤྱན་ཡིན། ཆུ་ལས་ཁྲག་བྱུང་བས་མཱ་མ་ཀཱི་ཡིན། མེ་ལས་དྲོད་བྱུང་བས་གོས་དཀར་མོ་ཡིན། རླུང་ལས་དབུགས་བྱུང་བས་དམ་ཚིག་སྒྲོལ་མ་ཡིན། ནམ་མཁའ་ལས་(༨༥)སེམས་བྱུང་བས་ཀུན་ཏུ་བཟང་མོ་ཆོས་ཀྱི་སྐུ་ཡིན་ནོ། །དེ་ལྟར་འབྱུང་བ་བཞི་ལས་ལུས་གྲུབ་དུས་ཕུང་པོ་ལྔ་བྱུང་སྟེ། གཟུགས་ཀྱི་ཕུང་པོ་རྡོ་རྗེ་སེམས་དཔའ་སྟེ་ཞེ་སྡང་གསལ་ལ་རང་བཞིན་མེད་པ་མེ་ལོང་ལྟ་བུའི་ཡེ་ཤེས་སོ། །འདུ་ཤེས་ཀྱི་ཕུང་པོ་སྣང་བ་མཐའ་ཡས་ཏེ། འདོད་ཆགས་བདེ་སྟོང་སོ་སོར་རྟོགས་པའི་ཡེ་ཤེས་སོ། །རྣམ་པར་ཤེས་པའི་ཕུང་པོ་རྣམ་པར་སྣང་མཛད་དེ་གཏི་མུག་རྣམ་པར་མི་རྟོག་པ་དྲི་མེད་ཆོས་ཀྱི་དབྱིངས་ཀྱི་ཡེ་ཤེས་སོ། །ཚོར་བའི་ཕུང་པོ་རིན་ཆེན་འབྱུང་ལྡན་ཏེ་ང་རྒྱལ་སྣང་སྟོང་མཉམ་པ་ཉིད་ཀྱི་ཡེ་ཤེས་སོ། །འདུ་བྱེད་ཀྱི་ཕུང་པོ་དོན་ཡོད་གྲུབ་པ་སྟེ་ཕྲག་དོག་རིག་སྟོང་བྱ་བ་གྲུབ་པའི་ཡེ་ཤེས་སོ། །གཞན་ཡང་རང་རིག་ཐིག་ལེ་ཉག་གཅིག་གི་རང་རྩལ་ལས་ཐུགས་རྗེས་འགྱུ་ཆ་བསམ་པ་ཐམས་ཅད་རང་བྱུང་རིག་པའི་རང་རྩལ་ལས་མ་འདས་ཀྱང་། རེ་ཞིག་བསྡུས་ན་རིག་པའི་ཡེ་ཤེས་ལྔ་ཚན་དུ་བསྟན་པ་ལས་དེའི་དོན་བཀྲོལ་ནས་རང་གི་སེམས་ཐོག་ཏུ་ངོ་སྤྲད་པ་ནི། རང་རིག་པའི་ཡེ་ཤེས་མ་རིག་པའི་ལུས་ལ་གནས་པའི་རྩལ་ལས་སེམས་ཅན་གྱི་རང་རྒྱུད་ལ་རྟོག་ཚོགས་བཞི་པཅུ་བྱུང་བ་སྟེ། རང་རིག་པའི་ཡེ་ཤེས་ལས་མ་འདས་ཏེ། ལུས་ཀྱི་ཕུང་པོ་ལྔ་པོ་འདི་རིགས་ཀྱི་ཡབ་ལྔ་ཡིན་ནོ། །དེའང་གཟུགས་ནི་རྡོ་རྗེ་སེམས་དཔའ་སྟེ། །འདུ་ཤེས་སྣང་བ་མཐའ་ཡས་ཉིད། །རྣམ་ཤེས་རྣམ་པར་སྣང་མཛད་དེ། །ཚོར་བ་རིན་ཆེན་འབྱུང་ལྡན་དང་། །འདུ་བྱེད་དོན་ཡོད་གྲུབ་པའོ། །འབྱུང་བ་ལྔ་ཡང་ཡུམ་ལྔ་སྟེ། །ཁྲག་ནི་རྡོ་རྗེ་མཱ་མ་ཀཱི། །དྲོད་ནི་པདྨ་གོས་དཀར་མོ། །ཤ་ནི་རིན་ཆེན་སངས་རྒྱས་སྤྱན། །དབུགས་ནི་ལས་ཀྱི་དམ་ཚིག་སྒྲོལ། །སེམས་ནི་ཆོས་དབྱིངས་དབང་ཕྱུག་མ། །རང་རིག་རྩལ་ལས་ཐུབ་པ་དྲུག །ང་རྒྱལ་ལྷ་ཡི་ཐུབ་པ་སྟེ། །ཕྲག་དོག་ལྷ་མིན་ཐུབ་པའོ། །འདོད་ཆགས་མི་ཡི་ཐུབ་པ་སྟེ། །གཏི་མུག་བྱོལ་སོང་ཐུབ་པའོ། །སེར་སྣ་ཡི་དྭགས་ཐུབ་པ་སྟེ། །ཞེ་སྡང་དམྱལ་བའི་ཐུབ་པའོ། །རྣམ་ཤེས་ཚོགས་བརྒྱད་ཡུལ་ཡུལ་ཅན། །སེམས་དཔའ་སེམས་མ་བརྒྱད་ཡིན་ཏེ། །མིག་གཟུགས་ལཱ་སེ་ཡབ་ཡུམ་སྟེ། །རྣ་སྒྲ་གླུ་མ་ཡབ་ཡུམ་ཉིད། །སྣ་དྲི་བདུག་སྤོས་ཡབ་ཡུམ་ལ། །ལྕེ་རོ་པུཥྤེ་ཡབ་ཡུམ་ཉིད། །ལུས་རེག་མཱ་ལེ་ཡབ་ཡུམ་སྟེ། །ཡིད་ཆོས་གར་མ་ཡབ་ཡུམ་ཉིད། །ཉོན་ཡིད་གནྡྷེ་ཡབ་ཡུམ་སྟེ། །ཀུན་གཞིའི་རྣམ་ཤེས་སྣང་གསལ་ཉིད། །སྒོ་བཞི་སྒོ་བ་བཞི་ཡིན་ཏེ། །ཆུ་སྒོ་ལྕགས་ཀྱུ་ཡབ་ཡུམ་ལ། །ས་སྒོ་ཞགས་པ་ཡབ་ཡུམ་ཡིན། །མེ་སྒོ་(༨༦)ལྕགས་སྒྲོག་ཡབ་ཡུམ་སྟེ། །རླུང་སྒོ་དྲིལ་བུ་ཡབ་ཡུམ་མོ། །ཐིག་ལེ་དཀར་དམར་ཉི་ཟླ་གཉིས། །གཞི་ཡི་ཀུན་བཟང་ཡབ་ཡུམ་སྟེ། །སྣང་སྟོང་ཐབས་ཤེས་ཟུང་འཇུག་གོ། །ཡང་རིག་པའི་རྩལ་ལས་སྐུ་ལྔར་ཡང་ཤར་ཏེ། རིག་པའི་ཡེ་ཤེས་འདི་ཅིར་ཡང་སྣང་བས་རྣམ་པར་སྣང་མཛད་ཀྱི་སྐུ་ཡིན་ནོ། །རིག་པའི་ཡེ་ཤེས་འདི་འགྱུར་བ་མེད་པས་མི་བསྐྱོད་རྡོ་རྗེའི་སྐུ་ཡིན་ནོ། །རིག་པའི་ཡེ་ཤེས་འདི་ནོར་བུ་རིན་པོ་ཆེ་དང་འདྲ་བས་རིན་ཆེན་འབྱུང་ལྡན་གྱི་སྐུ་ཡིན་ནོ། །རིག་པའི་ཡེ་ཤེས་འདི་ལ་མཐའ་མེད་པས་སྣང་བ་མཐའ་ཡས་ཀྱི་སྐུ་ཡིན་ནོ། །རིག་པའི་ཡེ་ཤེས་འདིས་དོན་ཐམས་ཅད་འགྲུབ་པས་དོན་ཡོད་གྲུབ་པའི་སྐུ་ཡིན་ནོ། །རིག་པའི་རྩལ་ལས་ཡེ་ཤེས་ལྔར་ཡང་ཤར་ཏེ། རིག་པའི་ངོ་བོ་མ་འགགས་པར་མངོན་སུམ་དུ་གསལ་བས་མེ་ལོང་ལྟ་བུའི་ཡེ་ཤེས་སོ། །རིག་པའི་ཡེ་ཤེས་འདིས་ཀུན་ལ་ཁྱབ་པས་མཉམ་པ་ཉིད་ཀྱི་ཡེ་ཤེས་སོ། །རིག་པའི་ཡེ་ཤེས་རྩལ་སྣ་ཚོགས་སུ་ཤར་བས་སོ་སོར་རྟོགས་པའི་ཡེ་ཤེས་སོ། །རིག་པའི་ཡེ་ཤེས་འདི་ཡོན་ཏན་ཐམས་ཅད་ཀྱི་ས་བོན་ཡིན་པས་བྱ་བ་གྲུབ་པའི་ཡེ་ཤེས་སོ། །དེ་ཐམས་ཅད་ཀྱང་ངོ་བོ་ཀ་དག་ཏུ་འདུས་པས་ཆོས་ཀྱི་དབྱིངས་ཀྱི་ཡེ་ཤེས་སོ། །རིག་པའི་རྩལ་ལས་རིགས་ལྔར་ཡང་ཤར་ཏེ། སངས་རྒྱས་ཐམས་ཅད་རིག་པ་རྟོགས་ནས་སངས་རྒྱས་ཀྱི་ས་ལ་གཤེགས་པས་དེ་བཞིན་གཤེགས་པའི་རིགས་སོ། །རིག་པ་དེ་རྟོགས་ནས་མི་འགྱུར་ཞིང་མི་ལྡོག་པས་རྡོ་རྗེའི་རིགས་སོ། །རིག་པ་ཉིད་ལས་ཡོན་ཏན་ཐམས་ཅད་འབྱུང་བས་རིན་པོ་ཆེའི་རིགས་སོ། །རིག་པ་ལ་སྐྱོན་གྱིས་མ་གོས་པས་པདྨའི་རིགས་སོ། །རིག་པ་མ་རྟོགས་ན་སངས་མི་རྒྱ་བས་ལས་ཀྱི་རིགས་སོ། །རིག་པའི་རྩལ་ལས་འོད་ལྔར་ཡང་ཤར་ཏེ། རིག་པ་ལ་དྲི་མ་གང་ཡང་མེད་པས་འོད་དཀར་པོ་ལྟར་ཡང་བྱུང་། ཡོན་ཏན་རྫོགས་པས་སེར་པོ། མ་བཙལ་རྫོགས་པས་དམར་པོ། བྱ་རྩལ་རྫོགས་པས་ལྗང་གུ། མི་འགྱུར་ཁྱབ་པས་མཐིང་ག་ལྟར་ཡང་ཤར་རོ། །རིག་པའི་པའི་རྩལ་ལས་ཤེས་རབ་ལྔ་སྟེ། རིག་པས་འཁོར་འདས་ཀྱི་ཆོས་ཐམས་ཅད་མཁྱེན་པས་འབྱེད་པའི་ཤེས་རབ། དེ་ཡང་རིག་པ་ལས་མ་འདས་པས་སྡུད་པའི་ཤེས་རབ། རིག་པ་ཉིད་ཀྱི་རྩལ་སྣ་ཚོགས་སུ་ཤར་བས་དཔྱོད་པའི་ཤེས་རབ། རིག་པས་འཁོར་བའི་སྲོག་བཅད་ནས་མྱ་ངན་ལས་འདས་པའི་སར་ཕྱིན་པས་སྒྲོལ་བའི་ཤེས་རབ། ཐམས་ཅད་རིག་པར་མ་འདུས་པ་མེད་པས་རང་བྱུང་གི་ཤེས་རབ་བོ། །ཡང་རིག་(༨༧)པའི་རྩལ་ལས་རླུང་ལྔར་ཡང་ཤར་ཏེ། རིག་པ་ལས་ཡེ་ཤེས་ཀྱི་དྲོད་འཆར་བས་མེ་དང་མཉམ་པའི་རླུང་ངོ་། །རིག་པ་དེས་འཁོར་འདས་ཀྱི་སྲོག་འཛིན་པས་སྲོག་གི་རླུང་ངོ་། །རིག་པ་དེས་འཁོར་འདས་ལ་སོགས་པ་འབྱེད་པར་བྱེད་པས་འབྱེད་པའི་རླུང་ངོ་། །རིག་པ་དེས་འཁོར་འདས་ཐམས་ཅད་ལ་ཁྱབ་པས་ཁྱབ་བྱེད་ཀྱི་རླུང་ངོ་། །རིག་པ་དེས་འཁོར་བ་དང་མ་རིག་པའི་སྲོག་བཅད་ནས་མྱ་ངན་ལས་འདས་པའི་སར་སྐྱེལ་བས་སྙིང་རྗེ་མེད་པའི་བསྐལ་པ་ལས་ཀྱི་རླུང་ངོ་། །དེ་ལྟར་ན་སྣང་སྲིད་འཁོར་འདས་ཀྱི་ཆོས་ཐམས་ཅད་རང་གི་རིག་པ་ཡིན་ལ། རིག་པ་གསལ་སྟོང་འཛིན་མེད་ཆེན་པོ་ཡིན་ནོ། །གསལ་སྟོང་འཛིན་མེད་ཀྱང་མཐའ་གྲོལ་ཀློང་ཡངས་ཆེན་པོའི་དགོངས་པ་ཡིན་ནོ། །ཞེས་ངོ་སྤྲད་དོ། །

དེ་ནས་དམ་ཚིག་གི་དབང་ནི། བདུད་རྩི་ལྕེ་ལ་བཞག་ནས་སྤྱི་བོར་རྡོ་རྗེ་བཟུང་སྟེ། ཀྱེ་རིགས་ཀྱི་བུ་དག་ཉོན་ཅིག །ཐུན་མོང་སྐྱབས་འགྲོ་ནས་བརྩམས་པའི། །སོ་ཐར་བྱང་སེམས་བསླབ་བྱ་དང་། །རིག་འཛིན་སྔགས་ཀྱི་དམ་ཚིག་ཀུན། །བྱང་ཆུབ་མ་ཐོབ་བར་དུ་ནི། །སྲོག་གི་ཕྱིར་ཡང་མ་གཏང་ཞིག །དམ་ཚིག་ཉམས་ན་བསྐལ་པ་རུ། །ངན་སོང་གསུམ་ནས་ཐར་མི་སྲིད། །དེ་ཕྱིར་སྲུངས་ཤིག་རིགས་ཀྱི་བུ། །ཁྱོད་ཀྱིས་གསང་སྔགས་ཀྱི་དབང་ཐོབ་པ་ཡིན་པས། དད་པ་དང་དམ་ཚིག་ལ་གནས་དགོས། དམ་ཚིག་ས་མ་ཡ་འབུམ་སྡེ་བཤད་ཀྱང་། ཀློང་གསལ་ལས། སྐུ་གསུང་ཐུགས་ཀྱི་དམ་ཚིག་ཏུ། །དམ་ཚིག་ཐམས་ཅད་འདུས་པར་བཤད། །ཅེས་པས། སྐུའི་དམ་ཚིག་ཏུ་རྡོ་རྗེ་སློབ་དཔོན་དང་སངས་རྒྱས་དང་བྱང་ཆུབ་སེམས་དཔའ་དང་ཡི་དམ་མཁའ་འགྲོ་མཆེད་ལྕམ་རྡོ་རྗེ་སྤུན་དང་། སེམས་ཅན་ཐམས་ཅད་དང་འབྱུང་བ་ལྔ་ལ་སོགས་པ་ཐམས་ཅད་དང་རང་གི་ལུས་ལ་མ་གུས་པ་དང་། སྲོག་གཅོད་སྐུ་འཕྲོག་རྡེག་བཙོག་ངན་སྨྲས་ལ་སོགས་པ་དང་། དག་སྣང་ལོག་ཅིང་མི་དགེ་བའི་ལས་སྡིག་པར་གྱུར་པ་ཐམས་ཅད་མི་བྱ་བར། ཕྱི་ནང་སྣོད་བཅུད་རང་ལུས་ཐམས་ཅད་ཡི་དམ་ལྷར་མ་གྱུར་པ་མེད་པས། སྐུའི་རིགས་སུ་གྱུར་པ་ཐམས་ཅད་ལ་ཕྱག་མཆོད་མཆོད་བསྟོད་ལ་སོགས་པའི་དག་སྣང་ཕྱོགས་མེད་དུ་བྱའོ། །གསུང་གི་དམ་ཚིག་ཏུ་རྡོ་རྗེ་སློབ་དཔོན་གྱིས་ཅི་གསུངས་པ་ལས་མི་འདའ་ཞིང་། སངས་རྒྱས་ནས་གང་ཟག་ཕལ་བའི་གསུང་རབ་ཡན་ཆོད་ལ་བརྙས་པར་མི་བྱ། འབྱུང་བ་དང་འགྲོ་བའི་སྒྲ་སྐད་ཐམས་ཅད་ལ་ཞེ་སྡང་དང་ཁོང་ཁྲོ་མི་བྱ་བར་སངས་རྒྱས་(༨༦)ཐམས་ཅད་ཀྱི་གསུང་དུ་དག་སྣང་དང་མོས་གུས་བྱའོ། །ཐུགས་ཀྱི་དམ་ཚིག་ཏུ་མི་དགེ་བའི་རྟོག་པ་སྐད་ཅིག་མ་ཡན་སྤངས་ལ་དགེ་བ་བྱང་ཆུབ་ཀྱི་སེམས་དུས་རྒྱུན་ཆད་མེད་པར་འགྲོ་བ་ཐམས་ཅད་ལ་ཅི་ཕན་དུ་བྱའོ། །སྐུའི་དམ་ཚིག་ཏུ་ཡི་དམ་ལྷའི་བསྐྱེད་རིམ་སྒོམ་ཞིང་། གསུང་གི་དམ་ཚིག་ཏུ་བཟླས་བརྗོད་དང་མ་བྲལ་བར། ཐུགས་ཀྱི་དམ་ཚིག་ཏུ་རྫོགས་རིམ་གྱི་འཁོར་ལོ་ལས་མི་འདའ་བར་བྱའོ། །དེ་ལྟར་སྐུའི་དམ་ཚིག་བསྲུངས་པས་གནས་སྐབས་སུ་ལུས་ཀྱི་ནད་མེད་ཅིང་། སེམས་ཅན་ལ་ཕན་ཐོགས་པས་མཐོང་ན་ཡིད་དུ་འོང་ཞིང་མཐོང་རེག་ཐམས་ཅད་དགེ་བ་ལ་འཁོད་ལ། མཐར་ཐུག་ལུས་ལ་རྡོ་རྗེའི་རྟེན་འབྱོན་ཞིང་གང་ན་བཞུགས་པ་དེར་གཞན་ལ་ཕན་ལ་སྐྱེ་བ་འཕོས་ནས་སྤྲུལ་པ་དཔག་ཏུ་མེད་པས་སེམས་ཅན་གྱི་དོན་བྱེད་ཅིང་། མཚན་དང་དཔེ་བྱད་དུ་འབར་བའི་སྐུས་འགྲོ་བའི་དོན་དུ་སངས་རྒྱས་ཀྱི་མཛད་པ་ཆེན་པོ་ལ་མངའ་བརྙེས་པར་འགྱུར་རོ། །སྐུའི་དམ་ཚིག་ཉམས་ན་གནས་སྐབས་སུ་ཚེ་ཐུང་ཞིང་ནད་མང་ལ། མི་འདོད་པ་ཐམས་ཅད་འབྱུང་ཞིང་མཐོང་རེག་ཐམས་ཅད་ངན་སོང་དུ་སྐྱེ་ལ། མཐར་ཐུག་རྡོ་རྗེ་དམྱལ་བར་ལུས་ཀྱི་སྡུག་བསྔལ་ལས་ཐར་པའི་དུས་མེད་དོ། །གསུང་གི་དམ་ཚིག་བསྲུངས་ན་གནས་སྐབས་སུ་ངག་སྙན་ཞིང་ཐམས་ཅད་ཀྱིས་བདེན་པར་འཛིན་པས་ལྷ་འདྲེ་མི་གསུམ་གྱིས་བཀའ་ཉན་པ། རྒྱུད་ལུང་མན་ངག་ཐམས་ཅད་ཤེས་ཤིང་ཆོས་ཀྱི་ཚིག་སྣ་ཚོགས་རང་རྡོལ་ནས་སྙན་ངག་བསྟན་བཅོས་བརྩམ་པར་ནུས་ཤིང་། གསུང་ཐོས་པ་ཐམས་ཅད་ཀྱི་གནོད་འཚེ་ཞི་ནས་བསམ་པ་ཐམས་ཅད་འགྲུབ་ཅིང་སྐྱེ་བ་གཅིག་གིས་གྲོལ་ལ། མཐར་ཐུག་གསུང་གི་སྤྲུལ་པས་འགྲོ་བའི་དོན་བྱེད་ཅིང་ཆོས་ཀྱི་འཁོར་ལོ་དྲི་མ་མེད་པ་བསྐོར་བར་འགྱུར་རོ། །གསུང་གི་དམ་ཚིག་ཉམས་ན་གནས་སྐབས་སུ་ལྕེ་འབབ་པའི་འཇིགས་པས་མི་ཁ་སྡང་ཞིང་གཏམ་གྱི་ཉེས་པས་རང་གཞན་ཐམས་ཅད་ལ་གནོད་ལ། དེའི་ཚིག་ཐོས་པ་ཐམས་ཅད་ཀྱང་བཀྲ་མི་ཤིས་ཤིང་ངན་སོང་དུ་སྐྱེ། མཐར་ཐུག་ལྕེ་ལ་རྨོད་དོར་ལྔ་བརྒྱ་བཙུགས་ནས་སྡུག་བསྔལ་བར་འགྱུར་རོ། །ཐུགས་ཀྱི་དམ་ཚིག་བསྲུངས་པས་གནས་སྐབས་སུ་ཐུགས་ཀྱི་སྤྲུལ་པས་འགྲོ་བ་འདུལ་ཞིང་། ཏིང་ངེ་འཛིན་རྒྱུད་ལ་སྐྱེ་བས་འགྲོ་བའི་བསམ་པ་ལ་རང་བཞིན་གྱིས་བསམ་གཏན་ལ་གནས་པར་འབྱུང་ཞིང་དེ་བཞུགས་པའི་གནས་དེར་ཡང་ཏིང་ངེ་འཛིན་སྐྱེ་ཞིང་ཡུལ་ཕྱོགས་དེའི་སེམས་ཅན་ཐམས་ཅད་བདེ་བ་ཅན་དུ་སྐྱེའོ། །མཐར་ཐུག་(༨༩)སེམས་ཅན་ཐམས་ཅད་སངས་རྒྱས་ལ་འཁོད་ཅིང་ཐུགས་རྡོ་རྗེ་དང་གཉིས་སུ་མེད་པའི་ངང་དུ་མྱ་ངན་ལས་འདའོ། །ཐུགས་ཀྱི་དམ་ཚིག་ཉམས་ན་གནས་སྐབས་སུ་རྒྱུད་མི་དགེ་བས་རང་གཞན་ཀུན་ལ་གནོད་ཅིང་དེས་གང་ཡིད་ལ་བྱས་པ་དེའི་བསམ་པ་མི་འགྲུབ་ལ་བཀྲ་མི་ཤིས་ཤིང་ནད་གདོན་དང་སྙིང་རླུང་ལ་སོགས་པ་འབྱུང་། མཐར་ཐུག་ངན་སོང་ལས་ཐར་པའི་སྐབས་མེད་དོ། །མདོར་ན་སྨིན་བྱེད་དབང་གི་སྡོམ་པ་རྒྱུད་ལ་གནས་པ་ལ། དམ་ཚིག་བསྲུང་དགོས་པས་མི་དགེ་བ་མཐའ་དག་ལས་ལོག་ནས་དགེ་བ་འབའ་ཞིག་བསྒྲུབ་པར་བྱའོ། །ཞེས་བརྗོད་དོ། །

གསུམ་པ་རྗེས་ཀྱི་རིམ་པ་ལ་དགའ་སྟོན་བྱས་ལ། རྡོ་རྗེ་སློབ་དཔོན་ལ་གུས་པས་བཀའ་བཞིན་བསྒྲུབ་ཅིང་སྡོམ་པ་དང་དམ་ཚིག་ལ་གནས་པར་བྱའོ། །ཚོགས་ཀྱི་འཁོར་ལོས་མཉེས་ཤིང་རྡོ་རྗེའི་གླུ་དང་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད་དོ། །

གསུམ་པ་ངག་གི་སྒྲིབ་པ་སྦྱོང་ཞིང་ངག་ལོངས་སྤྱོད་རྫོགས་པའི་སྐུར་གྲོལ་བའི་གསང་དབང་ལ་ཡང་གསུམ་ལས། སྔོན་འགྲོ་ནི། ཐོད་པར་བུར་སྦྲང་ཆང་དང་ཨ་མྲྀ་ཏ་སྦྱར་བ་བཤམས། ནམ་གྱི་སྲོད་ལ་དཀྱིལ་འཁོར་དེའི་ལྷོ་ཕྱོགས་སུ་སློབ་མ་འདུག་སྟེ། མཎྜལ་ཕུལ་ནས། དངོས་སམ་ཡིད་ཀྱིས་རིག་མ་བླ་མ་ལ་འབུལ་བ་ནི། ཨེ་མ་ཁྱོད་ནི་བདེ་བ་ཆེ། །བདེ་ཆེན་པདྨ་ཧེ་རུ་ཀ །བདེ་གཤེགས་རྣམས་ཀྱི་བདེ་ཆེན་ཡབ། །བདེ་བའི་འབྱུང་གནས་བདེ་སྩོལ་མཛོད། །བྱང་ཆུབ་སེམས་ནི་ཡང་དག་དོན། །རྣམ་དག་མཆོག་ནི་ཡང་དག་པའི། །དྲི་མེད་བདུད་རྩི་དམ་པ་ཡིས། །བླ་མེད་མཆོག་གི་དབང་བསྐུར་ལྟར། །དེ་བཞིན་རིགས་ཀྱི་བུ་དག་ལ། །འཁོར་བ་སྡུག་བསྔལ་ཀུན་བསལ་མཛོད། །དྲི་མེད་བདེ་ཆེན་བདུད་རྩི་ཡིས། །མ་རིག་ཉེས་པའི་དྲི་མ་འཇོམས། །བླ་མེད་བྱང་ཆུབ་བདེ་ཆེན་ཉིད། །དེང་འདིར་བདག་གིས་ཐོབ་མཛོད་ཅིག །ཅེས་པས་ཕུལ་བའི་རྗེས་སུ། བླ་མས་གཞིའི་ཀུན་བཟང་སྒོམས་ལ། དཀྱིལ་འཁོར་གྱི་ལྷ་ལ་མཆོད་པ་དང་བསྟོད་པ་ཅི་འགྲུབ་བྱས་ཏེ། སློབ་མའི་གདོང་གཡོགས་ཤིང་མེ་ཏོག་ཐོགས་ཏེ་བསྐོར་བ་གསུམ་དང་ཕྱག་གསུམ་བྱེད་དུ་བཅུག་ལ། ཡེ་ཤེས་དབབ་པའི་ཕྱིར་སློབ་མ་རྣམས་ལངས་ཏེ། རྐང་པའི་ལོང་བུ་གཉིས་གཤིབས་ལ་སྙིང་གར་ཐལ་མོ་སྦྱར་ལ། བླ་མས། ཀྱེ་མ་རིགས་ཀྱི་བུ་ཁྱོད་ཉོན། །རང་ཉིད་སངས་རྒྱས་ཌཱ་ཀི་མ། །རྡོ་རྗེ་ཕག་མོར་གསལ་བར་སྒོམས། །དེ་ལྟར་གསལ་བའི་ལྟེ་བ་རུ། །ཆོས་འབྱུང་དམར་པོ་སུམ་བརྩེགས་སྒོམས། །དེ་ཡི་ལྟེ་བར་ཕག་མོ་ནི། །ཤིན་(༩༠)ཏུ་ཆུང་ལ་གསལ་བར་སྒོམས། །ཀྱེ་རིགས་ཀྱི་བུ་ཁྱེད་རང་སྐད་ཅིག་གིས་རྡོ་རྗེ་ཕག་མོ་དམར་མོ་གཅེར་བུ་སྐྲ་གྲོལ་བ་རུས་པའི་རྒྱན་དང་ལྡན་པ་ཞལ་གཅིག་ཕྱག་གཉིས་ཕག་ཞལ་མཐིང་ནག་ངུར་བ། གཡས་གཡོན་གྲི་གུག་དང་ཐོད་པ་ཁྲག་གིས་བཀང་བ་ཐུགས་ཀར་འཛིན་པའི་ལྟེ་བར་ཆོས་འབྱུང་སུམ་བརྩེགས་ཀྱི་ནང་དུ། དེ་འདྲའི་ཕག་མོ་ཚོན་གང་བ་གཅིག་སྒོམས་ཤིག །ཅེས་བརྗོད་ལ། བླ་མས་བྱིན་དབབ་ཅིང་རོལ་མོ་དཀྲོལ་བས། སློབ་མ་ལ་བདེ་སྟོང་གི་ཉམས་སྐྱེའོ། །དེའི་ངང་ལ་མ་ཡེངས་པར་སྒོམ་དུ་གཞུག་ཅིང་། གདོང་གཡོགས་བཀྲོལ་ལ། འོ་རིགས་ཀྱི་བུ་ཁྱོད་གསོན་ཅིག །ཕྱི་བུམ་པའི་དབང་གི་དུས་སུ་རྡུལ་ཚོན་གྱི་དཀྱིལ་འཁོར་ལ་བརྟེན་ནས་དཔེའི་མཚོན་བྱར་ངོ་སྤྲོད་པ་ཡིན་གྱིས། དོན་དམ་པར་ན་རང་གི་ལུས་འདི་རྒྱལ་བའི་དཀྱིལ་འཁོར་ཆེན་པོར་བཞུགས་པ་ཡིན་ཏེ། ཀློང་གསལ་ཉི་མའི་རྒྱུད་ལས། འབྱུང་བའི་གདངས་ལས་གྲུབ་པ་ཡི། །ལུས་ནི་བདེ་གཤེགས་ཕོ་བྲང་ཉིད། །རིགས་ལྔ་ཡབ་ཡུམ་ལྔ་ཡི་གནས། །ཕུང་ཁམས་སྐྱེ་མཆེད་ལྷ་ཡི་སྐུ། །ཞེས་པས་རང་གི་རིག་པ་འདི་ཐོག་མར་འཁོར་འདས་གང་དུ་ཡང་མ་གྲུབ་པའི་སྔོན་རོལ་ན་འོད་གསལ་བདེ་བ་ཆེན་པོར་བཞུགས་ཏེ། དེ་ཉིད་རང་ངོ་རང་གིས་མ་ཤེས་པས་རང་རིག་འབྱུང་བཞིའི་སྦུབས་སུ་ཚུད་པའི་ལུས་འདི་སངས་རྒྱས་ཐམས་ཅད་ཀྱི་བཞུགས་གནས་ཡིན་ཏེ། སྤྱི་བོ་བདེ་ཆེན་གྱི་འཁོར་ལོ་ན་རྡོ་རྗེ་མཁའ་འགྲོ་ཡབ་ཡུམ་བཞུགས། མགྲིན་པ་ལོངས་སྤྱོད་ཀྱི་འཁོར་ལོ་ན་རིན་ཆེན་མཁའ་འགྲོ་ཡབ་ཡུམ་བཞུགས། སྙིང་ག་ཆོས་ཀྱི་འཁོར་ལོ་ན་སངས་རྒྱས་མཁའ་འགྲོ་ཡབ་ཡུམ་བཞུགས། ལྟེ་བ་སྤྲུལ་པའི་འཁོར་ལོ་ན་པདྨ་མཁའ་འགྲོ་ཡབ་ཡུམ་བཞུགས། གསང་གནས་བདེ་སྐྱོང་འཁོར་ལོ་ན་ལས་ཀྱི་མཁའ་འགྲོ་ཡབ་ཡུམ་བཞུགས་པས། ཕུང་པོ་ཐམས་ཅད་དཔའ་བོ། ཁམས་ཐམས་ཅད་དཔའ་མོའི་རང་བཞིན། བ་སྤུའི་ཁུང་བུ་རེ་རེ་ན་ཡང་ལྷ་དང་ལྷ་མོའི་རང་བཞིན་དུ་བཞུགས་ཏེ། ཡང་ཀློང་གསལ་ལས། འབྱུང་བཞིའི་དཀྱིལ་འཁོར་སངས་རྒྱས་ཞིང་། །འཁོར་ལོ་ལྔ་ནི་རིགས་ལྔའི་གནས། །ཕུང་ཁམས་ཐམས་ཅད་ལྷ་ཚོགས་ཉིད། །སེམས་ནི་ཡེ་ཤེས་ཆེན་པོ་ཉིད། །ཅེས་གསུངས་པས། རང་ལུས་རྒྱལ་བའི་དཀྱིལ་འཁོར་ཏེ། ཁྱེད་ཀྱིས་མེ་ཏོག་དོར་བའི་ལྷ་ཡང་ལུས་ཀྱི་རང་གནས་ཀྱི་ལྷ་རྣམ་པར་སྣང་མཛད་ཡིན་ཏེ་སྙིང་(༩༡)ག་ཆོས་ཀྱི་འཁོར་ལོ་ན་གསལ་བ་འདི་ཡིན་ནོ། །ཞེས་རིགས་གང་ལ་མེ་ཏོག་ཕོག་པའི་ལྷའི་ངོ་སྤྲད་ལ། བླ་མའི་མདུན་དུ་དར་གྱི་ཡོལ་བས་བྲེས་པའི་ནང་དུ་བླ་མ་ཡབ་ཡུམ་སྟན་ལ་འཁོད་ལ། བསྐྱེད་རིམ་གསལ་བཏབ་སྟེ་ཡབ་དཔའ་བོ་རྟ་མགྲིན་དུ་གསལ་བའི་གནས་ལྔར་མཁའ་འགྲོ་ཡབ་ལྔ་སྤྱི་བོར་ཨོ་རྒྱན་པདྨ་ཐོད་ཕྲེང་དང་། ཡུམ་རྡོ་རྗེ་ཕག་མོའི་འཁོར་ལོ་ལྔར་དཔའ་མོ་ལྔ། སྤྱི་བོར་མཁར་ཆེན་བཟའ་མཚོ་རྒྱལ། ཕུང་ཁམས་སྐྱེ་མཆེད་ཐམས་ཅད་ལྷ་དང་ལྷ་མོར་གསལ་བའི་ཡུམ་གྱི་མཁའ་གསང་ལ་པདྨ་འདབ་བཞི་དམར་པོ། ཡབ་ཀྱི་གསང་བ་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པར་བསྐྱེད་ལ། སྙོམས་པར་ཞུགས་པའི་བདེ་བས་འཁོར་ལོ་ལྔ་དང་ཕུང་པོ་ཁམས་དང་སྐྱེ་མཆེད་ཀྱི་ལྷ་ཐམས་ཅད་སྦྱོར་བའི་བརྡས་བསྐུལ་ཏེ་མཉེས་པས་དྭངས་མ་ཡུམ་གྱི་བྷ་གར་ཕབ་པ། མེ་ལོང་གིས་བླངས་པའམ། བླངས་པར་བསམས་ལ་ཐོད་པ་ནས་བདུད་རྩི་སློབ་མའི་ལྕེ་ཐོག་ཏུ་བཞག་ལ། ཀྱེ་མ་ཀྱེ་མ་རིགས་ཀྱི་བུ། །དུས་གསུམ་རྒྱལ་བ་ཀུན་གྱིས་ནི། །བྱང་ཆུབ་སྲས་པོ་དམ་པ་ལ། །ཇི་ལྟར་དབང་ནི་བསྐུར་བ་ལྟར། །དེ་བཞིན་གསང་བའི་བྱང་སེམས་ཀྱིས། །ད་ལྟ་ཁྱེད་ལ་དབང་བསྐུར་རོ། །ཨོཾ་གུ་རུ་ཌཱ་ཀི་ནི་ཧ་རི་ནི་ས་ར་ཙ་ཧྲཱི་ཡ་བྷོ་དྷི་ཙིཏྟ་ཨ་མྲྀ་ཏེ་སརྦ་པཉྩ་ཨ་བྷི་ཥིཉྩ་ཧཱུྃ། ཞེས་ལན་གསུམ་བརྗོད་ལ། དྭངས་མའི་ལམ་རྩ་དབུ་མ་མཐིང་ལ་དམར་བ་སྦུ་གུ་ཅན་ན་མར་སོང་བས་བདེ་སྟོང་གི་ཡེ་ཤེས་སྐྱེས་པར་སྒོམ་དུ་བཅུག་ཅིང་། འོག་རླུང་དྲག་ཏུ་འཐེན་ཅིང་སྟེང་རླུང་ཅུང་ཟད་མནན་ལ་དར་ཅིག་སྒོམ་དུ་བཅུག་པའི་ངང་ལ་ངོ་སྤྲད་དེ། ཨེ་མ་སྐལ་ལྡན་རིགས་ཀྱི་བུ། །བདེ་དང་སྟོང་པ་དབྱེར་མེད་པ། །དེ་ཉིད་ལྟོས་དང་ངོས་གཟུང་མེད། །རང་བཞིན་ལྷན་ཅིག་སྐྱེས་པའི་ངང་། །ཐམས་ཅད་རོ་མཉམ་བདེ་ཆེན་ནོ། །ཀྱེ་མ་རིགས་ཀྱི་བུ་སེམས་ཀྱི་རྣམ་རྟོག་ཀུན་དང་བྲལ་ཞིང་བདེ་སྟོང་ངོས་གཟུང་ལས་འདས་པའི་ངང་འདི་སངས་རྒྱས་ཐམས་ཅད་ཀྱི་གསང་བའི་དབང་དམ་པ་ཡིན་གྱིས་ངོས་བཟུང་ཞིག་ཅེས་བརྗོད་དོ། །

གསུམ་པ་རྗེས་དམ་ཚིག་འབོགས་པ་ནི། ཀྱེ་མ་རིགས་ཀྱི་བུ་ཁྱོད་ཀྱི། །གསང་བའི་དམ་ཚིག་ཆེན་པོ་ནི། །ཡེ་ཤེས་སྒྲུབ་རྫས་བདུད་རྩི་ལྔ། །དམར་ཆེན་ག་བུར་ཙན་དན་སྦྱར། །རྡོ་རྗེ་ཆུ་ཡི་ཀུན་ཏུ་བསྲེ། །དུས་གསུམ་རྒྱལ་བ་ཀུན་མཐུན་མཚུངས། །འདི་དང་འདོད་པའི་ཡོན་ཏན་ལྔ། །རྒྱུན་དུ་ཡང་དང་ཡང་དུ་བརྟེན། །འདི་ནི་(༩༢)དམ་ཚིག་བླ་ན་མེད། །མ་ཉམས་སྐལ་ལྡན་ཁྱོད་ཀྱིས་སྲུངས། །ཞེས་དཀྲོལ་ནས་ཀྱང་ལེགས་པར་དབོག་གོ། །དེ་ནས་ཀྱེ་རིགས་ཀྱི་བུ། ངག་གི་སྒྲིབ་པ་ཐམས་ཅད་དག་ཅིང་ངག་ནུས་པ་དང་ལྡན་པར་འགྱུར་བ་ཡིན་གྱིས། ཤ་ལྔ་བདུད་རྩི་ལྔ་བརྟེན་པ་དང་། གཏུམ་མོ་ཙཎ་ཌ་ལི་སྒོམས་ཤིག །ས་དགུ་པ་མན་ཆད་དང་སྐལ་བ་མཉམ་ཞིང་། རྒྱས་པའི་ཕྲིན་ལས་ཆེན་པོ་འགྲུབ་ལ་མཐར་ཐུག་ལོངས་སྤྱོད་རྫོགས་པའི་སྐུར་སངས་རྒྱ་བ་ཡིན་ནོ། །ཞེས་བརྗོད་ལ་ཚོགས་ཀྱི་དགའ་བ་བྱའོ། །

བཞི་པ་ཡིད་ཀྱི་སྒྲིབ་པ་སྦྱོང་ཞིང་། བདེ་བ་ཆེན་པོའི་སྐུར་གྲོལ་བ་ཤེས་རབ་ཡེ་ཤེས་ཀྱི་དབང་ལའང་། སྔོན་འགྲོ་དངོས་གཞི་རྗེས་དང་གསུམ་ལས། དང་པོ་ནི། དཀྱིལ་འཁོར་དེའི་ནུབ་ཕྱོགས་སུ་གུང་ལ་ཕྱག་རྒྱ་མཚན་ལྡན་ནམ་ཡིད་རིག་མོས་པས། སློབ་མ་ལ་དབང་བསྐུར་ཏེ། མཎྜལ་ཕུལ་ནས་སློབ་མ་རྣམས་མགྲིན་གཅིག་ཏུ། ཀྱེ་ཀྱེ་བཅོམ་ལྡན་བདེ་ཆེན་ཆོས་ཀྱི་དབྱིངས། །རྣལ་འབྱོར་རྡོ་རྗེ་མི་ཕྱེད་བདག །ཡང་དག་ཕྱག་རྒྱ་སྒྲུབ་པ་པོ། །རྡོ་རྗེ་རྣལ་འབྱོར་ལས་ནི་བྱུང་། །བདག་ཉིད་ཆེན་པོ་ཀུན་བདག་ཉིད། །མངའ་དབང་བདག་ལ་དེ་ཉིད་སྩོལ། །ཉོན་མོངས་འཁོར་བའི་འདམ་དུ་ནི། །བྱིངས་པའི་སྐྱབས་མེད་བདག་ལ་སྐྱོབས། །ཞེས་པ་གསུམ་གྱིས་གསོལ་བ་བཏབ་ནས། བླ་མས། ཀྱེ་མ་གསང་བ་ཤེས་རབ་ཡེ་ཤེས་ཀྱི། །དམ་ཚིག་བསྲུང་བྱ་སེམས་ལ་ཆོངས། །བུད་མེད་མི་སྤང་དང་དུ་བླང་། །ཚངས་སྤྱོད་དོན་ལ་གནས་པར་བྱ། །ཡོན་ཏན་ཐམས་ཅད་འདི་ལས་འབྱུང་། །འདི་སྤངས་བདེ་བའི་དངོས་གྲུབ་མེད། །ཉམས་ན་མཁའ་འགྲོའི་ཆད་པ་ཡིས། །ཚེ་འཕོས་དམྱལ་བ་དག་ཏུ་ལྟུང་། །ཞེས་པ་གསུམ་གྱིས་དམ་ཚིག་བྱིན་ལ། དེའི་དོན་སློབ་མས་ཁས་བླངས་པ་ནི། ཤི་འམ་སྲོག་ལ་བབས་གྱུར་ཀྱང་། །བྱ་དགའ་ཆེན་པོ་ཉིད་བྱུང་ཡང་། །དམ་ཚིག་བཀའ་ལས་འདའ་མི་བྱ། །ས་མ་ཡ་ན་ར་ཀན། ཞེས་པ་གསུམ་བརྗོད་ནས། བླ་མ་ལ་དངོས་སམ་ཡིད་ཀྱིས་ཕྱག་དང་བསྐོར་བ་བྱས་ལ། བླ་མ་ཡི་དམ་གྱི་ལྷར་གསལ་བས་སློབ་མ་ལ་གདོང་གཡོགས་བཅིངས་ཏེ། ཡེ་ཤེས་པ་དབབ་པ་ནི། དཔོན་སློབ་ཀུན་རྡོ་རྗེ་ཕག་མོར་བསྒོམས་པའི་བླ་མའི་ཐུགས་ཀ་ནས་ཕག་མོ་ཕྲ་མོ་མང་པོ་སྤྲོས་ཏེ། སློབ་མའི་སྙིང་ནང་དུ་ཐིམ་པར་བསྒོམ་དུ་བཅུག་ནས་བླ་མས། རྡོ་རྗེ་ཕག་མོ་བདེ་གཤེགས་ཡུམ། །ཉུང་འབྲུ་ཙམ་དུ་གསལ་བ་ལ། །བདེ་བས་མི་བཟོད་གར་བྱེད་པ། །བ་སྤུའི་བུ་ག་ཀུན་ཏུ་གང་། །(༩༣)ཡང་ཡང་སྒོམས་ཤིག་རིགས་ཀྱི་བུ། །ཞེས་བརྗོད་ལ་གདོང་གཡོགས་བཀྲོལ་ཏེ། ཡུམ་ལ་དངོས་སམ་ཡིད་ཀྱིས་ཕྱག་དང་བསྐོར་བ་བྱས་ལ། བླ་མས། འོ་རིགས་ཀྱི་བུ་ཡུམ་གྱི་བྷ་ག་ནི་སངས་རྒྱས་ཐམས་ཅད་བསྐྱེད་པའི་ཕོ་བྲང་ཆེན་པོ་སྟེ། ཀློང་གསལ་ལས། དུས་གསུམ་སངས་རྒྱས་ཐམས་ཅད་ཀྱང་། །བྷ་གའི་དབྱིངས་ནས་རང་བྱུང་སྟེ། །ཆོས་རྣམས་ཀུན་གྱི་འབྱུང་གནས་ཉིད། །བྷ་ག་གསང་སྔགས་ཀུན་གྱི་གནས། །བདེ་ཆེན་ཡེ་ཤེས་འབྱུང་གནས་ཡིན། །འདི་ཉིད་མ་བརྟེན་ཐབས་གཞན་མེད། །ཐབས་ཀྱི་རྒྱུད་ཀྱིས་གྲོལ་བ་ཡིན། །བདེ་ཆེན་འདི་བརྟེན་བདེ་བ་ཐོབ། །ཡང་དག་སངས་རྒྱས་འདི་ལས་བྱུང་། །ཞེས་པས་གསང་སྔགས་ཀྱི་ཆོས་ཐམས་ཅད་འདིར་འདུས་པར་གསུངས་ཤིང་། སངས་རྒྱས་ཐམས་ཅད་ཀྱང་ལམ་འདི་ལ་བརྟེན་ནས་སངས་རྒྱས། འཕྲལ་གྱི་བདེ་སྐྱིད་ཐམས་ཅད་ཀྱང་འདི་ལས་འབྱུང་བས་ཡུམ་གྱི་བྷ་ག་འདི་ལ་ཁྱོད་ཀྱིས་མཆོད་པར་གྱིས་ཤིག །བུད་མེད་ཙམ་ལ་ཁྲོ་བ་སྤོངས། །མཚན་ལྡན་ཡུམ་ལ་གུས་པར་གྱིས། །ཚེ་གཅིག་སངས་རྒྱས་བདེ་བ་ནི། །འདིས་སྟེར་ནུས་ཀྱིས་གཞན་གྱིས་མིན། །བུད་མེད་བརྙས་ཤིང་མཁའ་ལ་གཤེ། །བདེ་དང་བྲལ་ནས་ན་རག་སྤྱོད། །དེ་བས་རྟག་ཏུ་གུས་པར་གྱིས། །ཞེས་བརྗོད་ལ། ཕྱག་མཚལ་མེ་ཏོག་གཏོར་ནས། ཡུམ་དེས་འདི་སྐད་བརྗོད་དོ། །ཧཱུྃ་ང་ཡི་བྷ་ག་གསང་ཆེན་འདི། །གང་ཞིག་མོས་པས་སུས་བརྟེན་པ། །ཡོན་ཏན་དངོས་གྲུབ་ཐམས་ཅད་འབྱུང་། །བདེ་སྟོང་མཆོག་གི་དངོས་གྲུབ་ཐོབ། །ཨོཾ་གུ་རུ་ཌཱ་ཀི་ནི་ཧ་རི་ནི་ས་ར་ཙ་ཧྲི་ཡ་ཨཉྫ་ལི་ཧོཿས་བྷ་ག་ཅུང་ཟད་བསྟན་ནས། བླ་མས་ཕྱག་རྒྱའི་སྲིན་ལག་གཡོན་པ་བཟུང་ནས་སློབ་མ་ལ་གཏད་པ་ནི། ཧཱུྃ་ཡེ་ཤེས་ལྷ་མོ་བདེ་བའི་སྐུ། །ཀུན་ཏུ་བདེ་བའི་གནས་སྦྱིན་མ། །དགའ་བས་གཟུགས་མཛེས་ཡིད་འོང་མ། །རྟག་ཏུ་གུས་པས་མཆོད་པར་གྱིས། །ཨོཾ་མཧཱ་སུ་ཁ་ཧོཿ། ཞེས་པས་སློབ་མའི་ལག་ཏུ་གཏད་ནས།

གཉིས་པ་དངོས་གཞི་ནི། ཡང་བརྗོད་པ། ཀྱེ་མ་ལས་ལྡན་རིགས་ཀྱི་བུ། །ཁྱོད་ཉིད་པདྨ་ཧེ་རུ་ཀ །རྟ་མགྲིན་དབང་གི་སྐུ་རུ་སྒོམས། །ཡུམ་ནི་རྡོ་རྗེ་ཕག་མོར་བསྐྱེད། །གཉིས་ཀའི་ཕུང་ཁམས་སྐྱེ་མཆེད་རྣམས། །དཔའ་བོ་མཁའ་འགྲོར་གསལ་བཏབ་ནས། །བདག་དང་ཡུམ་གྱི་མཁའ་གསང་ནི། །རྡོ་རྗེ་པདྨར་བྱིན་གྱིས་རློབས། །དེའང་སྐད་ཅིག་དྲན་རྫོགས་སུ་རིགས་ཀྱི་བུ་ཉིད་རྟ་མགྲིན་དམར་པོ་ཞལ་གཅིག་ཕྱག་གཉིས་(༩༤)གཡས་གྲི་གུག་གཡོན་ཐོད་པ་གཅེར་བུ་རུས་པའི་རྒྱན་གྱིས་མཛེས་པའི་སྤྱི་བོར་པདྨ་དང་ཉི་ཟླའི་སྟེང་དུ། པདྨ་ཐོད་ཕྲེང་མཐིང་ནག་རྡོ་རྗེ་དང་དྲིལ་བུ་འཛིན་པ་བདེ་ཆེན་འཁོར་ལོར་ར་ལས་རྡོ་རྗེ་མཁའ་འགྲོ་དཀར་པོ། མགྲིན་པར་ཙ་ལས་རིན་ཆེན་མཁའ་འགྲོ་སེར་པོ། སྙིང་གར་ཨཱཿལས་ཆོས་དབྱིངས་མཁའ་འགྲོ་མཐིང་ག །ལྟེ་བར་ཧྲཱི་ལས་པདྨ་མཁའ་འགྲོ་དམར་པོ། གསང་བར་ཡ་ལས་ལས་ཀྱི་མཁའ་འགྲོ་ལྗང་གུར་གསལ་བའི་ལྷ་ཐམས་ཅད་གྲི་གུག་དང་ཐོད་པ་འཛིན་པའི་གསང་བར་རྡོ་རྗེ་སྔོན་པོ་རྩེ་ལྔ་པ་ཁོང་སེང་ཅན། ཧཱུྃ་གིས་མཚན་པའོ། །ལྷ་མོ་ཉིད་རྡོ་རྗེ་ཕག་མོ་དམར་མོ། གཅེར་བུ་གྲི་གུག་དང་ཐོད་པ་འཛིན་པའི་སྤྱི་བོར་པད་ཟླ་དང་ཉི་མའི་སྟེང་དུ་མཁར་ཆེན་བཟའ་མཚོ་རྒྱལ་དམར་མོ། གྲི་གུག་དང་ཐོད་པ་འཛིན་པ། བདེ་ཆེན་འཁོར་ལོར་ཧ་ལས་རྡོ་རྗེ་མཁའ་འགྲོ་མ་དཀར་མོ། མགྲིན་པར་རི་ལས་རིན་ཆེན་མཁའ་འགྲོ་མ་སེར་མོ། སྙིང་གར་མ་ལས་ཆོས་དབྱིངས་མཁའ་འགྲོ་མ་མཐིང་ག །ལྟེ་བར་ནི་ལས་པདྨ་མཁའ་འགྲོ་མ་དམར་མོ། གསང་བར་ས་ལས་ལས་ཀྱི་མཁའ་འགྲོ་མ་ལྗང་གུ། ཐམས་ཅད་ཀྱང་གཙོ་མོ་དང་ཕྱག་མཚན་མཐུན་པའི་བྷ་ག་པདྨ་དམར་པོ་འདབ་བཞིའི་དབུས་སུ་ཟླ་གམ་ལ་ཕཊ་སེར་པོ་བསྒོམས་ལ་ཕན་ཚུན་སྙོམས་པར་ཞུགས་ཤིང་། ཀྱེ་སྐལ་ལྡན། ཡུམ་གྱི་པདྨར་དལ་གྱིས་བཅིངས། །འོ་བྱ་ལུས་སེམས་བདེ་བ་བསྐྱེད། །བདེ་ལ་སེམས་བཟུང་དལ་བུས་བསྲུབས། །བྱང་སེམས་འཆོར་བ་སྙམ་བྱེད་ན། །མི་རྟོག་སྟོང་པའི་རྒྱ་ཡིས་གདབ། །སྟོང་པར་ཡལ་དུས་བསྲུབས་པ་ཡིས། །ཡང་ཡང་བདེ་བ་སྦར་བར་བྱ། །བདེ་སྟོང་གཉིས་མེད་དོན་དེ་ལ། །དེར་འཛིན་མ་བྱེད་ངོ་ལ་ལྟོས། །གཉིས་ཤོར་གཉིས་མཉམ་དུས་འདི་རུ། །ལྷན་ཅིག་སྐྱེས་པའི་ཡེ་ཤེས་འཆར། །དེ་ནི་ངོ་ཡིས་ཟིན་པར་བྱ། །དེ་ལྟར་ལྷ་དང་ལྷ་མོའི་རང་བཞིན་དུ་སྙོམས་པར་ཞུགས་པའི་བདེ་བ་སྤྱི་བོ་ནས་གཡོ་བ་ལ་ལྟོས་ཤིག །བདེ་སྟོང་སྤྲོས་པ་དང་བྲལ་བའི་ཡེ་ཤེས་འདི་ཉིད་དགའ་བའི་ཡེ་ཤེས་སོ། །མགྲིན་པར་དྭངས་མ་ཆེར་བབས་པའི་ཡེ་ཤེས་ལ་བལྟས་པས་རྣམ་པར་མི་རྟོག་པ་ནི་མཆོག་དགའི་ཡེ་ཤེས་སོ། །སྙིང་གར་བབས་པ་ནི་དགའ་བྲལ་གྱི་ཡེ་ཤེས་སོ། །གསང་བར་བབས་དུས་ཕྲ་རགས་ཀྱི་རྣམ་རྟོག་ཀུན་འགགས་ནས་སྣང་སྲིད་བདེ་བ་ཆེན་པོར་ཤར་ལ་གཉིས་འཛིན་གྱི་རྣམ་རྟོག་ཕྲ་རགས་མཐའ་དག་དང་བྲལ་བ་ནི་ལྷན་ཅིག་སྐྱེས་པའི་དགའ་བ་གཉུག་མའི་(༩༥)ཡེ་ཤེས་སོ། །འདི་ཉིད་ཀྱི་ངང་ལ་འོག་རླུང་དྲག་ཏུ་འཐེན་ལ་དར་ཅིག་མཉམ་པར་ཞོག་ཅིག །ཡང་བསྐྱོད་པ་དང་བསྲུབས་པས་བདེ་བ་སྦར་བའི་ངང་ལ་དེར་འཛིན་གྱི་རྣམ་རྟོག་དང་བྲལ་བས་ཅེར་གྱིས་ལྟོས་ལ་མཉམ་པར་ཞོག་ཅིག །ད་ནི་གསང་བ་ནས་ལྟེ་བར་བཟློག་ལ་དེ་ཉིད་ཀྱི་ངང་ལ་ཞོག་ཅིག །དེ་བཞིན་དུ་སྙིང་ག་དང་མགྲིན་པ་དང་སྤྱི་བོར་བྱང་སེམས་སྐྱ་ནར་གྱིས་བཟློག་ལ་གང་ཡང་ཡིད་ལ་མི་བྱེད་པ་གདོད་མའི་ཀ་དག་གི་ངང་དུ་ལྷོད་ཀྱིས་མཉམ་པར་ཞོག་ཅིག །ཅེས་ངོས་མ་ཟིན་གྱི་བར་ལ་བསྐྱར་ཞིང་ངོ་སྤྲད་ལ་མཐོང་བ་བརྒྱུད་པའི་རིམ་པས་དབབ་བཟློག་དགྲམ་པའི་ལྟ་སྟངས་དང་འཁྲུལ་འཁོར་ལ་སློབ་ཅིང་སྦྱོང་ངོ་། །

གསུམ་པ་རྗེས་ནི། བླ་མས་ཡང་བརྗོད་པ། ཀྱེ་མ་སྐལ་ལྡན་རིགས་ཀྱི་བུ། །དེས་ནི་དག་བྱ་གང་དག་ན། །ཉོན་མོངས་ཡིད་ཀྱི་སྒྲིབ་པ་དག །ཡིད་ནི་མཐུ་དང་ལྡན་པར་འགྱུར། །ལས་ཀྱི་ཕྱག་རྒྱ་བརྟེན་པར་དབང་། །སྐལ་བ་ས་བཅུ་དག་དང་མཉམ། །ཕྲིན་ལས་དབང་གི་ལས་རྣམས་འགྲུབ། །འབྲས་བུ་སྐྱེ་མེད་ཆོས་སྐུ་ཐོབ། །ཅེས་བརྗོད་ལ། ཚོགས་ཀྱི་དགའ་བ་རྒྱ་ཆེན་པོ་བྱའོ། །ཤེས་རབ་ཡེ་ཤེས་ཀྱི་དབང་རྒྱ་ཆེར་བཤད་པའོ། །

ལྔ་པ་ལུས་ངག་ཡིད་གསུམ་དུ་འཛིན་པའི་སྒྲིབ་པ་ཀུན་སྦྱོང་ཞིང་ཆོས་སྐུ་རྫོགས་པ་ཆེན་པོའི་ཟབ་དོན་མཐར་ཐུག་པ་ཚིག་དབང་རིན་པོ་ཆེ་ལ། སྔོན་འགྲོ་དང་དངོས་གཞི་རྗེས་གསུམ་ལས། དང་པོ་ནི་དཀྱིལ་འཁོར་གྱི་དབུས་སུ། ཐོད་པ་བདུད་རྩིས་བཀང་བའི་སྟེང་དུ་མེ་ལོང་ལ་ཆོས་འབྱུང་གཉིས་བརྩེགས་ཀྱི་དབུས་སུ་མཁའ་འགྲོ་ཡབ་ཡུམ་གྱི་རྩ་སྔགས་དང་། མཐར་སྐོར་ལ་རིག་འཛིན་གྱི་མཚན་བྲིས་ལ། ཁ་དགབ། ཕྱི་ནང་གི་ཚོགས་མཆོད་རྒྱ་ཆེར་བཤམས་ལ་བཞག །ཡང་ན་དཀྱིལ་འཁོར་གྱི་བྱང་དུ་མེ་ཏོག་ཚོམ་བུ་བཀོད་ལ། དེར་བཞག་ཅིང་། བདེ་བའི་ཕྱག་རྒྱ་མ་དེ་ཉིད་དང་སློབ་མ་ཀུན་བྱང་དུ་འཁོད་ལ། མཎྜལ་ཕུལ་ཏེ་གསོལ་བ་གདབ་པ་ནི། ཀྱེ་ཀྱེ་དུས་གསུམ་བླ་མ་རྗེ། །ཡང་དག་ཡེ་ཤེས་ངོ་བོ་ཉིད། །རིག་པའི་ངོ་བོ་ཡེ་ཤེས་ལ། །བདག་ཉིད་ངེས་པའི་ཤེས་པ་སྐྱེས། །གཉིས་མེད་ཡེ་ཤེས་མཆོག་འདི་ཉིད། །འགྲོ་གཞན་དག་ལ་ཡོད་པ་མིན། །དམ་ཆོས་བདུད་རྩིའི་མཆོག་འདི་ཉིད། །འཐུང་ཕྱིར་བདག་ཉིད་བླ་མ་ལ། །གུས་པའི་ཡིད་ཀྱིས་གསོལ་བ་འདེབས། །གལ་ཏེ་དོན་ཐལ་བདག་གིས་འཚལ། །རྣམ་པ་ཀུན་ཏུ་མཆོག་གྱུར་པའི། །བཞི་པའི་དབང་བསྐུར་བདག་ལ་སྩོལ། །ཞེས་པ་གསུམ་གྱི་རྗེས་ལ་བླ་མ་ཡི་དམ་དུ་གསལ་བའི་ངང་ནས་(༩༦)དཀྱིལ་འཁོར་རམ་ཚོམ་བུའི་དབུས་སུ་དཀྱིལ་འཁོར་གྱི་ལྷ་བསྐྱེད། མཚམས་སུ་དཔའ་བོ་ཡབ་ཡུམ་བསྐྱེད་དོ། །དེའང་དབུས་སུ་རྡོ་རྗེ་ཕག་མོ་ཡབ་ཡུམ་ལ། མཚམས་བཞིར་རིགས་བཞིའི་མཁའ་འགྲོ་ཡབ་ཡུམ་བསྐྱེད་ནས་ཡེ་ཤེས་པ་དགུག་ལ་ཡི་གེ་གསུམ་གྱིས་རྒྱས་གདབ་ཅིང་། བླ་མ་ཡབ་ཡུམ་སྙོམས་པར་ཞུགས་པའི་བདེ་བའི་སྒྲས་ཕྱོགས་བཅུ་དུས་གསུམ་གྱི་བླ་མ་ཡི་དམ་གྱི་ལྷ་ཚོགས་རྣམས་བདུད་རྩིའི་རྣམ་པར་བྱོན་ནས་ཐོད་པའི་བདུད་རྩི་ལ་ཐིམ་པར་བསམ་ཞིང་། ཚོམ་བུའི་ལྷ་ཚོགས་ལ་མཆོད་བསྟོད་བྱས་བས་འོད་དུ་ཞུ་ནས་རང་གི་སྙིང་གར་ཐིམ། ཐུགས་ཀ་ནས་འོད་ཟེར་ཁ་དོག་ལྔ་འཕྲོས་པས་ཐམས་ཅད་ལས་མཆོད་པའི་ལྷ་མོ་ལྔར་གྱུར་ཏེ། ནམ་མཁའ་ཁྱབ་པར་གང་ནས་མཆོད་སྤྲིན་སྣ་ཚོགས་ཐོགས་ཏེ། མེ་ལོང་གི་ཆོས་འབྱུང་གི་དབུས་སུ་རྡོ་རྗེ་ཕག་མོ་ཡབ་ཡུམ་དང་། མཐའ་བསྐོར་དུ་བླ་མ་བརྒྱུད་པ་བསྐྱེད་པ་ལ་མཆོད་ནས། དགྱེས་ཏེ་སྙོམས་པར་ཞུགས་པའི་བདུད་རྩི་བབས་པས་ཐོད་པ་གང་ཞིང་བདུད་རྩིས་བླ་མ་ཡི་དམ་ལ་མཆོད་ལ། ཚོགས་དབུལ་ཞིང་བརྒྱུད་པའི་བླ་མ་ལ་གསོལ་བ་བཏབ་ནས། དམ་ཚིག་སྦྱིན་པ་ནི། ༀ་ཨཱཿཧཱུྃ་ཧྲཱི༔ བསྲུང་དུ་མེད་པའི་དམ་ཚིག་ནི། །ཐམས་ཅད་རོ་མཉམ་ཆོས་ཉིད་ངང་། །འཁོར་འདས་སྤང་བླང་བྲལ་བ་ཡི། །གང་ཤར་ཆོས་ཉིད་རོལ་པ་ལ། །མ་རིག་འཛིན་པས་མ་བསླད་སྲུངས། །འདས་ན་འཁོར་ལྡོག་ན་ར་ཀན། །ཞེས་བརྗོད་ནས། སློབ་མ་རྣམ་སྣང་གི་ཆོས་བདུན་དང་ལྡན་པའི་སྨིན་ཕྲག་ཏུ་གཡུང་དྲུང་དམར་པོ་ཞིག་གཡོན་དུ་མྱུར་བར་འཁོར་བ་དམིགས་ཏེ། བླ་མ་ཡི་དམ་མཁའ་འགྲོ་སྤྲིན་ཕུང་གཏིབས་པ་ཙམ་སྤྱན་དྲངས་ལ་བསྟིམ་ཞིང་རོལ་མོའི་སྒྲ་བསྒྲགས་པའི་རྗེས་ལ།

དངོས་གཞི་ནི། འོ་རིགས་ཀྱི་བུ་དར་ཅིག་གློད་ལ་བཅོས་བསླད་མེད་པའི་ཤེས་པ་རང་སར་ཞོག་ཅིག །ཤེས་པ་བདེ་གསལ་མི་རྟོག་པའི་ཡེ་ཤེས་འབོལ་ལེ། ཤིག་གེ། ལྷོད་དེ་བ། སྐྱེ་མེད་སྤྲོས་པ་དང་བྲལ་བ་སྟོན་ཀའི་ནམ་མཁའ་རྣམ་པར་དག་པའི་དཀྱིལ་ལྟ་བུ་འདི་ཉིད་གཉུག་མ་ལྷན་ཅིག་སྐྱེས་པའི་ཡེ་ཤེས་རང་བཞིན་རྫོགས་པ་ཆེན་པོ་ཡེ་ཇི་བཞིན་པའི་གནས་ལུགས་ཡིན་པས་ངོ་ཤེས་པར་གྱིས་ཤིག །ཅེས་བརྗོད་ལ། སློབ་མ་རྣམས་ལངས་ཏེ་ཕྱོགས་བཞིའི་ནམ་མཁའ་ལ་རིམ་གྱིས་བལྟ་བཅུག་ནས་བླ་མས་བརྗོད་པ། ཀྱེ་མ་ཀྱེ་མ་རིགས་ཀྱི་བུ། །མིག་རྩེ་ནམ་མཁའི་ཤར་དུ་ལྟོས། །ཤར་གྱི་(༩༧)བར་སྣང་དག་ལ་ནི། །ཐོགས་པ་མེད་པར་འགྲོ་བར་སྒོམས། །ཀྱེ་མ་ཀྱེ་མ་རིགས་ཀྱི་བུ། །མིག་རྩེ་ནམ་མཁའི་ལྷོ་རུ་ལྟོས། །ལྷོ་ཡི་བར་སྣང་དག་ལ་ནི། །ཐོགས་པ་མེད་པར་འགྲོ་བར་སྒོམས། །ཀྱེ་མ་ཀྱེ་མ་རིགས་ཀྱི་བུ། །མིག་རྩེ་ནམ་མཁའི་ནུབ་ཏུ་ལྟོས། །ནུབ་ཀྱི་བར་སྣང་དག་ལ་ནི། །ཐོགས་པ་མེད་པར་འགྲོ་བར་སྒོམས། །ཀྱེ་མ་ཀྱེ་མ་རིགས་ཀྱི་བུ། །མིག་རྩེ་ནམ་མཁའི་བྱང་དུ་ལྟོས། །བྱང་གི་བར་སྣང་དག་ལ་ནི། །ཐོགས་པ་མེད་པར་འགྲོ་བར་སྒོམས། །འགྲོ་བར་བསམས་ན་འགྲོ་མཁན་མེད། །གང་དུ་འགྲོ་བསམ་ཕྱིན་པ་མེད། །འགྲོ་བར་བསམ་པ་རང་གི་སེམས། །སེམས་ནི་མཐའ་བྲལ་སྟོང་པ་ཡིན། །ཞེས་བརྗོད་ནས་ཡང་། ཀྱེ་མ་རིགས་ཀྱི་བུ་ཁྱོད་ཀྱིས། །སེམས་ནི་དང་པོ་གང་ནས་བྱུང་། །རྒྱུ་རྐྱེན་ཅི་ལས་བྱུང་བར་ལྟོས། །ཞེས་པས་མ་རྙེད་པའི་ཚེ། ཡང་བརྗོད་པ། ཀྱེ་མ་རིགས་ཀྱི་བུ་ཁྱོད་ཉོན། །རྩ་བ་བྲལ་བའི་སེམས་ཉིད་ལ། །གདོད་ནས་མ་སྐྱེས་དངོས་པོ་མེད། །ཁ་དོག་དབྱིབས་མེད་ངོས་གཟུང་མེད། །གང་ནས་མ་བྱུང་སོང་བ་མེད། །ད་ལྟ་མི་གནས་རྒྱུ་རྐྱེན་མེད། །འདི་ཉིད་སེམས་ཀྱི་གནས་ལུགས་ཏེ། །བརྗོད་དུ་མེད་པར་ཤེས་པར་གྱིས། །ཞེས་བརྗོད་པའི་དོན་བཤད་ལ། ཡང་ནམ་མཁའི་དཀྱིལ་ན་རིགས་ལྔའི་སྐུ་གཟུགས་བསྒོམ་དུ་བཅུག་ལ་བླ་མས་བརྗོད་པ། ཀྱེ་མ་རིགས་ཀྱི་བུ་ཁྱོད་ཀྱི། །རྒྱལ་བའི་སྐུ་གཟུགས་འདི་ལ་ལྟོས། །རྒྱན་དང་ཆ་ལུགས་དུ་མར་སྣང་། །སྣང་བ་འཛིན་པ་རང་གི་སེམས། །དེ་ལ་ལྟོས་དང་གཞི་རྩ་བྲལ། །དེ་བཞིན་ཡིད་ཡུལ་སྣང་བའི་གཟུགས། །ཡུལ་ཉིད་གསལ་ལ་མཁན་པོས་སྟོང་། །དེ་ནི་གསལ་སྟོང་ཆོས་སྐུ་ཡིན། །ཞེས་བརྗོད་ནས། དབྱུག་པ་རིང་པོ་ལ་དྲིལ་བུའི་ཕྲེང་བ་བརྒྱུས་ལ། ས་ལ་དབྱུག་པའི་རྩ་བ་བརྡུང་ཞིང་བརྗོད་པ། ཀྱེ་མ་རིགས་ཀྱི་བུ་ཁྱོད་ཀྱིས། །འདི་ཡི་སྒྲ་ནི་སྙན་མི་སྙན། །ལེགས་པར་ཐོས་སམ་ངོ་བོར་ལྟོས། །སྒྲ་རུ་འཛིན་པ་རང་གི་སེམས། །སེམས་ནི་གྲག་སྟོང་ཆོས་ཀྱི་སྒྲ། །དེ་ལ་ལྟོས་དང་གཞི་རྩ་བྲལ། །དེ་བཞིན་སྒྲ་རུ་གྲག་པ་ཀུན། །སྣ་ཚོགས་ཐོས་ཀྱང་ངོ་བོས་སྟོང་། །གསལ་པོར་གྲགས་ཀྱང་རང་བཞིན་སྟོང་། །ཤར་དུས་གཞི་མེད་རྩ་བ་བྲལ། །ངོ་བོ་ངོས་གཟུང་མ་རྙེད་པ། །དེ་ནི་གྲག་སྟོང་བྱ་བ་ཡིན། །ཞེས་པ་དང་ཡང་། སྤོས་དང་སྨན་ལ་སོགས་པའི་དྲི་སྣོམ་དུ་བཅུག་ལ། ཀྱེ་མ་རིགས་ཀྱི་བུ་ཁྱོད་ཀྱིས། །སྤོས་དང་སྨན་སོགས་དྲི་ཞིམ་དང་། །དེ་བཞིན་མི་(༩༨)ཞིམ་དྲི་རྣམས་ལ། །དགའ་དང་མི་དགའ་སྐྱེས་པའི་ཚེ། །རང་གི་སེམས་ལ་ཚུར་ལྟོས་དང་། །གང་ལས་འབྱུང་ཞིང་གང་དུ་སོང་། །དེ་ཡི་ངོ་བོ་ཅི་འདྲ་ཞིག །དགག་སྒྲུབ་སེམས་ཀྱི་ངོ་བོར་ལྟོས། །དེ་ནི་རྐྱེན་སྣང་ཤེས་པ་སྟེ། །གཉིས་འཛིན་ཤེས་པ་གློ་བུར་ཡིན། །རྐྱེན་ཕྱིར་སྣང་ཡང་ངོ་བོས་སྟོང་། །ཞེས་བརྗོད་ནས། ཡང་རོ་མངར་སྐྱུར་མྱོང་དུ་བཅུག་ལ། ཀྱེ་མ་རིགས་ཀྱི་བུ་ཁྱོད་ཀྱིས། །བཟའ་བཏུང་རོ་མཆོག་མྱོང་བར་གྱིས། །མངར་སྐྱུར་ལན་ཚྭ་ཚ་ཁ་བསྐ། །རོ་དྲུག་མྱོང་བའི་མཁན་པོར་ལྟོས། །བལྟས་པས་མི་རྙེད་སྐྱེ་བ་མེད། །མཐའ་བྲལ་དབུ་མ་སྤྲོས་བྲལ་ངང་། །རང་གྲོལ་ཆོས་སྐུར་ཤེས་པར་མཛོད། །ཡང་ཕྲག་པའི་གོས་ཕུད་ལ་རེག་བྱ་འཇམ་རྩུབ་རེག་ཏུ་བཅུག་ནས་བརྗོད་པ།

ཀྱེ་མ་རིགས་ཀྱི་བུ་ཁྱོད་ལ། །རེག་ལ་དགག་སྒྲུབ་སྐྱེས་པའི་སེམས། །དེ་ལ་གཉིས་འཛིན་གང་སྐྱེས་ཀྱང་། །རྣམ་པར་གསལ་ལ་རང་བཞིན་སྟོང་། །རང་གི་སེམས་སུ་ཤེས་པར་གྱིས། །སེམས་ནི་སྟོང་གསལ་ཆོས་སྐུའི་ངང་། །གདོད་ནས་རྩ་བ་བྲལ་བ་ཡིན། །ཞེས་བརྗོད་ནས་ཡང་། སྐྱིད་སྡུག་དགའ་མི་དགའ་ཆགས་སྡང་ལ་སོགས་པ་སྒོམས་ཤིག་བྱས་ལ། བརྗོད་པ། ཀྱེ་མ་རིགས་ཀྱི་བུ་ཁྱོད་ཀྱིས། །རང་གི་སེམས་ལ་ཕར་ལྟོས་དང་། །སྐྱིད་སྡུག་དགག་སྒྲུབ་ཅིར་སྣང་ཡང་། །སྣང་མཁན་སེམས་ལ་ཚུར་ལྟོས་དང་། །དགའ་དང་མི་དགའ་སེམས་ལས་བྱུང་། །བདེ་དང་སྡུག་བསྔལ་གང་བྱུང་ཡང་། །གསལ་ལ་ངོ་བོ་རིག་སྟོང་ཡིན། །དཔེར་ན་ཆུ་ཟླ་ཇི་བཞིན་ནོ། །ཞེས་པ་དང་། ཡང་དུག་ལྔ་དུག་གསུམ་རང་ག་མའི་སེམས་སྐྱེར་བཅུག་ལ། བརྗོད་པ།

ཀྱེ་མ་རིགས་ཀྱི་བུ་ཁྱོད་ལ། །དུག་ལྔ་དུག་གསུམ་ཅི་སྐྱེས་ཀྱང་། །མེ་ལོང་ནང་གི་གཟུགས་བརྙན་བཞིན། །སེམས་ལ་སྣང་ཡང་ངོས་གཟུང་མེད། །ཉོན་མོངས་གཞི་མེད་རྩ་བ་བྲལ། །ཁ་དོག་དབྱིབས་མེད་ངོས་གཟུང་མེད། །གདོད་ནས་མ་སྐྱེས་ཆོས་སྐུ་ཡིན། །ཉོན་མོངས་རྟོག་པའི་རང་བཞིན་ནི། །སེམས་ལས་ཤར་ཞིང་སེམས་ལ་ནུབ། །སྐྱེས་དང་གྲོལ་མཉམ་དབའ་རླབས་བཞིན། །རགས་དང་ཕྲ་བའི་རྣམ་རྟོག་ཀུན། །དེར་འཛིན་མེད་པར་རང་སར་ཞི། །དེ་ལྟར་རང་བཞིན་མ་གྲུབ་པ། །ཉོན་མོངས་རྟོགས་པའི་མཚང་རྟོགས་ན། །གཉེན་པོ་སྤང་བླང་མེད་པར་གྲོལ། །ཅེས་ངོ་སྤྲད་དོ། །

གསུམ་པ་རྗེས་ནི་བླ་མས། ཨེ་མ་སྐལ་ལྡན་རིགས་ཀྱི་བུས། །སྟོང་གསལ་ཆོས་སྐུའི་དབང་ཐོབ་པ། །དེས་ནི་དག་བྱ་གང་དག་ན། །ལུས་ངག་ཡིད་གསུམ་འཛིན་སྒྲིབ་དག །གསུམ་ཀ་ནུས་པ་ཚད་དུ་(༩༩)ཕྱིན། །བརྟེན་བྱ་བདེ་སྡུག་སྤང་བླང་བྲལ། །རྗེས་སུ་དབྱེར་མེད་བསྒོམ་པར་དབང་། །ས་ནི་བཅུ་གཅིག་ཀུན་ཏུ་འོད། །ཕྲིན་ལས་བཞི་པོ་མངོན་དུ་གྱུར། །འབྲས་བུ་སྐུ་ལྔ་ལྷུན་གྱིས་གྲུབ། །ཅེས་བརྗོད་ལ་ཚོགས་ཀྱི་དགའ་བ་བྱའོ། །

དྲུག་པ་སེམས་ཉིད་ཀྱི་ངོ་སྤྲད་པ་བླ་མའི་དབང་ཀ་དག་རྩལ་དབང་ལ་སྔོན་འགྲོ་སྣོད་སྦྱོང་ཞིང་བྱིན་གྱིས་བརླབ་པ། དངོས་གཞི་བཅུད་བླུགས་ཏེ་སྨིན་གྲོལ་ལ་དགོད་པ། རྗེས་སྤྲོ་དགའ་བསྐྱེད་དེ་གཟེངས་བསྟོད་པ་གསུམ་ལས། དང་པོ་ནི་ཁྲེགས་ཆོད་ཀྱི་སྔོན་འགྲོར་བསྐུར་བ་སྟེ། པད་འདབ་བརྒྱད་འོད་ར་དང་རྡོ་ར་མེ་རི་བྲིས་ལ། དེའི་སྟེང་དུ་ཐོད་པ་བདུད་རྩིས་བཀང་བ་བཞག །ཕྱི་ནང་གི་མཆོད་པས་བསྐོར་ལ། ཐོད་པའི་དབུས་སུ་པདྨའི་སྡོང་པོ་ལ་ཨོ་རྒྱན་ཡབ་ཡུམ་རྩ་བའི་བླ་མ་དང་ཐ་དད་མེད་པ་ལོངས་སྤྱོད་རྫོགས་པའི་སྐུ་ཟ་འོག་གི་འཇོལ་བེར་ཤ་བའི་སྙན་ཞྭ་ཐོད་པ་བདུད་རྩིས་བཀང་བ་དང་གྲི་གུག་འཛིན་པའི་སྐུ་དཀར་སེར་ཞལ་སྦྱོར་དུ་བསྒོམས་པའི། མདུན་དུ་རྡོ་རྗེ་མཁའ་འགྲོ། གཡས་སུ་རིན་ཆེན་མཁའ་འགྲོ། རྒྱབ་ཏུ་པདྨ་མཁའ་འགྲོ། གཡོན་དུ་ལས་ཀྱི་མཁའ་འགྲོ། སྟེང་དུ་ཆོས་སྐུ་ཀུན་བཟང་ཡབ་ཡུམ་ལ་སོགས་པ་བརྒྱུད་པའི་བླ་མ་དང་། ཞི་ཁྲོའི་དཀྱིལ་འཁོར། དེ་དག་གི་མཐའ་སྐོར་རྣམས་སུ་དཔའ་བོ་དཔའ་མོ། བཀའ་སྲུང་དམ་ཅན་རྣམས་བསྐྱེད་ནས་ཡེ་ཤེས་པ་བསྟིམ། མཆོད་པ་དང་བསྟོད་པ་བྱས་ལ། ཕྱག་དང་བསྐངས་ཀྱི་རྗེས་ལ། བདག་དང་མཐའ་ཡས་སེམས་ཅན་རྣམས་ཞེས་པ་ལ་སོགས་པས་སེམས་བསྐྱེད་ནས། གསོལ་བ་གདབ་པ་ནི། ཀྱེ་ཀྱེ་བླ་མ་རྣམས་ཀྱིས་བདག་སྨིན་པར་མཛད་དུ་གསོལ། རིག་པ་རྩལ་གྱི་དབང་བཀའ་རབ་འབྱམས་བསྐུར་དུ་གསོལ། བདག་གྲོལ་བར་མཛད་དུ་གསོལ། མཆོག་དང་ཐུན་མོང་གི་དངོས་གྲུབ་སྩལ་དུ་གསོལ། ཞེས་པ་ལན་གསུམ་བརྗོད་དོ། །

གཉིས་པ་དངོས་གཞི་ལ་ཀུན་འདུས་སྤྱིར་བསྐུར་བ་དང་། མཚན་བརྒྱད་བྱེ་བྲག་ཏུ་བསྐུར་བ་གཉིས་ལས། དང་པོ་ནི་བླ་མ་རྣམས་བྱོན་ནས་རང་ལ་ཐིམ་པར་བསྒོམ་དུ་བཅུག་ལ། ཨོཾ་གུ་རུ་ཀུན་བཟང་ཡབ་ཡུམ། རིགས་ལྔ་ཡབ་ཡུམ། རྡོ་རྗེ་འཆང་། རྡོ་རྗེ་སེམས་དཔའ། དགའ་རབ་རྡོ་རྗེ། ཤྲཱ྇་སིངྷ་། པདྨ་མཚན་བརྒྱད། ཡེ་ཤེས་མཚོ་རྒྱལ། པདྨ་ལས་འབྲེལ་རྩལ། ས་མ་ཡ་ཛཿཞེས་བརྗོད་དོ། །སློབ་མ་རྣམས་ལངས་ཏེ་ཐལ་མོ་སྤྱི་བོར་སྦྱར་ལ་རླུང་ཁ་སྦྱོར་བཟུང་ཞིང་བླ་མས། འོ་ཁྱེད་རྣམས་ཉོན་ཅིག །རང་གི་ལུས་འདི་ཐ་མལ་པ་ཤིན་ཏུ་མཛེས་ཤིང་ལང་ཚོ་རྒྱས་པ། ལོ་བཅུ་(༡༠༠)དྲུག་ལོན་པ་ལྟ་བུའི་སྙིང་ནང་དུ་ཨཱ་དཀར་པོ་ཟླ་བའི་སྟེང་ན་ཡོད་པ་འཁོར་བ་ལ་སེམས་ཟུང་ཞིག །ཡང་འོག་མིན་དང་ཕྱོགས་བཅུའི་ཞིང་ནས་སངས་རྒྱས་བྱང་ཆུབ་སེམས་དཔའ་དཔག་ཏུ་མེད་པ་སྤྲིན་ཕུང་གཏིབས་པ་བཞིན་བྱོན་ནས་སྙིང་ནང་གི་ཨཱ་ལ་ཐིམ་པར་སྒོམས་ཤིག །ཅེས་བརྗོད་ནས་རོལ་མོའི་སྒྲ་ཆེར་བྱས་ལ། ཡང་སྙིང་ནང་ནས་ཉི་མའི་སྟེང་དུ་ཨཱཿདམར་པོ་འཁོར་བར་དམིགས་ལ། ནམ་མཁའ་ནས་མར་རྡོ་རྗེ་ཕག་མོ་ལ་རིགས་བཞིའི་མཁའ་འགྲོ་དཔག་ཏུ་མེད་པས་བསྐོར་བ་བྱོན་ནས་ཨཱཿལ་ཐིམ་པར་སྒོམས་ཤིག །ཅེས་བརྗོད་ལ་རོལ་མོ་བསྒྲག་གོ། །ཡང་སྙིང་གི་ནང་དུ་ཉི་ཟླའི་སྟེང་དུ་ཧཱུྃ་མཐིང་ག་ཡོད་པ་དྲག་ཏུ་འཁོར་བར་དམིགས་ལ། རྩ་བའི་བླ་མ་ཆོས་སྐུ་ཀུན་བཟང་ཡབ་ཡུམ་དང་གཉིས་སུ་མེད་པ་ལ་བརྒྱུད་པའི་བླ་མས་བསྐོར་བ་སྤྱན་དྲངས་པ་བྱོན་ནས་ཧཱུྃ་ལ་ཐིམ་པར་སྒོམས་ཤིག །ཅེས་བརྗོད་ལ་སྤོས་དང་ཚིལ་ཆེན་གྱིས་བདུག་ཅིང་རོལ་མོའི་སྒྲ་ཆེར་བྱའོ། །

གཉིས་པ་ལ་སྐུ་ལྔ་ལྷུན་གྲུབ་ཏུ་དབང་བསྐུར་བ། སྐུ་གསུམ་བདེ་ཆེན་དུ་དབང་བསྐུར་བ། ཐིག་ལེ་ཉག་གཅིག་ཏུ་དབང་བསྐུར་བ་གསུམ་ལས། དང་པོ་ནི། ཡང་སློབ་མ་རྣམས་ལངས་ཏེ་ཐལ་མོ་སྦྱར་བའི་ཚེ། བླ་མས། ཀྱེ་རིགས་ཀྱི་བུ་རྣམས་སྐད་ཅིག་གིས་སྟོང་པའི་ངང་ལས་པདྨ་ཟླ་བ་དང་། ཉི་མའི་སྟེང་དུ་རང་ཉིད་པདྨ་མཁའ་འགྲོ་དམར་མོ་གཅེར་བུ་གྲི་གུག་དང་ཐོད་པ་འཛིན་པའི་འཁོར་ལོ་ལྔར། ཨོཾ་ཧཱུྃ་ཏྲཱྃ་ཧྲཱིཿཨཱཿརྣམས་པདྨ་དང་ཟླ་ཉིའི་སྟེང་ན་རང་བཞིན་གྱིས་བསྐོར་བར་བསམས་ལ། ཡང་ཆོས་ཀྱི་དབྱིངས་སྤྲོས་པ་མེད་པའི་ཕོ་བྲང་ནས་བླ་མ་སེངྒེ་སྒྲ་སྒྲོགས་ཡབ་ཡུམ་གཉིས་མེད་ཆོས་སྐུའི་རང་བཞིན་མཐིང་ག་རྒྱན་དྲུག་དང་བཅས་པ་ལ་བླ་མ་རྣམས་ཀྱིས་བསྐོར་བ་བྱོན་ནས་སྙིང་གའི་ཧཱུྃ་ལ་ཐིམ་པར་སྒོམས་ཤིག །ཅེས་བརྗོད་ལ་རོལ་མོ་བསྒྲག་གོ། །དེ་བཞིན་དུ་འོག་མིན་ནས་པདྨ་རྒྱལ་པོ་ཡབ་ཡུམ་ལོངས་སྤྱོད་རྫོགས་པའི་སྐུ་བརྒྱུད་པའི་བླ་མས་བསྐོར་བ་སེར་པོ་མགྲིན་པའི་ཏྲཱྃ་ལ་ཐིམ་པར་སྒོམས་ཤིག །ཅེས་རོལ་མོ་བསྒྲག །ཨོ་རྒྱན་ནས་བློ་ལྡན་མཆོག་སྲེད་ཡབ་ཡུམ་ཅིར་ཡང་སྤྲུལ་པའི་སྐུ་བརྒྱུད་པའི་བླ་མ་དང་བཅས་པ་ལྟེ་བའི་ཧྲཱིཿལ་ཐིམ་པར་སྒོམས་ཤིག །ཅེས་དང་རོལ་མོ་བསྒྲག །ལྷོ་ནུབ་རྔ་ཡབ་ཀྱི་གླིང་ནས་པདྨ་སམ་བྷ་ཝ་མི་འགྱུར་རྡོ་རྗེའི་སྐུ་ཡུམ་དང་བཅས་པ་ལྗང་གུ་བརྒྱུད་པའི་བླ་མས་བསྐོར་བ་བདེ་སྐྱོང་འཁོར་ལོའི་ཨཱཿལ་ཐིམ་པར་སྒོམས་ཤིག །ཅེས་དང་རོལ་མོ་བསྒྲག །རྡོ་རྗེ་གདན་ནས་ཤཱཀྱ་སེང་གེ་མངོན་པར་བྱང་ཆུབ་པའི་སྐུ་ཡུམ་དང་བཅས་པ་དཀར་(༡༠༡)སེར་བརྒྱུད་པའི་བླ་མས་བསྐོར་བ་བྱོན་ནས་སྤྱི་བོའི་ཨོཾ་ལ་ཐིམ་པར་སྒོམས་ཤིག །ཅེས་རོལ་མོ་ཆེར་བསྒྲག་གོ། །

གཉིས་པ་ནི་ཡང་། པདྨ་མཁའ་འགྲོ་བསམས་པའི་སྤྱི་བོ། མགྲིན་པ། སྙིང་ག་གསུམ་དུ་པད་ཟླ་ཉི་མའི་སྟེང་དུ། ཨོཾ་ཨཱཿཧཱུྃ་བསམ་པ་འཁོར་ཞིང་། སྐུའི་བླ་མ་པདྨ་འབྱུང་གནས་དཀར་པོ་ཡུམ་དང་བཅས་པ་ལ་བརྒྱུད་པའི་བླ་མས་བསྐོར་བ་སྤྱི་བོའི་སྟེང་གི་ནམ་མཁའ་ལ་བྱོན་ནས་བཞུགས་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་ལུས་ཐམས་ཅད་གང་། ཟག་མེད་ཀྱི་བདེ་བ་རྒྱས་ཤིང་སླར་སྤྱི་བོའི་ཨོཾ་ལ་ཐིམ། གསུང་གི་བླ་མ་ཉི་མའི་འོད་ཟེར་དམར་པོ་ཡུམ་དང་བཅས་པ་ལ་བརྒྱུད་པའི་བླ་མས་བསྐོར་བ་བྱོན་ནས་སྦྱོར་མཚམས་ནས་བདུད་རྩི་བབས་པས་གསུང་གི་དངོས་གྲུབ་ཐོབ་ཅིང་ལུས་གང་། སླར་མགྲིན་པའི་ཨཱཿལ་ཐིམ། ཐུགས་ཀྱི་བླ་མ་པདྨ་ཐོད་ཕྲེང་མཐིང་ནག་ཡུམ་དང་བཅས་པ་ལ་བརྒྱུད་པའི་བླ་མས་བསྐོར་བ་བྱོན་ནས་སྦྱོར་མཚམས་ནས་བདུད་རྩི་བབས་པས་ཐུགས་ཀྱི་དངོས་གྲུབ་ཐོབ་ཅིང་ལུས་ཐམས་ཅད་གང་ནས་བདེ་བ་རྒྱས་པའི་མཐར་སྙིང་གའི་ཧཱུྃ་ལ་ཐིམ་པར་བསམ་ཞིང་། གུ་གུལ་དང་སྤོས་དང་ཚིལ་ཆེན་གྱི་དུད་པ་རོལ་མོའི་སྒྲ་དང་བཅས་པ་ཆེར་བྱའོ། །

གསུམ་པ་ནི། ཐམས་ཅད་གྲལ་ལ་འཁོད་པ་རྣམ་སྣང་གི་ཆོས་བདུན་དང་ལྡན་པས་ལུས་སེམས་ཁོང་གློད་དེ་ཐོད་པ་ནས་དངོས་གྲུབ་ཀྱི་རྟེན་བདུད་རྩི་རེ་བླུད་ལ། བླ་མས། ཨེ་མ་སྐལ་ལྡན་རིགས་ཀྱི་བུ། །ངང་དྭངས་རང་བཞིན་བདག་ཉིད་ཆེ། །རབ་འབྱམས་རིག་པའི་དབང་བསྐུར་ཉོན། །ད་ལྟ་ཤེས་པ་རང་སོར་ཞོག །བཅོས་བསླད་མ་བྱེད་ལྷོད་ཀྱིས་གློད། །སེམས་ཀྱི་འཕྲོ་འདུ་ལིངས་ཀྱིས་བསྒྱུར། །རྦད་ཀྱིས་ཆོད་ལ་ཕྱམ་གྱིས་ཞོག །སེམས་ཉིད་མ་སྐྱེས་གཉུག་མའི་དོན། །རང་བཞག་ཡོངས་གྲོལ་ནམ་མཁའ་འདྲ། །ཡེ་ནས་མ་སྐྱེས་གདོད་མའི་ངང་། །བསམ་མེད་ཡེ་ནས་རྫོགས་པ་ཆེ། །འདུ་འབྲལ་མེད་པའི་ཆོས་ཉིད་དོ། །ཞེས་ངོ་སྤྲད་ལ། སེམས་ཉིད་སྟོང་པ་ཆོས་ཀྱི་སྐུ། ཐིག་ལེ་ཉག་གཅིག་ཏུ་གཏིང་ཐག་བཅད་དོ། །

གསུམ་པ་རྗེས་སྤྲོ་དགའ་བསྐྱེད་ཅིང་གཟེངས་བསྟོད་པ་ནི། འོ་རིགས་ཀྱི་བུ་ཁྱེད་རྣམས་ལ་བླ་མ་ཐམས་ཅད་ཀྱི་བྱིན་རླབས་ཞུགས་པས་གནས་སྐབས་དང་མཐར་ཐུག་གི་བདེ་བ་ཕུན་སུམ་ཚོགས་ཤིང་ཡིད་ལ་བསམ་པ་ཐམས་ཅད་རང་བཞིན་ལྷུན་གྱིས་གྲུབ་པ་ཡིན་ནོ། །ཞེས་བརྗོད་ནས་ཚོགས་ཀྱི་དགའ་བ་རྒྱ་ཆེར་བྱའོ། །

བདུན་པ་ཡེ་ཤེས་ཀྱི་གསང་སྒོ་དབྱེ་བ་རིག་པ་རྩལ་གྱི་དབང་ནི། ཐོད་རྒལ་གྱི་སྔོན་འགྲོར་བསྐུར་བ་ལས་འདི་(༡༠༢)ལ་ཡང་། སྔོན་འགྲོ་དངོས་གཞི་རྗེས་དང་གསུམ་ལས། དང་པོ་ནི་ཤོམ་ར་བླ་མའི་དབང་ལྟར་བཤམས་ལ། སློབ་མ་རྣམས་གྲལ་ལ་འཁོད་ནས་སེམས་བསྐྱེད་དོ། །གཉིས་པ་ནི་རང་གི་སྤྱི་བོར་པདྨ་འདབ་བཞི་དཀར་པོའི་དབུས་སུ། ཨཱ་དཀར་པོ་ལས་འོད་འཕྲོས་རང་ལུས་ཨོཾ་དུ་གྱུར་པ་ལས་འོད་འཕྲོས་སྣང་སྲིད་ཐམས་ཅད་ཨོཾ་དུ་གྱུར་ནས་བདག་གཞན་ཐམས་ཅད་ཀྱི་ལུས་ཀྱི་སྒྲིབ་པ་དག །སྐུའི་དབང་དང་དངོས་གྲུབ་ཐོབ་པར་བསམ་ལ། ཨཱ་ཨཱ་ཨཱ། ཞེས་བརྒྱ་རྩ་བརྒྱད་བཟླས་སོ། །ཡང་མགྲིན་པར་པདྨ་དམར་པོ་འདབ་མ་བཞིའི་དབུས་སུ། ཨཱཿདམར་པོ་ལས་འོད་འཕྲོས་རང་ལུས་ཨཱར་གྱུར་པ་ལས་འོད་འཕྲོས་སྣང་སྲིད་ཐམས་ཅད་ཨཱའི་རང་བཞིན་དུ་གྱུར་བདག་གཞན་ཐམས་ཅད་ཀྱི་ངག་གི་སྒྲིབ་པ་དག །གསུང་གི་དབང་དང་དངོས་གྲུབ་ཐོབ་པར་བསམ་ལ། ཨཱ་ཨཱ་ཨཱ་ཞེས་དབྱངས་དང་བཅས་པས་བརྒྱ་རྩ་གཅིག་བརྗོད་དོ། །ཡང་སྙིང་གར་པདྨ་སྔོན་པོ་འདབ་བཞིའི་དབུས་སུ་ཧཱུྃ་མཐིང་ག་ལས་འོད་འཕྲོས་རང་ལུས་ཧཱུྃ་དུ་གྱུར་པ་ལས་འོད་འཕྲོས་སྣང་སྲིད་ཐམས་ཅད་ཧཱུྃ་དུ་གྱུར་ནས་བདག་གཞན་ཐམས་ཅད་ཀྱི་ཡིད་ཀྱི་སྒྲིབ་པ་དག །ཐུགས་ཀྱི་དབང་དང་དངོས་གྲུབ་ཐོབ་པར་བསམ་ལ། ཧཱུྃ་ཧཱུྃ་ཧཱུྃ་ཞེས་བརྒྱ་རྩ་གཅིག་བརྗོད་དོ། །ཡང་ལྟེ་བར་པདྨ་སེར་པོ་འདབ་མ་བཞི་པའི་དབུས་སུ་ཏྲཱྃ་སེར་པོ་ལས་འོད་འཕྲོས་རང་གི་ལུས་ཏྲཱྃ་དུ་གྱུར་པ་ལས་སྣང་སྲིད་ཐམས་ཅད་ལ་འོད་ཟེར་ཕོག་པས་ཏྲཱྃ་དུ་གྱུར་ནས། བདག་གཞན་ཐམས་ཅད་ཀྱི་ང་རྒྱལ་གྱི་སྒྲིབ་པ་དག །ཡོན་ཏན་གྱི་དབང་དང་དངོས་གྲུབ་ཐོབ་པ་བསམས་ལ། ཏྲཱྃ་ཏྲཱྃ་ཏྲཱྃ་ཞེས་བརྒྱ་རྩ་གཅིག་བརྗོད་དོ། །ཡང་གསང་བར་པདྨ་འདབ་བཞིའི་དབུས་སུ་ཕཊ་ལྗང་གུ་ལས་འོད་འཕྲོས་རང་གི་ལུས་ཕཊ་དུ་གྱུར་པ་ལས་འོད་འཕྲོས་སྣང་སྲིད་ཐམས་ཅད་ཕཊ་དུ་གྱུར་པས་བདག་གཞན་ཐམས་ཅད་ཀྱི་ཕྲག་དོག་གི་སྒྲིབ་པ་དག །ཕྲིན་ལས་ཀྱི་དབང་དང་དངོས་གྲུབ་ཐོབ་པར་བསམས་ལ། ཕཊ་ཕཊ་ཕཊ་ཅེས་བརྒྱ་རྩ་གཅིག་བརྗོད་དོ། །དེ་ནི་ཡི་གེ་འཁོར་ལོའི་དབང་སྟེ་རྩལ་མ་བྱང་ནས་འོད་གསལ་འཆར་སླ་བའོ། །དེ་ནས་ཐོད་པ་ནས་བདུད་རྩི་བྱིན་ནས་སེམས་སྤྲོ་བསྡུ་མེད་པར་བཞག་པས། རིག་པ་རང་དྭངས་ལ་རྩལ་མི་འགག་པ་ནི་རང་བྱུང་གི་རིག་པའི་དོན་གྱི་རྩལ་དབང་ཡིན་ནོ། །ཞེས་ངོ་སྤྲད་དོ། །དེ་ནི་རང་བྱུང་(༡༠༣)རིག་པའི་རྩལ་དབང་ངོ་། །དེ་ནས་ལྷུན་གྲུབ་རིག་པའི་རྩལ་དབང་ནི་མངོན་སུམ་ངོ་སྤྲད་ལ་ཐེབས་པར་གདབ་བོ། །གསུམ་པ་རྗེས་ནི་ཚོགས་ཀྱི་དགའ་བ་བཀྲ་ཤིས་དང་བཅས་པ་བྱའོ། །

