གདམས་ངག་མཛོད་པོད་གསུམ་པ།
བྱང་ཆུབ་ལམ་གྱི་སྒྲོན་མའི་འགྲེལ་པ་སྙིང་པོར་བསྡུས་པ་བྱང་ཆུབ་ལམ་གྱི་སྣང་བ་རབ་ཏུ་གསལ་བ།
བྱང་ཆུབ་ལམ་གྱི་སྒྲོན་མའི་འགྲེལ་པ་སྙིང་པོར་བསྡུས་པ་བྱང་ཆུབ་ལམ་གྱི་སྣང་བ་རབ་ཏུ་གསལ་བ་ཞེས་བྱ་བ་བཞུགས་སོ།། །།
བྱང་ཆུབ་ལམ་གྱི་སྒྲོན་མའི་འགྲེལ་པ་སྙིང་པོར་བསྡུས་པ་བྱང་ཆུབ་ལམ་གྱི་སྣང་བ་རབ་ཏུ་གསལ་བ་ཞེས་བྱ་བ། བླ་མ་ཤཱཀྱའི་རྒྱལ་པོའི་ཞབས་ལ་གུས་པ་ཆེན་པོས་ཕྱག་འཚལ་ལོ། །བསོད་ནམས་བརྒྱ་ལྡན་མཚན་གྱི་མེ་ཏོག་དཔེ་བྱད་མཛེས་པའི་ཟེའུ་འབྲུ་ཆགས། །ཡན་ལག་དྲུག་ཅུའི་དབྱངས་ཀྱི་རྔ་སྒྲས་རིགས་གསུམ་གདུལ་བྱར་ཐར་ལམ་སྟོན། །ཡེ་ཤེས་ནམ་མཁའི་མེ་ལོང་ངོས་སུ་ཤེས་བྱའི་གཟུགས་བརྙན་མ་འདྲེས་གསལ། །བདག་ཅག་སྟོན་མཆོག་བཀའ་དྲིན་མཉམ་མེད་སྙིང་ནས་དྲན་ནོ་ཐུགས་རྗེས་སྐྱོངས། །སེམས་མཆོག་བསྐྱེད་ནས་རྒྱུན་གྱི་མཐའ་བར་ལམ་ཞུགས་ས་ལ་གནས་རྣམས་དང༌། །དེ་དག་གང་ལས་འབྱུང་བའི་གནས་གྱུར་སེམས་ཀྱི་དམ་པ་རིན་ཆེན་ཏེ། །དེ་ཉིད་སྟོན་བྱེད་དགེ་བ་གསུམ་ལྡན་ལེགས་གསུང་ཉི་ཟླའི་དཀྱིལ་འཁོར་ལ། །དད་ཅིང་མོས་པའི་ཡིད་ཀྱི་འདབ་བརྒྱ་ཡང་སྲིད་ཀུན་ཏུ་གྲོལ་གྱུར་ཅིག །མཐའ་ཡས་སྒྱུ་འཕྲུལ་ཁ་བ་ཅན་ལྗོངས་སུ། །ཐར་ལམ་མ་ནོར་སྟོན་མཛད་རྒྱལ་བའི་སྲས། །ས་གསུམ་གྲགས་པའི་རྒྱལ་མཚན་མངོན་མཐོ་བ། །མགོན་པོ་ཨ་ཏི་ཤ་ལ་ཕྱག་བགྱིའོ། །གང་དེའི་བརྒྱུད་འཛིན་བཀའ་རྣམས་གདམས་ངག་ཏུ། །སྟོན་པའི་རང་ལུགས་གསར་རྙིང་མུ་ཏིག་ཕྲེང༌། །རྣམ་ཐར་གསེར་གྱི་སྐུད་པར་བརྒྱུས་དེ་རྣམས། །ཡིད་ཆེས་དད་པས་གཙུག་གི་རྒྱན་ཏུ་བཅིངས། །ཐོས་པ་ཙམ་གྱིས་སྲིད་ལས་ངེས་པར་འབྱིན། །ཉམས་སུ་བླངས་པས་གཏན་
གྱི་འདུན་མ་འགྲུབ། །དྲི་མེད་བཻཌཱུརྻ་མཚུངས་རྣམ་དག་གཞུང༌། །གངས་ཅན་སྐྱེ་དགུའི་སྤྱི་ནོར་འདི་ཀོ་རྨང༌། །ཡོངས་གྲགས་ཉི་ཟླ་ལྟ་བུའི་བཀའ་སྲོལ་ཉིད། །དམ་པ་དུ་མས་ཤིན་ཏུ་གསལ་མཛད་མོད། །རང་མཉམ་བློ་གྲོས་བུམ་ཆུང་འགེངས་སླ་བའི། །ཚིག་འགྲེལ་བདུད་རྩིའི་ཉིང་ཁུ་ཅུང་ཟད་སྤེལ། །འདིར་རྒྱལ་བའི་གསུང་རབ་ཐམས་ཅད་ཀྱི་གནད་བསྡུས་པ། ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ་རྣམ་པ་ཐམས་ཅད་མཁྱེན་པའི་སར་འགྲོ་བའི་སྐྱེ་བོ་མཆོག་གི་ཆོས་ལུགས། སྐྱེས་བུ་གསུམ་གྱིས་ཉམས་སུ་བླང་བའི་རིམ་པ་ཐམས་ཅད་མ་ཚང་བ་མེད་པར་བསྡུས་པ། བྱང་ཆུབ་ལམ་གྱི་སྒྲོན་མ་འཆད་པ་ལ་གཉིས། བཤད་བྱའི་ཡན་ལག་དང༌། གདམས་པ་དངོས་ཀྱི་དོན་ནོ། །དང་པོ་ནི། བི་ཀྲ་མ་ལ་ཤཱི་ལའི་མཁས་པ་རྣམས་ཀྱིས། ཆོས་ཁུངས་བཙུན་པར་བསྟན་པའི་ཕྱིར་མཛད་པ་པོའི་ཆེ་བ་བསྟན་པ། གདམས་ངག་ལ་གུས་པ་བསྐྱེད་པའི་ཕྱིར་ཆོས་ཀྱི་ཆེ་བ་བསྟན་པ། ཆེ་བ་གཉིས་དང་ལྡན་པའི་ཆོས་ལ་ཉན་བཤད་ཇི་ལྟར་བྱ་བ་དང་གསུམ་སྔོན་དུ་གལ་ཆེ་བར་བཞེད་པ་ལྟར་འདིར་ཡང་ཅུང་ཟད་བཤད་ན། དང་པོ་གཞུང་འདི་མཛད་པ་པོ་ནི། བསྐལ་པ་བཟང་པོའི་བྱང་ཆུབ་སེམས་དཔའ་བསམ་བཞིན་དུ་ཟ་ཧོར་གྱི་ཡུལ་དུ་རྒྱལ་རིགས་ཆེན་པོར་སྐུ་འཁྲུངས་ཤིང༌། སྡེ་སྣོད་གསུམ་མང་དུ་མཁྱེན་པ་ལུང་གི་ཡོན་ཏན་དང༌། དེ་ཚུལ་བཞིན་དུ་བསྒྲུབས་པས་རྟོགས་པའི་ཡོན་ཏན་
མཐའ་དག་བརྙེས་ནས། རྡོ་རྗེ་གདན་བྱང་ཆུབ་ཆེན་པོའི་ཕོ་བྲང་དུ་མུ་སྟེགས་ཀྱི་སྨྲ་བ་ངན་པ་ལན་གསུམ་དུ་ཆོས་ཀྱིས་ཕམ་པར་མཛད་པ་སོགས་རྒྱ་བོད་གཉིས་སུ་སངས་རྒྱས་ཀྱི་བསྟན་པ་ལ་བྱ་བ་རྒྱ་ཆེན་པོ་མཛད་ཅིང༌། ཁྱད་པར་བོད་དུ་ཕེབས་ནས་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་མཐའ་ཡས་པ་བསྐོར་ཞིང༌། གཞུང་འདི་ཉིད་མཛད་པ་ལ་སོགས་པའི་སྒོ་ནས་རྒྱལ་བའི་བསྟན་པའི་སྲོལ་ནུབ་པ་རྣམས་གསར་དུ་བཙུགས། སྲོལ་ཅུང་ཟད་ཡོད་པ་རྣམས་གསལ་བར་མཛད་པས་ཀུན་ཀྱང་མངོན་མཐོ་དང་ངེས་ལེགས་ཀྱི་ལམ་མ་ནོར་བ་ལ་དངོས་དང་བརྒྱུད་པའི་སྒོ་ནས་འཁྲིད་པར་མཛད་པའི་པཎྜི་ཏ་ཆེན་པོ་ཇོ་བོ་རྗེ་དཔལ་ལྡན་ཨ་ཏི་ཤ་ཞེས་བྱ་བ་སྟེ། ནག་ཚོ་ལོ་ཙཱ་བའི་བསྡོད་པ་བརྒྱད་ཅུ་པ་ལས། ཇོ་བོ་བོད་དུ་མ་བྱོན་ན། །ཐམས་ཅད་ལོང་བ་བཞིན་དུ་གྱུར། །མཁྱེན་པ་རྒྱས་པ་ཁྱོད་བྱོན་པས། །བོད་དུ་ཡེ་ཤེས་ཉི་མ་ཤར། །ཞེས་གསུངས་པ་ལྟར་རོ། །གཉིས་པ་ཆོས་ཀྱི་ཆེ་བ་ནི། ས་གསུམ་གྱི་སྒྲོན་མེ་གཅིག་པུ་ཐུབ་པའི་གསུང་རབ་ཐམས་ཅད་ཀྱི་བཅུད་བསྡུས་པ། ཤིང་རྟ་ཆེན་པོ་གཉིས་ཀྱི་ལམ་སྲོལ། བརྒྱུད་པའི་ཆུ་བོ་གསུམ་འདྲེས་ཀྱི་མན་ངག །མངོན་མཐོ་དང་ངེས་ལེགས་ཀྱི་ལམ་ཆེན། མདོ་དང་དགོངས་འགྲེལ་མཐའ་དག་གི་ལྡེའུ་མིག །རྒྱ་བོད་ཀྱི་མཁས་གྲུབ་ཐམས་ཅད་ཀྱི་གཤེགས་ཤུལ། སྐྱེས་བུ་གསུམ་གྱིས་ཉམས་སུ་བླང་བྱ་མ་ཚང་བ་མེད་པར་སྟོན་པའི་གཞུང་བྱང་ཆུབ་ལམ་གྱི་སྒྲོན་མ་ཞེས་བྱ་བ་སྟེ། མདོ་སྔགས་གཉིས་ཀའི་གནད་བསྡུས་པས་བརྗོད་བྱ་ཡོངས་སུ་རྫོགས་པ་དང༌། སེམས་ཅན་འདུལ་བའི་རིམ་པ་གཙོ་བོར་སྟོན་པས་ལག་ཏུ་བླང་བདེ་བ་དང༌། ཤིང་རྟ་ཆེན་པོ་གཉིས་ཀྱི་ལུགས་ལ་མཁས་པའི་བླ་མ་གཉིས་ཀྱི་གདམས་པས་བརྒྱན་པས་ལུགས་གཞན་ལས་ཁྱད་པར་དུ་འཕགས་པ་ཡིན་པའི་ཕྱིར་རོ། །གསུམ་པ་ཆེ་བ་གཉིས་དང་ལྡན་པའི་ཆོས་ལ་ཉན་བཤད་ཇི་ལྟར་བྱ་བའི་ཚུལ་ནི། ཉན་པའི་ཚུལ། བཤད་པའི་ཚུལ། མཇུག་ཏུ་ཐུན་མོང་དུ་ཇི་ལྟར་བྱ་བའི་ཚུལ་
