cover

ཀློང་ཆེན་པའི་གསུང་འབུམ། ཟ༽

གླེགས་བམ་ཉེར་གཉིས་པ།

ཀུན་མཁྱེན་ཀློང་ཆེན་རབས་འབྱམས་དྲི་མེད་འོད་ཟེར།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

བླ་མ་ཞི་བའི་ཕྲིན་སྒྲུབ་རིན་པོ་ཆེའི་སྒྲོན་མེ་ཞེས་བྱ་བ།

༄༅། །གུ རུ ཤཱ ནྟི ྈྐ རྨ སཱ དྷ ན ར ཏྣ སྱ དཱི པྟ ནཱ མ བི ཧ ར ཏི སྨ།

༄༅། །བླ་མ་ཞི་བའི་ཕྲིན་སྒྲུབ་རིན་པོ་ཆེའི་སྒྲོན་མེ་ཞེས་བྱ་བ་བཞུགས་སོ། །

༄༅། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཕྲིན་སྒྲུབ་རིན་པོ་ཆེའི་སྒྲོན་མེ་ཞེས་བྱ་བ། སློབ་དཔོན་ཆེན་པོ་པདྨ་འབྱུང་གནས་ལ་ཕྱག་འཚལ་ལོ། །དངོས་གྲུབ་ཀུན་གྱི་རིན་ཆེན་གཏེར། །པདྨ་རྒྱལ་ལ་ཕྱག་འཚལ་ལོ། །སྐལ་ལྡན་སྨིན་གྲོལ་བྱ་བའི་ཕྱིར། །ཕྲིན་ལས་རིན་ཆེན་སྒྲོན་མེ་བྲི། །

འདི་ལ་སྔོན་འགྲོ། དངོས་གཞི་རྗེས་གསུམ་ལས། དང་པོ་སྔོན་དུ་འགྲོ་བ་ལ། དཀྱིལ་འཁོར་བྲི་བ། གཏོར་མ་བཅའ་བ། ཚོགས་མཆོད་བཤམས་པ་གསུམ་ལས། དང་པོ་ལ། བསྡུས་པ་འབྲུའི་ཚོམ་བུ་པདྨ་རིས་སམ། འབྲིང་རྡུལ་ཚོན་གྱིས། མཎྜལ་པདྨ་འདབ་མ་བརྒྱད་པའམ། ཁོར་ཡུག་བཞི་པའི་ལྟེ་བ་མཐིང་ག །ནང་པདྨ་འདབ་བཞི་དཀར། སེར། དམར། ལྗང་། བར་མ་འདབ་(༢)བརྒྱད། ཕྱི་མ་བཅུ་དྲུག་རྣམས་མཛེས་ཚོན་གྱི་མཐར་མེ་རི་བྲི་བའམ། རྒྱས་པ་དཀྱིལ་འཁོར་རྫོགས་པའི་ཚུལ་ལ། བཅུ་དྲུག་ཐིག་ལག་ཁྲིད་ལྟར་སྒོ་རྐྱང་བཏབ་པའི་དབུས་སུ་ཟླུམ་སྐོར་བཞིའི་ལྟེ་བ་མཐིང་ག་ལ། དྲག་སྒྲུབ་ཡིན་ན་ཆོས་འབྱུང་གཞན་གང་ཡིན་ཡང་ཟླ་གམ་དམར་པོ། མུ་ཁྱུད་ནང་མ་ལ་པདྨ་འདབ་བཞི། ཤར་དཀར། ལྷོ་སེར། ནུབ་དམར། བྱང་ལྗང་། བར་མ་ལ་པད་འདབ་བརྒྱད་མཛེས་ཚོན། ཕྱི་མ་ལ་པད་འདབ་བཅུ་དྲུག་མཛེས་ཚོན་ནོ། །གྲུ་ཆད་བཞི་ཤར་དམར། ལྷོ་ལྗང་། ནུབ་དཀར། བྱང་སེར། ཁྱམས་དཀར་སེར་དམར་ལྗང་། སྒོ་བཞི་ཕྱོགས་མདོག །རྩིགས་པ་ལྔ་ནང་ནས་རིམ་པ་བཞིན། མཐིང་ག །དམར་པོ། དཀར་པོ། སེར་པོ། ལྗང་གུའོ། །འདོད་ཡོན་དམར། དྲྭ་ཕྱེད་མཐིང་། ཕ་གུ་སེར། མདའ་ཡབ་དམར། པུ་ཤུ་དཀར། ཞིང་ཁམས་ལྗང་། རྟ་བབས་མཛེས་ཚོན། རྡོ་རྗེའི་རྭ་ཕྱོགས་ཀྱི་མདོག་ཅན། ཉི་མ་དམར། ཟླ་བ་དཀར། དུར་ཁྲོད་བརྒྱད་མཛེས་ཚོན་ནོ། །རྡོ་རྗེའི་ཕྲེང་བ་སྣ་ཚོགས་མེ་རི་དམར་པོ་བྲིའོ། །

གཏོར་མ་བཅའ་བ་ནི། སྤོད་སྣ་ཚོགས་དང་ཆང་བཟང་པོས་བརྫིས་ཏེ། བསྡུས་པ་དཔལ་གཏོར་རིན་པོ་ཆེ་འབར་བ་པདྨ་འདབ་བརྒྱད་ཀྱིས་མཚན་པ། འབྲིང་པདྨས་བསྐོར་བའི་བུམ་པ་ཁ་རྒྱན་པདྨའི་སྟེང་ན། ཉི་ཟླ་རིན་པོ་ཆེའི་དབུས་སུ་རིན་ཆེན་འབར་བ་ལྔ་ལྡན་གཅིག་ལ་འདུ་བ། རྒྱས་པ་ལ་རི་རབ་བང་རིམ་གསུམ་པ་སྒོ་བཞི་རྟ་བབས་དང་བཅས་པའི་བང་རིམ་ལ་པདྨའི་རིས་སུ་མ་འགྱུར། བ་གམ་སུམ་བརྩེགས་ཀྱི་ཁ་ཁྱེར་ལ་མར་གྱི་དྲྭ་བ་སྟེ། འོག་གི་འཕྲད་གཉིས་དང་སྟེང་གི་ཁ་ཁྱེར་ལ་ཉི་ཟླ་རིན་པོ་ཆེའི་སྦྲེང་ཚར། ཟུར་བཞིར་འབར་བ་བཞིས་མཚན་པའི་དབུས་སུ་ཉི་ཟླའི་ཟླུམ་སྐོར་ཉིས་བརྩེགས་ཀྱི་བར་ནོར་བུའི་ཟླུམ་ཁྲིགས་འོད་ཀྱི་དྲྭ་བ་རིས་ཀྱི་སྟེང་དུ་རིན་པོ་ཆེ་འབར་བའི་དབྱིབས་ལ་རིན་པོ་ཆེ་གསུམ་གྱིས་མཚན་པའི་རྩེ་མོ་རིན་པོ་ཆེའི་ཏོག་དང་བཅས་པས་འབར་བ་ལྔ་བརྩེགས་ནི། སྐུ་དང་ཡེ་ཤེས་ལྔ་ཚན་གྱི་གཞལ་ཡས་ཁང་མཚོན་པ་སྟེ། ཁ་ཟས་ཀྱི་རྒྱན་སྣ་ཚོགས་དང་། དར་གྱི་འཕན་འཕྱར། མེ་ཏོག་གི་དྲྭ་བ་རིས་ལ་སོགས་པས་མཛེས་པར་བྱས་ལ། ཁྲི་(༣)འཚམས་པའི་དཀྱིལ་འཁོར་གྱི་སྟེང་དུ་བཤམ་མོ། །དེའང་བསྡུས་པ་དང་འབྲིང་ལ་མཉྫི་ལ་སོགས་པ། རྒྱས་པ་ལ་དཀྱིལ་འཁོར་གྱི་ཟུར་ཕྱོགས་ནས་ཀ་བ་བཙུགས་པའི་ལྡིང་ཐོག་གི་སྟེང་དུ་བཤམ་མོ། །

ཚོགས་མཆོད་དངོས་བཤམ་པ་ནི། དཀྱིལ་འཁོར་ནང་རིམ་ལ་ཕྱི་མཆོད་སྤོས་མེ་ཏོག་མར་མེ་ལ་སོགས་པ་དང་། ཕྱི་འཁོར་ལ་བཀའ་སྲུང་དང་། གཞི་བདག་གི་གཏོར་མ་ཆ་ཅི་འབྱོར་དང་། ཚོགས་ཀྱི་ཡོ་བྱད་བདུད་རྩི་དང་། བལ་དང་། བཟའ་བཅའ་སྣ་ཚོགས་དང་། སྤྱན་གཟིགས་མང་པོ་བཤམས། ཁྱད་པར་དུ་སྒོ་བཞིར་ཐོད་པ་བདུད་རྩིས་བཀང་བ་དང་། དམ་རྫས་སྦྲང་ཆང་མར་གྱིས་བརྒྱན་པ་ཟུར་བཞིར་བཀོད་ཅིང་། རྡོ་རྗེ་དྲིལ་བུ་དང་། ལག་མཆོད་ཀྱི་ཐོད་པ་དང་། བླ་བྲེ་ཡོལ་བ་དང་། བྲིས་སྐུ་རོལ་མོ་ལ་སོགས་པ་རྒྱ་ཆེར་བཤམ་པར་བྱའོ། །

གཉིས་པ་དངོས་གཞི་ལ། བདག་བསྐྱེད་ཅིང་མཚམས་བཅད་པ། དཀྱིལ་འཁོར་བསྒྲུབ་ཅིང་མཆོད་བསྟོད་བྱ་བ། ཚོགས་ལ་རོལ་ཞིང་དབང་བསྐུར་བ་གསུམ་ལས། དང་པོ་ནི། བདག་ཉིད་པདྨ་དྲག་པོའི་སྐུར་དྲག་སྒྲུབ་ཀྱིས་སྐད་ཅིག་གིས་གསལ་བས་བགེགས་གཏོར་སྦྱིན། རོལ་མོས་བྱིན་ཕབ་ནས། ཐམས་ཅད་ཁྲོ་བོའི་ཞིང་ཁམས་བརྡལ་བའི་ང་རྒྱལ་གྱིས། ཧཱུྃ། བླ་མ་རྣམས་ཀྱི་བྱིན་རླབས་དང་། །ཡི་དམ་ལྷ་ཡི་ཏིང་འཛིན་དང་། །མཁའ་འགྲོ་རྣམས་ཀྱི་མཐུ་རྩལ་གྱིས། །དངོས་གྲུབ་བར་ཆད་བྱེད་པའི་བགེགས། །ལོག་འདྲེན་བདུད་ཀྱི་རིགས་རྣམས་ཀུན། །འདི་རུ་མ་འདུག་གཞན་དུ་དེངས། །ཅི་སྟེ་འགྲོ་བར་མི་བྱེད་ན། །བླ་མ་ཡི་དམ་མཁའ་འགྲོ་དང་། །འབར་བའི་ཏིང་འཛིན་མཐུ་རྩལ་གྱིས། །རྡུལ་ཕྲན་བཞིན་དུ་བརླག་པར་བྱེད། །དེ་བས་ལོག་འདྲེན་འགེགས་ཀྱི་ཚོགས། །འདི་རུ་མ་འདུག་གཞན་དུ་དེངས། །ༀ་གུ་རུ་དེ་ཝ་ཌཱ་ཀི་ནི་ཨུ་ཙ་ཏ་ཡ་ཧཱུྃ་ཧཱུྃ་ཕཊ། ཅེས་བརྗོད་ནས། འབར་བའི་མེ་དང་སྤྲུལ་པའི་ཁྲོ་ཆུང་མང་པོ་འཕྲོས་པས་བགེགས་རྣམས་རྒྱ་མཚོའི་མཐར་བསྐྲད་ནས། ཡེ་ཤེས་ཀྱི་མེ་རི་མཚོན་ཆའི་འཁོར་ལོ་ཁྲོ་ཆུང་གི་གུར་ཁང་དུ་བལྟས་པས་རླུང་ཡང་མི་ཐར་བར་བསམས་ལ། ཧཱུྃ་ཧཱུྃ་ཧཱུྃ་ཞེས་བརྗོད་དོ། །

གཉིས་པ་དཀྱིལ་འཁོར་མཆོད་སྒྲུབ་ལ་གཞལ་ཡས་ཁང་གསལ་གདབ་པ། དེའི་ནང་དུ་ལྷ་བསྐྱེད་པ། དབྱིངས་ནས་སྤྱན་དྲངས་ཤིང་བྱིན་དབབ་པ། གཉིས་མེད་བརྟན་པར་བཞུགས་ནས་འཕྲོ་འདུ་ཡེ་ཤེས་ཀྱི་འཛབ་ཁང་དབྱེ་བ། མཆོད་གཏོར་འབུལ་ཞིང་བསྟོད་པ་བྱ་བ་དང་ལྔ་ལས། དང་པོ་ནི། ༀ་དྷརྨ་དྷཱ་ཏུ་ཛྙཱ་ན་བཛྲ་ཨཱཏྨ་ཀོ྅ཧཾ། ཆོས་ཐམས་ཅད་སྟོང་པ་ཆེན་པོ། སྟོང་པའི་ངང་ལས་པྃ་པདྨ་མཎྜལ་སྣ་ཚོགས་པདྨ་ཡངས་ཤིང་རྒྱ་ཆེ་བ། ཨ་ཙནྡྲ་མཎྜ་ལ། དེའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ། མ་སཱུརྻ་མཎྜ་ལ། ཉི་མའི་དཀྱིལ་འཁོར་གྱི་དབུས་སུ། ཧཱུྃ་བཛྲ་རཀྵ་ཧཱུྃ། སྣ་(༤)ཚོགས་རྡོ་རྗེ་རྒྱ་གྲམ་སྟོང་གསུམ་དང་མཉམ་པའི་རྭ་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཐིང་གའི་ནང་གི་ནམ་མཁའ་ཆེན་པོ་ལ། བྲུཾ་ཙཀྲ་ྃ་ལས་ཡེ་ཤེས་འབར་བའི་གཞལ་ཡས་གྲུ་བཞི་རྟ་བབས་བཞི་དང་ལྡན་པའི་ཤར་དཀར། ལྷོ་སེར། ནུབ་དམར། བྱང་ལྗང་བའི་ཆ་ལས་ཡེ་ཤེས་ལྔའི་རྩིགས་པ་ཕྱི་མ་ནང་། མཐིང་ག་དང་། དམར་པོ་དང་། དཀར་པོ་དང་། སེར་པོ་དང་། ལྗང་གུ་ལྔ་སྦྲགས་གཞའ་ཚོན་རིས་སུ་སྣང་བའི་སྟེང་ན། རིན་པོ་ཆེའི་ཕ་གུ་ལ་ནོར་བུ་དང་མུ་ཏིག་གི་དྲྭ་ཕྱེད་འཕྱང་བའི་སྟེང་ན་མདའ་ཡབ་དང་པུ་ཤུས་མཛེས་པ། སྒོ་བཞིའི་སྟེང་ན་རྟ་བབས་བང་རིམ་བཞི་ལ་གསེར་གྱི་ཙོང་ཙོང་དང་། དབྱུག་པ་རིང་པོ་ལ་བཏགས་པའི་དྲིལ་བུའི་ཕྲེང་བ་དང་རྒྱལ་མཚན་བཙུགས་པ། རི་དྭགས་ཀྱིས་བསྐྱོད་པའི་གདུགས་ཆོས་ཀྱི་འཁོར་ལོ་ཅན་འཁོར་བ། དབུས་ཀྱི་བུམ་པ་ཟླུམ་པོའི་སྟེང་ན་ཡ་ཕུག་ཕྱུར་བུ་དང་། བྲེ་དང་། འཁོར་ལོའི་ཏོག་གིས་མཚན་པ་སྟེ། ཕྱི་མཆོད་རྟེན་རྩེ་ལྔ་པའི་རྣམ་པ་ལ། ནང་ལྷའི་གཞལ་ཡས་ཁང་པ་ཡེ་ཤེས་ལྔའི་རང་བཞིན་དུ་གསལ་བའི་དབུས་སུ་རིན་པོ་ཆེའི་ཁྲི་སེང་གེ་གླང་ཆེན་རྟ་དང་རྨ་བྱ་ཤང་ཤང་གིས་བཏེགས་པའི་ཁོང་སྟེང་ལ། པདྨའི་སྡོང་པོ་རྒྱུ་རིན་པོ་ཆེ་སྣ་ལྔ་ལས་གྲུབ་པའི་ཁྲི་རྐང་ལྔར་གྱེས་པའི་འདབ་མ་རྣམས། ཤར་ནས་བལྟས་ན་དཀར་ལ་འཚེར་བ། ལྷོ་ནས་བལྟས་ན་སེར་ལ་དྭངས་པ། ནུབ་ནས་བལྟས་ན་དམར་ལ་ཆགས་པ། བྱང་ནས་བལྟས་ན་ལྗང་ལ་གཡོ་བའི་སྣ་ཚོགས་པདྨ་འོད་ཟེར་དཔག་ཏུ་མེད་པ་འཕྲོ་བའི་དབུས་ཀྱི་ལྟེ་བ་དང་འདབ་མ་བཞིའི་སྟེང་དུ། ཨ་ཙནྡྲ་མཎྜལ་ཧཱུྃ། ཟླ་བའི་དཀྱིལ་འཁོར་ཉ་གང་བ་རེ་རེའི་སྟེང་དུ། མ་སཱུརྻ་མཎྜལ་ཧཱུྃ། ཉི་མའི་དཀྱིལ་འཁོར་རེ་རེ་གསལ་བའི་དབུས་ཀྱི་ལྟེ་བའི་ཉི་ཟླའི་སྟེང་དུ། ༀ་ལས་སློབ་དཔོན་ཆེན་པོ་ཀུན་འདུས་རྡོ་རྗེ་འཆང་གི་ངོ་བོ་ཆེ་མཆོག་ཐོད་ཕྲེང་རྩལ་སྨུག་ནག་འཁོར་ལོ་དང་དྲིལ་བུ་འཛིན་པས་ཡུམ་རྡོ་རྗེ་ཕག་མོ་དང་མཉམ་པར་སྦྱོར་བ། ཤར་གྱི་ཉི་ཟླའི་སྟེང་དུ་ཧཱུྃ་ལས་རྡོ་རྗེ་ཐོད་ཕྲེང་རྩལ་མཐིང་ནག་རྡོ་རྗེ་དང་དྲིལ་བུ་འཛིན་པ། སངས་རྒྱས་སྤྱན་མ་དང་མཉམ་པར་སྦྱོར་བ། ལྷོའི་ཉི་ཟླའི་སྟེང་དུ་སྭཱ་ལས་རིན་ཆེན་ཐོད་ཕྲེང་རྩལ་སེར་ནག་རིན་པོ་ཆེ་དང་དྲིལ་བུ་འཛིན་པས་མཱ་མ་ཀཱི་དང་སྦྱོར་བ། ནུབ་ཀྱི་ཉི་ཟླའི་སྟེང་དུ་ཨཱཿལས་པདྨ་ཐོད་ཕྲེང་རྩལ་དམར་ནག་པདྨ་དང་དྲིལ་བུ་འཛིན་པ་གོས་དཀར་མོ་དང་སྦྱོར་བ། བྱང་གི་ཉི་ཟླའི་སྟེང་དུ་ཧཱ་ལས་ཀརྨ་ཐོད་ཕྲེད་རྩལ་ལྗང་ནག་རྒྱ་གྲམ་དང་དྲིལ་བུ་འཛིན་པ་དམ་ཚིག་སྒྲོལ་མ་དང་མཉམ་པར་སྦྱོར་བ། ཡུམ་རྣམས་ཀྱི་ཕྱག་ན་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། ཡབ་ཡུམ་ཐམས་ཅད་ཀྱང་རྡོ་རྗེ་སྐྱིལ་(༥)ཀྲུང་མཛད་པ། རིན་པོ་ཆེ་དང་རུས་པའི་རྒྱན་གྱིས་བརྒྱན་ཅིང་སྤྱན་གསུམ་གསུམ་དང་ལྡན་པ། འོད་ཟེར་དུ་མ་འཕྲོ་བའི་ཐུགས་ཀར་པདྨ་དང་ཉི་ཟླའི་དབུས་སུ་རང་རང་གི་ས་བོན་ལ་ༀ་ཨཱཿཧཱུྃ་སྭཱ་ཧཱ་མར་མེའི་ཕྲེང་བ་ལྟར་བསྐོར་བའོ། །དེའི་ཕྱི་རོལ་པདྨའི་ཁྲི་རྐང་ལས་གྱེས་པའི་པ་ཏྲ་རིས་སྡོང་པོའི་ཡལ་ག་བརྒྱད་ཀྱི་སྟེང་དུ་ཨ་ལས་ཟླ་བ་དང་། མ་ལས་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུྃ་བརྒྱད་ཡོངས་སུ་གྱུར་པའི་ཤར་དུ་པདྨ་འབྱུང་གནས་སྐུ་མདོག་དཀར་པོ་གཡས་རྡོ་རྗེ། ལྷོར་ཤཱཀྱ་སེང་གེ་སེར་པོ་གཡས་རིན་ཆེན། ནུབ་ཏུ་ཉི་མ་འོད་ཟེར་དམར་པོ་གཡས་པདྨ། བྱང་དུ་པདྨ་སཾ་བྷ་བ་ལྗང་གུ་གཡས་རྒྱ་གྲམ། ཤར་ལྷོར་པདྨ་རྒྱལ་པོ་དཀར་པོ་གཡས་འཁོར་ལོ། ལྷོ་ནུབ་ཏུ་བློ་ལྡན་མཆོག་སྲེད་དམར་པོ་གཡས་སུ་པུ་སྟི། ནུབ་བྱང་དུ་སེང་གེ་སྒྲ་སྒྲོགས་དམར་ལྗང་གཡས་དབྱུག་ཏོ། བྱང་ཤར་དུ་རྡོ་རྗེ་གྲོ་ལོད་སྨུག་ནག་གཡས་རྩེ་གསུམ་བསྣམས་པ། གཡོན་པ་རྣམས་ན་ཐོད་པ་བདུད་རྩིས་གང་བ་མཉམ་བཞག་གི་སྟེང་ན་འཛིན་པ། རྡོ་རྗེ་གྲོ་ལོད་མ་གཏོགས་པ་ཐམས་ཅད་ཞི་མ་ཁྲོ་སྒེག་ཅིང་འཛུམ་པའི་སྤྱན་གཉིས་དང་ལྡན་པ། རྡོ་རྗེ་གྲོ་ལོད་རབ་ཏུ་ཁྲོས་པའི་སྤྱན་གསུམ་བགྲད་ཅིང་མཆེ་བ་གཙིགས་པ། དེ་ཐམས་ཅད་སྦས་པའི་ཡུམ་དང་བཅས་པའི་མཚོན་བྱེད་དུ་གྲུ་མོན་ཁ་ཊཱཾ་ག་བསྣམས་པ་ཞབས་རྡོ་རྗེ་སྐྱིལ་ཀྲུང་མཛད་པ། ཟ་འོག་གི་བེར་དང་མེ་ཏྲི་དམར་སེར་གྱི་ཆོས་གོས་གསོལ་བ། ཤ་བའི་སྙན་ཞུ་རྒོད་པོའི་རྩེ་རྒྱལ་དང་། དར་སྣ་ལྔས་མཚན་པའི་པད་ཞྭ་གསོལ་བ། ཐུགས་ཀར་ཉི་ཟླའི་སྟེང་དུ་ཧཱུྃ་རེ་དང་བཅས་པའོ། །དེའི་ཕྱི་རོལ་པདྨའི་སྡོང་པོ་བཅུ་དྲུག་ཉི་ཟླའི་གདན་དང་བཅས་པ་ལ་ཧཱུྃ་བཅུ་དྲུག་ཡོངས་སུ་གྱུར་པ་ལས། ཤར་གྱི་བཞི་ལ་སློབ་དཔོན་ཆེན་པོ་དགའ་རབ་རྡོ་རྗེ། རྡོ་རྗེ་ཆོས། རྡོ་རྗེ་དྲག་པོ་རྩལ། རྡོ་རྗེ་ཧཱུྃ་མཛད། ལྷོའི་བཞི་ལ་འཇམ་དཔལ་བཤེས་གཉེན། པྲ་བྷ་ཧ་སྟི། གུ་ཧྱ་དེ་བ། ཧཱུྃ་ཀ་ར། ནུབ་ཀྱི་བཞི་ལ་ཀླུ་སྒྲུབ་སྙིང་པོ། ཨིནྡྲ་བྷཱུ་ཏི། སངས་རྒྱས་གསང་བ། རྡོ་རྗེ་ཡང་དབང་གཏེར། བྱང་གི་བཞི་ལ་ཤྲཱི་སིངྷ། བི་མ་ལ་མི་ཏྲ། དེ་བ་ཙནྡྲ། མཚོ་སྐྱེས་རྡོ་རྗེ། དེ་ཐམས་ཅད་ཀྱང་ཕྱོགས་ཀྱི་མདོག་ཅན་རིག་འཛིན་སློབ་དཔོན་གྱི་ཆ་བྱད། ན་བཟའ་མན་ཏྲིའི་ལྷབ་ལྷུབ་དང་ཁ་ཊྭཱཾ་གས་མཚན་པ། པཎ་ཞྭ་དང་མེ་ཏོག་ཕྲེང་བ་གསོལ་ཞིང་རྡོ་རྗེ་དང་ཐོད་པ་འཛིན་པ། རྡོ་རྗེ་སྐྱིལ་ཀྲུང་དུ་བཞུགས་པའོ། །གྲུ་ཆད་བཞིའི་ཕྱོགས་མཚམས་བརྒྱད་དུ་རོ་བརྒྱད་ཀྱི་སྟེང་ན། ཤར་དུ་རྡོ་རྗེ་གིང་དང་རྡོ་རྗེ་མཁའ་འགྲོ་མ་དཀར་ཞིང་ཡབ་རྡོ་རྗེ་འཛིན་པ། ལྷོར་རིན་ཆེན་གིང་དང་རིན་ཆེན་མཁའ་འགྲོ་མ་སེར་ཞིང་ཡབ་རིན་པོ་ཆེ་འཛིན་པ། ནུབ་ཏུ་པདྨ་གིང་དང་པདྨ་མཁའ་འགྲོ་མ་དམར་ཞིང་ཡབ་པདྨ་འཛིན་པ། བྱང་དུས་ལས་ཀྱི་(༦)གིང་དང་ལས་ཀྱི་མཁའ་འགྲོ་མ་ལྗང་ཞིང་ཡབ་རལ་གྲི་འཛིན་པ། ཡབ་རྣམས་ཀྱི་ཕྱག་གཡོན་ན་ཐོད་པ་བདུད་རྩིས་བཀང་བ། ཡུམ་རྣམས་ཀྱི་ཕྱག་གཡས་གྲི་གུག་གཡོན་ཐོད་པ་ཁྲག་གིས་བཀང་བ་བསྣམས་པ། ཞབས་བརྐྱང་བསྐུམ་དུ་བཞུགས་པ། རིན་པོ་ཆེ་དང་རུས་པས་བརྒྱན་པའོ། །མཚམས་བཞིར་བདེ་གཤེགས་གིང་བཞི་དང་། ཆོས་དབྱིངས་མཁའ་འགྲོ་མ་བཞི་མཐིང་ག །ཡབ་འཁོར་ལོས་མཚན་པའི་གྲི་གུག་དང་ཐོད་པ་འཛིན་ཞིང་། ཡུམ་གྲི་གུག་དང་ཐོད་པ་འཛིན་པ་བརྐྱང་བསྐུམ་དུ་བཞུགས་པ། རིན་པོ་ཆེ་དང་རུས་པས་བརྒྱན་པའོ། །

ཁྱམས་ཀྱི་ཕྱོགས་བཞིར་རོའི་གདན་ཕྱི་མ་ནང་གི་ནང་རིམ་གྱི་ཕྱོགས་མཚམས་བརྒྱད་དུ་ཤར་ནས་རིམ་པ་བཞིན་དུ། མཁའ་འགྲོ་ཞི་བ་འཚོ། དཀར་མོ་ལས་བྱེད་མ། རྡོ་རྗེ་བདུད་འདུལ་མ། སེར་མོ་ལས་བྱེད་མ། རྡོ་རྗེ་ཕག་མོ། དམར་མོ་ལས་བྱེད་མ། རྡོ་རྗེ་ཕྲ་མེན་མ། ལྗང་མོ་ལས་བྱེད་མ་རྣམས་གྲི་གུག་དང་ཐོད་པ་འཛིན་པ། རིན་པོ་ཆེ་དང་རུས་པས་བརྒྱན་པ། དེ་ཐམས་ཅད་གྲུ་མོ་ན་ཁ་ཊྭཱཾ་ག་འཛིན་པ། ཞབས་གཉིས་བརྐྱང་བསྐུམ་གར་སྟབས་འཁྱུགས་པས་བཞུགས་པའོ། །ཕྱི་རིམ་རོའི་གདན་གྲངས་མེད་པ་ལ་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་དཔག་ཏུ་མེད་པ་དང་། སྲུང་མ་དམ་ཅན་རྒྱ་མཚོའི་ཚོགས་བསམ་གྱིས་མི་ཁྱབ་པ་བཞུགས་པའོ། །སྒོ་བཞིར་རོའི་གདན་རེ་རེ་ལ། ཤར་སྒོར་རྡོ་རྗེ་སྒོ་བ་རྡོ་རྗེ་ལྕགས་ཀྱུ་མ་དང་སྦྱོར་བ་ལྕགས་ཀྱུ་འཛིན་པ་དཀར་སེར་བརྐྱང་བསྐུམ་ཅན། ལྷོ་སྒོར་རིན་ཆེན་སྒོ་བ་རིན་ཆེན་ཞགས་པ་མ་དང་སྦྱོར་བ་དམར་སེར་བརྐྱང་བསྐུམ་ཞགས་པ་འཛིན་པ། ནུབ་སྒོར་པདྨའི་སྒོ་བ་པདྨ་ལྕགས་སྒྲོག་མ་དང་སྦྱོར་བ་དམར་སེར་བརྐྱང་བསྐུམ་ལྕགས་སྒྲོག་འཛིན་པ། བྱང་སྒོར་ལས་ཀྱི་སྒོ་བ་སྣ་ཚོགས་དྲིལ་བུ་མ་དང་སྦྱོར་བ་ལྗང་ནག་བརྐྱང་བསྐུམ་དྲིལ་བུ་འཛིན་པ། རིན་པོ་ཆེ་དང་རུས་པས་བརྒྱན་པ། བསྐལ་པའི་མེ་རི་འབར་བའི་ཀློང་ན་བཞུགས་པའོ། །གཙོ་བོ་ལྔ་ནི་ཕྱོགས་ཕྱོགས་ཀྱི་འཁོར་ལ་ཕྱིར་གཟིགས་པའོ། །འཁོར་རྣམས་ནི་གཙོ་བོ་ལ་ནང་དུ་གཟིགས་པ། འོད་ཟེར་གྱི་དྲྭ་བ་གཞའ་འོད་ལྟར་འབར་བའི་མཐའ་སྐོར་སྒོ་བའི་མེ་དཔུང་གིས་ཀུན་ནས་བསྐོར་ཞིང་འོད་ཟེར་འབར་བའི་ཚོགས་ཆེན་པོ་ཀུན་ནས་འཁྱིལ་བའོ། །དེ་ཐམས་ཅད་ཀྱི་ཕྱི་རོལ་གྱི་སྣམ་བུ་ལ་འདོད་ཡོན་གྱི་ལྷ་མོ་དཔག་ཏུ་མེད་པས་མཆོད་པའི་སྤྲིན་གྱི་ཆར་ཆེན་པོ་འབེབས་ཤིང་བཀྲ་ཤིས་ཀྱི་དབྱངས་ཀྱིས་ཀུན་ནས་བསྟོད་པ། དཀྱིལ་འཁོར་མཆོད་པའི་ཕྱི་རོལ་ཕྱོགས་མཚམས་དུར་ཁྲོད་བརྒྱད་ན། སློབ་དཔོན་བརྒྱད། ཤིང་བརྒྱད། སྤྲིན་བརྒྱད། མེ་བརྒྱད། ཆུ་བརྒྱད། ལྷ་བརྒྱད། ཀླུ་བརྒྱད། (༧)མཆོད་རྟེན་བརྒྱད་ལ་སོགས་པ་དུར་ཁྲོད་འཇིགས་པའི་མི་རོ་ལྕེ་སྤྱང་དང་བཅས་པ་རྣམས་ནམ་མཁའི་གཞའ་ཚོན་ལྟར་སྣང་ལ་རང་བཞིན་མེད་པའི་དཀྱིལ་འཁོར་ནམ་མཁའི་མཐའ་འབྱམས་ཀླས་པ་ཞིག་ཏུ་གསལ་བར་བསྐྱེད་དོ། །

སྤྱན་དྲངས་ཤིང་བྱིན་གྱིས་བརླབ་པ་ལ། བཞེངས་སུ་གསོལ་བ། སྤྱན་དྲངས་པ། བྱིན་དབབ་པ། བརྡ་ཕྱག་འཚལ་བ་དང་བཞི་ལས། ཆོས་ཀྱི་དབྱིངས་ནས་གཟུགས་སྐུ་ཐུགས་རྗེ་ཆེན་པོར་བཞེངས་སུ་གསོལ་བ་ནི། ཧཱུྃ། རང་བཞིན་ལྷུན་གྲུབ་བླ་མ་ཆོས་ཀྱི་སྐུ། མ་བཅོས་བདེ་ཆེན་ཆོས་སྐུའི་དབྱིངས་རུམ་ནི། །ཀུན་ཏུ་བཟང་མོ་གསང་བའི་བྷ་ག་ལས། །ཀུན་བཟང་རྡོ་རྗེ་བདེ་བ་ཆེན་པོར་བཞེངས། །རང་ཉིད་ཆོས་ཀྱི་སྐུ་ལས་མི་གཡོ་ཡང་། །གཟུགས་སྐུ་ལྷུན་གྲུབ་འོད་གསལ་ཆེན་པོ་ཉིད། །སྔོན་གྱི་ཐུགས་རྗེ་ཆེན་པོ་རབ་དགོངས་ལ། །ཆོས་ཉིད་ངང་ལས་སྒྱུ་མའི་སྐུ་བཞེངས་ཤིག །ༀ་དྷརྨ་དྷཱ་ཏུ་བཛྲ་ཛྙཱ་ན་ས་མ་ཡ་ཧོཿས་མ་ཡ་སྟྭཾ། ཛཿཧཱུྃ་བྃ་ཧོཿཞེས་བརྗོད་པས་ཆོས་སྐུའི་དབྱིངས་ནས་བཞེངས་ཏེ་བྱོན་པར་ཞལ་གྱིས་བཞེས་པར་བསམ་མོ། །

སྤྱན་དྲངས་པ་ནི། སྤོས་དང་རོལ་མོའི་སྒྲས། ཧཱུྃ། ཆོས་སྐུ་སྤྲོས་དང་བྲལ་བའི་ངང་ཉིད་ལས། །གཟུགས་སྐུས་འགྲོ་དོན་མཛད་ཕྱིར་སྐུ་སྤྲུལ་པ། །ཀུན་ཏུ་བཟང་པོ་རྡོ་རྗེ་སེམས་དཔའ་ཆེ། །རིགས་ལྔ་ཡབ་ཡུམ་ལ་སོགས་གཤེགས་སུ་གསོལ། །ཧཱུྃ། བདེ་གཤེགས་ཀུན་འདུས་ཆེ་མཆོག་ཐོད་ཕྲེང་རྩལ། །རིགས་བཞིའི་གཙོ་དང་བདེ་གཤེགས་མཚན་མཚོག་བརྒྱད། །རིག་འཛིན་བཅུ་དྲུག་ཡེ་ཤེས་མཁའ་འགྲོ་གིང་། །དམ་ཅན་རྒྱ་མཚོ་མ་ལུས་གཤེགས་སུ་གསོལ། །ཧཱུྃ། དུར་ཁྲོད་བརྒྱད་ཀྱི་གནས་མཆོག་དམ་པ་ནས། །སྒྲུབ་པ་བཀའ་བརྒྱད་དོན་རྟོགས་མཁས་པ་བརྒྱད། །

ཐེག་པ་མཆོག་ལ་དབང་བསྒྱུར་ཆོས་ཀྱི་རྗེ། །མཁའ་འགྲོའི་སྤྲིན་ཕུང་བཅས་པ་གཤེགས་སུ་གསོལ། །ཧཱུྃ་ཧཱུྃ་ཧཱུྃ། སྔོན་གྱི་བསྐལ་པ་དང་པོ་ལ། །ཡུལ་གྱི་མིང་ནི་ཨོ་རྒྱན་ཡུལ། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་ཀྱང་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །རྨོངས་པའི་མུན་པ་སེལ་མཛད་པ། །ཉི་མ་འོད་ཟེར་གྲགས་པ་བྱོན། །ཤེས་བྱ་ཀུན་ལ་མ་རྨོངས་པ། །བློ་ལྡན་མཆོག་སྲེད་གཤེགས་སུ་གསོལ། །བདུད་དང་མུ་སྟེགས་ཚར་གཅོད་པ། །འཕགས་པ་སེང་གེ་སྒྲ་སྒྲོགས་བྱོན། །ལོག་འདྲེན་གདུག་པ་འདུལ་མཛད་པ། །ཤཱཀྱ་སེང་གེ་གཤེགས་སུ་གསོལ། །མ་ཆགས་སྐྱོན་གྱིས་མ་གོས་པ། །པདྨ་རྒྱལ་པོ་གཤེགས་སུ་གསོལ། །ཡོན་ཏན་ཐམས་ཅད་རབ་རྫོགས་པ། །པདྨ་སཾ་བྷ་གཤེགས་(༨)སུ་གསོལ། །བོད་ཀྱི་ཡུལ་དུ་བྱོན་པའི་ཚེ། །དྲག་པོའི་ཕྲིན་ལས་མཛད་པའི་ཕྱིར། །གསང་མཚན་རྡོ་རྗེ་གྲོ་བོ་ལོད། །ཁྱེད་ཀྱི་རྗེས་སུ་བདག་སྒྲུབ་ཀྱིས། །སྔོན་གྱི་ཐུགས་དམ་བརྩེར་དགོངས་ལ། །བྱིན་གྱི་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་གྱིས་རློབས། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ཧཱུྃ་ཧཱུྃ། དུར་ཁྲོད་ཆེན་པོའི་གནས་བརྒྱད་ནས། །སློབ་དཔོན་པདྨ་མཚན་བརྒྱད་ལ། །འཁོར་དུ་མཁའ་འགྲོ་མང་པོས་བསྐོར། །ཐུགས་རྗེའི་རྣམ་འཕྲུལ་བསམ་མི་ཁྱབ། །རིག་འཛིན་མང་པོའི་ཚོགས་དང་བཅས། །མཁའ་འགྲོ་མང་པོའི་འཁོར་དང་བཅས། །བྱིན་རླབས་སྤྲིན་ཕུང་རབ་ཏུ་འཁྲིགས། །འོད་ཕུང་དཀྱིལ་འཁོར་ཀུན་ཏུ་འཁྲིགས། །གསེར་གྱི་རྔ་ཆེན་དི་རི་རི། །གསུང་གི་འཛབ་དབྱངས་ཁྲོ་ལོ་ལོ། །དཔའ་བོའི་གར་བྱེད་ཁྱུགས་སེ་ཁྱུག །དཔའ་མོའི་གླུ་ལེན་ཀྱུ་རུ་རུ། །རྒྱན་ཆ་མང་པོ་པུ་རུ་རུ། །སིལ་སྙན་མང་པོ་སི་ལི་ལི། །ཧཱུྃ་གི་སྣ་གླུ་དི་རི་རི། །ཕཊ་ཀྱི་གདངས་སྐད་སངས་སེ་སང་། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཅིང་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་ཅིག་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །དཔའ་བོའི་མིང་ནི་རྡོ་རྗེ་གིང་། །དཀར་པོ་རྡོ་རྗེ་ཐོད་ཁྲག་འཛིན། །དཔའ་བོའི་མིང་ནི་རིན་ཆེན་གིང་། །སེར་པོ་རིན་ཆེན་ཐོད་ཁྲག་འཛིན། །དཔའ་བོའི་མིང་ནི་པདྨ་གིང་། །དམར་པོ་པདྨ་ཐོད་ཁྲག་འཛིན། །དཔའ་བོའི་མིང་ནི་ཀརྨ་གླིང་། །ལྗང་གུ་རལ་གྱི་ཐོད་ཁྲག་འཛིན། །དཔའ་བོའི་མིང་ནི་བདེ་གཤེགས་གིང་། །མཐིང་ག་འཁོར་ལོ་ཐོད་ཁྲག་འཛིན། །དཔའ་མོ་རིགས་ལྔའི་མཁའ་འགྲོ་མ། །སོ་སོའི་ཡབ་དང་འདྲ་བ་ལ། །གྲི་གུག་ཐོད་ཁྲག་རིན་ཆེན་བརྒྱན། །ཀུན་ཀྱང་རོ་ཡི་སྟེང་ན་བཞུགས། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་ཅིག་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་སྒྲུབ་སྩོལ། །མཁའ་འགྲོའི་མིང་ནི་རྡོ་རྗེ་ཕག །དམར་མོ་ཐོར་ཚུགས་རུས་པས་བརྒྱན། །མཁའ་འགྲོའི་མིང་ནི་ཞི་བ་འཚོ། །དཀར་མོ་ཐོར་ཚུགས་རུས་པས་བརྒྱན། །མཁའ་འགྲོའི་མིང་ནི་བདུད་འདུལ་མ། །སེར་མོ་ཐོར་ཚུགས་རུས་པས་བརྒྱན། །མཁའ་འགྲོའི་མིང་ནི་ཕྲ་མེན་མ། །ལྗང་མོ་ཐོར་ཚུགས་རུས་པས་བརྒྱན། །ཀུན་ཀྱང་གྲི་གུག་ཐོད་ཁྲག་འཛིན། །ཞབས་གཉིས་གར་སྟབས་མི་རོ་གནོན། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་ཅིག་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །མཁའ་འགྲོའི་མིང་ནི་གཽ་རཱི་མ། །གཡས་གཡོན་རྡོ་རྗེ་ཐོད་ཁྲག་འཛིན། །མཁའ་འགྲོའི་མིང་ནི་ཙཽ་རཱི་མ། །སོར་མོ་རིན་ཆེན་ཐོད་ཁྲག་འཛིན། །མཁའ་འགྲོའི་མིང་ནི་ཨོ་རྒྱན་མ། །དམར་མོ་པདྨ་ཐོད་ཁྲག་འཛིན། །མཁའ་འགྲོའི་མིང་ནི་ཀསྨ་རཱི། །ལྗང་མོ་རྒྱ་གྲམ་ཐོད་ཁྲག་འཛིན། །ཀུན་ཀྱང་ཁ་ཊྭཱཾ་རིན་ཆེན་འཁྲོལ། །ཞབས་གཉིས་བརྐྱང་བསྐུམ་མི་རོ་གནོན། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་ཅིག་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །གར་མཁན་མིང་ནི་འགྱིང་བག་ཅན། །དཀར་མོ་རིན་ཆེན་རུས་པས་བརྒྱན། །གཡས་ན་ཐོད་པའི་ཅང་ཏེའུ་དཀྲོལ། །གཡོན་ན་མི་རྐང་གླིང་བུ་འབུད། །བལ་མོའི་མིང་ནི་གར་བྱེད་མ། །སེར་མོ་རིན་ཆེན་རུས་པས་བརྒྱན། །གཡས་ན་ཐོད་པའི་ཅང་ཏེའུ་དཀྲོལ། །གཡོན་ན་ཁ་ཊྭཱཾ་རྩེ་གསུམ་གསོར། །མོན་མོ་གསེར་གྱི་རྣ་ཆ་ཅན། །དམར་མོ་རིན་ཆེན་རུས་པས་བརྒྱན། །གཡས་སུ་གྲི་གུག་འབར་བ་ཐོགས། །གཡོན་ན་ཐོད་པ་ཁྲག་བཀང་བསྣམས། །དཔའ་མོའི་མིང་ནི་གླུ་ལེན་མ། །སྔོན་མོ་རིན་ཆེན་རུས་པས་བརྒྱན། །གཡས་ན་ལྟག་སྤྲོད་རྔ་ཆེན་བརྡུང་། །གཡོན་ན་བྷཉྫ་ལྕང་ལོ་འཕྱར། །བུ་མོ་མེ་ཏོག་མནྡཱ་ར། །དཀར་མོ་རིན་ཆེན་རུས་པས་བརྒྱན། །གཡས་ན་ཤེལ་གྱི་རྡོ་རྗེ་ཐོགས། །གཡོན་ན་མེ་ཏོག་མཆོད་གཞོང་འཛིན། །བལ་མོ་ཤཱཀྱཱ་དེ་བ་ནི། །སེར་མོ་རིན་ཆེན་རུས་པས་བརྒྱན། །གཡས་ན་གསེར་གྱི་ཕྲེང་བ་ཐོགས། །གཡོན་ན་གཡུ་ཡི་གཡེར་ཁ་འཁྲོལ། །རྐྱེན་བཟློག་རྡོ་རྗེ་ལྕམ་གཅིག་མ། །དམར་མོ་རིན་ཆེན་རུས་པས་བརྒྱན། །གཡས་ན་ཤེལ་གྱི་རྡོ་རྗེ་ཐོགས། །གཡོན་ན་གསེར་གྱི་བུམ་པ་ཐོགས། །ལས་ཀྱི་རིགས་ཀྱི་ཌཱ་ཀི་མ། །ལྗང་མོ་རིན་ཆེན་རུས་པས་བརྒྱན། །གཡས་པས་རྒྱ་གྲམ་རལ་གྲི་འཕྱར། །གཡོན་པས་གསེར་གྱི་དྲིལ་བུ་འཁྲོལ། །ཀུན་ཀྱང་ཞབས་གཉིས་མི་རོ་གནོན། །དཔལ་གྱི་རྒྱན་ཆ་ཁྲོ་ལོ་ལོ། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་ཅིག་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །རྡོ་རྗེ་ལས་བྱེད་ཞི་བྱེད་མ། །དཀར་མོ་རིན་(༡༠)ཆེན་རུས་པས་བརྒྱན། །ཕྱག་ན་ཆུ་ཡི་དཀྱིལ་འཁོར་ཐོགས། །རིན་ཆེན་ལས་བྱེད་རྒྱས་བྱེད་མ། །སེར་མོ་རིན་ཆེན་རུས་པས་བརྒྱན། །ཕྱག་ན་ས་ཡི་དཀྱིལ་འཁོར་ཐོགས། །པདྨ་ལས་བྱེད་དབང་བདུད་མ། །དམར་མོ་རིན་ཆེན་རུས་པས་བརྒྱན། །ཕྱག་ན་མེ་ཡི་དཀྱིལ་འཁོར་ཐོགས། །ཀརྨ་ལས་བྱེད་སྒྲོལ་བྱེད་མ། །ལྗང་མོ་རིན་ཆེན་རུས་པས་བརྒྱན། །ཕྱག་ན་རླུང་གི་འཁོར་ལོ་ཐོགས། །སྣ་ཚོགས་ལས་བྱེད་མཁའ་འགྲོ་མ། །སྲུང་མ་དམ་ཅན་རྒྱ་མཚོར་བཅས། །སྐུ་མདོག་ཕྱག་མཚན་བསམ་མི་ཁྱབ། །ཀུན་ཀྱང་རོ་ཡི་གདན་སྟེང་ན། །གར་མཛད་ཕ྄ཊ་དང་ཕེཾ་སྒྲ་སྒྲོགས། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་ཅིག་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ཧཱུྃ་ཧཱུྃ་ཧཱུྃ་ཧཱུྃ། སྒོ་བཞིར་གནས་པའི་མཁའ་འགྲོ་གིང་། །དཀར་སེར་དམར་ལྗང་འཇིགས་པའི་སྐུ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །ཡབ་ཡུམ་འཁྲིལ་ཞིང་ཕྱག་མཚན་གདེངས། །བསྐལ་བའི་མེ་དཔུང་རབ་འབར་ཞིང་། །འདོད་ཡོན་ལྷ་མོ་འབུམ་ཕྲག་དང་། །དུར་ཁྲོད་ཞིང་སྐྱོང་འཁོར་དང་བཅས། །སིལ་སྙན་གླུ་གར་སི་ལི་ལི། །དཔལ་གྱི་གདངས་སྐད་ཙེ་རེ་རེ། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཚོག་བདག་ལ་དབང་ཅིག་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་སྒྲུབ་སྩོལ། །དབྱིངས་དང་ཡེ་ཤེས་གཞལ་ཡས་ནས། །རྒྱལ་བ་རྒྱ་མཚོ་གཤེགས་སུ་གསོལ། །རྡོ་རྗེ་རིགས་ཀྱི་གཞལ་ཡས་ནས། །རྡོ་རྗེ་མཁའ་འགྲོ་གཤེགས་སུ་གསོལ། །རིན་ཆེན་རིགས་ཀྱི་གཞལ་ཡས་ནས། །རིན་ཆེན་མཁའ་འགྲོ་གཤེགས་སུ་གསོལ། །པདྨ་རིགས་ཀྱི་གཞལ་ཡས་ནས། །པདྨ་མཁའ་འགྲོ་གཤེགས་སུ་གསོལ། །ལས་ཀྱི་རིགས་ཀྱི་གཞལ་ཡས་ནས། །ལས་ཀྱི་མཁའ་འགྲོ་གཤེགས་སུ་གསོལ། །སོ་སོའི་རྟེན་དང་ཕོ་བྲང་ནས། །དམ་ཅན་རྒྱ་མཚོ་གཤེགས་སུ་གསོལ། །ཆོས་ཉིད་རྣམ་དག་གཞལ་ཡས་ནས། །རང་བྱུང་ཡེ་ཤེས་གཤེགས་སུ་གསོལ། །རང་སྣང་རྣམ་དག་གཞལ་ཡས་ནས། །སྐུ་དང་ཡེ་ཤེས་གཤེགས་སུ་གསོལ། །སྣང་སྲིད་སྣོད་བཅུད་གཞལ་ཡས་ནས། །འཁོར་འདས་བདེ་ཆེན་གཤེགས་སུ་གསོལ། །དམིགས་དང་བྲལ་བའི་ནམ་མཁའ་ལ། །ཏིང་འཛིན་དག་པས་སྤྱན་འདྲེན་གྱིས། །སོ་སོའི་མཐུ་སྟོབས་རྫུ་འཕྲུལ་བཞིན། །དཔལ་གྱི་འཁོར་ཚོགས་འབུམ་ཕྲག་རྣམས། །རྒྱན་ཆ་མང་པོ་པུ་རུ་རུ། །སིལ་སྙན་མང་པོ་སི་ལི་ལི། །(༡༡)རོལ་མོ་མང་པོ་དི་རི་རི། །ཞུབ་ཅན་སྟོང་དག་སི་ལི་ལི། །མཁའ་འགྲོ་འབུམ་ཕྲག་སྤུངས་སེ་སྤུང་། །དྲི་ཞིམ་ངད་པ་ཐུ་ལུ་ལུ། །མཁའ་འགྲོའི་བརྡ་སྐད་ཙེ་རེ་རེ། །དཔལ་གྱི་བྲོ་ཆེན་ཆེམས་སེ་ཆེམ། །དཔའ་བོའི་བཤུག་པ་ཀྱུ་རུ་རུ། །དཔའ་མོའི་གླུ་ལེན་ཙེ་རེ་རེ། །ཧཱུྃ་གི་སྣ་གླུ་དི་རི་རི། །ཕ྄ཊ་ཀྱི་གདངས་སྐད་སངས་སེ་སང་། །མཁའ་འགྲོ་ཕོ་མོ་གཤེགས་སུ་གསོལ། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲཱིཾ་ཧྲཱིཾ་ཛཿཛཿ ཛཿཧཱུྃ་བྃ་ཧོ། ཞེས་བརྗོད་པས་ཡེ་ཤེས་པ་རྣམས་བྱོན་ནས་འཐིབས་ཏེ་ཐམས་ཅད་སྤྲིད་ཕུང་བཞིན་དུ་འཁྲིགས་པར་བསམ་མོ། །

བྱིན་དབབ་བ་ནི། ལས་བྱང་ཕལ་ཆེར་ལས་འོག་ཏུ་བྱེད་ཀྱང་ཧ་ཅང་མ་འབྲེལ་བས། ཁོ་བོས་ནི་བླ་མའི་མན་ངག་གི་ལུགས་བཞིན་སྐབས་འདིར་བྱེད་དེ། རྒྱུད་ལས། ཡེ་ཤེས་པ་ཡང་གསལ་བར་བྱེད་པ་ཞེས་བཤད་པའི་ཕྱིར་ན། སྤོས་དང་རོལ་མོའི་སྒྲས་བྱིན་དབབ་ཅིང་། ཧཱུྃ། མ་གཡེལ་མ་གཡེལ་རིག་འཛིན་ཚོགས། །མ་གཡེལ་མ་གཡེལ་མཁའ་འགྲོའི་ཚོགས། །མ་གཡེལ་མ་གཡེལ་གིང་གི་ཚོགས། །མ་གཡེལ་མ་གཡེལ་སྲུང་མའི་ཚོགས། །ཧཱུྃ། རྗེ་བཙུན་པདྨ་ཐོད་ཕྲེང་རྩལ། །རིག་འཛིན་མཁའ་འགྲོའི་ཚོགས་དང་བཅས། །ཆོས་ཀྱི་དབྱིངས་ནས་སྐུ་སྐྱོད་འཚལ། །རྡོ་རྗེ་ཕག་མོས་བྱིན་གྱིས་རློབས། །དུར་ཁྲོད་བརྒྱད་ནས་སྐུ་སྐྱོད་ལ། །པདྨ་མཚན་བརྒྱད་བྱིན་གྱིས་རློབས། །ནམ་མཁའི་དབྱིངས་ནས་སྐུ་བསྐྱོད་ལ། །རིགས་བཞི་མཁའ་འགྲོས་བྱིན་གྱིས་རློབས། །རྒྱ་མཚོའི་གླིང་ནས་སྐུ་བསྐྱོད་ལ། །མཁའ་འགྲོ་བཞི་ཡིས་བྱིན་གྱིས་རློབས། །གངས་དཀར་རྩེ་ནས་སྐུ་བསྐྱོད་ལ། །གིང་ཆེན་བཞི་ཡིས་བྱིན་གྱིས་རློབས། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ཧཱུྃ་ཧཱུྃ། ཡུལ་གྱི་མིང་ནི་ཨོ་རྒྱན་ཡུལ། །དུར་ཁྲོད་མིང་ནི་བསིལ་བའི་ཚལ། །རྡོ་རྗེ་གདན་གྱི་ནུབ་བྱང་མཚམས། །རིགས་ནི་ཟ་ཧོར་རྒྱལ་པོའི་རིགས། །དགེ་སློང་མིང་ནི་ཤཱཀྱ་འོད། །བློ་ལྡན་མཆོག་སྲེད་ཅེས་ཀྱང་བྱ། །མཁའ་འགྲོ་རྡོ་རྗེ་ཕག་མོ་སྟེ། །དབུ་ལ་ཐོར་ཚུགས་རྒྱན་གྱིས་བརྒྱན། །སྙན་ལ་རིན་ཆེན་རུས་པས་བརྒྱན། །གསེར་གྱི་གདུ་བུ་ཁྲོ་ལོ་ལོ། །སིལ་སྙན་མང་པོ་སི་ལི་ལི། །རྒྱན་ཆ་མང་པོ་པུ་རུ་རུ། །རོལ་མོ་མང་པོ་དི་རི་རི། །གླུ་ལེན་གར་བྱེད་ཁྱུགས་སེ་ཁྱུག །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག༴། །སྒྲུབ་མཆོག༴། །བགེགས་དང་ལོག༴། །མཆོག་དང་༴། །ཧཱུྃ་ཧཱུྃ། ཡུལ་གྱི་མིང་ནི་རྒྱ་གར་ཡུལ། །གྲོང་ཁྱེར་མིང་ནི་མ་ག་དྷ། །དུར་ཁྲོད་མིང་ནི་ཚང་ཚིང་འཁྲིགས། །སློབ་དཔོན་པདྨ་སཾ་བྷ་ཝ། །འཕགས་པ་སེང་གེ་ཞེས་ཀྱང་གྲགས། །མཁའ་འགྲོའི་(༡༢)མིང་ནི་ཕྲ་མེན་མ། །ཀླུ་གཉན་གཟའ་སྐར་ཚོགས་དང་བཅས། །དབུ་ལ་ཐོར་ཚུགས་རྒྱན་གྱིས་བརྒྱན། །སྙན་ལ་རིན་ཆེན་རུས་པས་བརྒྱན། །གསེར་གྱི་གདུ་བུ་ཁྲོ་ལོ་ལོ། །སིལ་སྙན་མང་པོ་སི་ལི་ལི། །རྒྱན་ཆ་མང་པོ་པུ་རུ་རུ། །རོལ་མོ་མང་པོ་དི་རི་རི། །གླུ་ལེན་གར་བྱེད་ཁྱུགས་སེ་ཁྱུག །བྱིན་གྱིས་རློབ་ཕྱིར༴། །གནས་མཆོག༴། །སྒྲུབ་མཆོག༴། །བགེགས་དང་༴། །མཆོག་དང་༴། །ཧཱུྃ་ཧཱུྃ། ཡུལ་གྱི་མིང་ནི་རྒྱ་གར་ཡུལ། །གྲོང་ཁྱེར་མིང་ནི་ཡངས་པ་ཅན། །དུར་ཁྲོད་མིང་ནི་སོ་ས་གླིང་། །སློབ་དཔོན་པདྨ་ཐོད་ཕྲེང་རྩལ། །ཉི་མ་འོད་ཟེར་ཞེས་ཀྱང་གྲགས། །མཁའ་འགྲོའི་མིང་ནི་བདུད་འདུལ་མ། །དབུ་ལ་ཐོར་ཚུགས་རྒྱན་གྱིས་བརྒྱན། །ཅེས་སོགས་འགྲེས་སོ། །ཧཱུྃ་ཧཱུྃ། ཨོ་རྒྱན་ཡུལ་གྱི་ཤར་ལྷོ་མཚམས། །གྲོང་ཁྱེར་མིང་ནི་རྒྱལ་པོའི་ཁབ། །དུར་ཁྲོད་མིང་ནི་དགའ་བའི་ཚལ། །སློབ་དཔོན་པདྨ་འབྱུང་གནས་དཔལ། །པདྨ་རྒྱལ་པོ་ཞེས་ཀྱང་གྲགས། །མཁའ་འགྲོའི་མིང་ནི་ཞི་བ་འཚོ། །གར་མཁན་མིང་ནི་འགྱིང་བག་ཅན། །མོན་མོ་གསེར་གྱི་རྣ་ཆ་ཅན། །ཕྱག་ན་མི་རྐང་གླིང་བུ་བསྣམས། །དབུ་ལ་ཐོར་ཚུགས༴། །འགྲེས་སོ། །ཧཱུྃ་ཧཱུྃ། ཡུལ་གྱི་མིང་ནི་རྒྱ་གར་ཡུལ། །ཕོ་བྲང་རི་བོ་ཏ་ལའི་རྩེ། །རཱ་ག་ར་ཏིའི་གནས་མཆོག་ན། །གནས་མཆོག་དམ་པ་ཉམས་སུ་དགའ། །གནས་མཆོག་དམ་པ་མི་དགའ་རུ། །རྗེ་བཙུན་པདྨ་ཐོད་ཕྲེང་དང་། །བུ་མོ་མེ་ཏོག་མནྡཱ་ར། །གྲུབ་པ་ཐོབ་པའི་གནས་ལགས་པས། །མཁའ་འགྲོ་སྡེ་བཞིའི་འཁོར་དང་བཅས། །དབུ་ལ་ཐོར་ཚུགས༴། །

འགྲེས་སོ། །ཧཱུྃ་ཧཱུྃ། ཡུལ་གྱི་མིང་ནི་བལ་པོའི་ཡུལ། །ཡང་ལེ་ཤོད་ཀྱི་གནས་མཆོག་ན། །དབེན་གནས་དམ་པ་ཉམས་སུ་དགའ། །དབེན་གནས་ཉམས་སུ་མི་དགའ་རུ། །རྗེ་བཙུན་པདྨ་འབྱུང་གནས་དང་། །བལ་མོ་ཤཱཀྱ་དེ་ཝ་གཉིས། །གྲུབ་པ་ཐོབ་པའི་གནས་ལགས་པས། །མཁའ་འགྲོ་སྡེ་བཞི་འཁོར་དང་བཅས། །དབུ་ལ་ཐོར་ཚུགས༴། །འགྲེས་སོ། །ཧཱུྃ་ཧཱུྃ། ཡུལ་གྱི་མིང་ནི་བོད་ཀྱི་ཡུལ། །སྟག་ཚང་སེང་གེའི་དགོན་པ་ན། །གནས་མཆོག་དམ་པ་ཉམས་སུ་དགའ། །གནས་མཆོག་ཉམས་སུ་མི་དགའ་རུ། །སློབ་དཔོན་པདྨ་འབྱུང་གནས་དང་། །རྐྱེན་ཟློག་རྡོ་རྗེ་སྨན་གཅིག་མ། །དངོས་གྲུབ་བརྙེས་པའི་གནས་ལགས་པས། །མཁའ་འགྲོ་སྡེ་བཞི་འཁོར་དང་བཅས། །དབུ་ལ་ཐོར་ཚུགས༴། །འགྲེས་སོ། །ཧཱུྃ་ཧཱུྃ། ཡུལ་གྱི་མིང་ནི་རྔ་ཡབ་གླིང་། །ལྷོ་ནུབ་རྔ་ཡབ་གླིང་ཕྲན་ན། །གླིང་ཕྲན་དམ་པ་ཉམས་སུ་དགའ། །གླིང་ཕྲན་ཉམས་སུ་མི་དགའ་རུ། །སློབ་དཔོན་པདྨ་རྒྱལ་པོ་བཞུགས། །སྐྱེ་ཤི་མེད་པའི་སྐུར་བཞེངས་ནས། །སྲིན་པོ་རྣམས་ལ་དམ་ཆོས་སྟོན། །མཁའ་འགྲོ་སྡེ་བཞིས་ཡོངས་སུ་བསྐོར། །གིང་ཆེན་སྡེ་བཞི་གཡོག་ཏུ་ཆས། །ལྷ་སྲིན་སྡེ་བརྒྱད་བྲན་དུ་འཁོར། །གདོང་(༡༣)དམར་སྲིན་པོ་ཐབས་ཀྱིས་འདུལ། །དབུ་ལ་ཐོར་ཚུགས༴། །འགྲེས་སོ། །ཧཱུྃ་ཧཱུྃ། རྗེ་བཙུན་པདྨ་ཐོད་ཕྲེང་རྩལ། །གདུང་བ་དྲག་པོས་གསོལ་བ་འདེབས། །བདག་དང་མོས་པའི་གང་ཟག་རྣམས། །ཐུགས་རྗེས་བྱིན་གྱིས་བརླབ་མཛོད་ལ། །མཆོག་དང་ཐུན་མོང་དངོས་གྲུབ་སྩོལ། །ཐུགས་རྗེས་བུ་བཞིན་བསྐྱང་དུ་གསོལ། །རྫུ་འཕྲུལ་ཆེན་པོས་སྐུ་བསྐྱོད་ལ། །མཁའ་འགྲོ་སྡེ་བཞིའི་འཁོར་དང་སྤྱོན། །གིང་ཆེན་སྡེ་བཞིའི་གཡོག་དང་སྤྱོན། །དཔའ་བོ་དཔའ་མོའི་ཚོགས་སུ་སྤྱོན། །ལྷ་སྲིན་སྡེ་བརྒྱད་བྲན་དང་སྤྱོན། །བགེགས་དང་ལོག་འདྲེན་འདུལ་ཞིང་སྤྱོན། །བྱིན་རླབས་དངོས་གྲུབ་འབེབས་ཤིང་སྤྱོན། །སྐུ་ཡི་བྱིན་གྱིས་བརླབ་ཏུ་གསོལ། །ལུས་ལ་བདེ་ཆེན་སྦར་དུ་གསོལ། །སྐུ་ཡི་ཆག་ཉམས་བསྐང་དུ་གསོལ། །མི་འགྱུར་ཚེ་ཡི་དངོས་གྲུབ་སྩོལ། །གསུང་གི་བྱིན་གྱིས་བརླབ་ཏུ་གསོལ། །ངག་ལ་ནུས་པ་དབྱུང་དུ་གསོལ། །གསུང་གི་ཆག་ཉམས་བསྐང་དུ་གསོལ། །ཚངས་དབྱངས་ཆོས་ཀྱི་དངོས་གྲུབ་སྩོལ། །ཐུགས་ཀྱི་བྱིན་གྱིས་བརླབ་ཏུ་གསོལ། །སེམས་ལ་རྟོགས་པ་བསྐྱེད་དུ་གསོལ། །ཐུགས་ཀྱི་ཆག་ཉམས་བསྐང་དུ་གསོལ། །ཏིང་འཛིན་ཆོས་ཀྱི་དངོས་གྲུབ་སྩོལ། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲཱིང་ཧྲཱིང་ཛ་ཛཿ ཛཿཧཱུྃ་བྃ་ཧོཿཞེས་བརྗོད་པས་སློབ་དཔོན་འཁོར་དང་བཅས་པ་ནམ་མཁའི་དབྱིངས་ཀུན་གང་བར་བྱོན་ནས། གནས་དང་གང་ཟག་ཐམས་ཅད་ལ་བྱིན་གྱིས་བརླབས་པས་ཐམས་ཅད་གཡོ་ཞིང་འཁྲབ་པར་བསམ་མོ། །

བརྡ་ཕྱག་འཚལ་བ་ནི། ཕྱག་འཚལ་ཞིང་ཐལ་མོ་སྦྱར་ལ། ཧོཿ ཆོས་སྐུ་མཉམ་པའི་ཀུན་བཟང་རྡོ་རྗེ་ཡིས། །རྟོགས་པར་བྱ་བའི་ཆོས་ཉིད་ཀུན་བཟང་མོ། །གཉིས་མེད་ངང་ལ་རིགས་ལྔ་ལོངས་སྤྱོད་རྫོགས། །ཆེ་མཆོག་ཐོད་ཕྲེང་རྩལ་ལ་ཕྱག་འཚལ་ལོ། །སྐུ་གསུམ་ཡོན་ཏན་ཕྲིན་ལས་རྫོགས་པའི་ལྷ། །རིག་འཛིན་བཅུ་དྲུག་པདྨ་མཚན་བརྒྱད་དང་། །མཁའ་འགྲོ་སྡེ་ལྡ་དམ་ཅན་སྲུང་མར་བཅས། །སྒོ་བཞིའི་ལས་མཛད་རྣམས་ལ་ཕྱག་འཚལ་ལོ། །འདོད་ཡོན་ལྷ་མོ་མཆོད་པའི་སྤྲིན་འཕྲོ་ཞིང་། །དུར་ཁྲོད་མཆོག་ན་གྲུབ་པ་བརྒྱད་ལ་སོགས། །མཁའ་འགྲོ་ཞིང་སྐྱོང་སྣང་སྲིད་སངས་རྒྱས་ཞིང་། །ཆོས་རྣམས་ཡེ་སངས་རྒྱས་ལ་ཕྱག་འཚལ་ལོ། །པྲ་ཏཱིཙྪ་ཧོཿཞེས་བརྗོད་ནས་རང་གི་ལུས་རྡུལ་སྙེད་དུ་སྤྲུལ་ལ་ཕྱག་བྱའོ། །

གཉིས་མེད་བརྟན་པར་བཞུགས་ནས་འཛབ་ཁང་དབྱེ་བ་ལ། ཡེ་ཤེས་པ་བསྟིམ་པ་དང་། འཕྲོ་འདུ་ཛབ་དབྱངས་བྱ་བ་གཉིས་ལས། དང་པོ་ནི། སྤྱན་དྲངས་པའི་ཡེ་ཤེས་པ་རྣམས་དམ་ཚིག་པའི་དཀྱིལ་འཁོར་དུ་ཇི་ལྟར་བསྐྱེད་པའི་སྐུ་ལ་བརྟན་པར་བཞུགས་སུ་གསོལ་ཏེ། ཐལ་མོ་མེ་ཏོག་དང་བཅས་པས། ཧཱུྃ་ཧཱུྃ། རིན་ཆེན་ཕོ་བྲང་རྒྱ་རེ་ཆེ། །དུར་ཁྲོད་གཞལ་ཡས་བྱིན་རེ་ཆེ། །པདྨ་ཉི་ཟླ་འོད་རེ་གསལ། །རྟོག་མེད་རོ་གདན་བག་(༡༤)རེ་དྲོ། །གནས་མཆོག་དམ་པ་ཉམས་རེ་དགའ། །རྣལ་འབྱོར་ཕོ་མོ་དམ་རེ་གཙང་། །ཏིང་འཛིན་གཞལ་ཡས་དམ་པ་འདིར། །བླ་མ་ཡི་དམ་མཁའ་འགྲོ་རྣམས། །དགྱེས་ཤིང་བརྟན་པར་བཞུགས་སུ་གསོལ། །དངོས་གྲུབ་མཆོག་སྩོལ་གཟི་བྱིན་སྐྱེད། །ༀ་གུ་རུ་ས་མ་ཡ་ཏིཥྛ་ལྷན། ཛཿཧཱུྃ་བྃ་ཧོཿཞེས་བརྗོད་ནས་མེ་ཏོག་གཏོར་བས་ཡེ་ཤེས་པའི་ལྷ་རྣམས་དམ་ཚིག་པའི་དཀྱིལ་འཁོར་སོ་སོ་ལ་ཐིམ་པས་རབ་ཏུ་དགྱེས་ཤིང་གཟི་བརྗིད་འབར་བར་བསམ་མོ། །འཕྲོ་འདུ་སྔགས་ཀྱི་འཛབ་དབྱངས་བྱ་བ་ནི། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས་ལྷ་སོ་སོའི་ཐུགས་ཀའི་ས་བོན་ལ་ཕོག་དུས། ལྷ་སོ་སོའི་ཐུགས་ཀའི་སྔགས་ལས་སྔགས་ཀྱི་འོད་ཟེར་རང་སྒྲ་དང་བཅས་པ་རང་དང་སེམས་ཅན་ཐམས་ཅད་ཀྱི་སྙིང་གར་ཕོག་པས། ལུས་ངག་ཡིད་གསུམ་གྱི་ཉམས་ཆག་དང་སྡིག་སྒྲིབ་ཐམས་ཅད་དག །སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམས་ལ། རང་དང་ལྷའི་སྔགས་ཀྱི་འོད་ཟེར་འཕྲོ་འདུ་གཉིས་དུས་མཉམ་དུ་གསལ་བ་དང་། འཇིག་རྟེན་ཐམས་ཅད་སྔགས་ཀྱི་རང་སྒྲ་དེས་གཡོ་ལྡེག་འཕར་བས། བདུད་དྲེགས་པ་ཅན་ཐམས་ཅད་རེངས་ཤིང་འགྱེལ། དཔའ་བོ་དང་མཁའ་འགྲོ་ཐམས་ཅད་འཁྲབ་ཅིང་རྒྱུག །ལྷ་སྲིན་སྡེ་བརྒྱད་ཐམས་ཅད་དངངས་ཤིང་འདར། གནོད་བྱེད་དགྲ་བགེགས་ཐམས་ཅད་འཐོར་ཞིང་སྟོང་། ལུས་ངག་ཡིད་གསུམ་བདེ་ཞིང་གསལ། དངོས་གྲུབ་རྣམ་གཉིས་ཆར་བཞིན་འབབ། དགའ་བདེའི་ཉམས་འུར་བས་གནས་ཁང་གཟི་བྱིན་འཐིབས་པར་བསམས་ལ། ཧྲཱིཿའཁོར་འདས་བྱང་ཆུབ་སེམས་ཀྱི་ངང་། །དཀྱིལ་འཁོར་ཀུན་ཏུ་བཟང་པོའི་ཞིང་། །ཏིང་འཛིན་ཡངས་པའི་ཕོ་བྲང་ཆེར། །འཛབ་ཀྱི་འཕྲོ་འདུ་གསལ་བར་བྱ། །ༀ་ནི་ཆོས་དབྱིངས་ཡེ་ཤེས་དང་། །བཛྲ་འོད་གསལ་ལོངས་སྤྱོད་རྫོགས། །གུ་རུ་པདྨ་སྤྲུལ་པའི་སྐུ། །སིདྡྷི་དངོས་གྲུབ་ཆར་འབེབས་ཏེ། །ཨཱཿཧཱུྃ་དབྱིངས་དང་ཡེ་ཤེས་ཀྱིས། །ཁམས་གསུམ་ཡོངས་གྲོལ་ཆོས་སྐུར་རྫོགས། །ཨ་བཛྲ་གུ་རུ་པདྨ་སིདྡྷི་ཨཱཿཧཱུྃ། ཞེས་པའམ་ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་ཧ་རི་ནི་ས་ར་ཙ་ཧྲི་ཡ་སིདྡྷི་ཕ་ལ་ཧཱུྃ། ཞེས་ཐམས་ཅད་ཀྱིས་མགྲིན་གཅིག་པས་སྔོན་ལ་རིང་པོ། བར་དུ་འབྲིང་པོ། མཇུག་ཏུ་ཐུང་བས་འཛབ་དབྱངས་སྙན་པར་བླང་ངོ་། །འདི་ཡི་དུས་ན་ལུས་བདེ། ངག་གསལ། སེམས་མི་རྟོག་པའི་ཉམས་འུར་ཏེ། དགའ་བདེ་ཆོས་ཉིད་ཀྱི་རོལ་པར་འཆར་ཞིང་། རྣལ་འབྱོར་ཕོ་མོ་རྣམས་རང་དབང་མེད་པར་འཁྲབ་པ་དང་མཁའ་འགྲོ་འབབ་པར་ངེས་སོ། །སྒྲུབ་པ་རྒྱུན་གྱི་རྣལ་འབྱོར་ཀྱང་འདི་ཁོ་ནའོ། །

མཆོད་གཏོར་དབུལ་ཞིང་བསྟོད་པ་བྱ་བ་ལ། མཆོད་གཏོར་བྱིན་གྱིས་བརླབ་པ། མཆོད་སྐོང་(༡༥)བྱ་བ། ཆེ་བའི་ཡོན་ཏན་ལ་བསྟོད་པ་དང་གསུམ་ལས། དང་པོ་ནི། རང་གི་སྙིང་གའི་ཧཱུྃ་ལས་རྃ་འཕྲོས་མཆོད་གཏོར་ལ་ཕོག །འབག་བཙོག་དང་ཉེས་སྐྱོན་བསྲེགས། ཁྃ་ལས་ཆུས་སྦྱངས་ཡྃ་ལས་རླུང་གིས་གཏོར་ནས། སྟོང་པའི་ངང་ལས་ཏྲཱྃ་ལས་ཕྱི་མཆོད་མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ། གདུགས། རྒྱལ་མཚན་ལ་སོགས་པ་ནམ་མཁའི་དབྱིངས་ཀུན་གང་བ་དང་། ༀ་ཨཱཿཧཱུྃ་ལས་ནང་མཆོད། སྨན་རག །བདུད་རྩི། གཏོར་མའི་དངོས་པོ་རྣམས་ཡེ་ཤེས་ཀྱི་བདུད་རྩི་དམ་པ་ལ། རྣམ་པ་མཆོད་རྫས་སོ་སོར་གསལ་བ་ནམ་མཁའི་དབྱིངས་ཀུན་གང་བར་དམིགས་པ་དང་། གསང་མཆོད་བདེ་ཆེན་ཡེ་ཤེས་ཀྱི་རིགས་མ་དཀྱིལ་འཁོར་སོ་སོའི་ལྷ་ལ་འོས་པ་བདུད་རྩི་དཀར་དམར་གྱི་བདེ་བས་གང་བ་བདེ་ཆེན་སྟོང་པའི་དབྱིངས་ལ་བསྐུལ་བ་དཔག་ཏུ་མེད་པ་དང་། ཁྱད་པར་དུ་སྣོད་བཅུད་སྣང་སྲིད་ཐམས་ཅད་འདོད་ཡོན་ལྔ་དང་གཏོར་མའི་རང་བཞིན་དུ་ཤེས་པས། ༀ་ཨཱཿཧཱུྃ། བཛྲ་པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ༀ་མཧཱ་རཀྟ། མཧཱ་ཨ་མྲ྇་ཏ། མཧཱ་བ་ལིཾ་ཏ་ཨཱཿཧཱུྃ། ཞེས་བརྗོད་ནས་རོལ་མོས་བྱིན་དབབ་བོ། །སོ་སོ་རེ་རེ་བཞིན་རྒྱས་པར་བྱིན་གྱིས་བརླབ་ན་ཚོགས་མཆོད་རྒྱས་པ་ལྟར་ཤེས་པར་བྱའོ། །

མཆོད་སྐོང་བྱ་བ་ལ། ཕྱི་མཆོད། ནང་མཆོད། གསང་མཆོད། བླ་ན་མེད་པའི་མཆོད་པ། བཤགས་སྐོང་དང་ལྔ་ལས། དང་པོ་ནི། ཧཱུྃ། བླ་མ་ཡི་དམ་མཁའ་འགྲོའི་དཀྱིལ་འཁོར་འདིར། །ཏིང་འཛིན་དངོས་བཤམས་དག་པས་མཆོད་པ་ནི། །ལྷ་མིའི་འཇིག་རྟེན་ཀུན་ནས་ཡིད་འོང་བ། །ལྷ་རྫས་དགེ་བ་རིན་ཆེན་རྣམས་ཀྱིས་མཆོད། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་རོལ་མོའི་སྤྲིན། །གདུགས་དང་རྒྱལ་མཚན་བླ་རེ་འཕན་ལ་སོགས། །ཡིད་འོང་ནམ་མཁའི་དབྱིངས་ཀུན་བཀང་སྟེ་མཆོད། །གཟུགས་སྒྲ་དྲི་རོ་རེག་དང་འདོད་ཡོན་ལྔ། །སོ་སོའི་ལྷ་མོ་སྣ་ཚོགས་སྤྲིན་འཕྲོ་མ། །དཔག་ཡས་ནམ་མཁའི་དབྱིངས་ཀུན་བཀང་སྟེ་འབུལ། །ཐུགས་རྗེས་བཞེས་ཏེ་དབང་དང་དངོས་གྲུབ་སྩོལ། །ༀ་བཛྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ནང་མཆོད་ལ། སྨན། རཀྟ། བདུད་རྩི། གཏོར་མ་དང་བཞི་ལས། དང་པོ་ནི། སྨན་ནི་དྲིའི་སྣོད་ནས་མཐེབ་སྲིན་གྱིས་གཏོར་ཞིང་། ༀ། རང་བྱུང་ཡེ་ཤེས་དུག་ལྔ་སེལ་བའི་སྨན། །ཡེ་ཤེས་ལྔ་ལྡན་བདུད་རྩི་ཨ་མྲ྇་ཏ། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ༀ་ཨཱཿཧཱུྃ་སརྦ་པཉྩ་ཨ་མྲ྇་ཏ་ཧཱུྃ་ཧྲཱིཿཋཱ། རཀྟ་ནི། ཡིད་ཀྱིས་ལྷ་སོ་སོ་ལ་མཆོད་ཅིང་བྷནྡྷ་ཚར་གསུམ་གྱི་ཕྱག་(༡༦)རྒྱས། ཧྲཱིཿབྷནྡྷ་ཡེ་ཤེས་འབར་བའི་གཞལ་ཡས་སུ། །རཀྟ་དམར་གྱི་ཨརྒྷཾ་རྒྱ་མཚོར་བསྐྱིལ། །སྐུ་ལྔ་ཡེ་ཤེས་གྲུབ་པའི་རྫས་མཆོག་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ༀ་ཨཱཿཧཱུྃ་མཧཱ་རཀྟ་པཱུ་ཛ་ལ་ཁཱ་ཧི། བདུད་རྩི་ནི། ནང་མཆོད་ནས་འཐོར་ཞིང་། ཛ་གད་དཔའ་བོ་འབྲུ་བཅུད་ཕུན་སུམ་ཚོགས། །བླ་མེད་སྒྲུབ་རྫས་མཆོད་པ་དམ་པ་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ༀ་ཨཱཿཧཱུྃ་སརྦ་པཉྩ་ཨ་མྲ྇་ཏ་ཧཱུྃ་ཧྲཱིཿཐཱ། གཏོར་མ་ལ། བསྡུས་པ་སྤྱིར་འབུལ་བ་དང་། མཆོད་ཚོགས་དང་བཅས་ཏེ་བྱེ་བྲག་ཏུ་འབུལ་བ་གཉིས་ལས། དང་པོ་ནི། ༀ། གཞོང་པ་རྣམ་དག་ཆོས་དབྱིངས་ནམ་མཁའི་རྒྱར། །དཔལ་གྱི་གཏོར་མ་ཡེ་ཤེས་རྣམ་ལྔས་བཀང་། །འདོད་ཡོན་ལྔ་ལྡན་བརྗིད་ལྡན་འགྱིང་བ་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ༀ་ཨཱཿཧཱུྃ་མཧཱ་བ་ལིཾ་ཏ་ཏེ་ཛོ་བ་ལིཾ་ཏ་སརྦ་བཻ་ར་ཡོ་གི་ནཱི་ཨཱཿཧཱུྃ། བྱེ་བྲག་ཏུ་འབུལ་བ་ནི། ཧཱུྃ། རྗེ་བཙུན་པདྨ་གཤེགས་སུ་གསོལ། །གདུང་བ་དྲག་པོས་གསོལ་བ་འདེབས། །འདོད་ཡོན་ལྔ་ཡི་མཆོད་པ་འབུལ། །རཀྟ་དམར་གྱི་མཆོད་པ་འབུལ། །བ་ལིཾ་རྒྱན་གྱི་མཆོད་པ་འབུལ། །ཏིང་འཛིན་རྩེ་གཅིག་མཆོད་པ་འབུལ། །མཁའ་འགྲོའི་ཚོགས་རྣམས་མཆོད་པ་བཞེས། །གོང་གི་ཚོགས་རྣམས་མཆོད་པ་བཞེས། །དཔའ་བོའི་ཚོགས་རྣམས་མཆོད་པ་བཞེས། །དཔའ་མོའི་ཚོགས་རྣམས་མཆོད་པ་བཞེས། །སྲུང་མའི་ཚོགས་རྣམས་མཆོད་པ་བཞེས། །ཕྱི་ནང་གསང་བའི་མཆོད་པ་བཞེས། །ཏིང་འཛིན་རོལ་མོའི་མཆོད་པ་བཞེས། །ཆོས་ཉིད་བདེ་ཆེན་མཆོད་པ་བཞེས། །འདོད་ཡོན་རྒྱན་གྱི་མཆོད་པ་བཞེས། །སྤྲོས་དགའ་གནས་ཀྱི་མཆོད་པ་བཞེས། །རྣལ་འབྱོར་ཕོ་མོ་དམ་རེ་གཙང་། །མཁའ་འགྲོའི་ཚོགས་རྣམས་དང་རེ་སྤྲོ། །དུར་ཁྲོད་གནས་འདི་ཉམས་རེ་དགའ། །ཞིང་ཆེན་བླ་རེ་རྒྱན་དང་ལྡན། །གསུར་ཆེན་དུད་པ་དྲི་རེ་ཞིམ། །བམ་གྱི་ཁོག་སྟོད་བཅད་འཕྲོར་ལྡན། །ཤ་སྣ་སྙིང་སྣ་བསམ་མི་ཁྱབ། །བླ་མ་ཡི་དམ་མཁའ་འགྲོ་དང་། །བདེ་གཤེགས་རྒྱལ་བ་རྒྱ་མཚོ་མཆོད། །སྣང་བ་སྣོད་ཀྱི་འཇིག་རྟེན་གཏོར་གཞོང་དུ། །སྲིད་པ་བཅུད་ཀྱི་སེམས་ཅན་གཏོར་མར་སྦྱར། །དཔལ་གྱི་གཏོར་མ་བརྗིད་ལྡན་འགྱིང་བ་འདི། །རི་རབ་ལྷུན་པོ་བས་ཀྱང་དཔངས་རེ་མཐོ། །མ་མོའི་གཏོར་མ་མཐེབ་ཀྱུས་བསྐོར་བ་འདི། །རི་རབ་གླིང་བཞི་བས་ཀྱང་བཀོད་རེ་ལེགས། །དཀར་གྱི་ཐིག་གདབ་དམར་གྱི་གུར་ཕུབ་པ། །གསེར་ཀྱི་རི་བདུན་བས་ཀྱང་བརྗིད་རེ་ཆེ། །རཀྟ་དམར་གྱི་ཨརྒྷཾ་སྦྲེངས་པ་འདི། །རྒྱ་མཚོའི་མཆིང་རྣམས་བས་ཀྱང་རྒྱ་རེ་ཆེ། །བདུད་རྩི་སྨན་གྱི་མཆོད་(༡༧)པ་སྦྲེངས་པ་འདི། །ལྷ་ཡི་ཞལ་ཟས་བས་ཀྱང་རོ་རེ་བདའ། །དཀར་རྩི་དམར་རྩི་ཤ་ཆེན་དྲི་ཆེན་དང་། །དྲི་ཆུ་མཆོད་པའི་རྫས་ཏེ་བདུད་རྩི་ལྔ། །གླང་ཆེན་ཁྱི་དང་རྨ་བྱ་རྟ་དང་ནི། །མཆོག་ཆེན་མི་ལ་སོགས་ཏེ་ཤ་སྣ་ལྔ། །མཧཱ་མཱཾ་ས་ལ་སོགས་ཤ་སྣ་སྟོང་། །མཧཱ་རཀྟ་ལ་སོགས་ཁྲག་སྣ་སྟོང་། །མཧཱ་ཙིཏྟ་ལ་སོགས་སྙིང་སྣ་སྟོང་། །བ་སུ་ཏ་དང་ནང་ཁྲོལ་རྣམ་པ་ལྔ། །དབང་པོ་ལྔ་དང་གོ་རོ་ཙ་ན་དང་། །ཤིང་ཏོག་མེ་ཏོག་འབྲུ་སྣ་སྨན་རྣམས་དང་། །མངར་དང་ཁུར་བ་ཐུག་པའི་བྱེ་བྲག་དང་། །མར་ཐུད་ཕྲུམ་དང་ཞོ་དང་འོ་མ་དང་། །རྩི་དང་ཙ་རུ་ཚིལ་ཆེན་གོ་སྙོད་དང་། །ལྒ་དང་ལན་ཚ་སྤོད་ཀྱི་རིགས་རྣམས་དང་། །རི་སྒོག་ཀླུང་སྒོག་ཤ་བལ་སྣ་ཚོགས་དང་། །རམ་བུ་རུག་པ་ཤ་མོ་སྣ་ཚོགས་དང་། །བཟའ་དང་བཅའ་དང་བཏུང་བའི་བྱེ་བྲག་དང་། །གཟུགས་སྒྲ་དྲི་རོ་རེག་བྱ་ཆོས་ལ་སོགས། །འདོད་ཡོན་ལྔ་ཡི་མཆོད་པ་སྣ་ཚོགས་པ། །ཐོགས་མེད་བློ་ཡིས་ཐམས་ཅད་ཀུན་བླངས་ཏེ། །ཏིང་འཛིན་དགོངས་བརྒྱུད་དག་པས་བྱིན་རླབས་ཏེ། །བདུད་རྩིར་གྱུར་པའི་གཏོར་མ་རྒྱ་ཆེན་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །རྡོ་རྗེ་སློབ་དཔོན་ཐུགས་དམ་བསྐང་གྱུར་ཅིག །མཁའ་འགྲོ་སྡེ་བཞིའི་ཐུགས་དམ་བསྐང་གྱུར་ཅིག །ཡི་དམ་ལྷ་ཚོགས་ཐུགས་དམ་བསྐང་གྱུར་ཅིག །དམ་ཅན་སྲུང་མ་ཐུགས་དམ་བསྐང་གྱུར་ཅིག །མཆོད་པར་འོས་པའི་ཐུགས་དམ་བསྐང་གྱུར་ཅིག །བྷནྡྷ་རཀྟས་བཀང་བ་ཡང་། །མ་དང་མཁའ་འགྲོ་བརྟེན་ཕྱིར་འབུལ། །ཚིལ་ཆེན་དུད་པ་བཏང་བ་ཡང་། །མ་དང་མཁའ་འགྲོ་བརྟེན་ཕྱིར་འབུལ། །རཀྟའི་རྒྱ་མཚོ་འཁྱིལ་བ་ཡང་། །མ་དང་མཁའ་འགྲོ་བརྟེན་ཕྱིར་འབུལ། །ཞུན་ཆེན་མར་མེ་གཏམས་པ་ཡང་། །མ་དང་མཁའ་འགྲོ་བརྟེན་ཕྱིར་འབུལ། །དམ་རྫས་གཏོར་མ་བཤམས་པ་ཡང་། །མ་དང་མཁའ་འགྲོ་བརྟེན་ཕྱིར་འབུལ། །ཧཱུྃ་ཧཱུྃ། ཡེ་ཤེས་མཁའ་འགྲོ་བགྱི་བ་དེ། །ཆོས་རྣམས་ཆོས་ཉིད་མ་ལགས་སམ། །འཁོར་འདས་ཐམས་ཅད་མཆོད་པ་འབུལ། །རྡོ་རྗེ་མཁའ་འགྲོ་སྐད་པ་དེ། །སེམས་ཀྱི་སེམས་ཉིད་མ་ལགས་སམ། །སྣང་སྲིད་ཐམས་ཅད་མཆོད་པར་འབུལ། །རིན་ཆེན་མཁའ་འགྲོ་སྐད་པ་དེ། །སྣ་ཚོགས་སྤྲུལ་སྐུ་མ་ལགས་སམ། །གཟུང་འཛིན་བྲལ་བའི་མཆོད་པ་འབུལ། །པདྨའི་མཁའ་འགྲོ་སྐད་པ་དེ། །ཆགས་མེད་སྐྱོན་བྲལ་མ་ལགས་སམ། །མཉམ་ཉིད་རྫོགས་པའི་མཆོད་པ་འབུལ། །ལས་ཀྱི་མཁའ་འགྲོ་སྐད་པ་དེ། །ལས་ཀྱི་ཕྱག་རྒྱ་མ་ལགས་སམ། །ཕུང་པོ་ལྔ་ཡི་མཆོད་པ་འབུལ། །ཤ་ཟ་མཁའ་འགྲོ་སྐད་པ་དེ། །གཏོར་ལེན་ཕོ་མོ་མ་ལགས་སམ། །ཤ་ཁྲག་དམར་གྱི་མཆོད་པ་འབུལ། །ༀ་མཧཱ་བ་ལིཾ་ཏ་ཏེ་ཛོ་བ་ལིངྟ་པཱུ་ཛ་ལ་ཁཱ་ཧི།

གསང་བ་བྱང་ཆུབ་སེམས་ཀྱི་མཆོད་(༡༨)པ་ནི། ཡུམ་གྱི་དྭངས་མ་ལ་དམིགས་ཏེ་ཐལ་མོ་མཉེ་བས། །ཨཱཿ རྡོ་རྗེ་པདྨ་ལས་བྱུང་བ། །ཐབས་དང་ཤེས་རབ་བྱང་ཆུབ་སེམས། །བདེ་ཆེན་ཡེ་ཤེས་རྒྱལ་པོ་ཆེ། །ཡབ་ཡུམ་མཁའ་གསང་བདེ་བས་མཆོད། །ༀ་ཨཱཿཧཱུྃ་བོ་དྷི་ཙིཏྟ་གུ་ཧྱ་ཛྙ་ན་མཧཱ་པཱུ་ཛ་ཨཱཿཧཱུྃ། བླ་ན་མེད་པའི་མཆོད་པ་ནི། །ལྟ་དགོངས་ཟབ་མོ་གསལ་བཏབ་སྟེ། །ཧཱུྃ། ཆོས་རྣམས་རྣམ་དག་རྫོགས་པ་ཆེན་པོའི་ངང་། །མི་གཡོ་བྱང་ཆུབ་སྙིང་པོའི་མཁའ་ཀློང་དུ། །སྣང་སྲིད་འཁོར་འདས་ཆོས་རྣམས་ཡེ་ནས་མཆོད། །བཟང་ངན་བླང་དོར་མེད་པའི་དབྱིངས་སུ་བཞེས། །མཐའ་དང་དབུས་མེད་རིག་པ་བྱང་ཆུབ་སེམས། །མི་འགྱུར་ལྷུན་གྲུབ་ལྟ་བའི་རྒྱལ་པོ་མཆོག །ཀུན་མཉམ་ཡངས་པ་ཆེན་པོའི་ངང་དུ་མཆོད། །ཕྱོགས་དང་རིས་མེད་སྤྲོས་དང་བྲལ་བར་བཞེས། །འོད་གསལ་དྲི་མེད་ངང་དྭངས་བྱང་ཆུབ་སེམས། །རྣམ་པར་མི་རྟོག་སྒོམ་པའི་རྒྱལ་པོ་མཆོག །བྱིང་རྒོད་ཡེངས་པ་མེད་པའི་ཀློང་དུ་མཆོད། །རང་བྱུང་གསལ་འགྲིབ་མེད་པའི་ངང་དུ་བཞེས། །མ་འགག་རང་ཤར་རིག་པ་བྱང་ཆུབ་སེམས། །ཤར་གྲོལ་རིས་མེད་སྤྱོད་པའི་རྒྱལ་པོ་མཆོག །སྒྱུ་མ་རང་སྣང་སྟོང་གསལ་ཀློང་དུ་མཆོད། །སྣང་སེམས་རང་གྲོལ་རིག་པའི་ངང་དུ་བཞེས། །ཡེ་ནས་ལྷུན་རྫོགས་ཆོས་ཉིད་བྱང་ཆུབ་སེམས། །རང་རིག་འོད་གསལ་འབྲས་བུའི་རྒྱལ་པོ་མཆོག །རང་ཆས་ཐག་ཆོད་གཞི་གྲོལ་ཀློང་དུ་མཆོད། །གདོད་མའི་ཆོས་ཉིད་ཀུན་བཟང་ཀློང་དུ་བཞེས། །སྣང་སྲིད་ཆོས་རྣམས་སྣང་མེད་བྱང་ཆུབ་སེམས། །ཡེ་སྟོང་ཐིག་ལེ་ཆེན་པོར་རྣམ་དག་པས། །ཕྱི་དང་ནང་མེད་རྫོགས་པ་ཆེན་པོའི་ངང་། །ཆོས་ཉིད་དོན་གྱི་མཆོད་པ་བཞེས་སུ་གསོལ། །ༀ་ཨཱཿཧཱུྃ་མཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།

བཤགས་སྐོང་ནི། ཐལ་མོ་སྦྱར་ཏེ། ༀ། གདོད་ནས་རྣམ་དག་ཀུན་ཏུ་བཟང་པོའི་གནས། །ཡོན་ཏན་འབུམ་ཕྲག་ཡངས་པའི་དཀྱིལ་འཁོར་ནས། །བླ་མ་ཡི་དམ་མཁའ་འགྲོའི་ཚོགས་རྣམས་ཀུན། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །ཐམས་ཅད་ལྷུན་གྲུབ་བདེ་ཆེན་སངས་རྒྱས་ཞིང་། །མཁའ་ལྟར་རྣམ་དག་སྤྲོས་དང་བྲལ་བ་ལ། །མ་རིག་དབང་གིས་ང་དང་བདག་ཏུ་བཟུང་། །ཆོས་ཉིད་དོན་དང་འགལ་བ་མཐོལ་ལོ་བཤགས། །རང་སྣང་ལྷུན་གྲུབ་རིག་པའི་གཞལ་ཡས་འདིར། །ཏིང་འཛིན་དངོས་སུ་བཤམས་པའི་འབྱོར་ཚོགས་ཀྱིས། །བླ་མ་ཡི་དམ་མཁའ་འགྲོའི་ཐུགས་དམ་བསྐང་། །ཉམས་ཆག་བསྐངས་ནས་དངོས་གྲུབ་སྩལ་དུ་གསོལ། །བདག་མེད་སྤྲོས་བྲལ་གསང་བའི་དཀྱིལ་འཁོར་དུ། །རྡོ་རྗེ་མཆོག་གསུམ་བསྒྲུབ་པར་དམ་མནོས་ཀྱང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྩ་བ་ཡན་ལག་ཉམས་ཆག་མཐོལ་ལོ་བཤགས། །ཞིང་གྱུར་དམ་པ་མཆོག་གསུམ་(༡༩)སྤྱན་ལམ་དུ། །ཕྱི་ནང་གསང་བའི་ཚོགས་མཆོད་རྒྱ་མཚོ་བཤམས། །ད་ལྟ་རྒྱུ་མཆོག་དམ་པ་འདིས་བསྐང་བས། །ཉམས་ཆག་བསྐངས་ནས་དངོས་གྲུབ་སྩལ་དུ་གསོལ། །མི་གཡོ་རྡོ་རྗེ་སྙིང་པོའི་ཕོ་བྲང་དུ། །ཀུན་བཟང་མཆོད་སྤྲིན་རྒྱ་མཚོས་མཆོད་བྱས་ཏེ། །གཡར་དམ་བླངས་ཀྱང་དེ་ལྟར་རྔོ་མ་ཐོགས། །ཕྱི་ནང་མཆོད་ཚོགས་ཆུང་བ་མཐོལ་ལོ་བཤགས། །རབ་འབྱམས་ཡོན་ཏན་རྒྱ་མཚོའི་དཀྱིལ་འཁོར་དུ། །བསྟོད་དབྱངས་མཆོད་སྤྲིན་རྒྱ་མཚོའི་སྐོང་རྫས་འདིས། །རྡོ་རྗེ་རྒྱལ་པོ་སྒྲུབ་པའི་དཀྱིལ་འཁོར་དུ། །ཉམས་ཆག་བསྐངས་ནས་དངོས་གྲུབ་སྩལ་དུ་གསོལ། །གསང་སྔགས་རྡོ་རྗེ་མཆོག་གསུམ་དཀྱིལ་འཁོར་འདིར། །དབང་དང་དམ་ཚིག་འཇུག་སྒོ་གཅིག་པ་ལ། །བླ་མ་སྨོད་ཅིང་མཆེད་ལ་ཁྲོས་པ་དང་། །གསང་སྒོ་འཆོལ་བའི་ཉེས་ཀུན་མཐོལ་ལོ་བཤགས། །དཀྱིལ་འཁོར་མཆོག་གསུམ་ཚུལ་བཞིན་མཆོད་བྱས་ཏེ། །ཏིང་འཛིན་བསྙེན་སྒྲུབ་དམ་པ་བཅས་པ་འདིས། །བླ་མ་ཡི་དམ་ཐུགས་དམ་བསྐངས་གྱུར་ནས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །དད་ལྡན་བསོད་ནམས་བྱ་བའི་དངོས་པོ་དང་། །ཚོགས་མཆོད་མཆོད་སྦྱིན་རྫས་ལ་སྤྱད་གྱུར་པས། །འདྲེ་བཀྲེན་ཡི་དྭགས་སྐྱེ་བའི་རྒྱུར་གྱུར་པ། །འགའ་འཁྲུལ་ཉམས་ཆག་ཐམས་ཅད་མཐོལ་ལོ་བཤགས། །རྒྱལ་མཆོད་སེམས་ཅན་ཡུལ་ལ་སྦྱིན་བྱས་ཤིང་། །བསོད་ནམས་བྱ་བའི་ལམ་དང་འབྲེལ་གྱུར་པ། །བྱང་ཆུབ་སྙིང་པོའི་ལམ་དུ་རབ་བསྐང་བས། །ཉམས་ཆག་བསྐངས་ནས་དངོས་གྲུབ་སྩལ་དུ་གསོལ། །དུས་རྣམས་ཀུན་ཏུ་བསྒྲུབ་པར་དམ་བཅས་ཀྱང་། །ལེ་ལོ་རྐྱེན་དབང་ཚེ་འདིའི་དབང་སོང་བས། །བསྙེན་སྒྲུབ་གཡེལ་ཞིང་ཐུན་བཞི་དུས་ལས་ཡོལ། །སྒྲུབ་པའི་དམ་ཚིག་ཉམས་པ་མཐོལ་ལོ་བཤགས། །ཆོས་ཉིད་བྱང་ཆུབ་བརྡལ་བའི་མཁའ་དབྱིངས་སུ། །བསྐྱེད་རྫོགས་རང་བཞིན་མོས་པས་ཅི་ནུས་སྤྱད། །རྣམ་གསུམ་དགེ་ལ་བསྐུལ་ཞིང་བསྐང་བ་ཡིས། །ཉམས་ཆག་བསྐངས་ནས་དངོས་གྲུབ་སྩལ་དུ་གསོལ། །ཆོས་རྣམས་རང་བཞིན་དག་པའི་དཀྱིལ་འཁོར་དུ། །སྣང་གྲགས་དྲན་རིག་སྐུ་གསུང་ཐུགས་ཉིད་དང་། །ཤེས་དང་མི་སྤང་སྤྱད་དང་དང་དུ་བླང་། །ཉི་ཤུ་རྩ་བརྒྱད་ཉམས་ཆག་མཐོལ་ལོ་བཤགས། །ཕྱི་ནང་རྟོག་པ་དག་པའི་བདག་ཉིད་ཅན། །ལྟ་སྒོམ་སྤྱོད་འབྲས་ཉམས་སུ་བླངས་སོ་འཚལ། །ཉིན་མཚན་ཏིང་འཛིན་དགོངས་ཀློང་བསྐང་བ་ཡིས། །ཉམས་ཆག་བསྐངས་ནས་དངོས་གྲུབ་སྩལ་དུ་གསོལ། །འོད་གསལ་ཐིག་ལེ་ཆེན་པོའི་དཀྱིལ་འཁོར་དུ། །ངང་དྭངས་རང་བཞིན་བདག་ཉིད་མི་འབྲལ་བས། །དགོངས་སྤྱོད་རྒྱ་མཚོ་འདུ་འབྲལ་མེད་རྒྱུ་ལས། །བྱིང་རྒོད་སྡིག་ལ་འཆོལ་བ་མཐོལ་ལོ་བཤགས། །ཆོས་རྣམས་རང་བཞིན་རྫོགས་པ་ཆེན་པོའི་ངང་། །འཁོར་འདས་མིང་ཙམ་སྒྱུ་མ་རང་ཤེས་ལ། །རང་གྲོལ་(༢༠)གདོད་མའི་དབྱིངས་སུ་བསྐངས་པ་དེས། །ཁམས་གསུམ་ཡོངས་གྲོལ་ཀུན་བཟང་དངོས་གྲུབ་སྩོལ། །

ཧོཿ གསང་སྔགས་བླ་མེད་མཆོག་གི་དཀྱིལ་འཁོར་ཆེ། །རྡོ་རྗེ་ཐོད་ཕྲེང་རིགས་ལྔའི་དཀྱིལ་འཁོར་གཙོ། །འདོད་ཡོན་ལྔ་དང་ཡེ་ཤེས་རིགས་ལྔས་བསྐང་། །བསམ་རྫོགས་འཁོར་འདས་བདེ་ཆེན་དངོས་གྲུབ་སྩོལ། །ཚོགས་བརྒྱད་རྣམ་ཤེས་རྣམ་དག་བདེ་གཤེགས་བརྒྱད། །ཡོན་ཏན་མཆོག་བརྒྱད་ལྷུན་གྱིས་གྲུབ་དབྱིངས་སུ། །ཏིང་འཛིན་དག་པ་ཡེ་ཤེས་བརྒྱད་ཀྱིས་བསྐང་། །འཕགས་པའི་ཡན་ལག་བརྒྱད་ཀྱི་དངོས་གྲུབ་སྩོལ། །རྡོ་རྗེ་རྒྱལ་པོ་ཡོན་ཏན་འབྱུང་བའི་གནས། །རིག་འཛིན་བཅུ་དྲུག་ས་ཆེན་རྫོགས་པའི་དཔལ། །སྟོང་ཉིད་ས་ཡི་ཡེ་ཤེས་བཅུ་དྲུག་བསྐང་། །མཚན་རྫོགས་རྡོ་རྗེ་འཆང་གི་དངོས་གྲུབ་སྩོལ། །དབང་ཤེས་རྣམ་དག་རིགས་ལྔའི་མཁའ་འགྲོ་གིང་། །རྣམ་བཅུ་དབང་ལྡན་ཕ་རོལ་ཕྱིན་བཅུས་བསྐང་། །ཡེ་ཤེས་རྣམ་བཅུ་ཏིང་འཛིན་དག་པའི་དབྱིངས། །རང་གཞན་དོན་གཉིས་མཐར་ཕྱིན་དངོས་གྲུབ་སྩོལ། །རྟག་ཆད་མཐར་ཕྱིན་ཡེ་ཤེས་སྒོ་སྐྱོང་བཞི། །ཚད་མེད་བཞི་ལྡན་རང་བྱུང་འོད་གསལ་བསྐང་། །མཐའ་བཞི་ལས་གྲོལ་སྤྲོས་བྲལ་བྱང་ཆུབ་སེམས། །ཆོས་སྐུ་ཕྱག་རྒྱ་ཆེན་པོའི་དངོས་གྲུབ་སྩོལ། །འདོད་ཡོན་ལྷ་མོ་མཆོད་པའི་སྤྲིན་འཕྲོ་བ། །དུར་ཁྲོད་གནས་བརྒྱད་ཞིང་སྐྱོང་འཁོར་དང་བཅས། །སྣང་སྲིད་འདོད་ཡོན་མཆོད་སྤྲིན་རྒྱ་མཚོས་བསྐང་། །འཁོར་འདས་དབྱིངས་སུ་རྫོགས་པའི་དངོས་གྲུབ་སྩོལ། །རྡོ་རྗེ་མཆོག་གསུམ་སྒྲུབ་པའི་དཀྱིལ་འཁོར་དུ། །ཚོགས་གཉིས་བསྐང་ཞིང་ཉམས་ཆག་བཤགས་པ་ཡིས། །རིག་འཛིན་ས་བཞི་ལྷུན་གྱིས་གྲུབ་གྱུར་ཏེ། །མཆོག་དང་ཐུན་མོང་དངོས་གྲུབ་ཆར་ཆེན་ཕོབ། །ༀ་ཨཱཿཧཱུྃ་གུ་རུ་པདྨ་སིདྡྷི་ས་མ་ཡ་ཧོཿ།

ཞེས་བརྗོད་དངོས་གྲུབ་ཐམས་ཅད་ཀྱི་རྩ་བ་སྟེ། རིག་འཛིན་འདུས་པ་སྤྱིའི་རྒྱུད་ཀྱི་སྐོང་བཤགས་ལས་བསྡུས་པའོ། །ཆེ་བའི་ཡོན་ཏན་ལ་བསྟོད་པ་ནི། ཧཱུྃ་ཧཱུྃ། སྐྱེ་འཆི་གཉིས་སྤངས་རྡོ་རྗེ་ལྟ་བུའི་སྐུ། །ཚངས་པའི་གསུང་དབྱངས་ཆོས་ཀྱི་སྒྲ་ཆེན་སྒྲོགས། །མི་འགྱུར་ལྷུན་གྲུབ་བདེ་བ་ཆེན་པོའི་ཐུགས། །ཡོན་ཏན་ཕྲིན་ལས་རྫོགས་པའི་རྗེ་ལ་བསྟོད། །སྐུ་ནི་མི་འགྱུར་ཀུན་ཏུ་བཟང་པོའི་སྐུ། །གསུང་ནི་མི་འགག་མཉམ་ཉིད་རིག་པའི་གསུང་། །ཐུགས་ནི་མི་གཡོ་སྨྲ་བསམ་བརྗོད་ལས་འདས། །རང་བྱུང་པདྨ་རྒྱལ་ལ་ཕྱག་འཚལ་བསྟོད། །ཞི་བའི་ལས་མཛད་རྡོ་རྗེ་ཐོད་ཕྲེང་རྩལ། །རྒྱས་པའི་ལས་མཛད་རཏྣ་ཐོད་ཕྲེང་རྩལ། །དབང་གི་ལས་མཛད་པདྨ་ཐོད་ཕྲེང་རྩལ། །དྲག་པོའི་ལས་མཛད་ཀརྨ་ཐོད་ཕྲེང་རྩལ། །ཐམས་ཅད་ལྷུན་གྲུབ་བུདྡྷ་ཐོད་ཕྲེང་རྩལ། །ཕྲིན་ལས་རྫོགས་པའི་རྗེ་ལ་ཕྱག་འཚལ་བསྟོད། །ཧྲཱིཿ མ་ཆགས་སྐྱོན་གྱི་མ་གོས་པ། །པདྨ་འབྱུང་གནས་སྐུ་ལ་བསྟོད། །ཐམས་ཅད་དབང་དུ་སྡུད་མཛད་པ། །པདྨ་རྒྱལ་(༢༡)པོའི་སྐུ་ལ་བསྟོད། །ལོག་འདྲེན་གདུག་པ་འདུལ་མཛད་པ། །ཤཱཀྱ་སེང་གེའི་སྐུ་ལ་བསྟོད། །ཤེས་བྱ་ཀུན་ལ་མ་རྨོངས་པ། །བློ་ལྡན་མཆོག་སྲེད་སྐུ་ལ་བསྟོད། །རྨོངས་པའི་མུན་པ་སེལ་མཛད་པ། །ཉི་མ་འོད་ཟེར་སྐུ་ལ་བསྟོད། །བདུད་དང་མུ་སྟེགས་ཚར་གཅོད་པ། །སེང་གེ་སྒྲ་སྒྲོགས་སྐུ་ལ་བསྟོད། །ཡོན་ཏན་ཐམས་ཅད་རབ་རྫོགས་པ། །པདྨ་སཾ་བྷའི་སྐུ་ལ་བསྟོད། །ལྷ་སྲིན་སྡེ་བརྒྱད་འདུལ་མཛད་པ། །རྡོ་རྗེ་གྲོ་ལོད་སྐུ་ལ་བསྟོད། །ཡེ་ཤེས་ལྔ་ཡི་ངོ་བོ་ཉིད། །མཁའ་འགྲོ་སྡེ་ལྔའི་སྐུ་ལ་བསྟོད། །ཆོས་ཉིད་དོན་གྱི་མཁའ་དབྱིངས་ལ། །རིག་པའི་ཡེ་ཤེས་ཤུགས་ཀྱིས་འགྲོ། །མཁའ་འགྲོ་མ་སྲིང་དཔག་མེད་དང་། །དམ་ཅན་རྒྱ་མཚོའི་ཚོགས་ལ་བསྟོད། །དབྱིངས་དང་ཡེ་ཤེས་དཀྱིལ་འཁོར་བདག །སྒོ་སྐྱོང་བཞི་དང་ལྷ་མོ་ལྔ། །དུར་ཁྲོད་ཞིང་སྐྱོང་མཁའ་འགྲོར་བཅས། །རྡོ་རྗེ་དམ་ཅན་ཚོགས་ལ་བསྟོད། །སྣང་བ་ཡབ་ལ་སྟོང་པ་ཡུམ། །འཁོར་འདས་བྱང་ཆུབ་སེམས་ལ་བསྟོད། །ཐམས་ཅད་ལྷུན་མཉམ་བརྗོད་ལས་འདས། །སྤྲོས་དང་བྲལ་བའི་ངང་དུ་བསྟོད། །ཅེས་བརྗོད་དོ། །

ཚོགས་ལ་རོལ་ཞིང་དབང་བསྐུར་བ་ལ། ཚོགས་བྱ་བ་དང་། དབང་བསྐུར་བ་གཉིས་ལས། དང་པོ་ལའང་ཚོགས་བྱིན་གྱིས་བརླབ་པ། དབུལ་བ། རོལ་པ་དང་གསུམ་ལས། བྱིན་གྱིས་བརླབ་པ་ནི། རང་གི་སྙིང་ག་ནས་རྃ་ཡྃ་ཁྃ་འཕྲོས་གཏོར་ཚོགས་ལ་ཕོག །རྃ་གྱིས་བསྲེགས། ཁྃ་གིས་སྦྱངས། ཡྃ་གིས་གཏོར། སྟོང་པའི་ངང་ལས་ྃ་ལས་བྷནྡྷའི་སྣོད་སྟོང་གསུམ་ཙམ་དུ་ཚོགས་ཀྱི་ཡོ་བྱད་རྣམས་བཟའ་བཏུང་བཟང་རྒུ་རི་རབ་ལ་རྒྱ་མཚོས་བསྐོར་བ་དང་མཉམ་པ་བསྐྱེད་པའི་ནང་དུ་ༀ་ཨཱཿཧཱུྃ་གསུམ་ལས་འོད་འཕྲོས། ཕྱོགས་བཅུའི་སྣོད་བཅུད་དང་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་དངོས་གྲུབ་བདུད་རྩིའི་ཆར་དུ་ཕབ་བས་ཁེངས་ཏེ། སྐུའི་ལྷ་མོ་དཀར་མོ། གསུང་གི་ལྷ་མོ་དམར་མོ། ཐུགས་ཀྱི་ལྷ་མོ་མཐིང་གའི་ཚོགས་དཔག་ཏུ་མེད་པ་འཕྲོ་ཞིང་འདུ་བར་བསམས་ལ། ཧཱུྃ། རང་ཉིད་ལྷ་ཡི་ཐུགས་ཀ་ནས། །ཚོགས་འཁོར་སྦྱང་ཕྱིར་ཡི་གེ་སྤྲོ། །རྃ་ལས་མེ་འབར་ཐམས་ཅད་བསྲེགས། །ཁྃ་ལས་ཆུ་བྱུང་དག་པར་སྦྱངས། །ཡྃ་ལས་རླུང་བྱུང་གཏོར་ཞིང་སྟོང་། །ྃ་ལས་བྷནྡྷའི་གཞལ་ཡས་ཁང་། །བདུད་རྩིར་གྱུར་ནས་ལྷ་ཚོགས་འཕྲོ། །ཚོགས་མཆོད་ཡིད་བཞིན་སྤྲིན་དུ་གྱུར། །ༀ་ཨཱཿཧཱུྃ་མཧཱ་ག་ཎ་ཙཀྲ་ཏེ་ཛོ་བ་ལིཾ་ཏ་བ་ལ་བ་ཏི་གུ་ཧྱ་ཧྲཱི་ཤྭ་ས་མ་ཡེ་ཧཱུྃ་ཧྲཱིཿཐཱ། འབུལ་བ་ནི། ཚོགས་ལས་སྐུ་གསུང་ཐུགས་ཀྱི་ལྷ་མོ་སྤྲོས་ཏེ། བླ་མ་ཡི་དམ་མཁའ་འགྲོ་ཐམས་ཅད་མཆོད་པར་བསམས་ལ། ཧཱུྃ། བླ་མ་རིག་འཛིན་མ་ལུས་དང་། །ཡི་དམ་རྒྱལ་བ་ཞི་ཁྲོ་དང་། །བཅོམ་ལྡན་རྡོ་རྗེ་རྣལ་འབྱོར་མ། །རིགས་བཞིའི་མཁའ་འགྲོ་དཔའ་བོར་བཅས། །འཁོར་(༢༢)གྱི་མཁའ་འགྲོ་མ་ལུས་ལ། །མཛེས་སྡུག་གཟུགས་ཀྱི་མཆོད་པ་འབུལ། །སྤྱན་གྱིས་གཟིགས་ཤིང་བཞེས་སུ་གསོལ། །ཨ་ལ་ལ་སྟེ་ཚོགས་ལ་རོལ། །ཧཱུྃ། བླ་མ་རིག་འཛིན་མ་ལུས་དང་། །ཡི་དམ་རྒྱལ་བ་ཞི་ཁྲོ་དང་། །བཅོམ་ལྡན་རྡོ་རྗེ་རྣལ་འབྱོར་མ། །རིགས་བཞིའི་མཁའ་འགྲོ་དཔའ་བོར་བཅས། །འཁོར་གྱི་མཁའ་འགྲོ་མ་ལུས་ལ། །དབྱངས་སྙན་སྒྲ་ཡི་མཆོད་པ་འབུལ། །སྙན་གྱིས་གསན་ཅིང་བཞེས་སུ་གསོལ། །ཨ་ལ་ལ་སྟེ་ཚོགས་ལ་རོལ། །ཧཱུྃ། བླ་མ་རིག་འཛིན་མ་ལུས་དང་། །ཡི་དམ་རྒྱལ་བ་ཞི་ཁྲོ་དང་། །བཅོམ་ལྡན་རྡོ་རྗེ་རྣལ་འབྱོར་མ། །རིགས་བཞིའི་མཁའ་འགྲོ་དཔའ་བོར་བཅས། །འཁོར་གྱི་མཁའ་འགྲོ་མ་ལུས་ལ། །བདའ་རྒུ་དྲི་ཡི་མཆོད་པ་འབུལ། །ཤངས་ཀྱིས་སྣོམ་ཞིང་བཞེས་སུ་གསོལ། །ཨ་ལ་ལ་སྟེ་ཚོགས་ལ་རོལ། །ཧཱུྃ། བླ་མ་རིག་འཛིན་མ་ལུས་དང་། །ཡི་དམ་རྒྱལ་བ་ཞི་ཁྲོ་དང་། །བཅོམ་ལྡན་རྡོ་རྗེ་རྣལ་འབྱོར་མ། །རིགས་བཞིའི་མཁའ་འགྲོ་དཔའ་བོར་བཅས། །འཁོར་གྱི་མཁའ་འགྲོ་མ་ལུས་ལ། །བཟའ་བཏུང་རོ་ཡི་མཆོད་པ་འབུལ། །ལྗགས་ཀྱིས་མྱང་ཞིང་བཞེས་སུ་གསོལ། །ཨ་ལ་ལ་སྟེ་ཚོགས་ལ་རོལ། །ཧཱུྃ། བླ་མ་རིག་འཛིན་མ་ལུས་དང་། །ཡི་དམ་རྒྱལ་བ་ཞི་ཁྲོ་དང་། །བཅོམ་ལྡན་རྡོ་རྗེ་རྣལ་འབྱོར་མ། །རིགས་བཞིའི་མཁའ་འགྲོ་དཔའ་བོར་བཅས། །འཁོར་གྱི་མཁའ་འགྲོ་མ་ལུས་ལ། །བཟང་རྒུ་རེག་གི་མཆོད་པ་འབུལ། །སྐུ་ཡིས་རེག་ཅིང་བཞེས་སུ་གསོལ། །ཨ་ལ་ལ་སྟེ་ཚོགས་ལ་རོལ། །ཧཱུྃ། བླ་མ་རིག་འཛིན་མ་ལུས་དང་། །ཡི་དམ་རྒྱལ་བ་ཞི་ཁྲོ་དང་། །བཅོམ་ལྡན་རྡོ་རྗེ་རྣལ་འབྱོར་མ། །རིགས་བཞིའི་མཁའ་འགྲོ་དཔའ་བོར་བཅས། །འཁོར་གྱི་མཁའ་འགྲོ་མ་ལུས་ལ། །སྤྲོས་བྲལ་ཆོས་ཀྱི་མཆོད་པ་འབུལ། །ཐུགས་ཀྱིས་དགོངས་ཤིང་བཞེས་སུ་གསོལ། །ཨ་ལ་ལ་སྟེ་ཚོགས་ལ་རོལ། །དཔའ་བོ་དཔའ་མོ་མཆེད་ལྕམ་ལ། །ཞལ་ཟས་ཚོགས་ཀྱི་མཆོད་པ་འབུལ། །གཉིས་མེད་རོལ་པས་བཞེས་སུ་གསོལ། །ཨ་ལ་ལ་སྟེ་ཚོགས་ལ་རོལ། །ༀ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་མཧཱ་ག་ཎ་ཙཀྲ་ཁ་ཁ་ཁཱ་ཧི་ཁཱ་ཧི། ཞེས་པ་གསུམ་གྱིས་འབུལ་ལོ། །རོལ་པ་ནི། ལས་ཀྱི་ཀརྨ་གིང་གི་ཕྱག་རྒྱས་ཚོགས་བཏེགས་ལ། ཧཱུྃ། གཟིགས་ཤིག་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱར་མི་རུང་། །བྲམ་ཟེ་ཁྱི་དང་གདོལ་པ་ཡང་། །རང་བཞིན་གཅིག་ཏུ་དགོངས་ཏེ་རོལ། །དངོས་གྲུབ་ཐམས་ཅད་འདི་ལས་འབྱུང་། །སྐྱོགས་ཀྱི་ནང་ནས་བྷནྡྷ་བཟང་། །སྐོམ་གྱི་ནང་ནས་བདུད་རྩི་མཆོག །སྐྱོགས་ཀྱི་ནང་ནས་ཀ་པཱ་ལ། །ཟས་ནི་ཤ་ལྔ་བདུད་རྩི་ལྔ། །མ་མོ་མཁའ་འགྲོའི་ལོངས་སྤྱོད་ཡིན། །རྣལ་འབྱོར་ཕོ་མོའི་དངོས་གྲུབ་ཟས། །ཨ་ལ་ལ་སྟེ་ཚོགས་ལ་རོལ། །ཅེས་དྲངས་པའི་ལན་དུ་ལེན་པ་(༢༣)པོས་པད་སྐོར་བྱ་ཞིང་། ༀ། བདེ་བར་གཤེགས་པ་ཆོས་ཀྱི་སྐུ། །འདོད་ཆགས་ལ་སོགས་དྲི་མ་བྲལ། །གཟུང་འཛིན་རྣམ་པར་སྤངས་པ་ཡིས། །དེ་བཞིན་ཉིད་ལ་གུས་ཕྱག་འཚལ། །ཨ་ལ་ལ་སྟེ་སྐུ་ཡི་མཆོག །སྐུ་ཡི་དངོས་གྲུབ་འགྱུར་བ་མེད། །ཨ་ལ་ལ་སྟེ་གསུང་གི་མཆོག །གསུང་གི་དངོས་གྲུབ་འགག་པ་མེད། །ཨ་ལ་ལ་སྟེ་ཐུགས་ཀྱི་མཆོག །ཐུགས་ཀྱི་དངོས་གྲུབ་སྐྱེ་བ་མེད། །སྐུ་གསུང་ཐུགས་ཀྱི་དངོས་གྲུབ་སྩོལ། །ཨ་ཧོ་སུ་ཁ་ཧོཿཞེས་བརྗོད་ནས་བླངས་སྟེ། རང་གི་མགོ་དང་མགྲིན་པ་བླ་མའི་དཀྱིལ་འཁོར། སྙིང་ག་ཡི་དམ། ལྟེ་བ་མཁའ་འགྲོའི་ཕོ་བྲང་དུ་བསམས་ལ། བཟའ་བཏུང་བདུད་རྩིར་གྱུར་པ་ཟོས་ཤིང་འཐུང་བས་བླ་མ་ཡི་དམ་མཁའ་འགྲོ་ཐམས་ཅད་མཆོད་པར་བསམ་ཞིང་ཚིམ་པར་ལོངས་སྤྱོད་ཐམས་ཅད་ལྷའི་དཀྱིལ་འཁོར་གྱི་ངང་ལས་མ་གཡོས་པར་བྱ་ཞིང་། ཐ་མལ་གྱི་སྣང་བ་དང་། ཤགས་དང་། རྩོད་པ་དང་། ཀུ་ཅོ་ལ་སོགས་པ་མི་བྱའོ། །དེ་ནས་ལྷག་མ་རྣམས་བསྡུས་ལ་ཕྱོགས་གཅིག་ཏུ་བཞག་གོ། །སློབ་མ་མེད་ན། དེ་ནས་མཇུག་གི་ལས་རིམ་རྣམས་བྱའོ། །འདི་ནི་རྒྱུན་གྱི་སྒྲུབ་མཆོད་ནར་མ་དང་། ཚེས་བཅུ་ལ་སོགས་པ་ཇི་ལྟར་བྱ་བའི་ཆོ་ག་ཡང་ལེགས་པར་བསྟན་པ་ཡིན་ནོ། །

དབང་བསྐུར་བ་ནི། དཀྱིལ་འཁོར་འོག་མ་ལྟར་སྤྲོས་བཅས་བྱིས་པ་ཉེར་སྤྱོད་ཀྱི་དབང་ལས་ཆེས་ཁྱད་དུ་འཕགས་པ། བྱིན་རླབས་དོན་གྱི་རིམ་པ་ཚིག་དབང་རིན་པོ་ཆེའི་དབང་བཞི་བརྡ་དོན་དུ་བསྐུར་བར་རྣམ་པར་བཞག་པ་ལ། སྔོན་འགྲོ། དངོས་གཞི། རྗེས་དང་གསུམ་ལས། སྔོན་འགྲོ་ལ། སྔོན་དུ་བློ་བཅོས་པའི་ཆོས་བཤད་པ་དང་། སྔོན་འགྲོ་དངོས་གཉིས་ལས། དང་པོ་ནི། འདིར་བླ་མའི་དབང་བསྐུར་བ་རིན་པོ་ཆེའི་སྒྲོན་མ་ལ་འཇུག་པ་ལགས་པས། དད་གུས་རབ་དང་ལྡན་པས་མ་ཡེངས་པར་གསན་འཚལ། དེ་ལ་འོ་སྐོལ་རྣམས་སྐྱེ་བར་དཀའ་བ་འཛམ་བུའི་གླིང་དུ་སྐྱེས། ཐོབ་པར་དཀའ་བ་དལ་འབྱོར་བཅོ་བརྒྱད་དང་ལྡན་པ་མིའི་ལུས་རིན་པོ་ཆེ་ཐོབ། མཇལ་བར་དཀའ་བ་བླ་མ་དགེ་བའི་བཤེས་གཉེན་དང་མཇལ། ཐོས་པར་དཀའ་བ་ཐེག་པ་ཆེན་པོའི་དམ་པའི་ཆོས་ཟབ་མོ་ཐོས་པའི་སྐབས་འདིར། ཐར་པའི་ལམ་སྣ་ཟིན་པ་ཞིག་ཅིས་ཀྱང་བྱེད་དགོས། ད་རེས་ལམ་སྣ་མ་ཟིན་ན་ཤི་བའི་འོག་ཏུ་མཐའ་མེད་པའི་འཁོར་བ་ན་འཁོར་དུས་འོག་ནས་འོག་ཏུ་འགྲོ་བ་ལས་ཆོས་ཀྱི་སྒྲ་མི་ཐོས། དེ་བས་ད་ལྟ་མི་ལུས་རིན་པོ་ཆེ་བརྒྱ་ལམ་རེས་འགའ་ཞིག་ཐོབ་དུས་འདིར་འབད་དགོས། ཚེ་མི་རྟག་ནུབ་རིའི་གྲིབ་མ་དང་འདྲ། འཆི་བ་ལ་སྐད་ཅིག་ཐང་གཅིག་གིས་ཉེར་འགྲོ། འཆི་བའི་དུས་སུ་ཆོས་མ་ཡིན་པ་གང་གིས་ཀྱང་མི་སྟོངས། ཆོས་ལའང་བྱེད་ལུགས་བསམ་གྱིས་མི་ཁྱབ་ཀྱང་ཐེག་(༢༤)པ་ཆེ་ཆུང་གཉིས་ལས་མེད་དོ། །དེ་ལའང་སྔགས་མཚན་ཉིད་གཉིས་ལས། འབྲས་བུ་གསང་སྔགས་ཀྱི་ཐེག་པ་ལ་འཇུག །འདི་ལའང་དལ་སོ་སོ་ནས་འཇུག་པ་སྤྲོས་པ་དང་བཅས་པའི་ལུགས་དང་། ལམ་ཟབ་བླ་མའི་དཀྱིལ་འཁོར་ནས་འཇུག་པ་སྤྲོས་པ་མེད་པ་གཉིས་ལས། བླ་མའི་རིམ་པ་ནས་འཇུག་སྟེ། དཀྱིལ་འཁོར་ཐམས་ཅད་འདུས་པའི་མངའ་བདག་ཡིན་པའི་ཕྱིར་རོ། །ཕག་མོ་སྡོམ་འབྱུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཉིད། །ཅེས་པ་དང་། དགོངས་འདུས་ལས། བསྐལ་པ་སྟོང་གིས་སངས་རྒྱས་བས། །བླ་མ་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །བླ་མ་དག་ལ་བརྟེན་ནས་བྱུང་། །བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །ཅེས་པ་དང་། བྱང་ཆུབ་རོལ་པ་ལས། གང་གིས་བསྐལ་པ་བྱེ་བ་རུ། །ལྷ་སྐུ་འབུམ་ཕྲག་བསྒོམས་པ་བས། །བླ་མ་སྐད་ཅིག་དྲན་པ་ཙམ། །འདི་ནི་བསོད་ནམས་ཕ་མཐའ་ཡས། །དཀྱིལ་འཁོར་མ་ལུས་ཐམས་ཅད་ཀྱང་། །བླ་མའི་དཀྱིལ་འཁོར་ཉིད་དུ་འདུས། །རྒྱལ་བའི་ཐུགས་དགོངས་མ་ལུས་ཀྱང་། །བླ་མའི་ཐུགས་དགོངས་ཉིད་དུ་འདུས། །བླ་མ་མཆོག་གིས་བྱིན་བརླབས་ན། །རྒྱལ་བ་ཀུན་གྱི་བྱིན་བརླབ་འགྱུར། །དཀྱིལ་འཁོར་ཀུན་གྱིས་དབང་བསྐུར་འགྱུར། །ཞེས་སོ། །དེའང་རིག་འཛིན་འདུས་པ་སྤྱིའི་རྒྱུད་ལས། །རྡུལ་ཚོན་མེ་ལོང་བུམ་པ་དང་། །གཏོར་མ་ལ་སོགས་རྫས་དག་ལ། །བརྟེན་ནས་མཚན་ཉིད་ཀུན་ལྡན་པའི། །བླ་མའི་བྱིན་རླབས་དབང་བསྐུར་ན། །དཀྱིལ་འཁོར་ཀུན་གྱི་སྙིང་པོ་མཆོག །བཞི་པའི་དེ་ཉིད་དབང་བཞི་ཐོབ། །ཅེས་འབྱུང་བས། སྤྲོས་བཅས་བྱིས་པ་ཉེར་སྤྱོད་ཀྱི་དབང་གསུམ་ལས་ཆེས་འཕགས་པ། །བཞི་པ་ཚིག་དབང་དོན་གྱི་བུམ་གསང་ཤེས་རབ་ཡེ་ཤེས་ཚིག་དབང་དང་བཞིའི་བྱིན་རླབས་ཐོད་རྒལ་དུ་འཇུག་ཅིང་། བསྐྱེད་རྫོགས་དོན་གྱི་ལམ་བསྒོམ་པ་ལ་དབང་བའི་ཕྱིར་ན། རྫས་བཞི་ཆའམ་གང་རུང་རེའི་སྒོ་ནས་དབང་ཐོབ་པར་བྱེད་པ། བླ་མ་མཚན་ཉིད་དང་ལྡན་པ་གྲུབ་པ་ཐོབ་ངེས་གཅིག་གིས་རྩ་བའི་དཀྱིལ་འཁོར་དུ་བཅུག་པ་ལས་འབྱུང་ལ། སྐབས་འདིར་དཔལ་ཨོ་རྒྱན་གྱི་བླ་མ་གུ་རུ་པདྨ་འབྱུང་གནས་ཞེས་བྱ་བ། སངས་རྒྱས་སྣང་བ་མཐའ་ཡས་དངོས་བླ་མར་སྤྲུལ་ནས་འཛམ་བུའི་གླིང་དུ་རང་བྱོན་པ། མཚན་ཐོས་པ་ཙམ་གྱིས་ངན་སོང་དང་འཁོར་བ་ལས་སྐྱོབ་པ། སྐུ་ཆེ་བའི་ཡོན་ཏན་མངལ་གྱི་དྲི་མས་མ་གོས་པར་མེ་ཏོག་པདྨའི་སྡོང་པོ་ལས་རང་བྱུང་སྟེ་མཚན་དང་དཔེ་བྱད་ཀྱི་དཔལ་དུ་འབར་བ། གསུང་ཆེ་བའི་ཡོན་ཏན་ཕྱི་ནང་གསང་བའི་ཆོས་ཀྱི་འཁོར་ལོ་གདུལ་བྱའི་མོས་པ་དང་མཐུན་པར་བསྐོར་བ། ཐུགས་ཆེ་བའི་ཡོན་ཏན་ཤེས་བྱ་ཐམས་ཅད་ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་ཏིང་ངེ་འཛིན་དང་། མངོན་པར་ཤེས་པ་རྒྱ་མཚོའི་མཐར་སོན་པ། (༢༥)ཡོན་ཏན་ཆེ་བ་སྟོབས་བཅུ་མི་འཇིགས་པ་བཞི་ལ་སོགས་པ་སངས་རྒྱས་ཀྱི་ཆོས་མ་འདྲེས་པ་ཐམས་ཅད་ཡོངས་སུ་རྫོགས་པ། ཕྲིན་ལས་ཆེ་བ་སེམས་ཅན་གྱི་གནས་རིས་ཐམས་ཅད་གང་ལ་གང་འདུལ་གྱི་སྤྲུལ་པས་དོན་མཛད་དེ་ཕྲིན་ལས་བཞི་ལྷུན་གྱིས་གྲུབ་པས་འཁོར་བ་ཇི་སྲིད་མ་སྟོངས་ཀྱི་བར་དུ་བཞུགས་ནས་གཞན་དོན་ཡིད་བཞིན་ནོར་བུ་ལྟ་བུ་འབྱུང་བས། སྔོན་བསྐལ་པ་དཔག་ཏུ་མེད་པའི་སྔོན་རོལ་དུ་ཀུན་ཏུ་བཟང་པོ་ཆོས་ཀྱི་སྐུའི་སྟོན་པར་མངོན་པར་རྫོགས་པར་སངས་རྒྱས་ནས་ནུབ་ཕྱོགས་བདེ་བ་ཅན་གྱི་ཞིང་ན་ད་ལྟར་ལོངས་སྐུ་སྣང་བ་མཐའ་ཡས་ཀྱི་རྣམ་པར་བཞུགས་པ་ལས། འཛམ་བུ་གླིང་གི་འགྲོ་བ་འདུལ་བར་གཟིགས་ཏེ། སྣང་བ་མཐའ་ཡས་ཀྱི་ཐུགས་ཀ་ནས་འོད་ཟེར་གྱི་རྩེ་ལ་འོད་ཀྱི་ཁྱེའུ་མཚན་དང་དཔེ་བྱད་དུ་འབར་བ་ཞིག་ཨོ་རྒྱན་གྱི་ནུབ་ཕྱོགས་དྷ་ན་ཀོ་ཥའི་མཚོ་གླིང་གི་པདྨའི་སྡོང་པོའི་སྟེང་དུ་འཕྲོས་པ་ཉིད། རྒྱལ་པོ་ཨིནྡྲ་བྷཱུ་ཏིས་སྤྱན་དྲངས་ཏེ་ནུབ་ཕྱོགས་ཨོ་རྒྱན་གྱི་རྒྱལ་པོར་མངའ་གསོལ་ནས། ཆེ་བའི་རྫུ་འཕྲུལ་དང་མཛད་པ་དུ་མས་ཨོ་རྒྱན་དང་རྒྱ་གར་གྱི་ཡུལ་རྣམས་བཏུལ་ཞིང་། དུར་ཁྲོད་ཆེན་པོ་བརྒྱད་ན་སྤྲུལ་པ་མཚན་བརྒྱད་བཞུགས་ནས་མཁའ་འགྲོ་མ་རྣམས་ཀྱི་དོན་མཛད་པ་ལས། བོད་ཀྱི་རྒྱལ་པོ་བྱང་ཆུབ་སེམས་དཔའ་ཁྲི་སྲོང་ལྡེའུ་བཙུན་གྱིས་དཔལ་བསམ་ཡས་ལྷུན་གྱིས་གྲུབ་པའི་ཡུལ་དུ་སྤྱན་དྲངས་ཏེ་རྒྱལ་འབངས་ཐམས་ཅད་བདེ་བ་ལ་བཀོད། སངས་རྒྱས་ཀྱི་བསྟན་པ་དར་རྒྱས་སུ་མཛད་པའི་དུས་སུ་མཆིམས་ཕུར་ཚོགས་ཀྱི་འཁོར་ལོ་བསྐོར་ནས། མངའ་བདག་རྗེ་འབངས་ཀྱིས་ཕྱག་འཚལ་ཏེ་ཞུས་པ། ཀྱེ་སློབ་དཔོན་ཆེན་པོ་ལགས། བདག་ཅག་བོད་འབངས་ཐམས་ཅད་བསོད་ནམས་དང་ལྡན་པས་ད་ལྟ་ནི་ཁྱེད་ལྟ་བུའི་སློབ་དཔོན་སྤྲུལ་པའི་སྐུ་དངོས་དང་མཇལ། ཕྱི་ནང་གསང་བའི་ཆོས་མང་པོ་ནི་ཐོས། གསང་སྔགས་ལྷའི་དཀྱིལ་འཁོར་དུ་མའི་དབང་བསྐུར་བ་ནི་ཐོབ། ཡི་དམ་ལྷའི་དཀྱིལ་འཁོར་ལ་བརྟེན་ནས་འཚང་རྒྱ་བའི་ཐབས་མཆིས་ལགས་ན། བླ་མའི་ལམ་དང་དལ་དུ་ཞུགས་ནས་འཚང་རྒྱ་བའི་ཐབས་བླ་མ་སྤྲུལ་པའི་སྐུ་ཉིད་ལ་བསྟེན་པ་ཞིག །ད་ལྟ་བདག་ཅག་རྗེ་འབངས་དང་། ཕྱི་རབས་ཀྱི་འགྲོ་བ་བླ་མ་ཉིད་ཀྱི་གདུལ་བྱར་གྱུར་པ་རྣམས་ལ་ཅིས་ཀྱང་ཞུ་འཚལ། ཞེས་ཞུས་པའི་ཚེ། མཧཱ་གུ་རུས་བཀའ་སྩལ་པ། ཀྱེ་མངའ་བདག་རྗེ། ཐེག་པ་ཆེན་པོ་གསང་སྔགས་ཀྱི་ཐབས་དང་སྒོ་ནི་བསམ་གྱིས་མི་ཁྱབ་ཀྱང་། བསྡུ་ན་ཚེ་གཅིག་གིས་འཚང་རྒྱ་བར་བྱེད་པ་ལ་ཡི་དམ་ལྷའི་དཀྱིལ་འཁོར་དུ་དབང་བསྐུར་ནས་བསྐྱེད་རྫོགས་ཟབ་མོའི་དོན་ཉམས་སུ་ལེན་པ་དང་། བླ་མའི་ཐུགས་ཀྱི་དཀྱིལ་འཁོར་དུ་དབང་བསྐུར་ནས་བསྐྱེད་རྫོགས་ཟབ་མོའི་དོན་ཉམས་སུ་ལེན་པ་གཉིས་སུ་འདུས་སོ། །ཡི་དམ་ལྷའི་ལམ་ནི་རིམ་གྱིས་པ་དབང་པོ་སྤྱོད་པའི་ལས་ཅན་རྣམས་(༢༦)འཇུག་པ་ཡིན་ཏེ། བསྡུ་ན་གསང་སྔགས་ཕྱི་ནང་གཉིས་སུ་འདུས་སོ། །བླ་མའི་ལམ་ནི་དབང་པོ་གཅིག་ཅར་བ་སྔོན་ནས་སྦྱངས་པའི་ལས་འཕྲོ་སད་པ་རྣམས་འཇུག་པ་ཡིན་ཏེ། བསྡུ་ན་དཀྱིལ་འཁོར་ཡོངས་སུ་རྫོགས་པ་ཀུན་འདུས་སྤྱིའི་སྒྲུབ་པ་དང་། ལས་ཕྲན་ཚེགས་པ་བྱེ་བྲག་རྐྱང་པར་སྒྲུབ་པ་གཉིས་སུ་བསྡུས་ཏེ་བསྟན་པ་ཡིན་ནོ་ཞེས་བཀའ་སྩལ་ནས། རིག་འཛིན་འདུས་པ་སྤྱིའི་རྒྱུད་དང་བྱེ་བྲག་གི་རྒྱུད་ལ་བརྟེན་ནས་རིག་འཛིན་སློབ་དཔོན་གྱི་སྒྲུབ་པ་རྣམས་མཛད་དེ། དཀྱིལ་འཁོར་ཡོངས་སུ་རྫོགས་པ་ལྟར་སྒྲུབ་པ་དང་ལྷ་ཡབ་ཡུམ་རེའམ། དཔའ་བོ་གཅིག་པ་ལ་སོགས་པ་ཡན་ལག་གི་ཆ་ཤས་རྐྱང་པ་རེའི་སྒོ་ནས་གང་ཟག་རེ་སྨིན་གྲོལ་ལ་འགོད་པའི་རིམ་པ་རྣམས་གསུངས་པ་ལས། མཁའ་འགྲོ་ཡེ་ཤེས་མཚོ་རྒྱལ་གྱིས་དཀར་ཆག་ཏུ་བཏབ་སྟེ་རིན་པོ་ཆེ་སའི་གཏེར་དུ་སྦས་པ་རྣམས། དུས་ཕྱིས་མངའ་བདག་ཉང་རལ་པ་ཅན་གྱི་གཏེར་ནས་གདན་དྲངས་ཏེ། སྲས་འགྲོ་བའི་མགོན་པོ་ལ་གནང་། དེས་སྟག་སོ་པ་ཆོས་ཀྱི་བླ་མ་ལ། དེས་བླ་མ་གཉན་རས་ལ། དེས་བླ་མ་རིན་པོ་ཆེ་ཀུ་མཱ་རཱ་ཛ་ལ། དེས་རྣལ་འབྱོར་པ་དྲི་མེད་འོད་ཟེར་ལ། ཡང་སྲས་ཀྱིས་སློབ་དཔོན་ནམ་ལངས་པ་ལ། དེས་སློབ་དཔོན་བྱང་མགོན་ལ། དེས་སློབ་དཔོན་བསྟན་སྲུང་ལ། དེས་དྲི་མེད་འོད་ཟེར་ལའོ། །

དོན་གཉིས་པ་སྔོན་འགྲོ་དངོས་ལ། སྐྱབས་སུ་འགྲོ་བ། སེམས་བསྐྱེད་པ། ཡན་ལག་བདུན་པ་བྱ་བ། ཁྱད་པར་གྱི་ལམ། དོན་དམ་ཆོས་ཉིད་དུ་སེམས་བསྐྱེད་པ། གསོལ་བ་གདབ་པ་དང་ལྔ་ལས། དང་པོ་ནི། མཎྜལ་ཕུལ་ནས་ཐལ་མོ་སྦྱར་ཏེ། ན་མོ། སངས་རྒྱས་ཆོས་དང་དགེ་འདུན་དང་། །བླ་མ་ཡི་དམ་མཁའ་འགྲོ་དང་། །ལྟ་སྒོམ་སྤྱོད་པ་མ་ལུས་ལ། །ཕྱི་ནང་གསང་བར་སྐྱབས་སུ་མཆི། །ཞེས་ལན་གསུམ་བརྗོད་དོ། །

སེམས་བསྐྱེད་པ་ནི། ཨེ་མ་བདག་དང་སེམས་ཅན་རྣམས། །ཡེ་ནས་རྣམ་དག་སངས་རྒྱས་ཆོས། །མ་རྟོགས་འཁྲུལ་པའི་འཁོར་བ་རྣམས། །སྲིད་པའི་མཚོ་ལས་བསྒྲལ་བར་བྱ། །ༀ་མཧཱ་བོ་དྷི་ཙིཏྟ་རཏྣ་སཏྭ་ན་མཿཞེས་བརྗོད་དོ། །མདོར་བསྡུ་ན་ཐུན་མོང་དུ་བྱ་བ་ནི། སངས་རྒྱས་ཆོས་དང་དགེ་འདུན་དང་། །བླ་མ་ལ་ཡང་སྐྱབས་སུ་མཆི། །སེམས་ཅན་ཀུན་ལ་ཕན་དོན་དུ། །བླ་མེད་བྱང་ཆུབ་སེམས་བསྐྱེད་དོ། །ཞེས་པ་གསུམ་བརྗོད་པས་ཀྱང་རུང་ངོ་། །

ཡན་ལག་བདུན་པ་ནི། བདག་དང་སེམས་ཅན་ལུས་དཔག་ཏུ་མེད་པར་སྤྲུལ་པ་ལ་དམིགས་ལ་ཐམས་ཅད་ཀྱིས་བྱེད་པར་བསམས་ཏེ། ན་མོ། བླ་མ་ཡི་དམ་མཁའ་འགྲོ་དང་། །རྒྱལ་བ་འཁོར་བཅས་གནས་འདིར་གཤེགས། །མདུན་གྱི་ནམ་མཁར་པད་གདན་ལ། །སྤྲིན་ཚོགས་ལྟ་བུར་བཞུགས་སུ་གསོལ། །ལུས་ངག་ཡིད་གསུམ་གྲངས་མེད་པར། །སྤྲུལ་ནས་གུས་པའི་སེམས་ཀྱིས་འདུད། །དངོས་སུ་འབྱོར་(༢༧)དང་ཡིད་སྤྲུལ་པའི། །མཆོད་སྤྲིན་མ་ལུས་རྣམས་ཀྱིས་མཆོད། །སྔོན་ནས་བསགས་པའི་སྡིག་སྒྲིབ་རྣམས། །འགྱོད་པས་བཤགས་ཀྱིས་དག་པར་མཛོད། །རྒྱལ་བ་སྲས་བཅས་སེམས་ཅན་གྱི། །དགེ་བ་ཀུན་ལ་རྗེས་ཡི་རང་། །ཕྱི་ནང་གསང་བ་དམ་པའི་ཆོས། །འཁོར་ལོ་བླ་མེད་བསྐོར་བར་བསྐུལ། །མྱ་ངན་འདའ་བར་བཞེད་རྣམས་ལ། །མྱ་ངན་མི་འདའ་གསོལ་བ་འདེབས། །དགེ་བ་འདི་དང་གཞན་དག་གིས། །རྫོགས་པའི་སངས་རྒྱས་འགྲུབ་པར་ཤོག །ཅེས་པའམ། ༀ། བདེ་གཤེགས་མ་ལུས་འདུས་པའི་སྐུ། །བླ་མ་ཡི་དམ་མཁའ་འགྲོ་ལ། །ཞིང་རྡུལ་ཀུན་གྱི་གྲངས་རྙེད་ཀྱི། །ལུས་བཏུད་གུས་པས་ཕྱག་འཚལ་ལོ། །རྣམ་དག་འདོད་ཡོན་ལྔ་ལ་སོགས། །དངོས་དང་ཡིད་ཀྱིས་སྤྲུལ་པ་ཡི། །མཆོད་པ་དམ་པ་ཐམས་ཅད་ཀུན། །བླ་མ་ཡི་དམ་མཁའ་འགྲོར་མཆོད། །ཚེ་རབས་ཐོག་མ་མེད་པ་ནས། །ད་ལྟའི་ལུས་འདི་ཡན་ཆད་ལ། །སྡིག་པ་མི་དགེ་ཅི་བགྱིས་པ། །བླ་མ་སངས་རྒྱས་རྣམས་ལ་བཤགས། །འགྲོ་བ་སེམས་ཅན་དོན་སླད་དུ། །བསྐལ་པ་དུ་མར་མི་སྐྱོ་བར། །བྱང་ཆུབ་སྤྱོད་པ་སྣ་ཚོགས་ཀྱིས། །དགེ་བ་མཛད་ལ་རྗེས་ཡི་རང་། །སྤྱོད་དང་རྫུ་འཕྲུལ་སྣ་ཚོགས་ཀྱིས། །སེམས་ཅན་ཀུན་ལ་ཕན་དོན་དུ། །སངས་རྒྱས་བྱང་ཆུབ་སེམས་དཔའ་ལ། །ཆོས་ཀྱི་འཁོར་ལོ་བསྐོར་བར་བསྐུལ། །གང་དག་མྱ་ངན་འདའ་རྣམས་ལ། །ཇི་སྲིད་འཁོར་བ་མ་སྟོངས་བར། །མཐའ་ཡས་སེམས་ཅན་དོན་གྱི་ཕྱིར། །མྱ་ངན་མི་འདའ་གསོལ་བ་འདེབས། །བདག་གི་ལུས་ངག་ཡིད་གསུམ་གྱིས། །བྱས་དང་བྱེད་འགྱུར་གཞན་བསྐུལ་བའི། །དགེ་བས་མཐའ་ཡས་སེམས་ཅན་རྣམས། །ཀུན་མཁྱེན་སངས་རྒྱས་ཐོབ་པར་ཤོག །ཅེས་པའམ། བླ་མ་ཡི་དམ་མཁའ་འགྲོ་དང་། །སངས་རྒྱས་ཆོས་དང་དགེ་འདུན་ལ། །ལུས་ངག་ཡིད་གསུམ་གུས་ཕྱག་འཚལ། །ཕྱི་ནང་གསང་གསུམ་མཆོད་པར་འབུལ། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་གསོལ་བ་འདེབས། །དགེ་བས་བྱང་ཆུབ་ཆེ་ཐོབ་ཤོག །ཅེས་པ་གང་རུང་གསུམ་གསུམ་བརྗོད། ཡང་ན་ཐམས་ཅད་ཚང་མ་ལན་གཅིག་བརྗོད།

ཁྱད་པར་གྱི་སེམས་བསྐྱེད་པ་ནི། ཨེ་མ་ཧོ། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་གསུམ་བརྗོད་པ་ནི། འཁོར་བ་སྣང་དུས་ཉིད་ནས་ཐམས་ཅད་སངས་རྒྱས་ཀྱི་ཞིང་དུ་གསལ་འདེབས་པ་སྟེ། སྙིང་པོ་དོན་གྱི་དཀྱིལ་འཁོར་དུ་འཇུག་པའོ། །སྤྲོས་པ་ལ་དགའ་ན་སྐབས་འདིར། སེམས་ཅན་ཐམས་ཅད་སངས་རྒྱས་ཀྱི་དཀྱིལ་འཁོར་དུ་མཚོན་པ་ལ་ལྷ་དང་དལ་གྱི་རྣམ་དག་བཤད་དེ། དེ་ཡང་མེ་རི་རྡོ་རྗེའི་རྭ་(༢༨)བ་དང་བཅས་པ་འདི་འཁོར་འདས་ཐམས་ཅད་ཆོས་དབྱིངས་སྟོང་པ་དང་། སྣང་བ་ཆེན་པོའི་དབྱིངས་ན་ཡེ་ནས་གནས་པར་མཚོན་པའོ། །དུར་ཁྲོད་བརྒྱད་ནི་སྦྱང་བྱ་འཁོར་བའི་དུས་ནས་ཀུན་གཞི་དོན་གྱི་སངས་རྒྱས་གཞི་ལྷུན་གྱིས་གྲུབ་པའི་དཀྱིལ་འཁོར་འགྲོ་བ་ཡོངས་ལ་ཡེ་ནས་གནས་པར་མཚོན་པའོ། །པདྨ་དང་ཟླ་བ་ཉི་མ་གསུམ་ནི་འཁོར་བ་མྱང་འདས་སུ་སྦྱོར་བའི་ལམ་རང་རིག་པ་པདྨ་ལྟ་བུ་ལ། ཐབས་ཤེས་ཟུང་འཇུག །བསྐྱེད་རྫོགས་ཟུང་འཇུག །སྣང་སྟོང་ཟུང་འཇུག །བདེན་གཉིས་ཟུང་འཇུག །ཚོགས་གཉིས་ཟུང་འཇུག་ཉི་ཟླ་ལྟ་བུས་སྦྱང་དགོས་ཞེས་སྦྱོང་བྱེད་ལམ་གྱི་གནས་སྐབས་མཚོན་པའོ། །སྒོ་རྟ་བབས་ཀྱིས་བརྒྱན་པའི་དཀྱིལ་འཁོར་ལ་གཞི་ལམ་འབྲས་བུ་གསུམ་ཀ་མཚོན་དུ་རུང་ཡང་སྐབས་འདིར་འབྲས་བུ་དང་སྦྱར་ཏེ། རྟ་བབས་བཞི་ནི་སངས་རྒྱས་ཀྱི་སའི་དྲན་པ་ཉེ་བར་བཞག་པ་སེམས་ཅན་ལ་ཕན་པའི་བྱམས་པ་ཆེན་པོ་སོགས་བཞིའོ། །པུ་ཤུ་ནི་ཆོས་ཐམས་ཅད་མཐར་ཕྱིན་པའོ། །མདའ་ཡབ་ནི་ཐུགས་རྗེ་ཆེན་པོའོ། །ཕ་གུ་ནི་ལྷུན་གྱིས་གྲུབ་པའི་ཡོན་ཏན་ནོ། །དྲྭ་ཕྱེད་ནི་ཞིང་གི་རྒྱན་རང་སྣང་དུ་རྫོགས་པའོ། །འདོད་ཡོན་ནི་སངས་རྒྱས་ཀྱི་ཞིང་ན་རང་སྣང་ལྷུན་གྱིས་གྲུབ་པའི་འབྱོར་པ་ཡོད་པའོ། །རྩིག་པ་ལྔ་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔའོ། །སྒོ་བཞི་ནི་ཚད་མེད་པ་བཞིས་སེམས་ཅན་གྱི་དོན་གྱི་མཛད་པའོ། །ཁྱམས་ནི་ཆོས་ཉིད་ཡེ་ཤེས་ཀྱི་སྣང་བའོ། །གྲུ་ཆད་བཞི་ནི་ཕྲིན་ལས་བཞི་གྲུབ་པའོ། །པདྨའི་མུ་ཁྱུད་གསུམ་ནི་སྐུ་གསུང་ཐུགས་སོ། །ལྟེ་བ་ནི་རང་བྱུང་གི་ཡེ་ཤེས་ཐིག་ལེ་ཉག་གཅིག་ཏུ་ཐམས་ཅད་འདུ་ཞིང་། དེ་ལས་ཐམས་ཅད་བྱུང་བར་མཚོན་པ་སྟེ། ཆོས་འབྱུང་དང་བཅས་པའམ་ཟླ་གམ་གྱི་ཆའོ། །དེའི་སྟེང་ན་གཙོ་བོ་ལྔ་ནི་རིག་པ་མཐར་ཕྱིན་དུས་རིགས་ལྔར་གྲུབ་པའོ། །མཚན་བརྒྱད་ནི་རྣམ་ཤེས་བརྒྱད་དག་དུས་ཡེ་ཤེས་བརྒྱད་མཚོན་པའོ། །རིག་འཛིན་བཅུ་དྲུག་ནི་སྟོང་པ་ཉིད་ཀྱི་ཡེ་ཤེས་བཅུ་དྲུག་གོ། །མཁའ་འགྲོ་སྡེ་ལྔ་ནི་ཡེ་ཤེས་ལྔ་ཕྲིན་ལས་བཞིར་གྲུབ་ནས་དོན་མཛད་པའོ། །ཤུགས་འགྲོ་བརྒྱད་ནི་ཡེ་ཤེས་ལ་བྱ་བ་དང་བྱེད་པའི་ཕྲིན་ལས་བཞི་བཞིར་འཕྲོ་བའི་མཚོན་བྱེད་དོ། །སྲུང་མ་ནི་སངས་རྒྱས་དུས་རང་ལས་བྱུང་གི་དམ་ཅན་རང་ཤར་དུ་འབྱུང་བས་བསྟན་པ་སྐྱོང་ཞིང་སེམས་ཅན་གྱི་དོན་ལ་རྣམ་འཕྲུལ་འབྱུང་བའོ། །སྒོ་སྐྱོང་བཞི་ནི་བསྡུ་བའི་དངོས་པོ་བཞིས་དོན་མཛད་པའོ། །འདོད་ཡོན་ལྷ་མོ་ནི་སངས་རྒྱས་ཀྱི་ཞིང་ན་རང་སྣང་ཚོགས་གཉིས་རྫོགས་པའི་འབྱོར་པ་ལ་ལོངས་སྤྱོད་པའོ། །དུར་ཁྲོད་ནི་སངས་རྒྱས་ནས་སྤྲུལ་པ་གང་ལ་གང་འདུལ་དུ་བླ་མ་དང་། མཁའ་འགྲོ་དང་། འདྲེ་དང་། ཐ་ན་བྱ་དང་། ཤིང་དང་། ཆུ་དང་། མེ་དང་། ས་དང་། སྤྲིན་ཡན་ཆད་དུ་སྤྲུལ་ནས་འགྲོ་དོན་འབྱུང་བར་མཚོན་པའོ། །ཞེས་དབྱུག་པས་བསྟན་པར་བྱའོ། །དབང་པོ་རབ་ལ་རྣམ་དག་མ་བསྟན་ཀྱང་ཆོག་ལ། བསྟན་ཀྱང་འགལ་བ་མེད་དོ། །ཞེས་འབྱུང་ངོ་། །

གསོལ་བ་གདབ་(༢༩)པ་ནི། དེ་ལྟར་སངས་རྒྱས་ཀྱི་ཆོས་རྣམས་རང་ལ་ཡོད་ཀྱང་མངོན་དུ་མ་གྱུར་པ་ནི། ཐུགས་ཀྱི་དཀྱིལ་འཁོར་དུ་དབང་ཐོབ་པས་ལན་པས། ད་དབང་ཐོབ་པར་བྱེད་པ་ལ་སྔོན་དུ་གསོལ་བ་འདེབས་པ་ནི་གལ་ཆེ་བས། དད་གུས་རབ་དང་ལྡན་པས་མདུན་གྱི་ནམ་མཁར་བླ་མ་མཁའ་འགྲོ་བཞུགས་པ་ལ་དམིགས་ཏེ་གསོལ་བ་ཐོབ་ཅིག །ཅེས་བརྗོད་ལ། བླ་མ་རྡོ་རྗེ་འཛིན་པ་ནི། །ཁམས་གསུམ་འཁོར་བའི་གཉེན་གཅིག་པུ། །འགྲོ་བ་མགོན་མེད་རྣམས་ཀྱི་སྐྱབས། །ཐར་པའི་ལམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཉོན་མོངས་མེ་ཡིས་གདུངས་པ་ལ། །ཐུགས་རྗེའི་ཆར་གྱིས་བསིལ་བར་མཛོད། །ཐུགས་ཀྱི་དཀྱིལ་འཁོར་བཟང་པོ་འདིར། །བདག་ནི་ཡང་དག་གཞུག་ཏུ་གསོལ། །ཞེས་པ་གསུམ་བརྗོད། བསྡུས་པ་ལ། དེ་ནས་སློབ་བུ་པདྨ་མཁའ་འགྲོ་དམར་མོ་སྙིང་གར་འོད་མེ་ལོང་ཙམ་ཧ་རི་ནི་སས་མཚན་པ་ལ་སེམས་འཛིན་དུ་བཅུག་ལ་དབང་བསྐུར། རྒྱས་པར་བྱེད་ན་རིག་འཛིན་འདུས་པའི་བྱེ་བྲག་གི་རྒྱུད་ནས་འབྱུང་བ་ལྟར་གསོལ་བ་བཏབ་པའི་རྗེས་ལ། པདྨ་ཉི་ཟླའི་སྟེང་དུ་སློབ་བུ་རྣམས་ཧྲཱིཿམ་ལས་དཔའ་བོ་རྟ་མགྲིན་ཡབ་དབྱུག་ཏོ་དང་སྡིགས་མཛུབ་མཛད་ནས་བརྐྱང་བསྐུམ་དུ་བཞུགས་པའི་སྤྱི་བོར་རྟ་མགོ་ལྗང་གུ་མཚེར་བ་ལ། ཡུམ་རྡོ་རྗེ་ཕག་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པར་བསམས་པའི་སྤྱི་བོར་པད་ཉིའི་སྟེང་དུ་བླ་མ་ཡབ་ཡུམ་མཐིང་ནག་རྡོ་རྗེ་དྲིལ་བུ་འཛིན་པ་རྡོ་རྗེ་འཆང་ཡབ་ཡུམ་གྱི་རྣམ་པར་བཞུགས་པའི་གཡས་ན་དཔའ་བོའི་ཚོགས་མང་པོས་བྲོ་བརྡུང་བ། གཡོན་ན་དཔའ་མོའི་ཚོགས་མང་པོས་གླུ་ལེན་པ། རྒྱབ་ན་ཆོས་སྐྱོང་མང་པོའི་སྲུང་ཞིང་སྐྱོབ་པ། མདུན་ན་མཁའ་འགྲོ་མང་པོ་བཀའ་ཉན་པ། བདག་རང་རང་ལ་སྐུ་གསུང་ཐུགས་ཀྱིས་བྱིན་གྱིས་བརླབས་པར་བསྒོམས་ལ་མ་ཡེངས་གུས་པས་ལྷན་ནེ་གློད་ཅིག །ཅེས་བརྗོད་ནས། བླ་མས་དབྱངས་དང་བཅས་པ། ཧཱུྃ། ཡུལ་གྱི་མིང་ནི་ཨོ་རྒྱན་ཡུལ། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབས་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །དུར་ཁྲོད་ཆེན་པོའི་གནས་བརྒྱད་ནས། །སློབ་དཔོན་པདྨ་མཚན་བརྒྱད་ལ། །འཁོར་དུ་མཁའ་འགྲོ་མང་པོས་བསྐོར། །ནམ་མཁའི་མཐོངས་ནས་བྱིན་ཕོབས་ལ། །མོས་པའི་བུ་ལ་དབང་ཅིག་བསྐུར། །མཁའ་འགྲོའི་(༣༠)སྤྲིན་ཕུང་ཐིབས་སེ་ཐིབ། །གསེར་གྱི་རྔ་ཆུང་དི་རི་རི། །དར་གྱི་རྒྱན་ཆ་པུ་རུ་རུ། །ཐོར་ཚུགས་རིན་ཆེན་ལྡེམས་སེ་ལྡེམ། །དཔའ་བོས་བྲོ་བརྡུངས་ཁྲབས་སེ་ཁྲབ། །དཔའ་མོས་གླུ་ལེན་ཀྱུ་རུ་རུ། །ཕཊ་ཀྱི་གདངས་སྐད་སངས་སེ་སང་། །གནས་མཆོག་འདི་རུ་བྱིན་ཕོབས་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ༀ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲཱིཾ་ཧྲཱིཾ་ཛ་ཛཿཞེས་རོལ་མོའི་སྒྲ་དང་བཅས་དུས་རྣལ་འབྱོར་ཕོ་མོ་འགའ་ཟུང་གཤིབས་ཏེ་བྲོ་བརྡུངས་ཤིང་འཛབ་དབྱངས་བརྗོད་པས་བྱིན་ཕེབས་སོ། །

དངོས་གཞི་དབང་བསྐུར་བ་ནི། སློབ་བུ་རྣ་མས་སྐྱིལ་ཀྲུང་བཅས་པའི་སྤྱི་བོར་གཏོར་མ་བཏེགས་ནས། གཏོར་མ་ལྷའི་དཀྱིལ་འཁོར་ཡོངས་སུ་རྫོགས་པ་རང་རང་གི་སྤྱི་བོར་བྱོན་པས་ལྷ་རྣམས་ཀྱི་དབུའི་གཙུག་གི་ༀ་དཀར་པོ་ལས་འོད་འཕྲོས་རང་རང་གི་ལུས་ལ་ཕོག་པས་ལུས་ཀྱི་སྒྲིབ་པ་དག །སྐུ་དངོས་གྲུབ་བདུད་རྩི་དཀར་པོའི་རྒྱུན་བབས་པས་ལུས་ཁེངས། བུམ་པའི་དབང་ཐོབ། དབང་རྟགས་སུ་སྤྱི་བོར་ༀ་དཀར་པོས་མཚན། ལྷ་རྣམས་ཀྱི་མགྲིན་པའི་ཨཱཿདམར་པོ་ལས་འོད་འཕྲོས། རང་གི་མགྲིན་པར་ཕོག །ངག་གི་སྒྲིབ་པ་དག །གསུང་གི་དངོས་གྲུབ་བདུད་རྩི་དམར་པོའི་རྒྱུན་བབས། ལུས་ཁེངས་གསང་བའི་དབང་ཐོབ། དབང་རྟགས་སུ་མགྲིན་པར་ཨཱཿདམར་པོས་མཚན། ལྷའི་ཐུགས་ཀའི་ཧཱུྃ་མཐིང་ག་ལས་འོད་འཕྲོས། རང་གི་སྙིང་གར་ཕོག །ཡིད་ཀྱི་སྒྲིབ་པ་དག །ཐུགས་ཀྱི་དངོས་གྲུབ་བདུད་རྩི་སྔོན་པོའི་རྒྱུན་བབས་པས་ལུས་ཁེངས། ཤེས་རབ་ཡེ་ཤེས་ཀྱི་དབང་ཐོབ། དབང་རྟགས་སུ་སྙིང་གར་ཧཱུྃ་མཐིང་གས་མཚན། གཞན་ཡང་ཨོ་རྒྱན་ནས་སློབ་དཔོན་པདྨ་འཁོར་མཁའ་འགྲོ་དང་བཅས་པས་སྐད་ཅིག་གིས་སྤྲིན་ཕུང་བཞིན་དུ་བུན་ནུ་ནུ་བྱོན་པ་རང་གི་ལུས་ངག་ཡིད་གསུམ་ལ་ཐིམ་པར་སྒོམས་ཤིག །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧྲཱིཿམ་ཧ་རི་ནི་ས་ཨ་བྷི་ཥིཉྩ་ཀཱ་ཡ་ཝཱ་ཀ་ཙིཏྟ་ཧཱུྃ་ཧཱུྃ་ཕཊ་ཕཊ་ཕེཾ་ཕེཾ་ཞེས་བརྗོད་ནས་སྤྱི་བོར། མགྲིན་པ། སྙིང་ག་གསུམ་དུ་རིམ་པ་བཞིན་དུ་བསྐུར་རོ། །རྒྱས་པར་བྱེད་ན། སློབ་མ་རྣམས་སྐད་ཅིག་གིས་པདྨ་ཉི་མའི་སྟེང་དུ་ཡི་དམ་རྒྱལ་བ་རིགས་ལྔའམ། རྡོ་རྗེ་འཆང་གི་རྣམ་པར་གསལ་བའི་སྤྱི་བོར་དཔལ་གཏོར་དེ་ཉིད་སྔར་བསྐྱེད་པའི་སྐབས་ལྟར་བླ་མ་མཁའ་འགྲོའི་དཀྱིལ་འཁོར་དུ་གསལ་བའི་དབུ་གཙུག་གི་ༀ་དཀར་པོ་ལས་འོད་འཕྲོས། ཕྱོགས་བཅུའི་སངས་རྒྱས་ཐམས་ཅད་ཀྱི་སྐུའི་དཀྱིལ་འཁོར་ཐམས་ཅད་སྤྱན་དྲངས་སློབ་བུའི་ལུས་ལ་ཐིམ། ལུས་ཀྱི་སྡིག་སྒྲིབ་ཉམས་ཆག་ཐམས་ཅད་དག །སྐུའི་དངོས་གྲུབ་ཐོབ། བདུད་རྩི་དཀར་པོའི་རྒྱུན་གྱིས་ལུས་ཁེངས། བུམ་པའི་དབང་ཐོབ། སངས་རྒྱས་ཐམས་ཅད་རིགས་ལྔའི་སྐུར་(༣༡)བཞེངས། བདུད་རྩིའི་བུམ་པས་དབང་བསྐུར་བའི་ཆུ་ལུད་པ་ལས་རིགས་ལྔ་འོད་དུ་ཞུ་བ་ལས་བྱུང་བའི། སློབ་བུའི་དུང་ཁང་ན་འཁོར་ལོ་དཀར་པོ་ༀ་གྱིས་མཚན་པར་བསམས་ལ། ཨེ་མའོ། །ངོ་མཚར་རྨད་དུ་བྱུང་བའི་དབང་། །བླ་མ་རྣམས་དང་གཅིག་པ་དང་། །ཡི་དམ་ལྷ་དང་དབྱེར་མེད་དང་། །མཁའ་འགྲོས་བྱིན་གྱིས་རློབ་པའི་ཕྱིར། །དམ་རྫས་གཏོར་མའི་དབང་བསྐུར་བས། །རྩ་བ་གསུམ་གྱི་བྱིན་རླབས་ཀྱིས། །སྐུ་ཡི་བྱིན་རླབས་ལུས་ལ་ཞུགས། །ལུས་ཀྱི་སྒྲིབ་པ་བྱང་གྱུར་ནས། །སྐུ་མི་འགྱུར་ཚེ་ཡི་དབང་ཐོབ་ཤོག །ༀ་ཨཱཿཧཱུྃ་གུ་རུ་དེ་བ་ཛོ་ཀཱི་ཌཱ་ཀི་ནཱི་ཀཱ་ཡ་བ་ལིཾ་ཏ་ཨ་བྷི་ཥིཉྩ་ༀ་ༀ་ༀ། ཞེས་བརྗོད། གཏོར་མ་མགྲིན་པར་གཏུགས་ལ། ལྷ་རྣམས་ཀྱི་མགྲིན་པའི་ཨཱཿདམར་པོ་ལས་འོད་འཕྲོས། ཕྱོགས་བཅུའི་སངས་རྒྱས་ཐམས་ཅད་ཀྱི་གསུང་གི་དཀྱིལ་འཁོར་ཐམས་ཅད་སྤྱན་དྲངས། ངག་ལ་ཐིམ། ངག་གི་སྒྲིབ་པ་དང་ཉམས་ཆག་ཐམས་ཅད་དག །གསུང་གི་དངོས་གྲུབ་ཐམས་ཅད་ཐོབ། བདུད་རྩི་དམར་པོའི་རྒྱུན་བབ་པས་ལུས་ཁེངས། གསང་བའི་དབང་ཐོབ། སངས་རྒྱས་རིགས་ལྔས་དབང་བསྐུར། ཆུ་ལྷག་མ་དང་གཅིག་ཏུ་གྱུར་པ་ལས། མགྲིན་པར་པདྨ་འདབ་བརྒྱད་དམར་པོ་ཨཱཿས་མཚན་པར་གྱུར་པར་བསམས་ལ། ཨེ་མའོ། །ངོ་མཚར་རྨད་དུ་བྱུང་བའི་དབང་། །བླ་མ་ཀུན་དང་གཅིག་པ་དང་། །ཡི་དམ་ལྷ་དང་དབྱེར་མེད་དང་། །མཁའ་འགྲོས་བྱིན་གྱིས་རློབས་པའི་ཕྱིར། །དམ་རྫས་གཏོར་མས་དབང་བསྐུར་བས། །རྩ་བ་གསུམ་གྱི་བྱིན་རླབས་ཀྱིས། །གསུང་གི་བྱིན་རླབས་ངག་ལ་ཞུགས། །ངག་གི་སྒྲིབ་པ་བྱང་གྱུར་ནས། །གསུང་སྙིང་པོ་ལུང་གི་དབང་ཐོབ་ཤོག །ༀ་ཨཱཿཧཱུྃ་བཛྲ་གུ་རུ་དེ་ཝ་ཛོ་ཀི་ཌཱ་ཀི་ནི་ཝཱ་ཀ་བ་ལིཾ་ཏ་ཨ་བྷི་ཥིཉྩ་ཨཱཿཨཱཿཨཱཿཞེས་བརྗོད། གཏོར་མ་སྙིང་གར་གཏུགས་ལ། ལྷའི་ཐུགས་ཀའི་ཧཱུྃ་ལས་འོད་འཕྲོས། ཕྱོགས་བཅུའི་སངས་རྒྱས་ཐམས་ཅད་ཀྱི་ཐུགས་ཀྱི་དཀྱིལ་འཁོར་ཐམས་ཅད་སྤྱན་དྲངས་སློབ་མའི་ཡིད་ལ་ཐིམ། སེམས་ཀྱི་སྡིག་སྒྲིབ་དང་ཉམས་ཆག་དག །ཐུགས་ཀྱི་དབང་ཐོབ། བདུད་རྩི་མཐིང་གའི་རྒྱུན་བབ་པས་ལུས་ཁེངས། ཤེས་རབ་ཡེ་ཤེས་ཀྱི་དབང་ཐོབ། སངས་རྒྱས་རིགས་ལྔས་དབང་བསྐུར་བས་ཆུ་ལུད་པ་དང་རིགས་ལྔ་གཅིག་ཏུ་གྱུར་པ་དང་། དེ་སྙིང་གར་རྡོ་རྗེ་སྔོན་པོ་ཧཱུྃ་གིས་མཚན་པར་བསམས་ལ། ཨེ་མའོ། ངོ་མཚར་རྨད་དུ་བྱུང་བའི་གནས། །བླ་མ་ཀུན་དང་གཅིག་པ་དང་། །ཡི་དམ་ལྷ་དང་དབྱེར་མེད་དང་། །མཁའ་འགྲོས་བྱིན་གྱིས་རློབ་པའི་ཕྱིར། །དམ་རྫས་གཏོར་མས་དབང་བསྐུར་བས། །རྩ་བ་གསུམ་གྱི་བྱིན་རླབས་ཀྱིས། །ཐུགས་ཀྱི་བྱིན་རླབས་སེམས་ལ་ཐུགས། །སེམས་ཀྱི་སྒྲིབ་པ་བྱང་གྱུར་ནས། །ཐུགས་སྐྱེ་མེད་རྡོ་རྗེའི་དབང་ཐོབ་ཤོག །ༀ་ཨཱཿཧཱུྃ་གུ་རུ་དེ་ཝ་ཛོ་ཀི་ཌཱ་ཀི་ནཱི་ཙིཏྟ་བ་ལིཾ་ཏ་ཨ་བྷི་ཥིཉྩ་ཧཱུྃ་ཧཱུྃ་ཧཱུྃ། ཞེས་བརྗོད་དོ། །

དབང་བཞི་པ་ནི། (༣༢)ཐམས་ཅད་ཧཱུྃ་ཧཱུྃ་ཧཱུྃ་ཞེས་དབྱངས་དང་བཅས་པ་བྱིན་འུར་གྱིས་མ་ཕེབས་བར་དུ་བརྗོད་ལ། ཕཊ་ཅེས་དྲག་པོར་བརྗོད་ནས་ལུས་སེམས་ཁོང་གློད་པའི་ངང་ལ་ངོ་སྤྲོད་དེ། ཀྱེའོ་སྐལ་ལྡན་སེམས་འདས་པའི་རྗེས་མ་བཅད། མ་འོངས་པའི་སྔོན་མི་བསུ། ད་ལྟ་འཕྲོ་འདུའི་རྟོག་པ་རང་བབས་སུ་བཞག་དུས་འདི་ན། ཕྱི་སྣང་བ་མ་འགག་པར་གསལ་སེང་ངེ་། ནང་རིག་པ་མི་རྟོག་པར་རྗེན་སངས་སེ་བར་ལུས་སེམས་རབ་ཏུ་བདེ་མེ་རེ་བའི་རང་ངོ་ལ་ལྟོས་དང་། བདེན་མེད་དུང་བུན་ནེ། རྗེས་མེད་དུ་ཁྲེས་སེ། རྩ་བྲལ་དུ་ཤིགས་སེ། ཟང་ཐལ་སྤྲོ་བསྡུ་དང་བྲལ་བའི་རིག་པ་འདི་རང་ངོ་ཤེས་པ་ལ་ཚིག་དབང་རིན་པོ་ཆེ་ཐོབ་པ་ཞེས་བྱ་བ་ཡིན་ཏེ། གསང་བ་སྒྲ་རྒྱུད་ལས། རང་བྱུང་རིག་པ་དོན་གྱི་དབང་། །སལ་ལེ་སིང་ངེ་འོལ་ལེ་བ། །སྟོང་གསལ་སྟོན་ཀའི་ནམ་མཁའ་བཞིན། །ཆོས་སྐུ་ཉག་གཅིག་དོན་གྱི་དབང་། །ཞེས་འདི་ཉིད་རང་ཆས་ཡོང་ཡེའི་སངས་རྒྱས་ཡིན་པས། རང་ངོ་ཤེས་ཐོག་ཏུ་བཞག་པ་ལས་གཞན་མི་བཙལ་ཏེ། སྒྱུ་འཕྲུལ་ལས། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་གྱུར། །སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་ནས་མ་བཙལ་ཅིག །བཙལ་ཀྱང་རྒྱལ་བས་མི་རྙེད་དོ། །ཞེས་སོ། །འདིའི་ངང་ལ་འཁོར་འདས་ཀྱི་ཆོས་ཐམས་ཅད་མེད་སྣང་སྒྱུ་མ་ཙམ་དུ་སྐྱེ་འགག་གནས་གསུམ་ལྟར་སྣང་དུས་ཉིད་ནས་སྐྱེ་འགག་གནས་པ་མེད་པར་ལ་ཟློ་བ་ནི་རིག་པ་རྩལ་གྱི་དབང་སྟེ། སྒྱུ་འཕྲུལ་ལས། ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ལས་སྐྱེ་བ་མེད། །ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ནས་འགག་པ་མེད། །ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱིས་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ནས་གནས་པ་མེད། །ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ནས་འགྲོ་འོང་མེད། །ཅེས་གསུངས་པ་ལྟར་ཐག་གཅོད། དེ་ལྟར་ན་དབང་དང་པོ་གསུམ་སྣང་བཅས་ཐབས་བསྐྱེད་པའི་རིམ་པ་གཟུགས་སྐུ་སྒྱུ་མ་ལྟ་བུའི་དོན་བསྒོམ་པ་དང་བསྒྲུབ་པ་ལ་དབང་ལ།

བཞི་པ་སྣང་མེད་ཤེས་རབ་ཀྱི་རིམ་པ་རྫོགས་རིམ་ནམ་མཁའ་ལྟ་བུར་བསྒོམ་པ་དང་ཆོས་སྐུ་དམ་པ་ཐོབ་པའི་རྒྱུ་བྱེད་པ་ལ་དབང་བས་ན་དབང་ཞེས་བྱའོ། །དེའང་གཏོར་མ་རིན་པོ་ཆེ་འབར་བ་འདིས་མཚོན་ནས་བསྟན་ཏེ། དབང་དང་པོ་གསུམ་གྱི་སྐབས་སུ་གཏོར་མ་ལྷ་དང་གཞལ་ཡས་ཁང་དུ་ཤེས་པས་བསྐྱེད་རིམ་སྣང་བཅས་ཀྱི་དབང་བསྐུར་བའི་དོན་ཙམ་དུ་བྱུང་ལ། དབང་བཞི་པའི་སྐབས་སུ་གཏོར་མ་བརྡ་དོན་དུ་ཤེས་པའི་རྫོགས་རིམ་སྣང་མེད་ཀྱི་དབང་བསྐུར་(༣༣)བའི་དག་པར་བྱུང་སྟེ། དེའང་གཞི་ལམ་འབྲས་གསུམ་ལས། གཞི་གནས་ལུགས་མཚོན་བྱེད་རིན་པོ་ཆེ་འབར་བ་ལ་ལྟོས་ཤིག །སེམས་ཉིད་འདི་ལ་རྟོགས་ནས་སངས་རྒྱས་འབྱུང་ཞིང་། མ་རྟོགས་ན་འཁོར་བ་འབྱུང་ཡང་། གཞི་ལ་བཟང་ངན་གང་དུ་དབྱེར་མེད་པས་སྟོང་གསལ་ལྷུན་གྲུབ་ཆེན་པོར་གནས་པ་ཉིད། ཀློང་ཆེན་རབ་འབྱམས་ལས། སེམས་ཉིད་ནོར་བུ་རིན་པོ་ཆེ། །འཁོར་འདས་མ་ལུས་འབྱུང་བའི་གཞི། །ཞེས་སོ། །ལམ་སེམས་ཉིད་སྣ་ཚོགས་སུ་འཆར་བ་མཚོན་བྱེད་རིན་པོ་ཆེ་འབར་བ་ལ་ལྟོས་ཤིག །ཆོས་ཐམས་ཅད་སེམས་ཉིད་རིན་པོ་ཆེའི་འཆར་ཚུལ་གྱི་སྣང་བ་ཙམ་ཡིན་ཏེ། རིམ་དྲུག་ལས། སེམས་ཉིད་ནོར་བུ་རིན་པོ་ཆེ། །ཇི་ལྟར་བལྟས་པས་སྣང་བ་ལ། །འཁྲུལ་གཞི་ཡོད་མེད་སྒྲོ་སྐུར་བྲལ། །ཞེས་སོ། །དེའང་སེམས་ཉིད་མ་རྟོགས་པའི་དུས་ན་ནོར་བུ་རས་སྣ་ཚོགས་ཀྱི་སྟེང་ངམ། ནག་པོའི་སྟེང་དུ་བཞག་པ་ལྟར་འཁྲུལ་སྣང་རིགས་དྲུག་གཟུང་འཛིན་དུ་སྣང་ལ། རྟོགས་པ་ལམ་དང་འབྲས་བུའི་དུས་ནས་ལམ་གྱི་ཡོན་ཏན་དང་སངས་རྒྱས་ཀྱི་ཡེ་ཤེས་སུ་སྣང་སྟེ། ཡུམ་ལས། ནོར་བུ་རིན་པོ་ཆེ་རས་དཀར་པོས་དཀྲིས་ལ་ཆབ་ཀྱི་སྟེང་དུ་བཙལ་ན་དཀར་པོར་འགྱུར་རོ། །དེ་བཞིན་དུ་སེར་པོ་དང་། དམར་པོ་དང་། སྔོན་པོ་དང་། ནག་པོས་དཀྲིས་ཏེ་ཆབ་ཀྱི་སྟེང་དུ་བཙལ་ནའང་དེའི་ཁ་དོག་ཏུ་འགྱུར་རོ། །རིན་པོ་ཆེ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་བླ་དྭགས་སོ། །རས་སྣ་ཚོགས་ཞེས་བྱ་བ་ནི་འཁོར་བ་དང་མྱ་ངན་ལས་འདས་པའི་ཚིག་བླ་དྭགས་སོ། །ཞེས་སོ། །དེའང་སེམས་ཉིད་ནོར་བུ་ལྟ་བུ་ལ་དུག་ལྔ་སེར་སྣ་དང་དྲུག་གིས་དཀྲིས་པས་འགྲོ་དྲུག་འཁྲུལ་པའི་སྣང་བ་དྲུག་ཏུ་ཤར་བའོ། །གདོས་བཅས་དབང་པོ་དྲུག་གི་རས་ཀྱིས་དཀྲིས་པས་ཚོགས་དྲུག་ཡུལ་གྱི་སྣང་བ་ཤར་བའོ། །རང་འདོད་ཐེག་པའི་རས་ཀྱིས་དཀྲིས་པས་རིམ་དགུ་བཟང་ངན་གྱི་སྣང་བ་ཤར་བའོ། །དེ་ལྟར་སྣང་ཚུལ་ཇི་ལྟར་སྣང་ཡང་ཡིན་ཚུལ་རིག་པ་གཅིག་ལས་མ་གཡོས་ཏེ། ནོར་བུ་རས་གང་དཀྲིས་དེར་སྣ་ཚོགས་གྲངས་ལས་འདས་པར་སྣང་ཡང་ཡིན་ཚུལ་གཅིག་ལས་མ་གཡོས་པ་བཞིན་ནོ། །འབྲས་བུ་སྐུ་གསུམ་མཚོན་བྱེད་རིན་པོ་ཆེ་འབར་བ་ལ་ལྟོས་ཤིག །ནོར་བུ་ལ་དྭངས་པ་དང་། གསལ་བ། འཆར་སྒོ་མི་འགག་པ་གསུམ་གཅིག་པ་ལྟར། སེམས་ཉིད་འདི་སྟོང་པ་ཆོས་སྐུ། གསལ་བ་ལོངས་སྐུ། འཆར་ཚུལ་ཅིར་ཡང་མ་འགག་པ་སྤྲུལ་པའི་སྐུ་སྟེ། རིག་པ་ཉག་གཅིག་སྐུ་གསུམ་དུ་སྣང་བ་ཉིད་དེ། ལམ་རིམ་ལས། རྫོགས་པར་རྟོག་མེད་རེ་བ་སྐོང་། །ཟད་འཕེལ་འགྲོ་འོང་ཉེ་རིང་མེད། །ཆོས་དྲུག་ནོར་བུས་མཚོན་པའོ། །སེམས་ཉིད་རྫོགས་པའི་རྣལ་འབྱོར་ལ། །སྐུ་གསུམ་ལྷུན་གྱིས་གྲུབ་པར་རྫོགས་ཞེས་སོ། །

རྗེས་ལ་ལུང་འབོག་པ། ལྷ་མཆོད་(༣༤)པ། དངོས་གྲུབ་བླང་བ་དང་གསུམ་ལས། དང་པོ་ནི། སྔར་བསྐྱེད་རིམ་དུ་བཤད་པ་ལྟར་བླ་མ་མཁའ་འགྲོའི་དཀྱིལ་འཁོར་གསལ་བཏབ་ལ། ཐམས་ཅད་འཛབ་དབྱངས་བཟླས་པར་དམིགས་ཏེ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲཱིཾ་ཧྲཱིཾ། ཞེས་པའམ། ༀ་བཛྲ་གུ་རུ་པདྨ་སིདྡྷི་ཨཱཿཧཱུྃ། ཞེས་པ་སྔོན་ལ་རིང་པོ། བར་དུ་འབྲིང་པོ། རྗེས་ལ་ཐུང་བར་བརྗོད་ལ། དཀྱིལ་འཁོར་ཐམས་ཅད་རིམ་གྱིས་གཙོ་བོའི་ཐུགས་ཀར་བསྡུས་ལ། མཐར་མི་དམིགས་པའི་ངང་ལ་བཞག་གོ། །

ལྷ་མཆོད་པ་ནི། གཏོར་མའི་དཀྱིལ་འཁོར་སོ་སོའི་སྙིང་གར་ཐིམ་ནས། གཏོར་མ་ལྷའི་ཞལ་ཟས་འདོད་ཡོན་ལྔའི་ལྷ་མོ་དང་བཅས་པ་བླ་མ་ཡི་དམ་མཁའ་འགྲོའི་དཀྱིལ་འཁོར་དུ་མདུན་གྱི་ནམ་མཁར་གསལ་བ་ལ་དབུལ་ཏེ། ༀ་ཨཱཿཧཱུྃ་གུ་རུ་དེ་ཝ་ཛོ་ཀི་ཌཱ་ཀི་ནཱི་ཧ་རི་ནི་ས་ར་ཙ་ཧྲི་ཡ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་གསུམ་དང་རོལ་མོའི་སྒྲས་ཕུལ་བས་མཉེས་ནས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་ཞིང་། ཧྲཱིཿམ་བཅོས་སྤྲོས་བྲལ་བླ་མ་ཆོས་ཀྱི་སྐུ། །བདེ་ཆེན་འོད་གསལ་བླ་མ་ལོངས་སྤྱོད་རྫོགས། །པད་སྡོང་ལས་འཁྲུངས་བླ་མ་སྤྲུལ་པའི་སྐུ། །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། །དངོས་གྲུབ་མཆོད་བརྙེས་ཡ་མཚན་ཆེན་པོའི་སྐུ། །པདྨ་ལས་འཁྲུངས་ཚེ་དབང་རྡོ་རྗེའི་སྐུ། །བདེ་གཤེགས་ཀློང་ནས་ལྷུན་གྱིས་གྲུབ་པའི་སྐུ། །པདྨ་འབྱུང་གནས་སྐུ་ལ་ཕྱག་འཚལ་བསྟོད། །མ་ཆགས་སྐྱོན་བྲལ་གསུང་རབ་རྒྱ་མཚོའི་གླིང་། །གསང་སྔགས་མ་ལུས་དམ་ཆོས་རིན་ཆེན་མཛོད། །ཚངས་དབྱངས་ཟབ་མོའི་ཆོས་ཀྱི་ཆར་འབེབས་པ། །པདྨ་རྒྱལ་པོའི་གསུང་ལ་ཕྱག་འཚལ་བསྟོད། །ཆོས་སྐུ་རྟོག་བྲལ་མཁའ་ལྟར་དག་པའི་དང་། །ཏིང་འཛིན་སྐར་ཚོགས་འབུམ་ཕྲག་ཡངས་པའི་ཐུགས། །ཇི་སྙེད་ཇི་བཞིན་གཟིགས་པ་ཉི་ཟླའི་སྤྱན། །པདྨ་ཐོད་ཕྲེང་ཐུགས་ལ་ཕྱག་འཚལ་བསྟོད། །ཡོན་ཏན་བརྒྱད་སོགས་སྒྲུབ་པ་བདེ་གཤེགས་བརྒྱད། །དངོས་གྲུབ་ཆར་འབེབས་རིག་འཛིན་བཅུ་དྲུག་གཙོ། །ཡེ་ཤེས་ལྔ་རྫོགས་རིགས་ལྔའི་མཁའ་འགྲོ་གིང་། །དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད། །སྒོ་སྐྱོང་བཞི་དང་འདོད་ཡོན་ལྷ་མོ་ལྔ། །རང་གཞན་དོན་གཉིས་འབྱོར་ཚོགས་ལྷུན་གྱིས་གྲུབ། །དུར་ཁྲོད་ཞིང་སྐྱོང་འཁོར་བཅས་བྱང་ཆུབ་སེམས། །དཀྱིལ་འཁོར་རིན་ཆེན་གཏེར་ལ་ཕྱག་འཚལ་བསྟོད། །ཅེས་བསྟོད་དོ། །

དངོས་གྲུབ་བླང་བ་ནི། གཏོར་མ་དེ་མཆོག་དང་ཐུན་མོང་གི་དངོས་གྲུབ་ཀྱི་རྫས་ལྷའི་བདུད་རྩི་འདོད་ཡོན་ལྔའི་རང་བཞིན། ཟོས་པ་ཙམ་གྱིས་ནད་ཞི་བ། གདོན་ཞི་བ། རྐྱེན་ངན་དང་བར་ཆད་ཞི་བ། ཚེ་རིང་བ། ནད་མེད་པ། ལོངས་སྤྱོད་འཕེལ་བ། ཅི་བསམ་འགྲུབ་པ། མཐར་ཐུག་སངས་རྒྱས་ཀྱི་བྱང་ཆུབ་འགྲུབ་པར་དམིགས་ལ། ཀ་པཱ་ལའི་སྦྲང་ཆང་ཧུབ་རེ་དང་མཉམ་དུ་དྲངས་(༣༥)པ་རོལ་པས་དེ་ལྟར་ཐོབ་བོ།། །།

སྤྱི་དོན་གསུམ་པ་རྗེས་ཀྱི་ཆོ་ག་ལ། ཕྲིན་ལས་བཅོལ་བ། ལྷག་གཏོར་གཏོང་བ། བརྟན་མ་སྐྱོང་བ། བྲོ་བརྡུང་བ། བཟོད་པར་གསོལ་པ། དཀྱིལ་འཁོར་བསྡུ་བ། བསྔོ་བ་བྱ་བ། བཀྲ་ཤིས་བརྗོད་པ་དང་བརྒྱད་ལས། དང་པོ་ནི། གཏོར་ཆུང་རྣམས་ལ་བདུད་རྩི་རཀྟས་བྲན་ཏེ། ཧཱུྃ་བྷྱོ། རྡོ་རྗེ་རིགས་ཀྱི་མཁའ་འགྲོ་མ། །དཀར་མོ་དུང་གི་ཐོར་ཚུགས་ཅན། །རྡོ་རྗེ་གདན་ནས་སྐུ་བཞེངས་ཤིག །གནས་བཟང་དུར་ཁྲོད་ཉམས་རེ་དགའ། །གོས་བཟང་གཡང་གཞི་བརྗིད་རེ་ཆེ། །སྐྱོགས་བཟང་བྷནྡྷ་མཚན་རེ་བཟང་། །འབྲུ་བཟང་བདུད་རྩི་བག་རེ་དྲོ། །སྐྱེམས་བཟང་རཀྟ་བཅུད་རེ་ཆེ། །ཞལ་ཟས་མང་པོ་རོ་རེ་བདའ། །དམ་ཅན་སྲུང་མ་མཁའ་འགྲོའི་ཚོགས། །དམ་རྫས་རྒྱན་གྱི་གཏོར་མ་ལོངས། །བཞེས་ཤིག་རོལ་ཅིག་ཁ་རཾ་ཁཱ་ཧི། །གཏོར་མ་ཁྱེད་ལ་ཕར་བཏང་བས། །དངོས་གྲུབ་བདག་ལ་ཚུར་ལ་གསོལ། །ཚེ་སྲིངས་ནོར་སྤེལ་བསམ་པ་སྒྲུབས། །འཁོར་སྲུངས་རྐྱེན་ཟློག་བར་ཆད་སོལ། །ཧཱུྃ་བྷྱོ། རིན་ཆེན་རིགས་ཀྱི་མཁའ་འགྲོ་མ། །སེར་མོ་གསེར་གྱི་སྐེད་ཆིངས་ཅན། །དུར་ཁྲོད་གནས་ནས་སྐུ་བཞེངས་ཤིག །གནས་བཟང་༴། །སོགས་འགྲེས། ཧཱུྃ་བྷྱོ། པདྨ་རིགས་ཀྱི་མཁའ་འགྲོ་མ། །དམར་མོ་བསེ་ཡི་ལན་ཚར་ཅན། །དུར་ཁྲོད་གནས་ནས་སྐུ་བཞེངས་ཤིག །གནས་བཟང་༴། །འགྲེས། ཧཱུྃ་བྷྱོ། ལས་ཀྱི་རིགས་ཀྱི་མཁའ་འགྲོ་མ། །སྔོན་མོ་གཡུ་ཡི་ཐོར་ཚུགས་ཅན། །དུར་ཁྲོད་གནས་ནས་སྐུ་བཞེངས་ཤིག །གནས་བཟང་༴། །འགྲེ། མཁའ་འགྲོ་དཔའ་བོ་དཔའ་མོའི་ཚོགས། །ཐུགས་དམ་བསྐང་ངོ་གིང་གི་ཚོགས། །ཕྱི་ནང་གསང་མཆོད་གཏོར་མར་བཅས། །བཞེས་ཤིག་དཔའ་བོ་དཔའ་མོའི་ཚོགས། །ཁྱེད་ཅག་གཞན་དང་མི་འདྲ་སྟེ། །སྔོན་ཚེ་དཔལ་གྱི་དམ་མནོས་པ། །དཔལ་གྱི་གཏོར་ལེན་སྲུང་མ་ཡིན། །དམ་ལ་བཏགས་པའི་གཏོར་ལེན་ཡིན། །སློབ་དཔོན་པདྨའི་སྤྱན་སྔ་རུ། །ཁས་བླངས་དམ་བཅའ་གཉེན་པོ་དེ། །ད་ལྟ་རྣལ་འབྱོར་བདག་བསྐུལ་གྱིས། །བཀའ་ཡི་གཏོར་མ་འདི་ལོངས་ལ། །འཁོར་སྲུངས་རྐྱེན་ཟློག་བར་ཆད་སོལ། །བཀའ་ལ་བཏགས་སོ་བཀའ་ལྟར་གྱིས། །དམ་ལ་བཏགས་སོ་དམ་ཚིག་སྲུངས། །ཐུགས་ལ་བཏགས་སོ་ཐུགས་དམ་བཞེས། །སྔོན་གྱི་ཐུགས་དམ་རྗེས་དགོངས་ལ། །དམ་རྫས་རྒྱན་གྱི་གཏོར་མ་ལོངས། །བཞེས་ཤིག་རོལ་ཅིག་ཁ་རཾ་ཁཱ་ཧི། །གཏོར་མ་ཁྱེད་ལ་ཕར་བཏང་བས། །དངོས་གྲུབ་བདག་ལ་ཚུར་ལ་གསོལ། །ཚེ་སྲིངས་ནོར་སྤེལ་བསམ་པ་སྒྲུབས། །འཁོར་སྲུངས་རྐྱེན་ཟློག་བར་ཆད་སོལ། །ཞེས་བརྗོད་དོ། །

ལྷག་གཏོར་ནི། སྔར་གྱི་ལྷག་མའི་སྟེང་དུ་གཏོར་མ་སྤུངས་ལ། མར་མེ་གཅིག་བཞག་སྟེ། རྡོ་རྗེ་སློབ་དཔོན་གྱི་ཁ་ཆུ་བདུད་རྩིར་བསམ་པས་བྲན་ཏེ། ༀ་ཨཱཿཧཱུྃ་མཧཱ་པཉྩ་ཨ་མྲ྇་ཏ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལྷག་མའི་ཚོགས་ཀྱི་སྐལ་(༣༦)བ་ལ་དབང་བའི། །མཁའ་འགྲོ་གིང་དང་དྲེགས་པ་སྡེ་བརྒྱད་བཅས། །ལྷག་མའི་མཆོད་སྦྱིན་བཟང་པོ་འདི་སྣོམས་ལ། །བཅོལ་བའི་ཕྲིན་ལས་མ་ལུས་གྲུབ་པར་མཛོད། །ཅེས་བརྗོད་ལ་བཏང་ངོ་། །

བརྟན་མ་བསྐྱང་བ་ནི། ལྷག་གཏོར་ཕྱིར་སོང་བའི་རྗེས་ལ་རྔ་བརྡུང་ཞིང་། ཧཱུྃ། བཀའ་ཡི་ཚོགས་དང་བཅས་ཉིད་དུ། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་གཤེགས་རྒྱན་གྱི་གཏོར་མ་བཞེས། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་བརྟན་མ་བཅུ་གཉིས་པོ། །རིན་ཆེན་ལྷབ་ལྷུབ་མང་པོའི་རྒྱན་དང་བཅས། །ཕོ་ཉ་ཡང་གཡོག་མང་པོའི་འཁོར་དང་བཅས། །མཆོད་དང་གཏོར་མ་དམ་པ་འདི་བཞེས་ལ། །བཅོལ་བའི་ཕྲིན་ལས་མ་ལུས་གྲུབ་པར་མཛོད། །ཧཱུྃ། བརྟན་མ་ཆེན་མོ་ཁྱེད་རྣམས་ལ། །སློབ་དཔོན་པདྨ་ཐོད་ཕྲེང་གིས། །རྒྱ་ཡུལ་དེ་ནི་བསྟན་བཟང་ན། །ཨ་སུ་ར་ཡི་བྲག་ཕུག་ཏུ། །རྣམ་ལྔ་ཞིང་གི་མཆོད་བཤམས་ནས། །ཞིང་ཆེན་སྒྲོལ་བའི་གདན་སྟེང་དུ། །དམར་ཆེན་བྷནྡྷའི་མཆོད་བཤམས་ནས། །ལག་ཏུ་རྡོ་རྗེ་གཏད་ནས་ཀྱང་། །རྣལ་འབྱོར་སྒྲུབ་པའི་གྲོགས་གྱིས་ཞེས། །ཐར་པ་ཐོབ་ཕྱིར་མིང་བཏགས་ཏེ། །བྲན་གྱི་ཚུལ་དུ་ཁས་བླངས་མ། །དམ་ཚིག་དེ་ལས་ཁྱོད་མ་འདའ། །དམ་ཚིག་དེ་ལས་ཁྱེད་འདས་ན། བཛྲ་ཡཀྵ་ཁྲོ་མོ་ཡིས། །སྙིང་གི་དཀྱིལ་ནས་ཁྲག་དྲངས་ཏེ། །འོ་དོད་འབོད་པར་གདོན་མི་ཟ། །དེ་བས་བོད་ཁམས་སྐྱོང་མའི་ཚོགས། །སྔོན་གྱི་ཐུགས་དམ་རྗེས་དགོངས་ལ། །བཅོལ་བའི་ཕྲིན་ལས་གྲུབ་པར་མཛོད། །ལ་ལཱ། ལ་ལཱི། ཏང་ཏང་། ཏེ་ཏེ། རྡོ་རྗེ་སྲིང་འགྲོ་མ་ཧཱུྃ་བྷྱོ་ཧཱུྃ།

བྲོ་བརྡུང་བ་ནི། དེ་ནས་གཏོར་གཞོང་བཀྲུས་པ་སྒོར་ཁ་སྦུབས་པར་རྣལ་འབྱོར་པ་རྣམས་ཀྱིས་བསྐོར་ཞིང་གནོད་བྱེད་མནན་པར་བསམས་ལ། ཧཱུྃ། སྔོན་ཚེ་དཔལ་ཆེན་ཧེ་རུ་ཀས། །ཀུན་ཏུ་བཟང་མོའི་མཁའ་དབྱིངས་སུ། །ཁམས་གསུམ་ཡོངས་སྒྲོལ་མཛད་པའི་ཚེ། །དཔལ་གྱི་བྲོ་ཆེན་བརྡུངས་པ་ལྟར། །འབར་བའི་རྣལ་འབྱོར་སྔགས་འཆང་བདག །དབང་ཆེན་འབར་བའི་གཞལ་ཡས་འདིར། །རོལ་པའི་བྲོ་ཆེན་ཆེམས་སེ་ཆེམ། །ཧཱུྃ་གིས་དབང་བསྒྱུར་ཁམས་གསུམ་གཡོ། །ཕཊ་ཀྱི་འཕྲོ་འདུས་འཇིག་རྟེན་འཁྱོམས། །རྃ་གྱིས་མེ་འབར་ཐམས་ཅད་བསྲེགས། །རྐང་པ་གཡས་པ་ཐབས་ཀྱི་རྒྱས། །འཁོར་བ་ཆོས་ཉིད་རོལ་པར་མནན། །རྐང་པ་གཡོན་པ་ཤེས་རབ་རྒྱས། །མྱ་ངན་འདས་པ་དབྱིངས་སུ་མནན། །གཟུང་འཛིན་འཁོར་བའི་ཕུང་པོ་ལ། །གཉིས་མེད་ཡེ་ཤེས་བྲོ་བརྡུངས་པས། །ཐམས་ཅད་རང་བྱུང་ཡེ་ཤེས་ངང་། །སྲིད་གསུམ་ཡེ་ནས་གྲོལ་བར་མནན། །དུག་(༣༧)ལྔ་འདུས་པའི་ཕུང་པོ་ལ། །ཡེ་ཤེས་ལྔ་ཡི་བྲོ་བརྡུངས་པས། །ཉོན་མོངས་རྣམ་དག་ཡེ་ཤེས་དང་། །རང་བཞིན་འོད་གསལ་ཆེན་པོར་མནན། །སྣང་སྲིད་སྣོད་བཅུད་སྣང་བ་ལ། །དཀྱིལ་འཁོར་ཆེན་པོའི་བྲོ་བརྡུངས་པས། །ཐམས་ཅད་འོག་མིན་གཞལ་ཡས་ཁང་། །ཡེ་རྫོགས་ལྷུན་གྱིས་གྲུབ་པར་མནན། །དབང་ཆེན་གར་གྱི་དཀྱིལ་འཁོར་དུ། །བདུད་བཞི་འཇོམས་པའི་བྲོ་བརྡུངས་པས། །དགྲ་བགེགས་ཆོས་ཉིད་བརྡལ་བར་མནན། །ཞི་རྒྱས་དབང་དྲག་ཕྲིན་ལས་རྫོགས། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ་ཧཱུྃ་ཕཊ། ཨ་ནན། ལཾ་ནན། སྟྭཾ་བྷ་ཡ་ནན། ཞེས་བརྗོད་དོ། །

བཟོད་པར་གསོལ་བ་ནི། དེ་ནས་ནང་དུ་འོངས་ཏེ་དཀྱིལ་འཁོར་མཆོད་ནས་ཐལ་མོ་སྦྱར་ཏེ། ན་མོ། བླ་མ་ཡི་དམ་མཁའ་འགྲོའི་དཀྱིལ་འཁོར་དུ། །ཚུལ་བཞིན་མཆོད་ཀྱང་འགལ་འཁྲུལ་ཉེས་གྱུར་པ། །གང་ལགས་དེ་ཀུན་བཟོད་པར་བཞེས་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཞེས་པ་གསུམ་དང་ཡི་གེ་བརྒྱ་པ་བརྗོད།

དཀྱིལ་འཁོར་བསྡུ་བ་ནི། ༀ། བླ་མ་ཡི་དམ་མཁའ་འགྲོའི་ཚོགས་རྣམས་ཀུན། །རྗེས་སུ་མཐུན་པའི་དངོས་གྲུབ་སྩལ་ནས་ཀྱང་། །རང་གནས་དགེ་བ་རང་བཞིན་གནས་གཤེགས་ཏེ། །སླར་ཡང་ཐུགས་རྗེས་འབྱོན་པར་མཛད་དུ་གསོལ། །ༀ་བཛྲ་མུཿཞེས་བརྗོད་ནས་དམ་ཚིག་པ་རང་ལ་བསྡུ། ཡེ་ཤེས་པ་དབྱིངས་སུ་གཤེགས། །རྡུལ་ཚོན་རྣམས་མཐའ་ནས་དབུས་སུ་བསྡུའོ། །

བསྔོ་བ་ནི། ཕྱོགས་བཅུ་ན་བཞུགས་པའི་བླ་མ་དང་། ཡི་དམ་དཀྱིལ་འཁོར་གྱི་ལྷ་ཚོགས་ཐམས་ཅད་བདག་ལ་དགོངས་སུ་གསོལ། བླ་ན་མེད་པའི་དཀྱིལ་འཁོར་མཆོད་ཅིང་བསྙེན་སྒྲུབ་སྤྱད་པ་དང་། ཚོགས་ཀྱིས་བསྐངས་ཤིང་དབང་བསྐུར་བ་ལ་སོགས་པའི་དགེ་བའི་རྩ་བ་འདི་ལ་བརྟེན་ནས། སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་པར་གྱུར་ཅིག །སེམས་ཅན་ཐམས་ཅད་བདེ་ཞིང་སྐྱིད་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་དུ་ལོ་ཕྱུགས་རྟག་ཏུ་ལེགས་ཤིང་ཆར་ཆུ་དུས་སུ་འབབ་པར་གྱུར་ཅིག །ནད་མཚོན་གྱི་བསྐལ་པ་མེད་ཅིང་འཁྲུག་པ་དང་འཚེ་བ་ཐམས་ཅད་རྒྱུན་ཆད་པར་གྱུར་ཅིག །ཁྱད་པར་དུ་ཡང་བདག་རྡོ་རྗེ་སློབ་དཔོན་གྲོགས་མཆེད་ཡོན་མཆོད་འཁོར་དང་བཅས་པ་རྣམས་ཀྱི་རྐྱེན་དང་བར་ཆད་ཐམས་ཅད་ཞི་བར་གྱུར་ཅིག །ཚེ་དཔལ་འབྱོར་བ་ཐམས་ཅད་རྒྱས་པར་གྱུར་ཅིག །ལྟ་སྒོམ་དང་ཏིང་འཛིན་ཐམས་ཅད་འཕེལ་བར་གྱུར་ཅིག །འགལ་འཁྲུལ་ཉམས་ཆག་ཐམས་ཅད་བསྐང་བར་གྱུར་ཅིག །ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་གྱུར་ཅིག །ཧེ་རུ་ཀ་དཔལ་གྲོང་ཁྱེར་དུ། །ཚོགས་ཀྱི་འཁོར་ལོས་མཆོད་པ་ཡིས། །བདག་དང་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །དགེ་བ་འདི་(༣༨)ཡིས་བདག་དང་འགྲོ་བ་ཀུན། །བདེ་ཆེན་མཁའ་སྤྱོད་དག་པའི་ཞིང་བགྲོད་དེ། །པདྨ་རྒྱལ་དང་འདུ་འབྲལ་མེད་པ་ཡིས། །ཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །ཅེས་པ་གསུམ་བརྗོད་དོ། །

