cover

ཀློང་ཆེན་པའི་གསུང་འབུམ། ཙ༽

གླེགས་བམ་བཅུ་བདུན་པ།

ཀུན་མཁྱེན་ཀློང་ཆེན་རབས་འབྱམས་དྲི་མེད་འོད་ཟེར།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

བཏགས་གྲོལ་རྒྱུད་ཀྱི་མན་ངག་རིན་ཆེན་སྙིང་པོ་ཞེས་བྱ་བ།

༄༅། །བཏགས་གྲོལ་རྒྱུད་ཀྱི་མན་ངག་རིན་ཆེན་སྙིང་པོ་ཞེས་བྱ་བ་བཞུགས་སོ། །རིན་ཆེན་ཤོག་འདྲའི་སྐོར།

༄༅། བཏགས་གྲོལ་མན་ངག་རིན་ཆེན་སྙིང་པོ་ཞེས་བྱ་བ། གདོད་མའི་མགོན་པོ་འོད་མི་འགྱུར་བ་ལ་ཕྱག་འཚལ་ལོ། །ཆོས་ཀུན་མ་སྐྱེས་མཉམ་པའི་ངང་ཉིད་ལས། །སྐུ་དང་ཡེ་ཤེས་འདུ་འབྲལ་མེད་པ་ཡིས། །འགྲོ་བའི་དོན་མཛད་ཀུན་བཟང་རིགས་ལྔའི་ཚོགས། །རིག་འཛིན་བླ་མ་རྣམས་ལ་ཕྱག་འཚལ་ལོ། །སྐལ་ལྡན་རྣམས་ནི་འབད་མེད་གྲོལ་བྱའི་ཕྱིར། །བཏགས་གྲོལ་རྒྱུད་དྲུག་ཆོས་སྐུའི་སྟོན་པས་གསུངས། །དེ་ཉིད་བྲི་དང་རབ་གནས་དབང་བསྐུར་བཅང་། །ཀློག་ཅིང་བཞུ་བའི་རིམ་པ་ལེགས་པར་བསྟན། །

དང་པོ་བྲི་བ་ནི་མཐིང་ཤོག་ཟུར་ནས་ཟུར་དུ་སོར་བརྒྱད་པ་ལ། གསེར་གྱི་གཟབ་མར་དབུ་གཉིས་གྱེན་ལ་ཡོད་པས། བཏགས་གྲོལ་རྣམས་དང་འདས་རྗེས་གསུམ་པོ་བྲིས་ཏེ། དར་ཚོན་གྱིས་དྲིལ་ལོ། རབ་ཏུ་གནས་པ་ནི། ཟླ་བ་རྒྱས་པའི་ཚེ་དབེན་ཞིང་། ཉམས་དགའ་བར་མཎྜལ་མདའ་གང་མཐིང་ཁ་དཀར་སེར་དམར་ལྗང་ལྔའི་མུ་ཁྱུད་བསྐོར་ལ། དེའི་ནང་དུ་རིགས་ལྔའི་འོད་ཀྱི་ཚོམ་བུ་ལྔ་བྲིས་པ་ལ་སོ་སོའི་ཁ་དོག་གིས་གང་བར་ཁྱམས་མཐིང་གས་གང་། ཚོམ་བུའི་མུ་ཁྱུད་མཐིང་དམར་དཀར་པོའི་ར་བ་གསུམ་གསུམ་གྱིས་བསྐོར་བའི་དབུས་སུ་མཉྫིའི་སྟེང་དུ་རིན་པོ་ཆེའི་སྣོད་འབྲུས་བཀང་བ་གཅིག་གི་སྟེང་དུ་བཏགས་གྲོལ་རྣམས་ན་བཟའ་དང་བཅས་པ་གཞུག །དཀྱིལ་འཁོར་གྱི་མཐར་ཕྱི་ནང་གི་མཆོད་པ་དང་། ཚོགས་གཏོར་བཟང་དུ་བཤམ་མོ། །དེ་ནས་བགེགས་གཏོར་བྱིན་ལ་གུ་གུལ་གྱི་དུད་པ་དང་རོལ་མོའི་སྒྲས་བགེགས་རྣམས་རྒྱ་མཚོའི་མཐར་བསྐྲད་ལ་སྲུང་བའི་འཁོར་ལོས་མཚམས་བཅད་དེ། ཐམས་ཅད་ཀྱི་སྐྱབས་འགྲོ་སེམས་བསྐྱེད་བྱས་(༣༥)ལ། རང་ཉིད་ཀུན་བཟང་ཡབ་ཡུམ་མཐིང་ག་རིན་པོ་ཆེའི་རྒྱན་ཅན་དུ་བསྐྱེད། ཡེ་ཤེས་པ་དགུག་གཞུག་མཆོད་བསྟོད་ཅུང་ཟད་བྱས་ལ། རིགས་ལྔའི་རྩ་སྔགས་རྟེན་འབྲེལ་སྙིང་པོ་དང་བཅས་པ་ནས་བཟླས་པ་ཡང་སྟ་གོན་དུ་བྱའོ། །དེ་ནས་སྟོང་པའི་ངང་ལས་བདག་དང་གནས་དང་རྣལ་འབྱོར་པ་རྣམས་འོག་མིན་གྱི་ཞིང་དང་པོའི་སྟོན་པ་དང་འཁོར་དུ་བསམས་ཏེ། མདུན་གྱི་ཚོམ་བུའི་དཀྱིལ་འཁོར་འོད་ཟེར་གྱི་ཕུང་པོ་གཅིག་ཏུ་འབར་བའི་དབུས་ན། རྩ་བའི་བླ་མ་བརྒྱུད་པས་བསྐོར་བ་རྣམས་དཔལ་རྣམ་པར་སྣང་མཛད་ཀྱི་རྣམ་པ་ཅན་མཐིང་ག་འཁོར་ལོ་རྩིབས་བརྒྱད་པ། བྱང་ཆུབ་མཆོག་གི་ཕྱག་རྒྱས་བཟུང་བའི། ཤར་དུ་མི་བསྐྱོད་པ་དཀར་པོ་བདུད་འདུལ་གྱིས་རྡོ་རྗེ་དང་། ལྷོར་རིན་ཆེན་འབྱུང་ལྡན་སེར་པོ་མཆོག་སྦྱིན་གྱིས་ཨུཏྤ་ལ་དང་། ནུབ་ཏུ་སྣང་བ་མཐའ་ཡས་དམར་པོ་ཏིང་ངེ་འཛིན་གྱིས་པདྨ་དང་། བྱང་དུ་དོན་ཡོད་གྲུབ་པ་ལྗང་གུ་སྐྱབས་སྦྱིན་གྱིས་རྒྱ་གྲམ་འཛིན་པ། སོ་སོའི་ཡུམ་དང་བཅས་པ་བསྐྱེད་ལ། འོད་ཟེར་གྱི་ཕུང་པོ་གཅིག་ཏུ་འབར་བར་བཏགས་གྲོལ་དེ་ཉིད་བསམ་མོ། །དེ་ནས་རྡོ་རྗེ་དང་དྲིལ་བུ་འཛིན་པས་དབྱངས་དང་བཅས་ཏེ། ཧཱུྃ་མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་རིགས་ལྔ་ཡབ་ཡུམ་འཁོར་བཅས་གཤེགས། །ཞེས་པས་འོག་མིན་ནས་རིགས་ལྔའི་སངས་རྒྱས་དང་བྱང་ཆུབ་སེམས་དཔའ་གྲངས་མེད་པ་དང་། བླ་མ་བརྒྱུད་པ་ཐམས་ཅད་དང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་མཁའ་འགྲོ་དཔག་ཏུ་མེད་པ་སྤྲིན་ཕུང་གཏིབས་པ་བཞིན་དུ་བྱོན་པ་ལ། མེ་ཏོག་བདུག་སྤོས་སྣང་གསལ་དྲི། །ཞལ་ཟས་རོལ་མོ་ལ་སོགས་པ། །ཕྱི་ནང་མཆོད་པའི་སྤྲིན་ཕུང་གིས། །བདེ་གཤེགས་མ་ལུས་འཁོར་བཅས་མཆོད། །ཨཱ་བཛྲ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏྱ་ཤཔྟ་ཨཱཿཧཱུྃ། ཨཱ་ཡེ་ནས་འོད་གསལ་ཆོས་སྐུ་དག་པ་ལས། །སྣ་ཚོགས་གཟུགས་སྐུ་མཚན་དཔེའི་གཟི་འོད་ཅན། །བླ་མ་ཡི་དམ་རིགས་ལྔའི་སངས་རྒྱས་དང་། །མཁའ་འགྲོ་དམ་ཅན་རྒྱ་མཚོའི་ཚོགས་ལ་བསྟོད། །ཨཱ་བཛྲ་ཨཾ་ཀུ་ཤ་ཛཿ། བཛྲ་པཱ་ཤ་ཧཱུྃ། བཛྲ་སྥོ་ཊ་བཾ། བཛྲ་པྲ་ཝེ་ཤ་ཧོཿས། བཏགས་གྲོལ་ལྷའི་སྐུར་གསལ་བ་ལ། གཉིས་སུ་མེད་པར་ཐིམ། ཡང་ཕྱོགས་བཅུའི་དེ་བཞིན་གཤེགས་པ་རིགས་ལྔས་དབང་བསྐུར། ཡི་གེ་གསུམ་གྱིས་སྐུ་གསུང་ཐུགས་རྒྱས་བཏབ་ལ། སྔར་གྱི་(༣༦)བཟླས་པའི་མེ་ཏོག་གིས་གཏོར་ཞིང་། རིགས་ལྔའི་རྩ་སྔགས་རྟེན་འབྲེལ་སྙིང་པོ་དང་བཅས་པ་བརྒྱ་རྩ་བརྒྱད་བརྗོད་ནས། འབྲུ་དང་། སྨན་དང་རིན་པོ་ཆེའི་མཎྜལ་ལན་གསུམ་ཕུལ་ཏེ། ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཨཱ་བཛྲ་རེ་ཁེ་ཨཱཿཧཱུྃ། ཞེས་པ་དང་། མེ་ཏོག་ལ་སོགས་པ་ཕྱི་ནང་གི་མཆོད་པས་མཆོད་ལ། བླ་མ་དང་རིགས་ལྔའི་བསྟོད་པ་རྒྱས་པར་བྱས་ཏེ། མེ་ཏོག་གིས་སྙིམས་པ་བཀང་ལ་མགྲིན་གཅིག་ཏུ། གང་འདིར་བཅོམ་ལྡན་འདས་རིགས་ལྔའི་སངས་རྒྱས་སྲས་དང་བཅས་པ་དང་། བླ་མ་དང་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་དགོངས་སུ་གསོལ། ཆེ་གེ་མོ་ཞེས་བགྱི་བས་ཐོག་དྲངས་པའི་སེམས་ཅན་ཐམས་ཅད་སྨིན་པར་མཛད་དུ་གསོལ། གྲོལ་བར་མཛད་དུ་གསོལ། གང་བར་མཛད་དུ་གསོལ། རྒྱས་པར་མཛད་དུ་གསོལ། ཆེར་འཕེལ་བར་མཛད་དུ་གསོལ། ཅེས་པ་གསུམ་དང་། རྒྱུད་དང་འདས་རྗེས་རྣམས་ཚར་གཅིག་བརྗོད་པའམ། རྒྱུད་ཀྱི་སྙིང་པོ་ཚར་བདུན་བརྗོད་ལ། བཀྲ་ཤིས་ཀྱི་ལྷ་ཚོགས་དཔག་ཏུ་མེད་པས་བཀྲ་ཤིས་བརྗོད་པར་བསམ་ལ། མེ་ཏོག་འཐོར། རོལ་མོ་སྒྲོགས་ཤིང་མགྲིན་གཅིག་ཏུ། བདེ་གཤེགས་མི་འགྱུར་སྐུ་ལྔ་ལྷུན་གྱིས་གྲུབ། །ཡེ་ཤེས་ལྔ་ལྡན་ཕྲིན་ལས་ཕུན་སུམ་ཚོགས། །གདོད་མའི་མགོན་པོ་རིགས་ལྔའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་ཕུན་ཚོགས་ཤོག །འོག་མིན་ཡེ་ཤེས་བདེ་ཆེན་རྒྱ་མཚོའི་ཞིང་། །རྒྱལ་བ་རྒྱ་མཚོ་དཔག་མེད་ཚོགས་མངའ་བས། །འགྲོ་བའི་དོན་གཉིས་ལྷུན་གྱིས་གྲུབ་པ་ཡི། །བཀྲ་ཤིས་དམ་པ་དེས་ཀྱང་བདེ་ལེགས་ཤོག །བདེ་ཆེན་རིག་འཛིན་བདེ་གཤེགས་འགྲོ་བའི་ཡབ། །རྣམ་སྨིན་ཚེ་དབང་ཕྱག་རྒྱ་ལྷུན་གྱིས་གྲུབ། །སོ་སོའི་སྐུ་དང་ཡེ་ཤེས་ཕུན་ཚོགས་པའི། །བཀྲ་ཤིས་དམ་པ་དེས་ཀྱང་བདེ་ལེགས་ཤོག །དགའ་རབ་རྡོ་རྗེ་ཤྲཱི་སིངྷ་དང་། །ཨོ་རྒྱན་ཡབ་ཡུམ་མཁའ་འགྲོ་རྒྱ་མཚོར་བཅས། །དངོས་གྲུབ་སྣ་ཚོགས་འབར་བའི་སྤྲིན་འཕྲོ་བའི། །བཀྲ་ཤིས་དམ་པ་དེས་ཀྱང་བདེ་ལེགས་ཤོག །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །

ཞེས་པ་ལ་སོགས་པས་ཤིས་པ་རྒྱས་པར་བརྗོད་པའི་ཚེ། ཕྱོགས་བཅུར་བཀྲ་ཤིས་བདུད་རྩི་དང་། འོད་ཟེར་(༣༧)གྱི་དྲ་བས་འཇིག་རྟེན་ཐམས་ཅད་གྲོལ་ཏེ། སངས་རྒྱས་ཀྱི་བྱང་ཆུབ་ལ་གནས་པར་བསམ་ཞིང་། ཨཱ་སུ་པྲ་ཏིཥྛ་བཛྲ་ཡེ་སྭཱ་ཧཱས་བརྟན་པར་བྱའོ། །དེ་ནས་རབ་འབྱམས་རིག་པའི་རྩལ་དབང་བསྐུར་ཏེ། སྐལ་ལྡན་དེའི་གནས་ལྔར། ཨཱ་ཧཱུྃ་ཏྲཱཾ་ཧྲཱིཿཨཿལྔ་བསམ་པ་ལས་འོད་འཕྲོས། བདག་དང་སྣང་སྲིད་ཡི་གེ་དག་ཏུ་བསམས་ཤིང་། ཨཱ་ཨཱ་ཨཱ་ཞེས་པ་ལ་སོགས་བརྒྱ་རྩ་རེ་བརྗོད་ནས་སྣང་སྲིད་ལོངས་སྐུའི་ཞིང་དུ་བསམས་ལ། བླ་མས། ཨེ་མ་སྐལ་ལྡན་རིགས་ཀྱི་བུ། །འཁོར་འདས་སྣང་སྲིད་རང་གི་སེམས། །གདོད་ནས་མ་སྐྱེས་རྩ་བ་བྲལ། །སྟོང་གསལ་རིག་སྟོང་ཆོས་ཀྱི་སྐུ། །གང་ཤར་རང་གྲོལ་སྦྲུལ་མདུད་བཞིན། །སྤངས་བླང་གཉིས་མེད་ཤེས་པར་གྱིས། །ཞེས་ངོ་སྤྲད་ལ། ཡང་། ཨེ་མ་སྐལ་ལྡན་སྙིང་གི་བུ། །མིག་རྩེ་ནམ་མཁའི་ཁམས་སུ་ལྟོས། །སྣང་བ་སྣ་ཚོགས་འོད་གསལ་ཞིང་། །ཐིག་ལེ་དབྱིངས་དང་ལུ་གུ་རྒྱུད། །དུས་གསུམ་རྒྱལ་བའི་གསང་ཆེན་དབང་། །དོན་གྱི་སྙིང་པོ་འདི་ཉིད་དོ། །ཞེས་པས་མངོན་སུམ་ངོ་སྤྲད་དོ། །རྒྱུད་ཀྱི་གླེགས་བམ་ལ། མཎྜལ་ཚན་པ་གསུམ་ཕུལ་ནས། སློབ་མའི་སྤྱི་བོར་ཨཱ་བསམས་ལ་རྒྱུད་དེར་བཞག་པས། རྒྱུད་ལས་འོད་ཟེར་བྱུང་བའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུའི་དབང་དང་བྱིན་རླབས་ཐམས་ཅད་ཐོབ་པར་བསམས་ལ། སངས་རྒྱས་ཐམས་ཅད་ཀྱི་སྲས་གཅིག་པོས་མིང་འདི་ཞེས་བགྱི་བ་ལ་དབང་བསྐུར་ཞིང་བྱིན་གྱིས་བརླབ་ཏུ་གསོལ་ལོ། །སྨིན་པར་མཛད་དུ་གསོལ་ལོ། །གྲོལ་བར་མཛད་དུ་གསོལ་ལོ། །གང་བར་མཛད་དུ་གསོལ་ལོ། །ཆེར་འཕེལ་བར་མཛད་དུ་གསོལ་ལོ། །རྒྱས་པར་མཛད་དུ་གསོལ་ལོ། །སྐུ་རྡོ་རྗེ་གཉིས་སུ་མེད་པའི་དངོས་གྲུབ་ཆེན་པོ་འགྲུབ་པར་མཛད་དུ་གསོལ་ལོ། །ཨཱ་གྷ་ཛྷ་ཀཱ་ཡ་ཨ་བྷི་ཥིཉྩ་ཨཱ། ཞེས་བརྗོད་ནས་མགྲིན་པར་ཚིག་དེ་རྣམས་བརྗོད་ཅིང་ཁྱད་པར་དུ་གསུང་རྡོ་རྗེ་དང་གཉིས་སུ་མེད་པའི་དངོས་གྲུབ་ཆེན་པོ་འགྲུབ་པར་མཛད་དུ་གསོལ་ལོ། །ཨཱ་གྷ་ཛྷ་ཀཱ་ཡ་ཝཱཀྐ་ཨ་བྷི་ཥིཉྩ་ཨཱཿཞེས་པ་དང་སྙིང་གར་ཚིག་སྔ་མ་བཞིན་བརྗོད་ཅིང་། ཁྱད་པར་དུ་ཐུགས་རྡོ་རྗེ་དང་གཉིས་སུ་མེད་པའི་དངོས་གྲུབ་ཆེན་པོ་འགྲུབ་པར་མཛད་དུ་གསོལ་ལོ། །ཨཱ་གྷ་ཛྷ་དྷརྨ་ཀཱ་ཡ་ཙིཏྟ་ཨ་བྷི་ཥིཉྩ་ཧཱུྃ། ཞེས་བརྗོད་ནས་སྤྱི་བོའམ། སྙིང་གའམ། མཆན་ཁུང་གང་རུང་དུ་གདགས་སོ། །རྗེས་ནི་ཚོགས་ཀྱི་དགའ་བ་རྒྱ་ཆེན་པོ་བྱའོ། །དེ་ནས་ཀློག་པ་ནི། དུས་མ་ཡིན་པའི་སྒྲ་དང་། སད་དང་། སེར་བ་དང་། (༣༨)འབྲུག་དང་། ས་གཡོ་བ་དང་། འཇའ་འོད་དང་། ཉི་ཟླ་གཟས་ཟིན་པ་དང་། མུ་གེ་དང་། ནད་ལ་སོགས་པའི་མཚན་མ་བྱུང་དུས། སྟེང་དང་། འོག་དང་། ཕྱོགས་བཞི་གང་དུ་བྱུང་བ་བརྟགས་ལ། སྟེང་འོག་ཏུ་བྱུང་ན། རང་ཉིད་ཀུན་བཟང་ཡབ་ཡུམ་དུ་བསྒོམས་པའི་ལྕེ་འཁོར་ལོ་དཀར་པོ་རྩིབས་བརྒྱད་པར་བསམ། ཉི་ཟླ་གཟས་ཟིན་པ་དེ་ཉིད་ལ་སོགས་པའི་རྟགས་མཚན་ཡང་ཀུན་བཟང་ཡབ་ཡུམ་དུ་བསམས་ཏེ། རྒྱུད་དྲུག་འདས་རྗེས་དང་བཅས་པ་ཚར་གསུམ་མམ་ལྔའམ་བདུན་ནམ། བརྒྱ་སྟོང་ཅི་འགྲུབ་བཟླས་པའི་འོད་ཟེར་གྱིས། གནོད་པའི་མཚན་མ་ཐམས་ཅད་ཞི་ཞིང་། འཇིག་རྟེན་ཐམས་ཅད་བདེ་ལེགས་ཕུན་སུམ་ཚོགས་པར་བསམ་མོ། །རྗེས་ལ་སྣང་སྲིད་རིགས་ལྔའི་ཞིང་དུ་བསམ་སྟེ་བསྔོ་བ་བྱའོ། །དེ་བཞིན་དུ་ཤར་དང་ཤར་ལྷོར་བྱུང་ན། བདག་དང་མཚན་རྟགས་དེ་ཉིད། མི་བསྐྱོད་པ་ཡབ་ཡུམ་དུ་བསམ་པའི་རང་གི་ལྕེ་རྡོ་རྗེར་བསམས་ལ། ཞིང་ཁམས་མངོན་དགར་མོས་པ་བྱའོ། །ལྷོ་དང་ལྷོ་ནུབ་ལ་རང་དང་མཚན་རྟགས་རིན་ཆེན་འབྱུང་ལྡན་ཡབ་ཡུམ་དུ་བསམས་པའི་ལྕེ་རིན་པོ་ཆེར་བསམས་ལ། ཞིང་ཁམས་དཔལ་དང་ལྡན་པར་མོས་པ་བྱའོ། །ནུབ་དང་ནུབ་བྱང་ལ་འོད་དཔག་མེད་ཡབ་ཡུམ་གྱི་ལྕེ་པདྨ་དམར་པོ་འདབ་མ་བརྒྱད་པ། ཞིང་ཁམས་བདེ་བ་ཅན་ནོ། །བྱང་དང་བྱང་ཤར་ལ་དོན་ཡོད་གྲུབ་ཡབ་ཡུམ་གྱི་ལྕེ་རལ་གྲིར་བསམས་ལ། ཡུལ་དེ་ལས་རབ་གྲུབ་པའི་འཇིག་རྟེན་དུ་བསམས་ལ་བརྗོད་དོ། །

དེའང་མཚན་མ་གང་བྱུང་གི་ཕྱོགས་དེར་ཁ་བལྟས་ལ་ཀློག་པར་བྱའོ། །དེའང་མཚན་མ་དེ་དག་འགྲོ་བ་གང་གིས་མཐོང་བ་དང་། ཐོས་པ་དང་། རེག་པ་ཐམས་ཅད་སྤྲུལ་པའི་སྐུར་སངས་རྒྱའོ། །དེ་ནས་སྐལ་ལྡན་དེའམ། གཞན་ཡང་རུང་སྟེ་འདས་པའི་ཚེ་སྙིང་གར་བཏགས་ནས་བསྲེགས་པས་བར་དོར་སངས་རྒྱའོ། །དེ་ཡང་སྐུ་ཐོབ་པའི་རྟགས་སུ་སྤུར་ཁང་གི་དབུས་སུ་འཇའ་འཁྱིལ་པའམ། དུད་པ་སྔོན་པོ་གྱེན་ལ་འགྲེང་བའམ། གཡས་སུ་འཁྱིལ་པ་དང་། མེའི་འོད་དཀར་གསལ་འཁོར་ལོ་ལ་སོགས་པ་ཕྱག་མཚན་གྱི་རྣམ་པ་འབྱུང་ངོ་། །གདུང་ཤ་རཱི་རམ་སེར་པོ་དང་། ཆུ་རཱི་རམ་དཀར་པོ་དང་། བ་རཱི་རམ་དམར་པོ་དང་། ཉ་རཱི་རམ་ལྗང་གུ་དང་། པཉྩ་མ་མཐིང་ག་ལ་ཁ་དོག་ལྔ་ལྡན་ཏེ་རིགས་ལྔའི་གདུང་དང་། སྐུ་འབྱུང་ངོ་། །གསུང་གི་རྟགས་སུ་འོད་ཁྱིམ་གྱེན་འགྲེང་དང་། སྒྲ་འུར་བ་དང་། ཐུག་པ་དང་ས་གཡོ་བའོ། །ཐུགས་ཀྱི་རྟགས་སུ་ནམ་མཁའ་སྤྲིན་མེད་ཅིང་དྭངས་ལ་གསལ་བ་དང་། འཇའ་ཚོན་ཁ་དོག་སྣ་(༣༩)ལྔའི་སྣང་བ་དཔག་ཏུ་མེད་པ་འབྱུང་ངོ་། །གཞན་ཡང་ཡི་གེ་དང་། སྐུ་དང་། རིང་བསྲེལ་དུ་མ་འབྱུང་ངོ་། །ཕན་ཡོན་ནི་བཏགས་གྲོལ་སྙིང་པོའི་རྒྱུད་ལས། ཨེ་མ་འདི་ནི་ཁྱད་པར་འཕགས། །དབང་པོ་རྣམ་ལྔ་འོན་གྱུར་ཅིང་། །རྒན་གཞོན་ཕོ་མོ་དགེ་སྡིག་མེད། །བག་ཆགས་བཟང་ངན་མེད་པ་རུ། །འདི་ཉིད་བཅངས་པས་འཚང་རྒྱའོ། །ཐ་མ་དབུགས་ལ་སླེབས་ཀྱང་གྲོལ། །སངས་རྒྱས་གདུང་འཛིན་སྲས་གཅིག་ཡིན། །ཞེས་པ་དང་། རྡོ་རྗེ་འཆང་གི་དུས་གནད་ངེས་པ་ལས། འདི་ཉིད་བཅངས་པ་ཙམ་གྱིས་ཀྱང་། །སངས་རྒྱས་ཉིད་དུ་འགྱུར་བ་ལས། །ཐེ་ཚོམ་བྱ་བར་ཅི་ཞིག་དགོས། །གལ་ཏེ་བྱོལ་སོང་མགུལ་དུ་འདི། །བཏགས་པ་ཙམ་གྱིས་དེ་གྲོལ་ནས། །འགྲོ་བ་མི་རྣམས་སྨོས་ཅི་དགོས། །ཨེ་མ་རང་བྱུང་ཡི་གེ་འདིས། །སེམས་ཅན་རྣམས་ཀྱི་དོན་བྱེད་ན། །ཚེ་འདས་དེ་ཡི་སྤྱི་བོ་འམ། །མགུལ་དུ་འདི་བཏགས་བསྲེག་ན་ནི། །འདི་ཉིད་གྲོལ་བར་སྨོས་ཅི་འཚལ། །མཚམས་མེད་ལྔ་པོ་སྤྱད་པ་ཡང་། །ཉན་ཐོས་རྣམས་དང་སྐལ་བ་མཉམ། །ལུང་དུ་མ་བསྟན་སྐྱེ་བོ་རྣམས། །བྱང་ཆུབ་བསམས་དཔའི་ས་དང་མཉམ། །ཡིད་དཔྱོད་འཛིན་པའི་གྲུབ་མཐའ་ཡང་། །རྡོ་རྗེ་འཆང་དང་མཉམ་པར་ངེས། །འདི་ཉིད་བཅངས་པའི་སྐྱེས་བུ་དེ། །གང་ན་འདུག་པའི་ཡུལ་ཕྱོགས་ཙམ། །ངན་སོང་དག་ནས་གྲོལ་བར་འགྱུར། །མཆོག་དང་ཐུན་མོང་དངོས་གྲུབ་ཐོབ། །རིག་པ་དངོས་ཀྱི་རྟགས་ཡོད་པའི། །སྐལ་ལྡན་དེ་ལ་བསྲེག་མི་དགོས། །འཆི་ཁར་འཕྲད་པས་འགྱུར་བ་ཡིན། །ཞེས་པ་ལ་སོགས་དཔག་ཏུ་མེད་པ་གསུངས་སོ། །

ཨེ་མ་ཧོ། སངས་རྒྱས་རྣམས་ཀྱི་ཐུགས་རྗེའི་བྱིན་རླབས་ལས། །བཅངས་པ་ཙམ་གྱིས་གྲོལ་བའི་མན་ངག་འདི། །སྐལ་ལྡན་རྣམས་དང་རབ་ཏུ་འཕྲད་ནས་ཀྱང་། །ལྷུན་གྲུབ་ས་ལ་ཀུན་ཏུ་བཟང་པོར་ཤོག །ཨོ་རྒྱན་ཐུགས་སྲས་དྲི་མེད་འོད་ཟེར་གྱིས། །ཨོ་རྒྱན་ཟབ་ཆོས་མཁའ་འགྲོ་སྙིང་ཏིག་ལས། །ཨོ་རྒྱན་དགོངས་དོན་ཇི་བཞིན་བཤད་པ་འདི། །ཨོ་རྒྱན་རྫོང་དུ་ཕྱི་རབས་དོན་དུ་བཀོད། །བཏགས་གྲོལ་མན་ངག་རིན་ཆེན་སྙིང་པོ་ཞེས་བྱ་བ། པདྨ་ལས་འབྲེལ་རྩལ་གྱིས་བཀོད་པ་རྫོགས་སོ།། །།

དགེའོ།། །།

སྲེག་སྦྱོང་འོད་ཀྱི་སྙེ་མ།

༄༅། །སྲེག་སྦྱོང་འོད་ཀྱི་སྙེ་མ་བཞུགས་སོ། །ཤོག་སྐྱའི་སྐོར།

༄༅། སྲེག་སྦྱོང་འོད་ཀྱི་སྙེ་མ་ཞེས་བྱ་བ། དཔལ་སྣང་བ་མཐའ་ཡས་ལ་ཕྱག་འཚལ་ལོ། །གང་གི་རང་བཞིན་དབྱིངས་ལས་མ་གཡོས་ཀྱང་། །ཐུགས་རྗེའི་མེ་འོད་ཡེ་ཤེས་འོད་འཕྲོ་བས། །འགྲོ་ཀུན་སྒྲིབ་པའི་བུད་ཤིང་སྲེག་མཛད་པ། །བདེ་(༤༠)གཤེགས་རིག་འཛིན་རྣམས་ལ་ཕྱག་འཚལ་ལོ། །རྩ་བའི་རྒྱུད་སྡེ་རྫོགས་པ་རང་བྱུང་ལས། །ཚེ་འདས་ཕུང་པོ་བསྲེག་སྟེ་སྒྲིབ་སྦྱོང་དོན། །མ་ནོར་ཇི་བཞིན་གསལ་བའི་རིམ་པ་ཡིས། །པདྨ་ལས་འབྲེལ་རྩལ་གྱིས་ལེགས་པར་བསྟན། །

དེ་བཞིན་གཤེགས་པ་རིགས་ལྔའི་དཀྱིལ་འཁོར་དུ། རོ་བསྲེགས་ཏེ་སྡིག་པ་སྦྱང་བ་ལ། སྔོན་འགྲོ་སྟ་གོན་དུ་བྱ་བ། དངོས་གཞི་ཇི་ལྟར་སྦྱང་བ། རྗེས་རུས་བུ་བསྡུ་བ་གསུམ་ལས། དང་པོ་ལ་ཐབ་རྩིག་པ། རོ་ཆས་འཇུག་པ། མཆོད་རྫས་བཤམ་པ་དང་གསུམ་ལས། དང་པོ་ནི། སའི་སྟེགས་འདོམ་དོ་ལ་སོགས་པ་ཇི་ལྟར་འོས་པ་བྱས་ལ། ཐེག་ཆེན་བཞི་བཏབ་པའི་དབུས་སུ། མེ་ཁང་གྲུ་བཞི་པ། རོ་དེ་ཉིད་ཀྱི་ཁྲུ་སྐོར་གྱིས་རྨང་བཏིང་བའི་ནང་དུ་ཟླུམ་སྐོར་གསུམ་བྲིས་པའི་ནང་མ་ལ་རིགས་ལྔ་ཡབ་ཡུམ་གྱི་མཚན་མ་པད་འདབ་བཞིའི་དབུས་སུ་འཁོར་ལོ། ཕྱོགས་བཞིར་རྡོ་རྗེ་དང་། རིན་པོ་ཆེ་དང་། པདྨ་དང་། རྒྱ་གྲམ་རྣམས་བྲིས། གཉིས་པ་ལ་སེམས་དཔའ་སེམས་མ་ཡབ་ཡུམ་བརྒྱད་ཀྱི། ཐིག་ལེ་གཉིས་བརྩེགས་པ་ཁ་དོག་དང་མཐུན་པ་བརྒྱད་བྱ། གསུམ་པ་ལ་སྒོ་བ་ཡབ་ཡུམ་གྱི་མཚན་མ་དགོད། ཟུར་བཞིར་ཟླ་ཕྱེད་རྡོ་རྗེ་རེ་བྲི། ནང་མའི་མུ་ཁྱུད་བཞི་མཐིང་ག །བར་པ་དམར། ཕྱི་མ་དཀར་པོས་བཀང་། ཡེ་ཤེས་ཀྱི་མུ་ཁྱུད་ལྔ་ལྡན་ཕྱི་མ་ལ་བསྐོར། དེ་ཉིད་རས་ལ་སོགས་པས་བཀབ་ནས། སྔར་གྱི་འཕྲོ་གྱེན་ལ་རྩེ་ཁྲུ་གང་དང་མཛུབ་གང་རྩིགས་ལ། ཤིང་ཤུག་པ་བརླ་བས་མི་ཕྲ་བ། རྩེ་ཁྲུར་རེ་ཐབ་ཀྱི་ནང་དུ་བསླང་ལ་དྲང་པོར་གཤིབས་ཏེ་ཁེངས་པར་དགང་། ཕྱོགས་བཞིའི་གསེང་ཕུག་ས་ཐང་མཚམས་ལ་གྱེན་དུ་མཁྱིད་རེ་ཡོད་པའི་ཕྱོགས་སུ། ཤིང་གི་ཁོང་སེང་། དཔལ་འབར་འཛུགས་ཡོད་པ་རེ་བྱ། མདུན་གྱི་བུག་པ་དེ་ཤིང་བཅུག་པས་ཤོང་བར་བྱས་ལ་སོ་ཕག་ལ་སོགས་པས་ཕྱི་ནས་གཅད། རྩེ་ཁྲུ་གང་གི་གོང་ན་མཛུབ་གང་ཡོད་ས་བུག་པ་ཅིག་བྱས། ཡམ་ཤིང་ཕྲ་མོས་ཟང་ཟིང་དུ་དགང་། དེའི་སྟེང་ནས་རོ་ཁང་ཁྲུ་གང་པ་ཟླུམ་པོའམ་གྲུ་བཞི་པར་བརྩིག་གོ། །གཉིས་པ་ནི་རོའི་དྲུང་དུ་མཆོད་པ་བཤམས་ལ། བདག་ཉིད་ཀུན་བཟང་ཡབ་ཡུམ་དུ་བསྐྱེད་ལ། མཆོད་བསྟོད་བྱས་ནས་བུམ་པར་བཟླས་པ་བྱ། རོ་ལ་བསང་ཆུ་གཏོར་ནས། མེ་ཏོག་ཕོག་པའི་ལྷར་བསྐྱེད་ཏེ། རྣམ་ཤེས་བཀུག་ལ་བགེགས་བསྐྲད་སྡིག་པ་སྦྱང་། གཟུངས་སྔགས་ཀྱི་བུམ་ཆུས་བཀྲུ་ཞིང་། ཕར་ཕྱིན་དྲུག་དང་ཆུ་བོ་བཞི་ལ་སོགས་(༤༡)པའི་ཚིག་བཅད་བརྗོད་ནས། ཨཱ་སརྦ་བིད་བཛྲ་ཨ་དྷི་ཏིཥྛ་ཛྙཱ་ན་ས་མ་ཡེ་ཧཱུྃ་གིས། རྡོ་རྗེ་ཁུ་ཚུར་དང་བཅས་པས་བྱིན་གྱིས་བརླབས་ལ། རིགས་ལྔའི་རྩ་སྔགས་ཚན་པ་གསུམ་བྲིས་པའི་གཅིག་སྤྱི་བོ། གཅིག་མགྲིན་པ་གཅིག་སྙིང་ཁར་བཏགས་ལ་མཆོད་བསྟོད་བྱའོ། །སྐབས་འདིར་དབང་བསྐུར་ནས་ལམ་བསྟན་ལམ་སྦྱོང་བྱས་ནའང་ཤིན་ཏུ་ལེགས་ཤིང་། མ་བྱས་ཀྱང་འགལ་བ་མེད་དོ། །དེ་ནས་རོ་ཁང་དུ་བཅུག་སྟེ། རོལ་མོའི་སྒྲས་བགེགས་བསྐྲད་ལ། ཤིང་སྒྲོམ་མམ་དུར་ཁང་རྒྱ་ཕིབས་མ་བྱེད་ན་སྟེང་ནས་བཀབ། མེད་ན་བྲེའི་གཟུགས་གྲུ་བཞི་པ། ཅུང་ཟད་ཡངས་པ་གཅིག་གམ། དང་མའི་ཞབས་མཐོ་གང་ཕུག་པ་བཀབ། ཕྱི་ནས་དུ་བ་མི་འཆོར་བར་དྲེས་མས་བཅིངས་ལ་ཞལ་བ་བྱའོ། །གསུམ་པ་ནི་མཆོད་པ་མདུན། སྲེག་རྫས་གཡས། གཏོར་མ་གཡོན་དུ་བཤམ་མོ། །དེའང་མཆོད་པ་ནི། མཆོད་ཡོན་ལ་སོགས་པ་ཕྱི་ནང་གི་མཆོད་པ་རྣམས་སོ། །སྲེག་རྫས་ནི་ཡམ་ཤིང་སོར་བཅུ་གཉིས་པ་མང་པོ་དང་། མར་དང་། ཏིལ་དང་། ཡུངས་ཀར་དང་། ཞོ་ཟན་དང་འབྲས་ལ་སོགས་པ་འབྲུ་སྣ་ཚོགས་དང་། རའི་འོ་མའོ། །དེ་རྣམས་ཀྱི་ཡམ་ཤིང་དང་མར་མ་གཏོགས་པ་སྣོད་གཅིག་ཏུ་བསྲེས་པའམ། སོ་སོར་བྱའོ། གཏོར་མ་ནི་འཇིག་རྟེན་ལས་འདས་པའི་གཅིག །མཁའ་འགྲོའི་གཅིག །ཆོས་སྐྱོང་གི་གཅིག །མེ་ལྷ། གཞི་བདག །རིགས་དྲུག །བགེགས་གཏོར་དང་བདུན་ནོ། །

གཉིས་པ་དངོས་གཞི་ལ། བདག་བསྐྱེད་པ། མདུན་བསྐྱེད་པ། མཇུག་བསྡུ་བ་དང་གསུམ་ལས། དང་པོ་ནི། སྲུང་འཁོར་སྔོན་དུ་འགྲོ་བས་ཀུན་བཟང་དུ་བསྐྱེད་ལ། ཡེ་ཤེས་པ་བཅུག །དབང་བསྐུར་མཆོད་པ་དང་བསྟོད་པ་རྒྱས་པར་བྱའོ། །གཉིས་པ་ནི། གང་ཟག་མཆོག་ལ་ཛྭ་ལའི་སྔགས་ཙམ་གྱིས་མེ་སྦར། ཕལ་པ་ལ། གསོན་ཅིག་དགོངས་ཤིག་རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་རིགས་ལྔའི་མེ་སྦར་རོ། །འབྱུང་བ་བཞི་ཡི་བུད་ཤིང་ལ། །ལྷ་མོ་བཞི་ཡི་མེ་སྦར་རོ། །དབང་པོ་དྲུག་གི་བུད་ཤིང་ལ། །བྱང་ཆུབ་སེམས་དཔའི་མེ་སྦར་རོ། །ཡུལ་རྣམས་དྲུག་གི་བུད་ཤིང་ལ། །ལྷ་མོ་དྲུག་གི་མེ་སྦར་རོ། །ཉོན་མོངས་ལྔ་ཡི་བུད་ཤིང་ལ། །ཡེ་ཤེས་ལྔ་ཡི་མེ་སྦར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བ་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་གཉིས་འགྲུབ་པར་ཤོག །ཨཱ་བཛྲ་ཛྭ་ལ་རཾ་ཛྭ་(༤༢)ལ་རཾ། ཞེས་པས་མདུན་ངོས་ཀྱི་གསེང་ནས་མེ་སྦར་ལ། བསང་ཆུ་གཏོར་ནས་ཐབ་དང་མཆོད་གཏོར་སྲེག་རྫས་དང་བཅས་པ་བསངས་ནས། སྭ་བྷཱ་ཝས་སྟོང་པར་སྦྱངས་ལ། སོ་སོའི་སྔགས་ཀྱིས་བྱིན་གྱིས་བརླབས་ཏེ། ཨཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པའི་ངང་ལས། རིན་པོ་ཆེའི་ཐབས་ཡངས་ཤིང་རྒྱ་ཆེ་བ། སྒོ་བཞི་གྲུ་བཞི་རྟ་བབས་བཞི་དང་ལྡན་པའི་དབུས་སུ་ར་སྐྱེས་ཀྱི་སྟེང་ན་རཾ་ལས་མེ་ལྷ་དཀར་པོ་ཞལ་གཅིག་ཕྱག་བཞི་པ་གཡས་དང་པོ་པདྨ། གཉིས་པ་ནོར་བུའི་ཕྲེང་བ། གཡོན་དང་པོ་དབྱུག་པ། གཉིས་པ་རིལ་བ་སྤྱི་བླུགས་འཛིན་པའོ། །དེ་ནས་དབྱུག་གུའི་ཕྱག་རྒྱས་རྡོ་རྗེ་དྲིལ་བུ་དང་དབྱངས་ཀྱིས། ཨཱ་ཚུར་བྱོན་ཚུར་བྱོན་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །སྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་གཤེགས་སུ་གསོལ། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་པ་པོ། །ཐུགས་རྗེས་སེམས་ཅན་དོན་མཛད་པ། །འདི་ཉིད་དུ་ནི་བཞུགས་སུ་གསོལ། །ཨཱ་ཨགྣེ་ཡེ་མཧཱ་ཏེ་ཛ་ཨེ་ཧྱ་ཧི་ས་མ་ཡེ་ཛཿཛཿ ཞེས་པས་ཤར་ལྷོ་ནས་མེ་ལྷ་འཁོར་དང་བཅས་པ་སྤྱན་དྲངས་ལ་ཛཿཧཱུྃ་བཾ་ཧོཿས་ཐབ་ཀྱི་དམ་ཚིག་པ་བསྐྱེད་པ་ལ་བསྟིམས་ནས། ཨཱ་ཨགྣེ་ཡེ་པདྨ་ཀ་མ་ལ་ཡེ་སྟྭཾ་གྱིས་གདན་ཕུལ་ནས་ཀུ་ཤ་ཐོགས་ཏེ། ཀུ་ཤ་འདི་ནི་གཙང་ཞིང་དགེ། །ས་ལས་སྐྱེས་པའི་སྙིང་པོ་མཆོག །ཚངས་པའི་ལྷ་ཡང་དག་པ་སྟེ། །དཀོན་མཆོག་གསུམ་གྱིས་དག་བྱེད་ཡིན། །དེ་ཡིས་བདག་ཅག་འཁོར་བཅས་ལ། །བགེགས་རྣམས་མེད་ཅིང་ཞི་བར་མཛོད། །ཅེས་པས་རྩེ་མ་ཉམས་པར་དགྲམ་མོ། །དེ་ནས། ཨཱ་ཨགྣེ་ཡེ་སྭཱ་ཧཱས་མར་བླུགས་གཟར་བདུན་བདུན་གྱིས་བཀང་བའི་དགང་བླུགས་ཁ་སྦྱར་བ་གསུམ་དབུལ་ཞིང་། ཨཱ་ཨགྣེ་ཡེ་དི་བྱ་དི་བྱ་བི་ཤུདྡྷེ་མཧཱ་ཤྲཱ྇་ཧ་བྱ་ཀ་བྱ་བ་ཧ་ན་ཡ་ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་ཤནྟིང་ཀུ་རུ་ཡེ་སྭཱ་ཧཱས་བྱོན་ཟན་ཕུལ་ནས། གཙང་ཞིང་གཙང་མར་སྦྱར་བ་ཡི། །ལྷ་རྫས་བཟང་པོའི་མཆོད་ཡོན་འདི། །དྲང་སྲོང་འཁོར་དང་བཅས་ལ་འབུལ། །འགྲོ་བའི་དོན་དུ་བཞེས་སུ་གསོལ། །ཨཱ་ཨགྣེ་ཡེ་མཧཱ་ཏེ་ཛ་ཨརྒྷཾ་པྲ་ཏཱིཙྪ་པཱུ་ཙ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཧཱུྃ། ཞེས་པ་ནས་རོལ་མོའི་བར་ཕུལ་ལ། སྲེག་རྫས་རྣམས་ཀྱི་མར་དང་ཡམ་ཤིང་སོ་སོར་འབུལ། གཞན་མ་རྣམས་བསྲེས་ལ། ཨཱ་ཨགྣེ་ཡེ་ཆེ་གེ་མོའི་སྡིག་པ། སརྦ་པཱ་པཾ་ཤནྟིང་ཀུ་རུ་ཡེ་སྭཱ་ཧཱ། ཞེས་པས་ཉི་ཤུ་རྩ་གཅིག་རེ་གྲངས་བྱས་ལ་དབུལ། དེའང་རྒྱས་(༤༣)པར་བྱེད་ན་སྲེག་རྫས་རྣམས་སོ་སོར་དབུལ་ཏེ། ཨཱ་བྷོ་དྷི་པྲ྇ཀྵ་ཡེ་སྭཱ་ཧཱས་ཡམ་ཤིང་དང་། ཨགྣེ་ཡེས་མར། ཨཱ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱས་ཏིལ། ཨཱ་བཛྲ་སིད་དྷ་ཡེ་སྭཱ་ཧཱས་ཉུང་དཀར། ཨཱ་སརྦ་སཾ་བྷ་དེ་སྭཱ་ཧཱས་ཞོ་ཟན་དང་། འབྲས་ལ་སོགས་པ་སོ་སོར་འབུལ་ལོ། །འོག་མ་རྣམས་ལའང་ཚུལ་འདིས་ཤེས་པར་བྱའོ། །དེ་ནས་མཆོད་པས་མཆོད་ལ། འཇིག་རྟེན་དབང་ཕྱུག་ཚངས་དབང་མཆོག་གི་སྲས། །མེ་ལྷའི་རྒྱལ་པོ་ཌཱ་ཀིས་དབང་བསྐུར་བས། །ཤེས་རབ་མཆོག་གིས་ཉོན་མོངས་ཐམས་ཅད་བསྲེགས། །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཚངས་པ་འཇིག་རྟེན་མགོན་པོའི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེའི་དབང་གིས་སྐུ་སྤྲུལ་པ། །རིག་སྔགས་སྒྲུབ་པའི་དྲང་སྲོང་ཚུལ། །ཉོན་མོངས་བསྲེག་པའི་ཤེས་རབ་འོད། །བསྐལ་པའི་མེ་ལྟར་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་བཅིབས། །རིག་སྔགས་གསུང་གི་བགྲང་ཕྲེང་འཛིན། །བདུད་རྩིའི་བཅུད་ལྡན་གྷུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་བས་བསྟོད་དེ་ཕྱག་ཀྱང་འཚལ། །ཞེས་པས་འཇིག་རྟེན་པའི་མེ་ལྷ་མཆོད་ཅིང་བསྟོད་ནས། འཇིག་རྟེན་ལས་འདས་པའི་མེ་ལྷ་མཆོད་ཅིང་བསྟོད་པ་ནི། ལྷ་རྣམས་སྤྱན་དྲངས་ལ་གང་ཟག་མཆོག་ལ་རོ་དང་ལྷ་རྣམས་དབྱེར་མེད་ལ་མཆོད་བསྟོད་བྱ་ཞིང་། ཕལ་པ་ལ་ལྷ་བསྐྱེད་པ་ལ་སྲེག་རྫས་དང་། རོའི་ཤ་ཁྲག་རུས་པ་རྣམས་བདུད་རྩིར་བསམས་ལ་འབུལ་ལོ། །དེའང་རྒྱས་པ་ལ་དམ་ཚིག་པ་བསྐྱེད་ནས་ཡེ་ཤེས་པ་བསྟིམ་ལ། བསྡུས་པ་ལ་ཡེ་ཤེས་པ་སྤྱན་དྲངས་ཏེ། མེ་ལྷའི་ལྟོ་བར་བཞུགས་པར་བསམས་ལ་མཆོད་པའོ། །དེ་ཡང་ཐོག་མར་མེ་ལྷའི་ལྟོ་བ་ཡངས་ཤིང་རྒྱ་ཆེ་བར་ཁྲོ་བོ་རྟ་མགྲིན་ཡབ་ཡུམ་དུ་བསྐྱེད་ལ། ཧཱུྃ་ཡེ་ཤེས་བསྐལ་པའི་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་སྲེག །ཞེ་སྡང་གཤིན་རྗེའི་འཇིགས་པ་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བའི། །རིག་པའི་རྒྱལ་པོ་ཁྲོ་བོ་བཞུགས་སོ་འཚལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཨཱ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ས་མ་ཡ་ཛཿས་སྤྱན་དྲངས་(༤༤)པ་བསྟིམ་ལ། ཨཱ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ། ཨརྒྷཾ། པ་ཏྱཾ། པུཥྤཾ། དྷཱུ་པཾ། ཨཱ་ལོ་ཀེ། གྷནྡྷེ། ནཻ་ཝི་ཏེ། ཤཔྟ་ཨཱ་ཧཱུྃ་གིས་མཆོད་ནས། དབང་ཆེན་བསྐལ་པའི་མེ་ལྟར་གཟི་བརྗིད་འབར། །འཇིགས་བྱེད་ཆེན་པོ་རལ་པ་གྱེན་དུ་བརྫེས། །ཁྲོ་བོའི་རྒྱན་རྣམས་མ་ལུས་རབ་རྫོགས་པའི། །ཁྲོ་རྒྱལ་རྟ་མཆོག་དཔལ་ལ་ཕྱག་འཚལ་བསྟོད། །ཅེས་པའི་རྗེས་ལ་སྔགས་དེ་ཉིད་ལ། ཆེ་གེ་མོའི་སྡིག་པ་དང་སྒྲིབ་པ་ཤནྟིང་ཀུ་རུ་ཡེ་སྭཱ་ཧཱ། བཏགས་ལ། སྲེག་རྫས་རིམ་པས་བརྒྱ་རྩ་བརྒྱད་ལ་སོགས་པ་ཕུལ་བའི་རྗེས་ལ། ཧཱུྃ་མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཛོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པས། །བླ་མེད་དཀོན་མཆོག་གསུམ་པོ་གནས་འདིར་གཤེགས། །ཨཱ་ན་མོ་རཏྣ་ཏྲ་ཡཱ་ཡ། བྷུ་དྷཱ་དྷརྨཱ་སཾ་གྷ་ས་མ་ཡ་ཛཿས་སྤྱན་དྲངས་ལ། རྒྱལ་བ་སྲས་དང་བཅས་པ་ཁྲོ་བོའི་མདུན་དུ་བཞུགས་པ་ལ་མཆོད་པས་མཆོད་ནས། མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །ཞེས་པས་བསྟོད་ནས། ན་མོ་རཏྣ་ཏྲ་ཡཱ་ཡ་བུདྡྷ་དྷརྨཱ་སཾ་གྷ་བྷྱོ། ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་ཤནྟིང་ཀུ་རུ་ཡེ་སྭཱ་ཧཱ། བརྒྱ་རྩ་བརྒྱད་ལ་སོགས་པ་ཕུལ་ནས། སླར་ཡང་མཆོད་ཅིང་བསྟོད་ནས། ཁྲོ་བོའི་ལྟོ་བར་ཞི་ཁྲོའི་དཀྱིལ་འཁོར་བསྐྱེད་ལ། སྤྱན་དྲངས་ཏེ་བསྟིམ་ནས། མཆོད་བསྟོད་རྒྱས་པར་བྱས་ལ། རྣམ་སྣང་གི་རྩ་སྔགས་མིང་སྤེལ་དང་བཅས་པ་སྟོང་ངམ་འབུམ། གཞན་རྣམས་རང་རང་གི་སྔགས་རྣམས་ཀྱིས་བརྒྱ་རྩ་བརྒྱད་ལ་སོགས་པ་ཕུལ་ལ། མཆོད་པ་དང་བསྟོད་པ་ཡང་རྒྱས་པར་བྱས་ཏེ། སླར་ཡང་ཁྲོ་བོ་རྟ་མགྲིན་ལ། སྔར་གྱི་ཚུལ་དེ་ཉིད་ཀྱིས་བརྒྱ་སྟོང་གྲངས་མེད་པ་ཕུལ་ལ། མཆོད་བསྟོད་བྱས་ཏེ་བགེགས་ཞི་བར་གསོལ་བ་བཏབ་ནས། འཇིག་རྟེན་ལས་འདས་པའི་ལྷ་རྣམས་ལ་གཏང་རག་གི་མཆོད་ཅིང་བསྟོད་ནས། བཟོད་པར་གསོལ་ཏེ། ཨཱ་བཛྲ་མུཿས་སྤྱན་དྲངས་པ་རིམ་པ་བཞིན་གཤེགས་ནས། དམ་ཚིག་པ་བསྡུ་ལ་ཡང་མེ་ལྷའི་ལྟོ་བར་མཁའ་འགྲོ་(༤༥)ཆོས་སྐྱོང་ཡུལ་ལྷ་གཞི་བདག་ལ་སོགས་པ་རིམ་པར་སྤྱན་དྲངས་ཏེ། རང་རང་གི་སྔགས་སམ། ཨཱ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ་ཨདྱ་ནུད་པ་ནན་ཏྭ་ཏ་ཨཱ་ཨཱཿཧཱུྃ་ཕཊ། ཅེས་སྲེག་རྫས་ཕུལ་ལ་གཏོར་མ་ཡང་ཕུལ་ཏེ། ཕྲིན་ལས་བཅོལ་ནས་གཤེགས་སུ་གསོལ་ལ། སླར་ཡང་མེ་ལྷ་གསལ་བཏབ་ནས། སྲེག་རྫས་ལྷག་མ་ཅི་འབྱོར་པ་བདུན་ལ་སོགས་པ་ཕུལ་ཏེ། མཆོད་པ་དང་གཏོར་མ་ཕུལ་ནས་ཕྲིན་ལས་བཅོལ་ཏེ། བསྟོད་པ་བྱས་ནས། བདག་གི་དོན་དང་གཞན་གྱི་དོན། །སྒྲུབས་ཀྱིས་བཞུད་ཅིག་བྱིན་ཟ་ཁྱོད། །རང་གནས་དགེ་བར་གཤེགས་ནས་ཀྱང་། །སླར་ཡང་དུས་བཞིན་ཅི་ནས་བྱོན། །བདག་གི་ཞེས་མེ་ལྷའི་ཕྱག་རྒྱ་བཀྲོལ་ལ། འབྱུང་དགོས་པ་ཐམས་ཅད་མཛོད། །ཨཱ་ཨགྣེ་ཡེ་གཙྪ། །པོ་ཐམས་ཅད་པའི་གཏོར་མ་བྱིན་ནས་བསྔོ་བ་བྱས་ཏེ། ཨཱ་ཨཱཿཧཱུྃ་གིས་བདག་ཉིད་བསྲུངས་ནས། གསོན་པོ་དོན་དུ་བཀྲ་ཤིས་བརྗོད་ལ་ཡོན་ཕུལ་དགའ་སྟོན་བྱའོ། །གསུམ་པ་ནི་མེ་རྣམས་ཞི་བའི་ཚེ། བདག་བསྐྱེད་མདོར་བསྡུས་པས་ལག་པ་གཉིས་དཔུང་པར་བསྣོལ་ཏེ་སེ་གོལ་གཏོགས་ཤིང་། ཨཱ་བཛྲ་ས་མ་ཡེ་ཛཿཧཱུྃ་བཾ་ཧོཿས་རུས་བུ་བསྡུས་ལ། བུམ་ཆུས་བཀྲུ་ཞིང་སྡིག་སྒྲིབ་དག་པར་བསམ་ལ། རིགས་ལྔའི་རྩ་སྔགས་སྤེལ་ཚིག་དང་བཅས་པ་བརྗོད་ནས། མཆོད་དེ་གཤེགས་སུ་གསོལ་ལོ། །

དེ་ལྟར་ཚེ་འདས་སྒྲིབ་པ་སྦྱོང་བའི་ཐབས། །ཇི་ལྟར་རྒྱུད་ལས་གསུངས་བཞིན་སྦྱར་བ་ཡིས། །དགེ་བ་དྲི་མེད་སྟོན་ཀའི་ཟླ་འདྲ་དེས། །འགྲོ་ཀུན་རྒྱལ་བའི་གོ་འཕང་ཐོབ་པར་ཤོག །ཚུལ་འདི་རྒྱལ་སྲས་དྲི་མེད་འོད་ཟེར་གྱིས། །གངས་རི་ཐོད་དཀར་རིན་ཆེན་སྙིང་པོའི་མགུལ། །ཨོ་རྒྱན་རྫོང་ཞེས་བྱ་བའི་གནས་མཆོག་ཏུ། །རིན་ཆེན་ཤོག་སྐྱའི་ངོས་ལ་ལེགས་པར་བཀོད། །སྲེག་སྦྱོང་འོད་ཀྱི་སྙེ་མ་ཞེས་བྱ་བ། པདྨ་ལས་འབྲེལ་རྩལ་གྱིས་སྟོན་གསུམ་གངས་རི་ཐོད་དཀར་དུ་སྦྱར་བ་རྫོགས་སོ། །བྷ་ཝནྟུ།། །།

གཞན་ཕན་འོད་ཀྱི་འཁོར་ལོ།

༄༅། །གཞན་ཕན་འོད་ཀྱི་འཁོར་ལོ་བཞུགས་སོ། །རིན་ཆེན་ཤོག་དཀར་གྱི་སྐོར།

༄༅། གཞན་ཕན་འོད་ཀྱི་འཁོར་ལོ་ཞེས་བྱ་བ། སྟོན་པ་ཕུན་སུམ་ཚོགས་པ་དཔལ་རྣམ་པར་སྣང་མཛད་ལ་ཕྱག་འཚལ་ལོ། །ཤེས་བྱའི་མཁའ་ལ་མཁྱེན་རབ་སྤྲིན་ཚོགས་མཛད་པའི་གློག་གི་ཕྲེང་བ་ཅན། །ཐུགས་རྗེའི་འབྲུག་སྒྲ་ཕྱོགས་ཀྱི་མཐར་ཁྱབ་ཕན་བདེའི་ཆར་རྒྱུན་ལེགས་འབེབས་པ། །འགྲོ་བའི་བླ་མ་དཀོན་མཆོག་གསུམ་དེ་སྐྱེ་དགུའི་མཁའ་ལ་མཛེས་པ་ཡི། །བདག་གཞན་གཙུག་གི་ནོར་བུས་ཞབས་མཆོད་ཡུན་རིང་བཀྲ་ཤིས་བྱེད་པར་ཤོག །གང་འདིར་བདག་བློའི་ཡིད་ཀྱི་པདྨ་ལ། །བྱིན་རླབས་ཉིན་བྱེད་ཟེར་གྱིས་ཕོག་པ་ཡིས། །འགྲོ་བའི་དོན་གཉིས་སྒྲུབ་ལ་འདབ་སྟོང་རྒྱས། །དེ་སླད་གཞན་ཕན་འོད་ཀྱི་འཁོར་ལོར་བཤད། །

དེའང་འདིར་སྙིང་པོའི་རྒྱུད་རྫོགས་པ་རང་བྱུང་གི་རྗེས་སུ་(༤༦)འབྲངས་ནས་ཚེ་འདས་རྗེས་སུ་གཟུང་བའི་ཆོ་ག་བརྗོད་པར་བྱའོ། །འདི་ལ་ནུབ་དང་པོ་བྱ་བའི་རིམ་པ་དང་། ལྷག་མ་རྣམས་སུ་བྱ་བའི་རིམ་པ་གཉིས་ལས། དང་པོ་ལ་སའི་ཆོ་ག་དང་། སྔོན་འགྲོ་ལེགས་པར་བཤམ་པ་དང་། མེ་ཏོག་ཚོམ་བུའི་དཀྱིལ་འཁོར་དངོས་ཇི་ལྟར་མཆོད་པ་གསུམ་ལས། དང་པོ་ནི་སའི་ཆོ་ག་བསང་སྦྱངས་དགོས་པའི་ཕྱོགས་སུ། མཎྜལ་ཟླུམ་པོ་ཁྲུ་གང་པ་བ་བྱུང་དང་། དྲིས་བྱུག་པའི་དབུས་སུ། ཨཱ་པྲི་ཐི་དྷེ་ཝཱིས་དྲིའི་ཐིག་ལེ་དང་། མེ་ཏོག་གི་ཚོམ་བུ་བཀོད་ལ། དེའི་དྲུང་དུ་ཆུ་གཉིས་སྔོན་དུ་འགྲོ་བའི་མཆོད་པ་ལྔ་དང་གཏོར་མ་གསུམ་བཤམས་ལ། རང་ཉིད་སྐྱབས་སུ་འགྲོ་བ་དང་སེམས་བསྐྱེད་ནས། སྐད་ཅིག་གིས་ཀུན་བཟང་ཡབ་ཡུམ་དུ་བསྒོམས་ཏེ། ཨ་མྲ྇་ཏས་བསང་ཞིང་། སྭ་བྷཱ་ཝས་སྦྱངས་ཏེ། སྟོང་པའི་ངང་ལས་ཚོམ་བུ་ཉིད། པད་ཟླའི་སྟེང་དུ་པཾ་ལས་སའི་ལྷ་མོ་སེར་མོ་བུམ་པ་འཛིན་པར་བསྐྱེད་ནས། ལྷ་མོ་ཆེན་མོ་ས་བདག་འཇིག་རྟེན་ཡུམ། །རིན་ཆེན་རྫོགས་དབང་མཆོག་གི་རྒྱན་གྱིས་བརྒྱན། །དོ་ཤལ་རྐང་གདུབ་སྒྲ་སྒྲོགས་སེམས་དཔས་མཆོད། །མཆོད་ཡོན་འདི་བཞེས་འདི་རུ་བྱིན་རློབ་མཛོད། །ཨཱ་པྲ྇་ཐི་དེ་ཝཱི་ས་མ་ཡ་ཛཿཛཿ ཞེས་པས་ས་བོན་ལས་འོད་འཕྲོས། སའི་འོག་ནས་ལྷ་མོ་ས་བདག་ཀླུ་གཉན་གྱིས་བསྐོར་བ་སྤྱན་དྲངས་ལ་ཛཿཧཱུྃ་བཾ་ཧོཿས་བསྟིམ། ཡི་གེ་གསུམ་གྱིས་བྱིན་གྱིས་བརླབས་ནས། དྲི་མེད་ཡིད་འོང་བདུད་རྩི་ཡི། །ལྷ་རྫས་དམ་པའི་མཆོད་ཡོན་འདི། །ལྷ་མོ་ལ་ནི་བདག་འབུལ་གྱིས། །ས་འདི་བདག་ལ་གནང་དུ་གསོལ། །ཨཱ་པྲི་ཐི་དྷེ་ཝཱི་ཨརྒྷཾ་པྲ་ཏི་ཙ་ཡེ་སྭཱ་ཧཱ། ཚིག་དེས་མཆོད་པ་ལྷག་མ་རྣམས་ཀྱང་མཆོད་ནས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དུ། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །བདག་རྡོ་རྗེ་འཛིན་པ་ཆེ་གེ་མོ་ཞེས་བྱ་བས། ཆེ་གེ་མོའི་དོན་དུ་ས་ཕྱོགས་འདིར་དཀྱིལ་འཁོར་ཆེན་པོ་བཞེང་གིས། ལྷ་མོ་ཁྱོད་ཀྱིས་སའི་ཕྱོགས་འདི་བདག་ལ་གནང་བར་མཛོད་ཅིག །ཅེས་བརྗོད་པས་དེས་ཀྱང་རིག་པ་འཛིན་པ་ཁྱོད་ཀྱིས་ཅི་དགའ་བར་བྱོས་ཤིག །ཅེས་གསུངས་པར་བསམས་ལ། གཏོར་མ་དང་པོ་དེ་ལྷ་མོ་འཁོར་བཅས་ལ་འབུལ། གཉིས་པ་དེ་དཀར་པོའི་ཕྱོགས་ལ་བྱིན་ནས། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་(༤༧)སློང་བར་བགྱི། །དཀྱིལ་འཁོར་དོན་དུ་སྩལ་དུ་གསོལ། །དཀྱིལ་འཁོར་ཆེན་པོའི་བྱ་བ་མཐར་ཕྱིན་པའི་གྲོགས་མཛད་དུ་གསོལ། ཅེས་བརྗོད། གསུམ་པ་དེ་ནག་པོའི་ཕྱོགས་ལ་བྱིན་ནས། ས་ཕྱོགས་འདིར་ནི་སློབ་དཔོན་བདག །དཀྱིལ་འཁོར་རྒྱལ་པོ་སྒྱུ་འཕྲུལ་ནི། །བཞེང་གིས་ས་འདིར་གནས་པའི་བགེགས། །འདི་རུ་མ་འདུག་གཞན་དུ་དེངས། །ཨཱ་སུམ་བྷ་ནི་དང་གུ་གུལ་གྱིས་བདུག་ལ། །ཨཱ་བཛྲ་མུཿས་ལྷ་མོ་འཁོར་བཅས་གཤེགས་པར་བསམས་ཏེ། གྱོ་མོ་དང་རུས་པ་ལ་སོགས་དོར་ནས། ས་མཉེན་བཟང་པོ་ལ་སྟེགས་བུ་གྲུ་བཞི་པ་མེ་ལོང་གི་ངོས་ལྟར་འཇམ་ཞིང་སྙོམས་པ། ཤར་དང་བྱང་ཅུང་ཟད་གཞོལ་པའི། སྟེང་དང་ཁོར་ཡུལ་ཏུ་ལག་མཐིལ་གཡས་བསྐོར་ཞིང་། ཨཱ་ཧ་ན་ཧ་ན་ཧཱུྃ་ཕཊ་ཀྱིས་འོད་ཟེར་བྱུང་བས་མ་དག་པ་སྦྱངས། ཨཱ་བྷུ་ཁང་གིས་ས་ཕྱོགས་ཐམས་ཅད་ནམ་མཁར་གྱུར། ཨཱ་མེ་དེ་ནི་བཛྲ་བྷ་བྷནྡྷ་ཧཱུྃ་ཧཱུྃ་ཕཊ། ཀྱིས་རྡོ་རྗེའི་རང་བཞིན་དུ་གྱུར། ཨཱ་བཛྲ་རཀྵ་རཀྵ་ཕཊ་ཀྱིས་བསྲུང་ཞིང་བརྟན་པར་བྱའོ། །སའི་ཆོ་གའོ། །

གཉིས་པ་ནི་སྲད་བུ་དཀྱིལ་འཁོར་ཉིས་འགྱུར་དུ་བྱས་པའི་སྣ་སློབ་དཔོན་གཙོ་བོའི་ང་རྒྱལ་དང་ལྡན་པས་ཤར་དུ་བལྟས་ལ། སློབ་མ་མི་བསྐྱོད་པའི་ང་རྒྱལ་གྱིས་ནུབ་ཏུ་བལྟས་ཏེ། ཛ་ཞེས་བརྗོད་ཅིང་གཏད་ནས་ཚངས་ཐིག་ལ་སོགས་པ་གདབ་ཅིང་། ཆ་ཆེན་བཅུ་དྲུག་རྫོགས་པ་ན། །དང་པོ་ཕྱེད་གདབ་ཕྱི་མ་གདབ། །གཉིས་པ་ཆ་བཞིར་བགོ་བྱས་ཏེ། །གསུམ་པ་བཞི་པ་མི་གདབ་བཞག །ལྔ་པ་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །བདུན་པ་ཆ་བཞིར་བགོ་བྱས་ཏེ། །བརྒྱད་པ་དབུས་དོར་མཐའ་གཉིས་གདབ། །དེའང་དབང་ཆོག་ལྟར་ཡེ་ཤེས་ཀྱི་ཐིག་གདབ་པའང་བྱས་ན་ལེགས་སོ། །དེ་ནས་ལྷའི་གྲངས་དང་མཉམ་པའི་ཚོམ་བུ་བཀོད་པའི་མཐར་མཆོད་གཏོར་བཤམ་མོ། །

གསུམ་པ་ནི་བདག་ཉིད་བསྐྱེད་ཅིང་མཆོད་བསྟོད་བྱས་ཏེ། དཀྱིལ་འཁོར་སྒྲུབ་ཅིང་མཆོད་བསྟོད་བྱས་པའི་རྗེས། ཧོ་དགོངས་སུ་གསོལ། རྒྱལ་བ་རིགས་ལྔ་ཡབ་ཡུམ་ཁོར་དང་བཅས། །སེམས་དཔའ་སེམས་མ་མ་ལུས་བདག་ལ་དགོངས། །རྒྱལ་བ་སྲས་བཅས་མཆོད་པ་དང་། །ཚེ་འདས་ཁྱོད་ཀྱི་རྗེས་གཞུག་ཕྱིར། །བདག་ནི་ཆེ་གེ་ཞེས་བགྱི་བས། །ནངས་པར་རྒྱལ་བའི་དཀྱིལ་འཁོར་བྲི། །ཁྱེད་ཀྱི་ཐུགས་རྗེས་དགོངས་མཛོད་ལ། །བྱིན་གྱིས་བརླབ་པར་མཛད་དུ་གསོལ། །ཅེས་མཁྱེན་པར་གསོལ་བས། གཙོ་བོའི་ཞལ་ནས། རིགས་ཀྱི་བུ་ཁྱོད་ཀྱིས་སེམས་ཅན་གྱི་དོན་དུ་དཀྱིལ་འཁོར་ཆེན་པོའི་ལས་རྩོམས་ཤིག །གསུངས་པར་བསམ་ནས། གཏོར་(༤༨)མ་བསྔོས། བཟོད་པར་གསོལ། བསྔོ་བ་བྱས། བདག་ཉིད་བསྲུངས་ནས། སང་མེ་ཏོག་ཚོམ་བུའི་ལྷ་རྣམས་ལ། མཆོད་བསྟོད་མདོར་བསྡུས་བྱས་ཏེ། བཛྲ་མུས་ཡེ་ཤེས་པ་དཀྱིལ་འཁོར་གྱི་ནམ་མཁར་བཏེག་ནས་དམ་ཚིག་པ་བསྡུས་ཏེ། ཡི་གེ་བརྒྱ་པ་བརྗོད་ཅིང་ཚོམ་བུ་དང་མཆོད་པ་རྣམས་རེ་ཞིག་དབེན་པར་བསྡུའོ། །

གཉིས་པ་ནུབ་ལྷག་མར་བྱ་བའི་རིམ་པ་ལ། དཀྱིལ་འཁོར་བྲི་ཞིང་སྐུ་ལེགས་པར་བཤམ་པ་དང་། ཆོ་ག་དངོས་ཇི་ལྟར་བྱ་བ་གཉིས་ལས། དང་པོ་ནི། ཚོན་རྣམས་དབུས་དང་ཕྱོགས་བཞིར་རིགས་ལྔའི་ཁ་དོག་བཞིན་བཀོད་ལ། ཨཱ་ཧཱུྃ་ཏྲཱཾ་ཧྲཱིཿཨཿརྣམས་བྲིས་ཏེ། རིགས་ལྔར་བསྐྱེད་ནས་ཡེ་ཤེས་པ་བཅུག །མཆོད་བསྟོད་མདོར་བསྡུས་བྱས་ལ། ལྷ་རྣམས་འོད་དུ་ཞུ་བའི་ཚོན་ཡེ་ཤེས་ལྔར་བསམས་ལ། སློབ་དཔོན་གྱིས་ཤར་ནས་ཚོན་ཐོགས་ཏེ། སངས་རྒྱས་རིགས་ལྔ་ཡེ་ཤེས་གཙོ། །ཀུན་གྱི་དོན་རིག་བྱ་བའི་ཕྱིར། ཡེ་ཤེས་ལྔ་ཡི་ཚོན་དགྱེ་འོ། །ཞེས་པས་རེ་ཁཱ་བྲིའོ། །དེའི་ཚོན་གྱིས་བྲི་བ་ནི། །དབུས་སུ་འདབ་བརྒྱད་མུ་ཁྱུད་གསུམ། །དབུས་མཐིང་ཤར་དཀར་ལྷོ་སེར་ཞིང་། །ནུབ་དམར་བྱང་ལྗང་ཤར་ལྷོ་དམར། །ལྷོ་ནུབ་ལྗང་གུ་ནུབ་བྱང་དཀར། །བྱང་ཤར་སེར་པོས་དགང་བར་བྱ། །མུ་ཁྱུད་མཐིང་དམར་དཀར་པོས་བསྐོར། །གྲུ་དང་ལྷ་སྣམ་ཕྱོགས་མདོག་ལ། །ཕྱོགས་མཚམས་ཐིག་ལེ་གཉིས་གཉིས་དགོད། །སྒོ་བཞིར་ཐིག་ལེ་རེ་རེ་བྱ། །རྩིག་པ་ལྔ་ནི་ནང་རིམ་བཞིན། །མཐིང་ག་ལྗང་དམར་སེར་དང་དཀར། །འདོད་ཡོན་དམར་ལ་ཕ་གུ་སེར། །དྲ་ཕྱེད་སྔོ་ལ་མདའ་ཡབ་དམར། །པུ་ཤུ་མཛེས་ཚོན་ཞིང་ཁམས་ལྗང་། །རྟ་བབས་མཛེས་ཚོན་ཆུ་སྲིན་དམར། །རྡོ་རྗེའི་རྭ་ནི་ཕྱོགས་ཀྱི་མདོག །ཉི་ཟླ་དམར་དཀར་དུར་ཁྲོད་བརྒྱད། །ཕྱོགས་མཚམས་པདྨ་སྣ་ཚོགས་མདོག །རྡོ་རྗེ་མཐིང་ལ་མེ་རི་དམར། །ཡང་ན་ཡེ་ཤེས་རྣམ་ལྔའི་མདོག །སྲབ་མཐུག་མེད་ཅིང་སྙོམས་པར་བྲི། །དེ་དག་གི་ཁོར་ཡུག་ཀུན་ཏུ་ཆུ་གཉིས་སྔོན་དུ་འགྲོ་བའི་ཕྱི་མཆོད་དང་། བདུད་རྩི་སྨན་རག་ལ་སོགས་པ་ནང་མཆོད་རྣམས་ལེགས་པར་བཤམས། བུམ་པ་ཁ་རྒྱན་མགུལ་ཆིངས་ལྡན་པ་གཉིས་ཀྱང་སྨན་དང་འབྲུ་དང་ཆུས་བཀང་ལ་བཞག །སྔོན་འགྲོ་གཏོར་མ་གཉིས་དང་། གཞན་ལྔ་ཡང་བཤམས། བྱེ་མ་སོལ་ཕོར། ཏིང་ལོ་ཆངས་བུ་ལ་སོགས་པ་འདིར་དགོས་པ་རྣམས་ཚོགས་པར་བྱས་ལ། ཡོལ་བ་བླ་བྲེ་བྲིས་སྐུ་ལ་སོགས་པའང་དགྲམ་མོ། །

གཉིས་པ་ནི། ཐམས་ཅད་ཀྱི་སྤྱོད་ལམ་བསྟུན་ལ་ཐོག་མར་མཆོད་པ་བསང་སྦྱངས་ནི། ཀུ་(༤༩)ཤས་བསང་ཆུ་གཏོར་ནས། ཨཱ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། ཨརྒྷཾ། པཱཏྱཾཿ པུཥྤེ། དྷུ་པེ། ཨཱ་ལེ་ཀེ། གྷནྡྷེ། ནཻ་ཝི་ཏེ། ཤཔྟ་ཨཱ་ཨཱཿཧཱུྃ་ཡོངས་སུ་གྱུར་པ་ལས་ཕྱི་ནང་གི་མཆོད་པ་དྭངས་ཤིང་ཐོགས་པ་མེད་པས་ས་དང་བར་སྣང་ཀུན་ཏུ་བཟང་པོའི་མཆོད་པའི་སྤྲིན་ཕུང་ལྟ་བུས་གང་བར་གྱུར། ཚེ་ལས་འདས་པས་གཙོ་བྱས་པའི་སེམས་ཅན་ཐམས་ཅད། བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་ཞི་ཁྲོ་རབ་འབྱམས་ཀྱི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆིའོ། །ཆོས་ཐམས་ཅད་སྟོང་ཞིང་བདག་མེད་པ་ཡིན་པ་ལ། དེ་ལྟར་མ་རྟོགས་པའི་སེམས་ཅན་ཐམས་ཅད་སྙིང་རེ་རྗེ། དེ་དག་ཐམས་ཅད་རྫོགས་པའི་སངས་རྒྱས་ཀྱི་ས་ལ་འགོད་པར་བྱ། དེའི་ཆེད་དུ་བཅོམ་ལྡན་འདས་ཞི་ཁྲོ་རབ་འབྱམས་ཀྱི་དཀྱིལ་འཁོར་ཆེན་པོ་བསྒོམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་འཕྲད་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །དགའ་བ་ཆེན་པོ་དང་དུས་རྟག་ཏུ་མི་འབྲལ་བར་གྱུར་ཅིག །བདེ་སྡུག་གི་རྒྱུ་ཆགས་སྡང་ཐམས་ཅད་དང་བྲལ་བའི་བཏང་སྙོམས་ཆེན་པོ་ལ་གནས་པར་གྱུར་ཅིག །ཨཱ་སྭ་བྷཱ་ཝ་བི་ཤུདྡྷེ་སརྦ་དྷརྨཱ་སྭ་བྷཱ་ཝ་བི་ཤུདྡྷོ྅ཧཾ། ཕྱི་དང་ནང་གི་ཆོས་ཐམས་ཅད་སྟོང་པ་ཆེན་པོ། སྟོང་པའི་ངང་ལས་པཾ་ལས་པདྨ། ཨ་ལས་ཟླ་བ། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧྲཱིཿལས་འོད་འཕྲོས། སེམས་ཅན་གྱི་དོན་བྱས། སླར་འདུས་ཡོངས་སུ་གྱུར་པ་ལས། རང་ཉིད་དཔའ་བོ་རྟ་མགྲིན་ཞལ་གཅིག་ཕྱག་གཉིས་དབྱུག་ཐོ་དང་སྡིགས་མཛུབ་མཛད་པའི་པང་ན། རྡོ་རྗེ་ཕག་མོ་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། གཉིས་ཀའང་རིན་པོ་ཆེ་དང་རུས་པ་དང་ཐོད་པའི་ཕྲེང་བས་རབ་ཏུ་བརྒྱན་པ། སྤྱན་གསུམ་པ་ཁྲོ་བོའི་ལྟ་སྟངས་ཆེན་པོས་བསྐལ་པའི་མེ་རི་མེ་དཔུང་གི་དབུས་ན་བཞུགས་པའི་ལྐོག་མར་ཧྲཱིཿལས་པདྨ་དམར་པོ་འདབ་མ་བརྒྱད་པ། རྩ་བ་མགྲིན་པར་ཟུག་ཅིང་ལོ་འདབ་ལྐོག་མར་རྒྱས་པའི་མདུན་གྱི་འདབ་མའི་ལྕེའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་དབུས་སུ། ཧཱུྃ་ལས་རྡོ་རྗེ་དཀར་པོ་ཉལ་ཐབས་སུ་གནས་པ་འོད་དུ་ཞུ་ཟླ་བ་ལ་ཐིམ། དེ་འོད་དུ་ཞུ་ལྕེ་ལ་ཐིམ་པས་རྡོ་རྗེའི་ལྕེར་གྱུར། ཨཱ་བཛྲ་ཛི་ཧཱ་ལག་པའི་མཐིལ་གཉིས་སུ་ཨ་ཨ་ལས་ཟླ་བའི་དཀྱིལ་འཁོར་རེ་རེའི་དབུས་སུ་(༥༠)ཧཱུྃ་ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་གྱེན་དུ་འགྲེང་བ་རེ་རེ་འོད་དུ་ཞུ་བ་ལས་ཟླ་བ་ལ་ཐིམ། ཟླ་བ་ཞུ་བ་ལག་པ་ལ་ཐིམ་པས་རྡོ་རྗེའི་ལག་པར་གྱུར། ཨཱ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། སྟེང་འོག་ཕྱོགས་མཚམས་ཐམས་ཅད་རྡོ་རྗེའི་ར་བ་གུར་བླ་བྲེ་ཡེ་ཤེས་ཀྱི་མེ་རི་མེ་ཕུང་འབར་བའི་དལ་ཆེན་པོར་གྱུར། ཧཱུྃ་རབ་འཇིགས་ཕྲ་མེན་ཁྲོ་མོའི་སྐུ། །བཛྲ་སིང་ཧ་སེང་གེའི་གདོང་། །བཛྲ་བྱ་ཀྲི་སྟག་གདོང་མ། །མཐིང་ནག་མཚོན་ཆ་མེ་འོད་འཕྲོ། །གཏི་མུག་དབང་བསྒྱུར་ལས་མཁན་མ། །སྟེང་འོག་དགྲ་བགེགས་མཚམས་ཆོད་ཅིག །ཧཱུྃ་རབ་འཇིགས་ཕྲ་མེན་ཁྲོ་མོའི་སྐུ། །ཀང་ཀ་མུ་ཁ་བྱ་རོག་གདོང་། །དཀར་གསལ་མཚོན་ཆ་མེ་འོད་འཕྲོ། །ཞེ་སྡང་དབང་བསྒྱུར་ལས་མཁན་མ། །ཤར་སྒོའི་དགྲ་བགེགས་མཚམས་ཆོད་ཅིག །ཧཱུྃ་རབ་འཇིགས་ཕྲ་མེན་ཁྲོ་མོའི་སྐུ། །ཧུ་ལུ་མུ་ཁ་འུག་གདོང་མ། །ལྗང་ནག་མཚོན་ཆ་མེ་འོད་འཕྲོ། །ཕྲག་དོག་དབང་བསྒྱུར་ལས་མཁན་ལ། །བྱང་སྒོའི་དགྲ་བགེགས་མཚམས་ཆོད་ཅིག །ཧཱུྃ་རབ་འཇིགས་ཕྲ་མེན་ཁྲོ་མོའི་སྐུ། །ཤྭ་ན་མུ་ཁ་ཁྱི་གདོང་མ། །དམར་ནག་མཚོན་ཆ་མེ་འོད་འཕྲོ། །འདོད་ཆགས་དབང་བསྒྱུར་ལས་མཁན་མ། །ནུབ་སྒོའི་དགྲ་བགེགས་མཚམས་ཆོད་ཅིག །ཧཱུྃ་རབ་འཇིགས་ཕྲ་མེན་ཁྲོ་མོའི་སྐུ། །སུ་ར་ཀ་སེང་ཕག་གདོང་མ། །སེར་ནག་མཚོན་ཆ་མེ་འོད་འཕྲོ། །ང་རྒྱལ་དབང་བསྒྱུར་ལས་མཁན་མ། །ལྷོ་སྒོའི་དགྲ་བགེགས་མཚམས་ཆོད་ཅིག །ཨཱ་སུཾ་བྷ་ནི་སུཾ་བྷ་ཧཱུྃ། ཨཱ་གྷྲ྇ཧྞ་གྷྲ྇ཧྣ་ཧཱུྃ། ཨཱ་གྷྲ྇ཧྞ་པ་ཡ་གྷྲ྇ཧྣ་པ་ཡ་ཧཱུྃ། ཨཱ་ཨ་ན་ཡ་ཧོ། བྷ་ག་ཝན་བིདྱ་ར་ཙ་ཡ་ཧཱུྃ་ཕཊ། ཕྱོགས་མཚམས་སྟེང་འོག་ཐམས་ཅད་རྡོ་རྗེ་མེ་རིའི་རྭ་བ་གཉིས་པས་འབར་བར་གྱུར།

ཧཱུྃ་ཡེ་ཤེས་བསྐལ་པའི་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་བསྲེགས། །ཞེ་སྡང་གཤིན་རྗེའི་འཇིག་རྟེན་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སོ་འཚལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་དུ་མཆོད་ཀྱིས་གཤེགས་སུ་གསོལ། །སྟེང་གི་ནམ་མཁར་ཁྲོ་བོ་དབང་ཆེན་དཔག་ཏུ་མེད་པ་བྱོན། ཨཱ་མཧཱ་ཀོ་ཏ་ས་པཱ་རི་ཝཱ་ར། ཨརྒྷཾ་པ་ཏྱཾ་པུཥྤཾ་དྡྷུ་པཾ་ཨཱ་ལོ་ཀེ་གྷནྷེ་ནི་ཝི་ཏྱ་ཤཔྟ་ཨཱཿཧཱུྃ། ཛཿཧཱུྃ་བཾ་ཧོཿས་བདག་ལ་གཉིས་སུ་མེད་པར་ཐིམ།

ཧཱུྃ་ཆོས་ཉིད་སྟོང་པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་(༥༡)མི་སྤོང་ཞིང། །ཐམས་ལ་མཁས་པས་འཇིགས་བྱེད་སྐུར་སྟོན་པ། །ཁྲོ་ཆེན་འབར་བའི་ཚོགས་ལ་ཕྱག་འཚལ་བསྟོད། །ཡེ་ཤེས་ཞི་བའི་ངང་ལས་མ་གཡོས་ཀྱང་། །སྐུ་ཡི་ཆ་ལུགས་ཟ་བྱེད་རྔམ་སྟབས་ཅན། །གསུང་གི་ང་རོ་འབྲུག་སྟོང་ལྡིར་བའི་སྒྲས། །མ་རུངས་དབང་དུ་སྡུད་ལ་ཕྱག་འཚལ་བསྟོད། །ལྷག་པའི་ཡེ་ཤེས་རོལ་པ་སྟོན་མཛད་ཅིང་། །བསྡིགས་པའི་མཚོན་ཆ་སྣ་ཚོགས་ཕྱག་ན་བསྣམས། །ཉོན་མོངས་དུག་ཆེན་རྩད་ནས་འཇོམས་མཛད་པའི། །སྦྲུལ་གདུག་རྒྱན་གྱིས་བརྒྱན་ལ་ཕྱག་འཚལ་བསྟོད། །ཧཱུྃ་བསྐལ་པའི་མེ་ལྟར་འབར་བའི་ཀློང་དཀྱིལ་ནས། །དཔའ་བོའི་སྟངས་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱིས་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་བསྟོད། །ཧཱུྃ་གཏུམ་ཆེན་དུས་མཐའི་མེ་ལྟར་གཟི་བརྗིད་འབར། །གློག་སྟོང་འགྱུ་འདྲའི་ཁྲོ་གཉེར་མཆེ་བ་གཙིགས། །རྔམ་པའི་ང་རོ་འབྲུག་སྒྲ་སྟོང་སྒྲོགས་ཤིང་། །ཁྲོ་རྒྱལ་བགེགས་ཚོགས་འདུལ་ལ་ཕྱག་འཚལ་བསྟོད། །ཧཱུྃ་དབང་ཆེན་བསྐལ་པའི་མེ་ལྟར་གཟི་བརྗིད་འབར། །དབུ་སྐྲ་ཁམ་སེར་སྤྱན་གསུམ་སྡང་མིག་བགྲད། །མཆེ་བ་གཙིགས་ཤིང་བརྐྱང་བསྐུམ་འཇིགས་པའི་སྐུ། །དཔལ་ཆེན་(༥༡)ཡབ་ཡུམ་གཉིས་ལ་ཕྱག་འཚལ་བསྟོད། །ཧཱུྃ་ཉོན་ཅིག་བགེགས་དང་ལོག་འདྲེན་ཚོགས། །ལུས་ངག་ཡིད་གསུམ་གནོད་པའི་བགེགས། །བར་ཆད་འབྱུང་པོ་ཐམས་ཅད་ཀུན། །འདི་རུ་མ་འདུག་གཞན་དུ་དེངས། །ང་ནི་དཔལ་ཆེན་རྟ་མགྲིན་རྒྱལ། །རྡོ་རྗེ་འཛིན་བྱེད་འབར་བའི་སྐུ། །ང་ཡི་བཀའ་ལས་འདས་གྱུར་ན། །ཐལ་བའི་རྡུལ་བཞིན་བརླག་པར་འགྱུར། །ཨཱ་ཤྲཱ྇་བཛྲ་ཧ་ཡ་གྷྲི་ཝ་ར་ཙ་ཧྲི་ཡ་ཧ་རི་ནི་ས་རཀྵ་ཨུ་ཙ་ཏ་ཡ་ཧཱུྃ་ཕཊ། བགེགས་ཐམས་ཅད་རྒྱ་མཚོའི་མཐར་བྱེར་ནས། ཡེ་ཤེས་ཀྱི་མེ་ཕུང་གཅིག་ཏུ་འབར་བར་གྱུར། ཨཱ་བཛྲ་སཏྭ་ས་མ་ཡ། མ་ནུ་པཱ་ལ་ཡ། སརྦ་སཏྭ་ཏྭེ་ནོ་པ་ཏིཥྛ་ཌཱ྇་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨུ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུྃ། ཧ་ཧ་ཧ་ཧ་ཧོ་བྷ་ག་ཝཱན། སརྦ་ཏ་ཐཱ་ག་ཏ། བཛྲ་མ་མེ་མུཉྩ། བཛྲཱི་བྷ་ཝ། མཧཱ་ས་མ་ཡ་སཏྭ་ཨཱ།

ཨཱ་ཡོ་ག་ཤུདྡྷོཿསརྦ་དྷརྨཱ་སྭ་བྷཱ་ཝ་བི་ཤུདྡྷོ྅ཧཾ། ཕྱི་ནང་གི་ཆོས་ཐམས་ཅད་སྟོང་པའི་ངང་ལས། པཾ་ལས་པདྨ། ཨ་ལས་ཟླ་བ། རཾལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་མཐིང་ནག་ལས་འོད་འཕྲོས། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རང་ཉིད་རང་བཞིན་གཞིའི་ཀུན་ཏུ་བཟང་པོ། མཐིང་ག་(༥༢)ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་བ། ཨེ་ལས་ཆོས་ཉིད་ཀུན་ཏུ་བཟང་མོ་སྔོན་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ་གཉིས་ཀའང་རྡོ་རྗེའི་སྐྱིལ་མོ་ཀྲུང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའི་ཐུགས་ཀར་པདྨ་དང་ཉི་ཟླའི་དབུས་སུ། རྡོ་རྗེ་སྔོན་པོའི་ལྟེ་བ་ལ་ཧཱུྃ་གིས་མཚན་པའི་རྭ་ལྔ་ལ། ཨཱ་ཧཱུྃ་ཏྲཱཾ་ཧྲཱིཿཨཿས་མཚན་པའི་ཕྱི་རོལ་དུ་ཨཱ་ལི་བཅུ་དྲུག་དང་། ཀཱ་ལི་རྣམས་མར་མེའི་ཕྲེང་བ་ལྟར་འོད་གསལ་བའོ། །ལག་པའི་མཐིལ་གཉིས་སུ་ཨ་ཧཱུྃ། ཨ་ལས་ཟླ་བའི་དཀྱིལ་འཁོར་རེ་རེའི་སྟེང་དུ་ཧཱུྃ། ཧཱུྃ་གིས་མཐའ་སྐོར་གཉིས་ན་ཕར། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿམཆོག་ཏུ་དཀར་ཞིང་འོད་གསལ་བ་རྣམས་ཀྱིས་གང་བར་གྱུར། སོར་མོ་རྣམས་ལ་ཨ་ཙནྡྲ་མཎྜལ་གཡས་པའི་སོར་མོ་ལ་ཟླ་བའི་དཀྱིལ་འཁོར་གྱི་སྟེང་། རིགས་ལྔ་ཡབ་ཀྱི་ས་བོན་རིམ་པ་བཞིན་དུ། ཨཱ་ཧཱུྃ་ཏྲཱཾ་ཧྲཱིཿཨ་ལས་རྣམ་པར་སྣང་མཛད། མི་བསྐྱོད་པ། རིན་ཆེན་འབྱུང་ལྡན། འོད་དཔག་མེད། དོན་ཡོད་གྲུབ་པ། རྡོ་རྗེ་དབྱིངས་ཀྱི་དབང་ཕྱུག་མ། རྡོ་རྗེ་ཐུགས་མ། རྡོ་རྗེ་དབང་བསྐུར་མ། རྡོ་རྗེ་མཚོན་ཆ་མ། རྡོ་རྗེ་རྐུན་མོ་རྣམས། ཕན་ཚུན་ལྷ་དང་ལྷ་མོའི་རང་བཞིན། སྐུ་མདོག་ཕྱག་མཚན་ལ་སོགས་པ་འདྲའོ། །ཨཱ་ཧཱུྃ་ཏྲཱཾ་ཧྲཱི་ཨཱཿཨེ་རཾ་ལཾ་ཏཾ་ཡཾ། ལྷ་རྣམས་ཕན་ཚུན་དགྱེས་ཤིང་སྙོམས་པར་ཞུགས་པར་གྱུར། ཧཱུྃ་ཀུན་ཏུ་བཟང་པོ་བདེ་གཤེགས་རིགས་ལྔའི་གཙོ། །ཡེ་ཤེས་མཆོག་གིས་འགྲོ་བའི་དོན་མཛད་པ། །རང་བཞིན་དབྱིངས་ནས་ཐུགས་རྗེའི་རྣམ་འཕྲུལ་གྱིས། །ཡབ་ཡུམ་འཁོར་དང་བཅས་པ་གཤེགས་སུ་གསོལ། །ཡེ་ཤེས་པ་སྟེང་གི་ནམ་མཁར་བྱོན་པ་ལ། ཨཱ་ཕྱི་ནང་གསང་བ་བླ་ན་མེད་པ་ཡིས། །མཆོད་པའི་སྤྲིན་ཕུང་རབ་འབྱམས་རྒྱ་མཚོ་རྣམས། །མ་ལུས་བློ་ཡིས་བླངས་ཏེ་གུས་འབུལ་གྱིས། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་སརྦ་ཏ་ཐཱ་ག་ཏ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ངང་ཉིད་ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེའི་རྣམ་འཕྲུལ་སྣ་ཚོགས་སྟོན་མཛད་ཅིང་། །འགྲོ་བའི་དོན་གཉིས་ལྷུན་གྱིས་གྲུབ་པའི་ལྷ། །ཀུན་བཟང་ཡབ་ཡུམ་གཉིས་ལ་ཕྱག་འཚལ་བསྟོད། །ཛཿཧཱུྃ་བཾ་ཧོས་བདག་ལ་གཉིས་སུ་མེད་པར་ཐིམ། ཨཱ་ཨཱཿཧཱུྃ་གིས་སྐུ་གསུང་ཐུགས་ཀྱི་བྱིན་གྱིས་བརླབ། ཨཱ་བུདྷ་ཨ་བྷི་ཥིཉྩ་ཨཱ། ཨཱ་བཛྲ་ཨ་བྷི་ཥིཉྩ་ཧཱུྃ། ཨཱ་རཏྣ་ཨ་བྷི་ཥིཉྩ་ཏྲཱཾ། ཨཱ་པདྨ་ཨ་བྷི་ཥིཉྩ་ཧྲཱིཿ། ཨཱ་ཀརྨ་ཨ་བྷི་ཥིཉྩ་ཨཿ། (༥༣)སྤྱི་བོའི་གནས་ལྔར་རིགས་ལྔས་དབུ་བརྒྱན་པར་གྱུར། ཐུགས་ཀར་པད་ཟླའི་སྟེང་གི་རྡོ་རྗེ་དང་། སྔགས་རྣམས་ལས་འོད་ཟེར་བྱུང་བས། སྣོད་བཅུད་ཐམས་ཅད་ལྷ་དང་ལྷ་མོའི་རང་བཞིན་དུ་གྱུར། ཚེ་ལས་འདས་པའི་སྡིག་པ་ཐམས་ཅད་སྦྱངས། འོད་ཟེར་གྱི་འཕྲོ་འདུས་སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་སྟོན་པར་དམིགས་ཏེ་བཟླས་པ་བགྱི་འཚལ། ཨཱ་ཧཱུྃ་ཏྲཱཾ་ཧྲཱི་ཨཿ ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་ཤནྟིང་ཀུ་རུ་ཡེ་སྭཱ་ཧཱ། སླར་ཡང་བདག་བསྐྱེད་ལ་མཆོད་བསྟོད་བགྱི་འཚལ། ཨཱ་ཨཱཿཧཱུྃ་ཕྱི་ནང་གི་མཆོད་སྤྲིན་ས་དང་བར་སྣང་གང་བར་གྱུར།

ཧཱུྃ་ཕྱོགས་བཅུ་དུས་བཞིའི་འཇིག་རྟེན་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་རྒྱ་མཚོའི་ཚོགས་ལ་འབུལ། །ཨཱ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཧཱུྃ་ཕྱོགས་བཅུ་དུས་བཞིའི་འཇིག་རྟེན་ན། །མེ་ཏོག་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་རྒྱ་མཚོའི་ཚོགས་ལ་འབུལ། །ཨཱ་བཛྲ་པུཥྤེ་ཨཱཿཧཱུྃ། ཧཱུྃ་ཕྱོགས་བཅུ་དུས་བཞིའི་འཇིག་རྟེན་ན། །བདུག་སྤོས་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་རྒྱ་མཚོའི་ཚོགས་ལ་འབུལ། །ཨཱ་བཛྲ་དྷུ་པེ་ཨཱཿཧཱུྃ། ཧཱུྃ་ཕྱོགས་བཅུ་དུས་བཞིའི་འཇིག་རྟེན་ན། །སྣང་གསལ་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་རྒྱ་མཚོའི་ཚོགས་ལ་འབུལ། །ཨཱ་བཛྲ་ཨཱ་ལོ་ཀེ་ཨཱཿཧཱུྃ། ཧཱུྃ་ཕྱོགས་བཅུ་དུས་བཞིའི་འཇིག་རྟེན་ན། །དྲི་ཆབ་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་རྒྱ་མཚོའི་ཚོགས་ལ་འབུལ། །ཨཱ་བཛྲ་གྷནྡྷེ་ཨཱཿཧཱུྃ། ཧཱུྃ་ཕྱོགས་བཅུ་དུས་བཞིའི་འཇིག་རྟེན་ན། །ཞལ་ཟས་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་རྒྱ་མཚོའི་ཚོགས་ལ་འབུལ། །ཨཱ་བཛྲ་ནཻ་ཝི་ཏེ་ཨཱཿཧཱུྃ། ཧཱུྃ་ཕྱོགས་བཅུ་དུས་བཞིའི་འཇིག་རྟེན་ན། །སིལ་སྙན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་རྒྱ་མཚོའི་ཚོགས་ལ་འབུལ། །ཨཱ་བཛྲ་ཤཔྟ་ཨཱཿཧཱུྃ། ཧཱུྃ་སྣོད་བཅུད་སྣང་སྲིད་འཇིག་རྟེན་ཀུན། །རྡོ་རྗེ་གཟུགས་སྒྲ་དྲི་དང་རོ། །རེག་བྱའི་ཚོགས་སུ་ཀུན་སྤྲུལ་ཏེ། །རྒྱལ་བ་རྒྱ་མཚོའི་ཚོགས་ལ་མཆོད། །ཨཱ་བཛྲ་མཧཱ་པཱུ་ཙ་ཨཱཿཧཱུྃ། ཧཱུྃ་གསང་བའི་ལྷ་མོ་ཡིད་(༥༤)འོང་མ། །སོ་སོའི་གཟུགས་མཛེས་རིག་མ་ཡིས། །སྐུ་གསུམ་བདེ་ཆེན་རྒྱས་མཛད་མ། །རྒྱལ་བ་རྒྱ་མཚོའི་ཚོགས་ལ་མཆོད། །ཨཱ་བཛྲ་དྷེ་བ་ཏ་ཨཱཿཧཱུྃ། ཧཱུྃ་རང་བཞིན་གདོད་མའི་མགོན་པོ་ནི། །རྒྱལ་བ་རྒྱ་མཚོ་ཀུན་གྱི་ཡབ། །སངས་རྒྱས་ཀུན་ལས་སྔར་སངས་རྒྱས། །ལྷུན་གྱིས་གྲུབ་ལ་ཕྱག་འཚལ་བསྟོད། །མ་སྐྱེས་ཆོས་དབྱིངས་བྱང་ཆུབ་སེམས། །ཐོག་མཐའ་མེད་པའི་མཁའ་ཀློང་ནས། །དུས་གསུམ་རྒྱལ་བ་སྐྱེད་མཛད་མ། །ཀུན་ཏུ་བཟང་མོར་ཕྱག་འཚལ་བསྟོད། །རང་བཞིན་ཆོས་སྐུ་དག་པའི་ངང་། །སྣ་ཚོགས་ཐབས་མཁས་ཐུགས་རྗེ་ཡིས། །རིགས་ལྔ་ཡེ་ཤེས་ལྔར་སྟོན་པ། །ལྷ་ཡི་ལྷ་ལ་ཕྱག་འཚལ་བསྟོད། །

བུམ་པ་བསྒྲུབ་པ་ལ་འཇུག་པར་བགྱི། ཨཱ་ཨཱཿཧཱུྃ། ཨཱ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་པཾ་ལས་པདྨ། ཨཱཿལས་ཟླ་བ། རཾ་ལས་ཉི་མའི་སྟེང་དུ། བྷཱུྃ་བྷཱུྃ་ལས་རྣམ་པར་རྒྱལ་བ་དང་། ལས་ཐམས་ཅད་པའི་བུམ་པ་རིན་པོ་ཆེ་སྣ་ཚོགས་ཀྱི་རང་བཞིན། ཡངས་ཤིང་རྒྱ་ཆེ་བ། ལྟོ་བ་ལྡིར་བ་ཞབས་ཞུམ་པ། མཆུ་འཕྱངས་པ། མགྲིན་པ་ཕྲ་བ་དཔག་བསམ་ཤིང་གིས་ཁ་བརྒྱན་པ། ལྷའི་གོས་པཉྩ་ལི་ཀས་མགྲིན་པ་དཀྲིས་ལ། ཕྱི་བུམ་པའི་དབྱིབས་ཅན་ལ། ནང་ལྷའི་གཞལ་མེད་ཁང་དུ་གནས་པའི། ནམ་པར་རྒྱལ་བའི་བུམ་པར་དབུས་སུ་སེདྒེའི་ཁྲི། ཤར་དུ་གླང་པོ་ཆེ། ལྷོར་རྟ། ནུབ་ཏུ་རྨ་བྱ། བྱང་དུ་ཤང་ཤང་གི་སྟེང་རྣམས་སུ་པདྨ་དང་ཟླ་བའི་དབུས་སུ། དེ་བཞིན་གཤེགས་པ་རིགས་ལྔ་སོ་སོའི་སྐུ་མདོག་དང་། ཕྱག་མཚན་ཡུམ་དང་བཅས་པ་རྫོགས་པར་གྱུར། ལས་ཐམས་ཅད་པའི་བུམ་པར་པདྨ་དང་ཉི་མའི་དབུས་སུ་དཔའ་བོ་རྟ་མགྲིན་ཡབ་ཡུམ་ཁྲོ་བོའི་རྒྱན་ཆ་ལུགས་ཆེན་པོ་གསལ་བར་གྱུར། ཨཱ་བཛྲ་ས་མ་ཡ་ཛཿཡེ་ཤེས་པ་བྱོན། ཛཿཧཱུྃ་བཾ་ཧོཿགཉིས་སུ་མེད་པར་ཐིམ། ཨཱ་ཨཱཿཧཱུྃ། སྐུ་གསུང་ཐུགས་ཀྱི་བྱིན་གྱིས་བརླབ། ཨཱ་བུདྡྷ་ཨ་བྷི་ཥིཉྩ་ཨཱ། བཛྲ། རཏྣ། པདྨ། ཀརྨ་ཨ་བྷི་ཥིཉྩ་ཨཱ། དེ་བཞིན་གཤེགས་པ་རིགས་ལྔས་དབུ་བརྒྱན། བདག་གི་སྙིང་ག་ནས་འོད་ཟེར་གཟུངས་ཐག་ལ་འཁྲིལ་ཏེ་སོང་བས་རྣམ་པར་རྒྱལ་བའི་ལྷ་རྣམས་ལ་ཕོག །བདེ་བའི་སྒྲས་བསྐུལ། སྙོམས་པར་ཞུགས་པའི་སྦྱོར་མཚམས་ནས་བདུད་རྩིའི་རྒྱུན་བབས་པར་བསམས་ལ་བཟླ་བར་བགྱི། ཨཱ་ཧཱུྃ་ཏྲཱཾ་ཧྲཱིཿཨཱ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང་། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵཿ སླར་(༥༥)ཡང་ལས་ཐམས་ཅད་པའི་བུམ་པ་སྔ་མ་བཞིན་དམིགས་ཏེ་བཟླས་པ་རེ་བགྱི། ཨཱ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། ཨཱ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡེ་ཤྲཱི་ཧཱུཾཿ མཆོད་ཡོན་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་དང་། །རོལ་མོ་ལ་སོགས་མཆོད་པའི་སྤྲིན། །ཇི་སྙེད་ཀུན་གྱིས་རྒྱལ་བ་མཆོད། །ཨཱ་སརྦ་ཏ་ཐཱ་ག་ཏ་ཨརྒྷཾ་པ་ཏྱཾ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏེ་ཤཔྟ་ཨཱ་ཧཱུྃ། ཨཱ་ཨཱཿཧཱུྃ། གདོད་ནས་རང་བྱུང་སྐུ་ལྔ་ལྷུན་གྱིས་གྲུབ། །ཕུང་པོ་གནས་གྱུར་ཡེ་ཤེས་ལྔ་ཡི་དངོས། །བདེ་གཤེགས་ཡབ་ཡུམ་དབང་ཆེན་ཡབ་ཡུམ་ལ། །གཉིས་མེད་འདུ་འབྲལ་མེད་པས་ཕྱག་འཚལ་ལོ། །ཨཱ་བཛྲ་མུཿཡེ་ཤེས་པ་གཤེགས། ཨཱ་ཨཱཿཧཱུྃ་དམ་ཚིག་པ་ཞུ་བ་ལས་བྱུང་བའི་བུམ་པའི་ཆུར་གྱུར། མདུན་བསྐྱེད་ཀྱི་དཀྱིལ་འཁོར་ཆེན་པོ་བསྒྲུབ་པར་བགྱི།

ཨཱ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། ཨཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཤུདྡྷོ྅ཧཾ། ཕྱི་དང་ནང་གི་ཆོས་ཐམས་ཅད་སྟོང་པ་ཆེན་པོ། ཨཱ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས། ཧཱུྃ་ཡཾ་ཧཱུྃ་ལས་རླུང་གི་དཀྱིལ་འཁོར་ལྗང་གུ་གཞུའི་དབྱིབས་ལྟ་བུ་མཆོག་མ་བ་དན་ལ་ཡཾ་གིས་མཚན་པ། ཧཱུྃ་རཾ་ཧཱུྃ་ལས་མེའི་དཀྱིལ་འཁོར་དམར་པོ་གྲུ་གསུམ་པ་རཾ་གྱིས་མཚན་པ། ཧཱུྃ་བཾ་ཧཱུྃ་ལས་ཆུའི་དཀྱིལ་འཁོར་ཟླུམ་པོ་བཾ་གྱིས་མཚན་པ། ཧཱུྃ་ལཾ་ཧཱུྃ་ལས་སའི་དཀྱིལ་འཁོར་གྲུ་བཞི་སེར་པོ་ལཾ་གྱིས་མཚན་པ། ཧཱུྃ་སུཾ་ཧཱུྃ་ལས་རིའི་རྒྱལ་པོ་རི་རབ་ཀྱི་སྟེང་དུ། ཧཱུྃ་བཾ་ཧཱུྃ་ལས་སྣ་ཚོགས་པདྨ་ཡངས་ཤིང་རྒྱ་ཆེ་བའི་དབུས་སུ། ཧཱུྃ་ཨ་ཧཱུྃ་ལས་ཟླ་བའི་དཀྱིལ་འཁོར། ཧཱུྃ་རཾ་ཧཱུྃ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་ཧཱུྃ་ཧཱུྃ་ལས་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཆོག་ཏུ་མཐིང་གའི་དབུས་སུ། ཧཱུྃ་བྷྲཱུྃ་ཧཱུྃ་ལས་འོད་འཕྲོས། ཕྱི་སྣོད་ཀྱི་འཇིག་རྟེན་ལ་ཕོག །མ་དག་པ་ཐམས་ཅད་སྦྱངས། འོག་མིན་གྱི་ཞིང་ཁམས་ཤིན་ཏུ་ཉམས་དགའ་བར་གྱུར། སླར་འདུས་བྷྲཱུྃ་ཡོངས་སུ་གྱུར་པ་ལས། ཐར་པ་ཆེན་པོའི་གཞལ་ཡས་ཁང་པ་སྒོ་བཞི་གྲུ་བཞི་རྩིག་པ་ལྔ་དང་ལྡན་པ་རྣམས་ཀྱང་ནང་ནས་རིམ་པ་བཞིན། མཐིང་ག །ལྗང་གུ། དམར་པོ། སེར་པོ། དཀར་པོ་རྣམས་ཀྱི་སྟེང་ན་རིན་པོ་ཆེའི་ཕ་གུ་སེར་པོ་ལ། ནོར་བུའི་དྲ་བ། དྲིལ་བུ་གཡེར་ཁ། རྔ་མའི་ཆུན་པོ། དར་གྱི་ལྡ་ལྡི་ལ་སོགས་པ་འཕྱངས་པ། དེའི་སྟེང་ན་རྡོ་ཀརྨ་ཤི་ལ་ལས་གྲུབ་པའི་མདའ་ཡབ་རིན་པོ་ཆེའི་རྣམ་པར་སྤེལ་བའི་སྟེང་ན། རིན་པོ་ཆེའི་དྲྭ་མིག །གསེང་(༥༦)མའི་པཱུ་ཤུས་ཡོངས་སུ་བསྐོར་བ། རྩིག་པ་རྣམས་ཀྱི་ཕྱི་རོལ་འདོད་ཡོན་གྱི་སྣམ་བུ་ལ། ལྷ་མོ་བཅུ་དྲུག་གིས་མཆོད་རྫས་དུ་མ་ཐོགས་ནས་གཞལ་ཡས་ཁང་པའི་ལྷ་རྣམས་ལ་མཆོད་པའི་སྤྲིན་གྱི་འོད་ཟེར་ཆེན་པོ་འགྱེད་པ། སྒོ་རྣམས་ཀྱི་སྟེང་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་བཞི་དང་ལྡན་པ་རྣམས་ལ། རིན་པོ་ཆེའི་གདུགས། ཆོས་ཀྱི་འཁོར་ལོ། ཤིན་ཏུ་མཛེས་པའི་རི་དྭགས། ལྷའི་གོས། རྣམ་པར་རྒྱལ་བའི་རྒྱལ་མཚན། ཡིད་དུ་འོང་བའི་འཕན། ཟླ་བ་རླུང་གིས་བསྐྱོད་པ། རྔ་ཡབ་ནོར་བུའི་ཡུ་བ་ཅན་ལ་སོགས་པས་བརྒྱན་པའི། ནང་ཀ་བ་ཆེན་པོ་བརྒྱད་ཀྱིས་བཏེག་པའི་སྟེང་། རྡོ་རྗེའི་གདུང་བཞིས་མིག་མངས་རིས་སུ་ཕུག་པའི་དབུས། ཕྱུར་བུ་རབ་ཏུ་མཐོ་བའི་རྩེ་མོ་དང་ཕྱོགས་བཞིའི་རྟ་བབས་ཕྱུར་བུ་རྣམས་ཀྱི་རྩེ་མོ་ཐོད་པ་དང་། རྡོ་རྗེ་དང་ནོར་བུ་རིན་པོ་ཆེའི་ཏོག་གིས་མཛེས་པའི་ཁ་ཁྱེར་བཞི་བཞི་ལ། བ་དན་ཉི་ཤུ་རྩ་བཞི་ཐོད་པ་ལ་འཕྱངས་པའི་གསེར་གྱི་དྲིལ་བུ་གཡེར་ཁས་བྲེས་པ། ཕྱི་མཆོད་རྟེན་རྩེ་ལྔ་པ་ལ་ནང་ལྷའི་གཞལ་ཡས་ཁང་པ་ཕྱི་ནས་བལྟས་ན་ནང་གསལ་བ། ནང་ནས་བལྟས་ན་ཕྱི་གསལ་བ། ཡེ་ཤེས་རིན་པོའི་ཆེའི་ངོ་བོ་ལས་གྲུབ་པ། འོད་ཟེར་ཆེན་པོ་རབ་ཏུ་འབར་བས། འཇིག་རྟེན་གྱི་ཁམས་མཐའ་ཡས་པ་རྒྱས་པར་འགེངས་པའི་ཕྱི་རོལ་ན། དུར་ཁྲོད་ཆེན་པོ་བརྒྱད་ཀྱིས་བསྐོར་བ། མེ་བརྒྱད་དང་ཆུ་བརྒྱད། ཤིང་བརྒྱད་དང་སྤྲིན་བརྒྱད། གྲུབ་ཐོབ་ཀྱི་སློབ་དཔོན་བརྒྱད། ཞིང་སྐྱོང་གི་མཁའ་འགྲོ་བརྒྱད་ལ་སོགས་པས་མཚན་པ། རྡོ་རྗེའི་རྭ་བ་དང་། མེ་རི་མེ་ཕུང་གིས་བསྐོར་བའི་གཞལ་མེད་ཁང་ཆེན་པོའི་དབུས་སུ། ཨཱ་སཾ་ཨཱ་ལས་སེདྒེའི་ཁྲི། ཧཱུྃ་ག་ཧཱུྃ་ལས་ཤར་དུ་གླང་པོ་ཆེའི་ཁྲི། ཏྲཱཾ་ཐ་ཏྲཱཾ་ལས་ལྷོར་རྟ་མཆོག་གི་ཁྲི། ཧྲཱི་མཾ་ཧྲཱི་ལས་ནུབ་ཏུ་རྨ་བྱའི་ཁྲི། ཨ་གཾ་ཨ་ལས་བྱང་དུ་ཤང་ཤང་གི་ཁྲི་རྣམས་ཀྱི་སྟེང་དུ། པཾ་ལས་པདྨ། ཨ་ལས་ཟླ་བ། རཾ་ལས་ཉི་མའི་སྟེང་དུ། དབུས་ནས་ཕྱོགས་བཞིར་རིམ་པ་བཞིན། ཨཱ་ཧཱུྃ་ཏྲཱཾ་ཧྲཱིཿཨ། ཨེ་བཾ་ལཾ་རཾ་ཡཾ་ལས་འོད་ཟེར་གྱི་དྲ་བ་ཆེན་པོ་རབ་ཏུ་འཕྲོས་པས། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རབ་ཏུ་སྣང་བར་བྱས་སོ། །སྣང་བར་བྱས་པས་སེམས་ཅན་ཐམས་ཅད་ཀྱི་ལས་དང་སྒྲིབ་པ་སྦྱངས་ཏེ། ལྷ་དང་ལྷ་མོའི་རང་བཞིན་དུ་གྱུར། སླར་འདུས་ཨཱ་ཨེ་ཡོངས་སུ་གྱུར་པས་དབུས་སུ་བཅོམ་ལྡན་འདས་རྣམ་པར་སྣང་མཛད་དང་དབྱིངས་ཀྱི་དབང་ཕྱུག་མ། མཐིང་ག་ཞལ་(༥༧)གཅིག་ཕྱག་གཉིས་རིན་པོ་ཆེའི་རྒྱན་ཐམས་ཅད་ཀྱིས་མཛེས་ཤིང་། ཡབ་ཀྱི་ཕྱག་གཡས་འཁོར་ལོས་ཡུ་བ་བྱས་པའི་རྡོ་རྗེ་དང་གཡོན་དྲིལ་བུ་འཛིན་པ། ཡུམ་གྱི་ཕྱག་གཉིས་གྲི་གུག་དང་ཐོད་པ་འཛིན་པས། མཉམ་པར་སྦྱོར་བའི་ཐུགས་ཀར་པདྨ་དང་ཉི་མའི་དབུས་སུ་ཨཱ་གྱི་མཐར། ཧཱུྃ་ཏྲཱཾ་ཧྲཱིཿཨས་བསྐོར་བ་ལས་འོད་ཟེར་རབ་ཏུ་འཕྲོ་བའོ། །ཧཱུྃ་བཾ་ཡོངས་སུ་གྱུར་པ་ལས་ཤར་དུ་མི་བསྐྱོད་པ་དང་མཱ་མ་ཀཱི་དཀར་མོ། ཡབ་ཀྱི་གཡས་རྡོ་རྗེས་ཡུ་བ་བྱས་པའི་རྡོ་རྗེ་དང་། ཐུགས་ཀར་པད་ཟླ་ཉི་མའི་དབུས་སུ་ཧཱུྃ་གི་མཐར། ཨཱ་ཏྲཱཾ་ཧྲཱིཿཨས་བསྐོར་བ། ཏྲཱྃ་ལཾ་ལས་ལྷོ་རིན་ཆེན་འབྱུང་ལྡན་དང་སངས་རྒྱས་སྤྱན་མ་སེར་མོ་ཡབ་ཀྱི་གཡས་རིན་པོ་ཆེས་ཡུ་བ་བྱས་པའི་རྡོ་རྗེ་དང་། ཐུགས་ཀར་ཏྲཱཾ་གི་མཐར་ཧཱུྃ་ཨཱ་ཧྲཱིཿཨས་བསྐོར་བ། ཧྲཱིཿརཾ་ལས་ནུབ་ཏུ་སྣང་བ་མཐའ་ཡས་དང་གོས་དཀར་མོ་དམར་མོ་ཡབ་ཀྱི་གཡས་པདྨས་ཡུ་བ་བྱས་པའི་རྡོ་རྗེ་དང་། ཐུགས་ཀར་ཧྲཱིའི་མཐར་ཧཱུྃ་ཏྲཱཾ་ཨཱ་ཨས་བསྐོར་བ། ཨ་ཡཾ་ལས་བྱང་དུ་དོན་ཡོད་གྲུབ་པ་དང་དམ་ཚིག་སྒྲོལ་མ་ལྗང་གུ། ཡབ་ཀྱི་གཡས་རྒྱ་གྲམ་གྱིས་ཡུ་བ་བྱས་པའི་རྡོ་རྗེ་རལ་གྲི་དང་། ཐུགས་ཀར་ཨའི་མཐར་ཧཱུྃ་ཏྲཱཾ་ཧྲཱིཿཨཱ་གྱིས་བསྐོར་བ། ས་བོན་དེ་དག་ཐམས་ཅད་ཀྱི་མཐའ་ཨཱ་ལི་དཀར་པོ་དང་། ཀཱ་ལི་དམར་པོས་བསྐོར་བ། ཡབ་ཐམས་ཅད་ཀྱི་ཕྱག་གཡོན་དྲིལ་བུ་འཛིན་པ། ཡུམ་ཐམས་ཅད་ཀྱི་ཕྱག་ན་གྲི་གུག་དང་ཐོད་པ་འཛིན་པ། རྡོ་རྗེའི་སྐྱིལ་མོ་ཀྲུང་རིན་པོ་ཆེའི་རྒྱན་སྣ་ཚོགས་པས་བརྒྱན་པའོ། །དེ་དག་གི་ཟུར་གྱི་གྲྭ་ནང་མ་བཞིར་པདྨ་དང་ཉི་ཟླའི་སྟེང་དུ་ཧཱུྃ་ཏྲཱཾ་ཧྲཱིཿཨ་གཉིས་གཉིས་ལས། འོད་ཟེར་ཕྱོགས་བཅུར་འཕྲོས་པས་ཤར་ལྷོ། ཧཱུྃ་ཧཱུྃ་ལས་ནམ་མཁའི་སྙིང་པོ་དཀར་པོ་རལ་གྲི་དང་དྲིལ་བུ་འཛིན་པ། ཡུམ་རྡོ་རྗེ་སྒེག་མོ་དཀར་མོ་མེ་ལོང་འཛིན་པ་དང་སྦྱོར་བ་ཏྲཱྃ་ཏྲཱཾ་ལས་ལྷོ་ནུབ་ཏུ་སའི་སྙིང་པོ་སེར་པོ་རིན་པོ་ཆེའི་མྱུ་གུ་དང་དྲིལ་བུ་འཛིན་པ། ཕྲེང་བ་མ་སེར་མོ་རིན་པོ་ཆེའི་ཕྲེང་བ་འཛིན་པ་དང་སྦྱོར་བ། ཧྲཱི་ཧྲཱི་ལས་ནུབ་བྱང་དུ་སྤྱན་རས་གཟིགས་དམར་པོ་པདྨ་དང་དྲིལ་བུ་འཛིན་པ། གླུ་མ་དམར་མོ་པི་ཝང་འཛིན་པ་དང་སྦྱོར་བ། ཨ་ཨ་ལས་བྱང་ཤར་དུ་ཀུན་ཏུ་བཟང་པོ་ལྗང་གུ། རིན་པོ་ཆེའི་སྙེ་མ་དང་དྲིལ་བུ་འཛིན་པ། གར་མ་ལྗང་གུ་རྡོ་རྗེ་འཛིན་པ་དང་སྦྱོར་བའོ། །ཡང་ཕྱི་རོལ་གྱི་གྲྭ་བཞིར། པདྨ་དང་ཉི་ཟླའི་དབུས་སུ། ཧཱུྃ་ཏྲཱཾ་ཧྲཱིཿཨ་གཉིས་གཉིས་ལས། མེར་ཧཱུྃ་ཧཱུྃ་ལས་བྱམས་པ་དཀར་པོ་ཀླུ་ཤིང་དང་དྲིལ་བུ་འཛིན་པ། བདུག་སྤོས་མ་དཀར་མོ་བདུག་(༥༨)སྤོས་ཀྱི་ཁང་པ་འཛིན་པ་དང་སྦྱོར་བ། ཏྲཱཾ་ཏྲཱཾ་ལས་སྲིན་པོར་སྒྲིབ་པ་རྣམ་སེལ་སེར་པོ་པོ་ཏི་དང་དྲིལ་བུ་འཛིན་པ། མེ་ཏོག་མ་སེར་མོ་མེ་ཏོག་གི་ཟ་མ་ཏོག་འཛིན་པ་དང་སྦྱོར་བ། ཧྲཱི་ཧྲཱི་ལས་རླུང་དུ་འཇམ་དཔལ་དམར་པོ་རལ་གྲི་དང་དྲིལ་བུ་འཛིན་པ། སྣང་གསལ་མ་དམར་མོ་མར་མེའི་ཀོང་བུ་འཛིན་པ་དང་མཉམ་པར་སྦྱོར་བ། ཨ་ཨ་ལས་དབང་ལྡན་དུ་ཕྱག་ན་རྡོ་རྗེ་ལྗང་གུ་རྡོ་རྗེ་དང་དྲིལ་བུ་འཛིན་པ། དྲི་ཆབ་མ་ལྗང་གུ་དྲིའི་དུང་ཆོས་འཛིན་པ་དང་སྦྱོར་བ། དེ་ཐམས་ཅད་ཀྱང་སེམས་དཔའི་སྐྱིལ་མོ་ཀྲུང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའི་ཐུགས་ཀར་རང་རང་གི་ས་བོན་གྱིས་མཚན་པའོ། །དེ་དག་གི་སྐུའི་རྩལ་ལས་ཤར་གྱི་སྣམ་བུ་ལ་ཐགས་བཟང་རིས་མཐིང་ག་གོ་ཆ་འཛིན་པ། ལྷོར་ཤཱཀྱ་ཐུབ་པ་སེར་པོ་འཁར་གསིལ་དང་ལྷུང་བཟེད་འཛིན་པ། ནུབ་ཏུ་སེདྒེ་རབ་བརྟན་མཐིང་ག་པོ་ཏི་འཛིན་པ། བྱང་དུ་ཁ་འབར་དྷེ་བ་དམར་པོ་རིན་པོ་ཆེའི་སྒྲོམ་བུ་འཛིན་པ། སྟེང་དུ་བརྒྱ་བྱིན་དཀར་པོ་པི་ཝང་འཛིན་པ། འོག་ཏུ་ཨ་བ་གླང་མགོ་ནག་པོ་མེ་ཆུ་བསྣམས་པ་རྣམས་པད་ཟླའི་སྟེང་ན་བཞེངས་པའི་ཚུལ་གྱིས་སྤྲུལ་པའི་སྐུའི་རྒྱན་དང་ལྡན་པའོ། །སྒོ་བཞིར་པདྨ་དང་ཉི་ཟླའི་སྟེང་དུ། ཛཿཧཱུྃ་བཾ་ཧོཿ གཉིས་གཉིས་ལས་ཤར་དུ་ཛ་ཛ་ལས་ཁྲོ་བོ་རྣམ་པར་རྒྱལ་བ་དང་སྒོ་མ་ལྕགས་ཀྱུ་མ་དཀར་མོ་ལྕགས་ཀྱུ་འཛིན་པ་དང་སྦྱོར་བ། ཧཱུྃ་ཧཱུྃ་ལས་ལྷོ་སྒོར་ཁྲོ་བོ་གཤིན་རྗེའི་གཤེད་པོ་དང་། སྒོ་མ་ཞགས་པ་མ་སེར་མོ་ཞགས་པ་འཛིན་པ་དང་སྦྱོར་བ། བཾ་བཾ་ལས་ནུབ་སྒོར་ཁྲོ་བོ་རྟ་མགྲིན་རྒྱལ་བ་དང་། སྒོ་མ་ལྕགས་སྒྲོག་མ་དམར་མོ་ལྕགས་སྒྲོག་འཛིན་པ་དང་སྦྱོར་བ། ཧོ་ཧོ་ལས་བྱང་སྒོར་ཁྲོ་བོ་བདུད་རྩི་འཁྱིལ་པ་དང་སྒོ་མ་དྲིལ་བུ་མ་ལྗང་གུ་དྲིལ་བུ་འཛིན་པ་དང་སྦྱོར་བ། དེ་དག་ཐམས་ཅད་ཀྱང་ཁྲོ་བོའི་རྒྱན་ཐམས་ཅད་ཀྱིས་བརྒྱན་ཅིང་ཐུགས་ཀར་རང་རང་གི་ས་བོན་གྱིས་མཚན་པ། ཁྲོ་བོའི་སྟངས་སྟབས་ཀྱིས་མེ་རི་མེ་ཕུང་འབར་བའི་དབུས་ན་བཞུགས་པའོ། །དེ་དག་གི་སྐུའི་གདངས་ལས། སྟེང་ན་ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་མེ་རི་མེ་དཔུང་འབར་བའི་དབུས་ན་ཤིན་ཏུ་འཇིགས་སུ་རུང་བ་མེ་ལོང་ནང་གི་གཟུགས་བརྙན་ལྟར། སྐད་ཅིག་དྲན་རྫོགས་ཀྱིས་སྣང་ལ་རང་བཞིན་མེད་པར་བསམ་མོ། །རྡོ་རྗེ་བསྡུ་བའི་ཕྱག་རྒྱས་སེ་གོལ་དཔུང་པར་བསྣོལ་ཏེ་གཏོགས་ནས།

ཧཱུྃ་མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་(༥༩)གཤེགས་སུ་གསོལ། །ཧཱུྃ་དུས་གསུམ་བླ་མ་ཀུན་བཟང་ཆོས་ཀྱི་རྗེ། །ཉོན་མོངས་ལྔ་དག་ཕུང་པོ་གནས་གྱུར་པའི། །སྐུ་གསུམ་ལྔ་ལྡན་རིགས་ལྔ་ཡབ་ཡུམ་གཙོ། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཨཱ་གུ་རུ་བཛྲ་ཧཱུྃ་ཏྲཱཾ་ཧྲཱིཿཨ། ས་མ་ཡ་ཛ་ཛ། བླ་མ་དཀྱིལ་འཁོར་གྱི་ལྷ་ཚོགས་ཐམས་ཅད་བྱོན་པར་བསམ། ཧཱུྃ་སྒྱུ་མ་ཆུ་ཟླ་ཡེ་ཤེས་གཞལ་ཡས་ཁང་། །སྐྱོན་བྲལ་པདྨ་ཉི་ཟླའི་གདན་ལ་བཞུགས། །ཨཱ་པདྨ་སཱུརྱ་ཙནྡྲ་ཀ་མ་ལ་ཡེ་སྟྭཾ། ཆུ་དང་ཐང་སྐྱེས་མེ་ཏོག་ཡིད་འོངས་རྣམས། །དངོས་འབྱོར་ཏིང་འཛིན་དག་པའི་མཆོད་སྤྲིན་གྱིས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་སརྦ་ཏ་ཐཱ་ག་ཏ་པུཥྤེ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨ་གར་སིཧླ་ཙནྡན་ལ་སོགས་པ། །དངོས་འབྱོར་ཏིང་འཛིན་དག་པའི་མཆོད་སྤྲིན་གྱིས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་སརྦ་ཏ་ཐཱ་ག་ཏ་དྷཱུ་པེ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། རིན་ཆེན་སྣང་གསལ་ཉི་ཟླའི་འོད་འཕྲོ་བ། །དངོས་འབྱོར་ཏིང་འཛིན་དག་པའི་མཆོད་སྤྲིན་གྱིས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་ཚེ་འདས་དོན་དུ་བཞེས་(༦༠)སུ་གསོལ། །ཨཱ་སརྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཙ་མེ་གྷ་ས་མ་དྲ་སྥ་ར་ཎ་ས་མ་ཡེ་ཧཱུྃ། རང་བཞིན་ལྷན་ཅིག་སྐྱེས་དང་སྦྱར་བའི་དྲི། །དངོས་འབྱོར་ཏིང་འཛིན་དག་པའི་མཆོད་སྤྲིན་གྱིས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་སརྦ་ཏ་ཐཱ་ག་ཏ་གྷནྡྷེ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཁ་དོག་དྲི་ལྡན་རོ་བརྒྱ་ལྡན་པའི་ཟས། །དངོས་འབྱོར་ཏིང་འཛིན་དག་པའི་མཆོད་སྤྲིན་གྱིས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་སརྦ་ཏ་ཐཱ་ག་ཏ་ནི་ཝི་ཏེ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། སིལ་སྙན་དྲིལ་ཆེན་རྣམས་དཀྲོལ་ཚངས་པའི་དབྱངས། །དངོས་འབྱོར་ཏིང་འཛིན་དག་པའི་མཆོད་སྤྲིན་གྱིས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་སརྦ་ཏ་ཐཱ་ག་ཏ་ཤཔྟ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། གཞན་ཡང་ཕྱི་ནང་གསང་བའི་མཆོད་སྤྲིན་ནི། །དངོས་འབྱོར་ཏིང་འཛིན་དག་པའི་མཆོད་སྤྲིན་གྱིས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་སརྦ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། སྐུ་གསུང་ཐུགས་ཉིད་ཡེ་ནས་ཀུན་ཏུ་བཟང་། །སྐུ་ལྔ་ཡེ་ཤེས་འདུ་འབྲལ་མེད་པའི་ལྷ། །ཐབས་མཁས་ཐུགས་རྗེས་འགྲོ་བའི་དོན་མཛད་པའི། །བླ་མ་ཀུན་བཟང་རིགས་ལྔའི་ཚོགས་ལ་བསྟོད། །ཨཱ་བཛྲ་ཨཾ་ཀུ་ཤ་ཛཿ ཡེ་ཤེས་པ་རྣམས་དམ་ཚིག་པའི་དལ་དུ་བྱོན། ཨཱ་བཛྲ་པཱ་ཤ་ཧཱུྃ། སོ་སོའི་སྤྱི་བོར་བྱོན། ཨཱ་བཛྲ་སྥོ་ཊ་བཾ། གཉིས་སུ་མེད་པར་ཐིམ། ཨཱ་བཛྲ་པྲ་བེ་ཤ་ཡ་ཧོཿ དགྱེས་ཤིང་བརྟན་པར་གྱུར། དེ་ཐམས་ཅད་ཀྱི་སྤྱི་བོར་ཨཱ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཨཱ་བུདྡྷ་ཨ་བྷི་ཥིཉྩ་ༀ། ཨཱ་བཛྲ་ཨ་བྷི་ཥིཉྩ་ཧཱུྃ། ཨཱ་རཏྣ་ཨ་བྷི་ཥིཉྩ་ཏྲཱཾ། ཨཱ་པདྨ་ཨ་བྷི་ཥིཉྩ་ཧྲཱིཿ ཨཱ་ཀརྨ་ཨ་བྷི་ཥིཉྩ་ཨ། དེ་བཞིན་གཤེགས་པ་རིགས་ལྔས་བདུད་རྩིའི་བུམ་པ་ཐོགས་ནས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨཱ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ་གིས་དབང་བསྐུར་བས་རང་རང་གི་རིགས་ཀྱི་བདག་པོས་དབུ་བརྒྱན་པར་གྱུར། ཨཱ་ཨཱཿཧཱུྃ། ལྷ་རྫས་ལས་གྲུབ་པའི་མཆོད་པའི་སྤྲིན་བསམ་གྱིས་མི་ཁྱབ་པས་ས་དང་ནམ་མཁའ་ཀུན་ཏུ་ཁྱབ་པར་གྱུར།

ཧཱུྃ་ཕྱོགས་བཅུ་རབ་འབྱམས་རྒྱལ་བའི་ཞིང་ཁམས་ན། །མེ་ཏོག་སྤྲིན་ཕུང་ནམ་མཁའི་མཐའ་ཀླས་པ། །དངོས་དང་ཡིད་ཀྱིས་རྣམ་སྤྲུལ་ཇི་སྙེད་ཀུན། །རྒྱལ་བ་རྒྱ་མཚོའི་ཚོགས་ལ་གུས་པས་མཆོད། །ཨཱ་བཛྲ་པུཥྤེ་ཨཱཿཧཱུྃ། ཕྱོགས་བཅུ་རབ་འབྱམས་རྒྱལ་བའི་ཞིང་ཁམས་ན། །བདུག་སྤོས་སྤྲིན་ཕུང་ནམ་མཁའི་མཐའ་ཀླས་པ། །དངོས་དང་ཡིད་ཀྱིས་རྣམ་སྤྲུལ་ཇི་སྙེད་ཀུན། །རྒྱལ་བ་རྒྱ་མཚོའི་ཚོགས་ལ་གུས་པས་མཆོད། །ཨཱ་བཛྲ་དྷུ་པེ་ཨཱཿཧཱུྃ། ཕྱོགས་བཅུ་རབ་འབྱམས་རྒྱལ་བའི་ཞིང་ཁམས་ན། །སྣང་གསལ་སྤྲིན་ཕུང་ནམ་མཁའི་མཐའ་ཀླས་པ། །དངོས་དང་ཡིད་ཀྱིས་རྣམ་སྤྲུལ་ཇི་སྙེད་ཀུན། །རྒྱལ་བ་རྒྱ་མཚོའི་ཚོགས་(༦༡)ལ་གུས་པས་མཆོད། །ཨཱ་བཛྲ་ཨཱ་ལོ་ཀེ་ཨཱཿཧཱུྃ། ཕྱོགས་བཅུ་རབ་འབྱམས་རྒྱལ་བའི་ཞིང་ཁམས་ན། །དྲི་ཆབ་སྤྲིན་ཕུང་ནམ་མཁའི་མཐའ་ཀླས་པ། །དངོས་དང་ཡིད་ཀྱིས་རྣམ་སྤྲུལ་ཇི་སྙེད་ཀུན། །རྒྱལ་བ་རྒྱ་མཚོའི་ཚོགས་ལ་གུས་པས་མཆོད། །ཨཱ་བཛྲ་གྷནྡེ་ཨཱཿཧཱུྃ། ཕྱོགས་བཅུ་རབ་འབྱམས་རྒྱལ་བའི་ཞིང་ཁམས་ན། །ཞལ་ཟས་སྤྲིན་ཕུང་ནམ་མཁའི་མཐའ་ཀླས་པ། །དངོས་དང་ཡིད་ཀྱིས་རྣམ་སྤྲུལ་ཇི་སྙེད་ཀུན། །རྒྱལ་བ་རྒྱ་མཚོའི་ཚོགས་ལ་གུས་པས་མཆོད་། །ཨཱ་བཛྲ་ནཻ་ཝི་ཏེ་ཨཱཿཧཱུྃ། ཕྱོགས་བཅུ་རབ་འབྱམས་རྒྱལ་བའི་ཞིང་ཁམས་ན། །རོལ་མོའི་སྤྲིན་ཕུང་ནམ་མཁའི་མཐའ་ཀླས་པ། །དངོས་དང་ཡིད་ཀྱིས་རྣམ་སྤྲུལ་ཇི་སྙེད་ཀུན། །རྒྱལ་བ་རྒྱ་མཚོའི་ཚོགས་ལ་གུས་པས་མཆོད། །ཨཱ་བཛྲ་ཤཔྟ་ཨཱཿཧཱུྃ། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན་འདི་ཕུལ་བས། །སྲིད་པའི་འཁོར་ལོ་རྒྱུན་ཆད་ནས། །ཆོས་ཀྱི་འཁོར་ལོ་བསྐོར་བར་ཤོག །ཨཱ་སརྦ་ཏ་ཐཱ་ག་ཏ་ཙཀྲ་རཏྣ་པཱུ་ཙི་ཏེ་([ཨ་]པཱུ་ཛི་ཏེ་)ཨཱཿཧཱུྃ། བདེ་བར་གཤེགས་པ་ཐམས་ཅད་ལ། །ནོར་བུ་རིན་ཆེན་འདི་ཕུལ་བས། །བཀྲེས་ཤིང་ཕོངས་པ་རྒྱུན་ཆད་དེ། །འབྱོར་པ་ཕུན་སུ་ཚོགས་པར་ཤོག །ཨཱ་སརྦ་ཏ་ཐཱ་ག་ཏ་མ་ཎི་རཏྣ་པཱུ་ཙི་ཏེ([ཨ་]པཱུ་ཛི་ཏེ་)ཨཱཿཧཱུྃ། བདེ་བར་གཤེགས་པ་ཐམས་ཅད་ལ། །བཙུན་མོ་རིན་ཆེན་འདི་ཕུལ་བས། །མ་རིག་མུན་པ་རྒྱུན་བཅད་དེ། །ཤེས་རབ་དབྱིངས་ཀྱི་དོན་རྟོགས་ནས། །ཐབས་དང་ཤེས་རབ་འབྲེལ་པར་ཤོག །ཨཱ་སརྦ་ཏ་ཐཱ་ག་ཏ་ཝ་ཏི་རཏྣ་པཱུ་ཙི་ཏེ་([ཨ་]པཱུ་ཛི་ཏེ་)ཨཱཿཧཱུྃ། བདེ་བར་གཤེགས་པ་ཐམས་ཅད་ལ། །བློན་པོ་རིན་ཆེན་འདི་ཕུལ་བས། །ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པ་རབ་འཛིན་ཅིང་། །ཡོན་ཏན་ཐམས་ཅད་ལྡན་པར་ཤོག །ཨཱ་སརྦ་ཏ་ཐཱ་ག་ཏ་མཧཱ་ཏ་རཏྣ་པཱུ་ཙི་ཏེ་([ཨ་]པཱུ་ཛི་ཏེ་)ཨཱཿཧཱུྃ། བདེ་བར་གཤེགས་པ་ཐམས་ཅད་ལ། །གླང་པོ་རིན་ཆེན་འདི་ཕུལ་བས། །ལྟ་ངན་རྣམས་ནི་རབ་བསལ་ཏེ། །བླ་མེད་ཐེག་པར་རབ་ཞོན་ནས། །ཐམས་ཅད་མཁྱེན་གྲོང་བགྲོད་པར་ཤོག །ཨཱ་སརྦ་ཏ་ཐཱ་ག་ཏ་ཧསྟི་རཏྣ་པཱུ་ཙི་ཏེ་([ཨ་]པཱུ་ཛི་ཏེ་)ཨཱཿཧཱུྃ། བདེ་བར་གཤེགས་པ་ཐམས་ཅད་ལ། །རྟ་མཆོག་རིན་ཆེན་འདི་ཕུལ་བས། །སྲིད་པའི་གཟེབ་ལས་ངེས་གྲོལ་ཏེ། །རྫུ་འཕྲུལ་མཆོག་གི་ཤུགས་ཐོབ་ནས། །སངས་རྒྱས་ཞིང་དུ་བགྲོད་པར་ཤོག །ཨཱ་སརྦ་ཏ་ཐཱ་ག་ཏ་ཏུ་རཾ་ག་ཨ་ཤྭ་ཐཱ་རཏྣ་པཱུ་ཙི་ཏེ་([ཨ་]པཱུ་ཛི་ཏེ་)ཨཱཿཧཱུྃ། བདེ་བར་གཤེགས་པ་ཐམས་ཅད་ལ། །དམག་དཔོན་རིན་ཆེན་འདི་ཕུལ་བས། །ཉོན་མོངས་དགྲ་ལས་རྒྱལ་གྱུར་ནས། །ཕས་ཀྱི་རྒོལ་བ་ཚར་བཅད་དེ། །སྙེམས་བྲལ་མཆོག་ནི་ཐོབ་པར་ཤོག །ཨཱ་སརྦ་ཏ་ཐཱ་ག་ཏ་ཥཏྒ་རཏྣ་པཱུ་ཙི་ཏེ་([ཨ་]པཱུ་ཛི་ཏེ་)ཨཱཿཧཱུྃ། ཧཱུྃ་སྣོད་བཅུད་སྣང་སྲིད་སྣ་ཚོགས་ཡིད་འོང་གཟུགས། །རྡོ་རྗེ་གཟུགས་མའི་ཚོགས་སུ་ཀུན་སྤྲུལ་ཏེ། །རྒྱལ་བ་རྒྱ་མཚོའི་ཚོགས་ལ་མཆོད་པར་བགྱི། །ཐུགས་རྗེས་ཚེ་(༦༢)འདས་དོན་དུ་བཞེས་སུ་གསོལ། །ཨཱ་བཛྲ་རཱུ་པ་པྲ་ཏི་ཛ་ཧཱུྃ། སྣོད་བཅུད་སྣང་སྲིད་སྣ་ཚོགས་ཡིད་འོང་སྒྲ། །རྡོ་རྗེ་སྒྲ་མའི་ཚོགས་སུ་ཀུན་སྤྲུལ་ཏེ། །རྒྱལ་བ་རྒྱ་མཚོའི་ཚོགས་ལ་མཆོད་པར་བགྱི། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་བཛྲ་ཤཔྟ་ཧཱུྃ། སྣོད་བཅུད་སྣང་སྲིད་སྣ་ཚོགས་དྲི་ཞིམ་སྤོས། །རྡོ་རྗེ་དྲི་མའི་ཚོགས་སུ་ཀུན་སྤྲུལ་ཏེ། །རྒྱལ་བ་རྒྱ་མཚོའི་ཚོགས་ལ་མཆོད་པར་བགྱི། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་བཛྲ་གྷནྡྷེ་ཧཱུྃ། སྣོད་བཅུད་སྣང་སྲིད་སྣ་ཚོགས་རོ་ལྡན་ཟས། །རྡོ་རྗེ་རོ་མའི་ཚོགས་སུ་ཀུན་སྤྲུལ་ཏེ། །རྒྱལ་བ་རྒྱ་མཚོ་ཚོགས་ལ་མཆོད་པར་བགྱི། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་བཛྲ་ནཻ་ཝི་ཏེ་ཧཱུྃ། སྣོད་བཅུད་སྣང་སྲིད་སྣ་ཚོགས་བདེ་བའི་རོ། །རྡོ་རྗེ་རེག་མའི་ཚོགས་སུ་ཀུན་སྤྲུལ་ཏེ། །རྒྱལ་བ་རྒྱ་མཚོའི་ཚོགས་ལ་མཆོད་པར་བགྱི། །ཐུགས་རྗེས་ཚེ་འདས་དོན་དུ་བཞེས་སུ་གསོལ། །ཨཱ་བཛྲ་པཪྴེ་ཧཱུྃ། ཨཱ་རྡོ་རྗེ་སེམས་དཔའ་བསྡུས་པས་ན། །རྡོ་རྗེའི་རིན་ཆེན་བླ་ན་མེད། །རྡོ་རྗེ་ཆོས་ཀྱི་གླུ་བླངས་པས། །རྡོ་རྗེ་ལས་ཀུན་བྱེད་པར་འགྱུར། །ཨཱ་བཛྲ་ལཱ་སྱེ་ཧཱུྃ། ཨཱ་བཛྲ་མཱ་ལེ་ཏྲཱྃ། ཨཱ་བཛྲ་གྷཱ྇རྟི་ཧྲཱི། ཨཱ་བཛྲ་ནཱིརྟི་ཨཱ། ཨཱ་བཛྲ་དྷཱུ་པེ་ཧཱུྃ། ཨཱ་བཛྲ་པུཥྤེ་ཏྲཱྃ། ཨཱ་བཛྲ་ཨཱ་ལོ་ཀེ་ཧྲཱིཿ ཨཱ་བཛྲ་གྷནྡྷེ་ཨཱ། ཨཱ་བཛྲ་སཏྭ་སུ་སཾ་ཀྲ་ཧ། ཨཱ་བཛྲ་རཏྣ་མ་ནུ་ཏ་རི་རཾ། ཨཱ་བཛྲ་པདྨ་ཀ་ཡ་ནི། ཨཱ་བཛྲ་ཀརྨ་ཨ་རོང་བྷ་ཝེ།

ཧཱུྃ་གསང་མཆོག་སྐུ་ཡི་བདེ་ཆེན་རིག་མ་ནི། །སྐུ་མདོག་དཀར་མཛེས་མེ་ལོང་པདྨ་བསྣམས། །ཤིན་ཏུ་ཡིད་འོང་བདེ་གཤེགས་དགྱེས་མཛད་མ། །རྒྱལ་བ་རྒྱ་མཚོའི་ཚོགས་ཀུན་མཉེས་གྱུར་ཅིག །ཨཱ་བཛྲ་ཨ་དྷར་ཤེ་ཨཱཿཧཱུྃ། གསང་མཆོག་གསུང་གི་བདེ་ཆེན་རིག་མ་ནི། །སྐུ་མདོག་དམར་མཛེས་རྔ་ཟླུམ་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་དགྱེས་མཛད་མ། །རྒྱལ་བ་རྒྱ་མཚོའི་ཚོགས་ཀུན་མཉེས་གྱུར་ཅིག །ཨཱ་བཛྲ་མུ་རཉྫེ་ཨཱཿཧཱུྃ། གསང་མཆོག་ཐུགས་ཀྱི་བདེ་ཆེན་རིག་མ་ནི། །སྐུ་མདོག་མཐིང་མཛེས་པི་ཝང་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་དགྱེས་མཛད་མ། །རྒྱལ་བ་རྒྱ་མཚོའི་ཚོགས་ཀུན་མཉེས་གྱུར་ཅིག །ཨཱ་བཛྲ་ཝི་ནི་ཨཱཿཧཱུྃ། གསང་མཆོག་ཡོན་ཏན་བདེ་ཆེན་རིག་མ་ནི། །སྐུ་མདོག་སེར་མཛེས་གླིང་བུའི་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་དགྱེས་མཛད་མ། །རྒྱལ་བ་རྒྱ་མཚོའི་ཚོགས་ཀུན་མཉེས་གྱུར་ཅིག །ཨཱ་བཛྲ་ཝཾ་སེ་ཨཱཿཧཱུྃ། གསང་མཆོག་ཕྲིན་ལས་བདེ་ཆེན་རིག་མ་ནི། །སྐུ་མདོག་ལྗང་མཛེས་རྫ་རྔའི་སྒྲ་སྒྲོགས་མ། །ཤིན་ཏུ་ཡིད་འོང་བདེ་གཤེགས་དགྱེས་མཛད་མ། །རྒྱལ་བ་རྒྱ་མཚོའི་ཚོགས་ཀུན་མཉེས་གྱུར་ཅིག །ཨཱ་བཛྲ་མེ་དྷེ་([ཨ་]ནྲ྇་ཏཾ་)ཀེ་ཨཱཿཧཱུྃ། རྩ་བརྒྱད་སྟོང་སྦྱར་བདུད་རྩི་ཨ་མྲ྇་ཏ། །དུག་ལྔ་གནས་(༦༣)སྒྱུར་ཡེ་ཤེས་བསྒྲུབ་པའི་རྫས། །རོ་མཆོག་ཡོན་ཏན་ཀུན་དང་ལྡན་པ་ནི། །རྒྱལ་བ་རྒྱ་མཚོའི་ཚོགས་ལ་མཆོད་པར་བགྱི། །ཨཱ་ཨཱཿཧཱུྃ་སརྦ་པཉྩ་ཨཱ་མྲ྇་ཏ་ཁཱ་ཧི། བདེ་གཤེགས་རྒྱལ་བ་རྒྱ་མཚོ་ནི། །ཡབ་ཡུམ་གཉིས་མེད་མཁའ་གསང་ལས། །འཁྲིལ་སྦྱོར་བྱང་ཆུབ་སེམས་ཀྱིས་མཆོད། །བདེ་བའི་རོ་མཉམ་མཆོད་པར་བཞེས། །ཨཱ་ཨཱཿཧཱུྃ། བྷོ་དྷི་ཙིཏྟ་གུ་ཧྱ་པཱུ་ཙ་([ཨ་]པཱུ་ཛ་)མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ།

སྣ་ཚོགས་ཆོས་རྣམས་མ་སྐྱེས་མཉམ་པའི་ངང་། །སྣང་སྲིད་འཁོར་འདས་སྒྱུ་མའི་མཆོད་སྤྲིན་ནི། །ཆོས་སྐུ་སྟོང་པ་མཚན་མེད་སྨོན་པ་མེད། །གདོད་ནས་རྣམ་དག་ཞི་བའི་དབྱིངས་སུ་འབུལ། །ཨཱ་སརྦ་དྷརྨ་ཀཱ་ཡ་ཨཱཿཧཱུྃ། ཆོས་ཉིད་ཡེ་ཤེས་མཉམ་པའི་ངང་། །རང་བཞིན་ཡོན་ཏན་ལྷུན་གྱིས་གྲུབ། །ཐུགས་རྗེ་ཡིད་བཞིན་ནོར་བུ་འདྲ། །ཕྱག་འཚལ་གདོད་མའི་མགོན་པོ་ལ། །ཆོས་དབྱིངས་ཡེ་ཤེས་ངོ་བོ་ཉིད། །ཉོན་མོངས་གཏི་མུག་རྣམ་སྦྱོང་ཞིང་། །ནམ་མཁའི་ཁམས་ནི་རྣམ་པར་དག །ཕྱག་འཚལ་རྣམ་སྣང་ཡབ་ཡུམ་ལ། །མེ་ལོང་ཡེ་ཤེས་ངོ་བོ་ཉིད། །ཉོན་མོངས་ཞེ་སྡང་རྣམ་སྦྱོང་ཞིང་། །ཆུ་ཡི་ཁམས་ནི་རྣམ་པར་དག །ཕྱག་འཚལ་མི་བསྐྱོད་ཡབ་ཡུམ་ལ། །མཉམ་ཉིད་ཡེ་ཤེས་ངོ་བོ་ཉིད། །ཉོན་མོངས་ང་རྒྱལ་རྣམ་སྦྱོང་ཞིང་། །ས་ཡི་ཁམས་ནི་རྣམ་པར་དག །ཕྱག་འཚལ་རིན་འབྱུང་ཡབ་ཡུམ་ལ། །ཀུན་རྟོག་ཡེ་ཤེས་ངོ་བོ་ཉིད། །ཉོན་མོངས་འདོད་ཆགས་རྣམ་སྦྱོང་ཞིང་། །མེ་ཡི་ཁམས་ནི་རྣམ་པར་དག །ཕྱག་འཚལ་སྣང་མཐའ་ཡབ་ཡུམ་ལ། །བྱ་གྲུབ་ཡེ་ཤེས་ངོ་བོ་ཉིད། །ཉོན་མོངས་ཕྲག་དོག་རྣམ་སྦྱོང་ཞིང་། །རླུང་གི་ཁམས་ནི་རྣམ་པར་དག །ཕྱག་འཚལ་དོན་གྲུབ་ཡབ་ཡུམ་ལ། །བཅུ་དྲུག་ཡེ་ཤེས་ངོ་བོ་ཉིད། །གཟུང་འཛིན་སྒྲིབ་པ་རྣམ་སྦྱོང་ཞིང་། །རྣམ་ཤེས་ཚོགས་བརྒྱད་རྣམ་པར་དག །ཕྱག་འཚལ་སེམས་དཔའ་ཡབ་ཡུམ་ལ། །ཚད་མེད་ཡེ་ཤེས་ངོ་བོ་ཉིད། །ཁམས་བཞིའི་དྲི་མ་རྣམ་སྦྱོང་ཞིང་། །འབྱུང་བཞིའི་སྒོ་ནི་རྣམ་པར་དག །ཕྱག་འཚལ་སྒོ་བ་ཡབ་ཡུམ་ལ། །ཕ་རོལ་ཕྱིན་དྲུག་ངོ་བོ་ཉིད། །འགྲོ་དྲུག་བག་ཆགས་རྣམ་སྦྱོང་ཞིང་། །ཚོགས་དྲུག་རྣམ་ཤེས་རྣམ་པར་དག །ཕྱག་འཚལ་ཐུབ་པ་དྲུག་ལའོ། །ཞི་ལས་ཡེ་ཤེས་རྣམ་འཕྲོས་པ། །འཇིགས་གཟུགས་ཁྲོ་བོའི་དཀྱིལ་འཁོར་ནི། །ལྔ་བཅུ་རྩ་བརྒྱད་འབར་བའི་སྐུ། །ཕྱག་འཚལ་དབྱིངས་ཀྱི་དཀྱིལ་འཁོར་ལ། །ས་དང་ཡེ་ཤེས་ཞིང་ཁམས་ན། །འཇིག་རྟེན་འདས་དང་མ་(༦༤)འདས་ཚུལ། །དུར་ཁྲོད་ཆེན་པོའི་གནས་བརྒྱད་ན། །བཞུགས་པའི་འགྲོ་བ་ཀུན་ལ་བསྟོད། །

ཨཱ་ཨཱཿཧཱུྃ། གཏོར་མའི་སྣོད་ཡངས་ཤིང་རྒྱ་ཆེ་བར་བཅུད་ཡེ་ཤེས་ཀྱི་བདུད་རྩི་རི་དང་རྒྱ་མཚོར་མཉམ་པས་གང་བར་གྱུར། ཨཱ་ཨཱཿཧཱུྃ་ཨི་དཾ་གྷྲི་ན་བཱ་ལིང་ཏ་ཁ་ཁ་ཁཱ་ཧི་ཁཱ་ཧི། མཆོད་སྦྱིན་གྱི་གཏོར་མ་རྒྱ་ཆེན་པོ་འདི། བླ་མ་བདེ་གཤེགས་རིགས་ལྔ་ཞི་ཁྲོ་རབ་འབྱམས་ཀྱི་ལྷ་ཚོགས་འཁོར་དང་བཅས་པ་རྣམས་ལ་འབུལ་ལོ། །ཚེ་ལས་འདས་པའི་སྒྲིབ་པ་ཐམས་ཅད་བྱང་ཞིང་དག་ནས་མྱུར་དུ་མངོན་པར་རྫོགས་པ་སངས་རྒྱ་བར་མཛད་དུ་གསོལ། ཨཱ་ཨ་ཧ་རི་ནི་ས་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཁའ་འགྲོ་དཔའ་བོ་དཔའ་མོ་དམ་ཅན་རྒྱ་མཚོའི་ཚོགས་དང་བཅས་པ་ཐམས་ཅད་ལ་འབུལ་ལོ། །ཚེ་ལས་འདས་པའི་ས་དང་ལམ་གྱི་བར་དུ་གཅོད་པ་ཐམས་ཅད་ཞི་བར་མཛད་དུ་གསོལ། ཨཱ་ཨ་ཀཱ་རོ་མུ་ཁཾ་སརྦ་དྷརྨ་ནཾ་ཨདྱཱ་ནུད་པ་ནན་ཏྭད་ཨཱ་ཨཱཿཧཱུྃ་ཕཊ་སྭཱ་ཧཱ། ཡུལ་ལྷ་གཞི་བདག་གི་ཚོགས་ཐམས་ཅད་ལ་འབུལ་ལོ། །ཚེ་ལས་འདས་པའི་སྒྲིབ་པ་སྦྱོང་བ་ལ་བར་དུ་གཅོད་པ་ཐམས་ཅད་ཞི་བར་མཛད་དུ་གསོལ། ཨཱ་ཨ་ཀཱ་རོ་མུ་ཁཾ་སརྦ་དྷརྨ་ནཾ་ཨདྱཱ་ནུད་པ་ནན་ཏྭད་ཨཱ་ཨཱཿཧཱུྃ་ཕཊ་སྭཱ་ཧཱཿ འགྲོ་བ་རིགས་དྲུག་གནོད་བྱེད་ལན་ཆགས་བགེགས་རིགས་སྟོང་ཕྲག་བརྒྱད་ཅུ་དང་བཅས་པ་ལ་འབུལ་ལོ། །ཚེ་ལས་འདས་པ་ལ་ལན་ཆགས་པ་ཐམས་ཅད་ཁྱེར་ནས་གནོད་པ་དང་འཚེ་བ་ཐམས་ཅད་ཞི་བར་མཛོད་ཅིག །ཨཱ་ཨ་ཀཱ་རོ་མུ་ཁཾ་སརྦ་དྷརྨ་ནི་ཨདྱཱ་ནུཏྤ་ནན་ཏོད་ཨཱ་ཨཱཿཧཱུྃ་ཕཊ་སྭཱ་ཧཱཿདུས་ལས་འདས་པའི་གཙོར་བྱས་བར་དོ་ན་གནས་པའི་སེམས་ཅན་ཐམས་ཅད་ལ་འབུལ་ལོ། །བར་དོའི་སྡུག་བསྔལ་ཐམས་ཅད་དང་བྲལ་ནས་མྱུར་དུ་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །ན་མོ་བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །ཐོགས་པ་མེད་པར་འབྱུང་འགྱུར་ཤོག །སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་གཉིས་མེད་གནས་མེད་པ། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སྐྱོབ་པའི་སྲས་(༦༥)སུ་སྐྱེ། །དེ་ལྟར་ཆོས་དང་ཟང་ཟིང་གི་སྦྱིན་པས་ཚོགས་གཉིས་རྫོགས། སྒྲིབ་པ་གཉིས་བྱང་སྟེ། མྱུར་དུ་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །ཅེས་བརྗོད་ནས་སྐབས་འདིར། བདག་ཉིད་དཀྱིལ་འཁོར་དུ་དབང་བླང་ངོ་། །ཚེ་འདས་ལ་དབང་བསྐུར་ཏེ། སྒྲིབ་པ་སྦྱོང་བའི་ཐོག་མར་རྟེན་བསྐྱེད་པ་ལ་ཐུགས་གཏད་པར་ཞུ། ཨཱ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། ཨཱ་སྭ་བྷཱ་ཝ་བི་ཤུདྡྷ྅་སརྦ་དྷརྨ་སྭ་བྷཱ་ཝ་བི་ཤུ་དྷོ྅ཧཾ། སྟོང་པའི་ངང་ལས་པདྨ་དང་། ཟླ་བའི་སྟེང་དུ། ནྲ྇་ཡོངས་སུ་གྱུར་པ་ལས། ཚེ་འདས་དེ་ཉིད་ཀྱི་ཕུང་པོ་ཁམས་དང་སྐྱེ་མཆེད་ལ་སོགས་པ་གསོན་གྱི་དུས་ན་ཇི་ལྟར་གནས་པ་བཞིན་དུ་ཡོང་བར་གྱུར། ལྕགས་ཀྱུའི་ཕྱག་རྒྱས་ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བདེན་པ་དང་། དཀོན་མཆོག་གསུམ་གྱི་བྱིན་རླབས་ཀྱི་བདེན་པ་དང་། གསང་སྔགས་དང་རིག་སྔགས་ཀྱི་རྒྱལ་པོ་ཁྲོ་བོ་རྣམས་ཀྱི་བདེན་པ་དང་། གཟུངས་སྔགས་ཀྱི་རྒྱལ་མོ་ཁྲོ་མོ་རྣམས་ཀྱི་བདེན་པ་དང་། ཆོས་ཉིད་རང་བཞིན་གྱི་རྣམ་པར་དག་པའི་བདེན་པ་དང་། ཀུན་རྫོབ་རྟེན་ཅིང་འབྲེལ་པར་འབྱུང་བ་ཟབ་མོའི་བདེན་པ་དང་། བཅོམ་ལྡན་འདས་ཞི་ཁྲོ་རབ་འབྱམས་ཀྱི་ལྷ་ཚོགས་འཁོར་དང་བཅས་པའི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། འཇིག་རྟེན་འདི་ནས་ཕ་རོལ་དུ་ཚེ་ལས་འདས་པ་ཆེ་གེ་མོ་ཞེས་བགྱི་བའི་རྣམ་པར་ཤེས་པ་ལས་ཀྱི་དབང་གིས་ཁམས་གསུམ་འགྲོ་བ་རིགས་དྲུག་སྐྱེ་གནས་རྣམ་པ་བཞི། སྲིད་པ་བར་མ་དོ། འཁོར་བ་དང་མྱ་ངན་ལས་འདས་པའི་ཆར་གཏོགས་པ། གང་ན་གནས་ཀྱང་སྐད་ཅིག་ཐང་ཅིག་ཡུད་ཙམ་གཅིག་ལ་རྟེན་འདི་ལ་མཆིས་པར་གྱུར་ཅིག །ཨཱ་ཌཱཀྐི་ཛ་ཧཱུྃ། ཞེས་ལན་གསུམ་བརྗོད་ནས། རྣམ་ཤེས་འོད་ཀྱི་རྣམ་པ་ནམ་མཁར་བསམས་ལ། ཨཱ་ཤོ་དྷ་ནི་ཤོ་དྷ་ནི་སརྦ་པཱ་པཾ་ཨ་པ་ན་ཡེ་ཧཱུྃ། སྡིག་པ་སྦྱངས་ཏེ། ཛཿཧཱུྃ་བཾ་ཧོཿས་རྟེན་ལ་བསྟིམ། ཨཱ་སརྦ་པཱ་པཾ་བྷི་ཤཱ་དྷ་ནི་ཧཱུྃ། ཨཱ་སརྦ་བིད་ཏྲ་ཐཱ། ཨཱ་བཛྲ་པཱ་ཎི་བི་པོ་ཏ་ཡ་སརྦ་ཨ་པ་ཡ་བྷནྡྷ་ནི། པྲ་མོ་ཀྵ་ཡ་སརྦ་ཨ་པ་ཡ་གྷནྡྷེ་བྷྱ། སརྦ་ཏ་ཐཱ་ག་ཏ་བཛྲ་ས་མ་ཡ་ཏྲ་ཐཱ། ཨཱ་བཛྲ་བྷནྡྷ་ཏྲ་ཐཱ། ཨཱ་སརྦ་བིད་བཛྲ་ཨ་དྷི་ཏིཥྛ་ཛྙཱ་ན་ས་མ་ཡེ་ཧཱུྃ། རྣམ་པར་ཤེས་པ་ཨ་དཀར་པོ་དྲི་མ་མེད་པ་སྦྱང་དུ་རུང་བར་གྱུར།

ཐོག་མར་གཏོར་མ་བསྐོར་ཞིང་ཞི་བས་སྦྱོང་བ་ནི། ཨཱ་སརྦ་བིགྣཾན་མཿསརྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱ། སརྦ་ཏད་ཁཾ། ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ། ཚེ་ལས་འདས་པའི་སྡིག་པ་སྦྱོང་བ་ལ་བར་དུ་གཅོད་པའི་(༦༦)བགེགས་རྣམས་གཏོར་མ་འདིས་བརྔན་པར་གྱིས་ལ་སོང་ཞིག །ཅེས་པ་གསུམ་དང་། ཏིང་ལོ་དང་ཆང་བུས་བསྐོར་ཞིང་། སུཾ་བྷ་ནི། ཏིང་ལོ་འདིས་སྣང་བ་གྱིས་ཆངས་བུ་འདིས་ལམ་རྒྱགས་གྱིས་ལ་སོང་ཞིག །ཅེས་པས་ཞི་དྲག་ཕྱེད་མ་དང་། གུ་གུལ་གྱིས་བདུག་ཅིང་རྡོ་རྗེ་དྲིལ་བུ་གསིལ་ལ། ཧཱུྃ་ཡེ་ཤེས་བསྐལ་པའི་མེ་ལ་སོགས་པས་ཁྲོ་བོ་མང་པོ་བྱོན་པར་བསམ་ལ། ཧཱུྃ་འཇིགས་པའི་ཧཱུྃ་སྒྲ་ངེས་སྒྲོགས་ཤིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །ཨཱ་སུཾ་བྷ་ནིས་བགེགས་རྣམས་རྒྱ་མཚོའི་མཐར་བསྐྲད། ཨཱ་བཛྲ་ཛྭ་ལ་ཨ་ན་ལ་ཧ་ན། མ་ཐཱ་ད་ཧ་པ་ཙ་ཧཱུྃ་ཕཊ་ཀྱིས་མེ་རིས་མཚམས་བཅད་པར་གྱུར། རྟེན་གྱི་གཡས་སུ་མེ། གཡོན་དུ་ཆུ། མདུན་དུ་ཏིལ་བཞག་ནས། སྙིང་གའི་སྡིག་སྒྲིབ་ཀཾ་ནག་པོའི་རྣམ་པ་སྣ་སྒོར་སྡིག་པ་རྭ་ཅན་དུ་གྱུར་པ། མཐེབ་སྲིན་གྱིས་ཏིལ་ལ་ཐིམ་པ་གཡས་གཡོན་གྱི་ཡེ་ཤེས་ཀྱི་མེ་དང་ཆུར་བོར་བས་དག་པར་བསམ་ཞིང་། ཨཱ་བཛྲ་ཌཱ་ཀི་ཁ་ཁ་ཁཱ་ཧི་ཁཱ་ཧི། སརྦ་པཱ་པཾ་ད་ཧ་ན་བྷསྨིན་ཀུ་རུ་ཡེ་སྭཱ་ཧཱ། ཆེ་གེའི་སྡིག་པ་དང་སྒྲིབ་པ་ཐམས་ཅད་ཤནྟིང་ཀུ་རུ་ཡེ་སྭཱ་ཧཱ། སྔགས་བཟླས་པའི་བྱེ་མས་བྲབ་པས་སྡིག་སྒྲིབ་ཐམས་ཅད་དག་པར་བསམ་ཞིང་། ཨཱ་ཛི་ན་ཛི་ཀ་ལཾ་ཏེ་ཤ་ར་ཏེ་སྟྭཾ། ཧཱུྃ་བཛྲ་ཌྷྲ྇ཀ་མུཾ་དྷརྟུ་ཤྭ་ར་ཏི་སྟྭཾ། སྭཱ་རཏྣ་དྷྲ྇ཀ་མཾ་མོ་ཧ་ར་ཏི་སྟྭཾ། ཨཾ་ཨ་རོ་ལིཀ །པྱཾ་ར་ག་ར་ཏི་སྟྭཾ། ཧཱ་པྲ་ཛྙཱ་དྷྲ྇ཀ་ཏཾ་བཛྲ་ར་ཏི་སྟྭཾ། ཨཱ་ཧཱུྃ་ཏྲཱཾ་ཧྲཱིཿཨཱཿཛཿཧཱུྃ་བཾ་ཧོ། ཨཱ་སརྦ་པཱ་པཾ་ད་ཧ་ན་བཛྲ་ཧཱུྃ་ཕཊ། ཨཱ་སརྦ་པ་པཾ་བི་ཤྭ་དྷ་ནི་བཛྲ་ཧཱུྃ་ཕཊ། ཨཱ་སརྦ་ཀརྨ་ཨ་ཝ་ར་ཎ་བྷསྨིཾ་ཀུ་རུ་ཧཱུྃ་ཕཊ། ཨཱ་བྷྲཱུྃ་བྷི་ན་ཤ་ཡ། ཨ་ཝ་ར་ཎ་ནི་ཧཱུྃ་ཕཊ། ཨཱ་བྷྲཱུྃ་བི་ཤོ་དྷོ་ཡ་ཨ་ཝ་ར་ཎ་ནི་ཧཱུྃ་ཕཊ། ཨཱ་ཛྭ་ལ་ཛྭ་ལ། ཏ་ཀ་ཏ་ཀ་ཧ་ན་ཧ་ན་ཨ་ཝ་ར་ཎ་ནི་ཧཱུྃ་ཕཊ། ཨཱ་སྲུཾ་ས་ར་ས་ར་པྲ་ས་ར་པྲ་ས་ར་ཨ་ཝ་ར་ཎ་ནི་ཧཱུྃ་ཕཊ། ཨཱ་ཧཱུྃ་ཕཊ། སརྦ་ཨ་ཝ་ར་ཎ་ནི་བི་ཕོ་ཊ་ཡ་ཧཱུྃ་ཕཊ། ཨཱ་བྷྲི་ཏ་བྷྲི་ཏ་སརྦ་ཨ་ཝ་ར་ཎ་ནི་ཧཱུྃ་ཕཊ། ཨཱ་ཏྲ་ཐ་ཏྲ་ཐ་སརྦ་ཨ་ཝ་ར་ཎ་ནི་ཧཱུྃ་ཕཊ། ཨཱ་ཚིནྡྷ་ཚིནྡྷ་སརྦ་ཨ་ཝ་ར་ཎ་ནི་ཧཱུྃ་ཕཊ། ཨཱ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་དུན་ཧཱུྃ་ཕཊ། ཨཱ་པ་ཙ་པ་ཙ་སརྦ་པྲེ་ཏ་ག་ཏེ་ཧེ་དུན་ཧཱུྃ་ཕཊ། ཨཱ་མ་ཐ་མ་ཐ་སརྦ་ར་ཡ་ག་ཧེ་ཧེ་དུན་ཧཱུྃ་ཕཊ། ཚེ་ལས་འདས་པའི་སྡིག་པ་དང་སྒྲིབ་པ་ཐམས་ཅད་ཤནྟིང་ཀུ་རུ་ཡེ་སྭཱ་ཧཱ། ལྷའི་ངོས་སུ་མེ་ལོང་ལ་ཁྲུས་གསོལ་ཞིང་། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨཱ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ། (༦༧)འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩོལ་བར་མཛོད། །ཨཱ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ། དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་གང་བས་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཨཱ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །ཨཱ་ཧཱུྃ་ཏྲཱཾ་ཧྲཱི་ཨ། ཀཱ་ཡ་བྷི་ཤོ་དྷ་ན་ཡེ་སྭཱ་ཧཱ། ཞེས་གསོལ་བའི་ཆུ་ལས་བུམ་དུ་བླུགས་པར་རྣམ་རྒྱལ་གྱི་ཆུའང་བསྲེས་ནས། མིང་བྱང་ལ་བཀྲུ་ཞིང་། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་ཅིང་། །གཏོང་བ་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱི་ཁྲུས་བགྱི་འོ། །འདི་ནི་ཚུལ་ཁྲིམས་རང་བཞིན་ཆུ། །ཁྲིམས་འཆལ་དྲི་མ་སྦྱོང་མཛད་ཅིང་། །ཚུལ་ཁྲིམས་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱི་ཁྲུས་བགྱི་འོ། །འདི་ནི་བཟོད་པའི་རང་བཞིན་ཆུ། །ཁོང་ཁྲོའི་དྲི་མ་སྦྱོང་མཛད་ཅིང་། །བཟོད་པ་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱི་ཁྲུས་བགྱི་འོ། །འདི་ནི་བརྩོན་འགྲུས་རང་བཞིན་ཆུ། །ལེ་ལོའི་དྲི་མ་སྦྱོང་མཛད་ཅིང་། །བརྩོན་འགྲུས་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱི་ཁྲུས་བགྱིའོ། །འདི་ནི་བསམ་གཏན་རང་བཞིན་ཆུ། །རྣམ་གཡེང་དྲི་མ་སྦྱོང་མཛད་ཅིང་། །བསམ་གཏན་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱི་ཁྲུས་བགྱི་འོ། །འདི་ནི་ཤེས་རབ་རང་བཞིན་ཆུ། །ཤེས་འཆལ་དྲི་མ་སྦྱོང་མཛད་ཅིང་། །ཤེས་རབ་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱི་ཁྲུས་བགྱི་འོ། །ཆུ་བོ་དྲུག་གིས་ཁྲུས་བྱས་པས། །བག་ཆགས་རྣམ་དྲུག་སྦྱོང་མཛད་ཅིང་། །གང་ལ་ཉེས་པ་མི་མངའ་བ། །ཁྲུས་ལེགས་མཛད་ལ་ཕྱག་འཚལ་འདུད། །དྲི་ཆུ་དྲུག་གིས་ཁྲུས་བྱས་པས། །དྲི་མ་རྣམ་དྲུག་སྦྱོང་མཛད་ཅིང་། །རྒྱ་ཆེན་ཡོན་ཏན་དྲུག་ལྡན་པའི། །ཁྲུས་ལེགས་མཛད་ལ་ཉེས་མི་མངའ། །དྲི་མ་རྣམ་དྲུག་དག་པ་ཡིས། །ཡོན་ཏན་ཐམས་ཅད་དང་ལྡན་པའི། །སངས་རྒྱས་ཐམས་ཅད་མཆོད་དོན་དུ། །དད་པས་བདག་གིས་ཁྲུས་བགྱིའོ། །ༀ་ཧཱུྃ་ཏྲཱཾ་ཧྲཱིཿཨ། ཆེ་གེ་མོའི་ཕ་རོལ་ཏུ་ཕྱིན་པ་དྲུག་གི་མི་མཐུན་པའི་ཕྱོགས་དྲུག་ཞི་ནས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་གྱུར་ཅིག །འདོད་(༦༨)ཆགས་ཞེ་སྡང་གཏི་མུག་གསུམ། །འདི་དག་ཚེ་འདས་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་གསུམ། །འདི་དག་ཚེ་འདས་དུག་གསུམ་སྟེ། །སྐྱོབ་པའི་དམ་ཆོས་དུག་མི་མངའ། །དམ་ཆོས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་གསུམ། །འདི་དག་ཚེ་འདས་དུག་གསུམ་སྟེ། །འཕགས་པའི་དགེ་འདུན་དུག་མི་མངའ། །དགེ་འདུན་བདེན་པས་དུག་བཅོམ་མོ། །ཆེ་གེ་མོའི་ཉོན་མོངས་པ་དུག་ལྔ་དུག་གསུམ་ཐམས་ཅད་དཀོན་མཆོག་གསུམ་གྱི་བདེན་པས་ཤནྟིང་ཀུ་རུ་ཡེ་སྭཱ་ཧཱ། ཡང་འབྱུང་བ་བཞིས་བཀྲུ་ཞིང་། ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་ས་ཡི་ནང་དུ་སོང་། །ཆུ་ནི་དུག་གི་ཕ་ཡིན་ཏེ། །ཆུ་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་ཆུ་ཡི་ནང་དུ་སོང་། །མེ་ནི་དུག་གི་ཕ་ཡིན་ཏེ། །མེ་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་མེ་ཡི་ནང་དུ་སོང་། །རླུང་ནི་དུག་གི་ཕ་ཡིན་ཏེ། །རླུང་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་རླུང་གི་ནང་དུ་སོང་། །ཨཱ་ཧཱུྃ་ཏྲཱཾ་ཧྲཱིཿཨ། ཆེ་གེ་མོའི་འབྱུང་བའི་དུག་ཐམས་ཅད་འབྱུང་བ་བཞིའི་ནང་དུ་ཤཱནྟིང་ཀུ་རུ་ཡེ་སྭཱ་ཧཱ། ཞེས་བཀྲུས་ནས་ཤིས་པ་བརྗོད་པ་ནི། གང་ལ་སེར་སྣ་རྣམ་ཆགས་པ། །རྣམ་འཇོམས་དྲི་མ་སྦྱོང་མཛད་ཅིང་། །ཐུགས་ཞི་གནོད་པ་མི་མངའ་དེས། །ཁྱེད་ལ་བདེ་ལེགས་མཛད་པར་འགྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་འཛུད་མཛད་ཅིང་། །ཆོས་རྣམས་ཐམས་ཅད་སྟོན་པ་དེས། །ཁྱེད་ལ་བདེ་ལེགས་མཛད་པར་(༦༩)འགྱུར། །སྟོན་པ་འགྲོ་བ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་ཕྱིར་བདེ་ལ་མངའ་མཛད་དེས། །ཁྱེད་ལ་བདེ་ལེགས་མཛད་པར་འགྱུར། །སྐྱོབ་པ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་འཁོར་བར་འགྲོ་བ་ཡི། །སེམས་ཅན་ཀུན་གྱི་རྟེན་གྱུར་ཅིང་། །གླིང་དང་དཔུང་གཉེན་གྱུར་པ་དེས། ཁྱེད་ལ་བདེ་ལེགས་མཛད་པར་འགྱུར། །གང་ཞིག་ཆོས་རྣམས་མངོན་སུམ་གྱུར། །གཙང་ཞིང་བཀྲུ་བ་མི་མངའ་ལ། །གསུམ་གཙང་གཙང་མར་མཛད་པ་དེས། །ཁྱེད་ལ་བདེ་ལེགས་མཛད་པར་འགྱུར། །དཔའ་བོ་ཆེན་པོ་གང་སྐྱེས་པ། །ཕུན་སུམ་ཚོགས་དོན་འབྱོར་གྱུར་ཅིག །དོན་གྲུབ་ཚོགས་ཀྱང་གྲུབ་པ་དེས། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པར་རབ་གཡོས་ཏེ། །སེམས་ཅན་རབ་དགའ་མཛད་པ་དེས། །ཁྱེད་ལ་བདེ་ལེགས་མཛད་པར་འགྱུར། །བྱང་ཆུབ་སྙིང་པོར་གཤེགས་པ་ན། །ས་དག་རྣམ་དྲུག་གཡོས་གྱུར་ཅིང་། །བདུད་ཡིད་མི་བདེར་གྱུར་པ་དེས། ཁྱེད་ལ་བདེ་ལེགས་མཛད་པར་འགྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམ་གསུང་ཞིང་། །ཐུབ་པའི་སྙན་པ་གང་བྱུང་དེས། །ཁྱེད་ལ་བདེ་ལེགས་མཛད་པར་འགྱུར། །ཡིད་འཕྲོག་གང་ཞིག་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང་། །ཚོགས་ཀུན་དབང་དུ་མཛད་པ་དེས། །ཁྱེད་ལ་བདེ་ལེགས་མཛད་པར་འགྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ཚངས་པའི་ལྷ་རྣམས་དང་། །འབྱུང་པོ་ཀུན་གྱི་བདེ་ལེགས་ནི། །ཁྱེད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀུན་གྱི་བསམ་པ་ཡིས། །ཁྱེད་ཀྱི་འདོད་དོན་གང་ཡིན་པའི། །དོན་དེ་དེ་རིང་འགྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །ཁྱེད་ཅག་ལམ་འགྲོ་བདེ་ལེགས་ཤོག །ཕྱིར་འོང་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་བདེ་ལེགས་ཤིང་། །ཉིན་མཚན་ཀུན་ཏུ་བདེ་ལེགས་ཤོག །ཁྱེད་ཅག་སྡིག་པར་མ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །ཚེ་ལས་འདས་པ་ཆེ་གེ་མོས་གཙོ་བྱས་པའི་སྐྱེ་དགུ་ཐམས་ཅད་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ཞིང་ཤིན་ཏུ་བཀྲ་ཤིས་པར་གྱུར་ཅིག །ཅེས་བརྗོད་ནས་བྱང་བུ་འཛིན་པས། འཇིག་རྟེན་འདི་ནས་ཕ་རོལ་ཏུ་ཚེ་ལས་འདས་པས་གཙོ་བྱས་པའི་སེམས་ཅན་ཐམས་ཅད། གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་འཆང་ཞབས་པད་ལ་འདུད། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །དང་པོར་མེ་ཏོག་ཕོག་པ་ཡི། །དཀྱིལ་འཁོར་ལྷ་ཚོགས་རྣམས་ལ་འདུད། །ཕྱོགས་བཅུ་དུས་གསུམ་ན་བཞུགས་པའི་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བདེ་(༧༠)གཤེགས་རྒྱལ་བ་ཀུན་བཟང་རིགས་ལྔའི་གཙོ། །སེམས་དཔའ་སེམས་མ་སྒོ་སྐྱོང་ཐུབ་པ་དྲུག །ཞི་ཁྲོ་རབ་འབྱམས་དཀྱིལ་འཁོར་ལྷ་ཚོགས་ལ། །གུས་པས་ཕྱག་འཚལ་སྐྱབས་སུ་ཉེ་བར་མཆི། །གཞན་ཡང་ཕྱོགས་བཅུའི་རྒྱལ་བ་རྒྱ་མཚོ་དང་། །བྱང་ཆུབ་ལྕམ་དྲལ་ལྷ་དང་ལྷ་མོའི་ཚོགས། །རྡོ་རྗེ་ཕོ་ཉ་མཁའ་འགྲོ་ཤུགས་འགྲོར་བཅས། །གུས་པས་ཕྱག་འཚལ་སྐྱབས་སུ་ཉེ་བར་མཆི། །རྒྱལ་སྲས་ཉན་ཐོས་རང་སངས་རྒྱས་པའི་ཚོགས། །རྒྱུན་ཞུགས་ཕྱིར་འོང་ཕྱིར་མི་འོངས་པ་དང་། །སློབ་དང་མི་སློབ་བསོད་ནམས་ཞིང་རྣམས་ལ། །གུས་པས་ཕྱག་འཚལ་སྐྱབས་སུ་ཉེ་བར་མཆི། །ཐོག་མེད་དུས་ནས་འཁོར་བའི་རྒྱ་མཚོ་འདིར། །མ་རིག་དབང་གིས་འཁྲུལ་ཞིང་འཁྱམས་པའི་ཚེ། །ལུས་ངག་ཡིད་ཀྱིས་སྡིག་པ་ཅི་བགྱིས་པ། །མ་ལུས་ད་ལྟ་སོ་སོར་བཤགས་པར་བགྱི། །ཉན་ཐོས་རང་རྒྱལ་ཐེག་པ་ཆེ་ལ་སོགས། །སོ་སོའི་བསྟན་པ་རྒྱ་མཚོའི་འདུལ་ཁྲིམས་ལས། །འགལ་ཞིང་ནོངས་པའི་དངོས་པོ་ཅི་མཆིས་པ། །མ་ལུས་ད་ལྟ་སོ་སོར་བཤགས་པར་བགྱི། །ཤེས་དང་སྤྱད་དང་དང་དུ་བླངས་ལ་སོགས། །ཉི་ཤུ་རྩ་ལྔ་རྩ་བ་ཡན་ལག་བཅས། །བསྲུངས་མཚམས་དུས་ལས་ཡལ་བ་མཆིས་སོ་འཚལ། །མ་ལུས་ད་ལྟ་སོ་སོར་བཤགས་པར་བགྱི། །མདོར་ན་ཉེས་ལྟུང་སྡིག་པའི་ཚོགས་ཀུན་བཤགས། །དགེ་ལ་ཡི་རང་འཁོར་ལོ་བསྐོར་བར་བསྐུལ། །མྱ་ངན་མི་འདའ་རྟག་པར་གསོལ་བ་འདེབས། །འགྲོ་བའི་དོན་དུ་སངས་རྒྱས་འགྲུབ་པར་ཤོག །ཅེས་པས་ཕྱག་འཚལ་ནས། དེ་ནས་ཚེ་འདས་ཀྱིས་དབང་ཞུ་བའི་ཡོན་དུ་མཎྜལ་ཕུལ་ལ། ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཨཱ་བཛྲ་རེ་ཁེ་ཨཱཿཧཱུྃ་ཞེས་པ་དང་། ཨེ་མ་དུས་གསུམ་རྒྱལ་བ་ཀུན་ཏུ་བཟང་། །རིགས་ལྔའི་སངས་རྒྱས་དགོངས་སུ་གསོལ། །ཚེ་འདས་ཁྱེད་ཀྱི་རྗེས་སུ་འཇུག །དཀོན་མཆོག་གསུམ་ལ་སྐྱབས་འགྲོ་དང་། །སོ་ཐར་བྱང་སེམས་དམ་ཚིག་རྣམས། །ཐར་པའི་གྲོང་དུ་འཇུག་བྱའི་ཕྱིར། །མགོན་པོས་བདག་ལ་གནང་དུ་གསོལ། །ཅེས་བརྗོད་པར་བསམ་ནས་མེ་ཏོག་དོར་བའི་ལན་དུ། ཨེ་མ་སྣོད་དང་ལྡན་པའི་བུ། །གསང་སྔགས་ཆོ་ག་ཁྱེད་ལ་བསྟན། །འདས་དང་མ་བྱོན་ད་ལྟར་གྱི། །སངས་རྒྱས་མ་ལུས་(༧༡)ཐམས་ཅད་ཀྱང་། །གསང་སྔགས་ཆོ་ག་འདི་མཁྱེན་པས། །ཀུན་ཀྱང་སངས་རྒྱས་ཐོབ་པ་ཡིན། །ཀུན་བཟང་རྒྱལ་བ་རིགས་ལྔ་ཡིས། །བདུད་ཀྱི་དཔུང་ཡང་འདི་ཡིས་བཅོམ། །དེ་ལྟར་ཁྱོད་ཀྱིས་ཐོབ་བྱའི་ཕྱིར། །འདི་ཡི་རྗེས་སུ་ཀུན་ཞུགས་མཛོད། །ཅེས་བརྗོད་ནས་སྡོམ་པ་བྱིན།

ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་། །བླ་མ་ཡི་དམ་མཁའ་འགྲོའི་ཚོགས་རྣམས་དགོངས། །རྐང་གཉིས་གཙོ་བོ་ཕྱོགས་བཅུའི་སངས་རྒྱས་དང་། །ཞི་བ་ཆགས་བྲལ་དམ་པའི་ཆོས་རྣམས་དང་། །ཚོགས་མཆོག་འཕགས་པའི་དགེ་འདུན་ཐམས་ཅད་ལ། །བདག་ནི་གུས་པས་སྐྱབས་སུ་ཉེ་བར་མཆི། །ཀུན་བཟང་རིགས་ལྔའི་ལྷ་ཚོགས་ལ། །འདི་བཟུང་བླ་མེད་བྱང་ཆུབ་བར། །གུས་པའི་ཡིད་ཀྱིས་སྐྱབས་སུ་མཆི། །དཔའ་བོ་དཔའ་མོ་ཆོས་སྐྱོང་བཅས། །བྱང་ཆུབ་སེམས་དཔའ་སློབ་དཔོན་ལ། །བདག་ནི་གུས་པས་སྐྱབས་སུ་མཆི། །བླ་མ་ཀུན་བཟང་སྤྱན་སྔ་རུ། །ལུས་ངག་ཡིད་ཀྱིས་གཞན་རྣམས་ལ། །གནོད་པ་ལས་ལྡོག་དགེ་བ་བསྒྲུབ། །དགེ་ཚུལ་དགེ་སློང་བྱང་ཆུབ་སེམས། །སོ་སོར་ཐར་པའི་སྡོམ་པ་ལ། །བདག་ནི་རྒྱུན་དུ་གནས་ཤིང་བསྲུང་། །ཞེས་པ་གསུམ་དང་། ཧོ་བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །འགྲོ་དྲུག་སེམས་ཅན་ཐམས་ཅད་ལ། །མ་དང་བུ་ཡི་འདུ་ཤེས་ཀྱིས། །མ་བརྒལ་བ་རྣམས་བསྒྲལ་བ་དང་། །མ་གྲོལ་དགྲོལ་དང་དབུགས་དབྱུང་ཕྱིར། །སྨོན་པའི་བྱང་ཆུབ་སེམས་བསྐྱེད་དེ། །སྔོན་གྱི་རྒྱལ་བ་ཐམས་ཅད་ཀྱང་། །སྡོམ་པ་ལ་ནི་གནས་པ་ལྟར། །འདི་བཟུང་འཁོར་བ་མ་སྟོངས་བར། །བླ་མེད་འཇུག་པའི་བྱང་ཆུབ་སེམས། །ཚེ་འདས་བདག་གིས་བསྐྱེད་པར་བགྱི། །ཕ་རོལ་ཕྱིན་དྲུག་སློབ་ཅིང་བསྒྲུབ། །བརྩོན་འགྲུས་བདག་གིས་ཐམས་ཅད་བསྒྲལ། །ཀུན་དོན་ཚུལ་ཁྲིམས་གསུམ་རྟག་བསྲུང་། །བདག་གིས་སེམས་བསྐྱེད་སྡོམ་བཟུང་ནས། །མ་གྲོལ་དགྲོལ་དང་མ་བརྒལ་བསྒྲལ། །དབུགས་དབྱུང་མྱ་ངན་འདས་ལ་འགོད། །ཅེས་པ་གསུམ་དང་། སྲས་བཅས་སངས་རྒྱས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །ཚེ་འདས་ལ་ནི་དགོངས་སུ་གསོལ། །དེང་ནས་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་མི་གཏང་ངོ་། །རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་དང་། །བྱང་ཆུབ་སེམས་ནི་(༧༢)སྤང་མི་བྱ། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་རྣམས་བཤད། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །ཡར་མཆོད་གུས་ཤིང་མར་ལ་བརྩེ། །རྩ་བ་ཡན་ལག་དམ་ཚིག་བསྲུང་། །རྩ་བ་བཞི་ལས་འདའ་མི་བྱ། །ཞེས་པ་གསུམ་གྱི་རྗེས་ལ། གདོང་གཡོགས་ཡིད་ཀྱིས་བཅིངས་ལ་གསོལ་བ་བཏབ་པ། ཀྱེ་ཁྲོ་བོ་མི་བཟད་འཇིགས་པའི་སྐུ། །མཚོན་ཆ་སྣ་ཚོགས་ཕྱག་ན་བསྣམས། །བདག་ཅག་འཁོར་བ་ལས་བསྒྲལ་ཕྱིར། །ཁྱེད་ཀྱིས་གནང་སྟེ་གཏོང་དུ་གསོལ། །ཅེས་པ་དང་། ཁྱེད་སུ་ཡིན་ཅི་བྱེད་དྲིས་ལ། བདག་ནི་སྐལ་ལྡན་རིགས་ཀྱི་བུ་གཅིག་པོ་ལགས། དཔལ་རིགས་ཀྱི་བདག་པོ་ལ་དབང་ཞུ། ཞེས་ལན་སྨྲས་པར་བསམས་ལ། བགེགས་བསྐྲད། ཡང་། ཀྱེ་རིགས་ལྔ་བདེ་བར་གཤེགས་པ་དང་། །བླ་མ་ཡི་དམ་མཁའ་འགྲོ་དགོངས། །སྒོ་བ་ཆེན་པོ་ཁྱེད་རྣམས་ཀྱིས། །སྒོ་ཕྱེ་ཐར་པའི་གྲོང་བསྟན་འཚལ། །ཞེས་པ་གསུམ་དང་། བླ་མ་རྡོ་རྗེ་འཛིན་པ་དང་། །དཀྱིལ་འཁོར་ལྷ་ཚོགས་སྤངས་ན་ནི། །སྐྱོབ་བ་གཞན་ནས་མི་མངའ་བས། །ཁྱེད་ཀྱི་ཐུགས་རྗེས་བདག་ལ་སྩོལ། །ཞེས་པ་གསུམ་དང་། ཨེ་མ་ཁྱོད་ནི་སྣོད་མཆོག་དམ་པ་སྟེ། །ཁྱོད་འདོད་པ་ནི་བདག་གིས་སྦྱིན། །ཞེས་དང་།

བདག་ནི་འབྲས་བུ་གསང་སྔགས་ཀྱི། །དངོས་གྲུབ་བདུད་རྩིའི་ཆུ་རྒྱུན་གྱིས། །སྨིན་ཅིང་གྲོལ་བར་འདོད་པས་ན། །ཐུགས་རྗེས་བདག་ལ་གནང་བར་མཛོད། །གསུམ་གྱི་རྗེས་ལ། ཨེ་མ་ཨེ་མ་རིགས་ཀྱི་བུ། །ཁྱོད་ནི་ལས་ཟད་འཁྲུལ་པ་ཞིག །རིགས་ཀྱི་བུ་མཆོག་ཁྱོད་ཡིན་པས། །ངས་ཁྱོད་ཀུན་བཟང་རིགས་ལྔ་ཡི། །དཀྱིལ་འཁོར་འཇུག་ཅིང་ཡེ་ཤེས་དབབ། །དངོས་གྲུབ་ཐམས་ཅད་ཁྱོད་ཀྱིས་ཐོབ། །དངོས་གྲུབ་དཀྱིལ་འཁོར་འདི་དག་ནི། །མ་མཐོང་བ་ལ་སྨྲས་པ་ན། །དམ་ཚིག་ཉམས་ཏེ་དམྱལ་བར་ལྟུང་། །རིགས་ལྔ་ཡེ་ཤེས་རྣམ་པ་ལྔ། །ཁྱོད་ཀྱི་སྙིང་ལ་ཞུགས་པ་སྟེ། །འདི་སྨྲས་ཡེ་ཤེས་ལྷ་དང་བྲལ། །འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་ཉམས་ན་སྲེག་པར་བྱེད། །བསྲུང་ན་དངོས་གྲུབ་ཐམས་ཅད་ཐོབ། །དམ་ཚིག་བདུད་རྩིའི་ཆུ་འདི་འཐུང་། །ཨཱ་ཨ་མྲ྇་ཏ་དམ་ལས་མ་འདའ་སྭཱ་ཧཱ། ཁྱོད་ཀྱི་སྟོན་པ་རིགས་ལྔའི་སངས་རྒྱས་ང་ཡིན་པས། ངས་བཀའ་བསྒོ་བ་ལས་མ་འདའ་ཞིག །འདས་ན་རྡོ་རྗེའི་དམྱལ་བར་སྐྱེས་ནས་ཐོན་པའི་དུས་མེད་དོ། །ཞེས་པས་བདུད་རྩི་འཐོར་ནས། བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས། ཚེ་འདས་ཀྱི་སྙིང་ནང་དུ་ཐིམ་པར་བསམས་ལ། ཨཱ་བཛྲ་(༧༣)པྲ་བེ་ཤ་ཡ་པྲ་བེ་ཤ་ཡ་ཧཱུྃ་ཧཱུྃ། ཞེས་པས་རོལ་མོ་དཀྲོལ་ལོ། །ཚེ་འདས་གསོལ་བ་འདེབས་པར་བསམས་ནས། ཀྱེ་ཤར་སྒོ་སྲུང་བའི་སྒོ་བ་ལྕགས་ཀྱུ་མ། །ཤར་གྱི་སྒོ་འདི་ཕྱེས་ལ་ནི། །ཚེ་འདས་ཡི་དམ་ལྷ་དང་སྤྲོད། །ཀྱེ་ལྷོ་སྒོ་སྲུང་བའི་སྒོ་བ་ཞགས་པ་མ། །ལྷོ་ཡི་སྒོ་འདི་ཕྱེས་ལ་ནི། །ཚེ་འདས་ཡི་དམ་ལྷ་དང་སྤྲོད། །ནུབ་སྒོ་སྲུང་བའི་སྒོ་བ་ལྕགས་སྒྲོག་མ། །ནུབ་ཀྱི་སྒོ་འདི་ཕྱེས་ལ་ནི། །ཚེ་འདས་ཡི་དམ་ལྷ་དང་སྤྲོད། །བྱང་སྒོ་སྲུང་བའི་སྒོ་བ་དྲིལ་བུ་མ། །བྱང་གི་སྒོ་འདི་ཕྱེས་ལ་ནི། །ཚེ་འདས་ཡི་དམ་ལྷ་དང་སྤྲོད། །ཅེས་བརྗོད་ནས་མེ་ཏོག་དོར་ཏེ། ཀྱེ་བདེ་གཤེགས་རིགས་ལྔའི་ཕོ་བྲང་དུ། །འབྲེལ་བའི་མེ་ཏོག་འདི་དོར་བས། །འབྲེལ་བ་གང་ཡོད་ལྷ་དང་བདག་འཕྲད་ཤོག །ཨཱ་པུཥྤེ་སི་ཏི་([ཨ་]སིདྡྷི་)སྟྭཾ། ཞེས་དོར་ནས། སྟོན་པ་རིགས་ལྔའི་སངས་རྒྱས་ཀྱིས། །ཁྱོད་ཀྱི་མ་རིག་འཁོར་བའི་མིག །ཡེ་ཤེས་སྤྱན་དུ་དབྱེ་བ་ལྟར། །དེ་བཞིན་ཁྱོད་ཀྱིས་འགྲོ་བ་རྣམས། །ཡེ་ཤེས་སྤྱན་དུ་འབྱེད་པར་ཤོག །ཨཱ་ཙཀྵུ་སྭཱ་ཧཱ། ཞེས་ཡིད་ཀྱིས་གདོངས་གཡོགས་ཕྱེས་ལ། ཨེ་མ་ཚེ་འདས་རིགས་ཀྱི་བུ། །ཁྱོད་ནི་སྡིག་པ་ཀུན་ལས་གྲོལ། །དཀྱིལ་འཁོར་ཆེན་པོ་འདི་ལ་ལྟོས། །ལུས་ངག་ཡིད་ཀྱིས་དད་པ་བསྐྱེད། །སྔགས་དང་ཕྱག་རྒྱས་བྱིན་གྱིས་བརླབས། །དངོས་གྲུབ་ཐམས་ཅད་ཁྱོད་ཀྱིས་ཐོབ། །དམ་ཚིག་སྔགས་ལ་བརྩོན་པར་གྱིས། །ཀྱེ་རིགས་ཀྱི་བུ་རྡུལ་ཚོན་གྱི་དལ་འདི་ནི་རྟེན་ལྷའི་གཞལ་ཡས་ཁང་སྟེ། ཕུང་པོ་ཁམས་དང་སྐྱེ་མཆེད་མཚོན། དེ་ན་བཞུགས་པའི་ལྷ་ནི། རང་གི་སེམས་རིགས་ལྔའི་སངས་རྒྱས་སུ་བཞུགས་པར་དྲན་པར་གྱིས་ཤིག །ཅེས་བརྗོད་ནས། ཡང་མཎྜལ་ཕུལ་ཏེ། ཀུན་བཟང་ཡབ་ཡུམ་ཡེ་ཤེས་དབང་། །བདག་ལ་བསྐུར་བར་མཛད་དུ་གསོལ། །ཅེས་གསུམ་བརྗོད་དུས། མེ་ཏོག་གང་ལ་ཕོག་པ་འདི། །སྔོན་ནས་ཁྱོད་ཀྱི་ཡི་དམ་ལྷ། །རྟག་ཏུ་བསྒོམ་དང་བསྒྲུབ་པར་གྱིས། །ཨཱ་བཛྲ་པུཥྤེ་སི་ཏི་([ཨ་]སིདྡྷི་)སྟྭཾ། ཞེས་པས་མེ་ཏོག་བཅིངས་ལ། ཚེ་འདས་རྡོ་རྗེ་སེམས་དཔར་བསམས་ལ། བུམ་པ་སྤྱི་བོར་འཛིན་པས། ཧཱུྃ་གཟུགས་ཀྱི་ཕུང་པོ་རྣམ་དག་ཅིང་། །ཉོན་མོངས་ཞེ་སྡང་སྦྱོང་བྱེད་པའི། །མེ་ལོང་ལྟ་བུའི་ཡེ་ཤེས་ཀྱིས། །དཔལ་ལྡན་སྐུ་ཡི་དབང་བསྐུར་རོ། །ཨཱ་བཛྲ་ཨ་བྷི་ཥིཉྩ་ཧཱུྃ། འོ་རིགས་ཀྱི་བུ་ཁྱོད་ལ་ཆུ་འདི་གཏད་ཅིང་བཀྲུས་པ་ཙམ་གྱིས། ལུས་ཀྱི་སྒྲིབ་པ་ཐམས་ཅད་དག་ནས་འདིར་སངས་རྒྱས་ཐམས་ཅད་ཀྱི་སྐུའི་དབང་ཐོབ་པ་ཡིན་ནོ། །ཁྱོད་ཀྱི་གཟུགས་ཀྱི་ཕུང་པོ་རྡོ་རྗེ་སེམས་དཔའ་ཉིད་དུ་སངས་རྒྱས་ཏེ། ཆུའི་ཁམས་མཱ་མ་ཀཱིའི་རང་བཞིན་དུ་གནས་འགྱུར་ནས། ཞེ་སྡང་མེ་(༧༤)ལོང་ལྟ་བུའི་ཡེ་ཤེས་སུ་གྲོལ་ཏེ། སངས་རྒྱས་རྡོ་རྗེ་རིགས་ཀྱི་སྐུ་འགྱུར་བ་མེད་པ་ཐོབ་ནས་འགྲོ་བ་ཐམས་ཅད་ཀྱི་དོན་བྱེད་པར་འགྱུར་རོ། །ཞེས་པ་དང་། སྣང་བ་མཐའ་ཡས་སུ་བསམས་ཏེ་རྡོ་རྗེ་བཟུང་ནས། ཧཱུྃ་འདུ་ཤེས་ཕུང་པོ་རྣམ་དག་ཅིང་། །ཉོན་མོངས་འདོད་ཆགས་སྦྱོང་བྱེད་པའི། །སོ་སོར་རྟོགས་པའི་ཡེ་ཤེས་ཀྱིས། །དཔལ་ལྡན་གསུང་གི་དབང་བསྐུར་རོ། །ཨཱ་པདྨ་ཨ་བྷི་ཥིཉྩ་ཧྲཱིཿ འོ་རིགས་ཀྱི་བུ་ཁྱོད་ཀྱི་ལག་ཏུ་རྡོ་རྗེ་འདི་གཏད་པ་ཙམ་གྱིས། འདིར་ངག་གི་སྒྲིབ་པ་དག་ནས། སངས་རྒྱས་ཐམས་ཅད་ཀྱི་གསུང་གི་དབང་ཐོབ་པ་ཡིན་ནོ། །འདུ་ཤེས་ཀྱི་ཕུང་པོ་སྣང་བ་མཐའ་ཡས་ཉིད་དུ་སངས་རྒྱས་ཏེ་མེའི་ཁམས་ཀྱང་གོས་དཀར་མོའི་རང་བཞིན་དུ་དག་ནས། འདོད་ཆགས་སོ་སོར་རྟོག་པའི་ཡེ་ཤེས་ཉིད་དུ་གྲོལ་ཏེ། སངས་རྒྱས་པདྨ་རིགས་ཀྱི་གསུང་འགགས་མེད་པའི་ཆོས་ཀྱི་སྒྲ་དབྱངས་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་པ་དང་། རྣམ་སྣང་དུ་བསམས་ནས་མིང་འདོགས་པར་མོས་ཤིང་། ཧཱུྃ་རྣམ་ཤེས་ཕུང་པོ་རྣམ་དག་ཅིང་། །ཉོན་མོངས་གཏི་མུག་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་ཐུགས་ཀྱི་དབང་བསྐུར་རོ། །ཨཱ་བུདྡྷ་ཨ་བྷི་ཥིཉྩ་ཨཱ། འོ་རིགས་ཀྱི་བུ་ཁྱོད་ལ་མིང་ཆེ་གེ་མོ་ཞེས་བྱ་བ་བཏགས་པ་ཙམ་གྱིས། འདིར་ཡིད་ཀྱི་སྒྲིབ་པ་དག་ནས། སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ་པ་ཡིན་ནོ། །རྣམ་པར་ཤེས་པ་ཡང་རྣམ་པར་སྣང་མཛད་དུ་སངས་རྒྱས་ཏེ། ནམ་མཁའི་ཁམས་ཀྱང་ཆོས་ཀྱི་དབྱིངས་ཕྱུག་མར་དག་ནས། གཏི་མུག་ཆོས་ཀྱི་དབྱིངས་ཀྱི་ཡེ་ཤེས་སུ་གྲོལ་ཏེ། སངས་རྒྱས་དེ་བཞིན་གཤེགས་པའི་ཐུགས་འཁྲུལ་པ་མེད་པ་ཆོས་ཀྱི་སྐུ་ཐོབ་ནས་འགྲོ་བའི་དོན་བྱེད་པར་འགྱུར་རོ། །ཞེས་པ་དང་། རིན་འབྱུང་དུ་བསམས་ནས་དབུ་རྒྱན་ཐོགས་ནས། ཧཱུྃ་ཚོར་བའི་ཕུང་པོ་རྣམ་དག་ཅིང་། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱིས། །དཔལ་ལྡན་ཡོན་ཏན་དབང་བསྐུར་རོ། །ཨཱ་རཏྣ་ཨ་བྷི་ཥིཉྩ་ཏྲཱཾ། འོ་རིགས་ཀྱི་བུ་ཁྱོད་ལ་དབུ་རྒྱན་འདི་བསྐོན་པ་ཙམ་གྱིས། འདིར་ལུས་ངག་ཡིད་གསུམ་གྱི་སྒྲིབ་པ་དག་ནས། སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ་པ་ཡིན་ནོ། །ཚོར་བའི་ཕུང་པོ་རིན་ཆེན་འབྱུང་ལྡན་ཉིད་དུ་སངས་རྒྱས་ཏེ། སའི་ཁམས་ཀྱང་སངས་རྒྱས་སྤྱན་དུ་དག་ནས། ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ། སངས་རྒྱས་རིན་ཆེན་རིགས་ཀྱི་ཡོན་ཏན་ཐམས་ཅད་མཁྱེན་པ་ཐོབ་ནས། འགྲོ་བའི་དོན་བྱེད་པར་འགྱུར་རོ། །ཞེས་པ་དང་། དོན་གྲུབ་ཏུ་བསམས་ནས་(༧༥)དྲིལ་བུ་འཛིན་པས། ཧཱུྃ་འདུ་བྱེད་ཕུང་པོ་རྣམ་དག་ཅིང་། །ཉོན་མོངས་ཕྲག་དོག་སྦྱོང་བྱེད་པའི། །བྱ་བ་གྲུབ་པའི་ཡེ་ཤེས་ཀྱིས། །དཔལ་ལྡན་ཕྲིན་ལས་དབང་བསྐུར་རོ། །ཨཱ་ཀརྨ་ཨ་བྷི་ཥིཉྩ་ཨ། འོ་རིགས་ཀྱི་བུ་ཁྱོད་ལ་དྲིལ་བུ་འདི་གཏད་པ་ཙམ་གྱིས་འདིར་ལུས་ངག་ཡིད་གསུམ་གྱི་སྒྲིབ་པ་མ་ལུས་པ་དག་ནས་སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ་པ་ཡིན་ནོ། །འདུ་བྱེད་ཀྱི་ཕུང་པོ་ཡང་དོན་ཡོད་གྲུབ་པར་སངས་རྒྱས་ཏེ། རླུང་གི་ཁམས་ཀྱང་དམ་ཚིག་སྒྲོལ་མར་དག་ནས། ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ། སངས་རྒྱས་དོན་ཡོད་གྲུབ་པའི་ཕྲིན་ལས་ཐོགས་པ་མེད་པ་འགྲུབ་ནས་འགྲོ་བའི་དོན་བྱེད་པར་འགྱུར་རོ། །ཞེས་པ་དང་།

ཀུན་ཏུ་བཟང་པོར་བསམས་ཏེ། རྡོ་རྗེ་དྲིལ་བུ་འཛིན་པས། ཨཱ་ཨཱཿཧཱུྃ་ཐབས་དང་ཤེས་རབ་དབྱེར་མེད་ཅིང་། །སྣང་སྟོང་དབྱེར་མེད་འདི་ཟུང་ལ། །སྟོང་ཉིད་སྙིང་རྗེའི་སྙིང་པོ་ཡིས། །ཀུན་བཟང་རྡོ་རྗེ་འཛིན་ཁྱོད་ཀྱིས། །འགྲོ་ཀུན་རྗེས་སུ་འཛིན་པར་མཛོད། །འོ་རིགས་ཀྱི་བུ་ཁྱོད་ལ་རྡོ་རྗེ་དང་དྲིལ་བུ་འདི་གཏད་པ་ཙམ་གྱིས། འདིར་ཐམས་ཅད་མཁྱེན་པའི་ས་བོན་ཐེབས་ནས། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རང་བཞིན་ཀུན་ཏུ་བཟང་པོ་རིག་པའི་རྩལ་དབང་ཐོབ་པ་ཡིན་ནོ། །རང་གི་སེམས་སྐྱེ་བ་མེད་པ་ཆོས་ཀྱི་སྐུར་སངས་རྒྱས་ཏེ། འདི་ལྟར་སྣང་བ་ཐམས་ཅད་མ་སྤངས་གནས་སུ་དག་ནས། སྐུ་གསུམ་འབྲལ་བ་མེད་པས་འགྲོ་བའི་དོན་དཔག་ཏུ་མེད་པ་འགྲུབ་པར་འགྱུར་རོ། །ཞེས་པ་དང་། རྣམ་རྒྱལ་གྱི་བུམ་པ་འཛིན་པས། ཧཱུྃ་རྡོ་རྗེ་སེམས་དཔའ་བཅོམ་ལྡན་འདས། །མཱ་མ་ཀཱི་ཡི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །སྣང་བ་མཐའ་ཡས་བཅོམ་ལྡན་འདས། །གོས་དཀར་མོ་ཡི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །རྣམ་པར་སྣང་མཛད་བཅོམ་ལྡན་འདས། །ཀུན་ཏུ་བཟང་མོའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །རིན་ཆེན་འབྱུང་ལྡན་བཅོམ་ལྡན་འདས། །སངས་རྒྱས་སྤྱན་མའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །དོན་ཡོད་གྲུབ་པ་བཅོམ་ལྡན་འདས། །དམ་ཚིག་སྒྲོལ་མའི་ཕྱག་རྒྱ་བུམ་པ་སྟེ། །གཉིས་མེད་བྱང་ཆུབ་སེམས་ཀྱི་ཆུས། །རིགས་ཀྱི་བུ་ལ་དབང་བསྐུར་རོ། །ཨཱ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནི་སི་ཏི་([ཨ་]སིདྡྷི་)(༧༦)ཕ་ལ་ཧཱུྃ། ཨཱ་ཧཱུྃ་ཏྲཱཾ་ཧྲཱིཿཨཿཧ་རི་ནི་ས་ཨ་བྷི་ཥིཉྩ་བྷྲུཾ། སིདྡྷི་ཕ་ལ་ཧཱུྃ་ཨཱ། འོ་རིགས་ཀྱི་བུ་ཁྱོད་ལ་དབང་ཐམས་ཅད་བརྟན་པར་བྱེད་པ་བུམ་པའི་དབང་འདི་བསྐུར་བ་ཙམ་གྱིས། སྣོད་བཅུད་ལྷ་དང་གཞལ་ཡས་ཁང་གི་རང་བཞིན་ཕུང་པོ་ཁམས་དང་སྐྱེ་མཆེད་ལྷ་དང་ལྷ་མོར་གནས་གྱུར་པ་ཡིན་པས། ཕྱི་ནང་སྣོད་བཅུད་ཐམས་ཅད་ལ་བརྙས་པ་བྱས་ན་ལྟུང་བར་འགྱུར་བས་དག་སྣང་དང་མོས་པ་གྱིས་ལ་མཆོད་པ་དང་བསྟོད་པ་ལ་དགའ་བ་དང་ངོ་ཤེས་པར་གྱིས་ཤིག །ཅེས་པ་དང་། རིགས་ལྔའི་དབུ་རྒྱན་བསྟན་ལ། །འོ་རིགས་ཀྱི་བུ་ཁྱོད་ལ་རིགས་ལྔའི་སྐུ་འདི་བསྟན་པ་ཙམ་གྱིས། ཡེ་ཤེས་ལྔའི་ངོ་བོར་སངས་རྒྱས་པ་ཡིན་ནོ། །དེ་ཡང་ཉོན་མོངས་པ་རང་བཞིན་གྱིས་དག་ཅིང་ཡེ་ཤེས་ལྔ་རྒྱས་པས། རང་བཞིན་གྱི་དོན་གཉིས་ལྷུན་གྱིས་གྲུབ་པའི་བརྡ་ཡིན་ནོ། །ཞེས་པ་དང་། དེ་ལྟར་བརྡ་ཡི་ངོ་སྤྲོད་ཀྱང་། །ལོགས་ན་ཡོད་པ་མ་ཡིན་ཏེ། །རང་གི་ལུས་སེམས་འདི་ལ་ཚང་། །འཁོར་འདས་རིག་པའི་ཡེ་ཤེས་ཏེ། །སྐུ་ལྔ་ཡེ་ཤེས་ལྷུན་གྱིས་གྲུབ། །སངས་རྒྱས་གཞན་དུ་མ་འཚོལ་ཅིག །ཅེས་པ་དང་། ཨེ་མ་ཚེ་འདས་བུ་ཉོན་ཅིག །ཐུན་མོང་སྐྱབས་འགྲོ་ནས་བརྩམས་པའི། །སོ་ཐར་བྱང་སེམས་བསླབ་བྱ་དང་། །རིག་འཛིན་སྔགས་ཀྱི་དམ་ཚིག་ཀུན། །བྱང་ཆུབ་མ་ཐོབ་བར་དུ་ནི། །སྲོག་གི་ཕྱིར་ཡང་མ་གཏང་ཞིག །དམ་ཚིག་ཉམས་ན་བསྐལ་པ་རུ། །ངན་སོང་གསུམ་ནས་ཐར་མི་སྲིད། །དེ་ཕྱིར་སྲུངས་ཤིག་རིགས་ཀྱི་བུ། །འོ་ཁྱོད་ཀྱིས་གསང་སྔགས་ཀྱི་དབང་ཐམས་ཅད་རྫོགས་པར་ཐོབ་པ་ཡིན་པས་དད་པ་དང་དམ་ཚིག་ཐམས་ཅད་ལེགས་པར་བསྲུང་བ་ལ་བརྩོན་པར་མཛོད་ཅིག །ཅེས་བརྗོད་ནས། ཤིན་ཏུ་དབེན་ཞིང་སྐལ་བ་མཆོག་རབ་དང་ལྡན་པ་ལ་དབང་ལྷག་མའང་བསྐུར་ཞིང་། ཐུན་མོང་བ་ཐམས་ཅད་དེ་ནས་མཎྜལ་ཕུལ་ལོ། །བླ་མ་རྡོ་རྗེ་འཛིན་པ་ལ། །དེང་ནས་བྱང་ཆུབ་སྙིང་པོའི་བར། །ལུས་དང་ལོངས་སྤྱོད་ཀུན་གྱིས་མཆོད། །ཁྱེད་ཀྱིས་རྗེས་སུ་གཟུང་མཛོད་ལ། །སྲིད་པའི་རྒྱ་མཚོ་ལས་བརྒལ་མཛོད། །ཅེས་གཏང་རག་ཕུལ་བ་དང་། སླར་ཡང་མཆོད་ཅིང་བསྟོད་པ། ཁ་དོག་དབྱིབས་ལེགས་ཡིད་འོངས་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །མོས་བློས་རྟེན་གྱི་ལྷ་ལ་མཆོད་པར་བགྱི། །བཞེས་ཤིག་བླ་མེད་ཐར་ལམ་གྲུབ་པར་མཛོད། །ཨཱ་སརྦ་ཏ་ཐཱ་ག་ཏ་རཱུ་པ་ཀ་མ་(༧༧)གུ་ཎ་པཱུ་ཙི་ཏེ་ཨཱཿཧཱུྃ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་མཆོག་སྒྲ་སྙན་ཡིད་འོངས་ལྡན། །མོས་བློས་རྟེན་གྱི་ལྷ་ལ་མཆོད་པར་བགྱི། །བཞེས་ཤིག་བླ་མེད་ཐར་ལམ་གྲུབ་པར་མཛོད། །ཨཱ་སརྦ་ཏ་ཐཱ་ག་ཏ་ཤཔྟ་ཀ་མ་གུ་ཎ་པཱུ་ཙི་ཏེ་ཨཱཿཧཱུྃ། ཕྱོགས་དུས་ཀུན་ན་ཙན་དན་སྦྲུལ་སྙིང་དང་། །ཨ་གར་ནག་སོགས་དབང་པོ་ཚིམས་བྱེད་དྲི། །མོས་བློས་རྟེན་གྱི་ལྷ་ལ་མཆོད་པར་བགྱི། །བཞེས་ཤིག་བླ་མེད་ཐར་ལམ་གྲུབ་པར་མཛོད། །ཨཱ་སརྦ་ཏ་ཐཱ་ག་ཏ་གྷནྡྷེ་ཀ་མ་གུ་ཎ་པཱུ་ཙི་ཏི་ཨཱཿཧཱུྃ། ཕྱོགས་དུས་ཀུན་ན་བཅུད་དང་རོར་ལྡན་པའི། །ལུས་སེམས་བརྟས་བྱེད་རོ་མཆོག་ཅི་མཆིས་ཀུན། །མོས་བློས་རྟེན་གྱི་ལྷ་ལ་མཆོད་པར་བགྱི། །བཞེས་ཤིག་བླ་མེད་ཐར་ལམ་གྲུབ་པར་མཛོད། །ཨཱ་སརྦ་ཏ་ཐཱ་ག་ཏ་རཱ་ས་ཀ་མ་གུ་ཎ་པཱུ་ཙི་ཏེ་ཨཱཿཧཱུྃ། ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་ལུས་སེམས་ཚིམས་བྱེད་རྣམས། །མོས་བློས་རྟེན་གྱི་ལྷ་ལ་མཆོད་པར་བགྱི། །བཞེས་ཤིག་བླ་མེད་ཐར་ལམ་གྲུབ་པར་མཛོད། །ཨཱ་སརྦ་ཏ་ཐཱ་ག་ཏ་པཪྴེ་ཀ་མ་གུ་ཎ་པཱུ་ཛི་ཏེ་([ཨ]པཱུ་ཛི་ཏེ་)ཨཱཿཧཱུྃ། ཡེ་ནས་རྣམ་དག་ཆོས་སྐུ་དག་པ་ལས། །སྣ་ཚོགས་ཐབས་ཀྱི་གཟུགས་སྐུར་རྣམ་སྤྲུལ་ཞིང་། །འགྲོ་བའི་དོན་གཉིས་ལྷུན་གྱིས་གྲུབ་མཛད་པ། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། །ཞེས་བརྗོད་ནས། ནུབ་ཐ་མ་ལ་འདིར་བྱང་བུའི་རྣམ་ཤེས་ནམ་མཁར་ཧཱུྃ་དུ་བསམ་ལ་འོག་ཏུ་མེ་སྦར་ཏེ། གསོན་ཅིག་དགོངས་ཤིག་རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་རིགས་ལྔའི་མེ་སྦར་རོ། །འབྱུང་བ་བཞི་ཡི་བུད་ཤིང་ལ། །ལྷ་མོ་བཞི་ཡི་མེ་སྦར་རོ། །རྣམ་ཤེས་བརྒྱད་ཀྱི་བུད་ཤིང་ལ། །བྱང་ཆུབ་སེམས་དཔའི་མེ་སྦར་རོ། །སྐྱེ་མཆེད་དྲུག་གི་བུད་ཤིང་ལ། །ཐུབ་པ་དྲུག་གི་མེ་སྦར་རོ། །ཁམས་དང་ཕུང་པོའི་བུད་ཤིང་ལ། །ཁྲོ་བོ་ཡེ་ཤེས་མེ་སྦར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བའི་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་པ། །འགྲོ་བའི་དོན་དུ་འགྲུབ་པར་ཤོག །ཅེས་བསྲེགས་ནས། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་ཟེར་གྱིས། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་པ་ཀུན་སྦྱངས་ནས། །འཕགས་པའི་ལམ་དེར་འགྲོ་བར་ཤོག །ཨཱ་རད་ནེ་རད་ནེ། རད་ན་སམ་བྷཱ་ཝེ། རད་ན་མཱ་ལ། རད་ན་ཀི་བི་ཤུདྡྷེ། ཤོ་དྷ་ཡ། སརྦ་པཱ་པཾ་སྭཱ་ཧཱ། པདྨོ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨོ་ལས་བྱུང་བའི། །བདེ་བ་ཅན་དུ་སྐྱེ་བར་ཤོག །ཨཱ་པདྨེ་པདྨེ་པདྨ་སཾ་བྷ་ཝེ། སུ་ཁཾ་བྷ་ར་བྷ་ཡ། གྷ་ཚ་རུ་སྭཱ་ཧཱ། རྒྱལ་བའི་དཀྱིལ་འཁོར་བཟང་ཞིང་དགའ་བ་(༧༨)དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་ཚེ་འདས་དེར་ཐོབ་ཤོག །ཅེས་མེ་ཏོག་འཐོར་བས། ནུབ་ཕྱོགས་པདྨ་བརྩེགས་པ་རང་བཞིན་སྤྲུལ་སྐུའི་ཞིང་དུ་སྐྱེས་ཏེ། སྟོན་པ་འོད་དཔག་མེད་འཁོར་བཅས་མཆོད་ཅིང་ལུང་བསྟན་ནས། སླར་ཡང་སྟེང་གི་ནམ་མཁའ་དྲིན་ལན་གྱི་ཚུལ་གྱིས་མེ་ཏོག་གི་ཆར་འབེབས་ཤིང་། ཆེད་དུ་བརྗོད་པ། ཨེ་མ་སངས་རྒྱས་ཡེ་སངས་རྒྱས། །ཨེ་མ་སངས་རྒྱས་མཛད་པ་ལེགས། །གང་ཕྱིར་ངན་སོང་བདག་ཅག་སྦྱངས། །བྱང་ཆུབ་སྤྱོད་པ་ཉིད་ལ་བཞག །སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་སྐྱོབ་པ་མེད། །དགེ་འདུན་འདྲ་བའི་ཞིང་མེད་དོ། །སྔགས་དང་འདྲ་བའི་འདྲེན་པ་མེད། །ཨེ་མ་སངས་རྒྱས་རྣམས་ཀྱིས་ནི། །སངས་རྒྱས་མཛད་པ་ཡ་མཚན་ཆེ། །ཞེས་བརྗོད་ནས་སླར་བདེ་བ་ཅན་དུ་སོང་སྟེ་སངས་རྒྱས་པར་གྱུར། དེ་ནས་སྐབས་འདིར་ཚོགས་ཀྱི་དགའ་བ་བྱས་ལ། ཨཱ་ཨཱཿཧཱུྃ། མཆོད་པའི་སྤྲིན་ཕུང་ནམ་མཁའ་དང་མཉམ་པར་གྱུར། ཆུ་དང་ཐང་ལས་སྐྱེས་པ་ཡི། །ལྷ་རྫས་དམ་པའི་མེ་ཏོག་འདི། །མེ་ལོང་ཡེ་ཤེས་བརྙེས་ལ་འབུལ། །ཚེ་འདས་དོན་དུ་བཞེས་སུ་གསོལ། །ཨཱ་བཛྲ་པུཥྤེ་ཨཱཿཧཱུྃ། ལྷན་ཅིག་སྐྱེས་དང་སྦྱར་བ་ཡི། །བདུག་སྤོས་དམ་པ་འདི་དག་ནི། །མཉམ་ཉིད་ཡེ་ཤེས་བརྙེས་ལ་འབུལ། །ཚེ་འདས་དོན་དུ་བཞེས་སུ་གསོལ། །ཨཱ་བཛྲ་དྷཱུ་པེ་ཨཱཿཧཱུྃ། མུན་པའི་ཚོགས་རྣམས་འཇོམས་མཛད་ཅིང་། །ཕྱོགས་ཀུན་སྣང་བའི་མར་མེ་འདི། །ཀུན་རྟོག་ཡེ་ཤེས་བརྙེས་ལ་འབུལ། །ཚེ་འདས་དོན་དུ་བཞེས་སུ་གསོལ། །ཨཱ་བཛྲ་ཨཱ་ལོ་ཀེ་ཨཱཿཧཱུྃ། ལྷན་ཅིག་སྐྱེས་དང་སྦྱར་བ་ཡི། །དྲི་ཡི་མཆོད་པ་འདི་དག་ནི། །བྱ་གྲུབ་ཡེ་ཤེས་བརྙེས་ལ་འབུལ། །ཚེ་འདས་དོན་དུ་བཞེས་སུ་གསོལ། །ཨཱ་བཛྲ་གྷནྡྷེ་ཨཱཿཧཱུྃ། ཁ་དོག་དྲི་དང་རོ་ལྡན་པའི། །ཞལ་ཟས་མཆོག་གི་བཤོས་གཙང་འདི། །