རྣམས་ཏེ་རྒྱས་པ་བྱང་ཆུབ་ལམ་གྱི་རིམ་པའི་ཁྲིད་ཡིག་རྣམས་ལས་གསུངས་པ་ལྟར་ཤེས་པར་བྱའོ། །གཉིས་པ་གདམས་པ་དངོས་ཀྱི་དོན་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན་ནོ། །དང་པོ་ནི། རྒྱ་གར་འཕགས་པའི་ཡུལ་ན་སྐད་རིགས་ཆེན་པོ་བཞི་ཡོད་པ་ལས། ལེགས་སྦྱར་གྱི་སྐད་དུ། གཞུང་འདིའི་མཚན་ལ་བོདྷི་པ་ཐཱ་པྲ་དཱི་པ་ཞེས་པ། བོད་ཀྱི་སྐད་དུ། བྱང་ཆུབ་ལམ་གྱི་སྒྲོན་མ་ཞེས་བྱ་བར་བསྒྱུར་ལ། དེ་ཡང་བོདྷི་ནི་བྱང་ཆུབ། པ་ཐཱ་ནི་ལམ། པྲ་དི་པ་ནི་སྒྲོན་མ་ཞེས་བྱ་བའོ། །དེ་ལ་སྤང་རྟོགས་མཐར་ཕྱིན་པའི་བདག་ཉིད་ཅན་གྱི་སངས་རྒྱས་ཀྱི་ཡེ་ཤེས་ནི་སྒྲིབ་གཉིས་བག་ཆགས་དང་བཅས་པ་མ་ལུས་པ་བྱང་ཞིང༌། ཇི་ལྟ་ཇི་སྙེད་ཀྱི་ཆོས་ཐམས་ཅད་མ་ལུས་པ་ཆུབ་པས་བྱང་ཆུབ་དང༌། དེར་བགྲོད་པའི་ལམ་གྱི་གེགས་མ་རྟོགས་པ་དང༌། ལོག་པར་རྟོགས་པ་དང༌། ཐེ་ཚོམ་གྱི་མུན་པ་མ་ལུས་པ་བསལ་ནས། ས་བཅུ་ལམ་ལྔའི་རང་བཞིན་གསལ་བར་བྱེད་པའི་བསྟན་བཅོས་ཡིན་པས་སྒྲོན་མ་ཞེས་བྱའོ། །དེ་ལྟར་བསྟན་བཅོས་བསྒྱུར་བའི་ཐོག་མར་རྒྱ་སྐད་སྨོས་པ་ནི། ཆོས་ཁུངས་བཙུན་པར་ཤེས་པ་དང༌། ལོ་པཎ་རྒྱལ་བློན་རྣམས་ལ་བྱས་ཤེས་དྲིན་གཟོ་སྐྱེ་བ་དང༌། སཾ་སྐྲྀ་ཏའི་སྐད་ལ་བག་ཆགས་བཞག་པ་སོགས་ཀྱི་ཆེད་ཡིན་ནོ། །གཉིས་པ་འགྱུར་ཕྱག་ནི། ལོ་ཙཱ་བས་འགྱུར་མཛད་པའི་སྔ་ལོགས་སུ་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཞེས་བསྟན་བཅོས་འདི་སྤྱིར་རྒྱལ་བའི་བཀའ་མཐའ་དག་གི་དགོངས་འགྲེལ་ཡིན་ཀྱང་གཙོ་བོར་ཐེག་པ་ཆེན་པོའི་མངོན་པར་ཤེས་པ་དང༌། འགྱུར་མཐར་ཕྱིན་པ་སོགས་ཀྱི་ཆེད་དུ་བཀོད་པའོ། །གསུམ་པ་གཞུང་གི་དོན་ལ་གསུམ། མཆོད་པར་བརྗོད་ཅིང་བཤད་པར་དམ་བཅའ་བ། གཞུང་དངོས་བཤད་པ། རྒྱུ་གང་ལ་བརྟེན་ནས་བརྩམས་པའོ། །དང་པོ་ནི། བསྟན་བཅོས་རྩོམ་པའི་ཐོག་
མར་གང་ལ་ཕྱག་བྱ་བའི་ཡུལ། ཕྱོགས་བཅུ་དུས་གསུམ་གྱི་སངས་རྒྱས་རྒྱུ་སྡིག་པའི་ཆོས་བཅོམ་ཞིང༌། སྡིག་འབྲས་བདུད་ཀྱི་གཡུལ་ལས་རྣམ་པར་རྒྱལ་བ་ཐམས་ཅད་པ་དག་དང༌། དེའི་ཆོས་ཏེ་རྒྱལ་བ་དེ་རྣམས་ཀྱིས་གསུངས་པའི་ཆོས་གསུང་རབ་ལུང་གི་ཚོགས་དང༌། དེ་ཉམས་སུ་ལེན་པ་སྒྲུབ་པའི་ཆོས་དང༌། དེ་མངོན་དུ་གྱུར་པ་རྟོགས་པའི་ཆོས་རྣམས་དང༌། སྐྱབས་གནས་དང༌། དགེ་བ་ལ་ཤེས་ནས་དད་པ་ཐོབ་པས། དེ་དག་ལ་འདུན་ཞིང་དབྱེ་བར་མ་ནུས་པས་ན་དགེ་འདུན་ཏེ་ཞུགས་གནས་བརྒྱད་དང༌། རང་སངས་རྒྱས་དང༌། བྱང་ཆུབ་སེམས་དཔའི་ས་ལ་གནས་པ་སྟེ། ཡུལ་དེ་རྣམས་ལ་སྐྱབས་གནས་ཀྱི་ཡོན་ཏན་མཐོང་བའི་ཐུགས་ཀྱིས་དྲངས་པའི་ལུས་ངག་གིས་གུས་པ་ཆེན་པོས་ཕྱག་འཚལ་ལོ། །ཞེས་ཕྱག་མཛད་པས་བགེགས་དང་བར་ཆད་ཞི་ནས་རྩོམ་པ་མཐར་ཕྱིན་པ་དང༌། ཡ་རབས་དམ་པའི་སྤྱོད་པ་དང་མཐུན་པ་དང༌། འོ་སྐོལ་རྗེས་འཇུག་རྣམས་ལ་ལག་ལེན་དུ་བསླབ་པའི་ཆེད་ཡིན་ནོ། །དེ་ལྟར་ཕྱག་བྱས་ཏེ་ཅི་བྱ་ཞེ་ན། བྱ་བ་ཁྱད་པར་ཅན་བྱེད་པ་ཡིན་ཏེ། དེ་ཡང་བོད་ཐམས་ཅད་ཀྱི་བསྟན་པའི་བདག་པོར་ཆོས་རྒྱལ་བྱང་ཆུབ་སེམས་དཔའི་རིགས་སུ་འཁྲུངས་ཤིང༌། རྟེན་དགེ་སློང༌། དཀོན་མཆོག་ལ་མི་ཕྱེད་པའི་དད་པ་ཅན། མདོ་རྒྱུད་ལ་ཤེས་རབ་ཀྱི་སྤྱན་ཡངས་པ། ཇོ་བོ་དཀའ་བ་དུ་མས་སྤྱན་དྲངས་ཏེ། ཐུགས་ལ་བབ་པའི་དངོས་པོ་མཐའ་དག་གིས་མཉེས་པར་མཛད་པའི་རང་གི་སློབ་མ་ལྷག་པའི་ཐུགས་བསྐྱེད་བཟང་པོ་དང་ལྡན་པ་ལྷ་བླ་མ་བྱང་ཆུབ་འོད་ཀྱིས་བོད་དུ་བསྟན་པ་ལ་འདྲ་མི་འདྲའི་བབ་ཅོལ་མང་པོ་བྱུང་བས་ད་ལྟ་བསྟན་པ་སྤྱི་ལ་ཅི་ཕན་ཅིག་དགོས་ཚུལ་སོགས་སྙན་དུ་གསོལ་ནས། ཐེག་པ་ཆེན་པོ་མ་ལུས་པའི་དོན་ཚིག་ཉུང་ལ་དོན་འདུས་པ་བླ་མ་ཉིད་ཀྱིས་ཇི་ལྟར་ཐུགས་ཉམས་སུ་བཞེས་པའི་བསྟན་བཅོས་ཞིག་མཛད་པར་ཞུ་ཞེས་བསྐུལ་བར་གྱུར་པས། བླ་ན་མེད་པའི་བྱང་ཆུབ་ཐོབ་པའི་
ལམ་གྱི་སྣང་བ་ཀུན་ཏུ་སྟོན་པར་བྱེད་པའི་སྒྲོན་མ་ལྟ་བུའི་བསྟན་བཅོས་རབ་ཏུ་གསལ་བར་བྱའོ། །དེ་ལྟར་བསྟན་པའི་སྒྲོན་མེ་འདི་བཤད་པར་དམ་བཅའ་མཛད་པ་ནི་རྩོམ་པ་མཐར་ཕྱིན་པའི་ཆེད་ཡིན་ནོ། །གཉིས་པ་གཞུང་དོན་དངོས་བཤད་པ་ལ་གཉིས། སྐྱེས་བུ་གསུམ་གྱི་རྣམ་གཞག་མདོར་བསྟན་པ་དང༌། དེ་དག་གི་ལམ་གྱི་མཚན་ཉིད་སོ་སོར་བཤད་པའོ། །དང་པོ་ནི། གོང་དུ་བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། ཞེས་བཤད་པའི་བྱང་ཆུབ་ཀྱི་ལམ་དེ་ཇི་ལྟ་བུ་ཞེ་ན། སྤྱིར་སྐྱེས་བུ་ཞེས་པ་སེམས་ཅན་ཡིན་ནོ་ཅོག་ལ་འཇུག་ཀྱང༌། འདིར་སྐྱེས་བུའི་སྐད་དོད་པུ་རུ་ཥ་ཞེས་པ། དོན་བྱེད་པའམ་ནུས་པ་ལ་འཇུག་པས། འཇིག་རྟེན་ཕྱི་མ་ཕན་ཆད་ཀྱི་དོན་སྒྲུབ་པའི་ནུས་པ་དང་ལྡན་པས་སྐྱེས་བུ་ཞེས་བྱ་ཞིང༌། ཕྱི་མ་ཕན་ཆད་ཀྱི་བླང་དོར་ལ་དཔྱོད་པའི་ཡིད་ཤས་ཆེ་བས་མི་ཞེས་ཀྱང་བྱའི། ཚེ་འདི་པ་ཙམ་དོན་དུ་གཉེར་བ་ལ་འདིར་བསྟན་གྱི་མིའམ་སྐྱེས་བུ་ཞེས་མི་བྱ་སྟེ། བེའུ་བུམ་ལས། ཕྱི་མར་ངན་སོང་འཇིགས་པས་སྡིག་སྤོང༌། །འཁོར་བའི་སྐྱོན་དྲན་ཐར་པ་འདོད་པས། །བདེན་བཞིའི་ཚུལ་གྱིས་བསླབ་པ་གསུམ་འཇུག །ཐེག་དམན་འཇིགས་པས་བྱང་ཆུབ་སེམས་སྦྱོང༌། །དེ་ལྟ་བུ་ནི་མི་ཡི་སྤྱོད་པ། །གཞན་དུ་ན་ནི་ཅི་ཞིག་མ་ཡིན། །ཞེས་གསུངས་པ་ལྟར་རོ། །བླ་མེད་བྱང་ཆུབ་ཏུ་བགྲོད་པའི་ལམ་དེ་ལ་ཆུང་ངུ་མངོན་མཐོའི་ལམ་དང༌། འབྲིང་ངེས་ལེགས་ཐུན་མོང་བའི་ལམ་དང༌། མཆོག་ཏུ་གྱུར་པ་སངས་རྒྱས་ཉིད་ཀྱི་ལམ་གསུམ་ཡོད་པས། སྐྱེས་བུ་གསུམ་གྱི་ལམ་དེ་ཡང་གསུམ་ཉིད་དུ་ཤེས་པར་བྱ་ཞིང༌། དེ་དག་ཀྱང་རང་གི་ངོ་བོ་མཚོན་པར་བྱེད་པའི་མཚན་ཉིད་ཀྱི་སྒོ་ནས་རབ་ཏུ་གསལ་བ་སྟེ་གོ་སླ་བར། ལམ་གསུམ་སོ་སོའི་ངོ་བོ་དང་ཁྱད་པར་སྟོན་ཚུལ་མི་འདྲ་བའི་སྒོ་ནས་དབྱེ་བ་བྲི་བར་བྱའོ། །འདིར་འཕྲོས་དོན་གྱི་ཚུལ་དུ་ལམ་སྤྱིའི་རྣམ་བཞག་མདོར་བསྡུས་ཙམ་བཤད་ན། སངས་རྒྱས་ཀྱིས་ཐོག་མར་ཐུགས་བསྐྱེད་པ་དང༌། བར་དུ་ཚོགས་བསགས་པ་དང༌།