བརྒྱད་པ་བྱིན་རླབས་མཐར་ཕྱིན་པ་མཁའ་འགྲོ་དོན་གྱི་དབང་ལ་གསུམ་ལས། སྔོན་འགྲོ་ནི་དབང་ཁྲིད་རྒྱབ་ཆོས་དང་བཅས་པ་ཚར་ལ་ཁད་པའི་ཞག་ཐ་མའི་སྔར་ནུབ་ཤོམ་ར་སྔ་མ་ལྟར་བཤམས་ལ། དོན་དམ་པའི་སེམས་བསྐྱེད་ནས་ལངས་ཏེ་ཐལ་མོ་སྦྱར་བ་ལ་བླ་མས། པདྨ་རཀྟ་དང་སིནྡྷུ་རའི་ཐིག་ལེ་སྨིན་མཚམས་སུ་བཀོད་ལ། འོ་དོ་ནུབ་མཁའ་འགྲོ་དོན་གྱི་དབང་བགྱི་བས་མ་ཡེངས་པར་ཉོན་ཅིག་ཅེས་བརྗོད་དོ། །དངོས་གཞི་ཁྱད་པར་ཁྱད་དུ་སྒྲུབ་པ་སྟེ། འདིར་རང་གི་ལུས་དཔའ་བོ་རྟ་མགྲིན་དང་། རྡོ་རྗེ་ཕག་མོ་འཁྲིལ་སྦྱོར་གྲི་གུག་དང་ཐོད་པ་འཛིན་པའི་སྤྱི་བོ་བདེ་ཆེན་གྱི་འཁོར་ལོར་རྡོ་རྗེ་རིགས་ཀྱི་མཁའ་འགྲོ་ཡབ་ཡུམ་སུམ་བརྒྱ་དྲུག་ཅུ་འཁྲབ་པ་ལས་འོད་འཕྲོས་པས། ཤར་ཕྱོགས་ཀྱི་ནམ་མཁའི་དཀྱིལ་ན་ཚུར་རྡོ་རྗེ་མཁའ་འགྲོ་དཔག་ཏུ་མེད་པས་ཕེཾ་ཕེཾ་ཧྲཱིཾ་ཡོམ་ཡོམ་ཞེས་བརྗོད་ཅིང་བྱོན་ནས་སྤྱི་བོར་ཐིམ་པར་སྒོམས་ཤིག །ཨོཾ་ཨཱཿཧཱུྃཿཧྲཱིཿམ་ཧ་རི་ནི་ས་ར་ཙ་ཧྲི་ཡ་བཛྲ་ཌཱ་ཀི་ནི་ས་མ་ཡ་ཛ་ཛཿ དེ་བཞིན་དུ་མགྲིན་པ་ལོངས་སྤྱོད་ཀྱི་འཁོར་ལོར་རིན་ཆེན་མཁའ་འགྲོ་ཡབ་ཡུམ་བཅུ་དྲུག་གར་བྱེད་པའི་འོད་ཀྱིས་ལྷོ་ཕྱོགས་ནས་རིན་ཆེན་རིགས་ཀྱི་དཔའ་བོ་ཡབ་ཡུམ་བྱོན་ནས་མགྲིན་པར་ཐིམ། ཨོཾ་ཨཱཿཧཱུྃ་ཧྲཱི་མ་ཧ་རི་ནི་ས་ར་ཙ་ཧྲི་ཡ་རཏྣ་ཌཱ་ཀི་ནི་ས་མ་ཡ་ཛ་ཛཿ སྙིང་གར་ཆོས་ཀྱི་དབྱིངས་ཀྱི་མཁའ་འགྲོ་ཡབ་ཡུམ་སུམ་ཅུ་རྩ་གཉིས་འཁྲབ་པའི་འོད་ཟེར་གྱིས་སྟེང་གི་ནམ་མཁའ་ནས་མར་སངས་རྒྱས་མཁའ་འགྲོ་དཔག་ཏུ་མེད་པ་བྱོན་ནས་སྙིང་གར་ཐིམས་པར་སྒོམས་ཤིག །ཨོཾ་ཨཱཿཧཱུྃ་ཧྲཱིཿམ་ཧ་རི་ནི་ས་ར་ཙ་ཧྲི་ཡ་བུདྡྷ་ཌཱ་ཀི་ནི་ས་མ་ཡ་ཛ་ཛཿ ལྟེ་བར་པདྨ་མཁའ་འགྲོ་ཡབ་ཡུམ་དྲུག་ཅུ་རྩ་བཞི་དགའ་བས་ལང་ལིང་བན་བུན་དུ་འཕྱོ་བའི་འོད་ཟེར་གྱིས། ནུབ་ཕྱོགས་ནས་པདྨ་མཁའ་འགྲོ་དཔག་ཏུ་མེད་པ་བྱོན་ནས་ལྟེ་བར་ཐིམ་པར་སྒོམས་ཤིག །ཨོཾ་ཨཱཿཧཱུྃ་ཧྲཱིཿམ་ཧ་རི་ནི་ས་ར་ཙ་ཧྲི་ཡ་པདྨ་ཌཱ་ཀི་ནི་ས་མ་ཡ་ཛ་ཛཿ གསང་བར་ལས་ཀྱི་མཁའ་འགྲོ་ཉི་ཤུ་རྩ་བརྒྱད་གར་མཛད་པའི་འོད་ཟེར་གྱིས་བྱང་ཕྱོགས་ཀྱི་ནམ་མཁའ་(༡༠༤)ནས་ཚུར་སྣ་ཚོགས་མཁའ་འགྲོ་དཔག་ཏུ་མེད་པ་བྱོན་ནས་གསང་བར་ཐིམ་པར་སྒོམས་ཤིག །ཨོཾ་ཨཱཿཧཱུྃ་ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཀརྨ་ཌཱ་ཀི་ནི་ས་མ་ཡ་ཛ་ཛཿ གཞན་ཡང་ཕྱི་ནང་གི་དཔའ་བོ་མཁའ་འགྲོ་ཏིལ་གྱི་གོང་བུ་ཁ་བྱེ་བ་ལྟ་བུ་རྣམས་ཆར་བཞིན་དུ་བབས་པས་ལུས་ཀྱི་ཕྱི་ནང་དང་བ་སྤུའི་ཁུང་བུ་ཐམས་ཅད་དུ་སིབ་སིབ་ཐིམ་པར་སྒོམས་ཤིག །ཨོཾ་ཨཱཿཧཱུྃ་ཧྲཱིཾ་མཾ་ཕེཾ་ཕེཾ་ཡོམ་ཧ་ཧོ་ཧཱུྃ་ཧཱུྃ་ས་མ་ཡ་ཛ་ཛ༔ཛཿཧཱུྃ་བྃ་ཧོཿཞེས་བརྗོད་ལ་ཚིལ་ཆེན་གྱི་དུད་པ་འཐུལ་ཞིང་། ཐོད་རྔ་དང་རྐང་གླིང་དང་། རོལ་མོའི་སྒྲ་སྐད་ཆེར་བྱའོ། །དེ་དག་ནི་བསྐྱེད་རིམ་གྱི་དོན་དབང་ངོ་། །རྫོགས་རིམ་གྱི་དོན་དབང་ནི། བདུད་རྩི་བྱིན་ནས། རང་རིག་དྭངས་བྱིན་པར་གློད་པའི་ངང་ལ་ངོ་སྤྲད་དེ། རང་རིག་སྟོང་པ་དང་། གསལ་བ་དང་། རིས་མཉམ་པ་དང་། སོ་སོར་མ་འདྲེས་ལ་མི་རྟོག་པ་དང་། རང་གྲོལ་བ་རྣམས་ཆོས་དབྱིངས་མཁའ་འགྲོ། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ། ལས་ཀྱི་མཁའ་འགྲོ་དང་ལྔར་ངོ་སྤྲད་དོ། །རྗེས་ནི་ཚོགས་ཀྱི་དགའ་བ་རྒྱ་ཆེར་བྱའོ། །

གསུམ་པ་རྗེས་གཞན་དོན་བཀའ་རྒྱ་དང་བཅས་པ་ལ། གཞན་བཀའ། གཏད་རྒྱ། བཀའ་བསྒོ་དང་གསུམ་ལས། དང་པོ་ནི། དབང་ཁྲིད་རྒྱབ་ཆོས་དང་བཅས་པ་ཚར་བའི་ནུབ་མོ་གཞན་དོན་འགྲུབ་པ་རྣམས་ལ་གནང་བ་སྦྱིན་པ་ནི། ཚོགས་མཆོད་ལ་སོགས་སྔར་ལྟར་བཤམས་ལ་བླ་མ་བརྒྱུད་པའི་གསོལ་བ་བཏབ་ནས། རིག་འཛིན་གྱི་གཏོར་མ་མགོ་ཐོག་ཏུ་བཞག་ལ། འོ་རིགས་ཀྱི་བུ་ཁྱོད་ཀྱིས་འགྲོ་བ་དཔག་ཏུ་མེད་པ་ལ་ཟབ་མོའི་དབང་བསྐུར་ཆོས་ཤོད། བྱམས་པ་དང་སྙིང་རྗེས་འགྲོ་བའི་དོན་རྒྱ་ཆེར་མཛོད་ཅིག་ཅེས་ལན་གསུམ་བྱའོ། །རྗེས་ཚོགས་ཀྱི་འཁོར་ལོས་དགའ་བར་བྱའོ། །

གཉིས་པ་ནི་སློབ་མ་མཆོག་གི་བཀའ་སྲོལ་རྣམས་ཆིག་བརྒྱུད་དུ་བཟུང་ནས་འཇིག་རྟེན་ན་ཡུན་དུ་གནས་པས་འགྲོ་བའི་དོན་རྒྱ་ཆེར་འབྱུང་བས། དེའང་བླ་མ་ལ་སངས་རྒྱས་སུ་མཐོང་ཞིང་གདམས་པ་ལ་ཡིད་ཆེས་སྐྱེས་ནས་ཤེས་རབ་དང་སྙིང་རྗེར་ལྡན་ཞིང་གཞན་དོན་འགྲུབ་པ་ལ་བྱ་སྟེ། བདུད་རྩིའི་ཐིག་ལེ་གནས་གསུམ་དུ་བྱས་ལ། འཁོར་ལོ་ལྔར་རིགས་ལྔའི་སངས་(༡༠༥)རྒྱས་དང་། མཁའ་འགྲོ་ལྔ་བསྐྱེད་ལ་སྟེང་དང་ཕྱོགས་བཞི་ནས་བླ་མ་ཐམས་ཅད་དང་རྣམ་སྣང་སངས་རྒྱས་མཁའ་འགྲོ་འཁོར་དང་བཅས་པ་སྤྱན་དྲངས་ལ་སྤྱི་བོར་ཐིམ་པས་སྐུའི་འགྲོ་དོན་ཕྱོགས་མེད་དུ་འགྲུབ་པར་བསམ་ཞིང་། ༀ་ཨཱཿཧཱུྃ་གུ་རུ་སིདྡྷི་ཕ་ལ་ཧ་རི་ནི་ས་ཨ་བྷི་ཥིཉྩ་མྃ། ཞེས་བརྗོད། དེ་བཞིན་དུ་བླ་མ་དང་སྣང་མཐའ་པདྨ་མཁའ་འགྲོ་མགྲིན་པར་ཐིམ་པས་གསུང་གི་འགྲོ་དོན་འགྲུབ། བླ་མ་དང་མི་བསྐྱོད་པ་རྡོ་རྗེ་མཁའ་འགྲོ་སྙིང་གར་ཐིམ་ཐུགས་ཀྱི་འགྲོ་དོན་འགྲུབ། བླ་མ་དང་རིན་འབྱུང་རིན་ཆེན་མཁའ་འགྲོ་ལྟེ་བར་ཐིམ། ཡོན་ཏན་གྱི་འགྲོ་དོན་འགྲུབ། བླ་མ་དང་དོན་འགྲུབ་ལས་ཀྱི་མཁའ་འགྲོ་གསང་བར་ཐིམ་ཕྲིན་ལས་ཀྱི་འགྲོ་དོན་འགྲུབ། བླ་མ་དང་དཔའ་བོ་མཁའ་འགྲོ་ཞི་ཁྲོ་རབ་འབྱམས་ཀྱི་དཀྱིལ་འཁོར་ཆར་བཞིན་བབས་པས་ལུས་ཀྱི་ཕྱི་ནང་ཀུན་ཏུ་ཐིམ། འགྲོ་དོན་མཐར་རྒྱས་པར་བསམ་ལ། སྐུ་རྟེན་ཞི་ཁྲོའི་ཐང་ཀ །གསུང་གི་རྟེན་སྙིང་ཐིག་གི་གླེགས་བམ། ཐུགས་ཀྱི་རྟེན་རྡོ་རྗེ་སེམས་དཔའི་མེ་ལོང་རྣམས་གནས་གསུམ་དུ་བཞག་ཅིང་། འོ་རིགས་ཀྱི་བུ་ཁྱོད་ལ་སངས་རྒྱས་ཐམས་ཅད་ཀྱི་ཐུགས་གསང་བ་ཆེན་པོ་མཁའ་འགྲོ་སྙིང་ཏིག་གི་བསྟན་པ་གཏད་པ་ཡིན་པས། ཁྱོད་ཀྱིས་ཚེ་འདིའི་འདོད་པ་དང་གྲགས་པ་ལ་མ་བལྟ་བར་རང་དོན་གྱི་འཁྲི་བ་དང་བྲལ་བས། སྐལ་ལྡན་གཞན་ལ་ཟབ་མོའི་གདམས་པ་ཅི་ནུས་སུ་སྟོན་ལ། བཀའ་རྒྱས་བཏབ་ནས་ཕྱི་མའི་ཚེ་སྐལ་བ་དང་ལྡན་པ་གཅིག་ལ་བསྟན་པ་རྒྱ་ཆེར་གཏོད་ཅིག །རང་ཡང་ཉམས་སུ་ལོངས་ལ་གཞན་དོན་ཕུན་སུམ་ཚོགས་པར་མཛོད་ཅིག །ཨོཾ་ཨཱཿཧཱུྃ་གུ་རུ་སིདྡྷི་ཕ་ལ་ཧ་རི་ནི་ས་པུཥྚིཾ་ཀུ་རུ་ཡེ་སྭཱ་ཧཱ། ཞེས་བརྗོད་ལ་མཎྜལ་སྟེང་གི་བདུད་རྩི་བྱིན་ནས། བཀྲ་ཤིས་རྒྱས་པར་བརྗོད་དོ། །རྗེས་གསེར་གྱི་མཎྜལ་ཕུལ་ལ་ཚོགས་ཀྱི་འཁོར་ལོས་དགའ་བ་རྒྱ་ཆེར་བྱའོ། །

ཧཱུྃཿགསུམ་པ་ནི་གཞན་དོན་ལ་སྤྲོ་བའི་སྙིང་རྗེ་ཅན་དེའི་བར་ཆད་བསྲུང་བའི་ཕྱིར་བཀའ་བསྒོ་བྱ་བ་ནི། བཀའ་སྲུང་གི་དཔལ་གཏོར་མགོ་ཐོག་ཏུ་བཞག་ལ། རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱིས་ཇི་ལྟར་བཀའ་བསྒོས་ཤིང་དམ་ལ་གནས་པས་བར་ཆད་དང་དངོས་གྲུབ་འཕྲོག་པར་བྱེད་(༡༠༦)པའི་དགྲ་བགེགས་མ་རུངས་པ་རྣམས་ལ་མངོན་སྤྱོད་ཀྱི་ལས་མཛད་པའི་དཔལ་མགོན་དམ་པ་ཆོས་སྐྱོང་བའི་སྲུང་མ་ཐམས་ཅད་དང་། ཁྱད་པར་དུ་དཔལ་སྔགས་ཀྱི་བདག་མོ་སྲོག་སྒྲུབ་མ། གཟའི་རྒྱལ་པོ་འཁོར་དང་བཅས་པ། མཁའ་འགྲོ་སྙིང་ཏིག་གི་གཏེར་སྲུང་དམ་ཅན་རྒྱ་མཚོའི་ཚོགས་དང་བཅས་པ་ཁྱེད་རྣམས་ཀྱིས། རིགས་ཀྱི་བུ་སྐལ་བ་བཟང་པོ་འདི་ལ་འགོ་ཞིང་སྡོང་གྲོགས་རྒྱ་ཆེན་པོ་མཛད་པས་བཅོལ་བའི་ཕྲིན་ལས་ཐམས་ཅད་ལྷུན་གྱིས་གྲུབ་པར་མཛོད་ཅིག །ཅེས་ལན་གསུམ་བརྗོད་ལ་ཚོགས་ཀྱི་དགའ་བ་དང་། གླུ་གར་བཟང་པོ་དང་། བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད་དོ། །འདི་ནི་ཤིན་ཏུ་གཉན་པས་ལེགས་པར་བརྟགས་ལ་བཀའ་བསྒོ་བྱེད་པ་ཡིན་ནོ། །དཔེ་འདི་ཉིད་ཆིག་བརྒྱུད་མ་གཏོགས་པ་ལས་ཚང་བར་མི་སྦྱིན་ཞིང་དབང་མཆོག་རྣམས་ལའང་བུམ་པ་གསང་བ་ཤེས་རབ་ཡེ་ཤེས་ཚིག་དབང་རྩལ་དབང་རྣམས་ཕྱོགས་གཅིག་ཏུ་བྲིས་ཏེ་སྤེལ་ཞིང་། གཞན་རྣམས་ཕྱོགས་གཅིག་ཏུ་བྱས་ཏེ་གསང་ཞིང་སྦས་ལ་སྐལ་ལྡན་གཅིག་ལ་ཚང་བར་སྦྱིན་ནོ། །

དགེ་བ་འདི་ཡིས་སྲིད་པའི་སེམས་ཅན་ཀུན། །རྒྱལ་བའི་དཀྱིལ་འཁོར་མཆོག་ཏུ་རབ་ཞུགས་ཏེ། །མ་ལུས་ཕྱམ་གཅིག་ཐམས་ཅད་བྱང་ཆུབ་ནས། །འགྲོ་བའི་དོན་གཉིས་ལྷུན་གྱིས་གྲུབ་པར་ཤོག །གངས་རི་ཐོད་དཀར་རིན་ཆེན་སྙིང་པོའི་མགུལ། །ཨོ་རྒྱན་རྫོང་ཞེས་བྱ་བའི་གནས་མཆོག་ཏུ། །རིན་ཆེན་དབང་གི་ཕྲེང་བ་འདི་བཀོད་པས། །ཕྱི་རབས་སྐལ་ལྡན་ཚོགས་རྣམས་དགའ་བར་མཛོད། །རིན་ཆེན་དབང་གི་ཕྲེང་བ་ཞེས་བྱ་བ། གངས་རི་ཐོད་དཀར་གྱི་མགུལ་དུ་མེ་ཏོག་དང་འབྲས་བུ་སྨིན་པའི་སྟོན་ཀའི་ཚེ་པདྨ་ལས་འབྲེལ་རྩལ་གྱིས་བཀོད་པ་རྫོགས་སོ།། །།

མངྒ་ལྃ། བྷ་ཝནྟུ།། །།

བདག་འཇུག་པདྨ་ཀློང་ཡངས།

༄༅། །བདག་འཇུག་པདྨ་ཀློང་ཡངས་བཞུགས་པ་ལགས་སོ། །རིན་ཆེན་ཤོག་སྐྱའི་སྐོར།

༄༅། །བདག་འཇུག་པདྨ་ཀློང་ཡངས་ཞེས་བྱ་བ། རིགས་ལྔ་བདེ་བར་གཤེགས་པ་ཐམས་ཅད་ལ་ཕྱག་འཚལ་ལོ། །དཔལ་ལྡན་བདེ་ཆེན་གར་གྱིས་དགྱེས་མཛད་ཅིང་། །གཉིས་མེད་ཡེ་ཤེས་དུ་མའི་གངས་ཆེན་མཚོ། །སྲིད་ཞིའི་བདེ་འབྱུང་བདེ་གཤེགས་པདྨ་ལ། །བདག་གཞན་དུས་རྣམ་ཀུན་ཏུ་ཕྱག་འཚལ་ལོ། །རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ། །རང་གཞན་དོན་གཉིས་ཕུན་སུམ་(༡༠༧)ཚོགས་བྱའི་ཕྱིར། །རང་བྱུང་པདྨའི་གཞུང་ལུགས་ལ་བརྟེན་ནས། །བདག་ཉིད་འཇུག་པའི་རིམ་པ་གསལ་བར་བྱ། །

དེ་ལ་མཁའ་འགྲོ་སྙིང་ཏིག་གི་དཀྱིལ་འཁོར་དུ་དབང་ཐོབ་པའི་རྣལ་འབྱོར་པས། ཏིང་ངེ་འཛིན་གྱི་དཀྱིལ་འཁོར་ལ་དབང་བླངས་ཏེ་བྱང་ཆུབ་བསྒྲུབ་པའི་ཕྱིར་དབེན་པའི་གནས་སུ་རྟེན་གྱི་དྲུང་དུ་ཕྱི་ནང་གི་མཆོད་པ་དང་། གཏོར་མ་གསུམ་དང་། བུམ་པ་གཉིས་དང་། རྡོ་རྗེ་དྲིལ་བུ་ལ་སོགས་འདིར་དགོས་པ་རྣམས་ཚོགས་པར་བྱས་ལ། བགེགས་གཏོར་བྱིན་ནས་རྣལ་འབྱོར་ལ་གནས་པར་གསོལ་བ་བཏབ་ནས། ཡི་གེ་བརྒྱ་པས་རྒྱུད་སྦྱངས་ཏེ། དཀོན་མཆོག་གསུམ་ལ་སྐྱབས་སུ་འགྲོ་བ་དང་། སྲུང་འཁོར་བསྒོམ་པ་དང་། བདག་ཉིད་བསྐྱེད་དེ་མཆོད་པ་དང་། བསྟོད་པའི་བར་བྱས་ལ། དཀྱིལ་འཁོར་གྱི་དྲུང་ངམ་མཐའ་བསྐོར་གྱི་མཆོད་པ་རྣམས་བདུད་རྩིའི་ཆུས་བསང་ཞིང་སྦྱངས་ཏེ། ནམ་མཁའ་གང་བར་སྤྲུལ། རོལ་མོའི་སྒྲས་བྱིན་ཕབ་ནས་སྐད་ཅིག་གིས་སྲུང་འཁོར་གྱི་ནང་འབྱུང་བཞི་རིམ་བརྩེགས་རི་རབ་དང་བཅས་པ་ཡོངས་སུ་གྱུར་པ་ལས། གཞལ་ཡས་ཁང་བསྐྱེད་པ་དང་། ཡེ་ཤེས་པ་གཞུག་ཅིང་མཆོད་བསྟོད་བྱས་ལ། གཏོར་མ་དང་པོ་དེ་བླ་མ་དང་། དཀྱིལ་འཁོར་ལྷ་ཚོགས། གཉིས་པ་གཏེར་བདག་དམ་ཅན། གསུམ་པ་མཁའ་འགྲོ་སྤྱི་ལ་ཕུལ་ནས། རྣམ་རྒྱལ་གྱི་བུམ་པར་རིགས་ལྔ་དང་། ལས་ཐམས་ཅད་པར་རྡོ་རྗེ་སེམས་དཔའ་བསྐྱེད་ནས། བཟླས་པ་ཚུལ་བཞིན་དུ་བྱས་ལ་མཆོད་བསྟོད་ལ་སོགས་པ་བྱའོ། །དེ་ནས་རང་ཉིད་ཀུན་བཟང་ཡབ་ཡུམ་དུ་གསལ་བཏབ་ནས། བླ་མ་དང་གཙོ་བོ་ཐ་མི་དད་པའི་མདུན་དུ་དབང་བླངས་ཏེ། བླ་མས་མཛད་རྒྱུ་དེ་རྣམས་དེས་མཛད་ལ། ལས་ཀྱི་བྱ་བ་རྣམས་དེའི་ཐུགས་ཀ་ནས་སྤྲུལ་པའི་ཀུན་ཏུ་བཟང་པོས་མཛད་ཅིང་། སློབ་མའི་བྱ་བ་རྣམས་རང་གིས་དངོས་སུ་བྱའོ། །དེ་ནས་མཎྜལ་ཕུལ་ཐལ་མོ་སྦྱར་ལ།

ཨེ་མ་དུས་གསུམ་རྒྱལ་བ་ཀུན་ཏུ་བཟང་། །རིགས་ལྔའི་སངས་རྒྱས་དགོངས་སུ་གསོལ། །བདག་ཅག་ཁྱེད་ཀྱི་རྗེས་སུ་འཇུག །དཀོན་མཆོག་གསུམ་ལ་སྐྱབས་འགྲོ་དང་། །སོ་ཐར་བྱང་སེམས་དམ་ཚིག་རྣམས། །ཐར་པའི་གྲོང་དུ་འཇུག་བྱའི་ཕྱིར། །མགོན་པོས་བདག་ལ་གནང་དུ་གསོལ། །ཞེས་པ་གསུམ་གྱིས་གསོལ་བ་བཏབ་པས། བླ་མས། ཨེ་མ་སྣོད་དང་ལྡན་པའི་བུ། །གསང་སྔགས་ཆོ་ག་ཁྱེད་ལ་བསྟན། །འདས་དང་མ་འོངས་ད་ལྟར་གྱི། །སངས་རྒྱས་མ་ལུས་ཐམས་ཅད་ཀྱང་། །གསང་སྔགས་ཆོ་ག་འདི་མཁྱེན་པས། །(༡༠༨)ཀུན་ཀྱང་སངས་རྒྱས་འཐོབ་པ་ཡིན། །ཀུན་བཟང་རྒྱལ་བ་རིགས་ལྔ་ཡིས། །བདུད་ཀྱི་དཔུང་ཡང་འདི་ཡིས་བཅོམ། །དེ་ལྟར་ཁྱོད་ཀྱིས་ཐོབ་བྱའི་ཕྱིར། །འདི་ཡི་རྗེས་སུ་ཀུན་ཞུགས་མཛོད། །ཅེས་གནང་བ་བྱིན་ནས། ཐལ་མོ་སྦྱར་ཏེ་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་། །བླ་མ་ཡི་དམ་མཁའ་འགྲོའི་ཚོགས་རྣམས་དགོངས། །རྐང་གཉིས་གཙོ་བོ་ཕྱོགས་བཅུའི་སངས་རྒྱས་དང་། །ཞི་བ་ཆགས་བྲལ་དམ་པའི་ཆོས་རྣམས་དང་། །ཚོགས་མཆོག་འཕགས་པའི་དགེ་འདུན་ཐམས་ཅད་ལ། །བདག་ནི་གུས་པས་སྐྱབས་སུ་ཉེ་བར་མཆི། །ཞེས་པ་གསུམ་དང་ཡང་། ཀུན་བཟང་རིགས་ལྔའི་ལྷ་ཚོགས་ལ། །འདི་བཟུང་བླ་མེད་བྱང་ཆུབ་བར། །གུས་པ་ཡིས་ནི་སྐྱབས་སུ་མཆི། །ཞེས་པ་གསུམ་དང་ཡང་། དཔའ་བོ་དཔའ་མོ་ཆོས་སྐྱོང་བཅས། །བྱང་ཆུབ་སེམས་དཔའ་སློབ་དཔོན་ལ། །བདག་ནི་གུས་པས་སྐྱབས་སུ་མཆི། །ཞེས་པ་གསུམ་དང་ཡང་། བླ་མ་ཀུན་བཟང་སྤྱན་སྔ་རུ། །ལུས་ངག་ཡིད་ཀྱིས་གཞན་རྣམས་ལ། །གནོད་པ་ལས་ལྡོག་དགེ་བ་སྒྲུབ། །དགེ་ཚུལ་དགེ་སློང་བྱང་ཆུབ་སེམས། །སོ་སོར་ཐར་པའི་སྡོམ་པ་ལ། །བདག་ནི་རྒྱུན་དུ་གནས་ཤིང་བསྲུང་། །ཞེས་པ་གསུམ་དང་ཡང་། ཧོ་བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །འགྲོ་དྲུག་སེམས་ཅན་ཐམས་ཅད་ལ། །མ་དང་བུ་ཡི་འདུ་ཤེས་ཀྱིས། །མ་བསྒྲལ་བ་རྣམས་བསྒྲལ་བ་དང་། །མ་གྲོལ་དགྲོལ་དང་དབུགས་དབྱུང་ཕྱིར། །སྨོན་པའི་བྱང་ཆུབ་སེམས་བསྐྱེད་དོ། །ཞེས་པ་གསུམ་དང་ཡང་། སྔོན་གྱི་རྒྱལ་བ་ཐམས་ཅད་ཀྱང་། །སྡོམ་པ་ལ་ནི་གནས་པ་ལྟར། །འདི་བཟུང་འཁོར་བ་མ་སྟོངས་པར། །བླ་མེད་འཇུག་པའི་བྱང་ཆུབ་སེམས། །བདག་ཅག་རྣམས་ཀྱིས་བསྐྱེད་པར་བགྱི། །ཕ་རོལ་ཕྱིན་དྲུག་སློབ་ཅིང་བསྒྲུབ། །བརྩོན་འགྲུས་དག་གིས་ཐམས་ཅད་བསྒྲལ། །ཀུན་དོན་ཚུལ་ཁྲིམས་རྟག་ཏུ་བསྲུང་། །བདག་གིས་སེམས་བསྐྱེད་སྡོམ་བཟུང་ནས། །མ་གྲོལ་དགྲོལ་དང་མ་བསྒྲལ་བསྒྲལ། །དབུགས་དབྱུང་མྱ་ངན་འདས་ལ་འགོད། །ཅེས་པ་གསུམ་དང་ཡང་། འདི་བཟུང་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་མི་གཏོང་ངོ་། །རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་དང་། །བྱང་ཆུབ་སེམས་ནི་སྤང་མི་བྱ། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམས་བཞི་རྟག་ཏུ་གཏོང་། །པདྨ་རིགས་ཀྱི་དམ་ཚིག་(༡༠༩)ཏུ། །ཐེག་པ་གསུམ་གྱི་ཆོས་རྣམས་བཤད། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །ཞེས་སྡོམ་པ་བྱིན་ནས་ཡང་། ཡར་མཆོད་གུས་ཤིང་མར་ལ་བརྩེ། །རྩ་བ་ཡན་ལག་དམ་ཚིག་བསྲུང་། །རྩ་བ་བཞི་ལས་འདའ་མི་བྱ། །ཞེས་བརྗོད་ནས་སློབ་མ་རྡོ་རྗེ་སེམས་དཔར་གསལ་བའི་གནས་གསུམ་དུ་དྲིའི་ཐིག་ལེ་བྱས་ལ། ཨོཾ་བཛྲ་པྲ་ཝེ་ཤ་ཧོ། ཞེས་དྲིལ་བུའི་སྒྲ་རེས་འཇོག་གིས་བླ་མ་ཡི་དམ་ཆར་བཞིན་དུ་བབས་པས་སྤྱི་བོ་ནས་མར་ཐིམ་པར་བསམ་ཞིང་། ཨོཾ་ཧཱུྃ་ཏྲཱཾ་ཧྲཱིཿཨཱཿཛཿཧཱུྃ་བྃ་ཧོཿས་རིགས་ལྔའི་ལྷས་དབང་བསྐུར་བར་བསམ་ཞིང་བདུད་རྩི་ལྕེ་ཐོག་ཏུ་བཞག་གོ། །

དེ་ནས་ཆོས་བཤད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་གང་བྱས་པ། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །འཇིག་རྟེན་ཐམས་ཅད་མཁྱེན་པ་ཡི། །གོ་འཕང་བླ་ན་མེད་པར་འགྱུར། །གང་ཞིག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །དེ་ཕྱིར་ཁྱེད་རྣམས་ཐེག་ཆེན་དུ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ནི། །རང་བྱུང་སྐལ་བ་ཆེན་པོ་པ། །འཇིག་རྟེན་དག་ནི་མཁྱེན་པ་ཡི། །གོ་འཕང་བླ་མེད་ཐོབ་པར་འགྱུར། །ཞེས་བརྗོད་ནས། ཡང་བླ་མས། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དྭངས་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང་། །དེ་བཞིན་དེ་ཉིད་ངེས་པར་འབྱུང་། །བདེན་པ་དེ་ནི་དཀྱིལ་འཁོར་འདིར། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་དྲི་མེད་མཐོང་བར་ཤོག །ཅེས་ལན་གསུམ་གྱིས་བདེན་པའི་སྟོབས་བརྗོད་ནས་གདོང་གཡོགས་བཅིངས་ཏེ་ཕྱི་སྒོ་བཅད་པའི་དྲུང་ནས་གསོལ་བ་གདབ་པ་ནི། ཀྱེ་ཀྱེ་ཁྲོ་བོ་མི་བཟད་འཇིགས་པའི་གཟུགས། །མཚོན་ཆ་སྣ་ཚོགས་(༡༡༠)ཕྱག་ན་བསྣམས། །བདག་ཅག་འཁོར་བ་ལས་བསྒྲལ་ཕྱིར། །ཁྱོད་ཀྱིས་གནང་སྟེ་བཏང་དུ་གསོལ། །ཞེས་པ་གསུམ་གྱིས་ཞུས་པས། ནང་ནས་བླ་མས། ཁྱེད་སུ་ཡིན་ཅི་བྱེད་ཅེས་དྲིས་པའི་ལན་དུ། བདག་ནི་སྐལ་ལྡན་རིགས་ཀྱི་བུ་ལགས། དཔལ་རིགས་ཀྱི་བདག་པོ་ལ་དབང་ཞུ། ཞེས་ལན་བཏབ་ནས།

བགེགས་བསྐྲད་དེ་མཎྜལ་ཕུལ་ལ་གསོལ་བ་གདབ་པ་ནི། ཀྱེ་རིགས་ལྔའི་བདེ་བར་གཤེགས་པ་དང་། །བླ་མ་ཡི་དམ་ཌཱ་ཀི་དགོངས། །སྒོ་བ་ཆེན་པོ་ཁྱེད་རྣམས་ཀྱིས། །སྒོ་ཕྱེ་ཐར་པའི་གྲོང་བསྟན་འཚལ། །ཞེས་གསུམ་བརྗོད་པས་ནང་དུ་ཕྱིན་པར་བསམས་ལ། ཐལ་མོ་སྦྱར་ཏེ། ཀྱེ་བླ་མ་རྡོ་རྗེ་འཛིན་པ་དང་། །དཀྱིལ་འཁོར་ལྷ་ཚོགས་སྤངས་ན་ནི། །སྐྱོབ་པ་གཞན་ན་མི་མངའ་བས། །ཁྱེད་ཀྱི་ཐུགས་རྗེས་བདག་ལ་སྩོལ། །ཞེས་བརྗོད་པ་དང་། བླ་མས། ཨེ་མ་ཁྱོད་ནི་སྣོད་མཆོག་དམ་པ་སྟེ། །ཁྱོད་འདོད་པ་ནི་བདག་གིས་སྦྱིན། །ཞེས་པ་དང་། སློབ་མས། བདག་ནི་འབྲས་བུ་གསང་སྔགས་ཀྱི། །དངོས་གྲུབ་བདུད་རྩིའི་ཆུ་རྒྱུན་གྱིས། །སྨིན་ཅིང་གྲོལ་བར་འདོད་པས་ན། །ཐུགས་རྗེས་བདག་ལ་གནང་བར་མཛོད། །ཅེས་པ་གསུམ་བརྗོད་དུས། བླ་མས། ཨེ་མ་ཨེ་མ་རིགས་ཀྱི་བུ། །ཁྱེད་ནི་ལས་ཟད་འཁྲུལ་པ་ཞིག །རིགས་ཀྱི་བུ་མཆོག་ཁྱེད་ཡིན་པས། །ངས་ཁྱོད་ཀུན་བཟང་རིགས་ལྔ་ཡི། །དཀྱིལ་འཁོར་འཇུག་ཅིང་ཡེ་ཤེས་དབབ། །དངོས་གྲུབ་ཐམས་ཅད་ཁྱོད་ཀྱིས་འཐོབ། །དངོས་གྲུབ་དཀྱིལ་འཁོར་འདི་དག་ནི། །མ་མཐོང་བ་ལ་སྨྲས་པ་ན། །དམ་ཚིག་ཉམས་ཏེ་དམྱལ་བར་ལྟུང་། །བསྲུངས་ན་དངོས་གྲུབ་ཁྱེད་ཀྱིས་ཐོབ། །དམ་ཚིག་བདུད་རྩིའི་ཆུ་འདི་འཐུངས། །ཨོཾ་ཨ་མྲྀ་ཏ་དམ་ལས་མ་འདའ་སྭཱ་ཧཱ། འོ་ཁྱོད་ཀྱི་སྟོན་པ་རིགས་ལྔའི་སངས་རྒྱས་ང་ཡིན་པས། ངས་བསྒོ་བ་ལས་མ་འདའ་ཞིག །འདས་ན་མྱུར་དུ་རྡོ་རྗེ་དམྱལ་བར་སྐྱེས་ནས་ཐོན་པའི་དུས་མེད་དོ། །ཞེས་དམ་ཚིག་བསྒྲག་གོ། །ཡེ་ཤེས་པ་དབབ་པ་ནི། སྙིང་ནང་དུ་གཡུང་དྲུང་དམར་པོའི་ནང་དུ་ཟླ་བའི་སྟེང་དུ་ཡཾ། ཡན་ལག་བཞི་ལ། ཧ་རི་ནི་ས་བཞི་པསམས་ལ། ཡཾ་ལས་རླུང་བྱུང་བས་གཡུང་དྲུང་གཡོན་དུ་འཁོར་བར་བསམས་ལ། གུ་གུལ་ནག་པོ། བདུད་རྩི་ལྔ། བྱི་ལའི་བྲུན། ཟླ་མཚན། རའི་ཉ་ཤ་རྣམས་སྦྱར་བ་བསྲེགས་ལ། རོལ་མོའི་སྒྲ་དང་རྩ་སྔགས་བརྗོད་ཅིང་། བླ་མ་དང་དཀྱིལ་འཁོར་གྱི་ལྷ་ཚོགས་རང་ལ་སིབ་སིབ་ཐིམ་པར་བསམ་མོ། །དེ་ནས་སྒོ་བཞིར་རིམ་གྱིས་ཕྱིན་པར་མོས་ལ། ཀྱེ་ཤར་སྒོ་(༡༡༡)སྲུང་བའི་སྒོ་བ་ལྕགས་ཀྱུ་མ། །ཤར་གྱི་སྒོ་འདི་ཕྱེ་ལ་ནི། །བདག་ཅག་ཡི་དམ་ལྷ་དང་སྤྲོད། །ཀྱེ་ལྷོ་སྒོ་སྲུང་བའི་སྒོ་བ་ཞགས་པ་མ། །ལྷོ་ཡི་སྒོ་འདི་ཕྱེ་ལ་ནི། །བདག་ཅག་ཡི་དམ་ལྷ་དང་སྤྲོད། །ཀྱེ་ནུབ་སྒོ་སྲུང་བའི་སྒོ་བ་ལྕགས་སྒྲོག་མ། །ནུབ་ཀྱི་སྒོ་འདི་ཕྱེ་ལ་ནི། །བདག་ཅག་ཡི་དམ་ལྷ་དང་སྤྲོད། །ཀྱེ་བྱང་སྒོ་སྲུང་བའི་སྒོ་བ་དྲིལ་བུ་མ། །བྱང་གི་སྒོ་འདི་ཕྱེ་ལ་ནི། །བདག་ཅག་ཡི་དམ་ལྷ་དང་སྤྲོད། །ཅེས་བརྗོད་ནས་མེ་ཏོག་ཐོགས་ལ། ཀྱེ་བདེ་གཤེགས་རིགས་ལྔའི་ཕོ་བྲང་དུ། །འབྲེལ་བའི་མེ་ཏོག་འདི་དོར་བས། །སྔོན་ནས་འབྲེལ་པ་གང་ཡོད་པའི། །ཡི་དམ་ལྷ་དང་བདག་འཕྲད་ཤོག །ཨོཾ་བཛྲ་པུཥྤེ་སིདྡྷི་སྟྭཾ། ཞེས་མེ་ཏོག་དོར་ནས། བླ་མས། སྟོན་པ་རིགས་ལྔའི་སངས་རྒྱས་ཀྱིས། །ཁྱོད་ཀྱི་མ་རིག་འཁོར་བའི་མིག །ཡེ་ཤེས་སྤྱན་དུ་དབྱེ་བར་བྱ། །དེ་བཞིན་ཁྱོད་ཀྱིས་འགྲོ་བ་རྣམས། །ཡེ་ཤེས་སྤྱན་དུ་འབྱེད་པར་ཤོག །ཨོཾ་ཙཀྵུ་སྭཱ་ཧཱ། ཞེས་པས་གདོང་གཡོགས་བཀྲོལ་ལོ། །ཡང་། ཀྱེ་མ་རིགས་ཀྱི་བུ་རྣམས་ཀུན། །ཁྱེད་རྣམས་སྡིག་པ་ཀུན་ལས་གྲོལ། །དཀྱིལ་འཁོར་ཆེན་པོ་འདི་ལ་ལྟོས། །ལུས་ངག་ཡིད་ཀྱིས་དད་པ་བསྐྱེད། །སྔགས་དང་ཕྱག་རྒྱས་བྱིན་གྱིས་བརླབས། །དངོས་གྲུབ་ཐམས་ཅད་ཁྱོད་ཀྱིས་འཐོབ། །དམ་ཚིག་སྔགས་ལ་བརྩོན་པར་གྱིས། །ཞེས་པས་དཀྱིལ་འཁོར་བསྟན་ཏེ།

བུམ་དབང་གི་དོན་དུ། མཎྜལ་ཕུལ་ནས་གསོལ་བ་གདབ་པ་ནི། ཀུན་བཟང་ཡབ་ཡུམ་ཡེ་ཤེས་དབང་། །བདག་ཅག་རྣམས་ལ་བསྐུར་དུ་གསོལ། །ཞེས་པ་གསུམ་བརྗོད་ནས། ཤར་སྒོ་སེང་གེའི་ཁྲི་ལ་འདུག་པར་གྱུར་པ་ལ། མེ་ཏོག་གང་ལ་ཕོག་པ་འདི། །སྔོན་ནས་ཁྱོད་ཀྱི་ཡི་དམ་ལྷ། །རྟག་ཏུ་བསྒོམ་དང་བསྒྲུབ་པར་གྱིས། །ཨོཾ་བཛྲ་པུཥྤེ་སིདྡྷི་སྟྭཾ། ཞེས་པས་མེ་ཏོག་བླངས་ཏེ་གང་ལ་ཕོག་པའི་ལྷར་བསྒོམ་ནས། ཡང་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་ཡབ་ཡུམ་དུ་བསམ་པའི་སྤྱི་བོར་ཨཱོཾ་དཀར་པོ་ལས་འོད་འཕྲོས། ཕྱོགས་བཅུའི་བླ་མ་དང་དཀྱིལ་འཁོར་གྱི་ལྷའི་དངོས་གྲུབ་ཐོབ་པར་བསམ་ཞིང་། བླ་མས་རྣམ་རྒྱལ་བུམ་པ་བཟུང་བར་བསམ་ལ། ཧཱུྃ་གཟུགས་ཀྱི་ཕུང་པོ་རྣམ་དག་ཅིང་། །ཉོན་མོངས་ཞེ་སྡང་སྦྱོང་བྱེད་པའི། །མེ་ལོང་ལྟ་བུའི་ཡེ་ཤེས་ཀྱིས། །དཔལ་ལྡན་སྐུ་ཡི་དབང་བསྐུར་རོ། །ཨོཾ་བཛྲ་ཨ་བྷི་ཥིཉྩ་ཧཱུྃ། རིགས་ཀྱི་བུ་ཁྱོད་ཀྱིས་ཆུ་འདི་འཐུངས་ཤིང་བཀྲུས་པ་ཙམ་གྱིས་ལུས་ཀྱི་སྒྲིབ་པ་ཐམས་ཅད་དག་ནས་འདི་ཉིད་དུ་སངས་རྒྱས་ཐམས་ཅད་ཀྱི་སྐུའི་དབང་ཐོབ་པ་ཡིན་ནོ། །ཁྱོད་ཀྱི་གཟུགས་ཀྱི་ཕུང་པོ་འདི་(༡༡༢)རྡོ་རྗེ་སེམས་དཔའ་ཉིད་དུ་སངས་རྒྱས་ཏེ། ཆུ་ཡི་ཁམས་མཱ་མ་ཀཱིའི་རང་བཞིན་དུ་གནས་འགྱུར། ཞེ་སྡང་མེ་ལོང་ལྟ་བུའི་ཡེ་ཤེས་སུ་གྲོལ་ཏེ། སངས་རྒྱས་རྡོ་རྗེ་རིགས་ཀྱི་སྐུ་འགྱུར་བ་མེད་པ་ཐོབ་ནས་འགྲོ་བ་ཐམས་ཅད་ཀྱི་དོན་བྱེད་པར་གྱུར་ཅིག །ཅེས་བརྗོད་དོ། །

གསུང་གི་དབང་ནི། སློབ་མ་སྣང་བ་མཐའ་ཡས་དམར་པོ་བསམ་པའི་མགྲིན་པར་ཨཱཿལས་སྔ་མ་བཞིན་བསམ་ཞིང་། བླ་མས་རྡོ་རྗེ་བཟུང་ནས། ཧཱུྃ་འདུ་ཤེས་ཕུང་པོ་རྣམ་དག་ཅིང་། །ཉོན་མོངས་འདོད་ཆགས་སྦྱོང་བྱེད་པའི། །སོ་སོར་རྟོགས་པའི་ཡེ་ཤེས་ཀྱིས། །དཔལ་ལྡན་གསུང་གི་དབང་བསྐུར་རོ། །ཨོཾ་པདྨ་ཨ་བྷི་ཥིཉྩ་ཧྲཱིཿ འོ་རིགས་ཀྱི་བུ་ཁྱོད་ཀྱི་ལག་ཏུ་རྡོ་རྗེ་འདི་གཏད་པ་ཙམ་གྱིས་ངག་གི་སྒྲིབ་པ་དག་ནས་སངས་རྒྱས་ཐམས་ཅད་ཀྱི་གསུང་གི་དབང་ཐོབ་པ་ཡིན་ནོ། །འདུ་ཤེས་ཀྱི་ཕུང་པོ་སྣང་བ་མཐའ་ཡས་ཉིད་དུ་སངས་རྒྱས་ཏེ། མེའི་ཁམས་ཀྱང་གོས་དཀར་མོའི་རང་བཞིན་ཉིད་དུ་དག་ནས། འདོད་ཆགས་སོ་སོར་རྟོགས་པའི་ཡེ་ཤེས་སུ་གྲོལ་ཏེ། སངས་རྒྱས་པདྨ་རིགས་ཀྱི་གསུང་འགགས་པ་མེད་པའི་ཆོས་ཀྱི་སྒྲ་དབྱངས་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །

ཐུགས་ཀྱི་དབང་ནི། སློབ་མ་རྣམ་སྣང་མཐིང་གའི་ཐུགས་ཀར་ཧཱུྃ་གིས་མཚན་པ་ལས་སྔ་མ་བཞིན་དམིགས་ཏེ་བླ་མས། ཧཱུྃ་རྣམ་ཤེས་ཕུང་པོ་རྣམ་དག་ཅིང་། །ཉོན་མོངས་གཏི་མུག་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་ཐུགས་ཀྱི་དབང་བསྐུར་རོ། །ཨོཾ་བྷུདྡྷ་ཨ་བྷི་ཥིཉྩ་ཨཱ། འོ་རིགས་ཀྱི་བུ་ཁྱོད་ལ་པདྨ་ལས་འབྲེལ་རྩལ་ཞེས་མིང་བཏགས་པ་ཙམ་གྱིས། འདིར་ཡིད་ཀྱི་སྒྲིབ་པ་དག་ནས་སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ་པ་ཡིན་ནོ། །རྣམ་པར་ཤེས་པའི་ཕུང་པོ་ཡང་རྣམ་པར་སྣང་མཛད་ཉིད་དུ་སངས་རྒྱས་ཏེ། ནམ་མཁའི་ཁམས་ཀྱང་ཆོས་ཀྱི་དབྱིངས་ཀྱི་དབང་ཕྱུག་མར་དག་ནས། གཏི་མུག་ཆོས་ཀྱི་དབྱིངས་ཀྱི་ཡེ་ཤེས་སུ་གྲོལ་ཏེ། སངས་རྒྱས་དེ་བཞིན་གཤེགས་པའི་རིགས་ཀྱི་ཐུགས་འཁྲུལ་པ་མེད་པ་ཆོས་ཀྱི་སྐུ་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །

ཡོན་ཏན་གྱི་དབང་ནི། སློབ་མ་རིན་ཆེན་འབྱུང་ལྡན་དུ་བསམ་པའི་ལྟེ་བར་ཏྲཱྃ་ལས་འོད་འཕྲོས་ཕྱོགས་བཅུའི་བླ་མ་དང་དཀྱིལ་འཁོར་གྱི་ལྷའི་དངོས་གྲུབ་ཐོབ་པར་བསམ་ལ། དབུ་རྒྱན་བསྐོན་པར་བསམ་ཞིང་། ཧཱུྃ་ཚོར་བའི་ཕུང་པོ་རྣམ་དག་ཅིང་། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱིས། །དཔལ་ལྡན་ཡོན་ཏན་དབང་བསྐུར་རོ། །ཨོཾ་(༡༡༣)རཏྣ་ཨ་བྷི་ཥིཉྩ་ཏྲཱྃ། འོ་རིགས་ཀྱི་བུ་ཁྱོད་ལ་དབུ་རྒྱན་འདི་བསྐོན་པ་ཙམ་གྱིས་འདིར་ལུས་ངག་ཡིད་གསུམ་གྱི་སྒྲིབ་པ་དག་ནས་སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ་པ་ཡིན་ནོ། །ཚོར་བའི་ཕུང་པོ་རིན་ཆེན་འབྱུང་ལྡན་དུ་སངས་རྒྱས་ཏེ། སའི་ཁམས་ཀྱང་སངས་རྒྱས་སྤྱན་དུ་དག་ནས་ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ། སངས་རྒྱས་རིན་ཆེན་རིགས་ཀྱི་ཡོན་ཏན་ཐམས་ཅད་མཁྱེན་པ་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །

ཕྲིན་ལས་ཀྱི་དབང་ནི། སློབ་མ་དོན་གྲུབ་ཏུ་དམིགས་པའི་གསང་བར་ཨཱཿལས་འོད་འཕྲོས་ཕྱོགས་བཅུའི་བླ་མ་དང་དཀྱིལ་འཁོར་གྱི་ལྷའི་དངོས་གྲུབ་ཐོབ་པར་བསམ་ཞིང་། བླ་མས་དྲིལ་བུ་བཟུང་སྟེ། ཧཱུྃ་འདུ་བྱེད་ཕུང་པོ་རྣམ་དག་ཅིང་། །ཉོན་མོངས་ཕྲག་དོག་སྦྱོང་བྱེད་པའི། །བྱ་བ་གྲུབ་པའི་ཡེ་ཤེས་ཀྱིས། །དཔལ་ལྡན་ཕྲིན་ལས་དབང་བསྐུར་རོ། །ཨོཾ་ཀརྨ་ཨ་བྷི་ཥིཉྩ་ཨཱཿ འོ་རིགས་ཀྱི་བུ་ཁྱོད་ལ་དྲིལ་བུ་འདི་གཏད་པ་ཙམ་གྱིས་འདིར་ལུས་ངག་ཡིད་གསུམ་གྱི་སྒྲིབ་པ་མ་ལུས་པ་དག་ནས། སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ་པ་ཡིན་ནོ། །འདུ་བྱེད་ཀྱི་ཕུང་པོ་ཡང་དོན་ཡོད་གྲུབ་པར་སངས་རྒྱས་ཏེ། རླུང་གི་ཁམས་དམ་ཚིག་སྒྲོལ་མར་དག་ནས། ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ། སངས་རྒྱས་དོན་ཡོད་གྲུབ་པའི་ཕྲིན་ལས་ཐོགས་པ་མེད་པ་གྲུབ་ནས་འགྲོ་བའི་དོན་བྱེད་པར་འགྱུར་རོ། །ཞེས་བརྗོད་དོ། །

ཀུན་ཏུ་བཟང་པོའི་དབང་ནི། སློབ་མ་ཀུན་ཏུ་བཟང་པོ་མཐིང་ག་རྡོ་རྗེ་དང་དྲིལ་བུ་འཛིན་པར་བསམ་ལ། བླ་མས་རྡོ་རྗེ་དྲིལ་བུ་བཟུང་སྟེ། ཨོཾ་ཨཱཿཧཱུྃ། ཐབས་དང་ཤེས་རབ་དབྱེར་མེད་ཅིང་། །སྣང་སྟོང་དབྱེར་མེད་འདི་ཟུང་ལ། །སྟོང་ཉིད་སྙིང་རྗེའི་སྙིང་པོ་ཡི། །ཀུན་བཟང་རྡོ་རྗེ་འཛིན་ཁྱོད་ཀྱིས། །འགྲོ་ཀུན་རྗེས་སུ་བཟུང་བར་གྱིས། །འོ་རིགས་ཀྱི་བུ་ཁྱོད་ལ་རྡོ་རྗེ་དང་དྲིལ་བུ་འདི་གཏད་པ་ཙམ་གྱིས། ཐམས་ཅད་མཁྱེན་པའི་ས་བོན་ཐེབས་ནས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རང་བཞིན་ཀུན་ཏུ་བཟང་པོ་རིག་པའི་རྩལ་དབང་ཐོབ་པ་ཡིན་ནོ། །རང་གི་སེམས་སྐྱེ་བ་མེད་པ་ཆོས་ཀྱི་སྐུར་སངས་རྒྱས་ཏེ། འདི་ལྟར་སྣང་བ་ཐམས་ཅད་མ་སྤངས་གནས་སུ་དག་ནས་སྐུ་གསུམ་འདུ་འབྲལ་མེད་པས་འགྲོ་བའི་དོན་དཔག་ཏུ་མེད་པ་འགྲུབ་པར་འགྱུར་རོ། །ཞེས་བརྗོད་དོ། །

ཆུའི་དབང་ནི། བླ་མས་བུམ་པ་རང་གི་སྤྱི་བོར་བཟུང་བར་བསམ་ལ། ཧཱུྃ་རྡོ་རྗེ་སེམས་དཔའ་བཅོམ་ལྡན་འདས། །མཱ་མ་ཀི་ཡི་ཕྱག་(༡༡༤)རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཧཱུྃ་སྣང་བ་མཐའ་ཡས་བཅོམ་ལྡན་འདས། །གོས་དཀར་མོ་ཡི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཧཱུྃ་རྣམ་པར་སྣང་མཛད་བཅོམ་ལྡན་འདས། །ཀུན་ཏུ་བཟང་མོའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཧཱུྃ་རིན་ཆེན་འབྱུང་ལྡན་བཅོམ་ལྡན་འདས། །སངས་རྒྱས་སྤྱན་མའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཧཱུྃ་དོན་ཡོད་གྲུབ་པ་བཅོམ་ལྡན་འདས། །དམ་ཚིག་སྒྲོལ་མའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཨོཾ་ཨཱཿཧཱུྃ་གུ་རུ་དྷེ་ཝ་དྷཱ་ཀྐི་ནི་སིདྡྷི་ཕ་ལ་ཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿཧ་རི་ནི་ས་ཨ་བྷི་ཥིཉྩ་བྷྲཱུྃ་སིདྡྷི་ཕ་ལ་ཧཱུྃ་ཨཱཿ འོ་རིགས་ཀྱི་བུ་ཁྱོད་ལ་དབང་ཐམས་ཅད་བརྟན་པར་བྱེད་པ་བུམ་པའི་དབང་འདི་བསྐུར་བ་ཙམ་གྱིས། སྣོད་བཅུད་ལྷ་དང་གཞལ་ཡས་ཁང་གི་རང་བཞིན་ཕུང་པོ་ཁམས་དང་སྐྱེ་མཆེད་ཐམས་ཅད་ལྷ་དང་ལྷ་མོར་གྱུར་པ་ཡིན་པས། ཕྱི་ནང་སྣོད་བཅུད་ཐམས་ཅད་ལ་བརྙས་པ་བྱས་ན་ལྟུང་བར་འགྱུར་བས་དག་སྣང་དང་མོས་གུས་གྱིས་ལ་མཆོད་པ་དང་བསྟོད་པ་ལ་དགའ་བས་ལྷའི་རང་བཞིན་དུ་ངོ་ཤེས་པར་གྱིས་ཤིག །ཅེས་བརྗོད་ལ་བུམ་ཆུ་ཅུང་ཟད་འཐུངས་པ་དང་ཁྲུས་བྱའོ། །

དེ་ནས་བརྡའི་དབང་ནི། བླ་མས་འོ་རིགས་ཀྱི་བུ་ཁྱོད་ལ་རིགས་ལྔའི་སྐུ་བསྟན་པ་ཙམ་གྱིས་ཡེ་ཤེས་ལྔའི་ངོ་བོར་སངས་རྒྱས་པ་ཡིན་གྱིས། རིགས་ལྔའི་སྐུ་གསུང་ཐུགས་ཡོན་ཏན་ཕྲིན་ལས་ལྷུན་གྱིས་གྲུབ་པའི་དགོངས་པ་རྟོགས་ནས་སེམས་ཅན་གྱི་དོན་རླབས་པོ་ཆེ་བྱེད་པར་འགྱུར་རོ། །ཞེས་བརྡ་བསྟན་པར་བྱའོ། །

དོན་གྱི་དབང་ནི། བླ་མས། འོ་རིགས་ཀྱི་བུ་དུས་གསུམ་གྱི་སངས་རྒྱས་དང་སེམས་ཅན་གཉིས་ཀྱང་རང་གི་རིག་པའི་དོན་ལས་ལོགས་ན་མ་གྲུབ་པས། ལུས་སེམས་གཉིས་ཀྱི་འབྱུང་བ་དང་། ཁམས་དང་སྐྱེ་མཆེད་ཐམས་ཅད་ཀྱང་སངས་རྒྱས་རིགས་ལྔ་ཡབ་ཡུམ་དུ་ལྷུན་གྱིས་གྲུབ་པས་སྐུ་དང་ཡེ་ཤེས་འདུ་འབྲལ་མེད་པའི་དགོངས་པར་ཡིད་ཆེས་པར་གྱིས་ཤིག །ཅེས་ངོ་ཤེས་ཤིང་དྲན་པར་བྱའོ། །

དེ་ནས་དམ་ཚིག་གི་དབང་ནི། བདུད་རྩི་ལྕེ་ལ་བཞག་ནས། བླ་མས། ཨེ་མ་རིགས་ཀྱི་བུ་ཉོན་ཅིག །ཐུན་མོང་སྐྱབས་འགྲོ་ནས་བརྩམས་པའི། །སོ་ཐར་བྱང་(༡༡༥)སེམས་བསླབ་བྱ་དང་། །རིག་འཛིན་སྔགས་ཀྱི་དམ་ཚིག་ཀུན། །བྱང་ཆུབ་མ་ཐོབ་བར་དུ་ནི། །སྲོག་གི་ཕྱིར་ཡང་མ་གཏོང་ཞིག །དམ་ཚིག་ཉམས་ན་བསྐལ་པ་རུ། །ངན་སོང་གསུམ་ནས་ཐར་མི་སྲིད། །དེ་ཕྱིར་སྲུངས་ཤིག་རིགས་ཀྱི་བུ། །ཞེས་བརྗོད་པས་དོན་དྲན་པར་བྱའོ། །དེས་ནི་ལམ་བསྐྱེད་རིམ་བསྒོམ་པ་ལ་དབང་བ་དང་། ལུས་ཀྱི་སྡིག་པ་དག་ནས་སངས་རྒྱས་ཀྱི་སྐུའི་དངོས་གྲུབ་ཐོབ་པར་འགྱུར་རོ། །རྡོ་རྗེ་དྲིལ་བུ་ལ་སོགས་པ་དམ་ཚིག་གི་རྫས་རྣམས་བརྟེན་ཞིང་བྱམས་པ་དང་སྙིང་རྗེས་འགྲོ་བ་ལ་ཕན་པར་བྱའོ། །ཞེས་བླ་མས་གདམས་པར་བསམ་མོ། །

དེ་ནས་གསང་དབང་གི་དོན་དུ། དཀྱིལ་འཁོར་གྱི་ལྷོ་ཕྱོགས་སུ་འདུག་པར་བསམས་ནས་མཎྜལ་ཕུལ་ཏེ། ཡིད་ཀྱིས་བླ་མ་ལ་རིག་མ་ཕུལ་ལ། ཨེ་མ་ཧོ་ལྷ་མོ་བདེ་བ་ཆེ། །བདེ་ཆེན་པདྨ་ཧེ་རུ་ཀ །བདེ་གཤེགས་རྣམས་ཀྱི་བདེ་ཆེན་ཡབ། །བདེ་བའི་དབང་ཕྱུག་བདེ་སྩོལ་མཛོད། །བྱང་ཆུབ་སེམས་ནི་ཡང་དག་དོན། །རྣམ་དག་མཆོག་ནི་ཡང་དག་པའི། །དྲི་མེད་བདུད་རྩི་གང་བ་ཡིས། །བླ་མེད་མཆོག་གི་དབང་བསྐུར་ལྟར། །དེ་བཞིན་རིགས་ཀྱི་བུ་དག་ལ། །འཁོར་བའི་སྡུག་བསྔལ་ཀུན་བསལ་མཛོད། །དྲི་མེད་ཡེ་ཤེས་བདུད་རྩི་ཡིས། །མ་རིག་ཉེས་པའི་དྲི་མ་འཇོམས། །བླ་མེད་བྱང་ཆུབ་བདེ་ཆེན་ཉིད། །དུས་འདིར་བདག་གིས་ཐོབ་མཛོད་ཅིག །ཅེས་ཕུལ་བའི་རྗེས་ལ། གདོང་གཡོགས་བཅིངས་ལ་རྡོ་རྗེ་ཕག་མོར་སྐད་ཅིག་གིས་གསལ་བའི་ལྟེ་བར་ཆོས་འབྱུང་སུམ་བརྩེགས་ཀྱི་དབུས་སུ་ཕག་མོ་ཚོན་གང་བ་གཅིག་བསྒོམས་ཏེ་རོལ་མོའི་སྒྲས་རྩ་སྔགས་ཟློས་ཤིང་ཡེ་ཤེས་ཕབ་ནས། གདོང་གཡོགས་ཕྱེ་ལ་བླ་མས། འབྱུང་བའི་གདངས་ལས་གྲུབ་པ་ཡི། །ལུས་འདི་བདེ་གཤེགས་ཕོ་བྲང་ཉིད། །རིགས་ལྔ་ཡབ་ཡུམ་ལྔ་ཡི་གནས། །ཕུང་ཁམས་སྐྱེ་མཆེད་ལྷ་ཡི་སྐུ། །ཞེས་པས་ལྷར་ངེས་ཤེས་བསྐྱེད་ནས། མེ་ཏོག་ཕོག་པའི་ལྷ་ལུས་ལ་ངོ་སྤྲད་ལ། བདུད་རྩིའི་རིལ་བུ་ལྕེ་ཐོག་ཏུ་བཞག་ནས། དབང་དངོས་བསྐུར་བ། ཀྱེ་མ་ཀྱེ་མ་རིགས་ཀྱི་བུ། །དུས་གསུམ་རྒྱལ་བ་ཀུན་གྱི་ནི། །བྱང་ཆུབ་སྲས་པོ་དམ་པ་ལ། །ཇི་ལྟར་དབང་ནི་བསྐུར་བ་ལྟར། །དེ་བཞིན་གསང་བའི་བྱང་སེམས་ཀྱིས། །ད་ལྟ་ཁྱོད་ལ་དབང་བསྐུར་རོ། །ཨོཾ་གུ་རུ་དྷེ་ཝ་ཌཱ་ཀི་ནི་ཧ་རི་ནི་ས་ར་ཙ་ཧྲི་ཡ་བྷོ་དྷི་ཙིཏྟ་ཨ་མྲི་ཏེ་སརྦ་པཉྩ་ཨ་བྷི་ཥིཉྩ་མཾ། ཞེས་པ་གསུམ་གྱིས་ལུས་ཐམས་ཅད་བདེ་སྟོང་དུ་གསལ་བཏབ་ནས་བླ་མས། ཨེ་མ་སྐལ་ལྡན་རིགས་ཀྱི་བུ། །བདེ་དང་སྟོང་པ་དབྱེར་(༡༡༦)མེད་པ། །དེ་ཉིད་ལྟོས་དང་ངོས་བཟུང་བྲལ། །རང་བཞིན་ལྷན་ཅིག་སྐྱེས་པའི་ངང་། །ཐམས་ཅད་རོ་མཉམ་བདེ་ཆེན་ཉིད། །ཅེས་པ་གསུམ་གྱིས་ངོ་སྤྲད་ལ། རྗེས་སུ། ཀྱེ་མ་རིགས་ཀྱི་བུ་ཁྱོད་ཀྱིས། །གསང་བའི་དམ་ཚིག་གཉན་པོ་འདི། །ཡེ་ཤེས་སྒྲུབ་རྫས་བདུད་རྩི་ལྔ། །དམར་ཆེན་ག་བུར་ཙནྡན་སྦྱར། །རྡོ་རྗེ་ཆུ་ཡིས་ཀུན་ཏུ་བསྲེ། །དུས་གསུམ་རྒྱལ་བ་ཀུན་མཐུན་མཚུངས། །འདི་དང་འདོད་པའི་ཡོན་ཏན་ལྔ། །རྒྱུན་དུ་ཡང་དང་ཡང་དུ་བརྟེན། །འདི་ནི་དམ་ཚིག་བླ་ན་མེད། །མ་ཉམས་སྐལ་ལྡན་ཁྱོད་ཀྱིས་སྲུངས། །ཞེས་བརྗོད་པར་བྱའོ། །

དེ་ནས་ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ་ནས། ནུབ་ཕྱོགས་སུ་འདུག་པར་མོས་ལ་གསོལ་བ་གདབ་པ། ཀྱེ་ཀྱེ་བཅོམ་ལྡན་བདེ་ཆེན་ཆོས་ཀྱི་དབྱིངས། །རྣལ་འབྱོར་རྡོ་རྗེ་མི་ཕྱེད་བདག །ཡང་དག་ཕྱག་རྒྱ་སྒྲུབ་པ་པོ། །རྡོ་རྗེ་རྣལ་འབྱོར་ལས་ནི་བྱུང་། །བདག་ཉིད་ཆེན་པོ་ཀུན་བདག་ཉིད། །མངའ་དབང་བདག་ལའང་དེ་ཉིད་སྩོལ། །ཉོན་མོངས་འཁོར་བའི་འདམ་དུ་ནི། །བྱིང་བ་སྐྱབས་མེད་བདག་ལ་སྐྱོབས། །ཞེས་པ་གསུམ་བརྗོད་ནས་བླ་མས། ཨེ་མ་གསང་བ་ཤེས་རབ་ཡེ་ཤེས་ཀྱི། །དམ་ཚིག་བསྲུང་བྱ་སེམས་ལ་ཆོངས། །བུད་མེད་མི་སྤང་དང་དུ་བླང་། །ཚངས་སྤྱོད་དོན་ལ་གནས་པར་བྱ། །ཡོན་ཏན་ཐམས་ཅད་འདི་ལས་འབྱུང་། །འདི་སྤངས་བདེ་བའི་དངོས་གྲུབ་མེད། །ཉམས་པ་མཁའ་འགྲོའི་ཆད་པ་ཡིས། །ཚེ་འཕོས་དམྱལ་བ་དག་ཏུ་ལྟུང་། །ཞེས་པ་གསུམ་གྱིས་དམ་ཚིག་བྱིན་ནས། སློབ་མས། ཤི་འམ་སྲོག་ལ་བབ་གྱུར་ཏམ། །བྱ་དགའ་ཆེན་པོ་ཉིད་བྱུང་ཡང་། །དམ་ཚིག་བཀའ་ལས་འདའ་མི་བྱེད། །ས་མ་ཡ་ན་ར་ཀན། ཞེས་པ་གསུམ་བརྗོད་ནས། ཡེ་ཤེས་དབབ་པ་ནི། ཐམས་ཅད་རྡོ་རྗེ་ཕག་མོར་བསྒོམས་ལ། བླ་མའི་ཐུགས་ཀ་ནས་རྡོ་རྗེ་ཕག་མོ་ཕྲ་མོ་མང་པོ་བྱུང་བ་སློབ་མའི་སྙིང་ནང་དུ་ཐིམ་པར་བསམ་ཞིང་རོལ་མོ་དཀྲོལ་ནས། གདོང་གཡོགས་ཕྱེ་ལ་བླ་མས། དུས་གསུམ་སངས་རྒྱས་ཐམས་ཅད་ཀྱང་། །བྷ་གའི་དབྱིངས་ནས་རང་བྱུང་སྟེ། །ཆོས་རྣམས་ཀུན་གྱི་འབྱུང་གནས་ཉིད། །བྷ་ག་གསང་སྔགས་ཀུན་གྱི་གནས། །བདེ་ཆེན་ཡེ་ཤེས་འབྱུང་བ་ཡིན། །འདི་ཉིད་མ་བརྟེན་ཐབས་གཞན་མེད། །ཐབས་ཀྱི་རྒྱུད་ཀྱིས་གྲོལ་བ་ཡིན། །བདེ་ཆེན་འདི་བརྟེན་བདེ་བ་ཐོབ། །ཡང་དག་སངས་རྒྱས་འདི་ལས་བྱུང་། །བུད་མེད་ཙམ་ལ་ཁྲོ་བ་སྤངས། །མཚན་ལྡན་ཡུམ་ལ་གུས་པར་གྱིས། །ཞེས་བརྗོད་པས། ཡུམ་གྱིས། ཧཱུྃ་ང་ཡི་(༡༡༧)བྷ་ག་གསང་ཆེན་འདི། །གང་ཞིག་མོས་པས་སུས་བརྟེན་པ། །ཡོན་ཏན་དངོས་གྲུབ་ཐམས་ཅད་འབྱུང་། །བདེ་སྟོང་མཆོག་གི་དངོས་གྲུབ་ཐོབ། །ཨོཾ་གུ་རུ་དྷེ་ཝ་ཌཱ་ཀི་ནི་ཧ་རི་ནི་ས་ར་ཙ་ཧྲཾ་ཡ་ཨཉྫ་ལི་ཧོཿཞེས་བརྗོད་པར་བསམས་ནས། བླ་མས་སློབ་མ་ལ་གཏད་པ། ཧཱུྃ་ཡེ་ཤེས་ལྷ་མོ་བདེ་བའི་སྐུ། །ཀུན་ཏུ་བདེ་བའི་གནས་སྦྱིན་མ། །དགའ་བས་གཟུགས་མཛེས་ཡིད་འོང་མ། །འདི་ཁྱེར་དཔའ་བོ་སེམས་དཔའ་ཆེ། །རྟག་ཏུ་གུས་པས་མཆོད་པར་གྱིས། །ཨོཾ་མཧཱ་སུ་ཁ་ཧོཿཞེས་བརྗོད་ནས། སྙོམས་པར་ཞུགས་པར་བསམས་ཏེ་བླ་མས། ཨེ་མ་སྐལ་ལྡན་རིགས་ཀྱི་བུ། །བདེ་སྟོང་གཉིས་མེད་དོན་དེ་ལ། །དེར་འཛིན་མ་བྱེད་ངོ་ལ་ལྟོས། །གཉིས་ཤོར་གཉིས་མཉམ་དུས་འདི་རུ། །ལྷན་ཅིག་སྐྱེས་པའི་ཡེ་ཤེས་འཆར། །དེ་ནི་ངོ་ཡིས་ཟིན་པར་མཛོད། །ཅེས་བརྗོད་ནས་ཡང་། ཨེ་མ་སྐལ་ལྡན་རིགས་ཀྱི་བུ། །དེས་ནི་དག་བྱ་གང་དག་ན། །ཉོན་མོངས་ཡིད་ཀྱི་སྒྲིབ་པ་དག །ལས་ཀྱི་ཕྱག་རྒྱ་བརྟེན་པར་དབང་། །སྐལ་བ་ས་བཅུ་དག་དང་མཉམ། །ཕྲིན་ལས་དབང་གི་ལས་རྣམས་འགྲུབ། །འབྲས་བུ་སྐྱེ་མེད་ཆོས་སྐུ་ཐོབ། །ཅེས་བརྗོད་དོ། །

དེ་ནས་ཚིག་དབང་རིན་པོ་ཆེའི་དོན་དུ་བྱང་ནས་མཎྜལ་ཕུལ་བར་བསམ་ལ་གསོལ་བ་གདབ་པ་ནི། ཀྱེ་ཀྱེ་དུས་གསུམ་བླ་མ་རྗེ། །ཡང་དག་ཡེ་ཤེས་ངོ་བོ་ཉིད། །རིག་པའི་ངོ་བོ་ཡེ་ཤེས་ལ། །བདག་ཉིད་ངེས་པའི་ཤེས་པ་སྐྱེ། །གཉིས་མེད་ཡེ་ཤེས་མཆོག་དེ་ཉིད། །འགྲོ་གཞན་དག་ལ་ཡོད་པ་མིན། །དམ་ཆོས་བདུད་རྩིའི་མཆོག་འདི་ཉིད། །འཐུང་ཕྱིར་བདག་གི་བླ་མ་ལ། །གུས་པའི་ཡིད་ཀྱིས་གསོལ་བ་འདེབས། །གལ་ཏེ་དོན་ཐལ་བདག་གིས་འཚལ། །རྣམ་པ་ཀུན་ཏུ་མཆོག་གྱུར་པའི། །བཞི་པའི་དབང་བསྐུར་བདག་ལ་སྩོལ། །ཞེས་པ་གསུམ་བརྗོད་པ་དང་། བླ་མས། ཨོཾ་ཨཱཿཧཱུྃ་ཧྲཱིཿམ། བསྲུང་དུ་མེད་པའི་དམ་ཚིག་ནི། །ཐམས་ཅད་རོ་སྙོམས་ཆོས་ཉིད་ངང་། །འཁོར་འདས་སྤང་བླང་བྲལ་བ་ཡི། །གང་ཤར་ཆོས་ཉིད་རོལ་པ་ལ། །མ་རིག་འཛིན་པས་མ་བསླད་སྲུངས། །འདས་ན་འཁོར་ལྡོག་ན་ར་ཀན། །ཞེས་བརྗོད་ནས། སློབ་མའི་སྨིན་ཕྲག་ཏུ་གཡུང་དྲུང་དམར་པོ་འཁོར་བ་ལ་དམིགས་ཤིང་། བླ་མ་ཡི་དམ་སྤྲིན་ཕུང་གཏིབས་པ་ཙམ་ཐིམ་པར་བསམས་ནས། དར་ཅིག་མཉམ་པར་གཞག་གོ། །དེ་ནས་ནམ་མཁའི་ཕྱོགས་བཞིར་སློབ་མས་རིམ་པར་བལྟ་ཞིང་བླ་མས། ཨེ་མ་ཨེ་མ་རིགས་ཀྱི་བུ། །མིག་རྩེ་ནམ་མཁའི་ཤར་དུ་ལྟོས། །(༡༡༨)ཤར་གྱི་བར་སྣང་དག་ལ་ནི། །ཐོགས་པ་མེད་པར་འགྲོ་བར་སྒོམས། །ཀྱེ་མ་ཀྱེ་མ་རིགས་ཀྱི་བུ། །མིག་རྩེ་ནམ་མཁའི་ལྷོ་དང་ནུབ། །བྱང་དུ་བལྟས་ཏེ་འགྲོ་བར་སྒོམས། །འགྲོ་བར་བསམས་ན་འགྲོ་མཁན་མེད། །གང་དུ་འགྲོ་བསམ་ཕྱིན་པ་མེད། །འགྲོ་བར་བསམ་པ་རང་གི་སེམས། །སེམས་ནི་མཐའ་བྲལ་སྟོང་པ་ཡིན། །ཞེས་པ་དང་ཡང་། ཀྱེ་མ་རིགས་ཀྱི་བུ་ཁྱོད་ཀྱིས། །སེམས་ནི་དང་པོ་གང་ནས་བྱུང་། །རྒྱུ་རྐྱེན་ཅི་ལས་བྱུང་བར་ལྟོས། །ཞེས་པ་དང་ཡང་། ཀྱེ་མ་རིགས་ཀྱི་བུ་ཁྱོད་ཉོན། །རྩ་བ་བྲལ་བའི་སེམས་ཉིད་ལ། །གདོད་ནས་མ་སྐྱེས་དངོས་པོ་མེད། །ཁ་དོག་དབྱིབས་མེད་ངོས་བཟུང་མེད། །གང་ནས་མ་བྱུང་སོང་བ་མེད། །ད་ལྟར་མི་གནས་རྒྱུ་རྐྱེན་མེད། །འདི་ཉིད་སེམས་ཀྱི་གནས་ལུགས་ཏེ། །བརྗོད་དུ་མེད་པར་ཤེས་པར་གྱིས། །ཞེས་པ་དང་། ཀྱེ་མ་རིགས་ཀྱི་བུ་ཁྱོད་ཀྱིས། །རྒྱལ་བའི་སྐུ་གཟུགས་འདི་ལ་ལྟོས། །རྒྱན་དང་ཆ་ལུགས་དུ་མར་སྣང་། །སྣང་བར་འཛིན་པ་རང་གི་སེམས། །དེ་ལ་ལྟོས་དང་གཞི་རྩ་བྲལ། །དེ་བཞིན་ཡིད་ཡུལ་སྣང་བའི་གཟུགས། །ཡུལ་ཉིད་གསལ་ལ་མཁན་པོས་སྟོང་། །དེ་ནི་གསལ་སྟོང་ཆོས་སྐུ་ཡིན། །ཞེས་པ་དང་ཡང་། ཨེ་མ་རིགས་ཀྱི་བུ་ཁྱོད་ཀྱིས། །འདི་ཡི་སྒྲ་ནི་སྙན་མི་སྙན། །ལེགས་པར་ཐོས་སམ་ངོ་བོར་ལྟོས། །སྒྲ་རུ་འཛིན་པ་རང་གི་སེམས། །སེམས་ནི་གྲག་སྟོང་ཆོས་ཀྱི་སྐུ། །དེ་ལ་ལྟོས་དང་གཞི་རྩ་བྲལ། །དེ་བཞིན་སྒྲ་རུ་གྲགས་པ་ཀུན། །སྣ་ཚོགས་ཐོས་ཀྱང་ངོ་བོས་སྟོང་། །གསལ་པོར་གྲགས་ཀྱང་རང་བཞིན་སྟོང་། །ངོས་གཟུང་མ་རྙེད་གཞི་རྩ་བྲལ། །དེ་ནི་གྲག་སྟོང་ཆོས་སྐུ་ཡིན། །ཞེས་པ་དང་ཡང་། ཨེ་མ་རིགས་ཀྱི་བུ་ཁྱོད་ཀྱིས། །སྤོས་དང་སྨན་སོགས་དྲི་ཞིམ་དང་། །དེ་བཞིན་དྲི་མི་ཞིམ་སྣོམ་ལ། །དགའ་དང་མི་དགའ་སྐྱེས་པའི་སེམས། །དེ་ཉིད་ངོ་ལ་ཚུར་ལྟོས་དང་། །དེ་ཡི་ངོ་བོ་ཅི་འདྲ་ཞིག །བརྟགས་པས་མ་རྙེད་རྒྱུ་མཚན་མེད། །གཉིས་འཛིན་ཤེས་པ་གློ་བུར་ཡིན། །རྐྱེན་ཕྱིར་སྣང་ཡང་ངོ་བོས་སྟོང་། །ཞེས་པ་དང་ཡང་། ཨེ་མ་རིགས་ཀྱི་བུ་ཁྱོད་ཀྱིས། །བཟའ་བཏུང་རོ་མཆོག་མྱོང་བར་གྱིས། །མངར་སྐྱུར་ལན་ཚྭ་ཚ་ཁ་བསྐ། །རོ་དྲུག་མྱོང་བའི་མཁན་པོར་ལྟོས། །བལྟས་པས་མི་རྙེད་སྐྱེ་བ་མེད། །མཐའ་བྲལ་དབུ་མ་སྤྲོས་བྲལ་དང་། །རང་གྲོལ་ཆོས་སྐུར་ཤེས་པར་མཛོད། །ཅེས་པ་(༡༡༩)དང་ཡང་། ཨེ་མ་རིགས་ཀྱི་བུ་ཁྱོད་ལ། །རེག་ལ་དགག་སྒྲུབ་བསྐྱེད་པའི་སེམས། །དེ་ལ་གཉིས་འཛིན་གང་བྱུང་ཡང་། །རྣམ་པ་གསལ་ལ་རང་བཞིན་སྟོང་། །ངོ་བོ་མེད་ལ་གཞི་རྩ་བྲལ། །ཡེ་ནས་སྟོང་གསལ་ཆོས་སྐུ་ཡིན། །ཞེས་པ་དང་ཡང་། ཀྱེ་མ་རིགས་ཀྱི་བུ་ཁྱོད་ཀྱིས། །རང་གི་སེམས་ལ་ཚུར་ལྟོས་དང་། །དགག་སྒྲུབ་བདེ་སྡུག་ཅི་ཤར་ཡང་། །གསལ་ལ་ངོ་བོ་རིག་སྟོང་ཡིན། །དཔེར་ན་ཆུ་ཟླ་ཇི་བཞིན་ནོ། །ཞེས་པ་དང་ཡང་། ཀྱེ་མ་རིགས་ཀྱི་བུ་ཁྱོད་ལ། །ཉོན་མོངས་སྣ་ཚོགས་ཅི་སྐྱེས་ཀྱང་། །མེ་ལོང་ནང་གི་གཟུགས་བརྙན་འདྲ། །སེམས་ལ་སྣང་ཡང་ངོས་གཟུང་མེད། །ཉོན་མོངས་གཞི་མེད་རྩ་བ་བྲལ། །ཁ་དོག་དབྱིབས་མེད་ངོས་གཟུང་མེད། །གདོད་ནས་མ་སྐྱེས་ཆོས་སྐུ་ཡིན། །ཉོན་མོངས་རྟོག་པའི་རང་བཞིན་ནི། །སེམས་ལས་བྱུང་ཞིང་སེམས་སུ་ནུབ། །སྐྱེས་དང་གྲོལ་མཉམ་དབའ་རླབས་བཞིན། །ཕྲ་རགས་སེམས་དང་རྣམ་རྟོག་ཀུན། །ཡེ་སྟོང་གཞི་མེད་རྩ་བྲལ་ཡིན། །དེ་ལྟར་རྟོག་པའི་མཚང་རྟོགས་ན། །གཉེན་པོ་སྤང་བླང་མེད་པར་གྲོལ། །ཞེས་བརྗོད་ཅིང་། ཆོས་ཉིད་དེ་བཞིན་ཉིད་ཀྱི་ངོ་བོ་གསལ་གདབ་བོ། །རྗེས་ནི་ཡང་བླ་མས། ཨེ་མ་སྐལ་ལྡན་རིགས་ཀྱི་བུ། །སྟོང་གསལ་ཆོས་སྐུའི་དབང་ཐོབ་པ། །དེས་ནི་དག་བྱ་གང་དག་ན། །ལུས་ངག་ཡིད་གསུམ་སྡིག་སྒྲིབ་དག །གསུམ་ཀའི་ནུས་པ་ཚད་དུ་ཕྱིན། །བརྟེན་བྱ་བདེ་སྡུག་སྤང་བླང་བྲལ། །རྗེས་སུ་དབྱེར་མེད་བསྒོམ་པར་གནང་། །ས་ནི་བཅུ་གཅིག་ཀུན་ཏུ་འོད། །ཕྲིན་ལས་བཞི་པོ་མངོན་དུ་གྱུར། །འབྲས་བུ་སྐུ་ལྔ་ལྷུན་གྲུབ་ཐོབ། །ཅེས་བརྗོད་པ་དང་། མཎྜལ་ཕུལ་ལ། དེང་ནས་བརྩམས་ཏེ་བདག་གིས་ནི། །ལུས་དང་ལོངས་སྤྱོད་དངོས་ཀུན་གྱིས། །དཔལ་ལྡན་བླ་མ་ཁྱེད་མཆོད་ཀྱིས། །ཁྱོད་ཀྱི་རྗེས་སུ་གཟུང་བར་མཛོད། །ཅེས་པས་གཏང་རག་ཕུལ་ནས། དེར་འདུས་པ་རྣམས་ལ་ཚོགས་ཀྱི་དགའ་བས་མཉེས་པར་བྱས་ཏེ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་མཛོད། །བདག་དང་སེམས་ཅན་ཐམས་ཅད་མ་ལུས་ཀུན། །ཀུན་ཏུ་བཟང་པོ་རྒྱལ་བའི་དཀྱིལ་འཁོར་དུ། །མ་ལུས་ཕྱམ་ཅིག་ཐམས་ཅད་ལྷུན་གྲུབ་ནས། །བདེ་གཤེགས་རྣམས་དང་སྐལ་བ་མཉམ་པར་ཤོག །ཅེས་དངོས་དང་རས་བྲིས་ལ་སོགས་པ་བརྟེན་པར་གྱུར་པ་མི་གཤེགས་པར། ཚོམ་བུ་ལ་(༡༢༠)སོགས་པའི་ལྷ་དང་མགྲོན་རྣམས་ནི། ཨོཾ་ཁྱོད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཨོཾ་བཛྲ་མུཿས་ཡེ་ཤེས་པ་གཤེགས། ཛཿཧཱུྃ་བྃ་ཧོཿས་དམ་ཚིག་པ་བདག་ལ་ཐིམ་པར་བསམས་ལ། ཨོཾ་ཨཱཿཧཱུྃ་གིས་སྐུ་གསུང་ཐུགས་བསྲུངས་ཏེ། ལྷག་མའི་གཏོར་མ་དང་། རྡོ་རྗེའི་གླུ་དང་། བཀྲ་ཤིས་བརྗོད་པར་བྱའོ། །

ཆོས་ཚུལ་འདི་ནི་ཟབ་ཡངས་རྒྱ་མཚོའི་སྤྲིན། །སྐལ་ལྡན་སྐྱེ་བོའི་ཕུན་ཚོགས་སྒྲུབ་བྱེད་ཡིན། །གང་འདིར་སྙིང་ག་འོད་ཀྱི་པདྨ་ལ། །བདེ་གཤེགས་ཉི་མའི་འོད་ཟེར་ཕོག་པ་ཡིས། །བྱམས་དང་སྙིང་རྗེའི་འདབ་མ་རབ་རྒྱས་ཏེ། །དད་ལྡན་རྐང་དྲུག་ཉེར་འཚོའི་ལོངས་སྤྱོད་དུ། །པདྨ་ལས་འབྲེལ་རྩལ་གྱིས་ལེགས་པར་བཀོད། །དགེ་བ་འདི་ཡིས་བདག་དང་འགྲོ་བ་ཀུན། །རྒྱལ་བའི་དཀྱིལ་འཁོར་མཆོག་ཏུ་རབ་ཞུགས་ཏེ། །སྐུ་དང་ཡེ་ཤེས་འདུ་འབྲལ་མེད་པ་ཡིས། །འགྲོ་བའི་དོན་གཉིས་ལྷུན་གྱིས་གྲུབ་པར་ཤོག །སྟོན་གསུམ་མེ་ཏོག་འབྲས་བུར་སྨིན་པའི་ཚེ། །གངས་རི་ཐོད་དཀར་རིན་ཆེན་སྙིང་པོའི་མགུལ། །འཕགས་པའི་རི་ངོགས་དབེན་ཞིང་ཉམས་དགའ་བར། །པདྨ་ཀློང་ཡངས་རབ་ཏུ་རྒྱས་པ་ཡིས། །ལྷ་དང་དྲང་སྲོང་མཁའ་འགྲོ་རྒྱ་མཚོ་དང་། །བློ་གསལ་སྦྲང་རྩིར་སྤྱོད་རྣམས་དགའ་བར་མཛོད། །བདག་འཇུག་པདྨ་ཀློང་ཡངས་ཞེས་བྱ་བ། ཨོ་རྒྱན་གྱི་སློབ་དཔོན་ཆེན་པོ་པདྨ་ཡབ་ཡུམ་གྱིས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་གྱི་མགུལ་ཨོ་རྒྱན་རྫོང་གི་གནས་མཆོག་དམ་པར་སྟོན་གྱི་ཚེ་མེ་ཏོག་དང་འབྲས་བུ་སྨིན་པའི་དུས་སུ་བཀོད་པའོ། །ཕྱོགས་དུས་ཀུན་ཏུ་བདེ་ཆེན་གྱི་ཆར་བསྐལ་པ་རྫོགས་ལྡན་གྱི་དུས་སུ་ཉེ་བར་གནས་པ་བཞིན་འབབ་པར་ཤོག་ཅིག །ཤུ་བྷཾ།། །།

ཚོགས་མཆོད་རྒྱ་མཚོའི་སྤྲིན།

༄༅། །ཚོགས་མཆོད་རྒྱ་མཚོའི་སྤྲིན་བཞུགས་སོ། །ཤོག་སྐྱའི་སྐོར།

༄༅། །ཚོགས་མཆོད་རྒྱ་མཚོའི་སྤྲིན་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བསོད་ནམས་ཡེ་ཤེས་རྒྱ་མཚོའི་སྙིང་པོ་ལས། །རྒྱལ་བའི་སྤྲིན་ཚོགས་ཐུགས་རྗེའི་གློག་ཕྲེང་ཅན། །ཕན་བདེའི་ཆར་གྱིས་འགྲོ་བ་ཚིམ་མཛད་པ། །དངོས་གྲུབ་མཐའ་ཡས་རྙེད་ལ་ཕྱག་འཚལ་ལོ། །དུས་གསུམ་རྒྱལ་བ་འཁོར་བཅས་མཆོད་པ་དང་། །བགེགས་དང་ལོག་འདྲེན་བར་ཆད་ཞི་བ་དང་། །ཚེ་རིང་ནད་མེད་འདོད་དགུ་བསྒྲུབ་བྱའི་ཕྱིར། །ཚོགས་མཆོད་རྒྱ་མཚོའི་སྤྲིན་གྱིས་(༡༢༡)མཉེས་པར་བགྱི། །

དེའང་དབེན་ཞིང་ཡིད་དྭངས་མཐུན་པའི་གནས་སུ། བྲིས་སྐུའམ་མེ་ཏོག་གི་ཚོམ་བུ་ལ་སོགས་པ་བཀོད་པའི་དྲུང་དུ། ཕྱི་ནང་གི་མཆོད་པ་དང་། ཚོགས་དང་གཏོར་མའི་ཡོ་བྱད་རྒྱ་ཆེར་བཤམས་ལ། ལས་ཀྱི་སློབ་མས་ཚོགས་ཀྱི་སློབ་དཔོན་ཚོགས་དང་བཅས་པ་ལ། མཎྜལ་དང་མེ་ཏོག་ཕུལ་ནས་ཕྱག་འཚལ་ཏེ། ཧོ་དགོངས་སུ་གསོལ། རང་བཞིན་གྱིས་རྣམ་པར་དག་པ་ཀུན་ཏུ་བཟང་པོའི་ཕོ་བྲང་། ལྷ་དང་ལྷ་མོའི་སྤྲིན་ཕུང་གིས་གང་བ་འདིར། བླ་མ་རྡོ་རྗེ་སློབ་དཔོན་འཁོར་དང་བཅས་པ་རྣམས་རང་བཞིན་ལྷུན་གྱི་གྲུབ་པའི་རྣལ་འབྱོར་ལ་གནས་པར་ཞུ་འཚལ། ཞེས་གསོལ་བ་གདབ་བོ། །དེ་ནས་བགེགས་ལ་གཏོར་མ་བྱིན་ནས་སྐད་ཅིག་གིས་ཁྲོ་བོ་རྟ་མགྲིན་འཇིགས་པར་བསམས་ཏེ། ཧཱུྃ་ཉོན་ཅིག་བགེགས་དང་ལོག་འདྲེན་ཚོགས། །འདི་རུ་མ་འདུག་གཞན་དུ་དེངས། །ང་ཡི་བཀའ་ལས་འདས་གྱུར་ན། །ཐལ་བའི་རྡུལ་བཞིན་བརླགས་པར་འགྱུར། །ཨོཾ་བཛྲ་ཀྲོ་ཏ་ཧྱ་གྷྲི་བ་ཧུ་ལུ་ཧུ་ལུ་ཧཱུྃ་ཕཊ། ཅེས་བརྗོད་ཅིང་གུ་གུལ་གྱི་དུད་པ་དང་རོལ་མོའི་སྒྲ་ཆེར་བསྒྲགས་པས། བགེགས་ཐམས་ཅད་ཕྱིའི་རྒྱ་མཚོའི་མཐར་བྱེར་ཏེ། མེ་རི་འབར་བས་མཚམས་བཅད་ནས་བསྐལ་པའི་བར་མི་ཐར་བར་བསམ་མོ། །

དེ་ནས་སྐད་ཅིག་གིས་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་རྭ་བ་གུར་བླ་བྲེ་ཡེ་ཤེས་ཀྱི་མེ་རི་མེ་དཔུང་གིས་འཁྲིགས་པར་བསམས་ལ། ཧཱུྃ་ཡེ་ནས་མ་སྐྱེས་རང་བཞིན་རྫོགས་པ་ཆེ། །ཁྱབ་གདལ་མི་དམིགས་ཆོས་སྐུ་དག་པ་ལས། །རྡོ་རྗེ་རྭ་བ་བསྐལ་པའི་མེ་དཔུང་འབར། །རབ་འཇིགས་ཁྲོ་བོའི་དཀྱིལ་འཁོར་ཆེན་པོ་འདིར། །རྡོ་རྗེ་ཕྲ་མེན་སྒོ་སྐྱོང་ཆེན་མོ་བཞིས། །རང་བཞིན་གདོད་ནས་དག་པའི་མཚམས་ཆོད་ཅིག །ཨོཾ་སུམ་བྷ་ནི་སུམ་བྷ་ཧཱུྃ། གྷྲིཧྣ་གྷྲིཧྣ་ཧཱུྃ། གྷྲིཧྣ་པ་ཡ་གྷྲིཧྣ་པ་ཡ་ཧཱུྃ། ཨ་ན་ཡ་ཧོ། བྷ་ག་ཝཱན། བྷིདྱ་ར་ཙ་ཡ་ཧཱུྃ་ཕཊ། ཅེས་བརྗོད་ལ་དུར་ཁྲོད་བརྒྱད་ཀྱིས་བསྐོར་བའི་གཞལ་ཡས་ཁང་། ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་ཆེན་པོར་སྐད་ཅིག་གིས་ཝལ་གྱིས་གསལ་བའི་ངང་ལས་སྐྱབས་སུ་འགྲོ་བ་དང་། སེམས་བསྐྱེད་ལ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾཿ ཆོས་སྐུ་མ་སྐྱེས་མཉམ་པ་ཆེན་པོ་ལས། །འབྱུང་བཞི་རིམ་བརྩེགས་ཉི་ཟླ་པདྨའི་སྟེང་། །བྷྲཱུྃ་ལས་བདེ་གཤེགས་ཞི་བའི་གཞལ་ཡས་ཁང་། །སྒོ་བཞི་གྲུ་བཞི་རྩིགས་པ་ལྔ་དང་ལྡན། །རྟ་བབས་བཞི་དང་འཁོར་ལོ་རྒྱལ་མཚན་གདུགས། །(༡༢༢)རྒྱན་རྣམས་ཡོངས་རྫོགས་མཆོད་པའི་ལྷ་མོས་མཛེས། །དེ་དབུས་བདེ་གཤེགས་རིགས་ལྔ་ཡབ་ཡུམ་དང་། །སེམས་དཔའ་སེམས་མ་སྒོ་བ་ཡབ་ཡུམ་བཞི། །ཐུབ་པ་དྲུག་རྣམས་སྣང་ལ་རང་བཞིན་མེད། །ནམ་མཁའི་འཇའ་ཚོན་མེ་ལོང་གཟུགས་བརྙན་འདྲ། །དེ་སྟེང་ཁྲོ་བོའི་ཞིང་ཁམས་སྣང་བ་ནི། །འཇིགས་གཟུགས་མི་བཟད་བསྐལ་པའི་མེ་དཔུང་ཁྲོ། །ཀུན་ཀྱང་ཡབ་ཡུམ་རྒྱན་རྣམས་རྫོགས་པ་ལ། །མཚན་དང་དཔེ་བྱད་འོད་ཟེར་ཕྱོགས་བཅུར་འཕྲོ། །ཨོཾ་བཛྲ་ས་མ་ཡ་ཛཿ ནམ་མཁའི་དཀྱིལ་ནས་ཞི་ཁྲོའི་གཞལ་མེད་ཁང་། །རང་བཞིན་ལྷུན་གྱིས་གྲུབ་པར་རབ་བྱོན་ཏེ། །བདག་ལ་གཉིས་སུ་མེད་པར་ཐིམ་པར་གྱུར། །ཛཿཧཱུྃ་བྃ་ཧོཿ ཕྱི་དང་ནང་ཀུན་འོག་མིན་དག་པའི་ཞིང་། །ཐམས་ཅད་རྣམ་དག་ལྷ་དང་ལྷ་མོའི་ངང་། །སྐྱེ་མེད་ལྷུན་རྫོགས་འོད་གསལ་ཆེན་པོ་ལ། །བདག་གཞན་མ་ལུས་ངང་གིས་གནས་པར་གྱུར། །ཅེས་བདག་དང་སྣོད་བཅུད་ཐམས་ཅད་ལྷ་དང་ལྷ་མོར་གསལ་གདབ་བོ། །

དེ་ནས་སྐད་ཅིག་གིས་མདུན་གྱི་ནམ་མཁར་བླ་མ་དང་ཞི་ཁྲོ་དཔག་ཏུ་མེད་པའི་དཀྱིལ་འཁོར་བསམས་ལ། བསོད་ནམས་ཀྱི་ཞིང་སྤྱན་དྲངས་པ་ནི། ཧཱུྃ་ཆོས་སྐུ་མཉམ་པའི་ངང་ལས་མ་གཡོས་ཀྱང་། །གཟུགས་སྐུ་རང་སྣང་འོད་གསལ་ཐུགས་རྗེའི་ལྷ། །ཀུན་བཟང་ཡབ་ཡུམ་རིགས་ལྔ་རྡོ་རྗེ་འཆང་། །རྡོ་རྗེ་སེམས་དཔའ་དགའ་རབ་རྡོ་རྗེ་དང་། །ཤྲཱི་སིངྷ་པདྨ་ཐོད་ཕྲེང་རྩལ། །མཁར་ཆེན་མཚོ་རྒྱལ་རིགས་བཞི་མཁའ་འགྲོ་དང་། །རྡོ་རྗེ་ཕག་མོ་འཁོར་དང་བཅས་པ་དང་། །དགོངས་གཏེར་ཟབ་མོའི་སྲུང་མར་བཀའ་བསྒོས་པ། །སྲོག་སྒྲུབ་ལ་སོགས་དམ་ཅན་རྒྱ་མཚོའི་ཚོགས། །མ་ལུས་འཁོར་བཅས་གནས་འདིར་གཤེགས་སུ་གསོལ། །གཞན་ཡང་སྣང་སྲིད་འཁོར་འདས་འཇིག་རྟེན་ན། །གང་བཞུགས་སངས་རྒྱས་སེམས་ཅན་ཇི་སྙེད་པ། །བསོད་ནམས་ཞིང་ལ་དུས་འདིར་སྤྱན་འདྲེན་གྱི། །དགྱེས་པ་ཆེན་པོས་གནས་འདིར་གཤེགས་སུ་གསོལ། །ཞེས་པས། བླ་མ་ཡི་དམ་དཀྱིལ་འཁོར་གྱི་ལྷ་ཚོགས་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་སྐད་ཅིག་གིས་བྱོན་ནས། སྔར་གྱི་དམ་ཚིག་པ་དང་གཉིས་སུ་མེད་པ་ལ་གདན་འབུལ་ཞིང་བཞུགས་སུ་གསོལ་བ་ནི། ཧཱུྃ་གནས་ལྔ་ཡེ་ཤེས་ལྷུན་གྲུབ་དཀྱིལ་འཁོར་དུ། །ཐབས་དང་ཤེས་རབ་པདྨ་ཉི་ཟླའི་གདན། །སེང་གེ་གླང་ཆེན་རྟ་མཆོག་རྨ་བྱ་སོགས། །མཛེས་ཤིང་ཡིད་འོང་བཤམས་པའི་གདན་སྟེང་དུ། །བླ་མ་ཡི་(༡༢༣)དམ་དཀྱིལ་འཁོར་ལྷ་ཚོགས་དང་། །མཁའ་འགྲོ་དམ་ཅན་རྒྱ་མཚོ་བཞུགས་སུ་གསོལ། །ཨོཾ་པདྨ་ཙནྡྲ་སཱུརྱ་མ་དྷ་ལ་ཀ་མ་ལ་ཡེ་སྟྭཾ། ཞེས་པས་བཞུགས་པར་བསམས་ལ་ཕྱག་འཚལ་བ་ནི། ཧཱུྃ་དུས་གསུམ་བླ་མ་ཡི་དམ་མཁའ་འགྲོའི་ཚོགས། །མ་ལུས་འཁོར་དང་བཅས་པ་ཐམས་ཅད་ལ། །ནམ་མཁའི་མཐའ་ཁྱབ་བདག་གིས་ལུས་སྤྲུལ་ཏེ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །ཞེས་ཡིད་ཀྱིས་ཕྱག་བྱས་ཏེ། སོ་སོའི་མཚན་ནས་བརྗོད་ཅིང་། སརྦ་པཉྩ་ཨ་མྲྀ་ཏས་བདུད་རྩིའི་མཆོད་པ་ཙམ་ཕུལ། ཚོགས་མཆོད་བྱིན་གྱིས་བརླབ་པ་ནི། བདུད་རྩིའི་བསང་ཆུ་ཡོ་བྱད་ཀུན་ལ་གཏོར་ལ། སྭ་བྷཱ་ཝས་སྟོང་པར་སྦྱངས་པའི་ངང་ལས། ཡཾ་ལས་རླུང་གི་དཀྱིལ་འཁོར་གྱི་སྟེང་དུ། རཾ་ལས་མེའི་ཕུང་པོ་འབར་བའི་མཐར། ཀེཾ་ལས་ཐོད་པའི་སྒྱེད་པུ་རི་རབ་དང་མཉམ་པ་གསུམ་གྱི་སྟེང་དུ། ཨ་ལས་ཚོགས་གཏོར་གྱི་སྣོད་ཐོད་པ་དུམ་བུ་གཅིག་པ། ཕྱི་དཀར་བ། ནང་དམར་བ། དཔྲལ་བ་རང་ལ་བསྟན་པའི་ནང་དུ།

ཚོགས་ཀྱི་ཡོ་བྱད་རྣམས་ཤ་ལྔ་བདུད་རྩི་ལྔར་གྱུར་ཏེ། སྣོད་སྟོང་གསུམ་དང་མཉམ་པ་བསམ་གྱིས་མི་ཁྱབ་པའི་ནང་ཁེངས་པར་གྱུར་པའི་སྟེང་དུ། ཨ་ལས་ཟླ་བའི་ཁ་གཅོད་ཀྱི་དབུས་སུ། རྡོ་རྗེ་རྩེ་ལྔ་པའི་ཡུ་བ། ཨོཾ་ཨཱཿཧཱུྃ་གི་ལྟེ་བ་དང་། ཨོཾ་ཧཱུྃ་ཏྲཱྃ་ཧྲཱིཿཨཱཿས་རྭ་རྣམས་མཚན་པར་གྱུར། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས། ཡཾ་ལ་ཕོག །ཡཾ་ལས་རླུང་གཡོས། མེ་སྦར་ཏེ། ཐོད་པའི་བདུད་རྩི་ཁོལ་བའི་རླངས་པ་ཡི་གེ་ལྔ་ལ་ཕོག་པས་རིགས་ལྔ་ཡབ་ཡུམ་དུ་གྱུར་ཏེ། སྙོམས་པར་ཞུགས་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་རྡོ་རྗེའི་ཁོང་སེང་ན་མར་སོང་སྟེ་ཐོད་པའི་ནང་ཡེ་ཤེས་ཀྱི་བདུད་རྩིས་གང་། ལྟེ་བའི་ཨོཾ་ཨཱཿཧཱུྃ་ལས་འོད་འཕྲོས་པས་ཕྱོགས་བཅུའི་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དཔའ་བོ་མཁའ་འགྲོ་དཔག་ཏུ་མེད་པ་སྙོམས་པར་ཞུགས་པའི་བདུད་རྩིའི་རྒྱུན་ཐོད་པའི་ནང་ནས་བབས་པས་ཡེ་ཤེས་ལྔའི་བདུད་རྩིས་ཁེངས། ཟླ་བའི་ཁ་ཆོད་རྡོ་རྗེ་དང་བཅས་པ་ཡང་འོད་དུ་ཞུ་ནས་ཐོད་པའི་བདུད་རྩི་དང་གཉིས་སུ་མེད་པར་འདྲེས་པར་བསམ་མོ། །