བཀྲ་ཤིས་བརྗོད་པ་ནི། བར་བར་དུ་རོལ་མོའི་སྒྲ་དང་མེ་ཏོག་གི་ཆར་འབེབས་ཤིང་། ཐམས་ཅད་མགྲིན་གཅིག་ཏུ། ༀ། བཀྲ་ཤིས་ཉི་མ་སྟོང་ཁམས་བརྡལ་བ་ཡིས། །འདོད་རྒུའི་དཔལ་འབར་ཡོན་ཏན་རྫོགས་པའི་གཙོ། །ཀུན་བཟང་ཆོས་རྗེ་བླ་མའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཟླ་བ་ནམ་མཁའི་དབྱིངས་ཁྱབ་པས། །ལུས་ཅན་ཀུན་གྱི་རེ་བ་རྫོགས་མཛད་པ། །མགོན་པོ་ཚེ་དཔག་མེད་ཀྱི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་སྐར་ཚོགས་འབུམ་ཕྲག་ཡངས་པ་ལས། །གང་ལ་གང་འདུལ་དེ་ལ་དེར་སྟོན་པའི། །སྤྲུལ་སྐུ་པདྨ་འབྱུང་གནས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་རི་རབ་གླིང་བཞིར་བཀོད་པ་ལས། །ཡོན་ཏན་ལྷུན་གྲུབ་ཁང་བརྩེགས་དཔལ་འབར་བ། །མཁའ་འགྲོ་ཡེ་ཤེས་མཚོ་རྒྱལ་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་རྒྱ་མཚོ་འབྱོར་པ་མཐའ་ཡས་ལྡན། །མཐུ་དཔལ་རྫུ་འཕྲུལ་མངོན་ཤེས་དཔག་ཏུ་མེད། །མཁའ་འགྲོ་དམ་ཅན་རྒྱ་མཚོའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཞིང་ཁམས་ཤིན་ཏུ་མཐའ་ཡས་ལྡན། །འདོད་རྒུའི་འབྱོར་ཚོགས་ནམ་མཁའི་དབྱིངས་ཀུན་ཁྱབ། །སྣང་སྲིད་འཁོར་འདས་ཀུན་གྱི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཤིང་ཆེན་ཡལ་ག་མཐའ་ཡས་ལྡན། །གྲགས་ལྡན་མེ་ཏོག་འབྱོར་ཚོགས་དཔག་ཏུ་མེད། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་རིན་ཆེན་སྣ་བདུན་མཚུངས་པ་མེད། །གླིང་བཞིར་རྒྱུ་ཞིང་ལྷ་ཡུལ་ཀུན་ཏུ་འགྲོ། །མི་དབང་ཆོས་ཀྱིས་ས་སྡེ་ལེགས་སྐྱོང་བ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཡོན་ཏན་རྟགས་བརྒྱད་ཕུན་སུམ་ཚོགས། །གང་ལ་ཅི་དགོས་འདོད་རྒུའི་ཆར་འབབ་ཅིང་། །ཉིན་མཚན་རྟག་ཏུ་ཆོས་ལ་སྤྱོད་པ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཚེ་དཔལ་འབྱོར་པ་ཉམས་དགའ་བས། །མཐོ་རིས་ས་སྟེང་ལྷ་ཡུལ་རྣམས་བརྒྱན་ཅིང་། །བདེ་གཤེགས་བྱང་ཆུབ་སྙིང་པོའི་རྒྱུན་གྱུར་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་མེ་ཏོག་པདྨའི་མཚོ་གླིང་དུ། །གང་ཞིག་བལྟམས་པས་མཁའ་འགྲོའི་སྤྲིན་ཕུང་འཁྲིགས། །ཚེས་བཅུའི་ཉི་ཤར་དངོས་གྲུབ་ཆར་འབེབ་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་འཛམ་གླིང་ཀུན་གྱི་རྒྱན་གྱུར་པ། །སྣ་ཚོགས་མཛད་པའི་ངོ་མཚར་བསམ་མི་ཁྱབ། །ཕྲིན་ལས་རྣམ་བཞིས་འགྲོ་བ་འདུལ་མཛད་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་གངས་རིའི་ཡུལ་དུ་དཔལ་འབར་བ། །ལྷ་སྲིན་བཏུལ་ཞིང་དམ་ཆོས་ཆར་ཆེན་ཕབ། །ཟབ་གཏེར་རྒྱ་མཚོ་འགྲོ་ལ་སྣང་མཛད་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་དད་ལྡན་སྐྱེ་རྒུ་སྤྲིན་བཞིན་འདུ། །(༣༩)སྦྱིན་པ་རྣམ་བཞིས་བུ་བཞིན་ལེགས་སྐྱོང་ཞིང་། །གཞན་དོན་བྱེད་པ་ཤིན་ཏུ་མཐའ་ཡས་ལྡན། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་བརྗོད་དོ། །རང་བྱུང་པདྨ་རྒྱལ་པོའི་དཀྱིལ་འཁོར་དུ། །ཚེས་བཅུའི་ཚོགས་མཆོད་དབང་བསྐུར་བྱ་བའི་ཚུལ། །སྐལ་བཟང་སློབ་མ་རྣམས་ཀྱིས་བསྐུལ་བའི་དོན། །ཕྲིན་སྒྲུབ་རིན་ཆེན་སྒྲོན་མེ་ཞེས་བྱ་བཀོད། །ཡི་གེ་སྔ་མ་རྣམས་དང་སྤྱི་རྒྱུད་ལས། །ཕྲིན་ལས་ཆོག་བསྡེབས་གོང་འོག་འཁྲུགས་པ་རྣམས། །ཕྱོགས་གཅིག་བསྡེབས་ཏེ་ཤིན་ཏུ་གསལ་བར་ཕྱེས། །ཕྱི་རབས་རྗེས་འཇུག་ལག་ལེན་གོ་བདེར་བྱས། །ལྷོ་གཏེར་བླ་མའི་ལས་བྱང་གྲངས་མང་བས། །ཤོག་འདེབས་སིལ་བུ་ཚན་ཚན་བསྒྲིགས་པར་དཀའ། །ལ་ལས་བསྒྲིགས་ཀྱང་ཕྲིན་ལས་མ་ཚང་དང་། །ལྷག་པར་གྱུར་པས་ཕྱོགས་རེའི་འདོད་པ་ཙམ། །འདི་ནི་ཟབ་གཏེར་ཤོག་ལྡེབ་ཀུན་བསྒྲིགས་ནས། །རྒྱུད་ཀྱི་ཆིངས་བཞིན་ཕྲིན་ལས་ཁ་ཚང་ལ། །འགལ་འཁྲུལ་ལྷག་ཆད་ནོར་བའི་སྐྱོན་བྲལ་བ། །ཨོ་རྒྱན་དགོངས་པ་ཇི་བཞིན་ལེགས་པར་བཀོད། །ཕྱིར་བས་རྗེས་འཇུག་སྐལ་ལྡན་རྣམས་ཀྱིས་ཀྱང་། །ལས་བྱང་དབང་གི་སྒྲོན་མེ་འདི་ཆོག་སྡེབས། །ཚེ་དབང་དྲག་སྒྲུབ་ཐུགས་སྒྲུབ་ལ་སོགས་ཀྱང་། །འདོན་ཁ་བསྒྱུར་ནས་དབང་བསྐུར་གང་མོས་བྱ། །ཚུལ་འདི་ཉང་གི་གཏེར་བའི་ལག་ལེན་མཆོག །དབང་གི་ལས་བྱ་རིན་ཆེན་སྒྲོན་མེ་ཡིན། །སྐལ་བཟང་སྙིང་གི་བུ་རྣམས་དགའ་བར་གྱིས། །དགེ་བས་འགྲོ་ཀུན་དབང་རྫོགས་རྒྱལ་བར་ཤོག །གྲོག་རི་རིན་ཆེན་བརྩེགས་པའི་ངོས་ཡངས་སུ། །ཐེག་མཆོག་སྙིང་པོའི་རྣལ་འབྱོར་ཀུན་མཁྱེན་གྱིས། །ལེགས་སྦྱར་དགེ་བས་བདག་དང་འགྲོ་བ་ཀུན། །པདྨ་རྒྱལ་དང་འདུ་འབྲལ་མེད་པར་ཤོག །ཕྱོགས་དུས་ཀུན་ཏུ་བདེ་ཆེན་དཔལ་འབར་ཞིང་། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །ཕྲིན་སྒྲུབ་རིན་པོ་ཆེའི་སྒྲོན་མེ་ཞེས་བྱ་བ། རང་བྱུང་པདྨས་རྗེས་བཟུང་བའི་རྣལ་འབྱོར་པ་དྲི་མེད་འོད་ཟེར་གྱིས་ལེགས་པར་བཀོད་པ་འདི་ཡོངས་སུ་རྫོགས་སོ། །རྒྱལ་བ་རྣམས་ཀྱི་དམ་པའི་ཆོས་འཛིན་པར་གྱུར་ཅིག །དགེའོ།། །།

དྲག་སྒྲུབ་གསལ་བའི་མེ་ལོང་།

༄༅། །དྲག་སྒྲུབ་གསལ་བའི་མེ་ལོང་།

༄༅། །ༀ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་ཨ་རྩིག་ནི་རྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཧཱུྃ། ཨ་ཡ་མ་དུ་རུ་ཙ་ཤ་ན། ༀ་བཛྲ་ཧཱུྃ་ཡཀྴ་ཧཱུྃ་རཀྴ་ཧཱུྃ་ག་རུ་ཎ་ཙ་ལེ་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། དཔལ་ལྡན་ཡོན་ཏན་འབྱུང་བའི་གཙོ། །པདྨ་རྒྱལ་ལ་ཕྱག་འཚལ་ཏེ། །ཨོ་རྒྱན་དྲག་པོ་སྒྲུབ་པའི་ཐབས། །མ་བུའི་ཤོག་སེར་བསྡེབས་ཏེ་བྲི། །

བླ་མ་དང་དཀོན་མཆོག་གསུམ་ལ་སྐྱབས་སུ་སོང་ནས། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཕྱིར་ཨོ་རྒྱན་དྲག་པོར་བསྒྲུབ་པར་བྱ་སྙམ་དུ་སེམས་བསྐྱེད་དེ། སྟོང་པའི་ངང་ལས་ཨེ་ལས་ནམ་མཁའ་མཐིང་ནག་འབྱམས་ཀླས་པའི་དབུས་སུ། ཡྃ་ལས་རླུང་ནག་འཁྲུགས་(༤༠)པའི་དཀྱིལ་འཁོར་གྱི་དབུས་སུ། རྃ་ལས་མེའི་མེ་དཔུང་གི་ཀློང་ཡངས་པར། ར་ལས་རཀྟའི་རྒྱ་མཚོ་ཞིང་གི་རྦ་ཀློང་འཕྱོ་བར། ཀྃ་ལས་ཀེང་རུས་ཀྱི་ས་གཞི་དང་རི་རབ་བརྩེགས་པའི་སྟེང་དུ། ྃ་ལས་ཐོད་པ་འབར་བའི་གཞལ་ཡས་ཁང་གྲུ་བཞི་སྒོ་བཞི་རྟ་བབ་བཞི་དང་ལྡན་པ། རྒྱ་ནམ་མཁའི་མཐའ་ཀླས་ས། ཕྱི་ནང་ཀུན་ཏུ་ཡེ་ཤེས་ཀྱི་མེ་རི་དང་མེ་དཔུང་འབར་བའི་དབུས་སུ། བྃ་ལས་སྣ་ཚོགས་པདྨ། རྃ་ལས་ཉི་མའི་སྟེང་དུ་དྲེགས་པ་སྡེ་བརྒྱད་ཁ་བུབ་དང་བྱི་ཆིངས་སུ་བསྣོལ་བའི་སྟེང་དུ། ཧཱུྃ་ལས་རང་ཉིད་ཟིལ་གནོན་པདྨ་དྲག་པོ་སྐུ་མདོག་དམར་ནག་ཞལ་གཅིག་ཕྱག་གཉིས་པ། གཡས་གསེར་གྱི་རྡོ་རྗེ་རྩེ་དགུ་ཧཱུྃ་དགུ་ཕཊ་དགུ་རྃ་དགུའི་མཚན་པ་འཕྱར་སྟབས་སུ་འཛིན་པ། གཡོན་ལྕགས་ཀྱི་སྡིག་པ་ཁ་དགུ་མིག་དགུ་པ་ཕྱིར་ལ་གདེངས་པ་བསྣམས་པ། ཞབས་གཡས་བསྐུམ་གཡོན་བརྐྱང་བ་སྟག་གི་པགས་པས་ཤམ་ཐབས་བྱས་པ། མི་མགོ་རློན་པས་དོ་ཤལ་བྱས་པ། སྦྲུལ་ནག་གིས་བརྒྱན་པ། མི་ལྤགས་ཀྱི་གཡང་གཞི་དང་། གླང་ཆེན་གྱི་ཀོ་རློན་གྱིས་སྟོད་གཡོགས་པ། ཐོད་པ་སྐམ་པོ་ལྔའི་དབུ་རྒྱན་དང་། སྦྲུལ་ནག་གི་ཐོད་བཅིངས་ཅན། དབུ་སྐྲ་དམར་སེར་གྱེན་ལ་འཕྲོ་ཞིང་རིན་པོ་ཆེ་དང་རུས་པའི་སྙན་ཆ་བྱས་པ། ཞལ་མཆེ་བ་གཙིགས་ཤིང་སྤྱན་གསུམ་སྡང་མིག་ཏུ་གཟིགས་པ། སྨིན་མ་དང་སྨ་ར་དམར་སེར་མེ་ལྟར་འབར་བ། རྡོ་རྗེ་འབར་བའི་སྤུ་གསེབ་ནས་ཡེ་ཤེས་ཀྱི་མེ་རབ་ཏུ་འབར་བ། སྤྱུགས་པའི་འཐོར་རླུང་ཕྱོགས་བཅུར་འཕྲོ་ཞིང་སྐུ་ལས་བསྐལ་པའི་མེ་ཆེན་འབར་བ། དཔྲལ་བའི་མཛོད་སྤུར་གསེར་གྱི་འཁོར་ལོ་རྩིབས་བཞི་པའི་ལྟེ་བར་འཇམ་དཔལ་སེར་པོ་གཡས་རལ་གྲི་ཀླད་ལ་བསྐོར་ཞིང་གཡོན་སྡིགས་མཛུབ་ཐུགས་ཀར་མཛད་པའི་སྤྱི་བོར་ༀ་སེར་པོས་མཚན་པ། མགྲིན་པར་པདྨ་འདབ་བཞིའི་དབུས་སུ་རྟ་མགྲིན་དམར་པོ་གཡས་དབྱུག་ཏོ་འཕྱར་སྟབས་སུ་ནམ་མཁར་འཛིན་ཅིང་གཡོན་སྡིགས་མཛུབ་ཐུགས་ཀར་མཛད་པའི་མགྲིན་པར་པདྨ་འདབ་བཞིའི་དབུས་སུ་ཨཱཿདམར་པོས་མཚན་པ། སྙིང་གར་ཉི་མའི་དབུས་སུ་གསེར་གྱི་མཆོད་རྟེན་བང་རིམ་བཞི་པའི་བུམ་པའི་ནང་གི་ཉི་མའི་དབུས་སུ་ཕྱག་ན་རྡོ་རྗེ་མཐིང་ག་གཡས་རྡོ་རྗེ་འཕྱར་སྟབས་སུ་ནམ་མཁར་འཛིན་ཅིང་། གཡོན་སྡིགས་མཛུབ་ཐུགས་ཀར་མཛད་པའི་ཐུགས་ཀར་པདྨ་དང་ཉི་མའི་དབུས་སུ་ཧཱུྃ་ལ་རྩ་བའི་སྔགས་ཀྱིས་མར་མེ་འབར་བ་ལྟར་བསྐོར་བའོ། །ཐོར་ཚུགས་ཀྱི་རྩེ་ལ་ཁྲ་ལས་བྱ་ཁྱུང་ག་རུ་ཌ་གཤོག་པ་གདེངས་པས་ནམ་མཁའ་ཆོད་པ། རྡོ་རྗེ་འབར་བའི་སྤུ་གསེབ་ནས་ཡེ་ཤེས་ཀྱི་མེ་དང་གནམ་ལྕགས་ཀྱི་ཐོག་འཕྲོ་བ། ར་རིན་པོ་ཆེའི་དཔལ་དགའ་ལ་འོད་དཔག་མེད་དམར་པོ་མཉམ་གཞག་ཅན། ན་བཟའ་ཆོས་གོས་དམར་སེར་གསོལ་བ། སྟེང་གི་ནམ་མཁའ་ལ་པདྨ་དང་ཉི་མའི་དབུས་སུ་ཐོད་ཕྲེང་རྩལ་མཐིང་(༤༡)ག་རྡོ་རྗེ་དང་དྲིལ་བུ་འཛིན་པ། ཡུམ་ཡེ་ཤེས་མཚོ་རྒྱལ་དང་མཉམ་པར་སྦྱོར་བ། བླ་མ་དང་ཡི་དམ་མཁའ་འགྲོའི་ཚོགས་ཀྱིས་བསྐོར་བར་བསམ་མོ། །དེ་ནས་སྙིང་གའི་ཧཱུྃ་ལས་འོད་འཕྲོས་པས་འོག་མིན་ནས་སྔར་བསྒོམས་པ་ལྟ་བུའི་བླ་མ་ཡི་དམ་མཁའ་འགྲོའི་དཀྱིལ་འཁོར་སྐད་ཅིག་གིས་སྟེང་གི་ནམ་མཁར་བྱོན་པ་ལ། ༀ་གུ་རུ་དེ་ཝ་ཌཱ་ཀི་ནཱི་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཤཔྟ་ཨཱཿཧཱུྃ། ལན་གསུམ་གྱིས་སྐུ་གསུང་ཐུགས་མཉེས་པའི་མཆོད་པ་ཕུལ་ནས། ཛཿཧཱུྃ་བྃ་ཧོཿཞེས་བརྗོད་པས་ལྷ་ཡེ་ཤེས་སེམས་དཔའ་དེ་དག་བདག་དམ་ཚིག་སེམས་དཔའ་ལ་ཐིམ་པས་དགྱེས་ཤིང་བརྟན་པར་གྱུར། ཡང་དེ་བཞིན་གཤེགས་པ་ཐམས་ཅད་འདུས་ནས་རིན་པོ་ཆེའི་བུམ་པས་དབང་བསྐུར་བས་སྐུ་གསུང་ཐུགས་ཡོན་ཏན་ཕྲིན་ལས་ཡེ་ཤེས་རྡོ་རྗེའི་དངོས་གྲུབ་ཐོབ། དེ་བཞིན་གཤེགས་པ་རྣམས་གཅིག་ཏུ་གྱུར་པ་འོད་དཔག་མེད་ལ་ཐིམ་པར་གྱུར། གསལ་བར་གྱུར། འོད་འབར་བར་གྱུར་ཏོ། །དེ་ནས་ཐོད་མཁར་འབར་བའི་ཕྱི་ནམ་མཁའི་ཁམས་ཀྱི་མཐའ་ཀླས་པའི་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་གུར་ཁྱིམ་དུ་གྱུར་པའི་ཕྱི་རོལ་གསེར་གྱི་འཁོར་ལོ་རྩིབས་སྟོང་གཡས་སུ་འཁོར་བ་དང་། མཚོན་ཆའི་འཁོར་ལོ་རྩིབས་སྟོང་གཡོན་དུ་འཁོར་བའི་སྟེང་འོག་མེའི་འཁོར་ལོ་རྩིབས་སྟོང་རྩེ་བསྣོལ་དུ་འཁོར་བའི་བར་རྣམས་སུ་དྲེགས་པ་སྡེ་བརྒྱད་ཐམས་ཅད་མགོ་ལུས་དུམ་བུར་གཏུབ་ཅིང་། ཐུགས་ཀའི་ཧཱུྃ་ལས་ཧཱུྃ་འཕྲོས་བ་སྤུའི་བུ་ག་ནས་ཧཱུྃ་རྣམས་ཕྱིར་ཐོན་པས་སྤྲུལ་པའི་ཁྲོ་ཆུང་དུ་གྱུར། འོད་འཕྲོས་ནམ་མཁའ་གང་། རིག་སྔགས་ཀྱི་འབྲུག་སྒྲ་སྟོང་སྒྲོགས་པས་དྲེགས་པ་སྡེ་བརྒྱད་ཐམས་ཅད་ཚར་བཅད། འཇིག་རྟེན་གྱི་ཁམས་ཐམས་ཅད་གཡོ་ལྡེག་མེར་འཁྱོམས་པར་བསམ་ཞིང་། ༀ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་ཨ་རྩིག་ནི་རྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཧཱུྃ། ཨ་ཡ་མ་དུ་རུ་ཙ་ཤ་ན། ༀ་བཛྲ་ཧཱུྃ་ཡཀྴ་ཧཱུྃ་རཀྴ་ཧཱུྃ་ག་རུ་ཌ་ཙ་ལེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཅེས་ཅི་འགྲུབ་ཏུ་སེམས་གཞན་དུ་མ་ཡེངས་པར་རིག་པ་ངར་དང་ལྡན་པས་བཟླའོ། །དེ་ནས་ཐུན་འཇོག་ཁར་སྤྲུལ་པའི་ཁྲོ་ཆུང་རྣམས་ཧཱུྃ་ལ་བསྡུ། འཁོར་ལོ་རང་མལ་དུ་གནས་པའི་ངང་ལ་སེམས་མ་བཅོས་པར་གློད་ནས་སྟོང་གསལ་སྤྲོས་པ་མེད་པར་དལ་ཅིག་མཉམ་པར་བཞག །རྗེས་སེམས་ཅན་གྱི་དོན་དུ་བསྔོ། ཕན་ཡོན་ནི་བགེགས་དང་བར་ཆད་ཐམས་ཅད་ཞི་བ་དང་། ལྟ་སྒོམ་ཏིང་འཛིན་ཐམས་ཅད་གོང་ནས་གོང་དུ་འཕེལ་བ་དང་། མཆོག་དང་ཐུན་མོང་གི་དངོས་གྲུབ་མྱུར་དུ་ཐོབ་པ་ལ་སོགས་པ་གཞུང་ནས་བཤད་པ་ལྟར་འགྲུབ་བོ། །གྲངས་ཀྱི་བསྙེན་པ་ནི་འབུམ་ཕྲག་ཉི་ཤུ་རྩ་གཉིས་སུ་གསུངས་སོ། །བསྙེན་པ་རྫོགས་ནས་ལས་ཚོགས་གང་ཡང་འགྲུབ་བོ། །གཏོར་མ་དང་། འཁོར་ལོ་དང་། (༤༢)བྱབ་ཆོག་དང་། སེར་སྲུང་དང་། སྡེ་བརྒྱད་གནད་ལ་བབ་པ་ལ་སོགས་པ་མ་ཡིག་དང་། བུ་ཡིག་དང་། ལས་ཕྲན་ཚེགས་ཀྱི་ཤོག་སེར་གཞུང་ནས་བཤད་པ་བཞིན་དུ་ཤེས་པར་བྱའོ། །འདི་ནི་སྒོམ་རིམ་ལག་ལེན་དུ་བཀོད་པ་མ་ཡིག་བུ་ཡིག་བསྟོད་པ་གསུམ་འཁྲུགས་བསྡེབས་ཏེ་ཉམས་སུ་བླང་བའི་ཕྱིར་བཀོད་པའོ། །

དགེ་བ་འདི་ཡིས་བདག་དང་འགྲོ་བ་ཀུན། །རང་བྱུང་པདྨ་རྒྱལ་པོའི་གནས་ཐོབ་ནས། །མཆོག་དང་ཐུན་མོང་དངོས་གྲུབ་ཆར་འབེབས་ཤིང་། །སྐྱེ་རྒུའི་རེ་བ་ཡིད་བཞིན་འགྲུབ་པར་ཤོག །དྲག་སྒྲུབ་གསལ་བའི་མེ་ལོང་བྲག་སྲིན་མོ་སྤར་རྗེས་ཅན་གྱི་གཏེར་གྱི་ཡང་སྙིང་རྒྱལ་སྲས་དྲི་མེད་འོད་ཟེར་གྱིས་བཀོད་པ་རྫོགས་སོ།། །།དགེའོ།། །།

ཕྲིན་སྒྲུབ་ཀྱི་བུ་ཡིག་ཐུགས་རྗེའི་ལྕགས་ཀྱུ།

༄༅། །ཕྲིན་སྒྲུབ་ཀྱི་བུ་ཡིག་ཐུགས་རྗེའི་ལྕགས་ཀྱུ་བཞུགས་སོ། །

༄༅། །ཕྲིན་སྒྲུབ་ཀྱི་བུ་ཡིག་ཐུགས་རྗེའི་ལྕགས་ཀྱུ་ཞེས་བྱ་བ། གུ་རུ་ཞི་ཁྲོའི་ལྷ་ཚོགས་ལ་ཕྱག་འཚལ་ལོ། །པདྨ་རྒྱལ་ལ་ཕྱག་འཚལ་ནས། །སྲིད་པ་བར་དོའི་སེམས་ཅན་ལ། །གུ་རུའི་ཐུགས་རྗེས་བཟུང་བའི་ཕྱིར། །གཤིན་དོན་ཐུགས་རྗེའི་ལྕགས་ཀྱུ་བྲི། །

སྔོན་དུ་ཕྲིན་སྒྲུབ་དཀྱིལ་འཁོར་མཆོད་བསྟོད་འཛབ་སྐོང་གཞུང་ལྟར་བཏང་ལ། བུམ་པ་ལག་ཁྲིད་ལྟར་བཅས་ལ་གཟུག །དཀྱིལ་འཁོར་གྱི་མདུན་དུ་པདྨ་འདབ་དྲུག་བྲིས་ལ། དེའི་སྟེང་དུ་དྲི་མ་དང་མིང་བྱང་བཙུགས་ལ་སྤོས་ཆུས་བཀྲུ་ཞིང་། ༀ་བཛྲ་ཡཀྵ་ཡཀྵ་ཧཱུྃ་ཕཊ། ཅེས་བརྗོད་ཅིང་མིང་བྱང་དྲི་མ་སྦྱང་། བགེགས་བསྐྲད་པ་ནི། གཏོར་མ་བྱིན་ནས་བདེན་པ་བརྗོད་ལ་འདི་སྐད་དོ། །

ཧཱུྃ། འདི་ལྟར་ཉོན་ཅིག་བགེགས་ཀྱི་ཚོགས། །ཚེ་འདས་རིགས་ཀྱི་བུ་འདི་ལ། །གསོན་གྱི་དུས་ན་བདུད་གཅོད་ཅིང་། །ད་ལྟར་གཤེད་དུ་བྱེད་པ་ཡིས། །གཤེད་མར་གྱུར་པའི་བགེགས་ཚོགས་ཀུན། །མཆོད་སྦྱིན་གཏོར་མ་འདི་བཞེས་ལ། །ད་ལྟ་ཉིད་དུ་སོ་སོར་དེངས། །གལ་ཏེ་མི་འགྲོ་འདུག་གྱུར་ན། །གང་ཡིན་ཐལ་བའི་རྡུལ་དུ་རློག །ཅེས་ཡུངས་ཀར་ཐུན་གྱིས་བགེགས་བསྐྲད་དོ། །གཏོར་མ་ཆ་གསུམ་བཅས་ཏེ་གཅིག་ཚེ་འདས་ཀྱི་ལུས་ཀྱི་གླུད་དུ་བསྔོས་ཏེ་འདི་སྐད་དོ། །

ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །ཚེ་འདས་རིགས་ཀྱི་བུ་འདི་ཡི། །ལུས་དང་གྲིབ་མ་ལྟར་འགྲོགས་པའི། །གཤེད་མ་གྱུར་པའི་བགེགས་ཚོགས་ཀུན། །མཆོད་སྦྱིན་གཏོར་མ་འདི་བཞེས་ལ། །ཚེ་འདས་ལུས་ཀྱི་བཅིངས་པ་ཐོངས། །ལུས་ཀྱི་ཞེན་པ་མི་གཏོང་ན། །དུས་གསུམ་སངས་རྒྱས་ཐམས་ཅད་ཀྱི། །མངགས་གཞུག་ལས་ཀྱི་ཕོ་ཉ་ནི། །ཁྲོ་བོའི་རྒྱལ་པོ་གཤིན་རྗེ་གཤེད། །ཕྱག་ན་འཁོར་ལོ་རལ་གྲི་བསྣམས། །གང་ཡིན་ཐལ་བའི་རྡུལ་དུ་རློག །ༀ་མཉྫུ་ཤྲཱི་ཡ་མཱནྟ་ཀ་ཧཱུྃ་ཕཊ། ཅེས་བསྐྲད་དོ། །གཅིག་ངག་གི་གླུད་དུ་བསྔོས་ལ་འདི་སྐད་དོ། །

ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །ཚེ་འདས་རིགས་ཀྱི་བུ་འདི་ཡི། །ངག་དང་བྲག་ཅ་ལྟར་འགྲོགས་པའི། །(༤༣)གཤེད་མར་གྱུར་པའི་བགེགས་ཚོགས་ཀུན། །མཆོད་སྦྱིན་གཏོར་མ་འདི་བཞེས་ལ། །ཚེ་འདས་ངག་གི་ཞེན་པ་ཐོངས། །ངག་གི་ཞེན་པ་མི་གཏོར་ན། །དུས་གསུམ་སངས་རྒྱས་ཐམས་ཅད་ཀྱི། །མངགས་གཞུག་ལས་ཀྱི་ཕོ་ཉ་ནི། །ཁྲོ་བོའི་རྒྱལ་པོ་རྟ་མགྲིན་རྒྱལ། །ཕྱག་ན་དབྱུག་ཏོ་སྦྲུལ་ཞགས་བསྣམས། །གང་ཡིན་ཐལ་བའི་རྡུལ་དུ་རློག །ༀ་པདྨ་ཀྲ་ཏ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ། ཅེས་བསྐྲད་དོ། །གཅིག་སེམས་ཀྱི་གླུད་དུ་བསྔོས་ནས་འདི་སྐད་དོ། །

ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །ཚེ་འདས་རིགས་ཀྱི་བུ་འདི་ལ། །སེམས་དང་བག་ཆགས་ལྟར་འགྲོགས་པའི། །གཤེད་མར་གྱུར་པའི་བགེགས་ཚོགས་ཀུན། །མཆོད་སྦྱིན་གཏོར་མ་འདི་བཞེས་ལ། །ཚེ་འདས་ཡིད་ཀྱི་བཅིངས་པ་ཐོངས། །སེམས་ཀྱི་ཞེན་པ་མི་གཏོང་ན། །དུས་གསུམ་སངས་རྒྱས་ཐམས་ཅད་ཀྱི། །མངགས་གཞུག་ལས་ཀྱི་ཕོ་ཉ་ནི། །ཁྲོ་བོའི་རྒྱལ་པོ་གོས་སྔོན་ཅན། །ཕྱག་ན་རྡོ་རྗེ་སྡིགས་མཛུབ་བསྣམས། །གང་ཡིན་ཐལ་བའི་རྡུལ་དུ་རློག །ༀ་བཛྲ་པཱ་ཎི་མཧཱ་ཀྲོ་དྷ་ཧཱུྃ་ཕཊ། དེ་ནས་ཚེ་ལས་འདས་པ་དེ་ལ་སྙིང་རྗེ་དྲག་པོ་དུང་དུང་བ་བྱས་ལ་འདི་སྐད་དོ། །

ཧཱུྃ། ཉོན་ཅིག་ཚེ་འདས་རིགས་ཀྱི་བུ། །འདི་ནས་ཕ་རོལ་སོང་བའི་བུ། །ཁྱོད་ཀྱི་མིང་ནི་ཤི་བ་ཡིན། །སྔར་གྱི་སྒྱུ་ལུས་ཞིག་པ་ཡིན། །འབྱུང་བཞི་སྒྱུ་མའི་འཁྲུལ་འཁོར་ཞིག །ཤ་ཁྲག་ལུས་ཀྱི་ཕུང་པོ་དོར། །གཅེས་པར་གསོས་པའི་ལུས་པོ་བསྐྱུར། །ཡིད་ལ་གཅགས་པའི་གཉེན་དང་བྲལ། །སེར་སྣས་བསགས་པའི་ནོར་རྫས་ལུས། །རྨི་ལམ་འདྲ་བའི་ལུས་པོ་ལ། །ཡིད་ཀྱི་རྣམ་ཤེས་བརྟེན་བྱས་ཏེ། །བག་ཆགས་འཁྲུལ་པའི་རྗེས་སུ་འབྲངས། །རང་གི་སེམས་ལ་དབང་མ་ཐོབ། །བར་དོའི་གནས་ན་ཉོན་རེ་མོངས། །བར་དོའི་གནས་ན་རང་དབང་མེད། །འཆི་བདག་གཤིན་རྗེའི་ལག་ཏུ་ཚུད། །འཁོར་བར་འཁྱམས་པའི་སེམས་ཅན་ཁྱོད། །ཐུགས་རྗེ་ཆེན་པོའི་ངག་ལ་ཉོན། །འཁོར་བའི་གནས་ནས་ཡར་འདྲེན་པའི། །ཁྱོད་ཀྱི་སློབ་དཔོན་ང་ཡིན་གྱིས། །ལྷ་དང་སློབ་དཔོན་དྲན་པར་གྱིས། །དཀོན་མཆོག་གསུམ་པོ་དྲན་པར་གྱིས། །ཟིལ་གནོན་པདྨ་དྲན་པར་གྱིས། །མོས་གུས་གདུང་ཤུགས་དྲག་པོ་ཡིས། །མ་ཡེངས་དྲན་པའི་སེམས་ཀྱིས་ཟུངས། །ཁྱོད་ཀྱི་སློབ་དཔོན་ང་ཡིན་གྱི། །དྲིལ་བུ་སིལ་སིལ་སྒྲ་སྒྲོགས་ཅིང་། །འོ་དོད་ལྷང་ལྷང་འབོད་པ་ན། །གདུང་ཤུགས་དྲག་པོས་འདིར་ཤོག་ཅིག །ཁམས་གསུམ་གནས་ནས་འདིར་ཤོག་ཅིག །གཟུགས་མེད་གནས་ནས་འདིར་ཤོག་ཅིག །གཟུགས་ཁམས་གནས་ནས་འདིར་ཤོག་ཅིག །འདོད་ཁམས་གནས་ནས་འདིར་ཤོག་ཅིག །རིགས་དྲུག་གནས་ནས་འདིར་ཤོག་ཅིག །དམྱལ་བའི་གནས་ནས་འདིར་ཤོག་ཅིག །ཡི་དྭགས་གནས་ནས་འདིར་ཤོག་ཅིག །བྱོལ་སོང་གནས་ནས་འདིར་ཤོག་ཅིག །ལྷ་ཡི་གནས་ནས་འདིར་ཤོག་ཅིག །ལྷ་མིན་གནས་ནས་འདིར་ཤོག་ཅིག །མི་ཡི་གནས་ནས་འདིར་ཤོག་ཅིག །དཀྱིལ་འཁོར་བཟང་པོ་འདིར་ཤོག་ཅིག །རེ་དོགས་མེད་པར་འདིར་ཤོག་ཅིག །རྩལ་ཤུགས་(༤༤)དྲག་པོས་འདིར་ཤོག་ཅིག །ཨ་སུ་ནྲ྇་ཏྲི་པྲེ་དུ་བཛྲ་ཨདྐུ་ཤ་ཛ་ཛཿབརྗོད་པས་ཚེ་འདས་ཀྱི་རྣམ་ཤེས་ཨ་ཐུང་གི་ཚུལ་དུ་མདུན་དུ་བྱུང་བར་བསམས་ལ། དཀྱིལ་འཁོར་གྱི་ཟུར་བཞིར་ཤིང་བཞི་བཙུགས་ལ། ཧཱུྃ། ཤིང་གི་རྒྱལ་པོ་དཔག་བསམ་ཤིང་། །བྱང་ཆུབ་ཤིང་དུ་བྱིན་བརླབས་ནས། །ཕྱོགས་བཞིར་བཙུགས་པས་བདུད་བཞི་ཐུབ། །ལོ་འདབ་བསམ་གཏན་བྱིན་བརླབས་པས། །ཉོན་མོངས་འཁོར་བའི་ཚ་གདུང་སྐྱོབ། །གཞལ་ཡས་ཁང་དུ་བྱིན་བརླབས་པས། །ཚེ་འདས་གཤེད་མའི་ཚོགས་ལས་སྐྱོབ། །ཅེས་བརྗོད་ནས། རྣམ་པར་ཤེས་པ་དྲི་མ་ལ་ཐིམ་པས་ནྲ྇་དམར་ལྗང་ཅིག་འོད་དུ་ཞུ་ཡོངས་སུ་གྱུར་པ་ལས་ཚེ་འདས་སྔར་བཞིན་མངོན་སུམ་དུ་བྱུང་བར་བསམས་ལ། སེམས་ཀྱི་ངོ་བོ་ཡི་གེ་ཨ་རུ་ཡོད་པ་དེ་སྙིང་གི་དཀྱིལ་དུ་བབས་པས་དྲན་པ་ཤིན་ཏུ་གསལ་བར་བསམས་ལ། ཧཱུྃ། ཉོན་ཅིག་ཚེ་འདས་རིགས་ཀྱི་བུ། །མིང་བྱང་འདི་ནི་ལུས་ཀྱི་རྟེན། །སྨྱུག་མ་འདི་ནི་སྐུ་ཡི་རྟེན། །དྲི་མ་འདི་ནི་ལུས་ཀྱི་གོས། །གསེར་གདུགས་འདི་ནི་སྐྱབས་ཀྱི་རྟེན། །འཕན་ཆུང་འདི་ནི་ལུས་ཀྱི་སྐྱབས། །མེ་ལོང་འདི་ནི་གསལ་བའི་རྟེན། །ཤེལ་དུམ་འདི་ནི་བླ་ཡི་རྟེན། །མདའ་མོ་འདི་ནི་སྲོག་གི་རྟེན། །ལྡིང་ཁང་འདི་ནི་གཞལ་ཡས་ཁང་། །ཤིང་བཞི་བཙུགས་པ་སྐུ་ཡི་རྟེན། །དྲིལ་བུ་གསིལ་བ་གསུང་གི་རྟེན། །ཧྲཱིཿཡིག་ས་བོན་ཐུགས་ཀྱི་རྟེན། །དྲི་མ་འདི་ལ་གནས་ཆོས་ལ། །མ་ཡེངས་དྲན་པའི་སེམས་ཀྱིས་ཟུངས། །མིང་བྱང་དྲི་མར་བཅས་པ་འདི། །བག་ཆགས་ཆགས་པའི་རྟེན་ཡིན་པས། །དྲང་པོའི་སེམས་ཀྱིས་གནས་པར་གྱིས། །ཧཱུྃ། ཉོན་ཅིག་ཚེ་འདས་རིགས་ཀྱི་བུ། །པད་འདབ་ཡིད་འོང་མཛེས་པའི་གདན། །ལེབ་ཕྱིང་དཀར་པོ་རྔུལ་གྱི་གདན། །དར་ཟབ་འདི་ནི་བཀྲ་བའི་གདན། །དབྱིབས་ལེགས་འདི་ནི་དྲོ་བའི་གདན། །གཙང་ཞིང་མཛེས་པའི་གདན་འདི་ལ། །རིགས་ཀྱི་བུ་ཁྱོད་མཛེས་པར་བཞུགས། །ༀ་སརྦ་པདྨ་ཀ་མ་ལ་ཡ་སྟྭཾ། ཞེས་པས་ཚེ་འདས་དངོས་སུ་ཡོད་པར་བསམས་ལ། ཆུ་གཙང་ལ་འོ་མ་འམ་དར་བ་ཅུང་ཞིག་བླུགས་ལ་བྱིན་ཏེ། ༀ་ཨཱཿཧཱུྃ་ཨ་མྲ྇་ཏ་ཀུནྡ་ལི་ཧ་ན་ཧ་ན་ཧཱུྃ་ཕཊ། ཅེས་བདུད་རྩིར་བྱིན་གྱིས་བརླབས་ནས། ཧཱུྃ། ཉོན་ཅིག་ཚེ་འདས་ཆེ་གེ་མོ། །ཚེ་འདས་འཁྲུལ་པའི་བག་ཆགས་ཀྱིས། །སྲིད་པའི་གྲོང་ཁྱེར་བསྐོར་བསྐོར་ནས། །ལུས་ངག་ཡིད་གསུམ་ཆད་ཅིང་ངལ། །མགོན་སྐྱབས་མེད་པས་ཡི་ཡང་ཆད། །བདུད་རྩི་ཡེ་ཤེས་ཆུ་འདི་འཐུང་། །ལུས་ངག་ཡིད་གསུམ་བདེ་བར་འགྱུར། །ཞེས་བརྗོད་པ་དང་ཆུ་བཏུང་བས་ལུས་ངག་ཡིད་གསུམ་བདེ་བར་བསམ་མོ། །

དེ་ནས་མི་རྟག་པའི་ཆོས་བཤད་པར་བྱ་སྟེ། ཧོཿ ཉོན་ཅིག་ཚེ་འདས་རིགས་ཀྱི་བུ། །འཁོར་འདས་ཀྱི་ཆོས་ཐམས་ཅད་མི་རྟག་པ་ཡིན་ཏེ། དེའང་ཕྱི་ནམ་ཟླ་དུས་བཞིའི་འགྱུར་ལྡོག་གམ། ནང་ཕུང་པོའི་འགྱུར་ལྡོག་དང་དར་རྒུད་དམ། གསང་བ་རླུང་སེམས་ཀྱི་དར་གུད་ལ་བསམ་ཀྱང་(༤༥)མི་རྟག་པ་ཡིན་ཏེ། ཕྱི་ནམ་ཟླ་དུས་བཞི་ཡང་། དབྱར་སྟོན་དུ་འགྲོ། སྟོན་དགུན་དུ་འགྲོ། དགུན་དཔྱིད་དུ་འགྲོ། དཔྱིད་དབྱར་དུ་འགྲོ་བའི་སྒོ་ནས་ཀྱང་མི་རྟག་པ་ཡིན། ནང་ཕུང་པོ་མི་རྟག་པ་ནི། གཞོན་པ་མི་རྟག་རྒན་པོར་འགྲོ། རྒན་པོ་ཡང་མི་རྟག་ན་བའི་སྡུག་བསྔལ་ལ་སོགས་པ་དཔག་ཏུ་མེད་པ་ཡོད་དོ། །ཐམས་ཅད་མི་རྟག་འཆི་བའི་ཆོས་ཅན་ཡིན། དེ་ཡིན་པ་ཡང་རང་རེའི་ཕ་མ་དང་། ཕ་མའི་ཕ་མ་དང་། གྲོང་མི་ཁྱིམ་མཚེས། ཡུལ་མི་རྒན་རབས། གཉེན་ཉེ་བཞི་ལ་སོགས་པ་ཐམས་ཅད་དང་། འདས་མ་འོངས་དུས་བཞིའི་སེམས་ཅན་ཐམས་ཅད་ཀྱང་འཆི་བའི་རང་བཞིན་ཡིན་པས། དེ་བས་ན་འཆི་བ་ལ་ཕན་པ་སྐྱབས་དཀོན་མཆོག་གསུམ་མིན་པ་གཞན་མེད། དེའི་ཕྱིར་ན་ཚེ་ལས་འདས་པ་ཁྱོད་རང་ཡང་སྐྱབས་དཀོན་མཆོག་གསུམ་པོ་དྲན་པར་གྱིས་ལ། བླ་མ་དང་ཡི་དམ་གྱི་ལྷ་ཚོགས་ཐམས་ཅད་སྤྱི་བོ་རུ་སྒོམས་ལ་མོས་པ་དང་གུས་པ་གྱིས་ཤིག །ཅེས་བརྗོད་དོ། །

དེ་ནས་མདུན་གྱི་དཀྱིལ་འཁོར་གྱི་ལྷ་ལ་མཆོད་པ་འབུལ་བ་ནི། ཧཱུྃ། གཙང་ཞིང་གཙང་མར་སྦྱར་བ་ཡི། །མེ་ཏོག་དམ་པ་འདི་འབུལ་ལོ། །ༀ་སརྦ་ཏ་ཐཱ་ག་ཏ་བཛྲ་པུཥྤེ་ཨཱཿཧཱུྃ། ཧཱུྃ། གཙང་ཞིང་གཙང་མར་སྦྱར་བ་ཡི། །བདུག་སྤོས་དམ་པ་འདི་འབུལ་ལོ། །ༀ་སརྦ་ཏ་ཐཱ་ག་ཏ་བཛྲ་དྷཱུ་པེ་ཨཱཿཧཱུྃ། ཧཱུྃ། གཙང་ཞིང་གཙང་མར་སྦྱར་བ་ཡི། །སྣང་གསལ་དམ་པ་འདི་འབུལ་ལོ། །ༀ་སརྦ་ཏ་ཐཱ་ག་ཏ་བཛྲ་ཨཱ་ལོ་ཀེ་ཨཱཿཧཱུྃ། ཧཱུྃ། གཙང་ཞིང་གཙང་མར་སྦྱར་བ་ཡི། །དྲི་མཆོག་དམ་པ་འདི་འབུལ་ལོ། །ༀ་སརྦ་ཏ་ཐཱ་ག་ཏ་བཛྲ་གནྡྷེ་ཨཱཿཧཱུྃ། ཧཱུྃ། གཙང་ཞིང་གཙང་མར་སྦྱར་བ་ཡི། །ཞལ་ཟས་དམ་པ་འདི་འབུལ་ལོ། །ༀ་སརྦ་ཏ་ཐཱ་ག་ཏ་བཛྲ་ནེ་ཝིདྱ་ཨཱཿཧཱུྃ། ཧཱུྃ། གཙང་ཞིང་གཙང་མར་སྦྱར་བ་ཡི། །སིལ་སྙན་དམ་པ་འདི་འབུལ་ལོ། །ༀ་སརྦ་ཏ་ཐཱ་ག་ཏ་བཛྲ་ཤཔྟ་ཨཱཿཧཱུྃ། ཞེས་འབུལ་ལོ། །

བསྟོད་པ་ནི། ཧཱུྃ། དུས་གསུམ་སངས་རྒྱས་འདུས་པའི་དངོས། །ཆེ་མཆོག་ཐོད་ཕྲེང་སྐུ་ལ་བསྟོད། །སྐྱོན་བྲལ་ཆོས་དབྱིངས་ཡེ་ཤེས་དང་། །ཆེ་མཆོག་ཐོད་ཕྲེང་གསུང་ལ་བསྟོད། །སྨྲ་བརྗོད་བྲལ་བ་དབྱིངས་རིག་ཀློང་། །ཆེ་མཆོག་ཐོད་ཕྲེང་ཐུགས་ལ་བསྟོད། །དངོས་གྲུབ་སྟེར་ཞིང་བར་ཆད་སེལ། །དཀྱིལ་འཁོར་ལྷ་ལ་ཕྱག་འཚལ་བསྟོད། །ཅེས་པས་བསྟོད། དཀྱིལ་འཁོར་ལྷ་ལ་གཙོ་བོའི་མཚན་ནས་བརྗོད་ཅིང་ཕྱག་འཚལ་བ་ནི། ཐམས་ཅད་ཀྱིས་ཚེ་འདས་ཀྱི་དོན་དུ་ཕྱག་གྱིས་ཤིག་བྱས་ལ། ཕྱག་འཚལ་སྤྲིན་ཕུང་མའི་གཞུག་ཏུ། ཧོཿ དཀྱིལ་འཁོར་དབུས་ཀྱི་ལྟེ་བ་ལ། །བྷནྡྷ་ཐོད་ཕྲེང་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །ཤར་ཕྱོགས་འཁོར་ལོའི་རྩིབས་སྟེང་ན། །རྡོ་རྗེ་ཐོད་ཕྲེང་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །ལྷོ་ཕྱོགས་འཁོར་ལོའི་རྩིབས་སྟེང་ན། །རཏྣ་ཐོད་ཕྲེང་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །ནུབ་(༤༦)ཕྱོགས་འཁོར་ལོའི་རྩིབས་སྟེང་ན། །པདྨ་ཐོད་ཕྲེང་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །བྱང་ཕྱོགས་འཁོར་ལོའི་རྩིབས་སྟེང་ན། །ཀརྨ་ཐོད་ཕྲེང་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །ཕྱོགས་མཚམས་པདྨ་འདབ་བརྒྱད་ལ། །གུ་རུ་མཚན་བརྒྱད་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །ཕྱི་རོལ་པད་འདབ་བཅུ་དྲུག་ལ། །རིག་འཛིན་ཡབ་ཡུམ་བཅུ་དྲུག་བཞུགས། །གཉིས་མེད་གུས་པས་ཕྱག་འཚལ་ལོ། །ཕྱོགས་བཞིའི་གྲུ་ཆད་བཞི་པོ་ལ། །གིང་ཆེན་ཡབ་ཡུམ་བཅུ་དྲུག་བཞུགས། །གཉིས་མེད་གུས་པས་ཕྱག་འཚལ་ལོ། །དཀྱིལ་འཁོར་བར་ཁྱམས་བཞི་པོ་ལ། །རིགས་བཞིའི་དཔའ་བོ་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །གཞལ་ཡས་ཁང་གི་ཤར་སྒོ་ན། །འགུགས་བྱེད་ལྕགས་ཀྱུ་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །གཞལ་ཡས་ཁང་གི་ལྷོ་སྒོ་ན། །འཆིང་བྱེད་ཞགས་པ་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །གཞལ་ཡས་ཁང་གི་ནུབ་སྒོ་ན། །སྡོམ་བྱེད་ལྕགས་སྒྲོག་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །གཞལ་ཡས་ཁང་གི་བྱང་སྒོ་ན། །འབེབས་བྱེད་དྲིལ་བུ་ཡབ་ཡུམ་བཞུགས། །གཉིས་མེད་གུས་པས་ཕྱག་འཚལ་ལོ། །གཞལ་ཡས་ཁང་གི་ཁོར་ཡུག་ན། །དམ་ཅན་བྱེ་བ་དཔག་མེད་བཞུགས། །གཉིས་མེད་གུས་པས་ཕྱག་འཚལ་ལོ། །འདོད་ཡོན་སྣམ་བུ་བཞི་པོ་ལ། །མཆོད་པའི་ལྷ་མོ་དཔག་མེད་བཞུགས། །གཉིས་མེད་གུས་པས་ཕྱག་འཚལ་ལོ། །དུར་ཁྲོད་ཆེན་པོའི་གནས་བརྒྱད་ན། །དཔའ་བོ་དཔའ་མོ་དཔག་མེད་བཞུགས། །གཉིས་མེད་གུས་པས་ཕྱག་འཚལ་ལོ། །དེ་ནས་ཚེ་འདས་ཆེ་གེ་མོ་ཁྱོད་རང་དཀྱིལ་འཁོར་གྱི་ལྷ་རྣམས་ལ་སྐྱབས་སུ་སོང་ཞིག་བྱས་ལ། ཧཱུྃ། སངས་རྒྱས་ཐམས་ཅད་འདུས་པའི་སྐུ། །དམ་ཆོས་མ་ལུས་འདུས་པའི་གསུང་། །ཅིར་ཡང་མི་དགོངས་རྒྱལ་བའི་ཐུགས། །ཕྱོགས་བཅུའི་བླ་མ་ཡི་དམ་དང་། །ཌཱ་ཀི་ཆོས་སྐྱོང་མ་ལུས་དང་། །རིགས་འདུས་དཀྱིལ་འཁོར་ལྷ་ཚོགས་ཀྱིས། །ཚེ་འདས་འདི་ལ་དགོངས་སུ་གསོལ། །འཁོར་བའི་སེམས་ཅན་འདི་ལྟ་བུ། །བར་དོའི་གནས་ན་ཉོན་རེ་མོངས། །བར་དོའི་གནས་ན་མགོན་མེད་པས། །ཚེ་འདས་འདི་ལ་བསྐྱབ་ཏུ་གསོལ། །ཞེས་བརྗོད་དོ། །དེ་ནས་ད་ལྟའི་སྣང་བ་འདི་འཁྲུལ་སྣང་ཡིན་པའི་ཆོས་བཤད་བྱ་སྟེ། ཧོཿ ཚེ་ལས་འདས་པ་ཁྱོད་ཉོན་ཅིག །ད་ལྟར་གྱི་སྣང་བ་འདི་བར་དོའི་སྣང་བ་ཡིན་ཏེ། མཛོད་ལས་ཀྱང་། སྔོན་བྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་རྒྱུ། །ལས་ཀྱི་རླུང་པོའི་ཤུགས་དང་ལྡན། །རིགས་མཐུན་ལྷ་མིག་དག་བས་མཐོང་། །ཞེས་གསུངས། ད་ལྟར་གྱི་སེམས་འདི་སྔར་བས་དྲན་པ་བདུན་འགྱུར་དུ་གསལ་ཞིང་། དབང་པོ་ཀུན་ཚང་བ་ཤེས་པ་བཀྲ་བ་ལ་གཞི་གཅིག་ཏུ་མི་གནས་པས་ཐམས་ཅད་དུ་འཕྱོ་བ་དང་། ས་དང་བྲག་རི་རྩི་ཤིང་ཐམས་ཅད་ལ་ཐོགས་པ་མེད་པར་འགྲོ་བ་དང་། ལས་ཀྱི་རླུང་པོའི་ཤུགས་ཀྱིས་ཐམས་ཅད་ལ་གཏན་པ་མེད་པར་ཆོ་ལང་ལང་འགྲོ་བ་དང་། (༤༧)བྱ་སྒྲོ་རླུང་གིས་ཁྱེར་བ་བཞིན་དུ་སོང་བའི་དུས་སུ། བར་དོའི་ནང་ན་གནས་པ་རྣམས་ཀྱིས་མཐོང་ཞིང་། གཞན་ཡང་ལྷ་མིག་དག་པ་རྣམས་ཀྱིས་མཐོང་ལ། དེ་མ་ཡིན་པ་རྣམས་ཀྱིས་མི་མཐོང་། རང་གི་གཉེན་ཚན་རྣམས་ངུ་བ་དེ་ཐོས། དེའི་རྩར་ཕྱིན་མ་ངུ་ང་འདི་ན་ཡོད་བྱས་ཀྱང་མཉན་པ་དང་། ད་ང་ཤི་འདུག་སྙམ་པ་དང་སྙིང་མི་དགའ་བ་དང་། ང་གར་སྐྱེ་ན་སྙམ་པའི་རྟོག་པ་འབྱུང་ངོ་། །ཁྱོད་ཤི་བའི་རྟགས་སུ་ལུས་ལ་གྲིབ་མ་མེད་པ་དང་། སྨྲས་ཀྱང་གཞན་གྱིས་མི་ཐོས་པ་དང་། ཟས་བསྔོས་པ་མིན་པ་ཟར་མེད་པ་དང་། ཉི་མ་ཟླ་བའི་སྣང་བ་མེད་པ་ལ་སོགས་པ་དེ་ལྟ་བུའི་རྟགས༷་རྣམས་འབྱུང་ངོ་། །དེའི་དུས་སུ་ལས་ཀྱི་དབང་གིས་གཤིན་རྗེའི་ཕོ་ཉ་རྣམས་འོང་ངོ་། །ཞེས་བརྗོད་དོ། །

དེ་ལྟ་བུ་ལས་སྐྱོབ་པའི་ཕྱིར་དཀྱིལ་འཁོར་གྱི་ལྷ་ལ་ཡན་ལག་བདུན་པ་ཕུལ་ཞིག་བྱས་ལ། ༀ། བདེ་གཤེགས་མ་ལུས་འདུས་པའི་སྐུ། །བླ་མ་ཡི་དམ་མཁའ་འགྲོ་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་གུས་པས་ཕྱག་འཚལ་ལོ། །རྣམ་དག་འདོད་ཡོན་ལྔ་ལ་སོགས། །དངོས་དང་ཡིད་ཀྱིས་སྤྲུལ་པ་ཡི། །མཆོད་པའི་རྣམ་པ་ཐམས་ཅད་ཀུན། །བླ་མ་ཡི་དམ་མཁའ་འགྲོ་མཆོད། །ཚེ་རབས་ཐོག་མ་མེད་པ་ནས། །ད་ལྟའི་ལུས་འདི་ཡན་ཆད་ལ། །སྡིག་པ་མི་དགེ་ཅི་བགྱིས་པ། །བླ་མ་སངས་རྒྱས་རྣམས་ལ་བཤགས། །འགྲོ་བ་སེམས་ཅན་དོན་སླད་དུ། །བསྐལ་པ་དུ་མར་མི་སྐྱོ་བར། །བྱང་ཆུབ་སྤྱོད་པ་སྣ་ཚོགས་ཀྱིས། །དགེ་བ་མཛད་ལ་རྗེས་ཡི་རངས། །སྤྱོད་དང་རྫུ་འཕྲུལ་སྣ་ཚོགས་ཀྱིས། །སེམས་ཅན་ཀུན་ལ་ཕན་དོན་དུ། །སངས་རྒྱས་བྱང་ཆུབ་སེམས་དཔའ་ལ། །ཆོས་ཀྱི་འཁོར་ལོ་བསྐོར་དུ་གསོལ། །གང་དག་མྱ་ངན་འདའ་རྣམས་ལ། །ཇི་སྲིད་འཁོར་བ་མ་སྟོངས་པར། །མཐའ་ཡས་སེམས་ཅན་དོན་གྱི་ཕྱིར། །མྱ་ངན་མི་འདའ་གསོལ་བ་འདེབས། །བདག་གི་ལུས་ངག་ཡིད་གསུམ་གྱིས། །བྱས་དང་བྱེད་འགྱུར་གཞན་བསྐུལ་བའི། །དགེ་བས་མཐའ་ཡས་སེམས་ཅན་རྣམས། །ཀུན་མཁྱེན་སངས་རྒྱས་ཐོབ་པར་ཤོག །ཅེས་པས་འབུལ་ལོ། །

སྐྱབས་འགྲོ་སེམས་བསྐྱེད་གྱིས་ཤིག་བྱས་ལ། ན་མོ། སངས་རྒྱས་ཆོས་དང་དགེ་འདུན་དང་། །བླ་མ་ཡི་དམ་མཁའ་འགྲོ་དང་། །ལྟ་བ་སྤྱོད་པ་སྒོམ་པ་ལ། །ཕྱི་ནང་གསང་བར་སྐྱབས་སུ་མཆི། །ཞེས་ལན་གསུམ་བརྗོད་དོ། །སེམས་བསྐྱེད་པ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །མ་རྟོགས་འཁྲུལ་པས་འཁོར་བར་འཁྱམས། །སྲིད་པའི་མཚོ་ལས་བསྒྲལ་དོན་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་བརྗོད། དེ་ནས་བུམ་པ་གཞལ་ཡས་ཁང་དུ་གསལ་བཏབ་ལ། ལྷ་རྣམས་གཞུང་བཞིན་བསྐྱེད་ལ། མཆོད་(༤༨)བསྟོད་འཛབ་ཀྱི་བསྙེན་པ་བྱས་ལ། བུམ་པའི་ལྷ་ལས་འོད་ཟེར་དཔག་ཏུ་མེད་པ་བྱུང་བས། ཚེ་འདས་ཀྱི་སྒྲིབ་པ་མ་ལུས་པ་སྦྱང་བར་བསམས་ལ། མེ་ལོང་ནང་དུ་བདེ་གཤེགས་ཀྱི་སྐུ་གཟུགས་འཆར་བར་བྱས། བུམ་ཆུ་སྦྲེང་ཞིང་། ཧཱུྃ། རྒྱལ་བའི་སྐུ་གསུང་ཐུགས་མཆོག་ལ། །ཉོན་མོངས་དྲི་མ་མི་མངའ་ཡང་། །ཚེ་འདས་ལུས་ངག་ཡིད་གསུམ་གྱི། །ཉོན་མོངས་དྲི་མ་སྦྱང་སླད་དུ། །སྐུ་གསུང་ཐུགས་ལ་ཁྲུས་གསོལ་པས། །ཚེ་འདས་ལུས་ངག་ཡིད་གསུམ་གྱི། །དྲི་མ་མ་ལུས་དག་གྱུར་ཅིག །ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་ཧ་རི་ནི་ས་ར་ཙ་ཧྲཱི་ཡ་ཨ་བྷི་ཥིཉྩ་སྟཾ། ཞེས་བརྗོད་ལ། ཆུ་སླར་བུམ་པར་བླུགས་ཏེ། མེ་ལོང་ནང་དུ་མིང་བྱང་འཆར་བར་བྱས་ནས། ཧཱུྃ། འདོད་ཆགས་ཞེ་སྡང་གཏི་མུག་གསུམ། །དེ་དག་འཇིག་རྟེན་དུག་གསུམ་སྟེ། །རྫོགས་པའི་སངས་རྒྱས་དུག་མི་མངའ། །བཅོམ་ལྡན་སངས་རྒྱས་དུག་བཅོམ་མོ། །སངས་རྒྱས་བདེན་པའི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །ཧཱུྃ། འདོད་ཆགས་ཞེ་སྡང་གཏི་མུག་གསུམ། །དེ་དག་འཇིག་རྟེན་དུག་གསུམ་སྟེ། །རྫོགས་པའི་དམ་ཆོས་དུག་མི་མངའ། །བཅོམ་ལྡན་དམ་ཆོས་དུག་བཅོམ་མོ། །དམ་ཆོས་བདེན་པའི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །ཧཱུྃ། འདོད་ཆགས་ཞེ་སྡང་གཏི་མུག་གསུམ། །དེ་དག་འཇིག་རྟེན་དུག་གསུམ་སྟེ། །རྫོགས་པའི་དགེ་འདུན་དུག་མི་མངའ། །བཅོམ་ལྡན་དགེ་འདུན་དུག་བཅོམ་མོ། །དགེ་འདུན་བདེན་པའི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །གོང་གི་སྙིང་པོ་བརྗོད་ཅིང་ཁྲུས་བྱའོ། །ཧཱུྃ། ས་འདི་དུག་གི་ཕ་ཡིན་ཏེ། །ས་འདི་དུག་གི་མ་ཡང་ཡིན། །སངས་རྒྱས་སྤྱན་མར་བྱིན་བརླབས་ནས། །དུག་གསུམ་ས་ཡི་ནང་དུ་སོང་། །སངས་རྒྱས་སྤྱན་མའི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །ཆུ་འདི་དུག་གི་ཕ་ཡིན་ཏེ། །ཆུ་འདི་དུག་གི་མ་ཡང་ཡིན། །མཱ་མ་ཀཱི་རུ་བྱིན་བརླབས་ནས། །དུག་གསུམ་ཆུ་ཡི་ནང་དུ་སོང་། །མཱ་མ་ཀཱི་ཡི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །མེ་འདི་དུག་གི་ཕ་ཡིན་ཏེ། །མེ་འདི་དུག་གི་མ་ཡང་ཡིན། །གོས་དཀར་མོ་རུ་བྱིན་བརླབས་ནས། །དུག་གསུམ་མེ་ཡི་ནང་དུ་སོང་། །གོས་དཀར་མོ་ཡི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །རླུང་འདི་དུག་གི་ཕ་ཡིན་ཏེ། །རླུང་འདི་དུག་གི་མ་ཡང་ཡིན། །དམ་ཚིག་སྒྲོལ་མར་བྱིན་བརླབས་ནས། །དུག་གསུམ་རླུང་གི་ནང་དུ་སོང་། །དམ་ཚིག་སྒྲོལ་མའི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །ཅེས་དུག་སྦྱོང་ངོ་། །

དེ་ནས་དཀྱིལ་འཁོར་གྱི་ལྷ་ལ་མཆོད་བསྟོད་ཛབ་ཀྱིས་ཐུགས་དམ་བསྐུལ་བས་སྐུ་གསུང་ཐུགས་ལས་འོད་ཟེར་འཕྲོས། ཚེ་འདས་ཀྱི་ལུས་ངག་ཡིད་གསུམ་ལ་ཕོག །སྐལ་བ་དཔག་ཏུ་མེད་པའི་སྡིག་པ་དང་སྒྲིབ་པ་(༤༩)ཐམས་ཅད་བྱང་བར་བསམས་ལ། སྐབས་འདིར་ཙཀླི་ཡོད་ན་ཐོགས་ཏེ་དབང་བསྐུར། བསྡུ་ན་གནས་འདྲེན་ལ་འཇུག་པས་ཆོག་གོ། །ཧཱུྃ། དཀྱིལ་འཁོར་དབུས་ཀྱི་ལྟེ་བ་ལ། །ཟིལ་གནོན་པདྨ་ཐོད་ཕྲེང་དང་། །གསང་ཡུམ་རྡོ་རྗེ་ཕག་མོ་གཉིས། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་རྣམ་ཤེས་ཕུང་པོ་དང་། །ཡིད་ཀྱི་སྡིག་སྒྲིབ་སྦྱང་དུ་གསོལ། །ༀ་བཛྲ་གུ་རུ་བུདྡྷ་ཐོད་ཕྲེང་རྩལ། །ཚེ་འདས་རྡོ་རྗེ་མོས་པ་རྩལ། །བུདྡྷ་ཌཱ་ཀི་ནཱི་ཧཱུྃ་ཨ་བྷི་ཥིཉྩ་ཧཱུྃ། ཞེས་རང་རང་གི་རྩ་སྔགས་དང་། ཚེ་འདས་ཀྱི་མིང་སྤེལ་ཀུན་ལ་འགྲེས། ཧཱུྃ། ཤར་ཕྱོགས་འཁོར་ལོའི་རྩིབས་སྟེང་དུ། །བཅོམ་ལྡན་རྡོ་རྗེ་ཐོད་ཕྲེང་དང་། །གསང་ཡུམ་རྡོ་རྗེ་མཁའ་འགྲོ་གཉིས། །ཡབ་ཡུམ་ཐབས་ཤེས་ཟུང་འཇུག་གི། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་གཟུགས་ཀྱི་ཕུང་པོ་དང་། །ཤ་ཡི་སྡིག་སྒྲིབ་སྦྱང་དུ་གསོལ། །ༀ་བཛྲ་གུ་རུ་རྡོ་རྗེ་ཐོད་ཕྲེང་རྩལ། བཛྲ་ཌཱ་ཀི་ནཱི་ཨ་བྷི་ཥིཉྩ་ཧཱུྃ། ཧཱུྃ། ལྷོ་ཕྱོགས་འཁོར་ལོའི་རྩིབས་སྟེང་དུ། །བཅོམ་ལྡན་རཏྣ་ཐོད་ཕྲེང་དང་། །གསང་ཡུམ་རཏྣ་མཁའ་འགྲོ་གཉིས། །ཡབ་ཡུམ་ཐབས་ཤེས་ཟུང་འཇུག་གི། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་ཚོར་བའི་ཕུང་པོ་དང་། །ཁྲག་གི་སྡིག་སྒྲིབ་སྦྱང་དུ་གསོལ། །ༀ་རཏྣ་གུ་རུ་ཐོད་ཕྲེང་རྩལ། །རཏྣ་ཌཱ་ཀི་ནཱི་ཧཱུྃ་ཨ་བྷི་ཥིཉྩ་ཧཱུྃ། ཧཱུྃ། ནུབ་ཕྱོགས་འཁོར་ལོའི་རྩིབས་སྟེང་དུ། །བཅོམ་ལྡན་པདྨ་ཐོད་ཕྲེང་དང་། །གསང་ཡུམ་པདྨ་མཁའ་འགྲོ་གཉིས། །ཡབ་ཡུམ་ཐབས་ཤེས་ཟུང་འཇུག་གི། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་འདུ་ཤེས་ཕུང་པོ་དང་། །དྲོད་ཀྱི་སྡིག་སྒྲིབ་སྦྱང་དུ་གསོལ། །ༀ་པདྨ་གུ་རུ་ཐོད་ཕྲེང་རྩལ་པདྨ་ཌཱ་ཀི་ནཱི་ཧཱུྃ་ཨ་བྷི་ཥིཉྩ་ཧཱུྃ། ཧཱུྃ། བྱང་ཕྱོགས་འཁོར་ལོའི་རྩིབས་སྟེང་དུ། །བཅོམ་ལྡན་ཀརྨ་ཐོད་ཕྲེང་དང་། །གསང་ཡུམ་ལས་ཀྱི་མཁའ་འགྲོ་གཉིས། །ཡབ་ཡུམ་ཐབས་ཤེས་ཟུང་འཇུག་གི། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་འདུ་བྱེད་ཕུང་པོ་དང་། །དབུགས་ཀྱི་སྡིག་སྒྲིབ་སྦྱང་དུ་གསོལ། །ༀ་ཀརྨ་གུ་རུ་ཐོད་ཕྲེང་རྩལ་ཀརྨ་ཌཱ་ཀི་ནཱི་ཧཱུྃ་ཨ་བྷི་ཥིཉྩ་ཧཱུྃ། ཧཱུྃ། ཤར་ཕྱོགས་པདྨའི་གདན་སྟེང་དུ། །གུ་རུ་པདྨ་འབྱུང་གནས་དང་། །གསང་ཡུམ་མཁའ་འགྲོ་དཔལ་ཕྲེང་གཉིས། །ཡབ་ཡུམ་ཐབས་ཤེས་ཟུང་འཇུག་གི། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་རྣ་བའི་རྣམ་ཤེས་དང་། །གཟུགས་ཡུལ་སྡིག་སྒྲིབ་སྦྱང་དུ་གསོལ། ཧཱུྃ། ཤར་ལྷོ་པདྨའི་གདན་སྟེང་དུ། །གུ་རུ་པདྨ་རྒྱལ་པོ་དང་། །གསང་ཡུལ་མཁའ་འགྲོ་དཔལ་ཕྲེང་གཉིས། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་རྣ་བའི་རྣམ་ཤེས་དང་། །ཐོས་ཡུལ་སྡིག་(༥༠)སྒྲིབ་སྦྱང་དུ་གསོལ། །ཧཱུྃ། ལྷོ་ཕྱོགས་པདྨའི་གདན་སྟེང་དུ། །གུ་རུ་ཤཱཀྱ་སེང་གེ་དང་། །གསང་ཡུམ་མཁའ་འགྲོ་བདུད་འདུལ་གཉིས། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་སྣ་ཡི་རྣམ་ཤེས་དང་། །དྲི་ཡུལ་སྡིག་སྒྲིབ་སྦྱང་དུ་གསོལ། །ཧཱུྃ། ལྷོ་ནུབ་པདྨའི་གདན་སྟེང་དུ། །གུ་རུ་བློ་ལྡན་མཆོག་སྲེད་དང་། །གསང་ཡུམ་མཁའ་འགྲོ་ཞི་བ་འཚོ། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་ལྕེ་ཡི་རྣམ་ཤེས་དང་། །རོ་ཡུལ་སྡིག་སྒྲིབ་སྦྱང་དུ་གསོལ། །ཧཱུྃ། ནུབ་ཕྱོགས་པདྨའི་གདན་སྟེང་དུ། །གུ་རུ་ཉི་མ་འོད་ཟེར་དང་། །གསང་ཡུམ་མཁའ་འགྲོ་མནྡཱ་ར། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་མཐོང་བའི་དབང་པོ་དང་། །འདས་ཡུལ་སྡིག་སྒྲིབ་སྦྱང་དུ་གསོལ། །ཧཱུྃ། ནུབ་བྱང་པདྨའི་གདན་སྟེང་དུ། །གུ་རུ་སེང་གེ་སྒྲ་སྒྲོགས་དང་། །གསང་ཡུམ་མེ་ཏོག་སྒྲོལ་མཛེས་གཉིས། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་ཐོས་ཡུལ་དབང་པོ་དང་། །དུས་འདིའི་སྡིག་སྒྲིབ་སྦྱང་དུ་གསོལ། །ཧཱུྃ། བྱང་ཕྱོགས་པདྨའི་གདན་སྟེང་དུ། །གུ་རུ་པདྨ་སཾ་བྷ་དང་། །གསང་ཡུམ་མཁའ་འགྲོ་རིག་བྱེད་གཉིས། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་དྲི་ཡུལ་དབང་པོ་དང་། །མ་འོངས་སྡིག་སྒྲིབ་སྦྱང་དུ་གསོལ། །ཧཱུྃ། བྱང་ཤར་པདྨའི་གདན་སྟེང་དུ། །གུ་རུ་རྡོ་རྗེ་གྲོ་ལོད་དང་། །གསང་ཡུམ་མཁའ་འགྲོ་ཕྲ་མེན་གཉིས། །ཡབ་ཡུམ་ཐབས་ཤེས་ཟུང་འཇུག་ལས། །བྱང་ཆུབ་སེམས་ཀྱི་འོད་འཕྲོས་པས། །ཚེ་འདས་རོ་ཡུལ་དབང་པོ་དང་། །མ་ངེས་སྡིག་སྒྲིབ་སྦྱང་དུ་གསོལ། །ཧཱུྃ། ཕྱི་རོལ་པད་འདབ་བཅུ་དྲུག་ལ། །རིག་འཛིན་ཡབ་ཡུམ་བཅུ་དྲུག་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ༀ་པདྨ་ཌཱ་ཀི་ཧཱུྃ། ༀ་སཱུརྱ་ཌཱ་ཀི་ནཱི་ཧཱུྃ། ༀ་རཏྣ་ཌཱ་ཀི་ཧཱུྃ། ༀ་སརྦ་ཌཱ་ཀི་ནཱི་ཧཱུྃ། ༀ་བཛྲ་ཌཱ་ཀི་ཧཱུྃ། ༀ་མོ་ཧ་ཌཱ་ཀི་ནཱི་ཧཱུྃ། ༀ་ཀརྨ་ཌཱ་ཀི་ཧཱུྃ། ༀ་ཧ་རི་ཌཱ་ཀི་ནཱི་ཧཱུྃ། ཨ་བྷི་ཥིཉྩ་ཧཱུྃ། ཧཱུྃ། དཀྱིལ་འཁོར་བྱང་ཤར་གྲུ་ཆད་ལ། །རྡོ་རྗེ་གིང་ཆེན་ཡབ་ཡུམ་གཉིས། །གཉིས་མེད་སྦྱོར་བའི་བྱིན་རླབས་ཀྱིས། །ཚེ་འདས་རིགས་ཀྱི་བུ་འདི་ཡི། །སྣང་ཡུལ་སྡིག་སྒྲིབ་སྦྱང་དུ་གསོལ། །ཧཱུྃ། དཀྱིལ་འཁོར་ཤར་ལྷོའི་གྲུ་ཆད་ལ། །རཏྣ་གིང་ཆེན་ཡབ་ཡུམ་གཉིས། །གཉིས་མེད་སྦྱོར་(༥༡)བའི་བྱིན་རླབས་ཀྱིས། །ཚེ་འདས་རིགས་ཀྱི་བུ་འདི་ཡི། །ཚོར་ཡུལ་སྡིག་སྒྲིབ་སྦྱང་དུ་གསོལ། །ཧཱུྃ། དཀྱིལ་འཁོར་ལྷོ་ནུབ་གྲུ་ཆད་ལ། །པདྨ་གིང་ཆེན་ཡབ་ཡུམ་གཉིས། །གཉིས་མེད་སྦྱོར་བའི་བྱིན་རླབས་ཀྱིས། །ཚེ་འདས་རིགས་ཀྱི་བུ་འདི་ཡི། །རེག་ཡུལ་སྡིག་སྒྲིབ་སྦྱང་དུ་གསོལ། །ཧཱུྃ། དཀྱིལ་འཁོར་ནུབ་བྱང་གྲུ་ཆད་ལ། །ཀརྨ་གིང་ཆེན་ཡབ་ཡུམ་གཉིས། །གཉིས་མེད་སྦྱོར་བའི་བྱིན་རླབས་ཀྱིས། །ཚེ་འདས་རིགས་ཀྱི་བུ་འདི་ཡི། །ཉོན་མོངས་སྲེད་ཡུལ་སྦྱང་དུ་གསོལ། །ཧཱུྃ། གཞལ་ཡས་ཤར་ཕྱོགས་བར་ཁྱམས་ལ། །རྡོ་རྗེ་རིགས་ཀྱི་དཔའ་བོ་དང་། །རྡོ་རྗེ་རིགས་ཀྱི་དཔའ་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ཧཱུྃ། གཞལ་ཡས་ལྷོ་ཕྱོགས་བར་ཁྱམས་ལ། །རིན་ཆེན་རིགས་ཀྱི་དཔའ་བོ་དང་། །རིན་ཆེན་རིགས་ཀྱི་དཔའ་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ཧཱུྃ། གཞལ་ཡས་ནུབ་ཕྱོགས་བར་ཁྱམས་ལ། །པདྨ་རིགས་ཀྱི་དཔའ་བོ་དང་། །པདྨ་རིགས་ཀྱི་དཔའ་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ཧཱུྃ། གཞལ་ཡས་བྱང་ཕྱོགས་བར་ཁྱམས་ལ། །ལས་ཀྱི་རིགས་ཀྱི་དཔའ་བོ་དང་། །ལས་ཀྱི་རིགས་ཀྱི་དཔའ་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །བཛྲ་ཧ་རི་ནི་ས་ཧཱུྃ། རཏྣ་ཧ་རི་ནི་ས་ཧཱུྃ། པདྨ་ཧ་རི་ནི་ས་ཧཱུྃ། ཀརྨ་ཧ་རི་ནི་ས་ཧཱུྃ། ཨ་བྷི་ཥིཉྩ་ཧཱུྃ། ཧཱུྃ། གཞལ་ཡས་ཆེན་པོའི་ཤར་སྒོ་ན། །འགུགས་བྱེད་ལྕགས་ཀྱུ་དཀར་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ཧཱུྃ། གཞལ་ཡས་ཆེན་པོའི་ལྷོ་སྒོ་ན། །འཆིང་བྱེད་ཞགས་པ་སེར་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ཧཱུྃ། གཞལ་ཡས་ཆེན་པོའི་ནུབ་སྒོ་ན། །སྡོམ་བྱེད་ལྕགས་སྒྲོག་དམར་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ཧཱུྃ། གཞལ་ཡས་ཆེན་པོའི་བྱང་སྒོ་ན། །འབེབས་བྱེད་དྲིལ་བུ་ལྗང་མོ་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ༀ་བཛྲ་ཨངྐུ་ཤ་ཛཿༀ་རཏྣ་པཱ་ཤ་ཧཱུྃ། ༀ་པདྨ་སྥོ་ཊ་བྃ། ༀ་ཀརྨ་གཎྜེ་ཧོཿཨ་བྷི་ཥིཉྩ་ཧཱུྃ། ཧཱུྃ། གཞལ་ཡས་ཆེན་པོའི་ཁོར་ཡུག་ན། །དམ་ཅན་བྱེ་བ་དཔག་མེད་བཞུགས། །རང་རིག་རྟོགས་པའི་འོད་ཟེར་གྱིས། །ཚེ་འདས་ལས་སྒྲིབ་སྦྱང་དུ་གསོལ། །ༀ་ཀརྨ་རཀྵ་སརྦ་ས་མ་ཡ་ཧཱུྃ་ཕཊ། ཨ་བྷི་ཥིཉྩ་ཧཱུྃ། ཞེས་པས་ལྷ་ཚོགས་རྣམས་ལས་འོད་ཟེར་དཔག་ཏུ་མེད་པ་འཕྲོས་པས། ཚེ་ལས་འདས་པའི་ལས་དང་ཉོན་མོངས་པ་དང་ཤེས་བྱའི་སྡིག་སྒྲིབ་ཐམས་ཅད་དག་པར་བསམ་མོ། །

དེ་ནས་དཀྱིལ་འཁོར་ལྷ་ལ་མཆོད་བསྟོད་བྱ། མེ་ལོང་ནང་དུ་མིང་བྱང་འཆར་བར་བྱས་ལ་ཁྲུས་(༥༢)བྱའོ། །ཧཱུྃ། དུས་གསུམ་སངས་རྒྱས་ཐམས་ཅད་ཀྱི། །སྐུ་མཆོག་ཟིལ་གནོན་ཐོད་ཕྲེང་རྩལ། །ཕྱག་རྒྱ་ཡེ་ཤེས་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །གཏི་མུག་དྲི་མ་དག་གྱུར་ཅིག །དུས་གསུམ་སངས་རྒྱས་ཐམས་ཅད་ཀྱི། །གསུང་མཆོག་པདྨ་ཐོད་ཕྲེང་རྩལ། །ཕྱག་རྒྱ་ཡེ་ཤེས་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །འདོད་ཆགས་དྲི་མ་དག་གྱུར་ཅིག །དུས་གསུམ་སངས་རྒྱས་ཐམས་ཅད་ཀྱི། །ཐུགས་མཆོག་རྡོ་རྗེ་ཐོད་ཕྲེང་རྩལ། །ཕྱག་རྒྱ་ཡེ་ཤེས་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །ཞེ་སྡང་དྲི་མ་དག་གྱུར་ཅིག །དུས་གསུམ་སངས་རྒྱས་ཐམས་ཅད་ཀྱི། །ཡོན་ཏན་རཏྣ་ཐོད་ཕྲེང་རྩལ། །ཕྱག་རྒྱ་ཡེ་ཤེས་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །ང་རྒྱལ་དྲི་མ་དག་གྱུར་ཅིག །དུས་གསུམ་སངས་རྒྱས་ཐམས་ཅད་ཀྱི། །ཕྲིན་ལས་ཀརྨ་ཐོད་ཕྲེང་རྩལ། །ཕྱག་རྒྱ་ཡེ་ཤེས་བུམ་པའི་ཆུས། །ཚེ་འདས་ཁྱོད་ལ་ཁྲུས་པས། །ཕྲག་དོག་དྲི་མ་དག་གྱུར་ཅིག །འབྱུང་བ་རྣམ་དག་ཡུམ་ལྔའི་སྐུ། །ཕྱག་རྒྱ་ཡེ་ཤེས་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །འབྱུང་བའི་དྲི་མ་དག་གྱུར་ཅིག །རྣམ་ཤེས་རང་བྱུང་ཡེ་ཤེས་སྐུ། །མཚན་བརྒྱད་ཕྱག་རྒྱ་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །ཚོགས་བརྒྱད་དྲི་མ་དག་གྱུར་ཅིག །ཡུལ་བརྒྱད་རང་བྱུང་ཡེ་ཤེས་སྐུ། །ཡུམ་བརྒྱད་ཕྱག་རྒྱ་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །སྣང་ཡུལ་དྲི་མ་དག་གྱུར་ཅིག །ཕྱག་རྒྱ་ཆེན་པོའི་ཡེ་ཤེས་སྐུ། །རིག་འཛིན་ཕྱག་རྒྱ་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །མ་རིག་དྲི་མ་དག་གྱུར་ཅིག །དུས་གསུམ་མཐའ་བྲལ་ཡེ་ཤེས་སྐུ། །གིང་ཆེན་ཕྱག་རྒྱ་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །རྟག་ཆད་དྲི་མ་དག་གྱུར་ཅིག །ཆོས་ཉིད་རང་བྱུང་ཡེ་ཤེས་སྐུ། །དཔའ་བོ་དཔའ་མོ་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །རེ་དོགས་དྲི་མ་དག་གྱུར་ཅིག །དུས་གསུམ་མཐའ་བྲལ་ཡེ་ཤེས་སྐུ། །སྒོ་བ་ཕྱག་རྒྱ་བུམ་པའི་ཆུས། །ཚེ་འདས་ཁྱོད་ལ་ཁྲུས་བྱས་པས། །ཉོན་མོངས་དྲི་མ་དག་གྱུར་ཅིག །ཅེས་གཙོ་བོའི་སྙིང་པོ་བརྗོད་ཅིང་ཁྲུས་བྱའོ། །

དེ་ནས་རིགས་དྲུག་གནས་ནས་དྲངས་པ་ནི། རིགས་དྲུག་མཎྜལ་དང་གཏོར་མ་རིམ་པ་བཞིན་བཤམས་ལ། གང་དུ་མཆོད་བསྟོད་འབུལ། གསོལ་བ་དྲག་ཏུ་བཏབ་ལ། དམྱལ་བའི་མཎྜལ་ནས་རིམ་པ་བཞིན་སྤར་ནས། གཏོར་མ་བསྔོ་བ་འདི་སྐད་དོ། །ན་མོ། ཚེ་ལས་འདས་པ་མིང་རུས་འདི་ཞེས་བགྱི་བ་ཉོན་ཅིག །ཁྱོད་ཉོན་མོངས་པ་ཞེ་སྡང་རང་ག་མར་སྤྱད་པའི་དབང་གིས་དམྱལ་བ་ཚ་གྲང་གི་གནས་སུ་སྐྱེས་སམ་སྐྱེའམ་སྐྱེ་བར་འགྱུར་བའི་ལས་ཅན་དང་རིགས་ཅན་ཡིན་ནའང་། བདག་གིས་བྱམས་སྙིང་རྗེ་ཚད་མེད་པ་བསྒོམས་པ་དང་། མཆོད་སྦྱིན་གྱི་གཏོར་མ་འདི་བསྔོས་པས་ཚེ་ལས་འདས་པ་ཁྱོད་དམྱལ་བ་(༥༣)ཚ་གྲང་གི་སྡུག་བསྔལ་དང་བྲལ་བར་གྱུར་ཅིག །ཧཱུྃ། ཚེ་འདས་རིགས་ཀྱི་བུ་ཁྱོད་ཀྱི། །ཞེ་སྡང་སྲོག་བཅད་རྣམ་སྨིན་གྱིས། །དམྱལ་བའི་གནས་སུ་མ་སྐྱེས་སམ། །དམྱལ་བའི་གནས་སུ་སྐྱེས་པ་ན། །བྱམས་དང་སྙིང་རྗེའི་གོ་གྱོན་ལ། །ལྷ་དང་བླ་མ་དྲན་གྱིས་ལ། །དཀྱིལ་འཁོར་ལྷ་ལ་མཆོད་པ་ཕུལ། །ༀ་སརྦ་ཏ་ཐཱ་ག་ཏ་ༀ་བཛྲ་པུཥྤེ་ཨཱཿཧཱུྃ། དེ་བཞིན་དུ་ངྷཱུ་པེ། ཨཱ་ལ་ཀེ། གནྡྷེ། ནཻ་ཝི་དྱ། ཤཔྟ་རྣམས་ལ་འགྲེས་སོ། །དེ་ནས་མེ་ལོང་ནང་དུ་མིང་བྱང་དྲི་མ་འཆར་བར་བྱས་ལ། ཧཱུྃ། འདི་ནི་བཟོད་པའི་རང་བཞིན་ཆུ། །བཟོད་པ་ཆུ་ཡིས་ལེགས་བཀྲུས་པས། །ཞེ་སྡང་དྲི་མ་དག་གྱུར་ནས། །མེ་ལོང་ཡེ་ཤེས་དོན་རྟོགས་ཤོག །ས་འདི་བཅད་པ་མན་ཆད་ནི། །དམྱལ་ཁམས་བཅོ་བརྒྱད་ས་ཡིན་པས། །རྡོ་རྗེ་ཐོད་ཕྲེང་བྱིན་རླབས་ཀྱིས། །ཚ་གྲང་སྡུག་བསྔལ་ཞི་གྱུར་ནས། །དམྱལ་བའི་སྐྱེ་སྒོ་ཆོད་པར་ཤོག །ༀ་བཛྲ་གུ་རུ་ད་ཧ་ད་ཧ་ན་ར་ཀ་ག་ཏེ་ཧེ་ཏུཾ་ཧཱུྃ་ཕཊ། ཡང་གཏོར་མ་གཅིག་བསྔོས་ལ། ན་མོ། ཚེ་ལས་འདས་པ་ཆེ་གེ་མོ་ཁྱོད་ཉོན་ཅིག །ཁྱོད་ཀྱིས་ཉོན་མོངས་བ་སེར་སྣ་རང་དགའ་མར་སྤྱད་པའི་དབང་གིས། ཡི་དྭགས་བཀྲེས་སྐོམ་གྱི་གནས་སུ་སྐྱེས་སམ་སྐྱེའམ་སྐྱེ་བར་འགྱུར་བའི་རིགས་ཅན་ཅིག་ཡིན་ནའང་། བདག་གིས་སྦྱིན་པ་ཕྱོགས་རིས་མེད་པར་བཏང་བ་དང་། མཆོད་སྦྱིན་གཏོར་མ་འདི་བསྔོས་པས། ཚེ་ལས་འདས་པ་ཁྱོད་ཡི་དྭགས་བཀྲེས་སྐོམ་གྱི་སྡུག་བསྔལ་ཐམས་ཅད་དང་བྲལ་བར་གྱུར་ཅིག །ཧཱུྃ། ཚེ་འདས་རིགས་ཀྱི་བུ་འདི་ཡི། །སེར་སྣ་འཇུར་གེགས་རྣམ་སྨིན་གྱིས། །ཡི་དྭགས་གནས་སུ་སྐྱེས་པ་ན། །སྦྱིན་པ་ཆེན་པོའི་གོ་གྱོན་ལ། །ལྷ་དང་བླ་མ་དྲན་གྱིས་ལ། །དཀྱིལ་འཁོར་ལྷ་ལ་མཆོད་པ་ཕུལ། །ༀ་སརྦ་ཏ་ཐཱ་ག་ཏ་པུཥྤེ་དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྟ་ཨཱཿཧཱུྃ། ཧཱུྃ། འདི་ནི་སྦྱིན་པའི་རང་བཞིན་ཆུ། །སྦྱིན་པ་ཆུ་ཡིས་ལེགས་བཀྲུས་པས། །སེར་སྣའི་དྲི་མ་དག་གྱུར་ནས། །མཉམ་ཉིད་ཡེ་ཤེས་དོན་རྟོགས་ཤོག །ས་འདི་བཅད་པ་མན་ཆད་ནི། །ཡི་དྭགས་ཁམས་ཀྱི་ས་ཡིན་པས། །རཏྣ་ཐོད་ཕྲེང་བྱིན་རླབས་ཀྱིས། །བཀྲེས་སྐོམ་སྡུག་བསྔལ་ཞི་གྱུར་ནས། །ཡི་དྭགས་སྐྱེ་སྒོ་ཆོད་པ་ཤོག །ༀ་རཏྣ་གུ་རུ་པ་ཙ་པ་ཙ་པྲེ་ཏ་ཀ་ག་ཏེ་ཧེ་ཏུཾ་ཧཱུྃ་ཕཊ། ན་མོ། ཚེ་ལས་འདས་པ་ཆེ་གེ་མོ་ཁྱོད་ཉོན་ཅིག །ཁྱོད་ཀྱིས་ཉོན་མོངས་པ་གཏི་མུག་རང་དགའ་མར་སྤྱད་པའི་དབང་གིས། བྱོལ་སོང་གླེན་ལྐུགས་ཀྱི་གནས་སུ་སྐྱེས་སམ་སྐྱེའམ་སྐྱེ་བར་འགྱུར་བའི་རིགས་ཅན་ཅིག་ཡིན་ནའང་བདག་གིས་གསུང་སྒྲོགས་པ་དང་ཏིང་ངེ་འཛིན་གསལ་བར་བསྒོམས་པ་དང་། མཆོད་སྦྱིན་གྱི་གཏོར་མ་འདི་བསྔོས་པས། ཚེ་འདས་ལས་པ་ཁྱོད་བྱོལ་སོང་གླེན་ལྐུགས་ཀྱི་སྡུག་བསྔལ་ཐམས་ཅད་དང་བྲལ་བར་གྱུར་ཅིག །ཧཱུྃ། ཚེ་འདས་རིགས་ཀྱི་བུ་ཁྱོད་ཀྱི། །བྱིང་རྨུགས་གཏི་མུག་རྣམ་སྨིན་གྱིས། །བྱོལ་སོང་གནས་སུ་སྐྱེས་པ་ན། །རང་གསལ་ཡེ་ཤེས་གོ་གྱོན་ལ། །ལྷ་དང་བླ་མ་དྲན་གྱིས་ལ། །དཀྱིལ་འཁོར་ལྷ་ལ་མཆོད་པ་ཕུལ། །པུཥྤེ་ལ་སོགས་དབུལ། ཧཱུྃ། འདི་ནི་ཤེས་རབ་རང་བཞིན་ཆུ། །ཤེས་རབ་ཆུ་ཡིས་ལེགས་བཀྲུས་པས། །གཏི་མུག་དྲི་མ་དག་གྱུར་ནས། །ཆོས་དབྱིངས་ཡེ་ཤེས་དོན་རྟོགས་ཤོག །ས་འདི་བཅད་པ་མན་ཆད་ནི། །དུད་འགྲོ་ཁམས་ཀྱི་ས་ཡིན་པས། །བུདྡྷ་ཐོད་ཕྲེང་བྱིན་རླབས་ཀྱིས། །བཀོལ་སྤྱོད་སྡུག་བསྔལ་ཞི་གྱུར་ནས། །བྱོལ་སོང་སྐྱེ་སྒོ་ཆོད་པར་ཤོག །ༀ་བུདྡྷ་གུ་རུ་མ་ཐ་མ་ཐ་ཏིརྻ་ཀ་ག་ཏེ་ཧེ་ཏུཾ་ཧཱུྃ་ཕཊ། ན་མོ། ཚེ་ལས་འདས་པ་ཆེ་གེ་མོ་ཁྱོད་ཉོན་ཅིག །ཁྱོད་ཀྱིས་ཉོན་མོངས་ལེ་ལོ་རང་དགའ་མར་སྤྱད་པའི་དབང་གིས། ཕམ་ལྟུང་ལྷའི་གནས་སུ་སྐྱེས་སམ་སྐྱེའམ་སྐྱེ་བར་འགྱུར་བའི་ལས་ཅན་ཅིག་ཡིན་ནའང་། བདག་གིས་འཕགས་པ་མཆོད་པ་དང་ཕྱག་དང་མཆོད་པ་ལ་བརྩོན་པར་བྱས་པ་དང་། མཆོད་སྦྱིན་གྱི་གཏོར་མ་འདི་བསྔོས་པས། ཚེ་ལས་འདས་པ་ཁྱོད་ལྷ་ཕམ་ལྟུང་གི་སྡུག་བསྔལ་ཐམས་ཅད་དང་བྲལ་བར་གྱུར་ཅིག །ཧཱུྃ། ཚེ་འདས་རིགས་ཀྱི་བུ་ཁྱོད་ཀྱི། །ལེ་ལོ་ལས་ཀྱི་རྣམ་སྨིན་གྱིས། །ལྷ་ཡི་གནས་སུ་སྐྱེས་(༥༤)པ་ན། །བརྩོན་འགྲུས་དྲག་པོའི་གྱོན་ལ། །ལྷ་དང་བླ་མ་དྲན་གྱིས་ལ། །དཀྱིལ་འཁོར་ལྷ་ལ་མཆོད་པ་ཕུལ། །པུཥྤེ་སོགས། ཧཱུྃ། འདི་ནི་བརྩོན་འགྲུས་རང་བཞིན་ཆུ། །བརྩོན་འགྲུས་ཆུ་ཡི་ལེགས་བཀྲུས་པས། །ལེ་ལོའི་དྲི་མ་དག་གྱུར་ནས། །ལྷུན་གྲུབ་ཡེ་ཤེས་དོན་རྟོགས་ཤོག །ས་འདི་བཅད་པ་མན་ཆད་ནི། །སྙོམ་ལས་ལེ་ལོའི་ས་ཡིན་པས། །པདྨ་ཐོད་ཕྲེང་བྱིན་རླབས་ཀྱིས། །འཕོ་ལྷུང་སྡུག་བསྔལ་ཞི་གྱུར་ནས། །ལེ་ལོའི་སྐྱེ་སྒོ་ཆོད་པར་ཤོག །ༀ་པདྨ་མཧཱ་ཛྙཱ་ན་གུ་རུ་ཙྪིནྡ་ཙྪིནྡ་དེ་བ་ཧེ་ཏུཾ་ཧཱུྃ་ཕཊ། ན་མོ། ཚེ་ལས་འདས་པ་ཆེ་གེ་མོ་ཁྱོད་ཉོན་ཅིག །ཁྱོད་ཀྱི་ཉོན་མོངས་པ་ཕྲག་དོག་རང་དགའ་མར་སྤྱད་པའི་དབང་གིས། ལྷ་མ་ཡིན་འཐབ་རྩོད་ཀྱི་གནས་སུ་སྐྱེས་སམ་སྐྱེའམ་སྐྱེ་བར་འགྱུར་བའི་ལས་ཅན་དང་རིགས་ཅན་ཅིག་ཡིན་ནའང་། བདག་གིས་བཏང་སྙོམས་མཉམ་པ་ཉིད་ཕྱོགས་མེད་དུ་བསྒོམས་པ་དང་། མཆོད་སྦྱིན་གྱི་གཏོར་མ་འདི་བསྔོས་པས། ཚེ་ལས་འདས་པ་ཁྱོད་ལྷ་མ་ཡིན་འཐབ་རྩོད་ཀྱི་སྡུག་བསྔལ་ཐམས་ཅད་དང་བྲལ་བར་གྱུར་ཅིག །ཧཱུྃ། ཚེ་འདས་རིགས་ཀྱི་བུ་ཁྱོད་ཀྱི། །ཕྲག་དོག་འཐབ་རྩོད་རྣམ་སྨིན་གྱིས། །ལྷ་མིན་གནས་སུ་སྐྱེས་པ་ན། །བཏང་སྙོམས་ཆེན་པོའི་གོ་གྱོན་ལ། །ལྷ་དང་བླ་མ་དྲན་གྱིས་ལ། །དཀྱིལ་འཁོར་ལྷ་ལ་མཆོད་པ་ཕུལ། །པུཥྤེ་སོགས། ཧཱུྃ། འདི་ནི་བསམ་གཏན་རང་བཞིན་ཆུ། །བསམ་གཏན་ཆུ་ཡིས་ལེགས་བཀྲུས་པས། །ཁོང་ཁྲོའི་དྲི་མ་དག་གྱུར་ནས། །བྱ་གྲུབ་ཡེ་ཤེས་དོན་རྟོགས་ཤོག །ས་འདི་(༥༥)བཅད་པ་མན་ཆད་ནི། །ལྷ་མ་ཡིན་གྱི་གནས་ཡིན་པས། །ཀརྨ་ཐོད་ཕྲེང་བྱིན་རླབས་ཀྱིས། །འཐབ་རྩོད་སྡུག་བསྔལ་ཞི་གྱུར་ནས། །ལྷ་མིན་སྐྱེ་སྒོ་ཆོད་པར་ཤོག །ༀ་ཀརྨ་གུ་རུ་ཀླེ་ཤ་ཀླེ་ཤ་ཧེ་ཏུཾ་ཧཱུྃ་ཕཊ། ན་མོ། ཚེ་ལས་འདས་པ་ཆེ་གེ་མོ་ཁྱོད་ཉོན་ཅིག །ཁྱོད་ཀྱིས་ཉོན་མོངས་པ་འདོད་ཆགས་རང་དགའ་མར་སྤྱད་པའི་དབང་གིས། མཐའ་འཁོབ་ཀླ་ཀློ་མི་ལུས་ཙམ་པོའི་གནས་སུ་སྐྱེས་སམ་སྐྱེའམ་སྐྱེ་བར་འགྱུར་བའི་རིགས་ཅན་ཅིག་ཡིན་ནའང་། བདག་གིས་དཀྱིལ་འཁོར་ཟབ་མོ་སྒོམ་སྒྲུབ་བྱས་པ་དང་། གཟུངས་སྔགས་ཁྱད་པར་ཅན་བགྲང་བ་དང་། མཆོད་སྦྱིན་གཏོར་མ་འདི་བསྔོས་པས། ཚེ་ལས་འདས་པ་ཁྱོད་མི་སྐྱེ་རྒས་ན་འཆི་འཕོ་འགྱུར་གྱི་སྡུག་བསྔལ་ཐམས་ཅད་དང་བྲལ་བར་གྱུར་ཅིག །ཧཱུྃ། ཚེ་འདས་རིགས་ཀྱི་བུ་ཁྱོད་ཀྱི། །འདོད་སྲེད་ཞེན་པའི་རྣམ་སྨིན་གྱིས། །མཐའ་འཁོར་ཀླ་ཀློར་སྐྱེས་པ་ན། །ལྷ་དང་བླ་མ་དྲན་གྱིས་ལ། །མི་དགེ་སྤོང་བའི་གོ་གྱོན་ལ། །དཀྱིལ་འཁོར་ལྷ་ལ་མཆོད་པ་ཕུལ། །པུཥྤེ་སོགས། ཧཱུྃ། འདི་ནི་ཚུལ་ཁྲིམས་རང་བཞིན་ཆུ། །ཚུལ་ཁྲིམས་ཆུ་ཡིས་ལེགས་བཀྲུས་པས། །འཆལ་བའི་དྲི་མ་དག་གྱུར་ཅིག །སོར་རྟོག་ཡེ་ཤེས་དོན་རྟོགས་ཤོག །ས་འདི་བཅད་པ་མན་ཆད་ནི། །མི་ལུས་ཙམ་པོའི་གནས་ཡིན་པས། །ཟིལ་གནོན་པདྨའི་བྱིན་རླབས་ཀྱིས། །སྐྱེ་འཆིའི་སྡུག་བསྔལ་ཞི་གྱུར་ནས། །ཀླ་ཀློའི་སྐྱེ་སྒོ་ཆོད་པར་ཤོག །ༀ་པདྨ་གུ་རུ་ཙྪིནྡ་ཙྪིནྡ་ཧེ་ཏུཾ་ཧཱུྃ་ཕཊ། ས་འདི་བཅད་པ་ཚུན་ཆད་ནི། །ཐོད་ཕྲེང་རིགས་ལྔའི་ཞིང་ཁམས་ཡིན། །ས་འདི་བཅད་པ་ཚུན་ཆད་ནི། །ཡུམ་ཆེན་ལྔ་ཡི་དཀྱིལ་འཁོར་ཡིན། །ས་འདི་བཅད་པ་ཚུན་ཆད་ནི། །པདྨ་འོད་ཀྱི་གཞལ་ཡས་ཡིན། །འོག་མིན་དག་པའི་ཞིང་ཁམས་ཡིན། །བདེ་བ་ཆེན་པོའི་གནས་མཆོག་ཡིན། །ཆོས་ཉིད་དག་པའི་ཞིང་ཁམས་ཡིན། །བུམ་པ་སྐུ་ཡི་ཞིང་ཁམས་ཡིན། །མ་ཡེངས་བདེ་བར་གནས་པར་གྱིས། །ཞེས་བརྗོད་ནས། ཡུངས་ཀར་དང་ཕྱེ་མས་མིང་བྱང་བྲབ་བོ། །དེ་ནས་ལྷ་ཚོགས་ལ་མཆོད་བསྟོད་བྱ་ཞིང་གཏོར་མ་འབུལ་ལོ། །

དེ་ནས་ཚེ་འདས་དཀྱིལ་འཁོར་དུ་འཇུག་པ་དང་དབང་བསྐུར་བ་གཉིས་ལས། དང་པོ་ནི། བླ་མ་རྡོ་རྗེ་འཛིན་པ་ཆེན་པོ་ནི། །འཁོར་གསུམ་འཁོར་བའི་གཉེན་གཅིག་པུ། །ལ་སོགས་པའི་གསོལ་བ་འདེབས་ལན་གསུམ་བྱའོ། །གཉིས་པ་དབང་བསྐུར་བ་ནི། བུམ་པ་སྔར་བཞིན་བསྐྱེད་ནས། ལྷ་རྣམས་ཀྱི་སྤྱི་བོའི་ༀ་དཀར་པོ་ལས་འོད་ཟེར་དཀར་པོ་བྱུང་བས། སློབ་བུའི་སྤྱི་བོར་ཕོག །ལུས་ཀྱི་སྡིག་གྲིབ་ཐམས་ཅད་དག་སྐུའི་དངོས་གྲུབ་ཐོབ་པར་བསམ། དེ་བཞིན་དུ། མགྲིན་པའི་ཨཱཿལས་འོད་ཟེར་དམར་པོ་བྱུང་། སློབ་བུའི་མགྲིན་པར་ཕོག །ངག་གི་སྡིག་སྒྲིབ་དག །གསུང་གི་དངོས་གྲུབ་ཐོབ། ཐུགས་ཀའི་ཧཱུྃ་ལས་འོད་ཟེར་(༥༦)སྔོན་པོ་བྱུང་། སློབ་བུའི་སྙིང་གར་ཕོག །ཡིད་ཀྱི་སྡིག་སྒྲིབ་དག །ཐུགས་ཀྱི་དངོས་གྲུབ་ཐོབ་པར་བསམས་ལ། ཨེ་མ། ངོ་མཚར་རྨད་དུ་བྱུང་བའི་དབང་། །བླ་མ་ལྷ་དང་དབྱེར་མེད་ཅིང་། །མཁའ་འགྲོས་བྱིན་གྱིས་རློབ་པའི་ཕྱིར། །སྐུ་གསུམ་བུམ་པའི་དབང་བསྐུར་བས། །རྩ་བ་གསུམ་གྱིས་བྱིན་བརླབས་ནས། །སྐལ་ལྡན་རིགས་ཀྱི་བུ་ཁྱོད་ལ། །སྐུ་གསུང་ཐུགས་ཀྱི་དབང་བསྐུར་བས། །སྒོ་གསུམ་སྒྲིབ་པ་བྱང་གྱུར་ནས། །སྐུ་གསུམ་མི་འགྱུར་དབང་ཐོབ་ཤོག །ༀ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ༀ་ༀ་ༀ་ཨཱཿཨཱཿཨཱཿཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། སློབ་དཔོན་རྡོ་རྗེ་འཆང་ཡབ་ཡུམ་དུ་བསྒོམས་ལ་དབང་བསྐུར། ཅེས་སོ། །

བཞི་པ་རིག་པ་རྩལ་གྱི་དབང་ནི། སློབ་དཔོན་གྱིས་འདི་སྐད་ཅེས་ངོ་སྤྲད་དོ། །ཨེ་མ་ཧོ། ཕུང་པོ་ཡབ་ཡིན་ཁམས་རྣམས་ཡུམ་ཡིན་ནོ། །སྐྱེ་མཆེད་དབྱེར་མེད་སེམས་དཔའ་སེམས་མའི་ཚོགས། །བདག་གཞན་དབྱེར་མེད་འགྲོ་ཀུན་ལྷ་ཡི་ཚོགས། །ས་རྡོ་མི་དམིགས་རྩི་ཤིང་ནགས་ཚལ་ལྷ། །འབྱུང་བའི་སྒྲ་སྐད་གྲགས་སྟོང་བཟླས་པའི་སྔགས། །མདོར་ན་ལྷ་ཡིན་ལྷ་མིན་གཅིག་ཀྱང་མེད། །དག་དང་མ་དག་མེད་པར་བསྒོམ་པར་གྱིས། །དེ་ཡང་། ཕུང་པོ་ལྔ་ནི་རྒྱལ་བ་ཡབ་ལྔ་སྟེ། གཟུགས་ཀྱི་ཕུང་པོ་རྣམ་པར་སྣང་མཛད། ཚོར་བའི་ཕུང་པོ་རིན་ཆེན་འབྱུང་ལྡན། རྣམ་ཤེས་ཀྱི་ཕུང་པོ་མི་བསྐྱོད་པ། འདུ་ཤེས་ཀྱི་ཕུང་པོ་འོད་དཔག་མེད། འདུ་བྱེད་ཀྱི་ཕུང་པོ་དོན་ཡོད་གྲུབ་པར་ཡེ་ནས་སངས་རྒྱས་པ་ཡིན་ལ། འབྱུང་བའི་ཁམས་རྣམ་པ་ལྔ་ལ། ས་ཡུམ་སངས་རྒྱས་སྤྱན་མ། ཆུ་མཱ་མ་ཀི། མེ་གོས་དཀར་མོ། རླུང་དམ་ཚིག་སྒྲོལ་མ། ནམ་མཁའ་དབྱིངས་ཀྱི་དབང་ཕྱུག་མར་གདོད་ནས་ལྷུན་གྱིས་གྲུབ་པའི་ངོ་བོ་ཡིན་ནོ། །འཁོར་འདས་ཡེ་གྲོལ་ཅོག་གཞག་གཉུག་མའི་དབང་འདི་སྐད་དུ་ངོ་སྤྲད་དོ། །ཨེ་མ་ཧོ། སྐལ་ལྡན་རིགས་ཀྱི་བུ། ལུས་ངག་སྒྲིབ་སྦྱོང་ཟབ་མོའི་དབང་བསྐུར་བས། །མ་བཅོས་དབང་མཆོག་བདེ་བ་ཆེན་པོ་ཐོབ། །བཟང་རྟོག་ལྷར་འཛིན་ངན་རྟོག་འདྲེ་རུ་འཛིན། །བདག་དང་གཞན་དུ་འཛིན་པའི་རྣམ་རྟོག་དེ། །དང་པོ་གར་སྐྱེས་ད་ལྟ་གང་ན་གནས། །ལུས་ཀྱི་ཤའམ་པགས་པ་གང་ན་གནས། །དབྱིབས་དང་ཁ་དོག་རྣམ་པ་ཇི་ལྟ་བུ། །ཐ་མ་གར་འགྲོ་རྫོགས་མཐའ་ཇི་ལྟར་འདུག །ལྟོས་དང་བལྟས་པས་སེམས་དེ་མཐོང་བ་མེད། །བཟུང་ཡང་སེམས་དེ་སུས་ཀྱང་ཟིན་པ་མེད། །བསྒྲུབས་ཀྱང་སེམས་ཀྱི་བྱ་བ་ཐམས་ཅད་འཇིག །དེས་ན་མ་ཡེངས་རང་བཞིན་འཇོག་པ་གཅེས། །ལྟ་སྒོམ་དབང་དུ་འཛིན་པར་བྱེད་པ་དེ། །རྟོག་པའི་འཁོར་ལོ་དྲྭ་ཕྱེད་འབྲེལ་བ་ཡིན། །སེམས་ལ་བྱར་མེད་འབད་རྩོལ་མེད་པར་ཞོག །རྟོག་པ་མི་འགེགས་ཆེད་འཛིན་མེད་པར་ཞོག །ཧད་དེ་ཕྱང་ངེ་སལ་ལེ་ཧྲིག་གེ་ཞོག །ཡིད་ལ་མ་བྱེད་མཉམ་པ་ཉིད་ལ་ཞོག །ཆོས་སྐུ་ཉག་གཅིག་འཁོར་འདས་དབྱེ་(༥༧)བ་མེད། །ཇི་ལྟར་འདུག་པ་དེ་ལྟར་ངང་ལ་ཞོག །ཅེས་བརྗོད་དོ། །

དེ་ནས་ཟས་གཏད་བྱ་བ་ནི། ཤ་ཉེ་བའི་ཟས་དང་། སྐོམ་དང་། ནོར་དང་། གོས་རྒྱན་ལ་སོགས་པ་མིང་བྱང་གི་མདུན་དུ་བཞག་ལ། སྔགས་དྲུག་ཕྱག་རྒྱ་དྲུག་གིས་འདོད་པའི་ཡོན་ཏན་ལྔར་བྱིན་གྱིས་བརླབས་ནས། ཧཱུྃ། འདི་ནི་སྦྱིན་པའི་རང་བཞིན་ཟས། །དབུལ་ཕོང་སེར་སྣ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །ཧཱུྃ། འདི་ནི་ཚུལ་ཁྲིམས་རང་བཞིན་ཟས། །དབུལ་ཕོངས་འཆལ་པ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །ཧཱུྃ། འདི་ནི་བཟོད་པའི་རང་བཞིན་ཟས། །དབུལ་ཕོངས་ཁོང་ཁྲོ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །ཧཱུྃ། འདི་ནི་བརྩོན་འགྲུས་རང་བཞིན་ཟས། །དབུལ་ཕོངས་ལེ་ལོ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །ཧཱུྃ། འདི་ནི་བསམ་གཏན་རང་བཞིན་ཟས། །དབུལ་ཕོངས་གཡེང་བ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །ཧཱུྃ། འདི་ནི་ཤེས་རབ་རང་བཞིན་ཟས། །དབུལ་ཕོངས་རྨོངས་པ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱིས་ཟས་སུ་ཤོག །ཧཱུྃ། འདི་ནི་འདོད་ཡོན་ལྔ་ལྡན་ཟས། །དབུལ་ཕོངས་བཀྲེས་སྐོམ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །ཧཱུྃ། འདི་ནི་འདོད་ཡོན་ལྔ་ལྡན་ཟས། །དབུལ་ཕོངས་བཀྲེས་སྐོམ་ཐམས་ཅད་འཇོམས། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །དཔག་བསམ་ཤིང་དང་འདོད་འཇོའི་བ། །ཡིད་བཞིན་ནོར་དང་བུམ་པ་བཟང་། །རིན་ཆེན་མཛོད་དང་ནོར་བུའི་གཏེར། །བཀྲ་ཤིས་རྫས་བརྒྱད་རིན་ཆེན་གཏེར། །ལྷ་དང་མི་ཡི་ལོངས་སྤྱོད་ཀུན། །ཚེ་འདས་ཁྱོད་ལ་བསྔོས་པ་ཡིས། །བསྐལ་པ་ཡུན་གྱི་ཟས་སུ་ཤོག །ཟག་མེད་བདེ་བ་རྒྱས་པ་དང་། །ལྷ་ཡི་རྒྱན་གྱིས་མཛེས་པ་དང་། །མཚན་དཔེའི་འབྱོར་པ་རབ་རྒྱས་ཤིང་། །ཚེ་འདས་ཡུན་དུ་བདེ་བར་ཤོག །ཅེས་པའམ། ཚེ་འདས་ཀྱི་དོན་དུ་ཕུད་གཏོར་མ་ལ་འབུལ། མགྲོན་བཞི་ལ་གཏོར་མ་ཁྱབ་པར་བསྔོས་ལ་ཐམས་ཅད་ཚོགས་སུ་ལོངས་སྤྱད་དོ། །

དེ་ནས་དཀྱིལ་འཁོར་ལྷ་ལ་མཆོད་བསྟོད་འབུལ། ཚེ་འདས་འོག་མིན་བདེ་བ་ཅན་དུ་ལམ་བསྟན་པར་བྱ་སྟེ། ཧཱུྃ། ཉོན་ཅིག་ཚེ་འདས་རིགས་ཀྱི་བུ། འདུས་བྱས་ཀྱི་ཆོས་ཐམས་ཅད་མི་རྟག་པ་ཡིན་ཏེ། ཕུང་པོ་གཡར་པོ་ཡིན་པས་ལིངས་ཏེ་བསྐྱུར་བ་ཡིན། ཐིབས་ཏེ་འགགས་པ་རྣམ་རྟོག་ཡིན། ཧྲིག་གེ་བ་དེ་རིག་པ་ཡིན། ལྷག་གེ་ཤར་བ་ཡེ་ཤེས་ཡིན་པས་ཤར་བ་ཡིན། ཕྱམས་ཏེ་ཕྱུང་བ་ཆོས་ཉིད་ཡིན་པ་སྟེ། རང་སྣང་རིག་པའི་སྣང་བར་ཤེས་པར་གྱིས་ལ་ཉོན་ཅིག །ཅེས་འདི་སྐད་དོ། །ཧཱུྃ། ཉོན་ཅིག་ཚེ་འདས་རིགས་ཀྱི་བུ། །ཁྱོད་ཀྱི་ཉོན་མོངས་(༥༨)སྡིག་སྒྲིབ་ཀུན། །བླ་མ་ཡི་དམ་ཐུགས་རྗེས་སྦྱངས། །ཐུགས་རྗེ་ཐབས་མཁས་སློབ་དཔོན་ངས། །ལས་སྐལ་ལྡན་པའི་ཚེ་འདས་ཁྱོད། །བྱང་ཆུབ་ཞིང་དུ་ལམ་བསྟན་གྱིས། །མ་ཡེངས་དྲན་པའི་སེམས་ཀྱིས་ཟུངས། །ཕར་ཕྱིན་ཤེས་རབ་ཡུམ་གྱི་གཞུ། །སྦྱོར་བ་ཐབས་མཆོག་ཡབ་ཀྱི་མདའ། །གཉིས་མེད་བྱང་ཆུབ་སེམས་ཀྱིས་སྦྲེལ། །ཐབས་ཤེས་བྱང་ཆུབ་མཐེབ་སྦྱར་ནས། །ཆོས་དབྱིངས་ཐུགས་རྗེའི་མདེལ་རྩེ་ལ། །ཚེ་འདས་རྣམ་ཤེས་བླང་བྱས་ཏེ། །འོག་མིན་བདེ་ཆེན་ཞིང་ཁམས་ན། །ཟིལ་གནོན་པདྨ་ཡབ་ཡུམ་བཞུགས། །གཉིས་མེས་སྦྱོར་བའི་མཁའ་དབྱིངས་སུ། །རང་རིག་ཡེ་ཤེས་ཤུགས་ཀྱིས་འཕང་། །ལྷ་དང་བླ་མའི་ཐུགས་རྗེ་ཡིས། །ལམ་ལྔ་ས་བཅུ་སྐད་ཅིག་ལ། །མདའ་འཕངས་བཞིན་དུ་བསྒྲོད་པར་འགྱུར། །སྐྱེ་འཆི་མེད་པ་ཡུམ་གྱི་མཁའ། །འཕོ་འགྱུར་མེད་པ་ཡབ་ཀྱི་ཀློང་། །མཁའ་ཀློང་རྣམ་དག་ཆོས་ཀྱི་དབྱིངས། །ཡེ་ཤེས་ཕོ་བྲང་ཉམས་དགའ་བར། །རིགས་ཀྱི་བུ་ཁྱོད་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །ཡེ་ཤེས་གཞལ་ཡས་ཞིང་ཁམས་ན། །འདོད་སྲེད་ཞེན་པ་གནས་གྱུར་པའི། །དམ་ཅན་རྒྱ་མཚོ་དཔག་མེད་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །ཡེ་ཤེས་གཞལ་ཡས་སྒོ་བཞི་ན། །རྟག་ཆད་མུ་བཞི་གནས་གྱུར་པའི། །ཡེ་ཤེས་སྒོ་མ་བཞི་པོ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །གཞལ་ཡས་ཕྱོགས་བཞིའི་བར་ཁྱམས་ལ། །ཡུལ་བཞི་ཚོགས་ཡུལ་གནས་གྱུར་པའི། །རིགས་བཞི་དཔའ་བོ་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །གཞལ་ཡས་ཁང་གི་གྲུ་ཆད་ལ། །དུས་བཞི་ཡུལ་སྣང་གནས་གྱུར་པའི། །ཡེ་ཤེས་གིང་ཆེན་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །སྣ་ཚོགས་པད་སྐོར་ཕྱི་མ་ལ། །ཚོགས་ཡུལ་ཞེན་པ་གནས་གྱུར་པའི། །རིག་འཛིན་ཡབ་ཡུམ་བཅུ་དྲུག་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །པདྨ་འདབ་བརྒྱད་ཟེའུ་འབྲུ་ལ། །ཚོགས་ཡུལ་བརྒྱད་པོ་གནས་གྱུར་པའི། །པདྨ་མཚན་བརྒྱད་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །

མ་ཆགས་མ་འཁོར་མྱུར་དུ་གཤེགས། །ཤར་ཕྱོགས་འཁོར་ལོའི་རྩིབས་སྟེང་ན། །ཞེ་སྡང་ཉོན་མོངས་གནས་གྱུར་པའི། །རྡོ་རྗེ་ཐོད་ཕྲེང་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །ལྷོ་ཕྱོགས་འཁོར་ལོའི་རྩིབས་སྟེང་ན། །ང་རྒྱལ་ཉོན་མོངས་གནས་གྱུར་པའི། །རཏྣ་ཐོད་ཕྲེང་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །ནུབ་ཕྱོགས་འཁོར་ལོའི་རྩིབས་སྟེང་ན། །འདོད་ཆགས་ཉོན་མོངས་གནས་གྱུར་པའི། །པདྨ་ཐོད་ཕྲེང་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །བྱང་ཕྱོགས་འཁོར་ལོའི་རྩིབས་སྟེང་ན། །ཕྲག་དོག་ཉོན་མོངས་གནས་གྱུར་པའི། །(༥༩)ཀརྨ་ཐོད་ཕྲེང་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །དཀྱིལ་འཁོར་དབུས་ཀྱི་ལྟེ་བ་ལ། །གཏི་མུག་ཉོན་མོངས་གནས་གྱུར་པའི། །ཟིལ་གནོན་པདྨ་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །དབྱིངས་དང་རིག་པ་དབྱེར་མེད་པའི། །འབྱུང་བའི་ཁམས་ལྔ་གནས་གྱུར་པའི། །ཡེ་ཤེས་མཁའ་འགྲོ་ཡུམ་ལྔ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །ཟིལ་གནོན་པདྨའི་ཐུགས་ཀ་ནས། །ཡིད་དང་ཡིད་ཆོས་རྣམ་དག་པའི། །ཡེ་ཤེས་སེམས་དཔའ་ཡབ་ཡུམ་བཞུགས། །ཚེ་འདས་དེ་རུ་ལམ་བསྟན་གྱིས། །མ་ཆགས་མ་འཁོར་མྱུར་དུ་གཤེགས། །ཡེ་ཤེས་བླ་མའི་ཐུགས་ཀ་ནས། །སྐུ་གསུམ་འདུས་པའི་ཡི་གེ་ཧཱུྃ། །དམར་ལ་གསལ་བའི་མདངས་དང་བཅས། །འོད་ཟེར་མུ་མེད་འཕྲོ་བ་དེར། །ཚེ་ལས་འདས་པའི་རྣམ་པར་ཤེས། །བླ་མའི་ཐུགས་ཀའི་ཧཱུྃ་དང་འདྲེས། །གཉིས་མེད་ཆོས་སྐུར་སངས་རྒྱས་སོ། །ཞེས་ཚེ་འདས་ཀྱི་རྣམ་ཤེས་བླ་མའི་ཐུགས་ཀའི་ཧཱུྃ་དང་གཉིས་སུ་མེད་པར་བསམ་མོ། །

མར་མེ་ཤིན་ཏུ་གསལ་བ་ལ་མིང་བྱང་བསྲེག་པ་ནི། ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ཌཱ་ཀི་ནཱི་ཧཱུྃ། ཧཱུྃ། ཆོས་ཀྱི་དབྱིངས་ཀྱི་ཀོང་བུ་རུ། །བྱང་ཆུབ་སེམས་ཀྱི་མར་ཁུས་གཏམས། །རང་རིག་རྟོགས་པའི་རས་སྡོང་ལ། །ཤེས་རབ་ཡེ་ཤེས་མེ་སྤར་ཏེ། །ཚེ་འདས་ཉོན་མོངས་མ་ལུས་བསྲེག །མེ་ནི་ཞི་གནས་རང་བཞིན་མེ། །མེ་འདི་ཆོས་སྐུ་ཉག་གཅིག་མེ། །མེ་འདི་ཡེ་ཤེས་འོད་གསལ་མེ། །མེ་འདི་སྐྱེ་བ་མེད་པའི་མེ། །མེ་འདི་གནས་པ་མེད་པའི་མེ། །མེ་འདི་འགག་པ་མེད་པའི་མེ། །མེ་འོད་དོར་བ་མེད་པའི་མེ། །མེ་འདི་སྤངས་པ་མེད་པའི་མེ། །མེ་འདི་སྨོན་པ་མེད་པའི་མེ། །མེ་འདི་མཚན་མ་མེད་པའི་མེ། །མེ་འདི་རྡོ་རྗེ་ཐོད་ཕྲེང་མེ། །མེ་འདི་རཏྣ་ཐོད་ཕྲེང་མེ། །མེ་འདི་པདྨ་ཐོད་ཕྲེང་མེ། །མེ་འདི་ཀརྨ་ཐོད་ཕྲེང་མེ། །མེ་འདི་ཟིལ་གནོན་ཐོད་ཕྲེང་མེ། །མེ་འདི་མེ་ལོང་ཡེ་ཤེས་མེ། །མེ་འདི་མཉམ་ཉིད༴། །མེ་འདི་སོར་རྟོག༴། །མེ་འདི་བྱ་གྲུབ༴། །མེ་འདི་ཆོས་དབྱིངས༴། །མེ་འདི་རང་བྱུང་ཡེ༴། །མེ་འདི་སྐྱེ་ཤི་མེད་པའི་མེ། །མེ་འདི་མཉམ་ཉིད་ལྷུག་པའི་མེ། །བདག་འཛིན་རྟོག་པའི་ཕུང་པོ་བསྲེག །ཐམས་ཅད་ཆོས་དབྱིངས་བྷ་ག་ལས། །ཕྱག་རྒྱ་རྣམ་པ་གང་ཡང་མེད། །དེ་ཉིད་བྷ་གའི་རང་བཞིན་ནོ། །ཀུན་གཞི་སེམས་ཀྱི་རང་བཞིན་ལས། །ཡིད་ལ་རྣམ་རྟོག་གང་ཤར་ཡང་། །དེ་ཉིད་རང་ཞི་རང་གྲོལ་ལོ། །དེ་ལ་སྐྱེ་ཤི་གང་ཡང་མེད། །དེ་ལ་འཕོ་འགྱུར་ག་ལ་སྲིད། །དེ་ལ་སྤང་ཐོབ་གཉིས་མི་སྲིད། །དེ་ལ་རེ་དོགས་གཉིས་མི་སྲིད། །བྱ་རྩོལ་མེད་པར་ཡེ་སངས་རྒྱས། །འབད་རྩོལ་མེད་པར་ལྷུན་གྱིས་གྲུབ། །རང་བྱུང་ཡེ་ཤེས་ཆེན་པོ་དེ། །ཚེ་འདས་ཁྱོད་ལ་འདིར་སྣང་ངོ་། །ཞེས་སྙིང་པོ་བརྗོད་ཅིང་མིང་བྱང་བསྲེག་གོ། །

དེ་ནས་མེ་ཏོག་གཏོར་ཞིང་སྨོན་ལམ་(༦༠)བརྗོད། ཧོཿ ཚེ་འདས་རིགས་ཀྱི་བུ་ཁྱོད་ལ། །བྱང་ཆུབ་བརྟན་པ་མ་ཐོབ་པར། །དུས་གསུམ་སངས་རྒྱས་ཐམས་ཅད་དང་། །རྒྱུན་དུ་མི་འབྲལ་འགྲོགས་པར་ཤོག །བླ་མ་རྣམས་ཀྱི་བྱིན་རླབས་དང་། །ཡི་དམ་ལྷ་ཡི་ཐུགས་རྗེ་དང་། །མཁའ་འགྲོ་རྣམས་ཀྱི་མཐུ་རྩལ་གྱིས། །རྒྱུན་མི་འཆད་པར་བྱིན་རློབས་ཤིག །རིག་པའི་དོན་ལ་སྐྱེ་ཤི་མེད། །མ་སྐྱེས་པ་ཡི་ཚུལ་གྱིས་ནི། །སྐྱེ་བ་ཕྱིས་མི་ལེན་པ་དང་། །འཕོ་འགྱུར་མེད་པའི་སྐུ་ཐོབ་ཤོག །ས་ལམ་བར་ཆད་ཀུན་གྲོལ་ནས། །སངས་རྒྱས་ཞིང་ཁམས་ཉམས་དགའ་བར། །སྣོད་ལྡན་དག་པའི་འཁོར་གྱིས་བསྐོར། །ཐེག་ཆེན་ཆོས་ལ་སྤྱོད་པར་ཤོག །སྐྱེ་བ་གཞན་དུ་སོང་གྱུར་ན། །ཟབ་རྒུའི་ཆོས་དང་འཕྲད་ནས་སུ། །ངན་སོང་འཁོར་བ་དོང་སྤྲུགས་ཏེ། །ཀུན་གྱི་འདྲེན་པའི་དཔལ་དུ་ཤོག །སེམས་ཉིད་མཐའ་དབུས་མེད་པས་ན། །མ་སྐྱེས་པ་ཡི་ཚུལ་གྱིས་ནི། །སྐྱེ་བ་ཕྱིར་མི་ལེན་པ་དང་། །ཆོས་སྐུ་རྒྱལ་མཆོག་ཐོབ་པར་ཤོག །ༀ་ཨཱཿཧཱུྃ་གུ་རུ་པདྨ་ཐོད་ཕྲེང་རྩལ་ཧྲཱིཿམཧཱ་རི་ནི་ས་ར་ཙ་ཧྲི་ཡ་ལས་དང་ཉོན་མོངས་པ་ཤཱིནྟཾ་ཀུ་རུ་ཧཱུྃ་ཕཊ། དེ་ནས་མིང་བྱང་བསྲེགས་པའི་ཐལ་བ་དང་འཇིམ་པ་བསྲེས་ལ། སཱཙྪ་གདབ། མེ་ཏོག་གཏོར་ལ་ས་གཙང་ས་རུ་བཞུགས་སུ་གསོལ། གཏང་རག་མཆོད་གཏོར་བཟང་དུ་འབུལ་ལོ། །

དེ་ནས་མཇུག་གི་ཆོ་ག་ཕྲིན་སྒྲུབ་བཞིན་དུ་ཤེས་པར་བྱའོ། །ཕྲིན་སྒྲུབ་ཀྱི་བུ་ཡིག་ཐུགས་རྗེའི་ལྕགས་ཀྱུ་ཞེས་བྱ་བ། དྲི་མེད་འོད་ཟེར་གྱིས་མཆིམས་ཕུ་དགེ་གོང་གནས་སུ་བཀོད་པ་རྫོགས་སོ།། །།དགེའོ། །དགེའོ། །དགེའོ།། །།

རྒྱལ་བ་ཞི་ཁྲོའི་སྒྲུབ་དཀྱིལ་རིན་པོ་ཆེའི་གཏེར་མཛོད་ཅེས་བྱ་བ།

༄༅། །རྒྱབ་བ་ཞི་ཁྲོ་རབ་འབྱམས་ཀྱི་སྒྲུབ་དཀྱིལ་ཞེས་བྱ་བ་བཞུགས་སོ། །

༄༅། །རྒྱལ་བ་རྒྱ་མཚོའི་ཚོགས་ལ་ཕྱག་འཚལ་ལོ། །དངོས་གྲུབ་མཆོག་སྩོལ་ཡི་དམ་ལྷར། །དང་པོ་ཉིད་དུ་ཕྱག་འཚལ་ཏེ། །རང་གཞན་དོན་གཉིས་བསྒྲུབ་བྱའི་ཕྱིར། །རྒྱལ་བ་ཞི་ཁྲོའི་སྒྲུབ་དཀྱིལ་བྲི། །

དབེན་ཞིང་ཡིད་དུ་འོང་བའི་གནས་སུ་མཎྜལ་སྒྲུབ་རྫས་ཕྱི་ནང་གི་མཆོད་གཏོར་རྣམས་ཕྱག་བཞེས་ལྟར་ལེགས་པར་བཤམ། སྔོན་འགྲོ་བགེགས་གཏོར་བཏང་ལ་སྐྱབས་སུ་འགྲོ་བ་ནི། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་ཀུན་གུས་པས་སྐྱབས་སུ་མཆི། །ཞེས་བརྒྱའམ་ཉེར་གཅིག །

སེམས་བསྐྱེད་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །(༢)ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ལན་བདུན་ནམ་ལྔ།

བཀའ་བསྒོ་བ་ནི། ཧཱུྃ། ཆོས་རྣམས་རྣམ་དག་ནམ་མཁའ་ལྟ་བུ་ལ། །རིག་པའི་ངོ་བོ་ཡི་གེ་ཧཱུྃ་དུ་ཤར། །ཧཱུྃ་ལས་འོད་འཕྲོས་ཐམས་ཅད་སངས་རྒྱས་ཞིང་། །མཉམ་རྫོགས་བྱང་ཆུབ་སེམས་ཀྱི་རང་བཞིན་ལས། །རང་ཉིད་དཔལ་ཆེན་ཆེ་མཆོག་ཧེ་རུ་ཀ །ཞལ་གསུམ་ཕྱག་དྲུག་ཞབས་བཞི་དོར་སྟབས་བགྲད། །འཁོར་ལོ་མདའ་ཆེན་གཏུན་ཤིང་ཏྲི་ཤུ་ལ། །ཏི་ར་བམ་དབྱུག་རྔེའུ་ཆུང་སྒྲོག་པའི་ཚུལ། །ༀ་བཛྲ་རཀྵ་རཀྵ་ཧཱུྃ་ཕཊ། ཧཱུྃ། ཡང་དག་གསང་བའི་དཀྱིལ་འཁོར་འདིར། །འདུ་བའི་ལྷ་རྣམས་མ་གཏོགས་པ། །དངོས་གྲུབ་བར་ཆད་བྱེད་པའི་བགེགས། །འདི་རུ་མ་འདུག་གཞན་དུ་དེངས། །ཅི་སྟེ་འགྲོ་བར་མི་བྱེད་ན། །མགོ་ཡང་ཚལ་པ་བརྒྱར་འགས་ཤིང་། །ལུས་ཀྱང་དུམ་བུ་སྟོང་དུ་གཏུབ། །རྡུལ་ཆ་ཙམ་ཡང་མེད་པར་བྱེད། །ༀ་སུམྦྷ་ནི་སུམྦྷ་ཧཱུྃ། གྲ྇ཎ་གྲ྇ཎ་ཧཱུྃ། གྲ྇ཧྞ་པ་ཡ་གྲ྇ཧྞ་པ་ཡ་ཧཱུྃ། ཨ་ན་ཡ་ཧོཿ བྷ་ག་ཝཱན་བིདྱཱ་རཱ་ཛ་ཡ་ཧཱུྃ་ཕཊ།

མཚམས་གཅོད་ནི། ཧཱུྃ། ང་ནི་ཁྲོ་རྒྱལ་འདུས་པའི་སྐུ། །དཔལ་ཆེན་བདུད་འདུལ་རྡོ་རྗེ་འཆང་། །སངས་རྒྱས་ཀུན་གྱིས་དབང་བསྐུར་ནས། །གདུག་པ་འདུལ་བར་རབ་བསྔགས་པའི། །མེ་རི་མཚོན་ཆ་རྡོ་རྗེའི་རྭ། །ཁྲོ་ཚོགས་འབར་བས་མཚམས་བཅད་དོ། །རྃ་ཧཱུྃ་ྃ་དྷི་ཧ་རྃ། བཛྲ་རཀྵ་ཧཱུྃ་ཕཊ། ༀ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་སྐད་ཅིག་གིས་པདྨ་དང་ཟླ་བའི་སྟེང་དུ་རང་ཉིད་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཕྱག་གཡས་རྡོ་རྗེ་ཐུགས་ཀར་འཛིན་ཅིང་། ཕྱག་གཡོན་དྲིལ་བུ་དཀུ་ལ་བརྟེན་པ། ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའི་ཐུགས་ཀར་ཟླ་བའི་དཀྱིལ་འཁོར་ལ་ཧཱུྃ་དང་ཡིག་བརྒྱས་མཚན་པར་གྱུར། ༀ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲ྇་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ། བཛྲ་མཱ་མེ་མུཙྪ་བཛྲཱི་བྷ་ཝ་མཧཱ་ས་མ་ཡ་སཏྭ་ཨཱཿ ཞེས་བརྒྱའམ་ཉེར་གཅིག་གིས་རང་གཞན་གྱི་སྡིག་སྒྲིབ་སྦྱངས།

སྡོམ་པ་གཟུང་བ་ནི། ཧོཿ (༣)བླ་མ་རྡོ་རྗེ་འཛིན་པ་དང་། །རིགས་ལྔའི་བདེ་བར་གཤེགས་པ་ནི། །ཐམས་ཅད་བདག་ལ་དགོངས་སུ་གསོལ། །དེང་ནས་བྱང་ཆུབ་སྙིང་པོའི་བར། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །བླ་མ་ལ་ཡང་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །དགེ་བ་ཀུན་ལ་རྗེས་ཡི་རངས། །བྱང་ཆུབ་སེམས་ནི་བསྐྱེད་པར་བགྱི། །རིགས་ལྔའི་དམ་ཚིག་རྗེས་བཟུང་སྟེ། །རྡོ་རྗེ་དྲིལ་བུ་ལ་སོགས་པ། །དམ་ཚིག་རྫས་རྣམས་བཟུང་བར་བགྱི། །བླ་ན་མེད་པའི་དཀོན་མཆོག་གསུམ། །ནམ་དུ་ཡང་ནི་མི་བཏང་ཞིང་། །རྡོ་རྗེ་སློབ་དཔོན་མི་བཏང་ངོ་། །རྡོ་རྗེ་སྤུན་སྲིང་རྣམས་ལ་ཡང་། །ནམ་ཡང་སྨད་པར་མི་བྱའོ། །སེམས་ཅན་རྣམས་ལ་འཚེ་བ་སྤང་། །འཕགས་པ་རྣམས་ལ་སྨད་མི་བགྱི། །ཐེག་པ་དམན་ལ་མི་བརྙས་ཤིང་། །གསང་སྔགས་སྤང་བར་མི་བྱའོ། །བསྙེན་སྒྲུབ་ལས་ཀྱི་མཐའ་བཟུང་ཞིང་། །དཀྱིལ་འཁོར་འཁོར་ལོ་བསྒོམ་པར་བགྱི། །དམ་ཚིག་སྡོམ་པ་ལ་གནས་ཤིང་། །འཁྲུལ་པའི་བྱ་བ་མི་བགྱིའོ། །རང་གི་སེམས་ནི་ཡོངས་དུལ་ཞིང་། །ཕྱོགས་མཐའ་གཏུགས་པའི་སེམས་ཅན་གྱི། །དོན་ནི་བླ་མེད་བདག་གིས་བསྒྲུབ། །མ་གྲོལ་བ་རྣམས་དགྲོལ་བ་དང་། །མ་བསྒྲལ་བ་རྣམས་བསྒྲལ་བར་བགྱི། །དབུགས་མ་ཕྱུངས་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་བརྗོད་དོ། །

རང་ཉིད་རྡོ་རྗེ་སེམས་དཔའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་འཕྲོས་ཕྱོགས་བཅུའི་སངས་རྒྱས་བྱང་སེམས་ཐམས་ཅད་ནམ་མཁའ་ལ་སྤྱན་དྲངས་བཛྲ་ས་མ་ཡ་ཛཿ ༀ་ཧཱུྃ་ཏྲཱྃ་ཧྲཱིཿཨཱཿཛཿཧཱུྃ་བྃ་ཧོཿ ཞེས་དབང་བསྐུར་བྱིན་དབབ་པའོ། །

ཕྱག་རྒྱ་བཟུང་བ་ནི། ཧཱུྃ། ཐབས་ཤེས་ཟུང་འཇུག་ཆོས་ཉིད་མཚོན། །འདས་དུས་འགྲོ་རྣམས་སད་པའི་ཕྱིར། །རྡོ་རྗེ་གསོར་ཞིང་དྲིལ་བུ་དཀྲོལ། །བཛྲ་དྷརྨ་ཧཱུྃ་ཨཱཿ

མཆོད་པ་བྱིན་རླབས་ནི། ༀ་བཛྲ་ཡཀྵ་ཧཱུྃ། ༀ་བཛྲ་ཛྭ་ལ་ཨ་ན་ལ་ཨརྒ་ཧ་ན་ད་ཧ་པ་ཙ་ཧཱུྃ་ཕཊ། ༀ་སྭ་བྷཱ་ཝ་ཤུདྡྷོ྅ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ༀ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ། བདུད་རྩི། གཏོར་མ། རཀྟ། ཡུལ་ས་དང་བར་སྣང་ཐམས་ཅད་གཅལ་དུ་བཀྲམ་པ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་འབྱུང་བ། ངོ་བོ་བཟང་ཞིང་རྒྱ་ཆེ་བ། བྱེད་ལས་ཟག་མེད་ཀྱི་བདེ་བ་ཁྱད་པར་ཅན་བསྐྱེད་ཅིང་འཕགས་པ་རྣམས་མཉེས་པར་བྱེད་པ། བཀོད་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བ་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་ནམ་མཁའ་དང་མཉམ་པར་གྱུར། ཨརྒྷཾ་པྲ་ཏིཙྪ་སྭཱ་ཧཱ། པཱ་དྱཾ་པྲ་ཏཱིཙྪ་སྭཱ་ཧཱ། ༀ་ཨཱཿཧཱུཾ་བཛྲ་པུཥྤེ་ཨཱཿཧཱུྃ། ༀ་ཨཱཿཧཱུྃ་བཛྲ་དྷཱུ་པེ་ཨཱཿཧཱུཾ། ཨཱ་ལོ་ཀེ། གནྡྷེ། ནཻ་ཝི་དྱཱ། ཤཔྟ་ཨཱཿཧཱུྃ། ༀ་ཨཱཿཧཱུྃ་སརྦ་པཉྩ་ཨ་མྲ྇་ཏ་ཀུཎྜ་ལཱི་ཧཱུྃ་ཧྲཱིཿཋཱ། ༀ་ཨཱཿཧཱུྃ་མཧཱ་བ་ལིཾ་ཏ་ཏེ་ཛོ་བ་ལིཾ་(༤)ཏ་བ་ལ་བ་ཏི་གུ་ཧྱ་ས་མ་ཡེ་ཧཱུྃ་ཧྲཱིཿཋཱ། ༀ་ཨཱཿཧཱུྃ་མཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱ།

བུམ་པ་སྒྲུབ་པ་ནི། རང་ཉིད་སྐད་ཅིག་གིས་པདྨ་དང་ཉི་ཟླའི་སྟེང་དུ་ཞི་བ་ཀུན་ཏུ་བཟང་པོ་ཡབ་ཡུམ་སྐུ་མདོག་མཐིང་ག་རྡོར་དྲིལ་འཛིན་པར་གྱུར། ཐོད་པ་ནས་བདུད་རྩིས་བསང་། ༀ་བཛྲ་ཨ་མྲ྇་ཏ་ཀུནྜ་ལཱི་ཧ་ན་ཧ་ན་ཧཱུྃ་ཕཊ། ཅེས་པ་གསུམ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པྃ་ལས་པདྨ་དང་རྃ་ལས་ཉི་མ། ཨ་ལས་ཟླ་བའི་སྟེང་དུ་ྃ་ྃ་ཡོངས་སུ་གྱུར་པ་ལས་རྣམ་པར་རྒྱལ་བའི་བུམ་པ། ལས་ཐམས་ཅད་ཀྱི་བུམ་པ་དང་བཅས་པ། རིན་པོ་ཆེའི་རང་བཞིན་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མཆུ་འཕྱང་བ། མགྲིན་པ་ཕྲ་བ། ལྷའི་གོས་པཉྩ་ལ་ཀས་མགྲིན་པ་དཀྲིས་ཤིང་། དཔག་བསམ་ཤིང་གིས་ཁ་བརྒྱན་པ། ཕྱི་བུམ་པའི་དབྱིབས་ཅན་ནང་ལྷའི་གཞལ་ཡས་ཁང་ཆེན་པོ་འོད་ཟེར་རབ་ཏུ་འཕྲོ་བའི་རྣམ་རྒྱལ་བུམ་པའི་དབུས་སུ། པདྨ་དང་ཉི་ཟླའི་གདན་ལ་དེ་བཞིན་གཤེགས་པ་རིགས་རྣམ་པ་ལྔ་སྟེ། དབུས་སུ་ༀ་དང་ཨེ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་བཅོམ་ལྡན་འདས་རྣམ་པར་སྣང་མཛད་སྐུ་མདོག་མཐིང་སྐྱ་ཞལ་གཅིག་ཕྱག་གཉིས་པ་གཡས་འཁོར་ལོ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་ཀུན་ཏུ་བཟང་མོ་དང་མཉམ་པར་འཁྲིལ་བའོ། །ཤར་དུ་ཧཱུྃ་དང་བྃ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་བཅོམ་ལྡན་འདས་མི་བསྐྱོད་པ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཕྱག་གཡས་རྡོ་རྗེ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་མཱ་མ་ཀཱི་དང་མཉམ་པར་འཁྲིལ་བའོ། །ལྷོ་རུ་ཏྲཱྃ་ལྃ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་བཅོམ་ལྡན་འདས་རིན་ཆེན་འབྱུང་ལྡན་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་རིན་པོ་ཆེ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་སངས་རྒྱས་སྤྱན་མ་དང་མཉམ་པར་འཁྲིལ་བའོ། །ནུབ་ཏུ་ཧྲཱིཿརྃ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། བཅོམ་ལྡན་འདས་སྣང་བ་མཐའ་ཡས་སྐུ་མདོག་དམར་པོ་ཞལ་གཅིག་ཕྱག་གཉིས་པ། གཡས་པདྨ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་གོས་དཀར་མོ་མཉམ་པར་འཁྲིལ་བའོ། །བྱང་དུ་ཨཱཿཡྃ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་བཅོམ་ལྡན་འདས་དོན་ཡོད་གྲུབ་པ་སྐུ་མདོག་ལྗང་གུ་ཞལ་གཅིག་ཕྱག་གཉིས་པ། གཡས་རྡོ་རྗེ་རྒྱ་གྲམ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་དམ་ཚིག་སྒྲོལ་མ་དང་མཉམ་པར་འཁྲིལ་བའོ། །དེ་དག་ཀུན་ཀྱང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའོ། །ཡུམ་རྣམས་ཀྱང་སྐུ་མདོག་ཡབ་དང་མཐུན་ཞིང་ཕྱག་གཡས་གྲི་གུག་ཡབ་ཀྱི་མགུལ་ནས་འཁྱུད་པ། གཡོན་པས་ཐོད་པ་ཡབ་ལ་སྟོབ་པའོ། །དེའི་ཕྱི་རོལ་ཕྱོགས་མཚམས་བརྒྱད་དུ་པདྨ་དང་ཉི་ཟླའི་གདན་ལ་ཧཱུྃ་ཧཱུྃ། ཏྲཱྃ་ཏྲཱྃ། ཧྲཱིཿཧྲཱིཿ ཨཱཿཨཱཿ ཧཱུྃ་ཧཱུྃ། ཏྲཱྃ་ཏྲཱྃ། ཧྲཱིཿཧྲཱིཿ ཨཱཿཨཱཿརྣམས་ལས་འོད་(༥)ཟེར་འཕྲོ་འདུས་ཡོངས་སུ་གྱུར་པ་ལས། ཤར་དུ་བྱང་ཆུབ་སེམས་དཔའ་ནམ་མཁའི་སྙིང་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་རལ་གྲི་དང་། གཡོན་དྲིལ་བུ་འཛིན་པ། སེམས་མ་སྒེག་མོ་མ་དཀར་མོ་མེ་ལོང་འཛིན་མ་དང་མཉམ་པར་འཁྲིལ་བའོ། །ལྷོར་བྱང་ཆུབ་སེམས་དཔའ་ས་ཡི་སྙིང་པོ་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་རིན་པོ་ཆེའི་མྱུ་གུ་དང་། གཡོན་དྲིལ་བུ་འཛིན་པ། སེམས་མ་ཕྲེང་བ་མ་སེར་མོ་ཕྲེང་བ་འཛིན་མ་དང་མཉམ་པར་འཁྲིལ་བའོ། །ནུབ་ཏུ་བྱང་ཆུབ་སེམས་དཔའ་སྤྱན་རས་གཟིགས་དབང་སྐུ་མདོག་དམར་པོ་ཞལ་གཅིག་ཕྱག་གཉིས་པ། གཡས་པདྨ་དང་། གཡོན་དྲིལ་བུ་འཛིན་པ། སེམས་མ་གླུ་མ་དམར་མོ་པི་ཝཾ་འཛིན་མ་དང་མཉམ་པར་འཁྲིལ་བའོ། །བྱང་དུ་བྱང་ཆུབ་སེམས་དཔའ་ཀུན་ཏུ་བཟང་པོ་སྐུ་མདོག་ལྗང་སྐྱ་ཞལ་གཅིག་ཕྱག་གཉིས་པ། གཡས་རིན་པོ་ཆེའི་སྙེ་མ་དང་། གཡོན་དྲིལ་བུ་འཛིན་པ། སེམས་མ་གར་མ་ལྗང་གུ་རྡོ་རྗེ་རྩེ་གསུམ་འཛིན་མ་དང་མཉམ་པར་འཁྲིལ་བའོ། །ཤར་ལྷོར་བྱང་ཆུབ་སེམས་དཔའ་བྱམས་པ་མགོན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་ཀླུ་ཤིང་དང་། གཡོན་དྲིལ་བུ་འཛིན་པ། སེམས་མ་བདུག་སྤོས་མ་དཀར་སེར་སྤོས་ཀྱི་གའུ་འཛིན་མ་དང་མཉམ་པར་འཁྲིལ་བའོ། །ལྷོ་ནུབ་ཏུ་བྱང་ཆུབ་སེམས་དཔའ་སྒྲིབ་པ་རྣམ་སེལ་སྐུ་མདོག་དམར་སེར་ཞལ་གཅིག་ཕྱག་གཉིས་གཡས་པུ་སྟི་དང་། གཡོན་དྲིལ་བུ་འཛིན་པ། སེམས་མ་མེ་ཏོག་མ་སེར་མོ་མེ་ཏོག་འཛིན་མ་དང་མཉམ་པར་འཁྲིལ་བའོ། །ནུབ་བྱང་དུ་བྱང་ཆུབ་སེམས་དཔའ་འཇམ་དཔལ་གཞོན་ནུ་སྐུ་མདོག་དམར་པོ་ཞལ་གཅིག་ཕྱག་གཉིས་གཡས་རལ་གྲི་དང་། གཡོན་དྲིལ་བུ་འཛིན་པ། སེམས་མ་སྣང་གསལ་ལམ་དམར་མོ་སྣང་གསལ་འཛིན་མ་དང་མཉམ་པར་འཁྲིལ་བའོ། །བྱང་ཤར་དུ་བྱང་ཆུབ་སེམས་དཔའ་ཕྱག་ན་རྡོ་རྗེ་སྐུ་མདོག་ལྗང་སྐྱ་ཞལ་གཅིག་ཕྱག་གཉིས་གཡས་རྡོ་རྗེ་དང་གཡོན་དྲིལ་བུ་འཛིན་པ། སེམས་མ་དྲི་ཆབ་མ་ལྗང་གུ་དྲི་ཆབ་འཛིན་པ་དང་མཉམ་པར་འཁྲིལ་བའོ། །དེ་དག་ཀུན་ཀྱང་བྱང་ཆུབ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །གཙོ་འཁོར་དེ་དག་ཐམས་ཅད་ལ་དབུ་རྒྱན། ཕྱག་གདུབ། ཞབས་གདུབ། དཔུང་རྒྱན། དོ་ཤལ། སྙན་རྒྱན། མགུལ་རྒྱན། སྨད་རྒྱན། དར་སྣ་ཚོགས་ཀྱི་སྟོད་གཡོགས་དང་སྨད་གཡོགས་ལ་སོགས་པ་ལོངས་སྤྱོད་རྫོགས་པའི་རྒྱན་ཐམས་ཅད་ཀྱིས་བརྒྱན་པའོ། །དེ་དག་གི་མདངས་ལས་ཁྱམས་ཀྱི་ཤར་སྟོད་དུ་ལྷའི་ཐུབ་པ་དབང་པོ་བརྒྱ་བྱིན་སྐུ་མདོག་དཀར་པོ་པི་ཝཾ་འཛིན་པ། ཤར་སྨད་དུ་ལྷ་མིན་ཐུབ་པ་ཐགས་བཟང་རིས་སྐུ་མདོག་མཐིང་ག་གོ་ཆ་འཛིན་པ། ལྷོ་རུ་མི་ཡི་ཐུབ་པ་ཤཱཀྱ་ཐུབ་པ་སྐུ་མདོག་སེར་པོ་འཁར་གསིལ་དང་པར་བུ་འཛིན་པ། ནུབ་སྟོད་དུ་བྱོལ་སོང་ཐུབ་པ་སེང་གེ་རབ་བརྟན་སྐུ་མདོག་སྔོན་པོ་པུ་སྟི་འཛིན་པ། ནུབ་སྨད་དུ་དམྱལ་བའི་(༦)ཐུབ་པ་ཆོས་ཀྱི་རྒྱལ་པོ་སྐུ་མདོག་མཐིང་ག་མེ་ཆུ་འཛིན་པ། བྱང་དུ་ཡི་དྭགས་ཀྱི་ཐུབ་པ་ཁ་འབར་དེ་བ་སྐུ་མདོག་དམར་པོ་རིན་པོ་ཆེའི་སྒྲོམ་བུ་འཛིན་པའོ། །སྒོ་བཞིར་པདྨ་དང་ཉི་མའི་སྟེང་དུ་ཛཿཛཿ ཧཱུྃ་ཧཱུྃ། བྃ་བྃ། ཧོཿཧོཿལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། ཤར་སྒོར་ཁྲོ་བོ་རྣམ་པར་རྒྱལ་བ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་ལྕགས་ཀྱུ་དང་གཡོན་དྲིལ་བུ་འཛིན་པ། སྒོ་མ་ལྕགས་ཀྱུ་མ་དཀར་མོ་ལྕགས་ཀྱུ་འཛིན་མ་དང་འཁྲིལ་བའོ། །ལྷོ་སྒོར་ཁྲོ་བོ་གཤིན་རྗེའི་གཤེད་པོ་སྐུ་མདོག་སེར་པོ་ཞལ་གཅིག་ཕྱག་གཉིས་པ་གཡས་དབྱུག་ཏོ་དང་གཡོན་ཞགས་པ་འཛིན་པ། སྒོ་མ་ཞགས་པ་མ་སེར་མོ་ཞགས་པ་འཛིན་མ་དང་འཁྲིལ་བའོ། །ནུབ་སྒོར་ཁྲོ་བོ་རྟ་མགྲིན་རྒྱལ་པོ་སྐུ་མདོག་དམར་པོ་ཞལ་གཅིག་ཕྱག་གཉིས་པ་གཡས་ལྕགས་སྒྲོག་དང་གཡོན་སྡིགས་མཛུབ་མཛད་པ། སྒོ་མ་ལྕགས་སྒྲོག་མ་དམར་མོ་ལྕགས་སྒྲོག་འཛིན་མ་དང་འཁྲིལ་བའོ། །བྱང་སྒོར་ཁྲོ་བོ་བདུད་རྩི་འཁྱིལ་བ་སྐུ་མདོག་ལྗང་གུ་ཞལ་གཅིག་ཕྱག་གཉིས་པ། གཡས་རྒྱ་གྲམ་དང་གཡོན་དྲིལ་བུ་འཛིན་པ། སྒོ་མ་དྲིལ་བུ་མ་ལྗང་གུ་དྲིལ་བུ་འཛིན་མ་དང་འཁྲིལ་བའོ། །དེ་དག་ཐམས་ཅད་ཀྱི་སྐུ་ལ་དུར་ཁྲོད་འཇིགས་པའི་ཆས་བརྒྱད་ཀྱིས་བརྒྱན་ཅིང་མེ་དཔུང་གི་ཀློང་ན་གྱད་ཀྱི་དོར་སྟབས་སུ་བཞུགས་པའོ། །ལས་བུམ་དུ་པདྨ་དང་ཉི་ཟླའི་གདན་སྟེང་དུ་ཧཱུྃ་དང་བྃ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་རྡོ་རྗེ་སེམས་དཔའ་སྐུ་མདོག་དཀར་པོ་ཕྱག་གཡས་རྡོ་རྗེ་ཐུགས་ཀར་འཛིན་ཅིང་། ཕྱག་གཡོན་དྲིལ་བུ་ཡུམ་ལ་འཁྱུད་པ། ཞབས་རྡོ་རྗེ་སྐྱིལ་མོ་ཀྲུང་དུ་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཡུམ་མཱ་མ་ཀཱི་དང་མཉམ་པར་འཁྲིལ་བའོ། །ལྷ་ཚོགས་དེ་དག་ཐམས་ཅད་ཀྱི་སྤྱི་བོར་འཁོར་ལོ་དཀར་པོ་རྩིབས་བཞི་པའི་ལྟེ་བར་ༀ་དཀར་པོ། མགྲིན་པར་པདྨ་དམར་པོ་འདབ་མ་བཞི་བའི་ལྟེ་བར་ཨཱཿདམར་པོ། ཐུགས་ཀར་རྡོ་རྗེ་སྔོན་པོ་རྒྱ་གྲམ་གྱི་ལྟེ་བར་ཧཱུྃ་སྔོན་པོས་མཚན་པར་གྱུར། ཧཱུྃ་ཧཱུྃ་གིས་རྡོ་རྗེའི་གོ་ཞུགས་དང་ལྡན་པར་གྱུར། ༀ་ཧཱུྃ་ཏྲྃ་ཧྲཱིཿཨཱཿལས་དེ་བཞིན་གཤེགས་པ་ལྔ་སྟེང་གི་ནམ་མཁའ་ལ་རང་བྱོན། བདུད་རྩིའི་ཆུས་དབང་བསྐུར། དྲི་མ་དག །ཆུ་ལྷག་མ་ཡར་ལུད་པ་ལས། དབུས་ཕྱོགས་པ་ལ་རྣམ་པར་སྣང་མཛད། ཤར་ཕྱོགས་པ་ལ་མི་བསྐྱོད་པ། ལྷོ་ཕྱོགས་པ་ལ་རིན་ཆེན་འབྱུང་གནས། ནུབ་ཕྱོགས་པ་ལ་སྣང་བ་མཐའ་ཡས། བྱང་ཕྱོགས་པ་ལ་དོན་ཡོད་གྲུབ་པ་རྣམས་ཀྱིས་དབུར་བརྒྱན་པར་གྱུར། གཙོ་འཁོར་དེ་དག་ཐམས་ཅད་ཀྱི་གནས་གསུམ་ལས་འོད་འཕྲོས། ཕྱོགས་བཅུ་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ། སྐད་ཅིག་གིས་འགྲོ་བ་སེམས་ཅན་གྱི་དོན་དུ་སྤྱན་དྲངས། བཛྲ་ས་མཱ་ཛཿ

སྤྱན་འདྲེན་ནི། ཧཱུྃ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་(༧)འཁོར་བཅས་གནས་འདིར་གཤེགས་སུ་གསོལ། །ཛཿཧཱུྃ་བྃ་ཧོཿགཉིས་སུ་མེད་པར་གྱུར།

ཕྱག་འཚལ་བ་ནི། ཨ་ཏི་པཱུ་ཧོཿ པྲ་ཏཱིཙྪ་ཧོཿ ཨ་ལ་ལ་ཧོཿ མཆོད་པ་ནི། ཧཱུྃ། རྒྱལ་བ་རྒྱ་མཚོའི་མཆོད་རྫས་ལས་གྲུབ་པའི། །ཞིང་ཁམས་རྒྱ་མཚོའི་མཆོད་ཡོན་རྒྱ་མཚོའི་ཚོགས། །ཡོན་ཏན་རྒྱ་མཚོ་བུམ་པའི་ལྷ་རྣམས་ལ། །དད་པ་རྒྱ་མཚོས་འབུལ་ལོ་དབང་བསྐུར་སྩོལ། །ༀ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་སྭཱ་ཧཱ། རྒྱལ་བ་རྒྱ་མཚོའི༴། །ཞིང་ཁམས་རྒྱ་མཚོའི༴། །ཞབས་བསིལ༴ ། །ཡོན་ཏན་རྒྱ་མཚོ༴། །དད་པ་རྒྱ་མཚོས༴། །ༀ་སརྦ་ཏ་ཐཱ་ག་ཏ་པཱདྱཾ་པྲ་ཏཱིཙྪ་སྭཱ་ཧཱ། རྒྱལ་བ་རྒྱ་མཚོའི༴། །ཞིང་ཁམས་རྒྱ་མཚོའི་མེ་ཏོག༴། །ཡོན་ཏན་རྒྱ་མཚོ༴། །དད་པ་རྒྱ་མཚོས༴། །ༀ་སརྦ་ཏ་ཐཱ་ག་ཏ་པུཥྤེ་ཨཱཿཧཱུྃ། རྒྱལ་བ་རྒྱ་མཚོའི༴། །ཞིང་ཁམས་རྒྱ་མཚོའི་བདུག་སྤོས༴། །ཡོན་ཏན་རྒྱ་མཚོ༴། །དད་པ་རྒྱ་མཚོས༴། །ༀ་སརྦ་ཏ་ཐཱ་ག་ཏ་དྷཱུ་པེ་ཨཱཿཧཱུྃ། རྒྱལ་བ་རྒྱ་མཚོའི༴། ཞིང་ཁམས་རྒྱ་མཚོའི་སྣང་གསལ༴། །ཡོན་ཏན་རྒྱ་མཚོ༴། །དད་པ་རྒྱ་མཚོས༴། །ༀ་སརྦ་ཏ་ཐཱ་ག་ཏ་བཛྲ་ཨཱ་ལོ་ཀེ་ཨཱཿཧཱུྃ། རྒྱལ་བ་རྒྱ་མཚོའི༴། །ཞིང་ཁམས་རྒྱ་མཚོའི་དྲི་ཆབ༴། །ཡོན་ཏན་རྒྱ་མཚོ༴། །དད་པ་རྒྱ་མཚོས༴། །ༀ་སརྦ་ཏ་ཐཱ་ག་ཏ་བཛྲ་གནྡྷེ་ཨཱཿཧཱུྃ། རྒྱལ་བ་རྒྱ་མཚོའི༴། །ཞིང་ཁམས་རྒྱ་མཚོའི་ཞལ་ཟས༴། །ཡོན་ཏན་རྒྱ་མཚོ༴། །དད་པ་རྒྱ་མཚོས༴། །ༀ་སརྦ་ཏ་ཐཱ་ག་ཏ་ནཻ་ཝི་དྱཱ་ཨཱཿཧཱུྃ། རྒྱལ་བ་རྒྱ་མཚོའི༴། །ཞིང་ཁམས་རྒྱ་མཚོའི་སིལ་སྙན༴། །ཡོན་ཏན་རྒྱ་མཚོ༴། །དད་པ་རྒྱ་མཚོས༴། །ༀ་སརྦ་ཏ་ཐཱ་ག་ཏ་ཤཔྟ་པྲ་ཏཱིཙྪ་སྭཱ་ཧཱ།

ནང་མཆོད་ནི། ཧཱུྃ། སྣོད་བཅུད་སྣང་སྲིད་སྣ་ཚོགས་ཡིད་འོང་གཟུགས། །རྡོ་རྗེ་གཟུགས་མའི་ཚོགས་སུ་ཀུན་སྤྲུལ་ནས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་རཱུ་པ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་ཡིད་འོང་སྒྲ། །རྡོ་རྗེ་སྒྲ་མའི་ཚོགས་སུ་ཀུན་སྤྲུལ་ནས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་ཤཔྟ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་དྲི་ཞིམ་སྤོས། །རྡོ་རྗེ་དྲི་མའི་ཚོགས་སུ་ཀུན་སྤྲུལ་ནས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་གནྡྷེ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་རོ་ལྡན་ཟས། །རྡོ་རྗེ་རོ་མའི་ཚོགས་སུ་ཀུན་སྤྲུལ་ནས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་ནཻ་ཝི་དྱཱ་ཀཱ་མ་གུ་ཎ་པཱུ་ཛི་ཏེ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་བདེ་བའི་རེག །རྡོ་རྗེ་རེག་མའི་ཚོགས་སུ་ཀུན་སྤྲུལ་ནས། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་སྤཪྴེ་ཀཱ་མ་(༨)གུ་ཎ་བཛྲ་པཱུ་ཛི་ཏེ་ཨཱཿཧཱུྃ།

ཧཱུྃ། བླ་མ་ཀུན་བཟང་ཐིག་ལེའི་སྐུ། །ཉག་གཅིག་མཐའ་བྲལ་ལོངས་སྐུའི་རྒྱུད། །དབྱིངས་རིག་འདུ་འབྲལ་མེད་པ་ཡི། །ཅིར་མི་དགོངས་ལ་ཕྱག་འཚལ་བསྟོད། །ཞེ་སྡང་རྣམ་ཤེས་རང་གྲོལ་དབྱིངས། །མེ་ལོང་ཡེ་ཤེས་དཀར་གསལ་སྐུ། །ཆུ་ཁམས་རྣམ་དག་ཡབ་ཡུམ་རོལ། །མི་བསྐྱོད་ཡབ་ཡུམ་ཕྱག་འཚལ་བསྟོད། །འདོད་ཆགས་འདུ་ཤེས་རང་གྲོལ་དབྱིངས། །སོར་རྟོག་ཡེ་ཤེས་དམར་གསལ་སྐུ། །མེ་ཁམས་རྣམ་དག་ཡབ་ཡུམ་རོལ། །སྣང་མཐའ་ཡབ་ཡུམ་ཕྱག་འཚལ་བསྟོད། །གཏི་མུག་གཟུགས་ཁམས་རང་གྲོལ་དབྱིངས། །ཆོས་དབྱིངས་ཡེ་ཤེས་མཐིང་གསལ་སྐུ། །ནམ་མཁའ་རྣམ་དག་ཡབ་ཡུམ་རོལ། །རྣམ་སྣང་ཡབ་ཡུམ་ཕྱག་འཚལ་བསྟོད། །ང་རྒྱལ་ཚོར་བ་རང་གྲོལ་དབྱིངས། །མཉམ་ཉིད་ཡེ་ཤེས་སེར་གསལ་སྐུ། །ས་ཁམས་རྣམ་དག་ཡབ་ཡུམ་རོལ། །རིན་འབྱུང་ཡབ་ཡུམ་ཕྱག་འཚལ་བསྟོད། །ཕྲག་དོག་འདུ་བྱེད་རང་གྲོལ་དབྱིངས། །བྱ་གྲུབ་ཡེ་ཤེས་ལྗང་གསལ་སྐུ། །རླུང་ཁམས་རྣམ་དག་ཡབ་ཡུམ་རོལ། །དོན་གྲུབ་ཡབ་ཡུམ་ཕྱག་འཚལ་བསྟོད། །རྣམ་ཤེས་ཚོགས་བརྒྱད་སེམས་དཔའ་བརྒྱད། །ཉོན་མོངས་དྲུག་དང་ཐུབ་པ་དྲུག །མ་འགགས་རིག་རྩལ་སྒོ་བ་བཞི། །ཕྲིན་ལས་མཛད་ལ་ཕྱག་འཚལ་བསྟོད། །འོད་གསལ་ཡེ་ཤེས་སྒྱུ་མའི་ལྷ། །མཚན་རྫོགས་དཔེ་བྱད་དཔལ་འབར་ཞིང་། །སྐུ་གསུམ་ལྷུན་གྲུབ་རྫོགས་སངས་རྒྱས། །རྡོར་སེམས་ཡབ་ཡུམ་ཕྱག་འཚལ་བསྟོད། །

བུམ་བཟླས་ནི། རང་གི་ཐུགས་ཀ་ནས་འོད་ཟེར་འཕྲོས་གཟུངས་ཐག་ལ་འཁྲིལ་ཏེ་སོང་། བུམ་པའི་ལྷ་རྣམས་ཀྱི་ཐུགས་ཀར་ཕོག །ཐུགས་དམ་གྱི་རྒྱུད་བསྐུལ། ཡབ་ཡུམ་གྱི་སྦྱོར་མཚམས་དང་སྐུའི་ཆ་ཐམས་ཅད་ནས་བདུད་རྩིའི་རྒྱུན་བབས་པས་བུམ་པ་གང་བར་གྱུར། ༀ་ཛི་ན་ཛིཀ། ལྃ་ཏེ་ཤྭ་ར་ཏི་སྟྭཾ། ཧཱུྃ་བཛྲ་དྷཱཀ མཱུྃ་དྷཱ་ཏུ་ཤྭ་རི་སྟྭཾ། སྭཱ་རཏྣ་དྷྲ྇ཀ མཱྃ་མོ་ཧ་ར་ཏི་སྟྭཾ། ཨཾ་ཨ་རོ་ལ྇ཀ། པཱྃ་རཱ་གར་ཏི་སྟྭཾ། ཧཱ་པྲཛྙཱ་དྷྲ྇ཀ། ཏཱྃ་བཛྲ་ར་ཏི་སྟྭཾ། ཞེས་སམ། ༀ་བོ་དྷི་ཙིཏྟ་མཧཱ་སུ་ཁ་ཛྙཱ་ན་དྷ་ཏུ་ཨཱཿ ཞེས་རྣམ་རྒྱལ་དང་། ལས་བུམ་ལ་ཡི་གེ་བརྒྱ་པའམ། ༀ་བཛྲ་སཏྭ་ཧཱུྃ་བྃ་ཞེས་བརྒྱ་སྟོང་བཟླའོ། །

རྗེས་སུ་མཆོད་བསྟོད་ནི། ༀ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། འོག་མ་ཀུན་ལ་འགྲེའོ། །ཧཱུྃ། བླ་མ་ཀུན་བཟང་ཐིག་ལེའི་སྐུ། །ཉག་གཅིག་མཐའ་བྲལ་ལོངས་སྐུ་རྒྱུད། །དབྱིངས་རིག་འདུ་འབྲལ་མེད་པ་ཡི། །ཅིར་མི་དགོངས་ལ་ཕྱག་འཚལ་བསྟོད། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །འོད་གསལ་ཡེ་ཤེས་སྒྱུ་མའི་ལྷ། །མཚན་རྫོགས་དཔེ་བྱད་དཔལ་འབར་ཞིང་། །སྐུ་གསུམ་ལྷུན་གྲུབ་རྫོགས་སངས་རྒྱས། །རྡོར་སེམས་ཡབ་ཡུམ་ཕྱག་འཚལ་བསྟོད། །བཛྲ་མུཿཡེ་ཤེས་པ་རྣམས་རང་བཞིན་གྱི་གནས་སུ་གཤེགས། ༀ་ཨཱཿཧཱུྃ་གིས་དམ་ཚིག་པ་འོད་དུ་ཞུ་(༩)བ་ལས་བྱུང་བའི་བདུད་རྩིའི་ཆུ་རྒྱུན་གྱིས་བུམ་པ་གང་བར་གྱུར།

དཀྱིལ་འཁོར་བསྒྲུབ་པ་ནི། ལས་བུམ་ནས་བདུད་རྩིའི་ཆུ་གཏོར་ཞིང་། ཨ་མྲ྇་ཏ་ལན་གསུམ་གྱིས་བསང་། ༀ་ཡོ་ག་ཤུདྡྷོ་སརྦ་དྷརྨཿཡོ་ག་ཤུདྡྷོ་སྭ་བྷཱ་ཝ་ཨཱཏྨ་ཀོ྅ཧཾ། ཕྱི་དང་ནང་གི་ཆོས་ཐམས་ཅད་སྟོང་པ་ཆེན་པོ། སྟོང་པའི་ངང་ལས་འབྱུང་བཞི་རི་རབ་དང་བཅས་པ་ཡོངས་སུ་གྱུར་པ་ལས། པྃ་ལས་པདྨ། ཨ་ལས་ཟླ་བ། རྃ་ལས་ཉི་མའི་སྟེང་དུ་ྃ་ལས་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་རྩིག་པ་ལྔ་དང་ལྡན་པ་རྣམས་ཀྱང་ནང་ནས་རིམ་པ་བཞིན་མཐིང་ག །དཀར་པོ། དམར་པོ། སེར་པོ། ལྗང་གུ་རྣམས་ཀྱི་སྟེང་ན་རིན་པོ་ཆེའི་ཕ་གུ་སེར་པོ་ལ་དྲྭ་བ་དང་དྲྭ་བ་ཕྱེད་པ་འཕྱང་བ། དེའི་སྟེང་ན་རྡོ་ཀརྨ་ཤྲི་ཤ་ལས་གྲུབ་པའི་མདའ་ཡབ་དང་རིན་པོ་ཆེའི་དྲྭ་མིག་གསེང་མས་བསྐོར་བའི་པུ་ཤུས་མཛེས་པའི་སྟེང་གཙང་ཁང་ཕྱུར་བུའི་རྩེ་མོ་རྡོ་རྗེ་དང་ནོར་བུ་རིན་པོ་ཆེའི་ཏོག་གིས་མཛེས་ཤིང་། ཕྱོགས་བཞིར་རྟ་བབས་བང་རིམ་བཞི་དང་ལྡན་པ། རིན་པོ་ཆེའི་གདུགས། ཆོས་ཀྱི་འཁོར་ལོ། ཤིན་ཏུ་མཛེས་པའི་རི་དྭགས། ལྷའི་གོས་རྣམ་པར་རྒྱལ་བའི་རྒྱལ་མཚན། ཡིད་དུ་འོང་བའི་འཕན། ཟླ་བ་རླུང་གིས་བསྐྱོད་པ། རྔ་ཡབ་ནོར་བུའི་ཡུ་བ་ཅན་ལ་སོགས་པ་གཞལ་ཡས་ཁང་མཛེས་པར་བྱེད་པའི་རྒྱན་དུ་མས་བརྒྱན་པ། ཕྱི་རོལ་ན་འདོད་ཡོན་གྱི་སྣམ་བུ་ལ་ལྷ་མོ་བཅུ་དྲུག་གིས་མཆོད་རྫས་དུ་མ་ཐོགས་ནས་གཞལ་ཡས་ཁང་པའི་ལྷ་རྣམས་མཆོད་པར་བྱེད་པའི་ཕྱི་རོལ་ཏུ་དུར་ཁྲོད་ཆེན་པོ་བརྒྱད་དང་སྲུང་བའི་འཁོར་ལོས་བརྒྱན་པ། གཞལ་ཡས་ཁང་དེའང་ཕྱི་ནང་མེད་པར་གསལ་བ་རྒྱ་ཁྱོན་དཔག་ཏུ་མེད་ཅིང་གཞལ་ཡས་ཁང་རྒྱ་ཚད་ལས་འདས་པ་ཆོས་ཀྱི་དབྱིངས་ཀྱི་རང་བཞིན་ཅན་ནོ། །དེའི་ནང་ཀ་བ་ཆེན་པོ་བརྒྱད་ཀྱིས་བཏེག་ཅིང་རྡོ་རྗེའི་གདུང་བཞིས་མིག་མང་རིས་སུ་ཕུབ་པའི་དབུས་སུ་སེང་གེའི་ཁྲི། ཤར་དུ་གླང་པོ་ཆེ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་ཤང་ཤང་གིས་བཏེག་པའི་རིན་པོ་ཆེའི་ཁྲི་སྟེང་རྣམས་སུ་པདྨ་དང་ཉི་ཟླའི་གདན་ལ་དེ་བཞིན་གཤེགས་པའི་རིགས་རྣམ་པ་ལྔ་སྟེ། དབུས་སུ་ༀ་དང་ཨེ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། བཅོམ་ལྡན་འདས་རྣམ་པར་སྣང་མཛད་སྐུ་མདོག་མཐིང་སྐྱ་ཞལ་གཅིག་ཕྱག་གཉིས་པ་གཡས་འཁོར་ལོ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་ཀུན་ཏུ་བཟང་མོ་དང་མཉམ་པར་འཁྲིལ་བའོ། །ལྷ་ཚོགས་རྣམས་གོང་དང་འགྲེའོ། །

དེ་དག་གི་སྐུའི་གདངས་ལས་སྟེང་གི་བར་སྣང་ལ་མེ་རི་མེ་དཔུང་གི་ཀློང་ན་ཁྲག་འཐུང་རིགས་ལྔ་ཡབ་ཡུམ་ལ་གཽ་རཱི་མ་བརྒྱད། ཕྲ་མེན་མ་བརྒྱད། སྒོ་མ་བཞི། དབང་མོ་ཉེར་བརྒྱད་ཀྱིས་བསྐོར་བའི་སྐུ་ལ་ཁྲོ་བོའི་རྒྱན་ཐམས་ཅད་ཀྱིས་བརྒྱན་པའོ། །དེའི་སྟེང་གི་ནམ་མཁའ་ལ་འོད་ཕུང་འཁྲིགས་པའི་ཀློང་ན་དཔལ་ཀུན་ཏུ་བཟང་པོ་ཡབ་ཡུམ་ལ་རྒྱལ་བ་དགོངས་པའི་བརྒྱུད་པ། རིག་འཛིན་(༡༠)བརྡའི་བརྒྱུད་པ། གང་ཟག་སྙན་ཁུང་དུ་བརྒྱུད་པའི་བླ་མ་དམ་པ་རྣམས་དང་བཤད་བརྒྱུད་སྒྲུབ་བརྒྱུད་ཀྱི་བླ་མ། བཀའ་བརྒྱུད་རྒྱལ་བ་རྒྱ་མཚོའི་ཚོགས་ཀྱིས་བསྐོར་བའོ། །དཀྱིལ་འཁོར་གྱི་ཕྱི་ཡི་དུར་ཁྲོད་ལ་དབང་ཕྱུག་མཁའ་འགྲོ་ལང་ཀ་མགྲིན་བཅུའི་ཚོགས། དཔལ་སྔགས་སྲུང་གི་རྒྱལ་མོ་ཨེ་ཀ་ཛཱ་ཊི། མགོན་པོ་ལེགས་ལྡན་ནག་པོ། བདུད་མོ་རེ་ཏི། ཤན་པ་སྲོག་སྒྲུབ་ནག་མོ། གཟའ་ཆེན་པོ་རཱ་ཧུ་ལ། གནོད་སྦྱིན་ཤན་པ་དམར་ནག །དམ་ཅན་རྡོ་རྗེ་ལེགས་པ་རྣམས་ནི་འཁོར་སྤྲུལ་པ་ཡང་སྤྲུལ་ཕོ་ཉ་ལས་མཁན་དང་བཅས་པ། གཞན་ཡང་གཏེར་བདག་དམ་ཅན་རྒྱ་མཚོ། ལྷ་རབས་མཆེད་དགུ། བརྟན་མ་བཅུ་གཉིས། ཡུལ་ལྷ་གཞི་བདག་དང་བཅས་པ་རང་རང་གི་རྒྱན་ཆ་ལུགས། མཐུ་རྩལ་རྫུ་འཕྲུལ། བྲན་གཡོག་སྣ་ཚོགས་དང་བཅས་པའོ། །ལྷ་ཚོགས་དེ་དག་ཐམས་ཅད་ཀྱི་སྤྱི་བོར་འཁོར་ལོ་དཀར་པོ་རྩིབས་བཞི་པའི་ལྟེ་བར་ༀ་དཀར་པོ། མགྲིན་པར་པདྨ་དམར་པོ་འདབ་མ་བཞི་པའི་ལྟེ་བར་ཨཱཿ་དམར་པོ། ཐུགས་ཀར་རྡོ་རྗེ་སྔོན་པོ་རྒྱ་གྲམ་གྱི་ལྟེ་བར་ཧཱུྃ་སྔོན་པོས་མཚན་པར་གྱུར། ཧཱུྃ་ཧཱུྃ་གིས་རྡོ་རྗེའི་གོ་ཞུགས་དང་ལྡན་པར་གྱུར། ༀ་ཧཱུྃ་ཏྲཱྃ་ཧྲཱིཿཨཱཿལས་དེ་བཞིན་གཤེགས་པ་ལྔ་སྟེང་གི་ནམ་མཁའ་ལ་རང་བྱོན། བདུད་རྩིའི་ཆུས་དབང་བསྐུར་དྲི་མ་དག །ཆུ་ལྷག་མ་ཡར་ལུད་པ་ལས། དབུས་ཕྱོགས་པ་རྣམས་ལ་རྣམ་པར་སྣང་མཛད། ཤར་ཕྱོགས་པ་ལ་མི་བསྐྱོད་པ། ལྷོ་ཕྱོགས་པ་ལ་རིན་ཆེན་འབྱུང་ལྡན། ནུབ་ཕྱོགས་པ་ལ་སྣང་བ་མཐའ་ཡས། བྱང་ཕྱོགས་པ་ལ་དོན་ཡོད་གྲུབ་པ་རྣམས་ཀྱིས་དབུར་བརྒྱན་པར་གྱུར། གཙོ་འཁོར་དེ་དག་ཐམས་ཅད་ཀྱི་གནས་གསུམ་ལས་འོད་འཕྲོས། ཕྱོགས་བཅུ་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ། སྐད་ཅིག་གིས་འགྲོ་བ་སེམས་ཅན་དོན་དུ་སྤྱན་དྲངས། བཛྲ་ས་མཱ་ཛཿ

སྤྱན་འདྲེན་ནི། ཧཱུྃ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཀ་དག་སྤྲོས་བྲལ་ཆོས་སྐུའི་ཞིང་ཁམས་ནས། །བླ་མ་ཀུན་བཟང་རིགས་ལྔ་རྡོ་རྗེ་འཆང་། །རྒྱལ་བ་དགོངས་བརྒྱུད་བླ་མའི་ཚོགས་རྣམས་ཀུན། །མ་ལུས་སྤྱན་འདྲེན་གནས་འདིར་གཤེགས་སུ་གསོལ། །རང་བཞིན་ལྷུན་གྲུབ་ལོངས་སྐུའི་ཞིང་ཁམས་ནས། །དགའ་རབ་རྡོ་རྗེ་འཇམ་དཔལ་གཤེས་གཉེན་སོགས། །རིག་འཛིན་བརྡ་བརྒྱུད་བླ་མའི་ཚོགས་རྣམས་ཀུན། །མ་ལུས་སྤྱན་འདྲེན༴། །འགྲོ་བ་འདུལ་མཛད་སྤྲུལ་སྐུའི་ཞིང་ཁམས་ནས། །ཆོས་རྒྱལ་ཆེན་པོ་ཏིང་འཛིན་བཟང་པོ་སོགས། །གང་ཟག་སྙན་བརྒྱུད་བླ་མའི་ཚོགས་རྣམས་ཀུན། །མ་ལུས༴། །འོག་མིན་ཆོས་ཀྱི་དབྱིངས་ཀྱི་དཀྱིལ་འཁོར་ནས། །བདེ་གཤེགས་རིགས་ལྔ་སེམས་དཔའ་ལྕམ་དྲལ་ཚོགས། །ཞི་བ་རྡོ་རྗེ་དབྱིངས་ཀྱི་ལྷ་ཚོགས་རྣམས། །མ་ལུས༴། །ཡེ་ཤེས་ལྷུན་གྱིས་གྲུབ་པའི་དཀྱིལ་འཁོར་ནས། །དཔལ་ཆེན་ཧེ་རུ་ཡབ་ཡུམ་ཀེ་སེང་སོགས། །ཁྲག་འཐུང་འབར་བ་ཁྲོ་བོའི་ལྷ་ཚོགས་རྣམས། །མ་ལུས༴། །རང་བཞིན་(༡༡)ལྷུན་གྱིས་གྲུབ་པའི་གནས་མཆོག་ནས། །ཡེ་ཤེས་ལས་གྲུབ་དཔའ་བོ་མཁའ་འགྲོ་དང་། །དཔལ་གྱི་བཀའ་སྡོད་ཅི་བགྱིས་བཀའ་ཉན་ཚོགས། །མ་ལུས༴། །དུར་ཁྲོད་ལ་སོགས་སོ་སོའི་གནས་མཆོག་གནས། །དཔལ་ཆེན་གཙོ་བོ་ཨེ་ཀ་ཛ་ཊཱི་མ། །མགོན་པོ་ལེགས་ལྡན་བདུད་མོ་རེ་མ་ཏི། །ཤན་པ་སྲོག་སྒྲུབ་གཟའ་མཆོག་རཱ་ཧུ་ལ། །གནོད་སྦྱིན་དམར་ནག་དམ་ཅན་ཐིག་ལེ་རྩལ། །མ་ལུས༴། །བོད་ཡུལ་གཏེར་བདག་ལྷ་རབས་མཆེད་དགུ་དང་། །བརྟན་མ་བཅུ་གཉིས་ཡུལ་ལྷ་གཞི་བདག་སོགས། །བསྟན་སྲུང་དམ་ཅན་རྒྱ་མཚོ་འཁོར་བཅས་རྣམས། །མ་ལུས༴། །གུ་རུ་དེ་ཝ་ཌཱ་ཀི་ནཱི་དྷ་རྨ་པཱ་ལ་སརྦ་ས་མ་ཡ་ཛཿཛཿ

བཞུགས་སུ་གསོལ་བ་ནི། མཁའ་དབྱིངས་རྣམ་དག་སངས་རྒྱས་ཞིང་ཁམས་འདིར། །སྒྱུ་མ་ཆུ་ཟླ་ཡེ་ཤེས་གཞལ་ཡས་ཁང་། །སྐྱོན་བྲལ་པདྨ་ཉི་ཟླའི་གདན་སྟེང་དུ། །བླ་མ་ཡི་དམ་ཞི་ཁྲོའི་ལྷ་ཚོགས་དང་། །སྲུང་མ་དམ་ཅན་རྒྱ་མཚོའི་འཁོར་དང་བཅས། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །བཛྲ་ས་མ་ཡ་ཏིཥྛ་ལྷན།

ཕྱག་འཚལ་བསྟོད་པ་ནི། ཧཱུྃ། ངོ་བོ་རྣམ་དག་ཆོས་སྐུའི་མཁའ་དབྱིངས་ལས། །རང་བཞིན་འོད་གསལ་ལྷུན་གྲུབ་ལོངས་སྤྱོད་རྫོགས། །ཐུགས་རྗེ་ཀུན་མཁྱེན་སྤྲུལ་སྐུས་འགྲོ་དོན་མཛད། །བརྒྱུད་གསུམ་བླ་མ་རྣམས་ལ་ཕྱག་འཚལ་བསྟོད། །ཆོས་རྣམས་ཐམས་ཅད་ཡིད་དང་སེམས་ལ་འདུས། །ཡེ་ནས་དབྱེར་མེད་ཐབས་དང་ཤེས་རབ་དང་། །ཆོས་དབྱིངས་ཡེ་ཤེས་ཆེ་ལ་མངའ་བརྙེས་པའི། །ཀུན་བཟང་ཡབ་ཡུམ་གཉིས་ལ་ཕྱག་འཚལ་བསྟོད། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔའི་བདེ་བར་གཤེགས་པ་ཕྱག་འཚལ་བསྟོད། །ཆོས་ཀྱི་དབྱིངས་སུ་དབྱེར་མེད་ཚུལ་གཅིག་ཀྱང་། །ཕྱོགས་བཅུ་མཐའ་ཡས་བཞུགས་པ་དུས་གསུམ་གྱི། །བདེ་གཤེགས་བྱང་ཆུབ་སེམས་དཔའ་བསྐྱེད་མཛད་པའི། །རིགས་ཀྱི་ཡུམ་ཆེན་ལྔ་ལ་ཕྱག་འཚལ་ལོ། །རྣམ་ཤེས་དབང་པོ་དག་མཛད་བདེ་གཤེགས་སྲས། །སྲིད་པ་བླ་མེད་འགྲོ་བའི་དོན་ལ་བརྩོན། །ཉོན་མོངས་སྤྱོད་པའི་སྐྱོན་དང་རབ་བྲལ་བའི། །བྱང་ཆུབ་སེམས་དཔའ་བརྒྱད་ལ་ཕྱག་འཚལ་བསྟོད། །སྒེག་མོ་ཕྲེང་ཐོགས་རིན་ཆེན་གླུ་གར་དང་། །སྤོས་མཆོག་མར་མེ་ལ་སོགས་བྱུག་པ་དྲི། །མཛེས་ཚུལ་སྐུ་ལ་མཆོད་པས་མཉེས་མཛད་པ། །སེམས་མ་ཆེན་མོ་བརྒྱད་ལ་ཕྱག་འཚལ་བསྟོད། །སྲིད་པ་གསུམ་གྱི་ཡིད་བཞིན་བདེ་ལ་རོལ། །རྒྱུ་དྲུག་འཁོར་བའི་སེམས་ཅན་ཀུན་སྒྲོལ་ཅིང་། །འགྲོ་དྲུག་དྲང་ཕྱིར་སྤྲུལ་པའི་སྐུར་བསྟན་པ། །ཐུབ་པ་ཆེན་པོ་དྲུག་ལ་ཕྱག་འཚལ་ལོ། །ཕྱོགས་བཞིའི་སྒོ་སྐྱོང་ཡེ་ཤེས་བཞི་ཡི་ངང་། །ཕྱག་རྒྱ་བཞི་ཡིས་འགུགས་འཆིང་སྡོམ་ཞིང་བརྡེག །གདུག་པའི་ཚོགས་རྣམས་མ་ལུས་འདུལ་མཛད་པའི། །ཡེ་ཤེས་སྒོ་བ་བཞི་ལ་ཕྱག་འཚལ་ལོ། །སྐུ་གསུང་ཐུགས་འཛིན་མཉམ་ཉིད་ཀུན་གྱི་ངང་། །རྟག་ཆད་མཐར་འཛིན་མཚན་མ་ཀུན་སྤངས་ཤིང་། །མི་མཐུན་ཚོགས་འཇོམས་ཡེ་ཤེས་ཁྲོ་མོའི་ཚུལ། །སྒོ་མ་ཡུམ་ཆེན་བཞི་ལ་ཕྱག་འཚལ་ལོ། །བཅོམ་(༡༢)ལྡན་འཇིགས་བྱེད་ཁྲག་འཐུང་ཧེ་རུའི་ཚོགས། །ཡེ་ཤེས་སྐུ་མཆོག་འཇིགས་པའི་ཆོས་ཀྱིས་བརྒྱན། །ཉོན་མོངས་འཇོམས་མཛད་ཡེ་ཤེས་དཔལ་གྱི་ཐུགས། །ཁྲག་འཐུང་ལྔ་བཅུ་བརྒྱད་ལ་ཕྱག་འཚལ་བསྟོད། །ལེགས་ཉེས་སྟངས་འཛིན་དམ་ཚིག་རྗེས་ཀྱང་གཅོད། །བཀའ་དང་བསྟན་པ་གཉེན་པོ་སྲུང་མཛད་ཅིང་། །རྣལ་འབྱོར་དམ་ལྡན་སྐྱོང་བར་ཁས་བླངས་པའི། །མཁའ་འགྲོ་བཀའ་སྡོད་ཚོགས་ལ་ཕྱག་འཚལ་བསྟོད། །དཔལ་ཆེན་གཙོ་མོ་ཨེ་ཀ་ཛ་ཊཱི་མ། །ཞལ་གཅིག་ཕྱག་གཉིས་རུ་ལུའི་སྒྲ་སྐད་སྒྲོགས། །ཀུན་ཏུ་བཟང་མོ་དབྱིངས་ཀྱི་མ་མོ་མཆོག །ལས་དང་ཡེ་ཤེས་ཚོགས་ཀྱི་རྗེ་མོར་བསྟོད། །དཔལ་ལྡན་མགོན་པོ་མི་ཕམ་སྲིད་གསུམ་དང་། །ལེགས་ལྡན་ནག་པོ་གྲོང་ཁྱེར་སུམ་བརྩེགས་འཇིག །ཆེ་བའི་ཡོན་ཏན་ནམ་མཁའི་མཐའ་དང་མཉམ། །མཧཱ་ཀཱ་ལ་འཁོར་དང་བཅས་ལ་བསྟོད། །ཤིན་ཏུ་མི་སྲུན་བདུད་མོ་རེ་མ་ཏི། །མུན་པའི་མདོག་ཅན་དྲིལ་རྟ་རྐང་གསུམ་བཅིབས། །སྟོང་གསུམ་ཉུལ་ཞིང་སྐྱེ་འགྲོའི་སྲོག་དབུགས་ལེན། །བསྟན་པ་སྲུང་མཛད་མ་ལ་ཕྱག་འཚལ་བསྟོད། །ཤན་པ་ནག་མོ་མི་ལྤགས་གཡང་གཞི་གསོལ། །སྙིང་དང་ནད་ཀྱི་རྐྱལ་པ་ཕྱག་ན་བསྣམས། །ལས་བྱེད་མཁའ་འགྲོ་བྱེ་བའི་འཁོར་གྱིས་བསྐོར། །ནམ་གྲུ་ནག་མོ་འཇིགས་པའི་ཚོགས་ལ་བསྟོད། །དྲང་སྲོང་ཆེན་པོ་གཟའ་མཆོག་རཱ་ཧུ་ལ། །སྐུ་མདོག་དུད་ཁ་དབུ་དགུ་སྤྱན་སྟོང་འབར། །ཕྱག་བཞི་མདའ་གཞུ་རལ་གྲི་རྒྱལ་མཚན་བསྣམས། །སྲིང་བཞི་སྡེ་བརྒྱད་འཁོར་དང་བཅས་ལ་བསྟོད། །གནོད་སྦྱིན་དམར་ནག་ཟངས་ཀྱི་ཁྱུད་དམར་བཅིབས། །ཞལ་གཅིག་ཕྱག་བཞི་གྲི་གུག་ཐོད་ཁྲག་དང་། །རལ་གྲི་དགྲ་སྙིང་སྦྲུལ་ནག་ཞགས་པ་བསྣམས། །དྲག་གཏུམ་ཆེན་མོ་འཁོར་དང་བཅས་ལ་བསྟོད། །དམ་ཅན་ཆེན་པོ་དམར་ནག་ཐིག་ལེ་རྩལ། །ཞལ་གཅིག་ཕྱག་གཉིས་རྡོ་རྗེ་དགྲ་སྙིང་བསྣམས། །ཐོད་ཕྲེང་གཡང་གཞི་སྟག་གི་ཤམ་ཐབས་གྱོན། །འཁོར་དང་བཅས་ལ་གུས་པས་ཕྱག་འཚལ་བསྟོད། །སྔོན་ཚེ་རྡོ་རྗེ་འཆང་གི་སྤྱན་སྔ་རུ། །ཁས་བླངས་དམ་བཅས་སྲུང་མའི་ཚོགས་རྣམས་དང་། །བོད་ཡུལ་གཉེར་བདག་བརྟན་མ་བཅུ་གཉིས་དང་། །ཡུལ་ལྷ་གཞི་བདག་འཁོར་དང་བཅས་ལ་བསྟོད། །དྲེགས་པ་ཕོ་མོ་མིང་སྲིང་འཁོར་བཅས་རྣམས། །འཇིག་རྟེན་འདས་ཀྱང་འཁོར་བའི་ཆ་ལུགས་འཛིན། །ཡེ་ཤེས་གྲུབ་ཀྱང་ལས་ཀྱི་ཕོ་ཉར་སྟོན། །དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་བསྟོད་པར་བགྱི། །

མཆོད་པ་ནི། ཧཱུྃ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་མཆོད་པར་བཤགས་པ་འདི། །བླ་མ་ཡི་དམ་ཞི་ཁྲོ་དང་། །དམ་ཅན་རྒྱ་མཚོའི་ཚོགས་ལ་འབུལ། །འགྲོ་བའི་དོན་དུ་བཞེས་སུ་གསོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷ་རྨ་པཱ་ལ་ཨརྒྷཾ་པྲ་ཏཱིཙྪ་སྭཱ་ཧཱ། རབ་འབྱམས༴། །ཞབས་བསིལ༴། །བདག་གིས༴། །བླ་མ༴། །དམ་ཅན༴། །འགྲོ་བའི༴། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱི་ཀི་ནཱི་དྷརྨ་པཱ་ལ་པཱདྱཾ་པྲཏཱིཙྪ་སྭཱ་ཧཱ། རབ་འབྱམས༴། །མེ་ཏོག༴། །བདག་གིས༴། །བླ་མ༴། །དམ་ཅན༴། །འགྲོ་བའི༴། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་བཛྲ་པུཥྤེ་ཨཱཿཧཱུྃ། རབ་འབྱམས༴། །བདུག་སྤོས༴། །བདག་གིས༴། །བླ་མ༴། །དམ་ཅན༴། །འགྲོ་བའི༴། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་བཛྲ་དྷཱུ་པེ་ཨཱཿཧཱུྃ། རབ་འབྱམས༴། །སྣང་གསལ༴། །བདག་གིས༴། །བླ་མ༴། །དམ་ཅན༴། །འགྲོ་བའི༴། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷ་རྨ་པཱ་ལ་བཛྲ་ཨཱ་ལོ་ཀེ་ཨཱཿཧཱུྃ། རབ་འབྱམས༴། །དྲི་ཆབ༴། །བདག་གིས༴། །བླ་མ༴། །དམ་ཅན༴། །འགྲོ་བའི༴། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱིའི་དྷརྨ་པཱ་ལ་བཛྲ་གནྡྷེ་ཨཱཿཧཱུྃ། རབ་འབྱམས༴། །ཞལ་ཟས༴། །བདག་གིས༴། །བླ་མ༴། །དམ་ཅན༴། །འགྲོ་བའི༴། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷརྨཱ་པཱ་ལ་བཛྲ་ནཻ་ཝི་དྱ་ཨཱཿཧཱུྃ། རབ་འབྱམས༴། །སྒྲ་སྙན༴། །བདག་གིས༴། །བླ་མ༴། །དམ་ཅན༴། །འགྲོ་བའི༴། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་ཌཱ་ཀི་ནཱི་དྷ་རྨ་པཱ་ལ་བཛྲ་ཤཔྟ་ཨཱཿཧཱུྃ། ནང་མཆོད་ནི། ཧཱུྃ། སྣོད་བཅུད་སྣང་སྲིད་སྣ་ཚོགས་ཡིད་འོང་གཟུགས། །རྡོ་རྗེ་གཟུགས་མའི་ཚོགས་སུ་ཀུན་སྤྲུལ་ཏེ། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ༀ་སརྦ་ཏ་ཐཱ་ཏ་གུ་རུ་དེ་ཝ་ཌཱ་ཀི་ནཱི་དྷརྨ་པཱ་ལ་རཱུ་པ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ། སྣོད་བཅུད་སྣང་སྲིད་སྣ་ཚོགས་ཡིད་འོང་སྒྲ། །རྡོ་རྗེ་སྒྲ་མའི་ཚོགས་སུ་ཀུན་སྤྲུལ་ཏེ། །བླ་མ༴། །ཐུགས་རྗེས༴། །ༀ་སརྦ་ཏ་ཐཱ་ག་ཏ༴། བཛྲ་ཤཔྟ་ཀཱ་མ་གུ་ཎ༴། སྣོད་བཅུད་སྣང་སྲིད་སྣ་ཚོགས་དྲི་ཞིམ་སྤོས། །རྡོ་རྗེ་དྲི་མའི་ཚོགས༴། །བླ་མ༴། །ཐུགས་རྗེས༴། །ༀ་སརྦ༴། གནྡྷེ་ཀཱ་མ༴། སྣོད་བཅུད་སྣང་སྲིད་སྣ་ཚོགས་རོ་ལྡན་ཟས། །རྡོ་རྗེ་རོ་མའི༴། །བླ་མ༴། །ཐུགས་རྗེས༴། །ༀ་སརྦ༴། ནཻ་ཝི་དྱ་ཀཱ་མ༴། སྣོད་བཅུད་སྣང་སྲིད་སྣ་ཚོགས་བདེ་བའི་རེག །རྡོ་རྗེ་རེག་མའི༴། །བླ་མ༴། །ཐུགས་རྗེས༴། །ༀ་སརྦ༴། སྤཪྴེ་ཀཱ་མ༴།

གསང་མཆོད་ནི། ཧཱུྃ། གསང་མཆོག་བདེ་ཆེན་སྐུ་ཡི་རིག་མ་ནི། །སྐུ་མདོག་དཀར་མཛེས་མེ་ལོང་པདྨ་བསྣམས། །ཤིན་ཏུ་ཡིད་འོང་བདེ་གཤེགས་མཉེས་མཛད་མ། །གསང་མཆོག་བདེ་བའི་མཆོད་པ་བཞེས་སུ་གསོལ། །ༀ་བཛྲཱ་དཪྴ་ཨཱཿཧཱུྃ། གསང་མཆོག་གསུང་གི་བདེ་ཆེན་རིག་མ་ནི། །སྐུ་མདོག་དམར་སེར་རྔ་ཟླུམ་སྒྲ་སྒྲོགས་མ། །ཤིན་ཏུ་ཡིད་འོང་༴། །གསང་མཆོག་བདེ་བའི༴། །ༀ་བཛྲ་མུ་རཉྫ་ཨཱཿཧཱུྃ། གསང་མཆོག་ཐུགས་ཀྱི་བདེ༴། །སྐུ་མདོག་མཐིང་མཛེས་པི་ཝཾ༴། །ཤིན་ཏུ་ཡིད་འོང་༴། །གསང་མཆོག༴། །ༀ་བཛྲ་བཱི་ནི་ཨཱཿཧཱུྃ། གསང་མཆོག་ཡོན་ཏན་བདེ༴། །སྐུ་མདོག་སེར་མཛེས་གླིང་བུའི་སྒྲ༴། །ཤིན་ཏུ་ཡིད་འོང་༴། །གསང་མཆོད་བདེ་བའི༴། །ༀ་བཛྲ་ཝཾ་སེ་ཨཱཿཧཱུྃ། གསང་མཆོག་ཕྲིན་ལས༴། །སྐུ་མདོག་ལྗང་མཛེས་རྫ་རྔའི་སྒྲ༴། །ཤིན་ཏུ་ཡིད་འོང་༴། །གསང་མཆོག༴། །ༀ་བཛྲ་མིནྡྷ་ཨཱཿཧཱུྃ། ཧཱུྃ། དུང་ཆེན་ཡེ་ཤེས་ལྔ་ཡི་གཞལ་(༡༤)ཡས་སུ། །རྩ་བརྒྱད་སྟོང་ལ་སྦྱར་བའི་ཨ་མྲ྇་ཏ། །དུས་གསུམ་རྒྱལ་བ་རྒྱ་མཚོ་མཉེས་བྱེད་འདི། །བླ་མ་ཡི་དམ་དཀྱིལ་འཁོར་ལྷ་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །དྲིན་ཆེན་རྩ་བའི་བླ་མའི་ཞལ་དུ་སརྦ་པཉྩ་ཨ་མྲ྇་ཏ་ལ་ཁ་རཾ་ཁཱ་ཧི། རྒྱལ་བ་དགོངས་བརྒྱུད་བླ་མའི་ཞལ་དུ་སརྦ་པཉྩ་ཨ་མྲ྇་ཏ་ལ་ཁ་རཾ་ཁཱ་ཧི། རིག་འཛིན་བརྡ་བརྒྱུད་བླ་མའི་ཞལ༴། །གང་ཟག་སྙན་བརྒྱུད་བླ་མའི་ཞལ༴། །རྫོགས་ཆེན་བརྒྱུད་པའི་བླ་མའི་ཞལ༴། །ཕྱག་ཆེན་བརྒྱུད་པའི་བླ་མའི་ཞལ༴། །གཅོད་ཡུལ་བརྒྱུད་པའི་བླ་མའི་ཞལ༴། །བསྐྱེད་རྫོགས་བརྒྱུད་པའི་བླ་མའི་ཞལ༴། །མདོ་སྔགས་བརྒྱུད་པའི་བླ་མའི་ཞལ༴། །ཞི་བ་བཞི་བཅུ་རྩ་གཉིས་ཞལ༴། །ཁྲག་འཐུང་ལྔ་བཅུ་རྩ་བརྒྱད་ཞལ༴། །ཡེ་ཤེས་ལས་གྲུབ་མཁའ་འགྲོའི་ཞལ༴། །དཔལ་ལྡན་སྔགས་ཀྱི་སྲུང་མའི་ཞལ༴། །མགོན་པོ་ལེགས་ལྡན་ནག་པོའི་ཞལ༴། །ཤན་པ་སྲོག་སྒྲུབ་ནག་མོའི་ཞལ༴། །གཟའི་དགེ་བསྙེན་ཆེན་པོའི་ཞལ༴། །གནོད་སྦྱིན་ཤན་པ་དམར་ནག་ཞལ༴། །དམ་ཅན་རྡོ་རྗེ་ལེགས་པའི་ཞལ༴། །གཏེར་བདག་དམ་ཅན་རྒྱ་མཚོའི་ཞལ་༴། །ལྷ་རབས་མཆེད་དགུ་འཁོར་བཅས་ཞལ༴། །འཛམ་གླིང་བརྟན་མ་བཅུ་གཉིས་ཞལ། གུ་རུ་དེ་ཝ་ཌཱ་ཀི་ནཱི་ཀཱ་ཡ་ཝཱཀ་ཙིཏྟ་སིདྡྷི་ཧཱུྃ།

གཏོར་མའི་མཆོད་པ་ནི། ཧཱུྃ། ཞལ་ཟས་སྣ་ཚོགས་གཏོར་ཆེན་ལ། །ཤ་ལྔ་བདུད་རྩི་ལྔའི་རྒྱན་ལྡན། །དྲི་མཆོག་རོ་བརྒྱ་ལྡན་པ་ཡི། །བ་ལིཾ་རྒྱན་གྱི་གཏོར་མ་བཞེས་སུ་གསོལ། །ༀ་ཨཱཿཧཱུྃ་མཧཱ་བ་ལིཾ་ཏ་ལ་ཁཱ་རཾ་ཁཱ་ཧི། དྲིན་ཆེན་རྩ་བའི་བླ་མའི་ཞལ་དུ་ༀ་ཨཱཿཧཱུྃ་མཧཱ་བ་ལིཾ་ཏ་ལ་ཁ་རཾ་ཁཱ་ཧི། རྒྱལ་བ་དགོངས་བརྒྱུད་བླ་མའི་ཞལ༴། ཞེས་པ་བདུད་རྩི་འབུལ་བ་དང་མཚུངས་སོ། །

རཀྟའི་མཆོད་པ་ནི། ཧཱུྃ། རྒྱུད་དྲུག་རང་བཞིན་དབྱིངས་སུ་བསྒྲལ་བའི་ཁྲག །རཀྟ་དམར་གྱི་ཨརྒྷཾ་མཆོད་པར་འབུལ། །ༀ་ཨཱཿཧཱུྃ་མཧཱ་རཀྟ་ལ་ཁཱ་ཧི། རྒྱལ་བ་དགོངས་བརྒྱུད་བླ་མའི་ཞལ༴། ༀ་ཨཱཿཧཱུྃ་མཧཱ་རཀྟ་ལ་ཁ་རཾ་ཁཱ་ཧི། ཞེས་གཏོར་མ་འབུལ་བ་དང་མཚུངས་སོ། །བསྟོད་པ་གོང་གི་ཕྱག་འཚལ་བྱེད་དོ། །

བསྙེན་སྒྲུབ་ནི། རང་གི་ཐུགས་ཀར་ཟླ་བ་དང་ཉི་མའི་དཀྱིལ་འཁོར་གྱི་དབུས་སུ་ཨ་དམར་པོའི་མཐའ་སྐོར་དུ་བོ་དྷི་ཙིཏྟའི་སྔགས་དང་ༀ་རུ་ལུ་རུ་ལུའི་སྔགས་ཕྲེང་གཡོན་སྐོར་དུ་འཁོར་བ་ལས། འོད་ཟེར་སྤྲོ་བསྡུའི་བསྙེན་སྒྲུབ་བྱའོ། །ༀ་བོ་དྷི་ཙིཏྟ་མཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཞེས་བརྒྱ་དང་། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ། ཅེས་པ་བརྒྱ་སྟོང་དུ་མས་སྒྲུབ་པ་བྱའོ། །