མཐར་མངོན་པར་རྫོགས་པར་སངས་རྒྱས་པ་ཐམས་ཅད་སེམས་ཅན་ཁོ་ནའི་དོན་དུ་ཡིན་པས། ཆོས་གསུངས་པ་ཐམས་ཅད་ཀྱང་སེམས་ཅན་གྱི་དོན་ཁོ་ན་སྒྲུབ་པར་བྱེད་ལ། དེ་ལྟར་ན་བསྒྲུབ་བྱ་སེམས་ཅན་གྱི་དོན་ནི་གཉིས་ཏེ། གནས་སྐབས་མངོན་མཐོ་དང་མཐར་ཐུག་ངེས་ལེགས་སོ། །དེ་ཡང་དང་པོ་སྒྲུབ་པ་ལས་བརྩམས་ཏེ་ཇི་སྙེད་གསུངས་པ་ཐམས་ཅད་ནི། སྐྱེས་བུ་ཆུང་ངུ་དང་ཐུན་མོང་བའི་ཆོས་སྐོར་དུ་འདུ་སྟེ། སྐྱེས་བུ་ཆུང་ངུ་ཁྱད་པར་ཅན་ནི་ཚེ་འདི་ལ་ཆེད་ཆེར་མི་བྱེད་པར་ཚེ་ཕྱི་མའི་མཐོ་རིས་ཀྱི་ཕུན་ཚོགས་དོན་དུ་གཉེར་ཞིང༌། དེའི་རྒྱུ་རྣམས་ལ་འཇུག་པའི་ཕྱིར་རོ། །ངེས་ལེགས་ལ་གཉིས་ཏེ། འཁོར་བ་ལས་གྲོལ་བ་ཙམ་གྱི་ཐར་པ་དང༌། ཐམས་ཅད་མཁྱེན་པའོ། །དེ་ལ་ཉན་རང་གི་ཐེག་པ་ལས་བརྩམས་ཏེ་ཇི་སྙེད་གསུངས་པ་ཐམས་ཅད་ནི་སྐྱེས་བུ་འབྲིང་དངོས་སམ་དེ་དང་ཐུན་མོང་བའི་ཆོས་སྐོར་དུ་འདུ་སྟེ། སྐྱེས་བུ་འབྲིང་ནི་སྲིད་པ་མཐའ་དག་ལ་སྐྱོ་བ་སྐྱེས་ནས་སྲིད་པ་ལས་གྲོལ་བའི་ཐར་པ་རང་གི་དོན་དུ་ཐོབ་པར་བྱས་ཏེ། དེའི་ཐབས་བསླབ་པ་གསུམ་ལ་འཇུག་པས་སོ། །རྣམ་མཁྱེན་སྒྲུབ་པའི་ཐབས་ནི་གཉིས་ཏེ། ཕར་ཕྱིན་དང༌། སྔགས་ཀྱི་ཐེག་ཆེན་ནོ། །དེ་གཉིས་ནི་སྐྱེས་བུ་ཆེན་པོའི་ཆོས་སྐོར་དུ་འདུ་སྟེ། སྐྱེས་བུ་ཆེན་པོ་ནི་སྙིང་རྗེ་ཆེན་པོའི་གཞན་དབང་དུ་གྱུར་པས་སེམས་ཅན་གྱི་སྡུག་བསྔལ་ཐམས་ཅད་ཟད་པར་བྱ་བའི་ཕྱིར་དུ་སངས་རྒྱས་ཐོབ་བྱར་བྱས་ཏེ། ཕྱིན་དྲུག་དང་རིམ་གཉིས་སོགས་ལ་སློབ་པ་ཡིན་པས་སོ། །དེ་ཡང་རང་གཞུང་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །དེ་ནི་སྐྱེས་བུ་ཐ་མར་ཤེས། །ཞེས་པ་ལ་སོགས་པ་གསུངས་ཤིང་སྐྱེས་བུ་དེ་རྣམས་ཀྱི་ལམ་གྱི་གོ་རིམ་ལས་ཕར་ཕྱིན་དང་སྔགས་གཉིས་ཀ་འོག་ནས་གསུངས་པའི་ཕྱིར་རོ། །སྐྱེས་བུ་གསུམ་གྱི་ཐ་སྙད་ནི་གཏན་ལ་དབབ་པ་བསྡུ་བ་དང༌། མཛོད་འགྲེལ་སོགས་མང་པོར་གསུངས་སོ། །སྐྱེས་བུ་ཆུང་ངུ་ལ་ཚེ་
འདི་ལྷུར་ལེན་པ་དང༌། ཕྱི་མ་ལྷུར་ལེན་པ་གཉིས་ཡོད་པ་ལས་འདིར་ནི་ཕྱི་མ་སྟེ། དེ་ཡང་མངོན་མཐོའི་ཐབས་མ་ནོར་བ་ལ་ཞུགས་པ་བཟུང་ངོ༌། །དེ་ལྟར་སྐྱེས་བུ་གསུམ་དུ་བཤད་ཀྱང་སྐྱེས་བུ་ཆེན་པོའི་ལམ་དུ་གཞན་གཉིས་ཀྱི་ལམ་ཡང་འདུ་བས། དེ་གཉིས་ཐེག་ཆེན་གྱི་ལམ་གྱི་ཡན་ལག་ཡིན་པར་སློབ་དཔོན་རྟ་དབྱངས་ཀྱིས་གསུངས་སོ། །དེས་ན་འདིར་སྲིད་པའི་བདེ་བ་ཙམ་ཐོབ་བྱར་བྱེད་པ་སྐྱེས་བུ་ཆུང་ངུ་དང༌། རང་དོན་དུ་འཁོར་བ་ལས་ཐར་པ་ཙམ་ཐོབ་བྱར་བྱེད་པ་སྐྱེས་བུ་འབྲིང་གི་ལམ་གཉིས་དང༌། ཐུན་མོང་བའི་ལམ་འགའ་ཞིག་སྐྱེས་བུ་ཆེན་པོའི་ལམ་གྱི་སྔོན་འགྲོ་བྱས་ནས། སྐྱེས་བུ་ཆེན་པོའི་ལམ་སྦྱོང་བའི་ཡན་ལག་ཏུ་བྱེད་པ་ཡིན་ནོ། །དེའི་རྒྱུ་མཚན་ཡང་ཐེག་ཆེན་དུ་འཇུག་པའི་སྒོ་ནི་བྱང་ཆུབ་མཆོག་ཏུ་སེམས་བསྐྱེད་པ་ཉིད་ཡིན་ཏེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བརྩོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམ་ཀྱི་སྲས་ཞེས་བརྗོད་བྱ་ཞིང༌། །འཇིག་རྟེན་ལྷ་མིར་བཅས་པའི་ཕྱག་བྱར་འགྱུར། །ཞེས་གསུངས་པ་ལྟར་སེམས་དེ་རྒྱུད་ལ་སྐྱེས་ན་བྱང་ཆུབ་སེམས་དཔའ་ཞེས་པའི་མིང་ཐོབ་ནས་རྟེན་དེ་ལ་ཐེག་ཆེན་པོར་ཚུད་ལ། དེ་ཉམས་ན་ཐེག་ཆེན་པའི་གསེབ་ནས་ཐོན་པར་འགྱུར་བའི་ཕྱིར་རོ། །དེས་ན་ཐེག་ཆེན་དུ་འཇུག་པར་འདོད་པ་རྣམས་ཀྱིས་ནི་སེམས་དེ་སྒོ་དུ་མ་ནས་འབད་དེ་བསྐྱེད་དགོས་ལ། དེ་བསྐྱེད་པ་ལ་ནི་སྔོན་དུ་སེམས་དེ་བསྐྱེད་པའི་ཕན་ཡོན་བསྒོམས་ནས་ཕན་ཡོན་ལ་སྤྲོ་ཤུགས་འཕེལ་བ་ཅིག་དང༌། ཡན་ལག་བདུན་པ་སྐྱབས་འགྲོ་དང་བཅས་པ་དགོས་པར་བསླབ་བཏུས་དང་སྤྱོད་འཇུག་ལས་གསུངས་སོ། །དེ་ལྟར་གསུངས་པའི་ཕན་ཡོན་ཡང་བསྡུ་ན་གཉིས། གནས་སྐབས་དང༌། མཐར་ཐུག་གི་ཕན་ཡོན་ནོ། །དང་པོ་ལ་ཡང་ངན་འགྲོར་མི་ལྟུང་བ་དང༌། བདེ་འགྲོར་སྐྱེ་བ་གཉིས་ཏེ། སེམས་དེ་སྐྱེས་ན་ངན་སོང་གི་རྒྱུ་སྔར་བསགས་པ་དག་པ་དང་ཕྱིས་སོགས་རྒྱུན་
འཆད་ལ། བདེ་འགྲོའི་རྒྱུ་སྔར་བསགས་རྣམས་སེམས་དེས་ཟིན་པས་རྒྱ་ཆེར་འཕེལ་བ་དང༌། གསར་དུ་བྱེད་པ་རྣམས་ཀྱང་དེས་ཀུན་ནས་སློང་བས་ཟད་པའི་མཐའ་མེད་དོ། །མཐར་ཐུག་གི་དོན་ཐར་པ་དང་ཐམས་ཅད་མཁྱེན་པ་རྣམས་ཀྱང་སེམས་དེ་ལ་བརྟེན་ནས་བདེ་བླག་ཏུ་འགྲུབ་ལ། སྔོན་དུ་གནས་སྐབས་དང་མཐར་ཐུག་གི་ཕན་ཡོན་ལ་ཐོབ་འདོད་བཅོས་མ་མིན་པ་ཞིག་མེད་ན། ཕན་ཡོན་དེ་རྣམས་སེམས་བསྐྱེད་ལས་འབྱུང་བས་སེམས་བསྐྱེད་ལ་འབད་པར་བྱའོ། །ཞེས་སྨྲས་ཀྱང་ཚིག་ཙམ་དུ་ཟད་དོ། །དེ་ལ་སྔོན་དུ་མངོན་མཐོ་དང་ངེས་ལེགས་ཀྱི་ཕན་ཡོན་གཉིས་པོ་དེ་ཐོབ་འདོད་སྐྱེད་པ་ལ་སྐྱེས་བུ་ཆུང་འབྲིང་དང་ཐུན་མོང་བའི་བསམ་པ་སྐྱོང་དགོས་སོ། །དེ་ལྟར་ཕན་ཡོན་གཉིས་ལ་ཐོབ་འདོད་བསྐྱེད་ནས་ཕན་ཡོན་ཅན་གྱི་སེམས་སྒོམ་པ་ན། སེམས་དེའི་རྩ་བ་བྱམས་པ་དང་སྙིང་རྗེ་བསྐྱེད་དགོས་ལ། དེ་ཡང་རང་བདེ་བས་ཕོངས་ཤིང་སྡུག་བསྔལ་གྱིས་མནར་བའི་འཁོར་བར་འཁྱམས་པའི་ཚུལ་བསམས་པ་ན་བ་སྤུ་གཡོ་འགུལ་མེད་པ་ཞིག་ལ། སེམས་ཅན་གཞན་བདེ་བས་ཕོངས་ཤིང་སྡུག་བསྔལ་གྱིས་མནར་བ་ལ་མི་བཟོད་པ་མེད་དོ། །སྤྱོད་འཇུག་ལས། སེམས་ཅན་དེ་དག་ཉིད་ལ་སྔོན། །རང་གི་དོན་དུ་འདི་འདྲའི་སེམས། །རྨི་ལམ་དུ་ཡང་མ་རྨིས་ན། །གཞན་གྱི་དོན་དུ་ག་ལ་སྐྱེ། །ཞེས་གསུངས་སོ། །དེའི་ཕྱིར་སྐྱེས་བུ་ཆུང་ངུའི་སྐབས་སུ་རང་ལ་ངན་སོང་གི་སྡུག་བསྔལ་གྱིས་གནོད་པའི་ཚུལ་དང༌། འབྲིང་གི་སྐབས་སུ་མཐོ་རིས་ན་ཡང་སྡུག་བསྔལ་ཞིང་བདེ་བ་མེད་པའི་ཚུལ་ལ་བསམས་ནས། དེ་ནས་གཉེན་དུ་གྱུར་པའི་སེམས་ཅན་རྣམས་ལ་ཡང་རང་ཉམས་ལ་དཔག་ནས་བསྒོམས་པས་བྱམས་དང་སྙིང་རྗེ་སྐྱེ་བའི་རྒྱུར་འགྱུར་ཞིང༌། དེ་ལས་བྱང་ཆུབ་ཀྱི་སེམས་སྐྱེ་བས་ཆུང་འབྲིང་དང་ཐུན་མོང་བའི་བསམ་པ་སྦྱོང་བ་ནི། བྱང་ཆུབ་ཀྱི་སེམས་བཅོས་མ་མིན་པ་སྐྱེ་བའི་ཐབས་ཡིན་ནོ། །དེ་བཞིན་དུ་དེ་གཉིས་ཀྱི་སྐབས་སུ་སྐྱབས་འགྲོ་དང༌། ལས་འབྲས་