དེ་ནས་མཆོད་པ་ལན་བདུན་ལས། དང་པོ་ཕྱིའི་མཆོད་པ་རྣམས་རྒྱས་པའམ་རེ་ཞིག་བསྡུས་པས། བླ་མ་ཡི་དམ་མཁའ་འགྲོ་ལ། །མཛེས་པའི་མེ་ཏོག་རྒྱན་གྱིས་མཆོད། །དྲི་ཞིམ་བདུག་སྤོས་ཤངས་ལ་མཆོད། །སྣང་གསལ་མར་མེ་སྤྱན་ལ་(༡༢༤)མཆོད། །ཞལ་ཟས་རོ་མཆོག་ལྗགས་ལ་མཆོད། །ཡིད་འོང་དྲི་མཆོག་ཐུགས་ཀར་མཆོད། །རོལ་མོ་སིལ་སྙན་སྙན་ལ་མཆོད། །འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏྱ་ཤཔྟ་ཨཱཿཧཱུྃ། གཉིས་པ་ནང་གི་མཆོད་པ་ནི། བླ་མ་བདེ་གཤེགས་མཁའ་འགྲོ་ལ། །དབང་པོ་རྣམ་ལྔའི་མེ་ཏོག་མཆོད། །གསུར་ཆེན་དྲི་ཡི་བདུག་སྤོས་མཆོད། །ཞུན་ཆེན་སྣང་གསལ་མར་མེས་མཆོད། །རྡོ་རྗེ་དྲི་ཆུའི་བྱུག་པས་མཆོད། །རྡོ་རྗེ་དྲི་ཆེན་ཞལ་ཟས་མཆོད། །རྐང་གླིང་ཐོད་པའི་རོལ་མོས་མཆོད། །བྱང་སེམས་དཀར་དམར་བདུད་རྩིས་མཆོད། །དུག་ལྔ་ཡེ་ཤེས་ལྔ་རུ་མཆོད། །དུག་གསུམ་སྐུ་གསུང་ཐུགས་སུ་མཆོད། །སྣང་སྲིད་ཕྱག་རྒྱ་བཞི་རུ་མཆོད། །འགྲོ་བའི་དོན་དུ་བཞེས་སུ་གསོལ། །ཨོཾ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཐཱ། གསུམ་པ་གསང་བའི་མཆོད་པ་ནི། བླ་མ་ཡི་དམ་མཁའ་འགྲོ་ལ། །ཡབ་ཡུམ་གཉིས་མེད་མཁའ་གསང་ལས། །འཁྲིལ་སྦྱོར་བྱང་ཆུབ་སེམས་ཀྱིས་མཆོད། །བདེ་བའི་རོ་མཉམ་མཆོད་པར་བཞེས། །ཨོཾ་ཨཱཿཧཱུྃ་ཧྲཱིཿཐཱ། བཞི་པ་དེ་ཁོ་ན་ཉིད་ཀྱི་མཆོད་པ་ནི། བླ་མ་ཡི་དམ་མཁའ་འགྲོ་ལ། །བདེ་གསལ་རིག་པ་ཡེ་ཤེས་དང་། །སྣང་བ་སྣ་ཚོགས་ཐམས་ཅད་ཀུན། །བདེ་སྟོང་གསལ་སྟོང་རིག་པ་སྟོང་། །མི་རྟོགས་རང་བཞིན་སྣང་བས་སྟོང་། །ཡེ་ཤེས་ལྔ་ལྡན་ངང་དུ་བཞེས། །ཨོཾ་ཨཱཿཧཱུྃཿཧྲཱི༔ཐཱ། ལྔ་པ་བདུད་རྩིའི་མཆོད་པ་ནི། བླ་མ་བདེ་གཤེགས་མཁའ་འགྲོའི་ཚོགས་རྣམས་ལ། །རྩ་བརྒྱད་སྟོང་སྦྱར་བདུད་རྩི་ཨ་མྲྀ་ཏ། །དུག་ལྔ་གནས་འགྱུར་ཡེ་ཤེས་སྒྲུབ་པའི་རྫས། །རོ་མཆོག་ཡོན་ཏན་ཀུན་དང་ལྡན་པས་མཆོད། །ཨོཾ་སརྦ་པཉྩ་ཨ་མྲྀ་ཏ་ཁཱ་ཧི། དྲུག་པ་གཏོར་མའི་མཆོད་པ་ནི། བླ་མ་ཡི་དམ་མཁའ་འགྲོ་ལ། །གཏོར་མའི་མཆོད་པ་འབུལ་བ་ནི། །ཞལ་ཟས་སྣ་ཚོགས་གཏོར་ཆེན་ལ། །ཤ་ལྔ་བདུད་རྩིས་རྒྱན་དང་ལྡན། །དྲི་དང་རོ་མཆོག་ལྡན་པས་མཆོད། །ཨོཾ་གུ་རུ་དྷེ་བ་ཌཱ་ཀི་ནི་ཧ་རི་ནི་ས་ར་ཙ་ཧྲི་ཡ་ཨེ་དཾ་གྷྲི་ན་བྷ་ལིཾ་ཏ། ཁ་ཁ་ཁཱ་ཧི་ཁཱ་ཧི། ཞེས་པས་སྤྱིར་ཕུལ་ནས། བླ་མ་ཡི་དམ་བཀའ་སྲུང་སོ་སོའི་མཚན་རེ་རེ་ནས་བརྗོད་ཅིང་། བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་ལྔའམ། བདུན་གྱིས་མཆོད་པས་དགྱེས་ཤིང་རོལ་པར་བསམ། བདུན་པ་ཚོགས་ཀྱི་མཆོད་པ་ནི། ཚོགས་ཕུད་གཏོར་མར་བྲན་ལ། ཀུན་བཟང་ཡབ་ཡུམ་ཞི་ཁྲོ་རབ་འབྱམས་ཚོགས། །དུས་གསུམ་བདེ་གཤེགས་རིག་འཛིན་བླ་མ་དང་། །སློབ་དཔོན་ཆེན་པོ་པདྨ་ཡབ་ཡུམ་ལ། །བདེ་ཆེན་ཚོགས་ཀྱི་མཆོད་(༡༢༥)པ་དམ་པ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །སྐུ་གསུང་ཐུགས་ཀྱི་ཉམས་ཆག་བསྐང་གྱུར་ཅིག །རྡོ་རྗེ་ཕག་མོ་བདེ་གཤེགས་རིགས་ཀྱི་ཡུམ། །མཁའ་འགྲོ་སྡེ་ལྔ་སོ་སོའི་སྤྲིན་ཚོགས་དང་། །སྲོག་སྒྲུབ་ལ་སོགས་དམ་ཅན་རྒྱ་མཚོའི་ཚོགས། །སྔོན་ཚེ་སློབ་དཔོན་པདྨའི་སྤྱན་སྔ་རུ། །སྙིང་ཏིག་བསྟན་པ་བསྲུང་བར་ཞལ་བཞེས་པ། །འཇིག་རྟེན་ལས་གྲུབ་ཡེ་ཤེས་ཚོགས་བཅས་དང་། །རྒྱལ་ཆེན་བཞི་དང་ཕྱོགས་སྐྱོང་ལྷ་སྲིན་བརྒྱད། །ཡུལ་ལྷ་གཞི་བདག་འདིར་འདུས་མགྲོན་རྣམས་ལ། །ཞལ་ཟས་ཚོགས་ཀྱི་མཆོད་པས་ཐུགས་དམ་བསྐང་། །དགྱེས་མཛད་སྐུ་གསུང་ཐུགས་ཀྱི་དངོས་གྲུབ་སྩོལ། །མི་མཐུན་རྐྱེན་རྣམས་མ་ལུས་བཟློག་པ་དང་། །རྣལ་འབྱོར་བསམ་པ་ཡིད་བཞིན་འགྲུབ་པར་མཛོད། །ཨོཾ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནི་ཨོཾ་ཧཱུྃ་ཏྲཱྃ་ཧྲཱིཿཨཱཿབྃ་ལྃ་རྃ་ཡྃ་ཨེ་ཧ་རི་ནི་ས་ར་ཙ་ཧྲི་ཡ་ཤྲཱི་མཧཱ་ཀ་ལི་མ་མ་རག་མོ། ཡ་མ་ར་ཙ་དུ་ཏྲི་ཕུ་ཏྲི། གྷ་ན་ཙཀྲ་པུཙྪ་ཁ་ཁ་ཁཱ་ཧི། མཧཱ་སུ་ར་ཏ་ཁཱ་ཧི། མཧཱ་མཾ་ས་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། མཧཱ་གོ་རོ་ཙ་ན་ཁཱ་ཧི། མཧཱ་བ་སུ་ཏ་ཁཱ་ཧི། མཧཱ་བ་ལིཾ་ཏ་ཁཱ་ཧི། སིདྡྷི་ཕ་ལ་ཨཱཿཧཱུྃ། ཞེས་རོལ་མོའི་སྒྲ་དང་བཅས་པས་མཆོད་དོ། །

དེ་ནས་བསྟོད་པ་ནི། ཧཱུྃ་ངང་ཉིད་མ་སྐྱེས་ཆོས་སྐུ་དག་པ་ལས། །སྐྱེ་བའི་ཆོ་འཕྲུལ་སྣ་ཚོགས་སྟོན་མཛད་པ། བླ་མ་ཡི་དམ་མཁའ་འགྲོའི་ཚོགས་རྣམས་དང་། །དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད། །ཅེས་བརྗོད་ལ།

བཤགས་པ་བྱ་བ་ནི། ཧཱུྃ་དུས་གསུམ་བླ་མ་ཡི་དམ་མཁའ་འགྲོའི་ཚོགས། །དཔང་གྱུར་དམ་ཅན་རྒྱ་མཚོ་དགོངས་སུ་གསོལ། །ཡེ་ཤེས་མཁའ་འགྲོ་ཡབ་ཡུམ་ཆོས་ཀྱི་སྐུ། །ཡེ་ནས་བདག་དང་དབྱེ་བ་མེད་པ་ལས། །མ་རིག་དབང་གིས་བདག་གཞན་གཉིས་སུ་སྣང་། །གཉིས་འཛིན་ཐེ་ཚོམ་ལོག་ལྟ་ཅི་བགྱིས་པ། །ངང་དྭངས་རིག་པའི་ཀློང་དུ་མཐོལ་ལོ་བཤགས། །བཟོད་པར་བཞེས་ནས་ཚངས་པའི་དངོས་གྲུབ་སྩོལ། །ཧཱུྃ་རྡོ་རྗེ་ཌཱ་ཀི་གཙོ་འཁོར་ཡབ་ཡུམ་བཅས། །སུམ་བརྒྱ་དྲུག་ཅུ་གསན་ཅིང་དགོངས་སུ་གསོལ། །ལྟ་བ་མ་རྟོགས་ལོག་དང་རྟོགས་བརྫུས་དང་། །ཁ་ལྟ་བདུད་དབང་སོང་དང་ལོག་པར་བལྟས། །ཡིད་དཔྱོད་མཐའ་བྲལ་ཀློང་དུ་མཐོལ་ལོ་བཤགས། །ཧཱུྃ་རིན་ཆེན་ཌཱ་ཀི་ཡབ་ཡུམ་གཙོ་འཁོར་བཅས། །ཡབ་ཡུམ་བཅུ་དྲུག་གསན་ཅིང་དགོངས་སུ་གསོལ། །མཉམ་གཞག་ཏིང་འཛིན་དོན་ལས་གཡེལ་གྱུར་ཏེ། །མ་གསལ་མ་རིག་བསྐྱེད་(༡༢༦)རྫོགས་དོན་མ་བསྒོམས། །གསལ་སྟོང་བདེ་ཆེན་ངང་དུ་མཐོལ་ལོ་བཤགས། །ཧཱུྃ་པདྨ་ཌཱ་ཀི་ཡབ་ཡུམ་གཙོ་འཁོར་བཅས། །ཡབ་ཡུམ་དྲུག་ཅུ་རྩ་བཞི་གསན་ཅིང་དགོངས་སུ་གསོལ། །དུས་ལ་མ་བབས་སྤྱོད་པ་ཆོས་དང་འགལ། །མ་རིག་དབང་གིས་ལོག་པར་ཅི་སྤྱད་པ། །དམིགས་མེད་ཤར་གྲོལ་ཀློང་དུ་མཐོལ་ལོ་བཤགས། །ཧཱུྃ་སངས་རྒྱས་ཌཱ་ཀི་ཡབ་ཡུམ་གཙོ་འཁོར་བཅས། །ཡབ་ཡུམ་སུམ་ཅུ་རྩ་གཉིས་གསན་ཅིང་དགོངས་སུ་གསོལ། །ཡང་དག་དོན་གྱི་གནས་ལུགས་མ་ཤེས་ཏེ། །ཐེ་ཚོམ་དབང་གིས་འབྲས་བུའི་དོན་དང་འགལ། །རེ་དོགས་མཐའ་བྲལ་ཀློང་དུ་མཐོལ་ལོ་བཤགས། །ཧཱུྃ་ལས་ཀྱི་ཌཱ་ཀི་ཡབ་ཡུམ་གཙོ་འཁོར་བཅས། །ཡབ་ཡུམ་ཉི་ཤུ་རྩ་བརྒྱད་གསན་ཅིང་དགོངས་སུ་གསོལ། །ཕྲིན་ལས་རྣམ་བཞིའི་བསྲུང་དོན་མ་ཤེས་པས། །བྱ་བ་ཀུན་ལ་ལོག་པ་ཅི་བགྱིས་པ། །ཀུན་མཁྱེན་གསལ་བའི་ཀློང་དུ་མཐོལ་ལོ་བཤགས། །ཧཱུྃ་ཀེའུ་རི་མ་བརྒྱད་སིངྷ་ཕྲ་མེན་བརྒྱད། །སྒོ་མ་བཞི་དང་དབང་ཕྱུག་ཉི་ཤུ་བརྒྱད། །ལང་ཀ་བརྒྱད་དང་མ་བདུན་སྲིང་མོ་བཞི། །གིང་ཆེན་བཅོ་བརྒྱད་ཕོ་ཉ་དྲུག་ཅུ་བཞི། །བརྟན་མ་བཅུ་གཉིས་འཇིག་རྟེན་པ་ལ་སོགས། །ཀུན་གྱི་ཐུགས་དང་འགལ་བར་ཅི་གྱུར་པ། །ཕྱི་ནང་གསང་མཆོད་བདུད་རྩི་གཏོར་ཚོགས་དང་། །ལྟ་སྒོམ་སྤྱོད་པའི་ཏིང་འཛིན་ཐུགས་དམ་བསྐང་། །ཐུགས་དམ་བསྐང་ཞིང་ཉམས་བཤགས་དངོས་གྲུབ་ཞུ། །བདག་ཅག་མ་རིག་ལུས་ངག་ཡིད་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པ། །ཞལ་ཟས་ཚོགས་གཏོར་མཆོད་པས་སོ་སོར་བཤགས། །བདག་གིས་བཅོལ་བའི་ཕྲིན་ལས་གྲུབ་པར་མཛོད། །ཅེས་པ་དང་། ཡི་གེ་བརྒྱ་པ་བརྗོད་ནས།

ཕྲིན་ལས་བསྐུལ་བ་ནི། བྷྱོ་གནས་ལྔ་ཡེ་ཤེས་གཞལ་ཡས་ནས། །རིགས་ལྔའི་མཁའ་འགྲོ་དཔག་མེད་ཚོགས། །ཡེ་ཤེས་ལྔ་ལྡན་དུག་ལྔ་འཇོམས། །སྤྱན་གསུམ་གདངས་མིག་དགྲ་ལ་ལྟ། །ཞལ་ནས་ངན་སྔགས་དགྲ་ལ་སྒྲོགས། །ཤངས་ནས་ནད་ཀྱི་འཚུབས་མ་འཐོར། །གཏོར་ཚོགས་མཆོད་པ་འདི་བཞེས་ལ། །དགྲ་བགེགས་རང་བཞིན་དབྱིངས་སུ་སྒྲོལ། །བྷྱོ་རབ་འཇིགས་དུར་ཁྲོད་ནག་མོའི་གླིང་། །རྡོ་རྗེ་ཕག་མོ་ཡབ་ཡུམ་བཞུགས། །དམ་རྫས་བདུད་རྩི་འདི་གསོལ་ལ། །རྣམ་རྟོག་དགྲ་བགེགས་དབྱིངས་སུ་སྒྲོལ། །མཁའ་དབྱིངས་བདེ་བ་ཆེན་པོ་ནས། །རིགས་ལྔའི་མཁའ་འགྲོ་དཔག་མེད་ཚོགས། །སྐུ་མདོག་ཕྱག་མཚན་སྣ་ཚོགས་(༡༢༧)ཏེ། །རྒྱན་ཆ་མང་པོ་པུ་རུ་རུ། །སིལ་སྙན་མང་པོ་སི་ལི་ལི། །རྐང་པ་རྡོ་རྗེའི་སྒེག་འགྲོས་ཅན། །མཁའ་ལ་ཐོགས་མེད་པུན་ནུ་ནུ། །ལག་པ་གསེར་གྱི་གདུ་བུ་ཅན། །གླུ་ལེན་གར་བྱེད་ཁྱུགས་སེ་ཁྱུག །ཕྲིན་ལས་སྣ་ཚོགས་ལས་མཛད་མ། །གཏོར་ཚོགས་མཆོད་པ་འདི་བཞེས་ལ། །འདོད་དགུའི་ཕྲིན་ལས་ཐོགས་མེད་དབུས། །ཧཱུྃ་ཡུལ་གནས་ཉི་ཤུ་རྩ་བཞི་ནས། །དཔའ་བོ་དཔའ་མོ་ཉི་ཤུ་བཞི། །མཁའ་འགྲོ་བྱེ་བའི་འཁོར་དང་བཅས། །གཙོ་མོ་མི་མངོན་དབྱིངས་ན་བཞུགས། །འཁོར་གྱི་མཁའ་འགྲོ་བྱེ་བ་འབུམ། །ལ་ལ་བུད་མེད་རྒན་མོ་ལ། །རོ་ཤུན་རྙིང་པའི་ན་བཟའ་གསོལ། །ཁྲག་དང་ཞག་གི་ཐིག་ལེས་བརྒྱན། །ལ་ལ་བུད་མེད་གཞོན་ནུ་མ། །བཅུ་དྲུག་གཟུགས་མཛེས་ལང་ཚོ་རྒྱས། །སྙན་པའི་གླུ་ལེན་ཡིད་འཕྲོག་མ། །ལ་ལ་བུད་མེད་ཐ་མལ་གཟུགས། །འཇིག་རྟེན་སྤྱོད་པ་སྣ་ཚོགས་བྱེད། །ལ་ལ་སྒྱུར་བྱེད་ཆོས་མཁན་མོ། །ལ་ལ་མྱོས་བྱེད་ཆང་འཚོང་མ། །ལ་ལ་སྦྱོར་བྱེད་སྨད་འཚོང་མ། །ལ་ལ་དག་བྱེད་ཁྲུས་མཁན་མོ། །ལ་ལ་གསོད་བྱེད་ཤན་པ་མོ། །ལ་ལ་དཀའ་ཐུབ་བྲམ་ཟེ་མོ། །ལ་ལ་འཕྲོག་བྱེད་ཆོམ་རྐུན་མོ། །དེ་ལ་སོགས་ཏེ་མཐའ་ཡས་རྣམས། །གཏོར་ཚོགས་མཆོད་པ་འདི་བཞེས་ལ། །ནད་གདོན་གནོད་པ་བཟློག་པ་དང་། །བསམ་པའི་དོན་རྣམས་འགྲུབ་པར་མཛོད། །ཅེས་པས་ཕྲིན་ལས་བཅོལ་ནས། ལས་ཀྱི་སློབ་མས་ཕྱག་འཚལ་ཏེ། རྣམ་ལྔ་འདོད་པའི་ཕྱག་རྒྱ་བསྐོར་ལ། ཧོ་དཔའ་བོ་ཆེན་པོ་དགོངས་སུ་གསོལ། །འདིར་ནི་ཆོས་རྣམས་བཟང་པོར་ལྟོས། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་གསུམ། །རང་བཞིན་གཅིག་ཏུ་དགོངས་ཏེ་རོལ། །ཨ་ཧཱུྃ་སུ་ཀ་ཧོཿ ཞེས་ཐབས་ཤེས་གཉིས་ཀྱི་རྫས་ལག་པ་གཉིས་ཀྱིས་བཟུང་བ་བསྣོལ་ལ་དྲང་ངོ་། །ལེན་པ་པོས་ཀྱང་ཕྱག་རྒྱ་བྱ་ཞིང་མཉམ་དུ། བདེ་གཤེགས་ཆོས་ལ་རིན་ཐང་མེད། །འདོད་ཆགས་ལ་སོགས་དྲི་མ་སྤངས། །གཟུང་དང་འཛིན་པ་དང་བྲལ་བ། །དེ་བཞིན་ཉིད་ལ་བདག་ཕྱག་འཚལ། །ཨ་ལ་ལ་ཧོ། ཞེས་པས་བླངས་ལ། ལག་པའི་སོར་མོ་གཡས་པ་ལྔ་ལ་དཔའ་བོ་ལྔ་དང་ལག་མཐིལ་དུ་རྟ་མགྲིན། གཡོན་དཔའ་མོ་ལྔ་དང་རྡོ་རྗེ་ཕག་མོ་བསམས་ཏེ། སྤྲུལ་པའི་མཁའ་འགྲོ་འཕྲོ་བས་ཕུད་ཀྱིས་བླ་མ་ཡི་དམ་མཁའ་འགྲོ་སོ་སོའི་མཚན་ནས་བརྗོད་ཅིང་གཡོན་པའི་མཐེབ་སྲིན་གྱིས་མཆོད་ལ། ལག་པའི་དཔའ་བོ་ཡབ་ཡུམ་བཟའ་བཏུང་བཅུད་ཀྱིས་མཉེས་ཏེ་མཆོད་པས་ཚིམ་པར་བསམ་ཞིང་། (༡༢༨)འཁོར་ལོ་ལྔར་མཁའ་འགྲོ་དང་། ལུས་ཕྱི་ནང་དུ་དཔའ་བོ་མཁའ་འགྲོ་ཏིལ་གྱི་གང་བུ་ཁ་ཕྱེ་བ་ཙམ་དང་། ཞི་ཁྲོ་དང་བླ་མ་བརྒྱུད་པ་རྣམས་ནང་དུ་གསལ་བཏབ་ལ། བཟའ་བཏུང་རོལ་པས་མཉེས་པ་དང་། ཡ་རྐན་མ་རྐན་ལ་མཁའ་འགྲོ་ཡབ་ཡུམ་ལྔ་གསལ་བཏབ་ལ། ལྕེ་མཆོད་པའི་ལྷ་མོས་མཆོད་རྫས་ཕུལ་བས་ཤིན་ཏུ་མཉེས་པར་བསམས་ལ་རོ་ཕྱིན་པ་དང་། དགྱེས་ཤིང་ཚིམ་པས་ལོངས་སྤྱོད་དོ། །ཚོགས་ཁང་ལྷ་ཡི་གཞལ་ཡས་ཁང་། །འགྲོ་ཀུན་ལྷ་ཡི་དཀྱིལ་འཁོར་ཏེ། །བཟའ་བཏུང་བདེ་ཆེན་མཆོད་པའི་རྫས། །ཐམས་ཅད་ཡེ་ཤེས་ཆེན་པོའི་ངང་། །དགྱེས་ཤིང་རོལ་པས་ལོངས་སྤྱོད་པ། །བསོད་ནམས་ཕུང་པོ་དཔག་ཏུ་མེད། །ཀུན་ཏུ་བཟང་པོའི་རྣམ་འཕྲུལ་ཡིན། །ཤིན་ཏུ་བཟའ་བར་མི་བྱ་ཞིང་། །རྩོད་དང་ཀུ་ཅོ་བྱ་བ་མིན། །རྡོ་རྗེའི་གླུ་དང་བཀྲ་ཤིས་བརྗོད། །ཚེ་འདིར་བསམ་པ་ཀུན་འགྲུབ་ཅིང་། །ཕྱི་མ་མངོན་པར་སངས་རྒྱས་ཞིང་། །བདེ་ཆེན་མཁའ་སྤྱོད་གནས་སུ་འགྲོ། །དེ་ནས་ལྷག་མའི་གཏོར་མ་བསྡུས་ཏེ། ཚོགས་ཀྱི་སློབ་དཔོན་གྱིས་ཁ་ཕྲུ་བཏབ་ལ་མདོ་ཕྱོགས་བཞག་ལ། བྷྱོ་ལས་ཀྱི་མཁའ་འགྲོ་མི་བསྲུན་མ། །འཇིག་རྟེན་མཁའ་འགྲོ་རྫུ་འཕྲུལ་ཅན། །ཤ་ཟ་མཁའ་འགྲོ་ཡང་སྤྲུལ་དང་། །གཞན་ཡང་མཁའ་འགྲོའི་ཚོགས་མང་པོ། །ལྷག་མའི་གཏོར་མ་འདི་ཁྱེར་ལ། །བགེགས་དང་བར་ཆད་ཞི་བ་དང་། །ཡིད་ལ་བསམ་པ་ཀུན་འགྲུབ་མཛོད། །ཨོཾ་སྣ་ཚོགས་ཌཱ་ཀི་ནི། ཤ་ཟ་ཌཱ་ཀི་ནི། འཇིག་རྟེན་ཌཱ་ཀི་ཧ་རི་ནི་ས་ཁ་ཁ་ཁཱ་ཧི་ཁཱ་ཧི། ཞེས་པས་གཏོང་ངོ་། །དེ་ནས་གཏོར་མ་གཤེགས་ལ། དམིགས་པ་ཡོད་ན་ཟོར་འཕངས་པ་སྟེ། དེའི་ཕྱོགས་སུ་གཏང་བ་ནི། བྷྱོ་ང་ནི་རྣལ་འབྱོར་དམ་ཚིག་ཅན། །དགྲ་བགེགས་སྟེང་དུ་ཟོར་ཅིག་འཕེན། །མཁའ་འགྲོ་དམ་ཅན་རྒྱ་མཚོ་དང་། །འཇིག་རྟེན་དྲེགས་བྱེད་སྡེ་བརྒྱད་ཚོགས། །ཀུན་ཀྱང་དྲག་པོའི་ཟོར་ཐོགས་ནས། །དགྲ་བགེགས་སྟེང་དུ་མཱ་ར་ཡ། །ཉོན་མོངས་དུག་ལྔའི་དགྲ་བགེགས་ལ། །ཡེ་ཤེས་རྣམ་ལྔའི་ཟོར་འཕངས་པས། །སྲིད་གསུམ་འཁོར་བ་རབ་སྟོངས་ཏེ། །ཐམས་ཅད་བདེ་ཆེན་སངས་རྒྱས་ཤོག །ཅེས་བརྗོད་ནས།

བརྟན་མ་སྐྱོང་བ་ནི། བྷྱོ་དཔལ་ཆེན་ཡབ་ཡུམ་བཀའ་ཉན་མ། །ཤར་ནས་གཤེགས་པའི་མཁའ་འགྲོ་བདུན། །དྲུག་ནི་ཡེ་ཤེས་དབྱིངས་ན་བཞུགས། །གཅིག་ནི་ཐབས་ཀྱི་སྒོ་བ་མཛད། །རྡོ་རྗེ་རིགས་ཀྱི་མཁའ་འགྲོ་བདུན། །དམ་རྫས་གཏོར་མ་འདི་བཞེས་ལ། །ཁྱོད་ཀྱིས་ཞི་བའི་ལས་མཛོད་ཅིག །བྷྱོ་དཔལ་ཆེན་(༡༢༩)ཡབ་ཡུམ་བཀའ་ཉན་མ། །ལྷོ་ནས་གཤེགས་པའི་མཁའ་འགྲོ་བདུན། །དྲུག་ནི་ཡེ་ཤེས་དབྱིངས་ན་བཞུགས། །གཅིག་ནི་ཐབས་ཀྱི་སྒོ་བ་མཛད། །རིན་ཆེན་རིགས་ཀྱི་མཁའ་འགྲོ་བདུན། །དམ་རྫས་གཏོར་མ་འདི་བཞེས་ལ། །ཁྱོད་ཀྱིས་རྒྱས་པའི་ལས་མཛོད་ཅིག །བྷྱོ་དཔལ་ཆེན་ཡབ་ཡུམ་བཀའ་ཉན་མ། །ནུབ་ནས་གཤེགས་པའི་མཁའ་འགྲོ་བདུན། །དྲུག་ནི་ཡེ་ཤེས་དབྱིངས་ན་བཞུགས། །གཅིག་ནི་ཐབས་ཀྱི་སྒོ་བ་མཛད། །པདྨ་རིགས་ཀྱི་མཁའ་འགྲོ་བདུན། །དམ་རྫས་གཏོར་མ་འདི་བཞེས་ལ། །ཁྱོད་ཀྱིས་དབང་གི་ལས་མཛོད་ཅིག །བྷྱོ་དཔལ་ཆེན་ཡབ་ཡུམ་བཀའ་ཉན་མ། །བྱང་ནས་གཤེགས་པའི་མཁའ་འགྲོ་བདུན། །དྲུག་ནི་ཡེ་ཤེས་དབྱིངས་ན་བཞུགས། །གཅིག་ནི་ཐབས་ཀྱི་སྒོ་བ་མཛད། །ལས་ཀྱི་རིགས་ཀྱི་མཁའ་འགྲོ་བདུན། །དམ་རྫས་གཏོར་མ་འདི་བཞེས་ལ། །ཁྱོད་ཀྱིས་དྲག་པོའི་ལས་མཛོད་ཅིག །བྷྱོ་དཔལ་ཆེན་ཡབ་ཡུམ་བདེ་གཤེགས་བཀའ་ཉན་ཚོགས། །དབང་ཕྱུག་ཉེར་བརྒྱད་མཁའ་འགྲོ་སུམ་ཅུ་གཉིས། །གིང་ཆེན་བཅོ་བརྒྱད་ལང་ཀ་དུར་ཁྲོད་བདག །མ་བདུན་སྲིང་བཞི་འབར་བརྒྱད་དྲུག་ཅུ་བཞི། །བརྟན་མ་བཅུ་གཉིས་སོ་སོའི་གཡོག་འཁོར་བཅས། །བཤེས་གཉེན་ཀློང་རྫོགས་པདྨའི་སྤྱན་སྔ་རུ། །ཁས་བླངས་དམ་བཅས་བཀའ་ཡི་གཏོར་མ་ལོངས། །ཞི་རྒྱས་དབང་དྲག་དགུག་བཅིང་གནན་གཟིར་སོགས། །བཅོལ་བའི་ཕྲིན་ལས་མ་ལུས་འགྲུབ་པར་མཛོད། །ཅེས་རོལ་མོའི་སྒྲས་གཏོར་མ་བཏང་ལ། ཕྱིར་ལོག་པ་དང་གཏོར་གཞོང་སྦུབས་ལ། དགྲ་བགེགས་ཡོད་ན་དེའི་འོག་ཏུ་ལིངྒ་བཅུག་ནས།

བྲོ་བརྡུང་ནི། ཧྲཱིཿ དམར་ནག་གྲུ་གསུམ་མེ་ཡི་དཀྱིལ་འཁོར་ནས། །འཇིགས་བྱེད་ཁྲོ་རྒྱལ་རྟ་མགྲིན་ཁྲོས་པའི་སྐུ། །གཉིས་མེད་འཁྲིལ་སྦྱོར་རྡོ་རྗེ་ཕག་མོ་ཡུམ། །མཁའ་འགྲོ་དཔའ་བོ་དམ་ཅན་རྒྱ་མཚོའི་ཚོགས། །གཉིས་འཛིན་འཁོར་བའི་བག་ཆགས་ལ། །གཉིས་མེད་རྟ་བྲོ་ཆེམས་སེ་ཆེམ། །རྟ་བྲོ་འཁོར་གཅིག་དང་པོ་ལ། །བདུད་འདུལ་འཇོམས་པ་ཆེན་པོའི་བྲོ། །ང་རྒྱལ་འཇོམས་པའི་མཁའ་འགྲོ་མ། །ཞིང་བཅུའི་ཚོགས་ལ་ད་རྡུངས་ཤིག །རྟ་བྲོ་འཁོར་གཉིས་བར་མ་ལ། །སྲིན་པོ་ཤ་ཟའི་ལོངས་སྤྱོད་བྲོ། །ཞེ་སྡང་འཇོམས་པའི་མཁའ་འགྲོ་མ། །འབྱུང་པོའི་ཚོགས་ལ་ད་རྡུངས་ཤིག །རྟ་བྲོ་འཁོར་གསུམ་ཐ་མ་ལ། །ཁམས་གསུམ་ཁྲག་ནད་ནད་ཀྱི་བྲོ། །གཏི་མུག་འཇོམས་པའི་མཁའ་འགྲོ་མ། །འཁོར་བའི་གཅོང་ནད་སྐྲན་ལ་རྡུངས། །རྡུལ་དུ་རློགས་(༡༣༠)ཤིག་དགྲ་དང་བགེགས། །རྒྱ་མཚོའི་གཏིང་སྦ་རི་རབ་མནན། །འཁོར་བསྐྱོན་ཆུ་སྲིན་ཁ་རུ་བོར། །ཨོཾ་ཨཱཿཧཱུྃ་སྟྭཾ་བྷ་ཡ་ནན། ཞེས་བྲོ་བརྡུང་ངོ་། །དེ་ནས་མེ་ཏོག་ཐོགས་ལ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་པ། །དེ་ཀུན་མགོན་པོས་བཟོད་པར་མཛོད། །ཅེས་བརྗོད་ལ། ཡི་གེ་བརྒྱ་པ་བཟླས་ནས་ཐལ་མོ་སྦྱར་ཏེ། ཡེ་ཤེས་རྣམ་དག་ལྷུན་གྱིས་གྲུབ་པའི་ལྷ། །བླ་མ་བདེ་གཤེགས་ཡེ་ཤེས་མཁའ་འགྲོ་དང་། །དུས་རྣམས་ཀུན་ཏུ་འདུ་འབྲལ་མེད་པ་ཡི། །བདེ་ཆེན་ས་ལ་རྟག་ཏུ་རོལ་པར་ཤོག །ཧེ་རུ་ཀ་དཔལ་གྲོང་ཁྱེར་དུ། །ཚོགས་ཀྱི་འཁོར་ལོས་མཆོད་པ་ཡིས། །བདག་དང་འགྲོ་བ་མ་ལུས་ཀུན། །དཀྱིལ་འཁོར་གཅིག་ཏུ་འགྲུབ་པར་ཤོག །བདག་གི་དགེ་བའི་རྩ་བ་འདི་ཡིས་ནི། །ཕན་བདེའི་འབྱུང་གནས་བསྟན་པ་འཕེལ་བ་དང་། །ཕྱོགས་རྣམས་བཀྲ་ཤིས་བདེ་ལེགས་ཕུན་སུམ་ཚོགས། །གནས་སྐབས་མཐར་ཐུག་བསམ་པ་འགྲུབ་པར་ཤོག །ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཨོཾ་བཛྲ་མུཿས་ཡེ་ཤེས་པ་གཤེགས་ནས། ཛཿཧཱུྃ་བྃ་ཧོཿས་དམ་ཚིག་གི་དཀྱིལ་འཁོར་བདག་ལ་བསྡུས་ཏེ། ཆོས་ཐམས་ཅད་རང་བཞིན་གྱིས་སྟོང་པར་མོས་པ་བྱས་ལ། ཡང་བཀྲ་ཤིས་ཀྱི་ལྷ་ཚོགས་བསམས་ཏེ། མེ་ཏོག་དང་རོལ་མོའི་སྒྲས་མགྲིན་གཅིག་ཏུ། ངོ་བོ་རང་བཞིན་ཐུགས་རྗེ་མངོན་དུ་གྱུར། །ཆོས་དབྱིངས་རྣམ་དག་ཀློང་ལ་མངའ་བརྙེས་པའི། །བླ་མ་ཡི་དམ་རྣམས་ཀྱི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །དཀར་མོ་ཞི་མཛད་གར་སྒྱུར་སྒེག་པ་མོ། །མེ་ལོང་ཡེ་ཤེས་རྡོ་རྗེ་མཁའ་འགྲོ་མ། །སྐུ་ལ་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སེར་མོ་རྒྱས་མཛད་གར་སྒྱུར་སྒེག་པ་མོ། །མཉམ་ཉིད་ཡེ་ཤེས་རིན་ཆེན་མཁའ་འགྲོ་མ། །ཡོན་ཏན་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །དམར་མོ་དབང་མཛད་གར་སྒྱུར་སྒེག་པ་མོ། །ཀུན་རྟོགས་ཡེ་ཤེས་པདྨ་མཁའ་འགྲོ་མ། །གསུང་ལ་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལྗང་གུ་ལས་མཛད་གར་སྒྱུར་སྒེག་པ་མོ། །བྱ་གྲུབ་ཡེ་ཤེས་ལས་ཀྱི་མཁའ་འགྲོ་མ། །ཕྲིན་(༡༣༡)ལས་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །མཐིང་གསལ་བྱང་ཆུབ་གར་སྒྱུར་སྒེག་པ་མོ། །ཆོས་དབྱིངས་ཡེ་ཤེས་སངས་རྒྱས་མཁའ་འགྲོ་མ། །ཐུགས་ལ་དབང་བསྒྱུར་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྣ་ཚོགས་མཁའ་འགྲོ་དུར་ཁྲོད་བརྒྱད་ཀྱི་བདག །ཚོགས་ལ་དབང་བསྒྱུར་འཇིག་རྟེན་མཁའ་འགྲོ་མ། །བཀའ་སྲུང་དམ་ཅན་རྒྱ་མཚོའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་བརྗོད་དོ། །རང་བཞིན་དགེ་བའི་ཕུན་ཚོགས་ཆུ་གཏེར་ལས། །སྟོང་པའི་འདབ་སྟོང་སྙིང་རྗེའི་སྙིང་པོ་ཅན། །ཀུན་དགའི་དུས་སྟོན་རྒྱ་ཆེར་འཕེལ་བྱེད་འདིས། །བསོད་ནམས་ཡེ་ཤེས་ཚོགས་ཆེན་རྫོགས་པར་ཤོག །སྐུ་བཞིའི་རྒྱ་མཚོ་བདེ་ཆེན་ཆུ་བཞིའི་གནས། །ཡེ་ཤེས་ཀླུ་དབང་འབྱོར་བའི་རང་བཞིན་ལས། །ཚོགས་མཆོད་རྒྱ་མཚོའི་སྤྲིན་གྱི་བླ་བྲེ་འདིས། །རང་བཞིན་དོན་གཉིས་ལྷུན་གྱིས་གྲུབ་པར་ཤོག །ཚོགས་མཆོད་རྒྱ་མཚོའི་སྤྲིན་ཞེས་བྱ་བ། ཨོ་རྒྱན་རིན་པོ་ཆེ་པདྨ་འབྱུང་གནས་ཀྱིས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས་གངས་རི་ཐོད་དཀར་གྱི་མགུལ་དུ། སྟོན་རྣམས་ཀྱི་ཟླ་བ་དང་པོ་ལ་བཀོད་པ་རྫོགས་སོ། །ཤུ་བྷཾ།། །།

ཕྱག་འཚལ་དྲི་མེད་ཟླ་རྒྱས།

༄༅། །ཕྱག་འཚལ་དྲི་མེད་ཟླ་རྒྱས་བཞུགས་སོ། །རིན་ཆེན་ཤོག་འདྲ།

༄༅། །ཨོཾ་བཛྲ་གུ་རུ་པདྨ་སིདྡྷི་ཨཱཿཧཱུྃ། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་ཡེ་ཤེས་གང་ཆེན་མཚོའི་རྒྱ་མཚོ་ལས་ལྷུན་གྱིས་གྲུབ་པའི་རང་བཞིན་རྒྱལ་སྲས་ཆེན་པོ་པདྨ་འབྱུང་གནས་ཀྱི་ཞབས་ཀྱི་པདྨོ་དྲི་མ་མེད་པ་ལ་དུས་ཐམས་ཅད་དུ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་གཟུང་དུ་གསོལ། མགོན་པོ་གདོད་ནས་རྫོགས་སངས་རྒྱས། །བདེ་ཆེན་ཡོན་ཏན་འབྱུང་བའི་མཛོད། །སངས་རྒྱས་ཀུན་གྱི་བླ་མ་མཆོག །ཀུན་བཟང་ཡབ་ཡུམ་ལ་ཕྱག་འཚལ། །རིགས་ལྔ་ཡེ་ཤེས་ལྔ་ཡི་དངོས། །རྡོ་རྗེ་འཆང་གི་ངོ་བོ་ཉིད། །ཞི་དང་ཁྲོ་ཚུལ་དཔག་མེད་སྟོན། །རྡོ་རྗེ་སེམས་དཔའ་ལ་ཕྱག་འཚལ། །རྒྱལ་བའི་ཕྲིན་ལས་དཔག་མེད་ལས། །རང་བྱུང་རིག་འཛིན་ཀུན་གྱི་གཙོ། །ལྷ་མིའི་སྟོན་པ་བླ་ན་མེད། །དགའ་རབ་རྡོ་རྗེ་ལ་ཕྱག་འཚལ། །སྤངས་དང་ཡེ་ཤེས་ཕུན་ཚོགས་ཤིང་། །སྐུ་དང་ཕྲིན་ལས་བསམ་ཡས་ཀྱི། །འགྲོ་བའི་དོན་གཉིས་རྫོགས་མཛད་པ། །ཤྲཱི་སིངྷ་ལ་ཕྱག་འཚལ། །བདེ་གཤེགས་རྒྱ་(༡༣༢)མཚོའི་རྣམ་འཕྲུལ་ལས། །རང་བྱུང་གེ་སར་པདྨའི་སྟེང་། །མཚན་རྫོགས་དཔེ་བྱད་འབར་བའི་སྐུ། །པདྨ་འབྱུང་གནས་ལ་ཕྱག་འཚལ། །ངོ་བོ་ཡེ་ནས་ཀུན་ཏུ་བཟང་། །རང་བཞིན་བདེ་གཤེགས་འོད་དཔག་མེད། །ཐུགས་རྗེ་པདྨར་སྐུ་སྤྲུལ་པ། །ཤཱཀྱ་སེང་གེ་ལ་ཕྱག་འཚལ། །སྐུ་གསུམ་མཛད་པའི་ཕྲིན་ལས་ཀྱིས། །གདུལ་བྱའི་རེ་བ་རྣམས་སྐོང་ཞིང་། །མཁའ་འགྲོ་འབར་བའི་སྤྲིན་འཕྲོ་བ། །པདྨ་རྒྱལ་པོ་ལ་ཕྱག་འཚལ། །ཇི་སྙེད་ཇི་བཞིན་ཐམས་ཅད་མཁྱེན། །སྣ་ཚོགས་ཆོས་ཀྱི་རྔ་སྒྲ་ཡིས། །བདུད་དང་མུ་སྟེགས་ཚར་གཅོད་པའི། །བློ་ལྡན་མཆོག་སྲེད་ལ་ཕྱག་འཚལ། །ཀུན་མཁྱེན་ཡེ་ཤེས་གངས་རི་ལས། །རྣམ་གྲོལ་མཆོག་གི་གོ་འཕང་བརྙེས། །དཔག་མེད་འཁོར་བའི་ཚོགས་ནང་ན། །སེང་གེའི་སྒྲ་སྒྲོགས་ལ་ཕྱག་འཚལ། །ཐུགས་རྗེའི་ཆར་སྤྲིན་རོལ་པ་ལས། །ཕན་བདེའི་གློག་ཕྲེང་ཆར་འབེབས་ཤིང་། །འགྲོ་བློའི་ཕུན་ཚོགས་རྒྱས་མཛད་པ། །པདྨ་སཾ་བྷ་ལ་ཕྱག་འཚལ། །མཁྱེན་བརྩེའི་འོད་སྟོང་དཀྱིལ་འཁོར་གྱིས། །གསུང་རབ་པདྨ་རྒྱས་མཛད་ཅིང་། །འགྲོ་བའི་ལམ་ཡང་དཀར་པོར་མཛད། །ཉི་མ་འོད་ཟེར་ལ་ཕྱག་འཚལ། །རྣམ་སྤྲུལ་དྲག་པོས་འདུལ་བ་ལ། །འཇིགས་རུང་གར་དགུའི་ཉམས་ལྡན་ཞིང་། །ལྷ་སྲིན་གདུག་པ་ཚར་གཅོད་པའི། །རྡོ་རྗེ་གྲོ་ལོད་ལ་ཕྱག་འཚལ། །མཁའ་འགྲོ་འབར་བའི་སྤྲིན་ཕུང་ལས། །དངོས་གྲུབ་བདུད་རྩིའི་ཆར་འབེབས་ཤིང་། །བདེ་ཆེན་རྒྱལ་བ་མཉེས་མཛད་ཡུམ། །མཁར་ཆེན་མཚོ་རྒྱལ་ལ་ཕྱག་འཚལ། །ཤེས་བྱའི་དཀྱིལ་འཁོར་རབ་རྒྱས་ཤིང་། །དམ་ཆོས་རིན་ཆེན་མཛོད་འཛིན་པ། །ཟབ་མོའི་དགོངས་གཏེར་རྒྱས་མཛད་པའི། །དྲི་མེད་འོད་ཟེར་ལ་ཕྱག་འཚལ། །འདི་ནས། སྐུ་གསུམ་སྙིང་པོའི་དོན་རྟོགས་ཤིང་། །མཁྱེན་བརྩེའི་རོལ་པ་དཔག་ཡས་ཀྱིས། །འགྲོ་བའི་ལམ་བཟང་སྟོན་མཛད་པ། །སྤྲུལ་སྐུ་ལེགས་ལྡན་ལ་ཕྱག་འཚལ། །ཐུགས་རྗེའི་མངའ་བདག་ཤཱཀྱའི་སྲས། །བསླབ་གསུམ་རྒྱན་གྱིས་རབ་མཛེས་ཤིང་། །ཐེག་གསུམ་སྙིང་པོའི་དོན་རྟོགས་པ། །ཤནྟ་དེ་ཝ་ལ་ཕྱག་འཚལ། །མདོ་རྒྱུད་ཤེས་བྱའི་གནས་ལ་མཁས། །བསླབ་གསུམ་རིན་ཆེན་རྒྱན་གྱིས་མཛེས། །ཨ་ཏིའི་གསང་མཛོད་འཛིན་པའི་ཕ། །ཆོས་ཀྱི་གྲགས་པ་ལ་ཕྱག་འཚལ། །གྲུབ་ཐོབ་རྗེ་ཡི་རྒྱུད་པར་འཁྲུངས། །སྣ་ཚོགས་ཐབས་ཀྱིས་འགྲོ་བ་འདུལ། །གནས་ལྔ་རིག་པའི་པཎྜི་ཏ། །ཉི་མ་འོད་ཟེར་ལ་ཕྱག་འཚལ། །བྱང་ཆུབ་སེམས་ཀྱི་དཀྱིལ་འཁོར་དུ། །བསྐྱེད་(༡༣༣)རྫོགས་གཉིས་ལ་བརྟན་པ་ཐོབ། །སྐུ་ལྔ་ཡོངས་རྫོགས་འགྲོ་བའི་མགོན། །བྱང་སེམས་ཆེན་པོ་ལ་ཕྱག་འཚལ། །རྒྱལ་བ་ཀུན་གྱི་གསང་བའི་མཛོད་འཛིན་ཅིང་། །འགྲོ་བའི་གཉེན་མཆོག་སངས་རྒྱས་མི་གཟུགས་ཅན། །གུ་རུའི་སྤྲུལ་པ་གཙུག་རྒྱན་ཆོས་ཀྱི་རྗེ། །དཔལ་ལྡན་བླ་མ་ལ་ཕྱག་འཚལ། །འདི་ཡན་ཁ་བསྐང་། ཆོས་དབྱིངས་བདེ་ཆེན་ནམ་མཁའ་ཀློང་། །ཡེ་ཤེས་མཁའ་འགྲོའི་སྤྲིན་འཕྲོ་བ། །རྒྱལ་བ་སྲས་བཅས་ཀུན་གྱི་ཡུམ། །རྡོ་རྗེ་ཕག་མོ་ལ་ཕྱག་འཚལ། །ངང་ཉིད་ཆོས་དབྱིངས་རོལ་པ་ལས། །སྣ་ཚོགས་ཐབས་ཀྱི་རྣམ་འཕྲུལ་གྱིས། །ཕྲིན་ལས་རྣམ་བཞིའི་ལས་མཛད་པ། །དམ་ཅན་རྒྱ་མཚོ་ལ་ཕྱག་འཚལ། །གཞན་ཡང་ཕྱོགས་བཅུའི་རིག་འཛིན་དང་། །བདེ་གཤེགས་ཚོགས་དང་འཕགས་པའི་ཚོགས། །མཁའ་འགྲོ་བདེ་ཆེན་རྒྱ་མཚོ་དང་། །མཆོད་འོས་ཀུན་ལ་བདག་ཕྱག་འཚལ། །ཞིང་རྣམས་ཀུན་གྱི་རྡུལ་ཕྲན་གྱི། །གྲངས་དང་མཉམ་པའི་ལུས་སྤྲུལ་ཏེ། །ཕྱི་ནང་གསང་བའི་མཆོད་སྤྲིན་ནི། །ནམ་མཁའ་རབ་འབྱམས་ཡོངས་བཀང་སྟེ། །བླ་མེད་བླ་མའི་ཚོགས་རྣམས་དང་། །རྒྱལ་དང་རྒྱལ་སྲས་འཕགས་པའི་ཚོགས། །མཆོད་འོས་རྣམས་ལ་མཆོད་པར་བགྱི། །ཐོག་མ་མེད་ནས་ལུས་དང་ངག །ཡིད་ཀྱིས་སྡིག་པའི་ལས་བགྱིས་པ། །དེ་ཀུན་རབ་ཏུ་འགྱོད་སེམས་ཀྱིས། །མཆོད་འོས་རྣམས་ཀྱི་སྤྱན་སྔར་བཤགས། །ཤེས་དང་མི་སྤང་དང་དུ་བླང་། །སྒྲུབ་དང་ཁས་བླངས་ལ་སོགས་པ། །རྩ་བ་ཡན་ལག་དམ་ཚིག་ལས། །འགལ་ཞིང་ཉམས་པ་སོ་སོར་གཤགས། །བདག་གཞན་ཀུན་གྱི་དུས་གསུམ་གྱི། །དགེ་བ་ཀུན་ལ་ཡི་རང་ཞིང་། །འགྲོ་བའི་ཁམས་དང་མོས་པ་དང་། །བློ་ཡི་རིམ་པར་ཇི་བཞིན་དུ། །ཐེག་པ་སྣ་ཚོགས་ཐབས་ཚུལ་གྱིས། །ཆོས་ཀྱི་འཁོར་ལོ་བསྐོར་བར་བསྐུལ། །དེང་ནས་སྲིད་པ་མ་སྟོང་བར། །མྱ་ངན་མི་འདའ་རྟག་བཞུགས་ནས། །ཐུགས་རྗེའི་རྣམ་འཕྲུལ་དཔག་ཡས་ཀྱིས། །འགྲོ་བའི་དོན་གཉིས་མཛད་པར་གསོལ། །བདག་གཞན་དུས་གསུམ་དགེ་བ་ཀུན། །མ་ལུས་བློ་ཡིས་གཅིག་བསྡུས་ནས། །སེམས་ཅན་ཀུན་གྱི་དོན་གྱི་ཕྱིར། །རྒྱལ་བའི་གོ་འཕང་ཐོབ་པར་ཤོག །དུས་གསུམ་སྲིད་པའི་སེམས་ཅན་ཀུན། །རྡོ་རྗེ་ཐེག་ལ་རབ་ཞུགས་ནས། །གཉིས་མེད་ཡེ་ཤེས་དོན་རྟོགས་ནས། །ཚེ་འདི་ཉིད་ལ་སངས་རྒྱས་ཤོག །རྣམ་སྨིན་འབྱུང་བའི་ལུས་འདི་ཡང་། །མངོན་སུམ་འོད་གསལ་བསྒོམས་པ་ཡིས། །རང་དེངས་འོད་ཀྱི་ཕུང་པོ་རུ། །(༡༣༤)ཚེ་འདི་ཉིད་ལ་འགྲུབ་པར་ཤོག །ཕྱོགས་མཐར་གཏུག་པའི་སེམས་ཅན་ཀུན། །བདེ་ཐོབ་སྡུག་བསྔལ་ཀུན་བྲལ་ཏེ། །དམ་པ་རྣམས་ལས་ཆོས་ཐོབ་ནས། །ཐར་པའི་གྲོང་དུ་ཕྱིན་པར་ཤོག །བདག་ཀྱང་དེང་ནས་དུས་ཀུན་ཏུ། །ཟབ་མོའི་ཆོས་རྣམས་འཛིན་པ་དང་། །རྒྱལ་བ་རྣམས་ཀྱིས་མ་བསྒྲལ་བའི། །འགྲོ་ཀུན་མ་ལུས་སྒྲོལ་བར་ཤོག །བདག་གི་བདེ་དགེའི་ཆ་ཤས་ཀྱིས། །སེམས་ཅན་རྣམས་ནི་ཉེར་འཚོ་ཞིང་། །སེམས་ཅན་སྡུག་བསྔལ་མ་ལུས་ཀུན། །བདག་ལ་སྨིན་ནས་གྲོལ་བར་ཤོག །བདག་གིས་བརྩམས་པ་ཐམས་ཅད་ཀུན། །སེམས་ཅན་དོན་ལས་མ་གཏོགས་པ། །གཞན་དུ་རྡུལ་ཙམ་མི་དམིགས་པས། །འགྲོ་བའི་དོན་གཉིས་འགྲུབ་པར་ཤོག །བར་དོའི་ཡུལ་ལ་འཇུག་པའི་ཚེ། །འོད་གསལ་རང་ངོ་ཤེས་པ་ཡིས། །གདོད་མའི་གཞི་ལ་མཐར་ཕྱིན་ནས། །སེམས་ཅན་ཀུན་དོན་འགྲུབ་པར་ཤོག །ཡེ་ཤེས་དག་པའི་རང་བཞིན་གྱིས། །སྲིད་པའི་བར་དོ་མི་མཐོང་ཞིང་། །ཕྱོགས་བཅུ་རང་བཞིན་སྤྲུལ་པའི་ཞིང་། །བགྲོད་ནས་འགྲོ་བ་སྒྲོལ་བར་ཤོག །པདྨའི་མཚོ་ལ་བུང་བ་ལྟར། །འགྲོ་ལ་ལས་འབྲེལ་ཡོངས་སྩལ་ཏེ། །དྲི་མེད་ཡེ་ཤེས་འོད་ཟེར་གྱིས། །སྐལ་ལྡན་སྣང་བ་འབྱེད་པར་ཤོག །བདག་བློའི་དགེ་ལེགས་ཕུན་ཚོགས་ཀྱིས། །འགྲོ་བའི་བསམ་པ་ཀུན་གྲུབ་སྟེ། །སྲིད་ན་འགའ་ཡང་མི་གནས་པར། །ཕྱམ་ཅིག་སངས་རྒྱས་འགྲུབ་པར་ཤོག །མཁའ་འགྲོ་སྙིང་ཏིག་གི་ཕྱག་འཚལ་དྲི་མེད་ཟླ་རྒྱས་ཞེས་བྱ་བ། ཨོ་རྒྱན་པདྨའི་ཐུགས་ཀྱི་འོད་ཟེར་བློའི་པདྨོར་རེག་པས་འཛུམ་པར་བྱས་པའི་རྣལ་འབྱོར་པ་དྲི་མེད་འོད་ཟེར་གྱིས། སྟོན་གསུམ་གངས་རི་ཐོད་དཀར་དུ་སྦྱར་བ་རྫོགས་སོ།། །།

༼དྲི་མེད་འོད་ཟེར་གྱི་རྗེས་སུ་སྐུ་གསུམ་སྙིང་པོ་ཞེས་པ་ནས་དཔལ་ལྡན་བླ་མ་ལ་ཕྱག་འཚལ་ཞེས་པའི་བར་ཁ་བསྐང་བྱས་པ་ཞིག་ཡིན་འདྲ་བས་ངེས་པར་མཛོད།། །།༽

གསོལ་འདེབས་བདུད་རྩིའི་ཆུ་རྒྱུན།

༄༅། །གསོལ་འདེབས་བདུད་རྩིའི་ཆུ་རྒྱུན་བཞུགས་སོ། །རིན་ཆེན་ཤོག་འདྲ།

༄༅། །ཨོཾ་ཨཱཿཧཱུྃ། བྱིན་རླབས་བདུད་རྩིའི་སྤྲིན་འཁྲིགས་ཤིང་། །དངོས་གྲུབ་རྒྱ་མཚོའི་ཆར་འབེབས་པའི། །བླ་མ་ཀུན་ལ་གསོལ་བ་འདེབས། །ཅི་བསམ་འགྲུབ་པར་བྱིན་གྱིས་རློབས། །རང་བཞིན་གདོད་མའི་ཕོ་བྲང་དུ། །སྐུ་དང་ཡེ་ཤེས་འདུ་འབྲལ་མེད། །ཀུན་བཟང་ཡབ་ཡུམ་གསོལ་བ་འདེབས། །གཞི་ཐོག་གྲོལ་བར་བྱིན་གྱིས་རློབས། །བདེ་ཆེན་འོག་མིན་ཕོ་བྲང་དུ། །རིགས་ལྔ་བདེ་གཤེགས་རྡོ་རྗེ་འཆང་། །རྡོ་རྗེ་སེམས་དཔར་གསོལ་བ་འདེབས། །ལྷུན་གྲུབ་རྟོགས་པར་བྱིན་(༡༣༥)གྱིས་རློབས། །མེ་རི་འབར་བའི་ཕོ་བྲང་དུ། །ཐབས་མཁས་ཐུགས་རྗེའི་སྤྲིན་ཚོགས་ཅན། །དགའ་རབ་རྡོ་རྗེར་གསོལ་བ་འདེབས། །རིག་འཛིན་ཐོབ་པར་བྱིན་གྱིས་རློབས། །རྩུབ་འགྱུར་ཚལ་གྱི་ཕོ་བྲང་དུ། །ཡེ་ཤེས་ལྔ་ལྡན་འགྲོ་བའི་ཡབ། །ཤྲཱི་སིངྷར་གསོལ་བ་འདེབས། །གནས་ལུགས་རྟོགས་པར་བྱིན་གྱིས་རློབས། །སོ་ས་གླིང་གི་ཕོ་བྲང་དུ། །མཆོག་དང་ཐུན་མོང་དངོས་གྲུབ་བརྙེས། །པདྨ་ཐོད་ཕྲེང་གསོལ་བ་འདེབས། །སྐུ་གསུམ་འགྲུབ་པར་བྱིན་གྱིས་རློབས། །ཨོ་རྒྱན་ཡུལ་གྱི་ཕོ་བྲང་དུ། །མཁའ་འགྲོ་དཔག་མེད་ཀུན་གྱི་གཙོ། །ཡེ་ཤེས་མཚོ་རྒྱལ་གསོལ་བ་འདེབས། །བདག་རྒྱུད་གྲོལ་བར་བྱིན་གྱིས་རློབས། །རང་བྱུང་ཡེ་ཤེས་ཕོ་བྲང་དུ། །སྙིང་པོའི་དོན་རྟོགས་བྱིན་རླབས་ལྡན། །དྲི་མེད་འོད་ཟེར་གསོལ་བ་འདེབས། །འཇའ་ལུས་འགྲུབ་པར་བྱིན་གྱིས་རློབས། །

༈ ཆོས་ལྡིང་དཔལ་གྱི་ཕོ་བྲང་དུ། །ཐེག་མཆོག་ཆོས་འཁོར་ཀུན་གྱི་བདག །ཆོས་ཀྱི་གྲགས་པར་གསོལ་བ་འདེབས། །གཞན་དོན་འགྲུབ་པར་བྱིན་གྱིས་རློབས། །གྲོག་རི་ཨོ་རྒྱན་ཡང་དབེན་དུ། །བསླབ་གསུམ་ནོར་བུའི་རྒྱལ་མཚན་འཛིན། །ཉི་མ་འོད་ཟེར་གསོལ་བ་འདེབས། །དགོས་འདོད་འགྲུབ་པར་བྱིན་གྱིས་རློབས། །དཀར་པོ་ཆོས་ལུང་དགོན་པ་རུ། །རྡོ་རྗེ་སྙིང་པོའི་དངོས་གྲུབ་བརྙེས། །ཀུན་དགའ་རྒྱལ་མཚན་གསོལ་བ་འདེབས། །ཟབ་ལམ་མཐར་ཕྱིན་བྱིན་གྱིས་རློབས། །ཀུན་བཟང་གླིང་གི་ཕོ་བྲང་དུ། །ཟབ་དོན་རྒྱ་མཚོའི་བསྟན་པ་འཛིན། །ཆོས་དབྱིངས་གྲགས་པར་གསོལ་བ་འདེབས། །ཐམས་ཅད་མཁྱེན་པར་བྱིན་གྱིས་རློབས། །སྤྱི་གཙུག་ཉི་ཟླའི་གདན་སྟེང་དུ། །སྨིན་གྲོལ་མཆོག་གི་དངོས་གྲུབ་བརྙེས། །རྩ་བའི་བླ་མར་གསོལ་བ་འདེབས། །སྐུ་ལྔ་ལྷུན་གྲུབ་བྱིན་གྱིས་རློབས། །

༈ ཁྲ་མོ་བྲག་གི་ཕོ་བྲང་དུ། །ཚེ་གཅིག་སངས་རྒྱས་འགྲུབ་པའི་མཆོག །མཁའ་འགྲོ་སྙིང་ཏིག་གསོལ་བ་འདེབས། །ལྷག་མེད་འགྲུབ་པར་བྱིན་གྱིས་རློབས། །ལས་ཅན་འདུ་བའི་ཕོ་བྲང་དུ། །མཐུ་སྟོབས་རྫུ་འཕྲུལ་ཐོགས་པ་མེད། །གཏེར་སྲུང་རྣམས་ལ་གསོལ་བ་འདེབས། །བར་ཆད་ཞི་བར་བྱིན་གྱིས་རློབས། །གར་བཞུགས་ཆོས་ཀྱི་ཕོ་བྲང་དུ། །བསླབ་གསུམ་སྒྲུབ་པའི་རྒྱལ་མཚན་འཛིན། །ཆོས་མཛད་ཡོངས་ལ་གསོལ་བ་འདེབས། །བསྟན་པ་གནས་པར་བྱིན་གྱིས་རློབས། །རང་ལུས་ལྷ་ཡི་ཕོ་བྲང་དུ། །སྟོང་གསལ་ཡེ་ནས་ལྷུན་གྱིས་གྲུབ། །ཞི་ཁྲོ་རབ་འབྱམས་གསོལ་བ་འདེབས། །འོད་གསལ་འབྱོངས་པར་བྱིན་གྱིས་རློབས། །གྲགས་སྟོང་གསུང་གི་ཕོ་(༡༣༦)བྲང་དུ། །རྩ་གནས་ཡི་གེའི་འཁོར་ལོ་ཉིད། །རང་བྱུང་ཡེ་ནས་གསོལ་བ་འདེབས། །ཚངས་དབྱངས་ཐོབ་པར་བྱིན་གྱིས་རློབས། །སེམས་ཉིད་དོན་གྱི་ཕོ་བྲང་དུ། །ཐམས་ཅད་མ་སྐྱེས་མཉམ་པ་ཉིད། །རིག་སྟོང་ཆོས་སྐུར་གསོལ་བ་འདེབས། །རང་ཤར་རང་གྲོལ་བྱིན་གྱིས་རློབས། །སྣང་སྲིད་སྣོད་བཅུད་ཕོ་བྲང་དུ། །ཐམས་ཅད་ཡེ་ནས་སངས་རྒྱས་ཞིང་། །སྲིད་གསུམ་ཡོངས་ལ་གསོལ་བ་འདེབས། །མཉམ་ཉིད་རྟོགས་པར་བྱིན་གྱིས་རློབས། །མཐའ་གྲོལ་ཀློང་ཡངས་ཕོ་བྲང་དུ། །མཐའ་བྲལ་གཉིས་མེད་ནམ་མཁའི་དོན། །ལྟ་བ་མཆོག་ལ་གསོལ་བ་འདེབས། །ཕྱོགས་ལྷུང་མེད་པར་བྱིན་གྱིས་རློབས། །འོད་གསལ་དོན་གྱི་ཕོ་བྲང་དུ། །གསལ་སྟོང་གཉིས་མེད་གཉུག་མའི་དོན། །སྒོམ་པ་མཆོག་ལ་གསོལ་བ་འདེབས། །གསལ་འགྲིབ་མེད་པར་བྱིན་གྱིས་རློབས། །བླང་དོར་མེད་པའི་ཕོ་བྲང་དུ། །ཐམས་ཅད་ཡེ་ཤེས་སྒྱུ་མའི་ངང་། །སྤྱོད་པ་མཆོག་ལ་གསོལ་བ་འདེབས། །གཉིས་འཛིན་ཞིག་པར་བྱིན་གྱིས་རློབས། །རེ་དོགས་མེད་པའི་ཕོ་བྲང་དུ། །རང་རིག་འོད་གསལ་འཕོ་འགྱུར་མེད། །འབྲས་བུ་མཆོག་ལ་གསོལ་བ་འདེབས། །ཟད་སར་འཁྱོལ་བར་བྱིན་གྱིས་རློབས། །དུས་གསུམ་བདེ་གཤེགས་ཐམས་ཅད་དང་། །མཆོད་འོས་རྣམས་ལ་དུས་ཀུན་ཏུ། །སྙིང་ནས་གུས་པས་གསོལ་བ་འདེབས། །ཕྲིན་ལས་འགྲུབ་པར་བྱིན་གྱིས་རློབས། །བྱམས་དང་སྙིང་རྗེ་འབྱོངས་པ་དང་། །ངེས་འབྱུང་སྐྱོ་ཤས་སྐྱེ་བ་དང་། །ཉིན་མཚན་ཆོས་ཀྱིས་འདའ་བ་དང་། །བློ་སྣ་ཐུང་བར་བྱིན་གྱིས་རློབས། །སྣང་སྲིད་བླ་མར་རྟོགས་པ་དང་། །བྱིན་རླབས་རྒྱུན་ཆད་མེད་པ་དང་། །དག་སྣང་ཕྱོགས་མེད་འཆར་བ་དང་། །མོས་གུས་སྐྱེ་བར་བྱིན་གྱིས་རློབས། །རྟག་ཏུ་དབེན་པར་གནས་པ་དང་། །རྣམ་གཡེང་འདུ་འཛི་མེད་པ་དང་། །དངོས་འཛིན་འཁྲུལ་པ་ཞིག་པ་དང་། །ལམ་སྣ་ཟིན་པར་བྱིན་གྱིས་རློབས། །ཚེ་འདི་ཆོས་ཀྱིས་འདའ་བ་དང་། །རྟག་ཏུ་བླ་མ་མཉེས་པ་དང་། །སྒྲུབ་པ་མཐའ་རུ་ཕྱིན་པ་དང་། །གཞན་དོན་འགྲུབ་པར་བྱིན་གྱིས་རློབས། །ལས་དང་ཉོན་མོངས་ཟད་པ་དང་། །བྱང་ཆུབ་ལམ་ལ་བརྩོན་པ་དང་། །ས་དང་ལམ་རྣམས་རྫོགས་པ་དང་། །སངས་རྒྱས་འགྲུབ་པར་བྱིན་གྱིས་རློབས། །ཚེ་འདིར་འོད་ལུས་འགྲུབ་པ་དང་། །བར་དོ་རང་ངོ་ཤེས་པ་དང་། །རང་བཞིན་སྤྲུལ་པར་སྐྱེ་བ་དང་། །དོན་གཉིས་འགྲུབ་པར་བྱིན་གྱིས་རློབས། །གསོལ་འདེབས་བདུད་རྩིའི་ཆུ་རྒྱུན་གྱིས། །དགེ་བས་སྲིད་པའི་སེམས་ཅན་ཀུན། །འཁོར་བའི་རྒྱ་མཚོ་རབ་བརྒལ་ཏེ། །ཕྱམ་ཅིག་སངས་རྒྱས་འགྲུབ་པར་ཤོག །གསོལ་འདེབས་(༡༣༧)བདུད་རྩིའི་ཆུ་རྒྱུན་ཞེས་བྱ་བ། མཁའ་འགྲོ་སྙིང་ཏིག་གི་རྣལ་འབྱོར་པ་དྲི་མེད་འོད་ཟེར་གྱིས་གངས་རི་ཐོད་དཀར་གྱི་མགུལ་དུ་སྟོན་གསུམ་མེ་ཏོག་དང་འབྲས་བུ་སྨིན་པའི་དུས་སུ་སྦྱར་བ་དགེའོ།། །།

༼དྲི་མེད་འོད་ཟེར་གྱི་རྗེས་ཀྱི་ཤློ་ཀ་ལྔ་ཁ་བསྐང་ཡིན་པར་འདྲའོ།། །།༽

ཁྲིད་ཡིག་ནོར་བུ་ལུགས།

༄༅། །ཁྲིད་ཡིག་ནོར་བུ་ལུགས་བཞུགས་པ་ལགས་སོ། །རིན་ཆེན་ཤོག་འདྲ།

༄༅། །མཁའ་འགྲོ་སྙིང་ཏིག་གི་ཁྲིད་ཡིག་ནོར་བུ་ལུགས་སུ་གདབ་པ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་རྣམ་དག་ཆོས་སྐུའི་མཁའ་དབྱིངས་ལས། །ངེས་པ་ལྔ་ལྡན་གཟུགས་སྐུའི་དཀྱིལ་འཁོར་རྒྱས། །མཛད་པའི་ཟེར་གྱིས་གདུལ་བྱའི་པད་ཚལ་འཛུམ། །འགྲོ་ཀུན་འདྲེན་པ་དེ་ལ་ཕྱག་འཚལ་ལོ། །མཚོ་དབུས་གེ་སར་པདྨའི་སྙིང་པོ་ལ། །ཡ་མཚན་མཆོག་བརྙེས་བདེ་གཤེགས་པདྨ་ནི། །སྐུ་དང་ཡེ་ཤེས་འདུ་འབྲལ་མེད་པ་ཡིས། །འགྲོ་བའི་དོན་གཉིས་ལྷུན་གྱིས་གྲུབ་ལ་འདུད། །དཔལ་གྱི་མཆིམས་ཕུ་པདྨའི་ནགས་ཁྲོད་དུ། །མཁའ་དབྱིངས་རྣམ་དག་མཁའ་འགྲོས་བྱིན་བརླབས་ནས། །གསང་བའི་ཁྲིད་ཡིག་རབ་གསང་སྙིང་པོའི་དོན། །ནོར་བུའི་དབང་པོ་ནོར་བུའི་ལུགས་འདི་རྩོམ། །

འདིར་རྫོགས་པ་ཆེན་པོ་མཁའ་འགྲོ་སྙིང་ཏིག་གཏན་ལ་འབེབས་པར་བྱེད་དེ། དེ་ལ་བླ་མ་བརྒྱུད་པའི་རིམ་པ་དང་། དེ་ལས་བྱུང་བའི་མན་ངག་གཉིས་ལས། དང་པོ་ནི་གནས་ཕུན་སུམ་ཚོགས་པ། ཆོས་ཀྱི་དབྱིངས་ཀྱི་ཕོ་བྲང་རྣམ་དག་སྟུག་པོ་བཀོད་པ་བདེ་བའི་ཞིང་ན། སྟོན་པ་ཕུན་སུམ་ཚོགས་པ་དཔལ་ཀུན་ཏུ་བཟང་པོ་ཡབ་ཡུམ་ཆོས་སྐུ་སྤྲོས་པ་དང་བྲལ་བའི་ངང་ལས། ལོངས་སྐུ་རིགས་ལྔ་ལྷུན་རྫོགས་ཀྱི་རྣམ་པར་བཞེངས་ཏེ། ཆོས་ཕུན་སུམ་ཚོགས་པ་རང་བཞིན་རྫོགས་པ་ཆེན་པོ་འོད་ལྔ་ལྷུན་གྲུབ་ཀྱི་བསྟན་པ། འཁོར་ཕུན་སུམ་ཚོགས་པ་ལོངས་སྐུ་རྡོ་རྗེ་སེམས་དཔའ་ལ། དུས་ཕུན་སུམ་ཚོགས་པ་གཞིར་རྫོགས་འཕོ་འགྱུར་མེད་པའི་ཚེ། རང་བཞིན་གྱི་བྱིན་གྱིས་བརླབས་ཀྱིས་གསུངས། དེས་དུར་ཁྲོད་མེ་རི་འབར་བའི་གཞལ་ཡས་སུ་སྤྲུལ་པའི་སྐུ་དགའ་རབ་རྡོ་རྗེ་ལ་ཚིག་སྡེབ་སྦྱོར་ལེགས་པའི་སྒོ་ནས་གསུངས། དེས་རྩུབ་འགྱུར་ཚལ་གྱི་དུར་ཁྲོད་དུ། སློབ་དཔོན་ཆེན་པོ་ཤྲཱི་སིངྷ་ལ་གསུངས། དེས་དུར་ཁྲོད་ཆེན་པོ་སོ་སའི་གླིང་དུ། ཨོ་རྒྱན་གྱི་སློབ་དཔོན་པདྨ་ཐོད་ཕྲེང་རྩལ་ལ་གསུངས། དེས་གཞོ་སྟོད་ཏེ་སྒྲོ་བྲག་དཀར་དུ་རྡོ་རྗེ་ཕག་མོ་དང་དབྱེར་མེད་པའི་མཁའ་འགྲོ་ཡེ་ཤེས་མཚོ་རྒྱལ་ལ་གསུངས། དེས་མཆིམས་ཕུ་དཔལ་གྱི་ནགས་ཁྲོད་རི་མོ་ཅན་གྱི་དབེན་གནས་སུ་པདྨ་ལས་འབྲེལ་རྩལ་(༡༣༨)ལ་གསུངས་སོ། །

གཉིས་པ་དེ་ལས་བྱུང་བའི་གདམས་པ་ནི་ཆོས་ཀྱི་སྐུའི་བསྟན་པ་ཕུན་སུམ་ཚོགས་པ་སྟེ། ཐུན་མོང་གི་སྔོན་འགྲོས་སེམས་སྦྱང་བ་དང་། ཐུན་མོང་མ་ཡིན་པའི་སྔོན་འགྲོས་སྨིན་གྲོལ་གྱི་ལམ་ལ་འགོད་པ་གཉིས་ལས། དང་པོ་ལ། སྣང་སྲིད་བླ་མའི་ལམ་ཁྱེར། སྒྲིབ་སྦྱོང་མཎྜལ་གྱི་ལམ་ཁྱེར། ཚེ་མི་རྟག་པའི་ལམ་ཁྱེར། འཁོར་བ་རྒྱུ་འབྲས་ཀྱི་ལམ་ཁྱེར། ཚད་མེད་བཞིའི་ལམ་ཁྱེར། བྱང་ཆུབ་མཆོག་ཏུ་སེམས་བསྐྱེད་པའི་ལམ་ཁྱེར། སྒྲིབ་སྦྱོང་ཡིག་བརྒྱའི་ལམ་ཁྱེར་དང་བདུན་ལས། དང་པོ་ནི་ཆོས་ཐམས་ཅད་རང་བཞིན་གྱིས་སྟོང་པའི་ངང་ལས། ཨོ་རྒྱན་གྱི་ཡུལ་འོད་ལྔའི་ཞིང་ཁམས་རྣམ་པར་དག་པ་ན། ཐོད་པ་སྐམ་རློན་གྱི་གཞལ་མེད་ཁང་སྒོ་བཞི་རྟ་བབས་དང་ལྡན་པ་དཀྱིལ་འཁོར་གྱི་རྒྱན་ཡོངས་སུ་རྫོགས་པའི་དབུས་ན། སེང་གེ་རིན་པོ་ཆེའི་ཁྲི་རྐང་གིས་བཏེག་པའི་སྟེང་ཉི་ཟླ་པདྨའི་གདན་ལ་ཧཱུྃ་མཐིང་ནག་ལས། རང་ཉིད་པདྨ་ཐོད་ཕྲེང་སྐུ་མདོག་མཐིག་ནག་གྱད་ཀྱི་དོར་སྟབས་སུ་བཞུགས་པ། ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་དང་མཉམ་པར་སྦྱོར་བ། དབུ་སྐྲ་དམར་སེར་སྦྲུལ་ནག་དང་ཐོད་སྐམ་གྱིས་བརྒྱན་པའི་པང་ན་ཡུམ་མཁར་ཆེན་བཟའ་མཚོ་རྒྱལ་དང་མཁའ་ལྡིང་བཟའ་གཉིས་མར་མེའི་གྲིབ་མ་ལྟར་གཉིས་སུ་སྣང་ཡང་ངོ་བོ་གཅིག་པས། གྲི་གུག་དང་ཐོད་པ་འཛིན་ཅིང་ཡབ་ལ་འཁྱུད་པ། དམར་མོ་རིན་པོ་ཆེ་དང་རུས་པས་བརྒྱན་པ་སྟེ། སྒེག་པ། དཔའ་བ་མི་སྡུག་པ། རྒོད་དང་གཤེ་དང་འཇིགས་སུ་རུང་བ། སྙིང་རྗེ་རྔམ་དང་ཞི་བ་སྟེ། གར་དགུའི་ཉམས་དང་ལྡན་པའོ། །ཕྱོགས་བཞིར་ཧ་རི་ནི་ས་ལས་མཁའ་འགྲོ་བཞི་དང་། སྒོ་མ་བཞིའི་མཚན་པའོ། །གཙོ་བོའི་སྙིང་ནང་དུ་རྩ་བའི་བླ་མ་ཧེ་རུ་ཀའི་རྣམ་པར་བཞུགས་པ། སྨིན་མཚམས་སུ་པདྨ་ཐོད་ཕྲེང་ཁྲོ་བོའི་རྣམ་པ་ལ་མཚན་བརྒྱད་ཀྱིས་བསྐོར་བ། སྤྱི་བོར་ཀུན་བཟང་ཡབ་ཡུམ་ལ་བརྒྱུད་པའི་བླ་མས་བསྐོར་བའི་འོད་ཟེར་གྱིས་ཡེ་ཤེས་པ་སྤྱན་དྲངས་ལ་བསྟིམ་ནས། ཨོཾ་བཛྲ་གུ་རུ་པདྨ་སིདྡྷི་ཐོད་ཕྲེང་རྩལ་ཨཱཿཧཱུྃ། ཞེས་བཟླས་པས། སྣང་སྲིད་ཐམས་ཅད་ལྷ་དང་ལྷ་མོར་གྱུར་པ་ཐམས་ཅད་ཀྱིས་དེ་སྐད་ཅེས་བཟླས་པར་བསམས་ནས། མཐར་ཐུགས་ཀའི་བླ་མ་ལ་བསྡུས་པ་ཡང་མི་དམིགས་པར་བསམས་ལ་བསྔོ་བ་བྱའོ། །

གཉིས་པ་སྒྲིབ་སྦྱོང་མཎྜལ་གྱི་ལམ་ཁྱེར་ནི། ལེགས་པར་བཀོད་དེ་གཉིས་ཀྱིས་ལངས་ལ། ཕྱོགས་བཞི་ཐལ་མོས་སྐྱོར་ཏེ་ཕྱིའི་མཎྜལ་ཚངས་ཆེན་གྱི་བསྐལ་པ་གཅིག་བླ་མ་ཡི་དམ་མཁའ་འགྲོ་གཏེར་སྲུང་དང་བཅས་པ་ལ་འབུལ་བ་ནི། རིགས་ལྔའི་སྐུ་ལས་ཆགས་པ་འཇིག་རྟེན་ནམ་མཁའི་མཐའ་ཀླས་པ། ཟླུམ་པོ་དང་། གྲུ་བཞི་དང་། གྲུ་གསུམ་དང་། སོག་ཁ་དང་། གཞི་ཆལ་པ་ལ་སོགས་པར་བསམས་ལ། ཨོཾ་ཨཱཿཧཱུྃ། རིན་ཆེན་མཎྜལ་ཀུན་བཟང་མཆོད་པའི་སྤྲིན། །རིགས་ལྔའི་ཞིང་ཁམས་རྒྱ་མཚོས་བརྒྱན་པ་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་པ་གསུམ་དང་། གཉིས་པ་བཀོད་ལ། ཚངས་པ་རྔ་སྒྲའི་འཇིག་རྟེན་འོག་མིན་གྱི་གནས། རྣམ་དག་སྟུག་པོ་བཀོད་པ་བདེ་བའི་ཞིང་། དཀྱིལ་འཁོར་གྱི་བཀོད་པ་ཕུན་སུམ་ཚོགས་པར་དམིགས་ལ། ཡེ་ཤེས་མཎྜལ་རིན་ཆེན་གཞལ་མེད་ཁང་། །སྒོ་བཞི་རྟ་བབས་འཁོར་ལོ་རྒྱལ་མཚན་སོགས། །བཀོད་པའི་སྤྲིན་ཕུང་རྒྱ་མཚོ་ལེགས་ཕུལ་བས། །འགྲོ་ཀུན་མཁའ་སྤྱོད་བདེ་ཆེན་བགྲོད་པར་ཤོག །ཅེས་པ་གསུམ་དང་། གསུམ་པ་བཀོད་ལ། རྡོ་རྗེ་སྙིང་པོའི་འཇིག་རྟེན་རང་སྣང་རྣམ་པར་དག་པའི་འོད་གསལ་ལ་དམིགས་ལ། རང་བཞིན་མ་སྐྱེས་གདོད་ནས་འོད་གསལ་ཞིང་། །སྐུ་དང་ཐིག་ལེས་ལེགས་པར་བརྒྱན་པ་འདི། །དངོས་པོ་མཚན་མ་མེད་པར་ཕུལ་བ་ཡིས། །འགྲོ་ཀུན་གདོད་མའི་གནས་སུ་གྲོལ་བར་ཤོག །ཅེས་པ་གསུམ་གྱིས་དབུལ་ལོ། །གསུམ་པ་ཚེ་མི་རྟག་པའི་ལམ་ཁྱེར་ནི། ཕྱི་དུས་བཞིའི་འགྱུར་བ། ནང་འབྱུང་བཞིའི་འགྱུར་བ། གསང་བ་འབྱུང་བཞི་ཐིམ་ཚུལ། སྐད་ཅིག་ཐང་ཅིག་མི་རྟག་པས་ཀྱང་རང་གི་ཚེ་མི་རྟག་པར་འཆི་བར་ངེས་པར་བསྒོམས་པའོ། །བཞི་པ་འཁོར་བ་རྒྱུ་འབྲས་ཀྱི་ལམ་ཁྱེར་ནི། འཁོར་བའི་བདེ་སྡུག་དགེ་སྡིག་གི་ལས་ལས་གྱུར་པར་ཤེས་པས་སྔར་བྱས་ཀྱི་སྡིག་པ་བཤགས། ཕྱིས་བསྡམ་ཞིང་དགེ་བ་འབའ་ཞིག་བསྒྲུབ་པར་དམ་བཅའོ། །ལྔ་པ་ཚད་མེད་བཞིའི་ལམ་ཁྱེར་ནི། སེམས་ཅན་བདེ་བ་དང་མི་ལྡན་པ་རྣམས་བདེ་བ་ཕུན་སུམ་ཚོགས་པ་དང་ཕྲད། སྡུག་བསྔལ་གྱིས་ཉམ་ཐག་པ་རྣམས་དེ་དང་བྲལ། བདེ་བ་དང་སྐྱིད་པ་སེམས་ཅན་ལ་མི་འབྲལ་བར་གྱུར་ཅིག །ཉེ་རིང་ཆགས་སྡང་ཅན་རྣམས་སེམས་སྙོམས་པར་ཤོག་ཅིག་སྙམ་དུ་སྙིང་ནས་བསྒོམ་པའོ། །དྲུག་པ་བྱང་ཆུབ་མཆོག་ཏུ་སེམས་བསྐྱེད་པའི་ལམ་ཁྱེར་ནི། འདི་ལྟར་འཁོར་བའི་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པར་བྱ་སྙམ་དུ་ཀུན་རྫོབ་དང་། རང་གི་སེམས་དོན་དམ་པ་སྟོང་པ་ཉིད་ཡེ་ནས་སངས་རྒྱས་པའི་རང་བཞིན་དུ་གསལ་གདབ་པ་དོན་དམ་གྱི་བྱང་ཆུབ་མཆོག་ཏུ་སེམས་བསྐྱེད་པ། བདག་དང་མཐའ་ཡས་སེམས་ཅན་(༡༤༠)རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་གསུམ་བརྗོད་པའོ། །བདུན་པ་སྒྲིབ་སྦྱོང་ཡིག་བརྒྱའི་ལམ་ཁྱེར་ནི། སྐད་ཅིག་གིས་པད་ཟླའི་སྟེང་དུ་རང་ཉིད་རྡོ་རྗེ་སེམས་དཔའ་དཀར་པོ་ཡབ་ཡུམ། རྡོ་རྗེ་དང་དྲིལ་བུ་འཛིན་པའི་ཐུགས་ཀར་པད་ཟླའི་སྟེང་དུ་ཧཱུྃ་ལ་ཡི་གེ་བརྒྱ་པ་མཐིང་དམར་དཀར་གསུམ་གྱིས་བསྐོར་བ་ལས་འོད་ཟེར་བྱུང་། བདག་དང་སེམས་ཅན་གྱི་ལུས་ངག་ཡིད་གསུམ་གྱི་སྒྲིབ་པ་དག་པར་བསམས་ལ་ཡི་གེ་བརྒྱ་པ་ཅི་འགྲུབ་བཟླས་ཏེ། རྗེས་མི་དམིགས་པའི་ངང་ལས། རང་བཞིན་དག་པའི་དགེ་བ་འདིས། །འཁོར་བ་ངན་སོང་དོང་སྤྲུགས་ཏེ། །སྲིད་ན་འགའ་ཡང་མི་གནས་པར། །ཐམས་ཅད་སངས་རྒྱས་ཉིད་ཐོབ་ཤོག །ཅེས་བསྔོ་བ་བྱའོ། །

གཉིས་པ་ཐུན་མོང་མ་ཡིན་པ་ལ། སྨིན་གྲོལ་གྱི་ལམ་ལ་འགོད་པའི་མན་ངག །མ་སྨིན་པ་སྨིན་པར་བྱེད་པའི་དབང་དང་། སྨིན་པ་གྲོལ་བར་བྱེད་པའི་གདམས་པ་གཉིས་ལས། དང་པོ་ནི་སྐབས་འདིར་དབང་བསྐུར་རོ། །གཉིས་པ་ལ་སྔོན་འགྲོ་རྣམ་པ་གསུམ་གྱིས་སེམས་ཀྱི་ངོ་བོ་ངོ་སྤྲད་པ། དངོས་གཞི་རྣམ་པ་གསུམ་གྱིས་ཡེ་ཤེས་ཀྱི་ངོ་བོ་ངོ་སྤྲད་པ། རྗེས་རྒྱབ་ཆོས་གསུམ་གྱིས་ཡིད་ཆེས་བསྐྱེད་པ་གསུམ་ལས། དང་པོ་ལའང་ཕྱི་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་འཁྲུལ་པ་གཞིག་པ། ནང་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་སྒྲིབ་པ་སྦྱོང་བ། གསང་བ་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་གནས་ལུགས་བསྟན་པ་དང་གསུམ་ལས། དང་པོ་ལའང་གཉིས་ལས། རུ་ཤན་དབྱེ་བ་ནི་མི་མེད་པའི་ལུང་པ་སྟོང་པར་སོང་སྟེ། འགྲོ་དྲུག་ལུས་ཀྱི་སྤྱོད་པ་སྣ་ཚོགས་བྱས་པའི་མཐར། སངས་རྒྱས་ཀྱི་བཞུགས་སྟངས་བྱའོ། །འདིར་ཞག་གསུམ་བྱས་པས་ཕྱིས་སོ་སོར་མ་བྱས་ཀྱང་ཆོག་པའོ། །

གཉིས་པ་སྔོན་འགྲོ་དངོས་ནི། ལག་པ་སྤྱི་བོར་ཐལ་མོ་སྦྱར། རྒལ་ཚིགས་བསྲང་། རྐང་པའི་མཐིལ་སྤྲད་དེ་ཉིན་མཚན་མེད་པར་གནས་པའོ། །གཉིས་པ་ངག་ལའང་གཉིས་ལས། རུ་ཤན་དབྱེ་བ་ནི་དབེན་པར་སྒྲ་སྐད་སྣ་ཚོགས་པ་བརྗོད་པའི་མཐར། ཆོས་ཀྱི་སྒྲ་དབྱངས་ལ་བསླབ་བོ། །སྔོན་འགྲོ་དངོས་ལ། རྒྱས་གདབ་པ། རྩལ་སྦྱང་བ། མཉེན་བཙལ་ཞིང་ལམ་དུ་འཇུག་པ་གསུམ་ལས། དང་པོ་ལ་ཕྱི་སྣང་བ་ལ་རྒྱས་གདབ་པ་དང་། ནང་ཕུང་པོ་ལ་རྒྱས་གདབ་པ་གཉིས་ལས། དང་པོ་ནི་ཕྱི་རོལ་གྱི་སྣང་བ་ཐམས་ཅད་ཧཱུྃ་དུ་ཤར་ཤར་གསལ་བ་ལ། ཧཱུྃ་ཆུང་མང་པོས་(༡༤༡)གང་ནས་སྟེང་འོག་ཕྱོགས་མཚམས་ཐམས་ཅད་འོད་གསལ་གྱི་ཞིང་ཁམས་ཧཱུྃ་ཡེ་ཤེས་ལྔའི་རང་འོད་དང་བཅས་པས་མེ་རེ་རེ་ཁེངས་པར་བསམ་མོ། །དེའང་རི་ཧཱུྃ་ཆེན་གྱི་རྩི་ཤིང་ནགས་ཚལ་ཧཱུྃ་ཆུང་ལ་ལོ་འདབ་ཧཱུྃ་ཕྲན་དུ་བསམས་ཏེ། ཧཱུྃ་གི་གླུ་སྙན་ལ་རིང་བར་སོ་དང་། མཆུ་མ་རེག་ཙམ་དུ་བླང་ངོ་། །གཉིས་པ་ནང་ཕུང་པོ་ལ་རྒྱས་གདབ་པ་ནི། ཕྱིའི་ཧཱུྃ་དེ་རྣམས་རང་གི་ཁང་པའི་ནང་དུ་ཁ་སྣ་དང་བ་སྤུའི་ཁུང་བུ་ནས་ཚུར་ལ་སིབ་སིབ་ཐིམ་ནས་ལུས་ཀྱི་ནང་ཁེངས་པར་བསམ་མོ། །དེའང་རི་ལྟ་བུའི་ཧཱུྃ་ཆེ་བ་ནང་དུ་འཇུག་དུས་རང་གི་ལུས་ཀྱང་དེ་དང་འཚམས་པའི་ཆེ་བའམ། ཡང་ན་ཏིལ་འབྲུ་ཙམ་གྱི་ནང་དུ་ཚུད་པར་བསམས་པ་ནི། སྣང་བ་ངེས་མེད་ལ་རིག་པ་གཏད་མེད་ཤར་ནས་གྲོལ་བའོ། །གཉིས་པ་རྩལ་སྦྱང་བ་ལའང་གཉིས་ལས། ཕྱི་སྣང་བ་ལ་རྩལ་སྦྱོང་བ་ནི། ཧཱུྃ་མཐིང་ནག་ཡེ་ཤེས་ལྔའི་མེ་འོད་རེག་པ་ཙམ་གྱིས་ཐལ་བྱུང་དུ་འབིགས་པར་ནུས་པ། གང་འབིགས་པའི་ཡུལ་དང་འཚམས་པར་བསམས་ལ། སྟེང་འོག་ཕྱོགས་མཚམས་མེད་པ་འབིགས་པར་བསམས་ཤིང་། ཧཱུྃ་གི་གླུ་དྲག་ལ་ངར་ཆེ་བར་བརྗོད་དོ། །དེ་ཡང་སྣང་བ་ཐམས་ཅད་སང་སིང་། ཁྲལ་ཁྲོལ་འཇའ་ཚོན་ལྟ་བུར་མོས་པ་བྱའོ། །

གཉིས་པ་ནང་ཕུང་པོ་ལ་རྩལ་སྦྱོང་བ་ནི། རང་གི་ལུས་ཆེ་ཆུང་ཅི་རིགས་པར་སྤྲུལ་ལ། ཧཱུྃ་དེས་ཁེ་ཁོལ་མེད་པར་ཕུག་པས་ལུས་སུ་སྣང་ལ་རགས་པར་མ་གྲུབ་པར་ཆུའི་ཟླ་བ་ལྟ་བུར་མོས་པར་བྱའོ། །གསུམ་པ་མཉེན་བཙལ་ཞིང་ལམ་དུ་གཞུག་པ་ལའང་གཉིས་ལས། མཉེན་བཙལ་བ་ནི། ཤིང་སྡོང་དང་རི་ལ་སོགས་པ་ལ་ཧཱུྃ་གིས་དྲུ་བུ་ལྟར་དཀྲིས་ནས། ཕྱིར་གྲོལ་བ་ལ་ཤེས་པ་གཏད་ཅིང་ཧཱུྃ་གི་གླུ་རིང་པར་བླང་ངོ་། །གཉིས་པ་ལམ་དུ་གཞུག་པ་ནི། ཁྲུ་རེའི་སར་རི་མོ་སྲིན་འགྲོས་སུ་བྱས་པ། མཐོང་སྣང་མ་ཟད་ཀྱི་བར་ལམ་གཏོད་པ་ལ་ཧཱུྃ་ཁྲུ་གང་བ་མཐིང་ནག་གཅིག་མགྲོན་པོ་འགྲོ་བ་ལྟར་སོང་ནས། མཐོང་བ་ལས་འདས་པའི་ཕྱོགས་སུའང་སྔར་བཞིན་སོང་སྟེ་ཕྱིར་མི་ལྡོག་པར་ཧཱུྃ་དེ་སོང་བར་བསམ་ཞིང་། ཧཱུྃ་གི་གླུ་རིང་པོ་བླང་ངོ་། །གསུམ་པ་སེམས་ཀྱི་སྔོན་འགྲོ་ལའང་གཉིས་ལས། དང་པོ་རུ་ཤན་དབྱེ་བ་ནི། དབེན་པར་འགྲོ་དྲུག་གི་བདེ་སྡུག་དང་། ཆོས་དང་ཆོས་མིན་དགག་སྒྲུབ་སྣ་ཚོགས་བསམས་པའི་མཐར། བསྐྱེད་རྫོགས་ཀྱི་དོན་ལ་གཞག་གོ། །

གཉིས་པ་སྔོན་འགྲོ་དངོས་ལ་གསུམ་ལས། དང་པོ་བྱུང་ས་ལ་བརྟག་པ་ནི། སེམས་ནི་དང་པོ་གང་ནས་བྱུང་། ཕྱི་ནང་གི་ཡུལ་དང་ལུས་རྡུལ་ཕྲན་དུ་གཞིག་ཅིང་བརྟགས་པས། མ་རྙེད་པ་ནི་ཡེ་སྟོང་(༡༤༢)རྩ་བ་དང་བྲལ་བའི་དོན་རྟོགས་པའོ། །གཉིས་པ་ད་ལྟ་གང་ན་གནས་བརྟགས་པས། མ་རྙེད་པ་ནི་གཞི་མེད་ངོས་གཟུང་དང་བྲལ་བར་རྟོགས་པའོ། །གསུམ་པ་ཐ་མ་གར་འགྲོ་བརྟགས་པས་མ་རྙེད་པ་ནི་སེམས་འགྲོ་འོང་མེད་པའི་དོན་རྟོགས་པའོ། །གཉིས་པ་ནང་སྒོ་གསུམ་གྱི་སྔོན་འགྲོས་སྒྲིབ་པ་སྦྱང་བ་ནི། སྤྱི་བོར་ཨ། མགྲིན་པར་སུ། སྙིང་གར་ནྲ྇། ལྟེ་བར་ཏྲི། གསང་བར་པྲེ། རྐང་མཐིལ་དུ་བསམས་ལ། འགྲོ་དྲུག་གི་ལས་དང་བག་ཆགས་ཀྱིས་གང་བ་སོལ་དོང་གི་དུ་བ་འཐུལ་བ་ལྟ་བུའི། སྤྱི་བོར་ཨཱ། མགྲིན་པར་ཨཱཿ སྙིང་གར་ཧཱུྃ་གསུམ་ལས་མེ་འབར་བས་ཡི་གེ་དྲུག་དང་བག་ཆགས་ཀྱི་སྡིག་སྒྲིབ་ཐམས་ཅད་བསྲེགས་ནས་ལུས་ཤེལ་གོང་ལྟར་བསམས་ལ། ཨོཾ་ཨཱཿཧཱུྃ་གི་གླུ་སྙན་ལ་རིང་བ་འབུམ་ཚོ་བདུན་བཟླའོ། །

གསུམ་པ་གསང་བ་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་གནས་ལུགས་བསྟན་པ་ལ། ཞི་གནས་ཀྱི་རང་བཞིན་རྒྱུད་ལ་བསྐྱེད་པ་དང་། ལྷག་མཐོང་གི་རང་བཞིན་ངོ་སྤྲད་པ་དང་། ཟུང་འབྲེལ་གྱི་རང་བཞིན་ལ་བཟླ་བ་གསུམ་ལས། དང་པོ་ལའང་སྔོན་འགྲོ་རྣལ་དུ་དབབ་པས་ཞི་གནས་མ་སྐྱེས་པ་བསྐྱེད་པར་བྱེད་པ་དང་། དངོས་གཞི་སོར་འཇུག་པས་སྐྱེས་པ་ངོ་སྤྲད་དེ་ཉམས་སུ་བླང་ཚུལ། རྗེས་ལྟ་སྟངས་གསུམ་གྱིས་རྐྱེན་དང་བསྲེས་ཏེ་བོགས་དབྱུང་ཞིང་རྩལ་སྦྱོང་བ་གསུམ་ལས། དང་པོ་ནི་བདེ་བའི་མལ་དུ་ཉལ་ལ་ལུས་འགུལ་བསྐྱོད་དང་བྲལ་བ། ངག་སྨྲ་བརྗོད་དང་བྲལ་བ། སེམས་དྲན་བསམ་དང་བྲལ་བས་སོས་དལ། ཁོང་གློད་བག་ཕབ་ལ་ཕྱམ་གྱིས་སྐྱེ་མེད་བསམ་བརྗོད་དང་བྲལ་བའི་ངང་ལ་འཇོག་པའོ། །དེས་ནི་སེམས་སྤྲོས་བྲལ་ཞི་གནས་ཀྱི་དོན་སྐྱེ་ངེས་སོ། །

གཉིས་པ་ནི་ཉན་ཐོས་ཀྱི་ལྟ་སྟངས་རྣམ་སྣང་གི་ཆོས་བདུན་བཅས་ལ། མཉམ་པར་གཞག་ནས་ཅུང་ཟད་བརྟན་པ་དང་། བྱང་ཆུབ་སེམས་དཔའི་ལྟ་སྟངས་མིག་བར་སྣང་ལ་མདའ་གང་ཙམ་དུ་གཏད་པས་ཤེས་པ་གསལ་སྟོང་རྣམ་པར་མི་རྟོག་པའི་ཞི་གནས་ནམ་མཁའ་རྣམ་པར་དག་པའི་དཀྱིལ་ལྟ་བུ་སྤྲོས་པ་དང་བྲལ་བའི་ཡེ་ཤེས་སྐྱེ་བས་དེ་ཉིད་ངོ་སྤྲོད་དོ། །

གསུམ་པ་ནི་དེ་ཉིད་ཅུང་ཟད་བརྟན་ནས་ཁྲོ་བོའི་ལྟ་སྟངས། དང་པོ་གྱད་ཀྱི་དོར་སྟབས་ནི་ལངས་ཏེ་གོམ་པ་བགྲད་མིག་ཧར་པོར་བལྟས་ལ་ཞི་གནས་བསྒོམ་མོ། །གཉིས་པ་འཇིགས་པའི་སྒེག་འགྲོས་ནི། གོམ་པ་དལ་གྱིས་འདོར་ཞིང་ཞི་གནས་དང་བསྲེའོ། །གསུམ་པ་སེང་གེའི་མཆོངས་སྟངས་ནི། མཆོངས་རྒྱུག་རྒོད་སེམས་དགག་སྒྲུབ་ཏུ་འཕྲོར་བཅུག་ནས་ཞི་གནས་ཀྱི་དོན་ལ་རྩལ་(༡༤༣)སྦྱངས་པས། ཕྱིས་སྤྱོད་ལམ་ཐམས་ཅད་ཞི་གནས་སུ་འཆར་ངེས་སོ། །