ཚོགས་མཆོད་ནི། ལས་ཀྱི་སློབ་མས་ཕྱག་རྒྱ་ཕྲིན་སྔགས་ནི། ཧོ་དགོངས་སུ་གསོལ་ལོ། །སྣང་སྲིད་བདེ་བ་ཆེན་པོའི་དཀྱིལ་འཁོར་དུ། །འདོད་ཡོན་རྒྱན་གྱི་མཆོད་པས་རོལ་པའི་ཕྱིར། །ཚོགས་ཀྱི་ཡོ་བྱད་བྱིན་གྱིས་རློབ་པར་ཞུ། །འཚལ། བདུད་རྩིས་བསང་། སྭ་བྷཱ་ཝས་སྦྱངས། ཧཱུྃ། རྡོ་རྗེ་ལྟ་བུའི་ཡེ་ཤེས་ཀྱིས། །ཆོས་རྣམས་(༡༥)སྒྱུ་མར་རིག་པའི་ཕྱིར། །དངོས་དང་དངོས་འཛིན་བག་ཆགས་ཀུན། །ཡི་གེ་རྃ་ཁྃ་ཡྃ་གསུམ་གྱིས། །བསྲེག་ཅིང་བཀྲུས་ཏེ་གཏོར་བྱས་ནས། །དག་པར་མ་གྱུར་གང་ཡང་མེད། །རྃ་ཡྃ་ཁྃ་སྭཱ་ཧཱ། ༀ་ཨཱཿཧཱུྃ་ཧྲཱིཿཏྲཱྃ། ཡི་གེ་རྣམ་ལྔའི་རང་བཞིན་ལས། །ཞལ་ཟས་དངོས་པོ་ཡི་གེ་ལྔ། །ཡི་གེ་སྒྲ་དང་བཅས་པ་ཡི། །ཚོགས་ཀྱང་འོད་དུ་ལྟེམ་གྱིས་ཞུ། །འོད་ཕུང་འབར་བའི་བྱིན་རླབས་ཀྱིས། །རྒྱལ་བའི་ཐུགས་དམ་སྐོང་གྱུར་ཅིག །གུ་རུ་དེ་ཝ་ཤཱནྟིཾ་ཀྲོ་དྷ་ཌཱ་ཀི་ནཱི་ཨེ་ཀ་ཛ་ཊཱི་མཧཱ་ཀཱ་ལ་རེ་མ་ཏི་ཁྱི་ཁ་ལེ་མ་རུ་མ་ཙེ་བཛྲ་ས་དྷུ་སརྦ་ས་མ་ཡཿཛཿཛཿཞེས་བྱིན་གྱིས་བརླབས་ནས་མཆོད་པ་ནི། རྒྱལ་བ་དགོངས་བརྒྱུད་བླ་མའི་ཞལ་དུ་ག་ཎ་ཙཀྲ་པཱུ་ཛ་ཁཱ་ཧི། བརྒྱུད་རིམ་གོང་དང་འདྲ།

བཤགས་པ་ནི། ཧོ་དགོངས་སུ་གསོལ། བདག་ཅག་མ་རིག་འཁྲུལ་པའི་དབང་གྱུར་པས། །སྐུ་གསུང་ཐུགས་དང་རྩ་བ་ཡན་ལག་གི། །དམ་ལས་འགལ་ཞིང་ཉམས་པར་གྱུར་ཏོ་འཚལ། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །ཐོག་མེད་བག་ཆགས་འཁྲུལ་པའི་དབང་གྱུར་པས། །ཚོར་དང་མ་ཚོར་ཉམས་ཆག་ཅི་མཆིས་པ། །ཐུགས་རྗེ་ཆེན་པོའི་སྤྱན་སྔར་བཤགས་པར་བགྱི། །ཚངས་པ་དོན་གྱི་དངོས་གྲུབ་སྩལ་དུ་གསོལ། །བསྙེན་སྒྲུབ་མ་ཚང་ཕུད་དང་གཙང་སྦྲ་ཉམས། །དུས་སུ་མ་མཆོད་ལེ་ལོ་གསོག་འཇོག་བགྱིས། །ལྟ་བ་མ་རྟོགས་སྒོམ་པ་མ་གསལ་ཞིང་། །སྤྱོད་པ་བག་མེད་བགྱིས་པ་མཐོལ་ལོ་བཤགས། །བླ་མ་མཆེད་ལྕམ་རྡོ་རྗེ་སྤུན་ལ་སྨད། །སྡིག་དང་ཉོན་མོངས་རང་གར་གྱུར་ཏོ་འཚལ། །འཕྲལ་དང་ཡུན་གྱི་སྒྲིབ་པ་ཅི་མཆིས་པ། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །ཚངས་པ་དོན་གྱི་དངོས་གྲུབ་སྩལ་དུ་གསོལ། །ཡི་གེ་བརྒྱ་པ་བཟླའོ། །

ཚོགས་དྲང་བ་ནི། ཧོཿ དཔའ་བོ་ཆེན་པོ་དགོངས་སུ་གསོལ། །འདིར་ནི་ཆོས་རྣམས་བཟང་པོར་ལྟོས། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་ཕག །རང་བཞིན་གཅིག་ཏུ་དགོངས་ཏེ་རོལ། །

ལེན་པ་ནི། བདེ་བར་གཤེགས་པ་ཆོས་ཀྱི་སྐུ། །འདོད་ཆགས་ལ་སོགས་དྲི་མ་སྤངས། །གཟུང་འཛིན་རྣམ་པར་བྲལ་བ་ཡི། །དེ་བཞིན་ཉིད་ལ་བདག་ཕྱག་འཚལ། །ཨ་ལ་ལ་ཧོཿ

དེ་ནས་ཚོགས་ལྷག་གཏོང་བ་ནི། ༀ་ཨཱཿཧཱུྃ་གིས་བདུད་རྩིར་གྱུར། ཧཱུྃ། ཆོས་རྣམས་མཉམ་ཉིད་ཀློང་ཡངས་སུ། །ཕུད་དང་ལྷག་མ་གཅིག་ཏུ་བསྲེ། །ཐམས་ཅད་ཀུན་བཟང་རོལ་པའི་རྒྱན། །མཆོད་པར་མི་འོས་གང་ཡང་མེད། །དང་པོར་ཕུད་ཀྱིས་མི་མཆོད་དུ། །དཔལ་ཆེན་འཁོར་བཅས་ཕུད་ལ་དགྱེས། །བར་དུ་ཚོགས་ཀྱིས་མི་བསྐང་དུ། །ཡི་དམ་མཁའ་འགྲོ་ཚོགས་ལ་དགྱེས། །ཐ་མར་ལྷག་མས་མི་བརྔན་དུ། །སྲིད་བཞི་སྡེ་བརྒྱད་ལྷག་ལ་དགྱེས། །ཕུད་ལ་དགྱེས་པ་ཕུད་ལ་རོལ། །ཚོགས་ལ་དགྱེས་པ་ཚོགས་ལ་རོལ། །ལྷག་ལ་དགྱེས་པ་ལྷག་ལ་རོལ། །དགྱེས་ཤིང་གྲུབ་པའི་དངོས་གྲུབ་སྩོལ། །(༡༦)ༀ་ཨུཙྪིཥྚ་བ་ལིཾ་ཏ་ཁཱ་ཧི།

དེ་ནས་གཏོར་མ་དཔགས་ལ་ཆད་ཐོ་བཏང་བ་ནི། ཧཱུྃ། སྔོན་ཚེ་འདས་དུས་བསྐལ་པའི་དང་པོ་ལ། །འོག་མིན་དགའ་ལྡན་ཞེས་བྱའི་གནས་མཆོག་ཏུ། །བཅོམ་ལྡན་དཔལ་ཆེན་ཁྲག་འཐུང་ཆེན་པོ་ཡིས། །སྣང་སྲིད་མ་མོ་དམ་ལ་བཏགས་པའི་ཚེ། །ཀེ་སེང་རྟ་གདོང་སྲིང་མོར་བཅས་རྣམས་ཀྱིས། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །རང་རང་སྲོག་གི་སྙིང་པོ་ཕུལ་ནས་སུ། །བཀའ་ཡི་གཏོར་མ་ལེན་པར་མ་ཆད་དམ། །བཅོལ་བའི་ཕྲིན་ལས་སྒྲུབ་པར་མ་ཆད་དམ། །རྣལ་འབྱོར་ཚེ་སྲོག་སྲིང་བར་མ་ཆད་དམ། །རྒྱུ་སྦྱོར་རྐྱེན་ངན་ཟློག་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །ཤ་ཁྲག་དམར་གྱི་གཏོར་མ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །དེ་འོག་བར་གྱི་བསྐལ་པའི་བར་མ་ལ། །བལ་ཡུལ་ཡང་ལེ་ཤོད་ཀྱི་གནས་མཆོག་ཏུ། །སློབ་དཔོན་ཆེན་པོ་པདྨ་འབྱུང་གནས་དང་། །མཁས་པའི་མངའ་བདག་བི་མ་མི་ཏྲ་ཡིས། །རྡོ་རྗེ་དབྱིངས་ཀྱི་དཀྱིལ་འཁོར་ཞལ་ཕྱེས་ཚེ། །རྡོ་རྗེ་དབྱིངས་ཀྱི་སྲུང་མ་ཡོངས་འདུས་ནས། །སོ་སོའི༴། །རང་རང་༴། །བཀའ་ཡི༴། །བཅོལ་བའི༴། །རྣལ་འབྱོར༴། །རྒྱུ་སྦྱོར༴། །སྔོན་ཚེ༴། །ཤ་ཁྲག༴། །ཐུགས་དམ༴། །དེ་འོག་ཐ་མ་བསྐལ་པའི་སྙིགས་མ་ལ། །ཡར་ཀླུང་ཤམ་པོ་གངས་ཀྱི་ར་བ་རུ། །རིག་འཛིན་ཆེན་པོ་ཀུ་མ་རཱ་ཛ་དང་། །རྫོགས་ཆེན་རྣལ་འབྱོར་ཀློང་ཆེན་རབ་འབྱམས་ཀྱིས། །བྱང་ཆུབ་སེམས་ཀྱི་དཀྱིལ་འཁོར་ཞལ་ཕྱེས་ཚེ། །སྔགས་སྲུང་གཟའ་དང་དམ་ཅན་ཡོངས་འདུས་ནས། །སོ་སོའི༴། །རང་རང་༴། །བཀའ་ཡི༴། །བཅོལ་པའི༴། །རྣལ་འབྱོར༴། །རྒྱུ་སྦྱོར༴། །སྔོན་ཚེ༴། །ཤ་ཁྲག༴། །ཐུགས་དམ༴། །མ་མ་ཧྲཱིང་ཧྲཱིང་ཨ་མྲ྇་ཏ་ཁཱ་ཧི། ཞེས་བཤལ་ཆུས་བརྟན་མ་བསྐྱང་ངོ་། །ༀ་ཡེ་དྷརྨཱ་ནས། ཤྲ་མ་ཎ་སྭཱ་ཧཱ།

ཤིས་བརྗོད་ནི། རྒྱལ་མཚན་རྩེ་མོ་དབང་གིས་རྒྱལ་པོ་ལྟར། །ལྷག་པ་ལྷ་ཡི་གཙུག་གི་རྒྱན་གྱུར་པ། །སྒྲུབ་པ་པོ་ལ་དངོས་གྲུབ་མཆོག་སྩོལ་བའི། །དཔལ་ལྡན་བླ་མ་རྣམས་ཀྱི་བཀྲ་ཤིས་ཤོག །དབུས་ཀྱི་ཕྱོགས་ནས་བཀྲ་ཤིས་དོན་གྱི་ལྷ། །རྣམ་པར་སྣང་མཛད་བཀྲ་ཤིས་དོན་གྱི་ལྷ། །དེ་བཞིན་རིགས་ཀྱི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཤར་གྱི་ཕྱོགས་ནས་བཀྲ་ཤིས་དོན་གྱི་ལྷ། །རྡོ་རྗེ་སེམས་དཔའ་བཀྲ་ཤིས་དོན་གྱི་ལྷ། །རྡོ་རྗེ་རིགས་ཀྱི༴། །བཀྲ་ཤིས༴། །ལྷོ་ཡི་ཕྱོགས་ནས༴། །རིན་ཆེན་འབྱུང་གནས་བཀྲ་ཤིས༴། །རིན་ཆེན་རིགས་ཀྱི་བཀྲ་ཤིས་གང་ལགས་པ། །བཀྲ་ཤིས༴། །ནུབ་ཀྱི་ཕྱོགས་ནས་བཀྲ་ཤིས༴། །སྣང་བ་མཐའ་ཡས་བཀྲ་ཤིས༴། །པདྨ་རིགས་ཀྱི་བཀྲ་ཤིས་གང་༴། །བཀྲ་ཤིས༴། །བྱང་གི་ཕྱོགས་ནས༴། །དོན་ཡོད་གྲུབ་པ༴། །ལས་ཀྱི་རིགས་ཀྱི༴། །བཀྲ་ཤིས༴། །རྒྱལ་བ་སྲས་བཅས་བསོད་ནམས་མཐུ་དག་དང་། །ལྷ་རྣམས་ཀུན་གྱིས་(༡༧)ལེགས་པར་བསམ་པ་དང་། །གསང་སྔགས་རིག་སྔགས་རྣམས་ཀྱི་མཐུ་སྟོབས་དང་། །བདེན་པ་སྨྲ་བ་རྣམས་ཀྱི་བདེན་ཚིག་གིས། །བསོད་ནམས་རི་བོ་བཞིན་དུ་བརྟན་པ་དང་། །བརྒྱུད་འཛིན་ཉི་ཟླ་བཞིན་དུ་གསལ་བ་དང་། །སྙན་གྲགས་ནམ་མཁའ་བཞིན་དུ་ཁྱབ་གྱུར་པའི། །གསུམ་པོ་དེས་ཀྱང་དེང་འདིར་བདེ་ལེགས་ཤོག །བགེགས་རིགས་སྟོང་ཕྲག་སོགས་ནས་བདེ་ལེགས་ཤོག །ལོ་བརྒྱ་ཐུབ་ཅིང་སོགས་བདེ་ལེགས་ཤོག །སྦྱིན་པ་གཏོང་ཞིང་སོགས་བདེ་ལེགས་ཤོག །འབྱུང་པོ་གང་དག་འདིར་ནི་སོགས་སྤྱོད་པར་ཤོག །མི་འགྱུར་ལྷུན་པོ་སོགས་ཤོག །བཅོམ་ལྡན་འདས་ཀྱིས་སྤྱན་སྔ་རུ། །སྒྲུབ་པར་མཛད་པའི་གང་ཟག་ལ། །བུ་བཞིན་སྐྱོང་བར་ཞལ་བཞེས་པའི། །ཆོས་སྐྱོང་སྲུང་མ་རྣམས་ཀྱི་བཀྲ་ཤིས་ཤོག །ཟབ་ཅིང་རྒྱ་ཆེ་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ཡི་བཀྲ་ཤིག་ཤོག །ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །སོགས་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་རླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ནས། །དགེ་ལེགས་བསམ་པ་ཡིད་བཞིན་འགྲུབ་པ་དང་། །ཚེ་རིང་ནད་མེད་བདེ་སྐྱིད་ལྡན་པར་ཤོག །འབད་དང་རྩོལ་བས་མ་གོས་པའི། །སོགས་བཀྲ་ཤིས་ཤོག །འཇིག་རྟེན་འདྲེན་པའི་གཙོ་བོ་ཚེ་དཔག་མེད། །སོགས་བཀྲ་ཤིས་ཤོག །ཉིན་མོ་བདེ་ལེགས་མཚན་བདེ་ལེགས། །སོགས་དཀོན་མཆོག་གསུམ་གྱི་བཀྲ་ཤིས་ཤོག །ཅེས་བཀྲ་ཤིས་བརྗོད།

བཟོད་པར་གསོལ་བ་ནི། མ་འབྱོར་པ་དང་ཉམས་པ་དང་། །གཙོ་བོའི་ནུས་པ་མ་མཆིས་པ། །འདིར་ནི་བགྱིས་པ་གང་ལགས་པ། །དེ་ཀུན་མགོན་པོས་བཟོད་པར་མཛོད། །ཡི་གེ་བརྒྱ་པ་བཟླ་བར་བྱའོ། །ༀ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ ཡེ་ཤེས་པ་གཤེགས། དམ་ཚིག་པ་དཀྱིལ་འཁོར་གཙོ་བོ་ལ་བསྡུ། གཙོ་བོ་ཐུགས་ཀའི་ས་བོན་ལ་མི་དམིགས་པར་བསྡུའོ། །སླར་ཡང་སྒོ་གསུམ་ཁྱེར་སོ་གསུམ་དུ་བྱའོ། །

རང་བཞིན་དག་པའི་དགེ་བ་འདིས། །འཁོར་བ་ངན་སོང་དོང་སྤྲུགས་ཏེ། །སྲིད་ན་འགའ་ཡང་མི་གནས་ཤིང་། །ཐམས་ཅད་སངས་རྒྱས་ཉིད་ཐོབ་ཤོག །སངས་རྒྱས་བསྟན་པ་དར་ཞིང་རྒྱས་པར་ཤོག །སེམས་ཅན་ཐམས་ཅད་བདེ་ཞིང་སྐྱིད་པར་ཤོག །ཉིན་དང་མཚན་དུ་ཆོས་ལ་སྤྱོད་པར་ཤོག །རང་གཞན་དོན་གཉིས་ལྷུན་གྱིས་གྲུབ་པར་ཤོག །དེ་ལྟར་ཞི་ཁྲོའི་སྒྲུབ་དཀྱིལ་རིམ་པ་ཞིག །མདོ་ཙམ་བརྗོད་ལས་བསོད་ནམས་(༡༨)གང་ཐོབ་པ། །དེ་ཡིས་འགྲོ་ཀུན་ཚོགས་ཆེན་གཉིས་རྫོགས་ཏེ། །རྒྱལ་བ་རྒྱ་མཚོའི་གོ་འཕང་མྱུར་ཐོབ་ཤོག །དེང་སང་འགྲོ་བ་ཚིག་ཉུང་དོན་འདུས་པའི། །ཚུལ་ལ་མོས་ཕྱིར་ཚིག་ཉུང་མན་ངག་འདིས། །སྐལ་ལྡན་སྐྱེ་བོའི་ཚོགས་རྣམས་དགའ་བར་མཛོད། །རྒྱལ་བ་ཞི་ཁྲོའི་སྒྲུབ་དཀྱིལ་རིན་པོ་ཆེའི་གཏེར་མཛོད་ཅེས་བྱ་བ་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་ཨོ་རྒྱན་རྫོང་དུ་བཀོད་པ་རྫོགས་སོ།། །།དགེའོ།། །།

འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ།

དང་པོ། ལོ་རྒྱུས་ཀྱི་ལེའུ།

༄༅། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ་བཞུགས་སོ། །

༄༅། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཤིན་ཏུ་རྣམ་དག་པདྨོའི་མདངས་འདྲ་ཀུན་མཁྱེན་སྦྲང་རྩིའི་སྙིང་པོ་ཅན། །གཞན་ཕན་ཐུགས་རྗེའི་འདབ་སྟོང་རབ་རྒྱས་གྲགས་པའི་དྲི་བསུང་མ་སྨད་པ། །འཇམ་པའི་དབྱངས་ཞེས་ཕྱོགས་བཅུར་རབ་གྲགས་སངས་རྒྱས་ཀུན་གྱིས་བསྔགས་པའི་མགོན། །བློ་གྲོས་བདེ་འབྱུང་གཙུག་གིས་མཛེས་བྱས་ངག་གི་དབང་པོའི་ཞབས་ལ་འདུད། །སྔོན་ཆད་བླ་མ་རྣམས་ཀྱི་སྙན་ནས་སྙན། །གཅིག་ནས་གཅིག་བརྒྱུད་ཡི་གེར་མ་བཀོད་ཅིང་། །ཀུན་ལ་མ་གྲགས་ཟབ་མོའི་གནད་རྣམས་དང་། །གཞུང་དུ་བཀོད་པ་རྣམས་ནས་འདིར་བརྗོད་བྱ། །ལོ་རྒྱུས་རྗེས་གནང་སྒྲུབ་པ་དང་། །སྤོགས་དང་ཁ་བསྒྱུར་སྦྱིན་སྲེག་དང་། །ལས་ཚོགས་དང་ནི་རྣམ་བདུན་གྱིས། །འཇམ་དཔལ་སྒྲུབ་པའི་རིམ་པ་བཤད། །

དེ་ལ་ཡིད་ཆེས་པའི་ཡན་ལག་ཏུ་བླ་མ་བརྒྱུད་པའི་ལོ་རྒྱུས་ནི། སངས་རྒྱས་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན། མ་ག་དྷའི་གྲོང་ཁྱེར་དང་ཉེ་བའི་གཙུག་ལག་ཁང་ཞིག་ན་རྒན་པོ་ལོ་དགུ་བཅུ་རྩ་དགུ་ལོན་པ་ཞིག་ཕྱི་མ་ལ་བག་ཆགས་བཞག་པའི་ཕྱིར་པཎྜི་ཏ་སུ་མ་ཏི་ཀཱིརྟི་ལ་ཡི་གེ་སློབ་ཅིང་འདུག་གོ། །དེའི་ཚེ་ཡུལ་དེའི་རྒྱལ་པོ་འཁོར་དང་བཅས་པ་དེ་བར་འོངས་པས་དེ་མཐོང་ནས་རྒན་པོ་དེ་ལ་སྨྲས་པ། ཀྱེ་རྒན་པོ་ཁྱོད་ནི་བྱིས་པའི་རང་བཞིན་དུ་གྱུར་ཏམ། འདི་ལྟར་གཟོད་ཡི་གེ་དག་ལ་སློབ་པ་བརྩོན། ཅེས་མ་རངས་བཞིན་དུ་སྨྲ་བ་ཐོས་ནས། དེ་ཡིད་རབ་ཏུ་མི་དགའ་བས་ད་ནི་ཡི་གེ་སློབ་པ་བཏང་སྟེ་སྒྲུབ་པ་ཞིག་བྱའོ་སྙམ་ནས། སློབ་དཔོན་ལ་བསླབ་མི་དགོས་པར་རིག་པའི་གནས་ལོབ་པའི་གདམས་ངག་ཡོད་དམ་ཞུས་པས། སློབ་དཔོན་གྱིས་འཕགས་པ་འཇམ་དཔལ་གྱི་སྒྲུབ་ཐབས་འདི་གནང་ནས། ཞག་གསུམ་བསྒྲུབས་པའི་ཕྱི་མ་ལ་རལ་གྲི་དྲངས་ནས་འཕགས་པ་འཇམ་དཔལ་དོ་ནུབ་ཞལ་མི་སྟོན་ན་རང་ཉིད་ཀྱི་རྐེ་བཅད་ལ་འཆི་བར་བྱའོ་ཞེས་དམ་བཅས་ཏེ་བསྒྲུབས་པས། ནམ་ལངས་སུ་འཇམ་པའི་དབྱངས་ཞལ་མངོན་སུམ་དུ་བསྟན་ནས་བྱིན་གྱིས་(༡༩)བརླབས་པས་རྒན་པོ་དེ་ཉིད་བྱིས་པ་ལོ་བརྒྱད་ལོན་པ་ལྟར་གྱུར་ནས་སྡེ་སྣོད་གསུམ་དང་རིག་པའི་གནས་ཐམས་ཅད་ལ་མཁས་པར་གྱུར་ཏེ། སློབ་དཔོན་ཆེན་པོ་མཉྫུ་ཤྲཱི་ཞེས་བྱ་བར་གྲགས་སོ། །དེས་རྗེ་བཙུན་དམ་པ་རྒྱ་གར་ལ་གནང་། དེ་ནས་རིམ་པ་བཞིན་དུ་དམ་པ་ཀུན་དགའ། སྨོན་ལམ་འབར། ཤེས་རབ་སེང་གེ། ཆོས་ཀྱི་བླ་མ། ཀུ་མཱ་ར་ཀཱིརྟི། ཀུ་མཱ་ར་བློ་གྲོས། བླ་བྲང་པ་ཆོས་དཔལ་རྒྱལ་མཚན། སྙན་ངག་མཁན་ངག་གི་དབང་པོ། རི་ཁྲོད་སེང་གེའོ། །ལོ་རྒྱུས་ཀྱི་ལེའུ་སྟེ་དང་པོའོ།། །།

གཉིས་པ། རྗེས་གནང་གི་ལེའུ།

དེ་ལྟར་བླ་མ་དམ་པ་རྣམས་ལས་བརྒྱུད་པའི་རྗེ་བཙུན་འཇམ་པའི་དབྱངས་སྒྲུབ་པ་ལ་དང་པོ་རྗེས་སུ་གནང་བ་ཐོབ་དགོས་པས་དེའི་རིམ་པ་ནི། གནས་དབེན་པར་འཇམ་དཔལ་སྨྲ་བའི་སེང་གེའི་རྟེན་མཆོད་པ་དང་བཅས་པ་བཤམས་ལ། སློབ་དཔོན་ཉིད་འཇམ་དཔལ་དུ་མོས་པའི་ཕྲག་པ་གཡོན་དུ་དབྱངས་ཅན་མ། སྟེང་གི་ནམ་མཁའ་ལ་བླ་མ་དང་སངས་རྒྱས་དང་བྱང་ཆུབ་སེམས་དཔའི་ཚོགས་བཞུགས་པར་བསམས་ལ། ཡན་ལག་བདུན་པ་བྱས་ཏེ་གཏོར་མ་འབུལ། དེ་ནས་སློབ་མ་རྣམས་ཀྱིས་སློབ་དཔོན་ཉིད་འཇམ་དཔལ་དངོས་སུ་བསམ་པ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བར་མོས་པ་བྱས་ཏེ། ཡན་ལག་བདུན་པ་དང་། ཁྱད་པར་དུ་ལུས་དབུལ་བའི་མཆོད་པ་ཕུལ་ནས། ཆོས་ཐམས་ཅད་སྟོང་པའི་ངང་ལས་སློབ་མ་རྣམས་འཇམ་དཔལ་དུ་བསྐྱེད་པའི་ཕྲག་པར་དབྱངས་ཅན་མ། ཐུགས་ཀར་པདྨ་དང་ཟླ་བའི་སྟེང་ན་ཙཀྲ་དམར་པོ་རྩིབས་བཞི་པའི་ལྟེ་བ་ལ་རལ་གྲི་སོར་བཞིའི་ཆང་ཟུང་ལ་དྷཱིཿདང་རྩེ་མོ་ལ་ཧྲཱིཿས་མཚན་པའི་མཐའ་སྐོར་དུ་རྩ་བའི་སྔགས་ཀྱིས་བསྐོར་བ་ལ་སོགས་པ་སྒྲུབ་ཐབས་བཞིན་བསམས་ལ་ཡེ་ཤེས་པ་བཅུག་སྟེ། སློབ་དཔོན་གྱི་ཕྲག་པའི་དབྱངས་ཅན་མ་དང་། ཐུགས་ཀའི་ཙཀྲ་རལ་གྲི་དང་བཅས་པ་ལ་འོད་ཟེར་བྱུང་བ་སློབ་མའི་ཕྲག་པའི་དབྱངས་ཅན་མ་དང་སྙིང་གའི་འཁོར་ལོ་རལ་གྲི་དང་བཅས་པ་ལ་ཐིམ་པར་བསམ་པའི་འོད་ཀྱིས་བསྐུལ་བས། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའི་ཐུགས་ཀ་ནས་ཀྱང་འོད་བྱུང་ནས་སློབ་མ་ལ་ཐིམ་པར་བསམ་ཞིང་། སློབ་དཔོན་གྱི་ཕྲེང་བ་བཟུང་སྟེ་སྔགས་ཀྱི་རྗེས་ཟློས་ལན་གསུམ་བྱས་པས། སློབ་མ་དག་འཇམ་དཔལ་དངོས་སུ་གྱུར་པའི་འོད་ཟེར་གྱིས་ཐམས་ཅད་ཀྱི་བློ་ཡི་མུན་པ་ཐམས་ཅད་བསལ། འཕགས་པ་མཆོད། ཚུལ་འདུས་ཤེས་རབ་དང་སྤོབས་པའི་དངོས་གྲུབ་ཀྱི་བདུད་རྩིའི་ཆུས་ལུས་ཐམས་ཅད་གང་། ཐུགས་ཀའི་འཁོར་ལོར་དམིགས་པ་འཛིན་དུ་བཅུག་ལ་དར་ཅིག་མཉམ་པར་བཞག་ལ། དགེ་བ་བསྔོ། བཀྲ་ཤིས་བརྗོད། མེ་ཏོག་གཏོར་རོ། །རྗེས་གནང་གི་ལེའུ་སྟེ་(༢༠)གཉིས་པའོ།། །།

གསུམ་པ། སྒྲུབ་པའི་ལེའུ།

དེ་ལྟར་རྗེས་སུ་གནང་བ་ཐོབ་ནས་སྒྲུབ་པ་ལ་འཇུག་པར་བྱ་སྟེ། དེ་ཡང་སྔོན་དུ་རྫས་བསག་ཅིང་སྐྱབས་འགྲོ་སེམས་བསྐྱེད་བྱ་བ་དང་། དངོས་གཞི་ལྷ་བསྒོམ་ཞིང་སྔགས་བཟླ་བ། རྗེས་རྫོགས་རིམ་བསྒོམ་ཞིང་བསྔོ་བ་བྱ་བ་དང་གསུམ་ལས། དང་པོ་ལ་གཉིས་ཏེ། རྫས་བསག་ཅིང་རྟེན་དགྲམ་པ་དང་། སྐྱབས་འགྲོ་སེམས་བསྐྱེད་བྱ་བའོ། །དང་པོ་ནི། སྤང་རྒྱན་དཀར་པོ། གླ་རྩི། མཚལ་དཀར། ཡུང་བ། ཙན་དན་དམར་པོ། ཨ་ག་རུ་ནག་པོ། སྤང་སྤོས། དབང་པོ་ལག་པ་སྡེར་མོ་ལྔ་པ། ཤུ་དག་དཀར་པོ། ཨ་རུ་ཤ་ཆེན། ཤིང་མངར། རྒྱ་སྐྱེགས་རྣམས་ཞིབ་པར་བཏགས་ལ། སྦྲང་དཀར་དང་བ་དམར་མོའི་འོ་མས་རིལ་བུ་བརྒྱ་རྩ་བརྒྱད་བྱས་ལ། དར་རམ་ཤོག་བུ་སེར་པོ་ལ་པདྨ་དམར་པོ་འདབ་བརྒྱད་མུ་ཁྱུད་རིམ་པ་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་ཧྲཱིཿ རྩེ་མོར་དྷཱིཿ འདབ་མ་རྣམས་ཀྱི་དབུས་སུ་རྩ་བའི་སྔགས། རྩེ་མོ་ལ་ཧྲཱིཿ མུ་ཁྱུད་ནང་མ་ལ་ཨཱ་ལི། བར་མ་ལ་ཀཱ་ལི། ཕྱི་མ་རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པར་བླུགས་ལ། དར་རམ་ཤོག་བུ་ལ་འཁོར་ལོ་རྩིབས་ཆེན་བརྒྱད་མུ་ཁྱུད་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་དྷཱིཿ རྩེ་མོ་ལ་ཧྲཱིཿ རྩིབས་རྣམས་ཀྱི་དབུས་སུ་རྩ་སྔགས། རྩེ་མོར་དྷཱིཿ མུ་ཁྱུད་གསུམ་པ་ལ་ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པས་བཀབ་ལ། གནས་དབེན་པར་མཎྜལ་པདྨ་སེར་པོ་འདབ་བརྒྱད་ཀྱི་དབུས་སུ་མེ་ཏོག་བཀྲམ་པའི་དབུས་སུ་ལྷུང་བཟེད་དམ་རིན་པོ་ཆེའི་སྣོད་འབྲུས་བཀང་བའི་ཁར་རིལ་བུ་འཁོར་ལོ་དང་བཅས་པ་བཞག །འཇམ་དབྱངས་ཀྱི་རྟེན་དགྲམ། མཆོད་པ་བཤམ། རྟེན་གྱི་མདུན་དུ་ལྷུང་བཟེད་འོང་བར་བྱ། དེ་ནི་རྟེན་བཤམ་པའོ། །འདིར་གཞུང་གཅིག་ནས་འཁོར་ལོ་བྲི་བ་ནི་འདི་ལྟར་བཞེད་དོ། །དར་རམ་རས་ལ་འཁོར་ལོ་རྩིབས་བཞི་པའི་ལྟེ་བར་རང་གི་སྤེལ་ཚིག །ཤར་གྱི་རྩིབས་ལ་ཧྲཱིཿ ལྷོར་སི། ནུབ་ཏུ་བཻ། བྱང་དུ་བྷཻ་རྣམས་བྲིས་པའི་དབུས་སུ་རིལ་བུ་བླུགས་ནས། ཡང་པདྨ་འདབ་བརྒྱད་མུ་ཁྱུད་གསུམ་པའི་ལྟེ་བར་རལ་གྲིའི་ཆང་ཟུང་ལ་དྷཱིཿ རྩེ་མོར་ཧྲཱིཿ བར་དུ་རྩ་སྔགས། པད་འདབ་བརྒྱད་ཀྱི་རྩེ་མོར་ཧྲཱིཿ རྩ་བར་དྷཱིཿ དབུས་སུ་རྩ་བའི་སྔགས། མུ་ཁྱུད་གསུམ་ལ། ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་བྲིས་པས་སྟེང་ནས་དགབ། དེའི་སྟེང་དུ་དར་དམར་པོའི་གདུགས་ཕུབ་ལ་སྔ་མ་བཞིན་དུ་བྱ་གསུངས་སོ། །དེ་ལྟར་འཁོར་ལོ་གང་བྲིས་ཀྱང་སྟེང་འཁོར་གྱི་ཡིག་མགོ་ཕྱིར་བསྟན་ལ་གཡས་སྐོར་དུ་བྲི་ཞིང་། འོག་འཁོར་གྱི་ཡིག་མགོ་ཕྱིར་བསྟན་ལ་གཡོན་སྐོར་དུ་བྲི་བའི་སྣག་ཚ་མཚལ་རྒྱ་སྐྱིགས་གི་ཝཾ་གསུམ་ལ་བྱའོ། །འཁོར་ལོའི་མན་ངག་གོ། །དེ་ནས་ཟླ་བ་དང་ཉི་མ་ཡར་འཕེལ་གྱི་(༢༡)ཚེས་གཅིག་གམ་བརྒྱད་དམ་བཅོ་ལྔ་ནས་སྒྲུབ་པའི་མགོ་བརྩམ་པར་བྱ་སྟེ། ཐོ་རངས་སྔ་བར་མལ་ནས་ལངས་ཏེ་ནམ་མཁའི་དབྱིངས་སུ་དབྱངས་ཅན་མ་ལ་བཀྲ་ཤིས་ཀྱི་ལྷ་མོ་དཔག་ཏུ་མེད་པས་བསྐོར་བ་རྣམས་ཀྱིས་རྡོ་རྗེའི་གླུ་དང་བཀྲ་ཤིས་པའི་ཚིགས་སུ་བཅད་པ་དང་། ༀ་ཧྲཱིཿདྷཱིཿལ་སོགས་པའི་རིག་པ་བརྗོད་པས་བསྐུལ་བར་བསམས་ལ་ལངས་ཏེ། ཁྲུས་དང་གཙང་སྦྲ་སྔོན་དུ་སོང་ནས། སྟན་བདེ་བ་ལ་ཤར་དུ་ཕྱོགས་པས་འདུག་སྟེ། སྐྱབས་སུ་འགྲོ་བ། ཚད་མེད་པ་བཞི་སྒོམ་པ་དང་། བྱང་ཆུབ་ཏུ་སེམས་བསྐྱེད་ནས། ༀ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་གིས་ཆོས་ཐམས་ཅད་སྟོང་པ་ཉིད་དུ་བསམ། སྟོང་པའི་ངང་ལས་ྃ་ཞེས་བརྗོད་པས་ཕྱི་སྣོད་ཀྱི་འཇིག་རྟེན་ཐམས་ཅད་ཞིང་ཁམས་རྣམ་པར་དག་པ་བདེ་བ་ཅན་བཞིན་དུ་གྱུར་པའི་དབུས་ཀྱི་ནམ་མཁའ་ལ། སྃ་ལས་སེང་གེ་སྔོན་པོ་ལངས་པའི་སྟེང་དུ། པྃ་ལས་སྣ་ཚོགས་པདྨའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་རྃ་ལས་ཉི་མའི་སྟེང་དུ་རང་གི་སེམས་ཉིད་ཡི་གེ་དྷཱིཿདམར་པོ་ཚེག་དྲག་དང་བཅས་པ་ལས་འོད་ཟེར་དམར་པོ་ཕྱོགས་བཅུར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། སླར་འདུས་དྷཱིཿལ་ཐིམ་པས་རང་ཉིད་འཇམ་དཔལ་སྨྲ་བའི་སེང་གེ་སྐུ་མདོག་དམར་པོ་ཞལ་གཅིག་ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱའི་བར་ནས་ཨུཏྤ་ལའི་རྩ་བ་འཛིན་པས་སྙན་དྲུང་དུ་འདབ་མ་ཁ་བྱེ་བའི་གཡས་གཡོན་གྱི་སྟེང་དུ་རལ་གྲི་དང་པུསྟི་བསྣམས་པ། ཞབས་གཉིས་སྐྱིལ་ཀྲུང་ཕྱེད་པའམ་རྡོ་རྗེ་སྐྱིལ་ཀྲུང་གིས་བཞུགས་པའི་སྐུ་སྨད་ལ་དར་སྣ་ཚོགས་ཀྱི་ན་བཟའ་དང་སྐུ་སྟོད་ལ་ལྷའི་གོས་པཉྩ་ལི་ཀས་གཡོགས་ཤིང་། ཞལ་འཛུམ་པའི་ཐོར་ཚུགས་ཀྱི་རྩེ་མོར་ནོར་བུའི་རིན་པོ་ཆེས་བརྒྱན་པ། པདྨ་དང་ནོར་བུ་དང་ཨུཏྤ་ལའི་ཆུན་པོ་སྤེལ་བའི་ཐོད་ཀྱི་བར་ན་རིན་པོ་ཆེ་དང་ཟུར་ཕུད་ལྔ་རབ་ཏུ་གསལ་བའི་སྙན་གོང་ཨུཏྤལ་ལ་ཁ་བྱེ་ཞིང་། སྙན་ཤལ་ནོར་བུ་འཕྱང་བས་མཛེས་པ། རིན་པོ་ཆེ་དང་མེ་ཏོག་སྣ་ཚོགས་པའི་དབུ་རྒྱན། མགུལ་རྒྱན། སྙན་ཆ། དོ་ཤལ། གདུ་བུའི་སིལ་ཁྲོལ་སྣ་ཚོགས་པས་བརྒྱན་པ། གཞོན་ནུ་ལོ་བརྒྱད་ལོན་པའི་ངང་ཚུལ་ཅན་འོད་ཟེར་དམར་པོ་རབ་ཏུ་འཕྲོ་ཞིང་ཟླ་བའི་རྒྱལ་ཡོལ་ཅན་ཤིན་ཏུ་མཛེས་པ་གཅིག་ཏུ་བསམ་པའི་ཐུགས་ཀར་པདྨ་དང་ཟླ་བའི་དབུས་སུ་ྃ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པའི་དབུས་སུ་རལ་གྲི་སོར་བཞི་པའི་ཆང་ཟུང་ལ་དྷཱིཿ རྩེ་མོ་ལ་ཧྲཱིཿ བར་གྱི་སྦལ་ལ་མཱུྃ། རྩིབས་ཀྱི་དབུས་སུ་རྩ་བའི་སྔགས་རྣམས་མར་མེའི་ཕྲེང་བ་བསྒྲིགས་པ་ལྟར་འོད་གསལ་བས་ཡིད་ཀྱི་མུན་པ་མ་ལུས་དག་པར་བྱེད་པར་བསམ། འདིར་བླ་མ་ཁ་ཅིག །རལ་གྲི་ཆང་ཟུང་གི་དྷཱིཿདང་རྩེ་མོའི་ཧྲཱིཿའི་བར་གྱི་སྦལ་རྩ་སྔགས། རྩིབས་ཀྱི་རྩེ་མོར་ཧྲཱིཿ རྩ་བར་དྷཱིཿ བར་དུ་རྩ་སྔགས་འགོད་པའང་བཞེད་ལ། ཁ་ཅིག་རལ་གྲི་ལ་ས་བོན་གཉིས་བཀོད་ནས། རྩིབས་ལ་དྷཱིཿརེ་རེ་སྒོམ་པ་ཡང་ཕྱག་བཞེས་སུ་མཛད་དོ། །གང་ལྟར་སྒོམ་ཡང་དམིགས་པ་(༢༢)མ་གསལ་བར་དུ་གཅེས་སོ། །དེ་ནས་ཐུགས་ཀའི་རལ་གྲི་ལས་འོད་འཕྲོས་པས། མདུན་གྱི་ལྷུང་བཟེད་ཀྱི་ནང་དུ་པདྨ་དང་ཟླ་བའི་སྟེང་དུ་རིལ་བུ་དེ་རྣམས་འོད་དུ་ཞུ་བ་ལས་ཧྲཱིཿསྔོན་པོ་འོད་དུ་འཕྲོ་བ་གཅིག་ཏུ་གྱུར་པའི་འོད་ཀྱིས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྔོན་མོ་འཛུམ་ཁྲོ་རབ་ཏུ་བརྗིད་པ། ཞལ་གཅིག་ཕྱག་གཉིས་ཕྱག་མཚན་དང་བཞུགས་ཚུལ་ཡབ་དང་མཐུན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། འོད་ཟེར་སྔོན་པོ་འཕྲོ་ཞིང་གཞོན་ནུ་མ་ལོ་བརྒྱད་ལོན་པ་ལྟ་བུའི་ཐུགས་ཀར་པདྨ་དང་ཟླ་བའི་སྟེང་དུ་པདྨ་འདབ་མ་བཞི་དང་ལྡན་པའི་དབུས་སུ་རལ་གྲིའི་ཆང་ཟུང་ལ་ཧྲཱིཿདང་རྩེ་མོར་དྷཱིཿབར་གྱི་སྦལ་ལ་མཱུྃཿའདབ་མ་རྣམས་ལ་རྩ་བའི་སྔགས་རྣམས་གཡོན་སྐོར་དུ་ཡབ་ཀྱི་འཁོར་ལོ་བས་སོར་བཅུ་ཆས་དམའ་བ་ཁ་སྦྱར་གྱི་ཚོད་དུ་ཡོད་པའི་དཔངས་མཐོ་དམན་དུ་བསམ། འདིར་ཡང་སྔ་མ་བཞིན་བླ་མ་དེ་དག་སྔགས་ཀྱི་འགྲེས་ཡབ་ཀྱིས་མཚོན་པར་བཞེད་དོ། །དེ་ལྟར་བསྒོམས་པའི་ཐུགས་ཀ་ནས་ཡིག་འབྲུ་ལས་འཕྲོས་པའི་འོད་ཟེར་གྱིས་རང་བཞིན་གྱི་གནས་དང་རི་བོ་རྩེ་ལྔ་ནས་ཡབ་ཡུམ་ཇི་ལྟར་བསྒོམ་པ་དེ་འདྲ་བའི་ཡེ་ཤེས་པ་གཉིས་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་སྤྱན་དྲངས་ལ་མཆོད་དོ། །ཡབ་ལ་ཡབ་ཡུམ་ལ་ཡུམ་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་གཉིས་སུ་མེད་པར་ཐིམ་པར་བསམ་ལ། ཐུགས་ཀའི་འཁོར་ལོ་ལས་འོད་བྱུང་བས་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་མི་ཤེས་པའི་མུན་པ་ཐམས་ཅད་བསལ་ནས་ཡེ་ཤེས་ཀྱི་སྣང་བ་རྒྱས་པར་བསམས་ལ། རྩེ་གཅིག་ཏུ་མ་ཡེངས་པས་ཡིག་འབྲུ་རལ་གྲི་དང་བཅས་པ་ལ་སེམས་མཉམ་པར་བཞག་གོ། །འདིའི་དུས་ན་ལུས་དྲང་པོར་འདུག་ལ་སྟེང་རླུང་མནན། འོག་རླུང་བསྡམ། མིག་སྣ་རྩེར་གཏད། སེམས་ཡིག་འབྲུ་ལ་བཟུང་ལ། མིག་མ་འགུལ་བས་རླུང་དལ་བུས་ཐུབ་ཐང་དུ་ནང་དུ་བཟུང་བ་དང་། ཕྱིར་འཕང་བ་དང་དབང་དུ་གནས་པར་བྱ་བ་ནི་མན་ངག་དམ་པའོ། །དེ་ལྟར་སྒོམ་པས་སྐྱོན་བཟླས་པ་དང་སྤྲོ་བསྡུའི་རྣལ་འབྱོར་ལ་སེམས་བཟུང་བ་ནི། དེ་ལྟར་འཇམ་དཔལ་ཡབ་ཡུམ་ལ་སངས་རྒྱས་དང་བྱང་ཆུབ་སེམས་དཔའ་ས་གཞི་དང་བར་སྣང་གང་བས་བསྐོར་བར་བསམ་པ་རྣམས་ཀྱི་སྐུའི་འོད་ཀྱིས་རང་གཞན་གྱི་མི་ཤེས་པའི་མུན་པ་ཐམས་ཅད་བསལ། ཡེ་ཤེས་སྣང་བ་ཆེན་པོ་རྒྱས་པར་བསམ་ཞིང་། འཇམ་དཔལ་ཐུགས་ཀའི་དྷཱིཿལས་སྔགས་ཀྱི་ཕྲེང་བ་རྣམས་མར་མེ་ལས་མར་མེ་ཆད་པ་ལྟར་འོད་ཀྱི་ཚུལ་དུ་ཡིག་འབྲུ་རྣམས་སྣ་བུག་གཡས་སུ་ཐོན། ཡུམ་གྱི་གཡོན་དུ་ཞུགས་ཐུགས་ཀའི་ཧྲཱིཿལས་གྲོལ་བའི་ཚུལ་དུ་སྣ་བུག་གཡས་ནས་ཐོན། འཇམ་དཔལ་གྱི་གཡོན་དུ་ཞུགས་ཏེ་འགལ་མེ་ལྟར་འཁོར་བ་དང་མཉམ་དུ་བདག་གི་ཐུགས་ཀའི་སྔགས་ལས་འོད་ཟེར་ཕར་བྱུང་བ་དང་ལྷ་མོའི་ཐུགས་ཀ་ནས་(༢༣)ཚུར་བྱུང་བ་གཉིས་ལྕགས་ཀྱུ་བཞིན་དུ་སྒྲིལ་ནས་འཁོར་བར་བསམ་པའི་སྔགས་ཕྲེང་དང་འོད་ཟེར་གྱི་ཕྲེང་བར་འཁོར་བའི་ཕྲེང་བ་ལས་འོད་ཟེར་དཔག་ཏུ་མེད་པ་ཕྱིར་འཕྲོས་པའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་དང་། ཉི་མ་དང་། ཟླ་བ་དང་། གཟའ་དང་། སྐར་མ་དང་། རྩི་ཤིང་ནགས་ཚལ་ལ་སོགས་པའི་འོད་གཟི་བརྗིད་ཚེ་བསོད་ནམས་ཤེས་རབ་ཐམས་ཅད་ཚུར་བསྡུས་ཐུགས་ཀའི་རལ་གྲི་སྔགས་དང་བཅས་པ་ལ་ཐིམ་པས་བདག་ཉིད་ཤེས་རབ་ཕུན་སུམ་ཚོགས་པར་གྱུར། ཡང་ཕྱིར་འཕྲོས་པའི་འོད་ཀྱིས་སྣོད་ཀྱི་འཇིག་རྟེན་ལ་ཕོབ། རིན་པོ་ཆེའི་གཞལ་ཡས་ཁང་དང་ཞིང་ཁམས་དག་པར་བསམ། ཡང་འོད་འཕྲོས་བཅུད་ཀྱི་སེམས་ཅན་ལ་ཕོག་པས་སེམས་ཅན་ཐམས་ཅད་འཇམ་དཔལ་གྱི་སྐུ་དང་། སྒྲ་སྐད་ཐམས་ཅད་སྔགས་ཀྱི་རྒྱལ་པོ་ཉི་ཤུ་རྩ་གཅིག་པོའི་རང་སྒྲར་བསམས་ལ། ཡང་འོད་འཕྲོས་ནུས་པ་ཐམས་ཅད་བཀུག །རང་གི་སྤྱི་བོར་ཐིམ་ཞིང་ཡེ་ཤེས་ཀྱི་སྣང་བ་རྒྱས་པར་བསམས་ལ། རྩ་བའི་སྔགས་ཅི་འགྲུབ་བཟླས་པ་བྱའོ། །

དེ་ནས་རྫོགས་པའི་རིམ་པ་ལ་སེམས་བཟུང་བ་ལ། མཚན་མ་དང་བཅས་པ་དང་། མཚན་མ་མེད་པ་གཉིས་ལས། མཚན་མ་དང་བཅས་པ་ནི། དེའི་རྗེས་ལ་མཚན་མོ་ཉལ་བའམ། འཕྲོ་གཅོད་པའི་ཚེ་གང་རུང་གི་ངང་ལ་བཞག་པར་གསུངས་ཀྱང་ཕྱག་ལེན་ལ་འདི་ལྟར་མཛད་དོ། །དེ་ཡང་སྔ་དྲོ་དང་ཕྱི་དྲོ་གུང་གི་ཐུན་རྣམས་ལ་བསྐྱེད་རིམ་བཟླས་བརྗོད་དང་བཅས་པ་ཟིན་པའི་རྗེས་ལ། རང་གི་ལྟེ་བའི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དམར་པོ་མར་མེ་འབར་བ་ལྟ་བུ་ཞིག་བསམ་པའི་འོད་ཀྱིས་སྤྱི་གཙུག་གི་ཧྃ་དཀར་པོ་མགོ་ཐུར་དུ་ལྟ་བ་ལ་ཕོག་པས་བདུད་རྩིའི་རྒྱུན་བབས་ལྟེ་བའི་མེ་ལ་ཕོག་པས་ཐིག་ལེ་དེ་ཇེ་གསལ་དུ་གྱུར་པ་ནི། དཔེར་ན་མར་མེ་ཟད་ཀ་སྣུམ་ཐིགས་བབས་པ་བཞིན་གྱུར་པས་ལུས་ངག་ཡིད་གསུམ་གྱི་མུན་པ་ཐམས་ཅད་བསལ། ཡེ་ཤེས་ཀྱི་བདུད་རྩིས་ཁེངས་པར་བསམས་ལ། དེ་ནས་ཡང་རང་གི་སྙིང་གའི་འཁོར་ལོ་འོད་དུ་གྱུར་པ་སྙིང་གི་ཁོང་སེང་དུ་མར་མེ་འབར་བ་ལྟ་བུའི་འོད་ཀྱིས་དབུས་དང་ཕྱོགས་མཚམས་བརྒྱད་དུ་བུག་པ་བཏོད་པ་ལས་འོད་འཕྲོས་པས་སྤྱི་བོའི་ཧྃ་ལ་ཕོག་བས་བདུད་རྩིའི་རྒྱུན་བབས། བུག་པ་དགུ་ནས་མར་བྱུང་བས་སྙིང་གི་ནང་ཐམས་ཅད་ཁེངས་པར་བསམས་ལ། བདེ་གསལ་མི་རྟོག་པའི་ངང་ལ་བཞག་གོ། །

གཉིས་པ་ནི། སྲོད་ཀྱི་ཐུན་གྱི་རྗེས་ལ། ཐུགས་ཀའི་རལ་གྲིའི་དྷཱིཿལས་འོད་འཕྲོས་པས་ཕྱི་སྣོད་ཀྱི་འཇིག་རྟེན་ལ་ཕོག་འོད་དུ་ཞུ་ནང་བཅུད་ཀྱི་སེམས་ཅན་ལ་ཐིམ། དེ་ཡང་འོད་དུ་ཞུ་ནས་མདུན་གྱི་དབྱངས་ཅན་མར་ཐིམ། དེ་ཡང་འོད་དུ་ཞུ་ནས་འཇམ་དཔལ་གྱི་ཐུགས་ཀར་ཐིམ། དེ་ཡང་རིམ་གྱིས་སྐུ་སྟོད་སྨད་ཐུགས་ཀའི་འཁོར་ལོ། དེ་རལ་གྲི། དེ་ཧྲཱིཿ དེ་དྷཱིཿ དྷཱིཿའོད་དུ་ཞུ་ནས་ཐིག་ལེ་དམར་པོ་(༢༤)ཞིག་ཏུ་གྱུར་པ་ལ་དར་ཅིག་སེམས་གཏད། དེ་ནས་ཐིག་ལེ་ལས་ཐིག་ལེ་སྔོན་པོ་གཅིག་ཆད་པས་གཉིས་སུ་གྱུར་པ་ལ་སེམས་གཏད། དེ་ནས་དེ་གཉིས་ཅུང་ཟད་འགུལ་བར་བསམས་ལ་རྩ་བའི་སྔགས་བརྗོད་མ་ཐག་ཐིག་ལེ་དེ་གཉིས་རྡོ་འཕངས་པ་ལྟར་ནམ་མཁར་ཡར་ཐལ་མར་ཐལ་ཕར་ཐལ་ཚུར་ཐལ་སོང་ནས་ནམ་མཁའ་དང་སེམས་ཅན་གྱིས་གར་ཁྱབ་ཏུ་སོང་བར་བསམས་ལ། རྩ་བའི་སྔགས་ཅི་འགྲུབ་བརྗོད་ལ། ཉལ་བའི་དུས་སུ་ཐིག་ལེ་དེ་གཉིས་གཅིག་ཏུ་གྱུར། དེ་ཡང་འོད་དུ་ཞུ་ནས་ནམ་མཁའ་ལ་ཐིམ་པས་སྣང་བ་ཐམས་ཅད་དམར་ལམ་གྱིས་སོང་བར་བསམས་ལ་གང་དུ་ཡང་མི་རྟོག་པའི་ངང་ལ་ཕྱམ་གྱིས་ཉལ་ལོ། །

བསྡུས་ནས་བཞག་པ་ནི། ཡབ་ཡུམ་གང་རུང་གི་ཐུགས་ཀའི་ས་བོན་ལ་དམིགས་ལ་རྩ་བའི་སྔགས་བཟླས་པས་ཆོས་ཐམས་ཅད་བརྗོད་དུ་མེད་པའི་ངང་དུ་ཕྱམ་གྱིས་གྱུར་པར་བསམས་ལ་ཉལ་ལོ། །དེ་དག་གི་མཐར་དགེ་བ་མི་དམིགས་པའི་ངང་ནས་བླ་ན་མེད་པའི་བྱང་ཆུབ་ཏུ་བསྔོའོ། །དེ་ལྟར་གྲངས་ཀྱིས་བསྙེན་པ་འབུམ་ཕྲག་བདུན། དུས་ཀྱི་བསྙེན་པ་ཞག་ཉི་ཤུ་རྩ་གཅིག །མཚན་མའི་བསྙེན་པ་འགྲུབ་པའི་རྟགས་མ་བྱུང་གི་བར་དུ་བྱའོ། །

དེ་ལྟར་བྱས་པས་བསྙེན་པ་འགྲུབ་པའི་རྟགས་གསུམ་ལས། རབ་མངོན་སུམ་དུ་འོང་བ་ནི། ལྷུང་བཟེད་ཀྱི་རིལ་བུ་རྒྱལ་པོ་བཞིར་མཐོང་བ་དང་། དབྱངས་ཅན་མར་མཐོང་བ་དང་། ཉི་མ་ཟླ་བར་མཐོང་བ་དང་། འོད་དང་དུ་བར་མཐོང་བའོ། །འབྲིང་ལ་ཉམས་སྣང་དུ་དེ་དག་འབྱུང་བའོ། །ཐ་མ་ལ་རྨི་ལམ་དུ་འོད་ཆེན་པོ་དང་། དུ་བ་དང་། རྔ་དང་། དུང་དང་། རོལ་མོའི་སྒྲ་དང་། མེ་ཏོག་འཛུགས་པ་དང་། འབྲུ་བ་དང་། ཞིང་རྨོ་བ་དང་། སྣག་ཚ་འཐུང་བ་དང་། གླུ་གར་བྱེད་པ་དང་། ཡི་གེ་འབྲི་ཀློག་དང་། ཉི་ཟླ་ཤར་བ་ལ་སོགས་པའོ། །དེ་དག་གང་བྱུང་ཡང་སྔར་བཤད་པའི་ཡོན་ཏན་དེ་དག་འབྱུང་ཞིང་གྲུབ་པའི་རྟགས་ཡིན་ནོ། །

འདི་ལྟར་སྒྲུབ་པའི་ཚེ་རྫུན་དང་། ཤ་ཆང་དང་། སྒོག་ཙོང་དང་། སྔོ་ངད་དང་། འཁོན་དང་། ཞེ་སྡང་དང་། སྡིག་གྲོགས་དང་། མྱ་ངན་དྲག་པོ་བྱེད་པའི་སར་འགྲོ་བ་དང་བྱེད་པ་དང་། སྨྲེ་སྔགས་ལ་སོགས་པ་སེམས་ལ་གནོད་པ་སྟེ། ལུས་སེམས་མི་གཙང་བ་དེ་དག་སྤངས་ལ་གཙང་སྦྲ་ཁོ་ན་གལ་ཆེའོ། །སྒྲུབ་པའི་ལེའུ་སྟེ་གསུམ་པའོ།། །།

བཞི་པ། སྤོགས་པའི་ལེའུ།

དེ་ལྟར་དུ་བསྒྲུབས་ཀྱང་རྟགས་མ་བྱུང་ན། དོན་བཞི་པ་སྤོགས་པའི་ཆོ་ག་ནི། རང་ཉིད་དབྱངས་ཅན་མ་བསྒོམ་ཞིང་མདུན་དུ་འཇམ་དཔལ་བསྒོམས་ཏེ་རང་གི་སྣ་བུག་གཡོན་ནས་མདུན་གྱི་གཡས་སུ་ཞུགས་ཏེ་འཁོར་བར་བསམ་ཞིང་། འོད་ཀྱི་ཕྲེང་བ་ཡང་སྔ་མ་ལས་ལྡོག་པའི་ཚུལ་དུ་བྱས་ལ། ༀ་དྷཱིཿཧྲཱིཿམ་མེ་དཱི་པ་མཉྫུ་ཤྲཱི་མཱུྃ་ཧྲཱིཿཔྲཛྙཱ་བརྡྷ་ནི་དྷཱིཿཧྲཱིཿསྭཱ་ཧཱ། ཞེས་བཟླས་ཏེ་སྤྲོ་བསྡུ་སྔ་མ་བཞིན་བྱས་ལ། འཁོར་ལོའི་ཡི་གེ་དང་རལ་གྲི་ཐུར་དུ་འཕྱང་བ་ལ་སེམས་བཟུང་ལ་བཟླས་པས་སྔར་གྱི་རྟགས་མི་འབྱུང་མི་(༢༥)སྲིད་དོ། །རྟགས་བྱུང་བ་དང་སྔ་མ་བཞིན་བསྒོམ་མོ། །སྤོགས་པའི་ལེའུ་སྟེ་བཞི་པའོ།། །།

ལྔ་པ། ཁ་སྒྱུར་གྱི་ལེའུ།

དེ་ལྟར་སྒོམ་ཞིང་སྒྲུབ་པའི་དུས་སུ་རང་ཇི་ལྟར་འདོད་པའི་དངོས་གྲུབ་འགྲུབ་པའི་ཁ་བསྒྱུར་ནི། བསྐྱེད་རྫོགས་རྣམས་སྒོམ་ཚུལ་སྔ་མ་བཞིན་བྱས་ཏེ། སྔགས་དང་འོད་ཟེར་གྱི་ཕྲེང་བའི་འོད་ཀྱིས་འཆད་པ་དང་། རྩོད་པ་དང་། རྩོམ་པ་ལ་སོགས་པའི་ཤེས་རབ་གང་འདོད་ཀྱང་དེའི་དངོས་གྲུབ་སངས་རྒྱས་དང་བྱང་ཆུབ་སེམས་དཔའ་ཉན་རང་ལ་སོགས་པའི་ཤེས་རབ་དེ་ཉིད་བསྡུས་ནས་རང་གི་ལུས་ཁེངས་ཏེ་གང་འདོད་པའི་ཤེས་རབ་དང་ལྡན་པར་བསམ། དེ་བཞིན་དུ་དབང་དུ་བྱ་བ་ཕ་རོལ་གྱི་སེམས་དང་། ངག་བརྐུ་བ་དང་འཕྲོག་པ་ལ་སོགས་པ་འཆད་པར་འགྱུར་བ་དེ་དག་དེ་བཞིན་དུ་ཐོབ་པར་བསམས་ལ་བྱས་པས་དེ་ཁོ་ན་བཞིན་དུ་འགྲུབ་པའོ། །ཁ་སྒྱུར་གྱི་ལེའུ་སྟེ་ལྔ་པའོ།། །།

དྲུག་པ། སྦྱིན་སྲེག་གི་ལེའུ།

དེ་ལྟར་ཇི་ལྟར་འདོད་པའི་དངོས་གྲུབ་ཀྱི་རྟགས་དང་ལྡན་པས་དེའི་སྦྱིན་སྲེག་བྱས་ལ་དངོས་གྲུབ་མྱུར་དུ་འགྲུབ་ཅིང་བརྟན་པར་བྱ་བ་ནི། གནས་དེ་ཉིད་དུ་མཎྜལ་པདྨ་འདབ་བརྒྱད་བྲིས་པའི་སྟེང་དུ་ཤིང་བརྩེགས་ལ། གཡས་སུ་བསྲེས་རྫས། ཡམ་ཤིང་སོར་བརྒྱད་པ། མེ་ཏོག །བདུག་སྤོས། མར་མེ། དྲི་ཆབ། བཤོས་གཙང་། ནས། གྲོ། འབྲས། མར་ཁུ། དཱུརྦ། ཀུ་ཤ་བཞག །གཡོན་དུ་མཆོད་པ་ལྔ་གཏོར་མ་དང་བཅས་བཞག་ནས། ཐབ་ཀྱི་ནང་དུ་མེ་སྦར་ལ་འཇམ་དཔལ་ཡབ་ཡུམ་བསྐྱེད་ལ་ཡེ་ཤེས་པ་གཞུག །རིན་ཆེན་འབྱུང་ལྡན་གྱིས་དབུར་བརྒྱན། ཕྱག་དང་མཆོད་པ་མདོར་བསྡུས་བྱས་ལ། བསྲེག་རྫས་རྣམས་ༀ་ཨཱཿཧཱུྃ་གསུམ་གྱིས་བདུད་རྩིར་བསམས་ལ་རྩ་བའི་སྔགས་སམ། ༀ་ཧྲཱིཿདྷཱིཿམཱུྃཿསྭཱ་ཧཱ། བདག་གི་པྲཛྙཱ་པུཥྚིཾ་ཀུ་རུ་སྭཱ་ཧཱ། ཞེས་པས་རེ་རེ་བཞིན་དབུལ། འབུལ་བ་རྣམས་རྫོགས་པ་དང་གཏོར་མ་བཏང་ལ། བསྟོད་པ་བྱས་ཏེ་འདོད་པའི་དོན་ལ་གསོལ་བ་བཏབ་ནས། ཡེ་ཤེས་པ་གཤེགས་པ་ནི། ༀ། ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་བརྗོད། དམ་ཚིག་པ་བདག་ལ་བསྡུས་ནས་ལས་ཀྱི་རྗེས་མི་མངོན་པར་བྱ་ཞིང་། ཐལ་བ་རི་རྩེ་འམ་ཆུ་ཀླུང་ཆེན་པོར་དོར་བས་ཤེས་རབ་ཆེན་པོ་འཕེལ་ཞིང་རྒྱས་པར་འགྱུར་རོ། །སྦྱིན་སྲེག་གི་གྲངས་ནི་སྟོང་ཕྲག་བདུན་ནོ། །སྦྱིན་སྲེག་གི་ལེའུ་སྟེ་དྲུག་པའོ།། །།

བདུན་པ། ལས་ཚོགས་ཀྱི་ལེའུ།

དེ་ནས་ལས་ཚོགས་ཀྱི་རིམ་པ་ལ། རིལ་བུ་བཟའ་བ། ཚེ་དང་འབྱོར་པ་སྤེལ་བ། གཏོར་མ། དབང་དུ་བསྡུ་བ། ངག་བསྡུ་བ། མངོན་ཤེས་སྒྲུབ་པ། རིག་པ་འཛིན་པ། ཞལ་ལ་བལྟ་བ་དང་བརྒྱད་ལས། དང་པོ་ནི། དེ་ལྟར་བསྒྲུབས་པའི་རྟགས་(༢༦)རྣམས་རྫོགས་ཤིང་སྦྱིན་སྲེག་བྱས་པའི་རྗེས་ལ། མདུན་གྱི་རིལ་བུ་རྣམས་བཟའ་བའི་ལས་ཚོགས་ནི། སྒྲུབ་པ་དང་སྦྱིན་སྲེག་ཐོན་པའི་ནངས་པར་མདུན་གྱི་དབྱངས་ཅན་མ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་རྣམས་འོད་དུ་ཞུ་ནས་རིལ་བུའི་རང་བཞིན་དུ་བསམ་པ་ལས་འོད་འཕྲོས་པས་ཕྱོགས་བཅུའི་ཚེ་དང་དཔལ་འབྱོར་དང་། གཟི་བརྗིད་དང་། ཁྱད་པར་དུ་གང་འདོད་པའི་དངོས་གྲུབ་ཤེས་རབ་དག་བསྡུས་ནས་དེ་ལ་ཐིམ་པས་ཚེ་དང་བཀྲག་དང་གཟི་བརྗིད་རྒྱས་པར་འདོད་ན། རིལ་བུ་རྣམས་ཡེ་ཤེས་ཀྱི་བདུད་རྩི་ཁ་དོག་ལྔ་དང་ལྡན་པར་བསམས་ལ། འཁོར་ལོས་དྲིལ་ལ་མགུལ་དུ་བཅངས་ནས་ཞག་ཉི་ཤུ་རྩ་གཅིག་གི་ཉི་མ་རྩེ་ཤར་ལ་རིལ་བུ་དེ་རྣམས་ཀྱི་ནང་ནས་རིལ་བུ་ལྔ་ལྔ་བདུད་རྩིར་བསམས་ཏེ། རང་ཉིད་འཇམ་དཔལ་དུ་མོས་པས་ཁོང་དུ་མིད་པས་ཚེ་དང་བཀྲག་དང་གཟི་བརྗིད་རྒྱས་པར་བསམས་ལ། ལྷག་མ་བརྒྱད་སྒྲུབ་པའི་དངོས་གྲུབ་ཀྱི་རྟེན་དུ་ལུས་དང་མི་འབྲལ་བར་བཅང་ངོ་། །དེ་བཞིན་དུ་འཆད་པ་ལ་དཔལ་བེའུ་དང་། རྩོད་པ་ལ་རལ་གྲི་དང་། རྩོམ་པ་ལ་པདྨ་དཀར་པོ་དང་། གྲགས་པ་ཕུན་སུམ་ཚོགས་པ་ལ་དུང་དང་། འབྱོར་པ་རྒྱས་པར་འདོད་པ་ལ་ཡིད་བཞིན་ནོར་བུ་དང་། འགྲོ་བ་དབང་དུ་བསྡུ་བ་ལ་ལི་ཁྲི་དང་། བསམས་པ་ཐམས་ཅད་འགྲུབ་པར་འདོད་པ་ལ་བུམ་པ་བཟང་པོར་བསམས་ལ་བཟའ་འོ། །དེས་ནི་ཇི་ལྟར་འདོད་པའི་དོན་ཡིད་བཞིན་དུ་འགྲུབ་པར་འགྱུར་རོ། །དེ་རྣམས་ལྷག་མ་བརྒྱད་ནི་རྟེན་དུ་བྱས་ཏེ་བཅངས་ལ། ཕྱིས་སྒྲུབ་པ་བྱེད་ནའང་དེའི་གསེབ་ཏུ་བཏགས་པས་ཉིས་འགྱུར་གྱིས་འགྲུབ་ཐག་ཉེ་ཞིང་བྱིན་རླབས་ཆེ་བ་ཡིན་ནོ། །རིལ་བུ་བཟའ་བའི་ལས་ཚོགས་སོ། །

གཉིས་པ་ཚེ་དང་འབྱོར་པ་སྤེལ་བ་ནི། གོང་གི་རིལ་བུ་དེ་རྣམས་སྒྲུབ་དུས་ནས་ཚེ་དང་འབྱོར་པ་ཐམས་ཅད་བསྡུས་ཏེ་རིལ་བུར་ཐིམ་པར་བསམས་ལ། ཞག་ཉེར་གཅིག་ཏུ་བསྒྲུབས་ནས་ཁྱད་པར་དུ་རིལ་བུ་རྣམས་སེར་པོས་ཁ་བསྒྱུར་ཞིང་། ལྷ་ཡབ་ཡུམ་གཉིས་ཀའང་སེར་པོ་བསམས་ནས་བསྒྲུབས་ཐོན་པ་དང་རིལ་བུ་སྔ་མ་བཞིན་ཟོས་ན་ཚེ་ཉི་ཟླ་དང་མཉམ་ཞིང་འབྱོར་པ་རྒྱལ་པོ་དང་འདྲ་བར་འགྱུར་རོ། །ཚེ་དང་འབྱོར་པ་སྤེལ་པའི་ལས་ཚོགས་སོ། །

གསུམ་པ་གཏོར་མ་ནི། གོང་གི་སྒྲུབ་པའི་ཐུན་མཚམས་དང་དུས་རྒྱུན་དུ་མ་ཆག་པར་ཕྱག་ལེན་དུ་མཛད་པ་དེའི་མན་ངག་ནི། རིན་པོ་ཆེ་ལ་སོགས་པའི་སྣོད་གཙང་མར་དཀར་གསུམ་མངར་གསུམ་དྲི་བཟང་སྨན་འབྲུ་ལ་སོགས་པ་བླུགས་ཏེ། སྭ་བྷཱ་ཝས་སྟོང་པར་བསམས་པའི་ངང་ལས། ྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་ཨཱཿཧཱུྃ་གསུམ་ཡོངས་སུ་གྱུར་པ་ལས་བདུད་རྩིའི་རྒྱ་མཚོ་ནམ་མཁའ་དང་མཉམ་པའི་ནང་དུ་གང་ལ་ཅི་དགོས་པའི་ཡོ་བྱད་ལྷ་དང་མིའི་ཕུན་སུམ་ཚོགས་པ་ཐམས་ཅད་བསམས་ལ། ༀ་ཨཱཿཧཱུྃ་གསུམ་གྱིས་བྱིན་(༢༧)གྱིས་བརླབས་ཏེ། མདུན་གྱི་ནམ་མཁར་པདྨའི་སྡོང་པོ་ཡངས་ཤིང་རྒྱ་ཆེ་བ་འདབ་མ་བྱེ་བ་ཕྲག་མང་པོས་བསྐོར་བའི་དབུས་སུ་འཇམ་པའི་དབྱངས་ཡབ་ཡུམ་བསམ་པའི་འདབ་མ་རྣམས་ལ་སངས་རྒྱས་དང་བྱང་ཆུབ་སེམས་དཔའ་དང་བླ་མ་བརྒྱུད་པའི་ཚོགས་དང་བཅས་པ་རྣམས་བཞུགས་པར་བསམ། དེ་ཡང་པདྨའི་འདབ་མ་མཐོ་དམན་སུམ་རིམ་དུ་ཡོད་པའི་སྟེང་གི་ནམ་མཁའ་ལ་བླ་མ། དབུས་ཀྱི་ལྟེ་བར་ཡི་དམ། འདབ་མ་བརྒྱད་པའི་དང་པོ་ལ་སངས་རྒྱས། བར་པ་ལ་བྱང་ཆུབ་སེམས་དཔའ། ཐ་མ་ལ་སྲུང་མ་དམ་ཚིག་ཅན་དང་འགྲོ་བ་རིགས་དྲུག་སྲིད་པ་བར་མ་དོའི་སེམས་ཅན་སྐྱེ་བ་བཞི་དང་བཅས་པ་རྣམས་བསམས་ལ། རང་གི་སྙིང་ག་ནས་དྷཱིཿལས་འོད་འཕྲོས་པས་དེ་ཁོ་ན་འདྲ་བའི་ཡེ་ཤེས་པ་བྱོན་ནས་དེ་རྣམས་ལ་སོ་སོར་ཐིམ་པ་བསམས་ལ། རྩ་སྔགས་ཀྱི་མཐར་ཨི་དཾ་གྲ྇ཧྞ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་ལ་ལྔའམ་བདུན་གྱིས་ཕུལ་བས། དེ་དག་གི་ཞལ་ནས་ལྗགས་རྡོ་རྗེའི་སྦུ་གུ་ཅན་ལས་འོད་བྱུང་གཏོར་མ་ལ་གསོལ་ཞིང་ཉེ་བར་མཁོ་བའི་དངོས་པོ་བསྣམས་པར་བསམས་ལ། བསྟོད་པས་བསྟོད་ནས་མཉེས་པ་ལ་བཟོད་པར་གསོལ་ཏེ། ཡེ་ཤེས་པ་དང་འཇིག་རྟེན་པའི་འཁོར་རྣམས་གཤེགས་པར་བསམ་ཞིང་། འཇིག་རྟེན་ལས་འདས་པའི་དམ་ཚིག་པ་རྣམས་རང་ལ་བསྡུས་ལ་མི་དམིགས་པའི་ངང་ལ་དར་ཅིག་བཞག་ནས་བསྔོ་བ་བྱ། དེས་ནི་དངོས་གྲུབ་ཉེ་ཞིང་བར་ཆད་ཀྱིས་མི་ཚུགས་པ་ཡིན་ནོ། །གཏོར་མའི་ལས་ཚོགས་སོ། །

བཞི་པ་དབང་དུ་བྱ་བ་ལ། འགྲོ་བ་ཕལ་པ་དབང་དུ་བསྡུ་བ་དང་། མཆོག་དབང་དུ་བསྡུ་བའོ། །

དང་པོ་ལ་གཉིས་ལས། འགྲོ་བ་སྤྱི་དབང་དུ་བྱ་བ་ནི། སྔར་གྱི་རྫས་བཅུ་གཉིས་ཀྱི་སྟེང་དུ་ལི་ཁྲི་དང་། སེང་ལྡེང་སིནྡྷུ་ར་རྣམས་སྦྱར་ལ་རྒྱ་སྐྱེགས་ཀྱིས་ཁ་བསྒྱུར་ལ། སྔར་གྱི་འཁོར་ལོ་ལ་འགྲོ་བ་ཐམས་ཅད་དབང་དུ་སྡུས་ཤིག་གི་སྤེལ་ཚིག་བྲིས་པར་བསྡུས་ལ། ལྷ་རྣམས་དམར་པོར་གསལ་བཏབ་ནས་སྔ་མ་བཞིན་སྒྲུབ་ཅིང་ཁྱད་པར་དུ་མདུན་གྱི་རིལ་བུ་དབྱངས་ཅན་མ་དམར་མོར་བསམ་པའི་ཐུགས་ཀའི་རལ་གྲི་དང་ཧྲཱིཿལས་འོད་ཟེར་འཕྲོས་པས། ལྷ་དང་ཀླུ་དང་གནོད་སྦྱིན་དང་དྲི་ཟ་དང་སྣོད་བཅུད་ཐམས་ཅད་ལ་ཕོག །འོད་དུ་ཞུ་རིལ་བུ་ལ་ཐིམ་པར་བསམ་ཞིང་། ༀ་ཧྲཱིཿདྷཱིཿམ་མེ་དཱི་པ་མཉྫུ་ཤྲཱི་མཱུྃཿཧྲཱིཿཤྲཱི་སེང་ཧོ་ཥཿམུ་པ་ཏ་མཉྫུ་ཤྲཱི་ལོ་ཀ་སརྦ་པ་ཤཾ་ཀུ་རུ་སྭཱ་ཧཱ། ཞེས་ཁྲི་ཕྲག་གཅིག་ཏུ་བཟླས་པས་རིལ་བུ་ལས་འོད་དང་། རླངས་པ་དང་། མེ་ཏོག་གི་ཆར་བྱུང་ན་འགྲུབ་པ་རབ། རྨི་ལམ་དུ་བྱུང་ན་འབྲིང་། ཐ་མ་ཡང་ཕ་རོལ་སྙིང་ལ་དུང་དུང་པ་བྱུང་ན་རིལ་བུ་འཁོར་ལོས་དྲི་བ་སྔ་མ་བཞིན་མགུལ་དུ་བཏགས་ཏེ་ཕུད་ཁ་ཅིག་བཟའ། ཁ་ཅིག་བཅང་། གཞན་རྣམས་རྒྱལ་པོའི་ཕོ་བྲང་ངམ། གླིང་ངམ། ལམ་གྱི་བཞི་མདོ་(༢༨)འམ། ཚོང་དུས་སམ། མདོར་ན་མི་མང་པོ་འདུ་བའི་སར་བ་དམར་སེར་གྱི་ལྕི་བ་དང་བསྲེས་ལ་དུད་པ་བཏང་ན་དེ་ཐམས་ཅད་དབང་དུ་འགྱུར་རོ། །

གཉིས་པ་བྱེ་བྲག་ཏུ་སྐྱེས་པ་བུད་མེད་དབང་དུ་བྱ་བ་ལ། སྔར་གྱི་རྫས་རྣམས་ཀྱི་སྟེང་དུ་པདྨ་རཀྟ་དང་གི་ཝཾ་བསྲེས་ལ་རིལ་བུ་དམར་པོ་བྱ། འཁོར་ལོ་ལ་ཡང་དེ་དང་མཐུན་པར་བྲིས་ལ་རིལ་བུ་དྲིལ་ནས་མདུན་དུ་བཞག་ལ། རང་ཉིད་འཇམ་དཔལ་དང་དབྱངས་ཅན་མར་བསྐྱེད་པ་གཉིས་ལས། ཕོ་དབང་དུ་བྱེད་ན་རང་ཉིད་དབྱངས་ཅན། མདུན་གྱི་རིལ་བུ་འཇམ་དཔལ་དུ་བསྐྱེད་ལ་ཡེ་ཤེས་པ་བཅུག་པའི་འོད་ཟེར་གྱིས་བསྒྲུབ་བྱའི་རྣམ་ཤེས་བཀུག་ནས་རིལ་བུར་བསམ་ཞིང་། མོ་དབང་དུ་བྱེད་ན་དེ་ལས་ལྡོག་པས་བསྒྲུབ་བྱ་མོའི་རྣམ་ཤེས་རང་དང་མདུན་གྱི་ལྷའི་འོད་ཟེར་གྱིས་བཀུག་པ་བདག་ལ་ཆགས་བཞིན་དུ་རིལ་བུ་ལ་ཐིམ་པར་བསམས་ལ། རྩ་སྔགས་ཀྱི་སྤེལ་ཚིག་ཏུ་ཆེ་གེ་པ་ཤཾ་ཀུ་རུ་ཧོཿབཏགས་ལ་བཟླས་ཏེ་རྟགས་བྱུང་བ་དང་སྔ་མ་བཞིན་རང་བཟའ་ཞིང་བཅང་། ཕ་རོལ་པོ་དེ་ཉིད་ཀྱི་གོས་སམ་བཟའ་བཏུང་ལ་བྱུགས་ཏེ་བྱིན་ན་གང་དབང་དུ་བྱ་བ་དེ་འགྲུབ་པར་འགྱུར་རོ། །དེ་བཞིན་དུ་འབངས་ལ་ཚ་བ་གསུམ། སྐྱེས་པ་ལ་གུར་གུམ། བུད་མེད་ལ་ཟླ་བའི་ཁུ་བ། མི་ཕལ་པ་ལ་སེང་ལྡེང་སྦྱར་ལ་བསྒྲུབ་ན་ཇི་ལྟར་འདོད་པ་དེ་དབང་དུ་འགྱུར་རོ། །

གཉིས་པ་མཆོག་དབང་དུ་བསྡུ་བ་ནི། སྔར་གྱི་རྫས་བཅུ་གཉིས་པོའི་སྟེང་དུ། རྒྱལ་པོ་ལ་ལྕགས་ཕྱེ། བཙུན་མོ་ལ་གི་ཝཾ། བློན་པོ་ལ་མགྲོན་བུ། དགེ་བའི་བཤེས་གཉེན་ལ་རིན་པོ་ཆེ། སྨན་པ་ལ་ཨ་རུ་ར་མཆུ་སྙུང་བཏང་ལ་སྔ་མ་བཞིན་སོ་སོའི་མིང་སྤེལ་ཏེ་བསྒྲུབས་པའི་རིལ་བུ་དེ་དག་ལ་བྱུག་པའམ། བཟའ་བཏུང་དུ་སྦྱར་བ་འམ། དུད་པ་བཏང་ཞིང་། རང་གི་དཔྲལ་བར་ཐིག་ལེ་བྱས་ལ་བསྒྲུབ་བྱ་ལ་བལྟས་ན་དེ་ཉིད་དབང་དུ་འགྱུར་རོ། །དབང་དུ་བསྡུ་བའི་ལས་ཚོགས་སོ། །

ལྔ་པ་ངག་བསྡུ་བ་ནི། པཎྜི་ཏའམ། དགེ་བའི་བཤེས་སམ། སྔགས་པ་ནུས་པ་ཅན་ནམ། རིགས་ཀྱི་གཙོ་བོ་དྲན་པ་ཅན་ནམ། བསྒྲུབ་བྱ་ཤེས་རབ་ཅན་ནམ། ཤགས་སམ། རྩོད་པ་དྲག་པོས་རྒོལ་བ་རྣམས་ལ་བྱ་སྟེ། དེ་ཡང་ངག་རྐུ་བ་དང་འཕྲོག་པ་གཉིས་ལས། པཎྜི་ཏའམ་དགེ་བའི་བཤེས་གཉེན་ལ་སོགས་པ་ཡུལ་མཆོག་རྣམས་ཀྱི་ངག་བརྐུ་བར་བྱ་སྟེ། དེ་ཡང་བསྒྲུབ་བྱ་དེའི་ལྕེ་ཡི་སྟེང་ན་པདྨ་དམར་པོ་འདབ་མ་བརྒྱད་པ་ཁ་ཐུར་དུ་ལྟ་བ་དང་། སྙིང་གི་ནང་དུ་པདྨ་དམར་པོ་འདབ་མ་བརྒྱད་པ་ཁ་གྱེན་དུ་བསྟན་པ་གཉིས་ཁ་སྦྱོར་གྱི་ནང་དུ། ཁོ་ཡི་རྣམ་པར་ཤེས་པ་དང་ཤེས་རབ་ཀྱི་ངོ་བོ་ཨཱ་ལི་དམར་པོ་དང་ཀཱ་ལི་དཀར་པོས་མེར་གྱིས་ཁེངས་པ་ལ། རང་གི་སྙིང་ཀའི་དྷཱིཿལས་འོད་འཕྲོས་པས་ཕྱོགས་བཅུའི་སངས་རྒྱས་ལ་སོགས་པའི་ཤེས་རབ་ཐམས་ཅད་བསྡུས་(༢༩)ནས་དེ་ལ་ཐིམ་པས་བསྒྲུབ་བྱ་དེ་ཤེས་རབ་དང་ལྡན་པར་བསམ། དེ་ནས་རང་གི་སྙིང་གའི་དྷཱིཿལས་རྣམ་ཤེས་ཀྱི་བུང་བ་དམར་པོ་གྲངས་མེད་པ་འཕྲོས་ནས་བསྒྲུབ་བྱའི་ཁོང་པར་སོང་ནས་ཨཱ་ལི་ཀཱ་ལི་རྣམས་སོ་སོར་ཁྱེར་ནས་རང་གི་སྙིང་ག་དང་ལྕེ་ཡི་སྟེང་དུ་ཐིམ་པར་བསམ་ཞིང་། རྩ་སྔགས་ཀྱི་མཐར་ཆེ་གེ་མོའི་ངག་བྷི་ཤི་ཀུ་རུ་ཧོཿཞེས་བརྒྱ་རྩ་བརྒྱད་ལ་སོགས་པ་བཟླས་ལ། ཁོ་ཡི་སྙིང་དང་ལྕེའི་པདྨ་རང་གི་སྙིང་དང་ལྕེ་ཡི་པདྨ་ལ་ཐིམ་པས། རང་གི་སྙིང་གར་འཇམ་དཔལ་དང་ལྕེ་སྟེང་དུ་དབྱངས་ཅན་མའི་འཁོར་ལོ་གསལ་བཏབ་ལ་སྔགས་བཟླས་པས། ཁོ་ཡི་དྲན་པ་དང་ཤེས་རབ་ཉམས་ནས་རང་ལ་རྒྱས་པར་འགྱུར་རོ། །

ངག་འཕྲོག་པ་ནི། གཙོ་བོའི་རྩོད་པ་དང་ཤག་འགྲན་པའི་ཟླ་ལ་སོགས་པ་རང་བས་ཡུལ་དམན་པ་རྣམས་ལ་བྱ་སྟེ། དེ་ཡང་བསྒྲུབ་བྱ་དེ་ཡི་ལུས་ཀྱི་ནང་ན་རྩ་ཨ་ཝ་དྷཱུ་ཏི་རྒྱུ་མ་ཕུས་བཏབ་པ་དྲང་པོར་གྱེན་དུ་ལངས་པ་ལྟ་བུའི་མར་སྣ་གསང་གནས་དང་ཡར་སྣ་སྨིན་མཚམས་ལ་ཐུག་པའི་ནང་དུ་ཤེས་རབ་ཀྱི་ངོ་བོ་ཁོ་ཡི་རྣམ་ཤེས་ཨ་དཀར་པོས་ཐག་གིས་གང་བའི་སྨིན་མཚམས་སུ་བུག་པ་གྲུ་གསུམ་ལ་རྩ་དེའི་ཁ་བསྟན་ནས་ཨ་རྣམས་དཀར་ཉུག་ཉུག་ཡོད་པར་བསམ། དེ་ནས་རང་གི་ཐུགས་ཀའི་དྷཱིཿལས་འོད་དམར་པོ་འཕྲོས་པས་ཁོ་ཡི་སྨིན་མཚམས་ཀྱི་བུག་པའི་ཨ་རྣམས་ལ་ཕོག །ཨ་རྣམས་རིམ་པས་ཚུར་དྲངས་ཏེ་རང་གི་ཁོང་པར་ཐིམ་པས་འཕྲལ་ལ་ཤེས་རབ་ཀྱིས་གང་ཞིང་། ཁོ་ཡི་ཤེས་རབ་འཕྲལ་ལ་ཟད་དེ་སྟོང་སངས་སོང་བར་བསམ་ཞིང་སྔར་གྱི་སྔགས་བཟླས་ཏེ། མཐར་ཁོ་ཡི་ལུས་སྟོང་པར་སོང་། རང་གི་ལུས་གང་ནས་ཤེས་རབ་རྒྱས་པར་བསམས་ལ། ཁོ་ཡི་དྲན་པ་ཉམས་ཤིང་རང་གི་དྲན་པ་སྔོན་ལས་ཁྱད་པར་དུ་འཕགས་པ་ཐོབ་པར་འགྱུར་རོ། །སླར་ཡང་བླ་མ་དམ་པ་ལས་བརྒྱུད་པའི་གདམས་པ་ནི། བསྒྲུབ་བྱ་ཕ་རོལ་པོ་ཤེས་རབ་དང་ལྡན་པ་རྣམས་ཀྱི་སྙིང་གར་པདྨའི་སྡོང་པོ་འདབ་མ་རྒྱས་པའི་སྟེང་དུ་རྣམ་ཤེས་ཀྱི་ངོ་བོ་ཨཱ་ལི་ཀཱ་ལི་རེ་བསམས་ལ། རང་གི་སྙིང་གར་འཇམ་དཔལ་གྱི་རལ་གྲིའི་དྷཱིཿལས་རྣམ་ཤེས་ཀྱི་བུང་བ་མང་པོ་འཕྲོས་པས་ཁོ་ཡི་ཁོང་པར་ཞུགས་ནས་ཡི་གེ་རྣམས་བསྡུས་ཏེ་རང་གི་ཁོང་པར་ཐིམ། ཡང་བུང་བ་རྣམས་ཁོ་ཡི་ཁོག་པར་སོང་བས་པདྨ་རྣམས་ཀྱི་བཅུད་དང་བཀྲག་དང་གཟི་མདངས་ཐམས་ཅད་འཇིབས། རང་གི་ཁོང་པའི་དྷཱིཿལ་ཐིམ་པས་ཤེས་རབ་དང་བཀྲག་མདངས་གཟི་བརྗིད་རྒྱས། ཡང་དེ་བཞིན་དུ་ཡང་ནས་ཡང་དུ་བསམ་པའི་མཐར་ཁོ་ཡི་ཁོང་པའི་པད་སྡོད་རྙིངས་ཤིང་ནུས་པ་མེད་ལ། རང་གི་སྙིང་གའི་དྷཱིཿདང་འཁོར་ལོའི་བཀྲག་མདངས་རྒྱས་ཤིང་ནུས་པ་དང་ལྡན་པར་བསམས་ནས་སྔགས་བཟླས་ན་གཞན་གྱི་ཤེས་རབ་དང་གཟི་བརྗིད་ཚེ་དང་བསོད་ནམས་ཐམས་ཅད་རང་ལ་འཕོ་བར་འགྱུར་རོ། །འདི་ནི་ཤིན་ཏུ་(༣༠)གསང་བའི་མན་ངག་ཕྱི་རབས་ཀྱི་དོན་དུ་ཡི་གེར་བཀོད་པའོ། །དབང་དུ་བྱ་བའི་ཁྱད་པར་ལས་ཤེས་རབ་རྒྱས་པར་བྱེད་པ་སྟེ། ངག་བསྡུ་བའི་ལས་ཚོགས་སོ། །

དྲུག་པ་མངོན་ཤེས་སྒྲུབ་པ་ནི། ལྷུང་བཟེད་ཀྱི་འཁོར་ལོའི་ནང་དུ་སྔར་གྱི་སྨན་རྣམས་ཀྱི་སྟེང་དུ་མུ་ཏིག་དམར་པོ་དང་ཀ་ར་སྦྱར་བའི་རིལ་བུ་བྱས་ལ། འཇམ་དཔལ་དང་དབྱངས་ཅན་མའི་སྒོམ་རིམ་སྔར་བཞིན་བྱེད་ཅིང་། ༀ་ཧྲཱིཿདྷཱིཿམ་མེ་དཱི་པ་མཉྫུ་ཤྲཱི་མཱུྃཿཧྲཱིཿཔྲཛྙཱ་དྷཱ་ཏུ་ནི་ཧྲཱིཿ། ཝཱ་ཀཱི་ཤྭ་རི་མཱུྃཿཞེས་ཁྲི་ཕྲག་གཅིག་བཟླས་ལ། ཕྱིས་ཉི་ཟླ་གཟས་འཛིན་པའི་ཚེ་དེ་བཞིན་དུ་བསྒྲུབས་ཏེ་ཟོས་ན་མངོན་པར་ཤེས་པ་དྲུག་ཁྲི་དང་ལྡན་པར་འགྱུར་རོ། །འདིར་གཞུང་ཁ་ཅིག་ལས་མུ་ཏིག་དམར་པོ། ཨ་ག་རུ་ནག་པོ། སྤང་སྤོས། ཀ་ར་རྣམས་བ་དམར་སྐྱའི་འོ་མས་རིལ་བུ་བྱས་ཏེ་སྔ་མ་བཞི་སྒོམ་བཟླས་བྱས་ནས། ཉི་ཟླ་གཟས་ཟིན་པའི་ཉིན་པར་རིལ་བུ་ཟོས་ན་མངོན་པར་ཤེས་པ་འགྲུབ་པར་འགྱུར་རོ། །ཞེས་བཀོད་པ་རང་སྣང་ངོ་། །མངོན་པར་ཤེས་པ་སྒྲུབ་པའི་ལས་ཚོགས་སོ། །

བདུན་པ་རིག་པ་སྒྲུབ་པ་ནི། སྔར་བཤད་པའི་རིམ་པས་སྒྲུབ་ཅིང་། ན་མོ་མཉྫུ་ཤྲཱི་ཀུ་མཱ་ར་བྷཱུ་ཏཱ་ཡ། ཏདྱ་ཐཱ། ༀ་ཨ་ར་ཛེ་བི་ར་ཛེ། ཤུདྡྷེ་ཤུདྡྷེ། བི་ཤུདྡྷེ་བི་ཤུདྡྷེ། ཤོ་དྷ་ནི་ཤོ་དྷ་ནི། བི་ཤོ་དྷ་ནི་བི་ཤོ་དྷ་ནི། ཨ་མ་ལེ། བི་མ་ལེ། ཛ་ཡ་བ་ཏི། རུ་རུ་ཙ་ལེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། འབུམ་ཕྲག་གཅིག་བཟླས་ན་མཁས་པར་འགྱུར་རོ། །གཉིས་བཟླས་ན་རིག་པ་འཛིན་པར་འགྱུར་རོ། །གསུམ་བཟླས་ན་འཇམ་དཔལ་གྱི་ཞལ་མཐོང་བར་འགྱུར་རོ། །བཅངས་པ་ཙམ་གྱིས་སྐྱེ་བ་དྲན་པར་འགྱུར་རོ། །གལ་ཏེ་མཚམས་མེད་པ་ལ་སྤྱོད་པ་ཡིན་ཡང་དེ་ལྟར་སྦྱོར་བ་ཉིད་གུས་པས་བསྒྲུབ་ན་དེ་དག་གི་མཐའ་དག་བདག་གིས་རྫོགས་པར་བགྱིའོ། །གལ་ཏེ་དེ་ལྟར་མ་བགྱིས་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་རོ། །ཞེས་ཞལ་གྱིས་བཞེས་ཤིང་ཡི་དམ་དུ་མཛད་པའོ། །ཁ་ཅིག་ནི་བཟླས་པ་ཙམ་གྱིས་འགྲུབ་ཅེས་འདོད་ཀྱང་། བདག་གི་ལམ་ནི་སྒྲུབ་པ་དང་འབྲེལ་དགོས་ཞེས་བཞེད་དོ། །གཞན་ཡང་སྔར་གྱི་རྫས་བཅུ་གཉིས་པོའི་སྟེང་དུ་རྟའི་མགྲིན་པའི་ཤ་བཏང་ནས་སྔར་བཞིན་བསྒྲུབ་ན་རྐང་མགྱོགས་འགྲུབ་པར་འགྱུར་རོ། །འུག་པ་མཐིལ་རིལ་གྱི་མིག་འབྲས་བཏང་ནས་འོག་གི་གཏེར་མཐོང་བ་དང་མིག་རྣོ་བར་འགྱུར་རོ། །ཕུག་རོན་བྱ་རྒོད་འདབ་ཆགས་ཀྱི་མཁྲིས་པ་བཏང་ན་མངོན་ཤེས་འགྲུབ་པར་འགྱུར་རོ། །སྔགས་ཀྱི་ཤམ་བུ་ནི་ཇི་ལྟར་འདོད་པ་དེ་ཉིད་སྤེལ་ལོ། །རིག་པ་སྒྲུབ་པའི་ལས་ཚོགས་སོ། །

འཇམ་དཔལ་གྱི་ཞལ་ལྟ་བ་ནི། སྔར་གྱི་རྫས་རྣམས་ཀྱི་སྟེང་དུ་ག་བུར་དང་གི་ཝཾ་བསྲེས་པའི་རིལ་བུ་བྱས་ལ་སྔ་མ་བཞིན་བསྒོམ་ཞིང་། ༀ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མཱུྃཿཧྲཱིཿཔྲཛྙཱ་བརྡྷ་ནི་ཧྲཱིཿདྷཱིཿསྭཱ་ཧཱ། ན་མོ་མཉྫུ་ཤྲཱི་སིངྷ་ནི་ཡ་མཱནྟ་ཀ་ནི་ཧཱུྃ་ཕཊ། ཅེས་ཁྲི་ཕྲག་གཅིག་བཟླསཔའི་རིལ་བུ་ཆུ་གཙང་མ་དང་བསྲེས་ལ་རང་འཇམ་དཔལ་དུ་བསམ་པའི་ལག་མཐིལ་དུ་བླུགས་ཏེ་སྔགས་བརྒྱ་རྩ་བརྒྱད་བཟླས་ཏེ་མིག་ལ་བྱུག་ན་འཇམ་དཔལ་མཐོང་བར་འགྱུར་རོ། །གཞུང་ཁ་ཅིག་ལས་ག་བུར་གི་ཝཾ་བསྲེས་པའི་ཆུ་ལག་མཐིལ་གཡོན་དུ་བླུགས་ལ། རང་འཇམ་དཔལ་དུ་མོས་པས་སྔགས་བཟླས་ཏེ་མིག་ལ་བྱུགས་པས་ཞལ་མཐོང་བར་འགྱུར་རོ་ཞེས་བཀོད་པར་སྣང་ངོ་། །བདག་གི་བླ་མས་ནི་སྔ་མ་བཞིན་མཛད་པས་ཞལ་མཐོང་བ་ཉིད་ཡིན་ནོ། །ཞལ་ལྟ་བའི་ལས་ཚོགས་སོ། །ལས་ཚོགས་ཀྱི་ལེའུ་སྟེ་བདུན་པའོ།། །།

དེ་ལྟར་རྗེ་བཙུན་འཇམ་པའི་དཔལ་ནི་ལེགས་པར་སྒྲུབ་པའི་བསོད་ནམས་གང་། །སྟོན་མཁའ་ཡིད་མཁའི་དྲི་མ་མེད་ལ་མཚན་དཔེའི་འོད་རབ་གསལ་བའི་སྐུ། །མཛད་པའི་ཟེར་གྱིས་རྣམ་གྲོལ་རབ་བརྟན་གདུལ་བྱའི་འཇིག་རྟེན་འགེངས་པ་ཡིས། །མ་ལུས་བདེ་འབྱུང་གེ་སར་འཛུམ་པས་འགྲོ་བའི་བསམ་པ་འགྲུབ་པར་ཤོག །ཚུལ་འདི་གངས་རིའི་ཁྲོད་ཀྱི་སྙན་ངག་མཁན། །དཔལ་ལྡན་ཚུལ་ཁྲིམས་བློ་གྲོས་བཟང་པོ་ཡིས། །བློ་གྲོས་དོན་གཉེར་ཀུན་གྱི་གཙུག་རྒྱན་དུ། །བསམ་ཡས་ལྷུན་གྱིས་གྲུབ་པའི་གནས་སུ་སྦྱར། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། མང་དུ་ཐོས་པའི་སྙན་ངག་མཁན་བསམ་ཡས་པ་ངག་གི་དབང་པོས་གཞུང་དང་གདམས་པ་དང་རང་གིས་ཉམས་སུ་བླངས་པ་རྣམས་ཕྱོགས་གཅིག་ཏུ་བཀོད་པ་རྫོགས་སོ།། །།མངྒ་ལཾ།། །།

འཕགས་མ་དབྱངས་ཅན་མའི་སྒྲུབ་ཐབས་འོད་ཀྱི་དྲྭ་བ་ཞེས་བྱ་བ།

དང་པོ། རྗེས་གནང་གི་ལེའུ།

༄༅། །འཕགས་མ་དབྱངས་ཅན་མའི་སྒྲུབ་ཐབས་འོད་ཀྱི་དྲྭ་བ་ཞེས་བྱ་བ་བཞུགས་སོ། །

༄༅། །འཕགས་མ་ངག་གི་དབང་ཕྱུག་གི་སྒྲུབ་ཐབས་འོད་ཀྱི་དྲྭ་བ་ཞེས་བྱ་བ། ཐུགས་རྗེ་ཆེན་པོ་ལ་ཕྱག་འཚལ་ལོ། །གང་གི་ཡོད་མེད་སྣ་ཚོགས་སྐྱོན་བྲལ་ཐུགས་རྗེའི་ནམ་མཁའ་ཡངས་པ་ལ། །བློ་གྲོས་སྒྲིབ་བྲལ་ཉིན་མོར་བྱེད་སྐུའི་ཕྲིན་ལས་འོད་ཟེར་དྲྭ་བ་ཅན། །སྐལ་ལྡན་འགྲོ་བློའི་མཚོ་སྐྱེས་འཛུམ་མཛད་དབྱངས་ཅན་ཞབས་རྡུལ་གུས་མཆོད་དེ། །ཤེས་རབ་དོན་གཉེར་སྐྱེ་བོའི་དོན་སླད་དེ་ཉིད་བགྱིད་པའི་རིམ་པ་བཤད། །རྗེས་གནང་སྒྲུབ་ཐབས་གེགས་སེལ་དང་། །ལས་ལ་སྦྱར་དང་རྣམ་པ་བཞིས། །ལྷ་མོ་སྐལ་བཟང་དབྱངས་ཅན་གྱི། །ཡོངས་སུ་སྒྲུབ་པ་བསྟན་པ་ཡིན། །

དེ་ལ་བློ་གྲོས་ཀྱི་མཆོག་སྟེར་འཕགས་མ་དབྱངས་ཅན་གྱི་རྗེས་སུ་གནང་བའི་ཆོ་ག་ནི། གནས་དབེན་པར་མཎྜལ་ལེགས་པར་བྲིས་ཏེ་མཆོད་པ་བཤམས་ལ། སློབ་དཔོན་ལྷ་མོའི་སྐུར་གསལ་བའི་ཐུགས་ཀའི་འོད་ཟེར་གྱིས། ལྷོ་ཕྱོགས་རྒྱ་མཚོའི་ནང་ནས་དབྱངས་ཅན་གྱི་འཁོར་ལོ་སྤྱན་དྲངས་མདུན་གྱི་འཁོར་ལོ་ལ་བསྟིམས་ཏེ། མཆོད་ནས། སློབ་མའི་གྲངས་དང་མཉམ་(༣༢)པའི་མར་མེ་འཁོར་ལོའི་སྟེང་དུ་བཀོད་པའི་འོག་ཏུ་སློབ་མ་རྣམས་ཁྲུས་བྱས་ཏེ་གྲལ་ལ་འཁོད་པ་ལ་བགེགས་བསྐྲད་དེ། ལྷ་མོ་འཁོར་དང་བཅས་པ་སྒོམ་དུ་གཞུག །མདུན་གྱི་མར་མེ་དབྱངས་ཅན་མའི་འཁོར་ལོར་བསམས་ལ་དབྱངས་ཡིག་བརྗོད་ཅིང་ཟར་བཅུག་པས་ངག་གི་དངོས་གྲུབ་ཐོབ་པར་བསམ། དེ་ནས་རྡུལ་ཚོན་རྣམས་གཡོན་པའི་སྲིན་ལག་གིས་གང་ལ་རེག་པའི་ཡི་གེ་དེའི་མིང་ནས་བརྗོད་ཅིང་སློབ་མའི་དཔྲལ་བ། མགྲིན་པ། སྙིང་ག་རྣམས་སུ་བྱུགས་པས་ལུས་ངག་ཡིད་གསུམ་ནུས་པ་དང་ལྡན་ཞིང་དབྱངས་ཅན་མ་དངོས་སུ་བསམས་ལ་གསལ་བཏབ་པས་ཡེ་ཤེས་ཕེབས་པར་འགྱུར་རོ། །གལ་ཏེ་ཡེ་ཤེས་མ་ཕེབས་ན་སྙིང་གའི་འཁོར་ལོའི་ཡི་གེ་རྣམས་འདར་ཞིང་གཡོ་བ་ལ་སེམས་འཛིན་དུ་བཅུག་པས་མི་ཕེབས་མི་སྲིད་དོ། །ཡེ་ཤེས་ཕེབས་པའི་རྟགས་གསུམ་ལས། ལུས་བདེ་ཞིང་འཕར་བ་ལ་སོགས་པ་དང་། ངག་དགོད་ཅིང་སྨྲ་བ་ལ་སོགས་པ་དང་། ཡིད་གསལ་ཞིང་དྭངས་པ་ལ་སོགས་པ་སྟེ་སྐུ་གསུང་ཐུགས་ཀྱི་བྱིན་རླབས་ཞུགས་པའི་རྟགས་ཡིན་ནོ། །རྗེས་གནང་གི་ལེའུ་སྟེ་དང་པོའོ།། །།

གཉིས་པ། སྒྲུབ་པའི་ལེའུ།

དེ་ནས་སྒྲུབ་པ་ལ་འཇུག་པར་བྱ་སྟེ། རྗེས་སུ་གནང་བ་ཐོབ་པའི་རྣལ་འབྱོར་པས་གནས་དབེན་ཞིང་ཉམས་དགའ་བ་ཕྱི་ནང་གི་གནོད་པ་མེད་པར་སྟན་བདེ་བ་ལ་འདུག་སྟེ། སྐྱབས་སུ་འགྲོ་བ་དང་བྱང་ཆུབ་མཆོག་ཏུ་སེམས་བསྐྱེད་ནས། སྟོང་པར་བསམ་པའི་ངང་ལས་པདྨ་དཀར་པོ་དང་ཟླ་བའི་སྟེང་དུ། རང་ཉིད་ལྷ་མོ་དབྱངས་ཅན་སྐུ་མདོག་དཀར་ཞིང་རིན་ཆེན་སྣ་ཚོགས་ཀྱི་རྒྱན་དང་ལྡན་པ་ཕྱག་གཉིས་ཀྱིས་པི་ཝཾ་བསྒྲེང་ཞིང་ཞལ་འཛུམ་པ་དང་བཅས་པ། སྐུ་ཡི་སྨད་ལ་ལྷའི་གོས་ཀ་ཙ་ལིནྡ་གསོལ་ཞིང་སྐུ་སྟོད་ནོར་བུ་དང་མེ་ཏོག་གི་དྲྭ་བས་གཡོགས་པས་ཁེབས་ཤིང་། དབུ་སྐྲ་ལི་བ་གཡས་གཡོན་དུ་འཕྱང་ཞིང་ཟླ་བ་མཛེས་པས་སྤྱི་གཙུག་བརྒྱན་པ། འོད་ཟེར་མུ་མེད་པ་འཕྲོ་ཞིང་ཟླ་བའི་རྒྱབ་ཡོལ་ཅན་སྣང་ལ་རང་བཞིན་མེད་པར་བསྒོམ་པར་བྱའོ། །དེ་ནས་སྙིང་མགོ་ཐུར་དུ་འཕྱང་བ་བློས་གྱེན་དུ་བསླང་བའི་ནང་ན་ཟླ་བའི་སྟེང་དུ་ༀ་དཀར་པོ་ནཱ་ད་དང་བཅས་པ་ལས་འོད་ཟེར་དཀར་པོ་སྟོན་ཟླའི་བསིལ་ཟེར་ལྟ་བུ་སྣ་བུག་གཡས་ནས་ཕྱིར་འཕྲོས། ལྷོ་ཕྱོགས་རྒྱ་མཚོའི་ནང་རིན་པོ་ཆེའི་ཁང་བཟང་ན། རང་གིས་བསྒོམ་པ་ལྟ་བུའི་འཕགས་མ་དབྱངས་ཅན་གྱི་ཤངས་བུག་གཡོན་དུ་ཞུགས། ཐུགས་ཀའི་འཁོར་ལོ་ལ་རེག་པས་འཁོར་ལོ་ཤངས་བུག་གཡས་ནས་ཕྱིར་ཐོན། སྟོན་ཀའི་ཟླ་བ་འཆར་བ་ལྟར་ནམ་མཁར་བྱོན་པ་ལ་མེ་ཏོག་ལ་སོགས་པས་མཆོད་དེ། ༀ་པྲ་ཏི་དེ་ཝཱི་ཧྲཱིཿཏི་ཏ་ཧྲཱིཾཿ ཞེས་བརྗོད་པས་འཁོར་ལོ་འོད་དུ་གྱུར་པས་རང་གི་སྣ་བུག་གཡོན་དུ་ཞུགས། ཐུགས་ཀའི་ཨྃ་དང་འདྲེས་པས་སྙིང་པདྨ་འདབ་བརྒྱད་མཆོག་ཏུ་དཀར་ཞིང་འཚེར་བའི་ལྟེ་བར་ཟླ་བའི་སྟེང་དུ་ཧྲཱིཾཿ འདབ་མ་བརྒྱད་ལ་མདུན་ནས་གཡས་སྐོར་དུ། ཨ་ཨཱ། ཨི་ཨཱི། ཨུ་ཨཱུ། (༣༣)རི་རཱི། ལི་ལཱི། ཨེ་ཨེེ། ཨོ་ཨོོ། ཨཾ་ཨཿ ཞེས་པ་གཉིས་གཉིས་མར་མེའི་ཕྲེང་བ་ལྟར་འབར་བའི་འོད་ཀྱིས་མི་ཤེས་པའི་སྙིང་གི་མུན་པ་ཐམས་ཅད་བསལ། སྤྱི་བོ་ནས་རྐང་པའི་མཐིལ་གྱི་བར་དུ་ཡེ་ཤེས་ཀྱི་བདུད་རྩི་དཀར་པོས་མེར་གྱིས་ཁེངས། ལུས་ངག་ཡིད་གསུམ་བདེ་བ་ཆེན་པོས་ཆིལ་གྱིས་ཁྱབ་པར་བསམ་པ་ཡུན་རིང་དུ་བྱའོ། །

དེ་ནས་བཟླས་པ་ནི། ཧྲཱིཾ་ལས་ཧྲཱིཾ་མར་མེ་ལས་མར་མེ་ཆད་པ་ལྟར་ཁ་ནས་ལྟེ་བར་ཧྲཱིཾ་གི་ཕྲེང་བ་འཁོར་བའི་འོད་ཀྱིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ། ཉན་ཐོས་དང་། རང་སངས་རྒྱས་དང་། པཎྜི་ཏ་དང་། ཉི་ཟླ་དང་། རྩི་ཤིང་ནགས་ཚལ་དང་། ཚངས་པ་དང་། བརྒྱ་བྱིན་དང་། འོད་ཟེར་དང་། ས་དང་། ནམ་མཁའ་ཆེན་པོ་དང་ཆུང་ངུ་ཐམས་ཅད་ཀྱི་ཚེ་དང་། བསོད་ནམས་དང་། སྟོབས་དང་། གཟི་བརྗིད་དང་། བདེ་ལེགས་ཐམས་ཅད་བསྡུས་སྔགས་ཕྲེང་ལ་ཐིམ་པ། དེ་ཉིད་ཧྲཱིཾ་ལ་ཐིམ་པས་བདག་ཉིད་ནུས་པ་དེ་ལྟ་བུ་དང་ལྡན་པར་བསམ་ཞིང་། ཁྱད་པར་དུ་འཆད་རྩོད་རྩོམ་པ་འཛིན་པ་ལ་སོགས་པ་གང་འདོད་པའི་ཤེས་རབ་དེ་ཉིད་བསྡུས་ཏེ་སྙིང་གའི་ཧྲཱིཾ་ལ་ཐིམ་པས་བདག་ཉིད་ཀྱིས་གང་འདོད་པའི་ཤེས་རབ་དེས་ལུས་ངག་ཡིད་གསུམ་ཁེངས་པར་བསམ་པ་ནི་གནད་དོ། །དེ་ལྟར་འགལ་མེ་ལྟར་འཁོར་བའི་འོད་ཀྱིས་སྙིང་གི་མུན་པ་ཐམས་ཅད་སེལ་བར་བསམ་ཞིང་། ཧྲཱིཾ་ཞེས་འབུམ་ལྔ་ཉི་ཁྲི་ལྔ་སྟོང་བཟླ་ཞིང་། ཐུན་འཇོག་ཁར་སྔགས་ཕྲེང་སྙིང་གའི་ཧྲཱིཾ་ལ་ཐིམ་ཞིང་། ཧྲཱིཾ་གི་འོད་ཀྱིས་སྔ་མ་ལྟར་བསམ་ཞིང་། གང་འདོད་པའི་ཤེས་རབ་དེ་ཉིད་ལན་གསུམ་དུ་བསྡུས་པས་ལུས་ཁེངས་པ་ལ་དམིགས་པ་གཏད་དེ། སྐད་ཅིག་འཇམ་དབྱངས་སམ་མི་གཡོ་བར་ཀྲོང་བསྐྱེད་ལ་བསྔོ་བ་བྱའོ། །དེ་ནས་དངོས་སུ་སྔར་བས་དྲན་པ་གསལ་བ། ལོག་པོས་བློ་རྣོ་བ། རྨི་ལམ་དུ་བུ་མོ་གཞོན་ནུ་མས་བཟའ་བཏུང་སྦྱིན་པ་དང་། ཤེལ་དང་མེ་ཏོག་གི་ཕྲེང་བ་རྙེད་པ་དང་། ནམ་ལངས་པ་དང་། ཉི་མ་ཤར་བ་དང་། ཆུ་གཙང་མའི་རྒྱུན་ལ་འཐུང་ཞིང་ཁྲུས་བྱེད་པ་དང་། མེ་ཏོག་གི་ཚལ་ན་མེ་ཏོག་ལ་རྩེ་བ། ནམ་མཁའ་འོད་ཀྱི་རྣམ་པ་ཟ་འོག་གི་གུར་ཁྱིམ་ལྟར་ཕེབས་པ་དང་། བྱ་དང་རི་དྭགས་སྔོན་མ་མཐོང་བ་མཐོང་བ་རྨི་བ་དང་། ནམ་མཁའ་ལ་འཕུར་བ་དང་། ཞིང་རྨོ་བ་དང་། སྣག་ཚ་འཐུང་བ་དང་། རི་མཐོན་པོའི་རྩེ་ལ་ཕྱིན་པ་དང་། མཚོན་ཆ་དང་། པི་ཝཾ་དང་། མེ་ལོང་མཐོང་བའམ་རྙེད་པ་ལ་སོགས་རྨིའོ། །དེ་ཡང་སྒྲུབ་པ་ལ་བརྩོན་པ་ན་འདི་རྣམས་རྨིས་པ་ནི་སྤྲོ་བ་བསྐྱེད་པ་དང་། བསྒྲུབ་ནས་ཞག་བདུན་ནམ་བཅུ་གཅིག་ནས་བྱུང་ན་རྗེས་སུ་བཟུང་བ་དང་། ཞག་བཅུ་བཞིའམ་བཅོ་ལྔའི་དུས་སུ་བྱུང་ན་སྒྲུབ་པའི་མཚན་མ་སྟེ་མཚན་མ་གསུམ་འབྱུང་སྟེ། དེ་ལྟར་འགྲུབ་པའི་ཚེ་ཐུན་མཚམས་སུ་ཁྲོ་བོ་གང་རུང་གི་བསྙེན་པ་དང་གཏོར་མ་ལ་བརྩོན་པར་བྱའོ། །གཏོར་མ་ལེགས་པར་(༣༤)བཤམས་ལ་དབྱངས་ཅན་མ་མདུན་དུ་དམིགས་ཏེ། ཧྲཱིཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་ལྔའམ་བདུན་གྱིས་ཕུལ་ལ་བསྟོད་དེ་སླར་རང་ལ་བསྡུའོ། །འདིར་རང་ཉིད་ཐ་མལ་དུ་གནས་པའི་སྙིང་དུ་འཁོར་ལོ་སྒོམ་པ་དང་། ལྷ་གཞན་དུ་བསྒོམས་པའི་སྙིང་གར་འཁོར་ལོ་སྒོམ་པ་དང་། དབྱངས་ཅན་དུ་བསྒོམས་པའི་ཐུགས་ཀར་འཁོར་ལོ་སྒོམ་པ་དང་གསུམ་ལས་གང་མོས་སུ་བྱ་བར་གསུངས་ཀྱང་། རང་ཐ་མལ་དུ་སྒོམ་པ་ལ་ཆགས་པའི་སྐྱོན་དུ་འགྱུར་ཞིང་། ལྷ་གཞན་དུ་བསྒོམས་པའི་ཐུགས་ཀར་འཁོར་ལོ་སྒོམ་པ་སྙིང་ལུད་དུ་འགྱུར་རོ། །འདིས་ནོར་འགྲིབ་པ་ཡིན་ནམ་ཞེ་ན་མ་ཡིན་ཏེ། གེགས་སེལ་གནད་ཀྱི་ཟླ་འོད་ལས། རང་ཉིད་ལྷ་མོར་ལེགས་བསྒོམས་པས། །ཕྱི་རོལ་བུད་མེད་ཡུལ་ལ་ཆགས་མི་འགྱུར། །ཆགས་སྐྱེད་རྒྱུད་རྩུབ་དབུལ་པོར་མི་འགྱུར་ཞེས། །བྲམ་ཟེ་ཕུར་བུས་གཏུམ་པའི་སྡེ་ལ་བཤད། །ཅེས་སོ། །འོན་ཀྱང་ནོར་འགྲིབ་དོགས་ན། འོག་ཏུ་འཆད་པའི་ཏིང་ངེ་འཛིན་བསྒོམ་པར་བྱའོ། །དེ་ལྟར་རྟགས་གཉིས་པོ་གང་རུང་བྱུང་ནས་སྒྲུབ་པ་བྱས་པའི་གནས་དེ་ཉིད་དུ་སྦྱིན་སྲེག་བྱ་སྟེ། མཎྜལ་བ་ཡི་རྣམ་ལྔས་བྱུག་པར་བྱས་ལ་དབྱངས་ཅན་མའི་འཁོར་ལོ་བྲིས་ལ་ཤིང་འབྲས་བུ་ཅན་ནམ་ཞིང་སྐམ་པོ་ལ་སོགས་པ་གང་རུང་གིས་གྲུ་བཞི་བརྩིགས་ཏེ་མེ་སྤར་ལ་མེ་ནང་དུ་ལྷ་མོ་དབྱངས་ཅན་མ་བསྐྱེད། རང་གི་སྙིང་གའི་འོད་ཟེར་གྱིས་རྒྱ་མཚོའི་འགྲམ་ནས་ལྷ་མོ་དབྱངས་ཅན་མ་སྤྱན་དྲངས་ཏེ་ཐབ་ཀྱི་ལྷ་མོ་ལ་བསྟིམས་ཏེ་བསྲེག་རྫས་རིམ་པར་བཤམ་པ་རྣམས་འབུལ་ཏེ། ཡམ་ཤིང་སོར་བརྒྱད་པ། མེ་ཏོག་དཀར་སེར། མར་ཁུ། ཞོ་ཟན། དཱུརྦ། ཀུ་ཤ །མྱུ་གུ་རྣམས་རིམ་པར་འབུལ་ཞིང་། ཧྲཱིཾ་མེ་པྲཛྙཱ་བརྡྷ་མ་ཎཱ་ཡ་ༀ། ལྷ་མོ་བདག་གི་མཆོད་པའི་འདི་བཞེས་ལ་ཤེས་རབ་སྤེལ་བར་མཛད་དུ་གསོལ། ཞེས་རེ་རེ་བཞིན་དབུལ་ལོ། །དེ་ལྟར་ལན་གཅིག་ཚོར་བ་ལ་སྦྱིན་སྲེག་གཅིག་ཏུ་བྱས་པའི་ཁྲི་ཉིས་སྟོང་ལྔ་བརྒྱའོ། །དེ་ནས་ཐབ་ཀྱི་ལྷ་མོར་བསྟོད་དེ་མཆོད་ནས་རང་ལ་ཐིམ་པར་བསམས་ལ། སོལ་བ་ཆུས་བྲན་ཏེ་དམ་ཚིག་པའི་འཁོར་ལོར་བསྡུ་བའི་ཕྱིར་སོལ་བའི་ཕྱོགས་གཅིག་ནས་སྣ་བུག་ཏུ་བཏུད་དེ་བྲིས་པའི་འཁོར་ལོར་འཇུག་པའི་རླུང་དང་ལྷན་ཅིག་ཏུ་སྙིང་གར་ཐིམ་པར་བསམས་ལ་ལས་ཀྱི་རྗེས་བསྡུས་ཏེ། ཐལ་བ་རི་རྩེའམ་རླུང་ཆེན་པོ་ལ་བསྐྱལ་བས་གྲགས་པ་ཆེན་པོར་འགྱུར་རོ། །དེ་བསྒོམས་པས་ནི་ཤེས་རབ་བརྟན་ཞིང་སྒྲུབ་པའི་བོགས་འདོན་དངོས་སུ་འབྱིན་པ་ཡིན་ནོ། །སྒྲུབ་པའི་ལེའུ་སྟེ་གཉིས་པའོ།། །།

གསུམ་པ། གེགས་སེལ་གྱི་ལེའུ།

དེ་ལྟར་སྒྲུབ་པ་བྱེད་པ་ན་གེགས་སེལ་བ་ཤེས་དགོས་པས་ན། དེས་ན་ཐུན་མོང་དང་ཐུན་མོང་མ་ཡིན་པའོ། །དང་པོ་སྤྱིར་གྲགས་པ་དེ་འདི་སྐད་ཐོས་སོ། །སྙིང་རླུང་གི་གེགས་བསལ་བ་དང་། ཆགས་པའི་གེགས་བསལ་བ་དང་། ནོར་(༣༥)འགྲིབ་པའི་གེགས་བསལ་བའོ། །

དང་པོ་ནི། སྤྱིར་སྒོམ་པས་ཤེས་པ་འཕྲོ་ཞིང་རྒོད་པས་གཅིག་ཏུ་མི་ཚུགས་པ་སོགས་བྱུང་ན་སྙིང་གའི་པདྨ་ཅུང་ཟད་ཟླུམ་པ་ལ་དམིགས་པ་གཏད་པས་སེལ་ལོ། །དེས་མ་སེལ་ན་པདྨ་ཟླུམ་པའི་ནང་ན་འཁོར་ལོ་ཡོད་པའི་ཕྱི་ནས་ཁྲོ་བོ་གང་རུང་གི་སྔགས་ཀྱིས་དམིགས་ཏེ་བུམ་སྐུར་བསྡུས་པ་ལྟ་བུ་ལ་དམིགས་པ་གཏད་པས་སེལ་ལོ། །དེས་ཀྱང་མ་སེལ་ན་འཁོར་ལོ་མི་བསྒོམ་པར་སྙིང་གི་རྩེ་ཐུར་དུ་ལྟ་བ་ལ་སྙིང་ནང་དུ་བདུད་རྩིས་ཁེངས་པ་ལ་དམིགས་པ་གཏད་པས་སེལ་ལོ། །དེ་ནས་སྔ་མ་བཞིན་དུ་བསྒོམ་མོ། །

གཉིས་པ་ནི། དེ་ལྟར་བསྒོམས་པས་ཆགས་པའི་གེགས་བྱུང་ན་མེ་ཏོག་ལུག་རུ་དམར་པོའམ། སེར་པོ་བུད་མེད་ཀྱིས་མ་རེག་པ་གྲིབ་སྐམ་བྱས་པ་ལྔའམ་བདུན། དགུ་ཚུན་ཆད་ཆུར་གྲུབ་ཏུ་བཅུག་པའི་ཁུ་བ་ལྟོ་སྟོང་ལ་ལན་གསུམ་མམ་བདུན་བཏང་བས་སེལ་ལོ། །དེས་མ་སེལ་ན་བདུད་རྩི་གྲང་མོ་འཁོར་ལོ་ལས་བབས་པའི་ཆུས་ཁེངས་པར་བསམ། དེས་སེལ་ལོ། །

གསུམ་པ་ནི། དེའི་ཚེ་ནོར་འགྲིབ་པའི་རྟགས་བྱུང་ན། ཐུན་མཚམས་སུ་ནོར་རྒྱུན་མ་སེར་མོ་བུམ་པ་བསྣོལ་བའི་སྟེང་ན་བཞེངས་པ་དར་དང་རིན་པོ་ཆེས་བརྒྱན་ཅིང་། ཕྱག་གཡས་འབྲས་ཀྱི་སྙེ་མ་ཐུགས་ཀར་འཛིན་ཅིང་གཡོན་པས་བུམ་པ་པུས་མོའི་སྟེང་དུ་བརྐྱང་བ་རིན་པོ་ཆེས་གང་བ་འཛིན་པར་བསམ་ཞིང་གཏོར་མ་བཤམས་ལ། ༀ་ཨཱཿཧཱུྃ་གསུམ་གྱིས་བདུད་རྩིར་བསམ་ལ། ༀ་བ་སུ་དྷཱ་རི་བྃ་སྭཱ་ཧཱ། ཞེས་ལྔའམ་བདུན་གྱིས་ཕུལ་བས་མཉེས་པར་བསམ་ཞིང་། ཟས་ནོར་གྱི་དངོས་གྲུབ་སྩོལ་ཅིག །ཅེས་བརྗོད་པས་བར་ཆད་སེལ་ལོ། །དེས་མ་སེལ་ན་རང་ཉིད་ནོར་རྒྱུན་མར་བསམས་པའི་སྙིང་གར་དབྱངས་ཅན་མའི་འཁོར་ལོ་བསྒོམ། དེས་ཀྱང་མ་ཞི་ན་འཁོར་ལོ་ཡང་མི་བསྒོམ་པར་སྙིང་གར་བྃ་ༀ་བ་སུ་དྷཱ་རི་སྭཱ་ཧཱ་ཞེས་པས་བསྐོར་བ་ལ་དམིགས་པ་གཏད་པས་སེལ་ལོ། །

གཉིས་པ་ཐུན་མོང་མ་ཡིན་པའི་གེགས་སེལ་བ་ནི། བླ་མའི་མན་ངག་བརྒྱུད་པ་ལས་འོངས་ཏེ། དེ་ཡང་དང་པོ་ཉིད་ནས་སྒྲུབ་པའི་ཚེ་ཉི་མ་དྲོས་པ་ནས་ནམ་ལངས་པ་དང་ཐོ་རེངས་ཀྱི་བར་ཞི་བའི་དུས་ཏེ་སྙིང་གའི་འཁོར་ལོ་ལས་བདུད་རྩི་དཀར་པོ་དངུལ་ཆུའི་རང་བཞིན་དུ་བབས་པས་སྒྲིབ་པའི་དངོས་པོ་ཀུན་བསལ་བ་ལ་དམིགས་པ་གཏད་དེ་བསྒོམས་པས་གཏི་མུག་གི་སྐྱོན་དང་པོ་ཉིད་ནས་ཞི་བར་བྱ་བ་ཉིད་དོ། །འདི་ལྟར་སྒོམ་པ་མེད་ན་ཅི་ཙམ་བསྒྲུབས་ཀྱང་ཤེས་རབ་ཆེར་མི་འཕེལ་བར་སྔར་གྱི་ཤེས་རབ་ཅུང་ཟད་ཡོད་པའང་འགྲིབ་པར་འབྱུང་སྟེ་གེགས་འདི་བསལ་བ་ལ་མན་ངག་འདི་མཆོག་ཏུ་བཤད་དོ། །ཉི་མ་དྲོས་ཆེན་ནས་གུང་སྨད་ཀྱི་བར་རྒྱས་པའི་དུས་དེར་རང་གི་འོད་ཟེར་སེར་པོ་འཕྲོས། འཇིག་རྟེན་གྱི་ཟས་ནོར་བསྡུས་རང་གི་སྒྲུབ་ཁང་ཁེངས་གཟི་བརྗིད་ཀྱིས་ལུས་ཀྱི་ནང་ཁེངས་པ་ལ་སེམས་བཟུང་བས་ནོར་འགྲིབ་པའི་སྐྱོན་གཏན་མི་འབྱུང་ངོ་། །ཉི་མ་གུང་སྨད་ནས་ནུབ་ཀྱི་བར་དབང་གི་དུས་ཏེ་རང་གི་འཁོར་ལོའི་འོད་ཟེར་དམར་པོ་ལས་བདུད་རྩི་དམར་པོ་བབས་པས་རང་གི་ཉོན་མོངས་པ་ཐམས་ཅད་བསྲེགས་ཤིང་བཤལ་ཏེ་ཉོན་མོངས་པ་ཐམས་ཅད་དང་བྲལ་བར་བསམས་ལ་སེམས་(༣༦)བཟློག །ཉི་མ་ནུབ་ནས་གུང་གི་བར་དྲག་པོའི་དུས་སུ་རང་གི་འཁོར་ལོ་ལས་བདུད་རྩི་སྔོན་པོ་བབས་པས་ལུས་ཁེངས། སྙིང་རླུང་ལ་སོགས་པའི་སྐྱོན་བསལ་ཞིང་སྙིང་ནང་བདུད་རྩིས་ཁེངས་ཏེ་ཆོས་ཐམས་ཅད་མངོན་སུམ་དུ་ཤེས་པའི་ཤེས་རབ་ཀྱིས་ལུས་ངག་ཡིད་གསུམ་རྒྱས་པར་བསམ་པས་སྐྱོན་གང་ཡང་མི་འབྱུང་བ་ཡིན་ནོ། །མན་ངག་འདི་ནི་བླ་མ་ལས་བརྒྱུད་པ་མ་ཉམས་ཤིང་རང་གི་ཉམས་སུ་རྟོགས་པའི་སྟོབས་ཀྱིས། ཤིན་ཏུ་བརྗོད་པར་ཕོངས་ན་ཡང་བློ་དམན་པ་དག་ལ་ཕན་པའི་ཕྱིར་གབ་པ་རྣམས་མངོན་དུ་ཕྱུངས་ནས་ཕྱིན་ཅི་མ་ལོག་པར་བཀོད་པ་ཡིན་ནོ། །གཞན་སྣོད་མིན་རྣམས་ལ་སྦས་ཏེ་བསྟན་པའི་གནས་མེད་པས་སྙིང་གི་གཏེར་དུ་སྦོས་ཤིག །ས་མ་ཡ་ཞེས་གདམས་པའོ། །གེགས་སེལ་གྱི་ལེའུ་སྟེ་གསུམ་པའོ།། །།

བཞི་པ། ལས་ལ་སྦྱར་བའི་ལེའུ།

དེ་ལྟར་གེགས་སྤངས་ཏེ་བསྒྲུབས་པས་གྲུབ་པའི་རྣལ་འབྱོར་པ་བདག་གིས་གྲུབ་པའི་རྟགས་རྣམས་མངོན་དུ་བསྟན་པའི་ཕྱིར་ལས་སྦྱོར་གྱི་རིམ་པ་བཤད་པར་བྱའོ། །དེ་ཡང་རྣམ་པ་བཞི་སྟེ། དུག་ཞི་བ་དང་ཕྲན་ཚེགས་བསྟན། །དབང་དུ་བྱ་བ་རྩོད་པ་བཟློག །དེ་ལྟར་རྣམ་བཞིའི་རིམ་པ་བཞིན། །ཞི་རྒྱས་དབང་དང་དྲག་པོར་བཤད། །དེ་ཡང་ཞི་བའི་ཆོ་ག་དུག་ཞི་བ་ལ་སོགས་ཞི་བར་བྱ་བ་ནི། ནད་པ་དེའི་དཔྲལ་བའི་དཀྱིལ་དུ་པདྨ་འདབ་བརྒྱད་མཆོག་ཏུ་དཀར་བའི་ལྟེ་བར་ཧྲཱིཾ་ལས་བདུད་རྩི་དཀར་པོ་བབས་པས་ནད་པ་དེའི་ནད་ཐམས་ཅད་དང་། གདོན་རིམས་ཐམས་ཅད་བཤལ་ཏེ་ནད་གདོན་ལས་ཐར་བར་བསམ་ཞིང་། ཧྲཱིཾ་ཞེས་འབུམ་ཉི་ཁྲི་ལྔ་སྟོང་བཟླས་པས་ནད་ཐམས་ཅད་རབ་ཏུ་ཞི་བར་བྱེད་པའོ། །

གཉིས་པ་རྒྱས་པའི་ཆོ་ག་ལ་ཕྲན་ཚེགས་བསྟན་པ་ནི། བྱིས་པ་བཙས་མ་ཐག་པའི་ལྕེ་ལ་ཙནྡན། ག་བུར། གུར་གུམ། གི་ཝཾ་བཞི་སྦྱར་བས་ཧྲཱིཾ་བྲིས་ལ་དབྱངས་ཅན་མ་ཡི་འཁོར་ལོ་དགུག་གཞུག་བྱས་པས་བློ་རྣོ་བ་ངག་གི་དབང་ཕྱུག་དང་མཚུངས་པར་འགྱུར་རོ། །ཡང་འཆད་པ་ལ་ལྕེ་ལ་འཁོར་ལོ་གསལ་བཏབ་ནས་བཤད་ན་ཉན་པ་པོའི་རྣ་བར་སྙན་ཞིང་ཆོས་ཀྱི་ཚུལ་སྔོན་མི་ཤེས་པའི་ལེགས་བཤད་འཆད་ནུས་པའོ། །ཡང་འགྲེལ་གཏམ་དང་གླེང་བསླང་ལ་སོགས་ཀྱི་ཆོས་ཀྱི་ཚིག་དོན་བྱེད་པས་ན་དབྱངས་ཅན་འཁོར་ལོ་གསལ་བཏབ་ནས་བཤད་ན་སྤོབས་པ་ཐོགས་པ་མེད་ཅིང་ཀུན་གྱི་རྣ་བར་སྙན་པར་འགྱུར་རོ། །དེ་དག་ནི་འཁོར་ལོ་ཁ་དོག་སེར་པོ་འོད་དང་བཅས་པ་བསམ་པར་བྱའོ། །

གསུམ་པ་དབང་གི་ཆོ་ག་སྒྲུབ་པའི་ལས་བརྩམ་པ་ནི། གང་ལ་བྱ་བའི་བསྒྲུབ་བྱ་དེའི་རྣམ་ཤེས་ཀྱི་ངོ་བོ་ཨ་ཐུང་ཚེག་དྲག་ཅན་དོང་ཙེ་བརྩེགས་པ་ལྟ་བུའི་སྣ་དང་དཔྲལ་བའི་དཀྱིལ་ན་བུག་པ་གྲུ་གསུམ་པ་པད་འདབ་བཞི་པའི་ལྟེ་བར་གཏད་པའི་ཧྲཱིཾ་དམར་པོ་ཚེག་དྲག་ཅན་བསམས་ལ། རང་གི་སྙིང་གའི་འཁོར་ལོའི་ཧྲཱིཾ་དམར་པོ་བསམ་པའི་འོད་ཀྱིས་ཧྲཱིཾ་ཨ་ཐུང་ལ་ཕོག་པས་ཚུར་གཅིག་ལ་གཅིག་མཐུད་དེ་རང་གི་སྙིང་གའི་ཧྲཱིཾ་ལ་ཐིམ་པར་བསམས་ལ། ཧྲཱིཾ་ཆེ་གེ་མོ་ཨཱ་ཀཪྵཱ་ཡ་ཧྲཱིཾ་ཛཿ ཞེས་བཟླས་ཏེ་བསམ་པས་ཕོ་མོ་གང་ཡིན་ཡང་ཞག་བདུན་གྱིས་འགུགས་པ་ཉིད་དོ། །

བཞི་པ་དྲག་པོའི་ཚོགས་རྩོད་པ་སྨྲ་བ་ཚར་བཅད་པ་ནི། རང་གི་ལྕེ་འཁོར་ལོ་མཐིང་ག་གསལ་བཏབ་ནས་ཕ་(༣༧)རོལ་པོའི་ཡ་རྐན་ལ་ཟངས། མ་རྐན་ལ་ལྕགས་ཀྱི་འཁོར་ལོ་རྩིབས་བརྒྱད་པ། ལྕེ་སྟེང་གསེར་གྱི་རྡོ་རྗེ་རྒྱ་གྲམ་སྟེ། དེ་གསུམ་གྱི་ལྟེ་བར་ཧྲཱིཾ་ནག་པོ་ཞིག་གིས་མི་འགྱུར་བར་བསྔགས་པར་བསམ་པའི་གྲེ་བར་ཁྲོ་ཆུའི་མཆོད་རྟེན་ནག་པོ་གདུགས་ཆོས་འཁོར་དང་བཅས་པ་མགོ་མཇུག་བཟློག་པས་བཀབ་པར་བསམས་ཏེ། ཆེ་གེའི་ངག་སྟཱམྦྷ་ཡ་ནན་ཞེས་བརྒྱ་རྩ་བརྒྱད་ལ་སོགས་པ་བཟླས་ཏེ། རྩོད་དུས་དམིགས་པ་གསལ་བཏབ་ནས་རྩོད་པས་རྒྱལ་ངེས་སོ། །དེ་གལ་ཤིན་ཏུ་ཆེ་བའི་དབང་དུ་བྱས་པའོ། །རྩོད་པ་ཕལ་དང་ཤག་འགྲན་པ་ལ་རང་གི་ལྕེ་ལ་འཁོར་ལོ་གསལ་བཏབ་པས་རྒྱལ་ངེས་སོ། །ལས་ལ་སྦྱར་བའི་ལེའུ་སྟེ་བཞི་པའོ།། །།

དེ་ནས་དམ་ཚིག་ནི་རྟག་ཏུ་གཙང་སྦྲ་ལ་གནས་ཤིང་རྫུན་མི་སྨྲ། ཤ་ཆང་སྒོག་ཙོང་སྤང་། ཤེས་རབ་ཀྱི་རློམ་པས་གཞན་ལ་མི་སྨོད། བླ་མ་དང་། ཆོས་དང་། ཕྱག་མཚན་ལ་སོགས་པ་མཆོད་པར་འོས་པ་རྣམས་ལ་མི་སྨོད། རྟག་པར་འཕགས་མའི་བསྙེན་སྒྲུབ་ཀྱི་དམ་བཅའ་སྔགས་བརྒྱ་རྩ་རེ་མ་ཆགས་པ་རེ་ཞག་རེ་བཞིན་བཟླ་བར་བྱའོ། །དེ་ལྟར་བྱས་པས་མཚུངས་པ་མེད་པའི་སྙན་ངག །རྩོད་པ་དང་། འཆད་པ་དང་། འཛིན་པ་ལ་སོགས་གང་འདོད་པའི་ཤེས་རབ་ནམ་མཁའ་ལྟ་བུར་རྒྱ་ཆེ་ཞིང་ཉི་ཟླ་ལྟར་གྲགས་པ་འཇིག་རྟེན་ཀུན་ཏུ་མཛེས་ཤིང་ནད་དང་གནོད་པ་མ་ལུས་པ་ཞི་ནས་གནས་སྐབས་དང་མཐར་ཐུག་གི་གོ་འཕང་ཐོབ་སྟེ་རྣམ་པ་ཀུན་མཁྱེན་པའི་ཤེས་རབ་ཐོབ་པར་འགྱུར་རོ། །

དེ་ལྟར་དོན་གཉེར་སྐྱེ་བོའི་ཚོགས་ཀུན་གྱི། །བློ་ཡི་པདྨོ་རྒྱས་བྱེད་མཆོག་གི་ལམ། །འོད་ཀྱི་དྲྭ་བ་བཤད་ལས་གང་ཐོབ་པའི། །དགེ་དེས་འགྲོ་ཀུན་རྣམ་མཁྱེན་ཐོབ་པར་ཤོག །ཚུལ་འདི་གངས་རིའི་ཁྲོད་ཀྱི་སྙན་ངག་མཁན། །བསམ་ཡས་པ་ཡིས་དཔལ་ལྡན་གསང་ཕུའི་གནས། །བློ་གསལ་དགའ་བ་སྐྱེད་པའི་བསྟི་གནས་སུ། །ལེགས་བཤད་སྙིང་པོའི་བཅུད་རྣམས་བསྡུས་ཏེ་བསྟན། །འཕགས་མ་ངག་གི་དབང་ཕྱུག་གི་སྒྲུབ་ཐབས་འོད་ཀྱི་དྲྭ་བ་ཞེས་བྱ་བ། ལུང་དང་རིག་པ་དང་མན་ངག་གི་དོན་ལ་བློའི་པདྨོ་འཛུམ་ཞིང་། སྙན་ངག་དང་སྡེབ་སྦྱོར། མངོན་བརྗོད་ལ་སོགས་པའི་ཚུལ་ལ་མང་དུ་ཐོས་པའི་སྙན་ངག་མཁན་དཔལ་ལྡན་བསམ་ཡས་ཚུལ་ཁྲིམས་བློ་གྲོས་ཀྱིས་དཔལ་གསང་ཕུའི་ཆོས་གྲྭ་ཆེན་པོར་སྦྱར་བའོ། །འདི་བྲིས་དགེ་བས་འཆད་རྩོད་རྩོམ་པ་འཛིན་པའི་དོན་མ་ལུས་པ་ཐོགས་པ་མེད་པར་རིག་པའི་གནས་ལྔ་ལ་མཁས་པར་གྱུར་ཅིག །དགེའོ།། །།

དཔལ་ཚོགས་ཀྱི་བདག་པོའི་སྒྲུབ་ཐབས་རིན་ཆེན་སྤུངས་པའི་རི་རྒྱལ་ཞེས་བྱ་བ།

༄༅། །དཔལ་ཚོགས་ཀྱི་བདག་པོའི་སྒྲུབ་ཐབས་རིན་ཆེན་སྤུངས་པའི་རི་རྒྱལ་ཞེས་བྱ་བ་བཞུགས་སོ། །

༄༅། །རྒྱ་གར་སྐད་དུ། ཤྲཱི་ག་ཎ་པ་ཏི་སཔྟ་རཏྣ་ཀུ་ཏྲ་ནཱ་མ། བོད་སྐད་དུ། དཔལ་ཚོགས་ཀྱི་བདག་པོའི་སྒྲུབ་ཐབས་རིན་ཆེན་སྤུངས་པ་ཞེས་བྱ་བ། འཕགས་པ་རྡོ་རྗེ་འཛིན་པ་ལ་ཕྱག་འཚལ་ལོ། །དཔལ་ལྡན་བདེ་ཆེན་གར་གྱིས་རོལ་མཛད་པདྨ་རཱ་གའི་མདོག་འདྲ་ཞིང་། །ཉིན་བྱེད་དམར་བའི་ཕྲེང་བ་དང་མཚུངས་འབར་བའི་དཀྱིལ་འཁོར་ལ་གནས་ཤིང་། །འཇིགས་རུང་བདུད་སྡེའི་སྙིང་དྲུངས་འབྱིན་མཛད་རྒྱལ་བའི་རྣམ་འཕྲུལ་རྨད་བྱུང་སྐུ། །བསོད་ནམས་ཡེ་ཤེས་ཚོགས་ཀྱི་བདག་ལ་དེང་འདིར་གུས་པས་ཕྱག་འཚལ་ལོ། །དེ་ཉིད་སྒྲུབ་པའི་ཆོ་ག་ནི། །སྐུ་བྲི་བ་དང་སྒྲུབ་པ་དང་། །སྤོགས་དང་ལས་ལ་སྦྱར་བ་(༣༨)དང་། །རྣམ་པ་བཞིར་ནི་ཡང་དག་བརྗོད། །

དེ་ལྟར་དོན་བཞིར་གནས་པས། དང་པོ་སྐུ་གཟུགས་བྱ་བའི་ཆོ་ག་བརྗོད་པར་བྱ་སྟེ། རྒྱུ་སྐར་རྒྱལ་ཕུར་འཛོམ་པའི་དུས་སུ་ཙནྡན་དམར་པོ་ལས་གྲུབ་པའམ། རས་དར་དམར་པོ་ལ་འོག་ནས་བྱུང་བའི་མངོན་རྟོགས་ལྟར་བྲིས་ལ། དེའི་ཉིན་པར་སྒྲུབ་པའམ་རྒྱུ་སྐར་མཆོག་ལ་མཆོད་པ་དང་གཏོར་མ་ཕྱིར་བཤམས་ཏེ། པདྨ་དམར་པོ་འདབ་མ་བརྒྱད་པའི་ལྟེ་བར་དར་དང་རིན་པོ་ཆེའི་སྟེང་དུ་བཞུགས་ལ། བདག་ཉིད་འབྱུང་པོ་འདུལ་བྱེད་ནི། །ཞལ་གཅིག་ཕྱག་བཞི་རིན་ཆེན་བརྒྱན། །དང་པོ་གཉིས་ཀྱིས་ཐུགས་ཀར་ཏེ། །རྡོ་རྗེ་ཐོད་ཁྲག་སྟེང་འོག་འཛིན། །དེ་བཞིན་འོག་མའི་གཡས་གཡོན་གྱིས། །མདའ་གཞུ་རྒྱབ་ཏུ་འགེངས་པའོ། །མཆེ་གཙིགས་ཞལ་ནི་བགྲད་པ་དང་། །མདོག་སྔོ་ཐོད་པའི་ཕྲེང་བས་བརྒྱན། །རོ་དང་ཉི་སྟེང་གཡོན་བརྐྱང་ཞིང་། །གཡས་བསྐུམ་སྟག་གི་ཤམ་ཐབས་འཛིན། །འོད་ཟེར་མཐིང་ག་འབར་བར་བསྒོམ། །དེ་ནས་འོག་ནས་འབྱུང་བ་ལྟར་བསྐྱེད་ལ། སྙིང་གའི་ཧཱུྃ་ལས་འཕྲོས་པའི་འོད་ཀྱིས་ཚོགས་བདག་སྤྱན་དྲངས་ལ་མཆོད་ནས། ཛཿཧཱུྃ་བྃ་ཧོཿས་དེ་ལ་གཉིས་སུ་མེད་པར་བསྟིམས་ཏེ། དབང་བསྐུར་ནས་རིན་ཆེན་འབྱུང་གནས་ཀྱིས་དབུར་བརྒྱན་པར་བསམས་ལ་མཆོད་པས་མཆོད་དེ། རྟེན་འབྲེལ་སྙིང་པོ་དང་ཉེ་བའི་སྙིང་པོ་ལ་སོགས་པས་མེ་ཏོག་འཐོར་ནས་བཀྲ་ཤིས་ཀྱི་ཚིགས་སུ་བཅད་པ་བརྗོད་དེ། གསོལ་བ་བཏབ་ནས་རྫས་དང་མཉམ་དུ་སྦ་ཞིང་བཅང་བར་བྱ་བ་ནི་སྐུ་བྲི་བའི་ཆོ་གའོ། །

དོན་གཉིས་པ་སྒྲུབ་པ་ནི། དཔྱིད་ཟླ་ར་བའམ་འབྲིང་པོའི་ཚེས་བརྒྱད་ལ་མཁའ་འགྲོ་འདུ་བའི་གནས་སམ་ཉམས་དགའ་བར་གཞི་བདག་དང་རིགས་དྲུག་ལ་གཏོར་མ་བྱིན་ནས། མཎྜལ་ཁྲུ་དོ་ལ་སོགས་ཇི་ལྟར་རིགས་པ་ལ་ཟླུམ་སྐོར་བྲིས་པའི་དཀྱིལ་དུ་རེ་ཁཱ་དྲངས་ཏེ། ཟླ་གམ་ཁ་སྤྲོད་ཀྱི་ཚུལ་དུ་བྱས་པའི་སྟོད་ཀྱི་ཟླ་གམ་ལ་པདྨ་དམར་པོ་འདབ་མ་བརྒྱད་པ་མུ་ཁྱུད་དང་བཅས་པ་བྲིས་པའི་སྟེང་དུ་སྔར་གྱི་སྐུ་དེ་བཞུགས་སུ་གསོལ། ཟླ་གམ་མདུན་མ་ལ་འདབ་མ་བརྒྱད་བྲིས་པའི་ལྟེ་བའི་སྟེང་དུ་ལྷ་བཤོས་མཁར་ཐབས་སུ་བརྩིགས་པར་མར་དང་གླང་ཤས་བརྒྱན་ཏེ། སྤོས་དང་ཟས་སྣས་བརྒྱན་པ་རྟེན་གཏོར་དུ་བྱས་པ་དང་། འདབ་མ་བརྒྱད་ཀྱི་སྟེང་དུ་ལྷ་བཤོས་མར་གྱིས་བརྒྱན། ཤ་ལྷུ་བརྒྱད་དམ་མེད་ན་དུམ་བུ་བརྒྱད། ཆང་ཏིང་བརྒྱད། དཀར་གསུམ་མངར་གསུམ་གྱིས་སྤྲུས་པའི་རིལ་བུ་བརྒྱད་རྣམས་གཞུག་པའི་རྩར། ཉ་ཕྱིས་སམ། དངུལ་ཕོར་རམ། དུང་ཆོས་སུ་པདྨ་འདབ་མ་བརྒྱད་པའི་ལྟེ་བར་གྷ་དང་། འདབ་མ་རྣམས་ལ་རེ་རེ་བཞིན། ༀ་ཨཱཿགྷ་ཧཱུྃ་སྭཱ་ཧཱ། མུ་ཁྱུད་བཞི་ལ་རིམ་པ་བཞིན་དུ་ནང་ནས་ཉེ་སྙིང་། སྙིང་པོ་དང་མིང་གི་སྙིང་པོ་རྣམས་དང་འབོད་པའི་སྔགས་རྣམས་གི་ཝཾ་དང་དཀར་གསུམ་མངར་གསུམ་དྲི་བཟང་དང་སྦྱར་བས་བྲིས་ཏེ་སྤེལ་ཚིག་དང་བཅས་པ་བྲིས་པའི་སྣོད་སྦུབས་ཏེ་བཞག་གོ། །གཞན་ཡང་མཆོད་པའི་བྱེ་བྲག་དཔག་མེད་འབྱོར་ཚད་བཤམ་མོ། །སི་ལ་དང་ཙནྡན་དམར་པོའི་བདུག་སྤོས་སྤྱན་འདྲེན་དུས་དབུལ་བར་བྱའོ། །དེ་ལྟ་བུའི་གནས་སུ་རྣལ་འབྱོར་བྱ་བ་ལ་གཉིས་ལས། དང་པོ་བདག་ཉིད་བསྐྱེད་ཅིང་སྒོམ་བཟླས་བྱ་བ་ནི། སྟན་བདེ་བ་ལ་འདུག་སྟེ་(༣༩)སྐྱབས་འགྲོ་སེམས་བསྐྱེད་བྱས་ལ། སྐད་ཅིག་གིས་མདུན་གྱི་ནམ་མཁར་རྡོ་རྗེ་འཛིན་པ་བླ་མ་དང་དབྱེར་མེད་པ་ལ་སངས་རྒྱས་བྱང་སེམས་ཚོགས་ཀྱིས་བསྐོར་བ་བྱོན་པ་ལ་ཡན་ལག་བདུན་པས་མཆོད་གསོལ་བྱས་ནས། མཆོད་བྱ་མཆོད་བྱེད་ཀྱི་ངོ་བོ་ཐམས་ཅད་མི་དམིགས་པའི་ངང་ལ་བཞག་ནས། སྭ་བྷཱ་ཝས་སྦྱངས་པའི་ངང་ལ་ཅུང་ཟད་མཉམ་པར་བཞག་གོ། །དེའི་ངང་ལས་རི་རབ་ཆེན་པོའི་སྟེང་དུ་སྣ་ཚོགས་རྡོ་རྗེའི་ལྟེ་བ་ལ་གནས་པའི་པདྨ་དང་ཉི་མ་དང་བགེགས་ཀྱི་གདན་གནོན་ཞིང་། སྟེང་རྡོ་རྗེའི་གུར་དང་། འོག་རྡོ་རྗེའི་ས་གཞི་དང་། བར་རྡོ་རྗེ་རྭ་བ་དང་། མདའི་དྲྭ་བ་དང་། ཕྱི་ཡེ་ཤེས་ཀྱི་མེ་རབ་ཏུ་འབར་བའི་དབུས་ཀྱི་ཡི་དྭགས་ཀྱི་སྟེང་ན་ཧཱུྃ་ལས་བདག་ཉིད་འབྱུང་པོ་འདུལ་བྱེད་ཞལ་གཅིག་སྤྱན་གསུམ་འབར་བའི་སྟངས་སྟབས་ཅན། བགེགས་ཚོགས་མནན་ཅིང་སྐྲག་པར་མཛད་པ་མེ་རེའི་ཀློང་དུ་བསྐྱེད་པའི་སྙིང་གར་པདྨ་ཉི་མའི་སྟེང་ན་ཧཱུྃ་དང་མཐའ་སྐོར་དུ་སུམྦྷ་ནིས་བསྐོར་བར་བསམས་ལ། སྙིང་གའི་ཧཱུྃ་ལས་འོད་འཕྲོས་པས་སྟེང་གི་ནམ་མཁར་རྡོ་རྗེ་འཛིན་པ་དེ་ཁོ་ན་འདྲ་བ་བྱོན་པ་ལ་མཆོད་དེ། ཛཿཧཱུྃ་བྃ་ཧོཿས་གཉིས་སུ་མེད་པར་བསྟིམས་ལ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་ཏེ་མི་བསྐྱོད་པས་དབུར་བརྒྱན་པར་བསམས་ལ། སྙིང་གའི་སྔགས་ལ་དམིགས་ཏེ། ༀ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། ༀ་གྲ྇ཧྞ་གྲ྇ཧྣ་ཧཱུྃ་ཧཱུྃ་ཕཊ། ༀ་གྲ྇ཧྞ་པ་ཡ་གྲ྇ཧྞ་པ་ཡ་ཧཱུྃ་ཧཱུྃ་ཕཊ། ༀ་ཨ་ན་ཡ་ཧོ་བྷ་ག་ཝཱན་བིདྱ་རཱ་ཛ་ཡ་ཧཱུྃ་ཧཱུྃ་ཕཊ། ཅེས་པའི་སྔགས་ཅི་མང་དུ་བཟླས་ཏེ་རབ་ཏུ་དམིགས་པར་བྱའོ། །དེ་སྐད་དུ་མཁའ་འགྲོ་རྒྱ་མཚོ་ལས། དེ་ལྟའི་མཆོག་གི་སྒྲུབ་པ་ཉིད། །མ་མོ་རྣམས་ནི་སྒྲུབ་པའི་མཆོག །དེ་དབུས་ཁྲོ་བོ་ཆེན་པོ་ནི། །ཞལ་གཅིག་པ་ལ་ཕྱག་བཞི་པ། །ཞལ་གྱི་མཆེ་བ་ཅུང་ཟད་གཙིགས། །ཁྲོ་བཅས་ཞལ་ནི་བཞད་པ་ལ། །སྐུ་མདོག་སྔོན་པོ་འཇིགས་ཆེན་པོ། །ཐོད་པའི་ཕྲེང་བས་རྣམ་པར་བརྒྱན། །ཡི་དྭགས་ཞོན་ཞིང་ཉི་མར་གནས། །གར་ལྡན་སུམ་ཅུ་གསུམ་འཇིགས་མཛད། །སྟག་གི་པགས་པའི་གོས་འཛིན་ཞིང་། །རྒྱན་གསུམ་བཟང་པོའི་གཟུགས་ཅན་དེ། །བ་དན་གསུམ་པར་རྡོ་རྗེ་དང་། །ཐོ་བ་དང་ནི་མཚན་མོ་འཛིན། །གཡས་དང་གཡོན་གྱི་ཕྱག་དག་ན། །དེ་བཞིན་མདའ་དང་གཞུ་ཉིད་དོ། །ཞེས་གསུངས་པའི་དོན་ནི། བདག་ཉིད་བསྐྱེད་ཟིན་ནས་བཟླས་པའི་རྣལ་འབྱོར་བསྟན་ཟིན་ཏོ།། །།

གཉིས་པ་མདུན་བསྐྱེད་བྱ་ཞིང་བཟླས་པ་ནི། དེ་ལྟར་བདག་གི་རྣལ་འབྱོར་རྫོགས་པའི་མདུན་དུ་བྲག་རི་ཆེན་པོའི་རྩེར། པདྨ་དམར་པོ་དང་ཉི་མ་ལ་གནས་པའི་བྱི་བ་སྔོན་པོ་རིན་ཆེན་སྐྱུགས་པའི་སྟེང་ན་གྷ་དམར་སྐྱ་ཡོངས་སུ་གྱུར་པ་ལས། ཚོགས་ཀྱི་བདག་པོ་དམར་པོ་གླང་པོ་ཆེའི་སྣ་ཅན་གཡས་གཡོན་དུ་གཟིགས་པའི་སྤྱན་གསུམ་དང་རལ་པའི་ཐོར་ཚུགས་རཏྣའི་རྒྱན་གྱིས་མཛེས་པའི་དཔུང་རྒྱན་དང་དོ་ཤལ་འཆང་ཞིང་། མེ་ཏོག་དམར་པོའི་ཐོད་དང་ཕྲེང་བ་ཅན། ཕྱག་བཅུ་གཉིས་ཀྱི་གཡས་པ་དྲུག་ན་རིམ་པ་བཞིན་དུ་དགྲ་སྟྭ་དང་། མདའ་དང་། ལྕགས་ཀྱུ་དང་། རྡོ་རྗེ་དང་། རལ་གྲི་དང་། འཕང་མདུང་དང་། གཡོན་དྲུག་ན་གཏུན་ཤིང་དང་། གཞུ་དང་། ཁ་ཊྭཱྃ་ག་དང་། ཁྲག་གིས་གང་བའི་ཐོད་པ་དང་། ཤ་ཆེན་གྱིས་བཀང་བ་ཐོད་པ་(༤༠)དང་། ཕུབ་ཆུང་བ་དན་བསྡེབས་པ་སྟེ་དྲུག་གིས་རིམ་པ་བཞིན་ནོ། །དེ་ལ་གཡས་ཀྱིས་རྡོ་རྗེ་དང་གཡོན་གྱིས་ཐོད་པ་ཁྲག་གིས་བཀང་བ་གཉིས་ཐུགས་ཀར་སྟེང་འོག་ཏུ་འཛིན་ཅིང་། གཞན་རྣམས་བརྐྱང་བའི་རྣམ་པའོ། །སྟོད་སྨད་རིན་ཆེན་སྣ་ཚོགས་དང་བ་ཏི་ཁྲ་བོའི་ཤམ་ཐབས་ནོར་བུའི་ཕྲེང་བས་བཅིངས་ཤིང་། ཞབས་གཡོན་བརྐྱང་བས་བྱི་བའི་མགོ་མནན་ནས་གཡས་པའི་རྟིང་པ་གཡོན་གྱི་བྱིན་པ་ལ་གཏད་དེ་གར་མཛད་པའི་འོད་ཟེར་དམར་པོ་འཁྲུགས་པའི་བདག་གི་བསྒྲུབ་བྱ་འགུགས་ཤིང་ནོར་གྱི་ཆར་འབེབས་པ། ཐུགས་ཀར་པདྨ་དང་ཉི་མའི་སྟེང་ན་གྷ་དམར་སྐྱ་ལ་ཡི་གེ་ཉི་ཤུ་རྩ་གཅིག་གིས་བསྐོར་བ་ཅན་བསམ་པར་བྱའོ། །དེ་ནས་རང་གི་སྙིང་གའི་ཧཱུྃ་ལས་འོད་ཟེར་འཕྲོ་བ་དང་མཉམ་དུ། ༀ་གྷ་གྷ་སིདྡྷི་སིདྡྷི་སརྦ་ཨརྠ་སཱ་དྷ་མེ་པྲ་སཱ་དྷ་མེ་ཧཱུྃ་ཧཱུྃ་ཛཿཛཿསྭཱ་ཧཱ། ཞེས་བརྗོད་མ་ཐག་ཏུ་འོད་ཀྱིས་བསྐུལ་ཏེ་ཚངས་པའི་གནས་ནས་སྔ་མ་ལྟ་བུའི་ཚོགས་བདག་ནམ་མཁར་བྱོན་པ་ལ་མཆོད་དེ། ཛཿཧཱུྃ་བྃ་ཧོཿས་མདུན་གྱི་བྲིས་སྐུ་མདུན་བསྐྱེད་ཀྱི་ངོ་བོ་བསྐྱེད་མ་ཐག་པ་དེ་ལ་བསྟིམ། སླར་ཡང་མེ་ཏོག་དམར་པོ་ལ་སོགས་པ་དང་བདུག་སྤོས་སིལ་མས་མཆོད་དེ་དགྱེས་པར་བསམས་ལ། ༀ་ཨཱཿགྷ་ཧཱུྃ་སྭཱ་ཧཱ། ཞེས་འབུམ་ཕྲག་གཅིག་དང་། ༀ་བག་ཏྲཻ་ཀ་དཾཥྚ་བིནྡྷ་ཧཱུྃ་ཕཊ་སྭཱ་ཧཱ་སྟེ་སྙིང་པོ་འབུམ་དང་། ༀ་ག་ཎ་པ་ཏི་སྭཱ་ཧཱ། མིང་གི་སྙིང་པོ་འབུམ་རྣམས་སུམ་སྦྲེལ་ལམ། ཐོག་མར་ༀ་ཨཱཿགྷ་ཧཱུྃ་ཁོ་ན་བཟླས་པས་རྟགས་བྱུང་བ་དང་དངོས་གྲུབ་བླང་བར་བྱའོ། །གཞན་གསུམ་པོ་མ་བཟླས་ཀྱང་འགལ་བ་མེད། འབོད་པ་དང་བསྙེན་སྔགས་ཀྱིས་ངེས་པར་འགྲུབ་ཅེས་བླ་མའི་མན་ངག་ལས་བརྒྱུད་དོ། །དེ་ལྟར་གང་འཐད་བཟླས་པའི་འོད་ཟེར་གྱིས་ཕྱོགས་བཅུའི་ནོར་བུ་དང་དབང་པོ་ལ་སོགས་པའི་གཟི་བརྗིད། ལྷ་དང་ཀླུ་དང་མིའི་འབྱོར་པ་ཐམས་ཅད་དང་། གང་དབང་དུ་བྱ་བར་འདོད་པའི་བསྒྲུབ་བྱ་ཐམས་ཅད་བཀུག་ནས་བདག་གི་ཁང་པའི་ནང་དང་རྐང་པའི་དྲུང་དུ་བདག་ལ་ཆགས་པས་ལུས་དམར་ཞིང་གཅེར་བུར་ལྷགས་ནས། དེའི་རྣམ་པར་ཤེས་པ་བདག་གི་སྙིང་གར་ཐིམ་པར་བསམ་ཞིང་། ལྷའི་ང་རྒྱལ་གྱིས་སྔགས་བཟླས་ཏེ། ཐུན་འཇོག་ཁར་མཆོད་པས་མཆོད་དེ་བདག་གི་འདོད་པའི་དོན་ཚོགས་བདག་གིས་བསྒྲུབས་པར་བསམས་ལ། རྒྱལ་བའི་སྐུ་གསུང་རྡོ་རྗེ་ཡི། །གཉིས་མེད་ཡེ་ཤེས་ལས་བྱུང་བ། །ཚོགས་རྗེ་ཚོགས་བདག་དཔལ་དང་ལྡན། །བགེགས་ཀྱི་གཙོ་ལ་ཕྱག་འཚལ་བསྟོད། །ཅེས་པ་ལ་སོགས་པས་བསྟོད་དེ། ལྷ་ཡི་ང་རྒྱལ་གྱིས་ལངས་ལ་སེམས་ཅན་གྱི་དོན་དུ་བསྔོ་བ་བྱས་ལ་སྒྱུ་མ་ལྟ་བུར་གནས་པར་བྱའོ། །དེ་ལྟར་བསྒོམ་ཞིང་ཉིན་རེ་བཞིན་ཚོགས་བདག་གི་མདུན་དུ་ཤུག་པའམ་འབྲས་བུ་ཅན་གྱི་ཤིང་ངམ་གཞན་གྱིས་བརྩིགས་ལ་མེ་སྦར་རོ། །འོག་ནས་འབྱུང་བ་ལྟར་ལྷ་བསྐྱེད་པ་ལ་དཀར་གསུམ་མངར་གསུམ་སྦྱར་བའི་བག་ཕྱེ་དང་ཁུར་བ་མང་དུ་བྱས་པས་སྦྱིན་སྲེག་ཟླ་བ་ཕྱེད་ནས་གཅིག་གི་བར་དུ་བྱ་ཞིང་། ཚོགས་བདག་གིས་ལོག་འདྲེན་བརྒྱད་ཁྲི་བཞི་སྟོང་བསྐུལ་ནས། དེ་དག་(༤༡)གིས་བསྒྲུབ་བྱ་དང་ནོར་དང་འབྲུ་ལ་སོགས་པ་དབང་དུ་བྱས་ཏེ་བདག་ལ་ཕུལ་བར་བསམ་ཞིང་། འཇིག་རྟེན་ཐམས་ཅད་བདག་གི་དབང་དུ་གྱུར་པར་བསམ་མོ། །དེ་ལྟར་རྒྱས་པའི་འོག་ཏུ་གཏོར་མ་ཡང་རྩ་སྔགས་ཀྱིས་ཕུལ་ལ་མཉེས་པར་བསམ་ཞིང་། ཁྱད་པར་དུ་ཐོ་རངས་ཀྱི་དུས་སུ་བཟླས་བརྗོད་བརྩོན་པས་སྦྱིན་སྲེག་བྱ་ཞིང་། རྟེན་གཏོར་བཅས་པ་དེ་གསོལ་བར་བསམས་ལ་སྔ་མ་བཞིན་དུ་བྱའོ། །

ཐུན་མཚམས་སུ་སྣོད་གཙང་མར་ཅི་འབྱོར་པ་བཤམས་ལ། ༀ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་ལ། ཚོགས་བདག་མདུན་དུ་བསམས་ལ་རྩ་བའི་སྔགས་ཀྱིས་ཕུལ་ལ། རྒྱལ་བའི་བཞེད་པ་འགྲུབ་པ་དང་། །སྡུག་བསྔལ་ཆུ་བོར་གནས་པ་ཡི། །སྐྱེ་བོ་ཡུན་དུ་བསྐྱབ་པའི་ཕྱིར། །བྱང་ཆུབ་མཆོག་ཏུ་སེམས་བསྐྱེད་ཅིང་། །ཉི་མའི་འོད་བཞིན་གསལ་བའི་ཞལ། །མ་རིག་སྒྲིབ་པ་སྤངས་པའི་སྐུ། །འཇིག་རྟེན་འདིར་ནི་དོན་མཛད་པའི། །ཚོགས་བདག་ཉིད་ལ་ཕྱག་འཚལ་བསྟོད། །ལྷ་རྣམས་ཁྱོད་ལ་མཆོད་པར་བྱེད། །ཚོགས་བདག་ཉིད་ལ་ཕྱག་འཚལ་བསྟོད། །མེ་ཏོག་ཕྲེང་བ་རཏྣའི་དབྱིབས། །ལ་དུ་ལ་ཕུག་ཡིད་འོང་ཟས། །ཙནྡན་ག་པུར་དུ་རུ་ཀ །ལི་ལ་སོགས་པའི་སྤོས་མཆོག་དང་། །མར་མེ་རོལ་མོ་ལ་སོགས་པ། །མཆོད་པའི་བྱེ་བྲག་བསམ་མི་ཁྱབ། །བགེགས་རྒྱལ་ཚོགས་བདག་འཁོར་བཅས་མཆོད། །བདག་ལ་དངོས་གྲུབ་རྒྱ་ཆེན་སྩོལ། །ཨ་གྷ་གྷ་སིདྡྷི་སིདྡྷི་སརྦ་ཨརྠ་མེ་པྲ་སཱ་དྷ་ཡེ་ཆེ་གེ་པཱ་ཤཾ་ཀུ་རུ་ཧོཿཛཿཛཿསྭཱ་ཧཱ། ཞེས་པས་བསྟོད་པར་བྱའོ། །དེ་ལྟར་བསྒྲུབ་པས་སྒོ་རྡུང་བ་དང་། ཐོག་འཚེག་པ་དང་། འོད་འབྱུང་བ་དང་། ལྕགས་ལ་སོགས་པའི་ཚོང་དཔོན་བྱེད་པ་དང་། གླང་ཞོན་པ་དང་། ཡོངས་ཕུད་རྩེ་ཞིང་ཁ་ཟས་སྦྱིན་པ་ལ་སོགས་འབྱུང་ངོ་། །འཇིགས་པའི་ཆོ་འཕྲུལ་ཅི་བྱུང་ཡང་བློའི་ཆོ་འཕྲུལ་དུ་ཐག་བཅད་པ་རང་གྲོལ་དུ་བཞག་པས་ཞི་བར་འགྱུར་རོ། །སྒྲུབ་པའི་རྟགས་དེ་དག་བྱུང་བ་དང་བསྙེན་པ་ཁ་གསོ་བའི་ཕྱིར། གནས་དེ་ཉིད་དུ་མཎྜལ་གྲུ་བཞི་སེར་པོར་བྱུགས་ལ་འདབ་བརྒྱད་བཀོད་པའི་ཕྱི་རིམ་དུ་གྲུ་བཞི་རྒྱ་དང་དཔངས་ཉིས་འགྱུར་བྱས་པའི་མཐར་མུ་རན་གྲུ་བཞི་ལ་རིན་ཆེན་འབར་བ་བརྒྱད་དང་། ལྟེ་བ་དང་འདབ་མ་མེ་ཏོག་དམར་པོའམ་སེར་པོའི་ཚོམ་བུ་བཀོད་དེ། འབྲས་བུ་ཅན་གྱི་ཤིང་གིས་གྲུ་བཞིར་བརྩིགས་ལ། རང་ཉིད་སྟན་གོས་སེར་པོ་བྱས་ཏེ་སྒེག་པ་དང་བཅས་པས་རྒྱལ་པོ་རོལ་པའི་འདུག་སྟངས་ཀྱིས་ལྷོ་ནས་བྱང་ཕྱོགས་སུ་བལྟ་སྟེ། དགའ་ཞི་སྤྲོ་བས་འདུག་ལ་བདག་གི་རྣལ་འབྱོར་དང་མདུན་བསྐྱེད་ལ་མཆོད་དེ། མེ་ལྷ་སེར་པོ་ལས་འདོད་རྒུ་འབྱུང་བར་བསམས་ལ། བསྲེག་རྫས་རཏྣ་སྣ་ཚོགས། ཤིང་ཏོག་སྣ་ཚོགས། ཕྱུགས་ནོར་གྱི་སྤུ། དཀར་གསུམ་མངར་གསུམ། འབྲུ་སྣ་ཚོགས། མར་དང་ཁ་ཟས་སྣ་ཚོགས། ཙནྡན་དཀར་པོ། མེ་ཏོག་སེར་པོ་རྣམས་གཡས་སུ་བཤམ་ཤིང་། གཡོན་དུ་མཆོད་པ་ལྔ། གཏོར་མ་གཉིས་བཤམས་པའི་གཅིག་གཞི་བདག་ལ་སྦྱིན། དེ་ནས་བསྲེག་རྫས་ༀ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་ལ། བསྙེན་པའི་སྔགས་ཀྱི་མཐར་འབྱོར་པ་པུཥྚིཾ་ཀུ་རུ་ༀ། (༤༢)ཞེས་བརྗོད་ནས་བསྟོད་དེ། བརྒྱ་སྟོང་ལ་སོགས་པ་འབུལ་ཞིང་གསོལ་བ་བཏབ་ནས། མར་དགང་བླུགས་གསུམ་དང་གཏོར་མ་འབུལ། གསོལ་བ་བཏབ་པས་མཉེས་ཏེ་བདག་གི་གནས་དེར་རཏྣའི་ཆར་ཕབ་པར་བསམས་ལ། བཟོད་པར་གསོལ་ཏེ། གཤེགས་སུ་གསོལ་བ་ནི་དགོས་པ་མ་ཡིན་ཏེ་བྲིས་སྐུ་ལ་བསྟིམ་པར་བྱས་ནས། ཐལ་བ་རིའི་རྩེའམ་མི་ཕྱུགས་ཀྱིས་འཐུང་བའི་ཆུར་འདོར་བས་འབྱོར་པ་རྒྱས་པར་འགྱུར་རོ། །དེ་ནས་རྒྱུན་དུ་བྱེད་ན་བསྲེག་རྫས་རིལ་བུར་བྱས་ལ་སྦྱིན་སྲེག་བྱའོ། །དེ་ལྟར་སྐྱེ་བོས་དབེན་པར་ཟླ་ཕྱེད་དུ་བསྒྲུབས་པས་རྨི་ལམ་སྔར་སྨོས་པ་ལྟར་དང་། མེ་ཏོག་དམར་པོ་འཐུ་བ་དང་། ཉི་མ་ཤར་དང་རི་རྩེར་ཕྱིན། རྒྱལ་པོ་བདག་གི་དབང་དུ་འདུ། སྐྱེ་བོ་མང་པོས་བསྐོར་ཞིང་དགའ་བ་དང་། དངོས་སུ་ཡུལ་དཔོན་དང་ཡ་རབས་དབང་དུ་འདུ་བ་དང་། སྔར་བས་ཉམས་དགའ་བ་དང་། སྐྱེ་བོ་བྱམས་པ་ལ་སོགས་པ་འབྱུང་སྟེ་གྲུབ་རྟགས་སོ། །སྒྲུབ་པའི་ཆོ་ག་བརྗོད་ཟིན་ཏོ།། །།

དོན་གསུམ་པ་དེ་ལྟར་སྒྲུབ་བྱས་ཀྱང་རྟགས་མ་བྱུང་ན་སྤོགས་པའི་ཆོ་ག་ལ་གཉིས། དང་པོ་སྔགས་བཟློག་སྟེ་བཟླ། དེས་ཀྱང་མ་གྲུབ་ན་ཕྱེད་ནས་བཟློག་སྟེ་བཟླ། དེས་ཀྱང་མ་འགྲུབ་ན་འབྲུ་དཀྲུགས་ཏེ། ༀ་གྷ་ཨཱཿསྭཱ་ཧཱུྃ་ཧཱ། ཞེས་བརྒྱ་ཕྲག་གཅིག་བཟླས་པས་རྟགས་མི་འབྱུང་མི་སྲིད་དོ། །རྟགས་བྱུང་ནས་ལས་ལ་སྦྱར་རོ། །དེ་ལྟར་བྱས་ཀྱང་སྒྲུབ་པའི་རྟགས་མེད་ཅིང་ཐོག་སེར་བབ་པ་དང་། ཆུ་ཁམ་པ་འབབ་པ་དང་། གཅན་གཟན་མཆེ་བ་གཙིགས་པ་དང་། མི་དམར་པོས་རྒོལ་བ་དང་། ནོར་འཕྲོག་ཆོམ་རྐུན་སོགས་དང་སྙིང་མི་དགའ་བ་སོགས་ཟློག་རྟགས་བྱུང་ན་སྔར་ལྟར་སུམ་འདབ་ཏུ་བསྒྲུབ་པར་བྱའོ། །དེས་ཀྱང་མ་གྲུབ་ན། ༀ་བ་ར་ཏ་ཀ་ཡེ་སྭཱ་ཧཱ། ཉེ་སྙིང་དང་། ༀ་བ་ག་ཏྲེ་ཀ་དཾཥྚ་བིནྡྷ་ཧཱུྃ་ཕཊ་སྭཱ་ཧཱ། སྙིང་པོ་དང་། ༀ་ྃ་ག་ཎ་པ་ཏི་ཡེ་སྭཱ་ཧཱ། མིང་གི་སྙིང་པོ་འབུམ་བགྲང་། མཉམ་དུ་འབོད་པའི་སྔགས་ཅི་འགྲུབ་བཟླས་པས་རྟགས་བྱུང་བ་དང་དངོས་གྲུབ་བླང་ངོ་། །

དེས་ཀྱང་མ་འགྲུབ་ན་གནད་ལ་དབབ་པ་ནི། བྲིས་སྐུའི་མདུན་དུ་ཐབ་གྲུ་གསུམ་བྲིས་པའི་སྟེང་དུ་ཚེར་མ་གྲུ་གསུམ་དུ་བརྩིགས་ལ། རང་ཉིད་ཁྲོ་བོ་རྡོ་རྗེ་འཛིན་པར་དམིགས་ལ། ཚོགས་བདག་སྔར་བཞིན་ཐབ་ཏུ་བསྐྱེད་ལ་བསྲེག་རྫས་རིལ་བུར་བྱས་པ་བརྒྱ་རྩ་བརྒྱད་ནས། མར་ཁུ་བརྒྱ་རྩ་བརྒྱད། བལ་ལུའི་དུམ་བུ་བརྒྱ་རྩ་བརྒྱད་རྣམས་སྤེལ་ལ། སུམྦྷ་ནིའི་མཇུག་ཏུ་འདིའི་སྔགས་གོང་མ་གཉིས་བཏགས་ཏེ་སུམ་སྦྲེལ་གྱིས་ཕུལ་ལ། ཌཱ་མ་རུའི་སྒྲས་ཚོགས་བདག་བསྐུལ། དེས་ལོག་འདྲེན་རྣམས་བསྐུལ། དེ་རྣམས་ཀྱིས་རང་གི་འདོད་པ་སྒྲུབ་པར་བསམ་ཞིང་། ཞག་བདུན་དུ་བྱས་པས་སྔར་བཞིན་རྟགས་བྱུང་ནས་དངོས་གྲུབ་བླང་ངོ་། །དེས་མ་གྲུབ་ན་རྟེན་གཏོར་བྲིས་སྐུ་མདུན་དུ་བཤམས་པ་དེ་དག་གཡས་ཕྱོགས་སུ་བཤམ་པའི་བར་ལ་ཡོལ་བ་དམར་པོ་བཏང་ལ། རང་ཉིད་འབྱུང་པོ་འདུལ་བྱེད་དུ་གསལ་བས་ཚོགས་བདག་ཞབས་ཀྱིས་མནན་པར་བསྒོམས་ལ། ལག་པ་གཡས་པའི་མཐེ་བོས་མཐེབ་ཅུང་མནན་ལ། བར་མ་(༤༣)གསུམ་རྡོ་རྗེ་གདེངས་པའི་ཕྱག་རྒྱས་གཟིར་ཞིང་། གུ་གུལ་དང་ཤ་ཆེན་གྲི་ཁྲག་རྣམས་ཀྱི་དུད་པས་བྲིས་སྐུ་བླ་རྡོ་དང་བཅས་པ་བདུག་ཅིང་། གསུམ་སྦྲེལ་ཏེ་བཟླས་པའི་འོད་ཟེར་ཚ་ཞིང་རྩུབ་པས་གདུང་བས་མ་བཟོད་ནས་འཇིག་རྟེན་གསུམ་གྱི་ཚེ་དང་ལོངས་སྤྱོད། བསོད་ནམས་ཐམས་ཅད་བསྡུས་ནས་རང་ལ་དངོས་གྲུབ་བྱིན་པར་བསམས་ལ། སུམྦྷ་ནིའི་མཇུག་ཏུ་སྔགས་གསུམ་བཟློག་ནས་བགྲང་བ་སྦྲེལ་ལ། ཏིལ་ནག་པོ་ལ་བསྟིམས་ཏེ་བྲིས་སྐུ་ལ་བྲབས་པས་ཚོགས་བདག་གི་ཞབས་གཡོན་བྱི་བའི་སྟེང་དུ་བརྡབ་པས་རཏྣ་སྣ་ཚོགས་སྐྱུགས་ནས་རང་གི་གནས་ཁང་དེ་ཁེངས་པར་བསམ་ཞིང་སྔགས་བཟླས་པས་གཞན་བཙོན་དུ་བཟུང་བ་དང་། བརྡུངས་པ་དང་། རིད་པ་དང་། རང་ལ་འདུད་པ་དང་། ནམ་མཁའ་ལས་རཏྣའི་ཆར་འབབ་པ་དང་། མེ་ཏོག་ལེགས་པོ་རྒྱས་པ་དང་། གཏེར་རྙེད་པ་དང་། འབྲུ་སྣ་རཏྣ་ལ་ལོངས་སྤྱོད་པ་དང་། རིའི་ཁོང་གསེང་ནས་ནོར་བུ་འབུལ་བ་དང་། བྱེའུ་འམ་མི་དམར་པོས་ཕྱག་བྱེད་པ་སོགས་དེ་ལྟར་བཟང་རྟགས་རྣམས་སྤོགས་པས་བྱུང་ངམ་མ་སྤོགས་པའི་དུས་སུ་བྱུང་ཡང་རུང་སྟེ། སྔར་གྱི་སྒྲུབ་རྫས་རྣམས་ཀྱི་ཕུད་ཚོགས་བདག་ལ་མཚོན་ནས་རང་གིས་སྤྱོད་ཅིང་། ཉ་ཕྱིས་ལ་སོགས་འཁོར་ལོ་ཅན་གྱི་སྣོད་དུ་བདུད་རྩི་བཟང་པོས་བཀང་སྟེ། འཇིག་རྟེན་གསུམ་གྱི་དཔལ་འབྱོར་ཐམས་ཅད་དེ་ལ་བསྡུས་ལ། སྲིན་ལག་གིས་མཉེས་ཏེ་ཡིག་འབྲུ་རྣམས་འདྲེས་པ་དེ་འཐུངས་པས་ཇི་ལྟར་བསམ་པའི་དོན་རྣམས་འགྲུབ་ཅིང་གཟི་བརྗིད་དང་ལྡན་པར་བསམ་མོ། །དངོས་གྲུབ་བླང་ཐབས་འདི་མེད་ན་རང་གི་གཉེན་འདུན་ཡིན་ཡང་ཟས་ནོར་མི་སྟེར་བ་དང་འདྲ་བས་འདི་ཤིན་ཏུ་གལ་ཆེའོ། །མཆོད་གཏོར་ལ་བརྩོན་པར་བྱའོ། །དཀོན་མཆོག་མཆོད། ཚོགས་བདག་ལ་མཆོད། དབུལ་པོ་ལ་སྦྱིན་གཏོང་བྱ། དེ་ལྟར་སུས་བསྒྲུབས་ཤིང་འབད་པ་ལ་ལོངས་སྤྱོད་ཚོགས་བདག་ཉིད་དང་མཉམ་པར་འགྱུར་རོ། །འདི་རྒྱུད་འཇམ་ཞིང་བཀྲ་ཤིས་ཏེ་སྒྲུབ་པ་པོ་ཚེ་རིང་ཞིང་ནད་གདོན་གྱིས་མི་ཚུགས་སོ། །སྐྱེ་བ་ཀུན་ཏུ་ལོངས་སྤྱོད་དང་ལྡན་ནོ། །འདི་ལོག་འདྲེན་བརྒྱད་ཁྲི་བཞི་སྟོང་གི་དཔོན་ཡིན་པས་བགེགས་རིགས་ཐམས་ཅད་བདག་གི་མདུན་དུ་འོང་མི་ནུས་ཤིང་བར་གཅོད་བྱེད་མི་ནུས་སོ། །སྒྲུབ་པ་གཞན་བྱེད་པའི་ཡང་སྔོན་དུ་འདིའི་བསྙེན་སྒྲུབ་ཐེབས་ན་བགེགས་ཀྱི་བར་གཅོད་མི་འབྱུང་ངོ་། །རྒྱལ་པོ་ལ་སོགས་ཆེ་གཉན་བཙུན་གསུམ་རྣམས་འདུན་ཞིང་མཆོད་པས་དབང་དུ་འགྱུར་བ་དང་། སྔགས་པ་སྐལ་བ་བཟང་པོ་དེ་དག་གིས་མཐོང་ན་དགའ་བ་དང་། ཇི་སྐད་སྨྲས་པའི་ཚིག་ལ་དགྲས་ཀྱང་ངོ་མི་བཟློག་པར་སྒྲུབ་པ་དང་། སྙན་གྲགས་བསོད་ནམས་རྒྱས་ཤིང་སྐྱེ་བ་ཐམས་ཅད་དུ་འབྱོར་པ་དང་ལྡན་པར་འགྱུར་རོ། །དེས་ན་འདི་ཟབ་པས་གཞན་གྱིས་མ་ཚོར་བར་ཉམས་སུ་བླང་བར་བྱའོ། །བླ་མ་དམ་པའི་མགུལ་གྱི་བུམ་པའི་ཞལ་ཤེས་ཁོ་ནའི་གདམས་པའོ། །

ད་ནི་ཡང་གསང་བླ་མའི་ཞལ་ཤེས་ནི། སྐུ་གསུང་ཐུགས་ཀྱི་རྟེན་དུ་(༤༤)རབ་ཤེལ་ཟླ་བ་དང་། བྱེ་རུ། གསེར་རྣམས་ལ་རིམ་པ་བཞིན་ༀ་ཨཱཿཧཱུྃ་དམ་ག་བྲིས་པའི་མཐར་རྩ་བའི་སྔགས་སྤེལ་ཚིག་དང་བཅས་པ་བྲིས་ལ་རབ་གནས་སྔར་བཞིན་བྱས་ཏེ་སྐུ་དང་མཉམ་དུ་བཅངས་པས། འཁུ་ཟློག་ངན་པ་དང་མི་འགྲུབ་པ་གཏན་ནས་མི་སྲིད་པས་འདི་ཤིན་ཏུ་ཟབ་བོ། །དེས་ངེས་པར་འགྲུབ་པའི་སྦྱར་བ་བསྟན་ཟིན་ཏོ།། །།

ད་ནི་ལས་ལ་སྦྱར་བ་ལ་དོན་ལྔས་བསྟན་ཏེ། བསྙེན་སྒྲུབ་དངོས་གྲུབ་བླང་བ་གོང་དུ་རྫོགས་ནས། དང་པོ་གཏོར་མ་ལ་བརྟེན་ནས་འབྱོར་པ་སྤེལ་ཞིང་དབང་དུ་བྱ་བ་ནི། བསྒྲུབ་བྱ་དང་ནོར་དང་ཟས་ལ་སོགས་པ་གང་འདོད་པའི་གཟུགས་མིང་སྤེལ་ཚིག་དང་བཅས་པ་ལ་པཱ་ཤཾ་ཀུ་རུ་ཧྲཱིཿཞེས་པ་བྲིས་ཏེ། དགུག་གཞུག་ཡང་ཡང་བྱས་པ་འཛིན་གཏོར་གྱི་འོག་ཏུ་བཅུག་སྟེ་སྟེང་དུ་ཚོགས་བདག་གོང་དུ་བསྐྱེད་ལ་གཏོར་མ་དེ་ཕུལ་ནས། གང་འདོད་པ་དེ་ལ་གསོལ་བ་བཏབ་ནས་སྔགས་རིང་སྤེལ་ཚིག་དང་བཅས་པ་བཟླས་པའི་ཡུངས་ཀར་གྱིས་གཏོར་མ་དེ་བྲབས་པས། ཚོགས་བདག་གི་ཐུགས་ཀའི་འོད་ཟེར་ལྕགས་ཀྱུ་ལྟ་བུས་གང་འདོད་པ་དེ་བཀུག་ནས་དབང་དུ་བསྡུ་བར་བསམས་ལ། ཞག་བདུན་དུ་ཐོ་རངས་ཀྱི་ཐུན་ལ་སོགས་པར་བྱས་ན་གང་འདོད་པ་དེ་འགྲུབ་བོ། །གྲུབ་པ་དང་གཏོར་མ་གསོས་ཏེ་གཏང་རག་ཏུ་འབུལ་ཞིང་གཟུགས་དབེན་པར་སྦའོ། །གློ་བུར་དུ་དགོས་པ་བྱུང་ན་གཏོར་མ་གཅིག་བཤམས་ལ། བཟའ་བཏུང་ལ་སོགས་པ་གང་འདོད་པ་དེའི་རྣམ་པའམ་གཟུགས་བྱས་ལ། དེ་དགུག་གཞུག་བྱས་ཏེ་ཚོགས་བདག་བསྐྱེད་པ་ལ་ཕུལ་ནས་གསོལ་བ་བཏབ་ལ། གཏོར་མ་དབང་དུ་བྱ་བར་འདོད་པ་དེའི་ཕྱོགས་སུ་བཏང་ནས་བཟླས་པ་སྔར་བཞིན་བྱས་པས་དེ་མ་ཐག་ཏུ་འགྲུབ་བོ། །འགྲོ་ལམ་ལྟ་བུར་མཆོད་གཏོར་མ་འགྲུབ་ན་གོང་གི་བསྲེག་རྫས་རྣམས་ཕྱི་མར་བྱས་ལ་རིལ་བུ་ཕྱེ་མར་གྱིས་སྦྲུས་པའམ་སྦྲང་རྩིས་དྲིལ་བ་བཟུང་ལ། ནངས་པར་སྐར་མ་མ་ཡོལ་དུས་ཚོགས་བདག་མདུན་དུ་བསྐྱེད་ལ། བདུད་རྩིའི་ཕྱེ་མ་སྲིན་ལག་གཡོན་པའི་སེན་མོ་གང་ཕུལ་ལ། གང་འདོད་གསོལ་བ་བཏབ་ནས་སྙིང་པོ་བརྒྱ་རྩ་རེ་བཟླས་པས་ལུས་དང་གྲིབ་མ་བཞིན་དུ་འགྲོགས་ནས་ལས་ཐམས་ཅད་འགྲུབ་བོ། །ཡང་ཐོ་རངས་བསྒྲུབ་བྱ་ལ་དམིགས་ཏེ་ཚོགས་བདག་གི་རྐང་པའི་དྲུང་དུ་དྲངས་པར་བསམ་ཞིང་བཟླས་པ་སྟོང་ཕྲག་གཅིག་བྱས་པའི་མཆིལ་མ་གི་ཝཾ་དང་བསྲེས་ནས་དཔྲལ་བར་ཐིག་ལེ་བྱས་ནས་སྔར་གྱི་བསྒྲུབ་བྱ་དེ་ལ་བལྟས་པ་ཙམ་གྱིས་དབང་དུ་འགྱུར་ཞིང་། ཐིག་ལེ་མཐོང་བ་ཙམ་གྱིས་སྐྱེ་བོ་ཐམས་ཅད་དགའ་བར་འགྱུར་རོ། །དེ་ནས་གཏོར་མ་གཅིག་གཏང་རག་ཏུ་འབུལ་ལོ། །དུས་ཐམས་ཅད་དུ་བཟླས་སྒོམ་དང་གཏོར་མ་བྱས་ན་འདུ་འབྲལ་མེད་པར་གྲིབ་མ་བཞིན་དུ་ཚོགས་བདག་རྗེས་སུ་འབྲང་ཞིང་དོན་འགྲུབ་པར་འགྱུར་རོ། །གཏོར་མ་དེ་དག་ཁྱི་དང་བྱ་རོག་ལ་མི་སྦྱིན་ཞིང་ཤིན་ཏུ་གསང་སྟེ་སྒྲུབ་བོ། །དེ་ནས་དངོས་གྲུབ་ཀྱི་དང་པོ་དེ་ཁ་དོག་དམར་པོར་བྱུང་ན་བཟང་ངོ་། །

གཉིས་པ་སྦྱིན་སྲེག་གི་ལས་སྦྱོར་ནི། ནོར་དང་འབྲུ་ལ་སོགས་པ་འདོད་ན་སྔར་བསྟན་པ་བཞིན་བྱ་ཞིང་། བསྒྲུབ་བྱ་དབང་དུ་བྱེད་ན། སྐུ་གཟུགས་ཀྱི་མདུན་དུ་ཟླ་གམ་དམར་པོ་ཁྲུ་གང་(༤༥)ཁ་ཁྱེར་དང་མུ་རན་ཕྱིར་སྐྱེད་པ་ལ། དབང་ལ་པདྨ། དགུག་པ་ལ་ལྕགས་ཀྱུས་མཚན་པའི་པདྨ་འདབ་བརྒྱད་ཀྱི་ལྟེ་བར་ལྕགས་ཀྱུའི་སྟེང་དང་འདབ་མ་ལ་ཚོམ་བུ་དམར་པོ་དགོད། མེ་ཏོག་དམར་པོ་དང་ལྡན་པའི་ཤིང་ངམ་རྒྱ་ཤུག་ཐབ་ཀྱི་ཚད་དུ་བརྩིགས་པའི་གཡས་སུ་ཡམ་ཤིང་དམར་པོ་སོར་བཅུ་གཉིས་པ་དང་། མར་དང་། མེ་ཏོག་དམར་པོ་དང་། ཡུངས་ཀར་དང་། ལ་དུ་དང་། ལ་ཕུག་དང་། ཁུར་བ་དང་། ཟས་སྣ་ཚོགས་དང་། འབྲུ་སྣ་ཚོགས་དང་། དཱུརྦ་རྣམས་གུར་གུམ་གྱི་ཆུས་སྦྱངས་པ། དམར་པོ་མ་ཡིན་པ་རྣམས་རྒྱ་སྐེགས་ཀྱིས་བསྒྱུར་ཏེ་བདུད་རྩིར་བྱིན་གྱིས་བརླབས་ཤིང་། གཡོན་དུ་གཏོར་མ་དང་མཆོད་པ་དང་སྤྱན་གཟིགས་བཟང་པོ་ཡང་བཤམས་ལ། རང་ཉིད་སྟན་གོས་དམར་པོ་དང་དམར་པོའི་ཐོད་ཆིངས་འཛིན་པས་པདྨའི་འདུག་སྟངས་ཀྱིས་ཆགས་པའི་བསམ་པས་ཁ་ནུབ་ཏུ་བལྟས་ཏེ། ལྷའི་ང་རྒྱལ་གྱིས་ཐབ་དང་རྫས་རྣམས་ལ་ནང་མཆོད་ཀྱིས་གཏོར་ཏེ། ཨ་མྲ྇་ཏས་བསངས་ཤིང་། སྭཱ་བྷཱ་ཝས་སྦྱངས་པའི་ངང་ལས། ཧཱུྃ་ལས་པདྨ་རྭ་གའི་ཐབ་ཏུ་བྱིན་གྱིས་བརླབས་ཏེ། སྨད་འཚོང་མས་མེ་སྦར་ལ་ཚོགས་བདག་བསྐྱེད་དེ།

ༀ། དད་པ་དང་ནི་དམ་ཚིག་གིས། །ཚུར་གཤེགས་བགེགས་རྒྱལ་ཚོགས་ཀྱི་བདག །བསྲེག་བླུགས་ཞལ་ཟས་བཞེས་ནས་ཀྱང་། །དངོས་གྲུབ་ཐམས་ཅད་སྩལ་དུ་གསོལ། །ༀ་གྷ་གྷ་ལ་སོགས་ཀྱིས་ཚངས་པའི་གནས་ནས་སྤྱན་དྲངས་ཏེ་བསྟིམས་ལ། དབང་བསྐུར་ཏེ་པདྨའི་གདན་ཕུལ་ལ། ཚོགས་བདག་གི་ལྕེ་ཧཱུྃ་ལས་རྡོ་རྗེར་གྱུར་པའི་སྦུ་གུ་ནས་དགང་བླུགས་ཀྱི་རྃ་ལ་ཕོག་པས་ལེགས་བར་གསོལ་བར་བསམ་ཞིང་། ༀ་ག་ཎ་པ་ཏི་ཡེ་ཨེ་དཱི་བྱཱ་དཱི་བྱ་བི་ཤུདྡྷ་མཧཱ་ཤྲཱི་ཧ་ཀ་བྱ་བ་ཧ་ན་ཡ་སརྦ་པཱ་ཤཾ་ཀུ་རུ་ཧོཿས་བྱོན་ཟན་དགང་བླུགས་གསུམ་ཕུལ་ནས། ༀ་ག་ཎ་པ་ཏི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་རྣམ་ལྔ་འགྲེས་པས་མཆོད། དེ་ནས་ནང་མཆོད་ཀྱིས་མཆོད་ལ་བསྟོད་ནས་དངོས་གྲུབ་རླངས་ལ། ༀ་ཨཱཿགྷ་ཧཱུྃ་སྭཱ་ཧཱ། སརྦ་ཨཪྠ་མེ་པྲ་སཱ་དྷ་ཡེ་མ་མ་རཀྵ་འབྱོར་པ་པཱ་ཤཾ་ཀུ་རུ་ཧོཿཧཱུྃ་ཧཱུྃཿཛཿཛཿསྭཱ་ཧཱ། བརྗོད་ཅིང་རྫས་རྣམས་རེ་རེ་བཞིན་ཕུལ་ལ་བརྒྱ་སྟོང་བྱས་ནས། ཁྱད་པར་དུ་གང་འདུ་བ་དེ་མང་དུ་འབུལ་ཞིང་གསོལ་བ་བཏབ་ནས་འབུལ་བ་རྫོགས་པ་དང་། སྔགས་ཀྱི་མཐར་ཆེ་གེ་པཱ་ཤཾ་ཀུ་རུ་ཧོཿབཏགས་ལ་མར་དགང་བླུགས་བདུན་ཕུལ་ལ་གཏོར་མ་བཏང་སྟེ་མཆོད་ཅིང་བསྟོད་ནས་གསོལ་བ་བཏབ་པས་མཉེས་ནས་དབང་དུ་འདུས་པར་བསམས་ལ། ཚོགས་བདག་བྲིས་སྐུ་ལ་བསྟིམས་ཏེ་ལས་ཀྱི་རྗེས་བསྡུས་ལ། ཐབ་བ་ཡུལ་ཁམས་ཀྱི་མི་ཕྱུགས་ཀྱིས་འཐུང་བའི་ཆུའམ་རི་རྩེར་བསྐྱལ་བས་དབང་དུ་འགྱུར་རོ། །སྦྱིན་སྲེག་གོ། །

གསུམ་པ་འཁོར་ལོའི་ལས་སྦྱོར་ནི། རྒྱལ་གྱི་ཉིན་པར་མཐིང་ཤོག་གམ་གྲོ་ག་ལ་སོགས་པ་ལ་གསེར་རམ་སྣག་ཚ་དྲི་བཟང་བསྲེས་ལ། འཁོར་ལོ་རྩིབས་བརྒྱད་ལྟེ་བ་མུ་ཁྱུད་དང་བཅས་པའི་རྩིབས་ལ་གྷ་བརྒྱད་དང་། མུ་ཁྱུད་ལ་རྟེན་འབྲེལ་སྙིང་པོའི་མིང་སྤེལ་དང་བཅས་པ། ལྟེ་བར་ཆེ་གེ་མོ་དབང་དུ་བསྡུས་ཤིག་གམ། ༀ་ༀ་ནོར་སྤེལ་ཅིག་བྲི། རྩིབས་མཆན་ལ་སྔགས་རིང་སྤེལ་(༤༦)ཚིག་ཅན་བྲིས་ལ་རབ་གནས་བྱས་ལ་བཅངས་པས་ནོར་འགྲུབ་པར་བྱེད་པ་ལུས་ལ་བཅང་བའི་འཁོར་ལོའོ། །དེ་བཞིན་དུ་རྩིབས་བཅུ་གཉིས་པའི་རྩིབས་ལ་སྔགས་རིང་དང་རྩིབས་མཆན་ལ་མིང་སྤེལ། མུ་ཁྱུད་ལ་རྟེན་འབྲེལ། ལྟེ་བར་ཆེ་གེའི་འབྱོར་པ་དབང་དུ་སྡུས་ཞེས་བྲིས་ནས་རབ་གནས་བྱས་པ་འཁོར་ལོ་གོང་མ་དང་ཁ་སྦྱར་ཏེ་སྦྲང་རྩིས་བསྡམས་ལ་ཟངས་ཀྱི་གྭའུར་བཅུག་སྟེ། འབྱོར་པ་ཅི་ཡོད་ཀྱི་ཕུད་དང་། ནོར་སྣ་འབྲུ་སྣ། ཟས་གོས་གཡང་ཅན་གཞན་ཡང་དེར་བཅུག་སྟེ་ཚོགས་བདག་ཏུ་བསྐྱེད་ནས་མཆོད་པ་འབུལ་ཞིང་བླ་རྡོ་དང་མཉམ་དུ་འབྲལ་མེད་དུ་བཅངས་ན་དོན་ཐམས་ཅད་འགྲུབ་བོ། །

བཞི་པ་གྲི་ལག་གི་རྣལ་འབྱོར་ནི། འཁོར་ལོ་རྩིབས་བརྒྱད་སྔར་བཞིན་བྲིས་ནས། རྐུན་ཆེན་གྲིར་ཤི་བའི་ལག་པ་གཡས་པའི་གུང་མོ་ལ་དར་སྣ་དང་བཅས་པ་བཏགས་ལ། ཐོ་རངས་གཅེར་མོར་ཕྱུངས་ཏེ་སྔགས་རིང་བཟླས་ཤིང་། གྲི་ལག་དེ་ལས་འོད་འཕྲོས་པས་ལོངས་སྤྱོད་བསྒྲུབ་བྱ་ཐམས་ཅད་བསྡུས་པར་བསམ་ཞིང་གཡབ་པས་ས་རྣམས་གཡོ་ཞིང་ནོར་རྣམས་འཕར། སྲིད་གསུམ་འབད་མེད་དབང་དུ་འདུ། མིས་མི་མཐོང་བར་བྱའོ། །

ལྔ་པ་གཏེར་གྱི་བུམ་པའི་ལས་སྦྱོར་ནི། རྒྱལ་གྱི་ཉིན་པར་རྫའི་བུམ་པ་སོ་མ་ལྔར། ཙཀྲ་སྔར་བཞིན་བྲིས་ལ། འབྲུ་ལྔ། སྨན་ལྔ། སྙིང་པོ་ལྔ། དར་ཟབ་ལ་སོགས་པས་བཀང་ལ། དམིགས་པས་གཏེར་ཆེན་པོར་བྱིན་གྱིས་བརླབས་ཏེ། གཅིག་གི་ཁ་རྐུན་ཆེན་གྱི་ལག་པས་བཅད་ལ་བང་མཛོད་དུ་སྦ། བཞི་པོར་རྫའི་ཙཀྲ་རྩིབས་བརྒྱད་ལ་སྔར་གྱི་ཙཀྲ་སྦྱར་བས་ཁ་བཅད་ལ་ཁང་པའི་ཕྱོགས་བཞིར་སྦས་ལ་ཚོགས་བདག་གི་ལོངས་སྤྱོད་ཀྱི་གཏེར་དུ་བསམས་ལ་མཆོད་པ་དང་གཏོར་མ་ཕུལ་ཏེ། ལོངས་སྤྱོད་ཀྱི་གཏེར་འཕེལ་བར་མཛད་དུ་གསོལ། ཞེས་གསོལ་བ་བཏབ་པས་གཏེར་ཆེན་པོར་འགྱུར་ཞིང་བསམ་པ་ཐམས་ཅད་འགྲུབ་བོ། །ནོར་བུ་རིན་ཆེན་རྒྱལ་མཚན་རྩེར་མཆོད་གསོལ་བ་བཏབ་ལས་ཆེས་ལྷག་པའི། །ཚོགས་ཀྱི་བདག་པོའི་སྒྲུབ་པ་གསལ་བཀོད་དགེ་བ་རྒྱ་མཚོའི་སྙིང་པོ་དེས། །བདག་དང་འགྲོ་ཀུན་འབྱོར་ཚོགས་རིན་ཆེན་སྲིད་བདེའི་དཔུང་གི་འབྱོར་པ་དང་། ཞི་བ་རིན་ཆེན་གླིང་དུ་ལེགས་བགྲོད་འཕགས་པའི་ནོར་གྱིས་འབྱོར་པར་ཤོག །ཚུལ་ཁྲིམས་བང་མཛོད་བློ་གྲོས་ནོར་བུའི་འབྱུང་གནས་ལས། །ཚུལ་ཁྲིམས་ལུས་བཟང་བློ་གྲོས་རྒྱན་ཕྲེང་འཛིན་པ་ཡི། །ཚུལ་ཁྲིམས་འདོད་འབྱུང་བློ་གྲོས་ལྟ་བུའི་མཆོག་འདི་བརྩམས། །ཚུལ་ཁྲིམས་ཁང་བཟང་བློ་གྲོས་ནོར་གྱིས་འབྱོར་སླད་ཡིན། །དཔལ་ཚོགས་བདག་གི་སྒྲུབ་པ་འདི་བླ་མ་དམ་པའི་གསུང་གི་ཞལ་ཤེས་མ་ལུས་པ་བསྒྲིགས་པའི་བདུད་རྩི་ཡང་དག་པའོ། །སྙན་ངག་མཁན་ཀུན་མཁྱེན་དྲི་མེད་འོད་ཟེར་བསམ་ཡས་པས་བཀོད་པའོ།། །།

༈ ༀ་བདེ་ལེགས་སུ་གྱུར་ཅིག །དཔལ་འབྱོར་རོལ་པའི་ཆུ་འཛིན་ལ་གནས་འཇིག་རྟེན་བགེགས་ཀྱི་དཀྱིལ་འཁོར་དབུས། །རྒུད་པའི་གདུང་བ་རྣམ་པར་བསལ་མཛད་འདོད་རྒུའི་ཆར་གྱི་རྒྱུན་འབབ་ཅིང་། །རྒྱལ་བའི་རྣམ་འཕྲུལ་མཆོག་གི་དཔལ་མངའ་ཕྲིན་ལས་འབྲུག་སྟོང་ཆེར་སྒྲོག་ཅིང་། །བསོད་ནམས་ཡེ་ཤེས་ཚོགས་ཀྱི་བདག་པོ་མངོན་འདོད་རེ་བ་རྫོགས་སླད་བསྟོད། །བྲི་དང་རབ་ཏུ་གནས་བསྒྲུབ་པའི། །བགེགས་ཀྱི་རྒྱལ་པོའི་འཁོར་ལོ་ནི། །སྐལ་ལྡན་གྱི་རྣལ་འབྱོར་པས་(༤༧)རྒྱལ་དང་ཕུར་བུ་འཛོམ་པའི་ཉི་མ་ལ་འདིའི་ཆོ་ག་རྣམས་བརྩམ་པར་བྱ་སྟེ། དེ་བྲི་བ། རབ་གནས་སྒྲུབ་པའོ། །བྲི་བ་རྣམ་པ་གསུམ་ཉིད་དེ། སྟེང་དང་འོག་དང་བར་གྱི་འཁོར་ལོ་ཉིད་དོ། །ཐོག་མར་གསང་བ་སྙིང་གི་འཁོར་ལོ་བར་མ་བྲི་བར་བྱ་སྟེ། འོག་ནས་འཆད་པ་ལྟར་ལས་ཀྱི་རིམ་པ་དབྱེ་བས། དཀར་པོ་ལ་སོགས་པའི་གཞིར་ཚོགས་ཀྱི་བདག་པོའི་ལྟོ་བར་རིམ་པ་དགུ་བསྐོར་བའི་དབུས་སུ་ཞི་རྒྱས་དབང་དྲག་གི་རིམ་པས། ཟླ་བ་དཀར་བ་དང་། ནོར་བུ་དང་། ཉི་མ་དང་། གྲུ་གསུམ་བརྩེགས་མ་བྲིས་པའི་དབུས་སུ་གྷ་གསུམ་གསུམ་སོ་སོར་བྲིས་ཏེ། དབུས་དེ་ༀ་གཅིག །གཡས་དང་གཡོན་དང་གྱེན་དུ་འཁོར་ལོ། བར་གྷ་གསུམ་ལ། ༀ་ཨཱཿགྷ་ཧཱུྃ་སྭཱ་ཧཱ། ཞེས་པ་འདིས་འཁོར་བར་བྲིའོ། །

དེའང་ཞི་རྒྱས་དབང་དང་སྲུང་བ་རྣམས་ལ་ནི་ཡིག་མགོ་ཕྱིར་ལྟ་བས་གནས་ཤིང་། དེ་ལས་གཞན་པ་ལ་ཟློག་པ་བྲིའོ། །དེ་ནས་ཁོར་ཡུག་དང་པོ་ལ་པདྨ་འདབ་བརྒྱད་ཀྱི་འདབ་རེ་རེའི་དབུས་སུ་ཨ་རེ་རེའི་མཐར་ལས་ཀྱི་སྤེལ་ཚིག་འཁོར་བར་བྲིའོ། །