སོགས་ཀྱི་སྒོ་ནས་བསག་སྦྱང་གི་སྒོ་དུ་མ་ལ་འབད་པ་ནི། བྱང་ཆུབ་ཀྱི་སེམས་ཀྱི་སྔོན་འགྲོ་རྒྱུད་སྦྱོང་བའི་ཐབས་ཡན་ལག་བདུན་པ་སྐྱབས་འགྲོ་དང་བཅས་པ་རྣམས་ཀྱི་རིགས་སུ་འགྱུར་བས། དེ་དག་ཀྱང་སེམས་དེ་སྐྱེ་བའི་སྐབས་སུ་གོ་བར་བྱའོ། །འདིར་ཆུང་འབྲིང་གི་ཆོས་སྐོར་རྣམས་བྱང་ཆུབ་ཀྱི་སེམས་སྐྱེ་བའི་ཡན་ལག་ཏུ་འགྲོ་ལུགས་རྣམས་ཤེས་པ་གལ་ཆེ་སྟེ། དེ་ལྟར་མ་ཤེས་ན་སྐྱེས་བུ་ཆེན་པོའི་ལམ་དང་ལམ་སོ་སོ་བ་འབྲེལ་མེད་དུ་འགྱུར་བས་སོ། །དེ་ལྟར་ན་བྱང་ཆུབ་ཀྱི་སེམས་བཅོས་མ་མ་ཡིན་པ་རྒྱུད་ལ་ཅི་སྐྱེ་བྱ། དེ་ནས་སེམས་དེ་བརྟན་པར་བྱ་བའི་ཕྱིར་དུ་སྐྱབས་འགྲོ་ཐུན་མོང་མ་ཡིན་པ་སྔོན་དུ་བཏང་ནས་སྨོན་པའི་ཆོ་ག་བྱ། སྨོན་པ་ཆོ་གས་བཟུང་ནས་དེའི་བསླབ་པ་རྣམས་ལ་བསླབ། དེ་ནས་སྤྱོད་པ་ཕྱིན་དྲུག་དང་བསྡུ་བཞི་སོགས་ལ་སློབ་པར་འདོད་པའི་བློ་སྦྱོང་ལ། སྙིང་ཐག་པ་ནས་སློབ་འདོད་བྱུང་བ་ན། འཇུག་སྡོམ་རྣམ་དག་ཅིག་བླང༌། དེ་ནས་རྩ་ལྟུང་གིས་མ་གོས་པ་ལ་སྲོག་བསྡོས་བྱ། ཟག་པ་ཆུང་འབྲིང་དང་ཉེས་བྱས་རྣམས་ཀྱིས་ཀྱང་མ་གོས་པ་ལ་འབད་ཅིང༌། ཅི་སྟེ་གོས་ནའང་ལྟུང་བ་ཕྱིར་བཅོས་ཇི་ལྟར་གསུངས་པའི་སྒོ་ནས་ལེགས་པར་སྦྱང༌། དེ་ནས་ཕྱིན་དྲུག་སྤྱི་ལ་བསླབ་ཅིང༌། ཁྱད་པར་དུ་སེམས་དགེ་བའི་དམིགས་པ་ལ་ཇི་ལྟར་འདོད་བཀོལ་དུ་རུང་བར་བྱ་བའི་ཕྱིར་ཞི་གནས་ཀྱི་ངོ་བོ་བསམ་གཏན་ལ་བསླབ་བོ། །གཞུང་འདིར་མངོན་ཤེས་སྐྱེད་པའི་ཕྱིར་དུ་ཞི་གནས་ལ་བསླབ་པར་གསུངས་པ་ནི་མཚོན་ཙམ་སྟེ། ཇོ་བོ་ཉིད་ཀྱིས་སྐབས་གཞན་དུ་ལྷག་མཐོང་སྐྱེད་པའི་ཕྱིར་དུ་ཡང་གསུངས་པས་དེའི་ཕྱིར་དུ་ཞི་གནས་བསྒྲུབ་བོ། །དེ་ནས་བདག་གཉིས་སུ་འཛིན་པའི་འཆིང་བ་གཅོད་པའི་ཕྱིར་དུ་སྟོང་ཉིད་ཀྱི་ལྟ་བས་ཐག་ཆོད་པར་བྱས་ལ་བསྒོམ་ཚུལ་མ་ནོར་བར་བསྐྱངས་ནས་ཤེས་རབ་ཀྱི་ངོ་བོ་ལྷག་མཐོང་བསྒྲུབ་པར་བྱའོ། །དེ་ལྟར་ན་ཞི་ལྷག་སྒྲུབ་པ་མ་གཏོགས་པའི་འཇུག་སྡོམ་གྱི་བསླབ་བྱ་ལ་སློབ་པ་མན་ཆད་ཚུལ་ཁྲིམས་ཀྱི་བསླབ་པ་དང༌།
ཞི་གནས་ནི་སེམས་ཀྱི་བསླབ་པ་དང༌། ལྷག་མཐོང་ནི་ཤེས་རབ་ཀྱི་བསླབ་པར་འགྲེལ་བར་གསུངས་སོ། །གཞན་ཡང་ཞི་གནས་མན་ཆད་ཐབས་དང༌། བསོད་ནམས་ཀྱི་ཚོགས་དང༌། ཀུན་རྫོབ་བདེན་པ་ལ་བརྟེན་པའི་ལམ་དང༌། རྒྱ་ཆེ་བའི་ལམ་རིམ་ཡིན་ལ། ཤེས་རབ་ཁྱད་པར་ཅན་གསུམ་སྐྱེད་པ་ནི་ཤེས་རབ་དང༌། ཡེ་ཤེས་ཀྱི་ཚོགས་དང༌། དོན་དམ་བདེན་པ་དང༌། ཟབ་མོའི་ལམ་རིམ་ཡིན་པས། དེ་དག་གི་གོ་རིམ་དང༌། གྲངས་ངེས་པ་དང༌། ཐབས་ཤེས་ཡ་བྲལ་གྱིས་བྱང་ཆུབ་མི་འགྲུབ་པ་ལ་ངེས་པ་ཆེན་པོ་བསྐྱེད་པར་བྱའོ། །དེ་ལྟར་ལམ་ཐུན་མོང་པས་རྒྱུད་སྦྱངས་ནས་ནི་ངེས་པར་སྔགས་ལ་འཇུག་དགོས་ཏེ། དེ་ལ་ཞུགས་ན་མྱུར་དུ་ཚོགས་གཉིས་རྫོགས་པར་འགྱུར་བའི་ཕྱིར་རོ། །གལ་ཏེ་དེ་ཙམ་ལས་མི་ལྕོགས་པའམ་རིགས་ནུས་ཆུང་བས་མི་སྤྲོ་ན་ལམ་རིམ་དེ་ཉིད་ཇེ་རྒྱས་སུ་གཏོང་བ་ཙམ་བྱའོ། །སྔགས་ལ་འཇུག་ན་ནི་སྤྱིར་ཐེག་པ་ཐམས་ཅད་དང༌། ཁྱད་པར་སྔགས་ནས་གསུངས་པའི་བཤེས་གཉེན་བསྟེན་ཚུལ་ཁྱད་པར་དུ་གྱུར་བ་ཞིག་བྱ། དེ་ནས་རྒྱུད་སྡེ་རྣམ་དག་ནས་འབྱུང་བའི་དབང་གིས་རྒྱུད་སྨིན་པར་བྱས་ནས། དེའི་དུས་སུ་ཐོབ་པའི་དམ་ཚིག་དང་སྡོམ་པ་སྲོག་བསྡོས་བྱས་ཏེ་བསྲུང༌། ཁྱད་པར་རྩ་ལྟུང་ཕོག་ན་སླར་བླང་དུ་ཡོད་ཀྱང་རྒྱུད་ཆུད་ཟོས་ཏེ་ཡོན་ཏན་སྐྱེ་དཀའ་བས་དེས་མ་གོས་པར་བྱེད། ཡན་ལག་གི་ལྟུང་བ་རྣམས་ཀྱིས་མ་གོས་པར་བྱེད་ཅིང་གོས་ནའང་ཇི་མི་སྙམ་པར་མི་འཇོག་པར་བཤགས་བསྡམ་གྱིས་དག་པར་བྱའོ། །དེ་ནས་རྒྱུད་སྡེ་འོག་མ་ལྟར་ན་མཚན་བཅས་དང་གོང་མ་ལྟར་ན་བསྐྱེད་རིམ་གྱི་རྣལ་འབྱོར་གང་རུང་ཅིག་ལ་འཁྲིད། དེ་བརྟེན་ནས་རྒྱུད་སྡེ་འོག་མ་ལྟར་ན་མཚན་མེད་ཀྱི་རྣལ་འབྱོར་དང༌། གོང་མ་ལྟར་ན་རྫོགས་རིམ་གྱི་རྣལ་འབྱོར་གང་རུང་ལ་བསླབ་བོ། །དེ་ལྟར་བློ་རིམ་གྱིས་བསྐྱེད་དགོས་པ་ནི། གཟུངས་ཀྱི་དབང་ཕྱུག་རྒྱལ་པོས་ཞུས་པ་ལས། ནོར་བུ་མཁན་མཁས་པས་ནོར་བུ་རིམ་གྱིས་སྦྱང་བའི་དཔེ་དོན་དུ་སྦྱར་ནས་བཀའ་སྩལ་ཏོ། །མགོན་པོ་ཀླུ་སྒྲུབ་ཀྱིས་ཀྱང༌། དང་པོར་མངོན་པར་མཐོ་
བའི་ཆོས། །ཕྱིས་ནི་ངེས་པར་ལེགས་འབྱུང་བ། །གང་ཕྱིར་མངོན་པར་མཐོ་ཐོབ་ནས། །རིམ་གྱིས་ངེས་པར་ལེགས་པའོ། །ཞེས་མངོན་མཐོ་ངེས་ལེགས་ཀྱི་ལམ་ལ་རིམ་ཅན་དུ་འཁྲིད་པར་གསུངས་པ་དང༌། འཕགས་པ་ལྷས་ཀྱང༌། སེམས་ཅན་དང་པོའི་ལས་ཅན་རྣམས། །དམ་པའི་དོན་ལ་འཇུག་པ་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་སོ། །གཉིས་པ་དེ་དག་གི་ལམ་གྱི་མཚན་ཉིད་སོ་སོར་བཤད་པ་ལ་གསུམ། སྐྱེས་བུ་ཆུང་ངུའི་མཚན་ཉིད། འབྲིང་གི་མཚན་ཉིད། ཆེན་པོའི་མཚན་ཉིད་བསྟན་པའོ། །དང་པོ་ནི། ཚེ་འདི་ལ་མ་ཆགས་པར་གཙོ་བོར་ཕྱི་མ་ཕན་ཆད་ཀྱི་དོན་སྒྲུབ་ནུས་ཀྱི་སྐྱེས་བུ་གང་ཞིག །ཐབས་ནི་ལས་རྒྱུ་འབྲས་ལ་ཡིད་ཆེས་ཀྱི་དད་པ་སྔོན་དུ་སོང་བའི་སྒོ་ནས། མི་དགེ་བཅུ་སྤོང་གི་ཚུལ་ཁྲིམས་དང༌། ཟག་བཅས་ཀྱི་བསམ་གཏན་དང༌། གཟུགས་མེད་ཀྱི་སྙོམས་འཇུག་སོགས་ལྷའི་ཐེག་པ་དང༌། ཚངས་པའི་ཐེག་པ་ཞེས་བཤད་པ་གང་དག་གིས། འཁོར་ལོས་སྒྱུར་བའི་མཐར་ཐུག་པའི་མིའི་བདེ་བ་དང༌། བརྒྱ་བྱིན་ནས་གཟུགས་མེད་པའི་བར་གྱི་འཁོར་བའི་བདེ་བ་ཙམ་དག་ལ། ཆེད་དུ་བྱ་བ་གང་ཟག་རང་ཉིད་ཀྱིས་ཐོབ་པའི་དོན་དུ་གཉེར་བར་བྱེད་པ་གང་ཡིན་པའི་སྐྱེས་བུ་དེ་ནི། སྲིད་པ་དོན་དུ་གཉེར་ཞིང་གཞན་དོན་ལ་རྒྱབ་ཀྱིས་ཕྱོགས་པས། འབྲིང་དང་ཆེན་པོ་ལས་དམན་པའི་ཕྱིར། འདིར་བསྟན་གྱི་སྐྱེས་བུ་ཐ་མར་ཤེས་པར་བྱའོ། །སྤྱིར་ནི་སྐྱེས་བུ་ཆུང་ངུ་ལ་ཚེ་འདི་དོན་དུ་གཉེར་བ་ཙམ་ཡང་ཡོད་ཀྱང༌། འདི་ནི་མངོན་མཐོའི་ཐབས་མ་ནོར་བ་ལ་ཞུགས་དགོས་པས། འདིར་བསྟན་གྱི་སྐྱེས་བུ་ཆུང་ངུ་ལ་གཅིག་ཉིད་ལས་དབྱེ་བ་གཞན་མི་བྱེད་དོ། །སྐྱེས་བུ་གསུམ་གྱི་ལམ་མཐའ་དག་གི་རྩ་བ་བཤེས་གཉེན་བསྟེན་ཚུལ་ཡིན་ཏེ། དེས་མཉེས་པར་བྱས་ན་དལ་འབྱོར་ལ་སྙིང་པོ་ལེན་འདོད་སྐྱེ་ཞིང༌། དལ་བའི་རྟེན་ལ་སྙིང་པོ་ལེན་འདོད་དམ་ཆོས་སྒྲུབ་འདོད་ཀྱི་བློ་མ་སྐྱེས་བར་སྐྱེས་བུ་གསུམ་གྱི་
ལམ་གང་ཡང་ཉམས་སུ་ལེན་པ་མི་འོང་བས། བཤེས་གཉེན་བསྟེན་པ་དང༌། དལ་འབྱོར་གྱི་ཆོས་སྐོར་གཉིས་གསུམ་ཀའི་སྔོན་འགྲོ་ཡིན་པས། ཁྲིད་ཉམས་སུ་ལེན་པ་ན་བཤེས་གཉེན་བསྟེན་ཚུལ་སོགས་གོ་རིམ་ངེས་ཅན་དུ་བྱའོ། །དེ་ཡང་སྐྱེས་བུ་ཆུང་ངུའི་བསམ་པ་སྐྱེ་བ་ལ། མི་རྟག་པ་དང༌། ངན་སོང་གསུམ་གྱི་ཉེས་དམིགས་བསམ་པ་དང༌། སྦྱོར་བ་སྒྲུབ་པ་ལ། སྐྱབས་འགྲོ་དང༌། ལས་འབྲས་བསམ་ནས་མི་དགེ་བཅུ་སྤོང་གི་ཚུལ་ཁྲིམས་ལ་བསླབ་དགོས་པས། འདིར་བསྟན་གྱི་སྐྱེས་བུ་ཆུང་ངུའི་ལམ་གྱི་དངོས་གཞི་ལ་དམིགས་སྐོར་བཞི་ཡོད་དོ། །གཉིས་པ་སྐྱེས་བུ་འབྲིང་གི་མཚན་ཉིད་ནི། མནར་མེད་ནས་སྲིད་རྩེའི་བར་གྱི་འཁོར་བ་མཐའ་དག་གི་སྡུག་བསྔལ་རྒྱུ་མཚན་དུ་མའི་སྒོ་ནས་བསམས་པས་འཁོར་ལོས་སྒྱུར་རྒྱལ་སོགས་ཀྱི་བདེ་བ་ལའང་རྨི་ལམ་དུ་ཡང་འདོད་པ་མེད་པས། སྲིད་པའི་བདེ་བ་མཐའ་དག་ལ་རྒྱབ་ཀྱིས་ཕྱོགས་ཤིང་ཞེན་པ་ལོག་པ་བསམ་པའི་ཁྱད་པར། བསམ་པ་དེས་ཀུན་ནས་བསླངས་ཏེ། སྒོ་གསུམ་སྡིག་པ་མི་དགེ་བའི་ལས་ལས་ལྡོག་པའི་བདག་ཉིད་ཅན་གྱི་སོ་ཐར་རིས་བདུན་གང་རུང་གི་བརྟུལ་ཞུགས་ལ་ཡང་དག་པར་གནས་པ་སྦྱོར་བའི་ཁྱད་པར། བསམ་སྦྱོར་དེ་གཉིས་དང་ལྡན་པའི་རྟེན་གྱི་གང་ཟག་གང་ཞིག །རང་ཉིད་སྡུག་ཀུན་ཉེ་བར་ཞི་བའི་མྱང་འདས་ཙམ་དོན་དུ་གཉེར་བ་འབྲས་བུའི་ཁྱད་པར་སྟེ། ཁྱད་པར་དེ་གསུམ་དང་ལྡན་པ་ནི་དམ་ཆོས་མ་ནོར་བར་གྲུབ་པའི་ལམ་ལ་ཞུགས་པས། འདིར་བསྟན་གྱི་སྐྱེས་བུ་ཡིན་ཞིང༌། སྲིད་པ་མཐའ་དག་ལས་ཡིད་འབྱུང་བས་ཆུང་ངུ་ལས་ཁྱད་པར་འཕགས་པ་དང༌། འགྲོ་བའི་དོན་གྱི་ཁུར་འཁུར་བའི་ལྷག་བསམ་དང་མི་ལྡན་པས་ཆེན་པོ་ལས་དམན་པའི་ཕྱིར། དེ་ལ་ནི་འབྲིང་ཞེས་བརྗོད་པར་བྱ་བ་ཡིན་ནོ། །འདིར་དངོས་སུ་བསྟན་པའི་སྐྱེས་བུ་འབྲིང་ལ་དབྱེ་ན། ཐེག་པའི་སྒོ་ནས་ཉན་ཐོས་དང༌། རང་སངས་རྒྱས་ཀྱི་ཐེག་པ་ལ་ཞུགས་པ་གཉིས། བསྒོམ་བྱའི་སྒོ་ནས་འཕགས་པའི་བདེན་པ་བཞི་དང༌། རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལྡོག་ཏུ་བསྒོམ་པ་གཉིས། ནང་ཚན་གྱི་སྒོ་ནས་
རང་དོན་དུ་ཐར་པ་དོན་གཉེར་གྱི་བློས། དགེ་བཅུའི་ཚུལ་ཁྲིམས་ལ་སློབ་པ་ནི་སྐྱེས་བུ་འབྲིང་གི་ཆུང་ངུ༌། བསམ་པ་དེ་ལྡན་གྱིས་འཕགས་པའི་བདེན་པ་བཞི་བསྒོམ་པ་འབྲིང་གི་འབྲིང༌། བསམ་པ་དེ་དང་ལྡན་པ་གང་ཞིག །གཉིས་སྟོང་གི་བདག་མེད་བསྒོམ་པ་འབྲིང་གི་ཆེན་པོ་ཡིན་ནོ། །དེ་ལྟར་ན་འཕགས་མཆོག་ཀླུ་སྒྲུབ་དང་དཔལ་ལྡན་ཟླ་བའི་རྗེས་སུ་འབྲང་བས་ནི། བསྒོམ་བྱ་བདག་མེད་གསུམ་གྱི་སྒོ་ནས་ཀྱང་གསུམ་དུ་དབྱེར་ཡོད་དེ། གང་ཟག་རྫས་ཡོད་ཀྱིས་སྟོང་བ་ཙམ་གྱིས་བདག་མེད་དང༌། རྡུལ་ཕྲན་ཆ་མེད་བསགས་པའི་ཕྱི་རོལ་དོན་གྱིས་སྟོང་བ་གཟུང་བ་ཆོས་ཀྱི་བདག་མེད་དང༌། གང་ཟག་དང་ཆོས་རྟོག་པས་བཏགས་པ་ཙམ་ལས། རང་བཞིན་གྱིས་གྲུབ་པས་སྟོང་པའི་བདག་མེད་ཕྲ་མོ་རྟོགས་ཤིང་བསྒོམ་པའི་ཐེག་དམན་གྱི་གང་ཟག་གསུམ་བཞག་དགོས་པའི་ཕྱིར་རོ། །སྐྱེས་བུ་འབྲིང་གི་ལམ་གྱི་དངོས་གཞི་ནི། སྲིད་པའི་བདེ་ལ་རྒྱབ་ཕྱོགས་ཤིང༌། །ཞེས་པས་སྡུག་བདེན་དང༌། སྡིག་པའི་ལས་ལས། ཞེས་པས་ཀུན་འབྱུང་དང༌། རང་ཞི་ཙམ་དོན་གཉེར། ཞེས་པས་འགོག་བདེན་དང༌། ལྡོག་བདག་ཉིད། ཅེས་པས་ལམ་བདེན་བསྟན། ཞེས་ཤ་ར་བས་གསུངས་པ་ལྟར། འཕགས་པའི་བདེན་པ་བཞིའི་ལམ་ནི། ཐར་འདོད་རྣམས་ཀྱིས་བསྒོམ་བྱའི་གཙོ་བོ་དང༌། སྐྱེས་བུ་འབྲིང་གི་ལམ་གྱི་གཞུང་ཤིང་ཡིན་ཏེ། རྟེན་འབྲེལ་ཡན་ལག་བཅུ་གཉིས་ཀྱང་དེ་ཉིད་དུ་འདུས་པའི་ཕྱིར། །དེ་ཡང་ཐར་པ་དོན་གཉེར་གྱིས་གཏན་ལ་དབབ་བྱ་ཀུན་བྱང་གཉིས་སུ་ངེས་ཏེ། དང་པོ་ལ་རྒྱུ་འཆིང་བྱེད་ཀུན་འབྱུང་དང༌། འབྲས་བུ་བཅིངས་པ་སྡུག་བདེན་གཉིས་སུ་ངེས་ཤིང༌། ཕྱི་མ་ལ་ཐོབ་བྱ་འགོག་བདེན་དང༌། འཐོབ་བྱེད་ལམ་བདེན་གཉིས་སུ་ངེས་པའི་ཕྱིར། གོ་རིམ་ཡང་སྡུག་བདེན་ཐོག་མར་གསུངས་པ་ལྟར། ཐར་འདོད་རྣམས་ཀྱིས་དང་པོར་འཁོར་བ་སྤྱི་དང༌། སོ་སོའི་ཉེས་དམིགས་ལེགས་པར་བསམ་ཏེ། ཐར་འདོད་ཀྱི་བློ་བཅོས་མིན་བསྐྱེད། འཁོར་བའི་སྡུག་བསྔལ་བསམ་པས་ཡིད་སྐྱོ་བ་ན། འཁོར་