གཉིས་པ་ལྷག་མཐོང་གི་རང་བཞིན་ངོ་སྤྲད་པ་ནི་གསུམ་ཏེ། སྔོན་འགྲོ་གསུམ་གྱིས་མ་སྐྱེས་པ་བསྐྱེད་པ། དངོས་གཞི་གསུམ་གྱིས་སྐྱེས་པ་ངོ་སྤྲད་པ་དང་། རྗེས་རང་གྲོལ་གསུམ་གྱིས་བོགས་དབྱུང་ཞིང་རྩལ་སྦྱང་བའོ། །དང་པོ་ལའང་གསུམ་ལས། དང་པོ་རྟོག་པ་རྩད་གཅོད་པ་ནི། ལུས་ངག་ཡིད་གསུམ་པོ་འདིའི་བྱེད་པ་པོ་གང་དུ་འདུག །སྐྱེ་བ་སྔ་ཕྱིར་གང་ལ་འགྲོ་བར་འདུག །དགག་སྒྲུབ་གང་ལས་འབྱུང་བར་འདུག་བརྟགས་པས་སེམས་སུ་ཤེས་པའོ། །གཉིས་པ་བར་དུ་སེམས་ཀྱི་མཚང་བཙལ་བ་ནི། དེ་ལྟར་སེམས་དང་ལུས་ངག་ཡིད་གསུམ་གཅིག་ཏུ་འདུག་གམ་ཐ་དད་དུ་འདུག །དགའ་མི་དགའ་སྙན་མི་སྙན་སྐྱིད་སྡུག་ཏུ་བྱུང་དུས་སེམས་དང་དེ་དག་གཅིག་ཏུ་འདུག་གམ། ཐ་དད་དུ་འདུག །གཅིག་ན་སེམས་ལ་ཁ་དོག་ཡོད་པར་གྱུར་ཏེ་ལུས་དང་གཅིག་པའི་ཕྱིར་རོ། །ཐ་དད་ན་སོ་སོར་གང་ན་འདུག་བརྟགས་ཤིང་དཔྱད་པས། གཅིག་ཐ་དད་རྟོགས་པས་བརྟགས་པ་མ་རྟོགས་པར་མེད་པར་ཤེས་པས་ཐམས་ཅད་སྒྲོ་བཏགས་གློ་བུར་བར་གཏན་ལ་ཕེབས་སོ། །གསུམ་པ་ཐ་མ་བྱུང་གནས་འགྲོ་གསུམ་ལ་བརྟགས་པ་ནི། དེ་ལྟར་སྒྲོ་བཏགས་གློ་བུར་གྱི་སེམས་དེ་ཕྱི་ནང་སྣོད་བཅུད་གང་ལས་བྱུང་། སེམས་ཁོ་རང་ལས་སེམས་བྱུང་ངམ་སྙམ་དུ་སེམས་ལ་དཔྱད་པས། སྐྱེ་བའི་རྒྱུས་སྟོང་། གནས་ས་གནས་མཁན་ལ་བརྟགས་པས། གནས་པའི་ངོ་བོས་སྟོང་། འགྲོ་ས་འགྲོ་མཁན་ལ་དཔྱད་པས་རང་གི་ངོ་བོས་སྟོང་པར་ཤེས་པས་དུས་གསུམ་རྩ་བ་དང་བྲལ་བའི་སེམས་སུ་ཐག་ཆོད་ཀྱི་རྟོགས་པ་ཉི་མ་ཤར་བ་ལྟར་ལྷག་གིས་སྐྱེ་ངེས་སོ། །

གཉིས་པ་སྐྱེས་པ་ངོ་སྤྲད་ཚུལ་ལ། གནས་པ་སེམས་ཀྱི་རྒྱན་དུ་ཤར་བ། འཕྲོ་བ་སེམས་ཀྱི་རོལ་པར་ཤར་བ། གཉིས་མེད་མཉམ་པའི་ངང་དུ་གནས་པའི་ངོ་སྤྲད་པ་གསུམ་ལས། དང་པོ་ནི། འཆར་ཚུལ་སྣ་ཚོགས་སུ་ཤར་ཡང་། གྲུབ་པ་གང་དུའང་མ་གྲུབ་པའི་སེམས་འདི་ལ་ལེགས་པར་ལྟོས་དང་། དགའ་མི་དགའ་ལ་སོགས་པའི་རྣམ་པ་རྣམས་སེམས་ལས་གཞན་དུ་གྲུབ་པ་ཨེ་འདུག །དགག་སྒྲུབ་ཀྱི་ཤེས་པ་དང་། དེའི་རང་བཞིན་སོ་སོར་ཨེ་འདུག །གང་སྣང་གི་ཤེས་པ་དེར་འཛིན་དང་བྲལ་བའི་ངང་ནས་ཕཊ་གྱིས་ལ་ཅེར་གྱིས་ལྟོས་ལ་ཕྱམ་གྱིས་ཞོག་དང་། རྒྱ་མཚོའི་དབའ་རླབས་ཞི་བ་ལྟར་རྟོག་ཚོགས་ཆོས་ཉིད་ཀྱི་ངང་དུ་ལྷན་གྱིས་གནས་པ་ནི། རང་གནས་ཆོས་ཉིད་ཀྱི་ངོ་བོར་ངོས་བཟུང་ལ་ཕྱིན་ཆད་སེམས་ཇི་ལྟར་གནས་ཀྱང་དེའི་ངང་ལ་ཕྱམ་གྱིས་ཞོག་ཅིག །(༡༤༤)

གཉིས་པ་ནི་ཡང་དེའི་ངང་ལས་རྟོག་པ་སྣ་ཚོགས་སུ་སྤྲོས་དང་། སྤྲོས་པའི་སེམས་དེ་སྣ་ཚོགས་སུ་ཤར་ཡང་། ངོ་བོར་མ་གྲུབ་པ་རང་གྲོལ་ཆུའི་དབའ་རླབས་དང་འདྲ་བ་འདི་ལ། འདི་ཡིན་གྱི་ཆེད་འཛིན་མ་བྱེད་པར་གང་ཤར་གྱི་རིག་པ་གཏད་མེད་ཀྱི་ངང་ལ་རང་སར་ཡན་དུ་ཆུག་དང་། ཇི་ལྟར་འཕྲོས་ཀྱང་འཕྲོས་པ་དང་གྲོལ་བ་དུས་མཉམ་དུ་གནས་པ་ནི་ཡེ་ནས་སེམས་ཀྱི་གནས་ལུགས་ཡིན། ད་ཕྱིན་ཆད་སྣ་ཚོགས་ཀྱི་རྟོག་པ་ལ་དགག་སྒྲུབ་ཀྱི་སྐྱེལ་བསུ་མ་བྱེད་པར། ད་ལྟར་གྱི་ཤེས་པ་རང་གྲོལ་གྱི་ར་བར་གཉེར་ཀ་དང་ཆེད་འཛིན་མ་བྱེད་པར་ཡན་དུ་ཆུག་མཛོད།

གསུམ་པ་ནི་དེ་ལྟར་འཕྲོ་བདོ་བའི་དུས་ན་མཚང་ཤེས་པས་གཞི་ལས་འཕགས་མི་ནུས་པར་གནས་བདོ། གནས་བདོ་བའི་དུས་ན་རང་ཤར་གྱི་རིག་པ་འགག་མེད་དུ་འཕྲོ་བདོ་ཡང་། འཕྲོ་གནས་གཉིས་སུ་མེད་པ་རྒྱ་མཚོ་ལ་རླབས་བུ་ཆུང་ཤར་ནས་ཐིམ་པ་ལྟ་བུ་སྟེ། གང་ལྟར་ཤར་ཞིང་གནས་ཀྱང་། དེར་འཛིན་གྱི་འཕྲོ་མ་མཐུད་ན་ཆོས་ཉིད་ཀྱི་རོལ་པ་ལས་མི་འདའ་བས། ད་ཕྱིན་ཆད་འཕྲོ་གནས་གཉིས་སུ་མེད་པ་ལ་རེ་དོགས་དགག་སྒྲུབ་ཀྱི་འཛིན་པས་མ་བསླད་པར་མཐའ་གྲོལ་ཀློང་ཡངས་ཆེན་པོར་ངོས་བཟུང་ཞིག །

གསུམ་པ་ཟུང་འཇུག་གཉིས་མེད་དུ་ལ་བཟླ་བ་ནི། དེ་ལྟར་གནས་པའི་ཆ་ནས་ཞི་གནས། གསལ་སྟོང་ཤར་གྲོལ་གྱི་ཆ་ནས་ལྷག་མཐོང་དུ་ངོ་སྤྲད་ཀྱང་། འདི་ཡིན་གྱི་གཟའ་གཏད་དང་ངོས་བཟུང་གི་ངོ་བོར་གྲུབ་པ་གང་ཡང་མེད་པས། བཟང་ངན་གྱི་ཉམས་སྣང་དང་རྟོག་ཚོགས་ཀྱི་རོལ་པ་ཐམས་ཅད་ཆོས་ཉིད་ཀྱི་དབའ་རླབས་ཤར་བ་ཡིན་པས་ཡེ་སྟོང་རྩ་བྲལ་ཆེན་པོར་ལ་ཟློས་ཤིག

གཉིས་པ་དངོས་གཞི་ཡེ་ཤེས་ཆེན་པོ་ལ་ངོ་སྤྲད་པ་ལ། རབ་ཚེ་འདིར་སངས་རྒྱས་པའི་གདམས་ངག །འབྲིང་བར་དོར་གྲོལ་བའི་གདམས་ངག །ཐ་མ་རང་བཞིན་སྤྲུལ་སྐུའི་ཞིང་དུ་སངས་རྒྱ་བའི་གདམས་ངག་གསུམ་ལས། དང་པོ་ལ་བཞུགས་སྟངས་གསུམ་ལ་གཞི་བཅའ་བ། གཟིགས་སྟངས་གསུམ་གྱིས་གནད་བསྟན་པ། སྣང་བ་བཞིའི་འཆར་ལུགས་ངོས་གཟུང་བ་དང་གསུམ་ལས། དང་པོ་ནི་སྐུ་གསུམ་གྱི་བཞུགས་སྟངས་གསུམ་སྟེ། ཆོས་སྐུའི་བཞུགས་སྟངས་སེང་གེ་ནི། ཕྱི་ཚུགས་མོར་རྐང་མཐིལ་གཉིས་སྤྲད་པའི་སྟོངས་སུ། ལག་པའི་ཁུ་ཚུར་བཞག་པ་བསྲང་ནས་མཇིང་པ་ཡུད་ཙམ་དགྱེད་དེ་མིག་སྨིན་ཕྲག་གི་ནམ་མཁའ་ལ་ཧར་པོར་བལྟ་བའོ། །ལོངས་སྐུའི་བཞུགས་སྟངས་གླང་པོ་ནི་པུས་བྲང་སྦྱར་ལ། ལག་པའི་གྲུ་མོ་ས་ལ་བཙུགས་ཏེ་སོར་མོ་འགྲམ་པ་ལ་བརྟེན་ཅིང་སྦྱར་བའོ། །སྤྲུལ་སྐུའི་དྲང་སྲོང་ཙོག་པུ་ནི། ཙོག་པུའི་ལག་པ་མཁལ་ཁུང་དུ་(༡༤༥)འཁྱུད་པའམ། པུས་མོའི་སྟེང་དུ་བསྣོལ་ནས་བཀབ་པའོ། །གཉིས་པ་ནི་མིག་གྱེན་དུ་གཟིགས་པ་འཕྲེད་དུ་བལྟ་བ། ཐུར་ལ་ཕྱེད་བཙུམ་རབ་ཏུ་ཟིམ་པས་ཉི་མའི་ངོས་ནས་ཁྲུ་གང་གིས་སར་མ་ཡེངས་པར་བལྟ་བའོ། །གསུམ་པ་ནི་སྣང་བ་མི་འདྲ་བ་བཞི་འཆར་ཏེ། ཆོས་ཉིད་མངོན་སུམ་གྱི་སྣང་བ། ཉམས་གོང་འཕེལ་གྱི་སྣང་བ། རིག་པ་ཚད་ཕེབས་ཀྱི་སྣང་བ། ཆོས་ཉིད་ཟད་པའི་སྣང་བ་དང་བཞི་ལས། དང་པོ་ནི་དེའི་ཚེ་ནམ་མཁའ་སྟོང་པ་ལ་རིག་གདངས་སྣང་བ་ཤར་ཏེ། དབྱིངས་འོད་ཁྱིམ། ཐིག་ལེ་འགྲོ་འོང་། རྡོ་རྗེ་ལུ་གུ་རྒྱུད་གསུམ་དུས་གཅིག་ཏུ་ཤར་ནས། དབྱིངས་ཀྱི་ནང་དུ་ཐིག་ལེ་སྟོང་པའི་སྒྲོན་མའི་དབུས་སུ་རྡོ་རྗེ་ལུ་གུ་རྒྱུད་བཞག་ནས་བལྟས་པས། ཤེས་པ་གསལ་སྟོང་གཉིས་མེད་ཀྱི་ཡེ་ཤེས་ཤེས་རབ་རང་བྱུང་གི་སྒྲོན་མ་ཤར་ཏེ། ཉམས་སུ་བླངས་པས་ཐིག་ལེ་སུམ་སྦྲེལ་གྱི་སྣང་བ་མཐོང་བ་ཚུན་ཆད་ཆོས་ཉིད་མངོན་སུམ་གྱི་སྣང་བའོ། །དེ་ནས་དབྱིངས་རིག་སྨིན་མཚམས་དང་བྲལ་ཏེ། དང་པོ་དབྱིངས་སྣང་འོག་རིས་ཁྲུ་གང་བ་དང་། ཐིག་ལེ་སྲན་མ་ཙམ་དང་། རིག་པ་སྐར་མདའ་རྒྱུག་པ་ཙམ་དང་། དེ་ནས་ཡང་གོམས་པས་རིམ་གྱིས། དབྱིངས་ཀྱི་སྣང་བ་རེ་ལྡེ་ཙམ་དང་། ཡུལ་གྲུ་ཙམ་དང་། སྟོང་གསུམ་ཙམ་དུ་སྣང་བ་ཐམས་ཅད་ཀྱང་། རིན་པོ་ཆེ་འདྲ་བ་དང་། དྲྭ་བ་འདྲ་བ་དང་། དེ་བཞིན་དུ་པདྨ་སྟོང་ལྡན་དང་། ཡེ་ཤེས་མཁར་ཐབས་དང་། ཉི་ཟླ་གཟའ་བྲལ་དང་། མདའ་ལྟ་བུ་དང་། མདུང་རྩེ་དང་། རྡོ་རྗེ་དང་། དྲིལ་བུ་དང་། འཁོར་ལོ་དང་། རལ་གྲི་དང་། རྩེ་གསུམ་དང་། གྲི་གུག་དང་། ཉ་མིག་གི་རྣམ་པ་འདྲ་བ་ལ་སོགས་པའོ། །ཐིག་ལེ་མེ་ལོང་ཙམ་དང་། འཁར་གཞོང་ཙམ་དང་། བསེ་ཕུབ་ཙམ་དུ་སྣང་ཞིང་། རིག་པའང་འདབ་ཆགས་ལྡིང་བ་ཙམ་དང་། རི་དྭགས་རྒྱུག་པ་ཙམ་དང་། བུང་བ་བཅུད་ལ་འཁོར་བ་ཙམ་དང་། མི་འགུལ་བར་སྡོད་ཅིང་། ཐིག་ལེ་དང་རིག་པའི་བར་དུ་རྡོ་རྗེ་སེམས་དཔའ་ལ་སོགས་པའི་སྐུ་རྐྱང་པ་ཕྲ་མོ་རེ་སྣང་བ་ཚུན་ཆད་ཉམས་གོང་འཕེལ་གྱི་སྣང་བའོ། །དེ་ནས་སྐུ་ལྔ་ལྔ་ཟུང་འབྲེལ་དུ་སྣང་བའི་ཐུགས་ཀ་དང་། རང་གི་སྙིང་གར་ཟེར་ཐག་ཕྲ་མོས་འབྲེལ་བ་ནི་རིག་པ་ཚད་ཕེབས་ཀྱི་སྣང་བའོ། །དེ་ནས་ཕྱི་ནང་གི་རྡོས་བཅས་ཉོན་མོངས་དང་རྣམ་རྟོག །འཕེལ་སྣང་དང་བཅས་པ་ཟད་དེ། སྐབས་སུ་རང་གི་ལག་སོར་ཙམ་འོད་དུ་སྣང་བ་ནི་ཆོས་ཉིད་ཟད་པའི་སྣང་བའོ། །སྣང་བ་བཞི་པོ་དེ་རྫོགས་ནས་ནང་གསལ་གདོད་མའི་གཞི་ལ་མངོན་པར་རྫོགས་པར་འཚང་རྒྱ་བ་ལ་ཐེ་ཚོམ་མེད་པ་ཡིན་ནོ། །

གཉིས་པ་འབྲིང་བར་དོར་འཚང་རྒྱ་བ་ལ། མཚོན་བྱེད་དཔེའི་ངོ་སྤྲོད་ཀྱིས་(༡༤༦)སྤྱིར་བསྟན་པ་དང་། མཚོན་བྱ་དོན་གྱི་ངོ་སྤྲོད་ཀྱིས་བྱེ་བྲག་ཏུ་བཤད་པ་གཉིས་ལས། དང་པོ་ནི་རྡོ་རྗེ་སེམས་དཔའི་མེ་ལོང་བསྟན་ལ། འཁོར་འདས་གང་དུའང་མ་ཕྱེ་བའི་སྔོན་རོལ་ན། རང་གི་རིག་པའི་ཡེ་ཤེས་དྲི་མ་མེད་པ། སྐུ་གསུམ་ཡེ་ཤེས་དང་བཅས་པ་འདི་བཞིན་དུ་གནས་ཏེ། དེ་ཡང་མན་ཤེལ་དྲི་མ་མེད་པ་ངོ་བོ་ཀ་དག་གི་སྦུབས་ན། སྐུ་ལྔ་ཡེ་ཤེས་ལྔ་དང་བཅས་པ་འོད་གསལ་དུ་གནས་པ་གཞོན་ནུ་བུམ་པའི་སྐུ་ལ་ཐུགས་རྗེ་རིག་པའི་སྙིང་པོ་ཅན་དུ་བཞུགས་པ་ནི་ཡེ་ཐོག་གཞིའི་གནས་ལུགས་སོ། །དེ་ནས་འོད་ཕྱིར་བསྟན་ལ། གཞི་སྟོང་པ་ཀ་དག་གི་ངང་ལས་ལྷུན་གྲུབ་འོད་ལྔའི་རང་བཞིན་ཕྱིར་གསལ་དུ་ཤར་དུས། འོད་ལྔ་ཡེ་ཤེས་ཀྱི་རང་གདངས་ལས། དཀར་པོ་ཕྲ་ཕྲོ་ཐུགས་རྗེར་རིག་པས། རང་སྣང་རང་ཤར་དུ་ཤེས་པས་གདོད་མའི་ཀུན་ཏུ་བཟང་པོ་གཞི་ཐོག་དེ་ཉིད་དུ་གྲོལ་བའི་དཔེའོ། །མ་ཤེས་པས་སྐད་ཅིག་གཉིས་པར་འཛིན་པ་འཕྲོ་མཐུད་པ་ལས། འོད་ལྔས་ཡུལ་དང་ལུས་ཀྱི་འཁྲུལ་གཞི་བྱས། ཕྲ་ཕྲོ་ལྟར་རིག་པ་ཐུགས་རྗེའི་རྩལ་སེམས་སུ་འཁྲུལ་ཏེ། ལས་དང་བག་ཆགས་སྣ་ཚོགས་སུ་བསགས་པས་ཁམས་གསུམ་འཁོར་བར་འཁྱམས་སོ། །ད་ལྟ་རང་གི་སྙིང་དབུས་ན་གདོད་མའི་མགོན་པོ་འོད་མི་འགྱུར་བ་དེ་མཚན་ཉིད་གསུམ་ལྡན་དུ་བཞུགས་སྟེ། ངོ་བོ་སྟོང་པ་ཤེལ་དྲི་མ་མེད་པ་ལྟར་ཀ་དག་གི་ངང་ནས། རང་བཞིན་གསལ་བ་འོད་ལྔ་ལྷུན་གྲུབ་ཏུ་གསལ་བ་ལ། ཐུགས་རྗེ་རིག་པ་ཕྲ་ཕྲོ་སྣང་བ་ལྟར་སེམས་སུ་ཡོད་དེ། ཡེ་ཤེས་ནི་སྙིང་ན་གནས་ཏེ། དེའི་གདངས་གློ་བར་སོང་བ་རླུང་གི་རྟས་ཁུར་བས་སེམས་ཞེས་བྱ་བར་སོང་སྟེ། སྣ་ཚོགས་པ་རྟོགས་ལ་ངོ་བོ་མེད་པར་ཤར་བ་འདི་རང་ཡིན་ནོ། །ཕྱིས་བེམས་རིག་བྲལ་དུས་རླུང་བར་སྣང་ལ་ཡལ་བས་གདངས་ནང་དུ་འདུས་ཏེ། རིག་པ་ལྷུན་གྲུབ་ཆེན་པོའི་སྐུ་ནང་གསལ་དུ་དར་ཅིག་གནས་པ་ལས། རྣམ་ཤེས་ནམ་མཁའ་ལ་ཐིམ། ནམ་མཁའ་འོད་གསལ་ལ་ཐིམ་དུས། སྐད་ཅིག་དང་པོར་སྟོང་གསལ་སྤྲོས་པ་དང་བྲལ་བར་གདོད་མའི་ཀ་དག་གི་སྣང་བ་དབྱར་མ་སྟོན་གྱི་ནམ་མཁའ་སྤྲིན་དང་བྲལ་བ་ལྟ་བུ་འཆར་རོ། །དེ་རང་ངོ་ཤེས་པས་སྐད་ཅིག་ལ་གདོད་མའི་ངང་དུ་གྲོལ་ལོ། །དེ་ནས་འོད་གསལ་ཟུང་འཇུག་ལ་ཐིམ་པས་ཞི་ཁྲོའི་དཀྱིལ་འཁོར་སྣང་ཞིང་། ཟུང་འཇུག་ཡེ་ཤེས་ལ་ཐིམ་པས་ཡེ་ཤེས་བཞི་སྦྱོར་སྣང་ཞིང་། ཡེ་ཤེས་ལྷུན་གྲུབ་རིན་པོ་ཆེ་ལ་ཐིམ་པས་ཡར་ཀ་དག་གི་སྣང་བ། བར་འོད་གསལ་གྱི་འཇིག་རྟེན། མར་འགྲོ་དྲུག་གི་སྣང་བ་མཐོང་སྟེ། བླ་མའི་གདམས་ངག་གི་གྲོལ་བ་ནི། ཤེལ་གྱི་ཕྱི་འོད་ནང་དུ་ཐིམ་པ་ལྟར་སྣང་(༡༤༨)ངོ་། །དེའི་ཚེ་ཤེལ་དྲི་མ་མེད་པ་ནི། ངོ་བོ་ཀ་དག་གི་སྣང་བའོ། །ཕྲ་ཕྲོ་དང་འོད་ལྔ་སྦུབས་སུ་འཁྱིལ་པ་ནི། སྤྲུལ་སྐུ་དང་ལོངས་སྐུ་ཆོས་སྐུར་ཐིམ་ནས་ནང་གསལ་བུམ་པའི་སྐུར་ཐིམ་ལ་མ་རྨུགས་པ་གཞོན་ནུ་བུམ་པའི་སྐུར་ཐུགས་རྗེ་རིག་པའི་སྙིང་པོར་བཞུགས་པའི་དཔེའོ། །དེའི་དུས་ན་འོད་ཕྱིར་མི་གསལ་ཡང་ནང་ན་ཕྲ་བའི་རྣམ་པར་ཡོད་པ་བཞིན། ཆོས་སྐུ་ཀ་དག་གི་ངང་ན་རང་བཞིན་འོད་དང་། ཐུགས་རྗེ་རིག་པའི་ཆ་ཙམ་དུ་བཞུགས་པ་ནི་ཤེས་རབ་མཁའ་ལ་འཁྱིལ་པའི་དཔེའོ། །

གཉིས་པ་མཚོན་བྱ་དོན་གྱི་ངོ་སྤྲོད་ཀྱིས་བྱེ་བྲག་ཏུ་བཤད་པ་ལ། འོད་གསལ་ཆོས་སྐུའི་སྣང་བ་ལ་གཙོ་བོར་གྲོལ་བ་རྡོ་རྗེ་སེམས་དཔའ་ཁོང་སེང་གི་ལམ་གསང་ལམ་རྒྱུད་བུ་ཆུང་གི་ངོ་སྤྲོད་ལོངས་སྤྱོད་རྫོགས་པ་སྐུའི་སྣང་བ་ལ་གཙོ་བོར་གྲོལ་བ་ཞི་ཁྲོ་དོན་གྱི་ངོ་སྤྲོད། སྤྲུལ་པ་སྐུའི་སྣང་བ་ལ་གཙོ་བོར་གྲོལ་བ་ལྷུན་གྲུབ་རིན་པོ་ཆེའི་ངོ་སྤྲོད་དང་གསུམ་ལས། དང་པོ་ལ་ཆོས་སྐུའི་སྣང་བ་ངོས་གཟུང་། ཁོང་སེང་གི་ལམ་ལ་རིག་པ་འཕོ་ཚུལ། ཕྱིར་མི་ལྡོག་པ་དཔག་ཆེན་གྱི་མདའི་གདམས་པ། གྲོལ་ནས་སེམས་ཅན་གྱི་དོན་འབྱུང་ཚུལ་དང་ལྔར་ཤེས་པར་བྱའོ། །གཉིས་པ་ལ་ཀླད་པ་དུང་ཁང་ནས་ཁྲོ་བོའི་འཆར་ཚུལ། ཙིཏྟ་རིན་པོ་ཆེ་ནས་ཞི་བའི་འཆར་ཚུལ། ཐུན་མོང་དུ་སྙིང་ཏིག་གི་དགོངས་པས་རྒྱས་པར་བསྟན་ཚུལ། དེ་རང་ངོ་ཤེས་པའི་མན་ངག་གིས་གདོད་མར་གྲོལ་ཚུལ་དང་གསུམ་ལས། མན་ངག་ལ་ཞི་ཁྲོ་རང་སྣང་དུ་ཤེས་པ་མེ་ལོང་ལ་བྱད་ཤར་བ་ལྟ་བུའི་གདམས་ངག །རང་སྣང་ལྷུན་གྲུབ་ཏུ་ཤེས་པ་ཉི་མ་སྤྲིན་ལས་གྲོལ་བ་ལྟ་བུའི་གདམས་ངག །ལྷུན་གྲུབ་རང་ངོ་ཤེས་པ་མ་པང་དུ་བུ་འཇུག་པ་ལྟ་བུའི་གདམས་ངག །དེ་ལ་བཙན་ས་ཟིན་པ་རྒྱལ་པོས་རྒྱལ་སྲིད་ཟིན་པ་ལྟ་བུའི་གདམས་ངག །དེ་ནས་གཞན་དོན་འབྱུང་བ་རྒྱལ་འབངས་བདེ་བ་ལ་འགོད་པ་ལྟ་བུའི་གདམས་ངག །གདུལ་བྱའི་དོན་མཐར་ཕྱིན་ནས་སྐུ་གསུམ་དབྱིངས་སུ་འཁྱིལ་པ་འོད་ཁྱིམ་སྦུབས་སུ་ཚུད་པ་ལྟ་བུའི་གདམས་ངག་དང་དྲུག་ཏུ་ཤེས་པར་བྱས་ལ་ངོ་སྤྲད་དོ། །གསུམ་པ་ནི་ལྷུན་གྲུབ་ཀྱི་འཆར་ཚུལ། རང་སྣང་དུ་ཤེས་ཚུལ་བསམ་གཏན་ལ་གནས་ཚུལ། དེ་ཉིད་གྲོལ་ཚུལ་དང་བཞིར་ངོ་སྤྲད་དོ། །གསུམ་པ་བརྩོན་འགྲུས་ཐ་མའི་གྲོལ་ཚུལ་ནི། ཆོས་ཉིད་བདེན་པའི་བྱིན་རླབས་ལས། ཤར་ཕྱོགས་མངོན་དགར་སྤྲུལ་སྐུའི་ཞལ་མཐོང་ནས་ཆོས་ཐོས། ལྷོ་ཕྱོགས་དཔལ་དང་ལྡན་པར་དབང་བསྐུར། ནུབ་ཕྱོགས་པདྨ་བརྩེགས་པར་ལུང་བསྟན། བྱང་ཕྱོགས་ལས་རབ་རྫོགས་པར་དབུགས་དབྱུང་། དབུས་ཁྲོ་བོའི་ཞལ་མཐོང་བས་གྲོལ་ཚུལ་དང་ལྔར་ངོ་སྤྲད་དོ། །(༡༤༨)གདམས་པའི་ངོ་སྤྲོད་བཤད་ཟིན་ཏོ།། །།

༈ གསུམ་པ་རྗེས་རྒྱབ་ཆོས་གསུམ་གྱིས་ཡིད་ཆེས་བསྐྱེད་པ་ལ། མ་སྨིན་པ་སྨིན་པར་བྱེད་པ་དབང་གི་རྒྱབ་ཆོས། སྨིན་པ་གྲོལ་བར་བྱེད་པ་གདམས་པའི་རྒྱབ་ཆོས། ཐུན་མོང་གི་མཐུན་རྐྱེན་བསྒྲུབས་ཏེ་རྒྱ་མཚོའི་རྒྱབ་ཆོས་དང་གསུམ་ལས། དང་པོ་ལ་དབང་བཞི་རིག་པའི་རྩལ་དབང་། དེ་ཉམས་སུ་བླངས་པ་བདེ་སྟོང་གཏུམ་མོ་དང་བཅས་པ། ཞལ་གདམས་གནད་ཡིག་དང་བཅས་པ་གསུམ་མོ། །གཉིས་པ་ལ་ཁྲིད་ཡིག་ངོ་སྤྲད་དང་བཅས་པ། རྒྱབ་ཆོས་རྟགས་ཚད་དང་བཅས་པ། བཏགས་གྲོལ་འདས་རྗེས་དང་བཅས་པ་གསུམ་ལས། དང་པོ་ལ་འདས་རྗེས་དོན་ཁྲིད་དང་། ནོར་བུའི་སྙིང་པོ་དང་། སྐུ་གསུམ་ལམ་གྱི་དོན་ཁྲིད་དང་གསུམ་མོ། །གཉིས་པ་ལ་དོན་གསལ་མེ་ལོང་དང་། སྙིང་པོ་གསལ་བ་དང་། རྣལ་འབྱོར་བཞི་དང་། རྟགས་ཚད་བསྟན་པ་སྟེ་བཞིའོ། །གསུམ་པ་ལ་བཏགས་གྲོལ་སྐོར་དང་། འདས་རྗེས་རྣམ་པ་གསུམ་ཏེ་གཉིས་སོ། །གསུམ་པ་ལ་རིགས་ལྔའི་བསྐྱེད་རྫོགས། མཁའ་འགྲོའི་གནད་ཡིག །བཀའ་སྲུང་གི་གཏད་རྒྱ་སྟེ་གསུམ་མོ། །དེ་དག་ནི་རགས་རིམ་ཕྱེ་བ་སྟེ། ཞིབ་ཏུ་བར་དོའི་སྐོར་དང་། རྡོའི་བཅུད་ལེན་ལ་སོགས་པ་ཆོས་སྡེ་བརྒྱད་ཅུ་རྩ་ལྔ་པོ་ཡོངས་སུ་རྫོགས་པར་སྐལ་ལྡན་སྙིང་གི་བུ་ལ་བསྟན་ནོ། །དེས་ཀྱང་ཉམས་སུ་བླངས་ཏེ་འོད་ལུས་བསྒྲུབ་པར་བྱའོ། །

འདིར་ནི་མན་ངག་སྙིང་པོའི་བཅུད་བསྡུས་ནས། །མཁའ་འགྲོ་སྙིང་ཏིག་གསང་བའི་ཁྲིད་དུ་བསྡེབས། །ཕྱི་རབས་སྐལ་ལྡན་མྱུར་དུ་ཐར་འདོད་རྣམས། །ཡི་གེ་འདི་ལ་རྟག་ཏུ་ནན་ཏན་གྱིས། །བདག་གིས་སྔོན་རབས་སྐྱེ་བར་འབད་པའི་ཆོས། །དེང་སང་ཚེ་འདིར་ཡོངས་རྫོགས་དོན་མཐོང་ནས། །གངས་རི་ཐོད་དཀར་མགུལ་དུ་ལུས་གཅིག་དྲིལ། །ཟབ་གཏེར་ཡང་གཏེར་དགོངས་གཏེར་སྙིང་ལ་བབས། །ཡི་གེ་མི་ཤེས་དོན་རྣམས་མ་སྦས་པར། །ཤོག་སེར་ཤོག་སྐྱ་ཤོག་འདྲའི་ངོས་ལ་བཀོད། །ཕྱི་རབས་སྐལ་ལྡན་རྣམས་དང་འཕྲད་པར་ཤོག །འདིར་ནི་ཁྲིད་ཡིག་ཡིད་བཞིན་ནོར་བུའི་ལུགས། །ཤིང་མོ་ཡོས་ལ་མཆིམས་ཕུར་ལུང་བསྟན་དུས། །བླ་མ་ཡི་དམ་མཁའ་འགྲོའི་ཚོགས་རྣམས་ལ། །གསོལ་བ་བཏབ་ནས་རགས་རིམ་ཡི་གེར་བཀོད། །དཔྱིད་དུས་བབས་ལུགས་ཟབ་དོན་སྙིང་པོ་རྣམས། །དངོས་དང་རྨི་ལམ་ལུང་བསྟན་ལ་བརྟེན་ནས། །ཨོ་རྒྱན་རྫོང་ཞེས་བྱ་བའི་གནས་མཆོག་ཏུ། །སྟོན་གསུམ་མེ་ཏོག་འབྲས་བུ་སྨིན་པའི་ཚེ། །འོད་ཟེར་གོ་ཆས་གསོལ་བ་བཏབ་པའི་ངོར། །ཞིབ་མོར་བསྡུས་ཏེ་ཚན་པ་གསུམ་དུ་བྱེ། །རྒྱ་(༡༤༩)ཆེ་རབ་ཟབ་ཤོག་སྐྱའི་ངོས་ལ་བཀོད། །ཡང་ཟབ་གནད་རྣམས་ཤོག་འདྲའི་ངོས་ལ་མནན། །ཟབ་མོའི་ཡང་ཟབ་ཤོག་སེར་ངོས་ལ་བཏབ། །འདི་ནི་ཤོག་འདྲའི་ཁྲིད་ཡིག་གསང་བའི་དོན། །ངོ་མཚར་རྨད་དུ་བྱུང་བའི་ཡི་གེ་ཡིན། །དགེ་བ་འདི་ཡིས་མ་ལུས་འགྲོ་བ་ཀུན། །འཁོར་བའི་རྒྱ་མཚོ་གཏིང་མཐའ་མེད་བརྒལ་ཏེ། །མྱ་ངན་འདས་པ་མཆོག་ཏུ་ཞིར་འགྲོ་བའི། །རིན་ཆེན་གླིང་དུ་ཐམས་ཅད་ཕྱིན་པར་ཤོག །བདག་ཀྱང་དེང་ནས་གངས་ཀྱི་རི་བོ་ལྟར། །རིང་དུ་གསལ་བས་འགྲོ་བའི་དོན་བྱེད་ཅིང་། །ཟབ་མོའི་དགོངས་གཏེར་དཔག་མེད་སྣང་བ་ཡིས། །འདོད་དགུའི་རེ་བ་ཡིད་བཞིན་འགྲུབ་པར་ཤོག །མཁའ་འགྲོ་སྙིང་ཏིག་གི་ཁྲིད་ཡིག་ནོར་བུ་ལུགས་སུ་གདབ་པ་ཞེས་བྱ་བ་ཨོ་རྒྱན་པདྨའི་ཐུགས་ཀྱི་འོད་ཟེར་བློའི་པདྨོར་ཤར་བས་རྒྱས་པར་བྱས་པའི་རྣལ་འབྱོར་པ་པདྨ་ལས་འབྲེལ་རྩལ་གྱིས་གངས་རི་ཐོད་དཀར་གྱི་མགུལ་དུ་བཀོད་པ་རྫོགས་སོ།། །།

ཁྲིད་ཡིག་ཉི་ཟླ་གཟའ་སྐར།

༄༅། །ཁྲིད་ཡིག་ཉི་ཟླ་གཟའ་སྐར་བཞུགས་པ་ལགས་སོ། །རིན་ཆེན་ཤོག་འདྲའི་སྐོར།

༄༅། །ཨོཾ་ཨཱཿཧཱུྃ། པདྨ་ཐོད་ཕྲེང་རྩལ་ཡབ་ཡུམ་ལ་ཕྱག་འཚལ་ལོ། །ལས་དང་སྐལ་བར་ལྡན་པ་ཞིག །སྣང་བྱེད་འོད་ཀྱི་ལུས་བསྒྲུབ་ན། །དེ་ཡི་ཁྲིད་ཡིག་རིམ་པ་ནི། །ཉི་ཟླ་གཟའ་སྐར་ལུགས་སུ་གདབ། །

འདིར་མཁའ་འགྲོ་སྙིང་ཏིག་གི་མན་ངག་གི་ཁྲིད་ཚར་བ་དང་གྲོལ་བ་དུས་མཚུངས་པར་འདོད་ན། དཔོན་སློབ་ཀུན་འཇིག་རྟེན་གྱི་བྱ་བ་སྙིང་ནས་ཐོངས་པས། རབ་ཏུ་དབེན་པའི་ནགས་ཁྲོད་དམ། རྒྱ་མཚོ་ཆུ་གླིང་ངམ། དུར་ཁྲོད་དམ། མི་མེད་པའི་ལུང་སྟོང་ཆེན་པོར་ཕྱིན་ལ། ལྟོ་གོས་ཀྱི་ཞེན་པ་བཅད། རྡོའི་བཅུད་ལེན་དང་། གཏུམ་མོའི་ལག་ཁྲིད་བསླབས་ལ། བླ་མས་སློབ་བུ་ལ། ཕྱི་ནམ་ཟླ་དུས་བཞི། ནང་འབྱུང་བཞིའི་འགྱུར་ལྡོག །གསང་བ་སྐད་ཅིག་ཐེངས་ཅིག་ཡུད་ཙམ་འགྱུར་བས་ཀྱང་རང་གི་ཚེ་མི་རྟག་པར་འཆི་ངེས་པའི་སྐྱོ་ཤས་དྲག་པོ་ཟླ་བ་གཅིག་ཏུ་བསྒོམ་དུ་བཅུག་ནས། མི་ནས་བཟུང་སྟེ་འགྲོ་དྲུག་གི་སྡུག་བསྔལ་དང་འཁོར་བའི་ཉེས་དམིགས་སེམས་པ་ལ་ཟླ་བ་གཅིག་བློ་སྦྱོང་ངོ་། །དེ་ནས་འཁོར་བའི་རྒྱུ་མི་དགེ་བར་ཤེས་པས་འདོར་ཞིང་བཤགས་པ་དང་། མྱ་ངན་ལས་འདས་པའི་རྒྱུ་དགེ་བར་ཤེས་པས་འདོར་ལེན་ལ་ཟླ་བ་གཅིག་སྦྱང་ངོ་། །དེ་ནས་དལ་འབྱོར་རྙེད་དཀའ་བསམ་སྟེ། སྒྲིབ་པ་སྦྱོང་བའི་མཆོག་ཡི་གེ་བརྒྱ་པའི་སྒོམ་བཟླས་ལ་ཟླ་བ་གཅིག་སྦྱང་ངོ་། །དེ་ནས་ཚོགས་བསག་པའི་ཡན་ལག་ཕྱི་ནང་གསང་བའི་མཎྜལ་ལ་ཟླ་བ་གཅིག་སྦྱང་ངོ་། །དེ་ནས་བྱིན་རླབས་འཇུག་པའི་གཙོ་བོ་པདྨ་ཐོད་ཕྲེང་གི་ཐུགས་སྒྲུབ་ལ་ཟླ་བ་གཅིག་སྦྱང་ངོ་། །དེ་ནས་(༡༥༠)དབང་དང་གདམས་པ་གཉིས་ཆུན་གཅིག་གིས་རྫོགས་པར་བྱེད་དེ། ཐོག་མར་མཁའ་འགྲོའི་དབང་བསྐུར་ནས། དེའི་སྒྲུབ་པ་ལ་ཟླ་བ་གསུམ་སྦྱང་ངོ་། །དེ་ནས་སྤྲོས་བཅས་བུམ་དབང་བསྐུར་ནས། རིགས་ལྔའི་ཕྱི་ནང་གི་སྒྲུབ་པ་ལ་ཟླ་བ་དྲུག་སྦྱང་ངོ་། །དེ་ནས་ལུས་རུ་ཤན་འབྱེད་པའི་སྤྱོད་པ་ལ་ཞག་ཉི་ཤུ་དང་། རྡོ་རྗེ་སྐྱིལ་ཀྲུང་ཞག་བཅུར་སྦྱང་ངོ་། །དེ་ནས་སྤྲོས་མེད་གསང་དབང་བསྐུར་ལ། ངག་རུ་ཤན་འབྱེད་པའི་སྤྱོད་པ་ཞག་ཉི་ཤུ་བྱས་ལ། ཕྱི་སྣང་བ་ལ་རྒྱས་གདབ། ནང་ཕུང་པོ་ལ་རྒྱས་གདབ། རྩལ་སྦྱང་གཉིས། མཉེན་བཙལ་ལམ་གཞུག་དང་བཅས་པ་རྣམས་ལ། ཞག་ཉི་ཤུ་ཉི་ཤུ་བྱས་ནས། ནང་གི་སྔོན་འགྲོ་ཡི་གེ་གསུམ་གྱི་བཟླས་པ་ཟླ་བ་གཅིག་དང་ཞག་བཅུ་བྱས་ལ། གཏུམ་མོ་ཟླ་བ་གཅིག་དང་། རླུང་ཟླ་བ་གསུམ་བསྒོམ་མོ། །དེ་ནས་ཤེས་རབ་ཡེ་ཤེས་ཀྱི་དབང་རྟེན་ཅན་ནམ། རྟེན་མེད་དུ་བསྐུར་ལ་ཡུམ་མཁའ་ངོ་སྤྲད་ནས། སེམས་རུ་ཤན་འབྱེད་པའི་སྤྱོད་པ་ལ་ཞག་ཉི་ཤུ། བྱུང་གནས་འགྲོ་གསུམ་ལ་ཞག་དགུར་བརྟགས་ལ། རྣལ་འབེབས་ཞག་གསུམ་དང་། སོར་འཇུག་ཞག་གསུམ་གྱིས་ཞི་གནས་ངོ་སྤྲད་ལ། མ་ནིང་གི་རླུང་ཟླ་བ་གཅིག་བསྒོམས་ལ། རྡོ་རྗེ་ཆུ་འཐུང་དང་། ཆུ་འདྲེན་ཟླ་བ་གཉིས་སྦྱངས་ཏེ། རང་ལུས་སམ་གཞན་ལུས་ལ་བརྟེན་ནས་ཟླ་བ་གསུམ་དང་ཞག་བཅུར་བདེ་སྟོང་ལ་བསླབ་བོ། །དེ་ནས་ཚིག་དབང་བླ་མའི་དབང་བསྐུར་ལ། དང་པོར་རྟོག་པ་རྩད་བཅད་པ་ལ་ཞག་གསུམ་བར་དུ་སེམས་ཀྱི་མཚང་བཙལ་བ་ལ་ཞག་གསུམ། ཐ་མ་བྱུང་གནས་འགྲོ་གསུམ་ལ་ཞག་གསུམ་གྱི་རྗེས་ལ། ལྷག་མཐོང་གི་ཡེ་ཤེས་ཁྲེགས་ཆོད་ངོ་སྤྲད་དེ། བོགས་འབྱིན་དང་རྩལ་སྦྱོང་ལ་ལུས་ངག་ཡིད་གསུམ་དྲིལ་བའི་སྤྱོད་པ་ཞག་ཉི་ཤུ་རྩ་གཅིག་བྱའོ། །དེ་ནས་སྒོ་གསུམ་གྱི་བྱ་བ་གཏང་བ་ལ་ཞག་གསུམ། བཞུགས་སྟངས་གསུམ་ལ་ཞག་གསུམ་སོང་ནས། རྩལ་དབང་བསྐུར་ཏེ་མངོན་སུམ་ངོ་སྤྲད་ནས། ཉིན་དུས་འོད་གསལ་གྱི་སྣང་བ་དང་། མཚན་དུས་བདེ་སྟོང་གི་འོད་གསལ་ཉི་ཟླ་ཁ་སྦྱོར་ཟླ་བ་དྲུག་བསྒོམས་པས། ཉམས་གོང་དུ་འཕེལ་ཏེ། ཟླ་བ་བཅུ་གཅིག་བསྒོམས་པས་རིག་པ་ཚད་ལ་ཕེབས་སོ། །དེ་ནས་ཟླ་བ་བཅུ་གསུམ་ན་ཆོས་ཉིད་ཟད་པའི་སྣང་བ་མཐོང་སྟེ་ཀ་དག་གི་གྲོལ་གཞི་ལ་བཙན་ས་ལོ་ཕྱེད་ནས་ཟིན་ཏེ་འོད་ལུས་སུ་ཡལ་ཏེ་འཚང་རྒྱའོ། །དེ་ཡང་ཆོས་ཉིད་མངོན་སུམ་གྱི་དུས་ན་བདེ་སྟོང་འོད་གསལ་དུ་ནུབ་པར་བྱེད་དོ། །ཉམས་གོང་འཕེལ་གྱི་དུས་ན་འོད་གསལ་འཛིན་མེད་དུ་ནུབ་པར་བྱེད་དོ། །རིག་པ་ཚད་ཕེབས་ཀྱི་དུས་ན་འཛིན་མེད་ཀྱི་ཤེས་པའང་མཐའ་གྲོལ་དུ་ནུབ་པར་བྱེད་དོ། །(༡༥༡)ཆོས་ཉིད་ཟད་པའི་དུས་ན་མཐའ་གྲོལ་གདོད་མའི་ཀ་དག་གི་སར་ནུབ་པར་བྱེད་དོ། །གདོད་མའི་ཀ་དག་བུམ་པའི་སྐུར་ནང་གསལ་དུ་གནས་པས། དུས་གསུམ་འཕོ་འགྱུར་མེད་པའི་དགོངས་པ་ལ་ལྷུན་གྱིས་གྲུབ་བོ། །དེ་ལྟར་མདོར་དྲིལ་བས་ཟླ་བ་བདུན་ཅུ་རྩ་གཉིས་ཏེ། ལོ་དྲུག་ན་ཟག་པ་དང་བཅས་པའི་ཕུང་པོ་མི་སྣང་བར་གདོད་མའི་ས་ལ་འཚང་རྒྱ་བར་ངེས་པའོ། །

དེ་ལྟར་རབ་གསལ་བླ་མེད་སྙིང་པོའི་དོན། །ཉི་ཟླ་གཟའ་སྐར་འཆར་ནུབ་ཚུལ་བཞིན་དུ། །འོད་གསལ་ཁ་སྦྱོར་རིན་ཆེན་སྙིང་པོའི་ཁྲིད། །ཤིང་མོ་ཡོས་ལོ་དཔྱིད་འབྲིང་ནག་པས་ཉ། །གཟའ་ཚེས་འཛོམས་པར་དཔལ་གྱི་མཆིམས་ཕུ་དེར། །པད་མ་ལས་འབྲེལ་རྩལ་ལ་དགོངས་གཏེར་བབས། །ཡང་གཅིག་དེ་ཡི་སྔ་ལོ་སྟོན་འབྲིང་ལ། །པདྨ་དཀར་པོར་བཀའ་སྲུང་སྲོག་སྒྲུབ་མས། །དགོངས་གཏེར་དཔེ་རྣམས་དངོས་སུ་གཏད་པ་རྨིས། །དེ་ནས་བཟུང་སྟེ་གཏེར་སྲུང་མཁའ་འགྲོ་རྣམས། །ལུས་དང་གྲིབ་མ་ཇི་བཞིན་ཡོད་པར་མངོན། །འདིར་ནི་གངས་རི་ཐོད་དཀར་ཨོ་རྒྱན་རྫོང་། །དབེན་ཞིང་ཉམས་དགའ་རིག་པ་འཛིན་པའི་གནས། །སྟོན་གསུམ་མེ་ཏོག་འབྲས་བུ་སྨིན་པའི་ཚེ། །ཉི་ཟླ་གཟའ་སྐར་གསང་བའི་ཁྲིད་ཡིག་འདི། །ཤོག་འདྲའི་ངོས་ལ་ཕྱི་རབས་དོན་དུ་བཀོད། །དགེ་བ་དེ་ཡིས་སྲིད་པའི་འགྲོ་བ་ཀུན། །ཚེ་འདིར་འབྲས་བུ་འོད་གསལ་ལུས་འགྲུབ་ནས། །སྤངས་དང་རྟོགས་པའི་ཡོན་ཏན་མཐར་ཕྱིན་ཏེ། །འཕོ་བ་ཆེན་པོས་གཞན་དོན་འགྲུབ་པར་ཤོག །མཁའ་འགྲོ་སྙིང་ཏིག་གི་ཁྲིད་ཡིག་ཉི་ཟླ་གཟའ་སྐར་ལུགས་སུ་གདབ་པ་ཞེས་བྱ་བ་པདྨ་ལས་འབྲེལ་རྩལ་གྱིས་གངས་རི་ཐོད་དཀར་དུ་བཀོད་པ་རྫོགས་སོ།། །།

ཟབ་མོ་རབ་འབྱེད་ཅེས་བྱ་བ།

༄༅། །ཟབ་མོ་རབ་འབྱེད་ཅེས་བྱ་བ་བཞུགས་སོ། །ཚོགས་བསགས་པ་ཡང་ཡོད། རིན་ཆེན་ཤོག་འདྲའི་སྐོར།

༄༅། །ཟབ་མོ་རབ་འབྱེད་ཅེས་བྱ་བ། དཔལ་རིན་ཆེན་འབྱུང་ལྡན་ལ་ཕྱག་འཚལ་ལོ། །ཡེ་ཤེས་འོད་སྟོང་ཉི་ཟླའི་དཀྱིལ་འཁོར་གྱིས། །བདེ་ཆེན་གླིང་བཞིའི་འཇིག་རྟེན་སྣང་བྱེད་ཅིང་། །ཀུན་གྱི་ལམ་སྟོན་ཡེ་ནས་སངས་རྒྱས་པ། །གདོད་མའི་མགོན་པོ་དེ་ལ་ཕྱག་འཚལ་ལོ། །མཁའ་འགྲོ་སྙིང་ཏིག་བཀའ་གསང་རྒྱ་ཆེ་ལས། །ཟབ་མོའི་གནད་རྣམས་རབ་ཏུ་དབྱེ་བར་བྱ། །

འདིར་ཆོས་སྐུའི་བསྟན་པ་ཕུན་སུམ་ཚོགས་པ་འཆད་པ་ལ། བླ་མ་བརྒྱུད་པའི་སྒོ་ནས་ཡིད་ཆེས་བསྐྱེད་པ་དང་། མན་ངག་གི་སྒོ་ནས་ཉམས་སུ་བླང་བ་གཉིས་ལས། དང་པོ་ནི་སྐུ་གསུམ་བདེ་བ་ཆེན་པོའི་བརྒྱུད་པ་རྣམས་སོ། །གཉིས་པ་ལ་མ་སྨིན་པ་སྨིན་པར་བྱེད་པའི་དབང་ཐོབ་ནས། དེ་ཉིད་གྲོལ་བར་བྱེད་པའི་གདམས་པ་ལ། བརྩོན་འགྲུས་རབ་ཚེ་འདིར་(༡༥༢)འཚང་རྒྱ་བའི་གདམས་ངག །འབྲིང་བར་དོར་གྲོལ་བའི་གདམས་ངག །ཐ་མ་རང་བཞིན་སྤྲུལ་སྐུའི་ཞིང་དུ་དབུགས་འབྱིན་པར་བྱེད་པའི་གདམས་ངག་དང་གསུམ་ལས། དང་པོ་ལའང་སྔོན་འགྲོས་རྣལ་ལ་དབབ། དངོས་གཞི་ངོ་སྤྲོད། མཇུག་ཉམས་སུ་བླང་ཚུལ་གསུམ་ལས། དང་པོ་ལ་སྔོན་འགྲོ་གསུམ་ཇི་ལྟར་བྱ་བ་དང་། དེས་མཉམ་པ་ཉིད་ཀྱི་ངང་དུ་རྣལ་དུ་དབབ་པ་གཉིས་ལས། དང་པོ་ལ་ལུས་ངག་ཡིད་དེ་རྣམ་པ་གསུམ་མོ། །གཉིས་པ་ལུས་ངག་ཡིད་གསུམ་ཆུ་ཆད་པའི་རང་ཐག་ལྟར་འབད་རྩོལ་བྱར་མེད་ཀྱི་ངང་ལ་གནས་པའོ། །གཉིས་པ་དངོས་གཞི་ངོ་སྤྲད་པ་ལ་གཉིས་ལས། གཞི་ཁྲེགས་ཆོད་ནི་གང་ཤར་འཛིན་མེད་ཀྱི་ཤེས་པ་གཉེན་པོའི་བློ་དང་བྲལ་བ་སྟེ། དེའང་གནས་པ་སེམས་ཀྱི་རྒྱན་དུ་ཤར་བ། འཕྲོ་བ་སེམས་ཀྱི་རོལ་པར་ཤར་བ། གཉིས་མེད་མཉམ་པའི་ངང་ལ་གནས་པ་གསུམ་ལས། དང་པོ་ནི་རང་སེམས་ཡེ་ནས་སྤྲོ་བསྡུ་དང་བྲལ་བའི་ངང་དུ། གནས་སྐབས་སེམས་ཀྱི་འཇུག་པ་ནུབ་པ་རྒྱ་མཚོ་ལ་རླབས་ཞི་བ་ལྟ་བུའོ། །གཉིས་པ་ནི་སེམས་ཉིད་མ་བཅོས་རྒྱ་མཚོའི་ངང་ལས། རྟོག་ཚོགས་དབའ་རླབས་ཀྱི་རོལ་པར་ཤར་བ་རང་འགྲོས་སུ་གྲོལ་བའོ། །གསུམ་པ་ནི་འཕྲོ་གནས་གཉིས་སུ་མེད་པས་དགག་སྒྲུབ་རེ་དོགས་གཞི་བྲལ་ཆེན་པོར་གནས་པའོ། །གཉིས་པ་ལམ་ཐོད་རྒལ་སྒོམ་པ་རྣམ་དག་གིས་རྡོས་བཅས་འོད་ལུས་སུ་དག་པར་བྱེད་པ་ནི། ལྷུན་གྲུབ་ལུས་ཀྱི་དཀྱིལ་འཁོར་ནས་དེ་བཞིན་གཤེགས་པའི་གསང་སྒོ་ཕྱེ་ནས་ཕྱི་ཡི་དབྱིངས་རྣམ་པར་དག་པའི་ནམ་མཁའ་ལ། ནང་གི་དབྱིངས་ཡེ་ཤེས་ཀྱི་སྒྲོན་མ་ཤར་བས། སྣང་སེམས་འོད་གསལ་དུ་གྲོལ་བར་བྱེད་པ་སྟེ། མཐོང་བ་བརྡའི་ཡུལ་དུ་དབང་པོས་བལྟར་ཡོད་པའོ། །གསུམ་པ་མཇུག་ཉམས་སུ་ལེན་ཚུལ་བསྟན་པ་ལ་བཞུགས་སྟངས་གསུམ་ལ་གཞི་བཅའ་བ། གཟིགས་སྟངས་གསུམ་གྱིས་གནད་བསྟན་པ། སྣང་བ་བཞིའི་འཆར་ལུགས་བསྟན་པ་དང་གསུམ་ལས། དང་པོ་ནི་སེང་གེ་གླང་པོ་དྲང་སྲོང་གསུམ་གྱིས་སྐུ་གསུམ་གཞི་ལ་བཞུགས་ཚུལ་བསྟན་པའོ། །གཉིས་པ་ནི་ཆོས་སྐུ་ལོངས་སྐུ་སྤྲུལ་སྐུ་གསུམ་གྱིས་འཆར་སྒོ་གསུམ་གྱི་གནད་བསྟན་པའོ། །འཆར་སྒོ་གསུམ་ནི། ངོ་བོ་ཆོས་སྐུའི་འཆར་སྒོ་སྟོང་ལ་ངོས་གཟུང་དང་བྲལ་བ། རང་བཞིན་ལོངས་སྐུའི་འཆར་སྒོ་འོད་ལྔ་ལྷུན་གྲུབ་ཏུ་གསལ་བ། ཐུགས་རྗེ་སྤྲུལ་སྐུའི་འཆར་སྒོ་འཕེལ་སྣང་འཕྲོ་འདུ་དང་བཅས་པའོ། །གསུམ་པ་ནི་སྣང་བ་བཞིའི་འཆར་སྒོས་ལམ་བཞིའི་དྲོད་ཚད་བཟུང་བ་སྟེ། ལམ་བཞིའི་དྲོད་ཚད་ནི། ཆོས་ཉིད་མངོན་སུམ་གྱི་སྣང་བ་(༡༥༣)ལ་ཐིག་ལེ་སུམ་སྦྲེལ་དུ་མཐོང་བས་ཚོགས་ལམ་གསུམ་ཇི་ལྟར་རྫོགས་ཚུལ། ཉམས་གོང་འཕེལ་གྱི་སྣང་བ་དབྱིངས་རིག་རྒྱ་ཆེར་སྣང་བས། རྨི་ལམ་འོད་གསལ་དུ་གྲོལ་ཏེ། སྦྱོར་ལམ་བཞི་ཇི་ལྟར་སྐྱེས་ཚུལ། རིག་པ་ཚད་ཕེབས་ཀྱི་སྣང་བ་ལ་སྐུ་དང་ཡེ་ཤེས་སུ་སྣང་བས་མཐོང་ལམ་རྣམ་པར་མི་རྟོག་པའི་ཡོན་ཏན་བརྒྱ་ཕྲག་བཅུ་གཉིས་སུ་འཆར་ཚུལ། ཆོས་ཉིད་ཟད་པའི་སྣང་བ་ལ་མཐོང་ཟིན་གྱི་དོན་ལས་བསྒོམ་དུ་མེད་པས། ཕྱི་ནང་གི་རྡོས་བཅས་རྟོག་ཚོགས་དང་བཅས་པ་ཆེ་འབྲིང་ཆུང་དགུ་ཟད་པས། སྒོམ་ལམ་ས་དགུ་ཇི་ལྟར་བགྲོད་པའི་ཚུལ་བསྟན་པའོ། །གཉིས་པ་ནི། བར་དོ་དང་པོ་ཞི་བ་ཆོས་ཀྱི་སྐུའི་སྣང་བ་ལ་ཀ་དག་ཏུ་གྲོལ་ཚུལ། གཉིས་པ་ལྷུན་གྲུབ་ལོངས་སྐུའི་བར་དོ་ལ། ལྷུན་གྲུབ་ཏུ་གྲོལ་ཚུལ། གསུམ་པ་ལྷུན་གྲུབ་སྤྲུལ་སྐུའི་སྣང་བ་ལ་གཉིས་མེད་ཡེ་ཤེས་སུ་གྲོལ་ཚུལ་དང་གསུམ་མོ། །གསུམ་པ་ནི་རང་བཞིན་སྤྲུལ་པའི་སྣང་བ་མཐོང་ཚུལ། དེ་ཉིད་དུ་ཉོན་མོངས་པའི་བག་ཆགས་སྦྱོང་ཚུལ། ཁྲོ་བོའི་སྣང་བ་ལ་གཞི་ཐོག་ཡེ་ཤེས་སུ་གྲོལ་ཚུལ་གསུམ་མོ། །དེ་དག་ཏུ་གྲོལ་བའི་ཚེ་མཐར་ཕྱིན་མི་སློབ་པའི་ལམ་དུ་སངས་རྒྱས་བྱང་ཆུབ་རིམ་པ་གསུམ་བརྙེས་ནས། སྐུ་དང་ཡེ་ཤེས་འདུ་འབྲལ་མེད་པས། སེམས་ཅན་གྱི་དོན་རང་བཞིན་ལྷུན་གྲུབ་ཏུ་མཛད་པའོ། །

དེ་ལྟར་ཟབ་དོན་སྙིང་པོའི་དབྱེ་བ་ཡིས། །སྙིང་ཏིག་རྒྱ་ཆེའི་དོན་རྣམས་བདེ་བླག་ཏུ། །རྟོགས་པར་བྱ་ཕྱིར་དྲི་མེད་འོད་ཟེར་གྱིས། །གངས་རི་ཐོད་དཀར་ཨོ་རྒྱན་རྫོང་ཞེས་པར། །རིན་ཆེན་ཤོག་འདྲའི་ངོས་ལ་ལེགས་པར་བཀོད། །དགེ་བ་འདི་ཡིས་འགྲོ་ཀུན་གྲོལ་བར་ཤོག །ཟབ་མོ་རབ་འབྱེད་ཅེས་བྱ་བ། མཁའ་འགྲོ་སྙིང་ཏིག་གི་རྣལ་འབྱོར་པ་པདྨ་ལས་འབྲེལ་རྩལ་གྱིས་སྟོན་ཀའི་དུས། མེ་ཏོག་དང་འབྲས་བུ་ལེགས་པར་སྨིན་པའི་ཚེ་བཀོད་པ་རྫོགས་སོ། །དགེ་ཞིང་བཀྲ་ཤིས།། །།

ཚོགས་བསགས་པ།

༄༅། །ཚོགས་བསགས་པ་བཞུགས་སོ། །

༄༅། །ན་མོ་པདྨ་བཛྲ་ཡེ། མཁའ་འགྲོ་སྙིང་ཏིག་གི་དབང་ཁྲིད་གདམས་པ་ལ་འཇུག་པའི་སྔོན་དུ་ཀུན་ཏུ་བཟང་པོའི་རོལ་པས་རིག་པ་ཁྱད་པར་ཅན་གྱི་ཚོགས་བསགས་པ་ནི། ལས་ཀྱི་རྡོ་རྗེ་གསུམ་ལ་སོགས་པ་རྣམས་གཙོ་བོ་ལ་ཕྱག་འཚལ་ཏེ། བླ་མ་ཡི་དམ་མཁའ་འགྲོ་ཐམས་ཅད་དབྱིངས་ནས་སྤྱན་འདྲེན་ཞིང་བཞུགས་པ་ལ་ཕྱི་ནང་གི་མཆོད་པ་དང་། ཁྲུས་དང་ན་བཟའ་དབུལ་ཞིང་། མཆོད་བསྟོད་ཀྱི་རིམ་པ་རྣམས་དམིགས་པ་སྔགས་དང་ཕྱག་རྒྱ་གཅིག་པས་མགྲིན་གཅིག་ཏུ་དབྱངས་སྙན་པོས་མཆོད་པ་ནི། ཧོ་ཆོས་དབྱིངས་རྣམ་དག་ལྷུན་གྲུབ་ཆེན་པོ་ནས། །དཔག་ཡས་ཐུགས་རྗེའི་རྣམ་(༡༥༤)འཕྲུལ་འགྱེད་པའི་ལྷ། །ཀུན་བཟང་རིགས་ལྔ་རིག་འཛིན་མཁའ་འགྲོར་བཅས། །འདིར་གཤེགས་བདག་ལ་དགོངས་ཤིང་བྱིན་གྱིས་རློབས། །གདོད་ནས་བྱང་ཆུབ་རྡོ་རྗེ་སྙིང་པོའི་གདུང་། །དཀོན་མཆོག་གསུམ་དངོས་དམ་ཆོས་རིན་ཆེན་མཛོད། །དུས་གསུམ་རྒྱལ་བའི་ཕྲིན་ལས་གཅིག་བསྡུས་པ། །ད་ལྟ་དངོས་བཞུགས་བླ་མས་བྱིན་གྱིས་རློབས། །ཨོཾ་བཛྲ་ས་མ་ཡ་ཛཿ ཨོཾ་བཛྲ་ས་མ་ཡ་སྟྭྃ། རོལ་མོ་དབྱངས་སྙན་ཡིད་འོང་བདུད་རྩིའི་ཆུས། །ཡོན་ཏན་རྒྱ་མཚོའི་ཚོགས་ལ་ཁྲུས་གསོལ་ཞིང་། །ན་བཟའ་རིན་ཆེན་རྒྱན་མཆོག་འདི་ཕུལ་བས། །འགྲོ་ཀུན་སྐྱོན་བྲལ་ཡོན་ཏན་རྫོགས་པར་ཤོག །ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡེ་ཤྲཱི་ཧཱུྃ། ཨོཾ་ཧཱུྃ་ཏྲཱྃ་ཧྲཱི་ཨཱཿ ཀ་ཡ་བྷི་ཤོ་དྷ་ན་ཡེ་ཧཱུྃ། ཨོཾ་བཛྲ་ཝསྟྲ་ཨ་ལཾ་ཀ་ར་ཡེ་སྭཱ་ཧཱ། སྣང་སྲིད་རྣམ་དག་སངས་རྒྱས་ཞིང་ཁམས་འདིར། །ཀུན་བཟང་མཆོད་པའི་སྤྲིན་ཕུང་འདི་ཕུལ་བས། །ནམ་མཁའི་མཐའ་ཀླས་གྱུར་པའི་འགྲོ་བ་རྣམས། །བསོད་ནམས་ཡེ་ཤེས་ཚོགས་ཆེན་རྫོགས་པར་ཤོག །ཨོཾ་སརྦ་ཏ་ཐཱ་ག་ཏ་བཛྲ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏྱ་ཤཔྟ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། མངོན་པར་བྱང་ཆུབ་ཆོས་སྐུ་དག་པ་ལས། །མཛད་པའི་རྣམ་འཕྲུལ་སྒྱུ་མའི་སྐུར་བཞེངས་པ། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །དམ་ཅན་རྒྱ་མཚོའི་ཚོགས་ལ་གུས་ཕྱག་འཚལ། །རྡོ་རྗེ་གདུང་འཚོབ་རྣལ་འབྱོར་ཚོགས་རྣམས་ཀྱིས། །འགལ་འཁྲུལ་ཉམས་ཆག་དེང་འདིར་སྐོང་གྱུར་ཅིག །མཆོག་དང་ཐུན་མོང་དངོས་གྲུབ་སྩོལ་བ་དང་། །བླ་མེད་ཆོས་ཀྱི་འཁོར་ལོ་བསྐོར་དུ་གསོལ། །ཨོཾ་སརྦ་ཏ་ཐཱ་ག་ཏ་ཙཀྲ་རཏྣ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། སིདྡྷི་ཕ་ལ་ཧོ། ཞེས་བརྗོད་ནས་ཕྱག་འཚལ་ཏེ། མཎྜལ་རྒྱས་བསྡུས་ཅི་རིགས་སུ་འབུལ་ལོ། །ཚུལ་འདི་ནི་ཐེག་པ་མཆོག་གི་རྣལ་འབྱོར་པ་དྲི་མེད་འོད་ཟེར་གྱིས་གངས་རི་ཐོད་དཀར་དུ་ལེགས་པར་བཀོད་པ་དགེ་ལེགས་འཕེལ།། །།

ཁྲིད་ཡིག་རིན་པོ་ཆེ་གསེར་གྱི་ཕྲེང་བ།

༄༅། །ཁྲིད་ཡིག་རིན་པོ་ཆེ་གསེར་གྱི་ཕྲེང་བ་བཞུགས་སོ། །རིན་ཆེན་ཤོག་འདྲའི་སྐོར།

༄༅། །རྒྱ་གར་སྐད་དུ། རཏྣ་སོ་ན་མཱ་ལེ་ནཱ་མ། བོད་སྐད་དུ། རིན་ཆེན་གསེར་ཕྲེང་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་འདོད་དགུའི་ཕུན་ཚོགས་འབྱུང་བའི་གཞི། །ཀུན་བཟང་རིགས་ལྔ་རྡོ་རྗེ་འཆང་སེམས་དང་། །དགའ་རབ་རྡོ་རྗེ་ཤྲཱི་སིངྷ་དང་། །ཨོ་རྒྱན་ཡབ་ཡུམ་གཉིས་ལ་ཕྱག་འཚལ་ལོ། །རང་བཞིན་ཟབ་ཡངས་ངེས་དོན་སྙིང་པོའི་མཁར། །མཁའ་འགྲོ་སྙིང་ཏིག་བདུད་རྩིའི་སྤྲིན་འཁྲིགས་ཏེ། །ཡང་གསང་མཐར་ཐུག་ཟབ་མོའི་ཆར་འབབ་(༡༥༥)པས། །བདག་བློའི་པད་མཚོ་ངང་གིས་གང་བ་དེར། །མཁྱེན་བརྩེའི་ཆུ་ལྷ་གཞོན་ནུ་གསལ་གྱུར་པས། །ཇི་སྙེད་ཇི་བཞིན་དགའ་བའི་བློ་མིག་གིས། །དེ་ཉིད་ལེགས་མཐོང་འཛམ་བུའི་ཆུ་ཀླུང་ལས། །རིན་ཆེན་གསེར་ཕྲེང་བཟང་པོའི་རྒྱན་འདི་སྤྲོ། །

དེ་ལ་འདིར་རྡོ་རྗེ་སྙིང་པོའི་ཐེག་པའི་རྒྱལ་པོ་འོད་གསལ་ཆོས་ཀྱི་སྐུའི་བསྟན་པ་ཕུན་སུམ་ཚོགས་པ་ཉིད་འཆད་པ་ལ། རང་བཞིན་རྫོགས་པ་ཆེན་པོའི་བླ་མ་བརྒྱུད་པ། དེ་ལས་བྱུང་བའི་གདམས་པ་དངོས། གཙིགས་ཆེ་བ་བཀའ་རྒྱས་གདབ་པ་དང་གསུམ་ལས། དང་པོ་ནི་གནས་ཕུན་སུམ་ཚོགས་པ་ཆོས་ཀྱི་དབྱིངས་ཀྱི་ཕོ་བྲང་མཁའ་ཀློང་རྣམ་པར་དག་པ་ན། སྟོན་པ་ཕུན་སུམ་ཚོགས་པ་དཔལ་ཀུན་ཏུ་བཟང་པོ་ཡབ་ཡུམ། ཆོས་སྐུ་དྲི་མ་དང་བྲལ་བ་ཅིའི་ངོ་བོར་ཡང་མ་གྲུབ་པ་ལས། ལྷུན་གྲུབ་ཡེ་ཤེས་ཀྱི་རྣམ་པར་བཞེངས་ཏེ། རྣམ་དག་སྟུག་པོ་བཀོད་པ་བདེ་བའི་ཞིང་དུ། འཁོར་ཕུན་སུམ་ཚོགས་པ་རིགས་ལྔའི་སངས་རྒྱས་མཚན་རྫོགས་རྡོ་རྗེ་འཆང་དང་བཅས་པ་ལ། ཆོས་ཕུན་སུམ་ཚོགས་པ་རང་བཞིན་རྫོགས་པ་ཆེན་པོ་འོད་ལྔ་ལྷུན་གྲུབ་ཀྱི་བསྟན་པ། དུས་ཕུན་སུམ་ཚོགས་པ་རང་བཞིན་མཉམ་པ་ཆེན་པོའི་ཆོས་ཉིད་ལ་འཕོ་འགྱུར་མེད་པའི་ཚེ། ཐུགས་རིག་པ་རང་བྱུང་གི་ཡེ་ཤེས་རང་ཤེས་རིག་གི་རྒྱལ་པོར་དགོངས་པ་ཀློང་རྡོལ་ནས། ཐམས་ཅད་མཁྱེན་པའི་ཐུགས་རྗེ་ལྷུན་གྲུབ་ཡེ་ཤེས་རིན་པོ་ཆེའི་སྦུབས་ནས་བྱིན་གྱིས་བརླབས་ཀྱིས་རང་བཤད། དེ་ཉིད་ཀྱི་ངང་ལས་རྡོ་རྗེ་འཆང་ཡོན་ཏན་ཕུན་སུམ་ཚོགས་པའི་མངའ་བདག་ཏུ་རང་བྱོན་ནས། འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ། དཔལ་རྡོ་རྗེ་སེམས་དཔའ་ལ་རང་བཞིན་བྱིན་གྱིས་བརླབས་ཀྱིས་གསུངས། དེ་ཉིད་ཀྱི་ངང་ལས་ལོངས་སྐུ་མཚན་དང་དཔེ་བྱད་ཀྱིས་བརྒྱན་པ་དཔལ་རྡོ་རྗེ་སེམས་དཔས། དུར་ཁྲོད་མེ་རི་འབར་བའི་གཞལ་ཡས་ཁང་ཆེན་པོར། སྤྲུལ་པའི་སྐུ་དགའ་རབ་རྡོ་རྗེ་ལ་ཚིག་སྡེབ་སྦྱོར་ལེགས་པའི་སྒོ་ནས་གསུངས། དེ་ཉིད་ཀྱིས་རྩུབ་འགྱུར་ཚལ་གྱི་དུར་ཁྲོད་ཆེན་པོར་མཁས་པ་ཤྲི་སིངྷ་ལ་མངོན་སུམ་རང་ཐོག་ཏུ་ཕབ་ནས་གསུངས། དེ་ཉིད་ཀྱིས་དུར་ཁྲོད་ཆེན་པོ་སོ་སའི་གླིང་དུ། རིག་འཛིན་གྱི་སློབ་དཔོན་ཆེན་པོ་པདྨ་ཐོད་ཕྲེང་རྩལ་སྐྱེ་ཤི་འདས་གྲོངས་མི་མངའ་བ་རྡོ་རྗེ་ལྟ་བུའི་སྐུ་བརྙེས་པ་དེ་ལ་གནས་ལུགས་ཡིད་དཔྱོད་དང་ཕྲལ་ནས་གསུངས། དེ་ཉིད་ཀྱིས་གཞོ་སྟོད་ཏི་སྒྲོ་བྲག་གི་ཚོགས་ཁང་ཆེན་མོར་རྡོ་རྗེ་ཕག་མོ་དང་གཉིས་སུ་མེད་པའི་ཡུམ་མཁར་ཆེན་བཟའ་མཚོ་རྒྱལ་ལ་ལྔ་ལྡན་ཡེ་ཤེས་ཀྱི་སྙིང་པོར་རང་གསལ་མངོན་སུམ་དུ་གཏན་ལ་ཕབ་ནས་གསུངས། (༡༥༦)དེ་ཉིད་ཀྱིས་མཆིམས་ཕུ་དཔལ་གྱི་ནགས་ཁྲོད་རི་མོ་ཅན་གྱི་དབེན་གནས་དམ་པར། ཨོ་རྒྱན་ཡབ་ཡུམ་གྱིས་དངོས་སུ་བྱིན་གྱིས་བརླབས་པའི་པདྨ་ལས་འབྲེལ་རྩལ་ལ། མངོན་སུམ་འོད་གསལ་གྱི་དགོངས་པ་དབང་བཞི་ཡེ་ཤེས་ཀྱི་ཆུ་བོ་གཞི་སྣང་འཆར་ཚུལ་དང་བཅས་པ་མ་ལུས་ཤིང་ཡོངས་སུ་རྫོགས་པར་གསུངས་པའོ། །

གཉིས་པ་དེ་ལས་བྱུང་བའི་གདམས་པ་དངོས་ལ། བརྩོན་འགྲུས་རབ་ཚེ་འདི་ཉིད་ལ་འཚང་རྒྱ་བའི་གདམས་ངག །འབྲིང་བར་དོར་འཚང་རྒྱ་བའི་གདམས་ངག །ཐ་མ་རང་བཞིན་སྤྲུལ་སྐུའི་ཞིང་དུ་འཚང་རྒྱ་བའི་གདམས་ངག་དང་གསུམ་ལས། དང་པོ་ལ་སྔོན་འགྲོ་སེམས་ཀྱི་ཁང་བུ་བཤིག་པས་རང་བཞིན་མ་བཅོས་རྣལ་དུ་དབབ་པ། དངོས་གཞི་རིག་པའི་རང་ངོ་སྤྲད་པས་འོད་གསལ་ཆོས་སྐུ་ཅེར་མཐོང་ལ་བསྟན་པ། རྗེས་སྣང་ཉམས་ཀྱི་འཆར་ཚུལ་བསྟན་པས་དེ་ཉིད་ཉམས་སུ་ལེན་ཚུལ་བསྟན་པ་དང་གསུམ་ལས་དང་པོ་ལའང་། ཐུན་མོང་གི་སྔོན་འགྲོས་འཁོར་བ་ལས་ངེས་པར་འབྱུང་བ་དང་། ཐུན་མོང་མ་ཡིན་པའི་སྔོན་འགྲོས་སེམས་ཀྱི་གནས་ལུགས་བསྟན་པ་གཉིས་ལས། དང་པོ་ལའང་། སྣང་སྲིད་བླ་མའི་ལམ་ཁྱེར། སྒྲིབ་སྦྱོང་མཎྜལ་གྱི་ལམ་ཁྱེར། འཁོར་བ་རྒྱུ་འབྲས་ཀྱི་ལམ་ཁྱེར། ཚེ་མི་རྟག་པའི་ལམ་ཁྱེར། བྱམས་སྙིང་རྗེའི་ལམ་ཁྱེར་དང་ལྔ་ལས། དང་པོ་ནི་སྟན་བདེ་བ་ལ་འདུག་སྟེ་བླ་མ་དཀོན་མཆོག་གསུམ་ལ་སྐྱབས་སུ་སོང་ནས། སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་བསྒྲལ་བར་བྱ། དེའི་ཆེད་དུ་བདག་གིས་བླ་མའི་རྣལ་འབྱོར་བསྒོམ་སྙམ་དུ་ཀུན་རྫོབ་བྱང་ཆུབ་ཏུ་སེམས་བསྐྱེད་ནས། དོན་དམ་བྱང་ཆུབ་ཀྱི་སེམས་ནི་རང་གི་སེམས་ཉིད་ཡེ་ནས་སངས་རྒྱས་པར་གསལ་གདབ་པ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་གསུམ་བརྗོད་ལ། ཨོཾ་ཡོ་ག་ཤུདྡྷོ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་གིས། ཆོས་ཐམས་ཅད་རང་བཞིན་གྱིས་མ་སྐྱེས་པ་ནམ་མཁའི་དཀྱིལ་ལྟ་བུའི་ངང་ལས། ཧཱུྃ་ཧཱུྃ་ཧཱུྃ་ཞེས་བརྗོད་པས་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་ར་བ་གུར་བླ་བྲེ་ཡེ་ཤེས་ཀྱི་མེ་རི་མེ་དཔུང་འབར་བའི་དབུས་སུ། བྷྲཱུྃ་བི་ཤུདྡྷེ་ཛྙཱ་ན་བཛྲ་ཧཱུྃ་གིས། པདྨ་དང་ཟླ་བ་དང་ཉི་མའི་དབུས་སུ་ཐོད་པ་བརྩེགས་པ་ཡེ་ཤེས་ཀྱི་གཞལ་ཡས་ཁང་། སྒོ་བཞི་གྲུ་བཞི་རྩིག་པ་ལྔ་དང་ལྡན་པའི་ཕྱི་རོལ་དུ་དུར་ཁྲོད་བརྒྱད་དང་། ནང་ཀ་བ་བརྒྱད་ཀྱིས་བཏེགས་པའི་དབུས་སེང་གེ་དང་རིན་པོ་ཆེའི་ཁྲི་པདྨ་དང་ཉི་ཟླས་བརྒྱན་པའི་སྟེང་དུ་ཧཱུྃ་ལས་རང་ཉིད་རྩ་བའི་བླ་མ་(༡༥༧)ལ་བརྒྱུད་པའི་བླ་མ་ཀུན་འདུས་ལོངས་སྤྱོད་རྫོགས་པ་སྐུའི་རང་བཞིན་རྡོ་རྗེ་འཆང་གི་རྣམ་པ་མཐིང་ག་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། རྡོ་རྗེ་དང་དྲིལ་བུ་ཐུགས་ཀར་བསྣོལ་བའི་པང་ན། ཡུམ་རྡོ་རྗེ་ཕག་མོ་དམར་མོ་གཅེར་བུ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། གཉིས་ཀའང་རིན་པོ་ཆེ་དང་རུས་པས་བརྒྱན་ཅིང་རྡོ་རྗེའི་སྐྱིལ་མོ་ཀྲུང་མཛད་པའི་སྙིང་གར་ཞི་བའི་ལྷ་ཚོགས་བཞི་པཅུ་རྩ་གཉིས་དང་། ཐོད་པར་ཁྲོ་བོའི་ལྷ་ཚོགས་ལྔ་བཅུ་རྩ་བརྒྱད་འཇའ་ཚོན་ལྟར་འོད་གསལ་བའི་ཤར་ཕྱོགས་སུ་པདྨ་ཉི་ཟླའི་སྟེང་ན། པདྨ་འབྱུང་གནས་དཀར་པོ་ཡུམ་དང་བཅས་པ། ལྷོ་རུ་ཤཱཀྱ་སེངྒེ་སེར་པོ། ནུབ་ཏུ་ཉི་མ་འོད་ཟེར་དམར་པོ། བྱང་དུ་པདྨ་སམ་བྷ་ལྗང་གུ། ཤར་ལྷོར་བློ་ལྡན་མཆོག་སྲེད་དཀར་སེར། ལྷོ་ནུབ་ཏུ་པདྨ་རྒྱལ་པོ་དམར་སེར། ནུབ་བྱང་དུ་སེང་གེ་སྒྲ་སྒྲོགས་དམར་ལྗང་། བྱང་ཤར་དུ་རྡོ་རྗེ་གྲོ་ལོད་མཐིང་ནག །དེ་ཐམས་ཅད་ཀྱང་ཡུམ་དང་བཅས་པ་རིན་པོ་ཆེ་དང་རུས་པའི་རྒྱན་ཐམས་ཅད་ཀྱིས་བརྒྱན་ཅིང་། དར་གྱི་ན་བཟའ་དང་རིན་པོ་ཆེའི་པད་ཞྭ་རྒོད་སྒྲོའི་རྩེ་རྒྱན། དར་སྣ་ལྔས་བརྒྱན་པ། ཡབ་རྣམས་ཀྱི་ཕྱག་མཚན་གཙོ་བོ་དང་མཐུན་པ་ཡུམ་ཐམས་ཅད་ཀྱི་ཕྱག་མཚན་གཙོ་མོ་དང་མཐུན་པའི་སྒོ་བཞིར་ཤར་ནས་རིམ་པ་བཞིན། ལྕགས་ཀྱུ་མ་དཀར་མོ་ལྕགས་ཀྱུ་འཛིན་པ། ཞགས་པ་མ་སེར་མོ་ཞགས་པ་འཛིན་པ། ལྕགས་སྒྲོག་མ་དམར་མོ་ལྕགས་སྒྲོག་འཛིན་པ། དྲིལ་བུ་མ་ལྗང་གུ་དྲིལ་བུ་འཛིན་པའི་ཡབ་བཞི་ཡང་རྡོ་རྗེ་དང་དྲིལ་བུ་འཛིན་པས་ཡུམ་དང་མཉམ་པར་སྦྱོར་བ། རིན་པོ་ཆེ་དང་རུས་པས་བརྒྱན་ཅིང་། བཞེངས་པའི་ཚུལ་གྱིས་བཞུགས་པའི་བར་གྱི་ལྷའི་སྣམ་བུ་ལ་ཡེ་ཤེས་ཀྱི་མཁའ་འགྲོ་ཡབ་ཡུམ་སོ་སོའི་རིགས་དང་མཐུན་པའི་གྲི་གུག་དང་ཐོད་པ་དང་རིགས་ལྔའི་ཕྱག་མཚན་འཛིན་པའི་འཁོར་ལ། གཞལ་ཡས་ཁང་གི་ཕྱི་རོལ་གྱི་ས་དང་ནམ་མཁའ་གང་བར་འཇིག་རྟེན་གྱི་མཁའ་འགྲོ་དཔག་ཏུ་མེད་པ་སྤྲིན་ཕུང་འཐིབས་པ་ལྟར་བསམ་ལ། ཨོཾ་བཛྲ་ས་མ་ཡ་ཛཿཞེས་པས་འོག་མིན་དང་ཕྱོགས་བཅུའི་འཇིག་རྟེན་ནས་དེ་ཁོ་ན་འདྲ་བའི་ཡེ་ཤེས་པ་སྤྱན་དྲངས་ལ། མཆོད་ནས་གཉིས་སུ་མེད་པར་ཛཿཧཱུྃ་བྃ་ཧོཿས་ཐིམ་པར་བསམ་ལ། གནས་གསུམ་དུ་ཨོཾ་ཨཱཿཧཱུྃ་གིས་རྒྱས་གདབ། དེ་བཞིན་གཤེགས་པ་ལྔས་བདུད་རྩིའི་བུམ་པས་དབང་བསྐུར་བའི་ཆུ་ལྷག་མ་ཡར་ལུད་པ་ལས། དེ་བཞིན་གཤེགས་པ་དེ་དག་གཅིག་ཏུ་གྱུར་པའི་རང་བཞིན་མི་བསྐྱོད་པས་དབུར་བརྒྱན་པར་བསམ་ལ། ལྷ་དང་མིའི་མཆོད་པ་ནམ་མཁའ་གང་བས་མཆོད་ཅིང་བཀྲ་ཤིས་ཀྱི་གླུ་དབྱངས་སྙན་པོས་བསྟོད་(༡༥༨)པར་བསམ་ལ། དར་ཅིག་མཉམ་པར་བཞག་པའི་སྐུ་ལས་འོད་འཕྲོས་པས་སྣང་སྲིད་སྣོད་བཅུད་ཐམས་ཅད་ལ་ཕོག །ལས་དང་སྡིག་སྒྲིབ་ཐམས་ཅད་སྦྱངས། སྣོད་འོད་གསལ་ཡེ་ཤེས་ཀྱི་ཨོ་རྒྱན་སྣང་ལ་རང་བཞིན་མེད་པ་རང་བཞིན་སྤྲུལ་པ་སྐུའི་ཞིང་ལྟ་བུ། བཅུད་ཀྱི་སེམས་ཅན་ཐམས་ཅད་མཁའ་འགྲོ་དཔའ་བོ་དཔའ་མོའི་རང་བཞིན་ལྷ་དང་ལྷ་མོར་གྱུར་ནས། གླུ་གར་དང་མཆོད་པ་བྱེད་པས་རང་སྣང་གི་གཞལ་ཡས་ཁང་ལ་མཆོད་པར་བསམ་ལ། ཨོཾ་བཛྲ་གུ་རུ་པདྨ་སིདྡྷི་ཧྲཱིཿམ་ཧ་རི་ནི་ས་ར་ཙ་ཧྲིཿཡ་སིདྡྷི་ཕ་ལ་ཨཱཿཧཱུྃ། ཞེས་ཅི་འགྲུབ་ཏུ་བཟླས་པས། ཕྱི་ནང་གི་ལྷ་ཐམས་ཅད་ཀྱང་དེ་བཞིན་དུ་དི་རི་རི་བཟླས་པར་བསམ་ལ། གྲགས་སྟོང་ཆོས་སྐུའི་ངང་ནས་ལུས་ལྷ་ངག་སྔགས་སེམས་ཆོས་ཉིད་ཀྱི་འཁོར་ལོ་གསུམ་ལས་མི་འདའ་བར་བྱའོ། །རྗེས་ལ་སྣང་སྲིད་ཕྱི་ནང་གི་ཞིང་ཁམས་ཐམས་ཅད་སྙིང་གའི་ཧཱུྃ་ལ་བསྡུས་ལ། དེ་ཡང་རབ་ཏུ་མི་དམིགས་པ་ཆོས་ཀྱི་སྐུའི་ངང་ནས། རང་བཞིན་དག་པའི་དགེ་བ་འདིས། །འཁོར་བ་ངན་སོང་དོང་སྤྲུགས་ཏེ། །སྲིད་པར་འགའ་ཡང་མི་གནས་པར། །ཐམས་ཅད་སངས་རྒྱས་ཉིད་ཐོབ་ཤོག །ཅེས་པ་གསུམ་གྱིས་བསྔོ་བ་བྱའོ། །

གཉིས་པ་སྒྲིབ་སྦྱོང་མཎྜལ་གྱི་ལམ་ཁྱེར་ལ་གསུམ་ལས། དང་པོ་ཚངས་ཆེན་གྱི་བསྐལ་པ་ཆེན་པོ་མཎྜལ་དུ་འབུལ་བ་ནི། ཚོམ་བུ་སུམ་ཅུ་སོ་བདུན་བཀོད་ལ། གཉིས་ཀྱིས་ལངས་ཏེ་ཐལ་མོ་གྲུ་བཞིར་སྦྱོར་ལ་མགྲིན་གཅིག་ཏུ། ཨོཾ་ཨཱཿཧཱུྃ། དབང་ཆེན་གསེར་གྱི་ས་གཞི། རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་གླང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། གསེར་གྱི་རི་བདུན། རོལ་པའི་མཚོ་བདུན། བཀྲ་ཤིས་ཀྱི་རྫས་བརྒྱད། གཏེར་གྱི་བུམ་པ། དཔག་བསམ་གྱི་ཤིང་། མ་རྨོས་པའི་ལོ་ཏོག །ཡིད་དུ་འོང་བའི་འདོད་ཡོན། ཤིན་ཏུ་མཛེས་པའི་ལྷ་མོ། ཉི་མ། ཟླ་བ། དབུས་སུ་ལྷ་དང་མིའི་འདོད་པའི་ཡོན་ཏན་མ་ཚང་བ་མེད་པས་འཇིག་རྟེན་གྱི་ཁམས་རྒྱ་མཚོ་ལེགས་པར་བཀོད་དེ། བཅོམ་ལྡན་འདས་དཔལ་རྣམ་པར་སྣང་མཛད་ལ་སོགས་ཕྱོགས་བཅུའི་དེ་བཞིན་གཤེགས་པ་རིགས་ལྔ་གངས་ཆེན་མཚོའི་སྐུ་དང་གསུང་དང་ཐུགས་མི་ཟད་པ་རྒྱན་གྱི་འཁོར་ལོ་ལ་བརྟེན་པའི་ཞིང་ཁམས་འབྱམས་ཀླས་པ་ཚངས་ཆེན་གྱི་བསྐལ་པ་ཆེན་པོ། ལེགས་པར་བརྒྱན་པ་འདི་ཉིད་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་(༡༥༩)ཅན་རྒྱ་མཚོའི་ཚོགས་དང་བཅས་པ་རྣམས་ལ། ཀུན་ཏུ་བཟང་པོའི་མཆོད་པའི་སྤྲིན་ཕུང་ཆེན་པོ་བསམ་གྱིས་མི་ཁྱབ་པར་དམིགས་ཏེ་དབུལ་ལོ། །ཕྱོགས་བཅུའི་ཞིང་ཁམས་རྒྱ་མཚོའི་རྡུལ་སྙེད་རི་རབ་གླིང་བཞིའི་འཇིག་རྟེན་ཁམས། །ལྷ་དང་མི་ཡི་འདོད་ཡོན་ཕུན་ཚོགས་བདེ་གཤེགས་མཆོད་པའི་སྤྲིན་ཕུང་ཅན། །ཚངས་ཆེན་བསྐལ་པས་ལེགས་པར་བརྒྱན་པའི་དགེ་ལེགས་རྒྱ་མཚོའི་བསོད་ནམས་ཞིང་། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་ཚོགས་ལ་འབུལ། །རིན་ཆེན་མཎྜལ་ཡིད་འོང་མཆོད་པའི་སྤྲིན། །འདོད་དགུའི་འབྱོར་ཚོགས་དཔག་མེད་དང་ལྡན་པ། །དཔག་ཡས་ནམ་མཁའི་རྒྱན་གྱུར་འདི་ཕུལ་བས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་པ་ལན་གསུམ་ཕུལ་བས་ལུས་ཀྱི་སྒྲིབ་པ་དག །སྐུའི་དངོས་གྲུབ་ཐོབ་རང་བཞིན་སྤྲུལ་པའི་ཞིང་ཁམས་དག་པར་སྐྱེས་ནས་སངས་རྒྱས་ཀྱི་མཛད་པ་མཐར་ཕྱིན་པའི་དངོས་གྲུབ་ཆེན་པོ་ཐོབ་པར་འགྱུར་རོ། །

གཉིས་པ་ཚངས་པ་རྔ་སྒྲའི་ཞིང་ཁམས་མཎྜལ་དུ་འབུལ་བ་ནི། ཚོམ་བུ་དགུ་བཀོད་ལ་སྔ་མ་བཞིན་ལངས་ཏེ་ཐལ་མོ་གྲུ་བཞིས་མགྲིན་གཅིག་ཏུ། ཨོཾ་ཨཱཿཧཱུྃ། འོག་མིན་གྱི་གནས་རྣམ་དག་སྟུག་པོ་བཀོད་པ་བདེ་བའི་ཞིང་། ཐམས་ཅད་ཀྱང་སྣང་ལ་རང་བཞིན་མེད་པའི་ཞིང་ཁམས་ན། ཤིན་ཏུ་ཡིད་དུ་འོང་བའི་གཞལ་མེད་ཁང་ཆེན་པོ། སྒོ་བཞི་གྲུ་བཞི་རྟ་བབས་བཞི་དང་ལྡན་པ། རིན་པོ་ཆེའི་གདུགས། ཆོས་ཀྱི་འཁོར་ལོ། ཤིན་ཏུ་མཛེས་པའི་རི་དྭགས། ལྷའི་གོས། རྣམ་པར་རྒྱལ་བའི་རྒྱལ་མཚན། ཡིད་དུ་འོང་བའི་འཕན། ཟླ་བ་རླུང་གིས་བསྐྱོད་པ། རྔ་ཡབ་ནོར་བུའི་ཡུ་བ་ཅན། གསེར་གྱི་དྲིལ་བུ་གཡེར་ཁའི་ཕྲེང་བ། རྡོ་རྗེ་དང་ནོར་བུ་རིན་པོ་ཆེའི་ཏོག །རྩིག་པ་ལྔ་དང་ལྡན་པའི་སྟེང་ན་རིན་པོ་ཆེའི་ཕ་གུ། ནོར་བུ་སྣ་ཚོགས་ཀྱི་དྲྭ་ཕྱེད། རྡོ་ཀརྨ་ཤི་ཤའི་མདའ་ཡབ། རིན་པོ་ཆེའི་དྲྭ་མིག །སེང་མའི་པུ་ཤུ། རབ་ཏུ་མཐོ་བའི་ཕྱུར་བུ། འདོད་ཡོན་གྱི་སྣམ་བུ། སྒེག་མོ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཞལ་ཟས་མ། སིལ་སྙན་མ། མཆོད་པའི་སྤྲིན་ཕུང་བསམ་གྱིས་མི་ཁྱབ་པས་ཕྱི་ནང་ཀུན་ཏུ་ཡང་ལེགས་པར་བཀོད་པའི་གནས། ཚངས་པ་རྔ་སྒྲའི་ཞིང་ཁམས་ཆེན་པོ་ཡེ་ཤེས་རིན་པོ་ཆེའི་སྤྲིན་གྱི་དྲ་བས་བརྒྱན་པ་འདི་ཉིད། བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའི་ཚོགས་དང་བཅས་པ་རྣམས་ལ། ཇི་སྲིད་འཁོར་བ་མ་སྟོང་གི་བར་དུ་རྟག་པ་(༡༦༠)རྒྱུན་གྱི་འཁོར་ལོར་འབུལ་ལོ། །བདེ་ཆེན་གནས་འདི་ཤིན་ཏུ་མཐའ་ཡས་བཀོད་པའི་སྤྲིན་གྱི་འོད་ཟེར་ཅན། །སྒོ་བཞི་གྲུ་བཞི་རྟ་བབས་བཞི་ལྡན་ཡེ་ཤེས་ལྔ་ཡི་རྩིག་པས་བརྒྱན། །སྒེག་མོ་ཕྲེང་ཐོགས་རིན་ཆེན་གླུ་གར་མཆོད་པའི་སྤྲིན་གྱི་འོད་འཕྲོ་བ། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་ཚོགས་ལ་འབུལ། །འོག་མིན་བདེ་ཆེན་རིན་ཆེན་གཞལ་ཡས་ཁང་། །སྣ་ཚོགས་མཆོད་པའི་སྤྲིན་གྱི་བླ་བྲེ་ཅན། །ནམ་མཁའ་གང་བར་དམིགས་ཏེ་ཕུལ་བ་ཡིས། །འགྲོ་ཀུན་ལྷུན་གྲུབ་ཞིང་ལ་སྤྱོད་པར་ཤོག །ཅེས་པ་གསུམ་གྱིས་ངག་གི་སྒྲིབ་པ་དག །གསུང་གི་དངོས་གྲུབ་ཐོབ། རང་སྣང་འོག་མིན་གྱི་ཞིང་ལ་ལོངས་སྤྱོད་པར་འགྱུར་རོ། །

གསུམ་པ་རྡོ་རྗེ་སྙིང་པོའི་ཞིང་ཁམས་མཎྜལ་དུ་འབུལ་བ་ནི། ཚོམ་བུ་ལྔ་བཀོད་ལ་ལངས་ཏེ་ཐལ་མོ་གྲུ་བཞིར་སྦྱོར་ནས་མགྲིན་གཅིག་ཏུ། ཨོཾ་ཨཱཿཧཱུྃ། ཆོས་ཉིད་འོད་གསལ་གྱི་ཞིང་ཁམས། གདོད་མ་ནས་ངོ་བོ་ཉིད་ཀྱིས་རྣམ་པར་དག་ཅིང་། ནམ་མཁའ་ལྟར་སྟོང་ལ་མཐའ་དབུས་མེད་པ། ཉི་ཟླ་གཟའ་སྐར་ལྟར་བཀྲ་ཞིང་ལྷུན་གྱིས་གྲུབ་པ། འཁོར་བ་དང་མྱ་ངན་ལས་འདས་པ་གང་དུའང་མ་ཕྱེ་མི་འབྱེད་འབྱེད་པ་མེད་པའི་རང་བཞིན། སངས་རྒྱས་ཀྱི་ཞིང་དང་འགྲོ་བ་དྲུག་གི་རྣམ་པར་འཕྲུལ་པ་དཔག་ཏུ་མེད་པའི་འབྱུང་གནས་ཆེན་པོ། ལྷུན་གྲུབ་རིན་པོ་ཆེའི་སྦུབས། སྐུ་གསུམ་འདུ་འབྲལ་མེད་པའི་ཀློང་། དུས་བཞི་མཉམ་པ་ཉིད་ཀྱི་ཡེ་ཤེས། གཞོན་ནུ་བུམ་པའི་སྐུའི་ཞིང་ཁམས། ཕྱི་དང་ནང་མེད་པར་ཀུན་ཏུ་ཡང་ནང་དུ་གྱུར་པ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལྗང་གུའི་འོད་ཟེར་ཕྱོགས་བཅུར་འཕྲོ་ཞིང་། ནམ་མཁའི་མཐའ་ཀླས་པར་སྐུ་དང་ཡེ་ཤེས་ཀྱི་སྣང་བ་ཆེན་པོས། ལེགས་པར་བརྒྱན་པའི་བཀོད་པ་ཚད་མེད་པའི་མངའ་ཐང་ཆེན་པོ་ལ་དབང་འབྱོར་པ། འོད་གསལ་རྡོ་རྗེའི་སྙིང་པོའི་ཞིང་ཁམས། རང་བཞིན་གྱིས་རྣམ་པར་དག་ཅིང་ལྷུན་གྱིས་གྲུབ་པ་འདི་ཉིད། བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའི་ཚོགས་དང་བཅས་པ་རྣམས་ལ། དགོངས་ཀློང་རྣམ་པར་དག་པའི་ངང་དུ་ཡེ་ཤེས་ཀྱི་མཆོད་པ་དམ་པར་འབུལ་ལོ། །གདོད་ནས་རྣམ་དག་འོད་གསལ་ཞིང་ནི་མ་སྐྱེས་ལྷུན་རྫོགས་འདུས་མ་བྱས། །སྣ་ཚོགས་མི་དམིགས་སྤྲོས་ཀུན་ཉེར་ཞི་ཡེ་ཤེས་རྣམ་ལྔའི་གཞལ་ཡས་ཁང་། །སྐུ་གསུམ་མཛད་པའི་འོད་ཟེར་དང་བཅས་རང་བཞིན་ལྷུན་གྱིས་གྲུབ་པའི་གནས། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་(༡༦༡)ཚོགས་ལ་འབུལ། །འོད་གསལ་ལྷུན་གྲུབ་ཡེ་ཤེས་རྣམ་ལྔའི་ཞིང་། །སྐུ་དང་ཐིག་ལེས་ཡེ་ནས་བརྒྱན་པ་འདི། །རང་སྣང་དག་པས་ལེགས་པར་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་པ་ལན་གསུམ་གྱིས་ཕུལ་བས་ཡིད་ཀྱི་སྒྲིབ་པ་དག །ཐུགས་ཀྱི་དངོས་གྲུབ་ཐོབ། གདོད་མའི་གཞི་ལ་ལྷུན་གྱིས་གྲུབ་ནས་ཕྱོགས་བཅུར་སྐུ་དང་ཡེ་ཤེས་ཀྱི་རོལ་པས་འགྲོ་བའི་དོན་ལྷུན་གྱིས་གྲུབ་པའི་འབྲས་བུ་ཐོབ་པར་འགྱུར་རོ། །