ཆོས་དབྱིངས་ཡེ་ཤེས་བརྙེས་ལ་འབུལ། །ཚེ་འདས་དོན་དུ་བཞེས་སུ་གསོལ། །ཨཱ་བཛྲ་ནི་ཝི་ཏེ་ཨཱཿཧཱུྃ། རྒྱལ་བ་རྒྱ་མཚོ་སྲས་བཅས་ལ། །སྣང་སྲིད་འདོད་ཡོན་མཆོད་པའི་སྤྲིན། །བདུད་རྩི་བདེ་ཆེན་བླ་ན་མེད། །ཡེ་ཤེས་མཆོག་གི་མཆོད་པར་བགྱི། །ཨཱ་ཨ་མྲ྇་ཏ་པཱུ་ཙ་སརྦ་ཨཱཿཧཱུྃ། ཧཱུྃ་ཞི་བ་ལྷུན་གྱིས་གྲུབ་པ་ཡི། །རང་བཞིན་རྣམ་དག་དཀྱིལ་འཁོར་དུ། །ཕུང་པོ་ཉོན་མོངས་གནས་གྱུར་པའི། །བདེ་གཤེགས་བཞི་བཅུ་གཉིས་ལ་འདུད། །ཆེ་མཆོག་གདོད་ནས་རྫོགས་སངས་རྒྱས། །གར་དགུའི་རོལ་པར་རབ་དགྱེས་ཤིང་། །སྣ་(༧༩)ཚོགས་རྣམ་པར་འཕྲུལ་པའི་བདག །ཁྲག་འཐུང་ལྔ་བཅུ་བརྒྱད་ལ་འདུད། །ཞིང་དང་དུར་ཁྲོད་ཉེ་བའི་ཞིང་། །གནས་རྣམས་ལ་ནི་རབ་རྒྱུ་ཞིང་། །མཁའ་འགྲོ་དམ་ཅན་རྒྱ་མཚོའི་ཚོགས། །ཀུན་ལ་རང་བཞིན་གུས་ཕྱག་འཚལ། །ཞེས་པས་བསྟོད་ལ། སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེ་གྱུར་ཅིག །སྟོན་མཆོག་དམ་པ་ལྷ་མིས་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེ་གྱུར་ཅིག །ཞི་བ་ཆགས་བྲལ་ལྷ་མིས་མཆོད་འོས་པ། །ཆོས་ལ་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེ་གྱུར་ཅིག །ཚོགས་ཀྱི་མཆོག་རབ་ལྷ་མིས་མཆོད་འོས་པ། །དགེ་འདུན་ཕྱག་འཚལ་དེང་འདིར་བདེ་ལེགས་ཤོག །ཅེས་པས་མེ་ཏོག་འཐོར་ལ། གང་ཡང་བདག་བློ་གཏི་མུག་པས། །ལེགས་བྱས་འདི་ལ་ཉེས་གྱུར་གང་། །དེ་ཀུན་ལུས་ཅན་སྐྱབས་གྱུར་པ། །བླ་མ་མགོན་པོས་བཟོད་པར་མཛོད། །གང་ཡང་བདག་ཅག་རྩོད་པའི་དུས། སྙིགས་མའི་དུས་ཀྱི་སེམས་ཅན་དུ་གྱུར་པ་ལགས་པས། གཞུང་བཞིན་དུ་ཡོ་བྱད་མ་ཚོགས་པ་དང་། མ་འབྱོར་པ་ཅི་མཆིས་པ་ཐམས་ཅད་བདག་ཉིད་ཆེན་པོ་ཁྱེད་རྣམས་ཀྱིས་བཟོད་པ་ཆེན་པོ་མཛད་དུ་གསོལ། གང་ཡང་བདག་ཅག་ལས་དང་པོ་པའི་སེམས་ཅན་དུ་གྱུར་པས། ཏིང་ངེ་འཛིན་ལ་དབང་མ་ཐོབ་སྟེ། བྱིང་བ་དང་། རྒོད་པ་དང་། ཉོན་མོངས་པའི་དབང་གིས་ཆོ་ག་ཉམས་ཤིང་ལྷག་ཆད་འགལ་འཁྲུལ་ནོར་བའི་སྐྱོན་དངོས་པོ་ཅི་མཆིས་པ་དེ་དག་བདག་ཉིད་ཆེན་པོ་ཁྱེད་རྣམས་ཀྱིས་བཟོད་པ་ཆེན་པོ་མཛད་དུ་གསོལ་ལོ། །

ཨཱ་བཛྲ་སཏྭ་ས་མ་ཡཱ། མ་ནུ་པཱ་ལ་ཡ། སརྦ་སཏྭ་ཏྭེ་ནོ་པ་ཏིཥྛ། ཌི་ཌྷོ་མེ་བྷ་ཝ། སུ་ཏྭ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ། བཛྲ་མ་མེ་མུཉྩ། བཛྲཱི་བྷ་ཝ། མཧཱ་ས་མ་ཡ་སཏྭ་ཨཱཿ ཞེས་བརྗོད་ནས་བསྔོ་བ་བྱ་བ་ནི། ཕྱོགས་བཅུ་ན་བཞུགས་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་དང་ཞི་ཁྲོ་རབ་འབྱམས་ཀྱི་དལ་ཐམས་ཅད་ཚེ་ལས་འདས་པ་ལ་དགོངས་སུ་གསོལ། ཚེ་ལས་འདས་པས་དུས་གསུམ་དུ་བསགས་པའི་དགེ་རྩ་ཐམས་ཅད་དང་གང་ཡང་བདག་ཅག་གི་ཚེ་ལས་འདས་པའི་དོན་དུ། དཀོན་མཆོག་མཆོད་ཅིང་དབང་བསྐུར། འབྱུང་པོ་ལ་གཏོར་མ་བྱིན་ནས་(༨༠)ལ་སོགས་པའི་དགེ་བའི་རྩ་བ་འདི་དག་འཇིག་རྟེན་འདི་ནས་འཇིག་རྟེན་ཕ་རོལ་ཏུ་ཚེ་ལས་འདས་པ་ཆེ་གེ་མོས་ཐོག་དྲངས། ནམ་མཁའི་མཐའ་ཀླས་པའི་སེམས་ཅན་ཐམས་ཅད་དང་། ཐུན་མོང་གཅིག་ཏུ་བྱས་ཏེ། འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་ཞིང་། ཕུན་སུམ་ཚོགས་པ་ཐམས་ཅད་དང་ལྡན་ཏེ། ལྷ་དང་མིའི་མཆོག་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་གྱུར་ཅིག །དེ་མ་ཐོབ་ཀྱི་བར་དུ་ཡང་རྣམ་པར་སྨིན་པ་ལ་རེ་བ་མེད་པའི་སྦྱིན་པ་གཏོང་ནུས་པར་གྱུར་ཅིག །སྲིད་པར་སྐྱེ་བ་ལ་འདུན་པ་ཐམས་ཅད་དང་བྲལ་བའི་ཚུལ་ཁྲིམས་བསྲུང་ནུས་པར་གྱུར་ཅིག །སེམས་ཅན་ཐམས་ཅད་ལ་ཞེ་འགྲས་པ་མེད་པའི་བཟོད་པ་བསྒོམ་ནུས་པར་གྱུར་ཅིག །དགེ་བའི་ཆོས་མ་ལུས་པ་མྱུར་དུ་སྡུད་པའི་བརྩོན་འགྲུས་བརྩམ་ནུས་པར་གྱུར་ཅིག །གཟུགས་མེད་པའི་ཁམས་རྣམ་པར་གསལ་བའི་ཏིང་ངེ་འཛིན་ལ་མཉམ་པར་འཇོག་ནུས་པར་གྱུར་ཅིག །ཐབས་སྙིང་རྗེ་ཆེན་པོ་དང་མ་བྲལ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་རྟོགས་ཤིང་ཁོང་དུ་ཆུད་པར་གྱུར་ཅིག །དེ་ལྟར་གྱུར་ནས་ཀྱང་སེམས་ཅན་གྱི་དོན་དུ་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །དེ་མ་ཐོབ་ཀྱི་བར་དུ་ཡང་། བདེ་འགྲོ་མཐོ་རིས་ཀྱི་འཇིག་རྟེན་ལྷ་དང་མི་རྣམས་ཀྱི་ནང་དུ་ཕྱིན་པར་གྱུར་ཅིག །དེ་ཡང་མཐོ་རིས་ཡོན་ཏན་བདུན་དང་ལྡན་པ་སྐྱོན་གང་ཡང་མེད་པ་ཉིད་ཐོབ་པར་གྱུར་ཅིག །ཁྱད་པར་དུ་བླ་མ་ཡང་དག་པ་དགེ་བའི་བཤེས་གཉེན་མཐུན་པའི་ཞབས་དྲུང་དུ་སྐྱེ་བར་གྱུར་ཅིག །དེ་དག་ལས་ཐེག་པ་ཆེན་པོའི་ཆོས་ཟབ་པ་དང་རྒྱ་ཆེ་བའི་ཆོས་ཐོབ་པར་གྱུར་ཅིག །དེའི་དོན་ཉམས་སུ་བླངས་ནས་ས་དང་ལམ་ཐམས་ཅད་ཡོངས་སུ་རྫོགས་ནས། སྐུ་བཞི་ཡེ་ཤེས་ལྔ་དང་ལྡན་པའི་དཔལ་ཀུན་ཏུ་བཟང་པོའི་གོ་འཕང་རིན་པོ་ཆེ་མྱུར་དུ་ཐོབ་པར་གྱུར་ཅིག །ཅེས་པ་གསུམ་བརྗོད་ནས། གསོན་པའི་དོན་དུ་བསྔོ་བ། ཡང་། ཕྱོགས་བཅུ་ན་བཞུགས་པའི་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་ཐམས་ཅད་བདག་ཅག་རྣམས་ལ་དགོངས་སུ་གསོལ། གང་ཡང་བདག་ཅག་གི་དགེ་བའི་རྩ་བ་འདི་ལ་བརྟེན་ནས། རྒྱུ་སྦྱོར་བ་ཡོན་གྱི་བདག་པོས་གཙོ་བྱས་ནམ་མཁའི་མཐའ་ཀླས་པའི་སེམས་ཅན་ཐམས་ཅད་ཀྱིས། རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་གྱུར་ཅིག །དེ་མ་ཐོབ་ཀྱི་བར་དུ་ཚེ་འདི་ཉིད་(༨༡)ལ་ཡང་། ནད་དང་གདོན་དང་བར་དུ་གཅོད་པ་ཐམས་ཅད་ཞི་ཞིང་། མཐུན་པའི་རྐྱེན་ཐམས་ཅད་ཡིད་བཞིན་དུ་འགྲུབ་པར་གྱུར་ཅིག །དགེ་བ་རྒྱ་ཆེན་གྱུར་པ་འདི་ཡིས་ནི། །འགྲོ་བའི་ནང་དུ་སངས་རྒྱས་རང་བྱུང་ཤོག །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་བོའི་ཚོགས་རྣམས་བདག་གིས་སྒྲོལ་བར་ཤོག །སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུས་པའི་བྱིན་རླབས་ཀྱིས། །བདག་གིས་ཇི་ལྟར་བསྔོས་བཞིན་འགྲུབ་པར་ཤོག །ཅེས་བརྗོད་ནས། ཨཱ་ཨཱཿཧཱུྃ་གིས་སྐུ་གསུང་ཐུགས་བསྲུངས་ནས་ནུབ་ཐ་མ་ལ། ཨཱ་ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཨཱ་བཛྲ་མུས་ཡེ་ཤེས་པ་གཤེགས། དམ་ཚིག་པ་ཛཿཧཱུྃ་བཾ་ཧོས་བདག་ལ་ཐིམ་པར་གྱུར། དེ་ནས་ཨ་ཀཱ་རོས་བྱང་ཤར་ནས་རྡོ་རྗེ་སྲིན་འགྲོས་སུ་བྱས་ཏེ། རྡུལ་ཚོན་བསྡུས་ལ། ལས་ཀྱི་རྗེས་མི་མངོན་པར་བྱས་ནས། ཚོམ་བུ་ལྔ་བཀོད་ནས་རིགས་ལྔའི་སངས་རྒྱས་དང་། བཀྲ་ཤིས་ཀྱི་ལྷ་ཚོགས་དཔག་ཏུ་མེད་པས་ཤིས་པ་བརྗོད་པར་བསམས་ལ་མེ་ཏོག་འཐོར། རོལ་མོའི་སྒྲ་སྒྲོགས་ཤིང་མགྲིན་གཅིག་ཏུ། ཨཱ་ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པ་འདབ་འདྲའི་སྤྱན་མངའ་བ། །བཀྲ་ཤིས་དང་པོ་དེས་ཀྱང་དིང་འདིར་བདེ་ལེགས་ཤོག །དེ་ཡི་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །བཀྲ་ཤིས་གཉིས་པ་དེས་ཀྱང་དེང་འདིར་བདེ་ལེགས་ཤོག །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །བཀྲ་ཤིས་གསུམ་པ་དེས་ཀྱང་དེང་འདིར་བདེ་ལེགས་ཤོག །བསོད་ནམས་རི་བོ་བཞིན་དུ་བརྟན་པ་དང་། །བརྒྱུད་འཛིན་ཉི་ཟླ་བཞིན་དུ་གསལ་བ་དང་། །སྙན་པས་ནམ་མཁའ་བཞིན་དུ་ཁྱབ་པ་ཡི། །གསུམ་པོ་དེས་ཀྱང་དེང་འདིར་བདེ་ལེགས་ཤོག །བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །མི་མཐུན་གནོད་པའི་ཕྱོགས་ལས་གྲོལ་བ་དང་། །འདོད་པ་འགྲུབ་ཅིང་ཕུན་སུམ་ཚོགས་གྱུར་པའི། །བཞི་པོ་དེས་ཀྱང་དེང་འདིར་བདེ་ལེགས་ཤོག །ལོ་བརྒྱ་(༨༢)ཐུབ་ཅིང་སྟོན་བརྒྱ་མཐོང་བ་དང་། །ཚེ་རིང་ནད་མེད་བདེ་ལེགས་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་གྱུར་པའི། །ལྔ་པོ་དེས་ཀྱང་དེང་འདིར་བདེ་ལེགས་ཤོག །སྦྱིན་པ་གཏོང་ཞིང་ཚུལ་ཁྲིམས་སྲུང་བ་དང་། །བཟོད་པ་སྒོམ་བཞིན་བརྩོན་འགྲུས་རྩོམ་པ་དང་། །མཉམ་པར་འཇོག་ཅིང་གནས་ལུགས་རྟོགས་གྱུར་པའི། །དྲུག་པོ་དེས་ཀྱང་དེང་འདིར་བདེ་ལེགས་ཤོག །རྣམ་པར་སྣང་མཛད་རྒྱལ་བ་མི་བསྐྱོད་པ། །རིན་ཆེན་འབྱུང་ལྡན་སྣང་བ་མཐའ་ཡས་དང་། །དོན་ཡོད་གྲུབ་བཅས་རིགས་ལྔའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདེ་ཆེན་རྣམ་དག་ཆོས་དབྱིངས་གང་ཆེན་མཚོ། །མཁའ་འགྲོ་རིགས་ལྔ་ཡེ་ཤེས་སྤྲིན་འཕྲོ་བ། །སྣང་སྲིད་རྣམ་དག་ལྷ་དང་ལྷ་མོའི་ཞིང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཨཱ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་པས། མེ་ཏོག་གཏོར་ལ་བཀྲ་ཤིས་སུ་བྱའོ། །

སྙིང་པོའི་རྩ་རྒྱུད་རྫོགས་པ་རང་བྱུང་ལས། །ཇི་ལྟར་གསུངས་བཞིན་དེ་ཡི་དོན་བསྡུས་ནས། །ཕྱི་རབས་སྐལ་ལྡན་རྣམས་ཀྱིས་རྟོགས་བྱའི་ཕྱིར། །གངས་རི་ཐོད་དཀར་མགུལ་དུ་ལེགས་པར་བཀོད། །བདག་བློ་དྲི་མེད་ནམ་མཁའ་ཡངས་པ་ལས། །མང་དུ་ཐོས་པའི་འོད་ཟེར་སྟོང་འཕྲོ་བས། །བློ་གསལ་པདྨ་རབ་ཏུ་ཁ་ཕྱེ་ནས། །དད་ལྡན་རྣམས་ལ་ལས་འབྲེལ་རྩལ་དུ་སྣང་། །དགེ་བ་དེ་ཡིས་བདག་དང་འགྲོ་བ་ཀུན། །མ་ལུས་བདེ་འབྱུང་བདེ་གཤེགས་དབང་པོའི་གནས། །རང་བཞིན་གདོད་མའི་གླིང་དུ་ཕྱིན་གྱུར་ཏེ། །རང་གཞན་དོན་གཉིས་ལྷུན་གྱིས་འགྲུབ་གྱུར་ཤོག །གཞན་ཕན་འོད་ཀྱི་འཁོར་ལོ་ཞེས་བྱ་བ། ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་ཐུགས་ཀྱི་འོད་ཟེར་བློའི་པདྨོར་ཕོག་པས་ཁ་བྱེ་བའི་རྣལ་འབྱོར་པ་པདྨ་ལས་འབྲེལ་རྩལ་གྱིས། སྟོན་གསུམ་མེ་ཏོག་དང་འབྲས་བུ་སྨིན་པའི་ཚེ། གངས་རི་ཐོད་དཀར་གྱི་མགུལ་ཨོ་རྒྱན་རྫོང་གི་དབེན་གནས་དམ་པར་བཀོད་པ་རྫོགས་སོ། །བྷ་ཝན་ཏུ། བཀྲ་ཤིས།། །།

ཕྱག་རྒྱ་བཞི་མཆོད་འོད་ཀྱི་འཁོར་ལོའི་གནད་ཡིག

༄༅། །ཕྱག་རྒྱ་བཞི་མཆོད་འོད་ཀྱི་འཁོར་ལོའི་གནད་ཡིག་བཞུགས་སོ། །ཤོག་སྐྱའི་སྐོར།

༄༅། ཕྱག་རྒྱ་བཞི་མཆོད་ཅེས་བྱ་བ། རྡོ་རྗེ་གར་མཁན་ལ་ཕྱག་འཚལ་ལོ། །མཛེས་ཤིང་ཡིད་འོང་ལྟ་བས་མི་ངོམས་ཤིང་། །ཕྱི་ནང་མཆོད་སྤྲིན་འོད་ཟེར་རབ་འཕྲོ་བས། །རྒྱལ་བ་རྒྱ་མཚོའི་ཚོགས་ཀུན་མཉེས་མཛད་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །ཕྱི་ནང་གསང་བ་བླ་ན་མེད་པ་ཡི། །ཕྱག་རྒྱའི་གར་གྱིས་རྒྱལ་བ་མཆོད་པའི་ཕྱིར། །རྒྱུད་དོན་མན་ངག་རྒྱ་མཚོའི་བཅུད་བསྡུས་ནས། །(༨༣)ཕྱི་རབས་དོན་དུ་བདག་གིས་གསལ་བར་བཤད། །

དེ་ལ་དང་པོ་ཕྱིའི་མཆོད་པ་ལག་པ་བྱིན་གྱིས་བརླབས་པ་ནི། ཛཱི་ཧ་དང་མཉམ་དུ་ལག་པ་གཉིས་པུས་མོའི་སྟེང་དུ་མཐེ་བོང་ནང་དུ་བཀུགས་ལ་བཀན་པའོ། །ཧ་ཡ་གྷྲཱི་བས་མཚམས་གཅད་པ་ནི་སྡིགས་མཛུབ་རྒྱབ་སྤྲད་པའི་མཛུབ་མོ་གཉིས་སྦྲེང་། མཐེའུ་ཆུང་གཉིས་སྦྲེལ་ནས་སྟེང་འོག་ཕྱོགས་མཚམས་སུ་སྟོན་པའོ། །སུམ་བྷ་ནིས་མཚམས་གཅད་པའང་སྔགས་ཚར་གཅིག་དུམ་བུ་བཞིར་བྱས་པ་ཕྱོགས་མཚམས་དང་། གཅིག་ཕྱེད་ཀྱིས་སྟེང་། ཕྱེད་ཀྱིས་འོག་ཏུ་ཕྱག་རྒྱ་སྔ་མས་མཚམས་གཅད་དོ། །ཡི་གེ་བརྒྱ་པ་ནི་རྡོ་རྗེ་གསོར་ཞིང་དྲིལ་བུ་མ་ཆད་པར་དཀྲོལ་བའོ། །

སོར་མོ་བྱིན་གྱིས་བརླབས་པ་ནི། སྐྱིལ་ཀྲུང་གི་སྟེང་དུ་ཏིང་ངེ་འཛིན་ལྟར་བཀན་ལ། རིམ་པས་རེག་ཅིང་། ཨཱ་ཧཱུྃ་ཏྲཱཾ་ཧྲཱིཿཨཿཞེས་པའོ། གནས་ལྔར་དབང་བསྐུར་བ་ནི། བྷུདྡྷ་ཨ་བྷི་ཥིཉྩ་ལ་སོགས་པ་རིམ་པར་བརྗོད་པས་གོ་རིམ་བཞིན། ཐལ་མོ་སྦྱར་བ་སྤྱི་གཙུག །དེ་ཉིད་ལས་གུང་མོ་རྡོ་རྗེ་འདྲ་བར་གཤིབས། མཐེ་བོང་མཐེའུ་ཆུང་བརྐྱང་བ་དཔྲལ་བར། དེ་ཉིད་ལས་མཛུབ་མོ་དང་སྲིན་ལག་རིན་པོ་ཆེ་འདྲ་བར་བཀུག་སྟེ། རྣ་བ་གཡས་ཀྱི་སྟེང་དུ། མཐེ་བོང་མཐེའུ་ཆུང་གཤིབས་ལ་བརྐྱང་། གཞན་རྣམས་སོ་སོར་པད་འདབ་རྒྱས་པ་ལྟར་རྒྱབ་ཏུ་ཐལ་མོ་སྦྱར་བ་རྒྱ་རེ་ལྟར་བསྣོལ་ཏེ། རྣ་བ་གཡོན་པའི་ཐོག་ཏུ་བཞགས་པའོ། །ཕྱོགས་བཅུ་དུས་བཞིའི་མཆོད་པ་ཡང་། ཨརྒྷཾ་ལ་ཐལ་སྦྱར་གྱི་མཛུབ་མོ་གཉིས་དང་མཐེ་བོང་གཉིས་ཟླུམ་པོར་བཀུག །གུང་མོ་སོར་བཞག །སྲིན་ལག་མཐེའུ་ཆུང་ནང་དུ་བལྟ་བའོ། །པུཥྤེ་ཁུ་ཚུར་བཀན་ལ་མེ་ཏོག་འཐོར་བ་བཞིན་ནོ། །རྡོ་རྗེ་ཁུ་ཚུར་གཉིས་ཀྱི་མཛུབ་མོ་དང་མཐེ་བོང་སྦྱར་བས་སྤོས་རེང་འཛིན་པ་ལྟར་རོ། །རྡོ་རྗེ་ཁུ་ཚུར་གཉིས་ཀྱིས་མཐེ་བོང་གཉིས་མར་མེའི་སྡོང་བུ་ལྟར་སྒྲེང་ངོ་། །ཐལ་སྦྱར་གྱི་མཛུབ་མོ་གཉིས་དང་། མཐེ་བོང་གཉིས་ཟླུམ་པོར་བཀུག་གཞན་རྣམས་སོར་བཞག་ནས་དྲིའི་དུང་ཆོས་ལྟ་བུའོ། །རྡོ་རྗེ་ཐལ་མོ་ཁ་སྦུབ་ལ་བརྐྱང་བ། སླར་ལོག་སྟེ་བཤོས་འབུལ་བའི་ཚུལ་ལོ། །རྡོ་རྗེ་སེ་གོལ་བསྣོལ་ནས་སོ་སོར་གཏོག་གོ། །རྡོ་རྗེ་ཐལ་མོ་ལྔ་ལ། འདོད་ཡོན་ལྔའམ་མེ་ལོང་གི་ཕྱག་རྒྱའོ། །རིག་མ་ལ་པད་སྐོར་བྱས་ནས་བསྣོལ་ཏེ་ནུ་མ་གཡས་གཡོན་གྱི་སྟེང་དུ་འཇོག་པའོ། །དཀྱིལ་འཁོར་སྒྲུབ་མཆོད་ཀྱི་པདྨ་ཀརྨ་ལ་ནི་མེ་ཏོག་འབུལ་བ་བཞིན་ནོ། །ཨཾ་ཀུ་ཤ་ནི་རྡོ་རྗེ་ཁུ་ཚུར་བསྡམས་པ་ལས། མཛུབ་མོ་གཡོན་བརྐྱངས་པའི་སྟེང་དུ། གཡས་ལྕགས་ཀྱུ་ལྟར་རྩེ་བཀུག་པའོ། །པཱ་ཤ་ཧཱུྃ་ནི་དེ་ཉིད་(༨༤)ལས་ཞགས་པ་ལྟར་མཛུབ་མོའི་རྩེ་བཀུག་པའོ། །ཕོ་ཊ་བྃ་ནི་དེ་ཉིད་ལས་མཐེབ་མཛུབ་ཀྱི་ནང་དུ་གཅིག་བཅུག་པ་ལྕགས་སྒྲོག་ལྟར་སྦྲེལ་ལོ། །པྲ་བེ་ཤ་ཧོ་ནི། རྡོ་རྗེ་ཁུ་ཚུར་གྱི་མཐེ་བོང་གཉིས་ནང་དུ་བཅུག་ལ་བསྡམས་པའོ། །མེ་ལོང་བསྟན་ལ་ཁྲུས་གསོལ་ལོ། །འཁོར་ལོ་ནི་ལག་པ་གཉིས་མཁྲིག་མ་བསྣོལ་ཏེ་རྒྱབ་སྦྱར་སོར་མོ་རྣམས་བསྣོལ་ཏེ་འཁྱུད། མཐེ་བོང་གཉིས་ལག་མཐིལ་དུ་དགུག་གོ། །ནོར་བུ་ནི་ཐལ་སྦྱར་གྱི་མཐེ་བོང་དང་། མཛུབ་མོ་རིན་པོ་ཆེའི་མིག་ལྟར་ཟླུམ་པོར་བཀུག་ལ་གཞན་རྣམས་ཁ་སྦྱར་བའོ། །བཙུན་མོ་ནི་རྡོ་རྗེ་བསྡམས་པའི་གུང་མོ་གཉིས་རྩེ་སྤྲད་དེ་སྒྲེང་བའི་ལོགས་ལ་མཛུབ་མོ་གཉིས་སྦྱར་བ་གཅེར་བའོ། །བློན་པོ་ནི་རྡོ་རྗེ་བསྡམས་པའི་གུང་མོ་མཐེ་བོང་མཐེའུ་ཆུང་རྣམས་གཤིབས་ཏེ་སྒྲེང་། སྲིན་མཛུབ་བསྣོལ་ཏེ་རྡོ་རྗེ་རྩེ་གསུམ་པ་ལྟར་བྱ་བའམ། ཁུ་ཚུར་གྱི་མཛུབ་མོས་གཏེར་སྟོན་པ་ལྟ་བུའོ། །གླང་པོ་ནི་གཡས་གླང་པོའི་སྣ་ལྟར་བརྐྱངས་པའི་གྲུ་མོ་ནས་གཡོན་པའི་ལག་མཐིལ་གྱིས་བཏེག་པའམ་དེ་གཉིས་གོ་བཟློག་པའོ། །རྟ་མཆོག་ནི་རྡོ་རྗེ་བསྡམས་པའི་གུང་སྲིན་གཉིས་བརྐྱང་མཐེའུ་ཆུང་གཉིས་བསྣོལ་ཏེ་མཐེ་བོང་གཉིས་རྣ་བ་ལྟར་བརྐྱང་། མཛུབ་མོ་གཉིས་བསྣོལ་བའོ། །དམག་དཔོན་ནི་གཡོན་པའི་ཁུ་ཚུར་སྦུབས་ཅན་གྱི་ནང་ནས་གཡས་པས་གོང་མཛུབ་རལ་གྲི་ལྟར་བསྒྲེངས་པའི་མཐེ་བོས་སྲིན་མཐེབ་མནན་ལ་རལ་གྲི་ཤུབས་ནས་འབྱིན་པ་ལྟ་བུའོ། །གཟུགས་མ་ནི་གཡས་པའི་ཐལ་མོ་ཕྱིར་སྙིང་ག་ནས་མེ་ལོང་ལྟར་བསྟན་པའམ་མེ་ཏོག་འཐོར་བ་ལྟར་རོ། །སྒྲ་མ་ནི་པི་ཝང་སྒྲེང་བའམ་ཏིང་ཤག་དཀྲོལ་བ་ལྟར་རོ། །དྲི་མ་ནི་གཡོན་པའི་སྙིམས་པ་ནས་གཡས་པའི་མཐེབ་མཛུབ་ཀྱིས་དྲིའི་ཕྱེ་མ་འགྱེད་པའི་ཚུལ་ལོ། །རོ་མ་ནི་བཤོས་འདེགས་པ་ལྟར་རོ། །རེག་མ་ནི་མཐེབ་མཛུབ་གུང་སྲིན་རྩེ་སྤྲད་མཐེའུ་ཆུང་བསྒྲེང་ལ། གོས་འབུལ་བའི་ཚུལ་ལོ། །སྒེག་མོ་བརྒྱད་མཆོད་ལས། ལཱ་སྱ་ནི་རྡོ་རྗེ་ཁུ་ཚུར་གཉིས་དཀུར་བརྟེན་ནས་གཡོན་དུ་ཅུང་ཟད་འགྱིང་བའོ། །མཱ་ལེ་ནི་རྡོ་རྗེ་ཐལ་མོ་གཉིས་ནང་ནས་ཐུར་ལྡོག་གཡོ་བས་ཕྲེང་བ་འདོགས་པ་ལྟར་རོ། །གྷིརྟི་ནི་པི་ཝང་སྒྲེང་བའི་ཚུལ་དུའོ། །ནིརྟི་ནི་རྡོ་རྗེ་ཁུ་ཚུར་གཉིས་ཀྱི་སྤྱི་བོར་གར་བྱེད་པའི་ཚུལ་ལོ། །དྷུ་པེ་ནི། ཐལ་སྦྱར་ཚིགས་བཅག་པ་བདུག་སྤོས་ཀྱི་ཁང་པ་ལྟར་རོ། །པུཥྤེ་ནི་མེ་ཏོག་འཐོར་བའི་ཚུལ་ལོ། །ཨཱ་ལོ་ཀེ་ནི་རྡོ་རྗེ་ཁུ་ཚུར་གྱིས་མཐེ་བོང་གཉིས་མར་མེ་ལྟར་སྒྲེང་བའོ། །གྷནྡྷེ་ནི་སྔར་བསྟན་པའི་དུང་ཆོས་ཀྱི་ཚུལ་ལོ། །དེའང་། ཨཱ་རིང་པོ་རིང་པོ་གླུར་བླང་ཞིང་། རྒྱས་པ་ལ་བརྒྱད་པོ་རེ་རེའི་སྔ་ཕྱིར་ཚིགས་(༨༥)བཅད་དང་། སཏྭ་སུ་སངྐ་ཧ་ལ་སོགས་པའི་སྔགས་བརྗོད་ལ། འབྲིང་ལ་ཕྱི་སྒེག་བཞི་ལ་དེ་ལྟ་བུ་གཅིག །ནང་སྒེག་བཞི་ལ་དེ་ལྟ་བུ་གཅིག་དང་གཉིས་སོ། །བསྡུས་པ་ལ་ཆུན་གཅིག་གིས་བྱེད་པའོ། །སྐུའི་རིག་མ་ནི། ཐལ་མོ་སྙིང་ག་ནས་ཕྱིར་མེ་ལོང་ལྟར་རོ། །གསུང་ནི་རྔ་ཟླུམ་བརྡུང་བ་ལྟར། གཡོན་པ་ཅུང་ཟད་གྱེན་ལ་ཕྱོགས། གཡས་པའི་སོར་མོ་གཡོབ་པའོ། །ཐུགས་ནི་པི་ཝང་སྒྲེང་བ་ལྟར། གཡོན་གྱེན་དུ་བསྒྲེངས་པའི་མཐེ་བོས། གུང་སྲིན་མནན་མཛུབ་མོ་དང་མཐེའུ་ཆུང་བརྐྱང་། གཡས་པའང་དེ་བཞིན་བྱས་པས་སྒྲེང་བའོ། །

ཡོན་ཏན་ནི་གླིང་བུ་འབུད་པ་ལྟར། ཕྱག་རྒྱ་དེ་ཉིད་ཁའི་དྲུང་ནས་བྱེད་པའོ། །ཕྲིན་ལས་ནི་ཕྱག་རྒྱ་དེ་ཉིད་སྙིང་ག་ནས་ཕྱིར་བསྟན་ལ་རེ་མོས་ཀྱི་རྔ་བརྡུང་བ་ལྟར་བྱའོ། །བདུད་རྩི་གཡོན་པའི་མཐེབ་མཛུབ་སྦྱར་གཞན་བརྐྱང་བ་ཁ་བཀན་ཏེ། དུང་ཆོས་ཀ་པཱ་ལ་ལྟ་བུ་ནས་གཡས་པའི་མཐེབ་སྲིན་གྱིས་བླངས་ཏེ་གྱེན་དུ་འཐོར་བའི་ཚུལ་ལོ། །འཁྲིལ་སྦྱོར་ནི། རྡོ་རྗེ་ཁུ་ཚུར་གཡོ་བས་སྙིང་གར་བསྣོལ་བའོ། །བླ་ན་མེད་པ་ཕྱག་རྒྱ་ཆེན་པོའི་མཆོད་པ་ནི། མཚན་མ་མེད་པའི་ནམ་མཁའ་མཚོན་པས་པད་སྐོར་ཆེར་བསྐྱོད་པའོ། །འདིར་བསྟོད་པའི་སྐབས་སུ་རྡོ་རྗེ་དྲིལ་བུའི་འཇོག་མཚམས་ཚིག་རྐང་པ་གཉིས་གཉིས་སུ། རིགས་ལྔ་སྤྱི་དང་ཐུན་མོང་གི་ཕྱག་རྒྱས་བྱའོ། །དེའང་པད་སྐོར་གཡོ་བས་རྡོ་རྗེ་གསོར་ཞིང་དྲིལ་བུ་དཀྲོལ་ནས་གཡས་པའི་རྡོ་རྗེ་ཐལ་མོ་ནང་ནས་ཕྱིར་ལྡོག་ཅིང་། ཕྱི་ནས་ནང་དུ་ལྡོག་པས་འཕྲེད་ལ་ཅུང་ཟད་གཡོ་ཞིང་གྱེན་དུ་གསོར་རོ། །དབྱངས་ནི་ཁུགས་པ་རེ་དང་བསྟུན་ནས། རིགས་ལྔ་སོ་སོར་ཕྱག་རྒྱ་དང་སྤེལ་ལོ། །བྱང་ཆུབ་མཆོག་ནི་གཡོན་པའི་ཁུ་ཚུར་དུ། གཡས་པའི་མཛུབ་མོའམ་མཐེ་བས་སྒྲེང་བའོ། །བདུད་འདུལ་ནི་གཡས་པའི་པུས་མོ་ལ་རྡོ་རྗེ་ཐལ་མོ་ཁ་སྦུབ་པའོ། །མཆོག་སྦྱིན་ནི་དེ་ཉིད་བཀན་པའོ། །ཏིང་ངེ་འཛིན་ནི་མཉམ་བཞག་བཀན་པའོ། །སྐྱབས་སྦྱིན་ནི་གཡོན་མཉམ་གཞག་གཡས་སྙིང་ག་ནས་ཐལ་མོ་ཕྱིར་བསྟན་པའོ། །སྒེག་མོ་ནི་ཁུ་ཚུར་དཀུར་བརྟེན་པའོ། །ཕྲེང་བ་མ་ནི་ཕྲེང་བ་འདོགས་པའི་ཚུལ་ལོ། །གླུ་མ་ནི་པི་ཝང་སྒྲེང་བའོ། །གར་མ་ནི་རྡོ་རྗེ་ཁུ་ཚུར་སྤྱི་བོར་གར་བྱེད་པའོ། །གཞན་བཞི་ནི་སྔར་གྱི་བདུག་སྤོས་ལ་སོགས་བཞི་དང་འདྲའོ། །སྒོ་མ་བཞི་ཡང་སྔར་གྱི་དང་འདྲའོ། །གཞན་དག་ནི་ཕྱག་རྒྱ་མེད་པས་རིགས་ལྔ་སྤྱི་དང་ཐུན་མོང་གི་དྲིལ་ཐབས་སྤེལ་བའོ། །རྣམ་ཤེས་དགུག་པ་ནི་རྡོ་རྗེ་ཁུ་ཚུར་ལས་གཡོན་པའི་མཛུབ་མོ་དང་། གཡས་པའི་(༨༦)མཐེའུ་ཆུང་སྦྲེལ་ཏེ་མཛུབ་མོ་ལྕགས་ཀྱུ་ལྟར་བཀུག་པའོ། །ཤོ་དྷ་ནི་སྡིག་པ་སྦྱོང་བ་ནི་རྡོ་རྗེ་ཁུ་ཚུར་པད་སྐོར་དུ་བྱེད་པའོ། །བསྟིམ་པ་ནི་སྒོ་མ་བཞིའོ། །སརྦ་པཱ་པཾ་བི་ཤྭ་དྷ་ནི་ལ་རྡོ་རྗེ་བསྡམས་པའི་གུང་མོ་གཉིས་མཉམ་པས་མཐའ་བཞི་རྩེ་སྤྲད་པས་མཉེས་པའོ། །བཛྲ་བནྡྷ་ཏྲ་ཐཱ་ལ། རྡོ་རྗེ་བསྡམས་པ་ཕྲལ་བའོ། །ཨཱ་སརྦ་བིད་བཛྲ་ཨ་དྷི་ལ་སོགས་ལ་རྡོ་རྗེ་ཁུ་ཚུར་གྱིས་སྤྱི་བོ་ལ་སོགས་པར་གཏུགས་པར་བསམ་པའོ། །ཨཱ་བཛྲ་ཛྭ་ལ་ལ་སོགས་པ་ལ་སོར་མོ་རྒྱབ་སྤྲད་དེ་མེ་འབར་བ་ལྟར་རོ། །གཏོར་མ་ནི་མཐེབ་སྐྱུ་གསུམ་ལན་གསུམ་བཤམས་ལ་རྟེན་ལ་བསྐོར་བའོ། །སྲེག་པ་ནི་མཐེབ་སྲིན་གྱིས་ཏིལ་ལམ་ཉུང་ཀར་བླངས་པ་རྟེན་གྱི་སྣ་བུག་ནས་འབྱིན་པ་ལྟར་བྱས་ལ། བསྣོལ་ཏེ་གཡས་གཡོན་གྱི་མེ་དང་ཆུར་འདོར་བའོ། །བྱེ་མ་ནི་གཡས་པས་ཅུང་ཟད་རེ་བྲབ་པའོ། །ཁྲུས་ནི་ནུབ་དང་པོ་རྣམས་སུ་མེ་ལོང་གི་ངོས་ལ་བཀྲུ་ཞིང་། ཐ་མར་མིང་བྱང་དངོས་ལ་སྣུམ་བསྐུས་ཏེ་བཀྲུའོ། །ཤིས་པ་བརྗོད་པ་ནི་ཀུ་ཤའི་རྩེས་ལས་བུམ་ནས་རྟེན་ལ་ཚིགས་བཅད་ཀྱི་མཚམས་སུ་ཆུ་བླངས་ལ་གཏོར་བའོ། །ས་ནི་སས་མིང་བྱང་ལ་གཏོར་རོ། །ཆུ་ནི་ཆུས་སོ། །མེ་ནི་མེས་ཡུལ་བ་རེ་བྱའོ། །རླུང་ནི་རླུང་གཡབ་ཀྱིས་བྱའོ། །ཕྱག་ནི་བྱང་བུ་ལ་སོགས་པ་དེ་ཉིད་བུ་ལ་སོགས་པས་བཟུང་ལ་འཚལ་བའོ། །མཎྜལ་ནི་དབུས་དང་ཕྱོགས་བཞིར་རེ་རེ་སྟེ་ཚོམ་བུ་ལྔ་བཀོད་ལ་དབུལ་ལོ། །འཇུག་པ་དང་དབང་གི་སྐབས་སུ་ཚེ་འདས་ཉིད་ཡོད་པར་དམིགས་ཏེ། རྟེན་དེ་ལ་ཡང་དབང་བསྐུར་ཞིང་བུམ་ཆུས་འཐོར་བ་དང་བཀྲུའོ། །གཏང་རག་གི་སྐབས་སུ་སྔ་མའི་ཕྱག་རྒྱས་བྱའོ། །དེ་ཡང་ལུས་ལྷར་གསལ་བས་ཕྱག་རྒྱ་བྱ། ངག་སྔགས་སུ་གསལ་བས་སྔགས་རྣམས་བཟླས། སེམས་ཏིང་ངེ་འཛིན་དུ་གསལ་བས་སོ་སོའི་སྐབས་དང་བསྟུན་ལ་བྱའོ། །ཁྱད་པར་དུ་མཆོད་པ་གང་ལ་བབས་པའི་ལྷ་མོར་བསམ་པའི། སྙིང་ག་དང་ལག་པ་ལས་འོད་ཟེར་གྱི་རྩེ་ལས། མཆོད་པའི་ལྷ་མོ་དཔག་ཏུ་མེད་པ་འཕྲོས་ནས་བླ་མ་དང་དཀྱིལ་འཁོར་གྱི་ལྷ་ལ་མཆོད་པར་བསམ་མོ། །དེ་ནས་བཟོད་པར་གསོལ་དུས་སྙིམས་པ་མེ་ཏོག་དང་བཅས་པའོ། །བསྔོ་བ་ནི་ཐལ་མོ་སྙིང་ཁར་སྦྱར་བའོ། །བཀྲ་ཤིས་ནི་མེ་ཏོག་འཐོར་ཞིང་རོལ་མོ་སྒྲོགས་པས་ཚིགས་བཅད་རེའི་མཚམས་སུ་བརྗོད་པའོ། །མཆོད་པར་བྱིན་དབབ་པ་ནི་རོལ་མོ་འབུད་དཀྲོལ་ཆེར་བྱེད་པའོ། །མིང་བྱང་བྲི་བ་ནི། སྟོད་དུ་ཨཱ་ཧཱུྃ་ཏྲཱཾ་ཧྲཱིཿཨཱ། ན་མོ་ཕྱོགས་བཅུ་དུས་གསུམ་ན་(༨༧)བཞུགས་པའི་རྩ་བ་དང་བརྒྱུད་པར་བཅས་པའི་བླ་མ་རྣམས་དང་། ཞི་ཁྲོ་རབ་འབྱམས་ཀྱི་ལྷ་ཚོགས་འཁོར་དང་བཅས་པ་ཐམས་ཅད་ལ་ཞེས་བྲིས་པའི་སོར་གཅིག་གིས་མ་རེག་པའི་མཇུག་ཏུ། འཇིག་རྟེན་འདི་ནས་ཕ་རོལ་དུ་ཚེ་ལས་འདས་པ་མིང་དང་རུས་ཆེ་གེ་ཞེས་བྱ་བ་ཕྱག་འཚལ་ཞིང་སྐྱབས་སུ་མཆིའོ། །སྡིག་པ་སྦྱང་དུ་གསོལ། ལམ་བསྟན་དུ་གསོལ། བར་དོའི་འཕྲང་ལས་བསྒྲལ་དུ་གསོལ། མྱུར་དུ་མངོན་པར་རྫོགས་པར་སངས་རྒྱ་བར་བྱིན་གྱིས་བརླབ་ཏུ་གསོལ་ལོ། །ཞེས་བྲིས་པའི་རྒྱབ་ཏུ་གཟུགས་བྲིས་པའི་སྙིང་གར་ནྲ྇་བྲིས་ལ། སྐྱེས་པ་ལ་མདའ་བུད་མེད་ལ་འཕང་ལ་བཏགས་པ་དྲི་གོས་དཀྱིལ་འཁོར་གྱི་ཟུར་གཅིག་ཏུ་གཟུག་གོ། །བྱང་བུ་སྲེག་དུས་གང་རས་གློ་ལ་དྲིལ་ཏེ་ཚྭ་ཚྭའི་ནང་དུ་གཞུག་ཅིང་། ཐལ་བ་རྡུལ་ཚོན་དང་ལྷན་ཅིག་འཇིམ་པའི་གསེབ་ཏུ་བཏང་ལ་ཚྭ་ཚྭ་བཏབ་བོ། །ནུབ་ཐ་མ་ལ་ཟས་མང་པོ་ཨཱ་ཨཱཿཧཱུྃ་གིས་འདོད་ཡོན་ལྔར་བྱིན་གྱིས་བརླབས་ལ། གོས་ལྷྭམ་དང་ལྷན་ཅིག་ཕྱོགས་དུས་ཀུན་ལ་སོགས་པའམ། རྡོ་རྗེ་གཟུགས་མ་ལ་སོགས་པའི་དབྱངས་ཀྱིས་བསྟོད་པ་ཙམ་བྱའོ། །དྲི་གོས་ནི་བཤིག་གོ། །འདིར་དེ་ཙམ་ལས་གཞན་པའི་ཟས་གཏད་མེད་པས་མི་བྱའོ། །དཔོན་སློབ་ཀུན་ཀྱང་སྔགས་དང་། ཕྱག་རྒྱ་དང་། ཏིང་ངེ་འཛིན་གཅིག་པས། ཆོ་ག་ལྡིང་ཤར་ལ་མགྲིན་གཅིག་ཏུ་བྱའོ། །དེས་ནི་ཏིང་ངེ་འཛིན་གསལ་ཞིང་ཆད་ལྷག་མེད་པས་ཀུན་གྱི་ཡིད་དུ་འོངས་པ་ཡིན་ནོ། །

དེ་ལྟར་ཕྱག་རྒྱ་བཞི་མཆོད་གནད་ཡིག་འདི། །གངས་རི་རིན་ཆེན་ར་བའི་སྐྱེད་ཚལ་དུ། །དྲི་མེད་འོད་ཟེར་བདག་གིས་ལེགས་པར་བཀོད། །དགེ་བ་དེ་ཡིས་འགྲོ་ཀུན་གྲོལ་བར་ཤོག །བསོད་ནམས་སྤྲིན་གྱིས་གཞོལ་བའི་བླ་བྲེ་ལས། །ཡེ་ཤེས་ཆར་ཆེན་རབ་ཏུ་འབབ་པ་ཡིས། །ཕྱག་རྒྱ་གར་གྱི་གློག་ཕྲེང་འགྲན་པ་བཞིན། །ལྷན་ཅིག་སྐྱེ་དགུའི་འདབ་བསྐྱོད་དགའ་བར་ཤོག །འདི་འདྲའི་ཚུལ་ལ་བདག་འདྲའི་བློ་མིག་རྒྱས། །མང་པོའི་དབུས་ན་བཟང་པོའི་གྲགས་དཀར་ཅན། །མཁས་མཆོག་ཆོས་རྗེའི་མཆོག་གི་བདུད་རྩི་ལས། །ལེགས་འོངས་དོན་དེ་མ་འོངས་དོན་དུ་བཀོད། །རང་བཞིན་སྔོན་ནས་སྦྱངས་པའི་དཀྱིལ་འཁོར་ལས། །ཚེ་འདིར་ལན་རེ་ཐོས་པས་འོད་སྟོང་རྒྱས། །གཞན་ཕན་ཆུ་སྐྱེས་རབ་ཏུ་འཛུམ་པ་ཡིས། །སྐལ་བཟང་རྐང་དྲུག་ལྡན་རྣམས་དགའ་བར་མཛོད། །ཕྱག་རྒྱ་བཞི་མཆོད་ཅེས་བྱ་བ་གཞན་ཕན་འོད་ཀྱི་འཁོར་ལོའི་གནད་ཡིག་པདྨ་ལས་འབྲེལ་རྩལ་གྱིས། སྟོན་གསུམ་གངས་རི་ཐོད་དཀར་དུ་སྦྱར་བ་རྫོགས་སོ།། །།

མཆོད་རྟེན་རབ་གནས་རིན་ཆེན་དྲྭ་བ།

༄༅། །མཆོད་རྟེན་རབ་གནས་རིན་ཆེན་དྲྭ་བ་ཞེས་བྱ་བ་བཞུགས་སོ། །ཤོག་སྐྱའི་སྐོར།

༄༅། མཆོད་རྟེན་རབ་ཏུ་གནས་པའི་ཆོ་ག་རིན་ཆེན་དྲྭ་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་གི་ཐུགས་རྗེ་ཤིན་ཏུ་རྨད་བྱུང་བ། །དགུང་ཟླའི་འོད་ལས་ཆེས་དཀར་རབ་འཕྲོ་བས། །མ་རིག་མུན་སེལ་འགྲོ་ཀུན་མཚན་མོའི་མིག །ཐར་གླིང་སྣང་བར་མཛད་ལ་ཕྱག་འཚལ་ལོ། །རྒྱལ་བའི་སྐུ་གཟུགས་བདེ་ལེགས་ཕུན་ཚོགས་ཀྱིས། །རང་གཞན་དོན་གཉིས་མ་ལུས་བསྒྲུབ་བྱའི་ཕྱིར། །མཆོད་རྟེན་རབ་ཏུ་གནས་པའི་ཆོ་ག་ནི། །དྲི་མེད་འོད་ཟེར་བཟང་པོས་སྣང་བར་བྱས། །

འདིར་རང་ངམ་གཞན་གྱི་དོན་དུ་ཚྭ་ཚྭ་བཞེང་བར་འདོད་ན། གཏོར་མ་བྱིན་ནས་ས་བླངས་ཏེ། ཨཱ་བཛྲ་ཁ་ན་ཁ་ན་ཧཱུྃ་གིས་རིན་པོ་ཆེའི་ས་གཞིར་བྱིན་གྱིས་བརླབས་ལ། ཨཱ་བཛྲ་མུ་ཀ་ར་ཨ་ཀོ་ཏྲ་ཡཱ་ཧཱུྃ་གིས་བརྐོས་ནས་འཇིམ་པར་གཡོས་ལ། དེའང་ཚེ་འདས་པའི་ཆེད་ཡིན་ན། རུས་པའི་སྟེང་དུ་ཟླ་བའི་དཀྱིལ་འཁོར་བསམས་ལ། དེའི་དབུས་སུ་ཨ་དཀར་པོ་ལས་བདུད་རྩི་བབས་པས་སྡིག་པ་དག་པར་མོས་ཤིང་རིགས་ལྔའི་སྔགས་ཟློས་ཤིང་། དྲི་བཟང་པོའི་ཆུས་བཀྲུས་པའི་མཐར་ཨཱ་པྲ་མར་དྷ་ན་ཡེ་སྭཱ་ཧཱས་སྒྲིབ་པ་དག་པར་བསམས་ལ་ཞིབ་པར་བརྡུངས་ཏེ། འཇིམ་པ་དང་བསྲེས་ལ། པད་ཟླའི་སྟེང་དུ་འཇིམ་པའི་ཕུང་པོ་དེ་ཉིད་བྷྲཱུྃ་ལས་རིན་པོ་ཆེའི་ཕུང་པོར་བསམས་ལ། སྐད་ཅིག་གིས་བདག་ཉིད་ཀུན་བཟང་ཡབ་ཡུམ་དུ་བསམས་པའི་ཐུགས་ཀའི་འོད་ཟེར་འོག་མིན་གྱི་རྣམ་པར་སྣང་མཛད་ལ་ཕོག་པས། དེའི་ཐུགས་ཀ་ནས་འོད་ཟེར་བྱུང་བས་འཇིམ་པ་ལ་ཕོག་པས་ཡེ་ཤེས་ལྔའི་རང་བཞིན་དུ་བསམས་ལ། གཡོན་པའི་མཐེའུ་ཆུང་མཐེ་བོང་གིས་མནན་ནས་གན་རྐྱལ་དུ་བཞག་པའི་སྟེང་དུ། གཡས་པའང་དེ་བཞིན་དུ་བྱས་ལ་ཁ་སྦུབ་ལ། ཨཱ་ན་མོ་བྷ་ག་ཝ་ཏེ་བཻ་རོ་ཙ་ན་པྲ་བྷ་ར་ཛ་ཡཱཿ ཏ་ཐཱ་ག་ཏ་ཡ། ཨར་ཧ་ཏེ་སཾ་མྱག་སཾ་བྷུདྡྷ་ཡ། ཏདྱ་ཐཱ། ཨཱ་སུཀྵ་མེ་སུཀྵ་མེ། ས་མ་ཡེ་ས་མ་ཏེ། ཤན་ཏེ་དྷནྟེ། ཨ་ན་ཡ་ཨ་ལཾ་བྷེ། ཏ་རཾ་བྷེ། ཡ་ཤོ་བ་ཏི། མཧཱ་ཏེ་ཛ་ནིར་ཀུ་ལ་ནི་ར་བྷ་ནི། སརྦ་ཏ་ཐཱ་ག་ཏ་ཧྲིད་ད་ཡ། ཨ་དྷི་ཏིཥྛ་ན། ཨ་དྷི་ཏིཥྛ་ཏེ་སྭཱ་ཧཱ། ཞེས་བདུན་བརྗོད་ནས། ན་མཿས་མནྟ། བྷུདྡྷ་ནན། ཨཱ་བཛྲ་ཨཱ་ཡུ་ཤེ་སྭཱ་ཧཱས་འཇིམ་པ་སྙོམས་པར་བཅད་པའི་ནང་དུ། ཨཱ་ཨཱཿཧཱུྃ་ལ་སོགས་པའི་གཟུངས་གཞུག་ནི། ཨཱ་བཛྲ་དྷརྨ་དྷཱརྟུ་གྷརྦྷེ་ཡེ་སྭཱ་ཧཱས་གཞུག་གོ། །ཨཱ་(༨༩)བཛྲ་ཛྲོད་བྷ་ཝ་སྭཱ་ཧཱས་འབི་འབི་བྱས་ལ། ཨཱ་བཛྲ་ཨཱ་ར་ཛེ་ཝ་ར་ཛེ་སྭཱ་ཧཱས་སྣུམ་བསྐུས་ལ། ཨཱ་དྷརྨ་དྷཱརྟུ་གརྦྷེ་ཡེ་སྭཱ་ཧཱས་ཀོལ་ཕོར་དུ་བཅུག་ལ། ཨཱ་བཛྲ་མུད་ཀ་ར་ཨ་ཀོ་ཏྲ་ཡེ་སྭཱ་ཧཱས་ཀོལ་ཕོར་བརྡུང་ནས། ཨཱ་བཛྲ་དྷརྨ་ར་ཏེ་སྭཱ་ཧཱས་ཕྱུང་ལ། ཨཱ་སརྦ་ཏ་ཐཱ་ག་ཏ་དྷརྨ་ཀཱ་ཡ་མཧཱ་སུ་ཁ། བཛྲ་སུ་ར་ཏེ་ས་མ་ཡ་སྟྭཾ་གྱིས་ཆོས་སྐུར་བསམས་པའི་ངང་ལས། ཨཱ་སརྦ་ཏ་ཐཱ་ག་ཏ་སཾ་བྷོ་ཀཱ་ཡ་སྟྭཾ་གྱིས་ལོངས་སྐུར་བྱོན་ཏེ། ཨཱ་སརྦ་ཏ་ཐཱ་ག་ཏ་ནིར་མ་ཀཱ་ཡ་ས་མ་ཡ་སྟྭཾ་གྱིས་སྤྲུལ་སྐུས་སེམས་ཅན་གྱི་དོན་བྱེད་པར་བསམས་ལ་བྲེ་མཐུན་པར་བསྒྲིགས་ཏེ་གདབ་བོ། །དེ་དག་གི་མདུན་དུ་མཆོད་པ་ལྔ་དང་། གཏོར་མ་གསུམ་བཤམས་ལ། འབྲུའི་སྣོད་གཉིས་ཀྱང་སྟ་གོན་དུ་བྱའོ། །

དེ་ནས་གཏོར་མ་འོག་མ་གཉིས་བགེགས་དང་གཞི་བདག་ལ་བསྔོས་ཏེ་བཀའ་བསྒོ་བྱས་ལ། རང་ཉིད་ཀུན་བཟང་ཡབ་ཡུམ་དུ་དམིགས་ལ་མཆོད་བསྟོད་བྱས་ལ། སྣོད་ཀྱི་ནས་གཅིག་ལ་རིགས་ལྔའི་སྔགས་དང་། རྟེན་འབྲེལ་སྙིང་པོ་བཟླས་སོ། །

དེ་ནས། ཨཱ་སྭ་བྷཱ་ཝ་ཤུདྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངག་ལས་པཾ་ལས་པདྨ། ཨ་ལས་ཟླ་བ། རཾ་ལས་ཉི་མའི་སྟེང་དུ། བྷྲཱུྃ་ལས་རིན་པོ་ཆེའི་མཆོད་རྟེན། གདན་ཁྲི་རི་རབ་བུམ་པ་བྲེ་འཁོར་ལོ་བཅུ་གསུམ། གདུགས་ཆར་ཁེབས་ཏོག་དང་བཅས་པའི་བུམ་པ་མ་གཏོགས་པ་ཤར་དཀར། ལྷོ་སེར། ནུབ་དམར། བྱང་ལྗང་བུམ་པ་མཐིང་གའི་དབུས་སུ་སེང་གེའི་ཁྲི། ཤར་དུ་གླང་ཆེན། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་ཤང་ཤང་གི་ཁྲིའི་སྟེང་དུ་པདྨ་དང་ཉི་ཟླའི་དབུས་སུ། ཨཱ་ཧཱུྃ་ཏྲཱཾ་ཧྲཱིཿཨཿལྔ་ལས། རིགས་ལྔ་ཡབ་ཡུམ་དུ་བསྐྱེད་ལ། ཡེ་ཤེས་པ་གཞུག་དབང་བསྐུར། ཨཱ་ཨཱཿཧཱུྃ་གིས་སྐུ་གསུང་ཐུགས་ཀྱིས་བྱིན་བརླབས་ལ། ལངས་ཏེ་མེ་ཏོག་འཐོར་ཞིང་། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་ཁམས་རྣམས་མི་གནས་པའི་མྱ་ངན་ལས་འདས་པའི་ས་ལ་མ་གཞག་གི་བར་དུ། བརྟན་པར་བཞུགས་སུ་གསོལ། བྱེ་བྲག་ཏུ་ཡང་སྐུ་གསུང་ཐུགས་ཀྱི་རྟེན་འདི་དག་ལ་ཡང་འབྱུང་བ་ཆེན་པོ་བཞིའི་གནོད་པ་མ་བྱུང་གི་བར་དུ་བཞུགས་ནས། གང་གིས་མཐོང་བ་དང་། ཐོས་པ་དང་། རེག་པ་ཐམས་ཅད་བླ་ན་མེད་པའི་བྱང་ཆུབ་ལ་འགོད་པའི་ཕྲིན་ལས་མཛད་དུ་གསོལ། ཨཱ་སུ་པྲ་ཏིཥྛ་བཛྲ་ཡེ་སྭཱ་ཧཱ། (༩༠)ཨཱ་ཧཱུྃ་ཏྲཱཾ་ཧྲཱིཿཨཱཿཨཱ་ཡེ་དྷརྨ་ཧེ་ཏུ་པྲ་བྷ་ཝ་ཧེ་དུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མཧཱ་ཤྲ་མ་ཎ་ཡེ་སྭཱ་ཧཱ། ཞེས་མེ་ཏོག་འཐོར་ནས། ཨཱ་ན་མོ་བྷ་ག་ཝ་ཏེ་རད་ན་ཀེ་ཏུ་རཱ་ཛ་ཡཱ། ཏ་ཐཱ་ག་ཏ་ཡ། ཨར་ཧ་ཏེ་སཾ་མྱག་སམ་བུདྡྷ་ཡ། ཏདྱ་ཐཱ། ཨཱ་རད་ནེ་རད་ནེ་མཧཱ་རད་ནི། རད་ན་བི་ཛ་ཡེ་སྭཱ་ཧཱས་བསྐོར་བ་བྱ་ཞིང་། སངས་རྒྱས་རྗེས་སུ་དྲན་པ་བཏོན་ནས། མཆོད་པའི་སྤྲིན་ཕུང་ཆེན་པོར་བསམས་ཏེ། འཇིག་རྟེན་འདི་འམ་གཞན་དག་ན། །མེ་ཏོག་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །མགོན་པོ་སྲས་དང་བཅས་ལ་འབུལ། ཨཱ་བཛྲ་པུཥྤེ་ཨཱཿཧཱུྃ། དེ་བཞིན་དུ་མཆོད་པ་ལྷག་མའང་འགྲེས་མཐུན་པར་འབུལ། འགྲོ་བའི་བླ་མ་གཅིག་པོ་ལུམ་པར་བལྟམས། །སེར་སྐྱའི་གྲོང་ཁྱེར་གཅིག་ཏུ་གནས་མཛད་ཅིང་། །ཡོན་ཏན་རིན་ཆེན་བྱེ་བས་བརྒྱན་པ་ཡི། །བདེ་གཤེགས་མཆོད་རྟེན་རྣམས་ལ་ཕྱག་འཚལ་ལོ། །མ་ག་ཏ་ཡི་བྱང་ཆུབ་ཤིང་གི་དྲུང་། །ཆུ་བོ་ནཻ་རཉྫུ་ར་ཞེས་བྱ་བའི། །འགྲམ་བཞུགས་མཆོད་རྟེན་ཡོན་ཏན་རྒྱ་ཆེ་བས། །བྱང་ཆུབ་རྟེན་དུ་གྱུར་ལ་ཕྱག་འཚལ་ལོ། །ཀ་ཤི་ཀ་ཡི་ཝཱ་རཱ་ན་སཱི་རུ། །ཆོས་ཀྱི་འཁོར་ལོ་རྣམ་གྲོལ་རྨད་བྱུང་བས། །ཉོན་མོངས་སྒྲིབ་ཀུན་རྣམ་པར་སྦྱངས་མཛད་པའི། །ཡེ་ཤེས་མཆོད་རྟེན་བཞི་ལ་ཕྱག་འཚལ་ལོ། །མཉན་དུ་ཡོད་པར་གཞན་སྟོབས་ཚར་བཅད་ནས། །ཛེ་ཏའི་ཚལ་དུ་ཆོ་འཕྲུལ་ཆེན་པོ་ཡིས། །ས་གསུམ་དགོངས་པ་མཆོག་ཏུ་བསྒྲུབས་མཛད་པ། །མུ་སྟེགས་ཕམ་མཛད་མཆོད་རྟེན་ཕྱག་འཚལ་ལོ། །གྲོང་ཁྱེར་དམ་པ་མཆོག་ནི་གསལ་ལྡན་དུ། །ལྷ་རྣམས་གཤེགས་ཏེ་བླ་ན་མེད་པ་ཡི། །ཞབས་ལ་ཚངས་དབང་ཅོད་པན་གྱིས་མཆོད་པ། །སུམ་ཅུའི་ལྷས་མཆོད་མཆོད་རྟེན་ཕྱག་འཚལ་ལོ། །དགེ་འདུན་དབྱེན་བསྡུམ་སྔ་གྱུར་ཏེ། །སྟོན་པའི་ཉན་ཐོས་རབ་འདུམ་པ། །རྒྱལ་པོའི་ཁབ་ཀྱི་འོད་མའི་ཚལ། །བྱམས་པའི་མཆོད་རྟེན་ཕྱག་འཚལ་ལོ། །སྐུ་ཚེའི་འདུ་བྱེད་བཏང་བ་ལས། །སླར་ཡང་སྐུ་ཚེ་བྱིན་བརླབས་ཤིང་། །རྣམ་གྲོལ་ཡངས་པ་ཅན་གྱི་ཚལ། །བྱིན་རླབས་མཆོད་རྟེན་ཕྱག་འཚལ་ལོ། །ཀུ་ཤའི་གྲོང་དུ་འགྲོ་བ་རྣམས། །དགེ་བ་ལ་ནི་སྦྱོར་མཛད་ཅིང་། །འགྲན་མེད་གྱད་རྣམས་བཟུང་བའི་ཚལ། །མཆོད་རྟེན་མྱང་འདས་ཕྱག་འཚལ་ལོ། །ཤཱཀ་ཐུབ་མཆོད་རྟེན་བརྒྱད་པོ་དང་། །ཕྱོགས་བཅུ་གཞན་དང་གཞན་རྣམས་ན། །བཞུགས་པའི་མཆོད་རྟེན་ཀུན་ལ་འདུད། །གཞི་ལ་རྟག་ཏུ་སྤྱིས་ཕྱག་འཚལ། །ཞེས་བརྗོད་ནས་མེ་ཏོག་བཀྲམ་སྟེ། བླ་མ་རྡོ་རྗེ་འཛིན་པ་ལ་སོགས་(༩༡)པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད། མཆོད་རྫས་རྟེན་ཅིང་འབྲེལ་པར་འབྱུང་བའི་ལྷ་ཚོགས་འཁོར་དང་བཅས་པ་ཐམས་ཅད་བདག་ལ་དགོངས་སུ་གསོལ་ལོ། །འཕགས་པ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ལ། ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབ་པའི་ནུས་མཐུ་ལ་སོགས་པ་བསམ་གྱིས་མི་ཁྱབ་པ་མངའ་བ་ལགས་པས། ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་བྱིན་གྱིས་བརླབ་ཏུ་གསོལ་ལོ། །བསྟན་པའི་རྩ་ལག་བླ་མ་ཡང་དག་པ་དགེ་བའི་བཤེས་གཉེན་པ་རྣམས་ཀྱི་སྐུ་ཚེ་དང་། ཐུགས་དམ་དང་། རྟོགས་པ་དང་། ཕྲིན་ལས་ལ་བར་དུ་གཅོད་པ་མི་འབྱུང་ཞིང་གོང་ནས་གོང་དུ་འཕེལ་བས། འགྲོ་བའི་དོན་རྒྱ་ཆེན་པོ་འགྲུབ་པར་མཛད་དུ་གསོལ་ལོ། །བདག་ཅག་ཆོས་སྒྲུབ་པ་པོ་རྣམས་ཀྱི། ཆོས་སྤྱོད་བཅུའི་སྒྲུབ་པ་ལ་བར་དུ་གཅོད་པ་མི་འབྱུང་ཞིང་གོང་ནས་གོང་དུ་འཕེལ་ཞིང་རྒྱས་པར་མཛད་དུ་གསོལ་ལོ། །སྦྱིན་པའི་བདག་པོ་འཁོར་དང་བཅས་པ་ལ་གནོད་ཅིང་འཚེ་བའི་བར་དུ་གཅོད་པ་ཞི་ནས། ཅི་བསམ་པའི་དངོས་པོ་ཐམས་ཅད་ཆོས་ལྡན་དུ་འགྲུབ་པར་མཛད་དུ་གསོལ་ལོ། །འཇིག་རྟེན་གྱི་ཁམས་ཐམས་ཅད་དུ་ཡང་ལོ་ཕྱུགས་རྟག་ཏུ་ལེགས་ཤིང་། ཕྱི་འཁྲུགས་དང་། ནང་འཁྲུགས་དང་། མཐའ་དམག་དང་། སད་སེར་དང་། མུ་གེ་དང་། གནོད་འཚེ་ཐམས་ཅད་མེད་ཅིང་བདེ་ལེགས་ཕུན་སུམ་ཚོགས་པ་འབྱུང་བར་བྱིན་གྱིས་བརླབ་ཏུ་གསོལ་ལོ། །ཅི་བསམ་པའི་དངོས་པོ་ཐམས་ཅད་ཆོས་ལྡན་དུ་འགྲུབ་པར་མཛད་དུ་གསོལ་ལོ། །ཞེས་པ་གསུམ་གྱིས་མེ་ཏོག་འཐོར་རོ། །ཚེ་འདས་ཀྱི་ཡིན་ན་ཆེ་གེ་མོ་ཞེས་བྱ་བ་འདིའི་ས་དང་ལམ་གྱི་བར་དུ་གཅོད་པ་ཐམས་ཅད་ཞི་ནས་མྱུར་དུ་མངོན་པར་རྫོགས་པར་སངས་རྒྱས་བར་མཛད་དུ་གསོལ་ལོ། །ཞེས་བརྗོད་དོ། །

དེ་ནས་གཏོར་མ་དེ་ཉིད། དཔའ་མགོན་དམ་པ་ཆོས་སྐྱོང་བའི་སྲུང་མ་རྣམས་ལ། ཨ་ཀཱ་རོས་བསྔོས་ལ། རྟེན་འདི་ལ་ཕྱི་ནང་གི་གནོད་པ་དང་འཚེ་བ་ལ་སོགས་པ་ཐམས་ཅད་མེད་པར་མཛད་དུ་གསོལ་ལོ། །ཞེས་བརྗོད་ནས། བཀྲ་ཤིས་ཀྱི་ལྷ་ཚོགས་དཔག་ཏུ་མེད་པས་རྡོ་རྗེའི་གླུས་ཤིས་པ་བརྗོད་པར་བསམས་ལ། མེ་ཏོག་འཐོར་ཞིང་མགྲིན་གཅིག་ཏུ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་(༩༢)གསུམ་སྤངས་པ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་རྟག་ཏུ་ཞི་བྱེད་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །རྒྱལ་བ་སྲས་བཅས་བསོད་ནམས་མཐུ་དག་དང་། །ལྷ་རྣམས་ཀུན་གྱིས་ལེགས་པར་གསུངས་པ་དང་། །གསང་སྔགས་རིག་སྔགས་རྣམས་ཀྱི་མཐུ་སྟོབས་དང་། །བདེན་པར་སྨྲ་བ་རྣམས་ཀྱི་བདེན་ཚིག་གིས། །བསོད་ནམས་རི་བོ་བཞིན་དུ་བརྟན་པ་དང་། །བརྒྱུད་འཛིན་ཉི་ཟླ་བཞིན་དུ་གསལ་བ་དང་། །སྙན་པས་ནམ་མཁའ་བཞིན་དུ་ཁྱབ་པ་སྟེ། །གསུམ་པོ་དེས་ཀྱང་དེང་འདིར་བདེ་ལེགས་ཤོག །བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །མི་མཐུན་གནོད་པའི་ཚོགས་ལས་གྲོལ་བ་དང་། །མཐུན་པ་འགྲུབ་ཅིང་ཕུན་སུམ་ཚོགས་པ་སྟེ། །བཞི་པོ་དེས་ཀྱང་དེང་འདིར་བདེ་ལེགས་ཤོག །ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། །ཚེ་རིང་ནད་མེད་བདེ་ལེགས་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་གྱུར་པའི། །ལྔ་པོ་དེས་ཀྱང་དེང་འདིར་བདེ་ལེགས་ཤོག །སྦྱིན་པ་གཏོང་ཞིང་ཚུལ་ཁྲིམས་སྲུང་བ་དང་། །བཟོད་པ་སྒོམ་ཞིང་བརྩོན་འགྲུས་རྩོམ་པ་དང་། །མཉམ་པར་འཇོག་ཅིང་གནས་ལུགས་རྟོགས་གྱུར་པའི། །དྲུག་པོ་དེས་ཀྱང་དེང་འདིར་བདེ་ལེགས་ཤོག །རྣམ་པར་སྣང་མཛད་རྒྱལ་བ་མི་བསྐྱོད་པ། །རིན་ཆེན་འབྱུང་ལྡན་སྣང་བ་མཐའ་ཡས་དང་། །དོན་ཡོད་གྲུབ་བཅས་རིགས་ལྔའི་བཀྲ་ཤིས་གང་། །བཀྲ་ཤིས་དམ་པ་དེང་འདིར་བདེ་ལེགས་ཤོག །འབྱུང་པོ་གང་དག་འདིར་ནི་ལྷགས་གྱུར་ཏམ། །ས་འམ་འོན་ཏེ་བར་སྣང་འཁོད་ཀྱང་རུང་། །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །ཨཱ་སུ་པྲ་ཏིཥྛ་བཛྲ་ཡེ་སྭཱ་ཧཱས་བརྟན་པར་བྱས་ཏེ། གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་བྱས་(༩༣)གང་། །གང་ཕྱིར་ལུས་ཅན་སྐྱབས་གྱུར་པ། །དེ་ཀུན་མགོན་པོས་བཟོད་པར་མཛོད། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒས་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་འདོན་པར་ཤོག །ཅེས་བརྗོད་ལ་སྟན་ལ་འཁོད་ལ་དགའ་སྟོན་བྱའོ། །

གངས་རིའི་ངོས་ལ་བདུད་རྩིའི་ཆུ་བབས་པས། །ཡིད་འོང་བྱ་ཚོགས་མང་པོ་དགའ་བ་ལྟར། །བདག་བློའི་ལེགས་བཤད་པདྨའི་གངས་ཅན་མཚོའི། །རིགས་ལྡན་སྐྱེ་བོའི་ངང་པ་དགའ་བར་མཛོད། །འདི་ནི་རྒྱུད་དོན་སྙིང་པཔོའི་དགོངས་པ་བཞིན། །དྲི་མེད་འོད་ཟེར་དེང་སང་ཤར་བ་ཡིས། །མཁའ་འགྲོའི་སྙིང་ཏིག་ཟབ་མོའི་ཆ་རྐྱེན་དུ། །ཨོ་རྒྱན་རྫོང་ཞེས་བྱ་བའི་གནས་སུ་བཀོད། །དགེ་བ་འདི་ཡིས་སྲིད་པའི་སེམས་ཅན་རྣམས། །འོད་གསལ་སྙིང་པོའི་དེ་ཉིད་ལེགས་གཟིགས་ནས། །སྐུ་དང་ཡེ་ཤེས་འདུ་འབྲལ་མེད་པ་ཡིས། །གདོད་མའི་གནས་སུ་ལྷུན་གྱིས་གྲུབ་པར་ཤོག །མཆོད་རྟེན་རབ་ཏུ་གནས་པའི་ཆོ་ག་རིན་ཆེན་དྲ་བ་ཞེས་བྱ་བ་པདྨ་ལས་འབྲེལ་རྩལ་གྱིས་སྟོན་གསུམ་གངས་རི་ཐོད་དཀར་དུ་བཀོད་པ་རྫོགས་སོ།། །།

དགེ་ལེགས་སོ། །མངྒ་ལཾ།། །།

རབ་ཏུ་གནས་པའི་ཆོ་ག་ཡེ་ཤེས་དྲི་མེད།

༄༅། །རབ་ཏུ་གནས་པའི་ཆོ་ག་ཡེ་ཤེས་དྲི་མེད་ཅེས་བྱ་བ་བཞུགས་སོ། །རིན་ཆེན་ཤོག་སྐྱའི་སྐོར།

༄༅། དཔལ་ལྡན་ཡེ་ཤེས་འཁོར་ལོ་ཅན། །ཀུན་བཟང་རིགས་ལྔའི་སངས་རྒྱས་དང་། །རིག་འཛིན་རྣམས་ལ་ཕྱག་འཚལ་ཏེ། །རབ་ཏུ་གནས་པའི་ཆོ་ག་བཤད། །

དེའང་སྐུ་གཟུགས་ཟིན་ནས་རབ་ཏུ་གནས་པ་ནི། ལུགས་མ་ཡིན་ན་སྟོད་དུ་སངས་རྒྱས། བར་དུ་ཆོས་དང་དགེ་འདུན། སྨད་དུ་ཆོས་སྐྱོང་དང་གནོད་སྦྱིན་གྱི་གཟུངས་བཅུག །ཞབས་ར་བསྡམས། རས་བྲིས་ལ་སོགས་པའི་རྒྱབ་ཏུ་བྲིས་ལ། བགེགས་བསྐྲད། དེ་བཞུགས་པའི་མདུན་དུ་མཆོད་པ་བཤམས་ལ། རང་ཉིད་ཀུན་བཟང་ཡབ་ཡུམ་དུ་བསྒོམ་སྟེ་མཆོད་པ་དང་བསྟོད་པ་བྱས་ནས། འབྲུ་ལ་རིགས་ལྔའི་རྩ་སྔགས་དང་རྟེན་འབྲེལ་སྙིང་པོ་བཟླས་ཏེ། སྟ་གོན་དུ་བྱས་ནས། སྐྱབས་སུ་འགྲོ་བ་དང་སེམས་བསྐྱེད་ལ། སྭ་བྷཱ་ཝས་སྟོང་པའི་ངང་ལས། རྟེན་དེ་ལྷ་གང་ཡིན་པ་དེ་ཉིད་ཡི་དམ་རིགས་ལྔའི་སངས་རྒྱས་བསྐྱེད་ལ་ཡེ་ཤེས་པ་སྤྱན་དྲངས་ཏེ། མཆོད་ཅིང་བསྟོད་ནས་བསྟིམ་སྟེ། རིགས་ལྔས་དབང་བསྐུར། ཡི་གེ་གསུམ་གྱིས་སྐུ་གསུང་ཐུགས་བྱིན་གྱིས་བརླབས་ཏེ། རབ་(༩༤)གནས་ཀྱིས་བརྟན་པར་བཞུགས་པའི་ཚིག་བརྗོད་ནས། རིགས་ལྔའི་སྔགས་དང་། རྟེན་འབྲེལ་སྙིང་པོས་མེ་ཏོག་ཕུལ། མཎྜལ་གྱིས་མངའ་དབུལ་བ་ནི། མཎྜལ་འབུལ་བའི་ཚིག་གིས་དབྱངས་དང་བཅས་པ་དང་། མཆོད་པས་མངའ་དབུལ་བ་ནི། མེ་ཏོག་ལ་སོགས་པ་ཕྱི་ནང་གི་མཆོད་པ་དང་། བསྟོད་པས་མངའ་དབུལ་བ་ནི། རིགས་ལྔའི་བསྟོད་པ་དང་། ཤིས་པས་མངའ་དབུལ་བ་ནི། བཀྲ་ཤིས་ཀྱི་ཚིགས་སུ་བཅད་པ་མང་པོ་བརྗོད་དོ། །དེ་ཐམས་ཅད་ཀྱང་རྒྱས་པར་དབྱངས་དང་། རོལ་མོའི་སྒྲས་མངའ་དབུལ་ཆེར་བྱེད་རྣམ་པ་ཡིན་ནོ། །གཏོར་མ་བཏང་ནས་འདོད་པའི་དོན་ལ་གསོལ་བ་བཏབ་ནས་རབ་ཏུ་གནས་པའི་དགའ་སྟོན་རྒྱ་ཆེན་པོ་བྱའོ། །དེ་ཡང་གླེགས་བམ་རབ་ཏུ་གནས་ན། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་སེར་མོ་ཞལ་གཅིག་ཕྱག་བཞི་པ། གཡས་དང་པོ་པུ་ཏི་དང་། གཡོན་དང་པོ་པདྨ། འོག་མ་གཉིས་ཐུགས་ཀར་ཐལ་མོ་སྦྱར་བ། རིན་པོ་ཆེའི་རྒྱན་ཅན། རྡོ་རྗེ་སྐྱིལ་མོ་ཀྲུང་གིས་བཞུགས་པ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་གྲངས་མེད་པས་བསྐོར་བར་བསྐྱེད་ནས་འོག་མིན་ནས་དེ་འདྲ་བའི་ཡེ་ཤེས་པ་བཅུག་སྟེ། དབང་བསྐུར་ལ་སོགས་སྔ་མ་བཞིན་བྱའོ། །ཁྲུས་ཆུ་དང་། བཀོད་མའི་ཆུ་མིག་རབ་ཏུ་གནས་ན། དེ་ཉིད་ལྷའི་ཁྲུས་ཀྱི་རྫིང་བུ་བཟང་པོས་བརྒྱན་པར་བསམས་ལ། རྟེན་འབྲེལ་སྙིང་པོས་མེ་ཏོག་འཐོར་ཞིང་བཀྲ་ཤིས་བརྗོད་དེ། ཁང་པ་དང་སྐྱེད་མོས་ཚལ་ལའང་དེ་བཞིན་གཤེགས་པའི་གཞལ་མེད་ཁང་དང་། ལྷའི་ནགས་ཚལ་བསྟིམ་ལ། རབ་ཏུ་གནས་ཏེ་བཀྲ་ཤིས་བརྗོད་པར་བྱའོ། །མཁའ་འགྲོ་ལ་སོགས་པའི་སྐུ་ནི། དེ་ཉིད་ཀྱི་སྔགས་དང་བསྐྱེད་ཆོག་བྱས་ནས། སྦྱིན་སྲེག་དང་ནང་མཆོད་དང་། བདུད་རྩིས་མཆོད་པས་མཉེས་པར་བྱས་ལ། རབ་ཏུ་གནས་པ་ནི་མན་ངག་ཡིན་ནོ། །འདིར་མདོར་བསྡུས་ཏེ་གསལ་བར་ཕྱེ་བས་ལེགས་པར་བསྟན་ཏོ། །

དེ་ལྟར་སྙིང་ཏིག་བཀའ་གསང་རྒྱ་ཆེ་ལས། །རྫོགས་པ་རང་བྱུང་རྒྱུད་དོན་རབ་བསྡུས་ཏེ། །ཕྱི་རབས་སྐལ་ལྡན་རྣམས་ཀྱི་དོན་ཆེད་དུ། །ཡེ་ཤེས་དྲི་མེད་བཟང་པོས་འདི་བཀོད་པས། །འགྲོ་ཀུན་རྣམ་དག་རྒྱལ་བའི་ཞིང་ཁམས་སུ། །སྒྲིབ་བྲལ་རྫོགས་པའི་སངས་རྒྱས་ཐོབ་པར་ཤོག །དེ་ལྟར་དོན་གསལ་ཡིད་འོང་ཆོ་ག་འདི། །ཨོ་རྒྱན་ཐུགས་སྲས་དྲི་མེད་འོད་ཟེར་གྱིས། །སྟོན་གསུམ་མེ་ཏོག་འབྲས་བུ་སྨིན་པའི་ཚེ། །གངས་རི་ཐོད་དཀར་མགུལ་དུ་ལེགས་པར་བཀོད། །ཚིག་དོན་པདྨའི་ནགས་ཚལ་དགའ་བ་འདིས། །སྐལ་ལྡན་བུང་བ་རབ་ཏུ་ཚིམ་པར་ཤོག །རབ་ཏུ་གནས་པའི་(༩༥)ཆོ་ག་ཡེ་ཤེས་དྲི་མེད་ཅེས་བྱ་བ་མཁའ་འགྲོ་སྙིང་ཏིག་གི་རྣལ་འབྱོར་པ་པདྨ་ལས་འབྲེལ་རྩལ་གྱིས། སྟོན་ཀའི་དུས་མེ་ཏོག་དང་འབྲས་བུ་སྨིན་པའི་ཚེ་སྦྱར་བ་རྫོགས་སོ།། །།

མཐོང་སྣང་རིན་ཆེན་གསེར་གྱི་དྲ་བ།

༄༅། །མཐོང་སྣང་རིན་ཆེན་གསེར་གྱི་དྲ་བ་བཞུགས་སོ། །རིན་ཆེན་ཤོག་སྐྱའི་སྐོར།

༄༅། མཐོང་སྣང་རིན་ཆེན་གསེར་གྱི་དྲ་བ་ཞེས་བྱ་བ། དཔལ་སྣང་བ་མཐའ་ཡས་ལ་ཕྱག་འཚལ་ལོ། །གང་གི་རང་བཞིན་བདེ་གཤེགས་ཀུན་གྱི་དངོས། །པདྨ་རྒྱལ་ཞེས་མངོན་སྤྱོད་མ་འཁྲུལ་པའི། །འགྲོ་བའི་བླ་མ་དེ་ལ་ཕྱག་འཚལ་ལོ། །གྲུབ་པའི་རིམ་པས་མཐོང་བའི་སྣང་ཚུལ་བརྗོད། །

དེ་ལ་བསྐྱེད་རྫོགས་ཐུན་མོང་གི་མཐོང་སྣང་བ་དང་། འོད་གསལ་མཆོག་གི་མཐོང་སྣང་གཉིས་ལས། དང་པོ་ལ་གྲུབ་པའི་མཐོང་སྣང་ནི། རྣལ་འབྱོར་པ་རབ་ལ་མངོན་སུམ། འབྲིང་ལ་ཉམས་སྣང་། ཐ་མ་ལ་རྨི་ལམ་དུ་སྣང་སྟེ། དེ་ཡང་བླ་མ་ཡི་དམ་མཁའ་འགྲོའི་སྒྲུབ་པ་གང་ཡིན་ཡང་། དམ་ཅན་འདུ་བས་མཁའ་འགྲོའི་རྟགས་འབྱུང་ངེས་ཏེ། མཁའ་འགྲོའི་གཟུགས་དང་སྒྲ་སྐད་སྣ་ཚོགས་པས་ལུང་བསྟན་ཅིང་། དངོས་གྲུབ་སྟེར་བ་དང་། བདེ་གསལ་རྣམ་པར་མི་རྟོག་པའི་ཡེ་ཤེས་སྐྱེ་བ་དང་། གསལ་སྣང་མངོན་ཤེས་ལྟ་བུ་འབྱུང་བ་དང་། གཉིད་འོད་གསལ་བདེ་བ་ཆེན་པོར་འཆར་བ་དང་། གཞན་སྣང་འགྱུར་བར་ནུས་པ་དང་། རང་སྣང་དགའ་བདེར་འབར་བ་དང་། ཉོན་མོངས་པ་ཆོས་ཉིད་དུ་གྲོལ་བར་སྣང་བ་ནི་མངོན་སུམ་དང་ཉམས་སུ་མྱོང་བའི་སྣང་བའོ། །རྨི་ལམ་དུ་མཆོག་གི་རྟགས་སུ་ཤེལ་གྱི་མཆོད་རྟེན་ལ་འཛེགས་ཤིང་བསྐོར་བ་བྱེད་པ་དང་། དཀྱིལ་འཁོར་འདྲི་ཞིང་མཐོང་བ་དང་། རང་ཉིད་སངས་རྒྱས་པར་མཐོང་བ་དང་། རང་གིས་རང་གི་རོ་ཁུར་ནས་སྐྱེལ་བ་དང་། ཞིང་ཁམས་བཟང་པོར་ཕྱིན་ནས་སངས་རྒྱས་དང་བྱང་ཆུབ་སེམས་དཔའ་དང་འཕྲད་པ་དང་། སྔོན་མ་ཐོས་པའི་ཆོས་ཟབ་མོ་ཐོས་པ་དང་། བྱ་དང་རི་དྭགས་ཡ་མཚན་ཅན་མཐོང་བ་དང་། ཉི་ཟླའི་སྟེང་དུ་སྐྱིལ་ཀྲུང་བཅའ་བ་དང་། རྟག་ཏུ་ནམ་ལངས་ཤིང་ཉི་མ་ཤར་བ་རྨི་བ་དང་། རྫིང་དང་ཟམ་པ་འཛུགས་པ་དང་། བདག་ཉིད་གྲུའི་ཁ་ལོ་བྱས་ཏེ་ཆུའི་ཕ་རོལ་ཏུ་ཕྱིན་པ་རྨིས་ན། འཁོར་བ་ལས་ཐར་པའི་ལམ་སྣ་ཟིན་ཏེ། ངེས་པར་གྲོལ་བའི་ལྟས་སོ། །ཐུན་མོང་ལ་ནད་ཞི་བའི་ལྟས་སུ་ལུས་ལས་རྣག་ཁྲག་ཐོན་པ་དང་། གདོན་འཐོན་པའི་ལྟས་སུ་གཞན་ལས་རྒྱལ་བ་དང་། སྡིག་སྒྲིབ་དག་པའི་ལྟས་སུ་ཉི་ཟླ་ཤར་བ་དང་། གོས་དཀར་པོ་གོན་པ་དང་། ཁྲུས་བྱེད་པ་དང་། རི་རྩེ་ལ་ཕྱིན་(༩༦)པ་དང་། ནམ་ལངས་པའོ། །ཚེ་འཕེལ་ཞིང་རྒྱས་པའི་རྟགས་སུ་འབྲུའི་ཕུང་པོ་དང་། ལོ་ཐོག་ལེགས་པོ་དང་། ཉི་ཟླ་ཤར་བའོ། །ཤེས་རབ་རྒྱས་པའི་རྟགས་སུ་མེ་ཏོག་འཐུ་བ་དང་། ཡི་གེ་འབྲི་ཀློག་དང་། དཀར་གསུམ་འཐུང་བ་དང་། མེ་འབར་བ་དང་། ཉི་ཟླ་ཤར་བ་དང་། རལ་གྲི་རྙེད་པའོ། །གྲགས་པ་རྒྱས་པའི་རྟགས་སུ་དུང་འབུད་པ་དང་། རྔ་བརྡུང་བ་དང་། དར་པོ་ཆེ་ཕྱར་བ་དང་། ཀུན་གྱིས་བསྟོད་པ་རྨིའོ། །ནོར་རྒྱས་པའི་རྟགས་སུ། རིན་པོ་ཆེའི་ཆར་འབབ་པ་དང་། གཏེར་འདྲུ་བ་དང་། ལོ་ཐོག་ལེགས་པ་དང་། ཁང་བཟངས་ལོངས་སྤྱོད་ལྡན་པ་རྨིའོ། །འཁོར་འདབ་རྒྱས་པའི་རྟགས་སུ་སྐྱེ་བོ་མང་པོའི་དབུས་ན་འདུག་པ་དང་། བ་གླང་ལ་སོགས་པ་མང་པོ་སྐྱོང་བ་རྨིའོ། །འགྲོ་བ་དབང་དུ་འདུ་བའི་རྟགས་སུ་བུད་མེད་མང་པོས་ཕྱག་འཚལ་ཞིང་ནོར་འབུལ་བ་དང་། ཞལ་སློབ་དང་སྐྱེ་བོ་མང་པོས་བསྟོད་པའོ། །མཁའ་འགྲོ་མ་འདུས་པའི་རྟགས་སུ། བུད་མེད་མང་པོས་ཕྱག་འཚལ་རྒྱན་འདོགས་བསྟོད་པའོ། །དཔའ་བོ་འདུས་པའི་རྟགས་སུ་སྐྱེ་བོའི་ཚོགས་དང་། དམག་གི་ཚོགས་འདུས་ཏེ་ཕྱག་འཚལ་ཞིང་ནོར་འབུལ་བ་རྨིའོ། །བགེགས་དྲག་པོ་ཚར་གཅོད་པའི་རྟགས་སུ། གཞན་བསད་ཅིང་བརྡུང་བ་དང་། མེ་དཔུང་འབར་བ་དང་། རྒྱ་མཚོ་སྐམ་པ་དང་། ཆུ་ཆེན་པོ་འཕྲལ་ལ་འབབ་འཕྲོ་ཆད་པ་དང་། སེམས་ཅན་ཕྲ་མོ་མང་པོ་བསྲེགས་པ་དང་། རྒྱལ་བའི་སྒྲ་སྒྲོགས་པ་རྨིའོ། །མ་གྲུབ་པའི་རྟགས་ལ་བུད་མེད་མཚན་མ་སྟོན་པ་རྨིས་ན། མོ་རྒྱུད་མ་གྲུབ་པས་སྤོག་པའི་ལས་བྱ། སྐྱེས་པ་གཅེར་བུར་བྱུང་ན་ཕོ་རྒྱུད་ཁུ་བས་གཟིར་བའི་ལས་བྱ། འཐབ་རྩོད་བྱེད་ན་མཁའ་འགྲོ་འཁྲུགས་པས་སྐོང་བཤགས་བྱ། སྤྲང་པོ་བྱུང་ན་མ་བསྐང་བས་མེ་ཚོགས་དང་གཏོར་ཚོགས་བྱ། མཛེ་ཕོ་བྱུང་ན་གྲིབ་ཡོད་པས་ཁྲུས་དང་གཙང་སྦྲ་བྱེད། མུན་ནག་ཆར་འཐིབས་བྱུང་ན་དམ་ཚིག་ཉམས་པས་སྐོང་བཤགས་བྱ། ཉི་ཟླ་ནུབ་ན་ཚེ་ཐུང་བས་ཚེ་སྒྲུབ་བྱ། བཟའ་བཏུང་ཐོབ་ཁར་གཞན་གྱིས་ཁྱེར་བར་རྨིས་སམ་གཉིད་སད་ན། ཟ་ཁར་འཇུག་པའི་བགེགས་ལ་མནན་པ་བྱ། མཚོན་ཆ་ཆག་པ་དང་རྣོ་མེད་ན་སྔགས་ལ་ཆད་ལྷག་བྱུང་བས་གསོ་བར་བྱ། རོལ་མོ་ལ་སྐད་མེད་པ་རྨིས་ན་བསྐྱེད་རྫོགས་མ་དག་པས་གསལ་ལ་དག་པར་གསལ་གདབ། ངུ་བྲེད་དང་ཆོ་ངེས་བྱེད་པར་རྨིས་ན་སྲུང་མ་མ་མགུ་བས་སྐོང་བཤགས་དང་གཏོར་ཚོགས་བྱ། གཞན་གྱིས་འདོད་པ་བྱུང་ན། གཞན་གྱི་གཏོར་ཚོགས་ཀྱིས་མ་ཁེངས་པས་ཚོགས་གཏོར་རྒྱ་ཆེན་པོ་གཏང་། རང་(༩༧)ཉིད་ཀུན་གྱི་གྲལ་གཤམ་ན་འདུག་པ་རྨིས་ན། འཇིག་རྟེན་གྱི་ལྷ་འདྲེ་མ་འཆུན་པས་དམིགས་པ་རྒྱ་བསྐྱེད། མི་གཙང་བའི་འདབ་རྫབ་ཀྱི་ཁྲོད་དུ་འདུག་པ་རྨིས་ན་གྲིབ་ཡོད་པས་ཁྲུས་དང་སྐོང་བཤགས་བྱ། གོས་ངན་པ་གོན་པ་རྨིས་ན་བསོད་ནམས་དམན་པས་ཚོགས་བསག །རི་ནས་ཐུར་དུ་འགྲོ་བ་རྨིས་ན་བར་ཆད་དང་སྐལ་བ་ངན་པས་དགེ་སྦྱོར་ལ་འབད་ཅིང་བརྩོན་འགྲུས་བསྐྱེད། ས་རུབ་ཅིང་ཉི་ཟླ་ནུབ་པ་དང་། རྒུད་པ་དང་། གོས་དམར་པོ་གོན་ནས་མཆོད་རྟེན་དམར་པོ་ལ་འཛེགས་པ་དང་། གཅེར་བུར་བོང་བུ་ལ་ཞོན་པ་དང་། ནུབ་ཏུ་བལྟས་ནས་ཉམས་མི་དགའ་བཞིན་དུ་ཉི་མ་ནུབ་ཁར་འགྲོ་བ་རྨིས་ན། འཆི་རྟགས་ཡིན་པས་འཆི་བསླུ་དང་ཚེ་སྒྲུབ་ལ་འབད་པར་བྱའོ། །འདི་དག་ནི་མདོ་ཙམ་སྟེ། མདོར་ན་རྨི་ལམ་གང་ཡང་སད་དུས་ཤེས་པ་མི་དགའ་ན་ངེས་པར་ཞན་ལ། ཤེས་པ་མི་བདེ་བ་མེད་ན་བག་ཆགས་སུ་ཤེས་པར་བྱའོ། །དེའང་སྲོད་ལ་སྔར་འདས་པ་དང་། བགེགས་ཀྱི་ཆོ་འཕྲུལ་གྱི་རྨི་ལམ་གཞི་ཆེ། གུང་ལ་བག་ཆགས་དང་ད་ལྟའི་སྣང་བ་ཤས་ཆེ། ཐོ་རངས་མ་འོངས་པ་དང་ལྷས་ལུང་སྟོན་པའི་ཕྱིར། མངོན་ཤེས་ཀྱི་རྣམ་པ་དང་། ཆོས་མཐུན་པས་ཐོ་རངས་ལ་བརྟག་པ་ཡིན་ནོ། །ངན་པ་རྣམས་ལ་སོ་སོའི་གཉེན་པོ་རྣམས་དང་བདེན་མེད་ཀྱི་རྩལ་སྦྱངས་པས་ཞི་བར་འགྱུར་རོ། །དེ་དག་ཐུན་མོང་གི་མཐོང་སྣང་བཟང་ངན་རྣམས་རྣལ་འབྱོར་པས་ཤེས་པར་བྱ་བའི་ཕྱིར་དུ་སྨོས་པ་སྟེ། ཁོང་དུ་ཆུད་པར་བྱའོ། །

དོན་གཉིས་པ་འོད་གསལ་མཆོག་གི་མཐོང་སྣང་ལ་གཉིས་ལས། རང་རིགས་པའི་མཐོང་སྣང་ལའང་བཟང་པོ་ནི། གནས་ལུགས་ཀྱི་དོན་ལ་སྦྱངས་པས་ན། སེམས་ཅན་ལ་སྙིང་རྗེ་ཆེན་པོ་འབད་མེད་དུ་སྐྱེ་བ་དང་། བླ་མ་ལ་གདུང་བ་མཆོག་ཏུ་སྐྱེ་བ་དང་། འདོད་ཡོན་ལ་དགོས་མེད་སྐྱེ་བ་དང་། ཆགས་སྡང་གི་འཛིན་པ་ཇེ་ཆུང་ལ་འགྲོ་བ་དང་། རང་སེམས་ལ་གཡོ་ཟོག་གི་རྣམ་པ་མི་འབྱུང་བ་དང་། སྙིང་ནས་འཆི་བ་མི་རྟག་པ་སྐྱེ་བ་དང་། བློ་སྣ་བཙན་ཐབས་སུ་ཐུང་ལ་སྐྱོ་ཤས་གཏིང་ནས་སྐྱེ་བ་དང་། འཇིག་རྟེན་གྱི་སྣང་བ་སྒྱུ་མར་མཐོང་བ་དང་། སྣང་སྲིད་སློབ་དཔོན་དུ་འཆར་བ་དང་། ཅི་བྱས་གཞན་ལ་ཕན་པ་དང་། ཀུན་གྱིས་མཐོང་ན་དགའ་བ་དང་། དད་མོས་རྒྱུན་ཆད་མེད་པ་དང་། ཉོན་མོངས་པ་ཆོས་ཉིད་དུ་འཆར་བ་དང་། ཆོས་མིན་གྱི་བསམ་པ་རྒྱུད་ལ་མི་འབྱུང་བ་དང་། བདེ་གསལ་མི་རྟོག་པ་རང་བབས་སུ་སྐྱེ་བ་དང་། གང་ཤར་རང་གྲོལ་དུ་མཐོང་བ་དང་། ཐེ་ཚོམ་གྱི་འཛིན་པ་མི་སྐྱེ་བ་དང་། བླ་མའི་(༩༨)གདམས་ངག་ལ་ཡིད་ཆེས་སྐྱེ་བ་དང་། ཆོས་ཀྱི་ཚིག་དོན་སྔར་མི་ཤེས་པ་རྒྱུད་ལ་འཆར་བ་དང་། ཐམས་ཅད་བློ་བྲལ་དུ་ཤེས་པ་ལ་སོགས་པའོ། ངན་པ་ནི་ཉམས་སུ་བླངས་པའི་ཚེ་ན། དེ་དག་ལས་ལྡོག་པ་རྒྱུད་ལ་འཆར་ཞིང་། ཁྱད་པར་དུ་གནས་དང་ཡུལ་དང་། གཉེན་བཤེས་ལ་ཆགས་སྡང་སྐྱེ་ཞིང་། རྫས་དང་ཡོ་བྱད་ལ་སོགས་གང་རུང་ལ། ཆགས་ཞེན་ཇེ་ཆེར་གྱུར་པ་དང་། དུག་ལྔ་ཇེ་རགས་ལ་སོང་བས་མཐུན་མཇུག་དང་། ཆགས་སྡང་འབད་མེད་འབྱུང་བ་དང་། གཅིག་པུར་འདུག་ཀྱང་སེམས་ཉོན་མོངས་པས་གཡེངས་ཤིང་བྱ་བྱེད་འདུ་འཛི་ལ་དགའ་བ་དང་། བླ་མའི་གདམས་ངག་ལ་ཡིད་མི་ཆེས་པས་སྤྲོས་བཅས་ཀྱི་དགེ་སྦྱོར་ལ་གཙོ་བོར་འདོན་པ་དང་། བློ་སྣ་མང་ཞིང་རྣམ་རྟོག་ཇེ་རགས་ལ་འགྲོ་བ་དང་། དགག་སྒྲུབ་དང་འགྱུར་ལྡོག་མང་ཞིང་འགྲོགས་ཚད་ཆོས་མིན་ལ་འགོད་པ་དང་། ཁ་ལྟ་ཉམས་ལེན་འཛོལ་བས་སེམས་ལ་རྡུལ་ཙམ་ཡང་མ་ཕན་པ་ལ་སོགས་ཏེ། མདོར་ན་ཆོས་དང་མི་མཐུན་པ་ཀུན་ལ་རང་གནས་ཤིང་གཞན་ཡང་འགོད་པ་རྣམས་སོ། །དེ་དག་ལ་བླ་མ་དམ་པ་བཙལ་ནས་ཉོན་མོངས་པའི་གཉེན་པོར་གང་འགྱུར་བརྟེན་ནས། རང་སེམས་འདུལ་བ་མཆོག་ཏུ་ཟབ་བོ། །གཉིས་པ་འོད་ལྔ་ཕྱིའི་མཐོང་སྣང་ནི། ལུས་ངག་ཡིད་གསུམ་གྱི་གནད་རྣམས་ལེགས་པར་གཅུན་ཏེ་བསྒོམས་པས་ཐིག་ལེ་སྟོང་པའི་སྒྲོན་མ་མཐེབ་མཛུབ་ཀྱི་རྩོལ་བ་དང་བྲལ་ཡང་། སྣང་དུས་ནང་དུ་གཟུང་འཛིན་གྱི་རྩ་གཉིས་འོད་དུ་སོང་བས་འཁོར་བའི་འཆིང་བ་ལས་གྲོལ་ཏེ། རྩོལ་སྒྲུབ་ལས་འདས་པའི་དོན་ཁོང་དུ་ཆུད་པའི་ལྟས་སོ། །དེ་དུས་ཤི་ཡང་སྐྱེ་བ་གཉིས་ནས་སངས་རྒྱའོ། །དེ་ནས་དབྱིངས་རྣམ་པར་དག་པའི་སྒྲོན་མ་སྨིན་མཚམས་ནས་བྲལ་ཏེ་འོད་ལྔའི་སྣང་བ་དུམ་བུ་ལ་ཁྲུ་གང་ཙམ་པ་ཁ་དོག་ལྔ་ལྡན་གྱི་ནང་འོད་ཟླུམ་མུ་ཁྱུད་རིས་མར་པོར་སྣང་དུས། ནང་དུ་ཡེ་ཤེས་ཀྱི་སྣང་བས་དུག་ལྔ་དང་སྒོ་ལྔའི་འདབ་འོད་དུ་སོང་བས་འཁོར་འདས་རྒྱབ་གྱེས་ཏེ་ཕྱི་མ་མངལ་གྱི་གྲོང་ཁྱེར་དུ་མི་འཇུག་པའི་རྟགས་སོ། །དེ་དུས་ཤི་ཡང་སྤྲུལ་སྐུར་སྐྱེ་བས་འགྲོ་དྲུག་ཏུ་མི་སྐྱེའོ། །དེའང་མངོན་དགའ་ལ་སོགས་པར་རྫུས་ཏེ་སྐྱེ། ལོ་ལྔ་བརྒྱ་ན་སངས་རྒྱ་བའོ། །དེ་ནས་འོད་ལྔའི་སྣང་བ་གྱེན་ལ་འགྲེང་བ་དང་། རྩིབས་ཤར་དང་། མདུང་རྩེ་དང་། མདའ་ལྟ་བུ་དང་། རེ་ལྡེ་ཙམ་དུ་སྣང་དུས་ན། ནང་དུ་སྤྲུལ་པའི་ཞིང་གི་བག་ཆགས་འཛིན་པའི་རྩ་བདུན་གྱི་རྩ་གཉིས་རེ་འོད་(༩༩)དུ་སོང་བས་དབྱིངས་རིག་འདུས་ཏེ་བར་དོར་སངས་རྒྱ་བའོ། །དེའང་སྣང་བའི་འོད་གསལ་མདུན་ངོས་ཙམ་པར་གཞལ་ཡས་ཁང་པར་ཤར་བའི་གནད་ཀྱིས་སོ། །དེའང་དེ་དུས་ཤི་ན་བར་དོ་གསུམ་པ་ལྷུན་གྲུབ་ལ་གྲོལ་ལོ། །དབྱིངས་སྣང་ལ་རིན་པོ་ཆེའི་དྲ་བ་དྲ་ཕྱེད་དང་། མིག་མངས་རིས་དང་། མིག་ཚགས་ལྟ་བུ་དང་། ཟ་འོག་བེར་ཁྱིམ་དང་། མཆོད་རྟེན་དང་། ལྕགས་ཀྱུ་དང་། མདུང་རྩེ་དང་། མདའ་དང་། ཉ་མིག་གི་རྣམ་པ་ལྟ་བུ་ཤར་དུས་ནང་དུ་ལོངས་སྐུའི་ཆ་འཛིན་པའི་བག་ཆགས་ཀྱི་སྒྲིབ་པའི་རྩ་ལྔ་བརྒྱ་འོད་དུ་སོང་བས་ཡེ་ཤེས་བཞི་སྦྱོར་གྱི་སྣང་བ་ལ་སངས་རྒྱས་ཏེ་སྲིད་པའི་བར་དོ་མེད་དོ། །དེའང་ཆོས་ཉིད་ལས་སྲིད་པའི་བར་དོ་རང་ལོག་སྟེ། དབྱིངས་ཀྱི་རྒྱན་རྫོགས་པའི་ཕྱིར་རོ། །དབྱིངས་སྣང་གིས་ལུང་པ་འགགས་པ་ནི། ནང་དུ་སྒྲིབ་བྱེད་གཉིས་སྣང་གི་རྩ་བཞི་བརྒྱ་འོད་དུ་སོང་སྟེ། རྣམ་རྟོག་ཡུལ་གྱི་ཞེན་པ་དང་བྲལ་བས་འདི་དུས་ཤི་ཡང་། ཟུང་འཇུག་གི་སྣང་བ་ལ་སངས་རྒྱས་པའི་རྟགས་སོ། །དབྱིངས་རིག་ཉིན་མཚན་མེད་པར་འདྲེས་ཏེ་སྣང་དུས། ནང་དུ་སྐུ་གསུམ་སྣང་ཚུལ་གྱི་རྟེན་འབྲེལ་བྱེད་པའི་རྩ་སུམ་སྟོང་འོད་དུ་སོང་བས་འོད་གསལ་གྱི་སྣང་བ་ལ་སངས་རྒྱའོ། །དེའང་འཁོར་འདས་གཉིས་སུ་མེད་པར་གྲོལ་བའི་གནད་ཀྱིས་སོ། །དེ་དག་གི་ཚེ་ཐིག་ལེ་ཡང་སྲན་མའི་རྡོག་པོ་ཙམ་ལས་བསེ་ཕུབ་ཙམ་གྱི་བར་དུ་འཕེལ་ལོ། །དེའི་ཚེ་ལུས་ལ་གཉེར་མ་མེད་ཅིང་ཟས་སྐོམ་མི་དགོས་པ་དང་། རང་སྣང་ལས་འབྲལ་མི་ཕོད་པ་དང་། བར་སྣང་ལ་འགྲོ་བ་དང་། འཁྲུལ་པའི་གཏམ་མི་འབྱུང་བའོ། །དེ་ནས་ཐིག་ལེ་རེ་རེའི་ནང་དུ་རིགས་ལྔའི་སྐུ་རྐྱང་པ་རེ་ཤར་བ་དང་། ཡབ་ཡུམ་ཟུང་འབྲེལ་དུ་ཤར་དུས། ཕུང་པོ་འོད་གསལ་དུ་གྲོལ་དུས། འབྱུང་བཞིའི་གནོད་པ་མེད་པས་སྐྱེ་ཤི་ལས་འདས་ཏེ། ནང་རྩ་མ་ལུས་པ་འོད་དུ་སོང་ནས་རྡོས་བཅས་སུ་མི་སྣང་བར་ཆུའི་ཟླ་བ་ལྟ་བུར་སྣང་ངོ་། །དེ་དུས་སྐུ་གསུམ་གྱི་ཞེན་པ་ཆོད་དེ། ལོངས་སྐུའི་ཞིང་ལ་ད་ལྟ་སྤྱོད་པའོ། །དེའང་ལོངས་སྐུའི་ཞིང་ལ་གཉིས་ཏེ། མཐར་ཐུག་སངས་རྒྱས་ཀྱི་ཞིང་དང་། གནས་སྐབས་རྣལ་འབྱོར་པའི་ཞིང་ངོ་། །སངས་རྒྱས་ཀྱི་ཞིང་ནི་སངས་རྒྱས་ནས་ལོངས་སྐུར་བཞེངས་དུས་ནའོ། །རྣལ་འབྱོར་པ་ལ་གཉིས་ལས། ཚད་དུ་ཕྱིན་པ་མངོན་སུམ་གྱི་སྣང་བ་ནས། གོང་འཕེལ་གྱི་སྣང་བ་རྫོགས་པ་ཚུན་ཆད་དོ། །ཕྱིན་པ་ནི་རིག་པ་ཚད་ཕེབས་ཏེ། འདི་དག་ལ་ལོངས་སྐུའི་ཞིང་ཉུལ་བ་ཞེས་བྱ་སྟེ་གོང་ནས་གོང་དུ་འགྲོ་ཞིང་སངས་རྒྱས་ཀྱི་སར་(༡༠༠)བརྟན་པ་ཐོབ་དགོས་པའི་ཕྱིར་རོ། །སངས་རྒྱས་ནས་ལོངས་སྐུའི་ཞིང་བརྟན་པ་ཞེས་བྱ་སྟེ། མི་འགྱུར་ཞིང་མཐར་ཐུག་པའི་ཕྱིར་རོ། །དེ་ནས་འོད་ཀྱི་ནང་ན་ལག་སོར་བཀྲམ་པ་ཙམ་ལས་མི་མངོན་པས་ན་ཕྱི་ནང་གི་འཁྲུལ་སྣང་ཟད་དེ། སེམས་ཅན་གྱི་དོན་དུ་འཕོ་བའི་སྐུར་པདྨ་ལྟ་བུར་འབྱུང་ཞིང་ཁ་ཅིག་གདོད་མའི་སར་གྲོལ་ནས་སྤྲུལ་པས་དོན་མཛད་པའོ། །དེའང་ཕྱི་སྣང་བའི་འོད་གསལ་ལས། ནང་རིག་པའི་འོད་གསལ་འབྱོངས་ཏེ། གསང་བ་ཆོས་ཉིད་ཀྱི་འོད་གསལ་དུ་གྲོལ་བར་བྱེད་པས་ན་ཆོས་ཚུལ་འདི་ནི་ཀུན་ལས་ཁྱད་པར་འཕགས་སོ། །

ཨེ་མ་ཧོ། ཡང་གསང་སྙིང་པོ་མཁའ་འགྲོ་སྙིང་ཏིག་ལས། །མཐོང་སྣང་སྣ་ཚོགས་གསེར་གྱི་དྲ་བ་ཅན། །གང་གིས་གོམས་ཤིང་བསྒྲུབས་ལས་མངོན་དུ་སྣང་། །འདི་ཡང་རང་རིག་གོམས་པའི་ཆོ་འཕྲུལ་ཙམ། །སྣང་སྲིད་སྣོད་བཅུད་དག་དང་མ་དག་ཀུན། །གྲིབ་མ་གཟུགས་ལ་ཤར་བ་ཆོས་ཉིད་དང་། །འོད་གསལ་གདངས་ལས་སོ་སོར་སྣང་ན་ཡང་། །རང་བྱུང་ཡེ་ཤེས་གཟུགས་གཞན་འཕོ་འགྱུར་མེད། །དག་དང་མ་དག་གྲིབ་མ་ཇི་བཞིན་ཡང་། །གདོད་མའི་ངང་ལས་ཤར་དེར་མཐའ་ཡང་གྲོལ། །འཁོར་འདས་སྣང་རྟགས་ཤིན་ཏུ་དག་པའི་ཚེ། །གདོད་མའི་སར་ཕྱིན་རྨི་ལམ་སད་པ་འདྲ། །བཟང་ངན་གཉིས་མེད་མཉམ་རྫོགས་བློ་བདེ་འོ། །གངས་རི་ཐོད་དཀར་རིན་ཆེན་སྙིང་པོའི་མགུལ། །ཡོ་རྒྱན་རྫོང་དུ་དྲི་མེད་འོད་ཟེར་གྱིས། །ཕྱི་རབས་དོན་དུ་སྣང་བར་བྱས་པ་ཡིན། །མཐོང་སྣང་རིན་ཆེན་གསེར་གྱི་དྲ་བ་རྫོགས་སོ།། །།

དགེའོ།། །།

རྡོ་རྗེ་གཡུ་སྒྲོན་མའི་སྒྲུབ་ཐབས་ཟླ་བ་འདོད་འཇོ།

དང་པོ། ཕྱི་ལྟར་སྒྲུབ་པ།

༄༅། །རྡོ་རྗེ་གཡུ་སྒྲོན་མའི་སྒྲུབ་ཐབས་ཟླ་བ་འདོད་འཇོ་བཞུགས་སོ། །རིན་ཆེན་ཤོག་འདྲ།

༄༅། རྡོ་རྗེ་གཡུ་སྒྲོན་མའི་སྒྲུབ་ཐབས་ཟླ་བ་འདོད་འཇོ་ཞེས་བྱ་བ། སློབ་དཔོན་ཆེན་པོ་པདྨ་འབྱུང་གནས་ལ་ཕྱག་འཚལ་ལོ། །ཡིད་བཞིན་རེ་བ་ཀུན་འགྲུབ་ཅིང་། །འདོད་དགུའི་བསམ་པ་རྫོགས་མཛད་པ། །ཡེ་ཤེས་མཚོ་རྒྱལ་ལ་བཏུད་དེ། །རྡོ་རྗེ་གཡུ་སྒྲོན་སྒྲུབ་ཐབས་བཤད། །འདི་ལ་ཕྱི་ནང་གསང་བ་གསུམ། །ཕྱི་ལྟར་སྨན་བཙུན་མཆེད་ལྔ་ལ། །ནང་ལྟར་ཡིད་འོངས་ལྷ་མོ་ལྔ། །གསང་བར་མཁའ་འགྲོ་ལྔ་ཡིན་པས། །སྐུ་གསུང་ཐུགས་ཡིན་འདི་ལྟར་བསྒྲུབ། །

དང་པོ་ཕྱི་ལྟར་སྒྲུབ་པ་ནི། །ཡིད་དང་མཐུན་པའི་གངས་རི་འམ། །ནགས་རི་སྤང་རི་སྐྱེད་མོས་ཚལ། །དབེན་ཞིང་ཉམས་དགའི་གནས་ཉིད་དུ། །མཎྜལ་པདྨ་འདབ་བཞིའི་སྟེང་། །སྨན་མོའི་གཟུགས་དང་མེ་ལོང་མདའ། །དར་སྣ་ལྔས་བརྒྱན་གཞག་པར་བྱ། །མཐའ་སྐོར་དཀར་གསུམ་མངར་གསུམ་དང་། །མེ་ཏོག་ལ་སོགས་མཆོད་པ་བཤམས། །དེ་ནས་རང་ཉིད་སྐད་ཅིག་གིས། །པདྨ་འབྱུང་གནས་བསྒོམ་བྱས་ལ། །མདུན་དུ་གངས་རི་སྐྱེད་མོས་ཚལ། །དབུས་ན་རིན་ཆེན་ཁང་བཟང་སྟེ། །དེ་ནང་རིན་ཆེན་ཁྲི་སྟེང་དུ། །རྡོ་རྗེ་གཡུ་སྒྲོན་དཀར་གསལ་ནི། །དར་དཀར་ན་བཟའ་གསེར་གཡུས་བརྒྱན། །ཕྱག་གཡས་ཡིད་བཞིན་ནོར་བུ་སྟེ། །གཡོན་དུ་དངུལ་དཀར་མེ་ལོང་འཛིན། །དར་ཐོད་མེ་ལོང་ཕྲེང་རྒྱན་ཅན། །འཛུམ་བཅས་ཕྱེད་ཀྲུང་འོད་ཟེར་འཕྲོ། །ཕྱོགས་བཞིར་མཆེད་བཞི་གཙོ་མོ་འདྲ། །ཀུན་ཀྱང་བཅུ་དྲུག་ན་ཚོད་ལ། །སྒེག་མཛེས་དགྱེས་པའི་ཚུལ་དུ་བསྒོམ། །སྙིང་གའི་འོད་ཟེར་རབ་འཕྲོས་པས། །གནམ་སྨན་གངས་རི་ལྷ་ཡི་གནས། །སྤྲིན་དཀར་དག་པའི་ཕོ་བྲང་ནས། །ཡེ་ཤེས་སེམས་དཔའ་སྤྱན་དྲངས་བསྟིམ། །དངོས་དང་ཡིད་ཀྱིས་མཆོད་བྱས་ལ། །སྔགས་འདི་མ་ཡེངས་བཟླས་པར་བྱ། །ཨཱ་བཛྲ་པྲ་མོ་ཧ་ཧྲིང་ཧྲིང་སྭཱ་ཧཱ། བདག་ཉིད་པདྨའི་འོད་ཟེར་ནི། །ཕོག་པས་དེ་དག་སྐུ་གསུང་ཐུགས། །དགྱེས་པས་རིན་ཆེན་ཆར་འབེབས་ཤིང་། །འདོད་དགུའི་བསམ་པ་བསྒྲུབ་པར་བསམ། །རྗེས་ལ་དཀར་གསུམ་མངར་གསུམ་གྱི། །གཏོར་མ་འབྲུ་གསུམ་བྱིན་བརླབས་ལ། །ཨཱ་བཛྲ་པྲ་མོ་ཧ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་ལྔ་འམ་བདུན་གྱིས་དབུལ། །བསྟོད་པ་འདི་ཡང་བརྗོད་པར་བྱ། །རྡོ་རྗེ་གཡུ་སྒྲོན་ཤིན་ཏུ་མཛེས་པའི་སྐུ། །དཀར་གསལ་གངས་རིའི་ངོས་ལ་ཉི་ཤར་འདྲ། །སྒྲུབ་པ་པོ་ལ་དངོས་གྲུབ་མཆོག་སྩོལ་མཛད། །མཆེད་ལྔ་འཁོར་དང་བཅས་ལ་ཕྱག་(༡༠༢)འཚལ་བསྟོད། །སྔོན་ཚེ་སློབ་དཔོན་པདྨའི་སྤྱན་སྔ་རུ། །ཇི་ལྟར་ཞལ་བཞེས་ཐུགས་དམ་དྲན་མཛོད་ལ། །རྣལ་འབྱོར་བདག་ལ་དགྱེས་པའི་ཞལ་བཟང་སྟོན། །བཅོལ་བའི་ཕྲིན་ལས་མྱུར་དུ་འགྲུབ་པར་མཛོད། །ཅེས་བརྗོད་དགྱེས་པས་དོན་འགྲུབ་བསམ། །ཐུན་མཚམས་སྤྱོད་ལམ་ཅི་བདེར་བྱ། །དེ་ལྟར་ཞག་བདུན་བསྒྲུབས་པ་ཡིས། །རྨི་ལམ་སྔར་བས་འགྱུར་ཞིང་དགའ། །བུད་མེད་འདུ་དང་ཟས་སྟེར་དང་། །ཕྱག་དང་བསྐོར་བ་བྱེད་པ་རྨི། །དངོས་གྲུབ་ཟས་ནོར་སྤྲིན་བཞིན་འདུ། །ཁྱད་པར་བུད་མེད་བཟང་མོ་དང་། །ཡུལ་མི་མང་པོ་འདུ་བ་ཡིན། །འདོད་དོན་ཐུན་མོང་དངོས་གྲུབ་ཐོབ། །དེ་ནི་ཕྱི་ལྟར་སྒྲུབ་པའོ། །། རྒྱ་རྒྱ་རྒྱ།། །།

གཉིས་པ། ནང་ལྟར་སྒྲུབ་པ།

གཉིས་པ་ནང་ལྟར་སྒྲུབ་པ་ནི། །གནས་དང་དཀྱིལ་འཁོར་སྔོན་བཞིན་ཏེ། །ཁྱད་པར་ཟ་འོག་ཁུག་མ་རུ། །ཤེལ་དང་བྱི་རུ་གཡུ་ཆུང་གཞུག །བླ་རྡོ་ལྷ་མོ་མཆེད་ལྔ་ནི། །དམར་མཛེས་མེ་ལོང་པདྨ་བསྣམས། །དར་ཟབ་རིན་ཆེན་སྣ་ཚོགས་བརྒྱན། །ཕྱེད་ཀྲུང་འཛུམ་བཅས་འོད་ཟེར་འཕྲོ། །ཚངས་པ་ལྷ་ཡི་འཇིག་རྟེན་ནས། །ཡེ་ཤེས་སྤྱན་དྲངས་གཉིས་མེད་བསྟིམ། །མཆོད་དང་བསྟོད་པས་མཉེས་བྱས་ལ། །བདག་ཉིད་ཉི་མ་འོད་ཟེར་གྱི། །ཐུགས་ཀའི་འོད་ཀྱིས་བསྐུལ་བ་ཡིས། །འཇིག་རྟེན་སྐྱེ་བོ་ཟས་ནོར་བཅས། །སྐད་ཅིག་དབང་གིས་སྡུད་པར་བསམ། །ཨཱ་ཧྲཱི་བཛྲ་པྲ་མོ་ཧ་ཧྲིང་ཧྲིང་སྡུས་སྡུས་ཨ་ཀར་ཤ་ཡ་ཁུག་ཛཿ། སྒོམ་དང་བཟླས་པའི་འོད་ཟེར་གྱིས། །སྟོང་གསུམ་འོད་དམར་གཅིག་གྱུར་ནས། །རང་ལ་ཐིམ་ཞིང་འདུས་པར་བསམ། །ལྷ་མོ་མཆེད་ལྔའི་འོད་ཟེར་ལས། །སྤྲུལ་པའི་ལྷ་མོ་དཔག་མེད་འཕྲོས། །ཐམས་ཅད་དབང་བསྡུས་བཀུག་པར་བསམ། །ཁྱད་པར་གང་དམིགས་བསྒྲུབ་བྱ་ནི། །སྐད་གཅིག་བཀུག་ནས་དབང་གྱུར་བསམ། །རྗེས་ལ་ཅི་འབྱོར་གཏོར་མས་མཆོད། །བསྟོད་པ་འདི་ཡང་བརྗོད་པར་བྱ། །ཚངས་པ་ལྷ་ཡི་འཇིག་རྟེན་ན། །ལྷ་མོ་མེ་ཏོག་མན་དྷཱ་ར། །དཔག་མེད་ལྷ་ཡི་བསྟོད་པ་ནི། །འཇིག་རྟེན་གསུམ་དབང་མཛད་པ་མོ། །མཆོད་ཅིང་བསྟོད་དེ་ཕྱག་ཀྱང་འཚལ། །ཇི་ལྟར་བདག་གིས་བསམས་པ་བཞིན། །འདོད་དགུའི་རེ་བ་འགྲུབ་པར་མཛོད། །ཅེས་བརྗོད་ཐུན་མཚམས་ཅི་བདེར་གནས། །རྨི་ལམ་སྐྱེ་བོ་དཔག་མེད་འདུ། །ཉི་ཟླའི་སྟེང་གནས་ལྷ་ཡུལ་འགྲོ། །བུད་མེད་འདུ་དང་གཏེར་འདོན་རྨི། །དངོས་སུ་གང་དམིགས་དབང་དུ་འདུ། །ཀུན་གྱི་ཡིད་འཕྲོག་སྐྱེ་བོ་འདུ། །དབང་གི་དངོས་(༡༠༣)གྲུབ་རྒྱ་ཆེན་ཐོབ། །དེ་ནི་ནང་ལྟར་སྒྲུབ་པའོ། །། རྒྱ་རྒྱ་རྒྱ།། །།

གསུམ་པ། གསང་བ་ལྟར་སྒྲུབ་པ།

གསུམ་པ་གསང་བར་སྒྲུབ་པ་ནི། །དབེན་ཞིང་ཡིད་དང་རྗེས་མཐུན་པར། །མཎྜལ་འདབ་བཞི་དཀར་སེར་དམར། །ལྗང་དང་ལྟེ་བ་མཐིང་གའི་སྟེང་། །ཐོད་པ་བདུད་རྩིས་བཀང་བའི་སྟེང་། །མེ་ལོང་ཆོས་འབྱུང་སུམ་བརྩེགས་ནང་། །ཧྲཱི་ཧ་རི་ནི་ས་ལོ་ཀ་སརྦ་སིདྡྷི་ཕ་ལ་ཁུག་ཛཿ ཞེས་པ་དང་ནི་ཕྱི་རོལ་ལ། །ཡུལ་དང་སྐྱེ་བོའི་སྤེལ་ཚིག་བྲི། །དེ་ཉིད་མཁའ་འགྲོ་ལྔར་བསྐྱེད་དེ། །ཧྲཱིཿལས་དབུས་སུ་ཌཱ་ཀི་མ། །དམར་ནག་སྤྱི་གཙུག་རིན་ཆེན་ཏོག །ཕག་ཞལ་མཆེ་གཙིགས་གཅེར་བུ་ལ། །གཡས་གཡོན་གྲི་གུག་ཐོད་ཁྲག་འཛིན། །གཡས་བསྐུམ་གཡོན་བརྐྱང་རུས་པས་བརྒྱན། །གྲུ་མོ་ཁ་ཊྭཱཾ་མཚན་པ་ལ། །ཕྱོགས་བཞིར་ཧ་རི་ནི་ས་ལས། །གཙོ་མོ་འདྲ་བའི་འཁོར་བསྐྱེད་དོ། །ཀུན་གྱི་སྙིང་ཁར་པད་ཟླ་དང་། །ཉི་སྟེང་ཧྲཱིཿདམར་ཚེག་དྲག་ཅན། །ཧ་རི་ནི་སས་བསྐོར་བ་ལས། །འོད་ཟེར་འཕྲོ་བ་བསྒོམ་པར་བྱ། །རང་ཉིད་པདྨ་ཐོད་ཕྲེང་ནི། །མཐིང་ནག་འཇིགས་པའི་འོད་ཟེར་གྱིས། །འོག་མིན་ཡེ་ཤེས་བཀུག་ལ་བསྟིམ། །ཕྱི་ནང་གསང་བའི་མཆོད་པས་མཆོད། །སྔགས་འདི་མ་ཡེངས་བཟླས་པར་བྱ། །ཨཱ་ཧྲཱི་ཧ་རི་ནི་ས་ལོ་ཀ་སིདྡྷི་ཨ་ཀཪྵ་ཡ་ཁུག་ཁུག་སྡུས་སྡུས་ཛ་ཛ་ཙིཏྟ་ཧྲིང་ཧྲིང་། བདག་གི་སྙིང་གའི་འོད་ཟེར་གྱིས། །མཁའ་འགྲོ་ལ་ཕོག་བསྐུལ་མ་ཐག །མཁའ་འགྲོའི་འོད་ཟེར་རབ་འཕྲོས་པས། །འཇིག་རྟེན་སྐྱེ་བོའི་ཟས་ནོར་དང་། །གང་དམིགས་བསྒྲུབ་བྱ་བཀུག་པར་བསམ། །ཡང་ཅིག་འཕྲོས་པའི་འོད་ཟེར་གྱིས། །འཛམ་གླིང་ཁྱོམ་ཁྱོམ་མེར་མེར་ལ། །རྒྱལ་པོ་ལ་སོགས་བཀུག་པར་བསམ། །ཡང་ཅིག་འཕྲོས་པའི་འོད་ཟེར་གྱིས། །ནམ་མཁའ་རྒྱ་མཚོ་རྔ་ལྤགས་ལ། །ཁོར་ཡུག་རྔ་ཆེན་གཅིག་གྱུར་པ། །ཉི་ཟླའི་རྔ་ཡོག་གིས་བརྡུངས་པས། །བདག་གི་གྲགས་པའི་རྔ་སྒྲ་ཡིས། །འཇིག་རྟེན་གསུམ་པོ་ཀུན་གྲགས་ནས། །གཡོ་ལྡེག་མེད་ཅིང་ཁྱོམ་པ་ཡིས། །བདག་གི་དབང་དུ་འདུས་པར་བསམ། །སྔགས་དང་ཏིང་འཛིན་མ་ཡེངས་པས། །ཞག་བདུན་བར་དུ་བསྒྲུབ་པར་བྱ། །རྨི་ལམ་ཁྲོམ་དུ་སྐྱེ་བོས་བསྟོད། །ཟས་ནོར་ཆར་འབབ་མཁའ་ལ་འགྲོ། །གཏེར་དང་རིན་ཆེན་རྙེད་པ་དང་། །དུང་འབུད་རྔ་ཆེན་བརྡུང་བ་རྨི། །དངོས་སུ་འགྲོ་ཀུན་དབང་དུ་འདུ། །ཆེ་བཙུན་ཐམས་ཅད་འདུ་བ་དང་། །ཟས་ནོར་གཏེར་ནི་རྡོལ་བ་བཞིན། །ཕྱོགས་རྣམས་ཀུན་ནས་འདུ་བ་ཡིན། །དེ་ལྟར་གྲུབ་པའི་རྟགས་(༡༠༤)བྱུང་ནས། །མེ་ལོང་ཡི་གེ་བདུད་རྩིས་བཀྲུ། །ཐོད་པའི་བདུད་རྩིའི་འོད་ཟེར་གྱིས། །འཇིག་རྟེན་གསུམ་པོ་འོད་དུ་ཞུ། །ཐོད་པའི་ནང་ཐིམ་དམིགས་ནས་ནི། །བདག་ཉིད་བཏུང་བས་དངོས་གྲུབ་ཐོབ། །གསང་སྒྲུབ་ཡིད་བཞིན་ནོར་བུ་འདི། །སྒོམ་དང་བཟླས་པ་ཙམ་གྱིས་ནི། །ཐམས་ཅད་འདུ་ཞིང་ཟས་ནོར་འཕེལ། །ཅི་བསམ་འགྲུབ་དང་ཆོས་འཕེལ་ལོ། །དེ་ལྟར་བསྒྲུབས་པའི་དམ་ཚིག་ཏུ། །ཆགས་ཞེན་མི་བྱ་སྦྱིན་པར་གཏང་། །བླ་མ་ལ་གུས་དམ་ཚིག་བསྲུང་། །རིག་པ་ངར་བསྐྱེད་བརྟུལ་ཞུགས་བྱ། །གཏུམ་མོ་སྦར་ཞིང་བདེ་སྟོང་བསྒོམ། །དེས་ནི་མྱུར་དུ་འགྲུབ་པ་ཡིན། །། རྒྱ་རྒྱ་རྒྱ།། །།

ཡང་གསང་བླ་ན་མེད་པ་འདི། །རང་ཉིད་པདྨའི་ཐུགས་ཀ་རུ། །ཧྲཱི་དང་ཧ་རི་ནི་ས་ལས། །མཐིང་ནག་བདེ་ཆེན་ཕག་མོ་ནི། །ཕག་ཞལ་གཅིག་སྟེ་སྤྱན་གསུམ་བསྒྲད། །གྲི་གུག་ཐོད་པ་ཀ་ཊྭཱཾ་འཛིན། །གར་བྱེད་འོད་ཟེར་དཔག་མེད་འཕྲོ། །ཕྱོགས་བཞིར་དེ་འདྲའི་འཁོར་བཞི་བསམས། །ཀུན་གྱི་ཐུགས་ཀའི་ཉི་ཟླ་ལས། །ཧྲཱི་དང་ཧ་རི་ནི་ས་བསམ། །དེ་ལ་འོད་འཕྲོས་སྣོད་བཅུད་བསྡུས། །སླར་འདུས་སྙིང་གའི་ཧྲཱི་ལ་ཐིམ། །སྟེང་འོག་རླུང་ནི་ཁ་སྦྱར་ཏེ། །སྤྲོ་བསྡུའི་དམིགས་པ་སྔར་བཞིན་ལས། །ཁྱད་པར་སྣ་བུག་གཡས་པ་ནས། །རླུང་ནི་ལྕགས་ཀྱུ་ཞགས་པ་ཡིས། །ཐམས་ཅད་འོད་ཞུ་ཚུར་འདུས་ནས། །སྣ་བུག་གཡོན་ནས་སྙིང་གར་ཐིམ། །ལུས་ཁེངས་བདེ་དང་སྟོང་པར་བསྒོམ། །རྗེས་ལ་ཆོས་ཀུན་རང་གི་སེམས། །སེམས་ཉིད་ཡེ་སྟོང་སྤྲོས་དང་བྲལ། །མ་སྐྱེས་ནམ་མཁའི་རང་བཞིན་དུ། །མི་བསྒོམ་མི་བསྐྱེད་རང་སར་གཞག །མཉམ་ཉིད་ཡེ་ཤེས་གདོད་མའི་ངང་། །རྩ་བ་བྲལ་བའི་རང་བཞིན་དུ། །ཡེ་ཤེས་རླུང་གིས་མཐར་ཕྱིན་ཏེ། །བདེ་ཆེན་ས་ལ་མྱ་ངན་འདས། །འདི་ནི་རྫོགས་པའི་རིམ་པ་སྟེ། །མཆོག་གི་གོ་འཕང་མྱུར་དུ་ཐོབ། །སྔ་མ་གསུམ་ནི་བསྐྱེད་པ་སྟེ། །ཐུན་མོང་དངོས་གྲུབ་ཆར་བཞིན་འབབ། །དེ་ལྟར་བསྒོམ་ཤེས་རྣལ་འབྱོར་ལ། །འཇིག་རྟེན་འཇིག་རྟེན་འདས་པ་ཀུན། །ཇི་ལྟར་བསྐྱེད་རིམ་བསྒོམས་ཀྱང་འདྲ། །སྙིང་པོའི་རྫོགས་རིམ་ཁ་ལོ་བས། །ལེགས་བསྒྱུར་ཐར་པའི་གྲོང་དུ་འགྲོ། །གཞན་ཡང་འཁོར་འདས་མཉམ་པ་ཉིད། །ཇི་ལྟར་བསྒོམས་ཀྱང་བློ་ལས་འདས། །དེ་ལྟར་རྟོགས་ཏེ་འཁོར་བར་གྲོལ། །དེ་ཕྱིར་རྡོ་རྗེ་གཡུ་སྒྲོན་གྱི། །བསྐྱེད་དང་རྫོགས་པའི་རིམ་གཉིས་ཀྱི། །ཐར་ལམ་འབྲས་བུར་རབ་སྦྱིན་པས། །(༡༠༥)སྐལ་ལྡན་རྣམས་དང་འཕྲད་པར་ཤོག །ཤིན་ཏུ་ཡང་ཟབ་མཁའ་འགྲོའི་གནད། །བདེ་ཆེན་དངོས་གྲུབ་གཉིས་སྩོལ་བ། །དེ་འདྲ་རྒྱལ་སྲས་པདྨའི་ལུགས། །གང་དེ་དྲི་མེད་འོད་ཟེར་གྱིས། །གཅིག་ཏུ་བསྡུས་པ་ཟབ་མོའི་དོན། །སྟོན་གསུམ་གངས་རི་ཐོད་དཀར་རུ། །ལེགས་སྦྱར་དགེ་བས་འགྲོ་བ་ཀུན། །རྒྱལ་བའི་གོ་འཕང་ཐོབ་པར་ཤོག །འདི་ནི་རྩ་གནས་འཁོར་ལོ་ལས། །ཡི་གེ་བསྡུ་བའི་སྦྱོར་བ་ཡིས། །སྐལ་བཟང་དོན་དུ་གསལ་བར་བྱས། །གནད་འདིས་མྱུར་དུ་འགྲུབ་པ་ཡིན། །དཔལ་རྡོ་རྗེ་གཡུ་སྒྲོན་མའི་སྒྲུབ་ཐབས་ཟླ་བ་འདོད་འཇོ་ཞེས་བྱ་བ། ཨོ་རྒྱན་ཆེན་པོ་པདྨ་འབྱུང་གནས་ཀྱིས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས། སྟོན་གསུམ་མེ་ཏོག་དང་འབྲས་བུ་སྨིན་པའི་ཚེ། གངས་རི་ཐོད་དཀར་གྱི་མགུལ་ཨོ་རྒྱན་རྫོང་གི་གནས་སུ་སྦྱར་བ་རྫོགས་སོ། །དགེའོ།། །།

གཟའ་བདུད་གསང་སྒྲུབ།

༄༅། །གཟའ་བདུད་གསང་སྒྲུབ་བཞུགས་སོ། །རིན་ཆེན་ཤོག་འདྲ།

༄༅། གཟའ་བདུད་རཱ་ཧུ་ལའི་གསང་སྒྲུབ་དུག་གི་སྤུ་གྲི་ཞེས་བྱ་བ། སློབ་དཔོན་ཆེན་པོ་པདྨ་འབྱུང་གནས་ལ་ཕྱག་འཚལ་ལོ། །དྲག་གཏུམ་མི་བཟད་འབར་བའི་སྐུ། །ཆེ་མཆོག་ཧེ་རུ་ཀ་དཔལ་ལ། །བཏུད་དེ་ཟབ་ཆོས་རྒྱབ་བརྟེན་དུ། །རེག་ཆོད་དུག་གི་སྤུ་གྲི་བྲི། །

འདི་ལ་རྫས་དམིགས་སྔགས་གནད་གསུམ། །རྫས་ནི་ཕ་ཝང་ལོང་བུ་ཡི། །ངོས་བཞིར་ཏྲི་བཞི་ར་ཁྲག་བྲིས། །གསེར་དངུལ་ཟངས་ལྕགས་གཟི་རྙིང་དང་། །བདེ་གཤེགས་རིང་བསྲེལ་བཅས་པ་ནི། །འཁོར་ལོ་རྩིབས་བཞི་མུ་ཁྱུད་བཅས། །རྩིབས་ལ་ཧཱུྃ་བཞི་མུ་ཁྱུད་ལ། །ཨཱ་བཛྲ་ཙཎྜ་མཧཱ་རོ་ཥ་ན་ཧཱུྃ་ཕཊ། ཆེ་གེ་མོས་གཟའ་རྒོད་བརྟོད་ལ་ནོན་པར་གྱུར་ཅིག་སྭཱ་ཧཱ། ཞེས་བྲིས་ལྟེ་བར་རང་མིང་དང་། །གྲུབ་པར་གྱུར་ཅིག་ཅེས་པ་བྲི། །དེ་ལྟའི་འཁོར་ལོ་བྲི་བྱས་ལ། །འཁོར་ལོ་དར་ནག་གྲིལ་ལ་བཅངས། །དེས་ནི་འཚེ་དོགས་མི་བྱེད་ཅིང་། །ལུས་དང་གྲིབ་མ་བཞིན་དུ་འབྲང་། །དེ་ནས་བྲག་ནག་འཇིགས་པའི་སར། །ཕུང་ཤུལ་ས་བླངས་འབྲུབ་ཁུང་བཅའ། །རོ་སོལ་བྱུགས་པར་ལིང་ག་ནི། །དགྲ་གཟུགས་དཔྲལ་བར་དེ་ཡི་རུས། །སྙིང་གར་མིང་བྲིས་གཡས་གཡོན་དུ། །ཀ་ཏ་སྟཾ་སྟེ་བྷ་ཡ་མུ་ཁ་ཏཾ་ཡཱ། ཞེས་བྲིས་པྲ་ཚིལ་གྲིལ་ལ་གཞུག །བཤོས་བུ་དགུ་སྐོར་ནང་དུ་ཡང་། །ལིང་ག་ར་ཁྲག་བྲིས་ལ་གཞུག །དེ་ཉིད་འབྲུབ་ཁུང་སྟེང་དུ་གཞག །དམར་གཏོར་ཁྲག་སྣས་བརྒྱན་པར་བྱ། །དེ་ལ་གཟའ་ཡི་གཟུགས་བྲིས་གཟུག །དེ་ནས་རང་ཉིད་སྐད་ཅིག་གིས། །ཡེ་ཤེས་(༡༠༦)གཟའ་མཆོག་དུད་ཁ་ལ། །དབུ་དགུ་གཡས་གསུམ་དཀར་ལྗང་ལ། །གཡོན་གསུམ་དམར་ལྗང་དབུས་མ་གསུམ། །མཐིང་ནག་དུ་བའི་རྣམ་པ་ལ། །སྤྱི་གཙུག་སྒྲ་གཅན་བྱ་རོག་གདོང་། །ཕྱག་བཞི་གཡས་གཡོན་དང་པོ་ན། །ཆུ་སྲིན་ཞགས་པ་རལ་གྲི་བསྣམས། །འོག་མས་མདའ་གཞུ་རྒྱབ་ཏུ་འགེངས། །སྨད་སྦྲུལ་མིག་གིས་ལུས་ཁེངས་བསྒོམས། །ཐུགས་ཀའི་ཀྵ་ནག་འོད་འཕྲོས་པས། །ཕྱོགས་བཅུའི་སངས་རྒྱས་ཐུགས་ཀ་ནས། །ཡེ་ཤེས་གཟའ་མཆོག་སྤྱན་དྲངས་བསྟིམ། །མདུན་གྱི་བྲུབ་ཁུང་ནམ་མཁའ་ལ། །གཟའ་བདུད་ཆེན་པོ་འཇིགས་པའི་སྐུ། །ནམ་མཁའ་གང་བར་སྔར་བཞིན་བསྒོམ། །ཆུན་པར་དཀའ་ན་ཚོན་གང་བསྒོམ། །ཧྲཱི་ཤག་རུ་རྃ་ན་ག་ཙིཏྟ་ཏྲཾ། མ་མ་ཡོང་ཟ། འགྲམ་ཧ་ཧི། ཡོ་གེ་ཤ་ལ་ཛ་ཛཿ། ཟེར། དེ་ལྟར་འབོད་སྔགས་ཉེར་གཉིས་ཀྱིས། །རྒྱུ་ཕྱོགས་ཡེ་ཤེས་སྤྱན་དྲངས་བསྟིམ། །དམར་གཏོར་ལིང་ག་བཅས་པ་དེ། །དགྲ་བོར་བསམ་ལ་སྔགས་དེ་ལ། །བྷ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་པ་བཏགས་ལ་དབུལ་བར་བྱ། །དེ་ནས་སྔགས་རྒོད་ཉེར་གཉིས་པ། །ཞག་བདུན་བར་དུ་བཟླས་པར་བྱ། །དེ་ཚེ་བནྡྷེ་ཨ་ཙ་ར། །དངོས་སམ་རྨི་ལམ་ཉིད་དུ་འོང་། །ཐག་འཚེག་འོད་འབྱུང་སྒོ་བརྡུང་སོགས། །ཆོ་འཕྲུལ་སྣ་ཚོགས་ཅི་བྱུང་ཡང་། །སེམས་ཡིན་སེམས་ཉིད་ནམ་མཁའ་འདྲ། །གདོད་ནས་སྐྱེ་མེད་ངང་ལ་གཞག །འཇིགས་སྐྲག་མི་བྱ་བསྒོམ་བཟླས་བྱ། །དེ་ནས་ཞག་ནི་བཅུ་བཞི་རུ། །དགྲ་བོ་ཡོད་ན་གསོད་སྔགས་བཟླས། །ཨཱ་ཨ་ཀྲོ་ཏེ་ཀ་ཧྲཱི་ཤག་རུ་རཾ། མ་མ་ཡོང་ཟ། འགྲམ་ཧ་ཧེ་ཀེ་ཤ་ལ་ཆེ་གེ་མོའི་སྙིང་ལ་རྦད་ཛ་ཛ། ཞེས་བཟླས་དགྲ་བོ་བསད་དང་གཟིར། །རྡུལ་ཕྲན་ཆ་ཤས་ཙམ་མེད་པར། །གཟའ་མཆོག་ཁྲོས་པས་ཟོས་པར་བསམ། །དེ་ལྟར་ཞག་གྲངས་ཉེར་གཅིག་ཏུ། །ལྟ་བ་མ་ཡེངས་སྒོམ་བཟླས་བརྩོན། །ཐང་ལྷོད་མེད་པར་བསྒྲིམ་སྟེ་བསྒྲུབ། །དེ་ཡིས་སུ་ཡིན་ཕ་རོལ་སྒྲོལ། །ཇི་ལྟར་འགོར་ཡང་ཟླ་བ་གཅིག །ངེས་པར་འགྲུབ་པར་གདོན་མི་ཟ། །དེ་ནས་ལས་སྦྱོར་བསྟན་པ་ནི། །དགུ་སྟོང་ཉི་མ་ནུབ་མཚམས་ལ། །རང་ཁ་ལྷོ་ནུབ་མཚམས་བལྟས་ལ། །སྐྱེར་པ་སེ་བ་གྲུ་གསུམ་དུ། །འབྲུབ་ཁུང་སྟེང་རྩིག་གཟའ་བསྐྱེད་ལ། །མེ་སྦར་ལིང་ག་སྦྱིན་བསྲེག་བྱ། །གཏོར་མ་དབུལ་ཞིང་གཏོར་ཟོར་འཕངས། །ཐལ་བ་རྒྱ་གྲམ་འོག་ཏུ་མནན། །གནས་དེ་རང་གི་གཞི་ཡིན་ན། །སྒྲུབ་པ་ཐོན་པའི་ཤུལ་དེ་རུ། །བོང་དུག་ཐར་ནུ་སྤྱང་ཚེར་དང་། །གུ་གུལ་ནག་པོས་འབྲུབ་ཁུང་བཀྲུ། །རྩི་(༡༠༧)སྨན་སྣ་ཚོགས་བསྲེས་པའི་ས། །རིན་པོ་ཆེ་ཡི་བསྲེས་བྱུགས་ལ། །འབྲུབ་ཁུང་ནང་དུ་བཅུག་ལ་གཞག །དེ་ཡིས་དུག་ཕྱུང་བཀྲ་ཤིས་སོ། །གཞན་གནས་ལས་ཀྱི་རྗེས་བསྡུའོ། །ཡང་གཅིག་བརྟོད་ལ་གནོན་པ་ནི། །སྦྲུལ་དང་ར་རོག་ཤ་ཁྲག་དང་། །ཉ་ཤ་ར་ཚིལ་ཕ་ཝང་རྡོ། །རྟ་ནག་ར་ནག་ཁྱི་ནག་གི། །སྙིང་ཁྲག་དཀར་གསུམ་རྩི་སྨན་བཅས། །རྟ་ནག་ཐོད་པའི་ནང་དུ་གཞུག །རྟ་ཐོད་མཎྜལ་གྲ་རུ་གཞག །དེས་ནི་བརྟོད་ལ་ནོན་པར་འགྱུར། །ཡང་ཅིག་ཤི་ས་བསྟན་པ་ནི། །ཨཱ་བཛྲ་ཙཎྜ་མཧཱ་རོ་ཥ་ན་ཧཱུྃ་ཕཊ། ན་ཏེ་པ་ཏི་ཁ་ཛ་ཀེ་བེང་རུ་རུ་གྱི་མི་ཤ་ཡ་ཨཱ། མྱགས་ཐུམ་རིལ་རྦད་ཡཱ། རང་སྲོག་རང་གིས་གཅོད་པའི་ཚུལ། །ལས་རྣམས་འགྲུབ་པར་ཐེ་ཚོམ་མེད། །སྐབས་སུ་བཟླས་པས་མྱུར་དུ་འགྲུབ། །ཡང་ཅིག་ཞུད་ཁ་བླང་བ་ནི། །ཞུད་དེ་རྟགས་མེད་དམ་ཉམས་ན། །བསྐང་བཤགས་མཆོད་པ་དག་གིས་མཆོད། །འོ་མ་རྩི་སྨན་གུ་གུལ་དཀར། །ར་མཆིན་ཏིལ་ནག་ཕུད་ཀྱིས་མཆོད། །དེས་ནི་མྱུར་དུ་འགྲུབ་པ་ཡིན། །འཇིག་རྟེན་མཆོད་ཅིང་བསྟོད་པས་འགྲུབ། །དེ་ཕྱིར་བསྐང་གསོ་མཆོད་གཏོར་ནི། །དུས་གཉེན་བརྒྱད་དང་རྒྱུན་དུ་བྱ། །ཁྱད་པར་ཉི་ཤུ་དགུ་ལ་འོ། །དེས་ནི་ཐེ་ཚོམ་མེད་པར་འགྲུབ། །རྒྱལ་སྲས་པདྨ་འབྱུང་གནས་ཀྱིས། །ཕྱོགས་བཞིའི་ཟབ་གཏེར་ཆེན་པོ་བཞི། །ཡང་ཟབ་གཟའ་ཡི་གསང་སྒྲུབ་སྦས། །དེ་དག་ཀུན་གྱི་ཡང་ཟབ་གནད། །ཆིག་དྲིལ་དུག་གི་སྤུ་གྲི་ནི། །དྲི་མེད་འོད་ཟེར་བདག་གིས་བཀོད། །ཕྱི་རབས་བསྟན་པ་བསྲུང་བར་ཤོག །ཇི་ལྟར་བདག་གིས་སྒྲུབ་པ་ཡི། །གནད་རྣམས་བཅུད་ཀྱི་སྙིང་པོ་དྲིལ། །འདི་བས་ཟབ་པ་གཞན་མེད་པས། །གསང་ཞིང་སྦ་བས་བཅང་བར་བྱ། །སྙིང་དང་འདྲ་བའི་མན་ངག་འདིས། །བདག་གི་ཟབ་གཏེར་བསྲུང་བར་ཤོག །གཟའ་བདུད་རཱ་ཧུ་ལའི་གསང་སྒྲུབ། དུག་གི་སྤུ་གྲི་ཞེས་བྱ་བ། དཔལ་ཨོ་རྒྱན་གྱི་སློབ་དཔོན་པདྨས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས། སྟོན་གསུམ་གངས་རི་ཐོད་དཀར་དུ་བཀོད་པ་རྫོགས་སོ།། །།

དགེའོ།། །།

དྲང་སྲོང་གི་བསྟོད་པ།

༄༅། །དྲང་སྲོང་གི་བསྟོད་པའོ། །

༄༅། དེ་ནས་དྲང་སྲོང་ཆེན་པོ་ལ་བསྟོད་པ་འདི་གསུངས་སོ། །ཧྲཱིཿཁྱབ་མཇུག་ཆེན་པོ་སྒྲ་གཅན་འཛིན། །འཇིགས་པའི་ལུས་ལ་འབར་བའི་ཀློང་། །འཇིག་རྟེན་ཁམས་ཀྱི་དྲག་རྩལ་ཅན། །སྤྲུལ་པ་ཆེན་པོ་མི་བསྲུན་པ། །གནམ་ལྕགས་ཐོག་གི་བདག་པོ་སྟེ། །སྐྱིན་ཐང་སེར་བ་འབེབས་པའི་གཙོ། །དྲང་སྲོང་ཆེན་པོ་རྫུ་འཕྲུལ་ཅན། །རི་རབ་སྟེང་དུ་ལྷ་ཡི་གཙོ། །རྒྱ་མཚོའི་སྟེང་དུ་ཀླུ་ཡི་བདག །བར་སྣང་ཁམས་(༡༠༨)སུ་བསྐྱོད་ཙ་ན། །ལྷ་སྲིན་སྡེ་བརྒྱད་རྣམས་དང་བསྡོངས། །ལུས་གཅིག་མགོ་དགུ་སྲིད་གསུམ་གཙོ། །མགོ་གཅིག་ལྷ་སྲིན་ཁྲོས་པའི་ཞལ། །ཉི་མ་ཟླ་བ་གྲིབ་མས་གནོན། །གཅིག་ནི་བཞད་ཅིང་དགོད་པའི་ཞལ། །དགྱེས་པས་བཀའ་ཡི་བྱ་ར་མཛད། །གཅིག་ནི་ཁྲོས་པ་སྲིན་པོའི་གདོང་། །གདུགས་པའི་དགྲ་བགེགས་ཟས་སུ་ཟ། །གཅིག་ནི་རྔམ་ཞིང་ཟ་བྱེད་གདོང་། །གནམ་ལྕགས་མེ་ཡི་ཐོག་ཆེན་འབེབས། །གཅིག་ནི་འཇིགས་བྱེད་མ་རུངས་པ། །ཚ་གྲང་འཐབ་པའི་རྐན་སྒྲ་སྒྲོགས། །གཅིག་ནི་འཁྲུགས་བྱེད་འཇིགས་པའི་ཞལ། །གཡོ་འགུལ་ཆེན་པོའི་སེར་བ་འབེབས། །གཅིག་ནི་གཏུམ་བྱེད་ཡེ་ཤེས་ཞལ། །མངོན་ཤེས་ནུས་མཐུ་ཐོགས་མེད་སྟོན། །གཅིག་ནི་ལས་རྣམས་རྫུ་འཕྲུལ་གདོང་། །སངས་རྒྱས་བསྟན་པ་སྲུང་བར་བྱེད། །གཅིག་ནི་ཞི་བ་ལྷ་ཡི་ཞལ། །སྒྲུབ་པ་པོ་ལ་དངོས་གྲུབ་སྟེར། །ཧྲཱིཿཁྱོད་ནི་ཆོས་སྐྱོང་ཆེན་པོ་སྟེ། །སྟེང་གི་ཕྱོགས་ན་བྱ་རོག་ཞལ། །དཀོན་མཆོག་དབུ་འཕང་བསྟོད་པར་བྱེད། །རྭ་ཡི་མདའ་གཞུ་བསྣམས་པ་ནི། །སྡང་བྱེད་དགྲ་བོ་སྒྲོལ་བའི་རྟགས། །ཆུ་སྲིན་ཞགས་པ་བསྣམས་པ་ནི། །ས་བདག་ཀླུ་གཉན་འདུལ་བའི་རྟགས། །སྐུ་ལ་མིག་གིས་གང་བ་ནི། །ཕྱོགས་བཅུར་བསྟན་པ་སྐྱོང་བའི་རྟགས། །ཁྱོད་ནི་བདུད་འདུལ་ཆེན་པོ་སྟེ། །དཔལ་ལྡན་མགོན་པོའི་ལས་མཁན་མཆོག །རེ་མ་ཏི་ཡི་ཕོ་ཉ་ཆེ། །ཨེ་ཀ་ཙ་ཏིའི་བཀའ་སྡོད་དེ། །ཧེ་རུ་ཀ་ཡི་སྤྲུལ་པ་ཉིད། །རྡོ་རྗེ་འཆང་གིས་དབང་བསྐུར་ནས། །དཀྱིལ་འཁོར་བཅུག་ཅིང་དམ་ལ་བཏགས། །སྲིང་མོ་གདོང་མོ་མཆེད་བཞིར་བཅས། །ཀིང་ཀང་རྔམ་པའི་ལས་བྱེད་མ། །ཆོ་འཕྲུལ་འགྱེད་ཅིང་བསྟན་པ་བསྲུངས། །བྷ་ལིང་གཏོར་མ་འདི་བཞེས་ལ། །བསྟན་པ་བཤིག་པའི་དགྲ་བོ་ལ། །ཐོག་སེར་དབབ་པའི་དུས་ལ་བབས། །བསྟན་པ་བསྲུང་བའི་ལས་མཛོད་ཅིག །བཅོལ་བའི་ཕྲིན་ལས་གྲུབ་པར་མཛོད། །ཅེས་གསུངས་སོ། །འདི་ཁྲག་མཚོ་ཁོལ་མའི་རྒྱུད་ནས་དྲང་སྲོང་ཆེན་པོ་ལ་བསྟོད་པ་གསུངས་པ་རྫོགས་སོ།། །།

གཟའ་སྒྲུབ་པའི་གནད་ཡིག །རྡོ་རྗེ་འཛིན་ལ་ཕྱག་འཚལ་ལོ། །འདི་སྒྲུབ་པའི་གནད་ཡིག་ནི། །གདམས་ངག་གནད་ཐེམས་ཤིན་ཏུ་གཅེས། །རྫས་གནད་དམིགས་གནད་སྔགས་གནད་དོ། །རྫས་ནི་བློ་རྡོ་མན་ངག་བཞིན། །དམིགས་པ་རང་ཉིད་རཱ་ཧུ་ལ། །འཇིགས་པའི་ཐུགས་ཀ་ཀྵ་ནག་ལས། །འོད་འཕྲོས་ཕྱོགས་བཅུའི་སངས་རྒྱས་ཀྱི། །ཐུགས་ཀ་ཉིད་ནས་ཡེ་ཤེས་ཀྱི། །གཟའ་བདུད་སྤྱན་དྲངས་བདག་ལ་(༡༠༩)བསྟིམ། །མདུན་གྱི་ནམ་མཁར་འབྲུབ་ཁུང་དབུས། །གཟའ་བདུད་ཚོན་གང་གཞུང་བཞིན་བསྐྱེད། །འབོད་སྔགས་ཉེར་གཅིག་བཟླས་པ་ཡིས། །རྒྱུ་བའི་ཕྱོགས་ནས་གཟའ་བྱུང་ནས། །དེ་ཉིད་ལ་ནི་ཐིམ་པར་བསམ། །གཏོར་མ་དབུལ་ཞིང་ཐུན་རྫས་མཆོད། །བསྟོད་ནས་འབོད་སྔགས་ཞག་བདུན་བཟླས། །ཧྲཱི་ཤག་རུ་རྃ། ནཱ་ག་ཙིཏྟ་ཏྲཾ། མ་མ་ཡོང་ཟ། འགྲམ་ཧ་ཧི། ཡོ་གི་ཤ་ལ་ཛ་ཛཿ དེ་ལྟར་བཟླས་པས་དངོས་སུ་འོངས། །གང་འདོད་བཅོལ་ལ་འཇིགས་མི་བྱ། །དེ་ནས་བསད་སྔགས་བཟླས་པ་ནི། །དམིགས་པ་སྔར་བཞིན་འབོད་སྔགས་བཟླས། །གཏོར་མཆོད་བསྟོད་རྗེས་འདི་བཟླས་སོ། །ཨཱ་ཨ་ཀྲོ་ཏེ་ཀ་ཧྲཱི་ཤག་རུ་རཾ། མ་མ་ཡོང་ཟ། འགྲམ་ཧ་ཧི་ཀཱ་ལ་ཛ་ཛཿ དེ་ལྟར་ཞག་བདུན་བར་དུ་བསྒྲུབས། །དེ་ནས་སྔར་བཞིན་གཏོར་མའི་རྗེས། །བསད་སྔགས་མིང་དང་སྤེལ་ལ་བསྒྲུབ། །དེ་ལྟར་ཞག་གྲངས་ཉི་ཤུ་གཅིག །སོང་རྗེས་ལིང་ག་བསྲེགས་པ་ཡི། །ཐལ་བ་མནན་ལ་གཏོར་ཟོར་འཕངས། །དེས་ནི་ཐེ་ཚོམ་མེད་པ་ཡིན། །ཤིན་ཏུ་གསང་ནས་བསྒྲུབ་པ་གཅེས། །ཀློང་ཆེན་རབ་འབྱམས་བདག་གིས་ནི། །གཏེར་ཁ་དུ་མའི་གནད་མཐོང་ཞིང་། །བླ་མའི་མན་ངག་བཅུད་དྲིལ་ནས། །སྐལ་ལྡན་དོན་དུ་བྲིས་པ་ཡིན། །གནད་འདི་གཞན་ལ་མ་བསྟན་ཅིག །ཟབ། ཿ རྒྱ་རྒྱ་རྒྱཿ

གནོད་སྦྱིན་དམར་ནག་གི་སྒྲུབ་པ་མེ་རླུང་འཁྱིལ་པ།

༄༅། །གནོད་སྦྱིན་དམར་ནག་གི་སྒྲུབ་པ་མེ་རླུང་འཁྱིལ་པ་བཞུགས་སོ། །ཤོག་འདྲའི་སྐོར།

༄༅། དངོས་གྲུབ་ཀུན་གྱི་རིན་ཆེན་གཏེར། །པདྨ་ཐོད་ཕྲེང་རྩལ་ལ་འདུད། །གནོད་སྦྱིན་དམར་ནག་སྒྲུབ་པ་ཡི། །རིམ་པ་མེ་རླུང་འཁྱིལ་པ་བཤད། །

འདི་ལ་སྒྲུབ་པའི་རིམ་པ་མང་ཡང་། བརྟེན་ན་བཀྲ་ཤིས་ལ། རྦད་ན་མཐུ་ཆེ་བ་དྲིལ་སྒྲུབ་གསང་བ་ཡང་གསང་ཡིན་པས། དེ་ལ་རྟེན་བཅའ་བ། བསྒྲུབ་པར་བྱ་བ། ལས་ཕྲན་ཚེགས་བསྟན་པ་གསུམ་ལས། དང་པོ་ནི་རང་གི་སྒྲུབ་ཁང་དུ་སྟེགས་བུ་མདའ་གང་འབྲུབ་ཁུང་དང་བཅས་པའི་ཟུར་བཞིར། འོམ་བུའི་མདའ་བཞི་ལ་ཟ་འོག་དང་། བྱ་རྒོད་ཀྱི་སྒྲོ་ཅན། དར་སྣ་དང་རིན་པོ་ཆེ་སྣ་ཚོགས་པ་མགུལ་དུ་བཏག་པ་གཟུགས། མཎྜལ་གྱི་སྟེང་གི་ནམ་མཁར་འཛིན་གཏོར་སྤོད་དང་ཟས་སྣ་དང་རིན་པོ་ཆེས་བརྒྱན་པའི་ནང་དུ། འཁོར་དང་འབྱོར་པ་སྤེལ་ཅིག །བགེགས་དང་བར་ཆད་སྲུངས་ཤིག །འགལ་བྱེད་ཆམ་ལ་ཕོབ་ཅིག །ཅེས་པ་གསེར་གྱིས་བྲིས་ཏེ་གཞུག དེ་ལ་གནོད་སྦྱིན་གྱི་ཙ་ཀ་ལི་གཟུགས། །དེ་ཉིད་རྒྱུན་དུ་མི་གཤེགས་པར་གཞག་གོ། །འཕྲལ་གཏོར་ཅི་རིགས་པ་མཎྜལ་གྱི་ཟུར་དུ་བཤམ་(༡༡༠)མོ། །རྒྱུན་དུ་མི་འབྲལ་བ་བློ་རྡོའི་མན་ངག་ལ། དར་དམར་པོའམ་ཤོག་གུ་ལ་གནོད་སྦྱིན་གྱི་གཟུགས་བྲིས་པའི་ལྟོ་བར་མུ་ཁྱུད་རིམ་པ་བཞིར་བསྐོར་བའི་ཕྱི་མ་ལ། མཐུ་སེར་གྱི་དངོས་གྲུབ་སྩོལ་ཅིག་བྲིས། དེའི་ནང་མ་ལ་མི་ནོར་ཟས་གསུམ་སི་ཏི་([ཨ་]སིདྡྷི་)ཕ་ལ་ཧོ་བྲི། དེའི་ནང་མ་ལ་འཁོར་ལོ་རྩིབས་བརྒྱད་ལ། ཨེ་ཧེ་མ་རུ་ཙེ་དགྲ་བགེགས་ཐམས་ཅད་ཤ་ཏྲཱུཾ་མཱ་ར་ཡ་ཕཊ་བྲི། ལྟེ་བ་ལ་དྲག་པོའི་དངོས་གྲུབ་དང་། མི་ནོར་ཟས་གསུམ་གྱི་དངོས་གྲུབ་སྩོལ་ཅིག་བྲིས་པའི་དབུས་སུ་ཀྵ་དང་། ཧྲཱི་ཁ་སྤྲད་པ་མཚལ་གྱིས་གཟབ་མར་བྲི། དྲི་བཟང་དང་སྨན་སྣ་བྱུགས་ལ། རྡོ་ཕ་ཝང་ལོང་བུའི་ངོས་དྲུག་གི་གསུམ་ལ་ཧྲཱི་གསུམ། གསུམ་ལ་ཀྵ་གསུམ་བྲིས་ཏེ། རབ་གནས་བྱས་ནས་གྲིལ་ཏེ་ཟངས་ཁབ་དང་བཅས་པ་དར་དམར་པོས་གྲིལ་བ་ལ་ཚོན་སྐུད་སྣ་ལྔས་རེ་རེ་དཀྲིས་ཏེ། བྱ་ཕོ་མཚའ་ལུའི་སྙིང་ནང་དུ་བཅུག་པ་དེ་ཕྱིར་ཁུག་ཏུ་བཅུག་ལ་ལུས་ལ་བཅང་ངོ་། །དེས་ནི་སྙིང་ཉེ་བཀྲ་ཤིས་ཟས་ནོར་དང་འཁོར་འདབ་འཕེལ། ཅི་བགོ་བ་ཉན། ལུས་དང་གྲིབ་མ་ལྟར་འོང་ངོ་། །

གཉིས་པ་སྒྲུབ་པ་ནི། སྔོན་འགྲོ་བདག་ཉིད་ལྷར་གསལ་བས། དངོས་གཞི་གནོད་སྦྱིན་བསྐྱེད་ཅིང་སྔགས་བཟླས་པ། རྗེས་བསྟོད་བསྐུལ་བྱ་བ་དང་གསུམ་ལས། དང་པོ་ནི་རང་ཉིད་པདྨ་དྲག་སྒྲུབ་གང་རུང་དུ་བསྒོམས་ནས་ཐུགས་སྔགས་ཅི་འགྲུབ་བཟླས་སོ། །དངོས་གཞི་ནི་མདུན་གྱི་བར་སྣང་ལ་གནོད་སྦྱིན་དམར་ནག་ཞལ་གཅིག་ཕྱག་བཞི་པ། ཟངས་ཀྱི་བྱ་ཁྱུང་དམར་པོ་བཅིབས་པ། ཕྱག་གཡས་ཀྱི་དང་པོ་རལ་གྲི། འོག་མ་གྲི་གུག །གཡོན་དང་པོ་དགྲ་སྙིང་དང་བདུད་ཞགས། འོག་མ་བྷནྡྷ་ཁྲག་གིས་བཀང་བ་འཛིན་པ། རལ་པ་དམར་སེར་གྱེན་དུ་བརྫེས་ཤིང་སྤྱན་གསུམ་པ། ཞལ་གདངས་པ་མཆེ་བ་གཙིགས་པ། ཐལ་ཆེན་དང་ཞག་གི་ཚོམ་བུ་ཅན། མི་ལྤགས་ཀྱི་གཡང་གཞིས་སྟོད་གཡོགས་པ། སྟག་གི་པགས་པས་སྨད་དཀྲིས་པ། མེའི་ཚྭ་ཚྭ་དང་ཐོག་སེར་འཕྲོ་བ། གདོང་མོ་བཞི་དང་ལྷ་སྲིན་སྡེ་བརྒྱད་དང་། ཤ་ཟ་སྟོང་གིས་བསྐོར་བར་བསམས་ལ། ཚིལ་ཆེན་གྱི་དུད་པ་བཏང་། ཐོད་རྔ་དང་རོལ་མོ་དཀྲོལ་ནས། བྷྲཱུྃ་བྷྱོ། སྔོན་གྱི་བསྐལ་པ་དང་པོ་ལ། །ཧེ་ཆེན་བརྡལ་བའི་དུར་ཁྲོད་དུ། །བསད་ཁྲག་རྦ་ཀློང་དཀྱིལ་འཁོར་ནས། །གནོད་སྦྱིན་ཕུང་བྱེད་མཐུ་རྩལ་ཅན། །ཆིབས་སུ་ཟངས་ཀྱི་བྱ་ཁྱུང་བཅིབས། །འཁོར་དུ་ཤ་ཟ་སྟོང་གིས་བསྐོར། །གནོད་སྦྱིན་ཆེན་པོ་སྐུ་བསྐྱོད་ཅིག །ཤན་པ་དམར་ནག་དམ་ལ་ཤོག །ཨེ་ཧེ་(༡༡༡)རྨ་རུ་ཙེ་གྷུ་ན་ཧྲི་ཏྲི། གྷྲཾ་བྷྱོ་ཤ་རཾ་བྷྱོ། ཕུ་རུ་ཛ་གྷྲིག །ཧ་ལ་འགྲན་ཏ་ཡ་ཛཿཛ། ཞེས་པ་ཉི་ཤུ་རྩ་གཅིག་བརྗོད་པས། ལྷོ་ཕྱོགས་ཀྱི་དུར་ཁྲོད་ནས། རྟེན་བསྐྱེད་པ་དེ་ལ་ཐོགས་མེད་དུ་བྱོན་ནས་ཐིམ་པར་བསམས་ལ། སྔགས་དེའི་མཐར་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་པ་བཏགས་པ་བདུན་གྱིས་གཏོར་མ་ཕུལ་ནས། སྲོག་གི་སྙིང་པོ་བཟླས་པ་ནི། ཨེ་ཧཾ་ཤཾ་ཏྲི་ཏཾ་རྩལ་ཏྲི་ར་གཾ་ས་མ་ཡ་ཛཿཛཿ། ནཱ་ག་རཱ་ཛ་ཀྲོ་ཏ་ནི། ཏྲི་ཁ་ཐུན་ཏྲི་ཁ་ཐུན་ཨ་བྷི་ཤུ་ནཱ་ག་རཱ་ཛ་ཛཿཛཿ། ཏྲི་ཁ་ཐུན་བྷྱོ། དགྲ་བགེགས་མཱ་ར་ཡ་རྦད། ཅེས་ཅི་འགྲུབ་བཟླས་རྗེས་བསྟོད་བསྐུལ་བྱ་བ་ནི། གཏོར་མ་སྔར་བཞིན་ཕུལ་ལ་རོལ་མོ་དབྱངས་དང་བཅས་པས་འདི་སྐད་དོ། །ཨེ་ཧེ་རྨ་རུ་ཙེ་བྷྱོ། གླིང་བཞི་སྲིད་པའི་ཕོ་བྲང་ནས། །ཕུང་བྱེད་དམར་ནག་གཤེགས་སུ་གསོལ། །སློབ་དཔོན་པདྨའི་སྤྱན་སྔ་རུ། །བསྟན་པ་བསྲུང་བར་ཞལ་བཞེས་པའི། །གནོད་སྦྱིན་ཆེན་པོ་གཤེགས་སུ་གསོལ། །ཕྱག་དང་ཞབས་གཉིས་བསིལ་མཛད་ལ། །པདྨ་ཉི་ཟླའི་གདན་ལ་བཞུགས། །གནོད་སྦྱིན་འཁོར་དང་བཅས་པ་ལ། །དྭངས་པའི་ཡིད་ཀྱིས་ཕྱག་འཚལ་ཞིང་། །ཕྱི་ནང་གསང་བའི་མཆོད་པ་འབུལ། །འགལ་འཁྲུལ་ཉམས་ཆག་ཐམས་ཅད་བཤགས། །སྐུ་གསུང་ཐུགས་ཀྱི་དངོས་གྲུབ་སྩོལ། །དགྱེས་པའི་ཞལ་བཟང་དུས་འདིར་སྟོན། །བཅོལ་བའི་ལས་རྣམས་འགྲུབ་པར་མཛོད། །ཅེས་མཆོད་བསྟོད་བྱའོ། །དེ་ལྟར་ཞག་ཉི་ཤུ་རྩ་གཅིག་མཚམས་བཅད་དེ་བསྒྲུབས་པས། དངོས་སམ་རྨི་ལམ་དུ་རོལ་མོའི་སྒྲ་དང་། འོད་དང་སྐྱེ་བོ་མང་པོ་འདུ་བ་དང་། དཔོན་སྐྱ་དང་། ཞང་བློན་དང་། དགེ་བཤེས་དང་། བན་བོན་གྱི་ཚོགས་རྣམས་བདག་ལ་འདུད་པ་དང་། ནོར་དང་འབྲུའི་གཏེར་རྙེད་པ་ནི་འགྲུབ་པའི་རྟགས་སོ། །སྔོན་དུ་སྒྲུབ་པའི་ལས་འདི་ཁོ་ན་གལ་ཆེའོ། །ཕྱིས་ནས་གང་འདོད་པ་འགྲུབ་པ་ཡིན་པས་སྒྲུབ་པ་ལ་འབད་པར་བྱའོ། །

གསུམ་པ་ལས་ཕྲན་ཚེགས་སྒྲུབ་པ་ལ། དགྲ་བསད་པ་དང་། ངག་མནན་པ་དང་། སེར་བ་དབབ་པ་དང་། ཆོ་འཕྲུལ་གཏོང་བ་དང་། སྲིའུ་གསོ་བ། ནོར་སྒྲུབ་པ་དང་དྲུག་ལས། དང་པོ་བསད་པ་ནི། བྲག་དམར་གྱི་ཕུག་པ་ལ་སོགས་པར། ས་སྟེགས་མདའ་གང་གྲུ་གསུམ་པ་རོ་སོལ་གྱིས་བྱུགས་པར། དགྲ་བོའི་ལིང་ག་བྲིས་ཏེ། ཛས་མཐའ་བསྐོར་ནས། དགུག་གཞུག་བྱ་སྟེ། ཁྱི་ཐོད་ལྕགས་ཀྱི་འཁོར་ཁང་དུ་བསམས་པར་བཅུག་ནས། བདག་དང་གནོད་སྦྱིན་གྱི་སྒོམ་(༡༡༢)བཟླས་སྔར་དང་འདྲ་བ་ལས། སྔགས་ནི། ཨེ་ཧེ་རྨ་རུ་ཙེ། གྷུ་ན་ཧྲཱི་ཏྲི། བྷྲཾ་བྷྱོ། ཤ་རཾ་བྷྱོ། ཕུ་རུ་ཛ་གྷྲིག །ཧ་ལ་འགྲན་ཏ་ཡ། གྱིན་ཏ་རྦད་སོད། སུ་རུ་སྙིང་ཙེ། ཨ་པ་ལཾ་ཆེ་གེ་མོ་མཱ་ར་ཡ་སོད། ར་རྒྱུག་སྲོག་ལ་རྒྱུག །ཤ་ལ་རྔམ། དབུགས་ལ་རྔུབས། ཁྲག་ལ་འཇིབས། ཙིག་ཙིག་སྲོག་ལ་ཡཾ་ཡཾ། ཞེས་བཟླས་ནས། བསྟོད་བའི་རྗེས་ལ། གནོད་སྦྱིན་ཆེན་པོ་མ་རུངས་པ། །ཤ་ཟ་ཁྲག་འཐུང་སྟོང་གིས་བསྐོར། །ལྷ་སྲིན་སྡེ་བརྒྱད་དམག་དཔུང་བཅས། །དགྲ་བོའི་སྟེང་དུ་ད་རྒྱུག་ཅིག །རྦད་ཀྱང་ཕྲིན་ལས་མི་བྱེད་ན། །དམ་ཚིག་ཉམས་པར་མི་འགྱུར་རམ། །ད་དུང་དགྲ་བོ་མི་གསོད་ན། །གནོད་སྦྱིན་ཁྱོད་ལ་ཅི་བྱུང་གི། །ད་ལྟ་ཉིད་དུ་སོད་ལ་ཤོག །ཤ་ཟོ་ཁྲག་འཐུང་སྙིང་རྩ་ཕྱུང་། །བསད་རྟགས་དོན་སྙིང་ཁྱེར་ལ་ཤོག །ཅེས་རྦད་ལ། བསད་སྔགས་དེ་ལྕགས་ཕྱེ་ཟངས་ཕྱེ་རྡོ་ཕྱེ་ཉུང་ནག་དུག་སྣའི་ཐུན་དང་བསྡེབས་ལ། ལིང་ག་བྲབ་པས། རྡུལ་ཕྲན་དུ་སོང་བར་བསམ་མོ། །དེ་ལྟར་ཞག་བདུན་བསྒྲུབས་པས་རྨི་ལམ་དུ་དོན་སྙིང་འབྱིན་པ་དང་། ལིངས་བྱེད་པ་དང་། ཤིང་གཅོད་པ་ལ་སོགས་པ་རྨིས་དུས་གྲུབ་པས། ལིང་ག་མཚོན་གྱིས་གཏུབས་ལ་མེ་ནང་དུ་གནོད་སྦྱིན་བསྐྱོད་པའི་ཞལ་དུ་ཕུལ་ནས་ཐལ་བ་ལམ་རྒྱ་གྲམ་གྱི་འོག་ཏུ་མནན་པས། ལས་ཟླ་བ་མི་འགྱངས་བར་འགྲུབ་བོ། །དེ་ལྟར་བྱས་ཀྱང་མ་གྲུབ་ན། གནད་ལ་དབབ་པ་ནི། གནོད་སྦྱིན་གྱི་གཟུགས་སྲོག་སྔགས་དང་བཅས་པ་བྲིས་ཏེ། དགུག་གཞུག་བྱས་ནས། ཏེ་ལོའམ། ཕག་ཐོད་དུ་བཅུག་ལ། རང་གི་མལ་འོག་ཏུ་དོང་གྲུ་གསུམ་བྲུས་པའི་ནང་རོ་སོལ་བྱུགས། རོ་ཐལ་བཏིང་ནས་ཐོད་པ་དེ་གཞག །ས་ཚོན་སྣ་ལྔས་སྟེང་གཡོགས། རྡོ་རྗེ་རྒྱ་གྲམ་བྲིས་པའི་གཡམ་པས་ཁ་བཅད་ལ། དོང་ལྕགས་ཁང་དུ་བསམས་པས་གནོད་སྦྱིན་བཀའ་ཉན་པར་བསམ་ཞིང་། རང་ཉིད་ལྷར་གསལ་བས་དྲག་སྔགས་བཟླས་པས། དགྲ་རྟགས་བྱུང་བ་དང་། ཐོད་པ་ཕྱུང་ལ་སྐུ་བཏོན་ཏེ་འོ་མས་བཀྲུས་ལ་བཟོད་པར་གསོལ་ཏེ། ལས་སྦྱོར་བྱས་པས་འགྲུབ་བོ། །དེས་ཀྱང་མ་གྲུབ་ན། སྔགས་ཀྱི་སྒྲོམ་བྱ་བ་ནི། ཨཱ་ཀ་ཁ་ག་གྷ་ང་། ཧེ་བྷྱོ་རྨ་རུ་ཙེ་གྷུ་ན་ཧྲཱི་ཏྲི་ཙིཏྟ་ཧྲིང་ཧྲིང་ཛ། ཞེས་བཟླས་པས་རྟགས་བྱུང་བ་དང་། ཨེ་ཧེ་རྨ་རུ་ཙེ་གྷུ་ན་ཧྲཱི་ཏྲི། གྷྲཾ་བྷྱོ་ཤཾ་རཾ་བྷྱོ། ཕུ་རུ་ཛ་གྷྲིག་ཧལ་པ་འགྲན་ཏ་ཡཱ། གྱིན་ཏ་རྦད་སོད། སུ་རུ་སྙིང་ཙེ། ཨ་པ་ལཾ་མཱ་ར་ཡ་སོད། སརྦ་ཤ་ཏྲཱུཾ་ཆེ་གེ་མོ་མཱར་ཡ་རྦད། ཅེས་སྔར་གྱི་བསད་སྔགས་ཀྱིས་(༡༡༣)བྲབ་ལ། སྲོག་གནོན་གྱི་ལས་བྱས་པས་མི་འགྲུབ་མི་སྲིད་དོ། །

ངག་གནོན་ནི་དུག་ཤོག་ལ་དགྲའི་ལིང་ག་ལྕེ་ལྟོ་བར་དྲངས་པའི་དབུས་སུ་རྡོ་རྗེ་རྒྱ་གྲམ་བྲིས་པའི་རྭ་བཞི་ལ། ཨཱ་ནན། ཨཱ་ནན། ཧཱུྃ་ནན། སྟྭཾ་བྷ་ཡ་ནན། ལྟེ་བར་ནྲ྇་བྲི། ལྕེའི་ཐ་མར་ཆེ་གེ་མོའི་ལུས་ངག་ཡིད་གསུམ་སྟྭཾ་བྷ་ཡ་ནན་བྲིས་ཏེ། དུག་ཁྲག་གིས་བྱུགས་ལ་དགུག་བཞུགས་བྱས་ལ། སྐུད་པ་ཕྱིར་བཀལ་གྱི་ཚོན་སྐུད་ཀྱིས་དཀྲིས་ཏེ། ཁྱི་ཐོད་དམ་ལྐུགས་པའི་ཐོད་པར་བཅུག་ལ། དུག་སྣ་དང་། ཉུང་ནག་གི་ཐུན་གྱིས་བྲབ་ཅིང་། རྩ་སྔགས་ཀྱི་ཤམ་དུ། ཨཱ་ལཾ་ནྲ྇་ཛ། དགྲ་བོ་ཆེ་གེ་མོའི་ལུས་ངག་ཡིད་གསུམ་སྟྭཾ་བྷ་ཡ་ནན། ཨ་ལཾ་ནྲ྇་ཛ་ཧཱུྃ་ལཾ་ནྲ྇་ཛ། ནཱ་ག་ཤ་ཡ་ཧཱུྃ་ཕཊ། ཅེས་བཟླས་ཏེ། ཉིན་མོ་ཐུན་གྱིས་བྲབ། མཚན་མོ་རང་གི་མལ་འོག་ཏུ་དོང་གྲུ་གསུམ་བྲུས་པར་བཅུག་ནས་རོ་གཡམ་གྱིས་ཁ་བཅད་ལ་ཞག་གསུམ་བསྒྲུབ་ནས། ལིང་ག་མལ་འོག་ནས་ཕྱུང་སྟེ་ཚྭ་ཚྭ་ནག་པོའི་ཞབས་སུ་བཅུག་ནས་ལྷ་ཁང་རྙིངས་པའི་ཐེམ་འོག་ཏུ་མནན་པས། དགྲའི་ནུས་པ་ཉམས། ངག་ལྐུགས་ཁོ་རང་གི་བྱད་ཁ་ཁོ་རང་ལ་ལོག་ནས་བརླག་པར་འགྱུར་རོ། །འདི་ནི་སྔགས་པ་ནང་འགྲས་ན་བྱའོ། །

སེར་བ་དབབ་པ་ནི། འབྲུབ་ཁུང་གྲུ་གསུམ་དུ། རོ་སོལ་དང་། ཐལ་ཆེན་བྱུགས་ལ། ར་དམར་རྒྱའམ་ཝ་ཐོད་དུ་མུ་ཟི་ནག་པོ། ལྕགས་ཕྱེ། དངུལ་རྡོ། ཉུང་ནག །སྔོ་སྣ། སེར་སྲུང་གཞི་བདག་དང་བཅས་པའི་མིང་བྲིས་པ་རྣམས་བཅུག་ལ། མུན་པར་མཚམས་བཅད་ནས་ཐུན་གྱིས་བྲབ་ཅིང་། ཨེ་བྷྱོ་རྨ་རུ་ཙེ། གྷུ་ན་ཧྲཱི་ཏྲི། ཕྲ་གྷྲཾ་བྷྱོ་ཤཾ་རིལ་སུ་རུ་ཕྲ། གྷྲིག་ཧྲིལ་གྷྲན་ཏ་ཕྲ། གྱིན་ཏ་སུ་རུ། ཨ་པ་ལ་ཕྲ། རཾ་རཾ་ཏྲི་ཐུན། ཕྲ་ཉིག་ཧྲིལ་རྨར་སྟག་ལིང་ཤར་ལྡིང་བྷྱོ། འུར་བ་ཕྲ་ཕྲ་སེང་འུར། དཀར་ཐོག་ལིང་། དཀར་བྲན་བཅུག །གལ་བུན་བུན་ལོངས། ཀཱ་ལ་ཀཱ་ལ། བཾ་ཧྲིལ་ཧྲིལ། ཤར་ཤར་ཕོབ་ཡ། ཞེས་བཟླས་ཤིང་རྟགས་མ་བྱུང་གི་བར་དུ་བསྒྲུབ། དེ་ནས། ཨཱ་ཀ་ཁ་ག་གྷ་ང་། ཧེ་བྷྱོ། ཨེ་རྨ་རུ་ཙེ། གྷཱུ་ན་ཧྲཱི་ཏྲི། རཀྵ་བ་ཤ་ཁ་རག་དུན་ཏྲི། ཐ་ཏྲི་དུ་མཱ་ར་ཡ། རག་ཤ་ཁ་འདར་ཨུ་ཐཱ་གཟིར་གཟིར་ཡཱ། ལོ་ཐོག་སྔོན་པོ་དྲོངས། པི་པི་ཤར་ཤར། ཁ་དྲག་རྩ་དམར་པོ་ལང་ལང་། སྤུར་ཡ། དམ་ཉམས་ཡུལ་དུ་རཾ་རཾ། རིལ་རིལ། ཕྲོམ་ཕྲོམ། ཀིང་ཀང་དྲག་ཏུ་ཕོབ་ཡ། སྲིན་ཕོ་མོ་ལོང་། ཁྱུག་ཁྱུག །འུར་འུར། ཧྲིལ་ཧྲིལ། ཤར་ཤར། བྷྱོ་བྷྱོ། ཕོབ་ཕོབ། ཅེས་བཟླས་པས། སྐམ་འབྲུག་གློག་དམར་སྒྲུབ་ཁང་དུ་འབྱུང་ཞིང་རྨི་ལམ་དུ་རྩས་མ་བརྔ་བ་(༡༡༤)དང་། གནམ་ས་འཕོ་འགྱུར་བྱེད་པ་དང་། འཇའ་འོད་འཁྱིལ་པ་དང་། ཉི་ཟླ་ལྷུངས་པ་ལ་སོགས་པ་འོང་ངོ་། །དེ་ནས་ཐུན་དོང་གི་ཐོད་པས་ནམ་མཁའ་མ་མཐོང་བར་བྱས་ལ། དགྲའི་འོང་ས་དང་རི་ཟུར་དང་། ཡུལ་ལྷའི་རྟེན་ཡོད་སར་ཐུན་རེ་སྦས་ནས། དུས་གཉན་ལ་སེར་ཐུན་འོང་བར་འཕངས། གཏོར་མ་བཏང་ནས། བྷྱོ་གནོད་སྦྱིན་ཆེན་པོ་དྲག་རྩལ་ཅན། །སྡེ་བརྒྱད་ཀུན་གྱི་དམག་དཔོན་མཛད། །སྲིན་མོ་གདོང་མོ་མཆེད་བཞིར་བཅས། །ཀི་ཀང་སྔ་མའི་ལས་མཛད་ཀུན། །དམ་ཉམས་ཡུལ་དུ་ཀིང་ཀང་ཕོབ། །གནོད་སྦྱིན་ཆེན་པོ་ཟོར་བའི་གདོང་། །དུས་ལ་བབ་བོ་ས་མ་ཡ། །དགྲ་བོའི་ལོ་ཐོག་དྲུངས་ནས་ཕྱུང་། །ཐོག་སེར་སྡང་བའི་དགྲ་ལ་ཕོབ། །འབྲུ་དང་སྔོ་རྣམས་བཅུད་བསྡུས་ལ། །རྣལ་འབྱོར་སྒྲུབ་མཆོག་བདག་ལ་སྩོལ། །ཅེས་རྦད་ཅིང་དུལ་མོ་བརྡབས་པས་དེའི་མོད་ལ་འབབ་ངེས་སོ། །

ཆོ་འཕྲུལ་གཏོང་བ་ནི། གནོད་སྦྱིན་གྱི་གཟུགས་སྤྲ་ཚིལ་ལ་ལས་བྱས་པའི་མགོ་ལ་སྲིན་བྱའི་སྒྲོ་གཟུག །སྙིང་ཁར་དགྲའི་ལིང་ག་ལ། ཁྱིམ་དུ་ལྟས་ངན་སྣ་ཚོགས་དང་། སྨྱོ་འབོག་ཐོང་ཞིག་ཅེས་པ་བྲིས་ལ་གཞུག །དེ་ཝའི་ཐོད་པར་བཅུག་ལ། ཨེ་བྷྱོ་མ་རུ་ཙེ། ར་རྒྱུག་ཤམ་རྒྱུག །འཕྲུལ་ཏིང་ལིང་ཀ་ནི། དྷ་མ་ཛུ་ཏི་སུ་ཏྲི་མུན་ཏྲི། ཏྲཻ་ལཱོ་ཀྱ། ཤ་མ་བུ་ཏྲི། ཤད་ཤད་བྷྱོ། ལྟས་ངན་སྣ་ཚོགས་དགྲ་ལ་ཐོང་། ཞེས་བཟླས་པ་ཞག་ལྔར་བསྒྲུབས་ནས། དགྲ་བོའི་གྲོང་མཐོང་བའི་རི་ཟུར་དུ་སྦས་ཏེ། ས་དམར་སྤར་གང་གཏོར་ལ། གྲོང་འདིར་མི་འདིའི་ཁྱིམ་དུ་སོང་ཞིག །ཅེས་ལམ་བསྟན་པས། འོད་དང་། མེ་སྟག་དང་། རྡོ་ཆར་དང་། སྨྱོ་འབོག་དང་། ཁང་པ་རྡིབ་པ་ལ་སོགས་པ་ཡོང་ངོ་། །བབས་བྱེད་ན་ཐོད་པ་ནས་ལིང་ག་བཏོན་ནས་སྤོས་ཆུས་བཀྲུའོ། །

སྲིའུ་གསོ་བ་ནི། མ་བུའི་མལ་གྱི་སྟེང་དུ་རྟེན་གཏོར་ལ། མདའ་འུག་སྒྲོ་མའི་མགུལ་དུ་གནོད་སྦྱིན་གྱི་སྐུ་དང་དར་ལེབ་རྒན་བཏགས་པ་བཙུགས་ནས་ཕུལ། བསྟོད་བསྐུལ་བྱས་ནས། བུ་ཆུང་འདི་སྲུངས་ཤིག་བྱ་ཞིང་། གནོད་སྦྱིན་གྱི་སྐུ་བྲིས་ནས། རྩ་སྔགས་བྲིས་ཏེ་དྲིལ་ནས་བུ་ཆུང་ལ་བཏགས། རྫས་བསྲུང་ལ། གླ་རྩི་ཤིང་ཀུན། མུ་ཟི་ནག་པོ། ཟ་འོག །སྤྱང་བྲུན། བདུད་རྩི། སྟག་གི་སྡེར་མོ། བྱ་རོག་གི་མགོ། སྐེ་ཚེ། བྲག་དྲེག །རྒྱ་ཚིལ། ཐལ་ཆེན། ཤི་སྐྲ། སྒོག་སྐྱ། སླེ་ཏྲེས། བ་སྤྲུ། རྟ་བོན་པ། བྱི་ལའི་བྲུན་རྣམས་རྟ་ཚིལ་དང་བསྲེས་ལ། ཕྱེ་མའི་ཐུམ་པོ་ལུས་ལ་(༡༡༥)བཏགས། བུ་ཆུང་ཉོག་ན་དེ་རྣམས་ཀྱི་དུད་པས་བདུག །དུས་བཟང་ལ་གཏོར་མ་བཏང་བས་སོས་ངེས་སོ། །

ནོར་སྒྲུབ་པ་ནི། སྒྲུབ་ཁང་དུ་མཎྜལ་དམར་པོ་ཟླ་གམ་གྱི་སྟེང་དུ། གཏོར་མ་སྒྲུབ་ཐབས་བཞིན་བཤམས། དར་དམར་ལ་གནོད་སྦྱིན་གྱི་སྐུ་ཞལ་གཅིག་ཕྱག་གཉིས་ཕྱེད་སྐྱིལ་ཅན། གཡས་ལྕགས་ཀྱུ། གཡོན་ནེའུ་ལེ་འཛིན་པ། དར་ཟབ་དང་རིན་པོ་ཆེའི་རྒྱན་གྱིས་སྤྲས་པ། པདྨ་དང་བུམ་པའི་སྟེང་ན་དམར་གསལ་ཁྲོ་འཛུམ་དུ་བཞུགས་པ་བྲིས་པའི་རྒྱབ་ཏུ་རྩ་སྔགས་ལ་མི་ནོར་ཟས་གསུམ་གྱི་དངོས་གྲུབ་སྩོལ་ཅིག་བྲིས་པའི་ནང་དུ། རྡོ་ཕ་ཝང་ལོང་བུ་ལ་གསེར་རམ་པདྨ་རཀྟས་ཏྲི་དྲུག་བྲིས་པ་ལ། རབ་གནས་བྱས་པ་དེ་དར་ཟབ་ཀྱིས་གྲིལ་ལ་ཐོད་པ་མཚན་ལྡན་འབྲུ་དང་རིན་པོ་ཆེས་བཀང་བ། དེའི་ནང་དུ་བཞག་པ་དེ་དཀྱིལ་འཁོར་གྱི་སྟེང་དུ་ཟངས་གཞོང་དུ་གཞུག་ལ་མཆོད་པས་མཐའ་བསྐོར་ཏེ། རང་ཉིད་པདྨའི་བསྒོམ་བཟླས་བྱས་རྗེས། ཐོད་པ་རིན་པོ་ཆེའི་གཞལ་ཡས་ཁང་དུ་བསམ་པའི་ནང་དུ་གནོད་སྦྱིན་བྲིས་པ་ལྟར་བསྐྱེད་ལ་ཡེ་ཤེས་པ་བསྟིམ། གཏོར་མ་བཏང་། བསྟོད་པ་བྱས་ནས། རང་གི་སྙིང་གའི་ཧཱུྃ་ལས་འོད་འཕྲོས། གནོད་སྦྱིན་གྱི་ཐུགས་ཀའི་ཧྲཱིཿལ་ཕོག་པས། འཇིག་རྟེན་གྱི་ཁམས་ཀྱི་མི་ནོར་ལོངས་སྤྱོད་ཐམས་ཅད་བསྡུས་པར་བསམ་ལ། ཨེ་ཧེ་བྷྱོ་རྨ་རུ་ཙེ། རད་ན་སི་ཏི་([ཨ་]སིདྡྷི་)ཛ། གྷུ་ན་ཧྲི་ཧྲི། རད་ན་སི་ཏི་([ཨ་]སིདྡྷི་)ཧཱུྃ། གྷྲཾ་བྷྱོ། ཤཾ་རད་ན་སི་ཏི་ཛ་ཧཱུྃ། སུ་རུ་སི་ཏི་ཛ་ཧཱུྃ། སུ་རུ་སི་ཏི་([ཨ་]སིདྡྷི་)ཛ། གྷྲིག་སི་ཏི་ཧཱུྃ། གྷྲ་ན་ཏ་རད་ན་སི་ཏི([ཨ་]སིདྡྷི་)་ཛ། གྱིན་ཏ་ཨ་ཏྲི་ནྲི་སི་ཏི་([ཨ་]སིདྡྷི་)ཛ་ཧཱུྃ། ཨ་པ་ལམ། པ་ཤཾ་ཀུ་རུ་སི་ཏི་([ཨ་]སིདྡྷི་)ཧཱུྃ་ཛ། ཞེས་བཟླས་པས། རིན་པོ་ཆེའི་ཆར་བབས་པ་དང་། ནོར་རྙེད་པ་དང་། ཁྲོམ་འདུ་བ་དང་། རྔ་བརྡུང་བ་དང་། དུང་འབུད་པ་དང་། འབྲུ་དང་ལོངས་སྤྱོད་སྡུད་པ་རྨིའོ། །དེ་ནས། ཨེ་བྷྱོ་རྨ་རུ་ཙེ་ཨ་ཏྲི་ནྲ྇་ཛ། སི་ཏི་([ཨ་]སིདྡྷ་)ཟབ་མོའི་གདམས་པ་བདུད་རྩིའི་སྨན་དང་འདྲ། །ཉོན་མོངས་ནད་རྣམས་གསོ་བའི་མཆོག་ཡིན་པས། །རྒྱུད་ལ་བརྟེན་ཅིང་ལེགས་པར་གོམས་པ་ཡིས། །ད་ལྟ་ཉིད་ནས་ཀློང་དུ་འགྱུར་བར་མཛོད། །ཕ་ལ་རད་ན་ཁ་ཏེ་ཧཱུྃ་ཛ། འགུལ་འགུལ་མ་མ་ཧྲིང་ཧྲིང་། མ་མ་ཁ་ཤི་བཾ། ཨ་ཀར་ཤ་ཡ་ཛ། ཨ་ཀར་ཤ་ཡ་ཧྲིང་། མི་འགྲམ་ཁྱོགས། མི་སྙིང་སྒུལ། ནྲ྇་སྲོག་རྩ་བྲིང་བྲིང་། ཐུཾ་རིལ། ཡེཾ་ཡེཾ། ཡིད་ཀྱི་དབང་པོ་ཁུག་ཛ། མི་ནོར་ཟས་གསུམ་བདག་གི་དབང་དུ་བསྡུས་ཤིག །ཅེས་པ་ཞག་བདུན་བཟླས་པས། འཁོར་དང་འབྱོར་པ་ཕུན་སུམ་ཚོགས་པ་རྒྱས་པར་འགྱུར་རོ། །དེ་ནས་རྟེན་གྱི་བླ་རྡོ་དེ་ལུས་ལ་གདགས་སོ། །འདུ་བ་ཉུང་ན་བླ་རྡོ་བརྡར་ཅིང་། མེའི་ནང་དུ་གནོད་སྦྱིན་བསམས་ཏེ་སྦྱིན་སྲེག་བྱ། གཏོར་མ་བཏང་ནས། བྷྱོ་བྱང་ཕྱོགས་(༡༡༦)གནོད་སྦྱིན་གཏེར་གྱི་བདག །ཞལ་གཅིག་ཕྱག་གཉིས་མཛེས་པའི་སྐུ། །ཆིབས་སུ་བྱ་རྒྱལ་ཁྱུང་ལ་བཅིབས། །སྐུ་མདོག་དམར་པོ་འོད་ཟེར་ཅན། །རིན་ཆེན་སྣ་ཚོགས་རྒྱན་གྱིས་སྤྲས། །ཕྱག་གཡས་ལྕགས་ཀྱུས་ཟས་ནོར་འགུགས། །ཕྱག་གཡོན་ནེའུ་ལེས་ཟས་ནོར་སྟེར། །འཁོར་དུ་གནོད་སྦྱིན་སྟོང་གིས་བསྐོར། །གཏེར་བདག་འཁོར་དང་བཅས་པ་ལ། །མཆོད་ཚོགས་བྷ་ལིང་གཏོར་མ་འབུལ། །ལྷ་འདྲེ་མི་གསུམ་དབང་དུ་སྡུས། །ཟས་ནོར་ལོངས་སྤྱོད་ཆར་དུ་ཕོབ། །ཅི་བསམ་འགྲུབ་པའི་དངོས་གྲུབ་ཞུ། །ཞེས་རོལ་མོ་དང་བཅས་པ་བྱས་པས་བསམ་པ་འགྲུབ་བོ། །

དེ་ལྟར་གནོད་སྦྱིན་དམར་ནག་སྒྲུབ་པ་ཡི། །རིམ་པ་གསལ་བར་བཤད་དེས་བསོད་ནམས་ཀྱིས། །མ་ལུས་རེ་བ་ཡིད་བཞིན་རྫོགས་པའི་དཔལ། །ཡོན་ཏན་འབྱོར་པ་མཐའ་ཡས་ཡོངས་གང་ཤོག །གནོད་སྦྱིན་དམར་ནག་གི་གསང་སྒྲུབ་མེ་རླུང་འཁྱིལ་པ་ཞེས་བྱ་བ། རྣལ་འབྱོར་པ་དྲི་མེད་འོད་ཟེར་གྱིས་བཀོད་པ་རྫོགས་སོ།། །།

བཀྲ་ཤིས།། །།

ཤན་པ་སྲོག་སྒྲུབ་ནག་མོའི་གསང་སྒྲུབ།

༄༅། །ཤན་པ་སྲོག་སྒྲུབ་ནག་མོའི་གསང་སྒྲུབ་བཞུགས་སོ། །ཤོག་འདྲའི་སྐོར།

༄༅། ཤན་པ་སྲོག་སྒྲུབ་ནག་མོའི་གསང་སྒྲུབ་དུག་མདའ་ནག་མོ་ཞེས་བྱ་བ། འཇིགས་པའི་མ་མོ་འབུམ་ལ་ཕྱག་འཚལ་ལོ། །ཤན་པ་སྨུག་ནག་མི་བསྲུན་མ། །སྐྲ་ཡི་ལན་བུས་ནམ་མཁའ་ཁྱབ། །སྒྲོལ་གིང་ཆེན་མོ་ལ་བཏུད་དེ། །དེ་ཡི་གསང་སྒྲུབ་བཤད་པར་བྱ། །

བྲག་ནག་སྲིན་མོ་ཁྲོས་འདྲ་འམ། །ནགས་རོང་མོན་མོ་ཁྲོས་འདྲ་བར། །སྟེགས་བུ་ཁྲུ་གང་ལ་སོགས་པར། །རོ་སོལ་དུག་ཁྲག་ཆག་ཆག་གདབ། །དབུས་སུ་གྲུ་གསུམ་མུ་ཁྱུད་དམར། །ཕྱི་རིམ་རྩིབས་བཞི་མཐིང་ནག་སྟེ། །དེ་ཕྱིར་ཐོད་ཕྲེང་རྡོ་རྗེའི་ཕྲེང་། །སྒོ་དང་རྟ་བབས་ལྡན་པར་བྲི། །དེ་མཐའ་མེ་རི་འབར་བ་འོ། །སྟེང་དུ་ཁམས་སའི་དགྲ་གཟུགས་ཀྱི། །སྙིང་གར་ལིང་ག་བཅུག་པའི་སྟེང་། །མ་མོའི་དཔལ་གཏོར་ཟུར་གསུམ་ལ། །དགྲ་ཡི་ལིང་ག་གཟུགས་པར་བྱ། །དཔྲལ་བར་རུས་ལ་སྙིང་གར་མིང་། །འདོམས་སུ་བླ་དྭགས་བྲིས་པ་ཡི། །ཐ་མ་བསད་པའི་སྔགས་ཀྱིས་བསྐོར། །གཞན་ཡང་བླ་མ་ཆོས་སྐྱོང་དང་། །ཡུལ་ལྷ་གཞི་བདག་གཏོར་མ་བཤམ། །དེ་ནས་སྟོང་པའི་ངང་ཉིད་ལས། །གནམ་ས་མི་དམིགས་མུན་པས་འཁྲིགས། །འཇིགས་པའི་ལྕགས་ཁང་སྒོ་མེད་དུ། །མེ་ཡི་འོད་སྟོང་འབར་བའི་གནས། །དགྲ་བགེགས་མི་ཐར་བཙོན་(༡༡༧)དོང་གསལ། །རང་ཉིད་པདྨ་ཐོད་ཕྲེང་རྩལ། །འཇིགས་བྱེད་ཁྲོ་བོའི་དཀྱིལ་འཁོར་བསམ། །མདུན་གྱི་དཀྱིལ་འཁོར་འཇིགས་པ་རུ། །གསོད་བྱེད་ནག་མོ་ཆུ་གྲི་བསྣམས། །གློ་སྙིང་ཞལ་གསོལ་ཁྲག་འཛག་ཅིང་། །སྤྱན་གསུམ་རལ་པས་གནམ་ས་ཁྱབ། །མཆེ་གཙིགས་མཚོན་ཆའི་མེ་འོད་འཕྲོ། །སྲིད་པའི་རླུང་ཞོན་ནད་རིམས་གཏོང་། །སྨ་ར་དམར་སེར་འབར་བར་བསྒོམ། །གཡས་ན་ཤ་ཟ་ལྕེ་སྤྱང་གདོང་། །རོ་ལ་ཞོན་ནས་དགྲ་སྙིང་ཟ། །གཡོན་ན་ནག་མོ་ཝ་གདོང་མ། །ཕྱག་གཉིས་ཞགས་པ་གྲི་གུག་ཐོགས། །མདུན་ན་ནག་མོ་འུག་གདོང་སྟེ། །རྒྱབ་ན་སྲིད་པའི་ཤ་ཟ་འབུམ། །མཚོན་ཆ་སྣ་ཚོགས་ཟོར་འཕེན་བསམ། །ཐུན་ནི་ཉུང་ནག་གྲི་ཁྲག་གིས། །ལིང་ག་བྲབ་པས་མ་མོ་ཡིས། །དགྲ་བོ་བསད་པར་བསམ་ནས་ནི། །སྔགས་འདི་མ་ཡེངས་བཟླས་ཤིང་བྲབ། །ཨཱ་ཁྱི་ཁ་ལེ་ནག་མོས་སོད། སྲོག་མ་ཏྲི་སོད། སྙིང་ཁ་ཁྱ་([ཨ་]ཁ)བཾ། ཡ་ཡ་སོད། ཙ་ཝ་བི་རི་མུ་སོད་གྷ་ཡ་སོད། ཎི་ཡ་སོད། རཀྨོ་ཙིཏྟ་རྦད། དེ་ལྟར་ཞག་བདུན་སོང་རྗེས་ལ། །རྟགས་ནི་དགྲ་ལ་སྣ་ཚོགས་འབྱུང་། །དེ་ནས་སྔགས་དེའི་མཇུག་དེ་ལ། །རག་མོ་རག་མོ་མ་གཟིར་ནན། ཁམས་ཁུག་དྲོངས་ཆེ་གེ་མོའི་ཙིཏྟ་ལ་རྦད་སོད་ཡ། དེ་བཟླས་རང་ལ་ཚིག་པ་ཟ། །རྨུགས་དང་རྒྱག་སྙིང་འདོད་པ་དང་། །རྨི་ལམ་བུད་མེད་མཚན་མ་སྟོན། །དེ་ཚེ་འོག་མ་གཅིག་པུ་བཟླ། །དེ་ནས་གློ་སྙིང་མགོ་ཁྱེར་ནས། །ལན་གསུམ་བྱུང་དུས་གཏོར་ཟོར་འཕངས། །འབྲུབ་ཁུང་ཚེར་མའི་མེ་སྦར་ལ། །མ་མོ་འཁོར་བཅས་ཁ་གདངས་བསྐྱེད། །ལིང་ག་དགྲ་དངོས་བསམས་ལ་འབུལ། །དེ་ཡིས་ཐེ་ཚོམ་མེད་པར་འགྲུབ། །གལ་ཏེ་འགྱངས་ཤིང་རྟགས་མེད་ན། །འབོད་རྦད་མཐའ་ནས་ལྡོག་བྱས་ལ། །བསད་སྔགས་དྲག་([ཨ་]བཏགས་)ལ་བསྒྲུབ་པར་བྱ། །སོད་མོས་ནག་ལེ་ཁ་ཁྱི་ཨཱ། སྲོག་མ་ཏྲི་སོད། སྙིང་ཁ་ཁ་བྷཾ། ཡ་ཡཱ་སོད། ཙ་བ་བི་རི་མུ་སོད། གྷ་ཡ་སོད། ཎི་ཡ་སོད། རག་མོ་ཙིཏྟ་རྦད་རྦད་ཙི་མོ་རག །སརྦ་དུཥྚཾ་ཆེ་གེ་མོ་ཤ་ཏྲཱུཾ་མཱ་ར་ཡ་རྦད། དེ་ཡིས་ངེས་པར་འགྲུབ་པ་ཡིན། །དེས་ཀྱང་འགྲུབ་པར་མ་གྱུར་ན། །འབོད་རྦད་མགོ་གཤམ་ལྡོག་པ་ལ། །བསད་སྔགས་རྦད་སྔགས་བཏགས་ལ་བསྒྲུབ། །དེ་ཡིས་ཐེ་ཚོམ་མེད་པ་ཡིན། །གཞན་ཡང་འགྲུབ་པར་དཀའ་བ་ན། །ཨུ་ནེ་ཨུ་ནེ་ཧཱུྃ་ཕཊ། དེ་ནི་སྔགས་ཀྱི་མགོར་བཏགས་ཤིང་། །མྱགས་ཐུམ་(༡༡༨)རལ་རྦད། ཨ་ཨ། ཨི་ཨཱི། ཨུ་ཨཱུ། འདི་ནི་ཤམ་བུ་བཏགས་ལ་བཟླས། །དེ་ཡིས་གསོད་ཅིང་ཆོ་འཕྲུལ་འབྱུང་། །རྩ་བའི་སྒྲུབ་ཐབས་བསྟན་པའོ། །དེ་ཡི་གནད་ཡིག་ནི། རྫས་གནད་ན་ཆུང་ནལ་ཕྲུག་གམ། །ལུག་ནག་བྱ་ནག་སྙིང་ནང་དུ། །དུར་ཁྲོད་རས་ལ་འཁོར་ལོ་བྲི། །རྩིབས་བརྒྱད་མུ་ཁྱུད་གསུམ་པ་ལ། །རྩིབས་ལ་རྩ་སྔགས་བྲི་བར་བྱ། །མུ་ཁྱུད་མ་མོའི་སྤྱི་སྔགས་བྲི། །ལྟེ་བར་མ་བྷྱོ་གཟབ་ཏུ་བྲི། །རྒྱབ་ཏུ་རྟེན་འབྲེལ་སྙིང་པོ་བྲི། །རབ་གནས་བྱས་ལ་ལུས་ལ་བཅངས། །སྐབས་སུ་ཀླད་ལ་བསྐོར་ཞིང་བརྡབ། །དེ་ཡིས་བྲན་བཞིན་ལས་བྱེད་འགྱུར། །དུས་གནད་རྒྱུ་དུས་བསྟན་པ་ནི། །ཚེས་གཅིག་སྐྱ་རེངས་དང་པོ་ནས། །ཉི་ཤར་ཡན་ཆད་གཙོ་མོ་རྒྱུ། །འབྱུང་བ་ཤིང་གི་ཁམས་ཡིན་ནོ། །ཉི་མ་དྲོས་ནས་ཉིན་ཕྱེད་བར། །གཡས་ཀྱི་སྲོག་གཅོད་རྒྱུ་དུས་ཏེ། །འབྱུང་བ་མེ་ཡི་ཁམས་ཡིན་ནོ། །གྲིབ་ཆུང་ལྷགས་ནས་བྱ་གདང་བར། །གཡོན་གྱི་སྲོག་གཅོད་རྒྱུ་དུས་ཏེ། །འབྱུང་བ་ལྕགས་ཀྱི་ཁམས་ཡིན་ནོ། །ས་སྲོད་ནམ་ཕྱེད་ཚུན་ཆད་ལ། །མདུན་གྱི་སྲོག་གཅོད་རྒྱུ་དུས་ཏེ། །འབྱུང་བ་ཆུ་ཡི་ཁམས་ཡིན་ནོ། །ཉི་ཤར་ཕྱེད་ཡོལ་ས་སྲོས་ནས། །ནམ་ཕྱེད་ཡོལ་དུས་རྣམས་སུ་ནི། །གཙོ་འཁོར་སྲུང་མར་བཅས་པ་རྒྱུ། །འབྱུང་བ་ས་ཡི་ཁམས་ཡིན་ནོ། །ཁམས་གཤེད་གནད་ཡིག་བསྟན་པ་ནི། །སྒྲུབ་དུས་འབྲུབ་ཁུང་ལིང་ག་ལ། །རང་ཉིད་ཚེས་གཅིག་གཙོ་མོའི་དུས། །ཤིང་ལས་གྲུབ་པའི་གཙོ་མོར་བསྐྱེད། །ལིང་ག་ཤིང་གི་ཕུར་པས་མནན། །དགྲ་བོ་དགུག་གཞུག་ལིང་ག་ས། །ཤར་ཕྱོགས་ཁ་བལྟས་རྩ་སྔགས་མཐར། །ཆེ་གེ་མོའི་སྲོག་ལ་མཱ་ར་ཡ་ཐུན་བྷྱོ། རག་མོ་ཎི་ཤ་ཀུ་རུ་ལུ་ཐུཾ་རྦད། རག་མོ་ཁ་ལ་ཙ་ཐུན་བྷྱོ། རཀྟ་ཐུན་རྦད། ཙ་ལ་ཙ་ལ་ཐུན་བྷྱོ། རྩ་ཙིཏྟ་རྦད། སྙིང་ལ་དུན། རག་མོ་ཁ་ལ་ཙ་ཐུན་བྷྱོ། ཏི་ཐ་བཾ་རིལ་ས་མ་ཡ་ཐུན་བྷྱོ། དགྲ་བོའི་སྲོག་ལ་མཱ་ར་ཡ་ཐུན་བྷྱོ། ཞེས་བཟླས་ཤིང་གི་ཕུར་པ་གདབ། །གཡས་ཀྱི་མ་མོ་རྒྱུ་དུས་སུ། །རང་ཉིད་མེ་ལས་མ་མོའི་སྐུ། །ལིང་ག་ལྕགས་སུ་བསྐྱེད་བྱས་ཏེ། །དྲག་པོའི་མེ་འགལ་ཐུན་གྱིས་བྲབ། །ཐུན་སྔགས་རམ་དུ་བསྒྱུར་ལ་བཟླས། །གཡོན་གྱི་མ་མོ་རྒྱུ་དུས་སུ། །རང་ཉིད་ལྕགས་ཀྱི་མ་མོར་བསྐྱེད། །ལིང་ག་ཤིང་ལས་གྲུབ་པར་བསྐྱེད། །མི་བསད་མཚོན་ལྕགས་དྲག་ཐུན་གདབ། །ཐུན་སྔགས་སུཾ་དུ་བསྒྱུར་ལ་བཟླས། །མདུན་གྱི་མ་མོ་རྒྱུ་དུས་སུ། །རང་ཉིད་ཆུ་ཡི་མ་མོར་བསྒོམ། །ལིང་ག་མེ་ལས་གྲུབ་པར་(༡༡༩)བསྐྱེད། །དྲག་ཐུན་དུག་ཆུས་བྲབ་པར་བྱ། །ཐུན་སྔགས་བཾ་དུ་བསྒྱུར་ལ་བཟླས། །དུས་གཞན་རྣམས་སུ་གཞུང་བཞིན་བྱ། །རྒྱུ་བའི་ཕྱོགས་དང་བསྟུན་པ་རུ། །ཁ་ལྟ་ཐུན་ཟོར་མ་ཆད་གཅེས། །དགྲ་བོའི་ཁམས་དེ་རྒྱུས་ཡོད་ན། །རྒྱུན་དུ་དེ་ཡི་གཤེད་ཐུན་བྲབ། །རྒྱུ་དུས་ལུས་སྦྲིད་སྐྱི་ཟིང་འཇིགས། །ངེས་པའི་དུས་ཡིན་བསྟུན་པར་བྱ། །མོ་མོའི་ངན་སྔགས་གཤོར་ལ་གཏད། །གནད་ཀྱི་ཡང་སྙིང་མཐར་ཐུག་ཡིན། །ཆོ་འཕྲུལ་གནད་ཡིག་བསྟན་པ་ནི། །མ་ཏྲཾ་སྙིང་ཁར་བྲུབ་ཁུང་བཅའ། །དབུས་སུ་གཏོར་མ་ལིང་ག་གཞག །ཤ་འམ་སྙིང་ངམ་རུས་པ་ལ། །ཕུང་ས་ཁྲག་སྦྱར་ལྕེ་སྤྱང་མགོ། །དམར་མོ་ལག་ན་ལྟས་ངན་ནི། །སྤྲེའུ་འུག་པ་ལ་སོགས་ཐོགས། །དེ་ཡི་སྙིང་ཁར་ཀྵ་ཡི་གེ། །ཐ་མར་ལྟས་ངན་ཐོང་ཞིག་བྲི། །གཤིན་རྗེ་ཝ་གདོང་ནག་མོ་ཡི། །གཟུགས་བྱ་སྙིང་ཁར་ཡི་གེ་བྲི། །སྲོག་གཅོད་ཤ་ཟ་ནག་མོ་ནི། །འུག་གདོང་ཡི་གེ་ཕྱག་མཚན་འདྲ། །མ་ཏྲཾ་མགོ་ཟུར་གནོད་སྦྱིན་མོ། །གཡས་ཟུར་གཤིན་རྗེ་གཡོན་ཟུར་དུ། །བདུད་མོའི་གཟུགས་གཞག་གཏོར་མའི་རྩེར། །ལྷ་མོའི་གཟུགས་བྲིས་གཟུགས་པར་བྱ། །རྩ་བའི་སྔགས་ལ་འདི་བཏགས་བཟླས། །ཧེ་ཙ་དུན་པོ་བ་ལ། དེ་བཟླས་རང་ལ་ཆོ་འཕྲུལ་འོངས། །དེ་ནས་མ་ཏྲཾ་ལྷ་དང་གཟུགས། །དགྲ་ཡོད་ཕྱོགས་སུ་ཁ་བསྒྱུར་ལ། །རྒྱབ་ནས་ཐུན་གྱིས་བྲབ་བྱ་ཞིང་། །གང་ལ་རྦད་སྔགས་བཏགས་བྱས་ནས། །འདི་ལ་འདི་བཏགས་བཟླས་པ་བྱ། །ཆེ་གེ་མོ་ཙ་ཧེ་དང་ཕཊ་ཡ། ཞེས་བཟླས་བསྐུར་ཞིང་སྔགས་ཀྱིས་གཟིར། །གལ་ཏེ་མ་ཉན་ལྡོག་ལ་བཟླས། །དེས་ནི་དགྲ་ལ་ལྟས་ངན་ནི། །ཇི་ལྟར་རྦད་པ་དེ་ལྟར་འོངས། །སྔ་མའི་ལས་མཇུག་མནན་པ་ནི། །སྒྲུབ་པ་ཐོན་དུས་སྔར་བརྩམས་པའི། །ལིང་ག་སྦྱིན་སྲེག་གོང་བཞིན་བྱ། །ཐུན་གྱིས་ལིང་ག་འབྲུབ་ཁུང་གཞུག །དྲག་པོའི་ཐུན་བྲབ་གཡམ་པས་བཀབ། །ཀླུ་ཡི་ཐེབས་དུས་ལིང་ག་དང་། །དྲི་ཆེན་དྲོད་མ་ཡལ་བ་དང་། །དཀར་གསུམ་མངར་གསུམ་སྦལ་ནག་ཁྲག །རྫ་ཡི་གའུ་ཁ་སྦྱར་ནི། །དགྲ་བོའི་ཁམས་གཤེད་ཁ་དོག་ཅན། །དེ་ནང་རྫས་དང་སྡིག་པ་གཞུག །ག་འུའི་སྟེང་ལ་རྡོ་རྗེ་ནི། །རྒྱ་གྲམ་ལྟེ་བར་ཆེ་གེ་ནན། །རྭ་བཞིར་ཨཱ་ནན་ཨཱཿནན་དང་། །ཧཱུྃ་ནན་སྟྭཾ་བྷ་ནན་བྲིས་ལ། །ཕ་ཝང་བྲུན་དང་དམེ་ཕོའི་ཆུས། །བྱུགས་ལ་དགྲ་བོའི་ཁམས་དེ་བརྟགས། །(༡༢༠)ཤིང་ཁམས་ཡིན་ན་ཀླུ་གནས་སར། །མནན་ཞིང་ས་ཚོན་སྣ་ལྔས་བསྐོར། །མེ་ཁམས་ཡིན་ན་ཆུ་མིག་རྩར། །ས་ཁམས་ཤིང་གཅིག་དྲུང་དུ་མནན། །ཆུ་ཁམས་ས་གཉན་སྦ་བར་བྱ། །དེ་ལྟར་མནན་པའི་འབྲས་བུ་ནི། །རབ་ལ་མནན་དུས་དེ་རུ་འཆི། །འབྲིང་ལ་ཟླ་བ་གཅིག་ཡིན་ཏེ། །ཐ་མ་ཟླ་བ་གསུམ་ན་ངེས། །ཕྱི་དུས་ཟླ་བ་བཞི་ངེས་ཡིན། །དེ་ཚེ་རྟགས་ནི་མ་བྱུང་ན། །ས་དེར་ལྷ་འདྲེ་མེད་པས་ན། །སྒྲུབ་པ་མི་དགོས་ཐུན་དྲུག་གོ། །ལན་གསུམ་བསྐྱར་ལ་མནན་པར་བྱ། །དེ་ཡང་གཉན་ས་གསུམ་བཞིར་བྱ། །དེ་ཡིས་ཐེ་ཚོམ་མེད་པར་འགྲུབ། །དང་པོ་སྒྲུབ་པ་གཅིག་ཐེམས་ནས། །རྟག་ཏུ་སྒྲུབ་པ་བྱེད་མི་དགོས། །ཉིན་ཞག་ཕྲུགས་གཅིག་ཐུན་དྲུག་ནི། །བྱས་ནས་མནན་པ་གཅིག་པུས་འགྲུབ། །འདི་ལྟར་དང་པོ་སྒྲུབ་པ་དེ། །ལན་ཅིག་གྲུབ་ནས་ནམ་དགོས་དུས། །ཉིན་ཞག་གཅིག་གིས་ཐུན་དྲུག་འབད། །ལས་མཇུག་མནན་པས་འགྲུབ་པ་ཡིན། །དེ་ཡང་ཀླུ་གཉན་གནས་ས་ནི། །ངེས་པར་དགོས་པས་དེ་རུ་བྱེད། །དེ་ཡིས་མྱུར་དུ་འགྲུབ་པ་ཡིན། །སྒྲུབ་པར་བྱེད་པའི་དུས་སུ་ཡང་། །སྐབས་སུ་དམར་གཏོར་བཏང་བྱས་ལ། །འཇིགས་པའི་སྐུལ་འདིས་བསྐུལ་བར་བྱ། །བྷྱོ་མཁའ་འགྲོ་ནག་མོ་མི་བསྲུན་མ། །ཤ་ཟ་ཁྲག་མིག་སྲིན་མོའི་གདོང་། །འཇིགས་པའི་གཟུགས་ཅན་མཁའ་འགྲོའི་གཙོ། །སྐུ་མདོག་ནག་མོ་ཆར་སྤྲིན་མདོག །ཕྱག་ན་གསོད་པའི་མཚོན་ཆ་བསྣམས། །ཆིབས་སུ་སྲིད་པའི་རླུང་ལ་བཅིབས། །རལ་པ་མཚོན་ཆ་ཤ་ར་ར། །གཅེར་བུ་མི་ལྤགས་སྟོད་ལ་དཀྲིས། །མི་ཡི་གློ་སྙིང་ཞལ་དུ་ནི། །དམར་མོ་ཁྲག་འཛག་རྒྱུན་དུ་གསོལ། །ཞལ་ནས་ཁྲག་འཛག་ཀྱུ་རུ་རུ། །སྤྱན་གསུམ་ཁྲོ་གཉེར་མཆེ་བ་གཙིགས། །སྨ་ར་མཚོན་ཆ་མེ་ལྟར་འབར། །ཤངས་ནས་འཚུབས་མ་མཚོན་ཆར་འགྱེད། །བ་སྤུ་མཚོན་ཆ་མེ་ལྟར་འབར། །མི་མགོ་རློན་པའི་དོ་ཤལ་ཅན། །གསོད་བྱེད་མ་མོ་ཆེན་མོ་ལ། །དགྲ་བོའི་ཤ་ཁྲག་གཏོར་མ་འབུལ། །གཡས་ན་གསོད་བྱེད་ཤ་ཟ་མོ། །དམར་མོ་ཤ་ཟ་ཅེ་སྤྱང་གདོང་། །རོ་ལ་ཞོན་ནས་ཤ་ལ་ཟ། །རྐན་བརྡབ་དགྲ་བོའི་མིག་འབྲས་འབྲུལ། །ལྕགས་སྡེར་མཚོན་ཆས་དགྲ་སྙིང་འབྱིན། །དམར་མོ་ཁྲག་འཛག་ཞལ་དུ་གསོལ། །གཡོན་ན་ནག་མོ་ཝ་ཡི་གདོང་། །བ་སྤུ་མཚོན་ཆ་སྤུ་གྲིའི་སོ། །རེག་པ་ཙམ་གྱིས་མགོ་ལུས་བྲེགས། །ཕྱག་ན་ཞགས་པ་གྲི་གུག་ཐོགས། །ལུས་(༡༢༡)ཆིངས་སྲོག་རྩ་དམར་པོ་ཆོད། །ཤ་ཟ་ཁྲག་འཐུང་ཀེང་རུས་མུར། །མདུན་ན་སྲོག་གཅོད་ཤ་ཟ་སྟོང་། །ནག་མོ་འུག་གདོང་གནམ་ལྕགས་སྡེར། །ཁྲག་གི་རལ་པ་མཚོན་ཆའི་སྡེར། །མཚོན་སྡེར་དགྲ་ཡི་སྙིང་ལ་འདེབས། །གནམ་ལྕགས་མཆུ་ཡིས་སྲོག་རྩ་གཅོད། །སྐད་ཅིག་སྟོང་གསུམ་ཉུལ་བྱེད་མ། །རྐན་རྡེབ་སྲིད་གསུམ་སྙིང་ཁྲག་འབྲུལ། །སྟོང་གསུམ་ཟ་ཞིང་སྲིད་གསུམ་འཐུང་། །ཤ་ཟ་ཁྲག་འཐུང་འབུམ་གྱིས་བསྐོར། །ཤ་ཟ་དཔོན་གཡོག་འཁོར་དང་བཅས། །འདིར་བྱོན་ནག་མོ་ལས་མཁན་མ། །དགྲ་བོའི་ཤ་ཁྲག་གཏོར་མ་འབུལ། །དགྲ་བོ་སྒྲོལ་བའི་དུས་ལ་བབས། །རྒྱལ་བའི་བཀའ་ལས་མ་འདའ་བར། །དམ་ཉམས་ཤ་ཟོ་ཁྲག་ལ་འཐུང་། །བཅོལ་བའི་ཕྲིན་ལས་མྱུར་དུ་སྒྲུབས། །ཞེས་པས་བསྟོད་ཅིང་བསྐུལ་བར་བྱ། །སྐབས་སུ་མོ་རྒྱུད་གནད་འབེབས་བཟླས། །ཁ་ཐཾ་མུ་ཁ་ཐཾ། མ་རག་ཤ་ཁུ། མ་རིལ་མ་རིལ་མ་མོ་བྷྱོ། འདིས་ནི་མོ་རྒྱུད་ལས་ལ་ཁོལ། །ཞག་རེ་བརྒྱ་རྩ་བཟླས་པས་འགྲུབ། །ཀུན་གྱི་ཟབ་དོན་གནད་དྲིལ་ནས། །དུག་མདའ་ནག་མོ་གཏན་ལ་ཕབས། །

