གདམས་ངག་མཛོད་པོད་གསུམ་པ།
ཐེག་པ་ཆེན་པོའི་བློ་སྦྱོང་གི་རྩ་ཚིག
― LT12_Page_214A ―
[མ་དཔེ་གཟིགས་ན་འདིར་གནོན།]
ཐེག་པ་ཆེན་པོའི་བློ་སྦྱོང་གི་རྩ་ཚིག་བཞུགས་སོ། །དཔལ་བཀྲ་ཤིས་རིན་པོ་ཆེ་མྱུར་དུ་བདེ་བ་ཆེན་པོ་དང་ལྡན་པར་མཛད་པ་དོན་ཐམས་ཅད་གྲུབ་པའི་རྒྱལ་པོ་ལ་ཕྱག་འཚལ་ལོ། །དང་པོ་སྔོན་འགྲོ་དག་ལ་བསླབ། །དངོས་གཞི་གཏོང་ལེན་སྤེལ་མར་སྦྱང༌། །ཡུལ་གསུམ་དུག་གསུམ་དགེ་རྩ་གསུམ། །རྗེས་ཀྱི་མན་ངག་མདོར་བསྡུས་པའོ། །ལེན་པའི་གོ་རིམ་རང་ནས་བརྩམ། །དེ་གཉིས་རླུང་ལ་བསྐྱོན་པར་བྱ། །མན་ངག་སྙིང་པོ་མདོར་བསྡུས་པའོ། །སྤྱོད་ལམ་ཀུན་ཏུ་ཚིག་གིས་སྦྱོང༌། །འཕྲལ་ལ་གང་འདུག་བསྒོམ་དུ་སྦྱར། །གཉིས་པོས་ཚང་ན་ཐམས་ཅད་བླང༌། །བཀོལ་པ་རྣམས་ལ་རྟག་ཏུ་བསྒོམ། །ལེ་ལེན་ཐམས་ཅད་གཅིག་ལ་བདའ། །ཀུན་ལ་བཀའ་དྲིན་ཆེ་བར་སྒོམས། །དཀའ་བ་གསུམ་ལ་བསླབ་པར་བྱ། །ཐོག་མཐའ་གཉིས་ལ་བྱ་བ་གཉིས། །ཉམས་པ་མེད་པ་རྣམ་གསུམ་སྒོམས། །སྤྱི་དོན་གསུམ་ལ་རྟག་ཏུ་བསླབ། །འདུན་པ་བསྒྱུར་ལ་རང་སོར་བཞག །རྒྱུ་ཡི་གཙོ་བོ་རྣམ་གསུམ་བླང༌། །སྟོབས་ལྔ་དག་ལ་སྤྱད་པར་བྱ། །ཆོས་ཀུན་དགོངས་པ་གཅིག་ཏུ་འདུས། །དཔང་པོ་གཉིས་ཀྱི་གཙོ་བོ་བཟུང༌། །ཡིད་བདེ་འབའ་ཞིག་རྒྱུན་དུ་བརྟེན། །ཡེངས་ཀྱང་ཐུབ་ན་འབྱོངས་པ་ཡིན། །ཤག་ངན་མ་དགོད། ཡུས་མ་སྒྲོམས། ཀོ་ལོང་མ་སྡོམས། །འོར་ཆེ་མ་འདོད། །ཡུད་ཙམ་པ་མི་བྱ། །འཕྲང་མ་དགུག །མཛོ་ཁལ་གླང་ལ་མ་བྱོ། མགྱོགས་ཀྱི་རྩེ་མ་གཏད། གཞུང་བཟང་པོ་མ་བརྟེན། གོ་ལོག་མི་བྱ། རེས་འཇོག་མི་བྱ། གཏོ་ལོག་མི་བྱ། རྟོག་དཔྱོད་གཉིས་ཀྱིས་ཐར་བར་བྱ། དོལ་ཆོད་དུ་བྱ། འབྲལ་མེད་གསུམ་དང་ལྡན་པར་བྱ། །རྣལ་འབྱོར་ཐམས་ཅད་གཅིག་གིས་བྱ། །ལོག་ན་དེ་ཉིད་གཉེན་པོར་སྒོམས། གཉིས་པོ་གང་བྱུང་བཟོད་པར་བྱ། །ཡན་ལག་ཉམས་པ་བརྗོད་མི་བྱ། །
― LT12_Page_214B ―
[མ་དཔེ་གཟིགས་ན་འདིར་གནོན།]
གཞན་ཕྱོགས་གང་ཡང་མི་བསམ་མོ། །ལྷ་བདུད་དུ་མི་དབབ། སྐྱིད་ཀྱི་ཡན་ལག་ཏུ་སྡུག་མ་ཚོལ། རྐྱེན་གཞན་དག་ལ་ལྟོས་མི་བྱ། གཙོ་བོ་ངོས་བཟུང༌། འབྲས་བུར་རེ་བ་ཐམས་ཅད་སྤང༌། དུག་ཅན་གྱི་ཟས་སྤང༌། གནད་ནས་མི་བསྐུལ། སྙིགས་མ་ལྔ་པོ་བདོ་བ་འདི། །བྱང་ཆུབ་ལམ་དུ་སྒྱུར་བ་ཡིན། །བརྟན་པ་ཐོབ་ནས་གསང་བ་བསྟན། །མན་ངག་སྙིང་པོ་དམ་པ་འདི། །དམ་པ་དག་ལས་བརྒྱུད་པ་ཡིན། །རྩ་བའི་ཚིག་གོ །སརྦ་མངྒ་ལམ།། །།
| 