གསུམ་པ་འཁོར་བ་རྒྱུ་འབྲས་ཀྱི་ལམ་ཁྱེར་ནི། འདི་ལྟར་ཕྱི་ནང་སྣོད་བཅུད་འཁོར་བའི་རང་བཞིན་བདེ་སྡུག་སྣ་ཚོགས་སུ་སྣང་བ་ཐམས་ཅད། རང་རང་གི་ལས་སྣ་ཚོགས་སུ་བསགས་པའི་འབྲས་བུ་སྟེ། རྒྱུ་མི་དགེ་བ་ལས་ཀུན་འབྱུང་དང་དེའི་འབྲས་བུ་སྡུག་བསྔལ་གྱི་བདེན་པ་ཁམས་གསུམ་དང་རིགས་དྲུག་ན་རང་རང་གི་སྡུག་བསྔལ་སོ་སོར་མྱོང་བ་ཟོ་ཆུའི་འཁོར་ལོ་ལྟར་འཁོར་བ་མཐོ་དམན་དུ་འཁོར་ཞིང་། བསོད་ནམས་ཆ་མཐུན་གྱི་འབྲས་བུས་མཐོ་རིས་དང་སྡིག་པས་ངན་སོང་དུ་སྐྱེ་ལ། རྒྱུ་ཐར་པ་ཆ་མཐུན་གྱི་དགེ་བས་ལམ་དང་དེའི་འབྲས་བུ་འགོག་པའི་བདེན་པ་མྱ་ངན་ལས་འདས་པའི་བདེ་བ་ཐོབ་པས། དེའི་ཕྱིར་འཁོར་བ་སྡུག་བསྔལ་གྱི་རྒྱ་མཚོ་ལས་བདག་དང་འགྲོ་བ་ཐམས་ཅད་ཐར་བར་བྱ་དགོས། དེའི་ཆེད་དུ་ཐར་པའི་རྒྱུར་འགྱུར་བའི་དགེ་བ་འབའ་ཞིག་ལ་བསླབ་ཅིང་བསྒྲུབ་དགོས། དེ་ལྟར་མ་བྱས་ན་སྤྱིར་འཁོར་བའི་སྡུག་བསྔལ། བྱེ་བྲག་ཏུ་ངན་སོང་གསུམ་གྱི་སྡུག་བསྔལ་ལས་ཐར་པའི་དུས་མི་འདུག་པས། དེ་རིང་ཉིད་ནས་ཐར་པའི་ལམ་སྣ་ཅིས་ཀྱང་ཟིན་པར་བྱ་དགོས། མི་ལུས་རིན་པོ་ཆེ་རྙེད་པར་དཀའ་བ་དལ་འབྱོར་གྱི་གྲུ་བོ་འདི་དོན་ཡོད་པར་བྱ་དགོས་སྙམ་དུ། སྙིང་ནས་འཁོར་འདས་དགེ་སྡིག་ལ་སྤང་བླང་གི་བློ་བསྒོམ་པ་ལ་འབད་དོ། །

བཞི་པ་ཚེ་མི་རྟག་པའི་ལམ་ཁྱེར་ལ་གསུམ་ལས། དང་པོ་ནི་ཕྱི་དུས་བཞི་འགྱུར་བ་ལ་བསམས་ཏེ་ཚེ་མི་རྟག་པར་བསྒོམ་པ་ནི། ཕྱི་ནམ་ཟླའི་བྱེ་བྲག་དགུན་ནས་དཔྱིད། དཔྱིད་ནས་དབྱར། དབྱར་ནས་སྟོན་དུ་སོ་སོར་འགྱུར་ཞིང་ཞག་དང་ཟླ་བས་མི་རྟག་པ་བཞིན་དུ། རང་གི་ཚེ་ཡང་ངེས་པར་ཟད་པའི་རྟགས་ཡིན་ཏེ། ནམ་འཆིའམ་སྙམ་དུ་སྙིང་ཐག་པ་ནས་བསྒོམ་མོ། །གཉིས་པ་ནང་འབྱུང་བཞི་འགྱུར་བ་ལ་བརྟེན་ནས་རང་གི་ཚེ་མི་རྟག་པར་བསྒོམ་པ་ནི། རང་གཞན་ཐམས་ཅད་ཀྱི་ན་ཚོད་དང་ལང་ཚོ་ཡང་སོ་ཀའི་མེ་ཏོག་བཞིན་དར་ཅིག་རྒྱས་ཀྱང་ནམ་ཞིག་རྒྱུད་ལ་རྒས་པའི་རང་བཞིན་ཅན་ནད་དང་སྡུག་བསྔལ་གྱི་འབྱུང་གནས་འདི་ཡང་། སོ་སོར་ཞིག་(༡༥༠)ཅིང་རྣམ་པར་འཐོར་བ་དུར་ཁྲོད་ཀྱི་ཆོས་ཅན་དུ་ནམ་ཞིག་འགྱུར་ན་སྙམ་དུ་བསམ་པའོ། །གསང་བ་འབྱུང་བཞིའི་ཐིམ་ཚུལ་ལ་བསམས་ཏེ་ཚེ་མི་རྟག་པར་བསྒོམ་པ་ནི། ཐམས་ཅད་སྐད་ཅིག་གིས་མི་རྟག་ཅིང་འཇིག་པའི་ཆོས་ཅན། རྒན་གཞོན་དུ་རིམ་གྱིས་སོང་བ་རྣམས་བསམ་ཞིང་། རང་ཉིད་ཀྱང་འཆི་བའི་ཆོས་ཅན་ལས་མ་འདས་ཏེ་སྐྱེས་པའི་ཐ་མ་ངེས་པར་འཆི་བའི་རང་བཞིན་ནམ་འབྱུང་ངམ་སྙམ་པ་ནས། དེ་རིང་ནི་འཇིག་རྟེན་འདི་ན་འདུག་པའི་ཐ་མ་ཡིན་ལ། གྲོགས་དང་ཟས་གོས་དང་མལ་སྟན་གྱི་ཐ་མ་ཡིན་ངེས་སོ་སྙམ་པ་ནས་འབྱུང་བཞི་ཐིམ་ཚུལ་རྣམས་རང་གི་སྟེང་ནས་འབྱུང་བར་བསམས་ཏེ་སྙིང་ནས་མི་རྟག་པ་ཐུན་མོང་མ་ཡིན་པ་བསྒོམ་མོ། །

ལྔ་པ་བྱམས་སྙིང་རྗེའི་ལམ་ཁྱེར་ལ་གསུམ་ལས། དང་པོ་སེམས་ཅན་བདེ་བ་དང་མི་ལྡན་པ་རྣམས་ལ་བྱམས་པ་བསྒོམ་པ་ནི། ཁམས་གསུམ་རིགས་དྲུག་གི་སེམས་ཅན་འདི་རྣམས་རྟག་ཏུ་འཁོར་བའི་སྡུག་བསྔལ་གྱིས་ཉམ་ཐག་ནས་བདེ་བ་དང་མི་ལྡན་པ་འདི་རྣམས་སྙིང་རེ་རྗེ། བདག་གི་ཕ་དང་མར་མ་གྱུར་པ་གཅིག་ཀྱང་མེད་ལ། ཕ་མ་ཉམ་ཐག་པ་འདི་རྣམས་ནམ་ཞིག་ན་འཁོར་བ་ལས་ཐར་པར་འགྱུར་ན་སྙམ་དུ་སྙིང་ནས་བསྒོམ་པའོ། །གཉིས་པ་སྙིང་རྗེ་ནི་སྡུག་བསྔལ་གྱི་ཉམ་ཐག་པ་རྣམས་དེ་དང་བྲལ་བར་ཤོག་ཅིག་སྙམ་པ་སྟེ། རེ་ཞིག་ངན་སོང་གི་གནས་ན་ཚ་གྲང་བཀྲེས་སྐོམ་གྱིས་ཉམ་ཐག །མི་རྣམས་སྐྱེ་རྒ་ན་འཆིའི་ཆུ་བོ་བཞིས་ཉམ་ཐག །ལྷ་རྣམས་འཆི་འཕོ་ལྟུང་བའི་སྡུག་བསྔལ་གྱིས་ཉམ་ཐག་པ་རྣམས་མིག་སྔར་དུ་ཡོད་པ་ཙམ་ལ་དམིགས་ཏེ། འགྲོ་དྲུག་གི་སེམས་ཅན་འདི་རྣམས་སྙིང་རེ་རྗེ། འཁྲུལ་སྣང་འཁོར་བའི་སྡུག་བསྔལ་འདི་ལས། བདག་གི་ལུས་ལོངས་སྤྱོད་དགེ་བའི་རྩ་བ་འདི་དག་གིས་ད་ལྟ་ཉིད་དུ་ཐར་ནས་བདེ་ཆེན་གྱི་སར་ཕྱིན་པར་ཤོག་ཅིག་སྙམ་དུ་ཡུན་རིང་དུ་བསྒོམ་པའོ། །གསུམ་པ་བྱང་ཆུབ་ཀྱི་སེམས་བསྒོམ་པ་ནི། སངས་རྒྱས་ཀྱི་བྱང་ཆུབ་ཐོབ་པར་སྨོན་པ་སྟེ། འདི་ལྟར་འཁོར་བ་ན་འཁྱམས་པའི་སེམས་ཅན་ཐམས་ཅད་རྫོགས་མཐའ་མེད་པའི་དུས་ནས་གཏན་དུ་སྡུག་བསྔལ་སྣ་ཚོགས་ལ་སྤྱོད་ཅིང་འཁོར་བ་རྣམས། བདག་ཁོ་ནས་སེམས་ཅན་གཅིག་ཙམ་ཡང་མ་ལུས་པར་འཁོར་བ་ནས་དྲངས་ཏེ་སངས་རྒྱས་ཀྱི་ས་ལ་འགོད་པར་གྱུར་ཅིག་སྙམ་ཞིང་ཚིག་ཏུ་ཡང་བརྗོད་ནས་དགེ་བ་སེམས་ཅན་གྱི་དོན་དུ་བསྔོ་ཞིང་། སྤྱོད་ལམ་ཐམས་ཅད་དུ་སེམས་ཅན་གྱི་དོན་ལས་བྱ་རྒྱུ་མེད་པར་བློ་སྦྱོང་ངོ་། །དེ་དག་གི་དགོས་པ་ཡང་གཉིས་ཏེ། གནས་སྐབས་སུ་བླ་མའི་རྣལ་འབྱོར་གྱིས་བྱིན་རླབས་ཀྱི་སྒོ་འབྱེད། མཎྜལ་གྱི་(༡༦༣)རིམ་པས་སྒྲིབ་པ་གཉིས་ཀྱི་ལས་འདག །རྒྱུ་འབྲས་བསམ་པས་དགེ་སྡིག་གི་མཚང་ཤེས། མི་རྟག་པ་བསྒོམས་པས་ངེས་འབྱུང་དང་སྐྱོ་ཤས་སྐྱེ། བྱམས་སྙིང་རྗེས་ཐེག་ཆེན་གྱི་ལམ་དུ་འགྱུར་བ་དང་། མཐར་ཐུག་སངས་རྒྱས་ཐོབ་པའི་དགོས་པ་ཡོད་དོ། །

གཉིས་པ་ཐུན་མོང་མ་ཡིན་པའི་སྔོན་འགྲོས་སེམས་ཀྱི་གནས་ལུགས་བསྟན་པ་ལ་བཞི་སྟེ། རུ་ཤན་དབྱེ་བ། སྒྲིབ་པ་སྦྱང་བ་སྔོན་དུ་འགྲོ་བ། རྣལ་དུ་དབབ་པའོ། །དང་པོ་ལ་གསུམ་ལས་རུ་ཤན་དབྱེ་བ་ནི་མི་མེད་པའི་ལུང་བ་སྟོང་པར་སོང་སྟེ། གཞི་བདག་ལ་གཏོར་མ་བྱིན་ནས། ད་ནི་སེམས་ཅན་གྱི་དོན་དུ་འཁོར་འདས་རུ་ཤན་དབྱེ་སྙམ་དུ་སེམས་བསྐྱེད་ནས། ལུས་རྡོ་རྗེ་མེ་འབར་བའི་སྤྱི་བོར་བླ་མའི་རྣལ་འབྱོར་བསྒོམས་ལ། འགྲོ་དྲུག་སྣ་ཚོགས་ཀྱི་སྤྱོད་པ་དྲན་པས་འགྲོ་བ་དང་། འདུག་པ་དང་མཆོངས་པ་དང་རྒྱུག་པ་ལ་སོགས་པ་དྲན་དགུ་བྱས་པའི་མཐར་ཞི་ཁྲོ་ལ་སོགས་པའི་བཞུགས་སྟངས་བྱའོ། །ངག་རུ་ཤན་འབྱེད་པ་ནི། འགྲོ་དྲུག་སོ་སོའི་སྐད་སྣ་ཚོགས་དང་། ཕཊ་དང་ཧཱུྃ་ལ་སོགས་པ་སྨྲ་བརྗོད་དྲན་དགུ་བྱས་པའི་མཐར་ཆོས་ཀྱི་ཚིག་བརྗོད་པར་བྱའོ། །སེམས་རུ་ཤན་འབྱེད་པ་ནི། འགྲོ་དྲུག་གི་བདེ་སྡུག་དང་ཚོང་དང་འཁྲུགས་པ་དང་ཉོན་མོངས་པ་དང་ཆོས་དང་། ཆོས་མ་ཡིན་པའི་དྲན་བསམ་སྣ་ཚོགས་སྤྲོས་པའི་མཐར་ལྷའི་ཏིང་ངེ་འཛིན་བསྒོམ་པར་བྱའོ། །སྤྱོད་པ་གསུམ་པོ་དེ་ཆུན་གཅིག་ཏུ་སེམས་ལ་དྲན་པ་དང་། མཐུན་པར་རབ་ཏུ་བརྗོད་ཅིང་ལུས་ཀྱི་སྤྱོད་ཚུལ་དེ་དང་འདྲ་བར་ཉི་མ་གསུམ་དུ་བྱས་ནས། མཚན་མོ་ལུས་མི་གཡོ། ངག་མི་བརྗོད། སེམས་མི་རྟོག་པའི་ངང་ལ་རྣལ་དུ་དབབ་པར་བྱའོ། །དགོས་པ་ནི་ལུས་ངག་ཡིད་གསུམ་གྱི་སྡིག་པ་འདག །བར་ཆད་ཞི། མངོན་ཞེན་ལྡོག །སྐུ་གསུང་ཐུགས་རྡོ་རྗེར་འཚང་རྒྱ་བའོ། །

གཉིས་པ་སྒྲིབ་པ་སྦྱོང་བ་ནི། སྦྱང་བྱ་རང་ཉིད་ཐ་མལ་པའི་སྤྱི་བོའི་ནང་དུ་ཨ་དཀར་ནག་ལ་ལྷའི་བག་ཆགས་ང་རྒྱལ། མགྲིན་པར་སུ་སེར་ནག་ལ་ལྷ་མ་ཡིན་གྱི་ཕྲག་དོག །སྙིང་གར་ནྲ྇་སྔོ་ནག་ལ་མིའི་འདོད་ཆགས། ལྟེ་བར་ཏྲི་དམར་ནག་ལ་དུད་འགྲོའི་གཏི་མུག །གསང་བ་པྲེ་ལྗང་ནག་ལ་ཡི་དྭགས་ཀྱི་སེར་སྣ། རྐང་མཐིལ་དུ་དུ་དུད་ཁ་ལ་དམྱལ་བའི་ཞེ་སྡང་གི་བག་ཆགས་རྣམས་ཡི་གེའི་ཁ་དོག་དང་མཐུན་པར་ཡོད་པ་ལ། ལས་དང་ཉོན་མོངས་པ་འཁོར་དང་བཅས་པ་སོལ་དོང་ནས་དུ་བ་འཕྱུར་བ་ལྟར་བསམས་ལ། སྦྱོང་བྱེད་སྐུ་གསུང་ཐུགས་ཀྱི་ཡི་གེའང་། སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་མཐིང་ག་གསུམ་ལས་ཡེ་ཤེས་ཀྱི་མེ་འབར་བས་ཡི་གེ་དྲུག་(༡༦༤)བག་ཆགས་དང་བཅས་པ་ཐམས་ཅད་བསྲེགས་ནས་འཁོར་བ་ངན་སོང་གི་རྒྱུ་འབྲས་ཐམས་ཅད་དག་སྟེ། ལུས་ཤེལ་གོང་ཕྱིས་པ་ལྟར་བསམ་ཞིང་། ༀ་ཨཱཿཧཱུྃ་དབྱངས་དང་བཅས་པ་བརྗོད་དོ། །དགོས་པ་གསུམ་ལས། ཐུན་མོང་དུ་སྒོ་གསུམ་གྱི་སྡིག་པའི་ས་བོན་འདག་ཅིང་བར་ཆད་ཞི་ནས་ཞེན་པ་བཟློག་པའོ། །ཁྱད་པར་དུ་ཞེན་པ་ལོག་པས་ཕྱིས་འཁོར་བར་མི་འཇུག་པའོ། །མཐར་ཐུག་ཏུ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཐོབ་པའོ། །

གསུམ་པ་སྔོན་དུ་འགྲོ་བ་ལ་གསུམ་ལས། དང་པོ་ལུས་ཀྱི་སྔོན་དུ་འགྲོ་བ་ནི། རྐང་མཐིལ་གཉིས་སྤྲད། ལག་པ་སྤྱི་བོར་ཐལ་མོ་སྦྱར་ནས། རྡོ་རྗེ་མཐིང་ག་མེ་འབར་བ་ཅིག་ཏུ་བསྒོམ་མོ། །ལུས་ཁང་རུལ་ཞིག་པའི་རྣམ་པ་ལྟ་བུ་དང་། ཁོལ་བུར་ན་བ་དང་། དྲོད་སྐྱེ་བ་དང་། སེམས་མི་རྟོག་པའི་ངང་ལ་གནས་པ་ནི་ཚད་དོ། །དགོས་པ་གསུམ་ལས། ཐུན་མོང་དུ་སྡིག་པ་འདག །བར་ཆད་ཞི། མངོན་ཞེན་ལྡོག །ཁྱད་པར་དུ་ལུས་འཁོར་བར་མི་ལྡོག་ཅིང་སྤྲུལ་སྐུར་གྲོལ་བའོ། །མཐར་ཐུག་སྐུ་རྡོ་རྗེའི་ཀློང་དུ་མྱ་ངན་ལས་འདའ་བའོ། །ངག་གི་སྔོན་དུ་འགྲོ་བ་ལའང་། རྒྱས་གདབ་པ་དང་། རྩལ་སྦྱང་བ་དང་། མཉེན་བཙལ་བ་དང་། ལམ་དུ་གཞུག་པ་བཞི་ལས། དང་པོ་ལ་གཉིས་ལས། ཕྱི་སྣང་བ་ལ་རྒྱས་གདབ་པ་ནི། སོ་དང་མཆུ་མ་རེག་ཙམ་དུ་རླུང་དང་ཤེས་པ་ཧཱུྃ་གསུམ་གཅིག་ཏུ་བསྲེས་ལ། ཧཱུྃ་གི་གླུ་སྙན་ལ་རིང་བར་བླངས་པས་སྣང་བ་ཐམས་ཅད་ཧཱུྃ་དུ་མེ་རེ་རེ་ཁེངས་པར་བསམ་མོ། །ཕྱི་སྣང་བ་ཧཱུྃ་དུ་མེ་རེ་རེ་བྱུང་བ་ནི་ཚད་དོ་། །ནང་ཕུང་པོ་ལ་རྒྱས་གདབ་པ་ནི། ཧཱུྃ་བརྗོད་དུས་ཕྱིའི་ཧཱུྃ་དེ་དག་ཁ་སྣའི་སྒོ་ནས་ཞུགས་སྟེ། ལུས་ཀྱི་ནང་དུ་སིབ་སིབ་ཐིམ་པར་བསྒོམས་པས། ལུས་མི་བདེ་བ་སྙམ་པ་དང་། ཧཱུྃ་གིས་གང་བ་སྙམ་པ་ནི་ཚད་དོ། །དགོས་པ་ནི་ཕྱི་ནང་གི་སྣང་བ་ཐམས་ཅད་རང་བཞིན་མེད་པར་འགྱུར་བའོ། །གཉིས་པ་རྩལ་སྦྱང་བ་ལའང་གཉིས་ལས། ཕྱི་སྣང་བ་ལ་རྩལ་སྦྱང་བ་ནི། ཧཱུྃ་མཐིང་ནག་མེ་འབར་བ་གཅིག་གིས་ཕྱི་རོལ་གྱི་གཟུགས་ཆེ་ཆུང་ཐམས་ཅད་ཕར་ཐལ་ཚུར་ཐལ་ཡར་ཐལ་མར་ཐལ་ཕུག་པར་བསམ་ཞིང་ཧཱུྃ་དྲག་ལ་ངར་ཆེ་བར་བརྗོད་དོ། །སྣང་བ་སང་སེང་ཁྲ་ཁྲོལ་དུ་སོང་སྙམ་པ་ནི་ཚད་དོ། །ནང་ཕུང་པོ་ལ་རྩལ་སྦྱང་བ་ནི། དམིགས་པ་དེ་ཉིད་ཀྱིས་རང་གི་ལུས་ཁེ་ཁོལ་མེད་པར་དབུག་གོ། །ལུས་ཆུ་ཟླ་ལྟར་སྣང་ལ་རང་བཞིན་མེད་པའི་ཉམས་སྐྱེས་པ་ནི་འབྱོངས་པའི་ཚད་དོ། །དགོས་པ་ནི་ཕྱི་ནང་གི་ཆོས་གདོས་བཅས་སུ་སྣང་བ་རྣམས་འོད་གསལ་འཇའ་ཚོན་ལྟར་གྲོལ་བར་འགྱུར་རོ། །གསུམ་པ་མཉེན་བཙལ་(༡༦༥)བ་ནི། མདུན་དུ་དབྱུག་པ་བཙུག་པ་ལ་ཧཱུྃ་གིས་བ་ཐག་དཀྲིས་པས་རྩེ་མོར་སླེབས་དུས་ཕྱིར་གྲོལ་བ་ལྟ་བུ་ལ་ཤེས་པ་གཏད་ནས་ཧཱུྃ་རིང་བར་བརྗོད་པས། ཤེས་པ་གང་གཏད་དུ་ལྷན་ནེར་སྡོད་པ་སྙམ་པ་ནི་ཚད་དོ། །དེས་ནི་དམིགས་པ་གང་དུའང་བསྒྱུར་དུ་བཏུབ་པའི་དགོས་པ་ཡོད་དོ། །བཞི་པ་ལམ་དུ་གཞུག་པ་ནི། མདུན་ན་ཕར་སྲིན་འགྲོས་ལྟ་བུའི་ལམ་ཕར་འཁྱོག་ཚུར་འཁྱོག་པ། རྒྱང་རིང་པོར་རྩེ་ཟད་མཚམས་ལ་ཐུག་པར་བསམས་པ། ཧཱུྃ་རིང་པོར་བརྗོད་ཅིང་དེའི་ཕ་རོལ་ཏུའང་མཐའ་མེད་པར་ཕྱིན་པ་ལ་སེམས་གཏད་པས་དགའ་བ་སྐྱོ་བ་ལ་སོགས་པའི་ཉམས་སྐྱེས་པ་ནི་ཚད་དོ། །དེས་ནི་ལུས་ངག་གི་ལམ་སྲོལ་དུ་ཚུད་པའི་དགོས་པ་ཡོད་དོ། །དེ་ལྟར་ངག་གི་སྔོན་འགྲོ་བྱས་པ་ལ་དགོས་པ་གསུམ་ལས། ཐུན་མོང་དུ་ངག་གི་སྡིག་པ་འདག་ཅིང་ཡོན་ཏན་འཐོབ་མངོན་ཞེན་ལྡོག་པའོ། །ཁྱད་པར་དུ་ངག་ཕྱིས་འཁོར་བར་མི་འཇུག་ཅིང་། ལོངས་སྐུར་གྲོལ་བའོ། །མཐར་ཐུག་གསུང་རྡོ་རྗེའི་ཀློང་དུ་མྱ་ངན་ལས་འདའ་བའོ། །

གསུམ་པ་སེམས་ཀྱི་སྔོན་འགྲོ་ལའང་། དང་པོར་རྩད་བཅད་པ། བར་དུ་མཚང་བཙལ་བ། ཐ་མར་གནས་ལུགས་ལ་བརྟག་པ་གསུམ་ལས། རྩད་བཅད་པ་ནི། ལུས་ངག་ཡིད་གསུམ་པོ་འདི་གང་འཁོར་བར་འཁྱམས་པ་ཡིན། བདེ་སྡུག་དང་དགག་སྒྲུབ་ཐམས་ཅད་ཀྱི་བྱེད་པ་པོ་གང་ཡིན། ཚེ་སྔ་ཕྱིར་ཡང་གང་འཕོས་ཤིང་བརྒྱུད་པ་ཡིན། གཙོ་བོ་གང་དུ་འདུག་སྙམ་དུ་བརྟགས་པས་། སེམས་གཙོ་ཆེ་བར་ཤེས་པ་ནི་རྐུན་མ་ངོས་ཟིན་པ་ལྟ་བུའོ། །མཚང་བཙལ་བ་ནི། སེམས་དང་དེའི་ཡུལ་སྣང་གཉིས་གཅིག་གམ་ཐ་དད་ལ་བརྟག་པ་སྟེ། དེའང་ལུས་ངག་སེམས་གསུམ་པོ་གཅིག་གམ་ཐ་དད། གཅིག་ན་ལུས་ངག་ལྟར་སེམས་ཀྱང་མཐོང་ཐོས་སུ་འགྱུར་ལ། ཐ་དད་ན་ལུས་རྡུལ་ཕྲན་ཆ་མེད། ངག་རྗེས་མེད་གཏད་ཡལ། སེམས་བྱ་ལམ་རྗེས་མེད་དུ་སོང་རྗེས། ཐ་དད་བྱ་དང་། དད་བྱེད་འདུག་གམ། དཔྱད་ན་འབྲེལ་བ་མ་གྲུབ་པའི་ཕྱིར་གཅིག་དང་ཐ་དད་མ་ཡིན་ནོ། །དེ་ལྟར་ན་གཉིས་ཡིན་དང་། གཅིག་མ་ཡིན་གྱི་ཕུང་པོ་གསུམ་པའང་ཞར་ལ་ཁོགས་པས་གཅིག་དང་ཐ་དད་གྲུབ་པ་ནི་ཅུང་ཟད་ཀྱང་མེད་དོ། །དེ་བཞིན་དུ་ཕྱི་གཟུགས་སྒྲ་དྲི་རོ་རེག་དང་། ནང་སེམས་ལ་སེམས་ཀྱིས་འཛིན་དུས་ན། གཟུང་བ་ཡུལ་དུ་སྣང་བ་དང་། འཛིན་བྱེད་ཤེས་པ་གཉིས་གཅིག་དང་ཐ་དད་ལ་བརྟགས་པས། ཡུལ་མེད་རྟེན་འབྲེལ་གཅིག་ཏུ་རྟོགས་ཏེ། གཟུང་འཛིན་གྱི་རྩ་བ་ཆད། གཉིས་འཛིན་གྱི་མཁར་པོ་འགྱེལ། བདག་གཞན་གྱི་སྣང་བ་ནུབ། དགྲ་གཉེན་གྱི་འཁྲུལ་(༡༦༦)འཛིན་ཞིག །དགག་སྒྲུབ་ཀྱི་སྤྲིན་ཚོགས་དེངས། ཆོས་ཉིད་ནམ་མཁའ་ལྟ་བུའི་དགོངས་པ་ལ་ཕྱིན་ཏོ། །

གནས་ལུགས་ལ་བརྟག་པ་གསུམ་ལས། དང་པོ་བྱུང་ས་བྱུང་མཁན་ལ་བརྟག་པ་ནི། སེམས་ནི་ཡུལ་ལ་འཆར་དུས་ན། ཡུལ་ལས་སེམས་བྱུང་ངམ། སེམས་ལས་སེམས་བྱུང་། ཡུལ་ལས་སེམས་བྱུང་ན་ཡུལ་དེ་རགས་པ་ཡིན་ན་རྡུལ་ཕྲན་ཆ་མེད་དུ་བསིལ་བས་མ་གྲུབ་པས་དེའི་ཚེ་བྱུང་བའི་ཡུལ་མེད་པས་དེ་ལས་བྱུང་བའི་སེམས་མི་འགྲུབ་བོ། །ཕྲ་བ་ཡིན་ན་ཁ་དོག་དང་དབྱིབས་དང་ཆ་ཤས་བརྟག་པས་མི་རྙེད་དོ། །སེམས་ལས་སེམས་བྱུང་ན་སྐད་ཅིག་རང་དུས་ན་སེམས་ཆ་གཉིས་སུ་འགྱུར་ཏེ། བྱུང་ས་དང་བྱུང་མཁན་ཆ་གཉིས་སུ་ཡོད་པའི་ཕྱིར་རོ། །དེ་ལྟར་ན་སེམས་སྐད་ཅིག་ལ་ཆ་གཉིས་མེད་པས་ཀྱང་སེམས་ལས་སེམས་བྱུང་ས་མ་གྲུབ་བོ། །འོན་ཀྱང་བྱུང་ངོ་སྙམ་ན། སེམས་དེས་དེ་སྐད་ཟེར་རམ། ཡི་གེ་བྲིས་པ་འདུག་གམ། ཁྱོད་རང་སྙམ་པ་ཡིན་ནམ། དེ་སྐད་ཟེར་བ་དང་བྲིས་པ་འདུག་ན་ག་རེ། ཅི་ཡང་མི་འདུག་གོ་སྙམ་པས་དེར་འགྲོ་ན། སྣང་བ་འདི་མུན་པའོ། །སྙམ་པ་བྱས་དུས་དེར་འགྲོའམ། དེས་ན་བློས་བཀོད་པ་སྒྲོ་བཏགས་པ་ཡིན་པས་ཀྱང་རང་བཞིན་མ་གྲུབ་ལ། དེ་ལས་གཞན་དུའང་སྐྱེས་ས་དང་སྐྱེ་མཁན་མེད་པས། སེམས་དང་པོར་སྐྱེ་བ་མེད་པར་གཏན་ལ་ཕེབས་པས། ཆོས་སྐུ་བློ་བྲལ་ཆེན་པོ་ཐོག་མའི་ཟད་ས་ཤེས་སོ། །བར་དུ་གནས་ས་གནས་མཁན་ལ་བརྟག་པ་ཡང་དེ་དང་འདྲ་སྟེ། ཡུལ་དྲུག་གི་རང་བཞིན་ལ་དཔྱད་པས་གཞི་མེད་ནམ་མཁའ་ལྟར་དག་སྟེ་གནས་པའི་ཡུལ་མེད། གནས་མཁན་རང་གི་སེམས་ལ་བརྟགས་པས། ཁ་དོག་དང་དབྱིབས་དང་ངོ་བོ་དང་ངོས་གཟུང་མ་རྙེད་པས། འཛིན་བྱེད་ཤེས་པའི་རང་བཞིན་མ་རྙེད་དེ། གཟུང་འཛིན་སེམས་ཀྱི་འཁྲུལ་པ་སྟོངས་ནས། གནས་ས་མེད་པའི་སེམས་ཉིད་ལོངས་སྐུ་གཞི་བྲལ་གསལ་དག་ཆེན་པོ་ཆོས་ཉིད་རང་བབས་ཀྱི་དགོངས་པར་ཤེས་སོ། །ཐ་མར་འགྲོ་ས་འགྲོ་མཁན་ལ་བརྟག་པས། ཡུལ་ཐོག་ཏུ་ཤར་བའི་སེམས་ཞེས་མ་གྲུབ་སྟེ། དང་པོ་མ་སྐྱེས་པས་བར་དུ་མི་གནས། མི་གནས་པ་ལ་འགག་པ་མེད་པས་སྐྱེ་འགག་གནས་གསུམ་དང་བྲལ་བའི་ཆོས་ཉིད། ཤར་གནས་རིས་མེད་མཉམ་པ་ཆེན་པོར་ལ་བཟླ་སྟེ། རིག་སྟོང་རང་གྲོལ་སྤྲུལ་པའི་སྐུར་ཐག་ཆོད་པས། ཕྱམ་མཉམ་ཡངས་པ་ཕྱོགས་ཡན་ཆེན་པོར་བློ་བདེ་བའོ། །དེ་ལྟར་སེམས་ཀྱི་སྔོན་འགྲོ་བྱས་པ་ལ་དགོས་པ་གསུམ་ལས། ཐུན་མོང་དུ་སེམས་ཀྱི་སྡིག་པ་(༡༦༧)འདག །ཡོན་ཏན་སྐྱེ་མངོན་ཞེན་ལྡོག་པའོ། །ཁྱད་པར་དུ་ཕྱིས་འཁོར་བར་མི་འཇུག་ཅིང་ཆོས་སྐུར་གྲོལ་བའོ། །མཐར་ཐུག་ཐུགས་རྡོ་རྗེའི་ཀློང་དུ་མྱ་ངན་ལས་འདའ་བའོ། །བཞི་པ་རྣལ་དུ་དབབ་པ་ནི། བདེ་བའི་མལ་དུ་ལུས་སོ་མ་སྒུལ་བསྐྱོད་དང་བྲལ་བ། ངག་སོ་མ་སྨྲ་བརྗོད་དང་བྲལ་བ། ཡིད་སོ་མ་དྲན་རྟོག་དང་བྲལ་བར་ལྷོད་ཀྱིས་གློད་ལ་རང་བབས་སུ་ཉལ་ལོ། །དགོས་པ་གསུམ་ལས། ཐུན་མོང་དུ་རྩ་རླུང་ཁོད་སྙོམས་པས་འབྱུང་བ་མི་འཁྲུགས་ཤིང་ནད་མེད་པའོ། །ཁྱད་པར་དུ་ཏིང་ངེ་འཛིན་རང་བབས་སུ་སྐྱེ་ཞིང་ལུས་སེམས་ངང་གིས་བདེ་བའོ། །མཐར་ཐུག་སྒོ་གསུམ་གྱི་འཛིན་པ་རང་གྲོལ་དུ་འགྲོ་བའོ། །

དོན་གཉིས་པ་དངོས་གཞི་རིག་པའི་རང་ངོ་སྤྲད་པས་འོད་གསལ་ཆོས་སྐུ་ཅེར་མཐོང་དུ་བསྟན་པ་ལ། ཀ་དག་ཆོས་ཟད་དུ་ལ་བཟླ་བ་གཞི་ཁྲེགས་ཆོད་དང་། ལྷུན་གྲུབ་འོད་གསལ་དུ་འགག་བསྡོམ་པ་ལམ་ཐོད་རྒལ་དུ་ངོ་སྤྲད་པ་གཉིས་ལས། དང་པོ་ཁྲེགས་ཆོད་ལ་ངོ་སྤྲད་པ། རྩལ་སྦྱང་བ། བོགས་དབྱུང་བ་གསུམ་ལས། དང་པོ་ནི་ཚོགས་གཏོར་བཤམས། གསོལ་བཏབ་བརྒྱུད་པའི་བཤར་བཏབ་པའི་རྗེས་ལ། དཔོན་སློབ་ཀུན་ཤེས་པ་ཁོང་གློད། རིག་པ་དྭངས་ཕྱུང་། ས་ལེ་ཡེ་རེ་བའི་རང་ངོ་སྤྲད་པར་བྱ་སྟེ། ཀྱེ་སྐལ་ལྡན་ད་ལྟའི་རིག་པ་རང་གསལ་རྗེན་པ་འདི་ལ་ལྟོས་དང་། རྟོག་པར་མ་འཕྲོས། རྩེ་གཅིག་ཏུ་མ་བཟུང་། སྤང་བླང་དང་རེ་དོགས་ཀྱིས་མ་བསླད་པ། གསལ་བ་ལ་འཛིན་པ་མེད་པ། དྭངས་པ་ལ་ཕྱི་ནང་མེད་པ། ཡངས་པ་ལ་ཕྱལ་བར་མ་ཤོར་བ། ངང་དངས་ལ་ངོས་གཟུང་མེད་པ། ཟང་ཐལ་ལ་ཕྱམ་བརྡལ་བ། རང་བབས་རྗེན་པ་འདི་ཉིད་སེམས་ཉིད་རང་བཞིན་གྱིས་འོད་གསལ་བ། ཆོས་སྐུ་འགྱུར་བ་མེད་པའི་རང་བཞིན་དུ་རང་ངོ་ཤེས་པར་གྱིས་ལ། རང་དྭངས་འཛིན་མེད་ཆེན་པོར་སྐྱོངས་ཤིག །དྲི་མེད་དག་པའི་སངས་རྒྱས་ནི། །རང་རིག་ཆོས་སྐུ་འགྱུར་བ་མེད། །སལ་ལེ་སེང་ངེ་ཝལ་ལེ་བ། །སྤྲིན་མེད་སྟོན་ཀའི་ནམ་མཁའ་བཞིན། །མི་འགྱུར་བརྟན་པ་རི་བོ་བཞིན་དུ་ཞོག །མི་གཡོ་དྭངས་པ་རྒྱ་མཚོ་བཞིན་དུ་ཞོག །ཡངས་དོག་བྲལ་བ་ནམ་མཁའ་བཞིན་དུ་ཞོག །གང་ལྟར་གནས་ཀྱང་རིག་པའི་ངང་ཡིན་ཞོག །གང་ལྟར་ཤར་ཡང་རིག་པའི་གདངས་ཡིན་ཞོག །འཕྲོ་གནས་རང་རིག་དྭངས་སངས་ཕྱེད་པར་ཞོག །ཇི་ལྟར་བྱ་རྣམས་གང་དུ་འཕུར་ན་ཡང་། །མཁའ་ལས་མ་འདས་དེ་བཞིན་རིག་པའི་ངང་། །ཆོས་རྣམས་རང་གསལ་གཡོ་བ་མེད་པར་ཞོག །ཅེས་ཐེབས་པར་གདབ་བོ། །

གཉིས་པ་རྩལ་སྦྱང་བ་ལ། རང་(༡༦༨)གནས་བསམ་གཏན་གྱི་ངང་ལ་རྩལ་སྦྱང་བ་དང་། རང་དྭངས་ཡེ་ཤེས་ཀྱི་རོལ་པ་ལ་རྩལ་སྦྱང་བ་གཉིས་ལས། དང་པོ་ལའང་རང་གནས་ཀྱི་བསམ་གཏན་ངོས་གཟུང་བ་དང་། མཉམ་རྗེས་བསྲེ་བའི་ཐབས་བསྟན་པ་གཉིས་ལས། དང་པོ་ནི་སྐྱིལ་ཀྲུང་བཅས་ལ། མིག་མི་འགུལ་བས་ཅུང་ཟད་ཐུར་དུ་བལྟས་པས། སེམས་དྭངས་ལ་མི་རྟོག་པའི་ངང་དེ་ཉིད་ཀྱི་དུས་ན་མིག་ཐད་དྲང་དུ་ཧ་རེ་གཏད་པས། སྔར་གྱི་མི་རྟོག་པའི་དྭངས་དེ་ཞིག་ཀྱང་། བྱུང་ཚོར་གྱི་རྟོག་པ་དང་དྲན་འཛིན་གྱི་གཉེན་པོ་མེད་པའི་ཤེས་པ་རང་གསལ་རྒྱ་ཡན་པ། གཞི་ཕྱལ་པ་གཅིག་འཆར་ཏེ། དེ་ཉིད་རིག་པ་རང་གནས་ཀྱི་བསམ་གཏན་དུ་ཤེས་པར་བྱའོ། །དེ་ཉིད་ངོས་ཟིན་ནས་ཕྱིས་ཤེས་པ་གནས་སམ་འཕྲོའམ། དགག་སྒྲུབ་དང་། ཉོན་མོངས་དང་། མི་རྟོག་པའི་ཏིང་ངེ་འཛིན་ལ་གནས་པ་ལ་སོགས་པ་གང་གི་དུས་སུའང་རང་རིག་རང་བབས་ལ་ཆེར་གྱིས་གཏད་པས་འཛིན་མེད་རང་གནས་ཀྱི་བསམ་གཏན་དེ་རྗེན་སངས་ཀྱིས་འཆར་ཏེ། འདི་ཁོ་ན་མ་བྱས་ལྷུན་གྲུབ་ཀྱི་སྒོམ་པ་ཆུ་བོ་ལྟ་བུ་ཡིན་ནོ། །དེ་ངོ་མ་ཤེས་ན་རྐྱེན་རེས་འགའ་བའི་སྒོམ་པས་རྐྱེན་མི་ཐུབ་ཅིང་། བར་དོའི་བསམ་གཏན་ངོས་མི་ཟིན་པའི་སྐྱོན་ཡོད་དོ། །དེ་ཉིད་ཀློང་དྲུག་པ་ལས་ཀྱང་། རང་བཞིན་གནས་པའི་བསམ་གཏན་དང་། །རྩ་རླུང་སེམས་ཀྱི་ངལ་གསོ་གཉིས། །འདྲའོ་འདྲའོ་ནོར་ར་རེ། །ཞེས་གསུངས་པ་ཡིན་ནོ། །གནད་འདི་ཆོས་འདིའི་དཀའ་བའི་གནས་ཏེ། རང་བྱུང་པདྨའི་བྱིན་རླབས་ལས་རང་བབས་ཤེས་པ་ཡིན་ནོ། །ཕྱིན་ཆད་རང་བཞིན་གྱི་བསམ་གཏན་ངོས་ཟིན་པ་དག་ནི་ཡི་གེ་འདིའི་མཐུ་དང་། བདག་གི་བརྒྱུད་པ་ལས་བྱུང་བར་བལྟའོ། །མཉམ་རྗེས་བསྲེ་བའི་ཐབས་ནི། དེའི་ངང་ལ་ཅུང་ཟད་བརྟན་པ་ཐོབ་ནས་བསྡད་པ་ལས་ལངས་ཏེ་ཁྲོ་བོའི་སྟངས་སྟབས། གྱད་ཀྱི་དོར་སྟབས། སེང་གེའི་མཆོངས་སྟངས་གསུམ་ལ་བསླབ་པ་ལས། དང་པོ་ནི་ལྷན་ནེ་བསྡད་དུས་ཀྱི་བསམ་གཏན་གྱི་ངང་མ་ཤོར་བ་ལས་ལངས་ཏེ། གཡས་བསྐུམ་གཡོན་བརྐྱང་དུ་བྱེད་ཅིང་། མིག་ཕར་འཕྲུལ་ཚུར་འཕྲུལ་བྱས་ལ་བསམ་གཏན་དང་བསྲེ་བའོ། །དེ་བརྟན་ནས་གྱད་ཀྱི་དོར་སྟབས་ནི་བསམ་གཏན་གྱི་ངང་མ་ཤོར་བས་གོམ་པ་དལ་བུས་གྱ་ཚོམས་སུ་འདོར་བའོ། །དེ་བརྟན་ནས་སེངྒེའི་མཆོངས་སྟངས་ནི། བསམ་གཏན་གྱི་ངང་མ་ཤོར་བས་དྲག་ཏུ་འགྲོ་ཞིང་རིང་དུ་མཆོངས་པ་དང་། དལ་བུས་འགྲོ་ཞིང་ས་ལ་སྡོད་པ་དང་། སྐད་ཅིག་ལ་ལངས་ཤིང་ཅ་ཅོར་སྒྲོགས་པ་དང་། དྲན་བསམ་དུ་སྤྲོ་ཞིང་རྟོག་མེད་དུ་འཇོག་པ་ལ་སོགས་པ་ལ་བསླབས་པས། སྤྱོད་(༡༦༩)ལམ་ཐམས་ཅད་རང་བཞིན་གྱི་བསམ་གཏན་དང་འདྲེས་ནས། བྱ་བྱེད་དང་། སྨྲ་བརྗོད་དང་། དྲན་རྟོག་ཐམས་ཅད་ཆོས་ཉིད་ཀྱི་རོལ་པར་ཤར་ཏེ་མཉམ་རྗེས་ཀྱི་རིས་མེད། ཉིན་མཚན་གྱི་བར་མེད། བླང་དོར་གྱི་ཆོས་མེད། བསྒོམ་བྱའི་བློ་མེད། ཡིན་མིན་གྱི་རྩིས་མེད་པར་ཐམས་ཅད་རིག་པའི་ངང་རོལ་པ་གཅིག་ཏུ་འདྲེས་ཏེ། རྒྱ་ཡན་དུ་སོང་ཡང་ཕྱལ་བར་མ་ཤོར། ཆེད་དུ་མ་བསྒོམས་ཀྱང་ཏིང་ངེ་འཛིན་དང་མི་འབྲལ་བས། ཆོས་ཉིད་ཟད་པའི་དགོངས་པ་དགེ་སྡིག་བླང་དོར་ལས་འདས་པ་ལྟ་སྒོམ་སྤྱོད་འབྲས་ཀྱི་ཕན་གནོད་མེད་པར་རྟོགས་པས། སྒོམ་མེད་ཆུ་བོའི་རྒྱུན་གྱི་རྣལ་འབྱོར་ལ་རང་བཞིན་གྱིས་གནས་པར་འགྱུར་རོ། །

གཉིས་པ་ལ། གནས་པ་སེམས་ཀྱི་རྒྱན་དུ་ཤར་བ། འཕྲོ་བ་སེམས་ཀྱི་རོལ་པར་ཤར་བ། གཉིས་མེད་མཉམ་པའི་ངང་དུ་གནས་པ་གསུམ་ལས། དང་པོ་ནི་ལུས་ངག་ཡིད་གསུམ་ཁོང་གློད་ལ་སོས་བརྡལ་ཏེ་ལྷན་ནེར་གནས་པའི་ཚེ། དགག་སྒྲུབ་ཀྱི་རྟོག་པ་སྣ་ཚོགས་སུ་འཕྲོར་བཅུག་ལ། ཕྱམ་གྱིས་བཞག་ལ་ཆེར་གྱིས་བལྟས་པའི་ཚེ། རྒྱ་མཚོ་ལ་རླབས་ཞི་བ་ལྟར་འཕྲོ་མཁན་གྱི་ཤེས་པ་དང་། འཕྲོ་བྱའི་ཡུལ་གཉིས་སུ་མ་གྲུབ་པར་ཕྱམ་གྱིས་སེམས་གཞི་མེད་རྩ་བ་དང་བྲལ་བ་རང་བཞིན་གཞིའི་ངང་དུ་རང་བབས་སུ་གནས་པ་ནི། གདོད་མ་ཀ་དག་གི་གནས་ལུགས་ཆོས་སྐུ་འཕོ་འགྱུར་མེད་པའི་དགོངས་པ་ལ་ངོ་སྤྲད་པའོ། །གཉིས་པ་ནི། དེ་ཉིད་ཀྱི་ངང་ལས་སྣ་ཚོགས་ཀྱི་རྟོག་པ་སྤྲོས་ལ། དགག་སྒྲུབ་དང་རེ་དོགས་མེད་པར་གང་ཤར་གྱི་རྟོག་པ་དེར་འཛིན་པ་མེད་པས་རྒྱ་ཡན་དུ་བཅུག་ལ། སྔ་ཕྱི་དྲན་བསམ་གྱི་མདུད་པ་བོར་ནས། ད་ལྟའི་རིག་པ་ཐོལ་སྐྱེས་ཐོལ་ནུབ་ཏུ་འགྲོ་བ་གཤིས་ཀྱི་གནས་ལུགས་ཇི་ལྟར་འཕྲོས་ཀྱང་ཆོས་ཉིད་ཀྱི་རོལ་པ་ལས་མི་འདའ་བར་རྒྱ་མཚོ་ལས་རླབས་པོ་ཆེ་ཤར་བ་ལྟ་བུ། རང་གྲོལ་རང་ཤར་གྱི་ངོ་བོ་ཐུགས་རྗེས་འགག་པ་མེད་པའི་དགོངས་པ་ལ་ངོ་སྤྲད་པའོ། །གསུམ་པ་ནི་འཕྲོ་གནས་གཉིས་སུ་མེད་པ་སྟེ། གནས་བདོ་བའི་དུས་ན་མིག་སྒྲིལ་བས་འཕྲོ་ཡང་རང་བབས་སུ་བཞག་པས་གནས་ལ། འཕྲོ་བདོ་བའི་དུས་སུ་མིག་མ་འགུལ་བར་ཕྱམ་གྱིས་བཞག་པས་གནས་ཏེ། འཕྲོ་བ་དང་གནས་པ་གཉིས་སུ་མེད་པ་རྒྱ་མཚོ་ལས་རླབས་བུ་ཆུང་ཤར་བ་ཉིད་རྒྱ་མཚོར་ཞི་བ་ལྟ་བུའི་ངང་ལ་གཞག་གོ། །དེའང་གནས་པ་མི་བསྲིང་། འཕྲོ་བ་མི་དགག་མཉམ་པ་མི་བསྒྲུབ། སེམས་ཇི་ལྟར་ཤར་ཡང་དེ་ལྟར་མི་འཛིན་པས་དགག་སྒྲུབ་བླང་དོར་རེ་དོགས་ལས་འདས་པའི་ཆོས་ཉིད་ཡེ་གྲོལ་རང་བཞིན་རྫོགས་པ་ཆེན་པོའི་དགོངས་(༡༧༠)པ་ལ་ངོ་སྤྲད་པའོ། །དེ་ལྟར་ན་རང་ཤར་དུ་འདུག་པས་རང་གྲོལ་དུ་གྲོལ། ངེས་མེད་དུ་འདུག་པས་འཛིན་མེད་དུ་གྲོལ། ཡེ་གྲོལ་དུ་འདུག་པས་གཞི་བྲལ་དུ་གྲོལ། ཐོག་བབས་སུ་འདུག་པས་ཅར་ཕོག་ཏུ་གྲོལ། རང་གྲོལ་དུ་འདུག་པས་སྣང་སྟོང་དུ་གྲོལ་བའོ། །དེའང་རྣམ་རྟོག་མ་སྤངས་གཞི་ནས་གྲོལ་བས་བསྐྱར་ནས་གྲོལ་བྱེད་འབད་རྩོལ་ཞིག་པའི་གདེང་ཆོས། གང་ཤར་གྱི་རྣམ་རྟོག་རང་སར་གྲོལ་བས་དྲན་འཛིན་གྱི་གཉེན་པོ་ལ་མི་ལྟོས་པའི་གདེང་ཆོས། ཡུལ་དྲུག་ཅེར་མཐོང་དུ་གྲོལ་བས་སྔ་ཕྱིར་འཛིན་པའི་ཤེས་པ་དང་བྲལ་བའི་གདེང་ཆོས། བཟང་ངན་ཡོངས་གྲོལ་དུ་ཤེས་པས་བླང་དོར་ཕྱོགས་འཛིན་དང་བྲལ་བའི་གདེང་ཆོས། མདོར་ན་གང་ཤར་གྱི་རིག་པ་བཅིངས་གྲོལ་ལས་འདས་པའི་རང་བཞིན་འགྲོ་འོང་དང་བྲལ་བར་གཏན་ལ་ཕེབས་ཏེ། རང་སེམས་གྲོལ་བ་ཞེས་བྱ་བ། །གཅིག་ནས་གཅིག་ཏུ་སོང་བ་མེད། །གང་གིས་དགྲོལ་བ་མེད་པའི་སེམས། །གཞི་ནས་རྫོགས་པས་འགྲོ་འོང་མེད། །བརྟགས་པས་མ་རྙེད་རྒྱུ་མཚན་མེད། །གཞི་རྩ་མེད་པས་སྟོང་གསལ་གནས། །རང་གསལ་གནས་པའི་སེམས་དེ་ནི། །གནད་ཀྱིས་གྲོལ་བས་ཕྱོགས་རིས་མེད། །དུས་ཀྱིས་གྲོལ་བས་ལྟོས་གཞི་མེད། །འབད་མེད་གྲོལ་བས་རྩོལ་སྒྲུབ་མེད། །རང་གིས་གྲོལ་བས་གཉེན་པོ་མེད། །ཡེ་ནས་གྲོལ་བས་བསྐྱར་གཞི་མེད། །ཅེར་གྱིས་གྲོལ་བས་མཐོང་སར་ཡལ། །ཡོངས་སུ་གྲོལ་བས་འབད་རྩོལ་མེད། །ཅེས་ངོ་སྤྲད་དོ། །

གསུམ་པ་ལ་གསུམ་ལས། དང་པོ་དུག་ལྔ་རང་གྲོལ་ནི། ཕྱི་ནང་གི་འདོད་ཆགས་མི་བཟོད་པ་ཅི་སྐྱེས་པའི་ངོ་བོ་ལ་ཅེར་གྱིས་བལྟས་ནས་ཕྱམ་གྱིས་བཞག་པས་བདེ་སྟོང་གཉིས་སུ་མེད་པའི་ངང་ལ་རང་གྲོལ་ལོ། །ཞེ་སྡང་རགས་པའི་ངོ་བོ་ལ་ཅེར་གྱིས་བལྟས་ནས་ཕྱམ་གྱིས་བཞག་པས་གསལ་སྟོང་གཉིས་སུ་མེད་པའི་ཡེ་ཤེས་སུ་གྲོལ་ལོ། །གང་ཡང་མི་རྟོག་པའི་ཤེས་པ་ལུང་མ་བསྟན་རྨུགས་འཐིབས་པ་ལ་སོགས་བྱུང་དུས་གཏི་མུག་གི་ངོ་བོ་ལ་ཅེར་གྱིས་བལྟས་ལ་ཕྱམ་གྱིས་བཞག་ནས་གནས་པའི་ཞི་གནས་དེ་ཡང་བཤིག་ལ་རང་གྲོལ་དུ་ཕྱམ་གྱིས་བཏང་བ་ནི། ཆོས་སྐུ་གཞི་བྲལ་གྱི་ཡེ་ཤེས་སུ་རང་གྲོལ་ལོ། །ང་རྒྱལ་ཕྲག་དོག་གི་ངོ་བོ་ལ་ཅེར་གྱིས་བལྟས་ནས་ཕྱམ་གྱིས་བཞག་པས་རང་གསལ་གཉུག་མའི་ངོ་བོ་ལྷན་ཅིག་སྐྱེས་པའི་ཡེ་ཤེས་སུ་གྲོལ་ལོ། །གཉིས་པ་སྒོ་ལྔ་རང་གྲོལ་ནི། མིག་དང་རྣ་བ་དང་སྣ་དང་ལྕེ་དང་ལུས་ཀྱིས་འཛིན་པ་གང་སྐྱེས་པ་དེའི་ངོ་བོ་ལ་ཅེར་གྱིས་བལྟས་ནས་ཕྱམ་གྱིས་བཞག་པས་ཆོས་སྐུ་ཀ་དག་ཆེན་(༡༧༡)པོར་རང་གྲོལ་ལོ། །གསུམ་པ་ཚོགས་དྲུག་རང་གྲོལ་ནི། གཟུགས་དང་སྒྲ་དང་དྲི་དང་རོ་དང་རེག་བྱ་དང་། ཡིད་ཀྱི་བྱུང་ཚོར་དྲན་རིག་གི་དགག་སྒྲུབ་ཆགས་སྡང་ཅི་སྐྱེས་པ་དེའི་ངོ་བོ་ལ་ཅེར་གྱིས་བལྟས་ནས་ཕྱམ་གྱིས་བཞག་པས་ཡེ་སྟོང་རྩ་བྲལ་ཆེན་པོའི་ངང་དུ་ལ་ཟློས་ཏེ་གནས་ལུགས་སྟོང་གསལ་མཉམ་པ་ཆེན་པོར་ལྷུན་གྱིས་གྲུབ་བོ། །དེས་ནི་གང་ཤར་བླང་དོར་རེ་དོགས་ལས་འདས་པ་མ་བསྒོམས་ཡེ་ཤེས་ལྷུག་པའི་རང་བཞིན་དུ་ཁྲེགས་ཆོད་པའོ། །

དོན་གཉིས་པ་ལྷུན་གྲུབ་འོད་གསལ་དུ་འགག་བསྡམ་པ། ལམ་ཐོད་རྒལ་དུ་ངོ་སྤྲད་པ་ལ། སྔོན་འགྲོ་ཟག་མེད་ཀྱི་ཡེ་ཤེས་རྒྱུད་ལ་བསྐྱེད་པའི་ཚུལ། དངོས་གཞི་དེ་ཉིད་ངོ་སྤྲད་པའི་ཚུལ། རྗེས་རྣལ་འབྱོར་བཞིས་ཉམས་སུ་བླང་བའི་ཚུལ་དང་གསུམ་ལས། དང་པོ་ནི་ལུས་ངག་ཡིད་གསུམ་གྱི་བྱ་བ་དགུ་ཕྲུགས་སུ་བཏང་སྟེ་དལ་བར་གནས་པའོ། །དེའང་ལུས་ཕྱིའི་བྱ་བ་ཚོང་སོ་ནམ་ལ་སོགས་པ་འཇིག་རྟེན་གྱི་འཁྲུལ་པའི་ཀུན་སྤྱོད་སྣ་ཚོགས། ནང་ཕྱག་དང་བསྐོར་བ་ལ་སོགས་པ་དམན་པའི་དགེ་བ། གསང་བ་རྣམ་གཡེང་དང་འདུ་འཛི་སྤངས་ཏེ་གཅིག་པུར་འདུག་པའོ། །ངག་གི་ཕྱི་འཇིག་རྟེན་གྱི་འཁྲུལ་གཏམ་སྣ་ཚོགས། ནང་ཁ་ཏོན་དང་བཟླས་བརྗོད་སྣ་ཚོགས། གསང་བ་སྨྲ་བརྗོད་ཀྱི་རྣམ་པ་བཀག་ནས་ལྐུགས་པ་ལྟར་རོ། །ཡིད་ཀྱི་ཕྱི་འཇིག་རྟེན་གྱི་འཁྲུལ་རྟོག་སྣ་ཚོགས། ནང་བསྐྱེད་རྫོགས་ཀྱི་སེམས་འཛིན་སྣ་ཚོགས། གསང་བ་དྲན་རིག་གི་རྣམ་རྟོག་སྣ་ཚོགས་བཀག་ནས་རྟོག་མེད་ཀྱི་ངང་ལ་གནས་པའོ། །དེ་ལྟར་བྱས་པ་ལ་དགོས་པ་གཉིས་ལས། གནས་སྐབས་སུ་བྱ་བ་ཐེངས་པས་འཁྲུལ་ཕྱིར་མི་འབྲང་ལ། མཐར་ཐུག་ཟག་མེད་ཀྱི་ཡེ་ཤེས་མྱུར་དུ་འཆར་བའི་དགོས་པ་ཡོད་དོ། །

གཉིས་པ་ལ་གསུམ་ལས། ལུས་ཀྱི་གནད་བཞུགས་སྟངས་གསུམ་ལ་གནས་པའོ། །དེའང་ཆོས་སྐུའི་བཞུགས་སྟངས་སེང་གེ་ལྟ་བུ་ནི་ཙོག་པུ་རྐང་མཐིལ་གཉིས་སྤྲད་དེ་པུས་མོ་གཉིས་ཕྱིར་བརྒྱངས་ལ། ལག་མཐིལ་བརླའི་ཕྱི་ནས་ས་ལ་བཙུགས་པའམ། ནང་དུ་བཙུགས་པའི་མཐེ་བོང་བཅངས་ཏེ་མཇིང་པ་ཡུད་ཙམ་གྱེན་དུ་བསྟོད་ལ། སྨིན་ཕྲག་གི་ནམ་མཁའ་ལ་མ་འགུལ་བར་བལྟའོ། །ལོངས་སྐུའི་བཞུགས་སྟངས་གླང་པོ་ནི་ཁ་སྦུབ་ཀྱིས་པུས་བྲང་སྦྱར་ལ་གྲུ་མོ་གཉིས་ས་ལ་བཙུགས་ཏེ། ལག་མཐིལ་གཉིས་ཀྱིས་ཨོལ་ཀོ་བརྟེན་པའི་སོར་མོ་འགྲམ་པ་ལ་སྦྱར་ཞིང་། སྒལ་ཚིགས་བསྲངས་ཏེ་མིག་ནམ་མཁའ་ལ་ཟུར་གྱིས་རིག་པར་བལྟའོ། །སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ནི། ཙོག་(༡༧༢)པུར་འདུག་པའི་རྐང་པའི་ལོང་བུ་བཤིབས་ཏེ་ལག་པ་གཉིས་མཁལ་ཁུང་ངམ་པུས་མོ་ལ་བསྐོར་ནས་སྒལ་ཚིགས་བསྲངས་ཏེ་མིག་བར་སྣང་ལ་ཟིམ་བུར་བལྟའོ། །དེ་ལྟར་བྱས་པའི་དགོས་པ་ནི། གནས་སྐབས་སུ་བཞུགས་སྟངས་དང་པོས་ནང་གི་འབྱུང་བ་རྣམས་འཛད་པ་དང་། གཉིས་པས་གཡོ་བྱེད་ཀྱི་རླུང་ཟིན་པ་དང་། གསུམ་པས་དྲོད་སྐྱེ་ཞིང་འབྱུང་བ་སྙོམ་པའོ། །མཐར་ཐུག་ནི་རིམ་པ་བཞིན་ཀ་དག་གི་དོན་རྟོགས་པ་དང་། ལྷུན་གྲུབ་ཀྱི་དོན་འཆར་བ་དང་། འཁྲུལ་སྣང་ཞིང་ཁམས་སུ་འཆར་བའོ། །

གཉིས་པ་ངག་གི་གནད་ལ་གསུམ་ལས། དང་པོ་གནས་པ་ནི་སྨྲ་བ་བཅད་དེ་འཁྲུལ་གཏམ་བཀག་ནས། བརྟན་པ་ནི་རང་གི་ཁ་ཏོན་བཟླས་བརྗོད་ཅུང་ཟད་ཙམ་ལས་མི་བརྗོད། ལ་བཟླ་བ་ནི་བརྡ་ཙམ་ལས་བརྗོད་པ་ཅུང་ཟད་ཀྱང་མི་བྱེད་པའོ། །དེ་ལྟར་བྱས་པའི་དགོས་པ་ནི། གནས་སྐབས་སུ་འཁྲུལ་པ་དང་ཉོན་མོངས་པ་མི་འཕེལ། མཐར་ཐུག་རིག་པའི་དོན་ལ་རེག་ཅིང་། སངས་རྒྱས་ཐམས་ཅད་ཀྱི་གསུང་གི་ཀློང་དུ་མྱ་ངན་ལས་འདའོ། །གསུམ་པ་སེམས་ཀྱི་གནད་ནི། ནམ་མཁའ་སྤྲིན་དང་བྲལ་བ་ལ་སེམས་མ་ཡེངས་པར་གཏད་པས། ཡུལ་སྟོང་པ་ལ་རིག་པ་སྟོང་པ་འཆར་བའོ། །དེ་ལྟར་བྱས་པའི་དགོས་པ་ནི། གནས་སྐབས་སུ་རིག་པ་མངོན་སུམ་དུ་གསལ་བར་མཐོང་ལ། མཐར་ཐུག་ལྷག་མེད་དུ་འཚང་རྒྱའོ། །

གསུམ་པ་ཡེ་ཤེས་ཀྱི་གསང་ལམ་མཚོན་ཚུལ་ནི། སྙིང་ནས་མིག་ཏུ་རྩ་དར་དཀར་གྱི་སྐུད་པ་ལྟ་བུས་འབྲེལ་པ་དེའི་ནང་ན་ཡར་ཡེ་ཤེས་རྒྱ་སྐར་གྱི་ཉི་ཞུར་ལྟར་འཆར་བས་མིག་གི་ནང་དུ་གཟིགས་སྟངས་བྱ་སྟེ། ཆོས་སྐུའི་གཟིགས་སྟངས་གྱེན་ལོངས་སྐུའི་ཟུར་ལ་དལ་ཞིང་སྙོམས་པར། སྤྲུལ་སྐུའི་ཕབ་ལ་ཕྱེད་བཙུམ་རབ་ཏུ་ཟིམ་པར་བྱས་ལ་བལྟའོ། །རླུང་གི་གནད་དུ་མཆུ་དང་སོ་གཉིས་བག་ཙམ་མ་རེག་པར་བྱས་ལ་རླུང་ཁ་ནས་རབ་ཏུ་དལ་བར་གཏང་ངོ་། །རིག་པའི་གནད་དུ་ལུ་གུ་རྒྱུད་ཤར་བ་ལ་མ་འགུལ་བར་བལྟའོ། །དེས་ནི་གནས་སྐབས་སུ་རིག་པའི་ཡེ་ཤེས་མངོན་སུམ་དུ་གསལ་ལ། མཐར་ཐུག་སྣང་བ་བཞི་ཟད་དེ་ལྷག་མེད་དུ་འཚང་རྒྱའོ། །

གཉིས་པ་དངོས་གཞི་དེ་ཉིད་ངོ་སྤྲད་པ་ནི། རྣམ་པ་མང་ཡང་། འདིར་བསྡུ་ན་ལྔ་ཚན་བདུན་ལས། དང་པོ་སྐུ་ལྔར་ངོ་སྤྲད་པ་ནི། དེ་ལྟར་གནད་ཀྱིས་མཐོང་བའི་རིག་པ་རྡོ་རྗེ་ལུ་གུ་རྒྱུད་སྐུ་དང་ཡེ་ཤེས་ཀྱི་རང་གདངས། འོད་དང་ཐིག་ལེར་སྣང་བ་འདི་རང་ངོ་འོད་གསལ་དུ་སྣང་བས་རྣམ་སྣང་གི་སྐུ། འོད་གསལ་འགྱུར་བ་མེད་པས་མི་བསྐྱོད་རྡོ་རྗེའི་སྐུ། དེ་ཉིད་འཕེལ་བ་དང་བཅས་པས་རིན་ཆེན་འབྱུང་ལྡན་གྱི་སྐུ། སྣང་བ་ཚད་མེད་པས་སྣང་བ་མཐའ་ཡས་ཀྱི་སྐུ། འོད་ལྔ་ལྷུན་གྲུབ་ཏུ་ཤར་བས་དོན་ཡོད་གྲུབ་པའི་སྐུ་སྟེ་གཞི། དེར་སྣང་གཟུང་འཛིན་དང་བྲལ་བས་སྟོང་གསལ་དུ་བསྒོམས་པ་ལམ། རིགས་ལྔ་སོ་སོའི་སྐུར་གསལ་དུས་འབྲས་བུའོ། །

གཉིས་པ་ཡེ་ཤེས་ལྔར་ངོ་སྤྲད་པ་ནི། འོད་གསལ་དེ་ཉིད་དྲི་མ་མེད་ཅིང་སྐུའི་འཆར་གཞི་བྱེད་པས་མེ་ལོང་ཡེ་ཤེས། དེ་ཉིད་དབྱེར་མེད་པས་མཉམ་ཉིད་ཡེ་ཤེས། དེ་ལ་བློའི་བྱེ་བྲག་སོ་སོར་འཆར་བས་སོ་སོར་རྟོགས་པའི་ཡེ་ཤེས། དེ་ཉིད་མ་བཙལ་ལྷུན་གྱིས་གྲུབ་པས་བྱ་གྲུབ་ཡེ་ཤེས། དེ་ཐམས་ཅད་ཡེ་སྟོང་རྩ་བ་དང་བྲལ་བས་ཆོས་དབྱིངས་ཡེ་ཤེས་ཏེ་གཞི། དེ་ཉིད་ས་ལེ་སེང་ངེ་བསྒོམས་པ་ལམ། དེ་མཐར་ཕྱིན་ནས་སྣང་སྲིད་འོད་སྣང་དུ་ཤར་བ་འབྲས་བུའོ། །

གསུམ་པ་རིགས་ལྔར་ངོ་སྤྲོད་པ་ནི། འོད་གསལ་གྱི་སྣང་བ་དེ་དེ་བཞིན་གཤེགས་པ་ཐམས་ཅད་ཀྱི་གཤེགས་ཤུལ་ཡིན་པས་དེ་བཞིན་གཤེགས་པའི་རིགས། དེ་ཉིད་འོད་གསལ་ལས་འཕོ་འགྱུར་མེད་པས་རྡོ་རྗེའི་རིགས། ཡོན་ཏན་འབྱུང་བས་རིན་པོ་ཆེའི་རིགས། སྐྱོན་གྱིས་མ་གོས་པས་པདྨའི་རིགས། དེ་ཉིད་གོམས་ན་ལྷག་མེད་འགྲུབ་པས་ལས་ཀྱི་རིགས་ཏེ་གཞི། དེའི་ངང་ལ་ཡེ་རེ་ཝལ་ལེ་བསྒོམས་པ་ལམ། མཐར་ཕྱིན་ནས་ཕྱིར་མི་ལྡོག་པ་འབྲས་བུའོ། །

བཞི་པ་འོད་ལྔར་ངོ་སྤྲད་པ་ནི། འོད་གསལ་དེ་ཉིད་དྲི་མ་མེད་པས་དཀར་པོ། ཡོན་ཏན་རྫོགས་པས་སེར་པོ། མ་བཙལ་སྣང་བས་དམར་པོ། བྱ་རྩོལ་རྫོགས་པས་ལྗང་གུ། མི་འགྱུར་བརྟན་པས་མཐིང་ག་སྟེ་གཞི། དེ་ཉིད་བསྒོམས་པ་ལམ། མཐར་ཕྱིན་པ་འབྲས་བུའོ། །

ལྔ་པ་རླུང་ལྔར་ངོ་སྤྲད་པ་ནི། འོད་གསལ་དེ་ཉིད་ཡེ་ཤེས་ཀྱི་དྲོད་དང་མ་བྲལ་བས་མེ་དང་མཉམ་པའི་རླུང་། འཁོར་འདས་ཀྱི་སྲོག་འཛིན་པས་སྲོག་འཛིན་པའི་རླུང་། དེ་ཉིད་གོམས་པས་འཁོར་འདས་སོ་སོར་འབྱེད་པས་དྭངས་སྙིགས་འབྱེད་པའི་རླུང་། དག་མ་དག་ཀུན་ནས་འོད་ལྔ་དང་ཡེ་ཤེས་དེས་ཁྱབ་པས་ཁྱབ་བྱེད་ཀྱི་རླུང་། འཁོར་བའི་སྲོག་བཅད་ནས་མྱ་ངན་ལས་འདས་པའི་སར་བསྐྱེལ་བས་སྙིང་རྗེ་མེད་པ་བསྐལ་པ་ལས་ཀྱི་རླུང་སྟེ་གཞི། དེ་ཉིད་བསྒོམས་པ་ལམ། དེ་ཉིད་མཐར་ཕྱིན་པ་འབྲས་བུའོ། །

དྲུག་པ་ཤེས་རབ་ལྔར་ངོ་སྤྲད་པ་ནི། འོད་གསལ་རྟོགས་མ་རྟོགས་ལས་འཁོར་འདས་གཉིས་སུ་འབྱེད་པས་འབྱེད་པའི་ཤེས་རབ། ཡེ་ཤེས་སུ་སྡུད་པས་སྡུད་པའི་ཤེས་རབ། ཀུན་ལ་ཁྱབ་པས་ཁྱབ་བྱེད་ཀྱི་ཤེས་རབ། འོད་སྣང་འགྲོ་འོང་དང་བཅས་པས་བསྐྱོད་པའི་(༡༧༤)ཤེས་རབ། དེ་ཉིད་འཁོར་བ་ལས་སྒྲོལ་བས་སྒྲོལ་བའི་ཤེས་རབ་སྟེ་གཞི། དེ་ཉིད་བསྒོམས་པ་ལམ། མཐར་ཕྱིན་པ་འབྲས་བུའོ། །

བདུན་པ་མཁའ་འགྲོ་ལྔར་ངོ་སྤྲད་པ་ནི། འོད་མཐིང་ག་སངས་རྒྱས་མཁའ་འགྲོ། དཀར་པོ་རྡོ་རྗེ་མཁའ་འགྲོ། སེར་པོ་རིན་ཆེན་མཁའ་འགྲོ། དམར་པོ་པདྨ་མཁའ་འགྲོ། ལྗང་གུ་ལས་ཀྱི་མཁའ་འགྲོ་སྟེ་གཞི། དེ་ཉིད་བསྒོམས་པ་ལམ། མཐར་ཕྱིན་པ་འབྲས་བུའོ། །

གསུམ་པ་རྗེས་རྣལ་འབྱོར་བཞིས་ཉམས་སུ་བླང་ཚུལ་ལ། ལྟ་བ། སྒོམ་པ། སྤྱོད་པ། འབྲས་བུ་ལ་རྒྱུན་དུ་བྱེད་བའི་རྣལ་འབྱོར་བཞི་ལས། དང་པོ་ནི་འོད་གསལ་གྱི་ངོ་བོ་སྟོང་། རང་བཞིན་གསལ། ཐུགས་རྗེ་འགག་མེད་དུ་འཆར་བ་དེ་མཉམ་གཞག་གི་ལྟ་བ། རྗེས་ལ་སྣང་སྲིད་སྣ་ཚོགས་སུ་སྣང་བ་འདི་ཐམས་ཅད་སྣང་ལ་རང་བཞིན་མེད་པའི་གཟུགས་བརྙན་དང་འདྲ་བར་རྟོགས་པ་རྗེས་ཐོབ་ཀྱི་ལྟ་བའི་ངང་ལས་དུས་ཐམས་ཅད་དུ་མི་འབྲལ་བར་བྱའོ། །གཉིས་པ་དེ་ཉིད་ཀྱི་ངང་ལས་གསལ་སྟོང་སྤྲོས་པ་དང་བྲལ་བར་སྒོམ་པའོ། །གསུམ་པ་ནི་དེའི་ཚེ་གང་ལའང་གཟའ་གཏད་དང་ཆེད་འཛིན་ཞིག་པ་རང་བཞིན་སྨྱོན་པ་ལྟ་བུར་བླང་དོར་རེ་དོགས་དང་བྲལ་བར་སྤྱོད་པའོ། །བཞི་པ་ནི་གོམས་པ་ཀློང་དུ་གྱུར་པས་སྣང་སྟོང་འོད་གསལ་གྱི་འཆར་ཚུལ་ལ་དགག་སྒྲུབ་རེ་དོགས་དང་བྲལ་བར་སྤྱད་པས་རང་ཤར་རང་གྲོལ་དུ་སོང་བའོ། །དེ་ལྟར་ངོ་སྤྲད་པ་ལ་དགོས་པ་གཉིས་ཏེ། གནས་སྐབས་སུ་ཆོས་ཉིད་ཡིད་དཔྱོད་དུ་མ་ལུས་པར་མངོན་སུམ་དུ་མཐོང་ལ་མཐར་ཐུག་མངོན་སུམ་མཐོང་བའི་གནད་ཀྱིས་དགེ་སྡིག་གིས་མི་གོས་ཤིང་ཚེའི་བར་ཆད་ཀྱང་རང་བཞིན་སྤྲུལ་སྐུའི་ཞིང་དུ་སྐྱེ་བའོ། །

དོན་གསུམ་པ་རྗེས་སྣང་ཉམས་ཀྱི་འཆར་ཚུལ་བསྟན་པས། དེ་ཉིད་ཉམས་སུ་བླང་ཚུལ་བསྟན་པ་ལ། སྣང་བ་བཞིའི་འཆར་ཚུལ་ངོས་གཟུང་། མཐའ་བརྟེན་བཞིའི་རང་བཞིན་གོམས་ཚུལ། གྲོལ་ས་ཆེན་པོའི་རང་ས་ཟིན་ལུགས་གསུམ་ལས། དང་པོ་ལ་ཆོས་ཉིད་མངོན་སུམ་གྱི་སྣང་བ། ཉམས་གོང་འཕེལ་གྱི་སྣང་བ། རིག་པ་ཚད་ཕེབས་ཀྱི་སྣང་བ། ཆོས་ཉིད་ཟད་པའི་སྣང་བ་བཞི་ལས། དང་པོ་ནི་དེ་ལྟར་ངོ་སྤྲད་པའི་འོད་གསལ་གྱི་སྣང་བ་སྒྲོན་མ་བཞིར་སྣང་བ་སྟེ། དེའང་རྒྱང་ཞགས་ཆུའི་སྒྲོན་མ་ལས། དབྱིངས་རྣམ་པར་དག་པའི་སྒྲོན་མ་སྤྲིན་མེད་པའི་ནམ་མཁའ་སྟོང་པ་ལ་ཤར་བའི་དབུས་སུ། ཐིག་ལེ་སྟོང་པའི་སྒྲོན་མ་སྣང་བའི་ནང་དུ་རིག་པ་ལུ་གུ་རྒྱུད་གསལ་ལ་མ་(༡༧༥)ཡེངས་པར་བལྟས་པས་གསལ་སྟོང་རྣམ་པར་མི་རྟོག་པའི་ཡེ་ཤེས་ལྷག་གིས་སྐྱེས་པའི་ངང་ལས་མི་གཡོ་བར་མཉམ་པར་འཇོག་པའི་ཤེས་པ་གསལ་བ་དྭངས་པ་ཀ་དག་དང་ལྷུན་གྲུབ་གཉིས་སུ་མེད་པ་དེ་ཉིད་ཤེས་རབ་རང་བྱུང་གི་སྒྲོན་མ་ཞེས་བྱ་སྟེ། གདོད་མའི་གཞི་ལ་ད་ལྟར་གྱི་སྣང་སེམས་གྲོལ་བར་བྱེད་པ་སྟེ། གཞི་ཡི་གནས་ལུགས་ཉིད་འབྲས་བུ་ཡེ་གྲོལ་དུ་སྨིན་པར་བྱེད་པའི་ཤེས་རབ་ཅེས་བྱ་བ་སྟེ། གཞི་ཉིད་འབྲས་བུར་སྨིན་བྱེད་ཤེས་རབ་སྟེ། ཤེས་རབ་སྐུ་རུ་སྨིན་པ་ཡིས། ཞེས་པའི་དོན་ཉམས་སུ་བླངས་པས་དབྱིངས་ཀྱི་ར་བར་རིག་པ་ཚུད་དེ། ཐིག་ལེ་གསུམ་འབྲེལ་གྱི་སྣང་བ་དབང་པོས་མངོན་སུམ་དུ་མཐོང་བ་ཚུན་ཆད་ཆོས་ཉིད་མངོན་སུམ་གྱི་སྣང་བའོ། །དེའང་ཙིཏྟ་རིན་པོ་ཆེའི་སྦུབས་ན་གདོད་མའི་མགོན་པོ་འོད་མི་འགྱུར་བ་དབྱིངས་འོད་ཟེར་གྱི་ཕུང་པོ་ཆེན་པོའི་དབུས་ན། ངོ་བོ་སྟོང་པ། རང་བཞིན་གསལ་བ། ཐུགས་རྗེ་རིག་པའི་སྙིང་པོ་ཅན་རྨ་བྱའི་སྒོ་ང་ལྟར་ནང་གསལ་དུ་བཞུགས་པའི་གདངས་ལས། ཞི་ཁྲོའི་སྣང་བ་སྐུ་དང་ཐིག་ལེའི་ཞིང་ཁམས་འོག་མིན་གྱི་གནས་རྡོ་རྗེ་དབྱིངས་ཀྱི་ཕོ་བྲང་ཆེན་པོར། ལྷུན་གྱིས་གྲུབ་པའི་སྣང་བ་སྒྱུ་མའི་ལུས་ཀྱི་འཇིག་རྟེན་གྱི་ཁམས་རྣམ་པར་བཀོད་པའི་ཕྱོགས་བཅུའི་ཞིང་ཁམས་མ་ལུས་པ་ཐམས་ཅད་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོའི་རང་བཞིན་གྱིས་གང་ཞིང་ཆོས་དང་། འཁོར་དང་། གནས་དང་། དུས་དང་། སྟོན་པ་ཕུན་སུམ་ཚོགས་པའི་མངའ་ཐང་ཆེན་པོས། དབང་འབྱོར་པའི་ཚུལ་རྒྱ་མཚོ་ཇི་སྙེད་ལ་སྐལ་བ་དང་ལྡན་པའི་རྣལ་འབྱོར་པས་ནམ་དབང་ཐོབ་པ་ན། བདེ་ཆེན་མཁའ་སྤྱོད་ཀྱི་གནས་འོག་མིན་ཆེན་པོར་གཤེགས་ཏེ་སངས་རྒྱས་པ་ཞེས་ཀྱང་བྱ། རང་བཞིན་དག་པའི་ཞིང་དུ་དབང་ཐོབ་པ་ཞེས་ཀྱང་བྱ་སྟེ། སྙིང་ག་ཡེ་ཤེས་ཀྱི་འཇིག་རྟེན་གྱི་རང་གདངས་གསང་ལམ་ཆུའི་སྒྲོན་མ་ལས་སྣང་བ་ཕྱིའི་ནམ་མཁའ་སྟོང་པ་ལ་ཤར་བའི་ཚེ། དབྱིངས་ཀྱི་རྟགས་སུ་འོད་ཁྱིམ་རྣམ་པར་དག་པའི་སྒྲོན་མའི་ནང་དུ། ཡེ་ཤེས་ཀྱི་རྟགས་སུ་ཐིག་ལེ་སྟོང་པའི་སྒྲོན་མ་དང་། ཐིག་ཕྲན་གྲངས་མེད་པ་སྣང་བའི་དབུས་སུ། སྐུའི་རྟགས་སུ་ལུ་གུ་རྒྱུད་ཤར་བ་ལ་བལྟས་པས། ཐུགས་རྗེའི་རྟགས་ཤེས་པ་རང་གསལ་ཆེན་པོ་ཉིད། ངོ་བོའི་རྟགས་རྣམ་པར་མི་རྟོག་པའི་ཡེ་ཤེས་ལ། དུས་གསུམ་འཕོ་འགྱུར་མེད་པའི་དགོངས་པ། མཉམ་པ་ཉིད་ཆོས་སྐུའི་གཞི། རྫོགས་པ་ཆེན་པོ་གདོད་མ་ཀ་དག་གི་ནང་དུ་བརྡ་ཐིམ་མོ། །ཤིན་ཏུ་གསང་བའི་དོན་(༡༧༦)མངོན་སུམ་དུ་བསྟན་པའོ། །དེ་ལྟར་མངོན་སུམ་གྱི་སྣང་བ་མཐོང་བ་ལ་དགོས་པ་གཉིས་ཏེ། གནས་སྐབས་སུ་ཆོས་ཉིད་ཡིད་དཔྱོད་དང་བྲལ། མཐར་ཐུག་གདོད་མའི་ཟད་སར་གྲོལ་བའོ། །

གཉིས་པ་ཉམས་གོང་འཕེལ་གྱི་སྣང་བ་ནི། ཤེས་ཉམས་བདེ་གསལ་མི་རྟོག་པ་ལ་སོགས་པ་སྣ་ཚོགས་ཀྱང་མི་བསྟན་པས། ལམ་གྱི་ཚད་ངེས་པར་མི་བསླུ་བ་ཡེ་ཤེས་སྣང་བའི་ཉམས་ཕྱིར་ཤར་བས། རིག་པ་ནང་དུ་གྲོལ་བའི་ཚད་ཟིན་པ་ནི་ཆོས་འདིའི་ཁྱད་པར་གྱི་དགོངས་པ་ཟབ་མོ་སྟེ། ཤིན་ཏུ་སྦས་པའི་ཉེ་ལམ་ཆེན་པོའོ། །དེའང་སྔ་མའི་དོན་བླ་མའི་གདམས་ངག་བཞིན་དུ་ཉམས་སུ་བླངས་པས་དབྱིངས་རིག་ཀྱང་རེས་གསལ་རེས་འགྲིབ་པ་ཙམ་ལས་ཡང་ཉམས་སུ་ལེན་པ་ལ་བརྩོན་པས་དབྱིངས་རིག་སྨིན་མཚམས་ལས་བྲལ་ཏེ། དབང་པོའི་མངོན་སུམ་དུ་གསལ་ལོ། །ཐིག་ལེའི་སྣང་བ་དེ་དག་ཀྱང་སྲན་མ་ཙམ་དུ་སྣང་ཞིང་། དབྱིངས་ཀྱང་ཁྲུ་གང་ཙམ་དུ་སྣང་ཞིང་། རིག་པ་ལུ་གུ་རྒྱུད་ཀྱང་སྐར་མདའ་འགྲོ་བ་ཙམ་མོ། །ཡང་ཉམས་སུ་བླངས་པས། འོད་ལྔའི་དབྱིངས་སྣང་དུམ་བུ་དང་། གྱེན་འགྲེང་དང་། རྩིབས་ཤར་དང་། མདུང་རྩེ་ལྟ་བུ་དང་། རེ་ལྡེའི་རྣམ་པ་ཙམ་གྱིས་རང་གི་མདུན་ཕྱོགས་ཁྱབ་པར་འཆར་བའི་ནང་དུ་ཐིག་ལེ་ཡང་མེ་ལོང་ཙམ་ལ་རིག་པའང་འདབ་ཆགས་འཕུར་སྐྱེན་ཙམ་དུ་སྣང་ངོ་། །དེ་ནས་ཉམས་སུ་བླངས་པས། དབྱིངས་ཀྱི་སྣང་བ་དེ་དག་རིན་པོ་ཆེ་དང་། འོད་ཀྱི་དྲ་བ་དྲ་ཕྱེད་དང་། མིག་མངས་རིས་དང་། མིག་ཚགས་དང་། མདུང་རྩེའི་རྣམ་པ་དང་། མདའ་དང་། པདྨ་སྟོང་ལྡན་དང་། ཉི་ཟླ་འོད་ལྡན་དང་། ཡེ་ཤེས་མཁར་ཐབས་དང་། རལ་གྲི་དང་། རྡོ་རྗེ་དང་། འཁོར་ལོ་དང་། གྲི་གུག་དང་། མེ་ལྕེ་དང་། ཉ་མིག་གི་རྣམ་པ་ལྟ་བུར་འཆར་ཞིང་། སྣང་བ་དེས་རང་གནས་པའི་ལུང་པ་དེ་འགགས་པར་འགྱུར་རོ། །ཐིག་ལེ་ཡང་ཁམ་ཕོར་ཙམ་ལ། རིག་པ་ནི་རི་དྭགས་སྤང་རྩིབས་ལ་རྒྱུག་པ་ཙམ་མོ། །དེ་ནས་ཡང་ཉམས་སུ་བླངས་པས། འོད་ནི་ཡུལ་ཁམས་ཙམ་དུ་འཆར་ཞིང་། ཐིག་ལེ་ནི་བསེ་ཕུབ་ཙམ། རིག་པ་ཡང་ཤར་ཎ་དལ་གྱིས་འགྲོ་བ་ཙམ་མོ། །དེ་ནས་ཉམས་སུ་བླངས་པས། འོད་ནི་སྟོང་གསུམ་གང་དུ་བལྟས་ཚད་ཁྱབ་ཅིང་། དབྱིངས་རིག་ལ་ཉིན་མཚན་མེད་པར་གསལ་ཏེ། ཐིག་ལེའི་ནང་དུ་སྐུ་རྐྱང་པ་རེ་སྣང་ལ། རིག་པའི་ནང་དུའང་སྐུ་རྐྱང་པ་རེ་སྣང་ལ། རིག་པའི་བར་དུ་ཡང་རིགས་ལྔའི་སྐུ་ཕྲ་མོ་འབྱུང་ཞིང་འགུལ་འཕྲིགས་མེད་པར་སྡོད་དོ། །དེ་ལྟར་ཤར་བས་བར་དོའི་སྣང་བ་ད་ལྟར་མཐོང་བས་ཕྱིས་བར་(༡༧༧)དོ་མེད་དོ། །དེ་ལྟར་ཉམས་སྣང་གོང་དུ་འཕེལ་བས་གནས་སྐབས་སུ་ཉམས་སྣང་གི་ཡོན་ཏན་རྣམས་ཐོབ། མཐར་ཐུག་བར་དོའི་སྣང་བ་རང་སར་གྲོལ་བའི་དགོས་པ་ཡོད་དོ། །

གསུམ་པ་རིག་པ་ཚད་ཕེབས་ཀྱི་སྣང་བ་ནི། དབྱིངས་ཀྱི་སྣང་བས་ཐམས་ཅད་དུ་ཁྱབ་པས་ས་ཆུ་མེ་རླུང་གི་སྣང་བ་གང་ཡང་མེད་ཅིང་། ཐིག་ལེ་རྣམས་དང་རིག་པའི་ནང་དུ་རྣམ་པར་སྣང་མཛད་དང་ནམ་མཁའ་དབྱིངས་ཀྱི་དབང་ཕྱུག་མ། རྡོ་རྗེ་སེམས་དཔའ་དང་མཱ་མ་ཀཱི། རིན་ཆེན་འབྱུང་ལྡན་དང་སངས་རྒྱས་སྤྱན། སྣང་བ་མཐའ་ཡས་དང་གོས་དཀར་མོ། དོན་ཡོད་གྲུབ་པ་དང་དམ་ཚིག་སྒྲོལ་མ་སྟེ། སྟེང་ཕྱོགས་སུ་རྣམ་སྣང་གིས་གཙོ་བྱས་པའི་ལྔ་ཚན་ནས། ཕྱོགས་བཞིར་རིགས་རེ་རེས་གཙོ་བྱས་པའི་རིགས་ལྔ་ཡབ་ཡུམ་ཚོམ་བུའི་དཀྱིལ་འཁོར་འབུམ་ཕྲག་གྲངས་མེད་བརྗོད་ལས་འདས་པ་ནམ་མཁའི་མཐས་ཁྱབ་པར་འཆར་ཞིང་། རང་ཉིད་ཀྱང་འོད་ཀྱི་པདྨ་ཆེན་པོའི་སྟེང་འོད་དུ་གསལ་བའི་སྤྱི་བོ་ན་ཡར་ཐིག་ལེ་མཁར་གཞོང་བརྩེགས་མ་ལྟ་བུ་ལྔའམ་དགུ་གྱེན་དུ་སྣང་ཞིང་། རང་དང་ཚོམ་བུའི་ལྷ་རྣམས་ཀྱི་ཐུགས་ཀར་འོད་ཀྱི་ཟེར་ཐག་སྙེ་ཚོན་སྒྲིལ་མ་ལྟ་བུས་འབྲེལ་ནས་རང་ལུས་གདོས་བཅས་སུ་སྣང་བ་མེད་དེ་ལོངས་སྐུར་གྲོལ་བའོ། །དེ་ནས་ཉམས་སུ་མ་བླངས་ཀྱང་འགྱུར་བ་མེད་དོ། །དེའི་ཚེ་ཕྱི་སྣང་བ་འོད་གསལ་དུ་གྲོལ་བས་གདོས་བཅས་ས་རྡོའི་སྣང་བ་རང་ནུབ། ནང་སྒྱུ་ལུས་འོད་གསལ་དུ་གྲོལ་བས་ཤ་ཁྲག་གི་ཕུང་པོ་རང་ནུབ། གསང་བ་ཉོན་མོངས་པ་འོད་གསལ་དུ་གྲོལ་བས་སྒྲིབ་གཉིས་ཀྱི་སྣང་བ་རང་ནུབ། ཡང་གསང་སྐུ་དང་ཡེ་ཤེས་སུ་སྣང་བས་འོག་མིན་གྱི་ཞིང་ཁམས་རང་སྣང་། བླ་མེད་མཁྱེན་པའི་ཡེ་ཤེས་སུ་རྒྱས་པས་ཤེས་བྱའི་དཀྱིལ་འཁོར་རང་གསལ་ལོ། །དེ་ལྟར་རིག་པ་ཚད་ལ་ཕེབས་པས། གནས་སྐབས་སུ་མ་བསྒོམ་ཀྱང་ཚད་ལ་ཕེབས་ཤིང་མཐར་ཐུག་ལོངས་སྐུ་ངོས་ཟིན་པས་སྐུའི་འཛིན་པ་རང་གྲོལ་ལོ། །

བཞི་པ་ཆོས་ཉིད་ཟད་པའི་སྣང་བ་ནི། ཕྱི་ཉམས་སྣང་གི་འཕེལ་ཟད། ནང་སྒྱུ་ལུས་ཀྱི་ཆོས་ཟད། གསང་བ་རྟོགས་ཚོགས་ཀྱི་སེམས་ཟད། ཚིག་དང་འཁྲུལ་པ་ཐམས་ཅད་རང་ཟད་དེ། སྣང་བ་དང་མི་སྣང་དུ་འཛིན་པའི་བློ་ཟད་ནས། འོད་ཀྱི་ནང་ནས་སོར་མོ་ཙམ་སྣང་བ་ལས་འཁོར་འདས་ཀྱི་འདུ་ཤེས་བྲལ་ཏེ། སྣང་བ་ཅིའི་ངོ་བོར་ཡང་མ་གྲུབ་བོ། །དེའི་ཚེ་འབྱུང་བའི་དགྲས་མི་ཚུགས། ཉི་ཟླའི་སྣང་བ་མེད། འགྲོ་འདུག་གི་འདུ་ཤེས་ནུབ། དྲན་པ་ཝལ་པོ་རྗེས་མེད་ཅིང་། མངོན་པར་ཤེས་(༡༧༨)པ་ཐོགས་པ་མེད། ཐུགས་རྗེའི་ཆ་ལས་གསལ་བ་ཙམ་དུ་གནས་པའོ། །དེ་ལྟར་ཆོས་ཉིད་ཟད་པའི་སྣང་བ་མཐོང་བ་ལ་དགོས་ཆེད་གཉིས་ཏེ། གནས་སྐབས་སུ་སྣང་བ་བཞིའི་ཚད་ཟིན་པས་ས་མཚམས་ཕྱེད་ལ། མཐར་ཐུག་ཆོས་ཟད་ཀྱི་སྣང་བ་མཐོང་ནས་ལྷག་མེད་དུ་འཚང་རྒྱ་བར་ཐག་ཆོད་པའོ། །

གཉིས་པ་མཐའ་རྟེན་བཞིའི་གོམས་ཚུལ་ལ། མི་འགུལ་བ་གསུམ་ལ་གཞི་བཅའ་བ། སྡོད་པ་གསུམ་གྱིས་ཚད་གཟུང་བ། ཐོབ་པ་གསུམ་གྱིས་གཟེར་གདབ་པ། གདེང་བཞིས་གྲོལ་ཚད་བསྟན་པ་བཞི་ལས། དང་པོ་ནི་བཞུགས་སྟངས་གསུམ་ལ་རྒྱུན་དུ་གནས་པ་སྟེ། དེ་ཡང་ལུས་མི་འགུལ་བས་རྩ་མི་འགུལ། རྩ་མ་འགུལ་བས་མིག་མི་འགུལ། མིག་མ་འགུལ་བས་རླུང་མི་འགུལ། རླུང་མ་འགུལ་བས་སེམས་མི་འགུལ། དེ་ཉིད་ཀྱིས་འགྱུ་བྱེད་རྒྱུན་ཆད་ནས། རིག་པ་གཡོ་འགུལ་མེད་པར་གནས་པའི་དགོས་པ་ཡོད་དོ། །མིག་གཟིགས་སྟངས་གསུམ་ལས་མ་འགུལ་བར་བྱ་སྟེ། དེའང་རིག་པའི་གནད་རྩ། རྩའི་གནད་སྒོ། སྒོའི་གནད་སྒྲོན་ནའོ། །རྩ་མ་འགུལ་བས་མིག །མིག་མ་འགུལ་བས་སྒྲོན་མ། སྒྲོན་མ་མ་འགུལ་བས་སེམས། སེམས་མ་འགུལ་བས་རྟོག་ཚོགས་འབྱུང་མི་སྲིད་དོ། །དེས་དབྱིངས་རིག་འདུ་འབྲལ་མེད་པའི་དགོས་པ་ཡོད་དོ། །དེའང་རྟོག་ཚོགས་ནི་བརྟག་ན་ཡེ་ཤེས་ཀྱི་རྩལ་ཡིན་ཡང་རང་ངོ་མ་ཤེས་པས་འཁོར་བའི་ངོ་བོ་སྟེ། མེད་བཞིན་སྣང་བས་གཟུགས་བརྙན་དང་འདྲའོ། །ཐུགས་རྗེའི་རིག་པ་མེ་ལོང་གི་ངོས་ལྟ་བུ་སྟེ་ཕྱིར་གསལ་དུ་ཡོད་རིང་ལ། ཡུལ་སྣ་ཚོགས་ཀྱི་རྐྱེན་གྱིས་གཟུགས་བརྙན་མི་འགགས་པར་འཆར་བས་བློས་ཆེད་དུ་བཟུང་ན་འཆིང་ལ། མ་བཟུང་ན་གྲོལ་བ་སྟེ། བཟུང་ན་ལྟ་སྒོམ་དགེ་བས་ཀྱང་འཆིང་སྟེ། གཟུགས་མ་བསྡུས་པར་གཟུགས་བརྙན་སྣང་བ་བཞིན། མ་བཟུང་ན་ཉོན་མོངས་དུག་ལྔས་ཀྱང་གྲོལ་ཏེ། གཟུགས་བརྙན་གྱི་གནད་ཤེས་པས་མེ་ལོང་ལ་མི་གོས་པ་བཞིན་ནོ། །ཐུགས་རྗེ་ནང་དུ་ཐིམ་དུས་མེ་ལོང་གི་རྒྱབ་ཕྱིར་བསྟན་པ་བཞིན་བཟང་ངན་གྱི་གཟུགས་བརྙན་གང་ཡང་མི་སྣང་ལ། མེ་ལོང་ནང་གསལ་གྱི་ངོས་ལ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ཉག་གཅིག་མི་གཡོ་བར་བཞུགས་སོ། །

གཉིས་པ་སྡོད་པ་གསུམ་གྱིས་ཚད་གཟུང་བ་ནི། དབྱིངས་རིག་ལ་ཡུན་རིང་པོར་གནས་པས། བརྟན་པའི་ཚད་སྡོད་པ་གསུམ་འབྱུང་སྟེ། ཕྱི་སྣང་བ་སྐྱོད་བྱེད་ཀྱི་རླུང་ཟད་པས་དབྱིངས་རིག་འགྲོ་འོང་མེད་པར་སྡོད། ནང་ཕུང་པོ་སྐྱོད་བྱེད་ཀྱི་རླུང་ཟད་པས་ལུས་གཡོ་འགུལ་(༡༧༩)མེད་པར་སྡོད། གསང་བ་རྟོག་པ་སྐྱོད་བྱེད་ཀྱི་རླུང་ཟད་པས་རྣམ་རྟོག་འགྱུ་མི་སྲིད་པར་སྡོད་པའོ། །སྐབས་འདིར་ཚད་རྨི་ལམ་གྱིས་གཟུང་བ་དང་། རྟགས་ལུས་ངག་ཡིད་གསུམ་ལ་འཆར་བ་གཉིས་འབྱུང་སྟེ། བརྩོན་འགྲུས་རབ་ལ་རྨི་ལམ་དབྱིངས་སུ་ཐིམ་ནས་རྒྱུན་འཆད། འབྲིང་ལ་འོད་གསལ་བདེ་བ་ཆེན་པོར་འཆར། ཐ་མ་ལ་རྨི་ལམ་རྨི་ལམ་དུ་ཤེས་པས་ཟིན་པ་འབྱུང་ངོ་། །རྟགས་སྒོ་གསུམ་ལ་འཆར་བ་ནི། སྣང་བ་བཞི་ལ་གསུམ་གསུམ་སྟེ་བཅུ་གཉིས་ལས། དང་པོ་ཆོས་ཉིད་མངོན་སུམ་གྱི་རྟགས་གསུམ་ནི། ལུས་རུས་སྦལ་འཁར་གཞོང་དུ་བཅུག་པ་ལྟར་བྱ་བྱེད་གཡོ་འགུལ་མེད་པར་ས་གཅིག་ཏུ་འདུག་ཚུགས། ངག་ལྐུགས་པ་ལྟར་སྨྲ་སྙིང་མི་འདོད། སེམས་མཁའ་འགྲོ་སྙི་ལ་ཟིན་པ་ལྟར་འཕྲོ་བ་བཞིན་སྣང་ཡང་གར་གཏད་དུ་ཟིན་པའོ། །ཉམས་གོང་འཕེལ་གྱི་རྟགས་གསུམ་ནི། ལུས་སྐྱེས་བུ་ནད་ཀྱིས་ཐེབས་པ་ལྟར་བྱི་དོར་དང་རྒྱན་ཆའི་སྒེག་ཆོས་བྲལ། ངག་སྨྱོན་པ་ལྟར་གཏམ་ཐམས་ཅད་དོན་མེད་ཅལ་ཅོལ་དུ་སྨྲ། སེམས་སྐྱེས་བུ་རྩི་དུག་གིས་ཟིན་པ་ལྟར་ཁམས་གསུམ་དུ་ཕྱིར་མི་ལྡོག་པའོ། །རིག་པ་ཚད་ཕེབས་ཀྱི་རྟགས་གསུམ་ནི། ལུས་གླང་པོ་ཆེ་འདམ་དུ་ཚུད་པ་ལྟར་སྐད་ཅིག་མ་ལ་འབྱུང་བ་ལྔ་ལ་ཟང་ཐལ་དུ་འགྲོ། ངག་གྲུལ་བུམ་གྱི་ཕྲུག་གུ་ལྟར་ཅི་སྨྲས་གཞན་ལ་ཕན་ཅིང་དད་པའི་རྒྱུ་བྱེད། སེམས་སྐྱེས་བུ་འབྲུམ་ནད་བྱང་བ་ལྟར་ཕྱིན་ཆད་ཁམས་གསུམ་དུ་མི་ལྡོག་པར་ཡིད་ཆེས་པའོ། །ཆོས་ཉིད་ཟད་པའི་རྟགས་གསུམ་ནི། ལུས་དུར་ཁྲོད་ཀྱི་རོ་ལྟར་གཤེད་མ་ལྔ་བརྒྱས་མཐའ་བསྐོར་ཡང་ཡ་ང་བ་དང་བག་ཚ་བ་མེད། ངག་བྲག་ཆ་ལྟར་གཏམ་གྱི་ཟུངས་ཟད་དེ་གཞན་གྱི་རྗེས་ཟློས་བྱེད། སེམས་བར་སྣང་གི་ན་བུན་ལྟར་སྐད་ཅིག་མ་ལ་བག་ཆགས་ཀྱི་ཕུང་པོ་མི་སྣང་བར་འཚང་རྒྱའོ། །

གསུམ་པ་ཐོབ་པ་གསུམ་གྱིས་གཟེར་གདབ་པ་ལ་གསུམ་ལས། དང་པོ་སྐྱེ་བ་ལ་རང་དབང་ཐོབ་པ་ནི། འདིའི་དུས་སུ་ཕུང་པོའི་སྣང་བ་འགགས་ནས་གདོས་བཅས་སུ་མི་སྣང་བའི་ཚེ་སེམས་ཅན་གྱི་དོན་བྱ་བར་འདོད་ན། རང་གི་ལག་སོར་ལ་རིག་པ་གཏད་ཅིང་བལྟས་པས། སྣང་བ་དེ་ཀུན་རང་ལོག་སྟེ་སྣང་བྱེད་ཆུའི་ཟླ་བ་ལྟ་བུའི་གཟུགས་ཀྱིས་སེམས་ཅན་གྱི་དོན་བྱེད་པས། མི་ལ་སོགས་པའི་སེམས་ཅན་ལ་རིག་པ་བཅུག་ན། མཚམས་མེད་པ་ལྔ་བྱས་པ་ཡིན་ཡང་འདི་ཉིད་ལ་འབྱུང་བ་རང་དག་ནས་འཚང་རྒྱ་སྟེ། དེའང་རིག་པ་རང་བྱུང་གི་ཡེ་ཤེས་གནས་པའི་གནད་ཀྱིས་སོ། །དེའི་ཚེ་བེམས་(༡༨༠)པོ་ལ་རིག་པ་བཅུག་ཀྱང་འགུལ་བ་དང་། སྐད་འབྱིན་ནུས་པ་འོང་ངོ་། །གཉིས་པ་འཇུག་པ་ལ་རང་དབང་ཐོབ་པ་ནི། སོར་མོ་ལ་རིག་པ་གཏད་ནས་རང་ལུགས་སུ་བཞག་པས། དེ་ཉིད་ལ་མི་སྣང་བར་འཚང་རྒྱའོ། །གསུམ་པ་རླུང་སེམས་ལ་རང་དབང་ཐོབ་པ་ནི། རླུང་སེམས་ལས་སུ་རུང་བས་རླུང་གི་ཡོན་ཏན་ཐམས་ཅད་འབྱུང་། སེམས་ཅན་གཞན་ཚེ་འཕོ་བའི་དུས་སུ་དེ་ལ་རང་གི་རིག་པ་བཅུག་པས། དེས་མཚམས་མེད་པ་ལྔ་བྱས་ཀྱང་རང་དང་མཉམ་དུ་སངས་རྒྱ་སྟེ། ལས་ལ་བཟང་ངན་མེད་པའི་གནད་ཀྱིས་སོ། །བེམས་པོ་རྣམས་ལ་ཐོགས་མེད་དུ་ཟང་ཐལ་ཞིང་མངོན་པར་ཤེས་པ་ཐོགས་མེད་དུ་འཆར་རོ། །