གཉིས་པ་ལ། ༀ་གྷ་གྷ་སིདྡྷི་སིདྡྷི་སརྦ་ཨརྠ་མེ་པྲ་སཱ་དྷ་ཡེ་སྭཱ་ཧཱ། གསུམ་པ་ལ། ༀ་བ་ཀ་ཏ་ཡེ་སྭཱ་ཧཱ། བཞི་པ་ལ། ༀ་བ་ཀ་ཏྲཻ་དཾཥྚ་བིནྡྷ་ཧཱུྃ་ཕཊ་སྭཱ་ཧཱ། ལྔ་པ་ལ། ༀ་ྃ་ག་ཎ་པ་ཏི་ཡེ་སྭཱ་ཧཱ་རྣམས་སྤེལ་ཚིག་དང་བཅས་པ་བྲིའོ། །དྲུག་པ་ལ་དབྱངས་ཡིག་བཅུ་དྲུག་དང་། བདུན་པ་ལ་གསལ་བྱེད་སུམ་ཅུ་རྩ་བཞི་དང་། བརྒྱད་པ་ལ་རྟེན་འབྲེལ་སྙིང་པོ་རྣམས་སྤེལ་ཚིག་བཅས་པ་བྲིའོ། །དགུ་པ་ལ་ཞི་བ་ལ་ཟླ་བ། རྒྱས་པ་ལ་ནོར་བུ། དབང་ལ་ཞགས་པ། དགུག་པ་ལྕགས་ཀྱུ། བསད་པ་ལ་མཚོན་ཆ་སྣ་ཚོགས་འཁོར་བར་བྲིས་ལ། དེ་ཁོ་ན་ལྟར་སྔགས་ཀྱིས་སྤེལ་བ་བཟློག་པའི་རིམ་པས་སྟེང་འོག་གི་འཁོར་ལོ་ཁ་སྦྱར་དུ་བྲི་བ་ནི་བར་འཁོར་བྲི་བའི་མན་ངག་གོ། །

སྟེང་འོག་གི་འཁོར་ལོ་ཡང་ཁོར་ཡུག་ཏུ་དྲུག་བསྐོར་བའི་ལྟོ་བར་གྷ་ལ་སྤེལ་ཚིག་བསྐོར་བ་དང་། ཁོར་ཡུག་དང་པོ་ལ་པདྨ་འདབ་བརྒྱད་ཀྱི་ཕྱོགས་བཞིར་འབོད་པའི་སྔགས་ཡིག་འབྲུ་བདུན་དང་། ཤར་ལྷོར་ཉེ་སྙིང་དང་། ལྷོ་ནུབ་ཏུ་མིང་གི་སྙིང་པོ་དང་། ནུབ་བྱང་དུ་སྙིང་པོ་དང་། བྱང་ཤར་དུ་རྩ་སྔགས་རྣམས་སྤེལ་ཚིག་དང་བཅས་པའོ། །ཁོར་ཡུག་གསུམ་པ་ༀ་འབའ་ཞིག་གི་མཐར་སྤེལ་ཚིག་དང་བཅས་པའོ། །བཞི་པར་དབྱངས། ལྔ་བར་གསལ་བྱེད། དྲུག་པར་རྟེན་འབྲེལ་གྱི་མཐར་སྤེལ་ཚིག་དང་བཅས་པ་བྲི་བར་བྱའོ། །ད་ནི་དེ་ལྟར་དགོད་བྱའི་འཁོར་ལོ་དེ་ཡང་ཞི་བའི་ཆོ་གར་བྲིས་ན་ཞི་བར་འགྲོ་ཞིང་གཞན་གསུམ་པོ་དེ་བཞིན་ནོ། །ལྷའི་ནོར་བུ་རིན་པོ་ཆེ་རས་དཀར་པོས་དཀྲིས་ཏེ་ཆུར་བཙུད་ན་དཀར་པོར་འགྱུར་ཞིང་། དེ་བཞིན་སེར་པོ། དམར་པོ། ལྗང་གུ་ལ་སོགས་གང་གིས་དཀྲིས་པ་དེའི་ཁ་དོག་ཏུ་འགྱུར་རོ། །འཁོར་ལོ་ཡང་གཅིག་ཉིད་བཞིར་འགྱུར་བ་ཡིན་པས། དེ་ལ་བཞི་ལས། དང་པོར་ཞི་བའི་ཆོ་ག་ནི། ནྱ་གྲོ་ཏའི་འདབ་མ་ལ་སོགས་དཀར་པོ་ལ། འབྲས་ཀྱི་ཁུ་བས་ཞི་བའི་ཤིང་གི་སྨྱུག་གུས་ཤར་དུ་བལྟས་ཏེ་སྔར་བརྗོད་པའི་ཆོ་གས་བྲིས་ཏེ། (༤༨)བདག་ཆེ་གེའི་ནད་གདོན་ལྕེ་འབབ་པ་ལ་སོགས་གང་འདོད་པ་ཞི་བར་བྱ་བ་དེ་ཤཱནྟིཾ་ཀུ་རུ་སྭཱ་ཧཱ་བྲིས་ཏེ་མདུན་དུ་བཞག་ནས། བདག་ཉིད་ལྷའི་རྣལ་འབྱོར་དང་ལྡན་པས་འཁོར་ལོ་དེ་ཉིད་སྟོང་པར་སྦྱངས་པའི་ངང་ལས་བྲིས་པ་ལྟར་བསྐྱེད་དེ། ཡེ་ཤེས་པ་བཅུག་ནས། རྟེན་འབྲེལ་སྙིང་པོས་མེ་ཏོག་འཐོར་ཞིང་བཀྲ་ཤིས་དང་སྨོན་ལམ་བྱས་ནས། མར་སྦྲང་གིས་ཁ་སྦྱར་ཏེ་ཟླུམ་པོར་དྲིལ་ནས་སྟེང་འོག་གི་རིམ་པ་ལྟར་སྐུད་པ་དཀར་པོས་དཀྲིས་ཏེ། ག་བུར་དཀར་པོ་འོ་མ་སྦྲང་གསུམ་བསྲེས་པས་དགང་ཞིང་། དཀྱིལ་འཁོར་གྱི་དབུས་སུ་རིན་ཆེན་སྣོད་དུ་འབྲུ་བླུགས་པའི་སྟེང་དུ་བཞག་ནས། རང་ཉིད་འབྱུང་པོ་འདུལ་བྱེད་ཀྱི་ང་རྒྱལ་དང་ལྡན་པས་བཟླས་པ་བྱ་སྟེ། འཁོར་ལོ་དེ་ཉིད་རིན་པོ་ཆེ་དང་པདྨ་ཉི་མ་བྱེ་བའི་སྟེང་དུ། ཚོགས་བདག་དཀར་པོ་ཕྱག་བཅུ་གཉིས་པར་བལྟས་པའི་ཐུགས་ཀར་བྲིས་པ་ལྟ་བུའི་འཁོར་ལོ་བསམས་ལ་ཡེ་ཤེས་པ་བཅུག་ནས། རང་གི་སྙིང་གའི་སྔགས་ཀྱིས་ཚོགས་བདག་དེས་བགེགས་ཐམས་ཅད་བསྐུལ་ནས། བདག་གི་མི་མཐུན་པའི་གནོད་པ་ནད་གདོན་ཐམས་ཅད་དང་དགྲ་བགེགས་ཐམས་ཅད་ཞི་བར་བསམ་ཞིང་། རྩ་སྔགས་ཀྱི་མཐར་ནད་གདོན་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་པ་བདུན་བཟླས་ཏེ། འཁོར་ལོ་དེ་ཉིད་ཁུག་མ་དཀར་པོར་བཅུག་ལ་མཆན་ཁུང་གཡོན་དུ་བཅང་ཞིང་། སྐབས་སུ་སྔ་དྲོའི་དུས་སུ་མདུན་དུ་བཞག་སྟེ་སྔར་བཞིན་སྒོམ་བཟླས་བྱས་པས་ནད་གདོན་དང་རྒྱལ་པོའི་ཆད་པ་དང་ཆོམ་རྐུན་དང་འཇིགས་པ་ཆེན་པོ་བརྒྱད་དང་བཅུ་དྲུག་ལས་གྲོལ་བར་འགྱུར་རོ། །དེ་ནི་ཞི་བའི་ཆོ་གའོ། །

རྒྱས་པ་ལ་ནྱ་གྲོ་དྷ་ལ་སོགས་པའི་འདབ་མ་སེར་པོ་ལ་འཇག་རྒོད་སེར་པོའི་འབྲས་ཁུ་བས་བྲི་བ་སོགས་རྒྱས་པར་དབང་དྲག་ཀུན་ལ་འགྲེ། ཚོགས་བདག་ཀྱང་སེར་པོ་སྒྱུར་སྔགས་པུཥྚིཾ་དེས་འགྲེའོ། །ཤེས་པར་གྱིས་ཤིག །དབང་ལ་གྲོ་ག་ལ་གུར་གུམ། རྒྱ་སྐྱེགས། གིའུ་ཝཾ། པད་རག །སིནྡྷུ་ར། མུག་རྣམས་ཀྱི་ཁུ་བས་བསད་མནན་རེངས་པ་བསྐྲད་པ་བྱ་རོག་གི་སྒྲོའི་སྨྱུ་གུས་བྲིའོ། །སྲུང་དང་ཟློག་སྔགས་ཀྱི་སྔགས་ཀྱང་བསྒྱུར་རིག་པས་དཔྱད་དགོས་སོ། །དེ་ཡང་ཞི་རྒྱས་དབང་སྲུང་བཞི་ལ་ནི་སྔགས་མགོ་ཕྱིར་བསྟན། དྲག་པོ་ཙམ་ལ་ནང་ངོ་། །གཞན་བཞི་ལ་ཞག་བདུན་བདུན་པ། དྲག་པོ་ལ་ཉི་ཤུ་རྩ་གཅིག་གིས་བདག་གི་བར་གཅོད་ཞི་ནས་དགྲ་བགེགས་རྣམས་རྨུགས་རེངས་བརླག་པར་འགྱུར་རོ། །

ད་ནི་སྤོགས་ཆོག་ནི། དེ་ལྟར་ལས་བཞི་གང་བྱེད་ཀྱང་རྨི་ལམ་དུ་ཚུལ་ངན་པ་སྣ་ཚོགས་བྱུང་ཞིང་མ་གྲུབ་ན་སྔར་གྱི་འཁོར་ལོ་བླ་རྡོའི་གའུ་རྣམས་ཀླད་ལ་ལན་གསུམ་ཕྱིན་ཀར་བསྐོར་ནས་རྐང་པ་གཡས་པའི་མཐེ་བོང་གི་དྲུང་དུ་བཞག་ལ། འབྱུང་པོ་འདུལ་བྱེད་ཀྱི་སྔགས་དང་སྒོམ་པས་གཟིར་ཞིང་། འཁོར་ལོ་ཚོགས་བདག་ཏུ་བསམས་ལ་སྒོམ་བཟླས་དྲག་ཏུ་བྱས་པས་ཞག་གསུམ་ན་འཁུ་ལྡོག་ཆོ་འཕྲུལ་ཐམས་ཅད་ཞི་ནས། སྒྲུབ་པ་པོ་ལ་དངོས་གྲུབ་གདོན་མི་ཟ་བར་འབྱུང་ངོ་། །དེ་ནས་འཁོར་ལོ་སི་ལས་བདུག་སྟེ་(༤༩)ཚོགས་བདག་ལ་བཟོད་གསོལ་བྱའོ། །ཅུང་ཟད་ལ་དེ་ལྟར་མི་བྱའོ། །བྱས་ན་སྙིང་ཐག་རིང་བ་ཡིན་ནོ། །ལས་ཡང་དག་པའོ། །ཤིན་ཏུ་གསང་བས་དངོས་གྲུབ་མྱུར་དུ་མི་འབྱུང་དབང་མེད་པའི་ལས་བརྗོད་དོ། །ཡུན་རིང་དུ་གཞུང་བཞིན་བསྒྲུབས་ཀྱང་གྲུབ་རྟགས་མེད་ན་གཞན་གྱིས་བར་ཆད་བྱས་པ་ཡིན་པས་དེ་ལ་འདི་བསྒོམ་དགོས་སོ། །བྱི་བ་ལ་སོགས་པ་ནས་སྟོང་པར་བསྒོམ་པའི་ངང་ལས་བྲག་རི་དང་། པད་ཉི་བྱི་བའི་སྟེང་དུ་གྷ་ཡོངས་སུ་གྱུར་པ་ལས་བདག་ཉིད་ཚོགས་བདག་ཏུ་གྱུར་པའི་སྙིང་གར་པདྨ་དང་ཉི་མའི་དབུས་སུ་གྷ་ལ། ༀ་ཨཱཿགྷ་ཧཱུྃ་སྭཱ་ཧཱ། ཞེས་པས་བསྐོར་བས་བསམ་པའི་འོད་ཀྱིས་ཚངས་པའི་གནས་ནས་ཚོགས་བདག་སྤྱན་དྲངས་ལ་མཆོད། བདག་གི་སྤྱི་བོ་ནས་བདག་ལ་ཐིམ། བདག་ཉིད་གཟི་བརྗིད་ཆེན་པོ་དངོས་ཡིན་སྙམ་པའི་ང་རྒྱལ་གྱིས་ཡི་གེ་བཅུ་བདུན་པ་དང་དྲུག་པའི་མཐར་གང་འདོད་པའི་སྤེལ་ཚིག་བཏགས་ལ་བཟླ་ཞིང་། ལུས་ལས་འོད་ཟེར་འཕྲོས་པས་ཕྱོགས་བཅུའི་ཚེ་དང་དཔལ་འབྱོར་བསྡུས་ཤིང་བགེགས་ཀྱི་རིགས་ཐམས་ཅད་གཟིར་བས་དེ་རྣམས་ཀྱིས་འཇིག་རྟེན་གསུམ་གྱི་འབྱོར་པ་དང་སྐྱེ་བོ་ཐམས་ཅད་བཀུག་ནས་བདག་ལ་ཕུལ་བར་བསམས་ལ། སྔགས་བཟླ་ཞིང་ཡང་འོད་འཕྲོས་པས་སྟོང་གསུམ་དང་ཁྱད་པར་འཛམ་བུའི་གླིང་ཁྱབ་ཅིང་སྐྱེ་བོ་ཐམས་ཅད་ཀྱི་སྙིང་ལ་ཞུགས་པས་ཚུར་དྲངས་ཏེ་རང་དབང་མེད་པར་བདག་གི་རྐང་པའི་མདུན་དུ་བཀུག་ནས་སྒྲུབ་པ་གང་འདོད་ཀྱི་དངོས་གྲུབ་གདོན་མི་ཟ་བར་འགྲུབ་སྟེ། ཐུན་མོང་མ་ཡིན་པ་གསང་བ་ཐུགས་ཀྱི་གདམས་པའོ། །དེས་རང་ལ་འཁུ་ཟློག་མི་འོང་ཞིང་དངོས་གྲུབ་ཤུགས་ལས་འབྱུང་ངོ་། །

ཡང་ལོངས་སྤྱོད་སྤེལ་བའི་ཕྱིར་ཐབ་ཀྱི་ཆོ་ག་བརྗོད་པ་ནི། ཐབ་ཁུང་རྒྱས་པའི་སྦྱིན་སྲེག་གིས་སྦྱངས་པར་ཐབ་ཡོལ་གྱི་ནང་དུ་ཚོགས་བདག་གི་ཐུགས་ཀར་འཁོར་ལོ་དང་བཅས་པའི་སྐུ་གཞུག་ཅིང་། སྒྱེད་པོ་ཙར་ཙི་ཀའི་སྙིང་གར་ལོངས་སྤྱོད་སྒྲུབ་པའི་འཁོར་ལོར་སྦའོ། །ཐབ་ཁུང་དུ་འབྲུ་དང་ཟས་སྣ་ཚོགས་པའི་གཏེར་སྦས་ཏེ་དགུག་གཞུག་བྱ། བཀྲ་ཤིས་བརྗོད་ལ་བཟའ་བཏུང་རྒྱ་ཆེན་པོས་ཞལ་བསྲོ་བྱའོ། །ཐབ་ཡོལ་གྱི་ཚོགས་བདག་ཞལ་ཕྱག་རྫོགས་པའི་ཕྱག་གཉིས་གཡས་རྡོ་རྗེ་དང་། གཡོན་ཐོད་པ་ཁྲག་གིས་བཀང་བ་བྱི་བའི་སྟེང་ན་བཞུགས་པའི་ཞལ་དུ་སྒྱེད་པུའི་ལྷ་མོ་ཙར་ཙི་ཀ་དམར་མོ་གཡས་ཚོགས་བདག་ལ་ཟས་སྣ་ཚོགས་ཀྱིས་མཆོད་ཅིང་གཡོན་ནེའུ་ལེས་ནོར་བུ་སྐྱུགས་པར་བསམས་ལ། ཐུམ་བུ་ཁ་མ་ལོག་པས་བཟའ་བཏུང་གཡས་པས་ཚོགས་བདག་ལ་མཆོད་པར་འགྱུར་ཞིང་། དེས་ཐབ་ཀའི་ལོངས་སྤྱོད་རྒྱལ་པོ་བཟའ་བཏུང་གང་བྱེད་ཕུད་ཚོགས་བདག་ལ་མཆོད་པ་དང་། གཞན་ལ་མི་སྦྱིན་ནོ། །དེའི་འཁོར་ལོ་ནི་གྲོ་ག་ལ་གུར་གུམ་གྱིས་མུ་ཁྱུད་ལྔའི་ལྟེ་བ་ལ་སྤེལ་ཚིག་དང་། དང་པོ་ལ་ཉེ་སྙིང་དང་། གཉིས་པ་ལ་སྙིང་པོ། གསུམ་པ་ལ་མིང་གི་སྙིང་པོ། བཞི་པ་ལ་རྩ་སྔགས། ལྔ་པ་ལ་འབོད་པའི་སྔགས། ཐམས་ཅད་ཀྱི་མཐར་འཇིག་རྟེན་ཁམས་ཀྱི་ཟས་ཐམས་ཅད་པཱ་(༥༠)ཤཾ་ཀུ་རུ་ཧོཿཔུཥྚིཾ་ཀུ་རུ་སྭཱ་ཧཱ། ཞེས་བྱ་བ་སྤེལ་ཏེ་བྲིའོ། །ཐབ་ཀྱི་ཆོ་གའོ། །ཟབ་བོ། །དེ་བཞིན་དུ་བང་མཛོད་ཀྱི་ཆོ་ག་ནི། མི་རབས་བདུན་དུ་ཕྱུག་པ་ལ་སོགས་ཀྱི་བང་ས་དང་མཛོད་ཀྱི་ས་བསློང་ལ། རང་གི་བང་ས་དང་དེའི་རྩ་དངོས་སུ་ཚོགས་བདག་གི་སྐུ་འཁོར་དང་བཅས་པ་བཅུག་ནས་རབ་ཏུ་གནས། བང་བ་འབྲུས་བཀང་ཞིང་ཕྱུག་པོའི་ནས་ལ་སོགས་པ་བླུག །གཞན་ཡང་ནོར་སྣ་ཚོགས་བདག་གི་སྤྱན་གཟིགས་སུ་རབ་པ་དེ་ལྟར་བྱས་ལ། རབ་གནས་བྱས་ཏེ་གཡང་ཅན་གྱི་མིང་བཏགས། འབྲུ་ལ་སོགས་པའི་ཕུད་ཚོགས་བདག་ལ་མཆོད་ན་མི་ཟད་པའི་མཛོད་དུ་འགྱུར་རོ། །མི་ཟད་པའི་མཛོད་ཀྱི་གོ་ཆའོ། །འདི་དག་ནི་རང་བཟོ་དང་ཡིག་ཚོགས་སྐོང་ནས་བླ་མའི་ཞལ་ཤེས་ཕྱག་ལེན་ཁོ་ན་བཀོད་པའོ། །

དཔལ་ལྡན་བླ་མའི་དྲིན་གྱིས་ལེགས་རྟོགས་ནས། །ཚོགས་ཀྱི་བདག་པོའི་ཞལ་གདམས་ཡིག་ཆུང་འདི། །དཔལ་འབྱོར་རྒྱ་མཚོ་ཀུན་གྱིས་ཐོབ་བྱའི་ཕྱིར། །གནས་སྐབས་འདོད་རྒུའི་བསམ་དོན་འགྲུབ་པ་དང་། །མཐར་ཐུག་སྐུ་གསུམ་ཡིད་བཞིན་ནོར་བུའི་གླིང་། །བདག་དང་འགྲོ་བ་ཀུན་གྱིས་ཐོབ་པར་ཤོག །སརྦ་མངྒ་ལཾ།། །།

དམ་ཅན་སྡེ་བདུན་གྱི་རྗེས་སུ་གནང་བ་ཞེས་བྱ་བ།

༄༅། །དམ་ཅན་སྡེ་བདུན་གྱི་རྗེས་སུ་གནང་བ་ཞེས་བྱ་བ་བཞུགས་སོ། །

༄༅། །བླ་མ་དང་ཡི་དམ་ལྷ་ལ་ཕྱག་འཚལ་ལོ། །འདིར་དམ་ཅན་སྡེ་བདུན་གྱི་རྗེས་སུ་གནང་བ་བྱེད་པར་འདོད་པས། མཎྜལ་༼ནས་ཀྱིས་ཆོས་འབྱུང་བསྣོལ་མ་བྲི་༽དཔེའུ་ཆུང་ལྟར་བྲིས་ལ། གཏོར་མ་དང་མཆོད་པ་སྒྲུབ་ཐབས་ལྟར་བཤམས་ལ། སོ་སོའི་སྐུ་གསུང་ཐུགས་ཀྱི་མཚན་མ་དགོད། གྲལ་མ་ནོར་བར་བླ་མ་དང་སྔགས་སྲུང་དབུས། ཤན་པ་ཤར། གཟའ་ལྷོ། གནོད་སྦྱིན་ནུབ། དམ་ཅན་བྱང་། ལེགས་ལྡན་ལྕམ་དྲལ་བྱང་ཤར་དུ་བཤམ། གཞན་ཡང་ཚོགས་ཀྱི་མཆོད་པ། གཏོར་མ། སྤྱན་གཟིགས་ལ་སོགས་པ་སྒྲུབ་ཐབས་ལྟར་བཤམ། རྗེས་གནང་གི་ཐོད་པ། བཤོས་བུ། རི་རབ། བ་དན། རྒྱལ་མཚན། སྙིང་ཕྲེང་། མཆོད་གཏོར། ཐུན་རྫས། རཀྟ། ཡུངས་ཀར། ཕུར་པ། རལ་གྲི་རྣམས་ཚོགས་པར་བྱའོ། །

དངོས་གཞིའི་(༢)ཕྲིན་ལས་དངོས་གྲུབ་འབྱུང་གཏེར་རམ། དཔག་བསམ་ལྗོན་ཤིང་ལྟར་རྒྱས་པར་བྱའོ། །དེ་ནས་སློབ་མ་གཅིག་ལས་མང་བར་སྤེལ་དུ་མི་རུང་བས། ཁྲུས་བྱ། ཡོན་ཕུལ་ལ་ཐལ་མོ་སྦྱར་ཏེ། བླ་མ་ཀུན་ཏུ་བཟང་པོའམ་ཆེ་མཆོག་ཐོད་ཕྲེང་རྩལ་གང་ཡིན་དུ་མོས་ལ། གསོལ་བ་གདབ་པ་ནི། ཨེ་མ་སློབ་དཔོན་དགོངས་སུ་གསོལ། །བདག་ནི་བསྟན་པ་བསྲུང་བྱའི་ཕྱིར། །བདེ་བར་གཤེགས་པས་བཀའ་བསྒོས་པ། །དྲེགས་པ་མཐུ་ཡི་དབང་བསྐུར་ཞུ། །ཞེས་ལན་གསུམ་བརྗོད་ལ། །སློབ་དཔོན་གྱིས། ཚུར་ཤོག་སྐལ་ལྡན་རིགས་ཀྱི་བུ། །བསྟན་པ་བསྲུང་བར་དགོངས་པ་ལེགས། །དྲག་སྔགས་མཐུ་ཡི་དབང་བསྐུར་གྱིས། །སངས་རྒྱས་བསྟན་པ་ཐུབ་པར་སྲུངས། །ཞེས་པས་ལྕེ་ལ་དམ་ཆུ་བཞག་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ཐོབ། །ཅེས་པས་བྱིན་ནོ། །དེ་ནས་དབང་བསྐུར་བ་ནི། གཏོར་མ་རྣམས་རང་རང་གི་གཞལ་ཡས་ཁང་དུ་མོས་པའི་ནང་དུ་རང་རང་གི་སྐུ་གཞུང་ལྟར་བསྐྱེད་ལ་བརྡ་སྤྲད་ལ། སློབ་མ་ཀུན་བཟང་ཆེ་མཆོག་གང་རུང་དུ་བསྒོམ་དུ་བཅུག་སྟེ། གཏོར་མ་སྤྱི་བོར་བཞག་ལ།

ཧཱུྃ། དཔལ་ལྡན་གཙོ་མོ་ཨེ་ཀ་ཛ་ཊཱི་མ། །ཞལ་གཅིག་ཕྱག་གཉིས་རུ་ལུའི་སྒྲ་སྐད་སྒྲོགས། །ཀུན་ཏུ་བཟང་མོ་དབྱིངས་ཀྱི་མ་མོ་མཆོག །ལས་དང་ཡེ་ཤེས་ཚོགས་ཀྱི་རྗེ་མོ་ཆེ། །སྐལ་ལྡན་རིགས་ཀྱི་བུ་ལ་དབང་བསྐུར་བས། །སྔགས་སྲུང་འགྲུབ་ཕྱེད་མཐུ་དབང་ཐོབ་པ་དང་། །ཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །ༀ་མ་མ་ཨེ་ཀ་ཛ་ཊཱི་ཏྲག་རཀྴ་སྙིང་ཁ་རཀྨོ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཀཱ་ཡ་བ་ལིཾ་ཏ་ཨ་བྷི་ཥིཉྩ་ༀ། ཝཱ་ཀ་བ་ལིཾ་ཏ་ཨ་བྷི་ཥིཉྩ་ཨཱཿ ཙིཏྟ་བ་ལིཾ་ཏ་ཨ་བྷི་ཥིཉྩ་ཧཱུྃ། གནས་གསུམ་དུ་གཏུགས། སྔགས་སྲུང་གི་སྐུ་གསུང་ཐུགས་དང་སློབ་མའི་ལུས་ངག་ཡིད་གསུམ་དབྱེར་མེད་དུ་གྱུར་ནས་མ་མོའི་མཐུ་དབང་ཐོབ་སྟེ་བསྒོ་བ་ཉན་ཅིང་ལུས་དང་གྲིབ་ལྟར་འགྲོགས་པར་བསམ་མོ། །

སྔགས་ཀྱི་རྗེས་གནང་ནི། སློབ་དཔོན་གྱི་ཞལ་ནས་སྔགས་ཕྲེང་བྱུང་བ་སློབ་མའི་ཞལ་དུ་ཞུགས། ལུས་ཀྱི་དབྱིབས་བརྒྱུད་གསང་གནས་ནས་ཐོན། སྔགས་སྲུང་གི་མཁར་ཞུགས་ཞལ་ནས་ཐོན། སློབ་དཔོན་གྱི་གསང་གནས་ནས་ཞུགས། འགལ་མེའི་འཁོར་ལོ་ལྟར་འཁོར་བས་མ་མོའི་སྔགས་ཀྱི་དངོས་གྲུབ་(༣)ཐོབ་ནས་ལས་བྱེད་པར་བསམས་ལ། སྙིང་པོ་ཅི་ནུས་བགྲངས་ལ། སློབ་མས། སྔགས་སྲུང་བདག་ལ་བསྩལ་ལགས་ཀྱིས། །བདག་ལ་འགོ་བར་མཛད་དུ་གསོལ། །ཞེས་ལན་གསུམ་བརྗོད། བླ་མས། སྔགས་སྲུང་འདི་ལ་བསྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །གསུམ་བརྗོད། མེ་ཏོག་དོར། ཐུགས་ཀྱི་རྗེས་གནང་ནི། མདུན་གྱི་མ་མོ་སློབ་མ་ལ་བསྟིམ། སློབ་མ་ཡང་འོད་དུ་ཞུ་བ་ལས་འཇའ་ཡལ་བ་ལྟར་གྱུར་ནས་དབྱེར་མེད་པའི་དོན་ལ་བཞག་གོ། །འདི་ནི་གནད་གལ་པོ་ཆེ་སྲུང་མ་དང་དབྱེར་མེད་བསྲེས་པའི་འཁུ་ལྡོག་མི་འབྱུང་ཞིང་སྙིང་ཉེ་བའི་དགོས་པའོ། །དེ་འོག་མ་ཀུན་ལ་འགྲེས་ཤེས་པར་བྱའོ། །རང་རང་གི་གཏོར་མ་དང་སྐུ་གཟུགས་སྤྱི་བོ་ལ་སོགས་པའི་གནས་གསུམ་དུ་བཞག་ཅིང་། དམིགས་པ་རྣམས་གོ་བརྗེ་ཞིང་།

ཧཱུྃ། དཔལ་ལྡན་མགོན་པོ་མཧཱ་ཀཱ་ལ་ཡ། །བསྟོད་པ་ལྟར་བྱ་ཞིང་། ཁྱད་པར་དུ་རྗེ་མོ་འཁོར་བཅས་ཞེས་པའི་གནས་སུ། མཧཱ་ཀཱ་ལ་འཁོར་དང་བཅས་པ་ཡིས། །སྐལ་ལྡན་རིགས་ཀྱི་བུ་ལ་སོགས་གོང་ལྟར་རོ། །ༀ་ཤྲཱི་མཧཱ་ཀཱ་ལ་ཡེ་ཤཱ་ས་ན་ཀཱ་ཡ་བ་ལིངྟ་ཨ་བྷི་ཥིཉྩ་ༀ། ཝཱཀ་ཙིཏྟ་སོགས་དང་། སྔགས་ཀྱི་རྗེས་གནང་དང་། ཐུགས་ཀྱི་རྗེས་གནང་གོང་ལྟར་རོ། །རེ་མ་ཏིའི་གཏོར་མ་བཞག་ལ། བསྟན་པ་སྲུང་མཛད་འཁོར་དང་བཅས་པ་ཡིས། །སོགས། ༀ་ཏྲག་རཀྴ་རེ་མ་ཏི་ཀཱ་ཡ་བ་ལིངྟ་ཨ་བྷི་ཥིཉྩ་ༀ། ཝཱཀ་ཙིཏྟ་སོགས། སྲོག་སྒྲུབ་ཀྱི་གཏོར་མ་བཞག་ལ། ནམ་གྲུ་ནག་མོ་འཇིགས་པའི་ཚོགས་བཅས་ཀྱིས། །སོགས། ༀ་ཁྱི་ཁ་ལེ་ནག་མོ་སོད། སྲོག་མ་ཧི་སོད། སྙིང་ཁ་ཁ་བ་མ་ཡ་མ་སོད། ཙ་བ་མ་བི་རི་མུ་སོད། གྷ་ཡ་སོད། རྣྲ་ཡ་སོད། རཀྨོ་ཎི་ར་རྦད། ཀཱ་ཡ་བ་ལིཾ་ཏ་ཨ་བྷི་ཥིཉྩ་ༀ། ཝཱཀ་ཙིཏྟ་སོགས། གཟའི་གཏོར་མ་བཞག་ལ། སྲིད་བཞི་སྡེ་བརྒྱད་འཁོར་དང་བཅས་པ་ཡིས། །སྐལ་ལྡན་སོགས། ཧྲཱི་ཤག་རུ་རཾ་ནཱ་གེ་ཙིཏྟ་ཏྲཾ་མ་མ་ཡོ་ཟ་བགྲམ་ཧ་ཧེ་ཡོ་གི་ཤྭ་ལ་ཛ་ཛཿ ཀཱ་ཡ་བ་ལི་ངྟ་ཨ་བྷི་ཥིཉྩ་ༀ། ཝཱ་ཀ་ཙིཏྟ་སོགས། དམར་ནག་གི་གཏོར་མ་བཞག་ལ། དྲག་གཏུམ་ཆེན་མོ་འཁོར་དང་བཅས་པ་ཡིས། །སྐལ་ལྡན་སོགས། ༀ་ཨེ་ཧྱེ་ཧི་རྨ་རུ་ཙེ་གུ་ཎ་དྷི་ཏྲི་གྷྲཾ་བྷྱོ། ཤ་རཾ་བྷྱོ་པུ་ར་ཛ་དྷྲིཀ །ཧྲལ་གྷྲན་ཙ་ཡ་ཛཿཛཿ ཀཱ་ཡ་བ་ལིཾ་ཏ་ཨ་བྷི་ཥིཉྩ་ༀ། ཝཱཀ་ཙིཏྟ་སོགས། དམ་ཅན་གྱི་གཏོར་མ་བཞག་ལ། འཁོར་དང་བཅས་པ་མ་ལུས་ཐམས་ཅད་ཀྱིས། །སྐལ་ལྡན༴། །ༀ་བཛྲ་སཱ་དྷུ་ས་མ་ཡ་ཧས་བྱས་ཧ་བྱ་གླེ་གད་ཤ །ཨེ་བྷ་ཤ་ཡ་ཛ་ཛཿ ཀཱ་ཡ་བ་ལིཾ་ཏ། ཝཱཀ་ཙིཏྟ་སོགས། ཐོད་པ་སྤྱི་བོར་བཞག་ལ། ཧཱུྃ། ཡང་དག་གསང་བའི་ཐོད་པ་འདིས། །སྡེ་བརྒྱད་རྣམས་ཀྱི་ཕོ་བྲང་གནས་ན་རྟེན། །བྷནྡྷ་རྫས་མཆོག་འདི་ཡིས་དབང་བསྐུར་བས། །སྡེ་བརྒྱད་མ་ལུས་ལས་ལ་འགྱེད་པར་ཤོག །ཀ་པཱ་ལ་ཨ་བྷི་ཥིཉྩ་མཾ། བཤོས་བུས་དབང་བསྐུར་བ། ཧཱུྃ། བཤོས་བུ་བཞི་བརྩེགས་མར་མེ་ལྔ་དང་ལྡན། །ཁམས་གསུམ་སྲིད་པ་གསུམ་དང་(༤)ཡང་དག་ལྡན། །བཤོས་བུ་རི་རབ་ལྷུན་པོས་དབང་བསྐུར་བས། །དམ་ཅན་སྲུང་མ་མ་ལུས་མཉེས་བྱེད་ཤོག །ༀ་བ་ལིཾ་ཏ་སོགས་དང་། རྟེན་གྱི་རི་རབ་ཀྱི་དབང་། ཧཱུཾ། གླིང་ཆེན་བཞི་དང་རི་རབ་བཅས་པ་ཡི། །སྐུ་རྟེན་དམ་པ་འདི་ཡིས་དབང་བསྐུར་བས། །དམ་ཅན་སྲུང་མ་མ་ལུས་འཁོར་བཅས་རྣམས། །དབང་དུ་བསྡུ་ཤིང་འཁོར་བའི་དབང་ཐོབ་ཤོག །ༀ་རཏྣ་མཎྜལ་ཨ། བ་དན་གཏད་ལ། དར་གྱི་བ་དན་སྣ་ཚོགས་སྐུ་ཡི་རྒྱན། །དར་ལྕེ་གཡེར་ཁ་མང་པོས་སྤུད་ཅིང་གསིལ། །མཛེས་པའི་རྒྱན་ཆ་འདི་ཡིས་དབང་བསྐུར་བས། །ཡང་དག་ཕུན་ཚོགས་རྒྱན་དང་ལྡན་པར་ཤོག །པ་ཏྲ་དམ་མ། རྒྱལ་མཚན་གཏད་ལ། སྣ་ཚོགས་རྒྱན་གྱིས་མཛེས་པའི་རྒྱལ་མཚན་འདི། །མངའ་ཐང་ལོངས་སྤྱོད་ཕུན་སུམ་ཚོགས་པ་ཡི། །ཡིད་འོང་རྒྱལ་མཚན་མཆོག་གིས་དབང་བསྐུར་བས། །འདོད་རྒུའི་བསམ་པ་ཡིད་བཞིན་འགྲུབ་པར་ཤོག །དྷཱ་ཛ་གྭ་ཨ། སྙིང་ཕྲེང་གཏད་ལ། ཧཱུྃ། རང་རང་མཐུན་པའི་དམ་ཚིག་རྫས་ཀྱི་མཆོག །སེམས་ཅན་སྣ་ཚོགས་བསྒྲལ་བའི་སྙིང་ཕྲེང་འདིས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །མི་འབྲལ་ལུས་དང་གྲིབ་བཞིན་འགྲོགས་པར་ཤོག །ཙིཏྟ་ཨ། མཆོད་གཏོར་གཏད་ལ། དྲག་པོའི་མཆོད་གཏོར་རྫས་མཆོག་དམ་པ་འདིས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །བཀའ་སྲུང་དམ་ཅན་སྡེ་བརྒྱད་མ་ལུས་པ། །ཐམས་ཅད་བུ་ལ་འདུ་བའི་དབང་ཐོབ་ཤོག །མཧཱ་བ་ལིཾ་ཏ་སོགས། ཐུན་རྫས་གཏད་ལ། གདུག་པའི་རྫས་རྒོད་སྣ་ཚོགས་སྦྱར་བ་ཡི། །མངགས་པའི་ཕོ་ཉ་གདུག་པའི་མཚོན་དབལ་འདིས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །སྣ་ཚོགས་དྲག་པོའི་ལས་རྣམས་འགྲུབ་པར་ཤོག །ༀ་དུག་ཐུན་ཨ། རཀྟ་གཏད་ལ། ཧཱུྃ། བདག་འཛིན་ཆགས་པ་བྲལ་བའི་རཀྟ་འདི། །དགྲ་བགེགས་གསོད་པའི་མཚོན་ཆ་མ་མོའི་ནད། །སྐལ་ལྡན༴། དྲག་སྔགས་དམོད་པའི་ལས་རྣམས་འགྲུབ་པར་ཤོག །ༀ་མཧཱ་རཀྟ༴། །ཡུངས་ཀར་གཏད་ལ། ཡུངས་ཀར་རྒྱལ་པོ་དྲང་སྲོང་དམོད་པའི་མདའ། །མངགས་པའི་ཕོ་ཉ་གསོད་པའི་དམ་རྫས་མཆོག །སྣ་ཚོགས་མཚོན་དང་གདུག་པའི་དབལ་ཡིན་པས། །ཕྲིན་ལས་རྣམ་བཞི་མ་ལུས་འགྲུབ་པར་ཤོག །ཕུར་པའི་དབང་བསྐུར་བ། ཧཱུྃ། བརྣག་པ་མཐར་ཕྱིན་དྲག་པོའི་ཕུར་པ་འདི། །མངགས་པའི་ཕོ་ཉ་མཚོན་ཆའི་དབལ་རྣོན་འདིས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །དགྲ་བགེགས་གདུག་པ་མ་ལུས་སྒྲོལ་བར་ཤོག །ༀ་བཛྲ་ཀཱི་ལི་ཀཱི་ལ་ཡ་ཨ༴། རལ་གྲི་གཏད་ལ། ཧཱུྃ། འཁོར་བའི་སྐྱེ་ཤི་རྩད་ནས་གཅོད་པ་ཡི། །གདུག་པའི་མཚོན་ཆ་རབ་ཏུ་འབར་བ་འདིས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །དགྲ་བགེགས་སྲོག་རྩ་མ་ལུས་གཅོད་པར་ཤོག །ༀ་ཁཌྒ༴། ཨ་ཞེས་བརྗོད་ལ་གཏོར་མ་གཙང་སར་གཤེགས། གཞུང་གི་བྱ་བ་རྣམས་སྒྲུབ་(༥)ཐབས་ལྟར་བྱའོ། །གཏོར་མའི་དབང་གི་རྗེས་སུ། སྨོན་ལམ་ནི། སྔགས་སྲུང་སྨུག་ནག་ཁྲོས་མའི་རྒྱལ་མོ་འཁོར་དང་བཅས་པས། སྐལ་ལྡན་རྡོ་རྗེ་སློབ་མ་ཆེ་གེ་མོ་འདི་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་དབང་དང་དངོས་གྲུབ་སྩོལ་བ་དང་། སངས་རྒྱས་ཀྱི་བསྟན་པ་བསྲུང་བ་ལ་ནུས་མཐུ་དང་ལྡན་པར་མཛད་དུ་གསོལ། ཞེས་པ་དང་། ཐུགས་ཀྱི་རྗེས་གནང་གི་མཇུག་ཏུ། རང་རང་གི་སྙིང་པོའི་གཤམ་དུ། ཙིཏྟ་ཨ་བྷི་ཥིཉྩ་ཧཱུྃ། ཏིཥྛ་བཛྲ་ཧཱུྃ། ཞེས་པས་རྡོ་རྗེ་སྙིང་གར་གཏུག་གོ། །དེ་བཞིན་དུ་ལེགས་ལྡན་ནག་པོ་འཁོར་དང་བཅས་པས། ཤན་པ་སྲོག་སྒྲུབ་འཁོར་དང་བཅས་པས། གཟའ་མཆོག་ཆེན་པོ་འཁོར་དང་བཅས་པས། ཤན་པ་དམར་ནག་འཁོར་དང་བཅས་པས། དམ་ཅན་རྡོ་རྗེ་ལེགས་པ་འཁོར་དང་བཅས་པས། ཞེས་སོགས་བླ་མའི་ཞལ་ལས་བྱུང་བ་ལྟར་ཀློང་ཆེན་རབ་འབྱམས་ཀྱིས་ཕྱི་རབས་ཀྱི་དོན་དུ་བཀོད་པའོ།། །།

འདིའི་བཅས་ཤོམས་ལ། ནས་ཀྱི་ཆོས་འབྱུང་བསྣོལ་མ། བླ་མ་དང་ཨེ་ཀ་ཛ་ཊཱི་དབུས། ལེགས་ལྡན་རྣམས་ལ་པད་འདབ་བཞི་བཞི། གཟའ་དང་གནོད་སྦྱིན་ལ་ཨེ་ཀ་ཛ་ཊཱི་དང་འདྲ་བ་ལ་རྒྱབ་ཏུ་སྨན་ལེབ། ཏེལ་བ། སྣོད་གྲུ་བཞི་མཁར་ལ་བ་གམ་མེད་པར་མགོ། ཐམས་ཅད་ལ་པདྨ་འདབ་བཞི་མ། ལས་གཏོར་ལྷ་མོ་དང་འདྲ་བ་གཅིག་ལྷོ་ནུབ་ཏུ་བཞག །གྲུ་གསུམ་ལྔ་བརྩེགས་ལ་མ་མེ་ལྔ་བཞག །དམ་རྫས་ཐོད་ཆང་། རཀྟ། རྒྱལ་མཚན། འཕན། སྙིང་ཕྲེང་། རྟེན་རྫས་རལ་གྲི། ཡུངས་ཀར་གང་བཟང་། མདའ་དར་རྣམས་སོ། །

རྗེས་གནང་ནི། སློབ་དཔོན་དང་སློབ་མ་ཚོ་ལྷར་བསྐྱེད། མདུན་བསྐྱེད་ཚོ་བསྐྱེད་ལ། རང་རང་ལུས་ནམ་མཁར་ཡལ་བ་ལྟར་ངང་ལ་འཇོག་པ་སྐུའི་རྗེས་གནང་། གསུང་སྔགས་ཕྲེང་འཁོར་མ་རྦད་བཅད་དང་བགྲང་དུ་འཇུག་པ་སློབ་མ་ལ་ཐིམ་དུ་བཅུག །ཨེ་ཀ་ཛ་ཊཱི་ནས་བཟུང་སྟེ་སོ་སོར། འདི་ལ་བསྩལ་ལགས་ཀྱི། །སོགས་རྗེས་གནང་རྫོགས་རྟིང་། དེ་ནས་གཏོར་སྟེགས་འོག་ཏུ་ལག་གཉིས་བཅུག་ལ་མགོ་ཐོག་ཏུ་དམིགས་པ་བྱེད། བླ་མ་བརྒྱུད་པ་སྙིང་ཏིག་བཞིན། ཞི་རྒྱས་དབང་དྲག་གི་ཕྲིན་ལས་བཅོལ་བའི་བཀའ་བསྒོས་རྗེས་དེ་ནས་གསོལ་གདབ་བྱའོ། །སྡེ་བདུན་གྱི་བཅས་ཤོམས་ལག་ཁྲིད་དུ་བཀོད་པ་རྫོགས་སོ།། །།

དཔལ་སྔགས་ཀྱི་སྲུང་མའི་རྗེས་གནང་དངོས་གྲུབ་རྒྱ་མཚོའི་རང་བཞིན།

༄༅། །དཔལ་སྔགས་ཀྱི་སྲུང་མའི་རྗེས་གནང་དངོས་གྲུབ་རྒྱ་མཚོའི་རང་བཞིན་ཞེས་བྱ་བ་བཞུགས་སོ། །

༄༅། །ཧཱུྃ་འགྲུབ་པར་གྱུར་ཅིག །དཔལ་གདོད་མའི་མགོན་པོ་ལ་ཕྱག་འཚལ་ལོ། །འདིར་དཔལ་ལྡན་མི་ཕམ་རལ་གཅིག་མའི་རྗེས་སུ་གནང་བ་སྦྱིན་པ་ནི། རང་བཞིན་རྫོགས་པ་ཆེན་པོའི་དེ་བཞིན་ཉིད་མངོན་དུ་བྱེད་པའི་རྣལ་འབྱོར་པ་ལྟ་བའི་རྒྱབ་དང་ལྡན་པས། དབེན་པར་རཀྟ་དང་བདུད་རྩིས་ཆག་ཆག་བཏབ་ལ། ཆོས་འབྱུང་གྲུ་གསུམ་པ་པདྨ་འདབ་བརྒྱད་མེ་རིས་བསྐོར་བའི་དབུས་སུ། ཁྲིའུའི་ཁར་དཔལ་གཏོར་གྲུ་གསུམ་པ་འཁོར་ལྔ། དཀར་རྒྱན་དམར་རྒྱན་(༦)སྨན་རཀ་བྲན་པ་ལ་མདའ་དར་མཐིང་ནག་ཙཀླི་དང་བཅས་པ་གཟུག །མདུན་དུ་སྨན་རཀ་གཏོར་མ། བུམ་པ། མཐའ་སྐོར་དུ་ཚོགས་དང་སྤྱན་གཟིགས་སྣ་ཚོགས་བག་དྲོ་བར་བཤམས་ལ། རང་ཉིད་ས་མ་དྷིས་སྐོང་བའི་ཆོ་ག་སྔགས་སྒྲུབ་ཚོགས་ཡན་གྲུབ་པར་བྱ་ཞིང་། སློབ་བུ་ལ་སྐོང་བཤགས་ཡིག་བརྒྱ་བཟླ་བཅུག་ལ། དེ་ནས་སློབ་བུ་ལས་ལྡན་གསུམ་ལས་མི་མང་བ་ལ་ཁྲུས་བྱ། གུ་གུལ་བདུག །བགེགས་བསྐྲད། གདན་ལ་འཁོད་ཅིང་ཕྱག་བྱས་ཏེ། བླ་མ་ཀུན་ཏུ་བཟང་པོ་དངོས་སུ་བསམ་ཞིང་། མཎྜལ་ཕུལ་ཏེ། ཧོཿ བླ་མ་ཀུན་བཟང་ཧེ་རུ་ཀ །རང་བཞིན་དབྱིངས་ནས་སྐུ་བཞེངས་ལ། །བདག་ལ་དཔལ་ལྡན་ཁྲོས་མ་ཡི། །རྗེས་སུ་གནང་བ་སྩལ་དུ་གསོལ། །ལན་གསུམ་གསོལ་བ་གདབ། བླ་མས་བདུད་རྩི་བླུད་དེ། འོ་རིགས་ཀྱི་བུ་ཁྱོད་སྐལ་བ་བཟང་། །གསང་སྔགས་བསྟན་པ་བསྲུང་བ་དང་། །སེམས་ཅན་མ་ལུས་འདུལ་སླད་དུ། །ནག་མོ་ཁྲོས་མའི་གནང་བ་སྦྱིན། །དམ་བསྲུང་བདུད་རྩིའི་ཆུ་འདི་འཐུང་། །མཧཱ་སུ་ཁཾ། དེ་ནས་སློབ་བུ་རྣམས་གནས་ཨོ་རྒྱན་སྤྲུལ་པའི་གྲོང་ཁྱེར་ཕྱི་རོལ་ཏུ་དུར་ཁྲོད་ཆེན་པོས་ཡོངས་སུ་བསྐོར་བའི་དབུས་སུ་པདྨ་འདབ་བརྒྱད་ཆོས་འབྱུང་དང་བཅས་པར། སྐད་ཅིག་གིས་དབྱིངས་ཀྱི་ཀུན་ཏུ་བཟང་མོར་བསྐྱེད་པའི་ཐུགས་ཀར་དགའ་བ་འཁྱིལ་པ། བླ་མའི་ཐུགས་ཀ་ནས་འོད་འཕྲོས། དགའ་བ་འཁྱིལ་པ་འཁོར་བས། རང་བཞིན་གྱི་གནས་ཨོ་རྒྱན་བསིལ་བའི་ཚལ་ནས། དཔལ་ལྡན་སྔགས་ཀྱི་སྲུང་མ་སྐུ་མདོག་སྨུག །ཞལ་གཅིག་ཕྱག་གཉིས་ནུ་མ་འཕྱང་། རལ་པ་གཅིག་གཏིབས་དཔྲལ་ན་སྤྱན་གཅིག །ཞལ་ན་ཚེམས་གཅིག་ཁྲོ་རྔམས་འཇིགས་པ། མེ་རླུང་འཚུབས་མ་ཁྲག་གི་མཚོ་འཁྱིལ། ཕྱག་གཡས་ཙིཏྟ་ཞལ་དུ་གསོལ་ཞིང་། གཡོན་པས་ཞིང་དབྱུག་ཀླད་ལ་བསྐོར་ཞིང་། འཁོར་དུ་དབྱིངས་ཀྱི་མ་མོ་ལྔ་ཉིད་དང་། ལས་བྱེད་མ་མོ་འབུམ་གྱིས་བསྐོར་ཞིང་། དབྱར་གྱི་ཆར་སྤྲིན་ལྟ་བུར་བྱོན་པར་བསམ། དེ་ནས་གུ་གུལ་ཚིལ་ཆེན་པད་རཀ་གི་དུ་བས་བདུག་ཅིང་ཌ་དྲིལ་སོགས་རོལ་མོའི་སྒྲས། ཧཱུྃ། རང་བཞིན་དབྱིངས་ཀྱི་གནས་མཆོག་ནས། །དཔལ་ལྡན་ནག་མོ་ཁྲོས་མ་ནི། །ཨེ་ཀ་ཛ་ཊཱི་དབྱིངས་ཀྱི་ཡུམ། །མཆེད་ཀྱི་མ་མོ་སྤྲུལ་འཁོར་བཅས། །སྐུ་མདོག་སྨུག་ནག་ཙེ་རེ་རེ། །དགྱེས་པའི་ཞལ་བགྲད་ཡ་ལ་ལ། །དངོས་གྲུབ་ཆར་འབེབས་སི་ལི་ལི། །གནས་འདིར་སྤྱན་འདྲེན་གཤེགས་སུ་གསོལ། །བདག་དང་མོས་པའི་བུ་རྣམས་ལ། །དབང་བསྐུར་བྱིན་རླབས་ཚེ་དབང་སྩོལ། །ལས་བཞི་ཕྲིན་ལས་གྲུབ་པ་དང་། །བསྟན་པའི་དགྲ་བགེགས་བསྒྲལ་དུ་གསོལ། །ༀ་མ་མ་ཨེ་ཀ་ཛ་ཊཱི་ཏྲག་རཀྴ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེས་བསྟིམ། ཏིཥྛ་བཛྲས་བྱིན་ཕབ་ལ། བླ་མའི་དཔྲལ་བ་ལས་འོད་འཕྲོས། སྐུའི་མ་མོ་གྲངས་མེད་སྤྱན་དྲངས། སློབ་བུའི་དཔྲལ་བར་བསྟིམ། གཏོར་མ་གོང་གི་མངོན་རྟོགས་(༧)བཞིན་བསྒོམ། སྤྱི་བོར་བཟུང་། ཧཱུྃ། དུས་གསུམ་སངས་རྒྱས་ཐམས་ཅད་ཀྱི། །ཕྲིན་ལས་སྒྲུབ་མཛད་སྐུ་ཡི་ལྷ། །སྐུ་ཡི་མ་མོས་བྱིན་གྱིས་རློབས། །སྐུ་ཡི་དབང་བསྐུར་ཆེན་པོ་སྦྱིན། །སྔགས་ཤམ་རུ་ཀཱ་ཡ་ཨ་བྷི་ཥིཉྩ་ༀ། དེ་བཞིན་དུ་གསུང་ལས་འོད་ཟེར་འཕྲོས། གསུང་གི་མ་མོ། སློབ་མའི་ངག །ཧཱུྃ་ཞེས་སོགས། གསུང་གི་མ་མོ་སོགས། ཝཱཀ་ཨ་བྷི་ཥིཉྩ་ཨཱཿ། ཐུགས་ཀ་ནས་འོད་འཕྲོས། ཐུགས་ཀྱི། ཙིཏྟ་ཨ་བྷི་ཥིཉྩ་ཧཱུྃ། དེ་ནས། གཏོར་མ་གནས་སོ་སོ་བཟུང་། གཡས་སུ་སྙིང་། གཡོན་དུ་ཞིང་དབྱུག །མདུན་དུ་ཐོད་ཁྲག་སྒྲུབ་དཔེ་གཏད་དེ། གཏོར་མ་སྤྱི་བོར་བཟུང་། སློབ་དཔོན་ཆེ་བའི་ང་རྒྱལ་གཟི་བརྗིད་དང་བཅས་པས། ཧཱུྃ་བྷྱོ། སྐལ་ལྡན་རིགས་ཀྱི་བུ་ཁྱོད་ལ། །སྔགས་ཀྱི་སྲུང་མས་བྱིན་གྱིས་རློབས། །དངོས་གྲུབ་མ་ལུས་དུས་འདིར་ཐོབ། །ཕྲིན་ལས་རྣམ་པ་བཞི་ཡིས་ནི། །གསང་སྔགས་བསྟན་སྲུངས་དམ་ཆོས་སྐྱོངས། །ཁྱོད་ཀྱིས་འགྲོ་བ་འདུལ་བར་བརྩོན། །དེ་བཞིན་མ་མོ་འཁོར་བཅས་ཀྱིས། །དད་ལྡན་བུ་ལ་བྱིན་གྱིས་རློབས། །གོང་གི་སྔགས་ཤམ་དུ། ཀཱ་ཡ་ཝཱཀ་ཙིཏྟ་ཨཱ་ཡུ་པུཎྱེ་བ་སུ་པུ་ཏྲ་སིདྡྷི་ཧཱུྃ་ཧཱུྃ། ཤཱ་ཏྲཱུན་སརྦ་ཤཱནྟིཾ་མཱ་ར་ཡ་ཕཊ། ལྷ་འདྲེ་མི་གསུམ་པཱ་ཤཾ་ཀུ་རུ་མཆོག་ཐུན་མོང་པུཥྚིཾ་ཀུ་རུ་སྭཱ་ཧཱ། དཔལ་སྔགས་ཀྱི་སྲུང་མ་འཁོར་དང་བཅས་པས་དམ་རྫས་བདུད་རྩིའི་ཚོགས་གཏོར་རྒྱ་ཆེན་པོ་འདི་བཞེས་ལ། སྔོན་གྱི་ཐུགས་དམ་བཞིན་དུ་རྡོ་རྗེའི་སློབ་བུ་ཆེ་གེ་མོ་ལ་དབང་བསྐུར་བྱིན་གྱིས་རློབས་སོགས། སློབ་བུའི་རྒྱུད་ཚོད། འགྲོ་དོན་ནུས་མི་ནུས། མཆོག །ཕལ་པ། ནད་པ། གདོན་ཅན། བུ་ནོར་འདོད་སོགས་འདོན་པ་བསྒྱུར་ལ། གཏོར་མ་བྱིན་རླབས། འདོད་གསོལ། བཅོལ་དམ། གཉེར་གཏད། བཀའ་གཏད། རྗེས་སུ་གནང་བ། བཀའ་འགྲོལ་སོགས་རིགས་བརྟགས་ལ་རྒྱས་པར་བྱའོ། །

དེ་ནས་ཚོགས་ལ་རོལ། དཔལ་གཏོར་དངོས་གྲུབ་ཏུ་ལོངས་སྤྱོད། མཆོད་བསྟོད་གཤེགས་གསོལ་སྐབས་དང་སྦྱར།

དགེ་བ་འདི་ཡིས་བདག་དང་འགྲོ་བ་ཀུན། །ནད་གདོན་མི་མཐུན་གནོད་པའི་ཚོགས་ཞི་ནས། །དཔལ་ལྡན་ནག་མོས་བུ་བཞིན་ལེགས་བསྐྱངས་ཏེ། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །ཅེས་བསྔོ་བ་སྨོན་ལམ་ཤིས་པ་རྒྱ་ཆེར་བརྗོད་པར་བྱའོ། །ཚུལ་འདི་རིག་འཛིན་པདྨའི་གསུང་ཇི་ལྟར། །དེ་ཡི་ཐུགས་ཀྱི་འོད་ཟེར་ཕོག་པ་ཡི། །རྫོགས་ཆེན་རྣལ་འབྱོར་ཀློང་ཆེན་རབ་འབྱམས་ཀྱིས། །གངས་རི་ཐོད་དཀར་རིན་ཆེན་མགུལ་དུ་བཀོད། །ས་མ་ཡ། རྒྱ་རྒྱ་རྒྱ། དགེའོ།། །།

རཱ་ཧུ་ལའི་སྐོང་གསོ་ཁྲག་མཚོ་འཁྱིལ་པ།

༄༅། །རཱ་ཧུ་ལའི་སྐོང་གསོ་ཁྲག་མཚོ་འཁྱིལ་པ་ཞེས་བྱ་བ་བཞུགས་སོ། །

༄༅། །ཧཱུྃ། འགྲུབ་པར་གྱུར་ཅིག་མཐུ་སྟོབས་དབང་ཕྱུག་གཙོ། །རྡོ་རྗེ་ཐོད་ཕྲེང་རྩལ་ལ་ཕྱག་འཚལ་ལོ། །གཟའ་མཆོག་ཆེན་པོ་འཇིགས་བྱེད་རཱ་ཧུ་ལ། །ཐུགས་དམ་སྐོང་བའི་ཆོ་ག་བརྗོད་པར་བྱ། །དེ་ལ་གཟའི་བཤོས་བུ་དགུས་(༨)བསྐོར་རྩེ་ལ་ལིང་དམར་གྱིས་བརྒྱན་པ། སྐྱུ་གུ་བརྒྱད་དང་རིལ་བུ་བརྒྱད་ཀྱིས་བསྐོར་བ། དར་ནག་གི་འཕན་ལྡིང་བཅས་པ་བཤམ། ཚོགས་དང་སྤྱན་གཟིགས་མང་པོ་དང་། སྤོས་དང་ཚིལ་ཆེན་གྱི་དུད་པ་དང་། རྔ་དང་རོལ་མོ་བསྒྲག་ཅིང་། རང་ཉིད་པདྨ་ཐོད་ཕྲེང་གི་ང་རྒྱལ་གྱིས་མཚམས་བཅད་པ་ནི། ཧཱུྃ། བདག་ཉིད་རྡོ་རྗེ་ཐོད་ཕྲེང་རྩལ། །མཐིང་ནག་མེ་ཡི་ཀློང་ན་བཞུགས། །ཞལ་གཅིག་ཕྱག་གཉིས་སྤྱན་གསུམ་བགྲད། །ཞལ་གདངས་མཆེ་གཙིགས་ཧཱུྃ་སྒྲ་སྒྲོགས། །ཕྱག་གཡས་རྡོ་རྗེ་ཐོད་དབྱུག་གདེངས། །གཡོན་པ་སྡིགས་མཛུབ་ཐུགས་ཀར་མཛད། །ཞབས་གཉིས་བརྐྱང་བསྐུམ་དོར་སྟབས་ཏེ། །སྦྲུལ་དང་ཐོད་ཕྲེང་འབར་བས་བརྗིད། །ཧཱུྃ་དང་ཕཊྲ་ཀྱི་འཕྲོ་འདུ་ལས། །སྤྲུལ་པའི་ཁྲོ་ཆུང་གློག་ལྟར་འཁྱུགས། །མཚོན་ཆའི་མེ་རི་སྟོང་ཁམས་འབར། །རླུང་ཡང་འགྱུ་བའི་སྐབས་མེད་ན། །བར་ཆད་བགེགས་རྣམས་སྨོས་ཅི་དགོས། །ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ། ཨུ་ཙ་ཏ་ཡ་ཧཱུྃ་ཧཱུྃ་ཕཊ། ཅེས་པས་མཚམས་བཅད། མདུན་དུ་གཟའ་མཆོག་འཁོར་དང་བཅས་པ་རྣམས་སྐད་ཅིག་གིས་གསལ་ཏེ། སྤྱན་དྲངས་པ་ནི། ཧཱུྃ། རྡོ་རྗེ་འཆང་དབང་ཐུགས་ཀྱི་སྤྲུལ་པ་ལས། །ཡང་སྤྲུལ་མི་བཟད་འབར་བའི་སྐུར་སྟོན་པ། །གཟའ་མཆོག་ཆེན་པོ་འཇིགས་བྱེད་རཱ་ཧུ་ལ། །ངང་ཉིད་ཆོས་ཀྱི་དབྱིངས་ནས་སྐུ་བཞེངས་ཤིག །སྙིགས་དུས་མི་བཟད་ལྔ་བརྒྱ་ཐ་མ་འདིར། །སྣ་ཚོགས་ཐབས་ཀྱིས་གདུག་པ་འདུལ་དོན་དུ། །ཐུགས་ཉིད་ཞི་བ་ཆོས་དབྱིངས་རྣམ་དག་ཀྱང་། །དྲག་གཏུམ་མི་བཟང་ཐུགས་རྗེས་སྐུ་བཞེངས་ཤིག །ཧཱུྃ། ཞེ་སྡང་འབར་བའི་དཀྱིལ་འཁོར་ནས། །ཡཀྴ་ཛ་ལ་དམ་ལ་ཤོག །འདོད་ཆགས་འབར་བའི་དཀྱིལ་འཁོར་ནས། །རྡོ་རྗེ་གློག་འགྱུ་དམ་ལ་ཤོག །འདོད་ཆགས་ཞེ་སྡང་འབར་བ་ལས། །སྤྲུལ་པ་གཟའ་བདུད་དམ་ལ་ཤོག །མ་མོ་རོལ་པའི་དུར་ཁྲོད་ནས། །ལྗང་སྔོན་ཆེན་མོ་དམ་ལ་ཤོག །དགྲ་ལྷའི་ཚོགས་ཀྱི་དཀྱིལ་འཁོར་ནས། །དྲང་སྲོང་དཀར་སེར༴། །ཀླུ་བདུད་རོལ་པའི་དཀྱིལ་འཁོར་ནས། །བདུད་པོ་རཱ་ཛ༴། །སྲིན་པོའི་ཚོགས་ཀྱི་དཀྱིལ་འཁོར་ནས། །བྷི་ཏྲི་པ་ཏྲ༴། །དམུ་བདུད་རོལ་བའི་དཀྱིལ་འཁོར་ནས། །དམུ་བདུད་ཆེན་པོ༴། །གཤིན་རྗེ་རོལ་པའི་དཀྱིལ་འཁོར་ནས། །དུ་བ་མཇུག་རིང་དམ་ལ་ཤོག །ཀླུ་བཙན་རོལ་པའི༴། །ཁྱབ་འཇུག་ཆེན་པོ༴། །སྡེ་བརྒྱད་ཚོགས་ཀྱི༴། །སྒྲ་གཅན་ཆེན་པོ༴། །ཤར་ཕྱོགས་ནམ་མཁའི་དཀྱིལ་ཡངས་ནས། །སྟག་སྲིན་ཟོར་གདོང་༴། །ལྷོ་ཕྱོགས་ནམ་མཁའི༴། །བམ་སྲིན་དྲེད་གདོང་༴། །ནུབ་ཕྱོགས་ནམ༴། །ཀོང་སྲིན་བ་ལང་གདོང་ཅན༴། །བྱང་ཕྱོགས་ནམ༴། །འབྲོག་སྲིན་ཆུ་སྲིན་གདོང་ཅན༴། །སོ་སོའི་གནས་དང་ཕོ་བྲང་ནས། །སྤྲུལ་པའི་གཟའ་བརྒྱད༴། །རྒྱུ་སྐར་ཉེར་བརྒྱད་དམ༴། །ལྷ་སྲིན་སྡེ་བརྒྱད༴། །ཀླུ་འབུམ་ཚོགས་པའི་ཕོ་བྲང་ནས། །རྡོ་རྗེ་(༩)ལེགས་པ་དམ༴། །སྲིན་པོ་འབུམ་གྱི་ཕོ་བྲང་ནས། །ལྷ་མོ་ནག་མོ་དམ༴། །གཤིན་རྗེ་འབུམ་གྱི་ཕོ་བྲང་ནས། །བཤན་པ་དམར་ནག་དམ༴། །གནམ་སྨན་འབུམ་གྱི་ཕོ་བྲང་ནས། །ཚེ་འཛིན་མ་བཞི༴། །རོ་ལངས་འབུམ་གྱི་ཕོ་བྲང་ནས། །ཕོ་ཉ་ནག་མོ༴། །ལས་མཁན་འབུམ་གྱི་ཕོ་བྲང་ནས། །ནག་པོ་འཛུམ་མེད༴། །གཞན་ཡང་སྤྲུལ་པའི་ཕོ་ཉ་དང་། །ཡང་སྤྲུལ་ལྷ་སྲིན་འཁོར་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །ནམ་མཁའ་དབྱིངས་ཀྱི་ཕོ་བྲང་ནས། །གཟའ་བདུད་འཁོར་དང་བཅས་པ་རྣམས། །སྐུ་མདོག་དུད་ཁ་ཙེ་རེ་རེ། །དགྱེས་པའི་གད་རྒྱངས་ཡ་ལ་ལ། །དར་ནག་རུ་མཚོན་ཕྱ་ར་ར། །མི་རྐང་གླིང་བུ་ཙེ་རེ་རེ། །སྤྱན་སྟོང་མེ་རུ་འུ་རུ་རུ། །བཤུགས་པའི་གླུ་ལེན་ཀྱུ་རུ་རུ། །རྔམས་པའི་ང་རོ་དི་རི་རི། །དཔལ་གྱི་བྲོ་ཆེན་ཆེམས་སེ་ཆེམ། །འཇིགས་པའི་གླུ་ལེན་ཙེ་རེ་རེ། །གློག་དམར་ཞགས་པ་ཁྱུགས་སེ་ཁྱུག །ཚུར་བྱོན་ཚུར་བྱོན་གནས་འདིར་བྱོན། །ཕོ་བྲང་རབ་མཛེས་གཞལ་ཡས་འདིར། །གཟའ་བདུད་འཁོར་བཅས་གཤེགས་སུ་གསོལ། །ཧྲཱི་ཤག་རུ་རཾ། ནཱ་ག་ཙིཏྟ་ཏྲཾ། མ་མ་ཡོ་བྲ་གྷྲཾ། ཧ་ཧེ་ཡོ་གེ་ཤ་ལ་ཛ་ཛཿ

བཞུགས་སུ་གསོལ་བ་ནི། ཧཱུྃ། འཇིགས་བྱེད་ཆེན་པོ་གཟའ་མཆོག་རཱ་ཧུ་ལ། །སྲིང་བཞི་སྡེ་བརྒྱད་འཁོར་དང་བཅས་པ་རྣམས། །ཉི་ཟླ་པདྨ་ཞིང་ཆེན་གདན་སྟེང་དུ། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །ༀ་ཀེ་ཏ་ཀེ་ཏ་རཱ་ཧུ་ལ་ས་མ་ཡ་ཏིཥྛ་ལྷན། ཞེས་བཞུགས་པར་བསམ།

དང་པོ་ཕྱག་དང་མཆོད་པས་དགྱེས་པ་བསྐྱེད་པ་ནི། ཧཱུྃ། ཆེ་བའི་ཆེ་མཆོག་འཇིགས་བྱེད་རཱ་ཧུ་ལ། །མཐུ་དང་རྫུ་འཕྲུལ་ནམ་མཁའི་མཐའ་དང་མཉམ། །དྲེགས་པ་ཕོ་མོ་མིང་སྲིང་འཁོར་བཅས་ལ། །བསྟན་པ་བསྲུང་ཕྱིར་གུས་པས་ཕྱག་འཚལ་ལོ། །ༀ་ཀེ་ཏ་ཀེ་ཏ་རཱ་ཧུ་ལ་པྲ་ཏིཙྪ་ཧོ། ཕྱག་འཚལ་བའོ། །སྤོས་དང་མེ་ཏོག་སྣང་གསལ་ལ་སོགས་དང་། །ཛ་གད་ཕུད་དང་པཉྩ་ཨ་མྲ྇་ཏ། །ཕྱི་ནང་གསང་བའི་མཆོད་པ་རྒྱ་མཚོ་རྣམས། །དངོས་འབྱོར་ཏིང་འཛིན་དགོངས་ཀློང་དག་པས་མཆོད། །ༀ་མཧཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ།

དམ་བསྲེ་བ་ནི། བདུད་རྩི་འཐོར་ཞིང་། ཧཱུྃ། གཟའ་བདུད་འཁོར་དང་བཅས་པ་དང་། །རིག་འཛིན་རྣལ་འབྱོར་བདག་ཅག་གཉིས། །རྟག་ཏུ་མི་འབྲལ་འགྲོགས་པའི་ཕྱིར། །དམ་ཚིག་གཉན་པོ་གཅིག་ཏུ་བསྲེ། །འགོ་ཞིང་སྟོང་གྲོགས་མཛད་དུ་གསོལ། །ༀ་རཱ་ཧུ་ལ་སརྦ་པཉྩ་ཨ་མྲ྇་ཏ་ས་མ་ཡེ་ཧཱུྃ་ཧྲཱིཿཋཱ། བདག་ཀྱང་དམ་ལས་མི་འདའ་ན། །ཁྱེད་ཀྱང་དམ་ལས་མ་འདའ་ཞིག །གཉིས་ཀ་དམ་ལས་མི་འདའ་འཚལ། །དམ་ལས་གལ་ཏེ་འདས་པ་ན། །རྡོ་རྗེ་དམྱལ་བར་སྐྱེ་ཏ་རེ། །དེ་བས་དམ་ཚིག་གཉན་པོ་སྲུངས། །ༀ་རཱ་ཧུ་ལ་ས་མ་ཡ་ན་ར་ཀན།

དེ་ནས་ཚོགས་གཏོར་ༀ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་ནས་འབུལ་བ་ནི། ཧཱུྃ། ཕོ་བྲང་རབ་མཛེས་གཞལ་ཡས་འདིར། །འབྲུ་(༡༠)བཟང་སྣ་ཚོགས་བཤོས་བུ་བརྩིགས། །དར་ཟབ་མང་པོ་རྒྱན་དུ་བཏགས། །འབྲུ་བཅུད་མངར་གྱི་སྐྱེམས་སུ་འབུལ། །རྟ་དང་རྔ་མོང་བྱ་ཡི་ཚོགས། །གསེར་དངུལ་དར་ཟབ་གཡུ་ཡི་ཚོགས། །ཤ་ཆང་དཀར་དམར་མཆོད་པ་རྣམས། །གཟའ་བདུད་འཁོར་དང་བཅས་ལ་འབུལ། །གསོལ་ཞིག་རོལ་ཅིག་དགྱེས་པར་མཛོད། །བ་ལིང་རྒྱན་གྱི་མཆོད་པ་འབུལ། །དམ་རྫས་བདུད་རྩིའི་མཆོད་པ་འབུལ། །རཀྟ་དམར་གྱི་མཆོད་པ་འབུལ། །ཆུ་སྣ་སྟོང་གི་མཆོད་པ་འབུལ། །མེ་ཏོག་སྟོང་གི་མཆོད་པ་འབུལ། །གསུར་ཆེན་དུད་པའི་མཆོད་པ་འབུལ། །ཞུན་ཆེན་མར་མེའི་མཆོད་པ་འབུལ། །ཞལ་ཟས་ཚོགས་ཀྱི་མཆོད་པ་འབུལ། །རྐང་གླིང་རོལ་མོའི་མཆོད་པ་འབུལ། །གསོལ་ཞིག་རོལ་ཅིག་དགྱེས་པར་མཛོད། །ཤ་རུལ་ཁྲག་རུལ་ཉ་རུལ་དང་། །བཙོས་དང་རྗེན་ཤ་སྣ་ཚོགས་དང་། །ར་མཆིན་ལ་སོགས་ཤ་ཁྲག་ཚོགས། །དཀར་གསུམ་མངར་གསུམ་ཀླུ་སྨན་ག་བུར་དང་། །སྟག་དོམ་བ་གླང་ཉ་ཡི་སྙིང་། །ཤ་སྣ་སྙིང་སྣ་ཁྲག་སྣ་ཡིས། །གཟའ་བདུད་ཡབ་ཡུམ་འཁོར་བཅས་མཆོད། །གསོལ་ཞིག་རོལ་ཅིག་དགྱེས་པར་མཛོད། །ༀ་མཧཱ་པཱུ་ཛ་ལ་ཁཱ་ཧི།

དེ་ནས་སྐོང་བཤགས་བྱ་བ་ནི། ཧཱུྃ། ཕྱི་ནང་གསང་བའི་མཆོད་པ་དང་། །དམར་ཆེན་རྒྱན་གྱི་གཏོར་མ་དང་། །ཞལ་ཟས་ཚོགས་ཀྱི་མཆོད་པ་དང་། །ཤ་སྣ་སྙིང་སྣའི་མཆོད་པ་ཡིས། །གཟའ་མཆོག་ཆེན་པོའི་ཐུགས་དམ་བསྐང་། །བསྐང་བའི་དངོས་གྲུབ་བདག་ལ་སྩོལ། །འབྲུ་བཟང་ལྷ་བཤོས་ཤ་ཆེན་སྤོས། །ཚིལ་ཆེན་སྣང་གསལ་རོལ་མོའི་ཚོགས། །སྐུ་གླུད་སྤྱན་གཟིགས་མང་པོ་དང་། །དམ་རྫས་རྒྱན་གྱི་གཏོར་མ་ཡིས། །གཟའ་མཆོག་ཡབ་ཡུམ་ཐུགས་དམ་བསྐང་། །བསྐང་བའི་དངོས་གྲུབ་བདག་ལ་སྩོལ། །རཀྟ་དམར་གྱི་ཨརྒྷ་ཡིས། །ལྗོང་སྔོན་དྲག་པོའི༴། །ཤ་ཆེན་རི་རབ་བརྩེགས་པ་ཡིས། །བདུད་པོ་རོག་ཏིའི༴། །བསད་ཁྲག་རྦ་ཀློང་འཁྲུག་པ་ཡིས། །ཁྱབ་འཇུག་ཆེན་པོའི༴། །སྤོས་སྣ་སྣང་གསལ་རོལ་མོ་ཡིས། །དྲང་སྲོང་དཀར་སེར༴། །བམ་ཆེན་བཅད་འཕྲོ་ལྡན་པ་ཡིས། །བི་ཏྲི་པ་ཏྲེའི༴། །ཏི་ར་ཞིང་ཆེན་སྤུངས་པ་ཡིས། །ཧ་ལིང་ཀ་ལིའི་ཐུགས་དམ་བསྐང་། །དམར་དང་གསུར་ཆེན་དུད་པ་ཡིས། །དུ་བ་མཇུག་རིང་༴། །སྤྱན་གཟིགས་ཚོགས་ཀྱི་འཁོར་ལོ་ཡིས། །སྒྲ་གཅན་ཟིན་གྱི་ཐུགས༴། །ཤ་ཁྲག་དམར་ཆེན་གཏོར་མ་ཡིས། །སྲིང་མོ་བཞི་ཡི༴། །གདུགས་དང་རྒྱལ་མཚན་རོལ་མོ་ཡིས། །གཟའ་ཆེན་བརྒྱད་ཀྱི༴། །གཡོས་དང་ཁ་ཟས་སྣ་ཚོགས་ཀྱིས། །རྒྱུ་སྐར་ཉེར་བརྒྱད༴། །ཤ་སྣ་སྙིང་སྣ་འབུམ་ཕྲག་གིས། །ལྷ་སྲིན་སྡེ་བརྒྱད༴། །བསྐང་ངོ་བསྐང་ངོ་གཟའ་ཆེན་རྣམས། །ཐུགས་དམ་གཉན་པོ་སྐོང་བར་མཛོད། །ཆོས་སྐྱོང་གཟའ་བདུད་འཁོར་བཅས་ལ། །རིག་འཛིན་རྣལ་འབྱོར་བདག་ཅག་གིས། །དགའ་དང་གུས་པའི་ཕྱག་ཅིག་འཚལ། །མོས་དང་དད་པའི་(༡༡)མཆོད་པ་འབུལ། །རྣལ་འབྱོར་ཉམས་ཆག་སྐོར་བར་མཛོད། །ཅེས་བསྐངས་ལ།

བཤགས་པ་ནི། ཧཱུྃ། ཆོས་རྣམས་རྣམ་དག་ནམམཁའ་ལྟ་བུ་ལ། །མ་རིག་དབང་གིས་ང་དང་བདག་ཏུ་བཟུང་། །འདོད་ཆགས་ཞེ་སྡང་གཏི་མུག་དབང་གྱུར་པའི། །འགལ་འཁྲུལ་ཉམས་ཆག་ཐམས་ཅད་མཐོལ་ལོ་བཤགས། །སྲུང་མ་ཁྱོད་བསྟེན་བསྒྲུབ་པར་དམ་མནོས་ཀྱང་། །བསྙེན་སྒྲུབ་མ་ཚང་ཚོགས་མཆོད་ཆུང་བ་དང་། །བཟླས་གྲངས་ཉུང་ཞིང་སྦྱོར་སྒྲོལ་ལོག་པ་དང་། །ཐུན་ཟོར་མ་བཅོལ་ལེ་ལོའི་རྐྱེན་དབང་གིས། །སྐུ་གསུང་ཐུགས་དང་འགལ་བར་གྱུར་ཏོ་འཚལ། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །ཚངས་པ་དོན་གྱི་དངོས་གྲུབ་སྩལ་དུ་གསོལ། །ཞེས་པས་བཤགས་ལ་ཡི་གེ་བརྒྱ་པ་བརྗོད།

དེ་ནས་བསྟོད་པ་ནི། ཧཱུྃ། སྲིན་པོའི་གཟུགས་ཀྱི་གདུག་པ་ཅན། །ཚར་གཅོད་བྱང་ཆུབ་སེམས་དཔའ་སྟེ། །མཚན་གསོལ་གཟའ་མཆོག་རཱ་ཧུ་ལ། །དམ་ཚིག་ཅན་ལ་བདག་བསྟོད་དོ། །ཧཱུྃ། རིག་འཛིན་སྲོག་ཤིང་གཏེར་གྱི་བདག །གཙུག་ལག་བསྟན་སྲུང་མཐུ་བོ་ཆེ། །རྣལ་འབྱོར་དགྲ་ལྷ་ཐུགས་དམ་ཅན། །དམ་ཉམས་སྲོག་གཅོད་གཙོ་ལ་བསྟོད། །ཧྲཱིཿ ཁྱབ་འཇུག་ཆེན་པོ་སྒྲ་གཅན་འཛིན། །འཇིགས་པའི་ལུས་ལ་འབར་བའི་ཀློང་། །ཞལ་དགུ་ཕྱག་བཞི་རྔམས་པ་སྟེ། །འཇིག་རྟེན་ཁམས་ཀྱི་དྲག་རྩལ་ཅན། །གནམ་ལྕགས་ཐོག་གི་བདག་པོ་སྟེ། །སྐྱིན་ཐང་སེར་བ་འབེབས་པའི་གཙོ། །སྤྲུལ་པ་ཆེན་པོ་རྫུ་འཕྲུལ་ཅན། །མཐུ་སྟོབས་ཆེན་པོ་ཡོངས་ཀྱི་བདག །རི་རབ་སྟེང་ན་ལྷ་ཡི་གཙོ། །རྒྱ་མཚོའི་གཏིང་ན་ཀླུ་ཡི་བདག །བར་སྣང་ཁམས་སུ་སྡེ་བརྒྱད་གཙོ། །དབུ་དགུ་སྲིད་པ་གསུམ་གྱི་བདག །མགོ་གཅིག་ལྷ་མིན་ཁྲོ་བོའི་ཞལ། །ཉི་མ་ཟླ་བ་གྲིབ་མས་གནོན། །གཅིག་ནི་བཞད་ཅིང་མཛེས་པའི་ཞལ། །དགེས་པས་བཀའ་ཡི་བྱ་ར་མཛད། །གཅིག་ནི་ཁྲོས་པ་སྲིན་པོའི་གདོང་། །གདུག་པའི་དགྲ་བགེགས་ཟས་སུ་ཟ། །གཅིག་ནི་རྔམས་པའི་ཟ་བྱེད་གདོང་། །གནམ་ལྕགས་མེ་ཡི་ཐོག་ཆེན་འབེབས། །གཅིག་ནི་འཇིགས་བྱེད་མ་རུངས་པ། །ཚ་གྲང་འཐབ་པའི་རྐན་སྒྲ་སྒྲོགས། །གཅིག་ནི་འཁྲུག་བྱེད་དྲག་པོའི་ཞལ། །གཡོ་འགུལ་ཆེན་པོའི་སེར་ཆེན་འབེབས། །གཅིག་ནི་གཏུམ་ཆེན་ཡེ་ཤེས་ཞལ། །མངོན་ཤེས་རྫུ་འཕྲུལ་ཐོགས་པ་མེད། །གཅིག་ནི་སྟོབས་ཆེན་རྫུ་འཕྲུལ་ཞལ། །སངས་རྒྱས་བསྟན་པ་སྲུང་བར་བྱེད། །གཅིག་ནི་ཞི་བ་ལྷ་ཡི་ཞལ། །སྒྲུབ་པ་པོ་ལ་དངོས་གྲུབ་སྟེར། །སྟེང་གི་ཕྱོགས་ན་བྱ་རོག་ཞལ། །དཀོན་མཆོག་དབུ་འཕང་བསྟོད་པར་བྱེད། །གློག་འདྲ་རལ་གྲི་ཞགས་པ་ཡིས། །སྡང་བྱེད་དགྲ་བོའི་སྐྱེ་རྒྱུད་གཅོད། །ཆུ་སྲིན་ཞགས་པ་དབྱུག་པ་ཡིས། །སྲིད་པ་གསུམ་ཡང་དབང་དུ་སྡུད། །ར་ཡི་མདའ་གཞུ་བསྣམས་པ་ཡིས། །དམིགས་པའི་དགྲ་བགེགས་རྩད་ནས་(༡༢)གཅོད། །སྤྱན་སྟོང་མེ་དཔུང་སྡང་མིག་གིས། །དགྲ་དང་བགེགས་ལ་འབྲུ་ཚུགས་ལྟ། །སྐུ་སྨད་ས་ལ་བརྡབ་པ་ཡིས། །འཇིག་རྟེན་གཡོ་འགུལ་ལྡེག་པར་བྱེད། །ཞལ་ནས་ཧཱུྃ་དང་ཕཊ་སྒྲོགས་པས། །དྲེགས་པ་ཕོ་མོ་དབང་དུ་སྡུད། །སྐུ་མདོག་དུད་ཁ་འཇིགས་པ་ཡིས། །ཁམས་གསུམ་སྐྱེ་འགྲོ་ཟིལ་གྱིས་གནོན། །སྤྲུལ་པའི་གཟའ་བདུད་ནག་པོ་ཁྱོད། །འཇིག་རྟེན་ཁམས་ན་འགྲན་ཟླ་བྲལ། །བདུད་དང་དྲེགས་པ་བྲན་དུ་འཁོལ། །ལས་སུ་སངས་རྒྱས་བསྟན་པ་བསྲུང་། །དམ་ལྡན་རྣལ་འབྱོར་སྐྱོང་མཛད་པ། །མཐུ་སྟོབས་ཅན་ལ་ཕྱག་འཚལ་ལོ། །ཧཱུྃ། ཁྱོད་ཀྱི་བཀའ་ཉན་གདོང་མོ་བཞི། །རྫུ་འཕྲུལ་རི་རབ་ཐལ་བར་བརླག །ནད་དང་མཚོན་གྱི་བདག་མོ་སྟེ། །མཐུ་སྟོབས་ཅན་ལ་ཕྱག་འཚལ་ལོ། །

ཧཱུྃ། མི་བཟད་དྲག་གཏུམ་རྔམས་པའི་ཚོགས། །གཟའ་བརྒྱད་ལྷ་སྲིན་སྡེ་བརྒྱད་དང་། །རྒྱུ་སྐར་ཉི་ཤུ་བརྒྱད་ལ་སོགས། །ཕོ་ཉ་ཡང་སྤྲུལ་ཚོགས་ལ་བསྟོད། །

དེ་ནས་མངའ་གསོལ་བ་ནི། སྤོས་དང་ཚིལ་ཆེན་གྱི་དུད་པ་བཏང་ཞིང་། ཕུད་དང་རཀྟ་སྦྲེང་། རོལ་མོ་བསྒྲག །མེ་ཏོག་འཐོར་ཞིང་། ཧོཿ དམ་ཅན་གཟའ་ཡི་དགེ་བསྙེན་ཆེན་པོ་སྐུ་མདོག་དུད་ཁ་འཇིགས་པའི་མིག་གིས་གང་བ། དབུ་དགུ་རྔམས་པའི་ང་རོས་འགེངས་པ། ཐོད་སྦྲུལ་ཉི་ཟླའི་ཕྲེང་བས་བརྗིད་པ། ཞལ་གདངས་དུག་གི་མཆེ་བ་གཙིགས་པ། དབུ་སྐྲ་དང་སྨ་ར་དམར་སེར་འབར་བ། ཞལ་ནས་གདུག་པའི་ངན་སྔགས་སྒྲོགས་པ། ཕྱག་བཞི་གཡས་དང་གཡོན་གྱི་དང་པོ་ཆུ་སྲིན་རྒྱལ་མཚན་དང་རལ་གྲི་འབར་བ། འོག་མ་གཉིས་སྦྲུལ་ཞགས་དང་མདའ་གཞུ་འགེངས་པ། སྐུ་སྨད་དུག་སྦྲུལ་རབ་ཏུ་འཁྱིལ་པ། ཐོག་དང་སེར་ཆེན་རབ་ཏུ་འབེབས་པ་ལ་འབུལ་ལོ། །གསོལ་ལོ། །མཆོད་དོ། །སྡང་བའི་དགྲ་སོད་ཅིག །གནོད་པའི་བགེགས་ཐུལ་ཞིག །རྐྱེན་ངན་དང་བར་དུ་གཅོད་པ་ཐམས་ཅད་ཟློག་ཅིག །ཚེ་དང་དཔལ་འབྱོར་སྤེལ་ཞིག །བཀའ་དང་བསྟན་པ་སྲུངས་ཤིག །འཁོར་དང་གང་ཟག་སྐྱོངས་ཤིག །བཅོལ་བའི་ལས་མཛོད་ཅིག །གྲུབ་པའི་རྟགས་ཕྱུངས་ཤིག །ཕྲིན་ལས་གཉན་པོ་མཛོད་ཅིག །

གཞན་ཡང་གཟའ་མཆོག་ཐུགས་ཀྱི་དགྱེས་སྡེ་ཆེན་མོ་གདོང་མོ་མཆེད་བཞི་ནི། ཤར་ནས་སྟག་སྲིན་ཟོར་བའི་གདོང་ཅན་སྐུ་མདོག་དཀར་སེར་ལ་སྟག་དང་སྦྲུལ་གྱི་ཆུན་པོས་བརྒྱན་པ། ཕྱག་ན་ལྕགས་ཀྱུ་དང་ཞགས་པ་བསྣམས་པ་ལ་གསོལ་ལོ། །འབུལ་ལོ། །ལྷོ་ན་བམ་སྲིན་དྲེད་མོའི་གདོང་ཅན་སྐུ་མདོག་སེར་ནག་མི་ལྤགས་ཀྱི་གཡང་གཞི་གསོལ་བ། ཕྱག་ན་དབྱུག་ཏོ་དང་སྦྲུལ་ཞགས་བསྣམས་པ་ལ་གསོལ་ལོ། །འབུལ་ལོ། །ནུབ་ན་ཀོང་སྲིན་བ་ལང་གི་གདོང་ཅན་སྐུ་མདོག་དམར་ནག་ལ་སྟག་གཟིག་གི་གཟེར་ཁ་གསོལ་བ། ཕྱག་ན་དགྲ་སྟྭ་དང་ཞགས་པ་བསྣམས་པ་ལ་གསོལ་ལོ། །འབུལ་ལོ། །བྱང་ན་འབྲོག་སྲིན་ཆུ་སྲིན་གྱི་གདོང་ཅན་སྐུ་མདོག་ལྗང་ནག་(༡༣)ལ་མི་ལྤགས་ཀྱི་གཡང་གཞི་གསོལ་བ། ཕྱག་ན་གཏུན་ཤིང་དང་ཞགས་པ་བསྣམས་པ་ལ་གསོལ་ལོ། །འབུལ་ལོ། །མཆོད་དོ། །སྡང་བའི་དགྲ་སོད་ཅིག །ཅེས་སོགས་བརྗོད་དོ། །

གཞན་ཡང་གཟའ་མཆོག་བཀའི་ཕོ་ཉ་ཆེན་པོ། ཉི་མ་དང་ཟླ་བ་ལ་སོགས་ཏེ་གཟའ་ཆེན་པོ་བརྒྱད། བདུད་དང་གཤིན་རྗེ་ལ་སོགས་ཏེ་ལྷ་མ་སྲིན་སྡེ་བརྒྱད། ཚངས་པ་དང་བརྒྱ་བྱིན་ལ་སོགས་ཏེ་ལྷ་ཆེན་པོ་བརྒྱད། དགའ་བོ་དང་འཇོག་པོ་ལ་སོགས་ཏེ་ཀླུ་ཆེན་པོ་བརྒྱད། བརྒྱ་བྱིན་དང་མེ་ལྷ་ལ་སོགས་ཏེ་ཕྱོགས་སྐྱོང་བཅུ་དང་། སྨིན་དྲུག་དང་སྣར་མ་ལ་སོགས་རྒྱུ་སྐར་ཉེར་བརྒྱད་དང་། མཁའ་ལ་འགྲོ་བ་དང་ཤུགས་ཀྱིས་འགྲོ་བ་དང་། སྨྱོ་བྱེད་དང་སྲུལ་པོ་ལ་སོགས་པ་འཇིག་རྟེན་པའི་ཚོགས་དང་བཅས་པ་ཐམས་ཅད་ལ། རཀྟ་དམར་གྱིས་མཆོད་པ། ཛ་གད་ཕུད་ཀྱི་མཆོད་པ། བདུད་རྩི་སྨན་གྱི་མཆོད་པ། ཤ་ཆེན་གསུར་གྱི་དུད་པ། ཞལ་ཟས་ཚོགས་ཀྱི་མཆོད་པ། རྐང་གླིང་རོལ་མོའི་བྱེ་བྲག །སྤྱན་གཟིགས་དང་སྐུ་གླུད་བསམ་གྱིས་མི་ཁྱབ་པ་འབུལ་ལོ། །གསོལ་ལོ། །མཆོད་དོ། །སྡང་བའི་དགྲ་སོད་ཅིག །ཅེས་སོགས་ནས་ཕྲིན་ལས་གཉན་པོ་མཛོད་ཅིག །ཅེས་པའི་བར་བརྗོད་དོ། །

དེ་ནས་ཕྲིན་ལས་བཅོལ་བ་ནི། ཧཱུྃ་ཧྲཱིཿ བདག་ནི་རིག་འཛིན་སྒྲུབ་པ་པོ། །བདག་ནི་རྣལ་འབྱོར་དམ་ཚིག་ཅན། །དམ་ལ་གནས་ཤིང་ལྷ་ལ་ཕྲེང་། །ཁྱོད་ནི་སྲུང་མ་དམ་ཚིག་ཅན། ཁྱོད་ནི་མཐུ་སྟོབས་རྫུ་འཕྲུལ་ཅན། །དགོངས་དང་གཟའ་མཆོག་རཱ་ཧུ་ལ། །སངས་རྒྱས་རིན་ཆེན་སྙིང་པོ་དང་། །བཅོམ་ལྡན་ཤཱཀྱ་ཐུབ་པ་དང་། །རྡོ་རྗེ་འཆང་གི་སྤྱན་སྔ་རུ། །ཁྱོད་ཀྱིས་ཁས་བླངས་དམ་བཅས་པ། །ཐ་ཚིག་གཉན་པོ་འདི་མིན་ནམ། །རིན་ཆེན་སྙིང་པོས་བཀའ་བསྒོས་པ། །བྲམ་ཟེའི་ཁྱེའུ་ཁྱབ་འཇུག་སྤྲིན། །བསྟན་པ་སྲུང་བར་དམ་ཆོས་ཤིག །དམ་ཉམས་སྒྲོལ་བར་དམ་ཆོས་ཤིག །དེ་ཚེ་ཐ་ཚིག་དེ་མིན་ནམ། །ཤཱཀྱ་ཐུབ་པས་བཀའ་བསྒོས་པ། །མ་འོངས་བསྐལ་པའི་ཐ་མ་ལ། །བླ་མ་ལ་གནོད་སྔགས་ལ་སྡང་། །ཁྱད་པར་དབེན་གནས་གཉན་པོ་འཇིག །ཉམས་པ་དེ་ཡི་སྲོག་རྩ་ཆོད། །དེ་ཚེ་ཐ་ཚིག་དེ་མིན་ནམ། །རྡོ་རྗེ་འཆང་གི་སྤྱན་སྔ་རུ། །སངས་རྒྱས་བསྟན་པ་བསྲུང་ངོ་ཞེས། །དམ་ལྡན་རྣལ་འབྱོར་སྐྱོང་ངོ་ཞེས། །དགྲ་བོའི་སྲོག་རྩ་གཅོད་དོ་ཞེས། །ཁྱོད་ཀྱི་ཁས་བླངས་དེ་མིན་ནམ། །ཁྱོད་ཀྱི་དམ་བཅའ་གཉན་པོ་དེ། །ད་ལྟ་རྣལ་འབྱོར་བདག་བསྐུལ་ལོ། །ཁས་བླངས་བཞིན་དུ་ཕྲིན་ལས་མཛོད། །ཧཱུྃ། གཟའ་བདུད་འཁོར་བཅས་ཚུར་ཉོན་ཅིག །རྒྱལ་བའི་བཀའ་ལ་མི་ཉན་མེད། །ཟབ་མོའི་དོན་ལ་མི་སེམས་མེད། །མནའ་དང་ཁྲིམས་ལ་མི་གནས་མེད། །ཟས་དང་སྐོམ་ལ་མི་ཆགས་མེད། །དོ་ནུབ་ཁྱོད་ཀྱི་ཐུགས་དམ་བསྐང་། །ཉམས་ཆག་སྐོང་ཞིང་ཞིག་རལ་གསོ། །ལྷ་ལ་བཤགས་བགྱིད་སེམས་འཁོན་སྦྱང་། །ཕུད་འདྲེན་ཟླ་བོའི་གཞུང་གཅིག་བྱེད། །དོ་ནུབ་བྱམས་(༡༤)པའི་མནའ་གཅིག་འདོན། །དོ་ནུབ་སྔ་མའི་གཏང་རག་གཏོང་། །དོ་ནུབ་ཕྱི་མའི་ཞུ་བ་འབུལ། །དང་པོ་ཕུད་ཀྱིས་མི་མཆོད་དུ། །གཟའ་བདུད་འཁོར་བཅས་ཕུད་ལ་དགྱེས། །བར་དུ་ཚོགས་ཀྱིས་མི་བསྐང་དུ། །འཇིགས་བྱེད་ཆེན་པོ་ཚོགས་ལ་དགྱེས། །ཐ་མ་ལྷག་མས་མི་མཆོད་དུ། །སྲིང་བཞི་སྡེ་བརྒྱད་ལྷག་ལ་དགྱེས། །ལྷག་མ་ཁ་ཆུས་མི་བྲན་དུ། །འཁུ་ལྡོག་དམ་ལས་འདས་ཀྱི་དོགས། །རྣམ་གསུམ་གཅིག་ཏུ་མི་བསྲེ་རུ། །སྐུ་གསུང་ཐུགས་དང་མི་འབྲེལ་མེད། །ཕུད་ལ་དགྱེས་པ་ཕུད་ལ་རོལ། །ཚོགས་ལ་དགྱེས་པ་ཚོགས་ལ་རོལ། །ལྷག་ལ་དགྱེས་པ་ལྷག་ལ་རོལ། །བ་ལིཾ་གཏོར་མ་འདི་བཞེས་ལ། །རྣལ་འབྱོར་བདག་གི་ཕྲིན་ལས་མཛོད། །བསམ་པ་སྒྲུབས་ལ་རེ་བ་སྐོངས། །ཧཱུྃ་ཧྲཱིཿགཟའ་བདུད་ཆེན་པོ་ཚུར་གསོན་ཅིག །གྲོགས་ལ་གཞུང་ངན་མི་སྲིད་ཀྱིས། །རྗེ་ལ་བློན་མེད་མི་སྲིད་ཀྱིས། །བྱམས་ལ་དྲིན་མེད་མི་སྲིད་ཀྱིས། །མཛའ་ལ་གདུང་མེད་མི་སྲིད་ཀྱིས། །ཆོས་སྐྱོང་མཐུ་མེད་མི་སྲིད་ཀྱིས། །ཆད་དོན་མི་སྒྲུབ་མི་སྲིད་ཀྱིས། །ཚོགས་ཀྱི་གཏོར་མ་འདི་བཞེས་ལ། །རྣལ་འབྱོར་བདག་གི་ཕྲིན་ལས་མཛོད། །ཟས་ཀྱི་ངོ་གཅིག་ཁྱོད་ཀྱིས་བགྱིས། །ཆད་པའི་གཞུང་གཅིག་བདག་གིས་བསྲང་། །བདག་གི་ཚིག་འདི་ཁྱོད་ཀྱིས་ཉོན། །སྒྲུབ་པའི་གཞུང་ནི་ང་ཡིས་བསྲང་། །བཅོལ་བའི་ཕྲིན་ལས་ཁྱོད་ཀྱིས་མཛོད། །གཉིས་ཀ་ལས་ཀྱི་གཞུང་བསྲང་འཚལ། །གཉིས་ཀ་ལས་ཀྱི་གཉེར་བླང་འཚལ། །སྨྲས་སོ་ཆད་དོ་ཐུགས་དམ་ཅན། །བདག་ཅག་འཁོར་དང་བཅས་པ་ཡི། །ཕུར་ཁ་ཟློག་པའི་དུས་ལ་བབས། །ཟོར་ཁ༴། །བྱད་ཁ༴། །མི་ཁ༴། །དལ་ཁ༴། །ནད་ཁ༴། །རིམས་ཁ༴། །ཡམས་ཁ༴། །གདོན་ཁ༴། །ཁྲམ་ཁ༴། །ཤྭོ་ཁ༴། །བཟློག་ཅིང་བསྒྱུར་བའི་ཕྲིན་ལས་མཛོད། །གསོལ་ལོ་མཆོད་དོ་སྲུང་མའི་ཚོགས། །སོད་ཅིག་ཐུལ་ཞིག་དགྲ་དང་བགེགས། །གཏད་དོ་གཉེར་རོ་ཐུགས་དམ་ཅན། །བསྐལ་པ་ཞིག་ཀྱང་མི་འབྲལ་ལོ། །ཐུགས་དམ་གཡེལ་བར་མ་མཛད་ཅིག །ཐུགས་དང་གློ་བ་ཅི་ཉེར་མཛོད། །བརྩེ་གདུང་གདུང་སེམས་ཅི་ཆེར་མཛོད། །མཐུ་སྟོབས་རྫུ་འཕྲུལ་ཇི་ལྟ་བར། །རྣལ་འབྱོར་བདག་གི་ཕྲིན་ལས་མཛོད། །འཁོར་སྲུངས་རྐྱེན་ཟློག་བར་ཆད་སོལ། །ལེ་ལོ་སྙོམ་ལས་མ་མཛད་ཅིག །བཀའ་དང་དམ་ལས་མ་འདའ་ཞིག །རྫུན་དང་གཡོ་སྒྱུ་མ་མཛད་ཅིག །རྣལ་འབྱོར་བདག་གི་རེ་བ་སྐོངས། །ཚེ་སྲིང་དཔལ་སྐྱེད་འབྱོར་པ་སྤེལ། །སྙན་པ་སྒྲུབས་ལ་གྲགས་པ་སྒྲོགས། །འཇིག་རྟེན་གསུམ་པོ་དབང་དུ་སྡུས། །དགེ་དང་ཞི་བའི་ལས་འགྲུབ་དང་། །རྒྱས་དང་དབང་གིས་ཐམས་ཅད་གནོན། །མངོན་སྤྱོད་དྲག་པོའི་ལས་མཛོད་ཅིག །ཕྲིན་ལས་རྣམ་བཞི་འགྲུབ་པར་མཛོད། །ལེགས་པ་ཐམས་ཅད་སྒྲུབ་པ་དང་། །ཉེས་པ་ཐམས་ཅད་འགེགས་པ་དང་། །(༡༥)བསམ་པ་ཐམས་ཅད་འགྲུབ་པ་དང་། །རེ་བ་ཐམས་ཅད་བསྐང་བ་དང་། །བཀྲ་ཤིས་ཕུན་སུམ་ཚོགས་པར་མཛོད། །ཅེས་བརྗོད་དོ། །

རྒྱུན་གྱི་སྐོང་གསོལ། དེ་ནས་གཏོར་མ་བཏང་ལ་བཀྲ་ཤིས་བརྗོད། གལ་ཏེ་མངོན་སྤྱོད་འབའ་ཞིག་བསྒྲུབ་ན། ཉ་བོ་བསྒྲལ་ནས་གཏོར་མ་བསྟབ་པ་ནི། གྲིའམ་ཕུར་པ་བསྒྲིལ་ཞིང་། རང་ཉིད་དྲག་པོའི་ང་རྒྱལ་གྱིས་འདི་སྐད་དོ། །

ཧཱུྃ། ང་ནི་དཔལ་ཆེན་ཧེ་རུ་ཀ །དམ་ཉམས་སྒྲོལ་བའི་གིང་ཆེན་ཏེ། །སྡང་བྱེད་གདུག་པའི་དགྲ་བོ་འདི། །ལུས་སྲོག་དབུགས་དང་ཕྲལ་བར་བྱ། །ༀ་ཨཱཿཧཱུྃ། ཧཱུྃ་ཆེ་གེ་མོའི་སྙིང་དང་སྲོག་ལ་ཡཾ་ཡཾ། རྦད་རྦད། ཧཱུྃ། ཡང་སྤྲུལ་ཆེན་པོའི་དུས་ལ་བབས། །གཟའ་མཆོག་ཆེན་པོའི་དུས་ལ་བབས། །རཱ་ཧུ་ལ་ཡི་དུས༴། །གསོད་བྱེད་ཆེན་པོའི༴། །སྒྲོལ་གིང་ཆེན་པོའི༴། །ལས་མཁན༴། །མགོ་ལུས་ཕྲོལ་ལ་དབང་པོ་སྣུབས། །དུས་མཐའ་བསྡུས་ལ་བླ་ཚེ་ཕྲོགས། །སྙིང་རྩ་ཆོད་ལ་སྲོག་རྩ་གཏུབས། །སྲིང་མོ་བཞི་ཡི་དུས༴། །གཟའ་ཆེན་བརྒྱད་ཀྱི༴། །རྒྱུ་སྐར་ཉེར་བརྒྱད༴། །ལྷ་སྲིན་སྡེ་བརྒྱད༴། །དམ་ཉམས་བསྒྲལ་བའི་དུས་ལ་བབས། །ཨ་རྣྲ་མཱ་ར་ཡ་སྲོག་ལ་ཡཾ་ཡཾ། དམ་ཉམ་དགྲ་བོ་ཆེ་གེ་མོའི། །དབང་པོ་རྣམ་ལྔ་ཞལ་དུ་བསྟབ། །དོན་སྙིང་རྣམ་ལྔ་ཞལ༴། །ཡན་ལག་རྣམ་ལྔ༴། །བླ་ཚེ་སྲོག་གསུམ༴། །ཀླད་རུས་རྐང་མར༴། །

ཤ་ཁྲག་ཚིལ་ཆེན༴། །གསོལ་ཞིག་རོལ་ཅིག་ཁ་རཾ་ཁཱ་ཧི། །དམ་ཉམས་དགྲ་བོའི་ཤ་ཁྲག་འདི། །ཡཀྴ་ཛྭ་ལའི་ཞལ་དུ་བསྟབས། །རྡོ་རྗེ་གློག་འགྱུའི་ཞལ༴། །སྲས་མཆོག་གཟའ་བདུད༴། །གསོལ་ཞིག་རོལ་ཅིག །ཁ་རཾ་ཁཱ་ཧི། །དམ་ཉམས་དགྲ་བོའི་བླ་སྲོག་འདི། །ཕུང་བྱེད་གཟའ་བདུད་ཞལ༴། །གསོལ༴། །དམ་ཉམས་དགྲ་བོའི་དོན་སྙིང་འདི། །དྲང་སྲོང་མཐུ་ཆེན་ཞལ༴། །གསོལ༴། །དམ་ཉམས་དགྲ་བོའི་ཀླད་རུས་འདི། །བདུད་པོ་རོག་ཏིའི༴། །གསོལ༴། །དམ་ཉམས་དགྲ་བོའི་ནང་ཁྲོལ་འདི། །པི་ཏྲི་པ་ཏྲའི་ཞལ༴། །གསོལ༴། །དམ་ཉམས་དགྲ་བོའི་གློ་སྙིང་འདི། །བི་ནུ་རཱ་ཛའི༴། །གསོལ༴། །དམ་ཉམས་དགྲ་བོའི་སྲོག་དབུགས་འདི། །དུ་བ་མཇུག་རིང་༴། །གསོལ༴། །དམ་ཉམས་དགྲ་བོ་དབང་པོ་ལྔ། །སྟག་སྲིན་ཟོར་གདོང་༴། །གསོལ༴། །དམ་ཉམས་དགྲ་བོའི་སྐྱེ་མཆེད་དྲུག །བམ་སྲིན་དྲེད་གདོང་༴། །གསོལ༴། །

དམ་ཉམས་དགྲ་བོའི་ཕུང་པོ་ལྔ། །ཀོང་སྲིན་བ་ལང་ཞལ༴། །གསོལ༴། །དམ་ཉམས་དགྲ་བོའི་མདངས་དང་བཀྲག །འབྲོག་སྲིན་ཆུ་སྲིན་ཞལ༴། །གསོལ༴། །དམ་ཉམས་དགྲ་བོའི་རྣམ་ཤེས་བརྒྱད། །སྤྲུལ་པའི་གཟའ་བརྒྱད་ཞལ༴། །གསོལ༴། །དམ་ཉམས་དགྲ་བོའི་དྲོད་དང་དབུགས། །ལྷ་ཆེན་བརྒྱད་ཀྱི་ཞལ༴། །གསོལ༴། །དམ་ཉམས་དགྲ་བོའི་མི་ནོར་ཟས། །རྒྱུ་སྐར་ཉེར་བརྒྱད་ཞལ༴། །གསོལ༴། །དམ་ཉམས་དགྲ་བོ་འཁོར་བཅས་རྣམས། །གཟའ་མཆོག་འཁོར་བཅས་ཞལ༴། །གསོལ༴། །ཕུང་ཞིང་བརླག་པའི་ཕྲིན་ལས་མཛོད། །(༡༦)མིང་གི་ལྷག་མ་མེད་པར་མཛོད། །དུས་ལ་བབ་བོ་རཱ་ཧུ་ལ། །ཧྲི་ཤག་རུ་རཾ་ནཱ་གེ་ཙིཏྟ་ཏྲཾ། །མ་མ་ཡོ་ཟ་འགྲམ་ཧ་ཧེ་ཡོ་གེ་ཤ་ལ་ཛཿ ཧུར་ཐུཾ་རྦད་སོད། མཱ་ར་ཡ་ཤཱ་ཏྲཱུན་ཕཊ། ཅེས་གཏོར་མ་ལ་བསྟབ་བོ། །

དེ་ནས་རིགས་ཀྱི་དེད་དཔོན་རྣམས་དགྲ་ལ་རྦད་པ་ནི། གཏོར་མ་དགྲ་ཕྱོགས་སུ་བཏེགས་ལ་ཤིན་ཏུ་ཁྲོས་པས་འདི་སྐད་དོ། །ཧཱུྃ། གཟའ་བདུད་ཆེན་པོ་མཐུ་རྩལ་ཅན། །ཁྱོད་ཀྱི་ཐུགས་དམ་དུས་ལ་བབས། །བདག་ལ་བསྡོ་བའི་དགྲ་བོ་འདིས། །བླ་མ་དམ་པའི་སྐུ་ལ་བསྡོས། །སངས་རྒྱས་བསྟན་པ་འདི་ཡིས་བཤིག །དབེན་གནས་གཉན་པོའི་དཀོར་ལ་ཟོས། །སྲུང་མ་གཉན་པོ་ཁྱད་དུ་བསད། །ཁྱོད་ལ་མཐུ་སྟོབས་མེད་ཅེས་སྒྲོགས། །རྣལ་འབྱོར་བདག་ལ་ཕོད་དུ་བཙུགས། །བྱང་ཆུབ་སྒྲུབ་ཏུ་མ་སྟེར་རོ། །བས་གཟའ་བདུད་རཱ་ཧུ་ལ། །ཁྱོད་ལ་མཐུ་སྟོབས་ཡོད་དམ་མེད། །ཡོད་ན་ད་ལྟ་དུས་ལ་བབས། །སྐད་ཅིག་ཉིད་ལ་སྙིང་ཁྲག་སྐྱུགས། །འགྱུ་བའི་དབུགས་ཆོད་ཚེ་སྲོག་ཕྲོལ། །གློ་བུར་ཡེ་འདྲོག་ཆེན་མོ་ཐོང་། །མེད་ན་བསྒྲུབ་པ་དོན་རེ་ཆུང་། །བརྟེན་ཅིང་མཆོད་པ་འབྲས་རེ་མེད། །དམ་ཚིག་གཉན་པོའི་ཆད་པ་འོང་། །དེ་བས་གཟའ་བདུད་རཱ་ཧུ་ལ། །ཁྱོད་ཀྱི་མངོན་སྤྱོད་དུས་ལ་བབས། །སྡང་བའི་དགྲ་བོ་དམ་ཉམས་འདི། །ཕ་ཁུ་ཡིན་ཀྱང་ཁྱོད་ཀྱིས་སྒྲོལ། །དོ་ནུབ་ནམ་གྱི་གུང་སྨད་ལ། །དམ་ཉམས་དགྲ་བོ་མ་བསྒྲལ་ན། །ཁྱོད་ཀྱི་མཐུ་སྟོབས་བརྫུན་དུ་ཆེ། །བརྟེན་ཅིང་བསྒྲུབ་པ་དོན་རེ་ཆུང་། །བསྟེན་ཀྱང་རྒྱབ་བརྟེན་མི་ཡོང་ན། །ཁྱོད་ལས་ངན་པ་སུ་ཞིག་ཡོད། །ད་ལྟ་དགྲ་བོ་མ་བསྒྲལ་ན། །ཁྱོད་ཀྱི་གནས་འདི་འཕྲོག་གོ་ཟེར། །རྟེན་དང་ཕོ་བྲང་འཇིག་གི་ཟེར། །བདག་ཅག་དམངས་སུ་འབེབས་སོ་ཟེར། །དེ་བས་བསྒྲལ་བའི་དུས་ལ་བབས། །ཧཱུྃ། གཟའ་བདུད་ཆེན་པོ་རཱ་ཧུ་ལ། །རི་རབ་རྩེ་ནས་བསྭོ་ཡིས་ཐོབ། །ལྷ་དམག་མང་པོའི་དམག་ཡར་བསྡུས། །དགྲ་བོའི་ཡུལ་དུ་དམག་སྣ་དྲོངས། །ཁྱབ་འཇུག་ཆེན་པོས་དམག་དཔོན་མཛོད། །གློ་བུར་གྲི་རྒོད་ཁྲག་ཏུ་སྐྱུགས། །ཕུང་བྱེད་རྡུལ་ཕྲན་བཞིན་དུ་རློག །འཇིགས་བྱེད་སྒྲ་གཅན་རཱ་ཧུ་ལ། །རྒྱ་མཚོའི་གཏིང་ནས་ཀུ་ཡིས་ཐོབ། །མ་མོ་བྱེ་བའི་དམག་ཡར་བསྡུས། །དགྲ་བོའི་ཡུལ་དུ་དམག་སྣ་དྲོངས། །དྲང་སྲོང་ཆེན་པོས་དམག་དཔོན་མཛོད། །མཛེ་འབྲས་ཕོལ་མིག་ལྷོག་པ་ཐོང་། །རིམས་ནད་ཁྲག་ནད་དལ་ཡམས་ཐོངས། །གཟའ་བདུད་ནག་པོ་རཱ་ཧུ་ལ། །བསིལ་བའི་ཚལ་ནས་ཁུ་ཡིས་ཐོབ། །ནག་པོ་སྟོང་གི་དམག་ཡར་བསྡུས། །དགྲ་བོའི་ཡུལ་དུ་དམག་སྣ་དྲོངས། །བྱི་ནུ་རཱ་ཛས་དམག་དཔོན་མཛོད། །གཟེར་ནད་སྨྱོ་འབོག་གྲི་རྒོད་ཐོངས། །རྡུངས་ཤིག་གཏུབ་ཅིག་རླུང་གིས་གཏོར། །རྡུལ་ཕྲན་ཙམ་ཡང་མེད་པར་གྱིས། །ལས་མཁན་ཆེན་པོ་རཱ་ཧུ་ལ། །དུར་ཁྲོད་གནས་ནས་བསྭོ་ཡིས་ཐོབ། །ལྷ་སྲིན་(༡༧)སྡེ་བརྒྱད་དམག་ཡར་བསྡུས། །དགྲ་བོ་ཡུལ་དུ་དམག་སྣ་དྲོངས། །བི་ཏྲི་པ་ཏྲས་དམག་དཔོན་མཛོད། །སེར་ཆེན་ཐོག་དང་སྐར་མདའ་རྒྱོབ། །རིམས་ནད་ཁྲག་གཟེར་གྲི་ཐབས་ཐོངས། །སྲོག་བདག་ཆེན་པོ་རཱ་ཧུ་ལ། །ནམ་མཁའི་མཐོང་ན་ཀུ་ཡིས་ཐོབ། །གཟའ་སྐར་མང་པོ་དམག་ཡར་བསྡུས། །དགྲ་བོའི་ཡུལ་དུ་དམག་སྣ་དྲོངས། །དུ་བ་མཇུག་རིང་དམག་དཔོན་མཛོད། །སད་དང་སེར་ཆེན་རྒྱུ་གཟེར་ཕོབ། །གནམ་ལྕགས་ཐོག་དང་སྐར་མདའ་རྒྱོབ། །ནད་དང་མཚོན་གྱི་བསྐལ་པ་ཐོངས། །ཁྱབ་འཇུག་ཆེན་པོ་རཱ་ཧུ་ལ། །སྐར་མ་ཕོད་ཅན་འོད་པོ་ཆེ། །དགྲ་བོའི་སྟེང་དུ་དམག་སྣ་དྲོངས། །འུར་འུར་ཆེམ་ཆེམ་དམག་སྣ་དྲོངས། །སྲོག་གཅོད་སྲིང་མོ་གདོང་བཞིས་མཛོད། །བདག་ལ་སྡང་བའི་དགྲ་བོ་འདིའི། །ཕོ་རྒྱུད་ཐམས་ཅད་རྩད་ནས་ཆོད། །མོ་རྒྱུད་ཐམས་ཅད་མངལ་ནས་སྐོམས། །ཕུང་དུ་ཆུག་ལ་བརླག་པར་མཛོད། །རྡུལ་ཕྲན་ཙམ་ཡང་མེད་པར་མཛོད། །མིང་ཙམ་མེད་པར་ཕུང་དུ་ཆུག །དུས་ལ་བབ་བོ་རཱ་ཧུ་ལ། །ཧཱུྃ། གཟའ་མཆོག་ཆེན་པོ་རཱ་ཧུ་ལ། །འཇིགས་བྱེད་ཆེན་པོ་དྲག་རྩལ་ཅན། །ཕ་ནི་སྲིན་ལ་མ་ནི་ཀླུ། །ཀླུ་སྲིན་ཚོགས་པའི་མཐུ་བོ་ཆེ། །ལུས་པོ་གཅིག་ལ་མགོ་བོ་དགུ། །མགོ་ལུས་མེད་པར་མིག་གིས་གང་། །སྐུ་མདོག་འཇིགས་པའི་དུད་ཁ་ལ། །ཕྱག་བཞི་ཆུ་སྲིན་རྒྱལ་མཚན་དང་། །རལ་གྲི་ཞགས་པ་མདའ་གཞུ་བསྣམས། །ལྷོ་ནུབ་མཚམས་ནས་སྐུ་བསྐྱོད་ལ། །དགྲ་བོའི་སྟེང་དུ་ད་རྒྱུག་ཅིང་། །སྲིང་མོ་མཆེད་བཞི་ད་རྒྱུག་ཅིག །སྤྲུལ་པའི་གཟའ་ཆེན་ད་རྒྱུག་ཅིག །ལྷ་སྲིན་སྡེ་བརྒྱད་ད་རྒྱུག་ཅིག །ཚེས་གྲངས་བཞི་ཡི་སྲོག་དག་ལ། །ནུབ་ནས་ཤར་དུ་རྒྱུ་ཙམ་ན། །མ་མོ་ཡོངས་ཀྱི་དམག་དཔོན་བྱེད། །རིམས་ནད་འབེབས་པའི་མཐུ་བོ་ཆེ། །མ་མོའི་ཀི་ཀཾ་དགྲ་ལ་བྷྱོ། །ཚེས་གྲངས་བརྒྱད་ཀྱི་དྲོས་ཆེན་ལ། །ཤར་ལྷོ་ནུབ་བྱང་རྒྱུ་ཙམ་ན། །དགྲ་ལྷའི་རྒྱལ་པོའི་དམག་དཔོན་བྱེད། །ཡམས་ནད་འབེབས་པའི་མཐུ་བོ་ཆེ། །དགྲ་ལྷའི་ཀི་ཀཾ་དགྲ་ལ་བྷྱོ། །ཚེས་གྲངས་བཅུ་གཅིག་དུས་ཚོད་དུ། །ནམ་ནི་བྱིང་ནས་ནམ་ཕྱེད་ལ། །བྱང་ནས་ལྷོ་རུ་རྒྱུ་ཙམ་ན། །གཤིན་རྗེ་ཡོངས་ཀྱི་དམག་དཔོན་བྱེད། །ཡམས་ནད་འབེབས་པའི༴། །གཤིན་རྗེའི་ཀི་ཀཾ༴། །ཚེས་གྲངས་བཅོ་ལྔའི་ཉིན་ཕྱེད་ལ། །ལྷོ་ནུབ་བྱང་ཤར་རྒྱུ་ཙམ་ན། །སྲིན་པོ་ཡོངས་ཀྱི༴། །གྲི་རྒོད་གཏོང་བའི༴། །སྲིན་པོའི་ཀི་ཀཾ༴། །ཚེས་གྲངས་བཅོ་བརྒྱད་ནམ་ཕྱེད་ཡོལ། །ཤར་ནས་ནུབ་ཏུ་རྒྱུ་ཙམ་ན། །དམུ་རྣམས་ཡོངས་ཀྱི༴། །བྱིད་ནད་གཏོང་པའི༴། །དམུ་ཡི་ཀི་ཀཾ༴། །ཉི་ཤུ་གཉིས་ཀྱི་ཉི་ཕྱེད་ཡོལ། །ནུབ་བྱང་ཤར་ལྷོར་རྒྱུ་ཙམ་ན། །བཙན་རྣམས་ཡོངས་ཀྱི༴། །གཟེར་ནད་གཏོང་བའི༴། །བཙན་གྱི་ཀི་ཀཾ༴། །ཉི་ཤུ་ལྔ་ཡི་སྐྱ་རེངས་ལ། །ལྷོ་ནས་བྱང་དུ༴། །ཀླུ་རྣམས་ཡོངས་ཀྱི༴། །མཛེ་ནད་གཏོང་བའི༴། །ཀླུ་ཡི་ཀི་ཀཾ༴། །ཉི་ཤུ་དགུ་ཡི་མྱུར་སྨད་ལ། །བྱང་ཤར་ལྷོ་ནུབ་རྒྱུ་ཙམ་ན། །(༡༨)ལྷ་རྣམས་ཡོངས་ཀྱི༴། །ལྷ་ནད་འབེབས་པའི༴། །ལྷ་ཡི་ཀི་ཀཾ༴། །ཆོ་ཆོ་དམ་ཉམས་དགྲ་ལ་ཆོ། །གཟའ་མཆོག་ཉི་མ་དགྲ་ལ་བྷྱོ། །དམ་ཉམས་དགྲ་བོའི་ཤ་ལ་རོལ། །གཟའ་མཆོག་ཟླ་བ་དགྲ་ལ་བྷྱོ། །དམ་ཉམས་དགྲ་བོའི་ཁྲག་ལ་རོལ། །གཟའ་མཆོག་མིག་དམར་དགྲ་ལ་བྷྱོ། །དམ་ཉམས་དགྲ་བོའི་རུས་ལ་རོལ། །གཟའ་མཆོག་ལྷག་པ་དགྲ་ལ་བྷྱོ། །དམ་ཉམས་དགྲ་བོའི་སྙིང་ལ་རོལ། །གཟའ་མཆོག་ཕུར་བུ་དགྲ་ལ་བྷྱོ། །དམ་ཉམས་དགྲ་བོའི་ནང་ཁྲོལ་རོལ། །གཟའ་མཆོག་པ་སངས༴། །དམ་ཉམས་དགྲ་བོའི་དབུགས་ལ་རོལ། །གཟའ་མཆོག་སྤེན་པ་དགྲ་ལ་བྷྱོ། །དམ་ཉམས་དགྲ་བོའི་སྲོག་ལ་རོལ། །གདོང་མོ་མཆེད་བཞི་དགྲ་ལ་བྷྱོ། །དམ་ཉམས་དགྲ་བོའི་སྙིང་ལ་བྷྱོ། །ལྷ་སྲིན་སྡེ་བརྒྱད་དགྲ་ལ་བྷྱོ། །དམ་ཉམས་དགྲ་བོའི་སྲོག་ལ་བྷྱོ། །ཆོ་ཆོ་གཟའ་བདུད་འཁོར་བཅས་རྣམས། །དམ་ཉམས་དགྲ་བོའི་སྟེང་དུ་ཆོ། །ནད་ཀྱི་རླུང་དམར་དགྲ་ལ་ཐོབ། །མཚོན་གྱི་གྲུ་གུ་དགྲ་ལ་རྐྱོངས། །གློ་བུར་ཡེ་འདྲོག་དགྲ་ལ་ཐོབ། །ལྟས་ངན་ཕུང་རླག་དགྲ་ལ་ཐོངས། །སྨྱོ་འབོག་རེངས་ཤིང་བརྒྱལ་དུ་ཆུག །བདུད་ཆོད་མདངས་འཕྲོགས་དུམ་བུར་གཏུབས། །རླུང་གིས་གཏོར་ལ་སྟོང་པར་མཛོད། །རྡུལ་ཕྲན་ཙམ་ཡང་མེད་པ་དང་། །མིང་ཙམ་མེད་པར་རྡུལ་དུ་རློག །ཛཿཧཱུྃ་བྃ་ཧོཿ ཁ་སྒྱུར་དཀར་པོ་ཁུག་ཛཿ ཙ་ཙ་ཁུག་ཤག་ཐུཾ། དྲི་ཤག་བུ་རུ་ལུ་འུབ་ཛཿ མ་ཏ་ནག་པོ་ཛཿ མ་ཏི་པྲ་མ་ཤ་ཛཿ གི་རཾ་པུ་ཤག་ལྕགས་ཀྱི་རཾ་ཛཿ ཡཀྴ་ལ་རྦད། ཐོགས་མེད་ཛཿ བྷྲིན་ཆུ་ཁྱེར། ཁ་ཐུན་ཛཿ། རི་བྱི་ནག་པོ་སྟོང་རྒྱ་ཛཿ བུད་ཡ་བུད་ཡ། ཤཀྴ་ཐུན། སྙིང་ཆེན་ཟུང་། ལྕགས་སྒྲོག་ནག་པོས་སྡོམས། ནམ་མཐོང་ནག་པོ་ཐིབས། མི་རེངས་སྐྱ་བོའི་སྲིན་ལམ་དམར་པོ་ཕྱེ། ཆེ་གེའི་ཙིཏྟ་མཱ་ར་ཡ་རྦུད། ཧྲི་དུ་རུ་ན་ཐུཾ་འུབ། རཱ་ཙ་ཏྲིག་ནན། རྦད་ཐུཾ་རི་ལི་ལི། ཧེ་བ། རི་ས། ར་ཁ། ར་ཧོ་ར་ཏི་ཤོ་ཟོན་ཟོན། ཡ་མ་ཐུན་རྦད། ཅེས་བརྗོད། དུལ་མོ་རྡུལ་ལོ། །དེ་ནས་རང་གི་གནས་སུ་བཀྲ་ཤིས་བརྗོད།

དགེ་བ་འདི་ཡིས་དགྲ་བགེགས་དུས་མཐའ་བསྟུང་། །མཐུ་ཆེན་དྲག་པོའི་གྲགས་པ་རྒྱས་པར་ཤོག །གཟའ་བདུད་ཀྱི་སྐོང་གསོ་ཁྲག་མཚོ་འཁྱིལ་བ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་མཛད་པ་རྫོགས་སོ།། །།

དྲང་སྲོང་གཟའི་བཅོས་ཐབས་ཀྱི་གདམས་པ་རིན་ཆེན་ཕྲེང་བ་ཞེས་བྱ་བ།

༄༅། །དྲང་སྲོང་གཟའི་བཅོས་ཐབས་ཀྱི་གདམས་པ་རིན་ཆེན་ཕྲེང་བ་ཞེས་བྱ་བ་བཞུགས་སོ། །

༄༅། །མཚན་དཔེས་སྤྲས་པའི་ཞི་སྐུ་ཡིན་ནམ་འཇིགས་ཤིང་རྔམས་པས་དེ་ལྟའང་མིན། །དྲུག་ཅུའི་དབྱངས་ལྡན་ཞི་གསུང་ཡིན་ནམཧཱུཾ་སྒྲ་སྒྲོགས་པས་དེ་ལྟའང་མིན། །བྱམས་བརྩེར་ལྡན་པའི་ཞི་ཐུགས་ཡིན་ནམ་གདུག་པ་སྐྲག་པས་དེ་ལྟའང་མིན། །སངས་རྒྱས་ཀུན་གྱི་ཡབ་ཏུ་གྱུར་ཀྱང་སྲས་ཀྱི་ཐུ་བོའི་ཞབས་ལ་འདུད། །ཆུ་སྐྱེས་ལས་འཁྲུངས་སྐྱོན་དང་བྲལ་ཡང་སྙིགས་དུས་སྐྱེ་བོའི་ཁྲོད་ན་(༡༩)གནས། །བྱམས་དང་སྙིང་རྗེས་བདག་རྒྱུད་གཏམས་ཀྱང་གདུག་པ་འདུལ་ཕྱིར་སྤྲུལ་པ་སྟོན། །མི་འགྱུར་ཆོས་ཀྱི་དབྱིངས་ལ་བཞུགས་ཀྱང་གདུལ་བྱའི་རེ་བ་སྣ་ཚོགས་སྐོང་། །པདྨ་འབྱུང་གནས་བླ་མ་ལ་བཏུད་གཟའ་རྒོད་གསོ་སྲུང་གདམས་པ་འབྲི། །

དེ་ལ་རྟགས་དང་བཅོས་ཐབས་སྲུང་བ་གསུམ། །དང་པོ་སྤྱི་དང་བྱེ་བྲག་ཁྱད་པར་རྟགས། །སྤྱི་རྟགས་ཁ་མི་གཡོ་ཞིང་ཞ་རེངས་སྐྱུགས། །སྦྲིད་བེར་མགོ་ན་ཟི་ཁོལ་ཚ་ཞིང་འགྱེལ། །མིག་འགྲིབ་རྣ་བ་འོན་ཞིང་ཆལ་ལམ་ལྐུགས། །མིག་རྩ་དམར་རྒོད་འཕྱོ་འདར་སྙིང་མི་དགའ། །བཤང་གཅི་འཆོར་བསྡམས་གདོང་རྩ་རྟག་ཏུ་འཕར། །བྱེ་བྲག་ལུས་ཀྱི་གཡས་ན་ཁ་སྣ་སྐམ། །དྲོད་ཆེ་སྐོམ་འདོད་སོ་དྲེག་མེ་རིས་འབྱུང་། །ཟས་སྐོམ་ཟོས་ནས་ན་བ་མེ་ཡི་གཟའ། །ལུས་ཀྱི་གཡོན་ན་དྲོད་ཆུང་གྲང་འབྲུམ་འོང་། །ཁ་སྣ་ཆུ་མང་ཉོལ་བུ་ཞོ་གྲོད་འདྲ། །འདར་དངངས་སྒྲོ་སྒྲ་སོ་དྲེག་ཆེ་བ་ཆུ། །གཉིད་ཆེ་ལུས་ལྕི་ཤ་སེར་དང་ཁ་འགག །སྡོད་འདོད་སྨྲ་བ་ཉུང་བ་ས་ཡི་གཟའ། །གདོང་སྐྱ་གཉིད་མེད་གཡལ་མང་སྐོམ་ནད་ཆུང་། །མགོ་འཁོར་མཐོ་དམན་བྱེད་ཅིང་ཤེས་པ་འཕྱོ། །གླ་བཅོལ་དྲན་པ་ཉམས་པ་རླུང་གི་གཟའ། །རྣ་ལྟག་རུས་འབུར་མཐེ་བོས་མནན་མཉེས་ཤུལ། །དམར་ཐིག་བྱུང་བ་མེ་ཡིན་སྔོ་བ་ཆུ། །སེན་མོ་དམར་བ་མེ་ཡིན་དཀར་བ་ཆུ། །ཁྱད་པར་སྤོས་དཀར་གངས་ཐིག་སྦྱར་བ་ལ། །ཕྱག་རྡོར་སྔགས་ཀྱིས་བྱིན་རླབས་ཁོང་དུ་བཏང་། །མགོ་བསྟུམ་ཁོ་རང་གི་སྐྲ་སེན་ལ་ཚ་བསྲེས་པས་བདུག །གཟེར་སྦྲིད་ཤ་འགུལ་གང་རུང་བྱུང་བ་འམ། །མིག་སྤྲིན་སྔར་ལས་འགྱུར་ན་ངེས་པར་ཡིན། །ཡང་ན་གངས་ཐིག་ཉུང་མ་བྱེ་སྒོག་པ། །ཆུ་ལ་ཐུར་མགོ་ཕྱེད་སྦྱར་ཁོང་དུ་བཏང་། །སྙིང་བབས་སྨྱོ་ལྐུགས་སྣོད་བབས་འཁྲུ་དང་བཤལ། །མཁལ་མར་བབས་ན་རྒྱུན་གཉིས་སྡོམ་བྱེད་ཅིང་། །མཚེར་བབས་གཞོགས་སྐམས་མདོར་ན་གང་བབས་པའི། །ནད་དེ་ལྡང་འགྱུར་འཁྲུལ་མེད་བརྟག་ཐབས་ཡིན། །ཡང་ན་སྤོས་དཀར་སྤང་སྤོས་སྦང་སྐམ་གྲོ། །བདུག་པས་ཤ་དམར་ཁ་སྣ་སྐམས་ན་མེ། །ཁ་སྣའི་ཆུ་མང་ཤ་སྔོ་ཆུ་ཡི་གཟའ། །གླ་རྩི་གུ་གུལ་དཀར་ནག་མུ་ཟི་ནག །ཤུ་དག་ལྡོང་རོས་དྲུག་པོ་ཞིབ་བཏགས་ལ། །གཡའ་དང་བྲལ་བའི་མེ་ལོང་རྒྱབ་ཏུ་བྱུག །ༀ་ཙུ་དུ་ཨ་ཡ་ཤ་ལ་ཎ་སྭཱ་ཧཱ། ཞེས་པ་གསུམ་བདུན་རྫས་དང་མེ་ལོང་བཏབ། །དུད་པས་བདུག་ཅིང་ནད་པས་མེ་ལོང་བལྟ། །དམར་པོར་མཐོང་ན་མེ་ཡིན་སྔོན་པོ་ཆུ། །སེར་པོ་ས་ལ་དཀར་པོ་ལྕགས་ཀྱི་གཟའ། །ལྗང་གུའི་མདོག་མཐོང་ཤིང་གི་གཟའ་རུ་འདོད། །ཤ་པགས་ལ་བབས་ཁ་མིག་གླེ་ཀྱོག་འགྲོ། །རྩ་རྒྱུས་ལ་བབས་ཡན་ལག་ཞ་ཞིང་རེངས། །སྙིང་ལ་བབས་ན་དྲན་ཉམས་སྨྲ་བ་དཀའ། །གློ་བར་བབས་ན་གློ་འོང་སྐད་འགག་ཅིང་། །མཆིན་པ་ལ་བབས་ཁྲག་སྐྱུགས་གཟུགས་འཛིན་འགྲིབ། །མཚེར་བབས་གཞོགས་ཤ་སྐམས་ཤིང་ཀྱོག་པོར་འགྲོ། །མཁལ་ལས་རྣ་བ་འོན་ཅིང་རྩ་ཆུ་སྡོམ། །ཕོ་བར་བབས་ན་སྐྱུགས་ཤིང་རྒྱུ་མར་འཁྲུ། །བསྡོང་ཟླ་རྒྱལ་པོས་སྨྱོ་ཞིང་བདུད་ལ་ཞ། །མིག་ཆུ་ཁ་སྣ་ལྦུ་སྐྱུགས་མགྲིན་འགགས་བཙན། །(༢༠)སྨན་མོས་ཆགས་པ་སྐྱེ་ཞིང་ཤུ་དྲ་འཆོར། །མ་མོས་གཡང་ལྷུང་ཁུ་བ་བཤང་གཅི་འཆོར། །སྲིན་མོས་ལྟོ་འཕྱེ་གདོང་པ་དྲི་མི་ཞིམ། །རེས་དགོད་རེས་ངུ་དགྲ་ལྷའི་རྒྱལ་པོ་ཡིན། །དམུ་ལ་པགས་པ་འབུད་ཅིང་སྡུག་བསྔལ་འོང་། །ཡན་ལག་ཞ་ཞིང་ཁ་ཡོ་ས་བདག་བསྡོངས། །དེ་ལྟར་འཁྲུལ་མེད་རྟགས་ཀྱིས་ངོས་བཟུང་ལ། །བཅོས་ཐབས་བཙོན་འཛིན་དམའ་འབེབས་བྱད་འགྲོལ་དང་། །སྤུར་དང་མ་བསྟན་ཞི་དང་སྦྱང་བའོ། །དེ་ལ་དང་པོ་བཙོན་དུ་གཟུང་བ་ནི། །ༀ་བེ་ཏ་རི་ལ་གྲ་མོ་ཙན་ཤིག་ཟུང་ཟུང་། ཞེས་པའི་སྔགས་འདི་གུ་གུལ་དཀར་ནག་ལ། །བཏབ་པའི་ཆུ་དེ་ཁོང་དུ་བཏང་བར་བྱ། །རང་ཉིད་གསང་བའི་བདག་པོའི་བསྐྱེད་རིམ་བསྒོམ། །བསྒྲུབ་བྱ་མདུན་བཞག་རང་གི་ལག་གཉིས་བསྣོལ། །གཡས་པས་གཡས་དང་དེ་བཞིན་གཡོན་པ་ཡི། །སྲིན་ལག་གཉིས་ནས་ཟུང་ལ་འདི་སྐད་བརྗོད། །ངའི་བཀའ་མ་བྱུང་ཞིང་སྤུར་བ་དང་སྡོང་པ་དང་ལམ་མ་བསྟན་གྱི་བར་དུ་ཟུང་ཟུངས། ཞེས་པ་དང་། གང་ལ་བབས་པའི་གནས་ལས་གཞན་དུ་མ་བྱེར། མ་འཕྲོ། མ་འཕོ། མ་འཁྱུགས་ཤིག །ཅེས་པ་ལན་གསུམ་བརྗོད་པས་ཟིན་པར་འགྱུར། གནད་ཆེ།

གཉིས་པ་དམའ་ཕབ་ཚེར་མ་ཅན་གྱི་ཤིང་། །གང་འཛོམ་ལུང་པ་དགུ་ཡི་ཆུ་སྣ་དང་། །འོག་གོས་ལྡན་པའི་བུ་མོ་གཙང་མ་དང་། །ར་ཐག་རོལ་མོའི་ཆ་བྱད་སྣ་ཚོགས་བསག །རང་གི་མདུན་དུ་ཕྱར་བའི་གདན་གྱི་སྟེང་། །ནད་པ་གཅེར་བུར་བཞག་ལ་སྔགས་འདི་བརྗོད། །ཀེ་ཏ་ཀེ་ཏ་རཱ་ཧུ་ལ་མདུན་ཤིག་ཡ་ཐུམ་སྭཱ་ཧཱ། དོར་མ་དྲོན་མོས་མགོ་གཡོགས་ར་ཐག་དཀྲི། །རོལ་མོ་འཇིགས་པའི་ཚམ་རྔམས་སྣ་ཚོགས་བྱ། །དེ་ནས་དོར་མ་ར་ཐག་བཅས་པ་ཕབ། །འབྱུང་བཞིའི་དཔྱད་ལ་སྙིང་ག་མདུན་རྒྱབ་དང་། །ལྟག་པ་རྣམས་སུ་ཆུ་ལྕག་དྲག་ཏུ་རྡེག །དེ་ནས་རིམ་གྱིས་ལུས་ཀུན་ཁྱབ་པར་རྡེག །དེ་ནས་ཚེར་མའི་མེ་ཡིས་མདུན་རྒྱབ་གཡུག །རིམ་གྱིས་སས་བྲབ་ཕྱར་བའི་སྣེ་བཞི་ནས། །བཏེག་ཅིང་གཡོབ་པ་རླུང་གི་དཔྱད་དུ་འགྱུར། །སླར་ཡང་གསར་པའི་གདན་གྱི་སྟེང་དུ་བཞག །གསང་བའི་གནས་༼དཔྲལ་མགྲིན་སྙིང་གསུམ་ལ་༽སོགས་གང་ནའི་གནས། །ཤ་རུའི་ཙོང་ཀེ་གསེར་གྱི་རྡོ་རྗེ་རྩེ་ལྔ་པར། །བསམས་ལ་གསང་བ་གཤེད་འབེབས་སྔགས་ཀྱིས་བརྡུང་། །དྷརྨ་དྷཱ་ཏུ་ཧཱུྃ། སྤོ་ཏ་ཡ་སྤོ་ཏ་ཡ། བྷསྨིཾ་ཀུ་རུ་ཧཱུྃ། བཾ་ཛ་རཱ་ཧུ་ལ་ཙིཏྟ་དུན་དུན། པདྨ་ཛ་ལི་ཛ་རྦད། སླར་ཡང་སྔགས་བརྗོད་ཕྱི་བ་བྱ་རྒོད་པོ། །བྱ་རོག་སྲམ་གྱི་ལག་པས་རིམ་བཞིན་བྲད། །དེ་དག་མ་འབྱོར་ཏིང་འཛིན་གསལ་པོས་བྱ། །རྣམ་འཇོམས་ཁྲུས་བྱ་ཡོན་ཕུལ་ཚོགས་འཁོར་བཤམ། །ཤིས་པ་བརྗོད་ཅིང་སྨོན་ལམ་ལེགས་པར་བརྗོད། །

གསུམ་པ་བྱད་འགྲོལ་རིན་ཆེན་སྣོད་ཀྱི་ནང་། །འོ་ཆུས་བཀང་ཞིང་ཀླུ་སྨན་དར་སྣ་བཏབ། །དཀྱིལ་དུ་བག་ཟན་དག་ལ་སྒྲ་གཅན་གཟུགས། །(༢༡)མགོ་གསུམ་སྦྲུལ་མགོ་དང་བཅས་ལག་གཉིས་པ། །སྦྲུལ་འཇུག་སྨད་འཁྱིལ་༼དེའི་མཐར་༽ཀླུ་བརྒྱད་སྦལ་ལྕང་གཟུགས། །སྣོད་བཅུག་འགལ་ཐག་༼ཚོན་སྐུད་༽ཁྲོ་བོས་མཐའ་མ་བསྐོར། །སྣེ་མོ་ཕོ་༼ནད་པ་༽ཡི་གཡོན་དང་མོ་ཡི་གཡས། །སྲིན་ལག་བཏགས་ལ་སྔགས་འདི་བརྒྱ་ཕྲག་དྲུག །བཟླས་པ་བྱས་པའི་སྔགས་ཆུ་ཁོང་དུ་བཏང་། །ༀ་ཨ་ཏན་སོད། མི་ཏན་སོད། དུ་དུ་སོད་བཱ་གྷ་ལིངྷུ་རི་བ་སོད་སྭཱ་ཧཱ། སླར་ཡང་སྔགས་འདི་བཟླ་ཞིང་འགལ་ཐག་བཅད། དུར་ཤཾ་ཕཊ། པ་ཤཾ་ཕཊ། ཕེཾ་ཤཾ་ཕཊ། ཤར་ཤཾ་ཕཊ། ཏྲག་ཤཾ་ཕཊ། སེ་ཤཾ་ཕཊ། ཙ་ཤཾ་ཕཊ། ཕུར་ཤཾ་ཕཊ། ཤ་ཤཾ་ཕཊ། ཀྲག་ཤ་ཙ་ཤཾ་ཕཊཿ ཅེས་དང་། བི་ཤྭ་དྷ་ན་ཡ་ཧཱུྃ་ཕཊཿ སྤུར་བའི་སྐབས་ལྟར་འབྱུང་བཞིའི་དུག་སྤུར་རམ། །འབྱུང་བཞིའི་བྱད་འགྲོལ་ཞེས་སོགས་འདོན་པ་བསྒྱུར། །འགལ་ཐག་དུམ་བུ་ལུང་༼པ་༽སོགས་ཆུ་ནང་དོར། །དེ་དག་འབབ་ཆུའི་རྒྱུན་ནམ་རི་ངོས་བསྐྱལ། །

བཞི་པ་སྤུར་ལ་ཞི་དྲག་གནད་བསྐུལ་དང་། །རྫས་དང་སྲོག་ཆགས་ལ་བརྟེན་སྤུར་བའོ། །དང་པོ་སྔར་བསྟན་པ་ཡི་འབྱུང་བཞི་དང་། །ཤ་ཁྲག་གཅན་གཟན་རས་མ་བྱང་མིག་དགུ། །གཟའ་གཞུ་འོད་མ་གཟའ་མདའ་འུག་པ་དང་། །མེ་ལོང་རྒྱ་ལོང་གཟའ་ར་རོག་པོ་དང་། །གཟའ་ལུག་གན་༼གདོང་༽དམར་འབྲང་རྒྱས་ཞལ་དཀར་དང་། །མདའ་དར་དཀར་དམར་འབྲུ་སྣ་དར་སྣ་རྣམས། །རེ་རེའང་དགུ་དགུ་གཟའ་ར་གཟའ་ལུག་སོགས། །རང་ཉིད་མེད་ན་གཟུགས་བརྙན་བྱས་པ་བསག །དེ་ནས་ངུར་ཤཾ་ཕཊ་སོགས་བརྗོད་པའི་རྗེས། །ཕྱི་འབྱུང་བ་བཞིའི་དུག་སྤུར་རོ། །ནང་ཉོན་མོངས་པ་དུག་ལྔའི་དུག་སྤུར་རོ། །རྐྱང་པའི་དུག་སྤུར་རོ། །འདུས་པའི་དུག་སྤུར་རོ། །ཀུ་རེ་ལྟར་ཞུགས་པའི་དུག་སྤུར་རོ། །འཇབ་བུ་ལྟར་ཞུགས་པའི་དུག་སྤུར་རོ། །རིམ་གྱིས་ཞུགས་པའི་དུག་སྤུར་རོ། །གཅིག་ཅར་ཞུགས་པའི་དུག་སྤུར་རོ། །ཐོད་རྒལ་ཞུགས་པའི་དུག་སྤུར་རོ། །རྐུ་ཐབས་སུ་ཞུགས་པའི་དུག་སྤུར་རོ། །ཤ་ལ་མེ་ལྟར་རྒྱས་པའི་དུག་སྤུར་རོ། །ཁྲག་ལ་ཆུ་ལྟར་འབྲུབ་པའི་དུག་སྤུར་རོ། །པགས་ལ་མེ་ལྟར་འབར་བའི་དུག་སྤུར་རོ། །རྩ་ལ་རྟ་ལྟར་ཞོན་པའི་དུག་སྤུར་རོ། །ཆུ་རྒྱུས་ལ་སྦྲུལ་ལྟར་འཁྲིལ་བའི་དུག་སྤུར་རོ། །དོན་ལ་ཝ་ལྟར་འཇབ་པའི་དུག་ཐམས་ཅད་སྤུར་རོ། །ཞེས་དང་། གོང་གི་རྫས་དགུ་པོ་རེ་རེ་ནས། གཅན་གཟན་རས་མ་འདིས་སྤུར་རོ། །ཞེས་པ་ནས། འབྲུ་སྣ་དར་སྣ་དགུ་པོ་འདིས་སྤུར་རོ། །དྲང་སྲོང་གཟའི་བྱད་ཐམས་ཅད་སྤུར་རོ། །བི་ཤྭ་དྷ་ན་ཡ་ཧཱུཾ་ཕཊ། ཅེས་པ་དང་། གལ་ཏེ་སུ་ལ་དོ་བསྡོ་ཡང་། །དྲང་སྲོང་ཁྱེད་ལ་དོ་མི་བསྡོ། །ཞེས་ཞི་བ་བྱའོ། །དྲག་པོས་སྤུར་བ་མི་ལུས་༼དམག་ཆས་༽བསྒྱུར། །གོ་གྱོན་མཚོན་ཆ་སྣ་ཚོགས་ཐོགས། །ཁྲབ་བསིག་པ་ཡི་སྟངས་སྟབས་ཀྱིས། །ཇག་པའི་ཚུལ་གྱིས་བསྡིག་པར་བྱ། །སྔགས་དང་སྨོན་ལམ་གོང་དང་འདྲ། །གནད་ནས་བསྐུལ་ཏེ་སྤུར་བ་ནི། །བཅའ་ལུགས་གོང་དང་འདྲ་བ་ལ། །སྔགས་འཆང་རྔ་བརྡུང་(༢༢)འདི་སྐད་བརྗོད། །ང་ནི་གསང་བདག་རྡོ་རྗེ་འཛིན། །བསྟན་པ་སྲུང་བའི་ཆོས་སྐྱོང་ཡིན། །ཡོ་ཁལ་བསྲང་བའི་ཐིག་ཤིང་གཏད། །དཀར་ནག་འབྱེད་པའི་ལྡེ་མིག་ཡིན། །ད་ཡང་དྲང་སྲོང་གདུག་པ་ཁྱོད། །མི་ཡུལ་འདི་ན་ཡུན་མ་རིང་། །མི་ཡུལ་གདུག་རྩུབ་ངན་ཐབས་མང་། །མི་ཡུལ་མི་གཙང་བཙོག་གནས་ཆེ། །རོ་སྟོད་རྣག་ཁྲག་རྫིང་བུ་འཁྱིལ། །རོ་སྨད་དྲི་ངན་བཤང་གཅི་འཁྱིལ། །ཡན་ལག་ཉ་བཞི་དབྱུག་སྐམ་འདྲ། །སྐྲ་དང་སྨིན་མ་ནག་རུལ་འདྲ། །དེ་ལ་ཆགས་ན་དྲང་སྲོང་མིན། །ཁྱོད་ནི་འདོད་ཁམས་ལྷ་ཡི་ལུས། །ལུས་བཟང་འདི་རུ་བབས་པར་མཆིའོ། །ལ་ཡོགས་འཕྲལ་དུ་འབྱུང་བར་མཆིའོ། །འགྱོད་པ་དྲག་པོ་སྐྱེ་བར་མཆིའོ། །དྲང་སྲོང་རང་གི་ཡུལ་དུ་བཙུན། །འཇའ་ཚོན་ནམ་མཁའི་དབྱིངས་ན་བཀྲ། །ཡབ་ཡུམ་གནས་སུ་ལ་འུར་བཞུད། །ཅེས་གནད་ནས་བསྐུལ་ཏེ་སྤུར་རོ། །རྫས་དང་སྲོག་ཆགས་དག་གིས་སྤུར་བ་ལ། །རྫས་བསགས་པ་དང་དངོས་གཞིའི་ཆོ་གའོ། །རྫས་ལ་ར་དུག་སྤྱང་བྲུན་རྟ་ནག་བོན། །ལ་ཆ་ཤུ་དག་ཁྱི་དཀར་སྣ་དམར་བྲུན། །བཙན་དུག་བདག་མེད་ནག་མོའི་མངལ་ཁྲག་དང་། །ཆིག་སྐྱེས་གུ་གུལ་སྦྱར་བ་ཞག་གསུམ་བདུག །དངོས་གཞི་ཟངས་གཞོང་འོ་ཆུས་བཀང་བའི་ནང་། །ཉ་ཆུང་བཙུད་ཅིང་ནད་པའི་རྣ་བ་གཡོན། །གཏད་ལ་གཏུམ་པོ་ལ་སོགས་འདྲེན་དུ་བཅུག །བླ་མས་སྐྱབས་འགྲོ་སེམས་བསྐྱེད་སྔོན་སོང་བས། །གསང་བའི་བདག་པོའི་བསྐྱེད་རིམ་གསལ་བར་བསྒོམ། །སྔགས་རིང་བརྒྱ་དང་གཞན་ཡང་དྲག་སྔགས་སོགས། །བགྲངས་ལ་ནད་པའི་རྣ་བ་གཡས་ལ་རྡེག །ནད་པ་རང་གིས་བསྒོམ་བྱའི་དམིགས་པ་ནི། །བླ་མ་གསང་བདག་གསལ་བའི་བ་སྤུ་ནས། །ཕྱག་རྡོར་ཕྲ་མོ་འོད་ཆགས་དཔག་མེད་འཕྲོས། །ཁ་བ་བབ་ལྟར་སྤྱི་གཙུག་རྐང་མཐིལ་བར། །ལུས་ནང་གང་བའི་འོད་དང་གཟི་བརྗིད་ཀྱིས། །ནད་གདོན་ཐམས་ཅད་རྣ་བ་གཡོན་པས་ཐོན། །ཆུ་ནང་ཉ་ཆུ་དག་ལ་ཐིམ་པར་བསམ། །དེ་ལྟར་བྱས་པས་རྟགས་སོགས་འཕྲལ་དུ་འབྱུང་། །ཉ་ཉིད་ནུབ་འདམ་ཁ་དང་ཕུག་རོན་བྱང་དུ་བསྐྱལ། །རང་ཉིད་ཡིན་ན་ཤར་གྱི་ཕྱོགས་སུ་བསྐྱལ། །དེ་རྗེས་དོར་མས་མགོ་བསྟུམས་རྫས་ཀྱིས་བདུག །

ལྔ་པ་ལམ་བསྟན་འབྲང་རྒྱས་ཞལ་དཀར་དང་། །རཱ་ཧུའི་གཟུགས་བཅའ་མདའ་དར་དཀར་དམར་ཐོགས། །སྔགས་འཆང་རྔ་བརྡུང་འདི་སྐད་དྲག་ཏུ་བརྗོད། །དྲང་སྲོང་གཟའ་བརྒྱད་འཁོར་དང་བཅས། །དེ་ཡང་གནས་འདིར་ཡུན་རིང་བས། །ཁྱོད་ཀྱི་ཕོ་བྲང་འདེགས་རེ་འཚལ། །སངས་རྒྱས་བསྟན་པ་བཤིག་པ་ལ། །དྲང་སྲོང་ལམ་བསྟན་དེ་རུ་བསྟན། །དམ་ཆོས་བླ་མ་སྤོང་བ་ལ། །དྲང་སྲོང་ལམ་བསྟན་དེ་རུ་བསྟན། །ཆོས་མཛད་དབུ་འཕང་སྨད་པ་ལ། །དྲང་སྲོང་ལམ༴། །ཁ་དྲག་དཔུང་པ་འཕྱར་བ་ལ། །དྲང་སྲོང་༴། །ཐེག་པ་ཁྱད་དུ་གསོད་པ་ལ། །དྲང་སྲོང་༴། །རྨང་མཆོག་མཐེན་ལ་གནོན་(༢༣)པ་ལ། །དྲང་སྲོང་༴། །སྔགས་པའི་ནོར་ལ་འཕྲོག་པ་ལ། །དྲང་སྲོང་༴། །གཟའ་གཤེགས་པ་དེ་དེ་རུ་གཤེགས། །རྒྱུ་སྐར་གཤེགས་པ་དེ་རུ་གཤེགས། །སྔགས་འཆང་ངེད་ཀྱི་དབུ་འཕང་བསྟོད། །སྐུ་ཚེ་གཟའ་དང་མཉམ་པར་སྲིངས། །བར་ཆད་ངན་ཐབས་གདུག་རྩུབ་ཆོད། །བཅོལ་པའི་ཕྲིན་ལས་མྱུར་དུ་སྒྲུབས། །ཅེས་པས་ལམ་བསྟན་ནོ། །

བཅོས་ལུགས་༼ལྔ་པོ་༽ཀུན་གྱི་སྐབས་སུ་སྔགས་ཤམ་བུར། །རྩ་སྔགས་དྲེགས་པ་ཅན་གྱི་སྔགས་འདི་བགྲང་། །ༀ་ཐིལ་ཐིལ། ཕྲུམ་ཕྲུམ། ཤག་ཤག །གྷུ་རུ་ཡ་ཏིག་ནན། རཱ་ཧུ་ལ་ཤིག །རཱ་ཧུ་ལ་གཏུབ། རཱ་ཧུ་ལ་གཡས་སུ་ནན། ཙིཏྟ་རྦད་ནན། ཙིཏྟ་རྦད། གདོང་མོ་བཞི་པོ་གཡོན་དུ། ཞེས་པ་དང་། མེ་གཟའ་འཇོམས་པའི་སྔགས་ནི། ༀ་མ་ནན་ཨིག་སྭཱ་ཧཱ། ཆུ་གཟའ་འཇོམས་པའི་སྔགས་ནི། ཆུ་ཏི་མ་ནི་སོད། རླུང་གཟའ་འཇོམས་པའི་སྔགས་ནི། བྱེར་བ་ཕོས་སོ་སོད། ནམ་མཁའི་གཟའ་འཇོམས་པའི་སྔགས་ནི། དྷ་རི་ཀ་ནི་སོད། ས་གཟའ་འཇོམས་པའི་སྔགས་ནི། ཤ་ན་དྷ་ཏི་སོད། མགོ་ན་ན། ༀ་ཀྲུག་དུན་སྭཱ་ཧཱ། མིག་ན་ན། ༀ་ཤོ་ཀྲི་ཕོ་ཕེད་ཟི་ཟི་ཧི་རི་ཧཱུཾ། རྣ་བ་ན་ན། ཀོ་ལིང་པྲ་མ་ནན་སོད་སྭཱ་ཧཱ། སྙིང་ལ་བབས་ན་རོ་སོལ་ཅིག་སྙིང་ཐོག་ཏུ་བླན་ལ་སྦུད་པས་སྤུད། སྔགས་ནི། ༀ་ཤུ་ཀྲི་ཁ་ཏུན་ཕི་ར་ལ་ཙིཏྟ་རྒྱས་པར་མཛོད་ཅིག །ཡན་ལག་ན་ན། ཁུག་ཁུག །ཤན་ཤན། ཤད་ཤད། སྦེ་བུ་ལ་ནན་སྭཱ་ཧཱ། ཞེས་པའོ། །ཁ་སྣ་མིག་སོགས་ཡོ་བར་གྱུར་པ་ལ། །སླ་ང་ཆུ་འབོད་མན་ངག་བྱ་བ་ནི། །འཆུས་པའི་ཕྱོགས་སུ་སླ་ང་ཆུ་ཡིས་བཀང་། །མ་འཆུས་ཕྱོགས་སུ་སྟོང་པའི་སྣོད་བཞག་ལ། །ནད་པ་འཆུས་པ་དེ་ལས་བཟློག་པ་ཡིན། །འཆུས་པ་མི་གཟུགས་ཆུ་ཡི་ནང་དུ་བཞག །ནད་པ་རང་གིས་ཆུ་རྔུབས་སྟོང་པའི་སྣོད་དུ་ཡང་ཡང་དུ། བསྐྱར་ཅིང་སྣོད་གསུམ་མ་ཟད་བར་དུ་ཐང་ཆད་ཆད་དོར། བར་བྱ་ཟ་བ། ཡང་ཡང་རྒྱག་ལ་རྟེན་འབྲེལ་ཐུར་མ་ནི། །གླུད་ཀྱི་ཁོང་པར་༼ལོང་ཀ་འམ་རྒྱུ་མ་ལྟ་བུ་༽ཁྲག་བཀང་གཞུག །གང་ནའི་གནས་སྦྱར་ནད་པ་དངོས་སུ་བསམ། །ལྕགས་བསྲེགས་ཐུར་མ་ཁྲག་སྟོན་བརྡེག་པ་ཞལ་གདམས་ཡིན། །འདི་རྣམས་དུས་སུ་རང་ཉིད་ཡི་དམ་བསྒོམ། །མདུན་རྒྱབ་ན་ལ་ཕྱིང་བ་མར་བཙོས་བསླན། །དབྱུག་པས་དལ་བུས་བརྡུང་བ་ཞལ་གདམས་ཡིན། །ༀ་ཏུཾ་ཕི་ལི་ཏུཾ་ཕོ་ལི་བཱི་ལྟུཾ་བེ་ལྟུཾ་མེ་མེ་སུ་སུ་ཤིག་ཤིག་སྭཱ་ཧཱ། ཞེས་པ་དང་། ༀ་ཀེ་ཏ་ཀེ་ཏ་ཨ་པ་ར་ཙཀྲ་ཧྲི་སྟི་རཱ་ཧུ་ལ་ཨ་པ་ན་ཡེ་སྭཱ་ཧཱ། ཞེས་པའི་སྔགས་གཉིས་དམའ་ཕབ་ཞབས་མ་ཡི། །འཁོར་ལོ་བསྐོར་དང་དྲག་པོས་སྤུར་བའི་སྐབས། །རང་དང་གྲོགས་བྱེད་ཀུན་གྱིས་བགྲང་བར་བྱ། །ཁྱད་པར་རང་གི་རྩ་སྔགས་དྲེགས་པ་ཅན། །གནས་སྐབས་ཀུན་ཏུ་བགྲང་བ་ཞལ་གདམས་ཡིན། །ཞི་སྦྱང་གཉིས་ལས་དང་པོ་ཞི་བྱེད་ནི། །༼ཀ་ཀོ་མ་གཏོགས་པའི་༽བཟང་པོ་ལྔ་དང་ནལ་ཤ་སྐྱེས་པའི་༼གྲིར་ཤི་༽གྲི་བོ་ཤ །རྟ་ནག་ཁྲག་དང་བུད་མེད་༼གྲིར་ཤིའི་གྲི་མོ་༽ཁྲག་རྣམས་(༢༤)ནི། །ལྷོ་སྨན་ལྔ་དང་བོད་སྨན་བཞི་རུ་གྲགས། །མཛེ་ནག་ཁྲག་ཏེལ་ཁྲ་ཞེས་༼པའང་འདུག་ཤ་ཁྱི་སྨྱོན་མཆེད་ནི་ནག་པོ་ཁྲ་བོ་༽དཀར་པོ་ཆིག་ཐུབ་གསུམ། །སྒོག་བསྲེགས་བསྲེས་ན་ནག་སྦྱོར་ག་བུར་དཀར། །ཏེལ་ཤ་ཁྲ་བོ་གསུམ་ཀའང་ཁྲ་བོར་འགྱུར། །མ་འབྱོར་བཟང་པོ་ལྔ་དང་གྲི་ཤ་དང་། །ནལ་བུའི་ཤ་དང་སྒོག་བསྲེགས་ནག་སྦྱོར་ཏེ། །གསང་བ་ལས་ཀྱང་ཆེས་གསང་ཁོང་དུ་བཏང་། །མགོ་ན་གསེར་མདོག་མིག་ན་ཟངས་རྩི་སྡེབ། །སཱ་ལུའི་ལྗང་བ་སྐྱུགས་ལ་ད་ཏྲིག་ལྒ། །འཁྲུ་བའི་ནད་ལ་༼འོ་མེ་ལ་ཅུ་གུར་གྷི་ཧང་༽བསིལ་གསུམ་སྡེབ། །རླུང་ལ་ཛཱ་ཏི་ཤིང་ལ་སྙིང་ཞོ་ཤ །ས་ལ་ཅུ་གུར་བྲ་བོའི་ཡོས་བོག་སྡེབ། །ཆུ་ལ་ཙི་ཏྲ་ཤིང་ཚ་ནལ་ཤམ་སྟེ། །མགོ་བོ་ཟུག་བཅས་རུ་རྟ་དུར་བྱིད་གཉིས། །མར་དཀར་སྦྱར་ནས་བྱུག་ཅིང་ཀ་མིག་ཡོ། །བཙོང་བསྲེགས་བུལ་ཏོག་ར་དཀར་འོ་སྦྱར་བྱུག །ཆུ་བུར་རྨ་བྱུང་གཡེར་མའི་བྱུག་པ་བྱ། །ཕ་ནི་སྲིན་པོ་མ་ཀླུ་གདོང་མོ་བཞི། །ཁྱབ་འཇུག་དུག་རྣམས་རིམ་བཞིན་འཇོམས་པ་ནི། །སྲིན་བྱའི་ཀླད་པ་ཟངས་རྡོ་གྲི་ཁྲག་དང་། །ཡུགས་སའི་མངལ་ཁྲག་ཟངས་སྡེར་སྣོད་ཀྱི་ནང་། །བུ་རམ་མགོ་བསྡུས་རིལ་བུ་ནས་ཕྱེད་ཙམ། །ཕྱག་རྡོར་སྔགས་ཀྱིས་བྱིན་བརླབས་གསེབ་དང་བསྲུང་༼ལ༽། །ཚེས་བརྒྱད་བཅོ་ལྔ་ཉེར་དགུའི་དུས་སུ་བསྟེན། །གསོ་ན་བཞི་བརྒྱད་བཅུ་གཅིག་བཅོ་བརྒྱད་ཉ། །ཉེར་གཉིས་ཉེར་ལྔ་ཉེར་དགུ་རྒྱུ་དུས་བརྒྱད། །རིལ་བུ་རེ་རེ་གུ་གུལ་ཐང་གིས་ཕུལ། །རང་སྲུང་རིལ་བུ་ཟོས་པས་ལྡོག་མི་འགྱུར། །གཞན་ཡང་མནན་གཏད་ཀླུ་ཡི་བྱད་དུ་བཅུག །ས་བདག་ཀླུ་ཡི་དུག་རྣམས་འདི་ཡིས་འཇོམས། །ནལ་ཤ་པང་ཁྲག་གི་ཝཾ་གངས་ཏིག་དང་། །གྲི་སྙིང་སྲིན་བྱའི་ཤ་དང་ཉ་ཡི་མཁྲིས། །ཟངས་རྡོ་དངུལ་ཆུ་གྲི་ཁྲག་སྒོག་བསྲེགས་ཐལ། །ཏེལ་ཤ་ནཱ་ག་གེ་སར་བཟང་པོ་དྲུག །ཨ་གར་ནག་པོས་སྟེང་འོག་གདོན་རྣམས་འཇོམས། །སློབ་དཔོན་པདྨས་མཛད་པའི་མན་ངག་ལས། །བཟང་དྲུག་གི་ཝཾ་གླ་རྩི་ཨ་རུ་ར། །ཅོང་ཞི་རྣམས་ཀྱིས་འདུ་བ་སྤྱི་རུ་སྙོམས། །སྒོག་སྐྱ་ཡུགས་སའི་དོར་རྟ་བསྲེགས་པའི་ཐལ། །གཟའ་དུག་མེ་ཏོག་གསུམ་པ་ནང་གི་སྨན། །གྲི་སྙིང་གྲི་ཤ་ཡུགས་སའི་མངལ་ཁྲག་དང་། །ནལ་བུ་ཏེ་ལོ་པུ་ཤུད་སྲེ་མོང་ཤ །ཕ་གོལ་འདི་བདུན་གསང་བའི་སྨན་མཆོག་ཡིན། །བཀོལ་གྲང་དག་གིས་ཕུལ་ནས་བཏང་བར་བྱ། །ཡང་ན་སྙན་བརྒྱུད་ཟབ་མོའི་སྤྱི་སྨན་ནི། །སླ་ངའི་སྟེང་དུ་ཡུགས་སའི་དོར་རྟའི་སྟེང་། །སྒོག་སྐྱ་ཆིག་སྐྱེས་དུ་བ་མ་ཤོར་བསྲེག །ཟངས་རྡོ་སྲིན་བྱའི་ཀླད་པ་གྲི་ཁྲག་དང་། །མངལ་ཁྲག་ཨ་ག་རུ་དང་བཟང་པོ་དྲུག །གཟའ་དུག་དཀར་ནག་གུ་གུལ་དཀར་ནག་དང་། །གླ་རྩི་ཨ་རུ་ར་རྣམས་སྦྱར་ལ་བཏང་། །ཡང་ན་པདྨས་མཛད་པའི་གཉིས་པ་ནི། །བོང་ང་གུ་གུལ་བཟང་དྲུག་ཨ་རུ་ར། །གླ་རྩི་ཤུ་དག་རུ་རྟ་ཏི་ལོའི་ཤ །ཡུགས་སའི་མངལ་ཁྲག་དོར་རྟའི་ཐལ་བ་དང་། །ནལ་བུའི་ཤ་དང་གྲི་ཁྲག་བཙོད་ཀྱི་ཁྲག །གྲི་སྙིང་གཟའ་དུག་རྨ་བྱའི་སྒྲོ་མདོངས་སྦྱར། །(༢༥)ཡང་ན་ཐུན་མོང་མིན་པའི་སྨན་མཆོག་ནི། །ཡ་མེད་༼སྦྲུལ་ནག་༽གཉན་ཐུབ་བིག་པ་༼ན་སྒོག་བསྲེགས་༽རུ་རྟ་དང་། །ཤུ་དག་གུ་གུལ་སྤོས་དཀར་རྟ་ནག་ཁྲག །གྲི་ཤ་གྲི་ཁྲག་ཛཱ་ཏི་བཙོད་ཀྱི་ཁྲག །ཨ་རུ་ར་རྣམས་ཐུན་ཚད་རེ་རེ་སྟེ། །གླ་རྩི་ཆ་གཅིག་ཞིབ་པར་བཏགས་པ་དེ། །རིལ་བུ་སྲན་ཙམ་ནམ་མཁའ་མི་མཐོང་བར། །རྟེན་འབྲེལ་སྙིང་པོ་གསང་བདག་སྙིང་པོ་བཟླ། །ༀ་ཐིལ་ཐིལ། ཕྲུཾ་ཕྲུཾ། ཤག་ཤག །གོ་རི་ཡ་དེ་ནན། རཱ་ཧུ་ལ་རུ་ནན། རཱ་ཧུ་ལ་རིག་ཁྱུང་། སྔགས་འདི་བགྲངས་ལ་ཧ་ཡིས་གདབ་བྱ་ཞིང་། །རིལ་བུ་ཕྱག་ན་རྡོ་རྗེར་བསྒོམ་པར་བྱ། །རབ་གནས་བྱས་ལ་པར་བུ་བཟང་པོར་བཅང་། །དམེ་ཕོ་ཤོ་རེ་མཛེ་ཡུགས་ཉམས་པ་ཅན། །དེ་དག་རེག་ཏུ་མི་འཇུག་སྨན་ནུས་འཆོར། །ཆིག་བརྒྱུད་ཟབ་མོའི་རིལ་བུ་ཁྱད་འདོན་འདིས། །གཟའ་ནད་ཀུན་ལས་ངེས་པར་གྲོལ་བ་ཡིན། །སྤོས་དཀར་ཅོང་ཞི་གསེར་མདོག་སྒོག་བསྲེགས་རྣམས། །ཆ་ནི་གསུམ་རེ་གླ་གུལ་ཛཱ་ཏི་རྣམས། །ཆ་རེ་ཀ་རེ་བཞི་འགྱུར་ཆང་གིས་ཕུལ། །དྲང་སྲོང་གཟའ་ཡི་ནད་ལས་རྒྱལ་བར་འགྱུར། །གླ་རྩི་སྤང་སྤོས་སྤྱང་བྲུན་དུག་གང་འཛོམས་སྣ་ཚོགས། །ཤུ་དག་ཚ་གྲང་ཆུ་དང་མར་སྦྱར་བྱུག །མེ་གཟའ་ག་བུར་གྲང་གཟའ་དྲོད་སྨན་བསྣན། །རྐང་ལག་རེངས་འཁུམས་ལ་སོགས་འདི་ཡིས་གྲོལ། །སྦྱོང་བྱེད་རྙིངས་པ་ལུས་ལ་ཞེན་པ་ལ། །གང་བབས་ནད་གཞི་སྦྱར་ལ་རྩ་ལྟོས་སྦྱང་། །དྲང་སྲོང་སྲུང་བའི་དགེ་སྦྱོར་བྱེད་པ་ལ། །ཉེར་དགུ་ནས་བརྩམས་ཟླ་གཅིག་མཚམས་བཅད་ཅིང་། །ཐོ་རེངས་སྐྱབས་འགྲོ་སེམས་བསྐྱེད་སྔོན་བཏང་ནས། །རང་ཉིད་ཕྱག་ན་རྡོ་རྗེའི་བསྐྱེད་རིམ་བསྒོམ། །དེ་ཡི་བཟླས་པ་མྱུར་སྨད་བར་དུ་བྱ། །དེ་ནས་ནུབ་ཏུ་ཁ་བལྟས་ཐ་མལ་འདུག །མདུན་དུ་སྒྲ་གཅན་དུད་ཁ་མགོ་དགུ་པ། །སུམ་བསྒྲིགས་ཉིས་བརྩེགས་སྟེང་དུ་ཉིས་བསྒྲིགས་གཅིག །དེ་དབུས་བྱ་རོག་མགོ་མཚན་ལག་བཞི་པ། །དང་པོ་ཐལ་སྦྱར་གཡས་ཀྱི་གཉིས་པ་ན། །ཆུ་སྲིན་རྒྱལ་མཚན་ར་ཡི་མདའ་གཞུ་གཡོན། །ལུས་ཀུན་མིག་གིས་གང་བ་གསལ་བར་བསྒོམ། །རཱ་ཧུ་ལ་ཏྲིག་ནན་ཛཿ ཞེས་པས་ཡེ་ཤེས་སྤྱན་དྲངས་དགུག་གཞུག་བསྟིམ། །རང་གི་རྒྱབ་ཏུ་རུས་སྦལ་ཤིན་ཏུ་ཆེ། །དེའི་རྒྱབ་ཤིན་ཏུ་རྭ་རྣོའི་གླང་དམར་བསྒོམ། །དེ་ནས་རང་ཉིད་རཱ་ཧུ་ལ་ཡིས་མིད། །རཱ་ཧུ་ལ་ཡང་རུས་སྦལ་དག་གིས་མིད། །གླང་གིས་རུས་སྦལ་རཱ་ཧུ་ལ་བསད་ནས། །རང་སེམས་ཧཱུྃ་ཡིག་སྔོན་པོར་རྒྱངས་ཀྱིས་ཐོན། །དེ་ཉིད་གཟུང་འཛིན་བག་ཆགས་དང་བྲལ་བའི། །དོན་གྱི་ཕྱག་ན་རྡོ་རྗེ་ལེགས་པར་བསྒོམ། །ལྕང་ལོ་ཅན་ནས་སངས་རྒྱས་བྱང་སེམས་རྣམས། །ཕྱག་རྡོར་རྣམ་པ་དཔག་མེད་སྤྱན་དྲངས་བསྟིམ། །གནས་གསུམ་ཡི་གེ་གསུམ་གྱིས་མཚན་པ་ཡི། །ཐུགས་ཀར་ཧཱུྃ་མཐིང་སོར་བཞི་པ་ཡི་མཐར། །ༀ་ཉི་མ་ནན། ཟླ་བ་ནན། ཀླད་པ་ནན། སྙིང་མགོ་ནན། གཞི་རྩ་ལྟག་ཁུང་ང་ནན། ༀ་ཙི་ཏྲ་མན་ཏྲ་ཟློག །ནཱ་ག་ཤིག །ནཱ་ག་ཟློག །ནཱ་གའི་མགོ་ལ་ནན། བསྐོར་བར་དམིགས་ལ་སྲོད་པར་བརྒྱ་རྩ་བཟླ། །བཅོ་ལྔ་བར་དུ་བཅུ་ཕྲག་རེ་རེ་བསྣན། །དེ་(༢༦)ནས་ཉེར་དགུའི་བར་དུ་བཅུ་བཅུ་ཕྲི། །དེ་ལྟར་བྱས་པས་བསྐལ་པར་གནོད་མི་འགྱུར། །རྗེས་ལ་སྨོན་ལམ་ཤིས་བརྗོད་ལེགས་པར་བྱ། །༼སྲུང་བ་གཅིག་༽རང་ཉིད་སྒྲ་གཅན་དུད་ཁ་ཕྱག་གཉིས་པ། །མགོ་དགུ་བྱ་རོག་མགོ་བཅས་ལེགས་པར་བསྒོམ། །རཱ་ཧུ་ལ་རུ་དྲ་ཨ་མྲ྇་ཏ་ཏྲི་ཨ་ཡ་ཧཱུྃ་ཕཊ། ཅེས་པ་བརྒྱ་རྩ་ལ་སོགས་བཟླས་པའི་རྗེས། །དེ་ཞུ་ཐུགས་རྗེ་ཆེན་པོ་ཕྱག་བཞི་པར། །བསྒོམས་ལ་མ་ཎི་ཅི་ཙམ་ནུས་པ་བཟླ། །རྗེས་བསྔོ་འདིའང་སྲུང་བ་ཁྱད་པར་འཕགས། །ཡང་གཅིག་ལ། ཨ་ཀྲེ་ཀྵེ་བཾ་ཧཱུྃ། ཞེས་པ་ཐོ་རེངས་བརྒྱ་རྩ་བརྒྱད་བཟླས་ནས། །སྣ་བུག་ཕུ་ཡིས་བཏབ་པས་ངེས་པར་ཐུབ། །ཡང་ན་སྔགས་འདི་གསེར་གྱིས་བྲིས་བྱས་ལ། །རབ་གནས་བྱས་ནས་སྐེ་ལ་བཏགས་པས་ཐུབ། །གཟའ་ནད་སྲུང་བའི་མན་ངག་དམ་པ་ནི། །མུ་ནེ་ཀྱེ་དམེད་དྷ་ཕྱོ་ཛ་ལའི་བྷ་སྐྱོ་ཤར་ནི་དམན་བྲད་ནན་རྒྱུ། གྷོཿན་ལི་ཁ་སྟཾ་ཙ་ཀྲི་ཧོརྦྷ་རེ་ཨདྨན་སརྦ་ནེརྦ་ཛསྟརྩ་ར་ཀྲ་ཏེ་ཏིཾཿཤ་ཧཿ སྔགས་འདི་གསེར་གྱིས་ཚག་མེད་ལེགས་པར་བྲི། །རྟེན་འབྲེལ་སྙིང་པོ་རྒྱབ་བྲི་དེ་ཉིད་ཀྱིས། །རབ་གནས་བྱས་པ་མགུལ་དུ་བཏགས་པས་ཐུབ། །ཤོ་པ་ན་ཙ་ཁྲེ་དུ་ཁྲེ་དུ་ཕཊ། དུས་བཟང་བཞི་ལ་སྔགས་འདི་བརྒྱ་སྟོང་བཟླ། །མ་གྲུབ་བློ་ལ་བཟུང་བས་སྲུང་བའི་མཆོག །འདི་ཡི་ལོ་རྒྱུས་གཡུ་བྲག་པ་ཉིད་ལ། །དྲང་སྲོང་གནོད་པས་མཁས་ཟེར་ཀུན་ལ་གཏུགས། །ཕྱི་ནས་ཉང་སྟོད་སྣང་གཤེན་བོན་པོ་གཅིག །སྔགས་བཏགས་ཙམ་གྱིས་འཚོ་བར་འདུག་ཅེས་ཐོས། །གསེར་ཞོ་གང་དང་གོས་ཡུག་གཅིག་བསྐུར་ནས། །གདམས་པ་བླངས་པས་བོན་པོས་འདི་སྐད་བརྗོད། །ང་ཡི་འདི་ལ་གསེར་སྲང་རེ་ཡི་ཡོན། །མེད་པར་མི་སྦྱིན་བཀའ་རྒྱ་དམ་དུ་སྤྱོད། །ཁོ་བོས་ཨ་ཙ་ར་ལ་ཞུས་པ་ཡིན། །འདི་ལ་སྨན་དང་རྟེན་འབྲེལ་གཞན་མི་དགོས། །འདི་བཏགས་པ་ཡིས་མི་སེལ་གཅིག་ཀྱང་མེད། །དམ་པ་ཁྱེད་ལ་ཆད་ལྷག་མེད་པར་འབུལ། །བླ་མས་གསེར་གྱིས་བྲིས་ནས་བཏགས་པ་ཡིས། །ནད་རྣམས་རྡུལ་ཕྱིས་བཞིན་དུ་དག་པར་གྱུར། །༼ཡང་ལུགས་གཅིག་ལ།༽འཁོར་ལོ་འདོགས་ན་ཤོག་བུ་གཙང་མ་ལ། །རྩིབས་ལྔ་མུ་ཁྱུད་ཉིས་ལྡན་རྩིབས་ནང་དུ། །གཏུམ་པོ་ལི་བྲི་རྩིབས་ཀྱི་མཆན་རྣམས་ལ། །ཨ་ཡ་མ་ཏྲི་ཏུ་ཏི་ཤ་ན་ལ། །ཕྱི་ཡི་མུ་ཁྱུད་རྟེན་འབྲེལ་སྙིང་པོ་བྲི། །ནང་གི་ཨུ་ཁྱུད་ཉི་མ་ནན་སོགས་བྲི། །ལྟེ་བར་གང་ལ་གདགས་པའི་མིང་སྤེལ་༼རྐྱང་པ་༽གཞུག །གསེར་གྱིས་བྲིས་ལ་རབ་ནས་སྤྱི་འགྲོ་གདགས། །

མཚོ་སྐྱེས་ལ་སོགས་རྒྱ་བོད་མཁས་པས་འདི་གསོ་བ་དང་སྲུང་བའི་གདམས་པ་བྱས་ཟིན་མོད། །འོན་ཀྱང་འགའ་ཡིས་དར་གོས་བླུན་པོའི་རྐང་པར་དཀྲིས་ལྟར་ཉམས་པར་བྱས་པ་མ་བཟོད་ནས། །གསོ་དང་སྲུང་བའི་གདམས་པ་མཐའ་དག་དམ་པའི་སྙན་བརྒྱུད་ཞལ་ཤེས་མ་ལུས་རབ་བཀོད་པའི། །དགེ་བ་གང་དེས་འགྲོ་ཀུན་ཕྱི་ནང་སྒྲ་གཅན་གེགས་གྲོལ་སྐུ་གསུམ་མངོན་དུ་འགྱུར་བར་ཤོག། །།

གནོད་སྦྱིན་དམར་ནག་གི་སྐོང་གསོ་དགྲ་ལས་རྣམ་པར་རྒྱལ་བ།

༄༅། །གནོད་སྦྱིན་དམར་ནག་གི་སྐོང་གསོ་དགྲ་ལས་རྣམ་པར་རྒྱལ་བ་ཞེས་བྱ་བ་བཞུགས་སོ། །

༄༅། །ཧཱུྃ། འགྲུབ་པར་གྱུར་ཅིག་ཡོན་ཏན་རྫོགས་པའི་ལྷ། །ཟིལ་གནོན་པདྨའི་སྐུ་ལ་ཕྱག་འཚལ་ལོ། །གནོད་སྦྱིན་དམར་ནག་བསྟེན་པའི་གང་ཟག་གིས། །སྐོང་གསོའི་ཆོ་ག་ཇི་ལྟར་བྱ་བ་བཤད། །དེ་ལ་གནོད་སྦྱིན་གྱི་བཤོས་བུ་རྩེ་རྒྱལ་ལ། བཤོས་བུ་ཟུར་གསུམ་བཞི་དང་ཏེལ་ཁ་བཞིས་ཕྱོགས་མཚམས་བསྐོར་བའི་མཚམས་སུ་མཐེབ་སྐྱུ་དང་ཉ་བོས་བརྒྱན། དབུས་མའི་རྩེར་དགྲ་ཡི་ཉ་བོ་བཏིང་། ཡུགས་སའི་གཟུགས་ཤ་ཁྲག་གིས་བྲིས་པ་བཤམས་ལ། བདག་ཉིད་པདྨའི་ང་རྒྱལ་གྱིས་མཚམས་བཅད་པ་འདི་སྐད་དོ། །

ཧཱུྃ། བསྐལ་པའི་མེ་འོད་ཀློང་དཀྱིལ་ན། །ཐོད་མཁར་རིན་ཆེན་འབར་བས་བརྒྱན། །མཚོན་ཆ་སྣ་ཚོགས་སྐར་ལྟར་འཁྲུགས། །དེ་དབུས་ཉི་ཟླ་པདྨའི་སྟེང་། །རང་ཉིད་ཟིལ་གནོན་ཁྲོ་བོའི་སྐུ། །ཆེ་མཆོག་པདྨ་ཐོད་ཕྲེང་རྩལ། །ཞལ་གསུམ་ཕྱག་དྲུག་དབུས་ནག་པོ། །སྨུག་ནག་གཡས་དཀར་གཡོན་དམར་བ། །ཞལ་གདངས་མཆེ་གཙིགས་སྤྱན་གསུམ་བགྲད། །དབུ་སྐྲ་དམར་སེར་གྱེན་དུ་བརྫེས། །སྦྲུལ་དང་ཐོད་སྐམ་འབར་པར་བརྗིད། །ཕྱག་དྲུག་གཡས་གཡོན་དང་པོ་གཉིས། །རྡོ་རྗེ་ཐོད་དབྱུག་གདེངས་པ་སྟེ། །ཐ་མའི་གཡས་ན་ལྕགས་སྒྲོག་དང་། །གཡོན་ན་རྒྱུ་ཞགས་འདེབས་པའི་ཚུལ། །ཞབས་གཉིས་བརྐྱང་བསྐུམ་འདོར་སྟབས་ལ། །དཔལ་གྱི་ཆས་བརྒྱད་རྔམས་པས་བརྗིད། །ཧཱུྃ་དང་ཕཊ་ཀྱི་འཕྲོ་འདུ་ལས། །སྤྲུལ་པའི་ཁྲོ་ཆུང་གློག་ལྟར་འཁྱུགས། །ཁྲོ་བོའི་གསུང་སྒྲ་འབྲུག་སྟོང་སྒྲོགས། །ཡང་སྤྲུལ་གྲངས་མེད་སྤྲིན་ལྟར་འཁྲིགས། །ཕྱག་མཚན་མཚོན་ཆ་སྐར་ལྟར་འཁྲུགས། །བསྐལ་པའི་མེ་རི་འདུ་འཕྲོ་འབར། །སྟོང་ཁམས་ཐམས་ཅད་ཁྲོ་བོའི་ཞིང་། །ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེད་རྩལ་ཧཱུྃ་ཧཱུྃ་ཕཊ། ཉོན་ཅིག་བགེགས་དང་ལོག་འདྲེན་ཚོགས། །ང་ཡི་བཀའ་ལས་འདའ་མ་བྱེད། །དངོས་གྲུབ་བར་ཆད་བྱེད་པའི་བགེགས། །འདི་རུ་མ་འདུག་གཞན་དུ་དེངས། །ཅི་སྟེ་འགྲོ་བར་མི་བྱེད་པ། །སྟོབས་ཆེན་ཁྲོ་བོ་འབར་བ་ཡིས། །མགོ་བོ་ཚལ་པ་བརྒྱར་འགས་ཤིང་། །ལུས་ཀྱང་དུམ་བུ་སྟོང་དུ་གཏུབས། །ༀ་སུམྦྷ་ནི་སུམྦྷ་ཧཱུྃ། གྲ྇ཧྣ་གྲ྇ཧྣ་ཧཱུྃ། གྲ྇ཧྣ་པ་ཡ་གྲ྇ཧྣ་པ་ཡ་ཧཱུྃ། ཨཱ་ན་ཡ་ཧོ་བྷ་ག་ཝཱན་བིདྱ་རཱ་ཛ་ཡ་ཧཱཻུ་ཕཊཿ ཅེས་བརྗོད་པས་བར་དུ་གཅོད་པའི་འབྱུང་པོ་ཐམས་ཅད་རྒྱ་མཚོའི་མཐར་བྱེར་བར་བསམ་མོ། །

དེ་ནས་མདུན་དུ་གནོད་སྦྱིན་འཁོར་བཅས་གསལ་བར་བྱེད་པའམ། ཡོད་པར་མོས་པ་ཙམ་བྱས་ལ། སྤོས་དང་ཚིལ་ཆེན་གྱི་དུད་པ་དང་། རོལ་མོས་བྱིན་དབབ་ཅིང་སྙན་གསན་དྲངས་པ་ནི་འདི་སྐད་དོ། །ཨེ་ཧེ་རྨ་རུ་ཙེ་བྷྱོ་ས་མ་ཡ་ཛ་ཛཿ བྷྱོཿ གླིང་བཞི་སྲིད་པའི་ཕོ་བྲང་ནས། །ཕུང་བྱེད་དམར་ནག་གཤེགས་སུ་གསོལ། །སློབ་དཔོན་པདྨའི་སྤྱན་སྔ་རུ། །བསྟན་པ་བསྲུང་བར་ཞལ་བཞེས་པའི། །གནོད་སྦྱིན་ཆེན་པོ་(༢༨)གཤེགས་སུ་གསོལ། །མཐུ་རྩལ་རི་རབ་ཐལ་བར་རློག །རྫུ་འཕྲུལ་ནམ་མཁའི་མཐའ་དང་མཉམ། །སྐད་ཅིག་སྟོང་གསུམ་རྩིས་ལ་འདེབས། །སྲིད་གསུམ་གསལ་ཞིང་གློག་ལྟར་འགྱུ། །ཐོད་མཁར་རིན་ཆེན་འབར་བ་འདིར། །གནོད་སྤྱིན་ཆེན་པོ་ད་ཚུར་བྱོན། །ཨེ་བྷྱོ། དད་པ་དང་ནི་དམ་ཚིག་གིས། །གནོད་སྦྱིན་ཆེན་པོ་ཚུར་གཤེགས་ཤིག །དམར་མོ་མི་ཟན་ཚུར༴། །དམ་ཉམས་བཤན་པ༴། །གཟའ་བདུད་ཆེན་པོ༴། །གཏེར་བདག་ཆེན་པོ༴། །རྣལ་འབྱོར་དགྲ་ལྷ༴། །ཀྱཻ། གླིང་བཞིའི་རི་རབ་རྩེ་མོ་ནས། །གནོད་སྦྱིན་ཆེན་པོ་དྲག་རྩལ་ཅན། །ཆིབས་སུ་ཁྱུང་དམར་རླུང་གཤོག་བཅིབས། །སྐུ་ལ་དར་དམར་འཇོལ་བེར་གསོལ། །སྟག་རལ་གཡས་ལ་གཟིག་ཤུབ་གཡོན། །རྒྱབ་ཏུ་བསེ་ཡི་ཕུབ་དམར་ཁུར། །ཕྱག་གཡས་དར་མདུང་དགྲ་ལ་འདེབས། །གཡོན་པས་དགྲ་སྙིང་རྒྱུ་ཞགས་འཛིན། །བསེ་ཞྭ་བསེ་ཁྲབ་སི་ལི་ལི། །དམག་དཔོན་ཆེན་པོ་སྤྱན་འདྲེན་ནོ། །ཁྱོད་ཀྱི་བཀའ་ཉན་འཁོར་བརྒྱད་ནི། །ཤར་ཕྱོགས་རྒྱལ་པོ་སྟག་མགོ་ཅན། །ཆིབས་སུ་རྟ་དཀར་ཟེ་དམར་བཅིབས། །དར་དཀར་བེར་ཆེན་ཞུབ་ཆས་བརྒྱན། །སྟག་རལ་གཡས་ལ་གཟིག་ཤུབ་གཡོན། །གཡས་པས་མདུང་དཀར་གནམ་ལ་འཕྱར། །གཡོན་པས་སྙིང་དང་རྒྱུ་ཞགས་འཛིན། །རྒྱལ་པོ་ཆེན་པོ་སྤྱན་འདྲེན་ནོ། །ལྷོ་ཕྱོགས་གཤིན་རྗེ་གཟིག་མགོ་ཅན། །སྐུ་མདོག་དམར་ནག་འཇིགས་པའི་ཚུལ། །ཆིབས་སུ་རྟ་དམར་ཞུར་པོ་བཅིབས། །དར་དམར་འཇོལ་བེར་ཞུབ་ཆས་བརྒྱན། སྟག་རལ༴། །ཕྱག་གཡས་མདུང་དམར༴། །གཡོན་པས་སྙིང་དང་༴། །གཤིན་རྗེ་ཆེན་པོ༴། །ནུབ་ཕྱོགས་བཙན་རྗེ་དམ་མགོ་ཅན། །སྐུ་མདོག་སྔོན་པོ་འཇིགས་པའི་ཚུལ། །ཆིབས་སུ་རྟ་སྔོན་གློ་དཀར༴། །དར་སྔོན་བེར་ཆེན༴། །སྟག་རལ༴། །ཕྱག་གཡས༴། །ཕྱག་གཡོན་སྙིང་དང་༴། །བཙན་རྗེ་ཆེན་པོ་སྤྱན༴། །བྱང་ཕྱོགས་བདུད་ནག་འབྲོང་མགོ་ཅན། །སྐུ་མདོག་ནག་པོ་འཇིགས་པའི་ཚུལ། །ཆིབས་སུ་རྟ་ནག་རྟིང་དཀར༴། །དར་ནག༴། །སྟག་རལ༴། །ཕྱག་གཡས་མདུང་ནག༴། །གཡོན་པས་སྙིང་དང་༴། །བདུད་ནག་ཆེན་པོ་སྤྱན༴། །ཤར་ལྷོ་སྲིན་པོ་ནེ་ཙོའི་མགོ། །སྐུ་མདོག་དུད་ཁ༴། །ཆིབས་སུ་སྤྲིན་རྟ་ཁམ་པ་བཅིབས། །དར་སེར༴། །སྟག་རལ༴། །ཕྱག་གཡས་མདུང་ནག༴། །གཡོན་པས་སྙིང་དང་༴། །སྲིན་པོ་ཆེན་པོ་སྤྱན༴། །ལྷོ་ནུབ་ལྷ་མིན་རྨ་བྱའི་མགོ། །སྐུ་མདོག་ལྗང་ནག༴། །སྐུ་ལ་དར་བེར་ཁྲ་བོ་གསོལ། །ཆིབས་སུ་དྲིལ་རྟ་ཁ་དཀར༴། །ཕྱག་གཡས་མདུང་ནག༴། །གཡོན་པས་སྙིང་དང་༴། །ལྷ་མིན་ཆེན་པོ་སྤྱན༴། །ནུབ་བྱང་གཟའ་བདུད་ཤང་ཤང་མགོ། །སྐུ་མདོག་དུད་ཁ༴། །ཆིབས་སུ་རྟ་ནག་ཞུར་པོ༴། །དར་ནག་འཇོལ་བེར་ཞུབ་ཆས་བརྒྱན། །སྟག་རལ༴། །ཕྱག་གཡས་མདུང་ནག༴། །གཡོན་པས་སྙིང་དང་༴། །བྱང་ཤར་ཀླུ་བདུད་སེར་མིག་མགོ། །སྐུ་མདོག་མཐིང་ནག༴། །ཆིབས་སུ་བྲ་བོ་སྔོ་(༢༩)ནག༴། །དར་སེར་མཐིང་གའི་འཇོལ་བེར་གསོལ། །སྟག་རལ༴། །ཕྱག་གཡས་མདུང་སྔོན༴། །གཡོན་པས་སྙིང་དང་༴། །ཀླུ་བདུད་ཆེན་པོ༴། །དེ་དག་ཀུན་གྱི་བཀའ་ཉན་པ། །སྤྲུལ་པ་གནོད་སྦྱིན་འབུམ་གྱིས་བསྐོར། །ཡང་སྤྲུལ་བྱེ་བ་བསམ་མི་ཁྱབ། །འཁོར་བཅས་མ་ལུས་སྤྱན་འདྲེན་ནོ། །ལྷ་སྲིན་སྡེ་བརྒྱད་གནོད་སྦྱིན་ཚོགས། །དོན་ལ་གཤེགས་བཞུགས་མི་མངའ་ཡང་། །སངས་རྒྱས་བསྟན་པ་བསྲུང་སླད་དུ། །འཁོར་བཅས་མ་ལུས་སྤྱན་འདྲེན་ནོ། །ཨེ་ཧེ་རྨ་རུ་ཙེ་ས་མ་ཡ་ཛ་ཛཿ ཆུ་གཙང་སྨན་སྤོས་འོ་རྒྱུན་གྱིས། །ཕྱག་དང་ཞབས་གཉིས་བསིལ་མཛོད་ལ། །དུར་ཁྲོད་རོལ་པའི་དཀྱིལ་འཁོར་འདིར། །པདྨ་ཉི་ཟླའི་གདན་ལ་བཞུགས། །སངས་རྒྱས་བསྟན་པ་སྲུང་མཛད་ཅིང་། །གདུག་པའི་དགྲ་བགེགས་ཚར་གཅོད་པ། །གནོད་སྦྱིན་འཁོར་དང་བཅས་པ་ལ། །དད་པའི་ཡིད་ཀྱིས་ཕྱག་འཚལ་ལོ། །ཨེ་ཧེ་རྨ་རུ་ཙེ་པུ་རུ་ཛ་ཧོཿ ཞེས་དགྱེས་པར་གྱུར་པ་ལ།

མཆོད་པ་འབུལ་བ་ནི། ༀ་ཨཱཿཧཱུྃ་གིས་གཏོར་མ་དགྲ་བགེགས་ཀྱི་ཤ་ཁྲག་ལས་གྲུབ་པ། རི་དང་རྒྱ་མཚོར་མཉམ་པ། རཀྟ་དང་ཕྱི་ནང་མཆོད་པ་མང་པོར་དམིགས་ལ་འདི་སྐད་དོ། །ཨེ་ཧེ་རྨ་རུ་ཙེ་སརྦ་པཱུ་ཛ་མེ་གྷ་ས་མུ་དྲ་ཁཱ་ཧི། གནོད་སྦྱིན་ཆེན་པོ་འཁོར་དང་བཅས་པ་ལ། །ཕྱི་ནང་གསང་བའི་མཆོད་པ་རྒྱ་མཚོ་དང་། །དམ་ཉམས་བསྒྲལ་བའི་གཏོར་མ་དམར་ཆེན་འབུལ། །ཐུགས་དམ་གཉན་བསྐང་བཅོལ་བའི་ཕྲིན་ལས་མཛོད། །གླིང་བཞི་རི་རབ་འདོད་ཡོན་སྣ་ཚོགས་དང་། །གཟུགས་སྒྲ་དྲི་རོ་རེག་དང་མཆོད་པའི་ཚོགས། །རྩི་ཐོག་སྨན་སྣ་ཤིང་ཐོག་འབྲུ་བཅུད་སོགས། །སྤྱན་གཟིགས་ཞལ་ཟས་བདུད་རྩི་རོ་བརྒྱས་མཆོད། །དམ་ཉམས་དགྲ་བོ་བསྒྲལ་བ་ཡི། །ཤ་ཆེན་རཀྟ་ལ་སོགས་པ། །ཤ་སྣ་ཁྲག་སྣ་འབུམ་གྱིས་མཆོད། །གསོལ་ཞིག་རོལ་ཅིག་ཁ་རཾ་ཁཱ་ཧི། །བྷནྡྷ་རུས་པའི་ཚིལ་ཆེན་དང་། །རྩི་སྨན་འབྲུ་བཅུད་ཆང་གིས་མཆོད། །རོ་བརྒྱ་ལྡན་པའི་བ་ལིཾ་འདི། །གནོད་སྦྱིན་འཁོར་དང་བཅས་ལ་འབུལ། །སྨན་སྣ་སྟོང་དང་ཤ་སྣ་སྟོང་། །ཁྲག་སྣ་སྟོང་དང་ཛ་གད་ཕུད། །ཆུ་སྣ་སྟོང་དང་སྙིང་སྣ་འབུམ། །གནོད་སྦྱིན༴། །གོ་རོ་ཙ་ན་བ་སུ་ཏ། །དགྲ་བོའི་བླ་ཚེ་སྲོག་དང་དབུགས། །དོན་སྙིང་ནང་རོལ་དབང་པོ་ལྔ། །གནོད་སྦྱིན་འཁོར༴། །

འབྲུ་སྣ་རིན་ཆེན་དར་ཟབ་ལྔ། །གནོད་སྦྱིན༴། །གདུགས་དང་རྒྱལ་མཚན་བླ་བྲེ་འཕན། །ནམ་མཁའ་དར་གྱི་མཆོད་པ་ཀུན། །གནོད་སྦྱིན༴། །སེང་གེ་རྟ་དང་གླང་ཆེན་ཁྱུང་། །གཟིག་དང་མ་ཧེ་ལ་སོགས་པ། །བྱོལ་སོང་རྣམ་པ་སྣ་ཚོགས་དང་། །གསེར་དངུལ་ཟངས་ལྕགས་ལ་སོགས་པ། །སྤྱན་གཟིགས་རྣམ་པ་སྣ་ཚོགས་དང་། །བཟའ་བཏུང་ཚོགས་ཀྱི་མཆོད་ཆེན་རྣམས། །གནོད་སྦྱིན༴། །གསོལ་ཞིག་རོལ་ཅིག་ཁ་རཾ་ཁཱ་ཧི། །བཅོལ་པའི་ཕྲིན་ལས་གྲུབ་པར་མཛོད། །བདག་དང་སློབ་མར་བཅས་པ་ཡི། །འདོདཔ་སྒྲུབས་ལ་བར་ཆད་སོལ། །ཨེ་ཧེ་རྨ་རུ་ཙེ་པཱུ་ཛ་ལ་ཁཱ་ཧི། ཞེས་མཆོད་ནས་སྐོང་བཤགས་བྱ་བ་ནི། ཧཱུྃ། བདག་ནི་རིག་(༣༠)འཛིན་སྒྲུབ་པ་པོ། །བདག་ནི་རྣལ་འབྱོར་ཐུགས་དམ་ཅན། །དམ་ལ་གནས་ཤིང་ལྷ་ལ་ཕྲེང་། །ཁྱོད་ནི་སྲུང་མ་ཐུགས་དམ་ཅན། །བསྒྲུབ་ཕྱིར་བསྐུལ་ཕྱིར་གཤེགས་སུ་གསོལ། །གནོད་སྦྱིན་འཁོར་བཅས་གནས་འདིར་བྱོན། །བོས་སོ་གནོད་སྦྱིན་སྙན་མ་སྲ། །གཡབ་བོ་གནོད་སྦྱིན་སྤྱན་མ་རྟུལ། །བརྟེན་ནོ་གཏེར་བདག་རྒྱང་མ་རིང་། །བསྒྲུབ་པོ་ཆོས་སྐྱོང་གོང་མ་གཡེལ། །བསྐུལ་ལོ་གནོད་སྦྱིན་ཕྲག་མ་དོག །རྦད་དོ་གཟའ་བདུད་མཐུ་མ་ཆུང་། །དོ་ནུབ་དམ་བསྐང་གནས་འདིར་བྱོན། །དོ་ནུབ་ཆད་དང་ཁྲིམས་ལ་བྱོན། །དོ་ནུབ་མནའ་དང་ཐོ་ལ་བྱོན། །དོ་ནུབ་གྲོགས་བྱ་གཞུང་མ་ངན། །མཛའ་བོར་བྱས་སོ་ཁྲེལ་མ་ཤོར། །མནའ་ཐོ་བཅད་དོ་མནའ་མ་ཟ། །ཇོ་བོར་བྱས་སོ་དབང་མ་ཆེ། །བྲན་ལྟར་བསྐུལ་ལོ་རྒྱུད་མ་ཞན། །དམ་ཚིག་གཉན་ལ་མི་སེམས་ཀྱང་། །དང་པོའི་ཆད་ལ་འདི་མིན་ནམ། །དམ་ཚིག་བཙལ་བར་མ་ཆད་དམ། །བསྟན་པ་སྲུང་བར་མ་བྱས་སམ། །དམ་ལས་མ་གཡེལ་ད་ཚུར་བྱོན། །བཅོལ་བའི་ལས་འདི་མ་བྱས་ན། །བདེ་གཤེགས་རྒྱལ་བའི་བཀའ་ཡང་བསླུས། །རྣལ་འབྱོར་བདག་ཀྱང་ཡི་རེ་ཆད། །དང་པོའི་ཆད་པའི་མནའ་ཟོས་ན། །དམ་ཚིག་གཉན་པོའི་ཆད་པ་འོང་། །བཀའ་ཡི་དམོད་པས་བསྡིག་པར་མཆིས། །དེ་བས་དམ་ལ་མ་འདའ་ཞིག །ཐུགས་དམ་གཉན་པོ་ད་བསྐང་ངོ་། །བདག་ཀྱང་དམ་ལ་འདའ་རེ་ཀན། །ཁྱོད་ཀྱང་དམ་ལ་མ་འདའ་ཞིག །གཉིས་ཀ་དམ་ལས་མི་འདའ་འཚལ། །

ཀྱེ། ཉོན་ཅིག་གནོད་སྦྱིན་འཁོར་དང་བཅས། །རྒྱལ་བའི་བཀའ་ལ་མི་བདེན་མེད། །མནའ་དང་ཁྲིམས་ལ་མི་བརྟེན་མེད། །ཟས་དང་སྐོམ་ལ་མི་ཆགས་མེད། །དོ་ནུབ་ཁྱེད་ཀྱི་ཐུགས་དམ་བསྐང་། །དོ་ནུབ་ཉམས་ཆག་མ་ལུས་གསོ། །དོ་ནུབ་ཞིག་རལ་མ་ལུས་གསོ། །དོ་ནུབ་ལྷ་ལ་བཤགས་པ་བགྱིད། །དོ་ནུབ་ལྷ་ལ་སེམས་འཁོན་སྦྱང་། །དོ་ནུབ་མཉེས་པའི་གསོལ་ཟས་འབུལ། །དོ་ནུབ་མཛའ་བོ་གཞུང་ཞིག་བྱེད། །དོ་ནུབ་བྱམས་ལ་ལན་ཞིག་སྦྱིན། །དོ་ནུབ་ཕྱི་མའི་ཞུ་སྐྱེམས་འབུལ། །བསྐང་ངོ་ཁྱེད་ཀྱི་ཐུགས་དམ་བསྐང་། །བརྟེན་པའི་དམ་རྫས་ཡིན་པའི་ཕྱིར། །བྱ་རྒོད་གཡབ་དར་ཐུགས་དམ་བསྐང་། །དམ་ཚིག་གཉན་པོ་བསྲེ་བའི་ཕྱིར། །བདུད་རྩི་སྨན་གྱིས༴། །ལྗགས་ཀྱི་དབང་པོ་ཚིམ་བྱའི་ཕྱིར། །བཟའ་བཏུང་སྣ་ཚོགས༴། །དགྱེས་པའི་དམ་རྫས་ཡིན༴། །ཁྱི་དམར་སྙིང་གིས༴། །རཀྟ་སྐོམ་དུ་བཏུང་བའི་ཕྱིར། །དམར་ཆེན་ཨརྒྷས་ཐུགས་དམ་བསྐང་། །ཚིལ་ཆེན་དྲི་ཡི་བསྣོམ་པའི་ཕྱིར། །གསུར་ཆེན་དུད་པས༴། །རྟག་ཏུ་མི་འབྲལ་འགྲོགས་པའི་ཕྱིར། །བརྡ་བསྟོད་རྟེན་གཏོར༴། །གཏན་དུ་ཕྲིན་ལས་བཅོལ་བའི་ཕྱིར། །རྒྱུན་གྱི་གཏོར་མས་ཐུགས༴། །རྟག་ཏུ་ཕྲིན་ལས་མཛད་པའི་ཕྱིར། །ཚོགས་ཀྱི་མཆོད་པས༴། །གདུག་པའི་དགྲ་བགེགས་བསྒྲལ་བའི༴། །མཐུན་པའི་རྫས་ཀྱིས༴། །དམག་དཔུང་རུ་མཚོན་འགྱེད་པའི༴། །སྤྲུལ་(༣༡)པ་འབུམ་གྱི་ཐུགས༴། །བསྐང་ངོ་བསྐལ་པར་ཐུགས་དམ་བསྐང་། །དོ་ནུབ་ལྷ་ལ་མཐོལ་བཤགས་སོ། །ཚོར་བར་བདག་གིས་མ་ཉམས་ཀྱང་། །མ་ཚོར་ཐུགས་དང་འགལ་སྲིད་ཀུན། །མཐོལ་ལོ་བཤགས་སོ་ཐུགས་དམ་བསྐང་། །བསྐང་བར་གྱུར་ཅིག་ལྷ་ཡི་ཚོགས། །སྒྲུབ་ལ་བར་ཆད་གྱུར་པ་དང་། །དམ་རྫས་མ་ཚང་ལྷ་ལ་གསོལ། །བསྙེན་སྒྲུབ་གཡེལ་དང་ཚོགས་གཏོར་ཞན། །དམ་རྫས་མཐོང་དང་གསང་ཚིག་སྨྲས། །ཉམས་ཆག་གྱུར་པ་ཅི་མཆིས་པ། །དོ་ནུབ་བསྐང་ཞིང་བཤགས་པར་བགྱི། །ཐུགས་དམ་བསྐངས་ནས་དངོས་གྲུབ་སྩོལ། །དམ་ཚིག་ཉམས་པ་ཐམས་ཅད་བཤགས། །བར་ཆད་རྐྱེན་རྣམས་བསྲུང་དུ་གསོལ། །བདག་ཅག་འཁོར་དང་བཅས་པ་ཡི། །ནད་གདོན་མི་མཐུན་རྐྱེན་རྣམས་ཟློག །ཚེ་དང་དཔལ་འབྱོར་རྒྱས་པ་དང་། །ཕྲིན་ལས་རྣམ་བཞི་འགྲུབ་པར་མཛོད། །བསམ་པ་ཐམས་ཅད་སྒྲུབ་པ་དང་། །རེ་བ་ཐམས་ཅད་བསྐང་དུ་གསོལ། །ཞེས་བརྗོད་ནས།