བ་འདི་ཅིའི་རྒྱུ་ཅན་ཡིན་སྙམ་དུ་བསམས་པས། ཉོན་མོངས་པ་དང༌། ཟག་བཅས་ཀྱི་ལས་ལས་འཁོར་བ་འགྲུབ་པར་མཐོང་ནས། ཀུན་འབྱུང་སྤོང་འདོད་སྐྱེ་བས། དེའི་འོག་ཏུ་ཀུན་འབྱུང་འཁོར་བའི་འཇུག་རིམ་སྒོམ། ཀུན་འབྱུང་གི་གཙོ་བོ་མ་རིག་པ་ནི། ཡུལ་གྱི་གནས་ཚུལ་ལ་ཕྱིན་ཅི་ལོག་ཏུ་ཞུགས་པའི་བློ་ཡིན་པས། དེ་སྤོང་ནུས་སུ་ཤེས་པ་ན། འགོག་པ་མངོན་དུ་བྱ་ནུས་སུ་མཐོང་བས། དེའི་འོག་ཏུ་འོག་ས་བསྟན་པ་ཡིན་ལ། དེ་ཡང་ལམ་ལ་རག་ལས་པར་མཐོང་བས། དེ་ནས་ལམ་བདེན་བསྟན་པ་ཡིན་ཏེ། རྗེ་བཙུན་བྱམས་པས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེ་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་ཡི་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་གསུངས་པས་སོ། །གསུམ་པ་སྐྱེས་བུ་ཆེན་པོའི་མཚན་ཉིད་བསྟན་པ་ལ་གཉིས། མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི། དེ་ལྟར་སྐྱེས་བུ་ཆུང་འབྲིང་གི་ལམ་ལ་བློ་ལེགས་པར་སྦྱངས་ཤིང་འབྱུང་བའི་གང་ཟག་གིས་རང་གི་རྒྱུད་དུ་གཏོགས་པའི་འཁོར་བའི་སྡུག་བསྔལ་གྱིས་ཐོག་མཐར་བར་གསུམ་དུ་གདུངས་པར་མཐོང་བ་ན། དེ་དང་མཐུན་པར་སྲིད་མཚོར་འཁྱམས་པ་གང་ཞིག །མར་གྱུར་སེམས་ཅན་གཞན་ཀུན་གྱི་སྡུག་བསྔལ་ལ་བསམ་སྟེ། དེ་དག་ཐམས་ཅད་ཀྱང་རང་དང་འདྲ་བར་སྡུག་བསྔལ་ཐམས་ཅད་ཀྱི་མེ་འབར་བས་བསྲེགས་པ་ལ་མི་བཟོད་པའི་སྙིང་རྗེས་ཀུན་ནས་བསླངས་ཏེ་དེ་རྣམས་ཀྱི་སྡུག་བསྔལ་ཐམས་ཅད་དང༌། དེའི་རྒྱུ་སྒྲིབ་གཉིས་བག་ཆགས་དང་བཅས་པ་མ་ལུས་པ་ཀུན་ཡང་དག་པར་སླར་ལྡོག་པ་མེད་པར་ཟད་པར་ཀུན་ནས་འདོད་པའི་གཞན་དོན་དོན་གཉེར་གྱི་འདོད་པ་དང་མཚུངས་ལྡན་གྱི་ཐོབ་བྱ་བྱང་ཆུབ་ལ་དོན་དུ་གཉེར་བའི་སེམས་རིན་པོ་ཆེ་དང༌། དེས་ཀུན་ནས་བསླངས་པའི་རྒྱལ་བའི་སྲས་ཀྱི་སྤྱོད་པ་ཅི་རིགས་ལ་གནས་པའི་སྐྱེས་བུ་དེ་ནི། ཐེག་ཆེན་སྒྲུབ་པའི་ཐབས་མ་ནོར་བ་ལ་ཞུགས་པས། འདིར་
དངོས་སུ་བསྟན་པའི་སྐྱེས་བུ་མཆོག་གམ་ཆེན་པོའི་མཚན་ཉིད་ཡིན་ནོ། །དེ་ལ་དབྱེ་ན། ལྟ་བའི་སྒོ་ནས་དབུ་སེམས་གཉིས། ཐེག་པའི་སྒོ་ནས་མདོ་སྔགས་གཉིས། ལམ་མྱུར་བུལ་གྱི་སྒོ་ནས་ཕྱུགས་ཀྱི་ཤིང་རྟས་བགྲོད་པ་སོགས་ལྔར་དབྱེ་བ་ཡོད་དོ། །གཉིས་པ་སྐྱེས་བུ་ཆེན་པོའི་ལམ་རྒྱས་པར་བཤད་པ་ལ་གཉིས། ཕ་རོལ་ཏུ་ཕྱིན་པའི་ལམ་རྒྱས་པར་བཤད་པ་དང༌། སྔགས་ལ་འཇུག་པའི་ཚུལ་ཕྱོགས་ཙམ་བསྟན་པའོ། །དང་པོ་ལ་གཉིས། ལམ་གྱི་རྣམ་གཞག་དང༌། འབྲས་བུའི་རྣམ་གཞག་བཤད་པའོ། །དང་པོ་ལ་གཉིས། བཤད་པར་དམ་བཅའ་བ་དང༌། ལམ་ཡང་དག་པ་ཉིད་བཤད་པའོ། །དང་པོ་ནི། བཤད་པར་བྱའོ་ཞེས་པ་བཤད་པའི་གཞིར་བཞག་སྟེ། གང་བཤད་ན། བླ་ན་མེད་པའི་བྱང་ཆུབ་སྒྲུབ་པ་ལ་མེད་དུ་མི་རུང་བའི་ཐབས་ནིའོ། །གང་ལ་ན། སེམས་ཅན་དམ་པ་ཐེག་པ་ཆེན་པོའི་རིགས་སད་ཅིང༌། གཞན་དོན་དུ་བྱང་ཆུབ་མཆོག་གི་གོ་འཕང་ཐོབ་པར་འདོད་པའི་ལྷག་བསམ་རྣམ་པར་དག་པ་དང་ལྡན་པར་གྱུར་པ་དེ་དག་ལའོ། །ཚུལ་ཇི་ལྟར་ན། རང་བཟོ་མ་ཡིན་ཏེ། ཇོ་བོ་གསེར་གླིང་པ་ལ་སོགས་པའི་བླ་མ་དམ་པ་རྣམས་ཀྱིས་ཇི་ལྟར་བསྟན་པ་ཡི་གསུང་གི་རྗེས་སུ་འབྲང་ཞིང༌། ལུང་རིགས་དང་ལྡན་པས་ཡང་དག་པར་རོ། །དེ་ལ་སེམས་ཅན་དམ་པ་ཞེས་རྐང་པ་གཉིས་ཀྱིས་ཆོས་འདི་གང་ལ་བཤད་པའི་སྣོད་ངོས་བཟུང༌། བླ་མ་རྣམས་ཀྱི་བསྟན་པ་ཡི། །ཞེས་གཉིས་ཀྱིས་བདུད་རྩི་ལྟ་བུའི་ཆོས་ངོས་བཟུང་བའོ། །དེ་དག་ལས། ཡང་དག་ཐབས་ནི་ཞེས་པས་བརྗོད་བྱ་དང༌། བཤད་པར་བྱ་ཞེས་པས་དགོས་པ་དང༌། བླ་མ་རྣམས་ཀྱིས་བསྟན་པ་ཡི། །ཞེས་པས་རྗོད་བྱེད་ཀྱི་ཁྱད་པར་དང༌། བྱང་ཆུབ་མཆོག་ཅེས་པས་ཉིང་དགོས་དང༌། དེ་དག་ཀྱང་གཅིག་ལ་གཅིག་བསྟེན་པ་ནི་འབྲེལ་པ་སྟེ་གོ་སླའོ། །འོ་ན། བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། །ཞེས་པ་དང༌། དེ་དག་མཚན་ཉིད་རབ་གསལ་བ། །སོ་སོའི་དབྱེ་བ་བྲི་བར་
བྱ། །ཞེས་པ་དང༌། འདིར། ཡང་དག་ཐབས་ནི་བཤད་པར་བྱ། །ཞེས་པ་ཐམས་ཅད་བཤད་པར་དམ་བཅའ་བ་ཡིན་ན་ཟློས་པར་འགྱུར་རོ་ཞེ་ན། སྐྱོན་མེད་དེ། དང་པོས་གཞུང་སྤྱིའི་རྩོམ་པར་དམ་བཅའ་བ་དང༌། གཉིས་པས་སྐྱེས་བུ་གསུམ་གྱི་ལམ་གྱི་དབྱེ་བ་སོ་སོར་འཆད་ཅེས་པ་དང༌། གསུམ་པས་ཐེག་ཆེན་གྱི་རིགས་ཅན་ལ་བླ་མེད་བྱང་ཆུབ་སྒྲུབ་པའི་ཐབས་མ་ནོར་བར་འཆད་ཅེས་སྟོན་ཚུལ་ཐ་དད་པའི་ཕྱིར་རོ། །དེས་ན་སེམས་ཅན་དམ་པ་ཞེས་སོགས་ཤོ་ལོ་ཀ་འདི་གཞུང་འོག་མ་རྣམས་ཀྱི་མདོར་བསྟན་དུའང་བཟུང་ངོ༌། །གཉིས་པ་ཐབས་ཡང་དག་པ་བཤད་པ་ལ་གཉིས། སྨོན་པ་བསླབ་བྱ་དང་བཅས་པ་དང༌། འཇུག་པ་བསླབ་བྱ་དང་བཅས་པའོ། །དང་པོ་ལ་གསུམ། སྦྱོར་བ། དངོས་གཞི། མཇུག་བསླབ་བྱ་ལ་སློབ་ཚུལ་ལོ། །དང་པོ་ལ་གསུམ། ཚོགས་གསོག་པ། སྐྱབས་འགྲོ་ཁྱད་པར་ཅན་བྱ་བ། སེམས་གསུམ་ལ་བློ་སྦྱོང་བའོ། །དང་པོ་ནི། ཡུལ་གང་གི་མདུན་དུ་མཆོད་པ་ཇི་ལྟར་བྱ་ན། རྫོགས་པའི་སངས་རྒྱས་ཤཱཀྱ་ཐུབ་པ་རི་མོར་བྲིས་པའི་སྐུ་དང༌། འབུར་དུ་བརྐོས་པ་དང༌། ལུགས་སུ་བླུགས་པ་ལ་སོགས་པ་སྐུའི་རྟེན་དང༌། རིང་བསྲེལ་གྱི་སྙིང་པོ་ཅན་གྱི་མཆོད་རྟེན་ཐུགས་ཀྱི་རྟེན་དང༌། གསུང་རབས་ཡན་ལག་བཅུ་གཉིས་སོགས་དམ་པའི་ཆོས་ཀྱི་པུ་སྟི་གསུང་གི་རྟེན་རྣམས་མངོན་སུམ་དུ་བཞུགས་པ་ལ་ཕྱོགས་པའི་མདུན་ནས་མཆོད་པ་བྱའོ། །ཤ་ར་བས་ནས་ཞེས་པས་ཕྱག་འཚལ་བའང་བསྟན་པ་ཡིན་གསུངས། དངོས་པོ་གང་གིས་མཆོད་ན། མེ་ཏོག་དང༌། བདུག་སྤོས་དང༌། མར་མེ་དང༌། དྲི་དང༌། ཞལ་ཟས་ཏེ། ཉེར་སྤྱོད་ཀྱི་དངོས་པོ་དག་གིས་སོ། །དེ་ཡང་རང་གང་འབུལ་འདོད་པ་ཙམ་གྱིས་མཆོད་དམ་ཞེ་ན། རང་ལ་ཅི་འབྱོར་ཞིང་ཡོད་པ་ལྷག་མ་མ་ལུས་པ་ཡིས་མཆོད་པ་བྱ་དགོས་ཏེ། ཇོ་བོའི་ཞལ་ནས། འབྲས་དཀར་མོ་ཁ་ལ་གཅིག་བདོག་གོ །ཡོམ་བཏང༌། བྱང་ཆུབ་ཀྱི་སེམས་བཟང་པོ་མཆི། ཡོམ་བཏང༌། བྱང་ཆུབ་ཀྱི་སེམས་