བཞི་པ་གདེང་བཞིས་གྲོལ་ཚད་བསྟན་པ་ལ་གཉིས་ལས། ཡར་གྱི་གདེང་གཉིས་ནི་དཀོན་མཆོག་གསུམ་གྱི་ཡོན་ཏན་ཐོས་ཀྱང་ཐོབ་ཏུ་རེ་བ་དང་། མ་ཐོབ་ཀྱི་དོགས་པའི་སེམས་མེད་དེ། རང་རིག་ལས་གཞན་པའི་སངས་རྒྱས་མེད་པར་རྟོགས་པའི་ཕྱིར་རོ། །མར་གྱི་གདེང་གཉིས་ནི། འགྲོ་དྲུག་གི་ཚེ་ཚད་དང་། སྡུག་བསྔལ་ཐོས་ཀྱང་འཁོར་བར་མི་ལྟུང་དུ་རེ་བ་དང་། ལྟུང་གི་དོགས་པ་གཉིས་མེད་དེ་རྣམ་རྟོག་དབྱིངས་སུ་ཐིམ་པས་འཁོར་བར་ལྟུང་མཁན་མ་གྲུབ་པར་རྟོགས་པའི་ཕྱིར་རོ། །དེ་ལྟར་མཐའ་རྟེན་ལ་དགོས་པ་གཉིས་ལས། གནས་སྐབས་སུ་སོ་སོའི་དགོས་པ་འགྲུབ་ལ། མཐར་ཐུག་གོང་མའི་རྒྱབ་བརྟེན་བྱས་ནས་ལྷག་མེད་དུ་སངས་རྒྱའོ། །

གསུམ་པ་གྲོལ་ས་ཆེན་པོའི་རང་ས་ཟིན་ལུགས་ནི། དེ་ལྟར་སྣང་བ་བཞི་རྫོགས་ནས་གདོད་མའི་ཀ་དག་ཆེན་པོར་རང་གྲོལ་བ་ནི། དཔེར་ན་ཤེལ་གོང་དྲི་མ་སྦྱངས་པ་ལས་འོད་འབྱུང་སྟེ་ཉི་ཟེར་གྱི་རྐྱེན་དང་བྲལ་མ་ཐག །འོད་ལྔ་ནང་གསལ་དུ་ཐིམ་ནས་གནས་པ་ལྟར། དང་པོའི་ཀ་དག་ལས་ཕྱི་གསལ་དུ་ཤར་བ་རང་ངོ་མ་ཤེས་པས་གཟུང་འཛིན་འཁྲུལ་པའི་འདམ་རྫབ་ཀྱིས་དྲི་མས་གོས་ཀྱང་། སྣང་བ་བཞིའི་གདམས་ངག་ཉམས་སུ་བླངས་པས་འདག་སྟེ་འོད་ལྔ་ཤར་བ་ལྟར་རིག་པ་ཚད་ཕེབས་ཀྱི་སྣང་བ་ཤར་ནས། ཆོས་ཉིད་ཟད་ས་ལ་ཐུག་སྟེ། སླར་ཡང་འོད་ལྔ་ནང་ཐིམ་ལྟར་གདོད་མའི་གཞི་ཐོག་དེ་ཉིད་དུ་ཐིམ་དུས་གཞོན་ནུ་བུམ་པའི་སྐུ་བརྙེས་པ་ཞེས་བྱ་སྟེ་ཐིམ་པ་ལ་མ་རྨུགས་པ། གསལ་བ་ལ་མི་འཕྲོ་བ། རིག་པ་ལ་མི་རྟོག་པ་ཉིད་དུ་ལྷུན་གྱིས་གྲུབ་ནས། ངོ་བོ་སྟོང་པས་ཆོས་སྐུ། རང་བཞིན་གསལ་བས་ལོངས་སྐུ། ཐུགས་རྗེ་རིག་པས་སྤྲུལ་པའི་སྐུ། ཡེ་ཤེས་དང་བཅས་པ་འདུ་འབྲལ་མེད་པར་ལྷུན་གྱིས་གྲུབ་བོ། །སླར་ཡང་སེམས་ཅན་གྱི་དོན་དུ་ཆོས་སྐུ་དེ་ཉིད་ལས་མ་གཡོས་(༡༨༡)བཞིན་དུ་ལོངས་སྐུ་དང་སྤྲུལ་སྐུའི་སྣང་བས་གང་ལ་གང་འདུལ་དུ་སྐད་ཅིག་གཅིག་ལ་མཛད་པའི་ཕྲིན་ལས་འཁོར་བ་མ་སྟོངས་ཀྱི་བར་དུ་རྟག་པ་དང་། རྒྱུན་མི་འཆད་པ་དང་། རྒྱ་ཆེ་བའི་རྣམ་པར་འཕྲུལ་པ་ནམ་མཁའི་ཁམས་ཀྱི་མཐའ་ཀླས་པར་འབྱུང་བའོ། །དེ་དག་གིས་ཚེ་འདིར་གྲོལ་བའི་གདམས་པ་རྒྱ་ཆེར་བཤད་པའོ། །

དོན་གཉིས་པ་བརྩོན་འགྲུས་འབྲིང་བར་དོར་འཚང་རྒྱ་བའི་གདམས་ངག་ལ་བཞི་སྟེ། སྐྱེ་གནས་ཀྱི་བར་དོ་ལ་ཐོས་བསམ་གྱིས་སྒྲོ་འདོགས་བཅད་པ། རྒྱ་ཁྲ་ཚང་དུ་འཇུག་པའམ། དེད་དཔོན་གསེར་གླིང་དུ་ཕྱིན་པ་ལྟ་བུའི་གདམས་ངག །འཆི་ཁའི་བར་དོ་ལ་གསལ་གདབ་པ་སྒེག་མོས་མེ་ལོང་ལ་བལྟ་བའམ། རྒྱལ་པོའི་བཀའ་འཕྲིན་བསྐུར་བ་ལྟ་བུའི་གདམས་ངག །ཆོས་ཉིད་ཀྱི་བར་དོར་རང་སྣང་ལ་ཡིད་ཆེས་པ་ལམ་ཚོལ་གྲོགས་དང་འཕྲད་པའམ། མ་པང་དུ་བུ་འཇུག་པ་ལྟ་བུའི་གདམས་ངག །སྲིད་པའི་བར་དོར་ལས་ཀྱི་འཕྲོ་འཐུད་པ་ཡུར་བ་རྐང་ཆད་ལ་ཝ་འཛུགས་པ་ལྟ་བུའི་གདམས་ངག་གོ། །

དང་པོ་ནི་རྒྱ་ཁྲ་དེའང་ཚང་ལེགས་པར་རྟོགས་པའམ། དེད་དཔོན་རྒྱ་མཚོར་ནོར་བུ་ལེན་དུས་བྱ་རོག་དང་དུང་ལ་སོགས་པས་ཆུ་སྲིན་གྱི་སྒྲོ་འདོགས་བཅད་ནས་འགྲོ་བ་བཞིན་དུ། འདིར་ཡང་བླ་མའི་དྲུང་དུ་ཐོས་བསམ་གྱི་སྒྲོ་འདོགས་ལེགས་པར་བཅད་ནས་བར་དོའི་འོད་གསལ་ལ་འཇུག་པ་སྟེ། དེའང་དབང་པོ་རབ་འབྲིང་ཐ་གསུམ་ལས། རབ་ཀྱི་རབ་སྦྲུལ་མདུད་མཁའ་ལ་བོར་བ་ལྟར་གྲོལ་བ་དང་། རབ་ཀྱི་འབྲིང་མཚོ་ནང་དུ་ཁ་བ་བབས་པ་ལྟར་གྲོལ་བ་དང་། རབ་ཀྱི་ཐ་མ་འཁྱགས་རོམ་ཆུར་ཞུ་བ་ལྟར་གྲོལ་བའོ། །དང་པོ་ནི་བླ་མའི་བྱིན་རླབས་དང་ཟབ་མོའི་གདམས་པ་བཏབ་པ་ཙམ་གྱིས་སྣོད་ལྡན་གྱི་སློབ་མ་དེ་ཡེ་ཐོག་ཀུན་ཏུ་བཟང་པོའི་གཞི་ལ་རྩོལ་མེད་དུ་ལྷུག་པར་གྲོལ་བའོ། །གཉིས་པ་ནི་ཟབ་མོའི་གདམས་པ་ཉམས་སུ་བླངས་པས་ཉོན་མོངས་པ་ཅི་སྐྱེས་ཀྱང་ཆོས་ཉིད་ཀྱི་ངང་དུ་རོ་གཅིག་པར་རྟོགས་ནས་རང་གྲོལ་བའོ། །གསུམ་པ་ནི་གདམས་ངག་ངོ་སྤྲད་པ་རྣམ་པ་ལྔས་ཉམས་སུ་བླངས་པས་རིམ་གྱིས་འཁྲུལ་པ་རང་སྣང་དུ་ངོ་ཤེས་ཏེ་རང་གྲོལ་བའོ། །

གཉིས་པ་འཆི་ཁའི་བར་དོ་ནི། འཆི་ནད་ཀྱིས་ཐེབས་པ་སྟེ། དེའང་སྒེག་མོས་མེ་ལོང་བལྟས་པས་རང་གི་བཞིན་གསལ་བར་མཐོང་བའམ། རྒྱལ་པོའི་བཀའ་འཕྲིན་བསྐུར་བས་མི་དེ་ཆད་པས་འཇིགས་ནས་འཕྲིན་མི་བརྗེད་པ་ལྟར། བར་དོའི་གདམས་པ་གསལ་བཏབ་པས་རང་ཉིད་འཁོར་བར་སྐྲག་(༡༨༢)ནས་གདམས་པ་མི་བརྗེད་པ་སྟེ། དེའང་དབང་པོ་རབ་འབྲིང་གསུམ་ལས། འབྲིང་གི་རབ་སྙིང་སྡུག་མཛའ་བོ་མཐོང་བ་ལྟ་བུ། འབྲིང་གི་འབྲིང་མེ་ལོང་དུ་བྱད་གསལ་བ་ལྟ་བུ། འབྲིང་གི་ཐ་མ་ཁབ་མིག་ཏུ་སྐུད་པ་འཛུད་པ་ལྟ་བུའོ། །དང་པོ་ནི་འཆི་ལྟས་ཚང་བའི་དུས་སུ་ཚེ་འདིར་ཞེན་འཛིན་མེད་པར་བླ་མའི་གདམས་ངག་འབའ་ཞིག་ཡིད་ལ་གསལ་དུང་དུང་བ་འདུག་ན་དེས་ཆོག་གོ། །གཉིས་པ་ནི་འཆི་ཁའི་དུས་དེར་བླ་མའམ་མཆེད་གྲོགས་དམ་ཚིག་དང་ལྡན་པས་རྣ་བར་སྦུགས་མཆུ་བཙུགས་པའི་ནང་ནས་མར། ཨེ་མ་རིགས་ཀྱི་བུ་ཆོས་ཉིད་ཀྱི་བར་དོ་ལ་སྐུ་དང་ཡེ་ཤེས་ཀྱི་སྣང་བ་འབྱུང་བས་དེ་རང་སྣང་དུ་ངོ་ཤེས་པར་མཛོད་ཅིག །ཚེ་འདིའི་སྣང་བ་ལ་མ་ཆགས་པར་བདེ་བར་གཤེགས་ཤིག །ཅེས་ལན་གསུམ་གདབ་བོ། །འདེབས་ལོང་མེད་པར་དབུགས་བསྡུས་ན་རང་གི་ཁ་སྣ་དང་ཁོའི་ཁ་སྣ་སྤྲད་ལ་རང་གི་ཁ་སྣའི་དབུགས་གསུམ་ༀ་ཨཱཿཧཱུྃ་གསུམ་དུ་བསམ་པ་ཁོའི་ཁོང་བར་ཧ་ཞེས་འཕངས་པས་མིག་ཧྲིག་གིས་བྱུང་དུས་སུ་གསལ་གདབ་བོ། །གསུམ་པ་ནི་བར་དོའི་གདམས་པ་སྐད་ཅིག་ཀྱང་མ་ཡེངས་པར་བསྒོམ་པའོ། །དེའང་ས་ས་ལ་ཐིམ་པས་ལུས་ལྕི་ཞིང་ལྡང་མི་ནུས། ཆུ་ཆུ་ལ་ཐིམ་པས་ཁ་ཆུ་སྣ་ཆུ་འཛག །མེ་མེ་ལ་ཐིམ་པས་ལུས་ཀྱི་དྲོད་སྡུད་པས་ཁ་སྣའི་སྒོ་སྐམ། རླུང་རླུང་ལ་ཐིམ་པས་མིག་གྱེན་ལ་ལྡོག་ཅིང་ངར་ངར་རྐང་ལག་གཡབ། དེའི་ཚེ་སྐྱོད་བྱེད་ཀྱི་རླུང་བྲོས་པས་ལུས་མི་ཐེག་སྒྱིད་པ་བསྒྱུར་ཡན་ལག་མི་འདུས། སྨྲ་བ་དཀའ། མིག་གྱེན་དུ་ལྡོག །དབུགས་ཕྱིར་འཕུལ་ལོ། །བཀྲག་མདངས་བསྐྱེད་པའི་རླུང་བྲོས་པས་ལུས་དང་ཁ་སྣའི་སྒོར་བལ་དུད་འཆགས། ཤ་ཚ་ཁ་སྐམ་གཤིན་དྲི་མནམ། དྭངས་སྙིགས་འབྱེད་པའི་རླུང་བྲོས་པས་བཟའ་བཏུང་མི་ལེན་ལུས་སྟོབས་ཤོར་རོ། །མེ་དང་མཉམ་པའི་རླུང་བྲོས་པས་ལུས་ཀྱི་དྲོད་མཐའ་ནས་འཆོར་རོ། །སྐལ་བ་ལས་ཀྱི་རླུང་བྲོས་པས་ཤེས་པ་ཟང་ཟིང་ཕྱད་ཕྱོད་བྱེད་ཅིང་། རྩ་ཕྲན་གྱི་ཁྲག་རྣམས་སྲོག་རྩའི་ནང་དུ་འདུའོ། །དེའི་ཚེ་ཕྱིའི་སྣང་བས་སྲོས་པ་བཞིན་འཐིབས་ཀྱིས་སོང་། རིག་པ་སྙིང་གི་དཀྱིལ་དུ་འདུས་ནས་དྲན་པ་ཉམས་དུས་དེར། སྲོག་རྩའི་ནང་ནས་ཁྲག་ཐིགས་དང་པོ་གཅིག་སྙིང་དུ་བརྒྱབ་པས་ཁ་མིག་སྐྱ་ལོག་གིས་འགྲོ། གཉིས་པས་མགོ་ཁུག་པ་ཅིག་བྱུང་ནས་ཧ་ཟེར་དབུགས་ཕྱིར་མདའ་གང་དུ་སོང་ནས་འཆད། ཁྲག་ཐིགས་གསུམ་པས་ཨིག་ཅེས་དབུགས་འདོམ་གང་དུ་སོང་ནས་ཕྱི་དབུགས་འཆད་དོ། །དེ་དུས་(༡༨༣)རིག་པ་སྙིང་གི་ནང་ན་ཁྲག་གིས་བརྒྱལ་ནས་མི་གཅིག་ཟན་ཟ་བའི་རིང་དུ་དྲན་རྟོག་གང་ཡང་མེད་དོ། །

གསུམ་པ་ཆོས་ཉིད་བར་དོ་ནི་ལམ་འཕྲང་གི་དགྲ་རང་གི་གྲོགས་སུ་ཤེས་པས་འཇིགས་པ་མེད་པའམ། མ་བུ་འཕྲད་པས་ཡིད་ཆེས་པ་ལྟར་དབང་པོའི་བྱེ་བྲག་གིས། ཐ་མའི་རབ་བུམ་པ་ཆག་པ་ལྟ་བུ་ནི། དེ་ནས་རླུང་རྣམ་པར་ཤེས་པ་ལ་ཐིམ་པས་ནང་དབུགས་ཆད། རྣམ་པར་ཤེས་པ་ནམ་མཁའ་ལ་ཐིམ་པས་སེམས་དབྱིངས་སུ་ཐིམ་སྟེ་དར་ཅིག་བརྒྱལ་བ་དེ་སངས་མ་ཁད་ལ། ཞི་བ་ཆོས་ཀྱི་སྐུའི་ནམ་མཁའ་ཞེས་བྱ་བ། དབྱར་མ་སྟོན་གྱི་ནམ་མཁའ་སྤྲིན་དང་བྲལ་བ་ལྟ་བུའི་སྣང་བ་ཤར་ཏེ། དེ་ཉིད་ངོས་ཟིན་པ་ཙམ་གྱིས་ཀ་དག་གི་གཞི་ལ་རང་གྲོལ་བའོ། །དེ་ནས་ནམ་མཁའ་འོད་གསལ་ལ་ཐིམ་པ་ཞེས་བྱ་བ། རང་གི་མིག་གཉིས་ནས་འོད་ཀྱི་ཟེར་ཐག་ནམ་མཁའི་མཐོངས་སུ་ཤར་བ་ནི་མིག་ཐུགས་རྗེ་རྒྱུན་མི་འཆད་ཀྱི་ཐག་པ་ཞེས་བྱ་སྟེ། དེ་ལ་རིག་པ་གཏད་པས་ཡར་གྱི་ཟང་ཐལ་ཀ་དག་གི་ནང་དུ་གྲོལ་ལོ། །དེ་ངོས་མ་ཟིན་ན་ཟེར་ཐག་དེ་ལས་མཆེད་པས་དུས་མ་འགྱུར་བར་སྣང་བར་འགྱུར་ཏེ། འོད་གསལ་གྱི་ཞིང་ཁམས་མེ་ལོང་གི་ངོས་ལ་ཉི་མ་ཤར་བ་ལྟར་སྣང་བ་ནི། ཕྱི་ས་རྡོ་རི་བྲག་རྩི་ཤིང་ནགས་ཚལ། ཉི་མ་ཟླ་བ་ལ་སོགས་པའི་སྣང་བ་རྣམས་ནུབ་ནས། ནང་ཆོས་ཉིད་འོད་གསལ་གྱི་རང་སྣང་རྣམ་པར་དག་པ་ཕྲ་ལ་དྭངས་པ། གསལ་ལ་འཚེར་བ། རང་བཞིན་གྱི་བཀྲ་ལ་ཉམ་ང་བ། ཕྱིའི་རྒྱ་མཚོ་ཆེན་པོ་མཐོང་བ་ལྟར་ནམ་མཁའི་མཐས་ཁྱབ་པར་ཀུན་ཏུ་མེ་རེ་རེ་ཤར་བས་སྣང་སྲིད་འོད་དང་འོད་ཟེར་གྱི་ཕུང་པོར་འབར་བ། བཏེག་ན་འཕར་ཞིང་། མནན་ན་ནེམ་ཞེས་བྱེད་པ་ན། རང་ཉིད་སྣང་བྱེད་འོད་ཀྱི་ལུས་སུ་གསལ་ཞིང་ཕྱོགས་ཀུན་ཏུ་འོད་ཟེར་རྣམ་ལྔའི་ར་བ་གུར་བླ་བྲེ་ཆེན་པོས་ཁྱབ་པར་སྣང་བ་ཐམས་ཅད་རྒྱ་ཆེ་ལ་ལྷུན་སྡུག་ཅིང་དམིགས་སུ་མི་ཚུད་པར་འཆར་རོ། །དེའི་ཚེ་སྣང་བ་མཆེད་པ་དེ་རྣམས་རང་སྣང་དུ་ངོ་ཤེས་པས་རང་སྣང་དུ་གྲོལ་ལོ། །དེ་ནས་འོད་གསལ་ཟུང་འཇུག་ལ་ཐིམ་པ་ཞེས་བྱ་བ་ནི་སྣང་བ་དེ་རྣམས་ཞི་ཁྲོའི་ཚོམ་བུར་འཆར་ཏེ། དེའི་ཚེ་ཐ་མའི་འབྲིང་སེང་གེའི་གསོབ་མཐོང་བ་ལྟ་བུའི་གྲོལ་ལུགས་འབྱུང་སྟེ། སྐད་ཅིག་གདངས་ཀྱི་སྐུ་རྣམས་འཕྲོ་བས་སྒྲ་འོད་ཟེར་གསུམ་གྱི་རྣམ་པས་ཁྲོ་བོའི་དཀྱིལ་འཁོར་རིམ་གྱིས་ཤར་བའི་ཚེ། སྔར་གོམས་པའི་གདམས་པ་གཞིའི་འོད་གསལ་མ་དང་། ཕྱིས་ཤར་བ་བུ་རང་བྱུང་གི་འོད་གསལ་གཉིས་མ་བུ་འདྲེས་ཏེ་རང་ཤར་རང་སྣང་དུ་གྲོལ་ལོ། །དེ་ནས་(༡༨༤)ཡང་ཟུང་འཇུག་ཆེན་པོའི་སྣང་བ་ཞེས་བྱ་བ། སྙིང་གའི་ཞི་བའི་ཚོམ་བུ་ལྔ་ཚན་རིམ་གྱིས་འཆར་བས། ཞག་དང་པོ་ལ་འབྱུང་བ་ནམ་མཁའ་རྣམ་པར་དག་པའི་གདངས་མཐིང་གའི་དབུས་སུ་རྣམ་སྣང་གིས་གཙོ་བྱས་རིགས་ལྔའི་ཚོམ་བུ་འབུམ་ཕྲག་གྲངས་མེད་པ་འཆར་ཏེ། རང་སྣང་དུ་ཤེས་པས་རྣམ་སྣང་གི་ངོ་བོར་གྲོལ་ལོ། །དེ་བཞིན་དུ་ཞག་ལྷག་མ་བཞི་ལ་རིགས་གཞན་བཞིའི་ཚོམ་བུ་སོ་སོའི་ཕྱོགས་ཀྱི་སེམས་དཔའ་དང་། སེམས་མ་དང་། སྒོ་མར་བཅས་པ་སྟེ། ཚོམ་བུའི་དཀྱིལ་འཁོར་ལྔ་ཚན་འབུམ་ཕྲག་བརྗོད་དུ་མེད་པས་སྟེང་འོག་ཕྱོགས་མཚམས་ཐམས་ཅད་དུ་རིགས་ལྔ་ལྔ་ལྡན་དང་། ཡུམ་དང་བཅས་པས་བཅུ་ལྡན་དང་། དེ་ཉིད་ཀྱང་འབྱུང་བ་དང་། ཡེ་ཤེས་ཀྱི་དབྱེ་བས་རེ་རེ་བཞིན་བཅུ་བཅུ་སྟེ་བརྒྱ་ལྡན་དང་། དེ་ཉིད་ཕྱོགས་བཅུར་བརྒྱ་ཕྲག་བཅུར་སྣང་བས་སྟོང་ལྡན་དང་། དེ་ཉིད་ཀྱི་གདངས་ལས་ཡང་ཕྱོགས་བཅུར་དེ་སྙེད་སྣང་བས་འབུམ་ལྡན་དང་། དེ་ཉིད་ཀྱི་སྣང་བ་ལས་མཆེད་པའི་སངས་རྒྱས་ཀྱི་སྐུ་བསམ་གྱིས་མི་ཁྱབ་པ་ནམ་མཁས་གར་ཁྱབ་པ་ཀུན་ཏུ་གསལ་བ་འཚེར་བ། ལྷུན་སྡུག་པ། དཔངས་མཐོ་ཞིང་བཀོད་ལེགས་པས་བརྒྱན་པར་འཆར་རོ། །དེའི་ཚེ་གནད་གསུམ་གྱི་གདམས་པ་དྲན་པར་བྱ་སྟེ། འཇུག་པ་ཤེས་པའི་གནད། གྲོལ་བ་ལུས་ཀྱི་གནད། མཐར་ཕྱིན་པ་ངོ་ཤེས་པའི་གནད་དོ། །དང་པོ་ལའང་གཉིས་ལས། རིག་པ་འོད་ལ་ཕར་འཇུག་པ་ནི། རང་གི་སྙིང་ག་ནས་འོད་ཀྱི་ཟེར་ཐག་ཤིན་ཏུ་ཕྲ་བ་སྙེ་ཚོན་སྒྲིལ་མ་ལྟ་བུ་ཞིག་ཚོམ་བུའི་ལྷ་རྣམས་ཀྱི་ཐུགས་ཀར་འབྲེལ་ཏེ། ཟེར་ཐག་དེ་ལ་ཡང་ཐིག་ལེ་ཕྲ་མོ་གྲངས་མེད་པ་འཆར་རོ། །དེའི་ཚེ་ཚོམ་བུའི་ཐུགས་ཀར་རིག་པ་གཏད་དེ་གསལ་སྟོང་གི་ངང་ལ་བཞག་པས་ཚོམ་བུའི་སྐུ་དང་གཉིས་སུ་མེད་པར་གྲོལ་ལོ། །གཉིས་པ་འོད་རིག་པ་ལ་ཚུར་འཇུག་པ་ནི། ཚོམ་བུའི་ཐུགས་ཀ་ནས་ཀྱང་འོད་ཀྱི་ཟེར་ཐག་ཤར་བ་ལ་སླར་འདུས་ཏེ་སྐད་ཅིག་ལ་རང་གི་སྙིང་གར་ཐིམ་མོ། །དེའི་ཚེ་རང་ཤར་རང་ལ་ཐིམ་པ་བུ་ཆུང་མའི་པང་དུ་ཞུགས་པ་ལྟ་བུའི་གདམས་ངག་གིས་གསལ་སྟོང་གི་ངང་ལ་བཞག་པས་གྲོལ་ལོ། །ཡང་དེ་ཉིད་ལ་གདེང་མ་ཐོབ་ན་གཉིས་པ་གྲོལ་བ་ལུས་ཀྱི་གནད་ནི། ཟུང་འཇུག་ཡེ་ཤེས་ལ་ཐིམ་པ་ཞེས་བྱ་བ། རང་གི་སྙིང་ག་ནས་སྟེང་གི་ནམ་མཁར་འོད་ཁ་དོག་བཞིའི་ཐག་པ་ཟུག་སྟེ། མ་ཡེངས་པར་བལྟས་པས་སྣང་བ་དེ་གཞན་དང་མ་འདྲེས་པར་ཤིན་ཏུ་རྒྱ་ཆེ་བ་(༡༨༥)འཆར་ཏེ། རྒྱ་སྐར་ཉི་ཞུར་ལྟ་བུ་བཞི་པརྩེགས་པའི་སྟེང་རྣམས་ན་རང་རང་གི་ཁ་དོག་དང་མཐུན་པའི་ཐིག་ལེ་མེ་ལོང་ལྟ་བུའི་ཡེ་ཤེས་ཀྱི་གཏིང་གདངས་དང་བཅས་པ་གསལ་ལ་འཚེར་བ་རང་བཞིན་གྱི་ཐིག་ལེ་ལྔ་ལྔས་བརྒྱན་པའོ། །དེའི་སྟེང་དུ་དཀར་པོའི་སྣམ་བུ་ལ་ཐིག་ལེ་དཀར་པོ་དང་། དེའི་སྟེང་དུ་སེར་པོའི་སྣམ་བུ་ལ་ཐིག་ལེ་སེར་པོ་དང་། དེའི་སྟེང་དུ་དམར་པོའི་སྣམ་བུ་ལ་ཐིག་ལེ་དམར་པོས་བརྒྱན་པའོ། །དེའི་སྟེང་དུ་འོད་ཟླུམ་པོ་རྨ་བྱའི་གདུགས་ལྟ་བུའི་སྣང་བ་འཆར་རོ། །དེ་ནི་སྒྲོན་མ་བཞི་དབྱིངས་སུ་འཁྱིལ་པའི་སྣང་བའོ། །སྔ་མ་བཞི་ནི་རྡོ་རྗེ་སེམས་དཔའ་ཁོང་སེང་གི་ལམ་ཡེ་ཤེས་བཞི་སྦྱོར་གྱི་སྣང་བ་ཞེས་བྱ་སྟེ། དེའི་དུས་སུ་མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་དྲན་པར་བྱའོ། །དེའང་སྙིང་ཆུ་ཞུགས་པ་གསེར་གྱི་ཐུར་མས་ཡིད་གཞུངས་ཏེ་འདྲེན་པ་ལྟར། འོད་སྣང་གི་སྣམ་བུ་ལ་མ་ཡེངས་པར་རང་སྣང་དུ་ཤེས་ནས་བལྟས་པས་རྒྱུན་གྱི་ཏིང་ངེ་འཛིན་སྐྱེའོ། །དེ་ཉིད་དུ་གྲོལ་བ་ཡིན་ནོ། །གསུམ་པ་མཐར་ཕྱིན་པ་ངོ་ཤེས་པའི་གནད་གསུམ་ནི། དེའི་ཚེ་སྔར་གྱི་སྣང་བ་དེ་རྣམས་ལ་ཡིད་ཆེས་པ་མ་པང་དུ་བུ་འཇུག་པ་ལྟར་དྲན་པས་གྲོལ་བ་དང་། སྔར་འདྲིས་ཀྱི་མི་ཕྱིས་མཐོང་བས་ངོ་ཤེས་ཏེ་སྒྲོ་འདོགས་ཆོད་པ་ལྟར། སྔར་གྱི་གདམས་པའི་དོན་ངོ་ཤེས་པས་གྲོལ་བ་དང་། མི་འགྱུར་བ་གསེར་གྱི་ཐུར་མ་ལྟ་བུས་མ་ཡེངས་པར་རང་སྣང་གི་ཏིང་ངེ་འཛིན་ལ་གནས་པས་གྲོལ་བའོ། །དེ་ནས་ཕྱིར་མི་ལྡོག་པ་མངལ་ནས་སྐྱེས་པའི་སྐྱེས་བུའམ་གྱད་རྩལ་པོ་ཆེའི་མདའ་ལྟར། རིག་པ་ལྷུན་གྲུབ་ཆེན་པོའི་སྐུ་ལ་ཐིམ་པའི་ཚེ། ཡེ་ཤེས་ལྷུན་གྲུབ་རིན་པོ་ཆེ་ལ་ཐིམ་པ་ཞེས་བྱ་སྟེ། རང་སྣང་ཐམས་ཅད་སྟོན་ཀའི་ནམ་མཁའ་རྣམ་པར་དག་པ་ལྟ་བུའི་མཐའ་མ་འོད་ལྔའི་མུ་ཁྱུད་ཟླུམ་པོས་བསྐོར་བ་ནི་ཉི་མ་འཇས་འཁྱིལ་པ་ལྟ་བུ་སྟེ་དབང་པོའི་སྤྱོད་ཡུལ་དུ་གྱུར་ཚད་དུ་འཆར་རོ། །དེའི་ནང་རྣམས་སུ་ཞི་བ་དང་ཁྲོ་བོའི་སྐུ་སྣང་ལ་རང་བཞིན་མེད་པ་གྲངས་མེད་པ་ཀུན་ཏུ་སྣང་ངོ་། །དེའི་སྟེང་རྣམས་ན་འོད་ཟླུམ་པོ་ཁ་དོག་ལྔ་ལྡན་ཤིན་ཏུ་གསལ་བ་རེ་འཆར་རོ། །དེའི་ཚེ་ཡར་སངས་རྒྱས་ཀྱི་ཞིང་དུ་སྣང་ལ། ཐད་ཀར་རང་བཞིན་སྤྲུལ་པའི་སྣང་བ་འཆར་ཞིང་། མར་འགྲོ་བ་རིགས་དྲུག་གི་འཇིག་རྟེན་ལྟར་སྣང་བ་ཐམས་ཅད་ཀྱང་། གཟུགས་དང་སྒྲ་སྐད་སྣ་ཚོགས་པ་སྣང་ལ་ངོས་གཟུང་དང་བྲལ་བར་འཆར་རོ། །དེ་ལྟར་སྣང་(༡༨༦)བ་ལ་འཆར་ལུགས་བརྒྱད་དེ། ཐུགས་རྗེ་ལྟར་ཤར་བས་འཁོར་འདས་རྒྱ་མ་ཆད། འོད་ལྟར་ཤར་བས་སྣང་བ་ཐམས་ཅད་ནང་དུ་རང་གསལ། སྐུ་ལྟར་ཤར་བས་ཤེས་པ་ཁ་ཕྱིར་མ་ཤོར། ཡེ་ཤེས་ལྟར་ཤར་བས་སྣང་བ་ཐམས་ཅད་ཟང་ཐལ། གཉིས་མེད་ལྟར་ཤར་བས་རང་གི་ཤེས་པ་རྩེ་གཅིག་གནས། མཐའ་གྲོལ་ལྟར་ཤར་བས་མཐའ་གང་ལ་ཡང་མི་གནས། མ་དག་པ་སྲིད་པའི་སྒོ་ལྟར་ཤར་བས་སྲིད་པའི་བྱུང་ཁུངས་མི་འགག །དག་པ་ཡེ་ཤེས་ཀྱི་སྒོ་ལྟར་ཤར་བས་ཆོས་ཉིད་མ་བུ་འབྲེལ་ལོ། །ཡང་དེའི་ཚེ་དབང་པོ་དང་། སེམས་ལས་སུ་རུང་བ་དང་། ཤེས་རབ་ལ་དབང་ཐོབ་པ་དང་། ཡེ་ཤེས་ལ་གཟིགས་པ་རྣམ་པར་དག་པ་དང་། ཆོས་ཉིད་ཕྱིན་ཅི་མ་ལོག་པར་མཐོང་བ་དང་། སངས་རྒྱས་ཀྱི་གཟིགས་པ་ཕྱིན་ཅི་མ་ལོག་པར་མཐོང་བའི་མངོན་པར་ཤེས་པ་དྲུག་སྟེ། དྲུག་ཕྲག་དྲུག་འཆར་རོ། །ཡང་སྐུ་གསུང་ཐུགས་ཀྱི་མངོན་པར་མཁྱེན་པ་དགུ་སྐད་ཅིག་ལ་འཆར་ཏེ། སྐུའི་གསུམ་ནི། ཡར་གྱི་ཆོས་སྐུ་སྐྱེ་བ་མེད་པར་ཤེས། བར་ལོངས་སྐུའི་ཚོམ་བུར་རང་གསལ་དུ་ཤེས། མར་སྤྲུལ་སྐུ་དང་རིགས་དྲུག་གི་སྐྱེ་གནས་ཤེས་པའོ། །གསུང་གི་གསུམ་ནི། ཡར་ཆོས་སྐུའི་གསུང་བརྗོད་དུ་མེད་པར་ཤེས། བར་ལོངས་སྐུའི་གསུང་གསལ་གདངས་ཆེན་པོར་ཤེས། མར་སྤྲུལ་སྐུའི་གསུང་རིགས་དྲུག་གི་སྒྲ་སྐད་སྣ་ཚོགས་ཤེས་པའོ། །ཐུགས་ཀྱི་གསུམ་ནི། ཡར་ཆོས་སྐུའི་ཐུགས་ཀ་དག་ཆེན་པོར་ཤེས། བར་ལོངས་སྐུའི་ཐུགས་ལྷུན་གྲུབ་ཆེན་པོར་ཤེས། མར་སྤྲུལ་སྐུའི་ཐུགས་འཁོར་འདས་ཀྱི་བསམ་པ་ཤེས་པའོ། །དེ་ལྟར་དངོས་པོ་གཤིས་ཀྱི་འདུག་ཚུལ་རྟོགས་པ་ནི་རྗེས་སུ་དྲན་པ་ལས་བྱུང་སྟེ། བླ་མ་རྗེས་སུ་དྲན་པས་ཟབ་མོའི་གདམས་པ་ལ་དབང་བསྒྱུར། གདམས་པ་རྗེས་སུ་དྲན་པས་བར་དོ་རང་སྣང་གི་ཆོས་ཉིད་ལ་དབང་བསྒྱུར། ལྟ་བ་རྗེས་སུ་དྲན་པས་མི་འགྱུར་བའི་གདིང་དུ་ཐག་ཆོད། སྒོམ་པ་རྗེས་སུ་དྲན་པས་ཞག་ལྔར་རང་བཞིན་གྱི་བསམ་གཏན་ལ་གནས། སྤྱོད་པ་རྗེས་སུ་དྲན་པས་སྔར་འདྲིས་ཀྱི་མི་དང་འཕྲད་པ་བཞིན་དག་པའི་ཡེ་ཤེས་ལ་སྤྱོད། ལྷ་རྗེས་སུ་དྲན་པས་རང་སྣང་འོད་གསལ་གྱི་དཀྱིལ་འཁོར་དུ་གྲོལ། སྐྱེ་གནས་རྗེས་སུ་དྲན་པས་དབང་པོ་ཐ་མ་རྣམས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་འབྱིན་པའོ། །དེ་ནས་མི་བརྗེད་པའི་གཟུངས་དང་ཏིང་ངེ་འཛིན་ཐོབ་པས་འཁོར་བར་མི་ལྡོག་ངེས་སོ། །

དེ་ནས་ལྷུན་གྲུབ་ལ་གདེང་ཐོབ་པའི་ཚེ་ཐིམ་ལུགས་(༡༨༧)བརྒྱད་འབྱུང་བ་ནི། སྔར་ཕྱིར་ཤར་ལུགས་བརྒྱད་པོ་ནང་དུ་ཐིམ་པ་སྟེ། དེའང་ཐུགས་རྗེ་ཕྱིར་གསལ་ནང་གི་ཐུགས་རྗེ་ལ་ཐིམ་པས་དཔེར་ན་ཉི་མ་ནུབ་པའི་འོད་ཟེར་ལྟ་བུའོ། །དེ་བཞིན་ཡེ་ཤེས་ཡེ་ཤེས་ལ་ཐིམ་པ་མ་པང་དུ་བུ་ཞུགས་པ་ལྟ་བུ། འོད་འོད་ལ་ཐིམ་པ་འཇའ་ཚོན་ནམ་མཁའ་ལ་ཡལ་བ་ལྟ་བུ། སྐུ་སྐུ་ལ་ཐིམ་པ་བུམ་པའི་སྐུ་ལྟ་བུ། གཉིས་མེད་གཉིས་མེད་ལ་ཐིམ་པ་ཆུ་བོ་ལ་ཆུ་བོ་ཐིམ་པ་ལྟ་བུ། མཐའ་གྲོལ་མཐའ་གྲོལ་ལ་ཐིམ་པ་བུམ་ནང་གི་ནམ་མཁའ་བུམ་པ་ཆག་པས་ཕྱིའི་ནམ་མཁའ་ཆེན་པོ་ལ་ཐིམ་པ་ལྟ་བུ། མ་དག་པ་འཁོར་བའི་སྒོ་རིགས་དྲུག་གི་སྣང་བ་དེ་རྣམས་དག་པ་ཡེ་ཤེས་ཀྱི་སྒོ་ལ་ཐིམ་པས་སྦྲའི་ཆོན་ཐག་བསྡུས་པ་ལྟ་བུ། དག་པ་ཡེ་ཤེས་ཀྱི་སྒོ་སྤྲུལ་སྐུ་དང་ལོངས་སྐུའི་སྣང་བ་དེ་རྣམས་ངོ་བོའི་སྐུ་ཀ་དག་ཆེན་པོའི་ནང་དུ་ཐིམ་པས་སེང་གེས་གངས་ཟིན་པ་ལྟ་བུའོ། །དེའི་ཚེ་གཟིགས་སྣང་ཐམས་ཅད་མྱ་ངན་ལས་འདས་པ་ཞེས་བྱ་བ། ཕྱིར་གསལ་དུ་མེད་ལ་ནང་གསལ་དུ་ཕྲ་མོར་ཡོད་པ་ཤེལ་འོད་ཉི་ཟེར་དང་བྲལ་བ་ལྟ་བུས་གདོད་མའི་ས་ལ་སངས་རྒྱས་བྱང་ཆུབ་ཕྱིར་མི་ལྡོག་པས་སྐུ་གསུམ་འདུ་འབྲལ་མེད་པའི་དགོངས་པ་ལ་བཞུགས་སོ། །འདིའི་དབང་པོ་ཐ་མ་ལ་ནི་དེ་ལ་གྲོལ་བའི་གདེང་མ་རྙེད་པས་རང་བཞིན་སྤྲུལ་སྐུའི་ཞིང་དུ་ཆོས་ཉིད་བདེན་པའི་བྱིན་རླབས་ཀྱིས་སྐྱེ་ལ། འགྲོ་བ་ཕལ་པ་རྣམས་ལ་སྲིད་པ་བར་དོའི་སྣང་བ་འཆར་རོ། །

བཞི་པ་སྲིད་པའི་བར་དོ་ལ་ལས་བཟང་གི་འཕྲོ་མཐུད་པ་ཡུར་བ་ཁ་ཆད་ལ་ཝ་འཛུགས་པ་ལྟ་བུའི་གདམས་ངག་ནི། དེ་ལྟར་ལྷུན་གྲུབ་ཀྱི་སྣང་བ་ནུབ་ནས། སྲིད་པའི་བར་དོར་རྨི་ལམ་གྱི་སྣང་བ་ལྟར་དབང་པོ་ཚང་ཞིང་རྫུ་འཕྲུལ་དང་ལྡན་པ་ཀུན་ཏུ་འཇུག་ཅིང་འཇིག་པ་དང་བཅས་པས། བར་དོར་ཇི་ཙམ་གནས་པའི་ཕྱེད་སྔ་མའི་གཟུགས་དང་བག་ཆགས་སུ་སྣང་ལ། ཕྱེད་ཕྱི་མ་གང་དུ་སྐྱེ་བའི་གཟུགས་དང་སྣང་བ་འཆར་ཏེ། དེའང་ལྷ་མི་གཉིས་སུ་སྐྱེ་ན་འོད་དཀར་པོ་འདོམ་གང་བས་བརྒྱན་ནས་མགོ་གྱེན་དུ་བལྟ་ལ། ལྷ་མ་ཡིན་དང་དུད་འགྲོར་སྐྱེ་ན་སེར་པོ་སྣང་བས་མགོ་འཕྲེད་དུ་བལྟ་ཞིང་། དམྱལ་བ་དང་ཡི་དྭགས་ནག་པོར་སྣང་བས་མགོ་ཐུར་དུ་བསྟན་ཞིང་འགྲོ་བ་སྙམ་བྱེད་དོ། །ཡང་སྐྱེ་གནས་སོ་སོར་འཇུག་དུས། ལྷ་ཁང་དང་སྐྱེད་མོས་ཚལ་ནི་ལྷའི་སྐྱེ་གནས། འོད་ཀྱི་འཁོར་ལོ་ལྷ་མིན། ནམ་རྨུགས་པ་མི་ལུས་ཙམ་པོ། སྐྱེ་བོ་མང་པོའི་དབུས་མི་ལུས་རིན་པོ་(༡༨༨)ཆེ། ས་ཕུག་གམ་སྤྱིལ་པོ་བྱོལ་སོང་། གྲོག་པོ་སྟོང་པ་དང་ཕུག་རྡུགས་ཡི་དྭགས། མུན་ནག་ཆར་འཐིབས་ནི་དམྱལ་བའི་སྐྱེ་གནས་སོ། །འདིའི་ཚེ་དབང་པོ་གསུམ་ལས། ཐ་མའི་རབ་ཀྱི་མའི་མངལ་ལ་སོགས་པ་བདེན་མེད་དུ་ཤེས་པའམ། ཞེན་ལོག་གིས་བཀག་སྟེ་ཤར་ཕྱོགས་མངོན་པར་དགའ་བ་ལ་སོགས་པའི་ཞིང་ཁམས་ཡིད་ལ་བྱས་པས། འགྲོ་དྲུག་གི་མངལ་དུ་མི་འཇུག་པར། དག་པའི་ཞིང་དུ་པདྨ་ལས་རྫུས་ཏེ་སྐྱེའོ། །ཐ་མའི་འབྲིང་གིས་སྒྱུ་མ་ལྟ་བུའི་བསྐྱེད་རིམ་གསལ་བཏབ་པ་ཁ་ཅིག་ཡི་དམ་གྱི་ལྷར་གྲོལ་ལ། མངལ་ཆོས་འབྱུང་དུ་གསལ་བའི་ནང་ན་པདྨ་ཉི་ཟླའི་སྟེང་དུ་ཨོཾ་ཨཱཿཧཱུྃ་ལ་སོགས་པའི་ཡི་དམ་གྱི་ས་བོན་གསལ་བཏབ་ནས་རྣམ་ཤེས་དེ་ལ་ཞུགས་ཏེ། ཕ་མ་ཡི་དམ་ཡབ་ཡུམ་དུ་གསལ་བཏབ་པས་མི་ལུས་རིན་པོ་ཆེ་རྟག་ཏུ་ཆོས་ལ་སྤྱོད་པར་སྐྱེས་ནས། བླ་མ་དགེ་བའི་བཤེས་གཉེན་མཐུན་པའི་ཞབས་དྲུང་དུ་སྐྱེས་ཏེ་ཟབ་མོའི་ཆོས་དང་འཕྲད་དོ། །ཐ་མའི་ཐ་མ་སྐྱབས་འགྲོས་བཟློག་པ་ནི། སྣང་བ་དེ་དག་གི་དུས་སུ་བླ་མ་དང་ཕྱོགས་བཅུའི་དཀོན་མཆོག་གསུམ་ལ་སྐྱབས་སུ་འགྲོ་བར་བྱས་ཏེ། རྟག་ཏུ་ཆོས་ལ་སྤྱོད་པའི་རིགས་སུ་སྐྱེ་བར་བྱིན་གྱིས་བརླབ་ཏུ་གསོལ། ཞེས་བརྗོད་ཅིང་བཟང་པོ་སྤྱོད་པ་ལ་སོགས་པའི་སྨོན་ལམ་རྗེས་སུ་དྲན་པས་སྐྱེ་གནས་ངན་པ་ལས་ལྡོག་སྟེ། བདེ་འགྲོ་མཐོ་རིས་ཀྱི་འཇིག་རྟེན་ལྷ་དང་མི་རྣམས་ཀྱི་ནང་དུ་སྐྱེས་ནས་དཀོན་མཆོག་གསུམ་ལ་མངོན་པར་དད་པས་ཐར་པའི་ཆོས་ལ་སྤྱོད་པར་སྐྱེའོ། །འདི་དག་ནི་མངོན་སུམ་གྱི་དོན་མ་མཐོང་བར་ཚེ་དུས་བྱས་པ་རྣམས་ཀྱི་དབང་དུ་བྱས་པའོ། །

དོན་གསུམ་པ་བརྩོན་འགྲུས་ཐ་མ་རང་བཞིན་སྤྲུལ་སྐུའི་ཞིང་དུ་དབུགས་ཕྱུང་སྟེ་བར་དོ་མེད་པར་གྲོལ་བའི་གདམས་ངག་ནི། འདིར་ཆོས་ཉིད་མངོན་སུམ་གྱི་དོན་མཐོང་ཡང་བསྒོམས་ལོང་མ་བྱུང་སྟེ། བར་དོའི་གྲོལ་ཚད་དང་མི་ལྡན་པ་རྣམས་ཆོས་ཉིད་ཀྱི་བར་དོ་ཤར་ཡང་ངོས་མ་ཟིན་ཏེ། སྲིད་པའི་བར་དོར་རྨི་ལམ་གྱི་ཆ་ཙམ་དུ་སྣང་བ་ལས་ཆོས་ཉིད་བདེན་པའི་བྱིན་རླབས་དང་། རིག་འཛིན་གྱི་སློབ་དཔོན་ཆེན་པོ་པདྨའི་ཐུགས་རྗེས་རྨི་ལམ་སད་པའི་ཆ་ཙམ་ལ་ཤར་ཕྱོགས་མངོན་པར་དགའ་བ་མི་འགྱུར་རྡོ་རྗེའི་ཞིང་དུ་སྐྱེའོ། །དེའང་ཞིང་ཁམས་དཀར་པོ་ཤེལ་ལས་གྲུབ་པ། གཞལ་ཡས་ཁང་དང་། ཆོས་འཆད་པའི་རིན་པོ་ཆེའི་ཁྲི་དང་། ཆོས་ཀྱི་འཁོར་ལོ་དང་། རྒྱལ་མཚན་དང་། མཆོད་པའི་ལྷ་མོས་བཀྲ་ཤིས་ཀྱི་གླུ་དབྱངས་བརྗོད་པ་དང་། ཡན་ལག་བརྒྱད་ལྡན་གྱི་ཆུ་ལ་སྤྲུལ་པའི་ངང་པས་བརྒྱན་པ་དང་། རིན་པོ་ཆེ་(༡༨༩)པདྨའི་སྙིང་པོ་དང་དཔག་བསམ་གྱི་ཤིང་དང་། ས་གཞི་རེག་ན་འཇམ་ཞིང་བཏེག་ན་འཕར་བ་མནན་ན་ནེམ་པ་སྙམ་པ་ན། དེ་བཞིན་གཤེགས་པ་རྡོ་རྗེ་མི་བསྐྱོད་པ་རྡོ་རྗེའི་རིགས་ཀྱི་འཁོར་འབུམ་ཕྲག་དཔག་ཏུ་མེད་པ་མང་པོ་ལ་ཆོས་སྟོན་པར། རང་ཡང་རྡོ་རྗེ་རིགས་ཀྱི་སེམས་དཔའ་དཀར་པོའི་གཟུགས་ཅན་ཤིན་ཏུ་མཛེས་པར་ལྷུན་གྱིས་གྲུབ་སྟེ། སྟོན་པའི་ཞལ་མཐོང་གསུང་ཐོས་པས་ཞེ་སྡང་ལས་གྱུར་པའི་ཉོན་མོངས་པ་དག་སྟེ། ལོ་བརྒྱ་ཉི་ཤུ་རྩ་ལྔར་གནས་པ་ལས། སྐད་ཅིག་གིས་ལྷོ་ཕྱོགས་དཔལ་དང་ལྡན་པའི་འཇིག་རྟེན་དུ་སྐྱེས་ཏེ། ཞིང་ཁམས་སེར་པོ་འཛམ་བུ་ཆུ་བོའི་གསེར་ལས་གྲུབ་པ་ན། གཞལ་ཡས་ཁང་སྒོ་བཞི་རྟ་བབས་བཞིས་བརྒྱན་པ་ཟུར་བཞིར་རིན་པོ་ཆེའི་མཆོད་རྟེན་ལ་གསེར་གྱི་དྲིལ་བུ་གཡེར་ཁའི་ཕྲེང་བ་འཁྲོལ་བས་ཆོས་ཀྱི་སྒྲ་འབྱུང་བ་ལ་སོགས་སྔ་མ་ལྟར་གནས་པ་ན། དེ་བཞིན་གཤེགས་པ་རིན་ཆེན་འབྱུང་ལྡན་རིན་ཆེན་རིགས་ཀྱི་འཁོར་དཔག་ཏུ་མེད་པ་ལ་ཆོས་སྟོན་པར་རང་ཉིད་རིན་ཆེན་རིགས་ཀྱི་སེམས་དཔར་གྱུར་ཏེ། སྟོན་པས་དབང་བསྐུར་བས་ཉོན་མོངས་པ་ང་རྒྱལ་དང་གཏི་མུག་དག་ནས་ལོ་བརྒྱ་ཉི་ཤུ་རྩ་ལྔར་གནས་པ་ལས། སྐད་ཅིག་གིས་ནུབ་ཕྱོགས་པདྨ་བརྩེགས་པའི་ཞིང་ཁམས་སུ། པདྨ་རིགས་ཀྱི་སེམས་དཔར་སྐྱེས་ཏེ། དེ་བཞིན་གཤེགས་པ་སྣང་བ་མཐའ་ཡས་ཀྱིས་མངོན་སུམ་དུ་ལུང་བསྟན་ནས། འདོད་ཆགས་དག་སྟེ་ལོ་བརྒྱ་ཉི་ཤུ་རྩ་ལྔར་གནས་པ་ལས། སྐད་ཅིག་གིས་བྱང་ལས་རབ་རྫོགས་པའི་ཞིང་ཁམས་སུ་ལས་ཀྱི་སེམས་དཔར་བརྫུས་ཏེ་སྐྱེས་པ་ལ་དེ་བཞིན་གཤེགས་པ་དོན་ཡོད་གྲུབ་པས་དབུགས་ཕྱུང་སྟེ་ཉོན་མོངས་པ་ཕྲག་དོག་དག་ཅིང་ལོ་བརྒྱ་ཉི་ཤུ་རྩ་ལྔར་གནས་པ་ལས། སྐད་ཅིག་གིས་སྟེང་གི་ནམ་མཁར་མི་མཇེད་བརྩེགས་པ་ལ་དུར་ཁྲོད་མེ་རི་འབར་བའི་གནས་སུ་ཁྲོ་བོའི་ཞིང་ཁམས་མཐོང་སྟེ། གདོད་མའི་གཞི་ལ་སྐད་ཅིག་དེ་ཉིད་དུ་གྲོལ་ནས། ནང་གསལ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལ་དུས་གསུམ་འདུ་འབྲལ་མེད་པར་བཞུགས་ནས་ནམ་མཁའི་མཐས་ཀླས་པའི་སེམས་ཅན་ལ་གང་ལ་གང་འདུལ་གྱི་སྐུ་མངོན་པར་སྣང་བས་འཁོར་བ་མ་སྟོངས་ཀྱི་བར་དུ་འཛད་པ་མེད་པའི་ཐུགས་རྗེ་རྒྱུན་མི་འཆད་པའི་རང་བཞིན་ལྷུན་གྱིས་གྲུབ་པའི་ཕྲིན་ལས་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་ལྟར་འགྲོ་བའི་ཡིད་དང་མཐུན་པར་སྣང་ཞིང་། མཐར་ཐུག་གདོད་མའི་ཀུན་ཏུ་བཟང་པོ་ལ་འགོད་པར་མཛད་དོ། །

དོན་གསུམ་པ་གཙིགས་ཆེ་བ་བཀའ་རྒྱས་གདབ་(༡༩༠)པ་ནི། འདི་ལྟ་བུའི་གདམས་པ་ཡིད་བཞིན་གྱི་ནོར་བུ་དབང་གི་རྒྱལ་པོ་བས་ཀྱང་ཆེས་ཤིན་ཏུ་དཀོན་པས། ཕྱི་རབས་ཀྱི་སྐལ་བ་དང་ལྡན་པ། བླ་མ་ལ་གུས་ཤིང་གཏོང་ཕོད་ཆེ་བ། དམ་ཚིག་དང་སྡོམ་པ་ལ་གནས་ཤིང་སྒྲུབ་པ་ལ་བརྩོན་པ། རང་བཞིན་རྫོགས་པ་ཆེན་པོའི་སྣོད་དུ་རུང་ཞིང་མཁའ་འགྲོའི་མཚན་རྟགས་ཚང་བ་མ་གཏོགས་པ་ལ་རླུང་གི་ཕྱོགས་ཙམ་དུའང་མི་བསྒྲག་ཅིང་ཆུ་སྲིན་གྱི་གྲེ་བའི་ནོར་བུ་བཞིན་དུ་བསྡམ་མོ། །མཚན་རྟགས་ཚང་ཞིང་མཁའ་འགྲོའི་ལུང་བསྟན་འོངས་པས་དེའི་དུས་སུ་གདམས་པ་ཚང་བར་སྐལ་བ་མཆོག་དང་ལྡན་པ་གཅིག་ལ་བྱིན་ཏེ། དེས་ཀྱང་མངོན་ཞེན་དང་ལེ་ལོ་སྤངས་ཏེ་ཐོག་མར་རང་གིས་བསྒྲུབ་ཅིང་། བར་དོའི་གྲོལ་ཚད་དང་ལྡན་པ་ཡན་ཆད་ནས། རང་བས་གཞན་གཅེས་ཀྱི་སྙིང་རྗེ་ཆེན་པོས་གཞན་དོན་སྐྱོ་ངལ་མེད་ཅིང་སྤྲོ་བར་རང་བཞིན་ལྷུན་གྱིས་གྲུབ་པར་མཛོད་ཅིག

དེ་ལྟར་རྒྱུད་དོན་མན་ངག་རྒྱ་མཚོ་ལས། །ཟབ་མོའི་བཅུད་རྣམས་ཡང་ནས་ཡང་བསྡུས་པ། །ངེས་གསང་སྙིང་པོ་ཚེ་གཅིག་སངས་རྒྱས་ལམ། །མཁའ་འགྲོ་སྙིང་ཏིག་གསང་བའི་སྒོ་ཕྱེ་ནས། །ཕྱི་རབས་སྐལ་ལྡན་འཇུག་པའི་ཐེམ་སྐས་སུ། །ཟབ་དོན་སྙིང་པོའི་ཡི་གེ་འདི་བརྩམས་ཏེ། །རྡོ་རྗེ་སྙིང་པོའི་ལམ་བཟང་སྲོལ་བཏོད་ནས། །མ་ནོར་ཇི་བཞིན་ལེགས་པར་བཀོད་པ་ཡིན། །ཉི་མ་ཟླ་བ་ལྷུན་པོ་རྒྱ་མཚོར་བཅས། །རྒྱུན་རིང་བརྟན་པས་འགྲོ་བའི་དོན་བྱེད་ལྟར། །བདག་གི་ཆོས་ཚུལ་རྒྱ་མཚོ་འདི་ཡིས་ཀྱང་། །འགྲོ་བའི་དོན་གཉིས་ལྷུན་གྱིས་གྲུབ་པར་ཤོག །གངས་རི་ཐོད་དཀར་རིན་ཆེན་སྙིང་པོའི་མགུལ། །ཨོ་རྒྱན་རྫོང་ཞེས་བྱ་བའི་གནས་མཆོག་ཏུ། །ཁྲིད་ཡིག་རིན་ཆེན་གསེར་ཕྲེང་འདི་བརྩམས་པས། །འགྲོ་བའི་ཡིད་ལ་བསམ་པ་འགྲུབ་པར་ཤོག །

རིན་ཆེན་གསེར་ཕྲེང་ཞེས་བྱ་བ་ཨོ་རྒྱན་ཡབ་ཡུམ་གྱིས་དངོས་སུ་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་ཞེས་བྱ་བས། བསྟན་པ་ལྔ་བརྒྱ་ཕྲག་གཅིག་གི་སྲོག་ཤིང་མི་ནུབ་པའི་རྒྱལ་མཚན་ཆེན་པོ་གཟུག་པའི་ཕྱིར་སྐལ་བ་དང་ལྡན་པའི་བུ་མཆོག་འོད་ཟེར་གོ་ཆས་སྦྱིན་བདག་བགྱིས་ཏེ་གསོལ་བ་བཏབ་པའི་ངོར། ཟབ་མོའི་དོན་རྣམས་གཅིག་ཏུ་བསྡུས་ནས། ཕྱི་རབས་ཀྱི་འགྲོ་བ་སྨིན་ཅིང་གྲོལ་བའི་དོན་དུ། ཁྲིད་ཡིག་སྔ་མ་ལས་གསལ་བར་ཕྱེ་སྟེ། མཁའ་འགྲོ་དུ་མའི་ལུང་བསྟན་དང་མཐུན་པར་རིན་ཆེན་ཤོག་འདྲའི་ངོས་ལ་ཕྱིན་ཅི་མ་ལོག་པར། གངས་རི་ཐོད་དཀར་གྱི་མགུལ། ཨོ་རྒྱན་རྫོང་གི་དབེན་གནས་སུ་སྟོན་གྱི་ཟླ་བ་མེ་ཏོག་འབྲས་བུ་དུ་མ་སྨིན་པའི་ཚེ་བཀོད་པ་རྫོགས་སོ། །འདིས་འགྲོ་བ་དཔག་ཏུ་མེད་པ་ལ། ཕན་པ་དང་བདེ་བ་བསྐལ་པ་རྫོགས་ལྡན་གྱི་དུས་སུ་ཉེ་བར་གནས་པ་བཞིན་དུ་བྱེད་པར་གྱུར་ཅིག །རྒྱ། དགེའོ།། །།

ནམ་མཁའ་སྐོར་གསུམ་ལས། ནམ་མཁའ་རབ་འབྱམས།

༄༅། །ནམ་མཁའ་སྐོར་གསུམ་ལས། ནམ་མཁའ་རབ་འབྱམས་བཞུགས་པ་ལེགས།རིན་ཆེན་ཤོག་སྐྱའི་སྐོར་རྒྱབ་ཆོས་ཀྱི་རིམ་པ་ལས།

༄༅། །ནམ་མཁའ་རབ་འབྱམས་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཡེ་ནས་མ་བཅོས་རང་བཞིན་རྫོགས་པ་ཆེ། །བརྗོད་མེད་བསམ་འདས་མཉམ་ཉིད་ངང་ཉིད་ལས། །སྣ་ཚོགས་འཆར་སྒོ་ཡེ་ཤེས་རིགས་ལྔའི་གདངས། །རང་ཤར་རང་སར་གྲོལ་ལ་ཕྱག་འཚལ་ལོ། །ཤར་སྣང་འགྱུ་བ་ཡེ་ཤེས་རོལ་པའི་དབྱིངས། །དྲན་འཛིན་གཉེན་པོའི་བློ་ལས་འདས་པ་ནི། །གང་དང་མི་འགལ་ཀུན་ལས་འདས་པའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །རང་བཞིན་གདོད་ནས་དག་པའི་ངང་ཉིད་ལས། །སྐྱེ་མེད་ལྷུན་རྫོགས་སྙིང་པོའི་གདངས་ཤར་བ། །ཡོན་ཏན་རང་བཞིན་ཅན་ཡང་འཛིན་པའི་བློས། །སྣ་ཚོགས་འཁོར་བའི་སེམས་ཞེས་བཏགས་པར་སྣང་། །རང་གི་རང་བཞིན་ཡང་ནས་ཡང་ཤར་བ། །ཆུ་དང་རླབས་བཞིན་ཡེ་ཤེས་རྒྱ་མཚོའི་ངང་། །གཞི་མེད་རྩ་བྲལ་རིག་པའི་རླབས་ཤར་བ། །ཆོས་ཉིད་ངང་ལས་བྱུང་ཞིང་ངང་དུ་ཐིམ། །རང་ཤར་རང་གྲོལ་ཆོས་སྐུའི་རོལ་པ་ཆེ། །སྣ་ཚོགས་འཆར་སྒོ་ཆོས་དབྱིངས་ཀུན་ཏུ་བཟང་། །དེ་ཉིད་འཛིན་མེད་ཀུན་ཏུ་བཟང་མོའི་ཀློང་། །ཉོན་མོངས་དུག་ལྔ་ཡེ་ཤེས་རིགས་ལྔའི་གདངས། །ཞི་ཁྲོའི་རང་བཞིན་ཅན་དེ་ལྷུན་གྱིས་གྲུབ། །རྨོངས་པ་རྣམས་ཀྱིས་ཀུན་ཏུ་རྟོག་ཅེས་བཏགས། །བདེ་ཆེན་གནས་དེ་སྤོང་བའི་ཐབས་ལ་བརྩོན། །ཡེ་ཤེས་རྒྱ་མཚོ་ཉིད་ལས་འཕྲོས་པའི་རླབས། །ངོ་བོ་རྟེན་བྲལ་རང་བཞིན་སོ་སོར་གསལ། །ཐུགས་རྗེས་སེམས་ཅན་ཀུན་ལ་ཁྱབ་པའི་ཚུལ། །མཁས་པ་རྣམས་ཀྱིས་མཐོང་ནས་རབ་ཏུ་གྲོལ། །སྣ་ཚོགས་འཆར་གཞི་མ་འགགས་རིག་པའི་རྩལ། །ཡོན་ཏན་རང་བཞིན་ཅན་ཡང་སྐྱོན་ལྟར་སྣང་། །

ཀྱེ་མའོ། སྲིད་པའི་རང་བཞིན་ལོག་པའི་བློ། །རིགས་ཀྱི་ཉེ་བར་བཏགས་པས་བསླད་པར་ཟད། །རང་བཞིན་ཉིད་ལ་རྣམ་པར་འཕྲོས་པའི་སེམས། །གང་ལྟར་ཤར་ཡང་ཇི་ལྟར་མ་གྲུབ་པ། །ཤར་ཙམ་ཉིད་ནས་རང་ཤར་རང་སར་གྲོལ། །གཉེན་པོས་མ་བསླད་སྤང་བྱས་བསྒྱུར་དུ་མེད། །སོ་མ་གཉུག་མ་མ་བཅོས་རང་ཀ་མ། །རང་བཞིན་ལྷུག་པ་ཡེ་གྲོལ་ཆོས་ཉིད་ལ། །བཅིངས་དང་གྲོལ་མེད་ནམ་མཁའི་མདུད་པ་བཞིན། །སྤང་དང་འཁྲུལ་པའི་འབྱུང་ཁུངས་ཟད་པ་ཡིན། །ཆེད་འཛིན་གཉེར་ཁ་མ་བྱེད་ཡན་དུ་ཆུག །བཟང་ངན་བླང་དོར་ཐམས་ཅད་སྤྲོས་པའི་བློ། །དེ་ལ་ཆེད་འཛིན་ཞིག་ན་ཡེ་ཤེས་དངོས། །ཐད་ཀར་བསྒོམ་ཡང་ཅི་དགོས་གར་བདེར་(༡༩༢)ཐོངས། །གང་ལ་འཛིན་པ་ཡོད་ན་འཆིང་བྱེད་ཉིད། །གཉིས་འཛིན་རྟོག་པའི་གཟེབ་ཡིན་དགོས་པ་མེད། །དགག་སྒྲུབ་སྤང་བླང་མེད་པ་སྣ་ཚོགས་སེམས། །གང་ཤར་གང་ཡིན་ཡིན་གྱིས་རོལ་དུ་ཆུག །ཐམས་ཅད་འདི་ཡིན་མེད་ཀྱིས་གཉུག་མའི་སེམས། །སྣ་ཚོགས་འཆར་སྒོ་མ་འགག་གཞི་བྲལ་དང་། །ཡུལ་དང་དུས་མེད་སྣང་ལ་ངོས་བཟུང་བྲལ། །སྟོང་ལ་ཀུན་ཁྱབ་འཆར་ནུབ་རྙོག་བྲལ་བ། །དགེ་བའི་སེམས་ལ་འཛིན་པས་མ་བསླད་ཅིག །རང་འགྲོས་སེམས་དེ་ཡེ་ཤེས་ཁྱབ་གདལ་ལོ། །མི་མཁས་མི་དག་མཚན་མོའི་མུན་རུམ་ན། །ཅང་ཤེས་རྟ་དག་རང་འགྲོས་མི་བཏང་བར། །རང་གིས་བསྒྱུར་བས་ལམ་ནོར་སྡུག་བསྔལ་ཞིང་། །མཁས་པ་དག་གིས་དེ་ལས་བཟློག་པ་ཡིས། །འདོད་པའི་གནས་སུ་རང་གར་ཕྱིན་པ་བཞིན། །མི་མཁས་བྱིས་པ་དག་གིས་སེམས་བཟུང་སྟེ། །བསྐྱེད་ནས་མི་རྟོག་སྟོང་ཉིད་སྙིང་པོའི་བློས། །ལུས་བཅིངས་ངག་བསྡམས་སེམས་སྒྲིམས་མཉམ་པར་འཇོག །སྔགས་ཟློས་ལྷ་བསྐྱེད་ཁ་ལོ་བསྒྱུར་བ་ཡིས། །རྩལ་ཞིང་འབད་པ་དེ་སྲིད་ལམ་འཁྱམས་ཏེ། །འཁོར་བའི་གནས་ལས་གྲོལ་བའི་སྐབས་མེད་དོ། །མཁས་པ་དག་གིས་གང་ཤར་རིག་པའི་སེམས། །མ་གཟུང་མ་བསླད་མ་བསྒྱུར་རང་བབས་ངང་། །ཐ་མལ་ཤེས་པ་རང་གྲོལ་ཉིད་བཏང་བས། །རང་ཀའི་སེམས་ཏེ་ཅང་ཤེས་ཡེ་ཤེས་རྟ། །བདེ་ཆེན་གནས་སུ་འབད་མེད་ཕྱིན་པར་བྱེད། །ཀྱེ་མ་རྨོངས་པ་དག་ནི་སེམས་ཞུམ་སྟེ། །ཐ་མལ་ཤེས་པ་གཉེན་པོས་བཞུ་བཏུལ་བྱེད། །ཀྱི་ཧུད་དེ་ལྟར་འབད་པས་འཁོར་བར་འཆིང་། །སྡུག་བསྔལ་ཉིད་ལས་གྲོལ་བའི་སྐབས་མེད་དོ། །རང་བཞིན་དག་པའི་མཚོ་ལས་ཤར་བའི་རླབས། །དད་ཅིང་སྒྲུབ་མེད་རང་བཞིན་ཤེས་པས་གྲོལ། །གྲོགས་དག་ཚུར་ཉོན་ཤེས་རབ་རིག་པའི་མཚོན། །རང་གི་སེམས་ལ་འདི་ལྟར་བརྟག་འཚལ་ལོ། །སྣ་ཚོགས་འགྱུ་བ་རླུང་འདྲ་བརྟགས་ན་མེད། །མ་བརྟག་ལྟར་སྣང་འདི་ལ་སོམས་དང་ཀྱེ། །ད་ལྟ་གར་གནས་དང་པོ་གང་ནས་བྱུང་། །ཐ་མ་གར་འགྲོ་ཁ་དོག་དབྱིབས་འདུག་གམ། །བལྟས་པས་མཐོང་ངམ་འདི་ཞེས་ངོས་གཟུང་འདུག །ལེགས་པར་རྟོགས་དང་དྲན་བསམ་ཀུན་ལས་འདས། །གང་ལས་མ་བྱུང་གང་དུ་མ་སོང་ཞིང་། །གང་ནའང་མི་གནས་སྣ་ཚོགས་རིག་པའི་སེམས། །མ་བརྟག་སྣང་ཡང་སྣང་བའི་སེམས་འདུག་གམ། །རང་བཞིན་འདི་ཞེས་རི་མོར་བྱས་པའི་གཟུགས། །དགག་སྒྲུབ་ཡིན་ཞེས་སོ་སོར་བྲིས་འདུག་གམ། །དགག་སྒྲུབ་སེམས་དེ་ང་ཡིན་འདིར་ཡོད་ཅེས། །བརྗོད་མཁན་(༡༩༣)འདུག་གམ་རང་གིས་བཏགས་པ་སོམས། །རང་གི་བཏགས་པ་ཉིད་ལས་གཞན་མེད་དོ། །དེ་ལྟར་བཏགས་ཀྱང་བཏགས་པའི་དོན་དུ་མེད། །ཚ་བའི་མེ་ལ་བསིལ་བའི་ཆུར་བཏགས་ཀྱང་། །མེ་ཉིད་ཆུར་འགྱུར་མངོན་སུམ་སྲིད་དམ་ཅི། །བཏགས་པས་དོན་དེར་འགྱུར་བ་ག་ལ་ཡིན། །མ་བཏགས་དོན་ཞེས་དེ་ལས་ལོགས་ན་མེད། །བཏགས་དང་མ་བཏགས་ཐ་སྙད་རྨི་ལམ་འདྲ། །དེས་ན་དགག་སྒྲུབ་དགྲ་གཉེན་འཁོར་འདས་ཆོས། །བཏགས་པ་ཙམ་སྟེ་དོན་ལ་གྲུབ་པ་མེད། །མེད་ཅེས་བརྗོད་པའང་རང་གིས་བཏགས་པ་ཙམ། །བཏགས་པའི་དོན་ལ་འདི་ཞེས་ངོས་གཟུང་མེད། །དེས་ན་སྣ་ཚོགས་དགག་སྒྲུབ་ཅིར་ཤར་ཡང་། །དེ་ལྟར་སོམས་དང་དོན་ལ་གྲུབ་འདུག་གམ། །བཏགས་པའི་ཆོས་ལ་དོན་དུ་བཟུང་བས་འཁྲུལ། །འཁྲུལ་པའི་སེམས་དེ་རང་འགྲོས་བཏང་བས་གྲོལ། །གྲོལ་བའི་སེམས་གང་སྔོན་ནས་བཅིངས་པ་མེད། །མེད་པའི་ཆོས་ལ་སྤུ་རིས་སོ་སོར་འབྱེད། །འབྱེད་མཁན་འདུག་གམ་རིག་པའི་མཚོན་གྱིས་གཞིག །

ཀྱེ་ཧོ་འགྲོ་ཀུན་བཅིངས་དང་གྲོལ་བ་མེད། །གང་གིས་གང་བཅིངས་འཆིང་རྒྱུ་འདུག་གང་ཅི། །མ་བཅིངས་སེམས་དེ་གྲོལ་བ་རྡུལ་ཙམ་མེད། །འགྲོ་བ་དྲུག་ཅེས་བརྡ་ཙམ་བཏགས་པ་ཙམ། །གང་དུ་གང་འཁོར་འཁོར་མཁན་སོམས་དང་ཀྱེ། །འཁོར་བ་པོ་མེད་ངོས་གཟུང་དམིགས་སུ་མེད། །ཁ་དོག་དབྱིབས་བྲལ་སྐྱོན་ཡོན་གཟུང་འཛིན་འདས། །དེ་འདྲའི་སེམས་ལ་སྐྱེ་ཤི་འདུག་གམ་ཅི། །འཆི་མེད་སྐྱེ་ཤི་ཀུན་ལས་འདས་པའི་སེམས། །བར་དོའི་ཡུལ་ལ་འཇུག་པ་ག་ལ་འགྱུར། །མོ་གཤམ་བུ་དེ་སྐྱེ་ཤི་བར་དོར་འཇུག །སྣ་ཚོགས་སྡུག་བསྔལ་མྱོང་ཞེས་ལྟར་འདུག་གམ། །འོན་ཀྱང་མོ་གཤམ་བུ་ཞེས་མིང་ཙམ་བཏགས། །དེ་བཞིན་བསལ་བཞག་འགྲོ་འོང་མེད་པའི་སེམས། །མིང་ཙམ་ཉིད་ལས་ངོས་གཟུང་རྡུལ་ཙམ་མེད། །སྐྱེ་ཤིར་སྣང་བ་ཐ་སྙད་རྨི་ལམ་འདྲ། །ཇི་ལྟར་རྨི་ལམ་ནང་ན་བདག་ཉིད་ཤི། །དེ་ནས་བར་དོར་འཇུག་དང་སྐྱེར་སྣང་ཡང་། །རང་གི་མལ་ལས་ཅུང་ཟད་གཡོས་པ་མེད། །སྐྱེ་མེད་ཤི་མེད་བར་དོར་ཕྱིན་པ་མེད། །ཡེ་གྲོལ་ཆོས་ཉིད་ངང་ལས་གཡོས་པ་མེད། །ཐམས་ཅད་ནམ་མཁའ་འདྲ་བར་རྟོགས་པར་བྱ། །ཀྱེ་ཧོ་གྲོགས་དག་རང་གི་སེམས་ལ་ལྟོས། །གང་གིས་གང་བསྒོམ་སྒོམ་རྒྱུ་འདུག་གམ་ཅི། །བསྒོམ་པས་སེམས་དེ་གངས་རི་ལྟར་དཀར་ཞིང་། །མ་བསྒོམ་སོལ་བའི་མདོག་བཞིན་འགྲོར་འདུག་གམ། །རྟོགས་དང་རྟོག་མེད་བདེ་གསལ་(༡༩༤)བསྐྱེད་དང་རྫོགས། །གང་ཞིག་བསྒོམས་པས་སེམས་དེ་དེར་གྱུར་ན། །ཕྱིན་ཆད་གཞན་འབྱུང་རྟོག་ཚོགས་ཁེགས་སམ་ཅི། །ཅུང་ཟད་བསྒོམ་པས་ཐེགས་པ་ལྟར་སྣང་ཡང་། །འབད་པས་རྫིང་བུར་བསྐྱིལ་བའི་ཆུ་བཞིན་དུ། །ཀུན་རྟོག་སྤྲོས་པའི་ཆུ་ཀླུང་ཡུལ་ལ་འབབས། །སྣ་ཚོགས་རྟོག་པ་སྔོན་པས་རགས་པར་སྣང་། །དེ་བཞིན་འཁྲུལ་པའི་རྟོག་པ་གང་ཤར་བས། །སེམས་ནི་བསྒྱུར་ཞིང་ནག་པོར་འགྲོར་འདུག་གམ། །དེ་ལྟར་གྱུར་ན་མི་རྟོག་དགེ་བའི་སེམས། །འགྲོ་བ་རྣམས་ལ་སྐབས་འགའ་འབྱུང་མི་སྲིད། །དེས་ན་གང་ཤར་རྩིས་གདབ་མ་བྱེད་ཅིག །འཕྲོས་སམ་འགྱུས་ཀྱང་མི་དགར་དོན་ལ་མེད། །གནས་སམ་ཟིན་ཡང་དེ་ལ་དགར་ཅི་ཡོད། །རང་བཞིན་བབས་ཡིན་བཅོས་བསླད་མ་བྱེད་ཅིག །བདེ་བའི་སེམས་ལ་སྟོང་པའི་རྒྱས་གདབ་ཀྱང་། །འདོད་པའི་ཁམས་ལས་ཅུང་ཟད་མི་འདའ་ཞིང་། །གསལ་དང་མི་རྟོགས་གཟུགས་དང་གཟུགས་མེད་དོ། །ཆགས་པ་བཀག་ནས་སྟོང་པར་བསྒོམ་ཀྱང་སླའི། །བདེར་འགྲོའི་གནས་གསུམ་དག་ལས་འདའ་མི་ནུས། །ཆགས་ན་ངན་སོང་གནས་གསུམ་སོ་སོར་འཆིང་། །གང་ལྟར་བྱས་ཀྱང་སྲིད་ལས་གྲོལ་མི་ནུས། །གང་ལྟར་ཤར་ཡང་དེ་ལྟར་མི་འཛིན་ན། །སྲིད་པར་མི་གནས་མྱ་ངན་འདའ་མི་གནས། །རང་གྲོལ་མཉམ་པའི་ངང་དུ་མྱ་ངན་འདའ། །གྲོགས་དག་སོམས་དང་ཇི་ལྟར་བསྒོམས་ཀྱང་སླའི། །བསྒོམས་པའི་དོན་དེར་སེམས་དེ་ཡོད་དམ་མེད། །ཡོད་ན་གྲུབ་ཟིན་སྒོམ་ཡང་ཅི་ཞིག་དགོས། །མེད་ན་བསྒོམས་ཀྱང་དོན་མེད་ངལ་བའི་རྒྱུ། །བདེན་ཏེ་དོན་དེར་གསལ་འདེབས་ཡིན་ཞེ་ན། །མེད་ན་མི་གསལ་ཡོད་ན་དགོས་པ་མེད། །གང་ལྟར་བྱས་ཀྱང་བློ་ནི་གཉེན་པོའི་ཆོས། །དེ་ལ་འཁྲུལ་པའི་གཟེབ་ཡོད་འཆིང་བྱེད་ཡོད། །གང་དུའང་མི་གཟོ་རང་དགར་གཏང་ཤེས་ན། །སུས་ཀྱང་མི་འཆིང་སྲིད་ཞིའི་མཐའ་ལས་འདས། །ཇི་སྲིད་སྒོམ་ཡོད་ལྟ་དང་སྤྱོད་པ་ཡོད། །དེ་སྲིད་ཆོས་ཡོད་ཐེག་པའི་ཞེ་འདོད་ཡོད། །དེ་ལ་སྲིད་ཡོད་འཁོར་བའི་སྡུག་བསྔལ་ཡོད། །གང་ལ་ཆོས་མེད་ཐེག་པའི་ཞེ་འདོད་མེད། །དེ་ལ་སྲིད་མེད་སྲིད་པའི་སྡུག་བསྔལ་མེད། །ནམ་མཁའ་འདྲ་སྟེ་གང་གིས་གོས་པར་འགྱུར། །དེ་ལྟར་གཞི་དང་རྩ་བ་ལེགས་ཆོད་ནས། །ཉིན་དང་མཚན་མོ་ཅིར་སྣང་ཁྱད་པར་མེད། །དྲན་པའི་རྩིས་མེད་རྨི་ལམ་བཟུང་ཅི་དགོས། །སྤེལ་དང་བསྒྱུར་མེད་སྦྱང་རྒྱུ་ཅི་ཞིག་ཡོད། །ཇི་ལྟར་རྨི་ལམ་སྐྱེ་བོ་འགྲོ་དང་འདུག །འཆག་དང་ཉལ་དང་ཟ་དང་འབྱུང་བ་དང་། །(༡༩༥)དགའ་དང་མི་དགའ་སྣ་ཚོགས་ཅིར་སྣང་ཡང་། །རང་འགྲོས་ཉིད་ལས་དྲན་འཛིན་གཉེན་པོ་མེད། །རྨི་ལམ་འདི་ཡིན་རྨིས་པ་པོ་འདི་ཞེས། །གཉིས་སུ་མི་རྟོག་གཉིས་མེད་རྟོག་པ་མེད། །གང་ཤར་དོན་ལས་ལོགས་པའི་རྩིས་གདབ་མེད། །དེ་ཚེ་རྨི་ལམ་དགེ་སྡིག་ཅི་སྣང་ཡང་། །དེར་འཛིན་མེད་པས་ལས་མེད་རྣམ་སྨིན་མེད། །དེ་བཞིན་གཉིད་ཟད་ཉིན་དུས་སྣང་བ་ཡང་། །འདི་བཞིན་མི་འཛིན་རྨི་ལམ་སྐྱེས་བུ་བཞིན། །རང་བབས་ཉིད་ལས་གཉེན་པོས་མི་གཟོ་ན། །འཆིང་བའི་གཟེབ་མེད་ལས་འབྲས་རྣམ་སྨིན་མེད། །

ཀྱེ་ཧོ་གྲོགས་དག་དྲན་རིག་འགྱུ་བའི་སེམས། །བུ་ཆུང་བཞིན་ཏེ་རང་བབས་གང་དགའ་ཐོངས། །དྲན་བསམ་འཛིན་བྲལ་སྨྱོན་པའི་བརྟུལ་ཞུགས་ཅན། །གང་བབས་གང་བྱུང་ཐོག་བབས་ཆེན་པོར་ཐོངས། །རང་བབས་ལྷོད་ཆགས་རྒན་པོའི་ངང་ཚུལ་ཅན། །གཟེབ་བྲལ་ཁོང་ཡངས་གང་ཤར་རང་བབས་ཐོངས། །རྣལ་འབྱོར་ཆེན་པོའི་དགོངས་ཀློང་ཡངས་པ་ཡིན། །སྣ་ཚོགས་དྲན་རིག་ཐམས་ཅད་ཡེ་ཤེས་ངང་། །རང་ཤར་རང་གྲོལ་ཀུན་བཟང་ཆོས་ཀྱི་སྐུ། །ལྷུན་གྲུབ་ངང་ཡིན་ཡེ་ནས་གནས་པ་ཡིན། །དེ་ལྟར་ཀུན་བཟང་ཉིད་ལས་གཞན་པའི་ཆོས། །རྡུལ་ཙམ་མི་རྙེད་ཡེ་ནས་སངས་རྒྱས་ཡིན། །དེ་ལྟར་ཤེས་ཏེ་འཆིང་གྲོལ་ཀུན་ལས་འདས། །རང་བཞིན་གཞི་ཡི་དགོངས་ཀློང་ཡངས་པ་ཡིན། །

ཀྱེ་ཧོ་གྲོགས་དག་སྣ་ཚོགས་རིག་པའི་སེམས། །གང་དུ་ཤར་ཡང་དེར་འཛིན་མེད་པའི་ཚེ། །ཇི་ལྟར་སྣང་ཡང་གང་གིས་མི་གོས་པ། །མེ་ལོང་ངོས་ལ་ཤར་བའི་གཟུགས་བརྙན་འདྲ། །སེམས་ཉིད་ཡེ་ནས་དག་པའི་མེ་ལོང་ལ། །སྣ་ཚོགས་དགག་སྒྲུབ་གཟུགས་བརྙན་ཅི་ཤར་ཡང་། །དེ་ཡིས་མི་གོས་འཆར་གཞི་དགག་ཏུ་མེད། །རང་བཞིན་སྒྲུབ་མེད་རང་སྣང་བདེན་པས་སྟོང་། །ཇི་ལྟར་མེ་ལོང་མདུན་གྱི་གཟུགས་དེ་ཡང་། །འཆར་གཞིའི་རྒྱུ་བྱེད་མེ་ལོང་ནང་ཤར་ཡང་། །གཟུགས་དེ་མེ་ལོང་ངོས་ལ་འཕོས་པ་མེད། །དེ་བཞིན་སྣང་ལ་སྣང་ཡང་ངོས་གཟུང་མེད། །མེ་ལོང་གཟུགས་དེར་ཡེ་ནས་སྒྲུབ་པ་མེད། །དེ་བཞིན་ཡེ་ནས་དག་པའི་མེ་ལོང་འདི། །གང་དུ་མ་གྲུབ་གང་གིའང་འཆར་གཞི་བྱེད། །དགེ་སྡིག་དགག་སྒྲུབ་ཕྱི་རོལ་རྐྱེན་གྱི་གཟུགས། །སྣ་ཚོགས་སྣང་ཚེ་དེ་ཡི་གཟུགས་བརྙན་སེམས། །དགེ་སྡིག་དགག་སྒྲུབ་ལྟར་སྣང་ཡོད་མོད་ཀྱང་། །སེམས་ལ་དེ་མེད་ངོས་གཟུང་ཀུན་ལས་འདས། །འཛིན་མེད་དགེ་སྡིག་དགག་སྒྲུབ་ཅི་ཤར་ཡང་། །རང་བཞིན་དག་པའི་སེམས་ལ་གོས་པ་མེད། །སྣ་ཚོགས་སེམས་འདི་གང་དུའང་མ་(༡༩༦)གྲུབ་པས། །གང་དུའང་སྣང་བའི་འཆར་གཞི་མེ་ལོང་འདྲ། །གཅིག་ཉིད་ཡིན་ན་དུ་མའི་འཆར་གཞིར་འགལ། །དུ་མར་མ་ངེས་ངོས་གཟུང་ཅུང་ཟད་མེད། །དེ་ཕྱིར་སེམས་ལ་དགེ་སྡིག་དགག་སྒྲུབ་མེད། །ཕྱི་རོལ་རྐྱེན་གྱིས་སྣ་ཚོགས་སོ་སོར་སྣང་། །རྐྱེན་ལ་མ་གཟུང་དེ་ཡིས་གོས་པ་མེད། །བཟུང་ན་འཆིང་ལ་མ་བཟུང་རང་སར་གྲོལ། །སྣ་ཚོགས་ཤར་ཡང་གང་གིས་མ་གོས་པ། །དྲི་མེད་སེམས་ཉིད་དག་པའི་མེ་ལོང་འདྲ། །དེ་བཞིན་སྒྱུ་མ་སྨིག་རྒྱུ་ཆུ་ཟླ་དང་། །རང་བཞིན་སྤྲུལ་པ་ལྟ་བུར་སྣང་བའི་སེམས། །གཞི་མེད་རྟེན་བྲལ་སྣང་ལ་ངོས་གཟུང་མེད། །རང་བཞིན་གདོད་ནས་དག་པར་ཤེས་པར་གྱིས། །གང་གིས་མ་བཟུང་བཅོས་བསླད་མེད་པའི་སེམས། །རང་བཞིན་ཉིད་དེ་གང་བབས་རང་དགའི་ངང་། །སྲིད་འབྱུང་སྒྱུ་མར་རྣམ་སྦྱོང་ཡེ་ཤེས་དངོས། །ཐུགས་རྗེའི་རང་བཞིན་ཡང་ནས་ཡང་ཤར་བ། །བདེ་གཤེགས་སྙིང་པོས་འགྲོ་ཀུན་ཡོངས་ཁྱབ་པའོ། །མི་ཤེས་བྱིས་པ་དག་གིས་དེ་བསླད་དེ། །སྲིད་པའི་ནགས་ཁྲོད་འཐུག་པོར་རང་ཉིད་འཆིང་། །ལས་དང་ཡོན་མོངས་སྡུག་བསྔལ་དགྲས་གཙེས་ཤིང་། །ཡན་ལག་བཅུ་གཉིས་རྣམ་འགྲོས་ལུགས་སུ་འཇུག །རང་བཞིན་ཤེས་པ་དག་གིས་འདི་རིག་ན། །འཁོར་བའི་འབྲོག་དགོན་དག་ནི་རབ་བརྒལ་ཞིང་། །མ་རིག་ལ་སོགས་ལུགས་ལས་ལྡོག་པའི་ཆོས། །རང་བཞིན་དེ་རིག་ཤེས་རབ་ཕ་རོལ་ཕྱིན། །བྱང་ཆུབ་སྙིང་པོའི་སེམས་དེ་ཁྱབ་གདལ་བ། །གཞི་མེད་རྟེན་བྲལ་རང་གྲོལ་ཆོས་ཀྱི་སྐུ། །གང་ལྟར་ཤར་ཡང་སྣ་ཚོགས་རིག་པའི་སེམས། །ཤེས་རབ་རྟོགས་པའི་མེ་ལོང་ངོས་ཤར་བའི། །གཟུགས་བརྙན་གསལ་བ་འགྲོ་ཀུན་སྙིང་ལ་གནས། །གང་ཤར་བློ་རྣམས་རང་གྲོལ་སྐད་ཅིག་མ། །ཞེན་འཛིན་འཁྲུལ་པར་སྣང་ཡང་དགག་ཅི་དགོས། །སྟོན་ཀའི་མཁའ་ལ་དྲི་མེད་འོད་སྟོང་ལྡན། །ཆུ་སྐྱེས་པདྨོའི་སྦུབས་སུ་འོངས་པ་བཞིན། །རྟོགས་པའི་ཉི་མ་ནང་ནས་ཤར་བའི་གཟུགས། །ཐེ་ཚོམ་མུན་པ་མ་ལུས་ཀུན་བཅོམ་ཞིང་། །མཐའ་བྲལ་བློ་ཡི་པད་ཁ་རབ་རྒྱས་ཏེ། །བདེ་ཆེན་འོད་ཀྱི་སྣང་བས་འཇིག་རྟེན་ཁྱབ། །ད་ནི་སྲིད་པའི་གྲོང་ལས་འདས་པ་སྙམ། །འདི་ལྟར་རྟོགས་ནས་སུ་ལའང་དྲི་རྒྱུ་མེད། །སྐྱིད་པའི་ཉི་མ་ནང་ནས་ཤར་བའི་མཐུས། །དེ་རིང་བདག་བློ་དགའ་བའི་དཔལ་འདི་རྒྱས། །

ཀྱེ་ཧོ་གྲོགས་དག་རང་བཞིན་སྙིང་པོའི་སེམས། །སྣ་ཚོགས་ཤར་ཡང་དེ་ཡིན་དགག་སྒྲུབ་མེད། །ཆེད་དུ་མ་འཛིན་ཡེ་ནས་རང་བཞིན་གྲོལ། །འབད་པས་མ་ཡིན་རྩོལ་མེད་བློ་བདེ་བའོ། །(༡༩༧)གང་དགར་འཁྲོལ་བས་རང་བཞིན་རིགས་ལྔའི་གདངས། །ཡེ་ཤེས་ཆེན་པོ་ཡེ་ནས་རང་ཤར་བ། །མི་རྟོག་དྲན་བསམ་བྲལ་བའི་སེམས་ཉིད་ནི། །རྣམ་སྣང་ཆོས་དབྱིངས་ཡེ་ཤེས་བདེ་གཤེགས་རིགས། །སྣ་ཚོགས་འཆར་གཞི་མ་འགགས་རང་ཤར་བ། །མི་བསྐྱོད་མེ་ལོང་ཡེ་ཤེས་རྡོ་རྗེའི་རིགས། །གང་ལ་གཉིས་མེད་མཉམ་པའི་རང་བཞིན་སེམས། །རིན་འབྱུང་མཉམ་ཉིད་ཡེ་ཤེས་རིན་ཆེན་རིགས། །སྣ་ཚོགས་གང་ཤར་མ་འདྲེས་སོ་སོར་འབྱེད། །འོད་དཔག་སོར་རྟོགས་ཡེ་ཤེས་པདྨའི་རིགས། །སྣ་ཚོགས་གང་བསམ་དོན་འགྲུབ་རིག་པའི་སེམས། །དོན་ཡོད་བྱ་གྲུབ་ཡེ་ཤེས་ལས་ཀྱི་རིགས། །འཕྲོས་སམ་འགྱུས་སམ་གནས་པའི་དྲན་རིག་སེམས། །གང་ལྟར་ཤར་ཡང་ཡེ་ཤེས་རིགས་ལྔའི་གདངས། །ཇི་ལྟར་སྣང་ཡང་དགག་སྒྲུབ་བྱ་ཅི་དགོས། །སྐྱེ་མེད་ལྷུན་རྫོགས་ཡེ་གྲོལ་ཆོས་ཉིད་ལ། །མ་བཅོས་རྒྱལ་པོ་རང་བབས་ལྷུན་འབྱམས་ཤིང་། །ཐོག་བབས་རང་ཤར་ལྷུན་གྲུབ་ཆེན་པོའི་གདངས། །རང་བཞིན་རྫོགས་ཆེན་ནམ་ཞིག་སུས་མཐོང་བ། །སྐྱེ་མེད་ལྷུན་རྫོགས་ནམ་མཁའི་ངང་དུ་གྲོལ། །གཞི་དང་སྙིང་པོ་ཀུན་གྱི་བཅུད་ཕྱུང་བ། །དག་པའི་ནམ་མཁར་ཤར་བའི་ཉི་མའི་གཟུགས། །སྣ་ཚོགས་དྲན་རིག་ཀུན་བཟང་ཀློང་དུ་ཤར། །མི་ནུབ་འོད་ཀྱི་སྣང་བས་འཇིག་རྟེན་ཁྱབ། །འདི་ལྟར་རྟོགས་ན་གང་སྣང་འོག་མིན་གནས། །སུ་དང་འགྲོགས་ཀྱང་རང་བཞིན་རྡོ་རྗེའི་སྤུན། །ཇི་ལྟར་འགྱུས་ཀྱང་ཏིང་འཛིན་ཡངས་པའི་ཀློང་། །གདོད་མའི་གནས་སུ་མངོན་པར་བྱང་ཆུབ་ཡིན། །སྐལ་བཟང་སྐྱེ་བོ་མཆོག་སྟེ་རིག་འཛིན་ཆེ། །སྐུ་དང་ཡེ་ཤེས་འདུ་འབྲལ་མེད་པ་ཡིས། །འོག་མིན་གནས་སུ་མངོན་པར་བྱང་ཆུབ་སྟེ། །ཐུགས་རྗེའི་མཛད་པས་སྲིད་པའི་སེམས་ཅན་ལ། །བླ་མེད་ཆོས་ཀྱི་དགའ་སྟོན་འགྱེད་པ་ཡིན། །དེ་ལྟར་སྒོམ་མེད་ཡེ་ཤེས་རྡོ་རྗེའི་གླུ། །ནམ་མཁའ་རབ་འབྱམས་དང་དུ་བླངས་པ་འདིས། །འགྲོ་ཀུན་རང་བཞིན་རྫོགས་པ་ཆེན་པོའི་གནས། །གཉིས་མེད་མཉམ་པའི་ངང་དུ་གྲོལ་བར་ཤོག །བདག་བློའི་ཡིད་ཀྱི་ནམ་མཁའ་ཡངས་པ་ལ། །རྟོགས་པའི་འོད་སྟོང་དྲ་བ་འགྱེད་པ་ཡིས། །ཕྱི་ནང་ཡིད་མཁའི་མུན་པ་ཀུན་བསལ་ཏེ། །སྐལ་ལྡན་བློ་ཡི་པདྨོ་རྒྱས་པར་ཤོག །ཚིག་ཙམ་མ་ཡིན་རང་བཞིན་རྟོགས་པའི་དོན། །ཕྱི་རབས་རྣལ་འབྱོར་རྣམས་ཀྱི་དོན་དུ་བཀོད། །འབད་མེད་རང་སར་གྲོལ་བའི་ཡི་གེ་འདིས། །འགྲོ་བའི་དོན་ཀུན་ལྷུན་གྱིས་གྲུབ་པར་ཤོག །

ཁྲེགས་ཆོད་ཀྱི་ཡི་གེ་ཆེན་པོ་ནམ་མཁའ་རབ་འབྱམས་ཞེས་(༡༩༨)བྱ་བ། རིག་འཛིན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་ཐུགས་ཀྱི་འོད་ཟེར་ཀུན་ནས་ཕོག་པའི་ཕྲིན་ལས་ཀྱིས་རང་བཞིན་གཞིར་རྫོགས་ཀྱི་རྣལ་འབྱོར་པ་ཀློང་ཆེན་རབ་འབྱམས་ཀྱིས། རང་གིས་རྟོགས་པའི་དོན་ཇི་ལྟ་བར་སྐལ་བཟང་གི་སློབ་མ་དེ་ཁོ་ན་ཉིད་ཀྱི་དོན་མཐོང་བ་འགའི་རྟོགས་པ་ཐག་གཅད་པའི་ཕྱིར། ལྷུན་གྲུབ་པདྨ་དཀར་པོའི་གནས་སུ་བཀོད་པ་རྫོགས་སོ།། །།