ཨེ་མ་སྙིང་ཏིག་གསང་བའི་བཀའ། །ཡང་ཟབ་བསྲུང་བའི་དོན་བྱེད་དུ། །ཤན་པ་ནག་མོའི་སྒྲུབ་ཐབས་འདི། །སྟོན་གསུམ་གངས་རི་ཐོད་དཀར་དུ། །དྲི་མེད་འོད་ཟེར་བདག་གིས་བཀོད། །དགེ་བས་བསྟན་པ་འཕེལ་བར་ཤོག །ཤན་པ་སྲོག་སྒྲུབ་ནག་མོའི་སྒྲུབ་ཐབས་དུག་མདའ་ནག་མོ་ཞེས་བྱ་བ། པདྨ་ལས་འབྲེལ་རྩལ་གྱིས་གངས་རི་ཐོད་དཀར་གྱི་མགུལ་ཨོ་རྒྱན་རྫོང་དུ་བཀོད་པ་རྫོགས་སོ། །བྷ་ཝནྟུ།། །།

མཁའ་འགྲོ་ཡང་ཏིག་གི་ཐེམ་བྱང་དཔག་བསམ་ལྗོན་ཤིང་།

༄༅། །མཁའ་འགྲོ་ཡང་ཏིག་གི་ཐེམ་བྱང་དཔག་བསམ་ལྗོན་ཤིང་བཞུགས་པ་ལགས་སོ། །

༄༅། ཐེམ་བྱང་དཔག་བསམ་ལྗོན་ཤིང་ཞེས་བྱ་བ། དཔལ་དོན་ཡོད་གྲུབ་པ་ལ་ཕྱག་འཚལ་ལོ། །ཟབ་ཅིང་རྒྱ་ཆེ་སྐུ་ལྔ་ལྷུན་གྱིས་གྲུབ། །ཡོན་ཏན་ཕྲིན་ལས་འདོད་སྟེར་རོལ་པ་ཅན། །རང་བྱུང་ཆེན་པོ་པདྨ་འབྱུང་གནས་ལ། །བདག་གཞན་དུས་རྣམས་ཀུན་ཏུ་ཕྱག་འཚལ་ལོ། །དེ་ཡི་ཡུམ་ཆེན་མཁར་ཆེན་མཚོ་རྒྱལ་ནི། །རྡོ་རྗེ་ཕག་མོ་སངས་རྒྱས་ཀུན་གྱི་དངོས། །མཁའ་འགྲོ་དམ་ཅན་རྒྱ་མཚོའི་ཚོགས་བཅས་ལ། །དུས་རྣམས་ཀུན་ཏུ་གུས་པས་ཕྱག་འཚལ་ལོ། །ཟབ་ཅིང་རྒྱ་ཆེ་དཀར་ཤོག་སྡོང་པོ་ལ། །གདམས་ཁྲིད་སྙིང་པོ་ཤོག་འདྲའི་ཡལ་འདབ་རྒྱས། །ཡང་ཟབ་ཤོག་སེར་མེ་ཏོག་འབྲས་བུ་ཅན། །མཁའ་འགྲོ་ཡང་ཏིག་དངོས་གྲུབ་ལྗོན་ཤིང་སྤྲོ། །དེ་ལ་དབང་གི་མ་བུའི་གྲངས་བསྟན་པ། །སྔོན་འགྲོ་ཡིད་ཆེས་ཁུངས་བཙུན་ཤེས་བྱའི་ཕྱིར། །གཏེར་འབྱུང་ལོ་རྒྱུས་རིན་ཆེན་སྒྲོན་མེ་དང་། །ཉམས་ཆག་སྡིག་སྒྲིབ་དམ་ཚིག་སྐོང་དང་ནི། །དངོས་གྲུབ་ཀུན་འབྱུང་མཁའ་འགྲོའི་བརྡ་དབང་དང་། །དངོས་གཞི་དབང་བཞི་བྱིན་རླབས་བླ་མའི་དབང་། །རྒྱུད་ལ་སྨིན་གྲོལ་ནུས་པ་འཇུག་ཕྱིར་ཏེ། །རིག་པའི་རྩལ་དབང་སྣང་སྲིད་ཆོས་སྐུར་འཆར། །མཁའ་འགྲོའི་དོན་དབང་དངོས་གྲུབ་ཆུ་བོ་འགྲུབ། །རྡོ་རྗེ་སློབ་དཔོན་གཞན་ཕན་ཕྲིན་ལས་མཆོག །བསྟན་པའི་སྲོག་ཤིང་གཟུག་ཕྱིར་གཞན་བཀའ་དང་། །གཏད་རྒྱའི་བྱིན་རླབས་གཅིག་ནས་གཅིག་ཏུ་བརྒྱུད། །བཀའ་བསྒོས་མ་སྲིང་དམ་ཅན་ལས་ལ་ཁོལ། །དེ་ཡི་ཆ་ལག་ལེགས་པར་བསྟན་པ་ཡང་། །རང་ཉིད་དབང་དང་གདམས་པ་དག་བྱའི་ཕྱིར། །བདག་འཇུག་པདྨ་ཀློང་ཡངས་བཟང་པོ་དང་། །ལག་ལེན་བསྟན་ཕྱིར་ཚོགས་མཆོད་རྒྱ་མཚོའི་སྤྲིན། །བསོད་ནམས་ཡེ་ཤེས་ཚོགས་ཆེན་གཉིས་རྫོགས་ལྡན། །དེ་ལྟར་མ་དགུ་བུ་ནི་རྣམ་པ་དྲུག །རྩ་བའི་སྡེ་ཚན་རྣམ་པ་བཞིར་བསྡུས་པས། །རིན་ཆེན་དབང་གི་ཕྲེང་བ་ལེགས་པར་ཚང་། །དེ་དག་རྣམས་ནི་ཟབ་ཅིང་རྒྱ་ཆེ་བས། །རིན་ཆེན་དཀར་ཤོག་(༡༢༣)ངོས་ལ་ལེགས་པར་མནན། །བཀའ་ཡི་རྒྱས་བཏབ་ཕྱི་རབས་དོན་དུ་བསྟན། །

སྨིན་ཅིང་གྲོལ་བར་བྱེད་པ་བསྐྱེད་རྫོགས་ཏེ། །དེ་ཡི་གདམས་ངག་མ་བུའི་གྲངས་བསྟན་པ། །གསང་སྔགས་ཟབ་མོ་བྱིན་རླབས་བླ་མའི་ལམ། །དེ་ཕྱིར་གསོལ་འདེབས་དྲི་མེད་ཟླ་རྒྱས་དང་། །བདུད་རྩིའི་ཆུ་རྒྱུན་རྣམ་པ་གཉིས་སུ་བསྟན། །ལམ་ལ་འཇུག་པའང་རིམ་པས་བསླབ་པའི་ཕྱིར། །ཁྲིད་དུ་བསྡེབས་ཏེ་ཉམས་སུ་བླང་བ་ནི། །དང་པོའི་བབས་ཚུལ་ཅིག་ཆར་འཇུག་པའི་ཕྱིར། །ནོར་བུའི་ལུགས་ཏེ་ཕྲེང་བ་རྩར་བརྒྱུས་འདྲ། །སྐལ་ལྡན་སྐྱེས་བུ་ཁྲིད་ཚར་གཅིག་ཐོབ་པས། །མཁའ་སྤྱོད་གྲོལ་ཕྱིར་ཉི་ཟླ་གཟའ་སྐར་ལུགས། །དེ་དག་རིམ་པ་མི་འགྱུར་གཟེར་གདབ་ཕྱིར། །ཟབ་མོ་རབ་འབྱེད་དོན་གྱི་ཆིངས་སུ་བསྟན། །ཇི་ལྟར་ཁྲིད་ཚུལ་རབ་ཏུ་རྒྱས་པ་ནི། །རིན་ཆེན་གསེར་ཕྲེང་སྐལ་ལྡན་སྙིང་པོའི་བཅུད། །དབང་ཁྲིད་སྔོན་དུ་ཚོགས་ཆེན་རྫོགས་བྱའི་ཕྱིར། །རིག་པ་ཁྱད་པར་ཅན་གྱི་ཚོགས་བསགས་དང་། །དེ་ལྟར་མ་གསུམ་བུ་ནི་རྣམ་པ་བཞིས། །རིམ་བགྲོད་ཁྲིད་ཀྱི་ཡི་གེ་ཚང་བར་བསྟན། །འདི་དག་ཡང་ཟབ་གནད་དེ་དཀོན་པས་ན། །རིན་ཆེན་ཤོག་འདྲའི་ངོས་ལ་ལེགས་པར་བཏབ། །

དབང་ཁྲིད་དག་གི་རྒྱབ་ཆོས་བསྟན་པ་ནི། །སྟོང་པ་ཁྲིགས་ཆོད་ཆོས་སྐུ་ལམ་ཁྱེར་དང་། །སྣང་བ་ཐོད་རྒལ་གཟུགས་སྐུ་ལམ་དུ་བྱེད། །དེ་དག་ཆ་རྐྱེན་ཟབ་དོན་སྣ་ཚོགས་གསུམ། །སོ་སོར་ཕྱེ་ནས་གོ་རིམ་ངེས་པའི་དོན། །དུམ་དང་མ་བུའི་གྲངས་སུ་བསྟན་པ་ལགས། །ཁྲེགས་ཆོད་རྒྱབ་ཡིག་ནམ་མཁའ་སྐོར་གསུམ་ལས། །ནམ་མཁའ་རབ་འབྱམས་ལྟ་བ་བྱ་རྩོལ་མེད། །ནམ་མཁའ་ཀློང་ཡངས་སྒོམ་པ་བློ་ལས་འདས། །ནམ་མཁའ་དྲི་མེད་སྤྱོད་པ་བླང་དོར་མེད། །གདོད་མའི་ངང་དུ་གཉིས་མེད་ལ་བཟླ་འོ། །ཐོད་རྒལ་རྒྱབ་ཡིག་འོད་གསལ་གནད་བཞི་ལ། །གསེར་གྱི་སྒྲོམ་བུས་གནད་རྣམས་མདོར་དྲིལ་ཞིང་། །རིན་ཆེན་མཛོད་ཀྱི་དབྱེ་བ་རྒྱས་པར་བཤད། །རྒྱ་མཚོ་སྤྲིན་གྱིས་ཤིན་ཏུ་རྒྱ་ཆེ་བ། །རྣམ་(༡༢༤)གྲངས་མ་ལུས་ཡོངས་སུ་རྫོགས་པར་བསྟན། །ས་བཅུད་བསྡུས་དོན་ཉི་མའི་འོད་ཟེར་ཡང་ཡོད། དེ་ཡི་བོགས་འབྱིན་གནད་བསྡུས་གཅེས་པའི་འགག །གསང་སྤྱོད་རྡོ་རྗེ་ལམ་བསྟན་སྙིང་དང་འདྲ། །དེ་ལྟར་མ་དང་བུ་གཉིས་སྡེ་ཚན་བདུན། །རིན་ཆེན་ཤོག་སྐྱར་བཀོད་ནས་སྣང་བར་བྱས། །

དེ་དག་ཀུན་གྱི་སྙིང་པོའི་བཅུད་ཕྱུང་བ། །ཟབ་མོའི་ཡང་ཟབ་མཁའ་འགྲོ་སྙིང་གི་སྙིང་། །སྙིང་ལ་བབས་པས་སྙིང་གི་ཁྲག་ལྟ་བུ། །ཤིན་ཏུ་ཡང་ཟབ་བསྟན་པར་ཕངས་ན་ཡང་། །མཁའ་འགྲོའི་བཀས་གནང་སྐལ་ལྡན་སྙིང་གི་བུ། །ཕྱི་རབས་འགའ་ཙམ་འབྱུང་ཞེས་ལུང་བསྟན་པས། །དེ་ཡི་དོན་ཕྱིར་མ་བུའི་གྲངས་བསྟན་པ། །ཤིན་ཏུ་སྤྲོས་པ་མེད་པའི་གང་ཟག་རྣམས། །སྨིན་བྱེད་དབང་དང་གྲོལ་བྱེད་ཁྲིད་བསྟན་པ། །ངེས་དོན་སྙིང་པོ་རབ་གསང་ཡི་གེ་དང་། །རྒྱལ་སྲས་བླ་མའི་དངོས་གྲུབ་ཐོབ་བྱེད་པ། །བྱིན་རླབས་ཐུགས་སྒྲུབ་ཤིན་ཏུ་ཟབ་མོ་དང་། །ཚེ་གཅིག་རིག་འཛིན་ལམ་ལ་གནས་བྱེད་པ། །རིག་འཛིན་མཆོག་སྒྲུབ་རབ་ཏུ་གསང་བ་དང་། །མཆོག་དང་ཐུན་མོང་དངོས་གྲུབ་མྱུར་བསྒྲུབ་པ། །མཁའ་འགྲོའི་བསྐྱེད་རིམ་ཡིད་བཞིན་ནོར་བུ་དང་། རྫོགས་རིམ་རླུང་དྲུག་རྡོ་རྔོའི་ཆིངས་ཡང་ཡོད། །རླུང་ལས་འོད་གསལ་སྐད་ཅིག་འགྲུབ་བྱེད་པ། །རླུང་སྦྱོར་ཡེ་ཤེས་དྲ་བ་དམ་པ་དང་། །ཁམས་ཀྱིས་འཆི་མེད་འོད་གསལ་རབ་འགྲུབ་ཕྱིར། །ཟབ་ལམ་བདེ་ཆེན་རྒྱ་མཚོ་ཞེས་བྱ་དང་། །གསང་བ་ཟབ་མོའི་རྫོགས་རིམ་མངོན་བྱུང་བ། །ཡེ་ཤེས་འོད་གསལ་འཁོར་ལོའི་རིམ་པ་དང་། །གདོད་མའི་དབྱིངས་ཀྱི་རང་བཞིན་བསྟན་པ་ནི། །གཞི་སྣང་ངོ་སྤྲོད་རབ་ཏུ་གསང་བ་དང་། །མངོན་སུམ་སྙིང་པོའི་བཅུད་ཕྱུང་དྲིལ་བ་ནི། །འོད་གསལ་སྦུབས་འཇུག་སྙིང་གི་མན་ངག་དང་། །སྣང་རིག་ཡེ་ཤེས་མངོན་དུ་འབྱིན་བྱེད་པ། །སྒྲོན་མ་བཞི་སྐོར་མིག་ལྟར་གསལ་བ་དང་། །གང་ཡང་ལམ་གྱུར་འོད་གསལ་མདོར་གཅིག་པ། །འཁྲུལ་སྣང་གཞི་གྲོལ་རབ་ཏུ་གཅེས་པ་དང་། །བག་ཆགས་ཉོན་མོངས་མྱུར་དུ་(༡༢༥)འགོག་བྱེད་པ། །རྨི་ལམ་འོད་གསལ་སྦུབས་འཇུག་གདམས་པ་དང་། །སེམས་ཉིད་གསང་བའི་རང་བཞིན་མངོན་ཕྱུང་བ། །གདོད་མའི་དབྱིངས་སྣང་ངོ་སྤྲོད་གསང་བ་དང་། །གང་དང་མི་འདྲ་གནད་རྣམས་མཐར་ཐུག་པ། །ཟབ་དོན་གནད་ཀྱི་ལྡེ་མིག་གསང་བ་དང་། །མངོན་སུམ་དོན་ལ་ཡིད་ཆེས་མ་ནོར་ལམ། །འོད་གསལ་པྲ་ཁྲིད་རིན་ཆེན་གསལ་བ་དང་། །ཉིན་མཚན་བར་དོའི་གཅེས་པ་ཀུན་དྲིལ་བ། །གསང་ལམ་ངོ་སྤྲོད་སྙིང་པོའི་མཐར་ཐུག་དང་། །ནོར་དང་འཕྱུགས་མེད་གནད་རྣམས་དྲིལ་བའི་འགག །ཟབ་དོན་སྙིང་པོ་མན་ངག་གསང་བ་དང་། །དཔེ་དོན་རྟགས་ཀྱི་ངོ་སྤྲོད་གསལ་བའི་ལམ། །ཀུན་འདུས་རིན་ཆེན་གསང་བའི་ངོ་སྤྲོད་དང་། །ཤིན་ཏུ་ཡང་ཟབ་སྙིང་པོའི་བཅུད་དྲིལ་བ། །བར་དོ་སྦུབས་འཇུག་མན་ངག་སྙིང་པོ་དང་། །ཉམས་ལེན་གནད་ཀྱི་གདམས་པ་མཐར་ཐུག་པ། །བར་དོ་གནད་ཀྱི་སྒྲོན་མེ་ཞེས་བྱ་དང་། །གནད་གསུམ་སྒྲོན་མེ་ཡང་ཡོད། ཟབ་གཏེར་བབས་ལུགས་ངོ་མཚར་ཡིད་ཆེས་དོན། མཐོང་སྣང་རིན་ཆེན་འོད་ཀྱི་དྲ་བས་བསྟན། །ཕྱི་རབས་དོན་དུ་ཟབ་མོའི་སྙིང་གཏམ་ཚུལ། །ཞལ་ཆེམས་དྲི་མེད་འོད་ཀྱིས་ལེགས་པར་གདམས། །ཞལ་ཆེམས་གནད་ཀྱི་མེ་ལོང་དང་མཐར་ཐུག་གཅིག་མ་ཡང་ཡོད། དེ་ལྟར་མ་བཅུ་བུ་ནི་བཅུ་བཞི་ཡིས། །མཁའ་འགྲོའི་གདམས་པ་ཤོག་སེར་སྙིང་པོ་ཚང་། །གནད་ཀྱི་ཡང་གནད་མཆོག་ཏུ་གསང་བའི་གནད། །ཆེས་གསང་རྨད་དུ་བྱུང་བའི་སྙིང་པོ་འདི། །གང་དང་མི་འདྲ་ཀུན་གྱིས་མི་རྟོགས་པ། །བླ་མ་མཁའ་འགྲོའི་ཐུགས་བཅུད་སྙིང་པོ་འདི། །བདག་གི་སྙིང་སྟེ་རབ་ཏུ་ཕངས་པས་ན། །རིན་ཆེན་ཤོག་སེར་ངོས་ལ་བཀོད་པ་ནི། །བླ་མའི་བཀའ་རྒྱ་མཁའ་འགྲོའི་གཏེར་རྒྱ་དང་། །བཀའ་སྲུང་དམ་རྒྱ་བདེན་པའི་སྨོན་ལམ་རྒྱ། །ཟབ་མོའི་གནད་རྒྱ་རྒྱ་ལྔས་རྒྱས་བཏབ་ནས། །སྙིང་དང་འདྲ་བའི་བུ་མཆོག་སྐལ་ཆེ་བ། །བླ་མ་ལ་གུས་ཤེས་རབ་སྙིང་བརྩེར་ལྡན། །སྒྲུབ་ལ་བརྩོན་ཞིང་དམ་ཚིག་གཙང་བ་དང་། །ཚེ་འདི་བློས་བཏང་མཁའ་འགྲོའི་མཚན་རྟགས་ཅན། །རང་དང་འདྲ་བ་(༡༢༦)གཅིག་ནས་གཅིག་བརྒྱུད་བྱ། །མང་པོར་མི་སྤེལ་དེས་ཀྱང་གཅིག་ལ་བརྒྱུད། །དེ་ཡང་ལོ་གསུམ་བར་དུ་བརྟགས་ནས་སྦྱིན། །བླ་མ་མཁའ་འགྲོས་ལུང་བསྟན་མ་བྱུང་ན། །རྫོགས་པར་མི་སྦྱིན་སྙིང་ལ་ས་མཱ་ཡ། །གནད་རེས་ཀྱང་ནི་ཚེ་གཅིག་གྲོལ་བའི་ཆོས། །རིན་ཆེན་ཤོག་སེར་ཁོ་བོའི་སྙིང་གི་སྙིང་། །ཕྱི་རབས་སྐལ་ལྡན་དམ་པས་གཅེས་པར་ཟུང་། །འདི་འདྲའི་གདམས་པ་ཡང་གསང་སྙིང་པོའི་དོན། །ལོ་གསུམ་ཉམས་བླངས་འོད་ལུས་འགྲུབ་བྱེད་པ། །འཛམ་བུའི་གླིང་ན་དཀོན་པའི་རིན་པོ་ཆེ། །མཁའ་འགྲོའི་གསང་ཚིག་དམ་པ་ཡིན་པས་ན། །གཅིག་པུར་ཉམས་ལོངས་སྒྲུབ་པ་མཐའ་རུ་སྐྱོལ། །རང་འཚེངས་གཞན་འཚེངས་ཐམས་ཅད་རྫོགས་སངས་རྒྱ། །དེ་ཕྱིར་སྙིང་བས་གཅེས་པར་འདི་ཟུང་ལ། །ཡང་མཛོད་དམར་པོའི་ནང་དུ་རྒྱས་ཐོབ་ཅིག །

རིགས་ལྔའི་གསང་སྒྲུབ་པདྨ་སྟོང་ལྡན་ལ། །ཕྱི་ནང་གསང་བ་ཡང་གསང་རྣམ་བཞིས་ཚང་། །དེ་ཡིས་གཙོ་བོར་རང་བཞིན་སྤྲུལ་སྐུ་འགྲུབ། །རིགས་ལྔའི་བཅུད་ལེན་བདུད་རྩིའི་ཐིགས་པ་ལ། །སྙིང་པོ་ལྔ་དང་གཅེས་པའི་གནད་ལྔ་སྟེ། །ཡང་ཟབ་ཆིག་དྲིལ་ལེགས་པར་བསྟན་པ་ནི། །ས་ཡི་བཅུད་ལེན་བདུད་རྩི་ཡང་ཞུན་དང་། །ཆུ་ཡི་བཅུད་ལེན་བདེ་ཆེན་རྒྱ་མཚོ་དང་། །མེ་ཡི་བཅུད་ལེན་བདེ་དྲོད་རང་འབར་དང་། །རླུང་གི་བཅུད་ལེན་དཔག་བསམ་ལྗོན་ཤིང་དང་། །ནམ་མཁའི་བཅུད་ལེན་ཡེ་ཤེས་གསང་འཁོར་ཏེ། །མཆོག་དང་ཐུན་མོང་དངོས་གྲུབ་མྱུར་དུ་འགྲུབ། །གེགས་སེལ་ནད་འདོན་བདུད་རྩི་སྤྲིན་ཕུང་ལ། །འཁོར་ལོ་ལྔ་ཡིས་ཕྱི་ནང་བར་ཆད་སེལ། །འཆི་བ་བརྟགས་བསླུ་ཉི་ཟླ་གཟའ་བྲལ་ལ། །དུམ་བུ་གཉིས་ཀྱིས་རྣལ་འབྱོར་དོན་ཆེན་འགྲུབ། །བཏགས་གྲོལ་མན་ངག་རིན་ཆེན་སྙིང་པོ་ཡིས། །དེ་ཉིད་དོན་ཤེས་རང་གཞན་ཕན་པ་འགྲུབ། །བཅུ་དྲུག་ཕྲན་བུ་མ་བཞི་སྡེ་ཚན་ལྔར། །རིན་ཆེན་ཤོག་འདྲའི་ངོས་ལ་བཀོད་པ་ཡིན། །

དེ་དག་རྣམས་ཀྱི་ཆ་རྐྱེན་ཡན་ལག་ཏུ། །རྒྱུད་གཞན་དག་ལ་བལྟོས་པ་མེད་པའི་ཕྱིར། །གཞན་དོན་ཕྲིན་ལས་སྒྲུབ་པའི་རིམ་པ་ཡང་། །སྲེག་སྦྱོང་ཆོ་ག་འོད་ཀྱི་སྙེ་མ་(༡༢༧)ཡིས། །ཚེ་འདས་སྐུ་གདུང་ཇི་ལྟར་བཞུ་བ་བསྟན། །གཞན་ཕན་འོད་ཀྱི་འཁོར་ལོ་བཟང་པོ་ཡིས། །བར་དོའི་འགྲོ་བ་རྣམས་ལ་ཕན་གདགས་བཤད། །དེ་ཡི་གནད་ཡིག་ཕྱག་རྒྱ་བཞི་མཆོད་ཀྱིས། །ལག་ལེན་གནད་ཡིག་མ་ཚང་ཁ་སྐོང་བསྟན། །མཆོད་རྟེན་རབ་གནས་རིན་ཆེན་དྲྭ་བ་ཡིས། །ཚྭ་ཚྭའི་སྒོ་ནས་ཚོགས་བསག་སྒྲིབ་སྦྱོང་བསྟན། །རབ་གནས་ཆོ་ག་ཡེ་ཤེས་དྲི་མེད་ཀྱིས། །སྐུ་གསུང་ཐུགས་རྟེན་རབ་ཏུ་གནས་པ་བཤད། །མཐོང་སྣང་གསེར་གྱི་དྲ་བ་མིག་ལྟ་བུས། །ཉམས་རྟོགས་གནད་དང་ཆོས་ཀྱི་བབས་ཚུལ་ལ། །ངོ་མཚར་ཡིད་ཆེས་རྨད་བྱུང་བསྐྱེད་པ་བསྟན། །དེ་ལྟར་མ་གསུམ་བུ་གསུམ་སྡེ་ཚན་དྲུག །རིན་ཆེན་དཀར་ཤོག་བཟང་པོའི་ངོས་ལ་མནན། །ཕྱི་རབས་སྐལ་ལྡན་དམ་པའི་རིགས་ཅན་རྣམས། །རང་གཞན་དོན་དུ་སྤྱོད་ཅིག་ས་མ་ཡ། །

དེ་ལྟར་ཟབ་ཆོས་སྙིང་པོའི་བསྟན་པ་འདི། །མི་ནུབ་བསྲུང་ཕྱིར་དྲག་སྔགས་མཚོན་ཆ་ཡང་། །བཀའ་བསྲུང་སྒྲུབ་སྡེ་སོ་སོའི་རྒྱུད་གཞུང་ལས། །ཡང་ཟབ་གནད་རྣམས་བཏུས་ཏེ་བསྟན་པ་ནི། །སློབ་དཔོན་གསང་ཡུམ་རྡོ་རྗེ་གཡུ་སྒྲོན་མས། །རྣལ་འབྱོར་བསམ་པ་ཡིད་བཞིན་བསྒྲུབས་པས་ན། །དེ་ཡི་སྒྲུབ་ཐབས་ཟླ་བ་འདོད་འཇོ་ལ། །ཕྱི་ནང་གསང་གསུམ་མཆོག་ཏུ་ཟབ་པའི་གནད། །ཡིད་བཞིན་ནོར་བུའི་རྒྱལ་པོ་འདྲ་བ་བཤད། །འཇིག་རྟེན་ཁམས་ན་རྫུ་འཕྲུལ་མཐུ་རྩལ་ཅན། །ཀུན་གྱི་མཆོག་གྱུར་དྲང་སྲོང་ཆེན་པོ་སྟེ། །སྙིང་ཉེ་བཀྲ་ཤིས་དངོས་སུ་མཐུ་རྩལ་འབྱུང་། །དེ་ཕྱིར་དེ་འདྲ་ཀུན་ལས་འཕགས་པས་ན། །སློབ་དཔོན་ཆེན་པོའི་བཀའ་བསྲུང་གཙོ་བོ་ཡིན། །དེ་ཡི་གསང་སྒྲུབ་དུག་གི་སྤུ་གྲི་བསྟན། །ཁྱད་པར་གཟའ་བདུད་ཁྱབ་མཇུག་མིག་དམར་ནི། །སྔོན་བྱུང་སློབ་དཔོན་མཆེད་ཡིན་དྲག་རྩལ་ཅན། །སྣང་སྲིད་སིལ་བུར་གཏོང་བའི་མཐུ་མངའ་བ། །ཆོས་འདིའི་བཀའ་བསྲུང་གཉན་པོ་གསང་བ་སྟེ། །དེ་ཡི་སྒྲུབ་ཐབས་མེ་རླུང་འཁྱིལ་པ་བསྟན། །ཀུན་དང་མི་འདྲ་གསང་བའི་མ་མོ་ནི། །ཀུན་ཏུ་བཟང་མོའི་ཐུགས་ཀྱི་སྤྲུལ་པ་སྟེ། །ཨེ་ཀ་ཙ་ཏི་ཁྲོས་པའི་རྣམ་འཕྲུལ་མཆོག །སྲོག་(༡༢༨)སྒྲུབ་ནག་མོ་ཤན་པ་མི་བསྲུན་མ། །ཆོས་འདིས་ཕྱིར་ན་ལུས་དང་གྲིབ་མ་བཞིན། །འབྲལ་བ་མེད་པ་རྒྱུན་དུ་བསྲུངས་པས་ན། །ཀུན་བཟང་མཁའ་འགྲོ་མ་མོ་ཉིད་སྤྲུལ་ནས། །ཟབ་ཆོས་སྐྱོང་མཛད་གཏེར་སྲུང་མངའ་གསོལ་བ། །སློབ་དཔོན་ཆེན་པོས་བཀའ་བསྒོས་བཞག་པའི་ཕྱིར། །མཆོག་ཏུ་གཉན་ཞིང་སྒྲུབ་པ་པོ་ལ་བརྩེ། །དེ་ཕྱིར་དེ་ཡི་སྒྲུབ་ཐབས་གསང་བ་ནི། །དུག་མདའ་ནག་པོ་ཞེས་བྱ་རབ་ཏུ་བཀོད། །འདི་དག་རྣམས་ནི་འཇིགས་པའི་གནམ་ལྕགས་འདྲ། །དམ་ཚིག་ལྡན་ལ་སྒྲུབ་ཐག་ཤིན་ཏུ་ཉེ། །ཆོས་འདིའི་ཡི་གེ་གང་ཡོད་འདི་གནས་པས། །མ་བསྒྲུབས་ཀྱང་ནི་རྟག་ཏུ་སྲུང་སྐྱོབ་བྱེད། །དེ་ཕྱིར་མཆོད་གཏོར་རྒྱུན་དུ་བྱ་བ་གཅེས། །ཁྱད་པར་དུས་གཉན་བསྐང་གསོ་མཆོད་པར་བྱ། །ཚེ་དང་ནོར་ཕྱུག་སྙན་གྲགས་སྐྱེ་བོ་འདུ། །གེགས་རྣམས་མེད་ཅིང་བསམ་པ་ཡིད་བཞིན་འགྲུབ། །ཕྲན་གསུམ་བུ་སྟེ་མ་བཞི་སྡེ་ཚན་བཞི། །རིན་ཆེན་ཤོག་འདྲའི་ངོས་ལ་ལེགས་པར་བཀོད། །དེ་ལྟར་ཡང་ཟབ་ཆོས་ཀྱི་རྣམ་གྲངས་ཀུན། །ཡོངས་སུ་དྲིལ་བའི་ཆིངས་ཀྱི་གལ་མདོ་ལ། །རིན་ཆེན་དཀར་ཤོག་མ་བུ་བཅུ་དགུ་ཡང་། །རྩ་བའི་སྡེ་ཚན་བཅུ་བདུན་དག་ཏུ་བསྡུས། །རིན་ཆེན་ཤོག་འདྲ་མ་བུ་སུམ་ཅུ་ཡང་། །རྩ་བའི་སྡེ་ཚན་བཅུ་དྲུག་དག་ཏུ་བསྡུས། །རིན་ཆེན་ཤོག་སེར་མ་བཅུ་བུ་བཅུ་གསུམ། །སོ་སོར་དབྱེ་ན་ཉི་ཤུ་རྩ་གསུམ་མོ། །ཐེམ་བྱང་གཉིས་དང་བསྡམས་པས་བདུན་ཅུ་གསུམ། །མཁའ་འགྲོ་ཡང་ཏིག་གསང་བའི་དེབས་སུ་བསྟན། །ཕྱི་རབས་སྙིང་གི་བུ་གཅིག་མ་གཏོགས་པ། །གཞན་ལ་མི་བསྟན་མཁའ་འགྲོའི་བཀའ་རྒྱ་ཡོད། །

ཨེ་མ་ཧོ། རང་བྱུང་སྤྲུལ་སྐུ་པདྨ་འབྱུང་གནས་ཀྱིས། །བོད་ཡུལ་དབུས་སུ་ཟབ་གཏེར་སྦས་པ་ལ། །ལྷོ་རུ་བསྐྱེད་རྫོགས་འདྲིལ་བ་སྡོང་པོའི་སྐོར། །ནུབ་ཏུ་གསལ་བ་མེ་ཏོག་ཁ་བྱེ་འདྲ། །བྱང་དུ་རྒྱས་པ་ཡལ་འདབ་ཆེན་པོ་ལ། །ཤར་དུ་ལེགས་སྨིན་འབྲས་བུ་བཅུད་དུ་དྲིལ། །དབུས་སུ་ཟུག་པ་རྩ་བའི་སྐོར་ལྔ་ལས། །འདི་ནི་མཐར་ཐུག་འབྲས་བུའི་གཏེར་ཁ་སྟེ། །དགོངས་གཏེར་སྙིང་པོ་སྙིང་ཏིག་མངོན་(༡༢༩)སུམ་ལམ། །ཚེ་གཅིག་འབྲས་བུ་འོད་ལུས་འགྲུབ་པར་བྱེད། །དེ་ཕྱིར་འདི་འདྲའི་ཟབ་གཏེར་གཞན་ན་མེད། །དེང་སོང་ཚེ་ལོ་ལྔ་བཅུ་ཁ་རལ་དུས། །སྔ་མའི་ཚེ་ལ་དངས་ལུང་བྲག་ངོས་ནས། །ཆུ་མོ་གླང་ལོར་ཤོག་སེར་སྒོ་ཕྱེ་སྟེ། །རྗོད་བྱེད་ཚིག་གི་ཆ་ཙམ་དབང་བར་བྱས། །དེང་སོང་ཐོད་རྒལ་ལོངས་སྐུའི་ཞིང་ཉུལ་དུས། །ཤིང་མོ་ཡོས་ལ་མཆིམས་ཕུར་དགོངས་གཏེར་བབས། །བརྗོད་བྱའི་དོན་རྣམས་མ་ལུས་སྙིང་ལ་ཤར། །བླ་མ་མཁའ་འགྲོས་དངོས་སུ་བྱིན་བརླབས་པས། །ཚིག་དོན་འདྲེས་མེད་གསང་བའི་ཡི་གེ་རྣམས། །རྒྱལ་སྲས་བླ་མ་ཉིད་དང་མཚུངས་པས་ན། །ཡི་གེ་འདི་རྣམས་གཅེས་པས་སྙིང་ལ་ཕུར། །དགེ་བ་འདི་ཡིས་མ་ལུས་འགྲོ་བ་ཀུན། །ཚེ་གཅིག་འོད་ལུས་དམ་པ་རབ་འགྲུབ་ནས། །ཕྱམ་གཅིག་རང་བཞིན་གདོད་མའི་སར་གྲོལ་ཏེ། །རང་གཞན་དོན་གཉིས་ལྷུན་གྱིས་གྲུབ་པར་ཤོག །མཁའ་འགྲོ་ཡང་ཏིག་གི་ཐེམ་བྱང་དཔག་བསམ་ལྗོང་ཤིང་ཞེས་བྱ་བ། རང་བྱུང་པདྨས་དངོས་སུ་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་གྱི་མགུལ་དུ་བཀོད་པ་རྫོགས་སོ། །ཐེམ་བྱང་གཉིས་ལས། འདི་ནི་མཐར་ཐུག་གི་བུ་ལ་སྦྱིན་པའོ། །དེའང་སྣོད་ཕལ་པ་ལ་དང་པོ་ན་ཡོད་པ་བཞིན་ཤོག་སེར་རྣམས་ལས་སྡེ་ཚན་བདུན་མ་གཏོགས་པ། ཐམས་ཅད་ཡོངས་སུ་རྫོགས་པར་མི་སྦྱིན་ཏེ་བཀའ་རྒྱ་ཡོད། རབ་མཆོག་སྙིང་གི་བུ་གཅིག་ལ་འདི་ན་ཡོད་པ་ཐམས་ཅད། ཐེམ་བྱང་འདི་རྫོགས་པར་སྦྱིན། ཡི་གེ་འདིའི་ནང་ན་ཡོད་པའི་ཆོས་སྐོར་རྣམས་ལ་འདྲ་མིན་དང་བཅོས་བསླད་བྱེད་པ་བྱུང་ན། དམ་ཚིག་གི་ཆད་པས་དམྱལ་བར་ལྷུང་ཞིང་། བཀའ་སྲུང་གིས་སྲོག་དང་ཕྲོལ་ཅིག །གཟའ་རཱ་ཧུ་ལ། གནོད་སྦྱིན་དམར་ནག །རྡོ་རྗེ་གཡུལ་སྒྲོན། སྲོག་སྒྲུབ་ནག་མོ་རྣམས་ལ་གཏད་པས། ཐུབ་པར་སྲུངས་ཤིག་ས་མ་ཡ། བཀྲ་ཤིས། དགེའོ།། །།

ལོ་རྒྱུས་རིན་པོ་ཆེ་འོད་ཀྱི་ཕྲེང་བ།

༄༅། །ལོ་རྒྱུས་རིན་པོ་ཆེ་འོད་ཀྱི་ཕྲེང་བ་བཞུགས་སོ། །

༄༅༅། །ལོ་རྒྱུས་རིན་པོ་ཆེ་འོད་ཀྱི་ཕྲེང་བ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །སྟོན་པ་འཇིག་རྟེན་གསུམ་གྱི་མགོན། །ལྷ་རྣམས་ཀྱིས་ནི་ཕྱག་བྱས་པ། །བཀྲ་ཤིས་བདེ་ལེགས་སྦྱིན་མཛད་པ། །དང་པོ་ཉིད་དུ་ཕྱག་འཚལ་ལོ། །གང་དུ་དམ་པ་རྣམས་བྱོན་ཞིང་། །ཆོས་ཀྱི་འཁོར་ལོ་བསྐོར་བའི་ཚུལ། །ངོ་མཚར་རྨད་བྱུང་དགེ་བ་ཡི། །ལོ་རྒྱུས་འོད་ཀྱི་ཕྲེང་བ་(༢)སྤྲོ། །

དེ་ལ་ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོ་ཉིད། བསྐལ་པ་དཔག་ཏུ་མེད་པའི་སྔོན་རོལ་དུ། ཞིང་ཁམས་རང་བཞིན་རྣམ་པར་བཀོད་པ་ཞེས་བྱ་བར། སངས་རྒྱས་མེ་ཏོག་མཛེས་པ་ཆེན་པོ་ལ། གསེར་གྱི་རྡོ་རྗེ་གཅིག་ཕུལ་ནས། དང་པོར་བྱང་ཆུབ་མཆོག་ཏུ་ཐུགས་བསྐྱེད་དོ། །དེ་ནས་སྐྱེ་བ་གཉིས་ན་བྱང་ཕྱོགས་རླུང་གིས་གཡོ་བ་བཀོད་པ་ཞེས་བྱ་བར། ནོར་བུའི་ཕྲེང་བ་ཞེས་བྱ་བར་སྐྱེ་བ་བཞེས་ཏེ། སངས་རྒྱས་འཁོར་ལོ་ལེགས་པར་སྤྱོད་པ་ཞེས་བྱ་བའི་ཉེ་དྲུང་དུ་འཁོད་དེ་ཆོས་ཉན་ཏོ། །དེ་ནས་ཤི་འཕོས་ཏཻ། བདེ་བས་མྱོས་པའི་གླིང་ཞེས་བྱ་བར་ལེགས་སྦྱིན་ཞེས་བྱ་བར་སྐྱེ་བ་བཟུང་སྟེ། སངས་རྒྱས་དགེ་བའི་བློ་གྲོས་ལས་ལོ་ལྔར་བླ་ན་མེད་པའི་ཆོས་ཉན་ནས། ལོ་བདུན་དུ་ཏིང་ངེ་འཛིན་ལ་མཉམ་པར་བཞག་པས། ནོར་བུ་རིན་པོ་ཆེའི་ཕུང་པོ་རྣམ་པར་བཀོད་པ་ཞེས་བྱ་བའི་རིའི་རྩེ་མོ་ལ་(༣)མངོན་པར་རྫོགས་པར་སངས་རྒྱས་སོ། །དེ་ནས་བསྐལ་པ་ཆེན་པོ་གཅིག་ན་ཆོས་ཀྱི་སྤྲོས་གཞི་མཐའ་གང་དུའང་མ་ལྷུངས་པ་ནང་དབྱིངས་ལྷུན་གྲུབ་ཆེན་པོ་ལས། ཐུགས་རྗེ་རང་བྱུང་གི་ཡེ་ཤེས་ཆེན་པོ་ཉིད་གཡོས་ཏེ། ཆོས་ཉིད་ཀྱི་སྐུ་ལ་ལྷུན་གྲུབ་རིན་པོ་ཆེའི་སྣང་བ་ལ་རང་ཤར། ཡེ་ཤེས་ལྔའི་གདངས་ཕྱིར་གསལ། འོད་ཟེར་གྱི་འཕྲོ་འདུ་ལས་མཛད་པ་སུམ་ཅུ་རྩ་དྲུག་གི་རྒྱུར་རང་བྱུང་། གནས་པ་འོད་ཀྱི་ཐིག་ལེ་ལས་གནས་ཕུན་སུམ་ཚོགས་པ་དྲུག་ཅུར་རང་བཀོད། དེ་ཉིད་ཀྱི་རང་བཞིན་བྱིན་གྱིས་བརླབས་པ་ལས་སངས་རྒྱས་ཀྱི་སྐུ་འབུམ་ཕྲག་དཔག་ཏུ་མེད་པར་རང་སྣང་། རང་བྱུང་གི་ཡེ་ཤེས་དྲུག་ལས་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་བཀོད་དོ། །ཞེས་བྱ་བ་ལན་གསུམ་དུ་བྱུང་བ་ཉིད་ཀྱིས། རང་བྱུང་གི་ཡེ་ཤེས་རང་ཤེས་རིག་གི་རྒྱལ་པོ་ཀུན་ཏུ་བཟང་པོ་ཉིད་དུ་ཞལ་ཕྱག་གི་རྣམ་པར་རང་བྱུང་ནས། འཛད་པ་མེད་པའི་ཐུགས་རྗེ་ཕྱོགས་བཅུར་འཕྲོས་སོ། །དེ་ཉིད་ཀྱི་ངང་ལས་ཆོས་ཉིད་ཀུན་ཏུ་བཟང་མོའི་ལོངས་སྤྱོད་དུ་རིགས་ལྔའི་སངས་རྒྱས་རང་ཤར་ཏེ་རྫོགས་པ་ཆེན་པོའི་སྐུར་འོད་འབར་རོ། །དེའི་ཚེ་འོད་ཁྱིམ་རྣམ་པར་དག་པའི་གནས་འོད་ཀྱི་ཁང་བུ་བརྩེགས་པ་ན། སྟོན་པ་རྣམ་པར་དག་པ་རང་ཤེས་རིག་གི་རྒྱལ་པོ་རྣམ་པར་སྣང་མཛད་གང་ཆེན་མཚོ་ཞེས་བྱ་བ། དཀྱིལ་འཁོར་ཐམས་ཅད་ཀྱི་མངའ་བདག་ཏུ་རང་བྱུང་སྟེ། སྐུ་གསུང་ཐུགས་རང་བྱུང་བྱས་པ་མེད་པའི་བསྟན་པ་རིན་པོ་ཆེའི་ངང་ལ་མི་གཡོ་ཞིང་། རང་བྱུང་ཚོམ་བུའི་འཁོར་དཔག་ཏུ་མེད་པ་དང་ལྷན་ཅིག་རྣམ་དག་སྟུག་པོ་བཀོད་པའི་ཞིང་ཁམས་ན། སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལ་བཞུགས་པའོ། །

དེ་ནས་རང་བྱུང་གི་ཡེ་ཤེས་རྣམ་པར་གཡོས་ཏེ། ཐུགས་རྗེ་སྤྲུལ་པའི་སྐུར་རྣམ་པར་སྤྲུལ་པ་ལས། སྔོན་གྱི་སྨོན་ལམ་གྱི་རྟེན་རྗེས་སུ་དྲན་པའི་དབང་གིས། མཚན་རྫོགས་རྡོ་རྗེ་འཆང་གི་རྣམ་པར་བཞེངས་ཏེ། གདུལ་བྱའི་དོན་དུ་འདུལ་བྱེད་ཡིད་བཞིན་རིན་པོ་ཆེའི་སྐུ་མངོན་པར་སྣང་བའོ། །ཇི་ལྟར་སྣང་ན་གནས་བཅུ་གཉིས་སུ་(༤)སངས་རྒྱས་ཀྱི་མཚན་ཉིད་རྣམ་གྲངས་བཅུ་གཉིས་རིམ་པར་བྱོན་པས་དོན་མཛད་པ་རྣམས་སོ། །དེའང་ཆོས་སྐུའི་དུས་ན་སྟོན་པ་ཀུན་ཏུ་བཟང་པོ་ཉིད་ཞལ་ཕྱག་གི་རྣམ་པར་བཞེངས་ཏེ། སྐུ་གསུང་ཐུགས་གསུམ་ལ་ཕྱི་ནང་གསང་བ་བླ་ན་མེད་པ་དང་། བཞི་བཞིའི་མཛད་པ་སུམ་ཅུ་རྩ་དྲུག་གི་རྣམ་པར་རང་བྱུང་སྟེ། ཐུགས་ཀྱི་བསྟན་པ་ཆོས་ཉིད་ཀྱི་རྡོ་རྗེ་སུས་ཀྱང་བྱས་པ་མེད་པ་དང་ལྷན་ཅིག་གོ། །དེའི་བྱིན་རླབས་ལས་རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་བྱུང་བ་འགྲོ་བ་གང་ལ་བབས་པ་རྣམས་ཀྱིས་ཕྱག་གང་བ་ཞིག་ཀྱང་རང་སྣང་ངོ་། །ལོངས་སྐུའི་དུས་ན་རིགས་ལྔའི་སངས་རྒྱས་སུ་བཞེངས་ཏེ། སྐུ་གསུང་ཐུགས་ཕྱི་ནང་གསང་བ་བླ་ན་མེད་པའི་མཛད་པ་སུམ་ཅུ་རྩ་དྲུག་ཏུ་རང་བྱུང་། གསུང་གི་བསྟན་པ་རང་བྱུང་གི་ཡི་གེ་ཆེན་པོ་བསྟན་པའི་བུ་གཅིག་ཆོས་ཉིད་ཀྱི་རང་སྒྲར་གནས་པར་དང་ལྷན་ཅིག །དེའི་བྱིན་རླབས་ལས་རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་བྱུང་བ་འགྲོ་བ་གང་ལ་བབས་པའི་སྒྲ་སྐད་དང་མཐུན་པའི་དབྱངས་སུ་རང་གྲགས་པ་ཞིག་ཀྱང་རང་སྣང་ངོ་། །སྤྲུལ་སྐུའི་དུས་ན་མཚན་རྫོགས་རྡོ་རྗེ་འཆང་གི་སྐུར་བཞེངས་ཏེ། སྐུ་གསུང་ཐུགས་ཀྱི་མཛད་པ་སུམ་ཅུ་སོ་དྲུག་ཏུ་རང་བྱུང་། སྐུའི་བསྟན་པ་སངས་རྒྱས་ཐམས་ཅད་ཀྱི་བྱིན་རླབས་ལས། རང་ཤར་བ་དང་ལྷན་ཅིག །དེའི་བྱིན་རླབས་ལས་རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་བྱུང་བའི་སྐུ་འགྲོ་བ་གང་ལ་བབས་པའི་ལུས་བོངས་དང་མཉམ་པ་ཞིག་ཀྱང་རང་སྣང་ངོ་། །སྐུ་གསུང་ཐུགས་ཀྱི་བསྟན་པ་དངོས་སུ་ནི་སྐུ་གསུམ་དང་ལྷན་ཅིག་ཏུ་འོག་མིན་གྱི་ཞིང་ན་གནས་པ་ལ། གཟུགས་བརྙན་གྱི་བསྟན་པ་གསུམ་ནི་འཛམ་བུའི་གླིང་ན་གནས་ཏེ། སྤྲུལ་པ་དུ་མ་འཕྲོ་བས་སེམས་ཅན་རང་བཞིན་གྱིས་འགྲོ་བའི་དོན་མཛད་དོ། །དེ་ལྟར་སྤྲུལ་པའི་སྐུ་མཚན་རྫོགས་རྡོ་རྗེ་འཆང་གིས་དོན་མཛད་པ་ལས། དང་པོ་ཡུལ་དགའ་ལྡན་བརྩེགས་པར་སྟོན་པ་ཕུན་སུམ་ཚོགས་པ། རྡོ་རྗེ་འཆང་ཉིད་ཁྱེའུ་སྣང་བ་དམ་པ་བསམ་གྱིས་མི་ཁྱབ་པའི་སྐུར་བཞེངས་ཏེ། གནས་ཕུན་སུམ་ཚོགས་(༥)པ་མེ་ཏོག་པདྨའི་སྦུབས་ཁ་སྟོང་དང་ལྡན་པར། འཁོར་ཕུན་སུམ་ཚོགས་པ་སངས་རྒྱས་སྟོང་རྩ་གཅིག་སྔོན་དུ་སྤྲུལ་པས་བཀོད་པ་ལ། ཆོས་ཕུན་སུམ་ཚོགས་པ་བསྟན་པ་ཐམས་ཅད་ལ་སྔ་བ་སྒྲ་ཐལ་འགྱུར་ཆེན་པོ་ཉིད་དོ། །དུས་ཕུན་སུམ་ཚོགས་པ་ཚེ་ལོ་དཔག་ཏུ་མེད་པ་ཐུབ་པའི་དུས་སུ་གསུངས་སོ། །

དེ་ནས་གནས་ཕུན་སུམ་ཚོགས་པ་མི་མཇེད་འཇིག་རྟེན་དུ་སྐྱེ་གནས་ཕུན་སུམ་ཚོགས་པ་འོད་ཀྱི་སྒོང་དག་པ་ལ། སྟོན་པ་ཕུན་སུམ་ཚོགས་པ་ཁྱེའུ་འོད་མི་འཁྲུགས་པ་ཉིད། འཁོར་ཕུན་སུམ་ཚོགས་པ་མཁའ་འགྲོ་མ་འབུམ་ཕྲག་གཉིས་ལ། བསྟན་པ་ཕུན་སུམ་ཚོགས་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ། དུས་ཕུན་སུམ་ཚོགས་པ་ཚེ་ལོ་བྱེ་བ་ཐུབ་པའི་དུས་སུ་གསུངས་སོ། །དེ་བཞིན་དུ་གནས་ཕུན་སུམ་ཚོགས་པ་དྲོད་གཤེར་འདུས་པ་འོད་ཀྱི་ཕུང་པོར། སྟོན་པ་འཇིགས་པ་སྐྱོབ་པའི་ཡིད་ཀྱིས། འཁོར་བྱང་ཆུབ་སེམས་དཔའ་འབུམ་ཕྲག་དྲུག་ལ། བསྟན་པ་འཁོར་བ་དོང་སྤྲུག །རྨ་བྱ་འགྱིང་བསྣོལ། འབྱུང་བཞི་ཟད་པའི་རྒྱུད་རྣམས། ཚེ་ལོ་འབུམ་པའི་དུས་སུ་གསུངས་སོ། །དེ་ནས་གནས་ཆགས་འབྱུང་མངལ་དུ་སྣང་བར། སྟོན་པ་གཞོན་ནུ་རོལ་པ་རྣམ་པར་བརྩེ་བས། འཁོར་གནོད་སྦྱིན་དང་བྲག་སྲིན་འབུམ་ཕྲག་གཅིག་ལ། ཆོས་སེམས་སྡེ་རྩ་བའི་རྒྱུད་ལྔ། ཡན་ལག་གི་རྒྱུད་དྲུག་སྟེ་བཅུ་གཅིག །ཚེ་ལོ་བརྒྱད་ཁྲིའི་དུས་སུ་གསུངས་སོ། །དེ་ནས་གནས་འཚོ་བྱེད་གཞོན་ནུའི་ལྡུམ་རར། སྟོན་པ་རྡོ་རྗེ་འཆང་གིས། འཁོར་སངས་རྒྱས་རབས་བདུན་ལ་སོགས་པ་ལ། བསྟན་པ་ཕ་རོལ་ཏུ་ཕྱིན་པ་དྲུག་ལ་སོགས་པ། ཚེ་ལོ་བདུན་ཁྲིའི་དུས་སུ་གསུངས་སོ། །དེ་ནས་རི་རབ་ཀྱི་བྱང་ཕྱོགས་དུར་ཁྲོད་མེ་རི་འབར་བར། སྟོན་པ་གཞོན་ནུ་སྟོབས་ལྡན་དཔའ་བོ་ཆེན་པོས། འཁོར་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན་ལ། ཆོས་ཕ་རྒྱུད་མ་རྒྱུད་ལ་སོགས་པ། ཚེ་ལོ་དྲུག་ཁྲིའི་དུས་སུ་གསུངས་སོ། །དེ་ནས་གནས་སྲིན་པོ་རུ་ལུའི་སྒྲ་དང་ལྡན་པར། སྟོན་པ་དྲང་སྲོང་ཁྲོས་པའི་རྒྱལ་པོས། འཁོར་སྲིན་པོ་བྱེ་བ་གཅིག་ལ། ཆོས་རགས་པ་འདུལ་(༦)བའི་རྒྱུད་བཅུ་ལ་སོགས་པ། ཚེ་ལོ་ཁྲི་པའི་དུས་སུ་གསུངས་སོ། །དེ་ནས་གནས་བྱ་རྒོད་སྤུངས་པར་སྟོན་པ་དགྲ་བཅོམ་པ་གསེར་འོད་དམ་པས། འཁོར་ཉན་ཐོས་རྫུ་འཕྲུལ་དང་ལྡན་པ་དཔག་ཏུ་མེད་པ་ལ། ཆོས་འདུལ་བ་ཁྲི་ཕྲག་དཔག་ཏུ་མེད་པ། ཚེ་ལོ་ལྔ་སྟོང་པའི་དུས་སུ་གསུངས་སོ། །དེ་ནས་གནས་སོག་པོ་གཡུའི་སྨིན་མ་ཅན་གྱི་རྣམ་པར་རྒྱལ་བའི་ཤིང་དྲུང་དུ། སྟོན་པ་བརྩེ་བས་རོལ་པའི་བློ་གྲོས་ཀྱིས། འཁོར་ས་བརྒྱད་པའི་བྱང་ཆུབ་སེམས་དཔའ་རྣམས་ལ། ཆོས་ཕ་རྒྱུད་བདུན་ལ་སོགས་པ། ཚེ་ལོ་སྟོང་གི་དུས་སུ་གསུངས་སོ། །དེ་ནས་གནས་བྱ་རྒོད་ཕུང་པོར། སྟོན་པ་འོད་སྲུངས་བགྲེས་པོས། འཁོར་ཚེ་དང་ལྡན་པ་བདུན་ལ། ཆོས་མདོ་སྡེ། ཀྲི་ཡ། ཨ་ནུ་ཁྲི་ཕྲག་བརྒྱད་ལ་སོགས་པ། ཚེ་ལོ་ལྔ་བརྒྱའི་དུས་སུ་གསུངས་སོ། །དེ་ནས་གནས་རྡོ་རྗེ་གདན་བྱང་ཆུབ་འབྱུང་བའི་ཤིང་དྲུང་དུ། སྟོན་པ་མངོན་རྫོགས་རྒྱལ་པོས། འཁོར་རིགས་གསུམ་མགོན་པོ་ལ། ཆོས་ངེས་པའི་དོན་འགའ་ཞིག །ཚེ་ལོ་སུམ་བརྒྱ་པའི་དུས་སུ་གསུངས་སོ། དེ་ནས་གནས་མགོན་མེད་ཟས་སྦྱིན་གྱི་ཀུན་དགའ་ར་བ་ལ་སོགས་པར། སྟོན་པ་ཤཱཀྱ་ཐུབ་པས། འཁོར་རྣམ་པ་བཞི་ལ་སོགས་པ་ལ། ཆོས་བདེན་པ་བཞི་ལ་སོགས་པ། ཚེ་ལོ་བརྒྱ་པའི་དུས་སུ་གསུངས་སོ། །དེ་ལྟར་གནས་ཐ་དད་པར་བྱོན་པའི་སྟོན་པ་དག་ཀྱང་། རྡོ་རྗེ་འཆང་གཅིག་གི་དགོངས་པ་ཉིད་རིམ་པས་བརྒྱུད་པའི་ཕྱིར་དང་། དེ་ཡང་ལོངས་སྐུ་དང་ཆོས་སྐུའི་སྟོན་པ་དགོངས་པ་གཅིག་པོ་ཉིད་དེ་ལྟར་བརྒྱུད་པའི་ཕྱིར། རྒྱལ་བ་དགོངས་པའི་བརྒྱུད་པ་ཞེས་བྱའོ།། །།

དེ་ལྟར་ཞིང་དེར་མཛད་པ་དེ་ཙམ་ཞིག་སྟོན་པ་ལ་བསྟན་པའི་བདག་པོ་བཅོམ་ལྡན་འདས་ཞེས་བྱའོ། །སངས་རྒྱས་སྟོང་ཉིད་དགོངས་པ་གཅིག་བརྒྱུད་པར་གནས་ཤིང་། དེ་དག་གི་བར་དུ་བྱོན་པའི་སངས་རྒྱས་ལ་ནི་མཛད་པ་དེ་ལྟར་མེད་པས་བར་གྱི་སངས་རྒྱས་ཞེས་བྱ། ཀོལ་བུའི་བསྟན་པ་ཞེས་བྱའོ། །དེ་དག་གིས་རྒྱལ་བ་དགོངས་པའི་བརྒྱུད་པའི་ལོ་རྒྱུས་བསྟན་པའོ། །དེ་ནས་རིག་འཛིན་བརྡའི་བརྒྱུད་པ་ནི། སངས་རྒྱས་མྱ་ངན་ལས་འདས་ནས། ལོ་སུམ་བརྒྱ་དྲུག་ཅུ་སོང་བ་ན། ནུབ་ཕྱོགས་ཨུ་རྒྱན་གྱི་ཡུལ་དུ་རྒྱལ་པོ་ཨུ་པ་རཱ་ཛ་དང་། བཙུན་(༧)མོ་སྣང་བ་གསལ་བའི་འོད་ལྡན་མ་གཉིས་ལ། སྲས་མོ་སུ་དྷརྨཱ་ཞེས་བྱ་བ་ཡོད་པ་རབ་ཏུ་བྱུང་སྟེ། ནུབ་ཕྱོགས་གསེར་གྱི་བྱེ་མ་བརྡལ་བའི་རྒྱ་མཚོའི་གླིང་དུ་འཇག་མའི་སྤྱིལ་བུ་ཕུབ་སྟེ། བསམ་གཏན་ལ་ཡང་དག་པར་འཇོག་པའི་རྨི་ལམ་ན། མི་དཀར་པོ་ཞིག་གིས་རིན་པོ་ཆེའི་བུམ་པས་དབང་བསྐུར་བ་རྨིས་ཏེ། ཟླ་བ་བཅུ་ན་ཁྱེའུ་མཚན་དཔེར་ལྡན་པ་ཞིག་རྩིབ་ལོགས་གཡས་པའི་གོ་བར་ནས་བལྟམས་པ་ལ་ཡུམ་བྲེད་དེ། ཕ་མེད་བུ་འདི་འཇིག་རྟེན་འདྲེ་ལས་གཞན་པ་སུ། །འདི་ནི་ལོག་སྲེད་འགྲོ་བས་དཔྱས་གྱུར་སྡིག་རེ་ཆེ། །ཞེས་པ་ལ་སོགས་པའི་ཚིགས་སུ་བཅད་པ་བརྗོད་དེ། ཐལ་བའི་ཁུང་དུ་བོར་བ་ལས། ཞག་གསུམ་དུ་ས་གཡོ་བ་དང་། འོད་ཟེར་གསལ་བ་ལ་སོགས་པ་མཐོང་ནས་བལྟས་པས་ཅི་ཡང་མ་ཉེས་པར། ལྷ་དང་དྲང་སྲོང་གི་རྒྱལ་པོ་རྣམས་ཀྱིས་མཆོད་པ་མཐོང་བས། ངོ་མཚར་སྐྱེས་ནས་གསོས་ཏེ། ལོ་བདུན་ནས་ཆོས་རྣམས་རང་ཤར་མཁྱེན་པའི་ཚུལ་བསྟན་ནས། ཨུ་རྒྱན་དུ་བྱོན་ཏེ་པཎྜི་ཏ་རྣམས་དང་རྩོད་པས་རྒྱལ་ཞིང་། སངས་རྒྱས་ཀྱི་སྤྲུལ་པར་གྲགས་པ་ལ་རྒྱལ་པོ་དགྱེས་པས་དགའ་རབ་རྡོ་རྗེ་དང་། ཡུམ་གྱིས་རོ་ལངས་ཐལ་མདོག་དང་། ཡུལ་མིས་རོ་ལངས་བདེ་བ་དང་། པཎྜི་ཏས་པྲཛྙཱ་བྷ་ཝ་ཞེས་གསོལ་ཏེ། མཚན་གྱི་རྣམ་གྲངས་བཞིར་བྱུང་བ་ནི། སྔར་སྤྲུལ་པའི་སྐུ་བཅུ་གཉིས་ལས་ཆོས་ཉན་དུས། སྐྱེ་བ་བཞིའི་ལུས་ཀྱི་འདུན་པ་ལས་བྱུང་བའོ། །

དེ་ནས་བྱང་ཕྱོགས་སུ་རི་བོ་ཉི་མ་རབ་ཏུ་སྣང་བྱེད་དུ་བྱོན་ཏེ། ལོ་སུམ་ཅུ་རྩ་གཉིས་སུ་ཏིང་ངེ་འཛིན་ལ་མཉམ་པར་བཞག་ནས། མ་ལ་ཡ་རིན་པོ་ཆེ་རྣམ་པར་སྤུངས་པའི་རྩེ་མོར་བྱོན་ནས། སྔར་སངས་རྒྱས་རྣམས་ལས་ཐོས་པའི་སྡེ་སྣོད་དང་། རྒྱུད་སྡེ་རིན་པོ་ཆེ་རྣམས་དང་ཁྱད་པར་དུ། རང་བཞིན་རྫོགས་པ་ཆེན་པོའི་ཆོས་ཀྱི་རྣམ་གྲངས་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་རྣམས་ཡི་གེར་བཀོད་དེ། མཁའ་འགྲོ་མ་མངོན་པར་འབྱུང་བའི་ཕུག་ཏུ་བཞུགས་ནས། རྡོ་རྗེ་གདན་གྱི་བྱང་ཤར་དུར་ཁྲོད་བསིལ་བའི་ཚལ་དུ་གཤེགས་ཏེ་མཁའ་འགྲོ་མ་རྣམས་ལ་ཆོས་སྟོན་ཏོ། །དེའི་ཚེ་རྡོ་རྗེ་གདན་གྱི་ནུབ་ཕྱོགས་རིམ་པ་གཉིས་པ་ཞེས་བྱ་བའི་གྲོང་ཁྱེར་ན། ཡབ་བྲམ་ཟེ་ལེགས་ལྡན་སྟོན་པ་དང་། (༨)ཡུམ་སྣང་བ་སྒྲོན་མའི་སྲས་སློབ་དཔོན་ཆེན་པོ་འཇམ་དཔལ་བཤེས་གཉེན་ཞེས་བྱ་བ་རིག་པའི་གནས་ཐམས་ཅད་ལ་མཁས་པ་ཞིག་བཞུགས་པ་ལ་འཇམ་དཔལ་གྱིས་ལུང་བསྟན་པ། ཀྱཻ་རིགས་ཀྱི་བུ་འབྲས་བུ་ཚེ་གཅིག་ལ་སངས་རྒྱས་པར་འདོད་ན་དུར་ཁྲོད་བསིལ་བའི་ཚལ་དུ་སོང་ཞིག་ཅེས་ཐོས་མ་ཐག་བྱོན་པས། སློབ་དཔོན་དང་མཇལ་ནས་ལོ་བདུན་ཅུ་རྩ་ལྔའི་བར་དུ་ཆོས་ཉན་ཏེ། དེ་ནས་དུར་ཁྲོད་དེའི་བྱང་ཤར་ཆུ་བོ་དན་ཏིག་གི་མགོར་སྤྲུལ་པའི་སྐུ་མྱ་ངན་ལས་འདས་པའི་ཚུལ་བསྟན་པའི་ཚེ། གདུང་བའི་སྨྲེ་སྔགས་ཕྱུང་བ། ཀྱེ་མ་ཀྱི་ཧུད་ཀྱེ་མ་ཀློང་། །སྟོན་པ་སྒྲོན་མེའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་བརྗོད་པས། ནམ་མཁའ་འོད་ཕུང་གི་དཀྱིལ་ནས་ཕྱག་གཡས་པའི་གྲུ་མོ་མན་ཆད་ཕྱུང་སྟེ་རིན་པོ་ཆེ་གསེར་གྱི་ཟ་མ་ཏོག་སེན་གང་བ་ཞིག་འཕར་བ། འཇམ་དཔལ་བཤེས་གཉེན་གྱི་ཕྱག་ཏུ་བབས་པ་ཞལ་ཕྱེ་བ་ལས། ཚིག་གསུམ་གནད་དུ་བརྡེགས་པའི་ཞལ་ཆེམས་གཟིགས་པ་ཙམ་གྱིས་སློབ་དཔོན་དང་རྟོགས་པ་མཉམ་པར་གྱུར་ཏོ། །དེ་ནས་རང་བཞིན་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞི་པོ། སེམས་སྡེ། ཀློང་སྡེ། མན་ངག་གི་སྡེ་གསུམ་དུ་ཕྱེ་སྟེ། མན་ངག་གི་སྡེ་ལ་ཡང་བཤད་རྒྱུད་དང་། སྙན་རྒྱུད་དུ་ཕྱེ་བའི་སྙན་རྒྱུད་མཆན་དུ་བཏབ་ནས། བཤད་རྒྱུད་གཏད་པའི་སྣོད་མ་རྙེད་པས། དཔེ་རྣམས་རྡོ་རྗེ་གདན་གྱི་བྱང་ཤར་ཕ་བོང་རྡོ་རྗེ་རྒྱ་གྲམ་གྱིས་བཏབ་པའི་འོག་ཏུ་སྦས་ཏེ། རྡོ་རྗེ་གདན་གྱི་ནུབ་ཕྱོགས་སུ་དུར་ཁྲོད་ཆེན་པོ་སོ་ས་གླིང་དུ་དགོངས་པ་ལ་བཞུགས་སོ། །དེའི་ཚེ་རྒྱ་ནག་པོའི་ཡུལ་ཤྭ་ཁྱམས་གླིང་ཞེས་བྱ་བ་ན། ཡབ་ཁྱིམ་བདག་དགེ་བ་ལྡན་པའི་ཡིད་ཅན་དང་། ཡུམ་སྣང་གསལ་མཁྱེན་མའི་སྲས་སློབ་དཔོན་ཆེན་པོ་ཤྲཱི་སིང་ཧ་ཞེས་བྱ་བ་མཁས་པ་སྦྱངས་པའི་ཡོན་ཏན་དང་ལྡན་པ་ལ། ཐུགས་རྗེ་ཆེན་པོས་སྔར་བཞིན་སོ་ས་གླིང་དུ་ལུང་བསྟན་པ་ཐོས་ནས་བྱོན་པས། སློབ་དཔོན་འཇམ་དཔལ་བཤེས་གཉེན་དང་མཇལ་ཏེ། ལོ་ཉི་ཤུ་རྩ་ལྔར་ཆོས་ཉན་ཏོ། །

དེ་ནས་དུར་ཁྲོད་དེ་ཉིད་ཀྱི་མཆོད་རྟེན་གྱི་རྩེ་མོར་སློབ་དཔོན་ལྷག་མེད་དུ་གཤེགས་པ་ལ་སྔར་བཞིན་སྨྲེ་སྔགས་ཕྱུང་བས། ནམ་མཁའ་འོད་ཕུང་གི་དཀྱིལ་ནས་སྒོམ་ཉམས་དྲུག་པ་ཞེས་བྱ་བ་སྔར་བཞིན་བབས་(༩)པ་གཟིགས་པས་རྟོགས་པ་མཉམ་པ་ཉིད་དུ་གྱུར་ཏོ། །དེ་ནས་སིངྷས་རྡོ་རྗེ་གདན་གྱི་བྱང་ཤར་ནས་དཔེ་རྣམས་ཕྱུང་སྟེ། རྒྱ་ནག་པོ་བྱང་ཆུབ་འབྱུང་བའི་ཤིང་དྲུང་གི་བྲག་ཁང་འབྲེལ་མར་བྱོན་ནས། རྫོགས་པ་ཆེན་པོ་ཐིག་ལེའི་སྐོར་ལ་ཕྱི་ནང་གསང་བ། བླ་ན་མེད་པའི་སྐོར་དང་བཞིར་ཕྱེ་ནས། སྐོར་དང་པོ་གསུམ་སྤྲོས་བཅས་ཀྱི་དོན་དུ་གཏེར་དུ་སྦས། ཕྱི་མ་བཅངས་པ་ལས། མཁའ་འགྲོ་མས་ལུང་བསྟན་ནས། དེ་ནས་བཀྲ་ཤིས་ཁྲི་སྒོའི་ལྷ་ཁང་དུ་སྦས་ཏེ། དུར་ཁྲོད་ཆེན་པོ་བསིལ་སྦྱིན་དུ་དགོངས་པ་ལ་བཞུགས་སོ། །དེའི་ཚེ་རྒྱ་གར་ནུབ་ཕྱོགས་གླང་པོ་སྒང་ཞེས་བྱ་བའི་གྲོང་ཁྱེར་ན། ཡབ་ཁྱིམ་བདག་བདེ་ལྡན་འཁོར་ལོ་དང་ཡུམ་གསལ་རིག་མའི་སྲས། སློབ་དཔོན་ཆེན་པོ་བི་མ་ལ་མི་ཏྲ་དང་། རྒྱ་གར་ཤར་ཕྱོགས་ཀ་མ་ལ་ཡི་གྲོང་ཁྱེར་ན། ཡབ་གདོལ་བ་ཤན་ཏིང་ལག་པ་དང་། ཡུམ་དགེ་སེམས་མའི་སྲས་སློབ་དཔོན་ཆེན་པོ་ཡེ་ཤེས་མདོ་ཞེས་བྱ་བ་གཉིས་བཞུགས་པས། རྡོ་རྗེ་གདན་གྱི་ནུབ་ཕྱོགས་འདམ་བུའི་ཚལ་དུ་སྐྱོ་སངས་ལ་བྱོན་པར། རྡོ་རྗེ་སེམས་དཔས་ལུང་བསྟན་པ། ཀྱཻ་རིགས་ཀྱི་བུ་ཁྱེད་གཉིས་ཀྱིས་སྐྱེ་བ་ལྔ་བརྒྱར་པཎྜི་ཏའི་ལུས་བླངས་ཀྱང་འབྲས་བུ་མ་ཐོབ། ད་ནི་ཚེ་གཅིག་གི་སངས་རྒྱས་པའི་འབྲས་བུ་ཐོབ་པར་འདོད་ན། དུར་ཁྲོད་ཆེན་པོ་བསིལ་སྦྱིན་དུ་སོང་ཞིག་ཅེས་པ་ཐོས་མ་ཐག་ཏུ། བི་མ་ལ་བྱོན་ཏེ་སློབ་དཔོན་ཆེན་པོ་ཤྲཱི་སིངྷ་དང་མཇལ། སྐོར་དང་པོ་གསུམ་གསན་ནས་རྒྱ་གར་དུ་བྱོན་པ་དང་། ཡེ་ཤེས་མདོ་གཉིས་གྲོང་ཁྱེར་དགའ་བྱེད་ཀྱི་འདབས་སུ་མཇལ་བ་ན། སྔར་གྱི་དྲན་པ་སད་དེ་ཡེ་ཤེས་མདོས་བླ་མ་བཞུགས་སམ་ཞེས་དྲིས་པས། བཞུགས་ཞེས་གསུངས་ཏེ་དུར་ཁྲོད་ཐ་ཆུང་དུ་བྱོན་ནོ། །

དེ་ནས་སློབ་དཔོན་ཛྙཱ་ན་སཱུ་ཏྲས་ཀྱང་དུད་ཁྲོད་བསིལ་སྦྱིན་དུ་བྱོན་ཏེ། ཤྲཱི་སིངྷ་དང་མཇལ་ནས་དབང་ཁྲིད་གདམས་པ་དང་བཅས་པ་གསན་ཞིང་ཉམས་སུ་བླངས་པས་ཤྲཱི་སིང་ཧ་ཉིད་འོད་ལུས་སུ་གཤེགས་པ་ལ་ཡེ་ཤེས་མདོས་སྔར་བཞིན་སྨྲེ་སྔགས་གསོལ་བས། འོད་ཕུང་གི་དཀྱིལ་ནས་གཟེར་བུ་བདུན་པའི་འདས་རྗེས་བབས་པ་གཟིགས་པས་རྟོགས་པ་མཉམ་པར་གྱུར་ཏེ། དཔེ་རྣམས་ཕྱུང་ནས། རྒྱ་གར་གྱི་དུར་ཁྲོད་ཆེན་པོ་བྷ་སེང་དུ་བྱོན་ཏེ་དགོངས་པ་ལ་བཞུགས་སོ། །དེའི་ཚེ་བི་མ་ལ་ལ་(༡༠)མཁའ་འགྲོ་མ་དཔལ་གྱི་བློ་གྲོས་མས་ལུང་བསྟན་པ། ཀྱཻ་སྐལ་ལྡན་སྔ་མ་ལས་ཆེས་ཟབ་པ་གསང་བ་སྙིང་ཏིག་གི་གདམས་པ་བཞེད་ན་དུར་ཁྲོད་བྷ་སིང་དུ་སོང་ཞིག་ཅེས་ཐོས་མ་ཐག་བྱོན་ནས། སློབ་དཔོན་ཛྙཱ་ན་སཱུ་ཏྲ་ལ་ཕྱག་དང་བསྐོར་བ་མཛད་དེ་ཞུས་པས། ཡོངས་སུ་རྫོགས་པར་གནང་སྟེ། སློབ་དཔོན་ཉིད་མྱ་ངན་ལས་འདས་པའི་ཚུལ་བསྟན་པ་ལ། གདུང་བའི་སྨྲེ་སྔགས་ཕྱུང་བས། ནམ་མཁའ་འོད་ཕུང་གི་དཀྱིལ་ནས། བཞག་ཐབས་བཞི་པ་ཞེས་བྱ་བའི་འདས་རྗེས་བབས་པ་གཟིགས་པས་རྟོགས་པ་མཉམ་པར་གྱུར་ཏོ། །དེ་ནས་བི་མ་ལ་ཉིད་ཤར་ཕྱོགས་ཀ་མ་རུའི་རྒྱལ་བུ་སེང་གེ་བཟང་པོའི་མཆོད་གནས་ལོ་ཉི་ཤུ་མཛད་པའི་འོག་ཏུ། རྒྱ་གར་ནུབ་ཕྱོགས་བྷིརྱའི་གྲོང་ཁྱེར་གྱི་རྒྱལ་པོ་དྷརྨཱ་པ་ལའི་བླ་མཆོད་མཛད་ཅིང་། མཚན་མོ་དེ་ནས་དཔག་ཚད་ལྔ་བརྒྱ་འདས་པའི་བྱང་ཕྱོགས་དུར་ཁྲོད་ཆེན་པོ་རབ་ཏུ་སྣང་བྱེད་དུ་བཞུགས་ནས་གསང་བ་མཆོག་གི་དཔེ་རྣམས་ཚར་གསུམ་དུ་བྲིས་ཏེ། གཅིག་ནི་ཨུ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བརྡལ་བའི་གླིང་དུ་སྦས་སོ། །གཅིག་ནི་ཁ་ཆེའི་ཡུལ་གྱི་མཐའ་འཁོབ་གསེར་གྱི་གླིང་ཞེས་བྱ་བར་སྦས་སོ། །གཅིག་ནི་སྨྱུག་མའི་བསིལ་ཁང་དུ་བཞུགས་པས་བསོད་ནམས་ཀྱི་ཞིང་མཛད་དོ། །དེ་ནས་ཡང་སློབ་དཔོན་ཆེན་པོ་རྒྱ་གར་གྱི་གྲོང་ཁྱེར་སེར་སྐྱའི་རྒྱལ་པོ་ཨིནྡྲ་བོ་དྷིའི་བླ་མཆོད་ལོ་དྲུག་ཅུའི་བར་དུ་མཛད་ཅིང་བཞུགས་པའི་ཡུལ་ཁམས་ཙམ་དུ་དགེ་བར་གྱུར་ཏོ། །རིག་འཛིན་བརྡའི་བརྒྱུད་པའི་ལོ་རྒྱུས་བསྟན་པའོ།། །།

༈ གང་ཟག་སྙན་བརྒྱུད་ཀྱི་ལོ་རྒྱུས་ནི། དེའི་ཚེ་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དང་། ཉང་ཏིང་འཛིན་བཟང་པོ་གཉིས་བཀའ་བགྲོས་པས། བང་ཆེན་པ་མི་གསུམ་ལ་གསེར་ཕྱེ་དང་གསེར་གྱི་པ་ཏྲ་མང་པོ་བསྐུར་ཏེ། རྒྱལ་པོ་ཨིནྡྲ་བོ་དྷི་ལ་སྐྱེས་སུ་བརྫངས་ནས། སྐྱེ་ལན་དུ་པཎྜི་ཏ་མཁས་ཤིང་གྲུབ་པ་ཐོབ་པ་གཅིག་བརྫང་པར་ཞུས་པས། རྒྱལ་པོས་སློབ་དཔོན་ཆེན་པོ་བི་མ་ལ་བོད་དུ་བརྫང་དུས། རྨ་རིན་ཆེན་མཆོག །སྐ་བ་དཔལ་བརྩེགས། ཅོག་རོ་ཀླུའི་རྒྱལ་མཚན་གསུམ་གྱིས་གདན་དྲངས་ནས་བྱོན་པས། རྒྱ་གར་གྱི་ཉི་མ་བོད་ཀྱི་མི་གསུམ་གྱིས་ཁུར་ནས་སོང་བ་ལ་སོགས་པ་རྨིས་ཏེ། རྒྱ་གར་(༡༡)བས་རྐང་མགྱོགས་པ་བརྫངས་ནས་བོད་དུ་མདོ་བྱང་སྒྲོག་ཏུ་བཅུག་གོ། །དུས་དེར་ལོ་པཎ་གདན་ཕེབས་ཏེ། རྒྱལ་པོ་ལ་མཇལ་བར་ཞུས་པས། སང་མཇལ་དོ་ནུབ་བུདྡྷ་གསེར་ཁང་གླིང་དུ་བཞུགས་ཤིག །ཅེས་གསུངས་དུས། བློན་པོ་ཀུན་གྱིས་རྒྱལ་པོ་ལ། མཐའི་ངན་སྔགས་ཀྱིས་ཕུང་དུ་འཇུག་པའི་ཨ་ཙ་ར་སླེབས་ཡོད་འདུག་པས་བཀའ་ཆད་གསོལ་ལ་རྒྱ་གར་དུ་སྐྱེལ་བར་ཞུ་ཞེས་ཞུས་སོ། །དེ་ནས་ལོ་ཙཱ་བས་ཞུ་དུས། མཚན་བརྟག་གསུང་བ་ལ་ལོ་ཙཱ་བ་ཡིད་མ་བདེ་བ་ལ། བི་མ་ལས་ལྷ་རྣམས་ལ་ཕྱག་ཡ་གཅིག་དེང་མཛད་པ་ཙམ་གྱིས། གས་ནས་རྡུལ་ཕྲན་བཞིན་དུ་སོང་བ། སླར་སེ་གོལ་བརྡབས་པས་སྔོན་བས་ངོ་མཚར་ཞིང་ལེགས་པར་གྱུར་པའི་ལོ་རྒྱུས་རྣམས་གསོལ་བས། རྗེ་བློན་རྣམས་དགྱེས་ཏེ། བསུ་བ་ཆེན་པོ་མཛད་ནས། གསེར་གྱི་སེང་གེའི་ཁྲི་སུམ་བརྩེགས་ལ་བཞུགས་པ་ལ། རྒྱལ་བློན་ཀུན་གྱིས་ཕྱག་མཛད་དེ་ཆོས་བསྒྱུར་བར་ཞུས་པས། རྒྱུ་འབྲས་ཀྱི་ཆོས་མང་པོ་གཉགས་ཛྙཱ་ན་ཀུ་མཱ་ར་དང་། སྐ་ཅོག་ལ་སོགས་པས་བསྒྱུར། བཻ་རོ་ཙ་ན་རྒྱལ་མོ་ཚ་བའི་རོང་ནས་སྤྱན་དྲངས་ཏེ། སེམས་ཀློང་གི་སྐོར་མང་པོ་བསྒྱུར། རྒྱལ་པོ་ཁྲི་སྲོང་ལྡེའུ་བཙན། སྲས་མུ་ནེ་བཙན་པོ། ཉང་ཏིང་འཛིན་བཟང་པོ། སྐ་བ་དཔལ་བརྩེགས། ཅོག་རོ་ཀླུའི་རྒྱལ་མཚན་རྣམས་ལ་ཐིག་ལེ་ཕྱི་ནང་གསང་བ་བླ་ན་མེད་པའི་སྐོར་གསུངས་ཏེ། ཟབ་པའི་པོ་ཏི་བཞི་མཆིམས་ཕུ་དགེ་གོང་དུ་སྦས་ནས། བི་མ་ལ་རྒྱ་ནག་རི་བོ་རྩེ་ལྔར་གཤེགས་སོ། །དེ་ནས་ཉང་བན་ཆེན་པོས་རྡོ་རྗེ་ལེགས་པས་ཁམས་སུ་སེར་བ་ཕབ་པའི་རྫས་ལས་དབུ་རུ་ཞའི་ལྷ་ཁང་བཞེངས་པར་བཤད་རྒྱུད་ཀྱི་དཔེ་རྣམས་གཏེར་དུ་སྦས་ཏེ། སྙན་རྒྱུད་སྦས་བློ་གྲོས་དབང་ཕྱུག་ལ་བཤད་ནས། ལྷ་ས་བྲག་ལྷའི་ཕུག་ཏུ་བཞུགས་ནས་ལྷག་མེད་འོད་ལུས་སུ་མྱ་ངན་ལས་འདས་ཏེ། སྦས་ཀྱིས་འབྲོམ་རིན་ཆེན་འབར་ལ་བཤད། བཤད་རྒྱུད་རྣམས་ལོ་བརྒྱར་གཏེར་དུ་བཞུགས་པའི་འོག་དབུ་རུ་ལྷ་ཁང་དུ་ལྡང་མ་དགེ་མཆོག་གི་བུ་གནས་བརྟན་ལྡང་མ་ལྷུན་རྒྱལ་ལ། རྡོ་རྗེ་ལེགས་པས་གཏེར་དཔེ་ལུང་བསྟན་པ་བཞིན་བཏོན་ཏེ། ལོ་བཅོ་ལྔ་ན། ཉང་རོའི་ཡུལ་ཉང་ཚེ་ཞེས་བྱ་བ་ན། ལྕེ་ཐུབ་(༡༢)པའི་དབང་པོ་དང་། ཁྱུང་མོ་བཟའ་ལེགས་མའི་བུ། ལྕེ་བཙུན་སེང་གེ་དབང་ཕྱུག་དང་མཇལ་ཏེ། སྙན་རྒྱུད་འབྲོམ་ལས་ཐོས་པ་ཀུན་གནང་ནས། ལོ་གསུམ་ན་བཤད་རྒྱུད་ཀྱི་སྣོད་འཚོལ་དུ་བྱོན་པས། ལྕེ་བཙུན་དང་གཙང་གི་རི་གཟར་རྒོད་པོ་ལུང་དུ་མཇལ་ཏེ། ཁ་རག་ཏུ་དུས་བྱས་ནས། དཔེ་རྣམས་གནང་བ་ལ། སྐོར་དང་པོ་གསུམ་གྱི་དཔེ་ཚན་རྣམ་པ་གསུམ་པོ་ལང་གྲོར་མཆད་པ་སྟག་འདྲའི་ཆུ་མིག་རྩར་སྦས་ནས། འོ་ཡུག་ཤུག་གསེབ་ན་བཞུགས་པའི་རྨི་ལམ་དུ་བི་མ་ལས་ལུང་བསྟན་པ། བདག་ནི་བི་མ་མི་ཏྲ་མཁས་པ་སྟེ། །སྐལ་ལྡན་སྙིང་པོའི་ཡང་བཅུད་དོན་འདོད་ན། །མཆིམས་ཕུ་བྲག་དམར་དགེ་གོང་ཡར་འདབས་ལ། །གསང་བ་སྙིང་ཏིག་སྙིང་དང་འདྲ་བ་ཡོད། །དེ་དག་ཁྱེར་ལ་རྫ་ཡི་ར་བ་རུ། །སུས་ཀྱང་མཐོང་བ་མེད་པར་ལོ་བདུན་སྒོམས། །ཟག་བཅས་ཕུང་པོ་སྣང་བ་མ་ཡིན་ནོ། །ཞེས་ཐོས་པ་ལྟར། མཆིམས་ཕུར་བྱོན་དུས་བུད་མེད་གཅིག་གིས་དཔེ་རྣམས་བཏོན་ནས་གནང་བ་འོ་ཡུག་ཏུ་ཁྱེར་ནས་བྱོན་པ་ལས། བི་མ་ལ་དང་དངོས་སུ་མཇལ་ཏེ། དབང་ཁྲིད་གདམས་པ་དང་བཅས་པ་ཟླ་བ་ཕྱེད་ལ་རྫོགས་པར་གནང་ནས་རྒྱ་ནག་ཏུ་གཤེགས་སོ། །

དེ་ནས་བླ་མེད་ཀྱི་སྐོར་ཟབ་པའི་པོ་ཏི་བཞི་དང་བཅས་པ་བྱར་གྱི་ཕུ་བྲག་སེང་གེ་འདྲ་བར་གཏེར་དུ་སྦས་ནས། ལྕེ་བཙུན་གྱིས་ལོ་བདུན་བསྒོམས་པས་རང་རྒྱུད་དག་སྟེ་བཞུགས་པ་ལ། རོང་སྣར་མདའི་ལྕེ་སྒོམ་ནག་པོས་ཕྱི་ནང་གསང་བ་གསུམ་གྱི་སྐོར་རྣམས་ཞུས་སོ། །དེ་དག་གིས་དཔེ་སྦས་པ་ཡང་གཏེར་ནས་བྱུང་ངོ་། །དེའི་ཚེ་ཡུལ་ཡར་འབྲོག་སྒང་གི་སྣུབས་མཚོ་གླིང་དགུའི་བླ་དོ་ཞེས་བྱ་བ་ན། ཡབ་ཞང་རྡོ་རྗེ་དངོས་གྲུབ་དང་ཡུམ་ཞུ་མོ་ཉི་རི་ལྕམ་ལ་སྲས་བཀྲ་ཤིས་རྡོ་རྗེ་ཞེས་བྱ་བ། སྦྱངས་པའི་ལས་འཕྲོ་སད་པ་ཞིག་བཞུགས་པ་ལ། ཐུགས་རྗེ་ཆེན་པོས་རྨི་ལམ་དུ་ལུང་བསྟན་པ། ཀྱཻ་སྐལ་ལྡན་ཚེ་གཅིག་གིས་སངས་རྒྱ་བའི་མན་ངག་གསང་བ་བླ་ན་མེད་པའི་སྐོར་བྲག་སེང་གེ་འདྲ་བ་ལ་ཡོད་པ་ཐོན་ལ་སེམས་ཅན་གྱི་དོན་དཔག་ཏུ་མེད་པ་གྱིས་ཤིག །ཅེས་པ་ཐོས་པའི་མོད་ལ་མནལ་སད་པ་དང་། མི་དཀར་པོ་ཞིག་བྱུང་ནས། དངོས་གྲུབ་སྦྱིན་གྱིས་འདོད་དང་ཟེར་ནས་ཕྱིན་ཏེ། བྲག་(༡༣)སེང་གེ་དང་འདྲ་བའི་སར་སླེབས་པ་དང་ཁོ་མ་རྙེད། ཕུག་པ་ཞིག་ནས་གཏེར་དཔེ་རྣམས་རྙེད་དེ། དཔལ་སྔགས་སྲུང་གིས་ལུང་བསྟན་པས། དཔེ་རྣམས་བྲིས་ཏེ་མ་དཔེ་སྔར་ཤུལ་དུ་སྦས་ནས་བྱོན་པ་དང་། རྟ་ནག་ཟམ་ཁར་ལྕེ་བཙུན་སེང་གེ་དབང་ཕྱུག་དང་ཞལ་མཇལ། དབང་ཁྲིད་གདམས་པ་དང་བཅས་པ་རྫོགས་པར་གནང་། དེ་ནས་ལྕེ་བཙུན་ལོ་བརྒྱ་དང་ཉི་ཤུ་རྩ་ལྔ་ན་ཟག་མེད་དུ་གཤེགས་སོ། །ཞལ་ཆེམས་གསང་བའི་གནད་གསུམ་མཁའ་འགྲོ་མས་ཨུ་རྒྱན་དུ་གདན་དྲངས་ཞེས་གྲགས་སོ། །

དེ་ནས་རྒྱལ་བ་ཞང་སྟོན་ཉིད་ཀྱིས་སྐྱེར་སྒང་དང་སྒོམ་ཁང་དུ་བྱོན་ཏེ། གསང་བ་བླ་ན་མེད་པའི་ཆོས་ཀྱི་འཁོར་ལོ་བསྐོར་ཞིང་བཞུགས་སོ། །དེའི་ཚེ་ཡབ་སྤྲུལ་སྐུ་ཆེན་པོ་དེ་ཉིད་དང་། ཡུམ་རྒྱ་མོ་གཡང་དེའི་སྲས་མཁས་པ་ཉི་མ་འབུམ་ཞེས་གྲགས་པས། ཤེས་བྱའི་གནས་ལ་མཁྱེན་རབ་ཀྱི་པདྨོ་རྒྱས་པ་དེས་ཞུས་ཏེ། གསང་བ་བླ་ན་མེད་པའི་དོན་ཐོས་བསམ་སྒོམ་པས་ཐུགས་ཉམས་སུ་བཞེས་པ་ན། རྒྱལ་བ་ཞང་ཆེན་པོ་མྱ་ངན་ལས་འདས་ཏེ། འོད་དང་ས་གཡོ་བ་དང་མེ་ཏོག་གི་ཆར་དུ་མ་བབས། སྐུ་གདུང་རིང་བསྲེལ་དཔག་ཏུ་མེད་པ་བྱོན་པས་མི་རྣམས་ངོ་མཚར་གྱི་ས་ལ་བཀོད་དོ། །དེའི་ཚེ་མཁས་པ་ཉི་འབུམ་ཉིད་གདུལ་བྱ་དཔག་ཏུ་མེད་པའི་དོན་མཛད་ཅིང་དགོངས་པ་ཆོས་ཉིད་ལས་མི་གཡོ་བར་བཞུགས་པ་ན། ཡབ་མཁས་པ་ཆེན་པོ་དེ་ཉིད་ཀྱི་གཅུང་པོ་ཟླ་བ་འབུམ་དང་། ཡུམ་རྒྱ་མོ་ཨ་ལུའི་སྲས། གུ་རུ་ཇོ་འབེར་ཞེས་བྱ་བ་ལག་ན་རྡོ་རྗེའི་སྤྲུལ་པ་དེས། གསང་བ་བླ་ན་མེད་པའི་སྐོར་མ་ལུས་པ་ཞུས་སོ། །དེ་ནས་མཁས་པ་ཉི་མ་འབུམ་མྱ་ངན་ལས་འདས་ཏེ། འོད་དང་གདུང་དང་རིང་བསྲེལ་སྣང་བས་ངོ་མཚར་གྱི་ས་ལ་བཀོད་དོ། །དེ་ནས་གཡུ་རུ་གྲའི་ཕུ་སོ་གད་ཕྲེང་ཞེས་བྱ་བའི་གྲོང་དུ། ཡབ་བཀྲ་ཤིས་དངོས་གྲུབ་དང་། ཡུམ་ས་ལེའི་སྲས། འཁྲུལ་ཞིག་སངས་རྒྱས་དབོན་པོ་ཞེས་བྱ་བས་ཞུས་ཏེ་དོན་གྱི་སྙིང་པོ་གཏད་རྒྱ་དང་བཅས་པ་རྫོགས་དུས། གུ་རུ་ཇོ་འབེར་གདོད་མའི་སར་གཤེགས་ཏེ་མེ་ཏོག་གི་ཆར་བབས། འཇའ་འོད་ཀྱི་གུར་ཕུབ། ངོ་མཚར་གྱི་ས་ལ་བཀོད་དོ། །དེ་ནས་སྒྲགས་དར་ཕུག་ཅེས་བྱ་བར་ཡབ་རྣལ་འབྱོར་པ་བསམ་ཡས་དང་། (༡༤)ཡུམ་མ་ཇོ་འབར་མའི་སྲས་གྲུབ་ཐོབ་མེ་ལོང་རྡོ་རྗེས་སངས་རྒྱས་དབོན་པོ་ལ་ཞུས་ཏེ། གདམས་པ་རྣམས་ཡོངས་སུ་རྫོགས་ཤིང་དངོས་གྲུབ་བརྙེས་པ་དང་། འཁྲུལ་ཞིག་ཆེན་པོ་གདོད་མའི་དབྱིངས་སུ་གཤེགས་སོ། །འཇའ་འོད་རིང་བསྲེལ་ལ་སོགས་དཔག་ཏུ་མེད་པས་ངོ་མཚར་གྱི་ས་ལ་བཀོད་དོ། །དེའི་ཚེ་དབུ་རུ་འོན་གྱི་ནང་བར་སར་རྫིང་ཁ་ཞེས་བྱ་བར། ཡབ་ཇོ་སྲས་བསོད་ནམས་དཔལ་དང་། ཡུམ་ཁྱེ་བཟའ་འབུམ་མེའི་སྲས་ཐར་པ་རྒྱལ་ཞེས་བྱ་བར་འཁྲུངས་ཏེ། རབ་ཏུ་བྱུང་ནས་འགྲོ་བའི་མགོན་པོ་ཀུ་མ་རཱ་ཛ་ཞེས་མཚན་གསོལ་བ་དེས། སྒྲགས་ཡོངས་རྫོང་ཤེལ་གྱི་ཕུག་པར་གྲུབ་ཆེན་པ་བཞུགས་པ་ལས་ཞུས་ཏེ། གསང་ཆེན་བླ་ན་མེད་པའི་སྐོར་མ་ལུས་པ་ཐུགས་ཉམས་སུ་བཞེས་ནས། གདུལ་བྱ་རྒྱ་མཚོ་ལྟ་བུའི་དོན་མཛད་དོ། །དེའི་ཚེ་དཔལ་བསམ་ཡས་ལྷུན་གྱིས་གྲུབ་པའི་ལྷོ་ཕྱོགས་ཁམས་གསུམ་མེ་ཏོག་སྒྲོལ་གྱི་འདབས་སུ་རིག་པ་འཛིན་པའི་སློབ་དཔོན་བསྟན་སྲུང་དང་། འབྲོ་བཟའ་མ་བསོད་ནམས་རྒྱན་ཞེས་བྱ་བའི་བུ་རྡོ་རྗེ་རྒྱལ་མཚན་ཞེས་བྱ་བ་རབ་ཏུ་བྱུང་སྟེ་ཚུལ་ཁྲིམས་བློ་གྲོས་ཞེས་གྲགས་པ་དེས། སྐྱོམ་ཕུ་དཔལ་གྱི་རི་ཁྲོད་བཀྲ་ཤིས་དགེ་སྡིངས་ཞེས་བྱ་བར། རིག་འཛིན་ཆེན་པོ་བཞུགས་པའི་དྲུང་དུ་ཕྱིན་ནས། བླ་ན་མེད་པའི་དབང་ཁྲིད་གདམས་པ་དང་བཅས་པ་རྫོགས་པར་ཞུས་ཏེ། དཔལ་གྱི་མཆིམས་ཕུ་ལ་སོགས་པ་གྲུབ་པ་ཆེན་པོའི་གནས་རྣམས་སུ་ཉམས་སུ་བླང་ཞིང་། གོང་མ་རྣམས་ཀྱི་གདུང་འཚོབ་པར་རང་གི་དོན་དང་གཞན་གྱི་དོན་སྒྲུབ་པ་ལ་སྤྲོ་བ་མ་ཉམས་ཙམ་དུ་མཆིས་པས། སྐལ་ལྡན་གྱི་དོན་བྱེད་ཅིང་། ཨུ་རྒྱན་གྱི་གནས་ལ་གུས་པས། གསོ་བ་དང་ཚེས་བཅུའི་འདུ་བ་ཁྱད་པར་ཅན་གྱི་ཁུར་ཐེགས་ཏེ། ཡུལ་ཁམས་ཙམ་དུ་ཕན་པའི་རྟེན་འབྲེལ་དང་སྨོན་ལམ་བཟང་པོ་འདེབས་པ་ལ་བརྩོན་པས་གནས་སོ། །

དེ་ནས་ཆུ་མོ་ལུག་གི་ལོ་སྟོན་ཟླ་ཐ་ཆུང་ཚེས་བརྒྱད་ཀྱི་ཐོ་རངས། དྭགས་པོ་དང་ལུང་གི་རི་ཁྲོད་དུ་མྱ་ངན་ལས་འདས་ཚུལ་བསྟན་པས། ས་ཆེན་པོ་ནི་གཡོས། འོད་ལྔའི་སྣང་བ་ནི་བྱུང་། སིལ་སྙན་གྱི་སྒྲ་ནི་སྒྲོགས། པུར་སྦྱངས་པ། རིགས་ལྔའི་ཚོམ་བུའི་དཀྱིལ་འཁོར་དབུ་ཐོད་ལ་རང་བྱོན་ཏེ། འགྲོ་བ་རྣམས་ངོ་མཚར་(༡༥)གྱི་ས་ལ་བཀོད་དོ། །དེ་ལྟར་གསང་བ་བླ་ན་མེད་པའི་བརྒྱུད་པ་རིན་པོ་ཆེ་འདི་ཉིད་ལ་བྱིན་རླབས་དབང་གི་ཆུ་བོ་ཟམ་མ་ཆད་པས་གསང་སྔགས་ཟབ་མོའི་བཀའ་བབས་རྒྱུན་མ་ཆད། དམ་ཚིག་གཙང་མའི་གཞུང་གིས་འཕགས་པས་ཅི་བསམ་གྱི་རེ་བ་ཡིད་བཞིན་དུ་འགྲུབ། མཐོང་བ་བརྒྱུད་པའི་ངོ་སྤྲོད་ཡོད་པས་ཡིད་དཔྱོད་ཚིག་གི་ལྷད་མ་ཞུགས། བཀའ་ལུང་མན་ངག་གི་དཔང་པོ་ཡོད་པས་ཡིད་ཆེས་དོན་གྱི་ཕུག་ཟིན། དངོས་གྲུབ་བརྙེས་པའི་བརྒྱུད་པ་ཟམ་མ་ཆད་པས་བྱིན་རླབས་ཀྱི་བཀའ་བབས་ཆེ་བའི་ཕྱིར། བརྩོན་འགྲུས་ཅན་དམ་ཚིག་ལ་གནས་པས་བསྒྲུབས་ན་ཚེ་འདིར་ཕུང་པོ་ལྷག་མེད་དུ་སངས་རྒྱ་བ། འབྲིང་བར་དོར་སངས་རྒྱ་བ། ཐ་མ་རང་བཞིན་སྤྲུལ་པའི་ཞིང་ཁམས་དག་པར་སངས་རྒྱས་པའི་བརྒྱུད་པ་ཡིད་བཞིན་ནོར་བུ་རིན་པོ་ཆེ་རྩ་ལ་བརྒྱུས་པའི་འོད་ཀྱི་ཕྲེང་བ་ལྟ་བུའོ།། །།

དེ་ལྟར་མཆོག་གསང་རྫོགས་པ་ཆེན་པོའི་རྩེར། །དགོངས་པ་བརྡ་དང་སྙན་ཁུང་བརྒྱུད་པ་ཡི། །ལོ་རྒྱུས་རིན་ཆེན་འོད་ཀྱི་ཕྲེང་སྤྲོས་པས། །མ་ལུས་འགྲོ་ཀུན་མངོན་པར་བྱང་ཆུབ་ཤོག །ལོ་རྒྱུས་རིན་ཆེན་འོད་ཀྱི་ཕྲེང་བ་ཞེས་བྱ་བ། ཐེག་པ་རྒྱལ་པོའི་རྣལ་འབྱོར་པ་སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ། མེ་ཏོག་སྤྲིན་གྱི་སྐྱེད་མོས་ཚལ་དུ་སྦྱར་བ་རྫོགས་སོ།། །།

དགེའོ། །དགེའོ།། །།

ཕྱག་འཚལ་ཡིད་བཞིན་ནོར་བུ།

༄༅། །ཕྱག་འཚལ་ཡིད་བཞིན་ནོར་བུ་བཞུགས་སོ། །

༄༅། ༀ་ཨཱཿཧཱུྃ། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་མཉམ་པ་ཉིད་རྡོ་རྗེ་རྩེ་མོའི་ངོ་བོ་ལས་ལྷུན་གྱིས་གྲུབ་པ་དཔལ་ཀུན་ཏུ་བཟང་པོའི་རང་བཞིན་ཚད་མེད་པའི་མཁྱེན་རབ་དང་ཐུགས་རྗེར་ལྡན་པ། ཁམས་གསུམ་གྱི་བླ་མ་རིན་པོ་ཆེ་ཀུ་མ་རཱ་ཛའི་ཞབས་ཀྱི་པདྨོ་དྲི་མ་མེད་པ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་དུ་གསོལ།

ངོ་བོ་བརྗོད་འདས་ཆོས་སྐུའི་ངང་། །རང་བཞིན་འོད་གསལ་ལོངས་སྤྱོད་རྫོགས། །ཐུགས་རྗེ་ལྷུན་གྲུབ་སྤྲུལ་པའི་སྐུ། །བླ་མ་ཀུན་ལ་ཕྱག་འཚལ་ལོ། །ཤིན་ཏུ་སྐྱེ་མེད་ཆོས་ཉིད་ཀློང་། །གདོད་མའི་མགོན་པོ་ཡོན་ཏན་རྫོགས། །སངས་རྒྱས་ཀུན་གྱི་མེས་ཆེན་(༡༦)པོ། །ཀུན་བཟང་ཡབ་ཡུམ་ལ་ཕྱག་འཚལ། །རང་བཞིན་ལྷུན་གྲུབ་འོད་གསལ་ཞིང་། །གསལ་སྟོང་དབྱེར་མེད་ཞི་ཁྲོའི་སྐུ། །ཀུན་བཟང་ཀློང་ལས་རང་ཤར་བའི། །དམ་པ་རིགས་བརྒྱ་ལ་ཕྱག་འཚལ། །ཤིན་ཏུ་རྣམ་དག་གཉུག་མའི་ཀློང་། །ཡོན་ཏན་ལྷུན་རྫོགས་འོད་གསལ་སྐུ། །རང་བཞིན་ལྷུན་གྲུབ་རྫོགས་སངས་རྒྱས། །རྡོ་རྗེ་འཆང་ཆེན་ལ་ཕྱག་འཚལ། །ཤིན་ཏུ་སྐྱེ་མེད་ནམ་མཁའི་ངང་། །ཡེ་ཤེས་ཡོན་ཏན་ཁྱབ་གདལ་ཆེ། །གསལ་སྟོང་འོད་གསལ་སྒྱུ་མའི་སྐུ། །རྡོ་རྗེ་སེམས་དཔའ་ལ་ཕྱག་འཚལ། །སངས་རྒྱས་ཀུན་དང་དབྱེར་མེད་ཅིང་། །ཡོན་ཏན་ལྷུན་རྫོགས་རྡོ་རྗེ་འཛིན། །རྒྱུད་ཀུན་སྡུད་མཛད་གསང་སྔགས་འཆང་། །ཕྱག་ན་རྡོ་རྗེ་ལ་ཕྱག་འཚལ། །རྒྱལ་བའི་ཐུགས་རྗེ་ལྷུན་གྲུབ་ལས། །རང་བྱུང་རིག་འཛིན་ཀུན་གྱི་གཙོ། །དན་ཏིག་ཆུ་བོར་འཇའ་བཞིན་ཡལ། །དགའ་རབ་རྡོ་རྗེ་ལ་ཕྱག་འཚལ། །རང་བཞིན་ལྷུན་རྫོགས་ཀུན་བཟང་ངང་། །ཤིན་ཏུ་མཉམ་བཞག་གསལ་སྟོང་རྒྱས། །སོ་ས་གླིང་དུ་འོད་དུ་ཡལ། །འཇམ་དཔལ་བཤེས་གཉེན་ལ་ཕྱག་འཚལ། །ལྷུན་རྫོགས་ཆོས་སྐུར་རྣམ་སངས་རྒྱས། །གསལ་སྟོང་དབྱེར་མེད་ཡོན་ཏན་རྫོགས། །བསིལ་སྦྱིན་མཁའ་ལ་འོད་སྐུར་ཡལ། །ཤྲཱི་སིངྷ་ལ་ཕྱག་འཚལ། །གཉུག་མའི་ཀློང་ལས་ཡོན་ཏན་རྫོགས། །གཟུང་འཛིན་རང་གྲོལ་མཉམ་པ་ཉིད། །བྷ་སིང་ནགས་སུ་འོད་དུ་ཡལ། །ཛྙཱ་ན་སཱུ་ཏྲ་ལ་ཕྱག་འཚལ། །གདོད་མའི་ངང་དུ་རང་སར་གྲོལ། །ཐུགས་རྗེ་ལྷུན་གྲུབ་འགྲོ་བའི་དཔལ། །རིག་པ་འཛིན་པ་ཀུན་གྱི་རྗེ། །བི་མ་མི་ཏྲ་ལ་ཕྱག་འཚལ། །སྐལ་བཟང་འདྲེན་པ་སྟོང་གི་བར། །གཞན་དོན་འཕོ་བ་ཆེན་པོའི་སྐུ། །རི་བོ་རྩེ་ལྔར་རྟག་ཏུ་བཞུགས། །བི་མ་མི་ཏྲ་ལ་ཕྱག་འཚལ། །མཁྱེན་བརྩེའི་ཕྲིན་ལས་ལྷུན་གྲུབ་གྱིས། །འགྲོ་བའི་དོན་རྣམས་རྫོགས་མཛད་ཅིང་། །ཟག་མེད་ལྷུན་རྫོགས་རྡོ་རྗེའི་སྐུ། །དྲི་མེད་བཤེས་གཉེན་ལ་ཕྱག་འཚལ། །བླང་དོར་མེད་པ་ཆོས་སྐུའི་ཀློང་། །འོད་སྐུར་ཡོན་ཏན་ལྷུན་རྫོགས་ཤིང་། །གང་ཤར་རང་གྲོལ་འཛིན་པ་མེད། །ཏིང་འཛིན་བཟང་པོ་ལ་ཕྱག་འཚལ། །ཚོགས་གཉིས་རྒྱ་མཚོ་ལས་གྲུབ་ཅིང་། །འཇམ་(༡༧)དཔལ་དབྱངས་ཀྱི་རྣམ་འཕྲུལ་མཆོག །གངས་ཅན་དམ་ཆོས་རྒྱས་མཛད་པའི། །ཆོས་རྒྱལ་མཆོག་ལ་ཕྱག་འཚལ་ལོ། །འཛིན་མེད་རང་གྲོལ་གཉུག་མའི་ངང་། །འོད་གསལ་ལྷུན་གྲུབ་དབྱིངས་དང་འདྲེས། །མ་འགགས་རོལ་པས་གཞན་དོན་མཛད། །ལྡང་མ་ལྷུན་རྒྱལ་ལ་ཕྱག་འཚལ། །སངས་རྒྱས་ཀུན་དང་རྣམ་དབྱེར་མེད། །ཡོན་ཏན་ལྷུན་རྫོགས་གསལ་སྟོང་རྒྱས། །འོད་ལུས་གྲུབ་ནས་མཁའ་ལ་ཡལ། །སེང་གེ་དབང་ཕྱུག་ལ་ཕྱག་འཚལ། །རྟོག་པ་ཉོན་མོངས་རང་སར་གྲོལ། །ཐུགས་རྗེས་གཞན་དོན་ལྷུན་གྱིས་གྲུབ། །རང་བྱུང་ཟང་ཐལ་ཀློང་ཡངས་ཤར། །རྒྱལ་བ་ཞང་སྟོན་ལ་ཕྱག་འཚལ། །རང་བཞིན་ལྷུན་རྫོགས་རོལ་པའི་ངང་། །ཀུན་བཟང་དགོངས་པ་མཐར་ཕྱིན་ཞིང་། །ཤེས་བྱ་ཀུན་ལ་ཐོགས་པ་མེད། །མཁས་པ་ཉི་འབུམ་ལ་ཕྱག་འཚལ། །རང་བཞིན་གཉུག་མ་གདལ་བའི་ཀློང་། །གཟུང་འཛིན་རང་གྲོལ་ཆོས་སྐུའི་ངང་། །གསལ་སྟོང་འཛིན་མེད་ངོ་བོ་ཉིད། །གུ་རུ་ཇོ་འབེར་ལ་ཕྱག་འཚལ། །གཉིས་འཛིན་འཁྲུལ་པ་རང་སར་ཞིག །སྤང་བླང་རེ་དོགས་དབྱིངས་སུ་གྲོལ། །འགྱུར་མེད་སྙིང་པོའི་ཀློང་དུ་རྫོགས། །སེང་གེ་རྒྱབ་པ་ལ་ཕྱག་འཚལ། །ལྷུན་རྫོགས་རོལ་པ་ཀུན་བཟང་ངང་། །ཐམས་ཅད་རང་གྲོལ་འོད་གསལ་ཤར། །དཔེ་མེད་ནམ་མཁའི་རྣལ་འབྱོར་པ། །མེ་ལོང་མཚན་ཅན་ལ་ཕྱག་འཚལ། །སངས་རྒྱས་ཀུན་དངོས་ཆོས་སྐུའི་ཀློང་། །ཟག་མེད་རང་གྲོལ་དགེ་འདུན་ཆེ། །དུས་གསུམ་འཕོ་འགྱུར་མེད་པའི་ངང་། །ཀུ་མ་རཱ་ཛ་ལ་ཕྱག་འཚལ། །གདོད་མའི་ཆོས་དབྱིངས་ཀུན་ཏུ་བཟང་། །ལྷུན་མཉམ་ངང་ལས་མི་གཡོ་ཞིང་། །མཁྱེན་བརྩེའི་ཕྲིན་ལས་བསམ་ཡས་བརྙེས། །དྲི་མེད་འོད་ཟེར་ལ་ཕྱག་འཚལ། །ངོ་བོར་བརྗོད་འདས་ནམ་མཁའི་ཀློང་། །རང་བཞིན་འོད་གསལ་མཉམ་སྦྱོར་ཞིང་། །ཐུགས་རྗེ་འགྲོ་ཀུན་ཡོངས་ལ་ཁྱབ། །སྐྱབས་མཆོག་ཁྱེད་ལ་ཕྱག་འཚལ་ལོ། །སྙིང་པོའི་ཀློང་དུ་ཡེ་ནས་གྲོལ། །གསལ་སྣང་ཞིང་ཁམས་ཆེན་པོར་རྒྱས། །ཐམས་ཅད་མཉམ་སྦྱོར་ནམ་མཁའི་ངང་། །དཔེ་བྲལ་ཁྱེད་ལ་ཕྱག་འཚལ་ལོ། །ཡེ་ནས་ཀུན་བཟང་རོལ་པའི་ངང་། །ཁྱེད་ནི་རྟག་ཏུ་མཉམ་བཞག་(༡༨)ཀྱང་། །ནོར་བུ་ཇི་བཞིན་གཞན་དོན་མཛད། །ཡིད་བཞིན་ཁྱེད་ལ་ཕྱག་འཚལ་ལོ། །ཏིང་འཛིན་དང་ནི་མངོན་ཤེས་ཀྱིས། །གདུལ་བྱ་འཇིག་རྟེན་མ་ལུས་ཀུན། །གདོད་མའི་ཀློང་དུ་འཁྲིད་མཛད་པའི། །དེད་དཔོན་ཁྱེད་ལ་ཕྱག་འཚལ་ལོ། །འཁོར་བར་མགོན་མེད་རབ་འཁྱམས་ཤིང་། །སྡུག་བསྔལ་རྒྱ་མཚོའི་ཀློང་ཡངས་ལས། །སྒྲོལ་བར་མཛད་པའི་གྲུ་བོ་ཆེ། །བརྩེ་ཆེན་ཁྱེད་ལ་ཕྱག་འཚལ་ལོ། །ལས་དང་ཉོན་མོངས་འཁྲུལ་འཁོར་གྱིས། །ཡུན་རིང་སྲིད་པར་འདུག་པ་ལ། །སྤངས་གཉེན་རང་གྲོལ་མངོན་སུམ་ལམ། །སྟོན་མཆོག་ཁྱེད་ལ་ཕྱག་འཚལ་ལོ། །གང་ཞིག་མཐོང་བས་རབ་དད་ཅིང་། །ཐོས་པས་ཐེ་ཚོམ་དྲ་བ་གཅོད། །རེག་པས་བྱིན་རླབས་དངོས་གྲུབ་འབྱུང་། །མཚུངས་བྲལ་ཁྱོད་ལ་ཕྱག་འཚལ་ལོ། །གང་ཞིག་ཁྱོད་སྐུ་མཐོང་བ་དང་། །ཁྱོད་གསུང་ཐོས་དང་འཛིན་པ་ཡི། །འགྲོ་བ་དེ་དག་ཀུན་ལ་ཡང་། །རྟག་ཏུ་བདག་ནི་ཕྱག་འཚལ་ལོ། །དེ་བཞིན་ཕྱོགས་བཅུའི་སངས་རྒྱས་དང་། །ཆོས་དང་བྱང་ཆུབ་སེམས་དཔའི་ཚོགས། །ཉན་ཐོས་རང་སངས་རྒྱས་ཀུན་ལའང་། །རྟག་ཏུ་གུས་པས་ཕྱག་འཚལ་ལོ། །འཇིག་རྟེན་རྒྱ་མཚོའི་ཀློང་ཡངས་ན། །མཆོད་པའི་སྤྲིན་གྱི་ཕུང་པོ་ནི། །མཁའ་དང་མཉམ་པ་ཇི་སྙེད་ཀྱིས། །བླ་མའི་ཚོགས་དང་དཀོན་མཆོག་མཆོད། །དེ་བཞིན་དངོས་དང་ཡིད་ལས་སྐྱེས། །བླ་ན་ཡོད་མེད་མཆོད་པའི་སྤྲིན། །ལུས་དང་ལོངས་སྤྱོད་ལ་སོགས་ཀྱིས། །མཆོད་འོས་ཀུན་ལ་མཆོད་པར་བགྱི། །ཐམས་ཅད་ཀུན་བཟང་རོལ་པའི་ངང་། །མཆོད་པར་མི་འོས་གང་ཡང་མེད། །སྣང་སྟོང་མཆོད་སྤྲིན་རོལ་པ་ཡིས། །ཀུན་ལ་དེ་བཞིན་མཆོད་པར་བགྱི། །ཐོག་མ་མེད་ནས་ལུས་དང་ངག །ཡིད་ཀྱིས་སྡིག་པའི་ལས་བགྱིས་པ། །དེ་ཀུན་རབ་ཏུ་འགྱོད་སེམས་ཀྱིས། །མཆོད་འོས་ཀུན་གྱི་སྤྱན་སྔར་བཤགས། །དྲི་མ་གློ་བུར་དང་ལྡན་ཞིང་། །ཡོན་ཏན་ཡེ་ནས་རྫོགས་པའི་ངང་། ། འཁྲུལ་པའི་བག་ཆགས་ཅི་མཆིས་པ། །ཐམས་ཅད་ཀུན་བཟང་རོལ་པར་བཤགས། །ཡེ་ནས་གྲོལ་བའི་དེ་བཞིན་ཉིད། །སྤང་བླང་རེ་དོགས་མེད་པའི་ངང་། །ཆོས་ཀུན་བསམ་བརྗོད་མེད་པའི་དབྱིངས། །རང་(༡༩)བཞིན་གདོད་མའི་ཀློང་དུ་བཤགས། །བླ་ན་ཡོད་མེད་དགེ་བའི་ཚོགས། །བགྱིད་དང་བགྱིད་སྩལ་བགྱིས་པ་ལའང་། །དགའ་བས་རྗེས་སུ་ཡི་རང་ཞིང་། །རང་གྲོལ་ཆོས་ཀྱི་འཁོར་ལོ་བསྐོར། །ཀུན་ཀྱང་ཡེ་ནས་སྐྱེ་ཤི་མེད། །འདུ་འབྲལ་མེད་པའི་ཀློང་ཡངས་ལ། །མྱ་ངན་མི་འདའ་རྟག་པར་ཡང་། །སྒྱུ་མ་ཙམ་དུ་གསོལ་བ་འདེབས། །གདོད་ནས་ཁྱབ་བདག་རོལ་པ་ཆེ། །རང་གྲོལ་ཀུན་བཟང་ཆོས་སྐུ་ཡི། །འགྲོ་ཀུན་མ་སྤངས་རང་གྲོལ་དུ། །དགེ་བ་གཉུག་མར་བསྔོ་བར་བགྱི། །དེང་ནས་བྱང་ཆུབ་སྙིང་པོའི་བར། །འགྲོ་བའི་ཁམས་ཀུན་རྣམ་གྲོལ་ཕྱིར། །སྨོན་ལམ་རྒྱ་མཚོའི་ཀློང་ཡང་འདེབས། །མ་སྤངས་དབྱིངས་སུ་གྲོལ་བར་ཤོག །ཚུལ་ཁྲིམས་ནམ་མཁའི་རང་བཞིན་ལ། །བློ་གྲོས་འོད་གསལ་ཉི་མ་ཡིས། །འགྲོ་བའི་མུན་པ་རབ་སེལ་ཞིང་། །གདོད་མའི་ཀློང་དུ་གྲོལ་བར་ཤོག །སེམས་ཅན་ཇི་སྲིད་གནས་ཀྱི་བར། །འགྲོ་བ་ཕན་པའི་ཡིད་བཞིན་དུ། །བདག་ནི་དེང་ནས་གནས་གྱུར་ཏེ། །སྐུ་གསུམ་འབྲས་བུ་ཐོབ་པར་ཤོག །གང་སྣང་མི་སྤོང་མི་སྒྲུབ་ཅིང་། །རང་གྲོལ་གཉུག་མ་ཆོས་ཀྱི་སྐུ། །གང་ཤར་དོན་ལས་མ་འདས་པའི། །ལྷག་མཐོང་ཡེ་ཤེས་ཐོབ་གྱུར་ཅིག །འཁོར་དང་མྱ་ངན་འདས་པའི་ཆོས། །རོ་མཉམ་རྟོགས་པའི་གདེངས་ཆེན་གྱིས། །གང་ཡང་མི་སྤོང་མི་སྒྲུབ་ཅིང་། །གཉུག་མའི་རང་བཞིན་རྫོགས་པ་ཆེ། །བྱར་མེད་ཀློང་དུ་རྫོགས་པར་ཤོག །དབང་པོའི་སྐལ་བ་ཇི་བཞིན་དུ། །ཚེ་འདི་ཉིད་དམ་བར་དོ་རུ། །སྐྱེ་བ་གཞན་དུ་གོམས་བྱས་ཏེ། །སྐུ་དང་ཡེ་ཤེས་འགྲུབ་པར་ཤོག །རྣམ་སྨིན་འབྱུང་བའི་ལུས་འདི་ཡང་། །རང་མདངས་འོད་ཀྱི་རང་བཞིན་སྐུ། །ཕུང་པོ་ལྷག་མེད་འགྲུབ་གྱུར་ནས། །འགྲོ་བའི་དོན་ཀུན་འགྲུབ་པར་ཤོག །ཀུན་བཟང་ཆོས་སྐུའི་ངོ་བོ་ཉིད། །ཡོན་ཏན་ལྷུན་རྫོགས་དངོས་གྲུབ་གཏེར། །དཔལ་ལྡན་བླ་མའི་ཚོགས་རྣམས་ཀྱིས། །རྟག་ཏུ་བདག་ནི་སྐྱོང་བར་ཤོག །ཨེ་མ་གང་ཡང་མ་གྲུབ་ལ། །གང་དུ་འང་ནི་མི་གནས་ཤིང་། །གང་གིས་ཀྱང་ནི་མ་གཡོས་པ། །དོན་དམ་བདེན་པ་མཐོང་བར་ཤོག །ཆོས་རྣམས་རང་བཞིན་མ་སྐྱེས་པ། །གདོད་ནས་མྱ་ངན་འདས་པ་ཡིས། །(༢༠)ཡེ་ནས་འོད་གསལ་ཆོས་ཀྱི་སྐུ། །རང་བྱུང་ཡེ་ཤེས་རྟོགས་པར་ཤོག །དེ་ལྟར་བླ་མའི་ཚོགས་རྣམས་ལ། །དད་པས་དགེ་བསགས་དངོས་ཀུན་གྱིས། །འགྲོ་ཀུན་རང་གྲོལ་གཉུག་མའི་ངང་། །ཀུན་བཟང་ཀློང་དུ་རྫོགས་པར་ཤོག །དེང་ནས་བདག་དང་འགྲོ་བ་ཀུན། །སེམས་དང་སེམས་ཉིད་ཀུན་བཟང་ཀློང་། །གདོད་མའི་ངང་དུ་རབ་རྫོགས་ནས། །འགྲོ་བའི་དོན་ཀུན་འགྲུབ་པར་ཤོག །

བླ་མ་བརྒྱུད་པའི་རིམ་པ་རྣམས་ལ་གསོལ་བ་འདེབས་པ་ཡིད་བཞིན་ནོར་བུ་ཞེས་བྱ་བ། བླ་མ་དམ་པ་རྣམས་ལ་མི་ཕྱེད་པའི་དད་པ་དང་ལྡན་ཞིང་། ལུང་དང་། རིགས་པ་དང་། མན་ངག་གི་དོན་ལ་བློ་གྲོས་ཀྱི་སྣང་བ་གོང་དུ་འཕེལ་བའི་ཆོས་སྨྲ་བ། དཔལ་ལྡན་བསམ་ཡས་པ་ཚུལ་ཁྲིམས་བློ་གྲོས་ཀྱིས་མཆིམས་ཕུ་དཔལ་གྱི་དབེན་གནས་སུ་བཀོད་པའོ། །དགེའོ། །དགེའོ། །དགེའོ།། །།

གསོལ་འདེབས་བདུད་རྩིའི་ཆུ་རྒྱུན།

༄༅། །གསོལ་འདེབས་བདུད་རྩིའི་ཆུ་རྒྱུན་བཞུགས་སོ། །

༄༅། དངོས་གྲུབ་མ་ལུས་འབྱུང་བའི་གནས། །བྱིན་རླབས་བདུད་རྩིའི་སྤྲིན་འཁྲིགས་པའི། །བླ་མ་ཀུན་ལ་སྐྱབས་སུ་མཆི། །ཐུགས་རྗེའི་སྤྱན་གྱིས་གཟིགས་སུ་གསོལ། །རྣམ་དག་ཆོས་སྐུའི་ཕོ་བྲང་དུ། །ཀུན་བཟང་ཡབ་ཡུམ་ལ་གསོལ་བ་འདེབས། །གདོད་ནས་གཞི་རྩ་བྲལ་བ་ཡི། །སེམས་ཉིད་རྟོགས་པར་བྱིན་གྱིས་རློབས། །འོད་གསལ་ལོངས་སྐུའི་ཕོ་བྲང་དུ། །ཞི་ཁྲོ་རབ་འབྱམས་ལ་གསོལ་བ་འདེབས། །ཡེ་ནས་སྟོང་གསལ་དག་པའི་སྐུ། །ལྷུན་གྲུབ་རྟོགས་པར་བྱིན་གྱིས་རློབས། །ཀུན་ཁྱབ་སྤྲུལ་སྐུའི་ཕོ་བྲང་དུ། །རྡོ་རྗེ་འཆང་ལ་གསོལ་བ་འདེབས། །འགགས་མེད་ཐུགས་རྗེ་རོལ་པ་ཡིས། །གཞན་དོན་རྫོགས་པར་བྱིན་གྱིས་རློབས། །གསལ་སྟོང་འོད་ལྔའི་ཕོ་བྲང་དུ། །རྡོ་རྗེ་སེམས་དཔའ་ལ་གསོལ་བ་འདེབས། །གསལ་སྣང་འོད་གསལ་ཞིང་ཁམས་དེ། །མྱུར་དུ་འབྱོངས་པར་བྱིན་གྱིས་རློབས། །ལྷུན་རྫོགས་བརྗོད་མེད་ཕོ་བྲང་དུ། །ཕྱག་ན་རྡོ་རྗེ་ལ་གསོལ་བ་འདེབས། །ཉོན་མོངས་བདུད་དཔུང་བར་ཆད་དང་། །རྐྱེན་ངན་བཟློག་པར་བྱིན་གྱིས་རློབས། །འདུ་འབྲལ་མེད་པའི་ཕོ་བྲང་དུ། །དགའ་རབ་རྡོ་རྗེ་ལ་གསོལ་བ་འདེབས། །གདོས་བཅས་(༢༡)སྒྱུ་ལུས་ཕུང་པོ་འདི། །འོད་ལུས་དག་པར་བྱིན་གྱིས་རློབས། །མུ་བཞི་གདལ་བའི་ཕོ་བྲང་དུ། །འཇམ་དཔལ་བཤེས་གཉེན་ལ་གསོལ་བ་འདེབས། །ཕྱི་ནང་གཟུང་འཛིན་རིག་པ་འདི། །རང་སར་གྲོལ་བར་བྱིན་གྱིས་རློབས། །བླང་དོར་མེད་པའི་ཕོ་བྲང་དུ། །ཤྲཱི་སིངྷ་ལ་གསོལ་བ་འདེབས། །གཏད་མེད་རང་ཤར་རིག་པ་འདི། །འཛིན་མེད་ཆེན་པོར་བྱིན་གྱིས་རློབས། །རང་གསལ་གདལ་བའི་ཕོ་བྲང་དུ། །ཛྙཱ་ན་སཱུ་ཏྲ་ལ་གསོལ་བ་འདེབས། །ཀུན་ཁྱབ་གཞི་རྫོགས་ལྟ་བ་ཉིད། །མ་བཙལ་རང་རྫོགས་བྱིན་གྱིས་རློབས། །མཁྱེན་རབ་ཡེ་ཤེས་ཕོ་བྲང་དུ། །དྲི་མེད་བཤེས་གཉེན་ལ་གསོལ་བ་འདེབས། །རང་བབས་ལྷུན་གྲུབ་བསྒོམ་པ་ཉིད། །མ་བཙལ་རྫོགས་པར་བྱིན་གྱིས་རློབས། །རང་བཞིན་དག་པའི་ཕོ་བྲང་དུ། །ཏིང་འཛིན་བཟང་པོ་ལ་གསོལ་འདེབས། །ཏིང་འཛིན་འོད་གསལ་ཉི་ཟླ་ཉིད། །གསལ་འགྲིབ་མེད་པར་བྱིན་གྱིས་རློབས། །ཚོགས་ཆེན་ཡོངས་རྫོགས་ཕོ་བྲང་དུ། །ཆོས་རྒྱལ་མཆོག་ལ་གསོལ་བ་འདེབས། །བསམ་རྫོགས་ཆོས་སྐུའི་རྒྱལ་སྲིད་ལ། །འགྲོ་ཀུན་གནས་པར་བྱིན་གྱིས་རློབས། །སྙིང་པོ་ལྷུན་འབྱམས་ཕོ་བྲང་དུ། །ལྡང་མ་ལྷུན་རྒྱལ་ལ་གསོལ་བ་འདེབས། །སྒྲིབ་བྲལ་ཅོག་བཞག་དགོངས་པ་ཉིད། །ཡོངས་རྫོགས་ཆེན་པོར་བྱིན་གྱིས་རློབས། །འོད་ལུས་དག་པའི་ཕོ་བྲང་དུ། །སེང་གེ་དབང་ཕྱུག་ལ་གསོལ་བ་འདེབས། །ལུས་སེམས་སྲིད་པའི་འཆིང་བ་ལས། །ཚེ་འདིར་གྲོལ་བར་བྱིན་གྱིས་རློབས། །གཞི་ཀློང་ཀུན་གྲོལ་ཕོ་བྲང་དུ། །རྒྱལ་བ་ཞང་སྟོན་ལ་གསོལ་བ་འདེབས། །གཉིས་འཛིན་འཁྲུལ་པའི་རི་བོ་འདི། །རང་སར་ཞིག་པར་བྱིན་གྱིས་རློབས། །སྣ་ཚོགས་ཡོན་ཏན་གྱི་ཕོ་བྲང་དུ། །མཁས་པ་ཉི་འབུམ་ལ་གསོལ་བ་འདེབས། །ཚིག་དོན་ཆོས་ཀྱི་བདུད་རྩི་ཡིས། །བདག་རྒྱུད་དག་པར་བྱིན་གྱིས་རློབས། །གསལ་སྟོང་ཉི་ཟླའི་ཕོ་བྲང་དུ། །གུ་རུ་ཇོ་འབེར་ལ་གསོལ་བ་འདེབས། །འཆི་བ་རྗེས་དྲན་བསྐུལ་མ་ཡིས། །དམ་ཆོས་འགྲུབ་པར་བྱིན་གྱིས་རློབས། །གཟུང་འཛིན་རང་གྲོལ་གྱི་ཕོ་བྲང་དུ། །འཁྲུལ་ཞིག་ཆེན་པོ་ལ་གསོལ་བ་འདེབས། །སྣ་ཚོགས་འཁྲུལ་པའི་བག་ཆགས་སྤྲིན། །རང་སར་དེངས་པར་བྱིན་(༢༢)གྱིས་རློབས། །རྩོལ་བྲལ་ཉག་གཅིག་ཕོ་བྲང་དུ། །ཟླ་བ་མུན་སེལ་ལ་གསོལ་བ་འདེབས། །བྱར་མེད་རང་བབས་གནས་ལུགས་ལ། །རང་གནས་ཆེན་པོར་བྱིན་གྱིས་རློབས། །རྟོགས་པ་ནམ་མཁའི་ཕོ་བྲང་དུ། །ཀུ་མ་རཱ་ཛ་ལ་གསོལ་བ་འདེབས། །ཕྱོགས་མེད་རི་ཁྲོད་དབེན་གནས་སུ། །རང་ངོ་ཤེས་པར་བྱིན་གྱིས་རློབས། །ཡེ་གྲོལ་ཆོས་ཉིད་ཕོ་བྲང་དུ། །དྲི་མེད་འོད་ཟེར་ལ་གསོལ་བ་འདེབས། །ཡངས་དོག་མེད་པའི་རིག་པ་འདི། །ཕྱོགས་ལྷུང་བྲལ་བར་བྱིན་གྱིས་རློབས། །རང་སེམས་དད་མོས་ཀྱི་ཕོ་བྲང་དུ། །རྩ་བའི་བླ་མ་ལ་གསོལ་བ་འདེབས། །བྱིན་རླབས་དངོས་གྲུབ་ཆུ་རྒྱུན་གྱིས། །བདག་རྒྱུད་གང་བར་བྱིན་གྱིས་རློབས། །ལུས་དག་པ་ལྷ་ཡི་ཕོ་བྲང་དུ། །ཞི་ཁྲོ་རབ་འབྱམས་ལ་གསོལ་བ་འདེབས། །རང་གདངས་འོད་ཀྱི་སྒྲོན་མེ་ཡིས། །རང་གསལ་རྟོགས་པར་བྱིན་གྱིས་རློབས། །ངག་དག་པ་སྔགས་ཀྱི་ཕོ་བྲང་དུ། །རྩ་གནས་འཁོར་ལོ་ལ་གསོལ་བ་འདེབས། །སྣ་ཚོགས་ཐེག་པའི་རང་སྒྲ་ཡིས། །འགྲོ་དྲུག་སྨིན་པར་བྱིན་གྱིས་རློབས། །སེམས་དག་པ་ཆོས་སྐུའི་ཕོ་བྲང་དུ། །གཞི་རྫོགས་ཐུགས་ལ་གསོལ་བ་འདེབས། །རང་བཞིན་ལྷུན་གྲུབ་ཀྱི་དགོངས་པ་དེ། །ནང་ནས་འཆར་བར་བྱིན་གྱིས་རློབས། །དེ་ལྟར་བླ་མའི་ཚོགས་རྣམས་ལ། །སྒོ་གསུམ་དང་བས་ཕྱག་འཚལ་ལོ། །མཆོད་པའི་སྤྲིན་གྱི་ཕུང་པོ་མཆོད། །སྡིག་པའི་ཚོགས་ཀུན་རབ་བཤགས་ཏེ། །དགེ་བ་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་བ་དང་། །མྱ་ངན་མི་འདའ་རྟག་བཞུགས་ནས། །ཐུགས་རྗེས་སྤྱན་གྱིས་དགོངས་སུ་གསོལ། །ལས་ངན་སྡིག་སྒྲིབ་དག་པར་བྱིན་གྱིས་རློབས། །རྐྱེན་ངན་གྲོགས་སུ་འཆར་བར་བྱིན་གྱིས་རློབས། །འཁོར་བའི་ཞེན་པ་བཟློག་པར་བྱིན་གྱིས་རློབས། །སྐྱོ་ཤས་གཏིང་ནས་སྐྱེ་བར་བྱིན་གྱིས་རློབས། །ཅི་བསམ་ཆོས་སུ་འགྲུབ་པར་བྱིན་གྱིས་རློབས། །ཆོས་ཕྱོགས་དཀའ་སྤྱད་ནུས་པར་བྱིན་གྱིས་རློབས། །སྣང་བ་ཆོས་སྐུར་འཆར་བར་བྱིན་གྱིས་རློབས། །ཆོས་ཉིད་ཟད་སར་འཁྱོལ་བར་བྱིན་གྱིས་རློབས། །གཞན་དོན་ལྷུན་གྱིས་འགྲུབ་པར་བྱིན་གྱིས་རློབས། །མཐོང་(༢༣)ཐོས་བདེ་ལ་འགོད་པར་བྱིན་གྱིས་རློབས། །མདོར་ན་ཅི་བསམ་འགྲུབ་པར་བྱིན་གྱིས་རློབས། །

གསོལ་འདེབས་བདུད་རྩིའི་ཆུ་རྒྱུན་ཞེས་བྱ་བ། དཔལ་ཀུ་མ་རཱ་ཛའི་ཞབས་ཀྱི་པདྨོ་དྲི་མ་མེད་པ་ལ་གཏུགས་ཤིང་། ཐུགས་ཀྱིས་བཟུང་བའི་རྣལ་འབྱོར་པ་བྱར་མེད་ཀློང་ཡངས་ཀྱིས། མཆིམས་ཕུ་དཔལ་གྱི་ནགས་ཁྲོད། རང་བྱུང་པདྨའི་བཞུགས་གནས་སུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

མཎྜལ་འབུལ་བའི་ཆོ་ག་གླིང་བཞིའི་རྒྱན་གྱུར།

༄༅། །མཎྜལ་འབུལ་བའི་ཆོ་ག་གླིང་བཞིའི་རྒྱན་གྱུར་བཞུགས་སོ། །

༄༅། དཔལ་ལྡན་ཚོགས་གཉིས་རྫོགས་པའི་ལྷ། །རྒྱལ་བ་རྒྱ་མཚོ་ལ་བཏུད་དེ། །མཎྜལ་འབུལ་བའི་ཆོ་ག་ནི། །གླིང་བཞིའི་རྒྱན་གྱུར་བརྗོད་པར་བྱ། །

མཎྜལ་ལན་གསུམ་ཕྱིས་ཏེ། ཚོམ་བུ་བཅོ་ལྔ་བཀོད་ལ། ཞིང་ཁམས་ཕུན་སུམ་ཚོགས་པ་འདོད་དགུའི་འབྱོར་པར་དམིགས་ཏེ། བླ་མ་ཡི་དམ་དཀྱིལ་འཁོར་གྱི་ལྷ་ཚོགས་དཀོན་མཆོག་གསུམ་མཁའ་འགྲོ་དམ་ཅན་རྒྱ་མཚོའི་ཚོགས་དང་བཅས་པ་མདུན་གྱི་ནམ་མཁར་བསམས་ལ། དབྱངས་སྙན་པོས་མགྲིན་གཅིག་ཏུ་འབུལ་བ་ནི། ༀ་ཨཱཿཧཱུྃ། ཕྱོགས་བཅུའི་འཇིག་རྟེན་སྣ་ཚོགས་ཁམས་ཅན་སེམས་ཅན་དབྱིངས་མཐའ་ཇི་སྲིད་བར། །མ་ལུས་ཀུན་ཁྱབ་གཟུགས་དང་བཀོད་པ་དཔག་ཡས་རྒྱ་མཚོའི་སྙིང་པོ་ཅན། །གང་ཆེན་མཚོས་བརྒྱན་ལྷ་མིའི་མཆོད་སྤྲིན་ནམ་མཁའི་དབྱིངས་ཀུན་ཇི་ཙམ་པ། །དེ་སྙེད་རྒྱལ་བ་རྒྱ་མཚོའི་ཚོགས་བཅས་མཆོད་འོས་རྣམས་ལ་གུས་པས་འབུལ། །གསེར་གྱི་ས་གཞི་རི་རབ་ལྷུན་པོས་བརྒྱན། །གླིང་བཞི་གླིང་ཕྲན་ཉི་ཟླ་གཟའ་སྐར་བཀྲམ། །ལྷ་མིའི་འདོད་ཡོན་ཕུན་ཚོགས་དང་ལྡན་པ། །གླིང་བཞི་འཇིག་རྟེན་རྒྱན་གྱུར་རྣམས་ཀྱིས་མཆོད། །རིན་ཆེན་ཆུ་མཚོ་མེ་ཏོག་གིས་བཀྲམ་རྣམ་དག་པདྨོའི་གཞལ་ཡས་ཁང་། །ཆུ་དབང་ཡིད་བཞིན་དབང་པོས་ཉེར་བརྟེན་ས་འོག་ས་སྟེང་ས་བླ་དང་། །བར་སྣང་ལ་གནས་ཁང་བརྩེགས་ཡིད་འོང་རྣམ་མང་འདོད་ལྷའི་སྐྱེད་མོའི་ཚལ། །འོད་དང་གཟི་བརྗིད་དཔལ་དུ་འབར་བས་འགྲོ་བའི་བླ་མ་སྲས་བཅས་མཆོད། །གསེར་དང་དངུལ་དང་ཤེལ་དང་ཨིནྡྲ་ནཱིལ། །མར་གད་མུ་ས་གར་བ་བཻ་ཌཱུརྱ། །ཡིད་བཞིན་ནོར་བུ་སྣ་ཚོགས་(༢༤)མཛེས་འབར་བ། །བུམ་བཟང་དཔག་བསམ་ཤིང་ཆེན་རྣམས་ཀྱིས་མཆོད། །ཀུ་མུད་ཏ་དང་ཨུཏྤལ་མེ་ཏོག་དྲི་ལྡན་པ། །མདངས་བཀྲ་ཡིད་འོང་ཁ་བྱེ་ལྷག་གེར་གསལ་གྱུར་ཅིང་། །ནོར་བུའི་རྐང་གདུབ་ཡིད་འོང་འཁྲོལ་བས་མཛེས་བྱས་པ། །ལྷ་མིའི་བུ་མོ་བསྟོད་དབྱངས་སྒྲོགས་ལྡན་རྣམས་ཀྱིས་མཆོད། །རིན་ཆེན་བདུན་དང་བཀྲ་ཤིས་རྣམ་པ་བརྒྱད། །གཞལ་ཡས་ཁང་མཛེས་ཡུལ་འཁོར་ཉམས་དགའ་བ། །མི་དབང་དཔལ་ཏེ་ཕུན་ཚོགས་འདི་ཕུལ་བས། །རྒྱལ་བའི་འབྱོར་ཚོགས་ལྷུན་གྱིས་གྲུབ་པར་ཤོག །བསམ་གཏན་ལྷ་གནས་ཤིན་ཏུ་ཉམས་དགའ་དྭངས་པའི་འོད་ཀྱི་གཞལ་ཡས་ཁང་། །རྣམ་བཀྲ་གཟུགས་བཟང་ལྷ་མང་གིས་མཛེས་ཏིང་འཛིན་ཞི་བའི་སྐྱེད་མོས་ཚལ། །རྩེ་གཅིག་མི་གཡོ་གཟུགས་མེད་རབ་ཞི་བསོད་ནམས་སྤྲིན་གཙང་སྙིང་པོ་ཅན། །སྲིད་གསུམ་སྣོད་བཅུད་དངོས་དང་དངོས་མེད་བདེ་དགའི་རྒྱ་མཚོ་རྣམས་ཀྱིས་མཆོད། །ཉན་ཐོས་རང་སངས་རྒྱས་དང་བྱང་ཆུབ་སེམས། །རྒྱལ་བའི་གཟུགས་སྤྲིན་སྙིང་པོ་ལས་ཐོན་པ། །ཕྱི་ནང་གསང་བའི་མཆོད་སྤྲིན་རྒྱ་མཚོ་ཡིས། །བླ་མ་ཡི་དམ་དཀྱིལ་འཁོར་ལྷ་ཚོགས་མཆོད། །དག་པའི་ཞིང་ཁམས་རྒྱལ་སྲས་འབྱོར་པས་ཡོངས་གང་ལྷ་མིའི་བདེ་འབྱུང་གནས། །རྒྱལ་བ་རྒྱ་མཚོའི་སྤྲིན་ཕུང་དང་བཅས་ཡེ་ཤེས་ལས་གྲུབ་གཞལ་ཡས་ཁང་། །ནམ་མཁའི་དབྱིངས་ཁྱབ་ལོངས་སྐུའི་དཔལ་འབྱོར་ཆོས་སྐུའི་ཞིང་གི་སྙིང་པོ་ཅན། །མ་ལུས་ཡོངས་བཀོད་བདེ་ཆེན་རྒྱ་མཚོར་འགྲོ་ཀུན་ཕྱམ་ཅིག་བགྲོད་པར་ཤོག །རིན་ཆེན་མཎྜལ་ཀུན་བཟང་མཆོད་པའི་སྤྲིན། །སྲིད་ཞིའི་འབྱོར་ཚོགས་དཔག་མེད་དང་ལྡན་པ། །ཕུན་ཚོགས་བསོད་ནམས་ཞིང་ལ་ཕུལ་བ་ཡིས། །འགྲོ་ཀུན་ཐར་པའི་གྲོང་དུ་ཕྱིན་པར་ཤོག །ཅེས་པའམ། ཡང་ན་དེ་ཉིད་རྒྱུན་ཆགས་དང་ཚིགས་བཅད་སྤེལ་མས་དབུལ་བ་སྟེ། ༀ་ཨཱཿཧཱུྃ། ཕྱོགས་བཅུའི་འཇིག་རྟེན་སྣ་ཚོགས་ཁམས་ཅན་སེམས་ཅན་དབྱིངས་མཐའ་ཇི་སྲིད་མ་ལུས་ཀུན་ཁྱབ་གཟུགས་དང་བཀོད་པ་དཔག་ཡས་རྒྱ་མཚོའི་སྙིང་པོ་གང་ཆེན་མཚོས་བརྒྱན་ལྷ་མིའི་མཆོད་སྤྲིན་ནམ་མཁའི་དབྱིངས་ཀུན་ཇི་ཙམ་དེ་སྙེད་རྒྱལ་བ་རྒྱ་མཚོའི་(༢༥)ཚོགས་བཅས་མཆོད་འོས་རྣམས་ལ་གུས་པས་འབུལ། །གསེར་གྱི་ས་གཞི་རི་དབང་ལྷུན་པོས་བརྒྱན། །གླིང་བཞི་གླིང་ཕྲན་ཉི་ཟླ་གཟའ་སྐར་བཀྲམ། །ལྷ་མིའི་འདོད་ཡོན་ཕུན་ཚོགས་དང་ལྡན་པ། །གླིང་བཞི་འཇིག་རྟེན་རྒྱན་གྱུར་རྣམས་ཀྱིས་མཆོད། །རིན་ཆེན་ཆུ་མཚོ་མེ་ཏོག་གིས་བཀྲམ་རྣམ་དག་པདྨོའི་གཞལ་ཡས་ཆུ་དབང་ཡིད་བཞིན་དབང་པོས་ཉེར་བརྟེན་ས་འོག་ས་སྟེང་ས་བླ་བར་སྣང་ལ་གནས་ཁང་བརྩེགས་ཡིད་འོང་རྣམ་མང་འདོད་ལྷའི་སྐྱེད་ཚལ་འོད་དང་གཟི་བརྗིད་དཔལ་དུ་འབར་བས་འགྲོ་བའི་བླ་མ་སྲས་བཅས་མཆོད། །གསེར་དང་ཤེལ་དང་དངུལ་དང་ཨིནྡྲ་ནཱིལ། །མར་གད་མུ་ས་གར་བ་བཻ་ཌཱུརྱ། །ཡིད་བཞིན་ནོར་བུ་སྣ་ཚོགས་མཛེས་འབར་བ། །བུམ་བཟང་དཔག་བསམ་ཤིང་ཆེན་རྣམས་ཀྱིས་མཆོད། །ཀུ་མུ་ཏ་དང་ཨུཏྤལ་མེ་ཏོག་དྲི་ལྡན་མདངས་བཀྲ་ཡིད་འོང་ཁ་བྱེ་ལྷག་གེར་གསལ་གྱུར་ནོར་བུའི་རྐང་གདུབ་ཡིད་འོང་འཁྲོལ་བས་མཛེས་བྱས་ལྷ་མིའི་བུ་མོ་བསྟོད་དབྱངས་སྒྲོགས་ལྡན་རྣམས་ཀྱིས་མཆོད། །རིན་ཆེན་བདུན་དང་བཀྲ་ཤིས་རྣམ་པ་བརྒྱད། །གཞལ་ཡས་ཁང་མཛེས་ཡུལ་འཁོར་ཉམས་དགའ་བ། །མི་དབང་དཔལ་ཏེ་ཕུན་ཚོགས་འདི་ཕུལ་བས། །རྒྱལ་བའི་འབྱོར་ཚོགས་ལྷུན་གྱིས་གྲུབ་པར་ཤོག །བསམ་གཏན་ལྷ་གནས་ཤིན་ཏུ་ཉམས་དགའ་དྭངས་པའི་འོད་ཀྱི་གཞལ་ཡས་རྣམ་བཀྲ་གཟུགས་བཟང་ལྷ་མང་གིས་མཛེས་ཏིང་འཛིན་ཞི་བའི་སྐྱེད་མོས་རྩེ་གཅིག་མི་གཡོ་གཟུགས་མེད་རབ་ཞི་བསོད་ནམས་སྤྲིན་གཙང་སྙིང་པོ་སྲིད་གསུམ་སྣོད་བཅུད་དངོས་དང་དངོས་མེད་བདེ་དགའི་རྒྱ་མཚོ་རྣམས་ཀྱིས་མཆོད། །ཉན་ཐོས་རང་སངས་རྒྱས་དང་བྱང་ཆུབ་སེམས། །རྒྱལ་བའི་གཟུགས་སྤྲིན་སྙིང་པོ་ལས་འཐོན་པ། །ཕྱི་ནང་གསང་བའི་མཆོད་སྤྲིན་རྒྱ་མཚོ་ཡིས། །བླ་མ་ཡི་དམ་དཀྱིལ་འཁོར་ལྷ་ཚོགས་མཆོད། །དག་པའི་ཞིངཁམས་རྒྱལ་སྲས་འབྱོར་པས་ཡོངས་གང་ལྷ་མིའི་བདེ་འབྱུང་རྒྱལ་བ་རྒྱ་མཚོའི་སྤྲིན་ཕུང་དང་བཅས་ཡེ་ཤེས་ལས་གྲུབ་གཞལ་ཡས་ནམ་མཁའི་དབྱིངས་ཁྱབ་ལོངས་སྐུའི་དཔལ་འབྱོར་ཆོས་སྐུའི་ཞིང་གི་སྙིང་པོ་མ་ལུས་ཡོངས་བཀོད་བདེ་ཆེན་རྒྱ་མཚོར་འགྲོ་ཀུན་ཕྱམ་གཅིག་བགྲོད་པར་ཤོག །རིན་ཆེན་མཎྜལ་ཀུན་(༢༦)བཟང་མཆོད་པའི་སྤྲིན། །སྲིད་ཞིའི་འབྱོར་ཚོགས་དཔག་མེད་དང་ལྡན་པ། །ཕུན་ཚོགས་བསོད་ནམས་ཞིང་ལ་ཕུལ་བ་ཡིས། །འགྲོ་ཀུན་ཐར་པའི་གྲོང་དུ་ཕྱིན་པར་ཤོག །ཅེས་འབུལ་ལོ། །དད་ལྡན་རྣམས་ཀྱིས་ཉིན་དང་མཚན། །ཐུན་བཞིར་ཚོགས་ཆེན་རྫོགས་བྱའི་ཕྱིར། །ཏིང་འཛིན་དབྱངས་སྙན་མེ་ཏོག་བཅས། །རབ་དྭངས་ཡིད་ཀྱིས་དབུལ་བར་བྱ། །དགེ་བས་བདག་དང་འགྲོ་བ་ཀུན། །བྱང་ཆུབ་རྒྱ་མཚོ་མཐའ་ཡས་ཤོག །མཎྜལ་འབུལ་བའི་ཆོ་ག་གླིང་བཞིའི་རྒྱན་གྱུར་ཞེས་བྱ་བ། ཐེག་པ་མཆོག་གི་རྣལ་འབྱོར་པ། སྣ་ཚོགས་རང་གྲོལ་གྱིས་རང་བྱུང་པདྨའི་གནས་སུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། གུ་རུ་བི་མ་ལ་སྒྲུབ་པའི་རིམ་པ།

༄༅། །ཟབ་མོ་ཡང་ཏིག་ལས། གུ་རུ་བི་མ་ལ་སྒྲུབ་པའི་རིམ་པ་བཞུགས་སོ། །

༄༅། གུ་རུ་བི་མ་ལ་སྒྲུབ་པའི་རིམ་པ། བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །མཁྱེན་པའི་ཡེ་ཤེས་བརྩེ་བའི་ཐུགས་རྗེ་ཅན། །མཛད་པའི་ཕྲིན་ལས་སྐྱེ་དགུ་ཀུན་གྱི་དཔལ། །ལྷར་བཅས་འཇིག་རྟེན་ཡོངས་ཀྱི་གཉེན་གཅིག་པུ། །དཔལ་ལྡན་བླ་མའི་ཚོགས་ལ་ཕྱག་འཚལ་ལོ། །

འདིར་སྐལ་བ་ལྡན་པའི་རྣལ་འབྱོར་པས། ཡིད་དང་མཐུན་པའི་གནས་སུ། མཆོད་པ་དང་གཏོར་མ་ཅི་འབྱོར་པ་བཤམས་ཏེ། བླ་མའི་སྐུ་འདྲ་ཡོད་ནའང་བཀྲམ་ལ། མཎྜལ་འབུལ་ཞིང་ཡི་གེ་བརྒྱ་པས་རྒྱུད་སྦྱངས་པའི་འོག་ཏུ། གདན་བདེ་བ་ལ་འདུག་སྟེ། བླ་མ་དང་དཀོན་མཆོག་གསུམ་ལ་སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་ལ། སྐད་ཅིག་གིས་ཆོས་ཐམས་ཅད་སྟོང་ཞིང་བདག་མེད་པ་ནམ་མཁའི་དཀྱིལ་ལྟར་བསྒོམས་པའི་ངང་ལས། སྣ་ཚོགས་པདྨ་དང་ཟླ་བའི་སྟེང་དུ། ཧཱུཾ་ཡོངས་སུ་གྱུར་པ་ལས་རང་ཉིད་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ། རབ་ཏུ་དགྱེས་པའི་ཞལ་འཛུམ་མདངས་དང་ལྡན་ཞིང་། ཕྱག་གཡས་གསེར་གྱི་རྡོ་རྗེ་ཐུགས་ཀར་གཏད་དེ། གཡོན་པས་གཡུའི་དྲིལ་བུ་དཀུར་བརྟེན་ཅིང་རྡོ་རྗེའི་སྐྱིལ་ཀྲུང་དུ་བཞུགས་པའི་སྐུ་སྟོད་དང་དབུ་ལ་རིན་པོ་ཆེ་སྣ་ཚོགས་པས་བརྒྱན་ཅིང་། སྐུ་སྨད་ལ་དར་གྱི་ཤམ་ཐབས་གསོལ་བ། སྐུ་སྣང་ལ་རང་བཞིན་མེད་པ། འོད་(༢༧)ཟེར་སྣ་ཚོགས་འཕྲོ་བའི་སྤྱི་གཙུག་ཏུ་སྣ་ཚོགས་པདྨ་དང་། ཟླ་བ་དང་། ཉི་མའི་སྟེང་དུ་གུ་རུ་བི་མ་ལ་པཎྜི་ཏའི་ཆ་བྱད་ཅན། རྩ་བ་དང་བརྒྱུད་པའི་བླ་མ་རྣམས་དང་དབྱེར་མེད་པར་བསྒོམས་པའི་ཐུགས་ཀ་ནས་འོད་ཟེར་འཕྲོས་ཏེ་སོང་བས། རྒྱ་ནག་རི་བོ་རྩེ་ལྔ་ནས་གུ་རུ་བི་མ་ལ་འཁོར་མཁའ་འགྲོའི་ཚོགས་དཔག་ཏུ་མེད་པས་བསྐོར་བ། བྱ་ངང་པའི་ཁྱུ་ལྡིང་བ་བཞིན་སྟེང་གི་ནམ་མཁར་བྱོན་པ་ལ་བློས་སྤྲུལ་པའི་མཆོད་པས་མཆོད་ཏེ། ཛཿཧཱུྃ་བཾ་ཧོཿཞེས་བརྗོད་པས་རང་གི་སྤྱི་བོར་བསྐྱེད་པའི་བི་མ་ལ་ལ་ཐིམ་པས། སྣང་སྲིད་ཐམས་ཅད་འོད་དུ་འབར་ཞིང་ལྷ་དང་ལྷ་མོའི་རང་བཞིན་གྱིས་གང་བ་རྣམས་ཀྱིས་རྡོ་རྗེའི་གླུ་ལེན་ཞིང་། བཀྲ་ཤིས་ཀྱི་ཚིགས་སུ་བཅད་པ་དང་། མཆོད་པའི་ཆར་ཆེན་པོ་འབེབས་པར་བསམ་མོ། །དེ་ལས་གུ་རུ་བི་མ་ལའི་སྐུ་ལས་འོད་དང་བདུད་རྩིའི་ཐིགས་པ་བབས་པས། རང་གི་སྤྱི་བོའི་གཙུག་ནས་རྐང་མཐིལ་གྱི་བར་ཁྱབ། ལུས་ངག་ཡིད་གསུམ་གྱི་སྡིག་པ་ཐམས་ཅད་དག །ཟག་པ་མེད་པའི་བདེ་བ་ཆེན་པོ་རྒྱས་ཤིང་། དབང་དང་དངོས་གྲུབ་ཐམས་ཅད་ཐོབ་པར་བསམ་ལ། ༀ་ཨཱཿཧཱུཾ་གུ་རུ་བི་མ་ལ་བཛྲ་ས་ཏྭ། དྷརྨཱ་ཀཱ་ཡ་སིདྡྷི་ཧཱུྃ། ཞེས་ཅི་འགྲུབ་བཟླས་ཏེ། ཐུན་འཇོག་ཁར་གུ་རུ་བི་མ་ལ་འཁོར་དང་བཅས་པ་ཐམས་ཅད་དང་། ཕྱི་ནང་སྣོད་བཅུད་ཐམས་ཅད་རང་ལ་ཐིམ། རང་ཉིད་ཀྱང་གཞི་རྫོགས་པ་ཆེན་པོའི་ངང་དུ་ཐིམས་ནས། བརྗོད་བྲལ་ལྷན་ཅིག་སྐྱེས་པའི་ངང་ལ་ལྷོད་ཀྱིས་གློད་ལ་བཞག་གོ། །རྗེས་ལ་དགེ་བའི་རྩ་བ་སེམས་ཅན་གྱི་དོན་དུ་བསྔོའོ། །དེ་ལྟར་ཞག་ལྔའམ། བདུན་ནམ། ཉི་ཤུ་རྩ་གཅིག་གི་བར་དུ་བྱས་པས། རྨི་ལམ་མམ་དངོས་སུ་འཇའ་དང་ཐིག་ལེ་དང་། ཤེལ་དང་། མཆོད་རྟེན་དང་། གདུང་དང་། རིང་བསྲེལ་དང་། ཁྱེའུ་དང་། བུ་མོ་དང་། ཉི་ཟླ་དང་། བླ་མ་རྣམས་བྱུང་ན་འགྲུབ་པའི་མཚན་མའོ། །དེས་ནི་རྫོགས་པ་ཆེན་པོའི་ཆོས་འཆད་པ་དང་། དབང་བསྐུར་བ་དང་། སྒོམ་པ་ལ་དབང་ཞིང་མཁའ་འགྲོ་ཐམས་ཅད་ཀྱིས་སྟོང་གྲོགས་བྱེད་པར་འགྱུར་རོ། །དུས་ཐམས་ཅད་དུ་སྣང་སྲིད་འཁོར་འདས་ཀྱི་ཆོས་ཐམས་ཅད་བླ་མར་མོས་པ་ལ། གང་སྣང་རང་གྲོལ་གྱི་སྤྱོད་པ་བྱ་ཞིང་། ཅི་ཟ་ཅི་འཐུང་(༢༨)དང་། གོས་དང་རྒྱན་གྱི་ཕུད་ཀྱིས་བླ་མ་ལ་མཆོད་ཅིང་། རང་གྲོལ་ཆོས་ཉིད་ཀྱི་ངང་ནས་འགྲོ་བ་དང་། འདུག་པ་དང་། ཉལ་བ་དང་། ལྡང་བ་དང་། བཟའ་བ་དང་། བཏུང་བ་ལ་སོགས་བྱའོ། །གཞན་ཡང་སྣོད་གཙང་མར་གཏོར་མ་སྤེལ་སྦྱོང་ལ་སོགས་ཀུན་དང་མཐུན་པར་བྱས་ལ། མདུན་གྱི་ནམ་མཁར་གུ་རུ་བི་མ་ལ་བསམས་ལ། ༀ་ཨཱཿཧཱུྃ་གུ་རུ་བི་མ་ལ་བ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་པ་ལྔའམ་བདུན་གྱིས་ཕུལ་བས་ལྗགས་ལས་འོད་ཟེར་བྱུང་ནས་གཏོར་མ་གསོལ་ཞིང་མཉེས་པར་བསམས་ལ། བསྔོ་བ་དང་སྨོན་ལམ་བྱས་ཏེ། གཏོར་མའི་མགྲོན་རང་གི་སྤྱི་གཙུག་ཏུ་ཐིམ་པར་བསམ་མོ། །འདི་ལྟ་བུའི་རིམ་པས་དུས་བཞིའམ། གསུམ་དུ་བྱས་ན། སྣང་བ་ཐམས་ཅད་དབང་དུ་འདུ་ཞིང་། ཚེ་དང་དཔལ་དང་ཏིང་འཛིན་ཁྱད་པར་ཅན་སྐྱེས་ཏེ། མཐར་སྐྱེ་ཤི་མེད་པ་རྡོ་རྗེ་ལྟ་བུའི་སྐུ་ཐོབ་པར་འགྱུར་རོ། །གུ་རུ་བི་མ་ལ་སྒྲུབ་པའི་རིམ་པ། བྱར་མེད་ཀློང་ཡངས་ཀྱི་རྣལ་འབྱོར་པ་ཀློང་ཆེན་རབ་འབྱམས་ཀྱིས། འཆིམས་ཕུ་དཔལ་གྱི་དབེན་གནས་སུ་བཀོད་པ་འདིས། སེམས་ཅན་མང་པོ་ལ་ཕན་ཐོགས་པར་གྱུར་ཅིག །དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། སྙིང་པོ་ཡེ་ཤེས་ཀྱི་བླ་མ་སྒྲུབ་པ།

དང་པོ། ཕྱི་ལྟར་སྒྲུབ་པ།

༄༅། །ཟབ་མོ་ཡང་ཏིག་ལས། སྙིང་པོ་ཡེ་ཤེས་ཀྱི་བླ་མ་སྒྲུབ་པ་བཞུགས་སོ། །

༄༅། སྙིང་པོ་ཡེ་ཤེས་ཀྱི་བླ་མ་སྒྲུབ་པ་ཞེས་བྱ་བ། བླ་མ་དམ་པ་རྣམས་ལ་གུས་པས་ཕྱག་འཚལ་ལོ། །ཚོགས་གཉིས་རྫོགས་ནས་དོན་གཉིས་འབྱོར་བའི་མཐར། །ཐུགས་རྗེ་ཐབས་མཁས་མཛད་པ་བསམ་མི་ཁྱབ། །དུས་གསུམ་རྒྱལ་བའི་ཕྲིན་ལས་གཅིག་བསྡུས་པ། །དཔལ་མགོན་བླ་མའི་ཞབས་ལ་གུས་ཕྱག་འཚལ། །གསང་སྔགས་ཀུན་གྱི་ཟབ་ལམ་སྙིང་པོ་ནི། །བླ་མའི་མོས་གུས་དེ་ཉིད་སྒྲུབ་པ་སྟེ། །དེ་ཡི་རིམ་པ་ཤིན་ཏུ་གྲགས་མང་ལས། །འདིར་གཅིག་བསྡུས་ཏེ་ཕྱི་རབས་དོན་དུ་བཤད། །

དེ་ལ་ཕྱི་ནང་གསང་བ་བླ་ན་མེད་པ་དང་བཞི་ལས། དང་པོ་ཕྱི་ལྟར་སྒྲུབ་པ་ནི། སྐྱབས་སུ་འགྲོ་བ་དང་སེམས་བསྐྱེད་ལ། རང་གི་སྤྱི་བོར་པདྨའི་སྟེང་དུ་ཉི་ཟླ་གའུ་ཁ་སྦྱར་ལས་འོད་འཕྲོས་པས། རང་བཞིན་གྱི་གནས་ནས་རང་གི་རྩ་བའི་བླ་མ་ལ། དཀྱིལ་འཁོར་གྱི་ལྷ་ཚོགས་མཁའ་འགྲོ་དམ་ཅན་རྒྱ་མཚོས་བསྐོར་བ་སྤྱན་དྲངས་ཏེ་བཞུགས་པར་(༢༩)བསམས་ལ། ཆོས་འབྲེལ་ཡོད་པའི་བླ་མ་ཐམས་ཅད་དང་། བརྒྱུད་པའི་བླ་མ་ཐམས་ཅད་ཀྱང་སྤྱན་དྲངས་ཏེ་བསྟིམས་པ་ལས། ཕྱི་ནང་གསང་བའི་མཆོད་པ་དཔག་ཏུ་མེད་པས་མཆོད་པར་བསམས་ལ། ༀ་བཛྲ་པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་ཏྱེ། ཤཔྟ་ཨཱཿཧཱུཾ། ཞེས་བརྗོད་ནས། བླ་མ་རྡོ་རྗེ་འཛིན་པ་ནི། །ཁམས་གསུམ་འཁོར་བའི་གཉེན་གཅིག་པོ། །འགྲོ་བ་མགོན་མེད་རྣམས་ཀྱི་སྐྱབས། །ཐར་པའི་ལམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་མཚོ་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཉོན་མོངས་མེ་ཡིས་གདུངས་པ་ལ། །ཐུགས་རྗེའི་ཆར་གྱིས་བསིལ་བར་མཛོད། །བླ་མ་སངས་རྒྱས་རིན་པོ་ཆེ། །བདག་ལ་རེ་ས་གཞན་ན་མེད། །འདི་ནས་བྱང་ཆུབ་སྙིང་པོའི་བར། །སྐྱིད་སྡུག་རེ་ལྟོས་ཁྱེད་མཁྱེན་པས། །མགོན་མེད་བདག་ལ་ཐུགས་རྗེས་སྐྱོབས། །ནད་གདོན་བགེགས་དང་བར་ཆད་སོལ། །སྐུ་གསུང་ཐུགས་ཀྱི་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །ༀ་ཨཱཿཧཱུྃ་མཧཱ་གུ་རུ་སིདྡྷི་ཕ་ལ་ཧཱུྃ། ཞེས་བརྗོད་ནས་གདངས་སྙན་པོས་བླ་མ་དཀོན་མཆོག་གསུམ་ལ་སྐྱབས་སུ་འགྲོ་བ་བྱས་པས། བླ་མའི་སྐུ་ལས་བདུད་རྩིའི་རྒྱུན་བབས་ལུས་ཀྱི་ཕྱི་ནང་ཁྱབ། ནད་གདོན་སྡིག་སྒྲིབ་དག །དངོས་གྲུབ་རྣམ་གཉིས་ཐོབ། ལྟ་དགོངས་དང་ཏིང་འཛིན་གོང་ནས་གོང་འཕེལ་དུ་སྐྱེས་པར་བསམ་མོ། །བདག་གཞན་སེམས་ཅན་ལའང་སྦྱར་ཞིང་བསྒོམས་པའི་མཐར། སྣང་སྲིད་ཐམས་ཅད་བླ་མའི་ཞིང་དུ་བསམས་ལ། བླ་མའི་སྣང་བ་དང་མ་བྲལ་བས། ལུས་ཀྱི་ཕྱི་ནང་ཐམས་ཅད་བླ་མའི་སྐུ་ཕྲ་མོས་གང་ནས་བྱིན་གྱིས་བརླབས་པར་བསམས་ལ་བསྔོ་བ་བྱའོ། །འགྲོ་ཉལ་འདུག་སྡོད་ཐམས་ཅད་དུ་བླ་མ་སྒོམ་ཞིང་། ཅི་བྱེད་བླ་མའི་བྱ་བར་བསམས་ནས་སྤྱད་པས། སྣང་བ་ཆོས་ཉིད་ཀྱི་ཀློང་དུ་གྲོལ་བར་ངེས་སོ། །ཕྱི་ལྟར་སྒྲུབ་པའོ། །

དང་པོ། ཕྱི་ལྟར་སྒྲུབ་པ།

༈ གཉིས་པ་ནང་ལྟར་སྒྲུབ་པ་ནི། སྐྱབས་སུ་འགྲོ་བ་དང་སེམས་བསྐྱེད་དེ། སྟོང་པའི་ངང་ལས་རང་ཉིད་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་བསམས་པའི་སྤྱི་བོར་ཉི་ཟླ་པདྨའི་གདན་ལ་རྩ་བའི་བླ་མ་ཉིད་རྡོ་རྗེ་འཆང་མཐིང་ཁ་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། གཉིས་ཀ་རིན་པོ་ཆེ་དང་རུས་པས་བརྒྱན་པ། རྡོ་རྗེ་སྐྱིལ་ཀྲུང་དུ་བཞུགས་པར་བསམས་པའི་ཕྱོགས་བཞིར། ཧ་རི་ནི་ས་ལས་མཁའ་འགྲོ་དཀར་སེར་དམར་ལྗང་གྲི་གུག་དང་ཐོད་པ་འཛིན་པ་དཔག་ཏུ་མེད་པ་གར་སྟབས་བྱེད་པར་བསམ། བླ་མའི་སྐུ་ལས་འོད་འཕྲོས། བདག་དང་སེམས་ཅན་ཐམས་ཅད་ཀྱི་སྒྲིབ་པ་སྦྱངས། ཐམས་ཅད་དཔའ་བོ་མཁའ་འགྲོའི་ཞིང་ཁམས་སུ་གྱུར། ཧ་རི་ནི་སའི་རང་སྒྲ་སྒྲོགས་པར་བསམས་ལ། ༀ་ཨཱཿཧཱུྃ་མཧཱ་གུ་རུ་ཧྲཱིཿམ་ཧ་རི་ནི་ས་སིདྡྷི་ཕ་ལ་ཧཱུྃ། ཞེས་བཟླས་པའི་མཐར། བླ་མ་ཡབ་ཡུམ་གྱི་སྦྱོར་མཚམས་ནས་ཐིག་ལེ་བྱང་ཆུབ་ཀྱི་སེམས་དཀར་དམར་ཚངས་བུག་ནས་མར་བབས་ནས་ལུས་ཁེངས། ལུས་བདེ། བུམ་པའི་དབང་ཐོབ། ངག་བདེ། གསང་བའི་དབང་ཐོབ། སེམས་བདེ། ཤེས་རབ་ཡེ་ཤེས་ཀྱི་དབང་ཐོབ། བདེ་བའི་ངོ་བོ་སྟོང་ལ་གསལ་བས་ཚིག་དབང་རིན་པོ་ཆེ་ཐོབ། བདེ་གསལ་(༣༠)འཛིན་མེད་སྤྲོས་པ་དང་བྲལ་བའི་ངང་ལ་མཉམ་པར་བཞག་ཅིང་། བདུད་རྩི་བབས་པས་ལུས་སེམས་བདེ་བ་ཆེན་པོས་ཁྱབ་པར་བསམ་ཞིང་། འཇམ་རླུང་བཟུང་ལ། ལྟེ་བ་ནས་ཨ་ཤད་ལས་མེ་འབར་བས་ཚངས་བུག་ནས་ཧཾ་ལས་བདུད་རྩི་དེ་དང་བླ་མ་ཡབ་ཡུམ་གྱི་བདུད་རྩི་ཞུ་བ་བབས་པས། སྤྱི་བོ། མགྲིན་པ། སྙིང་ག །ལྟེ་གསང་གི་བར་རིམ་པས་བབས་པ་ཉིད། དགའ་བ། མཆོག་དགའ། དགའ་བྲལ། ལྷན་ཅིག་སྐྱེས་དགའི་ཡེ་ཤེས་སུ་ཤེས་པས། བདེ་གསལ་སྟོང་པའི་ངང་ལ་སྒོམ་མོ། །རྗེས་ལ་བླ་མ་ཡབ་ཡུམ་བདེ་བའི་ངོ་བོར་འོད་དུ་ཞུ། རང་གི་སྙིང་གར་ཐིམ། རང་ཡང་སྙིང་གའི་བར་ཡལ་ཏེ་མཐར་ཡིད་ལ་མི་བྱེད་པའི་ངང་དུ་གློད་ལ་དར་ཅིག་མཉམ་པར་བཞག་ནས་བསྔོ་བ་བྱའོ། །སྤྱོད་ལམ་ཐམས་ཅད་སངས་རྒྱས་ཀྱི་ཞིང་ཁམས་ལྷ་དང་གཞལ་ཡས་ཁང་དུ་མོས་པར་བྱས་ལ། བདེན་མེད་སྒྱུ་མར་སྦྱང་ངོ་། །རྟོགས་པ་ཁྱད་པར་ཅན་འཆར་བ་དང་། ཡོན་ཏན་གོང་དུ་འཕེལ་བ་དང་། བློ་བྲལ་ལྷན་ཅིག་སྐྱེས་པའི་ཡེ་ཤེས་མངོན་དུ་བྱེད་དོ། །ནང་ལྟར་སྒྲུབ་པའོ། །(༣༡)

གསུམ་པ། གསང་བ་ལྟར་སྒྲུབ་པ།

༈ གསང་བ་ལྟར་སྒྲུབ་པ་ནི། སྐྱབས་སུ་འགྲོ་བ་དང་སེམས་བསྐྱེད་ནས། རང་གི་སྙིང་གའི་ནང་དུ་པདྨ་ཉི་ཟླའི་སྟེང་དུ་བླ་མ་ཀུན་བཟང་ཡབ་ཡུམ་མཐིང་ཀ །མཉམ་བཞག་སྐྱིལ་ཀྲུང་གིས་བཞུགས་པར་བསམས་པའི་སྐུ་ལས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོ་ལྔ་འཕྲོས་པས། ཐོག་མར་ལུས་ཁེངས། ནད་གདོན་སྡིག་སྒྲིབ་དག །ཡེ་ཤེས་ལྔའི་དོན་རྟོགས། གདོས་བཅས་ཀྱི་སྒྱུ་ལུས་འོད་གསལ་དུ་གྲོལ། ཡང་འོད་འཕྲོས་སྣོད་བཅུད་འོད་གསལ་གྱི་ཞིང་དུ་གྲོལ། ནམ་མཁའི་མཐའ་ཀླས་པ་ཐམས་ཅད་ཡེ་ཤེས་ལྔའི་ཞིང་དུ་གསལ་བ་ལ་རིག་པ་གཏད་ལ་ཡུན་རིང་དུ་བསྒོམ། དེ་ནས་ཚུར་འདུས་ཏེ། སྙིང་གའི་ཡུམ་ཡབ་ལ་ཐིམ་སྟེ། ཡབ་ཀྱང་རང་ཡལ་ཏེ། ཅི་ཡང་མ་གྲུབ་པའི་ངང་ལ། ནང་དབྱིངས་ཀ་དག་གི་དགོངས་པ་སྟོང་གསལ་མཐའ་དབུས་མེད་པར་འཆར་རོ། །རྗེས་ལ་ཐམས་ཅད་སྣང་སྟོང་ཟང་ཐལ་རྗེན་པར་རང་སྣང་སྦྱང་ངོ་། །སྙིང་པོ་དོན་གྱི་ཡེ་ཤེས་རང་བཞིན་རྫོགས་པ་ཆེན་པོའི་དོན་ལ་རེག་པར་འགྱུར། གསང་བ་ལྟར་སྒྲུབ་པའོ། །

བཞི་པ། བླ་ན་མེད་པ་ལྟར་སྒྲུབ་པ།

༈ བླ་ན་མེད་པ་ལྟར་སྒྲུབ་པ་ནི། སྐྱབས་སུ་འགྲོ་བ་དང་སེམས་བསྐྱེད་ནས། བླ་མའི་རྣལ་འབྱོར་གསུམ་པོ་རྩ་བའི་བླ་མ་གཅིག་ལ་བསྡུས་ཏེ། རྣམ་པ་བླ་མ་དམ་པ་དང་། ངོ་བོ་རྡོ་རྗེ་འཆང་ཆེན། དགོངས་པ་ཀུན་ཏུ་བཟང་པོར་ཤེས་པ་ལ། ཕྱི་ནང་གསང་བས་མཆོད་ནས། གསོལ་བ་དྲག་པོ་བཏབ་ཅིང་། རིག་སྟོང་ཆོས་སྐུ་རྗེན་པའི་ངང་ལ་གང་ཤར་རིས་མེད་ཟང་ཐལ་དུ་སྐྱོང་བ་ཁྲེགས་ཆོད་ཀྱི་དོན་དང་མངོན་སུམ་འོད་གསལ་རང་སྣང་གི་ངང་ལ་དགོངས་པ་བློ་ཟད་ཐོད་རྒལ་དུ་བསྒོམས་པས། ཉིན་མོའི་རྣལ་འབྱོར་དུ་བྱ་བ་དང་། མཚན་མོ་མུན་པའི་རྣལ་འབྱོར་ཉིན་མོ་ལྟར་བསྒོམ་པའམ། སེང་གེའི་ཉལ་ལུགས་ཀྱིས་སྙིང་ནང་ནས་དུང་ཁང་གི་བར་དུ་འོད་ལྔའི་ཟེར་ཐག་འབྲེལ་བ་ལ། ཡར་སྣ་མིག་གཉིས་ལ་ཐིག་ལེ་སྟོང་པའི་སྒྲོན་མ་དམར་སེར་འོད་ལྔའི་མུ་ཁྱུད་ཅན། མར་སྣ་སྙིང་ནང་ནས་རང་བྱུང་ཡེ་ཤེས་ཀྱི་ཐིག་ལེ་འོད་ལྔའི་གོང་བུ་བསམས་པ་གཉིས། གཅིག་ལ་གཅིག་ཐིམ། གཅིག་ཡར་ཐིམ་མར་ཐིམ་དུ་གཉིད་དུ་འགྲོ་ཁར་(༣༢)སྦྱངས་ལ། མཐར་སྙིང་གའམ་དུང་ཁང་དུ་ཐིམ་པའི་ངང་ལ་ཉལ་བས། དང་པོ་རྨི་ལམ་ངན་པ་བཟང་པོར་འགྱུར། དེ་ནས་ཟིན། དེ་ནས་ཇེ་ཉུང་ལ་འགྲོ། དེ་ནས་འགག་གོ། །ནང་པར་གཉིད་སད་དུས་སེང་གེའི་ལྟ་སྟངས་དང་གཟིགས་སྟངས་ཀྱིས་གཞུ་གང་གི་ནམ་མཁའ་ལ། ཨ་དཀར་པོ་ལིང་ངེ་བ་ལ་སེམས་གཏད་ནས་མ་ཡེངས་པར་བསྒོམས་པས། ཨ་ཡང་མེད་གཞན་ཡང་མི་རྟོག་པའི་རིག་པ་སྟོང་གསལ་སྤྲོས་པ་དང་བྲལ་བ་རང་བྱུང་གི་ཡེ་ཤེས་ཀ་དག་གི་དགོངས་པ་འཆར་རོ། །དེ་ལྟར་ཉིན་མཚན་བསྒོམ་པའི་ཐུན་མཚམས་སུ་སྙིང་ཁའི་འོད་ཟེར་དེ་ཐིག་ལེ་སྟོང་པའི་སྒྲོན་མ་ལ་ཐིམ་པ་ཧིག་གིས་ཚངས་བུག་ལས་ཕྱིར་འཕངས་ཏེ། ཇེ་རིང་ལ་སྟེང་གི་ནམ་མཁར་སོང་བས་མཐར་བལྟར་མེད་པའི་ངང་ལ་བཞག་གོ། །རེས་འགའ་མིག་གཉིས་ནས་ཕྱིར་འཕངས་ཏེ་ཐད་ཀའི་ནམ་མཁའ་རྒྱང་རིང་པོ་བལྟར་མི་མངོན་པར་སོང་བའི་ངང་ལ་བཞག་གོ། །དེ་ནས་སྐད་ཅིག་གིས་སྟོང་གསལ་ཀ་དག་གི་ཡེ་ཤེས་འཆར་རོ། །དེ་ནི་སྔོན་དུ་སྦྱངས་པ་སྟེ། འཆི་ཁར་ཆུའི་སྒྲོན་མའམ། ཚངས་པའི་སྒོ་ནས་དབྱིངས་རིག་ལ་གཏད་དེ་འཕོས་པས། བར་དོ་མེད་པར་ཡར་གྱི་ཟང་ཐལ་དུ་གྲོལ་ཏེ། ཉི་ཟླ་ཁ་སྦྱོར་ལས། དབྱིངས་དང་རིག་པ་མ་འགྱུར་ན། །མི་དེ་བར་དོ་མེད་པར་ནི། །སངས་རྒྱ་བ་ལ་ཐེ་ཚོམ་མེད། །ཅེས་གསུངས་སོ། །བླ་མེད་ལྟར་སྒྲུབ་པའོ། །

དེ་ལྟར་ཡང་ཟབ་སྙིང་པོའི་གནད། །རྒྱུད་ལུང་མན་ངག་བཅུད་བསྡུས་ནས། །

སྣ་ཚོགས་རང་གྲོལ་བཟང་པོས་བཀོད། །དགེ་བས་འགྲོ་ཀུན་རྣམ་གྲོལ་ཤོག །སྙིང་པོ་ཡེ་ཤེས་ཀྱི་བླ་མ་སྒྲུབ་པ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། སྤྲོས་བཅས་ཀྱི་དབང་ཆོག་དངོས་གྲུབ་ཆུ་བོ།

༄༅། །ཟབ་མོ་ཡང་ཏིག་ལས། སྤྲོས་བཅས་ཀྱི་དབང་ཆོག་དངོས་གྲུབ་ཆུ་བོ་བཞུགས་སོ། །

༄༅། ཆོས་སྐུའི་མཁའ་ལ་ལོངས་སྐུའི་དཀྱིལ་འཁོར་རྒྱས། །སྤྲུལ་སྐུའི་ཟེར་གྱིས་འགྲོ་བློའི་མུན་པ་སེལ། །གདོད་མའི་མགོན་པོ་རིགས་ལྔ་བརྒྱུད་པར་བཅས། །བདག་བློའི་གཙུག་ན་ཡིད་བཞིན་ལྷུན་གྲུབ་མཛོད། །སངས་རྒྱས་(༣༣)རྣམས་ཀྱི་ཐུགས་ཀྱི་རྡོ་རྗེའི་དོན། །མངོན་གསུམ་སྙིང་ཐིག་བཀའ་གསང་རྒྱ་ཆེ་ལས། །སྨིན་བྱེད་དབང་བཞིའི་དང་པོ་གང་ཡིན་པ། །སྤྲོས་བཅས་ཆོ་གའི་རིམ་པ་གསལ་བར་བྱ། །

འདི་ལ་གསུམ་སྟེ། ཆོ་ག་ལ་འཇུག་པ་གང་ཟག་གི་མཚན་ཉིད། སྔོན་འགྲོ་ལེགས་པར་བཤམ་པ། དངོས་གཞི་དབང་བསྐུར་བའོ། །དང་པོ་ལ་གཉིས་ལས། བསྟེན་བྱ་སློབ་དཔོན་གྱི་མཚན་ཉིད་ནི་གསུམ་དང་ལྡན་པ་སྟེ། མདོ་རྒྱུད་ཀྱི་དོན་ལ་མཁས་པ། མངོན་སུམ་གྱི་གནད་ལ་གོམས་པ། རང་ཉིད་སྨིན་ནས་གཞན་རྒྱུད་གྲོལ་བའི་ནུས་པ་ཡོད་པའོ། །སྟེན་བྱེད་སློབ་མའི་མཚན་ཉིད་ནི་བཞི་སྟེ། མངོན་སུམ་སྙིང་པོའི་དོན་སྟོན་པའི་བླ་མ་ལ་སངས་རྒྱས་ཀྱི་འདུ་ཤེས་བསྐྱེད་པ། དད་པའི་ཞིང་ས་བཟང་བས་མི་དགེ་བའི་ཕྱོགས་སྦྲུལ་ལྟར་སྤོང་བ། འཁྲུལ་པའི་དོན་རིག་པས་ཡང་དག་པའི་གདམས་པ་ཞུ་བ་ལ་འཇིག་རྟེན་གྱི་ནོར་རྫས་གཏོང་ཕོད་ཆེ་བ། ལུས་དང་སྲོག་ལའང་མི་འཕངས་པར་བླ་མའི་ཕྱོགས་སུ་གཏོང་ཕོད་ཅིང་སྲི་ཞུ་དང་མོས་གུས་ཆེ་བའོ། །

དོན་གཉིས་པ་བཤམ་པ་ནི། མཎྜལ་འདོམ་གང་གྲུ་བཞི་མེ་ལོང་ལྟར་སྙོམས་པ་ལ། བའི་རྣམ་ལྔ་དང་དྲིས་བྱུགས་པའི་སྟེང་དུ་ཐིག་ཚོན་ཡེ་ཤེས་ལྔར་བྱིན་གྱིས་བརླབས་ལ། ཚངས་ཟུར་ནས་སྒོ་རྐྱང་གི་ཐིག་རྫོགས་པར་བཏབ་པའི་དབུས་སུ་འོད་ཟླུམ་མཐིང་ཀ་པདྨ་འདབ་བརྒྱད་ཤར་དཀར་ལྷོ་སེར་ནུབ་དམར་བྱང་ལྗང་བའི་མཚམས་བཞི་ལ་མཛེས་ཚོན་དུ་སྤེལ་ཞིང་། ལྷ་སྣམ་གྱི་གྲུ་ཆད་དང་སྒོ་རྟ་བབས་ཞིང་ཁམས་དང་བཅས་པའི་མཐར་ཉི་གདན་པདྨ་རྡོ་རྗེའི་ར་བ་འོད་ཟེར་ལྔའི་ཕྲེང་བས་བསྐོར་བ་བྲིས་པའི་དབུས་དང་ཕྱོགས་བཞིར། རིན་པོ་ཆེའི་བུམ་པ་རིགས་ལྔའི་ཁ་དོག་ཅན་སོ་སོའི་ས་བོན་ༀ་ཨཱཿཧཱུྃ་སྭཱ་ཧཱས་མཚན་པ་བྲིས་ལ། ཁ་རྒྱན་མགུལ་ཆིངས་དང་བཅས་པ་དགོད། ནང་དུ་རིན་པོ་ཆེ་ལྔ། འབྲུ་ལྔ། སྨན་ལྔ། སྤོས་ལྔ། སྙིང་པོ་ལྔ། ཆུ་གཙང་འོ་མ་དང་བཅས་པ་དཀར་གསུམ་མངར་གསུམ་གྱིས་བྲན་པས་དགང་ཞིང་། ཁ་རྒྱན་གསེབ་ཏུ་མདའ་ལྔ། མེ་ལོང་ལྔ། ཤེལ་ལྔ། དར་སྣ་ལྔ། རྨ་བྱའི་མདོང་ལྔ། རིགས་ལྔའི་ཙཀ་ལི་ལྔ་དང་བཅས་པ་བཀོད་ཅིང་། གསང་དབང་གི་རྫས་ཐོད་པ་བདུད་རྩིས་བཀང་བ་ཡང་བཞག །སྒོ་བཞིར་ཕུར་(༣༤)པ་བཞི། མཚམས་བཞིར་རལ་གྲི་བཞི་གཟུགས། མཐའ་སྐོར་དུ་ཕྱི་ནང་གི་མཆོད་པ་དང་། གཏོར་མ་དང་། ཚོགས་རྒྱ་ཆེར་བཤམས་ཤིང་། དབང་གསུམ་པའི་རྟེན་མཚན་དང་ལྡན་པ་ཡང་བཞག །བླ་བྲེ་ཐང་ཀ་ལ་སོགས་པས་བརྒྱན་པར་བྱའོ། །

དོན་གསུམ་པ་དངོས་གཞི་དབང་བསྐུར་བ་ལ་གསུམ་སྟེ། བདག་དང་དཀྱིལ་འཁོར་བྱིན་གྱིས་བརླབ་པ་དང་། སློབ་མ་འཇུག་པ། དབང་བསྐུར་བ་དངོས་སོ། །དང་པོ་ནི་གསང་སྔགས་འོག་མ་ལྟར་བསྐྱེད་རྫོགས་དུ་མའི་སྤྲོས་པ་མེད་ཀྱང་། ཡེ་ནས་དཀྱིལ་འཁོར་དུ་སངས་རྒྱས་པ་ལ། སངས་རྒྱས་པར་གསལ་འདེབས་པ་ཙམ་ཞིག་སྐད་ཅིག་གིས་བྱ་སྟེ། བདག་ཉིད་གཞིའི་ཀུན་བཟང་ཡབ་ཡུམ་མཐིང་ཀ་མཉམ་པར་སྦྱོར་བའི་ཕྱག་གཉིས་མཉམ་གཞག །ཞབས་གཉིས་སྐྱིལ་ཀྲུང་། འོད་ཟེར་མུ་མེད་པར་འཕྲོ་བར་བསམ་ལ། ཨཱཿབརྒྱ་རྩ་བརྒྱད་བཟླས་ནས་མདུན་གྱི་མཎྜལ་རིགས་ལྔའི་དཀྱིལ་འཁོར་དུ་སྐད་ཅིག་གིས་བསྐྱེད་ལ། ༀ་ཨཱཿཧཱུྃ་སྭཱ་ཧཱས་རྒྱས་བཏབ་ནས། སྣང་སྲིད་སྣོད་བཅུད་ཐམས་ཅད་ཡེ་ཤེས་ལྔའི་ཞིང་དང་། གཞལ་ཡས་ཁང་དང་ལྷ་མོས་གང་བ་ལ་དམ་རྫས་འདོད་ཡོན་གྱི་རྒྱན་དུ་ༀ་ཨཱཿཧཱུྃ་གསུམ་གྱིས་བྱིན་གྱིས་བརླབ་བོ། །ཚུལ་འདི་ནི་རྫོགས་པ་རང་བྱུང་གི་རྒྱུད་ལས་གསལ་བར་གསུངས་སོ། །

གཉིས་པ་ལ་བཅུ་གཅིག་ལས། དང་པོ་གསོལ་བ་གདབ་པ་ནི། མཎྜལ་ཕུལ་བའི་རྗེས་ལ་ཐལ་མོ་སྦྱར་ནས་སློབ་མས། ཨེ་མ་ཧོཿསྐྱེས་ཆེན་འགྲོ་མཆོག་བླ་མ་རྗེ། །བདག་ནི་ལས་ཅན་ཤེས་རབ་བུ། །གསང་ཆེན་ངེས་པའི་ལུང་འདི་ལ། །རྟོགས་པས་བདག་ནི་གཟུང་དུ་གསོལ། །ཞེས་ལན་གསུམ་བརྗོད་དོ། །

གཉིས་པ་གནང་བ་སྦྱིན་པ་ནི། བླ་མས། ཨེ་མ་སྐལ་ལྡན་ཤེས་རབ་བུ། །མཆོག་ཏུ་གསང་བའི་ཐེག་པ་འདིར། །རྡོ་རྗེ་འཛིན་པ་བདག་གི་ལུང་། །ཞུས་ནས་འབྲས་བུ་ངེས་ཐོབ་འགྱུར། །བདག་ཉིད་ཆེན་པོས་ཁྱེད་ཅག་གི། །བློ་ཡི་ཐེ་ཚོམ་རབ་བསལ་བས། །ནོར་བུའི་ཡོན་ཏན་མཐོང་བ་བཞིན། །བདག་ལ་བླ་མར་སྤྲོ་ལགས་སམ། །ཞེས་དྲིས་པའི་ལན་དུ། སློབ་མས། སྤྲོ་ལགས་ཞེས་བརྗོད་དོ། །

གསུམ་པ་སྐྱབས་འགྲོ་བྱ་བ་ནི། བླ་མས། རླུང་ལྔ་རྣམ་དག་དྭངས་མའི་རླུང་། །ཉོན་(༣༥)མོངས་རྣམ་དག་ཡེ་ཤེས་ལྔ། །སྐུ་གསུམ་མཛད་པ་མཐར་ཕྱིན་པའི། །དཀོན་མཆོག་གསུམ་ལ་རྟོགས་པས་འདུད། །ཅེས་རྗེས་ཟློས་ལན་གསུམ་བྱེད་དུ་བཅུག་སྟེ། སྐལ་ལྡན་རང་གི་ལུས་ཀྱི་འཁོར་ལོ་བཞིའི་རྩ་འདབ་དགེ་འདུན། ཐིག་ལེ་ཆོས། རླུང་ལྔའི་དྭངས་མ་ཡེ་ཤེས་ལྔ་ནི། ཉོན་མོངས་ཡེ་ནས་དག་པའི་སངས་རྒྱས་སྐུ་གསུམ་གྱི་བདག་ཉིད་དུ་རང་ངོ་ཤེས་ནས་སྒོམ་སྙམ་དུ་དོན་དམ་པའི་སྐྱབས་སུ་འགྲོ་བ་གྱིས་ཤིག །ཅེས་བཤད་དོ། །

བཞི་པ་སེམས་བསྐྱེད་ལ་གཉིས་ལས། སྨོན་པ་ནི། ཨེ་མ་ཧོཿམ་རིག་འཇིག་རྟེན་མུན་པའི་ཀློང་། །རང་གི་ཐབས་ཤེས་སྒྲོན་མེ་ཡིས། །རང་ལ་གནས་པའི་ཡེ་ཤེས་དེ། །བླ་མའི་དྲིན་གྱིས་རྟོགས་པར་བྱའོ། །ཞེས་པ་གསུམ་བརྗོད་ནས། རང་གི་རིག་པ་མངོན་སུམ་གྱི་ཡེ་ཤེས་ལམ་སྣང་བ་བཞི་ཉམས་སུ་བླང་སྙམ་དུ་སེམས་བླ་ན་མེད་པ་བསྐྱེད་པའོ། །ཞེས་བཤད་དོ། །འཇུག་པ་ནི། ཨེ་མ་ཧོཿསངས་རྒྱས་མཐར་ཐུག་དབྱིངས་རིག་གཉིས། །སྐུ་གསུམ་ངོ་བོ་མཐའ་བྲལ་བཞི། །ཚིག་ལས་འདས་པའི་རང་བྱུང་སྟེ། །ད་ལྟ་ཉིད་དུ་རྟོགས་པར་བྱའོ། །ཞེས་པ་གསུམ་དང་། དབྱིངས་ཀ་དག་ཆོས་སྐུ་ནམ་མཁའ་ལྟ་བུ་དང་། ཡེ་ཤེས་ལྷུན་གྲུབ་རང་རིག་སྐུ་གསུམ་གྱི་ངོ་བོ་སྤྲོས་པའི་མཐའ་བཞི་ལས་འདས་པ་དེ་ཉིད་ཚིག་དང་ཡི་གེ་མེད་པའི་དོན་སྨྲ་བསམ་བརྗོད་མེད་ཆེན་པོ་ཉིད་རང་ངོ་ཤེས་པར་བྱ་སྙམ་དུ་སེམས་བསྐྱེད་ཅིག །ཅེས་བཤད་དོ། །

༈ ལྔ་པ་སྲུང་སྐུད་གདགས་པ་ནི། འཁོར་བའི་ཀུན་རྟོག་ཡེ་ཤེས་ལྔས་བསྲུང་བའི་ཕྱིར་ཚོན་སྣ་ལྔའི་སྐུད་པ་ལ། ༀ་ཨཱཿཧཱུྃ་སྭཱ་ཧཱ། ༀ་སྭ་བྷཱ་ཝ་བི་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ་གི་སྔགས་ཀྱིས་མདུད་བྱས་ལ། ཕོའི་དཔུང་པ་གཡས། མོའི་དཔུང་པ་གཡོན་ལ་གདགས་སོ། །

དྲུག་པ་དམ་ཚིག་བསྒྲག་པ་ནི། ལས་བུམ་གྱི་ཆུ་བླུད་ལ། ཧཱུྃ་འདི་ནི་དམ་ཚིག་རྡོ་རྗེའི་ཆུ། །ཉམས་ན་དམྱལ་མེ་བཟོད་དཀར་བསྲེག །བསྐལ་པ་གྲངས་ཀྱིས་མི་ལངས་པར། །སྡུག་བསྔལ་ཆེན་པོ་མྱོང་བར་འགྱུར། །བསྲུངས་ན་དངོས་གྲུབ་རྨད་པོ་ཆེ། །མ་ལུས་རང་བཞིན་ལྷུན་གྱིས་གྲུབ། །དེ་བས་དམ་ཚིག་རྡོ་རྗེ་སྲོག་གི་ཆུ། །སྙིང་ལ་བཞག་པས་ཐུབ་པར་གྱིས། །ཨཱ་སརྦ་པཉྩ་ཨ་(༣༦)མྲ྇་ཏ་ས་མ་ཡ་ཏྲི་ཐཱ། ཞེས་རིམ་པས་བརྗོད་ནས། ༈ ཀྱཻ་སྐལ་ལྡན་ཀུན་དམ་ལས་ཉམས་ན་རྡོ་རྗེ་དམྱལ་བ་ནས་ཐར་པའི་དུས་མེད་ཅིང་། བསྐལ་པ་དུ་མར་སྡུག་བསྔལ་བཟོད་དཀའ་བ་མྱོང་དགོས་ལ། མ་ཉམས་པར་བསྲུང་ན་འདི་ཕྱིའི་ལེགས་པ་ཀུན་འགྲུབ་ཅིང་མྱུར་དུ་སངས་རྒྱས་ཐོབ་པས་ན་དམ་ཚིག་ལེགས་པར་སྲུངས་ཤིག །ཅེས་བརྗོད་པར་བྱའོ། །

བདུན་པ་ཡེ་ཤེས་དབབ་པ་ནི། སྤོས་དང་ཚིལ་ཆེན་བསྲེག་ལ། སློབ་མ་རྡོ་རྗེ་སྐྱིལ་ཀྲུང་གིས་འདུག་ལ། ཀུན་བཟང་ཡབ་ཡུམ་དུ་བསྒོམ་དུ་བཅུག་པའི་རྩ་གནས་འཁོར་ལོ་བཞིའི་རྩ་ཡིག་དང་། ཐིག་ལེ་འོད་སྐུ་དང་བཅས་པ་རིམ་པས་གསལ་བཏབ་ལ། རླུང་ཁ་སྦྱོར་དུ་འཛིན་དུ་བཅུག་ལ། བླ་མའི་ཚིག་གི་རིམ་པ་བཞིན། སློབ་མས་མ་ཡེངས་པར་དམིགས་པ་གསལ་བར་བསྒོམ་ཞིང་། བླ་མས་དལ་བུས་གཟབས་ལ་ཌཱ་མ་རུ་དཀྲོལ་ཞིང་། བར་བར་དུ་བཅད་ལ་དབྱངས་སྙན་པོས། ༈ ཨེ་མ་སྐལ་ལྡན་རིགས་ཀྱི་བུ། །ལྟེ་བ་སྤྲུལ་པའི་འཁོར་ལོ་ནི། །སྤྲུལ་པ་སྐུ་ཡི་བཞུགས་གནས་ཡིན། །རླུང་ལྔ་གཡོ་རྩོལ་ལས་འདས་པ། །ཐིག་ལེ་འོད་སྐུར་ཤིགས་སེ་ཤིགས། །ཨེ་མ་སྐལ་ལྡན་རིགས་ཀྱི་བུ། །སྙིང་ག་ཆོས་ཀྱི་འཁོར་ལོ་ནི། །ཆོས་ཀྱི་སྐུ་ཡི་བཞུགས་གནས་ཡིན། །སངས་རྒྱས་རིགས་ལྔ་མེ་རེ་རེ། །ཨེ་མ་སྐལ་ལྡན་རིགས་ཀྱི་བུ། །མགྲིན་པ་ལོངས་སྤྱོད་འཁོར་ལོ་ནི། །ལོངས་སྤྱོད་རྫོགས་སྐུའི་བཞུགས་གནས་ཡིན། །མཚན་དང་དཔེ་བྱད་རང་འཁྲུངས་པའི། །ཐིག་ལེ་འོད་སྐུ་ཡ་ལ་ལ། །ཨེ་མ་སྐལ་ལྡན་རིགས་ཀྱི་བུ། །སྤྱི་བོ་བདེ་ཆེན་འཁོར་ལོ་ནི། །སྐུ་གསུམ་འདུས་པའི་བཞུགས་གནས་ཡིན། །འབྲས་བུ་འདུས་པའི་རྩེ་མོ་ནས། །ཁྲོ་རྒྱལ་གད་རྒྱང་ཡ་ལ་ལ། །ཞེས་པ་དེ་དག་གིས་དམིགས་པ་གསལ་བར་བྱའོ། །

༈ བརྒྱད་པ་མེ་ཏོག་དོར་བ་ནི། ཐོག་མ་མེད་པའི་མ་རིག་པས་ཡེ་ཤེས་ཀྱི་མིག་ལྡོངས་པ་མཚོན་པའི་ཕྱིར། མིག་དར་ནག་པོས་བཀབ་ལ་ཐལ་མོ་སྦྱར་བའི་བར་དུ་དར་སྣ་ལྔའི་སྤྱན་དར་བཟུང་སྟེ། ཨེ་མ་ཧོ། ཐོག་མའི་འོད་གསལ་སྙིང་པོ་ནས། །ད་ལྟའི་ཐེག་མཆོག་འདི་འཕྲད་པར། །གཞི་ལ་སྦྱངས་པའི་(༣༧)ལས་འབྲས་ཀྱིས། །རིགས་མཆོག་དེ་ལ་བབ་པར་ཤོག །ཅེས་བརྗོད་ནས་ཕོ་བྲང་དབུས་སུ་དོར་ཏེ།

༈ དགུ་པ་མིང་གདགས་པ་ནི། མེ་ཏོག་དེ་ཉིད་དབུས་སུ་བབས་ན། སྣ་ཚོགས་རང་གྲོལ། ཤར་དུ་རྡོ་རྗེ་སྙིང་པོ། ལྷོར་འདོད་ཡོན་རང་ཤར། ནུབ་ཏུ་བདེ་ཆེན་རྒྱལ་པོ། བྱང་དུ་སྒོ་ལྔ་བྱ་བྲལ་དུ་གདགས་སོ། །

༈ བཅུ་པ་མིག་དར་དབྱེ་བ་ནི། སློབ་མས། ཀྱེ་མ་རྡོ་རྗེ་འཛིན་མགོན་རྗེ། །བདག་ནི་ཁམས་གསུམ་འཁོར་བར་ལོང་། །རྗེ་ཡི་ཡེ་ཤེས་ཐུགས་རྗེ་ཡིས། །བདག་གི་མ་རིག་བསལ་དུ་གསོལ། །ཞེས་པའི་ལན་དུ་བླ་མས། ཨེ་མ་སྐལ་ལྡན་རིགས་ཀྱི་བུ། །སྔོན་ཆད་གཟུང་འཛིན་འཁྲུལ་བས་ལོང་། །རང་ལ་གཞག་ནས་གཞན་དུ་བཙལ། །ཐུར་མས་ཡིད་བཞིན་ནོར་བུ་མཚོན། །ཞེས་བརྗོད་ལ། གསེར་གྱི་ཐུར་མས་མིག་དར་ཕྱེ་བས་མ་རིག་པ་བསལ་བར་བསམ་མོ། །དེའི་དོན་ཡང་སྙིང་པོ་རིག་པའི་ཡེ་ཤེས་ལྔ་ལྡན་ཡིད་བཞིན་གྱི་ནོར་བུ་རང་ལ་ཡོད་ཀྱང་ངོ་མ་ཤེས་པར་གཟུང་འཛིན་གྱི་མ་རིག་པས་བློ་མིག་མདོངས་ཏེ། གཞན་དུ་བཙལ་བས་འཁོར་བར་འཁྱམས། ད་ནི་བླ་མའི་ཐུགས་རྗེ་ཡེ་ཤེས་ཀྱི་གདམས་པ་གསེར་གྱི་ཐུར་མས་མ་རིག་པའི་སྒྲིབ་གཡོགས་བསལ་ལ། སྙིང་ནང་རིག་པའི་འོད་མདངས་དབང་པོས་མངོན་སུམ་དུ་བསྟན་པར་བྱའོ། །ཞེས་བཤད་དོ། །

བཅུ་གཅིག་པ་མཐོང་བ་བསྟན་པ་ལས། དང་པོ་བླ་མའི་མཐོང་བ་བསྟན་པ་ནི། བླ་མས། ལྟོས་ཤིག་ལྟོས་ཤིག་རིགས་ཀྱི་བུ། །མ་ཡེངས་སེམས་ཀྱི་ངང་དུ་ལྟོས། །ང་ལ་མཐོང་བ་སྣ་ཚོགས་པའོ། །བུ་ཁྱོད་ཀྱིས་ནི་ཅིར་མཐོང་ལྟོས། །ཞེས་པའི་ལན་དུ། བླ་མ་སངས་རྒྱས་སུ་མཐོང་བ་ལགས། ཞེས་བརྗོད་དོ། །དེ་ཡང་ལས་དག་པ་རྣམས་ཀྱིས་ལྷ་སྐུ་དང་འོད་ཕུང་ལ་སོགས་པར་མཐོང་ཞིང་། མོས་པས་སངས་རྒྱས་སུ་མཐོང་བའོ། །