བཟང་པོ་མི་མཆི་གསུང་སྐད། དེ་དག་ནི་རྫས་བཤམས་པས་མངོན་སུམ་དུ་མཆོད་པ་ཡིན་ནོ། །པུ་ཏོ་བའི་ཞལ་ནས། མཆོད་པ་ནི་གྲོགས་པོ་སྙིང་ཞོགས་ཞོགས་པ། ཚིག་པ་ཟ་ཙག་ཙག་པ་ཤོམ་དགོས་པ་ཡིན་ནོ་གསུངས། ཡིད་ཀྱིས་མཆོད་པའི་ཚུལ་ཡང༌། ཀུན་ཏུ་བཟང་པོའི་སྤྱོད་པའི་སྨོན་ལམ་ལས་གསུངས་པ་ཡི་ཕྱག་འཚལ། མཆོད་འབུལ། སྡིག་བཤགས། ཡི་རང༌། གསོལ་གདབ། བསྔོ་བ་སྟེ། མཆོད་པ་རྣམ་པ་བདུན་པོ་དག་ཀྱང་བྱ་བ་ཡིན་ནོ། །དེ་དག་ལ་མཆོད་པ་ཞེས་བྱ་སྟེ། མཆོད་པའི་དོན་ནི་ཕུལ་མཉེས་པར་བྱེད་པ་ཡིན་ལ། བདུན་པོ་དེས་ཀྱང་ཡུལ་ཁྱད་པར་ཅན་རྣམས་དགྱེས་པར་འགྱུར་བའི་ཕྱིར་རོ། །གཉིས་པ་སྐྱབས་འགྲོ་ཁྱད་པར་ཅན་བྱ་བ་ནི། དུས་ཁྱད་པར་ཅན་བྱང་ཆུབ་སྙིང་པོའི་མཐར་ཐུག་པ་སྟེ་ཆོས་ཀྱི་སྐུ་མངོན་དུ་མ་བྱས་ཀྱི་བར་དུའོ། །བྱང་ཆུབ་སྙིང་པོ་ནི་གཉིས་ཏེ། གནས་བྱང་ཆུབ་སྙིང་པོ་དང༌། རྟོགས་པ་བྱང་ཆུབ་སྙིང་པོའོ། །དང་པོ་ལ་གཉིས་ཏེ། རྡོ་རྗེ་གདན་ལྟ་བུ་སྤྲུལ་སྐུའི་དང༌། འོག་མིན་སྟུག་པོ་བཀོད་པ་ལྟ་བུ་ལོངས་སྐུའི་གནས་བྱང་ཆུབ་སྙིང་པོའོ། །གཉིས་པ་ནི་བླ་ན་མེད་པའི་ཡེ་ཤེས་ཀྱི་སྐུའོ་ཞེས་བུ་སྟོན་གྱིས་གསུངས་པ་ལྟར་རོ། །ཀུན་སློང་ཁྱད་པར་ཅན་སེམས་ཅན་ཐམས་ཅད་ལ་དམིགས་པའི་སྙིང་རྗེ་ཆེན་པོས་དཀོན་མཆོག་གསུམ་སྐྱབས་སུ་འཛིན་པ་ལས་ནམ་ཡང་མི་ལྡོག་པ་ཡི་སེམས་ཤིན་ཏུ་བརྟན་པ་དག་གིས། ཡུལ་ཁྱད་པར་ཅན་སྤང་རྟོགས་མཐར་ཕྱིན་གྱི་སངས་རྒྱས་དང༌། ལུང་དང་རྟོགས་པའི་ཆོས་དང༌། ཐུན་མོང་མ་ཡིན་པའི་དགེ་འདུན་བྱང་སེམས་འཕགས་པ་ཕྱིར་མི་ལྡོག་པ་སྟེ། དཀོན་མཆོག་རིན་པོ་ཆེ་རྣམ་པ་གསུམ་ལ། བསམ་པ་ཁྱད་པར་ཅན་སོ་སོའི་ཡོན་ཏན་ཐོས་པ་ན་རབ་ཏུ་དང་བའི་དད་པ་ཤུགས་དྲག་པོ་བསྐྱེད་ཅིང་སྤྲོ་བ་དང་ལྡན་པར་བྱས་ཏེ། ལུས་ཀྱི་ཀུན་སྤྱོད་རྐང་པ་གཉིས་ཀྱི་པུས་མོའི་ལྷ་ང་སར་བཙུགས་ནས་སམ།
ཙོག་པུར་འདུག་ཀྱང་རུང༌། བླ་གོས་ཕྲག་པ་གཅིག་ཏུ་གཟར། ལག་གཉིས་ཐལ་མོ་སྦྱར་བ་བྱས་ནས་ནི། གནས་སྐབས་སྨོན་པ་སེམས་བསྐྱེད་ཀྱི་ཆོ་ག་བྱེད་པའི་དང་པོར་སྐྱབས་འགྲོ་དག་གི་དངོས་གཞིའི་ཆོ་ག་བྱེད་པའི་དང་པོར་སྐྱབས་འགྲོ་དག་གི་དངོས་གཞིའི་ཆོ་ག་ལན་གསུམ་མམ་བརྗོད་པ་གསུམ་དུ་བྱ་སྟེ། གསུམ་པའི་ཚེ་སྐྱབས་འགྲོའི་སྡོམ་པ་ཐོབ་པ་ཡིན་པའི་ཕྱིར། ཤ་ར་བའི་ཞལ་ནས། ཉན་ཐོས་ལ་སྐྱབས་སུ་མི་འགྲོ་བ་དེ་བྱིན་རླབས་ཆུང་བ་མ་ཡིན་གྱིས། ལམ་མི་མཐུན་པ་གྲོགས་པོར་འཐུར་མི་བཏུབ་པ་དང་འདྲ་བ་ཡིན་གསུངས། དེ་ཡང་མདོ་སྡེ་རྒྱུན་ལས། འཚེ་བ་དག་ནི་ཐམས་ཅད་དང༌། །ངན་སོང་དང་ནི་ཐབས་མིན་དང༌། །འཇིགས་ཚོགས་ཐེག་པ་དམན་དག་ལས། །སྐྱོབས་ཕྱིར་སྐྱབས་ཀྱི་དམ་པའོ། །ཞེས་ཚེ་འདིའི་འཚེ་བ་དང༌། ཕྱི་མའི་ངན་སོང་དང་ཐབས་མིན་པ་ལམ་ལོག་པ་ལས་སྐྱོབ་པའི་ཕྱིར་སྐྱབས་སུ་འགྲོ་བ་སྐྱེས་བུ་ཆུང་ངུའི་དང༌། འཇིག་ཚོགས་ཟག་བཅས་ཀྱི་ཕུང་པོ་འདུ་བྱེད་ཀྱི་རང་བཞིན་ཅན་གྱི་འཁོར་བའི་སྡུག་བསྔལ་ལས་རང་ཉིད་ཐར་པའི་སྐྱབས་སུ་འགྲོ་བ་འབྲིང་གི་དང༌། ཐེག་དམན་ལ་འཇིགས་ནས་སེམས་ཅན་ཐམས་ཅད་འཁོར་བའི་འཇིགས་པ་ལས་སྐྱོབ་པའི་ཕྱིར་ཐུན་མོང་མ་ཡིན་པའི་དཀོན་མཆོག་གསུམ་ལ་སྐྱབས་སུ་འགྲོ་བ་ཐེག་ཆེན་གྱི་སྐྱབས་འགྲོར་གསུངས་སོ། །འོ་ན་སྐྱབས་འགྲོ་ཁྱད་པར་ཅན་དང༌། སྨོན་པ་ལ་ཁྱད་པར་ཡོད་དམ་མེད་ཅེ་ན། པུ་ཏོ་བས་སྨོན་པ་ནི་སེམས་ཅན་གྱི་དོན་དུ་སངས་རྒྱས་ཐོབ་པར་འདོད་ཅིང༌། སངས་རྒྱས་ཐོབ་ནས་སེམས་ཅན་སྒྲོལ་བ་ཚོང་དཔོན་རང་སྟོབས་ཀྱིས་སྐྱེལ་མ་བྱེད་པ་དང་འདྲ། སྐྱབས་འགྲོ་ཁྱད་པར་ཅན་ནི། སེམས་ཅན་སྡུག་བསྔལ་ལས་གྲོལ་བར་འདོད་པས་དེའི་ནུས་པ་མངའ་བ་དཀོན་མཆོག་གསུམ་ལ་ཞུས་ནས་ཚོང་དཔོན་ཁས་དྲག་པོ་གཞན་ལ་བརྟེན་ནས་སྐྱེལ་མ་བྱེད་པ་ལྟ་བུ་ཡིན་གསུངས་སོ། །མདོ་སྡེ་རྒྱན་ལས་ནི། འདི་ནི་དེ་དངོས་འདོད་པས་ཁས་ལེན་དེ་ཡང་སྙིང་བརྩེ་ལས་རིག་བྱ། །ཞེས་སངས་རྒྱས་འདོད་པས་ཁས་ལེན་པའང་གསུངས་སོ། །འདིར་སྐྱབས་
འགྲོའི་རྒྱུ་དང༌། ཡུལ་དང༌། ངོ་བོ་དང༌། བསླབ་བྱ་དང༌། ཕན་ཡོན་རྣམས་ནི་གཞན་ལས་ཤེས་པར་བྱའོ། །གསུམ་པ་སེམས་གསུམ་ལ་བློ་སྦྱོང་བ་ནི། ཚོགས་གསོག་སྔོན་དུ་སོང་བའི་སྐྱབས་འགྲོ་ཁྱད་པར་ཅན་བྱས་ཟིན་པ་དེ་ནས། མ་གྱུར་སེམས་ཅན་ཐམས་ཅད་ལ་དམིགས་པའི་བྱམས་པའི་སེམས་ནི་རྒྱུ་འབྲས་ཡན་ལག་བདུན་གྱི་ནང་ཚན་གྱི་སྙིང་རྗེའི་རྒྱུར་ངེས་པས་སྔོན་དུ་འགྲོ་དགོས་ལ། དེ་བས་ན་སེམས་ཅན་ཐམས་ཅད་ལ་མར་ཤེས་དྲིན་དྲན་དྲིན་གཟོའི་སྒོ་ནས་སྙིང་དུ་སྡུག་ཅིང་གཅེས་པའི་བློ་དུང་དུང་བ་བྱུང་ན། སྙིང་རྗེ་སྒོམ་སྟེ། དམིགས་པ་ངན་སོང་གསུམ་ན་སྡུག་བསྔལ་དྲག་རྒྱུན་རིང་བ་ཅི་ཡོད་དང༌། མི་ལ་སྐྱེ་རྒ་ན་འཆི་སོགས་ཀྱི་སྡུག་བསྔལ་དང༌། འདོད་ལྷ་དྲུག་ན་འཆི་འཕོ་བ་དང་འོག་ཏུ་ལྟུང་བའི་སྡུག་བསྔལ་དང༌། སོགས་ཁོང་ནས་བསྟན་པ་ཁམས་གོང་མ་གཉིས་ན་ཏིང་ངེ་འཛིན་གྱིས་མྱོས་ནས་ཆོས་ཀྱི་བློ་མེད་ཅིང་གནས་པ་ལ་རང་དབང་མ་ཐོབ་པའི་སྡུག་བསྔལ་ཏེ། མདོར་ན་སྡུག་བསྔལ་གསུམ་གྱིས་ཅི་རིགས་པར་སྡུག་བསྔལ་བའི་འགྲོ་བ་མ་ལུས་པ་ལ་ཐུགས་རྗེའི་སྤྱན་གྱིས་བལྟས་ཏེ། ངན་སོང་གསུམ་གྱི་སྡུག་བསྔལ་གྱིས་ནི་སྡུག་བསྔལ་བ་དང༌། མི་དང་འདོད་ལྷའི་འགྱུར་བའི་སྡུག་བསྔལ་དང༌། ཁམས་གོང་མའི་འདུ་བྱེད་ཀྱི་སྡུག་བསྔལ་དང༌། །དེ་རྣམས་སྐྱེད་པའི་རྩ་བ་ཀུན་འབྱུང་ལས་དང་ཉོན་མོངས་པ་རྒྱུ་མཚན་ལ་བསམས་ནས། དེ་ལས་འགྲོ་བ་མཐའ་དག་ཐར་བར་འདོད་པའི་སྙིང་རྗེ་དང༌། དེ་ཡིས་དྲངས་པའི་བྱང་ཆུབ་ཆེན་པོ་ཐོབ་འདོད་ཀྱི་བློ་སྦྱང་བ་ལ་ནན་ཏན་བྱ་དགོས་ཏེ། མདོ་ལས་བྱང་ཆུབ་སེམས་དཔའ་ཆོས་མང་པོ་ལ་བསླབ་པར་མི་བྱའོ། །ཆོས་གཅིག་ལ་བསླབ་པར་བྱ་སྟེ། གང་ཞེ་ན། སྙིང་རྗེ་ཆེན་པོའོ། །ཞེས་གསུངས་པས་སོ། །གཉིས་པ་དངོས་གཞི་ནི། དེ་ལྟར་བྱམས་པ་དང་སྙིང་རྗེའི་དམིགས་རྣམ་ལེགས་པར་སྦྱངས་ནས་བྱང་ཆུབ་ཀྱི་སེམས་རིན་པོ་ཆེ་ལས་དུས་ནམ་ཡང་ཕྱིར་ལྡོག་པ་མེད་པར་དམ་བཅའ་བའི་སྒོ་ནས། བྱང་ཆུབ་ཀྱི་སེམས་རིན་པོ་ཆེ་ནི་བསྐྱེད་པར་བྱའོ། །དེ་ཡང་བྱང་ཆུབ་མ་ཐོབ་ཀྱི་བར་དུ་སྐད་ཅིག་གཅིག་ཀྱང་མི་བཏང་བའི་སེམས་ཀྱིས་སྨོན་