མངའ་གསོལ་བ། ཧོཿ སྒྲོལ་གིང་ཆེན་པོ་ཤན་པ་དམར་ནག །ཞལ་གཅིག་ཕྱག་བཞི་ཁྱུང་དམར་བཅིབས་པ། གཡས་གཉིས་རལ་གྲི་གྲི་གུག་འཕྱར་བ། གཡོན་གཉིས་སྙིང་ཞགས་བྷནྡྷ་འཛིན་པ། ཞིང་ལྤགས་རློན་པའི་སྟོད་གཡོགས་གསོལ་བ། སྟག་ཤམ་སྐུའི་སྣམ་ཕྱེད་དཀྲིས་པ། ཐལ་ཆེན་ཞག་གི་ཐིག་ལེས་བརྒྱན་པ། བཀའ་བློན་ལྷ་སྲིན་སྡེ་བརྒྱད་བཅས་པ། ཤ་ཟ་སྟོང་གི་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །དགྱེས་པ་ཞལ་སྟོན་ཞིག །དཔལ་གྱི་མདངས་སྐྱེད་ཅིག །བཅོལ་བའི་ཕྲིན་ལས་མཛོད་ཅིག །སྒྲུབ་པའི་རྟགས་ཕྱུངས་ཤིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཅེས་བརྗོད་དོ། །

བསྒྲུབས་ནས་བསྟོད་བསྐུལ་བྱ་བ་ནི། ཨེ་ཧེ་རྨ་རུ་ཙེ་བྷྱོཿ གླིང་བཞི་སྲིད་པའི་ཕོ་བྲང་ནས། །ཕུང་བྱེད་དམར་ནག་སྐུ་བསྐྱོད་ལ། །གནོད་སྦྱིན་ཆེན་པོ་འཁོར་དང་བཅས། །འཇིགས་པའི་གཟུགས་ཅན་ཅིར་ཡང་སྤྲུལ། །སྣ་ཚོགས་སྤྲུལ་པའི་ཆིབས་ལ་ཞོན། །རྦད་པ་ཙམ་གྱིས་དགྲ་བོ་སྒྲོལ། །བསམ་པ་ཙམ་གྱིས་སྐྱེ་འགྲོ་འཆིང་། །དམིགས་པ་ཙམ་གྱིས་དགྲ་བོ་སྒྲོལ། །དམ་ཉམས་སྲོག་རྩ་རྨང་ནས་འབྱིན། །དམ་ཉམས་སྙིང་ཁྲག་ཐང་ལ་འབོ། །ལོངས་སྤྱོད་ཤ་དང་ཁྲག་ལ་བྱེད། །རྟ་རོ་མི་རོའི་གདན་ལ་བཞུགས། །མི་ལྤགས་རྟ་ལྤགས་ཡོལ་བ་བྲེས། །ཐོད་མཁར་རིན་ཆེན་འབར་བས་བརྒྱན། །གནོད་སྦྱིན་འཁོར་བཅས་སྐུ་བསྐྱོད་ཅིག །ཤ་ཁྲག་དམར་གྱི་གཏོར་མ་འདི་གསོལ་ལ། །དམ་ཉམས་དགྲ་བོ་མྱུར་ཏུ་སྒྲོལ་ལ་ཤོག །སྔོན་གྱི་ཁས་བླངས་དམ་བཅས་མ་འདའ་བར། །རྣལ་འབྱོར་བཅོལ་བའི་ཕྲིན་ལས་མྱུར་དུ་སྒྲུབས། །བདག་ལ་སྡང་སེམས་ལྡན་པའི་དགྲ་བོ་འདིས། །དཀོན་མཆོག་གསུམ་གྱི་བསྟན་པ་གཉན་པོ་བཤིག །ལྷ་སྲིན་སྡེ་བརྒྱད་གནོད་སྦྱིན་ཁྱེད་དང་བསྡོས། །མཐུ་དང་ནུས་པ་རྫུ་འཕྲུལ་མེད་ཅེས་ཟེར། །དམ་ཉམས་དགྲ་བོ་(༣༢)གནས་ནས་མ་བསྒྲལ་ན། །གནོད་སྦྱིན་ཁྱོད་ཀྱི་མཐུ་རྩལ་རྫུན་དུ་ཆེ། །པདྨའི་བཀའ་བཅག་དམ་ཚིག་ཆད་པ་འོང་། །སྡང་བའི་དགྲ་འདིས་ཁྱོད་ལ་ཕོད་བཙུགས་ཤིང་། །ཁྱོད་ཀྱི་སྲོག་དང་ཕོ་བྲང་གནས་ཁང་དང་། །མཐུ་དང་ནུས་པ་རྫུ་འཕྲུལ་འཕྲོག་གོ་ཟེར། །གནོད་སྦྱིན་ཁྱོད་ལ་མཐུ་སྟོབས་ཡོད་དམ་མེད། །ཡོད་ན་དུས་བབས་ད་ལྟ་དགྲ་བོ་སྒྲོལ། །མེད་ན་རྣལ་འབྱོར་བདག་གི་ཡི་ཡང་ཆད། །གསོལ་མཆོད་ཡུན་དུ་བསྒྲུབས་པ་དོན་རེ་ཆུང་། །བློ་གཏད་སྒྲུབ་པ་བྱས་པ་ཁྱོད་ཀྱིས་བསླུས། །དུས་ལ་བབ་པོ་ཕུང་བྱེད་ལས་མཁན་རྣམས། །ནམ་གྱི་གུང་སྨད་དམ་ཉམས་དགྲ་བོ་འདིའི། །བླ་འཁྱམས་ད་ལྟ་ཉིད་དུ་ཁྲིད་ལ་ཤོག །ཕུང་བྱེད་དམར་ནག་ཐུགས་དམ་དུས་ལ་བབས། །ཁྲག་སྐྱུགས་གློ་བུར་ནད་ཀྱིས་སོད་ལ་ཤོག །རཀྟ་དམར་གྱི་བདུད་རྩི་འདི་གསོལ་ལ། །དམ་ཉམས་དགྲ་བོ་ད་ལྟ་སྒྲོལ་ལ་ཤོག །བ་ལིཾ་རྒྱན་གྱི་གཏོར་མ་འདི་བཞེས་ལ། །གདུག་པའི་དགྲ་བགེགས་ད་ལྟ་སྒྲོལ་ལ་ཤོག །ཕུང་བྱེད་དམར་ནག་ཐུགས་དམ་དུས་ལ་བབས། །ལྷ་སྲིན་སྡེ་བརྒྱད་དམག་དཔོན་དགྲ་ལ་བྱོས། །དམ་ཉམས་ཤ་ཁྲག་ཙིཏྟ་དམར་ལ་ཁཱ་ཧི། ཞེས་བསྐུལ་ཐལ་མོ་རྡེབ། རཀྟ་སྦྲན། ཤིན་ཏུ་དོ་གལ་ཆེ་ན་དེའི་གཤམ་དུ་རྦད་བསྐུལ་བྱ་བ་ནི།

བྷྱོཿ སྔོན་གྱི་བསྐལ་པ་དང་པོ་ལ། །ཧེ་ཆེན་དྷ་ནའི་དུར་ཁྲོད་དུ། །བསད་ཁྲག་རྦ་ཀློང་དཀྱིལ་འཁོར་ན། །གནོད་སྦྱིན་ཡཀྴ་འབར་བྱེད་དང་། །སྲིན་མོ་དམར་ཤམ་གཉིས་ཀྱི་བུ། །ཕུང་བྱེད་དམར་ནག་མཐུ་རྩལ་ཅན། །ཡང་ལེ་ཤོད་ཀྱི་བྲག་ཕུག་ཏུ། །སློབ་དཔོན་པདྨའི་སྤྱན་སྔ་རུ། །མདོངས་གསོལ་སྲོག་གི་སྙིང་པོ་ཕུལ། །ལྔ་བརྒྱ་དུས་ཀྱི་སྙིགས་མ་ལ། །བསྟན་པ་བསྲུང་བར་ཞལ་བཞེས་པ། །ཁས་བླངས་དམ་ཅན་ད་རྒྱུག་ཅིག །སྔགས་འཆང་རྣལ་འབྱོར་སྒྲུབ་མཆོག་བདག །བྱང་ཆུབ་བསྒྲུབ་ཏུ་མ་སྟེར་རོ། །བདག་ལ་སྡང་བྱེད་དགྲ་བོ་འདིས། །བླ་མ་དམ་པའི་སྐུ་ལ་བསྡོས། །མཆེད་ལྕམ་རྣམས་ལ་གནོད་ཅིང་འཚེ། །རྡོ་རྗེ་རྒྱལ་པོ་རྨང་དུ་ཕབ། །ཆོས་འཁོར་འཇིག་ཅིང་རྒྱལ་ཁམས་ཕུང་། །དབེན་གནས་གཉན་པོ་འདི་ཡིས་བཤིག །ཆོས་སྲུང་སྒོམ་སྒྲུབ་བར་ཆད་བྱས། །སྡིག་ཅན་ཆོས་ལ་དམོད་པ་འདིའི། །སྙིང་རྩ་ཕྱུངས་ལ་སྲོག་རྩ་ཆོད། །ལྟས་ངན་ཕུང་ཁྲོལ་སྣ་ཚོགས་ཐོངས། །མྱུར་དུ་ཐལ་བའི་རྡུལ་དུ་རློག །

བྷྱོཿ གནོད་སྦྱིན་ཆེན་པོའི་དུས་ལ་བབས། །དམ་ཉམས་གདུག་པའི་དགྲ་བོ་ལ། །ཆོ་འཕྲུལ་བཏང་བའི་དུས་ལ་བབས། །བསྟན་པ་འཇིག་པའི་དགྲ་བོ་ལ། །འོད་དང་མེ་སྟག་རྡོ་ཆར་ཕོབ། །ཝ་བརྒྱལ་སྤྲེའུ་སྨྱོ་འབོག་ཐོངས། །མེ་འོད་གཅེར་བུ་གྲི་ཐོགས་ཐོངས། །འཚུབས་ནག་མེ་དཔུང་རླུང་དམར་ཐོངས། །དངངས་སྐྲག་གློ་སྙིང་འབྲུབ་ཏུ་ཆུག །སྲིན་བྱ་འུག་པ་འཁུན་དུ་ཆུག །ལྕེ་སྤྱང་དུར་བྱ་འཁྲུལ་དུ་ཆུག །སྐྲ་འཐེན་ཐོག་རྡུངས་མིང་ནས་བོས། །ཐོག་རྡིབ་རྟ་ཕུང་(༣༣)སྒོ་ཁྱི་སོད། །དུས་ལ་བབ་པོ་ས་མ་ཡ། །

བྷྱོ། ཧེ་ཆེན་ཁྲག་གི་དུར་ཁྲོད་ནས། །གནོད་སྦྱིན་ཆེན་པོ་སྐུ་བསྐྱོད་ཅིག །བཤན་པ་དམར་པོ་དམ་ལ་བྱོན། །ཆིབས་སུ་ཟངས་ཀྱི་ཁྱུང་དམར་བཅིབས། །ཁྱུང་དམར་གནམ་ལྕགས་མཆུ་སྡེར་ཅན། །དགྲ་བོའི་ནང་ཁྲོལ་ཕྱུང་ལ་ཤོག །དགྲ་བོའི་ཤ་ཟོ་ཁྲག་ལ་འཐུང་། །འདབ་གཤོག་ཟངས་དཀར་སྤུ་གྲི་ཡིས། །དམ་ཉམས་དགྲ་བོའི་མགོ་ལུས་གཏུབས། །གནོད་སྦྱིན་ཆེན་པོ་འཇིགས་པའི་གཟུགས། །དམར་ནག་ཁྲག་གི་རལ་པ་ཅན། །ཞལ་གཅིག་ཕྱག་བཞི་ཁྲོས་པའི་སྐུ། །གཡས་ཀྱི་དང་པོ་རལ་གྲི་ཡིས། །སྡང་བྱེད་དགྲ་བོ་སྲོག་རྩ་ཆོད། །འོག་མ་གྲི་གུག་དགྲ་སྙིང་འབྱིན། །གཡོན་པས་སྙིང་དང་རྒྱུ་ཞགས་བསྣམས། །དགྲ་མཆིན་དགྲ་སྙིང་ཞལ་དུ་གསོལ། །འོག་མ་ཐོད་ཁྲག་བྷནྡྷ་འཛིན། །དགྲ་བོའི་སྙིང་ཁྲག་ཞལ་དུ་གསོལ། །ཞིང་ལྤགས་རློན་པ་སྟོད་ལ་གསོལ། །སྟག་ཤམ་སྐུ་ཡི་སྣམ་ཕྱེད་དཀྲིས། །ཐལ་ཆེན་ཁྲག་གི་ཐིག་ལེས་བརྒྱན། །སྐུ་ལས་མེ་འབར་མཚོན་ཆ་ཡིས། །དམ་ཉམས་གདུག་པའི་དགྲ་ལ་འདེབས། །ལྗགས་ནི་གློག་ལྟར་འཁྱུགས་པ་ཡིས། །དགྲ་ཡི་སྙིང་ཆུ་ཧུབ་ཀྱིས་འདེབས། །མཆེ་བ་ཟུང་གསུམ་གཙིགས་པ་ཡིས། །དམ་ཉམས་དགྲ་བོའི་ཤ་ལ་གསོལ། །ཞལ་གདངས་དུག་རླངས་ང་རོ་ཡིས། །དམ་ཉམས་དགྲ་ལ་ནད་ཡམས་ཕོབ། །ཁྲོ་གཉེར་རལ་པ་སྤུངས་པ་ཡིས། །དམ་ཉམས་དགྲ་ལ་གཟེར་ནད་ཕོབ། །གནོད་སྦྱིན་སྲིན་པོ་མ་རུངས་པ། །ཤ་ཟ་ཁྲག་འཐུང་སྟོང་གིས་བསྐོར། །ལྷ་སྲིན་སྡེ་བརྒྱད་དམག་དཔུང་བཅས། །ཞུབ་ཆེན་བསོ་སྒྲ་དི་རི་རི། །མཚོན་ཆ་སྣ་ཚོགས་ཤ་ར་ར། །ཁྲག་གི་བུ་ཡུག་སི་ལི་ལི། །དུར་ཁྲོད་ལྕེ་སྤྱང་འདུ་རུ་རུ། །དུར་བྱ་ཁྭ་ཏ་ཁྲོ་ལོ་ལོ། །བདུད་བྱ་ཁ་ཅང་ཙེ་རེ་རེ། །དུར་ཁྲོད་འདྲེ་མོ་མང་པོ་ཡིས། །ངུ་འབོད་གཡབ་མོ་ལིངས་སེ་ལིང་། །མེ་ལོང་མཚོན་ཆ་སི་ལི་ལི། །དུག་ནད་རླངས་པ་བུན་ནེ་ནེ། །གཅེར་བུ་མཚོན་ཐོགས་ཡེ་རེ་རེ། །འཚུབས་མ་འབྲུག་སྒྲ་དི་རི་རི། །གནམ་ལྕགས་ཐོག་འབེབས་ལམས་སེ་ལམ། །དུས་ལ་བབ་པོ་ས་མ་ཡ། །གནོད་སྦྱིན་ཤན་པ་འཁོར་བཅས་རྣམས། །བོས་པའི་ཚེ་ན་སྙན་མ་སྲ། །རྦད་པ་ཚེ་ན་མཐུ་མ་ཆུང་། །བརྟེན་པའི་ཚེ་ན་རྒྱང་མ་རིང་། །བསྒྲུབ་པའི་ཚེ་ན་སྒྲུབ་མ་དཀའ། །གཡབ་པའི་ཚེ་ན་སྤྱན་མ་བརྟུལ། །གསོད་པའི་ཚེ་ན་ངང་མ་རིང་། །རྦད་ཀྱང་ཕྲིན་ལས་མི་བྱེད་ན། །དམ་ཚིག་ཉམས་པར་མི་འགྱུར་རམ། །ད་རུང་དགྲ་བོ་མི་གསོད་ན། །གནོད་སྦྱིན་ཁྱོད་ལ་ཅི་བྱུང་ཀྱེ། །ད་ལྟ་ཉིད་དུ་སོད་ལ་ཤོག །ཤ་ཟོ་ཁྲག་འཐུང་སྙིང་རྩ་ཕྱུངས། །བླ་སྲོག་ཆོད་ལ་དུས་མཐའ་བསྟུང་། །གློ་བུར་ཁྲག་སྐྱུགས་གྲི་རུ་སོད། །གནོད་སྦྱིན་ཆེན་པོ་དྲག་རྩལ་ཅན། །མཐུ་རྩལ་ཤིན་ཏུ་ཆེ་ཡོ་སྐད། །དོ་ནུབ་ནུབ་གཅིག་ཚུན་ཆོད་ལ། །དམ་ཉམས་དགྲ་བོ་མ་བསད་ན། །ཁྱོད་ཀྱི་མཐུ་རྩལ་མི་བདེན་གྱི། །(༣༤)ད་ལྟ་ཉིད་དུ་སོད་ལ་ཤོག །ཤ་ཟོ་ཁྲག་འཐུང་སྙིང་རྩ་ཕྱུངས། །བསད་རྟགས་དོན་སྙིང་ཁྱེར་ལ་ཤོག །གནོད་སྦྱིན་ཆེན་པོ་ད་རྒྱུག་ཅིག །ལས་མཁན་ཆེན་པོ༴། །ཕུང་བྱེད་དམར་ནག༴། །ཤན་པ་དམར་ནག༴། །གནོད་སྦྱིན་དམག་ཚོགས༴། །ལྷ་སྲིན་སྡེ་བརྒྱད༴། །དུར་ཁྲོད་ཤ་ཟ༴། །དགྲ་བོ་འཁོར་བཅས་སོད་ལ་ཤོག །དུར་ཁྲོད་འདྲེ་མོ་ད་རྒྱུག་ཅིག །ཕྱོས་ཕྱོས་དམ་ཉམས་དགྲ་ལ་ཕྱོས། །ཕུང་བྱེད་དམར་ནག་དགྲ་ལ་ཆོས། །དམ་ཉམས་དགྲ་བོའི་སྙིང་ལ་རོལ། །ཤར་ཕྱོགས་རྒྱལ་པོ་དགྲ་ལ་ཆོས། །དམ་ཉམས་དགྲ་ཡི་སྲོག་ལ་རོལ། །ལྷོ་ཕྱོགས་གཤིན་རྗེ་དགྲ༴། །དམ་ཉམས་དགྲ་ཡི་དབུགས་ལ༴། །ནུབ་ཕྱོགས་བཙན་རྗེ་དགྲ༴། །དམ་ཉམས་དགྲ་ཡི་ཤ་ལ༴། །བྱང་ཕྱོགས་བདུད་ནག་དགྲ་ལ༴། །དམ་ཉམས་དགྲ་ཡི་ཁྲག་ལ༴། །ཤར་ལྷོ་སྲིན་པོ༴། །དམ་ཉམས་དགྲ་ཡི་པགས་ལ༴། །ལྷོ་ནུབ་ལྷ་མིན་དགྲ་ལ༴། །དམ་ཉམས་དགྲ་ཡི་རུས་ལ༴། །ནུབ་བྱང་གཟའ་བདུད་དགྲ་ལ༴། །དམ་ཉམས་དགྲ་ཡི་བླ་ཚེ༴། །བྱང་ཤར་ཀླུ་བདུད་དགྲ་ལ༴། །དམ་ཉམས་དགྲ་ཡི་དོན་སྙིང་༴། །ཤ་ཟ་མང་པོ༴། །དམ་ཉམས་དགྲ་ཡི་འཁོར་ལ༴། །གནོད་སྦྱིན་མང་པོ༴། །དམ་ཉམས་དགྲ་ཡི་ཟས་ནོར་རོལ། །དུར་ཁྲོད་འདྲེ་མོ༴། །དམ་ཉམས་དགྲ་ཡི་སྡེ་དཔུང་རོལ། །བདག་ལ་བསྡོ་བའི་དགྲ་བོ་འདི། །སྐད་ཅིག་འདི་ལ་སོད་ལ་ཤོག །ཕོ་རྒྱུད་རྩད་ནས་ཆོད་ལ་ཤོག །མོ་རྒྱུད་མངལ་ནས་སྐོམ་ལ་ཤོག །འུར་འུར་ཆེམ་ཆེམ་དགྲལ་ཡ། །དགྲ་ཡི་ཡུལ་དུ་དམག་སྣ་དྲོངས། །ནད་ཀྱི་བུ་ཡུག་དགྲ་ལ་ཐོང་། །མཚོན་གྱི་གྲུ་གུ་དགྲ་ལ་རྐྱོངས། །ནང་འཁྲུག་དམེ་འཁྲུག་གྲི་འཐབ་ཐོང་། །ཕུང་བྱེད་ཁང་པ་དུས་འདིར་རྟིབས། །དལ་ཡམས་གནོད་པ་དགྲ་ལ་ཕོབ། །གཟེར་ནད་སྨྱོ་འབོག་དགྲ་ལ་ཕོབ། །ལྟས་ངན་བརྒྱད་ཅུ་རྩ་གཅིག་ཐོང་། །ཡེ་འདྲོག་སུམ་བརྒྱ་དྲུག་ཅུ་ཐོང་། །མིང་ཙམ་མེད་པར་བརླག་པར་གྱིས། །དུས་ལ་བབ་པོ་ས་མ་ཡ། །ཨེ་ཧེ་རྨ་རུ་ཙེ་བྷྱོ། གུ་ཎ་ཧྲི་ཏྲི་གྷྲཾ་བྷྱོ། ཤཾ་རཾ་བྷྱོ། ཕུ་རུ་ཛ་གྷྲིག །ཧ་ལ་འགྲན་ཏ་ཡ། གྱིན་ཏ་རྦད་སོད། སུ་རུ་སྙིང་ཙེ། ཨ་པ་ལཾ། མཱ་ར་ཡ་སོད། རང་རྒྱུད་སྲོག་ལ་རྒྱུག །ཤ་ལ་རྔམས། དབུགས་ལ་རྔུབས། ཁྲག་ལ་འཇིབས། ཙིག་ཙིག་སྲོག་མ་ཡཾ། ཆེ་གེའི་སྙིང་ལ་མཱ་ར་ཡ་རྦད། ཐུམ་རི་ལི་ལི། ཧེ་བ་ཧི་ས་སར་ཁ་ཧོ་ར་ཏཾ་ཤེད། ཟོན་ཟོན་མ་ལ་ཐུན་རྦད། ཅེས་ཞེ་སྡང་རང་ག་མས་རྦད་ཅིང་། གཏོར་མ་འཕང་། དུལ་མོ་བརྡུལ། ཐལ་མོ་བརྡབ། མདའ་དང་། རྡོ་དང་། ཁྲག་ཆུའི་ཟོར་ཀྱང་བསྔགས། དེས་འཕང་ཞིང་དགྲ་བོ་མི་ནོར་ཡུལ་ཁམས་དང་བཅས་ཐལ་བའི་རྡུལ་དུ་སོང་བར་བསམ་མོ། །དེ་ནས་གཏོར་གཞོང་སྦུབ་ལ། བཀྲ་ཤིས་རྒྱ་ཆེར་བརྗོད། ཚོགས་ཀྱི་འཁོར་ལོར་རོལ་པར་བྱའོ། །དེས་ནི་ལས་གང་ལ་ཡང་ཐོགས་པ་མེད་པར་འགྲུབ་བོ། །

དེ་ལྟར་གནོད་སྦྱིན་འཁོར་བཅས་སྐོང་བའི་ཐབས། །ལེགས་པར་བཀོད་ནས་མངོན་སྤྱོད་ཕྲིན་ལས་ཀྱིས། །སྡང་བྱེད་དགྲ་བོ་དུས་མཐའ་(༣༥)བསྟུང་གྱུར་ནས། །རང་གི་ཕྱོགས་རྣམས་རྣམ་པར་རྒྱལ་བར་ཤོག །ཚུལ་འདི་ཐེག་པ་མཆོག་གི་རྣལ་འབྱོར་པ། །སྣ་ཚོགས་རང་གྲོལ་དགོངས་ཀློང་ཡངས་པ་དེས། །སྒྲུབ་ཡིག་སོ་སོའི་གོ་རིམ་བསྡེབས་པ་བཞིན། །གངས་རི་ཐོད་དཀར་མགུལ་དུ་ལེགས་པར་བཀོད། །གནོད་སྦྱིན་དམར་ནག་གི་སྐོང་གསོའི་ཆོ་ག་དགྲ་ལས་རྣམ་པར་རྒྱལ་བ་ཞེས་བྱ་བ། གསང་སྔགས་མཆོག་གི་ལམ་ལ་སྦས་པའི་རྣལ་འབྱོར་པ་སྣ་ཚོགས་རང་གྲོལ་གྱིས་བསྡེབས་པ་རྫོགས་སོ།། །།

ཤན་པ་སྲོག་སྒྲུབ་ནག་མོའི་སྐོང་གསོའི་ཆོ་ག་རོ་ལངས་ཐལ་བྱེད་ཅེས་བྱ་བ།

༄༅། །ཤན་པ་སྲོག་སྒྲུབ་ནག་མོའི་སྐོང་གསོའི་ཆོ་ག་རོ་ལངས་ཐལ་བྱེད་ཅེས་བྱ་བ་བཞུགས་སོ། །

༄༅། །ཧཱུྃ། འགྲུབ་པར་གྱུར་ཅིག་ཚོགས་གཉིས་རྫོགས་པའི་གཙོ། །རང་བྱུང་པདྨ་རྒྱལ་ལ་ཕྱག་འཚལ་ལོ། །འཇིགས་བྱེད་ཆེན་མོ་རབ་ཏུ་དགྱེས་བྱའི་ཕྱིར། །སྐོང་གསོའི་རིམ་པ་ཇི་ལྟར་བྱ་བ་བཤད། །

དེ་ལ་མ་མོའི་དཔལ་གཏོར་མཐེབ་སྐྱུས་བསྐོར་བ་ཤ་ཁྲག་དམར་གྱིས་བརྒྱན་པ་བཤམས་ལ། ཚོགས་དང་སྤྱན་གཟིགས་དང་ཉ་བོ་ལ་སོགས་པ་དགོས་པ་རྣམས་བསགས་ཏེ། རང་ཉིད་པདྨའི་ང་རྒྱལ་གྱིས་མཚམས་བཅད་པ་ནི། ཧཱུྃ། བདག་ཉིད་དཔལ་གྱི་ཐུགས་ཀ་ནས། །སྤྲུལ་པའི་མེ་རི་མཚོན་ཆ་འབར། །ཁྲོ་བོའི་སྤྲུལ་པས་ནམ་མཁའ་ཁེངས། །ཕྱག་མཚན་མཚོན་ཆ་སྐར་ལྟར་འཁྲུག །རླུང་ཡང་རྒྱུ་བའི་སྐབས་མེད་ན། །བར་ཆད་བགེགས་རྣམས་སྨོས་ཅི་དགོས། །ཧཱུྃ་དང་ཕཊ་ཀྱི་འབྲུག་སྒྲ་ཡིས། །ནམ་མཁའི་དབྱིངས་ཀུན་གང་བར་གྱུར། །མེ་རི་མཚོན་ཆའི་ར་བའི་གུར། །རྡོ་རྗེའི་ར་བ་ཆེན་པོ་ལས། །སུ་ཡང་འདའ་བར་མ་བྱེད་ཅིག །ༀ་སུམྦྷ་ནི་སུམྦྷ་ཧཱུྃ། གྲ྇ཧྞ་གྲ྇ཧྞ་ཧཱུྃ། གྲ྇ཧྞ་པ་ཡ་གྲ྇ཧྞ་པ་ཡ་ཧཱུྃ། ཨ་ན་ཡ་ཧོ་བྷ་ག་ཝཱ་ནུ་བིདྱ་རཱ་ཛ་ཡ་ཧཱུྃ་ཕཊ། དེ་ནས་མདུན་གྱི་ནམ་མཁར་མ་མོ་འཁོར་དང་བཅས་པ་སྐད་ཅིག་གིས་བསྐྱེད་ལ།

སྤྱན་དྲངས་པ་ནི། ༀ་ཁྱི་ཁ་ལེ་ནག་མོ་ཏྲག་རཀྴ་ས་མ་ཡེ་ཛ་ཛཿ མ་མ་ཏྲག་རཀྴ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཧཱུྃ། བསྐལ་པའི་རླུང་ནག་འཚུབས་མའི་དཀྱིལ་འཁོར་ནས། །ལས་དང་ཡེ་ཤེས་ཚོགས་ཀྱི་རྗེ་མོ་ནི། །ཤ་ཟ་ཁྲག་འཐུང་དཔལ་གྱི་ཡུམ་ཆེན་རྣམས། །རུ་ལུའི་སྒྲ་སྐད་ནམ་མཁའི་འབྲུག་ལྟར་སྒྲོགས། །ལྷོ་སྤྲིན་འཐིབས་ཚུལ་སྐུ་མདོག་ནག་མོར་སྟོན། །གློག་ལྟར་འཁྱུགས་ཤིང་གང་ལའང་ཐོགས་པ་མེད། །དུས་བཞིར་ཉུལ་བྱེད་བསྟན་པའི་དམ་རྫས་བསྲུང་། །ཐུགས་ཀྱི་མ་མོ་སྲོག་སྒྲུབ་ནག་མོ་ནི། །ནམ་གྲུ་ཞིང་གི་རྡུལ་སྙེད་འཁོར་དང་བཅས། །གདུང་བས་སྤྱན་འདྲེན་གནས་འདིར་གཤེགས་སུ་གསོལ། །བཀའ་དང་བསྟན་པ་སྲུངས་ལ་གང་ཟག་སྐྱོངས། །འདོད་པའི་དོན་སྐོངས་ཕྲིན་ལས་རྫོགས་པར་མཛོད། །ༀ་བཛྲ་ས་མ་ཡ་གྷྲིག་ཛཿ

ཧཱུྃ། ནམ་མཁའི་དབྱིངས་ཀྱི་དཀྱིལ་འཁོར་ནས། །ཀུན་ཏུ་བཟང་མོའི་སྤྲུལ་པ་ལས། །སྲིད་པའི་མ་མོ་ཡལ་གམ་ཅན། །ཤན་པ་སྲོག་སྒྲུབ་ནག་མོ་སྟེ། །རལ་པ་(༣༦)གཡེངས་པས་ནམ་མཁའ་ཁྱབ། །རལ་པ་རེ་ལ་ཕུར་པ་རེ། །ཕུར་བུ་འཁྲོལ་བས་སྟོང་ཁམས་གཡོ། །ཆིབས་སུ་རླུང་ནག་འཚུབས་མ་བཅིབས། །ཕྱག་གཡས་སྙིང་རྩ་དམར་པོ་བསྣམས། །གཡོན་པས་ནད་ཀྱི་རྐྱལ་པ་སྟེ། །གཅེར་བུ་མི་ལྤགས་སྟོད་ལ་དཀྲིས། །ཞལ་གདངས་མཆེ་གཙིགས་སྤྱན་གསུམ་བགྲད། །ཤངས་ནས་རླུང་འཚུབས་བུ་ཡུག་འགྱེད། །བ་སྤུ་མེ་སྟག་མཚོན་ཆ་འཕྲོ། །མི་མགོ་རློན་པའི་དོ་ཤལ་ཅན། །གསོད་བྱེད་མ་མོ་གཤེགས་སུ་གསོལ། །གཡས་ན་གསོད་བྱེད་ཤ་ཟ་མ། །དམར་མོ་ཤ་ཟ་ལྕེ་སྤྱང་གདོང་། །རོ་ལ་ཞོན་ནས་ཤ་ལ་ཟ། །གཡས་གཡོན་ཞིང་དབྱུག་ཏི་ར་བསྣམས། །ཤ་ཟ་ཆེན་མོ་གཤེགས་སུ་གསོལ། །གཡོན་ན་ནག་མོ་ཝ་གདོང་མ། །ཕྱག་ན་གྲི་གུག་ཞགས་པ་བསྣམས། །དུར་བྱ་ཞོན་ནས་མཁའ་ལ་རྒྱུ། །ལས་མཁན་ཆེན་མོ་གཤེགས་སུ་གསོལ། །མདུན་ན་སྲོག་གཅོད་ཤ་ཟ་སྟོང་། །ནག་མོ་འུག་གདོང་གནམ་ལྕགས་སྡེར། །ཁྲག་གི་རལ་པ་ཤ་ར་ར། །དུར་ཕག་འཕར་བ་རྐང་རྡེབ་དང་། །སྟག་སྤྱང་དོམ་དྲེད་ལ་སོགས་ཞོན། །སྐད་ཅིག་སྟོང་གསུམ་ཉུལ་བྱེད་མ། །ཤ་ཟ་ནག་མོ་གཤེགས༴། །རྒྱབ་ན་ལས་བྱེད་མ་མོ་འབུམ། །སྐུ་མདོག་སྣ་ཚོགས་འཇིགས་པ་ལ། །ནད་དང་མཚོན་གྱི་གྲུ་གུ་རྐྱོངས། །ཐོག་དང་སེར་ཆེན་གློག་དམར་འགྱེད། །དྲེལ་རྟ་ཞོན་ནས་ཕྱོགས་བཅུར་རྒྱུག །ལས་ཀྱི་མ་མོ་གཤེགས༴། །གསོད་བྱེད་ཀུན་གྱི་བཀའ་ཉན་མོ། །བྱེ་བ་འབུམ་ཕྲག་མང་པོ་རྣམས། །ལ་ལས་ནད་ཀྱི་བུ་ཡུག་གཏོང་། །ལ་ལས་མཚོན་གྱི་བསྐལ་པ་གཏོང་། །ལ་ལས་དུས་ཀྱི་འཁྲུག་པ་གཏོང་། །ལ་ལས་མི་ནད་ཕྱུགས་ནད་གཏོང་། །ལ་ལས་ཞིང་ཆེན་རྒྱལ་མཚན་འཕྱར། །ལ་ལས་ཞིང་ཆུང་གླད་ལ་བསྐོར། །ལ་ལས་ཏི་ར་ཕྱོགས་བཅུར་འཕེན། །ལ་ལས་དུལ་མོ་ས་ལ་རྡེབ། །དེ་ལ་སོགས་ཏེ་བསམ་མི་ཁྱབ། །སྤྲུལ་པ་ཡང་སྤྲུལ་བཅས་པ་རྣམས། །སྐད་ཅིག་ཡུད་ཀྱིས་གཤེགས་སུ་གསོལ། །ༀ་ཁྱི་ཁ་ལེ་རཀྨོ་རཀྨོ་རུ་རུ་ཕེཾ་ས་མ་ཡ་ཛ་ཛཿ ཞེས་པས་ཐིབས་ཀྱིས་བྱོན་པར་བསམ་པ་ཀུན་དམ་ཚིག་པ་ལ་བརྟན་པར་བཞུགས་སུ་གསོལ་བ་ནི། ཧཱུྃ། ཆོས་ཀྱི་དབྱིངས་ལས་སྒྱུ་མའི་སྐུར་བཞེངས་པ། །དཔལ་ལྡན་སྲོག་སྒྲུབ་འཁོར་དང་བཅས་པ་རྣམས། །དུར་ཁྲོད་གསང་བ་མཆོག་གི་གནས་འདི་རུ། །དགྱེས་པའི་ཚུལ་གྱིས་བརྟན་པར་བཞུགས་སུ་གསོལ། །ༀ་རུ་རུ་ས་མ་ཡ་ཏིཥྛ་ལྷན། ཅེས་པས་བཞུགས་པར་བསམས་ལ།

དང་པོ་བརྡ་ཕྱག་འཚལ་བ་ནི། ཧཱུྃ། དབྱིངས་ཀྱི་ཡུམ་ཆེན་ཐུགས་ཀྱི་སྤྲུལ་པ་ནི། །འདོད་རྒུར་སྒྱུར་བའི་གཟུགས་ཅན་འཕྲུལ་མོ་ཆེ། །ཤན་པ་སྲོག་སྒྲུབ་འཁོར་དང་བཅས་པ་ལ། །སྒྲུབ་མཆོག་བདག་གིས་གུས་པས་ཕྱག་འཚལ་ལོ། །ༀ་ཁྱི་ཁ་ལེ་པྲ་ཏཱིཙྪ་ཧོཿ

དམ་བཅའ་བ་ནི། ཧཱུྃ། དཔལ་ལྡན་སྲོག་སྒྲུབ་ནམ་གྲུ་འཁོར་བཅས་རྣམས། །དམ་བཅའ་བདག་དང་མི་འབྲལ་རྟག་ཏུ་བརྟེན། །དེང་ནས་(༣༧)བཟུང་སྟེ་བྱང་ཆུབ་སྙིང་པོའི་བར། །བདག་ལ་བྱིན་རློབས་དཀྱིལ་འཁོར་གཉན་པོར་བཟུང་། །ༀ་ཁྱི་ཁ་ལེ་བཛྲ་ས་མ་ཡ་ཧཱུྃ། སྨན་རཀ་དང་མཆོད་གཏོར་ༀ་ཨཱཿཧཱུྃ་གིས་དགྲའི་ཤ་ཁྲག་གི་རི་དང་རྒྱ་མཚོར་བསམས་ལ།

རིམ་པར་འབུལ་བ་ནི། ཧཱུྃ། བསད་ཁྲག་རཀྟའི་རྦ་ཀློང་འཁྱིལ། །ཀེང་རུས་རི་རབ་བརྩེགས་པ་སྟེ། །ཤ་ཆེན་དམར་གྱི་གཏོར་མ་འདི། །མ་ཚོགས་འཁོར་དང་བཅས་ལ་འབུལ། །ༀ་ཁྱི་ཁ་ལེ་ནག་མོ་མ་ཏྲག་རཀྴ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཧཱ་མཱཾ་ས་ལ་ཁཱ་ཧི། མཧཱ་རཀྴ་ལ༴། མཧཱ་ཙིཏྟ་ལ༴། མཧཱ་བ་སུ་ཏ་ལ༴། མཧཱ་གོ་རོ་ཙ་ན་ལ༴། །མཧཱ་ཨ་མྲ྇་ཏ་ལ་ཁཱ་ཧི། ཧཱུྃ། སྣ་ཚོགས་བདུད་རྩི་མཆོག་གི་རོ། །རྩ་བ་བརྒྱད་ལ་ཡལ་ག་སྟོང་། །སྲོག་སྒྲུབ་འཁོར་དང་བཅས་པ་མཆོད། །དགྱེས་མཉམ་མཆོག་གི་དངོས་གྲུབ་སྩོལ། །ༀ་ཨཱཿཧཱུྃ་སརྦ་པཉྩ་ཨ་མྲ྇་ཏ་ཧཱུྃ་ཧྲཱིཿཐཱ། མཧཱ་པཉྩ་ཨ་མྲ྇་ཏ་ཁ་ཁ་ཁཱ་ཧི་ཁཱ་ཧི།

ཧཱུྃ། དཔལ་ཆེན་མ་ཚོགས་འཁོར་དང་བཅས་པ་ལ། །ཚོགས་དང་གཏོར་མའི་མཆོད་པ་འདི་འབུལ་གྱིས། །བཞེས་ནས་ལས་ཀྱི་དངོས་གྲུབ་སྩོལ་བ་དང་། །ཐུགས་དམ་གཉན་བསྐང་བཅོལ་པའི་ལས་མཛོད་ཅིག །

ཧཱུྃ། ཕྱི་ནང་གསང་བ་མཆོག་གི་མཆོད་པ་དང་། །ཚོགས་དང་གཏོར་མ་སྒྲུབ་རྫས་བདུད་རྩི་ལྔ། །ཤ་ལྔ་ལ་སོགས་མཐུན་པའི་དམ་རྫས་ཀྱིས། །མ་དང་མཁའ་འགྲོའི་ཐུགས་དམ་བསྐང་གྱུར་ཅིག །ༀ་མཧཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ།

སྐོང་བཤགས་བྱ་བ་ནི། ཧཱུྃ། དཔལ་ལྡན་སྲོག་སྒྲུབ་འཁོར་བཅས་ལ། །སྤོས་དང་མར་མེས་ཐུགས་དམ་བསྐང་། །མེ་ཏོག་དྲི་ཆབ༴། །སིལ་སྙན་རོལ་མོས༴། །བསྐངས་པས་དངོས་གྲུབ་སྩལ་དུ་གསོལ། །དཔལ་གྱི་མ་ཚོགས་འཁོར་བཅས་ལ། །དམར་ཆེན་གཏོར་མས་ཐུགས་དམ༴། །ཞུན་ཆེན་རཀྟས༴། །ཚིལ་ཆེན་དུད་པས༴། །རྐང་གླིང་རོལ་མོས༴། །བསྐངས་པས་དངོས་གྲུབ་བདག་ལ་སྩོལ། །དཔལ་གྱི་མ་ཚོགས་འཁོར་བཅས་ལ། །བསད་ཁྲག་རྦ་ཀློང་ཐུགས༴། །དབང་པོ་རྣམ་ལྔས༴། །ཤ་སྣ་སྙིང་སྣས༴། །ཛ་གད་ཕུད་ཀྱིས༴། །སྤྱན་གཟིགས་མང་པོས༴། །བསྐངས་པས་དངོས་གྲུབ་བདག་ལ་སྩོལ། །

ཧཱུྃ། སྐྱེ་མེད་ནམ་མཁའ་ལྟ་བུའི་རང་བཞིན་ལས། །མ་རིག་འཁྲུལ་པས་ང་དང་བདག་ཏུ་བཟུང་། །ཀུན་རྟོག་ཉོན་མོངས་གཟུང་འཛིན་གདོན་གྱིས་བརླམས། །ཆོས་ཉིད་དོན་དང་འགལ་བ་མཐོལ་ལོ་བཤགས། །ཐུགས་རྗེའི་དབྱིངས་ལས་སྤྲུལ་པའི་མ་མོ་ཁྱོད། །སྐུ་གསུང་ཐུགས་སུ་བསྒྲུབ་པར་དམ་བཅས་ཀྱང་། །བདག་རྟོག་དྲི་མས་དེ་ལྟར་རྔོ་མ་ཐོགས། །བསྙེན་སྒྲུབ་དོན་ལས་ཉམས་པ་མཐོལ་ལོ་བཤགས། །དཔལ་ལྡན་ནག་མོ་འཁོར་བཅས་སྤྱན་སྔ་རུ། །རྨད་དུ་བྱུང་བའི་མཆོད་པ་ཆེན་པོ་དང་། །ཤ་ཁྲག་དམར་གྱི་གཏོར་མ་ལ་སོགས་ཏེ། །ཚོགས་ཀྱི་མཆོད་པ་མངོན་དུ་མ་བཤམས་པ། །མཆོད་དང་སྒྲུབ་རྫས་ཉམས་པ༴། །བདག་ནི་མི་ཤེས་ཉོན་མོངས་དབང་གྱུར་པས། །ལུས་ངག་ཡིད་ཀྱིས་སྡིག་པའི་ལས་རྣམས་བགྱིས། །བགྱིད་དང་(༣༨)བགྱིད་དུ་བསྩལ་པ་ཅི་མཆིས་པ། །འཕྲལ་དང་ཡུན་གྱི་སྒྲིབ་པ་ཐམས་ཅད་བཤགས། །ཏིང་འཛིན་མ་གསལ་བསྙེན་སྒྲུབ་དོན་ལས་གཡེལ། །སྒོམ་པ་ཡུན་ཐུང་བཟླས་གྲངས་ཉུང་བ་དང་། །ཆོ་ག་ལྷག་ཆད་འགལ་འཁྲུལ་ནོར་བ་དང་། །མཆོད་གཏོར་ཉམས་དང་དུས་ལས་ཡོལ་བ་དང་། །ཆག་ཉམས་ལས་ཀྱི་སྐྱོན་རྣམས་ཐམས་ཅད་ཀྱང་། །རང་གནོང་འགྱོད་པའི་སེམས་ཀྱིས་མཐོལ༴། །དམ་རྫས་མ་ཚང་སྒྲུབ་པ་ཡུན་ཐུང་དང་། །ཏིང་འཛིན་མ་གསལ་བསྙེན་སྒྲུབ་འཆོལ་བར་སྤྱད། །སྦྱོར་དང་སྒྲོལ་བའི་ལས་མཐའ་ལོག་པ་དང་། །ཐུན་དང་ཟོར་གྱི་ལས་རྣམས་མ་རྫོགས་པས། །སྲོག་སྒྲུབ་འཁོར་བཅས་སྐུ་གསུང་ཐུགས་དང་འགལ། །ཚོར་དང་མ་ཚོར་ཉམས་ཆག་ཅི་མཆིས་པ། །མཐོལ་ཞིང་བཤགས་སོ་ཚངས་པར་མཛད་དུ་གསོལ། །བདག་ནི་མི་ཤེས་དང་པོའི་ལས་ཅན་ཏེ། །འགལ་འཁྲུལ་ཉམས་ཆག་ཞིག་རལ་ཅི་མཆིས་པ། །བྱམས་ལྡན་ཐུགས་རྗེའི་ཡུམ་ལ་བཤགས་པར་བགྱི། །བཟོད་པར་བཞེས་ནས་ཚངས་པར་སྩལ་དུ་གསོལ། །ཞེས་པ་དང་ཡི་གེ་བརྒྱ་པ་བརྗོད་དོ། །

དེ་ནས་མངའ་གསོལ་བ་ནི། ཕུད་དང་རཀྟ་སྦྲེང་། མེ་ཏོག་འཐོར་ཞིང་། ཧོཿ དཔལ་ལྡན་སྔགས་ཀྱི་བདག་མོ་སྲུང་མ་ཆེན་མོ་སྐུ་མདོག་ནག་མོ་ཞིང་ཆེན་གྱི་གཡང་གཞི་གསོལ་བ། ཁྲག་དང་ཞག་གི་ཐིག་ལེ་བྱུགས་ཤིང་རལ་པ་གཡེངས་པས་ནམ་མཁའ་ཁེངས་པ། ཕྱག་ན་སྙིང་དང་ནད་ཀྱི་རྐྱལ་པ་བསྣམས་པ། ཞལ་ནས་རཀྟའི་ཞམ་ཆུ་འབབ་ཅིང་མཆེ་བ་རྣོ་དཀར་དགྲ་ལ་གཙིགས་པ། སྤྱན་གསུམ་བསྐལ་པའི་མེ་འོད་འབར་ཞིང་མེའི་ཚྭ་ཚྭ་ཕྱོགས་བཅུར་འཕྲོ་བ། རླུང་ནག་འཚུབས་བའི་ནང་ན་བཞུགས་ཤིང་ནད་དང་མཚོན་གྱི་བསྐལ་པ་གཏོང་བ། རྡོ་རྗེ་འབར་བའི་སྤུ་གསེབ་ནས་ཡེ་ཤེས་ཀྱི་མེ་འབར་བས་སྟོང་ཁམས་ཐམས་ཅད་ཁེངས་པར་བྱེད་པ་ཁྱེད་ལ། དམར་གྱི་གཏོར་མ་བརྗིད་ཅིང་འགྱིང་བ། རི་རབ་ལྷུན་པོ་བས་འཕངས་མཐོ་བ། རཀྟའི་ཞམ་ཆུ་བས་བསྐྱིལ་ལེགས་པ། རྒྱ་མཚོ་ཆེན་པོ་བས་གཏིང་ཟབ་པ། དཀར་ལ་དམར་གྱི་ཐིག་བཀྱེས་པ་ཉི་ཟླ་གཟའ་སྐར་བས་མདངས་གསལ་བ། དཔལ་གྱི་མཐེབ་སྐྱུས་མཐའ་བསྐོར་བ་གླིང་བཞི་གླིང་ཕྲན་བས་བཀོད་ལེགས་པ། དར་དང་ཟ་འོག་གི་གུར་ཕུབ་པ། མཐིང་ག་བརྗིད་ཆགས་པ། སྤྱན་གཟིགས་སྣ་ཚོགས་ཀྱིས་མདུན་བཤམས་པ། ལྷའི་འབྱོར་པ་བས་རྒྱ་ཆེ་བ་འདི་འབུལ་ལོ། །གསོལ་ལོ། །མཆོད་དོ། །བསམ་པ་གཉན་པོ་སྒྲུབས་ཤིག །རེ་བ་གཉན་པོ་སྐོངས་ཤིག །འགལ་འཁྲུལ་ཉམས་ཆག་ཐམས་ཅད་སྐོངས་ཤིག །སྡང་བའི་དགྲ་སོད་ཅིག །གནོད་པའི་བགེགས་ཐུལ་ཞིག །ཚེ་དཔལ་དང་འབྱོར་པ་སྤེལ་ཞིག །སྙན་པ་དང་གྲགས་པ་སྒྲོགས་ཤིག །གཞན་ཡང་དཔལ་ལྡན་ནག་མོ་ཐུགས་ཀྱི་དགྱེས་སྡེ་མོ། གཡས་ཀྱི་གསོད་བྱེད་ཤ་ཟ་དམར་མོ། གཡས་གཡོན་ཞིང་དབྱུག་དང་རྒྱུ་ཞགས་བསྣམས་པ། རོ་ལ་ཞོན་ནས་ཕྱོགས་བཅུར་རྒྱུག་པ་ལ་(༣༩)གསོལ་ལོ། །འབུལ་ལོ། །མཆོད་དོ། །བསམ་པ་གཉན་པོ་སྒྲུབས་ཤིག །རེ་བ་གཉན་པོ་སྐོངས་ཤིག །འགལ་འཁྲུལ་དང་ཉམས་ཆག་ཐམས་ཅད་སྐོངས་ཤིག །སྡང་བའི་དགྲ་སོད་ཅིག །གནོད་པའི་བགེགས་ཐུལ་ཞིག །ཚེ་དཔལ་དང་འབྱོར་པ་སྤེལ་ཞིག །སྙན་པ་དང་གྲགས་པ་སྒྲོགས་ཤིག །གཡོན་ན་ནག་མོ་ཝ་གདོང་མ། ཕྱག་ན་གྲི་གུག་དང་རྒྱུ་ཞགས་བསྣམས་པ། དུར་བྱ་ཞོན་ནས་མཁའ་ལ་རྒྱུ་བ་ལ་གསོལ་ལོ། །འབུལ་ལོ། །མཆོད་དོ། །བསམ་པ་གཉན་པོ༴། རེ་བ་གཉན་པོ༴། འགལ་འཁྲུལ༴། སྡང་བའི༴། གནོད་པའི༴། ཚེ་དཔལ༴། སྙན་པ་དང་༴། མདུན་ན་སྲོག་གཅོད་ཀྱི་ཤ་ཟ་ནག་མོ་སྟོང། འུག་པ་ཁྭ་དང་བྱ་རྒོད་ལ་སོགས་པའི་གདོང་དང་ལྡན་པ། ཁྲག་གི་རལ་པས་གནམ་ས་ཁྱབ་ཅིང་མཚོན་ཆ་སྣ་ཚོགས་ཕྱག་ན་བསྣམས་པ། སྟག་སྤྱང་དོམ་དྲེད་འཕར་བ་ཞོན་ཅིང་སྐད་ཅིག་སྟོང་གསུམ་ཀུན་ཏུ་ཉུལ་བའི་ཚོགས་ལ་གསོལ་ལོ། །འབུལ་ལོ། །མཆོད་དོ། །བསམ་པ༴། རེ་བ༴། འགལ་འཁྲུལ༴། །སྡང་བའི༴། གནོད་པའི༴། ཚེ་དཔལ༴། སྙན་པ་དང་༴། རྒྱབ་ན་ལས་ཀྱི་མ་མོ་འབུམ་ཕྲག་སྐུ་མདོག་སྣ་ཚོགས་འཇིགས་པར་སྟོན་པ། ཕྱག་ན་ནད་དང་མཚོན་ཆ་བསྣམས་པ། ཐོག་དང་སེར་ཆེན་གློག་དམར་འགྱུ་བ། ཆིབས་སུ་དྲེལ་རྟ་རྐང་གསུམ་བཅིབས་པ། གསོད་བྱེད་འབུམ་གྱི་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །བསམ་པ༴། རེ་བ༴། འགལ༴། སྡང་༴། གནོད༴། ཚེ་དཔལ༴། སྙན་པ་དང་༴། ཕོ་ཉ་ཡང་སྤྲུལ་བཀའ་ཉན་གྱི་ཚོགས་སུ་གྱུར་པ་འབུམ་ཕྲག་བྱེ་བ་བསམ་གྱིས་མི་ཁྱབ་པ། ལ་ལས་གདུགས་དང་རྒྱལ་མཚན་འཕྱར་བ། ལ་ལས་སིལ་སྙན་རོལ་མོ་འཁྲོལ་བ། ལ་ལས་ནད་ཀྱི་རྐྱལ་པ་ཐོགས་པ། ལ་ལས་མཚོན་གྱི་གྲུ་གུ་རྐྱོང་བ། ལ་ལས་ཐོག་དང་སེར་བ་འབེབས་པ། ལ་ལས་གློ་བུར་ཡེ་འདྲོག་གཏོང་བ། ལ་ལས་ལྟས་ངན་ཆོ་འཕྲུལ་འགྱེད་པ། ལ་ལ་རླུང་ནག་འཚུབས་མར་འཁྱིལ་པ། ལ་ལས་མི་རྐང་གླིང་བུ་འབུད་པ། ལ་ལས་འོ་དོད་གནམ་དུ་འབོད་པ། ལ་ལས་དུལ་མོ་ས་ལ་བརྡུལ་བ། ལ་ལས་སྤྲུལ་པ་འབུམ་ཕྲག་འགྱེད་པའི་ཚོགས་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །བསམ་པ་གཉན༴། རེ་བ་གཉན༴། འགལ་འཁྲུལ༴། སྡང་བའི་དགྲ་ལ༴། གནོད་པའི་བགེགས༴། ཆག་ཆེ་དང་ཉམ་ང་ཐམས་ཅད་ཟློག་ཅིག །མཐུ་དང་རྫུ་འཕྲུལ་ཆེན་པོ་སྒྲུབས་ཤིག །ཚེ་དཔལ་དང་འབྱོར་པ་ཆེན་པོ་སྤེལ་ཞིག །སྙན་པ་དང་གྲགས་པ་བཟང་པོ་སྒྲོགས་ཤིག །ཅེས་བརྗོད་དོ། །

དེ་ནས་བསྟོད་པ་བྱ་བ་ནི། ཧཱུཾ། སྔོན་ཚེ་རྒྱ་གར་རྡོ་རྗེའི་གདན་དྲུང་དུ། །ཡུལ་གྱི་མ་མོ་ཐམས་ཅད་འདུས་པའི་ཚེ། །ཐུགས་ཀྱི་མ་མོ་གཅིག་ཏུ་བསྡུས་པ་ནི། །ཤན་པ་སྲོག་སྒྲུབ་ནག་མོར་མངའ་གསོལ་བ། །སྐུ་མདོག་ནག་མོ་ལྷོ་སྤྲིན་འཐིབས་པ་འདྲ། །རལ་པ་གཡེངས་པས་ནམ་མཁའ་ཐམས་ཅད་ཆོད། །ཕུར་བུ་འཁྲོལ་(༤༠)བས་སྟོང་ཁམས་ཐམས་ཅད་གཡོ། །ཞལ་ནས་ཁྲག་འཛག་རྣོ་དཀར་མཆེ་བ་གཙིགས། །ཤངས་ནས་རླུང་འཚུབས་སྤྱན་གསུམ་སྡང་མིག་གཟིགས། །ཞིང་ཆེན་གཡང་གཞི་སྐུ་ཡི་སྟོད་དུ་དཀྲིས། །བ་སྤུའི་གསེབ་ནས་མེ་ཡི་ཚྭ་ཚྭ་འཕྲོ། །རླུང་ནག་འཚུབས་མའི་ནང་དུ་སྐུ་བཞུགས་པ། །ཤན་པ་སྲོག་སྒྲུབ་སྐུ་ལ་ཕྱག་འཚལ་བསྟོད། །གཡས་ན་གསོད་བྱེད་ཤ་ཟ་རལ་པ་ཅན། །སྐུ་མདོག་དམར་མོ་ཞིང་དབྱུག་རྒྱུ་ཞགས་འཛིན། །གཅེར་བུ་རོ་ཞོན་སྟོང་ཁམས་ཁྱབ་པར་ཉུལ། །ལས་བྱེད་ནག་མོའི་སྐུ་ལ་ཕྱག་འཚལ་བསྟོད། །གཡོན་ན་འཇིགས་བྱེད་ནག་མོ་ཝ་གདོང་མ། །གྲི་གུག་རྒྱུ་ཞགས་སྡང་བའི་དགྲ་ལ་འདེབས། །དུར་བྱ་ཞོན་ནས་སྟོང་ཁམས་ཁྱབ་པར་ཉུལ། །ལས་བྱེད་ནག་མོའི་སྐུ་ལ་ཕྱག་འཚལ་བསྟོད། །མདུན་ན་སྲོག་གཅོད་ཤ་ཟ་ནག་མོ་སྟོང་། །ཁྭ་དང་འུག་པ་བྱ་རྒོད་གདོང་ཅན་སོགས། །ཁྲག་གི་རལ་པ་གནམ་ས་ཀུན་ཏུ་ཁྱབ། །མདའ་ཆེན་མདུང་དང་འཁོར་ལོ་གཏུན་ཤིང་སོགས། །མཚོན་ཆ་སྣ་ཚོགས་དགྲ་བགེགས་སྟེང་དུ་འཕེན། །སྟག་སྤྱང་དོམ་དྲེད་མ་ཧེ་གཟིག་ལ་སོགས། །སྣ་ཚོགས་ཞོན་ནས་སྟོང་ཁམས་ཀུན་ཏུ་ཉུལ། །ཤ་ཟ་སྟོང་གི་ཚོགས་ལ་ཕྱག་འཚལ་བསྟོད། །རྒྱབ་ན་སྣ་ཚོགས་ལས་ཀྱི་མ་མོ་འབུམ། །སྣ་ཚོགས་སྐུ་མདོག་གར་ཡང་སྤྲུལ་ཞིང་བསྒྱུར། །མི་བཟོད་མཚོན་དང་ཐོག་ཆེན་སྐར་མདའ་འཕེན། །དྲེལ་རྟ་ཞོན་ནས་སྟོང་ཁམས་ཁྱབ་པར་ཉུལ། །ལས་བྱེད་མ་མོའི་ཚོགས་ལ་ཕྱག་འཚལ་བསྟོད། །ཀུན་གྱི་བཀའ་ཉན་ཕོ་ཉ་ཡང་སྤྲུལ་ནི། །འབུམ་ཕྲག་བསམ་ཡས་སྣ་ཚོགས་འཇིགས་གཟུགས་ཅན། །རུ་ལུའི་སྒྲ་སྐད་ནམ་མཁའི་འབྲུག་ལྟར་སྒྲོགས། །ལ་ལ་གདུགས་དང་བླ་རེ་རྒྱལ་མཚན་འཕྱར། །ལ་ལ་འཕན་ལྡིང་སིལ་སྙན་རོལ་མོ་འཛིན། །ལ་ལ་གར་བྱེད་རིན་ཆེན་ཆར་པ་འབེབས། །ལ་ལ་རྡོ་རྗེ་ནོར་བུ་པདྨ་འཛིན། །ལ་ལ་རྒྱས་མཛད་རིན་ཆེན་སྒྲོམ་བུ་འཛིན། །ལ་ལ་དབང་མཛད་ཆགས་ཚུལ་མདངས་དང་ལྡན། །ལ་ལ་དྲག་མཛད་འཇིགས་གཟུགས་རྔམས་པ་སྟེ། །ལ་ལ་ཟིལ་གནོན་དྲག་པོའི་ཕྲིན་ལས་མཛད། །ལ་ལ་ནད་ཀྱི་རྐྱལ་པ་དགྲ་ལ་གཏོང་། །ལ་ལ་མཚོན་གྱི་བསྐལ་པ་དགྲ་ལ་གཏོང་། །ལ་ལ་ལྟས་ངན་གློ་བུར་ཡེ་འདྲོག་གཏོང་། །ལ་ལ་མི་རྐང་གླིང་བུ་དགྲ་ལ་འབུད། །ལ་ལ་རླུང་ནག་འཚུབས་མའི་ནང་ན་བཞུགས། །ལ་ལ་འོ་དོད་གནམ་དུ་འབོད་པ་སྟེ། །ལ་ལ་དུག་ཆེན་ས་ལ་བརྡལ་བར་བྱེད། །ཕོ་ཉ་ཡང་སྤྲུལ་ཚོགས་ལ་ཕྱག་འཚལ་བསྟོད། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །ཅེས་བརྗོད་ནས།

ཕུད་དང་རཀྟ་གཏོར་མར་སྦྲན་ལ། ཐུགས་དམ་གནད་ནས་བསྐུལ་ཞིང་ཕྲིན་ལས་བཅོལ་བ་ནི། ཧཱུྃ། ཤན་པ་ནག་མོ་མི་ཟན་མ། །མིང་པོ་རྡོ་རྗེ་བདག་འབོད་ཀྱིས། །སྲིང་མོ་མ་ཐོགས་མྱུར་དུ་བྱོན། །མིང་པོ་རྡོ་རྗེའི་ལས་མཛོད་ཅིག །མ་གཡེལ་མ་གཡེལ་མ་དང་སྲིང་། །བྲག་ཕུག་གཉན་པོར་འདུ་བ་དང་། །མ་དང་སྲིང་མོ་ཉེ་རུ་རེ། །ཤན་པ་ནག་མོ་ཉེ་རུ་རེ། །མཱཾ་ས་ཟས་སུ་ཟ་བ་ཡང་། །མ་དང་སྲིང་མོ་ཉེ་རུ་རེ། །ཤན་པ་ནག་མོ་ཉེ་རུ་རེ། །(༤༡)ཚིལ་ཆེན་དུད་པ་གཏོང་བ་ཡང་། །མདངས༴། །ཤན་པ༴། །བྷནྡྷ་རཀྟས་བཀང་བ་ཡང་། །མདངས་༴། །ཤན་པ༴། །དམར་ཆེན་གཏོར་མས་མཆོད་པ་ཡང་། །མདངས༴། །ཤན་པ༴། །ཛ་གད་ཕུད་ཀྱིས་མཆོད་པ་ཡང་། །མདངས༴། །ཤན་པ༴། །ཞིང་ཆེན་གཡབ་མོ་བྱ་བ་ཡང་། །མདངས༴། །ཤན་པ༴། །མི་རྐང་གླིང་བུ་འབུད་པ་ཡང་། །མདངས༴། །ཤན་པ༴། །ཚོགས་དང་མཆོད་པས་བསྐང་བ་ཡང་། །མདངས༴། །ཤན་པ༴། །གདུང་བའི་དབྱངས་ཀྱིས་འབོད་པ་ཡང་། །མདངས༴། །ཤན་པ༴། །བསྙེན་སྒྲུབ་ཏིང་འཛིན་བསྒོམ་པ་ཡང་། །མདངས༴། །ཤན་པ༴། །སྲོག་གི་སྙིང་པོ་བཟླ་བ་ཡང་། །མདངས༴། །ཤན་པ༴། །ཐུན་དང་ཟོར་གྱིས་བསྐང་བ་ཡང་། །མདངས༴། །ཤན་པ༴། །ཤེལ་ནག་མུན་པས་བསྐང་བ་ཡང་། །མདངས༴། །ཤན་པ༴། །མཁའ་ལྡིང་ནག་མོས་བསྐང་བ་ཡང་། །མདངས༴། །ཤན་པ༴། །ནམ་གྲུ་ནག་མོ་འཁོར་བཅས་ལ། །དམར་ཆེན་གཏོར་མས་ཐུགས་དམ་བསྐང་། །ཛ་གད་ཕུད་ཀྱིས༴། །ཞུན་ཆེན་མར་མེས༴། །ཚིལ་ཆེན་དུད་པས༴། །སྨན་དང་རཀྟས༴། །ཤེལ་ནག་མཁའ་ལྡིང་༴། །རྔ་དང་རོལ་མོས༴། །ཐུན་དང་ཟོར་གྱིས༴། །བསྐང་ངོ་བསྐལ་པར༴། །བསྐངས་པས་དངོས་གྲུབ་བདག་ལ་སྩོལ། །རྣལ་འབྱོར་བདག་ཅག་འཁོར་བཅས་ཀྱི། །ཚེ་དང་དཔལ་འབྱོར་རྒྱས་པ་དང་། །དགེ་ཞིང་ཞི་བའི་ལས་འགྲུབ་དང་། །འདོད་པ་སྐོངས་ལ་བསམ་པ་སྒྲུབས། །ཆག་ཆེ་ཉམ་ང་ལ་སོགས་པའི། །རྐྱེན་ངན་བར་ཆད་ཟློག་པ་དང་། །དགྲ་སོད་བགེགས་ཐུལ་འདོད་པ་སྒྲུབས། །བཀྲ་ཤིས་ཕུན་སུམ་ཚོགས་པར་མཛོད། །མཧཱ་བ་ལིཾ་ཏ་ཁཱ་ཧི། མཧཱ་མཱཾ་ས༴། མཧཱ་རཀྟ་ལ༴། མཧཱ་གོ་རོ་ཙ་ན་ལ༴། མཧཱ་ཨ་མྲ྇་ཏ་ལ་ཁཱ་ཧི། ཞེས་ཕུད་དང་རཀྟ་སྦྲེང་ངོ་། །

རྒྱུན་གྱི་སྐོང་གསོལ་དེ་ནས་གཏོར་མ་བཏང་ནས་བཀྲ་ཤིས་བརྗོད། གལ་ཏེ་མངོན་སྤྱོད་ཀྱི་ལས་བསྒྲུབ་དགོས་ན། གདབ་ལས་དང་རྦད་བསྐུལ་བྱ་བ་ལས། གདབ་ལས་ནི་ཉ་བོའི་སྟེང་དུ་ལག་ཕུར་རམ་ཟངས་གྲི་ལ་སོགས་པས་གདབ་ཅིང་དགྲ་དངོས་སུ་བསམས་ལ། ཧཱུྃ། སྲིད་པའི་མ་མོ་མཐུ་མོ་ཆེ། །བཤན་པ་གསོད་བྱེད་ནག་མོ་སྟེ། །ཞབས་གཉིས་རཀྟའི་རྦ་ལ་འཕྱོ། །ཕྱག་གཉིས་ཕུར་བུས་དགྲ་སྙིང་གཟིར། །སྲོག་དབུགས་ལྷུ་གཟུགས་སོ་སོར་འབྲལ། །དམ་ཉམས་དགྲ་བོ་ཆེ་གེ་ཡི། །སྲོག་ཆོད་སྙིང་ཕྱུང་དབང་པོ་སྣུབས། །དུས་མཐའ་བསྟུངས་ལ་གཟེར་ཆེན་ཕོབ། །དེ་ཡི་བཀའ་ཉན་ལས་མཁན་མོ། །ལག་ན་གདུག་པའི་མཚོན་ཆ་བསྣམས། །དགྲ་བོའི་སྟེང་དུ་ད་གཟིར་ཅིག །མགོ་ལུས་ཕྲོལ་ལ་དོན་སྙིང་ཕྱུངས། །ཤ་ཟོ་ཁྲག་འཐུང་རུས་ལ་ཡ། །ཤན་པ་ནག་མོའི་ཞལ་དུ་བསྟབ། །ལས་མཁན་འབུམ་གྱི་ཞལ་དུ༴། །ཤ་ཟ་སྟོང་གི༴། །གདུགས་པའི་དགྲ་བོ་ཆེ་གེ་མོ། །ཤན་པ་འཁོར་བཅས༴། །མ་དང་སྲིང་མོའི༴། །ཤ་རུས་ཁམ་ཚད་ལིངས་སི་ལིང་། །སྙིང་ཁྲག་དྲོན་མོ་ཙ་ར་ར། །གློ་སྙིང་ནང་ཁྲོལ་ཆི་ལི་ལི། །ཞིང་ཆེན་ལྷུ་གཟུགས་ཁྲོ་ལོ་ལོ། །ཐོད་རུས་རྒལ་ཚིགས་ཉི་ལི་ལི། །མ་སྲིང་ཞལ་དུ་ཁ་རཾ་ཁཱ་ཧི། ༀ་ཁྱི་ཁ་ལེ་ནག་མོ་ལི་ལི་ཏི་ཏི་རྃ་རྃ་བྷྱོ་བྷྱོ། མ་མ་རཀྨོ་རཀྨོ་ཆེ་(༤༢)གེ་མོའི་ལུས་ངག་ཡིད་གསུམ་ཁ་ཁ་ཁཱ་ཧི་ཁཱ་ཧི། ཞེས་པས་དུམ་བུར་ཕུལ་གཏོར་མར་བསྟབ་པོ། །

དེ་ནས་ལས་ཀྱི་མ་མོ་དགྲ་ལ་རྦད་པ་ནི། གཏོར་མ་དགྲ་ཕྱོགས་སུ་བཏེགས་ལ་རབ་ཏུ་ཁྲོས་བས་འདི་སྐད་དོ། །བྷྱོ། མཁའ་འགྲོ་ནག་མོ་མི་སྲུན་མ། །ཤ་ཟ་ཁྲག་མིག་སྲིན་མོའི་གདོང་། །འཇིགས་པའི་གཟུགས་ཅན་མཁའ་འགྲོའི་གཙོ། །སྐུ་མདོག་ནག་མོ་ཆར་སྤྲིན་མདོག །ཕྱག་ན་གསོད་པའི་མཚོན་ཆ་བསྣམས། །ཆིབས་སུ་སྲིད་པའི་རླུང་ལ་བཅིབས། །རལ་པ་མཚོན་ཆ་ཤ་ར་ར། །གཅེར་བུ་མི་ལྤགས་སྟོད་ལ་དཀྲིས། །གློ་སྙིང་ཁྲག་འཛག་ཞལ་དུ་གསོལ། །ཁྲག་གི་ཞམ་ཆུ་ཀྱུ་རུ་རུ། །མཆེ་བ་ཟངས་ཡག་རབ་ཏུ་གཙིགས། །སྨ་ར་སེར་པོ་མེ་སྟག་འཕྲོ། །སྤྱན་གསུམ་སྡང་མིག་དགྲ་ལ་གཟིགས། །ཤངས་ནས་འཚུབས་མ་མཚོན་ཆར་འགྱེད། །བ་སྤུ་མཚོན་ཆ་མེ་ལྟར་འབར། །མི་མགོ་རློན་པའི་དོ་ཤལ་ཅན། །དམར་གྱི་གཏོར་མ་འདི་བཞེས་ལ། །དགྲ་བོའི་སྟེང་དུ་ད་རྒྱུག་ཅིག །དམ་ཉམས་སྙིང་ལ་ད་གཟིར་ཅིག །དབུགས་ཆོད་སྲོག་འཕྲོག་བདུད་ཆོད་ཅིག །གཡས་ན་གསོད་བྱེད་ཤ་ཟ་མོ། །སྐུ་མདོག་དམར་མོ་ཙེ་རེ་རེ། །རལ་པ་ཉིལ་བས་ས་གཞི་ཁེབས། །ཕུར་བུ་འཁྲིལ་པས་སྟོང་གསུམ་གཡོ། །རོ་ལ་ཞོན་ནས་ཤ་ལ་ཟ། །རྐན་བརྡབ་དགྲ་བོའི་མིག་འབྲས་འབྲུལ། །ལྕགས་སྡེར་མཚོན་ཆས་དགྲ་སྙིང་འབྱིན། །ཞིང་དབྱུག་རྡེབས་པས་སྲིད་གསུམ་གཡོ། །དུང་གི་མཆེ་བ་ཐམས་སེ་ཐམ། །ཁྲག་གི་མཆི་མ་ཆི་ལི་ལི། །དམར་གྱི་གཏོར་མ་འདི་བཞེས་ལ། །དགྲ་བོའི་སྟེང་དུ་ད་རྒྱུག་ཅིག །དམ་ཉམས་སྙིང་ལ་ད་གཟིར་ཅིག །སྲོག་རྩ་དམར་པོ་ད་ཆོད་ཅིག །གཡོན་ན་ནག་མོ་ཝ་ཡི་གདོང་། །སྐུ་མདོག་ནག་མོ་ཙེ་རེ་རེ། །ཞལ་ནས་ཁྲག་གི་ཞམ་ཆུ་འབབ། །ཕྱག་ན་ཞགས་པ་གྲི་གུག་ཐོགས། །བ་སྤུ་མཚོན་ཆ་སྤུ་གྲིའི་སོ། །རེག་པ་ཙམ་གྱིས་མགོ་ལུས་འབྲལ། །དུར་བྱ་ཞོན་ནས་སྟོང་ཁམས་ཉུལ། །དམར་ཆེན༴། །དགྲ་བོའི༴། །དམ་ཉམས༴། །སྲོག་རྩ་ཆོད་ལ་སྙིང་རྩ་ཕྱུང་། །ཤ་ཟོ་ཁྲག་འཐུང་ཀེང་རུས་མུར། །མདུན་ན་སྲོག་གཅོད་ཤ་ཟ་སྟོང་། །སྐུ་མདོག་མཐིང་ནག་ཙེ་རེ་རེ། །ཁྭ་དང་འུག་པ་བྱ་རྒོད་གདོང་། །ཁྲག་རལ་མཚོན་ཆ་ཉི་ལི་ལི། །བསེ་ཡི་འདབ་གཤོག་སྤུ་གྲི་འབར། །གནམ་ལྕགས་མཆུ་སྡེར་ཟངས་སེ་ཟང་། །མཚོན་ཆ་སྣ་ཚོགས་ཤ་ར་ར། །ལྕེ་སྤྱང་ཞོན་ནས་སྟོང་ཁམས་ཉུལ། །དམར་ཆེན༴། །དགྲ་བོའི༴། །སྲོག་རྩ༴། །ཤ་ཟོ་ཁྲག་འཐུང་རུས་ལ་མུར། །རྒྱབ་ན་ལས་བྱེད་མ་མོ་འབུམ། །སྐུ་མདོག་སྣ་ཚོགས་ཙེ་རེ་རེ། །ཕྱག་མཚན་མཚོན་ཆ་སྐར་ལྟར་འཁྲུག །དྲེལ་རྟ་ཞོན་ནས་སྟོང་ཁམས་ཉུལ། །རལ་པ་མཚོན་ཆ་ཉི་ལི་ལི། །དམར་ཆེན༴། །དགྲ་བོའི༴། །དམ་ཉམས༴། །སྲོག་རྩ༴། །ཤ་ཟོ༴། །བཀའ་ཉན་ཡང་སྤྲུལ་ཕོ་ཉ་མོ། །ལས་མཁན་འབུམ་ཕྲག་བྱེ་བ་རྣམས། །འཇིགས་པའི་གཟུགས་ཅན་སྣ་ཚོགས་ཏེ། །ལ་ལ་བྱད་ཁ་རྦོད་གཏོང་མོ། །གཅེར་བུ་གྲི་ཐོགས་ཡེ་རེ་རེ། །ལ་ལ་ནད་དང་རིམས་བདག་མོ། །ནད་ཡམས་བུ་ཡུག་ཐུ་ལུ་ལུ། །ལ་ལ་གློ་བུར་(༤༣)ཡེ་འདྲོག་མོ། །གྲི་རྒོད་འཁྲུག་པ་ཤ་ར་ར། །ལ་ལ་རྨུགས་བྱེད་རོ་ལངས་མོ། །སྨྱོ་འབོག་བརྒྱལ་ནད་ཐ་ལ་ལ། །ལ་ལ་ཕུང་བྱེད་སྒྲོལ་གིང་མོ། །བསད་ཁྲག་རྦ་ཀློང་ཉེ་རེ་རེ། །ལ་ལ་འཇོམས་བྱེད་ལས་མཁན་མོ། །དགྲ་བགེགས་རྡུལ་དུ་སངས་སེ་སང་། །ལ་ལ་གསོད་བྱེད་ཤན་པ་མོ། །སྙིང་ཁྲག་ཞལ་དུ་ཀྱུ་རུ་རུ། །ལ་ལ་འབོད་བྱེད་རོ་ལངས་མོ། །འོ་དོད་གནམ་དུ་ལྷངས་སེ་ལྷང་། །ལ་ལ་དུལ་བྱེད་ལས་མཁན་མོ། །ཞིང་ཆེན་གཡབ་མོ་ལིངས་སེ་ལིང་། །དམར་གྱི་གཏོར་མ་འདི་བཞེས་ལ། །དགྲ་བོའི་སྟེང་དུ་ད་རྒྱུག་ཅིག །དམ་ཉམས་སྙིང་ལ་ད་གཟིར་ཅིག །སྲོག་རྩ་ཆོད་ལ་སྙིང་རྩ་ཕྱུང་། །ཤ་ཟོ་ཁྲག་འཐུང་རུས་ལ་མུར། །གསོད་བྱེད་ཆེན་མོ་ད་རྒྱུག་ཅིག །ལུས་སྲོག་ཕྲོལ་ལ་དབང་པོ་སྣུབས། །ལས་མཁན་ཆེན་མོ་ད༴། །དབུགས་ལོངས་བདུད་ཆོད་འོད་ཕྲོགས་ཤིག །སྒྲོལ་གིང་ཆེན་མོ་ད༴། །ཤ་ཟོ་ཁྲག་འཐུང་རུས་ལ་མུར། །བྱད་མཁན་ཆེན་མོ་ད༴། །དགྲ་བོའི་སྙིང་ལ་ཐུན་ཟོར་བྷྱོ། །ནད་བདག་ཆེན་མོ་ད༴། །དགྲ་ལ་དལ་ཡམས་གཟེར་ཐུང་ཕོབ། །རིམས་བདག་ཆེན་མོ་ད༴། །དགྲ་ལ་ཡམས་ནད་ཁྲག་ནད་ཕོབ། །སྨྱོ་བྱེད་ཆེན་མོ་ད༴། །དགྲ་ལ་བརྒྱལ་ནད་སྨྱོ་འབོག་ཐོང་། །རྗེད་བྱེད་ཆེན་མོ་ད༴། །དགྲ་རྣམས་རྨུགས་ཤིང་རེངས་སུ་ཆུག །འཇིགས་བྱེད་ཆེན་མོ་ད༴། །དགྲ་རྣམས་ཐལ་བའི་རྡུལ་དུ་རློག །ཟ་བྱེད་ཆེན་མོ་ད༴། །དགྲ་རྣམས་སྙིང་ཁྲག་གཏིང་ནས་འཇིབ། །གནོད་བྱེད་ཆེན་མོ་ད༴། །དགྲ་རྣམས་ཚལ་པ་དུམ་བུར་གཏུབས། །འཇོམས་བྱེད་ཆེན་མོ་ད༴། །དགྲ་རྣམས་ཐམས་ཅད་ད་གཞོམ་ཅིག །སྣ་སྟུན་ཆེན་མོ་ད༴། །དགྲ་རྣམས་མི་མཐུན་སོ་སོར་ཕྱེས། །ཕུང་བྱེད་ཆེན་མོ་ད༴། །དགྲ་རྣམས་མིང་ཙམ་མེད་པར་མཛོད། །ཐལ་བའི་རྡུལ་ཕྲན་བཞིན་དུ་རློག །མེ་ཡིས་བསྲེགས་ལ་ཆུ་ཡིས་ཤོལ། །རླུང་གིས་གཏོར་ལ་སྟོང་པར་མཛོད། །ༀ་ཁྱི་ཁ་ལེ་ནག་མོས་སོད། སྲོག་ཏྲི་སོད། སྙིང་ཁ་ཁ་བམ་ཡ་སོད། ཙ་བ་བརི་མུ་སོད། གྷ་ཡ་སོད། རཀྨོ་རཀྨོ་མ་གཟིར་ནན། ཁཾ་ཁུག་དྲངས་ཆེ་གེ་མོའི་ཙིཏྟ་ལ་རྦད། ཅེས་བརྗོད་དོ། །

དེ་ནས་རང་ཉིད་དྲག་པོའི་ལྷར་གསལ་ཞིང་ཤིན་ཏུ་རྔམས་པས་ཐུན་དང་ཟོར་གྱི་ལས་བྱ་སྟེ། ཟོར་ལམ་དབྱེ་བ་དང་། དཔང་གཟུག་པ་དང་། ཉེས་པ་བསྒྲག་པ་ནི། བྷྱོཿ མ་སྲིང་དམ་ཅན་རྒྱ་མཚོ་དང་། །ལྷ་ཀླུ་སྡེ་བརྒྱད་ལ་སོགས་པ། །སྣང་སྲིད་ལྷ་འདྲེ་ཐམས་ཅད་དང་། །ཡུལ་ལྷ་གཞི་བདག་འཁོར་བཅས་རྣམས། །དོ་ནུབ་གཟུ་དང་དཔང་མཛོད་ཅིག །དམ་ཉམས་སྡིག་ཅན་དགྲ་བོ་འདིས། །རིག་འཛིན་སྔགས་འཆང་རྣལ་འབྱོར་བདག །བྱང་ཆུབ་བསྒྲུབ་ཏུ་མ་སྟེར་བས། །ཐུན་དང་ཟོར་གྱི་ལས་བྱོས་ཤིག །བདག་ལ་སྡང་བྱེད་དགྲ་བོ་འདིས། །བླ་མ་དམ་པའི་སྐུ་ལ་བསྡོས། །སངས་རྒྱས་བསྟན་པ་གཉན་པོ་བཤིག །དཀོན་མཆོག་དབུ་འཕང་གཉན་པོ་སྨད། །འཇིག་རྟེན་སྐྱེ་བོ་ཡོངས་ལ་འཚེ། །དབེན་གནས་གཉན་འདི་བཅོམ་བརླག་བྱས། །རྡོ་རྗེ་རྒྱལ་པོ་དམངས་སུ་ཕབ། །སྲུང་མ་གཉན་(༤༤)པོ་ཁྱད་དུ་བསད། །སྡིག་ཅན་ལས་ཀྱི་མཐའ་འཁོར་བས། །དོ་ནུབ་བསྒྲལ་བའི་དུས་ལ་བབས། །

བྷྱོ། སྔགས་འཆང་བདག་གིས་ཟོར་ཅིག་འཕེན། །དོ་ནུབ་ཟོར་གྱི་ལམ་ཕྱེས་ཤིག །སྟེང་གི་ལྷ་ལ་མི་འཕེན་ནོ། །འོག་གི་ཀླུ་ལ་མི་འཕེན་ནོ། །གཞི་བདག་གཉན་ལ་མི་འཕེན་ནོ། །དབུ་ཞབས་བསྲིངས་པ་ཐམས་ཅད་བསྡུས། །དམ་ཉམས་དགྲ་བོའི་སྟེང་དུ་འཕེན། །ཤན་པ་འཁོར་བཅས་ད་རྒྱུག་ཅིག །མ་སྲིང་ལས་མཁན་ཆེན་མོ་རྣམས། །ཐུན་དང་ཟོར་གྱི་ལས་ལ་བྷྱོ། །

ཧཱུྃ། ཉུངས་དཀར་ཐུན་གྱི་རྒྱལ་པོ་འདི། །ཡན་ལག་མེད་པར་སྟོང་གསུམ་འགྲོ། །གཤོག་པ་མེད་པར་ནམ་མཁར་ལྡིང་། །མཚོན་ཆ་མེད་པར་ལྟོ་རྒྱབ་འབྱིན། །དགྲ་བོ་དམ་ཉམས་ཆེ་གེ་མོ། །ལྟོ་རྒྱབ་གཙང་མར་ཐལ་གྱིས་ཕྱུངས། །ཐོགས་པ་མེད་པར་བསྒྲལ་དུ་གསོལ། །ༀ་ཁྱི་ཁ་ལེ་ནག་མོས་སོད། མཱ་ར་ཡ་ཐུན་བྷྱོ། རྦད་ཐུམ་རི་ལི་ལི་ཧི་བ་ཧེ་ས་ར་ཁ་ར་ཧོར་ཏི་ཤོད། ཟོན་ཟོན་མཱཾ་ས་ཐུན་རྦད། ཅེས་པས་ཡུངས་ཀར་གྱི་ཟོར་དགྲ་ཕྱོགས་སུ་འཕངས་པས། ཡུངས་ཀར་རྡོག་པོ་རྣམས་ཕོ་ཉ་ཡང་སྤྲུལ་དུ་བསམས་ཏེ། སྐད་ཅིག་གིས་སོང་ནས་དགྲ་བོ་མི་ནོར་འཁོར་དང་བཅས་པ་ཐམས་ཅད་རྡུལ་དུ་བུན་བུན་སོང་ནས་མིང་ཡང་མེད་པར་བསམ་ཞིང་བརྒྱ་རྩ་བརྒྱད་དུ་འཕང་ངོ་། །དེ་ནས་ཆུ་ཟོར། ཁྲག་ཟོར། མདའ་ཟོར། རྡོ་ཟོར། མཚོན་ཟོར་རྣམས་ཀྱང་རིམ་པས་བརྒྱ་རྩ་རེ་དགྲ་ཕྱོགས་སུ་འཕང་ཞིང་། ཟོར་རྣམས་ལས་ཀྱི་ཤ་ཟ་འཕྲོ་བས་དགྲ་བོ་འཁོར་དང་བཅས་པ་ལ་བབས་ཏེ་ཁྲག་ཏུ་སྐྱུགས་ནས་བསད། མཚོན་གྱིས་གཏུབ། རྡུལ་ཕྲན་བཞིན་དུ་བརླག་པར་བསམ་ཞིང་། ཨ་ཁྱི་ཁ་ལེ་ནག་མོ་སོད། སྲོག་ཏྲི་སོད། སྙིང་ཁ་ཁ་བཾ་ཡ་ཡ་སོད། ཙ་བ་བ་རི་མུ་སོད། གྷ་ཡ་སོད། ཎི་ཡ་སོད། རཀྨོ་ཙིཏྟ་རྦད། ཆེ་གེ་མོའི་སྲོག་ལ་རྃ་ཡྃ་ཁྃ་མཱ་ར་ཡ་ཐུན་བྷྱོ། རཀྨོ་རྣྲ་ཤ་ཀུ་རུ་ལུ་ཐུཾ་རྦད། རཀྨོ་ཁ་ལ་ཙ་ཐུན་བྷྱོ། རཀྟ་ཐུན་རྦད། ཙ་ལ་ཙ་ལ་བྷྱོ། ཙིཏྟ་ལ་རྦད། སྙིང་ལ་དུན། རཀྨོ་ཁ་ལ་ཙ་ཙ་དུན་བྷྱོ། ཏི་ཐ་བཾ་རིལ། ས་མ་ཡ་དུན་བྷྱོ། དགྲ་བོའི་སྲོག་ལ་མཱ་ར་ཡ་ཐུན་བྷྱོ། ཞེས་བཟླས་ཤིང་རྔ་དང་རོལ་མོ་བྱ། ཟོར་འཕང་། དུལ་མོ་དང་དམོད་བཅོལ་བྱས་པས་ཟླ་བ་མི་བགྲང་བར་དགྲ་ལ་ཡམས་ནད་དང་། འཁྲུག་པ་དང་། ལྟས་ངན་དང་། ཡེ་འདྲོག་བྱུང་ནས་ཕུང་བར་བྱེད་དོ། །འདི་ཤིན་ཏུ་གཉན་པས་ལྟ་དགོངས་བརྟན་པ་གལ་ཆེའོ། །དེ་ནས་རང་གི་གནས་སུ་བཀྲ་ཤིས་བརྗོད་དོ། །

དཔལ་ལྡན་ཤན་པ་ནག་མོའི་སྐོང་གསོ་འདི། །ཐེག་མཆོག་རྡོ་རྗེ་རྒྱལ་པོའི་རྣལ་འབྱོར་པས། །གངས་རི་ཐོད་དཀར་མགུལ་དུ་ལེགས་པར་བཀོད། །དགེ་བས་མངོན་སྤྱོད་ཕྲིན་ལས་འགྲུབ་པར་ཤོག །ཤན་པ་ནག་མོའི་སྐོང་གསོ་རོ་ལངས་ཐལ་བྱེད་ཅེས་བྱ་བ་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བསྡེབས་པ་རྫོགས་སོ།། །།དགེའོ། །དགེའོ། །དགེའོ།། །།

རྒྱལ་བརྔན་ལག་ལེན་གནད་ཀྱི་ལྡེའུ་མིག་ཅེས་བྱ་བ།

༄༅། །རྒྱལ་བརྔན་ཞེས་བྱ་བ་བཞུགས་སོ། །

༄༅། །ཨོ་རྒྱན་པདྨ་འབྱུང་གནས་ལ་ཕྱག་འཚལ་ལོ། །རྒྱལ་བརྔན་འདི་ལ་དོན་ལྔ་སྟེ། མཛད་པ་པོ་གང་གིས་ན། མཆོག་དང་ཐུན་མོང་གི་དངོས་གྲུབ་བརྙེས་པའི་སློབ་དཔོན་པདྨ་འབྱུང་གནས་ཀྱིས་མཛད། གནས་གང་དུ་མཛད་ན། བྲག་དམར་དཔལ་གྱི་བསམ་ཡས་སུ་མཛད། དགོས་ཆེད་གང་ལ་མཛད་ན། སྔོན་བྱུང་རྒྱལ་པོའི་ཐུགས་དམ་དགོངས་པ་དཔལ་གྱི་བསམ་ཡས་བཞེངས་པ་དང་། ཕྱི་རབས་རྣལ་འབྱོར་པ་རྣམས་ཀྱི་འདོད་དོན་སྒྲུབ་པའི་དོན་དུ་མཛད། ཕན་ཡོན་ཇི་ལྟར་འབྱུང་ན། ལམ་འཕྲང་བགྲོད་པ་ལ་སོགས་གང་འདོད་ཐམས་ཅད་འགྲུབ། གང་དངོས་དོན་དུ་བསྟན་པ་ལ། །སྔོན་འགྲོ་དངོས་གཞི་རྗེས་གསུམ་ལས། །དང་པོ་ནི། རི་རྩེའམ་ཁང་ཐོག་གམ། ཆུ་འགྲམ་ལ་སོགས་ཕྱོགས་གཙང་(༡)མར། དར་མདུང་ལ་སོགས་པའི་རྟེན་བཙུགས་པའི་མདུན་དུ། རས་དཀར་རམ་ཕྱིང་དཀར་རམ་སྣམ་དཀར་དྲི་མ་མེད་པའི་ལྷ་གདན་གྱི་སྟེང་དུ་འབྲུའི་གཡུང་དྲུང་རིས་བྲི། ཚོམ་བུ་མང་དུ་བཀོད་པའི་མཐར། ཡོན་ཆབ་བདུག་སྤོས་ལ་སོགས་མཆོད་པ་རྣམ་པ་མང་པོ་དང་། དཀོན་མཆོག་སྤྱིའི་དཔལ་གཏོར། ཡུལ་ལྷ་སྤྱིའི་དཀར་གཏོར། འབྱུང་པོ་སྤྱིའི་བགེགས་གཏོར། སྐུ་གླུད་སྡེར་ཆ་གང་མང་རྣམས་བཤམ། དེའི་མཐར་གཟུགས་འགྲོས་རྟ། དྲེལ། མཛོ། གཡག །འབྲོང་། ཤྭ་བ། ར། ལུག་སྟག །གཟིག །དོམ། དྲེད། བྱ་ནག །ཁྱི་ནག །རུས་སྦལ། མི། སྦལ་པ། ལྕོང་མོ། ཉ། དུང་། གསེར་བྲེ། དངུལ་བྲེ། དོང་ཙེ། གླུད་རྣམས་སྡེར་ཆ་གཙང་མར་བཤམ། དཀར་གསུམ། མངར་གསུམ། ཆང་། ཟས་སྣ། རིན་པོ་ཆེའི་ཕྱེ་མ་དང་བཅས་པ་བཤམ། དེའི་མདུན་དབུས་མར་བསང་བཤོས་གཙང་མར་ཟས་སྣས་བསྐོར་བ་བཤམ། དེའི་དབུས་སུ་ཆང་ཕུད་གྲལ་ཐབས་དང་། དེའི་གཡོན་དུ་དྲི་བཟང་དང་རིན་པོ་ཆེའི་ཕྱེ་མ་བཏབ་པའི་ཆུ་སྣའི་སྣོད་བཤམ། ཀུན་གྱི་གཡས་རོལ་དུ་ཤིང་སྣའི་མེ་དང་ཕྱེ་མར་གྱིས་བཀང་བའི་སྣོད་བཤམ། ཕྱོགས་མཚམས་སུ་མདུང་དར་དང་དར་པོ་ཆེ་འཛུགས། རྔ་དུང་ཆ་ལང་ལ་སོགས་པའི་རོལ་མོས་བསྐོར་བའི་ནང་། བསང་བཤོས་ལ་ཉེ་བར་བསང་གཡོག་དང་བཅས་པས་སྦྲེངས་ཏེ་འདུག་ལ། དང་པོ་སྤྱོད་པའི་ཆོ་ག་དང་། གཉིས་པ་དངོས་གཞི་ལ་སྐྱབས་འགྲོ་སེམས་བསྐྱེད་དང་། བདག་ཉིད་གུ་རུ་བསྒོམས་ནས་མཆོད་པ་དང་གཏོར་མ་བྱིན་གྱིས་བརླབ། གདངས་སྙན་པོས་མགྲོན་རྣམས་སྤྱན་དྲངས་ལ། རེ་རེ་བཞིན་བརྔན་པའི་མཚམས་སུ་བསང་ཕུད་དྲངས་པའི་རས་མ་དང་ཟས་སྣ་ཚོགས་མཆོད་འབྲུ་དང་བཅས་པ་བླུགས་ལ་བཤམ། ཕུད་འཐོར་བ་དང་མཉམ་དུ་ཆུ་སྣའི་ཕུད་སྦྲེང་ཞིང་། ཤིང་སྣའི་མེ་ལ་ཕྱེ་མར་འབྲུ་སྣ་མེ་ཏོག་སྣ་ཚོགས་རིན་པོ་ཆེའི་ཕྱེ་མ་རྣམས་མེ་ལ་བསྲེག་ཅིང་། ཤིང་སྣའི་དུ་བ་བཏང་ཞིང་རོལ་མོའི་སྒྲ་བསྒྲག་པར་བྱའོ། །རྗེས་སུ་གཟུགས་འགྲོས་རྣམས་གཤེགས། བསང་རས་དང་ཤ་ཆང་ལ་སོགས་པ་དགའ་སྟོན་ལ་རོལ་ཞིང་། རྡོ་རྗེའི་གླུ་དང་། ཤིན་ཏུ་སྐྱིད་པའི་བྲོ་བརྡུང་། རྗེས་ལ་བཀྲ་ཤིས་པའི་ཚིགས་སུ་བཅད་པ་བརྗོད་དོ། །རྒྱལ་བརྔན་ལག་ལེན་གནད་ཀྱི་ལྡེའུ་མིག་(༣)ཅེས་བྱ་བ་ཀུན་མཁྱེན་དྲི་མེད་འོད་ཟེར་གྱིས་འབྲོག་རིན་ཆེན་དཔལ་གྱི་ཨོ་རྒྱན་དུ་སྦྱར་བའོ། །དགེའོ།། །།

རྒྱལ་བརྔན་ལོ་རྒྱུས་དང་བཅས་པ།

༄༅། །རྒྱལ་བརྔན་ལོ་རྒྱུས་དང་བཅས་པ་ཞེས་བྱ་བ་བཞུགས་སོ། །

༄༅། །ༀ་གུ་རུ་དེ་ཝ་ཌཱ་ཀི་ནཱི་ན་མ། སྔོན་འཛམ་བུ་གླིང་གི་དབུས་དག་ན། །བཙད་པོ་ཁྲི་སྲོང་ལྡེའུ་བཙན་དེས། །བསམ་ཡས་ཆོས་འཁོར་བཞེངས་པ་ལ། །ས་བདག་ཀླུ་གཉན་ཁྲོས་གྱུར་ནས། །ལྷ་ཁང་ཉིན་བརྩིགས་མཚན་མོར་བཤིག །རི་རྡོ་ཐམས་ཅད་གཤོང་ལ་ཕག །ཀླུང་རྡོ་ཐམས་ཅད་རི་ལ་བསྐྱལ། །ལོ་ཏོག་རྩི་ཤིང་ཐམས་ཅད་བསྲེགས། །ནད་དང་གནོད་པ་སྣ་ཚོགས་བྱུང་། །བཙན་པོའི་ལྷ་ཁང་ཤོལ་ལ་ཐུག །བཙན་པོ་རྒྱལ་བློན་བཀའ་བགྲོས་ཏེ། །སློབ་དཔོན་པདྨ་སྤྱན་དྲངས་ནས། །བྲག་དམར་དཔལ་གྱི་བསམ་ཡས་སུ། །སློབ་དཔོན་པདྨ་འབྱུང་གནས་ཀྱིས། །རྡོ་རྗེ་ཕུར་པའི་དཀྱིལ་འཁོར་བཞེངས། །ལྷ་འདྲེ་ཐམས་ཅད་དམ་ལ་བཏགས། །དཀོན་མཆོག་གསུམ་ལ་མཆོད་པ་ཕུལ། །ལྷ་དང་སྲུང་མ་ཐམས་ཅད་དང་། །ས་བདག་ཀླུ་གཉན་ཐམས་ཅད་བརྔན། །དེ་ཚེ་ཆོས་འཁོར་བཞེངས་སུ་བཏུབ། །ལྷ་སྲུང་བརྔན་པའི་བྱིན་རླབས་ཀྱིས། །བོད་ཁམས་བདེ་ཞིང་བཀྲ་ཤིས་དང་། །རྒྱལ་བློན་སྐུ་ཚེ་རིང་བ་དང་། །འབྲས་དྲུག་ལོ་ཏོག་སྨིན་པ་དང་། །ཤིང་ཏོག་རྩི་ཐོག་རྒྱས་པ་དང་། །ལེགས་པའི་ཡོན་ཏན་བསམ་མི་ཁྱབ། །དེ་ཕྱིར་ཕྱི་རབས་རྣལ་འབྱོར་པས། །བསམ་པ་ཐམས་ཅད་འགྲུབ་པ་དང་། །གྲགས་པས་ནམ་མཁའ་ཁྱབ་པ་དང་། །བཀྲ་ཤིས་བདེ་ལེགས་ཕུན་ཚོགས་དང་། །སངས་རྒྱས་བསྟན་པ་བསྲུང་བ་དང་། །དགེ་བའི་བར་ཆད་བསལ་བ་དང་། །སྒྲུབ་པོའི་སྡོང་གྲོགས་བྱེད་པ་དང་། །ནད་པ་ཡོ་ནས་བསླང་བ་དང་། །ཡུལ་མཁར་སོ་མ་རྩིག་པ་དང་། །དགོན་གནས་གསར་རྙིང་འཛིན་པ་དང་། །ཐག་རིང་མགྲོན་པོ་འགྲོ་བ་དང་། །ཆུ་ཆེན་སྒྲོལ་དང་ཟམ་འཛུགས་དང་། །གཏོ་འཕེན་དམག་སྣ་བཟློག་པ་དང་། །ནོར་བསྐྱང་རྒན་པོའི་ཚེ་བསྲིང་དང་། །བུ་ཚ་གསོ་དང་ཚེ་ཐར་གཏོང་། །གདོན་བགེགས་གནོད་པ་སྲུང་བ་དང་། །རྨི་ལྟས་ངན་པ་བཟློག་པ་དང་། །བྲི་ཀློག་ཉན་བཤད་བྱེད་པ་དང་། །རིམས་ནད་ཡམས་ནད་བཅད་པ་དང་། །སད་སེར་སྲུང་དང་ཆར་འབེབས་དང་། །བག་མ་གཏོང་ལེན་བྱེད་པ་དང་། །ཞིང་རྨོ་ཁང་ཁྱིམ་འབུབ་པ་དང་། །མཐུ་དང་སེར་བ་འབེབས་པ་སོགས། །ཞི་རྒྱས་དབང་དྲག་ལ་སོགས་པའི། །དྲག་དལ་ལས་རྣམས་གང་བྱེད་ཀྱང། །བླ་མ་དཀོན་མཆོག་མཆོད་པ་དང་། །ལྷ་འདྲེ་ཐམས་ཅད་བརྔན་པ་ནི། །ཤིན་ཏུ་གཙང་མའི་ས་གཞི་ལ། །གཞི་མ་དཀར་པོའི་སྟེང་དུ་ནི། །དཀོན་མཆོག་མཆོད་པ་རྒྱ་ཆེར་བཤམ། །ཤ་ཆང་གཏོར་མ་སྣ་ཚོགས་དང་། །ཟས་ཕུད་གཙང་མ་སྣ་ཚོགས་དང་། །རིན་ཆེན་འབྲུ་སྣ་སྣ་ཚོགས་དང་། །འབྲས་ཀྱི་གཡག་ལུག་ར་གསུམ་དང་། །བ་གླང་བོང་བུ་མཛོ་དྲེའུ་དང་། །སྲོག་ཆགས་གཟུགས་བརྙན་སྣ་ཚོགས་བྱེད། །མངར་གསུམ་སྨན་སྣ་མང་པོ་དང་། །དཀར་གསུམ་མེ་ཏོག་སྣ་ཚོགས་དང་། །གསེར་སྡོང་རིན་ཆེན་སྣ་ཚོགས་དང་། །སྟག་(༤)སོགས་རས་མ་སྣ་ཚོགས་དང་། །ཟ་འོག་དར་སྣ་སྣ་ཚོགས་དང་། །དུང་སོགས་མཆོད་པ་སྣ་ཚོགས་དང་། །སྦ་སོག་རྩི་ཤིང་སྣ་ཚོགས་དང་། །མཁན་ཤུག་ཕྱེ་མར་སྤོས་སྣ་སོགས། །དྲི་ཞིམ་དུད་པས་ནམ་མཁའ་གང་། །དར་ཕྱར་དུང་འབུད་རྔ་ཆེན་བརྡུང་། །སྙན་པའི་དབྱངས་ཀྱི་འདི་སྐད་དོ། །ཧཱུྃ། བསྟན་པ་འདི་ལ་ངོ་མཚར་རྨད་དུ་བྱུང་། །འཇིག་རྟེན་མགོན་གྱུར་པདྨ་རྒྱལ་པོ་ནི། །རིགས་ནི་ཟ་ཧོར་རྒྱལ་པོའི་རིགས་སུ་འཁྲུངས། །ཨོ་རྒྱན་ཡུལ་དུ་སྒྲོ་འདོགས་མ་ལུས་བཅད། །བསིལ་བ་ཚལ་དུ་དངོས་གྲུབ་མ་ལུས་བརྙེས། །ཝཱ་ར་ཎཱ་སཱིར་ཆོས་ཀྱི་འཁོར་ལོ་བསྐོར། །རྡོ་རྗེ་གདན་དུ་བསྟན་པའི་རྒྱལ་མཚན་བཙུགས། །རྒྱ་གར་ཡུལ་དུ་བསྟན་པ་རྒྱས་པར་མཛད། །བོད་ཀྱི་ཡུལ་དུ་སྣང་སྲིད་ལྷ་འདྲེ་བཏུལ། །ཁ་བ་ཅན་དུ་བསྟན་པ་རྒྱས་པར་མཛད། །ལྷོ་ནུབ་རྔ་ཡབ་གླིང་ཕྲན་ཡུལ་དུ་བྱོན། །ཞེ་སྡང་གདོང་དམར་སྲིན་པོའི་ཁ་གནོན་མཛད། །མྱ་ངན་མི་འདའ་འགྲོ་བའི་གཉེན་གཅིག་པུ། །སྐུ་གསུམ་ཆེ་མཆོག་བཛྲ་ཧེ་རུ་ཀ །དུས་གསུམ་མཉམ་ཉིད་བླ་མ་དུས་འདིར་དྲན། །བདག་དང་དབྱེར་མེད་བླ་མ་ཧེ་རུ་ཀ །རྒྱལ་བའི་དཀྱིལ་འཁོར་དག་པ་ཆེན་པོ་འདིར། །མི་འགྱུར་ལྷུན་གྲུབ་པདྨ་རྒྱལ་པོ་དང་། །བླ་མ་ཡི་དམ་མཁའ་འགྲོས་བྱིན་གྱིས་རློབས། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཧཱུྃ། བླ་མ་ཡི་དམ་མཁའ་འགྲོ་དང་། །སངས་རྒྱས་ཆོས་དང་དགེ་འདུན་དང་། །ཞི་རྒྱས་དབང་དང་མངོན་སྤྱོད་ལྷ། །ཕྱི་ནང་སྲུང་མའི་ཚོགས་རྣམས་དང་། །གསང་སྔགས་རིག་སྔགས་ལྷ་རྣམས་དང་། །འདས་དང་མ་བྱོན་ད་ལྟར་གྱི། །ཕྱི་ནང་སྲུང་མ་དམ་ཚིག་ཅན། །མ་མོ་མཁའ་འགྲོ་ཤུགས་འགྲོ་དང་། །འཇིག་རྟེན་གནས་ཀྱི་མཆོག་གྱུར་པའི། །སྒྲུབ་གནས་བྱིན་ཆེན་ཐམས་ཅད་དང་། །གཞན་ཡང་ས་འོག་ས་སྟེང་གི། །གནས་བདག་ཆེན་པོ་ཐམས་ཅད་དང་། །འཁོར་དུ་གཏོགས་པའི་སྡེ་བརྒྱད་པོ། །སྟོང་གསུམ་ཁྱབ་པའི་མཐུ་རྩལ་ཅན། །ཆེ་རྒུ་གཉན་རྒུ་ཐམས་ཅད་དང་། །གཙུག་ལག་ཁང་དང་དབེན་གནས་ཀྱི། །སྲུང་མ་གཉན་པོ་ཐམས་ཅད་དང་། །གཞན་ཡང་ལྷ་ཀླུ་གནོད་སྦྱིན་དང་། །དྲི་ཟ་གྲུལ་བུམ་མཁའ་འགྲོ་སོགས། །བརྔན་པར་འོས་པའི་མགྲོན་རྣམས་དང་། །ས་བདག་ཀླུ་གཉན་ཐམས་ཅད་ཀུན། །སངས་རྒྱས་བསྟན་པ་བསྲུང་བ་དང་། །སྒྲུབ་པའི་སྡོང་གྲོགས་བྱེད་པ་དང་། །དགོན་གནས་བར་ཆད་བསལ་བ་དང་། །དགྲ་དང་བགེགས་རྣམས་གཞོམ་པ་དང་། །ནད་གདོན་གནོད་པ་ལ་སོགས་པ། །ཆག་ཆེ་ཉམ་ང་བཟློག་པ་དང་། །འདོད་པ་ཐམས་ཅད་སྒྲུབ་པའི་ཕྱིར། །མགྲོན་རྣམས་སྤྱན་འདྲེན་གནས་འདིར་བྱོན། །འདིར་གཤེགས་བཤམ་པའི་མཆོད་པ་བཞེས། །བསྟན་པ་དར་ཞིང་རྒྱས་པར་མཛོད། །བདག་དང་རྒྱུ་སྦྱོར་ཡོན་བདག་གིས། །ཡིད་ལ་རེ་བ་སྐོང་བ་དང་། །ཀུན་ཀྱང་བཤད་པའི་ཆོས་ལ་ཉོན། །བྱིན་རླབས་དངོས་གྲུབ་དཀྱིལ་འཁོར་ནས། །སྐུ་ལྔ་ཡེ་ཤེས་ལྔ་ལྡན་(༥)མཆོག །སྒྲུབ་བརྒྱུད་བླ་མའི་ཚོགས་རྣམས་ལ། །ཕྱག་འཚལ་མཆོད་པ་སྣ་ཚོགས་འབུལ། །ཆོས་ཀྱི་དབྱིངས་ཀྱི་ཕོ་བྲང་ནས། །ཆོས་སྐུ་ཀུན་བཟང་ལ་སོགས་པའི། །ཆོས་སྐུའི་བླ་མ་ཐམས་ཅད་ལ། །ཕྱག་འཚལ༴། །མཚན་དཔེ་འབར་བའི་ཞིང་ཁམས་ནས། །ཞི་ཁྲོ་རབ་འབྱམས་ལ་སོགས་པའི། །ལོངས་སྐུའི་བླ་མ་ཐམས་ཅད་ལ། །ཕྱག་འཚལ༴། །འོག་མིན་ཆོས་ཀྱི་ཕོ་བྲང་ནས། །དྲུག་པ་རྡོ་རྗེ་འཆང་ཆེན་དང་། །རྩ་བརྒྱུད་བླ་མའི་ཚོགས་རྣམས་ལ། །ཕྱག་འཚལ༴། །ཁྱད་པར་འགྲོ་བའི་གཉེན་གཅིག་པུ། །ཨོ་རྒྱན་པདྨ་རྒྱལ་པོ་ལ། །ཕྱག་འཚལ༴། །སྐུ་གསུང་ཐུགས་ཀྱི་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །སྤྲུལ་སྐུའི་བླ་མ་ཐམས་ཅད་ལ། །ཕྱལ་འཚལ༴། །བཅོམ་ལྡན་རྒྱལ་བ་རིགས་ལྔ་ལ། ཕྱག་འཚལ༴། །ཡུམ་ལྔ་རིན་ཆེན་ཕྲེང་བ་ལ། །ཕྱག་འཚལ༴། །ཕྱོགས་བཅུའི་སངས་རྒྱས་ཐམས་ཅད་ལ། །ཕྱག་འཚལ༴། དུས་གསུམ་སངས་རྒྱས་ཐམས་ཅད་ལ། །ཕྱག་འཚལ༴། །ཞི་ཁྲོ་དཔལ་ཆེན་འཁོར་བཅས་ལ། །ཕྱག་འཚལ༴། །རིགས་གསུམ་མགོན་པོ་འཁོར་བཅས་ལ། །ཕྱག་འཚལ༴། །གདུང་བ་སེལ་བ་ལ་སོགས་པའི། །འཕགས་པ་རང་རྒྱལ་ཐམས་ཅད་ལ། །ཕྱག་འཚལ༴། །འོད་སྲུང་ཆེན་པོ་ལ་སོགས་པའི། །ཉན་ཐོས་ཆེན་པོ་ཐམས་ཅད་ལ། །ཕྱག་འཚལ༴། །བྷ་ར་དྷྭ་ཛ་ལ་སོགས་པའི། །གནས་བརྟན་ཆེན་པོ་ཐམས་ཅད་ལ། །ཕྱག་འཚལ༴། །ནམ་མཁའི་སྙིང་པོ་ལ་སོགས་པའི། །བྱང་ཆུབ་སེམས་དཔའ་ཐམས་ཅད་ལ། །ཕྱག་འཚལ་མཆོད༴། །ཚོགས་གཉིས་རྒྱ་མཚོ་རྫོགས་པར་མཛོད། །ཨིནྡྲ་བྷཱུ་ཏི་ལ་སོགས་པའི། །གྲུབ་ཆེན་བརྒྱད་པོ་ཐམས་ཅད་ལ། །ཕྱག་འཚལ༴། །ས་ར་ཧ་པ་ལ་སོགས་པའི། །གྲུབ་ཆེན་བརྒྱད་ཅུ་རྩ་བཞི་ལ། །ཕྱག་འཚལ༴། །ཀླུ་སྒྲུབ་སྙིང་པོ་ལ་སོགས་པའི། །རྒྱན་དྲུག་མཆོག་བརྒྱད་ཐམས་ཅད་ལ། །ཕྱག་འཚལ༴། །དོན་ཡོད་ཞགས་པ་ལ་སོགས་པའི། །ཀྲི་ཡ་བྱ་རྒྱུད་ལྷ་རྣམས་དང་། །པདྨ་བརྩེགས་པ་ལ་སོགས་པའི། །ཨུ་པ་སྤྱོད་རྒྱུད་ལྷ་རྣམས་ལ། །ཕྱག་འཚལ༴། །ངན་སོང་སྦྱོང་བ་ལ་སོགས་པའི། །ཡོ་ག་རྣལ་འབྱོར་ལྷ་རྣམས་ལ། །ཕྱག་འཚལ༴། །གསང་འདུས་རྡོ་རྗེ་གདན་བཞི་དང་། །མཱ་ཡཱ་འཇིགས་བྱེད་སྒྱུ་འཕྲུལ་དྲྭ། །རྡོ་རྗེ་ཕུར་པ་ལ་སོགས་པའི། །མཧཱ་ཨ་ནུ་བླ་མེད་ཀྱི། །དཀྱིལ་འཁོར་ལྷ་ཚོགས་ཐམས་ཅད་ལ། །ཕྱག་འཚལ༴། །མི་ནུབ་བྱང་ཆུབ་སེམས་ཀྱི་ལུང་། །ཀུན་བཟང་རྡོ་རྗེ་སེམས་དཔའི་ཚོགས། །སྙིང་པོ་དོན་གྱི་ལྷ་རྣམས་ལ། །ཕྱག་འཚལ༴། །འཇམ་དཔལ་སྐུ་དང་པདྨ་གསུང་། །ཕུར་པ་ཕྲིན་ལས་ལ་སོགས་པའི། །སྒྲུབ་པ་བཀའ་བརྒྱད་ལྷ་རྣམས་ལ། །ཕྱག་འཚལ༴། །ནུབ་ཕྱོགས་ཨོ་རྒྱན་ལ་སོགས་པའི། །དུར་ཁྲོད་ཆེན་པོ་ཐམས་ཅད་ཀྱི། །མ་སྲིང་མཁའ་འགྲོ་རྒྱ་མཚོ་ལ། །ཕྱག་འཚལ༴། །གནས་དང་ཉེ་བའི་གནས་དང་ཡུལ། །ཉི་ཤུ་རྩ་བཞིའི་མཁའ་འགྲོ་དང་། །(༦)སྲུང་མ་ཞིང་སྐྱོང་ཐམས་ཅད་ལ། །ཕྱག་འཚལ༴། །འདོད་རྒུའི་རེ་བ་བསྐང་དུ་གསོལ། །ཧཱུྃ། མཆོད་ཡོན་མེ་ཏོག་བདུག་སྤོས་དྲི། །ཞལ་ཟས་རོལ་མོ་གཏོར་མ་དང་། །སྐུ་གླུད་བསང་ཕུད་སྣ་ཚོགས་ཀྱིས། །འཇིག་རྟེན་འདས་དང་མ་འདས་པའི། །སྲུང་མ་གཉན་པོ་ཐམས་ཅད་དང་། །ལྷ་ཀླུ་གནོད་སྦྱིན་དྲི་ཟ་སོགས། །ཆེ་རྒུ་གཉན་རྒུ་ཐམས་ཅད་བརྔན། །ན་བཟའ་ལྷབ་ལྷུབ་སྣ་ཚོགས་དང། །རིན་ཆེན་ལྔ་ཡི་ཕྲེང་བ་ཡིས། །ལྷ་ཡི་དབང་པོ་ཚངས་པ་བརྔན། །བརྒྱ་བྱིན་གསེར་གྱི་ཕྱེ་མས་བརྔན། །རྒྱལ་ཆེན་སྡེ་བཞི་སྟག་གིས་བརྔན། །ཤེལ་སྒོང་ནག་པོ་སྤྱི་དཀར་དང་། །ཤ་ཁྲག་དམར་གྱི་གཏོར་མ་ཡིས། །མཧཱ་ཀཱ་ལ་ལྕམ་དྲལ་དང་། །ལེགས་ལྡན་ནག་པོ་འཁོར་བཅས་བརྔན། །རྒྱན་ཆའི་མཆོད་པ་སྣ་ཚོགས་དང་། །བདུད་རྩི་ཤ་ཁྲག་གསེར་སྐྱེམས་དང་། །མཁའ་ལྡིང་ནག་པོ་གསེར་མིག་གིས། །དཔལ་ལྡན་ལྷ་མོ་འཁོར་བཅས་བརྔན། །ཕྱི་ནང་གསང་བའི་མཆོད་གཏོར་དང་། །བྱ་ནག་ཁྱི་སྤྱང་དོམ་དྲེད་དང་། །བསང་ཕུད་སྤྱན་གཟིགས་སྣ་ཚོགས་ཀྱིས། །སྔགས་བདག་ཤན་པ་གཟའ་མཆོག་དང་། །དམར་ནག་དམ་ཅན་ལ་སོགས་པ། །དམ་ཅན་རྒྱ་མཚོ་འཁོར་བཅས་བརྔན། །ལྷ་རྣམས་འདོད་ཡོན་རྣམ་ལྔས་བརྔན། །ལྷ་མོ་མེ་ཏོག་ཕྲེང་བས་བརྔན། །ཀླུ་རྣམས་མངར་གསུམ་གཏོར་མས་བརྔན། །གཉན་རྣམས་དཀར་གསུམ་དར་ཟབ་བརྔན། །ས་བདག་གསེར་དངུལ་རིན་ཆེན་བརྔན། །ལྷ་མོ་བརྟན་མ་བུམ་པས་བརྔན། །དྲི་ཟ་དྲི་དང་གསུར་གྱིས་བརྔན། །གཤིན་རྗེ་ཤ་ཆང་གཏོར་མས་བརྔན། །ལྟོ་འཕྱེ་གྲུལ་བུམ་མི་འམ་ཅི། །མཁའ་ལྡིང་མཆོད་སྦྱིན་གཏོར་མས་བརྔན། །གནོད་སྦྱིན་རླུང་ལྷ་དྲང་སྲོང་རྣམས། །གསེར་གཡུ་སྦ་དང་སྨྱུག་མས་བརྔན། །དགེ་བསྙེན་ཤ་དང་ཆང་གིས་བརྔན། །ལྷ་འདྲེ་ཡིད་ཀྱི་གཟུགས་ཅན་རྣམས། །ཡིད་དང་མཐུན་པའི་གཏོར་མས་བརྔན། །བཙན་རྣམས་བྱ་དང་ར་དཀར་བརྔན། །ཀླུ་བདུད་སྦྲུལ་དང་སྦལ་པས་བརྔན། །ལན་ཆགས་མགྲོན་རྣམས་གཏོར་མས་བརྔན། །དམ་སྲི་གནོད་སྦྱིན་འབྱུང་པོ་རྣམས། །སྐུ་གླུད་དར་ཟབ་གཏོར་མས་བརྔན། །རྒྱ་མཚོའི་ནང་གི་ཀླུ་ཆེན་བརྒྱད། །ཀླུ་རྟ་རྒྱན་དང་བཅས་པས་བརྔན། །བར་སྣང་གནས་པའི་གཟའ་ཆེན་བརྒྱད། །ནས་ནག་ར་དང་སྙིང་གིས་བརྔན། །རྒྱུ་སྐར་ཉི་ཤུ་རྩ་བརྒྱད་དང་། །བློན་པོ་སུམ་ཅུ་རྩ་བདུན་རྣམས། །རིན་ཆེན་གསེར་འབུལ་ཕྱེ་མས་བརྔན། །འཕྲོག་མ་མ་བུ་ལྔ་བརྒྱའི་ཚོགས། །ཆང་བུ་དག་གི་གཏོར་མས་བརྔན། །རིགས་ཀྱི་སྲུང་མ་ཐམས་ཅད་ལ། །སོ་སོར་དགྱེས་པའི་གཏོར་མས་བརྔན། །སྒོ་བཞི་སྲུང་མ་འཁོར་བཅས་རྣམས། །རིན་ཆེན་དར་ཟབ་དོང་ཙེས་བརྔན། །ལྷ་སྲུང་གཉན་པོ་ཁྱེད་རྣམས་ཀྱིས། །བདག་ཅག་ཡོན་མཆོད་འཁོར་བཅས་ཀྱི། །བསམ་པ་སྒྲུབ་ལ་རེ་བ་སྐོངས། །འཁོར་སྲུང་རྐྱེན་ཟློག་བར་ཆད་སོལ། །བཀྲ་ཤིས་བདེ་ལེགས་ཕུན་ཚོགས་མཛོད། །ཧཱུྃ། དུས་གསུམ་སངས་རྒྱས་ཐམས་ཅད་ཀྱི། །བྱང་ཆུབ་ཐུགས་སུ་ཆུད་པའི་གནས། །(༧)རྡོ་རྗེ་གདན་གྱི་ས་བདག་བརྔན། །རྒྱ་གར་ཤར་ནུབ་རི་ཆེན་པོ། །མ་མོ་མཁའ་འགྲོ་འདུ་བའི་གནས། །རི་བོ་ཏ་ལའི་ས་བདག་བརྔན། །རྡོ་རྗེ་གདན་གྱི་བྱང་ཕྱོགས་ན། །བྱ་རྒོད་ཕུང་པོའི་རི་དང་ནི། །སྤོས་ངད་ལྡན་པའི་རི་བོ་ཡི། །ས་བདག་གཉན་པོ་ཐམས་ཅད་བརྔན། །ཙཱ་རི་ཙ་གོང་ལ་སོགས་པའི། །རྒྱ་གར་ཤར་ཕྱོགས་ཡུལ་རྣམས་ཀྱི། །ས་བདག་གཉན་པོ་ཐམས་ཅད་བརྔན། །བསིལ་བ་ཚལ་གྱི་དུར་ཁྲོད་དང་། །རྔམས་པ་སྒྲ་སྒྲོགས་ཚང་ཚིང་འཁྲིགས། །ཧ་ཧ་དགོད་པ་ལ་སོགས་འདི། །དུར་ཁྲོད་བརྒྱད་ཀྱི་ས་བདག་བརྔན། །རྒྱལ་པོའི་ཁབ་དང་ཡངས་པ་ཅན། །མཉན་ཡོད་གནས་བཅས་ལ་སོགས་པའི། །གྲོང་ཁྱེར་ཡུལ་འཁོར་ཐམས་ཅད་ཀྱི། །ས་བདག་གཉན་པོ་ཐམས༴། །གཞན་ཡང་ཁ་ཆེ་ཨོ་རྒྱན་ཡུལ། །ལི་ཡུལ་བལ་ཡུལ་ལ་སོགས་པའི། །ས་བདག་གཉན་པོ་ཐམས༴། །འཇིག་རྟེན་གསུམ་སྣང་མནྡཱ་ར། །འབིགས་བྱེད་ལ་སོགས་འཛམ་གླིང་འདིའི། །ས་བདག་གཉན་པོ་ཐམས༴། །མ་དྲོས་ལ་སོགས་མཚོ་རྣམས་དང་། །གངྒཱ་སིནྡྷུ་ལ་སོགས་པའི། །ཆུ་ཆེན་རྣམས་ཀྱི་ས་བདག༴། །ཏི་སེ་གངས་རི་ལ་སོགས་པའི། །མགུར་ལྷ་གཉན་པོ་ཐམས༴། །མ་ཕམ་ཀླུ་གཉན་ལ་སོགས་པའི། །ས་བདག་གཉན་པོ་ཐམས༴། །རི་བོ་གནྡྷོ་ལ་སོགས་པའི། །ལི་ཡི་ས་བདག་ཐམས༴། །ལྕང་ར་སྨུག་པོ་ལ་སོགས་པའི། །སོག་ཡུལ་གཞི་བདག་གཉན་པོ༴། །གཞན་ཡང་གྲུ་གུ་ཞང་ཞུང་དང་། །གར་ལོག་ལ་སོགས་མཐའ་འཁོབ་ཡུལ། །

གཞི་བདག་གཉན་པོ་ཐམས༴། །རྒྱ་གར་རྒྱན་ནག་ཧོར་དང་འཇང་། །བལ་ཡུལ་བོད་ཡུལ་ལ་སོགས་པའི། །གཞི་བདག་གཉན་པོ་ཐམས་ཅད༴། །ཁྱད་པར་མངའ་རིས་དབུས་གཙང་དང་། །མདོ་ཁམས་གཞི་བདག་གཉན་པོ༴། །བདག་ཅག་དཔོན་སློབ་འཁོར་བཅས་ཀྱི། །འཁོར་སྲུངས་རྐྱེན་ཟློག་བར་ཆད་སོལ། །བསམ་པ་སྒྲུབས་ལ་རེ་བ་སྐོངས། །བཀྲ་ཤིས་བདེ་ལེགས་ཕུན་ཚོགས་མཛོད། །ཧཱུྃ། ཡུལ་ནི་རྡོ་རྗེའི་བྲག་དམར་གྱི། །སྲིང་གཅིག་གངས་དཀར་ཤ་མེད་མ། །ཆིབས་སུ་དྲེའུ་རྟ་རྐང་གསུམ་ཆིབས། །བཤོས་བུ་སྙིང་དང་གཏོར་མས་བརྔན། །ཡུལ་ནི་རྨ་ཆེན་སྤོམ་ར་ཡི། །སྲིང་གཅིག་ཁ་རག་ཁྱུང་བཙུན་མ། །ཆིབས་སུ་གྱི་ལིང་ཁ་དཀར་བཅིབས། །བཤོས་བུ༴། །ཡུལ་ནི་དབུ་རུའི་ཉིན་ཚལ་གྱི། །སྲིང་གཅིག་རྡོ་རྗེ་གཡུ་སྒྲོན་མ། །ཆིབས་སུ་ཆུ་རྟ་སྔོན་པོ་བཅིབས། །བཤོས་བུ༴། །ཡུལ་ནི་མནྡཱ་དེ་བ་ཡི། །སྲིང་གཅིག་རྡོ་རྗེ་ཀུན་གྲགས་མ། །ཆིབས་སུ་ཆུ་གླང་སྔོན་པོ་བཅིབས། །བཤོས་བུ༴། །ཡུལ་ནི་ལྷོ་ཡུལ་དེ་ཉིན་གྱི། །སྲིང་གཅིག་སྐྱི་མཐིང་གཡའ་མ་སྐྱོང་། །ཆིབས་སུ་གསེར་ཤ་ཡུ་མོ་བཅིབས། །བཤོས་བུ༴། །ཡུལ་ནི་དཔེ་མེད་ལྟེ་བ་ཡི། །སྲིང་གཅིག་ཁུག་ཆོས་གཡའ་མ་བསིལ། །ཆིབས་སུ་རུས་སྦལ་མགོ་དགུ་བཅིབས། །བཤོས་བུ༴། ཡུལ་ནི་བལ་ཡུལ་གསེར་ཕུག་ན། །ཨེ་ཀ་ཛ་ཊཱི་རལ་གཅིག་མ། །ཆིབས་སུ་གཡུ་འབྲུག་སྔོན་པོ་བཅིབས། །བཤོས་བུ༴། །ཡུལ་ནི་ནཱ་ལེན་དྷ་ར་(༨)ན། །བཙན་ལ་རོལ་པའི་སྨན་གཅིག་མ། །ཆིབས་སུ་དྲེའུ་རྟ་རྐང་གསུམ་བཅིབས། །བཤོས་བུ༴། །ཡུལ་ནི་ཀོང་ཡུལ་ཀོང་ཕུག་ན། །སྲིང་གཅིག་གངས་ཀྱི་གཡུ་བུན་མ། །ཆིབས་སུ་སྟག་མོ་རིས་ཁྲ་བཅིབས། །བཤོས་བུ༴། །ཡུལ་ནི་མང་ཡུལ་མང་ཏིང་ན། །ཆེ་ཞེ་གཙུག་གི་འོད་འཆང་མ། །ཆིབས་སུ་འབྲོང་པོ་དར་མ་བཅིབས། །བཤོས་བུར༴། །ཡུལ་ནི་དབུ་རུ་སྙིང་པོ་ཡི། །བྱང་གི་མང་ཏིང་ཏིང་མོ་བཙུན། །ཆིབས་སུ་འབྲོང་ཆེན་འབྱིང་བ་བཅིབས། །བཤོས་བུ༴། །ཡུལ་ནི་ནུབ་ཡུལ་རྒན་ཚལ་གྱི། །བརྡལ་ལྷ་བཙན་མོ་གདུག་པ་འདུལ། །ཆིབས་སུ་དོམ་ནག་སྙིང་དཀར་བཅིབས། །བཤོས་བུར༴། །བརྟན་མ་ཆེན་མོ་ཁྱེད་རྣམས་ཀྱིས། །བདག་ཅག་དཔོན་སློབ་འཁོར་བཅས་ཀྱི། །བསམ་པ་སྒྲུབ་ལ་རེ་བ་སྐོངས། །བཀྲ་ཤིས་བདེ་ལེགས་ཕུན་ཚོགས་མཛོད། །ཧཱུྃ། བོད་ཡུལ་ཀུན་གྱི་གཞི་བདག་ནི། །ཆེ་རྒུ་གཉན་རྒུ་ཐམས་ཅད་བརྔན། །རྡོ་རྗེ་ལེགས་པ་ལ་སོགས་པའི། །གཙང་གི་གཡས་རུ་ཉིན་སྲིབ་ཀྱི། །གཞི་བདག་གཉན་པོ་ཐམས་ཅད་བརྔན། །ཁ་རག་ཁྱུང་བཙུན་ལ་སོགས་པའི། །གཙང་གི་གཡོན་རུ་ཉིན་སྲིབ་ཀྱི། །གཞི་བདག་གཉན་པོ་ཐམས་ཅད་བརྔན། །ཐང་ལྷ་ཡར་ཞུར་ལ་སོགས་པའི། །དབུ་རུ་ཉིན་སྲིབ་གཞི་བདག་བརྔན། །ཤམ་པོ་གང་བཟང་ལ་སོགས་པའི། །གཡོ་རུ་ཉིན་སྲིབ་གཞི་བདག་བརྔན། །ཡར་འབྲོག་གཡུ་མཚོ་ཕྱུག་མོ་བརྔན། །བྱང་གི་གནམ་མཚོ་ཕྱུག་མོ་བརྔན། །སྟོད་ཀྱི་ལྷ་རྒོད་མདུང་རྩེ་བརྔན། །འོད་དེ་གུང་རྒྱལ་ལ་སོགས་པའི། །ཉང་པོ་འོལ་ཁའི་གཞི་བདག་བརྔན། །སྒམ་པོ་དཔལ་རི་ལ་སོགས་པའི། །དྭགས་པོའི་གཞི་བདག་གཉན་རྣམས་བརྔན། །ཀོང་བཙུན་དེ་མོ་ལ་སོགས་པའི། །

ཀོང་པོའི་ཡུལ་གྱི་གཞི་བདག་བརྔན། །གསལ་རྗེ་གྱེར་རྗེ་ལ་སོགས་པའི། །གཉལ་ལོ་བྱར་གྱི་གཞི་བདག་བརྔན། །རྡོ་རྗེ་གྲགས་སྐྱེས་ལ་སོགས་པའི། །མོན་ཡུལ་རྡོ་དང་གློ་རྣམས་ཀྱི། །གཞི་བདག་གཉན་པོ་ཐམས་ཅད་བརྔན། །སྐུ་ལྷ་མཁའ་རི་ལ་སོགས་པའི། །ལྷོ་བྲག་ཡུལ་གྱི་གཞི་བདག་བརྔན། །རི་ཞུར་གངས་སྨན་ཅན་ལ་སོགས། །གྲུ་ཤུལ་ལུང་པའི་གཞི་བདག་བརྔན། །ནགས་སོག་ཆུ་རྒྱུད་དགེ་བསྙེན་དང་། །ཨ་ལ་རྡོད་ཀྱི་གཞི་བདག་བརྔན། །རྔུ་ཡི་ཉིན་སྲིབ་གཞི་བདག་བརྔན། །ལྷོ་ཡི་རོང་ལྷ་རྒྱལ་མཚན་དང་། །རོང་བཙན་ཁ་བ་དཀར་པོ་དང་། །དབང་ཆེན་ལྷ་མོ་མཆེད་བརྒྱད་དང་། །དམག་དཔོན་དགྲ་འདུལ་དབང་ཕྱུག་དང་། །སྨུག་རི་མོ་ནམ་ལ་སོགས་པའི། །ཚ་བ་སྒང་གི་གཞི་བདག་བརྔན། །ཀཾ་གྱི་ཐོད་རྒལ་རྨོག་ཞུ་དང་། །གཟེ་ཡི་ག་གཡོག་ག་པ་དང་། །ལྕེ་ཡི་བྲག་ལ་མདའ་ཟུག་དང་། །ཟླ་སྙིང་དཀར་ནག་སུམ་མདོ་དང་། །རྩི་ཡི་པང་རྒོད་མཐོན་པོ་དང་། །རྒྱ་མདོའི་གངས་དཀར་མཆེད་བརྒྱད་དང་། །ཟླ་བའི་གཞི་བདག་ཐམས་ཅད་བརྔན། །ཀླུ་ཡི་མགོན་པོ་དཀར་པོ་སོགས། །སྨར་ཁམས་ཡུལ་གྱི་གཞི་བདག་བརྔན། །ལྷ་ཡི་མགོན་པོ་དཀར་པོ་སྟེ། །མགྱོགས་བྱེད་སྡོང་ར་ལ་སོགས་པའི། །འབྲི་ཀླུང་ཉིན་(༩)སྲིབ་གཞི་བདག་བརྔན། །ལྡན་གྱི་ཝང་སྙེ་སྨྲེ་རུ་དང་། །གེར་མཛོད་རིང་མོ་དབང་ཞུ་དང་། །མཚམས་ལྷའི་གཞི་བདག་གཉན་པོ་བརྔན། །མཛའ་དང་ཤབ་རྨེ་ལ་སོགས་པའི། །སྤོམ་སྦོར་སྒང་གི་གཞི་བདག་བརྔན། །ཤར་གྱི་རྨ་གཉན་སྤོམ་ར་ནི། །རྨ་རིགས་སུམ་བརྒྱ་དྲུག་ཅུའི་མཆེད། །སྲིང་ལྕམ་བཞི་བཅུ་ཞེ་ལྔར་བཅས། །རྨ་ལུང་ཉིན་སྲིབ་གཞི་བདག་བརྔན། །བེའུ་ཡི་ནི་དུག་མཚོ་དང་། །སྟོང་ར་ཡི་ནི་མཚོ་ནག་དང་། །དེ་འུམ་ཆང་མཚོ་དཀར་མོ་དང་། །ཁྲི་ཤོར་རྒྱལ་མོའི་མཚོ་དང་ནི། །ཙོང་ཁ་ཡི་ནི་མཚོ་སྔོན་དང་། །མཚོ་སྨན་རྒྱལ་མོ་མཆེད་ལྔ་བརྔན། །སྐྱེས་རི་གཉན་པོ་ལ་སོགས་པའི། །ཙོང་ཁ་ཉིན་སྲིབ་གཞི་བདག་བརྔན། །ཨེ་ཚེ་རི་དང་ཧ་ལ་ཤན། །དགའ་དང་བྱང་ངོས་གཞི་བདག་བརྔན། །རྨ་ལུང་དན་ཏིག་རི་བོའི་ལྷ། །གཞོན་ནུ་ཀར་ཏི་ཀ་ལ་སོགས། །མདོ་ཁམས་སྒང་གི་གཞི་བདག་བརྔན། །ཞང་ཤོད་ལ་བོ་ཆེ་ལ་སོགས། །དབྱར་མོ་ཐང་གི་གཞི་བདག་བརྔན། །རྩི་ཡི་འདུས་རི་མཐོན་པོ་བརྔན། །སྤོ་ཏི་ཤག་དམར་སྒང་རྒྱུད་བརྔན། །སྤོ་ཏིའི་ཤེལ་ལུང་ཕྱུག་མོ་བརྔན། །གྲོལ་གྱི་གཡའ་ལུང་རལ་གསུམ་བརྔན། །རྨང་གྲོལ་རལ་གསུམ་གཞི་བདག་བརྔན། །དགུ་རིམ་བཞི་གསུམ་གཞི་བདག་བརྔན། །སྙེ་གོང་སྙེ་མར་གཞི་བདག་བརྔན། །སྙན་གོང་ཉིན་སྲིབ་གཞི་བདག་བརྔན། །བྲག་དམར་བྱ་རྒོད་ལ་སོགས་པའི། །ཏེ་ཆུའི་གཞི་བདག་ཀླུ་གཉན་བརྔན། །ལྷ་སྲིན་གདུག་པ་མང་བྱེད་པའི། །འོ་དེ་རལ་གསུམ་གཞི་བདག་བརྔན། །ཤིན་ཏུ་ཁྲོ་གཏུམ་ཆེ་བ་ཡི། །རྒྱལ་མོ་རོང་གི་གཞི་བདག་བརྔན། །འཇང་རི་སྨུག་པོ་ལ་སོགས་པའི། །འཇང་ཡུལ་གཞི་བདག་ཐམས་ཅད་བརྔན། །ཤར་ཕྱོགས་རྒྱ་ནག་འོད་དེ་ཤན། །རི་བོ་རྩེ་ལྔ་ལ་སོགས་པའི། །རྒྱ་ནག་ཡུལ་གྱི་གཞི་བདག་བརྔན། །ལྷ་ཀླུ་གནོད་སྦྱིན་དྲི་ཟ་དང་། །ཆེ་རྒུ་གཉན་རྒུ་ཐམས་ཅད་བརྔན། །བདག་ཅག་དཔོན་སློབ་འཁོར་བཅས་ཀྱི། །རེ་བ་ཐམས་ཅད་སྐོང་བ་དང་། །བཀྲ་ཤིས་བདེ་ལེགས་ཕུན་ཚོགས་མཛོད། །ཧཱུྃ། གཞན་ཡང་སྟོང་གསུམ་འཛམ་གླིང་ཡུལ། །ས་འོག་ས་སྟེང་ས་བླ་ཡི། །གཞི་བདག་གཉན་པོ་ཐམས་ཅད་བརྔན། །ས་ལ་གནས་པའི་ས་བདག་བརྔན། །ཆུ་ལ་གནས་པའི་ཆུ་བདག་བརྔན། །བྲག་ལ་གནས་པའི་གཞི་བདག་བརྔན། །བར་སྣང་གང་བའི་ལྷ་རྣམས་བརྔན། །ཡུལ་ལ་གནས་པའི་གཞི་བདག་བརྔན། །ལམ་ལ་གནས་པའི་གཞི་བདག་བརྔན། །འཕྲང་ལ་གནས་པའི་གཞི་བདག་བརྔན། །བྲག་ལ་གནས་པའི་གཞི་བདག་བརྔན། །གྲུ་ཟམ་ལ་གནས་གཞི་བདག་བརྔན། །འགྲོ་ལམ་ལ་གནས་གཞི་བདག་བརྔན། །གཞི་བདག་གཉན་པོ་ཁྱེད་རྣམས་ཀྱང་། །མཐུ་སྟོབས་རྫུ་འཕྲུལ་སོ་སོར་ཆེ། །དཔལ་དང་འབྱོར་པ་སོ་སོར་ཆེ། །མངའ་རིས་མངའ་ཐང་སོ་སོར་ཆེ། །མཛད་པའི་ཕྲིན་ལས་སོ་སོར་ཆེ། །མཆོད་པའི་འོས་སུ་སོ་སོར་ཆེ། །དེ་བས་གཞི་བདག་གཉན་རྣམས་ལ། །(༡༠)ཕྱག་འཚལ་མཆོད་པ་སྣ་ཚོགས་འབུལ། །འདོད་པའི་དོན་ལ་གསོལ་འདེབས་ཀྱི། །སྔོན་གྱི་ཐུགས་དམ་བརྩེར་དགོངས་ཏེ། །དགྱེས་པའི་མཆོད་ཡོན་བཞེས་ནས་ཀྱང་། །བདག་གི་རེ་བ་བསྐང་དུ་གསོལ། །བརྔན་འོས་ཁྱེད་རྣམས་བརྔན་པ་ཡིས། །བཀྲ་ཤིས་བདེ་ལེགས་ཕུན་ཚོགས་མཛོད། །ཧཱུྃ། གཞན་ཡང་བརྔན་པར་འོས་པའི་མགྲོན། །མིང་དང་མཚན་ནས་མ་ཐོན་པའི། །བླ་མ་ཡི་དམ་མཁའ་འགྲོ་དང་། །སྲུང་མ་དམ་ཅན་རྒྱ་མཚོ་དང་། །ལྷ་དང་དྲང་སྲོང་ཐམས་ཅད་བརྔན། །ཡུལ་ལྷ་ནོར་ལྷ་ནང་ལྷ་དང་། །ལམ་ལྷ་གཉན་པོ་ཐམས་ཅད་བརྔན། །གཞན་ཡང་དུས་གསུམ་ཕ་མ་དང་། །ཁམས་གསུམ་རིགས་དྲུག་ཐམས་ཅད་བརྔན། །ཡི་དྭགས་རྣམས་དང་བགེགས་རྣམས་དང་། །ལན་ཆགས་སྙིང་རྗེའི་མགྲོན་རྣམས་བརྔན། །གློ་བུར་ལྷགས་པའི་མགྲོན་རྣམས་དང་། །ལྷག་མའི་མགྲོན་རིགས་ཐམས་ཅད་བརྔན། །ཕམ་རྒྱལ་མེད་པར་ཐོབ་ནས་ཀྱང་། །ཡིད་ལ་རེ་བ་རྫོགས་པར་མཛོད། །ཧཱུྃ། དེ་ལྟར་མགྲོན་རིགས་ཐམས་ཅད་ཀྱིས། །མངའ་རིས་སྤྱན་ལམ་སོ་སོ་རུ། །མཆོད་སྦྱིན་གཏོར་མ་འདིས་བརྔན་པས། །ལོངས་སྤྱོད་ནམ་མཁའི་མཛོད་གྱུར་ཏེ། །གང་ལ་ཅི་འདོད་ཐོབ་པར་ཤོག །རྒྱལ་བརྔན་ཆེན་མོ་འདི་མཛད་པས། །མགྲོན་རིགས་བརྔན་པའི་བྱིན་རླབས་ཀྱིས། །བདག་གི་དོན་རྣམས་འགྲུབ་པར་ཤོག །སྔོན་ཚེ་སློབ་དཔོན་པདྨ་ཡིས། །རྒྱལ་བརྔན་ཆེན་མོ་འདི་མཛད་པས། །གཙུག་ལག་འགྲུབ་ཅིང་མཐའ་དམག་ཐུལ། །རྗེ་ཡི་དགོངས་པ་འགྲུབ་པ་ལྟར། །བདག་གིས་མགྲོན་རྣམས་བརྔན་པ་ཡིས། །བདག་ཅག་དཔོན་སློབ་འཁོར་བཅས་ཀྱི། །འཁོར་རྣམས་སྲུངས་ལ་རྐྱེན་རྣམས་ཟློག །ཚེ་སྲིངས་དཔལ་སྐྱེད་འབྱོར་པ་སྤེལ། །སྙན་པ་སྒྲུབས་ལ་གྲགས་པ་སྒྲོགས། །རྟག་ཏུ་འགོ་ཞིང་སྡོང་གྲོགས་མཛོད། །

མགྲོན་ལམ་བདེ་ཞིང་འཇིགས་པ་མེད། །ལམ་འཕྲང་བདེ་བར་བགྲོད་པ་དང་། །རྙེད་པ་ཆེན་པོ་འགྲུབ་པ་དང་། །གཞི་བྱེས་ཀུན་ཏུ་བདེ་ལེགས་མཛོད། །ཅེས་པ་འདི་ཡང་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་ཉེ་བར་སྦྱར་བའོ། །དགེའོ།། །།

ཞྭ་པདྨ་དབང་ཆེན་མི་འགྱུར་ལྷུན་གྱིས་གྲུབ་པའི་ཕུད་རབས་འཕགས་པ་ཀུན་ཏུ་བཟང་པོའི་མཆོད་པའི་དགའ་སྟོན།

༄༅། །ཞྭ་པདྨ་དབང་ཆེན་མི་འགྱུར་ལྷུན་གྱིས་གྲུབ་པའི་ཕུད་རབས་འཕགས་པ་ཀུན་ཏུ་བཟང་པོའི་མཆོད་པའི་དགའ་སྟོན་ཞེས་བྱ་བ་བཞུགས་སོ། །

༄༅། །དགོས་འདོད་མ་ལུས་འབྱུང་བའི་གནས། །བླ་མ་ཡི་དམ་མཁའ་འགྲོ་དང་། །དམ་ཅན་རྒྱ་མཚོའི་ཞབས་བཏུད་དེ། །ཕུད་རབས་མཆོད་པའི་ཆོ་ག་བྲི། །

དེ་ལ་དང་པོ་ལེགས་པར་བཤམས་པ་ནི། རིན་པོ་ཆེ་ལ་སོགས་པའི་མཆོད་གཞོང་གཙང་མར། བསང་བཤོས་ཟླ་གམ་རྩེ་ལྔ་པ་མར་ཐུད་ལ་སོགས་པས་བརྒྱན་པའི་མཐར་ཤ་དང་ཁུར་བ་ལ་སོགས་པས་བསྐོར་ཞིང་། གསེར་སྐྱེམས་དང་གཡུ་སྔོན་ལ་སོགས་པའི་མཆོད་རྫས་མང་པོ་དང་། སྤོས་དང་མར་མེ་ལ་སོགས་པའི་མཆོད་པ་དང་། རོལ་མོའི་བྱེ་བྲག་སྣ་ཚོགས་དང་། མཆོད་འབྲུ་དང་ཕུད་ཕོར་ལ་སོགས་སྟ་གོན་བྱས་ལ་མཆོད་རྫས་ཐམས་ཅད་ལ་རོལ་(༡༡)མོས་བྱིན་དབབ་པོ། །དེ་ནས་བདག་ཉིད་སྟན་བདེ་བ་ལ་སྐྱིལ་མོ་ཀྲུང་གིས་འདུག་སྟེ། ཐལ་མོ་སྦྱར་ཞིང་སྐྱབས་སུ་འགྲོ་བ་ནི། རྒྱུ་སྦྱོར་བས་ཐོག་དྲངས་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ལན་གསུམ།

སེམས་བསྐྱེད་པ་ནི། ཆོས་ཐམས་ཅད་སྟོང་ཞིང་བདག་མེད་པ་ཡིན་པ་ལ། དེ་ལྟར་མ་རྟོགས་པའི་སེམས་ཅན་ཐམས་ཅད་སྙིང་རེ་རྗེ། དེ་ཐམས་ཅད་རྫོགས་པའི་སངས་རྒྱས་ཀྱི་ས་ལ་འགོད་པར་བྱ། དེའི་ཆེད་དུ་གཙང་མ་ཕུད་ཀྱི་མཆོད་པ་དམ་པ་འབུལ་བར་བགྱིའོ། །ལན་གསུམ། ན་མོ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། ༀ་སྭ་བྷཱ་ཝ་ཤུདྡྷ་སརྦ་དྷརྨཱ་སྭ་བྷཱ་ཝ་བི་ཤུདྡྷོ་ཧཾ། ཕྱི་ནང་གི་ཆོས་ཐམས་ཅད་སྟོང་པ་ཆེན་པོ། སྟོང་པའི་ངང་ལས་པྃ་ལས་པདྨ་ཨ་ལས་ཟླ་བའི་དཀྱིལ་འཁོར་གྱི་དབུས་སུ། རང་ཉིད་འཕགས་པའི་རྒྱལ་པོ་སྤྱན་རས་གཟིགས་དཀར་པོ་ཞལ་གཅིག་ཕྱག་གཉིས་གཡོན་པདྨ་དཀར་པོའི་ཡུ་བ་ཐུགས་ཀར་འཛིན་ཅིང་། གཡས་མཆོག་སྦྱིན་གྱི་ཕྱག་རྒྱ་ཅན། ཞབས་སྐྱིལ་ཀྲུང་དུ་བཞུགས་པ་དར་གྱི་ན་བཟའ་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་། འོད་ཟེར་མུ་མེད་པ་འཕྲོ་བའི་འོད་ཀྱིས་ཤར་ཕྱོགས་རི་པོ་ཏ་ལ་ནས་འཕགས་པ་སྤྱན་རས་གཟིགས་ལ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་བ་འཁོར་དང་བཅས་པ་སྤྱན་དྲངས་ཏེ་བདག་ལ་ཐིམ་པས་རང་ཉིད་སྤྱན་རས་གཟིགས་དངོས་སུ་གྱུར། ༀ་མ་ཎི་པདྨེ་ཧཱུྃ་ཧྲཱིཿ

དེ་ནས་མཆོད་རྫས་བྱིན་གྱིས་བརླབས་པ་ནི། རྃ་ལས་མེ་འབར་མཆོད་རྫས་སོ་སོའི་འབག་བཙོག་དང་སེར་སྣ་ལ་སོགས་པའི་མ་དག་པ་ཐམས་ཅད་བསྲེགས། ༀ་སྭ་བྷཱ་ཝ་བི་ཤུདྡྷེ་བཛྲ་སིདྡྷི་ཧཱུྃ། མཆོད་རྫས་སུ་སྣང་བ་ཐམས་ཅད་ཀྱང་ཤིན་ཏུ་རྣམ་པར་དག་པར་གྱུར། སྟོང་པའི་ངང་ལས་ྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཁྃ་ལས་མཆོད་རྫས་ཀྱི་དངོས་པོ་ཡེ་ཤེས་ཀྱི་བདུད་རྩི་དཔག་ཏུ་མེད་པར་གྱུར། ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁ་བྷྱ་སརྦ་ཏཏྑཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཨ་ལས་བདུད་རྩི་དེ་ཉིད་འདོད་པའི་ཡོན་ཏན་ལྔ་དང་ལྡན་པར་གྱུར། ༀ་ཨ་མྲ྇་ཏེ་ཧཱུྃ་ཕཊ། ༀ་ལས་འདོད་ཡོན་དེ་དག་མགྲོན་སོ་སོས་ཅི་བཞེད་པའི་ལོངས་སྤྱོད་དུ་གྱུར། ༀ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨཱདྱ་ནུཏྤནྣ་ཏོཏྟ་ༀ་ཨཱཿཧཱུྃ་ཕཊ་སྭཱ་ཧཱ། ཧཱུྃ་ལས་འོད་འཕྲོས་ལོངས་སྤྱོད་དེ་དག་མགྲོན་སོ་སོའི་སྤྱན་ལམ་དུ་འབབ་པར་འགྱུར། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ། ཛ་ལས་སྤྱན་ལམ་དུ་བབས་པའི་ལོངས་སྤྱོད་རྣམས་མགྲོན་ཐམས་ཅད་ཀྱིས་ཕམ་རྒྱལ་མེད་པར་ཐོབ་པའི་ནུས་པ་དང་ལྡན་པར་གྱུར། ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནི་(༡༢) སརྦ་ཨརྠ་སཱངྷ་ནི་སྭཱ་ཧཱ། མཆོད་ཡོན་ཕུན་སུམ་ཚོགས་པ་ཡིད་བཞིན་གྱི་གཏེར་མཁོ་རྒུ་འབྱུང་བས་འཕགས་པ་སྤྱན་རས་གཟིགས་དང་། འདོད་ཡོན་ཀུན་ཏུ་བཟང་པོའི་མཆོད་པའི་སྤྲིན་ཕུང་ལྟ་བུས་ས་གཞི་བར་སྣང་ཐམས་ཅད་གང་བར་གྱུར།

དེ་ནས་ཡུལ་ཁམས་བྱིན་གྱིས་བརླབ་པ་ནི། ༀ་སྭ་བྷཱ་ཝས་སྦྱངས། སྣོད་བཅུད་ཀྱི་ཆོས་ཐམས་ཅད་སྟོང་པའི་ངང་ལས་ྃ་ཛྙཱ་ན་ཙཀྲ་ྃ་ལས་ཕྱི་ཡུལ་དུ་སྣང་བ་ཐམས་ཅད་སངས་རྒྱས་ཀྱི་ཞིང་ཁམས་རྣམ་པར་དག་པ་རིན་པོ་ཆེ་སྣ་ཚོགས་ཀྱི་ས་གཞི་ལ། ཡེ་ཤེས་རིན་པོ་ཆེའི་གཞལ་ཡས་ཁང་བཀོད་པ་ཚད་མེད་པས་བརྒྱན་པ། སངས་རྒྱས་དང་བྱང་ཆུབ་སེམས་དཔལ་ཐམས་ཅད་ཀྱི་བཞུགས་གནས་སུ་གྱུར་པ། རྒྱ་ཚད་མེད་པ། ཉེ་འཁོར་མཐའ་ཡས་པ། ཕྱི་ནང་ཀུན་ནས་མགྲོན་སོ་སོའི་གནས་དང་གདན་དང་བཀོད་པ་མཐའ་ཡས་པ་ས་གཞི་དང་བར་སྣང་ཐམས་ཅད་པདྨ་རིན་པོ་ཆེའི་ཁྲི་དང་དར་ཟབ་རྣམས་བརྩེགས་པའི་ཁྲི་དང་། གདུགས་དང་། རྒྱལ་མཚན་དང་། བླ་རེ་དང་། འཕན་ལྡིང་དཔག་ཏུ་མེད་པའི་ཚོགས་དང་། རོལ་མོའི་ཚོགས་མཐའ་ཡས་པ་དང་། འདོད་པའི་ཡོན་ཏན་དཔག་མེད་པའི་སྤྲིན་ཕུང་འཁྲིགས་པས་རབ་ཏུ་བརྒྱན་པར་གྱུར། ༀ། ནམ་མཁའི་ཁམས་ཀྱི་མཐའ་ཀླས་པར། །ཕུང་པོ་ཐམས་ཅད་སངས་རྒྱས་ཞིང་། །རྣམ་དག་རིན་ཆེན་ས་གཞི་ལ། །ཡེ་ཤེས་འབར་བའི་གཞལ་ཡས་ཁང་། །མཐའ་ཡས་བསམ་གྱིས་མི་ཁྱབ་པ། །ཀུན་ཏུ་བཀོད་པ་ཚད་མེད་དེ། །གདན་ཁྲི་རིན་ཆེན་པདྨ་དང་། །དར་ཟབ་ལྷ་ཡི་གོས་ཀྱིས་བརྒྱན། །བླ་རེ་གདུགས་དང་རྒྱལ་མཚན་འཕན། །རོལ་མོ་སྣ་ཚོགས་སྤྲིན་ཕུང་འཁྲིགས། །ཕྱོགས་ཀྱི་ཉེ་འཁོར་ཐམས་ཅད་ཀྱང་། །དཔག་བསམ་ཤིང་དང་ལྗོན་པའི་ཚལ། །རིན་ཆེན་ཆུ་མཚོ་པདྨས་བརྒྱན། །གསེར་དངུལ་ལ་སོགས་རིན་ཆེན་རི། །འོད་འབར་ལྷ་ཡི་ཁང་བརྩེགས་འབར། །ཀུན་ནས་མཛེས་པའི་བཀོད་པས་བརྒྱན། །ས་དང་བར་སྣང་ཁམས་ཀུན་ཏུ། །ལྷ་དང་མི་ཡི་འདོད་ཡོན་གང་། །སྤོས་དང་རོལ་མོའི་སྤྲིན་ཕུང་འཕྲོ། །གྲངས་མེད་བསམ་གྱིས་མི་ཁྱབ་པ། །སྣ་ཚོགས་ཞིང་གི་ཡོན་ཏན་མཆོག །སེམས་ཀྱི་ཏིང་འཛིན་རོལ་མོ་ཡིས། །མངོན་སྤྲུལ་དག་པའི་གནས་མཆོག་འདིར། །འཕགས་དང་སོ་སོའི་སྐྱེ་བོ་ཡི། །མགྲོན་རྣམས་བཞུགས་པའི་གཞིར་གྱུར་ཅིག །ༀ་རཏྣ་མཎྜ་ལ་ས་མ་ཡེ་ཙཀྲ་ྃ།

དེ་ནས་མགྲོན་སྤྱན་དྲངས་པ་ནི། རང་གི་སྙིང་གའི་འོད་ཟེར་གྱིས་སྟེང་འོག་ཕྱོགས་མཚམས་ཐམས་ཅད་ཀྱི་མགྲོན་རིགས་ཐམས་ཅད་ལ་ཕོག་ནས་གཤེགས་པར་ཞུ་བ་ཕུལ་བས་ཐམས་ཅད་དགྱེས་ནས་འབྱོན་པར་བཀའ་གནང་བར་བསམས་ཏེ། སྤོས་དང་རོལ་མོའི་སྒྲ་དང་བཅས་ནས་སྤྱན་དྲངས་པ་ནི། ན་མོ། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །སེམས་འདི་རྒྱ་ཆེ་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་(༡༣)ཤིག་སྟོབས་བཅུ་མངའ་བའི་ལྷ། །དུས་ལ་མི་འདའ་ཐུགས་རྗེའི་དབང་གིས་ནི། །སེམས་ཅན་དོན་ལ་དགོངས་པའི་དཀོན་མཆོག་གསུམ། །ཡིད་ཀྱིས་སྤྲུལ་ཞིང་མཆོད་པའི་གནས་འདི་རུ། །རྒྱལ་བ་འཁོར་བཅས་མ་ལུས་གཤེགས་སུ་གསོལ། །ཐོག་མའི་གནས་སུ་མངོན་པར་བྱང་ཆུབ་ནས། །རང་གཞན་དོན་གཉིས་ལྷུན་གྱིས་གྲུབ་པའི་དཔལ། །ཆོས་སྐུ་ཀུན་ཏུ་བཟང་པོ་ནས་བཟུང་སྟེ། །རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་། །གང་ཟག་སྙན་བརྒྱུད་བླ་མའི་ཚོགས་རྣམས་ཀུན། །བསོད་ནམས་རིན་ཆེན་གླིང་འདིར་སྤྱན་འདྲེན་གྱིས། །འཁོར་དང་བཅས་ཏེ་མ་ལུས་གཤེགས་སུ་གསོལ། །ཕྱི་ནང་རྒྱུ་འབྲས་ལུང་རིགས་སྙིང་པོའི་དོན། །མངོན་དུ་གྱུར་ནས་དངོས་གྲུབ་མཆོག་བརྙེས་ཤིང་། །སོ་སོའི་དམ་ཆོས་རིན་ཆེན་མཛོད་འཛིན་པར། །དཔལ་མགོན་བླ་མ་ཇི་སྙེད་བཞུགས་སོ་འཚལ། །ཡོན་ཏན་དགེར་འོས་གནས་འདིར་སྤྱན་འདྲེན་གྱིས། །འཁོར་དང་བཅས་ཏེ་མ་ལུས་གཤེགས་སུ་གསོལ། །སྤངས་དང་རྟོགས་པའི་ཡོན་ཏན་མཐར་ཕྱིན་ནས། །གཞན་དོན་མཐའ་ཡས་ཕྲིན་ལས་མངོན་དུ་གྱུར། །སྲིད་གསུམ་འགྲོ་བའི་རྩ་ལག་གཉེན་གཅིག་པུ། །ཕྱོགས་བཅུ་དུས་གསུམ་སངས་རྒྱས་བཞུགས་སོ་འཚལ། །བཀྲ་ཤིས་གཙུག་ལག་ཁང་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །བསོད་ནམས་ཡེ་ཤེས་ཚོགས་ཆེན་རྫོགས་པའི་གཙོ། །རང་སྣང་ལོངས་སྤྱོད་དཀྱིལ་འཁོར་ལྷུན་གྲུབ་དང་། །ཞི་དང་ཁྲོ་ཚུལ་འབར་བའི་སྐུར་སྟོན་ཅིང་། །འོག་མིན་ལ་སོགས་ཞིང་ན་མངོན་བཞུགས་པ། །གསང་སྔགས་ཕྱི་ནང་དཀྱིལ་འཁོར་དཔག་མེད་ཀུན། །ཏིང་འཛིན་ཡིད་བཞིན་གནས་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །ཐོག་མ་བར་དང་ཐ་མར་བར་དགེ་ཞིང་། །མྱ་ངན་འདས་པ་མཆོག་ཏུ་ཞི་བའི་ལམ། །རྒྱལ་བ་རྒྱལ་སྲས་ཉན་རང་ཀུན་གྱི་ཡུམ། །བཅོམ་ལྡན་ཤེས་རབ་ཕ་རོལ་ཕྱིན་ལ་སོགས། །བསྟན་པའི་དམ་ཆོས་ཇི་སྙེད་བཞུགས་སོ་འཚལ། །རིན་ཆེན་གཞལ་མེད་ཁང་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །གསང་སྔགས་རིག་སྔགས་གཟུངས་སྔགས་རྒྱུད་ཀྱི་དོན། །བྱ་བ་སྤྱོད་པ་རྣལ་འབྱོར་བླ་ན་མེད། །རྒྱལ་བ་ཀུན་གྱི་ཐུགས་ཀྱི་གསང་བ་མཆོག །རྡོ་རྗེ་ཐེག་པ་ཇི་སྙེད་བཞུགས་སོ་འཚལ། །ཡོན་ཏན་ཚད་མེད་གནས་འདིར་སྤྱན་འདྲེན་གྱིས། །

འཁོར་དང་བཅས་ཏེ༴། །རྒྱུ་འབྲས་ཐེག་པ་ཀུན་གྱི་རྩེར་གྱུར་པ། །ཡེ་ནས་བྱང་ཆུབ་རྡོ་རྗེ་སྙིང་པོའི་ལུང་། །མི་ནུབ་རྒྱལ་མཚན་བྱང་ཆུབ་སེམས་ཀྱི་མདོ། །རང་བྱུང་ཡེ་ཤེས་ཀུན་ཏུ་བཟང་པོའི་རྒྱུད། །རང་བཞིན་རྫོགས་པ་ཆེན་པོ་བཞུགས་སོ་འཚལ། །མི་འགྱུར་འཕགས་པའི་གནས་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །བསླབ་གཞི་ལེགས་བཅས་བརྩོན་པའི་རྣལ་འབྱོར་གྱིས། །རང་གཞན་དོན་ཆེན་སྒྲུབ་པའི་ལམ་ཞུགས་ཏེ། །སྤངས་རྟོགས་ཡོན་ཏན་གོང་མར་རིམ་བགྲོད་ནས། །མྱ་ངན་འདས་པའི་ས་ལ་རབ་(༡༤)གཞོལ་བ། །འཕགས་པའི་དགེ་འདུན་ཇི་སྙེད་བཞུགས་སོ་འཚལ། །སྐྱོབ་མཛད་འཇིགས་སེལ་གྲོགས་སུ་སྤྱན་འདྲེན་གྱིས། །འཁོར་དང་བཅས་ཏེ༴། །འགྲོ་བའི་མགོན་པོ་ཤཱཀྱ་སེང་གེ་ཡིས། །བཅོམ་ལྡན་བསྟན་པ་གང་གི་ཕྱག་ཏུ་བཞག །གསུང་རབ་རིན་ཆེན་སྒྲོམ་གྱི་ཁ་འབྱེད་པ། །འཕགས་པའི་གནས་བརྟན་ཆེན་པོ་བཞུགས་སོ་འཚལ། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །ནོར་བདུན་སྦྱངས་པའི་ཡོན་ཏན་དང་ལྡན་ཞིང་། །བདེན་བཞི་རྟེན་འབྲེལ་བཅུ་གཉིས་ལམ་སྒོམ་པ། །ཟུང་བཞི་ཡ་བརྒྱད་འབྲས་བུ་མངོན་དུ་གྱུར། །འགྲོ་བའི་བསོད་ནམས་ཞིང་གི་མཆོག་གྱུར་པ། །འཕགས་པ་ཉན་རང་དགེ་འདུན་བཞུགས་སོ་འཚལ། །ཡོན་སྤྱོད་མཆོད་པའི་གནས་སུ་སྤྱན་འདྲེན་གྱིས། །འཁོར་དང་བཅས༴། །བླ་མེད་བྱང་ཆུབ་ཆེན་པོའི་སེམས་སྟོབས་ཀྱིས། །རླབས་ཆེན་ཐེག་པས་འགྲོ་བའི་ཁུར་བཞེད་དེ། །ས་དང་ལམ་སྦྱངས་འཕགས་པའི་གོ་འཕང་བརྙེས། །ཡོན་ཏན་ཚད་མེད་ཡངས་པའི་ཚོགས་མངའ་བ། །བྱང་ཆུབ་སེམས་དཔའི་དགེ་འདུན་བཞུགས་སོ་འཚལ། །བསྟན་པ་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས༴། །ཐུགས་ནི་རྣམ་དག་སངས་རྒྱས་ཡུལ་ལ་འཇུག །སྐུ་ནི་སྣ་ཚོགས་གདུལ་བྱའི་རེ་བ་སྐོང་། །གསུང་ནི་གསང་སྔགས་ངེས་པའི་སྙིང་པོ་སྟོན། །ཡོན་ཏན་ཚད་མེད་ཕྲིན་ལས་རྣམ་པ་བཞི། །མཆོག་དང་ཐུན་མོང་དངོས་གྲུབ་ཆར་འབེབས་པ། །རིག་པ་འཛིན་པའི་དགེ་འདུན་བཞུགས་སོ་འཚལ། །འདོད་རྒུའི་རེ་བ་བསྐང་ཕྱིར་སྤྱན་འདྲེན་གྱིས། །འཁོར་དང་བཅས་ཏེ༴། །སྣང་སྲིད་སྣོད་བཅུད་སངས་རྒྱས་ཞིང་ཁམས་སུ། །བསྐྱེད་རྫོགས་ཟུང་འཇུག་ཏིང་འཛིན་དྲོད་ཐོབ་ནས། །གྲུབ་པ་བརྒྱད་དང་དངོས་གྲུབ་རྣམ་གཉིས་བརྙེས། །རིག་འཛིན་ས་བཞིས་རྒྱལ་བའི་སར་གཞོལ་བ། །གྲུབ་མཆོག་རིག་འཛིན་དགེ་འདུན་བཞུགས་སོ་འཚལ། །བླ་མེད་བསོད་ནམས་ཞིང་དུ་སྤྱན་འདྲེན་ན། །འཁོར་དང་བཅས་ཏེ༴། །དབྱིངས་དང་ཡེ་ཤེས་དོན་ལ་མངའ་བརྙེས་ཤིང་། །ཕྲིན་ལས་རྣམ་བཞིས་འགྲོ་ཀུན་དོན་མཛད་ཅིང་། །སྒྲུབ་པ་པོ་ལ་དངོས་གྲུབ་མཆོག་སྟེར་བ། །དཔའ་བོ་དཔའ་མོ་རིགས་ལྔའི་མཁའ་འགྲོ་གིང་། །རྡོ་རྗེ་ཕྲ་མེན་ཤུགས་འགྲོ་བཞུགས་སོ་འཚལ། །དངོས་གྲུབ་རིན་ཆེན་སླད་དུ་སྤྱན་འདྲེན་ན། །འཁོར་དང་བཅས་ཏེ༴། །བསྐལ་པ་མེ་ལྟར་འབར་བའི་ཀློང་དཀྱིལ་ན། །ཡེ་ཤེས་སྐུ་མཆོག་འཇིགས་བྱེད་རྒྱན་གྱིས་བརྒྱན། །འབར་བའི་ཆ་ལུགས་ཅིར་ཡང་བསྒྱུར་མཛད་ཅིང་། །བདུད་དང་གཤིན་རྗེ་བགེགས་དཔུང་འདུལ་མཛད་པ། །ཕྱོགས་བཅུའི་ཁྲོ་རྒྱལ་ཇི་སྙེད་བཞུགས་སོ་འཚལ། །བསྟན་པ་བསྲུང་བའི་སླད་དུ་སྤྱན་འདྲེན་ན། །འཁོར་དང་བཅས་ཏེ༴། །ཐུགས་རྗེའི་དབྱིངས་ལས་སྒྱུ་མར་སྐུར་བཞེངས་ཏེ། །འབར་བའི་སྐུ་མཆོག་འཇིགས་པའི་ཚུལ་འཆང་བ། །བསྟན་པའི་རྒྱ་མཚོ་ཡུན་རིང་བསྲུང་མཛད་ཅིང་། །རྣལ་འབྱོར་དམ་ཅན་ཚོགས་རྣམས་སྐྱོང་མཛད་པ། །དཔལ་མགོན་ཆོས་སྐྱོང་(༡༥)སྲུང་མ་མཐུ་བོ་ཆེ། །དྲེགས་པ་ཕོ་རྒྱུད་མོ་རྒྱུད་བཞུགས་སོ་འཚལ། །མགོན་སྐྱབས་དཔུང་གཉེན་སླད་དུ་སྤྱན་འདྲེན་ན། །འཁོར་དང་བཅས་ཏེ༴། །ལྷ་མི་ཀུན་གྱི་འཇིག་རྟེན་ཐམས་ཅད་ན། །བསོད་ནམས་དཔལ་རྒྱས་ལོངས་སྤྱོད་ཕུན་སུམ་ཚོགས། །དཔག་མེད་འབྱོར་པས་རྒྱལ་བ་མཆོད་པ་དང་། །སྡུག་བསྔལ་འཕོངས་པ་ཀུན་གྱི་ར་མདའ་མཛད། །དངོས་གྲུབ་རིན་ཆེན་ནོར་གྱི་ཆར་འབེབས་པ། །ཕྱོགས་བཅུའི་ནོར་ལྷ་ཇི་སྙེད་བཞུགས་སོ་འཚལ། །དམ་ཆོས་ལྷ་ཁང་སྐྱོངས་ཕྱིར་སྤྱན་འདྲེན་ན། །འཁོར་དང་བཅས་ཏེ༴། །སྔོན་གྱི་ཐུགས་རྗེ་སྤྱོད་པའི་སྨོན་ལམ་གྱིས། །ཤེས་རབ་མིག་མངའ་ཀུན་གྱི་མིག་འབྱེད་པ། །བློ་གྲོས་འཆད་རྩོད་མ་རིག་མུན་པ་སེལ། །ལོང་བའི་ཚོགས་དང་འདྲ་བའི་འགྲོ་བ་ལ། །བཟོ་དང་སྒྱུ་རྩལ་བསྟན་བཅོས་སྣང་བ་སྟོན། །ཤེས་རབ་འཕྲུལ་གྱི་ལྷ་ཚོགས་བཞུགས་སོ་འཚལ། །ཡོན་ཏན་ཕུན་ཚོགས་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །འཕགས་པའི་སྤྱན་སྔར་ཞལ་མཐོང་སྨོན་ལམ་མཐུས། །རྒྱལ་བའི་བསྟན་ལ་བཀུར་སྟི་རིམ་གྲོ་མཛད། །མཐུ་དཔལ་ཆེན་པོས་ལྷ་མིའི་འཇིག་རྟེན་སྐྱོང་། །ལྷ་ཡི་དབང་པོ་ཚངས་པ་བརྒྱ་བྱིན་སོགས། །ལྷ་ཡི་དགེ་བསྙེན་ཆེན་པོ་བརྒྱད་རྣམས་ཀྱང་། །དམ་ཆོས་རྒྱས་པའི་ཕྱིར་དུ་སྤྱན་འདྲེན་ན། །འཁོར་དང་བཅས་ཏེ༴། །བསོད་ནམས་ཆེན་པོ་ཀུན་ནས་འབར་བའི་འོད། །བྱམས་པ་ཆེན་པོས་ས་འོག་འཇིག་རྟེན་སྐྱོང་། །སྟོང་གསུམ་ཆེན་པོ་ཡུལ་གྱི་དབུས་ཀྱི་མཚོ། །ཀླུ་ཡི་སྡེ་དཔོན་ཆེན་པོ་བརྒྱད་རྣམས་ཀྱང་། །དམ་ཆོས་ལྷ་ཁང་བསྐྱང་ཕྱིར་སྤྱན་འདྲེན་ན། །འཁོར་དང་བཅས་ཏེ༴། །འཇིག་རྟེན་ཀུན་གྱི་ལེགས་ཉེས་དབང་བསྒྱུར་ཞིང་། །འཇིག་རྟེན་མངའ་མཛད་འཇིག་རྟེན་ཀུན་གྱིས་མཆོད། །གཟའ་ཡི་སྡེ་དཔོན་ཆེན་པོ་བརྒྱད་རྣམས་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །བསོད་ནམས་ཆེན་པོ་གཟི་བརྗིད་འབར་བའི་སྐུ། །མཐུ་སྟོབས་ཆེན་པོ་ནམ་མཁའི་མཐའ་ལ་འཇལ། །ཕྲིན་ལས་ཆེན་པོས་འཇིག་རྟེན་ཀུན་ལ་བསྒྱུར། །ལྷ་ཡི་འཇིགས་བྱེད་ཆེན་པོ་དགུ་རྣམས་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །སྔོན་གྱི་བསོད་ནམས་དགེ་བ་ལས་འཁྲུངས་པས། །ཕྱོགས་སྐྱོང་འཇིག་རྟེན་སྐྱོང་བར་མངའ་གསོལ་བ། །བརྒྱ་བྱིན་མེ་ལྷ་གཤིན་རྗེ་སྲིན་པོ་ཀླུ། །རླུང་ལྷ་གནོད་སྦྱིན་བགེགས་ཀྱི་རྒྱལ་པོ་སོགས། །ཕྱོགས་སྐྱོང་སྡེ་དཔོན་ཆེན་པོ་བཅུ་རྣམས་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །མཐུ་དཔལ་ཆེན་པོས་འཇིག་རྟེན་དབང་བསྒྱུར་ཞིང་། །བསོད་ནམས་ཆེན་པོས་ཕྱོགས་བཞིའི་འཇིག་རྟེན་སྐྱོང་། །ལྷ་ཡི་དབང་ཕྱུག་རྒྱལ་ཆེན་བཞི་རྣམས་ཀྱང་། །དམ་ཆོས་རྒྱལ་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །ཚད་མེད་ཡངས་པ་གླིང་བཞིའི་མཁར་རྒྱུ་ཞིང་། །དུས་ལ་དབང་བསྒྱུར་འཇིག་རྟེན་ལེགས་ཉེས་སྟོན། །རྒྱུ་སྐར་ཆེན་པོ་ཉི་ཤུ་(༡༦)བརྒྱད་རྣམས་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །དཀོན་མཆོག་གསུམ་གྱི་ཞབས་འབྲིང་ལྷ་རྣམས་དང་། །ཚོགས་ཀྱི་བདག་པོ་འབྲོག་གནས་མཆེད་ལ་སོགས། །གནོད་སྦྱིན་ཆོས་སྤུན་སུམ་ཅུ་རྩ་གཉིས་དང་། །ས་ཆུ་མེ་རླུང་འབྱུང་བཞིའི་ལྷ་རྣམས་དང་། །དཀར་ཕྱོགས་དགེ་བའི་ལྷ་མང་ཐམས་ཅད་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །སྦྱིན་སྲེག་བདག་པོ་དཀའ་ཐུབ་རལ་པ་ཅན། །བདེན་པའི་ཚིག་གིས་ཕན་འདོགས་དམོད་པ་འདོར། །ལྷ་དང་མི་ཡི་དྲང་སྲོང་ཆེ་རྒུ་དང་། །སྨན་གྱི་དྲང་སྲོང་ཆེན་པོ་ཐམས་ཅད་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །བསོད་ནམས་ཆེན་པོ་སྟོང་གསུམ་ཡུལ་གྱི་བདག །རྒྱ་མཚོ་རི་དང་ཆུ་ཀླུང་ཀུན་གནས་ཤིང་། །གྲོང་དང་ལྗོངས་དང་གཙུག་ལག་ཡང་རྣམས་སྐྱོང་། །དུས་སུ་ཆར་འབེབས་སྐྱེ་རྒུ་བདེ་མཛད་པ། །མ་དྲོས་ལ་སོགས་ས་བདག་ཀླུ་རྣམས་དང་། །ས་ལྷའི་བདག་དང་འཛམ་གླིང་ཡུལ་གྱི་བདག །མཐུ་དཔལ་རྫུ་འཕྲུལ་མངའ་བའི་ཚོགས་རྣམས་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །སྔོན་གྱི་ཐུགས་རྗེས་སྤྱོད་པའི་སྨོན་ལམ་གྱིས། །གཙུག་ལག་ཁང་རྣམས་བསྲུང་བར་དམ་བཅས་པ། །ཕོ་བྲང་འཁོར་སྐྱོང་སྲུང་མ་མཆོག་རྣམས་ཀྱང་། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །སྔོན་ཚེ་པདྨ་ཐོད་ཕྲེང་སྤྱན་སྔ་རུ། །ཁས་བླངས་དམ་བཅས་སྲུང་མ་ཐུགས་དམ་ཅན། །བོད་ཡུལ་གཏེར་བདག་བརྟན་མ་གཅུ་གཉིས་དང་། །ལྷ་རབས་མཆེད་དགུ་ཡུལ་ལྷ་གཞི་བདག་རྣམས། །དམ་ཆོས་རྒྱས་པའི་སླད་དུ་སྤྱན་འདྲེན་གྱིས། །འཁོར་དང་བཅས་ཏེ༴། །སེམས་ཀྱི་རང་བཞིན་གཅིག་ལས་མ་གཡོས་ཀྱང་། །བག་ཆགས་དབང་གིས་སྣ་ཚོགས་སྒྱུ་མར་སྣང་། །ཡོན་ཏན་བདེ་གཤེགས་སྙིང་པོའི་ཆོས་མཆོག་ཅན། །ལྷ་དང་ལྷ་མིན་མི་དང་བྱོལ་སོང་དང་། །ཡི་དྭགས་དམྱལ་བ་འགྲོ་བ་དྲུག་རྣམས་ཀྱང་། །མཆོད་སྦྱིན་བཟང་པོའི་གནས་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །ནད་བཏང་མདངས་འཕྲོག་སྐྱེ་རྒུའི་དབུགས་འཆང་བ། །བདུད་གཅོད་འཆི་བདག་མང་པོ་ཀུན་གྱི་རྗེ། །ཡི་དྭགས་གཤིན་རྗེ་འཇིག་རྟེན་ཚུལ་འཆང་བ། །མཐུ་སྟོབས་རྫུ་འཕྲུལ་མངའ་བའི་ཚོགས་རྣམས་ཀྱང་། །མཆོད་སྦྱིན་བཟང་པོའི་གནས་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །ལོག་འདྲེན་འཇིགས་པའི་ཚུལ་དུ་སྐུར་སྤྲུལ་ནས། །བགེགས་ལ་མངའ་མཛད་བགེགས་རྣམས་ཀུན་གྱི་གཙོ། །བགེགས་ཀྱི་རྒྱལ་པོ་ཇི་སྙེད་བཞུགས་སོ་འཚལ། །མཆོད་སྦྱིན་བཟང་པོའི་གནས་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །ཐོག་མེད་ཐ་མ་མེད་པའི་དུས་དག་ནས། །གང་ལ་ཅི་འགྱུར་དེ་ལྟར་རྗེས་འགྲོ་བ། །ལན་ཆགས་མགྲོན་རིགས་ཇི་སྙེད་བཞུགས་སོ་འཚལ། །མཆོད་སྦྱིན་བཟང་པོའི་གནས་འདིར་སྤྱན་འདྲེན་(༡༧)གྱིས། །འཁོར་དང་བཅས་ཏེ༴། །དམན་པའི་ཚུལ་གྱིས་བཀའ་ཡི་འཁོར་གནས་ཏེ། །ལྷག་མའི་ཚོགས་སྡུད་སོ་སོའི་ལས་མཛད་པ། །ལྷག་མའི་མགྲོན་རིགས་ཇི་སྙེད་བཞུགས་སོ་འཚལ། །མཆོད་སྦྱིན་བཟང་པོའི་གནས་འདིར་སྤྱན་འདྲེན་གྱིས། །འཁོར་དང་བཅས་ཏེ༴། །ཅེས་སྤྱན་དྲངས་ནས་མེ་ཏོག་གི་ཆར་དང་རོལ་མོའི་ཚོགས་བསྒྲགས་པའི་རྗེས་ལ་བྱེ་བྲག་ཏུ་སྤྱན་དྲངས་པ་ནི། འགྲེངས་ཏེ་འདུད་པ་དང་བཅས་པས་འདི་སྐད་དོ། །

ཧོཿ ཆོས་ཀྱི་དབྱིངས་ཀྱི་ཕོ་བྲང་ལྷུན་གྱིས་གྲུབ་པའི་གཞལ་ཡས་ངོ་མཚར་མཆོག་གི་གནས་མཆོག་དམ་པ་ན། འཁོར་བ་དང་མྱ་ངན་ལས་འདས་པ་ཀུན་གྱི་སྤྱི་ཕུད་དམ་པར་གྱུར་པ་དཔལ་ཀུན་ཏུ་བཟང་པོ་ལ་རྩ་བ་དང་བརྒྱུད་པར་བཅས་པའི་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་མཁའ་འགྲོ་དམ་ཅན་རྒྱ་མཚོའི་ཚོགས་ཀྱིས་བསྐོར་བ་རྣམས་དང་། ཁྱད་པར་དུ་ཡང་ཞྭ་པདྨ་དབང་ཆེན་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་སྐྱོང་བར་ཞལ་གྱིས་བཞེས་པའི་སྲུང་མ་ཆེན་པོ་དཔལ་ལྡན་སྔགས་ཀྱི་བདག་མོ་ཨེ་ཀ་ཛཱ་ཊི་འཁོར་ཞིང་གི་རྡུལ་སྙེད་དང་བཅས་པ། ལྷའི་དམག་དཔོན་ཆེན་པོ་ལེགས་ལྡན་ནག་པོ་ལྕམ་སྲིང་འཁོར་དང་བཅས་པ། གཟའ་ཡི་དགེ་བསྙེན་ཆེན་པོ་རཱ་ཧུ་ལ་འཁོར་དང་བཅས་པ། ནམ་གྲུ་སྲོག་སྒྲུབ་ནག་མོ་འཁོར་དང་བཅས་པ། གནོད་སྦྱིན་དམར་ནག་ཆེན་པོ་འཁོར་དང་བཅས་པ། གནོད་སྦྱིན་མདུང་དམར་ཅན་འཁོར་དང་བཅས་པ། དམ་ཅན་ཆེན་པོ་རྡོ་རྗེ་ལེགས་པ་འཁོར་དང་བཅས་པ། དཔལ་ལྡན་ཨ་ཕྱི་དབྱིངས་ཕྱུག་ཆོས་ཀྱི་སྒྲོན་མ་འཁོར་དང་བཅས་པ། གཏེར་བདག་དམ་ཅན་རྒྱ་མཚོའི་ཚོགས་སོ་སོའི་སྐུ་འཁོར་དང་བཅས་པ། བོད་ཁམས་སྐྱོང་བའི་བརྟན་མ་བཅུ་གཉིས། དགེ་བསྙེན་ཉི་ཤུ་རྩ་གཅིག །ལྷ་རབས་མཆེད་དགུ། ཡུལ་ལྷ་གཞི་བདག་གི་ཚོགས་སོ་སོའི་སྐུ་འཁོར་དང་བཅས་པ་ཐམས་ཅད་འོག་མིན་ལྷའི་གཞལ་ཡས་ཁང་ན་བཞུགས་སམ། གཟུགས་ཁམས་འོད་གསལ་བསམ་གཏན་གྱི་གནས་ན་བཞུགས་སམ། འདོད་ཁམས་ཡིད་འགྱུར་དཔག་བསམ་གྱི་ཚལ་ན་བཞུགས་སམ། དབུས་ཀྱི་རི་བོ་མཆོག་རབ་ཀྱི་སྟེང་ན་བཞུགས་སམ། ཉི་ཟླ་རིན་ཆེན་གཟའ་སྐར་གྱི་སྟེང་ན་བཞུགས་སམ། རི་བདུན་རོལ་མཚོ་ཁོར་ཡུག་གི་གནས་ན་བཞུགས་སམ། ཤར་གྱི་ལུས་འཕགས་པོ་ན་བཞུགས་སམ། བྱང་གི་སྒྲ་མི་སྙན་ན་བཞུགས་སམ། ནུབ་ཀྱི་བ་གླང་སྤྱོད་ན་བཞུགས་སམ། ལྷོའི་འཛམ་བུ་གླིང་ན་བཞུགས་སམ། དུར་ཁྲོད་ཆེན་པོ་བརྒྱད་ན་བཞུགས་སམ། ཡུལ་ཉི་ཤུ་རྩ་བཞི་ན་བཞུགས་སམ། གནས་སུམ་ཅུ་སོ་གཉིས་ན་བཞུགས་སམ། གཡའ་རི་གངས་རི་སྨན་རི་ན་བཞུགས་སམ། ནགས་ཚལ་མཚོ་གླིང་ན་བཞུགས་སམ། གྲོང་དང་གྲོང་ཁྱེར་གྲོང་བརྡལ་ན་བཞུགས་སམ། ལམ་སྲང་བཞི་མདོ་ཚོང་དུས་ན་བཞུགས་སམ། གཙུག་ལག་ཁང་དང་དབེན་(༡༨)གནས་ན་བཞུགས་སམ། སོ་སོའི་གནས་མཆོག་དམ་པ་གང་ན་བཞུགས་ཀྱང་རུང་སྟེ། དད་པས་སྤྱན་འདྲེན་གྱིས་སྙན་གསན་དང་བརྩེ་བ་ཆེན་པོས་དགོངས་ཏེ་བདག་གི་གནས་མཆོག་དམ་པ་འདིར་ལྷ་མི་ལོངས་སྤྱོད་ཀྱི་ལྟད་མོ་ལ་འདུ་བ་ལྟར་ས་གཞི་ཐམས་ཅད་ཁྲོམ་གྱིས་ཆོད་པ་དགྱེས་པའི་གླུ་གར་དང་བཅས་ཏེ་གཤེགས་སུ་གསོལ། ལྷོ་སྤྲིན་རིན་ཆེན་འཇའ་འོད་འཁྲིགས་པས་ནམ་མཁའ་ཐམས་ཅད་དར་གྱིས་ཆོད་པ་ལྟར་མཛེས་པའི་སིལ་སྙན་དང་བཅས་ཏེ་གཤེགས་སུ་གསོལ། ཉི་ཟླ་གཟའ་སྐར་འོད་དུ་འཚེར་བ་ལྟར་བར་སྣང་ཐམས་ཅད་མགྲོན་གྱིས་ཆོད་པ་ཕོ་ཉ་ཡང་སྤྲུལ་ལས་མཁན་དང་བཅས་ཏེ་གཤེགས་སུ་གསོལ། ༀ་བཛྲ་ས་མ་ཡ་ཛཿ བཛྲ་ས་མ་ཡ་ཧཱུྃ། བཛྲ་ས་མ་ཡ་བྃ། བཛྲ་ས་མ་ཡ་ཧོཿ ཞེས་པས་སེ་གོལ་དཔུང་པར་བརྡབས་ལ་འགྲེངས་ཏེ་ཐལ་མོ་སྦྱར་ལ་འདི་སྐད་དོ། །ཧོ། དཀྱིལ་འཁོར་དབང་ཕྱུག་གདོད་མའི་མགོན་པོ་ནས། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སྲུང་མ་དམ་ཅན་རྒྱ་མཚོ་འཁོར་དང་བཅས། །བགེགས་དང་ལན་ཆགས་རིགས་དྲུག་སྙིང་རྗེའི་མགྲོན། །ལྷག་མར་གྱུར་པའི་མགྲོན་རིགས་ཡན་ཆད་ཀུན། །བསོད་ནམས་རིན་ཆེན་གླིང་འདིར་སྤྱན་འདྲེན་གྱིས། །བྱང་ཆུབ་སེམས་བསྐྱེད་སེམས་དང་བཅས་ཏེ་བྱོན། །འཕགས་རྒུ་བསྙེན་བཀུར་སེམས་དང་བཅས་ཏེ་བྱོན། །སྐྱེ་རྒུ་ཕན་མཛད་སེམས་དང་བཅས་ཏེ་བྱོན། །གཙུག་ལག་སྐྱོང་བའི་སེམས་དང་བཅས་ཏེ་བྱོན། །མདོར་ན་དཀོན་མཆོག་གསུམ་གྱི་བཀའ་དྲིན་གྱིས། །འཁོར་འདས་ཐམས་ཅད་མགྲོན་དུ་སྤྱན་འདྲེན་གྱིས། །ཚོང་པ་རིན་ཆེན་གླིང་དུ་ཕྱིན་པ་ལྟར། །བསོད་ནམས་རིན་ཆེན་གླིང་འདིར་མྱུར་དུ་བྱོན། །ལྷ་རྣམས་འདྲེས་མའི་ཚལ་དུ་འདུ་བ་ལྟར། །ལོངས་སྤྱོད་འདྲེས་པའི་ཚལ་འདིར་མྱུར་དུ་བྱོན། །རིག་འཛིན་དཔག་བསམ་ཀུན་རར་རྒྱུ་བ་ལྟར། །མཆོད་སྦྱིན་དཔག་བསམ་ཀུན་རར་མྱུར་དུ་བྱོན། །ཞེས་རོལ་མོའི་སྒྲ་དང་བཅས་པས་མགྲོན་ཐམས་ཅད་ཕྱོགས་ཐམས་ཅད་ནས་ས་གཞི་དང་བར་སྣང་ཁྱབ་པ་བྱོན་པར་བསམས་ནས། བཞུགས་སུ་གསོལ་བ་ནི། པུས་མོ་བཙུགས་ཐལ་མོ་སྦྱར་ཏེ། ཧོཿ ཐམས་ཅད་ཀུན་ནས་བྱོན་ཅིང་གཤེགས་པ་རྣམས། །དངོས་བཤམས་ཏིང་འཛིན་དགའ་བའི་གནས་མཆོག་འདིར། །སོ་སོའི་མགྲོན་རིགས་དགྱེས་པའི་གདན་ཁྲི་ལ། །མི་འགྱུར་བདེ་ཆེན་ངང་དུ་བཞུགས་ནས་ཀྱང་། །བདག་གི་མཆོད་སྦྱིན་དམ་པ་བཞེས་སུ་གསོལ། །ༀ་བཛྲ་ས་མ་ཡ་ཛཿཧཱུྃ་བྃ་ཧོཿ བཛྲ་ས་མ་ཡ་ཏིཥྛ་ལྷན། ཅེས་སེ་གོལ་དང་བཅས་པས་མགྲོན་ཐམས་ཅད་སྔར་བསྐྱེད་པའི་གཞལ་མེད་ཁང་དུ་གཙོ་འཁོར་སོ་སོའི་གདན་ལ་ཆེ་ཆུང་སྟེང་འོག་ཕྱི་ནང་གི་ཚུལ་གྱིས་ཁྱབ་པར་བསམས་ལ། སྔོན་དུ་མཆོད་བསྟོད་མཉེས་པར་བྱ་བ་ནི། ༀ། བསོད་ནམས་རིན་ཆེན་གླིང་འདིར་གཤེགས་པ་ཡི། །འཁོར་འདས་མགྲོན་རྣམས་སོ་སོའི་སྤྱན་ལམ་དུ། །སྤོས་དང་མེ་ཏོག་མར་མེ་ལ་སོགས་པ། །(༡༩)ཕྱི་ནང་གསང་བ་མཆོག་གི་མཆོད་པ་དང་། །གདུགས་དང་རྒྱལ་མཚན་རོལ་མོའི་སྤྲིན་ཕུང་གིས། །ནམ་མཁའི་མཐའ་ཀླས་གྱུར་པ་བཀང་སྟེ་འབུལ། །བསོད་ནམས་ཡེ་ཤེས་ཚོགས་ཆེན་རབ་རྫོགས་ཏེ། །འགལ་འཁྲུལ་ཉམས་ཆགས་མ་ལུས་དག་གྱུར་ནས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ༀ་བཛྲ་པུཥྤེ། དྷུ་པེ། ཨཱ་ལོ་ཀེ། གནྡྷེ་ནཻ་ཝི་དྱ། ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དཔག་མེད་ཡོན་ཏན་རྒྱ་མཚོའི་དབང་ཕྱུག་གཙོ། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སྣང་སྲིད་སྣོད་བཅུད་མགྲོན་རྣམས་ཐམས་ཅད་ལ། །བྱང་ཆུབ་སེམས་ཀྱི་ངང་དུ་ཕྱག་འཚལ་བསྟོད། །ཆོས་རྣམས་རྣམ་དག་གདོད་ནས་དག་པའི་ཀློང་། །ཀུན་བཟང་རྫོགས་ཆེན་ཡེ་ནས་བརྡལ་བའི་ངང་། །སྣང་སྲིད་འཁོར་འདས་ཆོས་རྣམས་རྣམ་དག་པས། །གཞི་རྫོགས་སེམས་ཉིད་ངང་དུ་ཕྱག་འཚལ་བསྟོད། །ཅེས་སོ་སོའི་ཕྱག་རྒྱ་དང་དངོས་སམ་ཡིད་ཀྱིས་ཕྱག་བྱའོ། །དེ་དག་ནི་མགྲོན་སྤྱན་དྲངས་ཤིང་སྤྱིར་མཆོད་པའོ། །

དེ་ནས་བྱེ་བྲག་ཏུ་ཕུད་ཀྱི་མཆོད་པ་དངོས་ནི། བསང་བཤོས་ཀྱི་རྩེ་མོ་ལྔའི་དབུས་དང་གཡས་གཡོན་ནས་བཅད་ཁམ་བཅད་པ་ཕུད་ཕོར་དུ་རིམ་པས་མཆོད་འབྲུ་ཕུད་དང་བསྡེབས་པ་བླུགས་ཏེ་གཅིག་ལངས་ནས་བཟུང་ལ། མཚམས་མཚམས་སུ་རོལ་མོའི་སྒྲ་དང་བཅས་པས་གནམ་ཕུད་འཐོར་ཞིང་གདངས་སྙན་པོས་འདི་སྐད་དོ། །ཧོཿ ཆོས་སྐུ་མཉམ་པ་ཆེན་པོའི་རང་བཞིན་ལས་ལྷུན་གྱིས་གྲུབ་པའི་སྐུ་དང་ཡེ་ཤེས་འདུ་འབྲལ་མེད་པ། ཐོག་མའི་མགོན་པོ་དཔལ་ཀུན་ཏུ་བཟང་པོ་ལ་འཁོར་ཡེ་ཤེས་རྒྱ་མཚོ་ཚོགས་ཀྱིས་བསྐོར་བ་ཀུན་གྱི་སྤྱི་ཕུད་དམ་པར་གྱུར་པ་དང་། བླ་ན་མ་མཆིས་པའི་འཕགས་པ་དཀོན་མཆོག་གསུམ་པོ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་ཆོས་ཀྱི་དབྱིངས་དང་ནམ་མཁའི་མཐའ་ཀླས་པར་བཀང་སྟེ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་ལ་སོགས་པའི་སེམས་པའི་སེམས་ཅན་ཐམས་ཅད་ཚོགས་གཉིས་རྫོགས་པའི་མངའ་ཐང་ཆེན་པོས་དབང་དང་འབྱོར་པ་དང་འདོད་རྒུའི་རེ་བ་ཐམས་ཅད་ཡིད་བཞིན་དུ་འགྲུབ་ནས། སྐུ་དང་ཡེ་ཤེས་འདུ་འབྲལ་མེད་པས་རང་དང་གཞན་གྱི་དོན་གཉིས་ལྷུན་གྱིས་གྲུབ་ཅིང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ སངས་རྒྱས་ཐམས་ཅད་ཀྱི་ངོ་བོ། དམ་ཆོས་ཐམས་ཅད་ཀྱི་འབྱུང་གནས། དགེ་འདུན་ཐམས་ཅད་ཀྱི་རང་བཞིན། དངོས་གྲུབ་ཐམས་ཅད་ཀྱི་རྩ་བ། ཡོན་ཏན་ཐམས་ཅད་ཀྱི་གཏེར་མཛོད། དཔལ་ལྡན་རྩ་བ་དང་བརྒྱུད་པར་བཅས་པའི་བླ་མ་དམ་པ། རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུང་བརྒྱུད་པ། ཆོས་སྐུ་ཀུན་ཏུ་བཟང་པོ། ལོངས་སྐུ་ཞི་ཁྲོ་རབ་འབྱམས། སྤྲུལ་སྐུ་རྡོ་རྗེ་འཆང་ཆེན། སྟོན་པ་རྡོ་རྗེ་སེམས་དཔའ། གསང་བདག་ཕྱག་ན་རྡོ་རྗེ། སྤྲུལ་སྐུ་དགའ་བར་རྡོ་རྗེ། (༢༠)གུ་རུ་འཇམ་དཔལ་བཤེས་གཉེན། མཁས་པ་ཤྲཱི་སིངྷ་། རྒྱལ་བ་ཛྙཱ་ན་སུ་ཏྲཱ། པཎ་ཆེན་བི་མ་ལ་མི་ཏྲ། ཨོ་རྒྱན་པདྨ་ཡབ་ཡུམ། ཉང་ཏིང་འཛིན་བཟང་པོ། ཆོས་རྒྱལ་ཁྲི་སྲོང་ལྡེའུ་བཙན། གནས་བརྟན་ལྡང་མ་ལྷུན་རྒྱལ། ལྕེ་བཙུན་སེང་གེ་དབང་ཕྱུག །སྤྲུལ་སྐུ་རྒྱལ་བ་ཞང་སྟོན། གུ་རུ་མཁས་པ་ཉི་འབུམ། ཆོས་བདག་གུ་རུ་ཇོ་འབེར། འཁྲུལ་ཞིག་སེང་གེ་རྒྱབ་པ། གྲུབ་ཆེན་ཟླ་བ་མུན་སེལ། རིག་འཛིན་ཀུ་མ་རཱ་ཛ། ཆོས་རྗེ་ཀློང་ཆེན་རབ་འབྱམས་དང་བཅས་པ་ལ། གཙང་མ་ཕུད་ཀྱི་མཆོད་པ་དམ་པ་འདི་ཉིད། དེང་ནས་ཇི་སྲིད་འཁོར་བ་མ་སྟོངས་ཀྱི་བར་དུ་གསོལ་ལོ། །འབུལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པའི་འཕྲལ་གྱི་རྐྱེན་སོལ་ཞིག །ཡུན་གྱི་སྒྲིབ་པ་སྦྱོངས་ཤིག །དབང་དང་བྱིན་རླབས་སྩོལ་ཅིག །ལྟ་དགོངས་དང་ཏིང་འཛིན་སྤེལ་ཞིག །དངོས་གྲུབ་ཆར་བཞིན་ཕོབ་ཅིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །གཞན་ཡང་མདོ་རྒྱུད་བཀའི་བརྒྱུད་པ། དགོངས་འགྲེལ་བསྟན་བཅོས་ཀྱི་བརྒྱུད་པ། ཡིད་ཆེས་ལུང་གི་བརྒྱུད་པ། རྣམ་དཔྱོད་རིག་པའི་བརྒྱུད་པ། སྙིང་པོ་མན་ངག་གི་བརྒྱུད་པ། རྒྱུ་འབྲས་ཐེག་པའི་རྒྱུད་པ། ཐེག་པ་རིམ་དགུའི་བརྒྱུད་པ། ཡ་ཀི་རྫོགས་པའི་སངས་རྒྱས་ནས་རང་རང་གི་རྩ་བའི་བླ་མ་ལ་ཐུག་གི་བར་དུ་གདུལ་བྱ་སོ་སོའི་མོས་པ་དང་མཐུན་པར་རིམ་གྱིས་བརྒྱུད་པའི་དཔལ་མགོན་རྩ་བ་དང་བརྒྱུད་པར་བཅས་པའི་བླ་མ་དམ་པ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འདི་ཉིད་དེང་ནས་འགྲོ་བ་ཉེ་བར་ཞི་བའི་གོ་འཕང་ལ་གནས་ཀྱི་བར་དུ་གསོལ་ལོ། །འབུལ་ལོ། །མཆོད་དོ། །བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པ་དང་། ས་དང་ལམ་གྱི་ཐེམ་སྐས་བགྲོད་པ་དང་། གཟུངས་དང་ཏིང་ངེ་འཛིན་གྱི་ཡོན་ཏན་འབྱོར་པ་དང་། བསམ་རྒུའི་རེ་བ་ཡིད་བཞིན་དུ་བསྐང་བ་དང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འོག་མིན་མཉམ་པ་ཆེན་པོའི་ཞིང་ཁམས་ན་མངའ་དབང་རྫོགས་པའི་སྟོན་པ་དཔལ་ཀུན་ཏུ་བཟང་པོ་ལ་འཁོར་ཡེ་ཤེས་རྒྱ་མཚོའི་ཚོགས་ཀྱིས་བསྐོར་བའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་ཐམས་ཅད་སེམས་ཉིད་མངོན་པར་འདུས་མ་བྱས་པའི་དཀྱིལ་འཁོར་དུ་ཆོས་ཐམས་ཅད་རང་བཞིན་རྫོགས་པ་ཆེན་པོར་འོད་འབར་ཏེ། གདོད་མའི་གནས་སུ་མངོན་པར་བྱང་ཆུབ་ནས་རང་དང་གཞན་གྱི་དོན་གཉིས་ལྷུན་གྱིས་གྲུབ་ཅིང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་ཚབ་དམ་པ་སྟོན་པ་རིགས་ལྔའི་སངས་རྒྱས་ཞི་ཁྲོ་རབ་འབྱམས་ལ། འཁོར་རང་སྣང་ལོངས་སྤྱོད་རྫོགས་པའི་སྐུས་བསྐོར་བ་དང་བཅས་པའི་མངའ་རིས་དང་སྤྱན་ལམ་(༢༡)དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་ཐམས་ཅད་གནས་ལུགས་རང་བཞིན་ཆོས་ཀྱི་སྐུ་ལས་མ་གཡོས་པར་སྣང་ལུགས་རང་སྣང་ལོངས་སྤྱོད་རྫོགས་ཏེ་སྐུ་དང་ཡེ་ཤེས་འདུ་འབྲལ་མེད་པས་རང་གཞན་གྱི་དོན་གཉིས་འགྲུབ་པ་དང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འོག་མིན་བདེ་བ་ཆེན་པོའི་ཞིང་ཁམས་སུ། ཕྲིན་ལས་རྫོགས་པའི་ཡོན་ཏན་རྡོ་རྗེ་འཆང་ཆེན་པོ་ལ། འཁོར་མཁའ་འགྲོ་རྒྱ་མཚོའི་ཚོགས་ཀྱིས་བསྐོར་བའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །

བདག་ཅག་ཡོན་མཆོད་འཁོར་དང་བཅས་པ་ཐམས་ཅད་དབང་དང་བྱིན་རླབས་ཀྱི་ཆུ་བོས་སྨིན་ཏེ་བསྐྱེད་རྫོགས་ཟུང་འཇུག་མངོན་དུ་གྱུར་ནས། ཕྲིན་ལས་རྣམ་པ་བཞིས་འགྲོ་བ་འདྲེན་ཞིང་མཆོག་དང་ཐུན་མོང་གི་དངོས་གྲུབ་ཐོབ་ནས། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ ཆོས་སྐུ་ནམ་མཁའ་ལྟ་བུའི་ངོ་བོ་རོ་གཅིག་ཀྱང་གཟུགས་སྐུ་སྒྱུ་མའི་རོལ་པར་འཇའ་ཚོན་ལྟར་སོ་སོར་གསལ་བ་གསང་སྔགས་ཕྱི་ནང་གི་དཀྱིལ་འཁོར་དཔག་ཏུ་མེད་པ་རྣམས་དང་། ཁྱད་པར་དུ་ཡང་བདེ་གཤེགས་ཞི་བའི་ལྷ་ཚོགས། ཆེ་མཆོག་ཡོན་ཏན་གྱི་ལྷ་ཚོགས། ཡང་དག་ཐུགས་ཀྱི་ལྷ་ཚོགས། འཇམ་དཔལ་སྐུའི་ལྷ་ཚོགས། པདྨ་གསུང་གི་ལྷ་ཚོགས། ཕུར་པ་ཕྲིན་ལས་ཀྱི་ལྷ་ཚོགས། མ་མོ་རྦོད་གཏོང་གི་ལྷ་ཚོགས། རིག་འཛིན་སློབ་དཔོན་གྱི་ལྷ་ཚོགས། འཇིག་རྟེན་མཆོད་བསྟོད་ཀྱི་ལྷ་ཚོགས། དམོད་པ་དྲག་སྔགས་ཀྱི་ལྷ་ཚོགས་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ཐམས་ཅད་སྣོད་བཅུད་རྒྱལ་བའི་ཞིང་དུ་གསལ་བས་བསྐྱེད་རྫོགས་དོན་གྱི་དངོས་གྲུབ་བརྙེས་ཏེ་རང་གཞན་དོན་གཉིས་ལྷུན་གྱིས་གྲུབ་ནས། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འོག་མིན་ཆོས་ཀྱི་དབྱིངས་ཕོ་བྲང་ན། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྲས་ཕྱོགས་བཅུའི་སངས་རྒྱས་ཐམས་ཅད་ཀྱིས་བསྐོར་བའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་འདི་འབུལ་ལོ། །གསོལ་ལོ། །མཆོད་དོ། །བཀྲ་ཤིས་དང་དགེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འོག་མིན་སྟུག་པོ་བཀོད་པའི་ཞིང་ཁམས་ན། དཔལ་རྣམ་པར་སྣང་མཛད་འཁོར་ས་བཅུའི་སེམས་དཔས་བསྐོར་བ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འདི་འབུལ་ལོ། །གསོལ་ལོ། །མཆོད་དོ། །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ བྱ་རྒོད་ཕུང་པོའི་རི་བོ་ལ་བཅོམ་ལྡན་(༢༢)འདས་ཤཱཀྱ་ཐུབ་པ་ལ་དགེ་སློང་དང་དགེ་སློང་མ་ལ་སོགས་པ་ཐུན་མོང་གི་འཁོར་བཞི་དང་། བཟང་སྐྱོང་དང་དྲྭ་བས་བྱིན་ལ་སོགས་པ་ཁྱད་པར་གྱི་འཁོར་བཅུ་དྲུག་དང་། ལྷ་དང་ཀླུ་ལ་སོགས་པ་སྣ་ཚོགས་ཀྱི་འཁོར་བསམ་གྱིས་མི་ཁྱབ་པས་བསྐོར་བའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འདི་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་ཐམས་ཅད་ཐེག་པ་གསུམ་གྱིས་ངེས་པར་འབྱུང་བས་རྟག་ཏུ་དགེ་བའི་ཆོས་ལ་སྤྱོད་ཅིང་འཁོར་བ་སྡུག་བསྔལ་གྱི་ཆུ་བོ་བསྒྲལ་ནས་མྱུར་དུ་སངས་རྒྱས་ཀྱི་གོ་འཕང་ཐོབ་སྟེ། བསམ་རྒུའི་རེ་བ་ཡིད་བཞིན་དུ་འགྲུབ་ནས། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ ཆོས་ཐམས་ཅད་རང་བཞིན་གྱིས་རྣམ་པར་དག་ཅིང་དྲི་མ་དང་བྲལ་བའི་ཕོ་བྲང་ཆེན་པོ་ན། འཕགས་པ་གསུམ་གྱི་ངེས་པར་འབྱུང་བའི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བཀའ་འཁོར་ལོ་གསུམ་དང་། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གིས་བསྐོར་བ་ཐམས་ཅད་དང་། ཐེག་པ་བླ་ན་མེད་པའི་རྒྱུད། ཆོས་ཀྱི་འཁོར་ལོ་གསང་སྔགས་ཕྱི་ནང་བྱ་བའི་རྒྱུད་སྤྱོད་པའི་རྒྱུད། རྣལ་འབྱོར་གྱི་རྒྱུད། རྣལ་འབྱོར་བླ་ན་མེད་པའི་རྒྱུད། ཕ་བླ་ན་མེད་པ། མ་བླ་ན་མེད་པ། གཉིས་སུ་མེད་པ་བླ་ན་མེད་པ། གསང་བ་འདུས་པ། བདེ་མཆོག་འཁོར་ལོ། ཀྱེ་རྡོ་རྗེ། དུས་ཀྱི་འཁོར་ལོ། སྒྱུ་འཕྲུལ་དྲྭ་བ། རྡོ་རྗེ་ཕུར་པ། རྟ་མཆོག་རོལ་པ། རྡོ་རྗེ་གདན་བཞི། བདུད་རྩི་འབྱུང་བ། མཁའ་འགྲོ་སྒྱུ་མ། སངས་རྒྱས་མཉམ་སྦྱོར་ལ་སོགས་པ་དཔག་ཏུ་མེད་པ། ཡོངས་སུ་རྫོགས་པ་ཆེན་པོའི་རྒྱུད། འཁོར་བ་དོང་སྤྲུགས། ཀུན་བྱེད་རྒྱལ་པོ། ཁུ་བྱུག་རོལ་པ། མི་ནུབ་རྒྱལ་མཚན་ལ་སོགས་པ་སེམས་ཀློང་མན་ངག་གི་སྡེ་ཆོས་ཀྱི་ཕུང་པོ་ནམ་མཁའི་མཐའ་ཀླས་པ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་ཐམས་ཅད་ཉིན་མཚན་རྟག་ཏུ་ཆོས་ལ་སྤྱོད་ཅིང་ས་དང་ལམ་གྱི་ཡོན་ཏན་རྫོགས་ནས་བསམ་རྒུའི་རེ་བ་ཡིད་བཞིན་དུ་འགྲུབ་སྟེ། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ ཤར་རི་བོ་ཏ་ལའི་རྩེ་མོ་ན་ཐུགས་རྗེའི་བདག་ཉིད་སྤྱན་རས་གཟིགས་དབང་ཕྱུག་འཁོར་དང་བཅས་པ། རྒྱ་ནག་རི་བོ་རྩེ་ལྔ་ན་མཁྱེན་རབ་ཀྱི་བདག་པོ་འཕགས་པ་འཇམ་དཔལ་འཁོར་དང་བཅས་པ། ལྕང་ལོ་ཅན་གྱི་གནས་མཆོག་དམ་པ་ན་མཐུ་སྟོབས་ཀྱི་བདག་པོ་དཔལ་ཕྱག་ན་རྡོ་རྗེ་འཁོར་དང་བཅས་པ་དང་། གཞན་ཡང་ཕྱོགས་བཅུ་དུས་གསུམ་གྱི་བྱང་ཆུབ་སེམས་དཔའ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་ཐམས་ཅད་ཐར་པའི་ལམ་ལ་གནས་(༢༣)ཤིང་དད་པ་དང་སྙིང་རྗེ་བྱང་ཆུབ་ཀྱི་སེམས་མངོན་དུ་གྱུར་ནས་བྱང་ཆུབ་ཀྱི་སྤྱོད་པ་རླབས་པོ་ཆེ་རྫོགས་པར་བྱེད་ཅིང་འདོད་པའི་དོན་ཐམས་ཅད་ལྷུན་གྱིས་གྲུབ་སྟེ། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འཛམ་གླིང་གི་ལྷའི་གནས་ལ་སོགས་པ་ན། འཕགས་པའི་གནས་བརྟན་ཡན་ལག་འབྱུང་དང་གསེར་བེའུ་ལ་སོགས་པ་ཉན་ཐོས་ཀྱི་དགེ་འདུན་འཁོར་དང་བཅས་པ་དང། གདུང་བ་སེལ་བ་དང་འཇིགས་པ་སྐྱོབ་པ་ལ་སོགས་རང་སངས་རྒྱས་ཀྱི་དགེ་འདུན་འཁོར་དང་བཅས་པ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་ཐམས་ཅད་ཀྱི་ཚུལ་ཁྲིམས་དང་། ཏིང་ངེ་འཛིན་གྱི་ཕུང་པོ་ཡོངས་སུ་རྫོགས་པ་དང་། རྣམ་པར་གྲོལ་བའི་ཡེ་ཤེས་མཆོག་ལ་རེག་ཅིང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ གསང་སྔགས་མཆོག་གི་དངོས་གྲུབ་བརྙེས་ནས་ཕྲིན་ལས་རྣམ་བཞིས་འགྲོ་བ་འདྲེན་པ་གྲུབ་མཆོག་རྣམས་དང་རིགས་ལྔའི་མཁའ་འགྲོ། ཆོས་དབྱིངས་མཁའ་འགྲོ། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ། ལས་ཀྱི་མཁའ་འགྲོ། ཕྲ་མེན་ཤུགས་འགྲོ། རྡོ་རྗེ་གིང་ཆེན་འཁོར་དང་བཅས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ཐམས་ཅད་ཀྱི་ཕྲིན་ལས་རྣམ་བཞིའི་རེ་བ་འགྲུབ་ཅིང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ ཐུགས་ཞི་བ་ཆོས་ཀྱི་དབྱིངས་ལས་མ་གཡོས་ཀྱང་སྐུ་འབར་བའི་ཆོ་འཕྲུལ་ཅིར་ཡང་བསྒྱུར་བས་བདུད་དང་གཤིན་རྗེའི་འཇིག་རྟེན་འཇོམས་པར་མཛད་པ། ཁྲོ་བོ་འཇིག་རྟེན་གསུམ་ལས་རྣམ་པར་རྒྱལ་བ། མི་གཡོ་བ། གཤིན་རྗེའི་གཤེད། བགེགས་མཐར་བྱེད་ལ་སོགས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པའི་རྐྱེན་ཕྱི་ནང་གི་བར་དུ་གཅོད་པ་ཐམས་ཅད་ཞི་བ་དང་། འདི་དང་ཕྱི་མའི་ལེགས་པ་ཐམས་ཅད་འབྱུང་བ་དང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འབར་བ་ཆེན་པོའི་དབྱིངས་ལས་སྤྲུལ་པ་ལས་དང་ཡེ་ཤེས་ཀྱི་ཚོགས་ཀྱི་དབང་ཕྱུག་ཆེན་པོ། སངས་རྒྱས་ཀྱི་བསྟན་པ་བསྲུང་ཞིང་དམ་ལྡན་གྱི་རྣལ་འབྱོར་བ་སྐྱོང་བར་ཞལ་གྱིས་བཞེས་པ། དཔལ་ལྡན་མགོན་པོ་མཧཱ་ཀ་ལ། ལྷ་མོ་འདོད་ཁམས་དབང་ཕྱུག་དཔལ་འབར་མ། གཞན་ཡང་སྲུང་མ་དམ་ཅན་རྒྱ་མཚོ་དྲེགས་པ་ཕོ་རྒྱུད་མོ་རྒྱུད་དང་བཅས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སངས་རྒྱས་ཀྱིས་བསྟན་པ་བསྲུང་ཞིང་དགེ་འདུན་གྱི་གཙུག་ལག་ཁང་སྐྱོང་བ་དང་། བདག་ཅག་ཡོན་མཆོད་(༢༤)འཁོར་དང་བཅས་པའི་མགོན་སྐྱབས་དཔུང་གཉེན་མཛད་ཅིང་བསམ་རྒུའི་རེ་བ་འགྲུབ་ནས། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ དཔལ་ལྡན་ནོར་གྱི་དབང་ཕྱུག་ཆེན་པོ་ཚོགས་ཀྱི་བདག་པོ་འབྲོག་གནས་མཆེད་དང་། རྣམ་ཐོས་བུ་དང་། གང་བ་བཟང་པོ་དང་། ནོར་བུ་བཟང་པོ་དང། ཆུ་དབང་གནོད་མཛེས། འཕྲོག་མའི་བུ་དང་། ནོར་རྒྱུན་མ་སོགས་འཕགས་པ་ནོར་གྱི་དབང་ཕྱུག་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །གཙུག་ལག་ཁང་གི་འབྱོར་པ་སྤེལ་ཞིང་བདག་ཅག་ཡོན་མཆོད་འཁོར་དང་བཅས་པའི་མངའ་ཐང་དཔལ་འབྱོར་ཕྱོགས་བཅུར་རྒྱས་ནས། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། །ཧོཿ མཁྱེན་རབ་མཆོག་གི་དབང་ཕྱུག་དམ་པ་འཕགས་པ་འཇམ་དཔལ་གཞོན་ནུར་གྱུར་པ་དང་། རྒྱ་མཚོའི་ལྷ་མོ་འཕགས་མ་དབྱངས་ཅན་འཇིག་རྟེན་གསུམ་གྱི་ཤེས་རབ་གསལ་བྱེད་ལ་སོགས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །

མཆོད་དོ། །གཙུག་ལག་ཁང་དུ་རིག་པ་སྤེལ་ཞིང་བདག་ཅག་ཡོན་མཆོད་འཁོར་དང་བཅས་པས་བཟོ་དང་སྒྱུ་རྩལ་དང་བསྟན་བཅོས་ལ་སོགས་པའི་ཤེས་བྱ་ཐོགས་པ་མེད་པ་ལ་བློ་གྲོས་ཀྱི་སྣང་བ་ཐོབ་ནས། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ མཐུ་དཔལ་ཆེན་པོས་བསྟན་པ་སྐྱོང་བ་ལྷའི་དགེ་བསྙེན་ཆེན་པོ་ཚངས་པ་དང་བརྒྱ་བྱིན་ལ་སོགས་ཏེ་ལྷ་ཆེན་པོ་བརྒྱད་དང་། དགའ་བོ་དང་འཇོག་པོ་ལ་སོགས་པ་ཀླུ་ཆེན་པོ་བརྒྱད་དང་། ཉི་མ་དང་ཟླ་བ་ལ་སོགས་ཏེ་གཟའ་ཆེན་པོ་བརྒྱད་དང་། སྨིན་དྲུག་དང་སྣར་མ་ལ་སོགས་ཏེ་རྒྱུ་སྐར་ཉི་ཤུ་རྩ་བརྒྱད་དང་། བརྒྱ་བྱིན་དང་མེ་ལྷ་ལ་སོགས་པ་ཕྱོགས་སྐྱོང་བ་བཅུ་དང་། ཡུལ་འཁོར་སྲུང་དང་འཕགས་སྐྱེས་པོ་ལ་སོགས་རྒྱལ་པོ་ཆེན་པོ་བཞི་དང་། ནག་པོ་ཆེན་པོ་ལ་སོགས་པ་འཇིགས་བྱེད་ཆེན་པོ་དགུ་སྟེ། དཔལ་མགོན་བདུན་ཅུ་རྩ་ལྔ་འཁོར་དང་བཅས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །གཙུག་ལག་ཁང་གི་ལེགས་རྒུ་སྒྲུབ་ཅིང་འབྱོར་པ་སྤེལ་བ་དང་། བདག་ཅག་ཡོན་མཆོད་འཁོར་དང་བཅས་པའི་བསམ་རྒུ་སྒྲུབ་ཅིང་རེ་བ་བསྐངས་ནས། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ སྔོན་གྱི་བསོད་ནམས་དཔག་ཏུ་མེད་པས་རྒྱལ་བའི་ཞལ་མཐོང་བདུད་རྩི་ཐོས་ཤིང་། སངས་རྒྱས་བསྟན་པའི་རིམ་གྲོ་མཛད་པ། དཀོན་མཆོག་གསུམ་གྱི་ཞབས་འབྲིང་ཆེན་པོ། ལྷའི་དགེ་བསྙེན་ཧ་ནུ་མནྡྷ། གནོད་སྦྱིན་ཆོས་སྤུན་སུམ་ཅུ་རྩ་གཉིས། ཚོགས་ཀྱི་བདག་པོ། འབྲོག་གནས་མཆེད་དང་། དྲི་ཟའི་རྒྱལ་པོ་ཟུར་ཕུད་ལྔ་པ། ནམ་མཁའ་ལྡིང་གི་དབང་པོ་གསེར་གྱི་མིག་ཅན། སྲིན་པོའི་རྒྱལ་པོ་(༢༥)ལངྐ་མགྲིན་བཅུ་ལ་སོགས་པ་ཆོས་སྲིད་དགེ་བའི་ལྷ་དང་། ཀླུ་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ནམ་མཁའི་ལྡིང་གི་དབང་པོ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དང་། གཙུག་ལག་ཆེན་པོ་སྐྱོང་ཞིང་བདག་ཅག་ཡོན་མཆོད་འཁོར་དང་བཅས་པའི་བསམ་པ་ཐམས་ཅད་ཡིད་བཞིན་དུ་འགྲུབ་པ་དང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ སྔོན་གྱི་བསོད་ནམས་ཚོགས་ལས་འཁྲུངས་པ་འབྱུང་པོ་སོ་སོའི་ལྷ་ཚོགས་དམ་པ། རྒྱལ་ཆེན་བཞི་དང་སྐལ་བ་མཉམ་པ། སའི་ལྷ་དང་། ཆུའི་ལྷ་དང་། མེའི་ལྷ་དང་། རླུང་གི་ལྷ་དང་། བར་སྣང་གི་ལྷ་དང་། ཤིང་གི་ལྷ། ནགས་ཚལ་གྱི་ལྷ་དང་། སྐྱེད་མོས་ཚལ་གྱི་ལྷ། གྲོང་གི་ལྷ་དང་། གྲོང་ཁྱེར་གྱི་ལྷ་དང་། རིའི་ལྷ་དང་། ལྗོངས་ཀྱི་ལྷ་དང་། དུས་ཀྱི་ལྷ་དང་། ལྷན་ཅིག་སྐྱེས་པའི་ལྷ་ལ་སོགས་པ་འཁོར་དང་བཅས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །གཙུག་ལག་ཁང་དང་ཉེ་འཁོར་ཡོངས་སུ་སྐྱོང་ཞིང་། འབྱུང་བ་སོ་སོའི་གནོད་པ་རྣམས་བསྲུང་བ་དང་། ལོ་ཕྱུགས་ལེགས་ཤིང་ཆར་ཆུ་དུས་སུ་འབབ་པ་དང་། བདག་ཅག་ཡོན་མཆོད་འཁོར་དང་བཅས་པའི་མངའ་ཐང་དང་འབྱོར་པ་སྤེལ་ཞིང་། རྐྱེན་ཕྱི་ནང་གི་བར་དུ་གཅོད་པ་ཐམས་ཅད་མེད་པར་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ བརྟུལ་ཞུགས་དཀའ་ཐུབ་རྨད་དུ་བྱུང་བས་ཡོན་ཏན་མཆོག་གི་དངོས་གྲུབ་བརྙེས་པ་དྲང་སྲོང་ཆེན་པོ་སྐྱེ་རྒུའི་བདག་པོ་དང་། མེ་བཞི་འབར་དང་། ཐ་སྐར་དང། རྒྱུན་ཤེས་དང་། མདོག་ནག་དང་། རྒྱས་པ་ལ་སོགས་པ་ལྷ་དང་མིའི་དྲང་སྲོང་ཆེན་པོ་ཕན་འདོགས་ནུས་ཤིང་དམོད་པ་འདོར་བ་འཁོར་དང་བཅས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བསྟན་པ་དམ་པའི་ཆོས་དང་གཙུག་ལག་གཉན་པོ་སྐྱོང་ཞིང་འཇིག་རྟེན་དགེ་ལེགས་སུ་བྱ་བ་དང་། ཁྱད་པར་དུ་ཡང་བདག་ཅག་ཡོན་མཆོད་འཁོར་དང་བཅས་པའི་བདེན་ཚིག་འགྲུབ་པར་བཀའ་སྩལ་བ་དང་། ནད་དང་གནོད་པ་མེད་པས་ཀུན་ཏུ་བདེ་བ་དང་། ཡོན་ཏན་གྱི་དཔལ་འཕེལ་བས་མཁས་ཤིང་མཛངས་པ་དང་། མངའ་ཐང་དང་འབྱོར་བ་རྒྱས་པས་ཀུན་གྱི་རེ་སྨོན་དུ་གྱུར་པ་དང་ཚེ་རིང་བ་ལ་སོགས་ཏེ། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ མཐུ་སྟོབས་རྫུ་འཕྲུལ་དཔག་ཏུ་མེད་པས་སྟོང་གསུམ་ཡུལ་གྱི་དབུས་འཚོ་བ་ཀླུའི་རྒྱལ་པོ་སྟོང་གསུམ་འབྲུག་སྒྲ་དང་། དགའ་བོ་དང་། ཉེ་དགའ་བོ་དང་། མཐའ་ཡས་དང་། སྟོབས་ཀྱི་རྒྱུ་དང་། རིགས་ལྡན་དང་། པདྨ་དང་། པདྨ་ཆེན་པོ་ལ་སོགས་(༢༦)པ་འཁོར་དང་བཅས་པ་རྣམས་དང་། སའི་ལྷ་མོ་བརྟན་མ་འཁོར་དང་བཅས་པ་རྣམས་དང་། ཁྱད་པར་དུ་འཛམ་བུ་གླིང་གི་ས་བདག་ཀླུ་གཉན། ཀླུའི་རྒྱལ་པོ་མ་དྲོས་པ་དང་། སོག་མ་མེད་དང་། ཟི་ཆེན་དང་། ཝཱ་རུ་ཎ་དང་། དུང་སྐྱོང་ལ་སོགས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །དཀོན་མཆོག་གསུམ་གྱི་བསྟན་པ་དང་གཙུག་ལག་གཉན་པོ་བསྐྱང་ཞིང། ཡུལ་ཁམས་ཐམས་ཅད་དུ་ལོ་ཕྱུགས་ལེགས་ཤིང་ཆར་ཆུ་དུས་སུ་འབབ་པ་དང་། བདག་ཅག་ཡོན་མཆོད་འཁོར་དང་བཅས་པའི་གནས་དང་ཡུལ་ཁམས་ཡོངས་སུ་བསྐྱང་བ་དང་། ཆབ་སྲིད་མངའ་ཐང་ཆེན་པོ་སྤེལ་བ་དང་། ཕྱི་ནང་གི་འགལ་རྐྱེན་ཐམས་ཅད་མེད་པ་དང་། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ སྔོན་གྱི་ཐུགས་རྗེ་རྨད་དུ་བྱུང་བས་དཀོན་མཆོག་གསུམ་གྱི་བསྟན་པ་བསྲུང་ཞིང་། མཐུ་དང་རྫུ་འཕྲུལ་དཔག་ཏུ་མེད་པས་གཙུག་ལག་ཁང་རྣམས་ཀྱི་གཉེར་དུ་གཏད་པ། རྒྱ་གར་རྡོ་རྗེ་གདན་གྱི་སྲུང་མ། ཁ་ཆེ་ན་ཁྲི་རྟེན་གྱི་སྲུང་མ། ཨོ་རྒྱན་ན་བདེ་བྱེད་བརྩེགས་ཀྱི་སྲུང་མ། བལ་ཡུལ་ན་འཕགས་པ་ཤིང་ཀུན་གྱི་སྲུང་མ། འཕགས་པ་འཇའ་མ་ལི་དང་ཨུ་ཁང་གི་སྲུང་མ། སྤྱི་རོང་ན་འཕགས་པ་ལོ་ཀི་ཤྭ་རའི་སྲུང་མ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །

མཆོད་དོ། །དཀོན་མཆོག་གསུམ་གྱི་བསྟན་པ་སོ་སོའི་གཙུག་ལག་ཁང་བཅས་པ་བསྲུང་ཞིང་། བདག་ཅག་ཡོན་མཆོད་འཁོར་དང་བཅས་པའི་རེ་བ་བསྐང་ཞིང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འཕགས་དགུའི་ཡོན་ཏན་དཔག་ཏུ་མེད་པའི་སོ་སོའི་གནས་དང་གཙུག་ལག་ཁང་སྐྱོང་བ། རྒྱ་ནག་རི་བོ་རྩེ་ལྔའི་སྲུང་མ། སོ་སོར་ཐའི་སྲུང་མ། བཀྲ་ཤིས་ཁྲི་སྒོའི་སྲུང་མ། གྱི་ལྗང་ཧུའི་སྲུང་མ། ཕོ་བྲང་ཆེན་མོའི་སྲུང་མ། སྨན་རྩེ་མཁར་གྱི་སྲུང་མ། ལྗང་ཡུལ་རྡོ་རྗེའི་སྲུང་མ། ཧ་ལ་ཤན་གྱི་སྲུང་མ། འགའ་འགའ་མཁར་གྱི་སྲུང་མ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་གནས་དང་བསྟན་པ་བསྲུང་ཞིང་ཕྱི་དང་ནང་གི་འཁྲུག་འཚེ་མེད་ཅིང་། བདག་ཅག་ཡོན་མཆོད་འཁོར་དང་བཅས་པའི་བསམ་རྒུ་འགྲུབ་ཅིང་རེ་བ་སྐོང་བ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ ཀུན་གྱི་ནང་ནས་མཆོག་ཏུ་འཕགས་པ་གངས་རིའི་རྒྱུད་ཀྱི་སྲུང་མ་ཆེན་པོ། ལྷ་ཀླུ་གསང་བའི་དེད་དཔོན་ཆེན་པོ། སོ་ཁ་ཡུལ་གྱི་སོ་མཚམས་བསྲུང་ཞིང་སོ་སོའི་གནས་དང་བོད་ཁམས་སྐྱོང་བ། སྟོད་མངའ་རིས་སྐོར་གསུམ་གྱི་སྲུང་མ། བར་དབུས་གཙང་རུ་བཞིའི་སྲུང་མ། (༢༧)སྨད་མདོ་ཁམས་སྒང་དྲུག་གི་སྲུང་མ། གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་མོ་ལ་སོགས་པ་བོད་ཁམས་སྐྱོང་བའི་བརྟན་མ་བཅུ་གཉིས། སྐྱོང་མ་བཅུ་གཉིས། གཡའ་རི་མ་བཅུ་གཉིས། གངས་རི་མ་བཅུ་གཉིས་འཁོར་དང་བཅས་པ་དང་། གནོད་སྦྱིན་ཆེན་པོ་རྡོ་རྗེ་ཤོམ་པོ། རྡོ་རྗེ་ཐང་ལྷ། རྡོ་རྗེ་གངས་བཟང་ལ་སོགས་པ་ལྷ་རབས་མཆེད་དགུ་འཁོར་དང་བཅས་པ་དང་། སྐུ་ལྷ་མཁའ་རི། རྡོ་རྗེ་བྲག་སྐྱེས། དགེ་བསྙེན་ཡུལ་བདག་ལ་སོགས་པ་དགེ་བསྙེན་ཉི་ཤུ་གཅིག་འཁོར་དང་བཅས་པ་རྣམས་དང་། གཞན་ཡང་མིང་དང་མཚན་ནས་མ་ཐོན་པའི་ཡུལ་ལྷ་གཞི་བདག་ཆེ་རྒུ་གཉན་རྒུ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་ཡུལ་ཁམས་གཉེར་དུ་བཞེས་ནས་བོད་ཁམས་ཀྱི་སོ་ཁ་བསྲུང་ཞིང་། ཧོར་དང་། རྒྱ་དང་ཏུ་རུཥྐ་ལ་སོགས་པའི་མཐའ་དམག་གི་གནོད་པ་དང་འཚེ་བ་བཟློག་ཅིང་། ཕྱི་འཁྲུགས་ནང་འཁྲུགས་མེད་པར་རྒྱལ་ཁམས་བདེ་ཞིང་ལོ་ཕྱུགས་ལེགས་པ་དང་། བསྟན་པ་དར་ཞིང་དགེ་བ་བསྔགས་འོས་སུ་སྤྱོད་པ། ཁྱད་པར་དུ་ཡང་བདག་ཅག་ཡོན་མཆོད་འཁོར་དང་བཅས་པའི་ཡུལ་ཁམས་དར་བ། ལོ་ཕྱུགས་ལེགས་པ། འཁྲུག་འཚེ་མེད་པ། མངའ་ཐང་རྒྱས་པ། བསམ་རྒུ་འགྲུབ་པ། རེ་སྨོན་དམ་པའི་གཞིར་གྱུར་པ་སོགས་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ སྔོན་གྱི་འཕགས་པས་གཉེར་དུ་བསྐོས་པ། བསྟན་པ་བསྲུང་ཞིང་གཙུག་ལག་སྐྱོང་བ། ཆོས་འཁོར་མ་བུ་སྟོད་སྨད་ཀྱི་སྲུང་མ། དབེན་གནས་གཉན་གྱི་སྲུང་མ། རིན་ཆེན་རྫོང་གི་སྲུང་མ་འཁོར་དང་བཅས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །གནས་དང་བསྟན་པ་བསྲུང་ཞིང་བདག་ཅག་ཡོན་མཆོད་འཁོར་དང་བཅས་པའི་བསམ་རྒུ་བསྒྲུབ་ཅིང་རེ་བ་བསྐང་བ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ འཕགས་པའི་རྒྱལ་པོས་གཉེར་དུ་བསྒོས་པ། ཆོས་འཁོར་མ་བུ་སྟོད་ཀྱི་སྲུང་མ། ལྷ་ས་འཕྲུལ་སྣང་གི་སྲུང་མ། གཙང་ཁང་སྒོ་ལྔའི་སྲུང་མ། འཁོར་ས་ཀླུ་ཁང་གི་སྲུང་མ། བཀའ་གཙིགས་རྡོ་རིང་སྲུང་མ། ར་མོ་ཆེའི་སྲུང་མ། བྲག་ལྷ་མགོན་པོའི་སྲུང་མ། ཁྱད་པར་དུ་མ་མགོན་ལྕམ་དྲལ། སྲིན་པོའི་རྒྱལ་པོ་ལང་ཀ་མགྲིན་བཅུ། ཀླུའི་རྒྱལ་པོ་སྟོང་གསུམ་འབྲུག་སྒྲ། ཚངས་པ་དུང་གི་ཐོར་ཚུགས་ཅན་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་གནས་དང་བསྟན་པ་བསྲུང་ཞིང་བདག་ཅག་ཡོན་མཆོད་འཁོར་དང་བཅས་པའི་རེ་སྨོན་ཐམས་ཅད་ཡིད་བཞིན་དུ་འགྲུབ་པ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་(༢༨)མཛད་དུ་གསོལ། ཧོཿ མཐུ་སྟོབས་རྫུ་འཕྲུལ་དཔག་ཏུ་མེད་པས་གཙུག་ལག་ཁང་དང་བསྟན་པ་སྐྱོང་བ། ཆོས་འཁོར་མ་བུ་སྨད་ཀྱི་སྲུང་མ། དབུ་རྩེ་རིགས་གསུམ་གྱི་སྲུང་མ། མཆོད་རྟེན་བཞིའི་སྲུང་མ། གཏེར་ཁ་བརྒྱད་ཀྱི་སྲུང་མ། ཡཀྴ་ལྟག་འོག་གི་སྲུང་མ། མཁྱེན་རབ་འཇམ་དཔལ་གླིང་གི་སྲུང་མ། རྣམ་དག་ཁྲིམས་ཁང་གླིང་གི་སྲུང་མ། ཚང་མང་ཀེང་རུས་གླིང་གི་སྲུང་མ། ཨཱརྻ་པཱ་ལོའི་གླིང་གི་སྲུང་མ། བདུད་འདུལ་སྔགས་པ་གླིང་གི་སྲུང་མ། སྒྲ་བསྒྱུར་རྒྱ་གར་གླིང་གི་སྲུང་མ། ལུང་བསྟན་བཻ་རོ་ཙ་ནའི་སྲུང་མ། མི་གཡོ་བསམ་གཏན་གླིང་གི་སྲུང་མ། བྱང་ཆུབ་སེམས་བསྐྱེད་གླིང་གི་སྲུང་མ། རིན་ཆེན་སྣ་ཚོགས་གླིང་གི་སྲུང་མ། དཀོར་མཛོད་དཔེ་དཀར་གླིང་གི་སྲུང་མ། དག་བྱེད་ཁྲུས་ཁང་གླིང་གི་སྲུང་མ། མཐུ་རྩལ་ཀླུ་གླིང་གི་སྲུང་མ། འོད་འབར་སུམ་ཅུ་རྩ་གཉིས་ཀྱི་སྲུང་མ། ཕྱིའི་ལྕགས་རི་མུ་ཁྱུད་ཀྱི་སྲུང་མ། སྒོ་བཞིར་མགོན་ཁང་བརྒྱད་ཀྱི་སྲུང་མ་འཁོར་དང་བཅས་པ་དང་། ཇོ་མོ་གླིང་གསུམ་གྱི་སྲུང་མ། ཁམས་གསུམ་མེ་ཏོག་སྒྲོལ་གྱི་གཙུག་ལག་ཁང་གི་སྲུང་མ། དགེ་བ་མཐའ་རྒྱས་ཀྱི་གཙུག་ལག་ཁང་གི་སྲུང་མ། དགའ་ལྡན་བྱམས་སྒྲོལ་གཙུག་ལག་ཁང་གི་སྲུང་མ་འཁོར་དང་བཅས་པ་རྣམས་དང་། མཆིམས་ཕུ་ན་ཨ་རིའི་གཙུག་ལག་ཁང་གི་སྲུང་མ། བྲག་དམར་མགྲིན་བཟང་གི་གཙུག་ལག་ཁང་གི་སྲུང་མ། ཀ་ཆུ་དཔལ་འབྱུང་གི་གཙུག་ལག་ཁང་གི་སྲུང་མ། མེ་ས་གོང་གི་གཙུག་ལག་ཁང་གི་སྲུང་མ། དམ་པ་རྒྱ་མཁར་གྱི་གཙུག་ལག་ཁང་གི་སྲུང་མ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་གནས་དང་བསྟན་པ་བསྲུང་ཞིང་། བདག་ཅག་ཡོན་མཆོད་འཁོར་དང་བཅས་པའི་བསམ་པ་བསྒྲུབ་ཅིང་རེ་བ་བསྐང་བ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཁྱད་པར་དུ་ཡང་དཔེ་དཀར་གྱི་དགྲ་བླ་གཉེན་པོ། སྐུའི་རྒྱལ་པོ། གསུང་གི་རྒྱལ་པོ། ཐུགས་ཀྱི་རྒྱལ་པོ། ཡོན་ཏན་གྱི་རྒྱལ་པོ། ཕྲིན་ལས་ཀྱི་རྒྱལ་པོ། སོ་སོའི་ཡུམ་དང་བཅས་པ། བཀའི་བློན་པོ་བྱ་རྒོད་ཐང་ནག །པ་ཏྲ་དཀར་པོ། པུ་ཏྲ་ནག་པོ། གཡས་ཀྱི་རུ་འདྲེན་པ་དཔའ་བོ་སྟག་ཆས་བརྒྱ། གཡོན་གྱི་རུ་འདྲེན་པ་དགེ་སློང་དགྲ་བཅོམ་བརྒྱ། སྔོན་གྱི་ཤུལ་འདྲེན་པ་སྐྱེས་པ་དར་མ་གྲི་ཐོགས་པ་བརྒྱ། སླད་ནས་རྗེས་ཉུལ་བ་བུད་མེད་ནག་མོ་བརྒྱ། སྐུའི་སྐྱོ་བསང་བ་འབག་སེང་གར་མཁན་བརྒྱ། ཤར་ཕྱོགས་ན་སྟག་གི་རྒྱལ་མཚན་ཕྱར་བ། ལྷོ་ཕྱོགས་ན་སྤྲེའུའི་རྒྱལ་མཚན་ཕྱར་བ། ནུབ་ཕྱོགས་ན་མི་རྒོད་ཀྱི་རྒྱལ་མཚན་ཕྱར་བ། བྱང་ཕྱོགས་ན་རྨ་བྱའི་རྒྱལ་མཚན་ཕྱར་བ། ཕོ་ཉ་ཡང་སྤྲུལ་ལས་མཁན་གྱི་ཚོགས་དང་བཅས་པའི་མངའ་རིས་དང་སྤྱན་ལམ་དུ་འབུལ་ལོ། །གསོལ་ལོ། །མཆོད་དོ། །(༢༩)སྔོན་གྱི་གཙུག་ལག་ཁང་གཉན་པོ་བསྲུང་བ་དང་། བདག་ཅག་འཁོར་དང་བཅས་པའི་ལེགས་པ་བསྒྲུབ་ཅིང་རེ་བ་བསྐང་བ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ ཆོས་རྒྱལ་རྗེའི་ཐུགས་དམ་གཉན་པོ། ཁྲ་འབྲུག་བྱམས་པ་མི་འགྱུར་གཙུག་ལག་ཁང་གི་སྲུང་མ། སྐར་ཆུང་རྡོ་རྗེ་དབྱིངས་ཀྱི་གཙུག་ལག་ཁང་གི་སྲུང་མ། འོན་ཤོང་རྡོ་བཀྲ་ཤིས་དགེ་འཕེལ་གྱི་གཙུག་ལག་ཁང་གི་སྲུང་མ་འཁོར་དང་བཅས་པ་རྣམས་དང་། དབུ་རུ་ན་ཀ་ཚལ། གཡོ་རུ་ན་ཁྲ་འབྲུག །གཙང་ན་གྲོམ་པ་རྒྱང་། སྤ་གྲོ་ན་སྐྱེར་ཆུ། བུམ་ཐང་ན་བཀྲ་ཤིས་དགེ་གནས། ལྷོ་བྲག་ན་ཁོ་མཐིང་ཀོང་བོན་བུ་ཆུ། ལི་ཡུལ་ན་ལྕང་ར་སྨུག་པོ། མང་ཡུལ་ན་བྱམས་པ་སྤྲིན། ཁམས་ན་ཀློང་ཐང་སྒྲོལ་མ། ག་ཆུ་ན་གསེར་གྱི་ལྷ་ཁང་། ཉང་རོང་ན་རྩིས་ཀྱི་ལྷ་ཁང་། སྤ་དུ་ན་རྩེ་དང་། སྐྱོ་དུ་ན་རྩེ་ལ་སོགས་པ་མཐའ་འདུལ་དང་ཡང་འདུལ་གྱི་གཙུག་ལག་ཁང་བརྒྱ་རྩ་བརྒྱད་ལ་སོགས་པའི་སྲུང་མ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་གཙུག་ལག་ཁང་དང་བསྟན་པ་བསྲུང་ཞིང་། བདག་ཅག་ཡོན་མཆོད་འཁོར་དང་བཅས་པའི་བསམ་པ་བསྒྲུབ་ཅིང་རེ་བ་བསྐང་བ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ དབེན་གནས་གཉན་གྱི་སྲུང་མ་ཆེན་པོ་ལྷ་ས་ཡེར་བའི་སྲུང་མ། བསམ་ཡས་མཆིམས་ཕུའི་སྲུང་མ། འོན་ཤོང་རྡོའི་སྲུང་མ། ལྷ་རིང་བྲག་གི་སྲུང་མ། དཔལ་ཆེན་ཆུ་བོ་རིའི་སྲུང་མ་འཁོར་དང་བཅས་པ་རྣམས་དང་། སྤ་གྲོ་སྟག་ཚང་སེང་གེ་རྫོང་གི་སྲུང་མ། མོན་ཁ་རྫོང་གསུམ་གྱི་སྲུང་མ། ཁམ་བུ་རྫོང་གི་སྲུང་མ། ཁ་རག་རྫོང་གི་སྲུང་མ། ཤུན་ཕྲན་རྫོང་གི་སྲུང་མ་འཁོར་དང་བཅས་པ་དང་། ཕྱིང་བར་སྟག་རྩེ་དང་། ཡུམ་བུ་བླ་སྒང་ལ་སོགས་པ་སྐུ་མཁར་རྫོང་གི་སྲུང་མ། བང་སོ་རྫོང་གི་སྲུང་མ་དང་། གཞན་ཡང་བོད་ཀྱི་སྲུང་མ་ཆེན་པོ། གཏེར་བདག་ཆེན་པོ། གཞི་བདག་ཆེན་པོ། མིང་དང་མཚན་ནས་མ་ཐོས་པའི་ཆེ་རྒུ་དང་གཉན་རྒུ་ཅོག་དང་བཅས་པ། བསྟན་པ་བར་དར་དང་ཕྱི་དར་གྱི་གཙུག་ལག་ཁང་དང་སྡེ་དགོན་དཔག་ཏུ་མེད་པའི་སྲུང་མ་འཁོར་དང་བཅས་པ་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་གནས་དང་བསྟན་པ་སྐྱོང་ཞིང་བདག་ཅག་ཡོན་མཆོད་འཁོར་དང་བཅས་པའི་བསམ་པ་བསྒྲུབ་ཅིང་རེ་བ་བསྐང་བ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་བཀའ་ཉན་དུ་གཏོགས་ཤིང་། གསང་སྔགས་མཆོག་གི་དངོས་གྲུབ་(༢༠)བརྙེས་པ། ཉང་བན་ཆེན་པོ་ཏིང་ངེ་འཛིན་རབ་ཏུ་བཟང་པོས་མཐའ་འདུལ་ཡང་འདུལ་བོད་ཡུལ་དགེ་བའི་སྤྱི་ཕུད་དུ་བཞེངས་པ། ཞྭ་པདྨ་དབང་ཆེན་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གཉན་པོའི་སྲུང་མ་འཁོར་དང་བཅས་པ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་ཐུགས་དམ་གཉེར་དུ་བཞེས་ཤིག །བོད་ཡུལ་ཀུན་གྱི་སོ་ཁ་སྲུངས་ཤིག །མཐའ་དམག་འབྱུང་པོའི་རྒོལ་བ་བཟློག་ཅིག །སད་སེར་མུ་གེའི་འཇིགས་པ་སྐྱོབས་ཤིག །ནད་མཚོན་འཁྲུག་པའི་གནོད་པ་སོལ་ཞིག །གཙུག་ལག་ཁང་དང་བསྟན་པ་སྲུངས་ཤིག །ཁྱད་པར་དུ་ཡང་བདག་ཅག་ཡོན་མཆོད་འཁོར་དང་བཅས་པའི་ཉིན་གསུམ་གྱི་བྱ་ར་གྱིས་ཤིག །མཚན་གསུམ་གྱི་མེལ་ཚེ་གྱིས་ཤིག །འགྱེལ་ན་སློང་ཞིག །བུབ་ན་རྟེན་ཅིག །མདུན་གྱི་འཁར་བ་གྱིས་ཤིག །རྒྱབ་ཀྱི་བརྟེན་ས་གྱིས་ཤིག །མི་མཉམ་པ་དང་མཉམ་དུ་ཆུག་ཅིག །མཉམ་གཉིས་གོང་གི་རྒྱལ་པོར་གྱིས་ཤིག །གཞི་ལ་སྡོད་ན་ལེགས་པར་སྲུངས་ཤིག །བྱེས་སུ་འགྲོ་ན་མགོན་སྐྱབས་མཛོད་ཅིག །དམག་ལ་འགྲོ་ན་དམག་དཔོན་གྱིས་ཤིག །ཇག་ལ་འགྲོ་ན་ཇག་དཔོན་གྱིས་ཤིག །ཚོང་ལ་འགྲོ་ན་ཚོང་དཔོན་གྱིས་ཤིག །ཅི་བསམ་རེ་བ་ཡིད་བཞིན་དུ་སྒྲུབས་ཤིག །མངའ་ཐང་འབྱོར་པ་ཕྱོགས་བཅུར་སྤེལ་ནད་གདོན་བར་ཆད་དགྲ་བགེགས་སོལ་ཞིག །དཔལ་དང་གྲགས་པའི་བ་དན་ཕྱོར་ཅིག །རང་ཕྱོགས་རྒྱལ་བའི་རྒྱལ་མཚན་སློང་ཞིག །ཕ་རོལ་སྡེ་དཔུང་རུ་མཚོན་ཆོག་ཅིག །རྒྱལ་ཁམས་ཐམས་ཅད་དབང་དུ་སྡུས་ཤིག་རེ་སྨོན་དམ་པའི་ཕྲིན་ལས་མཛོད་ཅིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ གཙང་ཁང་དབུས་ཀྱི་སྲུང་མ་ཆེན་པོ་སྨུག་ནག་སྔགས་ཀྱི་བདག་མོ་ཆེན་མོ་ཕྱག་ན་སྙིང་དང་ནད་རྐྱལ་བསྣམས་པ་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །དཀོར་ཁང་ནང་གི་སྲུང་མ་ཆེན་པོ་དཔལ་ལྡན་མགོན་པོ་ལེགས་ལྡན་ལྕམ་དྲལ་ཕྱག་ན་གྲི་གུག་དང་ཐོད་ཁྲག་བསྣམས་པ་ལ་གསོལ་ལོ། །འབུལ་ལོ། །མཆོད་དོ། །རང་བྱོན་ལྷ་བཞིའི་སྲུང་མ་ཆེན་པོ་དཔལ་གྱི་རྣམཐོས་སྲས་སེང་གེ་ཆིབས་ཤིང་མདུང་དམར་བསྣམས་པ་འཁོར་དང་བཅས་པ་རྣམས་ལ་གསོལ་ལོ། །འབུལ་ལོ། །མཆོད་དོ། །ནང་སྒོའི་སྲུང་མ་རེ་བཟང་ལྷ་མོ་སྐུ་མདོག་ནག་མོ་དཔལ་འབར་དང་སྒྲོན་མེ་བསྣམས་པ་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །བཅོལ་བའི་ལས་མཛོད་ཅིག །གྲུབ་པའི་རྟགས་ཕྱུངས་ཤིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །མདའ་ཁང་མདོ་ཁྱམས་སྲུང་མ་ཆེན་པོ་ཨ་ཕྱི་དབྱིངས་ཕྱུག་ཆོས་ཀྱི་སྒྲོན་མ་དཀར་མཛེས་དར་ཟབ་རིན་ཆེན་བརྒྱན་པ་རྟ་མཆོག་བཅིབས་ཤིང་མེ་ལོང་བསྣམས་པ་འཁོར་དང་(༣༡)བཅས་པ་ལ་གསོལ་ལོ། །འབུལ་ལོ། །མཆོད་དོ། །གཙང་ཁང་ལྷོའི་སྲུང་མ་ཆེན་པོ་དཔལ་ལྡན་ནམ་གྲུ་སྲོག་བདུད་ནག་མོ་རླུང་ནག་འཚུབས་མའི་ཀློང་ན་བཞུགས་ཤིང་ཕྱག་ན་དགྲ་སྙིང་དང་ནད་རྐྱལ་བསྣམས་པ་ལ་གསོལ་ལོ། །འབུལ་ལོ། །མཆོད་དོ། །གཙང་ཁང་བྱང་གི་སྲུང་མ་ཆེན་པོ་གནོད་སྦྱིན་ཤན་པ་དམར་ནག་བྱ་ཁྱུང་བཅིབས་ཤིང་ཐོད་ཁྲག་དང་གྲི་གུག་བསྣམས་པ་ལ་གསོལ་ལོ། །འབུལ་ལོ། །མཆོད་དོ། །ཕྲ་མེན་མཆོད་རྟེན་གྱི་སྲུང་མ་གཟའ་བདུད་ནག་པོ་དབུ་དགུ་སྤྱན་སྟོང་མེ་དཔུང་འབར་བ་ཕྱག་བཞི་མདའ་གཞུ་རྒྱལ་མཚན་ཕྱར་བ་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །མགོན་ཁང་སྲུང་མ་མགར་བ་ནག་པོ་ཐོ་བ་དང་སྦུད་པ་བསྣམས་པ་ལ་གསོལ་ལོ། །འབུལ་ལོ། །མཆོད་དོ། །སྒོ་ཁང་སྲུང་མ་འབར་བ་ནག་པོ་སྔགས་པ་ཕྲེང་ཐོགས་འཇིགས་སུ་རུང་བའི་ཆ་བྱད་ཅན་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །གཙང་ཁང་སྟེང་གི་སྲུང་མ་སེར་སྐྱ་ནག་པོ་རླུང་ནག་འཚུབས་མའི་ནང་ན་མི་རྐང་གི་གླིང་བུ་འབུད་པ་ལ་གསོལ་ལོ། །འབུལ་ལོ། །མཆོད་དོ། །སྒོ་ཁང་འབར་བའི་སྲུང་མ་མོན་པ་ནག་པོ་གནམ་ལྕགས་ཀྱི་ཐོག་མདའ་འཕེན་པ་ལ་གསོལ་ལོ། །འབུལ་ལོ། །མཆོད་དོ། །བསམ་པ་སྒྲུབས་ཤིག །རེ་བ་སྐོངས་ཤིག །བཀྲ་ཤིས་བདེ་ལེགས་ཕུན་སུམ་ཚོགས་པར་མཛོད་ཅིག །ཕྱི་སྒོ་གཙང་ཁང་གི་སྲུང་མ་དཔལ་ལྡན་ལྷ་མོ་ནག་མོ་དྲེའུ་རྟ་བཅིབས་ཤིང་གྲི་དང་ནད་ཀྱི་རྐྱལ་པ་བསྣམས་པ་ལ་གསོལ་ལོ། །འབུལ་ལོ། །མཆོད་དོ། །ལྕགས་རི་ཁོར་ཡུག་གི་སྲུང་མ་ཐེའུ་རང་སྟོང་སྡེ་རྐྱལ་པ་དང་འཁར་བ་བསྣམས་པ་ལ་གསོལ་ལོ། །འབུལ་ལོ། །མཆོད་དོ། །གཙིགས་ཀྱི་ཁང་བུའི་སྲུང་མ་དུག་མདའ་ནག་པོ་དུང་ལོའི་རྣ་ཆ་འཕྱང་ཞིང་འོད་མའི་དུག་མདའ་འཕེན་པ་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །ཁྱད་པར་དུ་ཡང་དམ་ཅན་རྡོ་རྗེ་ལེགས་པ། རྡོ་རྗེ་འབར་བ། རྡོ་རྗེ་ཐིག་ལེ་རྩལ། སེང་གེ་དཀར་མོ་ཆིབས་སུ་བཅིབས་ཤིང་རལ་པའི་རྩེ་ནས་དུ་བ་འཕྱུར་བ། ཐོད་ཕྲེང་ཀོ་རློན་སྟག་ཤམ་བརྒྱན་ཅིང་རྡོ་རྗེ་དགྲ་སྙིང་རྒྱུ་ཞགས་འཛིན་པ། མཆེད་སུམ་བརྒྱ་དྲུག་ཅུའི་གཙོ་བོ། འཁོར་ཞིང་གི་རྡུལ་སྙེད་ཀྱིས་བསྐོར་བའི་ཚོགས་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པའི་མགོན་སྐྱབས་དང་དཔུང་གཉེན་མཛོད་ཅིག །ཆགས་ཆེ་དང་ཉམ་ང་བཟློག་ཅིག །སྡང་བའི་དགྲ་སོད་ཅིག །གནོད་པའི་བགེགས་ཐུལ་ཞིག །འཁོར་དང་གང་ཟག་སྐྱོངས་ཤིག །མངའ་ཐང་དང་འབྱོར་པ་སྤེལ་ཅིག །བསམ་རྒུའི་རེ་བ་སྐོངས་ཤིག །སྙན་པ་དང་གྲགས་པ་སྒྲོགས་ཤིག །ཉིན་གསུམ་གྱི་བྱ་ར་གྱིས་ཤིག །མཚན་གསུམ་གྱི་མེལ་ཚེ་གྱིས་ཤིག །མདུན་གྱི་འཁར་བ་གྱིས་ཤིག །རྒྱབ་ཀྱི་བརྟེན་ས་གྱིས་ཤིག །གཞན་ཡང་མི་མང་སར་(༣༢)སྨ་མ་དབབ། བྱ་མང་སར་སྤུ་མ་བཏོག །བརྒྱ་ཁ་མང་གིས་གླེང་དུ་མ་བཅུག །སྟོང་མིག་མང་གིས་བལྟ་རུ་མ་བཅུག །རང་བས་ཞན་པས་བརྙས་སུ་མ་བཅུག །དགྲ་བྱུང་ན་བྱ་ཐོང་། དུག་བྱུང་ན་རྩི་ཐོང་། ཉེས་པ་ཐམས་ཅད་ཆུའི་རི་མོ་བཞིན་དུ་སྲུབས་ཤིག །ལེགས་པ་ཐམས་ཅད་ཡར་གྱི་ཟླ་བ་བཞིན་དུ་སྐྱེད་ཅིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ལྷོའི་རུ་སྦལ་གྱི་ཡུལ་ལྷ་རྩེ་བྱང་ཆུབ་རྒྱལ་པ་ཆིབས་སུ་རྟ་དཀར་བཅིབས་ཤིང་མདུང་དཀར་བ་དན་ཕྱར་བ་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །ཤེལ་ལུང་རི་གཤོངས་ཀྱི་སྨན་མོ་སྤུན་བདུན་དར་ཟབ་གསེར་གཡུའི་རྒྱན་གྱིས་བརྒྱན་པ་ཟས་ནོར་གཞོང་པ་ཕྱག་ན་བསྣམས་ཤིང་དངུལ་དཀར་མེ་ལོང་རྒྱང་ནས་འཚེར་བ་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །བྱང་རི་བྲག་དཀར་རྡོ་རྗེ་རྫོང་བཙན་བསེ་ཁྲབ་གསོལ་ཞིང་མདུང་དམར་ཐོགས་པ་རྟ་དམར་བཅིབས་ཤིང་ཞུབ་ཅན་གྱིས་བསྐོར་བ་འཁོར་དང་བཅས་པ་ལ་གསོལ་ལོ། །འབུལ་ལོ། །མཆོད་དོ། །ལེགས་པ་ཆོས་ཤིག །ཉེས་པ་ཟློག་ཅིག །བསམ་པ་སྒྲུབས་ཤིག །རེ་བ་སྐོངས་ཤིག །བཀྲ་ཤིས་བདེ་ལེགས་ཕུན་སུམ་ཚོགས་པར་མཛོད་ཅིག །གཞན་ཡང་སྦས་ཡུལ་རིན་ཆེན་གླིང་གི་གཞི་བདག་ཕ་རི་གཡས་ལ་གནས་པ། ཚུར་རི་གཡོན་ལ་གནས་པ། འབབ་པ་ཆུ་ལ་(༣༢)གནས་པ། བརྟན་པ་བྲག་ལ་གནས་པ། བརྡལ་བ་ལ་གནས་པ། མིང་དང་མཚན་ནས་མ་ཐོན་པ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །ལེགས་པ་བརྒྱ་དང་སྤྲོད་ཅིག །ཉེས་པ་སྟོང་རྣམས་བཟློག་ཅིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ གཞན་ཡང་སྲུང་མ་དམ་ཅན་རྒྱ་མཚོ། དཀོན་མཆོག་གསུམ་གྱི་བསྟན་པ་གཉེར་དུ་བཞེས་པ་རྣམས་དང་། སློབ་དཔོན་ཆེན་པོ་པདྨ་འབྱུང་གནས་ཀྱི་བཀའ་ལ་གནས་ཤིང་དམ་ལ་བཏགས་པ། སློབ་དཔོན་ཆེན་པོའི་བི་མ་ལ་མི་ཏྲའི་བཀའ་ལ་གནས་ཤིང་དམ་ལ་བཏགས་པ། ཉང་བན་ཆེན་པོ་ཏིང་འཛིན་བཟང་པོའི་བཀའ་ལ་གནས་ཤིང་དམ་ལ་བཏགས་པ། རིག་འཛིན་ཆེན་པོ་ཀུ་མ་རཱ་ཛའི་བཀའ་ལ་གནས་ཤིང་དམ་ལ་བཏགས་པ། ཆོས་རྗེ་ཀློང་ཆེན་རབ་འབྱམས་ཀྱི་བཀའ་ལ་གནས་ཤིང་དམ་ལ་བཏགས་པ། ཕ་མྱེས་བརྒྱུད་ནས་བསྒྲུབས་ཤིང་བརྟེན་བརྟེན་པ། གསོལ་གསོལ་བ། མཆོད་མཆོད་པ། མིང་དང་མཚན་ནས་མ་ཐོན་པ་རྣམས་དང་། ངས་རོགས་བྱས། ངས་རྟེན་བྱས། ངས་སྐྱབས་བྱས། ངས་མགོན་བྱས་ཟེར་བའི་སྲུང་མ་ཡུས་པོ་ཆེ། ཡུལ་གྱི་ཡུལ་ལྷ། མཁར་གྱི་རྩེ་ལྷ། འགོ་བའི་ལྷ་ལྔ། བན་བོན་གྱི་སྲུང་མ་དང་བཅས་པ་མིང་དང་མཚན་ནས་མ་ཐོན་པ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་(༣༣)པ་དམ་པ་འབུལ་ལོ། །གསོལ་ལོ། །མཆོད་དོ། །སོ་སོའི་ཐུགས་དམ་གཉེར་དུ་བཞེས་ནས་བདག་ཅག་ཡོན་མཆོད་འཁོར་དང་བཅས་པའི་མགོན་སྐྱབས་དང་དཔུང་གཉེན་མཛད་ཅིང་། ལེགས་རྒུའི་བསམ་པ་ཡིད་བཞིན་དུ་འགྲུབ་པར་མཛད་དུ་གསོལ། གཞན་ཡང་མི་ལ་ན་ཚ་མ་གཏོང་། ཕྱུགས་ལ་གོད་ཁ་མ་གཏོང་། ནོར་རྫས་ལ་སྟོར་བརླག་མ་གཏོང་། དེས་ལན་དང་དེས་ཉེས་མ་གཏོང་། ཁ་སྨྲས་དང་གླེང་བརྗོད་མ་གཏོང་། རྐྱེན་ངན་དང་བར་ཆད་མ་གཏོང་། གཞན་ཡང་ལེགས་རྒུ་ཅོག་རྣམས་གོང་དུ་སྤེལ་ཞིག །ཉེས་རྒུ་ཅོག་རྣམས་འོག་ཏུ་སྲུབས་ཤིག །བསམ་པ་སྒྲུབས་ལ་རེ་བ་སྐོངས་ཤིག །

བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ སྔོན་གྱི་ལས་ཚུལ་དཔག་ཏུ་མེད་པས་གནས་རིས་སྣང་བ་སོ་སོར་གསལ་བ་དང་། འགྲོ་བ་རིགས་དྲུག་སྐྱེ་བ་རྣམ་བཞི་ལམ་རྒྱུད་ལྔས་བསྡུས་པའི་ཁམས་གསུམ་གྱི་སེམས་ཅན་དུས་གསུམ་གྱི་ཕ་མ་དྲིན་ཆེན་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །ད་ལྟར་གྱི་རྒྱུ་མཆོག་དམ་པ་འདིས་བསྐང་བའི་བསོད་ནམས་ཀྱིས་གནས་རིས་སོ་སོའི་སྡུག་བསྔལ་དང་བྲལ་ཞིང་བདེ་བ་དང་ལྡན་ཏེ། མཐར་ཐུག་བླ་ན་མེད་པའི་བྱང་ཆུབ་ཐོབ་པར་གྱུར་ཅིག །བདག་ཅག་ཡོན་མཆོད་འཁོར་དང་བཅས་པའི་འཕྲལ་དང་ཡུན་གྱི་སྒྲིབ་པ་བྱང་ཞིང་། བཀའ་(༣༣)དྲིན་གྱི་ལན་ཞོ་ཤས་འཁོར་ཏེ་ཁམས་གསུམ་རིགས་དྲུག་གི་སེམས་ཅན་ཐམས་ཅད་ཀྱི་སྐྱབས་དང་དཔུང་གཉེན་དམ་པར་གྱུར་ཅིག །ལེགས་རྒུའི་བསམ་པ་ཡིད་བཞིན་དུ་འགྲུབ་ནས་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ ལས་ཀྱི་རྫུ་འཕྲུལ་དཔག་ཏུ་མེད་པས་ཀུན་ཏུ་རྒྱུ་ཞིང་མཆོད་སྦྱིན་ལེན་པ་ཡི་དྭགས་ཀྱི་རྒྱལ་མོ་གཟི་བརྗིད་ཆེན་མོ་ཁ་འབར་མས་གཙོ་བྱས་པའི་ཡི་དྭགས་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། སྤྱི་མཐུན་གྱི་སྒྲིབ་པ་ཅན། སྒོ་ཁུད་ཀྱི་སྒྲིབ་པ་ཅན། མེ་ལྕེའི་ཕྲེང་བ་ཅན་ལ་སོགས་པ་ཡི་དྭགས་ཀྱི་ཚོགས་དཔག་ཏུ་མེད་པ་ཐམས་ཅད་ལ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །མཆོད་སྦྱིན་དམ་པ་བསྔོས་པའི་བསོད་ནམས་ཀྱི་ཡི་དྭགས་ཀྱི་འགྲོ་བ་མཐའ་དག་གི་སེར་སྣ་དང་འཇུར་གེགས་ལ་སོགས་པ་སོ་སོའི་ལས་ཀྱི་སྒྲིབ་པ་ཅི་མཆིས་པ་ཐམས་ཅད་བྱང་ཞིང་དག་ནས་ལུས་སེམས་བདེ་བ་དང་ལྡན་ཏེ་སོ་སོར་གང་ལ་ཅི་དགའ་བའི་བཟའ་བ་དང་། བཏུང་བ་དང་། གནས་དང་། བཞོན་པ་དང་། གོས་དང་། ནོར་ལ་སོགས་པ་འདོད་དགུའི་ཡོ་བྱད་དཔག་ཏུ་མེད་པ་སོ་སོར་གང་ལ་ཅི་དགའ་བ་ཐོབ་ནས་འཚེ་བ་དང་རྩོད་པ་མེད་པར་ལོངས་སྤྱོད་ཅིང་དགའ་བདེ་བླ་ན་མེད་པས་དབུགས་ཕྱིན་ནས་བླ་ན་མེད་པའི་བྱང་ཆུབ་ཆེན་པོ་ཐོབ་པར་གྱུར་ཅིག །བདག་ཅག་ཡོན་མཆོད་འཁོར་དང་བཅས་པའི་ནད་དང་གདོན་དང་བགེགས་དང་བར་དུ་(༣༤)གཅོད་པ་ཐམས་ཅད་ཞི་ཞིང་འདོད་རྒུའི་རེ་བ་ཐམས་ཅད་འགྲུབ་ནས་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ འཇིགས་པའི་ཆོ་འཕྲུལ་དཔག་ཏུ་མེད་པས་ནད་གཏོང་མདངས་འཕྲོག་བར་དུ་གཅོད་པའི་བགེགས་ཀྱི་རྒྱལ་པོ་བི་ན་ཡ་གས་གཙོ་བྱས་ལྷའི་གདོན་དང་། ཀླུའི་གདོན་དང་། གནོད་སྦྱིན་གྱི་གདོན་དང་། ལྷ་མ་ཡིན་གྱི་གདོན་དང་། དྲི་ཟའི་གདོན་དང་། ནམ་མཁའ་ལྡིང་གི་གདོན་དང་། མིའམ་ཅིའི་གདོན་དང་། ལྟོ་འཕྱེ་ཆེན་པོའི་གདོན་དང་། གྲིབ་གནོན་གྱི་གདོན་དང་། མ་མོའི་གདོན་དང་། མཁའ་འགྲོའི་གདོན་དང་། སྐེམ་བྱེད་ཀྱི་གདོན་དང་། བརྗེད་བྱེད་ཀྱི་གདོན་ལ་སོགས་པ་བགེགས་རིགས་སྟོང་ཕྲག་བརྒྱད་ཅུ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །མཆོད་སྦྱིན་དམ་པ་འདི་བསྔོས་པའི་བསོད་ནམས་ཀྱིས་བགེགས་རིགས་སོ་སོའི་སྡུག་བསྔལ་ཐམས་ཅད་དང་བྲལ། གནོད་སེམས་གདུག་སེམས་ཐམས་ཅད་ཀྱང་ཞི། ཀུན་ཀྱང་བྱམས་པའི་སེམས་ལ་གནས་པས་སླན་ཆད་འཚེ་བའི་སེམས་མི་འབྱུང་ཞིང་། དཀར་པོ་རྣམ་པར་འཕེལ་བས་དགེ་བའི་ངོ་བོ་མཐོང་ནས་བླ་ན་མེད་པའི་བྱང་ཆུབ་ཐོབ་པར་གྱུར་ཅིག །བདག་ཅག་ཡོན་མཆོད་འཁོར་དང་བཅས་པའི་ཆགས་ཆེ་བ་དང་། ཉམ་ང་བ་དང་། རྨི་ལམ་ངན་པ་དང་། ལྟས་ངན་པ་དང་། མཚན་མ་ངན་པ་སོགས་པ་བགེགས་དང་བར་དུ་གཅོད་པའི་ཆོ་འཕྲུལ་བཀྲ་མི་ཤེས་པ་ཐམས་ཅད་ཞི་ནས་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། །ཧོཿ ཐོག་མ་མེད་པའི་འཁོར་བ་ནས་འཁོར་བའི་ཚེ་ཕན་ཚུན་ཕན་ཅིང་དྲིན་དུ་གཟོ་བ་ལ་ཞོ་ཤེས་མ་འཁོར་བ་དང་། གནོད་པའི་ལས་ཀྱི་འབྲས་བུ་མ་བྱང་བས་ཚེ་རབས་བརྒྱུད་ཀྱང་རྗེས་སུ་འབྲངས་ཤིང་། བུ་ལོན་བཞིན་བསྙག་པར་ཆས་པའི་འཁོན་དུ་གྱུར་པ། ཁམས་གསུམ་རིགས་དྲུག་གི་རྒྱུད་དུ་གཏོགས་པ་ན་བདག་ལ་བལྟ་ཞིང་རྗེས་སུ་སེམས་པ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །མཆོད་སྦྱིན་དམ་པ་འདི་བསྔོས་པའི་བསོད་ནམས་ཀྱིས་ཕན་ཚུན་ལས་ཀྱི་བུ་ལོན་འཁོར་ཏེ། ནག་པོའི་ལས་ཐམས་ཅད་བྱང་ཞིང་དཀར་པོ་རྣམ་པར་འཕེལ་བའི་ལས་ཀྱིས་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཏུ་སངས་རྒྱས་ཏེ། ཁམས་གསུམ་དུ་འཁོར་བ་ཐམས་ཅད་སྟོངས་པར་གྱུར་ཅིག །ཁྱད་པར་དུ་ཡང་བདག་ཅག་ཡོན་མཆོད་འཁོར་དང་བཅས་པ་ལ་ཆེ་བ་སྲོག་གི་ལན་ཆགས་པ་ནས་ཆུང་བ་རྫས་ཀྱི་ལན་ཆགས་པའི་བར་གང་ཅི་དང་ཅི་ཡོད་པ་ཐམས་ཅད་དུས་འདིར་ཁྱེར་ཏེ་བྱང་ཞིང་དག་ནས་སླན་ཆད་སྲོག་དང་ཆབ་སྲིད་དང་འཁོར་དང་ལོངས་སྤྱོད་དང་གནས་དང་བཞོན་པ་དང་ཡོངས་སུ་བཟུང་བ་ཐམས་ཅད་ལ་(༣༥)ཉེ་ཞོ་དང་གནོད་པ་མེད་ཅིང་། ཚེ་དང་དཔལ་དང་འབྱོར་པ་དང་གྲགས་པ་དང་གཟི་བརྗིད་ལ་སོགས་པ་མཐུན་ཞིང་ཡིད་དུ་འོང་བའི་དངོས་པོ་ཐམས་ཅད་གོང་དུ་འཕེལ་ཏེ། བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། ཧོཿ སྔོན་ཆབ་སྲིད་གཉེར་དུ་བཞེས་པས་ད་ལྟ་སོ་སོའི་རྒྱུད་ལ་གཟིགས་པ་མངའ་རིས་བོད་ཀྱི་རྒྱལ་ཁམས་སུ་གཏོགས་སོ་ཅོག་དང་། ཁྱད་པར་དུ་བཀྲལ་ཡུལ་རིན་ཆེན་གླིང་གི་ཡུལ་ཁམས་ཀྱི་གོང་མ་རྗེའི་གདུང་རབས་ཀྱི་རྒྱལ་པོ་སྔ་རབས་འདས་པ། བཙུན་མོ་སྔ་རབས་འདས་པ། བློན་པོ་སྔ་རབས་འདས་པ། བཙན་པོ་སྔ་རབས་འདས་པ། ཞང་བློན་སྔ་རབས་འདས་པ། གཙོ་བོ་སྔ་རབས་འདས་པ། མོ་བཙུན་སྔ་རབས་འདས་པ། བྱིས་པ་སྔ་རབས་འདས་པ། ཡུལ་མི་སྔ་རབས་འདས་པ་རྣམས་དང་། ཁྱད་པར་དུ་ཡང་ཞྭ་པདྨ་དབང་ཆེན་གྱི་གཙུག་ལག་ཁང་གི་ཆོས་རྒྱལ་སྔ་རབས་འདས་པ། པཎྜི་ཏ་སྔ་རབས་འདས་པ། གྲུབ་ཐོབ་སྔ་རབས་འདས་པ། མཁན་པོ་སྔ་རབས་འདས་པ། སློབ་དཔོན་སྔ་རབས་འདས་པ། དགེ་སློང་སྔ་རབས་འདས་པ། དགེ་བཤེས་སྔ་རབས་འདས་པ། དགེ་ཚུལ་སྔ་རབས་འདས་པ། དགེ་བསྙེན་སྔ་རབས་འདས་པ། གནས་བརྟན་སྔ་རབས་འདས་པ། ལག་གི་བླ་སྔ་རབས་འདས་པ། སྦྱིན་བདག་སྔ་རབས་འདས་པ་རྣམས་ཀྱིས་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །མགྲོན་ནོ། །བསྔོའོ། །གཏན་པ་མེད་པའི་མཆོད་སྦྱིན་ཆེན་པོ་འདིས་སོ་སོའི་ལོངས་སྤྱོད་གང་ལ་གང་འོས་པ་དགྱེས་ཤིང་མཐུན་པའི་རྐྱེན་དུ་གྱུར་པ། གནས་དང་། བཞོན་པ་དང་། འཁོར་དང་། ཆབ་སྲིད་དང་། དབང་ཕྱུག་དང་། བྲན་དང་། བགོ་བ་དང་། བཟའ་བཏུང་ལ་སོགས་པ་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་སོ་སོར་ཐོབ་ནས། ཕྱི་མའི་མཐའ་མུར་ཐུག་པར་བདེ་བ་ཕུན་སུམ་ཚོགས་པ་དང་ལྡན་པར་གྱུར་ཅིག །བདེ་དཔལ་གྱི་མཆོག་དམ་པ་འཇིག་རྟེན་དང་འཇིག་རྟེན་ལས་འདས་པའི་ཡང་དག་ཕུལ་ལ་སོགས་ལོངས་སྤྱོད་ནས་བླ་ན་མེད་པའི་བྱང་ཆུབ་ཐོབ་པར་གྱུར་ཅིག །དེ་ལྟར་སྔ་རབས་འདས་པའི་ཚོགས་སུ་གྱུར་པ་དག་ནི་གཤིན་གྲལ་ན་མང་བ་ཡིན་ནོ། །གསོན་གྲལ་ན་ཉུང་བ་ཡིན་ནོ། །གཤིན་མིག་གསོན་ལ་མ་གཟིགས་ཤིག །གཤིན་གྱི་བརྩེ་གདུང་གསོན་ལ་མཆེ་བར་སོ་སོའི་དབང་པོ་ཚང་བ་དུར་ཁྲོད་ལ་སོགས་སྔོན་གྱི་བཞུགས་གནས། སྲོག་ཕུར་དང་བླ་ཕུར་བཏབ་པ་གང་ན་མཆིས་པ་དེར་བཞུགས་ལ། ཡུལ་ན་ཡུལ་ཆག་ཆེ་བ། སྒོ་ན་སྒོ་ཆག་ཆེ་བ། སྲང་ན་སྲང་ཆག་ཆེ་བ་ཐམས་ཅད་བཟློག་ཅིག །ན་རྒབ་དང་ཤི་རྒབ་ཐམས་ཅད་ཆོད་ཅིག །ཁྱད་པར་དུ་ཡང་བདག་ཅག་ཡོན་མཆོད་འཁོར་དང་བཅས་པའི་ཆག་ཆེ་བ་ཉམ་ང་བ་རྨི་ལམ་ངན་པ་ལྟས་ངན་པ། མཚན་མ་ངན་པ་མོ་ངན་པ་པྲ་ངན་པ་བཀྲ་མི་ཤིས་པ་ཐམས་ཅད་བཟློག་ལ། ན་གོད་དང་ཤི་གོད་ཐམས་ཅད་ཆོད་ཅིག །དེང་གི་གནས་མཆོག་དམ་པ་(༣༦)འདིར་ཡང་མཐོ་བ་མཐོ་ས་ན་དར། དམའ་བ་དམའ་ས་ན་དར། དགེ་འདུན་སྡེ་ཚུགས། ལོངས་སྤྱོད་འཕན་དར། མི་ནོར་དགུང་འཛོམ། དཔལ་རྒྱས་མངའ་ཐང་ཆེ། རེ་སྨོན་དམ་པའི་གཞིར་གྱུར་པ། བཀྲ་ཤིས་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ ལྷ་མིའི་མཆོད་སྡོང་མཆོག་ཏུ་གྱུར་པ། བཀྲ་ཤིས་ངོ་མཚར་མཆོག་གི་གཙུག་ལག་ཁང་ཞྭ་པདྨ་དབང་ཆེན་གྱི་གནས་ལྷ་ཁྱད་པར་ཅན་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །གཙུག་ལག་ཁང་གཉན་པོའི་གསེར་གྱི་ཀ་བ་ཡོ་རུ་མ་གཞུག །གཡུའི་གདུང་མ་འཚིག་ཏུ་མ་གཞུག །རྡོ་རྗེའི་རྩིག་པ་གྲུམ་དུ་མ་གཞུག །རིན་པོ་ཆེའི་ཐོག་ཕིབ་གཅོང་དུ་མ་གཞུག །གྱ་རལ་དང་གྱོ་དུམ་མ་གཏོང་། ཞིག་རལ་དང་ཀློང་རྡོལ་མ་གཏོང་། གྲུམ་གས་དང་འགྱུར་ལོག་མ་གཏོང་། དུས་ཀྱི་བཅོས་ལག་དང་ལྷ་མིའི་འདུ་བ་ཁྱད་པར་ཅན་དུ་གྱིས་ལ་དཀོར་ཆ་དང་ཉེ་འཁོར་ཐམས་ཅད་སྲུངས་ཤིག །བདག་ཅག་ཡོན་མཆོད་འཁོར་དང་བཅས་པའི་བསམ་པ་ཐམས་ཅད་སྒྲུབས། རེ་བ་ཐམས་ཅད་སྐོངས་ལ་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ སྔོན་གྱི་ཐུགས་དམ་གཉེར་དུ་བཞེས་པ། གཙུག་ལག་ཁང་གི་མཛོད་ཁང་སྐྱོང་བ་ནོར་གྱི་དབང་ཕྱུག་ཨཱརྻ་ཛཾ་བྷ་ལ། ཚོགས་ཀྱི་བདག་པོ། རྣམ་ཐོས་སྲས། གང་བ་བཟང་པོ། ནོར་བུ་བཟང་པོ། ཀུ་བེ་ར། རྒྱལ་བ་ཁྱུ་མཆོག །ཡང་དག་ཤེས། ནོར་གྱི་རྒྱུན། འཕྲོགས་མའི་བུ། བཟང་པོ་ལྔས་རྩེ་ན། པི་ཙི་ཀུཎྜ་ལི་ལ་སོགས་པ་ནོར་ལྷ་ཁྱད་པར་ཅན་ཁྱེད་རྣམས་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་དང་། དེང་གི་གནས་མཆོག་དམ་པ་འདི་འདོད་རྒུའི་ནོར་གྱི་ཆར་པ་ཕོབ་ཅིག །བང་མཛོད་ཐམས་ཅད་ལེགས་པར་ཁོངས་ཤིག །འབྲུ་དང་ནོར་གྱིས་འབྱོར་དུ་ཆུག་ཅིག །ཟས་དང་གོས་ཀྱི་ལོངས་སྤྱོད་སྩོལ་ཅིག །མངའ་ཐང་དང་འབྱོར་པ་རྒྱས་པར་སྤེལ་ཞིག །ལྷ་འདྲེ་མི་གསུམ་དབང་དུ་སྡུས་ཤིག ཟས་ནོར་ལོངས་སྤྱོད་ཆར་བཞིན་ཕོབ་ཅིག །འཇིག་རྟེན་ཁམས་ན་འབྱོར་པར་གྱིས་ཤིག །མི་ནོར་ལོངས་སྤྱོད་རྒྱས་པར་གྱིས་ཤིག །བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ བསོད་ནམས་བཀྲ་ཤིས་དཔལ་དུ་འབར་བས་བཟའ་བཏུང་ལོངས་སྤྱོད་ཕུན་སུམ་ཚོགས་པར་དབང་བསྒྱུར་བ། ཚང་མང་ཟས་ཀྱི་གཡོས་ལྷ་ཆེན་མོ། ཐབ་ལྷ་ཡུ་མོ། སྒྱེད་ལྷ་སྤུན་གསུམ། བང་ལྷ་གྲུ་བཞི་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་དང་། དེང་གི་གནས་མཆོག་དམ་པ་འདིར་སྐྱིད་མོ་མཚོས་སྐྱིད་དུ་ཆུག་ཅིག །གང་མོ་གཟས་གང་དུ་ཆུག་ཅིག །དཔལ་མོ་གཟས་དཔལ་སྐྱེད་ཅིག །བཀྲ་ཤིས་གཟས་གཡང་སྐྱེད་ཅིག །སླ་ང་ཚག་མ་བཅད། རང་ཐག་འུར་མ་(༣༧)བཅད། །གསེ་གཏུབ་རྡིག་མ་བཅད། དཀར་གྱི་རྒྱུན་མ་བཅད། མངར་གྱི་ལམ་མ་བཅད། དམར་གྱི་སྦུབས་མ་བཅད། གསུར་གྱི་དྲི་མ་བཅད། ཇ་ཆང་རྒྱུན་མ་བཅད། དབྱར་ཞོ་མལ་དུ་ཞོ་མ་བཅད། དགུན་ཆང་མལ་དུ་ཆང་མ་བཅད། སྟོན་ནས་མལ་དུ་ནས་མ་བཅད། དཔྱིད་ཇ་མལ་དུ་ཇ་མ་བཅད། ནང་ནུབ་ཟས་མལ་དུ་ཟས་མ་བཅད། ཟངས་དཀར་འོ་མ་ལུད་པ་བཞིན་དུ་ཇེ་དཀར་དང་ཇེ་མཐོ་ལ་ཐོངས་ཤིག །གངས་དཀར་ལ་ཁ་བ་བབ་པ་བཞིན་དུ་ཇེ་དཀར་དང་ཇེ་ལེགས་ལ་ཐོངས་ཤིག །སྟོན་ཀའི་ལོ་ཏོག་ལེགས་པ་བཞིན་དུ་ཇེ་བཟང་དང་ཇེ་ལེགས་ལ་ཐོངས་ཤིག །སྐྱིད་བདེའི་མགྲོན་ལ་འོ་ཚོགས་པ་བཞིན་དུ་ཇེ་དགའ་དང་ཇེ་སྐྱིད་ལ་ཐོངས་ཤིག །ནམ་གཞིག་གཏན་དུ་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ མཐུ་དཔལ་ཆེན་པོས་སྒོ་བཞི་སྲུང་བའི་སྒོ་བ་ལྕགས་ཀྱུ་མ། ཞགས་པ་མ། ལྕགས་སྒྲོག་མ། དྲིལ་བུ་མ་འཁོར་དང་བཅས་པའི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །བདག་ཅག་ཡོན་མཆོད་འཁོར་དང་བཅས་པ་དང་། དེང་གི་གནས་མཆོག་དམ་པ་འདིའི་ནང་མི་སྨུག་པོ་ཕྱིར་མ་གཏོང་ཕྱི་མི་སྐྱ་བོ་ནང་དུ་མ་གཏོང་། ཕུག་ནས་རོ་མ་གཏོང་། མདའ་ནས་དམག་མ་གཏོང་། ནང་ནས་སྟོར་རླག་མ་གཏོང་། ཕྱི་ནས་གླེང་མོ་མ༴། །མི་ཁ་དང་དགྲ་ཁ་མ༴། །དེས་ལེན་དང་དེས་ཉེས་མ༴། །རྐྱེན་ངན་དང་བར་ཆད་ཐམས་ཅད་ཀྱི་སྒོ་སྡོམས། སྡུག་བསྔལ་དང་ཉེས་པ་ཐམས་ཅད་ཀྱི་བྱུར་ཕུད། ལེགས་པ་དང་བཀྲ་ཤིས་ཐམས་ཅད་ཀྱི་སྒོ་ཕྱེས། སྐྱིད་པ་དང་བདེ་ལེགས་ཐམས་ཅད་ཀྱི་མགྲོན་བོས། ཉིན་གསུམ་གྱི་བྱ་ར་གྱིས། མཚན་གསུམ་གྱི་མེལ་ཚེ་གྱིས། རྟག་ཏུ་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག །ཧོཿ མཆོད་སྦྱིན་སོ་སོའི་དུས་ལས་ཡོལ་བ། དམ་ཚིག་དབང་གིས་གནས་འདིར་བྱོན་པ། གློ་བུར་དུ་ལྷགས་པའི་མགྲོན་རིགས་ལྷ་མཐུ་བོ་ཆེ། ཀླུ་མཐུ་བོ་ཆེ། བདུད་མཐུ་བོ་ཆེ། བཙན་མཐུ་བོ་ཆེ། གནོད་སྦྱིན་མཐུ་བོ་ཆེ། སྲུང་མ་མཐུ་བོ་ཆེ་རྣམས་དང་། གཞན་ཡང་ཁམས་གསུམ་རིགས་དྲུག་གིས་བསྡུས་པའི་མགྲོན་རིགས་གློ་བུར་དུ་ལྷགས་པ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །མགྲོན་ནོ། །བསྔོའོ། །དེ་དག་ཐམས་ཅད་ཀྱི་སྤྱན་ལམ་དུ་སོ་སོར་ཅི་ལ་ཅི་དགྱེས་པ། གང་ལ་གང་དགའ་བ་དེ་ལྟ་བུའི་བཟའ་བཏུང་དང་ལོངས་སྤྱོད་བསམ་གྱིས་མི་ཁྱབ་པ་ཞིག་ནམ་མཁའི་མཐས་གཏུགས་པ་ཇི་སྲིད་དུ་འབྱུང་ཞིང་རྒྱས་པར་གྱུར་ཅིག །དེ་ལྟར་གྱུར་ནས་ཀྱང་སྒྲུབ་པ་པོ་སོ་སོའི་རྣམ་པར་ཐར་པ་དང་རྗེས་སུ་འཚམས་པའི་ལས་མཛད་དེ། བདག་ཅག་ཡོན་མཆོད་འཁོར་དང་བཅས་པའི་རེ་བ་ཐམས་ཅད་བསྐང་ཞིང་ནད་དང་གདོན་དང་བགེགས་དང་བར་དུ་གཅོད་པ་ལ་སོགས་པ་མི་མཐུན་པའི་རྐྱེན་ཐམས་ཅད་བསལ་ཏེ་ཚེ་དང་དཔལ་དང་འབྱོར་པ་ལ་སོགས་པའི་མཐུན་རྐྱེན་ཐམས་(༣༨)ཅད་ཡིད་བཞིན་དུ་བསྒྲུབས་ནས། མགོན་སྐྱབས་དཔུང་གཉེན་དམ་པ་མཛད་པ་དང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། སྔོན་གྱི་དམ་ཚིག་ཆེན་པོའི་དབང་གིས་ལྷག་མའི་མཆོད་སྦྱིན་མགྲོན་དུ་བྱོན་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། གྲུལ་བུམ་དང་། མ་མོ་དང་། མཁའ་འགྲོ་མ་ལ་སོགས་པ་རྣམས་དང་། གཞན་ཡང་ལས་ཀྱི་དབང་གིས་ལྷག་མ་ལ་དབང་བའི་ཡི་དྭགས་ལ་སོགས་པ། འགྲོ་བ་སོ་སོའི་རིགས་སུ་གཏོགས་པ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །དེ་ཐམས་ཅད་ཀྱི་གནས་རིས་དང་ལོངས་སྤྱོད་སོ་སོར་གང་ལ་གང་མོས་པ་ཅི་ལ་ཅི་བསྒྲུབ་སོ་སོའི་རྣམ་པར་ཐར་པ་དང་མཐུན་པ་ནམ་མཁའི་མཐའ་ཀླས་པ་ཕྱི་མའི་མཐའི་མུར་ཐུག་པ་བཟང་བཏུང་དང་ལོངས་སྤྱོད་ཕུན་སུམ་ཚོགས་པ་འབྱུང་བར་གྱུར་ཅིག །དེ་ལྟར་གྱུར་ནས་ཀྱང་སོ་སོའི་དམ་ཚིག་བཞིན་རྗེས་སུ་མཐུན་པའི་ལས་མཛད་དེ། བདག་ཅག་ཡོན་མཆོད་འཁོར་དང་བཅས་པའི་ནད་དང་། གདོན་དང་། བགེགས་དང་བར་དུ་གཅོད་པ་ཞི་ཞིང་ཚེ་དང་དཔལ་དང་འབྱོར་པ་ཕུན་སུམ་ཚོགས་པ་ལ་སོགས་པ་རེ་སྨོན་ཐམས་ཅད་ཡིད་བཞིན་དུ་འགྲུབ་ནས། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛད་དུ་གསོལ། དེ་ནས་དཀྱིལ་རྩེ་བཞག་པ་དེ་བཅད་ཁམ་དུ་བྱས་པ་ཕུལ་ལ། ཧོཿ རྗེ་བཙུན་དམ་པའི་མངའ་བདག་ཆེན་པོ། བླ་མ་ཡི་དམ་དཀྱིལ་འཁོར་གྱི་ལྷ་ཚོགས་མཁའ་འགྲོ་དམ་ཅན་རྒྱ་མཚོའི་མགྲོན་ནས་བཟུང་སྟེ། ལྷ་ཀླུ་གནོད་སྦྱིན་ལྷག་མའི་མགྲོན་རིགས་ཡན་ཆད་དེང་གི་གནས་མཆོག་དམ་པ་འདིར་ཡང་མཆོད་སྦྱིན་དམ་པའི་མགྲོན་དུ་བྱོན་པ་ཐམས་ཅད་ཀྱི་མངའ་རིས་དང་སྤྱན་ལམ་དུ། དང་པོར་ནི་ཕུད་ཀྱིས་མཆོད། བར་དུ་ནི་ཚོགས་ཀྱིས་མཆོད། ཐ་མར་ནི་ལྷག་མས་མཆོད་ནས་སོ་སོའི་ཕྲིན་ལས་མཛད་པར་བསྐུལ་ཞིང་། ཁྱད་པར་དུ་ཡང་ཕུད་དང་གཙང་མར་སྦྱར་བས་སྔ་མ་ལེགས་པའི་གཏང་རག་ཏུ་འབུལ་ལོ། །ཕྱི་མ་ལེགས་པའི་ཞུ་འབུལ་དུ་གསོལ་ལོ། །ད་ལྟ་ལེགས་པའི་དྲིན་ལན་དུ་མཆོད་དོ། །རྟག་ཏུ་ལེགས་པའི་མཆོད་སྦྱིན་དུ་མགྲོན་ནོ། །འདི་ཕྱི་ལེགས་པའི་བསོད་ནམས་སུ་བསྔོའོ། །མགྲོན་རིགས་ཁྱད་པར་ཅན་ཁྱོད་རྣམས་ཀྱིས་དགྱེས་པ་ཆེན་པོས་བཞེས་ཏེ། སོ་སོའི་གཡར་དམ་བཞིན་ཕྲིན་ལས་མཛད་པར་བསྐུལ་གྱིས། སྔོན་གྱི་དམ་ཚིག་ཆེན་པོ་རྗེས་སུ་དྲན་པར་མཛོད་ལ། སངས་རྒྱས་ཀྱི་བསྟན་པ་འཁོར་རྣམ་བཞི་གཙུག་ལག་ཁང་དང་བཅས་པ་སྐྱོང་ཞིང་ཡུལ་འཁོར་སྲུང་བའི་ལས་མཛོད་ལ། ཡུལ་ཁམས་ཐམས་ཅད་ཀྱི་ལོ་ཕྱུགས་ལེགས་ཤིང་འཁྲུག་འཚེ་མེད་པར་དགེ་དངོས་སྤྱོད་ཅིང་རྟག་ཏུ་བདེ་བ་དང་། ལྷ་དང་མིའི་དཔལ་ཕུན་(༣༩)སུམ་ཚོགས་པས་བདེ་ཞིང་སྐྱིད་པར་མཛད་དུ་གསོལ་ལོ། །ཁྱད་པར་དུ་ཡང་བོད་ཁ་བ་ཅན་གྱི་རྒྱལ་ཁམས་སྔོན་གྱི་རྒྱལ་པོས་གཉེར་དུ་བཞེས་པའི་ཡུལ་ཁམས་ཆེན་པོ་འདིར་རྒྱ་དང་ཧོར་དང་སོག་པོ་ལ་སོགས་པ་མཐའི་དམག་དང་འབྱུང་པོ་ཆེན་པོ་བཀྲ་མི་ཤིས་པ་གཏོང་བ་ཐམས་ཅད་ཕྱིར་བཟློག་ཅིང་བསྒྱུར་དུ་གསོལ་ལ། ཕྱི་འཁྲུག་དང་ནང་འཁྲུག་དང་ནད་དང་འཚེ་བ་ཐམས་ཅད་ཞི་བར་མཛད་དུ་གསོལ་ལོ། །ལོ་ཕྱུགས་རྟག་ཏུ་ལེགས་པ། ཆར་ཆུ་དུས་སུ་འབབ་པ། ནད་མཚོན་མུ་གེ་མེད་པ། མི་རྣམས་དགེ་དངོས་སྤྱོད་པ། ཡུལ་རྣམས་དར་ཞིང་རྒྱས་པ། བཀའ་ཁྲིམས་ཆོས་ལ་གནས་པ། སྡེ་དགོན་བསོད་ནམས་རྒྱས་པ། དཀོན་མཆོག་བསྟན་པ་དར་བ། རྒྱལ་ཁམས་ཀུན་ཏུ་བདེ་བ། རྟག་ཏུ་བཀྲ་ཤིས་འབྱུང་བར་མཛད་དུ་གསོལ། ཁྱད་པར་དུ་ཡང་བདག་ཅག་ཡོན་མཆོད་འཁོར་དང་བཅས་པའི་མི་ལ་ན་ཚ་མ་གཏོང་། ཕྱུགས་ལ་གོད་ཁ་མ་གཏོང་། ནོར་རྫས་ལ་སྟོར་རླག་མ་གཏོང་། མངའ་རིས་ལ་ཤོར་གོད་མ་གཏོང་། བརྒྱ་ཁ་མང་གིས་གླེང་དུ་མ་འཇུག །སྟོང་མིག་མང་གིས་བལྟ་རུ་མ་གཞུག །རང་བས་ཞན་པས་བརྙས་སུ་མ་གཞུག །ལུས་ལ་ན་ཚ་མ་གཏོང་། སེམས་ལ་སྡུག་བསྔལ་མ་གཏོང་། བསམ་པ་ལ་བར་ཆད་མ་གཏོང་། དེས་ལེན་དང་དེས་ཉེས་མ་གཏོང་། ཁ་སྨྲས་དང་གླེང་ཆོ་མ་གཏོང་། ཕྱི་ནང་གི་འཁྲུག་འཚེ་མ་གཏོང་། རྐྱེན་ངན་དང་བར་ཆད་མ་གཏོང་། ཆག་ཆེ་དང་ཉམ་ང་མ་གཏོང་། རྦད་འདྲེ་དང་རྦོད་གཏོང་མ་གཏོང་། ཕུར་ཁ་དང་ཟོར་ཁ་མ་གཏོང་། གཞན་ཡང་ཉིན་གསུམ་གྱི་བྱ་ར་མཛོད་ཅིག །མཚན་གསུམ་གྱི་མེལ་ཚེ་མཛོད་ཅིག །མདུན་གྱི་འཁར་བ་མཛོད་ཅིག །རྒྱབ་ཀྱི་བརྟེན་སོ་མཛོད་ཅིག །ལྟ་བའི་མིག་མཛོད་ཅིག །སེམས་པའི་སྙིང་མཛོད་ཅིག །མགོན་སྐྱབས་དཔུང་གཉེན་མཛོད་ཅིག །གཞན་ཡང་སྔ་དགྲ་དར་བ་རྩ་བ་ནས་ཆོད་ཅིག །ཕྱི་དགྲ་སེམས་པ་རྡུལ་དུ་རློག་ཅིག །ད་དགྲ་བསྡོ་བ་ཕྱེ་མར་ཐོངས་ཤིག །དམ་ཉམས་དགྲ་བོའི་སྡེ་དཔུང་དཀྲུགས་ཤིག །གཞན་གྱི་དམག་དཔུང་རུ་མཚོན་ཆོག་ཅིག །རང་ཕྱོགས་རྒྱལ་བའི་བ་དན་ཕྱོར་ཅིག །གཞན་ཡང་དམག་ལ་འགྲོ་ན་དམག་དཔོན་གྱིས་ཤིག །ཇག་ལ་འགྲོ་ན་ཇག་དཔོན་གྱིས་ཤིག །ཚོང་ལ་འགྲོ་ན་ཚོང་དཔོན་གྱིས་ཤིག །ལམ་འཕྲང་ལ་འགྲོ་ན་སྐྱེལ་བསུ་གྱིས་ཤིག །ཆུ་ལ་འགྲོ་ན་སྒྲོལ་འདོན་མཛོད་ཅིག །ཕྱོགས་སུ་འགྲོ་ན་ལེགས་པར་སྐྱོབས་ཤིག །གཞི་ལ་སྡོད་ན་ལེགས་པར་སྲུངས་ཤིག །མངའ་ཐང་འབྱོར་པ་ཕྱོགས་བཅུར་སྤེལ་ཞིག །མི་མཉམ་པ་དང་མཉམ་དུ་ཆུག་ཅིག །མཉམ་གཉིས་གོང་གི་སྟེང་དུ་སྐྱོལ་ཞིག །སྙན་པའི་གྲགས་པ་ཕྱོགས་བཅུར་སྒྲོགས་ཤིག །ཐམས་ཅད་བདག་གི་དབང་དུ་སྡུས་ཤིག །རྒྱལ་ཁམས་ཆེན་པོའི་ཁ་ལོ་བསྒྱུར་ཅིག །འདོད་རྒུའི་དངོས་པོ་ཆར་བཞིན་ཕོབ་ཅིག །བསམ་རྒུའི་རེ་བ་ཡིད་བཞིན་དུ་སྒྲུབས་ཤིག །བཀྲ་ཤིས་དཔལ་འབར་བདེ་སྐྱིད་མཛོད་ཅིག །དེང་གི་གནས་མཆོག་དམ་པ་འདིར་ཡང་རྟག་ཏུ་དགེ་ཞིང་བཀྲ་ཤིས་(༤༠)པའི་ཕྲིན་ལས་གཉེན་པོ་མཛོད་ཅིག །ཧོཿ བདག་ཅག་ཡོན་མཆོད་འཁོར་དང་བཅས་པ་ཐམས་ཅད་དགུང་སྔོན་མཐོན་པོ་བས་འཕང་མཐོ་བར་མཛོད་ཅིག །རྒྱ་མཚོ་ཆེན་པོ་བས་ཀློང་ཡངས་པར་མཛོད་ཅིག །རི་རྒྱལ་རི་རབ་བས་བརྗིད་ཆེ་བར་མཛོད་ཅིག །ཉི་ཟླ་གཟའ་སྐར་བས་འཁོར་མང་བར་མཛོད་ཅིག །ལྷ་དང་བརྒྱ་བྱིན་བས་བཀའ་བཙན་པར་མཛོད་ཅིག །གླིང་བཞི་གླིང་ཕྲན་བས་གནས་མང་བར་མཛོད་ཅིག །འཁོར་ལོས་སྒྱུར་རྒྱལ་བས་མངའ་ཐང་ཆེ་བར་མཛོད་ཅིག །གཡུ་འབྲུག་སྔོན་པོ་བས་སྒྲ་ཆེ་བར་མཛོད་ཅིག །དཔག་བསམ་ཤིང་ཆེན་བས་དཔལ་རྒྱས་པར་མཛོད་ཅིག །བུམ་པ་བཟང་པོ་བས་འདོད་རྒུ་འབྱུང་བར་མཛོད་ཅིག །ནོར་བུ་བསམ་འཕེལ་བས་བཀྲ་ཤིས་པར་མཛོད་ཅིག །ཧོཿ ལས་དང་སྨོན་ལམ་མཐུན་པས་མཆོད་སྦྱིན་དམ་པའི་མགྲོན་དུ་གྱུར་པ། སྙིང་རྗེའི་ཡུལ་དང་ཞིང་དུ་གྱུར་པ། ཁས་ཉེན་པ། དབང་ཆུང་བ། ལྷག་མ་བཤལ་ཆུ་ལ་རེ་བ་ཐམས་ཅད་ཀྱི་མངའ་རིས་དང་སྤྱན་ལམ་དུ་གཙང་མ་ཕུད་ཀྱི་མཆོད་པ་དམ་པ་འབུལ་ལོ། །གསོལ་ལོ། །མཆོད་དོ། །མགྲོན་ནོ། །བསྔོའོ། །མཆོད་སྦྱིན་དམ་པ་འདི་བསྔོས་པས་སོ་སོའི་མངའ་རིས་སུ་གང་ལ་ཅི་དགའ་བ་འདོད་པའི་ཡོན་ཏན་ལྔ་ཆར་བཞིན་བབས་ཏེ་མཉམ་ཞིང་སྙོམས་པ་སོ་སོར་ཐོབ་ནས་ཕྱི་མའི་མཐའི་མུར་ཐུག་པར་ལོངས་སྤྱོད་ཟད་མི་ཤེས་པའི་གཏེར་དུ་གྱུར་ཏེ། དབུལ་ཞིང་ཕོངས་པ་ཐམས་ཅད་དང་བྲལ་ནས་རྟག་ཏུ་བདེ་སྐྱིད་ཀྱི་དཔལ་ཕུན་སུམ་ཚོགས་པ་དང་ལྡན་པར་གྱུར་ཅིག །དེ་ལྟར་གྱུར་ནས་ཀྱང་མྱུར་དུ་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །བདག་ཅག་ཡོན་མཆོད་འཁོར་དང་བཅས་པའི་རེ་སྨོན་ཐམས་ཅད་ཡིད་བཞིན་དུ་འགྲུབ་ཅིང་། དེང་གི་གནས་མཆོག་དམ་པ་འདིར་ཡང་བཀྲ་ཤིས་དང་བདེ་ལེགས་ཕུན་སུམ་ཚོགས་པར་གྱུར་ཅིག །ཅེས་བརྗོད་དོ། །

དེ་ནས་བདེན་པའི་སྟོབས་བརྗོད་པ་ནི། ན་མོ། ཆོས་ཐམས་ཅད་རང་བཞིན་གྱིས་རྣམ་པར་དག་པའི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་རླབས་དང་། གསང་སྔགས་དང་རིག་སྔགས་དང་ཕྱག་རྒྱ་ཕུན་སུམ་ཚོགས་པའི་མཐུ་དང་། བདག་གི་མོས་པ་དང་། ཏིང་ངེ་འཛིན་དང་སྨོན་ལམ་གྱི་དབང་གིས་མཆོད་སྦྱིན་དམ་པ་འདིས་མགྲོན་རིགས་སོ་སོའི་མངའ་རིས་དང་སྤྱན་ལམ་དུ་གནས་དང་། གོས་དང་། རྒྱན་དང་། བཟས་བཏུང་ལ་སོགས་པ་འདོད་པའི་ཡོན་ཏན་ལྔས་བརྒྱན་པ། སོ་སོར་གང་ལ་ཅི་དགའ་བའི་དངོས་པོ་དབང་པོ་དྲུག་གི་སྤྱོད་ཡུལ་དུ་འཚམས་ཤིང་ཚིམ་པར་བྱེད་པ། ཡིད་བཞིན་གྱི་ནོར་བུ་རིན་པོ་ཆེ་དང་དཔག་བསམ་གྱི་ཤིང་ལ་སོགས་པ་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་ཆེན་པོ་ལྟ་བུ་བསམ་གྱིས་མི་ཁྱབ་པ་ཞིག་ནམ་མཁའི་མཐའ་ཀླས་པར་ཕྱི་མའི་མུར་ཐུག་པའི་སྐལ་བ་དང་སྤྱོད་པ་གྲངས་མེད་པ་འཁོར་(༤༡)བའི་མཐར་གཏུགས་ཀྱི་བར་དུ་འབྱུང་ཞིང་གནས་པར་གྱུར་ཅིག །མགྲོན་རིགས་སོ་སོའི་སྤྱན་ལམ་དུ། །མཆོད་སྦྱིན་དམ་པ་འདི་བསྔོས་པས། །རྒྱལ་བ་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །བུ་ལོན་ལན་ཆགས་འཁོར་གྱུར་ཅིག །ཡིད་ལ་བསམ་པ་འགྲུབ་གྱུར་ཅིག །བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང་། །སེམས་ཅན་རྣམས་ལ་ཕན་གདགས་སླད། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་འདིར་མ་ལུས་པ། །ཐོགས་པ་མེད་པར་འབྱུང་གྱུར་ཅིག །ཅེས་བརྗོད་དོ། །དེ་ནས་ཆོས་ཀྱི་སྦྱིན་པ་ནི། མཆོད་སྦྱིན་བཟང་པོའི་མགྲོན་དུ་སྤྱན་དྲངས་པའི། །བསོད་ནམས་དགའ་བདེ་དགེ་བ་ཀུན་གསོན་ཅིག །འཇིག་རྟེན་མཐའ་ཡས་སྔ་ཕྱིའི་རྒྱུད་བལྟས་ན། །སངས་རྒྱས་འཇིག་རྟེན་འབྱུང་བའང་ཤིན་ཏུ་དཀོན། །དགེ་བའི་བཤེས་དང་འཕྲད་པའང་ཤིན་ཏུ་དཀོན། །མཐོ་རིས་བདེ་འགྲོའི་ལུས་རྙེད་རབ་ཏུ་དཀའ། །དབང་པོ་རྫོགས་པའི་ལུས་རྙེད་རབ་ཏུ་དཀའ། །བདེ་བླག་མཉམ་བག་ལུས་རྙེད་རབ་ཏུ་དཀའ། །གྲོགས་བཟང་མཐུན་པ་རྙེད་པའང་རབ་ཏུ་དཀའ། །དད་པའི་ཆུ་རླབས་གཡོ་བ་བརྒྱ་ལམ་ན། །འཕགས་རྒུ་བསྙེན་བཀུར་མཉེས་བྱེད་བརྒྱ་ལམ་ན། །མཆོད་སྦྱིན་ཆེན་པོ་མཐོང་བའང་བརྒྱ་ལམ་ན། །འཆི་བདག་གནམ་བབ་སྡེ་ཆེན་དེ་དག་དང་། །བདག་ཅག་ཡིད་གཅུགས་བཤེས་པ་མ་ཡིན་པས། །དེ་རིང་སང་ཙམ་འཆི་ཡང་སུས་ཤེས་ཀྱི། །གཤིན་རྗེའི་ཞགས་པ་ནག་པོས་མ་ཟིན་ཅིང་། །ན་རྒ་འཆི་བའི་རི་བོས་མ་ནོན་པར། །ཚེ་རབས་ཕྱི་མའི་ཆོས་སྲིད་དམ་པའི་ཆོས། །ཐོག་མ་བར་དང་ཐ་མར་རབ་དགེ་བ། །མངོན་མཐོ་ངེས་ལེགས་ཆོས་ལ་སྤྱད་པར་མཛོད། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་དུལ། །གཞན་གྱི་སེམས་ནི་དཀྲུགས་མི་བྱ། །འདི་ནི་སངས་རྒྱས་བསྟན་པ་ཡིན། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་པ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་མེད་ཅིང་གནས་མེད་པ། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ལས་ཉམས་མེད་བྱ། །འོན་ཀྱང་སྐྱོབ་པའི་སྲས་སུ་སྐྱེ། །དེ་ལྟར་ཆོས་དང་ཟང་ཟིང་གི་སྦྱིན་པས་ཚོགས་རྣམ་གཉིས་རྫོགས། སྒྲིབ་པ་རྣམ་གཉིས་བྱང་ནས་མྱུར་དུ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་སུ་གྱུར་ཅིག །ཅེས་བརྗོད་དོ། །

དེ་ནས་བཟོད་པར་གསོལ་ཞིང་གཤེགས་སུ་གསོལ་བ་ནི། གང་ཡང་བདག་ཅག་སྙིགས་མའི་དུས་ཀྱི་ལས་དང་པོ་བའི་(༤༢)སེམས་ཅན་དུ་གྱུར་པ་ལགས་པས་གཞུང་བཞིན་དུ་ཡོ་བྱད་མ་འབྱོར་པ་དང་། ཏིང་ངེ་འཛིན་མི་གསལ་བས་ཆོ་ག་མ་དག་ཅིང་འགལ་འཁྲུལ་ནོར་བའི་ཆར་གྱུར་པ་ཐམས་ཅད་མགྲོན་རིགས་ཁྱད་པར་ཅན་ཁྱེད་རྣམས་ཀྱིས་བཟོད་པ་དམ་པ་བཞེས་སུ་གསོལ། གཙོ་བོ་ནུས་པ་མ་མཆིས་པས། །མ་འབྱོར་མ་རྙེད་མ་ཚང་བ། །འདིར་ནི་བགྱི་བ་གང་ནོངས་པ། །དེ་ཀུན་བཟོད་པར་མཛད་དུ་གསོལ། །གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་བྱས་གང་། །ནོངས་པ་བགྱིས་དང་བགྱིད་སྩལ་པ། །དེ་ཀུན་མགོན་པོས་བཟོད་པར་གསོལ། །ༀ། རྣམ་དག་དགེ་བ་མཆོད་སྦྱིན་དམ་པའི་མགྲོན། །མཉེས་ཤིང་ཚིམས་ནས་ཕན་བདེའི་གང་སྟོན་སྩལ། །རང་རང་གནས་སུ་སོ་སོར་གཤེགས་ནས་ཀྱང་། །སླར་ཡང་ཐུགས་རྗེས་འབྱོན་པར་མཛད་དུ་གསོལ། །ༀ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །འཇིག་རྟེན་འདས་དང་མ་འདས་པའི། །མགྲོན་རིགས་མ་ལུས་ཐམས་ཅད་ཀུན། །རང་རང་བདེ་བར་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ༀ་བཛྲ་མུཿསརྦ་ལོ་ཀ་གཙྪ། ཞེས་བརྗོད་དོ། །

དེ་ནས་བསྔོ་བ་ནི། སངས་རྒྱས་དང་བྱང་ཆུབ་སེམས་དཔའ་རྣམས་མདུན་གྱི་ནམ་མཁར་བསམས་ལ་ཐལ་མོ་སྦྱར་ཏེ། ཧོཿ ཕྱོགས་བཅུ་ན་བཞུགས་པའི་བླ་མ་ཡིད་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའི་ཚོགས་ཐམས་ཅད་བདག་ལ་དགོངས་སུ་གསོལ། བདག་གིས་དུས་གསུམ་དུ་འབྲེལ་བར་བསགས་པའི་དགེ་བའི་རྩ་བ་རྣམས་དང་། ཁྱད་པར་དུ་གཙང་མ་ཕུད་ཀྱི་མཆོད་སྦྱིན་དམ་པས་མཆོད་པའི་དགེ་བའི་རྩ་བ་འདི་ལ་བརྟེན་ནས་བདག་དང་སྦྱིན་པའི་བདག་པོས་གཙོ་བྱས་ནམ་མཁའི་མཐའ་ཀླས་པའི་སེམས་ཅན་ཐམས་ཅད་དང་ཐུན་མོང་གཅིག་ཏུ་བྱས་ཏེ་མྱུར་དུ་བླ་ན་མེད་པའི་བྱང་ཆུབ་ཐོབ་པར་གྱུར་ཅིག །དེ་མ་ཐོབ་ཀྱི་བར་དུ་སྐྱེ་བ་དང་སྲིད་པར་ཐམས་ཅད་དུ་ཡང་མཐོ་རིས་ལྷ་དང་མིའི་ལུས་ཁྱད་པར་ཅན་ཡོན་ཏན་བདུན་དང་ལྡན་པ་ཐོབ་པར་གྱུར་ཅིག །དུས་གསུམ་གྱི་དགེ་བའི་རྩ་བ་ཐམས་ཅད་ཕྱོགས་གཅིག་ཏུ་བསྡུས་ཏེ། ཆོས་ཀྱི་དབྱིངས་མཉམ་པ་ཆེན་པོའི་ཚུལ་རྡོ་རྗེའི་དབྱིངས་སུ་མི་གནས་པའི་མྱ་ངན་ལས་འདས་པ་ཆེན་པོ་ལ་འགོད་པར་གྱུར་ཅིག །དེ་ལྟར་མ་གྱུར་གྱི་བར་དུ་གནས་སྐབས་ཚེ་འདི་ཉིད་ལའང་ནད་ཀྱི་རིགས་སུ་གྱུར་པ། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་ལ་སོགས་པ་ནད་བཞི་བརྒྱ་རྩ་བཞི་ཞི་བར་གྱུར་ཅིག །གདོན་གྱི་རིགས་སུ་གྱུར་པ། ལྷའི་གདོན་དང་། ཀླུའི་གདོན་དང་། ལྷ་མ་ཡིན་གྱི་གདོན་དང་། ནམ་མཁའ་ལྡིང་གི་གདོན་དང་། རླུང་ལྷའི་གདོན་དང་། མིའམ་ཅིའི་གདོན་དང་། ལྟོ་འཕྱེ་ཆེན་པོའི་གདོན་(༤༣)ལ་སོགས་པ། བགེགས་རིགས་སྟོང་ཕྲག་བརྒྱད་ཅུའི་གནོད་པ་ཞི་བར་གྱུར་ཅིག །འཕྲལ་གྱི་རྐྱེན་ལས་གྱུར་པ། རྨི་ལམ་ངན་པ། ལྟས་ངན་པ། མཚན་མ་ངན་པ། གཞན་གྱི་བསམ་པ་ངན་པ། སྦྱོར་བ་རྩུབ་པ་ལ་སོགས་པ་ཆག་ཆེ་བ། ཉམ་ང་བ། བདུད་དང་བར་ཆད་ཀྱི་རིགས་སུ་གྱུར་པ་ཐམས་ཅད་ཞི་བར་གྱུར་ཅིག །ཚེ་དང་དཔལ་དང་འབྱོར་པ་ལ་སོགས་པ་མཐུན་པའི་རྐྱེན་རྣམས་ཡིད་བཞིན་དུ་འགྲུབ་པར་གྱུར་ཅིག །ཉི་མ་དང་ཟླ་བ་གཟའ་སྒྲ་གཅན་ལས་ཐར་བ་བཞིན་དུ་བདུད་དང་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ནས་ཤིན་ཏུ་བཀྲ་ཤིས་པར་གྱུར་ཅིག

དེ་ནས་བཀྲ་ཤིས་བྱ་བ་ནི། ས་གཞི་དང་བར་སྣང་ཐམས་ཅད་བཀྲ་ཤིས་ཀྱི་ལྷས་ཁེངས་པར་བསམས་ལ། མཚམས་སུ་མེ་ཏོག་གི་ཆར་དང་རོལ་མོའི་འབུད་དཀྲོལ་བྱ་ཞིང་འདི་སྐད་དོ། །ༀ་ཡེ་དྷཱརྨཱ་སོགས་དང་། ༀ། བཀྲ་ཤིས་དམ་པ་དངོས་གྲུབ་ཆར་འབེབས་པ། །རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་། །གང་ཟག་སྙན་བརྒྱུད་བླ་མའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་དམ་པ་ལེགས་རྒུ་འབྱུང་བ་ཡི། །ཞི་ཁྲོ་རབ་འབྱམས་ཡི་དམ་ལྷ་ཚོགས་དང་། །མཁའ་འགྲོ་དམ་ཅན་རྒྱ་མཚོའི་བཀྲ་ཤིས་གང་། །བཀྲ་ཤིས༴། །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །བཀྲ་ཤིས་དམ་པ་དེས་ནི་སྐྱེ་རྒུའི་ཞི་བྱེད་དང་པོའོ། །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་རྒུ་རྣམས་ལ་ཞི་བྱེད་པ། །འདི་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །དགེ་འདུན་དམ་པའི་ཆོས་ལྡན་ཐོས་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་ཞིང་། །འདི་ནི་འཇིག་རྟེན་དགེ་བའི་བཀྲ་ཤིས་གསུམ་པའོ། །སངས་རྒྱས་བསོད་ནམས་ཆེན་པོའི་མཐུ་སྟོབས་དང་། །ལྷ་རྣམས་ཀུན་གྱིས་ལེགས་པར་བསམ་པ་དང་། །གསང་སྔགས་རིག་སྔགས་རྣམས་ཀྱི་བྱིན་རླབས་དང་། །བདེན་པར་སྨྲ་བ་རྣམས་ཀྱི་བདེན་ཚིག་གི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བསོད་ནམས་རི་བོ་བཞིན་དུ་བརྟན་པ་དང་། །བརྒྱུད་འཛིན་ཉི་ཟླ་བཞིན་དུ་གསལ་བ་དང་། །སྙན་གྲགས་ནམ་མཁའ་བཞིན་དུ་ཁྱབ་པ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །མི་མཐུན་གནོད་པའི་རྐྱེན་དང་བྲལ་བ་དང་། །མཐུན་པ་འགྲུབ་ཅིང་ཕུན་སུམ་ཚོགས་པ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །ཐེག་པ་མཆོག་ལ་ངེས་པ་འབྱུང་བ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྦྱིན་པ་གཏོང་ཞིང་ཚུལ་(༤༤)ཁྲིམས་སྲུང་བ་དང་། །བཟོད་པ་སྒོམ་ཞིང་བརྩོན་འགྲུས་རྩོམ་པ་དང་། །མཉམ་པར་འཇོག་ཅིང་གནས་ལུགས་རྟོགས་པ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འབྱུང་པོ་གང་དག་འདིར་ནི་ལྷགས་གྱུར་ཏེ། །ས་འམ་འོན་ཏེ་བར་སྣང་འཁོད་ཀྱང་རུང་། །སྐྱེ་རྒུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །གནས་འདིར་ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པ། །དཀོན་མཆོག་གསུམ་གྱི་བཀྲ་ཤིས་ཤོག །བདག་ཅག་ཡོན་མཆོད་འཁོར་དང་བཅས་པ་ཐམས་ཅད་ཉི་མ་དང་ཟླ་བ་གཟའ་སྒྲ་གཅན་གྱི་གནོད་པ་ལས་གྲོལ་བ་བཞིན་དུ། བདུད་དང་བར་ཆད་སྤང་བྱ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ནས་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག །ༀ་སུ་པྲ་ཏིཥྛ་བཛྲཱ་ཡེ་སྭཱ་ཧཱ། ཞེས་མེ་ཏོག་གི་ཆར་དབབ་པོ། །

དེ་ནས་དངོས་གྲུབ་ཀྱི་རྫས་ལ་རོལ་པ་ནི། བསང་བཤོས་བཅད་ཁམ་ཐལ་མོ་བཀན་པའི་སྟེང་དུ་བཟུང་ལ། ཨ་ལ་ལ་ཧོ། གངས་ཀྱི་ཐིགས་པ་ནི་ཉུང་ཉུང་འདྲ་སྟེ་མང་། རྗེ་ཡི་བཀའ་འབབ་ནི་ཆུང་ཆུང་འདྲ་སྟེ་ཆེ། མཆོད་སྦྱིན་བཟང་པོའི་དགའ་སྟོན་ནི་དངོས་གྲུབ་ཡིན་ཚད་ཀྱི་རྒྱུར་འཚལ་བས། དངོས་གྲུབ་ཆེན་པོ་སྩལ་དུ་གསོལ། །ཞེས་བརྗོད་ལ་ཉེ་འཁོར་དང་ནང་མི་ཀུན་ལ་བསང་རས་ཟས་སྣ་ཆང་ཕུད་བཅས་ཚོགས་ཀྱི་དགའ་སྟོན་རྒྱ་ཆེན་པོ་བྱའོ།། །།

ཚུལ་འདི་རྫོགས་པ་ཆེན་པོའི་རྣལ་འབྱོར་པ། །ཀུན་མཁྱེན་རྒྱལ་སྲས་དྲི་མེད་འོད་ཟེར་གྱིས། །སྔོན་གྱི་མཆོད་རབས་དམ་པའི་རྗེས་འབྲངས་ཏེ། །པདྨ་དབང་ཆེན་ཕུད་རབས་རྒྱས་པ་བཀོད། །ཁོ་བོ་སྔོན་སྦྱངས་ལས་ཀྱི་འཕྲོར་ལྡན་པས། །སྔགས་འཆང་རིགས་ལ་བཟང་པོའི་བརྒྱུད་པར་སྐྱེས། །མི་རབས་མང་པོར་སེམས་ཅན་ཕན་བདེ་བྱས། །ད་ལྟ་བསྡུ་བཞིས་སེམས་ཅན་དོན་བྱེད་ཅིང་། །དཀོན་མཆོག་གསུམ་མཆོག་གཙུག་ལག་གཉན་པོ་གསོ། །ཞྭ་པདྨ་དབང་ཆེན་གྱི་གཙུག་ལག་ཁང་གི་སྲུང་མ་ཐམས་ཅད་ལ་མཆོད་གསོལ་ཕུད་རབས་རྒྱས་པ་འདི་ཉིད། སྲུང་མ་ཐམས་ཅད་ལ་མཆོད་གསོལ་དང་ཕུད་རབས་ཀྱིས་དགྱེས་པར་བྱ་བའི་ཕྱིར་དུ། རང་བཞིན་རྫོགས་པ་ཆེན་པོའི་རྣལ་འབྱོར་པ་ཀློང་ཆེན་རབ་འབྱམས་ཞེས་བྱ་བས། དབུ་རུ་ཞྭའི་གཙུག་ལག་ཁང་དུ་སྦྱར་བའོ། །དགེའོ།། །།

རྫོགས་པ་ཆེན་པོ་སེམས་ཉིད་རང་གྲོལ་ཞེས་བྱ་བ།

༄༅། །རྫོགས་པ་ཆེན་པོ་སེམས་ཉིད་རང་གྲོལ་ཞེས་བྱ་བ་བཞུགས་སོ། །

དང་པོ། གཞི་རྟོགས་པས་གྲོལ་བའི་ལེའུ།

༄༅། །རྒྱ་གར་སྐད་དུ། མཧཱ་སནྡྷི་ཙིཏྟ་ཏཱ་སྭ་མུཀྟི་ནཱ་མ། བོད་སྐད་དུ། རྫོགས་པ་ཆེན་པོ་སེམས་ཉིད་རང་གྲོལ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ངོ་བོ་རྣམ་དག་བསམ་ཡུལ་འདས་པ་ལས། །རང་བཞིན་ལྷུན་གྲུབ་སྙིང་པོའི་གདངས་ཤར་བ། །མཚན་ཉིད་སྣ་ཚོགས་གཟུང་འཛིན་དག་པའི་སེམས། །རྒྱ་ཆད་ཕྱོགས་ལྷུང་བྲལ་ལ་ཕྱག་འཚལ་ལོ། །ཆོས་ཀུན་མ་སྐྱེས་མཉམ་པའི་ངང་ཉིད་ལས། །སྣང་སེམས་ཡེ་གྲོལ་འཛིན་མེད་ཕྱམ་བརྡལ་བ། །རྨད་བྱུང་རྒྱལ་པོ་སེམས་ཉིད་རང་(༢)གྲོལ་ནི། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ལྟ་བ་རྣམ་དག་མཐའ་དབུས་མེད་པ་ལ། །འདི་ཞེས་མི་མཚོན་ཡངས་དོག་མཐོ་དམན་མེད། །རྟག་ཆད་ལས་འདས་མུ་བཞིའི་དྲི་མ་བྲལ། །བཙལ་ན་མི་རྙེད་བལྟས་པས་མཐོང་བ་མེད། །ཕྱོགས་དང་རིས་བྲལ་བསམ་ཡུལ་ཀུན་ལས་འདས། །གྲུབ་པའི་མཐའ་མེད་སྟོང་དང་མི་སྟོང་མེད། །རྟོགས་དང་མ་རྟོགས་རྩིས་གདབ་གཟའ་གཏད་མེད། །ཆོས་ཀུན་ཡེ་ནས་རྣམ་དག་བྱང་ཆུབ་པས། །མ་སྐྱེས་མི་འགག་སྨྲ་བསམ་བརྗོད་དུ་མེད། །དག་དང་མ་དག་རང་བཞིན་དག་པའི་དབྱིངས། །ཐམས་ཅད་མི་དམིགས་མཉམ་རྫོགས་ཆེན་པོ་ཉིད། །བཅིང་གྲོལ་མེད་པས་འགྲོ་འོང་གནས་པ་མེད། །སྣང་སྟོང་ཀུན་བརྟགས་གཟུང་འཛིན་སྒྱུ་མའི་ངང་། །འཁོར་འདས་བདེ་སྡུག་རྨི་ལམ་བཟང་ངན་འདྲ། །སྣང་དུས་ཉིད་ནས་རང་བཞིན་སྤྲོས་དང་བྲལ། །དེ་ལས་སྐྱེ་འགག་ཆེན་པོ་རྟེན་འབྲེལ་ཉིད། །རྨི་ལམ་སྒྱུ་མ་མིག་ཡོར་དྲི་ཟའི་གྲོང་། །བྲག་ཅ་གཟུགས་བརྙན་འདྲ་སྟེ་ངོ་བོ་མེད། །སྐྱེ་སོགས་ཆོས་ཀུན་རང་བཞིན་མ་སྐྱེས་པས། །ནམ་ཡང་མི་འགག་དུས་གསུམ་འཕོ་འགྱུར་མེད། །གང་ནས་མ་འོང་གང་དུ་མ་སོང་ཞིང་། །གར་ཡང་མི་གནས་རྨི་ལམ་སྒྱུ་མ་འདྲ། །མི་མཁས་བདེན་པར་ཞེན་པའི་སྣང་འདི་ལ། །ཐེར་ཟུག་ཆོས་སུ་ང་བདག་འཛིན་པ་ནི། །སྒྱུ་མའི་ན་(༣)ཆུང་རེག་པས་ཞིག་པ་འདྲ། །བསླུ་བས་མི་བདེན་སྣང་ངོར་དོན་བྱེད་བཞིན། །འགྲོ་དྲུག་གནས་དང་སངས་རྒྱས་ཞིང་རྣམས་ཀྱང་། །རྡུལ་ཕྲན་འདུས་མིན་འགྲོ་སེམས་རང་སྣང་ཙམ། །ཇི་ལྟར་རྨི་ལམ་སངས་རྒྱས་སེམས་ཅན་རྣམས། །བདེན་བདེན་ལྟར་སྣང་རང་བཞིན་དཔག་མེད་ཀྱང་། །སད་པའི་ཚེ་ན་སྐད་ཅིག་ཡིད་ཀྱི་ཡུལ། །དེ་བཞིན་འཁོར་འདས་ཆོས་རྣམས་ཤེས་པར་བྱ། །སྣང་བའི་ངོས་ལས་ལོག་པའི་སྟོང་པ་མེད། །མེ་དང་མེ་ཡི་རང་བཞིན་ཚ་བ་བཞིན། །ཐ་དད་མོས་པ་བློ་ཡིས་དབྱེ་བ་སྟེ། །ཆུ་དང་ཆུ་ཟླ་དབྱེར་མེད་རྫིང་བུར་གཅིག །དེ་བཞིན་སྣང་སྟོང་ཆོས་ཉིད་ཆེན་པོར་གཅིག །སྣང་འདི་གདོད་ནས་མ་སྐྱེས་ཆོས་ཀྱི་སྐུ། །དྲི་མེད་རང་བཞིན་དག་པའི་གཟུགས་བརྙན་འདྲ། །དེ་ལ་ཡོད་མེད་བློས་བརྟགས་འཁྲུལ་པས་ན། །གང་སྣང་དོན་ལ་དམིགས་གཏད་མ་བྱེད་ཅིག །སྣང་ཡུལ་དེ་ཡང་སེམས་ཀྱི་གཟུགས་བརྙན་ཏེ། །བྱད་དང་མེ་ལོང་ནང་གི་གཟུགས་བརྙན་བཞིན། །གཉིས་སུ་མེད་བཞིན་གཉིས་སུ་སྣང་བ་ནི། །ཐོག་མེད་བགས་ཆགས་གོམས་པའི་རང་བཞིན་ཏེ། །སེམས་དང་རྨི་ལམ་གཉིས་སུ་མེད་མོད་ཀྱང་། །གཉིད་མྱོས་པ་ལ་རྨི་ལམ་སྣང་བ་བཞིན། །ངོ་བོ་ཐ་དད་མེད་པར་ཤེས་པར་བྱ། །ཇི་ལྟར་བུ་ཆུང་མེ་ལོང་མཐོང་བ་བཞིན། །བྱིས་པས་ཕྱི་རོལ་ཡུལ་ལ་དགག་སྒྲུབ་བྱེད། །ཨ་མས་མཐོང་བས་མེ་ལོང་ཕྱིས་པ་ལྟར། །རྒྱུ་འབྲས་ཐེག་པས་ཕྱི་རོལ་བཅོས་སྒྱུར་བྱེད། །བཟང་མོས་མཐོང་སྟེ་བཞིན་ལ་ཕྱི་བ་ལྟར། །དེ་ཉིད་ཤེས་པས་ནང་གི་སེམས་ཉིད་བལྟ། །འདི་ནི་དངོས་མེད་སྙིང་པོའི་ཐེག་པ་ཡིན། །སེམས་གང་ངོ་བོ་མེད་ལ་སྣ་ཚོགས་ནི། །ཡུལ་གྱི་རྐྱེན་གྱིས་ནང་དུ་ཤར་བ་སྟེ། །མེ་ལོང་རྒྱ་མཚོར་གཟུགས་བརྙན་སྣང་བ་བཞིན། །ངོ་བོ་སྟོང་ལ་རང་བཞིན་མ་འགགས་པ། །མཚན་ཉིད་སྣ་ཚོགས་སྣང་བའི་ཆོ་འཕྲུལ་ནི། །སེམས་ཉིད་གཅིག་ལ་འཁོར་འདས་གཉིས་འཕྲོ་བ། །དཀར་ནག་རས་ལས་ཤེལ་ལ་བསྒྱུར་བ་བཞིན། །ངོ་བོ་མི་འགྱུར་འཆར་གཞི་རྐྱེན་སྣང་གིས། །སྣང་བ་སྣ་ཚོགས་སྣང་དུས་འགྱུར་འདྲ་ཡང་། །དོན་ལ་མ་འགྱུར་ཤེལ་སྒོང་དག་པ་བཞིན། །ཡེ་སྟོང་རྩ་བ་བྲལ་བའི་སེམས་ཉིད་ལ། །འཁོར་འདས་ཆོས་རྣམས་སྣང་བས་མ་གོས་སོ། །དུས་གསུམ་དུས་མེད་ཀུན་ཏུ་བཟང་པོའི་ངང་། །གཞི་རྫོགས་འཕོ་འགྱུར་མེད་པའི་ངོ་བོ་ལ། །ཡུལ་དྲུག་སྣང་བས་མ་གོས་ཆུ་ཟླ་འདྲ། །མེད་སྣང་སྤྲུལ་པ་ལྟ་བུའི་འཁོར་འདས་ལ། །བླང་དོར་དགག་སྒྲུབ་རེ་དོགས་མ་བྱེད་ཅིག །སྤྲུལ་པའི་རང་བཞིན་ཤེས་པས་གྲོལ་བ་ནི། །སྒྱུ་མའི་དཔུང་ཚོགས་མཐོང་བས་(༤)བཟུང་ན་ཡང་། །རང་བཞིན་ཤེས་པས་འཇིགས་སྐྲག་མེད་པ་བཞིན། །སྣང་བའི་ཡུལ་རྣམས་ལོགས་སུ་སྤོང་མི་དགོས། །འཁོར་བའི་རང་བཞིན་སེམས་ཀྱི་ངོ་བོ་ཉིད། །ཡེ་ནས་མ་སྐྱེས་མྱ་ངན་འདས་པས་ན། །སྲིད་པའི་རང་བཞིན་སེམས་ཉིད་མཐོང་བས་གྲོལ། །དེ་ཚེ་ཞི་བ་གཞན་ཞིག་བསྒྲུབ་ཏུ་མེད། །རང་གི་དཔུང་ལ་གཞན་དུ་སྐྲག་པ་ལས། །ཕྱིས་ནས་ཤེས་པས་སླར་ཡང་བདེ་བ་ཐོབ། །དེ་རིང་དཔལ་ལྡན་བླ་མའི་བྱིན་རླབས་ཀྱིས། །སྲིད་པའི་ཀུན་རྟོག་ཆོས་སྐུར་ངོ་འཕྲོད་པས། །རང་བབས་བདེ་ཆེན་ནང་ནས་ཤར་བ་ཡིན། །སྤང་བླང་མི་དགོས་སྣང་སྲིད་བླ་མར་ཤར། །གདམས་ངག་མི་ཟད་ཐམས་ཅད་བྱང་ཆུབ་གྲོགས། །ཞི་བདེའི་སྟེང་དུ་བློ་བདེ་རྒྱུན་མི་འཆད། །ཐམས་ཅད་ཡིད་བདེ་ཆོས་ཉིད་བརྡལ་བ་ལས། །སྣ་ཚོགས་ཆོས་ཅན་མ་འགག་རོལ་པ་ནི། །ཆོས་སྐུ་གཟུགས་སྐུ་སྣང་སྟོང་ཚོགས་གཉིས་ཏེ། །ཐབས་དང་ཤེས་རབ་མཉམ་རྗེས་ལྷུན་གྱིས་གྲུབ། །མ་བྱས་རང་བབས་སྐུ་ལྔ་ཡེ་ཤེས་ལྔ། །སྣང་སེམས་འཛིན་མེད་རིག་པའི་ངང་དུ་རྫོགས། །ས་དང་ལམ་དང་གཟུངས་དང་ཏིང་འཛིན་ཏེ། །ཡོན་ཏན་ལྷུན་རྫོགས་ཆོས་ཉིད་གཉུག་མའི་ངང་། །ཕྱོགས་བྲལ་རིག་པ་རང་ཤར་ཆེན་པོ་ལ། །བཟུང་བས་མ་བསླད་འཛིན་པས་བཅིངས་པ་མེད། །སྒྱུ་མའི་རང་བཞིན་གཉིས་མེད་དག་པ་ལ། །བསམ་བརྗོད་ཏིང་འཛིན་བསྒོམ་པས་ཅི་ཞིག་བྱ། །བསྐྱེད་དང་རྫོགས་མེད་གཉིས་མེད་ཟུང་འཇུག་མེད། །གྲུབ་པའི་མཐའ་མེད་ཐེག་པའི་རྣམ་དབྱེ་མེད། །དེ་དག་ཀུན་བརྟགས་བློ་ཡི་རི་མོ་སྟེ། །རང་ཤར་ངང་ལ་རང་གྲོལ་བཏགས་པ་ཙམ། །འདི་ཡིན་གཟའ་གཏད་མེད་པའི་རིག་པ་ལ། །འདི་ཞེས་ཆེད་དུ་མ་མཛིན་བློ་ལས་འདས། །བྱར་མེད་ལྷུན་གྱིས་རྫོགས་པའི་སེམས་ཉིད་ལ། །བཅོས་བསྒྱུར་གཉེན་པོས་མ་བསླད་གང་བདེར་ཐོངས། །རྟོགས་དང་མ་རྟོགས་མཉམ་པའི་ཆོས་ཉིད་ལ། །བསམ་གཏན་འཆིང་བའི་གཟེབ་ཀྱིས་མ་བསླད་ན། །གནས་ལུགས་དོན་ལ་ཡོད་མེད་སྣང་སྟོང་མེད། །གཅིག་དང་དུ་བྲལ་ལ་སོགས་མི་མཚོན་ཞིང་། །ལྟ་སྒོམ་ལས་འདས་གྲུབ་བསལ་འགྲོ་འོང་མེད། །མཐའ་བྲལ་གཉིས་མེད་སྒྱུ་མ་རྨི་ལམ་ཞེས། །བདེན་པ་གཉིས་དོན་བདེན་ཞེན་དགག་ཕྱིར་ཏེ། །རྣལ་མའི་དོན་ལ་དོན་དམ་ཀུན་རྫོབ་མེད། །གང་ལྟར་བརྟགས་པ་དེ་ལྟར་མི་གནས་ཤིང་། །འདི་ཞེས་འཛིན་པ་དེ་ཡི་གཟེབ་ཏུ་འཆིང་། །ཇི་ལྟར་འདོད་ཀྱང་ཞེན་པའི་མཐར་ལྷུང་ཞིང་། །རྩོལ་སྒྲུབ་ཆོས་ཀྱིས་འཁོར་བ་རྒྱུན་མི་འཆད། །བཟང་ངན་ལས་ཀྱིས་སྲིད་པ་འདིར་འཁྱམས་ཏེ། །བདེ་སྡུག་མཐོ་དམན་ཟོ་ཆུའི་འཁྱུད་མོ་བཞིན། །དུས་གསུམ་འཁོར་བར་ཁམས་གསུམ་(༥)འགྲོ་བ་འཁྲུལ། །མ་རིག་ཀུན་བརྟགས་རྩོལ་བའི་ནད་ཀྱིས་གདུང་། །ཐོག་མཐའ་དུས་མེད་སེམས་ཅན་སྙིང་རེ་རྗེ། །ཀྱེ་ཧོ་དེ་ཀུན་རྨི་ལམ་སྒྱུ་མ་ཙམ། །ངེས་པའི་དོན་ལ་འཁོར་དང་འཁོར་མཁན་མེད། །ཐམས་ཅད་ཡེ་གྲོལ་ཀུན་ཏུ་བཟང་པོའི་ངང་། །གཞི་རྩ་དངོས་པོ་མེད་པས་བློ་རེ་བདེ། །མ་བཅོས་གདོད་ནས་དག་པའི་སེམས་ཉིད་ལ། །སྣང་སྲིད་ཆོས་ཀྱིས་མ་གོས་གཟུགས་བརྙན་འདྲ། །སྣང་བའི་ཡུལ་ལ་གཟུང་བ་མི་དམིགས་ཤིང་། །རང་ཤར་བློ་ལ་འཛིན་པ་མི་དམིགས་པའི། །གཉིས་མེད་ཡེ་ཤེས་གཉིས་སུ་སྣང་ལས་བྱུང་། །དེ་ཕྱིར་ཡུལ་སེམས་མི་འགགས་རྒྱན་དུ་ཆེ། །འཛིན་མེད་གླང་ཆེན་ཐབ་ལ་ཡན་པ་ནི། །རང་གྲོལ་འགྲོས་ཅན་གཉིས་མེད་དྲ་བས་མཛེས། །བླང་དོར་རེ་དོགས་འདམ་བུའི་ཚལ་འཇོམས་ཤིང་། །རྟོགས་པའི་སྟོབས་འཆང་གཉིས་མེད་རྒྱ་མཚོར་འཇུག །ཤར་གྲོལ་རིམ་པ་སྣ་མེད་ཡན་པ་ལ། །སྤང་གཉེན་ཞེན་པའི་ཐག་པས་མ་འཆིང་བར། །རླབས་ཆེན་རྫོགས་པའི་ལྟ་བ་ཁ་ཡན་སྐྱོང་། །རྩལ་ཆེན་རྫོགས་པའི་སྣང་སྲིད་ཆོས་སྐུར་འཆར། །ཡུལ་དྲུག་མ་འགགས་སྣང་མཁན་ངོ་བོས་སྟོང་། །མཐའ་བྲལ་སེམས་ཉིད་གཏད་མེད་གྲོལ་བ་ན། །འཁོར་འདས་གཉིས་མེད་རིག་པ་གཞི་ཐོག་ཕྱིན། །མཆོག་གི་དངོས་གྲུབ་བརྙེས་ཞེས་དེ་ལ་བྱ། །རང་གཞན་དོན་གཉིས་རྫོགས་པའི་མཐར་ཕྱིན་པས། །འོག་མིན་གནས་སུ་མངོན་པར་བྱང་ཆུབ་ཡིན། །ཨེ་མ་ཕྱུགས་དང་འདྲ་བའི་བསམ་གཏན་པ། །འདུ་ཤེས་བཀག་ནས་རྟོག་མེད་གནས་པ་ལ། །གནས་ལུགས་ཉིད་ཅེས་མངོན་པའི་ང་རྒྱལ་འཛིན། །དེ་ཉིད་གོམས་པས་དུད་འགྲོའི་སར་འཕེན་ཅིང་། །མ་གོམས་ན་ཡང་བསམ་གཏན་གཟུགས་མེད་ཉིད། །འཁོར་བའི་གནས་ལས་གྲོལ་བའི་སྐབས་མེད་དོ། །དེ་བས་ཆེས་ཆེར་མངོན་པའི་ང་རྒྱལ་ཅན། །

རང་རང་གྲུབ་མཐའི་གདོན་གྱིས་ཟིན་པ་དག །བློས་བརྟགས་འཁྲུལ་པའི་ཆོས་ཀྱི་རྗེས་འབྲང་བྱེད། །ཀུན་བརྟགས་དྲི་མས་ཆོས་ཉིད་དོན་མི་མཐོང་། །བདེན་གཉིས་གཞལ་ཀྱང་རྟག་ཆད་མཐར་ལྷུང་ཞིང་། །མཐའ་བྲལ་གཞལ་ཡང་སྲིད་རྩེའི་ལྟ་བ་སྟོན། །ཇི་ལྟར་བྱས་ཀྱང་གྲུབ་པའི་མཐས་བཅིངས་ནས། །གཉུག་མའི་ཡེ་ཤེས་ནམ་ཡང་མཐོང་མི་འགྱུར། །རྣལ་མའི་དོན་ནི་བསམ་བརྗོད་དམིགས་པས་སྒྲིབ། །བསམ་བརྗོད་དམིགས་ནི་རྣལ་མར་མ་ཤེས་པས། །བཙལ་བའི་དོན་ནི་རྩོལ་མཁན་བྱས་པས་གོལ། །སེམས་དང་ཡེ་ཤེས་ཆུ་དང་རླན་བྱད་བཞིན། །དུས་རྣམས་ཀུན་ཏུ་འདུ་འབྲལ་མེད་པ་ལ། །སྤང་བླང་ཡིད་ཀྱིས་སོ་སོར་ཕྱེ་བས་བསླད། །གང་སྣང་ཡུལ་སེམས་གཉུག་མའི་ངོ་བོ་ལ། །ཕྱོགས་རིས་འཛིན་པས་(༦)ནམ་མཁའ་གུད་དུ་བཅད། །ད་ནི་དམིགས་མེད་ཆོས་སྐུའི་དོན་འདོད་ན། །གཉུག་མའི་ཡུལ་ལ་ཚོལ་ཁྲོ་མ་བྱེད་པར། །གང་ཤར་རྒྱལ་པོ་དམིགས་གཏད་ཞེན་པ་བཤོལ། །ཕྱོགས་རིས་མ་བཅད་འདི་ཡིན་ངོས་བཟུང་མེད། །གང་ལྟར་ཤར་བ་དེ་ལྟར་མ་གྲུབ་ཅིང་། །ཇི་ལྟར་སྣང་བ་དེ་ལྟར་རང་བཞིན་མེད། །ཐ་མལ་སྣང་སེམས་ཡེ་གྲོལ་ཟང་ཀ་མ། །རང་བཞིན་རྫོགས་པ་ཆེན་པོའི་ལྟ་བ་ཡིན། །ཆོས་རྣམས་རང་བཞིན་ནམ་མཁས་མཚོན་བྱས་ཀྱང་། །ནམ་མཁའི་རང་བཞིན་ཆོས་རྣམས་དམིགས་སུ་མེད། །སེམས་ཉིད་མ་སྐྱེས་ཆོས་རྣམས་མཁའ་འདྲ་ཞེས། །མིང་ཙམ་བརྗོད་ཀྱང་བརྡ་ཙམ་བཏགས་པ་ཙམ། །ཡིན་མིན་ཕྱོགས་བྲལ་བསམ་ལས་འདས་པ་ལ། །འདི་ཞེས་མི་མཚོན་ཡེ་རྫོགས་ཕྱམ་གཅིག་གོ། །ཀྱེ་ཧོ་སྣང་སྲིད་རང་བཞིན་རྣམ་དག་ལ། །འཛིན་མེད་རིག་པ་གློ་བུར་རྣམ་དག་ཤར། །ཤར་ཙམ་ཉིད་ནས་གང་དུ་མི་གནས་པ། །རང་གྲོལ་རྫོགས་ཆེན་ནམ་ཞིག་མཐོང་བར་འགྱུར། །རྩ་བྲལ་གདོད་ནས་དག་པའི་སེམས་ཉིད་ལ། །བྱ་རྒྱུ་བྱེད་མཁན་མེད་པས་བློ་རེ་བདེ། །ཐམས་ཅད་གཟའ་གཏད་མེད་པའི་རིག་པ་ལ། །འདི་ཡིན་ཆེད་འཛིན་ཞིག་པས་དང་རེ་སྤྲོ། །རྒྱ་ཆད་ཕྱོགས་ལྷུང་མེད་པའི་ལྟ་སྒོམ་ལ། །ཡངས་དོག་མཐོ་དམན་མེད་པས་ཉམས་རེ་དགའ། །བླང་དོར་རེ་དོགས་མེད་པའི་སྤྱོད་འབྲས་ལ། །ཐོབ་དང་མ་ཐོབ་མེད་པས་བག་རེ་དྲོ། །ཐམས་ཅད་མཉམ་རྫོགས་སྒྱུ་མའི་རང་བཞིན་ལ། །བཟང་ངན་བླང་དོར་མེད་པས་དགོད་རེ་བྲོ། །སྣང་སེམས་འལ་འོལ་སང་སིང་ཁྲལ་མ་ཁྲོལ། །བན་བུན་ཆད་ཆོད་ཟང་ཐལ་གཉུག་མ་ལ། །གང་སྣང་དེར་ཡིན་དེར་སྣང་འཛིན་པ་མེད། །ཡིན་མིན་བློ་ཡིན་བློ་བྲལ་ཆོས་སྐུ་ཡིན། །གཏད་མེད་ཡུལ་ལ་ངེས་མེད་སྣང་བ་ཤར། །འཛིན་མེད་ཤེས་པ་གཉིས་མེད་གྲོལ་བའི་ཚེ། །སྣང་སེམས་ཆོས་རྣམས་སེམས་ཀྱི་རོལ་མོར་ཆེ། །གཞི་རྩ་དངོས་པོ་མེད་པའི་སེམས་ཉིད་ལ། །མ་བྱས་ལྷུན་གྱིས་གྲུབ་པའི་ཡོན་ཏན་རྫོགས། །དགག་སྒྲུབ་ཆོས་སྐུར་གྲོལ་བས་བློ་བདེ་རྙེད། །ཆེད་དུ་དམིགས་པ་ཐམས་ཅད་བཅོས་མ་སྟེ། །དམིགས་མེད་གང་ཤར་ཤར་ན་ཡེ་ཤེས་དངོས། །སྤང་བླང་རང་སར་གྲོལ་བས་བློ་བདེ་རྙེད། །སྤང་བླང་རང་སར་གྲོལ་བས་བསམ་ཡུལ་འདས། །མ་ལུས་རང་བཞིན་དག་པའི་སངས་རྒྱས་ནི། །རང་སེམས་ཉིད་ལས་གཞན་དུ་བཙལ་མི་བྱ། །ཚོལ་མཁན་གོལ་བས་བཙལ་བྱ་ལོག་ན་མེད། །སྒྱུ་མའི་རིགས་དང་སྨིག་རྒྱུའི་ཆུ་སྙེགས་འདྲ། །འཁོར་འདས་གཉིས་མེད་གཉིས་སུ་འཛིན་པ་ནི། །རང་བྱུང་རིག་པ་བཅོས་བསླད་མེད་པར་ཟད། །གང་གིས་ཆོས་(༧)ཀུན་མཉམ་པའི་དོན་མཐོང་ནས། །སེམས་ཉིད་མ་སྐྱེས་མཁའ་ལྟར་རྟོགས་པ་ནི། །སྣང་སྲིད་སྣོད་བཅུད་རང་བཞིན་དག་པའི་ཞིང་། །མ་སྐྱེས་ལྷུན་རྫོགས་མཉམ་པའི་ངང་དུ་ཕྱིན། །སྣང་སེམས་ངོ་བོ་སྟོང་པས་ཆོས་སྐུའི་དོན། །རང་བཞིན་མ་འགགས་ལོངས་སྐུའི་སྣང་བ་ལ། །མཚན་ཉིད་སྣ་ཚོགས་སྤྲུལ་པའི་སྐུར་ཤེས་པས། །ཐམས་ཅད་སྐུ་གསུམ་ཡེ་ཤེས་དག་པའི་ཞིང་། །བཅོས་བསྒྱུར་སྤང་གཉེན་མེད་པས་བློ་བདེའོ། །ཨེ་མ་འགྲོ་བས་གཉིས་སུ་བཟུང་བ་ཡིས། །རྨི་ལམ་འཁྲུལ་པའི་འཁོར་བར་གནས་དུས་འདིར། །ཇི་ལྟར་འབད་ཀྱང་འཁོར་བའི་རྒྱུ་འབྲས་ཏེ། །མི་རྟོག་ཀུན་གཞི་གོམས་པས་གཟུགས་མེད་ལ། །གསལ་སྟོང་ཀུན་གཞིའི་རྣམ་ཤེས་གཟུགས་ཀྱི་ཁམས། །ཚོགས་དྲུག་ཉིད་ལ་གོམས་པས་འདོད་པར་འཁྲུལ། །སེམས་ཀྱིས་བཅོས་བསྒྱུར་སྲིད་པའི་ཐེམ་སྐས་ལ། །ཐར་འདོད་རྣམས་ཀྱིས་མ་བཅོས་རྣལ་མའི་དོན། །སེམས་ལ་ལས་མེད་དལ་དུ་འཇུག་པ་འོ། །ཐ་མལ་ཤེས་པ་བཟོ་མེད་ལྷུག་པ་ལ། །འཁོར་འདས་འཛིན་པས་མ་གོས་རང་སར་གྲོལ། །དེ་ལྟར་གྲོལ་བས་རང་བབ་སྐད་ཅིག་ལ། །གནས་ལ་མི་རྟོག་ཆོས་སྐུའི་ངང་ཉིད་ལ། །འཆར་གཞི་མ་འགག་གསལ་སྟོང་ལོངས་སྤྱོད་རྫོགས། །འཕྲོ་ན་ཤར་གྲོལ་སྤྲུལ་སྐུར་ཐག་ཆོད་པས། །འཁོར་བའི་ཀུན་རྟོག་མྱ་ངན་འདས་པར་ངེས། །ཀྱེ་ཧོ་སྣང་སེམས་རང་བཞིན་འགྱུར་བས་ཀྱང་། །ཆོས་སྐུ་གཟའ་གཏད་བྲལ་བའི་མེ་ལོང་ལྟོས། །གཏད་མེད་ཆོས་ལ་འཛིན་མེད་ཤར་བ་ནི། །སེམས་ཀྱི་གསང་ཡིན་གཞན་ཞིག་མཚོན་དུ་མེད། །ལྷུན་གྲུབ་རིག་པ་གང་ཤར་སྙིང་པོའི་དོན། །རང་བཞིན་བབས་ཡིན་བཅོས་བསླད་མ་བྱེད་ཅིག །ཆོས་རྣམས་དངོས་པོ་མེད་པའི་རང་བཞིན་ལ། །འཛིན་མེད་སེམས་ཀྱི་ནམ་མཁའ་མཐའ་དབུས་མེད། །མ་བྱས་འགག་པ་མེད་པའི་རང་ཤར་ཡང་། །དགག་སྒྲུབ་མཚན་འཛིན་མེད་པ་རྣལ་མའི་དོན། །དུས་གསུམ་འཕོ་འགྱུར་མེད་པར་ཤེས་པར་བྱ། །ཡུལ་སེམས་གཉིས་མེད་གཉུག་མའི་ཡེ་ཤེས་ནི། །རྟོགས་པས་མཚོན་ཏེ་བསྟན་ཅིང་བསྟན་དུ་མེད། །དོན་དམ་སེམས་ཉིད་རང་བཞིན་གནས་ན་མཛེས། །བསམ་གཏན་མི་གཡོ་རྟོག་དཔྱོད་ཤེས་རབ་དང་། །ལུང་རིག་མན་ངག་མང་པོས་གོ་ཡུལ་ཙམ། །རྗེན་པའི་ཡེ་ཤེས་ནམ་ཡང་ཐོབ་མི་ནུས། །ནམ་མཁའ་འདི་ཞེས་མཛུབ་མོས་མཚོན་བྱས་ཀྱང་། །མཐོང་བའི་ཡུལ་མིན་རྣམ་ཕྱེའི་གོ་བ་ཙམ། །བླ་མའི་དྲིན་གྱིས་རྟོགས་པར་འཆར་བ་ནི། །ཉི་མའི་སྙིང་པོས་མུན་པ་བསལ་བ་བཞིན། །སྐད་ཅིག་རིག་པས་ཆོས་སྐུར་མཐོང་མ་ཐག །མ་རིག་ཡེ་ཤེས་ཉོན་མོངས་མཚོན་པར་སོང་། །དངོས་པོ་ཀུན་གྱིས་གཡོ་མེད་བསྙེན་པར་བཀུར། །མཆོག་དང་ཐུན་(༨)མོང་དངོས་གྲུབ་ཚེ་འདིར་ཐོབ། །རྨོངས་རྣམས་སྲིད་སྔངས་མྱ་ངན་འདས་པ་འཚོལ། །ནམ་ཡང་མི་རྙེད་ནོར་བུ་དོར་བྱས་ནས། །བྱི་དོར་བྱ་བའི་ནོར་བུ་གཞན་བླངས་ཏེ། །དྲི་མ་སྦྱངས་ཤིང་འཆིང་བུ་འཚོལ་བ་བཞིན། །སེམས་ཉིད་རང་གྲོལ་ནོར་བུ་རིན་པོ་ཆེ། །རང་ངོ་ཤེས་པས་འཁྲུལ་པའི་དྲི་མ་དག །དེ་ཉིད་ཤེས་པས་ཡོན་ཏན་རིན་ཆེན་གཏེར། །རང་གཞན་དོན་གཉིས་འབྱོར་པའི་སྙིང་པོ་ཡིན། །སེམས་ཉིད་དོན་གྱི་རྟོགས་པ་ཤར་བ་ན། །ཆུ་དང་རླབས་བཞིན་འཕྲོ་གནས་ཆོས་སྐུའི་ངང་། །གང་ལྟར་བྱུང་ཡང་དགག་སྒྲུབ་མི་དགོས་པས། །དུས་རྣམས་ཀུན་ཏུ་དགག་སྒྲུབ་བྱ་མི་དགོས། །དུས་རྣམས་ཀུན་ཏུ་བློ་བདེའི་རྣལ་འབྱོར་ལ། །ཆུ་བོ་རྒྱུན་གྱི་རྣལ་འབྱོར་ཆེན་པོ་ཡིན། །ཐམས་ཅད་མཉམ་རྫོགས་རང་བཞིན་ཆེན་པོའི་ངང་། །རིག་ཙམ་ཤར་བས་ངང་དྭངས་འོད་གསལ་ཞིང་། །ཡང་གཅིག་འཕྲོས་ཀྱང་དེ་བཞིན་ཆོས་ཉིད་ངང་། །འོད་གསལ་རིག་པ་མཐའ་དབུས་མེད་པའི་ཚེ། །ཉོན་མོངས་གཉེན་པོ་གཉིས་སུ་མེད་པས་ན། །སྤང་གཉེན་བྲལ་ཐོབ་རེ་དོགས་རང་སར་གྲོལ། །ནོར་བུ་སྒྲོན་མེའི་བརྟགས་པ་མ་ཤེས་པས། །སྒྲོན་མེའི་འོད་ལ་ནོར་བུར་ཞེན་པ་ཡིན། །རང་གྲོལ་ཉམས་དང་བསམ་གཏན་མ་ཕྱེད་ན། །ཤར་གྲོལ་རང་ལ་ཞེན་པས་འཆིང་བར་བྱེད། །ཉམས་དང་རྟོགས་པའི་དབྱེ་བ་མ་ཤེས་ན། །གོམས་པའི་ཉམས་ལ་རྟོགས་པར་འཛིན་པས་འཁྲུལ། །རྟོགས་ནས་དུས་ཀུན་བཟང་ངན་འཕོ་འགྱུར་མེད། །དེ་ཉིད་གོམས་པས་ཡོན་ཏན་ཉམས་རྣམས་འབྱུང་། །ཇི་ལྟར་མཁའ་ལ་འབྱུང་བཞིའི་འཕོ་འགྱུར་གྱིས། །ནམ་ཡང་མི་གཡོ་ནམ་མཁའ་སྔོན་བཞིན་གནས། །དེ་བཞིན་སེམས་ཉིད་རྟོགས་པའི་རྣལ་འབྱོར་ལ། །འཕེལ་འགྲིབ་ཉམས་ཀྱི་རྟོགས་པ་བཟང་ངན་མེད། །བཟང་ངན་བྱུང་ན་ཉམས་ཡིན་རྟོགས་པ་མིན། །ཐག་ཆོད་རྟོགས་པ་དམ་པའི་དྲུང་དུ་བཙལ། །ཕྱི་ནས་མི་གཡོ་དེ་བཞིན་མཉམ་པར་གནས། །འདི་བསྒོམ་ངེས་པ་དོན་གྱི་ལྟ་བ་སྟེ། །ཡང་རབ་དབང་པོ་དེ་ཉིད་མཐོང་བས་གྲོལ། །གོམས་ལ་མི་ལྟོས་ཐམས་ཅད་རྟོགས་པ་འཆར། །སྤང་བྱ་མེད་པས་གོམས་བྱེད་གཉེན་པོ་མེད། །ནད་མེད་པ་ལ་སྨན་དག་མི་དགོས་བཞིན། །ཕྱོགས་བྲལ་ལྟ་བ་འཛིན་མེད་ཤེས་པར་གྱིས། །རྫོགས་པ་ཆེན་པོ་སེམས་ཉིད་རང་གྲོལ་ལས། གཞི་རྟོགས་པས་གྲོལ་བའི་ལེའུ་སྟེ་དང་པོའོ།། །།

གཉིས་པ། དབང་པོ་འབྲིང་ཐབས་ལམ་གོམས་ཐོག་ནས་གྲོལ་བའི་ལེའུ།

སྒོམ་པ་རང་བབ་རང་གྲོལ་ཆེན་པོ་ལ། །བཅོས་བསྒྱུར་མི་དགོས་གང་ཤར་རྫོགས་པ་ཆེ། །བླང་དོར་མི་དགོས་གདོད་མའི་ངང་ཉིད་དུ། །ཕྱི་ནང་འཁོར་འདས་ཆོས་རྣམས་ཕྱམ་བརྡལ་ལོ། །གང་བྱུང་རིག་པ་ཚོགས་དྲུག་ལྷུག་པ་ལ། །མ་བཅོས་རིག་པ་བུ་ཆུང་ལྟ་བུར་ཞོག །གཞི་བྲལ་ངང་དུ་བློ་བྲལ་(༩)ལས་འདས་ན། །བསམ་མེད་རྒྱལ་པོ་འགྱུར་མེད་ལྷུན་གྱིས་གྲུབ། །ཐ་མལ་ཤེས་པ་བཟོ་མེད་ལྷུག་པ་ལ། །རང་བབ་ཤེས་པ་ཆུ་ལ་ཆུ་བཞག་བཞིན། །གཉིས་མེད་ཤེས་པ་བཅོས་བསླད་བྲལ་བར་བཞག །བྱར་མེད་ཤེས་པ་ཆོས་ཉིད་ཆེན་པོར་གནས། །སེམས་དལ་ཁོང་ཡངས་ངང་གིས་བློ་བདེ་ལ། །རང་བབ་ལྷུན་ཆགས་རྒན་བུ་ལྟ་བུར་ཞོག །ཐུན་མཚམས་རྩི་མེད་རང་ཤར་ཆེན་པོའི་ངང་། །རང་གྲོལ་རིག་པ་རྒྱ་ཡན་ཆེན་པོར་གནས། །གཏད་མེད་རིག་པ་ཟང་ཐལ་ཆེན་པོ་ལ། །འཛིན་མེད་རིག་པ་སྨྱོན་པ་ལྟ་བུར་ཞོག །བརྟུལ་ཞུགས་རིག་པ་ཕྱོགས་རིས་མེད་པའི་ངང་། །རྐྱེན་ངན་སྣ་ཚོགས་ཆོས་ཉིད་རོལ་པར་འཆར། །སྣ་ཚོགས་རང་སེམས་རིག་པའི་ཆོ་འཕྲུལ་ལ། །ཉམ་ང་མེད་པ་སེང་གེ་ལྟ་བུར་ཞོག །འཁྲུལ་སྣང་ཟིལ་གནོན་ཡེ་ཤེས་ཆེན་པོའི་ངང་། །ཤུགས་འབྱུང་རིག་པ་རང་གྲོལ་ཆེན་པོར་འཆར། །རྟོགས་པའི་ངོ་བོ་ཀློང་དུ་མ་གྱུར་པར། །ཉིན་མཚན་གཉིས་མེད་ལྕེ་སྤྱང་མིག་ལྟར་ཞོག །གོམས་ཤིང་འདྲིས་པས་མ་བུ་འཕྲོད་གྱུར་ན། །ཐམས་ཅད་ཕྱམ་གཅིག་རྒྱ་ཡན་ཆེན་པོར་འཆར། །ཕྱོགས་བྲལ་རིག་པ་མཐའ་དབུས་མེད་པ་ལ། །འདི་ཞེས་མི་མཚོན་ནམ་མཁའ་ལྟ་བུར་ཞོག །སྒོམ་མེད་རིག་པ་བཅོས་བསླད་མེད་པའི་དོན། །རང་བྱུང་རིག་པ་རང་བཞིན་ཁོང་ནས་འཆར། །ཉོན་མོངས་རྙོག་བྲལ་རང་དྭངས་ཆེན་པོ་ལ། །ངང་དྭངས་རིག་པ་རྒྱ་མཚོ་ལྟ་བུར་ཞོག །ཤར་གྲོལ་རིག་པ་རྦ་རླབས་ཆེན་པོ་བཞིན། །བྱད་དང་མེ་ལོང་གཟའ་སྐར་གཟུགས་བརྙན་འཆར། །སེམས་ཉིད་མི་གཡོ་འཕོ་འགྱུར་མེད་པ་ལ། །ཆོས་ཉིད་མི་གཡོ་རི་རྒྱལ་ལྟ་བུར་ཞོག །མཉམ་རྫོགས་རིག་པ་ལྷུན་རྫོགས་འདུས་མ་བྱས། །བྱ་རྩོལ་གཉིས་མེད་བཏང་སྙོམས་ལྷུན་གྱིས་གྲུབ། །གཉུག་མའི་སེམས་ཉིད་རང་ཤར་རང་གྲོལ་ལ། །རྒྱུན་ཆད་མེད་པ་ཆུ་བོ་ལྟ་བུར་ཞོག །ཅི་སྐྱེས་རྣམ་རྟོག་ཆོས་སྐུ་རོ་གཅིག་པས། །སྤང་བླང་མི་དགོས་ཕྱམ་གཅིག་མྱ་ངན་འདས། །མདོར་ན་གང་ཤར་ཆོས་ཉིད་རོལ་པ་ལ། །དམིགས་མེད་རང་གྲོལ་མཉམ་གཞག་ལྷུན་གྱིས་གྲུབ། །རེས་འཇོག་མི་དམིགས་སྒོམ་ཡུན་ཆེན་པོའི་ངང་། །ལེ་ལོ་མེད་པར་རྟོགས་པའི་རྩལ་སྦྱང་བྱ། །དེ་ཡི་བོགས་འབྱིན་ལམ་གྱི་ཆ་རྐྱེན་དུ། །སྒྱུ་མའི་སྤྱོད་པས་བླང་དོར་གཉིས་མེད་པས། །རྐྱེན་ངན་ལམ་ལྷོངས་མཉམ་རྗེས་བསྲེ་བའི་ཕྱིར། །རི་རྩེ་དུར་ཁྲོད་མཚོ་གླིང་ཚོང་དུས་སོགས། །ཡུལ་གྱིས་སེམས་ལ་གཡེངས་པའི་གནས་སོང་ནས། །ལུས་ནི་བྲོ་གར་ངག་ནི་གླུ་ལེན་ཅིང་། །སེམས་ནི་ཀུན་རྟོག་སྣ་ཚོགས་སྤྲོས་བྱས་ལ། །སྐད་ཅིག་རང་གྲོལ་ལྟ་སྒོམ་ངང་དུ་བསྲེ། །ཕྱི་ནས་ཐམས་ཅད་ལམ་དུ་ལྷོངས་པ་ཡིན། །བར་འགའ་སྣང་སྲིད་བླ་མའི་(༡༠)མོས་གུས་དང་། །ཚོགས་བསགས་སྒྲིབ་སྦྱང་མི་རྟག་འཆི་བ་བསྒོམ། །སྣང་སྲིད་ཆོས་རྣམས་རྨི་ལམ་སྒྱུ་མའི་ངང་། །སྒྲ་བརྙན་སྨིག་རྒྱུ་གཟུགས་བརྙན་སྤྲུལ་པ་འདྲ། །མིག་ཡོར་ཆུ་ཟླའི་རང་བཞིན་སྟོང་པའི་ངང་། །སྣ་ཚོགས་སྣང་བ་བདེན་མེད་འལ་འོལ་དུ། །སྐད་ཅིག་སྐད་ཅིག་ངོས་བཟུང་མེད་པར་སྦྱངས། །ཉིན་མཚན་མ་ཡེངས་མཉམ་རྗེས་རྩལ་སྦྱངས་པས། །ཤར་གྲོལ་རང་གནས་བདེ་གསལ་མི་རྟོག་ངང་། །རང་གནས་སྒོམ་པ་རྒྱུན་མི་འཆད་པ་ལ། །འཁྲུལ་པའི་རྨི་ལམ་བདེན་མེད་འོད་གསལ་དུ། །ཉིན་མཚན་འདྲེས་པས་འཁོར་འདས་རང་སར་གྲོལ། །ལྟ་བས་ཡུན་ཐོབ་སྒོམ་པས་ཡེངས་ཐུབ་ཅིང་། །སྤྱོད་པས་རྐྱེན་ཐུབ་འབྲས་བུས་གོལ་ས་ཐུབ། །རྟོགས་པའི་རང་བཞིན་མི་རྟོག་ཡེ་ཤེས་སུ། །དུས་རྣམས་ཀུན་ཏུ་འཕོ་འགྱུར་མེད་པ་གནས། །དེ་ཚེ་རང་བཞིན་གཅིག་སྟེ་གདོད་མའི་སར། །སྒོམ་མེད་དོན་ལ་གཏན་སྲིད་ཟིན་པ་ཡིན། །ཕྱི་ནས་འབྲས་བུ་བདེ་ཆེན་བཙལ་དུ་མེད། །གང་ཤར་རིག་པ་སྐུ་གསུམ་ལྷུན་གྲུབ་ལ། །རང་གཞན་དོན་རྣམས་འབད་རྩོལ་མེད་པར་འགྲུབ། །རིག་པ་ཡོན་ཏན་ཕྱོགས་བྲལ་ཉག་གཅིག་འཆར། །དེ་ལྟར་ཚེ་འདིར་གྲོལ་བའི་རྣལ་འབྱོར་པ། །ས་ཆུ་མེ་རླུང་རྣམ་ཤེས་འོད་གསལ་ཐིམ། །ཡེ་ཤེས་ངང་ལ་དབྱིངས་དང་རབ་འདྲེས་ནས། །གདོད་མའི་ས་ལ་གཏན་སྲིད་ཟིན་པ་ཡིན། །གཞན་དོན་སྐུ་གཉིས་ཡེ་ཤེས་རྨི་ལམ་བཞིན། །འགྲོ་ལ་སྣང་བ་དགོས་པའི་ཡོན་ཏན་ཡིན། །འདི་ནི་རིག་པའི་རང་བཞིན་སེམས་ཀྱི་གསང་། །སྐད་ཅིག་རང་སར་གྲོལ་བའི་མཆོག་རིག་ནས། །ཆེས་ཆེར་གོང་དུ་འཕེལ་བའི་ཡོན་ཏན་ནི། །ཚེས་གཅིག་ནས་བཟུང་བཅོ་ལྔའི་བར་འཕེལ་བས། །ཟླ་བ་རྒྱས་འདྲ་འཇིག་རྟེན་སྣང་མོད་ཀྱང་། །དོན་ལ་འཕེལ་འགྲིབ་གང་ཡང་མེད་པར་ལྟར། །རྟོགས་པའི་ངོ་མཐོང་གོམས་པའི་རྩལ་རྒྱས་ཀྱང་། །རྟོགས་པ་མི་གཡོ་གོམས་པའི་ཡོན་ཏན་འབྱུང་། །ཟླ་བ་གསལ་བས་གྲིབ་མ་ཆུང་བའམ། །ཁ་ཅིག་གྲིབ་མ་ཆུང་བས་ཟླ་རྒྱས་ལྟར། །གཉིས་འཛིན་བྲལ་བས་ཉམས་རྟོགས་འཕེལ་བ་འམ། །རྟོགས་པ་འཕེལ་བས་ཉོན་མོངས་ཆུང་གྱུར་ཏེ། །སྤངས་དང་རྟོགས་པའི་ཡོན་ཏན་མཐར་ཕྱིན་ཡང་། །ངོ་བོ་མི་འགྱུར་རང་བཞིན་མི་འགག་ཅིང་། །ཆོས་ཉིད་སྣ་ཚོགས་རྐྱེན་གྲོལ་རྣམ་པར་དག །མདོར་ན་ཉོན་མོངས་རྟོགས་པར་མ་ཤར་ན། །དུག་ལྔ་སྤངས་ནས་ལམ་མཆོག་གཞན་ན་མེད། །སྐུ་གཅིག་རང་གྲོལ་གསང་འདི་མ་ཤེས་ན། །ཉོན་མོངས་གཉེན་པོ་གཉིས་སུ་འཛིན་པས་བསླུ། །འགགས་ལ་གཟུང་འཛིན་རང་སར་མ་གྲོལ་ན། །ཁ་ལྟ་མཐོ་ཡང་བདུད་ཀྱི་གསང་ཚིག་(༡༡)ཙམ། །བསམ་གཏན་བཟང་ཡང་གོང་མའི་བདེ་འབྲས་ཙམ། །ཇི་ལྟར་འབད་ཀྱང་འཁོར་བའི་རྒྱུ་འབྲས་ཙམ། །ལྟ་བ་ཡང་ལ་སྒོམ་པ་ཁ་ཟླུམ་ཞིང་། །སྤྱོད་པ་དུལ་ཞིང་ཆེད་འཛིན་གྲོལ་བ་གཅེས། །གང་ལ་ཤར་གྲོལ་གཉིས་མེད་ཡངས་པའི་ངང་། །གཏད་མེད་ཆོས་ལ་ཡེངས་མེད་ཤར་བའི་ཚེ། །རྣལ་འབྱོར་སྲིད་པའི་རྒྱ་མཚོ་བརྒལ་བའི་རྟགས། །གཟུང་བས་མ་བཅིངས་འཛིན་པའི་ཞེན་པ་མེད། །ཐམས་ཅད་མཉམ་རྫོགས་ཆོས་སྐུར་བདེ་ཀློང་འཁྱིལ། །ལ་བརྒལ་ལུང་བརྒལ་འཕྲང་བརྒལ་འཇིགས་པ་མེད། །རང་ཡུལ་ཕྱིན་པས་རེ་དོགས་ཀུན་ལས་འདས། །དེ་ལྟར་གོམས་པས་འབྱུང་བ་རྣམ་པ་བཞི། །འཛིན་མེད་ལམ་གྱི་དྲོད་ཚད་འདི་བཞིན་འབྱུང་། །སྔོན་བསགས་ལས་དང་བླ་མའི་ཐུགས་རྗེ་དང་། །

དུས་ཐབས་མཁས་པས་རྟེན་འབྲེལ་ཚོགས་པའི་ཚེ། །རང་བྱུང་རིག་པ་ཟང་ཐལ་ཁ་གང་མ། །ཤར་གྲོལ་འཛིན་མེད་ལྷག་གིས་རྟོགས་པའི་ཚེ། །ཆོས་ཉིད་མངོན་སུམ་སྣང་བ་ཆེན་པོ་ཡིན། །ཕྱི་ནང་སྣང་བརྟགས་ཆོས་སྐུར་ཐག་ཆོད་པས། །ཇི་ལྟར་ཤར་ཡང་བླང་དོར་བཅོས་བསྒྱུར་མེད། །ཐམས་ཅད་རྟོགས་པའི་རྩལ་སྦྱོང་གཅིག་ཏུ་འཆར། །དེ་ཉིད་གོམས་པས་གོང་དུ་འཕེལ་བའི་ཚེ། །ཕྱི་ནང་དགག་སྒྲུབ་རྐྱེན་ངན་ལམ་དུ་བསླང་། །ཤར་བས་གྲོལ་ལ་གནས་པས་བདེ་བ་རྙེད། །གོམས་པས་སྤྱན་དང་མངོན་ཤེས་རྫུ་འཕྲུལ་སོགས། །རིག་པའི་ཡོན་ཏན་སྣ་ཚོགས་ཤར་བ་ན། །ཉམས་སྣང་གོང་འཕེལ་སྣང་བར་ཤེས་པར་བྱ། །དེ་ལས་ཆེས་ཆེར་གོམས་པ་ཀློང་གྱུར་པས། །རིག་པ་གསལ་སྟོང་རྗེན་པའི་ཡེ་ཤེས་ལ། །བྱིང་རྒོད་གཉིས་མེད་ཡེངས་དང་མ་ཡེངས་མེད། །མཉམ་རྗེས་གཉིས་མེད་རྟག་ཏུ་ཆུ་བོ་འདྲ། །ཡོན་ཏན་དྲོད་ཚད་ཁྱད་འཕགས་ཐོབ་པའི་ཚེ། །རིག་པ་ཚད་ཕེབས་སྣང་བ་མཐོང་བ་ཡིན། །དེ་ཉིད་ངང་ལས་རྟག་ཏུ་མི་གཡོ་ཞིང་། །མཚན་འཛིན་མི་དམིགས་སྤང་གཉེན་ཞེན་ཡུལ་འདས། །ཐམས་ཅད་མཉམ་རྫོགས་ཆེད་འཛིན་གཟའ་གཏད་བྲལ། །ཕྱི་ནང་ཆོས་ལ་འཛིན་པ་ཟད་པ་ན། །ཆོས་ཉིད་ཟད་པའི་སྣང་བ་མཐོང་བ་ཡིན། །དེ་ནས་རིག་པ་བཞི་ལ་མཐར་ཕྱིན་པས། །ཆོས་སྐུའི་ངང་དུ་གཟུགས་སྐུ་མྱ་ངན་འདས། །སྣང་འཛིན་སྟོང་པ་ལས་འདས་གྲོལ་བའི་ཚེ། །གདོད་མའི་ས་ལ་གཏན་སྲིད་ཟིན་པ་ཡིན། །དེ་ལྟར་གོམས་ཚེ་ལམ་ཉིད་མ་འཆུགས་པས། །རྨི་ལམ་ཚད་ཀྱང་རྣམ་པ་གསུམ་དུ་བསྟན། །དང་པོར་སྣང་སེམས་ཤར་གྲོལ་རྩལ་སྦྱངས་པས། །ངན་པའི་རྨི་ལམ་བཟང་པོར་བསྒྱུར་བ་ན། །ལས་ངན་བྱང་བས་དགེ་བ་རོ་གཅིག་རྟགས། །མེ་ལས་དུ་བ་ས་བོན་མྱུ་གུ་(༡༢)བཞིན། །བར་དུ་གོམས་པས་རྨི་ལམ་ཟིན་པ་དང་། །སྐད་ཅིག་གྲོལ་བས་དུས་མཉམ་འབྱུང་བ་ནི། །གཉེན་པོ་ཉིད་ཀྱང་རང་སར་གྲོལ་བའི་རྟགས། །ཀློང་དུ་གྱུར་པས་ཤིན་ཏུ་གོམས་པ་ནི། །རྨི་ལམ་རྒྱུན་ཆད་ཉིན་མཚན་འོད་གསལ་གནས། །འཁོར་བའི་ཀུན་རྟོག་དཔྱིས་སུ་ནུབ་པའི་རྟགས། །རང་བཞིན་མྱ་ངན་འདས་ནས་ཕྱམ་གཅིག་པས། །གདོད་མའི་ཟད་སར་གཏན་སྲིད་ཟིན་དུ་ཉེ། །ཁམས་གསུམ་སྒོ་གསུམ་སྐུ་གསུམ་སར་གྲོལ་ནས། །ཞི་བའི་དབྱིངས་སུ་མི་གནས་མྱ་ངན་འདས། །ཡེ་ནས་གྲུབ་བསལ་མེད་པའི་སེམས་ཉིད་ལ། །བཅོས་བསྒྱུར་གཉེན་པོ་མི་དགོས་གཉུག་མའི་ངང་། །ཕྱོགས་རིས་འཛིན་པ་ཀུན་ལས་གྲོལ་བས་ན། །སྒོམ་དང་བསྒོམ་བྱ་མེད་པར་ལྷུན་གྱིས་གྲུབ། །དེ་ལྟར་ཤེས་པ་ཐ་མལ་རང་གྲོལ་ལ། །ཕྱི་ནང་མི་དམིགས་གཟུང་འཛིན་མཐའ་ལས་འདས། །དགག་སྒྲུབ་རང་གྲོལ་སྤང་གཉེན་གཉུག་མར་ཤར། །གང་ཡིན་འདི་ཡིན་གཟའ་གཏད་མེད་པར་གྲོལ། །བླང་དོར་མི་དགོས་ཀུན་ཁྱབ་ཡེ་ཤེས་ནི། །ཕྱོགས་བྲལ་བདེ་ཆེན་མ་བཙལ་ལྷུན་གྱིས་གྲུབ། །ཡེ་གྲོལ་སོར་བཞག་ཡོངས་གྲོལ་ཆེན་པོ་ནི། །གང་ཡིན་འདི་ཡིན་ཀུན་ཡིན་ངོས་བཟུང་མེད། །གཏད་མེད་འཛིན་མེད་ཡོད་མེད་མཐའ་ལས་འདས། །ཀྱེ་ཧོ་ཕྱོགས་གཅིག་ཡེ་ནས་ཡོངས་གྲོལ་བས། །འབད་མེད་རིག་པ་མཉམ་པའི་ངང་དུ་གྲོལ། །ལྷུན་རྫོགས་རྒྱལ་པོ་མ་སྐྱེས་མི་འགག་པས། །མི་གནས་མི་དམིགས་རང་བཞིན་བརྗོད་དུ་མེད། །ཐམས་ཅད་བྱར་མེད་གཉུག་མའི་ངང་ཉིད་དོ། །ཨ་ཧོ། རང་བཞིན་གདོད་ནས་དག་པའི་སྣང་བ་ལ། །ཡ་མཚན་གད་མོ་འཆོར་བའི་རིག་པ་ཤར། །ཡུལ་སེམས་གཉིས་མེད་སྣང་མཁན་ངོ་བོས་སྟོང་། །འདི་ཞེས་མི་མཚོན་གཏད་མེད་ཆེན་པོར་གྲོལ། །ཐབས་དང་ཤེས་རབ་མཉམ་རྫོགས་གཅིག་གི་ངང་། །ཐམས་ཅད་མི་གཡོ་དེ་བཞིན་མཉམ་པར་གནས། །གཟའ་དང་རྒྱུ་སྐར་ཚེས་གྲངས་མི་དམིགས་ཤིང་། །དུས་དང་སྦྱོར་བ་བྱེད་པའི་ཡུལ་ལས་འདས། །གླིང་བཞི་མི་གནས་རི་རབ་ཉི་ཟླ་སྟོང་། །དཀྱིལ་འཁོར་མི་དམིགས་བཟླས་བརྗོད་དཀའ་ཐུབ་མེད། །ཡུལ་རྣམས་མི་དམིགས་རྩ་ཁམས་འཁོར་ལོར་སྟོང་། །ཕྱི་རོལ་ཉིད་ཀྱང་སྣང་བཞིན་མི་དམིགས་པས། །འཇིག་རྟེན་ཁམས་ཀུན་ཡུལ་ལྔ་ངོ་བོས་སྟོང་། །ཐམས་ཅད་མ་བྱུང་རང་བྱུང་གཞལ་ཡས་ཁང་། །བྱེད་པོ་མི་དམིགས་སྙིང་པོ་དོན་གྱི་ལྷ། །རྣམ་རྟོག་འཕྲོ་འདུ་ཡེ་ཤེས་རོལ་མོར་ཆེ། །ཡུལ་རྣམས་མཆོད་སྤྲིན་ཡེ་ཤེས་ལྷ་མཆོད་པས། །ཚོགས་ཆེན་ལྷུན་རྫོགས་སྒྲ་ཚིག་གསང་སྔགས་ཆེ། །ཉོན་མོངས་ཡེ་ཤེས་རང་བྱུང་རྫོགས་རིམ་ཉིད། །བྱ་རྩོལ་མི་དགོས་རང་བཞིན་ལྷུན་གྱིས་(༡༣)གྲུབ། །ས་དང་ལམ་རྫོགས་ཕ་རོལ་ཕྱིན་པའི་ངང་། །དབུ་མར་མི་གནས་ཟུང་འཇུག་རྣམ་པར་དག །སྤང་གཉེན་གོལ་སྒྲིབ་རྡུལ་ཙམ་མི་དམིགས་པས། །གང་ཤར་སྒོམ་པ་མ་བྱས་ལྷུན་གྱིས་གྲུབ། །རྣམ་པར་དབྱེ་དང་རྣམ་དབྱེ་མེད་པའི་ཆོས། །དཀར་ནག་དགེ་སྡིག་ལས་འབྲས་རྟེན་འབྲེལ་ཙམ། །རང་ངོས་སྟོང་ལ་གཟུགས་བརྙན་མི་འདོར་བས། །ཀུན་ནས་འདས་པའི་རང་གྲོལ་ཤེས་པར་བྱ། །བཟང་ངན་ལས་ཀྱིས་འཁོར་བ་མཐོ་དམན་གྲུབ། །ལས་ལས་འདས་ན་རང་བཞིན་མྱ་ངན་འདའ། །བླང་དོར་བྱེད་ན་མི་དགེ་ངེས་པར་གྲོལ། །དགེ་བ་སྒྲུབ་ཀྱང་ཞེན་པས་འཆིང་མི་བྱ། །ཕྱི་ནས་བླང་དོར་མེད་པའི་དོན་བཙལ་ལས། །དམ་པ་རྣམས་ལ་ཚད་བཙུགས་སྒྲུབ་ལ་འབད། །དོན་མེད་བསླུ་བ་བྱིས་པའི་ཆོས་སྤངས་ཏེ། །རྟག་ཏུ་སྐྱེ་བོ་དམ་པ་བསྟེན་པ་དང་། །རྟོགས་པའི་སྔོན་འགྲོ་མ་ནོར་ཐོས་བསམ་བྱ། །གཅིག་པུར་སྲན་ཚུགས་དབེན་པའི་རི་ངོགས་སུ། །སེམས་ཐག་བཅད་ལ་དོན་དམ་སྙིང་པོ་བླང་། །མི་རྟག་སྐྱོ་ཤས་བློ་སྣ་བསྟུང་བྱས་ལ། །སྙིང་ནས་ཆོས་ལ་འབད་པས་སྒྲུབ་པ་གཅེས། །ད་རེས་ཚེ་ལ་ཐར་ལམ་མ་བགྲོད་ན། །ཕྱིས་ནས་དལ་འབྱོར་ཆོས་དང་འཕྲད་པར་དཀའ། །སྒྲུབ་པའི་རྒྱལ་མཚན་དབེན་པའི་སར་བཙུགས་ནས། །ད་ལྟ་ཤི་ན་ཁྱེར་སོ་ཅི་འདུག་བལྟ། །དེ་ལྟར་ཉིན་མཚན་ཆོས་ཀྱིས་འདའ་བྱས་ན། །སྒྱུ་ལུས་འདོར་ཡང་སེམས་ཉིད་སྐྱེ་འཆི་མེད། །འགྱུར་མེད་ཆོས་སྐུའི་རྒྱལ་སྲིད་ཟིན་པ་ཡིན། །ཚེ་འདི་དོན་ཡོད་མཆོག་གི་དངོས་གྲུབ་བརྙེས། །དབང་པོ་འབྲིང་དང་ཐ་མའི་གང་ཟག་ཀྱང་། །བར་དོར་གྲོལ་ཞིང་ཕྱི་མ་འབྲས་དང་བཅས། །འཁོར་བའི་ལས་ལས་ཐར་པའི་ལམ་རྙེད་ནས། །བདེ་ཆེན་ས་ལ་སེམས་ཉིད་བཙན་ས་ཟིན། །འདི་ནི་ངེས་པ་དོན་གྱི་སྙིང་པོ་ཡིན། །ནོར་སའི་ལམ་ལ་ཕྱིན་ཞིང་གོལ་སྒྲིབ་མང་། །སྙིང་པོའི་དེ་ཉིད་ནམ་ཡང་མི་རྙེད་ཅིང་། །ཚེ་འདིར་ངལ་ལ་ཕྱི་མ་འབྲས་བུ་མེད། །དེས་ན་ལྟ་སྒོམ་མ་ནོར་བཙལ་བར་བྱ། །བྱམས་དང་སྙིང་རྗེ་བྱང་ཆུབ་སེམས་མེད་ན། །ཐེག་ཆེན་ལམ་ལས་གཞན་ཞིག་ཡིན་པར་ངེས། །ཇི་ཙམ་བསྒོམ་ཞིང་རང་རྒྱུད་གྱོང་བ་ན། །ཆོས་དང་གང་ཟག་སོ་སོར་སོང་བར་ངེས། །ཕྱི་དང་དངོས་དང་བར་བསྒོམ་ཞེན་པ་ན། །གཉིས་མེད་རྟོགས་པའི་སྐལ་བ་མེད་པར་ངེས། །ངེས་འབྱུང་སྐྱོ་ཤས་འཆི་བ་མ་དྲན་ན། །ཚེ་འདིར་ཞེན་པའི་བདུད་ཀྱིས་བསླུས་པར་ངེས། །བསྒོམས་ཀྱང་ཡོན་ཏན་གསར་དུ་མ་སྐྱེས་ན། །གོལ་སྒྲིབ་གཏིངས་སོགས་བྱིང་རྒོད་བྱུང་བར་ངེས། །ཞི་གནས་རླན་གྱིས་ལྷག་མཐོང་མ་ཟིན་ན། །ལྷག་མཐོང་མ་ཡིན་རྟོགས་པའི་རི་མོ་ཡིན། །གོ་ཡུལ་ཁ་ལྟས་གཉིས་མེད་དོན་སྨྲས་ཀྱང་། །(༡༤)རྐྱེན་ངན་མི་ཐུབ་དུག་ལྔ་རགས་པའི་གྲོགས། །ལྷག་མཐོང་རྩལ་གྱིས་ཞི་གནས་མ་ཟིན་ན། །ཞི་གནས་མ་ཡིན་གཏི་མུག་སེམས་གནས་ཙམ། །བསམ་གཏན་ཆགས་པ་ལེགས་ཀྱང་གོང་མའི་རྒྱུ། །བྱིང་རྒོད་ལྟོངས་པས་དུད་འགྲོའི་སྒོམ་པ་ལ། །རྟག་ཏུ་མ་ཆགས་ལྷག་མཐོང་ཡེ་ཤེས་རྩལ། །དམ་པས་བསྟན་པས་དྲི་མེད་རྟོགས་པའི་ཚེ། །སྒོམ་གྱི་ཚུལ་འཆང་ཐམས་ཅད་བྱང་ཆུབ་གྲོགས། །མ་བྱས་བདེ་གསལ་མི་རྟོག་ཁོང་ནས་འཆར། །དེ་ཉིད་མ་ཡིན་ངེས་པའི་སྙིང་པོ་མིན། །ད་ལྟ་རིག་པའི་གསང་འདི་མ་རྟོགས་ན། །སྒོམ་ལ་ཕར་འཆང་བླང་དོར་སྒྲོག་ཏུ་འཆིང་། །འདོད་པ་ཉུང་ལ་མི་འདོད་ཆར་བཞིན་འབབ། །རེ་བ་མི་འགྲུབ་དོགས་པས་རྒྱུན་དུ་གནོད། །ལུས་ངག་ཡིད་བཅོས་བདེ་གསལ་མི་རྟོག་ཀྱང་། །བྱིས་པས་བུམ་འཛིན་འཇིག་པས་ཕན་མི་ཐོགས། །མ་བྱས་མི་འཇིག་ཡོན་ཏན་འབྱུང་བའི་གནས། །རང་བབ་གཉུག་མའི་རྟོགས་པ་བཙལ་བ་གཅེས། །ལུས་བཅོས་ངག་བསྡམས་སེམས་བསྒྲིམས་རྣམ་རྟོག་བཀག །ཧར་རེ་སང་ངེ་རིག་པའི་མདུང་ཚུགས་ཀྱང་། །འཛིན་པའི་ངང་དུ་འདུ་ཤེས་ཚོར་བཀག་ནས། །བསམ་གཏན་གཟུགས་མེད་འཁོར་བ་སྒྲུབ་པར་སྣང་། །དབང་པོའི་སྣང་ཡུལ་རྟོག་མེད་གསལ་སྣང་དང་། །དུག་ལྔ་རང་གྲོལ་ཡེ་ཤེས་ཆེན་པོའི་ངང་། །བྱིང་རྒོད་གསེང་བ་ཕྲ་མོའི་རིག་པ་ལ། །སྤང་བྱར་ཞེན་པས་ཕྲ་རགས་སྦོམ་གསུམ་ཞེས། །མགྲིན་བཟང་རྣམས་ཀྱིས་སྤང་བའི་ཐབས་ལ་བརྩོན། །སྔ་མའི་ཤེས་པ་ཕྱི་མས་དྲན་བྱས་ཏེ། །ཚོར་ཙམ་ཉིད་ཀྱིས་གཉུག་མའི་དོན་མཐོང་ཞེས། །སྐྱེ་འགག་གྲངས་འདེབས་རྟོག་པའི་འཕྲོ་མཐུད་ལ། །གཉིས་མེད་དོན་དུ་འཛིན་པའི་སྒོམ་པ་འཁྲུལ། །ཅི་ཙམ་འབད་ཀྱང་རྟོག་པའི་དྲྭ་བ་ལས། །ཕྱི་མ་སྐྱེས་ཚེ་སྔ་མ་འགག་པའི་ཆོས། །གྲོལ་བར་ཞེན་པ་སྔ་ཕྱི་རང་གྲོལ་མིན། །ཐབས་ལམ་དབང་པོ་བདེ་བ་ལྷུར་ལེན་པ། །ཆགས་སྲེད་འཛིན་པས་ཕལ་ཆེར་ངན་སོང་རྒྱུ། །བདེ་འགྲོ་ཐོབ་ཀྱང་དམན་པའི་གནས་སུ་སྐྱེ། །རྣལ་འབྱོར་བརྒྱ་ལམ་འགའ་ཡི་ལམ་ཡིན་ཞེས། །གོལ་སྒྲིབ་ཤས་ཆེ་རྟོགས་པའི་དོན་མཐོང་དཀོན། །ཚོགས་གཉིས་བསྐྱེད་རྫོགས་ཡོད་མེད་རེས་འཇོག་ཅན། །ངེས་པའི་དོན་ཞེས་འབད་ཀྱང་བདེ་འབྲས་ཆུང་། །མཐོ་རིས་ཉིད་དེ་འཁོར་བ་ཆད་མི་ནུས། །མདོར་ན་སྐྱེ་བ་སྔོན་བསགས་སྐལ་བ་ཞན། །ལོག་གོལ་དམན་པའི་ལམ་ཞུགས་སྙིང་རེ་རྗེ། །ནམ་ཞིག་ཀུན་ཀྱང་ལེགས་པའི་མ་ནོར་ལམ། །ཇི་བཞིན་རྙེད་ནས་དེ་བཞིན་གྲོལ་བར་ཤོག །གང་ལ་མ་ནོར་སྟོང་ཉིད་སྙིང་རྗེ་ཆེ། །སྐད་ཅིག་གྲོལ་བ་རང་གནས་ཆོས་སྐུའི་ལམ། །འཆར་བ་ཤེས་རབ་(༡༥)ལྷག་མཐོང་རྗེན་པ་ཉིད། །གནས་པས་ཐབས་ཡིན་ཞི་གནས་མཉམ་པའི་ངང་། །རང་བབ་ཟུང་འཇུག་བཅོས་བསླད་ཀུན་དང་བྲལ། །འགྱུར་བས་ཡེངས་ལ་གནས་པས་རྣམ་པར་གནོན། །བྱིང་རྒོད་གཉིས་མེད་ཉོན་མོངས་རྩ་བྲལ་ངང་། །ཇི་ལྟར་ཤར་ཡང་རང་གྲོལ་ཆོས་སྐུ་ལ། །གང་ལྟར་གནས་ཀྱང་གཉིས་མེད་མཉམ་པའི་ངང་། །བླང་དོར་མི་དགོས་སེམས་ཉིད་རྣལ་མའི་དོན། །གཉུག་མའི་ངོ་བོ་ཆོས་ཉིད་ཡེ་ཤེས་ལ། །གོམས་པའི་རྩལ་སྦྱོང་རྒྱུན་ཆད་མེད་པར་མཛོད། །འདི་ནི་གནས་ལུགས་གཉུག་མའི་རང་གྲོལ་ཏེ། །མཆོག་གི་སྒོམ་པ་ཡང་ཟབ་བླ་ན་མེད། །སྙིང་པོའི་བཅུད་དྲིལ་ཡང་ནས་ཡང་བསྡུས་པ། །རྡོ་རྗེ་རྩེ་མོ་ཀུན་གྱི་སྙིང་པོ་ཡིན། །རྫོགས་པ་ཆེན་པོ་སེམས་ཉིད་རང་གྲོལ་ལས། དབང་པོ་འབྲིང་ཐབས་ལམ་གོམས་ཐོག་ནས་གྲོལ་བའི་ལེའུ་སྟེ་གཉིས་པའོ།། །།

གསུམ་པ། འབྲས་བུ་ལྷུན་གྲུབ་ཆེན་པོའི་ལེའུ།

འབྲས་བུ་ལྷུན་གྲུབ་གནས་སྐབས་མཐར་ཐུག་གཉིས། །གནས་སྐབས་ལྟ་བ་སྒོམ་པས་ཡོན་ཏན་ཐོབ། །ཉོན་མོངས་གཟུང་འཛིན་རང་སར་གྲོལ་བ་དང་། །ཕྱི་ནང་ཆོས་ལ་བསྟན་པ་ཐོབ་པ་དང་། །སྤྱན་དང་མངོན་ཤེས་རྫུ་འཕྲུལ་གྲུབ་པ་དང་། །རྟོགས་པ་གོང་འཕེལ་གཞན་དོན་སྙིང་རྗེ་འབྱུང་། །དེ་ཚེ་སྐད་ཅིག་རིག་པའི་ཡེ་ཤེས་ལ། །ཆ་ཡིས་དབྱེ་ན་ཡོན་ཏན་འདི་དག་གོ། །སྣང་བ་ཐབས་ཡིན་བསྐྱེད་རིམ་བསོད་ནམས་ཚོགས། །ཉོན་མོངས་ཀུན་རྟོག་གཟུང་བའི་རྟོག་པ་སྤང་། །སྟོང་པ་ཤེས་རབ་རྫོགས་རིམ་ཡེ་ཤེས་ཚོགས། །ཤེས་སྒྲིབ་ལྷན་སྐྱེས་འཛིན་རྟོག་རང་སར་གྲོལ། །སེར་སྣ་ཚུལ་འཆལ་ཁོང་ཁྲོ་ལེ་ལོ་གཡེངས། །ཤེས་འཆལ་མི་མཁས་ཉམ་ཆུང་མི་སྨོན་དང་། །རྨོངས་པའི་ཕྱོགས་བཅུ་རྣམ་པར་དག་པའི་ཆོས། །སྦྱིན་ཚུལ་བཟོད་བརྩོན་བསམ་གཏན་ཤེས་རབ་ཐབས། །སྟོབས་སྨོན་ཡེ་ཤེས་ཕ་རོལ་ཕྱིན་བཅུ་རྫོགས། །བླ་མའི་དྲིན་གྱིས་རྟོགས་པར་ཤར་བའི་ཚེ། །དགའ་བདེ་མཆོག་སྐྱེས་ས་རབ་དགའ་བ་སྟེ། །ཉོན་མོངས་རང་གྲོལ་དྲི་མ་མེད་པའི་ས། །བདེ་གསལ་མི་རྟོག་ཡེ་ཤེས་འོད་བྱེད་པ། །འཕྲོ་བའི་ཀུན་རྟོག་རང་གྲོལ་འོད་འཕྲོ་ཅན། །མཆོག་ལས་ཀུན་གྱི་ཡུལ་མིན་སྤྱད་དཀའ་བ། །རྟོགས་པ་མངོན་གྱུར་མངོན་དུ་གྱུར་པའི་ས། །འཁོར་བ་ལས་གྲོལ་རིང་དུ་སོང་བ་སྟེ། །རྟོགས་པ་མི་གཡོ་རི་རྒྱལ་མི་གཡོ་བ། །ཀུན་གྱི་མཆོག་ཡིན་ལེགས་པའི་བློ་གྲོས་ཅན། །ཡིད་མཁའ་ཁྱབ་པས་བཅུ་པ་ཆོས་ཀྱི་སྤྲིན། །བསོད་ནམས་ཡེ་ཤེས་རྣམ་དག་ཚོགས་སྦྱོར་ལ། །རྟོགས་པའི་དོན་མཐོང་གོམས་པས་མཐོང་གོམས་ཉིད། །གྲོལ་བའི་འབྲས་བུའི་ས་ཞེས་བརྗོད་པ་ཡིན། །དུག་གསུམ་གྲོལ་བ་སྡེ་སྣོད་གསུམ་ཚང་ཞིང་། །སྒོ་གསུམ་དག་པ་བསླབ་(༡༦)གསུམ་རྣམ་པར་དག །ཐམས་ཅད་གྲོལ་བྱ་དེ་ཉིད་སྤྱོད་པ་དང་། །རྟོགས་པའི་ཀློང་གྱུར་རྣལ་འབྱོར་བླ་ན་མེད། །རྒྱུད་སྡེ་བཞི་ཚང་རང་དོན་ཉན་རང་ལ། །གཞན་དོན་ཐེག་ཆེན་རྟོགས་པ་ཀྲི་ཡ་སྟེ། །གོམས་པས་ཨུ་པ་སྤྱོད་པས་ཡོ་གའོ། །ཐབས་དང་ཤེས་རབ་མཧཱ་ཨ་ནུ་ལ། །རང་རྫོགས་ཨ་ཏི་རིམ་དགུ་ཀུན་དང་མཐུན། །གཟུངས་དང་ཏིང་འཛིན་ཡེ་ཤེས་སྙིང་པོ་ཅན། །རང་གྲོལ་སྐད་ཅིག་དབྱེ་བ་གནས་པ་ནི། །ས་དང་ལམ་དང་སངས་རྒྱས་གོ་གཅིག་དོན། །གཉུག་མའི་ཡེ་ཤེས་སེམས་སངས་ཕྱག་རྒྱ་ཆེ། །མཉམ་རྫོགས་ལྷུན་གྲུབ་ཆེན་པོ་ཕྱམ་གཅིག་གོ། །མཐར་ཐུག་འབྲས་བུ་མི་གནས་གདོད་མའི་ངང་། །ཆོས་སྐུའི་ཞིང་ཁམས་བསམ་འདས་བརྗོད་དུ་མེད། །དབྱིངས་དང་ཡེ་ཤེས་རོ་གཅིག་གྱུར་པ་ན། །མངོན་པར་བྱང་ཆུབ་སྐུ་གསུམ་ལྷུན་གྱིས་གྲུབ། །ཕྲ་བའི་ཡེ་ཤེས་མཁའ་དབྱིངས་འཁྱིལ་པ་ལ། །ཐམས་ཅད་མཁྱེན་པའི་རང་བཞིན་འཆར་བཞིན་གནས། །གྲུབ་བསལ་མེད་པའི་ཆོས་ཉིད་ལྷུན་རྫོགས་དང་། །མ་སྐྱེས་མི་འགག་ནམ་མཁའི་རང་བཞིན་ནོ། །དེ་ལས་རྣམ་དག་སྟུག་པོ་བཀོད་པའི་ཞིང་། །རང་སྣང་འོད་གསལ་དཀྱིལ་འཁོར་ལྷུན་རྫོགས་ནས། །རིགས་ལྔ་ལྟོན་པ་མཚན་རྫོགས་འོད་ཟེར་འཕྲོ། །ཆོས་དབྱིངས་མེ་ལོང་མཉམ་ཉིད་སོ་སོར་རྟོག །བྱ་གྲུབ་ཡེ་ཤེས་ལྔ་ལྔའི་རང་བཞིན་ལས། །ཕྱོགས་བཅུ་དུས་བཞིའི་རང་སྣང་གདུལ་བྱའི་འཁོར། དཀྱིལ་འཁོར་རིགས་ལྔ་ཏིལ་གྱི་གོང་བུ་རྙེད། །སྟེང་འོག་ཕྱོགས་མཚམས་ནམ་མཁའ་ཁྱབ་པར་གནས། །སྒོ་དང་སྒོ་ཁྱུད་རྟ་བབ་མུ་ཁྱུད་སོགས། །སོ་སོའི་རིགས་དང་མཐུན་པར་རྣམ་པར་བཀྲ། །ཐམས་ཅད་ལྷུན་རྫོགས་དཀྱིལ་འཁོར་གཅིག་གི་ངང་། །མཉམ་རྫོགས་ཆོས་ཀྱིས་མཐའ་དབུས་མེད་པར་ཁྱབ། །དུས་གསུམ་དུས་མེད་ཀུན་ཏུ་བཟང་པོའི་དུས། །གཞི་རྫོགས་འཕོ་འགྱུར་མེད་པའི་ངང་ཉིད་དོ། །དེ་ལས་རང་བཞིན་སྤྲུལ་སྐུ་རིགས་ལྔའི་ཞིང་། །འོག་མིན་མངོན་དགའ་རིན་ཆེན་ཡོངས་གང་དང་། །པདྨ་བརྩེགས་དང་ལས་རབ་གྲུབ་པ་རུ། །སྟོན་པ་རིགས་ལྔ་ས་བཅུའི་འཁོར་རྣམས་ལ། །དུས་གསུམ་ཀུན་ཏུ་གཟུགས་བཟང་མེ་ལོང་སྟོན། །འོད་ཟེར་འཁྱིལ་པས་ས་བཅུའི་སྒྲིབ་སྦྱངས་ཏེ། །ཀུན་ཏུ་འོད་ལ་འཁོད་པའི་ཕྲིན་ལས་མཛད། །ཞིང་དེར་རྒྱལ་སྲས་དག་པའི་ཚོགས་ལ་སྣང་། །ལོངས་སྐུའི་ཞལ་ལས་འཕྲོས་པའི་འོད་ཟེར་ལས། །ལྷ་དང་ལྷ་མིན་མི་དང་དུད་འགྲོ་དང་། །ཡི་དྭགས་དམྱལ་བ་འཇིག་རྟེན་དྲུག་པོ་རུ། །བརྒྱ་བྱིན་ཐགས་བཟང་ཤཱཀྱ་ཐུབ་པ་དང་། །སེང་གེ་རབ་བརྟན་ཁ་འབར་དེ་བ་དང་། །ཨ་ཝ་གླང་མགོ་མཐུན་པའི་སྣང་གཟུགས་ཀྱིས། །(༡༧)མ་དག་དོན་མཛད་ཞི་བའི་དབྱིངས་སུ་བརྟེན། །སྣ་ཚོགས་སྤྲུལ་པ་བཟོ་དང་སྐྱེ་བ་དང་། །རྫིང་དང་ཟམ་པ་པདྨ་དཔག་བསམ་ཤིང་། །སྨན་དང་ནོར་བུ་སྒྲོན་མེ་ལ་སོགས་པ། །འགྲོ་བའི་བདེ་སྐྱིད་དགའ་བའི་གནས་མཛད་ནས། །མཐར་ཐུག་ངེས་པར་ལེགས་པའི་ཕྲིན་ལས་མཛད། །གདུལ་བྱ་ཟད་ནད་འདུལ་བྱེད་དབྱིངས་སུ་ནུབ། །དེ་ཡང་རྣམ་པ་གསུམ་དུ་ཤེས་པར་བྱ། །སྣ་ཚོགས་སྤྲུལ་དང་འགྲོ་འདུལ་ནུབ་པ་ནི། །ཆུ་སྣོད་མེད་པས་ཆུ་ཟླ་ནུབ་པ་བཞིན། །རང་བཞིན་རོལ་པའི་འཕྲོ་འདུ་རོལ་པ་ཙམ། །ནམ་ཞིག་གདུལ་བྱའི་སར་གནས་ཞི་བ་ན། །འདུལ་བྱེད་རང་བཞིན་སྤྲུལ་པའི་རིགས་ལྔ་ཡང་། །རང་སྣང་ལོངས་སྐུར་གཉིས་མེད་རང་ཐིམ་ནས། །གནམ་གང་ཟླ་བ་དབྱིངས་སུ་ནུབ་པ་བཞིན། །ཆོས་སྐུའི་དབྱིངས་སུ་རང་སྣང་ལོངས་སྐུ་ནུབ། །ཕྱི་རུ་མི་སྣང་རང་ངོར་དཀྱིལ་འཁོར་ཆེ། །སྔ་ཕྱི་འཕེལ་འགྲིབ་འཕོ་འགྱུར་མེད་པར་གནས། །འཕེལ་འགྲིབ་སྣང་བས་ཟླ་བ་མི་འཕྲོག་བཞིན། །ཡང་གཅིག་གདུལ་བྱ་ཡོད་ན་སྔོན་བཞིན་སྣང་། །འདི་དག་མཐར་ཕྱིན་གྲོལ་བའི་འབྲས་བུ་ཡིན། །རྫོགས་པ་ཆེན་པོ་སེམས་ཉིད་རང་གྲོལ་ལས། འབྲས་བུ་ལྷུན་གྲུབ་ཆེན་པོའི་ལེའུ་སྟེ་གསུམ་པའོ།། །།

དེ་ལྟར་ལེགས་བཤད་ཉི་མའི་སྙིང་པོ་འདི། །དྲི་མེད་འོད་ཟེར་ཤར་བས་སྣང་བར་བྱས། །དེང་སང་རྩོད་དུས་ལྟ་ངན་མུན་པས་བསྒྲིབས། །དེ་ཉིད་བསལ་ཕྱིར་ངེས་པའི་ལམ་འདི་བཀོད། །དགེ་བ་འདི་ཡིས་བདག་འདྲ་འགྲོ་བ་ཀུན། །མ་ལུས་ཕྱམ་གཅིག་གདོད་མའི་སར་གྲོལ་ནས། །སྤངས་དང་རྟོགས་པའི་ཡོན་ཏན་མཐར་ཕྱིན་ཏེ། །གཞན་དོན་ལྷུན་གྲུབ་ཆོས་ཀྱི་རྒྱལ་པོར་ཤོག །རྫོགས་པ་ཆེན་པོ་སེམས་ཉིད་རང་གྲོལ་ཞེས་བྱ་བ། དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་སམྦྷ་བས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་གྱི་མགུལ་ཨོ་རྒྱན་རྫོང་གི་གནས་མཆོག་དམ་པར་ཕྱི་རབས་ཀྱི་དོན་དུ་བཀོད་པ་རྫོགས་སོ།། །།དགེའོ།། །།

རྫོགས་པ་ཆེན་པོ་སེམས་ཉིད་རང་གྲོལ་གྱི་ལམ་རིམ་སྙིང་པོའི་དོན་ཁྲིད་ཅེས་བྱ་བ།

༄༅། །རྫོགས་པ་ཆེན་པོ་སེམས་ཉིད་རང་གྲོལ་གྱི་ལམ་རིམ་སྙིང་པོའི་དོན་ཁྲིད་ཅེས་བྱ་བ་བཞུགས་སོ། །

༄༅། །རྫོགས་པ་ཆེན་པོ་སེམས་ཉིད་རང་གྲོལ་གྱི་ལམ་རིམ་སྙིང་པོའི་དོན་ཁྲིད་ཅེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་གི་རང་བཞིན་ཡེ་ནས་མ་སྐྱེས་ཤིང་། །བརྗོད་མེད་བསམ་འདས་གཉིས་མེད་ཆོས་ཀྱི་སྐུ། །སེམས་ཉིད་རྒྱལ་པོ་རང་བྱུང་ཀུན་ཏུ་བཟང་། །གཞི་རྫོགས་འཕོ་འགྱུར་མེད་ལ་ཕྱག་འཚལ་ལོ། །རྣལ་འབྱོར་འབྲས་བུ་ཚེ་གཅིག་ངེས་པའི་ལུང་། །དམ་པ་རྣམས་ཀྱི་བྱིན་རླབས་མངོན་སུམ་པ། །གང་ཤར་རང་གྲོལ་སྤང་བླང་མེད་པའི་དོན། །ཁྲིད་(༡༨)དུ་བསྡེབས་ནས་བདག་གིས་བཤད་པར་བྱ། །

དེ་ལ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེ་བ་དེས། འགྲོ་བའི་ཁམས་དང་དབང་པོའི་རིམ་པར་བསྟུན་ཏེ། ཐེག་པའི་སྒོ་དང་ཆོས་ཀྱི་རྣམ་གྲངས་དཔག་ཏུ་མེད་པར་གསུངས་པའི་དོན། རིག་པ་བྱང་ཆུབ་ཀྱི་སེམས་སུ་འདུས་ཤིང་། དེ་ཉིད་ཉམས་སུ་ལེན་པའི་གདམས་པ་མང་ཡང་མཐར་འཛིན་གྱི་ཞེན་པས་བཅིངས་ཏེ་ཚེ་འདིར་གྲོལ་བའི་ལམ་ཉུང་བས། འདིར་བླང་དོར་གཞི་གྲོལ་ལ་སྐད་ཅིག་གིས་རྟོགས་པའི་ཐབས་མཆོག་ཏུ་གསང་བ་རྫོགས་ཆེན་སེམས་ཉིད་རང་གྲོལ་གྱི་གདམས་ངག་ཐེག་པ་ཀུན་ལས་འདས་པའི་རང་བཞིན་ངེས་པའི་བྱ་བ་ལ་གསུམ་ལས། བླ་མ་བརྒྱུད་པའི་རིམ་པ། དེ་ལས་བྱུང་བའི་གདམས་པ། རྩིས་ཆེ་བས་བཀའ་རྒྱས་གདབ་པའོ། །

དང་པོ་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ་ཆོས་སྐུ་ཀུན་ཏུ་བཟང་པོས། ལོངས་སྐུ་སྣང་བ་མཐའ་ཡས་ལ་གསུངས། དེས་སྤྲུལ་སྐུ་པདྨ་འབྱུང་གནས་ལ་གསུངས། དེས་མཁའ་འགྲོ་ཡེ་ཤེས་མཚོ་རྒྱལ་ལ་གསུངས། དེས་གུ་རུ་ཤཱི་ལ་མ་ཏི་ལ་གསུངས། དེས་མཁས་གྲུབ་བདེ་ལེགས་རྒྱ་མཚོ་ལ་གསུངས། དེས་ཆོས་རྗེ་སྨོན་ལམ་འོད་ཟེར་ལ་གསུངས། དེས་བདག་ལ་གནང་བའོ། །

གཉིས་པ་དེ་ལས་བྱུང་བའི་གདམས་པ་ལས། ཚེ་འདིར་ཉམས་ལེན་རང་གྲོལ་གྱི་གདམས་པ། བར་དོར་འཆར་གཞི་འོད་གསལ་གྱི་གདམས་པ། མཐར་ཕྱིན་འབྲས་བུའི་གདམས་པ་དང་གསུམ། དང་པོ་ལ་སྔོན་འགྲོ། དངོས་གཞི། རྗེས་གསུམ་ལས། སྔོན་དུ་འགྲོ་བའི་ཆོས་བདུན་གྱི། དང་པོར་བྱིན་རླབས་འཇུག་པ་བླ་མའི་ལམ་ཁྱེར་ནི། གདན་བདེ་བ་ལ་འདུག་སྟེ། སྐྱབས་སུ་འགྲོ་བ་དང་སེམས་བསྐྱེད་ནས། སྐད་ཅིག་གིས་རང་གི་སྤྱི་བོའི་གཙུག་ཏུ་པདྨ་དང་ཉི་ཟླའི་སྟེང་དུ་སློབ་དཔོན་ཆེན་པོ་པདྨ་འབྱུང་གནས་རྩ་བའི་བླ་མ་དང་ཐ་མི་དད་པ་མཚན་དང་དཔེ་བྱད་འབར་ཞིང་ཧེ་རུ་ཀའི་ཆ་བྱད་ཅན། སྐུ་མདོག་མཐིང་ག་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རིན་པོ་ཆེ་དང་རུས་པས་བརྒྱན་པའི་པང་དུ། མཁར་ཆེན་གཟའ་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། མཐའ་སྐོར་རྣམས་སུ་བརྒྱུད་པའི་བླ་མ་ཐམས་ཅད་དང་། སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་དཔའ་མོ་དཔག་ཏུ་མེད་པ་བསམས་ལ། ཡིད་ཀྱིས་ཕྱག་འཚལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་དང་། རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་རྣམས་བྱས་ལ། བླ་མ་རིན་པོ་ཆེ་བདག་གི་ལུས་ངག་ཡིད་གསུམ་གྱི་སྒྲིབ་པ་སྦྱོང་ཞིང་སྐུ་(༡༩)གསུང་ཐུགས་ཀྱི་དངོས་གྲུབ་ཐོབ་ནས། ཚེ་འདི་ཉིད་ལ་སངས་རྒྱས་ཐོབ་པར་བྱིན་གྱིས་བརླབ་ཏུ་གསོལ། ཞེས་པ་ལ་སོགས་པ་བརྗོད་པས། བླ་མ་རྣམས་ཀྱི་སྐུ་ལས་འོད་བྱུང་། བདག་དང་སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་སྒྲིབ་པ་དག །སྣང་སྲིད་ཐམས་ཅད་བླ་མའི་རང་བཞིན་དུ་གྱུར་ནས། དེ་ཐམས་ཅད་ཀྱི་སྐུ་གསུངས་ཐུགས་ཀྱི་འོད་ཟེར་བདག་གི་སྤྱི་བོ་ནས་ལུས་ཀྱི་ནང་དུ་ཞུགས་པས་བདེ་གསལ་རྣམ་པར་མི་རྟོག་པའི་ཡེ་ཤེས་སྐད་ཅིག་རང་གྲོལ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེས་པར་བསམ་ཞིང་། རླུང་དར་ཅིག་བཟུང་ནས་དམིགས་པ་རྒྱ་བསྐྱེད་ལ་བསྒོམ་མོ། །རྗེས་ལ་སྒྱུ་མའི་ངང་ནས་བསྔོ་བ་བྱའོ། །དེ་ལྟར་ཞག་བདུན་དུ་སྦྱངས་པས་བླ་མ་འགྲུབ་པའི་རྟགས་དང་བྱིན་རླབས་ཁྱད་པར་ཅན་གློ་བུར་དུ་འཇུག་པར་འགྱུར་རོ། །

གཉིས་པ་ཚོགས་ཆེན་གཉིས་རྫོགས་མཎྜལ་གྱི་ལམ་ཁྱེར་ནི། མདུན་གྱི་ནམ་མཁར་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་བསམས་ལ། མཎྜལ་ཚོམ་བུ་ཅི་འགྲུབ་ཏུ་བཀོད་ལ། གླིང་བཞི་འཇིག་རྟེན་ཁམས་མཚོན་པ་ཕྱོགས་བཅུའི་ཞིང་ཁམས་ཐམས་ཅད་རིན་པོ་ཆེ་སྣ་ཚོགས་ཀྱི་རང་བཞིན་ལ། ལྷ་དང་མིའི་འདོད་ཡོན་སྣ་ཚོགས་པས་གང་ཞིང་ཕྱི་ནང་གི་མཆོད་སྤྲིན་རྒྱ་མཚོས་བཀང་སྟེ། ལུས་ལོངས་སྤྱོད་དགེ་བའི་རྩ་བའི་བར་ཐམས་ཅད་མགྲོན་རྣམས་ལ་ཕུལ་བས་ཤིན་ཏུ་མཉེས་པར་བསམས་ལ། མཎྜལ་ཕུལ་བ་ལ་ཉིན་མཚན་བདུན་བརྩོན་པར་བྱའོ། །དེས་ནི་བསོད་ནམས་དང་ཡེ་ཤེས་ཚོགས་གཉིས་རྫོགས་ནས་རྟོགས་པ་ཁྱད་པར་ཅན་རྒྱུད་ལ་སྐྱེ་བའི་དགོས་པ་ཡོད་དོ། །