གཉིས་པ་དཀྱིལ་འཁོར་གྱི་མཐོང་བ་བསྟན་པ་ནི། ལྟོས་ཤིག་མིག་ཅན་སྐལ་ལྡན་ཀུན། །དཀྱིལ་འཁོར་བཟང་པོ་འདི་ལ་ལྟོས། །དད་པའི་མཆོག་ནི་བསྐྱེད་རེ་རན། །ཁྱེད་ཀྱིས་དཀྱིལ་འཁོར་ཅི་རུ་མཐོང་། །ཞེས་བརྗོད་པའི་ལན་དུ། དཀར་པོ་དང་། སེར་པོ་དང་། དམར་པོ་དང་། མཐིང་ཀ་ལ་སོགས་པ་གང་(༣༨)ཤས་ཆེར་མཐོང་བ་བཞིན་ལན་བརྗོད་པ་ནི། རང་གི་ཡེ་ཤེས་གང་མངོན་དུ་གྱུར་པའི་རིགས་ངོས་བཟུང་བའོ། །དེ་ནས་གསེར་གྱི་ཐུར་མ་ལ་སོགས་པས་རིམ་པས་ངོ་སྤྲད་ནས་དཀྱིལ་འཁོར་གྱི་དེ་ཉིད་བཤད་པ་ནི། དབུས་ཟླུམ་པོ་མཐིང་ཀ་བྱུང་བ་ནི། གཞི་ཆོས་ཉིད་ཀྱི་དོན་ལ་གཉེན་པོ་དང་བྲལ་བའི་བརྡའོ། །པདྨ་འདབ་བརྒྱད་མཛེས་མཚོན་དུ་བྱུང་བ་ནི། གཞི་མ་རླུང་ལྔའི་དྭངས་མ་དང་ལྡན་པའི་བརྡའོ། །གྲུ་ཆད་བཞིར་བྱུང་བ་ནི། འབྱུང་བ་བཞིའི་འོད་དང་ལྡན་པའི་བརྡའོ། །ཁྱམས་བཞི་སྒོ་དང་བཅས་པ་ནི། ཕྲིན་ལས་བཞི་པོ་རང་ལ་ཚང་བའི་བརྡའོ། །པཉྩ་རེ་ཁཱའི་རྩིག་པ་ལྔར་བྱང་བ་ནི། ཡེ་ཤེས་ལྔའི་ར་བ་དང་ལྡན་པའི་བརྡའོ། །རྟ་བབས་བཞི་ནི། གཞི་ལ་ཚད་མེད་བཞི་ལྷུན་གྱིས་གྲུབ་པའི་བརྡའོ། །རི་དྭགས་བརྒྱད་ནི་རྣམ་པར་ཤེས་པའི་ཚོགས་བརྒྱད་གཞི་ནས་དག་པའི་བརྡའོ། །འཁོར་ལོ་བཞི་ནི་ཕྱི་ནང་གསང་བ་བླ་ན་མེད་པའི་ཆོས་ཀྱི་འཁོར་ལོ་བཞི་ཡེ་ནས་བསྐོར་བའི་བརྡའོ། །གདུགས་བཞི་ནི་རྟག་པ་བརྟན་པ་འཕོ་འགྱུར་མེད་པ་ལྷུན་གྱིས་གྲུབ་པ་བཞིའི་དབྱིངས་ན་གདོད་མ་ནས་གསལ་བའི་བརྡའོ། །སྣ་ཚོགས་རྡོ་རྗེ་ནི་ཆོས་ཐམས་ཅད་ཡེ་ནས་སངས་རྒྱས་པ་རྫོགས་པ་ཆེན་པོའི་ངང་ན་གནས་པའི་བརྡའོ། །འདོད་ཡོན་གྱི་སྣམ་བུ་ནི་འདོད་ཡོན་མ་སྤངས་རྒྱན་དུ་ཤར་བའི་བརྡའོ། །ཕ་གུ་ནི་འདོད་དགུ་མ་སྤངས་རང་ལས་བྱུང་བའི་བརྡའོ། །དྲ་ཕྱེད་ནི་གཞིའི་ཡོན་ཏན་རྫོགས་པའི་བརྡའོ། །མདའ་ཡབ་ནི་ཐུགས་རྗེ་ཕྱོགས་རིས་མེད་པའི་བརྡའོ། །པུ་ཤུ་ནི་འོད་གསལ་སྙིང་པོར་གྱུར་པའི་བརྡའོ། །ཞིང་ཁམས་ནི་རང་སྣང་ལྷུན་གྱིས་གྲུབ་པའི་བརྡའོ། །ཉི་གདན་ནི་ཤེས་རབ་དབྱིངས་སུ་འཁྱིལ་པའི་བརྡའོ། །པདྨ་ནི་ཡེ་ནས་དྲི་མས་མ་གོས་པའི་བརྡའོ། །རྡོ་རྗེའི་ར་བ་ནི་དབྱིངས་ནས་འཕོ་འགྱུར་མེད་པའི་བརྡའོ། །འོད་ཟེར་གྱི་ཕྲེང་བས་བསྐོར་བ་ནི། དབྱིངས་ནས་སྐུ་དང་ཡེ་ཤེས་ལྔའི་རོལ་པ་ལྷུན་གྱིས་གྲུབ་པའི་བརྡའོ། །ཞེས་བཤད་དོ། །གསུམ་པ་རྫས་ཀྱི་མཐོང་བ་བསྟན་པ་ནི། ཨེ་མ་བརྡ་ཤེས་སྐལ་ལྡན་བུ། །བརྡ་དང་དམ་རྫས་བཀོད་པའི་ཚོགས། །གནས་ལུགས་མཚོན་པའི་རྫས་འདི་ལྟོས། །མཐོང་བའི་དོན་དེ་བདག་ལ་སྨྲོས། །ཞེས་བརྗོད་(༣༩)དུས། ཐམས་ཅད་ཆོས་ཉིད་ཀྱི་རོལ་པར་མཐོང་ལགས། ཞེས་ལན་གདབ་ལ། བླ་མས་རྫས་ཀྱི་དེ་ཉིད་བསྟན་པ་ནི། ཐུར་མས་མཚོན་ལ། ཀྱཻ་སྐལ་ལྡན་བུམ་པ་ལྔར་བྱུང་བ་ནི་རིགས་ལྔ་རང་ལ་རྫོགས་པའི་བརྡའོ། །མགུལ་ཆིངས་ལྔ་ནི། ཡུམ་ལྔ་དང་ཡབ་ལྔ་དབྱེར་མེད་པའི་བརྡའོ། །ཁ་རྒྱན་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ཡེ་ནས་རྫོགས་པའི་བརྡའོ། །ཤེལ་ལྔ་ནི། ངོ་བོ་ཀ་དག་ཆོས་སྐུའི་གཞི་མཚོན་པའི་བརྡའོ། །རྨ་བྱའི་མདོངས་ལྔ་ནི། རང་བཞིན་འོད་མདངས་སྒྲོན་མ་ལྔ་རང་ལ་འཆར་ནས་ལྷུན་གྲུབ་ལོངས་སྐུའི་ཞིང་མཚོན་པའི་བརྡའོ། །མེ་ལོང་ལྔ་ནི། ཐུགས་རྗེ་རིག་པའི་སྙིང་པོ་ཡེ་ཤེས་ལྔ་ལྡན་སྤྲུལ་པ་འཕྲོ་བའི་གཞིར་མཚོན་པའི་བརྡའོ། །མདའ་ལྔ་ནི། ཤེས་རབ་ལྔ་གཞི་ལ་མཚོན་པའི་བརྡའོ། །དར་སྣ་ལྔ་ནི། རླུང་ལྔ་དབྱིངས་ནས་མཚོན་པའི་བརྡའོ། །ཕུར་པ་བཞི་ནི། རིག་པའི་ཆོས་དབྱིངས་འཕོ་འགྱུར་མེད་པ་མཐའ་བཞི་ལས་གྲོལ་བའི་བརྡའོ། །གྲི་བཞི་ནི་སྐྱེ་བ་བཞིའི་མངལ་སྒོ་འཇོམས་པའི་བརྡའོ། །ཕྱི་ནང་གི་མཆོད་པ་གཏོར་ཚོགས་གནས་ཀྱི་བཀོད་པ་ཕུན་སུམ་ཚོགས་པས་བརྒྱན་པ་ནི། སྣང་སྲིད་སྣོད་བཅུད་ཀྱི་འདོད་ཡོན་སྒོ་ལྔའི་སྣང་ཡུལ་ཐམས་ཅད་རང་སྣང་རིག་པའི་ངང་ནས་རྨི་ལམ་གྱི་སྣང་བ་ལྟར་མ་འགགས་པ་ཡེ་ནས་ཤར་བའི་བརྡའོ། །ཞེས་བཤད་དོ། །བཞི་པ་མཆེད་ལྕམ་གྱི་མཐོང་བ་བསྟན་པ་ནི། ཨེ་མ་ངོ་མཚར་རིགས་ཀྱི་བུ། །གྲོགས་ཀྱི་དམ་པ་གང་ཡིན་པ། །འཇུག་སྒོ་གཅིག་པའི་མཆེད་ལྕམ་ལ། །དག་པའི་སྣང་བ་མཐོང་རེ་རན། །ཁྱེད་ཀྱིས་ཅི་མཐོང་བདག་ལ་སྨྲོས། །ཞེས་པའི་ལན་དུ་སོ་སོ་ནས། ཐར་པ་སྒྲུབ་པའི་གྲོགས་དཔའ་བོ་དང་རྣལ་འབྱོར་མའི་ཚོགས་རྣམས་ལྷ་དང་ལྷ་མོའི་རང་བཞིན་དུ་མཐོང་ལགས། ཞེས་བརྗོད་དོ། །

གསུམ་པ་དབང་བསྐུར་བ་དངོས་ལ་བཞི་ལས། དང་པོ་བུམ་པའི་དབང་ནི། སློབ་མ་རྣམས་རྡོ་རྗེ་སྐྱིལ་ཀྲུང་གིས་འདུག་པའི་སྤྱི་བོར། །དབུས་ཀྱི་བུམ་པ་བླངས་ཏེ་བཞག་ལ། ཀཱ་ལི་དང་རྩེ་མོ་བཀོད་པའི་རྩ་ཡིག་གིས་དབང་བསྐུར་བ་ནི། ཨཱ། ཆོས་ཀྱི་དབྱིངས་ཀྱི་བུམ་པ་རུ། །སྟོང་གསལ་རང་བྱུང་ཆུ་ཡིས་བཀང་། །སྐལ་ལྡན་བུ་ལ་དབང་བསྐུར་(༤༠)བས། །དབྱིངས་ཀྱི་གནས་ལུགས་རྟོགས་པར་ཤོག །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཕ་ཕཱ། ཕི་ཕཱི། མ་མཱ། མི་མཱི། བ་བཱ། བི་བཱི། ཉ་ཉཱ། ཉི་ཉཱི། ཀ་ཁ་ག་གྷ་ང་། ཙ་ཙཱ། ཚ་ཚཱ། ཌ་ཌཱ། ཐ་ཐཱ། པ་པཱ་ན། ཞེས་བརྗོད་ནས་རོལ་མོ་བསྒྲག་ཅིང་ཆུ་ཐིགས་གཅིག་སྤྱི་བོར་བླུགས་ནས་ཁྲུས་བྱའོ། །དེ་ཡང་བུམ་ནང་དང་བུམ་ནང་གི་ཆུ་ལྟར། རིག་པའི་ཆོས་དབྱིངས་སྟོང་པའི་ངང་ལ། ཡེ་ཤེས་སྣང་བར་ལྡན་པ་ནི། རིག་སྟོང་ཆོས་ཀྱི་དབྱིངས་ཀྱི་ཡེ་ཤེས་ངོ་ཤེས་པར་གྱིས་ཤིག་པའོ། །ཤར་གྱི་བུམ་པ་སྙིང་གར་གཏུགས་ཏེ། ཨཱ་ལི་དང་དྲན་པ་འདུས་པའི་རྩ་ཡིག་གིས་དབང་བསྐུར་བའོ། །ཧཱུྃ་མ་སྐྱེས་སྙིང་པོའི་བུམ་པ་རུ། །འགགས་མེད་རང་བྱུང་རྫས་ཀྱིས་བཀང་། །སྐལ་ལྡན་བུ་ལ་དབང་བསྐུར་བས། །འཇིགས་བྲལ་བཞི་ཡི་དོན་རྟོགས་ཤོག །ཨ་ཨཱ། ཨི་ཨཱི། ཨཱུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱཿ ཁ་ཚ་ཊ་ཏ་ཐ་ཡ་སྭཱ་ཧཱ། ཀ་གྷ་བྷ་ཛྷ། ཞེས་བརྗོད་ནས་ཆུ་ཐིགས་གཅིག་སྙིག་ཁར་བླུགས་ནས་ཁྲུས་བྱའོ། །དེ་ཡང་བུམ་པ་དང་། ནང་གི་ཆུ་ལྟར། རིག་པ་བདེ་གཤེགས་སྙིང་པོའི་བུམ་པ་རང་གསལ་མཐའ་བཞིའི་སྤྲོས་པ་དང་བྲལ་བའི་ངང་ནས། ཡེ་ཤེས་འགག་མེད་དུ་གསལ་བ་འདི་ཉིད་མེ་ལོང་ཡེ་ཤེས་རང་ལ་གནས་པ་ངོ་ཤེས་པར་གྱིས་ཤིག་པའོ། །ལྷོའི་བུམ་པ་མགྲིན་པར་གཏུགས་ལ། ཀཱ་ལི་དང་རོ་རྣམས་འདུས་པའི་རྩ་ཡིག་གིས་དབང་བསྐུར་བ་ནི། སྭཱ་རང་བྱུང་ཡེ་ཤེས་བུམ་པ་རུ། །འདོད་ཡོན་རང་སྤྲུལ་རྫས་ཀྱིས་བཀང་། །སྐལ་ལྡན་བུ་ལ་དབང་བསྐུར་བས། །བསམ་པ་ལྷུན་གྲུབ་དབང་ཐོབ་ཤོག །ཀཱ་ལིའི་རྗེས་ལ། ར་རཱ། ལི་ལཱི། ཨཾ་ཨེ། ཞེས་བརྗོད་ནས་ཆུ་ཐིགས་གཅིག་འཐུངས་པས་ཁྲུས་བྱའོ། །དེ་ཡང་བུམ་པ་དང་ཆུ་ལྟར། རང་བྱུང་ཡེ་ཤེས་ཀྱི་ངང་འདིར་རང་སྣང་འདོད་ཡོན་གྱི་སྣང་བ་རང་ཤར་བ་ལས་གང་ཤར་སྤང་བླང་མེད་པར་སྤྱད་པས་སྣང་ངོ་ཐ་དད་ཀྱང་རིག་ངོར་མཉམ་(༤༡)པ་ནི། མཉམ་ཉིད་ཡེ་ཤེས་རང་ལ་གནས་པས་ངོ་ཤེས་པར་གྱིས་ཤིག་པའོ། །ནུབ་ཀྱི་བུམ་པ་ལྟེ་བར་གཏུགས་ནས། ཨཱ་ལི་དང་སྐྱེད་བྱེད་འཁོར་ལོའི་རྩ་ཡིག་གིས་དབང་བསྐུར་བ་ནི། ཨཱཿམ་སྐྱེས་ཆགས་བྲལ་བུམ་པ་རུ། །བདེ་ཆེན་རྒྱུན་སྤྲོས་རྫས་ཀྱིས་བཀང་། །སྐལ་ལྡན་བུ་ལ་དབང་བསྐུར་བས། །ཆགས་བྲལ་འཛིན་མེད་དབང་ཐོབ་ཤོག །ཨཱ་ལིའི་རྗེས་ལ། ཨ་ཏ་ལི་ཧ། ཨུ་དྷ་རཾ་ཡཾ་ནཾ། ན་ཛ་ཊི། ས་ཁ་རཾ་ཡཾ། ཧ་ཧེ་ཧོ། ཞེས་བརྗོད་ནས་ཆུ་ཐིགས་ལྟེ་བར་བླུགས་ནས་ཁྲུས་བྱའོ། །དེ་ཡང་བུམ་པ་དང་ཆུ་ལྟར། རིག་པ་ཡེ་ནས་རྣམ་དག་གི་ངང་ན་རང་གནས་བདེ་བ་ཆེན་པོར་གནས་པའི་རང་དུས་དེར། ཕྱི་ཡུལ་སྣང་རིག་པ་ཤར་བའི་ཚེ་ན། ལྷུག་པར་གློད་པས་ཡུལ་སེམས་ཡབ་ཡུམ་ཟུང་འཇུག་ཏུ་ངང་གིས་གྲོལ་ཏེ། སྣང་རིག་འཛིན་མེད་ཀྱི་ཤེས་པ་བདེ་ཡངས་པ་ནི་སོ་སོར་རྟོགས་པའི་ཤེས་པ་རང་ངོ་ཤེས་པར་གྱིས་ཤིག་པའོ། །བྱང་གི་བུམ་པ་ལྟེ་བ་མགྲིན་པ་སྙིང་ག་སྤྱི་བོ་བཞི་ཀར་གཏུགས་ཤིང་། ཨཱ་ལི་དང་། ཀཱ་ལི་དང་། འཁོར་ལོ་བཞི་ཀའི་རྩ་ཡིག་གིས་དབང་བསྐུར་བ་ནི། ཧཱ། ཡེ་ཤེས་ཟང་ཐལ་བུམ་པ་རུ། །འགག་མེད་རླུང་ལྔའི་རྫས་ཀྱིས་བཀང་། །སྐལ་ལྡན་བུ་ལ་དབང་བསྐུར་བས། །རྩལ་ཆེན་རྫོགས་པའི་དབང་ཐོབ་ཤོག །ཨཱ་ལི་དང་ཀཱ་ལི་ཚང་བར་བརྗོད་པའི་རྗེས་ལ། ཕ་ཕཱ། ཕི་ཕཱི། མ་མཱ། མི་མཱི། བ་བཱ། བི་བཱི། ཉ་ཉཱ། ཉི་ཉཱི། ཀ་ཁ་ག་གྷ་ང་། ཙ་ཙཱ། ཚ་ཚཱ། ཊ་དྷ། ཐ་ཐཱ། པ་པཱ། ན། ཁ་ཙ་ཊ། ཏ་ཕ་ཡ་སྭཱ་ཧཱ། ཀ་གྷ་བྷ་ཛྷ། ར་རཱ། ལི་ལཱི། ཨཾ་ཨེ། ཨ་ཏ་ལི་ཧ། ཨུ་དྷ་རེ། ཡཾ་རཾ་ཎཾ། ན་ཛ་ཏྲི། ས་ཁ་རཾ་ཡཾ། ཧ་ཧེ་ཧོ། ཞེས་བརྗོད་ནས་གནས་བཞི་པོ་དེར་ཆུ་ཐིགས་རེ་བླུགས་ལ་ཁྲུས་བྱའོ། །དེ་ཡང་བུམ་པ་དང་ཆུ་ལྟར་རིག་པ་ཟང་ཐལ་ཡེ་གྲོལ་ཆེན་པོ་རླུང་ལྔའི་ཡེ་ཤེས་ལྔ་དང་བཅས་པའི་ངང་ནས། རང་གདངས་སྒོ་ལྔའི་རྣམ་ཤེས་ཡུལ་ལྔ་ལ་ཤར་བ་དང་། ཉོན་མོངས་ལྔའི་རྣམ་པ་ཡིད་ལ་ཤར་བ་རྣམས་ཟང་ཐལ་ཡེ་གྲོལ་ཆེན་པོའི་རང་སྣང་ཡིན་པས། གང་ཤར་ལ་སྤང་གཉེན་གྱི་འཁུ་འཕྲིགས་མི་ཞུགས་པར་ཤར་ས་རིག་པའི་ངང་ལ་ཚུར་བལྟས་པས། རོལ་པ་ཕྱོགས་ཡན་རྗེས་མེད་དུ་རང་(༤༢)གྲོལ་བ་ནི། བྱ་བ་གྲུབ་པའི་ཡེ་ཤེས་སུ་ངོ་ཤེས་པར་གྱིས་ཤིག་པའོ། །དེ་དག་གིས་བུམ་དབང་ཕུན་སུམ་ཚོགས་པ་ལྔ་སྟེ། དོན་རིག་པ་ལ་གདེང་འཆོས་པ་ནི་རྡོ་རྗེ་སློབ་དཔོན་གྱི་དབང་ཐོབ་པའོ། །

གཉིས་པ་གསང་བའི་དབང་ནི། སློབ་མའི་རྩ་གནས་བཞིའི་དབུས་ན་ཀུན་བཟང་ཡབ་ཡུམ་བཞི་མཉམ་པར་སྦྱོར་བའི་བྱང་ཆུབ་ཀྱི་སེམས་དཀར་དམར་བབས་པས་ལུས་ཀྱི་ནང་ཐམས་ཅད་ཁེངས་པར་བསམ་ཞིང་། ཀ་པཱ་ལ་བདུད་རྩིས་གང་བ་བཏེགས་ནས། གནས་བཞིར་གཏུགས་ནས་དབང་བསྐུར་བ་ནི། ཧཱུྃ་བདེ་ཆེན་གདལ་བའི་རང་བྱུང་ཀ་པཱ་ལར། །ཆགས་པ་དངོས་དག་ཀུན་བཟང་ཐིག་ལེས་བཀང་། །རིགས་ཆེན་སྐལ་ལྡན་བུ་ལ་དབང་བསྐུར་བས། །རྩ་རླུང་བྱང་སེམས་མཆོག་ལ་དབང་ཐོབ་ཤོག །ཅེས་བརྗོད་པའི་རྗེས་ལ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱཿ ཕ་ཕཱ། ཕི་ཕཱི། མ་མཱ། མི་མཱི། བ་བཱ། བི་བཱི། ཉ་ཉཱ། ཉི་ཉཱི། ཀ་ཁ་ག་གྷ་ང་། ཙ་ཙཱ། ཚ་ཚཱ། ཌ་ཌཱ། ཐ་ཐཱ། པ་པཱ་ན། ཁ་ཚ་ཊ། ཏ་པ་ཡ་སྭཱ་ཧཱ། ཀ་གྷ་བྷ་ཛྷ། ར་རཱ། ལི་ལཱི། ཨཾ་ཨེ། ཨ་ཨཱཿ ཨ་ཏ་ལི་ཧ། ཨུ་དྷ་རི་ཡཾ་ཎཾ། ན་ཛ་ཊི་པ་ཁ། རཾ་ཡཾ་ཧ་ཧེ་ཧོ། ཞེས་བརྗོད་ནས་ཧུབ་རེ་འཐུངས་པས་ལུས་ཀྱི་ནང་ཐམས་ཅད་འོད་ལྔས་ཁེངས་བདེ་བ་རྒྱས་པར་བསམ། དེ་ཡང་ཀ་པཱ་ལ་ནས་བདུད་རྩི་འཐུངས་པས་རོ་ཞིམ་པ་ལྟར། འཁོར་ལོ་བཞིའི་རྩ་སྦུབས། དྲི་མེད་འོད་གསལ་གྱི་རྩ་ཆེན་བཞིའི་ནང་ན། ཀུན་ཏུ་བཟང་པོ་འོད་གསལ་མཆོག་ཏུ་མི་འགྱུར་བའི་ཐིག་ལེ་ལྔ་ལྡན་རྡོ་རྗེ་ལུ་གུ་རྒྱུད་ཀྱི་སྣང་བ་དང་བཅས་པ། གཞི་ལ་ཡེ་ནས་ལྷུན་གྲུབ་ཏུ་གནས་པ་ཉིད་རྣལ་འབྱོར་པས་ཉམས་སུ་བླངས་དུས། སྣང་བ་བཞིའི་ཡེ་ཤེས་སུ་ཤར་ཏེ། རང་ལ་གནས་པའི་དོན་གསང་བའི་དབང་རང་ངོ་ཤེས་པར་གྱིས་ཤིག །གཞན་ཡང་རིག་པ་སྣང་ཐོག་ཏུ་ཤར་རམ། ཤེས་པ་རང་མལ་དུ་གནས་ཀྱང་རུང་སྟེ། རང་བབས་ལྷུག་པ་གཏད་མེད་བདེ་བ་ཆེན་པོར་ཤར་བས། བདེ་གསལ་རྣམ་པར་མི་རྟོག་པའི་ཡེ་ཤེས་གསང་བའི་དབང་དུ་རང་ངོ་ཤེས་པར་གྱིས་ཤིག་པའོ། །

གསུམ་པ་ཤེས་རབ་ཡེ་ཤེས་ཀྱི་(༤༣)དབང་ནི། ཡེ་ནས་རང་སྣང་རིག་མ་དང་ལྷན་ཅིག་སྙོམས་པར་ཞུགས་པའི་དོན་ལ་ངོ་སྤྲད་པ་ཡིན་ཏེ། སློབ་མ་རྣམས་ཀུན་བཟང་ཡབ་ཡུམ་ཟུང་འཇུག་འཁྲིལ་སྦྱོར་དུ་བསྐྱེད་ཅིང་སྣང་རིག་མ་འགགས་པ་ལྷ་ལ་ལྷ་སྦྱོར་བའི་ཚུལ་གྱིས་དབང་བསྐུར་བ་ནི། ཧཱུྃ་སྣང་སྲིད་བདེ་ཆེན་གདལ་བའི་ཞིང་ཁམས་ལ། །རོལ་པའི་ཡེ་ཤེས་བདེ་བ་ཆེན་པོར་ཤར། །ཐབས་ཤེས་འདོད་པ་སྤྱད་པས་གྲོལ་གྱུར་ཏེ། །མ་འགགས་རོལ་པར་སྤྱོད་ཅིག་བདེ་བ་ཆེ། །ཞེས་བརྗོད། དེ་ཡང་རང་གི་ཡེ་ཤེས་བདེ་བ་ཆེན་པོའི་ངང་ནས་རང་བྱུང་དོན་གྱི་ལྷ། འོད་གསལ་ཞི་ཁྲོའི་རང་བཞིན་ཡབ་ཡུམ་གཉིས་སུ་མེད་པར། ཡེ་ནས་ལྷུན་གྱིས་གྲུབ་པའི་རང་མདངས་ལས། འདི་ལྟར་སྣང་སྲིད་སྣོད་བཅུད་འཁོར་འདས་ཐམས་ཅད་རིག་པའི་རང་སྣང་དུ་ཤར་བ་ལ། ཐབས་མ་འགགས་པར་སྣང་བ་ཡབ་ལ། ཤེས་རབ་མི་འཛིན་པ་སྟོང་པ་ཡུམ་དང་གཉིས་མེད་དུ་སྦྱར་བས། གང་སྣང་རིག་པའི་གྲོགས་སུ་རང་ཤར་ཏེ་བློ་བྲལ་བདེ་བ་ཆེན་པོའི། ཡེ་ཤེས་ཡོད་མེད་རྟག་ཆད་ཀྱི་མཐའ་བཞི་ལས་གྲོལ་བ་ན། དགའ་བ་བཞིའི་ཡེ་ཤེས་ཤེས་རབ་ཡེ་ཤེས་ཀྱི་དབང་དུ་ངོ་ཤེས་པར་གྱིས་ཤིག་པ་སྟེ། སྣང་ཐོག་ཏུ་ཇི་ལྟར་ཤར་ཡང་། ཤར་དུས་ཀྱི་རིག་པ་ངོས་བཟུང་སྟེ། མི་སྤོང་མི་ལེན་མི་འཇོག་པར་བློ་བྲལ་གཉིས་སུ་མེད་པའི་ངོ་བོ་གཉུག་མ་དོན་གྱི་ཡེ་ཤེས་མཆོག་དབང་བདེ་བ་ཆེན་པོར་ངོ་ཤེས་པར་བྱའོ། །

བཞི་པ་ཚིག་དབང་རིན་པོ་ཆེ་བརྡའི་ངོ་སྤྲོད་པ་ནི། འོད་གསལ་སྣང་བ་བཞི་མཐར་ཕྱིན་པའི་རིག་པ་རང་མལ་ལྷུན་གྲུབ་རིན་པོ་ཆེའི་སྦུབས་ན་བཙན་ས་ཟིན་པའི་དབང་སྟེ། བརྡ་བཞིས་མཚོན་པ་ནི། ཀྱེ་སྐལ་བ་དང་ལྡན་པའི་བུ་རྣམས་ཉོན་ཅིག །ཀ༽ནམ་མཁའི་དབྱིངས་ན་ཡིད་བཞིན་གྱི་ནོར་བུ་རིན་པོ་ཆེ་ལ་ཉི་ཟླ་གཉིས་ཤར་ནས་འདུག་པ་དེ་མཐོང་ངམ། ཁ༽བར་སྣང་གི་འཇའ་ཚོན་ལ་རླུང་གིས་ཞགས་པས་བཏབ་ནས་འདུག་པ་དེ་མཐོང་ངམ། ག༽རྒྱ་མཚོའི་ནོར་བུ་ཤེལ་གྱི་རྟ་མཆོག་ལ་ཞོན་ནས་ཉི་ཟླའི་སྟེང་དུ་དཀྱུས་ཐག་གཅོད་པ་དེ་མཐོང་ངམ། ང་༽འབྱུང་ལྔའི་གྲོང་ཁྱེར་དུ་རིགས་དྲུག་གི་དམག་མི་བཅུག་ནས་རི་རབ་ཀྱི་སྟེང་དུ་སོང་བའི་མི་དང་། ཁམས་གསུམ་གྱི་(༤༤)འཕྲང་ལ་ཤེལ་གྱི་མི་ཕོ་བཙོན་ལ་བཟུང་བ་དེས་ཁམས་གསུམ་སྐད་ཅིག་ལ་བསྐོར་ནས་རང་ཁྱིམ་དུ་གཉིད་དུ་སོང་བ་དེ་མཐོང་ངམ། ཞེས་བརྗོད་ལ།

དོན་བཀྲོལ་བ་ལ་བཞི་ལས། བརྡ་དང་པོ་ནི། ཀ༽ནང་རིག་པའི་རང་མདངས་ཕྱི་ནམ་མཁར་ཤར་བའི་དབྱིངས་ན། ཀུན་ཏུ་བཟང་པོ་གཞིའི་ཐིག་ལེ་ཡིད་བཞིན་གྱི་ནོར་བུ་སྒོ་རྒྱང་ཞགས་ཆུའི་སྒྲོན་མ་ཉི་ཟླའི་མིག་སྔར་རང་སྣང་དུ་ཤར་བ་ཆོས་ཉིད་མངོན་སུམ་གྱི་སྣང་བ་མཐོང་ངམ་ཞེས་པའོ། །བརྡ་གཉིས་པ་ནི། ཁ༽དེ་ལྟར་ཤར་བའི་སྣང་བ་ལ་མི་འགུལ་བ་གསུམ་གྱིས་ཉམས་སུ་ལེན་དུས་རླུང་གནད་དལ་བ། ཞགས་པ་དང་འདྲ་བ་བཏབ་པས། སྣང་བ་འགུལ་འཕྲིགས་མེད་པར་འདུག་སྟེ། ཉམས་གོང་ནས་གོང་དུ་འཕེལ་བ་དེ་མཐོང་ངམ། ཞེས་པའོ། །བརྡ་གསུམ་པ་ནི། ག༽སྙིང་དབུས་འོད་གསལ་གྱི་རྒྱ་མཚོ་ནས་རང་མདངས་འོད་ཀྱི་ནོར་བུ། འོད་རྩ་ཤེལ་གྱི་རྟ་མཆོག་ལ་ཞོན་ནས་མིག་ཉི་ཟླའི་སྟེང་ནས་ཕྱིར་ཐོན་ཉམས་གོང་དུ་འཕེལ་བ་ལ་བསྒོམས་པས། རིག་པ་ཚད་ཕེབས་སུ་དཀྱུས་ཐག་ཆོད་པ་དེ་མཐོང་ངམ། ཞེས་པའོ། །བརྡ་བཞི་པ་ནི། ང་༽སྔར་འབྱུང་ལྔ་ས་བོན་གྱིས། ལུས་སེམས་རིགས་དྲུག་རང་སྣང་གི་དམག་ཏུ་གཡོས་པ་ལས། འཁྲུལ་པའི་སེམས་བདེ་སྡུག་དུ་མ་ལ་སྤྱོད་པ་དམག་མི་ལྟ་བུ། འཛིན་ཆགས་ཀྱི་རི་རབ་ལ་བརྟེན་པ་དང་། སེམས་ཀྱི་འཆར་གཞི་ཡེ་ཤེས་ཀྱི་རང་མདངས་ཤེལ་གྱི་མི་ཕོ་ལུས་ངག་ཡིད་གསུམ་གྱི་རྒྱས་བཟུང་བ་དེར་རང་མདངས་རིག་པ་ཚད་ཕེབས་ཀྱི་བར་མཐོང་དུས། འོད་ལྔ་ལུས་ཀྱི་གྲོང་ཁྱེར་དུ། རང་སྣང་ལྷུན་གྲུབ་ཀྱི་སྒོ་བརྒྱད་དང་། ཁྱད་པར་མ་དག་འཁོར་བའི་སྒོ། རིགས་དྲུག་གི་སྟོང་གཟུགས་དམག་མི་དང་འདྲ་བ་རྣམས་ནང་ཐིམ་དུ་བཅུག་ནས། ནང་དབྱིངས་ལྷུན་གྲུབ་རིན་པོ་ཆེ་རི་རབ་ཀྱི་སྟེང་དུ་སོང་དུས། འཁྲུལ་རྟོག་ཆ་དང་བཅས་པའི་སེམས་འགགས་པ་དང་། རང་སྣང་ཡེ་ཤེས་ཀྱི་མི་ཕོ་སྒོ་གསུམ་གྱི་རྒྱས་བཅིངས་པ་ལས་སྐད་ཅིག་གིས་གྲོལ་ཏེ། རང་གི་ཁམས་གསུམ་འཁོར་བ་དོང་སྤྲུག་ནས། ཤེལ་འོད་ནང་དུ་བསྡུས་པ་ལྟར། གཟིགས་སྣང་དང་འོད་ལུས་དང་བཅས་པ་ནང་དབྱིངས་ལྷུན་གྲུབ་ལ་ཐིམ་སྟེ། ཆོས་སྐུ་རང་ཁྱིམ་དུ་གཉིད་དུ་སོང་བ། ཐོག་མ་གཞི་(༤༥)ལས་མ་གཡོས་པའི་དུས་ལྟ་བུ་ལས། འཁྲུལ་ཆ་དག་པས་ཁྱད་པར་དུ་བྱས་པ་ཀ་དག་ལ་བཙན་ས་ཟིན་པ་དེ་མཐོང་ངམ། ཞེས་པའོ། །བརྡ་འདི་དག་ནི་སྔོན་འབྱུང་དུས་ཕྱེ་ཡང་རྡོ་རྗེའི་གནད་ཤིན་ཏུ་རྟོགས་དཀའ་བས། བོད་ཀྱི་སློབ་དཔོན་གང་གིས་ཀྱང་ཤིག་པར་མ་གྱུར་པ། ཁོ་བོས་གོང་མ་རྣམས་ལ་གསོལ་བ་བཏབ་པས། རིག་པའི་རང་སྣང་དུ་ཤར་བས་གྲོལ་ཏེ། ཕྱིན་ཆད་ནས་ནི་ཤེས་པ་བྱུང་ན་ནི་ཡི་གེ་འདིའི་མཐུར་བལྟའོ། །

དེ་ནས་དབང་བཞི་ངེས་པའི་དོན་རྡོ་རྗེའི་གླུས་བསྐུལ་བ་ནི། ཨེ་མ་ཧོཿ མ་ཡེངས་གསོན་ཅིག་རིགས་ཀྱི་བུ། །ཀ༽གཞི་ལ་འཁོར་འདས་གྲུབ་མེད་ཀྱང་། །རྩལ་གྱིས་འཆར་ཚུལ་ངོ་མཚར་ཆེ། །ཁ༽དོན་དམ་ཚིག་གིས་མི་རྟོགས་ཀྱང་། །མངོན་སུམ་གདེང་ཐོབ་ངོ་མཚར་ཆེ། །ག༽རིག་པ་སྐྱེ་འབྲི་མེད་མོད་ཀྱང་། །ལམ་སྣང་འཆར་ཚུལ་ངོ་མཚར་ཆེ། །ང་༽ཀ་དག་གྲོལ་རྒྱུ་མ་མཆིས་ཀྱང་། །རླུང་རིག་དག་ཚུལ་ངོ་མཚར་ཆེ། །ཅ༽ཐེག་པའི་འཇུག་སྒོ་མཐའ་ཡས་ཀྱང་། །ཅིག་ཆར་ཐོབ་པ་ངོ་མཚར་ཆེ། །ཆ༽འཆར་ཚུལ་སྣང་བ་རྒྱ་ཆེ་ཡང་། །ངོ་བོ་གདེང་ཐོབ་ངོ་མཚར་ཆེ། །ཇ༽ཚིག་གི་སྤྲོས་པ་མང་མོད་ཀྱང་། །བརྡ་ཡི་དོན་མཐོང་ངོ་མཚར་ཆེ། །ཞེས་པའི་དོན་ཡང་། ཀ༽གཞི་གཤིས་ཀྱི་ངོ་བོ་ལ་འཁོར་འདས་སུ་མ་གྲུབ་ཀྱང་། རིག་རྩལ་རང་ཤར་དུས་རིག་མ་རིག་གིས་འཁོར་འདས་སུ་ཤར་བ་དང་། ཁ༽དོན་དམ་པའི་རང་བཞིན་ཚིག་གིས་མི་ཤེས་པ་རིག་པས་མངོན་སུམ་དུ་མཐོང་བ་དང་། ག༽གདོད་མའི་ཆོས་ཁམས་རང་བཞིན་གྱི་རིགས་སྙིང་པོ་ལ་འཕེལ་འགྲིབ་མེད་ཀྱང་། ཉམས་སུ་བླངས་པས་སྣང་བ་བཞིའི་རིམ་པ་འཆར་བ་དང་། ང་༽ཀ་དག་གི་གཤིས་ལ་གྲོལ་རྒྱུ་མེད་ཀྱང་གནད་ཟབ་མོས་རླུང་སེམས་དབྱིངས་སུ་དག་པ་དང་། ཅ༽ཐེག་པ་མང་པོ་ལས་སངས་རྒྱས་དུས་ལ་ལྟོས་ཀྱང་། ངོ་བོ་ཡིན་ཐོག་ཅིག་ཆར་དུ་ཤེས་པས་གྲོལ་བ་དང་། ཆ༽ཉམས་ལ་རྣམ་པ་ཚད་མེད་ཀྱང་། ངོ་བོ་གཅིག་ལས་མ་གཡོས་པར་ཐག་ཆོད་པ་དང་། ཇ༽ཚིག་གི་སྤྲོས་པ་མཐའ་ཡས་པ་བརྡ་གཅིག་གིས་ཐམས་ཅད་རྟོགས་ནུས་པ་འདི་དག་ཤིན་ཏུ་ངོ་མཚར་ཆེ། ཞེས་བཤད་དོ། །

གཟེངས་བསྟོད་པ་ནི། དབང་འདི་ཉིད་ཐོབ་ནས་བསྐྱེད་རྫོགས་གནས་ལུགས་ཀྱི་དོན་ལ་དབང་ཐོབ་པ་དང་། རྩ་རླུང་ཡེ་ཤེས་(༤༦)ཀྱི་བདེ་བ་སྒོམ་པར་དབང་བ་དང་། མ་འབད་ཀྱང་སྐྱེ་བ་གསུམ་ནས་གྲོལ་བ་འགྲུབ་པ་ཡིན་ནོ། །ཞེས་བརྗོད་དོ། །དེ་ནས་མཎྜལ་ཕུལ་ལ། ཕྱི་ནང་གི་མཆོད་པས་མཆོད་དོ། །ཚོགས་ཀྱི་འཁོར་ལོ་ལ་རོལ་པར་བྱའོ། །དཀྱིལ་འཁོར་འདིར་འཇུག་པའི་ལོ་ཟླ། བསྐུར་དུས་སློབ་མའི་གྲངས་དང་བཅས་པ་བསྟན་པ་ནི། ཕྲ་ཐིག་ལས། སྤྲོས་བཅས་དག་གི་དབང་བསྐུར་ནི། །བྱི་བ་འབྲུག་དང་རྟ་དང་ཕག །ཁྱད་པར་ལོ་ནི་བཞི་དག་ལ། །དབང་བསྐུར་ཆོ་ག་འགྲུབ་པ་ཡིན། །ཟླ་བ་ར་བ་བཞི་དག་ལ། །དུས་རྫོགས་འབྲས་བུ་འབྱིན་ཕྱིར་འགྲུབ། །ཚེས་གྲངས་ཡར་གྱི་བཞི་ནས་ནི། །ཟླ་བ་ཟད་པའི་མཚམས་སུ་འོ། །བསྐུར་དུས་ཉིན་ཕྱེད་ནམ་གུང་ངོ་། །རྣལ་འབྱོར་ལུས་ཀྱི་བྱེ་བྲག་གིས། །སོ་སོའི་འབྱུང་བའི་ལོ་ལ་སྦྱར། །འདི་དུས་སློབ་མ་དམ་ཚིག་ཅན། །འབྱུང་བའི་ལུས་རྣམས་མཐུན་པ་ནི། །གྲངས་ལ་ཚད་དུ་གཟུང་དུ་མེད། །བརྒྱ་འམ་བཅུ་ལ་སོགས་པ་ཡིས། །འབྱུང་ལས་མཐུན་ན་འགལ་བ་མེད། །ཅེས་གསུངས་སོ། །འབྱུང་ལས་མཐུན་པ་ནི། ས་ཆུ་མེ་རླུང་བཞིའི་ལུས་མཐུན་པ་སྟེ། ས་ནང་མཐུན་པ་ལྟ་བུ་དང་། ས་དང་མེ་ལྟ་བུ་མ་བུ་བསྡེབས་མཐུན་པ་རྣམས་ཆུན་གཅིག་བསྐུར་བས་འབྲས་བུ་འགྲུབ་པ་ཡིན་ནོ། །

དེ་ལྟར་སྤྲོས་བཅས་དབང་གི་རིམ་པ་ལས། །ཇི་བཞིན་གསུངས་བཞིན་བཀོད་པའི་བསོད་ནམས་དེས། །འགྲོ་ཀུན་དབང་མཆོག་རྒྱལ་པོའི་གནས་ཐོབ་ནས། །དོན་གཉིས་ལྷུན་གྲུབ་ཡིད་བཞིན་རྫོགས་པར་ཤོག །བླ་མ་དམ་པ་རྣམས་ཀྱིས་སྔ་རབས་སུ། །རིམ་པ་འདི་ཉིད་ཡོངས་སུ་བཀོད་ན་ཡང་། །འཁྲུགས་དང་མི་གསལ་གབ་པ་མངོན་ཕྱུང་ནས། །མ་ནོར་མ་འཁྲུལ་གསལ་བར་བཀོད་པ་ཡིན། །ཆོས་ཚུལ་འདི་ལ་ཁོ་བོས་སྔོན་སྦྱངས་པས། །ཚེ་འདིར་ངམ་ངམ་ཤུགས་ཀྱིས་ལྷུན་གྱིས་གྲུབ། །དེ་ཕྱིར་དམ་པའི་བརྒྱུད་པ་མ་ཉམས་པ། །ཀློང་ཆེན་རབ་འབྱམས་བཟང་པོས་ལེགས་པར་སྦྱར། །གནད་ཀྱིས་གྲོལ་བ་ཡང་ཟབ་གདམས་པའི་མཆོག །གང་འདིས་སྐལ་བཟང་སྐྱེ་བོ་དགའ་བར་མཛོད། །གསང་བ་སྙིང་ཐིག་གི་དབང་རྣམ་པར་ཕྱེ་བ་ལས། སྤྲོས་བཅས་བུམ་པའི་དབང་གི་གསལ་བྱེད། དངོས་གྲུབ་ཆུ་བོ་ཞེས་བྱ་བ་ཀློང་ཆེན་རབ་འབྱམས་ཀྱིས། སྔོན་གྱི་ཡི་གེ་རྙིང་པ་དག་ལས་ཤིན་ཏུ་གསལ་བར་(༤༧)ཕྱེ་སྟེ། དོན་འགྲེལ་དང་བཅས་པ་ལེགས་པར་བཀོད་པ་འདི་ཡོངས་སུ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། དཀྱིལ་འཁོར་སྤྲོས་བཅས་མིང་གི་རིམ་པ།

༄༅། །ཟབ་མོ་ཡང་ཏིག་ལས། དཀྱིལ་འཁོར་སྤྲོས་བཅས་མིང་གི་རིམ་པ་བཞུགས་སོ། །

༄༅། བླ་མ་རྣམས་ལ་ཕྱག་འཚལ་ཏེ། །དཀྱིལ་འཁོར་སྤྲོས་བཅས་ནང་གཞུག་པའི། །མིང་གི་རིམ་པ་གསལ་བྱེད་པ། །འདི་ཉིད་དུ་ནི་རབ་བཤད་བྱ། །

དེ་ཡང་ཐོག་མའི་འོད་གསལ་སྙིང་པོ་ཡེ་ཤེས་ལྔའི་རང་བཞིན་ལས། རང་ཉིད་གང་གཙོ་བོ་དང་ཉེ་བའི་དཀྱིལ་འཁོར་གང་ཡིན་བརྟག་པའི་ཕྱིར་མེ་ཏོག་དོར་བ་ལས། དབུས་སུ་བབས་ན་ཆོས་དབྱིངས་ཡེ་ཤེས། དེ་བཞིན་གཤེགས་པའི་རིགས་རྣམ་པར་སྣང་མཛད་ལས་དྲས་ཏེ། གནས་ལུགས་མཚོན་པའི་མིང་གདགས་པ་ནི། སྣ་ཚོགས་རང་གྲོལ། ཆོས་ཉིད་དྲི་མེད། ལྷུན་གྲུབ་རྒྱལ་པོ། འགྱུར་མེད་ཡེ་ཤེས། མཁའ་ཀློང་ཡངས་པ། མི་དམིགས་ཆོས་ཉིད། ཡེ་གྲོལ་གཉུག་མ། ལྷུན་མཉམ་བྱ་བྲལ། ཀུན་བྱེད་རྒྱལ་པོ། ཀློང་ཆེན་རབ་འབྱམས། མཁའ་མཉམ་ཆོས་སྐུ། གཞི་བྲལ་ཆོས་ཉིད། བསམ་རྫོགས་རྒྱལ་པོ། བརྗོད་མེད་མཚོན་འདས། བྱང་ཆུབ་སྙིང་པོ། གཉུག་མ་ཁྱབ་གདལ། ཡེ་སྟོང་རྩ་བྲལ། ཀུན་གྲོལ་ཡེ་ཤེས། མ་ལུས་ཆོས་ཉིད། རོལ་པ་ཡེ་ཤེས། གང་ཤར་རང་གྲོལ། ཡེ་གྲོལ་འཛིན་མེད། མ་བཙལ་རང་རྫོགས། བྱར་མེད་རང་བྱུང་། སངས་རྒྱས་རང་ཆས། མི་འགྱུར་ལྷུན་གྲུབ། ཁྱབ་གདལ་ཆེན་པོ། སྣང་སྲིད་ཆོས་སྐུ། རྩལ་ཆེན་རྫོགས་པ་ལ་སོགས་ཏེ། དབྱིངས་འཕོ་འགྱུར་མེད་པ་ལས་དྲངས་ནས། སྐྱེས་པ་དང་བུད་མེད་གང་འོས་སུ་གདགས་སོ། །

ཤར་དུ་བབས་ན། མེ་ལོང་ཡེ་ཤེས་རྡོ་རྗེའི་རིགས་མི་བསྐྱོད་པ་ལས་དྲངས་ཏེ། འོད་གསལ་མཚོན་པའི་མིང་ལ། རྡོ་རྗེ་སྙིང་པོ། རྡོ་རྗེ་སེམས་དཔའ། རྡོ་རྗེ་ལེགས་པ། འོད་ལྔ་ལྷུན་གྲུབ། ཡེ་ཤེས་དྲི་མེད། ངང་དང་འོད་གསལ། ལྷུན་མཉམ་མི་གཡོ། ཕྱམ་ཅིག་བྱང་ཆུབ། གསལ་སྟོང་འཛིན་མེད། རང་གསལ་ཆོས་སྐུ། མ་ལུས་ལྷུན་གྲུབ། གདོད་ནས་བྱང་ཆུབ། དམིགས་བསམ་སྤྲོས་བྲལ། འགག་མེད་རང་(༤༨)གསལ། རང་བྱུང་ཡེ་ཤེས། འོད་གསལ་སྙིང་པོ། གཉིས་མེད་ཡེ་ཤེས། ཕྱོགས་མེད་རང་ཡན། དམིགས་མེད་ཀུན་གྲོལ། ཡངས་པ་ཆེན་པོ། འགྲོ་བ་ཆོས་ཉིད། བསམ་རྫོགས་གདོད་མ། བྱར་མེད་ནམ་མཁའ། མ་སྐྱེས་ཆོས་ཉིད། མི་གནས་རང་བྱུང་། མི་འོང་ཡེ་ཤེས། རོལ་པ་འགག་མེད། རྒྱ་ཡན་རང་གྲོལ། མཐའ་བྲལ་དབུ་མ། རྫོགས་པ་རང་བྱུང་། རིག་པ་དྲི་མེད། རང་ཤར་འགག་མེད། མཐའ་བྲལ་ཀློང་ཆེན་ལ་སོགས་ཏེ། གསལ་དྭངས་འོད་གསལ་ལས་དྲངས་ཏེ། གང་འོས་སུ་གདགས་སོ། །

ལྷོར་བབས་ན། མཉམ་ཉིད་ཡེ་ཤེས་རིན་ཆེན་རིགས་རིན་འབྱུང་ལས་བརྩམས་ཏེ། གཉིས་མེད་མཚོན་པའི་མིང་ལ། འདོད་ཡོན་རང་ཤར། རྒྱ་ཆེན་དཔལ་འབྱོར། ཡོན་ཏན་རང་བྱུང་། བསམ་རྫོགས་རྒྱལ་པོ། ཚོགས་ཆེན་ལྷུན་རྫོགས། འདོད་དགུ་རང་ཤར། ཡིད་བཞིན་སྙིང་པོ། དཔེ་མེད་རང་གྲོལ། དོན་གྲུབ་སྙིང་པོ། ཞིང་ཁམས་རྣམ་དག །ལྷུན་གྲུབ་ཡེ་ཤེས། མ་བྱས་རང་རྫོགས། གཞི་མེད་ཆོས་ཉིད། ཡེ་ཤེས་རྒྱས་པ། ཆོས་ཉིད་ངག་དབང་། ཀློང་རྫོགས་རྒྱལ་པོ། རང་བྱུང་ཀློང་རྒྱལ། རོལ་པ་རང་ཤར། གང་ཤར་ཆོས་ཉིད། ཅིར་སྣང་མཉམ་གྲོལ། བླང་དོར་གཉིས་མེད། གཏད་མེད་ཡོངས་གྲོལ། སྐུ་གསུམ་རང་རྫོགས། ཡེ་ཤེས་ལྔ་ལྡན། གཟུགས་སྤྲིན་སྙིང་པོ། ཡེ་ཤེས་ཉི་མ། ལྷུན་གྲུབ་གཟའ་སྐར་ལ་སོགས་ཏེ། གཉིས་སུ་མེད་པའི་མིང་ལས་བརྩམས་ཏེ་གདགས་སོ། །

ནུབ་ཏུ་བབས་ན། པདྨའི་རིགས་འོད་དཔག་མེད་ཀུན་རྟོག་ཡེ་ཤེས་ཀྱི་མིང་ལས། བདེ་ཆེན་རྒྱལ་པོ། ཁམས་གསུམ་ཡོངས་གྲོལ། མ་བསམ་ཆོས་ཉིད། ཅིར་སྣང་ཡེ་ཤེས། ལྷུན་མཉམ་བདེ་ཆེན། པདྨ་ཀློང་ཆེན། ཀློང་གསལ་དྲི་མེད། བདེ་ཆེན་རང་བྱུང་། ཐམས་ཅད་བབས་བདེ། གཞི་བདེ་རང་གསལ། འགྲོ་བ་བྱང་ཆུབ། ཐམས་ཅད་ཆོས་ཉིད། འཁོར་འདས་ཡེ་གྲོལ། མ་སྤངས་ཡོངས་རྫོགས། རང་གསལ་བདེ་ཆེན། འོད་གསལ་ཀློང་རྒྱལ། བྱང་ཆུབ་རང་བྱུང་། མཁའ་མཉམ་བདེ་ཆེན། གཞི་རྩ་བྱང་ཆུབ། གང་བྱུང་ཆོས་ཉིད། ཡོད་མེད་མཐའ་བྲལ། ཡངས་དོག་གཉིས་མེད། ཆོས་སྐུ་རང་ལུགས། མི་དམིགས་ཕྱམ་གདལ་ལ་སོགས་ཏེ། ཡེ་(༤༩)ཤེས་རང་གསལ་གྱི་མིང་རྣམས་གདགས་སོ། །

བྱང་དུ་བབས་ན། བྱ་གྲུབ་ཡེ་ཤེས་ཀྱི་རིགས་དོན་ཡོད་གྲུབ་པ་ལས་བརྩམས་ཏེ། སྒོ་ལྔ་བྱ་བྲལ། ལྷུན་རྫོགས་ཆོས་སྐུ། རང་ཤར་རིས་མེད། འཛིན་མེད་རྒྱལ་པོ། མ་ལུས་ཡོངས་གྲོལ། ཀུན་མཉམ་ཡངས་པ། ལྷུན་མཉམ་ཡོངས་གྲོལ། ཕྱམ་གཅིག་སངས་རྒྱས། ཡེ་ནས་བྱར་མེད། བྱ་བྲལ་ཀུན་གྲོལ། ཁྱབ་གདལ་ཆོས་ཉིད། ཕྲིན་ལས་ལྷུན་གྲུབ། ཡོངས་རྫོགས་བྱང་ཆུབ། རང་གཞན་དོན་གྲུབ། མ་སྤངས་ཡོངས་རྫོགས། རྩོལ་སྒྲུབ་བྱར་མེད། ཆོས་སྐུ་རང་རྫོགས། ལྷུན་གྲུབ་འཛིན་མེད། ཡོངས་གྲོལ་ཆེན་པོ་ལ་སོགས་ཏེ། ཕྱོགས་ཡན་རེ་དོགས་དང་བྲལ་བའི་མིང་རྣམས་གདགས་སོ། །

ཤར་ལྷོར་བབས་ན། རང་རྫོགས་གཉིས་མེད་ཀྱི་ཡེ་ཤེས་མཚོན་པའི་མིང་ལ། རང་གྲོལ་ཆོས་དབྱིངས། འགྱུར་མེད་ལྷུན་གྲུབ། ཡེ་གྲོལ་ཀློང་ཡངས། ཀུན་མཉམ་ཀློང་ཆེན། མཁའ་མཉམ་ཀློང་ཆེན། མཁའ་ཀློང་ཀུན་མཁྱེན། གཞི་རྫོགས་མཚོན་འདས། བྱང་ཆུབ་ཕྱམ་གདལ། ཡེ་གྲོལ་རོལ་པ། གང་ཤར་རྩལ་རྫོགས། མ་བཙལ་རང་བྱུང་། འཛིན་མེད་རང་ཤར། ལྷུན་གྲུབ་ཁྱབ་གདལ། སྣང་སྲིད་རྩལ་ཆེན། ཕྱམ་གདལ་ཡེ་ཤེས། མི་གཡོ་བྱང་ཆུབ། གདོད་ནས་ཡོངས་གྲོལ། འཁོར་འདས་ཡེ་གྲོལ། གཞི་རྩ་རྣམ་དག །ཕྱོགས་མེད་ཀུན་གྲོལ། ཆོས་ཉིད་བསམ་རྫོགས། བྱར་མེད་རྫོགས་པ། འགྲོ་འོང་ཡེ་ཟད། སྣང་སྲིད་རྒྱ་ཡན། གཞི་རྩ་རང་ཤར། འགག་མེད་ཡོངས་གྲོལ། ཆོས་ཟད་བློ་འདས་ལ་སོགས་པ། དབུས་དང་ཤར་ལྷོའི་མིང་རྣམས་བསྲེས་ལ་གདགས་སོ། །

ལྷོ་ནུབ་ཏུ་བབས་ན། ཆོས་སྐུ་རང་ཤར། འཁོར་བ་ཡེ་ཟད། རྫོགས་ཆེན་རང་ཤར། བསམ་རྫོགས་སྙིང་པོ། གཞི་བདེ་ཀློང་རྒྱས། གང་ཤར་མཉམ་གྲོལ། གཏད་མེད་ཕྱོགས་ཡན། ཀུན་གྲོལ་ཀློང་ཆེན། ཕྱལ་པ་བར་མེད། རྒྱ་གྲོལ་ནམ་མཁའ། གང་བསམ་ཆོས་ཉིད། ལྷུན་མཉམ་གདོད་མ། རང་ཤར་གཞི་བཞག །ཡེ་རྫོགས་ལྷུན་གྲུབ། ཆོས་སྐུ་རང་ལུགས། མ་བཞག་རང་གྲོལ། ཡེ་བཞག་གདེངས་ཆེན། རྒྱ་ཡན་ཕྱམ་གདལ། སྣང་མཉམ་སྟོང་མཉམ། མ་འགགས་རང་ཤར། རྒྱ་ཡན་གཏད་མེད། ཕྱོགས་(༥༠)མཉམ་ཡོངས་གྲོལ། ལྷུན་གྲུབ་གདོད་མ། གང་ཤར་ཡེ་ཟད། རྩལ་ཆེན་ཡོངས་རྫོགས། ཀློང་གསལ་རྒྱ་གྲོལ། འཁོར་འདས་རང་སྣང་། ཀུན་གྲོལ་གཞིར་སྣང་། ཐམས་ཅད་ཡེ་རྫོགས། ཡེ་སྟོང་རྩ་བྲལ་ལ་སོགས་པ་དབུས་དང་ལྷོ་ནུབ་ཀྱི་མིང་རྣམས་བསྲེས་ལ་གདགས་སོ། །

ནུབ་བྱང་དུ་བབས་ན། ཤར་གྲོལ་གཉིས་མེད་ཀྱི་ཡེ་ཤེས་མཚོན་པའི་མིང་ལ། སྒོ་ལྔ་རང་གྲོལ། གཟུང་འཛིན་རིས་མེད། ཡུལ་མེད་རང་ཤར། ཡོངས་གྲོལ་ཀུན་མཉམ། ལྷུན་མཉམ་ཕྱམ་གདལ། བྱར་མེད་ཡེ་ཟིན། ཀུན་གྲོལ་ཡེ་གྲུབ། རང་རྫོགས་ཤར་གྲོལ། ཡོངས་རྫོགས་བྱར་མེད། ཆོས་སྐུ་ཡེ་ཤར། སྣང་སྲིད་ཡེ་ཟད། ཡོངས་གྲོལ་ཀློང་ཆེན། ཅིར་སྣང་ཆོས་ཉིད། མེད་སྣང་གཟུགས་བརྙན། ལྷུན་མཉམ་ཀློང་ཆེན། གདལ་ཁོད་ཡེ་སྙོམས། ཆོས་ཟད་མིང་ཟད། ཡེ་གྲུབ་རང་རྫོགས། ཡེ་སྟོང་རང་ཤར། གཞི་བདེ་རང་སྣང་། ཐམས་ཅད་ལྷུན་མཉམ། རྫོགས་པ་སྤྱི་ཆིངས། སྣ་ཚོགས་རང་ཤར། གཞི་བྲལ་མཁའ་མཉམ། ཀློང་གསལ་ལྷུན་རྫོགས། གཏད་མེད་ཕྱོགས་འབྱམས། རྒྱུ་འབྲས་ཡེ་གྲོལ། སྒྲུབ་མེད་རྩལ་དཀྲུགས། ཀློང་ཆེན་ཡེ་གདལ། གཏད་མེད་རྒྱ་གྲོལ། ཤར་གྲོལ་བབས་སྟོང་། མཉམ་རྫོགས་བྱར་མེད། ཡེ་ཟིན་རང་བབས། ཆོས་ཉིད་བྱར་མེད། ཟང་ཐལ་ཆིག་རྫོགས། ཡེ་ཟིན་ཕྱམ་གདལ་ལ་སོགས་པ་དབུས་དང་ནུབ་བྱང་གི་མིང་རྣམས་བསྲེས་ལ་གདགས་སོ། །

བྱང་ཤར་དུ་བབས་ན། ཟང་ཐལ་ཆོས་ཟད་ཀྱི་ཡེ་ཤེས་མཚོན་པའི་མིང་ལ། ཆོས་སྐུ་ཡེ་ཤར། ལྷུན་གྲུབ་རང་གསལ། འཁོར་བ་གཞི་གྲོལ། བྱང་ཆུབ་རང་ཆས། སྲིད་གསུམ་ཡེ་གྲོལ། མ་བྱས་དོན་གྲུབ། མ་འབད་ཡེ་ཕྱིན། བགྲོད་མེད་རང་བཞག །གཞི་མཉམ་ཡངས་པ། མཁའ་མཉམ་རང་རིག །ཟང་མ་ཐལ་བྱུང་། ཐ་མལ་རང་གྲོལ། བབས་བཞག་ལྷུག་པ། གདལ་ཁོད་རང་སྙོམས། མ་སྤངས་རང་གྲོལ། མ་བཙལ་ཡེ་གྲུབ། ཀུན་རྫོགས་ཆོས་སྐུ། གཏད་མེད་རྒྱ་གྲོལ། གང་ཤར་གདོད་མ། རང་གསལ་འཛིན་མེད། ཆོས་ཟད་འཛིན་མེད། ཆོས་ཉིད་ཡོངས་རྫོགས། གདལ་ཁྱབ་ཡེ་གྲོལ། རང་བྱུང་གཞི་ཀློང་། བྱང་ཆུབ་རང་ཤར། ཡེ་ཤེས་ཉི་མ། རྒྱ་མཚོ་ཀློང་རྡོལ། མཉམ་རྫོགས་ཆུ་བོ། (༥༡)ཡེ་གདལ་རང་ཡན། སྤང་བླང་ཡེ་གྲོལ། སྣང་སེམས་ཡུལ་མེད། ཆོས་ཟད་རང་བབས། གདོད་མ་མངོན་འགྱུར། གང་སྣང་ཀུན་གྲོལ། ཡེ་སྟོང་ཡོངས་སྟོང་། ཕྱོགས་འབྱམས་བྱར་མེད། རང་བཞག་ཡེ་བདེ། མཁའ་མཉམ་ཡོངས་རྫོགས། དྲན་པ་རང་སངས། ཧར་བ་བར་མེད། ཕྱལ་པ་ལྷུན་གྲུབ་ལ་སོགས་པ། དབུས་དང་བྱང་ཤར་གྱི་མིང་རྣམས་བསྲེས་ལ་གདགས་སོ། །

མཁའ་དབྱིངས་རྣམ་དག་ཀློང་ཆེན་རྒྱལ་པོ་ཡིས། །མི་གཡོ་འགགས་པ་མེད་པའི་མིང་བརྗོད་པས། །འཁོར་འདས་མིང་ཙམ་འབད་མེད་ཡོངས་གྲོལ་ཏེ། །རང་བཞིན་རྫོགས་པ་ཆེན་པོའི་བཀྲ་ཤིས་ཤོག །མིང་གི་རིགས་བྱེད་མཆོག་ཏུ་གསང་བ་ཡེ་ཤེས་བསྐྱེད་པའི་རིམ་པ་དང་། དབྱིངས་མཐུན་པ་དབང་གི་ཆུ་བོ་རྒྱ་མཚོ་ལས་ཐེག་པ་མཆོག་གི་ཕ་རོལ་ཏུ་སོན་པའི་རྣལ་འབྱོར་པ། སྣ་ཚོགས་རང་གྲོལ་གྱིས་གནས་དཀའ་བ་བྱེ་བྲག་ཏུ་བཤད་པ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། སྤྲོས་མེད་ཀྱི་དབང་ཆོག་ཀློང་གསལ་ཆུ་བོ།

༄༅། །ཟབ་མོ་ཡང་ཏིག་ལས། སྤྲོས་མེད་ཀྱི་དབང་ཆོག་ཀློང་གསལ་ཆུ་བོ་བཞུགས་སོ། །

༄༅། ཡིད་བཞིན་རེ་བ་སྐོང་མཛད་པ། །ཡོན་ཏན་རྒྱ་མཚོ་བླ་མ་མཆོག །དད་བརྒྱའི་གཙུག་གི་པདྨོ་ལ། །ཐུགས་རྗེའི་ཞབས་བརྟེན་རོལ་པར་མཛོད། །འོད་གསལ་རྡོ་རྗེ་སྙིང་པོའི་ཐེག་པ་མཆོག །སྙིང་ཏིག་གསང་བའི་དབང་བཞིའི་རིམ་པ་ལས། །སྤྲོས་པ་མེད་པའི་དབང་གི་ཆེ་བ་ནི། །ཕྲ་ཏིག་རིན་ཆེན་དག་ལས་གསུངས་བཞིན་བྲི། །

དེ་ལ་དབང་གི་གནས་དབེན་ཞིང་ཉམས་དགའ་བར། མཎྜལ་ཁྲུ་དོ་བའི་དབུས་སུ་རྡུལ་ཚོན་གྱི་བུམ་པ་བསྣོལ་མ་དམར་པོ་ཁ་རྒྱན་མགུལ་ཆིངས་དང་ལྡན་པ་འོད་ལྔའི་མུ་ཁྱུད་ཅན་བྲིས་པའི་མཐར། འོད་ལྔའི་ར་བས་བསྐོར་བའི་ནང་ཚོན་སྔོན་པོ་འོད་ཟེར་ཐིག་ལེས་བརྒྱན་པ་བྲིས་ལ། དབུས་སུ་རིན་པོ་ཆེའི་བུམ་པར་སྨན་སྤོས་དང་འོ་མས་བཀང་བའི་ཕྱོགས་བཞིར། ཨཱ་དཀར་པོ་བཞི་བྲིས་ཏེ། ཁ་རྒྱན་གྱི་གསེབ་ཏུ་མེ་ལོང་གསུམ་དང་། རྨ་བྱའི་མདོངས་གསུམ་དང་། མན་ཤེལ་གསུམ་བཅུག་སྟེ། མགུལ་ཆིངས་དམར་པོས་དཀྲིས་ལ་བཞག་གོ། །(༥༢)མཐའ་སྐོར་དུ་ཕྱི་ནང་གི་མཆོད་པ་དང་། ཚོགས་དང་གཏོར་མ་དང་། དྲི་དང་འོ་མ་བསྲེས་པའི་ཁུ་བ་དང་། གུ་གུལ་ལ་སོགས་པ་ཉེ་བར་མཁོ་བའི་ཡོ་བྱད་ཚོགས་པར་བྱའོ། །དེ་ནས་སློབ་དཔོན་རང་ཉིད་ཀུན་བཟང་ཡབ་ཡུམ་མཐིང་ཀ་མཉམ་སྦྱོར་སྐྱིལ་ཀྲུང་མཛད་པར་མོས་པས། ཡི་གེ་གསུམ་དང་ཨཱ་ལི་ཀཱ་ལིའི་བསྙེན་པ་ཅི་འགྲུབ་བྱས་ཏེ། བུམ་པ་སྨན་སྤོས་དང་འོ་མས་གང་བ་ཡེ་ཤེས་ཀྱི་བདུད་རྩིར་བསམས་པའི་ནང་རྣམས་ཨཱ་དཀར་པོས་ཁེངས་པར་བསམས་ལ་ཨཱ་བརྒྱ་རྩ་བརྒྱད་བརྗོད་ལ་སྐྱེ་བ་མེད་པའི་རྒྱས་གདབ་པར་བྱའོ། །དེ་ནས་སློབ་དཔོན་གྱིས་སྔོན་དུ་སྐུའི་ཡི་གེ་ལ་སྟོང་ཕྲག་བདུན། གསུང་ལ་འབུམ་ཕྲག་གཅིག །ཐུགས་ལ་ཁྲི་ཕྲག་གཅིག །སྐྱེ་མེད་རང་བྱུང་གི་ཡི་གེ་ལ་ཨཱ་ལི་དང་། ཀཱ་ལི་འབུམ་ཕྲག་བདུན་བསྙེན་པ་བྱེད་པར་གསུངས་ཏེ། སློབ་དཔོན་གྱི་ངག་མ་དག་ན་སློབ་མས་དབང་མི་ཐོབ་པའི་ཕྱིར་རོ། །དེ་ནས་སློབ་མ་རྣམས་ཕྱི་རོལ་ནས་ཁྲུས་བྱས་ཏེ། ནང་དུ་ཞུགས་དུས་གུ་གུལ་གྱིས་བདུག་ཅིང་། རོལ་མོའི་སྒྲ་དང་ཁྲོ་བོ་ཆེན་པོའི་ཏིང་ངེ་འཛིན་དྲག་སྔགས་དང་བཅས་པས་བགེགས་བསྐྲད་ལ། སྲུང་བའི་འཁོར་ལོ་མེ་རི་དང་བཅས་པས་མཚམས་བཅད་ནས་གྲལ་ལ་འཁོད་ནས་མཎྜལ་དབུལ་བ་ལ་སྔོན་དུ་བློ་བཅོས་པའི་ཆོས་བཤད་དེ། ཤིན་ཏུ་རྙེད་དཀའ་བ་དལ་འབྱོར་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་རྙེད། གླིང་མཆོག་ཏུ་གྱུར་པ་འཛམ་བུའི་གླིང་དུ་སྐྱེས། བླ་མ་དམ་པ་དང་ཐེག་པ་ཆེན་པོའི་ཆོས་དང་འཕྲད། ཐར་པའི་ལམ་སྣ་ད་རེས་ཟིན་པའི་དུས་སུ། དམ་པའི་ཆོས་ལ་འཇུག་དགོས། འཁོར་བ་མཐའ་མེད་དུ་འཁྱམས་པའི་སྡུག་བསྔལ་བཟོད་དཀའ་བ་རྒྱ་མཚོར་གཟེངས་ཐག་ཆད་པའི་ཚོང་པ་ལྟ་བུ། འདབ་ཆགས་རྙི་ལ་ཟིན་པ་ལྟ་བུ། འཇིགས་བཅས་ཀྱི་སར་ལམ་ནོར་བ་ལྟ་བུ། གཤེད་མའི་དཀྱིལ་དུ་ཚུད་པ་ལྟ་བུ་ལས། ད་རེས་ཐར་པར་བྱ་དགོས། ཐར་པ་ནི་བསིལ་བ། ཞི་བ་འཇིགས་པ་མེད་པ། མཆོག་ཏུ་བདེ་བའོ་ཞེས་བྱ་བ་ལ་སོགས་པ་བརྗོད་ནས།

དབང་བསྐུར་བ་དངོས་ལ་གསུམ་སྟེ། འཇུག་པ། དབང་། གཟེངས་བསྟོད་པའོ། །དང་པོ་ནི། སློབ་མ་འཇུག་པ་སྟེ། ཁ་ཅིག་ཐུན་མོང་གི་འཇུག་པ་རྣམས་སྤྲོས་བཅས་(༥༣)དང་འདྲེས་པ་འདིར་མི་ཐོབ་པའི་ཕྱིར། ཐུན་མོང་མ་ཡིན་པའི་འཇུག་པ་ནས་མགོ་བརྩམ་ཟེར་ཡང་། དགོངས་པ་ཅུང་ཟད་མ་ལོན་པར་སྣང་སྟེ། ཕྲ་ཏིག་ལས། སྔོན་དུ་གསོལ་བ་གདབ་པས་བྱིན་རླབས་འཇུག་པའི་དགོས་པ་ཡོད་པ་དང་། སྐུ་གསུང་ཐུགས་དབྱེར་མེད་པའི་དམ་ཚིག་གི་གནང་བ་སྦྱིན་ནོ། །དམ་ཚིག་ཉམས་ན་འཆི་བར་བྱེད་ལ། མ་ཉམས་ན་དམ་པའི་དོན་ངེས་པར་སྟེར་བར་བྱེད་དོ། །ཞེས་འབྱུང་བས། ཐུན་མོང་གི་འཇུག་པ་གསུངས་སོ། །དེ་ལ་སྐབས་འདིར་བླ་མའི་ཕྱག་བཞེས་ཀྱི་རྒྱུད་མ་དག་ན་དབང་མི་འཐོབ་པས། ཉམས་ཆག་བསྐང་བའི་ཕྱིར་སྐོང་གི་རིམ་པ་མདོར་བསྡུས་མཛད་དོ། །དེ་ཡང་བླ་མ་དང་ཡི་དམ་ཞི་ཁྲོའི་དཀྱིལ་འཁོར་བསམས་པའི་སྤྱན་སྔར་རང་གི་ལུས་དཔག་ཏུ་མེད་པར་སྤྲུལ་པས་ཕྱག་དང་བཤགས་པ་ཅི་འགྲུབ་བྱས་ནས། སྤྲོས་པ་མེད་པའི་དཀྱིལ་འཁོར་དུ་འཇུག་པར་བྱེད་དོ། །

དེ་ཡང་འཇུག་པ་ལ་གཉིས་ལས། ཐུན་མོང་གི་འཇུག་པ་དང་། ཐུན་མོང་མ་ཡིན་པའི་འཇུག་པའོ། །དང་པོ་ལ་ལྔ་ལས། གསོལ་བ་གདབ་པ་ནི། བླ་མ་རྡོ་རྗེ་འཛིན་པ་ནི། །ཁམས་གསུམ་འཁོར་བའི་གཉེན་གཅིག་པོ། །འགྲོ་བ་མགོན་མེད་རྣམས་ཀྱི་སྐྱབས། །ཐར་པའི་ལམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཉོན་མོངས་སྡུག་བསྔལ་མེ་འབར་བས། །ཐུགས་རྗེའི་བརླན་གྱིས་བསིལ་བར་མཛོད། །ཅེས་གསུམ་དང་། བླ་མ་རྡོ་རྗེ་འཛིན་པ་ཆེན་པོ་རྣམས་དགོངས་སུ་གསོལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། རྡོ་རྗེ་དང་རིན་པོ་ཆེ་དང་པདྨ་དང་ལས་དང་བདེ་བར་གཤེགས་པའི་རིགས་ཐམས་ཅད་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ། བླ་མ་རྡོ་རྗེ་འཛིན་པ་ཆེན་པོས། བདག་གི་ལུས་བྱིན་གྱིས་བརླབ་ཏུ་གསོལ། ངག་བྱིན་གྱིས་བརླབ་ཏུ་གསོལ། སེམས་བྱིན་གྱིས་བརླབ་ཏུ་གསོལ། སྣང་བ་བྱིན་གྱིས་བརླབ་ཏུ་གསོལ། སྨིན་པར་མཛད་དུ་གསོལ་ལོ། །གྲོལ་བར་མཛད་དུ་གསོལ་ལོ། །གང་བར་མཛད་དུ་གསོལ་ལོ། །རྒྱས་པར་(༥༤)མཛད་དུ་གསོལ་ལོ། །ཞེས་ལན་གསུམ་བརྗོད་དོ། །

སྡོམ་པ་གཟུང་བ་ནི། བླ་མ་རྡོ་རྗེ་འཛིན་པ་ཆེན་པོ་རྣམས་དགོངས་སུ་གསོལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། རྡོ་རྗེ་དང་རིན་པོ་ཆེ་དང་པདྨ་དང་ལས་དང་དེ་བཞིན་གཤེགས་པའི་རིགས་རྣམས་དགོངས་སུ་གསོལ་ལོ། །བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ། སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །བླ་མ་ལ་ཡང་ཕྱག་འཚལ་ལོ། །བླ་མ་རྡོ་རྗེ་འཛིན་པ་དང་། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །རིགས་ལྔའི་དམ་ཚིག་རྗེས་གཟུང་སྟེ། །རྡོ་རྗེའི་དྲིལ་བུ་ལ་སོགས་པ། །དམ་ཚིག་རྫས་རྣམས་བཟུང་བར་བགྱི། །བླ་ན་མེད་པའི་དཀོན་མཆོག་གསུམ། །ནམ་དུ་ཡང་ནི་མི་གཏོང་ངོ་། །རྡོ་རྗེ་སློབ་དཔོན་མི་གཏོང་ངོ་། །རྡོ་རྗེ་སྤུན་སྲིང་རྣམས་ལ་ཡང་། །ནམ་ཡང་སྨད་པར་མི་བྱ་འོ། །སེམས་ཅན་རྣམས་ལ་འཚེ་བ་སྤང་། །འཕགས་པ་རྣམས་ལ་སྨད་མི་བྱ། །ཉན་ཐོས་རང་སངས་རྒྱས་ལ་ཡང་། །ཅུང་ཟད་བརྙས་པར་མི་བྱ་ཞིང་། །སྔགས་འཆང་སྤང་བར་མི་བྱའོ། །བསྙེན་སྒྲུབ་ལས་ཀྱི་མཐའ་རྣམས་ཀྱང་། །དུས་འདི་ཉིད་ནས་བཟུང་བར་བགྱི། །དམ་ཚིག་སྡོམ་པ་ལ་གནས་ཤིང་། །སྐུ་གསུང་ཐུགས་ལས་མི་འདའོ། །སྲོག་ཆགས་གསད་པར་མི་བྱ་ཞིང་། །དམ་ཆོས་ནམ་ཡང་མི་གཏོང་ངོ་། །འཁྲུལ་པའི་བྱ་བ་མི་བགྱི་འོ། །སེམས་ཅན་སྨིན་པ་ཉིད་དང་ནི། །མ་གྲོལ་བ་རྣམས་དགྲོལ་བ་དང་། །མ་བསྒྲལ་བ་རྣམས་བསྒྲལ་བར་བགྱི། །དབུགས་མ་དབྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །བསྟན་པ་སྨད་པར་མི་བྱ་ཞིང་། །བླ་མ་ལ་ཡང་ཡོན་དབུལ་ལོ། །འཁོར་བ་རིང་དུ་སྤང་བྱ་ཞིང་། །མྱ་ངན་འདས་པ་བླང་བར་བགྱི། །དགེ་སློང་སེམས་སུན་མི་བྱ་ཞིང་། །བསམ་གཏན་སྒོམ་པ་དཀྲུགས་མི་བྱ། །ཆོས་དང་གང་ཟག་སྨད་མི་བྱ། །ཁྱད་པར་དཀྱིལ་འཁོར་བསྒོམ་པར་བགྱི། །རྫོགས་རིམ་བསྒོམ་ལས་མི་འདའ་ཞིང་། །ཇི་ལྟར་བླ་མས་གསུངས་པ་ལས། །(༥༥)བདག་ནི་ནམ་ཡང་མི་འདའོ། །ཞེས་ལན་གསུམ་བརྗོད་དོ། །

དམ་ཚིག་གི་ཆུ་སྦྱིན་པ་ནི། འོ་མ་དང་སྨན་སྤོས་ཀྱི་ཐིགས་པ་རེ་སྙིམ་པར་བླུགས་ལ། ཧཱུྃ་འདི་ནི་དམ་ཚིག་དམྱལ་བའི་ཆུ། །དམ་ཚིག་འདས་ན་དམྱལ་མེས་སྲེག །བསྐལ་པ་གྲངས་ཀྱིས་མི་ལངས་པར། །སྡུག་བསྔལ་ཆེན་པོ་མྱོང་བར་འགྱུར། །དེ་བས་དམ་ཚིག་སྲོག་གི་ཆུ། །སྙིང་ལ་བཞག་པས་ཐུབ་པར་གྱིས། །གལ་ཏེ་ཉམས་པར་མ་གྱུར་ན། །འདི་ནི་དམ་ཚིག་དངོས་གྲུབ་ཆུ། །མཆོག་དང་ཐུན་མོང་ལོངས་སྤྱོད་ཅིང་། །རྫོགས་པའི་སངས་རྒྱས་འབྲས་བུ་ཐོབ། །དེ་བས་འདི་ཉིད་ཐུབ་པར་གྱིས། ཞེས་པ་རེ་རེ་བརྗོད་དོ། །

དམ་ཚིག་ཁས་བླང་བ་ནི། སློབ་མས། བདག་ནི་དུས་འདི་ནས་བཟུང་ནས། །བྱང་ཆུབ་མ་ཐོབ་བར་དག་ཏུ། །འཁྲུལ་པའི་བྱ་བ་བྱེད་རེ་ཀན། །བླ་མས་ཅི་གསུང་མི་ཉན་རེ། །སེམས་ཅན་ཀུན་ལ་འཚེ་རེ་ཀན། །བདེ་ཆེན་ལམ་དུ་མི་སློང་རེ། །འཇིག་རྟེན་འདོད་ཕྱིར་འབྲང་རེ་ཀན། །ལྟ་དང་སྒོམ་དང་སྤྱོད་པ་ནི། །སྲོག་གི་ཕྱིར་ཡང་གཏོང་རེ་ཀན། །དུར་ཁྲོད་ལ་སོགས་དབེན་པའི་གནས། །འདི་ནས་བཟུང་སྟེ་མི་བརྟེན་རེ། །མདོར་ན་འཇིག་རྟེན་བྱ་བ་གཏོང་། །འདས་པའི་བྱ་བ་གཏོང་རེ་ཀན། །ཞེས་ལན་གསུམ་བརྗོད་དོ། །

དམ་ཚིག་བསྒྲགས་ཏེ་སྡོམ་པ་སྦྱིན་པ་ནི། ཀྱཻ་སྐལ་ལྡན་རིགས་ཀྱི་བུ་གཅིག་ཉོན། །ཕྱི་ནང་གསང་བའི་ཐེག་པ་དང་། །དམ་ཆོས་བསྒྲུབ་པར་དམ་ཆོས་ཤིག །སེམས་ཅན་ཀུན་ལ་བྱམས་པའི་སེམས། །དུས་འདི་ཉིད་ནས་མ་སྤོངས་ཤིག །དཀྱིལ་འཁོར་འཁོར་ལོ་བསྒོམ་པ་དང་། །བླ་མ་ནམ་ཡང་མ་སྤོངས་ཤིག །རྡོ་རྗེ་མཆེད་ལ་མི་ཁྲོ་ཞིང་། །དཀོན་མཆོག་གསུམ་པོ་བཀུར་བ་དང་། །ཇི་ལྟར་སྔགས་ཀྱི་དམ་ཚིག་དང་། །སྡོམ་པ་ཐམས་ཅད་གཟུང་བར་གྱིས། །བསྟན་པ་ཀུན་ལ་གནོད་པ་སྤོངས། །ཐར་པའི་ལམ་དུ་འགྲོད་པར་གྱིས། །ཀྱཻ་སྐལ་ལྡན་རྫོགས་པའི་རང་བཞིན་ཅན། །དབང་བསྐུར་ཆོ་ག་ཇི་ལྟ་བར། །གཞན་ལ་བརྗོད་པར་མ་བྱེད་ཅིག །དམ་རྫས་རྣམས་དང་སྔགས་ཀྱི་ཚིག །དབང་བསྐུར་མ་ཐོབ་མི་རྣམས་ལ། །ནམ་ཡང་བཤད་པར་མ་བྱེད་ཀྭའི། །འཁོར་བ་རིང་དུ་སྤང་བར་གྱིས། །གང་གི་རྡོ་རྗེ་འཛིན་གྱུར་པའི། །དངོས་གྲུབ་(༥༦)རྣམས་ནི་མ་བཏང་ཞིག །ཅེས་པ་གསུམ་བརྗོད་དོ། །

གཉིས་པ་ཐུན་མོང་མ་ཡིན་པའི་འཇུག་པ་ལས། དང་པོ་གསོལ་བ་གདབ་པ་ནི། མཎྜལ་ཕུལ་ལ། སློབ་མས། བླ་མ་རྡོ་རྗེ་འཛིན་པ་ལ། །བདག་ནི་སྐལ་ལྡན་སྙིང་གི་བུ། །དད་པས་རབ་ཏུ་མཉན་པ་འཚལ། །རང་བཞིན་རྫོགས་པ་ཆེན་པོ་ཡི། །དབང་བསྐུར་ནང་དུ་འཇུག་ལགས་པས། །དཔའ་བོ་རྡོ་རྗེ་བླ་མ་ཡིས། །རང་གི་སེམས་ཀྱི་གནས་ལུགས་ཀྱི། །ཨ་ཏིའི་དཀྱིལ་འཁོར་བསྟན་དུ་གསོལ། །བདག་ནི་ཡང་དག་འདིར་ཞུགས་ནས། །སླར་ཡང་ལྡོག་པར་མི་བགྱིད་དོ། །གཉིས་པ་རྗེས་གནང་སྦྱིན་པ་ནི། བླ་མས། ཨེ་མ་བུ་ཁྱོད་སྐལ་བ་བཟང་། །སྐལ་ལྡན་བྱང་ཆུབ་སེམས་ཆེན་པོ། །སྔོན་ཆད་རང་བཞིན་རྫོགས་ཆེན་གྱི། །དབང་བསྐུར་ནང་དུ་མ་ཞུགས་པས། །དོ་ནུབ་སྐལ་ལྡན་བུ་ཁྱོད་ལ། །རྫོགས་ཆེན་དཀྱིལ་འཁོར་བསྟན་པར་བྱ། །སེམས་ཀྱི་རྟོག་པ་ཀུན་སོལ་ལ། །འཇིག་རྟེན་བཅིངས་པ་ཀུན་གྲོལ་གྱིས། །འདི་ལ་སྤང་བླང་ཐ་སྙད་བྲལ། །རིགས་དང་རྒྱུད་རྣམས་སྦྱོང་བ་ཡིན། །ལུས་ངག་བདེ་བའི་རྟེན་ཡིན་པས། །དེང་ནས་བརྩམས་ཏེ་སླར་མ་ལྡོག །ཅེས་པ་ལན་ཅིག་བརྗོད་དོ། །གསུམ་པ་རིག་པའི་མེ་ཏོག་དོར་བ་ནི། ཐུགས་ཀྱི་དཀྱིལ་འཁོར་གྱི་སྒོ་མཐའ་བཞི་དང་བྲལ་བས་ན་འཇུག་སྟེ། སློབ་མས་སྟོད་གཡོགས་ཕུད་ལ་ཐལ་མོ་སྙིང་གར་སྦྱར་ལ། བླ་མའི་ཐུགས་ཀར་མིག་གཏད་ལ། ཨཱ་ལི་ཀཱ་ལིའི་ཕྲེང་བས་སྙིང་ནང་བསྐོར་བར་བསམ་སྟེ། མ་ཡེངས་པར་ལྷན་ནེ་གློད་པས། གང་ལའང་འཛིན་པ་མེད་པའི་ངང་དུ་གནས་པའི་བདེ་བ་ཐུན་མོང་མ་ཡིན་པ་ཞེས་བྱ་བའོ། །

དོན་གཉིས་པ་དབང་བསྐུར་བ་དངོས་ལ་གཉིས་ཏེ། ཡི་གེ་འཁོར་ལོའི་དབང་དང་། ཆོས་ཉིད་དོན་གྱི་དབང་ངོ་། །དང་པོ་ལ་གསུམ་ལས། ཆོས་དབྱིངས་ཡི་གེའི་དབང་ནི། ཨཱ་རིང་དབྱངས་དང་བཅས་པ་བརྗོད་པས། ལུས་ཀྱི་ནང་ཐམས་ཅད་ཨཱ་དཀར་པོས་ཤིག་ཤིག་གང་བའི་ཨཱ་ལས་འོད་ཟེར་ཁ་དོག་ལྔ་ལྡན་ཡར་འཕྲོས་པས། ནམ་མཁའི་དཀྱིལ་ན་ཀུན་བཟང་ཡབ་ཡུམ་སྙོམ་པར་ཞུགས་པའི་སྦྱོར་མཚམས་སུ་ཕོག །བདུད་རྩི་འོད་ལྔའི་ཆར་བབས་པས། རང་གི་སྤྱི་གཙུག་ནས་ལུས་ཀྱི་ཕྱི་ནང་ཀུན་ཁེངས་པ་ལ་བློ་བཞག་ནས། སྤྱི་བོ། མགྲིན་(༥༧)པ། སྙིང་ག་གསུམ་དུ་དྲི་དང་འོ་མའི་ཐིག་ལེ་བྱས་དུས་ཐིག་ལེ་ཉི་ཟླ་ཁ་སྦྱོར་དུ་དམིགས་པའི་སྟེང་དུ། སངས་རྒྱས་ཀྱི་སྐུ་གསུང་ཐུགས་འོད་ལྔའི་གོང་བུར་གྱུར་པ་སྙིང་ནང་དུ་སོང་བ་འོད་དུ་ཞུ་བ་ལས། ལུས་ངག་ཡིད་གསུམ་བདེ་གསལ་མི་རྟོག་པར་སོང་བར་བསྒོམ་མོ། །དེའི་དུས་སུ་རླུང་དལ་བུས་ཨཱ་བརྗོད་པའི་མཚམས་སུ། རང་རང་གི་གསང་མཚན་བཅུག་ལ། སྐྱེ་མེད་དུ་གནང་བར་མཛད་དུ་གསོལ། ཞེས་བཟླས་ཤིང་། འཕྲོ་གཅོད་དུས། འཁོར་ལོ་བཞིའི་དབུས་སུ་ཨཱ་རྣམས་བསྡུས་ལ་སྟོང་ཉིད་ཀྱི་ངང་དུ་དར་ཅིག་བསྒོམ་པར་བྱའོ། །

སྐྱེ་མེད་ཡི་གེའི་དབང་ལ་གཉིས་ལས། ཨཱ་ལི་ནི་དམིགས་པ་གཞན་རྣམས་དེ་དང་འདྲ་བ་ལས། ཁྱད་པར་རྩ་རྣམས་ཀྱི་ནང་ནས་ཨཱ་ལི་དམར་པོ་འོད་འཕྲོ་བ་ཤིག་ཤིག་བྱུང་བའི་འོད་ཀྱིས་ནམ་མཁའ་ཁྱབ་ཅིང་། སྒྲ་སྐད་སྒྲོགས་པར་བསམས་ལ། ཨ་ཨཱ། ཨི་ཨཱི། ཨུ་ཨཱུ། རི་རཱི། ལི་ལཱི། ཨེ་ཨཻ། ཨོ་ཨཽ། ཨཾ་ཨཱཿཞེས་རིང་ཐུང་རན་པར་བཟླས་ལ། རྗེས་ལ་མིག་ཕུགས་ཀྱི་རྩ་གཏེམས་ལ་ཐིག་ལེ་བྱ་ཞིང་། ཡི་གེ་རྣམས་འཁོར་ལོ་བཞིར་སྦ་སྟེ། སྐྱེ་མེད་ཀྱི་ངང་ལ་བཞག་གོ། །ཀཱ་ལི་ནི་དཀར་པོར་བསམས་ལ། སྔར་བཞིན་བཟླས་ཤིང་ཁྱད་པར་དུ་ཕྱིར་མ་ཐོན་པར་ཁོང་པའི་ནང་ཐམས་ཅད་ཁེངས་པར་བསམ་ཞིང་། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿཞེས་བཟླས་པའི་རྗེས་ལ་རྣ་བའི་ཤོང་བུའི་རྩ་གཏེམས་ལ། ཐིག་ལེ་བྱུགས་ཏེ་ཡི་གེ་འཁོར་ལོ་བཞིར་སྦས་ལ་སྟོང་ཉིད་བསྒོམ་མོ། །

གསུམ་པ་རང་བྱུང་ཡི་གེའི་དབང་ལས། སྐུའི་ཡི་གེ་ནི། ཐིག་ལེ་སྤྱི་གཙུག་ཏུ་བྱུགས་ལ། སློབ་མ་རྣམས་ཨཱ་དཀར་པོར་བསམས་པའི་འོད་ཟེར་གྱིས་ནམ་མཁར་ཁྱབ་པའི་ཁྲོད་ན། ༀ་དུ་མེ་རེ་རེ་ཡོད་པ་ལས་རང་སྒྲས་འཇིག་རྟེན་ཁྱབ་པར་བསམས་ལ། ཨཱ་དྲག་ཤུལ་དང་བཅས་པས་བརྗོད་ལ། མགྲིན་པའི་རྩ་གཏེམས་ཤིང་སྟོང་པའི་རྒྱས་གདབ་བོ། །གསུང་གི་ཡི་གེ་ནི། ཐིག་ལེ་མགྲིན་པར་བྱས་ཏེ། ཨཱཿདམར་པོ་བསམས་ནས། ཨཱཿབརྗོད་པས་འོད་ཟེར་དང་རང་སྒྲས་ནམ་མཁའ་གང་བར་བསམས་ལ། མཆན་ཁུང་གི་རྩའམ། བདུད་རྩིའི་ཐེམ་(༥༨)བུའི་རྩ་གཏེམས་ལ་སྟོང་པའི་རྒྱས་གདབ་བོ། །ཐུགས་ཀྱི་ཡི་གེ་ནི། ཐིག་ལེ་སྙིང་གར་བྱུགས་ཏེ། ཧཱུྃ་མཐིང་ག་བསམས་ནས་ཧཱུྃ་བརྗོད་པས། སྐྱེས་པ་ལ་ནུ་མ་གཡོན་པའི་འོག་གི་འཕར་རྩ་གཏེམས་ཤིང་། བུད་མེད་ལ་གཡས་པ་གཏེམས་ལ་སྟོང་པས་རྒྱས་གདབ་བོ། །

གཉིས་པ་ཆོས་ཉིད་དོན་གྱི་དབང་ལ་བཞི་ལས། བདེ་ཆེན་སྤྱི་བླུགས་ཀྱི་དབང་ནི། སློབ་མའི་སྨིན་མཚམས་སུ་ཐིག་ལེ་ལན་གཉིས་བརྩེགས་མར་བྱུགས་ལ། ཉི་ཟླ་ཁ་སྦྱོར་དུ་གྱུར་པས་སེམས་ཉིད་སྤྲོ་བསྡུ་མེད་པའི་ངང་ལ་བསྒོམ་དུ་བཅུག་ནས། བུམ་པ་སྤྱི་བོར་བཞག་པའི་ནང་ནས་ཚིག་འདི་དག་རང་བྱུང་དུ་ལྷང་ལྷང་བྱུང་བས་སེམས་ཉིད་དོན་གྱི་ངོ་སྤྲད་པ་ནི། བླ་མས་ཆོས་ཉིད་ངང་ནས་རིག་པ་རྒྱ་བསྐྱེད་ལ། དབྱངས་སྙན་པོས་བརྗོད་ལ། ཆོས་ཐམས་ཅད་བརྗོད་དུ་མེད་པའོ། །བསམ་དུ་མེད་པའོ། །མཚོན་དུ་མེད་པའོ། །བལྟར་མེད་པའོ། །མཚན་མ་མེད་པའོ། །སྤྲོས་པ་མེད་པའོ། །སྤྲོས་པའི་མཐའ་ཐམས་ཅད་དང་བྲལ་བའོ། །ཞེས་བརྗོད་ལ། ད་ལྟར་གྱི་སེམས་ཉིད་རང་བཞིན་གྱིས་རྣམ་པར་དག་པ་ཡེ་གྲོལ་ཆེན་པོའི་ངོ་བོ་ལ། རང་མཚན་ངག་གིས་བརྗོད་དུ་མེད། ཡིད་ཀྱིས་བསམ་དུ་མེད། དཔེ་ཡིས་མཚོན་དུ་མེད། མིག་གིས་བལྟར་མེད། འདིའོ་ཞེས་མཚན་མ་མེད། དྲན་རྟོག་གིས་སྤྲོས་པ་མེད། སྤྲོས་མེད་ཀྱི་སྤྲོས་པའི་མཐའ་དང་བྲལ་བ་ངོ་ཤེས་པར་གྱིས་ཤིག །ཅེས་བརྗོད་པར་བྱའོ། །དེའི་དུས་སུ་རེ་རེ་བཞིན་སྙིམ་པར་བུམ་པའི་ཆུ་བླུགས་ལ། ཨ་ཨ་ཞེས་བརྗོད་ནས་རོལ་མོ་དཀྲོལ་ལོ། །

གཉིས་པ་རྒྱས་གདབས་ཚངས་པའི་དབང་ནི། བླ་མས། ཨེ་མ་ཧོ། ཆོས་ཉིད་སྤྲོས་དང་བྲལ་བའི་བདེ་ཆེན་དེ། །བལྟར་མེད་བསམ་ཡུལ་ལས་འདས་ངོ་མཚར་ཆེ། །གཉིས་མེད་རང་སྣང་ཀུན་ཁྱབ་ཡེ་ཤེས་ཉིད། །རང་རིག་མངོན་དུ་སྣང་བ་ངོ་མཚར་ཆེ། །བྱ་བྲལ་རང་བཞིན་རྫོགས་ཆེན་གནས་ལུགས་ཉིད། །མ་བཙལ་རང་ལས་འབྱུང་བ་ངོ་མཚར་ཆེ། །ངོ་བོ་སྤྲོས་བྲལ་རང་བཞིན་རྣམ་དག་ཉིད། །དགེ་སྡིག་མཐའ་ལས་འདས་པ་ངོ་མཚར་ཆེ། །རང་སྣང་སྤྲོས་པ་མེད་པའི་རང་རིག་ཉིད། །ལྟ་སྒོམ་སྤྱོད་པར་སྣང་བ་ངོ་མཚར་ཆེ། །རང་ལས་བྱུང་བའི་འོད་ཀྱི་སྒྲོན་མེ་ཉིད། །(༥༩)མངོན་སུམ་ཡུལ་དུ་སྣང་བ་ངོ་མཚར་ཆེ། །ངོ་བོ་རང་བཞིན་ཐུགས་རྗེ་ཕྱོགས་མེད་པས། །སྐུ་གསུམ་ཡེ་ནས་ཤར་བ་ངོ་མཚར་ཆེ། །བརྗོད་མེད་རྣམ་པར་དག་པའི་ཡེ་ཤེས་ཉིད། །དག་པའི་ཡུལ་ལ་སྣང་བ་ངོ་མཚར་ཆེ། །མ་རིག་མུན་སེལ་ཐིག་ལེ་སྟོང་པ་ཉིད། །དབང་པོའི་ཡུལ་ལ་སྣང་བ་ངོ་མཚར་ཆེ། །ཞེས་བརྗོད་ནས། ད་ལྟར་གྱི་རིག་པ་སྟོང་གསལ་སྤྲོས་པ་དང་བྲལ་བ་འདི་ཉིད། བལྟར་མེད་ཅིང་བསམ་དུ་མེད་ལ་སོ་སོ་རང་རིག་གི་སྤྱོད་ཡུལ་དུ་སྣང་བ་གཉིས་མི་འགལ་བ་ངོ་མཚར་ཆེ། རང་རིག་གཉིས་སུ་མེད་པ་དང་རང་གི་རིག་པ་གཉིས་མི་འགལ་བ་ངོ་མཚར། རང་བཞིན་རྫོགས་པ་ཆེན་པོ་བྱ་རྩོལ་དང་བྲལ་བ་དང་། ཐབས་ཀྱི་རང་ལ་སྣང་བ་མི་འགལ་བ་ངོ་མཚར། རིག་པའི་ངོ་བོ་དགེ་སྡིག་ལས་འདས་པ་དང་རིག་པ་ཉིད་ལྟ་སྒོམ་སྤྱོད་པར་སྣང་བ་དང་། རང་གདངས་ཆོས་ཉིད་མངོན་སུམ་དང་། སྟོང་གསལ་འཆར་བ་སྐུ་གསུམ་དུ་བྱུང་བ་དང་། བརྗོད་དུ་མེད་པའི་ཡེ་ཤེས་རིག་པའི་ངོ་བོར་སྣང་བ་དང་། ཐིག་ལེ་སྟོང་པའི་སྒྲོན་མ་མིག་ལམ་དུ་མཐོང་བ་རྣམས་ངོ་མཚར། ཞེས་བརྗོད་དོ། །

གསུམ་པ་རིག་པ་རྩལ་གྱི་དབང་ནི། བླ་མས། དངོས་པོ་གང་ལའང་རང་བཞིན་མེད་པའོ། །བལྟར་མེད་པའོ། །སྲོག་མེད་པའོ། །སྙིང་པོ་མེད་པའོ། །ཡ་མ་བརླའོ། །ཚིག་མེད་པའོ། །ཡི་གེ་མེད་པའོ། །སྒྲ་མེད་པའོ། །ཐ་སྙད་མེད་པའོ། །བརྗོད་དུ་མེད་པའོ། །ཞེས་བརྗོད་ནས། སེམས་ཉིད་འདི་ལ་ངོ་བོ་མ་གྲུབ་པས་རང་བཞིན་མེད་པ། ངོས་བཟུང་མེད་པས་བལྟར་མེད། ཡོད་མེད་ལས་འདས་པས་སྲོག་མེད། ཡིན་མིན་མེད་པས་སྙིང་པོ་མེད། མེད་ལ་སྣང་བ་ངོ་བོ་སྟོང་པས་ཡ་མ་བརླ། གང་དུའང་མ་གྲུབ་པས་ཚིག་མེད། དམིགས་བསམ་དང་བྲལ་བས་ཡི་གེ་མེད། ངག་ལས་འདས་པས་སྒྲ་མེད། སྨྲ་བསམ་ལས་འདས་པས་ཐ་སྙད་མེད། བརྗོད་བྱ་ལས་འདས་པས་བརྗོད་དུ་མེད་པའོ། །ཞེས་བཤད་པར་བྱའོ། །

བཞི་པ་ཀུན་ཏུ་བཟང་པོ་ཆོས་ཉིད་ལྷུན་གྱིས་གྲུབ་པའི་དབང་ནི། བླ་མས། ཆོས་རྣམས་ཐམས་ཅད་སྟོང་ཞིང་བདག་མེད་ལ། །འདོད་ཅིང་ཞེན་པའི་བློ་ནི་ཡོངས་རེ་འཁྲུལ། །ཆོས་ཀྱི་དབྱིངས་ཉིད་སྤྲོས་དང་བྲལ་བ་ལ། །མཚན་མ་ཚིག་ཕྱིར་(༦༠)འབྲངས་པ་ཡོངས་རེ་འཁྲུལ། །སྙིང་པོ་དོན་གྱི་ཡེ་ཤེས་རང་ཤར་ལ། །གཞན་བྱུང་རྩོལ་གྲུབ་བྱེད་པ་ཡོངས་རེ་འཁྲུལ། །སེམས་ཉིད་སྐྱེ་ཤི་གཉིས་ལས་འདས་པ་ལ། །སྐྱེ་ཤི་གཉིས་སུ་འཛིན་པ་ཡོངས་རེ་འཁྲུལ། །འབྲས་བུ་རང་རྫོགས་སྨོན་ལམ་བྲལ་བ་ལ། །རྣམ་དཔྱོད་དུས་ལ་ལྟོས་པ་ཡོངས་རེ་འཁྲུལ། །བདེ་སྡུག་ཐམས་ཅད་རིག་པའི་ཆོ་འཕྲུལ་ལ། །བླང་དོར་གཉིས་སུ་འཛིན་པ་ཡོངས་རེ་འཁྲུལ། །ཀུན་ཏུ་བཟང་པོ་རང་ལ་གནས་པ་ལ། །ཡི་དམ་གཞན་ནས་འཚོལ་བ་ཡོངས་རེ་འཁྲུལ། །བདག་ཉིད་ཡེ་སངས་རྒྱ་པ་ཡིན་པ་ལ། །ངན་སོང་གསུམ་དུ་འཛིན་པ་ཡོངས་རེ་འཁྲུལ། །འཁོར་བ་ངན་སོང་རོལ་པར་ཡེ་ཤར་ལ། །ཡང་དག་སངས་རྒྱས་རེ་བ་ཡོངས་རེ་འཁྲུལ། །དུག་ལྔ་མ་སྤངས་རང་བྱུང་ཆེན་པོ་ལ། །ཉོན་མོངས་སྤང་བྱར་འཛིན་པ་ཡོངས་རེ་འཁྲུལ། །འཁྲུལ་པའི་སྣང་བ་ཆོས་སྐུ་རང་སྣང་ལ། །དངོས་པོ་བདག་ཏུ་འཛིན་པ་ཡོངས་རེ་འཁྲུལ། །ཐེག་པ་རིམ་དགུ་རང་ལ་ཤར་བ་ལ། །སོ་སོའི་འདོད་གཞུང་འཛིན་པ་ཡོངས་རེ་འཁྲུལ། །ཞེས་པའི་དོན་ནི། ཀྱཻ་སྐལ་ལྡན་རྣམས། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གདོད་མ་ནས་སྟོང་ཞིང་བདག་མེད་པས། དགག་བསྒྲུབ་བླང་དོར་མེད་པའི་རང་བཞིན་དུ་གནས་པ་ངོ་ཤེས་པར་གྱིས་ཤིག །དེ་ལྟར་མི་ཤེས་པར་གང་ཟག་དང་ཆོས་ཀྱི་བདག་གཟུང་འཛིན་རང་མཚན་དུ་ཞེན་ཅིང་ཆགས་ན། འཁོར་བའི་ཁ་བརྒྱུད་པས་འཁྲུལ་པ་རང་རྒྱུད་པ་ཡིན་ནོ། །ཕྱི་སྣང་བའི་དངོས་པོ་ས་ཆུ་མེ་རླུང་། ནང་ཕུང་པོ་ཁམས་དང་སྐྱེ་མཆེད་ལ་སོགས་པའི་དབྱིངས་སམ་འབྱུང་གནས་ནི། སྤྲོས་པ་མཐའ་དག་དང་བྲལ་བ་ནམ་མཁའ་ལྟ་བུ་ཡིན་པས། སེམས་ཉིད་རང་བྱུང་གི་ཡེ་ཤེས་དངོས་མེད་ཟང་ཐལ་དུ་ཤེས་པར་གྱིས་ཤིག །དེ་ལྟར་ངོ་མ་ཤེས་པར་སྣང་བ་དང་སེམས་སུ་ཨ་འཐས་ཤིང་བདེན་ཞེན་གྱི་བློས་ཚིག་དང་ཐ་སྙད་དུ་བཏགས་པའི་ཕྱིར་སེམས་འབྲང་ནས་འཁྲུལ་ལོ། །སྙིང་པོ་དོན་གྱི་ཡེ་ཤེས་རང་ཆས་ལྷུན་གྲུབ་ཏུ་རང་ལ་ད་ལྟ་གནས་པ་ངོ་ཤེས་པར་གྱིས་ཤིག །དེ་ལྟར་མ་ཤེས་པར་ད་ལྟ་རྒྱུ་རྐྱེན་གྱིས་བསྒྲུབས་པས། དུས་ཕྱིས་དག་པའི་ཡེ་ཤེས་རྙེད་པར་འགྱུར་རོ་སྙམ་ནའང་(༦༡)རང་ངོ་མ་ཤེས་པས་འཁྲུལ་པའོ། །རང་གི་སེམས་ཉིད་དངོས་པོ་ངོས་བཟུང་མེད་པ་སྐྱེ་ཤི་མེད་པའི་རང་བཞིན་དུ་ཤེས་པར་གྱིས་ཤིག །དེར་མ་ཤེས་ཏེ་སྐྱེ་ཤིར་འཛིན་པས་སྐྱེ་འགག་ཏུ་ཞེན་ནའང་འཁྲུལ་པའོ། །སྐུ་གསུམ་འདུ་འབྲལ་མེད་པ་རང་ཆས་སུ་ཚང་བའི་རིག་སྟོང་ཆོས་སྐུར་ཤེས་པར་གྱིས་ཤིག །མ་ཤེས་འབད་རྩོལ་བྱས་པའི་མཐར་བསྐལ་པ་དུ་མ་ནས་སངས་རྒྱས་བསྒྲུབ་པར་འདོད་པས་འཁྲུལ་པ་ཡིན་ནོ། །བདེ་སྡུག་བར་མ་ཐམས་ཅད་རང་གི་སེམས་ལས་ཤར་བར་མཉམ་ཞིང་། ངོ་བོ་མེད་པས་ཡེ་གྲོལ་རིག་པའི་ཆོ་འཕྲུལ་དུ་ཤེས་པར་གྱིས་ཤིག །མ་ཤེས་པར་འདོད་པ་བསྒྲུབ། མི་འདོད་པ་དོར། བདེ་སྡུག་སོ་སོར་ཞེན་ན། གཉིས་མེད་གཉིས་སུ་བཟུང་པས་འཁྲུལ་པའི་རང་བཞིན་ཡིན་ནོ། །རང་གི་རིག་པ་རང་བྱུང་གིས་སངས་རྒྱས་ཀུན་ཏུ་བཟང་པོར་ཤེས་པར་གྱིས་ཤིག །མ་ཤེས་པར་མཚན་མ་རྟོག་སྒོམ་གྱིས་ཡི་དམ་གཞན་ནས་བཙལ་ཀྱང་། རང་གི་ཡིད་དཔྱོད་གོམས་པའི་རྣམ་རྟོག་ལས་གཞན་མེད་པས་འཁྲུལ་ལོ། །རིག་པའི་ངོ་བོ་ལ་ལས་དང་ཉོན་མོངས་ཡེ་ནས་སངས་ཤིང་། མཁྱེན་པའི་ཡེ་ཤེས་ཡེ་རྒྱས་སུ་ཡོད་པ་ངོ་ཤེས་པར་གྱིས་ཤིག །མ་ཤེས་པར་ངན་སོང་དུ་སོང་གིས་དོགས་ནས་འཛིན་པའང་ནོར་བའི་བློ་ཡིན་ནོ། །རང་རིག་གི་སྣང་ཚུལ་ལ་མར་འཁོར་བ་འགྲོ་དྲུག་གི་ཞིང་དང་། ཡར་མྱ་ངན་ལས་འདས་པ་སྐུ་གསུམ་གྱི་རོལ་པ་ཡེ་ཤེས་ལྷུན་གྲུབ་ཀྱི་སྦུབས་ལ་ཡོད་པ་ངོ་ཤེས་པར་གྱིས་ཤིག །མ་ཤེས་པར་འཁོར་འདས་སོ་སོར་ཞེན་ནས་འཁྲུལ་པ་སྤངས་ཏེ། མ་འཁྲུལ་པ་བདེན་བདེན་མོ་གཅིག་སྒྲུབ་འདོད་ཀྱི་བློ་ཡང་ནོར་འཁྲུལ་ཡིན་ནོ། །དུག་ལྔར་སྣང་དུས་ཉིད་ནས་རིག་སྟོང་ཡེ་ཤེས་ཀྱི་གདངས་སུ་ཤེས་པར་གྱིས་ཤིག །མ་ཤེས་པར་འཆར་སྒོ་གཅིག་ལ་བླང་དོར་གཉིས་སུ་ཞེན་ནས་དུག་ལྔ་གཏན་སྤངས་སུ་འདོད་ནའང་འཁྲུལ་པའོ། །ད་ལྟར་གྱི་ཕྱི་ནང་སྣོད་བཅུད་འཁྲུལ་པར་སྣང་བ་འདི་སྣང་བདོ་བ་ནས་གྲུབ་མ་མྱོང་བའི་སྟོང་གཟུགས་ཆོས་སྐུ་རང་སྣང་དུ་ཤེས་པར་གྱིས་ཤིག །མ་ཤེས་པར་བདག་གཞན་དགག་སྒྲུབ་ཀྱི་དངོས་པོ་རང་མཚན་པར་ཞེན་ན། བདག་འཛིན་འཁྲུལ་པ་ལ་སྤྱོད་པའང་(༦༢)ནོར་བའོ། །ཐེག་པ་རིམ་པ་དགུ་ལ་སོགས་པའི་གྲུབ་མཐའ་སོ་སོ་ཡང་རང་གི་བློས་རྟོག་གིས་བཏགས་པ་མ་གཏོགས་པ། སེམས་ཉིད་གཤིས་ཀྱི་གནས་ལུགས་ལ་མཐོ་དམན་དང་གྲུབ་མཐའ་མེད་པས། སྣང་བཏགས་བློ་རྟོག་གི་རི་མོ་ཙམ་ལས། དོན་བརྗོད་སྤྲོས་པ་ལས་འདས་པའི་རང་བཞིན་དུ་ཤེས་པར་གྱིས་ཤིག །དེ་ལྟར་མ་ཤེས་པར་ཉན་ཐོས་ནས་གསང་སྔགས་ཀྱི་བར་རང་རང་གི་གཞི་ལམ་འབྲས་བུའི་གྲུབ་མཐའ་སོ་སོར་བདེན་ཞེན་དུ་འཛིན་པ་ཐམས་ཅད་འཁྲུལ་པའི་རང་བཞིན་ཡིན་ནོ། །ཞེས་ལེགས་པར་བཤད་ལ། ངེས་ཤེས་བསྐྱེད་དོ། །

ཞར་ལ་དག་པ་དང་སྦྱར་ཏེ་ངོ་སྤྲད་པ་ནི། གསེར་གྱི་ཐུར་མ་རིང་པོའམ། དབྱུག་པ་རིང་པོ་ལ་རྨ་བྱའི་མདོངས་བཏགས་པས་རིམ་པ་ལྟར་ངོ་སྤྲད་དོ། །དེ་ཡང་མཎྜལ་ཟླུམ་པོ་ནི་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་མཚོན་པའོ། །ཁྲུ་དོ་པ་ནི་ཐབས་དང་ཤེས་རབ་སྣང་སྟོང་གཉིས་སུ་མེད་པའོ། །ངོས་མཉམ་པ་ནི། མུ་མཐའ་དང་བྲལ་བའོ། །ཕྱི་རོལ་ཚོགས་མཆོད་མེ་ཏོག་ལ་སོགས་པས་བརྒྱན་པ་ནི། ཚོགས་གཉིས་ལྷུན་གྱིས་རྫོགས་པའོ། །འོད་ལྔའི་ར་བས་བསྐོར་བ་ནི། སྐུ་དང་ཡེ་ཤེས་འདུ་འབྲལ་མེད་པ་ཡེ་ཤེས་ཀྱི་རང་མདངས་སོ། །དེའི་ནང་སྔོན་པོ་འོད་ཟེར་ཐིག་ལེས་བརྒྱན་པ་ནི། དབྱིངས་ཀ་དག་ཆེན་པོ་རང་གདངས་ཡེ་ཤེས་སུ་གནས་པ་འོད་དང་ཐིག་ལེས་བརྒྱན་པའོ། །རྡུལ་ཚོན་གྱི་བུམ་པ་དམར་པོ་འོད་ལྔས་བསྐོར་བ་བསྣོལ་མར་བྱུང་བའི་འོད་ལྔའི་མུ་ཁྱུད་ནི་ཡེ་ཤེས་ལྔའི་གདངས་སོ། །དམར་པོ་ནི་དབང་གི་མཚོན་བྱེད་དུ་ཐུགས་རྗེ་ཆེན་པོའོ། །བསྣོལ་བ་ནི་དབྱིངས་དང་ཡེ་ཤེས་འདུ་འབྲལ་མེད་པའོ། །ཁ་རྒྱན་མགུལ་ཆིངས་དང་བཅས་པ་ནི། ལྷུན་གྱིས་གྲུབ་པའི་ཡོན་ཏན་དང་ཕྲིན་ལས་མཚོན་པའོ། །དེའི་སྟེང་གི་བུམ་པ་དང་གསུམ་གཞི་གཅིག་ལ་དུ་མ་རྣམ་པ་སོ་སོར་སྣང་བ་ནི། སྐུ་གསུམ་དབྱིངས་སུ་གཅིག་པ་ཀ་དག་གི་ངང་ན་ཡེ་ཤེས་ལྷུན་གྲུབ་ཏུ་ཡེ་ནས་འདུ་འབྲལ་མེད་པའོ། །རིན་པོ་ཆེའི་བུམ་པའི་ནང་རྫས་དང་བཅས་པའི་རིན་པོ་ཆེ་ལས་གྲུབ་པ་ནི། རིག་པ་ཉིད་འདོད་དགུའི་འབྱུང་གནས་སུ་ལྷུན་གྱིས་གྲུབ་པའོ། །ནང་སྟོང་པ་ནི་སྟོང་ཉིད་དབྱིངས་ཀྱི་(༦༣)ངོ་བོར་གཅིག་པའོ། །འོ་མ་ནི་སྙིང་པོ་བཅུད་ཀྱི་ཡེ་ཤེས་སོ། །རིན་པོ་ཆེ་ལྔ་ནི་སྐུ་ལྔའོ། །སྤོས་ལྔ་ནི་གསུང་ལྔའོ། །བདུད་རྩི་ལྔ་ནི་ཐུགས་ལྔའོ། །འབྲུ་ལྔ་ནི་ཡོན་ཏན་ལྔའོ། །དྲི་ལྔ་ནི་ཕྲིན་ལས་ལྔའོ། །ཕྱིའི་ཨ་བཞི་ནི་ཕྲིན་ལས་བཞི་དབྱིངས་སུ་གཅིག་པའོ། །སྟེང་གི་ཁ་རྒྱན་ནི། བསམ་གྱིས་མི་ཁྱབ་པའི་སྟོབས་བཅུའོ། །མི་འཇིགས་པ་ལ་སོགས་པ་ཆོས་མ་འདྲེས་པ་བཅོ་བརྒྱད་མཚོན་པའོ། །མགུལ་ཆིངས་ནི་ཞིང་གི་རྒྱན་དང་བཀོད་པ་ཚད་མེད་པའོ། །ཤེལ་དང་རྨ་བྱ་མེ་ལོང་གསུམ་ནི། ངོ་བོ་རང་བཞིན་ཐུགས་རྗེ་གསུམ་གྱི་མཚོན་བྱེད་དོ། །ཡང་མེ་ལོང་ནི་ཇི་ལྟ་བ་དང་། ཇི་སྙེད་པའི་ཡེ་ཤེས་སོ། །དེ་ལ་ཐིག་ལེ་བྱས་པ་ནི། ཡེ་ཤེས་ཀྱི་ངོ་བོ་དྲི་མ་མེད་ཅིང་དག་པའོ། །རྨ་བྱ་ནི། ཡེ་ཤེས་ལྔ་དང་དེའི་གདངས་འོད་དང་ཐིག་ལེ་འཆར་བར་མཚོན་པའོ། །མན་ཤེལ་ནི་སྟོང་གསལ་ཆོས་སྐུའི་ཡེ་ཤེས་བསམ་འདས་བརྗོད་མེད་ཆེན་པོ་མཚོན་པའོ། །དེ་ལྟར་ཕྱིའི་མུ་ཁྱུད་ཀྱི་ནང་ན་བུམ་པ་གསུམ་དང་བཅས་པ་གཞི་གཅིག་ལ་འདུ་བ་ནི། དབྱིངས་དང་ཡེ་ཤེས་དབྱེར་མེད་པའི་ངང་ནས་སངས་རྒྱས་ཀྱི་སའི་ཆོས་ཇི་སྙེད་པ་ཐམས་ཅད་ལྷུན་གྲུབ་ཏུ་ཡེ་ནས་རིག་པ་ལ་རང་ཆས་སུ་ཚང་བའི་དོན་ཡིན་ནོ། །བུམ་པར་སྣང་བ་ནི། དེ་ལྟ་བུའི་དོན་མཐར་ཐུག་པ་ནི་གཞོན་ནུ་བུམ་པ་སྐུའི་ཞིང་ན་ཀུན་ཏུ་བཟང་པོའི་ཡེའི་སྟོན་པ་ཉིད་འཁོར་ཡེ་ཤེས་རྒྱ་མཚོའི་ཚོགས་ལ། བསམ་དུ་མེད་པའི་རང་བཞིན་རྫོགས་པ་ཆེན་པོ། ཆོས་ཉིད་ལས་མི་གཡོ་བ་བསམ་གྱིས་མི་ཁྱབ་པའི་དུས་ན་རང་སྣང་བ་ཞེས་བྱའོ། །དེ་དག་བསྡུ་ན་སྐུ་གསུམ་གྱི་དབྱིངས་རིག་འདུ་འབྲལ་མེད་པར་འདུ་བས། རྡོ་རྗེ་སེམས་དཔའི་མེ་ལོང་རེ་གཏད་ལ། མིག་བཅུག་ལ་བསྟན་ཏེ། ལྟོས་ཤིག་མན་ཤེལ་དྲི་མ་མེད་པ་ནི། དབྱིངས་སྟོང་པའི་ངང་ན་འོད་ལྔ་རང་ཆས་སུ་ཚང་བ་ནི། ཡེ་ཤེས་ལྷུན་གྲུབ་ཏུ་མཚོན་པས་རང་བཞིན་སྤྲུལ་པ་དང་། འགྲོ་འདུལ་སྤྲུལ་པ་དང་། སྣ་ཚོགས་སྤྲུལ་པས་ཡེ་ཤེས་གཉིས་ཀྱིས་འགྲོ་དོན་མཛད་པའི་བརྡའོ། །ཡང་ཤེལ་ཉིད་དབྱིངས་ཀྱི་ནང་ན། འོད་ལྔ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རིགས་ལྔ་སྟུག་པོ་བཀོད་པའི་ཞིང་ན། རང་སྣང་ལྷུན་གྲུབ་ཏུ་ཡོད་(༦༤)པའི་བརྡའོ། །ཡང་ཤེལ་དབྱིངས་ཀ་དག་གི་ངང་ནས། འོད་ལྔ་གདོད་མའི་ཡེ་ཤེས་རང་བཞིན་ལྷུན་གྲུབ་ཏུ་གནས་པ། ནང་གསལ་ཆོས་ཀྱི་སྐུའི་ངོ་བོ། གཞོན་ནུ་བུམ་པ་སྐུའི་ཞིང་ཁམས་མཚོན་པའི་བརྡའོ། །ཞེས་ངོ་སྤྲད་དོ། །གཞན་ཡང་གཞིའི་ངོ་བོ་རང་བཞིན་ཐུགས་རྗེ་གསུམ། ལམ་གྱི་གསུམ། འབྲས་བུའི་གསུམ་ཡང་ཕྱེ་ལ། རྡུལ་ཚོན་གྱི་བུམ་པ་དང་མན་ཤེལ་ལ་ངོ་སྤྲད་དེ། གདོད་མའི་དབྱིངས་ན་སྐུ་གསུམ་འདུ་འབྲལ་མེད་པ་ནི། ཕྱི་རིམ་འོད་ལྔ་དང་སྔོན་པོ་མཚོན་པའི་ནང་གི་གསུམ་མོ། །ལམ་དུས་གཞི་གནས་ཀ་དག་གི་ངང་ནས། ངོ་བོ་སྟོང་པ་སྙིང་གར་མི་གཡོ་བའི་གདངས་ཕྱིར་ཤར་བ་ཐོད་རྒལ་དང་། རླུང་འདྲེས་པ་ཁྲེགས་ཆོད་གསུམ་ནི། དབྱིངས་སྔོན་པོའི་ནང་ན། བུམ་པ་གསུམ་ལ་ངོ་སྤྲད་དོ། །འབྲས་བུའི་དུས་ན་དབྱིངས་གདོད་མའི་ངང་ནས། རིག་པ་སྐུ་གསུམ་རང་ས་ཟིན་པ་ཡང་། འོད་སྔོན་པོའི་དབུས་ཀྱི་བུམ་པ་གསུམ་ལ་ངོ་སྤྲད་དོ། །མན་ཤེལ་དྲི་མ་མེད་པས་གཞི་ལམ་འབྲས་བུ་གསུམ་གྱི་ཀ་དག་གི་སྟོང་ཆ་མཚོན་ལ། ནང་འོད་ལྔའི་ལྷུན་གྲུབ་ཀྱི་སྣང་ཆ་སྐུ་དང་ཡེ་ཤེས་ཀྱི་རང་གདངས་མཚོན་པ་ལ་ངོ་སྤྲད་དོ། །འདི་དག་ནི་གནད་གལ་པོ་ཆེ་ཡིན་པས་གཟབ་ལ་ངོ་སྤྲད་པ་ཡིན་ནོ། །

དོན་གསུམ་པ་གཟེངས་བསྟོད་པ་ལ་གསུམ་ལས། ལུང་བསྟན་པ་ནི། སྤྲོས་པ་མེད་པའི་དབང་ཐོབ་པས། ལུས་ངག་གི་སྒྲིབ་པ་དག་ནས། མ་འོངས་པའི་དུས་ན་ལོངས་སྤྱོད་རྫོགས་པའི་སྐུའི་ཞིང་ཁམས་སུ་སྐྱེ་བར་འགྱུར་རོ། །རྗེས་སུ་གནང་བ་ནི། སྔགས་བཟླ་བ་དང་། རྩ་རླུང་ཐིག་ལེ་བསྒོམ་པ་དང་། ཐིག་ལེ་སྟོང་པའི་སྒྲོན་མ་མངོན་སུམ་དུ་རང་གནད་ལ་བསྒོམ་པའི་གནང་བ་ཐོབ་པའོ། །དབུགས་དབྱུང་བ་ནི། དབང་འདི་ཐོབ་ཕན་ཆད་དམ་ཚིག་ཕུན་སུམ་ཚོགས་པས་འཁོར་བའི་ཁ་མི་བརྒྱུད། ངན་སོང་གི་སྒོ་ཁེགས། མ་འབད་ཀྱང་སྐྱེ་བ་ཕྱི་མ་ལས་མི་འགྱངས་པར་གྲོལ་ཞིང་། འབད་ན་ཚེ་འདིར་སངས་རྒྱས་ཀྱི་གོ་འཕང་ཐོབ་པ་ཡིན་ནོ། །ཞེས་བརྗོད་དོ། །དེ་ནས་ཚོགས་དང་གཏོར་མ་བྱིན་གྱིས་བརླབས་ཏེ། དབུལ་ཞིང་ལོངས་སྤྱོད་ལ། བླ་མ་དང་རྣལ་འབྱོར་གྱི་དབང་ཕྱུག་རྣམས་ཀྱིས་རྡོ་རྗེའི་གླུ་བླང་བ་དང་། བསྔོ་བ་བཀྲ་ཤིས་ཀྱི་ཚིགས་སུ་བཅད་པའི་བར། ཚོགས་ཀྱི་འཁོར་ལོའི་ཀུན་ཏུ་སྤྱོད་པ་རྣམས་ཚང་བར་བྱའོ། །དེ་ནས་ལས་ཀྱི་རྗེས་བསྡུས་ལ་མི་མངོན་པར་བྱ་སྟེ། ཤིས་པ་བརྗོད་པས་(༦༥)དབང་གི་གནས་ཁང་བརྒྱན་པར་བྱ་བ་དང་། སངས་རྒྱས་ཐམས་ཅད་ལ་དགའ་སྟོན་ཡོན་དང་བཅས་པར་བྱའོ། །དེས་ནི་འདི་དང་ཕྱི་མའི་ལས་བཞི་དང་དངོས་གྲུབ་གཉིས་དང་དོན་གཉིས་ཕུན་སུམ་ཚོགས་པ་འགྲུབ་པར་བྱེད་དོ། །ཆོ་གའི་རིམ་པ་འདི་ནི་སྔར་མཛད་མོད་ཀྱང་། ཅུང་ཟད་མི་གསལ་བ་དང་། འཐོར་བའི་ཕྱིར་ཇི་སྐད་གསུངས་པ་བཞིན་ལག་ལེན་དུ་འདེབས་ཤེས་པ་ཆེར་མ་བྱུང་བས། དབང་གི་ཕྲ་ཏིག་དང་། ཡང་ཏིག་དང་། གནད་ཡིག་ལ་སོགས་པ་ཕྱོགས་གཅིག་ཏུ་བསྡུས་ཏེ་ལེགས་པར་བཀོད་པ་ཡིན་ནོ། །

དགེ་བ་འདི་ཡིས་འགྲོ་བ་མ་ལུས་ཀུན། །སྤངས་དང་རྟོགས་པའི་ཡོན་ཏན་མཐར་ཕྱིན་ནས། །གདོད་མའི་མགོན་དང་རྣམ་དབྱེར་མི་ཕྱེད་ཅིང་། །དོན་གཉིས་ལྷུན་གྲུབ་ཆོས་ཀྱི་རྒྱལ་པོར་ཤོག །རྒྱུད་དོན་རྒྱ་མཚོའི་དབུས་ན་རབ་གསལ་ཞིང་། །མན་ངག་ཡིད་བཞིན་གདེང་ཀའི་དཔལ་འབར་བ། །བྱིན་རླབས་ཕུད་སྒྲའི་ང་རོས་རབ་མཛེས་གང་། །གངས་རི་ཐོད་དཀར་མགུལ་ན་གསལ་བ་ཡིན། །མ་འོངས་སྐལ་ལྡན་ཐར་པ་འདོད་རྣམས་ཀྱིས། །ཡི་གེ་འདི་ལ་རྟག་ཏུ་ནན་ཏན་མཛོད། །དབང་ཕྱུག་དམ་པའི་འབྱོར་པས་ཡོངས་གང་ཞིང་། །འགྲོ་ཀུན་དགའ་སྐྱེད་རྒྱལ་མཚན་འཛིན་པར་བྱེད། །དཔལ་ལྡན་བླ་མ་མཚུངས་མེད་ཆོས་རྗེའི་ཞབས། །གང་ལ་དད་བརྒྱའི་པདྨས་ལེགས་བཏུད་པ། །དེ་ཡི་ཚིག་དོན་རྣམ་བཀྲའི་མེ་ཏོག་ཕྲེང་། །སྐལ་བཟང་སྐྱེ་བོ་རྣམས་ལ་གཟིགས་པར་ཕུལ། །རྫོགས་པ་ཆེན་པོ་གསང་བ་སྙིང་ཏིག་གི་དབང་རྣམ་པར་ཕྱེ་བ་ལས། སྤྲོས་པ་མེད་པ་གསང་བའི་དབང་གི་ཆོ་གའི་རིམ་པ་གསལ་བར་བྱེད་པ་ཀློང་གསལ་ཆུ་བོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་དུ་བཀོད་པ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། བུམ་པའི་བརྡ་དོན།

༄༅། །ཟབ་མོ་ཡང་ཏིག་ལས། བུམ་པའི་བརྡ་དོན་བཞུགས་སོ། །

༄༅། རང་བཞིན་གདོད་ནས་དག་པའི་ནམ་མཁའ་ལ། །སེམས་ཉིད་རྒྱལ་པོ་འགྱུར་མེད་ལྷུན་གྱིས་གྲུབ། །རང་གསལ་རིགས་ལྔའི་ཕོ་བྲང་རང་ཤར་བའི། །ཐུགས་རྗེ་ཕྱོགས་བཅུར་འཕྲོ་ལ་ཕྱག་འཚལ་ལོ། །གང་འདིར་སྙིང་གི་འོད་ཀྱི་ཕུང་པོ་ཡི། །རང་གསལ་དེ་གནས་སྒྲིབ་བྲལ་གདོད་མའི་ངང་། །འགྲོ་རྣམས་ཡིད་ལ་སྣང་བར་བྱེད་དོན་དུ། །དབང་གི་ཆུ་བོ་བཞི་ལས་སྤྲོས་མེད་བརྗོད། །དག་པའི་(༦༦)སེམས་ལ་རང་གསལ་བུམ་པའི་སྐུ། །གཞི་དང་ལམ་དང་འབྲས་བུ་རྣམ་པ་གསུམ། །རང་བབས་གནས་ལ་བརྡ་ཡིས་འདིར་བསྟན་ཕྱིར། །བུམ་པ་བསྣོལ་མའི་ཐིག་འདི་གསལ་བར་བྱ། །གྲུ་བཞི་པ་ནི་ཆ་བཞིར་བགོ། །ནང་གི་ཆ་གཉིས་བུམ་པའི་ལྟོ། །གསུམ་པ་ཕྱེད་གོང་ཕྱི་ཐིག་གིས། །གཡས་གཡོན་ལྟོ་བའི་བཞི་ཆ་རེ། །མཚན་མ་བྱས་ལ་གྱེན་ཐུར་གདབ། །དེ་ཡང་ཕྱེད་དུ་བགོས་པ་ཡི། །ཤར་དང་ལྷོ་གཉིས་བུམ་པའི་གཤམ། །ནུབ་དང་བྱང་གཉིས་ཁ་ཡིན་ཏེ། །ལོགས་ཟུར་གང་རུང་རྩེ་ནས་བསྐོར། །ལོགས་ནས་བསྐོར་ན་བཞི་པ་ཡི། །ཤར་ལྷོའི་ཕྱེད་ལ་བུམ་གདན་བྱ། །ནུབ་བྱང་སྒང་པོ་ཁ་བརྒྱན་བྲི། །ཟུར་ནས་བསྐོར་ན་ཤར་དང་ལྷོའི། །བཞི་པ་རིལ་པོ་བུམ་པའི་གདན། །ནུབ་དང་བྱང་གི་བཞི་པ་ནས། །ཟླུམ་སྐོར་བར་དུ་དཔག་བསམ་ཤིང་། །ལོ་འདབ་ལྗང་ལ་སྙིང་པོ་དམར། །འབྲས་བུ་སེར་པོ་བྲི་བར་བྱ། །བུམ་པ་དམར་པོ་འོད་ལྔས་བསྐོར། །བུམ་གདན་སྣ་ཚོགས་པདྨ་སྟེ། །བར་ཁྱམས་སྟོང་གསལ་ནམ་མཁའི་མདོག །ཕྱི་རིམ་འོད་ལྔའི་རྭ་བས་བསྐོར། །དེ་ཡང་ནང་ནས་རིམ་པ་བཞིན། །དཀར་དམར་མཐིང་སེར་ལྗང་གུའོ། །

དེ་ཀུན་སྐུ་གསུང་ཐུགས་དང་ནི། །ཡོན་ཏན་ཕྲིན་ལས་རྣམ་ལྔའི་བརྡ། །དེ་ཡི་དག་པ་བསྟན་པ་ནི། །ཕྱོགས་རིས་རྒྱ་ཆད་མེད་པས་ན། །ཡུད་ཙམ་ཟླུམ་ལ་བརྟགས་ན་མིན། །རང་གསལ་གདངས་ལྔར་གནས་པས་ན། །ཁ་དོག་ལྔ་ཡི་རྭ་བས་བསྐོར། །སྣང་སྟོང་ཆོས་སྐུ་གཟུགས་སྐུའི་བརྡ། །བལྟ་ལུགས་གཉིས་ཀྱིས་བུམ་པ་གཉིས། །དེ་ལ་འདོད་དགུ་ལྷུན་གྲུབ་ཕྱིར། །དཔག་བསམ་ཤིང་གི་ཁ་རྒྱན་ཅན། །སྟོང་གསལ་སྣ་ཚོགས་པདྨའི་ཚུལ། །དེ་ཀུན་འོད་ལྔས་ཡོངས་བསྐོར་བ། །ཀུན་ཀྱང་གདོད་ནས་རིགས་ལྔའི་ངང་། །རང་བཞིན་གནས་པའི་བརྡ་ཡིན་ནོ། །དེ་འདྲའི་རང་བཞིན་བུམ་པ་དེ། །འགྲོ་བ་ཀུན་ལ་ཡེ་ནས་གནས། །རང་སེམས་འོད་མཐའ་མེད་པ་ནི། །སེམས་ཉིད་ཀ་དག་ཆོས་སྐུའི་ངང་། །འོད་གསལ་གཟུགས་སྐུའི་རང་བཞིན་ཤར། །དེ་ལ་སྐུ་ལྔ་ཡེ་ཤེས་ལྔ། །རང་གདངས་ཁ་དོག་རྣམ་ལྔར་ཤར། །དེ་ཕྱིར་ཆོས་སྐུ་གཟུགས་སྐུ་གཉིས། །གཞི་ནས་རྫོགས་ཕྱིར་སྣང་སྟོང་(༦༧)ཕྱིར། །གཞི་ཡང་བུམ་པའི་བརྡས་བསྟན་ནོ། །ལམ་ཡང་ཀ་དག་ལྷུན་གྲུབ་གཉིས། །གནས་ཕྱིར་དེ་ཡི་རྩལ་ཡང་གཉིས། །འགྱུར་བའི་སེམས་དང་འབྱུང་བཞིའི་ལུས། །གདོས་བཅས་ཡུལ་དང་བཅས་པ་འོ། །དེ་ལྟར་རྩལ་གཉིས་སྦྱང་བའི་ཕྱིར། །ཉམས་ལེན་ཁྲེགས་ཆོད་ཐོད་རྒལ་གཉིས། །ཁྲེགས་ཆོད་ཅོག་བཞག་རང་གྲོལ་གྱིས། །སྟོང་པའི་རྩལ་ལས་འཕྲོས་པ་ཡི། །འགྱུ་བའི་རིག་པ་ཟད་སར་སྐྱེལ། །ཐོད་རྒལ་རང་འོད་དབྱིངས་ཤར་ལ། །མི་འགྱུར་མཉམ་པའི་གཟེར་བཏབ་པས། །ལུས་དང་ཡུལ་གྱི་གདོས་བཅས་ནུབ། །རང་གསལ་ཐོག་མའི་འོད་ལྔར་གྲོལ། །ཟད་པའི་ས་ལ་གྲོལ་བར་བྱེད། །དེ་ཕྱིར་ཐོད་རྒལ་ཁྲེགས་ཆོད་གཉིས། །སྣང་སྟོང་ཆོས་སྐུ་གཟུགས་སྐུ་གཉིས། །ཉམས་སུ་ལེན་ཕྱིར་ལམ་གཉིས་ནི། །བུམ་པའི་བརྡ་ཡིས་མཛད་པའོ། །འབྲས་བུ་ཀ་དག་ལྷུན་གྲུབ་གཉིས། །དེ་ཡང་ཟད་སར་གྲོལ་བའི་ངང་། །རིག་པ་སྔོན་ཐོག་ཉིད་ཀྱི་གཞི། །རང་འོད་ལྔ་ཡི་གདངས་དང་བཅས། །རིགས་ལྔའི་ཚུལ་དུ་ལྷུན་གྱིས་གྲུབ། །དེ་ཡི་ངོ་བོ་སྣང་ཙམ་ནས། །བརྗོད་བྲལ་ཀ་དག་ཆེན་པོར་གནས། །དེ་ཡང་རང་རིག་འོག་མིན་གནས། །ཕྱོགས་བཅུ་ན་མེད་དབུས་མཐའ་མེད། །སྟོང་ཁམས་རིག་པའི་ཞིང་ཁམས་ན། །ཡེ་ཤེས་འོད་དང་འོད་ཁྱིམ་དང་། །གཙོ་འཁོར་ཡོངས་རྫོགས་ཚུལ་དུ་སྣང་། །ལྷུན་འབྱམས་སྙིང་པོ་རྒྱལ་བའི་ཞིང་། །རྣམ་དག་སྟུག་པོ་བཀོད་པའོ། །ཞིང་དེའི་རྒྱལ་བ་རྒྱ་མཚོ་ཡང་། །མི་གསུང་མི་གཡོ་སྤྲོས་བྲལ་དང་། །བྱིན་གྱིས་བརླབས་ཀྱིས་རང་བྱུང་བའི། །བསྟན་པ་གསང་བ་ཅོད་པན་ཡང་། །རང་བབས་ཕྱོགས་བཅུར་རང་སྣང་ངོ་། །དེ་ལྟར་སྐུ་གསུང་ཐུགས་ཆེན་པོ། །རང་བཞིན་ལྷུན་རྫོགས་ངང་ཉིད་ལས། །གདུལ་བྱའི་འཇིག་རྟེན་གང་ཡོད་དེར། །སྤྲུལ་པ་གང་འདུལ་དེར་སྣང་བས། །འགྲོ་བའི་དོན་ཀུན་ལྷུན་གྱིས་གྲུབ། །བརྗོད་བྲལ་ཀུན་གྱི་ངོ་བོ་ཉིད། །ཆོས་སྐུ་རང་བཞིན་གཟུགས་ཀྱི་སྐུ། །ཐུགས་རྗེ་དེ་ལས་འཕྲོས་པ་ཡིས། །སྤྲུལ་པ་རྣམས་ཏེ་དེ་ལྟར་ན། །འབྲས་བུའང་ཆོས་སྐུ་གཟུགས་སྐུ་གཉིས། །བུམ་པའི་བརྡ་ཡིས་བསྟན་པའོ། །འདི་ནི་བྱར་མེད་ཀློང་ཡངས་ཀྱིས། །མཆིམས་ཕུ་དཔལ་གྱི་རི་ལ་སྦྱར། །རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཤིན་ཏུ་སྤྲོས་པ་མེད་པའི་དབང་ཆོག་ཡེ་ཤེས་ཆུ་བོ།

༄༅། །ཟབ་མོ་ཡང་ཏིག་ལས། ཤིན་ཏུ་སྤྲོས་པ་མེད་པའི་དབང་ཆོག་ཡེ་ཤེས་ཆུ་བོ་བཞུགས་སོ། །

༄༅། དངོས་གྲུབ་རྒྱ་མཚོ་མཐའ་ཡས་ལྡན། །བླ་མ་ཀུན་ལ་ཕྱག་འཚལ་ཏེ། །ཤིན་ཏུ་སྤྲོས་པ་མེད་པ་ཡི། །དབང་བསྐུར་ཆོ་ག་བཤད་པར་བྱ། །

འདི་ལ་སྔོན་འགྲོ་སྤྱོད་པ་བརྩམས་པ་དང་། དངོས་གཞི་དབང་བསྐུར་བ་གཉིས་ལས། དང་པོ་ནི་བླ་མ་ལ་ཕྱག་དང་མཎྜལ་ཕུལ་ནས། དཔོན་སློབ་ཀུན་སྟོད་གཡོགས་ཕུད་ལ། སློབ་མ་དག་བླ་མའི་སྐུ་སྔོ་ནག་མཆེ་བ་གཙིགས་ཤིང་། ཁ་ཊྭཱཾ་ག་དང་རུས་པས་བརྒྱན་པའི་སྤྱི་བོར་ལཾ་སེར་པོ། དཔྲལ་བར་ཨེ་མཐིང་ག །ལྐོག་མར་སུ་སེར་པོ། མགྲིན་པར་ཁཾ་དུད་ཁ། ནུ་མ་གཉིས་ལ་ཧ་སེར་པོ། ལྟེ་བར་རཾ་དམར་པོ། རྐང་མཐིལ་གཉིས་སུ་ཡཾ་ལྗང་གུ་བསམ་དུ་བཅུག་ལ། བླ་མའི་སྙིང་ནང་ནས་ཧཱུྃ་མཐིང་ག་འཕྲོས་ཏེ་སློབ་མའི་སྙིང་ནང་དུ་གནས་པར་བསམ་ཞིང་། བླ་མས། ཧ་ཧ་ཞེས་ངར་བསྐྱེད་ལ་ལན་གསུམ་བརྗོད་ནས། སློབ་མ་དག་གཏོར་ཆུང་རེ་ཁྱེར་ཏེ་ལུང་སྟོང་སོ་སོར་སོང་ལ། ༀ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་ཏེ། བླ་མ་ཡི་དམ་མཁའ་འགྲོ་རྣམས་དང་། དེ་གཞི་བདག་ལ་ཕུལ་བས་བདག་ལུང་པ་འདིར་སེམས་ཅན་ཐམས་ཅད་ཀྱི་དོན་དུ་འཁོར་འདས་རུ་ཤན་འབྱེད་པའི་སྤྱོད་པ་ཞག་གསུམ་བྱེད་པས་བར་དུ་གཅོད་པ་མི་འབྱུང་བར་མཛད་དུ་གསོལ། ཞེས་བརྗོད་དོ། །དེ་ནས་ལུས་གཅེར་བུ་ཌཱ་མ་རུ་དང་བཅས་པས། སྔར་གྱི་དམིགས་པ་གསལ་བའི་ངང་ལ། ལུས་མཆོངས་པ་དང་། རྒྱུག་པ་དང་། འཁྲབ་པ་དང་། ཉལ་བ་དང་། འཕྲེས་པ་དང་། བསྒྱུར་ཏེ་འགྲོ་བ་ལ་སོགས་པ། ངག་སྨྲ་བ། ངུ་བ། རྒོད་པ། གླུ་ལེན་པ། སྨྲེ་སྔགས་འདོན་པ། སྔགས་དང་ཁ་ཏོན་བྱེད་པ། དུད་འགྲོ་ལ་སོགས་པའི་སྐད་བརྗོད་པ། སེམས་བདེ་བ། སྡུག་བསྔལ་བ། བར་མ། འདོད་ཆགས། ཞེ་སྡང་། གཏི་མུག །ང་རྒྱལ། ཕྲག་དོག །ཚོང་། འཁྲུགས་པ། དགག་སྒྲུབ། ལེགས་ཉེས། ཆོས། ཆོས་མ་ཡིན་པ། འགྲོ་བ་རིགས་དྲུག །ལམ་རྒྱུད་ལྔ། སྐྱེ་བ་རྣམ་བཞི་ལ་སོགས་པའི་ལུས་དང་། ཡུལ་དང་། སྣང་བ་བསམ་ཞིང་། འཁོར་འདས་ཐམས་ཅད་ཀྱི་བདེ་སྡུག་རང་གི་ཐོག་ཏུ་བསམ་ལ། དེ་དག་གི་ལུས་དང་། ངག་དང་། ཡིད་ཀྱི་རྣམ་པ་རྣམས་དང་མཐུན་(༦༩)པ་སྤྱད་ཅིང་གཅིག་ཏུ་བསམ། མང་པོར་བསྒྱུར། རགས་པར་བསྒོམ། ཕྲ་བར་སྤྱད། སྟོང་ཁྲོལ་ཁྲོལ། ཡང་ཕྱལ་ཕྱལ། བདེན་མེད་སྨྱོན་པའི་སྣང་བ་ལྟར་ཅི་དྲན་བྱ་ཞིང་། སྔར་བྱུང་བ། ད་ལྟ་བྱེད་པ། ཕྱིས་འབྱུང་འགྱུར། འཁོར་འདས་ཀྱི་ཆོས་སོ་ཅོག་རང་སྣང་སྒྱུ་མར་སྤྱད་དོ། །ཐུན་འཇོག་དུས་ལུས་ངག་ཡིད་གསུམ་དགེ་བའི་རྣམ་པ། ཆོས་འཆད་པ། ཕྱག །བསྐོར་བ་ལ་སོགས་པ་ཞིག་ལ་འཕྲོ་བཞག་ནས། བདེ་བའི་མལ་དུ་ལུས་མི་རོ་ལྟར་འགུལ་འཕྲིགས་མེད། ངག་བེམ་པོ་ལྟར་གླེང་བརྗོད་བྲལ། སེམས་ནམ་མཁའ་ལྟར་སྟོང་པའི་ངང་ལ་རྣལ་བཞག་ཆེན་པོར་ཉལ། དེ་ལྟར་ཞག་གསུམ་བརྩོན་པར་བྱས་པས། ཐུན་མོང་དང་མཆོག་གི་དགོས་པ་གཉིས་ཏེ། ཐུན་མོང་དུ་ལུས་ངག་ཡིད་གསུམ་གྱི་མངོན་ཞེན་བཟློག །བར་ཆད་ཞི། སྡིག་པ་འདག་གོ། །མཆོག་ནི་ལུས་ངག་ཡིད་ཕྱིར་འཁོར་བར་མི་འཇུག །སྐུ་གསུམ་དུ་གྲོལ། སྐུ་གསུང་ཐུགས་ཀྱི་ཀློང་དུ་མྱ་ངན་ལས་འདས་སོ། །

གཉིས་པ་དངོས་གཞི་དབང་བསྐུར་བ་ལ། བཤམས་པ་དང་། ཆོ་ག །གཟེངས་བསྟོད་གསུམ་ལས། དང་པོ་ནི་དྲི་ཡི་མཎྜལ་ལྔ་ཚན་ལྔས་ཟླུམ་སྐོར་བྲིས་པ་ལ། རིན་པོ་ཆེ་དང་། སྨན་དང་། སྤོས་དང་། འབྲུ་དང་། མེ་ཏོག་གི་ཚོམ་བུ་བཀོད་ནས། ཚོགས་དང་གཏོར་མ་ལ་སོགས་པ་ཕྱི་ནང་གི་མཆོད་རྫས་ཅི་འབྱོར་དུ་བཤམ་མོ། །ཆོ་ག་དངོས་ནི། སློབ་མ་བླ་མའི་མདུན་དུ་འཁོད་དེ། སྟོད་གཡོགས་ཕུད། ཐལ་མོ་སྦྱར་ལ། བླ་མས། བུ་ཁྱོད་སུ་ཡིན། ཞེས་ལན་གསུམ་དུ་དྲིས་དུས། སློབ་མས། བདག་སྐལ་ལྡན་སེམས་ཀྱི་བུ་གཅིག་པོ་ལགས། ཞེས་ལན་བརྗོད་དུས། ཡང་བླ་མས། དེ་ལྟར་ཡིན་ཕན་ཆད་རང་བཞིན་རྫོགས་པ་ཆེན་པོའི་དཀྱིལ་འཁོར་བཟང་ཞིང་ཉམས་དགའ་བ་འདིར་བཞུགས་ཤིག །ཅེས་བརྗོད་ནས། ཡང་བླ་མས། དཀྱིལ་འཁོར་འདིར་འཇུག་པའི་དོན་དུ་བླ་མ་ལ་གསོལ་བ་གདབ་པར་བགྱི་བས་རྗེས་ཟློས་མཛོད་ཅིག །བླ་མ་རྡོ་རྗེ་འཛིན་པ་རྣམས་དགོངས་སུ་གསོལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། རྡོ་རྗེ་དང་། རིན་པོ་ཆེ་དང་། པདྨ་དང་། ལས་དང་། བདེ་བར་གཤེགས་པའི་རིགས་(༧༠)ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ། བླ་མ་རྡོ་རྗེ་འཛིན་པ་ཆེན་པོས། བདག་གི་ལུས་བྱིན་གྱིས་བརླབ་ཏུ་གསོལ། ངག་བྱིན་གྱིས་བརླབ་ཏུ་གསོལ། ཡིད་བྱིན་གྱིས་བརླབ་ཏུ་གསོལ། སྣང་བ་བྱིན་གྱིས་བརླབ་ཏུ་གསོལ། སྨིན་པར་མཛད་དུ་གསོལ། གྲོལ་བར་མཛད་དུ་གསོལ། གང་བར་མཛད་དུ་གསོལ། རྒྱས་པར་མཛད་དུ་གསོལ། ཆེར་འཕེལ་བར་མཛད་དུ་གསོལ། ཞེས་གསུམ་དང་། ཡང་། ཀྱཻ་སངས་རྒྱས་ཀུན་གྱི་སྐུ་གསུང་ཐུགས་ལྡན་པ། །ཟག་པ་རང་ཟད་དབྱིངས་སུ་སྐུ་གཤེགས་པའི། །དྲི་མ་རང་དག་དབྱིངས་ནས་སྤྱན་གཟིགས་ལ། །ཐུགས་རྗེ་ཆེན་པོས་འགྲོ་བའི་དོན་མཛད་པའི། །བདེ་གཤེགས་འཇིག་རྟེན་མཁྱེན་པའི་སྟོབས་མངའ་བ། །དགོངས་པ་ཉག་གཅིག་མི་གཡོ་དབྱེར་མེད་ཀྱང་། །སྔོན་ཞུགས་དུར་ཁྲོད་གནས་ནས་རྗེས་དགོངས་ལ། །རང་བཞིན་མཛད་པ་གང་ཡང་མི་མངའ་ཡང་། །བདག་བློ་མོས་པའི་དོན་ཕྱིར་འདིར་གཤེགས་ཤིག །ཨེ་མ་ཧོ། བྱིན་རླབས་རྩ་བ་བླ་མ་བརྒྱུད་པ་ཡི། །རིམ་པ་ཉིད་ཀྱིས་རིམ་ནས་རིམ་ཞུགས་པའི། །བདག་ཉིད་ཆེན་པོ་རོ་ལངས་བདེ་བ་དང་། །མཁྱེན་པའི་ཐུགས་ནི་རབ་ཏུ་སྦྱངས་ལྡན་པ། །མཁྱེན་རབ་སྤྲུལ་པ་མཉྫུ་མི་ཏྲ་དང་། །ཐུགས་རྗེ་ཆེན་པོས་འགྲོ་བའི་སྡུག་བསྔལ་གཅོད། །ཐུགས་རྗེ་མཆོག་ལྡན་ཤྲཱི་སིངྷ་དང་། །ཐེག་པ་ཡོངས་ཀྱི་སྒྲོ་འདོགས་རབ་ཆོད་པ། །འཇིག་རྟེན་མུན་སེལ་ཛྙཱ་ན་སཱུ་ཏྲ་དང་། །སྐྱེ་ཤི་ཀུན་བྲལ་ཚེ་ལ་དབང་ཐོབ་པའི། །མཁས་པ་ཆེན་པོ་བི་མ་མི་ཏྲ་དང་། །རྟག་ཏུ་མཉམ་བཞག་རྗེས་ཐོབ་དབྱེར་མེད་པའི། །སེམས་ལ་དབང་ཐོབ་ཏིང་འཛིན་བཟང་པོ་དང་། །རང་རྒྱུད་འཁྲུལ་པ་བློ་ལ་མི་གནས་པའི། །བདུད་རྩིའི་བཅུད་སྟོན་ལྡང་མ་ལྷུན་རྒྱལ་དང་། །མཁའ་འགྲོས་ལུང་བསྟན་མཆོག་གི་དངོས་གྲུབ་བརྙེས། །གྲུབ་ཐོབ་ཆེན་པོ་སེང་གེ་དབང་ཕྱུག་དང་། །རྒྱལ་སྲས་སྤྲུལ་པ་འགྲོ་བ་འདྲེན་མཛད་པ། །རྗེ་བཙུན་ཆེན་པོ་སྤྲུལ་སྐུ་ཞང་སྟོན་དང་། །མཁྱེན་པའི་འོད་ཀྱིས་འཇིག་རྟེན་སྣང་མཛད་པ། །མ་རིག་མུན་སེལ་(༧༡)མཁས་པ་ཉི་འབུམ་དང་། །བླ་མེད་རྫོགས་ཆེན་སྙིང་པོ་དར་མཛད་པ། །མཐུ་སྟོབས་དབང་ཕྱུག་གུ་རུ་ཇོ་འབེར་དང་། །བྱང་ཆུབ་སེམས་འབྱོངས་འགྲོ་བའི་དཔལ་གྱུར་པ། །འཁྲུལ་ཞིག་ཆེན་པོ་སེང་གེ་རྒྱབ་པ་དང་། །གསལ་སྟོང་དབྱེར་མེད་བདེ་ཆེན་དོན་རྟོགས་པ། །ཟླ་བ་མུན་སེལ་སྦས་པའི་རྣལ་འབྱོར་དང་། །དགོངས་པ་མི་གཡོ་ཆོས་ཉིད་འོད་གསལ་དང་། །རིག་འཛིན་ཆེན་པོ་ཀུ་མ་རཱ་ཛ་དང་། །སྙིང་པོའི་དོན་མཐོང་ཆོས་ཟད་རྣལ་འབྱོར་པ། །ཀློང་ཆེན་རབ་འབྱམས་མཁས་པ་ཐུགས་རྗེ་ཅན། །དགོངས་པ་གཡོ་མེད་མཁའ་ལྟར་རྣམ་དག་ཅིང་། །འབྱུང་བ་རང་དེངས་ཟག་མེད་དབྱིངས་བཞུགས་ཀྱང་། །སྔོན་གྱི་ཐུགས་རྗེ་ཆེན་པོ་ཉིད་གཡོས་ལ། །ཐུགས་རྗེས་དགོངས་ཤིག་བདག་ལ་བྱིན་གྱིས་རློབས། །ༀ་ཨཱཿཧཱུཾ་གུ་རུ་སརྦ་སིདྡྷི་ཧཱུྃ། ༀ་ཨཱཿཧཱུྃ། དམ་པ་སངས་རྒྱས་ཀུན་གྱི་ཞལ་མཐོང་བདུད་རྩིའི་རོ་ལྡན་པ། །རོ་ལངས་བདེ་བ་ལྷ་ཡི་ལྷ་མཆོག་དམ་པ་ཉིད། །སངས་རྒྱས་སྤྲུལ་པ་འགྲོ་བའི་གདུང་བ་སེལ་མཛད་པ། །དམ་པ་བདུད་རྩི་བདེ་བ་ཉིད་ལ་ཕྱག་འཚལ་བསྟོད། །དེ་ཡི་རྗེས་འཛིན་འཇམ་དཔལ་སྐུ་སྤྲུལ་པ། །ཉོན་མོངས་རང་དག་མཁྱེན་པའི་ཐུགས་དང་ལྡན། །གསུང་གི་འོད་ཀྱིས་འགྲོ་བའི་སྡུག་བསྔལ་གཅོད། །དམ་པ་ཡིད་བཞིན་མྱུ་གུ་དེ་ལ་ཕྱག་འཚལ་བསྟོད། །དེ་ཡི་གདུང་འཛིན་མཁས་པ་སྡེ་སྣོད་ཀུན་གྱི་བདག །ཐུགས་རྗེ་ཆེན་པོའི་སྤྲུལ་པ་འཛམ་གླིང་ཀུན་གྱི་རྒྱན། །དྲི་མེད་གསུང་མངའ་འགྲོ་བ་ངལ་གསོའི་གནས། །དམ་པ་བཤེས་གཉེན་མྱུ་གུ་དེ་ལ་ཕྱག་འཚལ་བསྟོད། །དེ་ཡི་རྗེས་འཛིན་མཁས་པ་འཇིག་རྟེན་གསུམ་གྱི་མགོན། །རྡོ་རྗེ་སེམས་དཔའི་སྤྲུལ་པ་བདག་བློའི་འཆིང་གཅོད་པ། །ཚངས་པའི་གསུངས་མངའ་འགྲོ་བ་ཀུན་གྱི་ཡིད་འཕྲོག་པ། །དམ་པ་བདེ་བའི་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་གདུང་འཛིན་མཁས་བློར་སྐྱེ་བ་གྲངས་མེད་སྦྱངས། །མཁྱེན་རབ་མཆོག་གྱུར་སྡེ་སྣོད་ཀུན་ལ་རྨོངས་པ་མེད། །སྐྱེ་ཤི་འཇིགས་བྲལ་སྤྲུལ་པས་འགྲོ་བའི་དོན་མཛད་པ། །དམ་པ་བདེ་གསལ་མྱུ་གུ་ཉིད་ལ་ཕྱག་འཚལ་བསྟོད། །དེ་ཡི་རྗེས་འཛིན་རྣམ་དག་ཤ་ཡི་སྤྱན་མངའ་བ། །མི་རྟོག་བཟང་པོ་(༧༢)ཏིང་འཛིན་ཐུགས་ཀྱི་གནད་བཀྲོལ་ནས། །འཛམ་གླིང་འགྲོ་རྣམས་མ་ལུས་བསམ་པའི་རྒྱུད་མཁྱེན་པ། །དམ་པ་རྟོག་མེད་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་སྐལ་ལྡན་ཆོས་ཀྱི་མཛོད་མངའ་བ། །རིན་ཆེན་གཏེར་བརྙེས་འགྲོ་བའི་མ་རིག་མུན་པ་སེལ། །བདེ་གཤེགས་བཀའ་དང་བླ་མའི་མན་ངག་སྙིང་པོ་འཛིན། །དམ་པ་པདྨའི་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་གསང་སྔགས་ཀུན་གྱི་མཛོད་མངའ་བ། །དངོས་གྲུབ་མཆོག་བརྙེས་སྣང་བྱེད་འོད་ཀྱི་ལུས་གྲུབ་ནས། །གདོད་མའི་ཟད་སར་གཤེགས་ནས་འགྲོ་རྣམས་འདྲེན་པ་གང་། །དམ་པ་ཡེ་ཤེས་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་རྗེ་བཙུན་འགྲོ་བ་རྣམས་ཀྱི་མགོན། །གསང་སྔགས་དབང་བསྐུར་ལུང་བསྟན་རྗེས་སུ་འཛིན་པ་གང་། །བླ་མེད་དམ་ཆོས་པདྨོ་འགྲོ་ལ་རྒྱས་མཛད་པ། །དམ་པ་རིན་ཆེན་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་འཁོར་བའི་སྐྱབས་གནས་དཔའ་བོ་ཉིད། །འགྲོ་བ་རྣམས་ཀྱི་མགོན་པོ་དྲི་མ་མེད་པའི་དཔལ། །ཡོན་ཏན་མཆོག་ཚོགས་མཁྱེན་རབ་རྒྱ་མཚོའི་ཕ་རོལ་ཕྱིན། །དམ་པ་བློ་གསལ་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་བསྟན་པའི་སྙིང་པོ་དར་མཛད་ཅིང་། །ས་མཆོག་བརྙེས་ནས་རྒྱུད་དོན་ཀུན་ལ་དབང་འབྱོར་པ། །འདོད་དགུའི་རེ་བ་ཡོངས་སུ་སྦྱིན་མཛད་སྐྱེ་དགུའི་དཔལ། །དམ་པ་བློ་མཚོའི་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་མ་རིག་མུན་པའི་དཔུང་འཇོམས་ཤིང་། །ཡེ་ཤེས་འོད་ཟེར་ཉི་མ་བྱེ་བ་མཐའ་ཡས་ཀྱིས། །འགྲོ་བའི་སྡུག་བསྔལ་རྒྱ་མཚོ་སྐེམ་པར་བྱེད་པ་གང་། །དམ་པ་སྣང་བྱེད་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་ཐེག་པ་མཆོག་གི་བློ་གྲོས་ཅན། །ཇི་སྙེད་ཇི་བཞིན་ཀུན་ཏུ་གཟིགས་པ་མཐའ་ཡས་ཀྱིས། །ཡིད་བཞིན་འགྲུབ་པའི་ས་མཐོར་གཤེགས་པ་གང་ཡིན་པ། །དམ་པ་ཆོས་ཀྱི་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་རྗེས་འཛིན་འོད་གསལ་ཉི་མའི་སྙིང་པོ་བརྙེས། །བཟོད་དཀའི་མུན་ནག་འཐིབས་པོ་རབ་ཏུ་འཇོམས་མཛད་ཅིང་། །ཐུགས་རྗེའི་འོད་ཟེར་བྱེ་བས་འཛམ་གླིང་སྣང་མཛད་པ། །དམ་པ་རིག་འཛིན་མྱུ་གུ་མགོན་ལ་ཕྱག་འཚལ་(༧༣)བསྟོད། །དེ་ཡི་རྗེས་འཛིན་སྡེ་སྣོད་རྒྱ་མཚོའི་ཕ་རོལ་ཕྱིན། །རྒྱུད་དོན་ཉི་མ་ཏིང་འཛིན་འོད་གསལ་མཆོག་ཚོགས་ཅན། །རང་དོན་རྫོགས་ནས་གཞན་དོན་བརྩོན་པར་མཛད་པ་གང་། །དམ་པ་ཚོགས་མཆོག་མྱུ་གུ་མགོན་ལ་ཕྱག་འཚལ་བསྟོད། །དངོས་གྲུབ་ཀུན་འབྱུང་ཡོན་ཏན་རྒྱ་མཚོའི་བླ་མ་ལ། །གུས་པས་གསོལ་འདེབས་ཐུགས་རྗེས་བྱིན་གྱིས་བརླབ་ཏུ་གསོལ། །

ༀ་ཨཱཿཧཱུྃ་གུ་རུ་ན་མོ། མཧཱ་སིདྡྷི་ས་མ་ཡཱ། དྷརྨཱ་ཀཱ་ཡ། ས་མནྟ་བྷ་དྲཱ། བཛྲ་བྷ་གི་ཤུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། སམ་བྷོ་ཀཱ་ཡ་བཛྲ་དྷ་རི་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ནིརྨཱ་ཀཱ་ཡ་བཛྲ་ས་ཏྭ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། བཛྲ་པཱ་ཎི་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། པྲ་ཛྙཱ་བྷ་ཝ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། མཉྫུ་ཤྲཱི་མི་ཏྲ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ཤྲི་སིངྷ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ཛྙཱ་ན་སཱུ་ཏྲ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། བི་མ་ལ་མི་ཏྲ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ས་མ་ཏི་བྷ་དྲཱ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། བྷ་ཧྲི་ར་ཧེ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། སིང་ཧེ་ཤྭ་ར་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། སཱུརྱ་ལིཀྵཾ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ཇོ་འབེར་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ལོ་ཀི་ཛྙཱ་ན་གུ་རུ་ན་མོ། ས་མ་ར་ཐཱ་ཡ་སིང་། ས་ཧཱ་སིདྡྷི་ས་མ་ཡཱ། དྷེ་ཀེ་བཛྲ་གུ་རུ་ན་མ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ཀུ་མ་རཱ་ཛ་གུ་རུ་ན་མོ། ས་མ་ར་ཐཱ་ཡ་སིང་། མཧཱ་སིདྡྷི་ས་མ་ཡཱ། ཤཱི་ལ་མ་ཏི་གུ་རུ་ན་མོ། ༀ་ཨཱཿཧཱུྃ། ཨེ་མ་དམ་པ་སངས་རྒྱས་ཐམས་ཅད་བསྐྱེད་མཛད་ངོ་བོ་ཉིད་ཀྱི་རྗེ། །སངས་རྒྱས་སྟོང་གི་དཀྱིལ་འཁོར་ཉིད་ལ་དབང་བསྒྱུར་བླ་མ་ཉིད། །བཛྲ་བྷ་ཝ་ལྷ་རྗེ་དཔའ་བོ་ཉིད་ཀྱི་ཞལ། །བདག་བློའི་གཏི་མུག་མུན་པ་འཇོམས་ཕྱིར་བསྟན་དུ་གསོལ། །འཇིག་རྟེན་དྲི་མའི་སྐྱོན་བྲལ་ཉེས་པ་(༧༤)ཀུན་ལས་གྲོལ། །རང་རྒྱུད་རྣམ་པར་དག་ཅིང་སངས་རྒྱས་སུམ་སྟོང་གི། །ཐུགས་ལ་མངའ་མཛད་མཉྫུ་ཤྲཱི་མི་ཏྲའི་ཞལ། །བདག་བློའི་ཞེ་སྡང་མ་ལུས་འཇོམས་ཕྱིར་བསྟན་དུ་གསོལ། །ཐུགས་རྗེ་ཆེན་པོའི་གསུང་གི་འོད་ཟེར་ཅན། །ཚངས་པའི་དབྱངས་ཀྱིས་འགྲོ་བ་འདམ་ནས་འདྲེན། །ཤྲཱི་སིངྷ་མི་འགྱུར་རྡོ་རྗེའི་ཞལ། །བདག་བློའི་ང་རྒྱལ་ཟད་མཛད་བསྟན་དུ་གསོལ། །ཐེག་པའི་དོན་རྣམས་ཐུགས་ལ་ཇི་བཞིན་སྣང་སྟོང་པ། །མི་བསྐྱོད་ཡེ་ཤེས་འགྲོ་བའི་དོན་ལ་ཕན་བརྩོན་གང་། །ཛྙཱ་ན་སཱུ་ཏྲ་འཇིག་རྟེན་རྨོངས་པ་མེད་བའི་ཞལ། །བདག་བློའི་འདོད་ཆགས་དྲི་མ་ཟད་མཛད་བསྟན་དུ་གསོལ། །མཁྱེན་རབ་རྨད་བྱུང་སྒྲ་ཚིག་རྣམ་པ་མང་པོ་ཡིས། །འགྲོ་མགོན་ཡེ་ཤེས་ཉི་མའི་འོད་ཀྱིས་འཛམ་གླིང་ཀུན་ཏུ་ཁྱབ། །བི་མ་མི་ཏྲ་སྐྱེ་ཤི་ཀུན་བྲལ་རྡོ་རྗེའི་ཞལ། །བདག་བློའི་ཕྲག་དོག་དྲི་མ་ཟད་མཛད་བསྟན་དུ་གསོལ། །དགོངས་པ་བར་མཚམས་མེད་པ་རླུང་གི་འགྲོ་འོང་ཟད། །གཉིས་མེད་རྣམ་པར་དག་པས་གང་ཡང་གྲོགས་སུ་སྣང་། །ཏིང་འཛིན་བཟང་པོ་གཟུང་འཛིན་བྲལ་བའི་ཞལ། །བདག་བློའི་ཁོང་ཁྲོའི་དྲི་མ་ཟད་མཛད་བསྟན་དུ་གསོལ། །གདོད་ནས་ཆོས་ཀུན་མཉམ་ཉིད་རོ་གཅིག་རྟོགས་གྱུར་པས། །བདག་གཞན་དབྱེར་མེད་གཞི་ནས་བྱང་ཆུབ་དག་པའི་ངང་། །ལྷུན་གྱི་རྒྱལ་མཚན་བསོད་ནམས་གཟི་བརྗིད་ཆེན་པོའི་ཞལ། །བདག་བློའི་ཉོན་མོངས་དུག་ལྔ་ཟད་མཛད་བསྟན་དུ་གསོལ། །ལུས་ངག་ཡིད་ཀྱི་ཞེན་པ་རང་ལོག་སྟེ། །ཉམས་ལེན་མཐར་ཕྱིར་སྣང་བ་ཟད་སར་འཁྱོལ། །སེངྒེ་དབང་ཕྱུག་འཁྲུལ་སྣང་དག་པའི་ཞལ། །བདག་བློའི་འཁྲུལ་སྣང་ཟད་མཛད་བསྟན་དུ་གསོལ། །རྡོ་རྗེ་ཐེག་པའི་སྙིང་པོ་གསང་སྔགས་སྡོང་པོར་གྲགས། །ངེས་པའི་དོན་རྟོགས་གཉིས་མེད་མཁའ་འདྲའི་ཐུགས་མངའ་བ། །བཀྲ་ཤིས་མི་འགྱུར་ཡིད་བཞིན་རྡོ་རྗེ་འཆང་གི་ཞལ། །བདག་བློའི་ལས་དང་བག་ཆགས་ཟད་མཛད་བསྟན་དུ་གསོལ། །འཁོར་བ་མུ་མཐའ་མེད་པའི་ཀློང་དཀྱིལ་ནས། །ཆོས་ཉིད་དག་པ་ཀུན་གསལ་གཅིག་ཏུ་རྟོགས། །ཡེ་ནས་ལྷུན་མཉམ་རྫོགས་པ་ཆེན་པོའི་ཞལ། །བདག་བློའི་གཏི་མུག་ཟད་མཛད་(༧༥)བསྟན་དུ་གསོལ། །བླ་མེད་སྙིང་པོ་ཐེག་པ་མཆོག་གི་དེ་ཉིད་རྟོགས། །ཏིང་འཛིན་མི་གཡོ་ཇི་ལྟར་བརྟན་པའི་དགོངས་པ་ཅན། །ངེས་དོན་མཐར་ཕྱིན་ཚད་མེད་ཕྲིན་ལས་བཟང་པོའི་ཞལ། །བདག་བློའི་བཟང་རྟོག་འཛིན་པ་ཟད་མཛད་བསྟན་དུ་གསོལ། །རང་བཞིན་ལྷུན་གྲུབ་ཀུན་གསལ་ཆེན་པོའི་ངང་། །འོད་གསལ་མངོན་གྱུར་འཁོར་འདས་བྱ་རྩོལ་བྲལ། །རྟག་ཏུ་མི་གཡོ་ཀུན་ཏུ་བཟང་པོའི་ཞལ། །བདག་བློའི་མ་རིག་ཟད་མཛད་བསྟན་དུ་གསོལ། །རང་བཞིན་རྫོགས་པ་ཆེན་པོའི་མཁའ་དབྱིངས་སུ། །ཐམས་ཅད་ལྷུན་མཉམ་མཆོག་གི་དངོས་གྲུབ་བརྙེས། །ཚོགས་བསགས་རྒྱལ་པོ་རང་རིག་དྲི་མེད་ཞལ། །བདག་བློའི་འཁོར་བ་ཟད་མཛད་བསྟན་དུ་གསོལ། །གདོད་མའི་རང་བཞིན་ཆོས་དབྱིངས་ངང་ཉིད་དུ། །མ་བཅོས་སྤྲོས་བྲལ་འོད་གསལ་འཕོ་འགྱུར་མེད། །ཁམས་གསུམ་ཡོངས་གྲོལ་ཏིང་འཛིན་ཆེན་པོའི་ཞལ། །བདག་བློའི་བླང་དོར་ཟད་མཛད་བསྟན་དུ་གསོལ། །ཡོན་ཏན་མཐའ་ཡས་ཡེ་ཤེས་དཔལ་འབར་ཞིང་། །དངོས་འཛིན་རང་ཞིག་གཟུང་འཛིན་ཀུན་ལས་འདས། །རང་གྲོལ་རྒྱལ་པོ་དྲི་མེད་པདྨའི་ཞལ། །བདག་བློའི་འཁྲུལ་རྟོག་ཟད་མཛད་བསྟན་དུ་གསོལ། །ༀ་ཨཱཿཧཱུྃ་སྭཱ་ཧཱ། ཞེས་ལན་གསུམ་བརྗོད་དོ། །

དེ་ནས་རིན་པོ་ཆེ་དང་། འབྲུ་དང་། དྲི་དང་། སྨན་དང་། སྤོས་ཀྱིས་འཇིག་རྟེན་གང་བར་དམིགས་ལ། མཎྜལ་ལན་ལྔ་ཕུལ་ལ། སློབ་མ་ཀུན་ལངས་ཏེ། སྟོད་གཡོགས་ཕུད། ཐལ་མོ་སྦྱར། བླ་མའི་ཐུགས་ཀར་མིག་གཏད་པ་ལ། བླ་མས་ཨཱ་དྲུག་བརྩེགས་ཡེངས་ལ་བོར་བའི་མཚམས་སུ་དྲག་ལ་ཐུང་བར་བརྗོད་ལ་ལུས་འཕར། ངག་གསལ། སེམས་མི་རྟོག་པའི་ཡེ་ཤེས་དབབ་པའོ། །དེ་ནས་དཀྱིལ་འཁོར་དུ་གཞུག་པ་ནི། ལུས་གནད་དེ་ཉིད་ཀྱིས་ཁ་ཤར་དུ་གཏད་པ་ལ། བླ་མས་དབྱངས་སྙན་པོས། ཨེ་མ་སྐལ་ལྡན་ཤར་ཕྱོགས་ཀྱི་ནམ་མཁའི་དཀྱིལ་ན་ཕར་གམ་གམ་སོང་དང་། ཞེས་པ་གསུམ་དང་། ཡང་འགྲོ་ན་འགྲོ་ས་འདུག་གམ། ཞེས་པ་བརྗོད་དོ། །དེ་བཞིན་དུ་ལྷོ་དང་། ནུབ་དང་། བྱང་ལའང་མིང་བརྗེས་ལ་བརྗོད་པས། སྟོང་ཉིད་(༧༦)བསམ་ངོ་དང་བྲལ་བའི་ཉམས་འཆར། དེ་ནས་དཀྱིལ་འཁོར་བསྟན་པ་ནི། བླ་མས་ཕྱག་མཛུབ་བསྒྲེངས་ཏེ་ནམ་མཁའི་དབྱིངས་ལ་ཡུལ་ཡུལ་བྱ་ཞིང་། ཨེ་མ་སྐལ་ལྡན་ནམ་མཁའི་དབྱིངས་ལ་ལྟོས་ཤིག །ཅེས་པ་གསུམ་བརྗོད་དོ། །དེ་ནས་ལྷ་ངོ་བསྟན་པ་ནི། སྟོད་གཡོགས་གྱོན། སྐྱིལ་ཀྲུང་གིས་འདུག་པ་ལ། སྔ་མས། ཨེ་མ་ནམ་མཁའི་དཀྱིལ་ཡ་ཀི་ན། ཉི་མའི་དཀྱིལ་འཁོར་འོད་འཕྲོ་བ་ལྔ་པོ་ལ་ཤེས་པ་གཏོད་ལ། ཇེ་མཐོ་ཇེ་མཐོར་སོང་ཞིག་པ་གསུམ་བརྗོད་ནས། སླར་མ་ལྡོག་ཅིག །གསུམ་བརྗོད་པ་ནི། རིག་པ་སྐུ་གསུམ་ཀ་དག་གི་དབྱིངས་སུ་ཐིམ་པའི་དོན་ནོ།། །།

དེ་ནས་དབང་བསྐུར་བ་དངོས་ནི། བླ་མ་ལངས་ཏེ། ཞབས་གཡས་བརྐྱང་གཡོན་བསྐུམ་མཛུབ་མོ་གཉིས་མིག་གཉིས་ལ་བཙུགས་ནས། ཨ་བརྩེགས་མར་བརྗོད། ཤར་དང་ལྷོ་དང་ནུབ་དང་བྱང་དུ་བལྟའོ། །ཞབས་བརྐྱང་བསྐུམ་ནི་འཁོར་འདས་ཀྱི་སྤྲོས་པ་གཅོད་པའི་བརྡའོ། །མཛུབ་མོ་མིག་ལ་བཙུགས་པ་ནི། ཡེ་ཤེས་མིག་ནས་འཆར་བའི་བརྡའོ། །ཕྱོགས་བཞིར་ལྟ་བ་ནི་སྣང་བཞི་མཐར་ཕྱིན་པར་བྱེད་པའི་བརྡའོ། །ཨ་ནི་སྐྱེ་མེད་དུ་གྲོལ་བའི་བརྡའོ། །དེ་ནས་མཛུབ་མོ་ནམ་མཁར་བསྒྲེངས་ཏེ་མིག་ཧུར་བྱུང་ལ། ནམ་མཁའ་ནི་རྒྱ་ཆེའོ། །ཞེས་པ་གསུམ་བརྗོད་དོ། །ནམ་མཁའ་ནི་དབྱིངས་ཀྱི་བརྡའོ། །མཛུབ་མོ་རིག་པ་ལུ་གུ་རྒྱུད་ཀྱི་བརྡའོ། །མིག་ཧར་པོ་གཟིགས་སྟངས་ཀྱི་བརྡའོ། །རྒྱ་ཆེན་པོ་སྤྲོས་བྲལ་རང་བྱུང་གི་ཡེ་ཤེས་ཀྱི་བརྡའོ། །དེ་དག་གིས་དབང་གི་དངོས་གཞི་བསྟན་ཏོ། །

གསུམ་པ་གཟེངས་བསྟོད་པ་ནི། ཤིན་ཏུ་སྤྲོས་པ་མེད་པའི་དབང་བསྐུར་བ་ཐོབ་ནས་ཆོས་སྐུའི་ཞིང་ལ་སྤྱོད། ཡིད་ཀྱི་སྒྲིབ་པ་དག །རང་རིག་བྷནྡྷ་འབར་བའི་ཁྲོ་བོའི་ཞིང་ལ་དབང་ཐོབ། འབད་ན་ཚེ་འདིར་གྲོལ་ཞིང་། ཁྲེགས་ཆོད་སྟོང་ཉིད་བསྒོམ་པ་ལ་དབང་། མ་འབད་ཀྱང་བར་དོའམ་ཕྱི་མ་ལ་གྲོལ་བ་ངེས་པ་ཡིན་ནོ། །ཞེས་བརྗོད་ནས་ཚོགས་ཀྱི་དགའ་བ་བྱའོ། །

དེ་ལྟར་ཤིན་ཏུ་སྤྲོས་མེད་ཀྱི། །དབང་མཆོག་རྒྱལ་པོ་ཐོབ་པ་དེས། །སངས་རྒྱས་བསྟན་པ་དར་བ་དང་། །འགྲོ་ཀུན་བདེ་ལེགས་ཕུན་ཚོགས་ཤོག །ཤིན་ཏུ་སྤྲོས་(༧༧)པ་མེད་པའི་དབང་ཆོག་ཡེ་ཤེས་ཆུ་བོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ། ཀློང་ཆེན་རབ་འབྱམས་ཀྱིས། གངས་རི་ཐོད་དཀར་གྱི་མགུལ། ཀུན་ཏུ་བཟང་པོའི་ཁང་བཟངས་སུ་བཀོད་པ་རྫོགས་སོ།། །།

དགེའོ། །དགེའོ། །དགེའོ།། །།

རབ་ཏུ་སྤྲོས་པ་མེད་པའི་དབང་ཆོག་བྱིན་རླབས་ཆུ་བོ་ཞེས་བྱ་བ།

དང་པོ། འཇུག་པ།

༄༅། །རབ་ཏུ་སྤྲོས་པ་མེད་པའི་དབང་ཆོག་བྱིན་རླབས་ཆུ་བོ་ཞེས་བྱ་བ་བཞུགས་སོ། །

༄༅། དཔལ་ལྡན་ཚོགས་གཉིས་རྫོགས་པའི་གཙོ། །ཀུན་བཟང་ཆོས་རྗེ་བླ་མ་ལ། །དད་བརྒྱའི་སྤྱི་བོས་ཕྱག་འཚལ་ཏེ། །རབ་ཏུ་སྤྲོས་མེད་དབང་ཆོག་བྲི། །

དེ་ལ་ཤིན་ཏུ་དབེན་པའི་གནས་བླ་གབ་མེད་པར། ལྔ་ཚན་ལྔའི་མཎྜལ་ཚོགས་དང་གཏོར་མས་བརྒྱན་པ་སྟ་གོན་བྱས་ལ། ཉི་མ་རི་བོའི་རྩེར་ཤར་བའི་དུས་སུ་ཆོ་ག་དངོས་བྱ་བའི་རིམ་པ་ལ་བཞི་སྟེ། འཇུག་པ། དབང་། ངོ་སྤྲོད། གཟེངས་བསྟོད་པའོ། །དང་པོ་ནི། བླ་མས་བུ་ཁྱོད་སུ་ཡིན། ཞེས་ལན་གསུམ་དྲིས་པའི་ལན་དུ། སློབ་མས། སྐལ་ལྡན་སེམས་ཀྱི་བུ་གཅིག་པོ་ལགས། ཞེས་པ་གསུམ་བརྗོད་པ་དང་། བླ་མས། དེ་ལྟར་ཡིན་ཕན་ཆད་སེམས་ཉིད་གདོད་མ་ནས་སྐྱེ་མ་མྱོང་བའི་དཀྱིལ་འཁོར་འདི་ཉིད་དུ་ཞུགས་ཤིག་ཅེས་བརྗོད་པ་དང་། སློབ་མས་ཐལ་མོ་སྦྱར་ཏེ། ཀྱེ་བླ་མ་རྡོ་རྗེ་འཛིན་པ་ཉིད། །བདག་ལ་རབ་ཏུ་དགོངས་སུ་གསོལ། །བདག་ནི་ཁམས་གསུམ་འཁོར་གནས་སུ། །ཡུན་རིང་གནས་པ་དྲན་ཉམས་ཏེ། །འཁོར་བ་ཉིད་ལས་བརྒལ་དོན་དུ། །བླ་མ་ལ་ཡང་ཞུ་བར་བགྱིད། །བསྐལ་པ་བརྒྱ་ཕྲག་དུ་མར་ནི། །བདག་ནི་ཡང་ནས་ཡང་འཁོར་བས། །རྡོ་རྗེ་སེམས་དཔའི་ཡེ་ཤེས་རང་བྱུང་ཉིད། །སྨད་དང་རྩ་བ་བཅས་པའི་སངས་རྒྱས་སེམས་ལས་བྱུང་། །སེམས་ཀྱི་དམ་པ་བདག་ལ་བསྟན་དུ་གསོལ། །ཞེས་ལན་གསུམ་བརྗོད་ནས། བླ་མའི་ཐུགས་ཀར་ཅེ་རེར་བལྟར་བཅུག་པའི་མཚམས་སུ། བླ་མས། སེམས་གང་ཡིན་ཞེས་དྲག་ཤུལ་ཅན་གསུམ་དྲིས་པས། བརྗོད་མ་ཤེས་པའི་རིག་པ་སྟོང་པ་ནི། ཡེ་ཤེས་དབབ་པའོ། །

གཉིས་པ། དབང་།

གཉིས་པ་དབང་ལ་གསུམ་ལས། སྤྲུལ་སྐུའི་དཀྱིལ་འཁོར་དུ་འཇུག་པའི་དབང་ནི། སློབ་མ་རྣམས་སེང་གེའི་ལྟ་སྟངས་(༧༨)བསྟུན་ལ་ཤར་ཕྱོགས་སུ་བལྟས་ཏེ། ཚིག་ཕྱིར་སེམས་གཞོལ་བས་བསམ་དུ་གཞུག་ཅིང་། བླ་མས། ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན་ཅིག །ཤར་ཕྱོགས་མངོན་པར་དགའ་བའི་ཞིང་ཁམས་ཤིན་ཏུ་མཛེས་ཤིང་ཉམས་དགའ་བ་ཡིད་དུ་འོང་བ་ན། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྡོ་རྗེ་མི་འཁྲུགས་པ་ཞེས་བྱ་བ། སྐུ་མདོག་དཀར་པོ་རིན་པོ་ཆེའི་རྒྱན་གྱིས་བརྒྱན་པ། ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་། རང་རང་གི་སྟོན་པ་ལས་ཆོས་ཉན་ཞིང་རང་རང་གི་ཉེ་འཁོར་ལ་ཆོས་སྟོན་པ་དང་། རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ། །བུ་ཁྱོད་དེར་གླང་པོ་ཆེའི་ལྟ་སྟངས་ཀྱིས་ལྟོས་ལ། སེང་གེའི་མཆོངས་སྟངས་ཀྱིས་མཆོངས་ཤིག །ཨ་ཨ་ཨ། ཞེས་བརྗོད། ཡང་སློབ་མ་རྣམས་ལྷོར་བལྟས་ལ། གླང་པོ་ཆེའི་འདུག་སྟངས་བསྟུན་ཏེ། བླ་མས། ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན་ཅིག །ལྷོ་ཕྱོགས་ན་དཔལ་དང་ལྡན་པ་ཞེས་བྱ་བའི་ཞིང་ཁམས་ཤིན་ཏུ་མཛེས་ཤིང་ཉམས་དགའ་བ་ཡིད་དུ་འོང་བ་ན། ཡང་དག་པར་རྫོགས་པའི་སངས་རྒྱན་རིན་ཆེན་འབྱུང་ལྡན་ཞེས་བྱ་བ། སྐུ་མདོག་སེར་པོ་རིན་པོ་ཆེའི་རྒྱན་གྱིས་བརྒྱན་པ། ཡབ་ཡུམ་(༧༩)གཉིས་སུ་མེད་པ། འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་། རང་རང་གི་སྟོན་པ་ལས་ཆོས་ཉན་ཞིང་། རང་རང་གི་ཉེ་འཁོར་ལ་ཆོས་སྟོན་པ། རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ། །བུ་ཁྱོད་སེང་གེའི་ལྟ་སྟངས་ཀྱིས་ལྟོས་ལ། སྟག་མོའི་མཆོངས་སྟངས་ཀྱིས་མཆོངས་ཤིག །ཨ་ཨ་ཨ། ཞེས་བརྗོད་ནས། ནུབ་ཏུ་བལྟས་ཏེ་དྲང་སྲོང་གི་འདུག་སྟངས་བསྟུན་པ་ལ། བླ་མས། ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན་ཅིག །ནུབ་ཕྱོགས་ན་པདྨ་བརྩེགས་པ་ཞེས་བྱ་བའི་ཞིང་ཁམས་ཤིན་ཏུ་མཛེས་ཤིང་ཉམས་དགའ་བ་ཡིད་དུ་འོང་བ་ན། ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ཞེས་བྱ་བ། སྐུ་མདོག་དམར་པོ་རིན་པོ་ཆེའི་རྒྱན་གྱིས་མཛེས་པ། ཡབ་ཡུམ་གཉིས་སུ་མེད་པ། འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་། རང་རང་གི་སྟོན་པ་ལས་ཆོས་ཉན་ཞིང་། རང་རང་གི་ཉེ་འཁོར་ལ་ཆོས་སྟོན་པ། རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ཉིད་སྟོན་ཏོ། །བུ་ཁྱོད་དཔལ་ཆེན་གྱི་རྔམ་སྟབས་ཀྱིས་ལྟོས་ལ། ཁྱུང་ནམ་མཁའ་ལ་ལྡིང་བའི་འགྲོས་ཀྱིས་སོང་ཞིག །ཨ་ཨ་ཨ། ཞེས་པ་གསུམ་བརྗོད་ནས། བྱང་དུ་བལྟས་ཏེ། ཙོག་པུ་ལས་ལག་སོར་འཇུག་རྡོར་བསྒོངས་པ་བྱ་རྒོད་ཀྱི་སྤུངས་སྟངས་ཀྱིས་འདུག་པ་ལ། བླ་མས། ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན་ཅིག །བྱང་ཕྱོགས་ལས་རབ་རྫོགས་པ་ཞེས་བྱ་བའི་ཞིང་ཁམས་ཤིན་ཏུ་མཛེས་ཤིང་ཡིད་དུ་འོང་བ་ན། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་གདོན་མི་ཟ་བའི་རྒྱལ་པོ་ཞེས་བྱ་བ་སྐུ་མདོག་ལྗང་གུ་རིན་པོ་ཆེའི་རྒྱན་གྱིས་བརྒྱན་པ། ཡབ་ཡུམ་གཉིས་སུ་མེད་པ། འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་། རང་རང་གི་སྟོན་པ་ལས་ཆོས་ཉན་ཞིང་། རང་རང་གི་ཉེ་འཁོར་ལ་ཆོས་སྟོན་པ། རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ། །བུ་ཁྱོད་དེར་རྡོ་རྗེ་འཆང་གི་ལྟ་སྟངས་ཀྱིས་ལྟོས་ལ། གློག་དམར་གྱི་འཁྱུག་སྟངས་ཀྱིས་སོང་ཞིག །ཨ་ཨ་ཨ། ཞེས་བརྗོད་དོ། །དེ་དག་ནི་སྤྲུལ་པའི་སྐུར་གྲོལ་བར་བྱེད་པའི་དབང་ངོ་། །ལོངས་སྐུའི་དཀྱིལ་འཁོར་དུ་འཇུག་པར་བྱེད་པའི་དབང་ནི། སློབ་མ་རྡོ་རྗེའི་སྐྱིལ་ཀྲུང་གིས་འདུག་པ་ལ། བླ་མས། ཨེ་མ་སྐལ་ལྡན་སེམས་ཀྱི་བུ་གཅིག་པོ་རྣམས་ཉོན་ཅིག །དེ་དག་ཐམས་ཅད་ལས་འདས་པའི་ཕ་རོལ་ན། རྒྱན་ཡོངས་སུ་བཀོད་པ་ཞེས་བྱ་བའི་ཞིང་ཁམས། ཡེ་ཤེས་ལྔས་ཁྱབ་ཅིང་གསལ་བ། བར་དུ་མཉམ་ཉིད་མི་གཡོ་བ་ཉིད་ན། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། དགྲ་བཅོམ་པ། ཟག་པ་ཟད་པ། རིག་པ་དང་ཞབས་སུ་ལྡན་པ་ཡང་དག་པར་རྫོགས་པའི་སངས་རྒྱས་བརྒྱ་སྟོང་བྱེ་བ་མང་པོས་བསྐོར་བ། སེམས་ཉིད་མངོན་པར་འདུས་མ་བྱས་པ་ལ་རོལ་པ་ཞིག་ཡོད་ཀྱིས། བུ་ཁྱོད་དེར་གླང་པོ་(༨༠)ཆེའི་ལྟ་སྟངས་ཀྱིས་ལྟོས་ལ། སེང་གེའི་མཆོངས་སྟངས་ཀྱིས་སོང་ཞིག །ཨ་ཨ་ཨ། ཞེས་བརྗོད་དོ། །ཆོས་སྐུའི་དཀྱིལ་འཁོར་དུ་འཇུག་པའི་དབང་ནི། སློབ་མ་རྣམས་སེང་གེའི་འདུག་སྟངས་བསྟུན་པ་ལ། བླ་མས། ཨེ་མ། སྐལ་ལྡན་སེམས་ཀྱི་བུ་གཅིག་པོ་རྣམས་ཉོན་ཅིག །དེ་ལས་ཀྱང་འདས་པའི་ཕ་རོལ་ན། རང་གི་སེམས་ཉིད་བསམ་ངོ་དང་བྲལ་ཞིང་། ཚད་མེད་དཔག་ཏུ་མེད་ཅིང་དམིགས་སུ་མེད་པ། སྟོང་ཉིད་གང་དུའང་མ་ཕྱེ་བའི་ཆོས་ཉིད་ཅེས་བྱ་བ་བཞུགས་པས། དེར་བུ་ཁྱོད་ཁྱུང་ནམ་མཁར་ལྡིང་བའི་འགྲོས་ཀྱིས་མཐོ་སར་འདུག་ཅིག །དྲང་སྲོང་གི་ལྟ་སྟངས་ཀྱིས་གནས་པར་གྱིས་ཤིག །གླང་ཆེན་གྱི་ཉལ་སྟབས་ཀྱིས་སྙོམ་པར་ཉོལ་ཞིག །ལྕགས་སྡོང་གི་འདྲིལ་སྟངས་ཀྱིས་ཁ་སྦུབ་ལ་མཐའ་དྲིལ་ཞིག །སྐྱེས་བུའི་རྒྱངས་ཐབས་ཀྱིས་གན་རྐྱལ་དུ་རྒྱོངས་ཤིག །ཝ་མོའི་ཟུར་འགྲོས་ཀྱིས་སློག་ལ་སོང་ཞིག །བྱ་རྒོད་ཀྱི་སྤུངས་སྟངས་ཀྱིས་བསྒྱུར་བཟློག་གིས་སྤུངས་ཤིག །གྱད་ཀྱི་དོར་སྟབས་ཀྱིས་ངལ་བསོས་ལ་ས་ནོན་ཞིག །འབུ་སྲིན་གྱི་ནུར་འགྲོས་ཀྱིས་དབྱིངས་རིག་མ་ཆགས་པར་གྱིས་ཤིག །སྟག་མོའི་མཆོངས་སྟངས་ཀྱིས་ཉམས་སྣང་ལ་རྩལ་སྦྱོངས་ཤིག །གཡང་མོའི་སྤྲུགས་སྟངས་ཀྱིས་གཟུང་འཛིན་གྱི་བག་ཆགས་ཐམས་ཅད་དུས་གཅིག་ལ་ངོ་བོར་སྤྲུགས་ཤིག །སེང་གེའི་འགྱིངས་ཚུལ་གྱིས་དབྱིངས་རིག་ལ་ས་ཟུངས་ཤིག །ཨེ་མ་སྐལ་ལྡན་སེམས་ཀྱི་བུ་གཅིག །སེམས་ཉིད་སྟོང་པར་གནས་པས་གཞི་ཟུངས་ཤིག །སེམས་ཉིད་རིག་སྟོང་དུ་གནས་པས་གནད་ཚུད་ཅིག །སེམས་མ་འགག་པར་འགྱུར་བས་རྩལ་སྦྱོངས་ཤིག །སེམས་ཉིད་ཡེ་ཤེས་སུ་གསལ་བས་ལམ་སྦྱོངས་ཤིག །སེམས་ཉིད་ཀུན་ལ་ཁྱབ་པས་རྟགས་ཚོལ་ཞིག །སེམས་ཉིད་ཅིག་ཆར་དུ་མྱུར་བས་ལ་ཟློས་ཤིག །སེམས་ཉིད་སྣ་ཚོགས་མ་འདྲེས་པར་ཤན་ཕྱེས་ཤིག །སེམས་ཉིད་སྣ་ཚོགས་པར་འཕེལ་བས་མ་ཞེན་ཅིག །ཡེ་ཤེས་ལས་སླར་མ་ལྡོག་ཅིག །སྐུ་ལས་སླར་མ་ལྡོག་ཅིག །ཐིག་ལེ་ལས་སླར་མ་ལྡོག་ཅིག །ཅེས་བརྗོད་ལ་དེ་དག་གི་དོན་བཤད་དེ། དེ་ལྟར་གསུམ་ཡང་གཞི་སྣང་དང་གཞིའི་དབང་སྟེ། འདི་དང་བར་དོ་རང་བཞིན་སྤྲུལ་པ་སྐུ་གསུམ་གང་རུང་དུ་གྲོལ་བར་བྱེད་པའི་དབང་ངོ་། །

གསུམ་པ། ངོ་སྤྲད་པ།

གསུམ་པ་ངོ་སྤྲད་པ་ནི། བརྗོད་པ་དང་པོ་(༨༡)སྤྲུལ་སྐུ། གཉིས་པ་ལོངས་སྐུ། གསུམ་པ་ཆོས་སྐུའི་ལྟ་སྟངས་བསྟུན་དུ་བཅུག་ལ། བླ་མས། ཨེ་མ་སྐལ་ལྡན་སེམས་ཀྱི་བུ་གཅིག་པོ་རྣམས། སེམས་ཉིད་ངོ་བོ་སྟོང་ལ་རང་བཞིན་ཡེ་ཤེས་ལྷག་མཐོང་གི་དོན་ཉོན་ཅིག །སེམས་ཉིད་བདེ་སྟོང་ཟུང་འཇུག་ཕྱག་རྒྱ་ཆེན་པོའི་གཞི་ཡེ་ཤེས་ལྔར་བསྒྱུར་ཞིག །སེམས་ཉིད་བདེ་སྟོང་ཡེ་ཤེས་ཟང་ཐལ་གྱིས་མ་རིག་པ་སོལ་ཅིག །སེམས་ཉིད་བློ་རིམ་དུ་འཇུག་པའི་ཐེག་པ་ཐ་དད་ཀྱི་མཐའ་ཐིག་ལེ་ཉག་གཅིག་ཏུ་བསྡུས་ཤིག །སེམས་ཉིད་སྟོང་པ་མཐའ་བྲལ་ཐིག་ལེ་ཡོངས་རྫོགས་ལ་ཆོས་ཀྱི་ཕུགས་གཏོད་ཅིག །སེམས་ཉིད་ཟུང་འཇུག་རང་སྣང་ལྷུག་པས་དོན་གྱི་གནད་ཁྲོལ་ཞིག །སེམས་དབྱིངས་རིག་རྣམ་དག་སྨིན་མཚམས་འོད་གསལ་ལ་རླུང་རིག་གཅུད་ལ་བོར་ཞིག །གང་ཞེ་ན། མགྲིན་པ་ཨན་ཙམ་དགུག །མིག་གྱེན་ལ་ལོག །རླུང་རང་སོར་བཅད། ལག་པ་གཡས་པས་མིག་མནན། མིག་གཡོན་པ་ནམ་མཁར་བལྟས་པས་ཡེ་ཤེས་ཀྱི་སྣང་བ་འཕེལ་ལོ། །སེམས་ཉིད་ཆོས་སྐུ་མ་བཅོས་རང་བྱུང་རྣལ་མ་ལ། ཕྱི་ནང་གཅིག་ཏུ་གཞི་ཕོབ་ཅིག །སེམས་ཉིད་མ་འདྲེས་ཡོངས་རྫོགས་ཉག་གཅིག་ཕྱོགས་བྲལ་ལས་སླར་མ་ལྡོག་ཅིག །སྤྲུལ་སྐུར་སོང་ཞིག །ལོངས་སྐུར་སོང་ཞིག །ཆོས་སྐུར་སོང་ཞིག །ཆོས་སྐུ་ལ་མ་འཛིན་སླར་མ་ལྡོག་ཅིག །ལོངས་སྐུ་ལ་མ་འཛིན་སླར་མ་ལྡོག་ཅིག །སྤྲུལ་སྐུ་ལ་མ་འཛིན་སླར་མ་ལྡོག་ཅིག །ཅེས་པ་གསུམ་བརྗོད་དུས། བར་པ་ལ་མགྲིན་པ་དྲང་ཐད་ལ་བཞག །མིག་ཅུང་ཟད་དབབ་ཅེས་གོ་བརྗེའོ། །ཐ་མ་མགྲིན་པ་བསྟོད། མིག་གྱེན་ལ་བལྟ། ཞེས་གོ་བརྗེའོ། །མིག་ཀྱང་སྐྱེས་པ་ལ་གཡས། བུད་མེད་ལ་གཡོན་དུ་བརྗོད་པར་བྱའོ། །

བཞི་པ། གཟེངས་བསྟོད་པ།

བཞི་པ་གཟེངས་བསྟོད་པ་ནི། དབང་འདི་ཐོབ་ནས་རིག་པ་ཡེ་ཤེས་ཀྱི་རང་གདངས་ཞི་བ་ལོངས་སྐུའི་ཞིང་ལ་སྤྱོད་པར་དབང་། མ་རིག་པ་གཞི་ལ་སངས་ནས་སྒོ་གསུམ་འཆིང་བའི་རྒྱ་ལས་གྲོལ་བ་ཐོབ། ཡེ་ཤེས་ལྷུན་གྲུབ་ཀྱི་གཞི་སྣང་ཀ་དག་ཏུ་ཐིམ་ནས་ནང་དབྱིངས་ལྷུན་གྲུབ་ཀྱི་ཡེ་ཤེས་ལ་སྤྱོད། འབད་ན་ཚེ་འདིར་གྲོལ་ཞིང་། མ་འབད་ཀྱང་བར་དོའམ་རང་བཞིན་སྤྲུལ་པའི་ཞིང་དུ་སངས་རྒྱའོ། །ཞེས་བརྗོད་དོ། །དེ་ནས་ཚོགས་ཀྱི་དགའ་བ་དང་། རྡོ་རྗེའི་གླུ་བཀྲ་ཤིས་ཀྱི་བར་དུ་བྱའོ། །

དགེ་བ་འདི་ཡིས་འགྲོ་བ་ཀུན། །དབང་མཆོག་རྒྱལ་པོའི་ས་ཐོབ་ཤོག །བཀྲ་ཤིས་དགེ་ལེགས་ཕུན་ཚོགས་ཀྱིས། །རྟག་ཏུ་བཀྲ་ཤིས་བྱེད་པར་(༨༢)ཤོག །རབ་ཏུ་སྤྲོས་པ་མེད་པའི་དབང་ཆོག་བྱིན་རླབས་ཆུ་བོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ། མེ་ཏོག་བརྩེགས་པའི་སྐྱེད་མོས་ཚལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། དམ་ཚིག་གསུམ་བཀོད་ཅེས་བྱ་བ།

༄༅། །ཟབ་མོ་ཡང་ཏིག་ལས། དམ་ཚིག་གསུམ་བཀོད་ཅེས་བྱ་བ་བཞུགས་སོ། །

༄༅། དམ་ཚིག་གསུམ་བཀོད་ཅེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་མི་འགྱུར་ལྷུན་གྱིས་གྲུབ་དབྱིངས་སུ། །མངོན་པར་བྱང་ཆུབ་ཀུན་ཏུ་བཟང་པོ་དང་། །རིགས་གསུམ་བརྒྱུད་པ་ཆོས་རྗེ་བླ་མ་ལ། །དད་བརྒྱའི་འདབ་སྟོང་གཡོ་བས་ཕྱག་འཚལ་ལོ། །གསང་སྔགས་ཀུན་གྱི་ཉེ་ལམ་ངེས་པའི་དོན། །རྣམ་དག་དམ་ཚིག་སྡོམ་པ་རྒྱ་མཚོ་སྟེ། །མཆོག་དང་ཐུན་མོང་དངོས་གྲུབ་ཐོབ་བྱའི་ཕྱིར། །བསྲུང་ཚུལ་སྔགས་ཀྱི་འདུལ་བ་མདོར་བསྡུས་བརྗོད། །

འདི་ལ་གསང་སྔགས་ཐུན་མོང་གི་དམ་ཚིག་ཉི་ཤུ་རྩ་ལྔ་ལ། ཁྱད་པར་གྱི་དམ་ཚིག་ཉི་ཤུ་རྩ་བདུན། བླ་ན་མེད་པའི་དམ་ཚིག་བཞིར་རྟོགས་པར་བྱའོ། །དང་པོ་ཐུན་མོང་གི་དམ་ཚིག་ཉི་ཤུ་རྩ་ལྔ་ལ། ཤེས་པར་བྱ་བའི་དམ་ཚིག་ལྔ། སྤྱད་པར་བྱ་བའི་དམ་ཚིག་ལྔ། མི་སྤང་བའི་དམ་ཚིག་ལྔ། དང་དུ་བླང་བའི་དམ་ཚིག་ལྔ། གྲུབ་པར་བྱ་བའི་དམ་ཚིག་ལྔ་སྟེ། གསང་སྔགས་ནང་པ་འོག་མ་གཉིས་སུ་གཙོར་བསྟན་པས། བསྐྱེད་རྫོགས་སྤྲོས་པ་དང་བཅས་པ་ཕྱིའི་དམ་ཚིག་སྟེ། འདིར་རྫོགས་པ་ཆེན་པོ་ཐབས་ཀྱི་ཡན་ལག་ཤེས་པར་བྱ་བ་ཙམ་ལས། དངོས་ཀྱི་རིམ་པ་མ་ཡིན་པས། འོག་མར་བསྟན་པར་བྱ་སྟེ། སྤྲོས་པས་ཆོག་གོ། །ཁྱད་པར་གྱི་དམ་ཚིག་ཉི་ཤུ་རྩ་བདུན་ལ། རྩ་བ་སྐུ་གསུང་ཐུགས་གསུམ་ལ་ཕྱི་ནང་གསང་བ་གསུམ་གསུམ་དུ་ཕྱེ་བས། དགུ་ཚན་གསུམ་དུ་རྣམ་པར་བཞག་པ་ནི། ལྷུན་གྱིས་གྲུབ་པའི་རང་བྱུང་གི་ཡེ་ཤེས་རང་གནས་སྐུ་གསུང་ཐུགས་སུ་ཡོད་པ་ལ། ཕྱིན་ཅི་ལོག་ཏུ་སྒྲོ་བཏགས་པས་འཁྲུལ་པའི་ལུས་ངག་ཡིད་གསུམ་དུ་བག་ཆགས་ཏེ། སྒོ་གསུམ་མ་དག་པ་ཉིད་དག་པར་སྦྱོང་བའི་དབང་དུ་མཛད་དེ། འཁྲུལ་པའི་ལུས་ངག་ཡིད་གསུམ་ལ་དགུ་སྤྲུགས་སུ་གདམས་པས། མ་འཁྲུལ་པའི་སྐུ་གསུང་ཐུགས་གསུམ་དགུ་སྤྲུགས་སུ་བསྲུང་བའི་ཕྱིར། དང་པོ་དེའི་རྣམ་པར་གཞག་སྟེ། ཐལ་འགྱུར་ལས། དབང་རྟེན་པ་ཡི་དམ་ཚིག་བཤད། །དབྱེ་ན་བརྗོད་ཀྱིས་མི་ལང་ཡང་། །མདོར་བསྡུས་སྐུ་དང་གསུང་དང་ཐུགས། །(༨༣)རྣལ་འབྱོར་ལུས་ངག་ཡིད་ལ་སྦྱར། །ཞེས་སོ། །

སྐུའི་དམ་ཚིག་ཕྱི་ནང་གསང་བ་གསུམ་དུ་ཕྱེ་བའི་ཕྱི་ལའང་། ཕྱི་ནང་གསང་བ་གསུམ་ལས། ཕྱིའི་ཕྱི་མ་བྱིན་པ་ལེན་པ། ཕྱིའི་ནང་མི་ཚངས་པ་སྤྱད་པ། ཕྱིའི་གསང་བ་སྲོག་གཅོད་པ་གསུམ་སྤོང་བ་སྟེ། ཉམས་ན་ཉེས་པ་ཚད་མེད་པ་ཉིད་རིན་པོ་ཆེ་རྣམ་པར་སྤུངས་པའི་རྒྱུད་ལས། སྐུ་ཡི་ཕྱི་ཡི་དམ་ཚིག་ལས། །རྣམ་པ་གསུམ་དུ་བརྟགས་ཏེ་ཕྱེ། །མ་བྱིན་བླངས་པས་ཕྱི་ཡི་ཡང་། །སྐུ་ཡི་དམ་ཚིག་ཉམས་པར་འགྱུར། །དེ་ཡི་རྟགས་སུ་ཡན་ལག་ན། །མི་བཟད་སྣ་ཚོགས་ལུས་ལ་འབྱུང་། །མི་ཚངས་སྤྱད་པ་ནང་ཡིན་ཏེ། །རྟག་ཏུ་དབང་པོའི་ནད་རྣམས་སོ། །སྲོག་གཅོད་པ་ནི་གསང་བ་སྟེ། །དེ་ཡི་རྟགས་སུ་དོན་སྣོད་ནང་། །རྣལ་འབྱོར་པ་ཡིས་མྱང་བ་འོ། །ཞེས་སོ། །

སྐུའི་ནང་གི་དམ་ཚིག་ལའང་། ཕྱི་ནང་གསང་བ་གསུམ་ལས། ནང་གི་ཕྱི་སྤུན་དང་ཕ་མ་ལ་མི་སྨད། ནང་གི་ནང་ཆོས་ལ་མོས་པས་འཇུག་འདོད་པ། ཞུགས་པ་ཅུང་ཟད་སྤྱོད་པ་རྣམས་ཀྱི་ལུས་ལ་སྨོད་པ་སྤང་བ། ནང་གི་གསང་བར་རང་གི་ལུས་ལ་མི་སྨད་པ་སྟེ། སྨད་ན་ཉེས་པ་ལྕི་བ་ཉིད། གསེར་གྱི་ཁང་བུ་བརྩེགས་པའི་རྒྱུད་ལས། ནང་གི་ཕྱི་ནི་སྤུན་དང་ཡང་། །གང་གི་ཕ་དང་མ་ཉིད་དང་། །རང་གི་ལུས་ལ་མི་སྨད་དོ། །ནང་གི་ནང་ཉིད་སྤྱིར་ན་ཡང་། །ཐེག་པ་ཆེ་ཆུང་ཆོས་རྣམས་ལ། །འཇུག་པར་འདོད་དང་ཞུགས་པ་དང་། །ཞུགས་ཏེ་གཟུགས་བརྙན་འཛིན་པའི་ལུས། །སྨད་ཅིང་མཐོ་བརྩམས་རྒྱན་སྨད་ན། །སངས་རྒྱས་སྐུ་ནི་བརྒྱ་ཕྲག་བསླུས། །ནང་གི་གསང་བ་རང་གི་ལུས། །ལྷ་ཡི་དཀྱིལ་འཁོར་ཡིན་པའི་ཕྱིར། །སྨན་དང་ཟས་ལ་དུག་འདྲེས་ཟོས། །གལ་ཏེ་མཚོན་གྱིས་བཏབ་པ་ཡང་། །ཟག་པའི་ལམ་མེད་ལུས་བརྒྱ་བླང་། །དེ་འོག་ཚ་བའི་དམྱལ་བ་མྱང་། །ཞེས་སོ། །

སྐུའི་གསང་བའི་ཕྱི་ནང་གསང་བ་གསུམ་ལས། གསང་བའི་ཕྱི་རྡོ་རྗེ་སྤུན་སྲིང་ལ་མི་སྨད་པ། གསང་བའི་ནང་ཤིན་ཏུ་འདྲེས་པའི་མཆེད་ལྕམ་ལ་མི་སྨད་པ། གསང་བའི་གསང་བ་བླ་མའི་དྲུང་དུ་བག་མེད་པའི་སྤྱོད་པ་སྤང་བ་སྟེ། ཉམས་ན་ཉེས་པ་ཆེ་བ་ནི། ཡང་སྔ་མ་ལས། སྐུ་ཡི་གསང་བའི་ཕྱི་ཡི་ནི། །རྡོ་(༨༤)རྗེ་སྤུན་ནམ་སྲིང་མོ་ཡི། །ལུས་ཀྱི་རྒྱན་ལ་དཔྱས་པ་དང་། །མཐོ་འཚམས་ལག་གིས་བརྡེག་པའི་ཚུལ། །གལ་ཏེ་གཞན་ལ་བྱེད་བཅུག་ནའང་། །འདི་ཡང་མནར་མེད་རྒྱུད་འཕེལ་འགྱུར། །ནང་གི་ཤིན་ཏུ་འདྲེས་པའི་ཚུལ། །ཀུ་རེ་རྩེད་མོའི་ཚུལ་དུ་ཡང་། །བརྡེག་གམ་བརྡེག་པར་བརྩམས་པ་འམ། །རྨི་ལམ་ན་ཡང་ཡུམ་ལ་གཙེས། །དེ་མ་ཐག་ཏུ་མ་བཤགས་ན། །འདི་ཡང་སྔར་དང་སྡིག་མཉམ་མོ། །གསང་བའི་གསང་བ་བླ་མ་ཡི། །སྐུ་ཡི་གྲིབ་མ་མི་འགོང་དང་། །བླ་མའི་སྤྱན་ལམ་དག་ཏུ་ཡང་། །མཚོན་ཆ་གཟུང་བར་མི་བྱའོ། །རྐང་ལག་བརྐྱང་དང་ཉལ་མི་བྱ། །སྐྱིལ་ཀྲུང་འདུག་དང་རྒྱབ་མི་བསྟན། །ལྷམ་དང་གདན་དང་བཞོན་པ་དང་། །གདུགས་སོགས་སྒེག་པའི་རྒྱན་རྣམས་སྤང་། །བླ་མའི་གཟིམས་ཁང་དག་ལ་ཡང་། །ལག་པས་མཚོན་ནམ་རྡོ་དག་གིས། །བརྩམ་པར་བྱ་བ་མ་ཡིན་ནོ། །དེ་དག་ལ་ནི་འབུམ་འགྱུར་དུ། །བླ་མའི་གནས་ཁང་བཤིག་པ་དང་། །སྐུ་ལས་བརྩམས་ཤིང་སྡིག་བྱས་པ། །འདི་ཡི་སྡིག་པ་ཕ་མཐའ་ཡས། །གལ་ཏེ་བླ་མར་བག་མེད་པས། །མ་དཔྱད་སྟོང་ན་ཕ་མཐའ་ཡས། །འདི་ཡི་རྣམ་སྨིན་བརྗོད་མི་ནུས། །ཞེས་སོ། །

གསུང་གི་དམ་ཚིག་ཀྱང་ཕྱི་ནང་གསང་བ་གསུམ་གསུམ་ལས། གསུང་གི་ཕྱིའི་ཕྱི་རྫུན་མི་སྨྲ། ཕྱིའི་ནང་ཕྲ་མ་མི་སྨྲ། ཕྱིའི་གསང་བ་གཞན་གྱི་ཞེ་གཅོད་པའི་ཚིག་ཀྱལ་ཀ་དང་རྩུབ་མོ་སོགས་མི་སྨྲ་ཏེ། སྨྲས་ན་ཉེས་པ་ལྕི་བ་ཉིད། འཁོར་ལོ་རྣམ་པར་བརྩེགས་པའི་རྒྱུད་ལས། སྔགས་ཀྱི་མོས་པ་སྤྱོད་པ་ཡིས། །འགྲོ་བ་ཕལ་པ་དག་ལ་ཡང་། །རྫུན་གྱི་ཚིག་ནི་རང་འདོད་ཀྱིས། །སྨྲ་ལ་རྟག་ཏུ་དགའ་བ་དང་། །སྔགས་བཟླས་ནུས་པ་མི་འབྱུང་ཞིང་། །གཞན་ལ་སྨྲས་པ་བཙུན་པ་མིན། །རང་གི་ངག་ཉིད་ཉམས་པ་ཡིས། །འགྲོ་བ་གཞན་གྱི་ལྕེ་འབབ་འགྱུར། །མ་འོངས་དུས་ན་སྨེ་ཤའི་ལུས། །བྱང་གི་ཕྱོགས་སུ་མྱང་བར་འགྱུར། །དེ་འོག་ངན་སོང་སྡུག་བསྔལ་ཡང་། །རྣམ་པ་སྣ་ཚོགས་མྱང་བར་འགྱུར། །སྔགས་ལ་ཞུགས་པའི་གང་ཟག་གང་། །གཞན་གཉིས་དབྱེན་འཇུག་ཕྲ་མ་སྨྲ། །ཆོས་སྨྲས་འཁོར་རྣམས་མི་འདུ་(༨༥)དང་། །ཅི་བྱས་ལོག་པར་འགྱུར་བ་དང་། །མ་སྤྱད་རྣམས་ནི་དགྲར་གྱུར་དང་། །ལུས་ལ་མཚོན་གྱིས་འདེབས་པ་དང་། །ཤི་འཕོས་ནས་ནི་རྡོ་རྗེ་ཅན། །དེ་ནས་ངན་སོང་རིམ་གྱིས་མྱང་། །རྟག་ཏུ་ཞེ་གཅོད་ཚིག་སྨྲ་བ། །སྔ་མའི་ལུས་དང་ཕྱི་མའི་རྟགས། །འགྲོ་བ་བྱམས་བྲལ་བཤེས་ཀྱང་སྡང་། །ཆོས་ཀྱི་ཚིག་ཀྱང་འཆོལ་བར་འགྱུར། །ཤི་འཕོས་རབ་ཏུ་གྲགས་པའི་ལུས། །དེ་ནས་ངན་སོང་གསུམ་དུ་འཁོར། །ཞེས་སོ། །གསུང་གི་ནང་གི་ཕྱི། ཆོས་སྨྲ་བ་ལ་མི་སྨད། གསུང་གི་ནང་གི་ནང་། ཆོས་སྒྲུབ་པ་ལ་མི་སྨད། གསུང་གི་ནང་གི་གསང་བ། ཏིང་འཛིན་སྒོམ་པའི་བསམ་གཏན་པའི་སེམས་མི་དཀྲུགས་མི་སྨད། སྒྲོ་སྐུར་གཤེ་སྨད་མི་བྱ་སྟེ། བྱས་ན་ཉེས་པ་ཆེ་བ་ཉིད། དམ་ཚིག་རྣམ་པར་བཀོད་པའི་རྒྱུད་ལས། སྔགས་པ་སྡོམ་ལ་གནས་པ་ཡིས། །ཆོས་སྨྲ་རྣམས་དང་ཆོས་སྒྲུབ་དང་། །ཆོས་ནི་སྒོམ་པའི་གང་ཟག་ལ། །སྒྲོ་ཞིང་སྐུར་པ་བཏབ་པ་དང་། །གཤེ་ཞིང་སྨད་པའི་ཚིག་སྨྲས་ན། །གཞན་གྱི་མོས་པ་ཉམས་པ་དང་། །རང་གི་རྟོགས་པ་ཉམས་པ་དང་། །རང་གི་ཆོས་རྣམས་བརྗེད་ངེས་ཏེ། །ཡིད་དཔྱོད་འདྲ་མིན་འཆོལ་བར་འགྱུར། །ཞེས་སོ། །གསུང་གི་གསང་བའི་ཕྱི། རྡོ་རྗེ་སྤུན་སྲིང་ལ་མི་སྨད། ནང་བླ་མའི་ཕྱག་རྒྱ་དང་འཁོར་མི་སྨད། གསང་བ་བླ་མ་མི་སྨད་དེ། ཕྱག་རྒྱ་གཉིས་སྦྱོར་གྱི་རྒྱུད་ལས། རྡོ་རྗེ་མཆེད་དང་ལྕམ་དྲལ་ལ། །ཚིག་གིས་སྨྲས་དང་ངག་བཅགས་ན། །བསྐལ་པ་བརྒྱ་ཕྲག་བྱེ་བར་ནི། །ངན་སོང་སྡུག་བསྔལ་དྲག་པོ་མྱོང་། །འདི་ལ་བྱས་པའི་ལས་མཐའ་ནི། །ཚེ་ཡི་ཞབས་ལ་ངག་གི་ལས། །འཁོར་གྱི་གཞན་གྱིས་ལྕེ་འབབ་དང་། །གློ་བུར་དག་ཏུ་སྨྲ་རྒྱུན་འགག །བླ་མའི་བུ་དང་ཆུང་མ་དང་། །གང་དག་ཉེ་གནས་དག་ཀྱང་རུང་། །བཀའ་ལས་འདས་ཤིང་ངག་བཅགས་ན། །སྔ་མ་ལས་ནི་ཉིས་འགྱུར་རོ། །ཞེས་སོ། །

ཐུགས་ཀྱི་དམ་ཚིག་ལའང་། ཕྱི་ནང་གསང་བ་གསུམ་ལ་གསུམ་གསུམ་ལས། ཐུགས་ཀྱི་ཕྱི་ཡི་ཕྱི། བརྣབ་སེམས་མི་བྱ། ཕྱི་ནང་གནོད་སེམས་མི་བྱ། ཕྱི་ཡི་གསང་བ་ལོག་ལྟ་མི་བྱ། བྱས་ནས་ཉེས་པ་ལྕི་བ་ཉིད། སྙིང་པོའི་དོན་རྣམས་ལེན་པའི་རྒྱུད་ལས། གང་དག་གསང་(༨༦)སྔགས་རྡོ་རྗེ་འཛིན། །སེམས་ཅན་གཞན་ནམ་རང་ཡང་རུང་། །བརྣབ་པར་བྱ་བའི་སེམས་འཆང་ན། །འདི་ནི་ཤུ་བ་ཅན་གྱི་ལུས། །གྲང་བའི་རེག་པ་ལྡན་པ་ཡི། །ལུས་ནི་སྟོང་ཕྲག་ལྔ་བླངས་ནས། །གྲང་བའི་དམྱལ་བར་ངེས་པར་འགྱུར། །ཞེས་པ་དང་། གནམ་ལྕགས་མེ་ལྟར་འབར་བའི་རྒྱུད་ལས། གལ་ཏེ་སེམས་ཅན་ཕལ་པ་ལ། །ཡུམ་གྱུར་གནོད་པའི་སེམས་འཆང་ན། །འགྲོ་བ་ཐུན་མོང་ལུས་ཅན་ནི། །བརྒྱ་ཕྲག་གསུམ་གྱི་སྲོག་གཅོད་པས། །འདི་ཡི་སྡིག་པ་ཕ་མཐའ་ཡས། །གལ་ཏེ་བསྟན་པའི་རྟགས་འཛིན་པའི། །གཟུགས་ཅན་རྣམས་ལ་ལོག་འགྱུར་རོ། །སྔགས་ལ་ཞུགས་པ་ཕྲག་འགྱུར་རོ། །རྡོ་རྗེ་སྤུན་སྲིང་བདུན་ཕྲག་གོ། །བརྒྱུད་པའི་བླ་མ་བརྒྱ་ཕྲག་གོ། །རང་གི་བླ་མ་དེ་ཡི་བརྒྱ། །སྔགས་ཀྱི་སྒོར་ཞུགས་དབང་ཐོབ་པ། །མཆོག་ཏུ་རྣམ་སྨིན་དེ་ལྟར་རོ། །ཞེས་པ་དང་། བཀོད་པ་ཆེན་པོ་ལས། རང་ངམ་གཞན་གྱི་གྲུབ་པ་ཡི། །ཆོས་ལ་སྨད་པ་ལོག་པའི་ལམ། །རྩ་བའི་དམ་ཚིག་ལས་འདས་ན། །ས་སྤྱོད་མེ་ཡི་སྡུག་བསྔལ་ལ། །ཡུན་རིང་བར་དུ་གནས་པའོ། །རང་གི་གྲུབ་མཐར་ལོག་ལྟ་སྐྱེས། །དམྱལ་བ་ཉིད་ལས་ཐར་སྐབས་མེད། །ཅེས་སོ། །ཐུགས་ཀྱི་ནང་གི་ཕྱི། སྤྱོད་པ་ལོག་པ་སྤང་། ནང་སྒོམ་པ་ལོག་པ་སྤང་། གསང་བ་ལྟ་བ་ལོག་པ་སྤང་། མ་སྤངས་ན་ཉེས་པ་ཆེ་བ་ཉིད། ཤེལ་གྱི་ཁང་བུ་བརྩེགས་པའི་རྒྱུད་ལས། ལྟ་དང་སྒོམ་པ་སྤྱོད་པ་ལོག །འདི་ནི་ལམ་ལོག་ཆེན་པོ་སྟེ། །སེམས་ཅན་ཀུན་གྱི་སྡུག་བསྔལ་གང་། །འདི་ཡི་སེམས་ལ་སྨིན་པར་ངེས། །ཞེས་སོ། །ཐུགས་ཀྱི་གསང་བའི་ཕྱི། ལྟ་སྒོམ་སྤྱོད་པ་ཡིད་ལ་བྱ་བ། ནང་ཡི་དམ་གྱི་ལྷ་ཡིད་ལ་བྱ་བ། གསང་བ་བླ་མ་དང་རྡོ་རྗེ་སྤུན་སྲིང་ཡིད་ལ་བྱ་བ་སྟེ། མ་བྱས་ན་ཉེས་པ་ཆེ་བ་ཉིད། པདྨ་ཀློང་ཡངས་ཀྱི་རྒྱུད་ལས། སུ་ཡི་ཡིད་ཀྱི་ལས་འཁྱལ་ཏེ། །ཡིད་ལ་བྱ་བའི་ཆོས་རྣམས་ལ། །ཡིད་ལ་མ་བྱས་ཉམས་པ་དང་། །འདས་དང་ཞིག་པའི་ལས་ཀྱི་མཐའ། །མནར་མེད་སྡུག་བསྔལ་མྱང་བའོ། །ཞེས་གསུངས་སོ། །དེ་ལྟར་ཡང་སྤྱིར་དམ་ཚིག་གི་རིམ་པ་བསྲུང་བར་བྱ་བ་ལས། ཉམས་ན་དེ་མ་ཐག་བཤགས་པར་བྱ་སྟེ། རྡོ་རྗེ་ཉི་མ་ལས། གལ་(༨༧)ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །ཞེས་སོ། །