དགེའོ།། །།

ནམ་མཁའ་ཀློང་ཡངས་ཞེས་བྱ་བ།

༄༅། །ནམ་མཁའ་ཀློང་ཡངས་ཞེས་བྱ་བ་བཞུགས་སོ། །རིན་ཆེན་ཤོག་སྐྱའི་སྐོར།

༄༅། །ནམ་མཁའ་ཀློང་ཡངས་ཞེས་བྱ་བ། རང་བཞིན་གདོད་མའི་མགོན་པོ་ལ་ཕྱག་འཚལ་ལོ། །ཡེ་ནས་མ་བཅོས་གཞི་རྫོགས་གཉུག་མའི་ངང་། །བལྟར་མེད་བསམ་ཡུལ་འདས་པའི་རིག་པ་ནི། །གང་ལྟར་སྣང་ཡང་དེ་ལྟར་མ་གྲུབ་པ། །རང་ཤར་རང་སར་གྲོལ་ལ་ཕྱག་འཚལ་ལོ། །འདིར་ནི་སྐྱེ་མེད་ལྷུན་རྫོགས་སྙིང་པོའི་དོན། །རང་བཞིན་བྱས་པ་མེད་པའི་ཆོས་ཉིད་ལ། །སུས་ཀྱང་བཅོས་སུ་མེད་པ་རྣལ་མའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །དུས་གསུམ་འཕོ་འགྱུར་མེད་པའི་སེམས་ཉིད་འདི། །རང་བཞིན་གདོད་ནས་སྟོང་པའི་ཆོས་སྐུ་སྟེ། །འདི་ཞེས་མི་མཚོན་ལྟ་བའི་རྒྱལ་པོ་མཆོག །རྩ་བྲལ་སྟོང་པ་ལེགས་པར་མཁྱེན་པར་མཛོད། །གང་གིས་མ་སྒྲིབ་གཉིས་མེད་རིག་པའི་སེམས། །རང་ཤར་ཡེ་ནས་དག་པའི་འོད་གསལ་ཏེ། །གང་བབས་ངང་བཞག་སྒོམ་པའི་རྒྱལ་པོ་མཆོག །དྲན་བསམ་བློ་ལས་འདས་པར་མཁྱེན་པར་མཛོད། །གཉིས་མེད་བླང་དོར་བྲལ་བའི་རིག་པ་འདི། །ཤར་གྲོལ་འཛིན་མེད་ཡངས་པའི་སྤྲུལ་སྐུ་སྟེ། །ཤུགས་འབྱུང་འགག་མེད་སྤྱོད་པའི་རྒྱལ་པོ་མཆོག །ཅིར་སྣང་དགག་སྒྲུབ་མེད་པར་མཁྱེན་པར་མཛོད། །རེ་དོགས་འབད་རྩོལ་ཞིག་པའི་སེམས་ཉིད་འདི། །མ་བྱས་ལྷུན་གྱིས་གྲུབ་པའི་ཆོས་ཉིད་དེ། །ཡེ་གྲོལ་ཕྱམ་བརྡལ་འབྲས་བུའི་རྒྱལ་པོ་མཆོག །གདོད་མའི་ཟད་སར་ལེགས་པར་མཁྱེན་པར་མཛོད། །སྣང་སེམས་ཐམས་ཅད་རིག་པའི་ཆོ་འཕྲུལ་ཏེ། །རིག་པའི་རང་བཞིན་སྐྱེ་མེད་ནམ་མཁའི་ངང་། །གཉིས་འཛིན་འཁྲུལ་པའི་བྱུང་ཁུངས་ཟད་པ་ཡིན། །དེ་ལྟར་རྟོགས་ན་གཞི་བྲལ་ཆོས་སྐུ་སྟེ། །འདི་ཞེས་ཆེད་འཛིན་ཞིག་ན་མཐོང་བ་ཡིན། །ཧ་ཧ་གྲོགས་དག་གང་བབས་རིག་པའི་གནད། །གང་ཡིན་ཡིན་གྱིས་སེམས་ཀྱི་ཚོལ་འཕྲོ་ཞོག །འདི་ཡིན་མེད་ཀྱིས་དམིགས་གཏད་ཞེན་པ་ཐོང་། །ཡིན་མིན་མེད་ཀྱིས་ཕྱོགས་ལྷུང་འཛིན་པ་དོར། །གཟའ་གཏད་མེད་ཀྱིས་དགག་སྒྲུབ་འཕྲོ་(༡༩༩)མ་འཐུད། །ཀྱེ་ཧོ་ཕྱམ་ཅིག་ཆོས་སྐུའི་དོན་ལ་ཉོན། །ནན་ལྟར་བྱས་ན་དགག་སྒྲུབ་གཞི་གནས་མེད། །གཟུང་བའི་ཡུལ་མེད་འཛིན་པའི་སེམས་མེད་དེ། །བྱ་རྒྱུའི་ཆོས་མེད་ལྟ་སྒོམ་སྤྱོད་འབྲས་མེད། །ཐམས་ཅད་ཕྱམ་ཅིག་ཡེ་ནས་བྱང་ཆུབ་བོ། །ཧོ་ཧོ་འཁོར་འདས་སྒྱུ་མའི་རྩེད་མོ་ལ། །དོན་མེད་བདེན་པར་གཟུང་བས་འགྲོ་བ་འཁྲུལ། །སྨིག་རྒྱུའི་ཆུ་ལ་རི་དྭགས་སྙེགས་པ་བཞིན། །ནམ་ཡང་དངོས་པོ་མེད་པའི་ཆོས་ཀྱིས་བསླུས། །མེད་སྣང་འཁྲུལ་པས་བཅིངས་པའི་འགྲོ་བ་ཀུན། །གྲོང་ཁྱེར་དྲུག་ཏུ་ཡུན་རིང་འཁྱམས་པ་ནི། །སྒྱུ་མའི་སྐྱེས་བུ་ནམ་མཁའི་ཞགས་པས་བཟུང་། །རྨི་ལམ་གྲོང་དུ་བདེ་སྡུག་མྱོང་བ་བཞིན། །མེད་བཞིན་སྣང་ལ་འཛིན་པས་སྡུག་བསྔལ་ལོ། །ཀྱེ་མ་དུས་རིང་འཁོར་བའི་གྲོང་ཁྱེར་ན། །འགྲོ་དྲུག་འཁྲུལ་པའི་སེམས་ཅན་ཉོན་རེ་མོངས། །ཐོག་མཐའ་དུས་མེད་སེམས་ཅན་སྙིང་རེ་རྗེ། །རང་སྣང་འཁྲུལ་པའི་སྣང་བ་སྤང་རེ་དཀའ། །བཟོད་དཀའི་བག་ཆགས་སྣ་ཚོགས་སྙུགས་རེ་རིང་། །ཐར་དཀའ་སྲིད་པའི་རྒྱ་མཚོ་ནམ་ཞིག་བརྒལ། །འོན་ཀྱང་བདེ་གཤེགས་ཐུགས་རྗེའི་འོད་ཟེར་གྱིས། །སྲིད་པའི་ཆུ་གཏེར་སྒྲོལ་ལ་ཐག་མི་རིང་། །ཧེ་ཧེ་དེ་ཀུན་མདང་སུམ་རྨི་ལམ་འདྲ། །མེད་སྣང་འཁྲུལ་པའི་རང་བཞིན་རྟོགས་པས་གྲོལ། །རང་སྣང་ཡིན་པས་ལོགས་སུ་སྤངས་མི་དགོས། །སྦྲུལ་འཁྲུལ་ཐག་པ་རང་བཞིན་ཤེས་པས་གྲོལ། །སྒྱུ་མའི་རང་བཞིན་མཐོང་བས་བློ་བདེའོ། །ཧ་ཧ་གྲོགས་དག་ཆོས་ཉིད་ཕྱམ་བརྡལ་ལོ། །བྱ་རྒྱུ་བྱེད་མཁན་མེད་པའི་སེམས་ཉིད་ལ། །འཁྲུལ་གཞི་འཁྲུལ་མཁན་མེད་པས་ཉམས་རེ་དགའ། །འཁོར་བའི་རང་བཞིན་གཞི་ནས་མེད་པ་སྟེ། །རགས་པར་སྣང་བ་གཞིག་ན་རྡུལ་ཕྲན་ལ། །དེ་ཡང་ཆ་མེད་དངོས་པོར་ཡེ་ནས་མེད། །འཁོར་བྱ་འཁོར་བྱེད་འཁོར་བའི་རང་བཞིན་སྟོང་། །མེད་སྣང་འཁྲུལ་པའི་སེམས་ལ་བལྟས་པས་ཀྱང་། །ཁ་དོག་དབྱིབས་མེད་དུས་གསུམ་ཕྱི་ནང་མེད། །སེམས་ཞེས་བཏགས་ཀྱང་འདོགས་མཁན་བལྟས་པས་སྟོང་། །བཙལ་བས་མ་རྙེད་དངོས་མེད་ནམ་མཁའ་འདྲ། །གཟུང་འཛིན་སྒྲིབ་པ་གཞི་བྲལ་གང་ལ་བརྟེན། །ལས་དང་བག་ཆགས་རྩ་བ་སྟོང་པས་ན། །དེ་ལ་འཁོར་ས་འཁོར་མཁན་སོམས་དང་ཀྱེ། །དེ་ལྟར་གཞིག་ཅིང་ལེགས་པར་དཔྱད་པའི་ཚེ། །མྱ་ངན་མེད་པས་མྱ་ངན་འདས་པའང་མེད། །དེ་ལྟར་འཁོར་འདས་གཞི་ནས་མེད་པ་ལ། །བླང་དོར་གཉིས་འཛིན་རེ་དོགས་སྐྱེ་བོ་འཁྲུལ། །མ་བཀྲོལ་གཞི་ནས་གྲོལ་(༢༠༠)བའི་ཆོས་ཉིད་ལ། །འབད་ཅིང་རྩོལ་བའི་འགྲོ་བ་ཐང་རེ་ཆད། །དེ་ཉིད་རྟོགས་པའི་དོན་ལ་སྒོམ་མེད་པར། །ལྟ་སྒོམ་སྤྱོད་པའི་ཉམས་ཀྱིས་རྣལ་འབྱོར་འཆིང་། །ཇི་ཙམ་འབད་པ་དེ་ཙམ་སྒྲིབ་པ་སྟེ། །གནས་ལུགས་འཆིང་བའི་གཟེབ་ཡིན་དགོས་པ་མེད། །རེ་དོགས་ཆེད་འཛིན་ཞིག་ན་གཉུག་མའི་དོན། །གང་ཤར་རྟོགས་པའི་གྲོགས་ཡིན་ངོ་མཚར་ཆེ། །གྲོགས་དག་གནད་ཀྱི་མེ་ལོང་བསྟན་གྱིས་ལྟོས། །སྒོམ་མེད་དོན་དེ་བསྒོམས་པས་མཐོང་མི་འགྱུར། །དཔྱད་པས་མི་ཤེས་རྟོག་པའི་གཟེབ་ལས་འདས། །སྒོམ་མེད་བསྒོམས་ན་སྒོམ་པའི་གཟེབ་ཏུ་འཆིང་། །གོམས་པས་ཕྱིན་ན་འགྲོ་འོང་མི་འཆད་བཞིན། །མ་བསྒོམས་ལྷུག་པ་ཐ་མལ་སེམས་ལ་འཆར། །རང་སར་བསྡད་ན་འགྲོ་འོང་མེད་པ་བཞིན། །དཔྱད་ཀྱང་མི་མཐོང་རྟོག་པའི་འཕྲོ་འདུ་ཉིད། །ཞེན་པའི་ཕྲེང་ཐག་ཡིན་པས་དགོས་པ་མེད། །གནས་ལུགས་དོན་ལ་སེམས་ཀྱི་དྲན་བསམ་ཞོག །མ་བསམ་མ་དཔྱད་ཐ་མལ་རིག་པའི་གནད། །འགྱུས་པས་འགགས་ལ་སྣང་བས་རང་སར་གྲོལ། །དྲན་འཛིན་གཉེན་པོ་མི་དགོས་རང་གྲོལ་ཡིན། །ཆགས་སྡང་ལ་སོགས་རྟོག་ཚོགས་སྔ་མ་རྣམས། །བལྟས་དང་གློད་པས་རང་གྲོལ་ཡིན་སྙམ་ཡང་། །ཕྱི་མའི་ཚེ་ན་སྔ་མ་འགགས་པ་ནི། །གཤིས་ཀྱི་གནས་ལུགས་ཡིན་པ་མི་ཤེས་སམ། །རྟོག་པ་སྔ་ཕྱི་དུས་གཅིག་མི་སྡོད་པས། །སྔ་མ་འགག་ཕྱིར་བསྒོམས་པ་དོན་མེད་ངལ། །ཕྱི་མའི་སེམས་ཀྱང་རྟོག་ལས་མ་འདས་པས། །རྟོག་ལ་རྟོག་མཐུད་ཐག་རུལ་འབྲེང་རུལ་འདྲ། །སེམས་རྒྱུན་སྔ་ཕྱི་དུས་གཅིག་གཉིས་མི་སྲིད། །ཕྱི་མའི་དུས་ན་སྔ་མ་འགགས་ནས་མེད། །དེ་བས་སྔ་མའི་རྟོག་ཚོགས་གྲོལ་བྱའི་ཕྱིར། །ཕྱི་མའི་སེམས་ཀྱིས་གྲོལ་ཀྱང་རང་གྲོལ་མིན། །སྔ་ཕྱི་ཡིན་ཕྱིར་གཞན་གྲོལ་ཤེས་པ་ལ། །རང་གྲོལ་ཉིད་ཞེས་འཛིན་པ་བླུན་པོའི་བློ། །བ་གླང་སྐྱོང་ཞེས་ལོགས་ན་ཅི་ཞིག་ཡོད། །གཞན་ཡང་སྔ་མའི་སེམས་ལ་ཕྱི་མས་བལྟ། །རྟོག་པའི་འཕྲོ་འཐུད་ཡིན་པས་ལུ་གུ་རྒྱུད། །མི་གཡོ་བསམ་གཏན་མཆོག་ལས་རྒྱང་རིང་འགྱུར། །ཞི་གནས་ལྷག་མཐོང་ཟུང་འཇུག་མཉམ་གཞག་ཀྱང་། །རྟོག་པའི་འཕྲོ་གནས་མཉམ་སྦྱོར་གནས་པ་ཙམ། །གཞི་བྲལ་དོན་གྱི་རྟོགས་པ་མ་སྐྱེས་ན། །གོང་མའི་སྐྱེ་གནས་ཉིད་ལས་འདའ་མི་ནུས། །རྟོག་པ་འགག་ཕྱིར་སྒོམ་པའང་གནས་ལུགས་མིན། །བཀག་པས་མི་ཁེགས་སྔོན་པས་རགས་པར་འཆར། །རྫིང་བུའི་ཆུ་བཞིན་ནམ་ཞིག་ཉོན་མོངས་གྲོགས། །ཆོས་ཀུན་ཡེ་ནས་རང་བཞིན་(༢༠༡)མཉམ་པ་ཉིད། །འདི་ཞེས་མི་མཚོན་གཟའ་གཏད་མེད་པ་ལ། །བློ་ཡིས་བཅོས་ཤིང་བསྒྱུར་བས་བསླད་པ་ཡིན། །གང་ལྟར་ཤར་ཡང་དེ་ལྟར་མ་གྲུབ་པས། །སྣ་ཚོགས་ཤར་ཡང་རང་གྲོལ་གཉུག་མའི་ངང་། །ཆུ་དང་རླབས་བཞིན་ཡེ་ཤེས་རྒྱ་མཚོའི་ངང་། །རྟོག་མེད་གནས་ཀྱང་མ་བཅོས་ཆོས་ཉིད་ངང་། །རེས་ཤར་རེས་འགག་གཞི་ཀློང་ཡངས་པའི་ངང་། །དགག་སྒྲུབ་མི་དགོས་རང་ཤར་གདོད་མའི་ངང་། །མི་འགྱུར་གཞི་ཡི་དགོངས་ཀློང་ཡངས་པ་ཡིན། །སྣ་ཚོགས་ཆོས་རྣམས་སྒྱུ་མར་མཐོང་བ་དང་། །འཛིན་པའི་སེམས་ལ་དགག་སྒྲུབ་ཞིག་པ་དང་། །འདི་ཡིན་གཟའ་གཏད་རྡུལ་ཙམ་མེད་པའི་ཚེ། །ཕྱི་ནང་ཆོས་རྣམས་སྟོང་པར་རྟོགས་པ་ཡིན། །གང་ཤར་ཆོས་ལ་ཅི་དགར་རོལ་པས་ཆོག །མཁའ་ལ་རྫས་བཞིན་ཀུན་ཀྱིས་གོས་པ་མེད། །ཟས་ནོར་རྙེད་ཀུན་ཞེན་པ་མེད་པ་དང་། །བསྟོད་སྨད་སྒྲ་རྣམས་བྲག་ཆར་རྟོགས་པ་དང་། །དགྲ་གཉེན་ཆགས་སྡང་གཉིས་འཛིན་མེད་པའི་ཚེ། །དགག་སྒྲུབ་འཁྲུལ་པའི་རི་བོ་ཞིག་པ་ཡིན། །སྣང་སྲིད་གང་དགའི་ངོས་ལ་དེ་ལྟར་ཐོངས། །སྦྲུལ་མདུད་བཞིན་དེ་རང་སར་རང་གིས་གྲོལ། །ཀུན་ལས་བདག་ཉིད་དམན་པར་མཐོང་བ་དང་། །སྙིང་ནས་མི་རྟག་བློ་སྣ་ཐུང་བ་དང་། །འཁོར་བའི་ཆོས་ལ་ངེས་འབྱུང་སྐྱེས་པའི་ཚེ། །ཆོས་ཀྱིས་སེམས་ལ་ལེགས་པར་ཕན་པ་ཡིན། །ཚུལ་འཆོས་མི་དགོས་སྤྱོད་ལམ་རྣལ་མར་བྱ། །དབང་པོའི་གཙོ་བོ་རང་སེམས་གྲོལ་མེད་ཡིན། །སྣ་ཚོགས་མཛད་སྤྱོད་དགོངས་པར་ཤེས་པ་དང་། །སྙིང་ནས་མོས་གུས་རྒྱུན་ཆད་མེད་པ་དང་། །རྟོགས་པའི་རྟེན་འབྲེལ་སེམས་ལ་འཆར་བ་དང་། །བྱམས་དང་སྙིང་རྗེ་ཕྱོགས་རིས་མེད་པ་དང་། །ཆོས་མཛད་རྣམས་ལ་དག་སྣང་སྐྱེས་པའི་ཚེ། །བླ་མའི་བྱིན་རླབས་སྙིང་ལ་ཞུགས་པ་ཡིན། །རང་སྣང་དག་པས་གཞན་དོན་ངང་གིས་འགྲུབ། །དངོས་གྲུབ་སྤྲིན་ཚོགས་ནམ་མཁའི་མཐའ་དང་མཉམ། །འཁོར་འདས་དགག་སྒྲུབ་རེ་དོགས་ཞིག་པ་དང་། །བདེ་སྡུག་རྐྱེན་ངན་ལམ་དུ་ལོངས་པ་དང་། །ཐེ་ཚོམ་ཁུ་འཕྲིག་སྙེམས་ཐག་ཆོད་པའི་ཚེ། །རྟོགས་པའི་ཉི་མ་ནང་ནས་ཤར་བ་ཡིན། །གང་སྣང་དངོས་ལ་གཟའ་གཏད་ཀུན་བྲལ་བས། །ཟང་ཐལ་རིག་པ་ཐོག་བབས་བཏང་བས་ཆོག །གང་ཡང་བདེ་ཀློང་གཅིག་ཏུ་འཁྱིལ་པ་ཡིན། །

ཀྱེ་ཧོ་གྲོགས་དག་བདག་དང་འགྲོ་བ་ཀུན། །ཡེ་ནས་མ་སྐྱེས་རྨི་ལམ་སྒྱུ་མ་ལ། །སྣང་ཞིང་སྲིད་པ་ཐམས་ཅད་ཆོས་ཉིད་ངང་། །རྟོག་དང་མི་རྟོག་ཡེ་ནས་མཉམ་པ་ཉིད། །དག་དང་མ་དག་དེ་བཞིན་གཉིས་སུ་མེད། །སྒྱུ་མའི་གྲོང་ན་བདེ་(༢༠༢)སྡུག་སྣང་བ་བཞིན། །མེད་སྣང་འགྲོ་བ་དྲུག་ཅེས་བཏགས་པ་ཙམ། །སྣ་ཚོགས་སྣང་ཡང་ཡེ་ནས་དག་པའི་ཞིང་། །མངོན་པར་བྱང་ཆུབ་གཞི་ཀློང་ཡངས་པ་ཡིན། །དབའ་རླབས་རི་བོ་འདྲ་བ་རྒྱ་མཚོའི་ངང་། །དྲན་རིག་བདེ་སྡུག་སྣ་ཚོགས་སེམས་ཉིད་ངང་། །སེམས་ཉིད་ནམ་མཁའ་འདྲ་བ་ཆོས་ཉིད་ངང་། །ཆོས་ཉིད་ཡེ་ནས་མ་སྐྱེས་སྟོང་པའི་ངང་། །སྟོང་པ་ཕྱམ་བརྡལ་གཞི་རྫོགས་སྙིང་པོའོ། །

ཀྱེ་ཧོ་ལྷུན་རྫོགས་མཉམ་ཉིད་གདོད་མའི་ངང་། །སྐྱེ་མེད་མཁའ་ཀློང་ཡངས་པའི་ནམ་མཁའ་ལ། །ཉི་ཟླ་གཟའ་སྐར་སྤྲིན་ཚོགས་གྲངས་མེད་ཀྱང་། །ནམ་མཁའི་རང་བཞིན་མི་གཡོ་སྤྲོས་དང་བྲལ། །དེ་བཞིན་སེམས་ཉིད་ཡངས་པའི་ནམ་མཁའ་ལ། །རྟོགས་དང་མི་རྟོག་སྣང་སྲིད་ཅིར་ཤར་ཡང་། །ཐམས་ཅད་མ་སྐྱེས་རང་བཞིན་སྤྲོས་དང་བྲལ། །འདི་ཞེས་མི་མཚོན་ངོས་གཟུང་ཅུང་ཟད་མེད། །དུས་གསུམ་མི་འགྱུར་ཀུན་ཏུ་བཟང་པོའི་ངང་། །ཁྱབ་གདལ་འུབ་ཆུབ་མཐའ་གྲོལ་ཀློང་ཡངས་ཤིང་། །སྣ་ཚོགས་སྒྱུ་མའི་རོལ་པ་གཟིགས་མོར་ཆེ། །

ཀྱེ་ཧོ་འགྲོ་ཀུན་རྨི་ལམ་ལྟ་བུ་སྟེ། །ལེགས་ཉེས་ཤོར་ཐོབ་དགག་སྒྲུབ་ཅི་བྱུང་ཡང་། །རྨི་ལམ་ནོར་སྟོང་སྒྱུ་མའི་རྩེད་མོ་བཞིན། །ཡེ་ནས་དགག་སྒྲུབ་ཤོར་གོད་མ་མཐོང་ངོ་། །སྒོམ་ཉམས་དྲོད་ཚད་བཟང་ངན་དེ་དང་འདྲ། །སེམས་གོམས་བརྟགས་པའི་དོན་སྣང་གཟུགས་བརྙན་ལ། །བྱིས་པའི་ཁང་བུ་བཞིན་དུ་བདེན་པར་འཛིན། །དེ་ཀུན་བཟང་ངན་རྡུལ་ཙམ་མ་མཐོང་ཡང་། །འཇིག་རྟེན་འཁྲུལ་ལ་སྒོམ་མཁན་བཟང་པོར་རློམ། །ཨ་ཧོ་ཐམས་ཅད་མཉམ་ཉིད་ཕྱམ་བརྡལ་ལོ། །འཁྲུལ་པ་རྟོགས་ན་ཡེ་ཤེས་ལོགས་ན་མེད། །མ་རིག་སེམས་དེ་རིག་པས་ཆོས་ཉིད་དངོས། །ཐག་པའི་རང་བཞིན་ཤེས་པས་སྦྲུལ་འཛིན་གྲོལ། །དེ་བཞིན་སྣང་སྲིད་འཁྲུལ་སྣང་གཟུགས་བརྙན་ཙམ། །ཡོད་མེད་སྤྲོས་པའི་ཡུལ་ལས་འདས་པ་ཡིན། །འདིར་ནི་གཅིག་ཏུ་ངེས་པའི་བློས་དཔྱད་དེ། །སྣ་ཚོགས་སྣང་བའི་ཡུལ་ལ་ཕར་བལྟས་པས། །རྨི་ལམ་སྒྱུ་མ་གཉིས་མེད་ཆོས་སྐུའི་ངང་། །གཟུང་བའི་ཡུལ་མེད་འཛིན་པའི་སེམས་མེད་དོ། །དེ་ཉིད་འབྱེད་པའི་བློ་ལ་ཚུར་བལྟས་པས། །ལྟ་མཁན་མ་གྲུབ་གཟུང་འཛིན་མཁན་པོ་སྟོར། །ཡུལ་སེམས་གཉིས་མེད་གདོད་མའི་ངང་དུ་གྲོལ། །ཧ་ཧ་འགྲོ་ཀུན་འཁོར་བའི་གྲོང་ཁྱེར་ན། །འཆིང་དང་གྲོལ་མེད་ནམ་མཁའི་མདུད་པ་བཞིན། །ཐམས་ཅད་ཡེ་ནས་རྫོགས་སངས་རྒྱས་པར་མཐོང་། །འཁོར་བར་འཛིན་པ་མང་ཙམ་གློ་བུར་ཏེ། །གློ་བུར་རྐྱེན་ལ་ངོས་(༢༠༣)གཟུང་འགའ་མེད་དོ། །ཐམས་ཅད་ཡེ་ནས་མ་གྲོལ་གཅིག་ཀྱང་མེད། །བཅིངས་པ་འགག་མེད་ཡེ་སངས་རྒྱས་པ་ལ། །འཁོར་འདས་གཉིས་སྣང་འཛིན་པ་དགོད་རེ་བྲོ། །སྣང་སྲིད་སྒྱུ་མའི་ཡུལ་ལ་ཕར་བལྟས་པས། །ཐམས་ཅད་ཕྱམ་ཕྱམ་གཞི་ནས་གྲོལ་བར་མཐོང་། །ཡ་མཚན་དགོད་པོ་བྲོ་བའི་སྣང་བ་ལ། །འཛིན་མེད་གཟའ་གཏད་བྲལ་བའི་རྟོགས་པ་ཤར། །སྣང་སེམས་གཉིས་མེད་སྒོམ་དང་མི་བསྒོམ་མེད། །ལྟ་སྤྱོད་གཉིས་མེད་བླང་དང་དོར་བ་མེད། །གཟུང་འཛིན་གཉིས་མེད་རྨི་ལམ་སྣང་བ་འདྲ། །དེ་ལྟར་རྟོགས་ན་རང་གྲོལ་སྐུ་ཡིན་ཏེ། །ལྷག་པར་སྒོམ་མེད་ཐ་མལ་གནས་པས་བདེ། །སྔ་ཕྱིར་མི་འཛིན་ད་ལྟར་འཛིན་པ་ཞིག །དུས་གསུམ་དུས་མེད་དུས་བཞི་མཉམ་པ་ཉིད། །ཐམས་ཅད་ཕྱམ་ཕྱམ་ནམ་མཁའི་ཀློང་ཡངས་སོ། །འགྲོ་འཆག་ཉལ་འདུག་སྤྱོད་ལམ་ཐམས་ཅད་དུ། །རྩིས་མེད་རིས་བྲལ་མ་བཅོས་བློ་བདེའོ། །སོ་གཉུག་རྣལ་མ་བུ་ཆུང་ལྟ་བུ་སྟེ། །རེ་དོགས་གཉིས་མེད་ཚོང་ཟིན་སྐྱེ་བོ་འདྲ། །བླང་དང་དོར་མེད་དགག་སྒྲུབ་ཀུན་ལས་འདས། །དུས་རྣམས་ཀུན་ཏུ་ཀུན་ཏུ་བཟང་པོའི་ངང་། །བདེ་ཆེན་ས་ལ་བདེ་ཀློང་གཅིག་ཏུ་འཁྱིལ། །རང་བཞིན་གཉིས་སུ་མེད་པས་བློ་བདེའོ། །ཨེ་མ་གྲོགས་དག་འཁྲུལ་པ་ནང་ནས་ཞིག །སྐུ་གསུམ་ས་ལ་མ་ཕྱིན་ལྷུན་གྱིས་གྲུབ། །མཛད་པའི་ཕྲིན་ལས་ནམ་མཁའི་མཐའ་དང་མཉམ། །དུས་གསུམ་རིག་འཛིན་སྔ་ཕྱི་དགོངས་པ་གཅིག །གདོད་མའི་གཞི་ལ་ལྷུན་རྫོགས་བློ་བདེའོ། །ད་ནི་བསམ་རྫོགས་ཡེ་ཀློང་ཡངས་པའི་ངང་། །ཆོས་ཟད་བློ་ཟད་འཁོར་འདས་འཛིན་པ་ཟད། །རང་བཞིན་ལྷུན་འབྱམས་མ་བཅོས་གཉུག་མའི་དོན། །རང་བཞིན་ལྷུན་གྱིས་གྲུབ་པའི་ཆོས་ཉིད་ནི། །ཡེ་གྲོལ་སོར་བཞག་ཀུན་བཟང་རོལ་པའི་ཞིང་། །བཟང་ངན་བླང་དོར་རེ་དོགས་འདས་པ་ནི། །སྣང་སྲིད་མ་ལུས་སྐུ་གསུམ་འདུ་འབྲལ་མེད། །ཡེ་ནས་ཕྱམ་ཅིག་ཐམས་ཅད་ཆོས་ཟད་དོ། །མེད་སྣང་སྟོང་ལ་ཕྱོགས་རིས་འདས་པ་ནི། །ངོ་བོ་རང་བཞིན་ཐུགས་རྗེའི་འཆར་ཚུལ་ཏེ། །འདི་ཞེས་ཆེད་འཛིན་ཞིག་ན་གདོད་མའི་ངང་། །གཞི་རྫོགས་ཡེ་གྲོལ་ཕྱམ་ཅིག་སངས་རྒྱས་ཏེ། །སྐུ་གསུམ་འདུ་འབྲལ་མེད་པའི་ངང་ཉིད་དོ། །དེ་ལྟར་རྟོགས་ན་རང་སྣང་ཆོས་སྐུའི་ཞིང་། །མ་ལུས་འགྲོ་ཀུན་སྒྱུ་མའི་སངས་རྒྱས་ཏེ། །སྣ་ཚོགས་དྲན་རིག་ཏིང་འཛིན་ཡངས་པའི་ཀློང་། །མི་འགྱུར་གཞི་རྩ་ཀུན་ལས་འདས་པ་ནི། །འོག་མིན་གནས་སུ་མངོན་པར་བྱང་ཆུབ་ཡིན། །འདི་ཞེས་ཞེན་འཛིན་ཡོད་ན་འཁོར་བ་སྟེ། །དེ་(༢༠༤)ལ་ཆེད་འཛིན་ཞིག་ན་མྱ་ངན་འདས། །མི་འགྱུར་མཉམ་པའི་ངང་ཡིན་གནས་ལུགས་ཡིན། །འོད་གསལ་དག་པའི་ཞིང་ཡིན་སངས་རྒྱས་ཞིང་། །ཡངས་སོ་ཆེའོ་མ་བྱས་ལྷུན་མཐོའོ། །རང་བཞིན་གདོད་ནས་སྟོང་པའི་ཆོས་ཉིད་ལ། །སྣང་སྲིད་སྣ་ཚོགས་སྣང་བ་དགོད་རེ་འཆོར། །མ་སྤངས་རང་སར་གྲོལ་བ་བཞད་གད་ཆེ། །ཡེ་ནས་སངས་རྒྱས་ཡིན་པ་བློ་རེ་བདེ། །ཀྱེ་ཧོ་གྲོགས་དག་གནས་ལུགས་མཐོང་འདོད་ན། །བལྟས་པས་མི་མཐོང་ལྟ་བའི་ཚོལ་འཕྲོ་ཞོག །བསྒོམས་པས་མི་རྙེད་དྲན་འཛིན་དམིགས་གཏད་བཤོལ། །སྤྱད་པས་མི་གྲུབ་སྒྱུ་མར་འཛིན་པ་ཐོངས། །བཙལ་བས་མི་རྙེད་འབྲས་བུའི་ཞེན་པ་བོར། །ད་ལྟར་ཤེས་པ་བཟོ་མེད་ལྷུག་པ་ལ། །ཕྱོགས་རིས་མ་ཕྱེད་འཛིན་པས་མ་བསླད་ཅིག །གང་བབས་ཤེས་པ་རང་ཤར་རང་གྲོལ་ལ། །སྔ་ཕྱིའི་རྟོག་པས་མ་བསླད་ཡན་དུ་ཆུག །ཇི་ལྟར་ནམ་མཁའི་བྱ་ལམ་མི་མངོན་བཞིན། །དྲན་བསམ་སྔ་ཕྱི་ད་ལྟ་མ་འཛིན་པར། །གང་ལྟར་ཤར་བ་དེ་ལྟར་ཡིན་དུ་ཆུག །དེ་ཡིས་ཕན་གནོད་ཤོར་གོད་འཕུང་འཚེངས་མེད། །གཟེ་རེ་མ་བྱེད་ཁོང་ཡངས་སོས་གདོལ་ཅིག །འདི་ལྟར་རྟོགས་ན་ཡིན་མིན་གཟའ་གཏད་མེད། །སྒྱུ་མའི་སྐྱེ་བོ་སྣ་ཚོགས་ཡུལ་ལ་སྤྱོད། །རྨི་ལམ་དྲི་ཟའི་གྲོང་དང་ཁྱད་ཅི་ཡོད། །ཇི་ལྟར་ཤར་བ་དེ་ལྟར་རིག་པའི་རྩལ། །སྣ་ཚོགས་རྟོག་པའི་རྩལ་སྦྱོང་མེ་ལོང་སྟེ། །སྣང་སེམས་རོ་གཅིག་འདོད་ཡོན་སེམས་ཀྱི་རྒྱན། །ལས་དང་བག་ཆགས་ཀུན་ཀྱིས་མི་གོས་སོ། །འདི་ལྟར་ཆོས་ཉིད་སེམས་ཉིད་དབྱེར་མེད་པས། །ཆོས་ཉིད་དོན་ལ་བཟང་ངན་བླང་དོར་མེད། །དགེ་སྡིག་དགག་སྒྲུབ་བློ་ལས་འདས་པ་ཡིན། །སྔ་ཕྱིར་འཛིན་པའི་བག་ཆགས་སེམས་ལ་བརྟེན། །སེམས་ནི་གཞི་མེད་རྩ་བ་ཀུན་དང་བྲལ། །ལས་དང་བག་ཆགས་ཕྱམ་ཅིག་ཡེ་ནས་ཟད། །གདོད་མའི་གཞི་ལ་ཆོས་ཀུན་མཐར་ཕྱིན་ནོ། །ཐ་མལ་རྣམས་དང་རྣལ་འབྱོར་ཤེས་པ་ལ། །དགག་སྒྲུབ་ལ་སོགས་འཆར་བར་ཁྱད་མེད་ཀྱང་། །ཐ་མལ་སེམས་ལ་གཟུང་འཛིན་ཨར་འཐས་ཏེ། །རྣལ་འབྱོར་སེམས་ལ་སྐད་ཅིག་འཛིན་པ་མེད། །དེས་ན་དགག་སྒྲུབ་བཟུང་དང་མ་བཟུང་བས། །འཆིང་དང་མི་འཆིང་རྣམ་པ་གཉིས་སུ་ཤར། །ཐག་པ་དངོས་དང་མེར་ཚིག་གཟུགས་བརྙན་བཞིན། །རྣལ་འབྱོར་དགག་སྒྲུབ་རྟོགས་པའི་རྩལ་སྦྱོང་སྟེ། །ཡེ་གྲོལ་སེམས་ཉིད་དག་པའི་མེ་ལོང་ལ། །སྣང་སྲིད་སེམས་ཀྱི་གཟུགས་བརྙན་ཅི་(༢༠༥)ཤར་ཡང་། །དེ་ཡིས་མི་གོས་རང་སྣང་སྤྲོས་དང་བྲལ། །མེད་བཞིན་སྣང་བའི་གཟུགས་བརྙན་སྟོང་པས་གྲོལ། །སྣང་སེམས་གདོད་ནས་ཆུ་ཟླའི་རང་བཞིན་ལ། །མི་མཁས་བདེན་པར་བཟུང་བས་རབ་འཁྱམས་ཀྱང་། །རྟོགས་པའི་རྣལ་འབྱོར་སེམས་ཀྱི་རྩལ་སྦྱོང་ཚེ། །གང་སྣང་རང་སར་གྲོལ་བའི་རང་བཞིན་ནོ། །དེ་ལྟར་རྟོགས་ནས་འཆིང་གྲོལ་མེད་པའི་ངང་། །ཡེ་ནས་དག་པའི་རྣལ་འབྱོར་ནམ་མཁའ་འདྲ། །ཡངས་དོག་མེད་པའི་ངང་ནས་བློ་རེ་བདེ། །ཐམས་ཅད་ལྷུན་འབྱམས་གདོད་མའི་གནས་ལུགས་ཏེ། །སྐུ་གསུམ་འདུ་འབྲལ་མེད་པའི་དགོངས་པར་ཕྱིན། །ཕྱི་ནང་སྣོད་བཅུད་སྣང་སྲིད་ཆོས་རྣམས་ཀུན། །མ་ལུས་ཕྱམ་ཅིག་ཐམས་ཅད་བྱང་ཆུབ་བོ། །ཧ་ཧ་འཁྲུལ་པ་ཞིག་པའི་སྣང་བ་ལ། །འདི་ཡིན་གཟའ་གཏད་མེད་པ་དགོད་རེ་འཆོར། །བན་བུན་ཕྱད་ཕྱོད་འལ་འོལ་སྒྱུ་མ་འདྲ། །སང་སེང་ཁྲལ་ཁྲོལ་ཆུ་ཟླ་སྨིག་རྒྱུ་བཞིན། །སྣང་བས་སྟོང་སྟེ་འདི་ཞེས་ཆེད་འཛིན་མེད། །གང་ཤར་རྩིས་གདབ་མེད་པའི་རིག་པ་ལ། །དམིགས་གཏད་ཞེན་ཆགས་མེད་པའི་སྣང་བ་ཤར། །འདི་ཡིན་གཟའ་གཏད་མེད་པས་ཉམས་རེ་དགའ། །སྣང་སེམས་ཡེ་ནས་གྲོལ་བས་བློ་རེ་བདེ། །མ་བཙལ་ལྷུན་གྱིས་གྲུབ་པས་བག་རེ་བྲོ། །བདེ་ཆེན་རྒྱུན་ཆད་མེད་པས་བྱིན་རེ་ཆེ། །དེ་ལྟར་ཆོས་ཀུན་མཐར་ཐུག་སྙིང་པོའི་དོན། །ཡེ་ནས་གྲོལ་བའི་རང་བཞིན་གླུར་བླངས་པས། །འགྲོ་ཀུན་ཕྱམ་ཅིག་གདོད་མའི་ཁང་བཟངས་སུ། །རང་བཞིན་ལྷུན་གྱིས་གྲུབ་པའི་སངས་རྒྱས་ཤོག །རྟོགས་པའི་འོད་སྟོང་ཉི་ཟེར་གྱིས་ཕྱེ་བའི། །མེ་ཏོག་མ་རྙིང་ཡིད་འོད་པདྨོའི་མཚོས། །འགྲོ་ཀུན་ཡིད་ཀྱི་བུང་བ་དགའ་བསྐྱེད་ནས། །ལྷུན་གྲུབ་ས་ལ་ཀུན་ཏུ་བཟང་པོར་ཤོག །ཚུལ་འདི་བློ་གྲོས་ཡངས་པའི་ནམ་མཁའ་ལ། །དྲི་མེད་འོད་ཟེར་བརྒྱ་སྟོང་རབ་འཕྲོ་བས། །སྐལ་བཟང་དད་བརྒྱའི་པདྨོ་འཛུམ་པ་དེས། །གངས་རི་ཐོད་དཀར་མགུལ་དུ་ལེགས་པར་བཀོད། །དགེ་བ་དེ་ཡིས་སྲིད་པའི་སེམས་ཅན་ཀུན། །གཞི་རྫོགས་གདོད་མའི་ངང་དུ་གྲོལ་བར་ཤོག །ནམ་མཁའ་ཀློང་ཡངས་ཞེས་བྱ་བ། དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་སམྦྷ་ཝའི་སློབ་མ་རྣལ་འབྱོར་གྱི་དབང་ཕྱུག་པདྨ་ལས་འབྲེལ་རྩལ་གྱིས་གངས་རི་ཐོད་དཀར་གྱི་མགུལ་དུ་མཛད་པ་རྫོགས་སོ།། །།

དགེའོ།། །།

ནམ་མཁའ་དྲི་མེད།

༄༅། །ནམ་མཁའ་དྲི་མེད་བཞུགས་པ་ལགས། རིན་ཆེན་ཤོག་སྐྱའི་སྐོར།

༄༅། །ནམ་མཁའ་དྲི་མེད་ཅེས་བྱ་བ། དཔལ་གཉུག་མ་ཆེན་པོ་ལ་ཕྱག་འཚལ་ལོ། །སྙིང་པོའི་ཡེ་ཤེས་ཡེ་ནས་རྫོགས་པ་ཆེ། །རང་བཞིན་འོད་གསལ་སྣ་ཚོགས་སྤྲོས་ཀུན་ཞི། །རང་བྱུང་ཐུགས་རྗེ་འགག་མེད་རང་ཤར་ལ། །འདུ་འབྲལ་མེད་པའི་ཚུལ་གྱིས་ཕྱག་འཚལ་ལོ། །ངོ་བོ་མ་སྐྱེས་ཡེ་ནས་དག་པ་ལ། །རང་བཞིན་ལྷུན་གྲུབ་ཐུགས་རྗེ་ཕྱོགས་རིས་མེད། །སྣ་ཚོགས་མི་གཉིས་སྐྱེ་མེད་སྙིང་པོའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཆོས་ཀུན་གཞི་རྫོགས་བསམ་ཡུལ་འདས་པ་ལ། །འདི་ཞེས་མི་མཚོན་བསམ་བྱའི་དངོས་པོར་མེད། །རང་བཞིན་མི་དམིགས་ཡོད་མེད་མཐའ་ལས་འདས། །བཏགས་པ་ཙམ་སྟེ་དེ་ཀུན་གྲུབ་པ་མེད། །ཡིན་མིན་ཡོད་མེད་དགག་སྒྲུབ་བླང་དོར་སོགས། །ཇི་ལྟར་སྣང་ཡང་དེ་ལྟར་རང་བཞིན་མེད། །ཡེ་གྲོལ་ལྷུན་འབྱམས་གཞི་རྩ་ཀུན་ལས་འདས། །ནམ་མཁའ་བཞིན་དེ་མཚོན་པའི་ཡུལ་མེད་དོ། །མི་མཁས་བྱིས་པ་རྣམས་ནི་ཡུལ་གྱིས་བཅིངས། །སྨིག་རྒྱུའི་ཆུ་ལ་རི་དྭགས་རྒྱུག་པ་བཞིན། །གཟུགས་སོགས་ཡུལ་ལྔའི་དངོས་ལ་སྲེད་པས་བསླུས། །ཆགས་སོགས་ཉོན་མོངས་ཆུ་བོ་ལྔ་ཡིས་བཅིངས། །འཁོར་བའི་གནས་ལས་ཐར་པའི་སྐབས་མེད་དོ། །བསྒོམས་པའི་བསམ་གཏན་པ་རྣམས་བློ་ཡིས་བཅིངས། །སྲིན་བུའི་ཁ་ཆུས་རང་ཉིད་འཆིང་བ་བཞིན། །བསྒོམས་པའི་ཉམས་ཀྱིས་གཉུག་མའི་ཡེ་ཤེས་བསླུས། །ལྟ་སྒོམ་སྤྱོད་པའི་གཟེབ་ཀྱིས་རྟོག་པ་འཆིང་། །ཞེན་འཛིན་གཉེན་པོའི་ར་བར་རྟག་ཏུ་འཁོར། །གཉིས་མེད་རྣལ་འབྱོར་པ་རྣམས་སྙེམས་ཀྱིས་བཅིངས། །མིག་གི་དབང་པོས་རང་ཉིད་མི་མཐོང་བཞིན། །ཆོས་ཉིད་གདེང་གིས་གདོད་མའི་གནས་ལུགས་བསྒྲིབས། །འདི་ཞེས་མི་མཚོན་མཐའ་བྲལ་ངང་དུ་འཆིང་། །གཉིས་མེད་མཐའ་ལས་གྲོལ་བའི་དུས་མེད་དོ། །

ཀྱེ་ཧོ་གྲོགས་དག་ལེགས་པར་སོམས་མཛོད་དང་། །རྒྱལ་པོ་རང་གི་སྲིད་ལ་ཆགས་པ་དང་། །བློན་པོ་གཉེན་འཁོར་རྫས་ལ་ཆགས་པ་དང་། །(༢༠༧)དབུལ་པོ་ཁབ་ཙམ་ཞེན་པས་ཆགས་པ་དག །སྲེད་པའི་སེམས་ལ་ཁྱད་པར་འགའ་མེད་པས། །གང་ལ་ཞེན་པ་འཆིང་བའི་ཐག་པ་སྟེ། །བཟང་ངན་བླང་དོར་ཕྱོགས་འཛིན་མེད་པར་རོལ། །སྣ་ཚོགས་གང་ཤར་ཡུལ་ལ་མ་ཞེན་ན། །ཉོན་མོངས་དུག་ལྔས་སུ་ལ་ཕན་གནོད་ཡོད། །ཡེ་ཤེས་ཉིད་ཅེས་རང་རིག་གཟའ་གཏད་བྲལ། །རྟོགས་པའི་རྩལ་སྦྱོང་ཡིན་ཕྱིར་གཟིགས་མོར་ཆེ། །འདོད་ཡོན་མ་སྤངས་སེམས་ཀྱི་རྒྱན་དུ་རྟོགས། །གདོད་ནས་མ་སྐྱེས་རང་ཤར་ཆེན་པོའི་ངང་། །གཞི་བྲལ་སྟོང་པའི་ཉམས་ཞེས་འཛིན་པ་ཡོད། །གནས་ལུགས་ངང་དེར་གནས་ཀྱང་འཆིང་བྱེད་ཉིད། །ཤེས་བྱའི་སྒྲིབ་དེས་ནམ་ཡང་ཐར་པ་མེད། །གང་ལ་ཆེད་འཛིན་ཞེན་པའི་སེམས་མེད་ཅིང་། །ཐ་མལ་ཤེས་པ་རང་འགྲོས་ཟང་ཀ་མ། །གང་བབས་བླང་དོར་འཛིན་པས་མི་འཆིང་ན། །ཡེ་གྲོལ་ཉིད་དེ་དེ་ལ་བཅོས་ཅི་དགོས། །གཞི་ནས་མ་བཅོས་ལམ་དུ་མི་འཆོས་ན། །འབྲས་བུ་གཞི་ཐོག་མ་བཅོས་ལྷུན་གྱིས་གྲུབ། །གང་གིས་བཅོས་ན་འཇིགས་པ་ཆོས་ཉིད་དེ། །སྟོང་ཉིད་བསྒྲིབས་ཀྱང་མི་རྟོག་བློ་ཡི་ཉམས། །རྒྱལ་བའི་ཆོས་སྐུ་འཇིགས་མེད་འགྲུབ་མི་འགྱུར། །གདོད་མའི་གནས་ལུགས་བྱར་མེད་ཡེ་གྲོལ་ལ། །ལམ་དུ་བྱ་རྩོལ་གང་གིས་བསྒོམས་པའི་མཐར། །བྱར་མེད་རྒྱལ་པོ་ཆོས་སྐུ་འཕོ་འགྱུར་མེད། །རང་བཞིན་ལྷུན་གྲུབ་ཐོབ་པར་རློམ་པ་ནི། །རྒྱུ་འབྲས་འགལ་ལ་གནས་ལུགས་ཕྱིན་ཅི་ལོག །གཞི་ཉིད་ནས་སུ་བློ་ཡིས་ཐག་བཅད་ནས། །ལམ་དུ་བྲ་བོའི་ས་བོན་བཏབ་ལ་འབད། །འབྲས་བུ་ནས་བཟང་ཐོབ་ཅེས་རློམ་པར་ཟད། །གཞི་ནས་གཤིས་ཀྱི་གནས་ལུགས་མ་བཅོས་པ། །ལམ་དུ་མ་བཅོས་འབད་རྩོལ་བྱར་མེད་ན། །འབྲས་བུ་གདོད་མའི་གནས་ལུགས་ཅི་འདྲ་ཐོབ། །

ཀྱེ་ཧོ་གྲོགས་དག་རང་བཞིན་སྙིང་པོའི་སེམས། །གཏད་མེད་རྒྱལ་པོ་འཛིན་མེད་ཤར་བའི་ཚེ། །རང་གྲོལ་རྒྱལ་པོ་དུས་གསུམ་འཕོ་འགྱུར་མེད། །ཨེ་མ་ད་དུང་ལེགས་པར་སོམས་དང་ཀྱེ། །གཞི་ནས་མ་བཅོས་དོན་གྱི་ཡེ་ཤེས་ལ། །ལམ་དུ་ལྟ་སྒོམ་སྤྱོད་པས་འཆོས་པ་ནི། །ཕྱིན་ཅི་ལོག་(༢༠༨)སྟེ་གདོད་མའི་གནས་ལུགས་མིན། །གཞི་ལམ་འཛོལ་བས་འབྲས་བུ་ཐོབ་མི་འགྱུར། །ཧ་ཧ་སྙིང་པོའི་དོན་ལ་སྒོམ་དུ་མེད་པ་ལ། །བལྟར་མེད་སྤྱད་མེད་འབྲས་བུའི་ཞེན་པ་ཟད། །འདི་ཞེས་མི་མཚོན་ཡེ་ཡིན་རྫོགས་པ་ཆེ། །དག་པའི་སེམས་ལ་འཛིན་པས་མ་བསླད་ཅིག །གང་ལ་འཛིན་མེད་རྟོད་ཕུར་སྤངས་པའི་ཚེ། །སྐུ་དང་ཡེ་ཤེས་རང་བཞིན་འདུ་འབྲལ་མེད། །གང་ཤར་སྤྲོས་བྲལ་ཡེ་སྟོང་ཆོས་ཀྱི་སྐུ། །སྣ་ཚོགས་འཆར་གཞི་མི་འགག་ལོངས་སྤྱོད་རྫོགས། །ཤར་གྲོལ་འཛིན་མེད་གང་སྣང་སྤྲུལ་པའི་སྐུ། །ཡེ་གྲོལ་སོར་བཞག་མི་འགྱུར་རྡོ་རྗེའི་སྐུ། །གནས་ལུགས་ཕྱམ་ཅིག་མངོན་པར་བྱང་ཆུབ་སྐུ། །སྣང་སེམས་གཉིས་མེད་གདོད་མའི་ངང་དུ་གྲོལ། །ངོ་བོ་རང་བཞིན་ཐུགས་རྗེའི་སྙིང་པོ་ཅན། །མཉམ་པའི་རྒྱལ་པོ་འདུ་འབྲལ་འཕོ་འགྱུར་མེད། །དེ་ཚེ་གཟུང་འཛིན་མི་དམིགས་ངང་གཅིག་པ། །ཡིན་མིན་མཐའ་ལས་འདས་པ་ཆོས་ཀྱི་དབྱིངས། །སྣ་ཚོགས་འཆར་གཞི་འོད་གསལ་མེ་ལོང་འདྲ། །དགག་སྒྲུབ་བླང་དོར་གཉིས་མེད་མཉམ་ཉིད་ངང་། །སྣང་སེམས་ཀུན་ཁྱབ་ཕྱོགས་བྲལ་སོ་སོར་རྟོགས། །ཐོག་བབས་རང་བྱུང་ཤར་གྲོལ་བྱ་བ་གྲུབ། །ཡེ་ཤེས་ལྔ་ལྡན་ཡེ་ནས་རང་ཤར་བས། །གཟུང་འཛིན་ཞེན་པ་མ་བྱེད་རང་གར་ཞོག །གང་དགའི་སེམས་ཀྱིས་ཐ་མལ་རང་སར་གྲོལ། །ངང་ཡིན་ཡེ་ཡིན་རྫོགས་པ་ཆེན་པོ་ཡིན། །

ཀྱེ་ཧོ་གྲོགས་དག་དྲན་རིག་སྣ་ཚོགས་སེམས། །གཟུང་འཛིན་གཉིས་སྣང་འདི་ལ་སོམས་དང་ཀྱེ། །ཁ་དོག་དབྱིབས་མེད་ངོ་བོ་ངོས་གཟུང་མེད། །བཅོས་ཤིང་བསྒྱུར་མེད་ཡེ་ནས་དག་པ་ལ། །འདི་ཞེས་དགག་སྒྲུབ་བླང་དོར་བྱེད་པ་ནི། །འགའ་ཡིས་མཁའ་ལ་ཡིད་ཀྱིས་མདུད་པ་བོར། །དམ་ལྷོད་ལ་སོགས་སོ་སོར་ཞེན་བྱ་སྟེ། །ཕྱི་ནས་ཡེ་གྲོལ་ནམ་མཁའི་མདུད་པ་ཞིག །དེ་ལ་སོམས་དང་དགག་སྒྲུབ་ཅིར་འོང་གིས། །བྱིས་པའི་བློ་ཡིས་བརྟགས་པའི་ཆོས་རྣམས་ལ། །རྒྱུ་མཚན་གཟའ་གཏད་འདི་ཡིན་དོན་ལ་མེད། །མེད་པའི་ཆོས་ལ་སོ་སོར་ཞེན་པས་འཁོར། །ནམ་མཁའི་རང་བཞིན་ཡེ་ནས་དག་པ་ལ། །བཅོས་ཤིང་བསྒྱུར་མེད་མདུད་པ་ག་ལ་ཡོད། །རང་(༢༠༩)གིས་བཅིངས་གྲོལ་ཡིད་ཀྱིས་བྱས་པར་ཟད། །དེ་བཞིན་སེམས་ཉིད་ནམ་མཁའི་རང་བཞིན་ལ། །དགག་སྒྲུབ་བླང་དོར་མདུད་པ་བརྒྱ་བྱས་ཀྱང་། །དགག་ཅིང་སྒྲུབ་མེད་བླང་དོར་རེ་དོགས་བྲལ། །འབད་ཅིང་རྩོལ་མེད་འཆིང་བའི་གཟེབ་ལས་འདས། །དེ་ཀུན་རང་ཡིན་ནམ་མཁའི་མདུད་པ་ཙམ། །དོན་མེད་ཚིག་ལ་དགག་སྒྲུབ་བྱེད་དང་མཚུངས། །སྣང་སྲིད་བདེ་སྡུག་འགྲོ་དྲུག་འཁྲུལ་སྣང་འདི། །ངར་འཛིན་གཟུགས་བརྙན་བདེན་བདེན་ལྟར་སྣང་ཡང་། །མི་བདེན་སྒྱུ་མ་ཆུ་ཟླའི་གཟུགས་བརྙན་འདྲ། །མེད་སྣང་འཁྲུལ་པའི་རང་བཞིན་མ་རྟོགས་པས། །དོན་མེད་དངོས་ལ་བྱིས་པ་ཨ་ཐང་ཆད། །འཁོར་འདས་གཉིས་མེད་སྒྱུ་མའི་རྩེད་མོ་ལ། །མ་རྟོགས་བདེན་པར་བཟུང་བས་འགྲོ་བ་འཁྲུལ། །རྟོགས་པའི་རྣལ་འབྱོར་འཁོར་འདས་རང་སར་གྲོལ། །དག་པའི་སེམས་ཉིད་ཡེ་ཤེས་རྒྱ་མཚོ་ལ། །གཉིས་འཛིན་འཁྲུལ་རྟོག་གློ་བུར་ཆབ་རོམ་དག །བྱུང་ནས་བཤིག་སྟེ་ཆབ་རོམ་ཆུ་རུ་གྲོལ། །ཐོག་མེད་དུས་ནས་གོམས་པའི་བག་ཆགས་ཀྱང་། །ཡུན་རིང་མུན་པར་སྒྲོན་མེ་བཏེགས་པ་བཞིན། །སྐད་ཅིག་རྟོགས་པས་རང་གྲོལ་མྱ་ངན་འདས། །ཀྱེ་ཧོ་འཁོར་བའི་རང་བཞིན་རྟོགས་པའི་ཚེ། །འཁོར་བ་འདི་ཞེས་ལོགས་སུ་སྤང་མི་དགོས། །སོ་པ་ཐག་པ་ལ་ཁའི་ཐོ་ཡོར་རྣམས། །རང་བཞིན་ཤེས་པས་དགྲ་སྦྲུལ་འཇིགས་མེད་ཚེ། །དེ་དག་སྣང་བ་སྤང་མི་དགོས་པ་བཞིན། །ཇི་ལྟར་གསེར་མིན་ཁུངས་སུ་ལོགས་པའི་ཚེ། །དེ་བཞིན་གཞན་དུ་བཟློག་པ་མེད་པ་བཞིན། །འཁྲུལ་པའི་བྱུང་ཁུངས་འཁོར་བའི་ངང་བཟློག་པས། །འཁྲུལ་གཞི་ཆོམས་ནས་འཁྲུལ་མཁན་རང་སར་གྲོལ། །

ཀྱེ་ཧོ་གྲོགས་དག་འཁྲུལ་སྣང་ལྟར་སྣང་ཡང་། །སྣང་དུས་ཉིད་ནས་དེ་ཉིད་ཡོད་མ་མྱོང་། །རགས་པ་རྡུལ་ཕྲན་དེ་ཡང་ཕྱོགས་ཆ་མེད། །སེམས་ནི་དངོས་མེད་རང་བཞིན་སྟོང་པའི་ངང་། །དེ་ལ་གང་དང་གང་ཞིག་འཁྲུལ་པར་སྣང་། །འཁྲུལ་སྣང་གཞི་མེད་རང་གྲོལ་ཆོས་ཀྱི་སྐུ། །མེད་བཞིན་སྣང་བས་མེ་ལོང་གཟུགས་བརྙན་འདྲ། །དག་པའི་སེམས་ཉིད་མེ་ལོང་ངོས་ཤར་བས། །(༢༡༠)སྣ་ཚོགས་རྐྱེན་གྱི་གཟུགས་བརྙན་ཅིར་སྣང་ཀུན། །སེམས་ལས་མ་བྱུང་སེམས་ལ་སྣང་བ་ཙམ། །སྣང་བས་སེམས་ལ་གོས་པ་ཅུང་ཟད་མེད། །མེ་ལོང་གཟུགས་བརྙན་རྐྱེན་སྣང་ཤར་བ་ཙམ། །མེ་ལོང་ནང་ནས་བྱུང་བ་ཡིན་ནམ་ཅི། །དེ་ལྟར་མ་ཡིན་དེ་ལ་སྣང་བ་ཙམ། །དེ་ཕྱིར་སེམས་ལ་འཁྲུལ་སྣང་ཡོད་མ་མྱོང་། །སེམས་ཉིད་མེ་ལོང་གཞི་ཡི་སངས་རྒྱས་ཉིད། །ཀུན་གྱི་འཆར་གཞི་མི་འགག་གཟུགས་བརྙན་འཛིན། །དེ་ཉིད་རང་བཞིན་ཤེས་པས་གཟུང་འཛིན་གྲོལ། །དེ་ཕྱིར་སེམས་ལས་འཁྲུལ་པ་མ་བྱུང་ལ། །འཁྲུལ་པར་སྣང་དེ་སེམས་ལས་གཞན་ན་མེད། །དེ་ཕྱིར་འཁྲུལ་སྣང་རང་བཞིན་སེམས་ཉིད་དེ། །འཆིང་གྲོལ་མེད་བཞིན་འཆིང་གྲོལ་སྣང་བ་མཚར། །དེ་ལྟར་རྟོགས་ན་འཆིང་གྲོལ་ཀུན་ལས་འདས། །དེ་སྐད་སྨྲས་ཀྱང་ད་དུང་ཆེད་འཛིན་ན། །གོ་བའི་ཡུལ་དེ་རྟོགས་པ་ཡོད་རེ་ཀན། །འདི་ཉིད་ཐོས་ནས་གཟའ་གཏད་ཀུན་བྲལ་ན། །དུས་གསུམ་རིག་འཛིན་གྲལ་ལ་འཁོད་པ་སྟེ། །ཀུན་བཟང་ས་ལ་བཙན་ས་ཟིན་པ་ཡིན། །

ཀྱེ་ཧོ་གྲོགས་དག་དུས་རྣམས་ཐམས་ཅད་དུ། །རྣལ་འབྱོར་ཤེས་པ་ནམ་མཁའི་བྱ་ལམ་འདྲ། །བྱ་རྗེས་འདས་པ་འགགས་ནས་མི་མཐོང་ལྟར། །དྲན་བསམ་སྔ་མ་འགགས་ཤིང་མཐོང་བ་མེད། །དེ་ལ་རྗེས་སྙོགས་འཛིན་པ་མ་མཐུད་ཅིག །བྱ་རྗེས་ཕྱི་མ་མ་འོངས་དངོས་མེད་ལྟར། །དྲན་བསམ་ཕྱི་མའི་བསུན་མ་མ་བྱེད་ཅིག །བྱ་རྗེས་ད་ལྟ་ཁ་དོག་དབྱིབས་མེད་ལྟར། །ད་ལྟའི་དྲན་བསམ་ཐ་མལ་རང་འགྲོས་ལ། །འདི་ཞེས་གཉེན་པོས་བཅོས་བསླད་མ་བྱེད་ཅིག །གང་ཡིན་ཡིན་གྱིས་ཆེད་ཀར་མ་འཛིན་ཅིག །འདི་ཡིན་མེད་ཀྱིས་ཕྱོགས་རིས་མ་གཅད་ཅིག །གཟའ་གཏད་མེད་ཀྱིས་དགག་སྒྲུབ་མ་བྱེད་ཅིག །ཇི་ལྟར་ཤར་ཡང་དེ་ལྟར་མ་འཛིན་ཅིག །འདི་ནི་མཐར་ཐུག་སྙིང་པོའི་ལམ་ཁྱེར་ཡིན། །གང་ལྟར་ཤར་ཡང་དེ་ལྟར་མ་བཟུང་ན། །ཉོན་མོངས་རང་ཡན་ཡེ་ཤེས་ཆེན་པོ་ཡིན། །འདི་ཞེས་ཆེད་འཛིན་ཞེན་པའི་སེམས་ཡོད་ན། །ཡེ་ཤེས་རང་ཡན་ཉོན་མོངས་ཆེན་པོ་ཡིན། །རྟོགས་པའི་(༢༡༡)གནད་འདི་གང་ལ་ཡོད་གྱུར་ན། །ཐ་མལ་རང་ཡན་ཆུ་བོའི་རྣལ་འབྱོར་ཡིན། །བབས་ལུགས་འདི་མེད་ཆུ་བོའི་རྣལ་འབྱོར་ཡང་། །ཐ་མལ་གནས་སུ་ནན་གྱིས་ལྷུང་བ་ཡིན། །གཞི་ཡི་དོན་དེ་ལམ་དུ་སློང་ཤེས་ན། །ཆུ་བོ་རྒྱུན་གྱི་རྣལ་འབྱོར་ཆེན་པོ་ཡིན། །དག་པའི་སེམས་ལ་འཛིན་པས་མ་བསླད་ན། །གཉིས་མེད་རང་གྲོལ་ཀུན་ཏུ་བཟང་པོ་ཡིན། །མཐར་འཛིན་ཕྱོགས་ལྷུང་ཁས་ལེན་མེད་པ་ན། །རྡོ་རྗེ་སྙིང་པོའི་ཐེག་པ་མཐར་ཐུག་ཡིན། །རྒྱ་མཚོའི་དབྱིངས་སུ་ཆུ་བྲན་འདུ་བ་ལྟར། །སྙིང་པོའི་དོན་རྣམས་རྟོགས་པའི་ངང་འདིར་འདུས། །ནམ་མཁའི་དབྱིངས་སུ་ཡངས་དོག་མེད་པ་ལྟར། །སེམས་ཉིད་རྟོགས་ནས་ཐམས་ཅད་ཕྱམ་ཕྱམ་མོ། །ཐམས་ཅད་གཞི་རྫོགས་ལྷུན་གྲུབ་མཉམ་པ་ཉིད། །མ་སྐྱེས་རྒྱལ་པོ་འཕོ་འགྱུར་མེད་པའི་ངང་། །ཡེ་གྲོལ་ལྷུན་འབྱམས་གཞི་ཀློང་ཡོངས་པའི་ངང་། །རང་བཞིན་བདེ་ཆེན་སྤྲོས་ཀུན་ཉེར་ཞིའོ། །

ཀྱེ་ཧོ་གྲོགས་དག་ཞེན་འཛིན་འཆིང་བའི་རྒྱུ། །སྣ་ཚོགས་རྟོག་པའི་གཟེབ་ཡིན་དགོས་པ་མེད། །མ་བྱས་ཤེས་པ་རང་གྲོལ་ཐ་མལ་ངང་། །འདི་ཡིན་གཟའ་གཏད་མེད་པ་ཡེ་ཤེས་དངོས། །དེ་ཡིན་ཀུན་ཡིན་ཡེ་ཡིན་རང་བབ་ཡིན། །ཐམས་ཅད་མ་བཅོས་རྩོལ་སྒྲུབ་བྲལ་བ་ཡིན། །ཧ་ཧ་སྣང་སྟོང་ཟང་ཐལ་ཆེན་པོ་ལ། །རང་གྲོལ་ཤེས་པ་གཏད་མེད་ཟང་ཐལ་བར། །གང་བབས་གཞི་གྲོལ་འབད་རྩོལ་ཞིག་པ་ནི། །སྨྱོན་པ་བུ་ཆུང་ལས་ཟིན་སྐྱེས་བུ་འདྲ། །གང་ཤར་འཛིན་པ་མེད་ན་རང་དགར་རོལ། །དེ་ལ་ཆེད་འཛིན་མ་བྱེད་ངོས་གཟུང་མེད། །ཡིན་མིན་རྩིས་གདབ་མེད་ན་བློ་འདས་ངང་། །གཞི་བྲལ་ཆོས་སྐུ་ཡིན་ཏེ་གང་བདེར་ཐོངས། །གཉིས་མེད་མཉམ་པའི་ངང་སྟེ་ཁྱབ་གདལ་བ། །མ་བྱས་ལྷུན་གྱིས་གྲུབ་པའི་ཆོས་ཉིད་དོ། །

ཀྱེ་ཧོ་གདོད་ནས་མ་སྐྱེས་མཉམ་པའི་ངང་། །སྐྱེ་བའི་ཆོ་འཕྲུལ་སྣང་སྲིད་ཅིར་སྣང་ཡང་། །ཐམས་ཅད་སྐྱེ་མེད་རྫོགས་ཆེན་བྱ་རྩོལ་འདས། །ཨ་ཧོ་ཡེ་ནས་གྲོལ་བའི་སེམས་ཉིད་ལ། །གློ་བུར་རྐྱེན་གྱིས་གྲོལ་བ་དགོད་རེ་འཆོར། །དོན་མེད་བྱིས་པའི་རྩེད་མོ་འདྲ་བ་ལ། །གཟུང་(༢༡༢)འཛིན་གཟེབ་ཏུ་འཆིང་བ་ཡ་རེ་ཆ། །མ་སྐྱེས་རྩ་བ་བྲལ་བའི་རིག་པ་ལ། །དགག་སྒྲུབ་གཉིས་སྣང་རི་མོ་བཀྲག་རེ་ཆེ། །མེད་སྣང་འཁྲུལ་པའི་གཟུགས་བརྙན་རང་ཤར་ལ། །བདག་གཞན་སོ་སོར་འབྱེད་པ་ཉོན་རེ་མོངས། །དེ་ལྟར་དོན་མེད་དངོས་ལ་གོམས་པའི་བློ། །འཁྲུལ་ཕྱིར་འབྲེང་ཡང་འཁྲུལ་པ་གདོད་ནས་དག །མ་འཁྲུལ་རིག་ངོ་རིག་ན་དེ་ཀར་གྲོལ། །འཁྲུལ་པའི་སེམས་ལ་བག་ཆགས་འདིར་ཡོད་ཅེས། །སྤུངས་ཤིང་བསགས་མེད་པ་དག་མཐུད་པ་ཙམ། །གང་དུ་ཆད་པ་དེ་རུ་རྩ་བ་སྟོར། །སྐད་ཅིག་གྲོལ་བ་ཆོས་ཀྱི་སྐུ་ཞེས་བྱ། །རང་ངོ་རིག་པས་འཁྲུལ་པ་གཞི་ལ་སངས། །མདོར་ན་སེམས་ནི་སྐད་ཅིག་ཉིད་ཡིན་པས། །གཟུང་འཛིན་གཉིས་མེད་འཁྲུལ་དང་འཁྲུལ་གཞི་མེད། །གང་ཤར་གཅིག་དེ་དེ་ཉིད་རང་གྲོལ་བས། །སྔ་ཕྱིའི་ལས་དང་བག་ཆགས་སྐད་ཅིག་མ། །དེ་ཡང་དུ་མ་ཆ་ཤས་ཉིད་བྲལ་བས། །གཉིས་མེད་རང་གྲོལ་སྐད་ཅིག་རིག་པས་གྲོལ། །རང་བཞིན་བྱས་པ་མེད་པའི་སེམས་ཉིད་ལ། །སུས་ཀྱང་བཅོས་སུ་མེད་དེ་གང་བདེར་ཞོག །འདི་ཡིན་གཟའ་གཏད་མེད་པའི་རིག་པ་ལ། །དྲན་བསམ་མཐུད་མ་མ་གདགས་རང་འགྲོས་ཐོང་། །སྣང་སེམས་ཡེ་ནས་གྲོལ་བའི་རང་བཞིན་ལ། །དགག་སྒྲུབ་བླང་དོར་མ་བྱེད་རང་བབས་ཞོག །ཀྱེ་ཀྱེ་གདོད་ནས་དག་པའི་རང་བཞིན་ནི། །བསམ་ཡུལ་བློ་ལས་འདས་པས་ལྟ་བ་མེད། །ངོ་བོ་གཞི་ནས་བྲལ་བས་སྒོམ་དུ་མེད། །རང་གྲོལ་མཐའ་ལས་འདས་པས་སྤྱད་དུ་མེད། །རྩོལ་སྒྲུབ་ཞེན་པ་འདས་པས་འབྲས་བུ་མེད། །ངོ་བོ་སྟོང་ཉིད་ཡིན་པས་སྤངས་ཐོབ་མེད། །རང་བཞིན་གསལ་སྟོང་ཡིན་པས་རྩོལ་སྒྲུབ་ཞིག །ཐམས་ཅད་འགག་མེད་ཡིན་པས་ཕྱོགས་རིས་མེད། །གང་ལྟར་ཤར་ཡང་དེ་ལྟར་མ་འཛིན་ཅིག །སྣང་ཞིང་སྲིད་པའི་ཆོས་རྣམས་བཏགས་པ་ཙམ། །བཏགས་པའི་དོན་ལ་ངོས་བཟུང་མེད་པས་ན། །གང་ལའང་ཆེད་འཛིན་མ་བྱེད་རང་བབས་ཞོག །འདིར་ནི་ངང་དང་གློད་དང་གྲོལ་ལ་སོགས། །གཉེན་པོའི་རང་བཞིན་དམིགས་སུ་མེད་པ་སྟེ། །དེ་སྐད་ཚིག་ཏུ་གོ་བ་སླ་ཕྱིར་བརྗོད། །དྲན་(༢༡༣)འཛིན་གཉེན་པོ་མེད་པས་བློ་བདེའོ། །འདི་ལྟར་རྟོགས་ནས་འཆིང་གྲོལ་ཀུན་ལས་འདས། །གདོད་ནས་མ་སྐྱེས་ནམ་མཁའི་རྣལ་འབྱོར་ལ། །ཕྱོགས་ལྷུང་ཞེན་པའི་སྤྲིན་ཚོགས་དེངས་པ་ཡིན། །སྐྱེ་མེད་བསམ་འདས་ཡེ་གྲོལ་ལྟ་བ་སྟེ། །ཡན་ལྟར་བྱས་ན་ལྟ་རྒྱུ་མེད་པ་ལགས། །རང་བབས་ལྷོད་ཆགས་གང་ཤར་སྒོམ་པ་སྟེ། །ཡན་ལྟར་བྱས་ན་སྒོམ་རྒྱུ་མེད་པ་ལགས། །སྤང་བླང་གཉིས་མེད་སྒྱུ་མའི་སྤྱོད་པ་སྟེ། །ཡན་ལྟར་བྱས་ན་སྤྱད་རྒྱུ་མེད་པ་ལགས། །རེ་དོགས་གཉིས་མེད་འབྲས་བུའི་རང་བཞིན་ཏེ། །ཡན་ལྟར་བྱས་ན་འབྲས་བུ་མེད་པ་ལགས། །གང་སྣང་སེམས་ལ་བརྟེན་པའི་ཆོས་རྣམས་ནི། །བྱས་ཀྱང་ཆོག་ལ་རང་བཞིན་བཞག་ཀྱང་ཆོག །ཡན་ལྟར་བྱས་ན་བྱ་བྱེད་འདས་པ་ལགས། །ད་ནི་གཞི་རྫོགས་པདྨ་ལས་འབྲེལ་རྩལ། །ཆོས་ཟད་བློ་ཟད་འཁྲུལ་སྣང་གཞི་ནས་ཟད། །ཐམས་ཅད་རང་ཟད་ཡེ་གྲོལ་མཐར་ཕྱིན་པས། །གཞི་བདེའི་སྟེང་དུ་བློ་བདེ་རྒྱུན་མི་འཆད། །འཁོར་འདས་འཁྲུལ་གཞི་རང་བཞིན་རྒྱུན་ཆད་དོ། །གང་ལ་ཆོས་ཟད་འོད་གསལ་གཉིས་མེད་ངང་། །འཛིན་མེད་མཐའ་གྲོལ་ཆོས་ཉིད་ཟད་པའི་ས། །གདོད་མའི་ངང་ཡིན་བསམ་ཡུལ་འདས་པ་ཡིན། །དེ་ལྟར་རྟོགས་ཏེ་སྐུ་གསུམ་འདུ་འབྲལ་མེད། །བདེ་ཆེན་ས་ལ་རྒྱུན་དུ་གནས་པ་ཡིན། །

ཀྱེ་ཧོ་གཞི་ནས་དག་པའི་ཆོས་ཉིད་དེ། །མཐའ་མེད་མཐའ་དབུས་དྭངས་པའི་མཚོ་ནང་ན། །ཉི་མའི་དབང་པོ་འོད་གསལ་རྒྱུན་ཆད་མེད། །རང་བཞིན་ཡིད་མཚོར་རྟོགས་པའི་ཉི་མ་ཤར། །མི་ནུབ་སྟོང་ཁམས་བརྡལ་བ་ཀུན་ལ་ཁྱབ། །ཡེ་ཀློང་ཆེན་པོར་བདེ་ཀློང་གཅིག་ཏུ་འཁྱིལ། །གང་དུ་འཁྲུལ་སྣང་སྤྲུལ་སྐུར་ཐིམ་པའི་ཚེ། །སྤྲུལ་སྐུ་ལོངས་སྐུར་ལོངས་སྐུ་ཆོས་སྐུར་ཐིམ། །ཆོས་སྐུ་མཐའ་གྲོལ་གདོད་མའི་ཀློང་དུ་ཐིམ། །ནང་གསལ་ཡེ་ཤེས་བུམ་པའི་སྐུ་དེ་ཉིད། །ངོ་བོ་རང་བཞིན་ཐུགས་རྗེ་རྒྱུན་མི་འཆད། །སྐུ་གསུམ་ས་ལ་རང་བཞིན་ལྷུན་གྲུབ་བོ། །བདེ་ཆེན་རོལ་པས་གཞན་དོན་རྒྱུན་མི་འཆད། །ནམ་ཞིག་བདག་ཀྱང་དེ་འདྲར་འགྱུར་བར་ཤོག །འདི་ནི་རྒྱལ་སྲས་པདྨ་འབྱུང་གནས་ཀྱི། །ཐུགས་རྗེའི་བྱིན་རླབས་(༢༡༤)འོད་སྟོང་ཤར་བའི་ཚེ། །མཁའ་འགྲོ་སྙིང་ཏིག་གསང་བའི་དོན་བསྡུས་ནས། །ཕྱི་རབས་སྐལ་ལྡན་སྨིན་ཅིང་གྲོལ་བྱའི་ཕྱིར། །པདྨ་ལས་འབྲེལ་རྩལ་གྱིས་ལེགས་པར་བཀོད། །དགེ་བ་དེ་ཡིས་སྲིད་པའི་སེམས་ཅན་རྣམས། །མ་ལུས་ཕྱམ་ཅིག་ཐམས་ཅད་བྱང་ཆུབ་ནས། །གཞི་རྫོགས་འོད་གསལ་སྙིང་པོའི་ཞིང་ཁམས་སུ། །སྐུ་དང་ཡེ་ཤེས་འདུ་འབྲལ་མེད་པར་ཤོག །ནམ་མཁའ་དྲི་མེད་ཅེས་བྱ་བ་དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་རྒྱལ་པོའི་སློབ་མ་རྣལ་འབྱོར་གྱི་དབང་ཕྱུག་དྲི་མེད་འོད་ཟེར་གྱིས། སྟོན་གསུམ་མེ་ཏོག་དང་འབྲས་བུ་སྨིན་པའི་ཚེ། གངས་རི་ཐོད་དཀར་གྱི་མགུལ་ཨོ་རྒྱན་རྫོང་ཞེས་བྱ་བའི་གནས་མཆོག་དམ་པར་བཀོད་པ་རྫོགས་སོ།། །།དགེའོ།། །།

མན་ངག་རིན་པོ་ཆེ་གསེར་གྱི་སྒྲོམ་བུ་ཞེས་བྱ་བ།

༄༅། །མན་ངག་རིན་པོ་ཆེ་གསེར་གྱི་སྒྲོམ་བུ་ཞེས་བྱ་བ་བཞུགས་སོ། །རིན་ཆེན་ཤོག་སྐྱའི་སྐོར།

༄༅། །རྒྱ་གར་སྐད་དུ། རད་ན་ཨུ་པ་དེ་ཤ་སོ་ནཱ་ཛཱ་དྷ་ནཱ་མ། བོད་སྐད་དུ། མན་ངག་རིན་པོ་ཆེ་གསེར་གྱི་སྒྲོམ་བུ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །མགོན་པོ་གདོད་ནས་རྫོགས་སངས་རྒྱས། །རང་བཞིན་སེམས་པ་མི་མངའ་ཞིང་། །འོད་གསལ་རིན་ཆེན་གདངས་ལྔའི་སྐུ། །འགྱུར་བ་མེད་ལ་ཕྱག་འཚལ་ལོ། །ཐོག་མའི་ཀུན་ཏུ་བཟང་པོ་དང་། །ཁམས་གསུམ་སྲིད་པའི་སེམས་ཅན་ཀུན། །ཇི་ལྟར་བྱུང་དང་འཁྲུལ་དང་གྲོལ། །རྒྱལ་བའི་ལུང་ལ་བརྟེན་ནས་བཤད། །དེ་ཡང་གཞི་ལམ་འབྲས་བུ་ལས། །གཞི་ལ་ཀ་དག་ལྷུན་གྲུབ་སྟེ། །སྣང་སྟོང་འདུ་འབྲལ་མེད་པར་གནས། །རིག་པ་འོད་ལྔའི་ཀློང་དཀྱིལ་ན། །མ་བྱིང་མ་རྨོངས་ནང་གསལ་ཉིད། །ཕྱི་རུ་མ་འཕྲོས་བུམ་སྐུར་གནས། །དེ་ཚེ་གང་དུའང་མ་ངེས་པ། །ཐོག་མའི་སྤྱི་གཞི་ཞེས་བྱའོ། །གདོད་མའི་མགོན་པོ་འོད་མི་འགྱུར། །མེས་ཆེན་ཞེས་ཀྱང་དེ་ལ་ཟེར། །དེ་ནས་སྐྱེ་མེད་བསམ་ཡུལ་འདས། །ཐོག་མའི་ཀ་དག་ངང་ཉིད་ལས། །ལྷུན་གྲུབ་འོད་ལྔ་ཕྱིར་ཤར་བས། །ཐུགས་རྗེ་རིག་པའི་གདངས་ཉིད་ཀྱང་། །དེ་དང་མཉམ་དུ་རིག་སྟེ་ཤར། །དཔེར་ན་ཤེལ་གོང་དག་པ་ལ། །རྣམ་ལྔའི་འོད་དང་ཕྲ་ཕྲོའི་འོད། །ཇི་ལྟར་མཉམ་དུ་ཤར་བ་(༢༡༥)བཞིན། །དེ་ནས་རིག་པ་ཡོན་ཏན་ཉིད། །ཡུལ་ལ་འབྱེད་ཅིང་རྟོག་པར་ཤར། །འོད་ལྔའི་གདངས་ལ་འདི་སྙམ་དུ། །འདི་ལྟར་སྣང་བའི་རང་བཞིན་ལས། །བདག་ཉིད་བྱུང་ངམ་འོད་སྣང་འདི། །རང་ལས་བྱུང་ཞེས་དཔྱོད་པ་ན། །སྐད་ཅིག་དེ་ལ་རང་རིག་པས། །ཐོག་མའི་ཀུན་ཏུ་བཟང་པོ་ནི། །གཞི་ཐོག་ཉིད་དུ་བྱང་ཆུབ་བོ། །དེ་ལྟར་རང་འོད་ཤར་བ་ལ། །རང་དུ་མ་ཤེས་གཉིས་འཛིན་མཐུད། །དེ་ཚེ་འཛིན་པའི་སེམས་དེ་ལ། །རྩ་བའི་མ་རིག་ཞེས་བྱའོ། །སེམས་དེ་རགས་པར་མེད་པས་ན། །ཚིགས་ལ་གསལ་བའི་བདག་ཉིད་ཅན། །ཡོད་མིན་མེད་མིན་ཞེས་བྱ་སྟེ། །མྱུ་གུའི་སེམས་ཞེས་དེ་ལ་བྱ། །དེ་ཚེ་ཀུན་བཟང་ཆེན་པོ་དེའི། །ཀ་དག་ངང་ལས་སྐུ་སྤྲུལ་པ། །དགུ་ཕྲུགས་རིམ་གྱིས་སྟོན་པ་ཡི། །ལོངས་སྐུ་སྤྲུལ་སྐུའི་སྣང་བ་ལས། །མི་མཇེད་ལ་སོགས་འཇིག་རྟེན་གྱི། །ཐོག་མའི་མགོ་ཡང་བརྩམས་པར་མཛད། །དེ་ནས་སེམས་ཅན་སེམས་ཉིད་དེས། །ཅི་ཡང་མེད་པར་འཁྲུལ་པ་དང་། །ས་གཞི་རྒྱ་མཚོའི་བར་ཆགས་ཏེ། །རྣམ་ཤེས་ནམ་མཁའ་མཐའ་ཡས་འཁྲུལ། །དེ་ཚེ་རྒྱ་མཚོ་འཁྲུགས་པར་སྣང་། །དེ་ནས་གཟུགས་ཁམས་ཡས་རིམ་ཆགས། །དེ་ཚེ་རི་དང་གླིང་རྣམས་ཀྱང་། །མས་རིམ་གྲུབ་སྟེ་འདོད་པའི་ལྷ། །རི་རབ་དག་ལ་བརྟེན་ནས་བྱུང་། །དེ་ཚེ་སྤྲུལ་སྐུའི་ཆོས་སྐུ་ཡང་། །སྟོན་པའི་ཐུགས་རྗེའི་འོད་ཟེར་ལས། །རང་བཞིན་སྤྲུལ་སྐུའི་ཞིང་ཁམས་བཞི། །འོག་མིན་རྣམ་སྣང་ཕྱོགས་བཞིར་སྣང་། །དེ་ལྟར་ཞིང་ལྔའི་སྟོན་པ་ལས། །སྤྲུལ་སྐུ་ལོངས་སྐུའི་རྣམ་འཕྲུལ་ཏེ། །སྣང་བ་དམ་པ་ལ་སོགས་པའི། །སངས་རྒྱས་སྟོང་སྤྲུལ་སེམས་ཅན་བཏུལ། །དེ་དག་ཀུན་ལས་རྣམ་འཕྲུལ་བ། །སྤྲུལ་པའི་སྤྲུལ་པ་ཞེས་བྱ་སྟེ། །བཟོ་དང་སྐྱེ་བ་ལ་སོགས་པའོ། །དེ་ལྟར་འཁྲུལ་པའི་སེམས་ཅན་ལ། །སངས་རྒྱས་སྙིང་པོ་སྙིང་ལ་གནས། །རིག་པའི་ངོ་བོ་ཀ་དག་ལ། །རང་བཞིན་འོད་གསལ་གདངས་དང་བཅས། །ཐུགས་རྗེ་འགགས་མེད་རིག་པ་གསལ། །ཟེར་དང་གདངས་སུ་འཕྲོ་བའོ། །ལུས་ཀྱི་རྩ་བདུན་སྲོག་རྩར་(༢༡༦)བརྟེན། །དེ་ལྟར་བརྒྱད་ལ་རླུང་གི་རྟས། །རིག་པ་སྙིང་གི་གདངས་ཁུར་པས། །རྣམ་པར་ཤེས་པ་ཞེས་བྱར་བཏགས། །སེམས་ནི་རླུང་ཅན་གྲོང་ནས་རྒྱུ། །དབང་པོ་ལྔ་ལས་ཕྱིར་ཐོན་ནས། །ཡུལ་འཛིན་པ་ལ་སོ་སོར་འཇུག །བག་ཆགས་སྣ་ཚོགས་སོགས་པའོ། །ཡེ་ཤེས་སྙིང་ན་གནས་པའི་གདངས། །དུང་ཁང་ཁྲོ་བོའི་དཀྱིལ་འཁོར་ལ། །རྩ་རྣམས་ནང་ན་སྒྲོན་མར་གསལ། །ཐིག་ལེ་ཐིག་ཕྲན་འོད་ལྔས་བརྒྱན། །དེ་ལྟར་སྙིང་ནས་ཡེ་ཤེས་གདངས། །དར་དཀར་རྩ་ནས་རྒྱ་མཚོར་ཤར། །སྤྲིན་མེད་མཁའ་ལ་སྣང་བའོ། །དེ་ནི་གཞི་ཡི་བཞུགས་ཚུལ་ལོ། །ད་ནི་ལམ་གྱི་འཁྱེར་ཚུལ་ལ། །ཁྲེགས་ཆོད་ཐོད་རྒལ་རྣམ་གཉིས་སོ། །དེ་ཡང་ཤེལ་གྱི་ཕྲ་ཕྲོ་ལྟར། །སྣ་ཚོགས་འཛིན་པའི་སེམས་འདི་ཉིད། །ཡེ་ཤེས་གདངས་ཏེ་ངོས་གཟུང་མེད། །སྔ་ཕྱི་ད་ལྟ་བུའང་མེད། །ཁ་དོག་དབྱིབས་མེད་མཚན་མ་མེད། །དེ་ལྟར་ལྟ་བས་ཐག་བཅད་ནས། །དབང་པོ་རབ་འབྲིང་ཐ་མ་ཡིས། །དེ་ཉིད་ཉམས་སུ་ལེན་པའི་ཚེ། །ཐ་མས་རྟོག་པ་རྩད་བཅད་ལ། །སྐྱེ་འགག་མེད་པའི་ངང་ལ་གཞག །འབྲིང་གིས་ཕཊ་ཅེས་རང་ངོར་བལྟ། །རྦད་ཀྱིས་བཅད་ནས་ཕྱམ་གྱིས་གཞག །རབ་ཀྱིས་གང་ཤར་ཡེ་ཤེས་དྭངས། །སྤང་བླང་འཛིན་མེད་རང་སར་གྲོལ། །ཐོག་བབས་གང་ཤར་རང་འགྲོས་གཏང་། །ཡངས་སོ་ཆེའོ་རིག་པའི་སེམས། །སྣ་ཚོགས་སྣང་བའི་ཡུལ་རྣམས་ལ། །ཕྱོད་དེ་བུན་ནེ་འཛིན་པ་མེད། །གང་ཤར་རྟོག་པ་རོལ་དུ་ཆུག །ཡེངས་དང་མ་ཡེངས་བསྒོམ་དུ་མེད། །ལྟ་དང་མི་བལྟ་དཔྱད་དུ་མེད། །ཐམས་ཅད་ཀུན་བཟང་རོལ་པར་ཁྱེར། །དེ་ལྟར་གཞི་རྩ་ཆོད་པ་དེས། །ལུས་དང་ཡུལ་གྱི་རྡོས་བཅས་ཉིད། །འོད་གསལ་ངང་དུ་གྲོལ་བྱའི་ཕྱིར། །བཞུགས་སྟངས་གསུམ་ལ་གཞི་བྱས་ཏེ། །གཟིགས་སྟངས་གསུམ་གྱིས་གནད་བཀྲོལ་ནས། །སྐྱེས་པ་བུད་མེད་བྱེ་བྲག་གིས། །རྒྱ་མཚོ་གཡས་གཡོན་རིག་པ་གདོན། །དབྱིངས་ཀྱི་ངང་དུ་ལུ་གུ་རྒྱུད། །འགུལ་འཁྲིགས་མེད་པར་བཞག་པ་ལ། །མིག་གཏད་(༢༡༧)སེམས་ཀྱིས་གཟུང་མི་བྱ། །འོད་སྣང་ཆགས་ཞེན་མེད་པར་བལྟ། །དེ་ཚེ་ཆུ་ཡི་སྒྲོན་མ་ལས། །ཕྱི་དབྱིངས་ནམ་མཁའ་སྤྲིན་བྲལ་ལ། །ནང་དབྱིངས་རྣམ་དག་སྒྲོན་མ་ནི། །འཇའ་འམ་རྨ་བྱའི་མདོངས་ལྟར་འཆར། །དེ་ནས་ཐིག་ལེ་སྟོང་སྒྲོན་ནི། །ལྔ་ལྡན་འོད་ཀྱི་མུ་ཁྱུད་ཅན། །སུམ་སྦྲེལ་ལ་སོགས་ཤར་བའི་དབུས། །རིག་པ་རྡོ་རྗེ་ལུ་གུ་རྒྱུད། །ཕྲ་ལ་འགྲོ་འོང་བྱེད་པ་ནི། །མི་འགུལ་མིག་གིས་ལྟ་བ་དང་། །རླུང་ནི་ཁ་ནས་དྲངས་པ་ཡིས། །གསལ་སྟོང་སྐྱེ་མེད་ལྷག་ཤར་བ། །ཤེས་རབ་རང་བྱུང་སྒྲོན་མ་སྟེ། །དེ་ཉིད་ངང་ལ་རྒྱུན་དུ་བཞག །བྱིང་རྒོད་བྱུང་ན་རབ་གསལ་ཏེ། །ཟས་གོས་བསིལ་ལ་ལྟ་སྟངས་བསྟོད། །གནས་ནི་དྭངས་ཤིང་མཐོ་སར་བསྒོམ། །ཉམས་མ་འཕེལ་ན་སྤྱོད་པ་བྱ། །དུར་ཁྲོད་ལུང་སྟོང་ལ་སོགས་སུ། །སྨྱོན་པ་ལྟ་བུའི་བརྟུལ་ཞུགས་ཀྱིས། །ཅིར་སྣང་དགག་སྒྲུབ་མེད་པར་སྤྱད། །མངོན་ཞེན་དགག་སྒྲུབ་རང་སར་གྲོལ། །མཚན་དུས་འོད་གསལ་སྙིང་ལ་བསྡུ། །རང་གསལ་འོད་ལྔའི་ཕོ་བྲང་ན། །འོད་གསལ་རིགས་ལྔ་སྣང་བ་ལ། །མ་ཡེངས་ཤེས་པ་སྐྱེ་མེད་བཞག །གཉིད་རྣམས་འོད་གསལ་ཆོས་སྐུར་གྲོལ། །ལྡང་དུས་སྣང་སྲིད་ཆོས་སྐུའི་ཞིང་། །སེམས་ཅན་ལྷ་དང་ལྷ་མོའི་ངང་། །འགྲོ་ཀུན་ལྷ་ཡི་དཀྱིལ་འཁོར་ལ། །གྲགས་པའི་སྒྲ་རྣམས་སྔགས་སུ་ཤེས། །དྲན་རིག་རང་གྲོལ་ཆོས་ཉིད་ངང་། །སྣང་སྲིད་སྒྱུ་མའི་ལམ་ཁྱེར་བྱ། །ཉལ་དུས་གཞི་བྲལ་གདོད་མའི་ངང་། །ཆོས་ཀུན་མཉམ་པ་ཆེན་པོ་རུ། །སྐྱེ་མེད་འོད་གསལ་གོམས་པར་བྱ། །ཉི་མའི་ཕྱོགས་ནས་ཁྲུ་གང་སར། །མིག་གཏད་ཟུར་ལ་བགས་ཀྱིས་ཁྲིད། །དེ་ཡིས་འོད་སྣང་འཆར་བ་ཡིན། །མངོན་སུམ་གོང་འཕེལ་ཚད་ཕེབས་ཏེ། །ཕྱི་ནང་རྡོས་བཅས་རྟོག་མཐའ་ཟད། །དེ་ཚེ་འཁྲུལ་སྣང་ལོངས་སྐུར་ཟད། །ལོངས་སྐུ་ཉིད་ཀྱང་འཛིན་མེད་པར། །ཀ་དག་ངང་དུ་མྱ་ངན་འདའ། །ཇི་ལྟར་སྔོན་ཐོན་ཉིད་ཀྱི་གཞི། །ཐིམ་ལ་མ་རྨོངས་བུམ་པའི་སྐུ། །ནང་གསལ་ཕྱི་རྒྱ་མ་རལ་བ། །རང་ངོ་ནང་བལྟས་ཐམས་ཅད་མཁྱེན། །རྣམ་པའི་ཡུལ་རྣམས་ཕྱི་རོལ་མཁྱེན། །གདུལ་བྱ་གཟིགས་(༢༡༨)ནས་སྐུ་འགྱེད་དེ། །ངོ་བོ་ཉིད་ཀྱི་ཆོས་སྐུ་ལས། །ལྷུན་གྲུབ་ལོངས་སྐུ་རིགས་ལྔའི་གདངས། །དེ་ལས་སྣ་ཚོགས་སྤྲུལ་པ་ཡིས། །འགྲོ་བའི་དོན་ཀུན་རབ་རྫོགས་ནས། །ཐོག་མའི་ངང་དུ་སླར་ཐིམ་འགྱུར། །དེ་ལྟར་རབ་ཏུ་བརྩོན་པ་ཡིས། །ལོ་དྲུག་ཕུང་པོ་ལྷག་མེད་འགྲུབ། །བརྩོན་འགྲུས་འབྲིང་རྣམས་འདིར་སྤྱོད་ནས། །ཆོས་ཉིད་བར་དོར་མྱ་ངན་འདའ། །དེ་ཡང་སྐྱེ་གནས་བར་མ་དོར། །དམ་པའི་དྲུང་དུ་སེམས་ཐག་བཅད། །དང་པོར་ཐོས་པས་ཐག་བཅད་དེ། །ཅིར་སྣང་ཡེ་ཤེས་ལྷུན་གྲུབ་གདངས། །བྱུང་ཚོར་རྣམ་རྟོག་ཡེ་ཤེས་དངོས། །ཡིན་མིན་རོལ་པར་ངང་གཅིག་སྟེ། །གཞན་སྣང་མེད་དེ་རང་སྣང་དངོས། །ཐམས་ཅད་ཡེ་ཡིན་ཡེ་ཤར་དུ། །སྣང་སེམས་ལྟ་བས་ཐག་བཅད་ནས། །བར་དུ་དེ་ཉིད་འདི་ལྟར་བསྒོམ། །ཉིན་དུས་ཆོས་ཉིད་བར་དོ་ལ། །ལྷུན་གྲུབ་འོད་ལྔའི་རྩལ་སྤྱོད་བྱ། །འཇུག་དང་ཤེས་པ་གྲོལ་བའི་གནད། །རྣལ་འབྱོར་པ་ཡིས་ཤེས་པར་བྱ། །ཉལ་དུས་དབང་པོའི་འགགས་ཚུལ་དང་། །བར་དོའི་གདམས་པ་དྲན་པར་བྱ། །གཉིད་དུས་འོད་གསལ་སེམས་ཉིད་ལ། །གོམས་པས་གདོད་མའི་ངོ་སྤྲོད་དྲན། །རྨི་ལམ་བར་དོའི་འཆར་ཚུལ་དུ། །ངོས་གཟུང་ཡང་ཡང་རྩལ་སྦྱང་བྱ། །སད་དུས་སྔར་བཞིན་གསལ་གདབ་བོ། །ཐ་མར་དེ་ཉིད་གོམས་པ་ཡིས། །དུས་ཀུན་བར་དོ་དྲན་པ་དང་། །ཕྱོགས་བཞི་གསུམ་གཉིས་མདུན་ངོས་ཙམ། །འོད་ཀྱི་སྣང་བས་ཁྱབ་པ་དང་། །སེམས་ལ་དགག་སྒྲུབ་རྣམ་རྟོག་ཆུང་། །འཁྲུལ་པའི་རྨི་ལམ་རྒྱུན་ཆད་དང་། །ཅིར་སྣང་གང་ཤར་འཛིན་པ་མེད། །གར་གཏད་ཏིང་འཛིན་ཤེས་པ་གནས། །རྩ་བྲལ་ཀ་དག་རྟོགས་པར་ལྡན། །དེ་ལྟར་གོམས་པའི་རྣལ་འབྱོར་པ། །འཆི་ཁའི་བར་དོ་གསལ་གདབ་སྟེ། །རང་རིག་དོན་ལ་སླར་གདབ་བོ། །བླ་མའམ་ནི་རྡོ་རྗེའི་སྤུན། །དམ་ཚིག་ལྡན་པས་དྲན་པ་གསོ། །བར་དོར་འཆར་བའི་རང་སྣང་ལ། །རང་སྣང་ཉིད་དུ་ཤེས་པར་མཛོད། །བདེ་བར་གཤེགས་ཞེས་ལན་གསུམ་བརྗོད། །ས་ཆུ་མེ་རླུང་འབྱུང་བ་བཞི། །རང་རང་ལ་ནི་ཐིམ་དུས་སུ། །ཤེས་པ་མིག་ནས་མཁའ་ལ་བལྟ། །(༢༡༩)སྔར་གྱི་གདམས་པ་དྲན་པར་བྱ། །རྣམ་ཤེས་ནམ་མཁའི་ངང་དུ་ཐིམ། །དེ་ཚེ་སེམས་རིག་དབུགས་དང་བྲལ། །རིག་གདངས་རྟ་ཡང་ནམ་མཁར་ཡལ། །ནང་དབུགས་ཆད་དེ་ནམ་མཁའ་འདྲ། །འཛིན་པའི་སེམས་ནུབ་གཟུང་བ་ཐིམ། །ཕྲ་རགས་རྣམ་རྟོག་རང་ནུབ་སྟེ། །ནམ་མཁའ་འོད་གསལ་ཐིམ་པའི་ཚེ། །རང་བཞིན་གདོད་མའི་འོད་གསལ་ནི། །ཀ་དག་ནམ་མཁའ་འདྲ་བ་ལ། །ལྷུན་གྲུབ་ཉི་ཟླ་གཟའ་སྐར་ལྟར། །ནམ་མཁའ་ཁྱབ་པའི་སྣང་བ་འཆར། །ལ་ལ་འདི་ནས་གྲོལ་བ་ཡོད། །འོད་གསལ་ཟུང་འཇུག་ཐིམ་པའི་ཚེ། །ཚོམ་བུའི་དཀྱིལ་འཁོར་སྣང་བ་སྟེ། །སྒྲ་འོད་ཟེར་དུ་འཁྲིགས་པ་དང་། །ཁྲོ་བོའི་དཀྱིལ་འཁོར་མངོན་པར་སྣང་། །རང་སྣང་ཤེས་པས་གྲོལ་བ་ཡིན། །དེ་ནས་ཞི་བའི་དཀྱིལ་འཁོར་ནི། །རྣམ་སྣང་མི་བསྐྱོད་རིན་ཆེན་འབྱུང་། །སྣང་མཐའ་དོན་ཡོད་གྲུབ་པ་སྟེ། །སོ་སོའི་ཡབ་ཡུམ་སེམས་དཔའ་དང་། །སེམས་མ་སྒོ་མའི་རང་བཞིན་རྣམས། །ཞག་ལྔར་རིམ་གྱིས་འཆར་བ་ཡིན། །དེ་ཚེ་རང་ལུས་འོད་གསལ་གྱི། །སྙིང་ག་ནས་ནི་ཟེར་ཐག་བྱུང་། །འོད་ལྔའི་ཚོམ་བུའི་ཐུགས་ཀར་འབྲེལ། །རིག་པ་འོད་ལ་འཇུག་པ་སྟེ། །སྣང་བ་དེ་ཀུན་རང་ཡིན་པས། །དཔག་ཆེན་མདའ་ཡི་གདམས་ངག་ནི། །ཚོམ་བུའི་ཐུགས་ཀར་རང་རིག་འཕངས། །འདྲེས་པས་མི་རྟོག་ཏིང་འཛིན་འབྱུང་། །དེ་ལ་སེམས་གཟུང་རང་ས་ཟིན། །སྐད་ཅིག་གསུམ་ལ་གྲོལ་བ་ཡིན། །སྤྲུལ་པ་བཀྱེ་ནས་དོན་བྱེད་དོ། །དེ་ནས་གདོད་མར་རབ་ཐིམ་གྱུར། །དེ་ལྟར་མ་གྱུར་རྣལ་འབྱོར་པ། །སྣང་བ་དེ་ཀུན་ཟེར་ཐག་ལ། །འདུས་ནས་རང་ལ་ཐིམ་པ་ནི། །འོད་ནི་རིག་པར་འཇུག་པ་སྟེ། །དེ་ཚེ་མ་པང་བུ་འཇུག་སྟེ། །གདམས་ངག་འདི་ལྟར་དྲན་པར་བྱ། །རང་ཤར་རང་སྣང་རང་ལ་ཐིམ། །དེ་ཉིད་རང་ལ་སེམས་བཟུང་སྟེ། །མི་རྟོག་ཏིང་འཛིན་མཉམ་གཞག་པས། །རང་གྲོལ་གཞན་སྣང་སྤྲུལ་པ་འགྱེད། །ཀ་དག་ངང་དུ་མྱ་ངན་འདའ། །གདོད་མའི་ས་ལ་མཐར་ཕྱིན་ནོ། །དེ་ལ་ངེས་པ་མ་རྙེད་ན། །ཟུང་འཇུག་ཡེ་ཤེས་ལ་ཐིམ་ཚེ། །ཡེ་ཤེས་བཞི་སྦྱོར་སྣང་བ་འཆར། །སྙིང་ག་ནས་ནི་ནམ་མཁའ་ལ། །(༢༢༠)འོད་ཀྱི་ཉི་ཞུར་རྩེགས་མ་ནི། །མཐིང་ག་དཀར་སེར་དམར་བའི་མདངས། །ཁ་དོག་མཐུན་པའི་ཐིག་ལེས་བརྒྱན། །དེ་ཚེ་རང་སྣང་མི་འགྱུར་བ། །གསེར་གྱི་ཐུར་མའི་གདམས་ངག་ནི། །འོད་དང་ཐིག་ལེར་སེམས་བཟུང་བས། །ཀ་དག་ས་ལ་བཙན་ས་ཟིན། །དེ་ལ་ངེས་པ་མ་རྙེད་ན། །ཡེ་ཤེས་ལྷུན་གྲུབ་ཐིམ་པའི་ཚེ། །ཕྱོགས་རྣམས་སྟོན་ཀའི་ནམ་མཁའ་ལྟར། །སྣང་བ་མུ་ཁྱུད་ལྔ་དང་ལྡན། །ཀུན་གྱི་ནང་ན་ལྷ་ཡི་སྐུ། །ཞི་དང་ཁྲོ་ཚུལ་དཔག་མེད་སྣང་། །ཡར་ལ་ཀ་དག་ཟད་ས་མཐོང་། །མར་ལ་རིགས་དྲུག་སྣང་བ་མཐོང་། །བར་དུ་འཇའ་ཚོན་ལྷ་སྐུ་མཐོང་། །དེ་ཚེ་རང་སྣང་རང་རིག་པས། །དཔག་ཆེན་མདའ་ལྟར་ཕྱིར་མི་ལྡོག །འཆར་ཚུལ་བརྒྱད་དང་མངོན་ཤེས་དྲུག །རྗེས་དྲན་དྲུག་གིས་མཐར་ཕྱིན་ནི། །རོལ་པའི་རྩལ་དུ་ཐིམ་ཚུལ་བརྒྱད། །དེ་ལྟར་རིམ་གྱིས་སྔ་ཕྱི་རུ། །གྲོལ་བ་སྔ་ཕྱི་གོམས་པས་གཟུང་། །སྐད་ཅིག་དང་པོར་རང་ངོ་ཤེས། །གཉིས་པར་མི་རྟོག་བསམ་གཏན་སྐྱེ། །གསུམ་པར་གཞི་ཐོག་གྲོལ་བ་ཡིན། །འདི་ལ་དབང་པོའི་ཁྱད་པར་གྱིས། །ཕྱོགས་བཞི་འོད་སྣང་རྟོགས་པར་ལྡན། །བཅོ་ལྔའི་ཉི་ཟླ་འཆར་ནུབ་བཞིན། །དབུགས་ཆད་གྲོལ་བ་དུས་མཉམ་མོ། །འབྲིང་རྣམས་འོད་གསལ་ཟུང་འཇུག་གྲོལ། །ཐ་མ་ཡེ་ཤེས་ལྷུན་གྲུབ་ལ། །ངེས་པ་རྙེད་ནས་གྲོལ་བ་ཡིན། །ཐ་མལ་སྤྲུལ་པ་མི་འབྱིན་ཞེས། །རྒྱུད་དང་མན་ངག་དག་ལས་གསུངས། །ཡེ་ཤེས་ལྔ་སྦྱོར་མི་སྣང་བ། །བྱ་བ་གྲུབ་པའི་ཡེ་ཤེས་ནི། །ཀ་དག་གྲོལ་གཞི་ལྗང་གུར་གནས། །དེ་ཉིད་མི་སྣང་དེ་ཡི་ཕྱིར། །ཡེ་ཤེས་བཞི་སྦྱོར་སྣང་བར་འདོད། །དེ་འང་བར་དོའི་སྣང་བ་ལ། །སྐད་ཅིག་རང་ངོ་ཤེས་ཙམ་གྱིས། །གྲོལ་བ་གཞི་སྣང་མཐོང་བ་དང་། །འོད་ལུས་ཡིན་པར་ཤིན་ཏུ་སླ། །དཔེར་ན་རྨི་ལམ་འཇིགས་སྐྲག་ལ། །རྨི་ལམ་ཤེས་པས་སྐད་ཅིག་ལ། །སྣང་བ་རང་ལོག་བདེ་བ་བཞིན། །གདོད་མའི་གཞི་ལ་སྐད་ཅིག་གིས། །རང་གནས་ཀ་དག་ཆེན་པོར་གྲུབ། །དབང་པོ་འབྲིང་གི་གྲོལ་ལུགས་སོ། །ཐ་མ་རང་བཞིན་སྤྲུལ་སྐུའི་ཞིང་། །བར་དོ་མེད་པར་གྲོལ་(༢༢༡)བ་ནི། །ཚེ་འདིར་འོད་གསལ་གོམས་གྱུར་ནས། །ཤེས་རབ་རྟོགས་པར་མི་ལྡན་པས། །རྨི་ལམ་བཟང་བར་གྱུར་པ་དེ། །སྣང་སྲིད་རང་བཞིན་སྤྲུལ་སྐུའི་ཞིང་། །སེམས་ཅན་ལྷ་དང་ལྷ་མོ་རུ། །འགྲོ་འཆག་ཉལ་སད་ལྡང་བ་དང་། །སྤྱོད་ལམ་ཀུན་ཏུ་དྲན་པར་བྱ། །ཁྱད་པར་མིག་ནས་རང་རིག་ནི། །སྐབས་སུ་སྤྲུལ་སྐུའི་སྟོན་པ་ཉིད། །བསམ་པའི་ཐུགས་ཀར་འཕངས་པར་བྱ། །འཆི་དུས་རིག་པ་མིག་ནས་ནི། །སྤྲུལ་སྐུའི་ཞིང་དྲན་དེ་རུ་འཕངས། །དེ་ལ་གོམས་པ་མཆོག་གྱུར་པས། །དབུགས་ཆད་མངོན་དགར་སྐྱེ་བ་མཉམ། །འབྲིང་དང་ཐ་མའི་སྤྱོད་ཡུལ་ནི། །བར་དོ་རྣམས་ཀྱང་རིམ་ཤར་ནས། །ལྷུན་གྲུབ་ནུབ་དང་དུས་མཉམ་དུ། །ཆོས་ཉིད་བདེན་པའི་བྱིན་རླབས་ཀྱིས། །མངོན་དགའི་ཞིང་དུ་རྫུས་ཏེ་སྐྱེ། །ཐ་མས་སྲིད་པའི་བར་དོ་ཉིད། །ཉུག་ཙམ་ཤར་ནས་མངོན་དགར་སྐྱེ། །ཡང་མཐས་སྲིད་པའི་བར་དོ་རུ། །རིང་ཞིག་ལོན་ནས་རྨི་ལམ་བཞིན། །མངོན་དགའི་ཞིང་དུ་སྐྱེ་བ་ཡིན། །དེ་ཚེ་མངོན་དགའ་རྡོ་རྗེའི་ཞིང་། །རྡོ་རྗེ་སེམས་དཔའི་ཞལ་མཐོང་ནས། །ཆོས་ཐོས་ཞེ་སྡང་ཉིད་དག་སྟེ། །མེ་ལོང་ཡེ་ཤེས་དེ་ཡིས་ཐོབ། །དེ་ནས་བར་དོ་མི་སྣང་བར། །སྐད་ཅིག་རྫུས་ཏེ་དཔལ་དང་ལྡན། །རིན་ཆེན་འབྱུང་ལྡན་དབང་བསྐུར་ནས། །ང་རྒྱལ་དག་ཅིང་མཉམ་ཉིད་རྟོགས། །དེ་ནས་པདྨ་བརྩེགས་པ་རུ། །སྣང་བ་མཐའ་ཡས་ལུང་བསྟན་ནས། །འདོད་ཆགས་དག་ཅིང་སོར་རྟོགས་ཐོབ། །ལས་རབ་གྲུབ་པར་དབུགས་ཕྱུང་ནས། །ཕྲག་དོག་དག་བྱེད་བྱ་བ་གྲུབ། །ཁྲོ་བོའི་ཞིང་མཐོང་སྐད་ཅིག་ལ། །བདེན་པ་མཐོང་ནས་རྣམ་པར་གྲོལ། །ལྷུན་གྲུབ་ཀ་དག་ཉིད་ཐིམ་ནས། །ཀ་དག་ནང་གསལ་ཆོས་སྐུ་ལ། །རང་ས་ཟིན་ཏེ་འདུ་འབྲལ་མེད། །གདུལ་བྱ་གཟིགས་ནས་སྤྲུལ་པ་འགྱེད། །དེ་ཡང་ལྷུན་གྱིས་གྲུབ་པར་འབྱུང་། །གདུལ་བྱ་ཟད་ནས་སྤྲུལ་པ་ཡང་། །མི་གནས་གདོད་མའི་ངང་དུ་ཐིམ། །དེ་ལྟར་སངས་རྒྱས་ཆོས་རྣམས་ཀྱང་། །འབད་མེད་རང་སར་གྲོལ་བ་ཡིན། །ཇི་ལྟ་ཇི་ལྟར་སེམས་ཅན་གྱི། །བྱེ་བྲག་(༢༢༢)བསམ་གྱིས་མི་ཁྱབ་ལྟར། །དེ་ལྟ་དེ་ལྟར་སངས་རྒྱས་ཀྱི། །གྲོལ་བའི་ཆོས་ཀྱང་བསམ་མི་ཁྱབ། །ལ་ལར་ཐུན་མོང་རྒྱུ་འབྲས་ཏེ། །གྲངས་མེད་བསྐལ་པས་གྲོལ་བ་དང་། །ལ་ལར་འབྲས་བུ་ལམ་བྱེད་པས། །བཅུ་དྲུག་སྐྱེ་བས་གྲོལ་བ་དང་། །ལ་ལ་ཚེ་གཅིག་གྲོལ་ལོ་ཞེས། །ཕ་མ་གཉིས་སུ་མེད་རྒྱུད་དུ། །གསུངས་ཤིང་བསྟན་ཡང་དགོངས་དོན་ཙམ། །སངས་རྒྱས་སྙིང་པོ་འོད་གསལ་ཞིང་། །ཚེ་འདིར་རྡོས་བཅས་མི་ནུབ་པས། །ཡང་དག་མ་ཡིན་ངེས་དོན་མིན། །འདིར་ནི་ཀུན་ཏུ་བཟང་པོ་ཡིས། །མཆོག་གསང་ཡང་རབ་དབང་པོ་ལ། །ཆོས་ཀྱི་སྐུ་ཡི་བསྟན་པ་ནི། །བླ་མེད་རྡོ་རྗེ་སྙིང་པོ་གསུངས། །དེ་ཡིས་ཚེ་འདིའི་ལོངས་སྐུའི་ཞིང་། །བགྲོད་ནས་ཆོས་སྐུ་མཐར་ཕྱིན་འགྱུར། །གཞན་རྣམས་སྤྲུལ་སྐུའི་བསྟན་པ་སྟེ། །སེམས་ལས་སངས་རྒྱས་གྲུབ་པར་རློམ། །འདིར་ནི་སེམས་ལ་སངས་རྒྱས་མེད། །ཡེ་ཤེས་འོད་གསལ་ལམ་བྱེད་པས། །གདོད་མའི་གཞི་ལ་མཐར་ཕྱིན་ན། །གཞི་ལམ་འབྲས་བུ་འོད་གསལ་ཏེ། །སེམས་ནི་རིག་གདངས་རླུང་རྟར་ཞོན། །སྒྱུ་ལུས་ཞིག་ཚེ་འདོར་བར་འདོད། །དེ་ཕྱིར་ཀུན་དང་འདི་མི་མཚུངས། །དམ་པའི་སྙིང་གི་སྙིང་པོའི་ལམ། །སྙིང་ཏིག་གསང་བའི་མན་ངག་འདི། །ཤིན་ཏུ་ཡང་ཟབ་ཀུན་གྱི་རྩེ། །གྲོལ་བ་རྣམས་ཀྱི་མཐར་ཕྱིན་ནོ། །རྒྱལ་སྲས་པདྨའི་བཀའ་དྲིན་གྱིས། །དྲི་མེད་འོད་ཟེར་རྣལ་འབྱོར་པས། །སྟོན་གསུམ་གངས་རི་ཐོད་དཀར་དུ། །མན་ངག་གསེར་གྱི་སྒྲོམ་བུ་བཀོད། །དགེ་བས་སྲིད་གསུམ་སེམས་ཅན་ཀུན། །འོད་གསལ་ཞིང་དུ་གྲོལ་བར་ཤོག །མན་ངག་རིན་པོ་ཆེ་གསེར་གྱི་སྒྲོམ་བུ་ཞེས་བྱ་བ། དཔལ་ཨོ་རྒྱན་གྱི་མཁས་པ་ཆེན་པོ་རང་བྱུང་པདྨའི་བྱིན་རླབས་ལས། ལྷུན་གྱིས་གྲུབ་པའི་རྣལ་འབྱོར་པ་མང་དུ་ཐོས་པའི་ནང་ནས། རྒྱལ་མཚན་གྱི་རྩེ་མོ་བཞིན་མངོན་པར་མཐོ་བའི་པདྨ་ལས་འབྲེལ་རྩལ་གྱིས། གངས་རི་ཐོད་དཀར་གྱི་མགུལ་དུ་སྟོན་གསུམ་མེ་ཏོག་དང་འབྲས་བུ་སྨིན་པའི་ཚེ་མཛད་པ་རྫོགས་སོ། །དགེ་ཞིང་བཀྲ་ཤིས་པ་ལགས་སོ།། །།