གསུམ་པ་སྒྲིབ་གཉིས་སྦྱོང་བ་ཡི་གེ་བརྒྱ་པའི་ལམ་ཁྱེར་ནི། སྐད་ཅིག་གིས་སྟོང་པའི་ངང་ལས་རང་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། རིན་པོ་ཆེས་བརྒྱན་ཅིང་སྐྱིལ་ཀྲུང་གིས་བཞུགས་པའི་ཐུགས་ཀར་པད་ཟླའི་དབུས་སུ་ཧཱུྃ་གི་མཐར་ཡི་གེ་བརྒྱ་པས་བསྐོར་བ་ལས་འོད་ཟེར་བྱུང་བས་བདག་དང་སེམས་ཅན་ཐམས་ཅད་ཀྱི་སྒྲིབ་པ་དག་པར་བསམ་ཞིང་། ཡི་གེ་བརྒྱ་པ་ཅི་འགྲུབ་བཟླས་པ་ཞག་བདུན་གྱི་བར་བྱའོ། །དེས་རྣམས་ངན་པའི་སྒྲིབ་པ་བྱང་ཞིང་། གནས་ལུགས་མྱུར་དུ་རྟོགས་པའི་དགོས་པ་ཡོད་དོ་། །

བཞི་པ་ངེས་འབྱུང་སྐྱོ་ཤས་སྐྱེས་པས་ཚེ་མི་རྟག་པའི་ལམ་ཁྱེར་ནི། དལ་འབྱོར་རིན་པོ་ཆེས་བརྒྱན་པའི་ཚེ་འདི་ཡང་མྱུར་དུ་མི་རྟག་འཇིག་པའི་ཆོས་ཅན་དུ་ངེས་ཏེ། ཕྱི་སྣང་བའི་ཡུལ་འདི་དག་ཀྱང་ལོ་དང་ཟླ་བ་ཞག་དང་དུས་ཀྱི་འགྱུར་ཞིང་མི་རྟག་ལ། སེམས་ཅན་ཐམས་ཅད་ཀྱང་འཆི་བ་ལས་མ་འདས། ཉེ་འབྲེལ་ཤི་བ་ཀུན་ལ་བསམ་པས་ཀྱང་རང་གི་ཚེ་མི་རྟག་རང་གི་ཉེ་བར་ལེན་པའི་ཕུང་པོ་འདི་ཡང་སོ་སོར་འབྲལ་ཞིང་གྱེས་ལ། ལྦུ་བ་རྡོས་(༢༠)པ་དང་འདྲ། དེ་རིང་སང་ཙམ་མི་འཆི་བའི་གདིང་མེད་ན། འཆི་ངེས་སྙམ་ནས། དེ་རིང་ནི་འཇིག་རྟེན་འདིའི་ཐ་མ་སྟེ། འབྱུང་བཞི་སྡུད་ཅིང་ལུས་སེམས་འབྲལ་བའི་ཚུལ་ཅན་ཡིན་ནོ་སྙམ་ནས་སྙིང་ནས་དུང་དུང་པ་ཞག་བདུན་བསྒོམས་པས། མི་རྟག་པ་རྒྱུད་ལ་སྐྱེ་ཞིང་བློ་སྣ་ཐུང་ངུར་བསྟུངས་པས་ཆོས་ལ་འཇུག་ཅིང་བརྩོན་པའི་དགོས་པ་ཡོད་དོ། །

ལྔ་པ་ལམ་གྱི་སྔོན་དུ་འགྲོ་བའི་སྐྱབས་འགྲོའི་ལམ་ཁྱེར་ནི། མདུན་གྱི་ནམ་མཁར་ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཡི་དམ་དཀྱིལ་འཁོར་གྱི་ལྷ་ཚོགས་དང་། ཉན་རང་དགྲ་བཅོམ་ལ་སོགས་པ་དཀོན་མཆོག་གསུམ་བསྒོམས་ལ། དེ་རྣམས་སངས་རྒྱས་མ་ཐོབ་ཀྱི་བར་དུ་མགོན་དུ་བཟུང་བའི་བསམ་པས་བླ་མ་སོགས་ལ་སྐྱབས་འགྲོ་ཅི་འགྲུབ་ཏུ་བརྗོད་པས། དེ་རྣམས་ཀྱིས་ཕ་མ་བུ་ཚ་ལ་བརྩེ་བ་བཞིན་ལྷག་པའི་ཐུགས་རྗེས་གཟིགས་པར་བསམ་ཞིང་། སྙིང་ཁོང་རུས་པའི་གཏིང་ནས་སྐྱབས་འགྲོ་བྱས་པས། སེམས་ཅན་ཐམས་ཅད་ཀྱང་དི་རི་རི་སྐྱབས་སུ་འགྲོ་བའི་རྗེས་ཟློས་བྱེད་པར་བསམ་ཞིང་ཞག་བདུན་འབད་དོ། །དེས་ནི་ཆོས་སྒྲུབ་པའི་བར་ཆད་ཞི་བ་དང་། རྟོགས་པ་གོང་ནས་གོང་དུ་འཕེལ་བའི་དགོས་པ་ཡོད་དོ། །

དྲུག་པ་ཆོས་ལམ་དུ་འགྲོ་བ་བྱང་ཆུབ་སེམས་ཀྱི་ལམ་ཁྱེར་ནི། དམྱལ་བ་ཚ་གྲང་། ཡི་དྭགས་བཀྲེས་སྐོམ། དུད་འགྲོ་བཀོལ་སྤྱོད། མི་སྐྱེ་རྒ་ན་འཆི། ལྷ་མ་ཡིན་འཐབ་རྩོད། ལྷ་འཆི་འཕོ་ལྟུང་བའི་སྡུག་བསྔལ་ལ་སོགས་པ་མདུན་དུ་བསམས་ལ། དེ་དག་གིས་སྡུག་བསྔལ་དུས་རྒྱུན་མྱོང་བ་ལ་བསམས་ཏེ་འཁོར་བའི་རང་བཞིན་སྡུག་བསྔལ་ལས་མ་འདས་ཤིང་། སེམས་ཅན་འདི་རྣམས་གཏན་དུ་འཁོར་བའི་སྡུག་བསྔལ་གྱིས་ཉམས་ཐག་པ་འདི་རྣམས་བདག་གི་དགེ་བའི་རྩ་བ་དང་། ལུས་ལོངས་སྤྱོད་ལ་སོགས་པས་གནས་སྐབས་བདེ་བ་དང་འཕྲད། སྡུག་བསྔལ་དང་བྲལ་ཉེ་རིང་ཆགས་སྡང་མེད་པའི་ཚད་མེད་པ་བཞི་ལ་གནས་ཤིང་། མཐར་ཐུག་སངས་རྒྱས་ཀྱི་གོ་འཕང་ཐོབ་པར་ཤོག་ཅིག་སྙམ་དུ་བསམ་ཞིང་། ངག་ཏུ་ཡང་སེམས་བསྐྱེད་པའི་ཆོ་ག་མདོར་བསྡུས་པ་ཙམ་བླངས་ཏེ། མགོན་པོ་སྲས་དང་བཅས་རྣམས་དགོངས། །ཇི་ལྟར་དུས་གསུམ་རྒྱལ་བ་རྣམས། །བྱང་ཆུབ་ཐུགས་ནི་བསྐྱེད་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །ཇི་ལྟར་གསུངས་པའི་བསླབ་པ་ཡང་། །རིམ་པ་བཞིན་དུ་ལེགས་སློབ་ཅིང་། །འགྲོ་བའི་སྡུག་བསྔལ་ཀུན་བཅོམ་སྟེ། །ཅི་བྱས་གཞན་དོན་འགྲུབ་པར་ཤོག །ཅེས་བརྗོད་ཅིང་འགྲོ་བའི་སྡུག་བསྔལ་བདག་གིས་བླང་ཞིང་། བདག་གི་བདེ་བ་སེམས་ཅན་ལ་སྦྱིན་པ་གཉིས་སྤེལ་མར་སྦྱངས་ཏེ། སྙིང་རྗེ་(༢༡)དུང་དུང་ཞག་བདུན་དུ་བསྒོམ་མོ། །དེས་ནི་ལུས་ངག་རྩོལ་བ་ཐམས་ཅད་གཞན་དོན་འབའ་ཞིག་ཏུ་འགྱུར་བས་ཐེག་པ་ཆེན་པོའི་ལམ་དུ་འགྲོ་བའི་དགོས་པ་ཡོད་དོ། །

བདུན་པ་གནས་ལུགས་རྟོགས་པ་བསྐྱེད་པ་ངེས་དོན་སྙིང་པོའི་ལམ་ཁྱེར་ལ། ཞི་གནས་བཙལ། ལྷག་མཐོང་བསྐྱེད། ཟུང་འབྲེལ་ངོས་བཟུང་བ་གསུམ་ལས། དང་པོ་ནི། སྐྱིལ་མོ་ཀྲུང་བཅས་ཏེ། སེམས་ཀྱི་རྟོག་པ་འདས་པ་འགགས། མ་འོངས་པ་མ་སྐྱེས། ད་ལྟར་ཤེས་པ་གང་ལའང་མི་རྟོག་པའི་ངང་ལ་མཉམ་པར་བཞག་པ་ལ་ཞག་བདུན་འབད་དོ། །དེས་ནི་ཐ་མལ་གྱི་ངན་རྟོག་སྒྲིབ་པར་འགྱུར་བ་རྣམས་མགོ་ནོན་པ་དང་། རིག་པ་དྭངས་སྙིགས་འབྱེད་པས་འཕྲལ་བྱུང་གང་ཤར་གྱི་ཤེས་པ་ངོས་ཟིན་སླ་བའི་དགོས་པ་ཡོད་དོ། །དེ་ནས་ལྷག་མཐོང་བསྐྱེད་པ་ནི། སེམས་ཀྱི་རྟོག་པ་སྣ་ཚོགས་སུ་འཕྲོ་བ་སྔོན་བས་རགས་པ་ལྟ་བུར་འཆར་བ་ལ་བརྟགས་ཏེ་འཕྲོ་བདོ་བའི་དུས་ཤིག་ལ། གང་ནས་བྱུང་བ་བཙལ་ཞིང་། ལུས་མགོ་མཇུག་ཕྱི་ནང་བར་གསུམ་དུ་རྟོག་ཅིང་། །རྟོག་པ་དེ་ཉིད་ཀྱང་དབྱིབས་ཁ་དོག་ངོས་བཟུང་བཙལ་བས་གང་ནས་ཀྱང་མ་བྱུང་བས་སྐྱེ་བ་མེད་པའི་སེམས་ཉིད་རྩ་བ་དང་བྲལ་བའི་ངང་དུ་རྟོགས་པར་འགྱུར་རོ། །དེ་ནས་རྟོག་པ་དེ་ཉིད་གནས་བདོ་བའི་ཚེ་ཕྱི་ནང་བར་གསུམ་གང་ན་གནས། ཁ་དོག་ངོས་བཟུང་ཅི་འདུག་བརྟགས་པས་འགག་མེད་གསལ་སྟོང་ཆེན་པོའི་སེམས་ཉིད་གཞི་གནས་རྣམ་དག་ཆེན་པོར་རྟོགས་པར་འགྱུར་རོ། །དེར་རྟོག་པ་དེ་ཉིད་ཐོལ་བྱུང་ཡང་གར་སོང་ཆ་མེད་དུ་ཡལ་ནས། འགག་པའི་ཚེ་གང་དུ་སོང་བརྟགས་ནས་ངོས་བཟུང་བས་རྗེས་མེད་རང་སར་གྲོལ་བའི་རིག་པ་ངོས་བཟུང་ལས་འདས་པའི་དོན་རྟོགས་པར་འགྱུར་རོ། །དེ་ནས་ཟུང་འབྲེལ་ངོས་བཟུང་བ་ནི། ལུས་སེམས་རང་བབས་སུ་བཞག་སྟེ། སེམས་དྲན་བསམ་ལས་འདས་པར། ཕྱམ་མེ། ལྷན་ནེ། ཡེར་རེ། ཝལ་ལེ་བའི་ངང་ལས་འདས་པའི་དྲན་རྟོག་འགྱུ་བྱེད་ཞི་བ་ཞི་གནས་རིག་གེ་གསལ་བ་ལྷག་མཐོང་། དེ་གཉིས་དུས་མཉམ་གཅིག་ཅར་དུ་འདུག་པ་ཟུང་འབྲེལ་ལོ། །དེས་ནི་ཐབས་དང་བཅས་པའི་བསམ་གཏན་ངོས་ཟིན་པའི་དགོས་པ་ཡོད་དོ། །དེ་དག་ལ་ཞག་རེ་བྱའོ། །

གཉིས་པ་དངོས་གཞི་ངོ་སྤྲད་པ་ནི། ཐམས་ཅད་ལུས་སེམས་ཁོང་གློད། ད་ལྟར་ཤེས་པ་སྐད་ཅིག་མ་འདིའི་སྟེང་དུ་ངོས་བཟུང་སྟེ། དེ་ཡང་ཕྱི་ནང་སྣོད་བཅུད་དང་། འཁོར་འདས་ཀྱི་ཆོས་ཐམས་ཅད་རང་གི་སེམས་ཀྱི་འཆར་ཚུལ་ཡིན་ཏེ། མདང་གི་རྨི་ལམ་བཞིན། སེམས་འདི་ཡང་ངོ་བོ་སྟོང་། རང་བཞིན་གསལ། མཚན་ཉིད་སྣ་ཚོགས་སུ་འཆར་བ་མེ་ལོང་གཡའ་དག་པའི་ནང་དུ་གཟུགས་སྣང་བ་དང་འདྲ་སྟེ། སྣང་ལ་ངོས་བཟུང་ཐམས་ཅད་(༢༢)དང་བྲལ་བས་ཡོད་མེད་སྤྲོས་པའི་མཐའ་ཐམས་ཅད་དང་བྲལ་བ་ཡིན་ཞིང་། དེའི་དོན་ཡང་ད་ལྟའི་སེམས་སྣ་ཚོགས་སུ་འཕྲོ་བ་འདི་ལས་ལོག་པའི་ཆོས་ཉིད་མེད་དེ། སློབ་དཔོན་ཆེན་པོའི་ཞལ་ནས། རྟོག་པ་དེ་ཉིད་ཆོས་ཉིད་ཡིན་ཤེས་ན། །ཆོས་ཀྱི་དབྱིངས་ཉིད་གཞན་དུ་སྒོམ་དུ་མེད། །རྟོགས་ཐབས་གྲོལ་ཐབས་ཤེས་པས་ཆོག །རྟོག་པ་ཁོ་ན་ཆོས་སྐུར་བས། །ལམ་མཆོག་འདི་ཉིད་ཁོ་ན་འཕགས། །སྣང་སྲིད་རྒྱ་ཐེག་ཀུན་བཟང་པ། །རྟོག་སྤང་མི་རྟོག་སྒོམ་ལོ་པ། །སྣང་སྲིད་དགྲ་ལྟར་གྲོལ་འཁྲུལ་ལྟུང་། །ཞེས་གསུངས་པས། ད་ལྟའི་ཤེས་པ་དེ་ཉིད་ལས་བཅས་བཅོས་མ་བྱེད་པར་ཁོང་ཀློད་སོར་བཞག་རང་བབས་སུ་ཐོང་ལ། རྟོག་པ་ཅི་ཤར་ཡང་དགག་སྒྲུབ་མ་བྱེད་པར་དེ་གའི་སྟེང་དུ་ཐ་མལ་རང་ལུགས་རྗེན་པར་ལྷོད་ཀྱིས་ཞོག་མཛོད། ངོ་བོ་མཐོང་གྲོལ། རང་བཞིན་ཤེས་གྲོལ། མཚན་ཉིད་རང་གྲོལ་དུ་གནས་པ་སེམས་ཀྱི་རང་བཞིན་ཡིན་ཏེ། དེ་ལྟར་གང་ཤར་བ་རྩིས་མེད་དུ་བསྐྱངས་པས། རིག་པའི་རང་བབས་ལ་སེམས་གནས། རང་རྫོགས་སུ་ཡོད་པ་ཤུགས་ལ་ཤར་དུས་དགག་སྒྲུབ་ཞེན་པའི་རྩིས་མི་གདབ་པར། བདེ་གསལ་མི་རྟོག་པའི་ཡེ་ཤེས་སྐད་ཅིག་རང་གྲོལ་གྱི་རིག་པ་འཕོ་འགྱུར་མེད་པའི་ངང་དུ་གནས་པ་ཡིན་ནོ། །ད་ལྟའི་ཤེས་པ་འདི་ཉིད་ལ་འདི་ཡིན་གྱི་དམིགས་གཏད་མ་འཛིན་པར། རིག་པ་ཁོ་རང་གི་རང་གྲོལ་བྱུང་བ་དང་ཞིག་པ་དུས་མཉམ། ཞིག་དུས་བཅོས་བསླད་མེད་པའི་ངང་ལ་ཕྱི་མའི་རིག་པ་མ་ཤར་གྱི་བར་ལ་ཞོག །ཤར་དུས་ངོས་བཟུང་མེད་པའི་རིག་པ་འཕྲོ་མ་མཐུད། ཡན་སྟབས་སུ་ཞོག །ཡེངས་སྟབས་སུ་སྐྱོངས། འཛིན་མེད་དུ་ཐོང་། སྣོད་ཞབས་རྡོལ་དུ་རྫས་བཅུག་པ་ལྟར། རིག་པ་ཟང་ཐལ་སྐད་ཅིག་མ་རང་གྲོལ་ཐལ་གྲོལ་འདི་ཡིན་གཟའ་གཏད་མེད་པའི་ངང་ལ་གོམས་པར་མཛོད། མདོར་ན་ཤར་གྲོལ་རང་བཅས་ཀྱི་ལྟ་སྒོམ་རང་ཤར་ཀློང་རྡོལ་དུ་བྱུང་བས་སྤང་གཉེན་རང་ཞིག་ལ་གྲོལ་བ་ཡིན་ནོ། །དེ་ལྟར་སྣང་སྲིད་ཆོས་ཉིད་དུ་ཤར་བས་སྒོམ་ལ་རྒྱུན་ཆད་མེད། རིག་སྟོང་འཛིན་མེད་དུ་གྲོལ་བས་ཉོན་མོངས་ཡེ་ཤེས་སུ་དག །ཡོན་ཏན་ལྷུན་རྫོགས་སུ་འདུག་པས་རྩོལ་སྒྲུབ་འབད་པ་ལས་འདས། ཐམས་ཅད་གནས་ལུགས་སུ་ཤར་བས་གོལ་སྒྲིབ་རང་སར་དག་པའི་ཆོས་ཉིད་རང་ལ་རྙེད་པ་ཡིན་ནོ། །དེ་བས་ན་ད་ལྟའི་དྲན་བསམ་སོ་མ་འདི་ཀུན་ཆོས་སྐུ་རང་ལུགས་ཀྱི་དགོངས་པ་ཡིན་ཏེ། སློབ་དཔོན་ཆེན་པོའི་ཞལ་ནས། བསམ་དུ་མེད་པའི་སེམས་ཉིད་ལ། །སྒོམ་ཡང་མ་སྒོམས་ཕྱམ་མེ་ཞོག །སྒོམ་ཡང་འགལ་མེད་ཁྲིལ་ལེ་ཞོག །ཡེངས་ཀྱང་མ་ཡེངས་ཙེན་ནེ་ཞོག །ཡེངས་ཀྱང་འགལ་མེད་ཁྲིལ་ལེ་ཞོག །བལྟ་ཡང་མ་བལྟ་(༢༣)ཅོག་གེ་ཞོག །བལྟས་ཀྱང་འགལ་མེད་ཅེ་རེ་ཞོག །འཕྲོ་ཡང་མ་འཕྲོ་ཧྲིག་གེ་ཞོག །འཕྲོས་ཀྱང་འགལ་མེད་འདི་གར་ཞོག །བསྡུ་ཡང་མ་བསྡུ་ཝལ་ལེ་ཞོག །བསྡུས་ཀྱང་འགལ་མེད་ཏིང་ངེ་ཞོག །སྒྲིམ་ཡང་མ་སྒྲིམས་ཁྲོལ་ལེ་ཞོག །བསྒྲིམས་ཀྱང་འགལ་མེད་བཏུད་དེ་ཞོག །བཅོས་ཀྱང་མ་བཅོས་ས་ལེ་ཞོག །བཅོས་ཀྱང་འགལ་མེད་སང་ངེ་ཞོག །སྒྲུབ་ཀྱང་མ་སྒྲུབས་རྩོལ་མེད་ཞོག །བསྒྲུབས་ཀྱང་འགལ་མེད་ལྷུན་གྱིས་ཞོག །དགག་ཀྱང་མ་དགག་རང་བྱུང་ཞོག །དགག་ཀྱང་འགལ་མེད་སྐྱེ་མེད་ཞོག །ཞུམ་ཀྱང་མ་ཞུམ་ཧུ་རེ་ཞོག །ཞུམ་ཀྱང་འགལ་མེད་ལྷན་ནེ་ཞོག །རྩོལ་ཡང་མ་རྩོལ་འབོལ་ལེ་ཞོག །རྩོལ་ཡང་འགལ་མེད་ཤུགས་འབྱུང་ཞོག །བཞག་ཀྱང་མ་བཞག་གཞི་བྲལ་ཞོག །བཞག་ཀྱང་འགལ་མེད་ལྷུག་པར་ཞོག །ཅེས་གསུངས་པས། ད་ལྟའི་ཤེས་པ་གང་ཤར་ལྷུན་རྫོགས་མ་བཅོས་པའི་རང་བབས་ལ་བཏང་བས་ཕྱི་ནང་གི་ཆོས་ཞེན་པ་འཛིན་པ་མེད་ཅིང་། རྟོག་པ་ལ་དགག་སྒྲུབ་མེད་པས་གཉིས་མེད་སེམས་ཀྱི་ངང་ལ་རྒྱུན་ཆད་མེད། རགས་པའི་རྟོག་པ་ཁ་ཡན་དུ་མ་ཤོར་བས་འདོད་པའི་སེམས་ལས་རྣམ་པར་གྲོལ། འཕྲོ་བའི་ཤེས་པ་རང་བབས་སུ་ཤར་བས་གཟུགས་དང་གཟུགས་མེད་ཀྱི་གོལ་ས་ཀུན་ལས་འདས། འདི་ཞེས་ཆེད་དུ་མི་འཛིན་པས་ཞི་གནས་ལྷུན་གྱིས་གྲུབ། སོ་མ་ཤུགས་འབྱུང་དུ་ཤར་བས་ལྷག་མཐོང་ལྷུན་གྱིས་གྲུབ། འཕྲོ་གནས་གཉིས་སུ་མེད་པས་ཟུང་འབྲེལ་ལྷུན་གྱིས་གྲུབ། སྐད་ཅིག་རང་སར་གྲོལ་བས་ཤེས་རབ་ལྷུན་གྱིས་གྲུབ། གནས་པ་མེད་པས་བསམ་གཏན་ལྷུན་གྱིས་གྲུབ། ཤར་གྲོལ་འཛིན་པ་མེད་པས་ཡེ་ཤེས་ལྷུན་གྱིས་གྲུབ་སྟེ། སྐྱོན་ཐམས་ཅད་འཛིན་པའི་ཆ་ལས་གྲུབ་པས་འཛིན་མེད་ཟང་ཁར་གྲོལ། ཡོན་ཏན་ཐམས་ཅད་ཡེ་ཤེས་རིག་པ་ལ་འཆར་བས་གོམས་པ་གོང་དུ་འཕེལ། སེམས་རང་ལུགས་སུ་རྫོགས་ཏེ་ཚེ་འདིར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་ཞེས་གསུངས་པའོ། །བཟོ་མེད་རིག་པ་ཤུགས་འབྱུང་ཟང་ཀ་མ། །གང་ཤར་ངང་ལ་རང་ཤར་ཆེན་པོར་ཞོག །གཏད་མེད་རྒྱལ་པོ་འཛིན་མེད་བློ་བདེ་བས། །སྐྱེ་མེད་ཆོས་སྐུའི་གཏན་སྲིད་ཟིན་པ་ཡིན། །ཞེས་ཐེབས་པར་གདབ་བོ། །

གསུམ་པ་རྗེས་ལ་རྩལ་སྦྱོང་། བོགས་དབྱུང་། གེགས་བསལ་བ་དང་གསུམ་ལས། རྩལ་སྦྱང་བ་ནི། ད་ལྟའི་ཤེས་པ་གང་ཤར་ངང་བབས་སུ་སྦྱངས་པ་དངོས་གཞི་མཉམ་པར་བཞག་པའི་ངང་ལས་རྗེས་ཐོབ་ཏུ། ཕྱི་སྣང་བ། ནང་རིག་པ། གོམས་པ་ཉམས་མྱོང་དང་བཅས་པ་ཐམས་ཅད་རྨི་ལམ་དང་། སྒྱུ་མ་དང་། སྨིག་རྒྱུ་དང་། ཆུ་ཟླ་དང་། སྤྲུལ་པ་ལྟ་བུ། སྣང་དུས་ཉིད་ནས་རང་བཞིན་མ་གྲུབ་(༢༤)པའི་དོན་ལ་ཝལ་ཝལ་རྩལ་སྦྱངས། དེས་ནི་ཆོས་ཐམས་ཅད་ལ་བདེན་ཞེན་གྲོལ་ནས་རྨི་ལམ་ནའང་འཛིན་མེད་ཆོས་སྐུའི་ངང་ལ་གནས་པ་འབྱུང་ངོ་། །ནད་དང་གདོན་ལ་སོགས་པའི་གེགས་བསལ་བ་ནི། ནད་གདོན་རྟོག་པའི་ཆོ་འཕྲུལ་ནི་བརྟག་ན་ཕྱི་ནང་བར་གསུམ་ན་མེད་པར་ངེས་པས། སྐྱེ་བ་མེད་པའི་ལམ་ཁྱེར་དུ་བྱུང་བ་དེ་དགའ་སྙམ་དུ་བསམས་ནས། ན་སར་བུ་ག་གཟེར་འབྱིན་བསྒོམ་ཞིང་། གདོན་ལ་བྱང་ཆུབ་ཀྱི་སེམས་དང་། རང་བཞིན་མེད་པའི་རྩལ་སྦྱང་བྱའོ། །དེས་ནི་ཞི་བར་ངེས་སོ། །དགེ་སྦྱོར་ལྟེངས་ཏེ་བོགས་མེད་ན། བླ་མ་ལ་གསོལ་བ་དྲག་ཏུ་གདབ། ངེས་འབྱུང་སྐྱོ་ཤས་དྲག་པོ་རྒྱུད་ལ་སྐྱེ། ཚོགས་ཀྱི་འཁོར་ལོ་ལ་སོགས་པ་བསོད་ནམས་ཀྱི་ཚོགས་བསག །བྱམས་སྙིང་རྗེ་བྱང་ཆུབ་ཀྱི་སེམས་བསྒོམ། དུར་ཁྲོད་ལུང་སྟོང་དང་རི་རྩེ་ལ་སོགས་རབ་ཏུ་དབེན་པའི་སར་སོང་སྟེ། བླ་མ་སྤྱི་བོར་བསྒོམས་ལ། ལུས་མཆོང་རྒྱུག །ངག་སྨྲ་བརྗོད། སེམས་དགག་སྒྲུབ་བདེ་སྡུག་གི་རྣམ་པ་སྣ་ཚོགས་སུ་སྤྲོས་ལ། སྐད་ཅིག་རང་གྲོལ་རང་བསྲེ་སྟེ་ཉིན་ཞག་དུ་མར་ཉམས་སུ་བླངས་པས་རྟོགས་པ་ཁྱད་པར་ཅན་རྒྱུད་ལ་སྐྱེ་བ་ཡིན་ནོ། །འདི་དག་ནི་གནད་མཐར་ཐུག་པའོ། །དེ་ལྟར་གོམས་པའི་རྣལ་འབྱོར་པ་ནི་སྐྱེ་ཤི་ལ་ཉམ་མི་ང་བའི་གདིང་ཐོབ་ནས་གཟུང་འཛིན་རང་སར་གྲོལ་བ་ན། ཚེ་འདིར་ཉིད་ལ་མཆོག་དང་ཐུན་མོང་གི་ཡོན་ཏན་དངོས་སུ་མཐོང་བ་ཡིན་ནོ། །འདི་དག་གི་དོན་རྒྱས་པར་བཤད་ན་མཐའ་ཡས་པས་ཉུང་ངུར་བསྡུས་ཏེ་བསྟན་པ་ཡིན་ནོ། །ཚེ་འདི་གྲོལ་བའི་གདམས་པ་བཤད་ཟིན་ཏོ།། །།

གཉིས་པར་བར་དོའི་འཆར་གཞི་འོད་གསལ་གྱི་གདམས་པ་ལ། སྔར་སྐྱེ་ཤི་བར་དོར་སྐད་ཅིག་རང་གྲོལ་གྱི་གནད་ལ་གོམས་པས་རྨི་ལམ་བར་དོའི་ནང་དུ་ཡང་འཛིན་མེད་ཡེ་གྲོལ་གནས་ལུགས་ཤར། རྣལ་འབྱོར་པ་འཆི་ཁར། ས་ཆུ་ལ་ཐིམ་པས་ལུས་ཀྱི་སྟོབས་ཉམས། ཆུ་མེ་ལ་ཐིམ་པས་གཤེར་བའི་ཆུ་རྣམས་སྐམ། མེ་རླུང་ལ་ཐིམ་པས་དྲོད་མཐའ་ནས་བསྡུ། རླུང་རྣམ་པར་ཤེས་པ་ལ་ཐིམ་པས་དབུགས་འགྱུ་བ་ཆད། གཟུགས་སྒྲ་ལ་ཐིམ་པས་མིག་གིས་གཟུགས་མི་མཐོང་། སྒྲ་དྲི་ལ་ཐིམ་པས་རྣ་བས་སྒྲ་མི་ཐོས། དྲི་རོ་ལ་ཐིམ་པས་སྣས་དྲི་མི་ཚོར། རོ་རེག་ལ་ཐིམ་པས་ལྕེས་རོ་མི་ཚོར། རེག་ཆོས་ལ་ཐིམ་པས་ལུས་ཀྱིས་རེག་བྱ་མི་ཚོར། ཆོས་སེམས་ལ་ཐིམ་པས་གཟུང་འཛིན་གྱི་རྣམ་རྟོག་རགས་པ་རྣམས་འགགས་ཏེ། དྲན་མེད་བརྒྱལ་བ་དང་ཆོས་མཚུངས། རྣམ་པ་ཤེས་པའི་ཚོགས་བརྒྱད་ཀུན་གཞིར་ཐིམ་པའོ། །བསམ་གཏན་ལ་བཞག་པའི་སྐད་ཅིག་ལ་རིགས་ལྔའི་སྐུར་གྲོལ་ནས་གདོད་མའི་སར་ཕྱིན་པ་ནི། ལྔ་ལྡན་དང་རྫོགས་ལྡན་ཆེན་པོའི་དགོངས་པར་སླེབ་པའོ། །དེ་ཡང་འོད་མཐིང་ག་ཆོས་ཀྱི་དབྱིངས་ཀྱི་ཡེ་ཤེས་སུ་ཤེས་པ་(༢༥)གཏད་མེད་དུ་ལྷན་ནེ་བཞག་པའི་སྐད་ཅིག་ལ་རང་རིག་རྣམ་པར་སྣང་མཛད་ཀྱི་སྐུར་གྲོལ། དེ་བཞིན་དུ་དཀར་པོ་ལ་མེ་ལོང་ཡེ་ཤེས་ཏེ་མི་བསྐྱོད་པ། སེར་པོ་ལ་མཉམ་པ་ཉིད་ཀྱི་ཡེ་ཤེས་ཏེ་རིན་ཆེན་འབྱུང་ལྡན། དམར་པོ་ལ་སོ་སོར་རྟོག་པའི་ཡེ་ཤེས་ཏེ་སྣང་བ་མཐའ་ཡས། ལྗང་གུ་ལ་བྱ་བ་གྲུབ་པའི་ཡེ་ཤེས་ཏེ་དོན་ཡོད་གྲུབ་པའི་སྐུར་སངས་རྒྱས་ནས། སྤྲུལ་པའི་འགྲོ་བའི་དོན་མཛད་དེ་གདོད་མའི་གཞིར་མངོན་པར་བྱང་ཆུབ་པའོ། །དེ་ཡང་སྔར་སྐད་ཅིག་རང་གྲོལ་གྱི་གནད་ལ་གོམས་དུས་རང་ཤར་རང་ངོ་ཤེས་པའི་ངང་ནས་བདེ་གསལ་མི་རྟོག་པའི་ཡེ་ཤེས་མ་བཙལ་ལྷུན་གྲུབ་ཏུ་གནས་པར་ངོས་ཟིན་པས་བར་དོའི་འོད་གསལ་འདྲེས་ཏེ་སྐད་ཅིག་རང་གྲོལ་ལ་སོང་བའོ། །དེའི་རིག་པའི་ངོ་བོ་སྟོང་པས་གང་ནའང་མི་གནས། རང་བཞིན་གསལ་བས་འཆར་གཞི་མ་འགག །མཚན་ཉིད་སྣ་ཚོགས་པས་གང་ཤར་ཕྱོགས་མེད་དུ་གྲོལ་བའི་ངང་ལ་གནས་པ་ནི་སུམ་ལྡན་ནོ། །དེ་ནས་འབྱུང་བཞི་ཐིམ་ཚུལ་གྱི་སྣང་བ་ཐ་དད་པ་ནི་བཞི་ལྡན་ནོ། །དེ་ནས་འོད་གསལ་ཡེ་ཤེས་ལ་འཇུག་པས་སྐུ་ལྔར་གྲོལ་བ་ནི་ལྔ་ལྡན་ནོ། །དེ་ནས་སྤྲུལ་པས་འགྲོ་དོན་མཛད་པ་ནི་རྫོགས་ལྡན་ནོ། །དེ་ནས་ལོངས་སྐུ་ཆོས་སྐུར་ཐིམ་ནས་ཆོས་ཉིད་འཕོ་འགྱུར་མེད་པའི་ངང་ལ་བཙན་ས་ཟིན་པས་ཆོས་སྐུ་མཉམ་རྫོགས་ཆེན་པོར་བཞུགས་པ་ནི་རྫོགས་ལྡན་ཆེན་པོའོ། །དེ་དག་གིས་འབྲིང་རྣམས་བར་དོར་གྲོལ་བའི་གདམས་པའོ། །ཞར་ལ་ཐ་མ་སྲིད་པའི་བར་དོ་ལ་ལས་ཀྱི་འཕྲོ་མཐུད་པ་ནི། བར་དོའི་འོད་གསལ་མ་ཟིན་ནས། དེ་ནས་བར་དོའི་ཡིད་ཀྱི་ལུས་ཅན་ཇི་ཙམ་གནས་པའི་ཡུན་བྱེད་སྔ་མའི་སྣང་བ་ལས་ཕྱེད་ཕྱི་མའི་སྣང་བ་འཆར་བས་དབང་པོ་ཀུན་ཚང་བ། ལས་ཀྱི་རྫུ་འཕྲུལ་གྱིས་གར་བསམ་དུ་ཕྱིན་པ། མངལ་གནས་དང་རྡོ་རྗེ་གདན་མ་གཏོགས་པ་ཐམས་ཅད་ཟང་ཐལ་བ། རྨི་ལམ་གྱི་སྣང་བ་འདྲ་བ། བདེ་སྡུག་གི་སྣང་བ་དུ་མ་འཆར་རོ། །ཡུན་ལ་ངེས་པ་མེད་དེ་ཁ་ཅིག་མྱུར་དུ་སྐྱེ་བ་ལེན་ལ། ཁ་ཅིག་ཞག་བཞི་བཅུ་ཞེ་དགུ་ལ་སོགས་པར་གནས་སོ། །དེའང་རང་ཉིད་ཤི་བར་ཤེས་པ་བྱུང་ནས་སྡུག་བསྔལ་སླར་སྐྱེའོ། །དེའི་ཚེ་སྔར་གྱི་གདམས་པ་དྲན་པས་སྣང་སེམས་འཛིན་མེད་ཆེན་པོར་རྩལ་སྦྱང་ཞིང་། བླ་མ་ལ་གསོལ་བ་བཏབ་པས་གྲོལ་བ་ཡང་ཡོད་དོ། །དེ་དུས་ཞིང་ཁམས་དག་པ་ཡིད་ལ་བྱེད་པ་དང་། བར་དོའི་སྣང་བ་བདེན་མེད་དུ་ཤེས་པ་དང་། དད་གུས་དྲན་པ་མཆོག་ཏུ་གཅེས་སོ། ཁ་ཅིག་དེའི་ཚེ་ཞིང་ཁམས་དག་པར་སྐྱེས་ནས་སངས་རྒྱས་པར་གསུངས་སོ། །རབ་ཀྱི་བདེན་མེད། འབྲིང་གིས་སྒྱུ་མ་ལྟ་བུའི་བསྐྱེད་རྫོགས་དང་ཞིང་དག་པ། ཐ་མ་མངའ་སྒོ་འདམ་པ་དང་གསུམ་ལ་བསླབ་བོ། །མངལ་སྒོ་འདམ་པ་ནི། ལྷ་ལ་སྐྱེད་མོས་ཚལ་དང་གཞལ་ཡས་ཁང་། ལྷ་(༢༦)མིན་ལ་འོད་ཀྱི་འཁོར་ལོ། མི་ལ་ཁང་བཟང་དང་ཀུན་དགའ་ར་བ་དང་སྐྱེ་བོ་མང་པོ། དུད་འགྲོ་ལ་ཕུག་རྡུགས་དང་སྤྱིལ་པོ། ཡི་དྭགས་ལ་གྲོག་པོ་ཕུག་རྡུག་དང་མི་གཙང་བའི་ཁྲོད། དམྱལ་བ་ལ་མུན་ནག་ཆར་འཐིབས་ལ་སོགས་པ་སྣང་བས། སྐྱེ་གནས་དེ་རྣམས་ལ་ཆགས་ཞེན་སྤངས་ཏེ། ལྷ་མི་ཁྱད་པར་ཅན་གྱི་མངལ་གནས་ལྷའི་གཞལ་ཡས་ཁང་དུ་བསམ་པའི་ནང་ཧཱུྃ་ལ་སོགས་པའི་ཡི་གེ་བསམ་པ་ལ་རང་རིག་ཞུགས་ཏེ། ཕྱི་མ་ལ་དམ་པའི་ཆོས་དང་འཕྲད་དེ་མཆོག་གི་དངོས་གྲུབ་ཐོབ་པར་བྱ་སྙམ་པས་རང་ཉིད་ཡི་དམ་གྱི་ལྷར་བསྒོམ་པ་ཙམ་གྱིས་ལྷ་མིའི་ལུས་དལ་འབྱོར་ཁྱད་པར་ཅན་དང་ལྡན་པར་སྐྱེས་ཏེ། བླ་མ་དགེ་བའི་བཤེས་གཉེན་དམ་པ་དང་མཇལ་ནས། ཚེ་དེ་ཉིད་ལ་མཆོག་གི་དངོས་གྲུབ་ཐོབ་པར་འགྱུར་རོ། །བར་དོའི་གདམས་པ་བཤད་ཟིན་ཏོ།། །།

གསུམ་པ་མཐར་ཕྱིན་འབྲས་བུའི་གདམས་པ་ནི། ཚེ་འདི་ཉིད་དམ་ཕྱི་མ་བར་དོ་གང་དུ་གྲོལ་ཡང་འབྲས་བུ་བླ་ན་མེད་པའི་སངས་རྒྱས་སུ་ངེས་ཏེ། སེམས་ཉིད་རང་གྲོལ་ནས་རྣམ་པར་དག་ཅིང་། འོད་གསལ་བའི་དོན་མངོན་དུ་གྱུར་པས་ཆོས་སྐུ་དྲི་མ་མེད་པའི་ངང་དུ་བཙན་ས་ཟིན་པར་འགྱུར་རོ། །དེའི་ཚེ་ནམ་མཁའ་ལ་ཉི་ཟླའི་དཀྱིལ་འཁོར་ཤར་བ་ལྟར། ཆོས་སྐུའི་ངང་ལས་ལོངས་སྐུ་ངེས་པ་ལྔ་ལྡན་གྱིས་ས་ལ་གནས་པའི་དོན་བྱེད་ཅིང་། སྤྲུལ་སྐུ་མ་ངེས་སྣ་ཚོགས་ཀྱིས་སེམས་ཅན་གྱི་དོན་ལྷུན་གྲུབ་ཏུ་འབྱུང་ངོ་། །ཁྱད་པར་དུ་བར་དོའི་རང་སྣང་འོད་གསལ་གཞི་ལ་རང་ངོ་ཤེས་ན་ཆོས་སྐུའི་སྟེང་དུ་བཙན་ས་ཟིན་ནས། དེའི་ངང་ལས་ལོངས་སྤྲུལ་གྱིས་འགྲོ་བའི་དོན་འབྱུང་ལ། ཡེ་ཤེས་ལྔ་ལྡན་གྱི་སྣང་བ་ལ་རང་ངོ་ཤེས་ན་ལོངས་སྐུའི་ངང་དུ་བཙན་ས་ཟིན། སྤྲུལ་པའི་སྐུས་སེམས་ཅན་གྱི་དོན་བྱས་ཏེ། སྤྲུལ་སྐུ་ལོངས་སྐུར་ཐིམ། ལོངས་སྐུ་ཆོས་སྐུར་ཐིམ་ནས་གདོད་མའི་གཞི་ལ་བཞུགས་ཏེ། དེའི་ངང་ལས་སྐུ་རྣམ་པ་གཉིས་མངོན་པར་སྣང་བས་སེམས་ཅན་གྱི་དོན་འབྱུང་བའོ། །སྤྲུལ་པའི་སྐུ་དང་ཞིང་ཁམས་དག་པར་རང་ངོ་ཤེས་ན་སྤྲུལ་སྐུ་ལོངས་སྐུ་སྣང་བ་དེ་ཉིད་ཆོས་སྐུར་ཐིམ་ནས་འགྲོ་བའི་དོན་འབྱུང་བའོ། །དེའང་ད་ལྟའི་རིག་པ་འདི་ཉིད་ལ་འཁོར་འདས་རང་རྫོགས་སུ་ཡོད་པས། རང་ངོ་མ་ཤེས་ན་འཁོར་བའི་སྣང་བ་རྨི་ལམ་ལྟར་མ་རིག་པའི་གཉིད་ཀྱི་ངང་ལ་བདེ་སྡུག་སྣ་ཚོགས་སུ་འཆར་ཞིང་ཁམས་གསུམ་རིགས་དྲུག་ཏུ་འཁྱམས་པའོ། །རང་ངོ་ཤེས་ཐོག་ཏུ་གོམས་པའི་ཚེ་མྱ་ངན་འདས་པའི་སྣང་བ་རྨི་ལམ་ལྟར་ལོངས་སྤྱོད་རྫོགས་སྐུའི་ཞིང་ཁམས་སྣ་ཚོགས་སུ་སྣང་བས་འགྲོ་བའི་དོན་རྨི་ལམ་ལྟར་མཛད་པའོ། །ཁ་དོག་གང་ལྟར་སྣང་དུས་ཉིད་ནས་བདེན་པར་མ་གྲུབ་པ་གཉིད་སད་པ་ལས་རྨི་ལམ་སངས་པས། ཉིན་སྣང་ལྟར་ཆོས་སྐུ་སྤྲོས་(༢༧)པ་དང་བྲལ་བའི་ངང་དུ་རོ་གཅིག་པའོ། །དེས་ན་ད་ལྟའི་རིག་པ་འདི་ཉིད་ངོ་བོ་སྟོང་པ། མ་རིག་ན་ཡིད་དང་གཟུགས་མེད་ཁམས་གསུམ་གཏི་མུག་གི་འཁྲུལ་པས་མི་རྟོག་པའོ། །རང་བཞིན་གསལ་བས་ངག་དང་གཟུགས་ཁམས་སུ་ཞེ་སྡང་གིས་འཁྲུལ་པའོ། །མཚན་ཉིད་སྣ་ཚོགས་པས་ལུས་དང་འདོད་ཁམས་འདོད་ཆགས་ཀྱིས་འཁྲུལ་པས་བདེ་བའི་རྣམ་ལྡན་ནོ། །དེར་བརྟེན་ལས་མི་དགེ་བས་ངན་སོང་། དགེ་བ་ཟག་བཅས་ཏིང་ངེ་འཛིན་དང་མ་འབྲེལ་བས་འདོད་པའི་ལྷ་དང་མི། ཏིང་ངེ་འཛིན་གསལ་བས་གཟུགས་ཁམས་དང་། གནས་པས་གཟུགས་མེད་དུ་འཁོར་ཞིང་གཏན་དུ་སྡུག་བསྔལ་བའོ། །ད་ལྟའི་རིག་པ་རང་ངོ་ཤེས་ཤིང་རིག་དུས། ངོ་བོ་སྟོང་པ་ཆོས་སྐུ་སྤྲོས་པ་དང་བྲལ་བ། རང་བཞིན་གསལ་བ་ལོངས་སྐུ་ངེས་པ་ལྔ་ལྡན་ནོ། །མཚན་ཉིད་སྣ་ཚོགས་སུ་སྣང་བས་སྤྲུལ་སྐུ་གདུལ་བྱ་དང་འཚམས་པར་སྣང་བས་འགྲོ་བའི་དོན་ལྷུན་གྲུབ་ཏུ་འབྱུངབའོ། །དེའང་ཆོས་སྐུ་ནི་ནམ་མཁའ་ལྟར་སྤྲོས་པའི་མཐའ་ཐམས་ཅད་དང་བྲལ་བའི་ངང་ནས། ལོངས་སྤྱོད་རྫོགས་པའི་སྐུའི་ཞིང་ཁམས་འོག་མིན་སྟུག་པོ་བཀོད་པར། སྟོན་པ་ལོངས་སྤྱོད་རྫོགས་པའི་སྐུ་ཞི་བ་དང་ཁྲོ་བོའི་སྐུ་མཚན་དང་དཔེ་བྱད་ཀྱིས་བརྒྱད་པས་རང་སྣང་གི་འཁོར་དང་ས་བཅུའི་སེམས་དཔའ་དཔག་ཏུ་མེད་པ་ལ་འཁོར་བ་མ་སྟོངས་ཀྱི་བར་དུ་ཐེག་པ་ཆེན་པོའི་ཆོས་ཀྱི་དགང་བའི་ཚིམ་པར་མཛད་ཅིང་། དེ་ལས་རྣམ་པར་འཕྲུལ་པའི་སྤྲུལ་པ་དཔག་ཏུ་མེད་པ་འཇིག་རྟེན་དྲུག་གི་ཕྱོགས་བཅུ་ཀུན་ཏུ་སེམས་ཅན་སོ་སོའི་སྣང་བ་དང་མཐུན་པའི་སྐུ་དང་གསུང་དང་ཐུགས་མི་ཟད་པས་ཇི་ལྟ་བ་དང་། ཇི་སྙེད་པ་མཁྱེན་ཏེ་སེམས་ཅན་གྱི་དོན་མཛད་ཅིང་། ཕྲིན་ལས་ཚད་མེད་པའི་ཐུགས་རྗེ་ཆེན་པོའོ། །དེ་ལྟར་སྣང་བའི་སངས་རྒྱས་ཀྱི་ཡེ་ཤེས་དང་། ངོ་བོ་ནང་གསལ་དུ་ལོངས་སྤྱོད་རྫོགས་པའི་སྐུའི་ཆེ་བ་ལྔ་དང་། རྣམ་པ་ཕྱིར་གསལ་དུ་སྤྲུལ་པའི་སྐུའི་ཆེ་བ་གཉིས་སོ། །ནང་གི་ལྔ་ནི་ཆོས་ཀྱི་དབྱིངས་དང་། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་སོ། །ཕྱི་གསལ་གྱི་གཉིས་ནི་ཆོས་ཅན་མ་འདྲེས་པ་སོ་སོར་མཁྱེན་པ་ཇི་སྙེད་མཁྱེན་པ་དང་། ཆོས་ཉིད་རོ་གཅིག་ཏུ་མཁྱེན་པ་ཇི་ལྟ་བ་མཁྱེན་པའི་ཡེ་ཤེས་སོ། །དེ་དག་གིས་ལམ་མཐར་ཕྱིན་པ་འབྲས་བུའི་འཆར་ཚུལ་གྱི་རིམ་པ་དང་བཅས་པ་བཤད་ཟིན་ཏོ། །

སྐལ་ལྡན་རྣམས་ཀྱི་ལམ་བཟང་ཤིང་རྟ་ཆེ། །གཉིས་མེད་རང་གྲོལ་གཉུག་མའི་ཡེ་ཤེས་ནི། །ད་ལྟའི་ཤེས་པ་རང་གྲོལ་སྐད་ཅིག་མ། །ཤར་གྲོལ་དུས་མཉམ་རང་གྲོལ་སྔ་ཕྱི་མེད། །གཟུང་བས་མ་བསླད་འཛིན་པས་མ་གོས་ཤིང་། །ཉོན་མོངས་གང་ཡིན་ཡེ་ཤེས་ཉིད་འཆར་བ། །བླ་མའི་དྲིན་གྱིས་བདག་ལ་བབ་པའི་ཚུལ། །(༢༨)ཕྱི་རབས་དོན་དུ་ཁྲིད་ཀྱི་ཡི་གེར་བསྡེབས། །སྲིད་ལས་ཐར་འདོད་རྣམས་ཀྱིས་བསྟེན་པར་འོས། །གང་ལ་སྤང་བླང་འདི་ཡིན་ཞེ་འདོད་ཡོད། །དེ་ལ་གཉིས་མེད་ཆོས་ཀྱི་སྐལ་བ་མེད། །ལམ་འདིར་ཐམས་ཅད་ཡེ་ཤེས་ཉིད་མྱོང་བས། །གཞིར་རྫོགས་ཆོས་སྐུའི་གཏན་སྲིད་ཟིན་པ་ཡིན། །གྲོགས་དག་མཐའ་བྲལ་སྙིང་པོའི་ཁང་བཟང་འདིར། །སེམས་ཉིད་དོན་གྱི་ལོངས་སྤྱོད་བླང་བར་གྱིས། །བདེ་ཆེན་འབྲས་བུ་ཚེ་འདིར་ཐོབ་པར་ངེས། །ཕྱི་ནས་གཞན་དོན་ངང་གིས་འགྲུབ་པར་འགྱུར། །བདག་ཅག་ཚེ་འདི་གཡོ་བའི་སྤྲིན་དང་འདྲ། །ལུས་ནི་ལྦུ་བ་བཞིན་ཏེ་སྙིང་པོ་མེད། །ཆོས་ཐོས་ཐོས་པ་སྒྲུབ་པ་ཤིན་ཏུ་དཀའ། །དེ་བས་མྱུར་དུ་བརྩོན་པའི་སྟོབས་སྐྱེད་ཅིག །ལེགས་སྦྱོར་མེ་ཏོག་འབྲས་བུ་དུས་སྨིན་པས། །འགྲོ་ཀུན་རྒྱལ་བའི་གོ་འཕང་ཐོབ་པར་ཤོག །གངས་རི་ཐོད་དཀར་ཨོ་རྒྱན་རྫོང་གནས་སུ། །དྲི་མེད་འོད་ཟེར་དབང་གིས་འདི་བཀོད་པའི། །དགེ་བས་སྲིད་གསུམ་མ་ལུས་ཕྱམ་གཅིག་ཏུ། །ཀུན་བཟང་ས་ལ་ལྷུན་གྱིས་གྲུབ་པར་ཤོག །རྫོགས་པ་ཆེན་པོ་སེམས་ཉིད་རང་གྲོལ་གྱི་ལམ་རིམ་སྙིང་པོའི་དོན་ཁྲིད་ཅེས་བྱ་བ། ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ། །ཤིན་ཏུ་གསང་བའི་མན་ངག་མངོན་དུ་ཕྱུངས་པ། སྐལ་ལྡན་གསུམ་ལས་མང་ན་མཁའ་འགྲོའི་ཆད་པ་འབྱུང་བས་དམ་པར་བྱའོ། །དཔལ་མགོན་ལེགས་ལྡན་ནག་པོ་དང་། སྔགས་ཀྱི་སྲུང་མ་ཨེ་ཀ་ཛ་ཊཱི་དང་། གཟའི་དགེ་བསྙེན་རཱ་ཧུ་ལས་བཀའ་འདི་དམ་པར་སྲུངས་ཤིག །དགེའོ།། །།

སེམས་ཉིད་རང་གྲོལ་གྱི་གསོལ་འདེབས།

༄༅། །སེམས་ཉིད་རང་གྲོལ་གྱི་གསོལ་འདེབས་ཞེས་བྱ་བ་བཞུགས་སོ། །

༄༅། །སྐྱབས་སུ་འགྲོ་བ་ནི། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་དྲུག་གུས་པས་སྐྱབས་སུ་མཆི། །སེམས་བསྐྱེད་པ་ནི། མགོན་པོ་སྲས་དང་བཅས་རྣམས་དགོངས། །ཇི་ལྟར་དུས་གསུམ་རྒྱལ་བ་རྣམས། །བྱང་ཆུབ་ཐུགས་ནི་བསྐྱེད་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །ཇི་ལྟར་གསུངས་པའི་བསླབ་པ་ལ། །རིམ་པ་བཞིན་དུ་ལེགས་སློབ་ཅིང་། །འགྲོ་བའི་སྡུག་བསྔལ་ཀུན་བསལ་ཏེ། །ཅི་བྱས་གཞན་དོན་འགྲུབ་པར་ཤོག །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ལོངས་སྐུ་སྣང་མཐའ་ཡབ་ཡུམ་ལ་གསོལ་བ་འདེབས། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། སྤྲུལ་སྐུ་ཨོ་རྒྱན་ཡབ་ཡུམ་ལ་གསོལ་བ་འདེབས། ༀ་ཨཱཿཧཱུྃ་བཛྲ༴། རྒྱལ་སྲས་དྲི་མེད་འོད་ཟེར་ལ༴།(༢༩) ༀ་ཨཱཿཧཱུྃ་བཛྲ༴། མཁས་གྲུབ་བདེ་ལེགས་རྒྱ་མཚོ་ལ༴། ༀ་ཨཱཿཧཱུྃ་བཛྲ༴། བྱ་བཏང་མ་ཏི་མངྒ་ལ༴། ༀ་ཨཱཿཧཱུྃ་བཛྲ༴། བྱང་སེམས་གུ་ཎ་ཤྲཱི་ལ༴། ༀ་ཨཱཿཧཱུྃ་བཛྲ༴། སྤྲུལ་སྐུ་བསམ་གྲུབ་རྒྱལ་པོ་ལ༴། ༀ་ཨཱཿཧཱུྃ་བཛྲ༴། འཁྲུལ་ཞིག་ནམ་མཁའ་གཞོན་ནུ་ལ༴། །ༀ་ཨཱཿཧཱུྃ་བཛྲ༴། རྒྱལ་སྲས་ཆོས་དབྱིངས་རྡོ་རྗེ་ལ༴། །ༀ་ཨཱཿཧཱུྃ་བཛྲ༴། མཁས་གྲུབ་བློ་གྲོས་རྒྱལ་མཚན་ལ༴། ༀ་ཨཱཿཧཱུྃ་བཛྲ༴། དྲིན་ཆེན་རྩ་བའི་བླ་མ་ལ༴། ༀ་ཨཱཿཧཱུྃ༴། ཡི་དམ་དཀྱིལ་འཁོར་ལྷ་ཚོགས་ལ༴། ༀ་ཨཱཿཧཱུྃ༴། བཀའ་སྲུང་མཁའ་འགྲོ་ཆོས་སྐྱོང་ལ༴། ༀ་ཨཱཿཧཱུྃ་བཛྲ༴། བླ་མ་རིན་པོ་ཆེ་བདག་གི་ལུས་ངག་ཡིད་གསུམ་གྱི་སྒྲིབ་པ་བྱང་ཞིང་། སྐུ་གསུང་ཐུགས་ཀྱི་དངོས་གྲུབ་ཐོབ་ནས་ཚེ་འདི་ཉིད་ལ་སངས་རྒྱས་ཐོབ་པར་བྱིན་གྱིས་བརླབ་ཏུ་གསོལ། ཞེས་བརྗོད། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཕྱོགས་བཅུ་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་ཐུགས་ཡེ་ཤེས་གངས་ཅན་མཚོ་ལས་ལྷུན་གྱིས་གྲུབ་པའི་རང་བཞིན། རྒྱལ་སྲས་པདྨ་འབྱུང་གནས་ཀྱི་ཞབས་ཀྱི་པདྨོ་དྲི་མ་མེད་པ་ལ་དུས་གསུམ་ཐམས་ཅད་དུ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། མགོན་པོ་གདོད་ནས་རྫོགས་སངས་རྒྱས། །བདེ་ཆེན་ཡོན་ཏན་འབྱུང་བའི་མཛོད། །སངས་རྒྱས་ཀུན་གྱི་བླ་མ་མཆོག །ཀུན་བཟང་ཡབ་ཡུམ་ལ་ཕྱག་འཚལ། །རིགས་ལྔ་ཡེ་ཤེས་ལྔ་ཡི་དངོས། །རྡོ་རྗེ་འཆང་གི་ངོ་བོ་ཉིད། །ཞི་དང་ཁྲོ་ཚུལ་དཔག་མེད་སྟོན། །སྣང་མཐའ་ཡབ་ཡུམ་ལ་ཕྱག་འཚལ། །བདེ་གཤེགས་རྒྱ་མཚོའི་རྣམ་འཕྲུལ་ལས། །རང་བྱུང་གེ་སར་པདྨའི་སྟེང་། །མཚན་རྫོགས་དཔེ་བྱད་འབར་བའི་སྐུ། །པདྨ་འབྱུང་གནས་ལ་ཕྱག་འཚལ། །ངོ་བོ་ཡེ་ནས་ཀུན་ཏུ་བཟང་། །རང་བཞིན་བདེ་གཤེགས་འོད་དཔག་མེད། །ཐུགས་རྗེ་པདྨར་སྐུ་སྤྲུལ་པ། །ཤཱཀྱ་སེང་གེ་ལ་ཕྱག་འཚལ། །སྐུ་གསུམ་མཛད་པའི་ཕྲིན་ལས་ཀྱིས། །གདུལ་བྱའི་རེ་བ་རྣམས་སྐོང་ཞིང་། །མཁའ་འགྲོ་འབར་བའི་སྤྲིན་འཕྲོ་བ། །པདྨ་རྒྱལ་པོ་ལ་ཕྱག་འཚལ། །ཇི་སྙེད་ཇི་བཞིན་ཐམས་ཅད་མཁྱེན། །སྣ་ཚོགས་ཆོས་ཀྱི་རྔ་སྒྲ་ཡིས། །བདུད་དང་མུ་སྟེགས་ཚར་གཅོད་པ། །བློ་ལྡན་མཆོག་སྲེད་ལ་ཕྱག་འཚལ། །ཀུན་མཁྱེན་ཡེ་ཤེས་གངས་རི་ལ། །རྣམ་གྲོལ་མཆོག་གི་གོ་འཕང་བརྙེས། །དཔག་མེད་འཁོར་གྱི་ཚོགས་ནང་དུ། །སེང་གེའི་སྒྲ་སྒྲོགས་ལ་ཕྱག་འཚལ། །ཐུགས་རྗེའི་ཆར་སྤྲིན་རོལ་པ་ལས། །ཕན་བདེའི་གློག་ཕྲེང་ཆར་འབེབས་ཤིང་། །འགྲོ་བློའི་ཕུན་ཚོགས་རྒྱས་བྱེད་པ། །པདྨ་སམྦྷ་ལ་ཕྱག་འཚལ། །མཁྱེན་བརྩེའི་འོད་སྟོང་དཀྱིལ་འཁོར་གྱིས། །གསུང་རབ་པདྨོ་རྒྱས་མཛད་ཅིང་། །འགྲོ་བའི་ལམ་ཡང་དཀར་པོར་མཛད། །ཉི་མ་འོད་ཟེར་ལ་ཕྱག་འཚལ། །རྣམ་འཕྲུལ་(༣༠)དྲག་པོས་འདུལ་བ་ལ། །འཇིགས་རུང་གར་དགུའི་ཉམས་ལྡན་ཞིང་། །ལྷ་སྲིན་གདུག་པ་ཚར་གཅོད་པའི། །པདྨ་ཐོད་ཕྲེང་ལ་ཕྱག་འཚལ། །མཁའ་འགྲོ་འབར་བའི་སྤྲིན་ཕུང་ལས། །དངོས་གྲུབ་བདུད་རྩིའི་ཆར་འབེབས་ཤིང་། །བདེ་ཆེན་རྒྱལ་བ་མཉེས་མཛད་ཡུམ། །མཁར་ཆེན་མཚོ་རྒྱལ་ལ་ཕྱག་འཚལ། །ཤེས་བྱའི་དཀྱིལ་འཁོར་རབ་གཟིགས་ཤིང་། །དམ་ཆོས་རིན་ཆེན་མཛོད་འཛིན་པས། །ཟབ་མོའི་དགོངས་གཏེར་རྒྱས་མཛད་པ། །དྲི་མེད་འོད་ཟེར་ལ་ཕྱག་འཚལ། །ལྟ་སྤྱོད་ཟུང་དུ་འཇུག་པ་ཡིས། །རིག་འཛིན་མཆོག་གི་དངོས་གྲུབ་བརྙེས། །བླ་མེད་སྙིང་པོའི་བསྟན་པ་འཛིན། །བདེ་ལེགས་རྒྱ་མཚོ་ལ་ཕྱག་འཚལ། །བསྟན་པའི་གདུང་འཛིན་འགྲོ་བའི་ཡབ། །རྟོགས་པ་ཕུལ་ཕྱིན་བྱང་སེམས་ལྡན། །འགྲོ་རྣམས་སྨིན་གྲོལ་ལམ་ལ་འགོད། །མ་ཏི་མངྒ་ལ་ཕྱག་འཚལ། །སྔོན་སྦྱངས་སྨོན་ལམ་སྟོབས་ཆེན་གྱིས། །སྟོང་ཉིད་སྙིང་རྗེའི་དོན་རྟོགས་ནས། །འགྲོ་ཀུན་བརྩེ་བས་འདྲེན་པའི་དཔལ། །གུ་ཎ་ཤྲཱི་ལ༴། །མདོ་རྒྱུད་དགོངས་པ་ཐུགས་ཆུད་ཅིང་། །བསླབ་གསུམ་གྱིས་བརྒྱན་རྟོགས་པ་འབར། །སངས་རྒྱས་བསྟན་པའི་སྙིང་པོ་འཛིན། །སྤྲུལ་སྐུ་བསམ་རྒྱལ་ལ༴། །རྣལ་གྲོལ་ཆོས་དབྱིངས་མཉམ་ཉིད་དང་། །ཟག་མེད་ཡེ་ཤེས་འོད་གསལ་མཆོག །ཉིན་དང་མཚན་མོ་དབྱེར་མེད་པའི། །ནམ་མཁའ་གཞོན་ནུ་ལ༴། །གདོད་ནས་ལྷུན་གྲུབ་ཆོས་སྐུའི་ངང་། །གཟུགས་སྐུར་རོལ་པ་སྒྱུ་མའི་སྐུ། །སྣ་ཚོགས་ཐབས་ལྡན་འགྲོ་ཀུན་སྒྲོལ། །མཁའ་ཀློང་ཡངས་པ་ལ༴། །སྟོང་ཉིད་ཟབ་མོ་འདི་ཉིད་ལ། །མི་ཤེས་རང་བློས་བཅིངས་པ་ཀུན། །ཡེ་ཤེས་རིག་པའི་རལ་གྲིས་གཅོད། །མ་ཏི་དྷྭ་ཛ་ལ༴། །སྔོན་སྦྱངས་སྟོབས་ཆེན་ལས་འཕྲོ་ཡིས། །བླ་མེད་རྡོ་རྗེ་སྙིང་པོའི་དོན། །འབད་རྩོལ་མེད་པ་ལྷུན་གྱིས་གྲུབ། །རྩ་བའི་བླ་མ་ལ་ཕྱག་འཚལ། །ངང་ཉིད་ཆོས་དབྱིངས་རོལ་པ་ལས། །སྣ་ཚོགས་ཐབས་ཀྱི་རྣམ་འཕྲུལ་གྱིས། །ཕྲིན་ལས་རྣམ་བཞིས་ལས་མཛད་པ། །མཁའ་འགྲོ་དམ་ཅན་ལ༴། །གཞན་ཡང་ཕྱོགས་བཅུའི་རིག་འཛིན་དང་། །བདེ་གཤེགས་ཆོས་དང་འཕགས་པའི་ཚོགས། །མཁའ་འགྲོ་བདེ་ཆེན་རྒྱ་མཚོ་དང་། །མཆོད་འོས་ཀུན་ལ་བདག་ཕྱག་འཚལ། །དགེའོ།། །།

རྫོགས་ཆེན་པོ་ཆོས་ཉིད་རང་གྲོལ།

དང་པོ། གཞི་རྟོགས་པས་གྲོལ་བའི་ལེའུ།

༄༅། །རྫོགས་པ་ཆེན་པོ་ཆོས་ཉིད་རང་གྲོལ་ཞེས་བྱ་བ་བཞུགས་སོ། །

༄༅། །རྒྱ་གར་སྐད་དུ། མཧཱ་སནྡྷི་དྷརྨ་དྷཱ་ཏུ་ཨཱཏྨ་ཀོ་ནཱ་མ། བོད་སྐད་དུ། རྫོགས་པ་ཆེན་པོ་ཆོས་ཉིད་རང་གྲོལ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་མ་སྐྱེས་འོད་གསལ་མཉམ་པའི་ངང་། །སེམས་ཉིད་མི་གཡོ་འཛིན་མེད་ཡངས་པ་ཆེ། །སྐུ་གསུམ་ལྷུན་གྲུབ་བདེ་ཆེན་འོག་མིན་ནས། །གཞི་རྫོགས་འཕོ་འགྱུ་མེད་ལ་ཕྱག་འཚལ་ལོ། །བདག་དང་འགྲོ་ཀུན་སེམས་ཉིད་སངས་རྒྱས་ཀྱང་། །མ་རིགས་དབང་གིས་སྲིད་པའི་དགོན་པར་འཁྱམས། །དེ་(༣༡)ལས་ཐར་འདོད་ཤིང་རྟ་བཟང་པོའི་ལམ། །ངེས་དོན་སྙིང་པོའི་ཆོས་ཚུལ་འདིར་བརྗོད་བྱ། །གྲོགས་དག་གཏིང་མཐའ་མེད་པའི་འཁོར་བ་འདིར། །སྡུག་བསྔལ་སྣ་ཚོགས་རྦ་ཀློང་འཁྲུགས་པ་ནི། །བདག་འཛིན་འཁྲུལ་པའི་མ་རིག་ལས་བྱུང་བས། །དེ་ཡི་གཉེན་པོར་གནས་ལུགས་ལྟ་བ་གཅེས། །འདི་ལྟར་སྣང་སྲིད་འཁོར་འདས་ཆོས་རྣམས་ཀུན། །གདོད་ནས་མ་སྐྱེས་ཡེ་ནས་མཉམ་པ་ཉིད། །གྲུབ་བསལ་མེད་ཅིང་རྟག་ཆད་འགྲོ་འོང་མེད། །མཐའ་བྲལ་གཉིས་མེད་ཆོས་ཉིད་ནམ་མཁའི་ངང་། །སྣ་ཚོགས་ཆོས་ཅན་མ་འདྲེས་ཅིར་སྣང་ཡང་། །སྣང་དུས་ཉིད་ནས་རང་བཞིན་སྤྲོས་དང་བྲལ། །ཕྱི་རོལ་དངོས་མིན་སེམས་ཀྱི་སྣང་ལུགས་ཏེ། །སེམས་མིན་སེམས་ལས་བྱུང་བའི་ཆོས་ཀྱང་མིན། །ཡུལ་ལྔར་སྣང་བ་རབ་རིབ་སྐྲ་ཤད་འདྲ། །མེད་བཞིན་སྣང་ལ་གཉིས་སུ་བཟུང་བས་འཁྲུལ། །ཇི་ལྟར་རྨི་ལམ་སྒྱུ་མའི་གླང་པོ་ཆེ། །དཔུང་ཚོགས་དམག་གིས་བསྐོར་བའི་ཚུལ་མཐོང་ཚེ། །རང་ལས་གཞན་དུ་བཟུང་བའི་འཇིགས་ན་ཡང་། །དེ་ཡི་རང་བཞིན་གཞན་ནམ་སེམས་སུ་ཡོད། །དེ་ཚེ་ཕྱི་ནང་གང་དུའང་མ་གྲུབ་པས། །རང་བཞིན་ཤེས་རྣམས་འཇིགས་སྔངས་རང་སར་གྲོལ། །དེ་བཞིན་གཉིས་མེད་གཉིས་སུ་གཟུང་བའི་ཚེ། །མི་མཁས་བདེན་པར་བཟུང་བས་སྲིད་པ་འཁྲུལ། །མཁས་པའི་གཉིས་སྣང་གཉིས་སུ་མེད་ཤེས་པས། །འཁོར་བའི་རང་བཞིན་མྱ་ངན་འདས་པ་གྲོལ། །ཀྱེ་ཧོ་སྣང་འདི་གདོད་ནས་མ་སྐྱེས་ཏེ། །སྣ་ཚོགས་གཉིས་མེད་མེ་ལོང་གཟུགས་བརྙན་འདྲ། །སྟོང་པའི་རང་བཞིན་སྣང་ལས་ཐ་དད་མིན། །ཆུ་དང་རླན་བཞིན་ཟུང་འཇུག་གཉིས་མེད་ངང་། །སྒྱུ་མ་མཐའ་བྲལ་སྤྲུལ་པའི་གྲོང་ཁྱེར་བཞིན། །སྐྱེས་ཙམ་ཉིད་ནས་མ་སྐྱེས་གདོད་མའི་ངང་། །གནས་པར་སྣང་ཡང་མི་གནས་ཆོས་ཀྱི་སྐུ། །འགག་ཙམ་ཉིད་ནས་མི་འགགས་འཕེལ་འགྲིབ་མེད། །ཇི་ལྟར་སྣང་བ་དེ་ལྟར་མ་གྲུབ་ཅིང། །གང་ལྟར་བརྟགས་པ་དེ་ལྟར་རང་བཞིན་མེད། །ཡེ་གྲོལ་ཕྱམ་གཅིག་ཀུན་ཏུ་བཟང་པོའི་ངང་། །གཞི་རྩ་དངོས་པོ་མེད་པའི་ཆོས་རྣམས་ལ། །འདི་ཞེས་ཆེད་དུ་མི་འཛིན་ངོས་བཟུང་མེད། །མཁའ་བཞིན་བྱེད་པོ་མི་དམིགས་བྱ་བས་སྟོང་། །གང་ཡིན་ཀུན་ཡིན་འདི་ཡིན་གཟའ་གཏད་མེད། །ཕྱོགས་འཛིན་གྲུབ་པའི་མཐས་སྦྱར་ཁས་ལེན་དང་། །ལྟ་སྒོམ་སྤྱོད་པའི་རྣམ་གྲངས་མང་པོས་ཀྱང་། །སྙིང་པོའི་སེམས་ཉིད་གཉུག་མའི་དོན་མཐོང་དཀའ། །ཉན་རང་སེམས་ཙམ་རང་རྒྱུད་དབུ་མ་ཡང་། །གང་ཟག་ཆོས་བདག་མེད་པའི་རྣམ་དབྱེ་ཡིས། །དངོས་གཞིའི་ལྟ་སྒོམ་མཁའ་སོགས་བཞིར་གོལ་བས། །གྲངས་མེད་མང་པོའི་འགྲོ་བ་སྒྲུབ་པར་སྣང་། །བྱ་སྤྱོད་རྣལ་འབྱོར་བླ་ན་མེད་སྤྱོད་པའི། །རྒྱུད་དོན་བསྐྱེད་རྫོགས་བཅོས་བསྒྱུར་དུ་མས་ཀྱང་། །མ་བཅོས་རང་བབ་ལྷུན་གྲུབ་གཉུག་(༣༢)མ་ལ། །ཉེ་བར་མ་གྱུར་སྤྲོས་པའི་དྲྭ་བས་བཅིངས། །སེམས་སངས་འདི་ཞེས་ལྟ་སྒོམ་སྤྱོད་འབྲས་ཅན། །ཁ་ཅིག་འདུ་ཤེས་ཚོར་བ་འགོག་པ་དང་། །ལ་ལ་དུས་གསུམ་འབྲེལ་ཐག་བཅད་ནས་ཀྱང་། །ད་ལྟའི་ཤེས་པ་ཟང་ཐལ་ཡིན་ཞེས་སྨྲ། །གཞན་དག་སྐྱེ་འགག་གྲངས་སུ་འདེབས་པ་ལ། །གཉུག་མའི་དོན་ཞེས་རྟོག་པའི་རྦ་རླབས་གཡོ། །དེ་བཞིན་རླུང་འཆིང་གཉིས་སྦྱོར་བདེ་གསལ་ལ། །རྣལ་མའི་དོན་ཞེས་ཆགས་སྲེད་འཛིན་པས་འཆིང་། །རེས་འཇོག་བླང་དོར་དྲྭ་བར་ཆུད་པ་ལས། །སྙིང་པོའི་དོན་ཉིད་ནམ་ཡང་མཐོང་བ་མེད། །དེ་ཀུན་བློས་བརྟགས་ཆོས་ཀྱིས་འཁྲུལ་པས་ན། །སྲིད་པ་འདིར་འཆིང་གྲོལ་བའི་སྐབས་མེད་དོ། །ཀྱེ་མ་རིན་ཆེན་བརྟགས་པ་མ་ཤེས་པས། །ཡིད་བཞིན་དོར་ནས་འཆིང་བུ་ཚོལ་བར་སྣང་། །རང་བཞིན་སེམས་ཉིད་གཉུག་མའི་མཆོག་དོར་ནས། །བཅོས་བསྒྱུར་རེ་དོགས་སྦྲུལ་གྱི་གསེབ་ཏུ་འཆིང། །འབད་པའི་སེམས་ཀྱིས་ནམ་ཡང་གྲོལ་མི་འགྱུར། །བཙལ་བྱའི་དོན་གྱིས་ཚོལ་མཁན་བྱས་པས་བསླད། །ཨེ་མ་རང་བཞིན་སེམས་ཀྱི་དོན་འདོད་ན། །བརྟགས་དང་དཔྱད་པ་མང་པོས་ཅི་བྱར་ཡོད། །གང་སྣང་དེ་ཡིན་དེར་སྣང་འཛིན་པ་མེད། །འཛིན་མེད་ཕྱོགས་བྲལ་བླང་དོར་མི་དགོས་ཀྱིས། །ཐམས་ཅད་གཏད་མེད་བཅོས་བསླད་མ་བྱེད་ཅིག །ཡུལ་སེམས་སྣང་འདི་སྟོང་པའི་ཚུལ་ཡིན་ན། །སྟོང་ཞེས་ལྟ་བས་དེ་ལ་ཅི་ཞིག་དགོས། །མེད་ན་བལྟས་ཀྱང་སྟོང་པར་མི་འགྱུར་བས། །དོན་མེད་ངལ་བས་དེ་ལ་ཅི་བྱར་ཡོད། །དེ་བཞིན་བསྐྱེད་རྫོགས་རང་བཞིན་བསྒོམ་མི་དགོས། །བླང་དོར་ཆོས་རྣམས་ཇི་ལྟར་འཛིན་ཡང་སླའི། །དེ་ཉིད་དོན་དུ་ཡོད་ན་འབད་མི་དགོས། །མེད་ན་དོན་མེད་སོལ་བ་གསེར་འགྱུར་ཡིན། །དེ་ཕྱིར་བློས་བརྟགས་ཆོས་རྣམས་མ་གྲུབ་པས། །དེ་ལ་བཅོས་བསྒྱུར་གཉེན་པོས་མ་བསླད་ཅིག །འདིར་ནི་བླ་མེད་རྡོ་རྗེ་སྙིང་པོའི་དོན། །སྔགས་དང་རྒྱུད་མེད་གྲུབ་མཐའི་ཁས་ལེན་མེད། །འདི་ཞེས་ངོས་བཟུང་ལྟ་སྒོམ་སྤྱོད་འབྲས་མེད། །ཐམས་ཅད་མཉམ་རྫོགས་དཀྱིལ་འཁོར་གཅིག་གི་ངང་། །གྲུབ་པའི་མཐའ་རྫོགས་ལྟ་སྒོམ་སྤྱོད་འབྲས་རྫོགས། །འཁོར་འདས་མཉམ་རྫོགས་ཆོས་ཉིད་བརྡལ་བ་ཆེ། །མ་བཅོས་མ་གྲོལ་ཡེ་ནས་བྱང་ཆུབ་པས། །བྱར་མེད་རྒྱལ་པོ་ལྷུན་རྫོགས་ཆོས་སྐུའི་ངང་། །སྣ་ཚོགས་གཟུགས་སྐུ་སྒྱུ་མའི་རོལ་པ་ནི། །སྣང་སྲིད་སྐུ་གསུམ་ཡེ་ཤེས་འདུ་འབྲལ་མེད། །སྤང་བླང་མི་དམིགས་ཐམས་ཅད་རྣམ་དག་ངང་། །ཡངས་སོ་ཆེའོ་ཐམས་ཅད་ལྷུན་མཐོའོ། །ཆོས་རྣམས་ལྷུན་རྫོགས་ཐམས་ཅད་མཉམ་པ་ཉིད། །མ་སྐྱེས་རྒྱལ་པོ་མཐའ་དབུས་ཕྱོགས་བྲལ་ལ། །གཟུང་འཛིན་ཞེན་པ་མེད་ན་གཉུག་མའི་དོན། །སྤང་བླང་དགག་སྒྲུབ་མི་དགོས་ཕྱམ་གཅིག་པ། །ལྟ་(༣༣)བའི་ཡང་རྩེ་རྫོགས་པ་ཆེན་པོ་ཡིན། །གཏད་མེད་རྒྱལ་པོ་འཛིན་མེད་ཤེས་པར་གྱིས། །ཆེད་དུ་དམིགས་པ་ཐམས་ཅད་འཆིང་བ་སྟེ། །དམིགས་མེད་གང་དག་ཤར་ན་ཡེ་ཤེས་དངོས། །ཡེ་བབ་རང་སྟོང་སོ་མ་གཉུག་མའི་དོན། །འཛིན་མེད་ཕྱོགས་བྲལ་ལྟ་བ་ཐག་ཆོད་ཅིག །

ཀྱེ་ཧོ། སྣ་ཚོགས་སྣང་བ་འདི་དག་དགོད་རེ་བྲོ། །མ་བརྟགས་ཉམས་དགའ་བརྟགས་ན་ངོས་བཟུང་མེད། །ཤིན་ཏུ་བརྟགས་ན་རང་བཞིན་མཐའ་ལས་འདས། །དེ་ཉིད་འབྱེད་པའི་སེམས་ལ་ཚུར་བལྟས་ན། །དུས་གསུམ་མི་དམིགས་སྐྱེ་འགག་གནས་པར་མེད། །ཁ་དོག་དབྱིབས་བྲལ་ངོ་བོ་ངོས་བཟུང་མེད། །ཤར་བར་སྣང་དུས་ཤར་ས་ཤར་མཁན་མེད། །ཕྱི་ནང་མི་དམིགས་གཟུང་འཛིན་མཐའ་ལས་འདས། །ཕྱི་རོལ་ཡུལ་ལ་འཕྲོ་བར་སྣང་མོད་ཀྱང་། །འཕྲོས་པ་མེད་དེ་སེམས་ལ་ཤར་བ་ཙམ། །འཕྲོས་ན་དེ་ཚེ་རང་ཉིད་བེམས་པོ་ཡིས། །སྐད་ཅིག་རིག་པ་ཚན་པ་གཉིས་སུ་འགྱུར། །འཆར་གཞི་གཏན་མེད་ཡེ་གྲོལ་ནམ་མཁའ་འདྲ། །ཤར་བ་གཉིས་མེད་མེ་ལོང་གཟུགས་བརྙན་འདྲ། །དོན་ལ་གཉིས་མེད་ཆུ་དང་རྦ་རླབས་འདྲ། །བླང་དོར་མི་དགོས་རྫོགས་པ་ཆེན་པོའི་དོན། །རང་བཞིན་ཡེ་ནས་དག་པའི་སངས་རྒྱས་ཡིན། །སྣང་སེམས་གདོད་ནས་རང་བཞིན་མེད་པ་ལ། །དེ་རིང་དཔལ་ལྡན་བླ་མས་བསྟན་པ་རྟོགས། །ད་ནི་ཐམས་ཅད་ཆོས་སྐུར་ཐག་ཆོད་པས། །ཡིན་མིན་ཐེ་ཚོམ་སྒྲོ་འདོགས་ཀུན་དང་བྲལ། །སུ་ལའང་མི་དྲི་སེམས་ཉིད་རྣལ་མའི་དོན། །བྱར་མེད་གཉུག་མའི་ངོ་བོ་མཐོང་བ་ཡིན། །དེ་ཚེ་འཕྲོ་གནས་ཆོས་སྐུའི་རོལ་པ་ལས། །སྤང་བླང་མི་དགོས་གང་ཤར་རྒྱན་དུ་ཆེ། །གནས་ནའང་མི་གཡོ་ཆོས་ཉིད་གཅིག་གི་ངང་། །ཐམས་ཅད་ལྷུན་རྫོགས་འཕོ་འགྱུར་མེད་པ་ཡིན། །ད་ནི་དུས་གསུམ་རྒྱལ་བའི་དགོངས་པར་སླེབ། །བདེ་ཆེན་ལྷུན་གྲུབ་གཞི་རྫོགས་ཀུན་ཏུ་བཟང་། །དུས་རྣམས་ཀུན་ཏུ་འཕོ་འགྱུར་མེད་པས་ན། །ཐམས་ཅད་ཕྱམ་གཅིག་གདོད་མའི་སར་གྲོལ་ལོ། །ཀྱེ་མ་ཕྱོགས་རིས་འཛིན་པའི་སེམས་ཡོད་པར། །ཐར་པའི་སྐལ་མེད་འཆིང་བྱེད་དེ་རང་ཉིད། །ཇི་སྲིད་ཕྱོགས་བྲལ་མཐར་འཛིན་གྲོལ་བ་ན། །གཉིས་མེད་དོན་ཡིན་གཞན་ཞིག་མཚོན་དུ་མེད། །བལྟས་པས་མི་མཐོང་དཔྱད་པས་རྙེད་པ་མིན། །འདི་ཞེས་མི་མཚོན་ཐ་མལ་རང་བབ་ལ། །ཞེན་པའི་སེམས་ཀྱིས་འཆིང་གྲོལ་མ་བྱེད་ཅིག །གང་ལ་གཉིས་མེད་མཐའ་བྲལ་འདོད་ན་ཡང་། །མཐའ་བྲལ་མཐའ་རུ་སྙིང་པོའི་སེམས་ཉིད་འཆིང་། །བདེན་གཉིས་འདོད་ཀྱང་དེ་ཡི་མཐར་ལྷུང་ཞིང་། །ཟུང་འཇུག་འདོད་ཀྱང་གཉུག་མའི་གནས་ལུགས་མིན། །གང་ལྟར་བརྟགས་ཤིང་ཞེན་པའི་གཟེབ་ཏུ་འཆིང་། །ཐོག་མེད་གཟུང་འཛིན་འཁྲུལ་པས་མ་ཆོག་པས། །ད་དུང་ནན་བརྟགས་བློ་(༣༤)ཡི་རི་མོས་འཆིང་། །ཀྱེ་མ་འཁྲུལ་པའི་སེམས་ནི་སྙིང་རེ་རྗེ། །འདི་ཞེས་ངོས་བཟུང་ཡོད་ན་ལྟ་བ་མིན། །སྣ་ཚོགས་སྤྲོས་པའི་གཟེབ་ཡིན་དགོས་པ་མེད། །གང་ཤར་རྩིས་གདབ་མེད་པའི་རིག་པ་ལ། །ཡངས་དོག་མཐོ་དམན་མེད་ཀྱིས་ཞེན་འཛིན་ཐོང་། །འདི་ཡིན་གཟའ་གཏད་བྲལ་བའི་སྣང་སེམས་ལ། །སྤང་གཉེན་བཅོས་བསྒྱུར་མ་བྱེད་གང་བབ་ཞོག །འདི་ནི་ངེས་དོན་སྙིང་པོའི་མཐར་ཐུག་ཡིན། །སྣ་ཚོགས་ཆོས་ཀུན་མཉམ་པའི་རང་བཞིན་ལ། །གང་ཤར་དེ་ཡིན་གཉིས་མེད་ཡེ་ཤེས་ཡིན། །བློ་ཡིས་མ་རྟོག་ཡིད་ཀྱིས་ཚོལ་ཁྲོ་ཞོག །གཟུང་བས་མ་འཆིངས་འཛིན་པས་མ་བསླད་ཅིག །གང་ཞིག་ཆོས་ཀུན་ནམ་མཁའ་འདྲར་ཤེས་ཤིང་། །སྒྱུ་མ་མཉམ་མཐོང་ཞེན་པའི་ཡུལ་མེད་ན། །གཉིས་མེད་རང་བཞིན་ལྟ་བའི་རྒྱལ་པོ་མཆོག །མཐའ་བྲལ་རྟོགས་པའི་ཚད་ཡིན་ངོ་མཚར་ཆེ། །སྲིད་ཞི་གཉིས་མེད་རིག་པ་ཟང་ཁ་མ། །རང་ངོ་ཤེས་པ་གཞི་རྩ་དངོས་པོ་མེད། །འཆིང་གྲོལ་གཉིས་མེད་རྫོགས་པ་ཆེན་པོའི་དོན། །འགྲོ་ཀུན་སེམས་ལ་མ་ལུས་རྒྱུན་དུ་གནས། །དེ་ཉིད་མཐོང་ཕྱིར་དཔེ་བྲལ་ཟབ་མོའི་དོན། །དྲི་མེད་འོད་ཟེར་ཤར་བས་བསྟན་ནས་སོང་། །སྣང་སེམས་འཛིན་མེད་སྒྱུ་མའི་རྩེད་མོལས། །ཕྱོགས་བྲལ་རིག་པ་ལྟ་བར་མཁྱེན་འཚལ་ལོ། །རྫོགས་པ་ཆེན་པོ་ཆོས་ཉིད་རང་གྲོལ་ལས། གཞི་རྟོགས་པས་གྲོལ་བའི་ལེའུ་སྟེ་དང་པོའོ།། །།

གཉིས་པ། ལམ་བསྒོམས་པས་གྲོལ་བའི་ལེའུ།

རྡོ་རྗེ་རྩེ་མོ་མཆོག་གི་གཉིས་མེད་ལམ། །གང་ཤར་རིག་པ་དེར་འཛིན་མེད་པའི་ངང་། །ཆེར་གྱིས་བལྟས་ལ་ཆམ་གྱིས་བཞག་པའི་ཚེ། །ངང་དྭངས་ཤེས་པ་ཆུ་ལ་ཆུ་བཞག་བཞིན། །གཉིས་མེད་རང་གྲོལ་བདེ་གསལ་མི་རྟོག་འཆར། །ཡང་གཅིག་འཕྲོས་ཀྱང་མི་གཡོ་བརྟན་པར་གནས། །དེ་ཚེ་སྐྱེ་མེད་སེམས་ཉིད་ཆོས་སྐུའི་ངང་། །ཤར་གྲོལ་རིག་པ་གཟུགས་སྐུ་མྱ་ངན་འདའ། །སྤང་བླང་མི་དགོས་འཕྲོ་གནས་གང་བདེར་ཐོངས། །ཤར་གནས་ཞི་ལྷག་ཐབས་ཤེས་ཟུང་འཇུག་ལ། །བློ་ཡིས་མ་བཅོས་བཟོ་རིག་མ་བྱེད་ཅིག །གལ་ཏེ་དགག་སྒྲུབ་སྤང་བླང་འགའ་ཡོད་ན། །དེ་ཚེ་རེ་དོགས་གཉིས་འཛིན་གཟེབ་ཏུ་འཆིང་། །འདོད་སར་མི་ཕྱིན་གོལ་སར་ལྟུང་བས་ན། །གང་ཤར་དོན་ལ་སྤང་བླང་མེད་པ་གཅེས། །གྲོགས་དག་སེམས་ནི་གོ་བཟློག་རྔ་མོ་འདྲ། །བཟུང་ན་འགྲོ་ལ་སྤྲོས་ན་བརྟན་པར་གནས། །རང་བབ་གློད་ན་རང་གྲོལ་གཉུག་མའི་ངང་། །གཟུང་འཛིན་རང་སར་གྲོལ་བས་བློ་བདེ་རྙེད། །དེ་བས་ཆེད་དུ་དམིགས་པའི་སེམས་བཏང་སྟེ། །དམིགས་མེད་གང་ཤར་བཅོས་བསླད་མེད་པར་བཞག །གཟུང་འཛིན་གཉིས་མེད་རང་གྲོལ་ཆེན་པོར་གནས། །འགག་མེད་རིག་པ་གསལ་སྟོང་ཡེ་ཤེས་འཆར། །

༈ སྣ་ཚོགས་འཕྲོ་བས་སྣང་བའི་ཐབས་ཡིན་ལ། །གྲོལ་བའི་ལྷག་མཐོང་ཤེས་རབ་ལྷུན་གྱིས་གྲུབ། །དེ་ཉིད་ངང་གནས་ངང་དྭངས་ཞི་གནས་ལ། །(༣༥)བདེ་གསལ་མི་རྟོག་བསམ་གཏན་ལྷུན་གྱིས་གྲུབ། །མ་བྱས་མི་འཇིག་རང་བབ་ཆེན་པོ་འོ། །འགྱུ་བ་སེང་ལ་གནས་པས་རྣམ་པར་གནོན། །རང་བབ་འཕྲོ་གནས་ཡོན་ཏན་མཐའ་ལས་ཏེ། །འཕྲོས་པས་མ་བྱིང་སེམས་གནས་ཞེན་པ་འགོག །ལྷག་མཐོང་ཤེས་རབ་ཉོན་མོངས་རྩད་འབྱིན་ཞིང་། །གཟུགས་དང་གཟུགས་མེད་སེམས་ལས་རྣམ་པར་གྲོལ། །གནས་པའི་མི་རྒོད་སྤྲོས་པའི་དྲྭ་བ་འགོག །ཞི་གནས་ཡེ་ཤེས་ཉོན་མོངས་མགོ་གནོན་ཞིང་། །འདོད་པའི་སེམས་ལས་རྣམ་པར་གྲོལ་བ་ཡིན། །

༈ དེ་འདྲའི་སྒོམ་པ་མ་བྱས་ལྷུན་གྲུབ་ལ། །སྤང་བླང་གཉིས་མེད་རང་སེམས་གྲོགས་སུ་འཆར། །གཟུང་འཛིན་རང་གྲོལ་ཡོན་ཏན་ཕུན་སུམ་ཚོགས། །སེམས་སངས་བླ་མེད་མཉམ་གཞག་ཆེན་པོ་ཡིན། །

༈ དེ་ནས་ལངས་པའི་མཉམ་གཞག་རྒྱ་ཡན་དུ། །སྣང་བའི་རང་བཞིན་རྨི་ལམ་སྒྱུ་མ་དང་། །སྨིག་སྒྱུ་མིག་ཡོར་བྲག་ཆ་གཟུགས་བརྙན་དང་། །ཆུ་ཟླ་སྤྲུལ་པ་ལྟ་བུར་ངོ་བོས་སྟོང་། །མེད་བཞིན་སྣང་ལ་སང་སིང་ཁྲལ་མ་ཁྲོལ། །བན་བུན་འལ་འོལ་ཡལ་ཡོལ་ཕྱད་མ་ཕྱོད། །སྣང་ལ་དེར་འཛིན་མེད་པའི་ངང་ལ་སྤྱད། །

༈ བར་འགའ་ངེས་འབྱུང་སྐྱོ་ཤས་གཏིང་ནས་བསྐྱེད། །རྟག་ཏུ་འཆི་བསམ་བློ་སྣ་བཙན་ཐབས་བསྟུངས། །དག་སྣང་ཕྱོགས་མེད་མོས་གུས་རྒྱུན་ཆད་མེད། །སྐྱབས་འགྲོ་སེམས་བསྐྱེད་ཚོགས་གཉིས་ལམ་ལ་འབད། །དགེ་སྡིག་ལས་འབྲས་འཁོར་བའི་ཉེས་དམིགས་བསམ། །མདོར་ན་སེམས་ལ་དྲན་པའི་མེལ་ཚེ་ཡིས། །རྟག་ཏུ་བག་ཡོད་ཤེས་བཞིན་བསྟེན་པར་བྱ། །རེས་འགའ་སྣང་སྲིད་སྒྱུ་མའི་རྩལ་སྦྱོང་གི། །མཉམ་རྗེས་བསྲེ་ཞིང་རྐྱེན་ངན་ལམ་དུ་བསླང་། །ལྟ་སྒོམ་དོན་ལ་སྣ་ཚོགས་བོགས་འབྱིན་ཞིང་། །ཚོགས་དྲུག་རང་གྲོལ་སྒོ་ལྔའི་གཟིགས་མོ་ལྟ། །སྐྱབས་སུ་ངང་དྭངས་རྩེ་གཅིག་དོན་ལ་བཞག །རྩེ་གཅིག་ཞི་གནས་ཏིང་འཛིན་འགྲུབ་པར་འགྱུར། །དེ་བཞིན་རིག་པ་དལ་དུ་མི་གཞུག་པར། །ཕྱི་ནང་ཀུན་རྟོག་དུག་ལྔ་འཕྲོར་བཅུག་ལ། །སྐད་ཅིག་རང་གྲོལ་ལྷག་མཐོང་རྩལ་སྦྱང་བྱ། །དགག་སྒྱུར་རྐྱེན་ངན་སེམས་ཀྱི་གཟིགས་མོར་འཆར། །

༈ རེས་འགའ་རི་རྩེ་དུར་ཁྲོད་ལུང་སྟོང་སོགས། །དགའ་འཇིགས་མྱ་ངན་སྐྱེ་བའི་གནས་སོང་ནས། །ལུས་འདི་མཆོང་རྒྱུག་གར་དང་ཕྱག་རྒྱར་བསྒྱུར། །ངག་ནི་ཅ་ཅོ་གླུ་ལེན་འོ་དོད་འབོད། །སེམས་ནི་འགྲོ་དྲུག་བདེ་སྡུག་སྣ་ཚོགས་བསམ། །སྐད་ཅིག་མི་དལ་བརྩོན་པས་རང་གྲོལ་སྦྱང་། །ལྟ་སྒོམ་སྤྱོད་པ་ཐོག་ཏུ་ཕེབས་སམ་བལྟ། །དེ་རྗེས་སྣང་སྲིད་རྨི་ལམ་སྒྱུ་མར་སྦྱང་། །མཆོག་དང་ཐུན་མོང་དངོས་གྲུབ་མྱུར་དུ་ཐོབ། །མི་མཐུན་རྐྱེན་ངན་བར་ཆད་མ་ལུས་སེལ། །

༈ བར་འགའ་ནད་གདོན་ཆོ་འཕྲུལ་ཆེ་བ་ན། །མཚོ་གླིང་ནགས་ཚལ་(༣༦)བྲག་རོང་ཤིང་གཅིག་སོགས། །འདྲེ་དང་འབྱུང་པོ་རྒྱུ་བའི་གནས་སོང་ནས། །སྐྱབས་འགྲོ་སེམས་བསྐྱེད་བླ་མའི་མོས་གུས་བྱ། །དེ་རྗེས་ལུས་ནི་རི་རབ་ཙམ་སྤྲུལ་ནས། །གང་ལ་ཅི་འདོད་དུམ་བུར་ཕྱོགས་བཅུར་འཐོར། །བགེགས་རྣམས་ཚིམ་ཞིང་འགྲོ་དྲུག་ལན་ཆགས་སྦྱང་། །དེ་ནས་ནད་གདོན་འདྲེར་སྣང་འདྲེར་འཛིན་ཀུན། །སེམས་སུ་ཐག་བཅད་སེམས་ནི་སྟོང་པའི་ངང་། །དྲན་བསམ་ཡིད་ཀྱི་ཚོལ་ཁྲོ་ཀུན་བཞག་ལ། །ཐམས་ཅད་ཕྱམ་གཅིག་སྙེམས་བྲལ་ཉལ་ལ་བསྡད། །སྣ་ཚོགས་ཆོ་འཕྲུལ་རང་བྱུང་རང་ཞིར་བཞག །དེས་ནི་ནད་གདོན་བར་ཆད་ཞི་བ་དང་། །སེམས་ཀྱི་བདེ་སྡུག་སྤང་བླང་མེད་པ་དང་། །ཐམས་ཅད་མཁའ་ལྟར་གཟུང་འཛིན་མེད་རྟོགས་ཤིང་། །གཉུག་མའི་ངང་ལ་རིག་པའི་རྩལ་དབང་ཐོབ། །གཞན་ཡང་ཉིན་མཚན་དུས་དྲུག་འདི་ལྟར་སྦྱང་། །ཐོ་རངས་ངང་དྭངས་ནམ་མཁའ་ལྟ་བུ་ལ། །རྟོག་མེད་ཤེས་པ་གཟའ་སྐར་བཞིན་དུ་བཞག །སྔ་དྲོ་འཕྲོ་གནས་གཉིས་སུ་མེད་པ་ལ། །སྐད་ཅིག་རང་གྲོལ་ལྷག་མཐོང་རྗེན་པར་བཞག །གུང་ལ་དག་སྣང་མོས་གུས་ཕྱོགས་མེད་ལ། །སྣ་ཚོགས་ཆོས་ཀུན་རྨི་ལམ་སྒྱུ་མར་སྦྱང་། །ཕྱི་དྲོ་ངེས་འབྱུང་སྐྱོ་ཤས་བསྐྱེད་པ་དང་། །སྙིང་ནས་མི་རྟག་འཆི་བ་དྲན་པར་བྱ། །སྲོད་ལ་ཕུང་པོ་ཚོགས་ཀྱི་འཁོར་ལོ་དང་། །བྱམས་དང་སྙིང་རྗེ་བདེ་གསལ་མི་རྟོག་སྦྱང་། །གུང་ལ་སེམས་ཉིད་སྐྱེ་བ་མེད་པའི་ངང་། །རིག་པའི་འཕྲོ་འདུ་འཇུག་པ་ཐིམ་པར་ཉལ། །གཉིད་དང་རྨི་ལམ་འོད་གསལ་ཆེན་པོར་འཆར། །དེ་ལྟར་སྤྱོད་ལམ་དུས་དྲུག་རྣམ་སྦྱངས་པས། །འཁོར་བའི་ཀུན་རྟོག་བག་ཆགས་རང་ཞི་ནས། །སེམས་ཉིད་རང་གྲོལ་མྱ་ངན་འདས་གཞིར་འགྲོ། །སྤྱན་དང་མངོན་ཤེས་ཡོན་ཏན་སྣ་ཚོགས་འགྲུབ། །དང་པོར་ངན་པའི་རྨི་ལམ་བཟང་པོར་འགྱུར། །བར་དུ་ཟིན་དང་ཐ་མ་དབྱིངས་སུ་ནུབ། །དེ་ཚེ་འཁོར་བ་མྱ་ངན་འདས་པར་གྲོལ། །ས་དང་ལམ་རྫོགས་བསྐྱེད་རྫོགས་མཐར་ཕྱིན་ཏེ། །ཚེ་འདི་ཉིད་ལ་སེམས་ཉིད་རྫོགས་སངས་རྒྱ། །འདི་ནི་ངེས་དོན་སྙིང་པོའི་ཐེག་པ་ཡིན། །གནད་ཀྱི་སྙིང་པོ་ཐོག་ཏུ་ཁེལ་བའི་རྟགས། །རིམ་གྱིས་སྦྱངས་པ་ལས་ནི་འདི་ལྟར་འབྱུང་། །སྙིང་ནས་མི་རྟག་བློ་སྣ་ཐུང་བ་དང་། །སྐྱོ་ཤས་ངེས་འབྱུང་སྙིང་རྗེ་ཚད་མེད་སྐྱེ། །དག་སྣང་མོས་གུས་རྟོགས་པ་ཕྱོགས་མེད་འཆར། །ཆགས་ཞེན་རང་གྲོལ་དངོས་འཛིན་འཁྲུལ་པ་ཞིག །དེ་ཚེ་མ་ནོར་ལམ་དུ་ཚུད་པའི་རྟགས། །ཆེས་ཆེར་གོང་དུ་འཕེལ་བས་ས་མཆོག་འགྲུབ། །ཆོས་ཀུན་མ་སྐྱེས་སྒྱུ་མའི་རང་བཞིན་དུ། །ལྟ་སྒོམ་སྤྱོད་པས་ལེགས་པར་རྩལ་སྦྱངས་ལ། །སྙིང་པོའི་སེམས་ཉིད་ཐར་པའི་ཁང་བཟང་དུ། །ཆོས་ཉིད་འོད་གསལ་གཏན་སྲིད་ཟིན་པར་འགྱུར། །ནམ་(༣༧)ཞིག་རྣལ་འབྱོར་འབྱུང་བཞིའི་ཕུང་པོ་དེ། །དེ་ཚེ་ས་ཆུ་མེ་རླུང་རྣམ་པར་ཤེས། །ནམ་མཁའ་ཆོས་སྐུའི་འོད་གསལ་འགྲུབ་པའི་ཚེ། །ཚོགས་དྲུག་ཡུལ་དབང་ཀུན་གཞིའི་རྣམ་པར་ཤེས། །ཀུན་གཞི་ལ་ཞུགས་དེ་ཉིད་ཆོས་སྐུར་ཐིམ། །དེ་ཚེ་སྣང་མཆེད་ཐོབ་པ་ཉེར་ཐོབ་པ། །ཤིན་ཏུ་མི་རྟོག་འོད་གསལ་རྣམ་པ་བཞི། །རིམ་གྱིས་ཤར་བས་རང་བཞིན་བརྒྱད་ཅུ་ནུབ། །རང་ངོ་ཤེས་པས་ཆོས་སྐུའི་དབྱིངས་སུ་གྲོལ། །དེ་ནས་ལོངས་སྐུ་རིགས་ལྔའི་བར་དོ་ཡང་། །བསམ་གཏན་དག་པའི་ཞག་ལྔར་རིམ་གྱིས་འཆར། །རང་ངོ་ཤེས་པས་ལོངས་སྐུར་གྲོལ་བའི་ཚེ། །སྤྲུལ་སྐུའི་བར་དོར་སྣ་ཚོགས་རྣམ་འཕྲོ་བས། །འགྲོ་བའི་དོན་བྱས་སླར་ཡང་ལོངས་སྐུར་ཐིམ། །ལོངས་སྐུ་ཆོས་སྐུའི་ངང་དུ་རབ་ཐིམ་པས། །ཆོས་སྐུ་མི་གཡོ་བདེ་ཀློང་གཅིག་ཏུ་འཁྱིལ། །སྐུ་དང་ཡེ་ཤེས་ནང་གསལ་འདུ་འབྲལ་མེད། །འཆར་གཞིའི་རྣམ་པར་ཕྲ་བ་ཡེ་ཤེས་སུ། །ཐམས་ཅད་མཁྱེན་པ་འབྱེད་པ་མེད་པར་བཞུགས། །མཁའ་བཞིན་མ་སྐྱེས་འགག་མེད་ལྷུན་གྱིས་གྲུབ། །གདུལ་བྱ་ཡོད་ན་དེ་ལ་ཕྱིར་གསལ་དུ། །ལོངས་སྐུ་རིགས་ལྔ་སྤྲུལ་སྐུའི་འཆར་གཞིར་སྣང་། །སླར་ཡང་སྔོན་བཞིན་གཞི་ཐོག་ལྷུན་གྱིས་གྲུབ། །འདི་ནི་འབྲིང་རྣམས་བར་དོར་གྲོལ་བ་ཡིན། །ཐ་མས་སྲིད་པའི་བར་དོར་རིམ་ཤར་ནས། །རྨི་ལམ་བཞིན་དུ་སྣ་ཚོགས་སྣང་བའི་ཚེ། །བདེན་མེད་ངང་དྭངས་སྒྱུ་མ་བསྐྱེད་རྫོགས་དང་། །སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་གྱིས། །འཁོར་བའི་རུ་བཟློག་མངལ་སྒོ་དགག་དང་འདམ། །དག་པའི་ཞིང་དུ་རྣམ་ཤེས་འཕོ་བར་བྱ། །ཕྱི་མར་རང་སྣང་ཆོས་ལ་སྤྱོད་པའི་ལུས། །ཡོན་ཏན་བདུན་དང་ལྡན་པ་ཐོབ་ནས་གྲོལ། །འདི་ནི་ཡང་ཟབ་གནད་ཀྱི་གདམས་པ་ཡིན། །གྲོགས་དག་ཉིན་མཚན་མི་དལ་བརྩོན་པ་ཡིས། །ལྟ་བའི་རྩལ་སྦྱོང་སྒོམ་པའི་ཉམས་ལེན་དང་། །སྤྱོད་པའི་བོགས་འབྱིན་དོན་ལ་ནན་ཏན་བྱ། །ཐ་མལ་ཕྱོགས་སུ་སྐད་ཅིག་མི་བཏང་བར། །ཇི་སྐད་བཤད་ལ་སྒྲུབ་པའི་བརྩོན་འགྲུས་བརྩམ། །ད་ལྟའི་སེམས་ལ་རང་དབང་མ་ཐོབ་ན། །ཕྱི་མའི་སེམས་ལ་གྲོལ་བ་ཐོབ་མི་འགྱུར། །ཚེ་ནི་མྱུར་འགྲོ་འཁོར་བ་ཕ་མཐའ་མེད། །འདི་ལས་ད་རེས་ཐར་པའི་ཐབས་འཚལ་ལོ། །མདོར་ན་ཐོག་མེད་འཁོར་བར་འཁྱམས་པ་ཡང་། །གཉིས་འཛིན་གོམས་པའི་བདག་འཛིན་ལས་བྱུང་བས། །རྟག་ཏུ་བདེན་མེད་སྟོང་པའི་རང་བཞིན་འགྲོས། །སེམས་ཉིད་རྒྱལ་པོ་བྱ་རྩོལ་མེད་པར་སྦྱང་། །ཇི་སྲིད་བདག་འཛིན་འཁྲུལ་པའི་སེམས་ཡོད་པར། །ལྟ་སྒོམ་རྩལ་སྦྱང་དགེ་སྡིག་བླང་དོར་གཅེས། །ནམ་ཞིག་གཉིས་འཛིན་རང་སར་གྲོལ་བ་ན། །སྤང་གཉེན་མི་དགོས་ལྟ་སྒོམ་ཆོས་ལས་འདས། །དེ་ཚེ་སྣང་(༣༨)སྲིད་ཆོས་སྐུར་ཤར་བ་ཡིན། །ཀྱེ་ཧོ་གྲོགས་དག་འཁོར་འདས་གཞན་མེད་དེ། །ཐམས་ཅད་དབྱིངས་དང་སེམས་ཉིད་རོལ་པའི་ངང་། །གཞི་གྲོལ་ལམ་གྲོལ་འབྲས་བུ་ཡེ་ནས་གྲོལ། །ཐམས་ཅད་རང་གྲོལ་སྒྱུ་མའི་རྩེད་མོ་ལ། །འདི་ཡིན་གཟའ་གཏད་མེད་པའི་སྣང་བ་ཤར། །ཐམས་ཅད་དེ་ཡིན་ཆེད་འཛིན་ཞེན་པ་ཐོང་། །མཐར་ཐུག་དོན་ལ་འཁྲུལ་པ་འཁྲུལ་མཁན་མེད། །སྒོམ་དང་མི་སྒོམ་མེད་པར་ཐག་ཆོད་པས། །སྤྱོད་དང་སྤྱད་བྱ་མང་པོས་ཅི་ཞིག་བྱ། །གང་སྣང་དོན་ལ་འཛིན་ཞེན་མེད་པ་ཡིན། །ཆགས་མེད་ཞེན་མེད་རྩིས་མེད་རིག་མེད་བྱ། །བདག་མེད་སྟོང་པ་གཉིས་མེད་ལྷུན་གྱིས་གྲུབ། །འཁོར་བར་མི་གནས་མྱ་ངན་འདས་མི་གནས། །མདོ་རྒྱུད་མན་ངག་ཀུན་གྱི་དགོངས་པ་ཡིན། །འདི་ནི་རྒྱལ་སྲས་དྲི་མེད་འོད་ཟེར་གྱིས། །སྙིང་པོའི་གདམས་པ་མ་ལུས་བསྟན་ནས་སོང་། །ཕྱི་རབས་ཚེ་འདིར་གྲོལ་བ་གཉེར་འདོད་པས། །ཟབ་མོའི་དོན་འདིར་ཞུགས་ལ་བརྩོན་པར་མཛོད། །རྫོགས་པ་ཆེན་པོ་ཆོས་ཉིད་རང་གྲོལ་ལས། ལམ་བསྒོམས་པས་གྲོལ་བའི་ལེའུ་སྟེ་གཉིས་པའོ།། །།

གསུམ་པ། འབྲས་བུ་མཆོག་གི་གྲོལ་བའི་ལེའུ།

དེ་ལྟར་གཞི་ལམ་རྟོགས་པ་མཐར་ཕྱིན་ནས། །དྲི་མེད་རང་བཞིན་སེམས་ཉིད་རྣམ་དག་ཏུ། །སྣ་ཚོགས་སེམས་ཀྱི་འཇུག་པ་ཀུན་ནུབ་སྟེ། །དབྱིངས་དང་ཡེ་ཤེས་རོ་གཅིག་གྱུར་པ་ནི། །ཆོས་སྐུ་རྒྱལ་པོའི་གཏན་སྲིད་ཟིན་པ་ཡིན། །དེ་ཚེ་མཁའ་ལྟར་རང་བཞིན་སྤྲོས་དང་བྲལ། །རྒྱ་ཆད་ཕྱོགས་ལྷུང་ཀུན་ལས་འདས་པ་ནི། །དག་པ་གཉིས་ལྡན་ཆོས་ཉིད་འཕོ་འགྱུར་མེད། །དེ་ཉིད་ངང་ལས་ལྷུན་གྲུབ་ལོངས་སྐུ་ནི། །རང་སྣང་རྣམ་དག་འོག་མིན་སྟུག་པོ་བཀོད། །འོད་གསལ་ཡེ་ཤེས་རྣམ་ལྔའི་ཞིང་ཁམས་སུ། །ཞི་དང་ཁྲོ་ཚུལ་རིགས་ལྔའི་དཀྱིལ་འཁོར་ནི། །སྟེང་འོག་ཕྱོགས་མཚམས་ནམ་མཁའ་ཁྱབ་པར་སྣང་། །གཙོ་འཁོར་གྲངས་མེད་རྟོགས་པ་གཅིག་གི་ངང་། །མཚན་དང་དཔེ་བྱད་འོད་ཟེར་འབར་བ་སྟེ། །ཀུན་ཀྱང་སྐུ་ལྔ་ཡེ་ཤེས་རྣམ་པ་ལྔ། །མི་གཡོ་མི་གསུང་བརྗོད་འདས་ཆེན་པོ་ནི། །སྟོབས་སོགས་ཡོན་ཏན་རྒྱ་མཚོའི་ཕ་རོལ་ཕྱིན། །མཛད་པའི་ཕྲིན་ལས་སྐུ་གསུམ་ཆོ་འཕྲུལ་འགྱེད། །འདི་ནི་ཡེ་ཤེས་ལོངས་སྐུའི་སྟོན་པ་ཡིན། །དེ་ཉིད་ངང་ལས་གདུལ་བྱའི་འཇིག་རྟེན་དུ། །འདུལ་བྱེད་སྟོན་པ་རིགས་ལྔར་སྣང་བ་ནི། །མཁའ་ཟླའི་གཟུགས་བརྙན་ཆུ་ཟླར་སྣང་བ་བཞིན། །སར་གནས་འགྲོ་ལ་འོག་མིན་མངོན་དགའ་དང་། །རིན་ཆེན་ཡོངས་གང་བདེ་བ་ཅན་དང་ནི། །ལས་རབ་གྲུབ་པར་རྣམ་སྣང་མི་བསྐྱོད་པ། །རིན་འབྱུང་འོད་དཔག་དོན་གྲུབ་རིགས་ལྔ་ཉིད། །གཏི་མུག་ཞེ་སྡང་ང་རྒྱལ་འདོད་ཆགས་དང་། །ཕྲག་དོག་སྦྱང་ཕྱིར་སོ་སོའི་སྟོན་པར་སྣང་། །(༣༩)གཟུགས་བཟང་མེ་ལོང་བསྟན་པས་དོན་མཛད་དེ། །རྒྱལ་བའི་སྐུ་དང་འོད་ཟེར་འཁྱིལ་བ་ཉིད། །རང་གི་ལུས་དང་མཚུངས་པར་མ་མཐོང་ནས། །དེས་ན་ཆོས་ཉིད་རྟོགས་པ་རབ་སྦྱངས་པས། །ས་བཅུའི་དྲི་མ་རྣམ་བཅུ་རིམ་སྦྱངས་ཏེ། །ཀུན་ཏུ་འོད་ལ་འགོད་པའི་ཕྲིན་ལས་མཛད། །གདུལ་བྱ་ཇི་སྲིད་འདུལ་བྱེད་སྣང་བ་ནི། །ནམ་མཁས་གར་ཁྱབ་ཀུན་ཏུ་མཚུངས་པར་ཁྱབ། །འདི་ནི་རང་བཞིན་སྤྲུལ་པའི་སྐུ་ཞེས་བྱ། །དེ་ཉིད་ངང་ལས་འགྲོ་དྲུག་འཇིག་རྟེན་དུ། །ཐུབ་པ་དྲུག་གི་རྣམ་འཕྲུལ་མི་ཟད་པས། །འགྲོ་བའི་དོན་མཛད་ཆོས་ཚུལ་བསམ་ལས་སྟོན། །རང་དང་སྣང་ངོར་མཐུན་པའི་སྐུ་གསུང་ཐུགས། །སྣ་ཚོགས་མི་ཟད་རྒྱན་གྱི་འཁོར་ལོ་ཉིད། །ཇི་ལྟར་སྣང་བས་དེ་ལྟར་དོན་མཛད་པ། །འདི་ནི་འགྲོ་འདུལ་སྤྲུལ་པའི་སྐུ་ཞེས་བྱ། །དེ་ཉིད་ངང་ལས་སྣ་ཚོགས་སྤྲུལ་པའི་སྐུ། །བཟོ་དང་རང་བྱོན་སྐུ་གསུང་ཐུགས་ཀྱི་རྟེན། །ལྷ་དང་རི་མོ་ཡེ་གེ་ལ་སོགས་དང་། །རྫིང་དང་ཟམ་པ་ཁང་བཟང་སྐྱེད་མོས་ཚལ། །ས་ཆུ་མེ་རླུང་པདྨ་དཔག་བསམ་ཤིང་། །ནོར་བུ་སྒྲོན་མེ་སྨན་དང་ཁ་ཟས་མཆོག །གོས་དང་རྒྱན་སོགས་ཉེ་འཁོར་སྤྲུལ་ནས་ཀྱང་། །གནས་སྐབས་བདེ་སྐྱིད་མཐར་ཐུག་ལེགས་པའི་ལམ། །གང་ལ་འགྲོ་ཀུན་འགོད་པའི་ཕྲིན་ལས་ཅན། །སེམས་མེད་བེམས་པོར་སྣང་བས་དོན་བྱེད་པ། །རྒྱལ་བའི་ཐུགས་རྗེ་རྨད་བྱུང་མཐའ་ཡས་ནི། །སྣ་ཚོགས་མ་ངེས་སྤྲུལ་པའི་སྐུ་ཞེས་བྱ། །དེ་ལྟར་སྐུ་གསུམ་སྟོན་པ་དཔག་མེད་ཀྱང་། །གདུལ་བྱ་མེད་ཚེ་འདུལ་བྱེད་དབྱིངས་སུ་ནུབ། །སྔོན་བཞིན་དེ་ཡི་རང་བཞིན་རྣམ་དབྱེ་མེད། །དེ་ཡང་མས་རིམ་གཅིག་ལ་གཅིག་ཐིམ་ནས། །ལྷུན་གྲུབ་ཆོས་སྐུ་བདེ་ཀློང་གཅིག་ཏུ་འཁྱིལ། །ནང་གསལ་འཆར་གཞི་ཡེ་ཤེས་ཕྲ་མོའི་ངང་། །ཐམས་ཅད་མཁྱེན་ཉིད་ཞི་ལ་རྟག་བཞུགས་ནས། །གདུལ་བྱ་ཡོད་ན་ཡས་རིམ་སྔོན་བཞིན་སྣང་། །རྣམ་པ་ཐམས་ཅད་མཁྱེན་པའི་དོན་མཛད་དོ། །འདི་ནི་མཐར་ཕྱིན་ངེས་པའི་འབྲས་བུ་སྟེ། །དྲི་མེད་འོད་ཟེར་ཤར་བས་བསྟན་ནས་སོང་། །སྐལ་ལྡན་ངེས་པའི་ལམ་བཟང་འདོད་པ་དག །ལྷུན་གྲུབ་ས་ལ་གཏན་སྲིད་ཟིན་པར་མཛོད། །རྫོགས་པ་ཆེན་པོ་ཆོས་ཉིད་རང་གྲོལ་ལས། འབྲས་བུ་མཆོག་གི་གྲོལ་བའི་ལེའུ་སྟེ་གསུམ་པའོ།། །།

དེ་ལྟར་ཆོས་ཚུལ་ཟབ་ཅིང་རྒྱ་ཆེ་བ། །དྲི་མེད་འོད་ཟེར་ཤར་བས་སྣང་བྱས་པའི། །དགེ་བས་འགྲོ་ཀུན་སྲིད་པའི་མུན་བསལ་ཏེ། །སེམས་ཉིད་སངས་རྒྱས་པདྨོ་རྒྱས་པར་ཤོག །སྙིང་པོའི་མན་ངག་སྤྲིན་གྱི་ཕྲེང་བ་འདི། །གངས་རི་ཐོད་དཀར་མགུལ་དུ་ལེགས་བཀོད་པས། །སྐལ་ལྡན་བདུད་རྩིའི་ཆར་གྱིས་ཚིམ་བྱས་ཏེ། །ལམ་བཟང་སྣང་བས་ཕྱོགས་བཅུར་རྒྱས་པར་ཤོག །རྫོགས་པ་ཆེན་པོ་ཆོས་ཉིད་རང་(༤༠)གྲོལ་ཞེས་བྱ་བ། །དཔལ་ཨོ་རྒྱན་གྱི་སློབ་དཔོན་ཆེན་པོ་སེང་གེ་སྒྲ་སྒྲོགས་ཀྱིས་རྗེས་སུ་བཟུང་ནས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས་གངས་རི་ཐོད་དཀར་གྱི་མགུལ་དུ་བཀོད་པའོ། །སརྦ་མངྒ་ལཾ།། །།

རྫོགས་པ་ཆེན་པོ་ཆོས་ཉིད་རང་གྲོལ་གྱི་ཁྲིད་ཡིག

༄༅། །རྫོགས་ཆེན་ཆོས་ཉིད་རང་གྲོལ་གྱི་ཁྲིད་ཡིག་དོན་ཁྲིད་ཡིད་བཞིན་སྙིང་པོ་ཞེས་བྱ་བ་བཞུགས་སོ། །

༄༅། །རྫོགས་པ་ཆེན་པོ་ཆོས་ཉིད་རང་གྲོལ་གྱི་དོན་ཁྲིད་ཡིད་བཞིན་སྙིང་པོ་ཞེས་བྱ་བ། དཔལ་སྣང་བ་མཐའ་ཡས་ལ་ཕྱག་འཚལ་ལོ། །ཨོ་རྒྱན་མཚོ་གླིང་པདྨའི་ནགས་ཁྲོད་དུ། །རང་བྱུང་པདྨ་མཚན་དཔེས་བརྒྱན་པའི་སྐུ། །ཡོན་ཏན་ཀུན་རྫོགས་བརྙེས་ལ་ཕྱག་འཚལ་ཏེ། །ཡིད་བཞིན་སྙིང་པོའི་དོན་ཁྲིད་བརྗོད་པར་བྱ། །

དེ་ལ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་རྣམ་གྲངས་དཔག་ཏུ་མེད་པ་གསུངས་པའི་ངེས་དོན་མཐར་ཐུག་པ་རྡོ་རྗེའི་ཐེག་པ་ཡིན་ཞིང་། །དེའི་མཐར་ཐུག་པ་ལམ་རྫོགས་པའི་རིམ་པ་མངོན་དུ་གསལ་བ་རྫོགས་པ་ཆེན་པོ་ཆོས་ཉིད་རང་གྲོལ་དུ་གཏན་ལ་འབེབས་པར་བྱེད་དོ། །འདི་ལ་བླ་མ་བརྒྱུད་པའི་རིམ་པ། དེ་ལས་བྱུང་བའི་གདམས་པ། རྩིས་ཆེ་བ་བཀའ་རྒྱས་གདབ་པ་གསུམ་ལས། དང་པོ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། རྒྱལ་སྲས་དྲི་མེད་འོད་ཟེར་རྣམས་སོ། །

གཉིས་པ་ལ། བརྩོན་འགྲུས་རབ་ཚེ་འདིར་གྲོལ་བ། འབྲིང་བར་དོར་གྲོལ་བ། ཐ་མ་བདེ་བ་ཅན་དུ་འཕོས་ཏེ་གྲོལ་བའི་གདམས་པ་དང་གསུམ་ལས། དང་པོ་ལ། སྔོན་འགྲོས་སེམས་སྦྱང་བ། དངོས་གཞིའི་ངོ་སྤྲད་པ། རྗེས་ཇི་ལྟར་བསྐྱང་བ་གསུམ་ལས། དང་པོ་ལའང་རྣལ་འབྱོར་བདུན་གྱི། ཐོག་མར་བླ་མའི་རྣལ་འབྱོར་ནི། སྟན་བདེ་བ་ལ་འདུག་སྟེ། སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་ནས། རང་ཐ་མལ་བའི་སྤྱི་བོར་པད་ཟླའི་སྟེང་དུ་ཨ་དཀར་པོ་ལས་འོད་འཕྲོས་བདག་དང་སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་སྒྲིབ་པ་སྦྱངས། ལུས་འཇའ་ཚོན་ལྟར་ཟང་ཐལ་བ་ལ། རྡོ་རྗེ་སྙིང་པོའི་སྣོད་དུ་རུང་བ་བྱས། ཨ་ཡོངས་སུ་གྱུར་པ་ལས་རྩ་བའི་བླ་མ་ཉིད་སློབ་དཔོན་པདྨ་དང་ཐ་མི་དད་པ་ལ་བརྒྱུད་པའི་བླ་མས་བསྐོར་བ། ཐམས་ཅད་ཀྱང་གཅེར་བུ་རུས་པའི་རྒྱན་དང་ལྡན་པའི་ཌ་མ་རུ་དང་དྲིལ་བུའི་སྒྲ་འཁྲོལ་ཞིང་གར་མཛད་པའི་མཐར་མཁའ་འགྲོའི་སྤྲིན་ཕུང་འཕྲོ་བར་བསམ་པ་ལ། ཡིད་ཀྱིས་ཕྱག་འཚལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་རྣམས་བྱས་ཏེ། བླ་མ་རིན་པོ་ཆེ་བདག་གི་ལས་དང་ཉོན་མོངས་པའི་སྒྲིབ་པ་སྦྱངས་ཤིང་། །སྐུ་གསུངས་ཐུགས་ཀྱི་དངོས་གྲུབ་སྩལ་བ་དང་། །རྟོགས་པ་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ། ཞེས་པ་ལ་(༤༡)སོགས་པས་གསོལ་བ་བཏབ་པས་འོད་ཟེར་བྱུང་སྟེ་དངོས་གྲུབ་ཐོབ་པར་བསམ་ཞིང་། བདག་དང་སེམས་ཅན་ཐམས་ཅད་ཀྱིས་གསོལ་བ་འདེབས་པར་བསམས་ལ་སྙིང་ཐག་པ་ནས་མོས་གུས་རྩེ་གཅིག་ཏུ་བྱའོ། །རྗེས་ལ་སྣང་སྲིད་ཐམས་ཅད་བླ་མར་བསམས་ཏེ་རྨི་ལམ་ལྟ་བུའི་ངང་ནས་བསྔོ་བར་བྱའོ། །དེས་ནི་བྱིན་རླབས་ཐམས་ཅད་ཀྱི་རྩ་བ་སེམས་ཉིད་རྟོགས་པའི་ནུས་པ་ཁྱད་པར་ཅན་དུ་སྒྲུབ་པའི་དགོས་པ་ཡོད་དོ། །

གཉིས་པ་མཎྜལ་གྱི་རྣལ་འབྱོར་ནི། ལེགས་པར་ཕྱིས་ལ་ཚོམ་བུ་དགུ་ལ་སོགས་པ་བཀོད་དེ། འཇིག་རྟེན་གྱི་ཁམས་རྣམ་པར་དག་པ་རིན་པོ་ཆེ་སྣ་ཚོགས་ཀྱིས་གང་བ་ཕྱི་ནང་གི་མཆོད་སྤྲིན་རྒྱ་མཚོས་སྤྲས་པར་བསམས་ལ། མདུན་གྱི་ནམ་མཁར་བླ་མ་དང་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་ལ་ཕུལ་ཏེ། ཕྱོགས་བཅུའི་ཞིང་ཁམས་རྒྱ་མཚོའི་རྡུལ་སྙེད་ན། རི་རབ་ལྷུན་པོ་གླིང་བཞི་གླིང་ཕྲན་དང་། །ཉི་ཟླ་གཟའ་སྐར་ནོར་བུ་དཔག་བསམ་ཤིང་། །ཁོར་ཡུག་རི་དང་རི་ཕྲན་རིན་ཆེན་བདུན། །བཀྲ་ཤིས་ལྷ་མོ་མཆོད་པའི་སྤྲིན་འཕྲོ་བ། །ཕྱི་ནང་གསང་བ་བླ་ན་མེད་པ་ནི། །ནམ་མཁའི་མཐའ་ཀླས་ཡིད་ཀྱིས་མངོན་སྤྲུལ་ཏེ། །བླ་མ་ཡི་དམ་དཀྱིལ་འཁོར་ལྷ་ཚོགས་དང་། །མཁའ་འགྲོ་དམ་ཅན་རྒྱ་མཚོའི་ཚོགས་ལ་འབུལ། །རིན་ཆེན་མཎྜལ་ཀུན་བཟང་མཆོད་པའི་སྤྲིན། །དཔག་ཡས་ནམ་མཁའི་རྒྱུན་གྱུར་འདི་ཕུལ་བས། །རྒྱལ་བའི་འབྱོར་པ་ཕུན་ཚོགས་དང་ལྡན་པའི། །རྣམ་དག་ཞིང་ལ་འགྲོ་ཀུན་སྤྱོད་པར་ཤོག །ཅེས་པ་གསུམ་ལ་སོགས་པ་ཕུལ་བས། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་ཤིང་། ཉོན་མོངས་པ་དང་ཤེས་བྱའི་སྒྲིབ་པ་གཉིས་བྱང་ནས་སེམས་ཉིད་རྟོགས་པའི་དགོས་པ་ཡོད་དོ། །

གསུམ་པ་ཡི་གེ་བརྒྱ་པའི་རྣལ་འབྱོར་ནི། སྐད་ཅིག་གིས་སྟོང་པའི་ངང་ལས་པདྨ་དང་ཉི་ཟླའི་དབུས་སུ་ཧཱུྃ་ལས་རང་ཉིད་རྡོ་རྗེ་སེམས་དཔའ་མཐིང་ག་རིན་པོ་ཆེ་དང་རུས་པས་བརྒྱན་ཅིང་། རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་རྡོ་རྗེ་སྙེམས་མ་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། གཉིས་ཀའང་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་ཐུགས་ཀར་པདྨ་དང་ཉི་ཟླའི་དབུས་སུ་རྡོ་རྗེ་སྔོན་པོའི་ལྟེ་བ་ལ་ཧཱུྃ་གི་མཐར་སྐོར་དུ་ཡི་གེ་བརྒྱ་པས་བསྐོར་བར་བསམས་ལ། འོག་མིན་ནས་ཡེ་ཤེས་པ་བཀུག་ལ་ཐིམ་པར་བསམ་ཞིང་། ཡི་གེ་བརྒྱ་པ་བཟླས་པས་བདག་དང་སེམས་ཅན་ཐམས་ཅད་ཀྱི་སྒྲིབ་པ་སངས་སངས་དག་པར་བསམ་ཞིང་། མ་ཡེངས་པར་བཟླས་པའི་མཐར་བསྔོ་བ་བྱའོ། །དེས་ནི་འཁོར་བའི་བག་ཆགས་ཐམས་ཅད་བྱང་ནས་གནས་ལུགས་རྟོགས་པའི་དགོས་པ་ཡོད་དོ། །

བཞི་པ་ཚད་མེད་པ་བཞིའི་རྣལ་(༤༢)འབྱོར་ནི། ཁམས་གསུམ་གྱི་སེམས་ཅན་བདེ་བ་དང་མི་ལྡན་པ་རྣམས་ལ་དམིགས་ཏེ་བདེ་བ་དང་འཕྲད་པར་གྱུར་ཅིག་སྙམ་པའི་བྱམས་པ། སྡུག་བསྔལ་གྱིས་ཉམ་ཐག་པ་རྣམས་སྡུག་བསྔལ་དང་བྲལ་བར་གྱུར་ཅིག་སྙམ་པའི་སྙིང་རྗེ། བདེ་བ་དང་ལྡན་པ་རྣམས་བདེ་བ་དང་མི་འབྲལ་བར་གྱུར་ཅིག་སྙམ་པའི་དགའ་བ། ཉེ་རིང་ཆགས་སྡང་ཅན་རྣམས་ཆགས་སྡང་ཐམས་ཅད་དང་བྲལ་ནས་སེམས་ལས་སུ་རུང་བས་སྙོམས་པར་གྱུར་ཅིག་སྙམ་པའི་བཏང་སྙོམས་ཏེ། སེམས་ཅན་ཚད་མེད་པ་ལ་བློ་ཚད་མེད་པ་དུས་ཚད་མེད་པར་སྙིང་ཐག་པ་ནས་དུང་དུང་བསྒོམ་པར་བྱའོ། །དེས་ནི་སེམས་ལས་སུ་རུང་བ་དང་། སྙིང་རྗེ་ཁྱད་པར་དུ་འཕགས་པ་དང་། ཐབས་མཆོག་ཏུ་གྱུར་པས་ཟིན་པའི་ཤེས་རབ་སྐྱེ་བའི་དགོས་པ་ཡོད་དོ། །

ལྔ་པ་བྱང་ཆུབ་སེམས་ཀྱི་རྣལ་འབྱོར་ལ་སྨོན་པ་ནི། སེམས་ཅན་གྱི་དོན་དུ་བདག་གིས་རྫོགས་པའི་སངས་རྒྱས་ཐོབ་ནས་སེམས་ཅན་འཁོར་བ་ལས་དྲང་དགོས་སྙམ་དུ་སྙིང་ནས་དུང་དུང་བསྒོམ་ཞིང་། འཇུག་པ་ལ་ཁམས་གསུམ་གྱི་སེམས་ཅན་སྡུག་བསྔལ་གསུམ་གྱིས་ཉམ་ཐག་པ་རྣམས་ཀྱི་སྡུག་བསྔལ་དང་བདག་གི་བདེ་བ་གཉིས་བརྗེས་ཏེ་སེམས་ཅན་བདེ་བར་བསམ་པ་ལས། དམྱལ་བ་ཚ་གྲང། ཡི་དྭགས་བཀྲེས་སྐོམ། དུད་འགྲོ་བཀོལ་སྤྱོད་དང་གཏི་མུག །མི་སྐྱེ་རྒ་ན་འཆི། ལྷ་མ་ཡིན་འཐབ་རྩོད། ལྷ་འཆི་འཕོ་ལྟུང་བ་སྟེ་འདོད་ཁམས་པའི་སྡུག་བསྔལ་གྱི་སྡུག་བསྔལ་མངོན་གྱུར་ལ་གཞན་གཉིས་མཚུངས་ལྡན་དུ་ཡོད་པ་ལྟ་བུ་དང་། གཟུགས་ཁམས་པ་བསམ་གཏན་ལ་ཆགས་པས་སྔ་མའི་འབྲས་བུ་ཟད་དུས་ངན་སོང་ལ་སོགས་པར་འཇུག་པར་འགྱུར་བའི་སྡུག་བསྔལ་མངོན་གྱུར་ལ་གཞན་གཉིས་བག་ལ་ཉལ་དུ་ཡོད་པ་དང་། གཟུགས་མེད་ཞི་གནས་རྩེ་གཅིག་ཏུ་གནས་པས་དགེ་བ་སྒྲུབ་པའི་སྐལ་བ་མེད་ཅིང་སེམས་དེས་ཕྱིས་སྡུག་བསྔལ་གཞན་འདུ་བྱེད་པས། འདུ་བྱེད་ཀྱི་སྡུག་བསྔལ་མངོན་གྱུར་ལ་གཞན་གཉིས་བག་ལ་ཉལ་དུ་གནས་པའི་སྡུག་བསྔལ་གྱི་ཆ་དེ་བདག་གིས་བླངས་ཏེ། བདག་གི་བདེ་བའི་ཆ་དགེ་བ་གཞན་ལ་བཏང་བས་ཁམས་གསུམ་གྱི་སེམས་ཅན་ཐམས་ཅད་བདེ་ཞིང་སྐྱིད་ནས་ཐར་པའི་ལམ་ལ་འཛེག་པར་བསམ་མོ། །དེས་ནི་ཅི་བྱས་གཞན་དོན་དུ་འགྱུར་ཞིང་དགེ་རྩ་རླབས་ཆེ་བས་མྱུར་དུ་སངས་རྒྱས་འགྲུབ་ཅིང་སྟོང་ཉིད་སྙིང་རྗེའི་སྙིང་པོ་ཅན་རྒྱུད་ལ་སྐྱེ་བའི་དགོས་པ་ཡོད་དོ། །

དྲུག་པ་རིག་པ་ངོ་མཐོང་གི་རྣལ་འབྱོར་ནི། ལུས་ངག་ཡིད་གསུམ་བསྒྲིམས་ཏེ་རྟོག་པ་སྐད་ཅིག་ཀྱང་མི་འཕྲོ་བར་བྱ་སྙམ་དུ་རྩེ་གཅིག་པས་མཉམ་པར་བཞག་གོ། །དེས་ནི་འཆར་སྒོ་ཡེ་ཤེས་ཀྱི་ཀུན་རྟོག་སྔོན་བས་གསལ་ཞིང་རིག་པ་ངོས་ཟིན་པའི་དགོས་(༤༣)པ་ཡོད་དོ། །

བདུན་པ་ལྷག་མཐོང་ཡེ་ཤེས་ཀྱི་རྣལ་འབྱོར་ལ་གསུམ་ལས། དང་པོ་བྱུང་གནས་འགྲོ་གསུམ་ལ་བརྟག་པ་ནི། དེ་ལྟར་སྣ་ཚོགས་སུ་ཐོལ་ཐོལ་ཤར་བའི་རྟོག་པ་སྟེ། ཤར་དུས་ཉིད་ནས་ཕྱི་སྣང་བའི་ཡུལ་ལས་བྱུང་ངམ། ནང་ཕུང་པོའི་ཁམས་ལས་བྱུང་ངམ། ད་ལྟ་རྟོག་པ་འགྱུ་དུས་ན་ཕྱི་ནང་གང་ན་གནས། རྟོག་པ་སྔ་མ་ཡལ་དུས་ན་གང་དུ་སོང་བ་ཡིན་སྙམ་དུ་ཕྱི་ཡུལ་དང་ནང་ལུས་རྡུལ་ཕྲན་ཆ་མེད་དུ་གཞིག་ལ་བཙལ་བས། དུས་གསུམ་རྩ་བ་དང་བྲལ་བའི་སེམས་ཉིད་ཆོས་སྐུ་ལྷུན་གྲུབ་ཆེན་པོར་གཏན་ལ་ཕེབས་སོ། །

གཉིས་པ་ཁ་དོག་དབྱིབས་མཚན་ལ་བརྟག་པ་ནི། ཤར་ཤར་ཝལ་ཝལ་འགྱུ་བའི་སེམས་འདི་སྔོན་པོ་དང་སེར་པོ་ལ་སོགས་པའི་ཁ་དོག་ཏུ་འདུག་གམ། ནར་མོ་དང་གྲུ་བཞི་ལ་སོགས་པའི་དབྱིབས་སུ་འདུག་གམ། ཕོ་མོ་མ་ནིང་ལ་སོགས་པའི་རིགས་དང་རྒན་གཞོན་སྐྱེ་འཆི་ལ་སོགས་པའི་མཚན་མར་འདུག་གམ་སྙམ་དུ་བརྟགས་པས། རྒྱ་ཆད་ཕྱོགས་ལྷུང་དང་བྲལ་བའི་རིག་པ་སྟོང་གསལ་ལོངས་སྐུ་འགག་མེད་ཆེན་པོར་གཏན་ལ་ཕེབས་སོ། །

གསུམ་པ་བླང་དོར་ངོས་བཟུང་བར་བརྟག་པ་ནི། སྐད་ཅིག་མའི་དྲན་རིག་སྣ་ཚོགས་སུ་ཤར་བ་འདི་ལ། འདི་ནག་པོ་སྐྱོན་ཅན་དུ་འདུག་པས་སྤང་བྱ། འདི་དཀར་པོ་ཡོན་ཏན་ཅན་དུ་འདུག་པས་བླང་བྱ། འདི་ལྟ་སྒོམ་སྤྱོད་པར་འདུག་པས་བསྒོམ་བྱ། འདི་བཟླས་བརྗོད་བསྐྱེད་རྫོགས་སུ་འདུག་པས་བསྟེན་བྱ་སྟེ། འདི་ཀ་ཡིན་བྱ་བའི་ངོ་བོ་དང་ངོས་བཟུང་ལ་བརྟགས་པས། རིག་པ་ཤར་གྲོལ་ཆོས་སྐུ་ཀུན་ཁྱབ་ཆེན་པོར་གཏན་ལ་ཕེབས་སོ། །དེ་ལྟར་སྦྱངས་པས་སེམས་ཉིད་དོན་གྱི་ཡེ་ཤེས་ལྷག་མཐོང་རྗེན་པའི་རྟོགས་པ་ཉི་མ་ཤར་བ་ལྟ་བུ་རྒྱུད་ལ་སྐྱེ་བའི་དགོས་པ་ཡོད་དོ། །

གཉིས་པ་དངོས་གཞིའི་ངོ་སྤྲོད་པ་ནི། འདི་ལྟར་སྣང་སྲིད་འཁོར་འདས་ཀྱི་ཆོས་ཐམས་ཅད་རིག་པའི་ཆོ་འཕྲུལ་མདང་གི་རྨི་ལམ་ལྟ་བུ་ཡིན་ལ། རིག་པའི་གནས་ལུགས་ངོ་བོ་སྟོང་པའི་ཆོས་སྐུ། རང་བཞིན་གསལ་བས་ལོངས་སྐུ། འཆར་ཚུལ་རྐྱེན་གྱིས་སྣ་ཚོགས་སུ་སྣང་བས་སྤྲུལ་སྐུ་སྟེ། ད་ལྟར་གྱི་ཤེས་པ་ཐ་མལ་རང་འགྲོས་སུ་འཆར་བ་འདི་ཉིད་སངས་རྒྱས་ཀྱི་དགོངས་པ་མཐའ་གྲོལ་ཀློང་ཡངས་ཆེན་པོ་ཡིན་ཏེ། སློབ་དཔོན་གྱི་ཞལ་ནས། སྟོང་གསལ་རིག་པའི་ཡེ་ཤེས་ནི། །འཆར་ཚུལ་རྐྱེན་གྱིས་ཅིར་ཡང་སྣང་། །ཡིན་ཚུལ་ངེས་པ་མེད་པ་ལ། །རང་ཉིད་ཤར་བས་རང་སར་གྲོལ། །ཆུ་དང་རླབས་དང་རྒྱ་མཚོ་བཞིན། །རྟོག་པ་ཡེ་ནས་ཆོས་སྐུའི་གདངས། །ཆོས་དབྱིངས་གཞན་ཞིག་བསྒོམ་དུ་མེད། །རྟོག་སྤང་མི་རྟོག་སྒོམ་འདོད་པས། །སྣང་སྲིད་དགྲར་ལྡང་གྲོལ་འཁྲུལ་ལྟུང་། །གང་ཤར་སྤང་བླང་མེད་པ་ནི། །སྣང་སྲིད་རྒྱ་ཐེག་ཀུན་བཟང་(༤༤)ས། །སྒོམ་དང་མི་སྒོམ་རྩིས་ལས་འདས། །ལམ་མཆོག་འདི་ཉིད་ཁྱད་པར་འཕགས། །ཞེས་གསུངས་པས། ད་ལྟར་གྱི་ཤེས་པ་གང་ཤར་སོ་མ་ལ་བཅོས་བསླད་ཀྱི་བཟོ་མ་བྱེད་པར་ཅེར་གྱིས་ལྟོས་ལ་ཕྱམ་གྱིས་ཞོག །ལྷོད་ཀྱིས་གློད་ལ་གང་བདེར་ཞོག །ཤར་བ་ངོས་ཟུངས་ལ་ངང་དྭངས་སོ་མར་ཞོག །འཛིན་མེད་རང་བབས་སུ་ཐོངས་ལ་རང་འགྲོས་ཞེན་མེད་དུ་ཞོག །རྣམ་རྟོག་གང་སྐྱེས་ངོས་ཟིན་པས་རང་སར་གྲོལ་བ་ལྟ་བ། དེའི་ངང་ལ་ངང་དྭངས་བདེ་གསལ་མི་རྟོག་ཏུ་གནས་པ་བསྒོམ་པ། དེའི་ཚེ་ཕྱི་ནང་ཞེན་མེད་དུ་ཤར་བ་སྤྱོད་པ། གཏད་མེད་རང་ལུགས་སུ་གྲོལ་བ་འབྲས་བུ་སྟེ། མ་བྱས་པ་ཡི་ཆོས་ཉིད་ལ། །རང་བབ་ཆེན་པོའི་རིག་པར་ཤར། །རང་གྲོལ་ངང་དྭངས་འཛིན་པ་མེད། །ཀུན་ཏུ་བཟང་པོའི་གྲོལ་གཞི་ཡིན། །ཡེ་ནས་གྲོལ་བའི་སེམས་ཉིད་ལ། །གཟོད་ནས་གྲོལ་བ་མི་དགོས་པས། །ཐ་མལ་ཤེས་པ་རང་སོར་ཞོག །རང་གྲོལ་སྟོང་གསལ་རིག་པ་ནི། །སྐུ་གསུམ་བདེ་ཆེན་སངས་རྒྱས་ཞིང་། །ཐམས་ཅད་གཞི་གནས་ཆོས་སྐུའི་ངང་། །བཅོས་བསྒྱུར་གཉེན་པོས་བཟང་ངན་མེད། །བདེ་སྡུག་སེམས་ཀྱི་མེ་ལོང་ལ། །རྣལ་འབྱོར་རིག་པའི་རྩལ་སྦྱང་བྱ། །འདི་ནི་ཐེག་པ་ཀུན་གྱི་རྩེ། །རྡོ་རྗེ་སྙིང་པོའི་ལམ་མཆོག་ཡིན། །ཞེས་ཐེབས་པར་གདབ་བོ། །དེ་ལྟར་རྟོག་པ་གང་འཕྲོས་ཀྱི་རང་དུས་ན་རྦད་ཀྱིས་བཅད་ལ་ཕྱམ་གྱིས་བཞག་པས། རིག་པའི་ངོ་བོ་སྟོང་གསལ་སྤྲོས་པ་བྲལ་བའི་ཡེ་ཤེས་ཁོང་ནས་འཆར་ཏེ་འདོད་པའི་སེམས་ལས་རང་གྲོལ། ཕྱི་མའི་རྟོག་པ་བསམ་གཟུགས་གཟུགས་མེད་ཀྱི་ཤེས་པ་ལས་གྲོལ་ཏེ། ངང་དྭངས་ཤར་གྲོལ་ཆུ་བོ་རྒྱུན་གྱི་རྣལ་འབྱོར་ཆེན་པོ་ལྷུན་གྱིས་གྲུབ་པའོ། །

གསུམ་པ་རྗེས་ཇི་ལྟར་བསྐྱང་བ་ལ། ཐོ་རངས་ངང་དྭངས་ནམ་མཁའ་ལྟ་བུ་རྣམ་པར་མི་རྟོག་པའི་ཡེ་ཤེས་ཞི་ལྷག་ཟུང་འབྲེལ་ལ་ལུས་གནད་བཅོས་ཏེ་མིག་མི་འགུལ་བར་ཉམས་སུ་བླང་ངོ་། །དེས་ནི་བདེ་གསལ་མི་རྟོག་པའི་ཏིང་ངེ་འཛིན་ལྷུན་གྲུབ་ཏུ་འཆར་ཞིང་སྤྱན་དང་མངོན་ཤེས་འགྲུབ་པར་འགྱུར་རོ། །སྔ་དྲོ་འཕྲོ་གནས་གཉིས་སུ་མེད་པས་སྐད་ཅིག་རང་གྲོལ་གྱི་དོན་ལ་རིག་པའི་རྩལ་སྦྱངས་པས་ལྷག་མཐོང་རང་གྲོལ་གྱི་རྟོགས་པ་གོང་འཕེལ་དུ་འགྲུབ་བོ། །གུང་ལ་ཆོས་ཐམས་ཅད་རྨི་ལམ་དང་། སྒྱུ་མ་དང་། སྨིག་རྒྱུ་དང་། སྒྲ་བརྙན་དང་། སྤྲུལ་པ་དང་། མིག་ཡོར་དང་། གཟུགས་བརྙན་ལྟ་བུར་ཝལ་ཝལ་སྦྱང་ཞིང་། སེམས་ཅན་ཐམས་ཅད་ལ་དག་སྣང་དང་མོས་གུས་ཕྱོགས་མེད་དུ་སྦྱང་ཞིང་། བླ་མ་ལ་སོགས་པ་ལ་ལྷག་པར་མོས་གུས་དུང་དུང་བསྒོམས་པས། བདེན་མེད་ཀྱི་ངང་ནས་མཆོག་དང་ཐུན་མོང་གི་དངོས་གྲུབ་མྱུར་དུ་འགྲུབ་བོ། །ཕྱི་དྲོ་འཁོར་བའི་ཉེས་དམིགས། ཐར་པའི་ཕན་ཡོན། ལས་འབྲས་ཀྱི་ཡིད་ཆེས། དལ་འབྱོར་རྙེད་དཀའ། ཚེ་མི་རྟག་པ་ལ་སོགས་པས་བློ་སྣ་ཐུང་རྦུད་རྦུད་པ་ལ་བསླབ་བོ། །(༤༥)དེས་ནི་ཚེ་འདིའི་སྣང་བ་ལ་ཡིད་མི་འཇུག་ཅིང་ཕྱི་མའི་དོན་དུ་ཆོས་སྒྲུབ་པ་ལ་བརྩོན་འགྲུས་ཕུན་སུམ་ཚོགས་པ་འགྲུབ་བོ། །སྲོད་ལ་སྣང་བ་སེམས་སུ་ཐག་བཅད་དེ་སྣ་ཚོགས་རྨི་ལམ་འདྲ་བའི་ངང་ནས་བདེ་གསལ་རྣམ་པར་མི་རྟོག་པའི་ངང་ལ་མཉམ་པར་བཞག་པས། བར་ཆད་རང་སར་ཞི་སྟེ་དངོས་འཛིན་འཁྲུལ་པ་འཇིག་པའི་ངོ་བོ་འགྲུབ་བོ། །གུང་ལ་ཉལ་དུས་སེམས་ཉིད་མ་སྐྱེས་པའི་ངང་ལ་རྣམ་རྟོག་འཕྲོ་འདུ་མེད་པར་གཉིད་ལོག་པས་རྨི་ལམ་འོད་གསལ་བདེ་བ་ཆེན་པོར་འཆར་ཞིང་། ཉིན་མཚན་གཉིས་སུ་མེད་པའི་དགོངས་པ་འགྲུབ་པར་འགྱུར་རོ། །

དེ་ལྟར་ཉིན་མཚན་ཀུན་ཏུ་བརྩོན་པས་གནས་པའི་ཚེ། ལྟེངས་པ། གོལ་བ། འབྱམས་པ་གསུམ་ལས། ཇི་ཙམ་བསྒོམས་ཀྱང་སྐྱེད་མེད་ན་ལྟེངས་པ་སྟེ། ཤར་གྲོལ་ལྟེངས་ནས་ལྷག་མཐོང་གི་རྩལ་ཆུང་ན། སྐད་ཅིག་ཀྱང་གནས་སུ་མི་གཞུག་པར་དར་པོ་ཆེ་རླུང་གིས་བསྐྱོད་པ་ལྟར་འཕྲོར་བཅུག་ལ་རང་གྲོལ་དུ་སྦྱངས་པས་ལྷག་མཐོང་གི་ཡེ་ཤེས་རྒྱུད་ལ་གློ་བུར་དུ་འཆར་རོ། །ངང་དྭངས་རྣམ་པར་མི་རྟོག་པའི་ཞི་ལྷག་ལྟེངས་ནས་སྐྱེད་ཆུང་ན། ནམ་མཁའ་སྤྲིན་མེད་པའི་ཚེ་ཉི་མ་ལ་རྒྱབ་བསྟན་ཏེ། ནམ་མཁའི་ངང་དུ་མིག་ཧར་པོ་གཏད་ལ། སེམས་མི་འཕྲོ་བར་བཞག་པས་སྟོང་གསལ་སྤྲོས་དང་བྲལ་བའི་ཡེ་ཤེས་ཁོང་ནས་འཆར་རོ། །གཞན་ཡང་ཞི་གནས་ལྟེངས་ན་ལྷག་མཐོང་གིས་བཤིག་ལ་བསྒོམ། ལྷག་མཐོང་ལྟེངས་ན་ཞི་གནས་རྣམ་པར་མི་རྟོག་པའི་ངང་ལ་བཞག་པ་ཡང་རབ་ཏུ་ཟབ་བོ། །གོལ་གཞི་འདྲ་མིན་འཆོལ་བའི་ལམ་ལ་འཁྱམས་པ་སྟེ། །དང་པོར་བསྒོམས་པས་ཡོན་ཏན་ཅུང་ཟད་སྐྱེས་ཀྱང་རློམ་སེམས་དང་ང་རྒྱལ་ལ་སོགས་པས་ཁེངས་ན་གོང་མའི་ཡོན་ཏན་ལ་བསམ། ཚེ་འདི་ལ་ཆགས་ན་མི་རྟག་པ་བཙན་ཐབས་སུ་བསྒོམ། ཉམས་མཐོ་དམན་ལ་ཆགས་ན་གང་ཆགས་བཤིག་ལ་བསྒོམ། བྱམས་སྙིང་རྗེ་མེད་ན་འགྲོ་དྲུག་ཕ་མར་བསྒོམ། རིག་པས་རྐྱེན་མ་ཐུབ་ན་རྐྱེན་སྣང་བསྲེས་ལ་བསྒོམ། འདི་དག་ནི་མཆོག་ཏུ་ལས་དང་པོ་པ་ལ་ཟབ་བོ། །འབྱམས་པ་ལ། ཤར་གྲོལ་རྟོག་པར་འབྱམས་ན་སེམས་ནང་དུ་མི་གནས་པས་ཞི་གནས་ཀྱི་དོན་ལ་བསྒོམ། ངང་དྭངས་བདེ་ཆགས་སུ་འབྱམས་ན་རྟོགས་པ་ལ་སྐྱེད་མི་འབྱུང་བས་རྣམ་རྟོག་སྣ་ཚོགས་སུ་སྤྲོས་ལ་ཤར་གྲོལ་འཛིན་མེད་དུ་སྦྱང་། གཞན་ཡང་སྟོང་པའི་ཉམས་སྐྱེ་དུས་ཐམས་ཅད་སྟོང་པར་འདུག་པས་ལས་འབྲས་ཁྱད་དུ་གསོད་པའི་བདུད་འཇུག་སྟེ་སྙིང་རྗེ་བཙན་ཐབས་སུ་བསྒོམ་པ་ལ་འབད་དོ། །སྙིང་རྗེའི་ཉམས་སྐྱེ་དུས་འགྲོ་དྲུག་རང་མཚན་དུ་ཞེན་ནས་སྟོང་ཉིད་གཏད་མེད་ལ་ལོག་པ་ལྟ་བའི་བདུད་འཇུག་པས་ཐམས་ཅད་སྐྱེ་མེད་དུ་ཤེས་པ་གཅེས་སོ། །མདོར་ན་གང་བསྒོམས་ཀྱང་དེའི་ཉམས་སྐྱེ་བས་གཞན་ཁྱད་དུ་གསོད་(༤༦)པ་བྱུང་ན་དེ་ལས་བཟློག་པའི་ཐབས་ལ་བརྟེན་པ་མཆོག་ཏུ་ཟབ་བོ། །འདི་ལྟར་ཉིན་མཚན་དུ་འབད་ན་ཉི་མ་རེ་རེ་ཞིང་སྔོན་བས་འཕགས་པའི་ཡོན་ཏན་དུ་མ་གསར་དུ་འབྱུང་ཞིང་། སྟོང་པ་དང་སྙིང་རྗེ་ཟུང་དུ་འབྲེལ་བས་ཆོས་གང་ལའང་བདེན་ཞེན་སྐྲའི་རྩེ་མོ་ཙམ་ཡང་མེད་པར་འཁོར་བའི་གཟུང་འཛིན་མྱ་ངན་ལས་འདས་པར་གྲོལ་ཏེ། ཚེ་འདི་ཉིད་ལ་ཆོས་ཉིད་རྫོགས་པ་ཆེན་པོའི་གོ་འཕང་ཐོབ་པར་འགྱུར་རོ། །

གཉིས་པ་འབྲིང་བར་དོར་གྲོལ་བའི་གདམས་ངག་ལ། སྐྱེ་ཤིའི་བར་དོར་རྩལ་སྦྱང་བ། འཆི་ཁའི་བར་དོར་གསལ་གདབ་པ། འཁོར་འདས་བར་དོར་གྲོལ་ས་གཟུང་བ་གསུམ་ལས། དང་པོ་ལ་གཉིས་ལས། ཉིན་སྣང་གི་བར་དོར་རྩལ་སྦྱང་བ་ནི། སྔར་བསྟན་པ་བཞིན་བསྒོམ་པའོ། །གཉིས་པ་མཚན་སྣང་གི་བར་དོར་ཚད་འཛིན་པའོ། །དེའང་དང་པོར་རྨི་ལམ་མི་དགེ་བ་འགག །གཉིས་པར་རྨི་ལམ་རང་ངོ་ཤེས་ནས་བདེན་མེད་དུ་སྦྱང་། གསུམ་པ་རྨི་ལམ་འོད་གསལ་དུ་ཐིམ་ནས་མི་རྨི་བ་ནི་བར་དོར་གྲོལ་བའི་ཚད་དོ། །

གཉིས་པ་ནི། འཆི་ཁའི་ཚེ་ས་ཆུ་ལ་ཐིམ་པས་ལུས་ལྗི་ཞིང་ལྡང་མི་ནུས། དེ་དང་མཉམ་དུ་གཟུགས་སྒྲ་ལ་ཐིམ་པས་མིག་མི་གསལ་དུ་འགྲོ། །དེ་ནས་ཆུ་མེ་ལ་ཐིམ་པས་ལུས་ཀྱི་ཁྲག་དང་ཆུ་སེར་ལ་སོགས་པ་གཤེར་བའི་ཆ་རྣམས་དྭངས་མར་འདུ་ཞིང་སྐམ། དེ་དུས་སྒྲ་དྲི་ལ་ཐིམ་པས་རྣ་བ་མི་གསང་དུ་འགྲོ། དེ་ནས་མེ་རླུང་ལ་ཐིམ་པས་དྲོད་སྙིང་གར་བསྡུ། དེ་དུས་དྲི་རོ་ལ་ཐིམ་པས་སྣས་དྲི་མི་ཚོར། དེ་ནས་རླུང་རྣམ་ཤེས་ལ་ཐིམ་པས་དབུགས་འགྱུ་བ་ཆད། དེ་དུས་རོ་རེག་ལ་ཐིམ་པས་ལྕེས་རོ་མི་ཚོར། རྣམ་ཤེས་ནམ་མཁར་ཐིམ་པས་ཕྲ་རགས་ཀྱི་འཛིན་པ་ནུབ། དེ་དུས་རེག་ཆོས་ལ་ཐིམ་པས་བྱུང་ཚོར་གྱི་འདུ་ཤེས་འགག །དེ་ལས་ཐིག་ལེ་དཀར་དམར་ཨ་ཧཾ་སྙིང་གར་འདྲེས་ཏེ་ནམ་མཁའ་འོད་གསལ་ལ་ཐིམ་པའི་ཚེ་བདེ་གསལ་མི་རྟོག་པའི་ཡེ་ཤེས་སྐད་ཅིག་མ་བཞིར་འཆར་ཏེ། ཆོས་ཉིད་གདོད་མའི་སར་ཐིམ་པས་འཁོར་བའི་རང་བཞིན་མྱ་ངན་ལས་འདས་པར་གྲོལ་དུ་ཉེ་བའོ། །དེ་དག་གི་ཚེ་སྒེག་མོ་མེ་ལོང་ལ་ལྟ་བ་ལྟར། སྔར་གདམས་པ་དང་བར་དོའི་འོད་གསལ་དྲན་པས་གསལ་གདབ་པའོ། །

གསུམ་པ་ནི། དེ་ནས་མྱ་ངན་ལས་འདས་པའི་བར་དོར་སྐད་ཅིག་མ་གཞིའི་ཡེ་ཤེས་ཆོས་ཀྱི་སྐུ་དང་། སྣང་བ་རྣམ་པར་དག་པའི་འོད་གསལ་ལོངས་སྐུ་བསམ་གཏན་གྱི་ཞག་ལྔ་དང་། དེ་ཉིད་དུ་གྲོལ་བས་འགྲོ་དྲུག་རང་གནས་སུ་འཕྲོ་བ་སྤྲུལ་པའི་སྐུ་ལྷུན་གྲུབ་ཆེན་པོའི་སྣང་བ་ཤར་ནས་གདོད་མའི་སར་བྱངཆུབ་པ་ཉིད་བརྗོད་དེ། དེའང་འོད་གསལ་གྱི་སྐད་ཅིག་དང་པོ་ལ་སྣང་བ་ཞེས་བྱ་བའི་ཡེ་ཤེས་བདེ་གསལ་རྣམ་པར་མི་རྟོག་པ་སྔོན་བས་ཆེས་འཕགས་པ་སྐད་ཅིག་མ་གཅིག་ཏུ་འཆར་ཏེ། རིག་པའི་སྣང་ཡུལ་ཟླ་བ་ཤར་བ་ལྟར་དཀར་ལ་(༤༧)སྨིག་རྒྱུ་དང་དུ་བ་ལྟར་བན་བུན་སྣང་ངོ་། །ཡེ་ཤེས་དེས་ཞེ་སྡང་ལས་གྱུར་པའི་རྟོག་པ་སུམ་ཅུ་རྩ་གསུམ་འགགས་ཏེ། གང་ཞེ་ན། འཕགས་པ་ལྷའི་སྤྱོད་བཏུས་ལས། སྐྱེ་བ་ནི་ཀུན་རྫོབ་ཀྱི་བདེན་པའོ། །འཆི་བ་ནི་དོན་དམ་པའི་བདེན་པའོ། །དེའི་ཚེ་འོད་གསལ་བའི་ཡེ་ཤེས་བཞི་ཉིད་ལས། སྐད་ཅིག་མ་དང་པོས་ཞེ་སྡང་ལས་གྱུར་པའི་ཀུན་ཏུ་རྟོག་པ་སུམ་ཅུ་རྩ་གསུམ་འགག་གོ། །སུམ་ཅུ་རྩ་གསུམ་པོའི་མིང་གང་ཞེ་ན། འདི་ལྟ་སྟེ། འདོད་ཆགས་དང་བྲལ་བ་དང་། འདོད་ཆགས་དང་བྲལ་བ་བར་མ་དང་། ཤིན་ཏུ་འདོད་ཆགས་དང་བྲལ་བ་དང་། ཡིད་ཀྱིས་འགྲོ་བ་དང་། སོང་བ་དང་། མྱ་ངན་དང་། མྱ་ངན་བར་མ་དང་། ཤིན་ཏུ་མྱ་ངན་དང་། ཞི་བ་དང་། རྣམ་རྟོག་དང་། འཇིགས་པ་དང་། འཇིགས་པ་བར་མ་དང་། ཤིན་ཏུ་འཇིགས་པ་དང་། སྲེད་པ་དང་། སྲེད་པ་བར་མ་དང་། ཤིན་ཏུ་སྲེད་པ་དང་། ཉེ་བར་ལེན་པ་དང་། མི་དགེ་བ་དང་། བཀྲེས་པ་དང་། སྐོམ་པ་དང་། ཚོར་བ་དང་། ཚོར་བ་བར་མ་དང་། ཤིན་ཏུ་ཚོར་བ་དང་། རིག་པ་པོ་དང་། རིག་གཞི་དང་། སོ་སོར་རྟོག་པ་དང་། ངོ་ཚ་ཤེས་པ་དང་། བརྩེ་བ་དང་། བརྩེ་བ་བར་མ་དང་། ཤིན་ཏུ་བརྩེ་བ་དང་། དགོངས་པ་དང་བཅས་པ་དང་། བསགས་པ་ཉིད་དང་། ཕྲག་དོག་སྟེ། རང་བཞིན་གྱི་རྟོག་པ་སུམ་ཅུ་རྩ་གསུམ་མོ། །ཞེས་གསུངས་སོ། །དེའི་ཚེ་ཞེ་སྡང་མེ་ལོང་ལྟ་བུའི་ཡེ་ཤེས་སུ་ཐིམ་པའོ། །དེ་ནས་མཆེད་པ་ཞེས་བྱ་བའི་ཡེ་ཤེས་སྔོན་བས་ཆེས་དག་པར་ཤར་བའི་ཚེ། རིག་པའི་སྣང་ཡུལ་ཉི་མ་ཤར་བ་ལྟར་དམར་གསལ་དུ་གྱུར་ཏེ། སྲིན་བུ་མེ་ཁྱེར་ཙམ་སྣང་བ་སྐད་ཅིག་མ་གཉིས་ཀྱི་ཡུན་གནས་སོ། །ཡེ་ཤེས་དེས་འདོད་ཆགས་ལས་བྱུང་བའི་རྟོག་པ་བཞི་བཅུ་སོ་སོར་རྟོག་པའི་ཡེ་ཤེས་ཀྱི་དབྱིངས་སུ་ནུབ་སྟེ། སྔ་མ་དེའི་འཕྲོ་ལས། སྐད་ཅིག་མ་གཉིས་པས་འདོད་ཆགས་ལས་བྱུང་བའི་ཀུན་ཏུ་རྟོག་པ་བཞི་བཅུ་འགག་གོ། །གང་ཞེ་ན། འདི་ལྟ་སྟེ། ཆགས་པ་དང་། ཆགས་པ་བར་མ་དང་། ཀུན་ཏུ་ཆགས་པ་དང་། དགའ་བ་དང་། དགའ་བ་བར་མ་དང་། ཤིན་ཏུ་དགའ་བ་དང་། རངས་པ་དང་། རབ་ཏུ་མགུ་བ་དང་། ངོ་མཚར་བ་དང་། དགོད་པ་དང་། ཚིམ་པ་དང་། འཁྱུད་པ་དང་། འོ་བྱེད་པ་དང་། འཇིབ་པ་དང་། བརྟན་པ་དང་། བརྩོན་པ་དང་། ང་རྒྱལ་དང་། བྱ་བ་དང་། འགྲོགས་པ་དང་། སྟོབས་དང་། སྤྲོ་བ་དང་། ལྷན་ཅིག་བྱེད་པའི་དགའ་བ་ལ་སྦྱོར་བ་དང་། ཤིན་ཏུ་དགའ་བ་ལ་སྦྱོར་བ་དང་། སྒེག་པ་དང་། རྣམ་པར་སྒེག་པ་དང་། ཁེས་གྲགས་པ་དང་། དགེ་བ་དང་། ཚིག་གསལ་བ་དང་། བདེན་པ་དང་། ངེས་པ་དང་། ཉེ་བར་ལེན་པ་དང་། སྦྱིན་པ་པོ་དང་། གཞན་ལ་བསྐུལ་བ་དང་། དབང་བ་དང་། ངོ་ཚ་བ་མེད་པ་དང་། གཡོ་སྒྱུ་དང་། སྡུག་པ་པོ་དང་། མི་སུན་པ་དང་། གྱ་གྱུ་ཆེ་བ་སྟེ། འདོད་ཆགས་(༤༨)ལས་གྱུར་པའི་རྟོག་པ་བཞི་བཅུའོ། །ཞེས་སོ། །དེ་ནས་མཆེད་པ་ཐོབ་པ་ལ་ཐིམ་པས། སྔོན་བས་འཕགས་པའི་བདེ་གསལ་མི་རྟོག་པ་ཆེར་སྐྱེས་པ་ནི་ཐོབ་པའི་ཡེ་ཤེས་ཏེ། རིག་པའི་སྣང་ཡུལ་ནུབ་ཁའི་སྣང་བ་ལྟ་བུ་ལྗང་སེར་ལས་མར་མེ་རླུང་གིས་མ་བསྐྱོད་པ་ལྟ་བུ་སྐད་ཅིག་མ་གསུམ་དུ་འཆར་རོ། །ཡེ་ཤེས་དེས་གཏི་མུག་ལས་གྱུར་པའི་རྟོག་པ་བདུན་འགག་སྟེ། སྔ་མའི་འཕྲོ་ལས། སྐད་ཅིག་མ་གསུམ་པས་ནི། གཏི་མུག་ལས་གྱུར་པ་བདུན་འགག་གོ། །གང་ཞེ་ན་འདི་ལྟ་སྟེ། ཆགས་པ་བར་མ་དང་། བརྗེད་ངས་དང་། འཁྲུལ་པ་དང་། མི་སྨྲ་བ་དང་། སྐྱོ་བ་དང་། ལེ་ལོ་དང་། ཐམས་ཅད་གཏི་མུག་ལས་གྱུར་པ་སྟེ་བདུན་པོ་དེ་དག་འགག་གོ། །ཞེས་གསུངས་སོ། །དེའི་ཚེ་གཏི་མུག་ཆོས་ཀྱི་དབྱིངས་ཀྱི་ཡེ་ཤེས་སུ་ཐིམ་པས་ཤིན་ཏུ་རྣམ་པར་མི་རྟོག་པའི་ཡེ་ཤེས་སོ། །དེ་ནས་ཐོབ་པ་ཉེ་བར་ཐོབ་པ་ལ་ཐིམ་པས་སྔོན་བས་འཕགས་པའི་ཡེ་ཤེས་ཉེ་བར་ཐོབ་པ་ཞེས་བྱ་བ་སྐད་ཅིག་མ་བཞིར་ཤར་ཏེ། རིག་པའི་སྣང་ཡུལ་སྟོན་ཀའི་ནམ་མཁའ་རྣམ་པར་དག་པ་ཉི་མའི་འོད་ཀྱིས་ཁྱབ་པ་ལྟར་འཆར་རོ། །ཡེ་ཤེས་དེས་ཞེན་རྟོག་གི་ཆ་བག་ཆགས་དང་བཅས་པ་དབྱིངས་སུ་ནུབ་སྟེ། ཆོས་སྐུ་ལྷུན་གྲུབ་ཆེན་པོའི་རང་བཞིན་སངས་རྒྱས་ཐམས་ཅད་ཀྱི་དགོངས་པ་རང་ལུགས་སུ་འཆར་རོ། །དེའི་ཚེ་སྔར་གོམས་པའི་ངང་དྭངས་གཉིས་སུ་མེད་པའི་ཡེ་ཤེས་དང་མ་བུ་འཕྲོད་ནས་གྲོལ་བ་ཡིན་ནོ། །དེ་ལ་མ་གྲོལ་ན། དེ་ནས་རིག་པ་སྙིང་ནས་གནས་པ་བཏེག་མིག་ཏུ་འཕོས། མིག་ནས་འོད་ཟེར་ཁ་དོག་ལྔ་ལྔའི་སྣང་བ་ནམ་མཁར་མཆེད་པ་ལས། སྐད་ཅིག་དང་པོར་མཐིང་ག་རྣམ་དག་པར་དག་པ་རང་གདངས་ཆོས་ཀྱི་དབྱིངས་ཀྱི་ཡེ་ཤེས་ལས་རྣམ་པར་སྣང་མཛད་གཙོ་འཁོར་གྲངས་མེད་པ་སྣང་ངོ་། །དེ་ཉིད་རང་ངོ་ཤེས་པས་རང་ཉིད་རྣམ་སྣང་དུ་གྲོལ་ནས་གདོད་མར་ཕྱིན་ནོ། །དེ་བཞིན་དུ་སྐད་ཅིག་གཉིས་པ་དང་། གསུམ་པ་དང་། བཞི་པ་དང་། ལྔ་པ་ལ། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་ལས། དེའི་ཚེ་མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པའི་སྐུ་འབུམ་ཕྲག་གྲངས་མེད་པ་སྣང་བས་རང་ངོ་ཤེས་མ་ཐག་དེ་ཉིད་དང་གཉིས་སུ་མེད་པར་གྲོལ་བ་ནི་ལོངས་སྤྱོད་རྫོགས་པ་སྐུའི་བར་དོའོ། །དེ་ལྟར་རང་ངོ་ཤེས་པའི་ཚེ་སྐུ་དེ་ཉིད་དུ་རང་ཉིད་གྱུར་པའི་འོད་ཟེར་གྱི་རྩེ་མོ་འབུམ་ཕྲག་ཀུན་ཏུ་འཁྱིལ་པ་ལས། འཇིག་རྟེན་དྲུག་གི་ཕྱོགས་བཅུ་ཀུན་ཏུ་ཤཱཀྱ་ཐུབ་པ་ལ་སོགས་པ་སྤྲུལ་པ་དཔག་ཏུ་མེད་པ་འཕྲོས་ཏེ་སྐད་ཅིག་ལ་དོན་བྱེད་པར་སྣང་བ་ནི་རྫོགས་ལྡན་སྤྲུལ་པ་སྐུའི་བར་དོའོ། དེ་ནས་སྤྲུལ་སྐུ་ལོངས་སྐུར་ཐིམ། ལོངས་སྐུ་(༤༩)ཆོས་སྐུར་ཐིམ། ཆོས་སྐུ་རྫོགས་ལྡན་ཆེན་པོ་རིན་པོ་ཆེ་གསང་བའི་སྦུབས་ན་འཕོ་འགྱུར་མེད་པར་བཞུགས་པ་ནི་གདོད་མའི་ས་ལ་མངོན་པར་བྱང་ཆུབ་པ་ཡིན་ནོ། །དེ་དག་གིས་འབྲིང་བར་དོར་གྲོལ་བ་བཤད་ཟིན་ཏོ། །

ཞར་ལ་སྲིད་པ་བར་དོར་ལས་ཀྱི་འཕྲོ་མཐུད་པ་བཤད་དེ། དེའང་སྣང་བ་གོང་མ་ཤར་ཡང་རང་ངོ་མ་ཤེས་པ་ནི་དེ་ནས་རྨི་ལམ་བདེ་སྡུག་ལྟར་སྲིད་པའི་བར་དོར་འཁྱམས་ཏེ། ཇི་ཙམ་གནས་པའི་ཕྱེད་སྔ་མའི་བག་ཆགས། ཕྱེད་ཕྱི་མའི་སྣང་བར་འཆར་ཞིང་ཤི་བའི་སྡུག་བསྔལ་གྱིས་རིག་པ་རྟེན་མེད་པར་ཕྱོ་ལང་ལང་འཁྱམས་པ་ན། སྔར་བླ་མའི་གདམས་པ་ཉམས་སུ་བླངས་ཏེ་རབ་ཀྱིས་བདེན་མེད། འབྲིང་གིས་སྒྱུ་མ་ལྟ་བུའི་བསྐྱེད་རིམ། ཐ་མས་སྐྱབས་འགྲོ་དང་མོས་གུས་བྱས་ལ་ཞིང་ཁམས་དག་པ་བདེ་བ་ཅན་ལ་སོགས་པ་ཡིད་ལ་བྱས་པས་གྲོལ་བར་གསུངས་སོ། །དེའི་ཚེ་མངལ་སྒོ་ངན་པ་བཀག་ནས་མི་ལུས་རིན་པོ་ཆེ་ཡོན་ཏན་བདུན་དང་ལྡན་པར་སྐྱེ་བར་བྱ་སྙམ་ནས། མའི་མངལ་གཞལ་མེད་ཁང་དུ་ཉི་ཟླའི་སྟེང་དུ་ཧཱུྃ་ལ་སོགས་པ་ཡི་དམ་ལྷའི་ས་བོན་བསམ་པ་ལ་རྣམ་ཤེས་ཞུགས་པས་ཕྱི་མ་ལ་མི་ལུས་ཐོབ་ནས་ཟབ་མོའི་ཆོས་དང་འཕྲད་དེ་གྲོལ་བ་ལ་ཐེ་ཚོམ་མེད་དོ། །འཕྲོས་དང་བཅས་པའི་བར་དོ་བཤད་ཟིན་ཏོ། །

གསུམ་པ་འཕོས་ཏེ་གྲོལ་བ་ནི། རང་གི་ལུས་ཀྱི་ནང་ན་རྩ་དབུ་མ་ཕྲུ་མ་ཕུས་བཏབ་པ་ལྟ་བུ་ནང་སྟོང་པའི་ཡར་སྣ་ཚངས་བུག་ལ་གཏད་པའི་ནང་ན་རྣམ་ཤེས་ཨ་དཀར་པོ་དྲི་མ་མེད་པར་བསམས་ལ། ཨ་ཨ་ཞེས་ངར་དང་བཅས་པས་བརྒྱ་རྩ་རེ་བརྗོད་པས། ཨ་དེ་ཉིད་ཚངས་བུག་ནས་ཕྱིར་རྒྱང་རྒྱང་ཐོན་ནས། ནུབ་ཕྱོགས་བདེ་བ་ཅན་ན་ཆོས་སྐུ་སྣང་བ་མཐའ་ཡས་བཞུགས་པའི་ཐུགས་ཀར་འཕངས་པས་མི་རྟོག་པར་བསམ་ཞིང་། ཞག་བདུན་རྩོལ་བ་བྱས་ན་སྤྱི་གཙུག་འཕར་ཞིང་ཁ་ཕྱེ་ནས་བདེ་བ་ཅན་དུ་འཕོ་བར་ཐེ་ཚོམ་མེད་དོ། །འཆི་ལྟས་ཚང་པའི་ཚེ་བྱ་ཡིས་གཞན་དུ་ལྟུང་བར་འགྱུར་བས་མི་བྱའོ། །འཕོ་བ་གསེར་སྲང་མའི་གདམས་པ་མཐར་ཕྱིན་པའོ། །དོན་གསུམ་པ་བཀའ་རྒྱས་གདབ་པ་ནི། དེ་ལྟ་བུའི་གདམས་པ་སྐལ་ལྡན་སྣོད་ཡོད་ངེས་པ་གསུམ་ལས་མང་དུ་མི་སྤེལ་ཞིང་། ཤིན་ཏུ་བརྩོན་པས་ཉམས་སུ་ལེན་པ་ལ་འབད་པར་བྱའོ། །

དེ་ལྟར་ཡང་ཟབ་གནད་ཀྱི་གདམས་པ་འདི། །རང་བྱུང་པདྨའི་བྱིན་རླབས་ལ་བརྟེན་ནས། །གངས་རི་ཐོད་དཀར་ཨོ་རྒྱན་རྫོང་གནས་སུ། །དྲི་མེད་འོད་ཟེར་བདག་གིས་ལེགས་པར་བཀོད། །དགེ་བ་དེ་ཡིས་སྲིད་པའི་འགྲོ་བ་ཀུན། །གནས་སྐབས་མཐར་ཐུག་དོན་གཉིས་ཕུན་ཚོགས་ཏེ། །མ་ལུས་ཉེར་ཞི་གདོད་མའི་མཁའ་དབྱིངས་སུ། །སྐུ་དང་ཡེ་ཤེས་ལྷུན་གྱིས་གྲུབ་པར་ཤོག །རྫོགས་པ་ཆེན་པོ་ཆོས་ཉིད་རང་གྲོལ་གྱི་དོན་ཁྲིད་ཡིད་བཞིན་སྙིང་པོ་ཞེས་བྱ་བ། དཔལ་ཨོ་རྒྱན་གྱི་སློབ་དཔོན་ཆེན་པོ་(༥༠)པདྨ་རྒྱལ་པོས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་གྱི་མགུལ་ཨོ་རྒྱན་རྫོང་གི་དབེན་གནས་དམ་པར་བཀོད་པ་རྫོགས་སོ། །དཔལ་སྔགས་ཀྱི་སྲུང་མ་ཨེ་ཀ་ཛ་ཊཱི་དང་། ཤན་པ་སྲོག་སྒྲུབ་ནག་མོ་དང་། གཟའི་རྒྱལ་པོ་རཱ་ཧུ་ལས་སྲུངས་ཤིག །བཀའ་བསླད་པ་དང་འདྲ་མིན་འཆོས་པ་ལ་ཆད་པ་བྱིན་ལ་སྐལ་ལྡན་ལ་གཏོད་ཅིག །དགེའོ།། །།

རྫོགས་པ་ཆེན་པོ་མཉམ་ཉིད་རང་གྲོལ་ཞེས་བྱ་བ།

དང་པོ། རབ་གཞི་རྟོགས་པས་གྲོལ་བའི་ལེའུ།

༄༅། །རྫོགས་པ་ཆེན་པོ་མཉམ་ཉིད་རང་གྲོལ་ཞེས་བྱ་བ་བཞུགས་སོ། །

༄༅། །རྒྱ་གར་སྐད་དུ། མཧཱ་སནྡྷི་ས་མ་ཀོ་ནཱ་མ། བོད་སྐད་དུ། རྫོགས་པ་ཆེན་པོ་མཉམ་ཉིད་རང་གྲོལ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཆོས་ཀུན་མཉམ་ཉིད་ཡེ་ནས་བྱང་ཆུབ་པས། །བརྗོད་མེད་བསམ་འདས་མཁའ་དབྱིངས་བརྡལ་བའི་ཀློང་། །མི་གནས་མི་དམིགས་རྫོགས་པ་ཆེན་པོའི་ངང་། །རྣམ་དག་བྱང་ཆུབ་སེམས་ལ་ཕྱག་འཚལ་ལོ། །རྡོ་རྗེ་རྩེ་མོ་ཀུན་གྱི་ཐེག་པ་ནི། །རྒྱུ་འབྲས་ལས་འདས་སྤང་བླང་རེ་དོགས་བྲལ། །གང་ཡིན་ཀུན་ཡིན་ངོས་བཟུང་མེད་པས་ན། །རྒྱ་ཆད་ཕྱོགས་ལྷུང་བྲལ་བའི་དོན་འདི་ཉོན། །སྣང་སྲིད་འཁོར་འདས་ཡེ་གྲོལ་འོག་མིན་གནས། །སྣ་ཚོགས་མ་འགག་ཡེ་ཤེས་གཞལ་ཡས་སུ། །མཉམ་རྫོགས་སྟོན་པ་ཆོས་ཉིད་མི་འགྱུར་བས། །སྣོད་བཅུད་རྒྱུད་དྲུག་སྐུ་གསུམ་འཁོར་རྣམས་ལ། །དུས་གསུམ་དུས་མེད་གཞི་རྫོགས་དག་པའི་དུས། །བླང་དོར་རྩོལ་སྒྲུབ་མེད་པའི་ཆོས་བསྟན་པ། །ཕྱི་ནང་བྱ་བའི་ཆོས་ནི་དཔག་མེད་ཀྱང་། །བསྟན་པའི་ཐེག་པ་རྣམ་པ་དགུར་གསུངས་ཤིང་། །དེ་དག་རང་བཞིན་དབང་པོའི་རིམ་པ་སྟེ། །ངེས་པའི་དོན་ལ་ཀུན་དེས་ནམ་མཁའ་འདྲ། །ཐེག་པ་མེད་ཅིང་ངེས་པར་འབྱུང་བ་མེད། །འོང་མེད་འགྲོ་མེད་སྤང་གཉེན་བྲལ་ཐོབ་མེད། །ཐམས་ཅད་ཆོས་ཉིད་འཕོ་འགྱུར་མེད་པའི་ངང་། །ཇི་ལྟར་སྣང་བ་དེ་ལྟར་རང་བཞིན་མེད། །རྒྱུ་འབྲས་མིང་འདོགས་ཕྱི་ནང་བྱང་ཆུབ་སེམས། །ཡེ་ནས་འོད་གསལ་ལྷུན་གྲུབ་ངང་ཡིན་པས། །གྲུབ་བསལ་མི་དམིགས་རང་བྱུང་ཡེ་ཤེས་ལ། །ཕྱི་ནང་འབད་པས་ཅི་ཞིག་བཙལ་དུ་མེད། །མ་བཅོས་རྣལ་དུ་འཇོག་པ་ཆོས་ཉིད་ངང་། །དུས་གསུམ་འཕོ་འགྱུར་མེད་ཀྱི་གང་བདེར་ཐོངས། །འདི་ཞེས་དམིགས་སུ་ཡོད་པའི་གཟུང་འཛིན་དང་། །དགག་སྒྲུབ་བླང་དོར་མེད་ཀྱིས་རང་སར་ཞོག །ཉོན་མོངས་མ་སྤངས་རང་བྱུང་ཡེ་ཤེས་ལྔ། །གང་ཤར་ཉིད་ནས་རང་གྲོལ་སྤང་བླང་མེད། །སྤང་བསྒྱུར་མི་དགོས་སེམས་སངས་རྫོགས་པ་ཆེ། །ཡེ་བབ་རང་བྱུང་ད་ལྟར་ལྷུན་གྱིས་གྲུབ། །ཐ་མལ་སྣ་ཚོགས་ལྷུན་རྫོགས་དཀྱིལ་འཁོར་ཆེ། །མ་བྱས་རང་བྱུང་གཞལ་ཡས་ཁང་ཆེན་ནས། །གཟུགས་ཚོར་འདུ་ཤེས་འདུ་བྱེད་རྣམ་པར་ཤེས། །རིགས་ལྔ་ས་ཆུ་མེ་རླུང་ནམ་མཁའི་ཁམས། །ཡུལ་ལྔའི་རང་བཞིན་སྣང་སྲིད་རྣམ་དག་པས། །སྤང་(༥༡)བླངས་མི་དགོས་བཅོས་བསྒྱུར་གཉེན་པོས་སྟོང་། །ཐམས་ཅད་རོ་མཉམ་རྫོགས་པ་ཆེན་པོའི་ངང་། །གཞི་རྫོགས་གདོད་ནས་དག་པར་ཤེས་པར་གྱིས། །ཡེ་སྟོང་རྩ་བ་བྲལ་བའི་སེམས་ཉིད་ནི། །མ་བྱས་ལྷུན་གྱིས་གྲུབ་པའི་སངས་རྒྱས་ཏེ། །ཇི་བཞིན་བཞག་པའི་དེ་བཞིན་མཉམ་པར་གནས། །ཐོག་མཐའི་དུས་མིན་སྔ་ཕྱིའི་འཕོ་འགྱུར་མེད། །རྩིས་མེད་རིག་མེད་གོལ་སྒྲིབ་ཀུན་ལས་འདས། །བགྲོད་པའི་ས་མེད་ཕྱིན་པའི་ལམ་ཡང་མེད། །ངོ་བོ་མེད་ལ་སྦྱང་བགྲོད་གང་འདོད་པ། །དེ་དག་ནམ་མཁའ་བཅོས་བསྒྱུར་བྱེད་པར་ཟད། །རང་བྱུང་ཡེ་ཤེས་བཅོས་བསླད་ཀུན་དང་བྲལ། །ཟླ་བའི་རྒྱ་མཚོ་རྙོག་པ་ཡེ་ནས་མེད། །དག་དང་མ་དག་དབྱིངས་གཅིག་རོལ་པ་ཆེ། །འདི་ནི་ཡང་ཟབ་སྙིང་པོའི་དགོངས་ཀློང་ཡིན། །ཐམས་ཅད་ཀུན་བྱེད་ཆོས་ཉིད་ཡངས་པ་ནི། །ཀུན་གྱི་སྙིང་པོ་རང་བཞིན་ལྷུན་འབྱམས་ཞིང་། །ངོ་བོ་གསལ་ལ་ཐུགས་རྗེ་མ་འགག་པ། །ཇི་བཞིན་ཉིད་ནས་ཡེ་བཞིན་ལྷུན་གྱིས་གྲུབ། །དབྱིངས་གཅིག་ཆོས་ཉིད་ནམ་མཁའི་རང་བཞིན་ལས། །གཞན་པའི་ཆོས་ནི་རྡུལ་ཙམ་མི་དམིགས་པས། །ཆོས་ཅན་སྣང་སྟོང་ཆོས་ཉིད་ཆོ་འཕྲུལ་དུ། །རང་བཞིན་ལྷུན་གྲུབ་རོལ་པར་ཤར་བ་ཡིན། །སྣོད་བཅུད་སྣང་སྲིད་དུས་གསུམ་སངས་རྒྱས་ཀྱང་། །དེ་བཞིན་ཉིད་ལས་གཞན་དུ་མི་དམིགས་ལ། །ཡེ་ནས་མ་བྱས་རང་བཞིན་རྣམ་དག་པས། །གློ་བུར་མི་སྦྱོར་ངོ་བོའི་ཤེས་པ་གྲོལ། །བྱ་རྩོལ་མི་དགོས་རྒྱུ་རྐྱེན་ཀུན་ལས་འདས། །རང་བཞིན་གཞན་ཡིན་ཀུན་ཡིན་ངོས་བཟུང་མེད། །གང་ལྟར་བརྟགས་པ་དེ་ཡིན་གློ་བུར་ཙམ། །དཔྱད་ན་མི་གནས་བརྟག་ཕྱིར་ངོ་བོས་སྟོང་། །ཡིན་མིན་བློ་ཡིན་བློ་བྲལ་ཆོས་སྐུ་ཡིན། །བྲལ་བ་གཞན་མིན་གང་ཤར་འཛིན་མེད་ཡིན། །གཅིག་གི་རང་བཞིན་ནམ་མཁའ་ལྟ་བུ་ལ། །ཐ་དད་བློ་ཡི་གྲུབ་མཐའ་མང་པོ་སྣང་། །ཀུན་འདུས་རྫོགས་ཆེན་བྱང་ཆུབ་སེམས་དེ་ནི། །ནམ་མཁའ་བཞིན་དུ་ཁྱབ་ཅིང་གོ་འབྱེད་པས། །ཆོས་རྣམས་ཀུན་གྱི་འབྱུང་གནས་ཆེན་པོ་ཡིན། །སྣ་ཚོགས་ཆོས་ཀུན་མཉམ་རྫོགས་རོལ་པ་ལས། །བདེ་སྡུག་མཐོ་དམན་སྒྱུ་མ་ཆུ་ཟླའི་གཟུགས། །མེད་བཞིན་སྣང་བས་དོན་ལ་གོས་པ་མེད། །ལྷུན་རྫོགས་གཉིས་སུ་མེད་པའི་ངང་ཉིད་དོ། །ཇི་ལྟར་སྣང་ཡང་དེ་ལྟར་མ་གྲུབ་པས། །རྒྱུ་འབྲས་གཉིས་མེད་སྒྲོ་སྐུར་བྲལ་བ་ལ། །དགེ་སྡིག་ལུང་ལ་ལྟོས་པའི་ཐེག་པ་ཅན། །ཡང་དག་དོན་དང་ནམ་ཡང་འཕྲད་མི་འགྱུར། །དམ་པའི་དོན་ལ་མ་སྐྱེས་གདོད་ནས་དག །སྣང་དུས་མི་དམིགས་གཟུང་འཛིན་སྤྲོས་པ་བྲལ། །དེ་ལས་གཞན་ཞིག་ནམ་ཡང་མི་དམིགས་པས། །རྒྱུ་འབྲས་འདས་པས་རྣལ་མ་མཐོང་བ་མེད། །ད་དུང་གལ་ཏེ་རྒྱུ་འབྲས་ལས་རྐྱེན་འདོད། །དེས་ཏེ་སྣང་འདིའི་རང་བཞིན་བརྟག་པར་གྱིས། །ཕྱི་རོལ་ཡུལ་ལྔའི་དང་པོའི་རྒྱུ་འབྲས་གང་། །སེམས་(༥༢)ཀྱི་རང་བཞིན་གང་ཞིག་གང་གིས་སྐྱེས། །དེ་ལྟར་དཔྱད་ན་མཁའ་བཞིན་དངོས་མེད་དེ། །རྒྱུ་འབྲས་འདས་ཕྱིར་གདོད་མའི་ཆོས་ཉིད་ངང་། །མ་བྱས་མ་བྱུང་ལྷུན་གྱིས་གྲུབ་པར་ངེས། །དེ་ལས་རྩོལ་སྒྲུབ་ཞེན་པས་ཅི་བྱར་ཡོད། །ཆོས་ཀུན་ཡེ་ནས་སྟོང་ཞིང་བདག་མེད་ཀྱང་། །མ་རིག་འཛིན་པས་སྲིད་པ་འདིར་འཁྱམས་ཏེ། །དེ་ལས་བདེ་སྡུག་སྣ་ཚོགས་སྣང་ན་ཡང་། །རྨི་ལམ་ནང་བཞིན་དོན་ལ་གྲུབ་པ་མེད། །མ་བྱས་རང་བཞིན་དག་པའི་སངས་རྒྱས་ཏེ། །ཡེ་སྟོང་གཞི་རྩ་བྲལ་བར་ཤེས་པར་བྱ། །གང་རྣམས་བློ་ཡིས་བརྟགས་པ་ངོ་བོས་སྟོང་། །གཅིག་དང་ཐ་དད་གཉིས་མེད་ཆོས་རྣམས་ལ། །མི་མཁས་བདེན་པར་ཞེན་པས་རང་ཉིད་འཆིང་། །སྣ་ཚོགས་གྲུབ་མཐའི་གཟེབ་ཀྱིས་གྲོལ་བ་མེད། །དྲང་ངེས་རྒྱུ་འབྲས་ལུང་གི་རྗེས་འབྲངས་ཏེ། །བློས་བརྟགས་ཆོས་ཀྱི་འཁོར་བ་རྒྱུན་མི་འཆད། །འདི་ལྟར་རྒྱུ་ཡི་ཐེག་པ་གསུམ་དག་ནི། །སྤང་འགེགས་གཉེན་པོས་སེམས་ཉིད་སྦྱོང་བ་སྟེ། །རང་བྱུང་ཡེ་ཤེས་སོ་མ་བཅོས་བསླད་མེད། །གྲངས་མེད་གསུམ་སོགས་གྲོལ་བ་རྙེད་མི་འགྱུར། །འབྲས་བུ་འདོད་པའི་ཐེག་པ་གཉིས་དག་ལས། །གསང་སྔགས་ཕྱི་པ་གསུམ་ལས་ཀྲི་ཡ་ནི། །ཐམས་ཅད་དབྱིངས་གཅིག་དག་པའི་ཆོས་ཉིད་ལ། །རྗེ་ཁོལ་ཚུལ་གྱིས་གཉིས་འཛིན་བླང་དོར་བྱེད། །རེ་དོགས་གཟེབ་ལས་ནམ་ཡང་ཐར་བ་མེད། །གཅིག་དང་གཉིས་སུ་བཟུང་བས་བསླད་པ་ཡིན། །ཨུ་པས་རང་བཞིན་དག་པའི་ཆོས་ཉིད་ལ། །སྤུན་དང་གྲོགས་བཞིན་གཉིས་འཛིན་འཁྲུལ་པས་བསླད། །ངོ་བོ་གཅིག་ལ་བླང་དོར་གཉིས་ཕྱེ་བས། །དོན་གྱི་སྙིང་པོ་ནམ་ཡང་མཐོང་མི་ནུས། །ཡོ་གས་མངོན་བྱང་ལྔ་དང་ཆོ་འཕྲུལ་བཞི། །དེ་བཞིན་ཉིད་ལ་བཅོས་བསླད་མེད་པར་ཟད། །ཡེ་ནས་མ་སྐྱེས་ཕྱི་ནས་གྲུབ་པ་མེད། །སེམས་ཉིད་དོན་གྱི་སྙིང་པོ་མཐོང་བ་མེད། །ཀུན་ཀྱང་བཅུ་དྲུག་བདུན་དང་གསུམ་གྱི་ཚེར། །གཉུག་མའི་རང་བཞིན་གྲོལ་བའི་ས་ལ་སྒྲིབ། །ནང་པ་གསུམ་ལས་མཧཱས་དག་པའི་སེམས། །བསྙེན་སྒྲུབ་བཞི་དང་འཕྲོ་འདུས་བཅོས་བསླད་བྱེད། །ཡེ་ནས་ཡིན་ན་བཅོས་བསྒྱུར་མི་དགོས་ལ། །མིན་ན་ཕན་མེད་ནམ་མཁའི་མདུད་པ་བཞིན། །བླང་དོར་མེད་པའི་ངོ་བོ་མཐོང་བ་མེད། །ཨ་ནུས་དབྱིངས་དང་ཡེ་ཤེས་གཉིས་མེད་ངང་། །སྙིང་པོ་གཅིག་ལ་རྒྱུ་འབྲས་བཅོས་བསྒྱུར་མེད། །ནམ་མཁའི་རང་བཞིན་གཉིས་མེད་དག་པ་ལ། །བདེ་དང་སྟོང་པས་ནམ་ཡང་ཅི་བྱར་ཡོད། །ཨ་ཏི་བསྐྱེད་རྫོགས་གཉིས་མེད་བྱང་ཆུབ་སེམས། །མཐའ་བྲལ་ངང་དུ་སྙིང་པོའི་སེམས་ཉིད་འཆིང་། །ནམ་མཁའི་ཞགས་པས་སེམས་ཉིད་འཆིང་བར་ཟད། །སྟོང་པའི་ཕྱོགས་ཙམ་གདིང་དུ་སུ་འཆའ་བ། །ཀུན་གྱིས་སྣང་བའི་དེ་ཉིད་ཤེས་མིན་གྱི། །ཆོས་ཀུན་མཉམ་(༥༣)རྫོགས་གཅིག་གི་དོན་མི་ཤེས། །ཆད་པའི་ཆ་དང་མཐུན་པའི་རྣལ་འབྱོར་ལ། །སེམས་ཤེས་སུ་ཞིག་རབ་ཏུ་བསྟེན་པར་བགྱི། །དེ་ལྟར་དེ་དག་རྩོལ་སྒྲུབ་སྤང་ལེན་དང་། །དམིགས་མེད་ངང་དུ་རང་སེམས་དྲི་མེད་འཆིང་། །སྙིང་པོའི་དེ་ཉིད་རྟོགས་པའི་མཐུ་མེད་ཅིང་། །སྐལ་ངན་ཆོས་ངན་གྲུབ་པའི་མཐའ་ངན་པས། །སྤང་ཐོབ་མེད་པའི་དེ་ཉིད་མཐོང་བ་མེད། །ལམ་ལ་བགྲོད་ཅིང་ས་ལ་སྦྱོང་བར་བྱེད། །བརྩོན་པའི་ནད་ཀྱིས་གདུང་བའི་དམ་ཚིག་དང་། །སྡོམ་པས་མི་དག་སྲིད་པར་འཆིང་བའི་རྒྱུ། །རང་བྱུང་ཡེ་ཤེས་དགོངས་པར་ཕྱིན་པ་མེད། །བྱང་ཆུབ་ཉིད་ཀྱང་ནམ་མཁའི་རང་བཞིན་ལ། །བྱང་ཆུབ་སེམས་ཀྱང་ནམ་མཁའི་ངོ་བོ་ཉིད། །བྱང་ཆུབ་ལམ་ལ་སུ་ཞིག་བགྲོད་དུ་ཡོད། །ནམ་མཁའི་དབྱིངས་སུ་བགྲོད་པའི་སེམས་ཞོག་ལ། །སྤང་བླང་བྱ་བཙལ་མེད་པའི་དོན་མཐོང་མཛོད། །ཆོས་ཀུན་མ་སྐྱེས་སྒྲིབ་པ་མེད་པ་ལ། །བློ་ཡི་འཛིན་པས་གོལ་སྒྲིབ་གཉིས་སུ་འབྱུང་། །ངོ་བོ་མེད་ལ་བགྲོད་པས་གོལ་བ་སྟེ། །བལྟ་རུ་མེད་ལ་བལྟས་པས་སྒྲིབ་པ་འབྱུང་། །རྒྱུ་འབྲས་ཐེག་པ་རང་རང་གཞུང་བཞིན་དུ། །ཅི་ཙམ་འབད་ཅིང་རྩོལ་བ་དེ་སྲིད་པར། །གོལ་ཞིང་བསྒྲིབས་པས་རྣལ་མ་མཐོང་བ་མེད། །ཇི་ལྟར་བཟང་པོས་བཟང་པོ་བཙལ་བའི་ཚེ། །ཇི་ཙམ་བཙལ་བ་དེ་ཙམ་གོལ་ཞིང་སྒྲིབ། །མཐོང་བར་འདོད་ན་བཟང་པོ་མ་བཙལ་བར། །རང་ཉིད་བཟང་པོ་ཡིན་པར་ཐག་ཆོད་ལྟོས། །དེ་བཞིན་དག་པའི་སེམས་ཀྱིས་སེམས་བཙལ་ཡང་། །བཙལ་བྱའི་དོན་གྱིས་ཚོལ་མཁན་བྱས་པས་འཁྲུལ། །འདི་ནི་ཡེ་ནས་དག་པའི་སེམས་ཉིད་ལ། །བཅོས་བསྒྱུར་གཉེན་པོས་མ་བཙལ་རང་གར་ཞོག །རང་བྱུང་གཅིག་ལ་ཐེག་པ་དགུར་བལྟས་པས། །གོལ་སྒྲིབ་མི་འཆར་ཆུ་ཡི་གཉེར་མ་འདྲ། །བལྟས་པས་མི་མཐོང་བཙལ་བས་རྙེད་པ་མེད། །ཡེ་ནས་གྲུབ་བསལ་མེད་པར་རང་བཞིན་ཞོག །ཡེ་ཤེས་མི་ཤེས་ཟབ་ཞི་ཕྲ་བ་མེད། །གཉིས་མེད་འབྲེལ་མེད་སྒྲོ་སྐུར་མཐའ་ལས་འདས། །ཇི་བཞིན་རང་བཞིན་ཡེ་བཞིན་ལྷུན་གྲུབ་པས། །གང་ཡིན་དེ་ཉིད་ཀུན་ཡིན་ཆེན་པོར་ཞོག །ལྷུན་གྱིས་གྲུབ་ལ་རྩོལ་ཞིང་འབད་མི་དགོས། །མེད་པ་བལྟས་པས་མཐོང་བ་འགའ་ཡོད་དམ། །དེ་བས་ཆོས་ཀུན་མ་སྐྱེས་ཆོས་ཉིད་དང་། །རྒྱུ་འབྲས་འདས་པའི་དེ་ཉིད་གསལ་བར་ལྟོས། །འདིར་ནི་བླ་མའི་མན་ངག་སྙིང་པོའི་དོན། །ཆོས་ཉིད་དོན་གྱི་ནམ་མཁའ་མཐའ་དབུས་མེད། །རྒྱུ་འབྲས་བསྐྱེད་རྫོགས་ལམ་ལ་མི་ལྟོས་པར། །སེམས་ཉིད་རྒྱལ་པོ་ལྷུན་གྲུབ་ཡོན་ཏན་རྫོགས། །ཆགས་མེད་རེ་བ་འཇོག་པའི་ཏིང་འཛིན་གྱི། །སྙིང་པོའི་སེམས་ཉིད་མི་མཐོང་བསམ་ཡུལ་འདས། །སྣ་ཚོགས་སྤྲོས་པ་འཕེལ་བའི་རྟོག་དཔྱོད་ཀྱིས། །གདོད་མའི་གནས་ལུགས་མི་མཐོང་བློ་ལས་འདས། །སྣ་ཚོགས་(༥༤)ཐབས་ཚུལ་རྒྱ་མཚོའི་རིན་ཆེན་གྱིས། །ཇི་བཞིན་ཉིད་ནི་ཡེ་བཞིན་མཐོང་བ་མེད། །ཅོག་གཞག་རེ་དོགས་བྲལ་ན་དེ་རང་ཉིད། །གང་ན་འདུག་པར་མཐོང་སྟེ་ལྟ་བ་མེད། །འདི་ལས་གཞན་དུ་བཅོས་པས་བཟང་པོར་རློམ། །ཐེ་ཚོམ་ཡིད་གཉིས་ཟ་བས་རང་ཉིད་སྒྲིབ། །སྣ་ཚོགས་ཆོས་ཀྱི་རྣམ་གྲངས་དོན་གཅིག་པར། །སྙིང་པོའི་སེམས་ཉིད་མ་བཅོས་རྣལ་མ་སྟེ། །སྐུ་གསུམ་ཞིང་ཡིན་སྟོན་པ་འཁོར་གནས་སུ། །བསྟན་པ་ཕུན་ཚོགས་ལྔ་ཡི་རང་བཞིན་ཏེ། །དེ་ལྟར་ཤེས་པ་བཟོ་མེད་ལྷུག་པར་གནས། །སྔ་ཕྱི་དུས་གསུམ་འཁོར་འདས་རོལ་པའི་སེམས། །མ་ལུས་གཅིག་ཏུ་གནས་པའི་ངོ་བོ་སྟེ། །སྙིང་པོ་ལྷུན་འབྱམས་བྱང་ཆུབ་དེ་བཞིན་ཉིད། །ཡེ་ནས་སངས་རྒྱས་ད་ལྟའི་ཆོས་ཉིད་དོ། །མ་བྱས་ཡེ་ནས་དག་པའི་དགོངས་ཤར་བ། །སྣ་ཚོགས་བརྡ་ཡིས་མཚོན་ཏེ་བསྟན་དུ་མེད། །ཚིག་དང་ཡི་གེས་དེ་ཉིད་གོ་བར་ཟད། །ཐེག་པའི་རྣམས་གྲངས་རྩེ་མོར་ཕྱིན་པའི་སེམས། །བྱང་ཆུབ་སེམས་འདུས་དེ་ཉིད་རྟོགས་ཕྱིར་ཏེ། །ཐམས་ཅད་དབྱིངས་གཅིག་འབྲལ་བར་བཤད་པ་ཡིན། །འདི་ནི་མ་ལུས་ངེས་གསང་སྙིང་པོ་སྟེ། །དེར་ནི་སེམས་ཀྱི་དེ་ཉིད་མཐོང་བ་ཡིན། །སྐལ་ངན་རྣམས་ཀྱིས་ནམ་ཡང་མི་རྟོགས་ཏེ། །དམུས་ལོང་མདུན་དུ་གཟུགས་བརྙན་བསྟན་པ་བཞིན། །བརྡ་དང་རྟེན་འབྲེལ་ཐབས་ཀྱིས་ག་ལ་གོ། །སྐལ་བཟང་རྣམས་ལ་ཉི་ཟེར་པདྨོ་བཞིན། །བླ་མའི་དྲིན་གྱིས་རྟོགས་པ་ཁོང་ནས་འཆར་། །རང་གི་ངོ་བོ་དུས་གསུམ་མཉམ་ཉིད་ལ། །ཆོས་དང་ཆོས་ཉིད་མ་རྟོག་སོ་མར་ཞོག །ཡེ་ནས་བྱང་ཆུབ་རང་བཞིན་རྣམ་དག་པས། །གློ་བུར་ཞེན་པས་མ་འཆིངས་ཅི་དགར་རོལ། །ཆོས་དང་ཆོས་ཅན་ཆོས་ཉིད་མཉམ་པའི་ངང་། །གང་ཤར་རིག་པ་རང་བྱུང་རོལ་པའི་ཚེ། །རང་གྲོལ་ཡེ་བབ་བཅོས་བསླད་བྲལ་བར་ཤོག །སེམས་ཉིད་མ་བཅོས་ཆོས་སྐུའི་རོལ་པ་ལས། །ཡེངས་མེད་བསམ་གཏན་འཛིན་པའི་བརྟོད་ཕུར་གྱིས། །གཅིག་ཏུ་མ་བསྡུ་རྟོགས་དང་མ་རྟོགས་མཉམ། །ལེགས་ཉེས་ཤོར་གོད་རྡུལ་ཙམ་མི་དམིགས་པས། །ལྟ་སྒོམ་སྤྱོད་པའི་སྒྲོག་ཏུ་མ་འཆིངས་ཤིག །ཡེ་ནས་ཡིན་ལ་ཡེངས་དང་མ་ཡེངས་མེད། །གཅིག་ཏུ་སེམས་འཛིན་རེ་དོགས་འཁྲུལ་པའི་ཡིད། །དམིགས་མེད་རང་ལ་ཞེན་པར་འཆིང་བར་བྱེད། །སེམས་དང་སེམས་ཉིད་གཉིས་སུ་མི་དམིགས་ལ། །སྟོང་དང་མི་སྟོང་མཉམ་པའི་ངང་ཉིད་དུ། །ཤར་གནས་གང་ཡིན་ཡེ་ནས་དེ་ལྟར་ཡིན། །དེ་ལ་དགག་སྒྲུབ་ཆགས་སྡང་མ་བྱེད་པར། །ཇི་ལྟར་སྣང་བ་དེ་ལྟར་ཡིན་དུ་ཆུག །མི་རྟོག་མཁའ་ལྟར་དག་པའི་ཆོས་སྐུ་ལ། །སྣང་སེམས་སྣ་ཚོགས་རོལ་པའི་གཟིགས་མོར་ཆེ། །མ་སྐྱེས་སྤྲོས་བྲལ་སྐྱེ་བའི་ཆོ་འཕྲུལ་ཅན། །རྟོག་དཔྱོད་དྲན་བསམ་ཚོལ་ཁྲོས་མ་བསླད་(༥༥)པར། །གང་ཡིན་ངང་དེར་གང་ཤར་རོལ་དུ་ཆུག །ཐམས་ཅད་ཀུན་ཡིན་ཆོས་ཉིད་བརྡལ་བ་ལ། །སྤང་བླང་མ་བྱེད་དེ་བཞིན་ཉིད་དུ་ཞོག །ཇི་བཞིན་མི་གཡོ་དེ་བཞིན་མཉམ་པར་གནས། །ཡེ་བཞིན་མཐོ་དམན་མེད་ན་གདོད་མའི་གནས། །མི་རྟོག་མཐའ་དབུས་མེད་ཀྱི་དེ་བཞིན་ཞོག །རྩོལ་བྲལ་ཆོས་སྐུ་གཟུགས་མེད་བསྟན་དུ་མེད། །ཆགས་བྲལ་ཞི་བ་དངོས་མེད་དེ་བཞིན་ཉིད། །བྱ་བྲལ་ནམ་མཁའི་སེམས་ཉིད་བསྒོམ་དུ་མེད། །རྟོགས་དང་མ་རྟོགས་མཉམ་གྱིས་ཅི་བདེར་ཞོག །ལམ་མེད་ཞུགས་པ་རྣམས་ཀྱི་ནད་ཆེ་བ། །རྩོལ་བའི་དུག་གིས་སེམས་ལ་གདུང་བར་བྱེད། །ཇི་ལྟར་འབད་ཀྱང་འཁོར་བའི་རྒྱུ་འབྲས་ཏེ། །ཐར་པའི་ལམ་དུ་ནམ་ཡང་ཕྱིན་མི་ནུས། །རགས་པའི་སེམས་ལ་དཀར་ནག་གོམས་བྱེད་པ། །འདོད་ཁམས་ཉིད་དེ་མཐོ་རིས་ངན་སོང་འཛིན། །གསལ་བའི་སེམས་གང་དགེ་བས་རླན་བྱེད་པ། །གཟུགས་ཁམས་ཉིད་དེ་བསམ་གཏན་རིགས་བཞིར་འཕེན། །མི་རྟོགས་སེམས་གང་ཤིན་ཏུ་མི་གཡོ་བས། །གཟུགས་མེད་ཉིད་དེ་མཐའ་སོགས་རྣམ་བཞིར་འཁོར། །རྣལ་མའི་སེམས་ལ་བཅོས་བསླད་སུས་བྱེད་པ། །གང་ལྟར་བཅོས་པ་དེ་ཡིས་མི་རྟོག་སྐྱེ། །སྲིད་པའི་གནས་ལས་ཐར་བའི་སྐབས་མེད་དོ། །དུས་གསུམ་གཅིག་སྟེ་གདོད་ནས་བྱང་ཆུབ་ཆེ། །མཁའ་བཞིན་བསམ་བྲལ་རང་བཞིན་མཉམ་པའི་ངང་། །མིང་ཙམ་མི་དམིགས་མཚུངས་བྲལ་མཚན་མ་མེད། །ངོ་མཚར་རྨད་བྱུང་རོལ་པ་ཆེན་པོ་ནི། །གཞིར་རྫོགས་གླེང་བྲལ་བརྗོད་མེད་ལྷུན་གྱིས་གྲུབ། །མ་ཆགས་མི་གཡོ་རང་བཞིན་དག་པའི་ཞིང་། །མི་ནུབ་རྒྱལ་མཚན་ནམ་མཁའ་ཆེན་པོ་ནི། །སེམས་ཉིད་འོད་གསལ་ཀུན་གྱི་སྙིང་པོ་སྟེ། །སྒྲིམ་དང་ལྷོད་མེད་ཚོགས་ཀྱི་རྒྱན་རྣམས་ཀྱང་། །གཉིས་མེད་ལྷུན་བཞག་ཇི་བཞིན་སྤྲོས་དང་བྲལ། །རྩོལ་བྲལ་སྣང་ཞིང་སྟོང་པའི་ཡུལ་སེམས་ལ། །འདི་ཞེས་མི་མཚོན་རང་བཞིན་ལྷུག་པར་ཞོག །ཇི་བཞིན་སྟོང་སྟེ་མ་བཅོས་ཆོས་སྐུའི་ངང་། །མི་རྟོག་མཉམ་པའི་རྒྱལ་པོར་ལྷུན་གྱིས་གྲུབ། །རྒྱལ་པོ་དྲི་མེད་ཇི་བཞིན་སྤང་བླང་མེད། །གཉུག་མའི་སངས་རྒྱས་རྒྱུ་འབྲས་འདས་པའི་ངང་། །མ་སྐྱེས་ལྷུན་རྫོགས་ད་ལྟའི་སེམས་ཉིད་དེ། །གང་ཤར་བཅོས་བསླད་མེད་པ་ལྟ་བའི་དོན། །རང་བཞིན་རྫོགས་པ་ཆེན་པོའི་ངང་ཉིད་དོ། །ཆོས་ཉིད་མི་གཡོ་གཅིག་ལས་མ་འདས་ཀྱང་། །ཆོས་ཅན་མི་འགགས་སྣ་ཚོགས་སོ་སོར་གསལ། །རབ་ཞི་མ་སྐྱེས་མཁའ་ལྟར་དག་པ་སྟེ། །སྐྱེ་མེད་ཇི་བཞིན་ཡེ་ཤེས་སྒྲིབ་པ་མེད། །ཀུན་ཁྱབ་ཕྱོགས་བྲལ་མཆོག་གསང་རྫོགས་པ་ཆེ། །གཞི་རྩ་དངོས་པོ་མེད་པའི་རང་བཞིན་ལ། །བྱ་བྱེད་རྩོལ་སྒྲུབ་ཆོས་ཀྱིས་སྒྲུབ་མི་དགོས། །ཇི་བཞིན་ངང་ལ་དེ་བཞིན་ཤེས་པར་གྱིས། །གསང་བ་རྒྱ་མཚོ་ཤིན་ཏུ་སྒྲོག་པའི་གསུང་། །ལྷུན་རྫོགས་རིག་པ་(༥༦)གང་ཤར་རོལ་པ་ལ། །བླང་དོར་མི་དམིགས་ཡེ་གྲོལ་ཡངས་པ་ཆེ། །རང་གྲོལ་ཤེས་པ་རང་བབ་གདོད་མའི་ངང་། །རྟོགས་པའི་རི་རྒྱལ་རབ་ཏུ་མི་གཡོ་བས། །ལྷུན་འབྱམས་ཐིག་ལེ་ཆེན་པོའི་དབྱིངས་སུ་རོལ། །རྫོགས་པ་ཆེན་པོ་མཉམ་ཉིད་རང་གྲོལ་ལས། རབ་གཞི་རྟོགས་པས་གྲོལ་བའི་ལེའུ་སྟེ་དང་པོའོ།། །།