དེ་ཡང་སྤྱིར་དམ་ཚིག་ངོ་བོ་ལས་ཉམས་པ་ལ་ཉམས་པར་བརྗོད་ལ། ཆ་ཤས་དང་ཕྱོགས་མཐུན་ཉམས་པ་ལ་དམ་ལས་འགལ་བ་ཞེས་བརྗོད་དེ། ལྕི་ཡང་དུས་ལ་ལྟོས་ནས་ཕྱེ་ན་ཞག་གིས་བར་མ་ཆོད་པའི་ཆག་ཉམས་གསོ་སླ་བར་དགོངས་ནས་དམ་ལས་འགལ་བར་བརྗོད། ཟླ་བས་བར་མ་ཆོད་པ་རྣམས་དེ་བས་དཀའ་བ་ཉམས་པར་བརྗོད། ལོས་མ་ཆོད་པ་རྣམས་དེ་བས་དཀའ་བས་དམ་ལས་འདས་པར་བརྗོད། ལོ་གསུམ་ཚུན་ཆད་ཀྱི་ཆག་ཉམས་མ་བཤགས་པ་རྣམས་དམ་ཚིག་རལ་བར་བརྗོད་ལ། དེ་ཕན་ཆད་གསོར་མི་རུང་བར་བརྗོད་དོ། །རྡོ་རྗེ་ཉི་མ་དམ་ཚིག་བཀོད་པའི་རྒྱུད་ལས། སྤྱིར་ན་དམ་ཚིག་ཁྱད་པར་ལས། །དུས་ལས་ཁྱད་པར་ངེས་ཕྱེ་བ། །དམ་ལས་འགལ་ཞེས་ཉེས་བྱ་གང་། །ཞག་གིས་བར་མ་ཆོད་པ་ནི། །དམིགས་པའི་ཡུལ་ལ་བཤགས་བྱས་ནས། །དེས་ནི་སོར་ནི་ཆུད་པའོ། །ཉམས་ཞེས་ཟླ་བས་མ་ཆོད་པར། །འགྱོད་པ་དྲག་པོས་བཤགས་པའོ། །དམ་ལས་འདས་ན་ལོ་དག་གིས། །བར་དུ་མ་ཆོད་བཤགས་པས་སོ། །ལོ་ནི་གཉིས་ནས་གསུམ་དག་ལ། །དམ་ཚིག་རལ་བ་ཞེས་བྱ་བ། །མཆོག་ཏུ་དྲག་ན་གསོ་རུ་རུང་། །ལོ་གསུམ་དག་ལས་འདས་པ་ན། །དེ་ནས་གསོར་ཡང་མི་རུང་སྟེ། །གལ་ཏེ་བླངས་ན་གཉིས་ཀ་འཚིག །ངེས་པར་ས་སྤྱོད་སྡུག་བསྔལ་ལ། །རྒྱུན་དུ་སྤྱོད་པ་ཁོ་ནའོ། །ཞེས་སོ། །བསྐང་བའི་ཐབས་ཀྱང་དེ་ཉིད་ལས། འགལ་ན་ཚོགས་ཀྱི་འཁོར་ལོས་བཤགས། །ཉམས་ན་རང་གི་བདོག་པས་བསྐང་། །འདས་པ་བུ་དང་ཆུང་མ་དང་། །ཉེ་འཁོར་ལུས་དང་ངག་དག་དང་། །ཡིད་དང་བདོག་པར་བཅས་པས་བསྐང་། །རལ་བ་རང་གི་སྲོག་གིས་བསྐང་། །དེ་ལས་ཕྱིར་ཡང་གྱུར་པ་ན། །ཉམས་པ་ཆེན་པོ་ཞེས་བྱ་སྟེ། །གསོ་བར་རུང་བ་མ་ཡིན་ནོ། །ཞེས་སོ། །དེ་ལྟར་ཉམས་ཆག་གང་ལའང་ཚོགས་ཀྱི་འཁོར་ལོས་བཤགས་པ་དང་། སྐུ་གཟུགས་དང་གསུང་རབ་བཞེངས་པའི་དགེ་བས་སྦྱང་བ་དང་། ཕྱག་དང་བསྐོར་བ་དང་། སྔགས་དང་བཟླས་བརྗོད་དང་། བསྐྱེད་རྫོགས་ཟབ་མོའི་ཏིང་ངེ་འཛིན་བསྒོམས་པས་བཤགས་པ་དང་། སྒོ་གསུམ་གྱིས་དཀའ་བ་སྤྱད་(༨༨)ཅིང་གང་གིས་སྒོ་ནས་ཉམས་པ་དེ་གཙོ་བོར་སྦྱང་སྟེ། ལུས་ཀྱིས་ཉམས་ན་ལུས་གཙོ་བོར་ཕྱག་ལ་སོགས་པས་སྦྱངས། ངག་གིས་ཉམས་ཤིང་ངན་དུ་སྨྲས་པ་ལ་སོགས་ལ་བརྒྱ་འགྱུར་གྱིས་དེའི་ཡོན་ཏན་བརྗོད་ཅིང་བཟླས་བརྗོད་བྱ་བ་དང་། ཡིད་ཀྱིས་ལོག་པར་བལྟས་པ་ལ་སོགས་པ་ལ་ཡོན་ཏན་བསམ་པ་བརྒྱ་འགྱུར་གྱིས་ཡང་དག་པར་བལྟ་ཞིང་མཚན་བཅས་བསྐྱེད་པ། མཚན་མེད་རྫོགས་པ་བསྒོམས་པས་སྦྱང་སྟེ། ལུང་ལས། དྲང་པོར་འདུག་ལ་ཡང་དག་ལྟོས། །འདི་ནི་འགྱོད་ཚངས་མཆོག་ཡིན་ནོ། །ཞེས་པ་ལྟར་རོ། །དེ་ཡང་འགྱོད་པ་དང་གདུང་བ་དཀའ་སྤྱད་མངོན་དུ་སོང་བས། སྒྲིབ་པ་རགས་པ་རྣམས་དང་པོར་ཁོ་ཐག་ཆོད་པར་བཤགས་ལ། དེ་ནས་འགྱོད་པ་མེད་པར་སོར་ཆུད་པར་བྱེད་པ་ལ་དྲི་མ་ཕྲ་བ་ཆོས་ཉིད་སྟོང་པའི་རང་ངོས་སྦྱང་བར་བྱའོ། །ཁ་ཅིག་དང་པོ་ནས་སྟོང་པས་རྒྱས་འདེབས་པས་བྱ་བར་འདོད་པ་ནི་དེ་ལྟར་མ་ཡིན་ཏེ། གང་བསགས་པ་དེ་བློས་བསགས་པ་ཡིན་པས། བློས་སྦྱོང་བར་མ་བྱས་ན་ཡང་དག་པར་མི་འགྱུར་ཏེ། ཀུན་ནས་ཉོན་མོངས་པའི་སྒྲིབ་པ་རང་སར་གནས་པའི་ཕྱིར་རོ། །ཕྲ་བ་རང་བཞིན་ཤེས་པས་ཕྱིས་སྦྱང་སྟེ། ཤེས་སྒྲིབ་ཡིན་པའི་ཕྱིར་རོ། །དབང་པོ་མཆོག་གིས་དང་པོ་ནས་སྟོང་པར་སྦྱང་ངོ་། །ཞེས་པའང་བརྟག་དགོས་ཏེ། མཆོག་ཡིན་ན་དམ་ཉམས་པར་མི་བྱེད་དོ། །མ་ཡིན་པས་ཉམས་པའི་ཕྱིར་མཚན་བཅས་ཀྱི་དང་པོར་བཤགས། མཚན་མེད་ཀྱི་རྗེས་ལ་བཤགས་པ་ཁོ་ན་འཐད་དོ། །སྤྱིའི་གཉེན་པོར་ཡི་གེ་བརྒྱ་པ་ཁོ་ན་བསྔགས་ཏེ། དཔལ་རྡོ་རྗེ་སེམས་དཔས་དང་པོར་ཐུགས་བསྐྱེད་དུས། ང་ཡི་མིང་ཐོས་པ་ཐམས་ཅད་མཚམས་མེད་པ་དང་དམ་ཚིག་གི་སྒྲིབ་པ་ལས་ཐར་བར་གྱུར་ཅིག །ང་ཡང་དེའི་དྲུང་ན་འདུག་ནས་ཉེས་པ་སེལ་བར་ཤོག་ཅིག །ཅེས་པའི་སྨོན་ལམ་བཏབ་པའི་ཕྱིར་རོ། །ན་རག་གི་སྐོང་གི་ཆོ་ག་བྱ་བ་ཡང་བསྔགས་པའི་ཕྱིར་ཉ་སྟོང་གཉིས་ལ་དགེ་བ་གསོ་ཞིང་བསྐང་། སྡིག་པ་སྦྱང་ཞིང་སྤང་བའི་ཕྱིར། ཉ་ཤི་གསོ་སྦྱོང་སྤང་སྐོང་དུ་བྱའོ། །ཉ་བཅོ་ལྔའོ། །ཤི་བ་ཟླ་བ་མི་མངོན་པ་གནམ་སྟོང་ངོ་། །ཆོ་ག་རྒྱ་ཆེན་པོ་མ་ཤེས་ཀྱང་། དཀོན་མཆོག་གི་དྲུང་དུ་མཆོད་པ་ཅི་འབྱོར་དང་། ཁྱད་པར་དུ་མར་མེ་ཅི་འགྲུབ་ཕུལ་ལ། རྩ་བའི་(༨༩)བླ་མ་དང་ཞི་ཁྲོ་རབ་འབྱམས་ཀྱི་ལྷ་ཚོགས་མཁའ་འགྲོ་དམ་ཅན་རྒྱ་མཚོ་དང་བཅས་པ་རང་བཞིན་གྱི་གནས་ནས་བྱོན་ནས་བཤགས་པའི་རྟེན་དུ་བཞུགས་པར་བསམས་ལ། དངོས་དང་ཡིད་ཀྱིས་མཆོད་ཅིང་། ན་རག་སྐོང་བཤགས་ཀྱི་ཕྱག་ཀྱང་མང་དུ་བཙལ་ཞིང་། ཉེས་པ་འགྱོད་ཚངས་སུ་གསོལ་བས། སྙིང་ཁོང་རུས་པའི་གཏིང་ནས་ངེས་ཤེས་དང་བཅས་པས་བཤགས་སོ། །སྡིག་པ་དང་ཉམས་ཆག་དག་པའི་རྟགས་དངོས་སུ་ཤེས་པ་བདེ་ལ་དྭངས་པ་དང་། མར་མེ་གསལ་བ་དང་། ནམ་མཁའ་དྭངས་འབྱུང་ངོ་། །རྨི་ལམ་དུ་བླ་མ་མཁའ་འགྲོས་ལུང་སྟོན་པའམ། ཆོས་གསུང་པའམ། མཉེས་པའམ། ཉི་ཟླ་འཆར་བའམ། གོས་དཀར་པོ་གྱོན་པ་ལ་སོགས་རྨིའོ། །ཞག་བདུན་དུ་སྦྱངས་ན་དག་པའི་མཚན་མ་འབྱུང་བར་ངེས་སོ། །

གཞན་ཡེ་ཤེས་རྔམ་པ་གློག་གི་ཕྲེང་བའི་རྒྱུད་ལས། དམ་ཚིག་ཉམས་པར་གྱུར་པ་ན། །མགོན་བཙུན་མཉམ་པའི་དོན་རྟོགས་ན། །དེ་ཉིད་བསྐངས་པའི་གནས་སུ་འགྱུར། །བླ་མ་སྤུན་ལ་སྨད་གྱུར་ན། །ཚེ་འདི་ཉིད་ལ་མཉེས་བྱས་ཏེ། །མཐོལ་བཤགས་དྲག་པོས་འགྱོད་བྱས་ན། །དེ་ནི་བསྐངས་པའི་ལས་སུ་འགྱུར། །གལ་ཏེ་བདག་གིས་བླ་མ་སྤུན། །མ་བསྐངས་བར་དུ་ཚེ་འཕོས་ན། །དེ་ནི་བསྐང་བའི་ཚད་ལས་འདས། །གསུང་གི་ཐ་ཚིག་རལ་གྱུར་ན། །རྡོ་རྗེ་ཆོས་སུ་བདག་བསྒོམས་ཏེ། །ཐ་ཚིག་གང་བཀླག་འབུམ་འབུམ་འདོན། །ཐུགས་ཀྱི་དམ་ཚིག་རལ་གྱུར་ན། །རྡོ་རྗེ་སེམས་དཔའ་བདག་བསྒོམས་ན། །ལོ་གསུམ་བར་དུ་མི་སྨྲ་བར། །བསམ་གཏན་སྦྱོར་བ་རབ་ཏུ་བྱ། །ཡན་ལག་དམ་ཚིག་རལ་གྱུར་ན། །སོ་སོ་རང་རང་རིགས་ཀྱིས་བསྐང་། །ཞེས་པའི་ཐབས་ལྟར་ཡང་བསླབ་པར་བྱ། དེ་ལྟར་བཤད་པའི་དམ་ཚིག་ལེགས་པར་བསྲུངས་ན། ཚེ་འདི་ཉིད་དུ་ལེགས་པ་ཐམས་ཅད་འགྲུབ་པར་འགྱུར་ཏེ། རྡོ་རྗེ་ཉི་མ་ལས། རྩ་བ་གསུམ་ལ་ངེས་ཕྱེ་བ། །དགུ་ཡི་རྣམ་པར་ཕྱེ་བ་ལས། །ཉི་ཤུ་བདུན་གྱིས་དབྱེ་བ་ཡིས། །དམ་ཚིག་རྣམ་པར་འདུས་ཏེ་ཕྱེ། །འདི་ལས་འགལ་བར་མ་བྱས་ན། །རྡོ་རྗེ་འཛིན་པར་རྫོགས་སངས་རྒྱས། །ཚེ་འདི་ཉིད་ལ་ཐོབ་པར་ངེས། །དེས་ན་སྔགས་པས་འབད་པ་དང་། །ཤེས་བཞིན་གྱིས་ནི་ཟིན་པར་བྱ། །ཞེས་སོ། །ཁྱད་པར་དུ་དམ་(༩༠)ཚིག་གི་རྩ་བ་བླ་མ་དང་རྡོ་རྗེ་སྤུན་སྲིང་ཡིན་པས། ནམ་ཡང་བག་མེད་པ་དང་། མ་གུས་པ་དང་། ཐུགས་དང་འགལ་བར་མི་བྱ་བར། མཆོག་ཏུ་གུས་པར་བྱ་ཞིང་། བྱ་བ་ཐམས་ཅད་ལ་རྗེས་སུ་གནང་བར་ཞུ་བ་དང་། ཟས་གོས་ནོར་རྫས་ལ་སོགས་པའི་ཕུད་ཀྱིས་མཆོད་པ་དང་། འདོད་པ་མེད་ཀྱང་དབུལ་བ་དང་། ས་ཕྱོགས་བརྒལ་ཡང་དེའི་ཕྱོགས་ལ་དེངས་པ་རེ་བྱས་ནས། ཡིད་ཀྱིས་དབུལ་བ་དང་། རང་གིས་བྱ་བ་གང་བྱེད་ཀྱང་བླ་མའི་ཞབས་ཏོག་ཡིན་སྙམ་པ་བྱ་བ་དང་། འགྲོ་འདུག་ལ་སོགས་པའི་སྤྱོད་ལམ་གང་བྱེད་བླ་མས་གསུང་བྱོན་པ་ཡིན་པས། ཞབས་ཏོག་བསྒྲུབ་སྙམ་པ་ལ་སོགས་པས་སྤྱད་ན། བསོད་ནམས་དང་ཡེ་ཤེས་ཀྱི་ཚོགས་གཉིས་ལྷུན་གྲུབ་ཏུ་རྫོགས་པ་དང་། ཅི་བསམ་པ་ཐམས་ཅད་འགྲུབ་པ་དང་། བླ་མའི་བྱིན་རླབས་དངོས་སུ་འཇུག་པ་ལ་སོགས་པ་ཡོན་ཏན་དཔག་ཏུ་མེད་པ་ཐོབ་སྟེ། གསང་སྔགས་ཀྱི་ལམ་དང་འཆི་བའི་ཡོན་ཏན་ཐམས་ཅད་བླ་མ་ཁོ་ན་ལས་གསུངས་པ་དེའི་ཕྱིར་རོ། །

དམ་ཚིག་རྣམ་པར་བཀོད་པ་ལས། དངོས་གྲུབ་མཆོག་ཏུ་འདོད་པའི་མིས། །བླ་མས་ཇི་སྐད་གསུང་བཞིན་བསྒྲུབ། །བླ་མ་མཆོག་གིས་བཀའ་སྩལ་པ། །གལ་ཏེ་ཉེས་པའི་སྐྱོན་རིག་ཀྱང་། །ཇི་སྐད་སྨྲས་པ་དེ་བཞིན་བྱ། །དེ་ནི་བླ་མའི་བྱ་བ་ལ། །ལུས་ཀྱི་སྡུག་བསྔལ་མཆོག་གྱུར་ཀྱང་། །རང་གི་ནུས་པས་འབད་དེ་བྱ། །བླ་མའི་ཐུགས་ནི་སྐད་ཅིག་ཀྱང་། །དཀྲུགས་པར་བྱ་བ་མ་ཡིན་ནོ། །བླ་མའི་ཟས་དང་ནོར་རྣམས་ལ། །རང་གི་སྲོག་བས་ཕངས་པ་བཞིན། །རྣལ་འབྱོར་པས་ནི་རྟག་ཏུ་བསྲུང་། །གལ་ཏེ་བླ་མའི་ཞིང་ཁམས་སུ། །ཆོས་བཤད་དབང་བསྐུར་རབ་གནས་དང་། །བསམ་གཏན་བསྒོམ་པར་བྱ་བ་རྣམས། །རྗེས་ལ་མ་གནང་བར་མི་བྱའོ། །མདོར་ན་ལུས་དང་ངག་ཡིད་ཀྱིས། །བྱ་བ་རྣམ་པ་གང་བྱེད་ཀྱང་། །བླ་མར་མ་ཞུས་མ་གནང་བར། །ཅུང་ཟད་ཙམ་ཡང་མི་བྱ་འོ། །གཞན་ཡང་དགེ་བའི་ལས་གང་ཡང་། །བླ་མ་ལ་ཞུས་བརྩམ་པར་བྱ། །རྣལ་འབྱོར་སྤྱོད་ལམ་ཐམས་ཅད་དུ། །བླ་མ་མཆོག་དང་འབྲལ་མི་བྱ། །དུས་གསུམ་ཟས་ནི་ནམ་ཟ་ཡང་། །སུམ་ཆར་བཅད་པའི་ཕུད་རྣམས་ཀྱིས། །བླ་མ་མཆོག་ལ་བསྔོས་ཏེ་དབུལ། །མདོར་ན་བདག་གི་(༩༡)བསམ་པ་ནི། །རྣམ་པར་དག་པས་ཟོལ་མེད་པས། །བླ་མའི་ཕྱོགས་སུ་དམིགས་པར་བྱ། །རྣམ་དག་མཆོག་ཏུ་དགེ་བ་སྟེ། །ལེགས་པའི་ཡོན་ཏན་ཐམས་ཅད་ཐོབ། །དེས་ན་བླ་མ་མཉེས་པར་བྱའོ། །ཞེས་སོ། །ཁྱད་པར་གྱི་དམ་ཚིག་བསྟན་ཟིན་ཏོ། །

བླ་ན་མེད་པའི་དམ་ཚིག་ཆེན་པོ་བཞི་ནི། རྫོགས་པ་ཆེན་པོ་ཡེ་གྲོལ་ལྷུན་གྱིས་གྲུབ་པའི་དམ་ཚིག་སྟེ། མེད་པ། ཕྱལ་པ། ལྷུན་གྲུབ་གཅིག་པུའི་དམ་ཚིག་སྟེ། རིན་ཆེན་སྤུངས་པ་ལས། མེད་པ་ཉིད་དང་ཕྱལ་པ་དང་། །ལྷུན་གྱིས་གྲུབ་དང་གཅིག་པུ་པ། །ཞེས་སོ། །དངོས་པོ་མེད་པ་ནི། ཆོས་ཐམས་ཅད་དངོས་པོ་དང་མཚན་མ་མེད་པ། ནམ་མཁའ་ལྟ་བུའི་རང་བཞིན་དུ་རྣམ་པར་དག་པ་སྟེ། དེའི་དམ་ཚིག་ཏུ་རྣལ་འབྱོར་པ་གང་ལའང་བདེན་ཞེན་དང་གཟུང་འཛིན་མེད་པའི་ངང་ལས་མི་འདའ་བར་བྱའོ། །ཕྱལ་པ་ནི། ཆོས་ཐམས་ཅད་ནི་སུས་ཀྱང་མ་བཅིངས། ཅིས་ཀྱང་མ་བཅོས། རང་བྱུང་ཡེ་ཤེས་ཀྱི་ངང་ནས་ཕྱལ་པ་བར་མེད་དག་པར་རང་གནས་པ་སྟེ། དེའི་དམ་ཚིག་ཏུ་རྣལ་འབྱོར་པས་རིག་པ་སྟོང་གསལ་ཕྱལ་པ་ཀློང་ཡངས་པའི་ངང་ལ་མཐར་འཛིན་གྱི་ར་བ་མེད་པར་རྒྱ་ཡན་ཡོངས་གྲོལ་ཆེན་པོར་ཕྱམ་བརྡལ་ལོ། །ལྷུན་གྲུབ་ནི་ཆོས་ཐམས་ཅད་ཡེ་ནས་རིག་པའི་ངང་དུ་རང་ཤར་ལྷུན་གྲུབ་ཆེན་པོར་བྱུང་ཞིང་སྣང་ལ། རིག་པ་ཆོས་སྐུ་གསལ་དག་ཏུ་ཡེ་ནས་གྲུབ་པས་རེ་དོགས་གཞི་དག་སྟོང་གསལ་དུ་གནས་ཏེ། དེའི་དམ་ཚིག་ཏུ་རྣལ་འབྱོར་པས་ཆོས་གང་ལའང་སྤང་བླངས་རེ་དོགས་དང་བྲལ་བས་རང་རིག་ཆོས་སྐུ་ལྷུན་གྲུབ་ཏུ་ཐག་ཆོད་པའི་ངང་དང་མི་འབྲལ་བར་རང་དངས། རང་མལ། རང་གསལ་དུ་འཇོག་པའོ། །གཅིག་པུ་ནི། གང་སྣང་ཡང་རང་སྣང་གཅིག་པུ། གང་ཤར་ཡང་རང་ཤར་གཅིག་པུ། གང་འགྱུས་ཀྱང་རང་འགྱུས་གཅིག་པུ། གང་གནས་ཀྱང་རང་གནས་གཅིག་པུ། གང་གྲོལ་ཡང་རང་གྲོལ་གཅིག་པུ། རང་བྱུང་ཡེ་ཤེས་ཀྱི་ངང་དང་། རོལ་པ་དང་། རྒྱན་དང་རྩལ་ལས་གཞན་དུ་མ་གྲུབ་པའོ། །དེའི་དམ་ཚིག་ཏུ་རྣལ་འབྱོར་པས་ལུས་ཅིར་སྣང་རིག་པའི་རང་སྣང་། རང་རྩལ། རང་རྒྱན། རང་གྲོལ་དུ་ཤེས་ནས། སྣང་བ་རྒྱ་ཡན་ལ་རིག་པའི་རྗེས་འཛིན་མི་བྱ་བར་སྣང་སྟོང་རང་སྣང་གཅིག་པུར་ཐག་བཅད་དེ་གཟུང་བའི་ཡུལ་དུ་སྒྲོ་མི་གདགས། སེམས་ཉིད་ཅི་འཆར་ཅི་རྟོགས་ཅི་འགྱུས་ཀྱང་། རང་ཤར་རིས་མེད་གཅིག་པུར་རྟོགས་པས་འཛིན་པའི་སྒྲོག་གིས་མི་འཆིང་བར་གཟུང་འཛིན་ལུས་སེམས་གཉིས་མེད་རིག་པའི་རང་བབས་གཅིག་པུར་ལ་བཟླ་བ་ལས་མི་འདའ་བར་བྱའོ། །འདི་ལྟ་བུའི་དམ་ཚིག་ཆེན་པོ་བཞི་ལས་མ་འདས་པར་བསྲུང་ན། གཞི་ཆོས་ཉིད་ཀྱི་དབྱིངས་ནས་རིག་པ་ཡེ་ཤེས་ཀྱི་ཀློང་རྡོལ་བས། སྲིད་གསུམ་ཀ་དག་ཆེན་པོའི་(༩༢)དགོངས་པར་ཡེ་ནས་གནས་པ་སྟེ། རང་ངོ་ཤེས་པས་རང་མལ་ཆོས་སྐུའི་ངང་ལས་མ་གཡོས་པར། འཁོར་འདས་རིག་པའི་རྩ་བ་ཆོད་དོ། །མ་རིག་ཡེ་ཤེས་སུ་དག་སངས། འཁོར་བ་མྱང་འདས་སུ་རང་གྲོལ། འཁྲུལ་པ་ཆོས་ཉིད་དུ་མཐའ་དག །སྡུག་བསྔལ་བདེ་ཆེན་དུ་ཡེ་གྲོལ། འགྲོ་དྲུག་ཆོས་སྐུར་རྒྱས་གདབ། མཐོ་དམན་ཀློང་ཆེན་དུ་ཁོད་སྙོམས། གཞི་ཕྱམ་ཕྱམ། དོག་མེར་མེར། ཡངས་པ། ཆེ་བ། ཀུན་བཟང་དབྱེ་བ་མེད་པའི་ས་ལ་ལྷུན་གྱིས་གནས་པ་ཞེས་བྱའོ། །

དམ་ཚིག་འདི་ནི་རྨད་པོ་ཆེ། །མཁའ་ལྟར་རྣམ་དག་ཡངས་པ་སྟེ། །རིན་ཆེན་རྒྱ་མཚོ་ཆུ་དངས་བཞིན། །མི་འགྱུར་ལྷུན་པོ་རབ་ཏུ་བརྟན། །ཉི་བཞིན་འོད་གསལ་གཅིག་པུ་ཉིད། །ཡོངས་སུ་ཆེ་འོ་ཆེས་ཆེན་པོ། །རྡོ་རྗེ་རྩེ་མོ་རིན་ཆེན་དབྱིངས། །ནུབ་པ་མེད་པའི་དཔུང་རྒྱན་ཏེ། །འཆར་ནུབ་རྙོག་པ་མེད་པའི་མཚོ། །གཏིང་གསལ་ཡངས་པ་ཆེན་པོའི་ཀློང་། །ངོ་མཚར་རྨད་བྱུང་ཨེ་མ་ཧོ། །སྒྲ་དང་བློ་བྲལ་ཟབ་པ་སྟེ། །ཚིག་དང་བརྗོད་བྲལ་ཞི་བ་ཉིད། །བསམ་དང་བྲལ་བའི་ཡི་གེ་ལགས། །ངོ་མཚར་རྨད་བྱུང་རོལ་པ་འདི། །སྔོན་མེད་ཕྱིས་མེད་གདོད་ནས་མེད། །སྒྲ་མེད་སེམས་ཀྱི་སྤྱོད་ཡུལ་ཞི། །བསམ་མེད་རིག་པ་རང་སྣང་ཉིད། །འགག་མེད་རང་ཤར་དག་པ་སྟེ། །སྲིད་མེད་མྱ་ངན་འདས་པ་མེད། །ཡངས་པ་ཕྱལ་པ་རྣམ་དག་པ། །ལྷུན་གྲུབ་གཅིག་པུ་རང་གསལ་ཉིད། །ཡེ་ནས་མངོན་པར་འདུས་མ་བྱས། །ཐམས་ཅད་ནམ་མཁའི་དཀྱིལ་ཡངས་སོ། །མེད་པར་རང་སྣང་རིག་པ་ལ། །ཕྱལ་པ་ཕྱམ་ཕྱལ་བར་ཡངས་པ། །ལྷུན་གྲུབ་རང་བྱུང་ཟང་ཐལ་ཉིད། །གཅིག་པུ་ཆོས་ཀུན་སྙིང་པོ་གནས། །འདི་ནི་ངོ་མཚར་རྨད་བྱུང་ཉིད། །དེ་རིང་མགོན་པོ་དྲི་མེད་མཐོང་། །ད་ནི་སྨོན་པ་རང་ཞི་བས། །གཞན་དུ་དྲི་བར་མི་བྱའོ། །གང་དུ་བཙལ་ཡང་མི་རྙེད་ལ། །ཅིས་ཀྱང་མཚོན་པར་མི་ནུས་ལ། །རང་ལ་ཡོད་པའི་རིན་ཆེན་གཏེར། །བསལ་བཞག་མེད་པའི་ཟང་ཐལ་ཉིད། །འཁོར་འདས་ཟད་པའི་སར་མཐོང་བས། །ཐམས་ཅད་རང་སྣང་རྒྱ་ཡན་པ། །རྒྱ་གྲོལ་རང་གྲོལ་ཕྱམ་གྲོལ་ཅིག །ཡེ་ནས་འདུག་སྟེ་སུས་མ་ཚོར། །བྱར་མེད་ཆོས་ཟད་བློ་འདས་ཤིག །ཡེ་ནས་འདུག་སྟེ་སུས་མ་ཚོར། །བར་(༩༣)མེད་ཕྱལ་པ་ཧར་སོང་ཞིག །ཡེ་ནས་འདུག་སྟེ་སུས་མ་ཚོར། །མ་བྱས་ཆོས་སྐུ་ལྷུན་གྲུབ་ཅིག །ཡེ་ནས་འདུག་སྟེ་སུས་མ་ཚོར། །འཁོར་འདས་རིག་པ་གཅིག་པུ་ཉིད། །ཡེ་ནས་འདུག་སྟེ་སུས་མ་ཚོར། །ཆོས་ཀུན་བྱར་མེད་བྱས་ཟིན་དུ། །ཡེ་ནས་འདུག་སྟེ་སུས་མ་ཚོར། །འདི་ཀུན་རང་བྱུང་ཨེ་མ་ཧོ། །དམ་ཚིག་ཆེན་པོ་ཨ་ལ་ལ། །ཀློང་ཆེན་རབ་འབྱམས་ཀློང་རེ་ཡངས། །དྲི་མེད་འོད་ཟེར་འོད་རེ་གསལ། །སྣ་ཚོགས་རང་གྲོལ་རང་རེ་གྲོལ། །རྟོགས་པ་ཆུ་བོ་ཀློང་ཆེན་ཡིན། །དགོངས་པ་དྲི་མེད་འོད་གསལ་ཡིན། །སྣང་སྲིད་སྣ་ཚོགས་རང་གྲོལ་ཡིན། །བདག་གི་མིང་གིས་ཀུན་ལ་ཁྱབ། །ཀུན་གྱི་ཆོས་ཉིད་བདག་ལ་ཁྱབ། །ཐམས་ཅད་དབྱིངས་ཅིག་རྫོགས་པ་ཆེ། །དམ་ཚིག་ཆེན་པོའི་ངང་དུ་རྫོགས། །ཞེས་བྱ་བ་ནི་དམ་ཚིག་རྡོ་རྗེའི་གླུས་བསྐུལ་བ་སྟེ་རྟོགས་པ་རང་སྣང་ངེས་པའི་དོན་དགོངས་པ་ཆོས་ཉིད་ལས་མི་འདའ་བར་བསྟན་པའོ། །

རང་བཞིན་རྫོགས་པ་ཆེན་པོའི་རྣལ་འབྱོར་ཀློང་ཡངས་ལ། ཐབས་རྒྱ་ཆེ་བས་གང་ཡང་གྲོགས་སུ་འཆར་བར་བྱ་སྟེ། དེའི་ཕྱིར་དམ་ཚིག་ལས་མི་འདའ་བར་བསླབ་པ་ནི་སྙིང་པོ་དོན་གྱི་དགོངས་པ་སྟེ། དམ་ཚིག་རྩ་བ་རང་གི་སེམས་སུ་ཤེས་པ་དང་། དེ་ཡི་འཕེན་པ་བླ་མས་ཤེས་པ་དང་། དམ་པ་གསུམ་ལ་གུས་པ་བསྐྱེད་པ་དང་། རྡོ་རྗེ་སྤུན་སྲིང་མཆོག་ཏུ་བཀུར་བ་དང་། རྟག་ཏུ་དབེན་པར་གནས་པས་སྒྲུབ་པ་དང་། བླ་མ་མཆོད་ཅིང་དབང་རྫོགས་ཞུ་བ་དང་། ཚོགས་དང་གཏོར་མས་སྲུང་མ་མཆོད་པ་རྣམས་ནི། ལམ་གྱི་གྲོགས་སུ་རྣལ་འབྱོར་པ་རྣམས་ཀྱིས་བརྩོན་པར་བྱས་པ་ལས། ཡོན་ཏན་གྱི་སྒོ་རབ་ཏུ་བཟང་པོ་ཐོབ་པར་འགྱུར་ཏེ། རྡོ་རྗེ་སྙིང་པོ་སྲ་བ་འབྱུང་གནས་ཀྱི་རྒྱུད་ལས། དམ་ཚིག་སྡོམ་པ་རྣམས་བཤད་པ། །ཀུན་ཀྱང་རང་གི་སེམས་ལས་སོ། །དེ་ཡི་འཕེན་པ་བླ་མས་ཤེས། །དེ་ཕྱིར་སེམས་ལ་འདྲིས་པའི་མིས། །སངས་རྒྱས་ཞིང་ཁམས་མཐོང་བ་དང་། །སྐུ་གསུམ་ཚད་དུ་འབྱོངས་པ་དང་། །སངས་རྒྱས་ཡོན་ཏན་མངོན་པར་འགྲུབ། །བླ་མ་རྟག་ཏུ་བསྟེན་པའི་མིས། །མཁའ་འགྲོའི་གཟུགས་རྣམས་མཐོང་བ་དང་། །དེ་ཡི་བྱིན་རླབས་འཇུག་པ་དང་། །དུས་གསུམ་ལུང་ཡང་སྟོན་པ་དང་། །སྐྱེ་ཤི་གཉིས་(༩༤)ལ་དབང་ཐོབ་འགྱུར། །གྲོགས་ལ་བརྩེ་གདུང་ལྡན་པའི་མིས། །འགྲོ་བ་ཐམས་ཅད་འདུལ་བ་དང་། །ཀུན་གྱིས་སྙན་པར་གྲགས་པ་དང་། །གཟུགས་ཅན་ཀུན་གྱིས་བྱམས་པ་དང་། །རྟག་ཏུ་དམ་ཚིག་ལ་གནས་དང་། །མཁའ་འགྲོ་མ་རྣམས་འདུ་བ་དང་། །མ་བསྒྲུབས་དངོས་གྲུབ་འབྱུང་བ་དང་། །ངག་ལ་ནུས་པ་འབར་བ་དང་། །དེ་བཞིན་མཆོག་དང་ཐུན་མོང་གི། །དངོས་གྲུབ་ཐམས་ཅད་རྫོགས་པར་འགྲུབ། །རྟག་ཏུ་དགོན་པར་གནས་པའི་མིས། །རླུང་སེམས་ཚད་རྣམས་ཟིན་པ་དང་། །སྣང་བ་གྲོགས་སུ་འཆར་བ་དང་། །རང་གི་སེམས་ལ་དབང་ཐོབ་འགྱུར། །བླ་མ་བསྙེན་བསྐུར་བྱས་པའི་མིས། །ལོངས་སྤྱོད་མཆོག་དང་ལྡན་པ་དང་། །འཁོར་འདབ་རྒྱས་ཤིང་བསོད་ནམས་ལྡན། །འགྲོ་བ་ཡོངས་ལས་རྒྱལ་བར་འགྱུར། །རྟག་ཏུ་དབང་རྫོགས་ཐོབ་པའི་མིས། །འགྲོ་བའི་གཙོ་བོར་གྱུར་པ་དང་། །ཀུན་གྱིས་མཐོང་ན་དགའ་བ་དང་། །ཡེ་ཤེས་མངོན་དུ་འབྱོངས་པ་དང་། །སངས་རྒྱས་རྣམས་ཀྱིས་བྱིན་བརླབ་འགྱུར། །རྟག་ཏུ་གཏོར་མའི་ལས་བྱེད་པས། །བསོད་ནམས་ཚོགས་རྣམས་རྫོགས་པ་དང་། །བར་ཆད་མེད་ཅིང་ལས་རྣམས་འགྲུབ། །འདོད་པ་ཕུན་སུམ་ཚོགས་པ་དང་། །མཁའ་འགྲོ་བྲན་བཞིན་འཁོལ་བར་འགྱུར། །ཞེས་གསུངས་སོ། །

འདི་དག་དྲང་དོན་ཕན་ཡོན་བསྒྲགས་པ་ཙམ་མ་ཡིན་པར་ཡིད་ཆེས་པས་སྤྱད་ན་འབྲས་བུ་འདི་ཉིད་དུ་ངེས་པར་འབྱིན་ཏེ། བླ་མ་གོང་མ་རྣམས་ཀྱི་གསུང་དང་། རང་གི་སྟེང་དུའང་མྱངས་པས་གྲུབ་པའི་གཏན་ཚིགས་ཡིད་ཆེས་པས་མངོན་དུ་གྱུར་པ་ཡོད་དེ། ཆོས་ཀྱི་རྗེ་དཔལ་མགོན་བླ་མ་དམ་པ་རིན་པོ་ཆེ་ཀུ་མ་རཱ་ཛ་ལ། དད་པས་ཇ་སུན་གཅིག་དྲངས་པས་ད་ལྟ་ལོངས་སྤྱོད་དུ་དངོས་སུ་བྱུང་བ་དང་། གོས་ཟུང་གཅིག་ཕུལ་བས་ད་ལྟ་དངོས་སུ་སྨིན་པ་དང་། དུས་གཅིག་ན་གཞན་དུ་སྒྲུབ་པ་ལོ་གཅིག་བྱས་པ་བས། དད་པ་ཐུན་མོང་མ་ཡིན་པ་གཅིག་སྐྱེས་པའི་སྐད་ཅིག་ལ་རང་དལ་གྱི་བསམ་གཏན་ཤར་ནས། ད་ལྟའི་བར་དུ་འགྲོ་ཉལ་འདུག་སྡོད་ཐམས་ཅད་དུ་དེ་དང་མི་འབྲལ་བ་ཐོབ་པ་ལ་སོགས་པ་ངོ་མཚར་ཅན་མང་པོ་མྱངས་པས་(༩༥)ཡིད་ཆེས་པར་བྱུང་བས་འགྲུབ་པའོ། །ཕྱི་རབས་རྗེས་སུ་འཇུག་པ་རྣམས་ཀྱིས་ཀྱང་། སྤྱིར་དམ་ཚིག་ཐམས་ཅད་ལ་ཡིད་ཆེས་པས་མིག་བཞིན་བསྲུང་ལ་ཁྱད་པར་བླ་མ་མཆེད་ལྕམ་གྱི་དམ་ཚིག་སྙིང་དང་འདྲ་བར་བསྲུང་བ་ལ་གདམས་ཏེ། བསྲུངས་ན་དངོས་སུ་ཕན་ཡོན་ཐོབ་ལ། ཉམས་ན་དངོས་སུ་ཉེས་དམིགས་ལོ་མི་འགྱངས་པར་ཐོབ་བོ། །འདི་ཡང་མྱངས་པས་ཡིད་ཆེས་ཏེ། འདྲེས་པའི་མཆེད་ལྕམ་ལ་མ་གུས་པའི་ཚིག་བརྗོད་པས། འགྱོད་ཚངས་བྱས་ཀྱང་ད་ལྟའི་བར་རང་གིས་གུས་པར་བྱས་ཀྱང་གྲོགས་ཀྱི་བཤེས་གཉེན་དག་མ་ཉེས་པའི་སྒྲོ་སྐུར་དང་། གནོད་པ་དངོས་སུ་སྒྲུབ་པར་མཐོང་བ་རྒྱུད་ཐོག་ཏུ་བབས་པས་ཤེས་སོ། །དེའི་ཕྱིར་གསང་སྔགས་ཐམས་ཅད་ཀྱི་རྩ་བ་བླ་མ་ལ་གུས་ཤིང་མཆེད་ལྕམ་ལ་བརྩེ་བས་དམ་ཚིག་གཙང་མར་བསྲུང་བ་ནི་འདི་ཁོ་ན་ལ་ཐུག་པར་གསུངས་ཀྱང་གསུངས། ཡིད་ཀྱང་ཆེས་པས་ཕྱི་རབས་ནའང་དེ་ཁོ་ན་བཞིན་ཐུགས་ཉམས་ལ་བཞེས་ནས་ཕྱག་བཞེས་ལ་ཐེབས་པར་མཛད་པར་ཞུ་ཞེས་ཐལ་མོ་སྦྱར་བ་ལགས་སོ། །དེ་སྐད་དུའང་དམ་ཚིག་རྣམ་པར་བཀོད་པའི་རྒྱུད་ལས། མཆོག་ཏུ་དངོས་གྲུབ་འདོད་པས་ནི། །བླ་མ་བསླུ་བར་མི་བྱ་ཞིང་། །མཆེད་ལ་བརྩེ་གདུང་རྒྱུན་མི་འཆད། །ཅེས་པ་དང་། ཐལ་འགྱུར་ལས། དངོས་གྲུབ་འདོད་པའི་དད་པ་ཅན། །དངོས་གྲུབ་བླ་མ་མཉེས་ལས་འབྱུང་། །ཞེས་གསུངས་སོ། །

ཚུལ་འདི་བླ་མེད་ཐེག་པའི་ལམ་བཟང་སྟེ། །འབྲས་བུ་མངོན་འབྱིན་ད་ལྟ་ངེས་པའི་གནད། །གསང་སྔགས་འདུལ་བ་ཤིན་ཏུ་ཟབ་མོ་སྟེ། །དད་ལྡན་རྣམས་ཀྱིས་མིག་བཞིན་གཅེས་སྤྲས་བྱ། །ཁྱད་པར་མཆོག་གསང་རྫོགས་པ་ཆེན་པོ་ལས། །རང་རེའི་བརྒྱུད་པ་དམ་ཚིག་རྣམ་པར་དག །དེ་བས་སེལ་མེད་སྙིང་པོ་བྱ་བ་གཅེས། །དེ་ཕྱིར་དེ་དོན་གསང་བའི་དེབས་འདི་བཀོད། །རྡོ་རྗེ་སློབ་དཔོན་སློབ་མ་མཚུངས་པ་དག །དམ་ཚིག་གཅིག་པས་ཤིན་ཏུ་དག་པ་གཅེས། །མ་དག་མཛོ་སྦྲེལ་གཡང་ལ་ལྷུངས་པ་བཞིན། །དག་པ་ཁྱུང་ཆེན་གནམ་ལ་ལྡིང་བ་བཞིན། །ཆོས་སྐུའི་མཁའ་ལ་ཚེ་གཅིག་ལུས་འདི་འགྲོ། །ཀུན་གྱིས་བཀུར་ཞིང་བཞེད་དོན་འགྲུབ་པ་ལགས། །(༩༦)དེ་སྐད་བཀོད་པའི་དགེ་བས་འགྲོ་བ་ཀུན། །ལྷུན་གྲུབ་ས་ལ་ཀུན་ཏུ་བཟང་པོ་ཤོག །

དམ་ཚིག་གསུམ་བཀོད་ཅེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་ནགས་ནང་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཐུན་མོང་གི་སྔོན་འགྲོ་རིན་པོ་ཆེའི་པྲ་ཁྲིད།

༄༅། །ཟབ་མོ་ཡང་ཏིག་ལས། ཐུན་མོང་གི་སྔོན་འགྲོ་རིན་པོ་ཆེའི་པྲ་ཁྲིད་བཞུགས་སོ། །

༄༅། བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །མཁྱེན་པའི་ཡེ་ཤེས་བརྩེ་བའི་ཐུགས་རྗེ་ཅན། །མཛད་པའི་ཕྲིན་ལས་སྐྱེ་དགུ་ཀུན་གྱི་དཔལ། །དགོངས་པ་བརྡ་དང་སྙན་བརྒྱུད་རིན་ཆེན་ལ། །དད་བརྒྱའི་འདབ་སྟོང་གཡོ་བས་ཕྱག་འཚལ་ལོ། །སངས་རྒྱས་རྣམས་ཀྱི་བཀའ་གསང་རྒྱ་ཆེ་ལས། །ཀུན་གྱི་རྩེ་མོ་གསང་བ་བླ་ན་མེད། །དེ་ཡི་ངེས་དོན་ཟངས་ཀྱི་ཡི་གེ་ལས། །སེམས་སྦྱོང་དོན་ཁྲིད་སྙིང་པོའི་ཡང་ཞུན་བྲི། །

འདིར་ཐེག་པ་ཀུན་གྱི་མཐར་ཐུག །གསང་བ་བླ་ན་མེད་པའི་སྐོར་ལས། ཐུན་མོང་གི་སྔོན་འགྲོར་ངེས་པའི་དང་པོ་བླ་མའི་རྣལ་འབྱོར་ལ་སེམས་སྦྱོང་བ་ནི། སྐྱབས་སུ་འགྲོ་བ་དང་སེམས་བསྐྱེད་ནས། རང་ཉིད་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་དར་དང་རིན་པོ་ཆེས་བརྒྱན་པའི་སྤྱི་བོར་པདྨ་དང་ཉི་ཟླའི་སྟེང་དུ། རྩ་བའི་བླ་མ་ལ་བརྒྱུད་པའི་བླ་མ་རྣམས་དབྱེར་མེད་དུ་བཞུགས་པའི་མཐའ་སྐོར་དུ། སངས་རྒྱས་དང་བྱང་ཆུབ་སེམས་དཔའ། ཡི་དམ་མཁའ་འགྲོའི་སྤྲིན་ཕུང་དང་བཅས་པ་ནམ་མཁའ་གང་བར་བསམས་ལ། ཡིད་ཀྱིས་ཕྱག་འཚལ་དང་མཆོད་པ་བྱས་པས། སྐུའི་ཆ་ཤས་ནས་བདུད་རྩིའི་རྒྱུན་བབས། རང་གི་ལུས་ཀྱི་ཕྱི་ནང་ཁྱབ། སྒྲིབ་པ་དག་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམས་ལ། གདངས་སྙན་པོས་སྐྱབས་འགྲོ་ཅི་ནུས་བྱས་པའི་མཐར། སྣང་སྲིད་བླ་མའི་ཞིང་ཁམས་སུ་གསལ་བཏབ་ནས་བསྔོ་བ་བྱའོ། །དེས་ནི་བྱིན་རླབས་དངོས་སུ་འབྱུང་བའི་དགོས་པ་ཡོད་དོ། །དེ་ནས་མཎྜལ་ལ་སེམས་སྦྱོང་བ་ནི། མདུན་གྱི་ནམ་མཁར་བླ་མ་ཡི་དམ་མཁའ་འགྲོའི་སྤྲིན་ཕུང་བསམས་ལ། མཎྜལ་ཚོམ་བུ་བཀོད་དེ། ཕྱི་རི་རབ་གླིང་བཞིའི་འཇིག་རྟེན་གྱི་ཞིང་ཁམས་དག་པ་ན་ལྷ་དང་མིའི་ལོངས་སྤྱོད་ཕུན་(༩༧)སུམ་ཚོགས་པས་འབྱོར་བ། ནང་འོག་མིན་གྱི་དཀྱིལ་འཁོར་དག་པ་ན་མཆོད་པའི་སྤྲིན་གྱིས་སྤྲས་པ། གསང་བ་རང་བྱུང་གི་ཡེ་ཤེས་དག་པ་ན་དགོངས་ཀློང་ཏིང་འཛིན་གྱི་རོལ་པས་བརྒྱན་པར་དམིགས་ཏེ། ཕྱི་ནང་གསང་གསུམ་གྱི་མཎྜལ་ཆེན་པོའམ། གླིང་བཞི་རྒྱན་འགྱུར་ལ་སོགས་པ་འབུལ་ལོ། །དེས་ནི་ཚོགས་གཉིས་ཁྱད་པར་ཅན་རྫོགས་ནས་ཡོན་ཏན་རླབས་པོ་ཆེ་འགྲུབ་པའི་དགོས་པ་ཡོད་དོ། །

དེ་ནས་དལ་འབྱོར་རྙེད་དཀའ་བ་ལ་སེམས་སྦྱོང་བ་ནི། འདི་ལྟར་སེམས་ཅན་ཙམ་གྱི་ཁམས་ལ་བསམ་ནས། རང་གིས་དལ་བ་བརྒྱད། འབྱོར་པ་བཅུ་ཚང་བའི་མི་ལུས་རིན་པོ་ཆེ་ཐོབ་པ་ནི་དབུལ་པོས་ནོར་བུ་རྙེད་པ་བས་ཀྱང་ངོ་མཚར་ཆེ་བར་བལྟས་ཏེ། སྙིང་ནས་ཆོས་ལ་འབད་དགོས་སྙམ་དུ་བསམ་མོ། །དེས་ནི་སྤྲོ་བ་སྐྱེས་ནས་ཆོས་ཀྱི་སྣོད་དུ་རུང་བའི་དགོས་པ་ཡོད་དོ། །དེ་ནས་མི་རྟག་པ་ལ་སེམས་སྦྱོང་བ་ནི། ཕྱི་དུས་བཞིའི་འགྱུར་བ་སྣ་ཚོགས་ལོ་ཟླ་ཚེས་གྲངས་སྐད་ཅིག་ཐང་ཅིག་མི་རྟག་པས་ཀྱང་འཆི་བར་ངེས་ལ། ནང་ཕུང་པོའི་འགྱུར་བ་རྒས་གཞོན་དང་ལང་ཚོ་ཡོལ་བས་ཀྱང་ཤ་རུས་དང་སྐྲ་སེན་བྲལ་ཞིང་འཆི་བར་ངེས་པ། གསང་བ་འབྱུང་བཞི་སྡུད་པ་འཆི་ཁའི་སྣང་བ་དང་བར་དོ་བསམས་སྟེ་འཆི་བར་ངེས་པ་ལ་བསམ་པའོ། །དེས་ནི་སྐྱོ་ཤས་དྲག་པོས་ཆོས་ལ་བསྐུལ་བའི་དགོས་པ་ཡོད་དོ། །དེ་ནས་འཁོར་བ་བདེ་སྡུག་ལ་བསམ་སྟེ་རྒྱུ་འབྲས་བླང་དོར་ལ་སེམས་སྦྱོང་བ་ནི། དམྱལ་བའི་ཚ་གྲང་། ཡི་དྭགས་བཀྲེས་སྐོམ། དུད་འགྲོ་གླེན་ལྐུག །མི་སྐྱེ་རྒ་ན་འཆི། ལྷ་མིན་འཐབ་རྩོད། ལྷ་འཆི་འཕོ་ལྟུང་བ་ལ་སོགས་པའི་སྡུག་བསྔལ་ཐམས་ཅད་སྔོན་མི་དགེ་བ་བཅུ་བྱས་པ་ལས་བྱུང་བས་སྤང་དགོས། མཐོ་རིས་དང་ཐར་པའི་བདེ་བ་ཐམས་ཅད་དགེ་བ་བཅུ་ལ་སོགས་པ་སྤྱད་པ་ལས་བྱུང་བས་བླང་དགོས་སྙམ་དུ་བསམ་པའོ། །དེས་ནི་དགེ་སྡིག་བླང་དོར་དུ་ཤེས་པའི་དགོས་པ་ཡོད་དོ། །

དེ་ནས་དད་པ་ལ་སེམས་སྦྱོང་བ་ནི། དཀོན་མཆོག་གསུམ་དང་གོང་མ་རྣམས་ཀྱི་ཡོན་ཏན་ལ་མོས་པས་དད་པ་དང་། སེམས་ཅན་ཐམས་ཅད་བྱང་ཆུབ་ཀྱི་སྙིང་པོ་ཅན་དུ་ཤེས་པས་དག་སྣང་ཁྱད་པར་དུ་བསྒོམ་པའོ། །དེས་ནི་སྣོད་ལས་སུ་རུང་བའི་དགོས་པ་ཡོད་དོ། །དེ་ནས་སྙིང་རྗེ་ལ་(༩༨)སེམས་སྦྱོང་བ་ནི། སེམས་ཅན་ཐམས་ཅད་ཐོག་མ་མེད་པ་ནས་ཕ་མ་དྲིན་ཅན་ཡིན་པ་ལ། འཁོར་བ་ན་འཁྱམས་ཤིང་ད་དུང་ཐར་མི་ཤེས་ཆོས་ཀྱི་སྣང་བ་དང་བྲལ་བ་འདི་སྙིང་རེ་རྗེ། བདག་གི་བདེ་བས་འདི་དག་བདེ་བར་གྱུར་ལ། འདི་དག་གི་སྡུག་བསྔལ་བདག་ལ་སྨིན་ཞིང་། བདག་གི་དགེ་བས་འདི་དག་འཁོར་བ་ལས་མྱུར་དུ་ཐར་པར་ཤོག་ཅིག །སྙམ་པ་སེམས་ཅན་གཅིག་ནས་ཀུན་གྱི་བར་བསྒོམ་པའོ། །དེས་ནི་ཐེག་ཆེན་གྱི་ལམ་དུ་འགྱུར་བའི་དགོས་པ་ཡོད་དོ། །དེ་ནས་རྨི་ལམ་སྒྱུ་མ་ལ་སེམས་སྦྱོང་བ་ནི། འདི་ལྟར་ཡུལ་དུ་སྣང་བའི་ཆོས་ཐམས་ཅད་མདང་གི་རྨི་ལམ་དང་འདྲ་བ་མེད་པ་གསལ་སྣང་ཙམ་སྟེ། ཇི་ལྟར་སྣང་བའི་དུས་ན་བདེན་པར་མ་གྲུབ་ལ། ལུས་ངག་སེམས་སུ་སྣང་བའི་ཆོས་ཀྱང་མེད་ཅིང་སྣང་བ་སྒྱུ་མ་སྟོང་པའི་རང་བཞིན་ཏེ། ཕྱི་ནང་གི་ཡུལ་སེམས་ཐམས་ཅད་བདེན་སྟོང་རྨི་ལམ་སྒྱུ་མར་བསྒོམ་པའོ། །དེས་ནི་ཆོས་དང་གང་ཟག་གི་བདག་མེད་གཉིས་རྟོགས་པའི་དགོས་པ་ཡོད་དོ། །

དེ་ནས་མི་རྟོག་པའི་ཐབས་ཁྱད་པར་ཅན་ལ་སེམས་སྦྱོང་བ་ལ་གཉིས་ལས། རླུང་གི་པྲ་ཁྲིད་ནི། ལུས་ཆོས་བདུན་ལས། མཇིང་པ་ཅུང་ཟད་དགྱེད་དེ། རྩ་གསུམ་གྱི་མར་སྣ་ལྟེ་འོག་ནས་དབུ་མར་གུག་པ། ཡར་སྣ་མཛོད་སྤུ་ལས་རོ་རྐྱང་དཀར་དམར་གཉིས་སྣ་བུག་གཡས་གཡོན་གྱི་ནང་། དབུ་མ་ཚངས་བུག་ལ་ཟུག་པའི། སྣ་བུག་ནས་རླུང་དུ་བ་ལྟར་ཕྱིར་སོང་ཇེ་རིང་ལས། ནང་དུ་འོང་དུས་བརྟན་གཡོ་ཐམས་ཅད་ནམ་མཁའ་གཅིག་ཏུ་གྱུར་པ་ཚུར་རྔུབས་རོ་རྐྱང་དབུ་མར་གྱུར་པ་ལ་སེམས་ལ་རླུང་ཡང་དལ་བུས་བཟུང་བར་བྱའོ། དེས་ནི་གསལ་སྟོང་མི་རྟོག་པའི་ཡེ་ཤེས་འཆར་བའི་དགོས་པ་ཡོད་དོ། །

དེ་ནས་ཐིག་ལེའི་པྲ་ཁྲིད་ནི། ལྟེ་བའི་རྩ་ནང་ན་ཨ་ཐུང་ལས་མེ་འབར་བས། སྤྱི་བོའི་ཧཾ་ཞུ། དྭངས་མ་དཀར་དམར་གྱི་རྒྱུན་བབས་པས། རྩ་གསུམ་འཁོར་ལོ་བཞི་དང་ལུས་ནང་ཀུན་རིམ་གྱིས་གང་། བདེ་ཕྲི་ལི་ལི་བ་ལས་སྙིང་ག་ན་བཾ་སྲན་མ་ཙམ་ལ་སེམས་བཟུང་ནས་ཡུན་རིང་དུ་བསྒོམས་པའི་མཐར། ཇེ་ཆུང་ཇེ་ཕྲ་ལས་ཅིར་ཡང་བལྟར་མེད་པའི་ངང་དེར་གློད་ལ་བསྒོམ་པའོ། །དེས་ནི་བདེ་སྟོང་མི་རྟོག་པའི་འོད་གསལ་འཆར་བའི་དགོས་པ་ཡོད་དོ། །(༩༩)དེ་ལྟར་མཆོག་གསང་རྫོགས་པ་ཆེན་པོའི་གནས། །ཡི་གེ་གྲངས་མང་དག་ལས་འཐོར་བ་རྣམས། །འདིར་གཅིག་བསྡུས་ཏེ་ཐུན་མོང་སྔོན་འགྲོར་བཀོད། །དགེ་བས་འགྲོ་ཀུན་མངོན་པར་བྱང་ཆུབ་ཤོག །ཐུན་མོང་གི་སྔོན་འགྲོ་རིན་པོ་ཆེའི་པྲ་ཁྲིད་ཅེས་བྱ་བ། ཐེག་པ་རྒྱལ་པོའི་རྣལ་འབྱོར་པ་སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་ནགས་ནང་དུ། ཀུན་ཏུ་བཟང་པོའི་ཁང་བཟང། ཟླ་བ་ཆུ་ཤེལ་གྱིས་འཚེར་བར་བཀོད་པ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཁྲིད་ཡིག་སངས་རྒྱས་མཉམ་སྦྱོར།

༄༅། །ཟབ་མོ་ཡང་ཏིག་ལས། ཁྲིད་ཡིག་སངས་རྒྱས་མཉམ་སྦྱོར་བཞུགས་སོ། །

༄༅། གསང་བ་བླ་ན་མེད་པའི་ཁྲིད་ཀྱི་ཡི་གེ་ཆེན་མོ་སངས་རྒྱས་མཉམ་སྦྱོར་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་རྣམ་དག་ཆོས་སྐུའི་མཁའ་དབྱིངས་ལས། །ལྷུན་གྲུབ་འོད་གསལ་གཟུགས་སྐུའི་དཀྱིལ་འཁོར་རྒྱས། །མཛད་པའི་ཟེར་གྱིས་གདུལ་བྱའི་པད་མཚོ་འཛུམ། །ཀུན་བཟང་ཆོས་རྗེ་བླ་མའི་ཞབས་ལ་འདུད། །རིམ་དགུའི་རྩེ་མོ་མངོན་སུམ་འོད་གསལ་ལམ། །རིག་འཛིན་བླ་མ་འོད་སྐུར་གཤེགས་རྣམས་ཀྱི། །རྗེས་སུ་འཇུག་འདོད་སྐལ་ལྡན་དོན་ཆེད་དུ། །གསང་བ་བླ་མེད་དོན་ཁྲིད་ཆེན་མོ་སྤྲོ། །

དེ་ལ་འདིར་བཀའ་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་རྩེ་མོ། མན་ངག་ཐམས་ཅད་ཀྱི་སྙིང་པོ། ཐེག་པ་ཐམས་ཅད་ཀྱི་མཐར་ཐུག །གསང་བ་བླ་ན་མེད་པའི་གདམས་ངག་གནད་ཐོག་ཏུ་འབེབས་པར་བྱེད་པ་ལ་གཉིས་ཏེ། བླ་མ་བརྒྱུད་པའི་སྒོ་ནས་ཡིད་ཆེས་བསྐྱེད་པ་དང་། མན་ངག་གི་སྒོ་ནས་ཉམས་སུ་བླང་བའོ། །དང་པོ་ནི་ཆོས་ཀྱི་དབྱིངས་ཅིའི་ངོ་བོར་ཡང་མ་གྲུབ་པ་ལས། དཔལ་ཀུན་ཏུ་བཟང་པོ་ཞལ་ཕྱག་གི་རྣམ་པར་བཞེངས་ཏེ། ཆོས་ཀྱི་སྐུ་སྤྲོས་པ་དང་བྲལ་བའི་ངང་ལས། ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ཀྱི་རྣམ་པར་བཞེངས་པའི་རིགས་ལྔའི་སངས་རྒྱས་དང་། དཔལ་དྲུག་པ་རྡོ་རྗེ་འཆང་ལ་རང་བཞིན་གྱི་བྱིན་གྱིས་རླབས་ཀྱིས་བཤད། དེས་ཐུབ་པ་སྤྲུལ་པའི་སྐུ་དཔལ་རྡོ་རྗེ་སེམས་དཔའ་དང་། གསང་བའི་བདག་པོ་ཕྱག་ན་རྡོ་རྗེ་ལ་འོག་མིན་གྱི་གནས་སུ་རང་གི་ངོ་བོས་གསུངས། དེས་དུར་ཁྲོད་ཆེན་པོ་མེ་རི་འབར་བར་སྤྲུལ་པའི་(༡༠༠)སློབ་དཔོན་ཆེན་པོ་དགའ་རབ་རྡོ་རྗེ་ལ་ཚིག་སྡེབ་སྦྱོར་ལེགས་པའི་སྒོ་ནས་གསུངས། དེས་རྒྱ་གར་དབུས་འགྱུར་འོད་མའི་ཚལ་དུ་འཕོ་བ་ཆེན་པོའི་སྐུར་བཞེངས་པ་པཎ་ཆེན་བི་མ་ལ་མི་ཏྲ་ལ་མངོན་སུམ་རང་ཐོག་ཕབ་ནས་གསུངས། དེས་བྱར་གྱི་ཕུ་བྲག་དཀར་ཐེམ་པ་དང་འདྲ་བའི་རྩར་སྣང་བྱེད་འོད་ཀྱི་ལུས་སུ་གཤེགས་པའི་ལྕེ་བཙུན་སེང་གེ་དབང་ཕྱུག་ལ་མངོན་སུམ་རང་གནད་ལ་ཕབ་ནས་གསུངས། དེས་རྟ་ནག་ཟམ་ཁར་སྤྲུལ་པའི་སྐུ་རྒྱལ་བ་ཞང་ཆེན་པོ་ལ་དོན་སྐུ་གསུམ་དབྱེར་མེད་དུ་གཏན་ལ་ཕབ་ནས་གསུངས། དེས་སྤྲུལ་སྐུའི་བཞུགས་གནས་སྒོམ་ཁང་དུ་མཁྱེན་པའི་མངའ་བདག་ཞང་ཉི་འབུམ་ལ་འཁོར་འདས་ཚིགས་རྫོགས་སུ་གཏན་ལ་ཕབ་ནས་གསུངས། དེས་དཀྱིལ་ཁང་དཔལ་གྱི་གནས་མཆོག་ཏུ། ངེས་དོན་བརྒྱུད་འཛིན་གུ་རུ་ཇོ་འབེར་ལ་ཡིད་དཔྱོད་བློ་དང་ཕྲལ་ནས་གསུངས། དེས་གྲོ་བོ་འོན་པ་ཕུར་ཐུགས་རྗེ་ཆེན་པོས་ལུང་བསྟན་ཞིང་རྩོད་མེད་འཁྲུལ་པ་ཞིག་པའི་དྲིན་ཅན་སངས་རྒྱས་བླ་མ་ལ། དགེ་སྡིག་སྐྱོན་ཡོན་ལས་འདས་པའི་ངོ་བོ་རྗེན་པར་གསུངས། དེས་གདན་ས་དཔལ་གྱི་སེངྒེ་རྒྱབ་ཏུ་གྲུབ་ཆེན་ཟླ་བ་མུན་སེལ་ལ་སྟོང་སྒོམ་མུན་རྡོ་དང་ཕྲལ་ཏེ་འོད་གསལ་སྙིང་པོ་ལྔ་ལྡན་དུ་བསྟན་ནས། སེམས་ཅན་མཐར་ཟད་མིང་མེད་དུ་ལ་བཟླ་བའི་ཚུལ་གྱིས་གསུངས། དེས་སྒྲགས་ཕུ་དཔལ་གྱི་ཡང་རྫོང་དུ་འོད་གསལ་རྒྱུན་ཆད་མེད་པའི་རིག་འཛིན་ཆེན་པོ་ཀུ་མ་རཱ་ཛ་ལ་ཆོས་ཟད་བློ་འདས་ཆེན་པོར་གསུངས། དེས་སྐྱམས་ཕུ་དཔལ་གྱི་དགེ་སྡིངས་སུ་རིག་སྟོང་ཆོས་སྐུ་རང་མལ་དུ་རྟོགས་པའི་རྣལ་འབྱོར་པ་སྣ་ཚོགས་རང་གྲོལ་ལ་གཞི་རྫོགས་འཕོ་འགྱུར་མེད་པར་གསུངས་སོ། །

༈ དོན་གཉིས་པ་མན་ངག་གི་སྒོ་ནས་ཉམས་སུ་བླང་བ་ལ། གང་ཟག་ཇི་ལྟ་བུས་ཉམས་སུ་བླང་བ་དང་། མན་ངག་དངོས་གཉིས་ལས། དང་པོ་ནི། བྱ་བ་དགུ་ཕྲུགས་སུ་བཏང་ནས་དལ་བ་བརྟེན་པ་གཅིག་གིས་བསྒྲུབ་སྟེ། ཁྱུང་ཆེན་ལས། བྱ་བྲལ་གླན་པའི་ཤུགས་འཆང་བློ་བདེ་བ། །སྤྲོས་མེད་ནམ་མཁའི་ཡིད་ཅན་རྣམས་ཀྱིས་བྱོས། །ཞེས་སོ། །མན་ངག་དངོས་ལ་གསུམ་སྟེ། བརྩོན་འགྲུས་རབ་ཚེ་འདིར་སངས་རྒྱ་བའི་མན་ངག །འབྲིང་བར་དོར་སངས་རྒྱ་བའི་མན་(༡༠༡)ངག །ཐ་མ་རང་བཞིན་སྤྲུལ་པ་སྐུའི་ཞིང་དུ་སྐྱེས་ནས་བར་དོ་མེད་པར་སངས་རྒྱ་བའི་མན་ངག་གོ། །དང་པོ་ལ་གཞི་ཁྲེགས་ཆོད་དང་། ལམ་ཐོད་རྒལ་གཉིས་ལས། ཁྲེགས་ཆོད་ནི། གང་ཤར་ལྟོས་མེད་ཀྱི་ཤེས་པ་གཉེན་པོའི་བློ་དང་བྲལ་བ་དང་། ཐོད་རྒལ་ནི། ལྷུན་གྲུབ་ལུས་ཀྱི་དཀྱིལ་འཁོར་ལ་དེ་བཞིན་གཤེགས་པའི་གསང་སྒོ་ཕྱེ་སྟེ། ཕྱི་དབྱིངས་ནམ་མཁའ་སྟོང་པ་ལ། ནང་གི་དབྱིངས་རྣམ་པར་དག་པའི་སྒྲོན་མ་རིག་པ་ལུ་གུ་རྒྱུད་དང་བཅས་པ་འཆར་བའི་དགོངས་པ་ཉམས་སུ་ལེན་པ་ལས།

འདིར་དེ་གཉིས་ཕྱོགས་གཅིག་ཏུ་བསྡེབས་ཏེ་ཁྲིད་དུ་བྱ་བ་ལ་གཉིས་ཏེ། སྔོན་དུ་འགྲོ་བ་དང་། དངོས་གཞི་ངོ་སྤྲད་དེ་རྒྱུད་ལ་ཇི་ལྟར་བརྟེན་པའི་ཚུལ་ལོ། །དང་པོ་ལའང་གཉིས་ཏེ། སྔོན་འགྲོ་དངོས་དང་། རྣལ་དུ་ཕབ་པའོ། །

དང་པོ་ལ་གསུམ་ལས། ལུས་ཀྱི་སྔོན་དུ་འགྲོ་བ་ནི། ཐལ་འགྱུར་ལས། ལུས་ཀྱི་སྔོན་དུ་འགྲོ་བ་ནི། རྡོ་རྗེ་སྐྱིལ་ཀྲུང་དང་བཅས་ཏེ། །ལུས་སྦྱངས་སེམས་ལ་ཕན་པ་ཡིན། ཞེས་གསུངས་པས། དབེན་པར་ལུས་ཀྱི་ཆ་བསྲངས་ཏེ། རྐང་པའི་མཐིལ་གཉིས་སྤྲད། ལག་པ་མགོ་ལ་མ་རེག་པར་ཐལ་མོ་སྦྱར་ཏེ། རྡོ་རྗེ་སྔོན་པོ་རྩེ་གསུམ་པ་མེ་འབར་བ་གཅིག་ཏུ་བསམས་ལ་ཉམས་སུ་བླང་ངོ་། །དེ་ལྟར་བྱས་པས་རྟགས་ནི། དང་པོ་ལུས་ཀྱི་ཤ་རུས་འགྱུར་ཞིང་ན་བ་ལ་སོགས་པ་འབྱུང་། དེ་ནས་ལུས་ཁང་རུལ་ཞིག་པའི་རྣམ་པ་ལྟར་ཤིག་ཤིག་པའམ། འབོལ་ཤིག་པ་འབྱུང་ངོ་། །དེ་ལྟར་བྱས་པའི་དགོས་པ་གཉིས་ཏེ། ཐུན་མོང་དང་། མཆོག་གོ། །དང་པོ་ནི། ལུས་ལ་མངོན་ཞེན་ལོག་པ་དང་། བར་ཆད་ཞི་བ་དང་། དེ་གཉིས་ཐུན་མོང་དུ་ལུས་ཀྱི་སྡིག་པ་འདག་པའོ། །མཆོག་གི་དགོས་པ་ནི། ལུས་ཕྱིས་མངལ་གྱི་གྲོར་ཁྱེར་དུ་མི་འཇུག་པ་དང་སྤྲུལ་པའི་སྐུར་གྲོལ་བ་དང་། དེ་གཉིས་ཀྱི་ཐུན་མོང་དུ་སངས་རྒྱས་ཀྱི་སྐུ་དང་གཉིས་སུ་མེད་པར་འགྱུར་བའི་དགོས་པ་ཡོད་དོ། །

གཉིས་པ་ངག་གི་སྔོན་དུ་འགྲོ་བ་ཡང་། ཐལ་འགྱུར་ལས། ངག་ནི་ཧཱུྃ་ཞེས་གནས་པ་ལ། །རྒྱས་གདབ་པ་དང་(༡༠༢)རྩལ་སྦྱོང་དང་། །མཉེན་བཙལ་ལམ་དུ་ཞུགས་པ་ཡིས། །ངག་སྦྱངས་སེམས་ལ་ཕན་པ་ཡིན། །ཞེས་གསུངས་པས། རྒྱས་གདབ། རྩལ་སྦྱོང་། མཉེན་བཙལ་ཞིང་ལམ་དུ་ཞུགས་པ་གསུམ་ལས། རྒྱས་གདབ་པ་ལ་གཉིས་ཀྱི། དང་པོ་ཕྱི་སྣང་བ་ལ་རྒྱས་གདབ་པ་ནི། རང་གི་སྣ་བུག་ནས་ཧཱུྃ་གཅིག་ཐོན་གཉིས་ཐོན་ཐོ་ཕྱི་དང་ཡུལ་འཁོར་ཐམས་ཅད་ཧཱུྃ་གིས་གང་བར་དམིགས་ལ། ཧཱུྃ་གི་གླུ་སྙན་ལ་རིང་བ་བླང་ངོ་། །དེ་ལྟར་བྱས་པས་རྟགས་ནི་སྣང་བ་ཐམས་ཅད་ཧཱུྃ་གིས་གང་བར་སྙམ་པ་དང་། སྣང་བ་བན་བུན་དུ་འགྱུར་རོ། །དེའི་དགོས་པ་ནི། དངོས་གཞི་ཉམས་སུ་ལེན་དུས་སྣང་བའི་དབང་དུ་རིག་པ་མི་འགྲོ་བའི་དགོས་པ་ཡོད་དོ། །ནང་ཕུང་པོ་ལ་རྒྱས་གདབ་པ་ནི། ཕྱིའི་ཧཱུྃ་རྣམས་རེ་རེ་ནས་ནང་དུ་སྣ་ནས་ཁོང་དུ་ཐིམ་པར་བསྒོམ་ཞིང་། ཧཱུྃ་གོང་མ་ལས་ཅུང་ཟད་ཐུང་བར་བརྗོད་པས། རྟགས་ནི་ཧཱུྃ་གིས་ཁོང་བ་གང་བར་སྙམ་པའི་འགྲངས་པས་མི་བདེ་བ་སྙམ་པ་བྱེད་པ་འབྱུང་ངོ་། །དེའི་དགོས་པ་ནི། དངོས་གཞི་ཉམས་སུ་ལེན་དུས་ཕུང་པོའི་བཅིངས་པ་ལས་གྲོལ་བའི་དགོས་པ་ཡོད་དོ། །

དེ་ནས་རྩལ་སྦྱོང་བ་ལ་གཉིས་ལས། ཕྱི་སྣང་བ་ལ་རྩལ་སྦྱོང་བ་ནི། ཧཱུྃ་གིས་མཐོང་དམིགས་ཀྱི་དངོས་པོ་ཐམས་ཅད་རིམ་པས་ཕར་ཐལ་ཚུར་ཐལ་སྐོལ་ལེ་མེད་པར་ཐལ་བར་ཕུག་པར་བསམས་ལ། ཧཱུྃ་དྲག་ལ་ངར་ཆེ་བ་བརྗོད་པས། རྟགས་ནི་སྣང་བ་འདི་སང་སེང་ངམ་ཁྲལ་ཁྲོལ་འཇའ་འཚོན་ལྟར་སྣང་ལ་རང་བཞིན་མེད་པའི་ཉམས་འཆར་རོ། །དགོས་པ་ནི་སྣང་བ་རང་བཞིན་མེད་པར་འབྱོངས་པའི་དགོས་པ་ཡོད་དོ། །ནང་ཕུང་པོ་ལ་རྩལ་སྦྱོང་བ་ནི། ཧཱུྃ་གིས་རང་གི་ལུས་ལའང་སྔར་བཞིན་སྦྱོང་བ་སྟེ། རྟགས་ནི་ལུས་ཀྱི་ཤ་སྐོལ་ཚེར་འཕར་བ་དང་། ཁྲལ་ཁྲོལ་སང་སེང་རང་བཞིན་མེད་པ་སྙམ་པ་འབྱུང་ངོ་། །དགོས་པ་ནི། ཕུང་པོ་རང་བཞིན་མེད་པ་འབྱོངས་པའི་དགོས་པ་ཡོད་དོ། །

མཉེན་བཙལ་ཞིང་ལམ་དུ་ཞུགས་པ་ལའང་གཉིས་ལས། རིག་པ་མཉེན་བཙལ་བ་ནི། མདུན་དུ་དམིགས་རྟེན་བཙུགས་ལ། ཧཱུྃ་ཕྲེང་བ་བརྒྱུས་པའམ། ཐག་པ་ལྟ་བུས་དཀྲིས་པ་དང་། ཡང་རིམ་གྱིས་ཕྱིར་འགྲོ་བ་ལ་སེམས་བཟུང་ཞིང་ཧཱུྃ་སྙན་པར་བརྗོད་པས། རྟགས་ནི། ཤེས་པ་ལྷན་ལྷན་གནས་པ་དང་། གང་གཏད་དུ་ཟིན་པ་འབྱུང་ངོ་། །དགོས་པ་ནི་དངོས་གཞི་ཉམས་སུ་ལེན་དུས་རིག་(༡༠༣)པ་རང་དབང་ཐོབ་པས་དམིགས་པ་གང་དུའང་བསྒྱུར་དུ་བཏུབ་པའི་དགོས་པ་ཡོད་དོ། །ལམ་དུ་ཞུགས་པ་ནི། རི་མོ་སྲིན་འགྲོས་ལྟ་བུ་དང་། རྒྱང་རིང་པོའི་ལམ་མཐོང་ཚད་ན་ཕར་ཕར་ཧཱུྃ་ཞུགས་ནས་སོང་ནས། ལ་ཕར་ལྟོའི་རྒྱབ་དང་། སྔར་ཕྱིན་པའི་ཡུལ་ཁམས་རྣམས་སུ་འགྲོ་ཞིང་། རྗེས་ལ་ལུང་སྲོལ་མདའ་ཤར་དུ་ལྟ་བ། ཕུ་ནུབ་ལ་བསྟན་པ་དོག་ཅིང་ཉམ་ང་བ་ནགས་རོང་དང་ཆུ་རྒྱུན་འབབ་པར་ཕྱིན་པས་མཐའ་མེད་པ་ལ་ཧཱུྃ་གཅིག་པུའི་འགྲོ་བར་བསམ་ཞིང་ཧཱུྃ་རིང་ལ་སྙན་པར་བརྗོད་པས། རྟགས་ནི་མངོན་པར་སྐྱོ་བ་སྙམ་པ་དང་། འབོལ་ཤིག་པ་དང་། མི་རྟོག་པའི་ཏིང་ངེ་འཛིན་སྐྱེའོ། །དགོས་པ་ནི་རིག་པ་ཚད་ལ་ཕེབས་པར་བྱེད་དོ། །

དེ་ལྟར་ངག་གི་སྔོན་འགྲོ་བྱས་པ་ལ་དགོས་པ་གཉིས་ཏེ། ཐུན་མོང་དང་མཆོག་གོ། །ཐུན་མོང་གི་ནི་ངག་གི་མངོན་ཞེན་བཟློག་པ་དང་། ངག་གི་བར་ཆད་ཞི་བ་དང་། དེ་གཉིས་ཀྱི་ཐུན་མོང་དུ་ངག་གི་སྡིག་པ་འདག་པའོ། །མཆོག་གི་དགོས་པ་ནི། ངག་འཁོར་བར་མི་འཇུག་པ་དང་། ངག་ལོངས་སྐུར་གྲོལ་བ་དང་། དེ་གཉིས་ཀྱི་ཐུན་མོང་དུ་སངས་རྒྱས་ཐམས་ཅད་ཀྱི་གསུང་དང་གཉིས་སུ་མེད་པར་འགྱུར་བའི་དགོས་པ་ཡོད་དོ། །

གསུམ་པ་སེམས་ཀྱི་སྔོན་འགྲོ་ལ། མན་ངག་གི་གནད་བཀྲོལ་བ་དང་། སྔོན་འགྲོ་དངོས་གཉིས་ལས། དང་པོ་ལ། གང་གཙོ་བ། དཔེ་བསམ་པ། གཅིག་དང་ཐ་དད་བརྟག་པ་གསུམ་ལས། དང་པོ་ནི། ལུས་ངག་སེམས་གསུམ་པོ་འདིའི་གཙོ་བོ་གང་ན་འདུག །བྱ་བ་ཅི་དང་ཅི་བྱེད་དུས་སུ་གཙོ་གང་ཆེ་ཞེས་དཔྱད་པས། ཐམས་ཅད་ཀྱི་བྱེད་པ་པོ་སེམས་སུ་རྟོགས་པ་ནི་རྩ་བ་སེམས་ཀྱི་འདྲེ་ཀུན་ངོས་བཟུང་བ་སྟེ། ལུང་ལས། ཡིད་གཙོ་ཡིད་ནི་རབ་ཏུ་མགྱོགས་པ་སྟེ། །ཆོས་རྣམས་ཀུན་གྱི་སྣ་ལ་ཡིད་འགྲོའོ། །ཞེས་པ་བཞིན་ནོ། །

གཉིས་པ་ནི་འབྱུང་བ་རྣམས་ལས་དཔེ་ཅི་དང་ཅི་འདྲ་བརྟགས་པས། རགས་པའི་ཁ་དོག་དང་མཐོང་དམིགས་སུ་མེད་ཀྱང་འགྱུ་བ་ཙམ་དུ་མ་འགགས་ལ། འཆར་འཆར་འདྲ་བས་རླུང་དང་འདྲ་བར་རྟོགས་པ་ནི། རྟགས་བཞི་དཔེ་ངོ་ཤེས་པ་སྟེ། སྒྲ་རྒྱུད་ལས། རྣམ་ཤེས་རླུང་འདྲ་བྱ་བ་ཡིན། །ཞེས་པ་བཞིན་ནོ། །(༡༠༤)

གསུམ་པ་ཕྱི་ཡུལ་ལ་འཆར་རམ། གང་ལ་རྟོག་ཀྱང་རུང་སྟེ། དེའི་དུས་སེམས་དང་ཡུལ་དེ་གཅིག་གམ་ཐ་དད། གཅིག་ན་སེམས་ལྟར་ཡུལ་དེ་མཐོང་བྱ་ལ་སོགས་པར་མི་རུང་བའམ། ཡུལ་ལྟར་སེམས་ཀྱང་མཐོང་ཐོས་ལ་སོགས་སུ་འགྱུར་རོ། །དེ་བཞིན་དུ་ལུས་ངག་སེམས་གསུམ་གཅིག་གམ་ཐ་དད། གཅིག་ནའང་ཕན་ཚུན་འདྲེས་པས། མཚན་ཉིད་འཆོལ་པར་འགྱུར་ལ། ཐ་དད་ན་སེམས་དེ་ཐ་དད་དུ་བྱ་བ་གང་ན་འདུག །ཡང་རྡུལ་ཕྲན་ཆ་མེད་དང་། སྐད་ཅིག་ཆ་མེད་དུ་བརྟགས་ལ་ཐ་དད་པ་དང་། གཅིག་པར་བརྟགས་པས་གཅིག་དང་ཐ་དད་མེད་པར་རྟོགས་ཏེ། ཆོས་ཐམས་ཅད་གཉིས་སུ་མེད་པའི་དོན་མཐོང་བ་ནི། ལུང་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོགས་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་པ་དང་། གཅིག་པའང་བློ་ཡིས་བསླད་པ་ཡིན། །དུ་མ་བློ་ཡིས་བསླད་པ་ཡིན། །ཞེས་པ་བཞིན་ནོ། །དམིགས་པ་འདི་གསུམ་གྱི་དང་པོ་གཉིས་བླ་མ་དམ་པའི་འཁྲུངས་ཆོས་ཡིན་ལ། ཕྱི་མ་ནི་བི་མ་ལའི་ཁྲེགས་ཆོད་ཀྱི་རྒྱབ་ཡིག་ལས་སེམས་ཀྱི་ཁང་བུ་བཤིག་པར་གསུངས་པའི་ཆིངས་དེ་འདིར་བཀོད་པ་སྟེ། མེད་ཐབས་མེད་པའི་གནད་དམ་པའོ། །

སྔོན་འགྲོ་དངོས་ནི། ཐལ་འགྱུར་ལས། སེམས་ནི་དང་པོ་བྱུང་ས་དང་། །བར་དུ་གནས་དང་ཐ་མར་འགྲོ། །དེ་ལྟར་སེམས་ལ་བརྟགས་བྱས་པས། །སེམས་སྦྱངས་སེམས་ཀྱི་གནས་ལུགས་ཤེས། །ཞེས་གསུངས་པ་ལ་བརྟེན་ནས། བརྟགས་ལུགས་གསུམ་ལས། དང་པོ་བྱུང་ས་བྱུང་མཁན་ལ་བརྟག་པ་ནི། སེམས་རླུང་ལྟ་བུ་འདི་ཕྱི་སྣང་བ་ལས་བྱུང་ངམ། ནང་ཕུང་པོ་ལས་བྱུང་ངམ། སེམས་ཁོ་རང་ཇི་ལྟ་བུ་སྙམ་དུ། རིགས་པར་སྣང་བ་རྡུལ་ཕྲན་ཆ་མེད་དུ་ཕྱེ་ལ། བྱུང་ས་གར་འདུག །སེམས་སྐད་ཅིག་ཆ་མེད་དུ་དཔྱད་ལ་བྱུང་མཁན་ཇི་ལྟར་ཡིན་བརྟགས་པས། སེམས་སྐྱེ་མེད་རྩ་བྲལ་སྟོང་པར་རྟོགས་ཏེ། སྤྲུལ་པའི་སྐུ་དང་ངོ་འཕྲོད་པའི་དགོས་པ་ཡོད་དོ། །(༡༠༥)ད་ལྟ་གནས་ས་གནས་མཁན་ལ་བརྟག་པ་ནི། དྲན་རྟོག་འཆར་བདོ་བ་འདི་ད་ལྟ་ཕྱི་ནང་བར་གསུམ་གར་གནས་སྔར་བཞིན་བརྟགས་པས། གནས་མེད་རྟེན་བྲལ་དུ་རྟོགས་ཏེ། ལོངས་སྤྱོད་རྫོགས་པའི་སྐུ་དང་ངོ་འཕྲོད་པའི་དགོས་པ་ཡོད་དོ། །ཐ་མ་འགྲོ་ས་འགྲོ་མཁན་ལ་བརྟག་པ་ནི། དྲན་རྟོག་ཡལ་དུས་གར་འགྲོ་བརྟགས་པས། སེམས་རང་འགགས་པ་ཉིད་མེད་པས་འགག་མེད་མཐའ་བྲལ་དུ་རྟོགས་ཏེ། ཆོས་ཀྱི་སྐུ་དང་ངོ་འཕྲོད་པའི་དགོས་པ་ཡོད་དོ། །དེ་ལྟར་སེམས་ཀྱི་སྔོན་འགྲོ་ལ་དགོས་པ་གཉིས་ལས། ཐུན་མོང་གི་དགོས་པ་ནི། སེམས་ཐ་མལ་གྱི་མངོན་ཞེན་བཟློག་པ་དང་། སེམས་ཀྱི་བར་ཆད་ཞི་བ་དང་། དེ་གཉིས་ཀྱི་ཐུན་མོང་དུ་སེམས་ཀྱི་སྡིག་པ་འདག་པའོ། །མཆོག་གི་དགོས་པ་ནི། སེམས་ཕྱིས་འཁོར་བར་མི་འཇུག་པ་དང་། སེམས་ཆོས་ཀྱི་སྐུར་གྲོལ་བ་དང་། དེ་གཉིས་ཀྱི་ཐུན་མོང་དུ་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་སངས་རྒྱའོ། །

གཉིས་པ་རྣལ་དུ་དབབ་པ་ནི། ལུས་ངག་སེམས་གསུམ་གློད་ལ། ལུས་མི་འགུལ། ངག་མི་བརྗོད། སེམས་མི་རྟོག་པར་བདེ་ལུགས་སུ་ཉལ་ལོ། །དགོས་པ་ལ་གཉིས་ལས། ཐུན་མོང་ནི། ལུས་རྣལ་དུ་ཕབ་པས་བྱང་ཆུབ་ཀྱི་སེམས་རྒྱས། ངག་རྣལ་དུ་ཕབ་པས་བརྗོད་མེད་ཀྱི་དོན་ལ་གནས། སེམས་རྣལ་དུ་ཕབ་པས་མི་རྟོག་པའི་དོན་ལ་རེག་པའོ། །མཆོག་གི་དགོས་པ་ནི། ལུས་རྣལ་དུ་ཕབ་པས་སྤྲུལ་པའི་སྐུ་ལ་རེག །ངག་རྣལ་དུ་ཕབ་པས་ལོངས་སྤྱོད་རྫོགས་པའི་སྐུ་ལ་རེག །སེམས་རྣལ་དུ་ཕབ་པས་ཆོས་ཀྱི་སྐུ་ལ་རེག་པའི་དགོས་པ་ཡོད་དོ། །

གཉིས་པ་དངོས་གཞི་ངོ་སྤྲད་དེ་རྒྱུད་ལ་བརྟེན་པའི་ཚུལ་ལ་གཉིས་ཏེ། གཞི་ཁྲེགས་ཆོད། ལམ་ཐོད་རྒལ་ལ་ངོ་སྤྲད་པའོ། །

དང་པོ་ནི། ཚོགས་གཏོར་བཤམ་བརྒྱུད་པའི་བཤར་གདབ། རང་རིག་ལ་ཅེར་གྱིས་བལྟས་ཏེ་ཆོས་ཟད་བློ་འདས་ཆེན་པོའི་དགོངས་པ་ལ་གསལ་གདབ་པའི་རྗེས་ལ། ད་ནི་དབང་པོ་ཡང་རབ་མ་བསྒོམས་པར་སངས་རྒྱ་བ་ཁྲེགས་ཆོད་ཡེ་ཡིན་ཀ་དག་ཆེན་པོའི་དགོངས་པ་ལ་ངོ་སྤྲད་(༡༠༦)པར་བྱ་སྟེ། འདི་ལ་མཚོན་ཚུལ་མང་ཡང་སྤྲུལ་པ་སྐུ་ཡི་འདས་རྗེས་ཀྱི་སྒོ་ནས་ཚིག་གསུམ་གནད་དུ་བརྡེགས་པ་རང་གི་རིག་པ་ཆོས་སྐུ་དྲི་མ་མེད་པར་ངོ་སྤྲད་པ་ལ། ངོ་རང་ཐོག་ཏུ་སྤྲད་པ། ཐག་གཅིག་ཐོག་ཏུ་གཅད་པ། གདིང་གྲོལ་ཐོག་ཏུ་བཅའ་བ་དང་གསུམ་ལས། དང་པོ་ནི། རང་རིག་ཡེ་སྟོང་རྩ་བྲལ་དཔེ་ནམ་མཁའ་ལྟ་བུ་ཕྱི་ནང་བར་མེད་ཟང་ཐལ། སལ་ལེ་བ། སེང་ངེ་བ། ཧྲིག་གེ་བ། སང་ངེ་བ། ངོ་བོ་མ་གྲུབ་པ། གདངས་མ་འགགས་པ་འདི་ཉིད་ཐོག་མའི་ཀ་དག་ཆོས་སྐུ་རིག་སྟོང་རྗེན་པ་ཡིན་ཏེ། གསང་བའི་སྒྲ་རྒྱུད་ལས། སྔ་ཕྱིའི་དྲན་རྟོག་མེད་པ་ཡི། །རིག་གེ་སང་ངེ་གསལ་ལེ་བ། །ད་ལྟའི་ཤེས་པ་འདི་ཉིད་ལ། །ཆོས་སྐུ་བཞི་ལྡན་ངོས་བཟུང་ངོ་། །ཞེས་གསུངས་པས། ད་ལྟའི་རིག་པ་རང་བབས། དྲན་བསམ་སྔ་ཕྱིའི་འཕྲོ་འདུ་ཐ་མལ་གྱི་བཟང་རྟོག་ངན་རྟོག་གང་གིས་ཀྱང་མ་བསླད་པ་འདི་ལ་ལྟོས་དང་། སལ་ལེ་བ་ལ་རྟོག་པ་མེད་པ། རྟོག་པ་མེད་པ་ལ་སལ་ལེ་བ་ཞིག་འདུག་པ་འདི་ངོས་བཟུང་དང་། ཆོས་སྐུ་ཟང་ཐལ་རྗེན་པའི་ངོ་བོ། སྤྲོས་མེད་ལྷན་ཅིག་སྐྱེས་པའི་ཡེ་ཤེས། བློ་ཡི་དྲི་མས་མ་གོས་པའི་ཀ་དག །ཉམས་ཀྱི་ཞེན་པས་མ་བཅིངས་པའི་ཡེ་གྲོལ། གཏན་ནས་ཡེ་སངས་རྒྱས་པའི་ཆོས་སྐུ། རིག་པ་གཅེར་བུ་ལྷིངས་པ་འདི་ཁོ་ན་རང་ཐོག་ཏུ་ངོ་སྤྲད་པའོ། །ཐག་གཅིག་ཐོག་ཏུ་གཅད་པ་ནི། ད་ལྟ་ངོ་སྤྲད་ཐོག་གི་ངང་ལ་མ་ཡེངས་པར་འཇོག་པ་ཉིད་ཆོས་སྐུ་ཀུན་བཟང་ཡབ་ཡུམ་གྱི་དགོངས་པ་མ་བསྒོམས་ལྷུན་གྲུབ་ཆེན་པོར་ངོ་ཤེས་ཐག་ཆོད་ཡིད་ཆེས་པས། རིག་པར་རང་གསལ་ཀློང་ཡངས་ཆེན་པོར་རྒྱ་བསྐྱེད་དཔངས་བསྟོད་ཕྱལ་པ་བར་མེད་ཀློང་ཡངས་ཆེན་པོར་འཇོག་པ་ཙམ་ལས། དྲན་བསམ་ཡིད་ལ་བྱེད་པའི་སྒོམ་རྒྱུ་རྡུལ་ཙམ་ཡང་མེད་དོ། །ཤེས་པ་རང་བབས་སུ་གློད་པ་ཉིད་ཆོས་སྐུ་རང་མལ་དུ་གནས་པའི་དགོངས་པ་སྟེ། རང་བཞིན་སྐྱེ་བ་མེད་པ་ནམ་མཁའི་ངང་། །ཀ་དག་ཆོས་སྐུ་ཡིད་ལ་བྱར་མེད་པ། །འདི་ལྟ་འདི་སྒོམ་མེད་པའི་ངང་ཉིད་ལ། །རང་བབས་བཅོས་བསླད་བྲལ་བར་ལྷུན་གྱིས་ཞོག །རིག་པ་ཟང་ཐལ་རྗེན་པའི་ངང་ལ་བསྒོམ་མེད་དུ་སལ་ལེ། རྩ་བྲལ་ཡེ་ཤེས་ལྷུག་པའི་ངང་(༡༠༧)ལ་རྩོལ་མེད་དུ་སལ་ལེ། གང་ལའང་གཟའ་གཏད་མེད་པའི་ངང་ལ་འཛིན་མེད་དུ་སང་ངེ་། ཕྱལ་པ་བར་མེད་རྒྱ་ཡན་གྱི་ངང་ལ་སྟོང་གསལ་དུ་ཕྱལ་ལེ། སྒོ་ལྔ་ཧར་སངས་འཛིན་མེད་ཀྱི་ངང་ལ་རྒྱ་གྲོལ་དུ་ཕྱལ་ལེ། རང་བབས་གཉུག་མ་ལྷུན་གྲུབ་ཆེན་པོའི་ངང་ལ་བདེ་གདལ་དུ་ཤིགས་སེ་ཞོག་ཅིག

སྟོང་གསལ་ཡངས་པ་ནམ་མཁའ་བཞིན་དུ་ཞོག །རང་གསལ་འཛིན་མེད་ཉི་མ་བཞིན་དུ་ཞོག །མི་གཡོ་དྭངས་པ་རྒྱ་མཚོ་བཞིན་དུ་ཞོག །འཕོ་འགྱུར་མེད་པ་རི་བོ་བཞིན་དུ་ཞོག །སལ་ལེ་སེང་གེ་སྟོང་གསལ་གྱི་ངང་ལ་ཞོག །འབོལ་ལེ་ཤིག་གེ་ལྷོད་དེ་རང་གནས་ཀྱི་ངང་ལ་ཞོག །ཕྱད་དེ་བུན་ནེ་སང་ངེ་བདེན་མེད་ཀྱི་ངང་ལ་ཞོག །ཁྱབ་བེ་གདལ་ལེ་ཆོས་ཉིད་ཀྱི་ངང་ལ་ཞོག །སྟོང་ངེ་མེར་རེ་ཁྱིལ་ལེ་རང་བབས་ཀྱི་ངང་ལ་ཞོག །མི་སྤྲོ་མི་བསྡུ་མི་ཡེངས་མི་བསྒོམ་རྩ་བྲལ་གྱི་ངང་ལ་ཞོག །རྟོག་མེད་དུ་སེང་ངེ་། བདེན་མེད་དུ་བུན་ནེ། རྩོལ་མེད་དུ་ཤིགས་སེ། རྗེས་མེད་དུ་ཝལ་ལེ། སྒོམ་མེད་དུ་ཁྲེས་སེ། རང་གནས་སུ་ལྷོད་དེ། དགོངས་པ་ཐུན་མཚམས་ལས་འདས་པ། མ་བསྒོམས་ལྷུན་གྲུབ་ཆེན་པོའི་བསམ་གཏན། རིག་སྟོང་ཆོས་ཟད་ཀ་དག་གི་རང་མལ་དུ་ཐག་བཅད་པའོ། །གདིང་གྲོལ་ཐོག་ཏུ་བཅའ་བ་ནི། དེ་ལྟར་བཞག་པའི་ངང་ལས་གློ་བུར་གྱི་དྲན་བསམ་འཆར་སྒོ་མ་འགགས་པ་ཅི་ཤར་ཡང་། སྣ་མི་བསྐྱིལ་རྗེས་མི་འབྲང་། གཉེན་པོས་མི་འཇོམས། རང་སངས་སུ་བཞག་པས། འགྱུ་བ་དག་སངས། གང་ཤར་རང་གྲོལ། སྐྱེས་གྲོལ་དུས་མཉམ། ཤར་གྲོལ་སྔ་ཕྱི་མེད། རྩལ་གཞི་ལ་ཐིམ། མ་བུ་གང་འབྱོར། ཡེ་ཤེས་དབྱིངས་དང་འདྲེས། དྲན་གཞི་ཀ་དག་གི་དགོངས་པར་ཐུག་ནས། ཐམས་ཅད་ཆོས་ཉིད་ཀྱི་དབྱིངས་སུ་གྲོལ་ནས། རྒྱ་མཚོ་ལས་རླབས་ཤར་བ་རང་མལ་དུ་ཐིམ་པ་ལྟར་གྲོལ་ཏེ། ཤར་བའི་སྐད་ཅིག་མ་ལ་ཐོག་མའི་གྲོལ་ས་ངོས་འཛིན་པས་གདེང་གྲོལ་ཐོག་ཏུ་བཅས་ཏེ། ཡེ་ཡིན་དུ་འདུག་པས་ཆིག་ཆོད་དུ་གྲོལ། རང་ཤར་དུ་འདུག་པས་རང་གྲོལ་དུ་གྲོལ། གཏད་མེད་དུ་འདུག་པས་འཛིན་མེད་དུ་གྲོལ། ཕྱོགས་མེད་དུ་འདུག་པས་རིས་མེད་དུ་གྲོལ། རང་གྲོལ་དུ་འདུག་པས་གང་ཤར་དུ་གྲོལ། ཐོག་བབས་སུ་འདུག་(༡༠༨)པས་ཅར་ཕོག་ཏུ་གྲོལ། རང་རྩལ་དུ་འདུག་པས་རང་མལ་དུ་གྲོལ། ངོ་བོ་སྟོང་པའི་རང་གདངས་ཤེས་རབ་རིག་པའི་རྩལ་དུ་ཤར་བ་ཀ་དག་ཆོས་སྐུའི་རང་མལ་དུ་གྲོལ། དུས་བཞི་ཆོས་ཉིད་ཀྱི་འཁོར་ལོར་འཁྱིལ་པས། དབྱིངས་དང་ཡེ་ཤེས་འདུ་འབྲལ་མེད་པའི་དགོངས་པར་རོ་གཅིག་སྟེ། གང་ཤར་ཡེ་ཤེས་ཀྱི་རོལ་པར་ཀློང་རྡོལ་བས། སེམས་ལས་འདས་པའི་ཡེ་ཤེས། ཡིད་ལས་འདས་པའི་ཤེས་རབ། ཀུན་གཞི་ལས་འདས་པའི་ཆོས་སྐུར་གདེང་ཆོས་པ་ནི། ངོ་བོ་ཡེ་གྲོལ་དུ་ཤེས་པས་བསྐྱར་ནས་གྲོལ་རྒྱུ་མེད་པའི་གདེང་འཆོས། རང་བཞིན་ཡོངས་གྲོལ་དུ་ཤེས་པས་གཉེན་པོས་གྲོལ་རྒྱུ་མེད་པའི་གདེང་འཆོས། ཐུགས་རྗེ་རང་གྲོལ་དུ་ཤེས་པས་སྔ་ཕྱི་དུས་ལ་མི་ལྟོས་པར་གྲོལ་བའི་གདེང་འཆོས། ཆོས་ཉིད་ཅེར་གྲོལ་དུ་ཤེས་པས་སྣང་ཤེས་གཉིས་མེད་དུ་གྲོལ་བའི་གདེང་འཆོས། མཚན་ཉིད་རང་གྲོལ་དུ་ཤེས་པས་འབད་རྩོལ་བྱར་མེད་དུ་གྲོལ་བའི་གདེང་འཆོས་ཏེ། རྩལ་གཞི་ཐོག་ཏུ་གྲོལ་བས་ཆོས་སྐུ་རྒྱལ་པོའི་ཕོ་བྲང་དུ་གཏན་སྲིད་ཟིན་པ་ནི། ཐལ་འགྱུར་ལས། རང་སེམས་གྲོལ་བ་ཞེས་བྱ་བ། །གཅིག་ནས་གཅིག་ཏུ་སོང་བ་མེད། །གང་གིས་བཀྲོལ་བ་མེད་པའི་སེམས། །གཞི་ནས་རྫོགས་པས་འགྲོ་འོང་མེད། །བརྟགས་པས་མ་རྙེད་རྒྱུ་མཚན་མེད། །གཞི་རྩ་མེད་པས་སྟོང་གསལ་གནས། །རང་གསལ་གནས་པའི་དོན་དེ་ནི། །གནད་ཀྱིས་གྲོལ་བས་ཕྱོགས་རིས་མེད། །དུས་ཀྱིས་གྲོལ་བས་ལྟོས་གཞི་མེད། །འབད་མེད་གྲོལ་བས་རྩོལ་སྒྲུབ་མེད། །དེ་ལ་གདེང་གིས་གྲོལ་བ་ནི། །ཡེ་ནས་གྲོལ་བས་བསྐྱར་གཞི་མེད། །རང་གིས་གྲོལ་བས་གཉེན་པོ་མེད། །ཅེར་གྱིས་གྲོལ་བས་མཐོང་སར་ཡལ། །ཡོངས་སུ་གྲོལ་བས་འབད་མེད་དོ། །ཞེས་གསུངས་སོ། །དེ་ལྟར་ན་རང་རིག་ཆོས་སྐུར་ངོ་སྤྲད། ངང་གདངས་དགོངས་པར་ཐག་བཅད། ཤར་གྲོལ་ཀ་དག་ཏུ་གདེང་བཅའ་བ་གསུམ་གྱིས་གང་ཤར་ལྟོས་མེད་ཀྱི་ཤེས་པ་གཉེན་པོའི་བློ་དང་བྲལ་བ་གཞི་ཡེ་ཡིན་ཀ་དག་ཏུ་ཁྲེགས་ཀྱིས་བཅད་པའི་ངོ་སྤྲད་དེ། འདས་རྗེས་ལས། སྣང་སྲིད་ཐམས་ཅད་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། །དེ་ཉིད་སངས་རྒྱས་རྣམས་ཀྱི་དགོངས་བབས་(༡༠༩)པས། །ཞེས་སོ། །

དོན་གཉིས་པ་ཐོད་རྒལ་དུ་ངོ་སྤྲད་པ་ལ་བཞི་སྟེ། སྔོན་དུ་ལུས་ངག་ཡིད་གསུམ་གྱི་གནད་གཟིར་བ། གནད་རྣམ་པ་གསུམ་ལ་བརྟེན་ནས་མངོན་སུམ་རང་ཐོག་ཏུ་ངོ་སྤྲད་པ། དེ་ལྟར་ཉམས་སུ་བླངས་པས་སྣང་བ་བཞིའི་འཆར་ཚུལ། མཐའ་རྟེན་གྱི་མན་ངག་གོ། །

དང་པོ་ནི། ལུས་ཀྱི་གནད་དུ་བཞུགས་སྟངས་གསུམ་གང་རུང་འཆར་གཞུག །ངག་གི་གནད་ཅི་ཡང་མི་སྨྲ་བ་ལ་བསླབ། སེམས་ཀྱི་གནད་ཕྱིའི་དབྱིངས་ཀྱི་ནང་དུ་རིག་པ་མ་ཡེངས་པར་གཏད་ལ་ཉི་མ་འགར་བསླབས་པས། རླུང་སེམས་ཁོད་སྙོམས་ཤིང་བཞུགས་སྟངས་དང་གཟིགས་སྟངས་ལས་སུ་རུང་བའོ། །གཉིས་པ་ནི། གནད་བཞི་ལས་ངོ་སྤྲད་དེ། སྒོའི་གནད། ཡུལ་གྱི་གནད། རླུང་གི་གནད་རིག་པ་དང་རླུང་གཉིས་གཅིག་ཏུ་བརྩིས་པས་གནད་གསུམ་ཟེར། རིག་པའི་གནད། ངོ་སྤྲད་པ་དངོས་ལས། སྒོའི་གནད། གཟིགས་སྟངས་གསུམ་གང་རུང་གིས་བལྟ་བ་སྟེ། ཡེ་ཤེས་སྙིང་ནང་ན་གནས་པའི་རང་གདངས་ཆུའི་སྒྲོན་མར་ཐོན་པ་ཉིད་གཟིགས་སྟངས་གཅུན་པས་མངོན་པའི་ཕྱིར་རོ། །ཡུལ་གྱི་གནད་ཕྱི་དབྱིངས་ནམ་མཁའ་སྤྲིན་མེད་ལ་གཏད་པས། ནང་གི་དབྱིངས་རྣམ་དག་གི་སྒྲོན་མ་འཆར་བའི་ཕྱིར་གཏད་དོ། །རླུང་གི་གནད་རབ་ཏུ་དལ་བས་ཁ་ནས་དྲངས་ཤིང་ཕྱིར་འཕངས། ནང་དུ་གཟུང་། བར་དུ་གནས་པ་གསུམ་ལ་བསླབ་བོ། །རིག་པའི་གནད་དབྱིངས་ལ་ཡེ་ཤེས་ཀྱི་སྣང་བ་འཆར་དུས་ལུ་གུ་རྒྱུད་ཤར་བ་ལ་མ་ཡེངས་པར་བཙོན་དུ་བཟུང་ནས་དེ་དང་མི་འབྲལ་བར་བྱེད་པའོ། །དེ་དག་ནི་སྔོན་དུ་གནད་གཟིར་བའི་རིམ་པའོ། །ངོ་སྤྲད་པ་དངོས་ནི། གནད་ཀྱི་མཐོང་བའི་འོད་གསལ་རྡོ་རྗེ་ལུ་གུ་རྒྱུད་ཀྱི་སྣང་བ་སྟེ། ཕྱི་དབྱིངས་ནམ་མཁའ་དྭངས་པར། ནང་གི་དབྱིངས་འོད་ལྔ་ཤར་ཏེ། དེའི་ཁྲོད་ན་རིག་པ་རྡོ་རྗེ་ལུ་གུ་རྒྱུད་གསེར་གྱི་སྐུད་པ་ལ་ཐིག་ལེའི་འཕྲོ་འདུས་བརྒྱན་པ་འགྲོ་འོང་དུ་སྣང་བ་འདི་ཉིད། དབྱིངས་དང་ཡེ་ཤེས་འདུ་འབྲལ་མེད་པའི་རང་སྣང་། ཁམས་བདེ་གཤེགས་སྙིང་པོའི་རང་འོད་སྙིང་ཁ་དཔལ་གྱི་བེའུ་ན་རིག་པ་ཀ་དག་ཤེལ་གོང་ལྟ་བུ་ཕྱི་ནང་མེད་པའི་ནང་ན། ལྷུན་གྲུབ་གཏིང་གསལ་ཆེན་པོ་རང་གདངས་ལམ་རྩ་དར་དཀར་གྱི་སྣལ་མ་ལྟ་(༡༡༠)བུ་ནས་ཕྱིར་ཤར་ཏེ། སྒོ་ཆུའི་སྒྲོན་མ་ནས་དངོས་སུ་ཤར་བ་འདི་ཁོ་ན་མངོན་སུམ་ཡེ་ཤེས་ཀྱི་སྣང་བ་ཞེས་བྱ་སྟེ། ཐོག་མའི་ཀུན་ཏུ་བཟང་པོ་དང་ཞལ་མཇལ། ཡེ་ཤེས་དག་པའི་སྣང་བ་མཐོང་། དེ་རིང་དཔལ་རྡོ་རྗེ་སེམས་དཔའ་དང་སྐལ་བ་མཉམ་པ་ཞེས་བྱ་སྟེ། སངས་རྒྱས་སྲས་གཅིག་ལས། ཐོག་མའི་ཀུན་ཏུ་བཟང་པོ་དང་། །སྐལ་བ་ཉིད་ནི་མཉམ་པའོ། །ཞེས་པ་དང་། ཐལ་འགྱུར་ལས། མངོན་སུམ་གནད་འདི་སུས་མཐོང་བ། །འཁོར་བར་ལྡོག་པ་ག་ལ་སྲིད། །ཅེས་གསུངས་པས། ཆོས་ཉིད་བདེན་པའི་རང་སྣང་མཐོང་བས་མཆོག་ཏུ་འཕགས་པར་ངོ་སྤྲད་པ་ཡིན་ནོ། །

གསུམ་པ་དེ་ཉིད་ཉམས་སུ་བླང་བ་ལ། སྣང་བ་བཞིའི་འཆར་ཚུལ་བསྟན་པ་ལ། ཆོས་ཉིད་མངོན་སུམ་གྱི་སྣང་བ། ཉམས་གོང་འཕེལ་གྱི་སྣང་བ། རིག་པ་ཚད་ཕེབས་ཀྱི་སྣང་བ། ཆོས་ཉིད་ཟད་པའི་སྣང་བ་དང་བཞི་ལས། དང་པོ་ནི་བླ་མས་ངོ་སྤྲད་པའི་དོན་དེ་ཉིན་མཚན་དུ་སྔར་གྱི་གནད་གསུམ་གྱིས་ཉམས་སུ་བླངས་པ་ལས། དབྱིངས་སྣང་མཐིང་ཀ་ཁྱབ་པ་ཆེན་པོའི་འོད་ལས་མཆེད་པས་ཁ་དོག་ལྔ་ལྡན་གྱི་ནང་དུ་ལུ་གུ་རྒྱུད་བྲེངས་ཆགས་པ་དང་། ཐིག་ལེ་གསུམ་སྦྲེལ་དུ་སྣང་བ་ཚུན་ཆད་དོ། །དེའང་ཆོ༷ས་ཉིད༷་ནི་རིག་པ་བྱང་ཆུབ་ཀྱི་སེམས་སྟོང་གསལ་ཀ་དག་ཆེན་པོའི་ཀློང་ན། ལྷུན་གྲུབ་གཏིང་གསལ་དུ་ཡོད་པའི་སྣང་བ་དེ་ཉིད། མངོ༵ན་པ་ནི་སྙིང་ནས་མིག་ཏུ་བརྒྱུད་དེ་དབྱིངས་རྣམ་དག་གི་སྒྲོན་མར་འོད་ལྔ་ལུ་གུ་རྒྱུད་ཐིག་ལེ་ཐིག་ཕྲན་དང་བཅས་པར་གསལ་བའོ། །གས྄ུ༵མ་པ་ནི། དེ་ཉིད་དཔེ་ལ་མི་ལྟོས། རྟགས་ལ་མི་བརྟེན། གཅིག་ནས་གཅིག་ཏུ་བརྒྱུད་པ་མ་ཡིན་པར་རང་ལས་དངོས་ཤར་བའོ། །སྣང༵་བ༵་ནི་འོད་དང་ཁ་དོག་འགྲོ་འོང་འཕེལ་འགྲིབ་ལ་སོགས་པ་ད་ལྟ་དབང་པོའི་སྤྱོད་ཡུལ་དུ་བར་སྣང་གི་འཇའ་ཚོན་ལྟར་གསལ་བ་དེ་ཉིད་ལ་བལྟར་ཡོད་པའི་ཕྱིར། ཆོས་ཉིད་མངོན་སུམ་གྱི་སྣང་བ་ཞེས་བྱའོ། །ཉམས་གོང་འཕེལ་གྱི་སྣང་བ་ནི། དེ་ནས་ཀྱང་བརྩོན་པས་ཉམས་སུ་བླངས་པ་ལས། འོད་གསལ་གྱི་སྣང་བ་དེ་དག་ཇེ་རྒྱས་སུ་འཕེལ་བས། འཁྲུལ་པའི་སྣང་བ་ཇེ་ནུབ་ལ་ཕྱོགས་པའོ། །ཉམས་ནི་གཉིས་ལས། ཤེས་པའི་ཉམས་བདེ་བ་གསལ་བ་མི་རྟོག་པ་ལ་སོགས་པ་སྣ་ཚོགས་སུ་འཆར་ཡང་མི་བརྟན་(༡༡༡)པའི་ཕྱིར་ན། འདིར་ལམ་ཚོད་འཛིན་དུ་དངོས་སུ་མ་བསྟན་པར་སྣང་བའི་ཉམས་གཙོ་བོར་བཤད་དོ། །དེ་ཡང་དབྱིངས་ཀྱི་སྣང་བ་ནི། ཁ་དོག་ལྔ་འཇའ་ཚོན་ལྟ་བུའོ། །དབྱིངས་དེའི་རྒྱན་གྱི་སྣང་བ་ནི། འོད་ལྔའི་མུ་ཁྱུད་ཀྱི་ནང་ན་པདྨ་ལྟ་བུ་དང་། མདའ་ལྟ་བུ་ལ་སོགས་པ་སྟེ། གཞལ་ཡས་ཁང་གི་རྒྱན་དང་། ཕྱག་མཚན་དུ་གསལ་བའོ། །རིག་པའི་སྣང་བ་ནི་ལུ་གུ་རྒྱུད་དོ། །ལུ་གུ་རྒྱུད་དེའི་རྒྱན་གྱི་སྣང་བ་ནི། ཐིག་ལེས་ཚིགས་མཚམས་སུ་བརྒྱན་པ་དང་། ཐིག་ཕྲན་འགྲོ་འོང་དུ་གསལ་བའོ། །དེ་ཡང་དབྱིངས་དང་རིག་པའི་སྣང་བ་གཉིས་སུ་འདུས་ལ། དབྱིངས་སྣང་སངས་རྒྱས་ཀྱི་ཞིང་ན་གཞལ་ཡས་ཁང་གདན་ཁྲིའི་བཀོད་པས་བརྒྱན་པ་འཆར་བའི་རང་བཞིན་ལ། རིག་སྣང་དེར་ལྷའི་བཀོད་པ་སོ་སོར་འཆར་བའི་རང་བཞིན་དུ་གནས་པའོ། །

གོང་འཕེལ་ནི། སྣང་བ་རྒྱ་ཆེར་འཕེལ་བ་སྟེ། དང་པོ་སྨིན་མཚམས་དང་བྲལ་བ་ལས། ཡུལ་གྲུ་ཙམ་འོད་གསལ་གྱི་སྣང་བས་ཁྱབ་པའི་བར་རོ། །སྣང་བ་ནི་གཉིས་ལས། དབྱིངས་སྣང་དང་པོ་ལས་མཆེད་དེ། འོད་ལྔའི་སྣང་བ་རྩིབ་ཤར་དང་། གྱེན་འགྲེངས་དང་། མདུང་རྩེའི་རྣམ་པ་དང་། རེ་ལྡེའི་རྣམ་པ་དང་། པདྨ་སྟོང་ལྡན་དང་། མཆོད་རྟེན་བརྩེགས་པ་དང་། ཡེ་ཤེས་མཁར་ཐབས་དང་། དྲ་བ་ལྟ་བུ་དང་། དྲ་ཕྱེད་ལྟ་བུ་ལ་སོགས་པའོ། །རིག་པའི་སྣང་བ་ཐིག་ལེ་ཉ་མིག་ལྟ་བུ་དང་། རྨ་བྱའི་མདོངས་ལྟ་བུ་ལས། མེ་ལོང་ལྟ་བུ་དང་། འཁར་གཞོང་ཙམ་དང་། བསེ་ཕུབ་ཙམ་གྱི་བར་དུ་ཤར་བ་རྣམས་སོ། །

རིག་པ་ཚད་ཕེབས་ཀྱི་སྣང་བ་ནི། དེ་ནས་ཀྱང་ཉམས་སུ་བླངས་པས། དབྱིངས་སྣང་ཚད་དུ་ཕེབས་ཏེ། གང་བལྟས་འོད་ཀྱི་ཞིང་ཁམས་སུ་གསལ་བས་ས་རྡོ་རི་བྲག་གི་སྣང་བ་ནུབ་ནས། འོད་ལྔ་མུ་ཁྱུད་ཀྱི་གཞལ་ཡས་སུ་གསལ་བས་ཚོམ་བུའི་དཀྱིལ་འཁོར་སྣང་བར་རིག་སྣང་ཚད་ལ་ཕེབས་པས། རིག་པ་སྐུར་སྨིན་ཏེ། ལུ་གུ་རྒྱུད་ཀྱི་ཐིག་ལེ་དག་ཚོམ་བུའི་ཕོ་བྲང་དུ་རང་འབྱོར་ཏེ། རེ་རེའི་ནང་དུ་དང་པོ་རིགས་ལྔའི་སྐུ་རྐྱང་བ་ལས། དེ་ལས་ཡབ་ཡུམ་ཟུང་འབྲེལ་དང་། འཁོར་གྱི་ཚོགས་སུ་སྣང་བས་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་སོ་སོའི་དཀྱིལ་འཁོར་རྫོགས་པའི་སྣང་བས་ནམ་མཁའ་(༡༡༢)ཁྱབ་པར་འཆར་པའོ། །དེའང་རིག་པ་ནི་གཞི་འཛིན་པའི་རིག་པ་ངོ་བོ་ཀ་དག །མཚན་ཉིད་འཛིན་པའི་རིག་པ་ཡེ་ཤེས་ལྔ་སྟེ་རང་བཞིན་ལྷུན་གྲུབ། ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད། ཡུལ་སྣང་གི་རིག་པ་སྟོང་ཉིད་གང་དང་ཡང་དབྱེར་མི་ཕྱེད་པའོ། །དེ་དག་ཀྱང་རིག་པ་ནང་གསལ་གྱི་དུས་ན། གཞི་གནས་ཀྱི་དུས་ན་རིག་པ་ངོ་བོ་རང་བཞིན་ཐུགས་རྗེ་གསུམ། གཞི་འཛིན་པའི་རིག་པ་ངོ་བོ་ཀ་དག །མཚན་ཉིད་འཛིན་པའི་རིག་པ་ཡེ་ཤེས་ལྔ་རྣམས་ངོ་བོ་གཅིག་ཏུ་ཡོད་པའི་རང་གདངས་ལས། རང་བཞིན་ལྷུན་གྲུབ་ཀྱི་གདངས་ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་དང་། ཐུགས་རྗེ་ཀུན་ཁྱབ་ཀྱི་གདངས་ཡུལ་སྣང་གི་རིག་པ་སྟོང་ཉིད་གང་དང་ཡང་དབྱེར་མི་ཕྱེད་པར་ཤར་བའོ། །གདངས་ལ་རིག་པར་བཏགས་པ་ནི་རྒྱུ་རིག་པའི་མིང་འབྲས་བུ་གདངས་ལ་བཏགས་པ་སྟེ། འོད་ལ་ཉི་མར་བརྗོད་པ་བཞིན་ནོ། །ཚད་ནི་ཕྱི་ཡུལ་སྣང་ཡེ་ཤེས་སུ་འཆར་བ། ནང་སྒྱུ་ལུས་འོད་གསལ་དུ་གྲོལ་བ། གསང་བ་ལྔ་ལྡན་སྐུར་སྨིན་པའོ། །ཕེབས་པ་ནི། ཉམས་ལེན་དང་བྲལ་བའི་ངང་། བསྒོམ་དུ་མེད་པའི་དོན། བལྟར་མེད་པའི་ཡེ་ཤེས་ཆེན་པོ་ཐོག་ཏུ་ཁེལ་བས་ཕེབས་པ་ཞེས་བྱའོ། །སྣང་བ་ནི། ལམ་སྣང་ལོངས་སྐུའི་རང་སྣང་མཐོང་བས་གཞི་སྣང་གི་ཆ་མཐོང་བ་ལས། འཁྲུལ་འཛིན་གྱི་ཆ་ལོག་པས་ཁྱད་པར་དུ་བྱས་ཏེ། བཅོ་ལྔའི་ཟླ་བ་ཉ་གང་བ་ལྟ་བུ་ལ་དར་ཅིག་གནས་པའོ། །སྤྱིར་རིག་པ་ལས་རང་གདངས་ཇི་ལྟར་ཤར་ཡང་། གཞི་སྣང་། ལམ་སྣང་། འབྲས་སྣང་གསུམ་དུ་འདུས་ཏེ། དང་པོ་དབྱིངས་ལས་རང་གདངས་ཤར་བ་དང། ལམ་ཉམས་སུ་བླངས་པས་ཤར་བ་དང་། བར་དོར་ཤར་བ་དང་། ལྷུན་གྲུབ་ཀྱི་སྦུབས་ནས་ཕྱིར་གསལ་དུ་ཤར་བ་རྣམས་རིག་པའི་རང་གདངས་སུ་གཅིག་ཀྱང་། ཐ་དད་དུ་ཕྱེ་བ་ནི། རིག་གདངས་ཤར་ཡང་། དྲི་བཅས་རང་ངོ་མ་ཤེས་པའི་ཆ་ནས། རིག་གདངས་ཤར་དུས་གཞི་སྣང་དུ་བཞག་སྟེ། ཐོག་མའི་རང་གདངས་དང་བར་དོའི་རང་གདངས་བཞིན་ནོ། །བླ་མས་རིག་པའི་ཡིན་ལུགས་ངོ་སྤྲད་ནས་གདངས་ལ་བལྟས་པས་མ་རིག་པ་རང་གྲོལ་ཏེ། ཡེ་ཤེས་ཀྱི་རང་སྣང་མཐོང་བས་ལམ་སྣང་ལྷུན་གྲུབ་ཡུལ་དུ་བྱས་པ་ཞེས་བྱའོ། །དབྱིངས་སུ་ཐིམ་ཞིང་གྲོལ་བ་ལས་མ་གཡོས་པར་ནང་གདངས་ཕྱིར་ཤར་བས། ལོངས་སྐུ་ཕྱེད་སྤྲུལ་སྐུ་དང་། (༡༡༣)འགྲོ་འདུལ་སྤྲུལ་པ་ལ་སོགས་པས་དོན་མཛད་པས་འབྲས་བུའི་སྣང་བ་ཞེས་བྱའོ། །ཞར་ལ་འཕྲོས་ཏེ་བཤད་པའོ། །

ཆོས་ཉིད་ཟད་པའི་སྣང་བ་ནི། བཅུ་དྲུག་ནས་གནམ་སྟོང་གི་བར་ཟླ་བ་མར་དབྲི་བས་དབྱིངས་སུ་འཇུག་པ་ལྟར། སྔར་གྱི་རྟགས་རྣམས་སྐྱེ་མེད་ཀྱི་ཀློང་དུ་མྱ་ངན་ལས་འདའ་བ་སྟེ། གཟུང་འཛིན་གྱི་ཞེན་པ་ཐམས་ཅད་ཟད་ནས། ཅིའི་ངོ་བོར་ཡང་མ་གྲུབ་པས། རང་གདངས་ནང་དུ་འཇུག་པ་སྟེ། འདི་ལས་གཞན་དུ་རྟགས་ཟད་པ་ཞེས་བྱའོ། །དེའང་ཆོས་ཉིད་ནི་སྟོང་གསལ་ཀ་ནས་དག་པའི་རིག་པའི་ནང་དབྱིངས་སུ། བླ་མས་ངོ་སྤྲད་པའི་ལྷུན་གྲུབ་ཀྱི་རང་གདངས་ཚད་དུ་ཕེབས་པ་རྣམས། ཟད་པ་ནི་དེར་ཐུག་པ་དེ་ཤེལ་གོང་འོད་ནང་དུ་ཡལ་བ་བཞིན་ནོ། །ཟད་ལུགས་གཉིས་ཏེ། རིམ་གྱིས་ཟད་པ་བརྩོན་འགྲུས་ཅན་ཉམས་སུ་བླངས་པས་འཕེལ་སྣང་ཟླ་བ་མར་འགྲིབ་ལྟར་ཟད་པ་དང་། ཐོད་རྒལ་བ་ཅིག་ཆར་དུ་ཟད་པ་སྔ་མའི་སྦྱངས་པ་དང་། བླ་མའི་བྱིན་རླབས་སྟོབས་སུ་གྱུར་པ་ལས། འཕེལ་སྣང་ཚད་དུ་མ་ཕྱིན་ཡང་ནང་དབྱིངས་ཀ་དག་ལ་ཐུག་པ་ཡོད་པར་གསུངས་ཏེ། ཟངས་ཡིག་ཅན་དང་། རྟགས་ཚད་དུ་ཁ་ཅིག་ནི་སྣང་བ་འདི་ཀུན་ཚད་དུ་མ་ཕྱིན་པ་ལ་ཟད་པར་འགྱུར་བ་ཡང་ཡོད་དོ་ཞེས་གསུངས་སོ། །སྣང་བ་ནི་ངོ་བོ་ཀ་དག་གི་ཆ་ལས་ཐུགས་རྗེ་ཡེ་ཤེས་ཀྱི་མཛད་པ་རྒྱུན་མི་འཆད་པ་སྟེ། ནམ་མཁའ་སྤྲིན་དང་བྲལ་བ་ལྟ་བུའི་ངང་དུ་དར་ཅིག་གནས་པའོ། །འདིའི་དུས་སུ་སྐྱེ་བ་ལ་རང་དབང་ཐོབ་པས་རྡོ་རྗེའི་སྐུ་འགྲུབ་སྟེ། སེམས་ཅན་གྱི་དོན་བྱེད་པར་འདོད་ན་འཕོ་བའི་སྐུར་བཞེངས་ཏེ་གང་ལ་གང་འདུལ་གྱི་སྤྲུལ་པས་དོན་མཛད་པའོ། །འཇུག་པ་ལ་རང་དབང་ཐོབ་པས་འཕོ་བའི་དུས་སུ་སེམས་ཅན་སུམ་སྟོང་ལ་རིག་པ་བཅུག་པས་མཉམ་པ་ཉིད་དུ་གྲོལ་བ་དང་། བེམས་པོ་རྣམས་ལ་རིག་པ་བཅུག་པས་འགུལ་བ་དང་། སྐད་འབྱིན་པར་ནུས་པ་དང་། ཡུལ་ཁམས་གཅིག་ནས་གཅིག་ཏུ་སྤོ་བ་དང་། དངོས་པོ་ཕན་ཚུན་དུ་བསྒྱུར་བ་ལ་སོགས་པ་མཐུ་སྟོབས་དང་། རྫུ་འཕྲུལ་དཔག་ཏུ་མེད་པ་མངའ་བརྙེས་པའོ། །དེ་ལྟར་སྣང་བ་བཞི་ཚད་དུ་ཕྱིན་ནས་ཀ་དག་གི་ནང་དབྱིངས་ལྷུན་གྲུབ་རིན་པོ་ཆེའི་སྦུབས། གཞོན་ནུ་བུམ་པ་སྐུའི་ཞིང་ཁམས། ཆོས་སྐུ་ཐིག་ལེ་ཉག་གཅིག་གི་ངང་དུ་དབྱིངས་དང་ཡེ་ཤེས་(༡༡༤)རོ་གཅིག་པས། ཡེ་སངས་རྒྱས་ལ་ཡང་སངས་རྒྱས་ཀྱི་བྱང་ཆུབ་མངོན་སུམ་དུ་བརྙེས་ནས། རང་དོན་ཆོས་སྐུ་དག་པ་གཉིས་ལྡན་གྱི་ངོ་བོར་རོ་གཅིག་པས་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལས་མི་གཡོ། དངོས་པོ་དང་མཚན་མ་གང་དུ་ཡང་མ་གྲུབ་པ། ཤེལ་གོང་དྲི་མ་མེད་པ་གཏིང་གསལ་གྱི་ཆ་ཙམ་ལས། སྐུ་གསུམ་འདུ་འབྲལ་མེད་པའི་ངོ་བོ་རང་བཞིན་ཐུགས་རྗེ་གསུམ་གྱི་ཚུལ་དུ་དབྱིངས་ཀྱི་སྐུ་གསུམ་ཡེ་ཤེས་དང་བཅས་པར་བཞུགས་པའི་ངང་ལས། གཞན་དོན་དུ་ཤེལ་འོད་ཕྱིར་གསལ་བ་ལྟར་དབྱིངས་སྣང་ཡེ་ཤེས་ཕྲིན་ལས་ཀྱི་གཟུགས་སྐུ་གཉིས་གདུལ་བྱ་སྣང་བས་འཁོར་བ་ཇི་སྲིད་བར་སེམས་ཅན་གྱི་དོན་མཛད་པའོ། །དེ་ཡང་དབྱིངས་ཀྱི་སྐུ་དང་། དབྱིངས་ནང་གི་སྐུ་ནང་གསལ་དང་། ཕྱིར་གསལ་ཏེ། གཅིག་དང་ཐ་དད་ལས་འདས་པའི་རང་བཞིན་དུ་མཁས་པ་རྣམས་ཀྱིས་རིག་པར་བྱའོ།། །།

བཞི་པ་མཐའ་རྟེན་གྱི་མན་ངག་ལ་བཞི་སྟེ། མི་འགུལ་བ་གསུམ་ལ་གཞི་བཅའ་བ། སྡོད་པ་གསུམ་གྱི་ཚད་བཟུང་བ། ཐོབ་པ་གསུམ་གྱི་གཟེར་བཏབ་པ། གདིང་བཞིའི་གྲོལ་ཚད་གཟུང་བའོ། །

དང་པོ་ནི། ཉམས་སུ་ལེན་པ་དངོས་གཞི་ལ་ཞུགས་ནས་ཉམས་ལེན་དང་མ་བྲལ་གྱི་བར་ལ་དགོས་པའི་གནད་ལ། མི་འགུལ་བ་གསུམ་ལ་གཞི་བཅས་པས། རླུང་སེམས་རང་དག་སྟེ་རིག་པ་རང་མལ་དུ་གསལ། གྲོལ་བ་ཅེར་ཚད་ཟིན་པའི་དགོས་པ་ཡོད་དོ། །དེ་ལ་ལུས། མིག །རླུང་རིག་མི་འགུལ་བ་གསུམ་ལས། ལུས་མི་འགུལ་བ་བཞུགས་སྟངས་གསུམ་ལས་མི་གཡོ་བར་བྱེད་པ་ནི། ཆོས་སྐུའི་བཞུགས་སྟངས་སེང་གེ་ལྟ་བུ་ནི། ལུས་འགྱིང་ཚུགས་སུ་བསྲང་། རྐང་མཐིལ་ས་ལ་ཕབ། ལག་སོར་བསྒོངས་ཏེ་ས་ལ་ཕབ། རྩལ་མཇིང་པ་ལ་བསྐུལ་བས། ལས་ཀྱི་རླུང་རང་འགགས་ཏེ། ཡེ་ཤེས་ཀྱི་རླུང་ཟིན་ནས། ཆོས་ཉིད་ཀྱི་སྣང་བ་ལྷུག་པར་འཆར་བའི་གནད་དོ། །ལོངས་སྐུའི་བཞུགས་སྟངས་གླང་པོ་ལྟ་བུ་ནི། ཁ་སྦུབས་སུ་པུས་བྲང་སྦྱར། ལག་པའི་གྲུ་མོ་ས་ལ་བཙུགས། ལག་སོར་གྱིས་འགྲམ་པ་བཏེག །རྐང་པའི་སོར་མོ་བསྐུམས་ལ་ཕྱིར་བསྟན་པས། གཡོ་བྱེད་ཀྱི་རྟོག་པ་ནུབ་ནས། ཡེ་ཤེས་ཀྱི་དྲོད་འཕེལ་ཞིང་། དབྱིངས་རིག་འདུ་འབྲལ་(༡༡༥)མེད་པའི་དགོངས་པ་ལ་གནས་པའི་གནད་དོ། །སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུ་ནི། རྐང་པའི་ལོང་བུ་གཤིབས། ལག་པའི་གྲུ་མོ་པུས་མོའི་སྟེང་དུ་བསྣོལ། རྒལ་ཚིག་དྲང་བས། འབྱུང་བ་སྙོམས་ཤིང་རླུང་རིག་དག་པས་རྒྱུན་གྱི་ཏིང་ངེ་འཛིན་ལ་གནས་པའི་གནད་དོ། །མིག་མི་འགུལ་བ་གཟིགས་སྟངས་གསུམ་ལ་གནས་པ་ནི། ཡེ་ཤེས་ཀྱི་སྣང་བ་དངོས་སུ་འཆར་བའི་སྒོ་མིག་ཡིན་པས། གཟིགས་སྟངས་ཤེས་པ་གཅེས་ཏེ། ཆུ་ཡི་སྒྲོན་མ་དག་པ་ལས་ཡེ་ཤེས་ཀྱི་སྣང་བ་གསལ་བའི་ཕྱིར་རོ། །ཆོས་སྐུའི་གཟིགས་སྟངས་དྭངས་མ་འདྲེན་བྱེད་ཀྱིས་གྱེན་ལ་བལྟ་བ་ནི། མིག་གཉིས་སྨིན་མཚམས་ཀྱི་སྟེང་གི་ནམ་མཁའ་ལ་ཧད་པོར་བལྟས་པས། རྣམ་རྟོག་དབྱིངས་སུ་ནུབ་ནས་ཡེ་ཤེས་དངོས་སུ་མཆེད་པའི་གནད་དོ། །ལོངས་སྐུའི་གཟིགས་སྟངས་ཟུར་གྱིས་བལྟ་བ་ནི། ཐད་སོར་མིག་དྲང་པོར་གཏད་ལ། དེ་ནས་བབས་ཀྱིས་ཟུར་ལ་ཁྲིད་པས། གསལ་སྣང་ཞིང་ཁམས་སུ་རྒྱས་པའི་གནད་དོ། །སྤྲུལ་སྐུའི་གཟིགས་སྟངས་ཐུར་ལ་བལྟ་བ་ནི། ཅུང་ཟད་ཐུར་ལ་བཙུམ་རབ་ཏུ་ཟིམ་བུར་བལྟས་པས། རྟོག་མེད་ཀྱི་ཏིང་ངེ་འཛིན་ལ་གནས་པའི་གནད་དོ། །དེ་དག་ཀྱང་སྟེང་འོག་དང་ཐད་ཀའི་འོད་གསལ་འཕེལ་བར་བྱེད་པའི་གནད་དོ། །ཞར་ལ་ངག་གི་གནད་དུ་བསླབ་པ། གནས་པ། བརྟན་པ། ལ་བཟླ་བ་བཞི་ལས། དང་པོ་ནི། ཉི་མ་རེ་རེ་ཞིང་ཇེ་ཉུང་དུ་སྨྲ་བའོ། །གཉིས་པ་ནི་གཞན་དང་ཚིག་མི་འདྲེ་བའོ། །གསུམ་པ་ནི། མདོ་ཁ་ཏོན་ལ་སོགས་པའང་མི་བརྗོད་པའོ། །བཞི་པ་ནི། གང་ཡང་མི་སྨྲ་བའི་ངང་ལས་མི་འདའ་བར་སྒྲ་གཞི་མེད་དུ་རྟོགས་པར་བྱེད་པའོ། །

གཉིས་པ་སྡོད་པ་གསུམ་གྱི་ཚད་གཟུང་བ་ནི། དེ་ལྟར་ཉམས་སུ་བླངས་པས། ལམ་ཟབ་མོ་མངོན་དུ་གྱུར་པའི་བརྡར། ཕྱི་སྣང་བ་སྡོད་པས་རྐྱེན་ངན་གྲོགས་སུ་ཤར། ནང་སྒྱུ་ལུས་སྡོད་པས་འཁྲུལ་པའི་བྱ་བ་དང་བྲལ། གསང་བ་རླུང་སེམས་སྡོད་པས་རྣམ་རྟོག་སྐྱེ་མི་སྲིད་པའོ། །འདི་དག་གི་དུས། ཚད་རྨི་ལམ་གྱིས་གཟུང་བ་དང་། རྟགས་ལུས་ངག་ལ་འཆར་བ་གཉིས་འབྱུང་སྟེ། བརྩོན་འགྲུས་རབ་ལ་རྨི་ལམ་གཏན་ནས་འགགས། འབྲིང་རྨི་ལམ་ཟིན། ཐ་མའང་ངན་རྟོག་ནུབ་(༡༡༦)པའི་རྟགས་སུ་རྨི་ལམ་ཐམས་ཅད་བག་ཆགས་བཟང་པོར་འགྱུར་རོ། །རྟགས་ལུས་ངག་ལ་འཆར་བ་ལའང་། ཆོས་ཉིད་མངོན་སུམ་གྱི་དུས་སུ་ལུས་རུ་སྦལ་འཁར་གཞོང་དུ་བཅུག་པ་ལྟར། འདུག་སྟངས་ལས་མི་གཡོ། ངག་ལྐུགས་པ་ལྟར་བརྗོད་སྙིང་མི་འདོད། སེམས་མཁའ་འགྲོ་རྙི་ལ་ཟིན་པ་ལྟར་རྟོག་པ་འཕྲོ་ཡང་རང་ཡལ་རང་གྲོལ་དུ་རིག་པའི་ངང་ལས་མི་འདའ་འོ། །ཉམས་གོང་འཕེལ་གྱི་དུས་སུ་ལུས་སྐྱེས་བུ་ནད་ཀྱིས་ཐེབས་པ་ལྟར། ཁྲུས་དང་རྒྱན་ཆའི་སྒེག་ཆོས་ལས་གྲོལ། ངག་སྨྱོན་པའི་རང་ཚིག་ལྟར་གང་དྲན་བརྗོད་པ་ལ་རྗེས་འབྲང་དང་གཏད་བཟུང་མེད། སེམས་རྩི་དུག་ཐེབས་པ་ལྟར་དྲན་མེད་རྟོག་བྲལ་དུ་གནས་པའོ། །རིག་པ་ཚད་ཕེབས་ཀྱི་དུས་སུ་ལུས་གླང་པོ་ཆེ་འདམ་དུ་བྱིང་བ་ལྟར་རི་བྲག་གང་ལའང་ཐོགས་པ་མེད་པར་ཟང་ཐལ། ངག་གྲུལ་བུམ་གྱི་ཕྲུ་གུ་ལྟར་དབྱངས་སྙན་པོས་ཅི་སྨྲས་ཆོས་ཀྱི་ཚིག་ཏུ་རང་རྡོལ། སེམས་རིམས་ནད་བྱང་བ་ལྟར་བཟང་ངན་གྱི་རྟོག་པ་གང་ཤར་བའི་བག་ཆགས་བསྐྱར་ནས་ཡིད་ལ་མི་འགྱུ་བའོ། །ཆོས་ཉིད་ཟད་པའི་དུས་སུ། ལུས་དུར་ཁྲོད་ཀྱི་རོ་ལྟར་གསོད་པའི་གཤེད་མ་བྱུང་ཡང་འཇིགས་པ་དང་། སྐྲག་པ་མི་སྐྱེ། ངག་བྲག་ཆ་ལྟར་ཅི་སྨྲས་ཟུངས་མེད་པས་གཞན་གྱི་རྗེས་སུ་ཟློས། སེམས་ན་བུན་ཡལ་བ་ལྟར་གང་ཤར་སྐད་ཅིག་ལ་ཆོས་ཉིད་ཀྱི་ཀློང་དུ་རང་ཡལ་ཏེ་འཕྲོ་འདུའི་དྲན་རྟོག་ལས་འདས་པའོ། །

གསུམ་པ་ཐོབ་པ་གསུམ་གྱི་གཟེར་གདབ་པ་ནི། དེ་ནས་ཕྱི་སྣང་བ་ལ་རང་དབང་ཐོབ་པས་སྣང་རྐྱེན་ཞིང་ཁམས་སུ་གྲོལ། ནང་སྒྱུ་ལུས་ལ་རང་དབང་ཐོབ་པས་གདོས་བཅས་འོད་གསལ་དུ་གྲོལ། གསང་བ་རླུང་རིག་ལ་རང་དབང་ཐོབ་པས་འཁྲུལ་རྟོག་རང་འགག་པའོ། །

བཞི་པ་གདེང་བཞིའི་གྲོལ་ཚད་བསྟན་པ་ནི། ཡར་སངས་རྒྱས་ཀྱི་ཡོན་ཏན་བཤད་ཀྱང་ཐོབ་དུ་རེ་བ་དང་། མ་ཐོབ་ཀྱིས་དོགས་པ་གཉིས་མེད་དེ། རང་རིག་སངས་རྒྱས་སུ་ས་ཟིན། མར་འཁོར་བའི་སྡུག་བསྔལ་བཤད་ཀྱང་འཁོར་གྱིས་དོགས་པ་དང་མི་འཁོར་དུ་རེ་བ་མེད་དེ། རིག་པ་འཁྲུལ་རྟོག་ལས་གྲོལ་བའི་ཕྱིར་རོ། །དེ་ལྟར་ཉམས་སུ་ལེན་པ་དངོས་གཞི་ལ་ཞུགས་ནས། ཚེ་འདིར་གྲོལ་བའི་དབང་དུ་བྱས་ན། བརྩོན་འགྲུས་རབ་ལོ་གསུམ་(༡༡༧)དང་ཟླ་བ་གཅིག །འབྲིང་ལོ་བཞི་དང་ཟླ་བ་ལྔ་ཞག་དྲུག །ཐ་མ་ལོ་བདུན་དང་ཟླ་བ་བཅུ་གཅིག་ན་ཤ་ཁྲག་གདོས་བཅས་ཀྱི་ལུས་འོད་གསལ་དུ་གྲོལ་ནས། ནང་དབྱིངས་ཀ་དག་གི་ཆོས་སྐུ་ཀུན་ཏུ་བཟང་པོ་དང་དབྱེ་བ་མེད་པའི་ས་ལ་བྱང་ཆུབ་སྟེ། རབ་ཚེ་འདིར་གྲོལ་བའི་གདམས་ངག་གོ། །

སྤྱི་དོན་གཉིས་པ་བརྩོན་འགྲུས་འབྲིང་ཆོས་ཉིད་ཀྱི་བར་དོར་ཆོས་ཉིད་སྟོབས་སུ་གྱུར་ནས་སངས་རྒྱ་བའི་གདམས་ངག་ནི། དེ་ལྟར་བླ་མ་ལས་མངོན་སུམ་འོད་གསལ་གྱི་གདམས་ངག་ནི་ཐོབ། ཉམས་ལེན་དུམ་རེ་བྱས་ཀྱང་ཚད་དུ་མ་ཕྱིན་པ་རྣམས་ཆོས་ཉིད་བར་དོར་གཞི་སྣང་རིག་པའི་རང་གདངས་ཤར་བ་ལ་བཙན་ས་བཟུང་སྟེ། ཀ་དག་གི་ནང་དབྱིངས་སུ་གྲོལ་ལུགས་ཀྱི་གདམས་ངག་ལ་དོན་རྣམ་པ་བཞི་སྟེ། རང་བཞིན་གནས་པའི་བར་དོ་ལ་ཤེས་བྱའི་དྲས་ཐག་བཅད་པ་ཐི་བྱ་ཚང་དུ་འཇུག་པ་ལྟ་བུའི་མན་ངག །འཆི་ཁའི་བར་དོར་མི་གསལ་བ་གསལ་གདབ་པ་སྒེག་མོ་མེ་ལོང་ལ་ལྟ་བ་ལྟ་བུའི་མན་ངག །ཆོས་ཉིད་ཀྱི་བར་དོར་རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་མན་ངག །ཞར་ལ་སྲིད་པའི་བར་དོར་ལས་ཀྱི་འཕྲོ་འཐུད་པ་ཡུར་བ་རྐང་ཆད་ལ་ཝ་འཛུགས་པ་ལྟ་བུའི་མན་ངག་གོ། །དང་པོ་ནི། སྐྱེས་ནས་འཆི་ཁ་ལ་ཕྱོགས་པའི་བར་དུ་རང་བཞིན་གྱི་བར་དོ་ལ། ཕྱི་བླ་མའི་མན་ངག་དང་རྒྱུད་ལུང་ཟབ་མོ་ལ་ཐོས་པས་བློ་སྦྱངས། ནང་དེའི་དོན་ལ་བསམ་པས་ཚིག་དོན་གྱི་སྒྲོ་འདོགས་བཅད། གསང་བ་དོན་གྱི་རང་ཐོག་ཏུ་བསྒོམས་པས་ཀ་དག་ཆོས་ཟད་ཀྱི་ངང་དུ་ལ་བཟླ་བ་ནི། དཔེར་ན་ཐི་བྱ་ཚང་དུ་འཇུག་པའི་སྔོན་དུ་རྒྱང་རིང་པོ་ནས་ཕན་གནོད་ཀྱི་སྒྲོ་འདོགས་བཅད་ནས། དེ་ནས་ཐེ་ཚོམ་མེད་པར་རང་གི་ཚང་དུ་འཇུག་པ་ལྟར། དང་པོ་ཐོས་པས་མངོན་སུམ་གྱི་དོན་ལ་ཡིད་ཆེས། བར་དུ་བསམ་པས་ཐེ་ཚོམ་གྱི་སྒྲོ་འདོགས་ལེགས་པར་ཆོད། ཐ་མ་མངོན་སུམ་དབང་པོའི་ཡུལ་དུ་བསྒོམས་པས་དབྱིངས་རིག་འདུ་འབྲལ་མེད་པའི་ངང་དུ་ལ་བཟླ་བའོ། །

གཉིས་པ་འཆི་ཁའི་བར་དོ་གསལ་གདབ་པ་ནི། ཕྱི་ནང་གསང་བའི་འཆི་ལྟས་བརྟགས་ལ། བྱུང་ན་བཟློག་པའི་ཆོ་ག་བྱ། མི་བཟློགས་པར་འབྱུང་བའི་ཐིམ་ཚུལ་བྱུང་བའི་ཚེ། རང་ལ་གསལ་པོ་ཡོད་ན་དེས་ཆོག །མེད་ན་བླ་མའམ་གྲོགས་དམ་ཚིག་གཙང་བས་(༡༡༨)གདམས་པའི་གསལ་གདབ། འདེབས་འཕྲོ་ལ་ཕྱི་དབུགས་ཆད་ན་ནད་པ་དང་རང་གི་ཁ་སྣ་སྤྲད་དེ། རླུང་ཨཱ་གྱིས་འཕངས། ཨཱས་དྲངས། ཧཱུཾ་གིས་གནས་པ་ལ་ལན་ལྔ་ལ་སོགས་པ་བྱས་པས་མིག་ཧྲིག་གིས་བྱུང་བ་དང་། དབྱིངས་རིག་གི་སྣང་བ་ལྟར་བཅུག་ལ། འདི་ལ་མ་འགྱུར་བར་ལྟོས་ལ་བདེ་བར་གཤེགས་ཤིག །ཆོས་ཉིད་བར་དོར་རང་སྣང་ཆོས་ཉིད་ཀྱི་སྣང་བར་ངོ་ཤེས་པར་གྱིས་ཤིག །བདེ་བར་གཤེགས་ཤིག །མིག་ལ་རྡོ་རྗེ་སེམས་དཔའི་གསང་ལམ་ཐུགས་རྗེ་རྒྱུན་གྱི་ཐག་པ་ཤར་བ་ལ་མ་ཡེངས་པར་ལྟོས་ཤིག །བདེ་བར་གཤེགས་ཤིག །ཅེས་ལན་གསུམ་དུ་ངེས་ཤེས་བསྐྱེད་ལ་བརྗོད་དོ། །དེ་ཡང་དཔེར་ན་སྒེག་མོས་མེ་ལོང་དུ་རང་གི་བྱད་ལ་བལྟས་པས་དྲི་མ་ཡོད་མེད་དང་། རྒྱན་གྱི་བྱེ་བྲག་གསལ་བ་ལྟར། འཆི་ཁར་གདམས་པའི་དོན་གསལ་བར་ཡིད་ལ་བྱའོ། །དེའང་ས་ས་ལ་ཐིམ་པའི་རྟགས་སུ་ལུས་ཀྱི་པག་གཞི་ས་ལ་ལྷུང་། ལྡང་འདུག་མི་ནུས། ནང་དུ་ཤེས་པ་བན་བུན་དུ་སོང་། ཆུ་ཆུ་ལ་ཐིམ་པའི་རྟགས་སུ། ཁ་སྣ་དང་མིག་ནས་ཆུ་དར་ཅིག་བྱུང་ནས་སྐམ། སོ་དྲེག་དང་སོ་ངད་ཆགས། ནང་དུ་ཤེས་པ་ལང་ལོང་དུ་སོང་། མེ་མེ་ལ་ཐིམ་པའི་རྟགས་སུ། རྐང་ལག་མཐིལ་བཞི་ནས་དྲོད་སྡུད། སྨིན་ཕྲག་གི་བཀྲག་འཆོར། ནང་དུ་ཤེས་པ་ཉོག་ཐིབས་ཀྱིས་འགྲོ། རླུང་རླུང་ལ་ཐིམ་པའི་རྟགས་སུ། ཕྱི་དབུགས་རྒོད་ཅིང་བརྩེགས་མ་མང་། ནང་དུ་ཤེས་པ་མི་གསལ་བར་འགྱུར། རླུང་རྣམ་པར་ཤེས་པ་ལ་ཐིམ་པའི་རྟགས་སུ། ཕྱི་དབུགས་ཧ་ཞེས་ཕར་སོང་། ཧུ་ཞེས་ཚུར་འདྲེན། ཉམས་ཇེ་ཆུང་ལས་ཀྲོག་གིས་ཆད། ནང་དུ་ཤེས་པ་ཐིབས་ཀྱིས་སོང་། རྣམ་ཤེས་ནམ་མཁར་ཐིམ་པའི་རྟགས་སུ། ནང་དུ་དབུགས་སྙིང་གར་འདུས། དྭངས་མ་དཀར་དམར་འདུས། རླུང་གིས་དྭངས་མ་བསྐྱོད་པ་སྲོག་རྩར་འདུས་པས། དངངས་ཡིད་ལ་བྱུང་ཡང་ཕྱིར་མི་མངོན། དེའི་ཚེ་སྒོ་གསུམ་འབྲེལ་གྱེས་ཏེ། ལུས་གདོས་བཅས་བེམ་པོར་སོང་། རླུང་བར་སྣང་ལ་ཞ། རིག་པ་མེ་སྟག་ཡར་བའི་རྣམ་པ་ལྟར་མི་གནས་ཕྱིར་ཐོན་དུས། རྣམ་ཤེས་འོད་གསལ་ལ་འཇུག་ཏུ་ཉེ་བས། རྣམ་ཤེས་ནམ་མཁར་ཐིམ་པ་ཞེས་བྱ་བ་ཀ་དག་གི་སྣང་བ་སྤྲིན་མེད་པའི་ནམ་(༡༡༩)མཁའ་འདྲ་བ་དར་ཅིག་སྣང་དུས། དབྱིངས་རིག་གདོད་མའི་ཟད་ས་ངོ་ཤེས་པ་ཙམ་གྱིས་ཡར་གྱི་ཟང་ཐལ་དུ་གྲོལ་ཏེ། ཉི་ཟླ་ཁ་སྦྱོར་ལས། དབྱིངས་དང་རིག་པ་མ་འགྱུར་ན། །མི་དེ་བར་དོ་མེད་པར་ནི། །སངས་རྒྱ་བ་ལ་ཐེ་ཚོམ་མེད། །ཅེས་གསུངས་སོ། །

གསུམ་པ་ཆོས་ཉིད་ཀྱི་བར་དོར་རང་སྣང་ལ་ཡིད་ཆེས་པ་མའི་པང་དུ་བུ་འཇུག་པ་ལྟ་བུའི་མན་ངག་ནི། རིག་པ་རྒྱ་དང་བྲལ་བས་རང་གདངས་གཞི་སྣང་དུ་ཤར་བ་ཤེལ་འོད་ཕྱིར་གསལ་བའམ། བུམ་པ་ཆག་པས་མར་མེ་གསལ་བ་ལྟར། གསལ་བ་རང་སྣང་དུ་ཤེས་པར་བྱེད་པ་སྟེ། དེའང་ནམ་མཁའ་འོད་གསལ་ལ་ཐིམ་པའི་སྐད་ཅིག་དང་པོ་ལ། རང་གི་མིག་གཉིས་ནས་འོད་ཟེར་དཀར་དམར་སྐས་བཙུགས་པའམ་ཐག་པ་བརྐྱངས་པ་ལྟར་སྣང་བ་སྟེ། དེ་རང་གི་རིག་པའི་གདངས་སུ་ངོ་ཤེས་པ་ཙམ་གྱིས་ཡར་གྱི་ཟང་ཐལ་དུ་གྲོལ་ཏེ། ངོ་སྤྲོད་སྤྲས་པ་ལས། དེའི་ཚེ་རང་གི་མིག་གཉིས་ནས་འོད་སྐས་བཙུགས་པའམ་ཐག་པ་བརྐྱངས་པ་ལྟར་སྣང་སྟེ། དེ་ངོ་ཤེས་པ་ཙམ་གྱིས་སྐད་ཅིག་མ་ལ་ཡར་གྱི་ཟང་ཐལ་དུ་གྲོལ་ལོ། །ཞེས་གསུངས་སོ། །དེར་ངོ་མ་ཤེས་ན་ཆོས་ཉིད་ཀྱི་བར་དོ་ཞེས་བྱ་བ་སྣང་བ་ཐམས་ཅད་འོད་ལྔའི་རང་བཞིན་སོས་ཀའི་སྨིག་རྒྱུ་འགྱུ་བ་ལྟར་རང་བཞིན་གྱིས་བཀྲ་ལ་ཉམ་ང་བ་འཆར་ཏེ། འོད་ཀྱི་ནང་ནས་ཟེར་མཚོན་ཆའི་ཆར་འབབ་པ་ལྟར་ཁྲོ་བོའི་སྣང་བས་ནམ་མཁའ་གང་བ་ལ། ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ཙམ་བསྒྲགས་ཏེ། རང་སྣང་དུ་ངོ་ཤེས་པས་རང་རིག་ཁྲོ་བོའི་སྐུ་དང་གཉིས་སུ་མེད་པར་སངས་རྒྱའོ། །དེར་བརྟན་པ་མ་ཐོབ་ན་འོད་གསལ་ཟུང་འཇུག་ལ་ཐིམ་པ་ཞེས་བྱ་བ། སྣང་བ་ཐམས་ཅད་རིགས་ལྔའི་ཚོམ་བུར་གསལ་ཞིང་། རང་གི་ལུས་ཀྱང་འོད་དུ་གསལ་བའི་སྙིང་ག་དང་ཚོམ་བུའི་ཐུགས་ཀར་འོད་ཀྱི་ཟེར་ཐག་གིས་སྦྲེལ་བས། བསམ་གཏན་གྱི་ཞག་ལྔར་རང་བཞིན་གྱི་ཏིང་ངེ་འཛིན་ལ་གནས་པ་འབྱུང་ངོ་། །སྣང་བ་འདི་དག་ཤར་བ་དུས་གཅིག་ལ་ཤར་ནས་ངེས་པ་རིམ་གྱིས་རྙེད་པ་སྟེ། ཞག་དང་པོར་རྣམ་སྣང་། གཉིས་པར་མི་བསྐྱོད་པ། གསུམ་པ་ལ་རིན་འབྱུང་། བཞི་པ་ལ་འོད་དཔག་མེད། ལྔ་པ་ལ་དོན་ཡོད་གྲུབ་པ། སོ་སོའི་ཚོམ་བུའི་(༡༢༠)དཀྱིལ་འཁོར་ནམ་མཁའ་གང་བ་ཙམ་དུ་འཆར་རོ། །འདི་དག་གི་དུས་སུ། དུས་གསུམ་གྱི་གནད་ཀྱི་གདམས་པ་དྲན་པར་བྱ་བ་ལས། འཇུག་པ་ཤེས་པའི་གནད་ལ་རང་གི་སྙིང་ག་ནས་འོད་ཟེར་གྱི་ཐག་པར་འབྲེལ་བ་ནི་རིག་པ་འོད་ལ་འཇུག་པ་སྟེ། དེའི་དུས་སུ་རང་སྣང་དུ་ངོ་ཤེས། ཤེས་ཐོག་ཏུ་འཇོག་པ་གནད་དོ། །འོད་ཀྱི་ཚོམ་བུའི་ཟེར་ཐག་རང་གི་སྙིང་གར་འཇུག་དུས་འོད་རིག་པ་ལ་འཇུག་པ་སྟེ། རིག་པ་རང་ས་ཟིན་པར་ཤེས་པ་གཅེས་སོ། །གྲོལ་བ་ལུས་ཀྱི་གནད་ནི། དེའི་ཚེ་རིག་པ་འོད་ཀྱི་ལུས་སུ་ཡོད་པས། སྣང་བ་རང་གདངས་ལ་བཞག་པས། ཤེལ་འོད་ནང་དུ་ཐིམ་པ་ལྟར་འོད་ལུས་ནང་དུ་རིག་པ་ཐིམ་པར་ཤེས་པར་བྱའོ། །མཐར་ཕྱིན་པ་ངོ་ཤེས་པའི་གནད་ནི། དེ་ལྟར་རང་གདངས་སུ་ཤེས། ཤེས་ཐོག་ཏུ་བཞག །བཞག་ཐོག་ཏུ་ཐིམ་པས། གང་དུའང་གྲུབ་པ་མེད་པའི་རིག་པ་སྟོང་གསལ་སྤྲོས་པ་ཐམས་ཅད་དང་བྲལ་བའི་ངང་ལ་དར་ཅིག་གནས་པ་ཉིད་གདོད་མའི་ཟད་ས་མཐར་ཕྱིན་ཀ་དག་ཆེན་པོར་ངོ་ཤེས་པས་གྲོལ་བ་ཡིན་ནོ། །ཟུང་འཇུག་ཡེ་ཤེས་ལ་ཐིམ་པ་ནི། དེར་བརྟན་པ་མ་ཐོབ་ན། ཡེ་ཤེས་བཞི་སྦྱོར་གྱི་སྣང་བ་ཞེས་བྱ་བ། ཟུང་འཇུག་གི་སྣང་བ་རང་ལ་འདུས་པའི་སྐད་ཅིག་ལ། ཡང་རང་གི་སྙིང་ག་ནས་འོད་ཟེར་དཀར་པོ་གཅིག་ཤར། དེ་ལས་མཆེད་ནས་དབང་པོའི་སྤྱོད་ཡུལ་ཙམ་དུ་ཁ་དོག་དཀར་པོའི་སྣམ་བུ་ཤིན་ཏུ་གསལ་བའི་དཀྱིལ་དུ། ཡེ་ཤེས་ལྔའི་ཐིག་ལེ་མཆོག་ཏུ་གསལ་བའི་དབུས་མ་ཤེལ་གྱི་མེ་ལོང་འདྲ་བས་བརྒྱན་པ་འཆར་རོ། །དེའི་སྟེང་དུ་གསེར་གྱི་སྣམ་བུ་གྲུ་བཞིའི་དཀྱིལ་དུ་ཁ་དོག་ལྔའི་ཚོམ་བུ་ལྟར་བཀོད་པའི་དབུས་མ་གསེར་གྱི་མེ་ལོང་ལྟ་བུས་བརྒྱན་པ་འཆར་རོ། །དེའི་སྟེང་དུ་དམར་པོའི་སྣམ་བུ་གྲུ་བཞིའི་དཀྱིལ་དུ་ཡེ་ཤེས་ལྔའི་ཐིག་ལེའི་དབུས་མ་པད་མ་རཱ་ག་ལྟ་བུས་བརྒྱན་པ་འཆར་རོ། །དེའི་སྟེང་དུ་མཐིང་ཀའི་སྣམ་བུ་གྲུ་བཞིའི་དཀྱིལ་དུ་ཁ་དོག་ལྔའི་ཐིག་ལེ་བཀོད་པའི་དབུས་བཻ་ཌཱུརྱའི་མེ་ལོང་ལྟ་བུས་བརྒྱན་པ་འཆར་རོ། །དེ་དག་ནི་མེ་ལོང་ལྟ་བུ། མཉམ་པ་ཉིད། སོ་སོར་རྟོག་པ། ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་གདངས་སོ། །ལྗང་གུའི་སྣམ་བུ་མི་སྣང་བ་ནི། ཉི་ཟླ་ཁ་སྦྱོར་ལས། ལྗང་གུའི་སྣམ་བུ་མི་སྣང་བ་ནི་བྱ་བ་གྲུབ་པའི་ཡེ་ཤེས་ཀྱི་རྩལ་(༡༢༡)མ་རྫོགས་པའི་ཕྱིར་མི་སྣང་ངོ་། །ཞེས་གསུངས་སོ། །འདི་དག་གི་དུས་སུ་ཡང་། དང་པོ་སྙིང་ག་ནས་ཕར་མཆེད་པ་ལ་ལྟ་བ་རིག་པ་འོད་ལ་འཇུག་གོ། །སྣང་བ་ཚུར་འདུས་པ་འོད་རིག་པ་ལ་འཇུག་པ། རང་གི་ལུས་འོད་དུ་གསལ་བ། རིག་གདངས་ལུས་དང་བཅས་པ་དབྱིངས་སུ་ཐིམ་པ་རྣམས་འབྱུང་བས། སྔར་གྱི་དུས་གསུམ་གནད་ཀྱི་གདམས་ངག་དྲན་པར་བྱའོ། །ཡེ་ཤེས་ལྷུན་གྲུབ་རིན་པོ་ཆེ་ལ་ཐིམ་པ་ནི། ཡེ་ཤེས་ཀྱི་སྣང་བ་ལ་བརྟན་པ་མ་ཐོབ་ན། ཡེ་ཤེས་བཞི་སྦྱོར་རང་ལ་ནུབ་པའི་སྐད་ཅིག་ལ། ལྷུན་གྲུབ་རིན་པོ་ཆེའི་སྣང་བ་ཞེས་བྱ་བ་སྟོན་ཁའི་ནམ་མཁའ་རྣམ་པར་དག་པ་ལ། འོད་ལྔའི་ར་བས་བསྐོར་བ་ལྟ་བུའི་སྟེང་འོག་ཕྱོགས་མཚམས་དབང་པོའི་སྤྱོད་ཡུལ་ཁྱབ་པར་ཤར་བའི། སྟེང་གི་འོད་ཟླུམ་གྱི་ནང་མཐིང་ཀ་མི་འགྱུར་བའི་གདངས་ན། ཆོས་སྐུ་ཀ་དག་གི་སྣང་བ་མཚོན་པ་ཀུན་བཟང་ཡབ་ཡུམ་གྱི་ཆ་དང་། ཐད་ཀར་ལོངས་སྐུ་རིགས་ལྔའི་ཞིང་སྣང་དང་། མར་གྱི་འོད་ཟླུམ་ན་འགྲོ་དྲུག་འཁྲུལ་པའི་རང་སྣང་ཆུ་ཟླ་ལྟར་སྣང་བའོ། །འདི་དག་གི་ནང་ལྷུན་གྲུབ་ཀྱི་རྒྱ་ཁ་ཕྱིར་རལ་ཏེ། རིན་པོ་ཆེའི་ག་འུའི་ཀློང་རྡོལ་བ་ལས། གཞི་སྣང་ཆེན་པོའི་སྣང་བ་ཤར་བ་ཞེས་བྱའོ། །འདི་ལ་རིན་པོ་ཆེ་གསང་བའི་སྦུབས་ཞེས་ཀྱང་བཏགས་སོ། །ནང་ཡེ་ཤེས་རིན་པོ་ཆེའི་སྦུབས་ཀྱི་སྒོ་ཕྱེ་བས། ལྷུན་གྲུབ་ཀྱི་སྒོ་བརྒྱད་ལས། ཤར་ལུགས་བརྒྱད་སྐད་ཅིག་ལ་འབྱུང་སྟེ། དེའང་ཐུགས་རྗེ་ལྟར་ཤར་བས་ཁམས་གསུམ་གྱི་སེམས་ཅན་ཐམས་ཅད་ལ་བུ་གཅིག་པའི་མ་ལྟར་བརྩེ་བ་འབྱུང་། འོད་ལྟར་ཤར་བས་ཡེ་ཤེས་ལྔའི་རང་འོད་ཀྱིས་འཇིག་རྟེན་གྱི་ཁམས་ཐམས་ཅད་ཁྱབ་པར་སྣང་། སྐུ་ལྟར་ཤར་བས་སྣང་བ་ཐམས་ཅད་ལྷའི་དཀྱིལ་འཁོར་དུ་རང་སྣང་། ཡེ་ཤེས་ལྟར་ཤར་བས་སངས་རྒྱས་ཀྱི་ཞིང་ཁམས་དག་པ་རང་གི་དབང་པོའི་མངོན་སུམ་དུ་གསལ། གཉིས་མེད་ལྟར་ཤར་བས་མི་རྟོག་པའི་ཏིང་ངེ་འཛིན་ལ་རྩེ་གཅིག་ཏུ་གནས། མཐའ་གྲོལ་ལྟར་ཤར་བས་ཆོས་ཉིད་ཟང་ཐལ་དུ་རྟོགས། མ་དག་པ་འཁོར་བའི་སྒོ་ལྟར་ཤར་བས་འཁྲུལ་སྣང་གི་ཆོས་རྣམས་རྨི་ལམ་སྒྱུ་མ་ལྟར་རྟོགས། དག་པ་ཡེ་ཤེས་ཀྱི་སྒོ་ལྟར་ཤར་བས་ཇི་ལྟ་བ་དང་ཇི་སྙེད་པའི་མཁྱེན་ཆ་ནང་དུ་གསལ་ལོ། །དེའང་ལྷུན་གྲུབ་སྣང་ཚུལ་(༡༢༢)དང་སྦྱར་ན། ཡར་ཀ་དག་གི་སྣང་བ་ནི་དག་པ་ཡེ་ཤེས་ཀྱི་སྒོ་སྣང་བའོ། །ཐད་ཀར་ལོངས་སྐུའི་ཞིང་ཁམས་ཤར་བ་ནི། སྐུ་དང་། ཡེ་ཤེས་དང་། འོད་ཟང་ཐལ་དུ་ཤར་བས། མི་རྟོག་པའི་ཏིང་ངེ་འཛིན་ནི་གཉིས་མེད་ལ་ངང་གིས་གནས་པའོ། །མར་རིགས་དྲུག་གི་གནས་སྣང་དུས། བརྩེ་བའི་ཐུགས་རྗེ་སྣང་བས། རང་སྣང་དེ་ལྟར་གསལ་ཏེ། རྨི་ལམ་གྱི་སྣང་བ་ལྟ་བུའོ། །དེའི་དུས་སུ་དུས་གསུམ་གནད་ཀྱི་གདམས་ངག་དྲན་པར་བྱ་བ་ལས། སྔར་འདྲིས་ཀྱི་མི་དང་ཕྱིས་འཕྲད་པ་ལྟ་བུའི་གདམས་ངག་གི་རང་སྣང་ལ་ཡིད་ཆེས་པར་བྱ་བ་དང་། མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་གིས་མི་རྟོག་པའི་ཏིང་ངེ་འཛིན་ལ་གནས་པར་བྱ་བ་དང་། ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་གདམས་ངག་གི་ཀ་དག་གི་གྲོལ་གཞི་ལ་ཟང་ཐལ་ཆིག་རྫོགས་སུ་རང་ས་ཟིན་པ་གཅེས་སོ། །

དེ་ལྟར་ལྷུན་གྲུབ་ཡེ་ཤེས་རིན་པོ་ཆེའི་སྣང་བ་མཐར་ཕྱིན་གྱི་གདེང་རྙེད་པའི་ཚེ། མངོན་པར་ཤེས་པ་དྲུག་ཕྲག་དྲུག་འབྱུང་བ་ནི། དབང་པོའི་མངོན་པར་ཤེས་པ་དྲུག །ཤེས་རབ་ཀྱི་མཐོང་བ་དག་པའི་མངོན་པར་ཤེས་པ་དྲུག །ཡེ་ཤེས་ཀྱི་མཐོང་བ་རྣམ་པར་དག་པའི་མངོན་པར་ཤེས་པ་དྲུག །སེམས་ལས་སུ་རུང་བའི་ཏིང་ངེ་འཛིན་གྱི་མཐོང་བ་རྣམ་པར་དག་པའི་མངོན་པར་ཤེས་པ་དྲུག །ཟག་པ་མེད་པའི་ཕུང་པོའི་མངོན་པར་ཤེས་པ་དྲུག །རྣམ་པར་གྲོལ་བའི་ཡེ་ཤེས་ཀྱི་གཟིགས་པ་དག་པའི་མངོན་པར་ཤེས་པས། སངས་རྒྱས་ཀྱི་མཁྱེན་པ་མ་ལུས་པ་ཡོངས་སུ་རྫོགས་པའི་མངོན་པར་ཤེས་པ་དྲུག་སྟེ། སུམ་ཅུ་རྩ་དྲུག་གི་ཚེ། རྗེས་སུ་དྲན་པ་དྲུག་ཀྱང་འབྱུང་སྟེ། ལམ་རྗེས་སུ་དྲན་པ། ལྟ་བ་རྗེས་སུ་དྲན་པ། བསམ་གཏན་རྗེས་སུ་དྲན་པ། ལྷ་རྗེས་སུ་དྲན་པ། སྐྱེ་གནས་རྗེས་སུ་དྲན་པ། གདམས་པ་རྗེས་སུ་དྲན་པ་རྣམས་ཀྱི་གནད་ལས། མར་མ་དག་པ་འཁོར་བའི་སྣང་བ་མཐོང་བས་འཁྲུལ་པ་ལས་ལྡོག་པའི་རྐྱེན་རང་ཤར། ཐད་ཀར་ལོངས་སྐུའི་ཚོམ་བུའི་སྣང་བ་མཐོང་བས་དག་པ་མྱ་ངན་ལས་འདས་པར་འཇུག་པའི་རྐྱེན་དུ་རང་ཤར། ཡང་ཀ་དག་ཆོས་སྐུའི་མཚན་ཉིད་གསལ་བར་མཐོང་བས་གྲོལ་ས་ནང་དབྱིངས་(༡༢༣)ཀྱི་རང་སར་ངོ་ཤེས་པ་ལས། མི་བརྗེད་པའི་གཟུངས་དང་། རྒྱུན་གྱི་ཏིང་ངེ་འཛིན་ལ་སོགས་པ་སངས་རྒྱས་ཀྱི་ཡོན་ཏན་མ་ལུས་པ་མངོན་དུ་བྱེད་དོ། །འདིར་རང་ངོ་མ་ཤེས་ན་འཁོར་བའི་སྒོ་ལས་སྲིད་པར་འཇུག་པ་ཡིན་ལ། དེས་ན་དག་པ་མྱ་ངན་ལས་འདས་པའི་སྒོ་ནས་གྲོལ་བས། ལྷུན་གྲུབ་ཀྱི་སྣང་བ་ལ་ཤར་ལུགས་དྲུག་པོ་དེ་སྒོ་གཉིས་གང་རུང་ནས་འཇུག་པས། རིག་པ་ལ་གྲོལ་འཁྲུལ་འཁོར་འདས་གཉིས་ཀྱི་སྣང་བ་ཤར་བའི་གནད་ཐམས་ཅད་འདི་ལ་ཐུག་གོ། །ད་རེས་རང་ངོ་ཤེས་དུས་དང་སྦྱར་ནས། སྔར་གྱི་ཤར་བ་རྣམས་དག་པ་ཡེ་ཤེས་ཀྱི་སྒོ་ནས་ནང་དབྱིངས་ཀ་དག་གི་གཞི་ཐིམ་ལུགས་བསྟན་པ་ནི། དེ་ལྟར་ཤར་ལུགས་རྫོགས་ནས་གདམས་པས་རང་ངོ་ཤེས་པའི་སྐད་ཅིག་ལ། ཐིམ་ལུགས་བརྒྱད་དུས་གཅིག་ལ་འབྱུང་སྟེ། ཐུགས་རྗེ་ཐུགས་རྗེ་ལ་ཐིམ་པས། ཉི་མ་རྒས་པའི་ཟེར་ལྟར་གདུལ་བྱ་འདུལ་བྱེད་རྣམ་པར་དག །འོད་འོད་ལ་ཐིམ་པས་འཇའ་ཚོན་ལྟར་རིས་མེད། སྐུ་སྐུ་ལ་ཐིམ་པས་བུམ་སྐུ་ལྟར་མཁྱེན་པ་ནང་དུ་གསལ། ཡེ་ཤེས་ཡེ་ཤེས་ལ་ཐིམ་པས་མ་པང་དུ་བུ་ཞུགས་པ་ལྟར་རིག་པ་གཞི་ཐོག་ཏུ་གྲོལ། གཉིས་མེད་གཉིས་མེད་ལ་ཐིམ་པས་ཆུ་བོ་ལ་ཆུ་བོ་ཐིམ་པ་ལྟར་ཆོས་ཅན་དང་ཆོས་ཉིད་འདྲེས། མཐའ་གྲོལ་མཐའ་གྲོལ་ལ་ཐིམ་པས་ནམ་མཁའ་ལ་ནམ་མཁའ་ཐིམ་པ་ལྟར་དམིགས་གཏད་ཀྱི་འཛིན་པ་ཐམས་ཅད་དང་བྲལ་ཏེ་ཆོས་ཉིད་རང་ངོ་ལ་གནས། མ་དག་པ་འཁོར་བའི་སྒོ་དག་པ་ཡེ་ཤེས་ཀྱི་སྒོ་ལ་ཐིམ་པས་སྦྲའི་ཆོན་ཐག་ནང་དུ་བསྡུས་པ་ལྟར་ཐིག་ལེ་ཉག་གཅིག་ཏུ་འདུས་དག་པ་ཡེ་ཤེས་ཀྱི་སྒོ་ངོ་བོ་ལ་ཐིམ་པས་སེང་གེས་གངས་ཟིན་པ་ལྟར་ཆོས་ཉིད་ཀ་དག་གཅིག་གི་རང་ས་ཟིན་པའོ། །དེ་དག་ནི་ལྷུན་གྲུབ་རིན་པོ་ཆེའི་སྣང་བ་ཀ་དག་ཏུ་ཐིམ་པ་ཞེས་བྱ་བ་སྟེ་གྲོལ་པའི་གཞི་ལ་མཐར་ཕྱིན་པའོ། །དེའང་གཞི་ནང་དབྱིངས་ཀ་དག་གི་ངང་ནས་ངོ་བོར་རང་བཞིན་ཐུགས་རྗེ་གསུམ་དབྱེར་མེད་པ་དེར། གཞི་སྣང་གི་ཐུགས་རྗེ་དང་འོད་ལ་སོགས་པ་ཐིམ་པས། ཕྱིར་གསལ་དུ་མེད་པར་ཤེལ་འོད་ནང་དུ་ཡལ་བ་ལྟ་བུ་སྟེ། ཕྱིར་གསལ་མ་དག་པ་འཁྲུལ་པའི་སྣང་བ་གདུལ་བྱ་ལྟར་སྣང་བ་ལ། ཐུགས་རྗེ་ཞུགས་པ་ཉིད་དག་པ་ཡེ་ཤེས་(༡༢༤)ཀྱི་སྒོ་དང་། ནང་གི་ཐུགས་རྗེ་ལ་ཐིམ་དུས་འཁྲུལ་སྣང་དང་དེ་ལ་འཇུག་པའི་ཐུགས་རྗེར་སྣང་བ་གང་ཡང་མེད་པས་གདུལ་བྱ་དང་འདུལ་བྱེད་རྣམ་པར་དག་པ་ལ་སོགས་པ་བཞིན་ནོ། །ཆོས་ཉིད་བར་དོའི་གྲོལ་ཚུལ་ལོ། །

བཞི་པ་སྲིད་པའི་བར་དོ་ལ་བག་ཆགས་ཀྱི་མཚམས་སྦྱོར་བ་ཡུར་བ་རྐང་ཆད་ལ་ཝ་འཛུགས་པ་ལྟ་བུའི་གདམས་ངག་ནི། ཆོས་ཉིད་བར་དོ་ལ་རང་སྣང་ངོས་མ་ཟིན་པས། སྲིད་པའི་བར་དོ་ལ་ལམ་ཐོན་ནས། རྨི་ལམ་གྱི་ཤེས་པ་དང་། སྣང་བ་ལྷར་གསལ་བ་ལ་སྔ་ཕྱིའི་འབྲེལ་མེད་པ། ཐད་ཀའི་སྣང་བ་སྔར་གྱི་བག་ཆགས་ཀྱི་རྗེས་སུ་འབྲང་བས། སྔར་གྱི་ལུས་མེད་ཀྱང་ཡོད་པ་སྙམ་པ་བར་དོར་ཇི་ཙམ་གནས་ཀྱི་ཕྱེད་སྔ་མའི་ལུས་དང་སྣང་བ། ཕྱེད་ཕྱི་མ་གར་སྐྱེའི་སྣང་བ་ལ་སྤྱོད་པ། ཤེས་པ་ད་ལྟ་བས་བདུན་འགྱུར་གྱིས་གསལ་བ། མའི་མངལ་དང་རྡོ་རྗེ་གདན་ལས་གཞན་གང་ལའང་ཐོགས་མེད་དུ་འགྲོ་བ། ལས་ཀྱི་རྫུ་འཕྲུལ་དང་མངོན་ཤེས་དང་སྟོང་གསུམ་དུས་གཅིག་ཏུ་མཐོང་བའི་སྤྱན་ཡོད་པས། ས་གཅིག་ཏུ་མི་ཚུགས་ཤིང་ཉམ་ང་བ་ན། ཆོས་འདིས་དབང་པོ་ཐ་མ་ནི་ཆོས་ཉིད་བདེན་པའི་བྱིན་རླབས་ཀྱིས་རང་བཞིན་སྤྲུལ་པར་དབུགས་འབྱིན་ལ། དབང་པོ་ཡང་མཐའ་ནི་སྔར་གྱི་བྱིན་རླབས་དང་། བླ་མའི་མོས་གུས་དང་། དཀོན་མཆོག་གི་སྐྱབས་འགྲོ་དང་། ལྷའི་བསྐྱེད་རིམ་སྒྱུ་མ་ལྟ་བུ་ལ་སོགས་པ་དྲན་པས། ཕྱི་མ་ལ་ཕ་མ་དད་པ་ཅན་གྱི་བུ་ཚ་དལ་འབྱོར་བཅོ་བརྒྱད་དང་ལྡན་པ་སྐྱེས་ནས། ལོ་ཉི་ཤུ་རྩ་ལྔའམ། སུམ་ཅུ་རྩ་ལྔ་ལ་སོགས་པ་ནས་ཆོས་འདི་དང་འཕྲད་ནས། ཚེ་འདི་ཉིད་དམ། བར་དོར་སངས་རྒྱ་བ་ལ་ཐེ་ཚོམ་མེད་དོ། །དེའང་ད་ལྟ་བླ་མའི་མོས་གུས་དང་། སྐྱབས་འགྲོ་དང་། འཆི་ཁར་འཕོ་བའི་མན་ངག་ལ་སེམས་སྦྱོང་ངོ་། །དེའང་སྙིང་ནང་ན་འོད་ལྔའི་ཐིག་ལེ་སྒོ་ང་ཙམ་ཡོད་པ་ཧིག་གིས་ཚངས་བུག་ལ་འཕངས་ཏེ། འཆི་ཁར་འཕོས་པས་གདམས་པའི་མཆོག་ཏུ་ཉི་ཟླ་ཁ་སྦྱོར་དང་དེའི་རྒྱུད་འགྲེལ་དུ་གསུངས་སོ། །དེ་ནི་གནད་གལ་པོ་ཆེའོ། །

སྤྱི་དོན་གསུམ་པ་བརྩོན་འགྲུས་ཐ་མ་རང་བཞིན་སྤྲུལ་སྐུའི་ཞིང་དུ་སྐྱེས་ནས་བར་དོ་མེད་པར་སངས་རྒྱས་པའི་གདམས་ངག་ནི། ད་ལྟ་ཉམས་(༡༢༥)ལེན་དུམ་རེ་བྱས་ཀྱང་འཁྲུལ་པས་ཡེངས་ཏེ་ཚད་དུ་མ་ཕྱིན་པ་རྣམས། ཆོས་ཉིད་དག་པའི་བར་དོ་མཐོང་ཡང་རང་སྣང་ངོས་མ་ཟིན་པས། སྲིད་པའི་བར་དོ་ལ་རྨི་ལམ་འཁྲུལ་པའི་ཆ་ཙམ་དུ་ལམ་ཐོན་ནས། སྔར་མངོན་སུམ་གནད་ཀྱི་མན་ངག་ལ་ཡིད་ཆེས་པས། ཆོས་ཉིད་བདེན་པའི་བྱིན་རླབས་ཀྱིས། སྲིད་པར་བར་དོའི་ལས་ཟད་དེ་རྨི་ལམ་སད་པ་ལྟར་རང་བཞིན་སྤྲུལ་པའི་ཞིང་དུ་བརྫུས་ཏེ་སྐྱེས་ནས་གྲོལ་བ་ནི། རང་ཤར་ལས། བདེན་པ་མཐོང་བའི་གང་ཟག་གིས། །རྟོགས་པ་རྒྱུད་ལ་མ་སྐྱེས་ཀྱང་། །ཕྱོགས་བཅུ་རང་བཞིན་སྤྲུལ་པའི་ཞིང་། །གནས་ནས་མཐར་ཕྱིན་གྲོལ་བར་འགྱུར། །ཞེས་གསུངས་སོ། །དེའང་ཤར་ཕྱོགས་མངོན་པར་དགའ་བ་ཞེས་བྱ་བ། ས་གཞི་ཐམས་ཅད་རིན་པོ་ཆེ་ཤེལ་ལས་གྲུབ་པ། ཤེལ་གྱི་གཞལ་ཡས་ཁང་གྲུ་བཞི་སྒོ་བཞི་སྐར་ཁུང་བཞི་དང་ལྡན་པ། ཡན་ལག་བརྒྱད་དང་ལྡན་པའི་ཆུ་དང་། མཚེའུ་ཁ་དོག་སྣ་ཚོགས་དང་ལྡན་པ་བརྒྱད་ཀྱིས་ཡོངས་སུ་བསྐོར་བ། རིན་པོ་ཆེའི་ལྕགས་རི་ཆོས་ཀྱི་གདན་དང་བཅས་པ། ཕྱོགས་བཞིར་དར་གྱི་བ་དན་དང་། ཟུར་བཞིར་མཆོད་རྟེན་དྲིལ་བུ་གཡེལ་ཁས་སྦྲེལ་བ་ལས་ཆོས་ཀྱི་སྒྲ་འབྱུང་བ། དེ་ན་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་རྡོ་རྗེ་རིགས་ཀྱི་འཁོར་བྱང་ཆུབ་སེམས་དཔའ་བྱེ་བ་ཁྲག་ཁྲིག་མང་པོས་བསྐོར་ཞིང་ཆོས་སྟོན་པས་འཁོར་གྱི་རྒྱུད་ཡོངས་སུ་གྲོལ་བ། ནད་དང་སྡུག་བསྔལ་གྱི་ཟུག་རྔུ་མེད་པ། འདོད་པའི་ཡོ་བྱད་བསམ་པ་ཙམ་གྱིས་འབྱུང་བ་དེར་རྡོ་རྗེ་སེམས་དཔའ་འཁོར་དང་བཅས་པའི་ཞལ་བལྟ་ཞིང་ཆོས་ཉན་ཏོ། །དེ་བཞིན་དུ་ལྷོ་ཕྱོགས་དཔལ་དང་ལྡན་པ་ཞེས་བྱ་བ། ཞིང་ཁམས་དང་གཞལ་ཡས་ཁང་གསེར་ལས་གྲུབ་པ། སྔ་མ་ལྟར་གནས་པ་ན། བཅོམ་ལྡན་འདས་རིན་ཆེན་འབྱུང་ལྡན་རིན་ཆེན་རིགས་ཀྱི་འཁོར་བྱེ་བ་མང་པོས་བསྐོར་ཞིང་ཆོས་སྟོན་པར་དབང་བསྐུར་རོ། །དེ་བཞིན་དུ་ནུབ་ཕྱོགས་པདྨ་བརྩེགས་པ་ཞེས་བྱ་བའི་ཞིང་ཁམས་པདྨ་རཱ་ག་ལས་གྲུབ་པ་སྔ་མ་ལྟ་བུ་ན། བཅོམ་ལྡན་འདས་སྣང་བ་མཐའ་ཡས་པདྨ་རིགས་ཀྱི་འཁོར་ལ་ཆོས་སྟོན་པར་ལུང་སྟོན་ཏོ། །དེ་བཞིན་དུ་བྱང་ཕྱོགས་ལས་རབ་རྫོགས་པ་ཞེས་བྱ་བའི་ཞིང་ཁམས་(༡༢༦)མར་གད་ལྟར་གསལ་བ་སྔ་མ་ལྟ་བུ་ན། བཅོམ་ལྡན་འདས་དོན་ཡོད་གྲུབ་པ་ལས་ཀྱི་རིགས་ཀྱི་འཁོར་ལ་ཆོས་སྟོན་པར་དབུགས་ཕྱུང་སྟེ། ཁྲོ་བོའི་ཞིང་ཁམས་མི་མཇེད་བརྩེགས་པའི་ཞལ་མཐོང་བ་ཙམ་གྱིས་བར་དོ་མེད་པར་ཀ་དག་གི་ནང་དབྱིངས་སུ་སངས་རྒྱའོ། །སློབ་དཔོན་སྔ་མ་དག་ཞིང་དེར་ལོ་བརྒྱ་ཉི་ཤུ་རྩ་ལྔ་སོང་བའི་རྗེས་ལ་གྲོལ་བར་བཞེད་ཀྱང་། ཞིང་དེ་དག་གི་ཚེ་ལོ་ལྔ་བརྒྱ་ཡན་ཆད་དུ་བཤད་པ་དང་། གཅིག་ནས་གཅིག་ཏུ་བརྫུས་ཏེ་སྐྱེ་བས་སྐྱེ་བ་བཞི་བརྒྱུད་པར་འགྱུར་བས། རྒྱུད་ཀྱི་དགོངས་པ་ནི། ཞིང་གང་སྐྱེ་དེར་སྟོན་པ་ལས་ཆོས་ཉན་དབང་བསྐུར་བའི་མཐར་ཁྲོ་བོའི་ཞིང་མཐོང་ནས་གྲོལ་བར་ཁོ་བོས་ལེགས་པར་རྟོགས་སོ། །དེ་ཡང་ཨ་ཏི་བཀོད་པ་ཆེན་པོ་ལས། ལྔ་བརྒྱ་དག་ན་ངེས་པའི་སར་གྲོལ་ལོ། །ཞེས་གསུངས་པའི་དོན་ནོ། །དེ་དག་གིས་གསང་བ་བླ་ན་མེད་པའི་ཁྲིད་གཞུང་བླ་མ་དམ་པའི་ཕྱག་བཞེས་མན་ངག་དང་བཅས་པའི་དོན་ལེགས་པར་གཏན་ལ་ཕབ་ཟིན་ཏོ།། །།

ཐིག་ལེ་མཆོག་གསང་བླ་མེད་དོན་ཁྲིད་ལས། །ཡི་གེ་སྔ་མ་མི་གསལ་འཐོར་བ་དང་། །བླ་མའི་མན་ངག་ཕྱག་བཞེས་གབ་པ་རྣམས། །འདིར་གཅིག་བསྡུས་ཏེ་ཕྱི་རབས་དོན་དུ་བཀོད། །འགལ་འཁྲུལ་ནོར་པ་ཅུང་ཟད་མཆིས་སྲིད་ན། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །མཁས་གྲུབ་དམ་པ་བློ་མིག་ལྡན་རྣམས་དང་། །སྲུང་མ་དམ་ཅན་རྣམས་ལ་བཟོད་པར་གསོལ། །ཚུལ་འདི་སྐྱེ་བ་སྔོན་ནས་རབ་སྦྱངས་པས། །ཚེ་འདིར་ཐོས་བསམ་རྒྱ་མཚོའི་མཐར་སོན་ཞིང་། །ཐེག་མཆོག་སྙིང་པོའི་དོན་གྱི་རྣལ་འབྱོར་པ། །སྣ་ཚོགས་རང་གྲོལ་བཟང་པོས་ལེགས་པར་སྦྱར། །སྙིང་པོའི་ཡང་ཞུན་རྒྱུད་སྡེ་བཅུ་བདུན་དང་། །དེ་ཡི་མན་ངག་བརྒྱ་དང་བཅུ་དགུ་དང་། །མཆོག་ཏུ་ཟབ་མོའི་པོད་བཞི་ངེས་པའི་དོན། །མ་ནོར་ཁོང་དུ་ཆུད་ནས་བཀོད་པ་ཡིན། །དགེ་བ་དེ་ཡིས་བདག་དང་འགྲོ་བ་ཀུན། །མ་ལུས་དབྱིངས་གཅིག་གདོད་མའི་སར་གཞོལ་ཏེ། །སྐུ་དང་ཡེ་ཤེས་འདུ་འབྲལ་མེད་པ་ཡིས། །རང་གཞན་དོན་གཉིས་ལྷུན་གྱིས་གྲུབ་པར་ཤོག །གསང་བ་བླ་ན་མེད་པའི་ཁྲིད་ཀྱི་ཡི་གེ་ཆེན་པོ་སངས་རྒྱས་མཉམ་སྦྱོར་ཞེས་བྱ་བ། ཐེག་པ་རྒྱལ་(༡༢༧)པོའི་རྣལ་འབྱོར་པ་སྣ་ཚོགས་རང་གྲོལ་གྱིས། གསང་བ་བླ་ན་མེད་པའི་རྒྱུད་ལུང་མན་ངག་རྣམས་ཀྱི་བཅུད་བསྡུས་ནས། གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་སྐྱེད་མོས་ཚལ་གྱི་ནང་། ཀུན་ཏུ་བཟང་པོའི་ཁང་བཟང་དམ་པ། ཟླ་བ་ཆུ་ཤེལ་གྱིས་འཚེར་བར་བཀོད་པ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། གཞི་མ་བཅོས་ཇི་བཞིན་དུ་ངོ་སྤྲོད་པའི་རིམ་པ།

༄༅། །ཟབ་མོ་ཡང་ཏིག་ལས། གཞི་མ་བཅོས་ཇི་བཞིན་དུ་ངོ་སྤྲོད་པའི་རིམ་པ་བཞུགས་སོ། །

༄༅། གཞི་མ་བཅོས་ཇི་བཞིན་དུ་ངོ་སྤྲོད་པའི་རིམ་པ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཆོས་ཉིད་རྒྱལ་པོ་ཡེ་གདལ་གཏིང་མཐའ་མེད། །མི་རྟོག་རང་གསལ་མཉམ་ཉིད་ཆོས་ཀྱི་སྐུ། །སེམས་ཀྱི་རྒྱལ་པོ་རང་བྱུང་ཀུན་ཏུ་བཟང་། །ཐོག་མའི་སྟོན་པ་དེ་ལ་ཕྱག་འཚལ་ལོ། །ཆུ་དང་རྙོག་མ་རྒྱ་མཚོ་བཞིན། །ཤར་སྣང་ཤེས་པ་རང་བཞག་ན། །ཐ་མལ་རྣམ་རྟོག་ཆོས་ཀྱི་སྐུ། །རང་གྲོལ་གཞི་ལ་འདི་ལྟར་བསྐྱལ། །

ཡིན་པ་གྲུབ་པ་མེད་པའི་རིག་པ་འདི། རང་བཞིན་སྐྱེ་བ་མེད་པ་དཔེ་ནམ་མཁའ་དང་འདྲ་བ་དེ་ལ་མ་བཅོས་པར་མཉམ་བཞག་ལ་ངོ་སྤྲད་པ་ནི། འཁོར་བ་ལས་བློ་ལོག་པའི་གང་ཟག་དེ་གནས་རབ་ཏུ་དབེན་པར་ཁྲིད་ལ། གསོལ་བ་དྲག་པོ་བཏབ་པའི་རྗེས་ལ་ལུས་རྣམ་སྣང་གི་ཆོས་བདུན་བྱས་ལ། ནམ་མཁའ་དྭངས་པའི་ཕྱོགས་སུ་མིག་བར་སྣང་ལ་མདའ་གང་ཙམ་དུ་གཏོད་ལ། ད་ཁྱོད་རང་གི་རླུང་དང་རྣམ་པར་ཤེས་པ་བར་སྣང་ལ་ཕུལ་ལ། ལུས་ངག་ཡིད་གསུམ་སོ་གློད་ལ་ཙེན་གྱིས་ཞོག །ལུས་སོ་མ་ལ་འགུལ་བསྐྱོད་མི་བྱ། ངག་སོ་མ་ལ་གཏམ་མི་སྨྲ། སེམས་སོ་མ་ལ་རྟོག་པའི་རྗེས་སུ་མི་འབྲང་། མ་བཅོས་མ་བསླད་རང་སར་བཞག་པས་ན། །སྐྱོན་དང་གོལ་སར་ལྷུང་རྒྱུ་ཅི་ཡང་མེད། །བཅོས་བསླད་མེད་པའི་ངང་དུ་སུས་བསྒོམས་པ། །ཆོས་སྐུ་བྱང་ཆུབ་ཐོབ་པར་ཐེ་ཚོམ་མེད། །རང་བཞིན་སྐྱེ་བ་མེད་པ་ནམ་མཁའི་དབྱིངས་ཉིད་དུ། །ཀ་དག་ཆོས་སྐུ་ཡིད་ལ་བྱར་མེད་པས། །འདི་ལྟ་འདི་སྒོམ་མེད་པའི་ངང་ལ། སྒོམ་མེད་དུ་མ་ཡེངས་པར་སལ་ལེ། རྩལ་བྲལ་ཡེ་ཤེས་ལྷུག་པའི་ངང་ལ་རྩོལ་བྲལ་དུ་མ་ཡེངས་པར་སལ་ལེ། གང་ལའང་གཟའ་གཏད་མེད་པར་མ་བཅོས་པར་སྟོང་སང་ངེ་། སྟོང་པ་ཕྱང་ཆད་དུ་མ་སོང་བར། (༡༢༨)མི་སྤང་མི་རྟོག་མ་བསླད་པར་སལ་ལེ་སེང་ངེ་། གར་ལའང་འཛིན་པ་མེད་པར། མ་བསྒྱུར་བར་བདེ་ལྷན་ནེ། གང་ལའང་མི་སེམས་པར་སོ་མར་སལ་ལེ། གང་ལའང་མི་གནས་པར་གཉུག་མར་དྭངས་སང་ངེ་། ཏིག་པོ་མེད་པའི་ངང་ལ་རང་སོར་ཞོག །རྩོལ་མེད་དུ་ཞོག་ལ་ལྷུག་པར་ཞོག །མི་འགྱུར་བརྟན་པ་རི་བོ་བཞིན་དུ་ཞོག །མི་གཡོ་དྭངས་པ་རྒྱ་མཚོ་བཞིན་དུ་ཞོག །ཟུང་འཇུག་དུ་མ་རོ་གཅིག་གི་ངང་ལས་མ་ཡེངས་པར་བདེ་ལྷན་ནེ། རིག་པ་ཀ་དག་སལ་ལེ་སིང་ངེ་ཡེར་རེ་སྟོང་གསལ་གྱི་ངང་དུ་ཞོག །འབོལ་ལེ་ཤིག་གེ་ལྷོད་དེ་གནས་ལུགས་ཀྱི་ངང་ལ་ཞོག །ཁྱབ་བེ་གདལ་ལེ་ཆོས་ཉིད་ཀྱི་ངང་ལ་ཞོག །སྟོང་ངེ་ཡེར་རེ་ཁྱིལ་ལེ་གནས་ལུགས་ཀྱི་ངང་ལ་ཞོག །མི་སྤྲོ་མི་བསྡུ་མི་བསྒོམ་མ་ཡེངས་རྩ་བྲལ་གྱི་ངང་ལ་ཞོག །རྟོག་མེད་དུ་བུན་ནེ། སྒོམ་མེད་དུ་ཁྲེས་སེ། རྩོལ་མེད་དུ་སང་ངེ་། རྗེས་མེད་དུ་ཝལ་ལེ། ཕཊཿདེ་ཡན་ཆོད་དེ་འཇོག་པ་ལ་ངོ་སྤྲད་པའོ། །དེ་ལྟར་མཉམ་པར་བཞག་པས་གཟུང་འཛིན་རྣམ་རྟོག་འཇུར་དྲན། ཆགས་སྡང་། སེམས་ཉིད་ཡེ་སྟོང་། གཞི་མེད་རྩ་བྲལ་གནས་ལུགས་སྐྱེ་མེད་ཀྱི་ངང་ལ་ལྷན་ནེ་གནས་པའོ། །ཕཊཿའཇོག་པའི་རྗེས་ལ་ནི་ཤེས་པ་རྣམ་པར་རྟོག་པས་མ་བསླད་པ། ཤེས་པ་སལ་ལེ་བ་ལ་རྟོག་པ་མེད་པ། ཐ་མལ་གྱི་བཟང་རྟོག་ངན་རྟོག་གིས་མ་བསླད་པ་འདི་ལ་ལྟོས་དང་། སལ་ལེ་བ་ལ་རྟོག་པ་མེད་པ། རྟོག་པ་མེད་པ་ལ་སལ་ལེ་བ་འདི་ངོས་ཟུངས་དང་། སྤྲོས་མེད་ལྷན་ཅིག་སྐྱེས་པའི་ཡེ་ཤེས་གནམ་དྭངས་པ་ལ་ཉི་མ་ཤར་བ་ལྟར་ལྷག་གིས་མཐོང་བའོ། །དེ་ནི་རྗེས་ཀྱི་རིག་པ་གཅེར་བུ། བློ་ཡི་དྲི་མས་མ་གོས་པའི་ཀ་དག །ཉམས་ཀྱི་ཞེན་པས་མ་བཅིངས་པའི་ཡེ་གྲོལ། རིག་པ་གཅེར་བུ་ལྷིངས་པ་འདི་ཡིན་ནོ། །ཕཊཿགཉིས་པ་མ་ཡེངས་པར་སྐྱོང་བ་ནི། དང་པོ་ངོ་རང་ཐོག་ཏུ་སྤྲད་པ་ནི། སེམས་ཉིད་ཡེ་སྟོང་། གཞི་མེད་རྩ་བྲལ། དཔེ་ནམ་མཁའ་ལྟ་བུའི་ངང་ནས། ད་ལྟ་ཐོལ་སྐྱེས་ཀྱི་ཤེས་པ་སྐད་ཅིག་མ། བཟང་རྟོག་ངན་རྟོག་སྣ་ཚོགས་སུ་འགྱུ་བ་འདི། ངོ་རང་ཐོག་ཆོས་ཉིད་དུ་སྤྲོད་པ་སྟེ། རྣམ་རྟོག་འདི་མི་སྤོང་མི་འགེགས། མི་སྦྱོང་མི་བསྒྱུར། རྣམ་རྟོག་དེ་སྣ་མི་བསྐྱིལ། རྗེས་ཕྱིར་མི་འབྲང་། (༡༢༩)གཉེན་པོས་མི་འཇོམས་པར། ཕཊཿགྱིས་ལ་རྩོལ་མེད་ཀྱི་དྲན་པས་ཅེར་གྱིས་ལྟོས་དང་། བལྟས་པས་མཐོང་རྒྱུ་མེད་པར་རྣམ་རྟོག་མ་སྤངས་དབྱིངས་སུ་དག །རྣམ་རྟོག་ཆོས་སྐུར་ངོ་ཤེས། ཕཊཿལྟོས་དང་འགྱུ་བ་དག་སངས། རང་ཤར་རང་གྲོལ། སྐྱེ་གྲོལ་དུས་མཉམ། སྔ་ཕྱི་མེད། ཐ་མལ་གྱི་ཤེས་པ་སྒོམ་དུ་ཤར། གཉིས་པ་རྣམ་རྟོག་དང་ཆོས་སྐུ་དབྱེར་མེད་དུ་ཐག་གཅིག་ཐོག་ཏུ་བཅད་པ་ནི། སྣང་ཤེས་ཐམས་ཅད་ཆོས་སྐུར་ངོ་ཤེས། ཡིད་ཆེས། ཐག་ཆོད། གདེང་ཐོབ་པ། དཔེར་ན་རྒྱ་མཚོ་ལ་རླབས་བར་མ་ཆོད་པར་བྱུང་ཡང་། རླབས་ཉིད་རྒྱ་མཚོ། རྒྱ་མཚོ་ཉིད་རླབས། རླབས་དང་རྒྱ་མཚོ་དབྱེར་མི་ཕྱེད་པ་བཞིན་དུ། རྣམ་རྟོག་དང་ཆོས་སྐུ་དབྱེར་མི་ཕྱེད། འཁོར་འདས་དབྱེར་མི་ཕྱེད་པས། སྣང་སྲིད་ཐམས་ཅད་ཆོས་ཀྱི་སྐུ་རུ་ཤར། ཞེས་སོ། །སྐྱེ་མེད་ཀྱི་ངང་ནས་འཆར་ཚུལ་མ་འགགས། རོལ་པ་ཅི་ཤར་ཡང་འཆར་གཞི་མ་གྲུབ། གང་ཤར་ངོ་བོས་སྟོང་། ཡེ་སྟོང་ཐོག་མ་མེད་པ་ནས་སྟོང་། དངོས་སྟོང་ངོ་བོ་ཉིད་ཀྱིས་སྟོང་། དཔེར་ན་རྟ་ལ་རྟ་སྐྱེས་རྟ་རང་ཡིན། སྟོང་ཉིད་ལ་སྟོང་ཉིད་ཤར་བ་སྟོང་ཉིད་རང་ཡིན། སྐྱེ་མེད་ལ་སྐྱེ་མེད་ཤར། ཟུང་འཇུག་ལ་ཟུང་འཇུག་ཤར། ཕར་ཕྱིན་ལས། ཆོས་ཐམས་ཅད་གཉིས་སུ་མེད་དེ། གཉིས་སུ་བྱར་མེད། སོ་སོ་མ་ཡིན་ཐ་མི་དད་དོ། །ཞེས་པ་དང་། གཉིས་མེད་གཉིས་སུ་མེད་པར་སྟོང་། །ཡང་དག་དོན་ལ་གཉིས་མེད་གཅིག་མ་གྲུབ། །ཅེས་སོ། །ཤར་བ་དེ་ཉིད་རང་གི་ཐོག་ཏུ་གྲོལ། །ཞེས་པས། གདེང་གྲོལ་ཐོག་ཏུ་བཅའ་བ་ནི། ངེས་མེད་དུ་འདུག་པས་འཛིན་མེད་དུ་གྲོལ། ཐོག་བབས་སུ་འདུག་པས་ཅར་ཕོག་ཏུ་གྲོལ། ཡེ་ཡིན་དུ་འདུག་པས་ཆིག་ཆོད་དུ་གྲོལ། རང་ཤར་དུ་འདུག་པས་རང་གྲོལ་དུ་གྲོལ། རྣམ་རྟོག་གང་ཤར་ངོ་བོ་ཡེ་གྲོལ་དུ་ཤེས་པས། བསྐྱར་ནས་གྲོལ་རྒྱུ་མེད་པའི་གདེང་འཆོས། རང་བཞིན་རང་གྲོལ་དུ་ཤེས་པས་གཉེན་པོས་གྲོལ་རྒྱུ་མེད་པའི་གདེང་འཆོས། ཆོས་ཉིད་ཅེར་གྲོལ་དུ་ཤེས་པས་སྣང་ཤེས་གཉིས་མེད་དུ་(༡༣༠)གྲོལ་བའི་གདེང་འཆོས། མཚན་ཉིད་ཡོངས་གྲོལ་དུ་ཤེས་པས། འབད་རྩོལ་མེད་པར་གྲོལ་བའི་གདེང་འཆོས། ཞེས་གདམས་སོ། །གནད་དུ་བརྡེག་པའི་ངོ་སྤྲོད་དོ། །གཞི་མེད་རྩ་བྲལ་རང་གྲོལ་གཉུག་མའི་སེམས། །ཅེར་གྲོལ་ངང་དུ་རང་གྲོལ་བཤད་པ་འདིས། །འགྲོ་ཀུན་མ་སྤངས་དབྱིངས་སུ་རང་གྲོལ་ནས། །ཀུན་མཁྱེན་རྒྱལ་བའི་གོ་འཕང་ཐོབ་པར་ཤོག །གཞི་མ་བཅོས་པ་དེ་བཞིན་ཉིད་དུ་ངོ་སྤྲད་པའི་ཐབས། བླ་མ་དམ་པའི་ཞབས་ཀྱི་པདྨོ་དྲི་མ་མེད་པ་ལ་མངོན་པར་དད་པའི་རྣལ་འབྱོར་པ་བྱར་མེད་ཀློང་ཡངས་ཀྱིས་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། རྒྱ་མཚོ་ཨར་གཏད་ཀྱི་མུན་ཁྲིད་འོད་གསལ་འཁོར་ལོ།

༄༅། །ཟབ་མོ་ཡང་ཏིག་ལས། རྒྱ་མཚོ་ཨར་གཏད་ཀྱི་མུན་ཁྲིད་འོད་གསལ་འཁོར་ལོ་བཞུགས་སོ། །

༄༅། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐོད་རྒལ་གྱི་བོགས་འདོན་རྒྱ་མཚོ་ཨར་གཏད་ཀྱི་མུན་ཁྲིད་ལ་གསུམ། སྔོན་དུ་འགྲོ་བ་དང་། དངོས་གཞི་ཉམས་སུ་བླང་བ་དང་། རྗེས་ཉམས་དང་རྟགས་ཀྱི་རིམ་པའོ། །དང་པོ་ནི། བྱམས་པ་དང་སྙིང་རྗེ་བྱང་ཆུབ་ཀྱི་སེམས་བསྒོམ། མཎྜལ་དབུལ། བླ་མ་ལ་གསོལ་བ་དྲག་ཏུ་གདབ་བོ། །དངོས་གཞི་ནི། གནས་ཁང་མུན་པ་ནག་པོར་གདན་བདེ་བ་ལ་སྤྲུལ་སྐུའི་བཞུགས་སྟངས་བྱས་ཏེ། རྒྱ་མཚོ་ཨར་ལ་གཏད་པ་དང་། དངོས་སུ་གཞུག་པ་གཉིས་སོ། །དང་པོ་ནི་གྲུ་མོ་གཉིས་པུས་མོའི་སྟེང་དུ་བཞག་ལ། ལག་པ་གཡས་གཡོན་གཉིས་ཀྱིས་མཐེབ་མཛུབ་གསུམ་ཨཱ་ཨཱཿཧཱུྃ་དཀར་དམར་མཐིང་གསུམ་དུ་བསྒོམས་ལ། མིག་གི་འབྲས་བུ་གཉིས་ཆིར་མནན་པས། དང་པོ་ཡེ་ཤེས་ཀྱི་རང་གདངས་འོད་དང་ཐིག་ལེ་ཙེམ་ཙོམ་པ་བྱུང་བ་ལས། ལག་པ་གཉིས་ཕྱིས་བཏང་ལ་མིག་འབྲས་གཉིས་མ་འགུལ་བར་བལྟས་པས། ནང་གི་རིགས་ལྔ་ཞི་ཁྲོ་ཡེ་ཤེས་ལྔའི་རང་གདངས་སྣང་ཡུལ་དུ་གསལ་ལ། གཟུང་ཡུལ་དུ་མ་གྲུབ་པའི་ཟག་མེད་ཐིག་ལེ་བསམ་གྱིས་མི་ཁྱབ་བརྗོད་ཀྱིས་མི་ལངས་པ་མངོན་སུམ་དུ་གསལ་ལོ། །ཡེ་ཤེས་ཀྱི་འདུག་ཚུལ་དེ། གསལ་ནས་འདུག་ཀྱང་ཆོས་སྐུའི་ངང་། །སྟོངས་ནས་འདུག་ཀྱང་ཆོས་སྐུའི་ངང་། །གསལ་སྟོང་གཉིས་མེད་ཆོས་སྐུའི་ངང་། །ཆོས་སྐུའི་ངང་ལས་འདའ་མི་སྲིད། །རྣམ་པར་རྟོག་མེད་ལྷུན་གྱིས་གྲུབ། །ཡང་དག་བདག་(༡༣༡)མེད་དེ་བཞིན་ཉིད། །ཡང་དག་དོན་ལ་གཉིས་མེད་གཅིག་མ་གྲུབ། །སྐུ་དང་ཡེ་ཤེས་འདུག་ཚུལ་དེ། །ངོ་བོ་ཀ་དག་བརྗོད་པའི་ཚིག་དང་བྲལ། །རང་བཞིན་ལྷུན་གྲུབ་རྒྱ་ཆད་ཕྱོགས་ལྷུང་མེད། །རིག་པ་ཡེ་ཤེས་ཀྱི་ངོ་བོ་ནི། ཕྱོགས་རིས་མེད་པའི་རིག་གདངས་ཕྱི་རུ་རང་གསལ། རྒྱང་ཞགས་ཆུའི་སྒྲོན་མ་ལ་ཐིག་ལེ་སྟོང་པའི་སྒྲོན་མ། དཔེར་ན་རྨ་བྱའི་མདོངས་བཞིན་ཡེ་ཤེས་ཟང་ཐལ་ཆེན་པོར་ཤར་རོ། །

ཡུལ་གང་ལ་ཤར་བ་ལ་གསུམ། དང་པོ་འཁྲུལ་སྣང་གི་ཡུལ་དང་། སྒྲོན་མ་ཡེ་ཤེས་རང་གདངས་ཀྱི་ཡུལ་དང་། ཡང་དག་ཆོས་ཉིད་ཀ་དག་གི་ཡུལ་ལོ། །

དང་པོ་ནི། མིག་གི་ཡུལ་དུ་གཟུགས་སྣ་ཚོགས་རང་ཁ་མར་མཐོང་བ་ལ་བྱ་སྟེ། སྡུག་མི་སྡུག །ལེགས་མི་ལེགས། ཕྱི་འདོད་ཡོན་ལ་སྤྱོད་པས་ན་ཡུལ་ལོ། །གཉིས་པ་ནི། འོད་དང་ཐིག་ལེ་དང་། སྐུ་དང་ཡེ་ཤེས་ཀྱི་ཚོགས་ཁྲ་ཅེམ་གྱིས་སྟོང་གསལ་དུ་གསལ་ལོ། །གསུམ་པ་ཆོས་ཉིད་ཀ་དག་གི་ཡུལ་ནི། ཆོས་ཐམས་ཅད་འདུས་མ་བྱས་པ། བདག་མེད་དང་། སྟོང་པ། རང་བཞིན་གྱིས་འོད་གསལ་བ། བརྗོད་བྱའི་ཡུལ་ལས་འདས་པའོ། །སྒྲ་དང་ཚད་མ་གཏན་ཚིགས་གང་གིས་ཀྱང་གཏན་ལ་མི་ཕེབས་པ། མདོར་ན་རིག་པ་ཀ་དག་གི་ཡེ་ཤེས་ཉིད་ཡིན་ཏེ། སྐུ་དང་ཡེ་ཤེས་ལ་སོགས་པའི་འབྱུང་གནས་ཆེན་པོ་ཡིན་ནོ། །ཐིག་ལེ་སྟོང་པའི་སྒྲོན་མ་དེ་ལ་བརྟེན་ནས། དོན་དམ་པར་གཉིས་སུ་མེད་པའི་དོན་ངེས་པར་དེ་ལས་འབྱུང་བའོ། །དེའི་སྒོ་གང་ཞེ་ན། དབང་པོ་ཡུལ་ལ་འཆར་བར་བྱེད་པའི་ཡེ་ཤེས་ཀྱི་རྩལ་འཆར། ཐོག་མ་འོད་ཀྱི་ཐིག་ལེ་ནི། ཀུན་ནས་ཟླུམ་ལ། ཁ་དོག་ནི་ལྔ་སྟེ། འོད་ལྔའི་མཚན་ཉིད་དུ་གསལ་ལ། འོད་ལྔ་ཡེ་ཤེས་ལྔའི་ངོ་བོ་སྣང་ལ། ཉམས་དང་། དྲོད་རྟགས་དང་། འདོད་པ་མེད་པར་ཤར་བ་ནི། དཔེར་ན་ནོར་བུ་རིན་པོ་ཆེ་དང་འདྲ་བར་ཡོན་ཏན་བཙལ་མི་དགོས་པར་རྣམ་པར་རྟོག་མེད་ལྷུན་གྱིས་གྲུབ་པའོ། །སྐྱོན་སྤངས་མི་དགོས་པར་རང་དག །སྒྲོན་མའི་ཉམས་དེ་ཡང་ཉོན་མོངས་སྤངས་མི་དགོས་པར་རང་དག་སྟེ། གཉིས་མེད་གཉིས་སུ་མེད་པར་སྟོན། རང་ངོ་ཀ་དག་ལ་ལོངས་སྤྱོད་པའི་གནད་ཡིན་(༡༣༢)པས། ཉམས་རྟོགས་ཡོན་ཏན་ལ་འདོད་པ་མེད་པར་འབྱུང་བ་ནི། ནམ་མཁའི་ཆོ་འཕྲུལ་ལྟ་བུར་བཀག་པས་མི་ཁེགས་པར་འབྱུང་ངོ་། །དེ་ལྟར་ངོ་མུན་ནག་ཏུ་སྤྲད་པས། གསལ་སྟོང་ལོངས་སྐུའི་ཞིང་ཁམས་སུ་རྒྱས། དེ་ལྟར་ཉིན་མཚན་དུ་ཉམས་སུ་བླངས་པས། སྐུ་རྣམ་པ་གསུམ་རང་རྫོགས་སུ་སྣང་། ཡེ་ཤེས་ལྔ་རང་དག་ཏུ་གསལ། ངོ་བོ་རང་བཞིན་ཐུགས་རྗེ་གསུམ་དབྱེར་མི་ཕྱེད་པས་ཚེ་འདི་ཉིད་ལ་སངས་རྒྱའོ། །དེ་ཡང་ཐད་ལ་དྲང་པོས་བལྟ་ཞིང་། མཐེབ་མཛུབ་གཉིས་པོས་སྒྲོན་མའི་སྟེང་འོག་གཉིས། གཡས་གཡོན་གཉིས། ཡང་ན་སྟེང་ནས་གཏེམས་པས། རྗེས་ལ་མ་ཡེངས་པར་བལྟས་པས། རྣལ་འབྱོར་བདག་གཞན་རིག་པའི་ཡེ་ཤེས་དེ་ཉིད་ཉམས་སུ་མྱོང་བ། དཔགས་པར་དཀའ་བ་དོན་སྐུ་དང་ཡེ་ཤེས་ཀྱི་དགོངས་པ། རབ་ཏུ་འདི་ཉིད་ལ་འགྲུབ་པར་ཐེ་ཚོམ་མེད་དོ། །ཐུན་བཞིའམ་དྲུག་ཏུ་ཉམས་སུ་བླང་ངོ་། །དེ་ནི་རྒྱ་མཚོ་ཨར་ལ་གཏད་པའི་ལག་ལེན་ནོ། །རྒྱ་མཚོ་ལ་གསུམ། བརྡ་རྟགས་སྒོའི་རྒྱ་མཚོ། མཚོན་པ་དཔེའི་རྒྱ་མཚོ། ཆོས་ཉིད་ཀ་དག་དོན་གྱི་རྒྱ་མཚོ་རྒྱས་པར་བཤད་པའོ། །

གཉིས་པ་རྒྱ་མཚོ་དྭངས་སུ་གཞུག་པ་ནི། གདན་བདེ་བ་ལ་རྡོ་རྗེའི་སྐྱིལ་ཀྲུང་། བསམ་གཏན་གྱི་ཆོས་བདུན་བཅའ། རྐེད་པ་དྲང་བས་རྩ་དྲང་། རྩ་དྲང་བས་རླུང་དྲང་། རླུང་དྲང་བས་ཐིག་ལེ་དྲང་། ཐིག་ལེ་དྲང་བས་ཡེ་ཤེས་ཟང་ཐལ་དུ་འཆར་རོ། །མིག་གིས་ལྟ་སྟངས་གསུམ་གང་མོས་གཅིག་ལ་བལྟས་པས་སྣང་བ་ལོངས་སྐུའི་ཞིང་ཁམས་རྒྱས་པར་འཆར་རོ། །ཡེ་ཤེས་ཀྱི་ཆོས་ལྔ་ནི། སྐུ་ལས་འདས་པའི་ཡེ་ཤེས། སེམས་ལས་འདས་པའི་སངས་རྒྱས། ཀུན་གཞི་ལས་འདས་པའི་ཆོས་སྐུ། ཡིད་ལས་འདས་པའི་ཤེས་རབ། འབྱུང་བ་ལས་འདས་པའི་རང་གདངས། ཚིག་ལས་འདས་པའི་རང་སྣང་ངོ་། །ཞི་གནས་མི་རྟོག་དངོས་པོ་མཁའ་ཁྱབ་འདྲ། །ལྷག་མཐོང་མ་རྨོངས་མཁའ་ལ་གཟའ་སྐར་བཀྲམ། །འོད་གསལ་མི་རྟོག་མཁའ་ལ་ཉི་ལྟར་གསལ། །ཟུང་འཇུག་གཉིས་མེད་ཉི་མ་འོད་ཀྱི་ཚུལ། །རང་རིག་ཡེ་ཤེས་ཟང་ཐལ་ཤར་བ་དེ། །ནམ་མཁའི་དབྱིངས་སུ་ཕྱིན་(༡༣༣)ཀྱང་གཡང་ས་དང་། །ལྟུང་བའི་སྡུག་བསྔལ་རིག་པ་ང་ལ་མེད། །རི་རབ་ཀྱི་རྩེ་ལ་ཕྱིན་ཀྱང་ཉམ་ང་བ་དང་བྱིང་བ་མེད། རྒྱ་མཚོའི་གཏིང་དུ་ཕྱིན་ཀྱང་གཤེར་བ་དང་སུབ་པ་མེད། མེ་དཔུང་གི་ནང་དུ་ཕྱིན་ཡང་ཚ་བ་དང་འཚིག་པ་མེད། རིག་པ་ལྷུན་གྲུབ་མངོན་སུམ་སྐྱེ་ཤིའི་སྐྱོན་གྱིས་མ་གོས་འཁོར་བའི་ལས་དགེ་སྡིག་གིས་མ་གོས། སྐྱོན་མེད་རང་གྲོལ་ཆེན་པོར་རང་ཤར་བས། ཕྱོགས་རིས་གཟའ་གཏད་མེད་པའི་ལྟ་བ་ཞེས་བྱའོ། །