ཚིག་དོན་རིན་པོ་ཆེའི་བང་མཛོད།

༄༅། །ཚིག་དོན་རིན་པོ་ཆེའི་བང་མཛོད་བཞུགས་སོ། །དགེའོ། །ཤོག་སྐྱའི་སྐོར།

༄༅། །རྒྱ་གར་སྐད་དུ། རད་ན་སམ་བྷ་ཏྲ་ཀོ་ཤ་ནཱ་མ། བོད་སྐད་དུ། ཚིག་དོན་རིན་པོ་ཆེའི་བང་མཛོད་ཅེས་བྱ་བ། དཔལ་རྡོ་རྗེའི་འཆང་ཆེན་པོ་ལ་ཕྱག་འཚལ་ལོ། །ཤེས་བྱའི་དཀྱིལ་འཁོར་མ་ལུས་རབ་གཟིགས་ཤིང་། །སྐུ་གསུམ་མཛད་པའི་ཕྲིན་ལས་བཟང་པོ་ཅན། །ཀུན་བཟང་རྒྱལ་བ་ལོངས་སྐུ་རིགས་ལྔའི་ཚོགས། །རིག་འཛིན་བླ་མ་རྣམས་ལ་ཕྱག་འཚལ་ལོ། །བདག་བློའི་རྣམ་དཔྱོད་ལྡེ་མིག་བཟང་པོ་ཡིས། །མཁའ་འགྲོ་སྙིང་ཏིག་རིན་ཆེན་སྒོ་ཕྱེ་སྟེ། །ཚིག་དོན་རྣམ་བཀྲའི་འབྱོར་ཚོགས་དཔག་མེད་ཀྱིས། །སྐལ་ལྡན་སྐྱེ་བོའི་ཡིད་རབ་ཚིམ་པར་བྱ། །

དེ་ལ་འཁོར་འདས་གཉིས་ཀྱི་སྔོན་རོལ་ན། གཤིས་ཀྱི་གནས་ལུགས་བསྟན་པ་དང་གཅིག །ཀུན་ཏུ་བཟང་པོའི་གྲོལ་ཚུལ་དང་གཉིས། ཁམས་གསུམ་འཁོར་བའི་འཁྲུལ་ཚུལ་དང་གསུམ། སེམས་ཅན་ལ་ཡེ་ཤེས་ཀྱི་གནས་ཚུལ་དང་བཞི། ལམ་དང་སྒོ་གང་ནས་སྣང་ཚུལ་དང་ལྔ། ཡུལ་གང་ལ་སྣང་ཚུལ་དང་དྲུག །ཚེ་འདིར་ཇི་ལྟར་ཉམས་སུ་བླང་ཚུལ་དང་བདུན། བར་དོར་ཇི་ལྟར་འཆར་ཚུལ་དང་བརྒྱད། རང་བཞིན་སྤྲུལ་སྐུའི་སྣང་ཚུལ་དང་དགུ། གྲོལ་ས་གང་དུ་འབྲས་བུ་ཐོབ་ཚུལ་དང་བཅུ་ལས། དང་པོ་ནི་སྟོང་གསལ་འདུས་མ་བྱས་པའི་ཀ་དག་ནམ་མཁའ་རྣམ་པར་དག་པ་ལྟ་བུའི་ངང་ནས། འོད་གསལ་ལྷུན་གྱིས་གྲུབ་པའི་སྣང་བ། ཉི་ཟླ་གཟའ་སྐར་ལྟར་ནང་གསལ་ཡེ་ཤེས་ཀྱི་འོད་ལྔ་མ་འགགས་ཤིང་། ཐུགས་རྗེ་རིག་པའི་སྙིང་པོ་ཅན་དུ་བཞུགས་ཏེ། རྩ་བའི་རྒྱུད་རིག་པ་རང་ཤར་ལས། གདོད་མ་ངོ་བོ་ཆོས་ཉིད་ཀྱིས་དག་པའི་གནས་ལུགས་འདི་ལྟ་སྟེ། རྒྱ་མ་ཆད་པའི་ཡེ་ཤེས་ལྷུན་གྱིས་གྲུབ་པའི་སངས་རྒྱས་སྤྲོས་པ་དང་བྲལ་བའི་ཆོས་ཉིད་མཐའ་དང་བྲལ་བའི་རིག་པ། དག་པ་ཆེན་པོའི་སྣང་བ། ཕྱོགས་ལྷུང་མེད་པའི་ལྟ་བ། ཡངས་པ། གསལ་བ། མི་འགྱུར་བ། ཡེ་ཤེས་མི་འགག་པ། མི་འཁྲུལ་པའི་ཆོས་ཉིད། ཕྱི་རྒྱ་མ་རལ་བ། ནང་ཡེ་ཤེས་ཀྱི་འོད་ལྔ་མ་འགག་པ། སྐུ་དང་ཡེ་ཤེས་ཀྱི་ངོ་བོར་བཞུགས་སོ་ཞེས་པ་དང་། སྒྲོན་(༢༢༤)མ་འབར་བ་ལས། གདོད་མའི་ཀ་དག་ཆེན་པོ་ལ། །རང་བཞིན་ཉིད་ནི་འདི་ལྟ་བུ། །སུས་ཀྱང་མ་བྱས་རང་གསལ་བར། །ཡེ་ཉིད་ནས་ནི་རང་བཞིན་ནོ། །ཞེས་སོ། །དེ་ཡང་ངོ་བོ་རང་བཞིན་ཐུགས་རྗེ་གསུམ་དུ་བཞུགས་ཏེ། ཉི་ཟླ་ཁ་སྦྱོར་ལས། གཞི་གནས་ཀྱི་ཡེ་ཤེས་ནི་གསུམ་སྟེ། ངོ་བོ་ཀ་དག་གི་ཡེ་ཤེས་དང་། རང་བཞིན་ལྷུན་གྲུབ་ཀྱི་ཡེ་ཤེས་དང་། ཐུགས་རྗེ་རང་སྣང་གི་ཡེ་ཤེས་སོ། །ཞེས་སོ། །ཡེ་ཤེས་གསུམ་པོ་དེའི་ངོ་བོ་ནི་ཀློང་གསལ་ལས། ངོ་བོ་ཀ་དག་ཡེ་ཤེས་ནི། །མ་རིག་རྟོག་པ་ཀུན་དང་བྲལ། །རང་བཞིན་ལྷུན་གྲུབ་ཡེ་ཤེས་ནི། །སྟོང་གསལ་རང་མདངས་ཉིད་དུ་གནས། །ཐུགས་རྗེས་ཀུན་ཁྱབ་ཡེ་ཤེས་ནི། །འགག་མེད་སྣང་སྟོང་ཉིད་དུ་གནས། །ཞེས་པ་དང་། ཀུན་ཏུ་བཟང་པོ་ཐུགས་ཀྱི་མེ་ལོང་ལས། ཆོས་སྐུའི་ཡེ་ཤེས་བསམ་འདས་བརྗོད་མེད་ངང་། །ལོངས་སྐུའི་ཡེ་ཤེས་ཁ་དོག་མ་འདྲེས་གསལ། །སྤྲུལ་སྐུའི་ཡེ་ཤེས་ཅིར་ཡང་སྒྱུར་དུ་བཏུབ། །ཅེས་སོ། །དེའང་ནང་གསལ་ཡེ་ཤེས་ཀྱི་འོད་ལྔ་ལ་ཤེས་རབ་སྲོག་ཏུ་གྱུར་པའི་རླུང་ཡན་ལག་བཞི་ལྡན་ཐུགས་རྗེ་འཆར་བྱེད་ཀྱི་རྣམ་པར་གནས་ཏེ། ལུང་ཡེ་ཤེས་མར་མེའི་རྒྱུད་ལས། ཡན་ལག་རླུང་བཞི་མེ་སྟག་ཟེར་བཞིན་དུ། །རིག་པའི་ཀློང་ན་མ་འགག་གསལ་བའོ། །ཞེས་པས། རྩ་བ་ཐུགས་རྗེ་རིག་པའི་ཆ་ནི། སྲོག་རླུང་རྩལ་སྟོབས་སྐྱོན་ཡོན་སྣ་ཚོགས་ཀྱི་འཆར་གཞི་མ་འགགས་པ་ལས། གྱེན་དུ་རྒྱུ་ཤེས་རབ་ཀྱི་རྟ་རིག་པ་དང་། ཐུར་སེལ་ཤེས་རབ་ཀྱི་ཟེར་གདངས་འོད་ལྔ་དང་། མེ་དང་མཉམ་པ་སྨིན་པར་བྱེད་པའི་སྟོབས་ཅན་དང་། ཁྱབ་བྱེད་རྫོགས་པར་བྱེད་པའི་སྟོབས་ཅན་ཏེ། དབྱིངས་སུ་ནི་མ་འཕྲོས། འཕྲོ་གཞི་མ་འགགས་པའི་སྙིང་པོར་གནས་པའོ། །དེ་ལྟར་ན་ངོ་བོ་རང་བཞིན་ཐུགས་རྗེ་གསུམ་ཐ་དད་མེད་དེ། ཐལ་འགྱུར་ལས། ཡེ་ཤེས་རང་ངོར་གནས་པ་ལས། །གསུམ་གྱི་ཚུལ་དུ་དབྱེར་མེད་དོ། །རྟག་ཆད་གཉིས་ཀྱི་མཐའ་ལས་འདས། །མཐའ་གཞིའི་དྲི་མ་རང་སངས་ཉིད། །ཅེས་སོ། །

གཉིས་པ་ནི་གདོད་མའི་(༢༢༥)གཞི་འོད་ཀྱི་ཁང་པ་ཅན། ཆོས་ཉིད་དག་པའི་ཡེ་གདངས་ཆེན་པོ་ལས། ཡེ་ཤེས་ཀྱི་རླུང་ཐུགས་རྗེ་རིག་པའི་སྙིང་པོ་ཅན་གཡོས་པས། ནང་གསལ་ཕྱིར་ཤར་ཏེ། ཀ་དག་གི་ནམ་མཁའ་ལ་ལྷུན་གྲུབ་སྐུ་དང་ཡེ་ཤེས་ཀྱི་ཉི་ཟླ་གཟའ་སྐར་དང་བཅས་པ། ཤེལ་འོད་ཕྱིར་སྣང་བ་ལྟར་སྣང་ལ། ཡུལ་འོད་གསལ་གྱི་སྣང་བ་བྱད་དང་མེ་ལོང་གི་གཟུགས་བརྙན་ལྟར་རང་སྣང་རང་གདངས་ཆེན་པོར། ཐུགས་རྗེ་རིག་པའི་ཡེ་ཤེས་ཀྱི་རང་ངོ་ཤེས་པའི་སྐད་ཅིག་མ་གཅིག་གིས་བྱེ་བྲག་ཕྱེད་དེ། སྐད་ཅིག་མ་ཕྱི་མ་དེ་ལ་དང་པོའི་གཞི་ཐོག་ཉིད་དུ་སངས་རྒྱས་ཏེ། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་སོ། །དེའང་སྐད་ཅིག་མ་ལ་འགྱུ་བ་རང་ཐོག་གདོད་མའི་གཞིར་ཆོད་པ་ཉིད། ཐལ་འགྱུར་ལས། སངས་རྒྱས་འཁྲུལ་པར་མ་གྱུར་པས། །གཞི་ནས་འཕགས་པའི་དབང་པོ་ཡིས། །རང་སྣང་རང་བཞིན་མེད་ཤེས་པས། །འགྱུ་བ་རང་ཐོག་ཆོད་པའོ། །ཞེས་སོ། །དེའི་ཚེ་སྐད་ཅིག་དང་པོར་རིག་པས་མ་རིག་པའི་རྩ་བ་ཆད་དེ། ནང་གསལ་ཉིད་དུ་ལྷུན་གྱིས་གྲུབ་པ་ནི། ཡེ་ཤེས་ནམ་མཁའ་མཉམ་རྒྱུད་ལས། དེ་ཚེ་ཀུན་བཟང་ཆོས་དྲུག་གིས། །གཞི་ཤེས་མ་རིག་དྲུག་བཅོམ་ནས། །ཉུག་ཙམ་ལས་ནི་རིག་ཙམ་སྟོངས། །རིག་ཙམ་བྱུང་བས་རིག་འགྲིབ་བརླག །སལ་གྱིས་གསལ་ལས་མུན་ངོས་སངས། །ཝལ་གྱིས་བྱུང་བས་འཐིབས་པ་མེད། །སྒྲོ་སྐུར་བྲལ་བས་མ་རིག་དག །འགྱུར་བ་མེད་པས་ནམ་མཁའ་འདྲ། །དེ་ཡང་རྡོ་རྗེ་སེམས་དཔའ་ཉོན། །འཁྲུལ་པ་མ་རིག་ལོག་བཅོམ་པས། །ལུང་མ་བསྟན་པར་རང་བརླག་སྟོངས། །བེམས་རིག་ཕྱེད་པས་གཞི་དང་འཕྲད། །དེ་ཕྱིར་མ་རིག་མུན་པ་སངས། །རི་བོ་ཏ་ལར་ཉི་ཤར་འདྲ། །ཞེས་སོ། །

གསུམ་པ་ནི་དེ་ལྟར་གཞི་གདོད་མའི་ངང་ལས་རང་གདངས་ཕྱིར་ཤར་བའི་ཚེ། རང་བཞིན་འོད་ལྔའི་ཡུལ་ལ། ཐུགས་རྗེ་རིག་པའི་ཆས་ཡུལ་དེ་ཁ་དོག་གིས་མཚན་མར་གཟུང་སྟེ། དཔྱོད་བྱེད་འཛིན་པ་འཕྲོ་མཐུད་པ་ལས། ངོ་བོས་(༢༢༦)གཏི་མུག་གི་ཆ་རང་ངོ་མ་ཤེས་པས། རང་བཞིན་འོད་དུ་སྣང་བ་ལ་ཐུགས་རྗེས་སེམས་སུ་འཁྲུལ་པས། ལུས་དང་ཕྱི་རོལ་གྱི་ཡུལ་དེ་རྡོས་བཅས་དང་རྟོག་ཚོགས་ཀྱི་ཕུང་པོར་གྲུབ་སྟེ་ཀློང་གསལ་ལས། ཡེ་ཤེས་ཉིད་ལས་མ་རིག་འཁྲུལ། །ཡེ་ཤེས་ཁ་དོག་འབྱུང་བ་ལྔ། །འབྲལ་བ་མེད་དེ་མ་རིག་འཁྲུལ། །ཅེས་སོ། །དེའང་འཁོར་འདས་གཉིས་རྒྱུ་ཡེ་ཤེས་སུ་གཅིག་པ་ལས། རྐྱེན་རིག་མ་རིག་གིས་ཐ་དད་དུ་སྣང་བ་ནི་ལག་པའི་མདུན་རྒྱབ་ཙམ་མོ། །ཤེལ་གཅིག་ཉིད་དཀར་ནག་གི་ཡུལ་གཉིས་ཀྱིས་སོ་སོར་སྣང་བ་བཞིན་ནོ། །དེའང་ཀློང་གསལ་ལས། ཡེ་ཤེས་མ་རིག་ཡུལ་ལ་གཟུང་། །དེར་འཛིན་རླུང་སེམས་འདུས་པ་ལས། །འབྱུང་བ་བཞི་ཡི་སྦུབས་སུ་ཚུད། །དེར་ཚུད་འབྱུང་བའི་སྐྱེ་འཇིག་ལས། །ཉོན་མོངས་ཕུང་པོ་ལྔ་ལྔ་གྲུབ། །ལྔ་འདུས་མཚན་མ་སྦྱོར་བ་ལས། །ཉོན་མོངས་ལྔ་དང་ཡིད་དྲུག་དང་། །ཡེ་ཤེས་ལྔ་ཡི་བདག་ཉིད་དོ། །ཞེས་པས། འོད་ལྔ་ཡུལ་དུ་བཟུང་བས། འགྲོ་དྲུག་སོ་སོའི་ལུས་ཡུལ་དང་བཅས་པ་ལས། གཟུགས་མེད་ཡིད་ཀྱི་ལུས། མིང་བཞིའི་ཕུང་པོ་ལ་བརྟེན་པ་དང་། གཟུགས་ཁམས་འོད་ཀྱི་ལུས་ཁ་དོག་ལྔ་ལྡན་ལ་བརྟེན་པ་དང་། འདོད་ཁམས་ཤ་ཁྲག་གི་ལུས་རྡོས་བཅས་ཕུང་པོ་ལ་བརྟེན་པའོ། །ཁྱད་པར་དུ་འདོད་པ་ཕ་མའི་ཐིག་ལེ་དཀར་དམར་ལས། ཞག་བདུན་ཚན་བདུན་དུ་མེར་མེར་པོ་དང་། ནུར་ནུར་པོ་དང་། ལྟར་ལྟར་པོ་དང་། འཁྲང་འགྱུར་དང་། ཁྱབ་འཇུག་ཉའི་རྣམ་པ་ལྟ་བུ་དང་། རུས་སྦལ་གྱི་རྣམ་པ་ལྟ་བུ་ནས། རིམ་གྱིས་ལུས་གྲུབ་སྟེ། ཟླ་བ་བཅུ་ན་སྐྱེས་ཏེ། དར་ལ་བབས་པ་དང་། ན་བ་དང་། རྒས་པ་དང་། འཆི་བའི་སྡུག་བསྔལ་ལ་སོགས་པས་འགྲོ་བ་སོ་སོར་འཁོར་རོ། །

བཞི་པ་ནི་དེ་ལྟར་འཁྲུལ་དུས་ནའང་སངས་རྒྱས་ཀྱི་སྙིང་པོ། སྐུ་དང་ཡེ་ཤེས་ལྔ་ལྡན་དུ་གནས་ཏེ། ཀློང་གསལ་ལས། ཐོག་མ་མཐའ་མ་བར་གསུམ་དུ། །སྐུ་གསུམ་དབྱེ་བ་མེད་པ་རུ། །སེམས་ཅན་ཀུན་གྱི་རྒྱུད་ལ་གནས། །ཞེས་པ་དང་། ཐོག་མའི་རིག་རྩལ་ཡེ་ཤེས་(༢༢༧)ལྔ། །མ་རིག་འཁྲུལ་པས་འབྱུང་བར་གྲུབ། །དེས་ན་ལུས་ནི་སངས་རྒྱས་དངོས། །ཡེ་ཤེས་ཆེན་པོའི་འབྱུང་གནས་ཉིད། །ལུས་ཅན་ཀུན་ལ་བཟང་ངན་མེད། །བདེ་གཤེགས་ངོ་བོ་འགྲོ་ཀུན་ལ། །ཏིལ་ལ་མར་ཁུས་ཁྱབ་བཞིན་གནས། །མ་རིག་གྲོལ་ཚེ་འབྱུང་བའི་ལུས། །ལྷག་མེད་ཡེ་ཤེས་ངང་དུ་བཟློག །སེམས་ཅན་རང་རྒྱུད་རྟོག་ཚོགས་ནི། །བཞི་པཅུ་ཞེ་གཉིས་སངས་རྒྱས་ཏེ། །ཕུང་པོ་འབྱུང་བ་ཡབ་ཡུམ་ལྔ། །དུག་ལྔ་སེར་སྣ་ཐུབ་པ་དྲུག །ཚོགས་བརྒྱད་སེམས་དཔའ་ཡབ་ཡུམ་བརྒྱད། །སྒོ་བཞི་སྒོ་བ་ཡབ་ཡུམ་བཞི། །གཡས་གཡོན་ཉི་མ་ཟླ་བའོ། །ཞེས་པས། ཕུང་པོ་ལྔ་པོ་འདི་ཡབ་ལྔ། འབྱུང་བ་ལྔ་ནི་ཡུམ་ལྔ། རྣམ་ཤེས་ཚོགས་བརྒྱད་སེམས་དཔའ་ཡབ་ཡུམ་བརྒྱད། འབྱུང་བཞི་པསྐྱེད་པའི་སྒོ་བཞི་སྒོ་བ་ཡབ་ཡུམ་བཞི། དུག་ལྔ་སེར་སྣ་དང་དྲུག །ཐུབ་པ་དྲུག་གི་རང་བཞིན་དུ་གནས་སོ། །དེ་ཡང་ཙིཏྟ་རིན་པོ་ཆེའི་སྦུབས་སུ། སྙིང་ག་ཆོས་ཀྱི་འཁོར་ལོ་དང་། སྤྱི་གཙུག་བདེ་ཆེན་གྱི་འཁོར་ལོ་དང་། མགྲིན་པ་ལོངས་སྤྱོད་འཁོར་ལོ་དང་། ལྟེ་བ་སྤྲུལ་པའི་འཁོར་ལོ་དང་། གསང་གནས་བདེ་སྐྱོང་འཁོར་ལོ་ལྔའི་དབུས་ན། རོ་མ་རྐྱང་མ་ཀུན་དྷར་མ་གསུམ་ཀ་བ་ལྟར་གནས་པའི་དབུ་མའི་དབུས་ན་འོད་རྩ་ཤེལ་སྦུག་ཅན། ཕྲ་བར་གནས་པའི་གཡས་གཡོན་རོ་རྐྱང་ལས་ཐིག་ལེ་དཀར་དམར་ཤེལ་སྦུག་ཅན་ནས་དོན་དམ་ཡེ་ཤེས་ཀྱི་ཐིག་ལེ་གནས་པར་བཞེད་དོ། །དེའང་ཤེལ་སྦུག་མའི་འགྲེང་བུ་གཉིས་ཆུའི་སྒྲོན་མར་ཟུག་ཅིང་། རྐྱང་མའི་སྣ་གཉིས་ཀྱང་དབང་པོའི་དྭངས་མ་ལ་ཟུག་གོ། །དེའང་ཐལ་འགྱུར་ལས། རོ་མ་རྐྱང་མ་ཀུན་དྷར་མ། །ཀ་ཏི་ཤེལ་གྱི་སྦུ་གུ་ཅན། །འཁོར་ལོ་ལྔ་ཡི་དབུས་དག་ནས། །དབང་པོའི་སྒོ་ལ་ཟུག་པར་གནས། །ཞེས་སོ། །འཁོར་ལོ་ལྔ་ནས་རྒྱུའི་ཐིག་ལེ་ཡི་གེའི་ཚུལ་དུ་གནས་པ་ལ། འོད་གསལ་གྱི་ཐིག་ལེ་བརྟེན་པ་ནི་སྣུམ་དང་སྡོང་བུ་ལ་མར་མེ་འབར་བ་བཞིན་ནོ། །རྩ་དེ་དག་ཀྱང་གྲངས་ཅན་སྟོང་ཕྲག་བདུན་ཅུ་རྩ་གཉིས། གྲངས་མེད་བ་སྤུའི་གྲངས་དང་མཉམ་པ། (༢༢༨)གཙོ་བོ་གསུམ་མམ་བཞི་ནི་སྙིང་པོའི་ཚུལ་དུ་གནས་སོ། །དེ་དག་ནས་རླུང་ཡང་གྲངས་ཅན་ཉི་ཁྲི་ཆིག་སྟོང་དྲུག་བརྒྱ་རྒྱུ་སྟེ་དེ་ཉིད་ལས། རྩ་ལ་བརྟེན་པའི་རླུང་དག་ནི། །ཉི་ཁྲི་དང་ནི་སྟོང་ཕྲག་གཅིག །དྲུག་བརྒྱ་དག་ཏུ་འགྱུ་བ་ནི། །འགྱུ་བ་ཆེན་པོའི་རླུང་དུ་འདོད། །ཅེས་སོ། །གཙོ་བོ་གྱེན་རྒྱུ་ཐུར་སེལ། མཉམ་གནས་གསུམ་སྟེ། དེ་ཉིད་ལས། གྱེན་དུ་རྒྱུ་དང་ཐུལ་དུ་སེལ། །མཉམ་གནས་དང་ནི་གསུམ་དུ་འདོད། །ཅེས་སོ། །དེ་དག་ཀྱང་ཕོ་མོ་མ་ནིང་གི་རླུང་གསུམ་དུ་གནས་སོ། །ཁྱད་པར་དུ་འོད་གསལ་གྱི་གནས་བཞི་སྟེ། ཀློང་གསལ་ལས། སྙིང་དང་རྩ་དང་དུང་ཁང་དང་། །མིག་དང་བཞི་པཞིའི་གཞལ་ཡས་ན། །ཡེ་ཤེས་ཆེན་པོ་དེ་ན་གནས། །ཞེས་པ་དང་། ནོར་བུ་ཕྲ་བཀོད་ལས། རིན་ཆེན་ཟུར་བརྒྱད་གཞལ་ཡས་དང་། །འགྱུ་བྱེད་རྩ་ཡི་གཞལ་ཡས་དང་། །དུང་ཁང་བྷནྡྷའི་གཞལ་ཡས་དང་། །ལྟ་བྱེད་མིག་གི་གཞལ་ཡས་སོ། །གཞལ་ཡས་ཆེན་པོ་དེ་བཞི་ན། །གསང་སྔགས་ཀུན་གྱི་གསང་ཆེན་གནས། །ཞེས་སོ། །དེའང་སྙིང་ག་ན་ཞི་བའི་སྐུ་འོད་ཟེར་གྱི་ཕུང་པོར་གསལ་བའི་རང་གདངས་ལས། དུང་ཁང་ན་ཁྲོ་བོ་དང་། རྩ་རྣམས་ན་སྒྲོན་མར་སྣང་བས། མིག་ལ་གསལ་བ་སྟེ། དེའང་ཕྲ་བཀོད་ལས། ཨེ་མ་རིག་པའི་གནས་ལུགས་ནི། །རང་རང་ཙིཏྟའི་དཀྱིལ་ན་གནས། །ཡབ་དང་ཡུམ་གྱི་ཚུལ་དུ་གནས། །ཡབ་ཀྱི་ཆ་འཛིན་ཐབས་ཀྱི་སྐུ། །ཡུམ་གྱི་ཆ་འཛིན་ཤེས་རབ་སྐུ། །འོད་དང་འོད་ཟེར་ཚུལ་དུ་གནས། །དབྱིངས་དང་རིག་པར་རབ་བརྒྱན་ཏེ། །ལྷུན་རྫོགས་ཐིག་ལེ་ཆེན་པོར་གནས། །དེ་ནི་ཞི་བའི་བཞུགས་ཚུལ་ལོ། །རང་རང་མགོ་ལ་ཁྲོ་བོར་གནས། །ཡབ་དང་ཡུམ་དུ་མངོན་པར་སྣང་། །ཁྲོ་དང་ཁྲོ་མོའི་ཚུལ་འཆང་ཞིང་། །ཡེ་ཤེས་ལྔ་ལྔ་དག་དང་ལྡན། །སྐུ་ཡི་ཡེ་ཤེས་རེ་རེ་ལ། །དབུ་ཡི་ཡེ་ཤེས་ལྔ་ལྔའོ། །ཞེས་སོ། །དེའང་ཕྱི་ལྟར་ན་ཞི་ཁྲོའི་སྐུ། ནང་ལྟར་ན་མཁའ་འགྲོ་ལྔ། གསང་བ་ལྟར་ན་ཡི་གེ་ལྔ། ཡང་གསང་ལྟར་ན་ཐིག་ལེ་གཅིག་སྟེ་ཀློང་གསལ་ལས། ལུས་ལ་གནས་(༢༢༩)པའི་རིག་པ་ཡང་། །ཕྱི་ལྟར་ཞི་ཁྲོའི་རང་བཞིན་ལ། །ནང་ལྔར་ཌཱ་ཀི་ཡབ་ཡུམ་དང་། །གསང་བ་ཡི་གེ་ལྔ་ཡིན་ཏེ། །ཡང་གསང་ཐིག་ལེ་གཅིག་ཏུ་གནས། །ཞེས་སོ། །

ལྔ་པ་ལ་ལམ་གང་ནས་རྒྱུ་བ་དང་། སྒོ་གང་ནས་འཆར་བ་གཉིས་ལས། དང་པོ་ནི་སྙིང་ནས་མིག་ཏུ་འབྲེལ་བའི་རྩ་ཁྲག་དང་ཆུ་སེར་མེད་པ་ན་ཡང་། གོང་གི་རིག་པའི་རང་གདངས་འོད་དང་ཐིག་ལེ་རྒྱ་སྐར་གྱི་ཉི་ཞུར་ལྟར་གནས་ཏེ། ཀློང་གསལ་ལས། རིག་པ་ལྔ་ཡི་རང་མདངས་ནི། །རྩ་ཡི་ནང་ན་ཐིག་ལེ་དང་། །འོད་ཟེར་ལྟ་བུར་གནས་པའོ། །ཞེས་སོ། །གཉིས་པ་རྩའི་སྒོ་མིག་གཉིས་སུ་ཟུག་པ་ནས་སྣང་སྟེ། སེངྒེ་རྩལ་རྫོགས་ལས། འགག་མེད་གསལ་བའི་སྒོ་གཉིས་མཛོད། །དབྱིངས་དང་ལུ་གུ་རྒྱུད་དུ་གནས། །ཞེས་པ་དང་། སྔ་མ་ལས། རིག་པ་སྐུ་ཡི་རང་གདངས་འོད། །རྩ་ཡི་ནང་ནས་ཉི་ཟེར་བཞིན། །དབང་པོའི་སྒོ་ནས་ངེས་ཐོན་ཏེ། །སྒྲོན་མ་ནམ་མཁའི་མཐོངས་སུ་གསལ། །ཞེས་པ་དང་། ཡེ་ཤེས་སྙིང་གི་དཀྱིལ་ན་གནས། །དར་དཀར་སྐུད་པ་ལྟ་བུ་ཡིས། །རྩ་ཡི་ལམ་ནས་སྣང་བར་བྱེད། །ཡེ་ཤེས་འཆར་བའི་སྒོ་ཉིད་ནི། །ལུས་བཅུད་དྭངས་མ་ཀུན་འདུས་པའི། །ཙཀྵུ་ཞེས་པའི་སྒོ་ནས་དོན། །གཉིས་ཀྱི་ཆ་འཛིན་སྣང་བ་སྟོན། །ཁྱད་པར་སྐྱོན་ཡོན་དྭངས་འབྱེད་པའི། །བ་མེན་རྭ་འདྲ་འཁྱིལ་པ་ལས། །ཨ་འབྲས་ཞེས་པ་དཀར་ནག་འབྱེད། །རིག་ཅིང་གཟུགས་རྣམས་འཛིན་པ་དང་། །ཤེས་པའི་རང་རྩལ་རྫོགས་པར་སྟོན། །འདི་ལས་དངོས་སུ་འབྱུང་བ་སྟེ། །ཞེས་སོ། །དེ་ལྟར་གནས་པའི་དཔེ་ནི། ཀློང་གསལ་ལས། རིག་པའི་སྐུ་ནི་བུམ་སྐུ་འདྲ། །ཡེ་ཤེས་བུམ་པའི་མར་མེ་འདྲ། །ཐུགས་རྗེ་མེ་ལོང་ངོས་ལྟར་གསལ། །ལོངས་སྤྱོད་སྐུ་ལ་སྐུ་གསུང་ཐུགས། །ཡོན་ཏན་དང་ནི་ཕྲིན་ལས་སོ། །སྐུ་ནི་སྣང་ལ་རང་བཞིན་མེད། །གསུང་ནི་འགག་མེད་རིག་པའི་གསུང་། །ཐུགས་ནི་མི་རྟོག་ཆོས་ཀྱི་སྐུ། །ཞེས་སོ། །དེའང་རྩ་ནས་མིག་ཏུ་སྣང་བའི་སྒྲོན་མ་ནི། ཐུགས་རྗེའི་ཟེར་གདངས་ཏེ་དེ་ཉིད་ལས། ཐུགས་རྗེ་ལས་བྱུང་སྒྲོན་མ་ཉི་ཟེར་(༢༣༠)བཞིན། །སྒྲོན་མའི་འོད་ཟེར་སྟོང་ལ་ཐུག་པ་མེད། །གནས་པའི་འོད་ནི་ཙིཏྟའི་ནང་ན་གསལ། །རང་བཞིན་འོད་ནི་ནམ་མཁའི་མཐོངས་ན་གསལ། །ཞེས་སོ། །སྒྲོན་མ་དུ་ཞེ་ན་རང་ཤར་ལས། སྒྲོན་མ་རྣམ་བཞི་འདི་ལྟ་སྟེ། །ཐིག་ལེ་སྟོང་པའི་སྒྲོན་མ་དང་། །རིག་པ་དབྱིངས་ཀྱི་སྒྲོན་མ་དང་། །ཤེས་རབ་རང་བྱུང་སྒྲོན་མ་དང་། །རྒྱང་ཞགས་ཆུ་ཡི་སྒྲོན་མའོ། །སེམས་ཅན་ཀུན་ལ་གནས་པའོ། །ཞེས་སོ། །

དྲུག་པ་ནི་རྐྱེན་བྲལ་གསུམ་ལ་སྣང་བ་སྟེ། ཀློང་གསལ་ལས། རྐྱེན་བྲལ་གསུམ་ལ་འཆར་བར་འགྱུར་ཞེས་པས། དབང་པོ་རྐྱེན་དང་བྲལ་བ་ཆུའི་སྒྲོན་མ། གནས་རྐྱེན་དང་བྲལ་བ་དྭངས་ཤིང་མཐོ་བ། ཡུལ་རྐྱེན་དང་བྲལ་བ་ནམ་མཁའ་སྤྲིན་མེད་པའོ། །དེའང་ཡི་གེ་མེད་པ་ལས། མིག་ནི་ནམ་མཁའི་མཐོངས་སུ་བལྟ། །འོད་ནི་ཕྲ་ལ་འདྲིལ་བ་འབྱུང་། །ཞེས་པ་དང་། ཐལ་འགྱུར་ལས། དབྱིངས་ནི་ཕྱི་དང་ནང་དུ་སྟེ། །ཕྱི་ནི་སྤྲིན་བྲལ་ནམ་མཁའ་འཛིན། །ནང་གི་སྒྲོན་པ་ལམ་དུའོ། །ཞེས་སོ། །

བདུན་པ་ལ་དང་པོ་ངོ་སྤྲད་པ་དང་། སྣང་བ་བཞིའི་འཆར་ཚུལ་ངོས་བཟུང་བ། མཐའ་བརྟེན་གྱི་མན་ངག་གསུམ་ལས། དང་པོ་ནི་ལུས་འདུག་སྟངས་གསུམ་དང་། གཟིགས་སྟངས་གསུམ་གཅུན་ལ། རླུང་རབ་ཏུ་དལ་བས་དབྱིངས་ལ་ལྟ་བས་ཏེ། དེ་ཉིད་ལས། ལུས་ནི་སེང་གེ་གླང་ཆེན་དང་། །དྲང་སྲོང་ལྟ་བུར་གནས་པར་བྱ། །མིག་ནི་ལྡོག་ཕབ་ཟུར་གྱིས་བལྟ། །རླུང་རིག་དལ་བས་ཡེ་ཤེས་འགྲུབ། །ཅེས་སོ། །དེ་ནས་ཡུལ་ལ་ཤར་བའི་རིག་པ་འདི་ལྟར་ངོ་སྤྲད་དེ། ཕྱི་དབྱིངས་ནམ་མཁའ་སྟོང་པ་ལ། ནང་དབྱིངས་རྣམ་པར་དག་པའི་སྒྲོན་མ་འོད་ཁྱིམ་གྱི་ནང་དུ། ཐིག་ལེ་སྟོང་པའི་སྒྲོན་མ་རྨ་བྱའི་མདོངས་སམ་མཚོར་རྡོ་བོར་བ་ལྟ་བུའི་ནང་དུ། རིག་པ་རྡོ་རྗེ་ལུ་གུ་རྒྱུད་མ་འགུལ་བར་ལྟོས་ཤིག །དེའི་ཚེ་རིག་པ་སྟོང་གསལ་སྤྲོས་པ་དང་བྲལ་བའི་ཡེ་ཤེས་ཤར་བ་དེ་ཉིད་ཤེས་རབ་རང་བྱུང་གི་སྒྲོན་མ་ཡིན་པས་ངོས་ཟུང་ལ་སྒོམས་ཤིག །ཅེས་སོ། །འདིའི་དགོས་པ་ནི་ཀློང་གསལ་ལས། རྒྱང་ཞགས་(༢༣༡)ལས་ནི་གཟུགས་བསྡུས་ཏེ། །རླུང་གིས་བསྐྱེད་ཅིང་འཕེལ་བར་བྱེད། །འོང་དང་འགྲོ་བའི་འཕེལ་འགྲིབ་ཀྱིས། །ཡེ་ཤེས་དག་ནི་སྡུད་པར་བྱེད། །ཐིག་ལེ་སྟོང་པས་ལས་ཀུན་བྱེད། །འདས་པ་ལས་ཀྱི་རླུང་བཟུང་ནས། །རླུང་གིས་བཀྲག་དང་གཟི་མདངས་བསྐྱེད། །བསྒྱུར་ཞིང་ཡེ་ཤེས་སྣང་བ་སྟོན། །ཤེས་རབ་རང་བྱུང་སྒྲོན་མ་ཡིས། །ཆོས་ཀུན་མཉམ་པར་རོ་གཅིག་ཏུ། །བསྡུས་ཏེ་རང་སྣང་འཛིན་པར་བྱེད། །འདིས་ནི་བག་ཆགས་འབྲེལ་རྒྱུན་གཅོད། །དབྱིངས་ཀྱི་དྭངས་མ་སྡུད་པ་དང་། །རིག་པའི་སྐུ་རྣམས་འཛིན་པ་དང་། །གནད་གསུམ་བཅུད་དུ་སྨིན་པས་ཏེ། །འཁོར་བ་ཉིད་ནི་སྤོང་བར་བྱེད། །དེ་ལྟར་མིག་ལ་སྒྲོན་ཤར་བས། །སངས་རྒྱས་དགོངས་པའི་གནད་བསྡུས་པར། །རང་སྣང་ཡུལ་རྣམས་འཛིན་པའོ། །ཞེས་སོ། །དེའང་ཁྲེགས་ཆོད་ཀྱིས་གང་ཤར་གྱི་རྟོག་པ་རང་གྲོལ་དུ་ཉམས་སུ་ལེན་ཞིང་། ཐོད་རྒལ་གྱིས་ཉིན་མཚན་འོད་གསལ་ལ་གནས་པས། ཚོགས་གཉིས་རྫོགས། སྒྲིབ་པ་གཉིས་སྦྱངས། སྐུ་གཉིས་འགྲུབ་སྟེ། ཁྲེགས་ཆོད་ཀྱིས་སེམས་ལ་སྒྲིབ་པ་ཤེས་བྱའི་བུད་ཤིང་བསྲེག་ཅིང་། ཐོད་རྒལ་གྱིས་གཟུང་ཡུལ་རྡོས་བཅས་ལུས་ལ་སྒྲིབ་པ་ཉོན་མོངས་པའི་བག་ཆགས་སྟོངས་ནས་གཟུང་འཛིན་གཉིས་མེད་ཀྱི་ཡེ་ཤེས་འོད་གསལ་གདོད་མའི་ངང་དུ་ཕྱིན་པར་བྱེད་དོ། །དེའང་མུ་ཏིག་ཕྲེང་བ་ལས། ཉམས་བླངས་ཁྲེགས་ཆོད་ཐོད་རྒལ་ལོ། །ཞེས་སོ། །

གཉིས་པ་ལ་བཞི་ལས། དང་པོ་ཆོས་ཉིད་མངོན་སུམ་གྱི་སྣང་བ་ནི། ཐལ་འགྱུར་ལས། ཆོས་ཉིད་མངོན་སུམ་སྣང་བ་ནི། །དབང་པོའི་སྒོ་ནས་ངེས་ཐོན་ཏེ། །སྤྲིན་མེད་པ་ཡི་མཁའ་ལ་གསལ། །ཞེས་པ་དང་། ཀློང་གསལ་ལས། རྐྱེན་བྲལ་མཁའ་ལ་བླ་མ་ཡིས། །གཟིགས་སྟངས་གཅུན་ཅིང་ངོ་སྤྲད་པས། །དབང་པོའི་སྒོ་ལས་སྒྲོན་མ་ནི། །འཇའ་འམ་རྨ་བྱའི་མདོངས་ལྟ་བུ། །ཐིག་ལེ་ལུག་རྒྱུད་འབྲེལ་བ་ལས། །འགུལ་འཕྲིག་རྒྱུ་བའི་རྣམ་པར་རྒྱུ། །དེ་ལྟར་གསལ་བའི་དབྱིངས་རིག་ནི། །ཉི་མ་འོད་ཀྱི་ཚུལ་དུ་གནས། །ཞེས་སོ། །དེ་ཉིད་(༢༣༢)མཐོང་བས་ཁམས་གསུམ་དུ་མི་ལྡོག་སྟེ། འདས་རྗེས་ལས། མངོན་སུམ་གནད་འདི་སུས་མཐོང་བ། །ཁམས་གསུམ་ལྡོག་པ་མ་ཡིན་ནོ། །ཞེས་སོ། །གཉིས་པ་ཉམས་གོང་འཕེལ་གྱི་སྣང་བ་ནི། སྔ་མ་ལས། ཉམས་ཀྱི་སྣང་བ་གོང་འཕེལ་ནི། །ཡེ་ཤེས་ཁ་དོག་ཕྱིར་ཕྱུང་ནས། །གྱེན་འགྲེང་དང་ནི་རྩིབས་ཤར་དང་། །ཐིག་ལེ་སྣ་ཚོགས་སྐུ་ཉིད་དང་། །རགས་པར་སྣང་བའི་ཡུལ་ལས་གསལ། །ཞེས་པས། དེའང་སྔ་མ་བཞིན་ཉམས་སུ་བླངས་པས། འོད་ལྔའི་སྣང་བ་རེ་ལྡེ་ཙམ་དང་། ཐིག་ལེ་སྲན་མ་ཙམ་དང་། རིག་པ་འདབ་ཆགས་འཕུར་བ་ཙམ་དུ་སྣང་ཞིང་། ཡང་ཉམས་སུ་བླངས་པས་འོད་ཁ་དོག་ལྔ་ལྡན་དང་གྱེན་འགྲེང་དང་། རྩིབས་ཤར་དང་། མདུང་རྩེ་ལྟ་བུ་དང་། མདའ་ལྟ་བུ་དང་། པདྨ་ལྟ་བུ་དང་། མཆོད་རྟེན་འདྲ་བ་དང་། རྡོ་རྗེ་དང་། འཁོར་ལོ་དང་། རལ་གྲི་དང་། གྲི་གུག་དང་། མུ་ཏིག་གི་དྲ་བ་དྲ་ཕྱེད་ལྟ་བུ་དང་། མིག་ཚགས་དང་། མིག་མངས་རིས་དང་། ཉ་མིག་དང་། ཟ་འོག་གུར་ཁྱིམ་དང་། ཡེ་ཤེས་མཁར་ཐབས་དང་། ཉི་ཟླ་གཟའ་བྲལ་དང་། པདྨ་སྟོང་ལྡན་འདྲ་བ་ལ་སོགས་པ་སྣང་བ་མི་འདྲ་བ་གྲངས་མེད་པ་འཆར་རོ། །ཐིག་ལེ་མེ་ལོང་ཙམ་སྣང་ཞིང་། རིག་པའང་རི་དྭགས་སྤང་ལ་འགྲོ་བ་ཙམ་དང་། བུང་བ་འཁོར་བ་ཙམ་མོ། །ཡང་ཉམས་སུ་བླངས་པས་འོད་ཡུལ་གྲུ་ཙམ་དང་། ཐིག་ལེ་ཁམ་ཕོར་ཙམ་དང་། རིགས་པ་རི་དྭགས་དལ་བུས་འགྲོ་བ་ཙམ་མོ། །ཡང་འོད་ཡུལ་ཁམས་ཙམ་དང་། སྟོང་གསུམ་ཙམ་སྣང་ཞིང་། ཐིག་ལེ་འཁར་གཞོང་ཙམ་དང་། བསེ་ཕུབ་ཙམ་སྣང་བ་དང་། རིག་པའི་བར་དུ་སྐུ་རེ་རེའང་འཆར་རོ། །

གསུམ་པ་རིག་པ་ཚད་ཕེབས་ཀྱི་སྣང་བ་ནི། ཐལ་འགྱུར་ལས། རིག་པ་ཚད་ཕེབས་སྣང་བ་ནི། ལོངས་སྐུ་མཚན་དཔེར་གསལ་བ་སྟེ། མ་ངེས་ཁ་དོག་འཇའ་ཚོན་ལས། །རིགས་ལྔ་ཡབ་དང་ཡུམ་དུ་སྣང་། །དེ་ནས་ལྔ་ལྔ་ཟུང་དང་བཅས། །རབ་ཏུ་གསལ་བའི་ཐིག་ལེར་འབྲེལ། །ཡབ་ཡུམ་སྐུ་ཡི་སྣང་བ་ཅན། །འཁྲུལ་སྣང་ཟད་ནས་ཞིང་(༢༣༣)ཁམས་སོ། །ཞེས་པས། དང་པོ་ཐིག་ལེ་དང་རིག་པ་ནང་དུ། སྐུ་ཡབ་ཡུམ་ཟུང་སྦྲེལ་རེ་དབུས་ན་གསལ་བ་ལས། དེ་ནས་ཕྱོགས་བཞིར་ཡབ་ཡུམ་བཞི་པཞི་སྣང་བའོ། །འདིའི་ཚེ་ཕྱི་ཡུལ་གྱི་འཁྲུལ་སྣང་ཞིང་ཁམས་སུ་གྲོལ་བས། འོག་མིན་ལོངས་སྐུའི་ཕོ་བྲང་དུ་ལྷུན་གྱིས་གྲུབ། ནང་སྒྱུ་ལུས་འོད་གསལ་དུ་གྲོལ་བས། ཤ་ཁྲག་རྡོས་བཅས་ཀྱི་འབྱུང་བཞི་ནུབ་པས། སྐྱེ་རྒ་ན་འཆིའི་འཁོར་བའི་སྡུག་བསྔལ་ལས་རང་གྲོལ། གསང་བ་རླུང་སེམས་སྟོང་པས་ཉོན་མོངས་རྟོག་ཚོགས་ཀྱི་བག་ཆགས་དབྱིངས་སུ་ཐིམ་པའོ། །དེའང་རྡོས་བཅས་ཤ་ཁྲག་གི་ཕུང་པོ་དག་པས། སྙིང་ཁའི་ཞི་བའི་ཚོམ་བུ་ནམ་མཁའ་ལ་རང་གསལ་བའོ། །

བཞི་པ་ཆོས་ཉིད་ཟད་པའི་སྣང་བ་ནི། སྔ་མ་ལས། ཆོས་ཉིད་ཟད་པའི་སྣང་བ་ནི། །ཉམས་ཀྱི་སྣང་བ་སྟོངས་ནས་ནི། །ལུས་ཟད་དབང་པོའི་ཡུལ་ཡང་ཟད། །རྟོག་ཚོགས་འཁྲུལ་པ་ལས་གྲོལ་ནས། །བརྗོད་གཞིའི་ཚིག་དང་བྲལ་བའོ། །ཞེས་པས། ཕྱི་ནང་གི་ཉམས་སྣང་དུ་འཛིན་པ་དང་། རྟོག་ཚོགས་དང་བཅས་པ་ཟད་ནས་འོད་ཀྱི་ནང་ན་ལག་སོར་བཀྲམ་པ་ཙམ་ལས་མི་མངོན་ཏེ། འཁོར་འདས་ཀྱི་འདུ་ཤེས་ནུབ་ནས། སྣང་བ་ཅིའི་ངོ་བོར་ཡང་གྲུབ་པ་མེད་དོ། །དེའི་ཚེ་འགྲོ་དྲུག་དང་ཉི་ཟླའི་སྣང་བ་མེད་དོ། །གཟུང་འཛིན་གྱི་འཁྲུལ་པ་མེད་པས། ཆོས་སྐུ་རང་དག་གི་དགོངས་པ་ཆོས་ཉིད་ཟད་སར་ཐུག་པ་ཞེས་བྱའོ། །དེ་ནས་ན་བུན་ནམ་སྤྲིན་ཡལ་བ་ལྟར་ཕུང་པོ་མི་སྣང་བར་གདོད་མའི་ཀ་དག་ནམ་མཁའ་ལྟ་བུའི་ངང་དུ་རང་གྲོལ་ལོ། །

གསུམ་པ་མཐའ་རྟེན་གྱི་མན་ངག་ནི། ཀློང་གསལ་ལས། དེ་ལ་མཐའ་རྟེན་མན་ངག་བཞི། །གོང་མའི་རྒྱབ་ཏུ་མེད་ཐབས་མེད། །ཅེས་པ་དང་། ཐལ་འགྱུར་ལས། དེ་ལ་མཐའ་བརྟེན་ཡིད་ཆེས་བྱ། །མི་འགུལ་གསུམ་ལ་གཞི་བཅས་པས། །རླུང་སེམས་གནད་ལ་ཕེབས་པའོ། །སྡོད་པ་གསུམ་གྱིས་ཚད་གཟུང་བས། །རྨི་ལམ་ལོག་དང་ལུས་ངག་ཡིད། །རྟགས་དང་ཚད་ནི་ངེས་གཟུང་བའོ། །ཐོབ་པ་གསུམ་གྱིས་གཟེར་གཏབ་པས། །ཟག་བཅས་ཕུང་པོ་མི་སྣང་བའོ། །ཞེས་པ་དང་། མུ་ཏིག་ཕྲེང་བ་ལས། ཚད་ནི་གདེང་བཞིའི་རྣལ་འབྱོར་(༢༣༤)ཉིད། །ཅེས་པས། དང་པོ་མི་འགུལ་བ་གསུམ་ལ་གཞི་བཅའ་བ་ནི། ལུས་མི་འགུལ་བ་བཞུགས་སྟངས་གསུམ་ལ་སློབ་བོ། །མིག་མི་འགུལ་བ་གཟིགས་སྟངས་གསུམ་ལ་སློབ་བོ། །རླུང་རིག་མི་འགུལ་བས་ཅི་ནས་ཀྱང་དལ་བ་ལ་སློབ་བོ། །

གཉིས་པ་སྡོད་པ་གསུམ་གྱིས་ཚད་བཟུང་བ་ནི། དབྱིངས་རིག་ལ་གོམས་པས། ཕྱི་སྣང་བ་བསྐྱོད་པའི་རླུང་ཟད་པས། དབྱིངས་རིག་ལ་འགྲོ་འོང་མེད་པར་སྡོད། ནང་ཕུང་པོ་སྐྱོད་བྱེད་ཀྱི་རླུང་ཟད་པས། ལུས་གཡོ་འགུལ་མེད་པར་སྡོད། གསང་བ་རྟོག་པ་འགྱུ་བྱེད་ཀྱི་རླུང་ཟད་པས། རྣམ་རྟོག་འགྱུ་མི་སྲིད་པར་སྡོད་པའོ། །སྐབས་འདིར་ཚད་རྨི་ལམ་གྱིས་གཟུང་བ་དང་། རྟགས་ལུས་ངག་ཡིད་གསུམ་ལ་འཆར་བ་གཉིས་འབྱུང་ངོ་། །དེའང་བརྩོན་འགྲུས་རབ་ལ་རྨི་ལམ་དབྱིངས་སུ་ཐིམ། འབྲིང་ལ་འོད་གསལ་དུ་འཆར། ཐ་མས་རྨི་ལམ་ཟིན་པའོ། །རྟགས་ལུས་ངག་ཡིད་གསུམ་ལ་འཆར་བ་ལ་བཅུ་གཉིས་ལས་དང་པོ་ནི་ཆོས་ཉིད་མངོན་སུམ་གྱི་རྟགས་གསུམ་ནི། ལུས་རུས་སྦལ་འཁར་ཞོང་དུ་བཅུག་པ་ལྟར་གཡོ་འགུལ་མེད་པར་སྡོད། ངག་ལྐུགས་པ་ལྟར་སྨྲ་སྙིང་མི་འདོད། སེམས་མཁའ་འགྲོ་རྙི་ལ་ཟིན་པ་ལྟར། རྣམ་རྟོག་གར་གཏད་དུ་སྡོད་པའོ། །ཉམས་གོང་འཕེལ་གྱི་རྟགས་གསུམ་ནི། ལུས་སྐྱེས་བུ་ནད་ཀྱིས་གདུངས་པ་ལྟར། རྒྱན་དང་བྱི་དོར་མེད་པས་ངོ་ཚའི་རྣམ་རྟོག་དང་བྲལ། ངག་སྨྱོན་པའི་རང་ཚིག་ལྟར་དོན་མེད་སྨྲ། སེམས་རྩི་དུག་གིས་ཟིན་པ་ལྟར། ཁམས་གསུམ་དུ་མི་ལྡོག་པའོ། །རིག་པ་ཚད་ཕེབས་ཀྱི་རྟགས་གསུམ་ནི། ལུས་གླང་པོ་ཆེ་འདམ་དུ་ཚུད་པ་ལྟར་འབྱུང་བ་ཟང་ཐལ། ངག་གྲུལ་བུམ་གྱི་ཕྲུག་གུ་ལྟར་གཞན་གྱི་ཡིད་དུ་འོང་ཞིང་ཕན་ཐོགས་པའོ། །སེམས་འབྲུམ་ནད་བྱང་བ་ལྟར་བསྐྱར་ནས་ཁམས་གསུམ་དུ་མི་ལྡོག་པར་ངེས་པའོ། །ཆོས་ཉིད་ཟད་པའི་རྟགས་གསུམ་ནི། ལུས་དུར་ཁྲོད་ཀྱི་རོ་ལྟར་གཤེད་མ་ལྔ་བརྒྱས་བསྐོར་ཡང་ཉམས་མི་ང་བ་དང་། འཇིགས་སྐྲག་མེད། ངག་བྲག་ཆ་ལྟར་གཞན་གྱི་ལད་མོ་ཟློས། སེམས་བར་སྣང་གི་ན་བུན་ལྟར་(༢༣༥)སྐད་ཅིག་ལ་མི་སྣང་བར་སངས་རྒྱའོ། །

གསུམ་པ་ཐོབ་པ་གསུམ་གྱིས་གཟེར་གདབ་པ་ནི། འདིའི་དུས་སུ་སྐྱེ་བ་ལ་རང་དབང་ཐོབ་པས། སེམས་ཅན་གྱི་དོན་བྱ་བར་འདོད་ན། རང་གི་ལག་སོར་ལ་གཏད་ཅིང་བལྟས་པས། སྣང་བ་དེ་ཀུན་རང་ལོག་སྟེ། སྐབས་སུ་བེམས་པོ་འགུལ་ཞིང་སྒྲ་ཐོས་པས། སྣང་བྱེད་ཆུའི་ཟླ་བ་ལྟ་བུའི་ལུས་ཀྱིས་སེམས་ཅན་གྱི་དོན་བྱེད་དོ། །དེའང་སེམས་ཅན་ལ་རིག་པ་བཅུག་པས་འཚང་རྒྱ་བ་དང་། བེམས་པོ་ལ་རིག་པ་བཅུག་པས་འགུལ་ཞིང་སྒྲ་འབྱིན་པ་དང་། ཚེ་འཕོ་བའི་སེམས་ཅན་ལ་རིག་པ་བཅུག་པས་བར་དོར་གྲོལ་ལོ། །འཇུག་པ་ལ་རང་དབང་ཐོབ་པ་ནི། སོར་མོ་ལ་རིག་པ་གཏད་ནས་རང་ལུགས་སུ་བཞག་པས། དེ་ཉིད་ལ་མི་སྣང་བར་འཚང་རྒྱའོ། །རླུང་སེམས་ལ་རང་དབང་ཐོབ་པ་ནི། མངོན་པར་ཤེས་པ་ཐོགས་པ་མེད་པ་དང་། རྫུ་འཕྲུལ་དུ་མ་སྟོན་ནུས་པའོ། །

བཞི་པ་གདེང་བཞི་ནི། ཡར་དཀོན་མཆོག་གི་ཡོན་ཏན་ཐོས་ཀྱང་རེ་བ་དང་དོགས་པ་མེད། མར་རིགས་དྲུག་གི་སྡུག་བསྔལ་དང་ཚེ་ཚད་ཐོས་ཀྱང་རེ་བ་དང་དོགས་པ་མེད་པའོ། །

བརྒྱད་པ་བར་དོར་ཇི་ལྟར་འཆར་ཚུལ་ལ་བཞི་ལས། དང་པོ་སྐྱེ་གནས་ཀྱི་བར་དོ་ལ་དེད་དཔོན་གསེར་གླིང་དུ་ཕྱིན་པ་ལྟ་བུའི་གདམས་ངག་ནི། བླ་མའི་དྲུང་དུ་ཐོས་བསམ་གྱིས་སྒྲོ་འདོགས་བཅད་ནས། འོད་གསལ་གྱི་སྣང་བ་ལ་ཡིད་ཆེས་པར་བྱེད་དོ། །གཉིས་པ་འཆི་ཁའི་བར་དོ་ལ་གསལ་གདབ་པ་སྒེག་མོ་མེ་ལོང་ལྟ་བ་ལྟ་བུའི་གདམས་ངག་ནི། ཆོས་ཉིད་བར་དོར་འཆར་བའི་རང་སྣང་རྣམས་ཡིད་ལ་གསལ་བར་གསལ་འདེབས་པའོ། །དེའང་འདིའི་སྐབས་སུ་ས་ས་ལ་ཐིམ་པས་ལུས་ལྗི། ཆུ་ཆུ་ལ་ཐིམ་པས། ཁ་སྣའི་ཆུ་ཕྱིར་འཛག །མེ་མེ་ལ་ཐིམ་པས་ལུས་ཀྱི་དྲོད་སྡུད། རླུང་རླུང་ལ་ཐིམ་པས་ཡན་ལག་གཡབ་ཅིང་མིག་གྱེན་ལ་ལྡོག །རླུང་རྣམ་པར་ཤེས་པ་ལ་ཐིམ་པས་དར་ཅིག་བརྒྱལ། ཁྲག་ཐིགས་གསུམ་སྙིང་ནང་དུ་འདུའོ། །རྣམ་ཤེས་ནམ་མཁའ་ལ་ཐིམ་པས་ཤེས་པ་སྟོང་གསལ་དབྱར་མ་སྟོན་གྱི་ནམ་མཁའ་འདྲ་(༢༣༦)བར་འཆར་རོ། །གསུམ་པ་ཆོས་ཉིད་ཀྱི་བར་དོ་ལ། རང་སྣང་ལ་ཡིད་ཆེས་པས་མེ་ལོང་དུ་བྱད་གསལ་བའམ། མ་པང་དུ་བུ་འཇུག་པའི་མན་ངག་ནི། དེ་ནས་ནམ་མཁའ་འོད་གསལ་ལ་ཐིམ་པའི་ཚེ། མིག་ནས་ཐུགས་རྗེ་རྒྱུན་གྱི་ཟེར་ཐག་ལས། འོད་གསལ་གྱི་སྣང་བས་འཇིག་རྟེན་ཐམས་ཅད་ཁྱབ་པར་འཆར་ཏེ། ཐལ་འགྱུར་ལས། འདིར་ནི་ཆོས་ཉིད་བར་དོ་བཤད། །འཆི་ཁ་ལས་ནི་ཐལ་བའི་ཚེ། །རྣམ་ཤེས་ནམ་མཁའ་དག་ལ་ཐིམ། །ནམ་མཁའ་འོད་གསལ་ལ་ཐིམ་དུས། །ཕྲ་རགས་སྣང་བ་ཀུན་འགགས་ཏེ། །དབང་པོ་ཀུན་ལྡན་འོད་ཀྱི་ལུས། །ལུས་དང་གྲིབ་མ་བཞིན་དུ་འགྱུར། །དེ་ཚེ་འོད་སྣང་དུམ་བུའི་ཚེ། །མཁས་པས་སྣང་བ་མཆེད་པ་བཟུང་། །ཞེས་པས། འོད་སྣང་མཆེད་པས་རང་སྣང་དུ་ཤེས་པས་གྲོལ་ལོ། །དེ་ནས་འོད་གསལ་ཟུང་འཇུག་གི་སྐུ་ལ་ཐིམ་པ་ནི། སྐད་ཅིག་དང་པོའི་ཁྲོ་བོའི་སྣང་བས་སྒྲ་འོད་ཟེར་གསུམ་དུ་སྣང་སྟེ། ཀློང་གསལ་ལས། དེ་ཚེ་སྒྲ་འོད་ཟེར་དུ་འཁྲིགས། །སྐུ་ཡི་སྣང་བས་སྐྲག་པར་བྱེད། །ཅེས་པས། ཁྲོ་བོའི་གཟུགས་འཇིགས་སུ་རུང་བ་དང་། འོད་གསལ་གྱི་ཟེར་མཚོན་ཆའི་རྣམ་པ་འདྲ་བ་དང་། ཧཱུྃ་དང་ཕཊ་ཀྱི་སྒྲ་འབྲུག་སྟོང་ལྡིར་བ་ཙམ་འོང་བས་སེང་གེའི་གསོབ་མཐོང་བ་ལྟར་མཚང་ཕུག་ནས་རིག་སྟེ། རང་སྣང་དུ་ཤེས་པས་གྲོལ་ལོ། །དེ་ནས་ཞི་བའི་ཚོམ་བུ་རིགས་ལྔའི་དཀྱིལ་འཁོར་ལྔ་ཚན་ལྔ་རིམ་གྱིས་ཕྱོགས་མཐར་ཁྱབ་པར་བརྒྱ་སྟོང་གྲངས་མེད་པ་འཆར་ཏེ། ཐལ་འགྱུར་ལས། འཇུག་ཅིང་སྨིན་པའི་རླུང་ལ་ཡང་། །ཕྱོགས་བཞི་མཚམས་དང་སྟེང་འོག་གྲུབ། །དེ་ལ་ཕྱོགས་ཀྱི་འོད་འདུས་པས། །རིགས་ལྔའི་སྐུ་ཡང་མངོན་པར་སྣང་། །མཐིང་ག་དཀར་སེར་དམར་ལྗང་ནི། །སོ་སོའི་ཡུམ་དང་བཅས་པར་སྣང་། །སོ་སོའི་ཚོམ་བུ་རྫོགས་པ་ལ། །ལྔ་ལྡན་བཅུ་ལྡན་བརྒྱ་ལྡན་དང་། །ཚོམ་བུ་སྟོང་དང་འབུམ་ཕྲག་ནི། །བསམ་ངོ་རང་བཞིན་དག་པ་ཡི། །བརྗོད་ཀྱིས་མི་ལང་གྲངས་མེད་འཆར། །ཞེས་པས། རིགས་ལྔའི་སྐུ་ཤར་བའི་ཐུགས་ཀ་(༢༣༧)ནས། རང་གི་སྙིང་གར་ཟེར་ཐག་འཆར་བའི་ཚེ། གནད་གསུམ་གྱི་གདམས་ངག་དྲན་པར་བྱའོ། །

དེའང་དང་པོ་འཇུག་པ་ཤེས་པའི་གནད་ལ་གཉིས་ལས། རིག་པ་འོད་ལ་འཇུག་པ་ནི་ཟེར་ཐག་འབྲེལ་བའི་ཚེ། རང་བཞིན་གྱི་བསམ་གཏན་ལ་གནས་པས་ངོས་གཟུང་ངོ་། །འོད་རིག་པ་ལ་འཇུག་པ་ནི། སྣང་བ་དེ་ཀུན་རང་ལ་ཐིམ་པའི་ཚེ། མ་པང་དུ་བུ་འཇུག་གི་གནད་དྲན་པས་གྲོལ་ལོ། །གཉིས་པ་གྲོལ་བ་ལུས་ཀྱི་གནད་ནི། རང་ལུས་འོད་གསལ་དུ་ཡོད་པ་ལ་རང་ངོ་ཤེས་པས་གྲོལ་ལ། མཐར་ཕྱིན་པ་ངོ་ཤེས་པའི་གནད་ནི། རང་སྣང་དུ་ངོ་ཤེས་པས་སྐད་ཅིག་ལ་ནང་གསལ་དུ་གྲོལ་ལོ། །དེར་གདེང་མ་ཐོབ་ན། དེ་ནས་ཟུང་འཇུག་ཡེ་ཤེས་ལ་ཐིམ་པ་ཞེས་བྱ་བ་ནི། ཉི་ཟླ་ཁ་སྦྱོར་ལས། རང་གི་སྙིང་ག་ནས་འོད་ཀྱི་ཐག་པ་ཤིན་ཏུ་ཕྲ་བ་ཅིག་འཆར་རོ། །དེའང་སྟེང་གི་ནམ་མཁའ་ལ་གྱེན་དུ་ཟུག་པར་སྣང་ངོ་། །དེའི་དུས་སུ་རང་གིས་མ་ཡེངས་པར་བལྟས་པས། སྣང་བ་དེ་ཉིད་གཞན་དང་མ་འདྲེས་པར་ཤིན་ཏུ་རྒྱ་ཆེ་བར་འཆར་ཏེ། དེའང་དང་པོ་མཐིང་ཁའི་སྣམ་བུའི་སྟེང་དུ། ཐིག་ལེ་ཟེར་དང་ལྡན་པ་མེ་ལོང་ཁ་སྦུབ་པ་ཙམ་སྟེ། དཔེར་ན་མུ་མེན་གྱི་ཕོར་བ་ཁ་སྦུབ་པ་ལྟ་བུ་ལ། ཡེ་ཤེས་ཀྱི་གཏིང་གདངས་དང་ལྡན་པ་ཤིན་ཏུ་གསལ་ལ་འཚེར་བ། དེ་ཡང་རང་བཞིན་གྱི་ཐིག་ལེ་ལྔ་ལྔས་བརྒྱན་པའོ། །དེའི་མཐའ་དང་དབུས་མེད་པར་ཐིག་ལེ་དང་ཐིག་ཕྲན་གྱིས་བརྒྱན་པ་འཆར་རོ། །ཡང་དེའི་སྟེང་དུ་དཀར་པོའི་སྣམ་བུའི་སྟེང་དུ་ཐིག་ལེ་ཤིན་ཏུ་གསལ་ཞིང་དཀར་བའི་གདངས་ཆགས་པ། དཔེར་ན་ཤེལ་གྱི་ཕོར་བ་ཁ་སྦུབ་པ་ལྟ་བུ་ཡེ་ཤེས་ཀྱི་གཏིང་གདངས་དང་བཅས་པ་འཆར་རོ། །ཡང་སེར་པོའི་སྣམ་བུའི་སྟེང་དུ་ཐིག་ལེ་གསེར་གྱི་ཕོར་པ་ཁ་སྦུབ་པ་ལྟ་བུ་འཆར་རོ། །དེའི་སྟེང་དུ་དམར་པོའི་སྣམ་བུ་ལ་ཐིག་ལེ་པདྨ་རཱ་གའི་ཕོར་པ་ཁ་སྦུབ་པ་ལྟ་བུ་འཆར་རོ། །དེའི་སྟེང་དུ་འོད་ཟླུམ་པོ་ཤིན་ཏུ་གསལ་བ་རྨ་བྱའི་གདུགས་ལྟར་འཆར་རོ། །དེ་དག་ཀྱང་ཡེ་ཤེས་ལྔའི་སྣང་བ་སྟེ། བྱ་བ་གྲུབ་པའི་ཡེ་ཤེས་ནི་རྩལ་མ་རྫོགས་པས་མི་སྣང་ངོ་། །དེ་ནི་ཡེ་ཤེས་(༢༣༨)བཞི་སྦྱོར་གྱི་སྣང་བ་ཞེས་བྱ་བ་སྟེ་རྡོ་རྗེ་སེམས་དཔའ་ཁོང་སེང་གི་ལམ་ཞེས་བྱའོ། །ཞེས་གསུངས་སོ། །དེའི་དུས་སུ་མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་ནི་སྣང་བ་དེ་ལ་མ་ཡེངས་པར་རང་ངོ་ཤེས་པས་བལྟའོ། །དེས་ནི་རང་གྲོལ་ལོ། །དེར་གདེང་མ་རྙེད་ན། ཡེ་ཤེས་ལྷུན་གྲུབ་རིན་པོ་ཆེར་ཐིམ་པ་ཞེས་བྱ་བ་ནི། སྔ་མ་ལས། རིག་པ་ལྷུན་གྲུབ་ཆེན་པོའི་སྐུ་ལ་ཐིམ་པའི་ཚེ། རང་གི་སྣང་བ་ཁ་དོག་མཐིང་ག་ནམ་མཁའ་རྣམ་པར་དག་པའི་དཀྱིལ་ལྟ་བུ། ཐ་མ་འོད་ལྔའི་མུ་ཁྱུད་ཟླུམ་པོས་བསྐོར་བ་ནི། དཔེར་ན་ཉི་མ་འཇས་འཁྱིལ་པ་ལྟ་བུ་དབང་པོའི་ཁྱབ་ཚད་དུ་སྣང་ངོ་། །དེའི་སྟེང་དུ་འོད་ཟླུམ་པོ་ཤིན་ཏུ་གསལ་བ་ཞིག་གདུགས་ལྟར་འཆར་རོ། །ཅེས་སོ། །འདིའི་དུས་སུ་འཆར་ལུགས་བརྒྱད་འབྱུང་སྟེ། དེའང་རིག་པ་འདི་ཐུགས་རྗེ་ལྟར་ཤར་བས་འཁོར་འདས་རྒྱ་མ་ཆད། འོད་ལྟར་ཤར་བས་སྣང་བ་ཐམས་ཅད་འོད་དུ་གསལ། སྐུ་ལྟར་ཤར་བས་ཤེས་པ་ཁ་ཕྱིར་མ་ཤོར། ཡེ་ཤེས་ལྟར་ཤར་བས་སྣང་བ་ཐམས་ཅད་ཟང་ཐལ། གཉིས་མེད་ལྟར་ཤར་བས་རང་གི་ཤེས་པ་རྩེ་གཅིག་ཏུ་གནས། མཐའ་གྲོལ་ལྟར་ཤར་བས་ཤེས་པ་མཐའ་གང་ལའང་མི་གནས། མ་དག་པ་སྲིད་པའི་སྒོ་ལྟར་ཤར་བས་སྲིད་པའི་བྱུང་ཁུངས་མི་འགག །དག་པ་ཡེ་ཤེས་ཀྱི་སྒོ་ལྟར་ཤར་བས་ཆོས་ཉིད་མ་བུ་འབྲེལ་བ་སྟེ། རིན་ཆེན་སྤུངས་པ་ལས། ཐུགས་རྗེ་ལྟ་བུར་འཆར་ཚུར་ལས། །སེམས་ཅན་ཀུན་གྱི་སྐྱབས་པའི་གནས། །སྣང་བ་རང་གསལ་འགག་མེད་ལས། །འོད་ལྔའི་གསལ་བྱེད་ཚུལ་དུ་སྣང་། །མཁྱེན་པའི་སྣང་ཆ་མ་འགགས་པས། །ཡེ་ཤེས་དག་པའི་སྒོ་ཉིད་དུ། །སྣང་བ་འགགས་མེད་ལམ་ལྟར་ཤར། །རང་སྣང་ལུས་ཀུན་མཐའ་རྫོགས་ཕྱིར། །ཆོས་རྣམས་ཀུན་གྱི་སྐུ་ལྟར་སྣང་། །ཤེས་པའི་ངོ་བོ་གཅིག་ཡིན་པས། །གཉིས་སུ་མེད་པ་ལྟར་ཡང་ཤར། །དེ་ཉིད་རང་སར་གནས་མེད་པས། །མཐའ་གྲོལ་ཆེན་པོའི་སྣང་བ་ནི། །ངེས་མེད་(༢༣༩)ལྷུན་གྲུབ་གཞི་ལ་སྣང་། །རིག་པ་ཟང་ཐལ་ཚིག་རྫོགས་ཕྱིར། །དག་པ་ཡེ་ཤེས་ཉིད་ཀྱི་སྒོ། །ངོ་བོ་ཉིད་དང་འབྲེལ་བའོ། །བྱུང་ཚུལ་འགགས་པ་མེད་པའི་ཕྱིར། །སེམས་ཅན་རྣམས་ཀྱི་བྱུང་ཁུངས་སོ། །མ་དག་འཁོར་བའི་སྒོ་ལྟར་ཡང་། །ཁྱབ་བྱེད་སྣང་བའི་ཆ་ལས་ཤར། །ཞེས་སོ། །དེའི་ཚེ་ཕྱིར་མི་ལྡོག་པ་གྱད་ཀྱི་མདའ་ལྟ་བུའི་གདམས་ངག་ནི། རང་སྣང་རང་ངོ་ཤེས་པས་གྲོལ་བ་དེའི་ཚེ། མངོན་པར་ཤེས་པ་དྲུག་ཕྲག་དྲུག་འཆར་ཏེ། དབང་པོའི་མངོན་པར་ཤེས་པ་དྲུག །སེམས་ལས་སུ་རུང་བའི་མངོན་པར་ཤེས་པ་དྲུག །ཤེས་རབ་ལ་དབང་ཐོབ་པའི་མངོན་པར་ཤེས་པ་དྲུག །ཡེ་ཤེས་མཐོང་བ་རྣམ་པར་ཤེས་པའི་མངོན་པར་ཤེས་པ་དྲུག །ཆོས་ཉིད་ཕྱིན་ཅི་མ་ལོག་པར་མཐོང་བའི་མངོན་པར་ཤེས་པ་དྲུག །སངས་རྒྱས་ཀྱི་མཁྱེན་པ་ཕྱིན་ཅི་མ་ལོག་པར་མཐོང་བའི་མངོན་པར་ཤེས་པ་དྲུག་འཆར་ཏེ། ཀློང་གསལ་ལས། དེ་ཚེ་རིགས་ཀྱི་བུ་དེ་ལ། །མངོན་པར་ཤེས་པ་དྲུག་འཆར་ཏེ། །ཞེས་སོ། །དེ་ཚེ་ཡར་གཞིའི་སྣང་བ་ཀ་དག་ཆེན་པོ་གསལ། ཐལ་ཀར་རིགས་ལྔ་གཙོ་འཁོར་གྱི་ཚོམ་བུ་གསལ། མར་འགྲོ་བ་རིགས་དྲུག་གི་སྐྱེ་གནས་དང་། ལས་དང་སྡུག་བསྔལ་དང་ཚེ་ཚད་ལ་སོགས་པ་གསལ་ལོ། །དེ་ལྟར་མཐོང་བའི་གཞི་ལས་གྲོལ་བ་ནི། རྗེས་སུ་དྲན་པ་ལས་བྱུང་སྟེ། བླ་མ་དང་གདམས་པ་རྗེས་སུ་དྲན་པས་རང་སྣང་ལ་གཉིས་སུ་མེད་པར་སྤྱོད། ལྟ་བ་རྗེས་སུ་དྲན་པས་སྔར་འདྲིས་ཀྱི་མི་དང་འཕྲད་པ་ལྟར་རང་ངོ་ཤེས་སོ། །སྒོམ་པ་རྗེས་སུ་དྲན་པས་ཞག་ལྔར་བསམ་གཏན་ལ་གནས། སྤྱོད་པ་རྗེས་སུ་དྲན་པས་རང་སྣང་དག་པའི་ཆོས་ཉིད་ལ་སྤྱོད། ལམ་རྗེས་སུ་དྲན་པས་བར་དོའི་ཆོས་ཉིད་ལ་དབང་བསྒྱུར། ལྷ་རྗེས་སུ་དྲན་པས་རང་སྣང་དཀྱིལ་འཁོར་དུ་གྲོལ། སྐྱེ་གནས་རྗེས་སུ་དྲན་པས་རང་བཞིན་སྤྲུལ་སྐུའི་ཞིང་ཁམས་སུ་དབུགས་འབྱིན། མི་བརྗེད་པའི་གཟུངས་དང་ཏིང་ངེ་འཛིན་ཐོབ་པས་སྔར་མ་ཐོབ་པའི་ཆོས་རྣམས་ཀྱང་འཆར་རོ། །དེ་ལྟར་ལྷུན་གྲུབ་རིན་པོ་ཆེར་གྲོལ་བའི་སྐད་ཅིག་གསུམ་པ་ལ། ཐིམ་ལུགས་བརྒྱད་དུས་གཅིག་ལ་འབྱུང་སྟེ། ཐུགས་རྗེ་ཐུགས་རྗེ་ལ་ཐིམ་པ་(༢༤༠)ནི། ཉི་མ་རྒས་པའི་ཟེར་འདུས་པ་ལྟར། རིགས་དྲུག་གི་སྣང་ཆ་རང་ལ་འདུས་པས་མ་དག་པ་འཁོར་བའི་མིང་མེད། འོད་འོད་ལ་ཐིམ་པས་འཇའ་ཚོན་ནམ་མཁའ་ལ་ཡལ་བ་ལྟར། ཁ་དོག་མཚན་མའི་སྣང་བ་མེད་པས་སྟོང་པ་ངོས་བཟུང་དང་བྲལ་བའི་དབྱིངས་སུ་རོ་གཅིག །སྐུ་སྐུ་ལ་ཐིམ་པས་བུམ་པའི་སྐུ་ལྟར་ཤེས་བྱ་ནང་དུ་གསལ་བས་མཚན་མ་རིས་ཅན་གྱི་ཞལ་ཕྱག་ཏུ་མ་གྲུབ་པས་རང་ངོ་རྣམ་པར་དག །ཡེ་ཤེས་ཡེ་ཤེས་ལ་ཐིམ་པས་མ་པང་དུ་བུ་ཞུགས་པ་ལྟར་ཆོས་ཉིད་མ་དང་བུ་རིག་པ་གཉིས་འདྲེས་པས་གཉིས་མེད་གཅིག་ཏུ་གྱུར། གཉིས་མེད་གཉིས་མེད་ལ་ཐིམ་པས་ཆུ་བོ་ལ་ཆུ་བོ་ཐིམ་པ་ལྟར་གདོད་མའི་ངང་དུ་གྲོལ་བས་ཆོས་སྐུར་རོ་གཅིག །མཐའ་གྲོལ་མཐའ་གྲོལ་ལ་ཐིམ་པས་ནམ་མཁའ་ལ་ནམ་མཁའ་ཐིམ་པ་ལྟར་སྟོང་པ་ལ་གཏད་པའི་ཡུལ་མེད་པས། དམིགས་གཏད་དང་ཚད་འཛིན་ལས་འདས། མ་དག་པ་འཁོར་བའི་སྒོ་དག་པ་ཡེ་ཤེས་ཀྱི་སྒོ་ལ་ཐིམ་པས་སྦྲའི་ཆོན་ཐག་བསྡུས་པ་ལྟར་ཐིག་ལེ་ཉག་གཅིག་ལ་འདུས་པས་སྐུ་གསུམ་དུ་འདུ་འབྲལ་མེད། དག་པ་ཡེ་ཤེས་ཀྱི་སྒོ་ངོ་བོ་ལ་ཐིམ་པས་སེང་གེས་གངས་ཟིན་པས། ཡ་ང་བག་ཚ་དང་བྲལ་བ་ལྟར་གདོད་མའི་གཞི་ལ་ནང་གསལ་འཕོ་འགྱུར་མེད་པའི་དགོངས་པ་ལ་ལྷུན་གྱིས་གྲུབ་པའོ། །དེ་སྐད་དུའང་སྔ་མ་ལས། རོལ་པ་ཙམ་དུ་ཐིམ་ལུགས་བརྒྱད། །ཡོན་ཏན་ཚུལ་དུ་འདི་ལྟ་བུ། །ཐུགས་རྗེ་ཉིད་ནི་ཐུགས་རྗེ་ལ། །རང་གི་ངོ་བོ་རང་ཐིམ་པས། །དཔེར་ན་ཉི་མའི་སྙིང་པོ་ལ། །རང་གི་ཟེར་རྣམས་ཐིམ་པ་ལྟར། །རང་གི་གདངས་དང་བཅས་པ་ཡིས། །གཟིགས་སྣང་ཐམས་ཅད་མྱ་ངན་འདའ། །ཞེས་སོ། །དེ་ཡང་དབང་པོའི་ཁྱད་པར་གྱིས་སྐད་ཅིག་མ་གསུམ་དང་ཞག་ལྔ་དང་ཉི་ཤུ་རྩ་གཅིག་གིས་གྲོལ་བར་བཤད་པ་ནི། ཉི་ཟླ་ཁ་སྦྱོར་ལས། དེ་ལྟར་ན་དབང་པོ་ནི་གསུམ་སྟེ། རབ་ཀྱིས་སྐད་ཅིག་མ་གསུམ་ལ་གྲོལ་བར་འགྱུར་རོ། །འབྲིང་གིས་ཞག་ལྔ་ན་བརྟན་པ་ཐོབ་པ་ཡང་ཡོད་དེ། ཐ་མས་ཉི་ཤུ་རྩ་གཅིག་ན་བརྟན་པ་ཐོབ་པར་ངེས་པ་ཡིན་ནོ། །ཡང་ཐ་རྣམས་ནི་རང་བཞིན་སྤྲུལ་པའི་(༢༤༡)སྐུའི་ཞིང་ཁམས་སུ་དབུགས་ཕྱུང་ནས་བར་དོ་མེད་པར་སངས་རྒྱས་པ་ཡིན་ནོ། །ཞེས་སོ། །བཞི་པ་སྲིད་པ་བར་དོ་ལ་ལས་ཀྱི་འཕྲོ་མཐུད་པ་ཡུར་བ་ཁ་ཆད་ལ་ཝ་འཛུགས་པ་ལྟ་བུའི་གདམས་ངག་ནི། དེ་ལྟར་ཤར་ཡང་བརྟན་པ་མ་ཐོབ་ན། སྲིད་པའི་བར་དོ་ལ་ཕྱེད་སྔ་མ་དང་ཕྱེད་ཕྱི་མའི་སྣང་བས། དབང་པོ་ཀུན་ཚང་ཞིང་ལས་ཀྱི་རྫུ་འཕྲུལ་ཐོགས་པ་མེད་པས་འགྲོ་དྲུག་སོ་སོའི་སྣང་བ་ལ་སྤྱོད་པ་རྨི་ལམ་གྱི་ལུས་ལྟར་སྣང་བའི་ཚེ། རབ་ཀྱིས་བདེན་མེད་དུ་ཤེས་པས་གྲོལ། འབྲིང་གིས་ཡི་དམ་ལྷའི་བསྐྱེད་རིམ་སྒྱུ་མ་ལྟ་བུས་མངལ་སྒོ་བཀག་ནས་ཞིང་དག་པར་སྐྱེ། ཐ་མས་སྐྱབས་འགྲོ་དང་སེམས་བསྐྱེད་བྱས་ནས་མངལ་སྒོ་བཟང་པོ་འདམ་པའོ། །དེའང་འགྲོ་དྲུག་གི་མངལ་སྒོ་དྲུག་ལ། སྐྱེད་མོས་ཚལ་དང་གཞལ་མེད་ཁང་ལྷ། ནམ་རྨུགས་པ་དང་། སྐྱེ་བོ་མང་པོའི་དབུས་མི། འོད་ཀྱི་འཁོར་ལོ་ལྷ་མ་ཡིན། ཕུག་པ་དང་སྤྱིལ་པོ་བྱོལ་སོང་། གྲོག་པོ་ཡི་དྭགས། མུན་ནག་ཆར་ཐིབས་དམྱལ་བའི་སྐྱེ་གནས་སོ། །དེའི་ཚེ་ངན་པ་རྣམས་ལ་གཟབས་ཏེ། བཟང་པོ་ལ་ཕ་མ་ཡི་དམ་གྱི་ལྷ་ཡབ་ཡུམ་དུ་གསལ་བཏབ་ནས། ཞུགས་པས་མི་ལུས་རིན་པོ་ཆེ་ཐོབ་ནས་ཟབ་མོའི་གདམས་པ་དང་འཕྲད་དེ་འཚང་རྒྱའོ། །བར་དོའི་གྲོལ་ཚུལ་ལོ། །

དགུ་པ་རང་བཞིན་སྤྲུལ་སྐུའི་སྣང་ཚུལ་ནི། ཆོས་འདིའི་དབང་པོ་ཡང་མཐའ་རྣམས་སྲིད་པའི་བར་དོ་ལ་རྨི་ལམ་གྱི་ཆ་ཙམ་སྣང་བ་ལས། ཆོས་ཉིད་བདེན་པའི་བྱིན་རླབས་ཀྱིས། རང་བཞིན་སྤྲུལ་སྐུའི་ཞིང་དུ་སྐྱེ་བ་ནི་རང་ཤར་ལས། བདེན་པ་མཐོང་བའི་གང་ཟག་ནི། །རྟོགས་པ་རྒྱུད་ལ་མ་སྐྱེས་ཀྱང་། །ཕྱོགས་བཅུ་སྤྲུལ་པའི་ཞིང་ཁམས་སུ། །གནས་ནས་མཐར་ཕྱིན་གྲོལ་བར་འགྱུར། །ཞེས་པས། རྨི་ལམ་སད་པའི་ཚུལ་ཙམ་དུ་ཤར་ཕྱོགས་མངོན་པར་དགའ་བའི་ཞིང་ཁམས་སུ་རྡོ་རྗེ་རིགས་ཀྱི་སྤྲུལ་པའི་ཞལ་མཐོང་། ལྷོ་དཔལ་དང་ལྡན་པའི་ཞིང་ཁམས་སུ་རིན་ཆེན་རིགས་ཀྱི་སྤྲུལ་པས་དབང་བསྐུར། ནུབ་པདྨ་བརྩེགས་པའི་ཞིང་ཁམས་སུ་པདྨ་རིགས་ཀྱི་སྤྲུལ་པས་མངོན་སུམ་དུ་ལུང་བསྟན། (༢༤༢)བྱང་ལས་རབ་རྫོགས་པའི་ཞིང་དུ་ལས་ཀྱི་རིགས་ཀྱི་སྤྲུལ་པས་བག་ཆགས་ཀྱི་མཐའ་ཟད་པར་བྱས་ཏེ། དེ་ཉིད་དུ་ཁྲོ་བོའི་ཞིང་སྣང་དུར་ཁྲོད་མེ་རི་འབར་བ་མཐོང་བ་ཙམ་གྱིས་གྲོལ་ལོ། །

བཅུ་པ་ནི་ཡེ་ཐོག་དང་པོའི་གཞིར་གྲོལ་ཏེ། མུ་ཏིག་ཕྲེང་བ་ལས། གྲོལ་བ་ཉིད་ནི་ཐོག་མའོ། །ཞེས་པས་དེར་གྲོལ་བའི་ཚེ། ངོ་བོ་རང་བཞིན་ཐུགས་རྗེ་གསུམ་དུ་གནས་ཏེ། ངོ་བོ་ཆོས་སྐུ་ཀ་དག་ཆེན་པོ། རང་བཞིན་ལྷུན་གྲུབ་རང་གསལ་ཆེན་པོ། ཐུགས་རྗེ་ཀུན་ཁྱབ་རིག་སྟོང་ཆེན་པོར་བཞུགས་ཏེ། འཁོར་བའི་རྒྱུ་མ་རིག་པ་དང་། སྒྲིབ་གཉིས་ཆ་དང་བཅས་པའི་མུན་པ་སངས། ཡེ་ཤེས་ཀྱི་མཁྱེན་པ་མ་ལུས་པ་རྫོགས་ཏེ། རང་ཤར་ལས། མཚན་མར་འཛིན་པའི་འཁོར་བ་སངས། །ཡེ་ཤེས་སྐུ་ཉིད་དོན་ལ་རྒྱས། །སངས་རྒྱས་ཞེས་ཀྱང་དེ་ལ་བྱ། །ཞེས་སོ། །དེ་ཚེ་སེམས་ཅན་གྱི་དོན་དུ། ཆོས་སྐུ་ནང་གསལ་ཆེན་པོ་ལས་མ་གཡོས་བཞིན་དུ་སྤྲུལ་སྐུ་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་དང་། མི་བསྐྱོད་པ་ལ་སོགས་པའི་ཞི་ཁྲོ་སོ་སོའི་དཀྱིལ་འཁོར་རྫོགས་པར་འོག་མིན་ན་གསལ་བས། ས་གནས་ཀྱི་སེམས་དཔའ་རྣམས་ལ་སྣང་ཞིང་དོན་བྱེད་ལ། ཤཱཀྱ་ཐུབ་པ་ལ་སོགས་པ་འགྲོ་བ་འདུལ་བ་སྤྲུལ་པའི་སྐུ། ལོངས་སྐུ་ལས་མ་དག་པའི་ཞིང་དུ་སྣང་བ་ནི། ནམ་མཁའི་ཟླ་བ་ལས་ཆུ་ཟླ་ལྟར་ཤར་ཞིང་། སོ་སོའི་སྐྱེ་བོ་རྣམས་ཀྱི་དོན་བྱེད་ཅིང་། དེ་ལས་མ་དག་པ་སྤྲུལ་པའི་སྐུ་སོ་སོ་གང་འདུལ་དུ་ཚངས་པ་ལ་སོགས་པ། འགྲོ་དྲུག་ཕལ་བའི་གཟུགས་དང་། སྐྱེ་རྒ་ན་འཆི་དང་གཟིངས་དང་ཟམ་པ་དང་། ནོར་བུ་ལ་སོགས་པར་སྤྲུལ་ནས། སེམས་ཅན་རྣམས་ཀྱི་ཡིད་དང་མཐུན་པར་དོན་བྱེད་དོ། །ནམ་གདུལ་བྱ་མེད་པ་དེའི་ཚེ། ཆུ་སྣོད་མེད་པ་ལས་ཟླ་བ་མི་སྣང་བ་ལྟར་གདོད་མའི་གཞི་ནང་གསལ་ཉིད་དུ་ལྷུན་གྱིས་གྲུབ་བོ། །

དེ་ལྟར་བདག་བློ་རིན་ཆེན་བང་མཛོད་ལས། །ཚིག་དོན་ཕུན་ཚོགས་འདོད་དགུའི་ལོངས་སྤྱོད་ཀྱིས། །སྐལ་ལྡན་སྐྱེ་བོའི་ཚོགས་རྣམས་དགའ་བསྐྱེད་དེ། །ལྷུན་གྲུབ་ས་ལ་ཀུན་ཏུ་བཟང་པོར་ཤོག །ཚུལ་(༢༤༣)འདི་མཁའ་འགྲོ་སྙིང་ཏིག་གསང་བའི་ལམ། །ཚེ་གཅིག་སངས་རྒྱས་སྒྲུབ་བྱེད་ཐེག་པའི་མཆོག །དགོངས་གཏེར་སྙིང་པོ་མི་ཡུལ་འཇིག་རྟེན་དུ། །དྲི་མེད་འོད་ཟེར་བདག་གིས་སྣང་བར་བྱས། །ལྷུན་པོ་རྒྱ་མཚོ་ནམ་མཁའ་གནས་ཀྱི་བར། །ཆོས་ཚུལ་འདིས་ཀྱང་འགྲོ་བའི་དོན་བྱེད་ཅིང་། །སྲིད་པའི་འཁོར་བ་མ་ལུས་རབ་སྟོངས་ནས། །གཞི་རྫོགས་གདོད་མའི་ངང་དུ་ཕྱིན་པར་ཤོག །གངས་རི་ཐོད་དཀར་ཨོ་རྒྱན་རྫོང་ཉིད་དུ། །འོད་ཟེར་གོ་ཆས་གསོལ་བ་བཏབ་པའི་ངོར། །པདྨ་ལས་འབྲེལ་རྩལ་གྱིས་ལེགས་པར་བཀོད། །འགྲོ་བའི་དོན་གཉིས་ལྷུན་གྱིས་གྲུབ་པར་ཤོག །ཚིག་དོན་རིན་པོ་ཆེའི་བང་མཛོད་ཅེས་བྱ་བ། པདྨ་ལས་འབྲེལ་རྩལ་གྱིས་གངས་རི་ཐོད་དཀར་དུ་སྟོན་གསུམ་མེ་ཏོག་དང་འབྲས་བུ་སྨིན་པའི་ཚེ་བཀོད་པ་རྫོགས་སོ།། །།དགེ་ཞིང་བཀྲ་ཤིས།། །།