གཉིས་པ། ལམ་གོམས་པས་གྲོལ་བའི་ལེའུ།

དེ་ལྟར་ལྟ་བ་བྱ་རྩོལ་ཆེན་པོའི་ངང་། །རང་བབ་ཤེས་པ་ཇི་བཞིན་ཀློད་པའི་ཚེ། །གང་ཤར་རང་གྲོལ་ངང་དྭངས་རྒྱ་མཚོ་འདྲ། །མ་བསྒོམས་ཡེངས་མེད་བསམ་རྫོགས་གཟུང་འཛིན་བྲལ། །རང་བྱུང་རིག་པ་བཅོས་བསླད་མེད་པ་ནི། །རང་བཞིན་གདོད་ནས་དག་པའི་སྒོམ་པ་ཡིན། །རྟོགས་དང་མ་རྟོགས་མཉམ་པའི་ཆོས་ཉིད་ལ། །བསམ་གཏན་སེམས་འཛིན་འཆིང་བས་མ་བསླད་པར། །འཕྲོ་གནས་གཉིས་མེད་གདོད་མའི་ངང་ལ་ཞོག །མི་སྤྲོ་མི་བསྡུ་མི་བསྒོམ་ཐ་མལ་ངང་། །གང་བབ་རིག་པ་མཉམ་རྫོགས་འདུས་མ་བྱས། །བསྒོམ་དང་མི་བསྒོམ་མེད་པར་ཐག་ཆོད་པས། །ཇི་བཞིན་ངང་ལ་ཡེ་བཞིན་ལྷུག་པར་ཞོག །བསྐྱེད་རྫོགས་ཏིང་འཛིན་བདེ་གསལ་མི་རྟོགས་སོགས། །ཇི་སྲིད་བློས་བྱས་མི་རྟོག་ཡེ་ཤེས་ཀྱང་། །བག་ཆགས་ཉིད་དེ་སྲིད་པའི་རྒྱུ་འབྲས་ཙམ། །མཚན་བཅས་མཚན་འཛིན་རབ་ཞི་མཁའ་འདྲ་བས། །གོང་མའི་སྐྱེ་གནས་བརྒྱུད་ཅིང་འཁོར་བ་གྲུབ། །གང་ལ་ལས་དང་བག་ཆགས་གཉིས་མེད་ཅིང་། །ཏིང་འཛིན་མི་བསྒོམ་རྟོག་དཔྱོད་བློ་ལས་འདས། །དེ་ལས་སྲིད་མེད་སྲིད་པའི་སྡུག་བསྔལ་མེད། །སྐྱེ་མེད་རྡུལ་བྲལ་མཚན་མེད་སྨོན་པ་བྲལ། །མ་བཙལ་རང་བཞག་སྒོམ་པའི་རྒྱལ་པོ་ནི། །ཇི་བཞིན་ངང་ལས་ཅུང་ཟད་གཡོས་པ་མེད། །གཞི་ཉིད་ལྟ་བས་རྟོགས་པའི་དོན་བཞིན་དུ། །གང་ལྟར་བཤད་ཀྱང་སྤང་བླང་མེད་པའི་སེམས། །རང་བཞག་ལྟོས་བྲལ་ཡེ་བབ་རིག་པ་ནི། །འཛིན་མེད་ཆོས་སྐུ་རྒྱལ་པོའི་གཏན་སྲིད་ཟིན། །དབྱིངས་གཅིག་གདོད་མའི་ས་ལ་ད་ལྟ་ཕྱིན། །ཕྱི་ནས་འབྲས་བུ་སྐུ་གསུམ་སྒྲུབ་ཏུ་མེད། །སངས་རྒྱས་བྱང་ཆུབ་ཅེས་པའི་རང་བཞིན་ཏེ། །མངོན་དུ་གྱུར་པར་རེ་དོགས་གཉིས་དང་བྲལ། །རང་བྱུང་ལྷུན་གྲུབ་ཀུན་ཏུ་བཟང་པོའི་ས། །མ་བཅོས་རྣལ་བཞག་ཆེན་པོར་ལྷུན་གྱིས་གྲུབ། །རྙིང་པོའི་སེམས་ཉིད་རེས་འཇོག་མེད་པའི་ལམ། །མ་བསྒོམས་ཆུ་བོའི་རྒྱུན་བཞིན་གནས་པ་ལ། །གོལ་སྒྲིབ་གཉིས་མེད་བདེ་ཀློང་གཅིག་ཏུ་འཁྱིལ། །གྲུབ་དང་མ་གྲུབ་མེད་པས་བློ་བདེ་རྙེད། །ཡིན་དང་མ་ཡིན་མེད་པར་ཕྱམ་གཅིག་པས། །ཐམས་ཅད་གཞི་རྫོགས་ཀུན་ཏུ་བཟང་པོ་ཡིན། །ཁ་དོག་ངོས་བཟུང་མེད་པའི་རིག་པ་འདི། །གྲུབ་དང་མ་གྲུབ་མེད་པར་ཐག་ཆོད་པས། །ཇི་བཞིན་མ་བཅོས་ཐ་མལ་ལྷུག་པར་ཞོག །སྣ་ཚོགས་འཕྲོ་འདུ་རང་བྱུང་ཡེ་ཤེས་མདངས། །ཆུ་དང་རླབས་བཞིན་བཟང་ངན་མི་དམིགས་པས། །ཀུན་ཀྱང་རང་བྱུང་བྱ་རྩོལ་མེད་པ་(༥༧)ཡིན། །རང་གྲོལ་གདོད་ནས་དག་པའི་ལྟ་བ་ལ། །མ་སྤངས་སོར་བཞག་ཀུན་རྫོགས་གཅིག་གི་ངང་། །སྒྲིམ་ཀློད་གཉིས་མེད་རང་བྱུང་ཡེ་ཤེས་ཆེ། །རྩོལ་བྲལ་ངང་དུ་དྲན་བསམ་ལས་འདས་པ། །འོད་གསལ་སེམས་ཉིད་དག་པའི་སྒོམ་པ་ཡིན། །སྣང་སྲིད་ཆོས་རྣམས་མ་སྐྱེས་སྟོང་པའི་ངང་། །སྒོམ་གསུམ་ལྷུག་པ་དེ་བཞིན་ཉིད་དུ་ཞོག །ཀུན་རྫོབ་སྙིང་པོ་རྣམ་གཞག་རིག་པའི་ངང་། །ཕྱི་ནང་གཟུང་འཛིན་གཉིས་སུ་མེད་པ་ཡིན། །གང་སྣང་དོན་ལ་དེར་འཛིན་མ་བྱེད་པར། །རང་ཤར་རིག་པའི་རང་གྲོལ་དོན་ལ་བསྐྱང། །དགོངས་པ་མི་གཡོ་ཐུན་མཚམས་གཅིག་གི་ངང་། །དུས་གསུམ་དུས་མེད་མཉམ་པར་ལྷུན་གྱིས་གྲུབ། །ཡུལ་སེམས་ཇི་ལྟར་སྣང་ཡང་ཆོས་ཉིད་ངང་། །གཞི་གཞག་སྒོམ་པའི་མཆོག་ཡིན་དྲན་བསམ་འདས། །མཁའ་མཉམ་མཉམ་བཞག་གཅིག་ཏུ་ལྷུན་རྫོགས་པས། །ཐམས་ཅད་མ་སྐྱེས་བདེ་ཆེན་རོལ་པར་ཤར། །རང་བྱུང་བསྒོམ་དུ་མེད་པའི་སྙིང་པོ་ནི། །ཐ་མལ་ཤེས་པ་བཟོ་མེད་ཟང་ཁ་མ། །འཕྲོ་ན་རང་གྲོལ་གནས་ན་མཉམ་པ་ཉིད། །ཉོན་མོངས་དེ་ཉིད་སྟོང་གསལ་ཡེ་ཤེས་ལྔ། །སྤང་གཉེན་སྦྱོང་བསྒྱུར་མི་དགོས་གདོད་མའི་ངང་། །མཁའ་མཉམ་སྐྱེ་མེད་ཆོས་སྐུའི་རོལ་པའོ། །སྙིང་པོ་མཚན་མ་མེད་པའི་ཡེ་ཤེས་ལ། །རང་བྱུང་བསྒོམ་དུ་མེད་ཀྱི་གང་བདེར་ཐོངས། །མ་བསམ་རེ་དོགས་བྲལ་བའི་ཤེས་པ་ལ། །འཆིང་གྲོལ་གདོད་ནས་མི་དམིགས་གཞི་རྩ་མེད། །གང་གིས་འཆིང་བ་དེ་ཉིད་གྲོལ་བ་སྟེ། །ཉོན་མོངས་གཉེན་པོ་གཉིས་མེད་དེ་བཞིན་ཉིད། །ཇི་བཞིན་ཡུལ་ལ་སྐྱོན་ཡོན་གཉིས་མེད་པ། །ཀུན་བྱེད་རིག་པ་རང་ཡན་ཆེན་པོར་ཞོག །མ་བཅོས་རྣལ་བཞག་ཕྱོགས་རིས་མེད་པའི་ངང་། །སྟོང་པ་མཚན་མ་མེད་ཅེས་མི་དམིགས་པས། །དབྱིངས་གཅིག་དེ་བཞིན་ཉིད་དུ་སེམས་ལ་ཞོག །འདི་ལྟར་གཅིག་ཏུ་ངེས་པའི་དོན་ལ་ཉོན། །འཇིག་རྟེན་བྱ་བའི་ལས་དང་ཆོས་རྣམས་ཀུན། །བྱས་པས་མི་ཟིན་རང་བཞིན་བཞག་ན་ཟིན། །དེ་བས་རྩོལ་སྒྲུབ་ཆོས་ཀྱིས་དགོས་པ་མེད། །ཇི་ལྟར་དཔྱད་པ་དེ་ལྟར་འཆིང་བའི་རྒྱུ། །གྲུབ་དང་མ་གྲུབ་རེ་དོགས་གཟེབ་ཡིན་པས། །རང་བབ་སོར་བཞག་ཇི་བཞིན་ཉིད་དུ་ཞོག །འདས་པའི་ཆོས་རྣམས་འགག་པས་བསྒོམ་དུ་མེད། །མ་འོངས་མ་སྐྱེས་སྒོམ་པའི་ཡུལ་ན་མེད། །ད་ལྟའི་སེམས་ལ་བསྒོམ་དང་སྒོམ་བྱེད་མེད། །དུས་གསུམ་མཉམ་ཉིད་སྒོམ་ཡུལ་ཀུན་ལས་འདས། །དེ་བས་སྒོམ་པའི་སེམས་འཛིན་མ་བྱེད་པར། །རང་བབ་ཤེས་པ་གང་བབ་ངང་དེར་ཞོག །བསམ་གྱིས་མི་ཁྱབ་བདེ་ཆེན་ངེས་པའི་ལུང་། །གང་ལ་དེ་གནས་མཉམ་རྫོགས་ཆེན་པོ་ཉིད། །ཐབས་དང་ཤེས་རབ་གཉིས་མེད་སྙིང་པོའི་དོན། །སྐྱེ་མེད་ཕྱོགས་བྲལ་འཕེལ་འགྲིབ་ཀུན་ལས་འདས། །འདུ་ཤེས་མི་འགོག་ཡུལ་རྣམས་དེ་(༥༨)བཞིན་ཉིད། །འཛིན་བྱེད་མི་དམིགས་སྤང་གཉེན་རང་སར་གྲོལ། །མ་བསྒོམས་ལྷུག་པ་མཉམ་རྫོགས་ཆེན་པོ་ལ། །ཡངས་དོག་མཐོ་དམན་རྒྱ་ཆད་ཕྱོགས་ལྷུང་མེད། །མ་སྤངས་རེ་དོགས་ཆད་པའི་ངང་ཉིད་དུ། །མི་བསམ་འདུ་འཕྲོ་ཞིག་པའི་བྱང་ཆུབ་སེམས། །ཀུན་གསལ་རང་བཞིན་དག་པའི་ངང་དུ་ཞོག །སྣ་ཚོགས་སྣང་གྲགས་ཆོས་རྣམས་སེམས་ཀྱི་ངང་། །སེམས་ཉིད་མི་གཡོ་རང་བཞིན་གདོད་མའི་ངང་། །ཆོས་དང་ཆོས་ཉིད་མེད་པར་ལ་བཟླས་པས། །

འཁོར་འདས་མི་དམིགས་མཉམ་རྫོགས་ངང་ཉིད་དུ། །དྲན་པས་ཚོལ་ཁྲོ་མེད་པར་མཉམ་པར་ཞོག །གཅིག་ཏུ་མ་བསྡུས་གཉིས་སུ་མ་འཛིན་པར། །ལྷུན་གྲུབ་རེ་དོགས་བྲལ་བའི་ནམ་མཁའ་ལ། །ཡེངས་མེད་སྤྲོས་དང་བྲལ་བའི་ཤེས་པ་ཉིད། །རྒྱ་ཆད་ཕྱོགས་ལྷུང་བྲལ་བའི་ཚུལ་གྱིས་ཞོག །རྒྱ་བསྐྱེད་དཔང་བསྟོད་མཐའ་དབུས་བརྡལ་བར་བསྐྱེད། །མ་བཟུང་མ་བཏང་རང་གསལ་གཅིག་ཏུ་ལྟོས། །ཕྱམ་མེ་ཁྱབ་བརྡལ་དབྱིངས་གཅིག་གདོད་མའི་ངང་། །བསམ་རྫོགས་ཡེ་ཤེས་འོད་གསལ་ཁོང་ནས་འཆར། །གཉིས་མེད་དོན་ལ་འཇུག་པ་ཀུན་འདོད་ཀྱང་། །བློས་བཟུང་ཆོས་ལས་འགྲོ་ཀུན་མ་འདས་པས། །ཐེག་པའི་མཐོ་དམན་དོན་གཅིག་སྙིང་པོ་མེད། །ངེས་དོན་བརྗོད་བྲལ་མ་སྐྱེས་རྣམ་པར་དག །སེམས་ཉིད་མི་གཡོ་སངས་རྒྱས་རང་བཞིན་ལ། །བཅོས་བསྒྱུར་འབད་པའི་ཕྱི་ནས་དག་པར་འདོད། །འཁོར་བ་སྤངས་ནས་མྱ་ངན་འདས་འཚོལ་བ། །རྨོངས་པ་དེ་ཡིས་སྙིང་པོའི་དོན་མི་མཐོང་། །སྒོམ་པའི་རྗེས་ལ་སྒོམ་མེད་རྫོགས་པའི་ཆོས། །མཁའ་ལྟར་དྲི་མེད་སྐྱེ་བ་གང་འདོད་པ། །དེ་ལ་ལྟ་བའི་དེ་ཉིད་མཐོང་བ་མེད། །ཕྱི་ནས་དག་པའི་སྒོམ་མེད་ཅི་འདྲ་སྐྱེ། །འདི་ནི་རྟོགས་མཐོང་གོམས་པས་ཡོན་ཏན་འཆར། །འོན་ཀྱང་རྟོགས་པ་བཟང་ངན་འཕོ་འགྱུར་མེད། །དེ་ལྟར་ཤེས་ན་སྐྱེས་བུ་མཁས་པ་ཡིན། །རྨོངས་པས་མི་གོ་རྒྱུ་འབྲས་ཚད་མར་འཛིན། །རྒྱུ་རྐྱེན་དངོས་པོའི་རྟེན་འབྲེལ་ཆོས་དཔགས་ནས། །སེམས་ཉིད་དངོས་མེད་དོན་ལ་རྩོལ་སྒྲུབ་བྱེད། །དེ་ནི་ས་བོན་མྱུ་གུ་བསྐྱེད་མཐོང་ནས། །ནམ་མཁའ་སྦྱངས་པས་རྒྱུ་འབྲས་འདོད་པར་ཟད། །ཧ་ཅང་མ་འབྲེལ་ཕན་ཚུན་འགལ་བ་ཅན། །དངོས་མེད་སེམས་ལ་བཅོས་པས་ཅི་བྱར་ཡོད། །ནམ་མཁར་སྐྱེད་ཚལ་མྱུ་གུ་སྐྱེ་བ་བཞིན། །དངོས་མེད་དེ་བཞིན་ཉིད་ལ་བཅོས་མ་བྱེད། །འདི་ལྟར་ཆོས་ཚུལ་བསམ་གྱིས་མི་ཁྱབ་སྟེ། །ས་སོགས་དངོས་པོར་སྣང་བའི་ཆོས་རྣམས་ལ། །རྒྱུས་བསྐྱེད་རྐྱེན་གྱིས་བསྒྱུར་བས་སྣ་ཚོགས་བྱེད། །མཁའ་དང་དེ་བཞིན་ཉིད་ཆོས་དག་པ་ལ། །འབད་ཅིང་རྩོལ་བས་མི་འགྲུབ་འཕོ་འགྱུར་མེད། །དེ་བཞིན་སེམས་ལ་བག་ཆགས་འཁྲུལ་པ་གང་། །ཇི་ལྟར་འབད་རྩོལ་འཁོར་བ་རྒྱུན་མི་འཆད། །སེམས་ཉིད་མི་གཡོ་(༥༩)སྔ་ཕྱི་འཕོ་འགྱུར་མེད། །དེ་བས་སེམས་ཉིད་དག་པའི་སངས་རྒྱས་ལ། །བཅོས་བསྒྱུར་མ་བྱེད་དེ་བཞིན་ཉིད་དུ་ཞོག །ནམ་མཁའ་བཅོས་པའི་ངལ་བ་མ་བྱེད་ཀྱེ། །གྲུབ་དང་མ་གྲུབ་རང་བཞིན་མེད་པས་ན། །རྟོགས་དང་མ་རྟོགས་གཉིས་སུ་མི་འཛིན་པར། །རང་བྱུང་ཆོས་ལ་གང་བྱུང་དེ་བཞིན་ཞོག །མ་བཅོས་ཇི་བཞིན་བཞག་ན་གདོད་མའི་ངང་། །སྙིང་པོའི་འོད་གསལ་རྒྱུན་ཆད་མེད་པས་ན། །གང་བབ་ངང་ལ་རང་བབ་ཆེན་པོར་ཞོག །ངང་དྭངས་འོད་གསལ་ཉི་ཟླ་ལྟ་བུའི་སེམས། །དགའ་བདེ་ཕན་ཡོན་བཅས་པ་སྐྱེ་བར་འགྱུར། །འདི་ལ་མཆོག་དང་དམན་པའི་ཆོས་མེད་པས། །དམིགས་བྲལ་མ་རྩོལ་བདེ་བས་ལུས་སེམས་ཁྱབ། །ཀུན་གྲོལ་གདོད་ནས་ཇི་བཞིན་དམིགས་སུ་མེད། །མ་བྱས་རང་བཞིན་དག་པའི་རྒྱལ་པོ་ནི། །ཕྱོགས་བྲལ་ཡེ་ཤེས་སྣང་བ་འཆར་བར་བྱེད། །ཀུན་འདུས་རང་བཞག་མི་འགྱུར་སྙིང་པོའི་དོན། །ཇི་བཞིན་མི་འཆོས་སྒོམ་པའི་ངང་ལ་ཞོག །ཇི་ལྟར་བྱས་ཀྱང་སྒོམ་པར་ཤར་བ་ན། །མ་བསྒོམས་གང་ཤར་བཞག་ཀྱང་ཡེངས་པ་མེད། །མཐར་ཕྱིན་ལྷུན་གྲུབ་ཆེན་པོའི་སྒོམ་པ་ཡིན། །ལྟ་སྒོམ་བོགས་འབྱིན་སྤྱོད་པའི་རིམ་པ་ཡང་། །སྒྱུ་མ་སྤྲུལ་པ་གཉིས་མེད་ཆུ་ཟླའི་ངང་། །སྤྱོད་ལམ་དུས་དྲུག་ཀུན་ཏུ་བཟང་པོར་སྤྱོད། །གང་ལ་བཟང་ངན་ཡོད་ན་སྤྱོད་པ་མིན། །བླང་དོར་རེ་དོགས་བྲལ་བར་ཤེས་པར་བྱ། །འདོད་པའི་ཡུལ་རྣམས་གང་དང་གང་ལ་ཡང་། །ཆགས་ཞེན་དགག་སྒྲུབ་ཡོད་ན་སྤྱོད་པ་མིན། །ཇི་ལྟར་སྒྱུ་མས་སྒྱུ་མའི་ཡུལ་རྣམས་ལ། །གང་ལྟར་སྤྱོད་ཀྱང་ཞེན་འཛིན་མེད་པ་ལྟར། །རྣལ་འབྱོར་སྤྱོད་པ་མ་ཆགས་རོལ་པར་སྤྱོད། །ཆོས་སོ་ཅོག་ལ་ངོས་བཟུང་འགའ་མེད་དེ། །མེད་བཞིན་སྣང་ལ་དོན་དུ་མ་འཛིན་པར། །གཉིས་མེད་རང་གྲོལ་རྫོགས་པ་ཆེན་པོའི་ངང་། །ཇི་བཞིན་ཉིད་དུ་དེ་བཞིན་སྤྱད་པར་བྱ། །འདི་ཞེས་གཉིས་སུ་སྤྱོད་པའི་སེམས་ཡོད་པར། །གཉུག་མའི་རང་བཞིན་མི་མཐོང་འཁྲུལ་པའི་བློ། །མཐའ་བྲལ་སྤྱོད་ཀྱང་དེ་ཡི་མཐར་ལྷུང་ཞིང་། །སྒྱུ་མར་འདོད་པ་གང་གི་གཟེབ་ཏུ་འཆིང་། །རང་སེམས་ཡེ་གྲོལ་ཆོས་ཉིད་ཆེན་པོ་ལ། །སྤྱོད་དང་མི་སྤྱོད་བླང་དོར་གཉིས་མེད་ཀྱི། །རྩོལ་བའི་ནད་ཀྱིས་གདུང་བར་མ་བྱེད་པར། །ཇི་བཞིན་གཉིས་མེད་དེ་བཞིན་ཉིད་དུ་ཞོག །ཐམས་ཅད་དབྱིངས་གཅིག་མཉམ་པའི་ངོ་བོ་སྟེ། །གདོད་མའི་ཡེ་ཤེས་སེམས་ཉིད་རྫོགས་པ་ཆེ། །རང་བྱུང་དོན་གྱི་སྙིང་པོ་གང་བདེར་སྤྱོད། །ལྷུན་རྫོགས་ཡིན་གྱི་རྩོལ་སྒྲུབ་མ་བྱེད་ཅིག །གནས་ལུགས་ཡིན་གྱི་བཅོས་བསྒྱུར་མ་བྱེད་ཅིག །ཡེ་ནས་ཡིན་གྱི་ད་གཟོད་མ་སྒྲུབས་ཤིག །གྲུབ་བསལ་མེད་ཀྱི་སྦྱང་བསྒྱུར་མ་བྱེད་ཅིག །ཕྱོགས་རིས་མེད་ཀྱི་འདི་ཞེས་མ་འཛིན་ཅིག །འཁོར་འདས་མེད་ཀྱི་རེ་དོགས་མ་བྱེད་ཅིག །(༦༠)བཟང་ངན་མེད་ཀྱི་བླང་དོར་མ་བྱེད་ཅིག །ཇི་ལྟར་སྒོམ་དང་སྤྱོད་པར་བྱས་ན་ཡང་། །རང་གི་སེམས་ལས་གཞན་དུ་གཡོས་པ་མེད། །དེ་ལ་སྤང་བླང་མཆོད་བཤགས་ཅི་བྱར་ཡོད། །འཆིང་བའི་བསམ་གཏན་སེམས་ཀྱི་ནད་དུ་ཆེ། །དག་པའི་སེམས་ལ་འཛིན་པས་མ་བསླད་པར། །གང་ཤར་རྒྱལ་པོ་ཇི་བཞིན་རོལ་དུ་ཆུག །བཟང་ངན་བླང་དོར་མེད་ན་སྤྱོད་པ་ཡིན། །གང་ལ་འདི་ཞེས་རྡུལ་ཙམ་ཞེན་འཛིན་ཡོད། །དེ་ལ་དེ་ཉིད་གོལ་སྒྲིབ་ཆེན་པོར་བཤད། །ཚད་མེད་ནམ་མཁའི་དབྱིངས་ལ་མ་འཛིན་པར། །དག་པའི་སེམས་ཉིད་ནམ་མཁས་མཚོན་ཏེ་བྱོན། །སྣང་ཡུལ་ཐབས་ལ་བློ་ནི་ཤེས་རབ་དང་། །གཟུང་འཛིན་མི་དམིགས་རྒྱ་ཡན་ཆེན་པོར་སྤྱོད། །བསོད་ནམས་ཡེ་ཤེས་བསྐྱེད་རྫོགས་རྣམ་པར་དག །རོལ་པ་འགག་མེད་སྒྱུ་མར་ལྷུན་གྱིས་གྲུབ། །སྣང་སེམས་ངོ་བོ་མ་སྐྱེས་ཆོས་སྐུ་ལ། །རང་བཞིན་མི་འགགས་གསལ་སྟོང་ལོངས་སྤྱོད་རྫོགས། །སྣ་ཚོགས་ཤར་གྲོལ་སྤྲུལ་སྐུར་ཕྱམ་གཅིག་པར། །ཐམས་ཅད་སྐུ་གསུམ་ཡེ་ཤེས་ཆེན་པོར་སྤྱད། །སྣང་ཞིང་མི་རྟོག་རོལ་པར་ཤར་བའི་ཚེ། །རྒྱུ་འབྲས་ཐེག་པའི་ཡོན་ཏན་མ་ལུས་རྫོགས། །དེ་ཡང་སེམས་ཉིད་བསམ་གཏན་རིན་ཆེན་མཛོད། །སྲིད་དང་ཞི་བ་མཉམ་ཉིད་རྫོགས་པ་ཆེ། །གདོད་ནས་དག་པའི་ངོ་བོ་མཐོང་བའི་ཚེ། །རབ་ཏུ་དགའ་བའི་ས་ཞེས་བཏགས་པ་སྟེ། །གཉིས་འཛིན་དྲི་མེད་དྲི་མ་མེད་པའི་ས། །རྟོགས་པའི་འོད་བྱེད་འོད་འཕྲོ་ཅན་དང་ནི། །ཀུན་གྱི་ཡུལ་མིན་སྤྱད་དཀའ་མངོན་དུ་གྱུར། །སྲིད་ལས་རིང་སོང་ཆོས་ཉིད་མི་གཡོ་བ། །ཀུན་གྱི་རབ་མཆོག་ལེགས་པའི་བློ་གྲོས་ཅན། །ཡེ་ཤེས་ཉི་མ་དྲི་མེད་ཆོས་ཀྱི་སྤྲིན། །ཆ་ཡི་དབྱེ་བས་དེ་ལྟར་བཅུ་དང་ནི། །གཉིས་མེད་དོན་མཐོང་ཚོགས་ལམ་སྤྱོད་པས་སྦྱོར། །རྟོགས་པ་རབ་མཐོང་དོན་གོམས་སྒོམ་པའི་ལམ། །གཏན་སྲིད་ཟིན་པས་མི་སློབ་འབྲས་བུར་བརྗོད། །སྒོ་གསུམ་ཡེ་ཤེས་ཆེན་པོར་གཞིར་དག་པས། །བུམ་གསང་ཤེས་རབ་ཚིག་དབང་རྣམ་པ་བཞི། །ཡུལ་སེམས་སྣང་སྟོང་བསྐྱེད་རྫོགས་ཟུང་འབྲེལ་སོགས། །ཇི་སྙེད་དབྱེ་བ་དེ་སྙེད་ཡོན་ཏན་ལྡན། །མ་བཙལ་ལྷུན་གྱིས་གྲུབ་པས་རྫོགས་པ་ཆེ། །བྱས་ཆོས་བསམ་ལས་འདས་ན་མཐོང་བ་ཡིན། །བལྟས་པས་མི་མཐོང་བསྒོམས་པས་གྲུབ་པ་མེད། །དཔྱད་པས་མི་རྙེད་བྱ་རྩོལ་ཀུན་ལས་འདས། །རང་སེམས་སྙིང་པོ་འགྱུར་མེད་སངས་རྒྱས་ཏེ། །ཡིད་ནི་འཁོར་འདས་ཀུན་ལ་ཡེ་ནས་ཡོད། །ཁྱབ་ནི་དུས་གསུམ་སྔ་ཕྱི་མེད་པར་ཁྱབ། །ཡིན་ནི་ཆོས་དབྱིངས་རྒྱུ་འབྲས་འདས་པ་ཡིན། །བལྟ་རྒྱུ་མཚན་མའི་དངོས་མེད་ནམ་མཁའ་འདྲ། །རང་བྱུང་ཡེ་ཤེས་གཞི་གནས་མི་གཡོ་བ། །མཚོ་བཞིན་ངང་གིས་འོད་གསལ་དྭངས་པ་སྟེ། །ཡུལ་ལ་མི་རྟོག་དེ་བཞིན་ཉིད་དུ་གསལ། །བྱད་བཞིན་རང་གནས་རྐྱེན་ལ་ལྟོས་པ་མེད། །ཡུལ་ལ་ལྟོས་(༦༡)ན་ཡེ་ནས་རང་བྱུང་མིན། །གཞན་འབྱུང་ཡིན་པས་སྣ་ཚོགས་གཡོ་བར་འགྱུར། །དེས་ན་དུས་ཀུན་རང་བྱུང་འཕོ་འགྱུར་མེད། །འཆར་གཞི་མ་འགག་སྐུ་གསུམ་འདུ་འབྲལ་མེད། །རང་བཞིན་སྟོང་ལ་ངོ་བོ་གསལ་བའི་ངང་། །ཐུགས་རྗེ་མ་འགག་རིག་པའི་སྙིང་པོར་གནས། །ནང་གསལ་མི་གཡོ་ཇི་བཞིན་ལྷུན་གྱིས་གྲུབ། །ཡུལ་ལ་རྟོག་པའི་ཡེ་ཤེས་གང་ཤར་བ། །རྩལ་ལམ་མདངས་ཀྱི་ཡེ་ཤེས་ཞེས་བྱ་སྟེ། །རླབས་སམ་མེ་ལོང་ནང་གི་གཟུགས་བརྙན་བཞིན། །ཡུལ་ཡོད་རྐྱེན་གྱིས་དེ་བློ་འཆར་བ་སྟེ། །མེད་ན་མི་འབྱུང་འབྲེལ་བ་གྲུབ་པ་ན། །རང་ལ་ཤར་བས་རང་བྱུང་ཞེས་བཏགས་ཀྱང་། །རྒྱུན་དུ་མིན་པས་གཞན་འབྱུང་རྐྱེན་གྱི་ཡུལ། །འཕྲོ་འདུའི་རོལ་པ་འགག་པ་མེད་པ་ཡིན། །དེ་ཡང་གཞི་གནས་རང་བྱུང་དབྱིངས་ཡིན་ལ། །ཡུལ་ལ་ཤར་བའི་ཤེས་པ་ཡེ་ཤེས་ཏེ། །ཇི་བཞིན་བཞག་པ་གཉིས་སུ་མེད་པ་ཡིན། །དོན་འདི་མི་ཤེས་རྨོངས་པའི་བསམ་གཏན་པ། །ཁ་ཅིག་དབྱིངས་ཉིད་ངང་བཞག་འབའ་ཞིག་བཙལ། །འདུ་ཤེས་ཚོར་བ་འགོག་པའི་སེམས་འཛིན་གྱིས། །གཟུགས་དང་གཟུགས་མེད་བག་ཆགས་འཁོར་བ་སྒྲུབ། །ཁ་ཅིག་ཡུལ་གྱི་ཡེ་ཤེས་ཕྱིར་བལྟས་ལ། །རང་གྲོལ་ཟེར་ནས་འཕྲོ་འདུའི་རྟོག་པ་འདྲེན། །ཀུན་རྟོག་སྤྲོས་པས་འདོད་པའི་སྲིད་པར་འཆིང་། །དབྱིངས་དང་ཡེ་ཤེས་གཉིས་མེད་རྟོག་པ་མེད། །ལ་ལ་བསྐྱེད་རྫོགས་རྒྱུ་འབྲས་སྣ་ཚོགས་ཀྱིས། །སྙིང་པོའི་སེམས་ཉིད་རྣལ་མའི་དོན་ལ་སྒྲིབ། འཁོར་བའི་གྲོང་ལས་ཐར་པའི་སྐབས་མེད་དོ། །འདིར་ནི་གང་ཤར་སྤང་བླང་མེད་པའི་ཚེ། །ངང་དྭངས་དབྱིངས་དེར་རིག་པ་ལ་བཟླས་ནས། །གཉིས་མེད་གཅིག་ཏུ་བདེ་ཀློང་འཁྱིལ་པའི་ཚེ། །འཕྲོ་གནས་གཉིས་མེད་མཉམ་རྫོགས་ཆེན་པོར་གྲོལ། །ངང་ཡིན་ཡེ་ཡིན་རྫོགས་པ་ཆེན་པོ་ཡིན། །སྤང་བླང་མི་དགོས་སེམས་སངས་ཆེན་པོ་ཡིན། །ཡེ་ནས་རྟོག་པ་མེད་པའི་སེམས་ཉིད་ལ། །ད་ལྟ་གང་ཤར་གཟེ་རེ་མ་བྱས་ན། །སྣང་སེམས་མི་རྟོག་ཆོས་སྐུའི་ཞིང་དུ་གྲོལ། །ཕྱི་ནས་མཉམ་རྫོགས་དེ་བཞིན་སྒྲུབ་ཏུ་མེད། །རང་བྱུང་གཅིག་ལ་ཡུལ་དྲུག་ཤར་བའི་ཚེ། །བརྟག་དཔྱད་མི་དགོས་ཇི་བཞིན་ལྷུག་པར་ཞོག །མེ་ལོང་གཟུགས་བརྙན་གཉིས་མེད་དྭངས་པ་བཞིན། །དབྱིངས་དང་ཡེ་ཤེས་གཉིས་མེད་ལྷུན་གྱིས་གྲུབ། །ཡུལ་ལ་ཤར་ཡང་ཕྱི་རུ་མ་འཕྲོས་པས། །སེམས་ཉིད་དྭངས་པའི་གཟུགས་བརྙན་རོལ་པ་ཙམ། །ཐམས་ཅད་དབྱིངས་གཅིག་ཡེ་ནས་ཤེས་པའི་ཕྱིར། །རང་བྱུང་ཡེ་ཤེས་བཅོས་བསླད་མེད་པའི་དོན། །རྒྱུ་འབྲས་འདས་པའི་ངོ་བོ་བསྟན་པ་ཡིན། །ཇི་ལྟར་བློ་ཡིས་བཀོད་པའི་ཆོས་རྣམས་ནི། །བག་ཆགས་ཡིན་ཕྱིར་རྒྱུ་འབྲས་འཁོར་བར་འཁྱམས། །བདེ་སྡུག་བཟང་ངན་སྣ་ཚོགས་སོ་སོར་སྣང་། །ས་བོན་ཐ་དད་འབྲས་བུ་འབྱུང་བ་བཞིན། །ཇི་བཞིན་མ་བཅོས་སེམས་ཉིད་འོད་གསལ་ནི། །(༦༢)རྒྱུ་འབྲས་གཉིས་མེད་ཡེ་ནས་བྱ་རྩོལ་མེད། །མཁའ་བཞིན་མ་སྐྱེས་མི་འགགས་མི་གནས་པས། །དུས་གསུམ་འཕོ་འགྱུར་བརྗོད་མེད་བསམ་ལས་འདས། །མ་བཙལ་ལྷུན་གྱིས་གྲུབ་པས་སྐྱོན་ཡོན་མེད། །རོལ་པ་འགག་པ་མེད་པས་ཆོས་ཀྱི་དབྱིངས། །རང་བཞིན་གཅིག་ལ་བཅོས་བསླད་མ་བྱེད་ཅིག །བགྲོད་པས་མི་ཕྱིན་སྦྱངས་པས་དག་པ་མེད། །བཙལ་བས་མི་རྙེད་ཇི་བཞིན་ལྷུག་པར་ཞོག །སྐུ་དང་ཡེ་ཤེས་ཡོན་ཏན་ལྷུན་གྱིས་གྲུབ། །མ་བཅོས་དེ་བཞིན་ཉིད་དུ་བཞག་པས་འགྲུབ། །བྱ་རྩོལ་མ་བྱེད་སེམས་ཉིད་ནམ་མཁའ་ཆེ། །ཡེ་ནས་དག་པས་རྒྱུ་འབྲས་རྩོལ་མི་དགོས། །རང་སེམས་ཆོས་སྐུ་ལྷུན་གྲུབ་དོན་འདོད་ན། །གང་སྣང་ཡུལ་སེམས་དམིགས་གཏད་ཞེན་པ་བཤོལ། །འདི་ཞེས་ཆེད་འཛིན་མེད་ན་མངོན་དུ་འགྱུར། །ཀུན་ཡིན་གཅིག་ཡིན་གཟའ་གཏད་མེད་པས་ན། །ཕྱོགས་བྲལ་རིག་པ་མཉམ་མེད་ཡིན་པར་ཞོག །ཆོས་ལ་བྱར་མེད་བྱས་པས་ཟིན་པ་མེད། །ཟིན་མེད་རང་བཞག་བཅོས་བསླད་མ་བྱེད་པར། །གང་ཡིན་ཀུན་ཡིན་འདི་ཡིན་ངེས་མེད་པས། །མཐའ་བྲལ་ཀློང་ཡངས་རྫོགས་པ་ཆེན་པོར་ཞོག །བཞག་ས་ཡོད་ན་རྫོགས་པ་ཆེན་པོ་མིན། །ཅི་ཡིན་འདི་ཡིན་ངོས་བཟུང་མ་བྱེད་ཅིག །རྫོགས་པ་ཆེན་པོ་མཉམ་ཉིད་རང་གྲོལ་ལས། ལམ་གོམས་པས་གྲོལ་བའི་ལེའུ་སྟེ་གཉིས་པའོ།། །།

གསུམ་པ། འབྲས་བུ་ལྷུན་གྲུབ་ཆེན་པོའི་ལེའུ།

དེ་ལྟར་གཞི་ལམ་དབྱིངས་རིག་མཐར་ཕྱིན་ཚེ། །གཞི་རྫོགས་འབྲས་བུ་གདོད་མར་ལྷུན་གྱིས་གྲུབ། །རང་དོན་ཆོས་སྐུ་གཞན་དོན་གཟུགས་སྐུ་གཉིས། །དབྱིངས་དང་ཡེ་ཤེས་གཉིས་མེད་འདུ་འབྲལ་མེད། །འཁོར་འདས་གཉིས་མེད་རིག་པ་དབྱིངས་གཅིག་ཏུ། །ཞི་བར་བཞུགས་པ་སྤྲོས་དང་བྲལ་བའི་ཚེ། །ཀུན་བཟང་དབྱེ་བ་མེད་པའི་ས་ཞེས་བྱ། །འདི་ནི་མི་གནས་བསམ་རྫོགས་ཆོས་སྐུའི་ངང་། །རང་བཞིན་གདོད་ནས་དག་པའི་ཆོས་ཉིད་དོ། །དེ་ཉིད་ངང་ལས་ཕྲ་བའི་ཡེ་ཤེས་ནི། །ནང་གསལ་འཆར་གཞི་མ་འགག་ཐམས་ཅད་མཁྱེན། །སྐུ་དང་ཡེ་ཤེས་འདུ་འབྲལ་མེད་པ་ནི། །ཏིང་འཛིན་མི་གཡོ་མཉམ་རྫོགས་ཆེན་པོའི་ས། །དེ་ཉིད་ངང་ལས་རྣམ་པ་ཕྱིར་བཞེངས་ནས། །འོད་གསལ་སྣང་བས་ཀུན་བཟང་ཡབ་ཡུམ་གྱི། །འཕྲོ་འདུའི་རོལ་པ་འཁོར་ལོ་ཚོགས་ཆེན་ས། །དེ་ཉིད་ངང་ལས་ཞི་བ་རིགས་ལྔའི་ཞིང་། །འོད་གསལ་ལྷུན་རྫོགས་རང་སྣང་དག་པ་ཡིན། །ཞིང་དང་སྟོན་པ་ཆོས་འཁོར་དུས་རྣམས་ཏེ། །ཕུན་སུམ་ཚོགས་པ་ལྔ་ལྔར་སྣང་བ་ལས། །ཆོས་དབྱིངས་མེ་ལོང་མཉམ་ཉིད་སོ་སོར་རྟོག །བྱ་གྲུབ་ཡེ་ཤེས་ལྔ་ལྔའི་རང་བཞིན་ནི། །སྟུག་པོ་བཀོད་པའི་ས་ཞེས་བརྗོད་པ་ཡིན། །དེ་ཉིད་ངང་ལས་ཁྲོ་བོའི་ཞིང་ཁམས་ནི། །དཀྱིལ་འཁོར་ལྷུན་རྫོགས་རིགས་ལྔར་སྣང་བ་ཉིད། །སྐུ་དང་ཡེ་ཤེས་ནམ་མཁའ་མཉམ་སྦྱོར་བ། །རྡོ་རྗེ་འཛིན་པའི་ས་ཞེས་བརྗོད་པ་ཡིན། །(༦༣)དེ་ཉིད་ངང་ལ་ས་བཅུའི་སེམས་དཔའ་ལ། །རྣམ་དག་མི་བསྐྱོད་རིན་འབྱུང་འོད་དཔག་མེད། །དོན་གྲུབ་སྣང་བས་འཁོར་རྒྱུད་སྦྱང་བའི་ཕྱིར། །མེ་ལོང་ལྟ་བུས་གདུལ་བྱའི་དོན་མཛད་པ། །མ་ཆགས་པདྨ་ཅན་གྱི་ས་ཞེས་བྱ། །དེ་ཉིད་ངང་ལས་མ་དག་གདུལ་བྱ་ལ། །འགྲོ་འདུལ་ཐུབ་པ་དྲུག་དང་སྐྱེ་བ་དང་། །བཟོ་དང་མཁོ་རྒུའི་ཡོ་བྱད་སྣ་ཚོགས་ཏེ། །མདོར་ན་མཐུན་པའི་སྣང་གཟུགས་སྟོན་པ་དང་། །སོ་སོར་སྣང་བས་འགྲོ་བའི་དོན་མཛད་པ། །ཀུན་ཏུ་འོད་ཀྱི་ས་ཞེས་བྱ་བ་ཡིན། །ཉི་མའི་འོད་ཀྱིས་གླིང་བཞི་སྣང་བྱེད་ཅིང་། །པདྨོ་འཛུམ་པས་དགའ་བ་བསྐྱེད་པ་བཞིན། །སྤྲུལ་པའི་འོད་ཟེར་སྣང་བས་ཁྱབ་པར་བྱེད། །ཀུན་བཟང་དབྱེ་བ་མེད་དང་ཏིང་ངེ་འཛིན། །གཉིས་མེད་ཆོས་སྐུའི་ས་ཡིན་སྤྲོས་ཀུན་ཞི། །ཚོགས་ཆེན་སྟུག་པོ་བཀོད་དང་རྡོ་རྗེ་འཛིན། །རང་སྣང་ལོངས་སྐུའི་ས་ཡིན་འོད་གསལ་དང་། །པདྨ་ཅན་དང་ཀུན་ཏུ་འོད་ཟེར་འགྱེད། །རང་གཞན་འགྲོ་འདུལ་སྣ་ཚོགས་སྤྲུལ་སྐུའི་ས། །མཛད་པའི་ཕྲིན་ལས་དཔག་མེད་ལྷུན་གྱིས་གྲུབ། །དེ་ལྟར་སྐུ་དང་ཡེ་ཤེས་ཞིང་རྣམས་ཀྱང་། །ནམ་མཁའ་བཞིན་དུ་རྟག་ཁྱབ་འདུས་མ་བྱས། །འགྲོ་གྲོལ་བར་དུ་རྒྱུན་མི་འཆད་པར་སྣང་། །འདི་ནི་མཐར་ཕྱིན་གདོད་མའི་ངང་ཉིད་དེ། །རང་བཞིན་རྫོགས་པ་ཆེན་པོའི་འབྲས་བུ་ཡིན། །རྒྱུ་འབྲས་བསྐྱེད་མིན་ཡེ་ནས་ལྷུན་གྲུབ་ཡིན། །མ་བྱས་རང་བཞིན་དག་པའི་སེམས་ཉིད་ལ། །མི་བྱེད་རྩོལ་སྒྲུབ་མེད་པའི་དོན་མཐོང་ནས། །རང་བབ་ཡེ་གྲོལ་སོར་བཞག་ཀློང་གྱུར་པས། །ཡེ་ནས་ལྷུན་གྲུབ་མངོན་དུ་གྱུར་པ་ཡིན། །རྫོགས་པ་ཆེན་པོ་མཉམ་ཉིད་རང་གྲོལ་ལས། འབྲས་བུ་ལྷུན་གྲུབ་ཆེན་པོའི་ལེའུ་སྟེ་གསུམ་པའོ།། །།

དེ་ལྟར་ཆོས་ཚུལ་ཤིན་ཏུ་རྨད་བྱུང་འདི། །གངས་རི་ཐོད་དཀར་རིན་ཆེན་སྙིང་པོའི་མགུལ། །དྲི་མེད་འོད་ཟེར་ཤར་བས་སྣང་བྱས་པས། །དགེ་བས་འགྲོ་ཀུན་ཡིད་ཀྱི་མུན་སེལ་ཤོག དཔལ་ལྡན་གེ་སར་གསལ་བའི་དབང་པོ་ཡིས། །བདག་བློའི་སྦྲང་རྩི་འཛིན་འདི་དགའ་བསྐྱེད་པས། །ལེགས་བཤད་གླུ་དབྱངས་དར་དིར་སྙན་པར་བསྒྲགས། །དེ་ཡིས་སྐལ་ལྡན་སྐྱེ་བོ་དགའ་བར་མཛོད། །རྫོགས་པ་ཆེན་པོ་མཉམ་ཉིད་རང་གྲོལ་ཞེས་བྱ་བ། །དཔལ་ཨོ་རྒྱན་གྱི་སློབ་དཔོན་ཆེན་པོ་པདྨའི་དབང་པོས་ལེགས་པར་རྗེས་སུ་བཟུང་བའི་རྣལ་འབྱོར་པ་དྲི་མེད་འོད་ཟེར་གྱིས་གངས་རི་ཐོད་དཀར་གྱི་མགུལ་དུ་བཀོད་པ་རྫོགས་སོ།། །།དགེའོ།། །།

རྫོགས་པ་ཆེན་པོ་མཉམ་ཉིད་རང་གྲོལ་གྱི་དོན་ཁྲིད་རིན་ཆེན་སྙིང་པོ་ཞེས་བྱ་བ་ཤིན་ཏུ་གསལ་བ།

༄༅། །རྫོགས་པ་ཆེན་པོ་མཉམ་ཉིད་རང་གྲོལ་གྱི་དོན་ཁྲིད་རིན་ཆེན་སྙིང་པོ་ཞེས་བྱ་བ་ཤིན་ཏུ་གསལ་བ་བཞུགས་སོ། །

༄༅། །རྫོགས་པ་ཆེན་པོ་མཉམ་ཉིད་རང་གྲོལ་གྱི་དོན་ཁྲིད་རིན་ཆེན་སྙིང་པོ་ཞེས་བྱ་བ། དཔལ་དོན་ཡོད་གྲུབ་པ་ལ་ཕྱག་འཚལ་ལོ། །ཐར་པའི་ཁང་བཟང་ནམ་མཁའི་དབྱིངས་ཁྱབ་པ། །དཔལ་ལྡན་ཡོན་(༦༤)ཏན་འབྱོར་པས་ཡོངས་གང་ཞིང་། །མཁྱེན་པའི་རྔ་སྒྲ་ཡེ་ཤེས་བརྩེགས་པ་ཅན། །དུས་གསུམ་བདེ་བཤེགས་བླ་མའི་ཞབས་ལ་འདུད། །རང་བཞིན་གདོད་ནས་དག་པའི་སེམས་ཉིད་ལ། །སྣ་ཚོགས་ཐབས་ཚུལ་དཔག་མེད་སྟོབས་མངའ་བས། །སྙིང་པོའི་དེ་ཉིད་མཚོན་ཕྱིར་གཉུག་མའི་དོན། །ཁྲིད་དུ་བསྡེབས་ཏེ་བདག་གིས་བཤད་པར་བྱ། །

དེ་ལ་ཐེག་པ་ཐམས་ཅད་ཀྱི་ཡང་རྩེ་རྫོགས་པ་ཆེན་པོ་མཉམ་ཉིད་རང་གྲོལ་གྱི་དོན་ཁྲིད་འདི་ལ་གསུམ་སྟེ། བླ་མ་བརྒྱུད་པའི་རིམ་པ། དེ་ལས་བྱུང་བའི་གདམས་པ། རྩིས་ཆེ་བ་བཀའ་རྒྱས་གདབ་པའོ། །

དང་པོ་ནི། ཆོས་སྐུ་ཀུན་ཏུ་བཟང་མོས། ལོངས་སྐུ་རྡོ་རྗེ་ཕག་མོ། དེས་སྤྲུལ་སྐུ་པདྨ་ཡབ་ཡུམ། དེས་རྒྱལ་སྲས་དྲི་མེད་འོད་ཟེར།

གཉིས་པ་ལ། ཚེ་འདིར་གྲོལ་བ་སེམས་ཉིད་ཀྱི་གདམས་པ། བར་དོར་གྲོལ་བ་འོད་གསལ་གྱི་གདམས་པ། ཕྱི་མར་གྲོལ་བ་འཕོ་བའི་གདམས་པ་གསུམ་ལས། དང་པོ་ལའང་སྔོན་འགྲོ་གེགས་སྦྱང་བ། དངོས་གཞི་ངོ་སྤྲད་པ། རྗེས་སྐྱོང་ཐབས་བསྟན་པ་དང་གསུམ་ལས། དང་པོ་ལ་ལྔ་ལས། བླ་མའི་རྣལ་འབྱོར་ནི། སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་དེ། སྟོང་པའི་ངང་ལས་མདུན་གྱི་ནམ་མཁར་སེང་གེ་དང་ཉི་ཟླ་པདྨས་བརྒྱན་པའི་ཁྲི་ལ། སློབ་དཔོན་ཆེན་པོ་པདྨ་འབྱུང་གནས་རྩ་བའི་བླ་མ་དང་ཐ་མི་དད་པའི་སྐུ་མཚན་དང་དཔེ་བྱད་ཀྱིས་འབར་བ། ཟ་འོག་གི་བེར་དང་ཤར་བའི་མཉེན་ཞུ་གསོལ་ཞིང་། རྡོ་རྗེ་དང་དྲིལ་བུ་འཛིན་པས་སྐྱིལ་ཀྲུང་མཛད་དེ། དཀར་ལ་དམར་བའི་མདངས་ཅན་པདྨ་མཚན་བརྒྱད་ཀྱིས་བསྐོར་བའི་ནམ་མཁར་བརྒྱུད་པའི་བླ་མ་དང་། མཐའ་སྐོར་དུ་སངས་རྒྱས་དང་བྱང་ཆུབ་སེམས་དཔའ་མཁའ་འགྲོ་དམ་ཅན་རྒྱ་མཚོའི་སྤྲིན་ཕུང་འཁྲིགས་པར་བསམས་ལ། རང་གི་རྣམ་ཤེས་ལྷའི་རྣམ་པར་སྤྱི་གཙུག་ནས་འཐོན་ཏེ། ཆུ་གྲིས་རང་གི་ལུས་དེའི་ཐོད་པ་བཅད་པའི་འོག་ཏུ་ཐོད་པའི་སྒྱེད་པོ་གསུམ་དང་། དེའི་ནང་དུ་ལུས་ཀྱི་ཁོག་པ་དེ་ཉིད་བཅུག །འོག་ནས་རླུང་དང་མེ་གཡོས་པས་བདུད་རྩིར་ཞུ་ནས་ནམ་མཁའི་དབྱིངས་སུ་ཁྱབ་པར་བསམ་པའི་འོད་ཟེར་གྱིས་བདུད་རྩིའི་རྒྱུན་ཐོད་པར་བབས་པར་བསམས་ཏེ། རང་ཉིད་ལྷར་གྱུར་པའི་ལུས་དཔག་ཏུ་མེད་པར་སྤྲུལ་པ་དེ་དག་གིས་ཐོད་པ་དུམ་བུ་གཅིག་པ་མང་པོ་ཐོགས་ཏེ་བདུད་རྩི་བཅུས་ནས། བླ་མ་དང་སངས་རྒྱས་ལ་སོགས་པ་འཁོར་འདས་ཀྱི་མགྲོན་ཐམས་ཅད་ལ་མ་ཁྱབ་པ་མེད་པར་དྲངས་པས་མཉེས་ཤིང་ཚིམས་པར་བསམས་ནས། བདག་དང་སེམས་ཅན་ཐམས་ཅད་ཀྱིས་གསོལ་བ་འདེབས་པར་མོས་ལ། བླ་མ་རིན་པོ་ཆེ་བདག་གི་ལས་དང་ཉོན་མོངས་པའི་སྒྲིབ་པ་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། མཆོག་དང་ཐུན་མོང་གི་དངོས་གྲུབ་རྒྱ་ཆེན་པོ་སྩལ་དུ་གསོལ་ལོ། །(༦༥)ཚེ་འདི་ཉིད་ལ་མངོན་པར་རྫོགས་པར་སངས་རྒྱ་བར་བྱིན་གྱིས་བརླབ་ཏུ་གསོལ་ལོ། །ཞེས་པ་ལ་སོགས་པ་བརྗོད་པས། སྐུ་ལས་འོད་བྱུང་བདག་དང་སེམས་ཅན་ལ་ཕོག །སྒྲིབ་པ་དག་དངོས་གྲུབ་ཐོབ་པར་བསམ་པའི་རྗེས་སུ་ཐམས་ཅད་མེ་ལོང་ལ་ཧས་བཏབ་པ་བཞིན་བླ་མའི་ཐུགས་ཀར་ཐིམ་ནས། དེའང་མི་དམིགས་པ་ནམ་མཁའ་ལྟ་བུའི་ངང་ལ་དར་ཅིག་མཉམ་པར་བཞག་པའི་རྗེས་སྣང་རྨི་ལམ་སྒྱུ་མའི་ངང་ལས་བསྔོ་བ་བྱའོ། །དེས་ནི་གསང་སྔགས་ཀྱི་སྣོད་དུ་རུང་བས་བྱིན་རླབས་བཙན་ཐབས་སུ་སྐྱེ་ཞིང་བདག་འཛིན་རང་སར་གྲོལ་ནས་སེམས་ལས་སུ་རུང་བའི་དགོས་པ་ཡོད་དོ། །

གཉིས་པ་མཎྜལ་གྱི་རྣལ་འབྱོར་ནི། ལན་གསུམ་ཕྱིས་ཏེ་རྒྱན་གྱི་ཚོམ་བུ་ཅི་འགྲུབ་བཀོད་ལ། གླིང་བཞི་གླིང་ཕྲན་ལ་སོགས་པ་ཞིང་ཁམས་དག་པར་མོས་ཏེ། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་ཏུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་པ་ལ་སོགས་པ་བརྗོད་ནས་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་ཕུལ་བས། སེམས་ཅན་གྱི་རྒྱུད་དག་ཅིང་དྲི་མ་མེད་པས་རྟོགས་པ་སྐྱེ་སླ་བའི་དགོས་པ་ཡོད་དོ། །

གསུམ་པ་ཡིག་བརྒྱའི་རྣལ་འབྱོར་ནི། རང་ཉིད་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པའི་ཐུགས་ཀར་པད་ཟླའི་སྟེང་དུ་རྡོ་རྗེ་དཀར་པོ་ཧཱུྃ་གིས་མཚན་པ། ཧཱུྃ་གི་མཐའ་སྐོར་དུ་ཡིག་གེ་བརྒྱ་པ་བསམ་པའི་འོད་ཀྱིས་རང་གི་ནད་གདོན་སྒྲིབ་པ་ཐམས་ཅད་བྱང་བར་བསམས་ལ་བཟླས་པས། སེམས་ཅན་ཐམས་ཅད་ཀྱི་སྒྲིབ་པ་དག་ཅིང་རྡོ་རྗེར་སེམས་དཔར་བསམ་པའི་རྗེས་ལ། ཐམས་ཅད་མི་དམིགས་པའི་ངང་ལ་བསྔོ་བ་བྱས་པས་སྒྲིབ་པ་དག་ནས་རྟོགས་པ་སྐྱེ་བའི་དགོས་པ་ཡོད་དོ། །

བཞི་པ་སེམས་བསྐྱེད་པའི་རྣལ་འབྱོར་ནི། ཁམས་གསུམ་གྱི་སེམས་ཅན་འདི་རྣམས་ཐམས་ཅད་ཀྱིས་བདག་གི་ཕ་མ་མ་བྱས་པ་ནི་གཅིག་ཀྱང་མེད་ལ། དེ་དག་འཁོར་བའི་སྡུག་བསྔལ་མི་བཟད་པས་གདུངས་ཏེ་གཏན་དུ་སྡུག་བསྔལ་གྱི་རྒྱ་མཚོར་འཁྱམས་པ་སྙིང་རེ་རྗེ། དེའི་ཆེད་དུ་རྫོགས་པའི་སངས་རྒྱས་ཐོབ་པར་བྱ་སྙམ་ནས། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའ་ཚད་མེད་པ་བསམ་པའི་མདུན་དུ། ཕྱག་འཚལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་དང་། དགེ་བས་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པའི་ངང་བྱས་ཏེ། ཕྱོགས་རྣམས་ཀུན་ན་བཞུགས་པ་ཡི། །རྫོགས་སངས་རྒྱས་དང་བྱང་ཆུབ་སེམས། །ཐུགས་རྗེ་མངའ་རྣམས་དགོངས་སུ་གསོལ། །ཇི་ལྟར་རྒྱལ་བ་སྲས་བཅས་ཀྱིས། །བྱང་ཆུབ་ཐུགས་ནི་བསྐྱེད་པར་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བླ་ན་(༦༦)མེད། །དམ་པ་བདག་གིས་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །མ་བསྒྲལ་བསྒྲལ་དང་མ་གྲོལ་དགྲོལ། །དབུགས་དབྱུང་མྱ་ངན་འདས་ལ་འགོད། །ཅེས་ལན་གསུམ་བརྗོད་ནས། དགེ་བ་སེམས་ཅན་གྱི་དོན་དུ་བསྔོས་ལ། དགའ་བ་རྒྱ་ཆེན་པོ་བསྒོམ་མོ། །དེས་ནི་ཐེག་པ་ཆེན་པོར་འགྱུར་ཞིང་ཐབས་སྙིང་རྗེ་ཆེན་པོས་ཟིན་པས་ཤེས་རབ་མཐའ་གཉིས་ལ་མི་གནས་པ་རྒྱུད་ལ་སྐྱེ་བའི་དགོས་པ་ཡོད་དོ། །

ལྔ་པ་སེམས་ཉིད་དོན་གྱི་རྣལ་འབྱོར་ནི། རྟོག་པ་སྣ་ཚོགས་འཆར་བའི་འདི་དག་དང་པོ་གང་ནས་བྱུང་། བར་དུ་གང་དུ་འགྲོ་ཞིང་གནས། ཐ་མ་གར་སོང་ཡོད་མེད། དབྱིབས་དང་ཁ་དོག་ལ་སོགས་པ་ཅིར་འདུག །ཕྱི་ནང་བར་གསུམ་གང་ན་འདུག་སྙམ་དུ་བརྟགས་པས། སེམས་ཉིད་དུས་གསུམ་རྩ་བ་དང་བྲལ་བའི་ངོ་བོ་ངོས་བཟུང་ཐམས་ཅད་ལས་འདས་པ་གསལ་སྟོང་རྗེན་པའི་ཡེ་ཤེས་རྟོགས་པའི་དགོས་པ་ཡོད་དོ། །

གཉིས་པ་དངོས་གཞི་ངོ་སྤྲད་པ་ནི། ལུས་ཆོས་བདུན་ལྡན་པས་ཁྱད་པར་དུ་མིག་བར་སྣང་ལ་ཧ་རེ་གཏད་ནས་མི་འགུལ་བར་བྱེད་དུ་བཅུག་པའི་རྗེས་ལ། ཀྱེ་རིགས་ཀྱི་བུ་རྣམས་ཉོན་ཅིག །ཕྱི་སྣ་ཚོགས་སུ་སྣང་བ་ཐམས་ཅད་མདང་སུམ་གྱི་རྨི་ལམ་ལྟར། ནང་རང་གི་སེམས་ཀྱི་ཆོ་འཕྲུལ་ཡིན་པས་བཅོས་བསྒྱུར་དང་སྤང་གཉེན་མ་བྱེད། སེམས་འདིའང་བརྟགས་ན་གང་ནའང་མེད་ཅིང་མ་གྲུབ་པས་ཆོས་སྐུ་སྤྲོས་པ་དང་བྲལ་བ་ཡིན་ཞིང་། གསལ་ལ་རང་ངོས་སྟོང་པས་ལོངས་སྐུ་ལྷུན་གྱིས་གྲུབ་ཅིང་། སྣ་ཚོགས་སུ་ཤར་དུས་གང་དུའང་མ་གྲུབ་པས་ཤར་གྲོལ་སྤྲུལ་པའི་སྐུ་ཡིན་ཏེ། སློབ་དཔོན་གྱི་ཞལ་ནས། ད་ལྟའི་ཤེས་པ་སོ་མ་ལ། །ངོ་བོ་སྟོང་པས་ཆོས་ཀྱི་སྐུ། །རང་བཞིན་གསལ་བས་ལོངས་སྤྱོད་རྫོགས། །འཆར་ཚུལ་སྣ་ཚོགས་སྤྲུལ་པའི་སྐུ། །སངས་རྒྱས་གཞན་དུ་བཙལ་དུ་མེད། །སྒོམ་ཡང་མ་སྒོམས་སོ་མར་ཞོག །ལྟ་ཡང་མ་བལྟ་སོ་མར་ཞོག །འཛིན་ཡང་མ་འཛིན་སོ་མར་ཞོག །སྤྲོ་ཡང་མ་སྤྲོ་སོ་མར་ཞོག །བསྡུ་ཡང་མ་བསྡུ་སོ་མར་ཞོག །ཡེངས་ཀྱང་མ་ཡེངས་སོ་མར་ཞོག །གང་ཤར་རང་བཞག་སོ་མ་ལ། །ངང་དྭངས་རྒྱ་མཚོ་དྭངས་པ་འདྲ། །བདེ་གསལ་མི་རྟོག་ལྷུན་གྱིས་གྲུབ། །ཅེས་གསུངས་པས། རྟོག་པ་གང་ཤར་འགྱུ་དྲན་སོ་མ་ད་ལྟའི་ཤེས་པ་ཐོལ་སྐྱེས་འདིའི་སྟེང་དུ་སོ་མར་ཀློད་ལ། དྲན་བསམ་སྔ་ཕྱིའི་སྐྱེལ་བསུ་མ་བྱེད་པར་རང་བབ་ལྷུན་གྲུབ་ཆེན་པོར་ཞོག་དང་། འགྱུ་བ་དང་གྲོལ་བ་དུས་མཉམ་པས་ལྷག་མཐོང་ཤར་གྲོལ་གྱི་ལྟ་བ་རྒྱ་ཡན་ཆེན་པོ་ཡིན། དེའི་རྗེས་ལ་ང་བདག་དང་གཟུང་འཛིན་བྲལ་བའི་ཡེ་ཤེས་སྒོམ་པ་བདེ་གསལ་མི་རྟོག་པའི་ཉམས་དང་བཅས་པ་འཆར་བ་ནི་རང་བཞག་འོད་གསལ་ཆེན་པོའི་སྒོམ་པ་ཡིན། ཡང་སྔར་བཞིན་འགྱུས་ཀྱང་དེ་ལ་ཞེན་པའི་རྩིས་གདབ་མེད་པར་གློད་པས་ངང་དྭངས་ལྷུན་གྲུབ་(༦༧)ཆེན་པོའི་སྒོམ་པ་ལ་སྔར་བཞིན་གནས་པས་བདེ་གསལ་རྣམ་པར་མི་རྟོག་པའི་ཉམས་དང་རྟོགས་པ་གོང་མ་རྒྱུད་ལ་སྐྱེའོ། །དེ་དག་ཀྱང་བསྡུ་ན་སྣང་བ་སེམས་སུ་ངོ་སྤྲད། སེམས་ཉིད་སྟོང་པར་ངོ་སྤྲད། སྟོང་པ་ཤར་གྲོལ་དུ་ངོ་སྤྲད་པས་ལྟ་བ་ཡན་ཐུབ་པ་ཡིན་ནོ། །ཆོས་ཉིད་ངང་དྭངས་སུ་ངོ་སྤྲད། ངང་དྭངས་བདེ་གསལ་དུ་ངོ་སྤྲད། བདེ་གསལ་སྟོང་པར་ངོ་སྤྲད་པས་སྒོམ་པས་ཡེངས་ཐུབ་པ་ཡིན་ནོ། །སྣང་སེམས་སྒྱུ་མར་ངོ་སྤྲད། སྒྱུ་མ་འཛིན་མེད་དུ་ངོ་སྤྲད། འཛིན་མེད་ཕྱོགས་ཡན་དུ་ངོ་སྤྲད་པས་སྤྱོད་པས་རྐྱེན་ཐུབ་པ་ཡིན། རང་སེམས་སངས་རྒྱས་སུ་ངོ་སྤྲད། སངས་རྒྱས་རང་ཆས་སུ་ངོ་སྤྲད། རང་ཆས་ཤར་གྲོལ་དུ་ངོ་སྤྲད་པས་འབྲས་བུས་གོལ་ས་ཐུབ་པ་ཡིན་ནོ། །མདོར་དྲིལ་ན་ཡུལ་ཇི་ལྟར་སྣང་ཡང་སེམས་ཀྱིས་དེ་ལྟར་མ་འཛིན། ད་ལྟར་གྱི་ཤེས་པ་ཤར་གནས་གང་ཡིན་གྱི་སྟེང་དུ་བཅས་བཅོས་དང་སྤང་གཉེན་མེད་པར་ཞོག་དང་། གང་སྣང་ཆོས་ཉིད་ཀྱི་ཡོ་ལང་དུ་འགྱུར་རོ། །

གསུམ་པ་རྗེས་སྐྱོང་ཐབས་བསྟན་པ་ལ། སྣང་སེམས་རྨི་ལམ་དུ་ངོ་སྤྲད་པ། རྨི་ལམ་འོད་གསལ་དུ་ངོ་སྤྲད་པ། འོད་གསལ་བར་དོར་ངོ་སྤྲད་པ་གསུམ་ལས། དང་པོ་ནི། འདི་ལྟར་ཕྱི་སྣང་བའི་ཡུལ་གྱི་གཟུགས་སྒྲ་དྲི་རོ་རེག་བྱ། ནང་འཛིན་པའི་ཡིད་ཀྱི་རྟོག་པ་སྣ་ཚོགས་པ་ཐམས་ཅད་མདང་གི་རྨི་ལམ་ནང་གི་ཕྱི་སྣང་བ་ནང་རིག་པ་སྣ་ཚོགས་སུ་སྣང་ཞིང་རྟོགས་པ་དང་ཁྱད་པར་མེད་པས་ཅིར་སྣང་བདེན་མེད་དུ་ཤེས་ནས་གང་ལ་ཡང་འཛིན་པ་མེད་པའི་ངང་ནས་འགྲོ་འདུག་ལ་སོགས་པའི་བྱ་བ་རྣམས་བྱའོ། །དེ་ལྟར་སྤྱད་པས་ཆོས་ཐམས་ཅད་རྨི་ལམ་ལྟ་བུའི་ངོ་བོ་ཉིད་དུ་མཐོང་ནས་གང་ལའང་ཞེན་པ་མེད་པས་རང་བཞིན་གཉིས་སུ་མེད་པའི་འོད་གསལ་འཆར་བར་འགྱུར་རོ། །དེ་ཡང་ཡུལ་དུ་སྣང་ཡང་དེར་འཛིན་མེད་པས་ཤེས་པ་གསལ་ལ་དྭངས་པ་སྟོང་གསལ་རྣམ་པར་མི་རྟོག་པ་ནི་རང་བཞིན་གྱི་འོད་གསལ་ཏེ། དེ་ཉིད་རང་ངོ་ཤེས་པས་བར་དོར་གྲོལ་བ་ཐོབ་པ་ཡིན་ནོ། །

གཉིས་པ་རྨི་ལམ་འོད་གསལ་དུ་ངོ་སྤྲད་པ་ནི། གཉིད་དང་རྨི་ལམ་གྱི་མཚམས་ན་ཤེས་པ་གསལ་ལ་མི་རྟོག་པ་ཕྱི་ཚོགས་དྲུག་ཡུལ་གྱི་རྟོག་པ་རགས་པ་ནི་འགག །ནང་འཇུག་པ་གཉིད་དུ་ཐིམ་པ་ལྟ་བུ་ཕྲ་བ་ནི་མ་ཤར་བའི་བར་དེ་ན་རང་བཞིན་གྱི་འོད་གསལ་འཆར་ཏེ། དེ་ཉིད་ངོས་བཟུང་ལ་མ་ཡེངས་པར་བསྒོམ་མོ། །དེ་ལྟར་ཟླ་བ་ཕྱེད་དུ་བསྒོམས་པས། དང་པོ་རྨི་ལམ་ངན་པ་ལས་བཟང་པོར་འགྱུར་བ་དང་། བར་དུ་ཟིན་ནས་སྤེལ་སྤྱོང་དང་སྤྲུལ་བསྒྱུར་ནུས་པ་དང་། ཐ་མར་དབྱིངས་སུ་ནུབ་སྟེ་མི་རྨི་པར་འོད་གསལ་ཉིད་དུ་འཇུག་གོ། །གལ་ཏེ་མ་ཟིན་ན་སྙིང་གར་ཐིག་ལེ་ཁ་དོག་ལྔའི་རང་བཞིན་འོད་དུ་འབར་བ་འཇའ་ཚོན་ལྟ་བུ་ལ་སེམས་གཏད་པས་ཟིན་པར་འགྱུར་རོ། །དེས་ནི་ཉིན་མཚན་གཉིས་ཀ་འོད་གསལ་གྱི་འཁོར་ལོར་འཁྱིལ་(༦༨)བས་རབ་ཚེ་འདིར་གྲོལ་ཞིང་། འབྲིང་བར་དོ་འོད་གསལ་རང་ངོ་ཤེས་ཏེ་མངོན་པར་རྫོགས་པར་སངས་རྒྱའོ། །

གསུམ་པ་འོད་གསལ་བར་དོར་ངོ་སྤྲད་པ་ནི། སྐྱེ་ཤི་བར་དོའི་སྐབས་སུ་ལྟ་བ་སྟོང་གསལ་འགྱུར་བ་མེད་པ། །སྒོམ་པ་ངང་དྭངས་འོད་གསལ་བ། སྤྱོད་པ་ཚོགས་དྲུག་ལྷུག་པ། འབྲས་བུ་རང་གྲོལ་འཛིན་མེད་དུ་རྟོགས་ནས། རང་བཞིན་གྱི་འོད་གསལ་ལ་གོམས་འདྲིས་ཡོད་པའི་འཆི་ཁའི་བར་དོར་གསལ་ཐེབས་ཏེ། ཆོས་ཉིད་ཀྱི་བར་དོར་རང་ངོ་ཤེས་པས། སྲིད་པའི་བར་དོ་མི་མཐོང་བར་སངས་རྒྱའོ། །

དོན་གཉིས་པ་བར་དོར་གྲོལ་བ་འོད་གསལ་གྱི་གདམས་པ་ལ། ད་ལྟ་སྐྱེ་ཤིའི་བར་དོ་ཤར་བའི་དུས་འདིར་ངོ་སྤྲད་པའི་དོན་ལ་འདྲིས་པར་བྱའོ། །དེ་ཡང་ད་ལྟ་ལྟ་བས་ལ་བཟླ། སྒོམ་པས་གོམས་པར་བྱས། སྤྱོད་པས་ཐག་བཅད། འབྲས་བུ་རང་ངོ་ཤེས་པས་དོན་འདྲིས་པར་བྱས་པའི་རྣལ་འབྱོར་པ་དེ་ཉིད་འཆི་ཁའི་ཚེ་ཕྱི་ནང་གི་དངོས་པོ་ཐམས་ཅད་ལ་མ་ཞེན་པར་སྤོང་དག་བྱས་ལ། གདམས་པ་རྣམས་གསལ་གདབ་ཅིང་ད་ལྟའི་དགེ་སྦྱོར་ལས་མ་ཡེངས་པར་བྱའོ། །དེའང་ས་ཆུ་ལ་ཐིམ་པས་ལུས་ལྕི། ཆུ་མེ་ལ་ཐིམ་པས་རྩ་ཁམས་ཀྱི་ཁྲག་དང་ཐིག་ལེ་དྭངས་མར་རིམ་གྱིས་འདུ། མེ་རླུང་ལ་ཐིམ་པས་དྲོད་འཆོར། རླུང་རྣམ་པར་ཤེས་པ་ལ་ཐིམ་པས་ཕྱི་ནང་གི་དབུགས་ཆད། རྣམ་ཤེས་ནམ་མཁར་ཐིམ་པས་ཕྲ་རགས་ཀྱི་རྟོགས་པ་འགགས་ཏེ། འོད་གསལ་བའི་ཡེ་ཤེས་སྐད་ཅིག་མ་བཞིར་འཆར་རོ། །དེའང་སྐད་ཅིག་དང་པོར་བདེ་གསལ་རྣམ་པར་མི་རྟོག་པའི་ཡེ་ཤེས་སྣང་བ་ཞེས་བྱ་བ་སྔོན་གོམས་པའི་འོད་གསལ་ལས་ཆེས་ལྷག་པ་སྐད་ཅིག་མ་གཅིག་ཏུ་འཆར་རོ། །དེ་ནས་མཆེད་པའི་ཡེ་ཤེས་དེ་བས་ཀྱང་ཆེས་ལྷག་པ་སྐད་ཅིག་མ་གཉིས་སུ་འཆར་རོ། །དེ་ནས་ཐོབ་པའི་ཡེ་ཤེས་དེ་བས་ཀྱང་ཆེས་ལྷག་པ་སྐད་ཅིག་མ་གསུམ་འཆར་རོ། །དེ་ནས་ཉེ་བར་ཐོབ་པའི་ཡེ་ཤེས་དེ་ཐམས་ཅད་ལས་ཆེས་ལྷག་པ་སྐད་ཅིག་མ་བཞི་འཆར་རོ། །དེ་དག་གི་སྐབས་སུ་སྐད་ཅིག་དང་པོར་སྔར་ཤར་གྲོལ་ལ་སྦྱངས་པའི་རྟོགས་པ་རང་ངོ་ཤེས་ནས། ངང་དྭངས་འོད་གསལ་བའི་ངང་ལ་འཛིན་པ་མེད་པར་བཞག་པས་དེ་ཉིད་དུ་རང་སར་གྲོལ་ནས། ཆོས་སྐུ་ལྷུན་གྲུབ་ཆེན་པོའི་ངང་ལ་བཙན་ས་ཟིན་པ་ཡིན་ནོ། །དེ་ནི་སྟོང་པའི་འོད་གསལ་ལོ། །དེ་ནས་སྣང་བའི་འོད་གསལ་ཁ་དོག་ལྔ་ལྡན་གྱི་སྣང་བ་མཆེད་པས་ཕྱོགས་མཐའ་གཏུགས་པར་སངས་རྒྱས་ཀྱི་སྐུ་འབུམ་ཕྲག་གྲངས་མེད་པ་འཆར་རོ། །དེའི་ཚེ་རང་སྣང་རྨི་ལམ་དང་འདྲ་བར་ཤེས་ནས་དེར་གསལ་ལ་དེར་འཛིན་མེད་པར་བཞག་པས་དེ་ཉིད་དུ་རང་ངོ་ཤེས་ནས་གྲོལ་བར་འགྱུར་རོ། །དེ་ནས་རང་ངོ་མ་ཤེས་ན་སྣང་བའི་འོད་གསལ་དབྱིངས་སུ་ཐིམ་ནས་ཆོས་ཉིད་ཀྱི་བར་དོ་རང་ལོག་སྟེ་སྲིད་པའི་བར་དོ་སྣང་བར་འགྱུར་རོ། །དེ་ཡང་སྔར་ཐིམ་པ་ལ་དབྱིངས་ནས་སླར་མཆེད་པར་འགྱུར་ཏེ། (༦༩)བེམས་རིག་སོ་སོར་བྲལ་བས་ནུབ་དང་པོ་ཤི་བའི་སྲིད་པ་དང་། ནུབ་གཉིས་པར་སའི་སྲིད་པ་དང་། གསུམ་པར་ཆུ། བཞི་པར་མེ། ལྔ་པར་རླུང་། དྲུག་པར་ནམ་མཁའ། བདུན་པར་བག་ཆགས་ལས་ཀྱི་སྲིད་པ་དང་བདུན་ལས། དང་པོ་ནི། དར་ཅིག་བརྒྱལ་བ་ལྟར་གནས་སོ། །

གཉིས་པ་ནི། དེ་ལས་ཅུང་ཞིག་སངས་ནས་རང་སྣང་ཡིད་ཀྱི་སྣང་བ་རྨི་ལམ་ལྟ་བུར་ལུས་ཀྱང་སྲ་འཐས་སེ་འདུག་པ་སྙམ་བྱེད། ཕྱི་སྣང་བ་ཡང་སྨིག་རྒྱུའི་རྣམ་པ་ལྟར་རབ་རིབ་ཡད་ཡུད་འབྱུང་ངོ་། །ཤེས་པ་དེ་རང་བྱུང་གི་འོད་གསལ་ཏེ་སྔར་གཟུགས་རང་གྲོལ་དུ་ཤེས་པའི་གདམས་པ་དྲན་པས་གྲོལ་ལོ། །

གསུམ་པ་ནི། སྔར་བས་ཀྱང་ཅུང་ཟད་སངས་ནས་ལུས་ཀྱང་ཆུས་བང་བ་སྙམ་བྱེད། ཕྱི་སྣང་བ་ཡང་དུ་བའི་རྣམ་པ་ལྟ་བུ་བན་བུན་ལང་ལང་ཙམ་དུ་འབྱུང་ངོ་། །དེ་ཡང་རང་བྱུང་གི་འོད་གསལ་ཏེ། སྔར་ཤར་གྲོལ་གསལ་སྟོང་གི་ཉམས་མྱོང་དང་འདྲེས་ནས་གྲོལ་ལོ། །

བཞི་པ་ནི། སྔར་བས་ཀྱང་ཅུང་ཟད་སངས་ནས་ལུས་ཀྱང་མེས་བསྲེག་པ་སྙམ་བྱེད། ཕྱི་སྣང་བ་ཡང་སྲིན་བུ་མེ་ཁྱེར་ཙམ་དུ་འབྱུང་སྟེ། དེ་ཡང་རང་བྱུང་གི་འོད་གསལ་ཏེ་སྔར་ངང་དྭངས་བདེ་གསལ་གྱི་རྟོགས་པ་དང་འདྲེས་ནས་གྲོལ་ལོ། །

ལྔ་པ་ནི། ལུས་ཀྱང་རླུང་གིས་བསྐྱོད་པ་སྙམ་བྱེད། ཕྱི་སྣང་བ་ཡང་སྒྲོན་མེ་འབར་བ་ལྟར་མཐོང་སྟེ། དེ་ཡང་རང་བྱུང་གི་འོད་གསལ་ཏེ། སྔར་ཁ་དོག་གི་འོད་གསལ་གསལ་སྟོང་འཛིན་མེད་ཀྱི་རྟོགས་པ་འདྲེས་ནས་གྲོལ་ལོ། །

དྲུག་པ་ནི། ལུས་ཀྱང་ནམ་མཁའ་ལྟ་བུའི་རྣམ་པ་སྟེ། ཕྱི་སྣང་བ་ཡང་སྤྲིན་མེད་ནམ་མཁའ་ལྟ་བུ་ནི་རང་བྱུང་གི་འོད་གསལ་ཏེ། སྔར་སྟོང་གསལ་མི་རྟོག་པའི་འོད་གསལ་གྱི་ཉམས་མྱོང་དང་འདྲེས་ནས་གྲོལ་ལོ། །ཕྱི་རྟགས་ལྔ་པོ་ནི་འབྱུང་བ་ལྔ་ཡི་རླུང་ལྔ་མཆེད་པའི་སྣང་བ་ཡིན་ནོ། །ནང་རྟགས་རྣམས་ནི་འཆར་ཚུལ་རྐྱེན་གྱིས་གཟུགས་བརྙན་སྣང་བའོ། །གསང་རྟགས་འོད་གསལ་སྤྲོས་པ་མེད་པ་ནི་སེམས་ཉིད་ལྷུན་གྲུབ་གཞིའི་སངས་རྒྱས་རང་ལུགས་སུ་ཤར་བ་དངོས་ཡིན་ནོ། །དེ་ནས་ནུབ་བདུན་པ་ནི། སྔོན་བས་ཤིན་ཏུ་དྭངས་པའི་ཤེས་པ་མེ་ལོང་ལྟ་བུ་ལ་བག་ཆགས་ལས་ཀྱི་གཟུགས་བརྙན་སྣང་བར་འགྱུར་ཏེ། བདེ་སྡུག་ལ་སོགས་པའི་སྣང་བ་རྨི་ལམ་བཞིན་དུ་གསལ་བས་ལས་ཀྱི་མེ་ལོང་མཐོང་བ་ཞེས་བྱའོ། །དེའི་དུས་སུ་སྔར་འོད་གསལ་སྣང་སྟོང་ཟུང་འཇུག་སྤྲོས་པའི་མཐའ་བྲལ་དང་བསྐྱེད་རྫོགས་སྒོམ་པའི་ཉམས་མྱོང་དྲན་པ་ཙམ་གྱིས་ལས་ཀྱི་སྣང་བ་དང་འདྲེས་པར་འགྱུར་ཏེ། ཟླ་བ་འཆར་བ་དང་དབང་པོའི་གཞུ་ལྟར་རང་ཉིད་ཇི་ལྟར་བསྒོམས་པའི་ཡི་དམ་གྱི་ལྷར་སྣང་བ་སྒྱུ་མ་ལྟ་བུའི་ངང་ནས། སྒྲ་ཐོས་པ་ཐམས་ཅད་བྲག་ཅ་ལྟ་བུ་དང་། རྣམ་རྟོག་སྐྱེས་པ་ཐམས་ཅད་རྨི་ལམ་ལྟར་ཤེས་ཏེ། བདེ་གསལ་མི་རྟོག་པའི་ཡེ་ཤེས་སུ་རྟོགས་ནས་སངས་རྒྱའོ། །

དེ་དག་གི་སྐབས་སུ་གྲོལ་བྱེད་ཀྱི་ཐབས་གཉིས་ཏེ། གཞན་སྟོབས་ཀྱིས་གྲོལ་བ་དང་། རང་སྟོབས་ཀྱིས་གྲོལ་བའོ། །

དང་པོ་ནི། སློབ་དཔོན་ཆེན་པོ་པདྨ་འབྱུང་གནས་ལ་སོགས་པའི་ཐུགས་རྗེས་གྲོལ་བ་ནི་ཉི་མས་(༧༠)པདྨོ་ཕྱེ་བ་ལྟ་བུ་སྟེ། སྔར་བླ་མ་དང་ཡི་དམ་གྱི་ལྷ་གང་མོས་ལ་གསོལ་བ་བཏབ་པས་དེ་ཉིད་དྲན་པ་ཙམ་གྱིས་དུས་དེར་ལྷའི་སྤྱན་གྱིས་གཟིགས་ཏེ། དེའི་ཐུགས་རྗེས་བདག་ཉིད་གྲོལ་བའོ། །

གཉིས་པ་ལ་ལྟ་བ་རྟོགས་པའི་སྟོབས་ཀྱིས་གྲོལ་བ། སྒོམ་པ་གོམས་པའི་སྟོབས་ཀྱིས་གྲོལ་བ། སྤྱོད་པ་ཤེས་པའི་སྟོབས་ཀྱིས་གྲོལ་བ། འབྲས་བུ་ཤར་བའི་སྟོབས་ཀྱིས་གྲོལ་བ་དང་བཞི་ལས། དང་པོ་ནི། སྔར་སྐྱེ་ཤི་བར་དོའི་སྐབས་སུ་སྣང་སེམས་སྟོང་པའི་རང་བཞིན་དུ་ཤེས་པ་དུས་དེར་དེ་ཉིད་དྲན་པ་ཙམ་གྱིས་གྲོལ་བར་འགྱུར་རོ། །

གཉིས་པ་ནི། སྔར་ངང་དྭངས་འོད་གསལ་བའི་སྒོམ་པ་བདེ་གསལ་རྣམ་པ་མི་རྟོག་པའི་ཡེ་ཤེས་ལ་གོམས་པ་ཉིད་དུས་དེར་ཤར་བའི་རིག་པ་དང་འདྲེས་པ་ཙམ་གྱིས་གྲོལ་ལོ། །

གསུམ་པ་ནི། སྔར་གང་ཤར་སྒྱུ་མའི་ཚུལ་གྱིས་བླང་དོར་མེད་པར་སྤྱད་པས་ཀུན་ཏུ་བཟང་པོའི་སྤྱོད་པ་ལ་རྩལ་སྦྱངས་པ་དུས་དེར་དྲན་པ་ཙམ་གྱིས་བར་དོའི་རང་སྣང་ཐམས་ཅད་རྨི་ལམ་སྒྱུ་མའི་ཚུལ་གྱིས་བདེན་མེད་དུ་ཤེས་ཏེ། བླང་དོར་གཉིས་སུ་མེད་པར་རྟོགས་ནས་མངོན་པར་སངས་རྒྱའོ། །

བཞི་པ་ནི། སྔར་རིག་པ་རང་གྲོལ་ལྷུན་གྲུབ་ཆེན་པོར་ཐག་ཆོད་པས་བཅོས་བསྒྱུར་དང་སྤང་གཉེན་ཞིག་སྟེ། གཞི་རྫོགས་པ་ཆེན་པོའི་ངང་དུ་ལ་བཟླས་ཏེ་གདོད་མའི་ཟད་སར་ཤེས་པའི་དོན་དེ་དུས་དེར་དྲན་པ་ཙམ་གྱིས་གདོད་མའི་གཞི་ཐོག་ཏུ་སྐད་ཅིག་ལ་གྲོལ་ནས་མངོན་པར་བྱང་ཆུབ་པ་ཡིན་ནོ། །དེ་ལྟར་རང་སྣང་གི་ཞག་བདུན་པོ་དེ་ནི་སྲིད་པ་རྣམ་པ་བདུན་ཏེ། མདོ་ལས། སྲིད་པ་བདུན་པོ་དག་ལས་ཤིན་ཏུ་འདས་པ་ཞེས་པ་དང་། རྒྱུད་ལས། སྲིད་པ་བདུན་ནི་རྣམ་འཆང་བ། །ཞེས་པའི་དོན་ཏེ། དེ་ཡང་ད་ལྟ་གོམས་འདྲིས་རབ་དང་ལྡན་པ་དེར་གྲོལ་གྱི་གཞན་ནི་མ་ཡིན་ནོ། །ད་ལྟ་ལེགས་པར་གོམས་པ་དག་དེར་གྲོལ་བ་ཤིན་ཏུ་སླ་སྟེ། དཔེར་ན་ཉིན་པར་གོམས་པའི་དབང་གིས་རྨི་ལམ་ཟིན་པ་ན་མཚན་མོ་འཇིགས་སྐྲག་སྣ་ཚོགས་སུ་རྨིས་པ་རྨི་ལམ་དུ་ཤེས་པ་ཙམ་གྱིས་སྐད་ཅིག་ལ་གྲོལ་བ་བཞིན་ནོ། །དེ་ཡང་ད་ལྟའི་ཤེས་པ་བདུན་འགྱུར་བས་རྨི་ལམ་གསལ་ཏེ་ཤེས་པ་རགས་པ་འགགས་ནས་ཀུན་གཞི་ལས་ཡེ་ཤེས་ལངས་པས་མེ་ལོང་ལ་གཟུགས་བརྙན་སྣང་བ་བཞིན་ནོ། །རྨི་ལམ་བདུན་འགྱུར་བས་བར་དོར་གསལ་ཏེ་བེམས་རིག་བྲལ་བས་གདོས་བཅས་སྒྱུ་ལུས་ཀྱི་འཆིང་བྱེད་ནི་མེད། ཀུན་གཞི་ལས་དེ་ཡེ་ཤེས་པ་མཆེད་དེ་རང་སྣང་སྣ་ཚོགས་ཀྱི་ཡུལ་སྣང་ལ་སྔར་གྱི་བག་ཆགས་སྤྱོད་པའི་ཕྱིར་རོ། །དེ་ཡང་སྲིད་པར་འཇུག་པ་ནི་མ་རིག་པ་དང་ཆགས་སྡང་གིས་འདྲེས་ལ། །དུས་དེར་ཆོས་གང་ལའང་ཆགས་སྡང་མེད་པས་རང་སེམས་རྩ་བྲལ་དུ་ཤེས་ཤིང་། དེའི་དབང་གིས་རང་སེམས་གྲོལ་ཏེ་འཁོར་བར་མི་འཇུག་པ་ཡིན་ནོ། །དེའང་གཞིའི་གནས་ལུགས་སམ་ཟད་སའམ་ཡེ་གདོད་མའི་གནས་ལུགས་སམ་སེམས་ཉིད་འོད་གསལ་བའི་དབྱིངས་རང་བཞིན་གྱིས་རྣམ་པར་དག་པ་ནི་ད་ལྟའི་ཤེས་པ་བཅོས་བསླད་མེད་པ་(༧༡)འདི་ཁོ་ན་ཡིན་པས་རང་ངོ་གང་ཤེས་སུ་གཞི་ཐོག་ཀུན་ཏུ་བཟང་པོའི་སར་གྲོལ་བ་ཞེས་བྱའོ། །གཞན་ཡང་འགྲོ་དྲུག་གི་སྣང་བ་བདེན་མེད་དང་། བསྐྱེད་རིམ་གྱིས་འགོག་པ་དང་། ལྷ་མིའི་མངལ་གནས་འདམ་པ་དང་། ཞིང་ཁམས་དག་པ་ཡིད་ལ་བྱ་བ་རྣམས་ནི་ཞར་ལ་འོངས་པའི་མན་ངག་དམ་པའོ། །དེ་དག་གིས་བར་དོར་གྲོལ་བ་འོད་གསལ་གྱི་གདམས་པ་བཤད་ཟིན་ཏོ། །

དོན་གསུམ་པ་ཕྱི་མར་གྲོལ་བ་འཕོ་བའི་གདམས་པ་ནི། རང་ཉིད་ཡི་དམ་གྱི་ལྷ་གང་ཡང་རུང་བར་བསམ་པའི་སྙིང་ག་ནས་རང་གི་སེམས་ཚོན་སྣ་ལྔའི་གྲུ་གུ་རྡོག་པ་ལྟ་བུ་བསམས་ཏེ། ཧིཀ་ཉི་ཤུ་རྩ་གཅིག་གིས་སྤྱི་བོ་ཚངས་པའི་བུ་ག་ནས་འོག་མིན་ལ་སོགས་པ་རིགས་ལྔའི་ཞིང་ཁམས་དག་པར་རྣམ་སྣང་ལ་སོགས་པའི་ཐུགས་ཀར་འཕངས་པས་སངས་རྒྱས་ཀྱི་ཐུགས་དང་འདྲེས་ཏེ་ཕྱིར་མི་ལྡོག་པར་མོས་པ་བྱ་ཞིང་། ཞག་གསུམ་དུ་སྦྱངས་པས་སྤྱི་བོར་བུག་པ་དོད་པ་དང་བཞག་ལ། ཟླ་བ་རེ་ལ་ལན་རེ་སྦྱང་ཞིང་། འཇའ་ཚོན་གྱི་རིག་པ་ཞིང་དེར་འཕོ་བ་ཡིད་ཀྱིས་ཞག་རེ་བཞིན་བྱ་ཡི་ངག་གི་ཧིཀ་མི་བརྗོད་དོ། །དེ་ལྟར་གོམས་ན་ཕྱི་མ་ལ་སངས་རྒྱས་ཀྱི་ཞིང་ཁམས་དག་པར་སྐྱེས་ནས་མངོན་པར་རྫོགས་པར་སངས་རྒྱས་ཐོབ་བོ། །

དེ་ལྟར་ལེགས་བཤད་སྤྲིན་གྱི་རྔ་བོ་ཆེས། །འགྲོ་ཀུན་མི་ཤེས་གཉིད་མྱོས་རབ་སད་དེ། །སྤངས་དང་རྟོགས་པའི་ཡོན་ཏན་མཐར་ཕྱིན་ནས། །སྐུ་གསུམ་ལྷུན་གྲུབ་ཆོས་ཀྱི་རྒྱལ་པོར་ཤོག །ཚུལ་འདི་གངས་རི་ཐོད་དཀར་སྙིང་པོའི་མགུལ། །ཨོ་རྒྱན་རྫོང་ཞེས་བྱ་བའི་གནས་མཆོག་ཏུ། །དྲི་མེད་འོད་ཟེར་བདག་གིས་ལེགས་པར་བཀོད། །དད་ལྡན་སྐྱེ་བོའི་ཚོགས་རྣམས་དགའ་བར་མཛོད། །རྫོགས་པ་ཆེན་པོ་མཉམ་ཉིད་རང་གྲོལ་གྱི་དོན་ཁྲིད་རིན་ཆེན་སྙིང་པོ་ཞེས་བྱ་བ། དཔལ་ཨོ་རྒྱན་གྱི་སློབ་དཔོན་ཆེན་པོ་ཤཱཀྱ་སེང་གེས་བྱིན་གྱིས་བརླབས་པའི་རྣལ་འབྱོར་པ་དྲི་མེད་འོད་ཟེར་གྱིས་བཀོད་པ་རྫོགས་སོ། །དཔལ་སྔགས་ཀྱི་བདག་མོ་སྲོག་སྒྲུབ་མ་དང་། བཤན་པ་དམར་ནག་དང་། རྡོ་རྗེ་ལེགས་པས་བཀའ་འདི་སྲུངས་ཤིག །ལས་ཅན་ལ་གཏོད་ཅིག །ལས་མེད་ཀྱི་ལག་ཏུ་འགྲིམ་ན་ཆད་པ་དྲག་པོ་ཆོད་ཅིག །ས་མ་ཡ། རྒྱ་རྒྱ་རྒྱ། དགེའོ།། །།

བྱང་ཆུབ་ཀྱི་སེམས་ཀུན་བྱེད་རྒྱལ་པོའི་དོན་ཁྲིད་རིན་ཆེན་གྲུ་བོ་ཞེས་བྱ་བ།

༄༅། །བྱང་ཆུབ་ཀྱི་སེམས་ཀུན་བྱེད་རྒྱལ་པོའི་དོན་ཁྲིད་རིན་ཆེན་གྲུ་བོ་ཞེས་བྱ་བ་བཞུགས་སོ། །

༄༅། །གདོད་ནས་རབ་ཞི་མཁའ་ལྟར་འདུས་མ་བྱས། །དབྱིངས་དང་ཡེ་ཤེས་གཉིས་མེད་ཆོས་ཀྱི་སྐུ། །ཡོད་མེད་ཕྱོགས་བྲལ་རྒྱ་ཆད་འཕོ་འགྱུར་མེད། །ཐོག་མའི་མགོན་པོ་ཀུན་བྱེད་ཁྱེད་ལ་འདུད། །ཆོས་ཀུན་སྙིང་པོ་སེམས་ཉིད་མངོན་སུམ་ལམ། །མ་བགྲོད་མ་སྦྱངས་ད་ལྟ་མངོན་སངས་རྒྱས། །ལྷུན་རྫོགས་ཀུན་བྱེད་ཐེག་པའི་ཡང་རྩེའི་དོན། །ཁྲིད་དུ་བསྡེབས་ཏེ་ཕྱི་རབས་དོན་ཕྱིར་བཤད། །

དེ་ལ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེ་བ་དེས་ཆོས་ཀྱི་སྒོ་དང་ཐེག་པའི་རྣམ་གྲངས་དཔག་ཏུ་མེད་པ་ཞིག་གསུངས་ཀྱང་། གདུལ་བྱའི་(༧༢)དབང་པོ་དང་བསྟུན་ནས་ཕལ་ཆེར་དྲང་བའི་དོན་དུ་བསྟན་པ་ཙམ་ལས། ངེས་པའི་དོན་ཕྱོགས་གཅིག་ཏུ་གསུངས་པ་ནི་མེད་དེ། རྩ་བའི་རྒྱུད་ལེའུ་སུམ་ཅུ་རྩ་གསུམ་པ་ལས། སྐུ་གསུམ་སྟོན་པས་སོ་སོར་བསྟན་པ་ལས། །དེ་བཞིན་ཉིད་འབྱུང་དེ་ཡི་ལུང་བསྟན་ཡིན། །ཞེས་པ་དང་། ཕྱི་མའི་རྒྱུད་ལེའུ་དྲུག་ཅུ་རྩ་བཞི་པ་ལས་ཀྱང་། འཁོར་གྱི་དང་པོ་སྟོན་པ་སྐུ་གསུམ་གྱིས། །རང་རང་དགའ་བའི་ལམ་ལ་གཟུང་བའི་ཕྱིར། །ལམ་གྱི་ཁྱད་པར་བགྲོད་དུ་ཡོད་པར་བསྟན། །བློ་ཆུང་བརྒྱུད་ནས་དོན་ལ་འདྲེན་པའི་ཕྱིར། །དྲང་བའི་ལུང་དུ་ང་ཡིས་རྟོགས་པ་ཡིན། །ཞེས་པ་དང་། བཅོས་སུ་མེད་པའི་ལེའུ་ལས། དེ་བཞིན་ཉིད་ལས་མོས་པར་བྱེད་པ་ཡི། །སྟོན་པས་བདེན་ཚུལ་ཇི་ལྟར་བསྟན་པ་དང་། །ངེས་ལུང་མ་ཡིན་དྲང་ལུང་འབའ་ཞིག་ཡིན། །ཞེས་པ་དང་། ཉན་ཐོས་ནས་ཨ་ནུའི་བར་གྱི་ཐེག་པས་སེམས་ཉིད་རང་བྱུང་གི་ཡེ་ཤེས་སུ་འཇུག་པའི་སྒོར་ཕྱིན་པར་བྱེད་པའི་ཐབས་ཙམ་ལས། དེ་ཉིད་དངོས་སུ་རྟོགས་པ་ནི་མ་ཡིན་ཏེ། གོལ་སྒྲིབ་ལས་མི་འདའ་བའི་ཕྱིར་རོ། །འདི་སྐད་དུ་ཡང་། རྩ་བའི་རྒྱུད་ལེའུ་སུམ་ཅུ་རྩ་བརྒྱད་པ་ལས། ཀྱེ་སེམས་དཔའ་ཆེན་པོ་ཉོན་ཅིག །འཁོར་གྱི་སྟོན་པ་རྣམ་གསུམ་གྱིས། །བསྟན་པ་གསུམ་ནི་གོལ་སྒྲིབ་སྟེ། །དེ་ཡང་ཇི་ལྟ་བུ་ཞེ་ན། ངེས་པ་ཐོབ་པའི་ཐེག་པ་དྲུག །རྫོགས་པ་ཆེན་པོའི་གོལ་སར་བསྟན། །ཅེས་སོ། །

ཐེག་པ་འོག་མ་དེ་དག་གི་དོན་ལ་གོམས་པར་བྱས་ཀྱང་ཚེ་འདི་ཉིད་ལ་སེམས་ཉིད་ཀུན་བྱེད་ཀྱི་དོན་མི་མཐོང་ཞིང་འགལ་བར་བསྟན་ཏེ། ཕྱི་མའི་རྒྱུད་ཀྱི་སྐྱེ་བ་མེད་པའི་ལེའུ་ལས། ཀྱེ་ཀུན་བྱེད་ང་ཡི་རང་བཞིན་མ་རྟོགས་པར། །སོ་སོར་བསྟན་པའི་ལུང་ལ་མི་འཐད་ཅིང་། །སྐུ་གསུམ་སྟོན་པའི་དོན་ལ་གང་འཇུག་པ། །ཀུན་བྱེད་ང་ཡི་དོན་དང་ཤིན་ཏུ་འགལ། །ཞེས་གསུངས་སོ། །དེ་བས་ངེས་པའི་དོན་འབའ་ཞིག་མངོན་དུ་སྟོན་པའི་ལུང་དུས་གསུམ་རྒྱལ་བས་དུས་གསུམ་དུ་མ་གསུངས་པ་ཉིད། སྟོན་པ་ཀུན་བྱེད་ཀྱིས་གསུང་གསུངས་པ་སྟེ། ཕྱི་མ་ཕྱི་མའི་རྒྱུད་ལེའུ་བརྒྱད་ཅུ་རྩ་བཞི་པ་ལས། ཀྱེ་ང་ནི་སྟོན་པ་ཀུན་བྱེད་རྒྱལ་པོ་སྟེ། །ཐེག་པའི་རྩ་བ་ཆོས་ཀྱི་སྙིང་པོའི་ལུང་། །སྐུ་གསུམ་སྟོན་པས་མ་གསུངས་རྒྱ་ཆེ་བ། །སྐྱེ་བ་མེད་པ་སྟོན་པའི་སེམས་རྒྱུད་འདི། །དུས་གསུམ་རྒྱལ་བས་སྔ་མར་མ་གསུངས་ཏེ། །ཕྱི་མར་མི་གསུངས་ད་ལྟ་སྟོན་མི་མཛད། །ཀུན་བྱེད་རྒྱལ་པོ་འཕོ་འགྱུར་མི་མངའ་བས། །སྔར་ཡང་གསུངས་ཤིང་ཕྱིས་ཀྱང་གསུང་འགྱུར་བ། །ད་ལྟ་བྱུང་བར་གསུངས་པས་སྐལ་ལྡན་ལ། །ངེས་པར་བསྟན་པས་འབད་མེད་གྲོལ་བའི་ལུང་། །མདོ་ལུང་མངོན་དུ་བསྟན་པའི་བཀའ་བརྒྱུད་འདི། །མི་འཕེལ་མི་ནུབ་སྙིང་པོ་འཛིན་པ་ལ། །ཀུན་བྱེད་རྒྱལ་པོ་ངེས་པར་ཁྱོད་ལ་བསྟན། །ཅེས་སོ། །དེ་ལྟ་བུའི་ཀུན་བྱེད་ནི་ཆོས་ཐམས་ཅད་དང་ཐེག་པ་ཀུན་གྱི་སྙིང་པོའི་དོན་གཅིག་(༧༣)ཏུ་འདུས་པ་ཡིན་ཏེ། ཕྱི་མིའི་རྒྱུད་ལེའུ་བདུན་ཅུ་རྩ་དགུ་པ་ལས། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །མ་བཅོས་འཁོར་གྱི་ནང་དུ་ལུང་བསྟན་པ། །མ་བཅོས་སྙིང་པོའི་ཆོས་ཀུན་རྩ་བ་ལ། །ཇི་ལྟར་སྣང་བ་གཏན་ལ་འབེབས་པར་བྱེད། །སྙིང་པོའི་རང་བཞིན་གཅིག་གི་དོན་རྟོགས་ན། །ཀུན་གྱི་རང་བཞིན་ཀུན་བྱེད་ཉིད་དུ་འདུས། །དེས་ན་ཀུན་བྱེད་ང་ཡི་དོན་མཁས་ན། །བསམ་གྱིས་མི་ཁྱབ་ཆོས་ལ་མཁས་པར་འགྱུར། །ཀུན་བྱེད་ང་ཡི་དོན་ལ་གོམས་གྱུར་ན། །ཀུན་བྱེད་དོན་ལ་མཁས་ཤིང་གོམས་པ་ཡིན། །ཞེས་གསུངས་སོ། །དེ་ཉིད་ཐེག་པ་ཀུན་གྱི་སྙིང་པོའི་དོན་གཅིག་ཏུ་བསྡུས་པའི་ཉིང་ཁུ་ཡིན་ཏེ། རྩ་བའི་རྒྱུད་ལེའུ་བཅུ་གསུམ་པ་ལས། ཀུན་བྱེད་རྒྱལ་པོ་བྱང་ཆུབ་སེམས་ང་ནི། །ཐེག་པ་ཀུན་གྱི་ཡང་སྙིང་ཡིན་པར་བཤད། །སྟོན་པ་གསུམ་གྱིས་གནས་པའི་ཐེག་པ་གསུམ། །ངེས་པར་གནས་པ་ཐེག་པ་གཅིག་ལས་མེད། །གཅིག་ནི་ཀུན་བྱེད་བྱང་ཆུབ་སེམས་ཀྱི་ས། །དེ་ནི་ཐེག་པ་ཀུན་གྱི་ཉིང་ཁུར་བཤད། །ཅེས་སོ། །

དེ་ལྟར་ཐེག་པ་བརྒྱད་ལས་འདས་པའི་ཡང་རྩེ་རྫོགས་པ་ཆེན་པོ་ཀུན་བྱེད་ཨ་ཏིའི་ཐེག་པ། སྙིང་པོ་དོན་གྱི་གདམས་པ་འདི་ལ་གསུམ་སྟེ། སྟོན་བྱེད་སློབ་དཔོན་གྱི་རང་བཞིན། བསྟན་ཡུལ་སློབ་མའི་མཚན་ཉིད། བླང་བྱ་མན་ངག་གི་རང་བཞིན་ནོ། །

དང་པོ་ནི། ཕྱི་ནང་གི་ཆོས་དང་གྲུབ་པའི་མཐའ་ལ་མཁས་ཤིང་། ཁྱད་པར་ཨ་ཏིའི་དགོངས་པ་ལ་མངའ་བརྙེས་པས་སློབ་མའི་རྒྱུད་ལ་སྙིང་པོའི་དོན་དེ་ཉིད་རྟོགས་པར་བྱེད་པ་ཡང་དག་པའི་ལམ་སྟོན་པ་ལ་མཁས་ཤིང་། འཇིག་རྟེན་གྱི་ཆོས་དང་མཚན་མའི་རྣམ་པར་གཡེང་བས་མ་གོས་པ་བསྟེན་པར་བྱ་ཞིང་། འབྱོར་པ་ཐམས་ཅད་ཀྱིས་བླ་མ་དམ་པ་དེ་ཉིད་མཉེས་པར་བྱ་བ་ཡིན་ཏེ། རྩ་བའི་རྒྱུད་ལེའུ་ཉི་ཤུ་རྩ་བདུན་པ་ལས། དེ་བས་གསེར་ལ་ནག་མཚུར་བཏང་བ་ཡི། །སློབ་དཔོན་ཡང་དག་སྟོན་པ་རིན་ཆེན་མཛོད། །རིན་ཐང་དཔག་ཏུ་མེད་པས་བསླུ་བར་འོས། །ཞེས་གསུངས་སོ། །དེ་ལས་གཞན་དུ་རང་གཞན་གྱི་གྲུབ་པའི་མཐའ་དང་ཆོས་ཀྱི་དོན་ལ་རྨོངས་ཤིང་། དངོས་པོ་དང་མཚན་མར་ཞེན་པས་འདུ་འཛི་དང་གཡེང་བ་ལ་དགའ་བས། སྡོམ་པ་དང་དམ་ཚིག་ཉམས་ཤིང་། དད་ལྡན་འདྲེན་མེད་ལོག་པའི་ལམ་དུ་འཛུད་པ། ཆོས་ཀྱིས་རྙེད་པ་ཚོལ་བ་དེ་ནི་ཨ་ཏིའི་དོན་ལས་ཕྱི་རོལ་དུ་གྱུར་པས། ཚིག་ཙམ་གཞན་ལ་ཆོས་སུ་སྟོན་ཡང་རང་ལ་དེ་ཉིད་རྟོགས་པའི་སྐལ་བ་མེད་པས་སྤྲེའུ་ལྟ་བུའི་ཟློས་པ་དེ་ཉིད་སྤང་བའི་རིགས་སོ། །དེ་སྐད་དུ་ཡང་རྣམ་དག་དབྱིངས་ཀྱི་ལེའུ་ལས། བྱིས་པས་བསླུ་བས་རྟོག་པའི་ལམ་ལ་བཙུད། །ཕྱིན་པའི་དུས་མེད་རྟོགས་པའི་དུས་མེད་པས། །ཆོས་ཀྱིས་ཆོས་ཚོལ་རྙེད་པར་ག་ལ་འགྱུར། །ཚད་མར་མ་གྱུར་སློབ་དཔོན་སྤྲེའུ་འདྲའི་ལུང་། །བསྟེན་པས་ལམ་ནོར་རྟོག་པས་ཟིན་ཏ་རེ། །ཞེས་གསུངས་སོ། །(༧༤)

གཉིས་པ་བསྟེན་པར་བྱ་བའི་ཡུལ་སློབ་མའི་རང་བཞིན་ནི། སྤྱིར་དད་པ་དང་དམ་ཚིག་ལྡན་པ། ངང་རྒྱུད་རིང་ཞིང་སྙིང་རྗེ་ཆེ་བ། དད་པ་བརྟན་ཞིང་གཏོང་ཕོད་ཆེ་བ་སྟེ། ཕྱི་མའི་ཕྱི་མ་རྒྱུད་ལེའུ་བརྒྱད་ཅུ་རྩ་གསུམ་པ་ལས། གཞི་རྩ་ཀུན་འདས་བྱང་ཆུབ་སྙིང་པོའི་རྒྱུད། །དགོངས་པ་མངོན་དུ་ཕྱུང་བའི་ལུང་འདི་ནི། །དད་དང་དམ་ཚིག་བརྩོན་འགྲུས་ཆེ་བ་དང་། །སྙིང་རྗེ་ཡིད་རིང་སྐྱོ་དང་ཡིད་ཟློག་མེད། །ལུས་དང་བུ་དང་ཆུང་མ་བྲན་དང་ནོར། །གང་ལའང་མ་ཆགས་དད་དང་དགའ་བས་འབུལ། །འདི་དག་དད་དང་དམ་ཚིག་རྟགས་ཡིན་པས། །སྙིང་པོའི་དོན་དང་ལྡན་པས་སྦྱིན་པར་བྱ། །ཞེས་སོ། །ཁྱད་པར་དུ་འདིའི་ཚིག་དོན་རྫོགས་པར་སྦྱིན་པའི་སྣོད་ནི། ང་རྒྱལ་དང་ཆེ་བ་མེད་པས་བླ་མ་ལ་གུས་པ། བཀའ་ལས་མི་འདའ་བས་གསུངས་པ་བཞིན་བྱེད་པ། ལུས་དང་སྲོག་ལའང་ཕོངས་པ་མེད་པས་ཞབས་ཏོག་སྒྲུབ་པ། ཚེ་འདི་བློས་བཏང་ནས་དམ་བཅའ་སྒྲུབ་ནུས་པ། ད་ནས་ཇི་སྲིད་འཚོའི་བར་བླ་མའི་བཀའ་བཞིན་སྒྲུབ་ཅིང་དམ་ལས་མི་འདའ་བའི་མནའ་བསྐྱལ་ནུས་པ་ལ་སྦྱིན་ཏེ། དེ་ཉིད་ལས། གྲགས་པ་སྤངས་ཤིང་ང་རྒྱལ་དང་བྲལ་བ། །སྙིང་པོའི་དོན་ཕྱིར་ལུས་སྲོག་ཕོངས་པ་མེད། །བཀའ་ལས་མི་འདས་རྟགས་དང་ལྡན་པ་ལ། །སྙིང་པོའི་དོན་དང་སྐྱེ་མེད་བསྟན་པ་སྦྱིན། །གང་གི་སྙིང་པོའི་བསྟན་པ་བདག་ཐོབ་ནས། །འཇིག་རྟེན་མཚན་མས་བདག་ལ་ཅི་བགྱི་སྟེ། །ཐོབ་ན་བདག་གིས་བཀའ་བཞིན་སྒྲུབ་པོ་ཞེས། །དམ་བཅའ་ལེགས་པར་གནས་ན་བཀའ་འདི་སྦྱིན། །ཇི་སྲིད་བདག་དང་སློབ་དཔོན་འཚོ་བ་ཡི། །ལུས་དང་སྲོག་གི་འབྲལ་བ་མ་མཆིས་པར། །ཁྱོད་ཀྱི་བཀའ་བཞིན་སྒྲུབ་ཅེས་མནའ་བོར་ལ། །བསྟན་པའི་སྙིང་པོ་ཀུན་བྱེད་རྒྱལ་པོ་སྦྱིན། །ཞེས་སོ། །དེས་ཀྱང་ཆགས་སེམས་མེད་པས་འབྱོར་པ་ཀུན་གྱིས་བླ་མ་མཆོད་ཅིང་། །བླ་མས་ཀྱང་དེའི་ཚོགས་རྫོགས་པའི་ཕྱིར་བཞེད་པ་མེད་ཀྱང་བླངས་ཏེ་དཀོན་མཆོག་ལ་མཆོད་པར་བྱ་སྟེ། དེ་ཉིད་ལས། མདོར་ན་ལུས་དང་སྲོག་ཀྱང་འབུལ་བྱ་ཞིང་། །རྫས་དང་ཞིང་ཡུལ་རྐང་འགྲོས་སྨོས་ཅི་དགོས། །གལ་ཏེ་བདག་ལ་དགོས་པར་མ་གྱུར་ནའང་། །དམ་པས་བླངས་ཏེ་དཀོན་མཆོག་གསུམ་ལ་འབུལ། །ཞེས་སོ། །

གསུམ་པ་བླང་བྱ་མན་ངག་གི་རིམ་པ་ལ་གསུམ་སྟེ། ཡིད་ཆེས་ཤིང་ཁུངས་བཙུན་པ་བརྒྱུད་པའི་རིམ་པ་དང་། དེ་ལས་བྱུང་ཞིང་གདམས་པ་དངོས། །གསང་ཞིང་བཀའ་རྒྱས་བཏབ་པའོ། །

དང་པོ་རྩ་བའི་རྒྱུད་ལེའུ་གསུམ་པ་ལས། ཀྱེ་སེམས་དཔའ་ཆེན་པོ་ཉོན་ཅིག །ལོ་རྒྱུས་དོན་གྱི་དགོས་པ་བསྟན་པ་ནི། །དང་པོ་ཡིད་ཆེས་བྱུང་ཁུངས་བསྟན་པའི་ཕྱིར། །ལོ་རྒྱུས་དོན་གྱི་བཤད་ལུགས་བསྟན་པ་ནི། །རང་བཞིན་བྱིན་གྱིས་བརླབས་པའི་བཤད་ལུགས་དང་། །རང་གི་ངོ་བོ་བསྟན་པའི་བཤད་ལུགས་དང་། །དོན་གྱི་སྒྲ་ཚིག་བསྡེབས་པའི་(༧༥)བཤད་ལུགས་སོ། །ཞེས་པས། དང་པོ་ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བའི་ཀློང་ཡང་དག་དོན་གྱི་འོག་མིན་ཆེན་པོ་ན། བཅོམ་ལྡན་འདས་ཀུན་བྱེད་རྒྱལ་པོ་དགོངས་པ་དོན་གྱི་ཆོས་ཉིད་ལས་བཞེངས་ཏེ། འོག་མིན་ཁང་བུ་བརྩེགས་པའི་གཞལ་མེད་ཁང་ཆེན་པོར། རིགས་ལྔའི་སངས་རྒྱས་དང་། ཉིད་ཀྱི་ཐུགས་རང་བྱུང་གི་ཡེ་ཤེས་ལས་སྤྲུལ་པའི་སེམས་དཔའ་རྡོ་རྗེ་ལ་བྱིན་གྱི་རླབས་ཀྱིས་བཤད། དེས་ལོངས་སྤྱོད་རྫོགས་པའི་སྐུར་བྱོན་ཏེ། སྤྲུལ་པའི་སྐུ་དགའ་རབ་རྡོ་རྗེ་ལ་རང་གི་ངོ་བོས་གསུངས། དེས་སློབ་དཔོན་ཆེན་པོ་འཇམ་དཔལ་བཤེས་གཉེན་ལ་སྒྲ་ཚིག་སྡེབ་སྦྱོར་ལེགས་པར་སྦྱོར་བའི་སྒོ་ནས་གསུངས། དེས་སློབ་དཔོན་ཆེན་པོ་ཤྲཱི་སིངྷ་ལ་དོན་གྱི་དགོངས་པ་གཉིས་སུ་མེད་པར་གསུངས། དེས་སྤྲུལ་པའི་ལོ་ཙ་བ་བཻ་རོ་ཙ་ན་ལ་སྙིང་པོ་མཆོག་ཏུ་གསང་བའི་སྒོ་ནས་གསུངས། དེས་རྒྱལ་མོ་གཡུ་སྒྲ་སྙིང་པོ་ལ་གཉིས་མེད་ཡེ་ཤེས་ཆེན་པོར་གསུངས། དེས་ལྕོག་རོ་སྐྱེས་བཟང་ལེགས་སྨིན་ལ་དབྱིངས་བྱ་རྩོལ་དང་བྲལ་བར་གསུངས། དེས་འབྲོམ་ལེགས་པའི་བློ་གྲོས་ལ་དོན་སྐྱེ་བ་མེད་པར་གསུངས། དེས་རྦ་རྒྱལ་བའི་དབང་པོ་ལ་གཞི་འཕོ་འགྱུར་མེད་པར་གསུངས། དེས་མཚུངས་མཆོག་གི་བླ་མ་ལ་དཔེ་ནམ་མཁའ་ལྟ་བུར་གསུངས། དེས་དྲུང་ཡེ་ཤེས་དབང་པོ་ལ་དགོངས་པ་རྣལ་བཞག་ཆེན་པོར་གསུངས། དེས་ཟུར་སྟོན་རིན་ཆེན་གྲགས་པ་ལ་རང་བཞིན་གཉིས་སུ་མེད་པར་གསུངས། དེས་ལྕེ་དགའ་བའི་དབང་པོ་ལ་ངོ་བོ་གདོད་ནས་དག་པར་གསུངས། དེས་སྙན་རིན་ཆེན་རྩེ་མོ་ལ་སེམས་ཉིད་གྲུབ་བསལ་མེད་པར་གསུངས། དེས་ཆོས་རྗེ་ཀུན་དགའ་དོན་གྲུབ་ལ་ཆོས་ཉིད་བློ་འདས་ཆེན་པོར་གསུངས། དེས་སློབ་དཔོན་གཞོན་ནུ་དོན་གྲུབ་ལ་རང་བྱུང་བཅོས་བསླད་མེད་པར་གསུངས། དེས་རང་བཞིན་རྫོགས་པ་ཆེན་པོའི་རྣལ་འབྱོར་པ་ཀློང་ཆེན་རབ་འབྱམས་ལ་ཡེ་གྲོལ་རྒྱུ་འབྲས་ལས་འདས་པའི་ཚུལ་གྱིས་གསུངས། དེས་འཇམ་དབྱངས་ཀུན་དགའ་རྒྱལ་མཚན་ལ། དེས་མཚུངས་མེད་ཆོས་རྗེ་རིན་པོ་ཆེ་རཱ་ཛ་ལ་གསུངས་སོ། །

གཉིས་པ་དེ་ལས་བྱུང་བའི་གདམས་པ་དངོས་ལ་གསུམ་སྟེ། སྔོན་འགྲོ་བླ་མའི་རྣལ་འབྱོར། དངོས་གཞི་གདམས་པའི་མཚོན་ཚུལ། རྗེས་སྣང་ཉམས་ཀྱི་སྐྱོང་ཐབས་སོ། །

དང་པོ་ནི། སེམས་ཉིད་དོན་གྱི་ཡེ་ཤེས་རང་ངོ་ཤེས་པར་བྱ་བ་ནི་བླ་མ་དམ་པ་ལ་རག་ལས་པས། དེ་ཉིད་རྣལ་འབྱོར་དུ་སྒོམ་པའི་རིམ་པ་སྔོན་དུ་འགྲོ་དགོས་ཏེ། རྩ་བའི་རྒྱུད་ལེའུ་ཉི་ཤུ་རྩ་གསུམ་པ་ལས། ཤིན་ཏུ་མྱུར་བའི་ཡེ་ཤེས་བསམ་པ་ཀུན་དང་བྲལ། །བཤེས་གཉེན་ཀུན་ལས་བྱུང་བའི་ནོར་བུ་རིན་ཆེན་བཞིན། །དམིགས་པ་མེད་ཅིང་འགྱུར་བའི་གནས་ལ་མི་ལྟོས་པར། །རང་གི་རང་བཞིན་ལེགས་པར་རེ་བ་ཐམས་ཅད་བསྐང་། །བརྟགས་ན་མེད་ལ་(༧༦)བཞག་ན་ལེགས་པར་འབྱུང་བ་ཆེ། །དངོས་སུ་མི་སྣང་ཆགས་པའི་ཆ་ལུགས་ཀུན་ལ་སྟོན། །བདག་དང་གཞན་དུ་བྲལ་བའི་སྟོན་མཁས་རིན་ཆེན་མཛོད། །ཐམས་ཅད་གྲུབ་པའི་ཡུལ་ཞེས་བདག་མེད་སྙིང་རྗེས་སྟོན། །ཞེས་གསུངས་པས། སྟན་བདེ་བ་ལ་འདུག་སྟེ། སྐྱབས་སུ་འགྲོ་བ་དང་། དམིགས་པ་མེད་པའི་སྙིང་རྗེ་དང་། དོན་དམ་པར་རང་གི་ངོ་བོ་ཡེ་ནས་མ་སྐྱེས་པའི་རྗེས་ལ། རང་གི་ལུས་དང་སེམས་ཀྱི་རང་བཞིན་གཉིས་སུ་མེད་པའི་ཡེ་གེ་ཧཱུྃ་མཐིང་གའི་འོད་ཟེར་གྱིས་ཕྱི་དང་ནང་གི་གཟུང་འཛིན་དུ་སྣང་བ་ཐམས་ཅད་འོད་ཟེར་གྱི་དྲྭ་བ་ཆེན་པོས་དག་པར་བྱས་ཏེ། འོག་མིན་གྱི་གནས་ན་ལྷ་དང་ལྷ་མོའི་རང་བཞིན་དུ་བལྟའོ། །དེ་ཉིད་ཀྱི་ངང་ལས་རང་ཉིད་སེམས་དཔའ་རྡོ་རྗེ་མཐིང་ག་ཞལ་གཅིག་ཕྱག་གཉིས་པ། སེམས་དཔའི་སྐྱིལ་ཀྲུང་གིས་བཞུགས་པའི་སྐུ་ལ་དར་དང་རིན་པོ་ཆེས་བརྒྱན་པ། གཡས་རྡོ་རྗེ་གཏོད་དེ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། འཇའ་ཚོན་ལྟ་བུའི་ཐུགས་ཀ་ནས་འོད་ཟེར་གྱི་དྲྭ་བ་ཕྱོགས་བཅུར་འཕྲོས་པའི་རང་བཞིན་ཅན་དུ་བསམ་པར་བྱའོ། །དེའི་སྤྱི་གཙུག་ན་པདྨའི་སྡོང་པོ་སེང་གེ་རིན་པོ་ཆེས་བརྒྱན་པའི་སྟེང་ན་རྩ་བའི་བླ་མ་ཉིད་ཀུན་བྱེད་རྒྱལ་པོའི་རྣམ་པ་སྐུ་མདོག་མཐིང་ག་ཞལ་གཅིག་ཕྱག་གཉིས་པ་མཉམ་གཞག་གི་ཕྱག་རྒྱ་ཅན། ཆོས་ཀྱི་སྐུ་སྤྲོས་པ་ཐམས་ཅད་དང་བྲལ་བའི་བརྡར་རྒྱན་དང་ན་བཟའ་མེད་པའི་སྐུ་སྣང་ལ་རང་བཞིན་མེད་པ་རྡོ་རྗེའི་སྐྱིལ་ཀྲུང་གིས་བཞུགས་པའི་མཐར། བརྒྱུད་པའི་བླ་མ་རྣམས་ཀྱང་རིགས་ལྔའི་སངས་རྒྱས་གྲངས་མེད་པའི་སྐུ་འོད་ཀྱི་གོང་བུ་སྣང་ལ་རང་བཞིན་མེད་པ་རང་རང་གི་རྒྱན་ཆ་ལུགས་རྫོགས་པར་བསམ་པར་བྱའོ། །དེ་རྣམས་ཀྱི་སྐུ་ལས་འོད་ཟེར་ཚད་མེད་པ་ཕྱོགས་བཅུའི་འཇིག་རྟེན་དུ་འཕྲོས་པའི་རྩེ་མོ་ལ་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་ཐུབ་པ་དྲུག་གྲངས་མེད་པ་སྣང་བས་འཇིག་རྟེན་གྱི་དོན་བྱེད་པར་བསམ་ཞིང་། ༀ་ཨཱཿཧཱུྃ། ཞེས་རླུང་རྡོ་རྗེའི་བཟླས་པ་དང་ངག་ཏུ་ཅི་ཙམ་ནུས་ཀྱི་བར་དུ་བརྗོད་ནས། མཐར་དེ་ཐམས་ཅད་ཀུན་བྱེད་ཉིད་དུ་བསྡུས་ཤིང་ཐིམ་ནས། དེ་ཡང་ངོ་བོ་ཉིད་མེད་པའི་ངང་ལ་བཞག་ནས་ཨཱཿགྲངས་མེད་པ་བཟླ་བར་བྱའོ། །རྗེས་ལ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་གདོད་མའི་ངང་དུ་གྲོལ་བར་ཤོག་ཅིག །ཅེས་བརྗོད་པ་ལས་ལངས་པར་བྱའོ། །འདི་ནི་ཤིན་ཏུ་གསང་བ་དམ་པའོ། །དེ་ལྟར་ཟླ་བ་ཕྱེད་དུ་སྦྱངས་པས་སྣང་བ་འལ་འོལ་རྨི་ལམ་སྒྱུ་མ་ལྟར་རྟོགས་པའི་ངང་ནས་སེམས་ཅན་ལ་དམིགས་པའི་སྙིང་རྗེ་དང་། ཆོས་ཐམས་ཅད་བདག་མེད་པར་རྟོགས་པར་རང་བྱུང་དུ་སྐྱེ་ཞིང་། ཚེ་འདིའི་རྣམ་པར་གཡེང་བ་དང་། འཇིག་རྟེན་གྱི་ཆོས་ལ་བློ་མི་ཆགས་ཤིང་། སྐྱོ་ཤས་དང་ངེས་འབྱུང་བཙན་ཐབས་སུ་སྐྱེ་བའོ། །དེས་ནི་ཀུན་བྱེད་ཀྱི་དགོངས་པ་རང་ཤར་དུ་སྐྱེ་བའི་དགོས་པ་ཡོད་དོ། །

གཉིས་པ་དངོས་གཞི་གདམས་པའི་མཚོན་ཚུལ་ལ་བཞི་སྟེ། (༧༧)ལྟ་བས་ཐག་བཅད། སྒོམ་པས་ལ་བཟླ། སྤྱོད་པས་འཕྲང་བསལ། འབྲས་བུ་རེ་དོགས་སྤང་བའོ། །དང་པོ་ལ་གཉིས་ཏེ། སྣང་བ་སེམས་ཀྱི་རོལ་པར་ཐག་བཅད་པ་དང་། སེམས་ཉིད་སྟོང་པར་ཐག་བཅད་པའོ། །

དང་པོ་ནི། འདི་ལྟར་སྣང་སྲིད་ཐམས་ཅད་མདང་གི་རྨི་ལམ་ལྟར་རང་གི་སེམས་ལ་སྣང་བ་ལས་གཞན་དུ་གྲུབ་པ་འགའ་ཡང་མེད་དེ། རྩ་བའི་རྒྱུད་ལེའུ་དྲུག་པ་ལས། ཆོས་ཀུན་རྩ་བ་ཀུན་བྱེད་བྱང་ཆུབ་སེམས་། །ཇི་ལྟར་སྣང་ཡང་ང་ཡི་ངོ་བོ་ཉིད། །ཇི་ལྟར་བྱུང་ཡང་ང་ཡི་ཆོ་འཕྲུལ་ཡིན། །སྒྲ་ཚིག་ཇི་ལྟར་བྱུང་བ་ཐམས་ཅད་ཀུན། །ང་ཡི་དོན་ཉིད་ཚིག་སྒྲར་བྱུང་བ་ཡིན། །སངས་རྒྱས་སྐུ་དང་ཡེ་ཤེས་ཡོན་ཏན་དང་། །སེམས་ཅན་ལུས་དང་བག་ཆགས་ལ་སོགས་པ། །སྣང་སྲིད་སྣོད་བཅུད་བསྡུས་པ་ཐམས་ཅད་ཀུན། །བྱང་ཆུབ་སེམས་ཀྱི་ངོ་བོ་ཡེ་ནས་ཡིན། །ཞེས་གསུངས་སོ། །དེ་ལྟར་ཐམས་ཅད་རང་གི་སེམས་ཀྱི་ཆོ་འཕྲུལ་ལས་མ་འདས་པས། མ་རྟོགས་པ་ལ་འཁོར་བར་བསྙད་པ་ཡིན་ཏེ། དེ་ཉིད་ལས། ཀུན་བྱེད་ང་ཡི་རང་བཞིན་མ་རྟོགས་པར། །ང་ཡིས་བྱས་པའི་ཆོས་ལ་ངེས་བརྟགས་པས། བརྐམ་ཞིང་ཆགས་པའི་དབང་གིས་སྣང་བར་གྲུབ། །མི་རྟག་སྒྱུ་མའི་རང་བཞིན་འཇིག་པར་འགྱུར། །ཆ་མེད་དམུས་ལོང་ལྟ་བུའི་རང་བཞིན་ནོ། །ཞེས་སོ། །དཔེར་ན་སེམས་ལ་སྣང་བའི་ཆོས་དང་། རང་གི་སེམས་གཉིས་རྨི་ལམ་གྱི་རྣམ་པ་ལྟར་དོན་ལ་གཉིས་སུ་མེད་པའི་ངང་ལ་གོམས་པར་བྱ་སྟེ། རྩ་བའི་རྒྱུད་ལེའུ་བཅོ་ལྔ་པ་ལས། ཇི་ལྟར་སྣང་བའི་ཆོས་རྣམས་ཐམས་ཅད་དང་། །རང་སེམས་ཆོས་ཉིད་ཡེ་ནས་གཅིག་ཡིན་པས། །རྒྱུ་འབྲས་ལུགས་བཞིན་འདི་ལས་ལྡོག་མི་བྱེད། །རང་སེམས་དེ་བཞིན་ཉིད་ལས་ལྡོག་མི་བྱེད། །རང་སེམས་དེ་བཞིན་ཉིད་ལས་བརྟག་བྱ་རུ། །རང་གི་བྱང་ཆུབ་ངོ་བོ་སྣང་བ་ཡིན། །ཞེས་སོ། །དེ་ལྟར་བརྟགས་པའི་སྣང་བའི་དངོས་པོ་ས་ཆུ་མེ་རླུང་ལ་སོགས་པ་ཕྱི་རོལ་དུ་གྲུབ་པ་མེད་པའི་ངང་དུ་ཞག་བཅུར་བཞག་པས། བྱང་ཆུབ་སེམས་ལས་ཐ་དད་པའི་ཆོས་རྡུལ་ཙམ་ཡང་མེད་པར་རྟོགས་ནས་གཟུང་ཡུལ་གཞན་དུ་ཞེན་པའི་སྤྲོས་པ་ལས་གྲོལ་བའི་དགོས་པ་ཡོད་དོ། །དེ་ཡང་ཕྱི་སྣང་བའི་ངོ་བོ་ནི། རང་བཞིན་མེད་པར་སྟོང་པའི་ཆ་ལ་བྱང་ཆུབ་སེམས་ཀྱི་ངོ་བོར་བསྟན་པ་ལ། སྣ་ཚོགས་སྣང་ལ་མ་འགག་པའི་ཆ་ནས་བྱང་ཆུབ་སེམས་ཀྱི་རོལ་པར་བསྟན་ལ། སྣང་བ་སེམས་སུ་འདོད་པ་དང་མི་མཐུན་ཏེ། སྣང་བ་འདི་བྱང་ཆུབ་སེམས་ཀྱི་རོལ་པར་ཤར་ཡང་སེམས་བྱུང་གི་ངོ་བོ་མ་ཡིན་པའི་ཕྱིར་རོ། །དེས་ན་སེམས་དང་བྱང་ཆུབ་སེམས་གཉིས་མ་ཕྱེད་དོ། །བྱང་ཆུབ་སེམས་ནི་རྣམ་པར་མི་རྟོག་པའི་ཡེ་ཤེས་སེམས་ཉིད་འོད་གསལ་བ་ཡིན་ལ། སེམས་ནི་ཀུན་ཏུ་རྟོག་པ་འཁོར་བའི་རྒྱུ་སྟེ། བདེན་གཉིས་ལས། སེམས་དང་སེམས་བྱུང་ཁམས་གསུམ་པའི། །སྒྲོ་བཏགས་རྣམ་(༧༨)པ་ཅན་རྟོག་ཡིན། །ཞེས་པར་ལྟར་རོ། །གཤིས་གང་དུ་བྱང་ཆུབ་ཀྱི་སེམས་ཡིན་པ་ན་སེམས་སེམས་བྱུང་འགག་པའོ། །སེམས་ནི་ཡུལ་རྟོག །བྱང་ཆུབ་སེམས་ནི་ཡུལ་མི་རྟོག་པའོ། །དེས་ན་སེམས་སུ་ཞེན་པའི་འཛིན་པ་ཡང་གདོད་ནས་དག་པའི་ཆོས་ཉིད་དུ་བསྟན་པའི་ཕྱིར་རོ། །

གཉིས་པ་སེམས་སྟོང་པར་ཐག་བཅད་པ་ནི། རྩ་རྒྱུད་ལེའུ་རྩ་གཉིས་པ་ལས། ནང་དུ་མ་གཡོས་ནང་དུ་བཙལ་བའི་ཡུལ་མེད་དོ། །ཡུལ་ཕྱིར་ཆགས་ཤིང་ཡུལ་ལ་བསྔོ་བའི་དམིགས་པ་མེད། །མ་འབྱུང་མི་འཇུག་བདག་མེད་སྙིང་རྗེ་དེ་ཡིས་ནི། །གཞན་གྱི་དོན་ཆེན་མི་འོང་ཡེ་ནས་གནས་པ་ཡིན། །ཞེས་པས། ད་ལྟར་གྱི་དྲན་རིག་ཕྱི་ནང་བར་གསུམ་ལ་རྟོགས་པ་འདི་དང་པོ་གང་ནས་འོང་། ད་ལྟ་གང་ན་གནས། ཐ་མ་གར་འགྲོ་ཁ་དོག་དང་དབྱིབས་མཚན་ཉིད་ངོས་བཟུང་ཇི་ལྟར་འདུག །ད་ལྟ་ཤར་དུས་ཉིད་ནས་ཕྱི་སྣང་བའི་ཡུལ་ལ་འདུག་གམ། ནང་ཕུང་པོའི་ནང་ན་འདུག་གམ། བར་སྣང་འདི་ལ་གནས་སམ་སྙམ་དུ་བརྟགས་ཤིང་། ཕྱི་སྣང་བ་དང་། ནང་གི་ལུས་འདི་སོ་སོར་ཕྱེ་ཞིང་གཞིག་པས་གང་དུའང་མ་གྲུབ་པ་དེའི་ཚེ། རང་བཞིན་བཅུའི་དོན་ཡང་མ་གྲུབ་པ་ཉིད་དུ་ལ་བཟླ་བར་བྱ་སྟེ། དེ་ལྟར་བཙལ་བས་ངོ་བོ་མ་རྙེད་པའི་སེམས་འདི་ལ་ལྟ་བ་དང་། སྒོམ་པ་དང་། དམ་ཚིག་དང་། ཕྲིན་ལས་དང་། དཀྱིལ་འཁོར་དང་། དབང་དང་། ས་སྦྱང་བ་དང་། ལམ་བགྲོད་པ་དང་། སྒྲིབ་པ་སྦྱང་བ་དང་། ཡེ་ཤེས་སམ་སངས་རྒྱས་བྱ་བ་ཞིག་བསྒྲུབ་བྱ་སྒྲུབ་བྱེད་དུ་འདུག་གམ་སྙམ་དུ་སོ་སོར་བརྟགས་ཤིང་དཔྱད་པས། དེ་དག་གི་ངོ་བོ་གང་ཡང་མ་རྙེད་པ་ནི་གཞི་ནས་དག་པའི་རང་བཞིན་བཅུའི་དོན་སྒོམ་མེད་ཆེན་པོར་ལ་བཟླས་པ་ཞེས་གསུངས་སོ། །རྩ་རྒྱུད་ལེའུ་དགུ་པ་ལས། ཆོས་རྣམས་ཀུན་གྱི་ལ་ནི་ང་ཡིས་བཟླ། །ང་ལས་གཞན་དུ་ལུང་ནི་གཞལ་མེད་པས། །ལྟ་བ་སྒོམ་དུ་མེད་པར་ལ་ཡང་བཟླ། །ང་ལས་གཞན་དུ་བསྲུང་དུ་མེད་པའི་ཕྱིར། །དམ་ཚིག་བསྲུང་དུ་མེད་པར་ལ་ཡང་བཟླ། །ང་ལས་གཞན་དུ་བཙལ་དུ་མེད་པའི་ཕྱིར། །ཕྲིན་ལས་བཙལ་དུ་མེད་པར་ལ་ཡང་བཟླ། །ང་ལས་གཞན་དུ་གནས་པ་མེད་པའི་ཕྱིར། །ས་ལ་སྦྱང་དུ་མེད་པར་ལ་ཡང་བཟླ། །ང་ལས་གཞན་དུ་སྒྲིབ་པ་མེད་པའི་ཕྱིར། །རང་བྱུང་ཡེ་ཤེས་ཡིན་པར་ལ་ཡང་བཟླ། །ང་ནི་མ་སྐྱེས་ཆོས་ཉིད་ཡིན་པའི་ཕྱིར། །ཕྲ་བ་ཆོས་ཉིད་ཡིན་པར་ལ་ཡང་བཟླ། །ང་ལས་གཞན་དུ་བགྲོད་དུ་མེད་པའི་ཕྱིར། །ས་ལམ་བགྲོད་དུ་མེད་པར་ལ་ཡང་བཟླ། །སྙིང་པོ་བྱང་ཆུབ་ང་ལས་བྱུང་བའི་ཕྱིར། །ཡེ་ནས་གཉིས་སུ་མེད་པར་ལ་ཡང་བཟླ། །རང་བྱུང་ཡེ་ཤེས་གཏན་ལ་དབབ་པའི་ཕྱིར། །ལུང་ཆེན་ཐོག་འབེབས་ཡིན་པར་ལ་ཡང་བཟླ། །ཆོས་རྣམས་ཐམས་ཅད་ང་ལས་མེད་པའི་ཕྱིར། །ཀུན་བྱེད་ང་ནི་ཀུན་གྱི་ལ་བཟླའོ། །ཞེས་གསུངས་སོ། །དེ་དག་དབང་པོ་དང་བསྟུན་ནས་ཞག་གསུམ་ནས་ལྔ་བཅུ་གཅིག་ཏུ་རྟོགས། (༧༩)དེ་ནས་གཉིས་པ་སྒོམ་པ་ལ་བཟླ་བ་ནི། དེ་ལྟར་སེམས་ཉིད་རྒྱ་ཆད་ཕྱོགས་ལྷུང་མེད་པའི་ལྟ་བས་ཐག་ཆོད་པའི་རྟིང་ལ། དབེན་པར་ལུས་སེམས་ཁོང་ཀློད་ལ་སོས་དལ་བག་ཕབ་སྟེ་རྣམ་སྣང་གི་ཆོས་བདུན་དང་ལྡན་པ་ལ། བླ་མས་བསྟན་པ། དེ་ཡང་སྣང་སེམས་ཐམས་ཅད་ཡེ་ནས་དག་པ་དེ་བཞིན་ཉིད་ཀྱི་རང་བཞིན་མཉམ་པའི་རྒྱལ་པོ་ཡིན་པས། བཅོས་བསླད་དང་རེ་དོགས་མེད་པར་རང་བཞག་ཆེན་པོའི་ངང་ལ་ཀློད་ཅིག །འདི་ཉིད་མི་རྟོག་ཆོས་སྐུའི་དགོངས་པ་ཡིན་ཏེ། ངེས་པ་ཚིག་གཞིའི་ལེའུ་ལས། ཀྱེ་སེམས་དཔལ་ཆེན་པོ་འདི་ལྟར་དོན་རིག་གྱིས། །ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུས་ཀྱང་འཆོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་སྐུའི་དགོངས་པ་དེ་ལ་གནས། །ཞེས་གསུངས་པས། ད་ལྟའི་སེམས་ཉིད་ནམ་མཁའ་ལྟ་བུ་ཡེ་ནས་དག་པའི་ངང་ལ་སྒོ་གསུམ་རྩོལ་བྲལ་མཉམ་པ་ཉིད་དུ་ཞོག་ཅིག །སྣང་ཡུལ་ཅི་སྣང་ཡང་དེ་ལ་འཛིན་ཞེན་མེད་པ་དེ་ཉིད་ཀྱི་སྟེང་དུ་ཅེར་གྱིས་ལྟོས་ལ་ཕྱམ་གྱིས་ཞོག་དང་། རྟོག་དང་སྣང་བ་ཙམ་དུ་ཡང་འཛིན་པ་མེད་པའི་ངང་དྭངས་སྤྲོས་པ་དང་བྲལ་བ་འཆར་བ་ནི་སེམས་ཉིད་ཡེ་གྲོལ་ཀུན་བྱེད་ཀྱི་དགོངས་པ་ཡིན་ཏེ། ལྷུན་གྲུབ་རེ་དོགས་ལ་མེད་པའི་ལེའུ་ལས། ཀྱེ་སེམས་དཔའ་རྡོ་རྗེ་ལེགས་པར་ད་སྒོམས་ཤིག །མ་སྐྱེས་རྣམ་པར་དག་པའི་དོན་སྒོམ་པས། །སྣང་བ་དངོས་པོར་མི་ལྟ་འཛིན་མི་བྱེད། །སྣང་བ་སྐྱེ་བ་མེད་པར་རང་གྲོལ་བས། །སྟོང་པ་མི་བསྒོམས་ཅི་ཞིག་རྟོགས་པར་གྲོལ། །ཞེས་སོ། །དེ་ཉིད་རང་བྱུང་འོད་གསལ་གྱི་དགོངས་པ་ཡིན་ཏེ། ཇི་བཞིན་པ་ལ་བྱ་རྩོལ་རང་གྲོལ་བའི་ལེའུ་ལས། ཇི་བཞིན་སྤྲོས་བྲལ་བདེ་བ་ཆེན་པོ་ལ། །སྒོ་གསུམ་མ་བཙལ་བཅོས་ཤིང་དམིགས་མི་བྱེད། །ཡིད་ལ་མི་བྱེད་མཚན་མའི་རྗེས་མི་འབྲང་། །རང་བྱུང་ཡེ་ཤེས་བདེ་བའི་དོན་ལ་བཞག །འདི་ནི་རང་བྱུང་འོད་གསལ་དགོངས་པ་སྟེ། །ཀུན་བྱེད་རྒྱལ་པོའི་དགོངས་པའི་ཕྲིན་ལས་སོ། །ཞེས་པས་རང་གསལ་བཅོས་བསླད་མེད་པའི་ངང་ལ་ཅི་ཙམ་གནས་ཀྱི་བར་མཉམ་པར་བཞག །དེའི་ངང་ལ་རྟོགས་པ་ཅི་ཤར་ཡང་དེ་ཉིད་ལ་ཅེར་གྱིས་བལྟས་ཏེ་དེའི་སྟེང་དུ་བཞག་པས། རྟོག་པ་དེ་ཉིད་མ་སྤང་རང་སར་གྲོལ་ཏེ་སྔ་མའི་ངང་དུ་རྣམ་གཞག་གཅིག་ཏུ་གནས་པ་ནི། བྱུང་ཚོར་ཆུ་ཡི་རི་མོ་བཞིན་དུ་རང་སར་གྲོལ་བ་སྟེ། དེ་ཇི་བཞིན་པ་བྱ་རྩོལ་དང་བྲལ་བའི་ལེའུ་ལས། དེ་བཞིན་མ་བཅོས་རྒྱལ་བའི་དགོངས་པ་ལས། །སེམས་དང་སེམས་བྱུང་རྟོག་པ་ཅི་སྐྱེས་ཀྱང་། །དེ་ཉིད་སྐྱེ་མེད་ངང་དུ་གནས་ཤེས་ན། །བྱ་རྩོལ་མཚན་མའི་འདུ་ཤེས་ཀུན་དང་བྲལ། །ཞེས་པ་དང་། བསྒོམ་དུ་ཡོད་མེད་བསྟན་པའི་ལེའུ་ལས། དྲན་བསམ་ཡིད་ལ་འགྱུ་བ་མ་ལུས་ཀུན། །སྐྱེ་བ་མེད་པའི་ངང་ལས་མ་ཡེངས་པས། །གང་ལྟར་བསམ་ཀྱང་སྒོམ་པ་ཡིན་ཤེས་ན། །མ་བསྒོམས་གང་ལྟར་བཞག་ཀྱང་ཡེངས་པ་(༨༠)མེད། །ཅེས་གསུངས་སོ། །དེ་ནས་ས་ཆུ་མེ་རླུང་ནམ་མཁའི་ངང་ལ་རིམ་གྱིས་བལྟར་བཅུག་ལ། འབྱུང་བ་དེ་དག་ནི་རང་བཞིན་གྱིས་རྟོག་པ་མེད་པའི་ངོ་བོ་ལ་དེ་བཞིན་དུ་ངོ་སྤྲད་པར་བྱ་སྟེ། རང་སེམས་སྟོན་པར་འབྱུང་བའི་ལེའུ་ལས། ཀྱེ་ཁམས་གསུམ་སེམས་ཅན་ཐམས་ཅད་ཀུན། །རང་གི་བྱང་ཆུབ་སེམས་དེ་ཉིད། །སྟོན་པ་ཡིན་པར་མངོན་བསྟན་ན། །བསྐལ་པ་བརྒྱ་ཕྲག་སྟོང་དུ་ནི། །རང་སེམས་སྟོན་པ་མ་མཐོང་བས། །ཀུན་བྱེད་རྒྱལ་པོ་ང་ཡིས་ནི། །རང་སེམས་སྟོན་པར་མངོན་ཕྱུང་བས། །རང་སེམས་སྟོན་པའི་ཆོས་ཉོན་ཅིག །ཀུན་བྱེད་རྒྱལ་པོ་ང་ཡིས་ནི། །ཀུན་ཏུ་བྱང་ཆུབ་སེམས་ལས་ནི། །སེམས་ཀྱི་ངོ་བོ་འབྱུང་ཆེན་ལྔ། །སྟོན་པ་བྱང་ཆུབ་སེམས་ལྔ་བྱུང་། །སྐུ་ནི་ལོངས་སྤྱོད་རྫོགས་པའི་སྐུ། །ཆོས་ནི་རང་གི་ངོ་བོས་འཆད། །སྟོན་ནི་རང་གི་རང་བཞིན་སྟོན། །སྟོན་པ་ལོངས་སྤྱོད་རྫོགས་སྐུ་དེ། །དགོངས་པ་ཉིད་ལས་ཉིད་མི་རྟོག །ཡུལ་ཆོས་གཞན་ཡང་རྟོག་མི་བྱེད། །བྱང་ཆུབ་སེམས་ཀྱི་སྟོན་པ་ལྔས། །ཀུན་ཀྱང་ཆོས་ཉིད་དེ་བཞིན་སྟོན། །བྱང་ཆུབ་སེམས་ཀྱི་ཡེ་ཤེས་དེ། །སྟོན་པ་ས་ཡི་སྐུར་ཕྱུངས་ནས། །ཚིག་དང་ཡི་གེ་མི་སྟོན་ཏེ། །རང་གི་རང་བཞིན་སྟོན་བྱེད་པ། །བདག་ཏུ་མི་རྟོག་གཞན་མི་རྟོག །མི་རྟོག་མཉམ་པའི་ངོ་བོ་སྟོན། །ཁམས་གསུམ་སེམས་ཅན་ཐམས་ཅད་ཀྱིས། །དེ་རྟོགས་སངས་རྒྱས་ཀུན་དང་མཉམ། །བྱང་ཆུབ་སེམས་ཀྱི་ཡེ་ཤེས་ཏེ། །སྟོན་པ་ཆུ་ཡི་སྐུར་ཕྱུངས་ནས། །སྟོན་པ་མེ་ཡི་སྐུར་ཕྱུངས་ནས། །སྟོན་པ་རླུང་གི་སྐུར་ཕྱུངས་ནས། །སྟོན་པ་ནམ་མཁའི་སྐུར་ཕྱུངས་ནས། །ཚིག་དང་ཡི་གེ་མི་སྟོན་ཏེ། །རང་གི་ངོ་བོས་ཆོས་སྟོན་པ། །བདག་གཞན་གཉིས་སུ་མི་རྟོག་པར། །མི་ཕྱེད་པ་ཡི་དགོངས་པ་སྟོན། །ཁམས་གསུམ་སེམས་ཅན་ཐམས་ཅད་ལ། །མངོན་ཕྱུང་སྟོན་པ་དེ་རྣམས་ཀྱིས། །རང་གི་ངོ་བོས་ཆོས་བཤད་པ། །འདི་ཡིས་ཀུན་ཀྱང་རིག་པར་གྱིས། །ཀྱེ་ཁམས་གསུམ་སེམས་ཅན་ཐམས་ཅད་ཀུན། །ཀུན་བྱེད་རྒྱལ་པོ་ང་ཡིས་ནི། །ཁྱེད་རྣམས་ང་ཡིས་བྱས་པའི་ཕྱིར། །ང་ཡི་སྲས་ཡིན་ང་དང་མཉམ། །ང་དང་མི་གཉིས་ང་ཡིན་ཕྱིར། །ང་ཡིས་ཁྱོད་ལ་མངོན་ཕྱུང་བས། །ང་ཡི་ངོ་བོ་སྟོན་པ་ལྔས། །རང་བཞིན་རྣམ་ལྔ་གཅིག་ཏུ་བསྟན། །གཅིག་ནི་ཀུན་བྱེད་ང་ཡིན་ཕྱིར། །དེ་བཞིན་ཁྱོད་ཀྱིས་ཡིད་ཆེས་ཀྱིས། །ཀྱེ་ཁམས་གསུམ་སེམས་ཅན་མ་ལུས་ཀུན། །ང་མེད་ཙམ་ན་ཁྱོད་ཀྱང་མེད། །ཁྱོད་མེད་པ་ཡི་དུས་ཙམ་ན། །སྟོན་པ་ང་ཡང་འབྱུང་མི་འགྱུར། །མི་རྟོག་ཆོས་ཀྱང་གསུང་མི་འགྱུར། །ཞེས་གསུངས་པས། འདི་ལྟར་སྣང་བ་སྟོང་པར་ངོ་སྤྲད་པ་ཡིན་གྱི། ཕྱིན་ཆད་གང་སྣང་གི་སྟེང་དུ་དེར་འཛིན་མ་ཞུགས་པས་བཅོས་བསླད་མེད་པར་རང་ཤར་རང་གྲོལ་དུ་ངོ་ཤེས་པར་གྱིས་ཤིག །ཅེས་སོས་དལ་ལ། རི་ལ་སོགས་པའི་ས་དང་ཆུ་དང་། མར་མེ་(༨༡)ལ་སོགས་པའི་མེ་དང་། རླུང་དང་ནམ་མཁའ་རེ་རེ་བཞིན་ངོ་སྤྲད་དེ། དེས་ནི་སྣང་སྲིད་ཐམས་ཅད་ཀུན་བྱེད་བྱང་ཆུབ་སེམས་ཀྱི་སྒོམ་པའི་རྣམ་གཞག་ཆེན་པོར་འཆར་བའི་དགོས་པ་ཡོད་དོ། །དེ་ལྟར་ངོ་སྤྲོད་པས་ད་ལྟ་ཉིད་ནས་ཆོས་ཐམས་ཅད་རང་བཞིན་རྫོགས་པ་ཆེན་པོའི་ངང་དུ་གནས་པས། སྐྱོན་ཡེ་ནས་དག་ཅིང་ཡོན་ཏན་ཕུན་སུམ་ཚོགས་པ་ཐམས་ཅད་ལྷུན་གྱིས་གྲུབ་པས། ལུས་མིར་སྣང་ཡང་དགོངས་པ་སངས་རྒྱས་ཀྱི་ཆོས་ཉིད་ཡིན་པར་ལུང་བསྟན་པ་ནི། རྣམ་གྲངས་བསྡུ་བའི་ལེའུ་ལས། འདི་ལ་མ་རྫོགས་གང་ཡང་མེད། །གཅིག་རྫོགས་གཉིས་རྫོགས་ཀུན་རྫོགས་པ། །བྱ་བ་ཕུན་སུམ་ཚོགས་པས་བདེ། །གཅིག་རྫོགས་བྱང་ཆུབ་སེམས་སུ་རྫོགས། །གཉིས་རྫོགས་སེམས་ཀྱི་བྱ་བར་རྫོགས། །གསུམ་རྫོགས་ཕུན་སུམ་ཚོགས་པར་རྫོགས། །གཅིག་ལ་རྫོགས་པའི་ལུང་འདི་ཡིས། །སངས་རྒྱས་དགོངས་པ་འདི་ལ་གནས། །ཀུན་ལ་རྫོགས་པའི་དོན་འདི་ཡིས། །ཐམས་ཅད་ཕུན་སུམ་ཚོགས་པར་བྱེད། །བྱར་མེད་འདི་ལ་གང་གནས་པ། །ལུས་འདི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་ཡིན། །འདི་ཡིས་སེམས་ཅན་དོན་བྱས་ན། །རྩོལ་སྒྲུབ་མི་དགོས་བདེ་བར་གནས། །ཞེས་པའི་དོན་བཤད་ལ། དེ་རིང་ཉིད་ནས་སངས་རྒྱས་ཀྱི་དགོངས་པ་ལ་སླེབ་བོ། །ཞེས་ལུང་བསྟན་པར་བྱའོ། །

གསུམ་པ་སྤྱོད་པས་འཕྲང་བསལ་བ་ལ་གསུམ་སྟེ། ཉོན་མོངས་རང་གྲོལ་གྱི་སྤྱོད་པ། སྣང་བ་དབང་བསྒྱུར་གྱི་སྤྱོད་པ། བརྟུལ་ཞུགས་ལམ་སློང་གི་སྤྱོད་པའོ། །

དང་པོ་ནི། བླང་དོར་མེད་པའི་ལེའུ་ལས། འདོད་པ་ལྔ་ཡང་སེམས་ཀྱིས་སྤྱོད་པར་རྟོགས། །ཞེས་པ་དང་། མི་ནུབ་རྒྱལ་མཚན་གྱི་ལེའུ་ལས་ཀྱང་། འདོད་ཆགས་ཞེ་སྡང་གཏི་མུག་ཀྱང་། །བྱང་ཆུབ་ཆེན་པོའི་ལམ་ལས་བྱུང་། །ཀུན་སྤྱོད་འདོད་ཡོན་རྣམ་ལྔ་ཡང་། །ཆོས་ཉིད་དབྱིངས་ཀྱི་རྒྱན་ཞེས་གསུངས། །ཞེས་པ་དང་། བྱར་མེད་རྫོགས་པ་བསྒོམ་དུ་མེད་པ་ལས་ཀྱང་། ཀུན་དང་མི་མཐུན་འཇིག་རྟེན་ཡོངས་ཀྱིས་སྤང་བའི་ཆོས། །ཉོན་མོངས་ལྔ་པོ་མཚམས་མེད་ལྔ་པོ་ཡང་། །རྣམ་དག་ལམ་དེར་ཞུགས་ན་མཉམ་པའི་རྒྱལ་པོ་ཐོབ། །བུད་མེད་ལ་སོགས་ཀུན་ཀྱང་སྤང་མི་བྱེད། །ཅེས་གསུངས་པས། འདི་ལ་གཉིས་ཏེ། ཉོན་མོངས་སྐྱེ་བའི་ཡུལ་འདོད་ཡོན་རྒྱན་གྱི་སྤྱོད་པ་དང་། དེ་ལ་བླང་དོར་དུ་མ་ཞེན་པ་ཉོན་མོངས་རང་གྲོལ་གྱི་སྤྱོད་པའོ། །དང་པོ་ནི། གཟུགས་སྒྲ་དྲི་རོ་རེག་བྱ་ཡིད་དུ་འོང་བ་ཅི་སྣང་ཡང་སྣང་བ་དེ་ཉིད་ཆོས་ཅན་གྱི་ངོས་ནས་རྨི་ལམ་སྒྱུ་མ་ལྟར་སྣང་སྟོང་། གྲགས་སྟོང་། དྲི་སྟོང་། རོ་སྟོང་། རེག་སྟོང་བདེན་མེད་ཀྱི་སྣང་བ་འལ་འོལ་སེང་སེང་ཁྲལ་ཁྲོལ་དུ་སྤྱད་ཅིག །ཆོས་ཉིད་ཀྱི་ངང་ནས་རང་སེམས་སྟོང་པ་གསུང་བའི་ལེའུ་ལྟར། སྣང་ཐོག་དེ་ཉིད་དུ་ཆེར་(༨༢)བལྟས། ཕྱམ་བཞག་པས་དེར་འཛིན་གང་ཡང་མེད་པའི་ཤེས་པ་གཉིས་མེད་རང་གྲོལ་དུ་འཆར་རོ། །དེ་ལྟ་བུའི་སྤྱོད་པས་སྣང་བ་ཆོས་ཉིད་ཀྱི་རྒྱན་དུ་བྱེད་པས་འདོད་ཡོན་དབྱིངས་ཀྱི་རྒྱན་ཞེས་བྱའོ། །གཉིས་པ་ནི། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་གང་སྐྱེས་ཀྱང་དེའི་རྩལ་རྫོགས་སུ་བཅུག་ནས། ལས་མ་བསགས་པའི་དུས་སྐད་ཅིག་དང་པོ་ལ་ངོས་བཟུང་། གཉིས་པ་ལ་དེ་ཐོག་ཏུ་ཆེར་བལྟས་ཏེ་ཕྱམ་བཞག་པས་དུག་ལྔ་གང་སྐྱེས་དེ་ཉིད་མ་སྤངས་རང་སར་གྲོལ་བའི་རིག་པ་བདེ་གསལ་རྣམ་པར་མི་རྟོག་པའི་ཡེ་ཤེས་ཆེན་པོར་འཆར་རོ། །དེ་ཡང་འདོད་ཆགས་བདེ་སྟོང་སོ་སོར་རྟོག་པའི་ཡེ་ཤེས། ཞེ་སྡང་གསལ་སྟོང་མེ་ལོང་ལྟ་བུའི་ཡེ་ཤེས། གཏི་མུག་སྣང་སྟོང་ཆོས་ཀྱི་དབྱིངས་ཀྱི་ཡེ་ཤེས། ང་རྒྱལ་རིག་སྟོང་མཉམ་པ་ཉིད་ཀྱི་ཡེ་ཤེས། ཕྲག་དོག་རིག་སྟོང་བྱ་བ་གྲུབ་པའི་ཡེ་ཤེས་སུ་ཤར་ཏེ། ཉན་རང་ལྟར་མ་སྤངས། བྱང་སེམས་ལྟར་མ་སྦྱངས། གསང་སྔགས་ལྟར་མ་བསྒྱུར་བར་ཉོན་མོངས་པའི་རྟོག་པ་དེ་ཉིད་རང་སར་དག་སྟེ། ཀུན་བྱེད་རང་བྱུང་རིག་པའི་རྒྱལ་པོ་ལྷུན་གྱིས་གྲུབ་པ། ཐེག་པ་ཀུན་ལས་ཁྱད་པར་འཕགས་པ་ཞེས་བྱའོ། །དེས་ནི་ནང་ཉོན་མོངས་པ་སྐྱེ་གྲོལ་ཡེ་ཤེས་སུ་ཤར་བས་ད་ལྟ་སངས་རྒྱས་ཀྱི་དགོངས་པ་ལྷུན་གྲུབ་ཆེན་པོ་ལ་རིག་པའི་དགོས་པ་ཡོད་དོ། །

གཉིས་པ་སྣང་བ་དབང་བསྒྱུར་གྱི་སྤྱོད་པ་ནི། རྣམ་དག་དབྱིངས་ཀྱི་ལེའུ་ལས། མཐའ་དང་དབུས་མེད་ཡངས་པའི་རང་བཞིན་ཤེས། །མི་ལེན་མི་སྤངས་མཉམ་པའི་རྒྱལ་པོར་གནས། །སེམས་དང་བག་ཆགས་གཉིས་མེད་འདྲེས་ཤིང་མཚུངས། །འཛིན་པས་བརྟགས་ཤིང་སྣང་བའི་ཆོས་རྣམས་ནི། །རང་གི་རྒྱན་དུ་སྣང་བས་མི་འདོར་སྤངས་མི་བྱེད། །ཅེས་པ་དང་། མི་ནུབ་རྒྱལ་མཚན་ལས། བདག་དང་གཞན་དུ་མི་བྱེད་པས། །སྒྱུ་མ་ལྷུན་གྲུབ་ཡུལ་ལ་རོལ། །ཞེས་པ་དང་། སྙིང་པོའི་དོན་ལ་གནས་པའི་ལེའུ་ལས། ཀྱེ་རིག་པའི་རྒྱལ་པོ་གསལ་བར་དབང་བསྒྱུར་བས། །སྙིང་པོ་སྐུ་ཡི་དཀྱིལ་འཁོར་བཀོད་པ་ནི། །ཇི་ལྟར་སྣང་ཞིང་སྲིད་པའི་ཆོས་རྣམས་ཀུན། །སྐྱེ་བ་མེད་པའི་ཆོས་དབྱིངས་ངང་ལ་བཀོད། །སྙིང་པོའི་དོན་ལ་བླང་དོར་མེད་པའི་ཕྱིར། །དེ་ཡང་ཀུན་བྱེད་ང་ཡི་བཀོད་པ་ཡིན། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །སྙིང་པོ་གསུང་གི་དཀྱིལ་འཁོར་བཀོད་པ་ནི། །ཇི་ལྟར་གྲགས་ཤིང་སྣང་བའི་ཆོས་རྣམས་ཀུན། །སྐྱེ་མེད་དབྱིངས་ལས་ཚིག་གི་གསུང་དུ་བཀོད། །སྙིང་པོ་བརྗོད་དུ་མེད་པའི་གསུང་ལ་འདུས། །དེ་ཡང་ཀུན་བྱེད་རྒྱལ་པོས་བཀོད་པ་ཡིན། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །སྙིང་པོ་རིག་པའི་དཀྱིལ་འཁོར་བཀོད་པ་ནི། །ཇི་ལྟར་དྲན་རིག་རྟོག་པ་ཐམས་ཅད་ཀུན། །མ་སྐྱེས་ཀུན་བྱེད་ཉིད་ཀྱི་དོན་དུ་རིག །ཀུན་བྱེད་ང་ཡི་སྐུ་གསུང་ཐུགས་ཉིད་ནི། །མ་བཅོས་རྣལ་དུ་(༨༣)བཞག་པའི་དཀྱིལ་འཁོར་གསུམ། །མ་བཀོད་དུས་གཅིག་རྫོགས་པའི་དོན་རྟོགས་པས། །ལྷུན་གྲུབ་སྙིང་པོའི་དོན་ལ་འཇུག་པར་བྱེད། །ཅེས་གསུངས་པས། གཟུགས་སྣང་། སྒྲ་སྣང་། དྲན་རིག་ཡིད་ཀྱི་རྟོག་པ་ཐམས་ཅད་སྣང་དུས་ཉིད་ནས་མ་སྐྱེས་པའི་དཀྱིལ་འཁོར་གསུམ་དུ་གནས་པའི་ཕྱིར། དེ་ཐོག་ཏུ་རྟོག་དཔྱོད་གང་ཡང་མི་བྱེད་པར་རང་བབ་གཉིས་མེད་ཆེན་པོར་སྤྱོད། དེས་ནི་སྣང་སྲིད་དཀྱིལ་འཁོར་གྱི་རང་བཞིན་དུ་རྟོགས་པས་དགག་སྒྲུབ་དང་སྤང་གཉེན་རང་སར་གྲོལ་བའི་དགོས་པ་ཡོད་དོ། །

གསུམ་པ་བརྟུལ་ཞུགས་ལམ་སློང་གི་སྤྱོད་པ་ནི། དགའ་མི་དགའ། བདེ་སྡུག །གཙང་བཙོག །འཇིགས་མི་འཇིགས། ན་མི་ན། དགྲ་གཉེན། ཆགས་སྡང་ལ་སོགས་པ་གཉིས་བཅས་དགག་སྒྲུབ་ཀྱི་ཞེན་ཡུལ་བླང་དོར་ཐམས་ཅད་ཀྱི་སྟེང་དུ་རོ་སྙོམས་ཤིང་། ཐོག་འགེལ་བཟློག་བསྒོམ་བྱ་བ་ཡིན་ཏེ། མ་གཡོས་འདོད་པ་མེད་པའི་ལེའུ་ལས། ཀྱེ་སེམས་དཔའ་ཆེན་པོ་གཅིག་ལ་གཉིས་སུ་མ་བྱེད་ཅིག །བདེ་དང་སྡུག་བསྔལ་བྱང་ཆུབ་གཅིག །སངས་རྒྱས་སེམས་ཅན་སེམས་སུ་གཅིག །སྣང་སྲིད་སྣོད་བཅུད་ཆོས་ཉིད་གཅིག །བདེན་རྫུན་གཉིས་ཀྱང་ཆོས་ཉིད་མཉམ། །བདེ་བ་མ་ལེན་སྡུག་མ་སྤོངས། །རང་བཞིན་གནས་པ་ཀུན་ཀྱང་སྒྲུབས། །བདེ་ལ་ཆགས་པ་སྡུག་བསྔལ་ཡིན། །ཀུན་བསལ་དེ་ལ་རྟོག་མེད་པས། །དེ་ནི་རང་བྱུང་ཡེ་ཤེས་ཡིན། །ཞེས་པ་དང་། བླང་དོར་མེད་པའི་ལེའུ་ལས། ཀྱེ་ཀུན་བྱེད་རྒྱལ་པོའི་སྤྱོད་པ་བསྟན་པ་ནི། །དགེ་སྡིག་བླང་དོར་གཙང་སྦྲ་ཆེ་ཆུང་ཀུན། །སྐྱེ་མེད་བྱང་ཆུབ་སེམས་སུ་ཀུན་གཅིག་པས། །བླང་དང་དོར་བ་མེད་པ་དོན་དུ་རྟོགས། །གཙང་དང་མི་གཙང་མེད་པ་ཉིད་དུ་རྟོགས། །སྤྱད་དང་མ་སྤྱད་གཉིས་སུ་མེད་པར་རྟོགས། །མཐའ་དང་དབུས་སུ་འབྱེད་པ་མེད་པར་རྟོགས། །གཞི་རྩ་མེད་པའི་བྱང་ཆུབ་སེམས་སུ་རྟོགས། །ཀྱེ་ཀུན་བྱེད་རྒྱལ་པོའི་སྤྱོད་པ་བསྟན་པ་ནི། །གང་ལྟར་སྤྱོད་པ་དེ་ལྟར་མི་འགལ་ཏེ། །བྱས་དང་མ་བྱས་གཉིས་ཀ་སྐྱེ་མེད་པ། །ཤེས་པས་གང་ལྟར་སྤྱོད་པ་སྐྱེ་མེད་དོན། །ཀྱེ་ཀུན་བྱེད་རྒྱལ་པོ་ང་ཡི་སྤྱོད་པ་ལ། །མཁའ་ལྟར་གནས་པས་གྲངས་དང་ཚད་གཟུང་མེད། །གཉིས་སུ་མེད་པས་ཡིན་མིན་ཕྱོགས་ལས་འདས། །ཀུན་བྱེད་བྱང་ཆུབ་སེམས་ཀྱི་སྤྱོད་པར་བསྟན། །འདོད་ཡོན་ལྔ་ཡང་སེམས་ཀྱི་སྤྱོད་པར་རྟོགས། །ཆགས་སྡང་ལྔ་ཡང་སེམས་ཀྱི་སྤྱོད་པར་རྟོགས། །རྒྱན་གྱི་རྒྱུ་ལྔ་སེམས་ཀྱི་སྤྱོད་པར་རྟོགས། །ཁམས་གསུམ་སྲིད་གསུམ་སེམས་ཀྱི་སྤྱོད་པར་རྟོགས། །སྐྱེ་མེད་མ་རྟོགས་པ་ཡི་སྤྱོད་པ་ནི། །རྒྱལ་བ་ཀུན་གྱི་མེས་པོ་ངས་མ་བཤད། །ཅེས་པ་དང་། མཉམ་པར་བླང་དོར་མེད་པའི་ལེའུ་ལས། ཀྱེ་ཀུན་བྱེད་རྒྱལ་པོ་བྱང་ཆུབ་སེམས་ང་ནི། །ང་ཡི་འཁོར་དུ་འདུས་པའི་ཚོགས་རྣམས་ལ། །(༨༤)བླང་དང་དོར་བའི་ཆོས་ཉིད་ངས་མི་སྟོན། །གཅིག་ལས་གཉིས་སུ་དབྱེ་བའི་ཆོས་མི་སྟོན། །རྟོག་དཔྱོད་འདས་ལ་རྟོག་དཔྱོད་བསམ་མི་བྱ། །མ་བཅོས་ཇི་བཞིན་པ་ལ་འཆོས་མི་བྱེད། །བྱ་བ་གང་དང་ཅི་སྣང་ཆོས་ཉིད་ལ། །མ་བསམ་རང་བཞིན་བཞག་པས་གྲོལ་བར་སྟོན། །ཞེས་པ་དང་། ཡང་དེ་ཉིད་ལས། ཀུན་བྱེད་རྒྱལ་པོ་ང་ཡི་སྤྱོད་པ་ནི། །མ་བཙལ་ལྷུག་པར་བཞག་པས་དོན་ཀུན་རྫོགས། །སྙིང་པོའི་དོན་དུ་འདུས་པས་བླང་དོར་མེད། །རེ་དོགས་རྣམ་པར་ཆད་པས་མྱ་ངན་འདས། །ཀུན་བྱེད་ང་ཡི་སྤྱོད་པ་གང་རྟོགས་པ། །དུས་གསུམ་སྐྱེ་མེད་ངང་དུ་མཉམ་པ་ལྟར། །འཇུག་དང་མི་འཇུག་ཚིག་ལས་ཤིན་ཏུ་འདས། །འདི་ནི་བླང་དོར་མེད་པར་ལུང་བསྟན་ཏོ། །ཞེས་གསུངས་སོ། །དེ་ལྟར་གཉིས་མེད་རང་གྲོལ་དུ་སྤྱོད་པས་སྤང་གཉེན་གྱི་མཁར་འགྱེལ། གཉེན་པོ་དྲན་པའི་མེལ་ཚེ་ཞིག །འདི་ཡིན་གྱི་ཆོས་མེད། རེ་དོགས་ཀྱི་འཕྲང་འདས། དུས་གསུམ་གཞི་མེད་ཀུན་བྱེད་རྒྱལ་པོའི་དགོངས་པ་མ་བགྲོད་ལྷུན་གྱིས་གྲུབ་པས། ཆོས་ཉིད་ཟད་པའི་ས་ལ་གཏན་སྲིད་ཟིན་པ་ཞེས་བྱའོ། །དེས་ནི་ལྟ་སྒོམ་བོགས་འབྱིན་པའི་དགོས་པ་ཡོད་དོ། །

བཞི་པ་འབྲས་བུ་རེ་དོགས་སྤང་བ་ནི། ད་ལྟར་གྱི་སེམས་ཉིད་ཡེ་གྲོལ་གཞི་རྩ་མེད་པའི་ངོ་བོ་ཉིད་ལས་གཞན་པའི་སངས་རྒྱས་ཞིག་ལོགས་ནས་བཙལ་དུ་མེད་དེ། བཅོས་སུ་མེད་པའི་ལེའུ་ལས། ཀྱེ་ཆོས་ཀྱི་སྐུ་ནི་བྱང་ཆུབ་སེམས། །བྱང་ཆུབ་སེམས་ལ་ཆོས་ཀྱི་སྐུ། །རྡུལ་ཙམ་སུས་ཀྱང་བཅོས་སུ་མེད། །དེ་བས་སངས་རྒྱས་སེམས་ལས་མེད། །ལོངས་སྤྱོད་རྫོགས་སྐུ་བྱང་ཆུབ་སེམས། །བྱང་ཆུབ་སེམས་ལས་ལོངས་སྤྱོད་རྫོགས། །སེམས་ལས་བྱུང་བའི་ཆོས་རྣམས་ལ། །ལོངས་སྤྱོད་རྫོགས་ལས་སྐུ་གཞན་མེད། །སྤྲུལ་པའི་སྐུ་ནི་བྱང་ཆུབ་སེམས། །བྱང་ཆུབ་སེམས་ནི་སྤྲུལ་པ་ལྔ། །འགྲོ་བའི་དོན་མཛད་གཞན་ན་མེད། །དུས་གསུམ་སངས་རྒྱས་ཐམས་ཅད་ཀྱང་། །བྱང་ཆུབ་སེམས་ལས་གཞན་མེད་དོ། །སྔ་རབས་འདས་པའི་སངས་རྒྱས་རྣམས། །རང་སེམས་མ་བཅོས་སྔར་མཐོང་རྟོགས། །ད་ལྟར་བཞུགས་པའི་སངས་རྒྱས་རྣམས། །མ་བཅོས་པ་ཡི་རང་སེམས་དེ། །མ་བཅོས་ཇི་བཞིན་རྟོགས་གྱུར་ཏེ། །ད་ལྟ་འགྲོ་བའི་དོན་ཡང་མཛད། །སླད་ནས་འབྱོན་པའི་སངས་རྒྱས་རྣམས། །རང་བྱུང་སེམས་ཉིད་འདི་ལ་ནི། །སྔར་མ་བཅོས་པར་ལུང་མ་བསྟན། །ད་ལྟ་ཏིང་འཛིན་སེམས་མི་འཆོས། །མ་བཅོས་ལམ་དུ་ཞུགས་ནས་བྱོན། །ཞེས་སོ། །དེས་ན་སེམས་ཉིད་བཅོས་བསླད་མེད་པའི་ངང་ན་སྐུ་དང་ཡེ་ཤེས་འདུ་འབྲལ་མེད་པར་བཞུགས་པ་ད་ལྟ་རང་ཆས་ལྷུན་གྲུབ་ཏུ་ཡོད་པ་ཡིན་ཏེ། སྦྱང་དུ་མེད་པའི་ལེའུ་ལས། ཀློང་ཆེན་སེམས་ཀྱི་གནས་འདི་ན། །མི་གནས་པ་ནི་གཅིག་ཀྱང་མེད། །ཀུན་གྱི་གནས་དང་ས་ཡིན་ཏེ། །འདུ་འབྲལ་མེད་པ་དེ་ན་བཞུགས། །དེ་ལ་སྦྱངས་ཤིང་བགྲོད་མི་(༨༥)དགོས། །ཞེས་སོ། །འོ་ན་ད་ལྟ་སངས་རྒྱས་ཡིན་ན་ས་དྲུག་རྫོགས་སམ་ཞེ་ན། ཤིན་ཏུ་ཡང་རྫོགས་པར་བཤད་དེ། དེ་ཉིད་ལས། རང་བྱུང་ཡེ་ཤེས་མ་འགག་པ་ཡི་རྟགས། །དབང་པོ་སྒོ་ལྔ་ཀུན་ཏུ་གསལ་བ་ལ། །ཀུན་ཏུ་འོད་ཀྱི་ས་ཞེས་བཏགས་པ་ཡིན། །ཡུལ་དུ་མི་རྟོག་ཆགས་པ་མེད་པ་ལ། །མ་ཆགས་པདྨ་ཅན་དུ་བཏགས་པ་ཡིན། །སྐྱེ་འཇིག་མེད་པའི་བྱང་ཆུབ་སེམས་དེ་ལ། །རྡོ་རྗེ་འཛིན་པ་ཞེས་སུ་ང་ཡིས་བཤད། །རང་གི་རང་བཞིན་ཆོས་ཉིད་དཔག་མེད་ལ། །རང་བྱུང་ཡེ་ཤེས་ཆོས་ཉིད་མཉམ་པར་བཀོད། །སྟུག་པོ་བཀོད་པའི་ས་ཞེས་བཏགས་པ་ཡིན། །བྱང་ཆུབ་སེམས་ཀྱི་རང་བཞིན་དཀྱིལ་འཁོར་དེ། །རང་ལ་གནས་པའི་ཆོས་རྣམས་ཐམས་ཅད་ལ། །ཡེ་གེ་འཁོར་ལོ་ཚོགས་ཆེན་ས་རྣམས་ཏེ། །སྐུ་གསུང་ཐུགས་ལ་སྐྱེ་དང་འཇིག་མེད་པས། །རྡོ་རྗེ་འཆང་གི་ས་ཞེས་བཤད་པ་ཡིན། །བྱང་ཆུབ་སེམས་ལ་རྒྱུ་འབྲས་གཉིས་མེད་དེ། །སེམས་ལས་བྱུང་བའི་ཆོས་རྣམས་ཐམས་ཅད་ལ། །བཟང་ངན་བླང་དོར་ཡེ་ནས་མེད་པའི་ཕྱིར། །དབྱེ་བ་མེད་པའི་ས་ཞེས་ང་ཡིས་བཤད། །ཅེས་གཅིག་ལས་སོ་སོར་དབྱེ་ན་དྲུག་ཏུ་སྣང་ཡང་དེ་དག་རང་བྱུང་ཡེ་ཤེས་ཀྱི་ས་གཅིག་ལས་གཞན་མ་ཡིན་པས་རྫོགས་པ་ཆེན་པོ་ས་གཅིག་པ་ཞེས་བྱའོ། །དེས་ན་ད་ལྟའི་སེམས་ལ་ཡེ་ནས་སྒྲིབ་པ་མེད་པས་དེ་བཞིན་ཉིད་ལས་མ་གཡོས་པས་ཀྱང་སྒོ་ལྔའི་རྣམ་ཤེས་སོ་སོར་གསལ་བ་དང་ཉོན་མོངས་པ་ལྔ་ཡེ་ཤེས་ལྔར་སོ་སོར་གསལ་བ་ཉིད་ཡེ་ཤེས་ཀྱི་རོལ་པ་ཞེས་བྱ་སྟེ། མ་བཙལ་རང་ལ་རྫོགས་པས་རེ་དོགས་བྱ་མི་དགོས་པ་ཉིད་དོ། །ཡེ་ཤེས་སྒྲིབ་པ་མེད་པའི་ལེའུ་ལས། ཀྱེ་ཀུན་བྱེད་རྒྱལ་པོ་ང་ཡི་ཡེ་ཤེས་ནི། །རྣམ་པར་མི་རྟོག་སྤྲོས་པ་ཀུན་དང་བྲལ། །རབ་ཞི་རྡུལ་མེད་མཁའ་ལྟར་དག་པ་སྟེ། །སྐྱེ་བ་མེད་པ་ཞེས་སུ་བསྟན་པ་ཡིན། །རང་བྱུང་ཡེ་ཤེས་གཅིག་ལས་མ་གཡོས་ཀྱང་། །རྣམ་པའི་ཁྱད་པར་མ་བཅོས་སོ་སོར་གསལ། །དེ་ལྟར་གང་གིས་རིག་ཅིང་རྟོགས་པ་ནི། །ཀུན་བྱེད་རྒྱལ་པོའི་སུས་སུ་ལུང་བསྟན་ཏོ། །ཞེས་སོ། །དེ་ཡང་རང་གསལ་སྤྲོས་བྲལ་གྱི་སེམས་ཉིད་གྲྭ་མ་ཆག་ཟུར་མ་ཉམས་པར་རྩོལ་མེད་གཞི་གྲོལ་དུ་རྟོགས་པ་ལས་གཞན་པའི་འབྲས་བུ་མེད་དོ། །ལྷུན་གྲུབ་བཙལ་དུ་མེད་པའི་ལེའུ་ལས། ཀྱེ་ང་ནི་མ་བཙལ་ལྷུན་གྱིས་གྲུབ་པའི་ཕྱིར། །ཇི་ལྟར་རྟོགས་པ་ཁྱོད་ལ་ལུང་བསྟན་པས། །ཁྱོད་ཀྱིས་ཆོས་ཀུན་དེ་ལྟར་རྟོགས་པར་འགྱུར། །ཡེ་ནས་རྩོལ་སྒྲུབ་མེད་པར་དབུགས་ཕྱིན་ཏོ། །ཀུན་བྱེད་རྒྱལ་པོ་ང་ཉིད་ལུང་བསྟན་ཏོ། །ཞེས་པ་དང་། ལྷུན་གྲུབ་རེ་དོགས་མེད་པའི་ལེའུ་ལས་ཀྱང་། ཀྱེ་སེམས་ཀྱི་རང་བཞིན་ལྷུན་གྱིས་གྲུབ་པའི་ཕྱིར། །གྲུབ་དང་མ་གྲུབ་གཉིས་སུ་ལུང་མི་སྟོན། །བདེ་དང་སྡུག་བསྔལ་གཉིས་སུ་རྟོག་མི་བྱ། །འཁོར་དང་མྱ་ངན་འདས་པ་རེ་དོགས་བྲལ། །ཞེས་སོ། །དེས་ན་རྒྱུ་འབྲས་ཀྱི་ཐེག་པ་བརྒྱད་ནི། རྒྱུ་འབྲས་གཉིས་(༨༦)ལ་གང་ལྟ་བ་འདུས་མ་བྱས་ལ་རྒྱབ་ཀྱིས་ཕྱོགས་པས། ད་ལྟའི་སེམས་ལས་གཞན་པའི་སངས་རྒྱས་འདོད་པ་ཡིན་ཏེ། ནམ་མཁའ་འདི་སྦྱངས་ཤིང་བསྒྱུར་བས་ད་ལྟའི་ནམ་མཁའ་འདི་ལས་གཞན་པའི་ནམ་མཁའ་རྣམ་དག་གཅིག་ཕྱི་ནས་འདོད་པ་དང་མཚུངས་སོ། །འདི་ནི་ད་ལྟ་སངས་རྒྱས་ཀྱི་ངོ་བོར་འདོད་པས། རང་གསལ་དུ་བསྒོམས་པས་ཆུའི་རྙོག་མ་དྭངས་པ་ལྟར་གློ་བུར་གྱི་ཀུན་རྟོག་སེམས་ཉིད་ཀྱི་ངང་དུ་དྭངས་པས། སྐུ་གསུམ་རང་ཆས་སུ་འཆར་བ་ཨ་ཏི་ཡོ་ག་རང་བཞིན་ལྷུན་གྱིས་གྲུབ་པའི་ཐེག་པ་ཡིན་ནོ། །

གསུམ་པ་རྗེས་སྣང་ཉམས་ཀྱི་སྐྱོང་ཐབས་ནི། བླ་མ་དམ་པའི་མན་ངག་ལས་བྱུང་བ་བཞིན་རང་གིས་ཉམས་སུ་མྱོང་བ་རྣམས་འདིར་བརྗོད་དེ། དེ་ཡང་ལྟ་བ་ཕྱོགས་བྲལ་འཛིན་མེད། སྒོམ་པ་རང་གསལ་ཤར་གྲོལ། སྤྱོད་པ་ཤུགས་འབྱུང་ཟང་ཐལ། འབྲས་བུ་རེ་དོགས་གཉིས་མེད་རྣམས་ཀྱི་དོན་ལ་གོམས་ཤིང་འདྲིས་པར་བྱེད་པ་ལ། ལྟ་བའི་གོལ་ས་སྟོང་པ་ཕྱང་ཆད་པས་དགེ་སྡིག་འཆོལ་བར་སྤྱད་ཅིང་སྙིང་རྗེ་མེད་ན། ནག་པོ་ཁ་འབྱམས་བདུད་ཀྱི་ལྟ་བ་ལ་གོལ་བས། བླ་མ་ལ་གསོལ་བ་བཏབ་པ་དང་དག་སྣང་མོས་གུས་བྱ། བྱམས་དང་སྙིང་རྗེ་བསྒོམ། ལས་འབྲས་དང་མི་རྟོག་པ་ལ་བློ་སྦྱོང་ངོ་། །དངོས་པོ་ལ་མཚན་མར་ཞེན་ནས་ལྟ་བ་གོ་ཡུལ་ཙམ་ལས་ཕྱི་ནང་གི་ཆོས་ལ་བདེན་བདེན་ཡིན་ཡིན་ངོས་བཟུང་ཅན་དུ་ཤར་ན། བདག་འཛིན་མཚན་མའི་ལྟ་བ་ལ་གོལ་བས་ཆོས་ཐམས་ཅད་བདེན་མེད་ཟང་ཐལ་ལ་བློ་སྦྱོང་། གང་སྣང་རྨི་ལམ་ལ་འཛིན་མེད་སྒྱུ་མར་བསླབ། དེ་ནས་སྣང་བ་ལ་ངོས་འཛིན་མེད་པའི་རིག་པ་རྒྱ་ཆད་ཕྱོགས་ལྷུང་མེད་པ་ཤར་དུས་དེ་ཀའི་ངང་ལ་མ་ཡེངས་པར་གསལ་སང་ངེ་བསྒོམ་མོ། །བྱིངས་ཞིང་འཐིབས་ན་རྣམ་རྟོག་ཡུལ་ལ་སྤྲོ། བསིལ་ཁང་མཐོ་ས་བསྟེན། རྩལ་སྦྱངས་ཤིང་འབད་དོ། །སྒོམ་པའི་གོལ་ས། རྣམ་རྟོག་སྣ་ཚོགས་འཕྲོ་ན་འཛིན་མེད་དུ་བློ་སྦྱངས་ཏེ། དེ་བས་ཀྱང་རྟོག་པ་མང་བར་འཕྲོ་ན་སེམས་ཅུང་ཟད་ཀྱང་ནང་དུ་མི་བཞག་པར་སྤྲོ་ལ་ངོས་བཟུང་ནས་གང་དུ་ཡང་མི་འཕྲོ་བའི་ཚེ་ན་རྟོག་མེད་མཉམ་པའི་ངང་ལ་མ་ཡེངས་པར་སེམས་ཕྱི་རོལ་སྣང་བའི་སྟེང་དུ་བཟུང་ལ་བསྒོམས་པས་གསལ་ལ་རྟོག་མེད་དུ་ཤར་བ་ན་དེ་ཉིད་རྒྱུན་བསྲིངས་ལ་བསྒོམ་མོ། །བདེ་གསལ་མི་རྟོག་པའི་རིག་པ་ལ་ཆགས་ན་དེ་ཉིད་བཤིག་ལ་རང་གི་ངོ་བོ་ལ་བརྟགས་ཤིང་ལྟ་བའི་རྩལ་སྦྱང་བྱའོ། །དེ་ནས་སྣང་བ་འཛིན་མེད་དུ་བུན་ནེ་ཤིགས་སེ་བསྒོམ་བྱ་སྒོམ་བྱེད་རྩོལ་སྒྲུབ་མེད་པས་ན་བློ་དེ་ཉིད་ཀྱི་སྟེང་དུ་རྒྱུན་བསྲིངས་ལ་གསལ་སྟོང་མི་རྟོག་པ་ལ་རང་ངོས་སྟོང་པའི་ངང་ལ་བློ་སྦྱོང་ངོ་། །དེ་ཡང་དང་པོ་དམིགས་པ་གང་ཡང་རུང་བ་ཅིག་ལ་བློ་བརྟན་པ་ཐོབ་པར་བྱེད་པ་གལ་ཆེའོ། །ཕྱིས་ནས་ཐམས་ཅད་རོ་མཉམ་གཅིག་ཏུ་འཆར་བར་འདུག་གོ། །སེམས་གནས་ཐོག་ནས་འཕྲོ། འཕྲོ་ཐོག་ན་གནས། གནས་འཕྲོ་(༨༧)གཉིས་མེད་དུ་ཤར་བ་ནི་གོམས་པ་ཆུང་འབྲིང་ཆེ་གསུམ་མོ། །དེ་ནས་ད་ལྟར་གྱི་སྣང་བ་ལ་བདེན་ཞེན་མེད་པའི་ཉམས་འཆར་རོ། །འདིའི་དུས་སུ་སྣང་བ་ཡད་ཡུད། གཏམ་ཡང་ངེས་མེད་རྨི་ལམ་ཡང་དགེ་བ་འབའ་ཞིག་གོ། །དེ་ནས་སྣང་བ་ཡང་འལ་འོལ། གཏམ་ཡང་འབྲེལ་མེད། རྨི་ལམ་ཡང་ཟིན་ལ་ཉིན་དུས་ཅི་བྱེད་པ་རྨིའོ། །དེ་ནས་སྣང་བ་ཡངས་སང་ངེ་། གཏམ་ཡང་ངེས་མེད། རྨི་ལམ་ཡང་འོད་གསལ་དུ་གྲོལ་ཏེ། དེའི་ཚེ་རིག་པ་གཏད་མེད་འབའ་ཞིག་ཏུ་འཆར་རོ། །དེ་ལྟར་རྨི་ལམ་རྒྱུན་ཆད་ནས་བག་ཆགས་ཀྱི་འཁྲུལ་པ་རང་ཞིག་ལ་སོང་སྟེ། སེམས་ཉིད་ནམ་མཁའ་ལྟ་བུའི་རང་བཞིན་དབྱིངས་སྐྱེ་བ་མེད་པ་དང་རོ་མཉམ་གཅིག་ཏུ་གྱུར་པས་གདོད་མའི་ཀུན་བྱེད་ཡེ་ཤེས་སྒྲིབ་པ་མི་མངའ་བའི་གཞི་ལ་བྱང་ཆུབ་པ་ཞེས་བྱའོ། །དེ་ཡང་སེམས་ཉིད་སྤྲོས་པ་དང་བྲལ་བའི་ངང་དུ་བསྒོམས་པས་ཆོས་སྐུ་མཐར་ཐུག་གི་དོན་ལྷུན་གྱིས་གྲུབ་པས་ན། ལོངས་སྐུ་དང་སྤྲུལ་སྐུ་དེའི་ངང་ལས་ལྷུན་གྲུབ་ཏུ་འཆར་བ་ནི། རང་བྱུང་ཡེ་ཤེས་ཀྱི་ཆེ་བའོ། །སྤྱོད་པའི་གོལ་ས་ཐ་མལ་རང་གིས་གཉིས་འཛིན་མཚན་མ་ལ་ཞེན་པ་སྟེ། གང་བྱུང་ཡང་ལྟ་སྒོམ་གྱི་དོན་ལས་ཅུང་ཟད་ཀྱང་མ་ཡེངས་པར་སྤྱོད་པས་ཤུགས་འབྱུང་ཟང་ཐལ་གྱི་སྤྱོད་པ་ཚོགས་དྲུག་ལྷུག་པའི་རང་བཞིན་ཅན་འབྱུང་ངོ་། །དེ་ཉིད་ཀྱི་དོན་ལས་མི་འགལ་བར་སྤྱོད་དོ། །འབྲས་བུའི་གོལ་ས་རེ་དོགས་གཉིས་སུ་འཛིན་པའི་རྟོག་པ་འབྱུང་སྟེ། རང་བྱུང་གི་ཡེ་ཤེས་འདི་ཉིད་སངས་རྒྱས་ཡིན་པར་དོན་ལ་ཡིད་ཆེས་པས། ཐེ་ཚོམ་ཅན་དུས་ཕྱིས་ཐོབ་ཏུ་རེ་བའི་གོལ་ས་ལས་གྲོལ་ལོ། །

དོན་གསུམ་པ་གསང་བའི་རྒྱས་གདབ་པ་ནི། སྣོད་མིན་ལ་གསང་ཞིང་སྣོད་ལྡན་ལ་ཡང་ལྔ་ལས་མང་ན་མཁའ་འགྲོའི་བཀའ་ཆད་འབྱུང་བས་རབ་ཏུ་གསང་ངོ་། །མ་གསང་ན་གཉིས་ཀ་ལ་བར་ཆད་དང་སྒྲོ་སྐུར་འབྱུང་ཞིང་སྙིང་པོའི་བསྟན་པ་ནུབ་པར་འགྱུར་ཏེ། བསྟན་པ་གང་ལ་བཞག་པའི་ལེའུ་ལས། སྙིང་པོའི་དོན་ལ་བླང་དོར་མི་གནས་ཀྱང་། །མི་མ་ཡིན་དང་འབྱུང་པོས་བར་གཅོད་ཅིང་། །མཁའ་འགྲོ་གྲུབ་པ་ཅན་གྱིས་གཉིས་ཀ་ལ། །དུས་མིན་འཆི་དང་འཇིགས་པའི་དབང་གྱུར་ནས། །སྒྲོ་སྐུར་དབང་གིས་སྙིང་པོའི་ཐེག་པ་སྣུབ། །དེ་བས་རིགས་ངན་གང་ཟག་ལ་གསང་བྱ། །ཞེས་གསུངས་སོ། །དེ་ལྟར་སྣོད་མིན་ལ་གསང་ཞིང་། །སྐལ་ལྡན་ལ་བསྟན་པས་མཆོག་གི་དངོས་གྲུབ་འགྲུབ་བོ། །

དེ་ལྟར་ཀུན་བྱེད་རྒྱལ་པོའི་དོན་ཁྲིད་འདི། །བློ་བཟང་སློབ་མས་ནན་གྱིས་བསྐུལ་བའི་ངོར། །གངས་རི་ཐོད་དཀར་མགུལ་དུ་ལེགས་པར་བཀོད། །དགེ་བས་འགྲོ་ཀུན་ཀུན་བྱེད་ཉིད་གྱུར་ཅིག །གང་བློ་མཁའ་ལྟར་ཡངས་ཤིང་རབ་ཞི་ཡང་། །དེ་བློ་ཅུང་ཟད་མི་རྟོགས་ལོག་པར་རྟོགས། །ཉན་བློ་མུན་པའི་རང་བཞིན་འདི་མཐོང་ནས། །འཕགས་བློའི་ཐུགས་རྗེས་ཟིན་པའི་གོ་སྐབས་དཀའ། །དེང་སང་བདག་ཅག་སྲིད་པའི་མཚོར་འཁྱམས་ཏེ། །གཏི་མུག་རང་བཞིན་(༨༨)སྒྲིབ་པའི་དྲྭ་བས་གཡོགས། །ཆོས་ཚུལ་རིན་ཆེན་མིག་ཐུར་དབྱེ་བྱས་ཀྱང་། །ད་དུས་སྙིང་པོའི་དེ་ཉིད་མཐོང་དུས་མེད། །ཀྱེ་མ་སེམས་ཉིད་རིན་ཆེན་ནོར་བུ་མཆོག །སྐལ་མང་གཞན་དུ་སྟོར་བ་འདིར་སྙེད་ཀྱང་། །ལེན་པར་མི་བྱེད་སྤྲོས་པའི་རླུང་གིས་དཀྲུགས། །ཉེ་དུ་འཁོར་བའི་གནས་ལས་ཐར་དུས་མེད། །གང་ན་གནས་རྣམས་བྱང་ཆུབ་དེ་འདོད་ཀྱང་། །དབེན་པའི་སེམས་ལ་དེ་ཉིད་མཐོང་དུས་མེད། །འདིར་འབད་ཕྱི་དུས་རེ་བའི་བསམ་པས་བསླུས། །ཏིང་འཛིན་ལས་རུང་ཙམ་ཞིག་འདིར་ཡོད་དམ། །བདག་གཞན་དོན་མེད་འཇིག་རྟེན་གཡེང་བའི་མཚོར། །བསྐལ་མང་ཞིག་ཏུ་ལྷུང་བས་ཐར་དུས་མེད། །དེ་ལས་སྐྱོབ་པར་བྱེད་པ་སུ་ཞིག་ཡོད། །འདི་ལྟར་བསམ་པས་མི་བཟོད་སྐྱོ་བ་འཕེལ། །ཟབ་མོའི་ཆོས་ཚུལ་བརྒལ་དཀའ་རིན་ཆེན་གྲུ། །མངོན་སུམ་སྙིང་པོའི་སེམས་ཉིད་འདིར་བརྟེན་ནས། །མི་ཡི་སྲིད་པ་དོན་དང་ལྡན་པར་མཛོད། །ནམ་ཕུགས་གཏན་གྱི་བདེ་བ་རྙེད་པར་འགྱུར། །བདག་གིས་འདི་ན་སྲིད་པའི་གྲོལ་བ་ལ། །སྙིང་རྗེས་ཤས་ཙམ་སྦྱིན་པ་མ་གཏོགས་པ། །དེ་ཉིད་མངོན་སུམ་འདྲེན་པར་ནུས་མེད་པས། །གཅིག་པུར་ནགས་ཀྱི་ནང་དུ་གནས་པ་ཡིན། །ཆུ་གཙང་ལོ་མ་མེ་ཏོག་འབྲས་མང་ཞིང་། །སྦ་དང་འཁྲི་ཤིང་འོད་མའི་ར་བས་བསྐོར། །སྨྱུག་མའི་བསིལ་ཁང་ཡིད་འོང་ཉམས་དགའ་བར། །བདག་བློ་ཞི་བའི་ཏིང་འཛིན་འགྲུབ་པར་ཤོག །དེར་ནི་འདྲེ་དང་སྐྱེ་བོས་མི་མཐོང་ཞིང་། །ཆུ་གཙང་དཀའ་ཐུབ་ཟས་ཙམ་དེས་འཚོ་བས། །བླ་མའི་མན་ངག་བདུད་རྩིའི་དོན་བསྒོམས་ཏེ། །སྲོག་དང་བཅས་པའི་ལུས་འདི་འདོར་བར་ཤོག །དེ་ཡང་འཆི་ཁའི་འོད་གསལ་ཟིན་པ་དང་། །བར་དོའི་འོད་གསལ་གདོད་མའི་སར་གྲོལ་ཏེ། །སྐུ་དང་ཡེ་ཤེས་འདུ་འབྲལ་མེད་པ་ཡིས། །འགྲོ་བའི་དོན་གཉིས་ལྷུན་གྱིས་གྲུབ་པར་ཤོག །བྱང་ཆུབ་ཀྱི་སེམས་ཀུན་བྱེད་རྒྱལ་པོའི་དོན་ཁྲིད་རིན་ཆེན་གྲུ་བོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས། སློབ་མ་དམ་པས་བསྐུལ་བའི་ངོར། ལོ་ཙཱ་བ་ཆེན་པོ་བཻ་རོ་ཙ་ནའི་སེམས་ལུང་རིན་ཆེན་སྒྲོན་མེའི་ལུང་བཞིན་བཀོད་པ་རྫོགས་སོ།། །།

དཔལ་སྔགས་ཀྱི་བདག་མོ་དང་། གཟའི་དགེ་བསྙེན་ཆེན་པོ་རཱ་ཧུ་ལ་དང་། དམ་ཅན་རྡོ་རྗེ་ལེགས་པས་བཀའ་འདི་སྲུངས་ཤིག །ས་མ་ཡ། དགེའོ།། །།

རྒྱུད་དོན་འོ་མའི་རྒྱ་མཚོ་བསྲུབ་པ་ལས། །ཟབ་མོའི་མན་ངག་ཉི་མ་གཞོན་ནུའི་དཔྱིད། །སྐལ་བཟང་བློ་ཡི་པདྨོ་རྒྱས་པའི་གཉེན། །རང་གྲོལ་སྐོར་གསུམ་ལེགས་པར་བཤད་པའི་གཞུང་། །ཆོས་སྦྱིན་མི་ཟད་སྤར་གྱི་གཏེར་ཆེན་པོ། །དགེ་ལེགས་འདོད་པ་འཇོ་བའི་རང་བཞིན་ཅན། །འགྲོ་འདུལ་དཔའ་བོ་རྡོ་རྗེའི་ཐུགས་བསྐྱེད་ཀྱིས། །བསྒྲུབས་ལས་བྱུང་བའི་རབ་དཀར་དགེ་བ་ཡིས། །སྲིད་གསུམ་འགྲོ་བའི་ཚོགས་རྣམས་མ་ལུས་པ། །གདོད་མའི་ས་ལ་གཏན་སྲིད་ཟིན་པར་ཤོག །ཅེས་རྗེ་བླ་མ་མཆོག་གི་བཀའ་ཡི་བསྐུལ་ངོར་གུས་འབངས་ཐུབ་བསྟན་སྙན་གྲགས་པས་སྦྱར་བ་འགྲོ་ཀུན་རིག་འཛིན་བླ་མའི་རྗེས་སུ་འཛིན་པར་གྱུར་ཅིག །སརྦ་མངྒ་ལམ།། །།