ངོ་བོ་ཆོས་སྐུ་རྣམ་དག་སྤྲོས་བྲལ་ངང་གིས་སྟོང་། །རང་བཞིན་ལོངས་སྐུ་མཚན་དང་དཔེ་བྱད་འཇའ་ཚོན་སྐུ་རུ་གསལ། །སྤྲུལ་སྐུ་སྣ་ཚོགས་འགྲོ་བ་ཐུགས་རྗེས་འདུལ། །ཆོས་ཉིད་གདངས་ཅན་ཡེ་ཤེས་ཁ་དོག་ནི། །མཐིང་ག་དཀར་སེར་དམར་ལྗང་ལྔ་རུ་གསལ། །ཆོས་དབྱིངས་ཡེ་ཤེས་ནམ་མཁའི་ངོ་བོ་ཉིད། །མེ་ལོང་ཡེ་ཤེས་མི་སྐྱེ་མི་འགགས་གསལ། །མཉམ་ཉིད་ཡེ་ཤེས་དབྱེར་མེད་ཐམས་ཅད་མཁྱེན། །སོ་སོར་ཀུན་རྟོགས་མི་རྟོག་སོ་སོར་གསལ། །བྱ་བ་གྲུབ་པས་འབྲས་བུ་མངོན་དུ་གྱུར། །སྐུ་ལྔ་བསྟན་པས་དགོངས་སྤྱོད་མཁའ་ལ་གྲོལ། །མཚན་མ་སྤྲོས་བྲལ་ཐ་སྙད་ཚིག་གིས་སྟོང་། །ཉིན་ནུབ་མི་འོང་ཉིན་མཚན་གཉིས་སུ་མེད། །འཁོར་འདས་གཉིས་འཛིན་བསམ་པ་སྐྱེ་མི་སྲིད། །ཁྲེགས་ཆོད་ལྟ་བའི་རྩི་ཡིས་ཟིན་པ་གཅེས། །སངས་རྒྱས་བསྟན་པ་འཇིག་རྟེན་སྒྲོན་མེ་མཆོག །མི་གཡོ་རྒྱ་མཚོ་དྭངས་སུ་འཇུག་པའི་ཁྲིད། །ཉིན་མཚན་གསུམ་ན་རྟགས་འབྱུང་ཐེ་ཚོམ་མེད། །རྒྱ་མཚོ་ཨར་གཏད་ཀྱི་མུན་ཁྲིད་འོད་གསལ་འཁོར་ལོ་ཞེས་བྱ་བ། རང་བཞིན་རྫོགས་པ་ཆེན་པོའི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ།། །།

རིག་པ་མངོན་སུམ་མ་སྦྱངས་ན། །བར་དོར་ཡེ་ཤེས་བདུད་དུ་ལྡང་། །རིག་པ་སྒྱུ་ལུས་སེམས་འཛིན་གྱིས། །རང་ལ་རང་འཇིགས་ལུས་ངན་ལེན། །དགོངས་སྤྱོད་མངོན་དུ་གྱུར་པ་ན། །སྒྱུ་མའི་ལུས་འདི་འོད་གསལ་ལྷ། །རིག་པའི་དོན་ནི་དེ་བཞིན་ཉིད། །རྟག་པར་ནམ་མཁའི་མཐའ་ལ་བལྟ། །ཆོས་ཉིད་མཁའ་ལ་ཉི་ཤར་འདྲ། །དགོངས་པ་ཆུ་བོ་ལྟ་བུའི་རྒྱུན། །ལུས་མེད་ལུས་དེ་(༡༣༤)ལུས་ཀྱི་མཆོག །ལུས་ཀྱི་མཐའ་ནི་ཆོས་སྐུར་རྟོགས། །སེམས་མེད་སེམས་ཡང་སེམས་ཀྱི་མཆོག །རིག་པ་རང་གསལ་ཐམས་ཅད་མཁྱེན། །ངག་མེད་སྨྲ་བརྗོད་ཡུལ་ལས་གྲོལ། །བརྗོད་མེད་སྟོང་པ་ཆོས་ཀྱི་སྒྲ། །གདུལ་བྱ་རྣམ་དག་ཆོས་ཉིད་ཞིང་ཁམས་ན། །ཐམས་ཅད་མཁྱེན་པའི་ཚུལ་གནས་པ། །མ་རིག་སེམས་ཅན་གདུལ་དཀའ་འདུལ། །ཐུགས་རྗེའི་ལྕགས་ཀྱུས་འགྲོ་བ་འདུལ། །འཁོར་བའི་སེམས་ཅན་ཆོས་སྐུར་གྲོལ། །ཡིད་བཞིན་རིན་ཆེན་རང་སར་སྐྱེལ། །ཞེས་གསུངས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཁྱུང་ཆེན་གཤོག་རྫོགས།

༄༅། །ཟབ་མོ་ཡང་ཏིག་ལས། ཁྱུང་ཆེན་གཤོག་རྫོགས་བཞུགས་སོ། །

༄༅། ཁྱུང་ཆེན་གཤོག་རྫོགས་ཞེས་བྱ་བ། ཆོས་ཉིད་གདལ་བ་ཆེན་པོ་ལ་ཕྱག་འཚལ་ལོ། །གཞི་མེད་རྩ་བྲལ་འགྱུར་མེད་གཉུག་མའི་སེམས། །མ་བཅོས་རྒྱལ་པོ་ཅོག་བཞག་རང་གྲོལ་བ། །སྤང་བླང་དགག་སྒྲུབ་རེ་དོགས་ཀུན་ལས་འདས། །གཞི་རྫོགས་སེམས་ཉིད་ངང་ལ་ཕྱག་འཚལ་ལོ། །གདོད་ནས་རྣམ་དག་བསམ་ཡུལ་འདས་པའི་ཀློང་། །སེམས་ཉིད་རྒྱལ་པོ་རང་བཞིན་རྫོགས་པ་ཆེ། །གང་ཡང་མ་སྤངས་ཀུན་ལས་འདས་པའི་ངང་། །ཆོས་ཀུན་ཡེ་ནས་གྲོལ་བའི་རང་བཞིན་ཉོན། །བརྗོད་བྲལ་ཡེ་རྫོགས་སེམས་ཉིད་ནམ་མཁའ་ཆེ། །བྱར་མེད་རྩོལ་བྲལ་དྲན་བསམ་ཀུན་ལས་འདས། །གང་ཤར་ཞེན་མེད་ལྷུན་འབྱམས་རིག་པའི་ཀློང་། །ཅོག་བཞག་རང་གྲོལ་ཅེར་མཐོང་བསམ་ཡུལ་མེད། །རང་བཞིན་བབས་ཡིན་བཅོས་བསླད་མ་བྱེད་ཅིག །རྨོངས་པ་གང་གིས་ངོ་བོ་དེ་བོར་ནས། །གཉུག་མའི་སེམས་ལ་སྒྲིན་པོའི་གཟེབ་བསྐུར་ཏེ། །བཅོས་ཤིང་བཅོས་ཤིང་སྙིང་པོའི་དོན་ལ་སྒྲིབ། །གྲོལ་བ་མེད་དེ་དེ་ཡིས་སླར་འཆིང་བྱེད། །གང་ལ་བློ་ཡི་ཁོག་ཡངས་ལྷོད་ཡོད་པ། །རང་བཞིན་ཉིད་དེ་དེ་ལ་བཅོས་མི་དགོས། །འགྱུ་མཐོང་རང་དག་གཉེན་པོས་མ་བསླད་ཅིང་། །སྤང་བྱས་མ་བསྒྱུར་ཤེས་དེ་རྫོགས་པ་ཆེ། །ཡོད་ཉིད་མེད་སྦྱངས་མེད་ལས་ཡོད་པའི་མཐར། །དངོས་ཀུན་བཤིག་པའི་སྟོང་པ་ནམ་མཁའ་ཆེ། །བཅོས་ཤིང་བཅོས་ཤིང་གྲོལ་བ་འདོད་པའི་མི། །རྟག་ཆད་(༡༣༥)ཉིད་ལས་ཐར་པ་ཡོད་དམ་ཅི། །གཞི་མེད་རྩ་བྲལ་ཡེ་ནས་རྫོགས་པ་ཆེ། །སྟོང་དང་སྣང་དང་ཡོད་དང་མེད་མི་བསྒོམ། །གང་ལ་སྒོམ་ཡོད་ལྟ་དང་སྤྱོད་པ་ཡོད། །དེ་ལ་སྲིད་ཡོད་འཁོར་བའི་སྡུག་བསྔལ་ཡོད། །གང་ལ་ཆོས་ཡོད་ཐེག་པའི་ཞེ་འདོད་ཡོད། །དེ་ལ་ཉོན་མོངས་གཟེབ་ཡོད་འཆིང་བྱེད་ཡོད། །གཞི་བྲལ་ལམ་འགགས་འབྲས་བུའི་ཞེན་པ་ཟད། །ཐེག་པའི་འདོད་ཞེན་རྡུལ་ཙམ་མི་གནས་པ། །དེ་ལ་ལས་མེད་རྣམ་སྨིན་གོས་པ་མེད། །སྲིད་ཞིར་མི་གནས་ནམ་མཁའི་ངང་དུ་གྲོལ། །རྩ་དང་རླུང་སྦྱངས་ཐིག་ལེའི་འགྲེམས་སྡུད་དང་། །གཉིས་སྦྱོར་དབང་པོའི་བདེ་བ་ལ་གནས་པའི། །དགའ་དང་མཆོག་དགའ་དགའ་བྲལ་ལྷན་སྐྱེས་སོགས། །བདེ་དང་སྟོང་ཞེས་གྲོལ་བའི་རྒྱུར་སྨྲ་བ། །འདོད་པའི་ཁམས་ལས་གང་དུ་འདའ་མི་ནུས། །བཅོས་མའི་སྟོང་པས་གྲོལ་བ་ཉིད་མི་འགྱུར། །སེམས་གསལ་ཉིད་དམ་དབང་པོའི་སྒོར་སྣང་བའི། །རླུང་གི་ཁ་དོག་ཡུལ་རྐྱེན་གསལ་ལ་སོགས། །མི་རྟོག་ཉིད་ཅེས་བཅོས་ཤིང་སུས་བསྒོམས་པ། །གཟུང་བའི་ཡུལ་ལ་འཛིན་པའི་གདིང་བཅས་ཏེ། །ཡུལ་ཅན་ཡུལ་གྱི་འཆིང་བས་རབ་བཅིངས་ནས། །གཟུགས་ཁམས་ཉིད་ལས་གྲོལ་བ་ཡོད་དམ་ཅི། །ལུས་བཅོས་ངག་བསྡམས་སེམས་བསྒྲིབས་རྣམ་རྟོག་བཀག །དམིགས་འབྲས་སྣང་ཡུལ་མེད་པའི་སྒོམ་པ་ཡང་། །གཟུགས་མེད་ཉིད་དེ་མཁའ་སོགས་རྣམ་པ་བཞིར། །འཁོར་ཞིང་འཁོར་ཞིང་གྲོལ་བ་ནམ་ཡང་མེད། །བདེ་གསལ་མི་རྟོག་སྲིད་གསུམ་སོ་སོའི་སེམས། །འདོད་གཟུགས་གཟུགས་མེད་སྲིད་པར་འཁོར་བ་ལས། །གྲོལ་བའི་སྐབས་མེད་མུ་སྟེགས་རྣམས་ལའང་ཡོད། །འགྲོ་གཞན་སེམས་དང་ཁྱད་པར་གང་ཞིག་ཡོད། །འོན་ཏེ་དེ་དག་སྟོང་པར་སྒོམ་ཞེ་ནའང་། །བཅོས་ཤིང་བཅོས་ཤིང་སྟོང་པར་སུས་བསྒོམས་པ། །བཟང་རྟོག་ཉིད་དེ་འཆིང་བྱེད་གཉེན་པོའི་བློ། །རང་བཞིན་བབས་མིན་སྟོང་པས་ཕན་ཅི་ཡོད། །རྟོག་ལས་རྟོག་འཐུད་བཟང་ངན་རྟོག་ཚོགས་ཅན། །ད་དུང་འཁོར་བའི་གྲོང་ཁྱེར་སྒྲུབ་བྱེད་ཡིན། །བཟང་པོར་རྟོག་གང་མཐོ་རིས་བདེ་འགྲོ་གཉིས། །ངན་པར་རྟོག་གང་ངན་སོང་རྣམ་པ་གསུམ། །(༡༣༦)རིམ་གྱིས་འགྲོ་ཞིང་འཁོར་རྒྱུན་འདའ་མི་ནུས། །གང་ལ་བཟང་ངན་ལས་ཀྱི་རྒྱུ་མེད་པ། །དེ་ལ་དེས་བསྐྱེད་འབྲས་བུར་འཁོར་བ་མེད། །ནམ་མཁའ་བཞིན་ཏེ་གང་གིས་གོས་པར་འགྱུར། །ཡུལ་གྱི་ཆུ་བོར་གློ་ཡི་གཟིངས་བཅས་ཏེ། །དམིགས་གཏད་གྲུ་འཛིན་འབད་མེད་རྩོལ་བའི་མི། །སྲིད་པའི་རྒྱ་མཚོར་འཁོར་ཞིང་དུབ་པ་ལས། །རྣམ་གྲོལ་རྒྱ་མཚོའི་ཕ་རོལ་ཕྱིན་མི་ནུས། །གང་ལ་དམིགས་གཏད་སྒོམ་པའི་སེམས་ཡོད་པ། །རྩོལ་ཞིང་འབད་དེ་སྒྲུབ་པ་དེ་སྲིད་བར། །འཁོར་བ་ཉིད་ལས་གྲོལ་བའི་ཐབས་མེད་དོ། །ཡུལ་གྱི་མཁའ་ལ་རིག་པའི་རྩལ་འཕྱོ་བ། །གཏད་མེད་རྒྱལ་པོ་འཛིན་མེད་ཤར་བའི་མིང་། །ཡུལ་དང་ཡུལ་ཅན་སྲིད་ལས་རང་གྲོལ་ནས། །དུས་གསུམ་འཕོ་འགྱུར་མེད་པའི་ངང་དུ་གནས། །རྩོལ་བའི་དུག་གིས་སུ་ཡི་སྙིང་ཟིན་པ། །དེ་ལ་སྲིད་པའི་སྡུག་བསྔལ་ཆར་བཞིན་འབབ། །རྩོལ་མེད་རྒྱལ་པོ་བྱ་བྲལ་བློ་བདེ་བ། །རང་གྲོལ་རྒྱལ་པོ་མཉམ་པའི་གདེང་རྙེད་ནས། །རྟོག་པའི་འཕྲོ་འདུ་ཡེ་ཤེས་རོལ་པར་འཆར། །དེ་ནི་གདོད་མའི་སར་ཕྱིན་འཁྲུལ་པ་མེད། །རང་བྱུང་ལྷུན་གྲུབ་ཆེན་པོའི་དགོངས་པར་ཕྱིན། །གང་གི་ཡིད་ལ་གྲོལ་བ་སུ་འདོད་པ། །གཉུག་མའི་སེམས་ལ་བཅོས་བསླད་མ་བྱེད་ཅིག །བཅོས་ཤིང་བཅོས་ཤིང་དེ་ཡིས་ངེས་པར་འཆིངས། །མ་བཅོས་རྒྱལ་པོ་ལྷུན་རྫོགས་རིག་པའི་གནད། །གང་བབས་ངང་ལ་རང་བབས་རང་དགའི་སེམས། །བྱ་རྩོལ་མ་བྱེད་ཟང་ཐལ་སྐད་ཅིག་མ། །གང་ཡིན་ཡིན་གྱི་དགག་སྒྲུབ་རྡུལ་ཙམ་མེད། །འདི་ཡིན་མེད་ཀྱིས་སྤང་བླང་ཐ་སྙད་བྲལ། །གཞི་གྲོལ་ལམ་གྲོལ་འབྲས་བུ་གྲོལ་བའི་ངང་། །རང་གྲོལ་རྒྱལ་པོ་དུས་གསུམ་འཕོ་འགྱུར་མེད། །བརྗོད་མེད་བསམ་འདས་གཞི་རྫོགས་གཉུག་མའི་ཀློང་། །གྲོལ་བ་མེད་དེ་གྲོལ་གཞི་རྡུལ་ཙམ་མེད། །བལྟར་མེད་མཐོང་མེད་བརྡ་ཡིས་མཚོན་དུ་མེད། །བསམ་ཡུལ་འདས་ཏེ་བསམ་བྱའི་དངོས་པོ་མེད། །ཡོད་མེད་མ་ཡིན་གཉིས་དང་གཉིས་མེད་མིན། །མུ་བཞི་ལས་འདས་གདལ་བ་ཆེན་པོའི་ཀློང་། །རང་བཞིན་ལྷུན་རྫོགས་སྐྱེ་མེད་ནམ་མཁའི་ཀློང་། །གཏིང་མཐའ་མུ་མེད་རིན་ཆེན་རྒྱ་མཚོའི་ཀློང་། །རང་བཞིན་(༡༣༧)འོད་གསལ་སྣང་སྟོང་ཉི་ཟླའི་ཀློང་། །མ་སྤྲོས་རྒྱལ་པོ་འདུ་འབྲལ་མེད་པའི་ཀློང་། །རྒྱུ་མེད་རྐྱེན་བྲལ་མཐོང་སྣང་རང་སར་དག །སྒྲིབ་བྲལ་ཅོག་བཞག་རང་གྲོལ་རིག་པའི་གནད། །འགྱུས་པས་འགགས་ལ་སྣང་བས་རང་སར་གྲོལ། །གྲོལ་དང་མ་གྲོལ་ཐ་སྙད་རྨི་ལམ་འདྲ། །རྩ་བྲལ་ངང་ལ་གོལ་བ་གང་ཞིག་ཡོད། །འདི་ཀུན་བརྗོད་པའི་ཐ་སྙད་ཙམ་དུ་འོ། །རིག་པའི་རྒྱལ་པོ་སྟོང་གསལ་ཆོས་སྐུའི་གདེང་། །ཡེ་གྲོལ་རང་བས་ཡེ་གྲུབ་ཆེན་པོའི་གདེང་། །མ་སྤངས་ཡོངས་རྫོགས་གདོད་ནས་དག་པའི་གདེང་། །མི་འགྱུར་ལྷུན་གྲུབ་གཞི་རྩ་བྲལ་བའི་གདེང་། །རང་གྲོལ་ཅོག་བཞག་རང་ཤར་ཆེན་པོའི་གདེང་། །སོ་མ་གཉུག་མ་མ་བཅོས་རང་ག་མ། །ཐ་མལ་ཤེས་པ་རང་གྲོལ་རྒྱལ་བའི་ལམ། །རང་རིག་རང་གྲོལ་གཉེན་པོས་བཅོས་མི་དགོས། །སྐྱེ་མེད་ལྷུན་རྫོགས་ཡེ་གྲོལ་རིག་པའི་ཀློང་། །གང་སྣང་གྲོགས་སུ་འཆར་བའི་རང་བཞིན་ལ། །སྤང་བླང་འཁྲུལ་པའི་བྱུང་ཁུངས་ཟད་པ་ཡིན། །བཟང་ངན་བདེ་སྡུག་གང་ཤར་རིག་པའི་ངང་། །རིག་པའི་རང་བཞིན་ཡེ་ཤེས་རོལ་པའི་ངང་། །འཁོར་འདས་འཁྲུལ་གཞི་ཟད་པ་ངོ་མཚར་ཆེ། །གཅིག་གིས་ཀུན་གྲོལ་ཀུན་གྱིས་གཅིག་མི་གྲོལ། །དེ་ལྟར་ཤེས་ཏེ་རང་གྲོལ་རིག་པའི་གནད། །ཡེ་གྲོལ་བསྐྱར་གཞི་མེད་དེ་གདོད་མའི་ངང་། །ཅེར་གྲོལ་ངོ་བོ་མེད་དེ་བདེན་པས་སྟོང་། །རང་གྲོལ་གཉེན་པོ་མེད་དེ་གཉུག་མའི་སེམས། །འགྱུས་གྲོལ་རང་སར་དག་སྟེ་སྐད་ཅིག་མ། །ཤར་གྲོལ་དུས་མཉམ་ཡིན་ཏེ་སྔ་ཕྱི་མེད། །གང་ལའང་ཆེད་འཛིན་མ་བྱེད་གཟའ་གཏད་བྲལ། །རང་ཤར་རང་བབས་རང་གར་ཡན་དུ་ཆུག །རང་ཡན་རང་ཞིག་ངོས་གཟུང་ཀུན་ལས་འདས། །བློ་ཡིས་མ་གཟོ་འགྱུ་བ་མ་དགག་ཅིག །ཕྱི་ནང་ཡུལ་མེད་ནམ་མཁའ་ལྟ་བུའི་ངང་། །ཡེ་སྟོང་ནང་ན་བློ་སྟོང་ཡངས་པ་ཆེ། །ཆོས་ཟད་ངང་ནས་བློ་ཟད་ཉམས་རེ་དགའ། །ཡུལ་གྱི་རང་བཞིན་བློ་ཡི་སྐྱོན་ལས་འདས། །བློ་ཡི་ངོ་བོ་ཡུལ་གྱིས་གོས་པ་མེད། །སྤང་ལེན་དགག་སྒྲུབ་རེ་དོགས་མ་བྱེད་ཅིག །གང་ལ་མི་གནས་བརྗོད་གཞི་ཀུན་ལས་འདས། །མ་བཅོས་ལྷུག་པ་ཡེ་གྲོལ་ཆོས་ཉིད་ལ། །ཕྱི་ནང་(༡༣༨)གཉེན་པོས་དེ་ལ་བཅོས་མི་དགོས། །རང་གྲོལ་རྒྱལ་པོ་གང་བབས་རིག་པའི་གནད། །རང་བཞག་ལྟོས་བྲལ་བཅོས་བསླད་མེད་པའི་ངང་། །ལྷུན་འབྱམས་རིག་པ་གང་ཤར་ཡུལ་ལ་རོལ། །མ་བཙལ་རང་བཞག་རང་བབས་ཀུན་བཟང་ངང་། །ཚིག་དང་བློ་ཟད་དབང་པོའི་ཡུལ་ལས་འདས། །བལྟར་མེད་བསྒོམ་མེད་འདི་ཞེས་མཚོན་དུ་མེད། །བྱ་བྲལ་གླེན་པའི་ཤུགས་འཆང་བློ་བདེའོ། །ཕྱོགས་མེད་རིས་བྲལ་ཡེ་ཤེས་ཁྱབ་གདལ་བ། །མ་རྙོག་རང་གདངས་དཔེ་ཟླ་མེད་པའི་དོན། །བཙལ་བས་མི་རྙེད་བཞག་པས་རང་རྙེད་པའི། །རང་སྣང་འགྱུ་བ་ཆོས་སྐུའི་རོལ་པར་ཤར། །ཤར་ཙམ་ཉིད་ནས་འཆར་ནུབ་རྙོག་བྲལ་བ། །བླ་མའི་དྲིན་གྱིས་རྟོགས་པའི་དངོས་དེ་རྒྱལ། །སྣ་ཚོགས་གྲུབ་མཐའ་ལམ་གྱིས་མི་རྟོགས་ཤིང་། །ཡིད་དཔྱོད་བློ་ཡིས་སྒྲོ་འདོགས་དང་བྲལ་བ། །རང་གྲོལ་རང་བབས་རིག་པའི་མཚངས་འདི་མཚར། །གཞི་རྫོགས་བསམ་ཡུལ་ཀུན་ལས་འདས་པའི་ངང་། །སེམས་ཀྱི་མཁའ་ལ་ཡིད་ཀྱི་དལ་འཕྱོ་ལ། །རྒྱུ་མེད་རྐྱེན་བྲལ་ཉག་གཅིག་ཐིག་ལེའི་འགྲོས། །རང་བཞིན་དག་པའི་མཁའ་ལ་རང་སྣང་བ། །མི་འགྱུར་མཉམ་པའི་གཟེར་ཆེན་ཐེབས་པ་འདི། །སྣང་མིན་སྟོང་མིན་མུ་བཞི་གདལ་བའི་ངང་། །རྣམ་ཀུན་སྟོང་པའི་གཟུགས་ཀློང་ཡངས་པ་ཡིན། །རང་བཞིན་རང་གྲོལ་ལྷུན་གྲུབ་ཡངས་པའི་ཀློང་། །ཁྱུང་ཆེན་གཤོག་རྫོགས་མུ་བཞི་གདལ་བའི་དོན། །ཀློང་ཆེན་རབ་འབྱམས་ངང་དུ་བཤད་པ་འདིས། །འགྲོ་ཀུན་མ་སྤངས་ཀློང་དུ་རྫོགས་པར་ཤོག །

ཁྱུང་ཆེན་གཤོག་རྫོགས་ཞེས་བྱ་བ། བྱར་མེད་ཀློང་ཡངས་ཀྱི་རྣལ་འབྱོར་པ་ཀློང་ཆེན་རབ་འབྱམས་ཀྱིས། མཆིམས་ཕུ་དཔལ་གྱི་དབེན་གནས་སུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཁྱུང་ཆེན་གཤོག་རྫོགས་ཀྱི་བསྡུས་དོན།

༄༅། །ཟབ་མོ་ཡང་ཏིག་ལས། ཁྱུང་ཆེན་གཤོག་རྫོགས་ཀྱི་བསྡུས་དོན་བཞུགས་སོ། །

༄༅། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདིར་གསང་བ་བླ་ན་མེད་པའི་དོན། ཁྲེགས་ཆོད་དང་ཐོད་རྒལ་གཉིས་ལས། ཁྲེགས་ཆོད་སྒོམ་མེད་དོན་གྱི་གནད་འགག་ཐམས་ཅད་གཅིག་ཏུ་བསྡུས་པ། ཁྱུང་ཆེན་གཤོག་རྫོགས་(༡༣༩)འདི་ལ་དོན་གསུམ་སྟེ། མན་ངག་ལ་འཇུག་པ་རྒྱུའི་དོན་གྱི་ངོ་བོ་མདོར་བསྟན། མན་ངག་དངོས་ཀྱི་དོན་གྱིས་རང་བཞིན་རྒྱས་པར་བཤད་པ། མན་ངག་རྫོགས་པ་མཇུག་གི་དོན་གྱིས་དེ་གཉིས་ཀའི་དོན་བསྡུ་བའོ། །དང་པོ་ལ་གསུམ་སྟེ། མཚན་གྱི་རྣམ་གྲངས་ཁྱུང་ཆེན་བཀོད་པས་དོན་གྱི་ངོ་བོ་མདོར་བསྟན། བསྡུས་པ་ཆོས་ཉིད་དང་རྒྱས་གྲོལ་ཀློང་པའི་ཕྱག་གིས་གཞི་མེད་གནས་ལུགས་རྒྱས་པར་བཤད། གདོད་ནས་བརྩམ་པར་དམ་བཅའ་བས་དོན་བསྡུ་བའོ། །སྤྱི་དོན་གཉིས་པ་དངོས་ཀྱི་དོན་ལ་གསུམ་སྟེ། གཤིས་རྫོགས་པ་ཆེན་པོ་སྒོམ་མེད་ཆོས་ཟད་བློ་འདས་སུ་ཐག་བཅད་པ། དགོངས་པ་མཐའ་གྲོལ་ཀློང་ཡངས་སུ་འགག་བསྡམ་པ། ཐམས་ཅད་ཆོས་སྐུ་ཕྱམ་ཕྱམ་དུ་ལ་བཟླ་བའོ། །དང་པོ་ལ་གསུམ་སྟེ། རིམ་དགུ་བློའི་ཐེག་པས་གནས་ལུགས་མ་རྟོགས་པ་སྤྱིར་བསྟན། བསྐྱེད་རྫོགས་བློའི་སྒོམ་པས་གནས་ལུགས་དོན་གྱི་སྙིང་པོ་མ་རྟོགས་པ་བྱེ་བྲག་ཏུ་བཤད། རྒྱུ་འབྲས་བློའི་ཐེག་པས་གནས་ལུགས་མ་རྟོགས་ཤིང་སླར་འཁོར་བའི་དོན་བསྡུ་བའོ། །དང་པོ་ལ་གསུམ་སྟེ། བརྗོད་བྲལ་གནས་ལུགས་རིག་པའི་ངོ་བོ་བཅོས་བསླད་མེད་པར་བསྟན་པ། དེ་ལ་རྨོངས་པས་བཅོས་པས་འཆིང་བར་བསྟན་པ། གང་ལ་རང་བབས་བཅོས་བསླད་མེད་པས་རྩོལ་བྲལ་ཆེན་པོར་ཐག་གཅད་པའོ། །གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། བློས་བྱས་རྟོག་པའི་ཕྲེང་བས་གནས་ལུགས་ཀྱི་དོན་མི་རྟོགས་པ་བསྐྱེད་རིམ་པ་སྤྱིར་དགག་པ་དང་། ཐབས་ཤེས་དམིགས་མྱོང་གི་འཆིང་བས་གནས་ལུགས་ཀྱི་དོན་མི་རྟོགས་པར་བསྟན་པ་རྫོགས་རིམ་པ་བྱེ་བྲག་ཏུ་དགག་པའོ། །དང་པོ་ལ་གསུམ་སྟེ། ཡོད་ཉིད་བཅོས་མའི་བསྐྱེད་རིམ་གྱིས་ཐར་པ་མི་ཐོབ་པ་བློས་སྒོམ་གཞི་མེད་འཆིང་བྱེད་ཀྱི་གཟེབ་ཏུ་བསྟན་པ། བསམ་བྲལ་བློ་བྲལ་གནས་ལུགས་དགོངས་པར་ཐག་གཅད་པའོ། །གསུམ་པ་རྫོགས་རིམ་པ་བྱེ་བྲག་ཏུ་དགག་པ་ལ། བདེ་རྩ་དང་གསལ་སེམས་གསལ་མི་རྟོག་ལུས་བཅོས་པ་ཐབས་དང་བཅས་པས་གནས་ལུགས་ཀྱི་དོན་མ་རྟོགས་པ་སྤྱིར་བསྟན་པ། དེ་གསུམ་བདེ་གསལ་ཁམས་གསུམ་སོ་སོའི་ཁམས་ལས་མ་འདས་པ་བྱེ་བྲག་(༡༤༠)ཏུ་བཤད་པ། འོན་ཏེ་དེའི་ལན་དགག་པར་བསྟན་པའོ། །གསུམ་པ་རྒྱུ་འབྲས་པས་མ་རྟོགས་པའི་དོན་བསྡུ་བ་ལ་དྲུག་སྟེ། གང་ལ་གཤིས་རྒྱུ་འབྲས་ལས་འདས་པ་ནམ་མཁའ་ལྟར་བསྟན་པ། ཡུལ་གྱི་རྒྱུ་འབྲས་བྱ་བ་ཙམ་གྱིས་འཁོར་བར་བསྟན་པ། ཡུལ་གྱི་བྱར་མེད་གདོད་མའི་གཤིས་སུ་བསྟན་པ། རྩོལ་བས་རྩོལ་མེད་ཟད་པའི་དགོངས་པར་བསྟན་པ། བཅོས་བསླད་གང་གི་མེད་པའི་དོན་ལ་གདམས་པ། དེའི་བཅོས་ཤིང་འཐད་པ་རྒྱ་ཆེར་དགོད་པ། དོན་གཉིས་པ་དགོངས་པ་མཐའ་གྲོལ་ཀློང་ཡངས་སུ་འགག་བསྡམས་པ་ལ་དྲུག་སྟེ། མུ་བཞི་དགོངས་ཀློང་ཡངས་པ་ཆེན་པོའི་ངོ་བོར་མདོར་བསྟན་པ། དེའི་རྒྱུ་མེད་རང་གནད་བསྟན་པ། དེ་ཡེ་གྲོལ་ལས་གནས་ལུགས་ཀྱི་གདང་ཚད་བསྟན་པ། དེའི་གང་ལའང་རང་གནད་བསྟན་པ། དེ་ལས་རིམ་པའི་གནས་ལུགས་ཀྱི་གདང་ཚད་བསྟན་པ། དེའི་སོ་མ་རང་གནད་བསྟན་པའོ། །དོན་གསུམ་པ་ཐམས་ཅད་ཆོས་སྐུར་ལ་བཟླ་བ་ལ་དྲུག་སྟེ། ཡུལ་གྱི་གཟུང་འཛིན་ཡུལ་མེད་ཆེན་པོར་ལ་བཟླ་བ། སྤང་གཉེན་གང་ལ་བློ་བྲལ་ཆེན་པོར་ལ་བཟླ་བ། རང་རང་གྲོལ་བབས་ལྷུན་འབྱམས་ཆེན་པོར་ལ་བཟླ་བ། བློ་བདེ་མ་བཙལ་རང་མལ་ཆེན་པོར་ལ་བཟླ་བ། སྟོང་པ་ཕྱོགས་མང་མཁའ་མཉམ་ཆེན་པོར་ལ་བཟླ་བ། ཆོས་སྣ་ཚོགས་ཟད་བློ་འདས་ཆེན་པོར་ལ་བཟླ་བའོ། །སྤྱི་དོན་གསུམ་པ་མན་ངག་རྫོགས་པ་མཇུག་གི་དོན་གྱིས་དེ་གཉིས་ཀའི་དོན་བསྡུ་བ་ལ་གསུམ་སྟེ། གཞི་རྫོགས་རིག་སྟོང་ཆོས་ཟད་ཡེ་ནས་དག་པས་རྟག་ཏུ་ཁྲེགས་ཆོད་དོན་གྱི་དགོངས་པ་སྒོམ་མེད་རང་མལ་ཆེན་པོར་བསྟན་པ། རང་བཞིན་དུས་བཞི་ཆོས་ཉིད་ཀྱི་འཁོར་ལོར་ཤར་བས་དགོངས་པ་ཀུན་བཟང་གི་ངང་དུ་ཕྱིན་པས་ཀློང་ཆེན་རྫོགས་པའི་དབྱིངས་སུ་བསྔོ་བ། ཡོངས་སུ་རྫོགས་པ་མཚན་གྱི་དོན་གང་གིས་སྦྱར་བ་རྫོགས་ཚིག་དང་བཅས་པ་བསྟན་པའོ། ཁྲེགས་ཆོད་དོན་གྱི་མདོ་ཆིངས་ཁྱུང་ཆེན་གཤོག་རྫོགས་ཀྱི་བསྡུས་དོན། ཆོས་ཉིད་དོན་གྱི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པའོ། །དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། གསང་བ་བླ་མེད་སྤྱི་བབས།

༄༅། །ཟབ་མོ་ཡང་ཏིག་ལས། གསང་བ་བླ་མེད་སྤྱི་བབས་བཞུགས་སོ། །

༄༅། བླ་ན་མེད་པའི་སྤྱི་བབས་བསྟན་པ། སྟོང་ཁམས་གདལ་བ་ཆེན་པོ་ལ་ཕྱག་འཚལ་ལོ། །སྐྱེ་མེད་ཀློང་ནས་ཐུགས་རྗེའི་སྐུར་བཞེངས་པ། །རིག་པའི་རྒྱལ་པོ་རང་བྱུང་ཀུན་ཏུ་བཟང་། །འོད་ལྔའི་རང་བཞིན་རིགས་ལྔ་ལྷུན་རྫོགས་ངང་། །ཐུགས་རྗེ་ཀུན་ཁྱབ་འཕྲོ་ལ་ཕྱག་འཚལ་ལོ། །སེམས་ཉིད་ངོ་བོ་གཞི་རྩ་བྲལ། །རང་བཞིན་འོད་གསལ་ལོངས་སྤྱོད་རྫོགས། །ཐུགས་རྗེ་ཀུན་ཁྱབ་གདལ་བར་ཤར། །གདོད་ནས་རྣམ་སངས་རྒྱས་ལ་འདུད། །ཕྱི་ནང་གསང་བ་ཡང་གསང་ལས། །ཡང་གསང་རྒྱལ་པོ་བླ་ན་མེད། །ཐེག་པ་རིམ་དགུའི་རྩེར་སོན་པའི། །སྤྱི་བབས་དག་ནི་འདི་ཉིད་དོ། །གཞི་ལམ་འབྲས་བུ་རྣམ་གསུམ་ལས། །ཀ་དག་ལྷུན་གྲུབ་གཉིས་སུ་གནས། །ཀ་དག་རྣམ་པ་གསུམ་ཉིད་ལས། །ཐོག་མ་གཞི་ཡི་ཀ་དག་ནི། །གདོད་ནས་གཞི་རྩ་བྲལ་བའོ། །གནས་སྐབས་ལམ་གྱི་ཀ་དག་ནི། །རང་སེམས་སྟོང་པ་རྩ་བྲལ་ལོ། །མཐར་ཐུག་འབྲས་བུའི་ཀ་དག་ནི། །གདོད་མའི་ཟད་སར་ཕྱིན་པའོ། །ལྷུན་གྲུབ་གསུམ་ལས་གཞི་ལྷུན་གྲུབ། །འོད་མཐའ་མེད་པའི་རིག་པ་ནི། །འཁོར་འདས་གང་དུའང་མ་ལྷུང་ཞིང་། །ཀུན་གྱི་གྱེས་གཞིར་གནས་པའོ། །གནས་སྐབས་ལམ་གྱི་ལྷུན་གྲུབ་ནི། །ཙིཏྟ་དུང་ཁང་གཞལ་ཡས་ན། །ཞི་ཁྲོ་རང་གསལ་འོད་ལྔའི་གདངས། །མིག་ནས་སྤྲིན་བྲལ་མཁར་སྣང་བ། །མངོན་སུམ་གོང་འཕེལ་ཚད་ཕེབས་སོ། །མཐར་ཐུག་འབྲས་བུའི་ལྷུན་གྲུབ་ནི། །དེ་ཉིད་ཉམས་སུ་བླངས་པའི་མཐར། །ཆོས་ཉིད་ཟད་པའི་སྣང་བ་ཐིམ། །ནང་དབྱིངས་ལྷུན་གྲུབ་ཆེན་པོའོ། །དེ་ལས་སླར་ཡང་རིག་པའི་གདངས། །སེམས་ཅན་རྣམས་ཀྱི་མོས་པ་བཞིན། །རང་གདངས་རིགས་ལྔ་ཁྲོ་བོའི་སྐུ། །སྟོང་གསལ་ཀུན་ཁྱབ་ཡེ་ཤེས་སོ། །འཁོར་འདས་རང་བཞིན་བབས་ཚུལ་ནི། །ཀ་དག་ཆེན་པོའི་ངང་ཉིད་ལས། །འོད་མཐའ་མེད་པའི་རིག་པ་ནི། །མཁའ་ལ་འཇའ་ཚོན་བཞིན་དུ་ཤར། །ལྷུན་གྲུབ་གཞི་ཡི་སངས་རྒྱས་ཏེ། །གདོད་མའི་མགོན་པོ་འོད་མི་འགྱུར། །འཁོར་འདས་གང་དུའང་མ་ཆད་ཅིང་། །སྔར་སངས་སྔ་ནས་རྒྱས་པའོ། །དེ་ལ་རིག་པའི་རྩལ་གཡོས་པ། །གཡོས་ཙམ་(༡༤༢)ཉིད་ནས་རང་རིག་པ། །ཐོག་མའི་ཀུན་ཏུ་བཟང་པོ་སྟེ། །གཞི་ཐོག་ཉིད་ནས་གྲོལ་བའོ། །འདིས་ནི་བག་ཆགས་མ་བསགས་ཤིང་། །སྐད་ཅིག་གཡོས་པ་རང་རིག་པས། །སྐད་ཅིག་གཅིག་གིས་རྫོགས་སངས་རྒྱས། །ཡོན་ཏན་ཡེ་ནས་རྫོགས་པས་ན། །ཕྱིས་འབྱུང་རྒྱུ་འབྲས་ངེས་བསྐྱེད་པའི། །སྐུ་དང་ཡེ་ཤེས་མ་ཡིན་ཏེ། །གདོད་ནས་གཞི་ལ་ལྷུན་གྲུབ་ཕྱིར། །རྩོལ་བར་བསྒྲུབ་ཏུ་མི་དགོས་པའོ། །འདིས་ནི་སྐད་ཅིག་གཅིག་དེ་ལ། །ཤེས་བྱའི་དཀྱིལ་འཁོར་ཀུན་གཟིགས་པས། །སླར་ཡང་འཁོར་བ་མ་ཡིན་ནོ། །གཞི་ཡི་སངས་རྒྱས་ངང་ཉིད་ལས། །རིག་པའི་རྩལ་འཕྲོས་འཕྲོ་མཐུད་དེ། །རང་མ་རིག་པས་རང་ཉིད་ལ། །གཟུང་འཛིན་གཉིས་སུ་སྒྲོ་བཏགས་པས། །བདག་གཞན་གཉིས་སོགས་སྣ་ཚོགས་བྱུང་། །དེ་ཡིས་རྒྱུ་དང་རྐྱེན་བྱས་ཏེ། །སེམས་ཀྱང་རགས་ཕྲ་ཤིན་ཏུ་ཕྲ། །གསུམ་བྱུང་སྲིད་གསུམ་རང་ཤར་ཏེ། །ཐོག་མར་གཟུགས་མེད་དེ་ནས་གཟུགས། །དེ་ནས་འདོད་པའི་ཁམས་སུ་བྱུང་། །དེ་འདྲའི་སྣ་ཚོགས་འབྱུང་བའི་སེམས། །གཞི་ལ་མེད་ལ་རྩལ་ལ་སྣང་། །འགྱུས་སྟོང་རང་ངོ་སུས་ཤེས་ན། །དེ་ནི་གྲོལ་བ་ཉིད་དུ་འགྱུར། །གྲོལ་བ་ཐོག་མ་གང་ཡིན་པའོ། །རིག་པ་འོད་ལྔའི་རང་བཞིན་ནི། །ཐོག་མའི་ངང་ལས་སྣང་སྟོང་གཉིས། །དེ་ལས་རིག་པའི་རྩལ་ཡང་གཉིས། །སྣང་བའི་རྩལ་དང་སྟོང་པའི་རྩལ། །སྣང་བའི་རྩལ་ནི་ལུས་དང་ཡུལ། །སྣ་ཚོགས་སྣང་བའི་དངོས་ཀུན་ཤར། །དེ་ཡང་ལྷུན་གྲུབ་རྩལ་དུའོ། །སྟོང་པའི་རྩལ་ནི་འགྱུ་བའི་སེམས། །གཞི་རྩ་མེད་པ་སྣ་ཚོགས་འཕྲོ། །འཕྲོས་ཙམ་ཉིད་ནས་བལྟས་ན་མེད། །ཀ་དག་རྩལ་ལས་རང་བྱུང་ངོ་། །ཡོན་ཏན་སྐྱོན་དུ་ཤར་བས་ན། །རྩལ་འདི་གཉིས་ཀྱིས་མཐོང་རྐྱེན་བྱས། །དེ་གཉིས་སྦྱོང་བྱེད་རྣམ་པ་གཉིས། །ཐོད་རྒལ་དང་ནི་ཁྲེགས་ཆོད་དོ། །ཐོད་རྒལ་གྱིས་ནི་ལུས་དང་ཡུལ། །རྡོས་བཅས་རང་གདངས་འོད་ལྔར་གྲོལ། །དེ་ཚེ་ཐོག་མའི་རིག་པ་ནི། །འོད་ལྔའི་ནང་དུ་རང་གྲོལ་ལོ། །ཁྲེགས་ཆོད་ཀྱིས་ནི་འགྱུ་བའི་སེམས། །འགྱུས་པའི་ངོ་བོར་བལྟས་པའི་ཚེ། །འགྱུ་བས་འགྱུ་བ་རང་གྲོལ་ནས། །ཅོག་བཞག་རང་བབས་རང་གནས་པས། །རྩ་བྲལ་ཐོག་མའི་རིག་(༡༤༣)པ་འདི། །ཆོས་ཉིད་ཟད་པའི་ངང་དུ་གྲོལ། །ཐོག་མ་རང་གནས་འཕོ་འགྱུར་མེད། །འབྱུང་བཞི་ཟད་པའི་ནམ་མཁའ་ལ། །འགྱུ་བ་ཟད་པའི་རིག་པ་དེ། །རང་བྱུང་རང་འོད་ནམ་མཁའི་གདངས། །ཞི་ཁྲོ་ལ་སོགས་རང་སྣང་ཡང་། །རྐྱེན་བྲལ་ཆུ་ཟླ་འཇའ་ཚོན་བཞིན། །རང་སྣང་འོག་མིན་གཞལ་ཡས་ན། །རང་ཉིད་གཙོ་འཁོར་ཚུལ་ཙམ་སྣང་། །གདུལ་བྱ་འདུལ་བྱེད་མ་ཡིན་ནོ། །དེ་ལས་སྤྲུལ་པའི་ཟེར་འཕྲོས་པས། །སེམས་ཅན་རྣམས་ཀྱི་མོས་པ་བཞིན། །བཟོ་དང་སྐྱེ་དང་བྱང་ཆུབ་ཆེ། །ཞི་དང་ཁྲོ་བོའི་རྣམ་སྤྲུལ་ནི། །གདུལ་བྱའི་འཇིག་རྟེན་གང་ཡོད་དེར། །ཇི་ལྟར་འཚམས་པའི་ཆོ་འཕྲུལ་གྱིས། །འགྲོ་བའི་དོན་ཀུན་ལྷུན་གྱིས་གྲུབ། །ཆོས་ཚུལ་འདི་ནི་ངེས་པའི་དོན། །ཇི་བཞིན་ཉིད་ལས་དགོངས་དོན་མེད། །དེས་ན་བྱར་མེད་ཀློང་ཡངས་ཀྱིས། །མཆིམས་ཕུ་དཔལ་གྱི་རི་ལ་སྦྱར། །དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཟབ་མོ་བཅུད་བསྡུས།

༄༅། །ཟབ་མོ་ཡང་ཏིག་ལས། ཟབ་མོ་བཅུད་བསྡུས་བཞུགས་སོ། །

༄༅། ཟབ་མོ་བཅུད་བསྡུས་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་རང་བྱུང་སུས་ཀྱང་འདུས་མ་བྱས། །འཁོར་འདས་ཀུན་འབྱུང་རིག་པ་བྱང་ཆུབ་སེམས། །རང་བྱུང་ཡེ་ཤེས་རྫོགས་པ་ཆེན་པོ་ལ། །དུས་གསུམ་འདུ་འབྲལ་མེད་པས་ཕྱག་འཚལ་ལོ། །ཐེག་པའི་མཐར་ཐུག་རྡོ་རྗེ་སྙིང་པོའི་ལུང་། །གང་ཡང་མ་སྤངས་ཀུན་ལས་འདས་པའི་དོན། །ཟབ་ཡངས་ངོ་མཚར་རྨད་དུ་བྱུང་བའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །གདོད་མའི་ངང་ནི་བརྗོད་འདས་གཞི་རྩ་བྲལ། །སྤང་བླང་རྩོལ་སྒྲུབ་རེ་དོགས་ཕྱོགས་རིས་མེད། །མི་འགྱུར་ལྷུན་གྲུབ་ཆོས་སྐུ་བྱང་ཆུབ་ཀློང་། །ཀུན་བཟང་ཡངས་པ་ཆེན་པོའི་རང་བཞིན་ནོ། །གནས་དེར་གནས་ན་ཀུན་ཀྱང་ཆོས་ཀྱི་སྐུ། །རང་བཞག་བདེ་བ་ཆེན་པོར་ལྷུན་གྲུབ་པས། །བཅས་བཅོས་མ་བྱེད་ཇི་བཞིན་ལྷུག་པར་ཞོག །རེ་དང་དོགས་མེད་གདོད་མའི་གཞི་དབྱིངས་ལགས། །སྒོམ་དུ་མེད་དོ་རྣམ་ཀུན་སྟོང་པའི་གཟུགས། །གང་ཤར་རྒྱལ་པོ་ལྷུན་རྫོགས་ངང་ལ་རོལ། །ཅོག་བཞག་རང་གྲོལ་འབད་མེད་གང་དགའི་ཡུལ། །ཤར་གྲོལ་(༡༤༤)རིས་མེད་ཆོས་སྐུར་ཕྱམ་གདལ་ལོ། །ཡེ་ནས་གཉིས་མེད་རང་བྱུང་ཡེ་ཤེས་ལ། །དམིགས་འཛིན་ཞེན་པའི་བསམ་གཏན་ཅི་ཞིག་བྱ། །གང་བབས་རང་སྟོང་ཟང་ཀ་རྗེན་པ་ཉིད། །ཆུ་བོའི་གཞུང་བཞིན་རྟག་ཏུ་འདུ་འབྲལ་མེད། །འདི་ཉིད་ལྷུན་གྲུབ་རྒྱལ་པོའི་དགོངས་པ་སྟེ། །རང་བཞིན་གཞི་ཡི་བསམ་གཏན་ངོས་ཟིན་པས། །སྒོམ་མེད་ངང་དྭངས་འབྲལ་མེད་ཆེན་པོར་གནས། །ཐུན་མཚམས་རིས་མེད་རྫོགས་པ་ཆེན་པོར་གྲུབ། །ཀ་དག་ཆོས་ཟད་ཡིད་ལ་བྱར་མེད་པས། །ཕྱལ་པ་བར་མེད་སྣང་བ་བདེ་ཡངས་པ། །ཐམས་ཅད་ཕྱམ་ཕྱམ་ནམ་མཁའ་ཡངས་པ་བཞིན། །ཆོས་ཟད་ངང་ན་བློ་ཟད་ཉམས་རེ་དགའ། །ཕྱི་རོལ་དངོས་ཀུན་སྒྱུ་མ་རྨི་ལམ་དང་། །ཆུ་ཟླ་མིག་ཡོར་དྲི་ཟའི་གྲོང་ཁྱེར་བཞིན། །མེད་པ་གསལ་སྣང་སྟོང་པའི་རང་གཟུགས་སུ། །དེ་རིང་ཉིད་ནས་མཐོང་བས་བློ་བདེའོ། །ནང་གི་རིག་པ་སྟོང་གསལ་ཆོས་ཀྱི་སྐུ། །ཟང་ཐལ་ཕྱལ་པ་བར་སྣང་དག་པ་བཞིན། །འགྱུ་བ་དངོས་མེད་རང་ཡལ་རྗེས་མེད་པས། །སྤང་གཉེན་རང་གྲོལ་ཆོས་ཟད་མཚར་རེ་ཆེ། །གནས་ལུགས་མཐོང་ལ་གཞི་རྩ་དངོས་པོ་མེད། །ཆོས་ཉིད་མཐོང་ལ་སྒོམ་པ་རྡུལ་ཙམ་མེད། །སྙེམས་དང་བྲལ་ལ་སྤྱོད་པ་གཟའ་གཏད་མེད། །རེ་དོགས་བྲལ་ལ་འབྲས་བུ་བསྒྲུབ་བྱ་མེད། །དེ་ཉིད་ཤེས་ན་རྣལ་འབྱོར་མཁས་པ་ཡིན། །དགེ་བ་དེ་ཡིས་འགྲོ་ཀུན་གྲོལ་བར་ཤོག །ཟབ་མོ་བཅུད་བསྡུས་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། སྙིང་པོ་དོན་བསྡུས་ཞེས་བྱ་བ།

༄༅། །ཟབ་མོ་ཡང་ཏིག་ལས། སྙིང་པོ་དོན་བསྡུས་ཞེས་བྱ་བ་བཞུགས་སོ། །

༄༅། སྙིང་པོ་དོན་བསྡུས་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གཞི་དབྱིངས་འོད་གསལ་དྲི་མེད་རྣམ་དག་ལ། །རྟོགས་པ་མངོན་གྱུར་རྒྱལ་བ་དགོངས་བརྒྱུད་དང་། །རིག་འཛིན་བརྡ་བརྒྱུད་གང་ཟག་སྙན་ཁུང་བརྒྱུད། །དཔལ་མགོན་བླ་མའི་ཚོགས་ལ་ཕྱག་འཚལ་ལོ། །གདོད་ནས་ལྷུན་གྲུབ་འོད་གསལ་སྙིང་པོའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཐོག་མའི་འོད་གསལ་ཀ་དག་ལྷུན་གྲུབ་ཉིད། །ངོ་བོ་རང་བཞིན་ཐུགས་རྗེའི་སྙིང་པོ་ཅན། །རྒྱ་(༡༤༥)ཆད་ཕྱོགས་ལྷུང་མེད་པའི་རང་བཞིན་ཏེ། །གང་དུ་མ་གྲུབ་འཆར་གཞིའི་དབྱིངས་སུ་གནས། །ཤེལ་ལ་འོད་བཞིན་ལྷུན་གྲུབ་མདངས་ཤར་བས། །གཞིར་སྣང་སྤྱི་གཞི་མ་ངེས་ལྷུན་གྲུབ་ལས། །ཐུགས་རྗེའི་རྩལ་གྱིས་རང་སྣང་རང་ངོ་ཤེས། །ཡུལ་ཕྱིར་མ་འབྲངས་འགྱུ་བ་རང་ཐོག་ཆོད། །གཞི་ལས་མ་གཡོས་ཤེལ་འོད་བསྡུས་པ་བཞིན། །ཀུན་ཏུ་བཟང་པོ་གཞི་ཐོག་གྲོལ་བ་ཡིན། །དེ་ཉིད་མ་རིག་གསུམ་གྱི་རང་བཞིན་ལས། །འོད་ལས་ཡུལ་དང་ལུས་ཀྱི་འཁྲུལ་གཞིར་གྱུར། །ཐུགས་རྗེའི་རིག་རྩལ་རྟོག་པའི་སེམས་སུ་འཁྲུལ། །ཁམས་གསུམ་རིགས་དྲུག་སོ་སོའི་སྣང་བ་ཤར། །འཁྲུལ་དུས་འགྲོ་ལ་བདེ་གཤེགས་སྙིང་པོས་ཁྱབ། །ལུས་ངག་ཡིད་གསུམ་བག་ཆགས་སྦུབས་ཀྱིས་བསྒྲིབས། །འོད་ཀྱང་སྙིང་དབུས་གཞོན་ནུ་བུམ་པའི་སྐུ། །ངོ་བོ་རང་བཞིན་ཐུགས་རྗེ་གསུམ་དུ་གནས། །ངོ་བོ་སྐུར་གནས་ཆོས་སྐུ་སྟོང་པའི་ངང་། །རང་བཞིན་འོད་གསལ་ལྷུན་གྲུབ་མདངས་དང་བཅས། །ཐུགས་རྗེའི་རིག་པ་སྤྲུལ་སྐུར་འཆར་བྱེད་ཚུལ། །སྐུ་དང་ཡེ་ཤེས་འདུ་འབྲལ་མེད་པའི་དོན། །གང་གིས་ཉམས་སུ་ལེན་པ་སུས་འདོད་པ། །ལྟ་སྟངས་གཟིགས་སྟངས་གནད་དུ་གཅུན་པ་ཡིས། །དབྱིངས་རིག་རང་སྣང་འོད་གསལ་དོན་ལ་གནས། །མངོན་སུམ་གོང་འཕེལ་ཚད་ཕེབས་ཟད་པ་ཡིས། །རླུང་སེམས་སྟོངས་ཏེ་ཤེལ་འོད་བསྡུས་པ་བཞིན། །ཀ་དག་ངང་དུ་གཟིགས་སྣང་མྱ་ངན་འདས། །གཞི་ཉིད་འབྲས་བུར་སྨིན་པས་ཡེ་ཤེས་གསུམ། །ཆོས་སྐུ་ལོངས་སྐུ་སྤྲུལ་སྐུར་རྣམ་པར་དག །ཆོས་སྐུར་གཅིག་པས་ལོངས་སྤྲུལ་འཆར་གཞིའི་ཆ། །ལྷུན་གྲུབ་ཐུགས་རྗེ་གཏིང་གསལ་ཕྲ་མོའི་ཚུལ། །ཤེལ་གོང་རང་སོ་དྲི་མ་མེད་པ་བཞིན། །དེ་ལས་གཞི་སྣང་འབྲས་སྣང་གནས་འགྱུར་ལས། །ལོངས་སྤྲུལ་ཕྱིར་སྣང་གདུལ་བྱའི་ཞིང་ཁམས་སུ། །སངས་རྒྱས་མཛད་པ་མཐའ་ཡས་ལྷུན་གྱིས་གྲུབ། །འདི་ནི་མཐར་ཐུག་དོན་གྱི་དགོངས་པ་ཡིན། །དགེ་བས་འགྲོ་ཀུན་མངོན་པར་བྱང་ཆུབ་ཤོག །སྙིང་པོ་དོན་བསྡུས་ཞེས་བྱ་བ། རྣལ་འབྱོར་པ་སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། འོད་གསལ་སྙིང་པོ།

༄༅། །ཟབ་མོ་ཡང་ཏིག་ལས། འོད་གསལ་སྙིང་པོ་བཞུགས་སོ། །

༄༅། འོད་གསལ་སྙིང་པོ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཆོས་སྐུ་བྱང་ཆུབ་སྤྲོས་དང་བྲལ་བའི་ཀློང་། །ཡེ་ནས་ལྷུན་གྲུབ་མངོན་པར་འདུས་མ་བྱས། །གདོད་མའི་མགོན་པོ་འོད་མི་འགྱུར་བ་ལ། །རླུང་རིག་རྣམ་པར་དག་པས་ཕྱག་འཚལ་ལོ། །གཞི་ལས་གདངས་ཤར་ལམ་དུ་མངོན་སྣང་བ། །མི་འགྱུར་མཉམ་པའི་གཟེར་ཆེན་བཏབ་པ་ཡིས། །གདོད་མའི་དབྱིངས་སུ་ཟད་པའི་སར་ཕྱིན་པ། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཉི་ཟླས་བརྒྱན་པའི་རིན་ཆེན་ཁང་པ་ན། །འོད་གསལ་རྡོ་རྗེ་སྙིང་པོ་མཆོག་བཞུགས་པས། །ངོ་བོ་རང་བཞིན་ཐུགས་རྗེ་གསུམ་ཉིད་དེ། །སྟོང་གསལ་རིག་པའི་སྙིང་པོར་ལྷུན་གྱིས་གྲུབ། །གདངས་གསུམ་ངང་ལས་རིག་པའི་གནས་ཚུལ་ནི། །ངོ་བོ་སྐུར་གནས་ཆོས་སྐུ་སྟོང་པའི་གདངས། །དྲན་བསམ་སྤྲོས་དང་བྲལ་བའི་ཚེ་ན་མངོན། །རང་བཞིན་འོད་གནས་ལྷུན་གྲུབ་གཏིང་གསལ་གདངས། །དབྱིངས་སྣང་ཁ་དོག་ཕྱིར་གསལ་ཚེ་ན་མངོན། །ཐུགས་རྗེ་རིག་གནས་འཆར་ཚུལ་མ་འགགས་གདངས། །ཤར་གྲོལ་རིས་མེད་རང་ཡལ་ཚེ་ན་མངོན། །ཕྱི་གསལ་དེ་བཞིན་ཉིད་དུའང་དེ་བཞིན་ཏེ། །རྩ་རྣམས་ནང་ན་གདངས་གསུམ་རང་སྣང་བས། །ནང་གི་ཤེས་པ་སྟོང་དང་གསལ་དང་འགྱུ། །རང་བཞིན་ངང་དུ་བལྟས་ཚེ་མངོན་པ་ཡིན། །དེ་ཉིད་དོན་ལ་ཇི་ལྟར་བསྒོམས་པ་ཡང་། །ལྟ་སྟངས་གཟིགས་སྟངས་རླུང་སེམས་དལ་བ་ཡིས། །མི་གཡོ་གསུམ་ལྡན་རླུང་རིག་མཁའ་ལ་གཏད། །རང་ལ་སྣང་བ་འོད་ཀྱི་ར་བ་ན། །རིག་གདངས་རྒྱལ་པོ་རྡོ་རྗེ་ལུ་གུ་རྒྱུད། །འགུལ་འཕྲིགས་མེད་པར་བཙོན་དུ་གཟུང་བར་བྱ། །དེ་ཚེ་རང་རིག་གདངས་གསུམ་རང་གསལ་བཞུགས། །ངོ་བོའི་གདངས་ལ་སྟོང་གསལ་དམིགས་འཛིན་མེད། །རང་བཞིན་རང་གདངས་དབྱིངས་རིག་རང་ངོར་གསལ། །ཐུགས་རྗེའི་རིག་གདངས་ཤར་གྲོལ་གཉེན་པོ་ཞིག །རང་ཡལ་རྗེས་མེད་ངང་ལ་གནས་པ་ཡིན། །གདངས་གསུམ་དུས་གཅིག་རྟེན་འབྲེལ་མཐུན་པའི་ཚེ། །རང་བྱུང་འོད་གསལ་དགོངས་ཀློང་ཡངས་པ་ཡིན། །ཕྱི་རུ་སྣང་བའི་རང་གདངས་སྣང་བའི་ཚེ། །ནང་དུ་རིག་པ་ཀ་(༡༤༧)དག་ཆོས་ཟད་ཀློང་། །དྲན་རྟོག་ཡིད་ལ་བྱེད་པའི་ཆོས་མེད་པར། །མཁའ་བཞིན་མི་རྟོག་རྒྱལ་བའི་དགོངས་པར་གནས། །རླུང་སེམས་རང་དག་སྣང་བ་འཛིན་མེད་གསལ། །འདི་ནི་ཐོད་རྒལ་སྙིང་པོའི་མན་ངག་ཡིན། །དགེ་བས་འགྲོ་ཀུན་འོད་ལུས་དག་པར་ཤོག །འོད་གསལ་སྙིང་པོ་ཞེས་བྱ་བ། ཐེག་པ་རྒྱལ་པོའི་རྣལ་འབྱོར་པ། སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ངེས་དོན་སྙིང་པོ།

༄༅། །ཟབ་མོ་ཡང་ཏིག་ལས། ངེས་དོན་སྙིང་པོ་བཞུགས་སོ། །

༄༅། ངེས་དོན་སྙིང་པོ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་རྣམ་དག་རིག་པ་བྱང་ཆུབ་སེམས། །འགྲོ་དང་འོང་མེད་ཀུན་ཏུ་ཁྱབ་པར་གདལ། །ཕྱོགས་དང་རིས་མེད་གཞི་རྩ་བྲལ་བ་ལ། །གཏང་གཞག་འགྲོ་འོང་མེད་པས་ཕྱག་འཚལ་ལོ། །གང་གིས་མ་བསླད་རྟོག་མེད་ཟང་ཀ་མ། །ཡེ་བབས་རང་སྟོང་རྫོགས་པ་ཆེན་པོའི་གནད། །རིག་པའི་རང་གྲོལ་གཤིས་ཀྱི་འདུག་ཚུལ་ཡིན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཡེ་ནས་རྣམ་དག་རང་བྱུང་ཡེ་ཤེས་ནི། །ཡོད་མེད་འདས་པས་འདི་ཞེས་མཚོན་དུ་མེད། །ཕྱོགས་རིས་འདས་པས་སྤྲོས་བརྗོད་བསམ་དུ་མེད། །དམིགས་ལས་འདས་པས་སྒོམ་དང་མི་སྒོམ་མེད། །བླང་དོར་འདས་པས་བཟང་ངན་བྱ་རྩོལ་མེད། །ཡེ་སངས་ཡེ་རྒྱས་རྫོགས་པ་ཆེན་པོའི་ངང་། །གང་ཡང་མ་སྤངས་ཀུན་ལས་འདས་པ་ཡིན། །ཇི་ལྟར་ནམ་མཁའ་ཡངས་པའི་དཀྱིལ་རུམ་ན། །སྣང་སྲིད་སྣོད་བཅུད་རོལ་པ་ཅིར་སྣང་ཡང་། །མཁའ་ལས་མ་གཡོས་ངང་ནས་གསལ་བ་བཞིན། །རིག་པའི་ངང་ནས་འཁོར་འདས་ཆོས་ཀུན་གསལ། །གཞི་བཞག་ཡེ་གཞག་ཅོག་བཞག་རྒྱས་ཐེབས་ན། །བྱར་མེད་ལྷུན་རྫོགས་ཆོས་སྐུའི་རང་སར་གནས། །གར་ཡང་མི་བསམ་ཅི་ཡང་མི་འཛིན་ན། །ངང་ཡིན་ཡེ་ཡིན་རྫོགས་པ་ཆེན་པོ་ཡིན། །ཆོས་ཟད་ཀ་དག་ཐོག་མའི་དགོངས་པ་ཡིན། །སྟོང་གསལ་ངང་དེར་གཡོ་མེད་ལྷན་གྱིས་ཞོག །རང་ལས་རང་ཤར་ཐུགས་རྗེའི་རིག་རྩལ་ནི། །ཤར་བ་རང་གྲོལ་ཆོས་སྐུ་ཟང་ཀ་ཉིད། །རྗེས་མེད་རང་ཡལ་ཆོས་ཟད་རྗེན་པར་སངས། །གདོད་མའི་གཞི་ལ་རང་ཤར་(༡༤༨)རང་གྲོལ་ཡིན། །དེ་ལྟར་མཐོང་ནས་ཆེད་དུ་སྒོམ་མི་དགོས། །མ་བསྒོམས་ལྷུན་གྲུབ་སྒོམ་པའི་རྒྱལ་པོ་ལ། །འདུ་འབྲལ་མེད་པས་ཆོས་སྐུ་རང་མལ་རྙེད། །རྟོགས་དང་མི་རྟོག་མཉམ་པའི་དགོངས་པར་ཕྱིན། །གང་ཡིན་ཡིན་གྱིས་བཅོས་བསླད་མ་བྱེད་ཅིག །འདི་ཡིན་མེད་ཀྱིས་ཕྱོགས་རིས་མ་འཛིན་ཅིག །གཟའ་གཏད་མེད་ཀྱིས་དགག་སྒྲུབ་མ་བྱེད་ཅིག །གང་ཡང་དམིགས་གཏད་མེད་པའི་རིག་པ་ལ། །ཕྱི་ནང་རྐྱེན་གྱིས་རྣམ་པ་ཅི་ཤར་ཡང་། །མ་སྤངས་མ་བསྒྱུར་མ་འཛིན་གང་བདེར་ཞོག །གཞི་ལ་རང་སངས་ཆོས་སྐུའི་དགོངས་པར་འཆར། །འདི་ཉིད་གསང་ཆེན་ངེས་པའི་མན་ངག་ཡིན། །དགེ་བས་འགྲོ་ཀུན་མ་སྤངས་ཡོངས་གྲོལ་ཤོག །ངེས་དོན་སྙིང་པོ་ཞེས་བྱ་བ། རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། མཐར་ཐུག་དོན་གྱི་སྙིང་པོ་ཞེས་བྱ་བ།

༄༅། །ཟབ་མོ་ཡང་ཏིག་ལས། མཐར་ཐུག་དོན་གྱི་སྙིང་པོ་ཞེས་བྱ་བ་བཞུགས་སོ། །

༄༅། མཐར་ཐུག་དོན་གྱི་སྙིང་པོ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །མགོན་པོ་གདོད་ནས་རྫོགས་སངས་རྒྱས། །འོད་གསལ་རིན་ཆེན་དག་པའི་སྐུ། །དྲི་མེད་ཟབ་ཅིང་རྒྱ་ཆེ་བ། །ལྷུན་གྱིས་གྲུབ་ལ་ཕྱག་འཚལ་ལོ། །གཞི་དང་གཞི་སྣང་ཁྱད་པར་ལས། །ཀུན་བཟང་སེམས་ཅན་གྲོལ་དང་འཁྲུལ། །འཁྲུལ་པ་བཟློག་ཚུལ་འབྲས་བུར་བཅས། །བདག་གིས་རྟོགས་བཞིན་བཤད་ཀྱིས་ཉོན། །འཁོར་དང་འདས་པ་གང་གིས་ཀྱང་། །གོས་པ་མེད་པའི་སྔོན་རོལ་ན། །རང་བྱུང་ཡེ་ཤེས་ཀ་དག་ཉིད། །ངོ་བོ་སྟོང་པ་མཚོན་བརྗོད་འདས། །རང་བཞིན་འོད་ལས་གཏིང་གསལ་ཚུལ། །ཐུགས་རྗེ་རིག་པའི་སྙིང་པོ་ཅན། །ནང་དབྱིངས་དག་པ་ཆེན་པོར་གནས། །ངོ་བོ་སྐུར་གནས་འཕོ་འགྱུར་མེད། །རང་བཞིན་འོད་ལས་གསུང་ཉིད་འཆར། །ཐུགས་རྗེ་ཐུགས་ཏེ་རིག་པར་གནས། །སྐུ་རུ་གནས་ཀྱང་ཞལ་ཕྱག་མེད། །འོད་དུ་གནས་ཀྱང་ཁ་དོག་མེད། །རིག་པར་གནས་ཀྱང་འཕྲོ་འདུ་མེད། །རང་ངོ་ནང་གསལ་འཆར་གཞིའི་ཆ། །སྐུ་ལས་སྐུ་གསུམ་ཉིད་དང་ནི། །འོད་ལས་ལྷུན་གྲུབ་ལོངས་སྤྱོད་རྫོགས། །ཐུགས་རྗེ་རིག་པ་ཡེ་ཤེས་སུ། །ངང་གིས་འཆར་(༡༤༩)བའི་གཞི་མར་གནས། །འདི་ནི་གདོད་མའི་གནས་ལུགས་སོ། །གཞི་ལས་གཞི་སྣང་སྣང་ཚུལ་ལ། །ནང་དབྱིངས་གཏིང་གསལ་ལྷུན་གྲུབ་ཉིད། །རླུང་གིས་ཕྱིར་གཡོས་རང་གདངས་ཤར། །ལྷུན་གྲུབ་རྒྱ་ཁ་རལ་བའི་ཚེ། །ཤར་ལུགས་དྲུག་དང་སྒོ་གཉིས་སྣང་། །རིག་པ་ནང་གསལ་གཅིག་པོ་ལ། །རིག་གདངས་རླུང་གིས་གཡོ་བ་ཡིས། །ནང་མདངས་ཕྱི་རུ་བསྐྱོད་པ་སྟེ། །ཐུགས་རྗེ་ལྟ་བུར་རང་ཤར་བས། །རིག་པའི་རང་རྩལ་གདངས་ལ་འཇུག །འོད་ལྟར་ཤར་བས་འཇའ་ཚོན་བཞིན། །ཐམས་ཅད་དབྱིངས་སྣང་དག་པར་གདལ། །སྐུ་ལྟར་ཤར་བས་ཚོམ་བུའི་སྐུ། །མཐའ་དབུས་མེད་པར་ཀུན་ལ་ཁྱབ། །ཡེ་ཤེས་ལྟ་བུར་རང་ཤར་བས། །དག་པའི་ཞིང་ཁམས་མངོན་དུ་གྱུར། །གཉིས་མེད་ལྟ་བུར་རང་ཤར་བས། །མི་རྟོག་ཏིང་འཛིན་རང་ངོར་གནས། །མཐའ་གྲོལ་ལྟ་བུར་རང་ཤར་བས། །ཐམས་ཅད་ཟང་ཐལ་མཐའ་དབུས་མེད། །མ་དག་འཁོར་བའི་སྒོ་ལྟར་ཤར། །འགྲོ་དྲུག་སྣང་བ་རྨི་ལམ་བཞིན། །འོག་ཏུ་གསལ་ཏེ་སྟོང་གཟུགས་བཞིན། །སྣང་བ་འདི་ཡོད་འཁྲུལ་རྒྱུར་གནས། །དག་པ་ཡེ་ཤེས་སྒོ་ལྟར་ཤར། །མྱང་འདས་རང་སྣང་ཀ་དག་གཞིན། །གྱེན་དུ་གསལ་ཏེ་ནམ་མཁའ་བཞིན། །སྣང་བ་འདི་ཡང་གྲོལ་རྒྱུར་གནས། །ཤར་ལུགས་དྲུག་ནི་གྱེས་གཞི་ལ། །སྒོ་གཉིས་རང་རང་འཇུག་སྒོར་སྣང་། །འཇུག་པ་འཁོར་འདས་སོ་སོའོ། །འདི་དག་གཞིར་སྣང་ཤར་ཚུལ་ལོ། །དེ་ཚེ་ཀུན་བཟང་གྲོལ་ཚུལ་ནི། །ཐུགས་རྗེའི་རྩལ་གྱི་གཞི་སྣང་ཀུན། །རིག་པའི་རང་སྣང་ཤེས་པ་ཡིས། །ཡུལ་ཕྱིར་མ་ཤེས་འགྱུ་བ་ཀུན། །རང་ཐག་ཆོད་པས་རྣམ་པར་གྲོལ། །རིག་གདངས་ཐུགས་རྗེའི་ཤར་ཚུལ་དེ། །འགྲོ་ལ་བརྩེ་བའི་ཐུགས་རྗེར་གྱུར། །འོད་སྐུ་ཡེ་ཤེས་ཤར་བ་ཡང་། །རང་དུ་རྟོགས་པས་ཐད་ཀར་ཆོད། །གཉིས་མེད་ལྟར་ཤར་དགོངས་པར་གསལ། །མཐའ་གྲོལ་ལྟར་ཤར་དབྱིངས་གཅིག་རྟོགས། །འཁོར་བའི་སྒོ་ཉིད་སྒྱུ་མར་རྟོགས། །དག་པའི་སྒོ་ལ་རང་ཐིམ་ནས། །དག་པ་ཡེ་ཤེས་ཉིད་ཀྱི་སྒོ། །གཞི་སྣང་བཅས་པ་ངོ་བོར་ཐིམ། །ཤེལ་འོད་ནང་དུ་བསྡུས་པ་བཞིན། །ཐོག་མའི་ནང་དབྱིངས་ཆོས་སྐུར་(༡༥༠)གནས། །ཐམས་ཅད་ཡེ་ཤེས་དག་པའི་ཀློང་། །ཡེ་སངས་རྒྱས་ལ་ཡང་སངས་རྒྱས། །ཀུན་བཟང་གཞི་ལ་གྲོལ་ཚུལ་ནི། །དེ་ཡི་ཀུན་ལ་ལམ་བསྟན་པས། །འཁོར་འདས་ཀུན་གྱི་དཔལ་ཞེས་བྱ། །གྲོལ་ཚུལ་འདི་འདྲ་ད་ལྟ་ཡང་། །ཡོད་ཅེས་སྤྲུལ་པའི་སྐྱེས་མཆོག་གསུངས། །དེར་མ་ཟད་དེ་ཆོས་འདི་ཡིས། །གང་གྲོལ་རབ་འབྲིང་ཐ་མ་ཀུན། །གཞི་སྣང་གཞི་ལས་མཐར་ཕྱིན་ནས། །གྲོལ་བར་ཕྱོགས་མཐུན་ཤེས་པར་བྱ། །འོན་ཀྱང་གཞི་ཐོག་གྲོལ་བ་དེ། །འཁྲུལ་མ་མྱོང་བས་མ་རིག་དག །རང་མལ་གཡོས་པ་མེད་པར་གྲོལ། །རབ་འབྲིང་ཐ་མའི་གང་ཟག་རྣམས། །འཁྲུལ་ནས་ལམ་སྦྱངས་གྲོལ་བའི་ཕྱིར། །བྱེ་བྲག་དེ་ལྟར་ཤེས་པར་བྱ། །ཀུན་བཟང་གྲོལ་བའི་ཚུལ་བསྟན་པའོ། །མ་རིག་སེམས་ཅན་འཁྲུལ་ཚུལ་ལ། །གཞི་སྣང་ཤར་བའི་སྣང་བ་ལ། །རང་སྣང་ཡིན་པར་མ་ཤེས་ཏེ། །རྐྱེན་བཞི་དམིགས་པ་མ་དག་པས། །ཐག་པ་སྦྲུལ་འཛིན་བཞིན་དུ་འཁྲུལ། །རྒྱུ་ཡི་རྐྱེན་ནི་མ་རིག་གསུམ། །རང་ངོ་མ་ཤེས་ལྷན་ཅིག་སྐྱེས། །ལྷན་ཅིག་སྐྱེས་པའི་མ་རིག་དང་། །མ་རིག་སྦགས་པའི་རིག་པ་དེ། །མ་རིག་ཉིད་དང་ལྷན་ཅིག་པས། །བདག་ཉིད་གཅིག་པའི་མ་རིག་དང་། །རིག་རྩལ་འགྱུ་བ་ཡུལ་ལ་སྤྱོད། །ཀུན་ཏུ་བརྟགས་པའི་མ་རིག་པ། །གསུམ་གྱིས་རྒྱུ་ཡིས་རྐྱེན་བྱས་ཏེ། །བདག་རྐྱེན་རིག་པ་སྔ་མ་ཉིད། །ནང་དབྱིངས་ཡེ་ཤེས་རྣམ་གསུམ་ལས། །ངོ་བོས་ཡུལ་གྱི་གོ་ཕྱེ་ལ། །རང་བཞིན་ལུས་དང་རྣམ་པར་ཕྱེ། །རིག་པ་སེམས་ཀྱི་འཁྲུལ་གཞིར་གྱུར། །དེ་ཕྱིར་བདག་རྐྱེན་རིག་པ་ཉིད། །ག་བུར་གཅིག་གིས་སྨན་དུག་བཞིན། །རྟོགས་ན་གྲོལ་བའི་རྐྱེན་ཡིན་ཡང་། །མ་རྟོགས་འཁྲུལ་རྐྱེན་ཉིད་དུ་སྣང་། །དམིགས་པའི་རྐྱེན་ནི་གཞི་སྣང་ཉིད། །རང་གདངས་ཡིན་ཡང་གཞན་ལྟར་སྣང་། །དམིགས་པའི་ཡུལ་དུ་རང་སྣང་བས། །ཐག་སྦྲུལ་ཐོ་ཡོར་མིར་སྣང་བཞིན། །བརྟགས་ན་ཐག་པ་ཐོ་ཡིན་ཡང་། །སྦྲུལ་དང་མིར་འཁྲུལ་འཇིགས་པ་བསྐྱེད། །གཞི་སྣང་རིག་གདངས་རང་ཡིན་ཡང་། །གཞན་དུ་བཟུང་བས་འཁྲུལ་རྐྱེན་བྱས། །མཚུངས་པ་དེ་མ་ཐག་པའི་རྐྱེན། །མ་རིག་སྦགས་པའི་རིག་པ་དང་། །གཞི་(༡༥༡)སྣང་དུས་མཚུངས་གྱུར་པ་ལས། །འཁྲུལ་པར་དངོས་སུ་གྲུབ་པ་སྟེ། །འོད་ལྔ་བསྒྲིབས་ཤིང་རིག་པ་བརླབ། །མ་རིག་སེམས་ནི་བག་ཆགས་པས། །ཡུལ་དོན་སེམས་ནི་འཁོར་བར་སྣང་། །དེ་ཕྱིར་དེ་མ་ཐག་རྐྱེན་ནི། །མཚོན་དང་ལུས་གཉིས་རེག་མཚུངས་པས། །རྨ་ཡིས་ཟུག་རྔུར་གྱུར་པ་བཞིན། །དེ་ལྟར་རྐྱེན་བཞི་མ་དག་པས། །རང་བྱུང་ཡེ་ཤེས་ཆེན་པོ་ཡང་། །གཟུགས་མེད་གཟུགས་དང་འདོད་པ་ཡི། །ཁམས་གསུམ་འཁོར་བའི་གནས་སུ་འཁྱམས། །ལུས་ངག་སེམས་ཀྱི་རྡོས་པས་བཅིངས། །འཁྲུལ་སྣང་བདེ་སྡུག་བག་ཆགས་དབང་། །རང་སྣང་འགྱུར་བས་གཡོས་པར་སྣང་། །འགྲོ་དྲུག་འགལ་མེ་བཞིན་དུ་འཁོར། །དཔེར་ན་རང་མལ་མ་གཡོས་པར། །རྨི་ལམ་ཡུལ་འཁོར་བརྒྱུད་པ་བཞིན། །བདེ་སྡུག་མཐོ་དམན་སྲིད་པར་སྣང་། །འདི་ནི་འཁྲུལ་པའི་བྱུང་ཚུལ་ལོ། །འཁྲུལ་པ་བཟློག་པའི་ཐབས་ལ་གཉིས། །རང་བཞིན་ཤེས་པར་བྱ་བ་དང་། །ཤེས་ནས་མངོན་དུ་བྱ་བའོ། །རང་བཞིན་ཤེས་པར་བྱ་བ་ནི། །འཁྲུལ་དུས་སེམས་ཅན་ཐམས་ཅད་ལ། །རང་བྱུང་ཡེ་ཤེས་ཆེན་པོ་དེ། །ཏིལ་འབྲུ་ལས་ནི་མར་བཞིན་དུ། །ཡེ་ནས་ཀུན་ཁྱབ་ཆེན་པོར་གནས། །ཙིཏྟ་རིན་ཆེན་གཞལ་ཡས་ན། །དྭངས་མའི་རྟེན་ལ་གནས་པ་ནི། །སྣུམ་དང་སྡོང་བུ་ཞུན་མར་བཞིན། །རང་གདངས་འོད་ལྔའི་ཀློང་ན་བཞུགས། །ངོ་བོ་ཀ་དག་སྟོང་པ་ཉིད། །རང་བཞིན་ལྷུན་གྲུབ་གདངས་དང་བཅས། །ཐུགས་རྗེ་རིག་པ་རྩལ་དང་བཅས། །ཡེ་ཤེས་གསུམ་གྱི་ཚུལ་དུ་གནས། །དེ་ལས་ཟེར་གདངས་འཕྲོས་པ་ཡིས། །དུང་ཁང་ཁྲོ་བོའི་སྐུར་གསལ་ལ། །རྩ་རྣམས་ནང་ན་ཐིག་ལེར་གསལ། །རླུང་གིས་འཕྲོ་དང་འགྱུ་བར་གནས། །ཁྱད་པར་ཀ་ཏི་ཤེལ་སྦུགས་ཅན། །དར་དཀར་སྣལ་མ་ཕྲ་ལ་འཁྲིལ། །འདི་བཞིའི་ནང་ན་འོད་དང་ཟེར། །ཐིག་ལེ་ཐིག་ཕྲན་ཡེ་ཤེས་རླུང་། །རྒྱུ་བས་ཡེ་ཤེས་སྣང་བ་སྟོན། །འོད་རྩའི་རང་གདངས་ལུ་གུ་རྒྱུད། །ཐིག་ལེས་བརྒྱན་པ་དེ་ཡིན་ནོ། །འདི་དག་འཕེལ་དང་དག་པ་ཡིས། །ལས་རླུང་ཟད་དེ་གཞི་སྣང་གྲོལ། །ཀ་དག་རང་གནས་དེ་བཞིན་ནོ། །ཡེ་ཤེས་གནས་ཚུལ་བསྟན་(༡༥༢)པའོ། །ཤེས་ནས་མངོན་དུ་བྱ་བ་ལ། །གཞི་ལམ་འབྲས་བུ་གསུམ་ཉིད་ལས། །གཞི་ནི་རིག་པ་བྱང་ཆུབ་སེམས། །སྒོ་གསུམ་དྲི་མས་བསྒྲིབས་པ་དེ། །དག་ཅིང་སྨིན་པར་བྱ་བའི་ཕྱིར། །དབང་བཞིས་རང་གི་རྒྱུད་སྦྱངས་ནས། །སྤྲོས་བཅས་ལུས་སྦྱངས་ངོ་བོ་སྐུར། །སྨིན་ཅིང་ཀ་དག་ས་ལ་སྦྱོར། །སྤྲོས་མེད་ངག་སྦྱངས་རང་བཞིན་གསུང་། །སྨིན་ཅིང་ལྷུན་གྲུབ་ནང་དབྱིངས་སྦྱོར། །ཤིན་ཏུ་སྤྲོས་མེད་རིག་པ་ཐུགས། །སྨིན་ཅིང་ཡེ་ཤེས་དབྱིངས་སུ་སྦྱོར། །རབ་ཏུ་སྤྲོས་མེད་སྒྲིབ་ཀུན་སྦྱངས། །ཤེས་རབ་སྐུར་སྨིན་རིག་བཞི་ཉིད། །འབྲས་བུ་སྦྱོར་བས་ཡེ་ཤེས་གསུམ། །སྐུ་གསུམ་དག་པས་མཐར་ཕྱིན་ནས། །ཀུན་བཟང་དབྱེ་བ་མེད་པ་ཐོབ། །དེ་ཕྱིར་དབང་བཞིས་སྨིན་པར་བྱ། །ལམ་ནི་ཁྲེགས་ཆོད་ཐོད་རྒལ་གཉིས། །ཁྲེགས་ཆོད་ཡེ་ཡིན་གཞི་ཐོག་དེ། །འཕྲོ་གནས་གང་ཡིན་རང་བཞག་གོ། །དེ་ཡང་ཤེལ་ལྟར་ཟང་ཐལ་གྱི། །རིག་པ་སྟོང་སངས་རྗེན་པ་ཉིད། །ཆོས་སྐུ་ཟང་མར་ཐག་བཅད་ལ། །ཤར་གནས་མཉམ་པའི་ཤེས་པ་གསུམ། །དགོངས་ཆེན་གསུམ་གྱིས་ཉམས་སུ་བླང་། །དེ་ལ་དང་པོ་གནས་པའི་དོན། །ཡུལ་ཕྱིར་མ་འཕྲོས་མི་རྟོག་པ། །དེ་ཉིད་རང་དུས་རིག་པ་ལ། །སྟོང་པས་ཆོས་ཉིད་སྐྱེ་མེད་དང་། །གསལ་བས་འཛིན་མེད་ལོངས་སྐུའི་ངང་། །རིག་ལ་མི་རྟོག་སྤྲུལ་སྐུའི་བདག །ངང་དྭངས་རང་བཞིན་བདག་ཉིད་དུ། །རང་མལ་གནས་ཚེ་ཤེས་པར་བྱ། །དེ་ལས་མི་གཡོ་དགོངས་པ་ཡིན། །ཤར་བ་ཐུགས་རྗེའི་རང་རྩལ་དུ། །གྲོལ་བ་བཞི་ཡིས་ཤེས་པར་བྱ། །གང་ལྟར་ཤར་བའི་རིག་པ་དེ། །རང་གྲོལ་ཡིན་པས་གཉེན་པོ་མེད། །ཅེར་གྲོལ་ཡིན་པས་མཐོང་སར་ཡལ། །ཤར་གྲོལ་ཡིན་པས་སྔ་ཕྱི་མེད། །ཡེ་གྲོལ་ཡིན་པས་བསྐྱར་གཞི་མེད། །རང་གྲོལ་གཉེན་པོ་མེད་པའི་གནད། །གང་ཤར་རང་གིས་རང་གྲོལ་ཕྱིར། །ཅེར་གྲོལ་མཐོང་སར་ཡལ་བའི་གནད། །གང་ཤར་ས་དེར་ཡལ་བའི་ཕྱིར། །ཤར་གྲོལ་སྔ་ཕྱི་མེད་པའི་གནད། །གང་ཤར་དུས་འདིར་གྲོལ་བའི་ཕྱིར། །ཡེ་གྲོལ་བསྐྱར་གཞི་མེད་པའི་གནད། །གང་ཤར་ཡེ་ནས་གྲོལ་བའི་ཕྱིར། །མཚངས་འདི་ཤེས་པའི་རྣལ་འབྱོར་ལ། །རྟོག་པ་ཆེད་དུ་སྤང་(༡༥༣)མི་དགོས། །རང་གྲོལ་ཆོས་སྐུའི་རོལ་པར་ཤར། །ཐུགས་རྗེའི་རྩལ་དུ་སྣང་བའི་ཕྱིར། །མཉམ་པའི་ཤེས་པ་བདེ་ཡངས་པ། །ཤར་དུས་རང་མལ་གནས་པ་ལ། །གནས་དུས་ངང་ལས་འཆར་བ་བཞིན། །རིས་མེད་གཅིག་ཏུ་མངོན་གྱུར་པས། །རྟོགས་དང་མི་རྟོགས་བར་མེད་འདྲེས། །དེ་ཚེ་རང་བབས་རིག་པའི་དོན། །གང་དུ་མ་གྲུབ་མེད་པ་ལ། །འཛིན་བྱེད་བྲལ་བས་ཕྱལ་པ་ཉིད། །རང་བབས་གནས་པས་ལྷུན་གྲུབ་ལ། །རིག་པར་གཅིག་པས་གཅིག་པུ་ཉིད། །ཐམས་ཅད་རང་བྱུང་ཡེ་ཤེས་ངང་། །སྣོད་བཅུད་ནམ་མཁའི་ངང་གནས་བཞིན། །རང་སྣང་རང་མལ་མ་གཡོས་པ། །མེད་པ་ཕྱལ་པ་ལྷུན་གྱིས་གྲུབ། །གཅིག་པུ་ཉིད་དུ་མངོན་གྱུར་པས། །གདོད་མའི་ཟད་སར་འཁྱོལ་བ་སྟེ། །ཀ་དག་དོན་ལས་མི་འགྱུར་བས། །ཁྲེགས་ཆོད་དོན་གྱི་མན་ངག་གོ། །ཐོག་མ་ཐ་མ་མེད་དུས་ནས། །བར་མེད་མཉམ་པར་གནས་པའི་ཕྱིར། །གནས་པ་ཤར་བ་རིས་མེད་གསུམ། །ཀ་དག་བབས་ཀྱི་དགོངས་དོན་དུ། །ཁྲེགས་ཆོད་དོན་གྱི་སྙིང་པོར་གནས། །དེ་ཉིད་རྟོགས་ནས་གང་བསྒོམ་པ། །འཁོར་བ་མིང་མེད་ཆེན་པོར་གྲོལ། །གསང་ཆེན་ངེས་པའི་མན་ངག་གོ། །ཐོད་རྒལ་ལྷུན་གྲུབ་རང་བཞིན་གདངས། །སྒྲོན་མ་བཞི་ཡིས་ཉམས་བླངས་པས། །མངོན་སུམ་གོང་འཕེལ་ཚད་ཕེབས་དང་། །ཟད་པའི་སྣང་བ་མཐར་ཕྱིན་ཏེ། །ཀ་དག་ནང་དབྱིངས་ཆེན་པོ་ལ། །གཞིར་སྣང་རང་གྲོལ་ཆོས་སྐུར་གནས། །རབ་རྣམས་ཚེ་འདིར་གྲོལ་ཚུལ་ལོ། །འབྲིང་རྣམས་ཆོས་ཉིད་བར་དོ་ལ། །འོད་གསལ་ཟུང་འཇུག་ཡེ་ཤེས་ངང་། །ལྷུན་གྲུབ་གཞི་སྣང་ཤར་བའི་ཚེ། །རང་ངོ་ཤེས་པས་རྣམ་པར་གྲོལ། །ཤར་ལུགས་བརྒྱད་ལ་གདེང་རྙེད་པས། །མངོན་ཤེས་དྲུག་དང་རྗེས་དྲན་དྲུག །རྒྱུན་གྱི་ཏིང་འཛིན་ལ་སོགས་ཐོབ། །ཐིམ་ཚུལ་བརྒྱད་ཀྱིས་གདོད་མར་གྲོལ། །ཐ་མ་ཆོས་ཉིད་མ་ཟིན་པས། །སྲིད་པའི་བར་དོ་རྨི་ལམ་བཞིན། །ལམ་བྱུང་གཉིད་སད་ཚུལ་ཙམ་དུ། །མངོན་སུམ་མཐོང་བའི་རང་ཤུགས་ཀྱིས། །རང་བཞིན་སྤྲུལ་པར་དབུགས་ཕྱུང་སྟེ། །བར་དོ་མེད་པར་སངས་རྒྱས་རྙེད། །དབང་པོ་(༡༥༤)གསུམ་གྱི་ལམ་དུ་བསྟན། །གསུམ་པ་འབྲས་བུའི་ཐོབ་ཚུལ་ནི། །གཞི་ལས་གཞི་སྣང་ཤར་བ་ཉིད། །རང་ངོ་ཤེས་པས་མ་རིག་དག །འཁྲུལ་པ་སངས་པས་མྱ་ངན་འདས། །སྣང་བ་དབྱིངས་སུ་ཐིམ་པ་ལས། །སྐུ་གསུམ་ཆོས་སྐུར་རོ་གཅིག་པས། །རང་ངོ་སྤྲོས་བྲལ་སྟོང་གསལ་ཀློང་། །ལྷུན་གྲུབ་ཐུགས་རྗེ་ནང་གསལ་ཏེ། །ཁ་དོག་རིས་མེད་འཆར་གཞི་ཙམ། །འབྱེད་མེད་ཐམས་ཅད་མཁྱེན་པར་བཞུགས། །གཞི་ཡི་ཡེ་ཤེས་ཡུལ་དག་པས། །འབྲས་བུ་གྲོལ་བ་ཉིད་དུ་འགྱུར། །ཆོས་སྐུའི་ཡེ་ཤེས་ཞེས་བྱའོ། །མཚན་ཉིད་འཛིན་པ་འཆར་གཞི་དང་། །ཤེས་བྱའི་ཡེ་ཤེས་འཆར་གཞི་ལས། །རང་ངོ་སྤྲོས་བྲལ་ཉིད་དུ་གནས། །དཔེར་ན་ཤེལ་འོད་ནང་གསལ་ལམ། །གནམ་གང་ཟླ་བ་དབྱིངས་འཁྱིལ་བཞིན། །དེ་ལྟར་ཆོས་སྐུ་ཀ་དག་ལས། །འབྱེད་མེད་ཐུགས་རྗེ་རང་གཡོས་པས། །གཏིང་གསལ་འཆར་གཞི་རང་གདངས་ཉིད། །ཕྱི་ནང་འོད་གསལ་འོག་མིན་ཞིང་། །ལྷུན་གྲུབ་སྟུག་པོ་བཀོད་པ་སྣང་། །རྒྱལ་བའི་རང་སྣང་ཆེན་པོ་ལས། །ཞི་ཁྲོ་རང་བཞིན་སྤྲུལ་པའི་ཞིང་། །ཕྱོགས་བཅུར་སྣང་བས་དོན་མཛད་པ། །མཁའ་ཟླ་ཆུ་ཟླ་སྣང་བ་བཞིན། །གདུལ་བྱ་དག་པའི་དོན་མཛད་དེ། །ཞིང་དག་རིན་ཆེན་སྙིང་པོ་ན། །འཁོར་དང་ལོངས་སྤྱོད་ཟད་མི་ཤེས། །སྐུ་ཚེ་མཐའ་ཡས་བསམ་མི་ཁྱབ། །ཆོས་ཀྱི་འཁོར་ལོ་དཔག་ཏུ་མེད། །ཡེ་ཤེས་ལྔ་ཡི་མཚན་ཉིད་འཛིན། །ཆོས་དབྱིངས་མེ་ལོང་མཉམ་པ་ཉིད། །སོར་རྟོགས་བྱ་གྲུབ་ཡེ་ཤེས་སོ། །མ་དག་འགྲོ་དྲུག་འཇིག་རྟེན་དུ། །འགྲོ་འདུལ་སྤྲུལ་སྐུ་དཔག་མེད་ཀྱིས། །སོ་སོའི་འགྲོ་དོན་སྣ་ཚོགས་མཛད། །ཤེས་བྱའི་ཡེ་ཤེས་གཉིས་དང་ལྡན། །ཇི་ལྟར་མཁྱེན་པའི་ཡེ་ཤེས་ཀྱིས། །སྤྱི་དང་ཆོས་ཉིད་སྟོང་པར་མཁྱེན། །ཇི་སྙེད་མཁྱེན་པའི་ཡེ་ཤེས་ཀྱིས། །བྱེ་བྲག་ཆོས་ཅན་སྣང་བ་མཁྱེན། །གདུལ་བྱའི་ཁམས་དང་བསམ་པ་བཞིན། །ལས་བཞིན་དམ་ཆོས་ཆར་པ་འབེབས། །ཉེ་བར་ཞི་བའི་བདེ་ལ་འགོད། །འབད་པ་མེད་པར་སེམས་ཅན་གྱི། །དོན་ཀུན་ལྷུན་གྱིས་གྲུབ་པ་ནི། །འོད་གསལ་མཆོག་གི་འབྲས་བུའོ། །དེ་ལྟར་ཡང་ཟབ་སྙིང་པོའི་དོན། །

བླ་ན་མེད་པའི་ཐེག་པ་ལ། །(༡༥༥)བརྟེན་ནས་གྲོལ་བ་གཉེར་དོན་དུ། །ལེགས་པར་བཤད་འདི་བདག་གིས་སོ། །གླིང་འདིར་དམ་ཆོས་ཉི་མ་དག །ཤར་བ་གང་གི་རྩེ་མོའི་རྩེ། །འོད་གསལ་བླ་མེད་རྫོགས་པ་ཆེ། །སྲིད་པ་ཐ་མའི་དམ་ཆོས་ཉིད། །བསགས་པ་རབ་དང་སྐལ་བ་ཆེ། །དབང་པོ་ཡང་རབ་གྱུར་རྣམས་དང་། །འཕྲད་དེ་དེ་ལས་གཞན་དུ་མིན། །ངེས་གསང་མཆོག་འདི་ནོར་བུ་བཞིན། །རྙེད་ནས་དོར་བར་མི་བྱ་སྟེ། །འདོད་དགུ་བསྒྲུབ་ཕྱིར་གསོལ་བ་གདབ། །འབད་དེ་བརྩོན་པས་ནན་ཏན་བསྐྱེད། །རང་བཞིན་མི་ཟད་གཏེར་དང་འཕྲད། །ཚུལ་འདི་ཐེག་པ་རྒྱལ་པོ་ཡི། །དོན་ལ་མཁས་པའི་རྣལ་འབྱོར་པ། །སྣ་ཚོགས་རང་གྲོལ་ཞེས་བྱས་བཀོད། །དགེ་བས་འགྲོ་ཀུན་ཡོངས་གྲོལ་ཤོག །མཐར་ཐུག་དོན་གྱི་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། གཞི་ལམ་འབྲས་བུའི་གནས་གསལ་བ།

༄༅། །ཟབ་མོ་ཡང་ཏིག་ལས། གཞི་ལམ་འབྲས་བུའི་གནས་གསལ་བ་བཞུགས་སོ། །

༄༅། གཞི་ལམ་འབྲས་བུའི་གནས་གསལ་བ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་བྱང་ཆུབ་མངོན་པར་འདུས་མ་བྱས། །རྣམ་དབྱེར་མེད་པའི་ཡོན་ཏན་ལྷུན་གྲུབ་ཅིང་། །གློ་བུར་ཁམས་སྟོང་ཐོག་མཐའ་མེད་པའི་དབྱིངས། །རྣམ་དག་བྱང་ཆུབ་སེམས་ལ་ཕྱག་འཚལ་ལོ། །རྒྱལ་བའི་དགོངས་པ་ཤིན་ཏུ་རྨད་བྱུང་གང་། །རྡོ་རྗེ་རྩེ་མོ་ལྷུན་གྱིས་གྲུབ་པའི་དབྱིངས། །གཞི་ལམ་འབྲས་བུའི་དེ་ཉིད་ངེས་པའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །གཞི་དབྱིངས་མི་འགྱུར་སེམས་ཉིད་འོད་གསལ་ཁམས། །རང་བཞིན་རྣམ་དག་བདེ་གཤེགས་སྙིང་པོ་ལ། །མ་རིག་གཟུང་འཛིན་གློ་བུར་བསྒྲིབས་པ་ཡིས། །ཀུན་ཏུ་བརྟགས་པ་ཡུན་རིང་གོམས་བྱས་པས། །ཡུལ་དང་དོན་དང་སེམས་སུ་བག་ཆགས་ཏེ། །འཁོར་བའི་འཁྲུལ་སྣང་སྣ་ཚོགས་མངོན་པར་གྲུབ། །ཐོག་མཐའ་མེད་ཅན་ཤིང་རྟའི་འཕང་ལོ་བཞིན། །ཁམས་གསུམ་རིགས་(༡༥༦)དྲུག་བདེ་སྡུག་སྣ་ཚོགས་སྣང་། །རང་རང་ལས་ཀྱིས་ཉེ་བར་བཀོད་ཅན་ནོ། །འདི་ཀུན་རང་བཞིན་རྨི་ལམ་སྒྱུ་མ་བཞིན། །དྲི་ཟའི་གྲོང་དང་སྤྲུལ་པ་མིག་ཡོར་ཚུལ། །བྲག་ཆ་ཆུ་ཟླ་འདྲ་ཞིང་སྙིང་པོ་མེད། །གསོག་དང་གསོབ་དང་ཡ་མ་བརླ་འདྲ་ཞིང་། །རྐྱེན་སྣང་རྟེན་ཅིང་འབྲེལ་འབྱུང་ངོ་བོ་ཉིད། །མ་བརྟགས་ཉམས་དགའ་བརྟགས་ན་ངོས་བཟུང་མེད། །མེད་པ་གསལ་སྣང་སྟོང་པའི་རང་གཟུགས་སྟེ། །སྣང་བའི་དུས་ན་བདེན་པའི་རང་བཞིན་མེད། །མེད་ལ་ཡོད་པར་བཟུང་བས་བརྟགས་པ་ཙམ། །གཟུང་བའི་ཡུལ་མེད་རྨི་ལམ་སྒྱུ་མའི་འགྲོས། །གཟུགས་སོགས་ཡུལ་ལྔར་རང་སྣང་སྟོང་གཟུགས་བཞིན། །ངོ་བོ་ཆ་ཤས་རང་བཞིན་མེད་པ་སྟེ། །གཞི་མེད་གནས་མེད་ཡུལ་དངོས་གྲུབ་པ་མེད། །དེ་ཕྱིར་བཟུང་དང་གཟུང་ཡུལ་གྲུབ་པ་མེད། །རྣམ་ཀུན་སྟོང་པར་གདོད་ནས་དག་པ་ཡིན། །འཛིན་པའི་སེམས་ཀྱང་རང་བཞིན་ཡོད་མིན་ཏེ། །ཀུན་གཞིར་བརྟེན་པ་ཀུན་གཞིའི་རྣམ་ཤེས་དང་། །ཡིད་དང་ཉོན་ཡིད་སྒོ་ལྔའི་ཤེས་པ་སྟེ། །རྣམ་ཤེས་ཚོགས་བརྒྱད་སེམས་ཀྱི་རྣམ་པ་ཡང་། །རིག་པའི་ཆ་ལ་མ་རིག་སྒྲོ་བཏགས་ཀྱི། །ཀུན་དུ་བརྟགས་པས་སེམས་ཞེས་མཚོན་པ་ཙམ། །དོན་གྱི་ངོ་བོ་རང་སྟོབས་རིག་པ་སྟེ། །ཁྱད་པར་གཞན་སྟོབས་སེམས་བྱུང་ལྔ་བཅུ་གཅིག །དཔྱད་ན་རྒྱུན་དང་སྐད་ཅིག་ཆ་ཤས་མེད། །དུས་གསུམ་དངོས་མེད་སྐྱེ་འགག་གནས་པས་སྟོང་། །གང་གིས་གང་འཛིན་དེ་ལ་རང་བཞིན་ཅི། །ཁ་དོག་དབྱིབས་མེད་ཕྱོགས་ཆ་མཐའ་དབུས་མེད། །བསམ་དང་བྲལ་བ་ནམ་མཁའི་རང་བཞིན་ཅན། །དངོས་དང་དངོས་པོ་མེད་པའི་མཚམས་ལས་འདས། །ཡེ་ནས་བདག་མེད་སྤྲོས་དང་བྲལ་བའི་ཕྱིར། །འཛིན་པའི་སེམས་ལ་རང་བཞིན་མེད་པ་ལགས། །དེ་ལྟར་གཟུང་དང་འཛིན་པ་མེད་པ་ཉིད། །གདོད་ནས་རྣམ་དག་དོན་གྱི་གནས་ལུགས་ཏེ། །རྣམ་དབྱེར་བཅས་པའི་དྲི་མ་བདེན་སྟོང་ཕྱིར། །འཁོར་བ་མིང་ཙམ་སྒྱུ་མར་རྟོགས་བྱས་ནས། །བརྟེན་གཞི་འོད་གསལ་སྙིང་པོའི་ཁམས་ལ་འཇུག །སྣོད་བཅུད་བརྟེན་གཞི་ནམ་མཁའི་དབྱིངས་རུམ་བཞིན། །འཁོར་འདས་ཀུན་འབྱུང་རིག་པ་བྱང་ཆུབ་སེམས། །(༡༥༧)མཐའ་དང་དབུས་མེད་ཡངས་པ་ཆེན་པོའི་ཀློང་། །སྟོང་གསལ་འགྱུར་མེད་སྤྲོས་དང་བྲལ་བ་ནི། །ཉི་མཁའ་བཞིན་ཏེ་རྒྱ་ཆད་ཕྱོགས་ལྷུང་བྲལ། །ནོར་བུ་བཞིན་ཏེ་ཡོན་ཏན་ལྷུན་གྱིས་གྲུབ། །ཐོག་མཐའ་མེད་དེ་དུས་གསུམ་འཕོ་འགྱུར་མེད། །འདུས་མ་བྱས་ཏེ་རྒྱུ་རྐྱེན་ཀུན་ལས་འདས། །དོན་དམ་དབྱིངས་ཏེ་ཟབ་ཅིང་རྒྱ་ཆེའི་གནས། །ཀུན་ལ་ཡོད་ཀྱང་རྟོགས་པར་དཀའ་བའི་དོན། །གཞི་དབྱིངས་མི་འགྱུར་སྤྲོས་དང་བྲལ་བ་ལགས། །ནམ་མཁའི་ངང་དུ་སྣོད་བཅུད་ཤར་བ་ལྟར། །ཆོས་རྣམས་ཐམས་ཅད་རིག་པའི་ངང་དུ་སྣང་། །མཁའ་དང་སྣོད་བཅུད་ངང་དང་ངང་ཅན་ལྟར། །རིག་དང་ཆོས་ཀུན་དབྱིངས་དང་དབྱིངས་སྣང་སྟེ། །སྣང་དང་སྣང་གཞི་དཔྱད་ན་སྟོང་པའི་ངང་། །གཅིག་དང་དུ་མའི་ཆ་ཤས་ཀུན་ལས་འདས། །སྣོད་བཅུད་ཆགས་འཇིག་འཕོ་ལྡེག་ཅི་བྱུང་ཡང་། །ནམ་མཁའི་རང་བཞིན་འགྱུར་བ་མེད་པ་ལྟར། །སྣང་སྲིད་འཁོར་འདས་བཟང་ངན་ཅི་བྱུང་ཡང་། །རིག་པའི་རང་བཞིན་འགྱུར་བ་མེད་པར་གནས། །རིག་པ་ཡེ་སྟོང་རང་བཞིན་རྣམ་དག་ལས། །འདི་ཞེས་མི་མཚོན་བསམ་བརྗོད་ཀུན་ལས་འདས། །ཡོད་མིན་མེད་མིན་ཡོད་མེད་མཐའ་དང་བྲལ། །དབུས་ཤེས་མི་དམིགས་གདོད་ནས་མ་སྐྱེས་པ། །ཡེ་ནས་ལྷུན་གྲུབ་བྱང་ཆུབ་སེམས་ཀྱི་ངང་། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཉིད། །ཀུན་འབྱུང་གང་ཡིན་ཤེལ་དང་ནོར་བུ་བཞིན། །ཕྱོགས་དང་རིས་བྲལ་དག་ཅིང་དྲི་མ་མེད། །གཉིས་མེད་བསམ་བྲལ་འགྱུར་མེད་དེ་བཞིན་ཉིད། །དོན་དམ་སྙིང་པོ་གདོད་མའི་སངས་རྒྱས་ཏེ། །ཆོས་རྣམས་ཀུན་གྱི་གཞི་ཡི་གནས་ལུགས་ལགས། །དབྱིངས་གཞིར་མ་རྟོགས་སྟོང་པ་ལྟ་བ་དང་། །སྟོངས་པ་ཉི་ཚེ་དབྱིངས་ལ་བདག་ཏུ་འཛིན། །རྟག་ཆད་ཉིད་དེ་མཐའ་བྲལ་དོན་དང་འགལ། །འཁོར་བ་གཞི་མེད་མཚན་ཉིད་ཆད་པ་དང་། །མྱ་ངན་འདས་གཞི་ལྷུན་གྱིས་གྲུབ་པ་གཉིས། །དབྱིངས་དང་དབྱིངས་སྣང་མཁའ་དང་སྤྲིན་ཚོགས་བཞིན། །ཉི་དང་ཟེར་བཞིན་ཡོན་ཏན་ལྷུན་གྲུབ་ཀུན། །དབྱིངས་ལ་ཡོད་ཀྱང་སྒྲིབ་པ་མ་དག་པ། །གློ་བུར་དྲི་བཅས་སྤྲིན་རུམ་ཉི་མ་བཞིན། །(༡༥༨)དེ་གསལ་ཆེད་དུ་ལམ་གྱི་འབད་པ་དང་། །དག་པ་ཉི་མཁའ་འབྲས་བུའི་གནས་སྐབས་རྣམས། །དབྱིངས་དང་ངང་ནས་འཕོ་དང་འགྱུར་མེད་པས། །ལྷུན་གྲུབ་འདུས་མ་བྱས་དབྱིངས་ཡོན་ཏན་ལ། །ཇི་ལྟར་སྔོན་བཞིན་ཕྱིས་དེའི་རང་བཞིན་ཉིད། །གཞི་གཅིག་སྟེང་ན་དེ་ལྟར་གནས་པ་ནི། །སྤྲིན་གྱིས་མ་དག་དག་དང་རྣམ་དག་དེས། །རིམ་བཞིན་དབྱིངས་ལ་དྲི་བཅས་གཞི་དང་ནི། །ལམ་གྱི་ཕྱོགས་གཅིག་དག་དང་འབྲས་བུའི་དུས། །ཤིན་ཏུ་རྣམ་དག་ཉི་མཁའ་རང་བཞིན་བཞིན། །འདི་དག་དབྱིངས་གཅིག་གཞི་ལས་མ་གཡོས་དཔེ། །སེམས་ཉིད་འོད་གསལ་ལྷུན་གྲུབ་འདུས་མ་བྱས། །ཆོས་རྣམས་ཀུན་གྱི་གཞི་མར་ཤེས་པར་བྱ། །དོན་འདི་འཁོར་ལོ་ཐ་མའི་དགོངས་པ་སྟེ། །གསང་སྔགས་རྡོ་རྗེ་ཐེག་པའི་ངེས་དོན་ལགས། །འདི་ལྟར་སུས་ཤེས་སྐྱེས་བུ་མཁས་པ་ཡིན། །འདུས་མ་བྱས་དབྱིངས་ཤིན་ཏུ་རྣམ་དག་ལ། །སྟོངས་སོགས་དབྱིངས་ཀྱི་ཡོན་ཏན་ཡེ་ལྡན་དང་། །གློ་བུར་རྣམ་དག་དྲི་བྲལ་ཡོན་ཏན་ལྡན། །འདི་གཉིས་དབྱེ་བ་མ་ནོར་ཤིན་ཏུ་གཅེས། །གཞི་ཡི་ཆོས་སྐུ་སྟོབས་སོགས་ཡོད་སྨྲ་ཡི། །དག་པ་གཉིས་ལྡན་ཡོན་ཏན་དེ་ལྟ་མིན། །དྲི་བཅས་དྲི་མེད་སྐབས་ཡིན་དེ་ཡི་ཕྱིར། །ལྷུན་གྲུབ་དབྱིངས་ཀྱི་ཡོན་ཏན་ཉིད་དང་ནི། །མངོན་གྱུར་འབྲས་བུའི་ཡོན་ཏན་ལ་ལྟོས་ནས། །གཞི་དང་འབྲས་བུའི་གནས་སྐབས་གཉིས་དག་ལས། །དབྱིངས་འདི་རང་བཞིན་རྣམ་པར་དག་པ་ཅན། །གཞི་ཡི་ཆོས་སུ་མཁས་པས་རིག་པར་བྱ། །ལམ་ནི་དབྱིངས་ཀྱི་དྲི་མ་བསལ་བས་ཏེ། །དབང་བཞིས་སྨིན་པའི་རིག་པ་བྱང་ཆུབ་སེམས། །སྟོང་ཉིད་སྙིང་རྗེ་ཟུང་དུ་འབྲེལ་བ་སྟེ། །ཟབ་མོའི་གནད་ཀྱི་ཉམས་སུ་ལེན་པར་འདོད། །འདིར་ནི་རང་གི་མོས་དགེ་ཕུན་ཚོགས་དང་། །བླ་མའི་བྱིན་རླབས་ཤིན་ཏུ་རྨད་བྱུང་མཐུས། །ཆོས་རྣམས་བདག་མེད་སྤྲོས་དང་བྲལ་བའི་དོན། །སེམས་ཉིད་འོད་གསལ་གཞི་ཡི་གནས་ལུགས་ཉིད། །དབང་ཁྲིད་གདམས་པས་ལེགས་པར་ངོ་འཕྲོད་པ། །གནས་ལུགས་རྟོགས་པའི་ལྟ་བ་ལགས་པར་གསུངས། །དེའི་ཕྱིར་གཞི་དང་ལྟ་བ་ཕྱེད་པ་གཅེས། །གཞི་ནི་དབྱིངས་ཀྱི་གནས་ལུགས་དོན་ཡིན་ལ། །ལྟ་བ་དེ་ཉིད་རྟོགས་(༡༥༩)པའི་རང་བཞིན་ལགས། །རྟོགས་པའི་ངང་ལ་འཇོག་པ་སྒོམ་པ་སྟེ། །རྣམ་པར་མི་རྟོག་ཡེངས་མེད་སྤྲོས་དང་བྲལ། །མཁའ་ལྟར་རྣམ་དག་འོད་གསལ་འདུས་མ་བྱས། །བསམ་བརྗོད་མཚོན་འདས་རིག་པ་བྱང་ཆུབ་སེམས། །རང་རྣལ་ངང་གནས་སྒོམ་པའི་རྒྱལ་པོ་ལགས། །དེ་ཚེ་བྱིང་རྒོད་མཚན་མ་རབ་ཞི་ལ། །བདེ་གསལ་མི་རྟོག་ཉམས་སྐྱེ་འཛིན་ཞེན་མེད། །ཚོགས་དྲུག་ལྷུག་པ་སྒོ་ལྔ་རྒྱ་ཡན་ཉིད། །རིག་པ་རྟེན་མེད་ཕྱལ་པ་བར་སྣང་འདྲ། །ཕྱི་ནང་བར་མེད་ཟང་ཐལ་ཆེན་པོ་སྟེ། །རྒྱལ་བའི་དགོངས་པར་རང་བྱུང་ཡེ་ཤེས་ནི། །མཐའ་གྲོལ་ཀློང་ཡངས་ཆེན་པོར་ཤེས་པར་བྱ། །སེམས་ཅན་སེམས་དང་རྒྱལ་བའི་དགོངས་པ་གཉིས། །རིག་པ་ཁོལ་བུ་རྒྱ་ཡན་ཁྱད་པར་ཏེ། །ཡུལ་གཅིག་ཡིད་བྱེད་འདུ་ཤེས་གཟེབ་ལ་ཐོགས། །ཁམས་གསུམ་སེམས་ཅན་རང་རང་དམིགས་དང་བཅས། །དེ་ལས་རྣམ་འདས་ཕྱོགས་དང་རིས་མེད་པ། །མཁའ་ལྟར་རྣམ་དག་རྒྱལ་བའི་དགོངས་པ་ལགས། །

༈ རྒྱལ་བ་བྱས་ཀྱང་རང་བྱུང་ཡེ་ཤེས་ངང་། །རང་མལ་གནས་པ་རྒྱལ་བའི་དགོངས་པ་ཉིད། །སེམས་ཅན་བྱས་ཀྱང་རང་གནས་མ་རྟོགས་པ། །སེམས་དང་སེམས་བྱུང་ཀུན་རྟོག་གཟུང་འཛིན་ཉིད། །རྟོག་དང་མི་རྟོག་མཚན་མའི་ངང་ལ་གནས། །འདོད་གཟུགས་གཟུགས་མེད་སེམས་གསུམ་ར་བ་རུ། །རང་བྱུང་ཡེ་ཤེས་བཅིངས་ནས་བདག་ཏུ་བཟུང་། །དེ་བས་རྟོགས་དང་མི་རྟོག་དུས་ཀུན་ཏུ། །རིག་པ་རང་གསལ་རྒྱ་ཡན་ཟང་ཐལ་ཉིད། །རང་གནས་མཉམ་པའི་དགོངས་པ་ཤེས་པར་བྱ། །འདི་ཉིད་ཤེས་པས་ཀུན་ལ་མཁས་པར་འགྱུར། །སྙིང་པོའི་དེ་ཉིད་རྟོགས་པའི་ངང་གནས་ཞེས། །མཚུངས་མེད་ཆོས་རྗེ་བླ་མ་དེ་སྐད་གསུངས། །མཆོག་གསུམ་རྡོ་རྗེ་སྙིང་པོའི་ཁང་བཟངས་སུ། །མི་གཡོ་རི་རྒྱལ་ལྟ་བུའི་རྣལ་འབྱོར་པ། །གནས་གསུམ་ཆོས་ཉིད་འཁོར་ལོར་གནས་པའི་ཚེ། །རྩ་གསུམ་དབུ་མ་དག་པའི་རང་བཞིན་དུ། །སྲོག་རྩོལ་ཉི་ཟླའི་འཇུག་པ་ནུབ་གྱུར་པས། །རླུང་སེམས་མི་གཡོ་ཤིན་ཏུ་དག་པ་ན། །བདེ་ཆེན་འོད་ཀྱིས་ནམ་མཁའི་དབྱིངས་ཁྱབ་པར། །ཡེ་ཤེས་རོ་གཅིག་དབྱིངས་དང་རྣམ་འདྲེས་པས། །ནང་གི་དེ་ཉིད་འོད་གསལ་ཤར་བའི་ཚེ། །ཉི་དང་ཟེར་བཞིན་ཆོས་དབྱིངས་རིག་པའི་གདངས། །ཡེ་ཤེས་སྲོག་རླུང་ཁ་དོག་(༡༦༠)འབྱེད་པ་ལས། །ཕྱི་རོལ་རྣམ་ཀུན་སྟོང་པའི་འོད་གསལ་གཟུགས། །མངོན་སུམ་ཡུལ་དུ་སྣང་བའི་རང་བཞིན་དང་། །ཕྲ་མོའི་རླུང་ཟིན་འབྱུང་ལྔའི་ཁྱད་པར་ལས། །རྟགས་བཅུ་རྣམ་དག་མེད་བཞིན་སྣང་བ་ནི། །དག་པའི་མཁའ་ལ་གཟའ་སྐར་བཀྲམ་པ་བཞིན། །དེ་ཚེ་རང་བཞིན་གཅིག་སྟེ་གདོད་མའི་ངང་། །གང་ཡང་མི་འཛིན་ཅིར་ཡང་མི་རྟོག་པས། །གནས་ལུགས་རང་བཞིན་ཤེས་རབ་ཕ་རོལ་ཕྱིན། །ཟུང་འཇུག་དབྱེར་མེད་རྫོགས་པ་ཆེན་པོའི་ངང་། །བཞི་པའི་དེ་ཉིད་ཕྱག་རྒྱ་ཆེན་པོ་ནི། །མཐའ་གཉིས་གནས་གསལ་དབུ་མའི་རང་བཞིན་ཏེ། །དུས་གསུམ་རྒྱལ་བ་ཀུན་གྱི་གཤེགས་ཤུལ་ལགས། །གང་ཚེ་གཟུང་དང་འཛིན་པ་གཉིས་མེད་པར། །བློ་ཡི་མདུན་ན་འཇུག་པ་རབ་ཞི་བ། །དེ་ཚེ་བསམ་བརྗོད་སྤྲོས་པ་མེད་པའི་དབྱིངས། །མ་སྐྱེས་རྣམ་པར་དག་པའི་ཆོས་ཉིད་ལ། །ཡང་དང་ཡང་དུ་ཉིན་མཚན་ལེགས་བསྒོམས་པས། །སྣ་ཚོགས་དངོས་དང་དེ་བློ་མི་དམིགས་པར། །མངོན་སུམ་གོང་འཕེལ་ཚད་ཕེབས་ཟད་པ་ལ། །ཕྱི་རོལ་སྣང་བའི་འོད་གསལ་དབྱིངས་ནུབ་སྟེ། །ཉི་བྲལ་རྐྱེན་གྱིས་ཤེལ་འོད་ནང་གནས་ལྟར། །རིག་པ་གཟུང་འཛིན་རླུང་དང་བྲལ་བ་ལས། །ཡེ་ཤེས་རླུང་ལྔ་རང་མལ་དབྱིངས་སུ་ཐིམ། །ནང་གི་དེ་ཉིད་ཤིན་ཏུ་མི་གཡོ་བ། །ཐོག་མ་དང་ནི་ཐ་མ་མེད་པའི་བདག །མ་ལུས་དབྱིངས་གཅིག་གདོད་མའི་སར་གཞོལ་ཏེ། །རང་རིག་རྡོ་རྗེ་སྙིང་པོའི་དབྱིངས་ལ་འཇུག །དེ་ལྟར་བསྒོམ་པས་ས་ལམ་གང་བགྲོད་དེ། །སྤྱན་དང་མངོན་ཤེས་རྫུ་འཕྲུལ་ཏིང་འཛིན་སོགས། །ཡོན་ཏན་ཆེས་མཆོག་གོང་མ་བརྙེས་པ་ལགས། །མཉམ་གཞག་ཆོས་ཉིད་ཟབ་མོའི་རང་བཞིན་དུ། །ཟག་མེད་དགེ་བ་སྤྲོས་དང་བྲལ་བའི་ཚེ། །རྟོགས་དང་ངང་གནས་སྣང་ལ་འཛིན་མེད་པས། །ལྟ་སྒོམ་སྤྱོད་གསུམ་ངོ་བོ་གཅིག་པ་ལ། །རྟོགས་པས་ཐ་དད་ཙམ་དུ་ཤེས་པར་བྱ། །རྗེས་ཐོབ་རྨི་ལམ་སྒྱུ་མའི་ཚུལ་ཙམ་དུ། །སྦྱིན་སོགས་དགེ་བ་འཁོར་གསུམ་དག་པར་སྤྱད། །སྣང་སྲིད་འཁོར་འདས་ཆོས་རྣམས་ཐམས་ཅད་ཀུན། །དབྱིངས་སྣང་བདེན་མེད་སྒྱུ་མར་རྣམ་སྦྱོང་བ། །འདི་དག་ལྟ་སྒོམ་སྤྱོད་པའི་རིམ་པ་ལགས། །མདོར་ན་གཞི་དབྱིངས་རྟོགས་པ་ལྟ་བ་སྟེ། །ངང་ལ་མི་རྟོག་ཡེངས་མེད་སྒོམ་པའི་མཆོག །རྨི་ལམ་སྒྱུ་མ་བདེན་མེད་སྤྱོད་པའི་ཚུལ། །ཐམས་ཅད་རིག་པའི་(༡༦༡)ངང་དུ་རོ་གཅིག་པས། །ལམ་གྱི་ཆོས་ཤེས་བླ་མ་སངས་རྒྱས་གསུངས། །འདི་དག་མཐར་ཕྱིན་འབྲས་བུའི་རིམ་པ་ནི། །ཁམས་དེའི་དྲི་མ་མ་ལུས་དག་པའི་ཚེ། །སྤྲིན་བྲལ་ཉི་བཞིན་དབྱིངས་ཀྱི་ཡོན་ཏན་ཀུན། །མ་ལུས་མངོན་གྱུར་བྱང་ཆུབ་ཆེན་པོ་སྟེ། །དག་པ་གཉིས་ལྡན་ལྷུན་གྲུབ་རང་སྣང་ལས། །སྤངས་དང་རྟོགས་པའི་ཡོན་ཏན་ཕུན་ཚོགས་ལྡན། །སྐུ་དང་ཡེ་ཤེས་འདུ་འབྲལ་མེད་པ་བརྙེས། །དེ་ཚེ་དབྱིངས་ཀྱི་སྐུ་གསུམ་རོ་གཅིག་པས། །རྒྱལ་བའི་སྤྱོད་ཡུལ་སྐུ་གསུམ་ཉག་ཅིག་ལས། །ཡེ་ཤེས་ཕྲིན་ལས་དག་པའི་གཟུགས་སྐུ་གཉིས། །རྒྱལ་བའི་བྱིན་རླབས་གདུལ་བྱའི་སྨོན་ལམ་མཐུས། །ཇི་ལྟར་འདོད་བཞིན་སོ་སོར་སྣང་བ་ཡིས། །ངེས་པ་ལྔ་ལྡན་ལོངས་སྤྱོད་རྫོགས་པ་དང་། །ངེས་མེད་སྣ་ཚོགས་སྤྲུལ་པའི་སྐུ་རྣམ་གཉིས། །གདུལ་བྱའི་ཁམས་དང་མོས་པའི་རྗེས་འགྲོ་བས། །ཆོས་དབྱིངས་ཇི་བཞིན་ནམ་མཁའི་དབྱིངས་ཀུན་ཁྱབ། །ནོར་བུ་ཇི་བཞིན་འདོད་དགུའི་རེ་བ་སྐོང་། །སྲིད་པ་ཇི་སྲིད་གཞན་དོན་རྒྱུན་མི་ཆད། །དེ་དག་མཐར་ཕྱིན་འབྲས་བུའི་རིམ་པ་ལགས། །ཡེ་ནས་ལྷུན་གྲུབ་དབྱིངས་ཀྱི་སྐུ་གསུམ་དང་། །གདུལ་བྱའི་རང་སྣང་ཕྲིན་ལས་གཟུགས་སྐུ་གཉིས། །མཁའ་དབྱིངས་སྟོན་ཟླ་དྭངས་པའི་མཚོར་སྣང་བཞིན། །དབྱིངས་སུ་དབྱིངས་སྣང་དེ་ཡི་གཟུགས་བརྙན་ཏེ། །གཅིག་དང་ཐ་དད་མཐའ་ལས་འདས་ཚུལ་དུ། །རྒྱལ་དང་གདུལ་བྱའི་ངོ་ཁ་སོ་སོར་སྣང་། །དེ་ཕྱིར་འདི་གཉིས་དབྱེ་བ་ཤེས་པ་གཅེས། །འདི་དག་འདྲེས་ནས་གཅིག་ཏུ་ཤེས་པ་ན། །རྒྱལ་བའི་ཆོས་སྐུ་འགྲོ་ལ་སྣང་བར་རིགས། །ངོ་བོ་གཅིག་པའི་གཟུགས་སྐུ་སྣང་བའི་ཕྱིར། །སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཡོན་ཏན་སངས་རྒྱས་འཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་རྒྱལ་བ་རྣམས་ཀྱི་སྤྱོད་ཡུལ་ལོ། །ཞེས་སོགས་ལུང་གི་ཡང་དག་དམིགས་ཕྱེ་བས། །དབྱིངས་དང་ཡེ་ཤེས་ཕྲིན་ལས་སྐུར་ཤེས་བྱ། །དེ་ལྟར་རྟོགས་ན་སྐྱེས་བུ་མཁས་པ་ཡིན། །ཚུལ་འདི་ངེས་པའི་དོན་གྱི་སྙིང་པོ་སྟེ། །མདོ་རྒྱུད་མན་ངག་ཀུན་གྱི་མཐར་ཐུག་ཡིན། །དགེ་བ་འདི་ཡིས་བདག་དང་འགྲོ་བ་ཀུན། །མ་ལུས་དབྱིངས་གཅིག་རྫོགས་པའི་སངས་རྒྱས་ཤོག །གཞི་ལམ་འབྲས་བུའི་གནས་གསལ་བ་ཞེས་བྱ་བ། མང་དུ་ཐོས་པའི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་(༡༦༢)གྱི་མགུལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། རྣལ་འབྱོར་བཞིའི་རིམ་པ།

༄༅། །ཟབ་མོ་ཡང་ཏིག་ལས། རྣལ་འབྱོར་བཞིའི་རིམ་པ་བཞུགས་སོ། །

༄༅། རྣལ་འབྱོར་བཞིའི་རིམ་པ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་འོད་གསལ་ལྷུན་གྲུབ་འདུས་མ་བྱས། །མཁའ་ལྟར་རྣམ་དག་ཆོས་དབྱིངས་བྱང་ཆུབ་སེམས། །རང་བྱུང་ཡེ་ཤེས་ལྷུན་གྱིས་གྲུབ་དབྱིངས་སུ། །འདུ་འབྲལ་མེད་པའི་ཚུལ་གྱིས་ཕྱག་འཚལ་ལོ། །དོན་གྱི་སྙིང་པོ་བྱང་ཆུབ་ཆོས་སྐུ་ལ། །རྩོལ་ཞིང་སྒྲུབ་མེད་རེ་དོགས་བྲལ་ན་ཡང་། །དབྱིངས་དེར་རབ་འཇུག་གསང་ཆེན་ངེས་པའི་ལམ། །རྣལ་འབྱོར་བཞི་ཡི་ཚུལ་གྱིས་བརྗོད་པར་བྱ། །

དེ་ལ་གང་གིས་ཉམས་སུ་ལེན་པའི་མན་ངག་དང་། ཇི་ལྟར་ཉམས་སུ་བླང་བའི་རིམ་པ་གཉིས་ལས། དང་པོ་ནི། འཁོར་བར་བློ་ལོག་ནས་ཐར་པ་དོན་དུ་གཉེར་བའི་དད་པ་རབ་དང་ལྡན་པ་དེས། སྔོན་དུ་བླ་མ་མཚན་ཉིད་དང་ལྡན་པ་བསྟེན་ཞིང་མཆོད་པ་དང་། གདམས་པའི་སྙིང་པོ་རྫོགས་པར་བྱས་ལ། འཁོར་བའི་འབྲེལ་པ་ཚེ་འདིའི་བྱ་བ་ཐམས་ཅད་སྤངས་ཏེ། རྒྱུས་མེད་པའི་ཡུལ་ལམ། ལུང་སྟོངས་ཆེན་པོའམ། རི་ངོགས་དབེན་པའམ། ནགས་ཚལ་འཐིབས་པའམ། རྒྱ་མཚོའི་གླིང་ལ་སོགས་པར་ཕྱིན་ལ། གཅིག་པུར་སྒྲུབ་པ་ལ་བརྩོན་པར་བྱ་སྟེ། ཐལ་འགྱུར་ལས། དད་ལྡན་འཁོར་བའི་ཡིད་བྲལ་བས། །བླ་མ་མཆོད་དང་གཏོང་བར་བྱ། །འཁོར་བའི་འབྲེལ་པ་ཀུན་སྤངས་ནས། །གྲོགས་སྤངས་གཅིག་པུར་གནས་པར་བྱ། །ཞེས་སོ། །དེའང་བྱ་བ་དགུ་ཕྲུགས་སུ་བཏང་ནས་བསྒྲུབ་སྟེ། ལུས་ཀྱི་ཕྱིའི་འཇིག་རྟེན་འཁྲུལ་པའི་བྱ་བྱེད་ཚོང་སོ་ནམ་ལ་སོགས་པའི་ཆེད་དུ་འགྲོ་འདུག་སྒུལ་བསྐྱོད། ནང་དམན་པའི་དགེ་བ་ཕྱག་དང་སྐོར་བ་ལ་སོགས་པ། གསང་བ་མཚན་བཅས་ཀྱི་རིམ་པ་ཕྱག་རྒྱ་དང་གར་ལ་སོགས་པ་བཏང་ནས། ལུས་ལྟ་སྟངས་ལས་མི་གཡོ་བར་བྱའོ། །ངག་གི་ཕྱི་འཁྲུལ་གཏམ་གླེང་བརྗོད། ནང་ཆོས་ཀྱི་གླེང་བརྗོད། གསང་བ་ཁ་ཏོན་དང་བཟླས་བརྗོད་ལ་སོགས་པ་ངག་གི་བརྗོད་པ་ཐམས་ཅད་སྤངས་ལ། ཅི་ཡང་མི་བརྗོད་པར་ལྐུགས་པ་ལྟ་བུ་བྱའོ། །སེམས་ཀྱི་ཕྱི་འཇིག་རྟེན་(༡༦༣)གྱི་འཁྲུལ་རྟོག་སྣ་ཚོགས་སུ་འཕྲོ་བ། ནང་ཆོས་ཀྱི་བསམ་བློ་བཏང་བ། གསང་བ་ལྷ་ཡི་བསྐྱེད་རིམ་ལ་སོགས་པ་ཡིད་ལ་བྱེད་པའི་ཆོས་རྣམས་སྤངས་ལ། ཅི་ཡང་མི་རྟོག་པའི་ངང་ལས་མི་གཡོ་བར་བྱའོ། །མདོར་ན་སྙིང་པོ་དོན་གྱི་སྒྲུབ་པ་ལ་ཞུགས་ནས། སེམས་ཉིད་དོན་གྱི་ངོ་བོ་སྐྱོང་བ་ལས་སྐད་ཅིག་ཀྱང་མ་ཡེངས་མ་འཆུགས་པར་བྱས་ལ། ལྟ་སྒོམ་སྤྱོད་འབྲས་ཀྱི་རྩལ་གསུམ་རང་རྫོགས་སུ་འགྱུར་བ། ཉམས་ལེན་གནད་ཀྱི་དྲོད་རྟགས་ཐོབ་པ། ཚེ་འདིའི་འཁྲུལ་པ་ལ་སྐད་ཅིག་ཀྱང་མ་ཤོར་བ། དངོས་འཛིན་འཁྲུལ་པའི་རི་བོ་ཞིག་པ། གནས་ལུགས་དོན་གྱི་ཟད་སར་སྐྱོལ་བ་ཞིག་དགོས་པའོ། །དབེན་པར་འདུག་ནས་རིག་པ་དྭངས་སྙིགས་ཕྱེ་དུས། ཅི་ཡང་དྲན་ནས་ཅི་བྱེད་ལ་སྟོར་བ་འབྱུང་བས། འདུག་ཚུགས་པར་བྱས་ལ་བསྒྲུབ་དགོས། ད་རེས་ཀྱི་འདི་ལས་སྟབས་ལེགས་པ་མེད་པས། འཁོར་འདས་ཤན་འབྱེད་པའི་ས་མཚམས་སུ་བབས་པ་ལ་སྙིང་རུས་བསྐྱེད་ནས་ཉམས་ལེན་ལ་འབུངས་པ་གལ་ཆེ། འཇིག་རྟེན་གྱི་བྱ་བ། ཐུན་མོང་གི་ཆོས་སྤྱོད། ཐ་མལ་གྱི་སྣང་བ། གང་དང་ཅི་ཡང་རུང་། ཆེ་བཞག །ཆུང་བཤོལ་ལ། དམ་བཅའ་བརྟན་པོ་བྱས་ཏེ་བསྒྲུབ་དགོས་སོ། །དེའང་བག་ཆགས་ངན་པས་སྒོམ་རྗེས་སུ་བསྙེག་པས། སོ་སོ་སྔར་གང་བྱེད་ཀྱི་བྱ་བཞག །བཟོ་རིག་དང་ཡོན་ཏན། འཁོར་གཡོག་དང་ཟས་ནོར། གྲགས་པ་ལོ་འདོད་ལ་སོགས་པ་ཆོས་སྒྲུབ་པའི་བར་དུ་བཏང་བས། དྲན་པས་བཟུང་ལ། སྔར་ཇི་ཙམ་བྱས། སྤྱད། བསྐྱངས། བྱས་ཀྱང་སྙིང་པོ་མི་འདུག་པས། ད་ནས་བྱང་ཆུབ་མ་ཐོབ་ཀྱི་བར་དུ། ཆོས་མིན་གྱི་ཕྱོགས་སུ་སྐད་ཅིག་ཀྱང་མ་སོང་བ་ཞིག་བྱ་བསམ་པའི་ཞེ་བཅད་ཆེན་པོས་སྙིང་རུས་བསྐྱེད་ལ་བསྒྲུབ་བོ། །ཕོ་མོ་གང་གིས་བསྒྲུབས་ཀྱང་སྙིང་རུས་ཆེ་བ་ཁོ་ན་གལ་ཆེའོ། །འདི་རྣམས་ཆོས་མཐར་ཕྱིན་པར་བྱེད་པ་ལ་མེད་ཐབས་མེད་པའི་ཆིངས་ཡིན་པས། གཅིག་པུར་འདུག་ཚུགས་པའི་ཉམས་ལེན་ལ་འབད་པ་གལ་ཆེའོ། །

དོན་གཉིས་པ་ཇི་ལྟར་ཉམས་སུ་བླང་བའི་རིམ་པ་ལ་བཞི་སྟེ། ལྟ་བ། སྒོམ་པ། སྤྱོད་པ། འབྲས་བུ་རྣལ་འབྱོར་དུ་བྱའོ། །དང་པོ་ལ་གསུམ་(༡༦༤)སྟེ། ལྟ་བ་གྲོང་ཁྱེར་རྒྱུན་གཅོད། མན་ངག་རི་བོ་ཅོག་བཞག །དགོངས་པ་ཁམས་གསུམ་ཡོངས་གྲོལ་ལོ། །དང་པོ་ནི། རྫོགས་པ་ཆེན་པོ་བྱ་བྲལ་ལྷུན་གྱིས་གྲུབ་པ་རང་བྱུང་གི་ཡེ་ཤེས་ཏེ། ངོ་བོ་གང་དུའང་མ་གྲུབ་པ། རང་བཞིན་གསལ་ལ་དག་པ་ཐུགས་རྗེ་ཅིར་ཡང་འཆར་བ་སྟེ། རིག་སྟོང་ཀ་དག་ཆེན་པོའི་དབྱིངས་ན། སྣང་སྲིད་འཁོར་འདས་ཐམས་ཅད་རོལ་པ་དང་། རྒྱན་དང་རྩལ་ཙམ་དུ་རང་སྣང་རང་ཤར་རང་གྲོལ་བར་གནས་སོ། །དེ་ཡང་རིག་པའི་རང་གཟུགས་སྟོང་གསལ་ཟང་ཐལ་ཆེན་པོ་ཅིར་ཡང་མ་གྲུབ་པའི་ངང་ནས། ལྷུན་གྲུབ་འོད་ལྔའི་རྩལ་ལས། ཕྱི་ཡུལ་སྣང་ལུས་དང་བཅས་པར་གྲུབ་པས་རང་སྣང་གི་རྒྱན་དུ་ཤར། ཡེ་ཤེས་ཀྱི་རོལ་པར་ཤར། འགག་མེད་ཀྱི་རྩལ་དུ་ཤར་ཡང་། སྣང་ལ་བདེན་པར་མ་གྲུབ་པ། དཔེ་རྨི་ལམ་གྱི་སྣང་བ་ཡུལ་མེད་རང་སྣང་གི་རྩལ་དང་རྒྱན་དང་། རོལ་པར་ཤར་བ་བཞིན་ནོ། །ཐུགས་རྗེ་རིག་པའི་རྩལ་ལས་ནང་སེམས་དང་སེམས་བྱུང་ཚོགས་བརྒྱད་ཀྱི་ཤེས་པར་གྲུབ་སྟེ། རིག་པའི་རྩལ་དུ་ཤར། ཐུགས་རྗེའི་རོལ་པར་ཤར། རང་བྱུང་གི་རྒྱན་དུ་ཤར་ཡང་། རང་ངོ་བདེན་པར་མ་གྲུབ་པས། དཔེ་རྨི་ལམ་གྱི་ཤེས་པ་ལྟར་དུ་དེར་ཤར་ཡང་ཤར་ས་ནས་རང་གྲོལ། རང་དག །རང་ཡལ་བ། རང་ཤར་གྱི་རྩལ་དང་རྒྱན་དང་རོལ་པར་སྣང་བའོ། །དེའི་ཕྱིར་ཕྱིའི་ཡུལ། བར་ལུས། ནང་སེམས་དང་བཅས་པ་ཐམས་ཅད་གཞི་མེད་རང་སྣང་སྟོང་པའི་ཆོ་འཕྲུལ་ཙམ་དུ་ཤར་བ་ལས། བདེན་པ་དང་། གྲུབ་པ་རྩྭའི་རྩེ་མོ་ཙམ་ཞིག་ཀྱང་མེད་དོ། །མི་བདེན་ལ་སྣང་བ་ནི། རིག་པའི་འཆར་ཚུལ་མ་འགགས་པ་ལས་རྩལ་དང་རྒྱན་དང་རོལ་པར་སྣང་སྟེ། ནོར་བུའི་ངོ་བོ་གང་དུའང་མ་ཆད་ལ། རྩལ་དང་རྒྱན་དང་རོལ་པར་འདོད་དགུ་འབྱུང་བ་ནི། ནོར་བུ་ལ་ཡོན་ཏན་ཆེ་བའི་བདག་ཉིད་རྫོགས་པ་ལས་སྣང་བ་བཞིན་ནོ། །དེའི་ཕྱིར་ཆོས་ཐམས་ཅད་དང་པོའང་རིག་པ་ལས་ཤར། ད་ལྟའང་རིག་ངོར་སྣང་། མཐར་ཡང་རིག་པར་གྲོལ་བས། རང་བྱུང་གི་ཡེ་ཤེས་སུ་ཡེ་ནས་སངས་རྒྱས་ཤིང་རྣམ་པར་དག་པ་ཞེས་བྱ་སྟེ། རིག་པ་ལ་རིག་ལྔ་ཡོད་པས་ཕུང་པོ་ལྔར་ཤར། (༡༦༥)འོད་ལྔ་ཡོད་པས་འབྱུང་ལྔ་ཡུམ་དུ་ཤར། ཡེ་ཤེས་ལྔ་ཡོད་པས་ཉོན་མོངས་པ་ལྔར་ཤར་ཏེ། སྣང་བ་འཁྲུལ་པར་སྣང་ཡང་། དོན་རྣམ་དག་ཏུ་གནས་ཏེ། མེད་པ་གསལ་སྣང་གི་རང་བཞིན་དུ་སངས་རྒྱས་པ་ནི། གཉིས་མེད་དོན་གྱི་ལྟ་བ་སྟེ། སེང་གེ་རྩལ་རྫོགས་ལས། ཉོན་མོངས་ལྔ་ལས་ཡེ་ཤེས་ལྔ། །ཡུལ་ལྔ་ལས་ནི་འོད་ལྔའི་སྐུ། །ཕུང་པོ་ལྔ་ལས་སངས་རྒྱས་ལྔ། །འབྱུང་བ་ལྔ་ལས་ཡུམ་ལྔར་རྟོགས། །སྲིད་པ་གསུམ་ཉིད་སངས་རྒྱས་ཞིང་། །གཉིས་མེད་ལྟ་བའི་རང་ལུས་ཡིན། །ཞེས་པ་དང་། མུ་ཏིག་ཕྲེང་བ་ལས། ཕུང་པོ་ཁམས་དང་སྐྱེ་མཆེད་ཀུན། །རིགས་དང་རིགས་ཀྱི་བདག་པོར་གྲོལ། །ཞེས་པ་དང་། སྣོད་བཅུད་ཡེ་ནས་སྟོང་པ་སྟེ། །དོན་དམ་ཀུན་རྫོབ་གཟུགས་ཅན་ནོ། །ཞེས་སོ། །

གཉིས་པ་རི་བོ་ཅོག་བཞག་གི་མན་ངག་ནི། གང་སྣང་ཆོས་ཉིད་ཀྱི་རོལ་པར་རྟོགས་པས། བཟང་ངན་དབྱེ་བསལ་དང་། ཡིན་མིན་གྱི་རྩིས་གདབ་མི་བྱ་བར། ཅོག་གཞག་རང་མལ་འགྱུར་མེད་དུས་བཟུང་སྟེ། ལྟ་བའི་རང་མལ་མཐོང་བས་ཡིད་དཔྱོད་བློ་ཡི་ཐེ་ཚོམ་དང་འགལ་འཁྲུལ་མེད་པར་ཐག་ཆོད་པས་བློ་བདེ་བ་རི་བོ་འཕོ་འགྱུར་མེད་པ་ལྟ་བུ་སྟེ། ཐལ་འགྱུར་ལས། ལྟ་བའི་ངོ་བོ་མཐོང་བ་ལ། །ཡིད་དཔྱོད་ཚིག་གིས་འགྲུས་ས་མེད། །ཅེས་སོ། །དེ་ལྟར་རྟོགས་པའི་རྣལ་འབྱོར་པས་ཕྱི་ཆོས་ཅན་ལ་བལྟས་པས་སྣང་ལ་རང་བཞིན་མེད་པར་མཐོང་། ནང་ཆོས་ཉིད་ལ་བལྟས་པས་སྟོང་པ་ངོས་བཟུང་མེད་པར་མཐོང་། གསང་བ་རང་རིག་ལ་བལྟས་པས་སྟོང་གསལ་ཀ་ནས་དག་པར་མཐོང་སྟེ། ལྟ་བ་ལ་ཟློས། འཁྲུལ་གཞི་ཁུངས་རྡིབ། ཆོས་སྐུ་རང་མལ་ཟིན་པ་ཞེས་བྱའོ། །དེའང་ལྟ་ལུགས་ནི། དང་པོ་ཡུལ་དུ་ལམ་གྱིས་སྣང་དུས་ཆོས་ཅན་སྤྱི་ལ། ཤེས་རབ་ཀྱི་མིག་ཅོག་བཞག་གིས་ཤེས་པས་ཆེར་བལྟས་པས། མེད་ལ་སྣང་བ་དཔྱད་ར་ཞིག་པ་སྒྱུ་མའམ་རྨི་ལམ་གྱི་སྣང་བ་ལྟར་མཐོང་བས། འཁྲུལ་སྣང་དོན་ལ་མེད་པར་རྟོགས་པས་ཁམས་གསུམ་དུ་བཟློག་པ་མེད་པར་ཤེས་པས་བློ་བདེའོ། །དེ་ནས་ཡུལ་སོ་སོའི་བྱེ་བྲག་ལ་འདི་དང་འདིའོ་སྙམ་དུ་ངེས་དུས་ཆོས་ཅན་དུམ་བུ་པ་སྟེ། རྡོ་རྗེའི་མིག་གང་ཤེས་ཐད་ཀ་དེར་ཅོག་བཞག་ལ་བཏང་བས། ཡུལ་མེད་སྟོང་པའི་ཆོ་འཕྲུལ་དུ་མཐོང་(༡༦༦)བས། རིག་སྟོང་རང་སྣང་གི་རོལ་པར་རྟོགས་ཏེ། འཁྲུལ་འཛིན་ཡུལ་མེད་སྟོང་པར་མཐོང་བས་རིག་པ་ལ་ལས་དང་བག་ཆགས་མེད་པར་མཐོང་བས་བློ་བདེའོ། །རང་ཤར་ལས། ཆོས་ཅན་མཚན་མར་སྣང་བ་ལ། །མིག་དང་དབང་པོ་མ་འགགས་པས། །སེམས་ཀྱི་ལྟ་བ་ལེགས་པ་ཡིན། །རང་གི་རིག་པ་གསལ་བ་ཡིས། །ཆོ་འཕྲུལ་ཕྱི་ཡི་སྣང་བ་སྟེ། །རྟོག་མེད་གསལ་བའི་ངོ་བོ་ལ། །རང་བྱུང་ཆེན་པོར་ཤེས་གྱུར་ན། །ཆོས་ཅན་ལྟ་བའི་ལྟ་བའོ། །ཞེས་པ་དང་། ཉི་ཟླ་ཁ་སྦྱོར་ལས། དམིགས་པར་སྣང་བའི་ཡུལ་རྣམས་ལ། །རང་བཞིན་མེད་པར་གང་གོམས་པ། །འདིས་ནི་སྣང་སྟོང་གཉིས་སུ་མེད། །ཅེས་སོ། །ནང་ཆོས་ཉིད་ནི་དེ་ལྟར་ཕྱི་ཡུལ་མེད་དུ་ཕྱམ་གྱིས་སོང་སྟེ། རྗེས་སྟོང་པར་རང་གནས་གཅིག་ཏུ་གནས་པ་སྟེ། བར་མེད་སྟོང་པའི་ངང་ལ་ཅེར་གྱིས་བལྟས་པས་མེད་པའང་མ་ཡིན་ཡུལ་སྣང་རྣམས་ཁྲ་ལམ་མེ། ཡོད་པའང་མ་ཡིན་ངོས་གཟུང་མེད་པར་སང་ངེ་། ཕྱི་ནང་རིས་མེད་སྒྱུ་མ་རང་སྣང་དུ་རྟོགས་པས་གཟུང་འཛིན་ཞིག་པའི་རང་སྣང་ཆོས་ཟད་བློ་འདས་སུ་རྗེན་ནེ་བྱུང་སྟེ་ཆོས་སུ་འཛིན་པ་ཡལ་བའི་དུས་སོ། །ཐལ་འགྱུར་ལས། ནང་ནི་ཆོས་ཉིད་ལ་བལྟས་པས། །ངོ་བོ་རང་བཞིན་སྒྱུ་མར་མཐོང་། །ཞེས་སོ། །གསང་བ་རིག་པ་ལ་བལྟ་བ་ནི། དེ་ལྟར་འཇོག་བྱེད་ཀྱི་རིག་པ་རང་ངོ་ལ་ཆེར་གྱིས་བལྟས་པས། གཏན་མེད་ཟང་ཁ། རྗེས་མེད་རང་ཡལ། ཕྱམ་ཕྱམ་རིས་མེད། འདི་ཡིན་འདི་མིན་གྱི་རྩིས་གདབ་མེད་པ་རང་གསལ་རྗེན་པར་སལ་ལེ་གཅིག་མཐོང་བས། དེ་ཁོ་ན་རང་བྱུང་གི་ཡེ་ཤེས་ཆོས་སྐུ་རང་མལ་དུ་གསལ་བ་ཞེས་བྱ་སྟེ། གསང་བ་རྒྱལ་པོའི་ལྟ་བ་ཆོས་ཉིད་མངོན་སུམ་གྱི་ཡེ་ཤེས། དབྱིངས་སྟོང་པའི་ངང་ན་རིག་པ་རང་གསལ་དུ་གནས་པས། དབྱིངས་རིག་འདུ་འབྲལ་མེད་པའི་དོན་ཏེ། སེང་གེ་རྩལ་རྫོགས་ལས། སངས་རྒྱས་ཀུན་གྱི་ལྟ་ཕུགས་ནི། །དབྱིངས་རིག་གཉིས་ལས་མ་འདས་སོ། །ཞེས་སོ། །དེ་ལྟར་ངོ་བོ་རིག་པའི་སྐུ་དེ་ཅོག་བཞག་རང་མལ་ལས་མ་གཡོས་པར་བཞག་དུས། (༡༦༧)གང་ཡང་མ་སྤངས་པར་འཁོར་བའི་འཁྲུལ་པ་རང་སངས། ཅི་ཡང་མ་བསྒྲུབས་པར་མྱང་འདས་ཀྱི་ཡོན་ཏན་ལྷུན་གྱིས་གྲུབ། སྤང་བླང་དང་བྱ་རྩོལ་མེད་པར་ཆོས་སྐུ་རྒྱལ་པོའི་གཏན་སྲིད་ཟིན་ཏེ། ཁྱུང་ནམ་མཁར་ལྡིང་བའི་འགྲོས་ཀྱིས་ས་གཅོད་པ་ལྟར་འཁོར་འདས་ཀྱི་ས་གཅད་ནས། ཆོས་སྐུ་རང་བྱུང་གི་ཡེ་ཤེས་རང་ས་ཟིན་པར་བྱེད་དོ། །འདི་ནི་ལྟ་བའི་ཕྱི་རྒྱ་རླབས་ཀྱིས་གཅོད་པ་ཞེས་བྱ་སྟེ། དཔེར་ན་དབུས་ཀྱི་རི་བོ་མཆོག་རབ་ཀྱི་རྩེ་མོ་ནས་གླིང་བཞི་དུས་གཅིག་ལ་མཐོང་བ་ལྟར་རྫོགས་པ་ཆེན་པོའི་ངོས་ནས་བལྟས་པས་ཐེག་པ་རིམ་པ་དགུའི་ལྟ་དགོངས་ཐམས་ཅད་རང་ལུགས་སུ་མཐོང་ལ། ཐེག་པ་དགུས་འདིའི་དོན་མི་མཐོང་བས་རི་བོ་ཅོག་བཞག་གི་དགོངས་པ་ཞེས་བྱ་བ། མི་འགྱུར་བས་རིག་པ་རང་སོར་བཞག་པས་ཀྱང་རི་བོ་ཅོག་བཞག་གོ། །འདི་ཉིད་རྟོགས་པས་ཕྱི་མ་ལ་མངལ་གྱི་གྲོང་ཁྱེར་རྒྱུན་གཅོད་པའི་ཕྱིར། གྲོང་ཁྱེར་རྒྱུན་གཅོད་ཀྱི་ལྟ་བ་ཞེས་བྱའོ། །

གསུམ་པ་ཁམས་གསུམ་ཡོངས་གྲོལ་གྱི་ལྟ་བ་ནི། དེ་ལྟར་རྟོགས་ཐོག་ནས་རྩལ་སྦྱངས་པས། ལྟ་བ་རང་བྱུང་གི་ཡེ་ཤེས་ཀྱི་དོན་རང་ཐོག་ཏུ་ཕེབས་ཏེ། ཆོས་ཐམས་ཅད་ཡེ་ནས་གྲོལ་བས་བསྐྱར་ནས་མི་གྲོལ་མི་རྩོལ་མི་འབད་པར་ངང་གིས་རྟོགས་ཏེ། དགོངས་པ་ཆོས་ཉིད་ལས་མི་གཡོ་བས་ཁམས་གསུམ་ཡོངས་གྲོལ་ཞེས་བྱའོ། །དེའི་ཚེ་ཉོན་མོངས་པ་ནི་མ་སྤངས་ལ་མི་གནས་པར་རང་གནས་སུ་དག་སྟེ། མཁའ་ལ་སྤྲིན་དེངས་པའམ། ཆུའི་རྙོག་རང་སངས་པ་ལྟར་དག་སྟེ། དང་པོ་འཁྲུལ་མ་མྱོང་། ད་ལྟ་འཁྲུལ་པ་ལ་མི་གནས། ཐ་མར་འཁྲུལ་མི་སྲིད་པའི་གནད་མངོན་དུ་གྱུར་པའོ། །འདིའི་དུས་ན་རྣལ་འབྱོར་པ་དེ་ལ་ཆོས་བོར་བ་ཞེས་བཏགས་ཏེ། ཆེད་དུ་ཡིད་ལ་བྱ་བའི་ཆོས་མེད་པའི་ཕྱིར་རོ། །དེ་ཡང་དགོངས་པ་ཀློང་ཡངས་པས་ལྟ་བ་ལམ་དུ་བྱེད་པའི་རྣལ་འབྱོར་བསྟན་ཟིན་ཏོ། །

དོན་གཉིས་པ་སྒོམ་པ་རྣལ་འབྱོར་དུ་བྱ་བ་ལ་གསུམ་སྟེ། སྒོམ་པ་ཉིན་མཚན་ཁ་སྦྱོར། མན་ངག་རྒྱ་མཚོ་ཅོག་བཞག །དགོངས་པ་སྣང་སྲིད་གཞི་བཞག་གོ། །དང་པོ་ནི། དུ་མ་བཤད་ཀྱང་(༡༦༨)བསམ་གཏན་གྱི་ཐུན་བཞིར་བསྡུས་ནས་བསླབ་པ་ལ། ཟས་ཀྱི་ཞེན་པ་བཅད་པ་བསམ་གཏན་གྱི་ཐུན་ལ་བསླབ་པ། གོས་ཀྱི་ཞེན་པ་བཅད་པ་བསམ་གཏན་གྱི་ཐུན་ལ་བསླབ་པ། རྨི་ལམ་གྱི་ཞེན་པ་བཅད་པ་བསམ་གཏན་གྱི་ཐུན་ལ་བསླབ་པ། བག་ཆགས་ཀྱི་ཞེན་པ་བཅད་པ་བསམ་གཏན་གྱི་ཐུན་ལ་བསླབ་པའོ། །

དང་པོ་ནི། བཅུད་ལེན་རྣམ་པ་སོ་སོའི་དམིགས་པ་དང་བཅས་པ་སྟེ། མཆོག་ཏུ་ཟབ་པ་དངུལ་ཆུ་དང་། རླུང་གི་རྣལ་འབྱོར་ལས། དངུལ་ཆུ་ནི། རིལ་བུ་བརྟེན་ལ་དམིགས་པ་གཏུམ་མོའི་འབར་འཛག་ལས་ཏིང་ངེ་འཛིན་ཟས་སུ་ཟ་བའོ། །རླུང་གི་འབྱུང་བ་རྒྱུན་གཅོད་དེ། ལུས་ཙོག་པུར་འདུག་ལ། རླུང་རོ་ཕྱིར་ཕུད་ནས། ཕོ་བར་ཡེ་ཤེས་ཀྱི་རླུང་བདུད་རྩིའི་དྭངས་མ་དཀར་དམར་ཆིལ་གྱིས་ཁེངས་པ་ལ་དམིགས་པ་གཏད་ལ་སྟེང་འོག་གི་རླུང་ཁ་སྦྱར་ཏེ་བཟུང་། དལ་བུས་ཕྱིར་འཕངས། ནང་དུ་རྔུབ་དུས་བརྟན་གཡོའི་སྣོད་བཅུད་ཐམས་ཅད་དྭངས་མ་དཀར་དམར་གྱི་རྣམ་པ་སྣ་བུག་ནས་བྱུང་ནས་ལུས་ཁེངས་པ་ལ་སེམས་བཟུང་བས། བདེ་བ་གསལ་བ་མི་རྟོག་པའི་ཏིང་ངེ་འཛིན་ལྷུན་གྲུབ་ཏུ་སྐྱེས། ཟས་གོས་ཀྱི་ཞེན་པ་དང་བྲལ་ལོ། །ཐལ་འགྱུར་ལས། བཅུད་ཀྱིས་ལེན་པ་འདི་ལྟ་བུ། །རིན་པོ་ཆེ་ལ་བརྟེན་པ་ཡིས། །ཚེ་ནི་ཉི་ཟླ་དག་དང་མཉམ། །སྣ་ཚོགས་རྡོ་ཡི་སྦྱོར་བ་ཡིས། །གཟི་བརྗིད་ལྡན་ཞིང་གཞོན་པར་འགྱུར། །ཤ་ལ་བརྟེན་པའི་སྦྱོར་བ་ཡིས། །ལུས་ཟུངས་ལྡན་ཤིང་སྟོབས་བསྐྱེད་འགྱུར། །གཞན་ཡང་རླུང་ལ་བརྟེན་པ་ཡིས། །ངོ་མཚར་ཆེ་བའི་བཅུད་ལེན་བཤད། །འབྱུང་བ་རྒྱུན་གཅོད་ཅེས་བྱ་བ། །སྟེང་དང་འོག་གི་རླུང་གིས་ཤེས། །མཁས་པ་རླུང་གི་གནས་སུ་སྦ། །ཡང་ན་རླུང་གི་འགྱུར་རྩིས་ཀྱིས། །ཟས་ཀྱི་རྣལ་འབྱོར་དག་ཏུ་འགྱུར། །དེ་ལྟར་བཅུད་ཀྱིས་ལེན་པ་ཡིས། །འགྲོ་བ་གདུང་བ་ཆོད་པའོ། །ཞེས་སོ། །

གོས་ཀྱི་ཞེན་པ་གཅད་པ་བསམ་གཏན་གྱི་ཐུན་ལ་བསླབ་པ་ནི། ལུས་ཙོག་པུར་འདུག་ལ། ལྟེ་བ་ནས་རྃ་ནས་ཙམ་འབར་བས་རྩ་དབུ་མའི་ནང་ན་སྤྱི་བོའི་ཧྃ་ལ་རེག །དྭངས་མ་དམར་པོས་ལུས་བསྲེག །(༡༦༩)དཀར་པོ་བབས་པས་བདེ་བ་རྒྱས་པར་བསམས་ལ། རླུང་ལྟེ་བར་ཁ་སྦྱར། འོག་རླུང་དྲག་ཏུ་འཐེན་ལ་བཟུང་། ཕྱིར་དལ་བུས་འཕངས་ཤིང་། རྃ་གྱིས་མེ་དྲག་ཏུ་སྦར་བས་དྲོད་སྐྱེ། དྭངས་མས་བདེ་བ་སྐྱེ། གོས་ཀྱི་ཞེན་པ་དང་བྲལ་ལོ། །འདི་དག་གི་དུས་སུ་རླུང་ལ་ཤིས་པའི་ཁ་ཟས་དང་། ཐིག་ལེ་འབར་འཛག་གི་རྟེན་འབྲེལ་བསྟུན་པར་བྱ་སྟེ། ཐལ་འགྱུར་ལས། གོས་ཀྱི་རྟེན་འབྲེལ་འདི་ལྟ་སྟེ། །རླུང་དང་རྟེན་འབྲེལ་ཟབ་མོས་བྱ། །རླུང་གིས་འཕེན་ཞིང་སྡུད་པ་ལས། །འགྲོ་འོང་བསྐྱེལ་བའི་གནད་ཀྱིས་ཀྱང་། །དམིགས་པ་སོ་སོའི་འབྱུང་བ་དང་། །རྣལ་འབྱོར་ལུས་དང་མཐུན་པར་བྱེད། །ཅེས་སོ། །

རྨི་ལམ་གྱི་ཞེན་པ་བཅད་པ་བསམ་གཏན་གྱི་ཐུན་ལ་བསླབ་པ་ནི། སྔོན་འགྲོ་དངོས་གཞི་གཉིས་ལས། སྔོན་འགྲོ་ནི། ཉི་མ་འགར་དལ་བར་བྱས་ལ། སེམས་ཀྱི་བྱུང་ཚོར་ཅི་འགྱུ་ཐམས་ཅད་མ་ཡེངས་པར་ངོས་བཟུང་བས། རྨི་ལམ་གསལ་བར་འགྱུར་ཏེ། སྔར་ཞེན་གྱི་བག་ཆགས་ཤས་ཆེར་རྨི་ན། བསྒྱུར་དཀའ་སླ་འབྲིང་པོ། ད་ལྟའི་ཤས་ཆེར་རྨི་ན་ཤིན་ཏུ་སླ་བ། སྔར་མ་ཕྱིན་པའི་ཡུལ་དང་སྣང་བ་ཤས་ཆེར་རྨི་ན་དཀའ་བ། དེ་གསུམ་འདྲེས་མར་རྨི་ན་ཤིན་ཏུ་དཀའ་བ་ཡིན་པས་ཉིན་དུས་འདུན་པ་དེ་དང་མཚུངས་པས་བསྟུན་པ་གཅེས་སོ། །དངོས་གཞི་ལ། སྦྱང་བ། བསྒྱུར་བ། བཅད་པ། གནད་ཀྱི་མན་ངག་དང་བཞི་ལས། སྦྱང་བ་ནི། ཉིན་པར་གྱི་སྣང་བ་ཐམས་ཅད་རྨི་ལམ་དངོས་སུ་བསྒོམས་ཞིང་། ངག་ཏུའང་རྨི་ལམ་ཡིན་སྒྱུ་མ་ཡིན་ཞེས་བརྗོད་པས། རྨི་ལམ་དུ་རྨི་ལམ་ཟིན་ངེས་སོ། །ཟིན་ལུགས་གཉིས་ཏེ། འཇམ་ཟིན་དང་། རྩུབ་ཟིན་ནོ། །འཇམ་ཟིན་ནི། རྐྱེན་ལ་མ་ལྟོས་པར་རྨི་ལམ་ཟིན་པའོ། །རྩུབ་ཟིན་ནི། གཡང་ངམ། ཁྱིའམ། དགྲའམ། ཆུ་ལ་སོགས་པའི་དངངས་སྐྲག་གཅིག་གིས་རྐྱེན་བྱས་པས། རྨི་ལམ་དུ་འདུག་སྙམ་དུ་ཟིན་པའོ། །དེ་ནས་རྨི་ལམ་ཡིན་གང་ཡང་མི་བདེན་ནོ་སྙམ་པ་བདེན་མེད་དང་། འཛིན་མེད་དང་། སྟོང་པར་ལམ་(༡༧༠)ལམ་ཤར་ཤར་སྦྱང་ངོ་། །བསྒྱུར་བ་ནི། ཉིན་པར་མེ་ལོང་དུ་ལྷ་སྐུའི་གཟུགས་བརྙན་འཆར་དུ་བཅུག་ལ། སྣང་བ་ཐམས་ཅད་ལྷ་སྐུར་བསྒྱུར་བ་དང། དེ་བཞིན་དུ་མགོ་དང་ལག་པ་དང་། རྐང་པ་ཡོ་བྱད་ཀྱི་རྣམ་པ་སྤོས་པའི་གཟུགས་བརྙན་ཤར་བས་དཔེ་བསྒྱུར་ལ། སེམས་ཀྱི་རོལ་པར་བསྒྱུར་ཏེ། གཅིག་ལས་མང་པོར་བསྒྱུར། མང་པོ་གཅིག་ཏུ་བསྒྱུར། སེམས་ཅན་དང་ལྷ་སྐུ་ལ་སོགས་སྤྲུལ་བསྒྱུར་དུ་མ་བྱས་ལ། བདེན་མེད་རྨི་ལམ་སྒྱུ་མར་རྩལ་བསྒྱུར་ཞིང་། དགག་སྒྲུབ་དང་ཆགས་སྡང་དང་། ཆོས་བརྒྱད་ཐམས་ཅད་མགོ་སྙོམས་སུ་བདེན་མེད་སྟོང་པར་བསྒྱུར་རོ། །བཅད་པ་ནི། ཕྱི་ནང་བཅད། སྟོང་པ་ཟང་ཀར་ཐག་བཅད། ནང་རིག་པ་གཞི་མེད་སྟོང་པར་ལ་བཟླ་ཞིང་། ཡིད་ལ་མི་བྱེད་པའི་ངང་ལ་བསྒོམས་པས། རྨི་ལམ་ཇེ་ཆུང་ལས་མཐའ་གཏན་ནས་ཆད་ཅིང་འགག་པའོ། །གནད་ཀྱི་མན་ངག་ལ། དཀྲུགས། གཅུད། བོར། བསྐྱིལ། བཟློག་པ་དང་ལྔ་ལས། འདུན་པས་རྩལ་སྣང་དཀྲུགས་པ་ནི། ཉིན་དུས་སྐད་ཅིག་ཀྱང་མ་ཡེངས་པར་རྨི་ལམ་གྱི་སྣང་བ་དཀྲུགས་ཤིང་། རླུང་སེམས་དཀྲུགས་ལ་རིང་དུ་འཕངས་དལ་བར་གཟུང་། དྲག་ཏུ་བསྡམས་པས་རྨི་ལམ་ལྷོངས་ཏེ། ཟིན་པར་སླ་བའི་གནད་དོ། །ལུས་གནད་གཅུན་པ་ནི། སེང་གེའི་ཉལ་ལུགས་གཅུན་པས་རླུང་སེམས་གཅུད་ལ་འབོར་བར་ནུས་པས། རྨི་ལམ་བསྒྱུར་སྦྱོང་སླ་བའི་གནད་དོ། །གནད་ལ་བོར་བ་ནི། མ་ཟིན་ན་སྙིང་ནང་དུ་པདྨ་དམར་པོ་འདབ་མ་བཞི་པའི་དབུས་སུ་ཨ་དམར་པོ་ལ་སེམས་གཏད་དོ། །ཡང་མགྲིན་པར་གཏད་ལ་དེའི་ངང་དུ་ཉལ་བས་ངེས་པར་རླུང་སེམས་གནད་ལ་ཐེབས་སོ། །མིག་མ་བཙུམ་པས་རྨི་ལམ་གསལ་དྭངས་ཕྱེད་པའི་གནད་དོ། །བསྐྱིལ་བ་ནི། ལུང་དལ་བུས་ནང་དུ་བཟུང་ལ་རྨི་ལམ་དྭངས་ལ། བསྒྱུར་འགག་བཏུབ་པའི་གནད་དོ། །བཟློག་པ་ནི། ཉལ་དུས་གང་ཡང་ཡིད་ལ་མི་བྱེད་པར་རྟོག་མེད་དུ་མ་ཡེངས་པས་རྨི་ལམ་ཆད་པའི་གནད་དོ། །འདི་དག་རང་གནད་གལ་པོ་ཆེར་བཀོད་པའོ། །དེ་ལྟར་བསྒོམས་(༡༧༡)པས་རྨི་ལམ་ཐོག་མར་མང་བ་ལ། བརྩོན་འགྲུས་རབ་ལ་བརྗེད་ངས་ཏེ་འགག །འབྲིང་ལ་ཉུང་ལ་གསལ། ཐ་མ་ལ་བག་ཆགས་བཟང་པོར་གནས་འགྱུར་བ། སངས་རྒྱས་ཀྱི་ཞིང་ཁམས་དག་པར་ཕྱིན་པ་དང་། སྔར་མ་མཐོང་བའི་བྱ་དང་ཤིང་དང་ཡུལ་ལ་སོགས་པ་ངོ་མཚར་ཅན་མཐོང་བ་དང་། དཀྱིལ་འཁོར་བྲི་བ་དང་། བྲིས་པ་མཐོང་བ་ལ་སོགས་པ་རྨིའོ། །དེའང་སེམས་རང་གནས་སུ་སོང་། རྟོག་པ་ཉུང་ངུར་སོང་བ་དང་རྨི་ལམ་ཡང་ཇེ་ཉུང་ཇེ་གསལ་དུ་གནས་པ་ཡིན་ཏེ། ཉིན་མོའི་སེམས་འདི་ཀ་བཙན་ཐབས་སུ་གཉིད་པས་རྨི་ལམ་དུ་ཤར་བ་ལས་གཞན་ནི་མེད་དོ། །དེ་ཡང་རིག་པ་ལ་སྣང་བ་མི་འགགས་པས་ཉིན་དུས་སྒོ་ལྔ་མཚན་དུས་ཡིད་ཆོས་ལ་སྣང་བ་གཉིས་དང་། གཞན་ཡང་འཁོར་བ་དང་འདས་པའི་སྣང་བ་ཐམས་ཅད་གཅིག་ཡོང་དུས་གཅིག་སངས་པ་ལྟར་གནས་པ་ནི། རང་སྣང་འགག་མེད་དུ་ཤར་བའི་གནད་ལས་བྱུང་བའོ། །དེ་དག་ཀྱང་ཐལ་འགྱུར་ལས། རྨི་ལམ་གནད་ཀྱི་ལམ་ཁྱེར་ནི། །སྔོན་དུ་བྱ་དང་གནད་ལ་དབབ། །སྔོན་དུ་ལུས་ངག་སེམས་སྦྱངས་ཏེ། །འབྱོངས་པའི་རྟགས་ལ་བརྟེན་ནས་ནི། །རྟགས་དང་ཟིལ་གྱིས་མནན་པ་དང་། །བག་ཆགས་གསུམ་པོ་ངོས་བཟུང་བྱ། །དེ་ནས་གནད་ལ་འབེབས་དུས་སུ། །སྦྱང་དང་བསྒྱུར་དང་བཅད་པ་དང་། །དཀྲུགས་དང་གཅུད་དང་གནད་ལ་བོར། །བསྐྱིལ་བཟློག་ལས་ཀྱི་གནད་བྱས་པས། །ལས་ཀྱི་རྨི་ལམ་མཐར་ཟད་དེ། །བག་ཆགས་འཁྲུལ་པ་དྲུངས་ནས་ཐོན། །འདི་དུས་རང་གི་བརྩོན་འགྲུས་ཀྱིས། །རབ་ལ་ཆད་དང་འབྲིང་ལ་ཤེས། །ཐ་མ་འགྱུར་བར་ངེས་པ་སྟེ། །འདི་དག་རྨི་ལམ་ཐོག་མ་མང་། །རབ་ལ་བརྗེད་ངས་ཐ་མ་འགག །འབྲིང་ལ་ཤིན་ཏུ་གསལ་བ་དང་། །ཐ་མ་མི་གསལ་དེ་ནས་འགྱུར། །དེ་དག་རྣམས་ཀྱིས་ཚད་ལ་ཕེབས། །ཞེས་སོ། །

བག་ཆགས་ཀྱི་ཞེན་པ་བཅད་པ་བསམ་གཏན་གྱི་ཐུན་ལ་བསླབ་པ་ལ། འོད་གསལ་དང་སྒྱུ་ལུས་གཉིས་ལས། འོད་གསལ་སྒོམ་པ་ནི། ཉིན་དུས་ལུས་གནད་རྣམ་སྣང་གི་ཆོས་བདུན་བཅས་ལ། སྙིང་གར་འོད་ལྔའི་གོང་བུ་སྲན་མ་ཙམ་ལ་སེམས་བཟུང་བས། དང་པོ་དམིགས་པ་འོད་(༡༧༢)ལྔར་གསལ་བ་ལས། དངོས་གཞི་དེ་ཡང་མེད་པར་རྟོག་མེད་སྟོང་གསལ་དུ་ཕྱམ་གྱིས་འཆར་ཏེ། དེ་ཉིད་སྒོམ་པ་ལས་ནམ་མཁར་འོད་དང་ཐིག་ལེ་མང་པོ་སྣང་ཞིང་གསལ་སྟོང་གི་ཏིང་འཛིན་སྐྱེའོ། །མཚན་དུས་སེང་གེའི་ཉལ་ལུགས་བྱས་ལ་གཉིད་དང་རྨི་ལམ་གྱི་མཚམས་སུ་རྣམ་རྟོག་མེད་ལ་རང་གནས་ཀྱི་རིག་པ་དར་ཅིག་ཤར་བ་སྟེ། རྟོག་མེད་ཀྱི་འོད་གསལ་རྟག་ཏུ་ཡོད་པ་ངོས་བཟུང་ལ་ཉལ་བས། རྨི་ལམ་འོད་གསལ་དུ་ནུབ་སྟེ། ཤེས་པ་སྟོང་གསལ་གྱི་རང་གདངས་མ་ཞིག་པ། ཉེ་འཁོར་གྱི་སྣང་བ་མ་འགགས་པ་མཐོང་བ། གཉིད་སད་རྒྱུ་ཡོད་པ། མ་རྨུགས་པར་སིང་ངེ་བ་འབྱུང་ངོ་། །དེའང་རིག་པ་སྟོང་གསལ་དེ་ཉིད་གཞིའི་འོད་གསལ་ཡིན་ལ། ངང་ལ་གནས་པ་དེ་ཉིད་ལམ་གྱི་འོད་གསལ་ལ། མཐར་ཐུག་གི་ཆོས་སྐུ་འབྲས་བུའི་འོད་གསལ་ཏེ། རང་རིག་ཐིག་ལེ་ཉག་གཅིག་ལ་སྔ་ཕྱི་འཕོ་འགྱུར་མེད་དོ། །ཐལ་འགྱུར་ལས། གཉིད་ཀྱི་བསམ་གཏན་ལ་སྦྱངས་ནས། །འབྱོངས་པས་ཉིན་དང་མཚན་མེད་པར། །ཕྱི་རོལ་སྣང་བ་གསལ་བ་དང་། །འདིས་ནི་འོད་གསལ་ཆེན་པོ་འགྲུབ། །ཅེས་སོ། །དེའང་བྱང་ཆུབ་ཀྱི་སེམས་རང་གསལ་དུ་གནས་དུས། འཁོར་བའི་སེམས་ཀུན་ཏུ་རྟོག་པའི་དྲི་མ་མེད་དེ། རང་བཞིན་སྟོང་གསལ་གྱི་ངང་གདངས་ཆོས་ཉིད་དོན་གྱི་དབྱིངས་སུ་གསལ་བའི་ཕྱིར་རོ། །ཡུམ་ལས་ཀྱང་། སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་འོད་གསལ་བ་ལགས་སོ། །ཞེས་སོ། །སྒྱུ་ལུས་ནི། ཕྱི་ཡུལ་སྣང་ཐམས་ཅད་སྒྱུ་མའི་སྣང་བ། ནང་རང་གི་ལུས་སེམས་ཀྱང་སྒྱུ་མའི་སྣང་བ། ཅི་སྣང་ཅི་ཤར་ཐམས་ཅད་ཟང་ཐལ་ཆུའི་ཟླ་བ་ལྟ་བུ་ར་རི་འལ་འོལ་སྣང་ལ་རང་བཞིན་མེད་པར་བསྒོམ་སྟེ། དང་པོའང་ཡེ་ཤེས་ཀྱི་འོད་ལ་བག་ཆགས་པས་སྣང་ལ། ད་ལྟའང་འབྱུང་ལྔ་ལུས་དང་ཡུལ་སྣང་ཐམས་ཅད་རང་སྣང་རང་གྲོལ་དུ་གསལ་ཞིང་། མཐར་ཡང་འོད་གསལ་སྒྱུ་མར་དག་དགོས་པས་གང་སྣང་མར་མེའི་གྲིབ་མ་ལྟར་སྒོམ་ཞིང་། བདེན་མེད་ཀྱི་སྣང་བ་འཛིན་མེད་དུ་སྦྱངས་ཏེ། ཐལ་འགྱུར་ལས། སྒྱུ་ལུས་རྨི་ལམ་དག་ཏུ་སྦྱང་། །དེ་ཉིད་འབྱོངས་པའི་(༡༧༣)ལུས་ཉིད་ཀྱང་། །གྲིབ་མའི་རྣམ་པ་ལྟ་བུར་གྱུར། །དེ་ནས་བར་མ་དོ་ཡི་ལུས། །འདི་དག་རང་དུ་འཛིན་པར་འགྱུར། །ཞེས་སོ། །ད་ལྟ་ཐམས་ཅད་རང་སྣང་སྒྱུ་མར་སྦྱངས་པས། གང་ལའང་འཛིན་ཞེན་མེད་པ་དང་། ལུས་ལ་གྲིབ་མ་མེད་པ་དང་། བར་དོར་ཡེ་ཤེས་སྒྱུ་མ་མངོན་དུ་གྱུར་ཏེ་གྲོལ་བའི་དགོས་པ་ཡོད་དོ། །འདིའི་གདམས་ངག་ལ། སྲོད་ལ་དབང་པོ་གནས་སུ་བསྡུ་བ། སྙིང་ག་ན་འོད་ཀྱི་གོང་བུ་ལས་ཡར་འཕྲོས། དུང་ཁང་ན་ཐིག་ལེ་སྟོང་པའི་སྒྲོན་མ་ལ་ཕོག་པ་ལས། འོད་ཡར་འཕྲོ་མར་འཕྲོར་སྦྱངས་ལ་སེམས་བཟུང་། དེ་ནས་ནམ་ཕྱེད་ཤེས་བྱ་བུམ་པར་གཞུག་པ་སྙིང་ནང་གི་འོད་གཅིག་པུ་ལ་སེམས་གཏད། ཐོ་རངས་ཡེ་ཤེས་གསལ་བར་བྱེད་པ་ལ། ལུས་སེང་གེའི་འགྱིང་ཚུགས་སུ་འདུག་པའི་སྨིན་མཚམས་ནས་གཞུ་གང་གི་ནམ་མཁའ་ལ་ཨ་དཀར་པོ་ལྷིང་ངེ་བ་གཅིག་ལ་སེམས་བཟུང་བས་སྟོང་གསལ་དུ་འཆར་རོ། །ཉིན་པར་སྣང་བ་རྒྱ་ཡིས་བཏབ་པ་ཐམས་ཅད་སྒྱུ་མ་རྨི་ལམ་དུ་འདུན་པ་སྦྱང་ངོ་། །གནད་འདི་བཞི་ནི། རྨི་ལམ། སྒྱུ་ལུས། འོད་གསལ། གསུམ་འཛོམ་སྦྱོང་བ་གཅེས་སོ། །དེ་ཐམས་ཅད་ཀྱི་སྐབས་སུ། ཡོད་པ་ཆེད་དུ་མི་སྤང་། མེད་པ་ཆེད་དུ་མི་བསྒྲུབ། ཡོད་པ་ལ་མངོན་པར་མི་ཞེན། མེད་པ་ལ་འདོད་བློས་མི་བསྒྲུབ། འདས་པའི་རྗེས་མི་གཅད། མ་འོངས་པའི་སྔུན་མི་བསུ། ད་ལྟར་གྱི་བག་ཆགས་གཉེན་པོ་རང་རྒྱུད་པ་མ་བརྟེན་པས། སྣང་བ་སྣང་ས་ནས་གྲོལ། དངོས་པོར་འཛིན་པ་དག །འགྱུ་བ་འགྱུ་ཐོག་ནས་གྲོལ། རང་ཡལ་རྗེས་མེད། སྣང་ཤེས་གཉིས་མེད་དུ་གྲོལ། ཆུ་ལ་ཆུ་ཐིམ་པ་ལྟར་དུ་ཐ་དད་རིས་དང་བྲལ། བདག་ཏུ་ལྟ་བའི་ཡུལ་ལས་འདས་པས། བག་ཆགས་འཁྲུལ་པའི་རྩ་བ་དག་པའི་རྣལ་འབྱོར་ལ་གནས་པ་ཞེས་བྱ་སྟེ། ཀློང་དྲུག་པ་ལས། སྐྱེས་བུ་གང་གིས་འདས་པའི་རྗེས་མ་གཅོད། མ་འོངས་པའི་སྔུན་མ་བསླང་། ད་ལྟའི་ཤེས་པ་སོ་མ་ལ་བཞག་ནས། སྔ་ཕྱི་མེད་པར་འདྲེས་ནས། གཅིག་འདུས་ངོ་བོ་ཉིད་ཅེས་བྱ་སྟེ། དུས་གསུམ་མཉམ་པ་ཉིད་རྟོགས་པའི་རྣལ་འབྱོར་རོ། །(༡༧༤)ཞེས་སོ། །

གཞན་ཡང་དམིགས་པ་རྟེན་ཅན་ལ་བསླབ་པ་དང་། རྟེན་མེད་ལ་བསླབ་པ་གཉིས་ལས། རྟེན་ཅན་ནི་གཟུགས་སྒྲ་དྲི་རོ་རེག་གི་ཡུལ་ལ་སེམས་མདུང་ཚུགས་སུ་གཏད་པས། རང་གནས་མི་རྟོག་པའི་ཏིང་ངེ་འཛིན་འགྲུབ་སྟེ། ཐལ་འགྱུར་ལས། མིག་གཟུགས་སྒྲ་དང་དྲི་དང་རེག །འདོད་ཡོན་ལྔ་ཡི་གནས་སྦྱངས་ཏེ། །གཟུགས་ནི་ཁ་དོག་དབྱིངས་རྣམས་དང་། །བཟོ་དང་སྒྱུ་རྩལ་ཐ་དད་དང་། །མིག་ནི་རྣམ་པ་སྣ་ཚོགས་པའོ། །སྒྲ་ནི་པི་ཝཾ་བུམ་ལྡིར་དང་། །རྒྱུད་མངས་རྫ་རྔ་གླིང་བུ་དང་། །ཕེད་དང་ཧར་ལ་སོགས་པའོ། །དྲི་ནི་ངད་དང་སྦྱར་མ་དང་། །ཡིད་མཐུན་རྟེན་འབྲེལ་ཟབ་མོས་བྱ། །རོ་ནི་བུ་རམ་དྲུག་ལྡན་དང་། །རྒུན་ཆང་སྦྱར་མ་སྣ་ཚོགས་བསྒྱུར། །རྟེན་འབྲེལ་ཡན་ལག་སྦྱོར་བས་སོ། །རེག་ནི་མཁས་པས་ཁྲི་སྟེང་འདུག །བཞུ་བསྣོལ་པ་ཡི་འབྱུང་བ་དང་། །ཤིང་གི་ལོ་མ་འགའ་ཞིག་གིས། །རེག་པ་ཙམ་གྱིས་ཆོས་ཉིད་ལ། །འབྲལ་མེད་སེམས་ཀྱིས་གནས་པའོ། །ཞེས་སོ། །ཤིང་ལོ་འགའ་ཞིག་རྒྱ་གར་གྱི་ནགས་ན་ཡོང་བ་ལུས་ལ་རེག་པས་ཏིང་ངེ་འཛིན་སྐྱེའོ་ཞེས་སྔོན་རབས་ཀྱི་བླ་མ་དག་བཞེད་ཀྱང་། ངེས་པའི་དོན་དུ་བྱས་ན། ཕྱག་རྒྱ་མཚན་དང་ལྡན་པའི་རྩ་འདབ་འཕྲད་པ་དེ། བདེ་སྟོང་མི་རྟོག་པའི་ཡེ་ཤེས་དངོས་འཆར་བའོ། །དེ་ཡང་རྩ་རླུང་ཐིག་ལེ་ལས་སུ་རུང་བའི་བདེ་བ་ཆེན་པོ་ནི། ཐིག་ལེ་དྭངས་མའི་ཀློང་དུ་ཡེ་ཤེས་སྦ་ཞེས་བྱ་སྟེ། ཀུན་རྫོབ་ཀྱི་ཐིག་ལེ་དབབ་པ། རྡོ་རྗེའི་བུམ་པར་གཟུང་བ། རང་གནས་སུ་བཟློག་པ། རྩ་ལ་དགྲམ་པ། རླུང་དང་བསྲེ་བ། སྟོང་ཉིད་དུ་བསྐྱལ་བ། ལུས་སེམས་གོ་བཟློག་པའི་ཐབས་རྣམས་ལག་ཁྲིད་ལྟར་བྱ་སྟེ། དེ་ཉིད་ལས། རེ་ཞིག་ཀུན་རྫོབ་ཐིག་ལེ་ལ། །བརྟེན་ནས་སངས་རྒྱས་འདོད་པ་ཡིས། །རིག་མ་མཚན་ཉིད་རྫོགས་པ་ནི། །དགུག་པའི་སྦྱོར་བ་ངེས་བརྩམས་ནས། །བརྟེན་བྱ་ཉིད་དང་རྩ་རྣམས་དང་། །དམིགས་པ་དག་གི་ལུས་རྫོགས་བྱ། །དེ་ནས་ཀུན་རྫོབ་ཐིག་ལེ་ཉིད། །དབབ་ཅིང་གཟུང་དང་བཟློག་པ་དང་། །རྩ་ལ་གདབ་ཅིང་རླུང་(༡༧༣)ལ་བསྲེ། །སྟོང་ཉིད་བྱ་ཞིང་བློ་རྗེས་བཅད། །ལུས་དང་སེམས་གཉིས་གོ་ལོག་བྱ། །ཞེས་སོ། །འདིའི་ལག་ཁྲིད་རླུང་དང་ཆགས་པའི་པྲ་ཁྲིད་དུ་གསུངས་པ་བཞིན་ནོ། །དམིགས་པ་རྟེན་མེད་ལ་བསླབ་པ་ལ། ཉེར་གཅིག་གསུངས་ཀྱང་བདུན་དུ་འདུ་བས། དེའི་སྒོམ་ཚུལ་དང་པོ་མཚན་མ་ཨ་དཀར་ལ་སེམས་བཟུང་བ་ནི། བླ་མའི་རྣལ་འབྱོར་གྱི་རྗེས་ལ། རང་གི་སྣ་རྩེར་ཨ་དཀར་པོ་གཅིག་བསམས་ལ། རླུང་ཕར་སོང་དུས་ཨ་ཡང་ཇེ་རིང་དུ་སོང་། ཚུར་རྔུབ་དུས་ཨ་ཡང་བྱུང་ནས་སྔར་ཤུར་དུ་གནས་པ་ལ་སེམས་སྦྱོང་ཚ་བ་ཤས་ཆེ་ན་ཨ་དེ་གྲང་རེག་ཏུ་བསྒོམ། གྲང་ཤས་ཆེ་ན་ཚ་རེག་ཏུ་བསྒོམས་པས། སྐྱེ་མེད་བསམ་ཡུལ་ལས་འདས་པའི་ཉམས་འཆར་རོ། །སྒོམ་ཚུལ་གཉིས་པ་བར་ཆད་སེལ་བའི་ཡི་གེ་ཕཊ་ལ་སེམས་བཟུང་བ་ནི། ལུས་སེམས་དར་ཅིག་ཀློད་ལ། ཤེས་པ་ཡེངས་པའི་མཚམས་སུ་ཕཊ་དྲག་པོ་ཐུང་བ་བརྗོད་པས། སྔ་ཕྱི་ད་ལྟའི་དྲན་རྟོག་གིས་མ་བསླད་པའི་རིག་པ་གསལ་དྭངས་ཕྱེད་པ་འཆར་བས། དེ་ཆོས་སྐུར་ངོས་བཟུང་ལ་བསྒོམ་མོ། །དེ་ལྟར་ཕཊ་ཀྱིས་ཉམས་སུ་བླངས་པས་རང་བཞིན་ཡོངས་སུ་དག་པའི་ཏིང་ངེ་འཛིན་སྐྱེའོ། །གསུམ་པ་ཁྲོ་བོ་དགྱེས་པའི་གད་མོ་ལ་སེམས་བཟུང་བ་ནི། ཧ་དྲག་ལ་ཐུང་བ་བརྗོད་ལ། སྔར་བཞིན་གཟུང་འཛིན་སྤྲོས་པ་དང་བྲལ་བའི་དོན་རྒྱུད་ལ་སྐྱེའོ། །བཞི་པ་ལྷ་མ་ཡིན་རྩོད་པ་བྱེད་པ་ལ་སེམས་བཟུང་བ་ནི། ཕྱོགས་མཐོ་སར་ཙོག་པུར་འདུག་ལ། ལྟེ་བར་རྃ་ལ་སེམས་གཏད་ལ། ལུས་སྒུལ་བསྐྱོད་བྱ། མགོ་དལ་བུས་སྒྲིལ། དེ་ནས་ཇེ་དྲག་ལ་སྒྲིལ་བས། ཇི་ཞིག་ན་སྣང་བ་ཐམས་ཅད་དམར་ལམ་ལམ། སེར་ལྡེང་ལྡེང་། སྔོ་གྱ་གྱུར་སོང་བ་ལས། སང་སེང་དང་ཁྲལ་ཁྲོལ་ལས། ཅིར་ཡང་མ་གྲུབ་པར་རང་འགག་ལ་འགྲོ་སྟེ། མཐོང་སྣང་རང་སར་གྲོལ་བའི་ཉམས་སྐྱེའོ། །ལྔ་པ་ཡི་གེ་ཧཱུྃ་ལ་སེམས་བཟུང་བ་ནི། ཧཱུྃ་རིང་པོ་དབྱངས་དང་བཅས་བརྗོད་དུས། སེམས་སྟོང་གསལ་དུ་རང་གནས་པའི་ཉམས་སྐྱེའོ། །དྲུག་པ་སྟོང་ཉིད་རིམ་གྱིས་པ་ལ་སེམས་(༡༧༦)གཟུང་བ་ནི། དང་པོར་ལུས་ཀྱི་བྱེ་བྲག་སོ་སོར་གསིལ། མིང་དུ་མས་གཞིག །མགོ་གཅིག་པུ་ལ་ཡང་མིང་དོན་ཆ་ཤས་མང་པོ་བཏགས་པས་ཅིར་ཡང་མ་གྲུབ་པ་བཞིན་དུ། ཕྱི་སྣང་བའང་གཞིག་པས་ཆོས་ཐམས་ཅད་མིང་ཙམ། མིང་བཏགས་པ་ཙམ་ལས་དོན་ལ་མེད་པར་རྟོགས་པའི་ངང་ལ་གློད་ནས་བཞག་པས། སྟོང་ཉིད་བསམ་ངོ་དང་བྲལ་བའི་ཉམས་སྐྱེའོ། །བདུན་པ་སྟོང་ཉིད་ཅིག་ཅར་ལ་སེམས་གཟུང་བ་ནི། ཅི་སྣང་དེ་རང་ཡལ་དུ་སངས་སངས་བསྒོམས་པས། དང་པོ་སྣང་། གཉིས་པ་སྟོང་། གསུམ་པ་གང་དུའང་མ་གྲུབ་པའི་ཉམས་འཆར་རོ། །འདི་དག་ཐམས་ཅད་བསླབ་དགོས་པ་མ་ཡིན། གང་མོས་ལ་སེམས་བཟུངས་པས་ཐབས་ཀྱི་ཡན་ལག་ཏུ་བཤད་པའོ། །ཉི་ཟླ་ཁ་སྦྱོར་ལས། ཡི་གེ་ཨ་ལ་སེམས་གཏད་པས། །དངོས་པོའི་ཞེན་པ་རང་སར་དག །ཡི་གེ་ཧཱུྃ་ལ་སེམས་གཏད་པས། །དེ་ཡིས་ངག་གི་དྲི་མ་དག །རྃ་ལ་སེམས་ནི་སུས་འཛིན་པ། །དེ་ཡིས་དངོས་པོ་ཐམས་ཅད་སྦྱང་། །ཡི་གེ་ཧ་ལ་སེམས་གཏད་པ། །གཏི་མུག་ཐམས་ཅད་ཟད་པར་བྱེད། །གང་ཞིག་ཕཊ་ལ་སེམས་གནས་པ། །དེ་ཡིས་ལུས་ངག་གནོད་པ་སྤང་། །སྟོང་པ་ཉིད་ལ་སུ་གནས་པ། །འདིས་ནི་དངོས་པོའི་ཞེན་པ་བཟློག །སྟོང་ཉིད་ཧད་པོར་སུས་བསྒོམ་པ། །དྲན་པ་རྣམས་ནི་ཅིག་ཆར་སྟོང་། །ཞེས་སོ། །དེ་དག་ལ་ལྷ་དང་མིའི་སེམས་འཛིན་ཞེས་བཤད་དོ། །ལས་དང་པོ་པ་དམིགས་པ་ལ་སེམས་འཛིན་དུས། ལྷ་དང་མིའི་སེམས་འཛིན་ནོ། །ཏིང་ངེ་འཛིན་སྐྱེས་པའི་ངང་ལ་སྒོམ་དུས་བྱང་ཆུབ་སེམས་དཔའི་བསམ་གཏན་ནོ། །བརྟན་པ་ཀློང་དུ་གྱུར་དུས་བདེ་བར་གཤེགས་པའི་དགོངས་པའོ། །འདི་དག་ནི་སྔ་ཕྱིའི་རིམ་པས་ཆ་ལ་བཏགས་ཏེ། དོན་སེམས་འཛིན་ཀློང་དུ་གྱུར་ན་དགོངས་པ་རང་གནས་སུ་གཅིག་པའོ། །ཕལ་གྱིས་སོ་སོར་ཕྱེ་ཡང་དོན་ལ་མ་འབྲེལ་བས། འདི་ཁོ་ནའོ། །

གཉིས་པ་མན་ངག་རྒྱ་མཚོ་ཅོག་བཞག་ནི་མི་སྒོམ་ན་ཕར་ཞོག །སྒོམ་ཚད་ལ་མིག་མི་འཛུམ་པར་བལྟ་བ་གནད་ཡིན། དེ་ཡང་མེ་ལོང་ཡེ་ཤེས་(༡༧༧)རང་གདངས་ཆུའི་སྒྲོན་མ་ལ་ཟུག་པས། ཤེས་པ་མིག་ལ་གཏད་དུས། གསལ་བ་ཟང་ཐལ་ཆེན་པོའི་གདངས་འཆར་བའི་ཕྱིར་རོ། །མིག་རྒྱ་མཚོར་བཞག་སྟེ། སྣང་བའི་གཟུགས་བརྙན་ཆུ་ནང་དུ་ཤར་བའི་ཉམས་ལྟར་གསལ་བ་དེ་རང་དྭངས་སུ་འཇོག་པ་དེ་གནད་གལ་པོ་ཆེའོ། །དཔེར་ན་རྒྱ་མཚོའི་ནང་དུ་གཟའ་སྐར་གྱི་གཟུགས་བརྙན་བཀྲ་སལ་ལེ་བ་སྣང་ཡང་། རྒྱ་མཚོ་ལས་མ་གཡོས་པས་སྣང་ཡུལ་དུ་ཡོད་ལ། གཟུང་ཡུལ་དུ་མེད་པ་ལྟར། མིག་གིས་ཧྲིག་གེ་ཤེས་པ་སང་ངེ་བལྟས་དུས་ཕྱིའི་སྣང་བ་རྣམས་མ་འགག་པར་སྣང་ཡང་ཤེས་པ་སྣང་ཐོག་ཏུ་མ་ཤོར་བར་རྟོག་མེད་རང་གསལ་དུ་སལ་ལེ། སྣང་བས་ཤེས་པ་མ་བསླད། ཤེས་པས་སྣང་བ་ལ་མ་བཟུང་། སྣང་ཤེས་འབྲེལ་མེད་དུ་ཕར་ཆད་ཚུར་ཆད་ལ་ཕྱམ་མེ་རང་གསལ་དུ་གནས་པ་ནི། སྒོམ་པའི་མན་ངག་རྒྱ་མཚོ་ཅོག་བཞག་སྟེ། ཡི་གེ་མེད་པ་ལས། ཡེ་ནས་མ་བཅོས་རང་བྱུང་ཅོག་བཞག་ཉིད། །སྣང་བས་མ་བསྒྱུར་བློ་ཡིས་མ་བཅོས་པ། །ཆོས་ཉིད་མཁའ་ལ་གནས་ན་དགོངས་པར་བསྟན། །ཆོས་སྐུ་ཡེ་ཤེས་བསམ་པ་ཀུན་སྤང་སྟེ། །འགྱུ་བྱེད་མེད་ན་སྒོམ་པའི་རྒྱལ་པོ་མཆོག །དམིགས་པ་ཕྱོགས་དག་མི་འཛིན་ན། །རྒྱ་མཚོར་གཟའ་སྐར་ཤར་བ་བཞིན། །འཛིན་བྱེད་གསལ་ཆ་མ་འགག་གསལ། །དགོངས་པའི་འདུག་ཚུལ་དེ་བཞིན་ནོ། །ཞེས་སོ། །སྒོམ་དུས་ཚོགས་དྲུག་གི་སྣང་བ་འགགས་ན། ཉན་ཐོས་འགོག་པའི་སྒོམ་དུ་གོལ་བ་ཡིན་ནོ། །གསལ་བ་རིས་ཅན་དུ་འཛིན་ན་བསམ་གཏན་ལྷའི་སྒོམ་པར་གོལ་བ་ཡིན་ནོ། །སྟོང་པ་ཕྱལ་ཆད་དུ་སོང་ན་མུ་སྟེགས་ཆད་པའི་སྒོམ་དུ་གོལ་བ་ཡིན་ནོ། །བདེ་བར་སེམས་ཆགས་སུ་སོང་ན་འདོད་ལྷ་ཡིད་ཀྱི་སྒོམ་པར་གོལ་བ་ཡིན་ནོ། །བཏང་སྙོམས་ལྟེངས་པོར་སོང་ན་གཏི་མུག་སེམས་ཆགས་ཀྱི་སྒོམ་པར་གོལ་བ་ཡིན་ནོ། །གུད་ཆ་རང་བདེར་ཞེན་ན་འདོད་པ་རང་སའི་ཤེས་པར་གོལ་བ་ཡིན་ནོ། །དེ་ཐམས་ཅད་ནི་མཐར་འཛིན་གྱི་དྲི་མས་གོལ་བ་ཡིན་ཏེ། ཐལ་འགྱུར་ལས། རིས་ཅན་གསལ་བ་མ་ཡིན་དང་། །(༡༧༨)གུད་ཆ་སྟོང་པར་མ་སོང་དང་། །བདེ་བ་རྒྱུན་ཆགས་མ་ཡིན་དང་། །བཏང་སྙོམས་ལྟེངས་པོར་མ་སོང་དང་། །སྦྱངས་པ་ལོག་ཆར་མ་སོང་དང་། །འཛིན་ཆ་ནང་དུ་འགྱུ་བདེ་དང་། །ཞེས་པ་དང་། ཡི་གེ་མེད་པ་ལས། བྱིང་བ་མ་ཡིན་རྒོད་པ་ངང་གིས་མེད། །ཅེས་སོ། །མ་གོལ་བ་ནི། སྐྱོན་དེ་རྣམས་མེད་པའི་རིག་པ་རང་གསལ་རྒྱ་ཡན་ཡོངས་གྲོལ་ཕྱལ་པ་ཐ་མལ་དུ་མ་ཤོར་བ་སྟེ། ཡུལ་སྣང་ལ་འཛིན་རྟོག་མེད་པར་གསལ་བ་སྟེ། ཐལ་འགྱུར་ལས། དབང་པོའི་སྒོ་རྣམས་གསལ་བ་ལ། །ཡིད་ཀྱི་རྟོག་པར་མ་འགྱུས་པ། །ཤེས་པ་ཉིད་ལ་སྐྱོད་པའི་ཡིད། །ཕྱིར་ལ་ཤོར་བ་མེད་པ་ཉིད། །མ་གོལ་གནས་པའི་སྒོམ་པ་འོ། །ཞེས་སོ། །

གསུམ་པ་དགོངས་པ་སྣང་སྲིད་གཞིར་བཞག་པ་ནི། དེ་ལྟར་བསྒོམས་པ་ལས་སྣང་སྲིད་ཀྱི་ཆོས་ཡུལ་སེམས་སུ་སྣང་བ་ཐམས་ཅད་རང་སྣང་གཞིར་བཞག་ཆེན་པོའི་རང་མལ་གནས་ཏེ། གཟུང་འཛིན་མཉམ་ཉིད་ཆོས་སྐུར་ནུབ་པས། ཐུན་མཚམས་བར་མེད་ཆེན་པོ་གཅིག་ཏུ་འདྲེས་པ་ཞེས་བྱའོ། །འདིའི་དུས་ན་ཉོན་མོངས་པ་ལ་ཆོས་ཉིད་ཀྱི་རྒྱས་ཐེབས་པས། ཡེ་ཤེས་སུ་ཤར་བ་ཞེས་བྱ་སྟེ། འཇིམ་པར་བཀོས་ཕོར་གྱིས་རྒྱས་ཐེབས་པས་ཚ་ཚར་ཀྲོང་ཀྲོང་འཆར་བ་ལྟར། ཤེས་པ་གང་ཤར་ཡེ་ཤེས་སུ་འཆར་བའོ། །འདིའི་དུས་ཀྱི་རྣལ་འབྱོར་པ་དེ་ཆོས་ལ་གནས་པའི་དུས་ཞེས་བྱ་སྟེ། གང་སྣང་གི་ཆོས་ལ་རང་མལ་གྱི་སྒོམ་པ་རང་ཆས་སུ་གནས་པའི་ཕྱིར་རོ། །སྒོམ་པ་ལམ་དུ་བྱེད་པའི་རྣལ་འབྱོར་བསྟན་ཟིན་ཏོ། །

དོན་གསུམ་པ་སྤྱོད་པ་རྣལ་འབྱོར་དུ་བྱ་བ་ལ་གསུམ་སྟེ། སྤྱོད་པ་སྣང་བ་དབང་བསྒྱུར། མན་ངག་སྣང་བ་ཅེར་བཞག །དགོངས་པ་སྣང་སྲིད་གཞི་བཞེངས་སོ། །དང་པོ་ལ་གསུམ་སྟེ། ལས་དང་པོ་པའི་སྤྱོད་པ། འཁོར་འདས་རུ་ཤན་འབྱེད་པའི་སྤྱོད་པ། བརྟུལ་ཞུགས་རླུང་འཛིན་གྱི་སྤྱོད་པའོ། །དང་པོ་ནི། ཆོས་ལ་ཐོག་མར་ཞུགས་པ་རྣམས་ཀྱིས་སྒོ་གསུམ་སྡོམ་ཞིང་ཉིན་མཚན་གྱི་ཆ་ལ་ཐུན་མོང་གི་ཆོས་སྤྱོད་ཕྱག་དང་། བསྐོར་བ་དང་། ཐོས་བསམ་ལ་སོགས་(༡༧༩)པ་ལ་འབད་པས། ཆོས་སུ་ཅི་འགྲོ་དགེ་བསྒྲུབ་སྡིག་པ་ལས་ལྡོག །སེམས་རབ་ཏུ་འདུལ། ཆོས་སྤྱོད་བཅུ་ལ་སོགས་པ་སྤྱད་པར་བྱའོ། །ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོག་པའི་རྒྱུད་ལས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་འདོན་བྱེད་པ་དང་། །དེ་སེམས་པ་དང་སྒོམ་པ་སྟེ། །འདི་བཅུ་ཆོས་ཀྱི་སྒོ་མོ་ཡིན། །ཞེས་སོ། །

འཁོར་འདས་རུ་ཤན་འབྱེད་པའི་སྤྱོད་པ་ནི། རྣལ་འབྱོར་པས་སྐབས་སུ་ཉམས་ལེན་གྱི་རྩལ་སྦྱོང་དང་བོགས་འབྱིན་དུ་བྱ་སྟེ། ཐལ་འགྱུར་ལས། འཁོར་འདས་རུ་ཤན་མ་འབྱེད་ན། །ཁམས་གསུམ་ལུས་ངག་ཡིད་ཀྱི་ཡང་། །འབྲེལ་བ་ཆོད་པར་མི་འགྱུར་བས། །འཁོར་འདས་རུ་ཤན་དབྱེ་བ་བཤད། །ཅེས་སོ། །འབྱེད་ལུགས་ནི། དབང་གོང་མའམ། སྔོན་འགྲོར་བསྟན་པ་བཞིན་བྱའོ། །

བརྟུལ་ཞུགས་རླུང་འཛིན་གྱི་སྤྱོད་པ་ཉེར་གཅིག་ཡོད་ཀྱང་། འདིར་བདུན་བྱ་བ་ལས། དང་པོ་སྒོ་མོ་ཀུན་ནས་བསྡུད་པ་བུང་བ་ཚང་འཚོལ་བ་ལྟ་བུའི་སྤྱོད་པ་ནི། ཐོས་པས་སྤང་བླང་དང་ཆོས་དང་ཆོས་མ་ཡིན་པ་ཤན་ཕྱེད། བསམ་པས་དོན་ཡིད་ལ་བྱ་ཞིང་ཉོན་མོངས་པ་མགོ་མནན། བསྒོམས་པས་གནས་ལུགས་ཀྱི་ཐོག་ཏུ་དབབ་ཅིང་ཉོན་མོངས་པ་རྩ་བ་དྲུངས་ནས་འདོན་ནོ། །དེའི་གྲོགས་སུ་ཐེ་ཚོམ་མེད་པ་ཐི་བྱ་ཚང་དུ་འཇུག་པ་ལྟ་བུའི་སྤྱོད་པ་ནི། ཐི་བྱ་དེ་སྔོན་དུ་མི་ལ་སོགས་པས་མི་གནོད་པའི་སྒྲོ་འདོགས་གཅད་པར་ཚང་བཅའ་ནས། ཕྱིས་ཐེ་ཚོམ་མེད་པར་ཚང་དུ་འཇུག་པ་ལྟར། ཆོས་རྣམས་སྒྲོ་འདོགས་བཅད་ནས་རང་ཡིད་ཆེས་པ་གཅིག་ལ་ཡི་དམ་དུ་བཟུང་ནས་བསྒྲུབ་པར་ཞུགས་ཏེ། དེ་ལའང་ལྟ་སྒོམ་གྱི་གནད་ཁ་ཚང་ཞུས། ཐེ་ཚོམ་མེད་པར་ཞུན་ཐར་བཅད་ནས་སྒོམ་པ་ཡིན་གྱི། མཐོ་རིས་ཤིག་ཐོབ་པ་ཙམ་ཉམས་སུ་བླང་མི་རུང་བས། སྒྲོ་འདོགས་ཤིན་ཏུ་ཆོད་པའི་གནད་ཐམས་ཅད་ལེན་པ་གཅེས་པ་ཡིན་ནོ། །དེའི་གྲོགས་སུ་ཀུན་གྱི་སྤྱོད་ཡུལ་མ་ཡིན་པ་རི་དྭགས་ལྟ་བུའི་སྤྱོད་པ་ནི། རི་དྭགས་རྨས་མ་དེ་རྨའི་གནོང་གིས་མི་ལ་འབྲོས་པ་ལྟར། (༡༨༠)རྣལ་འབྱོར་པ་དེ་ཡང་གདམས་པ་ནི་ཡོད། འཁོར་བ་སྤོང་བའི་གནོང་གིས་མི་མེད་པའི་རིའམ། ལུང་སྟོང་ལ་སོགས་པར་གཅིག་པུར་ཉམས་སུ་ལེན་པ་ཡིན་ནོ། །དེའི་གྲོགས་སུ་ལྐུགས་པ་ལྟ་བུའི་སྤྱོད་པ་ནི། ངག་སྨྲ་བ་བཅད་དེ་སུ་དང་ཡང་མི་སྨྲ་བར་བྱའོ། །དེ་ལྟར་བྱས་པས་དྲན་པ་རེངས་པ་སྨྱོན་པ་ལྟ་བུའི་སྤྱོད་པ་འབྱུང་སྟེ། སེམས་དགག་སྒྲུབ་དང་བྲལ། ངག་རང་རྡོལ་འབྲེལ་མེད་དུ་འབྱུང་། ལུས་སྦ་གསང་ངོ་ཚ་དང་བྲལ། དྲན་རྟོག་རིས་མེད་གཏང་ཡལ་དུ་འགྲོའོ། །འདིའི་དུས་སུ་གཙང་དམེ་མེད་པ་ཁྱི་ཕག་ལྟ་བུའི་སྤྱོད་བ་ཞར་ལ་འབྱུང་སྟེ། ཟས་བཟང་ངན་མེད་པར་ལོངས་སྤྱོད། གོས་འདམ་ཁ་མེད་པར་གོན། སྣང་བ་གཟའ་གཏད་མེད་པར་འགྲོ་བའོ། །དེ་ལྟར་དྲུག་རྫོགས་པ་ལས་ཟིལ་གྱིས་མི་གནོན་པ་སེང་གེ་ལྟ་བུའི་སྤྱོད་པ་འབྱུང་སྟེ། སེང་གེ་དེ་རྩལ་གསུམ་རང་ལ་རྫོགས་པས་ཕར་ཐམས་ཅད་ཟིལ་གྱིས་གནོན། ཚུར་གང་གིས་ཀྱང་མི་གནོན་པ་ལྟར། རྣལ་འབྱོར་པ་དེ་ཡང་ལྟ་སྒོམ་སྤྱོད་པའི་ཡོན་ཏན་རྫོགས་པས། ཕར་སྣང་བ་ཐམས་ཅད་ལ་དབང་བསྒྱུར་ཞིང་ཟིལ་གྱིས་མནན་ནོ། །ཚུར་གང་གིས་ཀྱང་ཟིལ་གྱིས་མི་གནོན་ཉམ་ང་བ་དང་། བག་ཚ་བ་མེད་པས་ཟང་ཐལ་ཆེན་པོར་སྤྱོད་པའོ། །འདི་ཕན་ཆད་སྣང་བ་ལ་རང་དབང་བསྒྱུར་བས། མ་དད་པ་དད་པར་བསྒྱུར་བ་དང་། བསད་པ་གསོ་ནུས་པའི་ཡོན་ཏན་འཆར་རོ། །སྤྱོད་པ་དེ་དག་ལ་མིང་དུ་བཏགས་ན་སྣང་བ་དབང་བསྒྱུར་གྱི་སྤྱོད་པ་ཞེས་བྱ་སྟེ། ཕྱི་སྣང་བ་ལ་ནང་གི་རིག་པ་ཤར་གྲོལ་ཆོས་ཉིད་དུ་དབང་བསྒྱུར་བས་སོ། །དེ་དག་ཀྱང་ཉི་ཟླ་ཁ་སྦྱོར་ལས། བུང་བ་ལྟ་བུའི་སྤྱོད་པ་ཡིས། །ཆོས་རྣམས་ཀུན་གྱི་རོ་མྱང་བྱ། །རི་དྭགས་ལྟ་བུའི་སྤྱོད་པ་ཡིས། །འཁྲུལ་པའི་རྐྱེན་གྱུར་ཡུལ་རྣམས་སྤང་། །ལྐུགས་པ་ལྟ་བུའི་སྤྱོད་པ་ཡིས། །འཁྲུལ་པའི་ངང་ནི་རྣམ་པར་སྤང་། །ཐི་བྱ་ལྟ་བུའི་སྤྱོད་པ་ཡིས། །གསང་བའི་སྔགས་ཀྱི་ཐེ་ཚོམ་གཅོད། །སྨྱོན་པ་ལྟ་བུའི་སྤྱོད་པ་ཡིས། །གཅིག་ཏུ་གནས་པའི་ཡུལ་རྣམས་སྤང་། །སེང་གེ་(༡༨༡)ལྟ་བུའི་སྤྱོད་པ་ཡིས། །འཇིགས་པའི་སེམས་སྤང་དུར་ཁྲོད་རྒྱུ། །ཁྱི་ཕག་ལྟ་བུའི་སྤྱོད་པ་ཡིས། །གཙང་དང་དམེ་བའི་རྣམ་རྟོག་སྤང་། །ཞེས་སོ། །

གཉིས་པ་སྣང་བ་ཅེར་བཞག་གི་མན་ངག་ལ། གང་སྣང་ལ་ཅེར་གྱིས་བཞག་པས། ཅེར་ས་དེར་གྲོལ་བ་ནི། སྣང་བ་ཅེར་བཞག་གི་ཐབས་ཏེ། ཆོས་ཅན་དུམ་བུ་ལ་བསླབས་པས་གཟུགས་བརྙན་ཡོངས་སུ་དག །ཆོས་ཅན་སྤྱི་ལ་བསླབས་པས་རང་བཞིན་ཡོངས་སུ་དག་པ་ནི། ཅེར་གྲོལ་མཐོང་སར་ཡལ་བའི་གནད་ལས་བྱུང་བའོ། །དོན་ལ་གང་སྣང་རང་ཐོག་ཏུ་ཆོད་པས་འཁྲུལ་སྣང་འཛིན་མེད་དུ་དག་པའི་མན་ངག་གོ། །གནད་འདིའི་དགག་སྒྲུབ་ཆགས་སྡང་རེ་དོགས་ཐམས་ཅད་ལ་ཅེར་བཞག་གི་རྒྱས་བཏབ་པས་རང་ཆོད་དུ་ཡལ་ཏེ། གྲོགས་སྤྱོད་པས་ཞེས་བྱ་བས་མཆོག་ཏུ་ཟབ་བོ། །སྤྱིར་གྲོལ་ལུགས་བཞི་སྟེ། ཡེ་གྲོལ་ནམ་མཁའ་ལྟ་བུ་བཅིངས་པ་མེད་པའི་གནད་ཀྱིས་གྲོལ་ཞེས་བཏགས་པ་དང་། རང་གྲོལ་སྦྲུལ་མདུད་ལྟ་བུ་གཉེན་པོ་གཞན་མེད་པར་རང་གིས་རང་གྲོལ་བར་བསྟན་པ་དང་། ཤར་གྲོལ་དབའ་རླབས་ལྟ་བུར་ཤར་བ་དེ་རང་གྲོལ་ཏེ། སྐད་ཅིག་སྔ་ཕྱི་ལ་ལྟོས་པ་མེད་པ་དང་། ཅེར་གྲོལ་ཆུ་ཟླ་ལྟ་བུ་མཐོང་སྣང་རང་བཞིན་མེད་ལ་མཐོང་མཁན་རིས་མེད་དུ་ཡལ་བའམ། རྡོ་ཚན་ལ་ཁ་བ་བབས་པ་ལྟར་མཐོང་སར་ལྷན་ལྷན་གྲོལ་བའོ། །དོན་ལ་སྣང་ཐོག་ཏུ་རིག་པ་རྗེས་མེད་འཛིན་མེད་དུ་ཡལ་བ་ལ་ཅེར་གྲོལ་ཞེས་བཏགས་པའི། གྲོལ་ལུགས་བཞི་པོ་འདིས་གང་ཤར་སྤྱོད་པར་དག་པ་ཞེས་བྱའོ། །

གསུམ་པ་དགོངས་པ་སྣང་སྲིད་གཞི་བཞེངས་ནི། དེ་ལྟར་སྤྱད་པས་རིག་པའི་ངང་ནས་ཤར་གྲོལ་གྱི་རྩལ་བཞེངས་ཏེ། ཕྱི་སྣང་བའི་སྟེང་དུ་གྲོལ་བ་ཡང་། སྣང་བ་སྣོད། སྲིད་པ་བཅུད། གཉིས་ལ་འཆར་སྒོ་མ་འགགས་པར་ཤར་བ་དེ་ཅེར་ཤར། ཐད་ཀ་དེར་ཡལ་བ་དེ་ཅེར་གྲོལ། དེའི་ངང་དྭངས་ཤར་བས་གནས་པ་ལ་མི་གནོད། གནས་པས་འཆར་བ་ལ་མི་འགགས་པ་ནམ་མཁའ་ཡངས་པའི་དབྱིངས་རུམ་ལྟ་བུ་ལ་སྣང་སྲིད་གཞི་བཞེངས་ཀྱི་དགོངས་པ་ཞེས་བྱའོ། །(༡༨༢)འདིའི་དུས་ན་ཉོན་མོངས་པ་ཡེ་ཤེས་སུ་གནས་འགྱུར་ཏེ། ཉོན་མོངས་སུ་འཆར་བདོ་བ་དེ་ཤར་ས་ན་རང་གྲོལ་རང་དྭངས་ཆེན་པོར་ཤིག་ཤིག་བྱུང་བས་ཕྱི་སྣང་ཐོག་ཏུ་བཞག་པས། ནང་རིག་ཐོག་ཏུ་གྲོལ་བ་ལ་རིགས་དང་རིགས་ཀྱི་བདག་པོར་གྲོལ་བ་ཞེས་བྱ་སྟེ། མུ་ཏིག་ཕྲེང་བ་ལས། ཕུང་པོ་ཁམས་དང་སྐྱེ་མཆེད་རྣམས། །རིགས་དང་རིགས་ཀྱི་བདག་པོར་གྲོལ། །ཞེས་སོ། །རྣལ་འབྱོར་པ་དེ་ཡང་ཆོས་ལ་སྤྱོད་པའམ་གནས་པ་ཞེས་བྱ་སྟེ། སྣང་བ་ཅེར་བཞག་གི་ཆོས་དང་སྣང་སྲིད་གཞི་བཞེངས་ཀྱི་དགོངས་པ་ལ་གནས་པའི་ཕྱིར་རོ། །སྤྱོད་པ་ལམ་དུ་བྱེད་པའི་རྣལ་འབྱོར་བསྟན་ཟིན་ཏོ། །

དོན་བཞི་པ་འབྲས་བུ་རྣལ་འབྱོར་དུ་བྱ་བ་ལ་གསུམ་སྟེ། འབྲས་བུ་རང་བཞིན་རྣམ་དག །མན་ངག་རིག་པ་ཅོག་བཞག །དགོངས་པ་སྲིད་གསུམ་ཀ་དག་གོ། །དང་པོ་ནི། རིག་པ་ཡེ་དག་ལྷུན་གྲུབ་རང་མལ་ཆོས་སྐུའི་དགོངས་པ་འདུ་འབྲལ་མེད་པ་རང་རྫོགས་དྲི་མེད་རྣམ་དག་ཏུ་རྟག་པར་ཡོད་པ་དེ་འབྲས་བུའི་ངོ་བོ་ཡིན་ལ། བླ་མས་ངོ་སྤྲད། རང་གིས་དེ་ལྟར་རྟོགས་པ་ནི་འབྲས་བུ་རང་ངོ་ཤེས་པ་ཞེས་བྱ་སྟེ། དེ་དང་མི་འབྲལ་བར་དེའི་ངང་ལ་གནས་པས་འབྲས་བུ་ལམ་དུ་བྱེད་པ་ཞེས་བྱའོ། །དེ་ཡང་ཐོབ་བྱ་སྔོན་དུ་རང་ལ་འདུག་པར་རྟོགས་པས་རེ་དོགས་མེད་པར་རང་མལ་དུ་བློ་བདེ་བའི་གདེང་དང་བཅས་པ་ལ་འབྲས་བུ་རྣལ་འབྱོར་དུ་བྱེད་པ་ཞེས་བརྗོད་དོ། །བློ་རྩལ་རབ་ཀྱི་གཞིར་འབྲས་བུ་འབྱུང་བའོ། །དབང་རྣམ་པར་ཕྱེ་བ་ལས། འབྲས་བུ་རང་རྫོགས་སྨོན་ལམ་བྲལ་བ་ལས། །རྣམ་དཔྱོད་དུས་ལ་ལྟོས་པ་ཡོངས་རེ་འཁྲུལ། །ཞེས་སོ། །འདི་ལ་རྒྱལ་པོ་གདན་ས་ཟིན་པས་མི་འགྱུར་བ། བློན་པོ་བཙོན་དུ་ཟིན་པས་མི་འགྱུར་བ། དམངས་ཆམ་ལ་ཕེབས་པས་མི་འགྱུར་བ་གསུམ་ལས། དང་པོ་ནི། འབྲས་བུ་ཆོས་སྐུ་རང་མལ་དུ་ཤེས་པ་ལ་རྒྱལ་པོ་གདན་ས་ཟིན་པ་ཞེས་བྱ་སྟེ། རིག་པ་རྒྱལ་པོ་ལྟ་བུའི་གདན་ས་ཆོས་སྐུའི་རང་མལ་ལས་མ་གཡོས་པར་ཟིན་དུས། འཁྲུལ་ཕྱིར་མི་འགྱུར་ཏེ། འཁྲུལ་པ་རང་སར་དག་པའི་ཕྱིར་རོ། །དོན་གྱི་འབྲས་བུ་རྒྱུར་མི་(༡༨༣)ལྡོག་པ་བསེ་ཤིང་གི་འབྲས་བུ་ལྟ་བུའོ། །དཔེར་ན་རྒྱལ་རིགས་སྤྱི་བོ་ནས་དབང་བསྐུར་བ་རྒྱལ་པོའི་ཁྲི་ལ་འདུག་སྟེ། དེ་རྒྱལ་ས་ཐོབ་པས་མི་འགྱུར་ཞིང་དབང་བསྐུར་བ་ལྟར། རྣལ་འབྱོར་པས་བླ་མས་རིག་པ་ཆོས་སྐུར་ངོ་སྤྲད་ནས། འཕྲོད་དེ་ཆོས་སྐུའི་རང་མལ་ན་རང་གསལ་འཛིན་མེད་ཟང་ཐལ་དུ་གནས་པ་དེ། ཐམས་ཅད་ཆོས་ཉིད་ཀྱི་རོལ་པར་རྟོགས་པས་འཁོར་བ་གཞི་མེད་ཀྱི་དབྱིངས་སུ་དག་སྟེ་འགྱུར་བ་མེད་པའོ། །བློན་པོ་བཙོན་དུ་བཟུང་ནས་མི་འགྱུར་བ་ནི། དཔེར་ན་བཀའ་བློན་བཙོན་དུ་ཟིན་ནས་རྒྱལ་པོ་ཡང་ཉན་དགོས་པ་ལྟར། ཡིད་ཀྱི་འགྱུ་བ་རང་ཤར་རང་དྭངས་ཁུངས་ཆོད་བཙོན་དུ་ཟིན་པས་རིག་པ་ཁ་ཡན་དུ་མ་ཤོར་བར་ཆོས་སྐུ་རང་མལ་དུ་ངང་གིས་གནས་པ་སྟེ། དྲན་རྟོགས་ཤར་གྲོལ་གྱི་རྒྱས་ཐེབས་པས་ཆོས་ཉིད་དོན་གྱི་དགོངས་པ་ལ་འགྱུར་བ་མེད་པར་རང་དབང་ཐོབ་པའོ། །ཤར་ཡང་ཆོས་སྐུའི་ཀློང་ནས་ཤར། །གྲོལ་ཡང་ཆོས་སྐུའི་ཀློང་དུ་གྲོལ། །གནས་ཀྱང་ཆོས་སྐུའི་ཀློང་དུ་གནས། །ཡིད་ཀྱི་འགྱུ་བ་ཅི་འགྱུས་ཀྱང་། །ཐད་ཀར་རང་ཆོད་ཡེ་ཤེས་རྩལ། །ཡེ་ཤེས་ཀློང་དུ་རང་འགྱུར་གསལ། །དོན་ལ་འགྱུས་དང་མ་འགྱུས་མེད། །རླུང་གིས་རྟ་བྱས་རིག་པའི་གདངས། །རིག་པ་བཅིངས་པས་རླུང་དང་བྲལ། །རིག་པ་ཆོས་སྐུ་རང་མལ་ཉལ། །བློན་པོ་བཙོན་དུ་ཟིན་ཞེས་བརྗོད། །སེམས་དང་ཡེ་ཤེས་རྒྱབ་གྱེས་སོ། །གནད་དུ་དྲིལ་ན་དེ་ལས་མེད། །ཅེས་པ་ནི། དོན་གྱི་ཆིངས། གནད་ཀྱི་གཟེར། གསང་བའི་འཕྱོང་། ཡང་གབ་སྦས་པའི་མིག་འབྱེད་དུ་བཀོད་པའོ། །དམངས་ཆམ་ལ་ཕབ་སྟེ་མི་འགྱུར་བ་ནི། རྒྱལ་པོ་གཅིག་གིས་དམངས་རྣམས་དམག་གིས་བཅོམ་ནས་ཆམ་ལ་ཕབ་དུས་འགྱུར་བ་མེད་པ་ལྟར། སྒོ་ལྔའི་རྣམ་ཤེས་རང་གདངས་སུ་མ་འགགས་པ་ལ་མི་རྟོག་པར་བཞག་པས། གཟུང་བའི་ཡུལ་ལྔ་ལ་དྲན་རྟོག་མི་འཕྲོ་བར་ཆམ་ལ་ཕེབས་ཏེ། རིག་སྟོང་ཆོས་སྐུ་རང་མལ་ལས་འགྱུར་བ་མེད་པའོ། །ཇེ་ཞིག་ན་རྣམ་ཤེས་ཡུལ་དང་བཅས་པ་སྟོང་པས་འཁོར་བའི་མིང་མེད་དོ། །དེ་ལ་རིག་པ་ཆོས་སྐུར་ཐག་ཆོད་ནས། གཟུགས་སྒྲ་དྲི་རོ་རེག་གི་(༡༨༤)ཤེས་པ་གང་ཤར་གྱི་རང་དུས། མིག་གམ། རྣ་བ། སྣ། ལྕེ། ལུས་ཀྱི་སྒོ་དེ་ཀར་མདུང་ཚུགས་སུ་གཏད་པས། འགྱུ་བ་རང་ཡལ། རིག་པ་རང་གསལ། དྲན་རྟོག་ཆམ་ལ་ཕེབས་ཏེ། དབང་པོ་དགག་སྒྲུབ་མི་དགོས་པར་རང་གྲོལ་ཚོགས་དྲུག་ལྷུག་པའི་མན་ངག་ཏུ་བྱུང་བའོ། །གནད་འདི་གལ་ཆེ་བར་ཡོད་པས་ལེགས་པར་གཏན་ལ་ཕེབས་སོ། །རྒྱལ་བློན་དམངས་གསུམ་གང་ཆམ་ལ་ཕབས་ཀྱང་རིག་པ་ཆོས་སྐུར་རྗེན་སང་ངེ་བ་ཞིག་འོང་བ་དེ་ངོས་བཟུང་བས་འབྲས་བུ་རང་ཡལ་དུ་ཤར་བ་ཞེས་བྱ་སྟེ། རིག་པ་ངོ་ཤེས། འགྱུ་བ་དག་སངས། རྣམ་ཤེས་གཏད་ཡལ་བ་ནི། འབྲས་བུ་དེ་ལ་མིང་དུ་གདགས་ན། རང་བཞིན་རྣམ་པར་དག་པའི་འབྲས་བུ་ཞེས་བྱ་སྟེ། བྱས་པའི་རྩོལ་བས་ཐོབ་པ་མ་ཡིན། ཡེ་ནས་གནས་པའི་དོན་རང་ཐོག་ཏུ་ངོ་འཕྲོད་པས་རང་ས་ཟིན་པ་ཞེས་བྱའོ། །

གཉིས་པ་མན་ངག་རིག་པ་ཅོག་བཞག་ལ། ཕྱིའི་ཡུལ་ལྔ་སྣང་དུས་སྒོ་ལྔའི་རྣམ་ཤེས་ཅོག་བཞག་ཏུ་བྱ་བ་དང་། ནང་དྲན་རིག་འཆར་དུས་ཡིད་ཀྱི་ཤེས་པ་ཅོག་བཞག་ཏུ་བྱ་བ་དང་། གསང་བ་རིག་པ་རང་གནས་སུ་དྭངས་དུས་རང་མལ་ཆོས་སྐུའི་ཅོག་བཞག་གི་ཐབས་གསུམ་ལ་བསླབ་པར་བྱ་སྟེ། ཤེས་པའི་གནད་ཐམས་ཅད་དེ་གསུམ་དུ་མ་འདུས་པ་གང་ཡང་མེད་དོ། །དོན་ལ་སྣང་ཤེས་གང་བྱུང་ཅོག་བཞག་རང་དྭངས་སུ་སྟོང་པའོ། །སེམས་སྣང་བའི་རང་འགྲོས་ལ། ཡུལ་རིག་པའི་འཆར་ཚུལ་ལ། རིག་པ་རང་མལ་ཆོས་ཀྱི་སྐུ་ལ། ཕྱལ་པ་བར་མེད་རྒྱ་ཡན་ལ། རང་བབ་རྣལ་མའི་འདུག་ཚུལ་ལ། རྗེན་ནེ། ཡེར་རེ། ཟང་ཐལ་ལ་ལ། ཕྱམ་ཆལ་ལ་ལ། དག་སངས་སངས། གཞི་རང་མལ་ཆོས་སྐུའི་རང་གཟུགས་སུ་འདུག་པ། བློ་རང་མལ་ཆོས་སྐུའི་འཆར་ཚུལ་དུ་འདུག་པ། ཡུལ་རང་སྣང་ཆོས་སྐུའི་སྟོང་གཟུགས་སུ་འདུག་པ། ཕྱལ་བ་བར་མེད་ཆོས་སྐུའི་རང་མལ་དུ་འདུག་པ། ཟང་ཐལ་དྲི་མེད་ཆོས་སྐུའི་རང་ངོར་འདུག་པ། ཆོས་ཟད་བློ་འདས་ཆོས་སྐུའི་ཡིན་ལུགས་སུ་འདུག་པ། ཨ་ལ་ལ་ཨེ་མ་ཧོ་ལེགས་པར་རྟོགས་(༡༨༥)སོ། །དགའ་ཡལ་ལ་ལ་འཛུམ་ཤིག་ཤིག་རྣལ་འབྱོར་པས་སྣང་བ་ཆོས་སྐུར་ཤར་བ་ལགས་སོ། །

གསུམ་པ་དགོངས་པ་སྲིད་གསུམ་ཀ་དག་གི་དུས་ཙམ་ན། ཕྱི་ནང་བར་གསུམ། ལུས་ངག་ཡིད་གསུམ་རྒྱ་ཡན་ཡོངས་གྲོལ་ཆེན་པོར་ཤར་བས། ལས་དང་བག་ཆགས་ལས་འདས་ཏེ། ཁམས་གསུམ་ལ་ཟློས། འཁོར་བ་དོང་སྤྲུག །འཁྲུལ་པ་དག་སངས་ཏེ། གཞི་འབྲས་ཆོས་སྐུའི་དགོངས་པར་ལྷུན་གྱིས་གྲུབ་པས། སྲིད་གསུམ་ཀ་དག་གི་དགོངས་པ་ཞེས་བྱའོ། །ཆོས་ཟད་དོ། །བློ་འདས་སོ། །ལས་ཟིན་ཏོ། །ནམ་མཁའ་ལྟར་དག་པའི་སྒོ་ཐོབ་བོ། །ཆོས་སྐུའི་གླིང་དུ་ཕྱིན་པས་ཕྱིར་མི་ལྡོག་གོ། །འཁོར་བའི་རྒྱ་མཚོ་བརྒལ་ཟིན་ཏོ། །འདིའི་དུས་ན་ཉོན་མོངས་པ་ནི་དབྱིངས་སུ་གྲོལ་ཏེ། གཟུང་འཛིན་གྱི་འཆིང་བ་ཆད་པ་ནམ་མཁའ་ལ་སྤྲིན་དེངས་པ་ལྟ་བུའོ། །རྣལ་འབྱོར་པ་དེ་ལ་ཆོས་ཟད་པ་ཞེས་བྱ། ཆོས་བོར་བ་ཞེས་བྱ། ཆོས་ལས་འདས་པ་ཞེས་བྱའོ། །དོན་ལ་རིག་པ་རང་ས་ཟིན་པས་ཕྱིར་མི་ལྡོག་པ་ལས་འབྲས་བུ་ཞེས་པའོ། །རྡོ་རྗེ་སེམས་དཔའ་སྙིང་གི་མེ་ལོང་ལས། འབྲས་བུའི་ཆོས་ཐམས་ཅད་སྐུ་གསུམ་ལས་ཕྱིར་མི་ལྡོག་པའི་འབྲས་བུར་ཤེས་པར་གྱིས་ཤིག །ཅེས་སོ། །འབྲས་བུ་ལམ་དུ་བྱེད་པའི་རྣལ་འབྱོར་བསྟན་ཟིན་ཏོ། །

དེ་ལྟར་རྣལ་འབྱོར་བཞི་ཡང་གང་ལ་གང་མོས་པའི་ལམ་དུ་བསྟན་གྱིས། སྒོམ་དུས་གཅིག་ལ་མ་ཚང་བར་གཅིག་བསྟན་པ་ནི་མ་ཡིན་ཏེ། གང་རུང་རེ་རེས་ཀྱང་ལམ་ཚང་ལ་མ་ནོར་པའི་ཆ་རྐྱེན་རྫོགས་པར་བསྟན་པའི་ཕྱིར་རོ། །དེའི་ཕྱིར་རང་བཞིན་རྫོགས་པ་ཆེན་པོའི་སྒོའི་ཆོས་ཀྱི་རྣམ་གྲངས་ནམ་མཁའ་ལྟར་རྒྱ་ཆེ་ཞིང་ཐབས་དང་ལམ་གྱི་གོ་སྐབས་ཡངས་པ་ཡིན་ནོ། །

ཚུལ་འདི་ངེས་དོན་སྙིང་པོའི་གདམས་པ་སྟེ། །དུས་གསུམ་རྒྱལ་བ་སྔ་ཕྱིའི་གཤེགས་ཤུལ་ཡིན། །བླ་མའི་དྲིན་གྱིས་རྟོགས་པའི་རྣལ་འབྱོར་པ། །སྣ་ཚོགས་རང་གྲོལ་བཟང་པོས་ལེགས་པར་བཀོད། །ཕྱི་རབས་རྗེས་སུ་འཇུག་པའི་སྐལ་ལྡན་གྱིས། །ཡི་གེ་འདི་ལ་གུས་པས་གཅེས་སྤྲས་མཛོད། །བདག་གིས་ཉམས་མྱོང་ངེས་པའི་གནད་(༡༨༦)རྣམས་དང་། །རྒྱུད་ལུང་མན་ངག་བཅུད་ཀྱི་ཡང་སྙིང་ལགས། །དགེ་བ་འདི་ཡིས་བདག་དང་འགྲོ་བ་ཀུན། །འབད་མེད་ཡོངས་གྲོལ་ཆོས་ཀྱི་རྒྱལ་པོར་ཤོག །རྣལ་འབྱོར་བཞིའི་རིམ་པ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་དུ་བཀོད་པ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཟབ་མོ་པྲ་ཁྲིད།

དང་པོ། རྟེན་རྩའི་མན་ངག

༄༅། །ཟབ་མོ་ཡང་ཏིག་ལས། ཟབ་མོ་པྲ་ཁྲིད་བཞུགས་སོ། །

༄༅། ཟབ་མོ་པྲ་ཁྲིད་ཅེས་བྱ་བ། དཔལ་བདེ་བ་ཆེན་པོ་ལ་ཕྱག་འཚལ་ལོ། །རྡོ་རྗེ་མཆོག་གསུམ་སྒྲུབ་པའི་དཀྱིལ་འཁོར་དུ། །ཡོན་ཏན་རབ་རྫོགས་སྣང་སྲིད་སངས་རྒྱས་ཤིང་། །ཡེ་ནས་ཡབ་ཡུམ་ཐབས་ཤེས་འདུ་འབྲལ་མེད། །གཉིས་མེད་བྱང་ཆུབ་སེམས་ལ་ཕྱག་འཚལ་ལོ། །རྣལ་འབྱོར་འབྲས་བུ་ཚེ་གཅིག་ངེས་པའི་ལུང་། །རྡོ་རྗེའི་ལུས་ལ་ཐབས་ལམ་སྙིང་པོར་བྱེད། །དེ་ཡི་ལག་ལེན་ཟངས་ཀྱི་ཡི་གེའི་དོན། །ཉམས་མྱོང་གནས་བསྡུས་ཟབ་མོའི་པྲ་ཁྲིད་བྱ། །

འདི་ལ་གསུམ་སྟེ། རྟེན་རྩའི་མན་ངག །བརྟེན་པ་རླུང་གི་མན་ངག །ཁམས་བདེ་བ་ཆེན་པོའི་མན་ངག་གོ། །

དང་པོ་རྩ་ཡུར་བ་དང་འདྲ་ལ། རླུང་དང་ཐིག་ལེའི་རྟེན་ཡིན་པས། སྔོན་དུ་མ་སྦྱངས་ན་རླུང་ཐིག་སྒོམ་དུ་མི་རུང་བའི་ཕྱིར། ཐོག་མར་སྦྱང་དགོས། འདི་ལ་རྩའི་གཙོ་བོ་གསུམ། འཁོར་ལོ་བཞི་ཡི་རྩ་བྲན་བསམ་གྱིས་མི་ཁྱབ་པ་ཡོད་ཀྱང་། གཏུམ་མོ་ཡེ་ཤེས་ཀྱི་མེ་དབུ་མར་དག་པས་ཐམས་ཅད་ཞར་ལ་འབྱོངས་པའི་ཕྱིར། དེའི་མན་ངག་ནི། དྲང་སྲོང་གི་འདུག་སྟངས་ཀྱིས་ཙོག་པུར་འདུག་ལ། པུས་འཁྱུད་བཅིངས་ལ་བླ་མའི་རྣལ་འབྱོར་གྱི་རྗེས་ལ། རང་ཉིད་ཕག་མོ་དམར་མོ་གཅེར་བུ་གྲི་གུག་དང་ཐོད་པ་ཁ་ཊྭཱཾ་ག་དང་རུས་པའི་རྒྱན་ཅན། སྤྱན་གསུམ་པ། བཞད་པ་ཞབས་བརྐྱང་བསྐུམ་དུ་བཞུགས་པ། ཡེ་ཤེས་ཀྱི་མེ་དཔུང་འབར་བའི་ཀློང་ན། བདེ་དྲོད་རབ་ཏུ་འབར་བར་བསྒོམས་པའི་གསང་བ་ནས་སྤྱི་གཙུག་གི་བར། རྩ་དབུ་མ་མདའ་སྨྱུག་ལྟར་དྲང་ལ། སྦུབས་མ་ཡོ་བའི་འོག་སྒོར་ཨ་ཡྃ་གཉིས་སུ་མེད་པ་ཡེ་ཤེས་ལྔའི་རླུང་འོད་ལྔའི་གོང་བུ་སྲན་མ་ཙམ། ལྟེ་བར་ཧྲི་མྃ་གཉིས་སུ་མེད་པ་མེའི་གོང་བུ་སྲན་མ་ཙམ་པ་དང་། ཡར་སྣ་སྤྱི་བོ་ནས་མར་སྣ་ལྟེ་བ་ལ་ཧཾ་བྃ་གཉིས་སུ་མེད་པ་བྱང་ཆུབ་སེམས་ཀྱི་གོང་བུ་སྲན་མ་ཙམ་བསྒོམ་སྟེ། འོག་རླུང་འཐེན། སྟེང་རླུང་མནན། ཕོ་འོག་ལྟེ་བའི་མེ་ལ་ཤེས་པ་གཏད་ལ། རླུང་དལ་བུས་ཕྱིར་སོང་། རང་སོར་དར་ཅིག་ཀློད། ནང་དུ་འཇུག་དུས་སྣ་བུག་གཡས་ནས་དབུ་མའི་བར་རོ་མ་དར་སྐུད་ལྟར་དཀར་བ་དང་། གཡོན་རྐྱང་མ་དར་སྐུད་ལྟར་དམར་བ་ནས་སྣོད་བཅུད་ཐམས་ཅད་ནམ་མཁའ་གཅིག་ཏུ་སྔོ་ཕྱམ་གྱུར་པ་དེ་ཚུར་བྱུང་ནས། འོག་སྒོའི་རླུང་གི་གོང་བུ་ལ་ཕོག །གསལ་བདེ་མི་རྟོག་པའི་ཡེ་ཤེས་སུ་གྱུར། དེའི་ངད་ཀྱིས་རླུང་ལྔའི་དྭངས་མ་དུ་བ་ལྟར་ཡར་སོང་། ལྟེ་བའི་མེ་ལ་རེག །བདེ་ལ་དྲོད་དུ་འབར་བའི་ཡེ་ཤེས་སྐྱེས། དེའི་ངང་མེའི་འོད་ཟེར་སེར་པོ་རྟ་རྔ་ཙམ་ལས་དམིགས་པ་ཇེ་བརྟན་ལ་སོང་དུས་ཇེ་སྦོམ་དུ་འབར་བས་སྤྱི་བོའི་ཧཾ་བྃ་བྱང་ཆུབ་སེམས་ཀྱི་གོང་བུ་ལ་རེག །སྟོང་པ་དེ་རང་གསལ་དག་པའི་ཡེ་ཤེས་སྐྱེས། དེའི་ངད་ཀྱིས་དྭངས་མ་བདུད་རྩིའི་ཐིགས་པའི་ཚུལ་དུ་དཀར་ལ་དམར་ཆགས་པ་ནར་ར་ར་མར་བབས་མེ་གསོས་བྱས། བདེ་དྲོད་ཆེར་འབར་དབུ་མའི་ནང་ཐམས་ཅད་ཁྱབ། ཇེ་ཆེར་འབར། སྤྱི་བོ། མགྲིན་པ། སྙིང་ག་གསང་གནས་ཁྱབ་པར་བདེ་དྲོད་ཡེ་ཤེས་ཀྱི་མེ་བཟོད་པར་དཀའ་བས་ཁྱབ། མཐར་བ་སྤུའི་ཁུང་ཐམས་ཅད་ནས་ནང་གི་བདེ་དྲོད་མེའི་འོད་ཟེར་ཕྲ་མོ་འབར་བས་ལུས་ཕྱི་ནང་དྲོད་དུ་འབར་ཞིང་། རླུང་གིས་བསིལ། མེས་དྲོས། ཁམས་ཀྱི་བདེ་བ་ཆེན་པོར་ཁྱབ་པ་ལ་མ་ཡེངས་པར་བརྩོན་པས་བསྒོམ་ཞིང་། རྒྱུ་ཞབས་འུབས་སེ། ཨ་ལོང་ཚུམ་མེ། འོག་རླུང་ཐེན་ནེ་བྱས་པས། སྟེང་རླུང་རྩོལ་མེད་ནང་དུ་བསྐྱིལ་དུས་འདོད་པ་ཡིན་ནོ། །

དེ་ལྟར་བསྒོམས་པས་དང་པོ་ཁམས་བདེ་བ་ཆེན་པོར་ཁྱབ་པ་ལ་མ་ཡེངས་པར་བརྩོན་པས་བསྒོམ་ཞིང་། དྲོད་ཁོལ་བུར་སྐྱེ། དེ་ནས་མཆེད་དེ་ཁྱབ་པར་སྐྱེའོ། །ཞག་བདུན་དྲོད་ཀྱི་རྟགས་དང་པོ་འབྱུང་སྟེ། ལུས་རྔུལ་བ་དང་། ཁ་(༡༨༨)སྐམ་པ་དང་། ཤེས་པ་བདེའོ། །དེ་ནས་གོས་ཀྱང་ཇེ་སྲབ་ལ་བྱས་པས་བཅུ་བཞི་ན་ཁྱབ་པར་སྐྱེའོ། །ཉི་ཤུ་རྩ་གཅིག་ན་བརྩོན་པ་རབ་རྣམས་གོས་རྐྱང་རེས་ཆོག་པར་འགྲོ། འབྲིང་ཟླ་བ་གཅིག་ནས་འགྲོའོ། །ཐ་མ་ཟླ་བ་གཉིས་ནས་འགྲོའོ། །དེའི་བར་ཁ་ཟས་བཅུད་ཅན་བརྟེན། ཤ་ཆང་མེད་དུ་མི་རུང་ངོ་། །དངོས་སུ་ཉམས་དགའ་བྱིན་འཐིབས། བག་དྲོ། ཤེས་པ་བདེ། གཟི་བྱིན་སྐྱེ། ཏིང་འཛིན་གསལ། རྨི་ལམ་དུ་བུད་མེད་ཀྱི་ཚོགས་འདུ། མཁའ་འགྲོས་ལུང་སྟོན། བླ་མས་ཆོས་གསུངས་པ་ལ་སོགས་པ་ངོ་མཚར་ཅན་མང་པོ་འབྱུང་ངོ་། །སྔོན་འགྲོ་རྩ་སྦྱོང་བའི་མན་ངག་བསྟན་ཟིན་ཏོ། །

གཉིས་པ། བརྟེན་པ་རླུང་གི་མན་ངག

གཉིས་པ་བརྟེན་པ་རླུང་གི་མན་ངག་ལ། རླུང་གི་ཁ་དོག་དབྱིབས་གྲངས་ལ་སོགས་པ་བསླབ་ཐབས་མང་དུ་གསུངས་ཀྱང་། རང་གནད་མྱོངས་པ་ངེས་པ་དང་བསྟུན་ནས་སྒོམ་པ་ལ། བླ་མའི་རྣལ་འབྱོར་དང་། ཕག་མོར་གསལ་བ་སྔར་དང་འདྲ་བའི་དབུ་མ་སྔོ་སྐྱ། གཡས་རོ་མ་དཀར། གཡོན་རྐྱང་མ་དམར། དབུ་མའི་འོག་སྒོར། རོ་རྐྱང་གི་སྣ་གཉིས་ཚུད་པའི་འཛོམ་དེར་ཐོད་པ་ཕྱི་དཀར་ལ་ནང་དམར་བ་ཡེ་ཤེས་ལྔའི་རླུང་གིས་གང་བའི་དབུས་ན། རིག་པ་རྡོ་རྗེ་སྔོན་པོ་མཐེ་བོང་ཙམ་ལས། ཡེ་ཤེས་ལྔའི་ཁ་དོག་གི་རླུང་ལྔ་འཇའ་འོད་ལྟར་འཕྲོས་པས་དབུ་མའི་ནང་གང་བ་ལ་ཤེས་པ་གཏད་ལ། རླུང་ཕྱིར་དལ་བུས་འཕངས། ཐུན་ཐུང་གཅིག་ཕྱིར་བཟུང་ནས། ནང་དུ་ཟུང་འཇུག་སྔར་བཞིན་སྣོད་བཅུད་ནམ་མཁར་གྱུར་པ་སྣ་བུག་གཉིས་ནས་རོ་རྐྱང་ན་མར་ཞུགས་པས། ཐོད་པར་ཐིམ། གསལ་སྟོང་གི་ཡེ་ཤེས་སྐྱེས། རྡོ་རྗེ་ལས་འོད་ལྔ་འཕྲོས། དང་པོ་དབུ་མ་གང་། ཡུན་རིང་ཞིག་ན། ལྟེ་བ། སྙིང་ག །སྤྱི་བོ། ལུས་ནང་གང་། བ་སྤུ་ནས་ཐོན་ཕྱི་དང་ལུང་པ་དང་། ཡུལ་ཁམས་དང་། འཇིག་རྟེན་ཐམས་ཅད་ཡེ་ཤེས་ལྔའི་རླུང་གིས་འཇའ་འོད་ལྟར་གང་བ་ལ་དམིགས་ལ། རླུང་རང་མལ་དུ་ཇི་ཙམ་གནས་བཞག་ནས། ཡང་སྔར་བཞིན་འཕང་གཟུང་བྱའོ། །ཕྱིར་དངོས་སུ་བཟུང་བས་ནང་དུ་ཤུགས་ལ་ཟིན་ནས་གསལ་བདེ་མི་རྟོག་པའི་ཏིང་(༡༨༩)འཛིན་སྐྱེ་བ་ནི། མ་ནིང་གི་རླུང་སྦྱོར་ཞེས་བྱ་སྟེ། འདིའི་གནད་དམ་པའོ། །ཐུན་རྗེས་ཕྱི་ནམ་མཁའ་དག་པ་ཐམས་ཅད་ནང་དུ་ཆུད། ནང་གི་རླུང་ཐམས་ཅད་རྡོ་རྗེ་ལ་འདུས། རྡོ་རྗེ་ཡང་ཇེ་ཕྲ་ལ་མཐར་ཅི་ཡང་མི་དམིགས་པའི་ངང་དུ་དར་ཅིག་ཅི་ཙམ་གནས་པ་བསྒོམས་ལ། ཧ་དྲག་པོ་སུམ་བསྟུད་བརྗོད་པ་དང་། ཡན་ལག་བཞི་འཕྲད་དུས་གཅིག་བྱས་པས། རླུང་དུག་སེལ་ཏེ་གེགས་མི་འབྱུང་བའི་གནད་དོ། །རླུང་སྦྱོར་འདི་གཞན་དང་མི་འདྲ་སྟེ། གེགས་མེད་ལ་ཡོན་ཏན་སྐྱེ་བར་སླ་བ་ཡིན་ནོ། །དེ་ལྟར་བྱས་པས་ཞག་བདུན་ན་གསལ་ལ་རྟོག་པ་མེད་པའི་ཏིང་ངེ་འཛིན་རང་དྭངས་སུ་སྐྱེ། བཅུ་བཞི་ན་ཕྱི་ནང་གཅིག་ཏུ་འདྲེས་པའི་ཉམས་འཆར། ཉི་ཤུ་རྩ་གཅིག་ནས་དྭངས་ལ་རྙོག་པ་མེད་པའི་རིག་པ་ཟང་ཐལ་དུ་མཐོང་སྟེ། སྒོམ་ཁང་དུ་ཡེ་ཤེས་ལྔའི་སྣང་བ་མཐོང་བ་དང་། མུན་པ་མེད་པར་སྐྱ་སེང་ངེ་བ་དང་། རྩིག་པའི་ཕྱི་རོལ་ཟང་ཐལ་དུ་མཐོང་བ་དང་། ཆ་མཐུན་པའི་མངོན་ཤེས་གཞན་གྱི་སེམས་གྱི་འགྱུ་བ་ཕྲ་མོ་ཤེས་པ་དང་། མངོན་ཤེས་དང་འདྲ་རུང་གི་ཤེས་པ་ཀློང་རྡོལ་བས་ད་གཟོད་མི་ལ་སོགས་པ་གང་བྱུང་གི་དོན་སྤྱི་གསལ་བ་ལམ་འཆར་བ་ཤེས་པ་དང་། གཉིད་སྲབ་སྟེ་རྨི་ལམ་ཟིན་པ་དང་། ཤེས་རབ་ཀློང་རྡོལ་དུ་སྐྱེ་བ་དང་། མགྱོགས་ཤིང་ལུས་ཡང་བ་དང་། གཞོན་ཤ་ཆགས་པ་ལ་སོགས་པ་འབྱུང་ངོ་། །རླུང་གི་མན་ངག་བསྟན་ཟིན་ཏོ། །

གསུམ་པ། ཁམས་བདེ་བ་ཆེན་པོའི་མན་ངག

གསུམ་པ་ཁམས་བདེ་བ་ཆེན་པོའི་མན་ངག་ལ། རང་ལུས་ཐབས་ལྡན་དང་། གཞན་ལུས་ཤེས་རབ་ལ་བརྟེན་པ་གཉིས་ལས། དང་པོ་ནི། བསླབ་ཚུལ་དུ་མ་གསུངས་ཀྱང་། ལག་ཁྲིད་ངེས་པ་ནི། བླ་མའི་རྣལ་འབྱོར་གྱི་རྗེས་ལ། རང་ཉིད་ཀུན་བཟང་ཡབ་ཡུམ་མཐིང་ག་མཉམ་སྦྱོར་རྡོ་རྗེའི་སྐྱིལ་ཀྲུང་ཅན་རྩ་གསུམ་འཁོར་ལོ་བཞི་དང་བཅས་པ་གསལ་བཏབ་ལ། གསང་བར་རྩ་གསུམ་འདུས་པའི་མདོར་ཤེས་རབ་བྱང་ཆུབ་སེམས་ཀྱི་ས་བོན་ཨ་དམར་པོ་ཉི་མ་ལ་གནས་པ་བདེ་དྲོད་མེའི་རང་བཞིན་དུ་འབར་བ་དང་། སྤྱི་བོར་ཐབས་བྱང་ཆུབ་སེམས་ཀྱི་ས་བོན་ཧཾ་དཀར་པོ་ཐུར་དུ་ལྟ་བ་མཐེ་བོང་ཙམ་ཟླ་བ་(༡༩༠)ལ་གནས་པར་བསྒོམས་ལ། འོག་རླུང་དྲག་ཏུ་འཐེན་སྟེང་རླུང་རང་སོར་གནས། སྣོད་བཅུད་དྭངས་མ་ཡེ་ཤེས་ཀྱི་བདུད་རྩི་དཀར་ལ་དམར་མདངས་ཆགས་པར་གྱུར་བ་སྣ་བུག་རོ་རྐྱང་ནས་སུམ་མདོའི་ཨ་ལ་ཞུགས་པས། བདེ་དྲོད་ཀྱི་མེ་སྐུད་པ་ཙམ་ཡར་འབར་བ་ཧཾ་ལ་རེག་པས། བདུད་རྩི་དཀར་དམར་གྱི་རྒྱུན་བབས། དབུ་མའི་ནང་དྭངས་མའི་དྭངས་མས་གང་། ཡང་མེ་འབར་བདུད་རྩི་བབས་པས་སྤྱི་གཙུག་བདེ་ཆེན་འཁོར་ལོ་གང་། དགའ་བའི་ཡེ་ཤེས་སྐྱེས། མགྲིན་པར་བབས། ལོངས་སྤྱོད་འཁོར་ལོ་གང་། མཆོག་ཏུ་དགའ་བའི་ཡེ་ཤེས་སྐྱེས། སྙིང་གར་བབས། ཆོས་ཀྱི་འཁོར་གང་། དགའ་བྲལ་གྱི་ཡེ་ཤེས་སྐྱེ། ལྟེ་བ་ནས་གསང་བར་བབས། སྤྲུལ་པའི་འཁོར་ལོ་དང་། བདེ་སྐྱོང་འཁོར་ལོ་གང་ལྷན་ཅིག་སྐྱེས་པའི་ཡེ་ཤེས་སྐྱེས། ཨ་ལས་བདེ་དྲོད་ཡེ་ཤེས་ཀྱི་རང་བཞིན་ཧཾ་ལས་དྭངས་མ་ཆེར་བབས་པ་ཙམ་གྱིས་སྐྱེས། བཟོད་པར་དཀའ་བ་མཆོག་ཏུ་བདེ་བ་ཆེན་པོའི་ཡེ་ཤེས་སྐྱེས་པ་ལ་སེམས་བཟུང་ལ། རླུང་དལ་བུས་འཐེན་ལ་སྔར་བཞིན་བསྒོམས་པ་ནི་ཡས་བརྟན་གྱི་དགའ་བ་ཡེ་ཤེས་བསྒོམ་ཚུལ་ལོ། །དེ་ནས་གསང་བའི་དྭངས་མ་ལྟེ་བར་ཐིམ་བདེ་བའི་ཡེ་ཤེས་རོ་གཅིག་བསྒོམས་པས་དགའ་བའི་ཡེ་ཤེས། ལྟེ་བའི་དྭངས་མ་སྙིང་གར་ཐིམ་དར་ཅིག་བདེ་བར་བསྒོམས་པས་མཆོག་དགའི་ཡེ་ཤེས། སྙིང་གའི་དྭངས་མ་མགྲིན་པར་ཐིམ། དར་ཅིག་བསྒོམས་པས་དགའ་བྲལ་གྱི་ཡེ་ཤེས། མགྲིན་པའི་དྭངས་མ་སྤྱི་བོར་ཐིམ། དར་ཅིག་བསྒོམས་པས་ལྷན་ཅིག་སྐྱེས་དགའི་ཡེ་ཤེས། སྤྱི་བོའི་དྭངས་མ་ཡང་དབུ་མའི་ཧཾ་ལ་འདུས། ཨ་ཧཾ་གཉིས་སུ་མི་རྟོག་པ་ཅིར་ཡང་མ་གྲུབ་པ། སྟོང་པ་ཆེན་པོའི་ངང་ལ་དར་ཅིག་གློད་ནས། དར་ཅིག་བསྒོམས་པས། ཀ་དག་གཞིའི་ཡེ་ཤེས་ཀུན་ཏུ་བཟང་པོའི་དགོངས་པ། མས་བརྟན་གྱི་དགའ་བཞིའི་ཡེ་ཤེས་ཆོས་ཟད་ཆེན་པོའོ། །དེ་བརྟན་ནས་ཡང་རྩ་གསུམ་འཁོར་ལོ་བཞི་སྔར་བཞིན་བསྒོམས་ལ། སྤྱི་བོའི་ཧཾ་དང་དྭངས་མ་མགྲིན་པར་འདུས་པས། དར་ཅིག་བདེ་བར་བསྒོམས་པ་དགའ་བའི་ཡེ་ཤེས། མགྲིན་པའི་དྭངས་མ་སྙིང་གར་ཐིམ། དར་ཅིག་བསྒོམས་པ་མཆོག་དགའི་ཡེ་ཤེས། སྙིང་ཁའི་དྭངས་མ་ལྟེ་བར་(༡༩༡)ཐིམ། དར་ཅིག་བསྒོམས་པ་དགའ་བྲལ་གྱི་ཡེ་ཤེས། ལྟེ་བའི་དྭངས་མ་གསང་བར་ཐིམ། དར་ཅིག་བསྒོམས་པ་ལྷན་ཅིག་སྐྱེས་དགའི་ཡེ་ཤེས། དེ་དབུས་སུ་འདུས་པ་ཨ་ཧཾ་གཉིས་སུ་མེད་པ་བདེ་བ་ཆེན་པོའི་དོན་ལ་དར་ཅིག་བསྒོམས་པ་ཀ་དག་གཞིའི་ཡེ་ཤེས་ཀུན་ཏུ་བཟང་མོའི་དགོངས་པ་བློ་བྲལ་བདེ་སྟོང་ཆེན་པོའམ། ཡུམ་གྱུར་གྱི་དགའ་བའི་ཡེ་ཤེས་བསྒོམ་ཚུལ་ལོ། །དེ་བརྟན་ནས་ཡང་སྔར་བཞིན་རྩ་གསུམ་འཁོར་ལོ་བདུད་རྩིས་གང་བར་བསྒོམས་པའི་རྗེས་ལ། སྤྱི་བོ་ནས་དྭངས་མ་ཐམས་ཅད་ཧཾ་ལ་འདུས་པ་མགྲིན་པར་བབས། བདེ་བའི་ངང་ལ་བསྒོམས་པ་དགའ་བའི་ཡེཤེས། གསང་བ་ནས་དྭངས་མ་ཐམས་ཅད་ཨ་ལ་འདུས་པ་ལྟེ་བར་ཐིམ། དར་ཅིག་བསྒོམས་པ་མཆོག་དགའི་ཡེ་ཤེས། མགྲིན་པའི་དྭངས་མ་ཐམས་ཅད་ཧཾ་ལ་འདུས་པ་སྙིང་གར་ཐིམ་པ་དར་ཅིག་བསྒོམས་པ་དགའ་བྲལ་གྱི་ཡེ་ཤེས། ལྟེ་བའི་དྭངས་མ་ཐམས་ཅད་ཨ་ལ་འདུས་ཏེ་སྙིང་ཁར་ཐིམ་པ་དར་ཅིག་བསྒོམས་པ་ལྷན་ཅིག་སྐྱེས་དགའི་ཡེ་ཤེས། སྙིང་ཁའི་དྭངས་མ་དཀར་པོ་ཐམས་ཅད་ཧཾ་ལ་འདུས། དམར་པོ་ཐམས་ཅད་ཨ་ལ་འདུས། ཨ་ཧཾ་གཉིས་གཅིག་ཏུ་འདྲེས་ནས་གཉིས་སུ་མི་རྟོག་པ་ལ་དར་ཅིག་བསྒོམས་པ་ཀུན་བཟང་ཡབ་ཡུམ་མཉམ་པའི་ཡེ་ཤེས། དེ་ཡང་ཇེ་ཕྲ་ལས་ཅི་ཡང་མེད་པའི་ངང་ལ་དར་ཅིག་བསྒོམས་པ་མཉམ་པ་ཆེན་པོའི་ཡེ་ཤེས། དེའི་རྗེས་ལ་སྒོམ་མི་བསྒོམས་ལས་འདས་པའི་བློ་བདེ་གསལ་རྟོག་མེད་སྟོང་པར་རང་ཤར་ཏེ་གཟུང་འཛིན་གང་ཡང་མེད་པ་ནི། ཐབས་ཐམས་ཅད་ཀྱི་རྫོགས་རིམ་ཕྲ་མོ་བསྒོམས་པའི་འབྲས་བུ། ཤེས་རབ་ཐམས་ཅད་ཀྱི་ཡེ་ཤེས་ཟབ་མོར་རྟོགས་པའི་མཐར་ཐུག །རྫོགས་པ་ཆེན་པོ་རང་བྱུང་ཡེ་ཤེས་བློ་བྲལ་འཛིན་པ་མེད་པ་དེ་ཁོ་ན་ཉིད་དོན་དམ་པའི་བདེན་པ། བསམ་བརྗོད་ལས་འདས་པའི་ཡེ་ཤེས་མངོན་དུ་གྱུར་པ་ཞེས་བྱའོ། །ཡས་བརྟན་མཉམ་པ་ཆེན་པོའི་བར་གྱི་བསྒོམ་ཚུལ་ཐམས་ཅད་ལམ་ཡིན་ལ། རང་བྱུང་གི་ཡེ་ཤེས་སྐྱེས་པ་ལམ་གྱི་འབྲས་བུ་རྫོགས་པ་ཆེན་པོའི་མཐར་ཐུག་གི་གཉེར་བྱ་དོན་དམ་བདེན་པའོ། །འདི་ཉིད་ངོས་ཟིན་ནས་བསྒོམས་པས་ཚེ་འདིར་མཆོག་གི་གོ་འཕང་ཐོབ་པའོ། །ཚུལ་(༡༩༢)འདི་དག་ཀྱང་ཡས་བརྟན་གྱི་དགའ་བ་བཞི་ལ་དྭངས་མ་དབབ། མས་བརྟན་གྱི་དགའ་བ་བཞི་ལ་རང་གནས་སུ་དྲངས་ལ་བཟུང་བ་ཀུན་ཏུ་བཟང་པོའི་དགོངས་པ་ཡེ་ཤེས་ཆེན་པོར་སྦ་བའོ། །དེ་ནས་མར་ཐིམ་ཡུམ་གྱི་དགའ་བཞིའི་དུས་ན་དྭངས་མ་བསྐྱིལ་ཞིང་ལམ་དུ་གཞུག་པས་རྡོ་རྗེའི་བུམ་པར་གཟུང་བ་སྟེ། ཀུན་ཏུ་བཟང་མོའི་དགོངས་པ་ཡེ་ཤེས་ཆེན་པོར་སྦའོ། །དེ་ནས་སྟེང་འོག་གི་འཁོར་ལོ་བཞི་ལ་གཅིག་ལ་གཅིག་ཐིམ་པས་སྙིང་གར་བརྟན་པ་གཉིས་སུ་མེད་པའི་དགའ་བ་བཞིའི་དྭངས་མ་ཆོས་ཉིད་དུ་དགྲམ་ཞིང་ཀ་དག་ཏུ་ལ་བཟླ་བ་ཀུན་བཟང་ཡབ་ཡུམ་གཉིས་སུ་མེད་པའི་དགོངས་པས་ཡེ་ཤེས་ཆེན་པོར་སྦའོ། །དེ་ནས་སྒོམ་པ་མངོན་དུ་གྱུར་པའི་འབྲས་བུ་རང་བྱུང་རྫོགས་པ་ཆེན་པོའི་ཡེ་ཤེས་མཐོང་བ་ནི་དྭངས་མ་ཤིན་ཏུ་དྭངས་མ་ཆེན་པོ་སྦ་བ་སྟེ། འཁོར་བ་མྱང་འདས་སུ་གྲོལ། སྣང་བ་སྟོང་བར་གྲོལ། འཁོར་འདས་དབྱིངས་སུ་ཐིམ། ཆོས་སྐུ་རང་མལ་དུ་འཁྱིལ། ནང་དབྱིངས་ཟད་སར་ཕྱིན། ཀ་དག་དང་ལྷུན་གྲུབ་གཉིས་མེད་དག་པ་མཐར་ཐུག་གི་གྲོལ་ས་ཆེན་པོ་གང་ཡིན་པ་དུས་དེར་གསལ་བ་ཞེས་བྱའོ། །རྒྱུད་ཀུན་ནས་དྭངས་མ་ཆེན་པོས་རྡོ་རྗེ་འཆང་གི་སྐུ་འགྲུབ་པར་གསུངས་པ་ཚུལ་འདི་ཡིན་ནོ། །གནད་འདི་མ་གོ་བར་ཀུན་རྫོབ་ཀྱི་དྭངས་མ་དངོས་དེས་རྡོ་རྗེ་འཆང་གི་སྐུ་འགྲུབ་ཟེར་བ་ཧ་ཅང་ཐལ་བའི་རྡོལ་ཐབས་སུ་སྨྲ་བ་སྟེ། རྡོ་རྗེ་འཆང་གི་རིག་པ་མངོན་པར་འདུས་མ་བྱས་པའི་ཆོས་སྐུ་འཇིག་འབྲལ་མེད་པ་དེ། ཀུན་རྫོབ་རྒྱུའི་དྭངས་མས་བསྒྲུབ་མི་དགོས་མི་འགྲུབ། འགྲུབ་ན་འདུས་བྱས་ཀྱི་མཐའ་འཇིག་པས་ཆོས་སྐུ་འཇིག་པར་འགྱུར་རོ། །དེ་ནས་དྭངས་མ་དྭངས་མ་ཆེན་པོར་སྦས་དུས་དྭངས་མ་ཆེན་པོ་རིག་པའི་རང་ངོ་ཅི་ཡིན་པ་མངོན་དུ་རང་རིག་པ་སྟེ། དེ་ཉིད་བརྟན་པས་ཆོས་སྐུ་རང་ས་ཟིན་པས་དྭངས་མ་ཆེན་པོས་རྡོ་རྗེ་འཆང་འགྲུབ་ཅེས་གསུངས་པ་ཡིན་ནོ། །འདི་ནི་གསང་བ་སྙིང་ཏིག་གི་ཆ་རྐྱེན་རང་ལུས་ཐབས་ལྡན་གྱི་དགོངས་པ་ཤིན་ཏུ་གསང་བའོ། །སྣོད་ལྡན་རེ་ལས་མང་དུ་མི་སྤེལ་ལོ། །

གཉིས་པ་གཞན་ལུས་ཤེས་རབ་ལ་བརྟེན་པ་ལ། སྔོན་དུ་རང་ལུས་འབྱོངས་ཤིང་། དྭངས་མ་འབེབས་བཟློག་ལ་དབང་ཐོབ་པ་ཞིག་བྱ་སྟེ། གནད་གཞན་བསྟན་པ་ལས། ཁྱད་པར་ཐིག་ལེ་ནོར་བུའི་ནང་ནས་ཨ་ཝ་དྷུ་ཏི་ནས་སྤྱི་བོའི་ཧཾ་ལ་ཐུག་པར་ཧཱུྃ་གི་བ་ཐག་བརྒྱུས་པ་ལྟར་ཡོད་པས། མས་ཡར་གཅིག་ལ་གཅིག་ཐིམ་དུ་བསམ་ཞིང་། ལུས་གནད་མིག་བཟློག །ལྕེ་རྩེ་རྐན་ལ་དྲིལ། ཨ་ལོང་བཙུམ། གསུས་པ་སྒལ་པར་འུབ་ཀྱིས་སྦྱར། སྐྱིལ་ཀྲུང་གི་སོར་མོ་བསྐུམ། ལག་སོར་བསྐུམ་ལ་བརླ་གཡས་གཡོན་གྱི་སྟེང་ལོགས་སུ་བཟུང་། རླུང་གནད་ཧཱུྃ་ཞེས་དྲག་ཏུ་ཡར་འཐེན་ཕྱིར་བཟུང་ནས། ཧཾ་ཡང་རང་ཐིམ་ལ་ཅི་ཡང་མེད་པར་སྟོང་པའི་ངང་ལ་དར་རེ་བཞག་པ་དེ་ལ་ཞག་ཉི་ཤུ་རྩ་གཅིག་བསླབས་པས། རྡོ་རྗེ་སྦུབས་སུ་ནུབ། ཐིག་ལེ་གྱེན་དུ་དྲངས། རང་གནས་ཀ་དག་ཏུ་ཁྲེམས་པ་གསུམ་དུས་གཅིག་འབྱུང་ངོ་། །ཚད་ནི་དྭངས་མ་རྡོ་རྗེའི་རྩ་བར་བབས་དུས་གྱེན་དུ་བཟློག །དེ་ནས་བུམ་པར་བྱུང་དུས་བཟློག །དེ་ནས་རྩེ་མོར་བྱུང་དུས་བཟློག་པས། དེ་མ་ཐག་ཏུ་མ་ཟག་པར་སྤྱི་བོར་དྲངས། རང་མལ་དུ་ཁྲེམས། ཅི་ཡང་མི་དམིགས་པའི་ངང་ལ་འབད་མེད་དུ་གནས་པའོ། །ཐུན་རྗེས་རྐང་ལག་ཕྱིར་སྤྲུག །ཧ་དྲག་ཏུ་འདོན། མགོ་དྲག་ཏུ་སྒྲིལ་ལོ། །གནད་འདི་སྔོན་དུ་འགྲོ་བའི་རིམ་པའོ། །དངོས་གཞི་ལ་ཕྱག་རྒྱ་མ་མཚན་དང་ལྡན་པ་བཙལ་ལ། དགྱེས་པ་བསྐྱེད་པ་དང་། འོ་བྱ་བ་ལ་སོགས་པས་སྔོན་དུ་རྩ་བསླང་ཞིང་བདེ་བ་རྒྱས་པར་བྱས་ལ། རྩ་སྣ་བསྐྱེད་པ་དང་། ཡབ་ཡུམ་ལྷར་གསལ་བའི་མཁའ་གསང་རྡོ་རྗེ་དང་པདྨར་བྱིན་བརླབས་མཉམ་པར་སྦྱར་བ་དང་། རླུང་གནད་འཇམ་རླུང་ཅུང་ཟད་བཟུང་བས། དང་པོ་ཐིག་ལེ་སྤྱི་བོ་ནས་གསང་བའི་ཡས་བརྟན་གྱི་དགའ་བ་བཞི་ཕབ་ལ། རྡོ་རྗེ་བུམ་པར་བཟུང་ཞེས་བསྐྱིལ་ཏེ། ཡུམ་གྱི་དྭངས་མ་འུབ་འུབ་རྡོ་རྗེའི་ནང་དུ་འདུས་པར་བསམ་ཞིང་། ཡུལ་གྱི་རྩ་གསུམ་གང་རྙེད་དེ་རྡོ་རྗེའི་བུ་གར་ཚུད་པ་ནས་དྲང་། གསུམ་ཀ་རྙེད་ན་གཡོན་པའི་རྩ་སྣ་གཅུད་ལ་རླུང་དང་དམིགས་པས་དྲང་ངོ་། །འདྲོངས་པའི་རྟགས། ཡུམ་མི་བཟོད་པར་སྐད་འབྱིན་ཞིང་འུབ་འུབ་པར་ཡོང་ངོ་། །ཡབ་དང་ཡུམ་གྱི་དྭངས་མ་གཉིས་རྡོ་རྗེ་དང་པདྨའི་རྩེར་གཉིས་ཤོར་གཉིས་མཉམ་གྱི་དུས་དེར། (༡༩༤)གསལ་ལ་རྟོག་པ་མེད་པ། བདེ་ལ་ངོ་བོས་སྟོང་པ། བློ་བྲལ་འཛིན་པ་མེད་པའི་ཡེ་ཤེས་སྐྱེ་བས། སྔར་རང་ལུས་ཀྱི་སྐབས་སུ་ཀུན་བཟང་ཡབ་ཡུམ་གྱི་དགོངས་པ་དྭངས་མ་རྡོ་རྗེའི་རྩ་བར་བབས་དུས་ཚང་བར་ངོས་གཟུང་། ཡུམ་གྱི་དགོངས་པ། བུམ་པར་བབས་དུས་ངོས་གཟུང་། གཉིས་སུ་མེད་པའི་དགོངས་པ་མཉམ་པར་རྩེ་མོར་ངོས་གཟུང་། མཉམ་པ་ཆེན་པོ་བདེ་ཆེན་སྟོང་ཆར་ཕེབས་དུས་ངོས་གཟུང་། དེ་ནས་དེ་ཐམས་ཅད་ཀྱི་འཛིན་རྟོག་གང་ཡང་མེད་པར་ཕྱལ་པ་རིས་མེད། ནམ་མཁའ་དྭངས་པ་འདྲ་བའི་ངང་སྟོང་གསལ་བདེ་ཕྱམ་ཞིག་ཏུ་གྱུར་དུས། རང་བྱུང་གི་ཡེ་ཤེས་རྫོགས་པ་ཆེན་པོ་དོན་གྱི་ཡེ་ཤེས་ངོས་བཟུང་ལ་ཇི་སྲིད་གཟུང་འཛིན་གྱི་རྟོག་པ་མ་སྐྱེས་ཀྱི་བར་དུ་བསྒོམ། དེའི་ངང་དེར་ཡབ་ཡུམ་གཉིས་ཀ་རྩ་བཟང་ན་ཉིན་མཚན་བདེ་བ་ཆེན་པོར་འཁོར་བའང་གསུངས་ལ། རིགས་ཅན་གྱི་ཡུམ་བཟང་ན་མི་གཅིག་ཟན་ཟ་ཡུན་ལྔ་ཙམ་འཛིན་རྟོག་མེད་པའོ། །རྩ་བར་ཡབ་ལ་དར་རེ་གསལ་བདེ་མི་རྟོག་པའི་ངང་འཆར་རོ། །དེ་ཡང་ངོས་བཟུང་ལ་དྭངས་མ་རྡོ་རྗེའི་བུམ་པ་ཉིད་དུ་རླུང་དང་། དམིགས་པས་བཟུང་ལ། ཡེ་ཤེས་ངོས་ཟིན་ཞིང་དེའི་ངང་ལ་སྲོད་ནས་གུང་གི་བར་ལ་སོགས་པར་ཇི་སྲིད་འདོད་ཀྱི་བར་མཉམ་པར་གཞག་ཅིང་། དབབ་པ་དང་གཟུང་བའི་གནད་ཀྱིས་བདེ་བ་ཆེན་པོའི་ཡེ་ཤེས་མངོན་དུ་བྱའོ། །རྩ་ངན་ན་དེ་མ་ཐག་འཆོར་བས་ཐིག་ལེ་བཟུང་བ་ཡང་རྩོལ་བ་ཆེན་པོར་དགོས་སོ། །རྩ་བཟང་ན་ཡབ་ཀྱིས་འབད་པ་མི་དགོས་པར་རང་ཟིན་དུ་གནས་པ་ཡོད་དོ། །དེ་ནས་དྭངས་མ་དཀར་དམར་དྲོང་བ་ལ་རྐང་ལག་གི་སོར་མོ་བསྐུམ། མིག་གྱེན་དུ་བཟློག །རྒྱུ་ཞབས་འུབ་ཀྱིས་བསྡུ། རླུང་གྱེན་ལ་དྲག་ཏུ་འཐེན། དམིགས་གནད་ཡུམ་གྱི་དྭངས་མ་ཐམས་ཅད་ནར་ར་ར་རྡོ་རྗེའི་བུ་ག་ནས་དྭངས་མ་དཀར་པོ་དང་འདྲེས་པ་ལྟེ་བ་ནས་ཡར་གྱི་སྤྱི་བོའི་གཙུག་གི་བར་ཐིམ་པས་ཡས་བརྟན་གྱི་དགའ་བ་བཞི་ངོས་བཟུང་ལ། མགོ་འདར་བ་ལྟར་སྒྲིལ་བ་གློད་ནས། ཅི་ཡང་དམིགས་འཛིན་མེད་པའི་ངང་དུ་ལ་བཟླ་བ་ལ་ཕྱམ་གདལ་བར་གཞག་གོ། །དེ་ལ་བཞེངས་ནས། ལུས་གཞུ་འགེངས་དང་། ཡན་ལག་སྤྲུག་པ་དང་། (༡༩༥)གསིག་པ་ལ་སོགས་བྱས་ལ། སིའི་སྒྲ་བརྗོད་པས་ཐིག་ལེ་རང་མལ་དུ་ཁྲེམས་ནས་གེགས་མེད་པར་སྣང་བ་བདེ་ཡངས་སུ་སྤྱོད་དོ། །དེ་དག་གི་ཚེ་ཡབ་ཡུམ་མཉམ་པར་སྦྱར་བ་ལས་དྭངས་མ་གསང་བར་བབས་པ་ཀུན་ཏུ་བཟང་མོའི་ཡེ་ཤེས། རྡོ་རྗེ་པདྨའི་རྩེར་ཟིན་ནས་ཅིར་ཡང་མི་རྟོག་པ་གཉིས་མེད་རང་བྱུང་དེ་ཁོ་ན་ཉིད་ཀྱི་ཡེ་ཤེས། དེ་ནས་དྲངས་ཏེ་ཡར་ཐིམ་ནས་ཡིད་ལ་མི་བྱེད་པ་ཀུན་ཏུ་བཟང་པོའི་ཡེ་ཤེས་དང་གསུམ་དུ་ཡང་ངོས་གཟུང་བར་བྱའོ། །འདི་ནི་འདོད་ཆགས་བདེ་བ་ཆེན་པོར་གྱུར་པ་ཐབས་ལམ་གསང་བའི་མན་ངག་སྟེ། འདོད་ཆགས་རང་གའི་འཛིན་རྟོག་ཏུ་མ་བྱས་ལ། མཉམ་ཉིད་དོན་གྱི་དགོངས་པ་དུས་ཀྱི་གནད་ལས་ཉམས་སུ་བླང་བར་བྱའོ། །སྦྱོར་བ་ཡས་བརྟན་བཞི། རྗེས་མས་བརྟན་བཞིའི་ཐབས་ཀྱིས་ཐུན་མོང་གི་དངོས་གྲུབ་ཚེ་རིང་བ་ནད་མེད་པ། རྒ་ཤི་ཟིལ་གྱིས་གནོན་པ། མཁའ་འགྲོ་མ་དབང་དུ་འདུ་བས་བུད་མེད་ཀྱི་ཚོགས་འདུ་ཞིང་ཟས་ནོར་གྱི་དངོས་གྲུབ་འབྱུང་བ་ལ་སོགས་པ་ཐོབ་ལ། དངོས་གཞི་རྡོ་རྗེ་རྩེ་མོ་དབྱིངས་དང་ཡེ་ཤེས་འདུ་འབྲལ་མེད་པར་རང་བྱུང་གི་ཡེ་ཤེས་ངོས་བཟུང་ནས་བསྒོམས་པས། ལྟ་བ་དང་དགོངས་པ་དང་ཏིང་ངེ་འཛིན་ལྷུན་གྲུབ་ཏུ་གསལ་བས། འབྲས་བུ་ཆོས་སྐུ་བདེ་བ་ཆེན་པོ་མཆོག་གི་དངོས་གྲུབ་ཚེ་འདིར་ཐོབ་ནས། རབ་ལུས་དྭངས་མ་ཆེན་པོར་གྲོལ་ཏེ་འཇིག་འབྲལ་མེད་པ་རྡོ་རྗེའི་སྐུ་ཐོབ་ནས་ཚེ་ཉི་ཟླ་དང་མཉམ། སྐྱེ་ཤི་འདས་གྲོངས་མེད་པར་སེམས་ཅན་གྱི་དོན་བྱེད་དོ། །འབྲིང་དབུགས་བོར་བ་དང་། ཆོས་སྐུར་སྐད་ཅིག་ལ་སངས་རྒྱས་སོ། །ཐ་མ་བར་དོར་ཆོས་ཉིད་འོད་གསལ་བདེ་བ་ཆེན་པོར་གྲོལ། ཡང་མཐའ་ཡང་པདྨ་བརྩེགས་པའི་ཞིང་དུ་བརྫུས་ཏེ་སྐྱེས་ནས་མངོན་པར་རྫོགས་པར་སངས་རྒྱའོ། །དེ་བཞི་ནི་བདེ་ཆེན་སྣང་བ་ཡེ་ཤེས་དགའ་བ་བཞིའི་སྟོབས་སུ་གྱུར་པའི་ཕྱིར་ཏེ། དགའ་བ་ཡེ་ཤེས་མཐར་ཕྱིན་པ་ཡང་མཐའ། མཆོག་དགའ་ཐ་མ། དགའ་བྲལ་འབྲིང་། ལྷན་ཅིག་སྐྱེས་དགའ་མཐར་ཕྱིན་དུས་རང་བྱུང་གི་ཡེ་ཤེས་སུ་ཤར་བ་བརྟན་པ་ཐོབ་པར་གྲགས་སོ། །དོན་ལ་དགའ་བ་མཐར་ཕྱིན་པ་མཆོག་དགའ་ཐོབ། མཆོག་དགའ་མཐར་ཕྱིན་དགའ་བྲལ། དགའ་བྲལ་མཐར་ཕྱིན་ལྷན་(༡༩༦)ཅིག་སྐྱེས་དགའ། ལྷན་ཅིག་སྐྱེས་དགའ་མཐར་ཕྱིན་རྫོགས་པ་ཆེན་པོ་རང་བྱུང་གི་ཡེ་ཤེས་ཀུན་ཏུ་བཟང་པོའི་གོ་འཕང་ངོ་། །ཚུལ་འདི་ཉིད་རང་བཞིན་རྫོགས་པ་ཆེན་པོ་ཐབས་མང་བ་སྒོ་ཡངས་པས་ཁྱད་པར་བྱས་ཏེ། ཤིན་ཏུ་གསང་བའི་མན་ངག་མཐར་ཐུག་པའོ། །དགེ་བ་འདི་ཡིས་བདག་དང་འགྲོ་བ་ཀུན། །འཆི་མེད་བདེ་ཆེན་རྡོ་རྗེའི་ལུས་ཐོབ་ནས། །ནམ་མཁའི་མཐའ་མཉམ་གྱུར་པའི་སེམས་ཅན་ལ། །ཕན་བདེའི་ཆར་ཆེན་རབ་ཏུ་འབེབས་པར་ཤོག །ཟབ་མོ་པྲ་ཁྲིད་ཅེས་བྱ་བ། ཐེག་པ་མཆོག་གི་རྣལ་འབྱོར་པ། སྣ་ཚོགས་རང་གྲོལ་གྱིས་བླ་མའི་མན་ངག་ཉིང་ཁུར་ཕྱུང་བ་རང་ཉམས་ངེས་པའི་གནད་དང་བཅས་པ། ཕྱི་རབས་ཀྱི་དོན་དུ་བཀོད་པ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། སྙིང་པོའི་ཡང་བཅུད།

དང་པོ། ཉམས་སུ་ལེན་པ་སྤྱིའི་ཆིངས།

༄༅། །ཟབ་མོ་ཡང་ཏིག་ལས། སྙིང་པོའི་ཡང་བཅུད་བཞུགས་སོ། །

༄༅། སྙིང་པོའི་ཡང་བཅུད་ཅེས་བྱ་བ། དཔལ་ཀུན་ཏུ་བཟངཔོ་ལ་ཕྱག་འཚལ་ལོ། །ལེགས་པའི་ཡོན་ཏན་མ་ལུས་མཐར་ཕྱིན་པ། །དུས་གསུམ་རྒྱལ་བ་རིག་འཛིན་མཁའ་འགྲོར་བཅས། །བླ་མ་དམ་པའི་ཞབས་ལ་ཕྱག་འཚལ་ཏེ། །སྙིང་པོའི་ཡང་བཅུད་གནད་ཀྱི་མན་ངག་བྲི། །

དེ་ལ་ཉམས་སུ་ལེན་པ་སྤྱིའི་ཆིངས། བྱེ་བྲག་གི་ཆིངས། བླ་ན་མེད་པའི་ཆིངས་དང་གསུམ་ལས། དང་པོ་ནི། མངོན་སུམ་གནད་ཀྱི་མན་ངག་ཐོབ་ནས། རབ་ཏུ་དབེན་པའི་གནས་སུ་སྒྲུབ་པ་ལ་རྩེ་གཅིག་ཏུ་ཞུགས་པ་ན། ཐོག་མར་གནད་གསུམ་གཅུན་ནས་རིག་པ་རྟེན་དང་ཕྲལ་བར་བྱ་སྟེ། ལུས་ཀྱི་གནད་བཞུགས་སྟངས་གཅུན་པས་རིག་པ་ཡུལ་དང་ཕྲལ། ངག་གི་གནད་མི་སྨྲ་བར་གཅུན་པས་བརྗོད་དུ་མེད་པའི་དོན་ཁོང་དུ་ཆུད། ཡིད་ཀྱི་གནད་དྲན་བསམ་འཕྲོ་འདུ་གཅུན་པས་གང་བསམ་བསམ་གཏན་དུ་འགྱུར་རོ། །དེ་ནས་ལུས་ངག་ཡིད་གསུམ་རུ་ཤན་འབྱེད་པའི་སྤྱོད་པ་ཟླ་བ་ཕྱེད་དུ་སྦྱངས་པས་སྒོ་གསུམ་གྱི་ཞེན་པ་ཆོད་དེ། འཁོར་བར་མི་འཇུག་ཅིང་སྒྲུབ་པ་ངང་གིས་འཕེལ་བའི་གནད་དོ། །འདི་ཉིད་སྐབས་སུ་སྦྱངས་པས་བོགས་འབྱིན་གྱི་མཆོག་ཏུ་འགྱུར་རོ། །

གཉིས་པ། བྱེ་བྲག་གི་ཆིངས།

གཉིས་པ་བྱེ་བྲག་གི་ཆིངས་ལ་གསུམ་ཚོ་ལྔ་ལས། བཞུགས་(༡༩༧)སྟངས་གསུམ་ནི། སེང་གེ །གླང་པོ། དྲང་སྲོང་ལྟར་བཅས་པས་རླུང་སེམས་གཅུད་ལ་བོར་ཏེ། ཡེ་ཤེས་དངོས་སུ་གསལ་པའི་གནད་དོ། །གཟིགས་སྟངས་གསུམ་ནི། ཆོས་སྐུའི་གཟིགས་སྟངས་དྭངས་མ་འདྲེན་བྱེད་ལ་གཟིགས་པས་སྣང་སྲིད་འོད་གསལ་དུ་བསྒྱུར་བ། ལོངས་སྐུའི་གཟིགས་སྟངས་ཟུར་ལ་ཡུད་ཙམ་དལ་ཞིང་སྙོམས་པར་བལྟས་པས་རང་སྣང་སྤེལ་བ། སྤྲུལ་སྐུའི་གཟིགས་སྟངས་ཕབ་ལ་རབ་ཏུ་ཟིམ་པར་བྱས་པས། འཁྲུལ་སྣང་འོད་གསལ་དུ་བསྒྱུར་བའི་གནད་དོ། །རྟེན་གསུམ་ལ་བསླབ་པ་ནི། ཆོས་སྐུའི་རྟེན་སཱུརྱ་ལ་བསླབ་པ། ཉི་མའི་ཐད་ནས་ཁྲུ་གང་གི་སར་དང་པོ་ཆོས་སྐུའི་གཟིགས་སྟངས་ཀྱིས་བལྟས་པས། དབྱིངས་སྣང་གི་ཁ་དོག་གམ། དཀར་ཁྲ་ཁྲོལ་ཙམ་ཞིག་མཐོང་བ་ལ་གཏད། དེ་ནས་ལོངས་སྐུའི་གཟིགས་སྟངས་ཀྱིས་ཟུར་གྱིས་ཁྲིད་དེ། ཕན་ཚུན་ཡན་མན་དུ་དལ་གྱིས་ཁྲིད་པས་ཁ་དོག་ལྔ་རེ་ལྡེ་ཙམ་དུ་གསལ་བ་ན། སྤྲུལ་སྐུའི་གཟིགས་སྟངས་ཀྱིས་ཐུར་ལ་ཕབ་ནས་བལྟས་པས་སྣང་བ་ཐམས་ཅད་དབྱིངས་སྣང་དུ་འཆར་རོ། །དེ་དག་གི་ཚེ་ལུ་གུ་རྒྱུད་དབྱིངས་ཀྱི་ར་བར་བཅུག་ནས་བལྟ་བ་གནད་དོ། །ལོངས་སྐུའི་རྟེན་ཙནྟྲ་ལ་བསླབ་པ་ནི། སྔར་དང་གཟིགས་སྟངས་འདྲ་བ་ལས། དྭངས་མ་ཐོག་མར་ཟླ་བའི་དཀྱིལ་འཁོར་དུ་གཏད་པས། ཉིན་པར་སཱུརྱས་ཚ་བ་འཕེལ་ཏེ་བསྒྲིབས་པ་སེལ་བར་ངེས་སོ། །དེ་ནས་སྔར་བཞིན་ཁྲིད་ལ་བལྟའོ། །སྤྲུལ་སྐུའི་རྟེན་ཨཱ་ལོ་ཀེ་ལ་བསླབ་པ་ནི། ཙནྡྲ་བཞིན་ནོ། །གཏད་པའི་འབེམ་གསུམ་ནི། སྔར་གྱི་རྟེན་གསུམ་ལ་གཏད་ནས་ཉམས་སུ་ལེན་པ་ནི། སྣང་བ་གང་གཏད་དུ་དབྱིངས་སྣང་མ་ཤར་གྱི་རིང་ལ། རྟེན་ལ་གཏད་ནས་བསླབ་དགོས་པ་གཏད་པའི་འབེམ་གསུམ་ཞེས་བྱའོ། །ཚུལ་ནི་སྔར་བཞིན་ནོ། །ཁྲིད་པའི་ཐབས་གསུམ་ནི། མན་ཤེལ་གྱི་དུས་སུ་དང་པོ་ཤར་ཕྱོགས་སུ་མ་ཡེངས་པར་བྱ། དེ་ནས་སྣང་བ་དེ་ལྷོ་ཕྱོགས་སུ་དལ་གྱིས་ཁྲིད་ལ་བལྟ། དེ་ནས་དལ་གྱིས་ཕར་ཕར་ཇེ་རིང་ལ་ཁྲིད་ལ་བལྟ། གལ་ཏེ་མི་གསལ་ན། རྟེན་ལ་གཏད་ཅིང་ཡང་ཕར་ཕར་ཁྲིད་ལ་ཉམས་སུ་བླང་ངོ་། །དེ་ནས་ལྷོ་ཕྱོགས་སུ་ཁྲིད་ལ་གཏད་ཅིང་ཁ་དོག་ལྔར་གསལ་བ་དང་། ནུབ་ཏུ་བག་རེ་ཁྲིད་ཅིང་བལྟའོ། །ཕྱི་ཕྲེད་ནུབ་ཏུ་གཏད་པ་ལས་དབྱིངས་རིག་ཏུ་སྣང་བའི་ཚེ། བྱང་དུ་ཁྲིད་དེ་བལྟ་ཞིང་། མི་གསལ་ན་སྔར་བཞིན་རྟེན་ལ་བསླབས་ལ་ཡང་ཕར་ཕར་ཁྲིད་ཅིང་(༡༩༨)བལྟའོ། །དེ་ལྟར་ཇེ་རིང་ལ་ཕར་ཕར་བསླབས་པས་རྟེན་ཡོད་མེད་འདྲ་བར། གང་བལྟས་འོད་ལྔར་གསལ་དུས། གཟིགས་སྟངས་གསུམ་གྱིས་གཡས་གཡོན་དང་སྟེང་འོག་ལ་སོགས་པར་བལྟ་ཞིང་། དབྱིངས་ཀྱི་ནང་དུ་ལུ་གུ་རྒྱུད་འཛིན་པ་གནད་དོ། །འོད་གསལ་གྱི་དུས་སུ་འབེམས་ལས་མཐོ་གང་དང་། ཁྲུ་གང་དུ་གཏད་དེ། གཡས་གཡོན་དང་སྟེང་འོག་ཏུ་ཁྲིད་པ་གནད་དོ། །ཆུ་ཤེལ་གྱི་དུས་སུ་ཐོག་མར་རྟེན་ལ་མ་ཡེངས་པར་བལྟའོ། །དེ་ནས་གཡས་གཡོན་དང་སྟེང་འོག་ཏུ་བལྟའོ། །དེ་ནས་ཕར་ཁྲིད་ལ་བལྟའོ། །དེ་ལྟར་བྱས་པ་ལ་རྟེན་མི་དགོས་པར་འགྲོའོ། །འོད་ཐམས་ཅད་ཀྱི་དུས་སུ་ལུ་གུ་རྒྱུད་ལ་གཏད་པ་གནད་དོ། །

གསུམ་པ། བླ་ན་མེད་པའི་ཆིངས།

གསུམ་པ་བླ་ན་མེད་པའི་ཆིངས་ལ། དབྱིངས་ཀྱི་སྐབས་སུ་ཐིག་ལེའི་སྣང་བར་མཐོང་ན། མིག་གཉིས་མཉམ་པར་བལྟ་བ་གནད་དོ། །འོད་རྩིབས་ཤར་ལ་མདུན་དུ་དྲིལ་ནས་བལྟ་བ་གནད་དོ། །གྱེན་འགྲེང་ལ་ཐུར་དུ་དབབ་བོ། །གྲུ་བཞི་ལ་གཡས་སུ་གཅུན་ནོ། །ཟླུམ་པོ་ལ་གཡོན་ན་གཅུན་ནོ། །ཟླ་གམ་ལ་སྟེང་དུ་བལྟའོ། །གྲུ་གསུམ་ལ་ཐུར་དུ་བལྟའོ། །ཡེ་ཤེས་ལྔའི་དབྱིངས་མཁར་ཐབས་དང་། པདྨ་སྟོང་ལྡན་དང་། ཟ་འོག་བེར་ཁྱིམ་ལ་སོགས་པའི་དུས་ན་གང་དུ་སྣང་བའི་དཀྱིལ་དུ་བལྟ་བ་གནད་དོ། །འཆར་བ་ཡུལ་གྱི་གནད་ལ། ཕྱིའི་ཡུལ་ནམ་མཁའ་སྟོང་པ་ལ་ནང་གི་རྣམ་པར་དག་པའི་སྒྲོན་མ་གཏད་དོ། །ཐིག་ལེ་གནས་པའི་གནད་ལ། ཉི་མའི་དཀྱིལ་འཁོར་ལ་རིག་པ་བཅུག་སྟེ་བསྒོམས་པས། ཡེ་ཤེས་ཀྱི་སྣང་བ་ལྷུག་པར་འཆར་རོ། །ཤེས་པ་གཏད་པ་འབེམ་གྱི་གནད་ལ། ཡུལ་ནམ་མཁའ་ལ་མིག་མ་འགུལ་བར་བལྟ། རླུང་དལ་བས་འཕངས་ཏེ། ཕྱིར་བཟུང་བས་སྟོང་གསལ་རང་བྱུང་གི་ཡེ་ཤེས་ཁོང་ནས་འཆར་རོ། །རིག་པའི་གནད་ལུ་གུ་རྒྱུད་དབྱིངས་ཀྱི་ར་བར་བཅུག་པས། དབྱིངས་རིག་འདུ་འབྲལ་མེད་པའི་དགོངས་པ་ལ་གནས་པའོ། །ལྟ་སྟངས་དང་གཟིགས་སྟངས་རྒྱུན་དུ་བཅས་པས་རིག་པའི་གནད་འཆིང་བར་བྱེད་དོ། །སྤྱོད་ལམ་གཞན་གྱིས་དེ་ལྟར་མ་ཡིན་པས། སྒོམ་རུང་མི་བསྒོམ་རུང་དེ་ལྟར་བཅའ་བ་གཅེས་སོ། །(༡༩༩)སྒོ་ཡི་གནད་ཀྱི་དུས་སུ་དམར་ཤས་ཆེ་ན་ཐུར་ལ་མནན། དཀར་ཤས་ཆེ་ན་གཡས་སུ་བཟློག །སེར་ཤས་ཆེ་ན་གྱེན་དུ་བཟློག །ལྗང་ཤས་ཆེ་ན་གཡོན་དུ་བལྟ། མཐིང་ཤས་ཆེ་ན་དབུས་སུ་བལྟ། ཁ་དོག་ལྔ་སྙོམས་ན་དཀྱིལ་ལས་མ་ཡེངས་པ་གནད་དོ། །འཁྲིད་པའི་དུས་སུ་ཙནྡྲའི་ཚེ་མིག་ལ་བྱ་ནག་མོའི་སྒོང་ངའི་སེར་པོ་བྱུག །འོད་དུ་སྣང་དུས་ས་རྡོ་ལ་སོགས་པའི་སྟེང་དུ་གཏད་ལ་བལྟ། རླུང་དར་རེ་ནང་དུ་བསྡམ་མོ། །ཉི་མའི་དུས་སུ་སྐབས་སུ་དོམ་ལྤགས་སམ། རས་ཡུག་ནག་པོ་བཏིང་ལ་བལྟས་པས་འབྱུང་བ་སྙོམས་སོ། །དེའང་སྐྱེས་པ་མིག་གཡས་ནས་ཁྲིད་པ་དང་། བུད་མེད་གཡོན་ནས་ཁྲིད་པ་ནི་གནད་དོ། །འདི་དག་གི་སྐབས་སུ་བླ་མའི་མོས་གུས་ཁོ་ན་གལ་ཆེའོ། །རླུང་ལ་ཤིས་པའི་ཁ་ཟས་བརྟེན་ནོ། །དབྱིངས་ཀྱི་སྒྲོན་མའི་སྐབས་སུ། བུད་མེད་ཀྱིས་ཉི་མའི་རྟེན་ལ་བལྟས་པས། འོད་ཀྱི་གྲུ་ཆད་མཐོང་སྟེ། ཁད་ཀྱི་སྔར་བཞིན་ཁྲིད་ལ་ཉམས་སུ་བླངས་པས། གཞུག་ཏུ་གང་བལྟས་འོད་དུ་སྣང་དུས། ལག་ཏུ་ཤེལ་གོང་བཟུང་ནས། ཉི་མ་ལ་བལྟས་པས་སྐུའི་སྣང་བ་ནམ་མཁའ་ཁྱབ་པར་འཆར་རོ། །སྐྱེས་པས་ཟླ་བ་རྒྱས་པའི་དུས་སུ་གོང་ལྟར་བལྟས་པས་འཁྲུལ་སྣང་འགག་གོ། །མིག་མི་བདེ་ན་བཅོས་པའི་ཐབས་ནི། མིག་ལ་ཞེམ་རྩོའི་ལྡེ་གུ་བྱུགས། སྣང་བ་པྲ་ཡས་ན་མིག་ཐུར་ལ་མནན་ནོ། །དེ་ཁྲིད་དུ་མ་བཏུབ་ན་རླུང་གྱེན་ལ་དྲང་ངོ་། །ཡུལ་གྱི་སྐབས་སུ་ལུས་གློད། མིག་རང་བབས། རླུང་རང་སར་བཞག་ལ། ཆ་ཆ་ནས་གློད་ཆགས་པས་རིག་པ་མིག་ལ་གཏད་དོ། །དབྱིངས་རིག་གི་སྣང་བ་མ་ཡེངས་པར་བལྟ་བ་གནད་ཀྱི་དམ་པའོ། །ཡུལ་གྱི་གནད་མེད་ན་བསྒོམས་ཀྱང་ཉམས་གོང་དུ་མི་འཕེལ། སྒོའི་གནད་མེད་ན་ཆོས་ཉིད་ཡིད་དཔྱོད་དུ་འགྱུར། རླུང་དང་རིག་པའི་གནད་མེད་ན་བསྒྲུབས་ཀྱང་དོན་མེད་འགྱངས་པས་ན། དོན་གནད་གསུམ་དང་ལྡན་པ་གཅེས་སོ། །དབྱིངས་ཀྱི་དུས་སུ་བྱིང་ན་རླུང་གྱེན་ལ་འཐེན། རྒོད་ན་ཐུར་ལ་མནན་པ་གནད་དོ། །སྣང་བའི་གནད་ལ་འཕེལ་བ་དང་ཟད་པ་གཉིས་ཏེ། རླུང་ནང་དུ་མི་གཞག་པར་ཕྱིར་(༢༠༠)འཕུལ་ལ། ཁ་ནས་དྲངས་ཏེ་ཧིག་གི་སྒྲ་འདོན་པས་གཉིས་ཀ་འགྲུབ་བོ། །ལས་རླུང་ཟད་པའི་གནད་ལ། ནང་དུ་འགེངས་པ་དལ་ལ། ཕྱིར་འཕངས་དྲགས་པས་ཧུ་སྒྲ་ཐོན་པའོ། །དབྱིངས་ལུ་གུ་རྒྱུད་གཟུང་བའི་གནད་ནི། རླུང་ཁ་ནས་དྲངས་ཏེ། མིག་ཨར་ལ་གཏད། ལུས་འདུག་སྟངས་བསྟུན། ཤེས་པ་ཡངས་སུ་བཅུག་པས་ཟིན་པའོ། །དེའང་དབྱིངས་རིག་ལ་གཏད་པས། སེམས་འཕྲོ་ལ་སྒོམ་མེད་པ་འདྲ་བ་ནི། དང་པོ་རླུང་མ་འཆིང་དུས་སུ་འོང་སྟེ། སེམས་ཡས་སུ་བཅུག་པས་རང་ཟིན་ལ་འགྲོ། ནང་དུ་རླུང་དག་པ་ལ་དབྱིངས་ལ་བལྟས་པས་ངང་གིས་འགགས་ཏེ། བལྟ་འཕྲོ་བཞག་དུས་དྭངས་རྙེད་པས་ཤེས་སོ། །སྒྲོན་མའི་གནད་གཟིགས་སྟངས་འབེམ་དང་མ་བྲལ་བར་བྱེད་པ་སྟེ། དབྱིངས་རིག་གི་སྣང་བ་མཐོང་བས། རླུང་སེམས་གཞི་ལ་དག་ནས་སྣང་བ་བཞི་ཚད་དུ་ཕྱིན་ཏེ། གཞི་སྣང་རླུང་གི་རྐྱེན་དང་བྲལ་བས། ནང་དབྱིངས་སུ་ཐིམ་སྟེ། ཀ་དག་གི་སར་གྲོལ་ལོ། །དེའང་འཕྲོ་འདུ་མེད་དུས། དར་རེ་ཀ་དག་རང་མལ་དུ་ཐིམ་ལ། སྣང་བ་ཐམས་ཅད་ཐིམ་དུས་རང་མལ་ཆེན་པོར་རྟག་ཏུ་བཞུགས་པ་ཞེས་བྱའོ། །གནད་འདི་ལྟ་བུའི་བརྩོན་པས་ཉམས་སུ་བླངས་ན། རབ་ལོ་གསུམ། འབྲིང་ལྔ། ཐ་མ་བདུན་ན་ལྷག་མེད་དུ་སངས་རྒྱའོ། །

དེ་ལྟར་ཡང་ཟབ་སྙིང་པོའི་བཅུད་བསྡུས་ནས། །ཕྱི་རབས་སྐལ་བཟང་རྣམས་ཀྱི་དོན་དུ་བསྡེབས། །དགེ་བ་འདི་ཡིས་བདག་དང་འགྲོ་བ་ཀུན། །འོད་ལུས་དག་པས་གདོད་མའི་སར་ཕྱིན་ཤོག །སྙིང་པོ་ཡང་བཅུད་ཅེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། རིག་པ་བརྟུལ་ཞུགས་ཀྱི་སྤྱོད་པ།

༄༅། །ཟབ་མོ་ཡང་ཏིག་ལས། རིག་པ་བརྟུལ་ཞུགས་ཀྱི་སྤྱོད་པ་བཞུགས་སོ། །

༄༅། རིག་པ་བརྟུལ་ཞུགས་ཀྱི་སྤྱོད་པ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་སངས་རྒྱས་རིག་པའི་ཀློང་ཡངས་སུ། །སྣང་སྲིད་འཁོར་འདས་ཆོས་ཀུན་རྣམ་དག་པ། །ཀུན་བཟང་དབྱེ་བ་མེད་ལ་ཕྱག་(༢༠༡)འཚལ་ཏེ། །བརྟུལ་ཞུགས་དབང་བསྒྱུར་སྤྱོད་པའི་མན་ངག་བསྟན། །

སློབ་དཔོན་ཆེན་པོ་བི་མ་ལས་རྣམ་རྟོག་ཐོག་རྫིས་སུ་སྤྱོད་པའི་མན་ངག་གསུངས་པའི་དོན་གཅིག་ཏུ་བསྡུས་ཏེ་ཉམས་སུ་བླང་བ་ལས། རང་གནད་ངེས་པ་གསུམ་ལས། ཕྱི་ཡུལ་གྱི་རང་གནད་དུར་ཁྲོད་མཚོ་གླིང་དང་ཆུ་མདོ་དང་རི་ལ་སོགས་པ་འཇིག་རྟེན་གྱི་ལྷ་འདྲེ་གནས་སར་ཕྱིན་ལ། འདི་འཇིགས་སྙམ་པ་ཞིག་ཏུ་བསྡད་དེ། བླ་མའི་རྣལ་འབྱོར་གསོལ་འདེབས་དང་བཅས་པ་བྱས་ལ། ནང་སེམས་ཀྱི་གནད་སྣང་སྲིད་ཀྱི་ལྷ་འདྲེ་ཐམས་ཅད་བསམས་ནས། ཕུང་པོ་དུམ་བརྒྱ་དུམ་སྟོང་དུ་བགོས་ལ་བྱིན་ནས་ཚོགས་སུ་བསྔོའོ། །ཕྱོགས་ཕྱོགས་གཏོར་ལ། རྡུལ་ཆ་ཙམ་ཡང་མ་ལུས་པར་བསམ་མོ། །གནས་ལུགས་ཉམས་ལེན་གྱི་གནད་གང་ཡང་མི་བསམ་ཅི་ཡང་མི་དམིགས་པའི་ངང་ལ་གློད་ནས་ཉལ་བས། དངོས་དང་གཟི་བྱིན་རྨི་ལམ་གསུམ་གྱི་ཆོ་འཕྲུལ་འབྱུང་སྟེ། དེ་ཀ་དཔྱད་བྱའི་དོན་དུ་ཤར་བས། རང་གི་སེམས་ཀྱིས་བརྟགས་ཤིང་སེམས་ལ་སྣང་བ་ལས་གཞན་མ་ཡིན་སེམས་ཉིད་གདོན་དུ་ཤར། ལྷར་ཤར། འཁོར་འདས་སུ་ཤར་ཡང་། རང་ངོ་ལ་བལྟས་པས་སྟོང་སངས་གཏད་ཡལ་ནམ་མཁའ་ལྟ་བུ་མཐོང་སྟེ། ལྷ་མེད་འདྲེ་མེད་ཀྱི་རིག་པ་རྗེན་པར་མཐོང་བས། དཔྱད་བྱ་དོན་གྱི་སྙིང་པོ་མཐོང་བ་ཞེས་བྱའོ། །དེའི་དུས་སུ་ཆོ་འཕྲུལ་ཅི་ཙམ་ཆེ་ཡང་རང་རྩལ་ངར་བསྐྱེད་ལ་གཏད་པས། མི་སྤངས་ལ་མི་གནས་པར་རང་ཞི་སྟེ། ཚར་ཚད་ཟས་ནོར་སྟེར་བ་ལ་སོགས་དངོས་སམ་རྨི་ལམ་དུ་འབྱུང་ངོ་། །གཉན་སར་རིག་པ་ལྷོངས་དུས། ཆགས་སྡང་ཟུག་གཟེར། ནད་གདོན་གྱི་ཟིངས་ཐམས་ཅད། རྗེན་རྗེན་ངོས་བཟུང་བའི་ངང་དེར་མདུང་ཚུགས་སུ་ཉམས་སུ་བླངས་པས། སྔར་གྱི་ལམ་ཁྱེར་རྗེན་ལ་ཕུད་ནས་རྡོ་རུས་ཐུག་པ་ཞིག་འོང་ངོ་། །དེ་ནས་གང་དུ་ཕྱིན། གང་དུ་འདུག་ཀྱང་། སྟོང་གསལ་རྗེན་པའི་རིག་པ་ཟང་ཀར་མཐོང་བས། ཆོས་གོ་ཕྱིར་མ་ཤོར་བར་རྒྱུད་ལ་ཁེལ་བ་ལགས་སོ། །གཉན་ས་ན་འགྲོ་དུས། གཏོར་མ་བྱིན་ནས་བསྔོ་བ་བྱས་པས། གཞི་བདག་སྟོངས་གྲོགས་སུ་འཆར་ཞིང་ཅི་བསམ་ལྷུན་(༢༠༢)གྲུབ་ཏུ་འབྱུང་བའི་དགོས་པ་ཡོད་དོ། །འདི་ནི་རྣལ་འབྱོར་པ་རྣམས་ཀྱི་ཉམས་ལེན་གྱི་གྲོགས་སུ་སྐབས་སུ་བྱ་བ་ཤིན་ཏུ་གཅེས་སོ་ཕྱི་ཡུལ་སྣང་ལམ་སློང་གི་སྤྱོད་པའོ། །

ནང་རིག་པ་ལམ་སློང་གི་སྤྱོད་པ་ལ་གནད་གསུམ་ལས། དང་པོ་རབ་ཏུ་དབེན་པའི་ལུང་སྟོང་དུ་སོང་ལ། ལུས་ཀྱི་གནད་གཅེར་བུར་ཕྱུང་ལ། བླ་མའི་སྐུ་སྔོ་ནག་རབ་ཏུ་འཇིགས་པར་བསམས་པའི་སྤྱི་བོར་ལྃ། དཔྲལ་བར་ཨེ། མགྲིན་པར་ཁྃ། ལྐོག་མར་སུ། སྙིང་ནང་དུ་ཧཱུྃ། ནུ་མར་ཧ། ལྟེ་བར་རྃ། རྐང་མཐིལ་དུ་ཡྃ་རྣམས་བསམས་ལ། ལུས་མཆོངས་པ་དང་། རྒྱུག་པ་དང་། ཉལ་བ་དང་། ལང་བ་ལ་སོགས་པ་འགྲོ་དྲུག་གི་སྤྱོད་པ་སྣ་ཚོགས་བྱ། ངག་གི་གནད་དེ་དག་དང་བསྟུན་ལ་ཆགས་སྡང་དང་། ངོ་ཚ་བ་དང་། ཆོས་མ་ཡིན་པ་དང་། དུད་འགྲོ་སྣ་ཚོགས་པའི་སྐད་དང་གླུ་དང་ངུ་བ་ལ་སོགས་པ་བྱ། སེམས་ཀྱི་གནད་ཆགས་སྡང་དགག་སྒྲུབ། ཉོན་མོངས། བསྐྱེད་རྫོགས། སྐྱིད་སྡུག་ལ་སོགས་པ་སྣ་ཚོགས་སུ་སྤྲོས་ལ། དེ་མ་ཐག་རང་ངོ་ཅེར་ཅེར་བལྟས་པས། རྗེས་མེད་དུ་བུན་བུན། འཛིན་མེད་དུ་སངས་སངས་བ་འབྱུང་། ལུས་ངག་ཡིད་གསུམ་གྱི་གནད་སྤྲུག་ལ་ཉིན་མོ་ཉམས་སུ་བླང་ཞིང་མཚན་མོ་བདེ་བའི་མལ་དུ་ལུས་མི་འགུལ། ངག་མི་བརྗོད། སེམས་མི་རྟོག་པར་ཉལ་ལ། ཡང་སང་ཉིན་སྔ་མ་ལྟར་སྤྱད། རང་ཉིད་དུག་ལྔ་གང་རགས་པ་དེ་གཙོ་བོར་བཟུང་ལ་ཚར་བཅད་པས་རྗེས་མེད་རང་ཡལ་དུ་གྲོལ་ལོ། །དེ་ལྟར་དགག་སྒྲུབ། ཆགས་སྡང་རེ་དོགས། བླང་དོར་གང་བྱུང་བ། ད་ལྟར་གནས་པ། ཕྱིས་འབྱུང་བ་ཐམས་ཅད་དྲན་པས་བསླངས་ལ། སྐད་ཅིག་མ་རང་ངོར་རྗེན་པར་བལྟ་ཞིང་། རང་ཤར་རང་གྲོལ་དུ་ཕྱལ་ཕྱལ་རྩལ་སྦྱངས་པས། དྲན་རྟོག་ཐམས་ཅད་ཝལ་པོ་རྗེས་མེད་དུ་གཏད་ཡལ་ནས། ལུས་སེམས་དང་བར་སྣང་འདྲེས་པ་མཉམ་པ་དང། མེད་པ་མཉམ་པ་དང་། ཕྱམ་ཡས་པ་མཉམ་པའི་ཉམས་འབྱུང་ཞིང་། ཆགས་སྡང་དང་དགག་སྒྲུབ་ཐམས་ཅད་དུས་འདིར་ཞིག་ནས་ལས་ཅན་ཁ་ཅིག་དེ་ཉིད་དུ་གྲོལ་བདེ་ཡོད་པར་(༢༠༢)ཡང་གསུངས་སོ། །སྤྱོད་པ་འདི་འཁོར་འདས་རུ་ཤན་ཕྱེད་པ་ཞེས་བྱ་སྟེ། དགེ་སྦྱོར་གྱི་རྩལ་སྦྱོང་དང་བོགས་འབྱིན་གྱི་གནད་གལ་པོ་ཆེ་ཡིན་པས། སྐབས་སྐབས་སུ་དེ་ལྟར་ཉམས་སུ་ལེན་པ་ལ་བརྩོན་པར་བྱའོ། །དེ་ནི་ཐུག་ཕྲད་རང་གྲོལ་དུ་ལྷོངས་པ་དང་། རྐྱེན་སྣང་ལམ་དུ་ལྷོངས་པ་དང་། དྲན་རྟོག་ཆོས་ཉིད་དུ་ལྷོངས་པ་དང་། གང་བསམ་བསམ་གཏན་དུ་འགྱུར་བ་དང་། དངོས་འཛིན་འཁྲུལ་པ་འཇིག་པ་དང་། ཀ་དག་བཙན་ས་ཟིན་པ་ལ་སོགས་པ་ཡོན་ཏན་དུ་མ་བྱེད་དོ། །

ཨེ་མ་ཧོ། ཆོས་ཉིད་རང་བཞིན་རྡོ་རྗེ་སྙིང་པོའི་ཆོས། །མངོན་སུམ་སྙིང་ཏིག་ཟབ་མོའི་གནད་བསྡུས་ནས། །ཕྱི་རབས་དོན་དུ་གསལ་བར་བཀོད་པ་ཡིས། །མ་ལུས་འགྲོ་ཀུན་མངོན་པར་སངས་རྒྱས་ཤོག །ཆོས་ཚུལ་ཞི་བ་སྤྲིན་ཆེན་སྙིང་པོ་ལས། །བདུད་རྩིའི་ཆར་གྱིས་འགྲོ་བ་བསིལ་བར་ཤོག །རིག་པ་བརྟུལ་ཞུགས་ཀྱི་སྤྱོད་པ་ཞེས་བྱ་བ། ཐེག་པ་རྒྱལ་པོའི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ་དུ་བཀོད་པ་རྫོགས་སོ།། །།དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། དུས་ཀྱི་གསལ་བྱེད།

༄༅། །ཟབ་མོ་ཡང་ཏིག་ལས། དུས་ཀྱི་གསལ་བྱེད་བཞུགས་སོ། །

༄༅། དུས་ཀྱི་གསལ་བྱེད་ཅེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འགྲོ་བའི་མགོན་པོ་ཤིན་ཏུ་ཐུགས་རྗེ་ཆེ། །ཀུན་བཟང་ཆོས་རྗེ་བླ་མའི་ཞབས་བཏུད་དེ། །རྣལ་འབྱོར་རྣམས་ཀྱི་ཕུང་པོའི་བྱེར་ཟུག་ལས། །འཆི་བ་བརྟག་བསླུ་དུས་ཀྱི་གསལ་བྱེད་བྲི། །

འདི་ལ་འཆི་བ་བརྟག་པ། བསླུ་བ་གཉིས་ལས། དང་པོ་བརྟག་པའི་རིམ་པ་མང་དུ་གསུངས་ཀྱང་། འབྱུང་བ་རང་གདངས་ཀྱི་སྣང་བ་ཚེ་གཟུགས་བརྟག་པ་ཁོ་ན་མཆོག་ཏུ་གསུངས་པ་འདི་ལ་ཆད་ལྷག་ལས་འཆི་བའི་དུས་ཚོད་བརྟག་པ། དབྱིབས་ལ་བསླུ་བས་བཟློག་གམ་མི་བཟློག་བརྟག་པ། ཁ་དོག་ལས་གདོན་བརྟག་པ་དང་གསུམ་ལས། དང་པོ་ནི་ནམ་མཁའ་དྭངས་པའི་ཆོས་རབ་ཏུ་དབེན་པའི་གནས་སུ་སོང་ལ། ཉི་མ་ལ་རྒྱབ་གཏད་དེ་ལངས་ལ་གཅེར་བུའམ། གོས་རྗེ་རྗེ་ཅང་ཅང་དུ་བྱས་ལག་ཏུ་དབྱུག་པའམ། ཕྲེང་བ་བཟུང་བའི་གྲིབ་མའི་སྙིང་གར་མིག་(༢༠༤)མ་འགུལ་ཤེས་པ་མ་ཡེངས་པས་རིང་ཞིག་བལྟས་པས་སྐྱ་འོལ་བ་བྱུང་དུས། མིག་ནམ་མཁའ་ལ་བལྟས་པས། རང་གི་གཟུགས་ཀྱི་རྣམ་པ་ལམ་གྱིས་འཆར་ཏེ། ཡན་ལག་ཚང་ཞིང་ཕྱག་མཚན་དང་བཅས་པ་རྫོགས་པ་མཐོང་ན་སྐྱོན་མེད་དོ། །གཟུགས་དེའི་ལག་གི་ཕྱག་མཚན་མེད་ན། བརྟེན་པའི་ལྷ་དང་བྲལ་བ་ཞེས་བྱ་སྟེ། ལོ་བདུན་ན་འཆིའོ། །ལག་པ་གཡས་མེད་ན་ལོ་ལྔ་ནའོ། །གཡོན་མེད་ན་ལོ་གསུམ་ནའོ། །རྐང་པ་གཡས་པའི་པུས་མོ་མན་མེད་ན་ལོ་གཉིས་ནའོ། །ཐམས་ཅད་མེད་ན་ཟླ་བ་བརྒྱད་ནའོ། །རྐང་པ་གཡོན་མེད་ན་ལོ་གཅིག་ནའོ། །མགོ་ཡི་གཡས་མེད་ན་ཟླ་བ་དགུ་ནའོ། །གཡོན་མེད་ན་ཟླ་བ་བདུན་ནའོ། །རྐེ་ཡན་ཆད་མེད་ན་ཟླ་བ་ལྔ་ནའོ། །རྐེ་དང་བཅས་པ་མེད་ན་ཟླ་བ་གསུམ་མོ། །རོ་སྟོད་མེད་ན་ཟླ་བ་གཉིས་སོ། །རོ་སྨད་མེད་ན་ཟླ་བ་གཅིག་གོ། །ལུས་ཕྱེད་ཚལ་གྱི་གཡས་མེད་ན་ཞག་ཉི་ཤུ་རྩ་དགུ་ནའོ། །གཡོན་མེད་ན་ཞག་ཉི་ཤུ་རྩ་གཅིག་གོ། །གཡས་ནི་ལག་ཆ་གཡས་སུ་བཟུང་བ་དེ་གང་ཤར་བ་དེ་ལ་རྩིས་པས་ཤེས་སོ། །དབྱིབས་ལས་བསླུ་བས་བཟློག་གམ་མི་བཟློག་བརྟག་པ་ནི། གྲུ་བཞི་དང་། ནར་མོ་དང་། ཟླུམ་པོ་དང་། ཟླ་གམ་དུ་བྱུང་ན་བསླུ་བས་བཟློག་གོ། །གྲུ་གསུམ་དང་རོ་གཏུམས་པ་ལྟ་བུ་བྱུང་ན་མི་བཟློག་པས་གདམས་པའི་གསལ་གདབ་བོ། ཁ་དོག་ལས་གདོན་བརྟག་པ་ན། ལྟ་བའི་ཚེ་དཀར་ལམ་པ་ལས་དབུས་ནས་ཡལ་ན་ཀླུ་དང་རྒྱལ་པོའི་གདོན་གྱིས་ཟིན་པའོ། །ནག་པོ་ལས་གཡས་ནས་ཡལ་ན་བདུད་དང་མ་མོས་ཟིན་པའོ། །དམར་པོ་ལས་གཡོན་ནས་ཡལ་ན་ཀླུ་བཙན་དང་འགོང་པོས་ཟིན་པའོ། །སྔོན་པོ་ལས་རྐང་པ་ནས་དེ་ཐུར་ལ་ཡལ་ན་ཀླུ་དང་མཚོ་སྨན་གྱིས་ཟིན་པའོ། །ནག་བན་བུན་ནི་མ་མོ་དང་གཤིན་རྗེ། སེར་བྲེང་བྲེང་ནི་ས་བདག །ཁྲ་ཀྱག་གྱུག་ནི་ཤི་འདྲེས་ཟིན་པའོ། །ཁ་དོག་འདི་དག་ནི་ཆད་ལྷག་དང་དབྱིབས་འགྱུར་བའི་དུས་སུ། གང་གནོད་ཀྱི་གདོན་གློ་བུར་བ་དེ་ངོས་བཟུང་སྟེ། བསྲུང་བཟློག་དང་བཅོས་ཀ་བྱེད་པར་བསྟན་ལ། རང་བཞིན་དུ་ལྷན་སྐྱེས་ཀྱི་གདོན་ངོས་གཟུང་བ་ཡིན་ནོ། །(༢༠༥)

དོན་གཉིས་པ་འཆི་བ་བསླུ་བ་ལ་གསུམ་སྟེ། ཕྱི་རྟེན་འབྲེལ་ཐབས་ཀྱི་རིམ་པ། ནང་བཅུད་ལེན་ཚེ་སྒྲུབ་ཀྱི་རིམ་པ། གསང་བ་གནས་ལུགས་དོན་གྱི་རིམ་པའོ། །དང་པོ་ལ། འཁོར་ལོས་འབྱུང་བ་མཉམ་པ། མདོས་གླུད་ཀྱིས་གདོན་བསྐང་བ། བཅོས་ཐབས་ཀྱིས་ཚེ་གཟུགས་གསོ་བ་དང་གསུམ་ལས། དང་པོ་ནི། འཁོར་ལོ་རྩིབས་བཞི་མུ་ཁྱུད་གཅིག་པ་ལྔ། འབྱུང་བ་ལྔའི་ཁ་དོག་ཏུ་བསྒྱུར་ལ། ལྟེ་བ་ལ་ཡྃ་རྃ་ཁྃ་ལྃ། ཨེ་རྣམས་བྲིས་ལ། རྩིབས་བཞི་ལ་ལྟེ་བར་བཀོད་པའི་ལྷག་གི་ཡི་གེ་གཞན་བཞི་བྲི། མུ་ཁྱུད་ལ་ཨཱ་ལི་བྲིས་ལ། འབྱུང་བ་ལྔའི་ལྷར་བསྐྱེད་དེ། སོ་སོར་ཡེ་ཤེས་པ་བསྟིམ། མཆོད་བསྟོད་འཆི་བ་བཟློག་པར་གསོལ་བ་བཏབ་ལ། སོ་སོའི་ཡི་གེ་ལོ་གྲངས་དང་རྟེན་འབྲེལ་སྙིང་པོའི་མེ་ཏོག་གཏོར། བཀྲ་ཤིས་བརྗོད་ནས་ཁམ་ཕོར་ཁ་སྦྱར་དུ་བཅུག་སྟེ། ཚོན་སྐུད་སྣ་ལྔས་བཅིངས་ལ། ཤིང་སྣ། ཆུ་སྣ། མེ་སྣ། ས་སྣ། སེམས་ཅན་རིགས་མི་མཐུན་པའི་ཁ་རླངས་ལ་བསྒྲེས་པའི་ཟན་ལ། མི་གཟུགས་ཁྲུ་གང་པ་བྱས་པའི་སྙིང་གར། ཁམ་ཕོར་སོ་མ་ཁ་སྦྱར་ཚོན་སྐུད་ཀྱིས་བཅིངས་པ་དེ་བཅུག་ནས། གླུད་དེའི་དབང་པོ་ལྔ་ལ་ཡི་གེ་ལྔ་ལྔ་བྲིས་པ་གཞུག་གླུད་ལོ་གྲངས་འབྱུང་བ་ལྔའི་ཁ་དོག་གིས་བསྒྱུར་བ། ངར་གླུད་ཆེ་བ་དེའི་མཐའ་བསྐོར་ལ། རང་གི་དྲི་མ་གོས་དུམ། མཆིལ་སྣབས། སྐྲ་སེན། དྲི་ཆུ་རྣམས་བསྲེ་ཞིང་གདབ། བལ་ཚོན་དང་། དར་སྣ་དང་། ལྟས་ངན་གྱི་བྱ་སྒྲོ་སྣ་ཚོགས་གཟུག །དེ་དག་གི་མདུན་དུ་གཏོར་མ་དེའི་ཁ་དོག་དང་མཐུན་པ་རེ་རེ། ཆངས་བུ་ལོ་གྲངས་རེ་བཞག་ནས། ཨ་མྲ྇་ཏས་བསངས། སྭ་བྷཱ་ཝས་སྦྱངས། ཨ་ཀཱ་རོས་འདོད་ཡོན་དུ་བྱིན་གྱིས་བརླབས། བི་ཤོ་མུ་ཥྱས་བདུད་རྩིར་བསྒྱུར། ༀ་ན་མཿས་མནྟ་བུདྡྷུ་ནཾ་གྱིས་དགོས་དགུར་སྦྱིན། ཨ་ཝ་ལོ་ཀི་ཏེས་སོ་སོ་མཉམ་པོར་ཐོབ་པར་བསམས་ལ། བདུད་རྩིའི་དངོས་པོ་ཅི་འདོད་འབྱུང་བའི་གཏེར་དུ་བསམ་མོ། །དེ་ནས་བསྔོ་བ་ནི། འབྱུང་བའི་ལྷ་དང་གནོད་བྱེད་ཀྱི་འདྲེ་རྣམས་བསམས་ལ། ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཞེན་པ་དང་། །(༢༠༦)དྲན་དང་གཟུང་དང་བསམ་དང་རིག །གློད་དང་ཞི་དང་གྲོལ་བར་མཛོད། །ཅེས་པ་གསུམ་བརྗོད་པས། བདག་གི་དོན་དུ་གླུད་ཁྱེར་ནས་འཆི་བ་བསླུས་པར་བསམས་ལ། ཡས་རྣམས་བསྡུས་ཏེ་ཆུ་བོ་ཆེན་པོའི་གཞུང་ལ་བསྐྱལ་བས་ལོ་གསུམ་གྱི་བར་ལ་འཆི་བ་བཟློག་གོ། །འཆི་ལྟས་མ་བྱུང་གོང་དུ་ལོ་གསུམ་གསུམ་ན་རེ་རེ་བྱས་ན་མཆོག་ཏུ་ལེགས་སོ། །མདོས་གླུད་ཀྱིས་གདོན་བསྐང་བ་ནི། དེ་ལྟ་བུ་ལན་གསུམ་བསྐྱར་བ་དང་། གཞན་ཡང་བཙན་ལ་སོགས་པ་གང་གནོད་གྱི་མདོས་གླུད་སོ་སོའི་ཆོ་ག་བཞིན་བྱའོ། །བཅོས་ཐབས་ཀྱིས་ཚེ་གཟུགས་གསོ་བ་ནི། ཕྱག་མཚན་མེད་ན་རང་གི་བླ་མ་ལ་ཚོགས་བརྒྱ་རྩ་བྱའོ། །ལག་པ་གཡས་མེད་ན་འབྲུ་སྣ་བདུན་གྱི་ཕྱེ་ལ་གླུད་ཁྲུ་གང་པ། སེང་གེའི་མགོ་ཅན་ཁ་གདངས་པ་བྱས་ཏེ། བྱ་སྤུ་ལོ་གྲངས་བཙུགས་ནས་བྱང་ཕྱོགས་ཀྱི་ལམ་སྲོང་དུ་བསྐྱལ་ལོ། །གཡོན་མེད་ན་སྲེ་མོའི་རླིད་བུར་རྟ་ནག་ཁྲག་ཕག་ནག་ཁྲག །ཁྱི་ནག་ཁྲག་གསུམ་གྱི་མཆེ་བ་དང་དྲི་ཆུས་སྦྲུས་པའི་ངར་གླུད་བཅུགས་ལ་ཆུ་བོ་ལ་དོར་རོ། །རྐང་པ་གཡས་པའི་པུས་མོ་མན་ཆད་མེད་ན། ས་རུབ་དུས་སེང་ལྡེང་ངམ། ཤུག་པའི་མེ་ལོང་གྲངས་སྤེལ་ལ་གཏོང་ངོ་། །གཡོན་མེད་ན། ས་དཀར་པོའི་གླུད་ཁྲུ་གང་གི་སྙིང་ཁར་སྟག་པའི་བྱང་བུ་ལ། ལོ་གྲངས་ཀྱི་ཉག་གཅིག་བྲིས་ལ་བཙུགས་ནས་ལྷ་ཁང་འདྲེས་ཅན་དུ་ཐོ་རངས་བསྐྱལ་ལོ། །མགོ་ཡི་གཡས་མེད་ན། ཕུང་ཤུལ་གྱི་ས་སྣ་དགུ་དང་ཤིང་ནག་པོའི་འབྲས་བུ་སྦྱར་ཏེ། གའུ་ནག་པོ་ཁ་སྦྱོར་དུ་སྐྲ་སེན་གོས་དུམ་བཅུག །རྒྱབ་ཏུ་ལོ་བཅུ་གཉིས་ཀྱི་མིང་གླང་མའི་བྱང་བུ་ལ་བྲིས་པ་བཙུགས། ཚེར་མ་སྣ་ཚོགས་ཀྱིས་བཙུགས་ནས་ནམ་ཕྱེད་དུས་དུར་ཁྲོད་དུ་བསྐྱལ་ལོ། །ས་སྣའི་གའུ་བྱས་པའོ། །ལོ་བཅུ་གཉིས་བྱི་བ། གླང་། སྟག །ཡོས། འབྲུག །སྦྲུལ། རྟ། ལུག །སྤྲེའུ། བྱ། ཁྱི། ཕག །གཡོན་མེད་ན་འབྲུ་སྣ་ཉི་ཤུ་རྩ་ལྔའི་ངར་གླུད་ཀྱི་སྙིང་ཁར་མི་རྟ་ཁྱི་གསུམ་གྱི་རུས་པ། རང་གི་གོས་དུམ་དྲིལ་བ་བཅུག་ལ། ཚེས་བཅུ་གཅིག་གི་ནམ་སྲོད་དུས་གོམ་པ་བརྒྱད་ཅུའི་ཕྱིར་དོང་བྲུས་པར་བཅུག་ནས་རང་མིང་ནས་བོས་ཏེ་ངུ་བའི་ཚུལ་ལན་གསུམ་བྱས་ནས་(༢༠༧)སྦའོ། །རྐེ་ཡན་ཆོད་མེད་ན་ཤར་ལྷོར་ཚེར་མའི་ཧོམ་ལོ་གྲངས་བྱ་སྟེ། བསྲེགས་ཏེ་རྃ་ལོ་གྲངས་བརྗོད་དོ། །རྐེ་དང་བཅས་པ་མེད་ན། ལུས་རོ་སོལ་གྱིས་བྱུགས་ཏེ། སྐྲ་སྤྱི་བོར་བཅིངས་ལ། ཤོག་བུ་སོར་བཞི་ལ་རང་གི་ལོའི་མིང་དང་། གནམ་ལོའི་མིང་བྲིས་པའི་ཕྱོགས་བཞིར་ཡྃ་རྃ་ལྃ་ཁྃ་བྲིས་པ་རང་གི་སྣ་ལ་བཏགས་ཏེ་གུ་གུལ་གྱིས་བདུག་ཅིང་། ཚེས་དགུའི་ནམ་ཕྱེད་དུས་ཕྱོགས་བཞིར་རྒྱུག་ཅིང་། ཁ་ལ་ཁྱོད་ཁྱེར། ཝ་ལ་འབིར་ཏི་ཞེས་འབྲེལ་མེད་མང་པོ་བརྗོད་ནས། ཤོག་བུ་དེ་དུར་ཁྲོད་དུ་སྦའོ། ཁོག་སྟོད་མེད་ན། མི་ལོ་བཅུ་གཉིས་ཀྱི་མིང་བྱང་བསྲེག་གོ། །སྨད་མེད་ན་དུར་ཁྲོད་དུ་ཕྱིན་ནས་རུས་པ་སྣ་ཚོགས་ཀྱི་དུད་པ་གཏོང་། ལུས་སྤྱིའི་གཡས་མེད་ན་གཙུག་ཏོར་ལོ་གྲངས་འདོན། ཚ་ཚ་ལོ་གྲངས་གདབ་བོ། །གཡོན་མེད་ན་གོས་དམར་པོ་གོན་ཞིང་གཟུངས་གྲ་ལྔ་འདོན། དེ་ནས་ཚེ་གཟུགས་བརྟགས་པས་སོས་པར་ངེས་སོ། །ལན་གསུམ་ལ་སོགས་པ་ནས་ལོ་གྲངས་ཀྱི་བར་ཅི་འགྲུབ་བྱས་པས་བཟློག་སྟེ་ཕྱིའི་བསླུ་ཐབས་སོ། །

གཉིས་པ་ནང་བཅུད་ལེན་ཚེ་སྒྲུབ་ཀྱིས་འཆི་བ་བསླུ་བ་ནི། ཕྱིའི་ཐབས་ཀྱིས་མ་ཕན་ན་བྱ་སྟེ། བཅུད་ལེན་ཤ་སྦྱོར་དང་། སྔོ་སྦྱོར་དང་། སྨན་ལ་སོགས་པ་དབང་པོའི་དྭངས་མ་གསོ་བའི་རིགས་རྣམས་དང་། ཚེ་སྒྲུབ་དམིགས་པ་སྣ་ཚོགས་ཀྱི་རིགས་ཏེ། བླ་མའི་ཐུགས་ཉམས་སུ་བཞེས་པ་གནང་བ་དང་སྦྱར་ན། ཐོ་རངས་ལངས་ཏེ་སྐྱིལ་ཀྲུང་བྱ། རླུང་རོ་གསུམ་ཕྱིར་བུས་ནས། འཇམ་རླུང་ནང་དུ་བཟུང་སྟེ། རང་ཉིད་ཚེ་དཔག་མེད་དམར་པོ་ལོངས་སྤྱོད་རྫོགས་སྐུ་མཉམ་གཞག་གི་སྟེང་ན་བུམ་པ་བསྣམས་པའི་སྙིང་གར་ཉི་མ་ལ་ཧྲཱིཿདམར་པོ་རིང་ཆ་ཚེག་དྲག་ཅན། སྤྱི་བོར་པད་ཉིའི་སྟེང་ན། ཚེ་དཔག་མེད་དམར་པོ་བཞེངས་སྐུའི་རལ་པ་རྟིང་པར་སླེབ་པ། ཕྱག་གཉིས་ལྟེ་བར་བུམ་པ་འཛིན་པ། ཆོས་གོས་དམར་པོ་ཅན་ལ། བདེ་བ་ཅན་ནས་ཡེ་ཤེས་པ་སྤྱན་དྲངས་པ་བཅུག་ལ། བུམ་པའི་ནང་ནས་ཚེའི་བདུད་རྩི་བབས། རང་གི་ཚངས་བུག་ནས་ཧྲཱིཿལ་ཕོག །ལུས་བདུད་རྩིས་ཁེངས་པར་དམིགས་པ་གཏད་ལ་རླུང་ཐུབ་ཚད་ཅིག་བཟུང་ལ། མཆིལ་མ་ཞིག་མིད་དུས། (༢༠༨)ཨཱ་ཨ་མ་ར་ཎི་ཛི་བཱནྟི་ཡེ་སྭཱ་ཧཱ། ཞེས་བརྗོད་པ་སྟེ་ལན་བདུན་བདུན་མ་ཆག་པར་བྱ། བདུན་པ་ཉི་ཤུ་རྩ་གཅིག་སྟེ། བདུད་རྩིས་འགེངས་པ་བདུན། རླུང་བསྐྱེལ་ཐེབས་བདུན། སྔགས་བདུན་མཆིལ་མ་དང་བཅས་པའོ། །རྗེས་ལ་སྤྱི་བོའི་ལྷ་བདུད་རྩིར་ཞུ་བ་སྙིང་གའི་ཧྲཱིཿལ་བསྡུས་ལ་བསྔོ་བ་བྱའོ། །འདི་ལ་དང་པོ་ཞག་ཉེར་གཅིག་བསྒྲུབ། དེ་ནས་ཐོ་རངས་བཞིན་དམིགས་པ་བདུན་པོ་མ་ཆག་པར་བྱས་ན། རྨི་ལམ་དུ་འབྲུ་དང་ལོ་ལེགས་པ་དང་། ཕོར་སྡེར་ལ་སོགས་པ་གྲངས་བྱེད་པ་དང་། མི་རྒན་པོ་རྨི་ཞིང་ཚེ་འཕེལ་བར་འགྱུར་རོ། །ཚེ་གཟུགས་སྔར་བཞིན་བརྟགས་པས་སོས་སོ། །ལན་གསུམ་བསྒྲུབ་ན་ཅིས་ཀྱང་སོས་པ་ལ་ཐེ་ཚོམ་མེད་དོ། །སྤྱིར་སྔོན་ནས་ཚེ་རིང་ཐུང་གི་ལས་ཡོད་པས། དེ་ཟད་ན་འཆི་བ་ལ་སྲོག་འདོན་པ་ལ་སོགས་ཚེ་བསྲིང་བའི་ལས་བསགས་པས་ཕན་ནོ། །ལུས་ཀྱི་སྲོག་རྩ་ན་ཚེ་ཞེས་བྱ་བ་རླུང་དང་དྭངས་མའི་བཅུད་འདུས་པའི་ཁ་ཆུ་ལྟ་བུ་རྣམ་ཤེས་ཀྱི་རྟེན་དྲོད་དང་དབུགས་ཀྱི་དྭངས་མ་རྟ་རྔའི་ཉག་མ་ལྟ་བུ་ཡོད་དེ། དེ་ལ་འཁྱོགས་ཡོད་ན་ནད་དང་གནོད་པ་མང་། དེ་རིང་ན་ཚེ་རིང་། ཐུང་ན་ཐུང་། བར་མ་ལ་བར་ཆད་འབྱུང་སྟེ། དེ་ཆད་ནའང་འཆི་བ་ལ། བཅུད་ལེན་དང་ཚེ་སྒྲུབ་ཀྱིས་དྭངས་མ་དང་རླུང་འཕེལ་ཏེ་རིང་དུ་འཕེལ་བར་བྱའོ། །བསོད་ནམས་ཞེས་བྱ་བ་དགེ་བའི་སྟོབས་ཁྱད་པར་ཅན་ཡོད་པས་དེ་ཟད་ནའང་འཆི་བ་ལས། འདིར་དེ་འཕེལ་བ་ལ་དཀར་ཕྱོགས་ཀྱི་དགེ་བ་བྱས་པས་ཚེ་རིང་བ་ཡང་དེ་ཡིན་ནོ། །ལས་དང་། ཚེ་དང་། བསོད་ནམས་གང་རུང་རེའམ། གཉིས་ཟད་ན་ཐབས་ཀྱིས་གསོ་ཐུབ་ལ། གསུམ་ག་དུས་གཅིག་ལ་ཟད་ན་གསོ་བར་མི་རུང་བས། དུས་མ་ཡིན་པར་འཆི་བ་ཞེས་བྱ་བ། དེ་གསུམ་ཐམས་ཅད་མ་ཟད་པར་འཆི་བ་ཡོད་ན། དེ་བཟློག་པའི་ཕྱིར་འཆི་བསླུས་ཕན་པར་གསུངས་པས། འདིར་དེ་བྱེད་པ་ཡིན་ནོ། །དུས་མ་ཡིན་པར་འཆི་བའི་རྐྱེན་ནི། སྨན་པས་སྨན་མ་ཡིན་པ་སྦྱར་བ་ལ་སོགས་པ་བརྒྱད་དོ། །ངོ་བོ་གདོན་གྱིས་བྱེད་པས་རིམ་གྲོ་དང་། ལྷའི་བསྐྱེད་རིམ་ལ་སོགས་པ་བསྲུངས་པའི་རིམ་པ་རྣམས་གསུངས་པས། རྒྱུན་དུ་དེ་དང་བསྟུན་པར་བྱའོ། །(༢༠༩)ནང་གི་འཆི་བསླུའོ། །

གསུམ་པ་གསང་བ་གནས་ལུགས་ཀྱི་འཆི་བསླུ་ནི། དེ་ལྟར་ཕྱི་ནང་འཆི་བསླུས་མ་ཕན་ན། རྩ་བའི་བླ་མ་བཞུགས་ན་འཁོར་གསུམ་དག་པས་སྤོང་དག་དང་ཚོགས་ཀྱི་འཁོར་ལོ་བྱ། མི་བཞུགས་ན་རྡོ་རྗེ་སྤུན་སྲིང་ལ་བྱ། དེ་ཡང་མེད་ན་སྔགས་ལ་ཞུགས་པའི་རྣལ་འབྱོར་པ་ལྟ་དགོངས་མཐུན་པ་རྣམས་བསགས་ལ་བྱ། དེ་ཡང་མེད་ན་མི་མཐུན་པ་ལ་བྱ། དེ་ཡང་མེད་ན་རྒྱུའི་ཐེག་པ་ལ་ཞུགས་པ་ལ་བྱ། དེ་ཡང་མེད་ན་སྐྱེ་བོ་ཕལ་པ་དང་འགྲོ་བ་མང་པོ་ལ་སྤོང་དག་དང་སྦྱིན་པ་བྱས་ལ། དགེ་བ་ཆོས་ཀྱི་རྟེན་ཚེ་རིང་བ་ལ་བསྔོས་ལ། ཐུན་བཞིར་བླ་མའི་རྣལ་འབྱོར་བསྒོམས་ལ་གསོལ་བ་དྲག་པོ་གདབ། ཕྱོགས་མཐོ་བར་འདུག་སྟེ། རང་ཉིད་ཀུན་བཟང་ཡབ་ཡུམ་དུ་བསྒོམས་ལ། སྣོད་བཅུད་ཐམས་ཅད་ནམ་མཁའ་གཅིག་ཏུ་གྱུར་པ་དེ། རང་གི་སྣ་ནས་ལུས་ཀྱི་ནང་དུ་ཞུགས་པས། ཁམས་གསུམ་ཐམས་ཅད་གཅིག་ཏུ་གྱུར་པ་རྡོ་རྗེ་ཚེའི་ནམ་མཁའ་འཇིག་འབྲལ་མེད་པས་ལུས་གང་བར་བསམས་ལ། རླུང་ཐུབ་ཐང་བཟུང་ཞིང་སྟེང་རླུང་མནན་འོག་རླུང་འཐེན་ལ་ཁ་སྦྱར་དུ་བསྒོམ་མོ། །ཐུན་རྗེས་གང་འཆི་ལུས་རྡུལ་ཕྲན་ཆ་མེད་པས་འཆི་རྒྱུ་མི་འདུག །སེམས་དངོས་པོ་ངོས་བཟུང་མེད་པས་འཆི་མཁན་མི་འདུག །ལུས་སེམས་གཞི་རྩ་དངོས་པོ་མེད་པ་ལ་འཆི་བ་མེད་ན། དེ་ལས་གཞན་འཆི་བ་མི་འདུག་སྟེ། འཆི་བ་བློས་བཏགས་པར་འདུག །བློས་བཏགས་རང་གི་རྟོག་ངན་ཁོང་བཟོས་ཙམ་ལས་དོན་ལ་གྲུབ་པར་མི་འདུག་སྙམ་པའི་ངང་ལ། འཆི་ས་འཆི་རྒྱུ་འཆི་མཁན་མི་འདུག་པའི་རིག་པ་རང་གསལ་ནམ་མཁའ་ལྟར་རྒྱ་བསྐྱེད་དཔངས་བསྟོད་ལ་བཞག་གོ། །ཡང་བླ་མ་དང་ཡི་དམ་མཁའ་འགྲོ་དམ་ཅན། འགྲོ་དྲུག་སེམས་ཅན་གནོད་བྱེད་ལན་ཆགས་དང་བཅས་པ་མདུན་གྱི་ནམ་མཁར་བསམས་ལ། འཆི་བ་བློས་བཏགས་ཆགས་ཞེན་དུ་འདུག་པས། ད་ཆགས་མེད་ཀུ་སུ་ལུའི་ཚོགས་འཁོར་བྱ་སྙམ་དུ་སེམས་བསྐྱེད་ནས། རྣམ་ཤེས་ཧཱུྃ་གི་རྣམ་པར་སྤྱི་བོར་ཐོན་ནས་དཔའ་བོ་ཆུ་གྲི་དང་། ཐོད་པ་ཐོགས་པར་གྱུར་པའི་ཆུ་གྲིས་ཐོད་པ་མཛོད་སྤུར་བཅད་པ། ཐོད་པའི་སྒྱེད་པུ་(༢༡༠)གསུམ་གྱི་སྟེང་དུ་བཙུགས་པའི་ནང་དུ་ལུས་དུམ་བུར་གཏུབས་པ་བླུགས་པས་ཁེངས་པར་བསམས་ལ། འོག་ནས་རླུང་གཡོས་མེ་འབར་ཐོད་པ་ཁོལ། ཕྱོགས་བཅུའི་ཞིང་ནས་བདུད་རྩི་བབས་པ་དེ་རོ་བཅུད་དང་ལྡན་པར་བསམས་ལ། དཔའ་བོ་གཅིག་པོ་དེ་བྱེ་བ་མང་པོར་སྤྲུལ་པས་ཐོད་པས་བཅུས་ཏེ་མགྲོན་རྣམས་ལ་དྲངས་པས། སོ་སོར་གང་ལ་དགྱེས་པའི་ཞལ་ཟས་སུ་གྱུར་པ་དགྱེས་པའི་འོད་ཟེར་བདག་ལ་ཕོག་པས། ནད་གདོན་འཆི་བ་ཐམས་ཅད་བསླུས་པར་བསམ་ལ། རང་གནས་སུ་གཤེགས་པར་བསམས་ལ་བསྔོ་བ་བྱའོ། །འདི་ནི་འཆི་བ་བསླུ་བའི་མཆོག་ཏུ་གསུངས་སོ། །དང་པོར་ཚོགས་འདི་བརྒྱ་རྩ་ལ་སོགས་པ་གང་འགྲུབ་བྱས་ལ། དེ་ནས་ནམ་མཁའ་ཟས་སུ་ཟ་བའི་དམིགས་པ་དང་། སྐྱེ་མེད་དོན་གྱི་འཆི་བ་བསླུ་བ་གསུམ་རིམ་པས་བྱས་པས། དུས་མ་ཡིན་པར་འཆི་བ་ལས་ལོག་སྟེ། ཚེ་རྡོ་རྗེ་ལྟར་བརྟན་པ་ཐོབ་བོ། །ཚེ་གཟུགས་སྔར་བཞིན་བརྟགས་པས་སོས་ཏེ་སྐྱོན་མེད་པར་མཐོང་ངོ་། །འདི་དག་ཀྱང་ལོ་གྲངས་ཙམ་ལྷག་པར་བྱས་པས་འགྲུབ་པ་ཡིན་ནོ། །

དེ་ལྟར་འཆི་བ་བརྟག་བསླུའི་རིམ་པ་འདི། །བླ་མའི་གསུང་དང་མན་ངག་སྙིང་པོ་དང་། །རང་ཉམས་ངེས་པའི་གནད་རྣམས་བཞིན་བསྡུས་ནས། །བཀོད་པའི་དགེ་བས་འཆི་མེད་གནས་ཐོབ་ཤོག །དུས་ཀྱི་གསལ་བྱེད་ཅེས་བྱ་བ་ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ། ཀུན་ཏུ་བཟང་པོའི་ནགས་ནང་། ཟླ་བ་ཆུ་ཤེལ་གྱི་ཁང་བཟངས། ཚེས་རབ་ཏུ་བཟང་པོར་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། འདའ་ཁ་དོན་གྱི་མན་ངག

དང་པོ། འབྱུང་བའི་ཐིམ་ཚུལ།

༄༅། །ཟབ་མོ་ཡང་ཏིག་ལས། འདའ་ཁ་དོན་གྱི་མན་ངག་བཞུགས་སོ། །

༄༅། འདའ་ཁ་དོན་གྱི་མན་ངག་ཅེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གང་གི་ཆོས་ཀྱི་བདུད་རྩི་མཆོག་བརྙེས་ནས། །འཆི་མེད་ཞི་བར་འགྲོ་བ་འདྲེན་མཛད་པ། །དུས་གསུམ་རྒྱལ་བ་རིག་འཛིན་རྒྱ་མཚོ་དང་། །བླ་མ་དམ་པའི་ཞབས་ལ་ཕྱག་འཚལ་ལོ། །ཆོས་སྐུ་བྱང་ཆུབ་སྙིང་པོའི་ཤིང་དྲུང་དུ། །མངོན་པར་སངས་རྒྱས་(༢༡༡)རང་ལ་ཡོད་པའི་དོན། །དུས་ལ་བབས་ཚེ་མངོན་དུ་བྱ་བའི་ཚུལ། །འདའ་ཁ་འཆི་བྲོད་དོན་གྱི་མན་ངག་བྲི། །

དེ་ལ་སྣང་སྲིད་འཁོར་འདས་ཀྱི་ཆོས་ཐམས་ཅད་རིག་པའི་ངང་ནས་ཤར། ངང་དུ་གནས། ངང་དུ་གྲོལ་བ་ཙམ་ལས། གཞན་དུ་གཡོས་པ་ཅུང་ཟད་ཀྱང་མེད་དེ། ནམ་མཁའི་ངང་དུ་སྣོད་བཅུད་ཀྱི་ཆགས་འཇིག་གི་སྣང་བ་བཞིན་ནོ། །སྐྱེ་འགྲོ་ཐམས་ཅད་དང་པོ་རིག་པའི་རང་གདངས་ལྔ་ལ་བདག་ཏུ་བཟུང་བས་སྣོད་བཅུད་ལུས་སུ་སྣང་བའི་འབྱུང་བ་ལྔར་བག་ཆགས་ཀྱང་། མཐར་འཆི་བའི་དུས་སུ་སྙིགས་མའི་འབྱུང་བ་ལྔ་དྭངས་མར་གྲོལ་ཏེ། དང་པོའི་བྱུང་སར་ཐིམ་ནས་འཁོར་བ་མྱང་འདས་སུ་གྲོལ་བར་འགྱུར་བའི་གནས་སྐབས་ཡོད་པས། གདམས་པའི་དམར་ཐག་ཐམས་ཅད་དུས་དེར་བཅད་པ་ཞིག་གལ་ཆེའོ། །འདི་ལ་འབྱུང་བའི་ཐིམ་ཚུལ། སྣང་བའི་འཆར་ཚུལ། དགོངས་པའི་གྲོལ་ཚུལ་དང་གསུམ་ལས། དང་པོ་ནི། འཆི་ཁའི་དུས་སུ། སྣང་བ་སེམས་ཀྱི་དབང་དུ་འདུས་པས། ཕྱི་གཟུང་བའི་ཡུལ་ལ་འཇུག་པའི་ཤེས་པ་ནང་དུ་སྡུད་སེམས་ཡེ་ཤེས་ཀྱི་དབང་དུ་འདུ་བས་ཆོས་ཉིད་ལ་འཇུག་པར་བྱེད་པ་ཡང་། དང་པོ་ཡང་རང་ལས་ཤར་བས་ཐ་མ་ཡང་རང་དུ་ཐིམ་པ་ནི། ཀུན་གསལ་ལས། འཇིག་རྟེན་འཁྲུལ་པའི་སྣང་བ་འདི། །དང་པོ་རང་ལས་ཤར་བའི་ཕྱིར། །ཐ་མ་རང་ལས་ངང་དུ་གྲོལ། །སྣང་བ་སེམས་ཀྱི་དབང་འདུས་པས། །གཟུང་བར་བྱས་པའི་ཡུལ་དང་བྲལ། །སེམས་རྟོག་ཡེ་ཤེས་དབང་གྱུར་པས། །འཛིན་པར་བྱེད་པའི་སེམས་དང་བྲལ། །ཞེས་པ་དང་། དང་པོ་ས་ལ་ས་ཐིམ་པས། །ལུས་ལྕི་ཤེས་པ་འཐིབས་པ་ཡིན། །དེ་ནས་ཆུ་ལ་ཆུ་ཐིམ་པས། །ལུས་པོ་ཁ་སྣ་སྐམ་པ་ཡིན། །དེ་ནས་རླུང་ལ་རླུང་ཐིམ་པས། །ལུས་དང་ཤེས་པ་དིབ་ཅིང་ལྕི། །དེ་ཚེ་མེ་ལ་མེ་ཐིམ་པས། །ལུས་ཀྱི་དྲོད་དང་བྲལ་བ་ཡིན། །རྣམ་ཤེས་ནམ་མཁའི་དབྱིངས་སུ་ཐིམ། །ཚོར་བ་བདེ་སྡུག་རྣམ་རྟོག་བྲལ། །ཁྱབ་པ་མེད་པའི་གདངས་ལ་གནས། །ཞེས་པ་དང་། འབྱུང་བ་སོ་(༢༡༢)སོར་ཐིམ་ནས། རླུང་སེམས་གཉིས་ཀྱི་རླུང་གློ་བ་ནས་ནམ་མཁར་ཕྱིར་སོང་། ཚུར་མ་འདུས་ཏེ་ཕར་ཡལ། སེམས་སྙིང་གར་འདུས། རིག་པ་དར་ཅིག་ཀ་དག་གི་སྣང་བ་སྔོ་ཕྱམ་པ་ལ་གནས་དུས། ད་ལྟ་རང་མལ་ཆོས་སྐུའི་དགོངས་པ་ངོས་ཟིན་པ་དང་། དེ་འདྲེས་ནས་སྐད་ཅིག་མ་ལ་ཆོས་སྐུར་སངས་རྒྱའོ། །དེའང་འབྱུང་བ་སྡུད་དུས་འཆི་ལུགས་གཉིས་ཏེ། ན་ཚ་ཟུག་གཟེར་དང་བཅས་པ་ཀུན་ཏུ་བཟང་པོའི་ངང་དུ་འཆི་བ་དང་། ཟུག་གཟེར་མེད་པར་ཀུན་ཏུ་བཟང་མོའི་ངང་དུ་འཆི་བའོ། །དང་པོ་རླུང་ལོག་ནས་ནད་ཐམས་ཅད་སྲོག་རྩར་འདུས་པས་ཟུག་ཡིན་ཏེ། དེ་དུས་རིག་པ་གསལ་དྭངས་ཕྱེད་པས་རྟོག་པའི་ཤེས་རབ་སྐྱེའོ། །གཉིས་པ་ནི་ཐིག་ལེ་སྲོག་རྩར་འདུས་པས་བདེ་བའི་འོད་གསལ་དུ་འཆར་ཏེ། རང་ངོ་ཤེས་པས་གྲོལ་རྐྱེན་བྱེད་པའོ། །འདིའི་དུས་སུ་རླུང་གི་རྟ་དང་རིག་པ་བྲལ་ནས། སེམས་དང་ཡེ་ཤེས་རྒྱབ་གྱེས་པའི་དུས་སོ། །

གཉིས་པ། སྣང་བའི་འཆར་ཚུལ།

གཉིས་པ་སྣང་བའི་འཆར་ཚུལ་ནི། དུས་དེར་རིག་པ་སྙིང་ནང་ནས་གནས་བཏེག །ལམ་རྩ་དར་དཀར་གྱི་སྣལ་མ་ལ་ཞུགས་ནས། སྒོ་ཆུའི་སྒྲོན་མ་ལས་ཐོན་དུས། རྡོ་རྗེ་སེམས་དཔའི་སྣ་ཐག་ཐུགས་རྗེ་རྒྱུན་གྱི་ཐག་པ་ཞེས་བྱ་བ། མིག་གཉིས་ནས་ནམ་མཁའི་དཀྱིལ་དུ་ཟུག་པ་འོད་ཟེར་གྱི་ཐག་པ་དཀར་པོ་དང་། དམར་པོ་འཚེར་ལ་དྭངས་པ་འཆར་རོ། །དེ་ལས་མཆེད་ནས་འོད་ལྔའི་སྣང་བ་ནམ་མཁའ་ཁྱབ་པར་འཆར་བ་སྟེ། འཁྲུལ་སྣང་གི་འཁོར་བ་དོང་སྤྲུག །སངས་རྒྱས་ཀྱི་ཞིང་ཁམས་དག་པ་ཞག་ལྔར་འཆར་རོ། །

གསུམ་པ། དགོངས་པའི་གྲོལ་ཚུལ།

གསུམ་པ་དགོངས་པའི་གྲོལ་ཚུལ་ནི། སྣང་བ་དེ་ལ་རིག་པ་མ་ཡེངས་པར་གཏད་པས། བར་དོ་མེད་པ་ཡར་གྱི་ཟང་ཐལ་དུ་གྲོལ་ཏེ། ཆོས་སྐུའི་རིན་པོ་ཆེའི་སྦུབས་ལ་རང་ས་ཟིན་ནོ། །འཆི་ཁར་གདམས་པ་ཐམས་ཅད་ཀྱི་དམར་ཐག་འདིར་བཅད་པ་སྟེ། དབྱིངས་དང་ནམ་མཁའ་སྟོང་པར་རིག་པ། རྡོ་རྗེ་སེམས་དཔའི་སྣ་ཐག་ཤར་བ་ལ་རང་སྣང་མ་འགྱུར་པར་གཏད་པས་གྲོལ་བ་ནི། ཉི་ཟླ་ཁ་སྦྱོར་ལས། དབྱིངས་དང་རིག་པ་མ་འགྱུར་ན། །མི་དེ་བར་དོ་མེད་པར་ནི། །འཚང་རྒྱ་བ་ལ་ཐེ་ཚོམ་མེད། །(༢༡༣)ཅེས་པ་དང་། སངས་རྒྱས་ངོ་སྤྲོད་པའི་ལུང་ལས། གསང་བའི་བདག་པོ་འབྱུང་བ་དྭངས་སྙིགས་འབྱེད་པའི་དུས་སུ། རང་གི་སྙིང་གི་དཀྱིལ་ནས་ཡེ་ཤེས་གནས་བཏེག་པས། གདངས་ཕྱིར་ཤར་ནས་རང་གི་མདུན་གྱི་ནམ་མཁའ་ལ་ཡེ་ཤེས་ཀྱི་མཐོང་ཐོས་ཞེས་བྱ་བ། འོད་ཁ་དོག་ལྔ་བཀྲ་ལམ་མེ་རང་ལ་སྣང་བའོ། །དེ་ངོ་ཤེས་པས་ལྕགས་ལ་གསེར་འགྱུར་གྱི་རྩི་བཏང་བའམ། མུན་ཁང་དུ་སྒྲོན་མེ་བཏེག་པ་ལྟར་སྐད་ཅིག་མ་ལ་ཡར་གྱི་ཟང་ཐལ་དུ་གྲོལ་ལོ། །རིགས་ཀྱི་བུ་རང་དབུགས་མ་ཆད་པ་ལ་རྡོ་རྗེ་སེམས་པའི་སྣ་ཐག་ཅེས་ཀྱང་བྱ། ཐུགས་རྗེ་རྒྱུན་གྱི་ཐག་པ་ཞེས་ཀྱང་བྱ་བ་རང་གི་མདུན་ནས་ནམ་མཁའ་ལ་ཁ་དོག་ལྔ་ཐག་པ་བརྐྱང་བའམ། སྐས་བཙུགས་པ་ལྟར་རང་སྣང་ལས་སྣང་ངོ་། །དེའི་དུས་སུ་ཤེས་པ་རང་གི་མིག་ལ་གཏད་དོ། །མིག་ཐུགས་རྗེ་རྒྱུན་གྱི་ཐག་པ་ལ་གཏད་པས་ཡར་གྱི་ཟང་ཐལ་དུ་གྲོལ་ལོ། །ཡང་ན་ཐུགས་རྗེའི་ཐག་པ་འོད་ཁ་དོག་ལྔར་ཤར་བའི་ཚེ་ཡེ་ཤེས་ལྔ་ཤར་བས། ལྔ་ལྡན་གྱི་དཀྱིལ་འཁོར་དེ་ཐོབ་ནས། དབུགས་མ་ཆད་པ་ལ་སངས་རྒྱའོ། །ཞེས་སོ། །དེའང་ཆོས་ཉིད་ཀྱི་འོད་གསལ་ཐམས་ཅད་རིག་པ་མིག་གི་སྒོར་དར་ཅིག་གསལ་ཏེ་རྟེན་དུས་དེར་འཆར་ལ། དེ་ཉིད་ལུས་འདི་དང་འབྲེལ་བས་བར་དོ་མེད་པར་འདིར་གྲོལ་བའི་ཁོངས་སུ་བསྡེབས་པ་ཡིན་ཏེ། དབུགས་མ་ཆད་པ་ལ་སངས་རྒྱས་པ་ཞེས་བཏགས་པ་ཡིན་ནོ། །ངོ་སྤྲོད་སྤྲས་པའི་རྒྱུད་ལས། དབུགས་མ་ཆད་པ་ལ་སངས་རྒྱས་པར་འདོད་པས་འདི་ལྟར་ཤེས་པར་བྱའོ། །རང་འཆི་བའི་དུས་སུ་དབུགས་མ་ཆད་པ་ལ་རང་ལ་ཆོས་ཉིད་རང་སྣང་གི་ནམ་མཁར་འཆར་རོ། །ཆོས་ཉིད་རང་སྣང་གི་ནམ་མཁའ་ལ་ཡེ་ཤེས་སྒྱུ་མ་ལྟ་བུའི་སྐུ་འཆར་རོ། །ཡེ་ཤེས་ཀྱི་སྐུ་ཚོམ་བུའི་དཀྱིལ་འཁོར་ལྔ་ལྡན་དུ་འཆར་རོ། །དེའི་དུས་སུ་རང་སྣང་གི་མིག་ནང་ནས་འོད་ལྔ་ཤར་ནས། ཡེ་ཤེས་ཀྱི་སྐུ་ཚོམ་བུ་ལྔ་ལྡན་དང་འབྲེལ་ནས་འཆར་རོ། །གསང་བའི་བདག་པོ་དེའི་དུས་སུ་ཆོས་ཉིད་མ་དང་འཕྲད་པ་ཡིན་ནོ། །ཆོས་ཉིད་མ་དང་འཕྲད་པའི་དུས་སུ་རང་གི་རིག་པ་མིག་(༢༡༤)ལ་གཏད་དོ། །མིག་ཆོས་ཉིད་ལ་གཏད་པས་ཡེ་ཤེས་ཀྱི་སྐུ་ལྔ་ལྡན་དུ་གྲོལ་ལོ། །གསང་བའི་བདག་པོ་དབུགས་མ་ཆད་པ་ལ་སྐད་ཅིག་མ་གཉིས་ལ་སངས་རྒྱས་སོ། །སྐད་ཅིག་མ་དང་པོ་ལ་ཆོས་ཉིད་མ་དང་འཕྲད་དོ། །སྐད་ཅིག་མ་གཉིས་པ་ལ་ཡེ་ཤེས་རང་ས་ཟིན་ནོ། །སྐད་ཅིག་མ་དང་པོ་ལ་ཆོས་ཉིད་མ་དང་འཕྲད་པ་ནི་ཆོས་ཉིད་མ་དང་རང་སྣང་གི་ནམ་མཁའ་ལ་ཡེ་ཤེས་སྒྱུ་མ་ལྟ་བུའི་སྐུ་རང་ལས་ཤར་བ་རང་གིས་མཐོང་བ་དེ་ཡིན་ནོ། །སྐད་ཅིག་མ་གཉིས་པ་ལ་ཡེ་ཤེས་རང་ས་ཟིན་པ་ནི། ཆོས་ཉིད་མ་དང་རང་སྣང་གི་ནམ་མཁའ་ལ་ཡེ་ཤེས་སྒྱུ་མ་ལྟ་བུའི་སྐུ་རང་ལ་ཤར་བ་མཐོང་བ་དེ་རང་སྣང་གཉིས་སུ་མེད་པར་མཐོང་བ་ཡིན་ནོ། །རྡོ་རྗེ་འཛིན་པ་དབུགས་མ་ཆད་པ་ལ་ཆོས་ཉིད་རང་སྣང་གི་ནམ་མཁའ་ལ་ཡེ་ཤེས་སྒྱུ་མ་ལྟ་བུའི་སྐུ་འཆར་རོ། །དེ་ངོ་ཤེས་པས་ཆོག་གོ། །ཞེས་གསུངས་སོ། །དེ་ཡང་ཐུགས་རྗེའི་ཐག་པ་དཀར་དམར་ལས་འོད་ལྔར་མཆེད་པའི་ཀློང་ན་ཚོམ་བུའི་སྐུ་དང་རང་སྣང་དུ་ཤར་བ་དེ་རང་ངོ་ཤེས་པ་དང་། སྐད་ཅིག་མ་ལ་གྲོལ་ཏེ་ཟང་ཐལ་བས། ཕྱིར་སྣང་གང་ཡང་མེད་དོ། །དཔེར་ན་ཁང་ནང་གི་ནམ་མཁའ་སྒོ་མཐོངས་ནས་ནམ་མཁའ་ཆེན་པོ་དང་འབྲེལ་པ་དེ། ཁང་པ་ཞིག་དུས་དབྱེར་མེད་གཅིག་ཏུ་གནས་པ་བཞིན་ཏེ། ཀུན་གསལ་ལས། དབང་པོས་ཡང་རབ་གྱུར་པ་ལ། །ཡེ་ནས་ཟང་ཐལ་ཆེན་པོ་ལ། །བར་དོ་མེད་ཅིང་སྐད་ཅིག་མེད། །ད་ལྟ་ཉིད་དུ་རང་གནས་ཡིན། །རང་བཞིན་དག་པའི་ནམ་མཁའ་ལ། །ཆོས་ཉིད་དག་པའི་ངོ་བོ་གནས། །དེ་ལ་རིག་པ་ཟང་ཐལ་ཤར། །ཤར་བ་མ་ཡིན་གནས་པ་ཡིན། །དཔེར་ན་ནམ་མཁའ་ཟང་ཐལ་ལ། །ཁང་ཁྱིམ་བྱས་པས་གུད་དུ་ཆད། །ཁང་པ་ནང་གི་ནམ་མཁའ་དང་། །རང་བཞིན་དག་པའི་ནམ་མཁའ་གཉིས། །སྒོ་འམ་མཐོངས་ན་སྒྲིབ་མེད་པར། །ནམ་མཁའ་གཉིས་པོ་སྒྲིབ་མེད་གསལ། །བག་ཆགས་སྦུབས་ཀྱི་རིག་པ་དང་། །མཁའ་ལ་གནས་པའི་རིག་པ་གཉིས། །ཡེ་ཤེས་སྒོ་ཡིས་མཚམས་སྦྱར་ནས། །བག་ཆགས་ལུས་ཀྱིས་མ་བསྒྲིབས་པར། །གཉིས་མེད་ཟང་ཐལ་ཆེན་པོར་གནས། །རྟོགས་པའི་དོན་ཆེན་དེ་ལྡན་ན། །སེང་གེས་མཆོངས་པས་ས་ཆོད་ལྟར། །ཡེ་ཤེས་ཟང་ཐལ་(༢༡༥)ཆེན་པོ་ཡིས། །བར་དོ་སྐྱེ་འགགས་མི་གནས་པར། །རིན་ཆེན་སྦུབས་ཀྱི་ནང་ན་སྤྱོད། །ཅེས་གསུངས་སོ། །དུས་དེར་སེམས་དང་ཡེ་ཤེས་རྒྱབ་གྱེས་པར་ཡར་གྱི་ཟང་ཐལ་ཐུགས་རྗེའི་ཐག་པ་ངོས་གཟུང་སྟེ། ངོ་སྤྲོད་སྤྲས་པ་ལས། རྡོ་རྗེ་འཛིན་པ་སེམས་གློ་བའི་ནང་ན་ཡོད་པ་དེ་ལམ་རྩ་གྲོ་སོག་སྦུབས་མ་ན་ཡར་སོང་བས། འདོད་པའི་སྒོ་གསུམ་དབུགས་ཆད་དོ། །ཡེ་ཤེས་སྙིང་གི་དཀྱིལ་ན་ཡོད་པས། ལམ་རྩ་དར་དཀར་གྱི་སྐུད་པ་འདྲ་བ་ནས་འོང་། སྒོ་མིག་ནས་ཐོན་པས་སེམས་དང་ཡེ་ཤེས་རྒྱབ་གྱེས་སོ། །རིག་པ་འཛིན་པ་ཉོན་ཅིག །དབུགས་མ་ཆད་པ་ལ་རང་གི་མིག་གཡས་པའི་ནང་ནས་ཐུགས་རྗེའི་ཞགས་པ་དཀར་ལ་འཚེར་བ་ཤར། མིག་གཡོན་པའི་ནང་ནས་ཀུན་དུ་བཟང་མོའི་ཐག་པ་དམར་ལ་དྭངས་པ་ཤར་བའི་དུས་སུ། ཐག་པ་དཀར་ལ་འཚེར་བ་འདི་རང་གི་ཤེས་རིག་མ་འགགས་པར་གསལ་བ་ཀུན་ཏུ་བཟང་པོའི་གདངས་སུ་ཤར་བ་ཡིན། དམར་ལ་དྭངས་པ་འདི་རིག་པའི་ངོ་བོ་སྟོང་པ་ཆོས་ཉིད་ཀུན་ཏུ་བཟང་མོའི་རང་གདངས་ཡིན་སྙམ་པ་རྒྱུད་ལ་ཤར་བ་དང་རང་གི་སེམས་གློ་བའི་ནང་ནས་དོན། རྩ་སོག་མའི་སྦུ་གུ་ཙམ་ནས་ཡར་སོང་། རང་གི་སྙིང་གི་ནང་ན་སྐུ་གསུམ་ཡེ་ཤེས་ལྔའི་སྦུག་ན་བུམ་པའི་ནང་གི་མར་མེ་བཞིན། འོད་ལྔའི་ནང་ན་སྐུ་དང་ཡེ་ཤེས་འགག་པ་མེད་པར་གསལ་བ་དང་འཕྲད། སེམས་རྟོག་པ་དང་བཅས་པའི་ཡེ་ཤེས་རྟོག་མེད་དུ་ཐིམ། སེམས་ཡེ་ཤེས་སུ་གྲོལ་བས་བློན་པོ་བཙོན་དུ་ཟིན་ནོ། །ཡེ་ཤེས་ཐུགས་རྗེའི་ཐག་པ་ལ་འདུས། ཐག་པ་ཀུན་བཟང་ཡབ་ཡུམ་ལ་ཐིམ། ཀུན་བཟང་ཡབ་ཡུམ་རིན་པོ་ཆེའི་སྦུབས་ན་བུམ་པའི་ནང་གི་མར་མེ་བཞིན་གསལ་ལ་འཛིན་པ་མེད་པར་བཞུགས་སོ། །དབུགས་མ་ཆད་པར་སེམས་ཡེ་ཤེས་ཀྱི་ངང་དུ་ཐིམ་པས་འཆི་རྒྱུ་མ་བྱུང་། མ་ཤི་བར་སངས་རྒྱས་ཐོབ་ནས་ཕུང་པོ་ལྷག་མ་མེད་པར་སངས་རྒྱའོ། །བར་དོར་མི་སྡོད་པར་ཡར་གྱི་ཟང་ཐལ་དུ་སངས་རྒྱའོ། །ཞེས་སོ། །དེའི་ཚེ་གྲོལ་ལུགས་ནི། ཡང་དེ་ཉིད་ལས། རང་གི་སྙིང་གི་དཀྱིལ་ན་སྐུ་གསུམ་ཡེ་ཤེས་ལྔའི་སྐུ་བཞུགས་པས། དེའི་སྣང་བ་རང་གི་མིག་གི་ནང་དུ་ཤར་(༢༡༦)ནས། མདུན་གྱི་ནམ་མཁའ་ལ་འོད་ཁ་དོག །རྣམ་པ་ལྔ་རང་ལ་འཆར་རོ། །དེའི་དུས་སུ་རང་གི་ཤེས་པ་མིག་ལ་གཏད་དོ། །མིག་ཆོས་ཉིད་ལ་གཏད་ནས་བལྟས་པས། སྣང་བ་སེམས་ཀྱི་དབང་དུ་འདུས་ནས་སེམས་རིག་པའི་དབང་དུ་འདུས་ཏེ། མིག་གི་རྣམ་ཤེས་འོད་དཀར་པོའི་ནང་དུ་འདུས། རྣ་བའི་རྣམ་ཤེས་འོད་ལྗང་གུའི་ནང་དུ་འདུས། སྣའི་རྣམ་ཤེས་འོད་སེར་པོའི་ནང་དུ་འདུས། ལྕེའི་རྣམ་ཤེས་འོད་དམར་པོའི་ནང་དུ་འདུས། ལུས་དང་ཡིད་ཀྱི་རྣམ་ཤེས་འོད་མཐིང་ཁའི་ནང་དུ་འདུས། འོད་མཐིང་ཁ་རྣམ་སྣང་དུ་གྲོལ། འོད་དཀར་པོ་རྡོ་རྗེ་སེམས་དཔར་གྲོལ། འོད་སེར་པོ་རིན་ཆེན་འབྱུང་ལྡན་དུ་གྲོལ། འོད་དམར་པོ་སྣང་བ་མཐའ་ཡས་སུ་གྲོལ། འོད་ལྗང་གུ་དོན་ཡོད་གྲུབ་པར་གྲོལ། རྣམ་པར་སྣང་མཛད་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངང་དུ་གྲོལ། རྡོ་རྗེ་སེམས་དཔའ་མེ་ལོང་ལྟ་བུའི་ཡེ་ཤེས་ཀྱི་ངང་དུ་གྲོལ། རིན་ཆེན་འབྱུང་ལྡན་མཉམ་པ་ཉིད་ཀྱི་ཡེ་ཤེས་ཀྱི་ངང་དུ་གྲོལ། སྣང་བ་མཐའ་ཡས་སོ་སོར་རྟོགས་པའི་ཡེ་ཤེས་ཀྱི་ངང་དུ་གྲོལ། དོན་ཡོད་གྲུབ་པ་བྱ་བ་གྲུབ་པའི་ཡེ་ཤེས་ཀྱི་ངང་དུ་གྲོལ། ཡེ་ཤེས་ལྔ་ཀུན་བཟང་ཡབ་ཡུམ་གྱི་ངང་དུ་གྲོལ། ཀུན་བཟང་ཡབ་ཡུམ་ཞིང་ཁམས་སུམ་བརྩེགས་ཀྱི་ངང་དུ་བཞུགས་སོ། །ཞེས་སོ། །

དེ་ལྟར་ཐུགས་རྗེའི་ཐག་པ་དང་དེའི་གདངས་ལས་ཤེས་རབ་ཀྱི་སྐུ་ལྔ་སྐད་ཅིག་ལ་སྣང་བ་རང་ངོ་ཤེས་ནས། མ་ཐོག་ཏུ་གྲོལ་བ་ནི། བར་དོ་མེད་པར་སངས་རྒྱ་བའི་མན་ངག་གོ། །དེ་རང་ངོ་མ་ཤེས་ན་སྒྲ་འོད་ཟེར་གསུམ་དུ་ཤར་བའི་རྗེས་ལ། སྣང་སྲིད་ཐམས་ཅད་ཆོས་ཉིད་ཀྱི་འོད་གསལ་དུ་ཤར་བ་ལ། འཇུག་པ་ཤེས་པའི་གནད། གྲོལ་བ་ལུས་ཀྱི་གནད། མཐར་ཕྱིན་པ་ངོ་ཤེས་པའི་གནད་དོ། །གནད་ཀྱི་མན་ངག་གསུམ་ཁྲིད་ཡིག་ཏུ་བསྟན་པ་བཞིན་ཤེས་པར་བྱའོ། །འདི་དག་གི་ཚེ་གདམས་པའི་དམར་ཐག་བཅད་པ། འཆི་བའི་དམར་ཐག་བཅད་པ་སངས་རྒྱ་བའི་དམར་ཐག་བཅད་པ་གསུམ་དུ་རིགས་པར་བྱ་སྟེ། སངས་རྒྱས་རང་ཆས་ཆེན་པོའི་རྒྱུད་ལས། གང་ཞིག་འཆི་བའི་ཚེ་དྲོད་རྐང་མཐིལ་ནས་སྤྱི་བོ་ཚངས་པའི་བུ་ག་ནས་ཡར་ཐོན། སེམས་གློ་བའི་ནང་ནས་ཐོན་ནས་དབུགས་(༢༡༧)སྣ་སྒོར་ཆད། སངས་རྒྱས་སྙིང་གའི་ནང་ནས་ཡར་བྱོན་པའི་མིག་གཡས་ནས་ཡར་ཐོན་པའི་དུས་སུ། འཁོར་བ་རུ་ལོག་ནས་སྣང་སྲིད་ཐམས་ཅད་འོད་དང་སྐུར་འཆར་རོ། །སྣང་སྲིད་འོད་དང་སྐུར་ཤར་བ་དེ་རང་གི་རིག་པའི་ལུས་སམ། རང་འོད་དམ། རང་སྣང་ངམ། རང་གདངས་རང་ལ་ཤར་བ་ཤེས་པས། རང་འོད་སྐུ་ལ་གཉིས་སུ་མེད་པར་ཐིམ་ནས་སངས་རྒྱ་བས། གདམས་ངག་ཐམས་ཅད་ཀྱི་དམར་ཐག་སྣང་སྲིད་འོད་སྐུར་ཤར་བའི་དུས་སུ་བཅད་དོ། །ཀུན་ཏུ་བཟང་པོའི་ངང་དུ་འཆི་བ་དང་། ཀུན་ཏུ་བཟང་མོའི་ངང་དུ་འཆི་བའོ། །དེ་ལ་ཀུན་ཏུ་བཟང་པོའི་ངང་དུ་འཆི་བ་ནི། ནད་ཐམས་ཅད་སྲོག་རྩར་འདུས་ནས་འཆི་བ་ཡིན་པས། ན་ཚ་ཟུག་གཟེར་ཤིན་ཏུ་ཆེ་བར་འཆིའོ། །ན་ཚ་ཟུག་གཟེར་ལྷག་པ་རེ་ལ་རྟོགས་པའི་ཤེས་རབ་ལྷག་པར་སྐྱེའོ། །བདག་འཆི་བའི་དུས་ཀྱི་དམར་ཐག་ཀུན་ཏུ་བཟང་པོའི་ངང་དུ་འཆི་བ་ལ་ཐག་བཅད་དོ། །

ཀུན་ཏུ་བཟང་མོའི་ངང་དུ་འཆི་བ་ནི། དྭངས་མ་ཐམས་ཅད་རྩ་སྦུབས་སུ་འདུས་པས་ནད་ཀྱི་ཟུག་གཟེར་མེད་དེ། བདེ་བའི་འོད་གསལ་རེ་སྐྱེའོ། །དེའི་ཚེ་ཆོས་ཉིད་ཀུན་ཏུ་བཟང་མོའི་ངང་དུ་ཐག་བཅད་དོ། །གསང་བའི་བདག་པོ་སངས་རྒྱ་བ་ལ་གཉིས་ཡིན་ཏེ། ཆོས་ཉིད་མ་དང་འཕྲད་པ་དང་། ཡེ་ཤེས་རང་ས་ཟིན་པའོ། །ཆོས་ཉིད་མ་དང་འཕྲད་པ་ནི། འཁྲུལ་སྣང་འགགས་པས་དག་སྣང་འཆར་བ་ཡིན་ནོ། །ཡེ་ཤེས་རང་ས་ཟིན་པ་ནི་འོད་ལྔ་རང་འོད་དུ་ངོ་ཤེས་པས། རང་འོད་ཀྱི་སྣང་བ་ལ་གཉིས་སུ་མེད་པར་ཐིམ་ནས་སངས་རྒྱ་བས། བདག་སངས་རྒྱ་བའི་དུས་ཀྱི་དམར་ཐག་ཆོས་ཉིད་མ་དང་འཕྲད་པའི་དུས་ན་བཅད་དོ། །ཞེས་གསུངས་སོ། །

འདི་ནི་འདའ་ཁ་དོན་གྱི་མན་ངག་སྟེ། འཕྲད་ཆོག་སྙིང་ཏིག་གི་ཟབ་ཆོས་སུ་དང་འཕྲད་པ་འབད་མེད་དུ་གྲོལ་བར་བྱེད་པའོ། །དེ་ཡང་ངོ་སྤྲོད་སྤྲས་པ་ལས། གསང་བའི་བདག་པོ་དབང་པོ་ལ་རྣོ་རྟུལ་མེད་དོ། །ཤེས་རབ་ལ་ཆེ་ཆུང་མེད་དོ། །དུས་ལ་སྔ་ཕྱི་མེད་དོ། །ན་སོ་ལ་རྒས་གཞོན་མེད་དོ། །སྡིག་པ་ལ་ཆེ་ཆུང་མེད་དོ། །འཆི་ཁར་བསྟན་ཀྱང་སངས་རྒྱ་བས་འཆི་ཁ་མ་བསྒྱུར་ཐབས་ཀྱི་མན་ངག་ཅེས་བྱའོ། །རིགས་ཀྱི་བུ་ངའི་མན་ངག་རིན་པོ་ཆེ་འདི་ནི་མ་བསྒོམས་(༢༡༨)པར་སངས་རྒྱ་བ་ཡིན་ནོ། །དེའི་ཕྱིར་ན་གདམས་ངག་ཅན་གནད་ཀྱིས་སངས་རྒྱ་བ་ཡིན་ནོ། །ཞེས་སོ། །འདི་ལྟ་བུའི་ཡེ་ཤེས་རྟག་ཏུ་ཡོད་པས་འཆི་ཐེབས་རེ་ལ་ཤར་ཡང་། ངོ་མ་ཤེས་པས་འཁོར་བར་འཁྱམས་ཏེ་འཁོར་ལ། ཐུན་མོང་གི་ཆོས་ལ་འབད་ཀྱང་མི་གྲོལ་ཏེ། དེ་ཉིད་ལས། ཁམས་གསུམ་གྱི་སེམས་ཅན་ལ་ཡེ་ཤེས་སྣང་བ་ཡང་ནས་ཡང་དུ་ཤར་ཡང་། དེ་ངོ་མ་ཤེས་པས་འཁོར་བར་འཁྱམས་སོ། །ཞེས་པ་དང་། མན་ངག་སྙིང་དགོངས་ལས། ཀྱེ་གསང་བའི་བདག་པོ་རང་སྣང་ངོ་མ་ཤེས་ན་བསྐལ་པར་ཆོས་བྱས་ཀྱང་སངས་མི་རྒྱའོ། །ཞེས་སོ། །དེའི་ཕྱིར་གཞི་ལྷུན་གྲུབ་ཀྱི་སངས་རྒྱས་ད་ལྟ་རང་ལ་ཡོད་པས་ངེས་ཤེས་བསྐྱེད་ནས། འཆི་ཁར་རང་ངོ་ཤེས་པར་བྱ་བ་གཅེས་ཏེ། འཁོར་བ་ལ་བློ་ལོག་པའི་ཕྱིར་རོ། །རྣལ་འབྱོར་རྣམས་ཀྱི་དབུགས་འཕོ་དུས་མིག་དང་ཚངས་བུག་གཉིས་རིག་པའི་སྒོ་ཡིན་ལ། དེ་གཉིས་གང་ནས་འཕོས་ཀྱང་འདའ་ཁ་ཡེ་ཤེས་ཀྱི་དགོངས་པ་མངོན་དུ་འཆར་རོ། །ཁྱད་པར་དུ་མིག་གཉིས་མེ་ལོང་ཡེ་ཤེས་ཀྱི་སྒོ་ཡིན་པས། ཐུགས་རྗེ་རྒྱུན་གྱི་ཐག་པ་འཆར་བའི་གནད་ཀྱིས། ད་ལྟ་ཤེས་པ་མིག་ལ་གཏད་པ་གཅེས་སོ། །དངོས་སུ་རིག་པ་དང་རང་གདངས་ད་ལྟ་ཏིང་ངེ་འཛིན་ཤུགས་ལ་སྐྱེ། ད་གཟོད་རྩ་ལམ་བྱང་བས་སྐད་ཅིག་མ་ལ་རང་སྣང་ངོ་ཤེས་པར་བྱེད་པའི་གནད་དོ། །དེ་ཕྱིར་འདའ་ཁའི་གདམས་ངག་སྙིང་གི་དཀྱིལ་དུ་སྦའོ། །

ཚུལ་འདི་གསང་ཆེན་གནད་ཀྱི་མན་ངག་སྟེ། །སུ་དང་འཕྲད་པ་འབད་མེད་གྲོལ་བའི་ལམ། །སྲིད་པ་ཐ་མའི་དམ་ཆོས་སྙིང་པོ་འདི། །ཞེ་དགའི་ཡིད་ཀྱིས་རང་གི་སེམས་ལ་འཆང་། །ཁོ་བོ་སྔོན་སྦྱངས་བསགས་པ་རྒྱ་ཆེ་བས། །བླ་མ་སངས་རྒྱས་དངོས་དང་ཞལ་མཇལ་ཏེ། །འདི་འདྲའི་དམ་ཆོས་ཡིད་བཞིན་གཏེར་དང་འཕྲད། །ཆོས་ཉིད་མལ་ན་བློ་བདེའི་རྣལ་འབྱོར་ཉལ། །ཕྱི་རབས་ཀུན་ཀྱང་དད་ལྡན་དགའ་བ་བསྐྱེད། །རང་རེའི་ཆོས་བརྒྱུད་འཕྲད་ཆོག་བདུད་རྩིའི་གཏེར། །སངས་རྒྱས་ལག་འཆང་འདི་འདྲ་གཞན་ན་མེད། །ངོ་མཚར་བས་ཀྱང་ཆེས་མཚར་ཨེ་མ་ཧོ། །ཟབ་མོའི་གནད་བསྡུས་ངེས་གསང་སྙིང་པོ་འདིས། །མ་ལུས་འགྲོ་ཀུན་ཕྱམ་གཅིག་ཡོངས་གྲོལ་ཤོག །འདའ་ཁ་(༢༡༩)དོན་གྱི་མན་ངག་ཅེས་བྱ་བ། བླ་ན་མེད་པའི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་ནགས་ཁྲོད། ཀུན་ཏུ་བཟང་པོའི་ཁང་བཟང་། ཆོས་མཐོང་བའི་སྒོ་རབ་ཏུ་བཟང་པོར་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། བཏགས་གྲོལ་སྙིང་པོ།

༄༅། །ཟབ་མོ་ཡང་ཏིག་ལས། བཏགས་གྲོལ་སྙིང་པོ་བཞུགས་སོ། །

༄༅། དཔལ་ལྡན་ཡོན་ཏན་རིན་ཆེན་གཏེར། །འདོད་དགུའི་རེ་བ་རྫོགས་མཛད་པ། །བླ་མ་ཀུན་ལ་ཕྱག་འཚལ་ཏེ། །བཏགས་གྲོལ་ཐིག་ལེ་ཆེན་པོ་བྲི། །

དེ་ཡང་མཐིང་ཤོག་ངོས་རེར་སོར་བཅུ་དྲུག་གྲུ་བཞི་པའི་དབུས་ན། གླན་སོར་གཉིས་ནས་རེ་ཁ་བཞིས་བསྐོར་བའི། ལྟེ་བ་ལ་གསེར་གྱི་རྡོ་རྗེ་རྩེ་གསུམ་པ་ལྟེ་བ་ལ་ཨཱ་ཨཱཿཧཱུྃ་གིས་མཚན་པའི་མཐར། དཀར་དམར་སྔོ་སེར། ལྗང་གུའི་འོད་ལྔས་བསྐོར་བ་བྲི། ཁོར་ཡུག་ནང་ན་ཀུན་བཟང་ཡབ་ཡུམ་སྙིང་པོ་བྲི། བར་པ་ཐིག་ལེ་ཉི་ཤུ་རྩ་ལྔར་ཡེ་ཤེས་ཉི་ཤུ་རྩ་ལྔའི་སྙིང་པོ་བྲི། ཕྱི་མ་ལ་ཆ་ལྔར་བསྐོར་བའི་ནང་མ་ལ། ཡིག་དྲུག་ཐིག་ཆུང་རེ་བྲི། དེ་ནས་ཕྱི་ཕྱིར། དབྱངས་ཡིག་བཅུ་དྲུག །གསལ་བྱེད་སུམ་བཅུ་རྩ་བཞི། རྟེན་འབྲེལ་སྙིང་པོ། ཕྲིན་ལས་བཞིའི་སྤེལ་ཚིག་རྣམས་ཡིག་མགོ་ཕྱིར་བསྟན་པ་བྲིས་པའི་མཐར་དཀར་དམར་མཐིང་སེར་ལྗང་གུའི་འོད་རིམ་ལྔས་བསྐོར་བའོ། །ཀུན་བཟང་ཡབ་ཡུམ་གྱི་སྙིང་པོ་ནི། ཨེ་མ་ཀི་རི་ཀི་རི་མ་ས་དྷ་བྷ་ལི་ས་མི་ཏ། སུ་རུ་སུ་རུ། ཀན་དྷ་ལི་མ་སུ་མ་སུ། ཨི་ཀ་ར་སུ་བྷ་ས་ཏ་ཡེ། ཙ་ཀ་ར་བྷུ་ལི་ཏ་ལཱ་ཡེ། ས་མུན་ཏ་ཙ་རྒྱ་སུ་བྷ་ཡེ། བྷི་ཏི་ས་ན་བྷྱེ། བྷུ་ལི་ཡཱེ། ས་ཀ་རི་དྷུ་ཀ་ནི། མ་ཏ་དྷུ་བྷེ་ཏ་ན། པ་ར་ལི་ཏི་ས་ན། མ་ཁར་ཏེ་ཀེ་ལ་ན། སམ་བྷུ་ར་ཏ་མེ་ཀ་ཙ་ར་ཏར་པ། སུཪྻ་གྷར་པ་ཨེ་པ་ཤ་ན། ན་ར་བྷི་དྷི་ས་གྷུ་ཏི་པ་ཡ། གྷུ་ར་གྷུ་ར་ས་ཀ་ཁ་ར་ན་ལཾ། ན་ར་ན་ར་ཨི་ཐ་ར་ས། ཌ་ལཾ། སིརྣ་སིརྣ། བྷས་ས་རས་པ་ལཾ། བུདྡྷ་བུདྡྷ་ལཾ། བྷུད་ཚིལ་ཤེས་ཀྱེ་ལཾ། ས་སཱ། རི་རཱ྇། ལ་ཁཱེ། ཨི་ཨཱི། མ་མཱ། རི་རཱ྇། མཧཱ་ཨ་སྨས་ཏ་བྷས་ལི། ས་མི་ཏ་སུ་རུ་སུ་རུ། ཀུན་དྷ་ལི་མ་སུ། ཨ་རི་ལི་བྷ་ཏ་ཡེ་ཙ་ཀུ་བྷུ་ཏི་ཏ་ལུ་ཡཱེ་ས་མུན་ཏ་ཙརྱ་སུ་གྷ་ཡཱེ། བྷི་ཏ་ས་(༢༢༠)ན་བྷ་གུ་ཡཱེ། ཀི་རི་དྷ་ཀི་ན། དྷ་ཀ་མཧཱ་བྷོ་ཏེ། ཏ་ན་པ་བར་ལཾ་དྷི། ས་ནཾ་ཁར་ཏ་ཀེ་ལ་ན། སཾ་དྷུ་དྷ་ར་ཏ། ཨེ་ཀ་ཙ་ར་པ་ཏི། ས་ཏ་སུཪྻ་གྷ་ཏར་ཨཱ། མ་ན་ས་ར་བྷེ་ཧོ། ཏིང་གྷུར་ལ། མ་སྨིན་ས་གུ་ཏི་ལ་ཏ་ཡཱེ། གྷུར་རླངས་གྷ་ཁ་པ། ན་ར་ལཾ། ན་ར་ན་ར་ལཾ། ཨི་ཐ་ས་ཏ་ལཾ། སིརྣ་བེ་ས་རས་པ་ལཾ། ས་ཁེ་ལཾ། ས་སཱ། རི་རཱ྇། ལི་ལཱ྇། ཨི་ཨཱི། མ་མཱ། ར་རཱ། ཞེས་པའོ། །ཡེ་ཤེས་ཉི་ཤུ་རྩ་ལྔའི་སྙིང་པོ་ནི། །དབང་པོའི་ཞེན་པ་བཟློག་པའི་ཕྱིར། །ཀརྨ་རཀྵ་གྷི་ཧར་ཧི། །ཕུང་པོའི་ཞེན་པ་བཟློག་པའི་ཕྱིར། །བྷེ་ག་ར་ལ་སོ་གད་གླིང་། །ཡུལ་ཀུན་ཞེན་པ་བཟློག་པའི་ཕྱིར། །བྷུ་ག་རི་ལ་བྷ་དྷུ་ཏྲི། །སེམས་ཀྱི་མངོན་ཞེན་བཟློག་པའི་ཕྱིར། །རཾ་པ་ཀ་ལ་ས་མི་ཁྱེ། །བྱུང་ཚོར་གནས་སུ་གཅད་པའི་ཕྱིར། །མ་ཏཾ་ཕ་རོལ་རས་མི་ཏ། །འདུས་ཚོགས་སྣང་བ་ངོས་བཟུང་ཕྱིར། །ཁ་ཏ་རི་ཀ་ས་མི་ཀླུང་། །རིག་པ་བཙོན་རར་གཞུག་པའི་ཕྱིར། །ཨ་ཀེ་ར་ན་བྷེ་ཙཀྵ། །འཁྲུལ་པའི་རང་རྒྱུད་ཁུངས་གཅད་ཕྱིར། །ཡ་ཏི་མུ་ཏ་ས་གུ་ལི། །རིགས་དྲུག་རིམ་གྱིས་བསྒྲལ་བའི་ཕྱིར། །ཡ་སིང་ར་ལུང་ས་མཱ་ཡ། །འཁོར་བ་དོང་ནས་དཀྲུགས་པའི་ཕྱིར། །མ་མ་ཀོ་ལིང་ས་མནྟ། །ཆོས་ཅན་ཐུར་དུ་གཞུག་པའི་ཕྱིར། །ག་རཾ་རཾ་པ་རི་མ་ཏི། །རོ་ཡི་བྱུང་ཁུངས་སྤུར་བའི་ཕྱིར། །བུ་ག་སིང་ཧ་ཕ་ག་ལ། །ཞེན་པའི་ཕྲེང་ཐག་གཅད་པའི་ཕྱིར། །རས་མི་སི་སི་ཁ་ཏེ་པ། །ལུག་རྒྱུད་ཨར་ལ་གཏད་པའི་ཕྱིར། །བྷི་གུ་མ་ལ་པ་ཏཾ་ཀེ། །ལྷ་ཡི་ཕྱག་རྒྱ་བལྟ་བའི་ཕྱིར། །ས་མ་ཉི་ཁཾ་དྷེ་ར་པ། །ལྟ་སྒོམ་ལོག་པ་དག་བྱའི་ཕྱིར། །བཛྲ་སཏྭ་ཏྲི་ཏོ་མེ། །ས་ལམ་དུས་གཅིག་གཅད་པའི་ཕྱིར། །གྷེ་བ་སུ་གྷར་ན་མ་ཡེ། །ཡིད་དཔྱོད་ལྟ་བ་ཁུངས་གཅད་ཕྱིར། །དྷརྨཱ་ས་ཏི་ས་གྷུ་ལཱི། །སྐུ་གསུམ་ལམ་དུ་བསླང་བའི་ཕྱིར། །རས་མི་ས་མ་ཁ་རྒད་ཚེ། །སྣང་བ་ལམ་དུ་བསླང་བའི་ཕྱིར། །རུ་པ་ས་མ་མི་ཏ་ལམ། །སྒྲ་ཡི་ཞེན་པ་ཐག་གཅད་ཕྱིར། །ང་ཏིག་པ་ཡང་ཀ་ལི་ས། །བསམ་གཏན་ཆེན་པོའི་ས་གནོན་ཕྱིར། །གྷཙྪ་ས་ཡང་པ་ལི་ཏཾ། །ཕྲིན་ལས་མཐའ་རུ་དབྱུང་བའི་ཕྱིར། །ཀརྨ་ཨེ་ཨ་ཨ་ནུ་ས། །སངས་རྒྱས་མངོན་ཞེན་བཟློག་པའི་ཕྱིར། །སང་ཀྲི་མ་མ་ཀརྨཱ་ཏ། །(༢༢༡)རྒྱལ་སྲས་རྣམས་ཀྱི་གནས་བཙལ་ཕྱིར། །ང་ལ་ཁེ་པ་ཀི་ལི་ས། །ཞེས་པའོ། །རང་བྱུང་གི་ཡི་གེ་དྲུག་ནི། འ། ཨ་ཧ། ཤ །ས། མའོ། །དབྱངས་ཡིག་བཅུ་དྲུག་ནི། ཨ་ཨཱ། ཨི་ཨཱི། ཨུ་ཨཱུ། རི་རཱ྇། ལི་ལཱ྇། ཨེ་ཨཻ། ཨོ་ཨཽ། ཨཾ་ཨའོ། །གསལ་བྱེད་སུམ་ཅུ་རྩ་བཞི་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵའོ། །རྟེན་འབྲེལ་སྙིང་པོ་ནི། ཨཱ་ཡེ་དྷརྨཱ་ཧེ་ཏུ་པྲ་བྷ་ཝ། ཧེ་ཏུནྟེ། ཥཱནྟ་ཐ་ག་ཏོ། ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི། མཧཱ་ཤྲ་མ་ཎ་སྭཱ་ཧཱ། ལས་བཞིའི་སྤེལ་ཚིག་ནི། ནད་དང་གདོན་དང་འཇིགས་པ་བརྒྱད་དང་། སྡིག་སྒྲིབ་ཐམས་ཅད་རིག་པར་ཞི་བ་ཤནྟིཾ་ཀུ་རུ་ཡེ་སྭཱ་ཧཱ། ཚེ་དང་བསོད་ནམས་ཞིང་ཁམས་ཐམས་ཅད་རིག་པར་པུཥྚིཾ་ཀུ་རུ་ཡཱེ་སྭཱ་ཧཱ། སངས་རྒྱས་ཆོས་དང་དགེ་འདུན་དང་འཁོར་འདས་ཐམས་ཅད་རིག་པར་པ་ཤཾ་ཀུ་རུ་ཡེ་སྭཱ་ཧཱ། དགྲ་དང་བགེགས་དང་དུག་ལྔ་དུག་གསུམ་ཉོན་མོངས་པ་ཐམས་ཅད་རིག་པར་མཱ་ར་ཡ་ཕཊ། ཅེས་པའོ། །མཐིང་ཤོག་ལ་གསེར་གྱིས་བྲིས་ཏེ། རྡོ་རྗེའི་རྩེ་ཐད་དྲངས་ལ་ཡིག་མགོ་ཐམས་ཅད་གཏད་ནས་གཟབས་མ་བྲིའོ། །འདི་ནི་གསེར་ཡིག་ཅན་གྱི་སྙིང་པོ་དམ་པ་སྟེ་མེད་ཐབས་མེད་དོ། །

དེ་ནས་རབ་ཏུ་གནས་པ་ནི། ཚོམ་བུ་ལྔའི་མཎྜལ་ལམ། ནས་ཀྱི་ཚོམ་བུའི་སྟེང་དུ་མཉྫི་འབྲུའི་སྣོད་དར་ཟབ་དང་བཅས་པའི་སྟེང་དུ་འཁོར་ལོ་གཞུག་སྟེ། ཕྱི་ནང་གི་མཆོད་པས་བསྐོར། ཚོགས་ཀྱི་ཡོ་བྱད་བཤམས། བདག་ཉིད་ཁྲོ་བོའི་ང་རྒྱལ་གྱིས་བགེགས་བསྐྲད་ལ། སྟོང་པའི་ངང་ལས་བྷྲུཾ་ལས་འཁོར་ལོ་དེ་ཉིད་ཡེ་ཤེས་ལྔའི་རྭ་བའི་དབུས་ན། ཀུན་བཟང་ཡབ་ཡུམ་ལ། རིགས་ལྔའི་སངས་རྒྱས་ཀྱིས་བསྐོར་བ་སྤྲུལ་སྐུའི་འཕྲོ་འདུ་ཅན་དུ་བསྐྱེད་ལ། ཡེ་ཤེས་པ་གཞུག །སྐུ་གསུང་ཐུགས་ཀྱི་བྱིན་གྱིས་བརླབས། རིགས་ལྔའི་སྙིང་པོ་རྟེན་འབྲེལ་སྙིང་པོ་དང་བཅས་པས་མེ་ཏོག་འཐོར་མཆོད་པ་དང་། བསྟོད་པ་དང་། མངའ་དབུལ་ཅི་རིགས་སུ་བྱས་ལ། ཤིས་པ་བརྗོད་ནས། རང་བྱུང་གི་ཡི་གེ་ཉིད་དུ་བསྒྱུར་ཏེ། ཚར་གཅིག་བཀླགས་པའི་རང་སྒྲས་སེམས་ཅན་ཐམས་ཅད་འཁོར་བ་ལས་ཐར་ཏེ། གདོད་མའི་དབྱིངས་སུ་ཐིམ་པ་ནི་རབ་ཏུ་གནས་པའོ། །དེ་ནས་དབང་བསྐུར་ཏེ་ལུས་(༢༢༢)ལ་གདགས་པ་ནི། འཁོར་ལོ་སློབ་མའི་སྤྱི་བོར་བཞག་ལ། གང་འདིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་ཐམས་ཅད་ཀྱིས་བྱིན་གྱིས་བརླབ་དུ་གསོལ། དབང་བསྐུར་དུ་གསོལ། སྐུ་རྡོ་རྗེ་འགྱུར་བ་མེད་པ་དངོས་གྲུབ་དམ་པ་ཐོབ་པར་མཛད་དུ་གསོལ། རིགས་ཀྱི་བུ་ཆེ་གེ་མོ་ཞེས་བྱ་བའི་ཚེ་འདི་ཉིད་ལ་ལྟ་བ་དང་དགོངས་པ་དང་ཏིང་ངེ་འཛིན་ཁྱད་པར་ཅན་གོང་ནས་གོང་དུ་འཕེལ་བ་དང་། ནད་དང་གདོན་དང་འཇིགས་པ་ཆེན་པོ་བརྒྱད་ལ་སོགས་པ་མི་མཐུན་པའི་ཕྱོགས་ཐམས་ཅད་རབ་ཏུ་ཞི་ཞིང་། ཚེ་དང་དཔལ་དང་སྣང་བ་བཞིའི་ཡེ་ཤེས་དམ་པ་རྒྱས་ཏེ། འཁོར་འདས་ཐམས་ཅད་རིག་པའི་ངང་དུ་འདུས་ནས་ཕྲིན་ལས་བཞིའི་དགོངས་པ་མཐར་ཕྱིན་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པ་ཐོབ་པར་མཛད་དུ་གསོལ། བར་དོར་ཡང་ཆོས་ཉིད་འོད་གསལ་གྱི་དགོས་པ་མངོན་དུ་གྱུར་ནས་ལྷུན་གྲུབ་རིན་པོ་ཆེའི་སྦུབས་ལ་གྲོལ་བར་མཛད་དུ་གསོལ། ཕྱི་མར་ཡང་རང་བཞིན་སྤྲུལ་པ་སྐུའི་ཞིང་ཁམས་བགྲོད་པ་བར་དོ་མེད་པར་གདོད་མའི་ས་ལ་མངོན་པར་རྫོགས་པར་སངས་རྒྱས་ཏེ། སེམས་ཅན་གྱི་དོན་གཉིས་ལྷུན་གྱིས་གྲུབ་པ་འབྱུང་བར་མཛད་དུ་གསོལ། ཨཱ་ཨཱཿཧཱུྃ་སྭཱ་ཧཱ། ཀཱ་ཡ་ཨ་བྷི་ཥཱིཉྩ་ཨཱ་ཨཱ་ཨཱ་ཞེས་བརྗོད་དོ། །མགྲིན་པར་གཏུགས་ལ། ཚིག་རྣམས་བརྗོད་ཅིང་། གསུང་རྡོ་རྗེ་ཞེས་པ་དང་། ཝ་ཀཱ་ཨ་བྷི་ཥཱིཉྩ་ཨཱཿཨཱཿཨཱཿཞེས་བརྗོད་དོ། །སྙིང་གར་གཏུགས་ལ། ཐུགས་རྡོ་རྗེ་ཞེས་པ་དང་། ཙིཏྟ་ཨ་བྷི་ཥཱིཉྩ་ཧཱུཾ་ཧཱུཾ་ཧཱུཾ། ཞེས་བརྗོད་དོ། །སྤྱི་བོ། མགྲིན་པ། སྙིང་ག །ལྟེ་བ་གསང་བ་ལྔར་གཏུགས་ལ། ཡེ་ཤེས་རྡོ་རྗེ་ཞེས་པ་དང་། ཛྙཱ་ན་བཛྲ་ཨ་བྷྱི་ཥཱིཉྩ་ཧཱུཾ། ཨཱ་ཧཱུཾ་ཏྲཱཾ་ཧྲཱི་ཨཿཞེས་བརྗོད་ནས་དར་ཟབ་ཀྱི་ན་བཟའ་གསོལ་རིན་པོ་ཆེའི་གའུར་བཅུག་སྟེ། སྤྱི་བོའམ། མགུལ་ལམ། སྙིང་གར་བཏགས་སོ། །དེའང་སྐྱེས་པ་གཡོན། བུད་མེད་ཀྱི་གཡས་སུ་སྙིང་གནས་པས་མཆན་ཁུང་གཉིས་གང་རུང་དུ་འཆང་བ་ཡིན་ནོ། །འདི་བཏགས་ན་དགེ་བ་བྱས་ཚད་དང་། སྡིག་པ་བྱས་ཚད་འབུམ་འགྱུར་དུ་འཕེལ་བས། སྡིག་(༢༢༣)པ་སྤང་། དགེ་བ་ལ་འབད་དོ། །མངོན་སུམ་སྙིང་ཏིག་གི་རྣལ་འབྱོར་པས་མ་བྲལ་བར་བཅངས་ཏེ། འཆི་ཁར་དབུགས་དང་བྲལ་དུས་ཡོད་པས་འགྲུབ་བོ། །གཞན་ལ་རོ་དང་ལྷན་ཅིག་བསྲེག་པའམ། འདི་ཉིད་སྙིང་གར་བསྲེགས་པས་བར་དོར་གྲོལ་བ་དང་། རང་བཞིན་སྤྲུལ་པར་གྲོལ་བ་དང་། དལ་འབྱོར་ཁྱད་པར་ཅན་ཐོབ་ནས་གྲོལ་བ་གང་རུང་སྟེ། མཚམས་མེད་བྱས་པ་ཡང་དེ་ལས་སྐྱོབ་སྟེ། སངས་རྒྱ་བར་བྱེད་པའི་ཐབས་ཁྱད་པར་ཅན་ཡིན་པས་ངོ་མཚར་བསྐྱེད་ལ་བཅང་བར་བྱའོ། །

གསང་ཆེན་ཐབས་ཀྱི་རྒྱལ་པོ་མཆོག །བཏགས་པས་འཁོར་བ་ལས་གྲོལ་བ། །འབད་མེད་སངས་རྒྱས་འཐོབ་བྱེད་ཉིད། །ཕྱི་རབས་དོན་དུ་ཡི་གེར་བཀོད། །དགེ་བས་བྱང་ཆུབ་ཐོབ་པར་ཤོག །བདག་གཞན་ཕྱོགས་བཅུར་ལྷུན་གྲུབ་ཤོག །གསེར་ཡིག་ཅན་གྱི་ཡང་སྙིང་། བཏགས་གྲོལ་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས་གངས་རི་ཐོད་དཀར་དུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཟབ་དོན་སྙིང་པོ་ཞེས་བྱ་བ།

༄༅། །ཟབ་མོ་ཡང་ཏིག་ལས། ཟབ་དོན་སྙིང་པོ་ཞེས་བྱ་བ་བཞུགས་སོ། །

༄༅། ཟབ་དོན་སྙིང་པོ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་ཚོགས་གཉིས་ཡོན་ཏན་རྒྱས་པའི་སྐུ། །རྣམ་གྲོལ་ཚངས་དབྱངས་དམ་ཆོས་སྒྲོགས་པའི་གསུང་། །ཟབ་ཅིང་རྒྱ་ཆེ་མཁྱེན་རབ་རྒྱས་པའི་ཐུགས། །རྒྱལ་དང་དེ་སྲས་བླ་མའི་ཚོགས་ལ་འདུད། །རྒྱུད་དོན་མན་ངག་སྙིང་པོའི་གནས་དག་ལས། །རབ་ཏུ་རྟོགས་དཀའ་དབྱེ་བ་ངེས་པའི་དོན། །རྣམ་གསུམ་རང་བཞིན་དག་པའི་ཟབ་དོན་ཉིད། །ཕྱི་རབས་དོན་དུ་བདག་གིས་འདིར་གསལ་བྱ། །

དེ་ལ་རྡོ་རྗེའི་གནས་སྤྱིའི་རང་བཞིན་ཤེས་པར་བྱ་བ་དང་། ཤེས་ནས་ཉམས་སུ་བླང་བའི་རིམ་པའོ། །དང་པོ་ལ་གསུམ་སྟེ། ཀུན་གཞི་དང་ཆོས་སྐུའི་དབྱེ་བ། སེམས་དང་ཡེ་ཤེས་ཀྱི་དབྱེ་བ། ཡིད་དང་ཤེས་རབ་ཀྱི་དབྱེ་བའོ། །དང་པོ་ནི། རང་བྱུང་གི་རིག་པ་གཅིག་ལ་འཁོར་འདས་གཉིས་བརྟེན་པ་ན། ངོ་བོ་རིག་པ་གཅིག་ལ་ཀུན་གཞི་དང་ཆོས་སྐུ་གཉིས་སུ་དབྱེ་བ་ལས། དང་པོ་ཀུན་གཞི་(༢༢༤)ནི་རིག་པ་ལས་གཞི་སྣང་ཤར་བ་ལས་བདག་ཏུ་བཟུང་བས་འཁོར་བ་གྲུབ་དུས། དྲི་མ་དང་བཅས་པའི་རིག་པ་གང་ཞིག་འཁོར་བ་པ་སོ་སོའི་ལུས་ངག་སེམས་དང་། དེ་དྲི་མ་རྣམས་ཀྱི་རྟེན་དུ་གྱུར་པའོ། །འདི་ལ་ངོ་བོ་ངེས་ཚིག །དབྱེ་བ། བྱེད་ལས། སྒྲ་འཇུག་པའི་རྒྱུ་མཚན་དང་བཞི་ལས། ངོ་བོ་ཚོགས་པ་སྡུད་པར་བྱེད་པའོ། །ངེས་ཚིག་ཀུན་མང་བ་ལས། གཞི་མང་པོ་འདུས་པའི་ལས་བྱེད་པའོ། །དབྱེ་ན་གསུམ་སྟེ། ཡེ་དོན་གྱི་ཀུན་གཞི་གནས་པས་གཞི་ཡིན་ལ། འགྱུ་བས་ན་ཀུན་ཡིན་པའོ། །སྦྱོར་བ་དོན་གྱི་ཀུན་གཞི་ནི། འདུས་པས་ན་ཀུན་ཡིན་ལ། གཉིས་སྦྱོར་བས་ན་གཞི་ཡིན། བག་ཆགས་ལུས་ཀྱི་ཀུན་གཞི་ནི། སྔ་ཕྱི་བསྡེབ་པས་ན་ཀུན་ཡིན་ལ། དངོས་པོ་འདུས་པས་གཞི་ཡིན། དེ་དག་ནི་རིག་པ་ཉིད་འཁོར་བས་བསྒྲིབས་པའི་ཆ་ནས་ཡེ་དང་། སེམས་རྣམ་ཤེས་ཚོགས་བརྒྱད་ཀྱི་རྟེན་དུ་གྱུར་པས་སྦྱོར་བ་དང་། ཁམས་གསུམ་སོ་སོའི་ལུས་གསུམ་གྱི་ཆར་བརྟེན་པས་བག་ཆགས་ཀྱི་ལུས་ཀུན་གཞི་ཞེས་སོ་སོའི་ཆའམ། ལྡོག་པ་ནས་བཏགས་པའོ། །བྱེད་ལས་ནི། བག་ཆགས་སྔ་ཕྱིའི་རྟེན་བྱེད། ལས་དང་ཉོན་མོངས་པས་རྒྱུ་བྱེད། ལུས་དང་ཚོགས་པ་དུ་མའི་རྐྱེན་བྱེད། ལུས་སེམས་ཀྱི་ཚོགས་སྦྱོར་བར་བྱེད་དོ། །སྒྲ་འཇུག་པའི་རྒྱུ་མཚན་ནི། བག་ཆགས་སྔ་ཕྱིའི་ཉིང་མཚམས་ནས་ལས་ཀྱི་རྣམ་སྨིན་སྔ་ཕྱིའི་འབྲེལ་དང་། རྒྱུ་འབྲས་ཀྱི་སྡེ་པ་ཀུན་ཡིན་ལ། དེ་ལྷན་ཅིག་ཏུ་ཚོགས་པའི་གཞི་ཡིན་པས་ན་ཀུན་གཞི་ཞེས་བྱ་སྟེ། མདོར་ན་འཁོར་བའི་ལུས་ངག་སེམས་དང་ཡུལ་དུ་སྣང་བ་ཐམས་ཅད་ཀྱི་རྟེན་ནམ་གཞིར་གྱུར་པས་ཀུན་གཞི་སྟེ། ཡེ་དོན་གྱི་ཀུན་གཞི་མ་རིག་པ་མཚུངས་ལྡན་ལུང་མ་བསྟན་དང་། སྦྱོར་བ་དོན་གྱི་ཀུན་གཞི་རྣམ་ཤེས་ཚོགས་བརྒྱད་དང་མཚུངས་ལྡན་ལུང་མ་བསྟན་དང་། བག་ཆགས་ལུས་ཀྱི་ཀུན་གཞི་གདོས་བཅས་འོད་དང་། མིང་གཞིའི་ཕུང་པོ་གསུམ་དང་མཚུངས་ལྡན་ལུང་མ་བསྟན་དུ་གནས་པའོ། །ཆོས་ཀྱི་སྐུ་ནི་སྟོང་གསལ་ཀ་ནས་དག་པའི་རིག་པ་མཚོན་བརྗོད་ལས་འདས་པ། ངོ་བོ་དགེ་སྡིག་སྐྱོན་ཡོན་ལས་འདས་པ་ནམ་མཁའ་ལྟ་བུའོ། །དེ་ལ་ངོ་བོ་རང་(༢༢༥)རིག་ཀ་ནས་དག་པའོ། །ངེས་ཚིག་རྣམ་པར་གྲོལ་བའི་ཡོན་ཏན་མཐར་ཐུག་གི་ཆོས་ཡིན་པས་ཆོས་སྐུའོ། །དབྱེ་ན་ངོ་བོ་རྣམ་དག་སྟོང་པའི་ཆོས་སྐུ། རང་བཞིན་གཏིང་གསལ་འཆར་གཞིའི་ཆོས་སྐུ། ཐུགས་རྗེ་རིག་སྟོང་ཁྱབ་པའི་ཆོས་སྐུ་གསུམ་སྟེ། ངོ་བོ་རང་བཞིན་ཐུགས་རྗེ་གསུམ་མོ། །བྱེད་ལས་དབྱིངས་དང་ཡེ་ཤེས་འདུ་འབྲལ་མེད་པས་འཁོར་བ་ཆོས་ཉིད་དུ་གྲོལ་བའི་གཞི་བྱེད་དོ། །སྒྲ་འཇུག་པའི་རྒྱུ་མཚན་ནི་དྲི་མ་མེད་པ་དང་། ལྷུན་གྱིས་གྲུབ་པ་དང་། གོ་མི་འགགས་པར་ཡེ་ཤེས་ཀྱི་སྣང་བ་དང་ཡོན་ཏན་གྱི་ཚོགས་འཆར་བའི་ཆོས་ཀྱི་འབྱུང་ཁུངས་ཡིན་པའི་ཕྱིར་ཆོས་སྐུ་ཞེས་སྒྲར་སྦྱར་བའོ། །མདོར་ན་རིག་པའི་གཤིས་ཤེལ་དང་ནམ་མཁའ་མེ་ལོང་ལྟ་བུ་ནི་ཆོས་སྐུ་ཞེས་བྱ་སྟེ། ངོ་བོ་སྟོང་ཡང་ཕྱང་ཆད་དུ་མ་སོང་། རང་བཞིན་གསལ་ཡང་མཚན་མར་མ་གྲུབ། ཐུགས་རྗེ་རིག་ཀྱང་དྲན་རྟོག་ཏུ་མ་གཡོས་པའོ། །དེ་དག་ཀྱང་མུ་ཏིག་ཕྲེང་བ་ལས། ཀུན་གཞི་ཉིད་ནི་བསགས་པའི་ཕྱིར། །ཆོས་ཀྱི་སྐུ་ནི་ཟག་པ་ཟད། །སྟོང་ཞིང་གསལ་ལ་གསལ་ཞིང་ཁྱབ། །བསམ་པས་མ་སྦགས་དྲན་པས་སངས། །སྤྲོས་པ་ཉིད་དང་བྲལ་བ་སྟེ། །ནམ་མཁའ་ལྟ་བུར་ཁྱབ་ཅིང་སྟོང་། །རང་དག་མཚོན་པ་ཀུན་དང་བྲལ། །རྒྱུ་དང་རྐྱེན་བཅས་ཀུན་གཞི་ལ། །བག་ཆགས་གསོག་བྱེད་གཟིངས་དང་འདྲ། །ཆོས་ཀྱི་སྐུ་ནི་བག་ཆགས་བྲལ། །ཡིད་དང་སེམས་སོགས་འདུས་པ་ལས། །ལུས་ཅན་ཀུན་གཞི་དུ་མར་སྣང་། །ཆོས་སྐུ་ཡིད་སོགས་བྲལ་བས་ན། །དུ་མ་གཟུགས་སྣང་ལུས་མེད་པའི། །འབྱུང་ཆེན་ལུས་ལ་ལྔ་པོ་སྣང་བས་ན། །དངས་པའི་འོད་ལྔ་འབྱུང་བས་བསྒྲིབས། །ཕྲ་རགས་ལྔ་ནི་ཡུལ་སྣང་བས། །ཁ་དོག་ལྔ་ཡང་རྡུལ་དང་བཅས། །འབྱུང་ལྔའི་ཆོས་སྐུ་མདུད་པ་རང་གྲོལ་བས། །ཆེན་པོ་ལྔ་ཡང་འོད་ལྔར་གསལ། །ཕྲ་རགས་དྲི་མ་ངང་ལོག་པས། །ཁ་དོག་ལྔ་པོ་མ་འདྲེས་གསལ། །བག་རྡུལ་ནམ་མཁའ་རང་དྭངས་པས། །གཞི་སྣང་བའི་ཡེ་ཤེས་ལྔ་ནི་འོད་དུ་ཤར། །དམིགས་པའི་འོད་ལྔ་ཆོས་སྐུ་ཆ་ལ་ཐིམ། །ཡུལ་དང་ཤེས་པ་རང་ཡལ་བས། །འབྱུང་ལྔའི་དྭངས་མ་འོད་དུ་ཐིམ། །དེ་ཕྱིར་འབྱུང་བ་དྭངས་(༢༢༦)སྙིགས་དབྱེ། །ཞེས་གསུངས་སོ། །

གཉིས་པ་སེམས་དང་ཡེ་ཤེས་དབྱེ་བ་ནི། སེམས་དང་ཡེ་ཤེས་གཉིས་པོ་རིག་པའི་རྩལ་དུ་གཅིག་ཀྱང་། འཁོར་འདས་སོ་སོའི་སྐྱོན་ཡོན་ལ་འཇུག་པའི་ཆ་ནས། སེམས་དང་ཡེ་ཤེས་གཉིས་སུ་དབྱེ་བ་ལས། དང་པོ་སེམས་ཀྱི་ངོ་བོ་ནི། རིག་པའི་རྩལ་གཟུང་འཛིན་དུ་ཞེན་པས། འཁོར་བའི་འཁྲུལ་སྣང་རྒྱུ་འབྲས་སྐྱེད་པར་བྱེད་པ་སྟེ། ངོ་སྤྲོད་སྤྲས་པ་ལས། རིགས་ཀྱི་བུ་སེམས་དང་སེམས་ལས་བྱུང་བ་ཐམས་ཅད་ནི་འཁོར་བའི་ཆོས་ཡིན་ནོ། །ཞེས་སོ། །དེ་ལས་སེམས་ཀྱི་ངོ་བོ་ཁམས་གསུམ་པའི་སེམས་སེམས་བྱུང་སྒྲོ་བཏགས་ཀྱི་རྣམ་པ་ཅན་དྲི་མའི་ཆོས་ཏེ། བདེན་གཉིས་ལས་ཀྱང་། སེམས་དང་སེམས་བྱུང་ཁམས་གསུམ་པའི། །སྒྲོ་བཏགས་རྣམ་པ་ཅན་རྟོག་ཡིན། །ཞེས་པ་དང་། འཇུག་པ་ལས། སེམས་འགགས་པ་དེ་སྐུ་ཡི་མངོན་སུམ་མཛད། །ཅེས་དགག་བྱ་དྲི་མར་བཤད་དོ། །དབྱེ་ན་སེམས་རྣམ་པར་ཤེས་པའི་ཚོགས་བརྒྱད། སེམས་བྱུང་ལྔ་བཅུ་རྩ་གཅིག་གོ། །ངེས་ཚིག་གཟུང་འཛིན་དུ་སེམས་པས་སེམས་སོ། །སྒྲ་འཇུག་པའི་རྒྱུ་མཚན་ནི། གང་ལ་སེམས། གང་གིས་སེམས། གང་སེམས་པར་བྱེད་པ་གསུམ་གྱིས་ཕྱིར་ན་སེམས་སོ། །དེའང་སེམས་ཀྱི་རྩ་བ་ཡེ་ཤེས་ཀྱི་གདངས་ཏེ། རླུང་གིས་བསྐྱོད་པ་ལས་ཡུལ་རིག་པ་ཡེ་ཤེས་ཀྱི་རྩལ། མི་འགྱུ་དགུ་འགྱུ་རླུང་གི་ཆ་སྟེ། རྟ་ལོང་བ་རྐང་ཅན་དང་། མི་འཕྱེ་བོ་མིག་ཅན་བཞིན་ནོ། །འདི་དག་ལ་མན་ངག་གང་གིས་ཕྱེ་ན། རྟེན་དང་། གནས་དང་། ལམ་དང་། སྒོ་དང་། བྱེད་ལས་དང་། འབྲས་བུ་ཐ་དད་དུ་བཞག་པ་ཉིད། ངོ་སྤྲོད་སྤྲས་པའི་རྒྱུད་ལས། གསང་བའི་བདག་པོ། སེམས་ཀྱི་རྟེན་ནི་རང་གི་ཤ་ཁྲག་གི་ལུས་བྱང་ཁོག་སྟོད་ཡིན་ནོ། །གནས་ནི་གློ་བའི་ནང་ན་གནས་སོ། །ལམ་ནི་གློ་བ་ནས་མགྲིན་པར་རྩ་གྲོ་སོག་གི་སྦུག་མ་ཙམ་གཅིག་གིས་སྦྲེལ་ནས་ཡོད་དོ། །དེ་ནས་ཡང་དབུགས་འགྱུ་བ་དེ་སེམས་ཀྱི་ལམ་ཡིན་ནོ། །སྣ་ཚོགས་པའི་འདོད་པའི་སྒོ་ཁ་དང་སྣ་བུག་གཉིས་ཏེ་གསུམ་ཡིན་ནོ། །འདོད་པའི་ཤེས་པ་དེ་ནས་བྱུང་ངོ་། །སེམས་རང་གི་ངོ་བོ་ནི་རྣམ་པར་རྟོག་པ་དང་བཅས་པ་དབུགས་(༢༢༧)ཕྱི་ནང་དུ་རྒྱུ་བ་འདི་རང་ཡིན་ནོ། །རིགས་ཀྱི་བུ་སེམས་དང་སེམས་ལས་བྱུང་བ་ཐམས་ཅད་འཁོར་བའི་རྒྱུ་ཡིན་ནོ། །ཞེས་སོ། །ཡེ་ཤེས་ཀྱི་ངོ་བོ་ནི་རྣམ་པར་མི་རྟོག་པའི་ཤེས་པ་རང་གི་གདངས་རང་འོད་ལྔ་དང་བཅས་པ་མྱ་ངན་ལས་འདས་པའི་ཆ་འཛིན་པར་བྱེད་པའོ། །དེ་ཡང་ཡེ་ཤེས་ཀྱི་ངོ་བོ་རིག་པ་དྲན་རྟོག་དང་བྲལ་བའོ། །ངེས་ཚིག་དེའི་དོན་ཤེས་པས་ཡེ་ཤེས་སོ། །དབྱེ་ན་གཞི་གནས་ཀྱི་ཡེ་ཤེས་ངོ་བོ་རང་བཞིན་ཐུགས་རྗེ་གསུམ། མཚན་ཉིད་འཛིན་པའི་ལྔ། ཤེས་བྱའི་ཡེ་ཤེས་གཉིས་སོ། །སྒྲ་འཇུག་པའི་རྒྱུ་མཚན་ནི། ཡེ་ཡི་དོན་གཞི་ཇི་བཞིན་པའི་ཤེས་པ་ཡིན་པས་ན་ཡེ་ཤེས་སོ། །དེ་དག་ཀྱང་རྟེན་ལ་སོགས་པས་དབྱེ་ན། ངོ་སྤྲོད་སྤྲས་པ་ལས། གསང་བའི་བདག་པོ་བདེ་བར་གཤེགས་པ་ཡེ་ཤེས་ཀྱི་ལུས་ཅན། བརྟེན་པ་རང་གི་ལུས་བྱང་ཁོག་སྟོད་འདི་ན་བརྟེན་ནས་ཡོད། གནས་པ་སྙིང་ན་གནས་སོ། །ལམ་ནི་སྙིང་དང་མིག་གི་བར་དུ་རྩ་དར་དཀར་གྱི་སྐུད་པ་ལྟ་བུ་མཉེན་ལ་འཁྲིལ་བ། ཁྲག་དང་ཆུ་སེར་མེད་པ་གཅིག་གིས་འབྲེལ་ནས་ཡོད་དོ། །དེ་ནི་ཡེ་ཤེས་ཀྱི་ལམ་ཡིན་ནོ། །སྒོ་ནི་མངོན་དུ་གྱུར་པའི་སྒོ་གཉིས་ལྐོག་ཏུ་གྱུར་པའི་སྒོ་གཉིས་ཏེ་བཞི་ཡིན་ནོ། །མངོན་དུ་གྱུར་པའི་སྒོ་གཉིས་ནི་རང་གི་མིག་གཉིས་ཡིན་ནོ། །ལྐོག་ཏུ་གྱུར་པའི་སྒོ་གཉིས་ནི་རང་གི་རྣ་བ་གཉིས་ཡིན་ནོ། །རང་གི་ངོ་བོ་ནི་དག་པ་ཆོས་ཀྱི་སྐུ་ངོ་བོ་སྟོང་པར་བཞུགས་སོ། །ཡེ་ཤེས་གསལ་བར་བཞུགས་སོ། །སྙིང་པོ་ཟང་ཐལ་དུ་བཞུགས་སོ། །ངོ་བོ་སྟོང་པར་བཞུགས་པ་ནི། རང་གི་རིག་པ་འདི་ཉིད་ནི་དངོས་པོ་དང་མཚན་མ་གང་ཡང་མ་གྲུབ་པས། ངོ་བོ་སྟོང་པར་འདུག་པ་འདི་ཉིད་ཡིན་ནོ། །སྙིང་པོ་གསལ་བར་བཞུགས་པ་ནི། རང་གི་རིག་པའི་ངོ་བོ་མ་འགགས་པར་གསལ་བ་འདི་ཡིན་ནོ། །རིགས་ཀྱི་བུ་རང་གི་ངོ་བོ་མ་འགགས་པར་གསལ་བ་འདི་སངས་རྒྱས་ཀྱི་དགོངས་པ་ཡིན་ནོ། །ཟང་ཐལ་དུ་བཞུགས་པ་ནི། སངས་རྒྱས་སྙིང་གི་ནང་ན་བཞུགས་པ་ཤ་ཁྲག་གི་ལུས་ཀྱིས་གཏུམས་ཀྱང་མ་ཐུམས་པར་རང་གི་མིག་གི་རྣམ་པར་ཤེས་པ་ལ་མཐོང་བ་མ་འགགས་པར་གསལ་བ་འདི་ཡིན་ནོ། །འདི་ཉིད་ཡེ་ཤེས་ཟང་ཐལ་གྱི་དགོངས་པ་ཡིན། ཞེས་སོ། །

དེ་དག་ཀྱང་མུ་ཏིག་ཕྲེང་བ་ལས། སེམས་(༢༢༨)ནི་འདུས་ཚོགས་འབྱུང་བའི་ཕྱིར། །དྲི་མ་ཉིད་དང་ཡང་སྦགས་པས། །ཀུན་གཞི་སྡུད་པའི་སེམས་ལ་བསགས། །དྲི་མའི་གྲངས་སུ་གྱུར་པས་ན། །སེམས་དང་ཡེ་ཤེས་དབྱེ་བ་ནི། །མཁས་པ་རྣམས་ཀྱིས་ཤེས་པར་བྱ། །སེམས་ནི་བག་ཆགས་ཀུན་གྱི་གཞི། །ལུས་ཅན་རྣམས་ཀྱི་དྲི་མ་ཡིན། །གཟུང་བ་ཡུལ་ལ་འཛིན་པ་སེམས། །དེ་ཕྱིར་འཁོར་བའི་ཆོས་ཉིད་དོ། །སེམས་དེ་བྲལ་ན་སངས་རྒྱས་པ། །ལུས་ཅན་ཀུན་གྱི་དྲི་མ་ཟད། །འགྲོ་བ་རྣམས་ནི་སེམས་དེས་འགྲོ། །དེ་མིན་འགྲོ་བར་ནུས་མིན་ཏེ། །དེ་ཕྱིར་འགྲོ་རྣམས་འཁྲུལ་འཁོར་བཞིན། །ཐུགས་ནི་སྤྱོད་པ་ཀུན་བྲལ་བས། །བེམ་པོ་ལྟ་བུ་མ་ཡིན་ཏེ། །ཤེས་ཤིང་རིག་པ་གསལ་བྱེད་སྣང་། །རྣམ་པར་རྟོག་པ་ཀུན་བསྲེག་སྟེ། །ཡེ་ཤེས་ཉིད་ནི་མེ་བཞིན་ཟ། །ནམ་མཁའ་ཉིད་དང་མཚུངས་པ་ཡིན། །སྟོང་གསལ་རིག་ཅན་ཉིད་ཡིན་ནོ། །དེ་ཕྱིར་ཡེ་ཤེས་སྣང་བ་སྟོན། །དབྱེར་མེད་ཐུགས་རྗེ་རང་ཤར་བས། །ཁྱབ་ཅིང་ཀུན་འབྲེལ་ཆོས་ཀུན་རྫོགས། །དྲན་པ་ཉིད་ནི་དྲན་མེད་པས། །ཡེ་ཤེས་དྲན་གཞི་ཉིད་དང་བྲལ། །ཡེ་ཤེས་ཉིད་ནི་འདི་ལྟ་སྟེ། །གཞི་གནས་དག་པའི་ཡེ་ཤེས་དང་། །མཚན་ཉིད་འཛིན་དང་ཡུལ་ཁྱབ་བོ། །ཞེས་པ་དང་། ཐིག་ལེ་ཀུན་གསལ་ལས། སེམས་དང་ཡེ་ཤེས་རྣམ་པ་གཉིས། །གཅིག་མིན་ཐ་དད་མ་ཡིན་ཏེ། །དབྱེ་བ་རབ་ཏུ་དཀའ་བའི་ཆོས། །སེམས་ནི་ཡེ་ཤེས་རྩལ་ཡིན་ཏེ། །སེམས་ཀྱི་གཞི་མ་ཡེ་ཤེས་ཡིན། །དེ་བས་སེམས་དང་ཡེ་ཤེས་གཉིས། །གཅིག་པ་དང་ནི་ཐ་དད་ལས། །གྲོལ་བའི་མ་གྲོལ་ཞེས་བྱའོ། །སེམས་དང་ཡེ་ཤེས་དབྱེ་བ་ནི། །ངོ་བོའི་སྒོ་ནས་དབྱེ་བ་དང་། །གནས་ཀྱི་སྒོ་ནས་དབྱེ་བ་དང་། །ལམ་གྱི་སྒོ་ནས་དབྱེ་བ་དང་། །སྒོ་ཡི་སྒོ་ནས་དབྱེ་བ་དང་། །སྐྱོན་ཡོན་སོ་སོའི་སྒོ་ནས་དབྱེ། །དེ་ལ་ཡེ་ཤེས་ངོ་བོ་ནི། །རང་བཞིན་རྣམ་པར་དག་པ་ཆོས་ཀྱི་སྐུ། །འདུག་ཚུལ་འོད་དུ་འདུག་པ་གཟུགས་ཀྱི་སྐུ། །སྣང་ཚུལ་ཕྱི་ནང་མེད་པས་ཟང་ཐལ་ལ། །སྐུ་གསུམ་དབྱེར་མེད་དངོས་པོའི་སྒྲིབ་ལས་འདས། །སེམས་ཀྱི་ངོ་བོ་བསྟན་པ་ནི། །སྦུབས་དང་བཅས་པའི་གཟུང་འཛིན་ཡིན། །སེམས་དང་ཡེ་ཤེས་གནས་བསྟན་པ། (༢༢༩)།ཡེ་ཤེས་ཆེན་པོའི་བཞུགས་གནས་ནི། །རྣམ་དག་དབྱིངས་ཀྱི་ཐིག་ལེ་ཡིན། །ད་ལྟ་རིན་ཆེན་ཀློང་ན་བཞུགས། །འདུག་ཚུལ་གནས་དང་སྣང་ཚུལ་མཇལ། །སེམས་ནི་རླུང་ཅན་གྲོང་ན་གནས། །ལམ་ཡང་རྣམ་པ་གཉིས་སུ་བསྟན། །རིན་ཆེན་རྒྱ་མཚོ་འབྲེལ་བ་ནི། །དཀར་འཇམ་ཁོག་པ་སྟོང་པའི་རྩ། །ཐིག་ལེ་ཁྲག་གིས་མ་གོས་པ། །ཡེ་ཤེས་ཆེན་པོ་ཀུན་ཏུ་རྒྱུ། །དེ་ནི་ཡེ་ཤེས་ལམ་དུ་བཤད། །མགྲིན་པ་སེམས་ཀྱི་ལམ་དུ་བཤད། །དེ་ལ་དབུགས་རྒྱུ་གསང་ལམ་ཡིན། །སྒོ་ལ་རྣམ་པ་གཉིས་སུ་བཤད། །ཡེ་ཤེས་སྒོ་དང་སེམས་ཀྱི་སྒོ། །ཡེ་ཤེས་སྒོ་ལ་གཉིས་ཡིན་ཏེ། །ཁྱབ་ལ་མི་སྣང་ལྐོག་གྱུར་སྒོ། །རྣ་བ་གཉིས་སུ་བསྟན་པ་ཡིན། །གསལ་བའི་བདག་ཉིད་ཟང་ཐལ་བས། །མངོན་གྱུར་སྒོ་དེ་སྤྱན་དུ་བསྟན། །སེམས་སྒོ་འདོད་པའི་སྒོ་གསུམ་ཡིན། །ཡེ་ཤེས་ཡོན་ཏན་སྐུར་སྣང་སོགས། །སེམས་ཀྱི་སྐྱོན་ནི་འཁོར་བའི་ཆོས། །དེ་དང་དེ་ལས་བྱུང་བར་རྩིས། །ཞེས་གསུངས་སོ། །དེ་ལ་སྒོ་ལྔ་ཡོད་པ་ལས། མིག་དང་རྣ་བ་ཡེ་ཤེས་ཀྱི་སྒོར་འཇོག །གཞན་མི་འཇོག་པ་ནི། ཡེ་ཤེས་ཀྱི་རྩལ་རྣམ་ཤེས་རྒྱུ་བའི་ཆ་བཏགས་ན་འདྲ་མོད་ཀྱང་། ཡེ་ཤེས་ཀྱི་རང་གདངས་སྒྲ་འོད་ཟེར་གསུམ་ད་ལྟ་དངོས་སུ་བལྟ་ཞིང་ཉན་དུ་ཡོད་མེད་ཀྱི་ཆ་ནས་དེ་ལྟར་བཞག་པའོ། །གནད་འདི་ནི་གཞན་གྱིས་མི་ཤེས་རང་གནད་ཁོ་བོས་རྟོགས་པ་འདིར་བཀོད་པའོ། །

གསུམ་པ་ཡིད་དང་ཤེས་རབ་དབྱེ་བ་ནི། རིག་པས་ཡུལ་ཤེས་པས་ན་ཡིད་དང་ཤེས་རབ་གཉིས་ཀས་དོན་རིག་པར་གཅིག་པས་ཆའི་འདྲེས་པ་དབྱེ་བ་གཉིས་ལས། དང་པོ་ཡིད་ནི་སེམས་ཀྱི་རྩལ་རྟོག་པས་ཡུལ་ཕྱིར་འབྲེངས་ནས་ཞེན་ཅིང་རྟོག་པའོ། །དེ་ལ་ཡིད་ཀྱི་ངོ་བོ་རྟོག་པ་རང་ཀར་འགྱུར་བའོ། །ངེས་ཚིག་ཡུལ་ཡིད་ལ་བྱེད་པས་ཡིད་དོ། །དབྱེ་ན་ཀུན་ཏུ་ཚོགས་པ་ལ་སོགས་པ་དྲུག་གམ། ཡིད་ཤེས་ཡུལ་རིག་ཙམ་དང་། ཉོན་ཡིད་ཆགས་སྡང་དུ་སྐྱེད་པ་གཉིས་སོ། །བྱེད་ལས། ལས་དང་བག་ཆགས་བསགས་ནས་འཁོར་བ་མངོན་པར་འདུ་བྱེད་དོ། །འབྲས་བུ་སྡུག་བསྔལ་ལོ། །སྒྲ་འཇུག་པའི་རྒྱུ་མཚན་ནི། ཡུལ་ཐོག་ཏུ་སྤྱོད་ཅིང་འགྱུ་བའི་(༢༣༠)ཆ་ནས་ཡིད་ཅེས་བཏགས་སོ། །རྡོ་རྗེ་སེམས་དཔའ་སྙིང་གི་མེ་ལོང་ལས། ཡིད་ནི་དཔེར་ན་བྱ་སྒྲོ་རླུང་ཁྱེར་འདྲ། །ཞེས་སོ། །ཤེས་རབ་ནི་ཐུགས་རྗེའི་རྩལ་ཤར་གྲོལ་གཉིས་མེད་ཀྱི་ཤེས་པ་སྟེ། ཡུལ་རིག་ཀྱང་ཡུལ་ཕྱིར་མ་འབྲངས་པས། རིག་གདངས་མི་རྟོག་པའོ། །མེ་ལོང་ལྟ་བུ་གཟུགས་བརྙན་ལྟ་བུ་ཤར་དུ་རྟོག་དཔྱོད་མེད་པས། རྣམ་པ་སྣང་ཡང་གང་སྣང་གི་རྣམ་པ་ལ་མི་རྟོག་པའི་ཕྱིར་རྣམ་པར་མི་རྟོག་པའི་ཤེས་རབ་དམ་པ་ཞེས་བྱའོ། །ཤེས་རབ་ཀྱི་ངོ་བོ་ཡུལ་ངེས་ཀྱང་རྣམ་པར་མི་རྟོག་པའོ། །ངེས་ཚིག་ཡུལ་གྱི་རྣམ་པ་ཅི་ཡིན་པ་སྐད་ཅིག་གིས་ཤེས་ཀྱང་། དེ་ལ་རྟོག་དཔྱོད་ཞིབ་རྩིང་གི་ཚུལ་གྱིས་མི་རྟོག་པས། ཡུལ་ཤེས་པ་ཐམས་ཅད་ཀྱི་ནང་ནས་རབ་ཏུ་གྱུར་པའི་ཕྱིར་ན་ཤེས་རབ་བོ། །དབྱེ་ན་ཆོས་ཅན་ཤེས་པའི་ཤེས་རབ་དང་། ཆོས་ཉིད་ཤེས་པའི་ཤེས་རབ་གཉིས་སམ། ཐོས་བསམ་སྒོམ་གསུམ་གྱི་རིམ་པའོ། །རྣལ་འབྱོར་པས་ཐོས་ཀྱང་མི་རྟོག །བསམ་ཀྱང་མི་རྟོག །སྒོམ་ཀྱང་མི་རྟོག་སྟེ། སྐད་ཅིག་རྗེས་འཐུད་ཀྱི་རྣམ་པ་མེད་པས། སྐད་ཅིག་གཅིག་གིས་ཁོང་དུ་ཆུད་པར་བྱེད་དོ། །མཚན་བརྗོད་ལས། ཤེས་རབ་ཆེན་པོའི་སྐད་ཅིག་ལ། །ཆོས་ཀུན་ཁོང་དུ་ཆུད་པ་འཆང་། །ཞེས་སོ། །སྒྲ་འཇུག་པའི་འཐད་པ་ནི། གཞན་ཡུལ་ཤེས་པའི་རབ་རྣམ་པར་མི་རྟོག་པས། ཤེས་པས་ཤེས་པ་ཡིན་པའི་ཕྱིར་ཤེས་རབ་བོ། །རྟགས་ཚད་ལས། ཡིད་དང་ཤེས་རབ་ཤེས་པའི་ཚད་ཆོས་རྣམས་སྣ་ཚོགས་སུ་ཤར་བའི་ཚེ་ན་ཡིན། ཞེས་སོ། །དེའང་བླ་མེད་ཀྱི་རྒྱུད་དང་མན་ངག་ཏུ་རེས་འགའ་རྟོག་པས་འཁོར་བར་འཇུག་པ་སྤང་བྱར་གསུངས་པ་དང་། རེས་འགའ་དགོངས་པའི་ཀློང་ཆེན་དུ་གསུངས་པ་ཐམས་ཅད་ཚུལ་འདིས་ཤེས་པར་བྱ་སྟེ། དྲི་མ་དང་གེགས་དང་སྤང་བྱར་བཤད་པ་རྣམས་གང་བྱུང་དུ་ཡིད་ཡུལ་ཕྱིར་འགྱུ་བའི་རྟོག་པ་ལ་ངོས་གཟུང་ངོ་། །རང་གྲོལ་རང་ཤར་རོལ་པ་ཙམ་དགོངས་པ་ཞེས་རྟོག་པ་མི་སྤང་བར་ལམ་འཁྱེར་དུ་བཤད་པ་ཐམས་ཅད། མིང་རྟོག་པ་དང་ཡིད་དུ་བཏགས་ཀྱང་དོན་ཤེས་རབ་ཏུ་ངོས་གཟུང་སྟེ། དཔེར་ན་འདས་རྗེས་སུ། སྣང་སྲིད་ཐམས་ཅད་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། །(༢༣༡)ཞེས་པ་ལྟ་བུའོ། །དེའང་འཆར་དུས་རིག་ཆ་དེ་ཤེས་རབ་ཏུ་ཡོད་ཀྱང་། འགྱུ་ཆ་དེ་རླུང་དུ་བྱུང་བས། ཡིད་ཀྱི་རྟ་རླུང་དང་བྲལ་དགོས་པས་ཡིད་དང་ཤེས་རབ་ཕྱེད་པ་གཅེས་སོ། །ཤེས་རབ་ལ་རིག་ཆ་ཡོད་ཀྱང་འགྱུ་ཆ་མེད་པས་ཡིད་དང་དོན་མི་མཚུངས་སོ། །གང་ཕྱིར་འདི་གཉིས་ཁྱད་པར་དག །མཁས་པ་རྣམས་ཀྱིས་མ་རྟོགས་པས། །བློ་གྲོས་བླུན་པས་ཇི་ལྟར་རྟོགས། །གཟུགས་ཀྱི་དབྱེ་བ་དམིགས་པའི་སྐབས། །མིག་ལྡན་རྣམས་ནི་མ་རྟོགས་པ། །དམུས་ལོང་དག་ལ་ཡོད་དམ་ཅི། །དེ་བས་འདྲེས་པ་དབྱེ་བའི་གནས། །རྟོགས་པ་འདི་འདྲ་ལེགས་པར་ཟུང་། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པ་སྟེ། རྟོགས་དཀའ་བའི་གནས་ཤེས་པར་བྱ་བ་ལ་གདམས་པའོ། །

དོན་གཉིས་པ་ཤེས་ནས་ཉམས་སུ་བླང་བའི་རིམ་པ་ལ་གསུམ་སྟེ། ཆོས་སྐུའི་གནས་ངོ་བོ་ཀ་དག་གི་རང་མལ་ཤེས་ནས་ཉམས་སུ་བླང་བ། ཡེ་ཤེས་ཀྱི་གནས་རང་བཞིན་ལྷུན་གྲུབ་ཀྱི་རང་གདངས་ཤེས་ནས་ཉམས་སུ་བླང་བ། ཤེས་རབ་ཀྱི་གནས་ཐུགས་རྗེ་ཀུན་ཁྱབ་ཀྱི་རང་རྩལ་ཤེས་ནས་ཉམས་སུ་བླང་བའི་མན་ངག་བསྟན་པའོ། །དང་པོ་ནི། ད་ལྟའི་རིག་པ་བློ་བྲལ་རྗེན་པའི་རང་ངོ་སྟོང་སངས་ནམ་མཁའ་ལྟ་བུ་འདི་ཀ་གདོད་མའི་ཀ་དག་ཆོས་སྐུའི་ངོ་བོ་གཤིས་སུ་ངོ་སྤྲོད་པའི་རང་མལ་སྟོང་པ་ཧར་སངས། ཕྱི་ནང་བར་མེད་ཕྱལ་ཡས་སུ་ངོས་བཟུང་ནས་རྟེན་མེད་དུ་སངས་སེ། ཟང་ཐལ་དུ་སལ་ལེ། རང་གསལ་དུ་ཝལ་ལེ། བར་མེད་དུ་ཕྱལ་ལེ། སྟོང་སངས་སུ་ཧར་རེ་འཇོག་པ་ཡིན་ཏེ། ཐལ་འགྱུར་ལས། གཞི་ལ་ཡུལ་མེད་རྟོགས་པས་ཆོག །དེ་ཙམ་ཉིད་ན་ཆོས་ཀྱི་སྐུ། །སལ་ལེ་སང་ངེ་ཝལ་ལེ་བ། །སྤྲིན་མེད་སྟོན་ཁའི་ཟླ་བ་བཞིན། །ཞེས་གསུངས་སོ། །

གཉིས་པ་སྙིང་ག་ནས་ཡེ་ཤེས་སུམ་བརྩེགས་ཀྱི་རང་གདངས་མིག་ནས་ནམ་མཁར་ཤར་བ་ཉིད། མངོན་སུམ་སྙིང་པོའི་རང་གདངས་སུ་ངོ་སྤྲད་ནས། སྒྲོན་མ་བཞིས་ཉམས་སུ་ལེན་པ་ཡིན་ནོ། །དེ་ལ་རྒྱང་ཞགས་ཆུའི་སྒྲོན་མ་ནི། མིག་གི་ཨ་འབྲས་ཀྱི་དབང་རྟེན་དང་པོ་གཉིས་ཏེ། འདིའི་གནད་དུ་ཆོས་སྐུའི་གཟིགས་སྟངས་དྭངས་མ་འདྲེན་བྱེད་གྱེན་དུ་བལྟ་བ། ལོངས་སྐུའི་ཟུར་དང་ཐད་སོར་བལྟ་བ། སྤྲུལ་སྐུའི་གཟིགས་སྟངས་ཐུར་ལ་དབབ་པ་གསུམ་གང་བྱེད་ཀྱང་། ཆེད་དུ་རྩོལ་བས་མ་(༢༣༢)བསྒྲིབས་པར་བག་ཆགས་ཀྱི་རང་བབ་ཆ་ན་ལྷོད་ཡོད་པར་བྱས་པས། མིག་བདེ་ཞིང་འཕེལ་སྣང་བརྟན་པར་བྱེད་པའི་གནད་དམ་པའོ། །དབྱིངས་རྣམ་པར་དག་པའི་སྒྲོན་མ་ནི། དེ་ལས་ཕྱི་ཡུལ་ནམ་མཁའ་སྟོང་པར་དང་པོ་ལ་མཐིང་ཀ་ཁྱབ་པ་ཆེན་པོའི་འོད་ལས་ཁ་དོག་ལྔར་མཆེད་པ་འོད་ཀྱི་མུ་ཁྱུད་ཟླུམ་འཁྲིགས་དང་བཅས་པ་རྨ་བྱའི་མདོངས་ལྟ་བུའོ། །འདིའི་གནད་དུ་ནམ་མཁར་རིག་པ་བལྟ་བ་ཉིད་མ་ཡེངས་པར་དལ་བས་འགྲུབ་བོ། །ཐིག་ལེ་སྟོང་པའི་སྒྲོན་མ་མིག་ཕུགས་ཀྱི་འོད་ཚོན་གང་བ་སྟེ། ཇི་ཞིག་ན་དེ་ཉིད་ཀྱང་དངོས་སུ་ནམ་མཁར་སྣང་བས་དབང་པོའི་ཡུལ་དུ་འགྱུར་རོ། །འདིའི་གནད་དལ་བུས་སོར་མོས་གཏེམས་ལ་རིག་པས་དེ་ལ་མ་ཡེངས་པར་བལྟའོ། །ཤེས་རབ་རང་བྱུང་གི་སྒྲོན་མ་ནི། རིག་པ་རང་གདངས། ཤེས་རབ་རང་གསལ་རྟོག་མེད་རྒྱ་ཆད་བྲལ་བར་རྟོགས་པའི་ཆ་དེ་ཡིན་ལ། དེའི་དྭངས་ནི་རྡོ་རྗེ་ལུ་གུ་རྒྱུད་གསེར་གྱི་སྐུད་པ་ལྟ་བུའོ། །ཚིགས་ཀྱི་བར་ན། ཐིག་ལེ་དང་བཅས་པ་ཕྲ་བ་འགྱུ་བའི་ལྡིངས་པར་སྣང་བའོ། །འདིའི་གནད་ལུ་གུ་རྒྱུད་དབྱིངས་ཀྱི་ར་བར་གཏད་པ་ལ་མིག་མི་འགུལ་ཤེས་པ་མ་ཡེངས་པར་བྱས་པའོ། །དེ་ཡང་ཐལ་འགྱུར་ལས། དབྱིངས་རིག་དལ་བས་ཡེ་ཤེས་འགྲུབ། །ཅེས་སོ། །དེ་དག་གི་འགག་བསྡུ་ན། ལུས་ལྟ་སྟངས་ལས་མ་འགྱུར་བར། མིག་གི་གཟིགས་སྟངས་གཅུན་ནས། ཕྱི་ཡུལ་དུ་སྣང་བའི་འོད་གསལ་བ་བལྟས་པས། ནང་གི་རླུང་འཆིང་སྟེ་རིག་གདངས་རླུང་དང་བྲལ་བས་གདངས་སྙིང་གར་འདུས་ཏེ། སེམས་དང་ཡེ་ཤེས་ཕྱེད་ནས། ཡེ་ཤེས་རང་ངོ་གསལ་བ་མར་མེ་རླུང་གིས་མ་བསྐྱོད་པ་ལྟར། ཀ་དག་དོན་གྱི་དགོངས་པ་གཞི་གནས་ཀྱི་ཡེ་ཤེས། ནང་གསལ་ཐམས་ཅད་མཁྱེན་པ་ཆོས་སྐུ་ཐིག་ལེ་ཉག་ཅིག་གི་དགོངས་པ་ལས་མི་གཡོ་ཞིང་འདུ་འབྲལ་མེད་པར་བཞུགས་པས། ཀུན་བཟང་ཡབ་ཡུམ་གྱི་དགོངས་པ་ལ་བར་མཚམས་མེད་པར་གནས་པ་ཞེས་བྱ་བའོ། །

གསུམ་པ་ནི་ཐུགས་རྗེ་རིག་པའི་རང་གདངས་གང་ཤར་ངོས་གཟུང་མེད་པར་གྲོལ་བ་ཉིད་ཐུགས་རྗེའི་རང་རྩལ་དུ་ངོ་སྤྲད་ནས། དྲན་རྟོག་རང་ཡལ་རྗེས་མེད་བར་སྣང་གི་སེར་བུའམ། ཆུའི་རླབས་ལྟར་བྱུང་བ་ཆོས་ཉིད་ཀྱི་ངང་དེར་ཟང་ཐལ་རྗེན་པར་བཞག་པས། རྣམ་རྟོག་ཆོས་སྐུར་གྲོལ། འགྱུ་བ་རང་དག །རང་ཡལ་རྗེས་མེད། རང་(༢༣༣)གྲོལ་དུས་མཉམ། སྟོང་སངས་ཕྱལ་པས། རྟོགས་དང་མི་རྟོགས་མཉམ་པར་ལ་ཟློས་ཏེ། ཡུལ་སེམས་ལྟར་སྣང་དུས་ནས། འཕྲོ་འཐུད་མེད་པར་ཧར་སངས་སུ་གྲོལ་ཏེ། འགྱུ་བྱེད་ཀྱི་ཡིད་དང་རང་གྲོལ་གྱི་ཤེས་རབ་དུས་དེར་ཕྱེད་པས། ཤར་སྣང་ཡེ་ཤེས་ཀྱི་རྒྱན་དུ་ཆེ་བས། ཆོས་ཟད་ཡེ་གྲོལ་གྱི་རང་རྒྱས་ཐེབས་པ་ཞེས་བྱའོ། །འདས་རྗེས་ལས། སྣང་སྲིད་ཐམས་ཅད་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། །ཞེས་སོ། །འདིའི་གནད་ལ། རིག་པའི་མདངས་མ་འགགས་པ། འཆར་ཚུལ་མི་འགགས་པ། ལྟ་བྱེད་གཉེན་པོའི་གོས་དང་བྲལ་བ། རང་སངས་རིག་པའི་རང་མལ་ཤེས་པར་བྱས་ལ། ཉོན་མོངས་ལ་སོགས་གང་ཤར་ཡང་། ངོ་ཤེས། རྩལ་རྫོགས། རྗེས་ཕྱིར་མ་འབྲང་། གློད་ཤེས་པར་བྱས་པས། ཆོས་ཟད་ཐུགས་རྗེའི་རང་མལ་དུ་དྲན་རྟོག་སངས་ནས། ཤེས་རབ་ཉིད་ཀྱི་རྩལ་ཡང་གཞི་ལ་ཐིམ་སྟེ། ཀ་དག་རང་མལ་གཅིག་ཏུ་བདེ་ཀློང་གཅིག་ཏུ་འཁྱིལ་ལོ། །དོན་འདི་སྡུད་པ་ལས་ཀྱང་། འདུ་ཤེས་རྣམ་པར་བཤིག་ནས་སྤོང་པ་ཕ་རོལ་འགྲོ། །ཞེས་གསུངས་པ་དང་དོན་མཐུན་ནོ། །

དེ་ལྟར་ན་ངོ་བོ་ཀ་དག་རང་བྱུང་གི་ཡེ་ཤེས་ཀྱི་ལྟ་བར་ལ་བཟླ་བ། རང་བཞིན་ལྷུན་གྲུབ་ཀྱི་ཡེ་ཤེས་ཀྱི་སྒོམ་པས་འགགས་བསྡམས་པ། ཐུགས་རྗེ་ཀུན་ཁྱབ་ཤེས་རབ་ཀྱི་སྤྱོད་པས་ཐུགས་ཕྲད་རྗེས་མེད་དུ་གེགས་བསལ་བ། ཐམས་ཅད་རིག་པ་ཆོས་ཟད་དུ་ཆིངས་བཅིངས་པས། གསང་བ་བླ་ན་མེད་པའི་རྒྱུད་ལུང་མན་ངག་གི་དཀའ་བའི་གནད་བཀྲོལ། གསལ་བའི་མིག་ཕྱེ། དོན་གྱི་བཅུད་ཕྱུང་ནས། སྙིང་པོའི་ཡང་ཞུན་ཆེན་པོར་གཏན་ལ་ཕབ་པའོ། །

ཡང་གསང་བླ་མེད་སྙིང་པོའི་གནད་དཀའ་བ། །བླ་མའི་དྲིན་གྱིས་ལེགས་པར་རྙེད་པ་འདི། །སྣ་ཚོགས་རང་གྲོལ་ཐེག་མཆོག་རྣལ་འབྱོར་པས། །གངས་རི་ཐོད་དཀར་མགུལ་དུ་ལེགས་པར་བཀོད། །དགེ་བ་འདི་ཡིས་བདག་དང་འགྲོ་བ་ཀུན། །གསང་སྔགས་རྒྱུད་དོན་རྒྱ་མཚོའི་མཐར་སོན་ནས། །སྐུ་དང་ཡེ་ཤེས་འདུ་འབྲལ་མེད་པ་ཡིས། །གཞན་དོན་ལྷུན་གྲུབ་ཆོས་ཀྱི་རྒྱལ་པོར་ཤོག །ཟབ་དོན་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ། འོད་ཟེར་སྤྲིན་(༢༣༤)གྱི་སྐྱེད་མོས་ཚལ། ཀུན་ཏུ་བཟང་པོའི་ཁང་བཟངས། ཟླ་བ་ཆུ་ཤེལ་གྱིས་འཚེར་བར་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། ཚིག་དོན་སྙིང་པོ།

༄༅། །ཟབ་མོ་ཡང་ཏིག་ལས། ཚིག་དོན་སྙིང་པོ་བཞུགས་སོ། །

༄༅། ༀ་ཨཱཿཧཱུྃ། བླ་མ་ཞི་ཁྲོ་མངོན་སངས་རྒྱས། །ཐེག་དགུ་བཅུ་བདུན་སྙིང་པོའི་ཆོས། །ཆོས་མཛད་དོན་རྟོགས་དགེ་འདུན་ལ། །འདས་དང་མ་འོངས་ད་ལྟར་གྱི། །ལུས་ངག་ཡིད་གསུམ་གུས་པས་འདུད། །རབ་ཏུ་སྤྲོས་པ་མེད་པ་ཡི། །ཀུ་སུ་ལུ་པའི་དོན་ཆེད་དུ། །ཚིག་དོན་སྙིང་པོ་འབྲི་བར་བྱ། །ཇི་ལྟར་བརྗོད་བྱ་ཐམས་ཅད་ཀུན། །བགྲངས་པ་ཙམ་དུ་ཟད་མོད་ཀྱང་། །མདོ་ནི་ཟབ་མོའི་དོན་དུ་བསྡུས། །གནས་ལུགས་བསམ་གྱིས་མི་ཁྱབ་ཀྱང་། །ཡེ་ཤེས་རྣམ་པ་གསུམ་ཡིན་ནོ། །འཁྲུལ་གཞི་རྣམ་པ་མང་བཤད་ཀྱང་། །ལྷུན་གྲུབ་དང་ནི་ཐུགས་རྗེའོ། །རང་གནས་སྐུ་རིག་ཡེ་ཤེས་སོ། །གནས་པ་ཐུགས་རྗེ་ཙིཏྟའི་དཀྱིལ། །ལམ་ནི་རྩ་བཞི་འགྱུ་བྱེད་རླུང་། །འཆར་བྱེད་སྒོ་ནི་མིག་ལ་སོགས། །ནམ་མཁའ་རྐྱེན་བྲལ་ཡུལ་དུ་འདུས། །ཉམས་བླང་ཁྲེགས་ཆོད་ཐོད་རྒལ་ལོ། །ཚད་ནི་གདེང་བཞིའི་རྣལ་འབྱོར་ཉིད། །བར་དོ་མ་བུ་གཉིས་སྦྱོར་བ། །གྲོལ་ས་ཉིད་ནི་ཐོག་མའོ། །ཞེས་རྒྱུད་ཐམས་ཅད་ཀྱི་སྡོམ་སྟེ་བསྟན་པའོ། །ཚིག་དོན་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས་གངས་རི་ཐོད་དཀར་དུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

ཟབ་མོ་ཡང་ཏིག་ལས། གདམས་ཁྲིད་དོན་གྱི་མདོ་ཆིངས།

༄༅། །ཟབ་མོ་ཡང་ཏིག་ལས། གདམས་ཁྲིད་དོན་གྱི་མདོ་ཆིངས་བཞུགས་སོ། །

༄༅། གདམས་ཁྲིད་དོན་གྱི་མདོ་ཆིངས་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དངོས་གྲུབ་ཆར་འབེབས་དཔལ་མགོན་བླ་མ་དང་། །མཁའ་འགྲོ་དམ་ཅན་རྒྱ་མཚོའི་ཞབས་བཏུད་དེ། །བླ་མེད་རྡོ་རྗེ་སྙིང་པོའི་ཐེག་པ་འདིར། །ཇི་ལྟར་འཇུག་ཚུལ་གནད་ཀྱི་མན་ངག་བྲི། །དད་པ་རབ་དང་ལྡན་པའི་སྐལ་བཟང་གིས། །འཁོར་བའི་གནས་ལས་བརྒལ་བར་བྱ་དོན་དུ། །དམ་པའི་བླ་མ་རབ་ཏུ་མཉེས་བྱས་ཏེ། །སྔོན་དུ་གསེར་ལ་སོགས་པའི་མཎྜལ་ཕུལ། །ཚོགས་ཀྱི་འཁོར་ལོས་མཆོད་ནས་གསོལ་བ་གདབ། །དེས་ཀྱང་མཚན་བཏགས་རྗེས་སུ་བཟུང་བྱས་ལ། །ལོ་ཟླའི་སྔོན་དུ་བླ་མའི་རྣལ་འབྱོར་དང་། །མཎྜལ་གསོལ་འདེབས་(༢༣༥)ལུང་འབོགས་བརྩོན་པར་བྱ། །དུས་ལ་བབས་ཚེ་དབེན་པའི་གནས་དག་ཏུ། །སྒྲུབ་པའི་མཐུན་རྐྱེན་ཚོགས་ཆས་ཀུན་བསགས་ལ། །ཐོག་མར་སྤྲོས་བཅས་བུམ་པའི་དབང་བསྐུར་བྱ། །དེ་ནས་སྣོད་ལྡན་རིགས་ཀྱི་བུ་རྣམས་ལ། །ཐུན་མོང་སྔོན་འགྲོ་ལམ་ཁྲིད་རྫོགས་པར་གདབ། །དམིགས་པ་རེ་ལ་རབ་འབྲིང་ཐ་མའི་རིམ། །ཞག་ལྔ་གསུམ་རེར་བརྩོན་པས་ཉམས་སུ་བླང་། །དེ་ནས་སྤྲོས་མེད་གསང་བའི་དབང་བསྐུར་ལ། །ལམ་ཁྲིད་ཆེན་མོ་ཤིན་ཏུ་འབྱོངས་པར་གདབ། །དབང་ཁྲིད་གང་བྱེད་སྔོན་དུ་མཎྜལ་དང་། །བརྒྱུད་པའི་གསོལ་འདེབས་དད་གུས་ཚད་མེད་བྱ། །ཁྱད་པར་ཁྲིད་དམིགས་ཀུན་གྱི་སྔོན་འགྲོ་རུ། །མཎྜལ་གསོལ་འདེབས་ཤིན་ཏུ་གཅེས་པར་བསྟན། །འདིས་ནི་ཚོགས་རྫོགས་སྒྲིབ་གཉིས་བྱང་བ་དང་། །བླ་མ་སྒྲུབ་པའི་མཆོག་གི་སྙིང་པོར་འགྱུར། །དེ་ཡི་བྱིན་རླབས་རྟོགས་པ་ཤུགས་ལ་འཆར། །ཏིང་འཛིན་ལྷུན་གྲུབ་གེགས་དང་བར་ཆད་སེལ། །ཁྲིད་དམིགས་རེ་ལ་རབ་འབྲིང་སྔར་དང་མཚུངས། །ཁྱད་པར་སེམས་ཀྱི་སྔོན་འགྲོའི་དུས་དག་ཏུ། །དྲི་བ་གཟབ་ལ་ཐེ་ཚོམ་ཆོད་པར་བྱ། །ཡུན་རིང་འབད་པས་འདི་ཡི་རང་གནད་གཟབས། །གནས་ལུགས་རྟོགས་པས་ཤེས་རབ་རྩལ་ལ་རེག །དེ་ཡི་གནད་དུ་འདི་ལས་ལྷག་པ་མེད། །ཞག་འགས་དོན་གྱི་སྙིང་པོ་དངོས་སུ་མཐོང་། །གདམས་པའི་ཁྱད་ཆོས་ཀུན་ལས་འཕགས་པ་ཡིན། །འོག་མའི་ལམ་དུ་ལོ་མང་བསྒོམས་པ་ལས། །འདི་ཡི་དམིགས་གནད་ཞག་གཅིག་དོན་ལ་ཉེ། །དེ་བས་མོས་གུས་བརྩོན་འགྲུས་རབ་བསྐྱེད་ལ། །སྐད་ཅིག་མ་ཡེངས་བསམ་མནོ་ཞིབ་མོར་གཏང་། །རྟོགས་པ་འབུལ་ཞིང་ཐེ་ཚོམ་ཆོད་པར་བྱ། །དོན་སྤྱིའི་སྒོམ་པས་སེམས་ཉིད་རྟོགས་དུས་མེད། །རང་གི་མ་མཐོང་མུན་པའི་མདའ་འཕེན་འདྲ། །འདིར་ནི་རང་གི་དངོས་སུ་མཚུངས་རྟོགས་པས། །རང་རིག་ཆོས་སྐུ་འོད་གསལ་ཉི་ཤར་འདྲ། །ཡིད་དཔྱོད་བློ་བྲལ་མངོན་སུམ་ཨེ་མ་ཧོ། །དེ་ནས་དངོས་གཞི་ཁྲེགས་ཆོད་ངོ་སྤྲད་ལ། །གཞི་གྲོལ་ཟང་ཀ་རིག་པའི་ཐག་ཆོད་གྲོགས། །ཁྱུང་ཆེན་ལ་སོགས་མང་ཉུང་ཅི་རིགས་བཤད། །ཞག་འགའ་དེ་ཡི་དོན་ལ་བརྟན་ཆགས་བྱ། །འདི་ནི་ཀ་དག་ཆོས་སྐུའི་དོན་ཆེན་ཏེ། །ལྟ་བའི་རྫོགས་ཆེན་ངོ་མཚར་རྨད་བྱུང་བས། །ཐག་ཆོད་དགོངས་པས་གཏན་ལ་ཕེབས་པར་བྱ། །(༢༣༦)དེ་ནས་ཐོད་རྒལ་འོད་གསལ་ངོ་སྤྲོད་ལ། །ལྷུན་གྲུབ་རང་གསལ་གཟུགས་སྐུ་རང་གནས་དོན། །རང་བྱུང་ནང་གསལ་ཕྱིར་སྣང་ཡིད་ཆེས་བྱ། །དེ་ཡི་གསལ་འདེབས་སྣང་བཞི་མཐའ་རྟེན་བསྟན། །འབྲིང་དང་ཐ་མའི་གདམས་ངག་རྫོགས་པར་བྱ། །ད་བར་དུ་ཡང་གནད་ཀྱི་ངོ་སྤྲོད་ནི། །གཞི་ལམ་འབྲས་གསུམ་ཞུགས་དོན་གསུམ་གནས་དང་། །ངོ་སྤྲོད་རྣམ་བཞི་སྒྲ་འོད་ཟེར་གསུམ་དང་། །གསང་ལམ་ཐུགས་རྗེ་རྒྱུན་གྱི་ངོ་སྤྲོད་རྣམས། །ཤིན་ཏུ་གཟབས་ལ་གཏན་ལ་ཕེབས་པར་བྱ། །དེ་ནས་དབང་པོའི་ཚད་དང་རབ་སྦྱོར་ལ། །ཁྲེགས་ཆོད་ཐོད་རྒལ་རྒྱབ་ཆོས་ཅི་འོས་བཤད། །དད་བརྩོན་ཆེ་ཞིང་སྒྲུབ་ངེས་གང་ཟག་ལ། །ཉམས་ལེན་ལག་ཁྲིད་འཆུགས་མེད་དངོས་སུ་བསྟན། །ཁྲིད་རྒྱབ་ཚར་ནས་ཚོགས་ཀྱི་གཏང་རག་བྱ། །ཟླ་བ་གསུམ་གཉིས་གཅིག་གིས་རིམ་པ་བཞིན། །རབ་འབྲིང་ཐ་མའི་དབང་ཁྲིད་གདམས་པ་གྲུབ། །དེ་རྗེས་བརྩོན་པས་ལོ་ཟླར་ཉམས་སུ་བླང་། །འདི་དག་ཐོག་མའི་གདམས་ཁྲིད་མན་ངག་གོ། །དེ་ནས་ལོ་ནི་གཅིག་ལ་སོགས་པ་ན། །སྐལ་བཟང་དད་ལྡན་བརྩོན་པའི་སློབ་མ་དེས། །བླ་མ་མཆོག་ལ་དབང་རྫོགས་གསོལ་བ་གདབ། །དེས་ཀྱང་རི་རྩེ་ལུང་སྟོང་ལ་སོགས་པར། །སློབ་མ་ཁྲིད་ལ་སྔོན་འགྲོ་སྤྱོད་པ་བརྩམ། །སྔོན་གྱི་ལམ་འཁྱེར་བོགས་འབྱིན་རྩལ་སྦྱང་བྱ། །རུ་ཤན་ཕྱེད་ནས་ཤིན་ཏུ་སྤྲོས་མེད་ངང་། །རབ་ཏུ་སྤྲོས་མེད་དབང་རྫོགས་དུས་གཅིག་བསྐུར། །དགའ་སྟོན་བྱ་ཞིང་དམ་བཅའ་སྒྲུབ་ཡོན་དབུལ། །དེ་ནས་གསང་ཆེན་ངེས་པའི་རྒྱུད་རྣམས་དང་། །ལུང་དང་མན་ངག་གདམས་ཁྲིད་རྒྱ་ཆེར་བསྟན། །དད་བརྩོན་སྒྲུབ་ལ་སྙིང་པོར་བྱེད་རྣམས་ལ། །གསང་བའི་གནད་རྣམས་མ་ལུས་ཚང་བར་བྱིན། །བསྟན་པའི་སྙིང་པོ་འཛིན་པར་ནུས་རྣམས་ལ། །རྒྱུད་ལུང་མན་ངག་ལུང་རྣམས་ཚང་བར་བྱིན། །བརྒྱུད་པའི་བྱིན་རླབས་ཆུ་བོ་འབབ་པ་ལ། །གཏད་རྒྱ་བཀའ་ལུང་ངེས་པའི་སྙིང་པོ་བྱིན། །དེ་ལས་གཞན་དུ་བླ་མ་མཆེད་མི་གུས། །ཚེ་འདིའི་ཞེན་པ་ཅན་ལ་གདམ་གཞུག་སྦ། །ཅི་ཕྱིར་གདམས་ཀྱང་དེ་ལ་ཕན་མི་ཐོགས། །གསང་བའི་གནད་རྣམས་འཆུགས་ཤིང་བྱིན་རླབས་ཡལ། །བཀའ་བསྒོ་འཆོལ་ནས་བཀའ་ཆད་འབྱུང་བའི་ཕྱིར། །སྣོད་(༢༣༧)དང་མི་ལྡན་རྣམས་ལ་གསང་ཞིང་སྦ། །སྣོད་ལྡན་རྣམས་ལ་བྱིན་ཞིང་བཀའ་རྒྱས་གདབ། །དེས་ནི་བསྟན་པའི་སྙིང་པོ་ཡུན་རིང་གནས། །སྤྱིར་ན་གསང་སྔགས་དབང་ཁྲིད་མན་ངག་ལ། །ཁྲིགས་ཆགས་དང་ནི་དུམ་བུའི་ལུགས་གཉིས་ཏེ། །སྐལ་ལྡན་ཡང་རབ་རྣོན་པོའི་རིགས་རྣམས་ལ། །དབང་བཞི་དུས་གཅིག་གདམས་ཁྲིད་ཁྲིགས་ཆགས་གསུངས། །འོན་ཀྱང་བརྟག་དཀའ་མངོན་ཤེས་མི་ལྡན་ཕྱིར། །ཕྱག་བཞེས་ཉིད་ལ་དུམ་བུའི་ལུགས་འདི་མཛད། །དེ་བས་འདི་ཉིད་ཤིན་ཏུ་ལེགས་པར་མངོན། །སྐལ་ལྡན་ཡིན་ན་བསྒུག་ལོངས་ཡོད་པ་དང་། །དོན་གཉེར་ཆེ་བས་ཅིས་ཀྱང་རྫོགས་པར་ཐོབ། །སྐལ་བ་ཡོད་མེད་རང་བཞིན་མི་ཤེས་པར། །ཟབ་མོའི་དབང་ཁྲིད་དུས་གཅིག་རྫོགས་པར་གདབ། །གསང་སྒོ་འཆོལ་ན་དཔོན་སློབ་གཉིས་ཀ་ལ། །མཁའ་འགྲོ་གྲུབ་པ་ཅན་གྱི་བཀའ་ཆད་འབྱུང་། །དེ་བས་དུམ་སྐྱོང་འཁྲིད་པའི་ཐབས་ཟབ་འདི། །སྔོན་བྱུང་བླ་མས་སྙན་བརྒྱུད་རིན་ཆེན་རྣམས། །རིམ་གྱིས་འཁྲིད་པའི་ལོ་རྒྱུས་ཡིད་ཆེས་མཐོང་། །ཁོ་བོས་ཀྱང་ནི་རིག་འཛིན་བླ་མ་ལ། །རབ་འབྲིང་ཐ་མའི་ཞབས་ཏོག་སྲི་ཞུ་བྱས། །མཉེས་བཞིན་པ་ཡིས་ཐུགས་རྗེས་བཟུང་བ་ལས། །དུམ་བུའི་ལུགས་སུ་བར་བར་གནད་རྣམས་ཐོས། །ལོ་དྲུག་སོང་རྗེས་དབང་བཞི་རྫོགས་པ་དང་། །ཕྲ་མོའི་གདམས་ཁྲིད་ངོ་སྤྲོད་གཏད་རྒྱ་ཐོབ། །དེ་བས་གསང་ཆེན་དོན་གྱི་ཐེག་པ་འདི། །ཤིན་ཏུ་ཟབ་དྲགས་གཉན་ལ་བབས་ཆེ་བས། །ལོ་རེ་ཟླ་རེས་ཞུས་དག་ག་ལ་ཆོད། །ཡུན་དུ་སྒྲུབ་ཅིང་ཡུན་དུ་བླ་མ་བརྟེན། །ཡུན་དུ་བསྲིངས་པ་དོན་ཆེན་ཡུན་གྱིས་འགྲུབ། །ངང་ཐུང་རེས་འཇོག་ཡོན་ཏན་ཐོབ་དུས་མེད། །ཟབ་ཅིང་རྒྱ་ཆེ་བསྟན་པའི་སྙིང་པོ་འདི། །མཁའ་ལྟར་རྒྱ་ཆེ་ཟབ་ཅིང་རྟོགས་དཀའ་བས། །བླ་མ་བརྟེན་ཞིང་སྒྲུབ་པ་ཡུན་བསྲིངས་པས། །ཆོས་རྣམས་རྫོགས་ཤིང་མཐར་ཐུག་ངེས་པ་རྙེད། །དེ་ཕྱིར་རིམ་གྱིས་དུམ་སྐྱོང་གནད་དུ་ཆེ། །ཕྱིན་ཆད་རྗེས་སུ་འཇུག་པའི་བུ་རྣམས་ཀྱིས། །དབང་ཁྲིད་གདམས་པ་དེ་ལྟར་བརྟེན་པར་བྱ། །བླ་མའི་བཀའ་རྒྱ་ཡིན་ནོ་སྙིང་ལ་ཕུར། །རྗེས་འཇུག་གཏད་རྒྱ་(༢༣༨)ཡིན་ནོ་དམ་དུ་ཟུང་། །ངེས་པའི་སྙིང་གཏམ་ཡིན་ནོ་བརྩོན་པས་སྒྲུབས། །སྙིང་པོའི་གདམས་པ་ཡིན་ནོ་ཟད་སར་སྐྱོལ། །གཙོ་བོ་དམ་ཚིག་ཡིན་ནོ་རྣམ་དག་སྲུངས། །བྱིན་རླབས་རྩ་བ་ཡིན་ནོ་མོས་གུས་སྐྱེད། །དངོས་གྲུབ་རྩ་བ་ཡིན་ནོ་སྒྲུབ་ལ་རེམས། །བླ་མས་བྱིན་གྱིས་བརླབ་ཀྱིས་གསོལ་བ་ཐོབ། །ཡི་དམ་དངོས་གྲུབ་སྟེར་གྱིས་བསྐྱེད་རྫོགས་སྒོམས། །མཁའ་འགྲོས་སྟོང་གྲོགས་བྱེད་ཀྱིས་ཚོགས་གཏོར་ཤོམས། །བཀའ་སྲུང་བར་ཆད་སེལ་གྱིས་མཆོད་ལ་བརྩོན། །ཚེ་འདི་འཁྲུལ་པ་ཡིན་གྱིས་ཞེན་པ་ཆོད། །ཅིས་ཀྱང་དགོས་མེད་ཡིན་གྱིས་དངོས་འཛིན་ཐོང་། །གདམས་པའི་མཐར་ཐུག་ཡིན་གྱིས་སེམས་ཉིད་ལྟོས། །འདིར་བདེ་ཕྱི་མར་སྐྱིད་ཀྱིས་ཆོས་རང་མཛོད། །འཇིག་རྟེན་བྱ་བ་བཏང་ན་ངང་གིས་བདེ། །སྣང་བ་ཆོས་ལ་བསྒྱུར་ན་དེས་ཀྱང་བདེ། །ཟབ་དོན་སྙིང་པོ་བསྒྲུབས་ན་ཤིན་ཏུ་བདེ། །གནས་ལུགས་ཟད་སར་སྐྱོལ་ན་ལོས་ཀྱང་བདེ། །དེ་བས་སྐལ་ལྡན་མོས་གུས་ཡོད་པ་རྣམས། །གདམས་པའི་མཆོག་འདི་ནན་ཏན་སྙིང་པོར་མཛོད། །ཚེ་འདིར་(༢༣༨)འཁོར་བའི་རྒྱ་མཚོ་རབ་བརྒལ་ནས། །ཞི་བ་བྱང་ཆུབ་མྱ་ངན་འདས་ཐོབ་འགྱུར། །ཚུལ་འདི་གདམས་ཁྲིད་དོན་གྱི་སྙིང་པོའི་ཆིངས། །མ་འོངས་སྐལ་ལྡན་རྣམས་ལ་གདམས་པ་སྟེ། །རང་གཞན་དོན་གཉིས་འགྲུབ་པར་བྱེད་དོན་དུ། །མ་ནོར་མ་འཁྲུལ་གོ་རིམ་ལག་ཁྲིད་བསྡེབས། །དགེ་བ་འདི་ཡིས་མ་ལུས་འགྲོ་བ་ཀུན། །མངོན་པར་བྱང་ཆུབ་མཛད་པ་མཐའ་ཡས་ཤོག །གདམས་ཁྲིད་དོན་གྱི་མདོ་ཆིངས་ཞེས་བྱ་བ། ཐེག་པ་རྒྱལ་པོའི་(༢༣༩)རྣལ་འབྱོར་པ་ཀློང་ཆེན་རབ་འབྱམས་ཀྱིས། གངས་རི་ཐོད་དཀར་གྱི་མགུལ། ཀུན་ཏུ་བཟང་པོའི་ནགས་ནང་། ཟླ་བ་ཆུ་ཤེལ་གྱི་ཁང་བཟངས་སུ་ལེགས་པར་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།

སྙན་བརྒྱུད་གནད་ཀྱི་མདོ་ཆིངས།

༄༅། །སྙན་བརྒྱུད་གནད་ཀྱི་མདོ་ཆིངས་བཞུགས་སོ། །

༄༅། སྙན་བརྒྱུད་གནད་ཀྱི་མདོ་ཆིངས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དངོས་གྲུབ་ཀུན་འབྱུང་དཔལ་ལྡན་བླ་མ་དང་། །མཁའ་འགྲོ་དམ་ཅན་རྒྱ་མཚོའི་ཞབས་བཏུད་དེ། །ཟབ་དོན་སྙིང་པོའི་མཆོག་འདིར་འཇུག་འདོད་པས། །སྙན་བརྒྱུད་སྙིད་པོ་དོན་གྱི་མདོ་ཆིངས་བྲི། །སྐལ་ལྡན་དད་པས་ཉེ་བར་གདུངས་པ་ཅན། །ཆོས་དོན་གཉེར་བས་དམ་པའི་(༢)ཞབས་དྲུང་ངོ་། །སྣོད་ལྡན་ངང་ཚུལ་བཟང་པོའི་རྟགས་ཡོད་པ། །དེ་ལ་ཐོག་མར་སྣོད་དུ་རུང་བའི་ཆོས། །བླ་མའི་རྣལ་འབྱོར་གསོལ་འདེབས་ལུང་ཕོག་ལ། །མཎྜལ་འབུལ་ཞིང་བརྩོན་པས་གནས་པར་བྱ། །དེ་ནས་ཟབ་ལམ་དབང་གི་སྒོ་ཕྱེས་ལ། །ལམ་ཁྲིད་ཆེན་མོས་ནན་ཏན་སྙིང་པོར་བྱ། །ཁྱད་པར་གཟུང་འཛིན་སེམས་ཀྱི་རྩ་བ་གཅད། །དྲི་བ་གཟབས་ལ་ཕུ་ཐག་འཁྲུས་པར་བྱ། །དངོས་གཞི་ངོ་སྤྲོད་ད་ལྟའི་ཉམས་ལེན་གདབ། །ཞག་འགར་གསལ་གདབ་བརྟན་ཆགས་རྙེད་པར་བྱ། །ཡེ་གྲོལ་སོར་བཞག་དགོངས་པའི་གདིང་ཆེན་བསྟན། །སྙན་བརྒྱུད་དང་པོས་ལྟ་སྒོམ་སྤྱོད་འབྲས་བསྟན། །ལམ་ཟབ་སྙིང་པོས་འཕྱུགས་མེད་ཐག་ཆོད་བྱ། །ད་ལྟའི་ཡིན་ལུགས་སྐྱོང་ལུགས་མི་ཤེས་པར། །བར་དོའི་ལག་བརྡས་དགོས་དུས་སྟོང་པར་དཀའ། །དེ་བས་ད་ལྟའི་ཉམས་ལེན་ཚད་ལ་དབབ། །ལྟ་སྒོམ་སྤྱོད་འབྲས་དྲོད་ཚད་རྙེད་(༣)པར་བྱ། །འདི་ནི་ཐོག་མའི་གདམས་ཁྲིད་མདོ་ཆིངས་ཡིན། །དེ་ནས་དངོས་གཞི་བར་དོའི་ངོ་སྤྲོད་ལ། །སྙན་བརྒྱུད་གཉིས་པ་དོན་གྱི་མེ་ལོང་བཞིན། །གཞི་ལམ་འབྲས་བུའི་ངོ་སྤྲོད་གཟབས་ལ་བྱ། །ཁྱད་པར་དམར་ཁྲིད་ལམ་གྱི་ངོ་སྤྲོད་ལ། །ད་ལྟ་རང་གནས་སྐུ་གསུམ་འདུ་འབྲལ་མེད། །བར་དོ་རང་སྣང་སྐུ་ལྔ་ཡེ་ཤེས་གདངས། །སྒྲ་འོད་ཟེར་གསུམ་ཐུགས་རྗེའི་ཐག་པ་དང་། །ངོ་སྤྲོད་རྣམ་བཞི་ལག་ཁྲིད་གཟབས་ལ་སྤྲད། །ཤེལ་དང་འདྲ་འབག་འོད་ཁྱིམ་ཁ་སྦྱོར་གསུམ། །འདུ་འབྲལ་མེད་པ་ཉི་མའི་སྙིང་པོ་བཞིན། །ངེས་ཤེས་བསྐྱེད་ལ་བརྡ་དོན་འཕྲོད་པར་བྱ། །ཆོས་སྐུ་མན་ཤེལ་ནང་གསལ་རིན་ཆེན་སྦུབས། །རང་བཞིན་འོད་ལྔ་སྐུ་གསུམ་འདུ་འབྲལ་མེད། །ཐོག་མའི་གཞི་དང་གཞི་སྣང་ངོ་སྤྲོད་ཡིན། །ལོངས་སྐུ་འདྲ་འབག་ཕྱི་གསལ་ཚོམ་བུའི་སྐུ། །རང་གདངས་འོད་ལྔ་ནམ་མཁའི་དབྱིངས་ཤར་བ། །ལྔ་ལྡན་དགོངས་པར་བརྡ་དོན་ངེས་ཤེས་བསྐྱེད། །སྐུ་སྤྲུལ་འོད་ཁྱིམ་ཁ་སྦྱོར་སྒྲོན་མར་སྤྲད། །ནང་འོད་སྙིང་ག་ཕྱི་འོད་ནམ་མཁའ་གཉིས། །རྒྱང་ཞགས་སྒོ་ལ་འོད་གསལ་ཁ་སྦྱོར་ཡིན། །ཐུགས་རྗེའི་ཟེར་སྣང་སྤྲུལ་སྐུའི་ངོ་སྤྲོད་དེ། །མན་ཤེལ་ཉི་ཟེར་ཕྱི་ནང་ཁ་སྦྱར་བཞིན། །རྩལ་ལམ་ཐུགས་རྗེའི་ཟེར་ཐག་ངོ་སྤྲོད་ཡིན། །འདི་ནི་འཆི་ཁར་ཟེར་ཐག་ཁ་སྦྱར་ཉིད། །གཞི་གནས་རྒྱ་མཚོར་གནས་བཏེག་ནམ་མཁར་ཟུག །དཀར་དམར་ཟེར་གཉིས་རྩེ་ལ་ལྷ་མོ་བརྒྱད། །ཚོམ་བུའི་སྐུར་སྣང་ཟང་ཐལ་གྲོལ་བ་ཡིན། །འདུ་འབྲལ་མེད་པ་ཉི་མའི་སྙིང་པོ་ནི། །ཉི་འོད་ཟེར་གསུམ་སྐུ་གསུམ་འབྲལ་མེད་དེས། །ད་ལྟར་རང་གནས་བར་དོར་རང་སྣང་འཆར། །རང་ངོ་ཤེས་པས་རྟོགས་པས་རང་གྲོལ་དུས། །ཐུགས་རྗེས་གཞན་གྲོལ་རྫོགས་ལྡན་ངོ་སྤྲོད་ཡིན། །དེ་ནས་དབྱིངས་གཅིག་རྫོགས་ལྡན་ཆེན་པོ་ནི། །ཆོས་སྐུ་མན་ཤེལ་རིན་ཆེན་སྦུབས་ཞེས་བྱ། །ངོ་སྤྲོད་རྣམ་བཞི་དོན་གྱི་སྙིང་པོ་ལ། །ཐིག་ལེ་ཉག་ཅིག་ཆོས་སྐུ་ངོ་སྤྲོད་དང་། །མཧཱའི་ལྔ་ལྡན་ལོངས་སྐུ་ངོ་སྤྲོད་དང་། །ཨ་ནུའི་འོད་ཁྱིམ་སྤྲུལ་སྐུ་ངོ་སྤྲོད་དང་། །ཨ་ཏི་རྫོགས་ལྡན་འདུ་འབྲལ་མེད་ངོ་སྤྲོད། །གཞི་དང་སྣང་ཚུལ་ངེས་རྙེད་གྲོལ་བ་སྟེ། །དགོངས་ཆེན་རྣམ་བཞི་རིན་ཆེན་སྦུབས་གཅིག་འཁྱིལ། །འདི་རྣམས་རིམ་པས་གཟབས་ལ་རང་ངོ་སྤྲད། །ཅི་ཡིན་ཆ་མེད་འལ་འོལ་མི་བྱ་བར། །རང་གིས་ཐོག་མར་(༤)ངེས་ཤེས་རབ་བསྐྱེད་ལ། །དེ་རྗེས་གཞན་ལ་དལ་བུས་བསྟན་པར་བྱ། །མཚོན་དཔེ་མང་ཡང་རིན་ཆེན་མན་ཤེལ་མཆོག །མཚོན་རྟགས་མང་ཡང་ཚོན་གང་རང་འོད་མཆོག །མཚོན་དོན་མང་ཡང་རང་རིག་ཆོས་སྐུ་མཆོག །དཔེ་རྟགས་དོན་གསུམ་རང་མལ་ཆོས་སྐུར་བསྟན། །བརྡ་དོན་བཤད་ལ་རྒྱལ་བའི་གྲལ་ལ་བཞག །འདི་ནི་ངེས་དོན་གནད་ཀྱི་མན་ངག་ཡིན། །གནད་ལ་མ་ཕོག་དོན་ཉིད་ཤེས་པ་མིན། །བསྐལ་པར་འབད་ཀྱང་གྲོལ་བ་ཤིན་ཏུ་དཀའ། །འཁོར་འདས་རྒྱབ་གྱེས་སྣང་སྲིད་ཞིང་ཁམས་ཤར། །རང་རིག་འོད་གསལ་སྒྱུ་མའི་སྦུབས་རྙེད་ཚེ། །ཡེ་ཤེས་ལུས་ཅན་རང་ངོ་ཤེས་པས་ཆོག །ཕྱི་རུ་མི་འཁྱར་ཐམས་ཅད་སངས་རྒྱས་ཤིང་། །ནང་དུ་མི་འཁྱར་རང་རིག་ཡེ་ཤེས་དངོས། །འཁོར་བའི་ཡུལ་སེམས་དེ་དུས་དོང་སྤྲུག་པས། །མྱ་ངན་འདས་པ་རང་སྣང་སྐུ་གསུམ་ཞིང་། །རང་ངོ་ཤེས་པས་སྐད་ཅིག་ཆོས་སྐུར་གྲོལ། །ལོངས་སྐུའི་ཞལ་ལས་སྤྲུལ་སྐུའི་འོད་འཕྲོས་པས། །ལས་དག་འཕྲོ་ལ་སྤྲུལ་པ་དངོས་སུ་སྣང་། །སེམས་ཅན་དོན་བྱས་སྔ་ཕྱི་སྤྲུལ་པ་བརྒྱུད། །འགྲོ་དོན་དཔག་མེད་ལྷུན་གྱིས་གྲུབ་དབྱིངས་སུ། །སྤྲུལ་པ་ལོངས་སྐུ་དེ་ཉིད་ཆོས་སྐུར་འདུས། །རིན་ཆེན་སྦུབས་ལ་རང་ས་རབ་ཏུ་ཟིན། །སྦུབས་གསུམ་གཅིག་ཐིམ་སྤྱན་གསུམ་དེ་བཞིན་ནོ། །འདི་ནི་གནད་ཀྱི་སངས་རྒྱས་ཆེ་བའི་ཆོས། །ཀུན་ལས་འཕགས་པ་དོན་གྱི་སྙིང་པོ་ཡིན། །སྣོད་ལྡན་བློ་རབ་སྐལ་བ་ཅན་རྣམས་ལ། །སྲིད་པ་ཐ་མའི་དམ་ཆོས་སྙིང་པོར་བཤད། །དེ་བས་མཁས་མཆོག་རིག་འཛིན་རྒྱལ་པོ་ཆེ། །འདི་འདྲའི་དོན་སྟོན་སྤྲུལ་པའི་གང་ཟག་དངོས། །དེས་ཀྱང་བར་དོའི་གནད་རྣམས་གཟབས་ལ་སྤྲད། །དེ་ནས་ལྟ་སྟངས་གཟིགས་སྟངས་རབ་བསྟུན་ལ། །གསང་སྒོ་ཕྱེ་ལ་འོད་གསལ་ཉི་མ་བསྟན། །དེ་ལ་གནད་གསུམ་མན་ངག་ཉམས་ལེན་བྱ། །ཡུལ་དང་སྒོ་དང་རིག་པའི་གནད་གསུམ་མོ། །ལག་ཁྲིད་སྙིང་པོས་གདམས་པའི་གསལ་འདེབས་བྱ། །ཀུན་ལ་མ་ཡིན་ལས་ཅན་འགའ་ཡི་ཡུལ། །བླ་མ་ལ་གུས་དབང་པོ་མཆོག་ལ་བསྟན། །འདི་ཉིད་གསང་བ་དུང་གི་ཡི་གེ་ལས། །ཡི་གེ་མེད་པའི་སྙན་བརྒྱུད་འདི་ཉིད་འབྲེལ། །ཞེས་གསུངས་མངོན་སུམ་དངོས་སུ་བལྟ་བར་བྱ། །དེ་ནས་སྤྲོས་པའི་མཐའ་རྣམས་གཅད་པ་དང་། །གསང་ཆེན་ངེས་པའི་ཐེག་པ་མཐའ་རྫོགས་ཕྱིར། །(༥)ཟབ་དོན་མེ་ལོང་རྒྱབ་ཆོས་ཆེན་མོ་བསྟན། །དེ་ཡིས་མུན་སངས་ངེས་དོན་སྙིང་པོ་རྙེད། །ཟབ་ཅིང་རྒྱ་ཆེའི་གནས་ལ་དབང་འབྱོར་ཐོབ། །སྣོད་ལྡན་འགའ་ལས་ཀུན་ལ་གསང་བར་བྱ། །ཡང་རབ་རྣམས་ལ་མངོན་ཕྱུང་གསལ་བར་བཤད། །དེ་ཡིས་ཐེག་པའི་སྒྲོ་འདོགས་ཆོད་པ་དང་། །གདམས་པའི་སྙིང་པོ་རྩེ་མོར་ཤེས་པ་དང་། །སྙིང་པོའི་བསྟན་པ་ཡུན་རིང་གནས་པ་དང་། །ལས་ཅན་སྐྱེ་བོ་ཚེ་འདིར་གྲོལ་བ་དང་། །རྒྱལ་བའི་ཕྲིན་ལས་མཐའ་རུ་རྒྱས་པ་དང་། །དཔལ་མགོན་བླ་མའི་དགོངས་པ་རྫོགས་པ་དང་། །རང་གི་དགེ་ཚོགས་རྒྱ་མཚོ་གང་བ་དང་། །ལྟ་དགོངས་ཏིང་འཛིན་གོང་དུ་འཕེལ་ལ་སོགས། །དཔག་མེད་ཡོན་ཏན་མཚོ་ཆེན་མི་ཟད་ལྡན། །དེ་ཕྱིར་ཟབ་ཅིང་རྒྱ་ཆེའི་ཆོས་ཀྱི་སྒོ། །གདམས་ཁྲིད་ལག་ལེན་གོ་རིམ་མ་ནོར་བར། །སྣོད་ལྡན་རྣམས་ལ་རིམ་གྱིས་སྦྱིན་པར་བྱ། །ཆོས་ཁ་ཚང་བས་ཉམས་ལེན་སྙིང་པོ་འགྲུབ། །སྣོད་མེད་རྣམས་ལ་གསང་ཞིང་དམ་དུ་སྦ། །ཐོས་ཟིན་ན་ཡང་གདམས་གཞུག་གནད་རྣམས་སྦ། །ནམ་ཡང་མི་སྦྱིན་ཆོས་ཀྱི་ཆེ་བ་ཉམས། །བཀའ་རྒྱ་ཞིག་པས་བཀའ་ཆད་འབྱུང་བ་ཡིན། །སྐལ་ལྡན་བླ་མ་ལ་གུས་དབང་པོ་རབ། །དད་བརྩོན་སྙིང་པོར་བྱེད་པ་ཐམས་ཅད་བྱིན། །མཁའ་འགྲོའི་ལུང་བསྟན་བྱུང་ན་བརྒྱུད་པ་གཏད། །བཀའ་རྒྱ་གྲོལ་ཞིང་གཞན་དོན་ཕྲིན་ལས་བསྐུལ། །འདི་ནི་ངེས་པར་རང་གནད་དམ་པ་ཡིན། །བདག་གིས་ཚུལ་འདིར་དཀའ་བ་མང་སྤྱད་པས། །སྙིང་པོའི་གནད་རྣམས་མ་ལུས་གསལ་བར་མཐོང་། །བླ་མ་མཉེས་ཤིང་བརྒྱུད་པའི་བྱིན་རླབས་བབས། །དེ་ཕྱིར་རྣམ་གྲངས་ངེས་པའི་དོན་འདི་བཀོད། །ཕྱི་རབས་དད་ལྡན་སེམས་ཀྱི་བུ་རྣམས་ཀུན། །རང་གཞན་དོན་གཉིས་བསྒྲུབ་ལ་ནན་ཏན་བསྐྱེད། །གདམས་ཁྲིད་གནད་རྣམས་ཆིངས་འདི་ཇི་བཞིན་ཐོབ། །མ་ནོར་རྣམ་གྲངས་ངེས་པའི་དོན་ལ་རེག །དེ་ཕྱིར་ཟབ་དོན་ཐིག་ལེ་གསང་བའི་སྐོར། །མང་ཐོས་སྙིང་པོ་དོན་གྱི་རྣལ་འབྱོར་པ། །སྣ་ཚོགས་རང་གྲོལ་ཀློང་ཆེན་རབ་འབྱམས་ཀྱིས། །གངས་རི་ཐོད་དཀར་མགུལ་དུ་ལེགས་པར་སྦྱར། །དགེ་བ་དེ་ཡིས་མ་ལུས་འགྲོ་བ་ཀུན། །སུས་ཀྱང་མ་འབད་ཅིས་ཀྱང་མ་རྩོལ་བར། །རྒྱལ་བའི་བྱིན་རླབས་ངོ་མཚར་ལྷུན་གྱིས་གྲུབ། །ཁམས་གསུམ་ཡོངས་གྲོལ་ཆོས་ཀྱི་རྒྱལ་པོར་ཤོག །

སྙན་(༦)བརྒྱུད་གནད་ཀྱི་མདོ་ཆིངས་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀུན་མཁྱེན་སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ། ཀུན་ཏུ་བཟང་པོའི་ནགས་ནང་། ཟླ་བ་ཆུ་ཤེལ་གྱི་ཁང་བཟང་ཆོས་ཀྱིས་མཐོ་བའི་ཁྲི་རབ་ཏུ་བཟང་པོ་ལ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།

གསང་སྐོར་བརྒྱུད་པའི་ཕྱག་འཚལ་བྱིན་རླབས་སྤྲིན་ཕུང་།

༄༅། །གསང་སྐོར་བརྒྱུད་པའི་ཕྱག་འཚལ་བྱིན་རླབས་སྤྲིན་ཕུང་བཞུགས་སོ། །

༄༅། ༀ་ཨཱཿཧཱུྃ། སངས་རྒྱས་ཐམས་ཅད་ཀྱི་ངོ་བོ། ཆོས་ཐམས་ཅད་ཀྱི་འབྱུང་གནས། དགེ་འདུན་ཐམས་ཅད་ཀྱི་རང་བཞིན། ཚད་མེད་པའི་ཐུགས་རྗེ་དང་།ལྷུན་གྱིས་གྲུབ་པའི་ཕྲིན་ལས་མངའ་བ་ཆོས་ཀྱི་རྗེ་རིག་འཛིན་ཆེན་པོ་ཀུ་མ་རཱ་ཛའི་ཞབས་ཀྱི་པདྨོ་དྲི་མ་མེད་པ་ལ། དུས་ཐམས་ཅད་དུ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ།གདོད་ནས་ཚོགས་གཉིས་རབ་རྫོགས་ཤིང་། །ཡོན་ཏན་ཕྲིན་ལས་རླབས་ཆེ་བས། །འཁོར་འདས་ཀུན་གྱི་དཔལ་གྱུར་པ། །ཀུན་བཟང་ཡབ་ཡུམ་ལ་ཕྱག་འཚལ། །ཆོས་སྐུའི་ཞིང་ལས་མ་གཡོས་པར། །འོད་གསལ་ལོངས་སྤྱོད་རྫོགས་པ་ཡིས། །དཔག་མེད་གཞན་དོན་ལྷུན་གྱིས་གྲུབ། །རྡོ་རྗེ་སེམས་དཔའ་ལ་ཕྱག་འཚལ། །སངས་རྒྱས་ཀུན་གྱི་རྣམ་འཕྲུལ་ལས། །རང་བྱུང་གསང་སྔགས་ཀུན་གྱི་བདག །རིག་འཛིན་ཀུན་གྱི་བླ་མ་མཆོག །དགའ་རབ་རྡོ་རྗེ་ལ་ཕྱག་འཚལ། །ཐུགས་རྗེ་ཡེ་ཤེས་གྲུ་ཆེན་གྱིས། །འཁོར་བའི་ཆུ་བོར་རབ་བསྒྲལ་ཞིང་། །མཁྱེན་རབ་རྒྱ་མཚོའི་མཐར་སོན་པ། །འཇམ་དཔལ་བཤེས་གཉེན་ལ་ཕྱག་འཚལ། །ཤེས་བྱའི་དཀྱིལ་འཁོར་ཡངས་པ་ལ། །མཁྱེན་རབ་འོད་སྟོང་རབ་འཕྲོས་པས། །འཇིག་རྟེན་གསུམ་པོ་སྣང་མཛད་པ། །ཤྲཱི་སིང་ཧ་ལ་ཕྱག་འཚལ། །སྐྱེ་ཤི་མེད་པའི་སྐུར་བཞེངས་ནས། །སོ་སོ་ཡང་དག་རིག་བཞི་ཡིས། །འགྲོ་བའི་དོན་ཀུན་རྫོགས་མཛད་པ། །བི་མ་མི་ཏྲ་ལ་ཕྱག་འཚལ། །རྣམ་གྲོལ་གདོད་མའི་མཁའ་དབྱིངས་སུ། །ཏིང་འཛིན་མི་གཡོ་རབ་བརྟན་ཞིང་། །མཆོག་དང་ཐུན་མོང་དངོས་གྲུབ་བརྙེས། །ཏིང་འཛིན་བཟང་པོ་ལ་ཕྱག་འཚལ། །མཁྱེན་བརྩེའི་བློ་མིག་རབ་དག་པས། །གཞུང་ལུགས་རྒྱ་མཚོའི་ཕ་རོལ་ཕྱིན། །རྣམ་ཀུན་འོད་གསལ་སྙིང་པོ་བརྙེས། །བློ་གྲོས་དབང་ཕྱུག་ལ་ཕྱག་འཚལ། །(༧)ཟབ་ཅིང་རྒྱ་ཆེའི་རྒྱ་མཚོ་ལས། །རང་བྱུང་ཡེ་ཤེས་ནོར་བུ་བརྙེས། །རང་གཞན་དོན་གཉིས་ལྷུན་གྱིས་གྲུབ། །རིན་ཆེན་འབར་བ་ལ་ཕྱག་འཚལ། །རྒྱལ་བ་ཀུན་གྱི་བྱིན་རླབས་ལས། །དངོས་གྲུབ་ཡིད་བཞིན་གཏེར་གྱི་བདག །བར་དོར་མཆོག་གི་དངོས་གྲུབ་བརྙེས། །ལྡང་མ་ལྷུན་རྒྱལ་ལ་ཕྱག་འཚལ། །སྙིང་པོའི་དོན་ལ་རབ་སྦྱངས་པས། །ཚེ་འདིར་མཆོག་གི་དངོས་གྲུབ་བརྙེས། །འོད་ལུས་གྲུབ་ནས་མཁའ་ལ་གཤེགས། །སེང་གེ་དབང་ཕྱུག་ལ་ཕྱག་འཚལ། །ཟབ་མོའི་དེ་ཉིད་རབ་རྟོགས་ནས། །ཏིང་འཛིན་བརྩོན་པས་འཁྲུལ་པ་ཞིག །རླུང་སེམས་དག་པས་འོད་གསལ་བརྙེས། །ཤོང་པ་རས་པ་ལ་ཕྱག་འཚལ། །ཆོས་ཉིད་དོན་གྱི་མཆོག་བརྙེས་པ། །རང་བྱུང་ཡེ་ཤེས་དགོངས་པ་ལ། །འདུ་འབྲལ་མེད་པར་ལྷུན་གྱིས་གྲུབ། །ཟབ་སྟོན་ཆོས་འབར་ལ་ཕྱག་འཚལ། །དགོངས་པ་རང་བྱུང་ཡེ་ཤེས་དང་། །བརྟུལ་ཞུགས་སྤྱོད་པ་བླ་ན་མེད། །དངོས་གྲུབ་མཆོག་གི་སྙིང་པོར་བརྙེས། །དམ་པ་དགྱེར་ཞིག་ལ་ཕྱག་འཚལ། །ཤེས་བྱའི་དཀྱིལ་འཁོར་བཟང་པོ་ལ། །སྦྱངས་པའི་བློ་མིག་རབ་དག་པས། །མཁས་ཤིང་གྲུབ་པའི་རྒྱལ་མཚན་བརྙེས། །ཤེས་རབ་རྩེ་མོ་ལ་ཕྱག་འཚལ། །བརྒྱུད་པའི་བྱིན་རླབས་མ་ཉམས་ཤིང་། །གདམས་པའི་ཆུ་བོ་བཞི་འདུས་པས། །སྨིན་གྲོལ་ལམ་ལ་འགྲོ་བ་འདྲེན། །སྤྲུལ་སྐུ་མཆེད་གཉིས་ལ་ཕྱག་འཚལ། །རང་དོན་གྲུབ་པ་མཆོག་བརྙེས་ནས། །གཞན་དོན་ཕྲིན་ལས་ཕུན་སུམ་ཚོགས། །དགོངས་པ་ཆོས་ཉིད་བར་མཚམས་མེད། །ནམ་མཁའ་རྡོ་རྗེ་ལ་ཕྱག་འཚལ། །རང་བྱུང་རྟོགས་པའི་རྩལ་ཆེན་གྱིས། །འཁོར་འདས་གཞི་གྲོལ་ཆོས་སྐུའི་ངང་། །གཞན་དོན་ཕྲིན་ལས་རླབས་ཆེ་བ། །ཀུ་མ་རཱ་ཛ་ལ་ཕྱག་འཚལ། །རང་རིག་དག་པའི་ནམ་མཁའ་ལ། །ཏིང་འཛིན་ཉི་མའི་འོད་གདལ་བས། །རང་བྱུང་ཡེ་ཤེས་ཆོས་ཉིད་ཀློང་། །སྣ་ཚོགས་རང་གྲོལ་ལ་ཕྱག་འཚལ། །ལྟ་སྤྱོད་ཟུང་དུ་འཇུག་པ་ཡིས། །ཏིང་འཛིན་མཆོག་གི་དངོས་གྲུབ་བརྙེས། །བླ་མེད་སྙིང་པོའི་བསྟན་པ་འཛིན། །བདེ་ལེགས་རྒྱ་མཚོ་ལ་ཕྱག་འཚལ། །རང་བྱུང་གདོད་ནས་དག་པའི་ཀློང་། །འཁོར་འདས་གཞི་གྲོལ་མཉམ་པ་ཉིད། །རྟོག་པ་མཆོག་གྱུར་འགྲོ་བ་འདྲེན། །མ་ཏི་མཾ་ག་ལ་ཕྱག་འཚལ། །ཕྱོགས་བྲལ་རྟོགས་པའི་ནམ་མཁའ་(༨)ལ། །འོད་གསལ་ཉི་ཟླའི་དཀྱིལ་འཁོར་རྒྱས། །འགྲོ་བའི་མ་རིག་མུན་པ་སེལ། །བྱང་སེམས་གུ་ཎ་ལ་ཕྱག་འཚལ། །ཟབ་མོའི་དེ་ཉིད་རབ་རྟོགས་ནས། །གཉིས་མེད་རང་བྱུང་ཡེ་ཤེས་ལ། །འགྲོ་བ་མ་ལུས་འགོད་མཛད་པ། །སྤྲུལ་སྐུ་བསམ་རྒྱལ་ལ་ཕྱག་འཚལ། །རང་བྱུང་ཡེ་ཤེས་སྒོམ་པ་ཉིད། །བར་མཚམས་མེད་པར་རབ་རྟོགས་ནས། །འགྲོ་ཀུན་སངས་རྒྱས་སར་འགོད་པ། །ནམ་མཁའ་གཞོན་ནུ་ལ་ཕྱག་འཚལ། །ཐུགས་རྗེ་རང་ཤར་རིག་པ་ཉིད། །རང་གྲོལ་ཆོས་སྐུ་རབ་རྟོགས་ནས། །ཚད་མེད་ཕྲིན་ལས་གཞན་དོན་འགྲུབ། །ཆོས་དབྱིངས་རྡོ་རྗེ་ལ་ཕྱག་འཚལ། །ཇི་ལྟ་ཇི་སྙེད་མཁྱེན་པ་རྒྱས། །བརྩེ་བས་མཁའ་མཉམ་རབ་བསྒྲལ་ནས། །ཐམས་ཅད་གདོད་མར་འཁྲིད་མཛད་པ། །མ་ཏི་དྷྭ་ཛ་ལ་ཕྱག་འཚལ། །ཡེ་གྲོལ་བློ་འདས་ངང་ཉིད་ནས། །རང་བབས་ལྷུག་པར་ཉམས་བླངས་ཤིང་། །འགྲོ་ལ་སྙིང་རྗེ་མ་ལྟར་བརྩེ། །རྩ་བའི་བླ་མ་ལ་ཕྱག་འཚལ། །གཞན་ཡང་བླ་མ་ཡི་དམ་དང་། །དཀྱིལ་འཁོར་ཀུན་ཏུ་བཟང་པོའི་ཞིང་། །མཁའ་འགྲོ་དམ་ཅན་རྒྱ་མཚོ་ལ། །རྟག་ཏུ་གུས་པས་བདག་ཕྱག་འཚལ། །ཞིང་རྡུལ་ཀུན་གྱི་གྲངས་སྙེད་ཀྱི། །སངས་རྒྱས་ཆོས་དང་དགེ་འདུན་ལ། །དེ་སྙེད་ལུས་ཀུན་རྣམ་སྤྲུལ་ཏེ། །ལུས་བཏུད་པས་ནི་གུས་ཕྱག་འཚལ། །མཁན་པོ་དེ་ནི་སློབ་དཔོན་མཆོག །བཤེས་གཉེན་དམ་པ་མ་ལུས་དང་། །སྐུ་གཟུགས་མཆོད་རྟེན་ལ་སོགས་པ། །མཆོད་འོས་ཀུན་ལ་གུས་ཕྱག་འཚལ། །སྤོས་དང་མེ་ཏོག་མར་མེ་དང་། །དྲི་ཆབ་ཞལ་ཟས་རོལ་མོ་སོགས། །ཕྱི་ནང་གསང་བའི་མཆོད་སྤྲིན་གྱིས། །ནམ་མཁའི་དབྱིངས་ཀུན་བཀང་སྟེ་མཆོད། །ཐོག་མ་མེད་ནས་ལུས་དང་ངག །ཡིད་ཀྱིས་སྡིག་པའི་ལས་བགྱིས་པ། །ཐམས་ཅད་མཆོད་འོས་རྣམས་ལ་བཤགས། །འགལ་འཁྲུལ་ཉམས་ཆག་དག་པར་མཛོད། །རྒྱལ་བ་སྲས་བཅས་ཉན་རང་དང་། །འགྲོ་བ་ཀུན་གྱི་དགེ་འདུན་ལ། །ངོ་མཚར་ཀུན་ནས་རབ་དད་པས། །རྟག་པར་རྗེས་སུ་ཡི་རང་ངོ་། །བླ་མ་ཡི་དམ་མཁའ་འགྲོ་དང་། །མགོན་པོ་སྲས་དང་བཅས་རྣམས་ལ། །ཐལ་མོ་སྦྱར་ཏེ་གསོལ་བ་ནི། །ཆོས་ཀྱི་འཁོར་ལོ་བསྐོར་བར་བསྐུལ། །སེམས་ཅན་དབྱིངས་མཐའ་ཇི་སྲིད་པར། །སྐུ་ཚེ་ཕྲིན་ལས་མཐའ་ཡས་ཀྱིས། །མྱ་ངན་མི་(༩)འདའ་བཞུགས་ནས་ཀྱང་། །འགྲོ་བའི་མགོན་པོར་མཛད་དུ་གསོལ། །དགེ་བ་འདི་དང་གཞན་དག་གི། །དགེ་བ་རྒྱ་མཚོ་མཐའ་ཡས་ཀྱིས། །འགྲོ་བ་སེམས་ཅན་མ་ལུས་པ། །ཐར་པའི་བྱང་ཆུབ་ཐོབ་པར་ཤོག །བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བ་ཅི་ཡོད་པ། །འགྲོ་བ་ཀུན་ལ་རབ་སྨིན་ཏེ། །བདེ་དགའི་མྱ་ངན་འདས་ཐོབ་ཤོག །སེམས་ཅན་སྡུག་བསྔལ་ཅི་ཡོད་པ། །དེ་ཀུན་བདག་གིས་ཁུར་ཁྱེར་ཏེ། །ལས་དང་བག་ཆགས་རབ་སྦྱངས་ནས། །སངས་རྒྱས་གོ་འཕང་ཐོབ་པར་ཤོག །རྒྱལ་བ་སྲས་བཅས་ཇི་སྙེད་ཀྱི། །མཛད་པ་ཐམས་ཅད་གཅིག་བསྡུས་པ། །དེ་ཉིད་སྤྱོད་པ་རླབས་པོ་ཆེ། །བདག་གིས་གཞན་དོན་སྤྱོད་པར་ཤོག །བདག་ལ་ཁྲོ་བའམ་སྨོད་གྱུར་ཏམ། །དད་དམ་བསྟོད་པར་གྱུར་ཀྱང་རུང་། །མིང་ཙམ་ཐོས་པའི་འགྲོ་བ་ཀུན། །ཐར་པའི་བྱང་ཆུབ་ཐོབ་པར་ཤོག །སྲིད་དང་སྐྱེ་བ་ཐམས་ཅད་དུ། །དཔལ་མགོན་བླ་མ་མཉེས་པ་དང་། །ཟབ་མོའི་ཆོས་ལ་བརྩོན་པ་ཡིས། །རང་གཞན་དོན་གཉིས་འགྲུབ་པར་ཤོག །ཐིག་ལེ་གསང་སྐོར་གྱི་བརྒྱུད་པའི་ཕྱག་འཚལ་བྱིན་རླབས་སྤྲིན་ཕུང་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ་མེ་ཏོག་སྤྲིན་གྱི་ནགས་ནང་། ཀུན་ཏུ་བཟང་པོའི་ཁང་བཟངས་སུ་སྦྱར་བ་རྫོགས་སོ།། །།

དགེའོ། །དགེའོ། །དགེའོ།། །།

དགོངས་བརྒྱུད།

༄༅། །དགོངས་བརྒྱུད་བཞུགས་སོ། །

༄༅། གནས་ཉི་མ་ལྟ་བུའི་ཕོ་བྲང་དུ། །ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །(༡༠)བར་དོར་འོད་གསལ་འབྱོངས་པར་བྱིན་གྱིས་རློབས། །འཇའ་ཚོན་ལྟ་བུའི་དཀྱིལ་འཁོར་ན། །ལོངས་སྐུ་རིགས་ལྔ་ཡབ་ཡུམ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །འོག་མིན་ཆོས་ཀྱི་ཕོ་བྲང་ན། །སྤྲུལ་སྐུ་སེམས་དཔའ་བཅུ་དྲུག་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །རི་རབ་རི་ཡི་རྩེ་མོ་ན། །རིག་འཛིན་དགའ་རབ་རྡོ་རྗེ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །བསིལ་བ་ཚལ་གྱི་དུར་ཁྲོད་ན། །གུ་རུ་འཇམ་དཔལ་བཤེས་གཉེན་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །བྱང་ཆུབ་སྙིང་པོའི་ཤིང་དྲུང་ན། །མཁས་མཆོག་ཤྲཱི་སིངྷ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །བྷ་སིང་ཆེན་པོའི་དུར་ཁྲོད་ན། །པཎ་ཆེན་བི་མ་མི་ཏྲ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །བསམ་ཡས་མཆིམས་ཕུའི་དགེ་གོང་ན། །ཉང་ཆེན་ཏིང་འཛིན་བཟང་པོ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །གཡོ་རུ་གཟོང་ཕུག་ཕོ་བྲང་ན། །སྦས་སྟོན་བློ་གྲོས་དབང་ཕྱུག་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །བྲག་དཀར་རྟ་སོའི་ཕོ་བྲང་ན། །འབྲོམ་སྟོན་རིན་ཆེན་འབར་བ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །དབུ་རུ་ཞྭ་ཡི་ལྷ་ཁང་ན། །ལྡང་མ་ལྷུན་གྱི་རྒྱལ་མཚན་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །(༡༡)བར་དོར་འོད་གསལ་འབྱོངས་པར་བྱིན་གྱིས་རློབས། །འོད་ལེ་ཟམ་ཁའི་ཕོ་བྲང་ན། །ལྕེ་བཙུན་སེང་གེ་དབང་ཕྱུག་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །གཡོ་རུ་བྲག་དམར་ཕོ་བྲང་ན། །གུ་རུ་ཤོང་པ་རས་པ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །གཡོ་ཕུག་གསལ་བའི་དགེ་སྡིངས་ན། །བླ་མ་ཟབ་སྟོན་ཆོས་འབར་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །ཉང་སྨད་ཆུ་སྒོའི་དགོན་པ་ན། །དམ་པ་དགྱེར་སྟོན་ཡབ་སྲས་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །ཉང་སྨད་ཆུ་སྒོའི་སྨན་སྒང་ན། །གཉེན་སྟོན་ཤེས་རབ་རྩེ་མོ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །ཡོན་ཏན་སྒང་གི་དབེན་རྩ་ན། །དྲིན་ཆེན་སྤྲུལ་སྐུ་མཆེད་གཉིས་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །དམིགས་བཞི་འོད་གསལ་རི་ཁྲོད་ན། །འཁྲུལ་ཞིག་ནམ་མཁའ་རྡོ་རྗེ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །ཤམ་པོ་གངས་ཀྱི་ར་བ་ན། །རིག་འཛིན་ཀུ་མ་རཱ་ཛ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །སྐྱོམ་ཕུ་དཔལ་གྱི་དགེ་སྡིངས་ན། །རྒྱལ་སྲས་དྲི་མེད་འོད་ཟེར་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །ཐར་པ་གླིང་གི་གནས་མཆོག་ཏུ། །མཁས་གྲུབ་བདེ་ལེགས་རྒྱ་མཚོ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །སྨན་རྩ་གསང་སྔགས་ཕོ་བྲང་ན། །མཁས་གྲུབ་བྱ་བཏང་ཆོས་རྗེ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །བདེ་ཆེན་རྩེ་མོའི་གནས་མཆོག་ཏུ། །བྱང་སེམས་གུ་ཎ་ཤྲཱི་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་་འོད་གསལ་འབྱོངས་པར་བྱིན་གྱིས་རློབས། །སྨན་རྩེ་གྲུབ་པའི་བསྟི་གནས་སུ། །སྤྲུལ་སྐུ་བསམ་འགྲུབ་རྒྱལ་པོ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །གར་བཞུགས་ཆོས་ཀྱི་ཕོ་བྲང་ན། །ཆོས་རྗེ་ནམ་མཁའ་གཞོན་ནུ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །བྱང་ཆུབ་གླིང་གི་གནས་མཆོག་ཏུ། །(༡༢)ཆོས་རྗེ་མཁའ་ཀློང་ཡངས་པ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །སྨན་རྩེ་རྒྱལ་བའི་ཕོ་བྲང་དུ། །མཁས་བཙུན་བློ་གྲོས་རྒྱལ་མཚན་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །སྤྱི་གཙུག་ཉི་ཟླའི་གདན་སྟེང་དུ། །དྲིན་ཅན་རྩ་བའི་བླ་མ་ལ་གསོལ་བ་འདེབས། །ཚེ་འདིར་ལྟ་དགོངས་ཏིང་འཛིན་འཕེལ་བ་དང་། །བར་དོར་འོད་གསལ་འབྱོངས་པར་བྱིན་གྱིས་རློབས། །དགེའོ། །དགེའོ། །དགེའོ།། །།

གསང་སྐོར་བླ་མ་བརྒྱུད་རིམ་གྱི་གསོལ་འདེབས།

༄༅། །གསང་སྐོར་བླ་མ་བརྒྱུད་རིམ་གྱི་གསོལ་འདེབས་སོ། །

༄༅། ཨཱ་ཨཱཿཧཱུྃ། མི་འགྱུར་ལྷུན་གྲུབ་ཀུན་བཟང་རྡོ་རྗེ་སེམས། །དགའ་རབ་རྡོ་རྗེ་འཇམ་དཔལ་བཤེས་གཉེན་དང་། །ཤྲཱི་སིངྷ་པཎ་ཆེན་བི་མ་ལར། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །ཏིང་འཛིན་བཟང་པོ་བློ་གྲོས་དབང་ཕྱུག་དང་། །རིན་ཆེན་འབར་བ་ལྷུན་གྱི་རྒྱལ་མཚན་དང་། །སེང་གེ་དབང་ཕྱུག་ཤོང་པ་རས་པ་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །ཟབ་སྟོན་ཆོས་འབར་དམ་པ་དགྱེར་ཞིག་དང་། །ཤེས་རབ་རྩེ་མོ་སྤྲུལ་སྐུ་མཆེད་གཉིས་དང་། །ནམ་མཁའ་རྡོ་རྗེ་ཀུ་མ་རཱ་ཛ་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །(༡༣)བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །སྣ་ཚོགས་རང་གྲོལ་བདེ་ལེགས་རྒྱ་མཚོ་དང་། །མ་ཏི་མཾ་ག་བྱང་སེམས་ཆེན་པོ་དང་། །སྤྲུལ་སྐུ་བསམ་རྒྱལ་ནམ་མཁའ་གཞོན་ནུ་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །རྒྱལ་སྲས་དམ་པ་མཁའ་ཀློང་ཡངས་པ་དང་། །མཁས་བཙུན་ཆེན་པོ་མ་ཏི་དྷྭ་ཛ་དང་། །རང་གྲོལ་ལྷུག་པ་པུཎྱཻ་རཏྣ་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །བཀའ་དྲིན་འཁོར་མེད་རྩ་བའི་བླ་མ་དང་། །གདོད་མའི་རྒྱལ་བ་བརྒྱུད་པའི་བླ་མའི་བར། །དངོས་གྲུབ་ཀུན་འབྱུང་བླ་མའི་ཚོགས་རྣམས་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །སྐུ་གསུམ་རྒྱལ་བ་ཞི་ཁྲོ་རབ་འབྱམས་དང་། །དུས་གསུམ་རྒྱལ་བ་མ་ལུས་ཚོགས་དང་བཅས། །ཡི་དམ་དཀྱིལ་འཁོར་ལྷ་ཚོགས་ཐམས་ཅད་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །མཁའ་འགྲོའི་གཙོ་མོ་རྡོ་རྗེ་ཕག་མོ་ནས། །རིགས་གསུམ་རིགས་བཞི་རིགས་ལྔའི་མཁའ་འགྲོ་དང་། །རྡོ་རྗེ་གིང་ཆེན་ཤུགས་འགྲོ་ཐམས་ཅད་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང། །བར་དོར་འོད་གསལ་འགྲུབ་པར་བྱིན་གྱིས་རློབས། །དཔལ་ཆེན་ཁྲག་འཐུང་འབར་བའི་དབང་ཕྱུག་ནས། །འཇིག་རྟེན་ལས་བྱེད་མཐུ་སྟོབས་རྫུ་འཕྲུལ་ཅན། །བསྟན་སྲུང་དམ་ཅན་རྒྱ་མཚོའི་ཚོགས་རྣམས་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །རྒྱལ་བ་རིག་འཛིན་གྲུབ་ཆེན་དཔག་མེད་(༡༤)ནས། །ཕྱི་ནང་དམ་ཆོས་གཞུང་བཞིན་སྒྲུབ་མཛད་པའི། །དུས་གསུམ་སྔ་ཕྱིའི་ཆོས་མཛད་ཐམས་ཅད་ལ། །གུས་པས་གསོལ་འདེབས་ཐུགས་རྗེའི་སྤྱན་གྱིས་གཟིགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཆོས་མཛད་ཡོངས་ལ་གུས་པས་གསོལ་བ་འདེབས། །ཚེ་འདིར་ནད་གདོན་སྡིག་སྒྲིབ་དག་པ་དང་། །བར་དོར་འོད་གསལ་འགྲུབ་པར་བྱིན་གྱིས་རློབས། །དགེའོ། །དགེའོ། །དགེའོ།། །།

གསོལ་འདེབས་དངོས་གྲུབ་ཀུན་འབྱུང་།

༄༅། །གསོལ་འདེབས་དངོས་གྲུབ་ཀུན་འབྱུང་བཞུགས་སོ། །

༄༅། གདོད་ནས་ལྷུན་གྲུབ་གནས་མཆོག་ཏུ། །ཀུན་བཟང་ཡབ་ཡུམ་ལ་གསོལ་བ་འདེབས། །སྟོང་གསལ་ཀ་དག་ཆོས་ཉིད་ལ། །ཟད་སར་སྐྱོལ་བར་བྱིན་གྱིས་རློབས། །འོག་མིན་ཆོས་དབྱིངས་གནས་མཆོག་ཏུ། །རྡོ་རྗེ་སེམས་དཔའ་ལ་གསོལ་བ་འདེབས། །ལྷུན་གྲུབ་དག་པའི་འོད་གསལ་ཉིད། །རང་ངོ་ཤེས་པར་བྱིན་གྱིས་རློབས། །རི་རབ་རི་ཡི་རྩེ་མོ་རུ། །དགའ་རབ་རྡོ་རྗེར་གསོལ་བ་འདེབས། །མ་འགགས་རང་ཤར་རོལ་པ་ཉིད། །ཐུགས་རྗེར་འཆར་བར་བྱིན་གྱིས་རློབས། །བསིལ་བ་ཚལ་གྱི་གནས་མཆོག་ཏུ། །འཇམ་དཔལ་བཤེས་གཉེན་གསོལ་བ་འདེབས། །རང་གསལ་གཞི་ཡི་བསམ་གཏན་ཉིད། །དགོངས་པ་རང་གནས་བྱིན་གྱིས་རློབས། །བྱང་ཆུབ་འབྱུང་བའི་གནས་མཆོག་ཏུ། །ཤྲཱི་སིངྷར་གསོལ་བ་འདེབས། །མ་སྤངས་དབྱིངས་སུ་རྣམ་དག་པའི། །ཆོས་དབྱིངས་རྟོགས་པར་བྱིན་གྱིས་རློབས། །བྷ་སིང་ཆེན་པོའི་གནས་མཆོག་ཏུ། །བི་མ་མི་ཏྲ་ལ་གསོལ་བ་འདེབས། །མ་བཙལ་ལྷུན་གྱིས་རང་གྲུབ་པའི། །ཆོས་སྐུ་མངོན་གྱུར་བྱིན་གྱིས་རློབས། །མཆིམས་ཕུ་དགེ་གོང་གནས་མཆོག་ཏུ། །ཉང་བན་ཆེན་པོར་གསོལ་བ་འདེབས། །རང་བྱུང་ཡེ་ཤེས་སྒོམ་པ་ཉིད། །བར་མཚམས་མེད་པར་བྱིན་གྱིས་རློབས། །གཡོ་རུ་གཟོང་ཕུག་གནས་མཆོག་ཏུ། །བློ་གྲོས་དབང་ཕྱུག་ལ་གསོལ་བ་འདེབས། །ངོ་བོ་སྟོང་གསལ་རང་རིག་ཉིད། །མཐའ་དབུས་མེད་པར་བྱིན་གྱིས་རློབས། །བྲག་དཀར་རྟ་སོའི་གནས་མཆོག་ཏུ། །རིན་ཆེན་འབར་བར་གསོལ་བ་འདེབས། །རང་བཞིན་ལྷུན་གྲུབ་སྣང་བ་ཉིད། །ཚད་ལ་ཕེབས་པར་བྱིན་གྱིས་རློབས། །ཀླུངས་ཤོད་ཞྭ་ཡི་གནས་མཆོག་ཏུ། །ལྡང་མ་ལྷུན་རྒྱལ་གསོལ་བ་འདེབས། །ཐུགས་རྗེ་རང་ཤར་རིག་པ་ཉིད། །རང་གྲོལ་ཆོས་སྐུར་བྱིན་(༡༥)གྱིས་རློབས། །འོད་ལེ་ཟམ་ཁའི་གནས་མཆོག་ཏུ། །སེང་གེ་དབང་ཕྱུག་ལ་གསོལ་བ་འདེབས། །རྡོས་བཅས་སྒྱུ་ལུས་ཕུང་པོ་འདི། །འོད་ལུས་དག་པར་བྱིན་གྱིས་རློབས། །གཡོ་རུ་བྲག་དམར་གནས་མཆོག་ཏུ། །ཤོང་པ་རས་པར་གསོལ་བ་འདེབས། །ཐམས་ཅད་ཟད་པ་ཆོས་ཉིད་དང་། །རླུང་སེམས་སྟོང་པར་བྱིན་གྱིས་རློབས། །གཡུ་ཕུག་གསལ་བའི་གནས་མཆོག་ཏུ། །ཟབ་སྟོན་ཆོས་འབར་གསོལ་བ་འདེབས། །འཁོར་འདས་རང་སྣང་སྟོང་པའི་ངང་། །འཁྲུལ་སྣང་ཟད་པར་བྱིན་གྱིས་རློབས། །ཉང་སྨད་ཆུ་སྒོའི་གནས་མཆོག་ན། །དགྱེར་སྟོན་ཞིག་པོར་གསོལ་བ་འདེབས། །སྒོ་གསུམ་བྱ་བྲལ་ཆོས་ཉིད་ངང་། །བདག་འཛིན་ཞིག་པར་བྱིན་གྱིས་རློབས། །ཉང་སྨད་སྨན་སྒང་གནས་མཆོག་ཏུ། །ཤེས་རབ་རྩེ་མོར་གསོལ་བ་འདེབས། །ཡུལ་སྣང་བདེན་མེད་གཞི་བྲལ་ངང་། །གཟུང་རྟོག་གྲོལ་བར་བྱིན་གྱིས་རློབས། །ཡོན་ཏན་སྒང་གི་གནས་མཆོག་ཏུ། །སྤྲུལ་སྐུ་མཆེད་གཉིས་གསོལ་བ་འདེབས། །རིག་པ་སྟོང་གསལ་ཟང་ཐལ་ངང་། །འཛིན་རྟོག་གྲོལ་བར་བྱིན་གྱིས་རློབས། །གཡུ་རུ་རྒྱ་སྨད་གནས་མཆོག་ཏུ། །ནམ་མཁའ་རྡོ་རྗེར་གསོལ་བ་འདེབས། །རང་གདངས་རིག་པ་རྒྱ་ཡན་ངང་། །ཆོས་ཟད་དགོངས་པར་བྱིན་གྱིས་རློབས། །ཕྱོགས་མེད་རི་ཁྲོད་གནས་མཆོག་ཏུ། །ཀུ་མ་རཱ་ཛར་གསོལ་བ་འདེབས། །ཐམས་ཅད་རིག་པ་ཟང་ཐལ་ངང་། །ཀ་དག་དགོངས་པར་བྱིན་གྱིས་རློབས། །ཨོ་རྒྱན་རྫོང་གི་གནས་མཆོག་ཏུ། །སྣ་ཚོགས་རང་གྲོལ་གསོལ་བ་འདེབས། །གཞི་བྲལ་ལྷུན་གྱིས་གྲུབ་པའི་ངང་། །དགོངས་པ་རྟོགས་པར་བྱིན་གྱིས་རློབས། །ཐར་གླིང་དཔལ་གྱི་གནས་མཆོག་ཏུ། །བདེ་ལེགས་རྒྱ་མཚོར་གསོལ་བ་འདེབས། །མཁྱེན་བརྩེའི་རྟོགས་པ་མངོན་གྱུར་ནས། །གཞན་དོན་མཐར་ཕྱིན་བྱིན་གྱིས་རློབས། །སྨན་རྩེ་དབེན་པའི་གནས་མཆོག་ཏུ། །མ་ཏི་མངྒར་གསོལ་བ་འདེབས། །འཇིག་རྟེན་བྱ་བ་བློས་བཏང་ནས། །རི་ཁྲོད་གནས་པར་བྱིན་གྱིས་རློབས། །སྨན་རྩེ་གྲུབ་པའི་བསྟི་གནས་སུ། །གུ་ཎ་ཤཱི་ལ་གསོལ་བ་འདེབས། །བྱང་ཆུབ་སེམས་ཀྱི་ཆུ་རྒྱུན་གྱིས། །འགྲོ་རྣམས་སྨིན་པར་བྱིན་གྱིས་རློབས། །སྨན་རྩེ་གསང་སྔགས་ཕོ་བྲང་དུ། །སྤྲུལ་སྐུ་བསམ་རྒྱལ་(༡༦)གསོལ་བ་འདེབས། །མ་ངེས་སྤྲུལ་པས་འགྲོ་བའི་དོན། །མྱུར་དུ་འགྲུབ་པར་བྱིན་གྱིས་རློབས། །གར་བཞུགས་དག་པའི་གནས་མཆོག་ཏུ། །ནམ་མཁའ་གཞོན་ནུ་གསོལ་བ་འདེབས། །སེམས་ཉིད་ནམ་མཁའ་ལྟ་བུའི་དོན། །མཐའ་བྲལ་རྟོགས་པར་བྱིན་གྱིས་རློབས། །བྱང་ཆུབ་གླིང་གི་གནས་མཆོག་ཏུ། །མཁའ་ཀློང་ཡངས་པར་གསོལ་བ་འདེབས། །ཆོས་ཉིད་གདོད་མའི་མཁའ་དབྱིངས་སུ། །མྱུར་དུ་འཇུག་པར་བྱིན་གྱིས་རློབས། །སྨན་རྩེ་རྒྱལ་བའི་ཕོ་བྲང་དུ། །མ་ཏི་དྷྭ་ཛར་གསོལ་བ་འདེབས། །རང་རིག་སྟོང་གསལ་ཟུང་འཇུག་དོན། །མངོན་དུ་འགྱུར་བར་བྱིན་གྱིས་རློབས། །སྤྱི་གཙུག་ཉི་ཟླའི་གདན་སྟེང་དུ། །རྩ་བའི་བླ་མར་གསོལ་བ་འདེབས། །ཡེ་གྲོལ་བློ་འདས་གཉུག་མའི་དོན། །མྱུར་དུ་རྟོགས་པར་བྱིན་གྱིས་རློབས། །གདུལ་བྱ་དད་མོས་གནས་མཆོག་ཏུ། །བླ་མ་ཀུན་ལ་གསོལ་བ་འདེབས། །སྣང་སྲིད་གཞི་ནས་གྲོལ་བའི་ངང་། །དགོངས་པ་ཆོས་སྐུར་བྱིན་གྱིས་རློབས། །གར་བཞུགས་ཆོས་ཀྱི་གནས་མཆོག་ཏུ། །ཆོས་མཛད་ཡོངས་ལ་གསོལ་བ་འདེབས། །སྣང་བ་ཆོས་སུ་བསྒྱུར་བ་དང་། །དག་སྣང་འབྱོངས་པར་བྱིན་གྱིས་རློབས། །བྱིན་རླབས་འདུ་བའི་གནས་མཆོག་ཏུ། །མཁའ་འགྲོ་དམ་ཅན་ལ་གསོལ་བ་འདེབས། །སྒྲུབ་ལ་བར་ཆད་མེད་པ་དང་། །དངོས་གྲུབ་ཐོབ་པར་བྱིན་གྱིས་རློབས། །རང་བྱུང་ཡེ་ཤེས་གནས་མཆོག་ཏུ། །འཁོར་འདས་ཡོངས་ལ་གསོལ་བ་འདེབས། །ཐམས་ཅད་ཡེ་གྲོལ་མཉམ་པ་ཉིད། །སྤངས་བླང་མེད་པར་བྱིན་གྱིས་རློབས། །རིག་པ་དབང་བསྒྱུར་ཐོབ་པ་དང་། །རྟོགས་པ་འཆར་བར་བྱིན་གྱིས་རློབས། །སྣང་བ་ལམ་དུ་ལྷོངས་པ་དང་། །རང་གནས་དགོངས་པར་བྱིན་གྱིས་རློབས། །བྱམས་དང་སྙིང་རྗེ་འབྱོངས་པ་དང་། །གཞན་དོན་འགྲུབ་པར་བྱིན་གྱིས་རློབས། །ངེས་འབྱུང་བློ་སྣ་ཐུང་བ་དང་། །འཆི་བ་དྲན་པར་བྱིན་གྱིས་རློབས། །ཚེ་འདི་བློ་ཡིས་ཐོངས་པ་དང་། །དགོས་མེད་སྐྱེ་བར་བྱིན་གྱིས་རློབས། །དངོས་འཛིན་འཁྲུལ་པ་ཞིག་པ་དང་། །གཟུང་འཛིན་གྲོལ་བར་བྱིན་གྱིས་རློབས། །ཅིར་སྣང་སྒྱུ་མར་འབྱོངས་པ་དང་། །བདག་འཛིན་ཞིག་པར་བྱིན་གྱིས་རློབས། །བན་མ་བུན་མར་བྱིན་གྱིས་རློབས། །ཤག་མ་ཤིག་མར་བྱིན་གྱིས་རློབས། །ཁྲལ་མ་ཁྲོལ་མར་བྱིན་གྱིས་(༡༧)རློབས། །སང་མ་སེང་མར་བྱིན་གྱིས་རློབས། །ཕྱལ་མ་ཕྱོལ་མར་བྱིན་གྱིས་རློབས། །འར་མ་འུར་མར་བྱིན་གྱིས་རློབས། །ཆལ་མ་ཆིལ་མར་བྱིན་གྱིས་རློབས། །ད་ལྟ་ཉིད་དུ་བྱིན་གྱིས་རློབས། །གསོལ་འདེབས་དངོས་གྲུབ་ཀུན་འབྱུང་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས། གངས་རི་ཐོད་དཀར་དུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།

གསང་སྐོར་གྱི་དབང་གི་ལག་ལེན་གསལ་བའི་སྒྲོན་མེ།

༄༅། །གསང་སྐོར་གྱི་དབང་གི་ལག་ལེན་གསལ་བའི་སྒྲོན་མེ་བཞུགས་སོ། །

༄༅། ༀ་ཨཱཿཧཱུྃ། གདོད་མའི་མགོན་པོ་ཡོན་ཏན་རྫོགས་པའི་སྐུ། །མི་འགྱུར་ལྷུན་གྲུབ་ཀུན་ཏུ་བཟང་པོ་དང་། །དཔལ་མགོན་བླ་མའི་ཚོགས་ལ་ཕྱག་འཚལ་ཏེ། །གསང་སྐོར་སྙན་བརྒྱུད་དབང་གི་ལག་ལེན་བྲི། །

དེ་ལ་གནས་དབེན་པར་མཎྜལ་དྲིས་བྱུགས་པར་ཚངས་ཟུར་གྱི་ཐིག་གདབ་ལ་རིམ་པ་གསུམ་དུ་བསྐོར་བའི་ནང་མ་ལ་པདྨ་འདབ་མ་བརྒྱད། བར་མ་ལ་བཅུ་དྲུག །ཕྱི་མ་ལ་ཉི་ཤུ་རྩ་བཞི་བྲིས་ལ། ལྟེ་བ་མཐིང་ཀའི་ཤར་དཀར། ལྷོ་སེར། ནུབ་དམར། བྱང་ལྗང་གུ། མཚམས་དང་གཞན་རྣམས་མཛེས་ཚོན་དུ་བསྐྱེད་ལ། དེའི་སྟེང་དུ་མཉྫིའི་ཁར་དཔལ་གཏོར་སྤོད་དང་ཆང་གིས་བརྫིས་པའི་མཐའ་བསྐོར་དུ། ཆོས་སྐྱོང་སྤྱི། སྔགས་སྲུང་། གཟའ། དམ་ཅན། གཞི་བདག་ལྔའི་གཏོར་མ་དང་། ཕྱི་ནང་གི་མཆོད་པ། ཚོགས་ཀྱི་ཡོ་བྱད་དང་བཅས་པ་བཤམས་ཏེ། སློབ་དཔོན་རང་ཉིད་སྐྱབས་སུ་འགྲོ་བ་དང་སེམས་བསྐྱེད་ནས། ༀ་ཡོ་ག་ཤུདྡྷོ་སརྦ་དྷརྨཱ་སྭ་བྷཱ་ཝ་ཨཱཏྨ་ཀོ྅ཧཾ་གིས་སྟོང་པའི་ངང་ལས། སྟེང་འོག་ཕྱོགས་མཚམས་ཐམས་ཅད་སྲུང་བའི་འཁོར་ལོ། ཡེ་ཤེས་ཀྱི་མེ་རི་མེ་དཔུང་དང་བཅས་པའི་དབུས་སུ། བྷྲུཾ་ལས་འཇའ་ཚོན་སྤེལ་བའི་གཞལ་ཡས་ཁང་གི་ནང་དུ་སེང་གེ་ཉི་ཟླ་རིན་པོ་ཆེའི་ཁྲི་ལ། དཔལ་ཀུན་ཏུ་བཟང་པོ་ཡབ་ཡུམ་སྐུ་མདོག་མཐིང་ག་མཉམ་པར་སྦྱོར་བ། རྡོ་རྗེ་སྐྱིལ་མོ་ཀྲུང་གིས་བཞུགས་པ་གསལ་བཏབ་ལ། ༀ་ཨཱཿཧཱུྃ་བརྒྱ་རྩ་བརྗོད་ནས་མདུན་གྱི་མཎྜལ་གཏོར་མ་དང་བཅས་པ་དེ་སྐད་ཅིག་གིས་བྷྲུྃ་ལས་འོད་ལྔའི་གཞལ་ཡས་ཁང་གི་རྣམ་པར་བསྐྱེད་པའི་དབུས་སུ་རྡོ་རྗེ་སེམས་དཔའ་ལ་རིགས་ལྔའི་སངས་རྒྱས་ཀྱིས་བསྐོར་བའི་མཐར། རིག་འཛིན་བརྡའི་བརྒྱུད་པ་དང་། གང་ཟག་སྙན་ཁུང་(༡༨)གི་བརྒྱུད་པའི་བླ་མ་རྣམས་དང་། དེའི་ཕྱི་རིམ་དུ་རིགས་བཞིའི་མཁའ་འགྲོ་དམ་ཅན་རྒྱ་མཚོའི་ཚོགས་དང་བཅས་པ་རྣམས་སྤྲིན་ཕུང་འཁྲིགས་པ་བཞིན་དུ་གསལ་བཏབ་ལ། རྔ་དང་རོལ་མོའི་སྒྲ་སྒྲོག་ཅིང་འདི་སྐད་དོ། །

ཧཱུྃ་ཆོས་ཉིད་ཞི་བའི་ངང་ལས་མ་གཡོས་ཀྱང་། །ཐུགས་རྗེ་ཐབས་མཁས་ཡེ་ཤེས་རོལ་པའི་ལྷ། །དུས་གསུམ་རྒྱལ་བ་རིག་འཛིན་བླ་མར་བཅས། །ཆོས་ཀྱི་དབྱིངས་ལས་སྒྱུ་མར་སྐུར་བཞེངས་ཤིག །ཧཱུྃ་མ་གཡེལ་མ་གཡེལ་རིག་འཛིན་ཚོགས། །མ་གཡེལ་མ་གཡེལ་ཡི་དམ་ལྷ། །མ་གཡེལ་མ་གཡེལ་མཁའ་འགྲོའི་ཚོགས། །མ་གཡེལ་མ་གཡེལ་སྲུང་མའི་ཚོགས། །རྒྱལ་པོའི་ཕོ་བྲང་གང་ན་ཡོད་པ་ན། །ཡུལ་ཁམས་སྐྱེ་བོ་ཐམས་ཅད་དེ་ན་འདུ། །བསྟན་པའི་སྙིང་པོ་གང་ན་ཡོད་པ་ན། །དམ་ཅན་རྒྱ་མཚོའི་ཚོགས་ཀྱང་དེ་ན་འདུ། །ཉི་མའི་སྙིང་པོ་གང་ན་ཤར་བ་ན། །འོད་ཟེར་མང་པོ་འཕྲོ་ཞིང་འདུ་བ་ལྟར། །བྱང་ཆུབ་སེམས་ཀྱི་དགོངས་ཀློང་གསལ་བ་ན། །ཞི་ཁྲོ་རབ་འབྱམས་ཚོགས་ཀྱང་དེ་ན་འདུ། །ནམ་མཁའ་སྟོང་ལ་ལྷོ་སྤྲིན་གཏིབས་པ་བཞིན། །རིག་འཛིན་དམ་ཅན་ཚོགས་ཀྱང་དེ་ན་འདུ། །རྒྱ་མཚོ་ཆེན་པོར་ཆུ་བྲན་འདུ་བ་བཞིན། །མ་སྲིང་རྒྱ་མཚོའི་ཚོགས་ཀྱང་དེ་ན་འདུ། །ལྷུན་གྱིས་གྲུབ་པའི་རིག་འཛིན་མ་གཡེལ་ཞིག །ཕྱག་རྒྱ་ཆེན་པོ་ཚེ་ལ་དབང་བ་ཡི། །རྣམ་པར་སྨིན་པའི་རིག་འཛིན་མ་གཡེལ་ཞིག །ཧཱུྃ་ཉི་མ་ལྟ་བུའི་ཕོ་བྲང་ནས། །ཆོས་སྐུ་ཀུན་བཟང་ཡབ་ཡུམ་ལ། །འཁོར་དུ་ཡེ་ཤེས་རྒྱ་མཚོས་བསྐོར། །འདིར་གཤེགས་བདག་ལ་བྱིན་གྱིས་རློབས། །འཇའ་ཚོན་འབར་བའི་དཀྱིལ་འཁོར་ནས། །ལོངས་སྐུ་རིགས་ལྔ་ཡབ་ཡུམ་ལ། །འཁོར་དུ་བྱང་ཆུབ་སེམས་དཔས་བསྐོར། །འདིར་གཤེགས་བདག་ལ་བྱིན་གྱིས་རློབས། །འོག་མིན་ཆོས་དབྱིངས་ཕོ་བྲང་ནས། །སྤྲུལ་སྐུ་རྡོ་རྗེ་སེམས་དཔའ་ལ། །འཁོར་དུ་ཉེ་བའི་སྲས་ཀྱིས་བསྐོར། །འདིར་གཤེགས་བདག་ལ་བྱིན་གྱིས་རློབས། །རི་རབ་རི་ཡི་རྩེ་མོ་ནས། །སྟོན་པ་དགའ་རབ་རྡོ་རྗེ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །བསིལ་བ་ཚལ་གྱི་དུར་ཁྲོད་ནས། །གུ་རུ་འཇམ་དཔལ་བཤེས་གཉེན་ལ། །འཁོར་དུ་མཁའ་འགྲོ་མང་(༡༩)པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །བྱང་ཆུབ་འབྱུང་བའི་ཤིང་དྲུང་ནས། །གུ་རུ་ཤྲཱི་སིངྷ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །བྷ་སིང་ཆེན་པོའི་དུར་ཁྲོད་ནས། །གུ་རུ་བི་མ་མི་ཏྲ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །བསམ་ཡས་མཆིམས་ཕུའི་དགེ་གོང་ནས། །ཉང་བན་ཏིང་འཛིན་བཟང་པོ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །གཡོ་རུ་གཟོང་ཕུག་ཕོ་བྲང་ནས། །རྗེ་བཙུན་བློ་གྲོས་དབང་ཕྱུག་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །བྲག་དཀར་རྟ་སོའི་ཕོ་བྲང་ནས། །གུ་རུ་རིན་ཆེན་འབར་བ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །ཀླུངས་ཤོད་ཞྭ་ཡི་ལྷ་ཁང་ནས། །གནས་བརྟན་ལྡང་མ་ལྷུན་རྒྱལ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །འོད་ལེ་ཟམ་ཁའི་ཕོ་བྲང་ནས། །ལྕེ་བཙུན་སེང་གེ་དབང་ཕྱུག་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །གཡོ་རུ་བྲག་དམར་ཕོ་བྲང་ནས། །གུ་རུ་ཤོང་པ་རས་པ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །གཡུ་ཕུག་གསལ་བའི་ཕོ་བྲང་ནས། །བླ་མ་ཟབ་སྟོང་ཆོས་འབར་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །ཉང་སྨད་ཆུ་སྒོའི་དགོན་པ་ནས། །དམ་པ་དགྱེར་སྟོན་ཞིག་པོ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །ཉང་སྨད་ཆུ་སྒོའི་སྨན་སྒང་ནས། །གཉན་སྟོན་ཤེས་རབ་རྩེ་མོ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །ཡོན་ཏན་སྒང་གི་གནས་མཆོག་ནས། །དྲིན་ཆེན་སྤྲུལ་སྐུ་མཆེད་གཉིས་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །འོད་གསལ་དག་པའི་ཕོ་བྲང་ནས། །བླ་མ་ནམ་མཁའ་རྡོ་རྗེ་ལ། །འཁོར་དུ་མཁའ་འགྲོ་(༢༠)མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །རང་བྱུང་ཡེ་ཤེས་ཕོ་བྲང་ནས། །རིག་འཛིན་ཀུ་མ་རཱ་ཛ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །ལྷུན་གྲུབ་རིག་པའི་ཕོ་བྲང་ནས། །ཀུན་མཁྱེན་སྣ་ཚོགས་རང་གྲོལ་ལ། །འཁོར་དུ་མཁའ་འགྲོ་མང་པོས་བསྐོར། །འདིར་གཤེགས་བདག་ལ་བྱིན་གྱིས་རློབས། །ཞེས་སྤྱན་དྲངས་པས་སྟེང་གི་ནམ་མཁར་སྤྲིན་ཕུང་གཏིབས་པ་བཞིན་དུ་བྱོན་ཏེ་བདག་དང་། རྟེན་གཏོར་བསྐྱེད་པ་དང་། གནས་རྣམས་ལ་དབྱེར་མེད་དུ་བྱིན་གྱིས་རློབ་ཅིང་ས་གཞི་བར་སྣང་དང་བཅས་པ་ཐམས་ཅད་བླ་མའི་ཞིང་ཁམས་སུ་བསམས་ལ།

བྱིན་དབབ་པ་ནི། རིག་འཛིན་དབེན་གནས་སོ་སོ་ནས། །བླ་མ་བདེ་གཤེགས་རྡོ་རྗེ་འཆང་། །འཁོར་དུ་བརྒྱུད་པའི་བླ་མས་བསྐོར། །གདུགས་དང་རྒྱལ་མཚན་ཐིབས་སེ་ཐིབ། །རིན་ཆེན་རྒྱན་ཆ་ཁྲོ་ལོ་ལོ། །རོལ་མོ་མང་པོ་དི་རི་རི། །སིལ་སྙན་མང་པོ་སི་ལི་ལི། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བསྐུར་སྩོལ། །ཧཱུྃ་འོག་མིན་ཆོས་དབྱིངས་ཕོ་བྲང་ནས། །ཡི་དམ་རྒྱལ་བ་རིགས་ལྔ་ལ། །འཁོར་དུ་སེམས་དཔའ་བཅུ་དྲུག་བསྐོར། །གདུགས་དང་རྒྱལ་མཚན་ཐིབས་སེ་ཐིབ། །རིན་ཆེན་རྒྱན་ཆ་ཁྲོ་ལོ་ལོ། །རོལ་མོ་མང་པོ་དི་རི་རི། །སིལ་སྙན་མང་པོ་སི་ལི་ལི། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བསྐུར་སྩོལ། །ཧཱུྃ་རང་བྱུང་དུར་ཁྲོད་སོ་སོ་ནས། །མ་དང་ཡེ་ཤེས་མཁའ་འགྲོ་ལ། །འཁོར་དུ་དཔའ་བོ་དཔའ་མོས་བསྐོར། །གདུགས་དང་རྒྱལ་མཚན་ཐིབས་སེ་ཐིབ། །རིན་ཆེན་རྒྱན་ཆ་ཁྲོ་ལོ་ལོ། །རོལ་མོ་མང་པོ་དི་རི་རི། །སིལ་སྙན་མང་པོ་སི་ལི་ལི། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བསྐུར་སྩོལ། །བསྟན་པའི་སྙིང་པོའི་བཀའ་འཁོར་ནས། །སྔགས་བདག་ཡེ་ཤེས་སྟོབས་ལྡན་ལ། །འཁོར་དུ་དམ་ཅན་རྒྱ་མཚོས་བསྐོར། །གདུགས་དང་རྒྱལ་མཚན་ཐིབས་སེ་ཐིབ། །རིན་ཆེན་རྒྱན་ཆ་ཁྲོ་ལོ་ལོ། །རོལ་མོ་མང་པོ་དི་རི་རི། །སིལ་སྙན་མང་པོ་སི་ལི་ལི། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བསྐུར་སྩོལ། །(༢༡)ཞེས་བརྗོད་པས། བདག་དང་རྟེན་དང་གནས་ཀྱི་ནམ་མཁའ་གང་བར་དབྱེར་མེད་གཅིག་ཏུ་བཞུགས་པ་ལ་མཆོད་པ་འབུལ་བ་ནི། ཧཱུྃ་ཕྱི་ཡི་མཆོད་པ་རིན་པོ་ཆེ། །སྣང་སྲིད་རྣམ་དག་མཆོད་པར་འབུལ། །སྐྱེ་འགག་མེད་པར་བཞེས་སུ་གསོལ། །ནང་གི་མཆོད་པ་རིན་པོ་ཆེ། །འདོད་ཡོན་སྣ་ལྔ་མཆོད་པར་འབུལ། །རྒྱུན་ཆད་མེད་པར་བཞེས་སུ་གསོལ། །གསང་བའི་མཆོད་པ་རིན་པོ་ཆེ། །དུག་ལྔ་ཁོང་ཁྲོ་མཆོད་པར་འབུལ། །འགྲོ་འོང་མེད་པར་བཞེས་སུ་གསོལ། །ཡང་གསང་མཆོད་པ་རིན་པོ་ཆེ། །ཏིང་འཛིན་དགོངས་ཀློང་མཆོད་པར་འབུལ། །འཕེལ་འགྲིབས་མེད་པར་བཞེས་སུ་གསོལ། །ཞེས་བརྗོད་ནས།

བསྟོད་པ་ནི། ཧཱུྃ་གདོད་ནས་རྣམ་དག་ཆོས་དབྱིངས་དག་པ་ལས། །རང་བྱུང་ཡེ་ཤེས་བཅོམ་ལྡན་ཐུགས་རྗེའི་ལྷ། །ཀུན་བཟང་རིགས་ལྔ་རྡོ་རྗེ་སེམས་དཔའ་དང་། །རིག་འཛིན་བླ་མ་རྣམས་ལ་ཕྱག་འཚལ་བསྟོད། །སྐྱེ་མེད་ངང་ལས་ཐུགས་རྗེའི་སྐུར་བཞེངས་པ། །རྡོ་རྗེ་ཕག་མོ་རིགས་བཞི་མཁའ་འགྲོར་བཅས། །མཁའ་འགྲོ་ཤུགས་འགྲོ་ཐོགས་མེད་རྫུ་འཕྲུལ་ཅན། །འཇིག་རྟེན་འཇིག་རྟེན་འདས་པའི་ཚོགས་ལ་བསྟོད། །ཆེ་བའི་རྫུ་འཕྲུལ་ནམ་མཁའི་མཐའ་དང་མཉམ། །མཐུ་སྟོབས་དཔག་མེད་སངས་རྒྱས་བསྟན་པ་སྲུང་། །སྒྲུབ་མཆོག་རྣམས་ལ་བུ་བཞིན་ལེགས་སྐྱོང་བ། །དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད། །ཅེས་སྟ་གོན་གྱི་ཆོ་ག་རྣམས་རྫོགས་པར་བྱའོ། །

དེ་ནས་དངོས་གཞི་དབང་བསྐུར་བ་དངོས་ལ་གཉིས་ལས། སྔོན་འགྲོ་ནི་ན་རག་རྒྱས་བསྡུས་གང་རུང་གི་སྐོང་བཤགས་དང་། མོས་གུས་ཁྱད་པར་ཅན་གྱིས་གསོལ་བ་གདབ་པའི་རྗེས་ལ་སློབ་བུས་མཎྜལ་ཕུལ་ནས། ཐལ་མོ་སྦྱར་ཏེ་འདུག་པ་ལ། བླ་མས་དམ་པའི་ཆོས་ངོས་གཟུང་བ་ནི། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྤྱིར་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེ་བ་དེས། འགྲོ་བ་སེམས་ཅན་གྱི་དོན་དུ་ཆོས་ཀྱི་སྒོ་དང་། ཐེག་པའི་རིམ་པ་བསམ་གྱིས་མི་ཁྱབ་པ་ཞིག་གསུངས་ཀྱང་། བསྡུ་ན་ཐེག་པ་ཆེ་ཆུང་གཉིས་ལས། འདིར་ཐེག་པ་ཆེན་པོ་སྟོན་པ་ལགས། (༢༢)ཐེག་པ་ཆེན་པོ་ལ་ཡང་གསང་སྔགས་དང་ཕ་རོལ་ཏུ་ཕྱིན་པ་གཉིས་ལས། ད་རེས་འབྲས་བུ་གསང་སྔགས་རྡོ་རྗེ་ཐེག་པ་སྟོན་པ་ལགས། སྔགས་ལའང་ཕྱི་ནང་གཉིས་ལས། འདིར་ནང་པ་ཐབས་ཀྱི་རྒྱུད་སྟོན་པ་ལགས། ནང་པ་ལ་ཡང་བསྐྱེད་པ་མཧཱ་ཡོ་ག་དང་། ལུང་ཨ་ནུ་ཡོ་ག་དང་། རྫོགས་པ་ཆེན་པོ་ཨ་ཏི་ཡོ་ག་གསུམ་ལས། འདིར་ཨ་ཏི་སྟོན་པ་ལགས། ཨ་ཏི་ལ་ཡང་ཕྱི་སྐོར། ནང་སྐོར། གསང་སྐོར་གསུམ་ལས། འདིར་གསང་བའི་སྐོར་སྟོན་པ་ལགས། དེ་ལ་ཡང་དཔེ་བརྒྱུད་དང་སྙན་བརྒྱུད་གཉིས་ལས། འདིར་སྙན་བརྒྱུད་སྟོན་པ་ལགས། སྙན་བརྒྱུད་ལ་ཡང་ཡི་གེ་ཅན་དང་ཡི་གེ་མེད་པ་གཉིས་ལས། འདིར་ཡི་གེ་མེད་པའི་སྙན་བརྒྱུད་གསང་བ་གནད་ཀྱི་མེ་ལོང་ཞེས་བགྱི་བ་སྟོན་པ་ལགས། དེ་ལའང་མ་སྨིན་པ་སྨིན་པར་བྱེད་པ་དབང་དང་། སྨིན་པ་གྲོལ་བར་བྱེད་པའི་གདམས་པ་གཉིས་ཡོད་པ་ལས། འདིར་དབང་སྟོན་པ་ལགས། དེ་ལ་ཡང་བརྒྱུད་པའི་ལོ་རྒྱུས་དང་། དེ་ལས་བྱུང་བའི་དབང་གཉིས་ལས། ལོ་རྒྱུས་རྒྱས་བསྡུས་ཅི་རིགས་པ་ཞིག་བཤད་ལ། གཉིས་པ་དབང་དངོས་ལ། སྔོན་འགྲོ་སློབ་མ་གཞུག་པ་དང་། དབང་བསྐུར་བ་དངོས་གཉིས་ལས། སློབ་མ་འཇུག་པ་ལ་ལྔ་ལས། དང་པོ་སྐྱབས་འགྲོ་སེམས་བསྐྱེད་ཐུན་མོང་མ་ཡིན་པ་ནི། སློབ་མས། བླ་མ་རྡོ་རྗེ་འཛིན་པ་དང་། །དཀོན་མཆོག་གསུམ་ལ་སྐྱབས་སུ་མཆི། །སེམས་ཅན་ཀུན་ལ་ཕན་དོན་དུ། །བླ་མེད་བྱང་ཆུབ་སེམས་བསྐྱེད་དོ། །ཞེས་པ་གསུམ་དང་། ཐུན་མོང་མ་ཡིན་པ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་ལན་གསུམ་བརྗོད་དོ། །

གཉིས་པ་སྡོམ་པ་གཟུང་བ་ནི། བླ་མ་རྡོ་རྗེ་འཛིན་པ་དང་། །དཔའ་བོ་རྣལ་འབྱོར་མ་རྣམས་ཀུན། །ཐམས་ཅད་བདག་ལ་དགོངས་སུ་གསོལ། །དེང་ནས་བྱང་ཆུབ་སྙིང་པོའི་བར། །སེམས་ཅན་ཀུན་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །སྡོམ་པ་ཐམས་ཅད་གཟུང་བར་བགྱི། །རིགས་ལྔའི་དམ་ཚིག་རྗེས་བཟུང་སྟེ། །རྡོ་རྗེ་དྲིལ་བུ་ལ་སོགས་པ། །དམ་ཚིག་རྫས་རྣམས་གཟུང་བར་བགྱི། །རྡོ་རྗེ་སློབ་དཔོན་ཉིད་དང་ནི། །དཀོན་མཆོག་གསུམ་པོ་མི་སྤང་ཞིང་། །རྡོ་རྗེ་སྤུན་སྲིང་སྨད་མི་བགྱི། །ཐེག་པ་(༢༣)དམན་ལ་མི་བརྙས་ཤིང་། །སེམས་ཅན་ཀུན་ལ་འཚེ་བ་སྤང་། །ཆོས་དང་གང་ཟག་མི་སྨོད་ཅིང། །འཁྲུལ་པའི་བྱ་བ་ཡང་མི་བགྱིད། །བསྟན་པ་སྨད་པར་མི་བྱ་ཞིང་། །བསམ་གཏན་སྒོམ་པ་དཀྲུགས་མི་བྱ། །གསང་བ་སྔགས་ཀྱི་དམ་ཚིག་མཆོག །སྐུ་གསུང་ཐུགས་ལས་མི་འདའ་ཞིང་། །བསྐྱེད་རྫོགས་འཁོར་ལོ་བསྒོམ་པ་དང་། །བླ་མས་གསུངས་པ་ཇི་བཞིན་བསྒྲུབ། །ཐར་པ་ཆེན་པོའི་གྲོང་ཁྱེར་དུ། །མ་བསྒྲལ་བ་རྣམས་བསྒྲལ་བ་དང་། །མ་གྲོལ་པ་རྣམས་དགྲོལ་བ་དང་། །དབུགས་མ་ཕྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་བརྗོད་དོ། །

གསུམ་པ་དམ་ཚིག་ལ་གནས་པར་བྱ་བ་ལ་གཉིས་ལས། དམ་ཚིག་བསྒྲག་པ་ནི། ཐོད་པ་ནས་དམ་ཆུ་བླུད་ལ། ཧཱུྃ་འདི་ནི་རྡོ་རྗེ་དམ་ཚིག་ཆུ། །འདས་ན་དམྱལ་ཁམས་མེ་ཡི་བསྲེག །བསྲུངས་ན་དངོས་གྲུབ་བླ་ན་མེད། །དེ་བས་དམ་ཚིག་རྡོ་རྗེ་མཆོག །སྙིང་ལ་བཞག་པས་ཐུབ་པར་གྱིས། །ཨཱ་ས་མ་ཡཱ་པཉྩ་ཨ་མྲ྇་ཏ་ཧྲཱི་ཐཱཿཞེས་བརྗོད་དོ། །དམ་ཚིག་སྦྱིན་པ་ནི། བླ་མས། ཀྱཻ་སྐལ་ལྡན་སེམས་ཀྱི་བུ་གཅིག་ཉོན། །རང་བཞིན་རྫོགས་པ་ཆེན་པོ་ཡི། །དཀྱིལ་འཁོར་བཟང་པོ་འདིར་ཞུགས་ནས། །ཕྱི་ནང་གསང་བའི་ཐེག་པ་དང་། །དམ་ཆོས་བསྒྲུབས་པར་དམ་ཆོས་ཤིག །ཇི་ལྟར་སྔགས་ཀྱི་དམ་ཚིག་དང་། །སྡོམ་པ་ཐམས་ཅད་གཟུང་བར་བགྱི། །དམ་རྫས་རྣམས་དང་སྔགས་ཀྱི་ཚིག །དབང་བསྐུར་མ་ཐོབ་མི་རྣམས་ལ། །གསང་བ་བསྒྲགས་པར་མི་བྱ་ཞིང་། །བསྟན་པ་ཀུན་ལ་གནོད་པ་སྤང་། །གང་གིས་རྡོ་རྗེ་འཛིན་པ་ཡིས། །དངོས་གྲུབ་མཆོག་ལ་རེག་པར་བགྱི། །ཞེས་བརྗོད་པར་བྱའོ། །

བཞི་པ་རྗེས་སུ་གཟུང་བ་ལ་གཉིས་ལས། གསོལ་བ་གདབ་པ་ནི། བླ་མ་རྡོ་རྗེ་འཛིན་པ་ནི། །ཁམས་གསུམ་འཁོར་བའི་གཉེན་གཅིག་པོ། །འགྲོ་བ་མགོན་མེད་རྣམས་ཀྱི་སྐྱབས། །ཐར་པའི་ལམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་མཚོ་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཉོན་མོངས་མེ་ཡིས་གདུངས་པ་ལ། །ཐུགས་རྗེའི་བརླན་གྱིས་བསིལ་བར་མཛོད། །ཐུགས་ཀྱི་དཀྱིལ་འཁོར་བཟང་པོ་འདིར། །བདག་ནི་ཡང་དག་གཞུག་པར་གསོལ། །ཞེས་པ་གསུམ་དང་། (༢༤)ཡང་འདི་སྐད་དོ། །བླ་མ་རྡོ་རྗེ་འཛིན་པ་ལ། །བདག་ནི་གུས་པས་གསོལ་བ་འདེབས། །རང་བཞིན་རྫོགས་པ་ཆེན་པོ་ཡི། །དབང་བསྐུར་ནང་དུ་ཞུགས་ལགས་པས། །རང་གི་སེམས་ཀྱི་གནས་ལུགས་ཀྱི། །ཨ་ཏིའི་དཀྱིལ་འཁོར་བསྟན་དུ་གསོལ། །ཞེས་གསུམ་བརྗོད་དོ། །གཉིས་པ་གནང་བ་སྦྱིན་པ་ནི། བླ་མས། ཨེ་མ་བུ་ཁྱོད་སྐལ་བ་བཟང་། །རྫོགས་ཆེན་དཀྱིལ་འཁོར་བསྟན་པར་བྱ། །སེམས་ཀྱི་རྟོག་པ་ཀུན་སོལ་ལ། །འཇིག་རྟེན་འཆིང་བ་ཀུན་གྲོལ་གྱིས། །འདི་ལ་སྤང་བླང་ཐ་སྙད་བྲལ། །རིགས་དང་རྒྱུད་རྣམས་སྦྱོང་བ་ཡིས། །ལུས་ངག་བདེ་བའི་རྟེན་ཡིན་པས། །དེང་ནས་བརྩམས་ཏེ་སླར་མ་ལྡོག །ཅེས་བརྗོད་དོ། །

ལྔ་པ་བྱིན་དབབ་པ་ནི་སློབ་མ་ཀུན་ལངས་ལ། ཐལ་མོ་སྙིང་གར་སྦྱར་མིག་བཙུམ། དད་གུས་བསྐྱེད་ལ། བླ་མའི་རྩ་བ་དང་བརྒྱུད་པའི་བླ་མ་རྣམས་དང་། ཡི་དམ་རིགས་ལྔ་དང་། མཁའ་འགྲོ་རིགས་ལྔའི་སྤྲིན་ཕུང་གཏིབས་ཏེ། རིམ་པས་གསལ་བཏབ་ལ་དབྱེར་མེད་དུ་བསྟིམ་ཞིང་། སོ་སོའི་མཚན་དང་། རོལ་མོའི་སྒྲ་སྒྲོགས་ཤིང་། སྤོས་དང་ཚིལ་ཆེན་གྱི་དུད་པས་བདུག་གོ། །དེས་ནི་ཡེ་ཤེས་ཕེབས་སོ། །

དོན་གཉིས་པ་དབང་བསྐུར་བ་དངོས་ནི། སློབ་མ་སྐྱིལ་ཀྲུང་བཅས་ལ་རྡོ་རྗེ་སེམས་དཔར་སྒོམ་དུ་བཅུག་པའི་སྤྱི་བོར་གཏོར་མ་བཞག་ལ། སྔར་གསལ་བཏབ་པའི་བླ་མ། ཡི་དམ་མཁའ་འགྲོ་གསུམ་པོའི་རྣམ་པ་དང་། སློབ་དཔོན་རང་ཉིད་ཀུན་བཟང་ཡབ་ཡུམ་དུ་གསལ་བ་རྣམས་ཀྱི་དབུའི་གཙུག་ཏོར་ནས་འོད་ཟེར་དཀར་པོ་གྲངས་མེད་པ་བྱུང་། སློབ་བུའི་ལུས་ལ་ཕོག་པས་ལུས་ཀྱི་སྒྲིབ་པ་དག་སྐུའི་བྱིན་རླབས་བདུད་རྩིའི་རང་བཞིན་གྱིས་ལུས་ཁེངས། བུམ་པའི་དབང་ཐོབ། རྟགས་སུ་རྣམ་པར་སྣང་མཛད་ཚོན་གང་བས་དབུ་བརྒྱན་པར་བསམས་ལ། ཧཱུྃ་སྐུ་ཡི་དབང་བསྐུར་ལུས་ལ་བསྐུར། །ལུས་ཀྱི་སྒྲིབ་པ་དག་གྱུར་ནས། །སྐུ་ཡི་དངོས་གྲུབ་ཐོབ་གྱུར་ཏེ། །བུམ་དབང་རིན་ཆེན་རྫོགས་པར་ཤོག །ཨཱ་ཀཱ་ཡ་ཀ་ལ་ཤ་ཨ་བྷི་ཥཱིཉྩ་ཨཱ། གཏོར་མ་མགྲིན་པར་གཏུགས་ཏེ་ལྷ་དང་བླ་མའི་མགུལ་ནས་འོད་ཟེར་དམར་པོ་བྱུང་། སློབ་བུའི་ངག་ལ་ཕོག །ངག་གི་སྒྲིབ་པ་དག །གསུང་གི་བྱིན་རླབས་བདུད་རྩིའི་རྒྱུན་གྱིས་ལུས་གང་། (༢༥)གསང་བའི་དབང་ཐོབ་པར་བསམས་ལ། ཧཱུྃ་གསུང་གི་དབང་བསྐུར་ངག་ལ་བསྐུར། །ངག་གི་སྒྲིབ་པ་དག་གྱུར་ནས། །གསུང་གི་དངོས་གྲུབ་ཐོབ་གྱུར་ཏེ། །གསང་དབང་རིན་ཆེན་རྫོགས་པར་ཤོག །ཨཱཿཝཱ་ཀ་གྷུ་ཡ་ཨ་བྷི་ཥཱིཉྩ་ཨཱཿ། གཏོར་མ་སྙིང་གར་གཏུགས་ལ། ལྷ་དང་བླ་མའི་ཐུགས་ཀ་ནས་འོད་ཟེར་མཐིང་ག་བྱུང་། སློབ་མའི་སྙིང་གར་ཕོག །ཡིད་ཀྱི་སྒྲིབ་པ་དག །ཐུགས་ཀྱི་དངོས་གྲུབ་བདུད་རྩིའི་རྒྱུན་བབས། ལུས་ཁེངས། བདེ་བ་ཆེན་པོར་རོ་གཅིག་ཏུ་བསམ་ཏེ། ཧཱུྃ་ཐུགས་ཀྱི་དབང་བསྐུར་སེམས་ལ་བསྐུར། །ཡིད་ཀྱི་སྒྲིབ་པ་དག་གྱུར་ནས། །ཐུགས་ཀྱི་དངོས་གྲུབ་ཐོབ་གྱུར་ཏེ། །ཤེས་རབ་ཡེ་ཤེས་དབང་རྫོགས་ཤོག །ཧཱུྃ་ཙིཏྟ་པྲཛྙཱ་ཛྙཱ་ན་ཨ་བྷི་ཥཱིཉྩ་ཧཱུྃ། ཞེས་བརྗོད་ནས།

བཞི་པ་ཚིག་དབང་རིན་པོ་ཆེ་རྫོགས་ཆེན་རིག་པའི་རྩལ་དབང་ནི། སེམས་ཉིད་མ་བཅོས་པའི་ངང་དུ་གློད་ནས་རིག་པའི་རང་གདངས་ཟང་ཐལ་ཆོས་ཀྱི་སྐུ་དེ་རང་རྫོགས་ཐིག་ལེ་ཉག་གཅིག་ཏུ་ངོ་སྤྲད་དོ། །དབང་རིན་པོ་ཆེའི་འཁོར་ལོ་ལས། སྔོན་རྒྱ་གར་གྱི་ཡུལ་གྲོང་ཁྱེར་སེར་སྐྱ་ཞེས་བྱ་བར། རྒྱལ་པོའི་ཕྲུག་གུ་ལྟད་མོ་ལ་ཕྱིན་པས། རྒྱལ་བུ་རྐང་འཁྱམས་ཏེ། སྤྲང་པོ་ལྟ་བུར་སོང་། དེ་ནས་དུས་ནམ་ཞིག་ན། བློན་པོས་ངོ་ཤེས་ནས། དབང་བསྐུར་བས་འཁོར་འབངས་མངའ་འོག་ཏུ་འདུས་སོ། །དེ་བཞིན་དུ་ཐོག་མའི་སངས་རྒྱས་དང་། སེམས་ཅན་འོད་མཐོང་བ་ལས། རང་ངོ་མ་ཤེས་འཁྲུལ་པར་ཤར། །དེ་ལ་ངོ་སྤྲོད་བསྟན་པ་ནི། །རང་རིག་ཡེ་ཤེས་དབང་བསྐུར་བས། །འཁོར་བའི་མཚན་མ་རང་སར་གྲོལ། །ཞེས་པས་ཏེ། དཔེ་རྒྱལ་བུ། དོན་རང་རིག །རྟགས་ད་ལྟའི་ཤེས་པ་རང་མདངས་རང་ཤར་བ་འདི་སངས་རྒྱས་སུ་ངེས་ཤེས་བསྐྱེད་ལ་ངོ་སྤྲད་དོ། །དེ་ནས་ཚོགས་ལ་རོལ་ཞིང་གཏོར་མ་དངོས་གྲུབ་ཏུ་ཤེས་པས་ལོངས་སྤྱོད་ལ། བསྔོ་བ་སྨོན་ལམ་རྡོ་རྗེའི་གླུ། ལྷག་མའི་གཏོར་མ། བཀྲ་ཤིས་དང་བཅས་པའི་གྲངས་ཡོངས་སུ་རྫོགས་པར་བྱའོ། །ཡི་གེ་སྔ་མར་ཅུང་ཟད་མ་ཚང་བ་རྣམས་དང་། ཅུང་ཟད་གབ་པ་རྣམས་བླ་མའི་ཕྱག་བཞེས་ལྟར་ལྷག་ཆད་མེད་པར་བཀོད་པའོ། །

དགེ་བ་འདི་ཡིས་བདག་དང་འགྲོ་བ་ཀུན། །རང་བཞིན་རྫོགས་པ་ཆེན་པོའི་ལམ་ཞུགས་ཏེ། །འགས་(༢༦)ཀྱང་མ་འབད་སུས་ཀྱང་མ་རྩོལ་བར། །དོན་གཉིས་ལྷུན་གྲུབ་ཆོས་ཀྱི་རྒྱལ་པོར་ཤོག །སྙན་བརྒྱུད་ཡི་གེ་མེད་པའི་སྒོ་འབྱེད། དབང་རིན་པོ་ཆེ་གསལ་བའི་སྒྲོན་མེ་ཞེས་བྱ་བ། རང་བཞིན་རྫོགས་པ་ཆེན་པོའི་རྣལ་འབྱོར་པ། སྣ་ཚོགས་རང་གྲོལ་གྱིས་བཀོད་པའོ།། །།

དགེའོ། །དགེའོ། །དགེའོ།། །།

མཆོག་གསང་ལམ་ཁྲིད་ཆེན་མོ།

༄༅། །མཆོག་གསང་ལམ་ཁྲིད་ཆེན་མོ་བཞུགས་སོ། །

༄༅། ཨཱ་ཨཱཿཧཱུྃ། བླ་མ་དམ་པའི་ཞབས་ལ་ཕྱག་འཚལ་ལོ། །ཐིག་ལེ་གསང་བ་ཡི་གེ་མེད་པ་ལས། །ཁྲིད་ཀྱི་རིམ་པ་ངོ་སྤྲོད་ཟབ་མོའི་གནད། །གཅིག་ཏུ་བསྡུས་ཏེ་ཕྱི་རབས་དོན་དུ་བྲི། །

དེ་ལ་གསུམ་ལས། སྔོན་འགྲོ་ཉམས་སུ་བླང་བ་ལ་བདུན་གྱི་དང་པོ་བླ་མའི་རྣལ་འབྱོར་ནི། སྣང་སྲིད་ཀུན་ཏུ་བཟང་པོའི་ཞིང་དུ་གསལ་བའི་ངང་ལས། རྩ་བ་དང་བརྒྱུད་པའི་བླ་མ་རྣམས་སྤྱི་བོར་བསམས་ལ་གསོལ་བ་གདབ་བོ། །གཉིས་པ་མཎྜལ་ནི་གླིང་བཞི་རི་རབ་དང་བཅས་པའི་ཚོམ་བུ་བཀོད་ལ་སངས་རྒྱས་ཀྱི་ཞིང་དང་ལྷ་མིའི་ལོངས་སྤྱོད་དུ་བསམས་ལ་དབུལ་ལོ། །གསུམ་པ་རྡོ་རྗེ་སེམས་དཔའི་རྣལ་འབྱོར་ནི། རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པའི་ཐུགས་ཀར་ཡི་གེ་བརྒྱ་པ་བསམ་ལ་བཟླས་སོ། །བཞི་པ་ཚེ་མི་རྟག་པའི་ལམ་ཁྱེར་ནི། ཕྱི་དུས་བཞི་འགྱུར་བ། ནང་ཕུང་པོ་འགྱུར་བ། གསང་བ་བར་དོ་ཡིན་པའི་འདུ་ཤེས་བསྒོམ་མོ། །ལྔ་པ་འཁོར་བའི་སྐྱོ་ཤས་ནི། འགྲོ་དྲུག་སོ་སོའི་སྡུག་བསྔལ་ལ་བསམ་མོ། །དྲུག་པ་བྱང་ཆུབ་ཀྱི་སེམས་བསྒོམ་པ་ནི། ནམ་མཁའི་མཐའ་ཀླས་པའི་སེམས་ཅན་ལ་ཕར་རང་གི་བདེ་བ་བྱིན་པ་དང་། དེ་དག་གི་སྡུག་བསྔལ་ཚུར་རང་ལ་བླང་བ་གཉིས་སྤེལ་མར་བསྒོམ། སྙིང་རྗེ་ཆེན་པོ་བསྒོམ་པའོ། །བདུན་པ་གཟུང་འཛིན་སེམས་ཀྱི་རྩ་བ་གཅད་པ་ལ་གསུམ་ལས། དང་པོ་ཕྱི་གཟུང་བའི་ཡུལ་ལྔར་རང་བཞིན་མེད་པར་སྦྱང་བ་ནི། འདི་ལྟར་ཡུལ་ལྔར་སྣང་བའི་ཆོས་ཐམས་ཅད་སྒྱུ་མ་རྨི་ལམ་ལྟར་མེད་བཞིན་སྣང་བ་ཡང་། སྣང་བའི་དུས་འདི་ཉིད་ནས་རྟེན་མེད་པ། གནས་མེད་པ་ནམ་མཁའི་རང་བཞིན་དུ་བསྒོམ་མོ། །ནང་འཛིན་པ་སེམས་ཀྱི་རྩ་བ་གཅད་པ་ལ། དགག་སྒྲུབ་རྟོག་ཚོགས་སུ་ཤར་བའི་སེམས་འདི་ཉིད། དང་པོ་བྱུང་ས་དང་། བྱུང་མཁན་དང་། བར་དུ་གནས་ས་དང་། གནས་མཁན་དང་། ཐ་མར་འགྲོ་ས་དང་འགྲོ་(༢༧)མཁན། དབྱིབས་ཁ་དོག །ངོ་བོ་ངོས་གཟུང་བརྟགས་པས་སེམས་ཉིད་ནམ་མཁའ་ལྟར་རྟོགས་པ་ནི། འཁོར་འདས་མཉམ་པ་ཉིད་དུ་བསྟན་པའོ། །སྔོན་འགྲོ་དེ་དག་ཤིན་ཏུ་འབྱོངས་པ་གཅེས་སོ། །གཉིས་པ་དངོས་གཞི་ངོ་སྤྲད་པ་ལ་གཉིས་ལས། ཀ་དག་ཆོས་སྐུ་རུ་ངོ་སྤྲད་པས་ད་ལྟ་ཉམས་སུ་བླང་བ་ནི། ཚོགས་གཏོར་བཤམས། གསོལ་བ་བཏབ། ལུས་གནད་བཅས། བརྒྱུད་པའི་བཤར་བཏབ་ནས། བརྡ་སྦྱར་བ་ནི། ད་ལྟར་གྱི་རང་རིག་ཟང་ཐལ་རྗེན་པའི་ངོ་བོ་འདི་ལ་ལྟོས་དང་། གསལ་བ་ལ་འཛིན་པ་མེད་པ། སྟོང་པ་ལ་བདག་མེད་པ། རིག་པ་ངོས་བཟུང་མེད་པ་འདི་ཆོས་སྐུ་ཡིན་པས། འདིའི་ངང་ལ་མ་ཡེངས་བཅོས་བསླད་མེད་པར་རང་སོར་སྐྱོངས་ཤིག །ཅེས་ཐེབས་པར་གདབ་བོ། །ལྷུན་གྲུབ་འོད་གསལ་དུ་ངོ་སྤྲད་པས་བར་དོར་གྲོལ་བར་བྱེད་པ་ལ། མཐོང་ཁ་ཉི་ཞུར་ལ་ཤེལ་གྱིས་མཚོན་ཏེ། ཡེ་ཐོག་གཞིའི་གནས་ལུགས། ཀུན་ཏུ་བཟང་པོའི་གྲོལ་ལུགས། མ་རིག་སེམས་ཅན་གྱི་འཁྲུལ་ལུགས། སེམས་དང་ཡེ་ཤེས་ཀྱི་གནས་ལུགས། གདམས་པ་ཉམས་ལེན་གྱི་བྱེད་ལུགས། བར་དོ་འོད་གསལ་གྱི་གྲོལ་ལུགས་རྣམས་ངོ་སྤྲད་རྟིང་། སྐར་ཁུང་བཀག་ལ། མི་མོ་ལ་བརྟེན་ནས་ཞུགས་གནས་དོན་གསུམ་གྱི་ངོ་སྤྲོད་དམ། བརྡ་བསྐོར་ས་ལ་བཀོད་པ། དེ་ཤེལ་གྱི་བཏེག་ལ་དཔེ་དོན་རྟགས་གསུམ་གྱིས་ངོ་སྤྲད་ནས་སྐུ་གསུམ་ངོ་སྤྲད་པའང་ཤེལ་དང་ཉི་མ། འདྲ་འབག་གསུམ་ལ་བརྟེན་ནས། ཤེལ་ཆོས་སྐུ། འདྲ་འབག་ལོངས་སྐུ། ཉི་མ་ལས་ཟེར་འཕྲོས་པ་སྤྲུལ་སྐུའི་ངོ་སྤྲོད་རྣམས་ལག་ལེན་བརྒྱུད་པ་བཞིན་ངོ་སྤྲད་ནས། ཉི་ཞུར་ལ་ཤེལ་འཕྱར་བའི་ཞུར་གྱིས་སྙིང་ནས་མིག་ཏུ་འབྲེལ་པའི་རྩ་ལམ་ངོ་སྤྲད་པ་དང་། སེམས་དང་ཡེ་ཤེས་རྒྱབ་གྱེས་པའི་དུས་ངོ་སྤྲད་པ་དང་། བར་དོའི་གཞི་སྣང་ངོ་སྤྲད་པ་དང་། སྒྲ་འོད་ཟེར་གསུམ་གྱི་འཆར་ཚུལ་ངོ་སྤྲད་པ་དང་། ལྷུན་གྲུབ་རིན་པོ་ཆེའི་སྦུབས་སུ་སྐུ་དང་ཡེ་ཤེས་འདུ་འབྲལ་མེད་པས་ནང་གསལ་ཆོས་སྐུར་བཞུགས་བཞིན་དུ། ཕྱི་གསལ་ལོངས་སྤྲུལ་གྱིས་གཞན་དོན་མཛད་པ་དང་བཅས་པ་རྣམས་གཟབས་ལ་ངོ་སྤྲད་དོ། །འདི་རྣམས་སྙན་བརྒྱུད་གསུམ་ཀ་རྫོགས་པའི་ལམ་ཁྲིད་ཆེན་མོ་ཡིན་ནོ། །གསུམ་པ་རྗེས་རྒྱབ་ཆོས་ནི། རྒྱས་བསྡུས་ཅི་རིགས་(༢༨)བཤད་ནས་བཀའ་རྒྱས་གདབ་པར་བྱའོ། །

དེ་ལྟར་སྙན་བརྒྱུད་ཡི་གེ་མེད་པ་ཡི། །ལམ་ཁྲིད་ཆེན་མོ་བཀོད་པའི་བསོད་ནམས་དེས། །མ་ལུས་འགྲོ་ཀུན་ཐེག་མཆོག་འདིར་ཞུགས་ཏེ། །རྒྱལ་མཆོག་ཀུན་ཏུ་བཟང་པོའི་གནས་ཐོབ་ཤོག །ཡི་གེ་མེད་པའི་སྙན་བརྒྱུད་མཆོག་ཏུ་གསང་བའི་ལམ་ཁྲིད་ཆེན་མོ་ཞེས་བྱ་བ། རང་བཞིན་རྫོགས་པ་ཆེན་པོའི་རྣལ་འབྱོར་པ་སྣ་ཚོགས་རང་གྲོལ་གྱིས་བཀོད་པ་རྫོགས་སོ།། །།དགེའོ། །དགེའོ། །དགེའོ།། །།

ཡེ་གྲོལ་སོར་བཞག

༄༅། །ཡེ་གྲོལ་སོར་བཞག་བཞུགས་སོ། །

༄༅། ཡེ་གྲོལ་སོར་བཞག་ཅེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་མ་སྐྱེས་གཞི་རྩར་བྲལ་བའི་ངང་། །ཐ་མལ་ཡེ་བབས་རང་ལུགས་གཉུག་མ་ལ། །གཏང་བཞག་འགྲོ་འོངས་མེད་པས་ཕྱག་འཚལ་ལོ། །གཤིས་ཀྱི་ཡིན་ལུགས་མདོ་ཙམ་བཤད་ཀྱིས་ཉོན། །ཕྱི་ནང་སྣང་སྲིད་འཁོར་འདས་ཆོས་རྣམས་ཀུན། །ཡེ་སྟོང་བབས་སྟོང་རང་བཞིན་གདོད་ནས་སྟོང་། །ཇི་ལྟར་སྣང་ཡང་དེ་ལྟར་མ་གྲུབ་པས། །ཡོད་མེད་རྟག་ཆད་རང་བཞིན་སྤྲོས་དང་བྲལ། །སེམས་ལ་སྣང་ཡང་སེམས་སུ་མ་གྲུབ་ལ། །སེམས་ལས་གཞན་དུའང་རྡུལ་ཙམ་གྲུབ་པ་མེད། །ཇི་ལྟར་རྨི་ལམ་རང་གི་སྣང་བ་བཞིན། །མེད་བཞིན་སྣང་ཡང་རང་བཞིན་ཅུང་ཟད་མེད། །སེམས་མིན་སེམས་ལས་བྱུང་བའི་ཆོས་ཀྱང་མིན། །ཡོད་མིན་མེད་མིན་བདེན་མིན་རྫུན་པའང་མིན། །མཐའ་བྲལ་མ་བྲལ་སྟོང་མིན་མི་སྟོང་མིན། །གང་ལྟར་བརྟགས་ཀྱང་དེ་ལྟར་མི་གནས་པས། །ཡིན་པའི་ལུགས་ལ་འདི་ཞེས་གྲུབ་པ་མེད། །དབྱིངས་གཅིག་གདོད་ནས་དག་པའི་རང་བཞིན་ལ། །ཐ་དད་བློ་ཡིས་གྲུབ་མཐའ་མང་བར་མཐོང་། །རང་རང་ཕྱོགས་གྲུབ་འདི་ཞེས་མཚོན་བྱེད་ཀྱང་། །ཡིད་དཔྱོད་རྟོག་པའི་དྲ་བས་འཛིན་པ་ལས། །རྣལ་མའི་དོན་ལ་ཀུན་མིང་བཏགས་པ་ཙམ། །འདི་ལྟར་ཡུལ་དུ་སྣང་བའི་ཆོས་རྣམས་ཀུན། །ཡུལ་མེད་རྟེན་བྲལ་རྣམ་ཀུན་སྟོང་པའི་ངང་། །རྨི་ལམ་ཡུལ་དང་བར་སྣང་འཇའ་ཚོན་བཞིན། །ཇི་ལྟར་སྣང་བ་དེ་ལྟར་ཝལ་ལེ་བ། །མེད་པ་གསང་སྣང་སྒྱུ་མའི་དཔེ་བརྒྱད་ལྟར། །གང་སྣང་གཞི་རྩ་བྲལ་བའི་རང་བཞིན་ནོ། །ནང་གི་བདག་འཛིན་སེམས་ཀྱང་བཏགས་པ་ཙམ། །བཙལ་ན་མི་རྙེད་ཕྱི་ནང་གང་ན་མེད། །(༢༩)རང་ཡལ་རྗེས་མེད་འཚོལ་མཁན་རང་སར་སྟོང་། །ཁ་དོག་དབྱིབས་མེད་ཕྱལ་པ་ཟང་ཁ་མ། །བལྟས་པས་མི་མཐོང་ཇི་བཞིན་བཞག་ན་གསལ། །འདི་ཞེས་མི་མཚོན་རིག་པ་བརྗོད་འདས་ངང་། །དངོས་པོ་རིས་མེད་ཕྱོགས་ཆ་ངོས་གཟུང་མེད། །སྟོང་དང་མི་སྟོང་ཡོད་མེད་ཡིན་མིན་མེད། །ཅི་ཡིན་འདི་ཡིན་ངོས་གཟུང་གཟའ་གཏད་མེད། །གཞི་མེད་ལམ་མེད་འབྲས་བུ་ཡེ་ནས་མེད། །ལྟ་སྒོམ་སྤྱོད་འབྲས་འཚོལ་འཕྲོས་ཇི་ལྟར་ཡོད། །རང་སེམས་འཛིན་པའི་རྩ་བ་བཅད་བྱས་ན། །འཛིན་མེད་རྩ་བྲལ་ཆོས་སྐུ་ཟང་ཀ་མ། །བློ་ཟད་ཆོས་ཟད་ཀ་དག་རིག་པར་ཐུག །ངོ་མཚར་ལས་ཀྱང་ཡ་མཚན་རྨད་དུ་བྱུང་། །ཧ་ཧ་སེམས་དང་རང་རིག་དགོད་བྲོ་འཆོར། །མེད་ལ་ཡོད་ཡོད་འདྲ་བའི་འཆར་སྒོ་འདི། །གཞན་དུ་བལྟས་པས་རང་ཉིད་ངོ་བོ་སྟོང་། །སྟོང་པ་བཙལ་བས་འཚོལ་མཁན་བར་དེར་བོར། །བོར་བ་བཙལ་ཡང་སྔར་བཞིན་མ་རྙེད་པས། །རྗེས་མེད་ཟང་ཀ་ཕྱལ་པ་མིང་མེད་གཅིག །གང་ཡིན་ཅི་ཡིན་འདི་ཡིན་མེད་པར་གྲོལ། །སྣང་བ་རྒྱ་ཡན་རིག་པ་རང་བྱུང་གསལ། །རྟེན་མེད་གཞི་བྲལ་བར་སྣང་དག་པ་བཞིན། །ཐམས་ཅད་ཕྱམ་གདལ་ཀུན་བཟང་དགོངས་པར་ཕྱིན། །ཧོ་ཧོ་དེ་འདྲ་ལོས་ཀྱང་དགོད་རེ་བྲོ། །གཏད་མེད་ཡུལ་ལ་ངེས་མེད་སྣང་བ་ཤར། །འཛིན་མེད་རིག་པ་རྒྱ་ཡན་ཕྱོགས་བྲལ་ཏེ། །གང་ལྟར་ཤར་ཡང་དེ་ལྟར་མ་གྲུབ་པས། །གང་ཡིན་ཀུན་ཡིན་གཟའ་གཏད་མེད་པར་གྲོལ། །ཇི་ལྟར་རྨི་ལམ་ནང་གི་སྣང་བ་བཞིན། །གཉིས་སུ་བཟུང་དུས་གཅིག་ཏུ་མ་གྲུབ་པས། །གཟུང་འཛིན་མི་དམིགས་ཡེ་སྟོང་རྩ་བ་བྲལ། །སྣང་སེམས་གཞི་བྲལ་རྫོགས་པ་ཆེན་པོའི་ངང་། །ཐ་མལ་ཤེས་པ་ཡེ་བབས་ལྷུག་པ་ལ། །སྤང་གཉེན་ཞེན་པས་བླང་དོར་མ་ཕྱེད་པར། །གང་ལྟར་ཤར་བ་དེ་ལྟར་ཡིན་དུ་ཆུག །ཞེན་འཛིན་འཆིང་བའི་གཟེབ་ཡིན་འཁོར་བ་ཡིན། །འཛིན་མེད་རིག་པའི་བབས་ཡིན་མྱང་འདས་ཡིན། །འཁོར་འདས་རིག་པར་འུབ་ཆུབ་སྤང་བླང་མེད། །དགག་སྒྲུབ་རྣལ་མར་འུབ་ཆུབ་བླང་དོར་མེད། །ཚོགས་བརྒྱད་སེམས་སུ་འུབ་ཆུབ་གཞི་རྩ་མེད། །འཛིན་རྟོག་རང་ཡལ་བར་སྣང་བྱ་རྗེས་འདྲ། །ཤར་གྲོལ་རིས་མེད་ཆུ་དང་དབའ་རླབས་འདྲ། །གཟུང་འཛིན་གཉིས་མེད་རྨི་ལམ་(༣༠)ཡུལ་སེམས་འདྲ། །ཡུལ་སྣང་སྟོང་པ་ཆུ་ཟླ་སྨིག་རྒྱུ་འདྲ། །འགྱུ་བ་དངོས་མེད་བར་སྣང་སེར་བུ་འདྲ། །རང་ཡལ་རྗེས་མེད་མཁའ་ལ་སྤྲིན་དེངས་འདྲ། །རིག་པ་སྟོང་སངས་ནམ་མཁའ་དག་པ་འདྲ། །ངང་དངས་རང་གནས་རྒྱ་མཚོ་དངས་པ་འདྲ། །འགག་མེད་རང་ཤར་མེ་ལོང་དག་པ་འདྲ། །རིག་སྟོང་ཟང་ཀ་ཤེལ་གོང་དྲི་མེད་འདྲ། །འོད་གསལ་ལྷུན་གྲུབ་རང་གདངས་འོད་ལྔ་འདྲ། །ཐུགས་རྗེའི་རོལ་པ་ཕྱིར་གསལ་ཡུལ་སྣང་འདྲ། །འཁོར་འདས་རང་སྣང་རྨི་ལམ་སྣང་བ་འདྲ། །དབྱིངས་ལས་མ་གཡོས་མཁའ་དབྱིངས་སྣོད་བཅུད་འདྲ། །འཁྲུལ་སྣང་རང་སངས་རྨི་ལམ་སད་དང་འདྲ། །ནང་དབྱིངས་རྣམ་དག་གནམ་གང་ཟླ་བ་འདྲ། །ཀ་དག་ཆོས་སྐུ་དྲི་མེད་ནམ་མཁའ་འདྲ། །དེ་ལྟར་ཤེས་ན་སྐྱེས་བུ་མཁས་པ་་ཡིན། །ངང་ཡིན་ཡེ་ཡིན་འོད་གསལ་ཆེན་པོ་ཡིན། །གཏང་གཞག་དམིགས་བསལ་སྤྲོ་བསྡུ་མེད་པ་ཡིན། །གང་ཡིན་ཀུན་ཡིན་རང་བབས་ཆེན་པོ་ཡིན། །གཟོ་མེད་རེ་དོགས་བཅོས་བསླད་མེད་པར་ཞོག །ངང་ཡིན་ཡེ་ཡིན་རྫོགས་པ་ཆེན་པོར་གྲོལ། །བདེའོ་གསལ་ལོ་མི་རྟོག་མཐའ་དབུས་མེད། །རྩོལ་སྒྲུབ་བྲལ་བའི་རྒྱ་ཡན་ཁོང་ནས་འཆར། །རེ་དོགས་མེད་པའི་ཆོས་སྐུ་ལྷུན་གྱིས་གྲུབ། །རིག་པ་གཅེར་བུ་ལྷིངས་པ་ཟང་ཀ་མ། །སེམས་དང་སེམས་བྱུང་བློ་ལས་འདས་པའི་དོན། །གང་ཡིན་མངོན་གྱུར་གདོད་མའི་ཟད་སར་ཕྱིན། །ཀྱེ་ཧོ་ཆོས་ཉིད་ཡངས་པ་ཆེན་པོའི་ཀློང་། །རང་བཞིན་བཅོས་བསླད་མེད་པའི་ནམ་མཁའ་ལ། །གཏང་བཞག་འགྲོ་འོངས་མེད་པའི་བྱང་ཆུབ་སེམས། །བསམ་བརྗོད་སྤྲོས་དང་བྲལ་བའི་ཉི་ཟླ་ཤར། །བདེ་གསལ་རྟོག་པ་མེད་པའི་འོད་ཀྱིས་ཁྱབ། །རང་བྱུང་ཡེ་ཤེས་ཡིན་གྱི་ལྷུན་གྱིས་ཞོག །དྭངས་གསལ་གཡོ་བ་མེད་པའི་རྒྱ་མཚོ་ལ། །སྣང་གསལ་སྒོ་ལྔ་མ་འགགས་གཟུགས་བརྙན་ཤར། །དབའ་རླབས་རྙོག་པ་མེད་པའི་ངང་དེར་ཞོག །ཡིན་ལུགས་གཏིང་མཐའ་མེད་པའི་ངོ་བོ་མཐོང་། །གྲུབ་གསལ་འཕོ་འགྱུར་མེད་པའི་རི་བོ་ལ། །རྣལ་གཞག་གཉིས་སུ་མེད་པའི་དགོངས་པ་ཤར། །ལྷུན་གཞག་ཡེ་ནས་དག་པའི་ངང་དེར་གྲོལ། །རེ་དོགས་སྤང་བླང་ཟད་པའི་ངོ་བོ་མཐོང་། །གཞི་དག་གདོད་ནས་དག་(༣༡)པའི་འབྲས་བུ་རྙེད། །ཡིན་ལུགས་མངོན་དུ་གྱུར་པའི་དགོངས་པ་ཡིན། །རང་བཞག་བསམ་དང་བྲལ་བའི་རིག་པ་དེ། །རྒྱ་ཆད་ཕྱོགས་ལྷུང་བྲལ་བར་ལྷུན་གྱིས་ཞོག །ངང་དེར་གནས་ན་ཀུན་ཀྱང་ཆོས་ཀྱི་སྐུ། །

སྟོང་གསལ་འགག་པ་མེད་ཀྱིས་གང་བདེར་ཐོང་། །ཆེད་དུ་དམིགས་པ་ཡོད་ན་འཆིང་བའི་རྒྱུ། །བདག་མེད་སྤྲོས་བྲལ་ཡིན་ཀྱང་བོར་ལ་ཐོང་། །ཡིན་མིན་ངོས་གཟུང་མེད་ན་གདོད་མའི་ངང་། །སྣང་སེམས་ཇི་ལྟར་ཤར་ཡང་གང་བབས་ཞོག །རེ་བཅས་འཇུར་བུས་བཅིངས་ནས་ཕྱིན་ཅི་ལོག །མ་ཡེངས་ཏིང་འཛིན་བཟང་ཡང་གཤིས་ལ་ཐོང་། །ཡེངས་དང་མ་ཡེངས་མེད་ན་རྣལ་མའི་དོན། །རྒྱ་ཡན་ཡུལ་ལ་འཇུག་ཀྱང་གང་བདེར་ཐོང་། །ཕྱི་ནས་དག་པར་འདོད་ན་འཁྲུལ་པའི་བློ། །ནམ་ཡང་གྲུབ་པ་མེད་ཀྱིས་དམིག་གཏད་བཤོལ། །སྤང་བླང་རེ་དོགས་མེད་ན་གདོད་མའི་དབྱིངས། །ཆོས་སྐུའི་རང་མལ་ཡིན་གྱིས་རྩོལ་སྒྲུབ་བཤོལ། །ཀྱེ་ཧོ་ཆོས་ཉིད་རྡོ་རྗེ་སྙིང་པོའི་རྩེ། །ངེས་པའི་དོན་ལ་བདག་གཞན་འཁོར་འདས་མེད། །སྤང་གཉེན་རེ་དོགས་འབད་རྩོལ་འཆིང་བའི་རྒྱུ། །རྒྱུ་འབྲས་ཐེག་པས་དེ་ཉིད་ཇི་ལྟར་རྟོགས། །མཁའ་ལ་ཡོད་མེད་བྱིས་པས་རྩོད་པ་བཞིན། །བསལ་བཞག་མེད་པའི་དོན་ལ་ཇི་ལྟར་རེག །དྲང་ངེས་ལུང་ལ་ལྟོས་པའི་ཡིད་དཔྱོད་ཀྱིས། །སྤྲོས་བྲལ་སྙིང་པོའི་དེ་ཉིད་ནམ་ཞིག་མཐོང་། །མངོན་སུམ་རྗེས་སུ་དཔག་པའི་ཚད་མ་ཡིས། །རྣལ་མའི་སེམས་ཉིད་མཐོང་བའི་སྐབས་ཡོད་དམ། །ཐོག་མེད་བག་ཆགས་དྲི་མས་མ་ཆོག་པར། །ད་དུང་ཀུན་བརྟགས་གྲུབ་མཐའི་གཟེབ་ཀྱིས་བཅིངས། །ཁམས་གསུམ་རིགས་དྲུག་སྲིད་པའི་གྲོང་ཁྱེར་ལས། །ཐར་པ་མེད་པའི་བག་ཆགས་ར་བས་བསྐོར། །རྟོག་པའི་དྲྭ་བ་ཀུན་ནས་གཅད་དཀའ་བས། །རང་བཞིན་སྔོན་ནས་གོམས་པའི་སྐྱེ་བོ་ལ། །ཆོས་ཉིད་དོན་གྱི་བདེན་པ་ཇི་ལྟར་འཇུག །ཀྱེ་མ་འཁོར་བའི་རྩ་བ་གཟུང་འཛིན་ཉིད། །མ་རིག་ཀུན་རྟོག་གཟུང་འཛིན་ཕྱི་ཕྱིར་འཕེལ། །སྲིད་པའི་བདེ་སྡུག་སྣ་ཚོགས་རྒྱུན་མི་ཆད། །ལས་ཟད་ལས་ལས་གྲོལ་བའི་སྐབས་ཡོད་དམ། །འདི་ཞེས་སེམས་ལ་བཟང་ངན་འཛིན་པ་ཡོད། །ཇི་ལྟར་གཟུང་བ་དེ་ལྟར་བག་ཆགས་ཉིད། །བཟང་ངན་ལས་ཀྱིས་རིག་(༣༢)པའི་དོན་ལ་སྒྲིབ། །ས་འདམ་རས་ཀྱིས་ནོར་བུ་བསྒྲིབས་པ་བཞིན། །དགེ་སྡིག་ལས་ཀྱི་བག་ཆགས་ངན་སོང་དང་། །བདེ་སྡུག་ཁྱད་པར་རྨི་ལམ་བཞིན་དུ་བྱེད། །འདུས་བྱས་གཡོ་བ་མི་རྟག་འཁོར་བ་པ། །བདེ་འབྲས་ཐོབ་ཀྱང་འགྱུར་ཞིང་སྙིང་པོ་མེད། །དེ་བས་དེ་རྒྱུ་སྡུག་བསྔལ་ཀུན་འབྱུང་ཚུལ། །གང་འདིར་བག་ཆགས་ཆུ་བོ་བཟློག་པའི་ཕྱིར། །སྟོང་པ་ཞི་བ་བདག་མེད་སྒོམ་པར་མཛོད། །ཧོ་ཧོ་ད་ལྟའི་ཤེས་པ་ཟང་ཀ་མ། །འདི་ཞེས་མི་འཛིན་བཅོས་བསླད་བྲལ་བ་འདི། །བདག་ཉིད་གཟུང་འཛིན་དྲི་མ་བྲལ་བ་སྟེ། །དོན་དམ་བདེན་པའི་གནས་ལུགས་ངང་དེར་སྐྱོང་། །འཕྲོ་གནས་རིས་མེད་ཡིད་ལ་མི་བྱེད་པར། །རང་བབས་ངང་དེར་མ་ཡེངས་ཙེན་ནེ་ཞོག །དེ་བས་སླ་བ་འདི་ན་ཅི་ཡོད་ཀྱེ། །བཙལ་དུ་མེད་དེ་འཚོལ་མཁན་ཀུན་དང་བྲལ། །བལྟས་པས་མི་མཐོང་གཞི་རྩ་རྟེན་མེད་པས། །ཡངས་སུ་འཁྲོལ་དུ་རང་བབས་ངང་དུ་བསྐྱུར། །རིག་ལ་སྟོང་ལ་ངོས་གཟུང་མེད་པའི་སེམས། །ཕྱལ་པ་བར་མེད་བར་སྣང་དག་པ་འདྲ། །རེ་དོགས་མེད་པས་གོལ་སྒྲིབ་རང་སར་དག །དེ་ཉིད་ཤེས་ན་སྙིང་པོའི་རྣལ་འབྱོར་ཡིན། །ལྟ་བ་དེ་ཡིན་སྟོང་གསལ་སྤྲོས་དང་བྲལ། །སྒོམ་པ་དེ་ཡིན་རང་དངས་སྟོང་པའི་ངང་། །སྤྱོད་པ་དེ་ཡིན་ཚོགས་དྲུག་ལྷུག་པ་ཉིད། །འབྲས་བུ་དེ་ཡིན་རེ་དོགས་གཉིས་སུ་མེད། །རིག་པ་ཟང་ཀ་ཟད་སར་ཐུག་པ་ཡིན། །འདི་ལྟར་རྟོགས་ན་ཐམས་ཅད་གཞི་བྲལ་ངང་། །ཚིག་དང་བློ་ཟད་དབང་པོའི་སྤྱོད་ཡུལ་འདས། །ཆོས་རྣམས་མིང་ཙམ་བརྡ་ཙམ་བཏགས་པ་ཙམ། །བཏགས་ཀྱང་མེད་དེ་ནམ་མཁའི་མཚན་ཉིད་བཞིན། །རིག་པ་གསལ་དག་རང་བྱུང་ཡེ་ཤེས་ལ། །ལྟ་མིན་བལྟས་པས་མཐོང་མིན་ལྟ་མཁན་མིན། །སྒོམ་མིན་བསྒོམས་པས་མཐོང་མིན་སྒོམ་མཁན་མིན། །སྤྱོད་མིན་སྤྱད་པས་མཐོང་མིན་སྤྱོད་མཁན་མིན། །

འབྲས་མིན་འབྲས་བུར་བསྒྲུབ་མིན་སྒྲུབ་མཁན་མིན། །རིག་པ་མ་འགགས་རང་སྣང་འཆར་ཚུལ་ལ། །ཀུན་ཡིན་ཕྱོགས་ཙམ་གཞལ་ན་ཐམས་ཅད་ཡིན། །སྣང་ཡིན་སྟོང་ཡིན་ཡོད་ཡིན་མེད་པ་ཡིན། །བདེན་ཡིན་རྫུན་ཡིན་གཉིས་ཡིན་གཉིས་མེད་ཡིན། །འཁོར་ཡིན་འདས་ཡིན་སྲིད་ཞི་མཉམ་ཉིད་ཡིན། །བསྐྱེད་ཡིན་རྫོགས་ཡིན་ཐབས་ཡིན་ཤེས་(༣༣)རབ་ཡིན། །ངང་ཡིན་ཡེ་ཡིན་རྫོགས་པ་ཆེན་པོ་ཡིན། །རང་བཞིན་གཤིས་ལ་གཞལ་ན་ཐམས་ཅད་མིན། །ཡོད་མིན་བདེན་མིན་སྣང་མིན་སྟོང་པ་མིན། །བདེན་མིན་རྫུན་མིན་བཟང་ངན་བླང་དོར་མིན། །འཁོར་མིན་འདས་མིན་བསྐྱེད་རྫོགས་ཟུང་འཇུག་མིན། །ཐབས་མིན་ཤེས་མིན་གཞི་ལམ་འབྲས་བུ་མིན། །བདག་མིན་གཞན་མིན་གཉིས་མིན་ཡེ་ཤེས་མིན། །རྟག་མིན་ཆད་མིན་སྨྲ་བསམ་བརྗོད་ལས་འདས། །འདི་ལྟར་རྟོགས་ནས་ད་ནི་གླུ་ལེན་ཏེ། །ཐམས་ཅད་ཕྱལ་ཕྱལ་ཡངས་པའི་རྣལ་འབྱོར་ལ། །འཁོར་འདས་རང་སར་གྲོལ་བས་བློ་བདེ་རྙེད། །

རེ་དོགས་རྩ་བ་ཆོད་པས་གཞི་བདེ་རྙེད། །ཡིན་མིན་ཐེ་ཚོམ་བྲལ་བས་དོན་བདེ་རྙེད། །བདེན་རྫུན་བློ་ལས་འདས་པས་རང་བདེ་རྙེད། །བདེ་སྡུག་གྲོགས་སུ་ཤར་བས་དགའ་བདེ་རྙེད། །སྣང་སྲིད་བླ་མར་ཤར་བས་དག་བདེ་རྙེད། །ཅིར་སྣང་དཔེ་ཆར་འཆར་བས་ཚིག་བདེ་རྙེད། །གང་ཡང་རྒྱན་དུ་ཤར་བས་བབས་བདེ་རྙེད། །ཐམས་ཅད་ཟད་སར་ཐུག་པས་ཡེ་བདེ་རྙེད། །ཆོས་སྐུ་རང་མལ་ཟིན་པས་འབྲས་བདེ་རྙེད། །ཕྱི་རབས་ཀུན་ཀྱང་དེ་ལྟར་ཤེས་པར་བྱོས། །

ཨེ་མ་ཧོ། ཡངས་པའི་ཀློང་(༣༤)དུ་ཆོས་ཉིད་ཉི་མ་ཤར། །ནུབ་པ་མེད་པའི་རྒྱལ་མཚན་རྩེ་མོར་ལྟོས། །རི་རབ་མེད་པའི་སྟོང་ཁམས་གདལ་བ་ལ། །འཆར་ནུབ་མེད་པའི་ཡེ་ཤེས་འོད་རེ་གསལ། །གསེར་གླིང་ལྟ་བུར་དབྱེ་བསལ་མེད་པའི་ཀློང་། །ཐམས་ཅད་རང་བྱུང་དོན་གྱི་དགོངས་པར་གསལ། །གཤེར་བ་མེད་པའི་རང་དངས་རྒྱ་མཚོ་ལ། །རྙོག་པ་མེད་པའི་གཏིང་གསལ་མ་གཡོས་ལྟོས། །ཡོན་ཏན་ཡིད་བཞིན་ནོར་བུ་ལྷུན་གྲུབ་པས། །མ་གཡོས་ཇི་བཞིན་བཞག་ན་ངང་གིས་གསལ། །འགྱུར་བ་མེད་པའི་རང་བྱུང་ལྷུན་པོ་ལ། །རང་སྣང་དག་པའི་ཉི་ཟླ་འོད་རེ་གསལ། །མ་བཀོད་རྫོགས་པའི་སྣང་སྲིད་རྒྱ་རེ་ཆེ། །བདེ་བརྡལ་རང་བརྡལ་ཀུན་བཟང་དགོངས་པར་ལྟོས། །རི་རབ་རྩེ་ནས་གླིང་བཞི་དུས་གཅིག་གསལ། །མཁའ་གསལ་ཀློང་ཡངས་ནམ་མཁའ་རྒྱ་ཆེ་བས། །ཐམས་ཅད་འུབ་ཆུབ་ཀ་དག་དགོངས་པར་སྐྱོལ། །འདི་ནི་གདོད་མའི་ཆོས་སྐུ་བྱང་ཆུབ་ཡིན། །དེ་ལྟར་རང་བཞིན་རྫོགས་པ་ཆེན་པོའི་རྩེ། །རང་བྱུང་ཡེ་ཤེས་ནམ་མཁའ་ལྟ་བུའི་དོན། །ཀློང་ཆེན་རབ་འབྱམས་བཟང་པོས་བཤད་པ་དེས། །མ་ལུས་འགྲོ་ཀུན་གདོད་མའི་སངས་རྒྱས་ཤོག །(༣༤)ཡེ་གྲོལ་སོར་བཞག་ཅེས་བྱ་བ། ཐེག་པ་རྒྱལ་པོའི་རྣལ་འབྱོར་པ་སྣ་ཚོགས་རང་གྲོལ་གྱིས། གནད་ཀྱི་གཟེར་བུ་ལ་བཟླ་བ་ཆོས་ཉིད་ཀྱི་ཆིངས་དང་བཅས་པ་རྫོགས་སོ།། །།དགེའོ། །དགེའོ། །དགེའོ།། །།

སྙན་བརྒྱུད་ཐུགས་ཀྱི་མེ་ལོང་།

༄༅། །སྙན་བརྒྱུད་ཐུགས་ཀྱི་མེ་ལོང་བཞུགས་སོ། །

༄༅། སྙན་བརྒྱུད་ཐུགས་ཀྱི་མེ་ལོང་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དུས་གསུམ་རྒྱལ་བ་སྲས་བཅས་མ་ལུས་དང་། །རིག་འཛིན་བླ་མ་སྙན་བརྒྱུད་མཁའ་འགྲོར་བཅས། །དམ་ཅན་སྲུང་མའི་ཚོགས་ལ་ཕྱག་འཚལ་ལོ། །ཐིག་ལེ་སྙན་བརྒྱུད་ཐུགས་ཀྱི་མེ་ལོང་བྲི། །

དེ་ལ་རང་བཞིན་རྫོགས་པ་ཆེན་པོ། བཀའ་ལུང་མན་ངག་ཐམས་ཅད་ཀྱི་སྙིང་པོ། ཐིག་ལེ་ཕྱི་ནང་གསང་བ་གསུམ་གྱི་ཡང་ཞུན། ཡེ་ཤེས་མིག་གཅིག་དྲི་མ་མེད་པ་བསྟན་པ་ལ་གསུམ་སྟེ། ངོ་མཚར་བརྒྱུད་པའི་ལོ་རྒྱུས། གདམས་པ་ངོ་སྤྲོད་ཀྱི་མཚོན་ཚུལ། གཙིགས་ཆེ་བ་བཀའ་རྒྱའི་རིམ་པའོ། །དང་པོ་ནི་བཅོམ་ལྡན་འདས་དཔལ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་དགོངས་པ་རང་བཞིན་བྱིན་གྱིས་བརླབས་ཀྱིས་བཤད། རྡོ་རྗེ་སེམས་དཔས་དགའ་རབ་རྡོ་རྗེ་ལ་ཚིག་སྡེབ་ལེགས་པའི་སྒོ་ནས་གསུངས། དེས་སློབ་དཔོན་འཇམ་དཔལ་བཤེས་གཉེན་ལ་གསུངས། དེས་སློབ་དཔོན་ཤྲཱི་སིང་ཧ་ལ་གསུངས། དེས་སློབ་དཔོན་ཆེན་པོ་བི་མ་ལ་མི་ཏྲ་ལ་གསུངས། གང་ཟག་སྙན་བརྒྱུད་ནི། རྒྱལ་པོ་ཁྲི་སྲོང་ལྡེའུ་བཙན་གྱིས་ལོ་ཙཱ་བ་རྨ་རིན་ཆེན་མཆོག །སྐ་བ་དཔལ་བརྩེགས། ཅོག་རོ་ཀླུའི་རྒྱལ་མཚན་གསུམ་ལ་གསེར་ཕྱེ་མང་པོ་བསྐུར་ཏེ་གདན་འདྲེན་དུ་བཏང་བས་བྱོན་ཏེ། ཕྱི་ནང་གི་ཆོས་མང་པོ་གསུང་དུས། སྙན་བརྒྱུད་འདིའི་སྣོད་བརྟགས་པའི་ཕྱིར། ཧས་པོ་རིའི་རྩེར་ཕྱིན་ཏེ་གཉགས་ལ་གཟིགས་པས་སྣོད་དུ་མ་གྱུར། ཉང་ལ་སྤྱིར་ངེད་ལྷོ་བལ་གསེར་ལ་བརྩི། སྒོས་ང་རྒྱ་གར་ལ་འགྲོ་བས་གསེར་ལ་བརྩི། ཁྱེད་ཀྱིས་ཡུལ་གཞིས་མ་ལུས་པ་བཙོངས་ནས། ང་ལ་གསེར་སྟེར་ནུས་སམ་གསུངས་པས། ཉང་གི་བསམ་པ་ལ། རྒྱལ་པོ་དང་གཉགས་ལ་སོགས་པ་ལ་མི་འདོད་པར། ང་ལ་འདོད་པ་ཚོགས་རེ་བསགས་འབུལ་དགོས་སྙམ་པ་དེ་མཁྱེན་ནས། ཡང་ང་ལ་གསེར་དགོས་པ་མེད། སྣོད་བརྟགས་པ་ཡིན་པས་ཁྱེད་སྣོད་ལྡན་དུ་འདུག་གསུངས་ནས། དུས་(༣༥)དེར་སྙན་བརྒྱུད་ཉང་ལ་གསུངས། དེས་སྦས་བློ་གྲོས་དབང་ཕྱུག་ལ་གསུངས། དེས་འབྲོམ་སྟོན་རིན་ཆེན་འབར་ལ་གསུངས། དེས་གནས་བརྟན་ལྡང་མ་ལྷུན་གྱི་རྒྱལ་མཚན་ལ་གསུངས། དེས་ལྕེ་བཙུན་སེང་གེ་དབང་ཕྱུག་ལ། དེས་གུ་རུ་ཤངས་པ་རས་པ་ལ། དེས་བླ་མ་ཟབ་སྟོན་ཆོས་འབར་ལ། དེས་ཙཱ་རི་དམ་པ་དགྱེར་ཞིག་ལ། དེས་གཉེན་སྟོན་ཤེས་རབ་རྩེ་མོ་ལ། དེས་མཉམ་མེད་སྤྲུལ་སྐུ་མཆེད་གཉིས་ལ། དེས་བླ་མ་ནམ་མཁའ་རྡོ་རྗེ་ལ། དེས་རིག་འཛིན་ཀུ་མ་རཱ་ཛ་ལ། དེས་མཁས་པ་སྣ་ཚོགས་རང་གྲོལ་ལ་གསུངས་སོ། །

གཉིས་པ་གདམས་པ་ངོ་སྤྲོད་ཀྱི་མཚོན་ཚུལ་ལ་བཞི་སྟེ། གཞི་གནས་ཀྱི་གནས་ལུགས་ལ་གཞིའི་གདར་ཤ་བཅད་པ། ལམ་འཁྲུལ་པའི་འཁྲུལ་ལུགས་ལ་འཁྲུལ་པའི་གདར་ཤ་གཅད་པ། འཁྲུལ་པ་བཟློག་པའི་བཟློག་ཚུལ་དབང་པོ་རབ་འབྲིང་གི་གདམས་པའི་གདར་ཤ་གཅད་པ། འབྲས་བུ་གྲོལ་བའི་གྲོལ་ལུགས་ལ་བར་དོ་དྲུག་གི་གདར་ཤ་གཅད་པའོ། །དང་པོ་ལ་གཉིས་ཏེ། ཡེ་ཐོག་གཞིའི་གནས་ལུགས་དང་། ཀུན་ཏུ་བཟང་པོའི་གྲོལ་གཞིའོ། །

དང་པོ་ནི་འཁོར་འདས་གང་དུ་ཡང་མ་གྲུབ་པའི་སྔོན་རོལ་ནི། རིག་པ་རང་བྱུང་གི་ཡེ་ཤེས་དེ་མཚན་ཉིད་ལྔ་ལྡན་དུ་གནས་ཏེ། ངོ་བོ་སྟོང་པ། རང་བཞིན་གསལ་བ། ཐུགས་རྗེ་འགགས་པ་མེད་པ། ཡོན་ཏན་འགྱུར་བ་མེད་པ་ཕྲིན་ལས་ཐོགས་པ་མེད་པ་རྣམས་སོ་སོ་མ་ཡིན་ཐ་མི་དད་པ་གདོད་མའི་དབྱིངས་གཅིག་ཏུ་བཞུགས་སོ། །གཉིས་པ་ནི་ངོ་བོ་སྟོང་པའི་ངང་ལས། རང་བཞིན་གསལ་བའི་གདངས་ཕྱིར་ཤར་དུས། ཐུགས་རྗེ་རིག་པ་ཡེ་ཤེས་ཀྱི་རང་སྣང་དུ་ངོ་ཤེས་པས། ཡོན་ཏན་སྐུ་དང་ཡེ་ཤེས་སུ་ཤར་བའི་གཞི་སྣང་ཕྲིན་ལས་ཐོགས་པ་མེད་པར། ནང་དབྱིངས་ངོ་བོ་ཀ་དག་ཏུ་གྲོལ་ནས། གཞི་ཐོག་ལས་མ་གཡོས་པར་སངས་རྒྱས་པའོ། །དེ་ཡང་ཀུན་ཏུ་བཟང་པོ་ནི། ཐོག་མར་གཞི་དོན་ལ་མཁས་པས་ངོ་བོ་འཕོ་འགྱུར་མེད་པར་རྟོགས། བར་དུ་རྒྱུ་དང་རྐྱེན་ལ་མཁས་པས་གཞི་སྣང་འོད་ལྔ་རང་གདངས་སུ་རྟོགས། ཐ་མ་རང་ཤར་རང་གྲོལ་ལ་མཁས་པས། རང་དངས་གཞི་གྲོལ་རང་ས་ཟིན་པའི་ཚུལ་གྱིས་ཐོག་མའི་མགོན་པོར་བྱུང་བ་ནི། མཁས་པ་ཆེན་པོ་བཅོམ་(༣༦)ལྡན་འདས། །ཞེས་སོ། །

ལམ་འཁྲུལ་པའི་གདར་ཤ་གཅད་པ་ནི། གཞི་ལས་གཞིར་སྣང་ཤར་བ་དེ་ངོ་མ་ཤེས་པས་འཛིན་རྟོག་སྐྱེས་པས་འཁོར་བར་འཁྱམས་ཏེ། གཞི་མཚན་ཉིད་ལྔ་ལྡན་གྱི་རང་གདངས་འོད་ལྔ་རང་གདངས་སུ་མ་ཤེས་པར། ཡུལ་དང་ཡུལ་ཅན་གཟུང་འཛིན་གྱིས་རྣམ་པར་སྤྱད་པས། རང་སྣང་འཁོར་བའི་འཁྲུལ་སྣང་དུ་གྲུབ་པ་ནི། ངོ་བོ་སྟོང་པར་མ་ཤེས་པས་རིག་པ་གཞི་ལས་མ་འཕགས། རང་བཞིན་གསལ་བར་མ་ཤེས་པས་ལུས་དང་ཡུལ་དུ་འཁྲུལ། ཐུགས་རྗེ་འགག་མེད་མ་ཤེས་པས་རྟོགས་ཚོགས་སེམས་སུ་ཤར། ཡོན་ཏན་འགྱུར་མེད་མ་ཤེས་པས། རང་རྩལ་སྐྱོན་གྱི་རྣམ་པར་སྣང་། ཕྲིན་ལས་ཐོགས་མེད་མ་ཤེས་པས། འཁོར་བ་མཐོ་དམན་དུ་བརྒྱུད་ཅིང་འཁོར་ནས། སྐྱེ་བ་བཞི་སོ་སོའི་ལུས་དང་། གནས་དང་། བདེ་སྡུག་གི་འཁྲུལ་སྣང་དུ་མ་ལ་རྨི་ལམ་ལྟར་སྤྱོད་པའོ། །

འཁྲུལ་པ་བཟློག་ཚུལ་ནི། དབང་པོ་གསུམ་ལ་གདམས་ཚུལ་བཞིའི་ཤེས་པར་བྱ་བ་ལས། དབང་པོ་རབ་ཀྱི་ཆོས་ལྔ་ནི། སྣང་བ་སེམས་སུ་གཏན་ལ་དབབ། སེམས་ཉིད་སྟོང་པར་གཏན་ལ་དབབ། སྣང་སྟོང་དབྱེར་མེད་དུ་གཏན་ལ་དབབ། དུ་མ་རོ་གཅིག་ཏུ་གཏན་ལ་དབབ། ཡེ་ཤེས་རྒྱུན་ཆགས་སུ་གཏན་ལ་དབབ་པའོ། །འབྲིང་ལ་དཔེ་ལྔས་གཏན་ལ་དབབ་པ་ནི། གཉིད་དང་རྨི་ལམ་དཔེས་མཚོན་ནས། །སྣང་བ་སེམས་སུ་གཏན་ལ་དབབ། །ནམ་མཁའ་སྟོང་པའི་དཔེས་མཚོན་ནས། །སེམས་ཉིད་སྟོང་པར་གཏན་ལ་དབབ། །དཔེ་དོན་གཅིག་ཆད་སོང་མཆན། ཆབ་དང་ཆབ་རོམ་གྱི་དཔེས་མཚོན་ནས། །དུ་མ་རོ་གཅིག་ཏུ་གཏན་ལ་དབབ། །ཆུ་བོ་རྒྱུན་ཆགས་ཀྱི་དཔེས་མཚོན་ནས། །ཡེ་ཤེས་རྒྱུན་ཆད་མེད་པར་གཏན་ལ་དབབ་པའོ། །གང་ཟག་གཅིག་གི་ཆ་རྐྱེན་ལ། སྣང་བ་དང་སྲིད་པའི་ཆོས་ཐམས་ཅད་བསྡུ་ན། བཀའ་རྫོགས་པ་ཆེན་པོར་འདུས། དེ་ཡང་ལྟ་བ་སྒོམ་པ་སྤྱོད་པ་འབྲས་བུ་བཞིར་འདུས་ཏེ། ལྟ་བ་རིག་པ་སྟོང་པ། སྒོམ་པ་རང་གདངས་ངང་གསལ་བ། སྤྱོད་པ་ཆགས་སྡང་རང་གྲོལ། འབྲས་བུ་དྲི་མེད་ཟང་ཐལ་ལོ། །དབང་པོ་འབྲིང་ལ་རྒྱན་བཞི་གདགས་པ་ནི། ལྟ་བ་སྟོང་པ་ལ་ཡེ་ཤེས་ཀྱི་རྒྱན་གདགས། སྒོམ་པ་རང་གསལ་ལ་འཛིན་མེད་ཀྱི་རྒྱན་གདགས། སྤྱོད་པ་རང་གྲོལ་ལ་རང་རྒྱུད་ཞི་བའི་རྒྱན་(༣༧)གདགས། འབྲས་བུ་དྲི་མེད་ཟང་ཐལ་ལ་རིག་པ་གཅེར་བུའི་རྒྱན་གདགས་སོ། །ཡང་གང་ཟག་གཅིག་གི་ཆ་རྐྱེན་ལ། ལྟ་སྒོམ་སྤྱོད་ཐབས་དང་བཞིར་འདུས་ཏེ། འབྲས་བུ་ཤུགས་ལ་འཆར་རོ། །དེ་ཡང་ལྟ་བ་མ་བཅོས་པ། སྒོམ་པ་མི་རྟོག་པ། སྤྱོད་པ་མ་ཞེན་པ། ཐབས་མ་ཡེངས་པའོ། །ངོ་སྤྲོད་བཞི་ལ། ལྟ་བ་མ་བཅོས་པ་གཉུག་མའི་ཤེས་རབ་ངོ་སྤྲད། སྒོམ་པ་མ་བཅོས་པ་ཐ་མལ་གྱི་ཤེས་པར་ངོ་སྤྲད། སྤྱོད་པ་མ་ཞེན་པ་ཚོགས་དྲུག་ལྷུག་པར་ངོ་སྤྲད། ཐབས་མ་ཡེངས་པ་དྲན་པ་རྒྱུན་ཆགས་སུ་ངོ་སྤྲད་དོ། །གང་ཟག་དབང་པོ་རབ་འབྲིང་ཐ་མ་གསུམ་གྱི་ཆ་རྐྱེན་ལ། སྡེ་སྐོར་ཉི་ཤུ་རྩ་གཅིག་གིས་མ་ཚང་བ་མེད་པར་བསྟན་པ་ལས། དབང་པོ་རབ་ལ་ཡིན་ལུགས་ཤེས་པ། ངང་ལ་གནས་པ། ཐད་ཀར་ཆོད་པ། སེམས་ལ་ཕན་པ། དྲན་པ་ཟིན་པ། རྣམ་རྟོག་མི་སྐྱེ་བ། མངོན་དུ་གྱུར་པ་དང་བདུན་ནོ། །གཞག་ཐབས་གསུམ་ནི། ནམ་མཁའི་སྤྲིན་ལྟར་གཞག་པ། ཆུ་ཆད་པའི་རང་འཐག་ལྟར་གཞག་པ། ལས་ཟིན་པའི་སྐྱེས་བུ་ལྟར་གཞག་པའོ། །དབང་པོའི་འབྲིང་ལ། ཡིན་ལུགས་མ་ཤེས་ན་གོལ་སྒྲིབ་ཀྱི་གདར་ཤ་མི་ཆོད། ངང་ལ་མ་གནས་ན་ཤེས་པ་རྐྱེན་ཁར་འཆོར། ཐད་ཀར་མ་ཆོད་ན་ཡུལ་གྱི་རྗེས་ཕྱིར་འབྲང་། སེམས་ལ་མ་ཕན་ན་སྐྱེ་བོ་ཐ་མལ་པ་དང་འདྲ། དྲན་པས་མ་ཟིན་ན་དུག་ལྔ་དུག་གསུམ་དུ་འཆོར། རྟོག་མེད་མ་བྱུང་ན་ཉོན་མོངས་པ་རང་ཁར་འཆོར། མངོན་དུ་མ་གྱུར་ན་འཁོར་བའི་ས་བོན་བྱེད་པས་གདར་ཤ་གཅད་ཐབས་དང་བདུན་ནོ། །བཙའ་ཐབས་གསུམ་ནི། རྟ་དམུ་རྒོད་ལྟ་བུར་བཙའ་བ། རྒྱལ་པོའི་བཙུན་མོ་ལྟ་བུར་བཙའ་བ། ཡིད་བཞིན་གྱི་ནོར་བུ་ལྟ་བུར་བཙའ་བའོ། །དབང་པོ་ཐ་མ་ཡིན་ལུགས་ཤེས་པ་ལ། གདིང་དང་ལྡན་ནམ་མི་ལྡན་བརྟག །ངང་ལ་གནས་པ་ལ་ཕན་གནོད་འདུག་གམ་མི་འདུག་བརྟག །ཐད་ཀར་ཆོད་པ་ལ་དུག་ལྔར་འཆོར་རམ་མི་འཆོར་བརྟག །སེམས་ལ་ཕན་པ་ལ་གཞི་རྩ་ཆོད་དམ་མི་ཆོད་བརྟག །དྲན་པས་ཟིན་པ་ལ་རང་སར་གྲོལ་ལམ་མི་གྲོལ་བརྟག །རྟོག་མེད་བྱུང་བ་ལ་གསལ་ཆ་ཐོན་ནམ་མ་ཐོན་བརྟག །མངོན་དུ་གྱུར་པ་ལ་མཁན་པོ་འདུག་གམ་མི་འདུག་བརྟག་པ་དང་བདུན་ནོ། །ངོ་སྤྲོད་རྣམ་པ་གསུམ་ནི། མིག་གི་ཡུལ་དུ་གཟུགས་སྡུག་མི་སྡུག་གཉིས་ལས། སྣང་བ་རང་བཞིན་མེད་པ་ཆུ་(༣༨)ནང་གི་ཟླ་བ་ལྟ་བུར་ངོ་སྤྲད་དོ། །རྣ་བའི་ཡུལ་དུ་སྒྲ་སྙན་མི་སྙན་གཉིས་ལས། ལུང་སྟོང་གི་བྲག་ཆ་ལྟ་བུར་ངོ་སྤྲད་དོ། །ཡིད་ཀྱི་ཡུལ་དུ་དྲན་རྟོག་དགག་སྒྲུབ་ཀྱི་འཕྲོ་འདུ་ཐམས་ཅད་ཁང་སྟོང་སྤྲེའུ་ལྟ་བུར་ངོ་སྤྲད་དོ། །དེ་ལྟར་སྡེ་སྐོར་ཉི་ཤུ་རྩ་གཅིག་ཐབས་དགུ་སྟེ་སུམ་ཅུས་དབང་པོ་གསུམ་གྱི་ཉམས་ལེན་བསྟན་པའོ། །གང་ཟག་གཅིག་གི་ཆ་རྐྱེན་ལ། ལྟ་བའི་ངོ་བོ་སྟོང་པ་འགྱུར་མེད། སྒོམ་པའི་ངོ་བོ་རང་གསལ་འཛིན་མེད། སྤྱོད་པའི་ངོ་བོ་རང་ཤར་རིས་མེད། གདམས་ངག་གི་ངོ་བོ་ཡིན་ལུགས་བསླད་མེད། འབྲས་བུའི་ངོ་བོ་རྣམ་དག་དྲི་མེད་དོ། །ཡང་གང་ཟག་གཅིག་གི་ཆ་རྐྱེན་ལ། ལྟ་སྒོམ་སྤྱོད་འབྲས་ཀྱི་ལས་བཞི་བསྟན་པ་ནི། ལྟ་བའི་ལས་སུ་གཟུང་འཛིན་སྤང་། །སྒོམ་པའི་ལས་སུ་ཉོན་མོངས་སྤང་། །སྤྱོད་པའི་ལས་སུ་ཕྱོགས་རིས་སྤང་། །འབྲས་བུའི་ལས་སུ་རེ་དོགས་སྤང་ངོ་། །བླ་མ་དམ་པའི་གདམས་ངག་གིས་འཇིག་རྟེན་གྱི་བྱ་བ་གཏང་། བྱ་བ་མ་ཐེངས་ན་སྐྱེ་བོ་ཐ་མལ། ཐེངས་ན་དོན་གྱི་སྐྱེས་བུ། འགྱུར་མེད་སྟོང་པའི་ལྟ་བས་ཕྱི་ནང་གི་གཟུང་འཛིན་སྤང་། གཟུང་འཛིན་མ་སྤངས་ན་ཁ་ལྟ་གོག་པོ། སྤངས་ན་དོན་གྱི་རྣལ་འབྱོར། རང་གསལ་འཛིན་མེད་སྒོམས་པས་དུག་ལྔ་རང་རྒྱུད་ཀྱི་ཉོན་མོངས་སྤང་། ཉོན་མོངས་མ་སྤངས་ན་མིང་གི་སྒོམ་ཆེན། སྤངས་ན་དོན་གྱི་རྒྱལ་སྲས། རང་ཤར་རིས་མེད་ཀྱི་སྤྱོད་པས་བཟང་ངན་བླང་དོར་གྱི་ཕྱོགས་རིས་སྤང་། ཕྱོགས་རིས་མ་སྤངས་ན་སྤྱོད་པ་ཚུལ་འཆོས། སྤངས་ན་དོན་གྱི་འཁྲུལ་ཞིག །རྣམ་དག་དྲི་མེད་ཀྱི་འབྲས་བུ་གཉིས་འཛིན་རེ་དོགས་ཀྱི་འཁྲིས་སྤང་། རེ་དོགས་མ་སྤངས་ན་ཕྱི་དུས་ཀྱི་ཡིད་སྨོན། སྤངས་ན་དོན་གྱི་སངས་རྒྱས་སོ། །ཚད་བཞི་བསྟན་པ་ནི། གཟུང་འཛིན་གཉིས་སུ་མེད་ན་ལྟ་བ་ཚད་དུ་སྐྱོལ། བྱིང་རྒོད་གཡེང་བ་མེད་ན་སྒོམ་པ་ཚད་དུ་སྐྱོལ། ཞེན་ཆགས་མཁའ་ལྟར་དག་ན་སྤྱོད་པ་ཚད་དུ་སྐྱོལ། སེམས་ལ་དྲི་མ་མེད་ན་ཉམས་མྱོང་ཚད་དུ་སྐྱོལ། འཁོར་འདས་དབྱེ་བསལ་མེད་ན་འབྲས་བུ་ཚད་དུ་སྐྱོལ། དཔེ་ལྔ་ནི། སྣང་བ་རང་དངས་ཀྱི་གདམས་ངག་དཔེ་ཆར་པ་ལྟ་བུ། མཉམ་གཞག་གི་རིག་པ་དཔེ་གསེར་ལྟ་བུ། རྗེས་ཐོབ་གཉུག་མར་གནས་པ་དཔེ་བུ་ཆུང་ལྟ་བུ། དུས་གསུམ་རྒྱུན་དུ་གནས་པ་དཔེ་ཆུ་བོ་ལྟ་བུ། བརྗོད་བྱ་ལས་(༣༩)འདས་པ་དཔེ་ནམ་མཁའ་ལྟ་བུའོ། །ཡང་གང་ཟག་གཅིག་གི་ཆ་རྐྱེན་ལ། འཁོར་འདས་འཁྲུགས་པར་བྱེད་པས་གོ་བཞི་བགོ། ཆིངས་བཞི་བཅིངས། མཚོན་བཞི་ཐོགས་དགྲ་བཞི་གསོད་པའོ། །གོ་བཞི་ལ། དད་པའི་གོ་བསྐོན་ལ་དཀའ་བ་བཟོད་པར་བྱ། ཐོས་པའི་གོ་བསྐོན་ལ་ཕྱི་ནང་གི་སྒྲོ་འདོགས་བཅད། བརྩོན་འགྲུས་ཀྱི་གོ་བསྐོན་ལ་སྒྲུབ་པ་ཉམས་སུ་བླང་། དམན་པའི་གོ་བསྐོན་ལ་གྲགས་པའི་ས་མི་གཟུང་བའོ། །ཆིངས་བཞི་ལ། བཀའ་གཉིས་ལ་མི་འགོང་པའི་ཆིངས། གདམས་ངག་ལ་ཐེ་ཚོམ་མི་ཟ་བའི་ཆིངས། ཉམས་ལེན་ལ་ཡལ་བར་མི་གཏོང་བའི་ཆིངས། དངོས་པོ་རང་རྒྱུད་པར་མི་འཛིན་པའི་ཆིངས་སོ། །མཚོན་བཞི་ལ། ལྟ་བའི་མཚོན་ཐོགས་ལ་ཕྱོགས་རིས་ཀྱི་དགྲ་བསད། སྒོམ་པའི་མཚོན་ཐོགས་ལ་བྱིང་རྒོད་ཀྱི་དགྲ་བསད། སྤྱོད་པའི་མཚོན་ཐོགས་ལ་ཚུལ་འཆོས་ཀྱི་དགྲ་བསད། འབྲས་བུའི་མཚོན་ཐོགས་ལ་རེ་དོགས་ཀྱི་དགྲ་བསད་དོ། །དགྲ་བཞི་བསད་པ་ལ། ཕྱིའི་དགྲ་འཇིག་རྟེན་གྱི་ཆོས་བརྒྱད་བསད། ནང་གི་དགྲ་དུག་ལྔ་དུག་གསུམ་བསད། གསང་བའི་དགྲ་ང་དང་བདག་འཛིན་གསད། དེ་ཁོ་ན་ཉིད་ཀྱི་དགྲ་མ་རིག་པ་གསད་དོ། །དེ་ལྟར་ཉམས་སུ་བླངས་པའི་རྣལ་འབྱོར་པ་དེ་ཉིད། རྒྱ་བཞིའི་སྒོ་ནས་སངས་རྒྱ་བ་ནི། སེང་གེ་མངལ་རྒྱའི་ཚུལ་དུ་སངས་རྒྱ་བ། ཁྱུང་སྒོང་རྒྱའི་ཚུལ་དུ་སངས་རྒྱ་བ། ཉི་ཟླ་གའུ་ཁ་སྦྱོར་གྱི་ཚུལ་དུ་སངས་རྒྱ་བ། རྣལ་འབྱོར་པ་ལུས་རྒྱའི་ཚུལ་དུ་སངས་རྒྱ་བར་བསྟན་པའོ། །

འབྲས་བུ་གྲོལ་བའི་གྲོལ་ལུགས་བར་དོ་དྲུག་གི་གདར་ཤ་གཅད་པ་ལ་གསུམ་སྟེ། བར་དོའི་ངོ་བོ། ངེས་ཚིག །དབྱེ་བའོ། །ངོ་བོ་ནི་དབྱིངས་ལས་གཞི་སྣང་བསྐྱོད་ནས། དབྱིངས་སུ་མ་གྲོལ་གྱི་བར་གྱི་རང་སྣང་བཟང་ངན་ཀུན་ཡིན་ཏེ། དག་པ་མྱང་འདས་ཀྱི་སྣང་བ་ཆོས་ཉིད་འོད་གསལ་སྐུ་དང་ཡེ་ཤེས་སུ་སྣང་བ་དང་། མ་དག་པ་འཁོར་བའི་འཁྲུལ་སྣང་ཚེ་སྔ་ཕྱི་བར་དོ་རྨི་ལམ་དང་བཅས་པ་དང་། ལམ་པ་ཏིང་ངེ་འཛིན་གྱི་ཉམས་སྣང་རྩལ་འཕང་དང་བཅས་པ་སྟེ། རིག་པ་ལས་ཕྱི་ནང་དུ་ཤར་བ་ཐམས་ཅད་དོ། །ངེས་ཚིག་ནི། རིག་པ་རང་མལ་དུ་གནས་པ་དང་། རང་ས་ཟིན་པའི་བར་གྱི་ཆོས་ཡིན་པས། བར་ཞེས་བྱ། གཞི་སྣང་ཡིན་པས་མ་ཞེས་བྱ། (༤༠)འཁོར་འདས་གཉིས་འབྲེལ་གྱི་སྣང་བ་ཡིན་པས་དོ་ཞེས་བྱའོ། །དབྱེ་ན་དྲུག་སྟེ། རང་བཞིན། ཏིང་ངེ་འཛིན། རྨི་ལམ། འཆི་ཁ། ཆོས་ཉིད། སྲིད་པའི་བར་དོའོ། །

དང་པོ་ནི། སྐྱེས་ནས་འཆི་རྐྱེན་གྱི་ནད་ཀྱིས་མ་བཏབ་པའི་བར་གྱི་ཚོགས་དྲུག་ཡུལ་སྣང་ལ་སྤྱོད་པའི་རང་དུས་ཐམས་ཅད་སྟེ། རིག་པ་ཆོས་ཉིད་ཀྱི་དོན་ལ་ཐོས་བསམ་གྱི་སྒྲོ་འདོགས་གཅོད་པ། ཐི་བྱ་ཚང་དུ་འཇུག་པ་ལྟ་བུས་དོན་ཉམས་སུ་བླང་ཞིང་ཐམས་ཅད་རང་སྣང་དུ་ཐག་གཅོད་པ་ནི། ལྷ་རྒྱུད་ལས། ཕར་བལྟས་པས་ནི་ཚུར་གསལ་བ། །མེ་ལོང་བྱད་ཀྱི་དཔེ་བཞིན་ནོ། །ཞེས་སོ། །

གཉིས་པ་རིག་པ་སྟོང་གསལ་གྱི་ངང་ལ། གདངས་མ་འགགས་པར་སལ་ལེ་སིང་ངེ་ཝལ་ལེ་བཞག་པས། ནམ་མཁའི་ཡུལ་དུ་འཇའ་ཚོན་ཤར་བ་ལྟ་བུ་ཉམས་སུ་བླང་སྟེ། སེམས་ལུང་ལས། གསལ་ལ་ཡུལ་མེད་མི་གཡོ་བར། །རྣལ་འབྱོར་དག་པའི་དགོངས་པ་བསྟན། །ཞེས་སོ། །

གསུམ་པ་ནི། གཉིད་འཇུག་པ་ནས་མ་སད་ཀྱི་བར་སྒོ་ལྔའི་ཡུལ་འཛིན་ནང་དུ་བསྡུས་ནས། ཀུན་གཞིའི་རྣམ་ཤེས་ཀྱི་སྟེང་དུ་ཡིད་ཤེས་གཅིག་ཏུ་ལངས་པའི་སྐབས་ཐམས་ཅད་དོ། །འདིར་ཉམས་སུ་བླང་བ་ལ་གཉིད་དུ་འགྲོ་ཁར། གསལ་ལ་རྟོག་པ་མེད་པའི་དོན་ངོས་བཟུང་ལ་མ་ཡེངས་པར། དེའི་ངང་ལ་ཏིང་ངེ་འཛིན་འཕྲོ་འཐུད་པས། རྨི་ལམ་གྱི་འཁྲུལ་པ་འགགས་པ་ཆུ་བོའི་གཞུང་ལྟ་བུ་སྟེ། ཀྱཻ་རྡོ་རྗེ་ལས། ཆུ་བོའི་རྒྱུན་ནི་རང་བབ་ཅིང་། །མར་མེའི་རྩེ་ནི་རབ་གསལ་བས། །ཉིན་མཚན་རྟག་ཏུ་རྣལ་འབྱོར་པས། །འདི་ཉིད་འབའ་ཞིག་སྤྱད་པར་རིགས། །ཞེས་སོ། །

བཞི་པ་ནི། འཆི་རྐྱེན་གྱིས་ཟིན་ནས་འབྱུང་བཞི་སོ་སོའི་ཆ་ལ་ཐིམ་པའི་ཚེ། ཤེས་པ་ཟ་ཟི་ཕྱད་ཕྱོད་ཆད་ཆོད་བན་བུན་དུ་གྱུར་ཏེ། སྔར་བསྒོམས་པའི་དོན་དང་བར་དོའི་གདམས་ངག་ལ་རྩེ་གཅིག་མ་ཡེངས་པར་བྱ་བ། ཁབ་མིག་ཏུ་སྐུད་པ་འཛུད་པ་ལྟ་བུ་སྟེ། སེམས་ལུང་ལས། འཆི་ཁ་བར་དོའི་དེ་ཉིད་དུ། །མ་ཡེངས་དྲན་པས་ངོས་བཟུང་བ། །ཁབ་མིག་སྐུད་པ་ཇི་བཞིན་ནོ། །ཞེས་སོ། །

ལྔ་པ་ནི། ནམ་མཁའ་འོད་གསལ་ལ་ཐིམ་པས། ཕྱི་ས་རྡོ་རི་བྲག་གི་སྣང་བ་འགགས་ཏེ། སྣང་བ་ཡེ་ཤེས་ལྔའི་ཞིང་ཁམས་སུ་རང་སྣང་། ནང་སེམས་དང་སེམས་བྱུང་གི་འཁྲུལ་རྟོག་འགགས་ཏེ། རང་བཞིན་གྱི་ཏིང་ངེ་འཛིན་ལ་རང་(༤༡)གནས། སྣང་སྲིད་ཐམས་ཅད་སྐུ་དང་ཡེ་ཤེས་ཀྱི་ཞིང་ཁམས་སུ་རང་ཤར་ཏེ། ལོངས་སྤྱོད་རྫོགས་པ་སྐུའི་དཀྱིལ་འཁོར་དུ་གསལ་བའི་ཚེ། རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་གདམས་པ་དྲན་པར་བྱས་པས། གཞི་སྣང་དབྱིངས་སུ་ཐིམ་ནས་སངས་རྒྱས་ཏེ། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་སོ། །དེའི་ཚེ་ཉོན་མོངས་པ་ལྔ་ཡེ་ཤེས་ལྔར་དག་པས་འཁོར་བར་སྐྱེ་བའི་རྒྱུ་མེད། འོད་ལྔ་ཀ་དག་གི་དབྱིངས་སུ་ཐིམས་པས་ཡུལ་གྱི་འཁྲུལ་གཞི་རང་ལོག །རང་རིག་གདོད་མའི་ངང་དུ་གྲོལ་བས་ང་བདག་གི་འཛིན་པ་སྟོང་། སྒོ་གསུམ་སྐུ་གསུང་ཐུགས་སུ་གྲོལ་བས། ཁམས་གསུམ་འཁྲུལ་པའི་བྱུང་ཁུངས་ཟད། ཕྱི་གཟུང་བའི་ཡུལ་མེད་པས་སྐྱེ་བའི་གནས་མེད། ནང་འཛིན་པའི་སེམས་མེད་པས་སྐྱེ་མཁན་གྱི་སེམས་ཅན་མེད། འཁོར་འདས་དང་པོའི་གཞིར་གྲོལ་བས། གནས་ལུགས་ཆོས་སྐུ་ཉག་གཅིག་གི་ཀློང་དུ་སངས་རྒྱས་སོ། །དེའི་ཚེ་སྐུ་ལས་འདས་པའི་ཡེ་ཤེས་གཏིང་གསལ་གྱི་ཀློང་དུ་སངས་རྒྱས་པས། ཡུལ་ལས་འདས་པ་ཆོས་སྐུ་མཁའ་ཁྱབ་དག་པའི་ཀློང་དུ་སངས་རྒྱས། གཉིས་མེད་ལས་འདས་པ་སངས་རྒྱས་ཀྱི་དགོངས་པ་ཐུགས་ཡང་དག་པའི་ཀློང་དུ་སངས་རྒྱས། ཆོས་ལས་འདས་པ་ལྷུན་གྲུབ་ཡེ་ཤེས་ལྔའི་ཀློང་དུ་སངས་རྒྱས། གཞི་ལས་འདས་པ་རྣམ་པ་ཐམས་ཅད་མཁྱེན་པའི་ཀློང་དུ་སངས་རྒྱས་པའོ། །དེ་ཡང་གཞིའི་དུས་སུ་ཐམས་ཅད་མཁྱེན་པའི་ཡེ་ཤེས་ཉིད། རང་ངོ་ཤེས་པས་གྲོལ་དུས་འབྲས་བུར་དག་པས་རྣམ་པ་ཐམས་ཅད་མཁྱེན་པའི་ཡེ་ཤེས་ཞེས་བྱ་ལ། དེ་ཉིད་ཀྱང་ནང་གསལ་ཐམས་ཅད་མཁྱེན་པ་དང་། ཕྱི་གསལ་རྣམ་པ་ཐམས་ཅད་མཁྱེན་པའི་ཡེ་ཤེས་སུ་སྣང་བས་དོན་གཉིས་ལྷུན་གྱིས་གྲུབ་སྟེ། གདོད་མའི་དབྱིངས་ལས་འཕོ་འགྱུར་མེད་པར་བཞུགས་སོ། །

དྲུག་པ་སྲིད་པའི་བར་དོ་ནི། ཆོས་ཉིད་ཀྱི་བར་དོ་ངོ་མ་ཤེས་པས། རང་ཡལ་བའི་རྗེས་ལ་སྐྱེ་བ་འདིའི་ལུས་ནི་བྲལ། ཕྱི་མའི་ལུས་ནི་མ་ལོན་པའི་བར་དེར། རྨི་ལམ་གྱི་ལུས་དང་སྣང་བ་ལྟར་ཤེས་པ་ད་ལྟ་བས་བདུན་འགྱུར་གྱིས་གསལ་བ། དབང་པོ་ཀུན་ཚང་བ། མའི་མངལ་དང་རྡོ་རྗེ་གདན་མ་གཏོགས་གང་ལའང་ཐོགས་པ་མེད་པར་འགྲོ་བ། ལས་ཀྱི་རྫུ་(༤༢)འཕྲུལ་དང་ལྡན་པ། ཕར་ལ་ཐམས་ཅད་མཐོང་བ། ཚུར་ལ་རང་གི་རིགས་དང་ལྷའི་མིག་ཅན་ལས་གཞན་གྱིས་མི་མཐོང་བ། ཤེས་པ་རྟེན་དང་བྲལ་བས་རང་བཞིན་གྱིས་ཉམ་ང་ཞིང་བག་གྲང་བ་ལ། ཕྱད་ཕྱོད་བན་བུན་ཙམ་དུ་གནས་པས་ལུས་འཚོལ་བ་ལ་རྒྱུག་པའོ། །དེའི་ཚེ་ཡུར་བ་རྐང་ཆད་ལ་ཝ་འཛུགས་པ་ལྟ་བུའི་གདམས་ངག་དྲན་པར་བྱ་བ་ནི། རབ་ཀྱིས་བདེན་མེད་དུ་ཤེས་པས་འཛིན་མེད་དུ་གྲོལ་ལོ། །འབྲིང་གིས་སྒྱུ་མར་ཤེས་པས་རང་བྱུང་གི་བསྐྱེད་རྫོགས་སུ་གྲོལ་ལོ། །ཐ་མས་ཞིང་དག་པའི་སངས་རྒྱས་ལ་སྐྱབས་སུ་འགྲོ་བ་དང་། སྨོན་ལམ་འདུན་པས་ཕ་མ་དད་པ་ཅན་གྱི་བུ་ཚར་དལ་འབྱོར་གྱི་ལུས་སུ་སྐྱེས་ནས་ཟབ་མོ་གནད་ཀྱི་མན་ངག་སྲིད་པ་ཐ་མའི་ཆོས་དང་འཕྲད་དེ། སྐྱེ་བ་དེ་ཉིད་དམ། བར་དོར་མངོན་པར་རྫོགས་པར་སངས་རྒྱས་པའོ། །དེ་དག་ནི་བར་དོ་དྲུག་གི་གདར་ཤ་གཅད་པའོ། །

དོན་གསུམ་པ་གཙིགས་ཆེ་བ་བཀའ་རྒྱའི་རིམ་པ་ནི། ཐུན་བཞིར་ཉམས་ལེན་ལ་འབུངས། རྟག་ཏུ་བླ་མ་དྲན་པར་བྱ། གསང་བའི་མན་ངག་སྣོད་མིན་ལ་མི་བཤད། ལས་རྒྱུ་འབྲས་ལ་མི་གཤེ། དག་སྣང་དང་མོས་གུས་ཆེར་བྱ། ཁྱད་པར་དུ་ཆོས་འདི་མཁའ་འགྲོས་བདག་བྱས་པས་རབ་ཏུ་གསང་ལ་ཉམས་སུ་བླང་བར་བྱའོ། །རྩ་བ་དམ་ཚིག་ཡིན་པས་བླ་མ་དང་མཆེད་ལྕམ་ལ་སྒོ་གསུམ་གྱི་འཁྲུལ་པ་སྡོམ་ཞིང་མོས་གུས་དང་སྲི་ཞུ་བྱའོ། །

རབ་ཟབ་བླ་མའི་མན་ངག་སྙིང་པོ་ལས། །མཆོག་ཏུ་ཡང་ཟབ་རྡོ་རྗེ་སྙིང་པོའི་རྩེ། །ཕྱི་རབས་དོན་དུ་ཡི་གེར་བཀོད་པ་ཡིས། །མ་ལུས་འགྲོ་ཀུན་མངོན་པར་བྱང་ཆུབ་ཤོག །བདག་དང་བདག་གིར་འཛིན་པས་རབ་འཁྲུལ་ཏེ། །སྐྱེ་བར་སྐྱེ་ཤིའི་རྒྱ་མཚོ་འཁོར་དུས་འདིར། །རང་སྣང་རང་རིག་སྙིང་པོའི་དོན་བསྒོམས་ནས། །མི་གནས་མི་དམིགས་མྱ་ངན་འདས་ཐོབ་ཤོག །ཚུལ་འདི་དྲི་མེད་ཆོས་དབྱིངས་ནམ་མཁའ་ལ། །བློ་གྲོས་འོད་ཟེར་སྟོང་ཕྲག་རབ་འཕྲོ་བས། །རང་གཞན་ཡིད་མཁའི་མུན་པ་སེལ་བ་དེས། །གངས་རི་ཐོད་དཀར་མགུལ་དུ་ལེགས་པར་བཀོད། །སྙན་བརྒྱུད་ཐུགས་ཀྱི་མེ་ལོང་ཞེས་བྱ་བ། ཐེག་པ་མཆོག་གི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།