སེམས་ཆོ་གས་བླངས་ནས། འོག་ནས་འབྱུང་བའི་བསླབ་བྱ་ལྔ་པ་ལ་ངེས་པར་སློབ་དགོས་སོ། །སྨོན་སེམས་ཆོ་གས་ལེན་པ་དངོས་ནི་གཞན་ལས་ཤེས་པར་བྱའོ། །གསུམ་པ་འཇུག་པ་བསླབ་བྱ་དང་བཅས་པ་ལ་ལྔ། ཕན་ཡོན་དྲན་པ་ལ་བསླབ་པ། བྱང་ཆུབ་ཀྱི་སེམས་སྦྱང་བ་ལ་བསླབ་པ། ཚོགས་གཉིས་བསགས་པ་ལ་བསླབ་པ། སེམས་ཅན་བློས་མི་སྤང་བ་ལ་བསླབ་པ། དཀར་ནག་ཆོས་བརྒྱད་བླང་དོར་བྱེད་ཚུལ་ལ་བསླབ་པའོ། །དང་པོ་ནི། སྔར་བཤད་པ་དེ་ལྟར་བྱང་ཆུབ་སྨོན་པའི་སེམས་དག་ནི། ཆོ་གས་བསྐྱེད་པའི་ཡོན་ཏན་ནམ་ཕན་ཡོན་དཔག་ཏུ་མེད་པ་གང་ཡིན་པ་དེ་ནི། འཕགས་པ་སྡོང་པོ་བཀོད་པ་ཡི་མདོ་ལས། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་ཆོས་དཀར་པོ་རྣམ་པར་འཕེལ་བར་བྱེད་པའི་ཞིང་ས་ལྟ་བུའོ། །ཞེས་སོགས་དཔེ་ཉིས་བརྒྱ་ལྷག་ཙམ་གྱི་སྒོ་ནས་བྱང་ཆུབ་སེམས་དཔའ་ནོར་བཟང་ལ། རྒྱལ་ཚབ་བྱམས་པས་རབ་ཏུ་རྒྱས་པར་བཤད་དོ། །གཉིས་པ་ནི། དེ་ལྟར་སྨོན་སེམས་ཆོ་གས་བླངས་པའི་བྱང་སེམས་དེ་ཡིས། མདོ་དང་བསྟན་བཅོས་རྣམས་རང་ཉིད་ཀྱིས་ཀློག་པའམ། ཡང་ན་བླ་མ་ལས་ལེགས་པར་མཉན་ཏེ། རྫོགས་པའི་བྱང་ཆུབ་ལ་དམིགས་པའི་སྨོན་སེམས་ཀྱི་ཡོན་ཏན་ནམ་ཕན་ཡོན་མཐའ་ལས་འདས་ཤིང་དཔག་ཏུ་མེད་པ། ཐེག་ཆེན་གྱི་མདོ་སྡེ་ལ་སོགས་པ་རྣམས་ལས་ཇི་སྐད་གསུངས་པ་དག་རྣམ་པར་མཐའ་ཆོད་པར་ཤེས་པར་བྱས་ནས། དགོས་པ་རང་རྒྱུད་ལ་སེམས་དེ་གནས་ཤིང་མི་ཉམས་པར་འཕེལ་བའི་རྒྱུ་མཚན་ནམ་རྒྱུ་རྐྱེན་དུ། དེ་ལྟར་ཡང་དང་ཡང་དུ་ཐ་ན་ཉིན་དང་མཚན་མོ་ལན་གསུམ་གསུམ་དུ་བྱང་ཆུབ་ཀྱི་སེམས་དེ་ནི་བསྐྱེད་པར་བྱའོ། །དེ་ཡང་ཆོ་ག་རྒྱས་པ་མ་གྲུབ་ནའང༌། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་པ་སོགས་ཀྱི་ཚིགས་བཅད་ཇོ་བོ་ཉིད་ཀྱི་གཞུང་ལས་འབྱུང་བ་དེ་ལྟར་བྱའོ། །འོ་ན་བྱང་ཆུབ་སེམས་ཀྱི་ཡོན་ཏན་མཐའ་མེད་པ་དེ་གང་ལས་བཤད་ཅེ་ན།
ཁྱིམ་བདག་དཔལ་སྦྱིན་གྱིས་ཞུས་པའི་མདོ་སྡེ་དག་ལས། བྱང་ཆུབ་ཀྱི་སེམས་འདི་ཡི་བསོད་ནམས་ཕན་ཡོན་རྒྱ་ཆེར་རབ་ཏུ་བསྟན་པ་གང་གི་ཚེ་ན། དེ་དག་ལས་ཚིགས་བཅད་གསུམ་ཙམ་དུ་མདོར་བསྡུས་ནས་གསུངས་པས་ན། དེ་ནི་གཞུང་འདིར་ཡང་བྲི་བར་བྱའོ། །འོ་ན་དེ་ཇི་ལྟ་བུ་ཞེ་ན། བྱང་ཆུབ་མཆོག་ཏུ་སེམས་བསྐྱེད་པ་ཉིད་ཀྱི་བསོད་ནམས་གང་ཡིན་པ་དེ་གཟུགས་སུ་མ་གྲུབ་མོད་ཀྱི། དེ་ལ་གལ་ཏེ་གཟུགས་ཤིག་མཆིས་ན་ཕྱོགས་བཅུའི་ནམ་མཁའི་ཁམས་ནི་མ་ལུས་པ་ཀུན་ཕྱུར་བུར་བཀང་སྟེ་གཏམས་ནའང༌། ཕན་ཡོན་དེ་ནི་ནམ་མཁའ་དེ་བས་ཀྱང་ལྷག་པར་འགྱུར་ཏེ་མི་ཤོང་བ་ཡིན་ནོ། །གཞན་ཡང་སྣོད་ཀྱི་ཁྱད་པར་ཆུ་བོ་གངྒའི་འགྲམ་གྱི་བྱེ་མའི་གྲངས་སམ། ཆུ་ཉིད་རྡུལ་དུ་ཕྱེ་བའི་བྱེ་མ་ཇི་སྙེད་པ་དེ་སྙེད་ཀྱི་སངས་རྒྱས་ཀྱི་ཞིང་ཁམས་རྣམས། རྟེན་དད་པ་དང་ལྡན་པའི་མི་གང་གིས། མཆོད་རྫས་ཀྱི་ཁྱད་པར་ལྷའི་རིན་ཆེན་དབང་གི་རྒྱལ་པོ་དག་གིས་ཀུན་ཏུ་བཀང་སྟེ། ཡུལ་ཁྱད་པར་ཅན་འཇིག་རྟེན་གྱི་མགོན་པོ་སངས་རྒྱས་བཅོམ་ལྡན་འདས་རྣམས་ལ་འབུལ་བ་ཕུལ་བ་བས། རྟེན་གྱི་གང་ཟག་ཐེག་ཆེན་གྱི་རིགས་ཅན་གང་གིས་དཀོན་མཆོག་གམ་བླ་མའི་དྲུང་དུ་དད་པས་ཐལ་མོ་སྦྱར་བ་བགྱིས་ཏེ། བླ་ན་མེད་པའི་བྱང་ཆུབ་མཆོག་ཏུ་སེམས་བཏུད་པ་སྟེ་བསྐྱེད་ན། བྱང་ཆུབ་ཏུ་སེམས་བསྐྱེད་པའི་མཆོད་པ་འདི་ནི་སྔ་མ་ལས་ཁྱད་པར་དུ་འཕགས་ཤིང་མཆོག་ཏུ་གྱུར་པ་ཡིན་པའི་ཕྱིར། བྱང་ཆུབ་ཀྱི་སེམས་དེ་ལ་བསོད་ནམས་ཀྱི་མཐའ་ནི་མ་མཆིས་སོ། །གསུམ་པ་ནི། ཕན་ཡོན་དྲན་པ་དང་དུས་དྲུག་ཏུ་སྦྱོང་བ་གཉིས་ཀྱི་སྒོ་ནས་བྱང་ཆུབ་སྨོན་པའི་སེམས་དག་བསྐྱེད་པར་བྱས་ནས་ནི། དཀོན་མཆོག་ལ་མཆོད་པ། དགེ་འདུན་ལ་བསྙེན་བསྐུར། འབྱུང་པོ་ལ་གཏོར་མ། ཕོངས་པ་ལ་སྦྱིན་པ་སོགས་བསོད་ནམས་དང༌། ཡེ་ཤེས་ཀྱི་ཚོགས་བསགས་པ་ལ་འབད་པ་མང་པོས་སེམས་དེ་ཀུན་ཏུ་སྤེལ་བར་བྱ་དགོས་ཏེ། ཚོགས་ཀྱི་གཏམ་ལས། བདག་གིས་དེ་རིང་བསོད་ནམས་དང༌། །ཡེ་ཤེས་ཚོགས་ནི་གང་ཞིག་གིས། །
གཞན་ལ་ཕན་པ་གང་བྱ་ཞེས། །བྱང་ཆུབ་སེམས་དཔས་ཡང་ཡང་བསམ། །ཞེས་གསུངས་པའི་ཕྱིར་རོ། །ཞིང་ཞེས་པ་འོག་མ་སྡུད་པའི་ཚིག་གོ །བཞི་པ་ནི། འདི་ནི་སྐྱེ་བ་གཞན་དུའང་དྲན་དོན་དུ། །ཞེས་པའི་གང་གིས་སྒྲས་བསྟན་པར་ཞང་རམ་པས་བཞེད་དོ། །དེ་ཡང་གང་གི་སྒྲས་ཚེ་འདིར་སེམས་བསྐྱེད་མི་ཉམས་པའི་རྒྱུད་ལ་བསླབ་པར་བསྟན་ཞིང༌། སེམས་ཅན་བློས་སྤང་གིས་སེམས་བསྐྱེད་གཏོང་བས་སོ་སྙམ་དུ་དགོངས་པས་ཤིན་ཏུ་ལེགས་ཞེས་དམ་པ་ཁ་ཅིག་འཆད་དོ། །ལྔ་པ་ནི། འདིར་བསྟན་སྨོན་སེམས་ཆོ་གས་བཟུང་བ་འདི་ལ་ནི་སྔར་བཤད་པའི་བསླབ་བྱ་བཞིའི་སྒོ་ནས་ཚེ་འདིར་མི་ཉམས་པའི་རྒྱུ་ལ་བསླབ་པ་དེ་ཙམ་གྱིས་ཆོག་གམ་ཞེ་ན། མི་ཆོག་སྟེ་སྐྱེ་བ་ཕྱི་མ་ཚེ་རབས་གཞན་དུའང་སེམས་དེ་མི་བརྗེད་ཅིང་དྲན་པར་བྱ་བའི་དོན་དུ། འོད་སྲུངས་ཀྱིས་ཞུས་པའི་མདོ་ལས་ཇི་སྐད་བཤད་པའི་བསླབ་པ་བཞི་ཚན་གཉིས་པོ་ཡོངས་སུ་བསྲུང་བ་དང་བསྟེན་པར་བྱ་བ་ཡིན་ནོ། །གཉིས་པ་འཇུག་པ་བསླབ་བྱ་དང་བཅས་པ་བཤད་པ་ལ་གསུམ། མཚམས་སྦྱར་ཏེ་འཇུག་སྡོམ་བླང་བར་བསྟན་པ། ཇི་ལྟར་བླང་བའི་ཚུལ། སྡོམ་པ་བླངས་ནས་བསླབ་བྱ་ལ་བསླབ་པ་རབ་བསྟན་པའོ། །དང་པོ་ནི། དེ་ལྟར་བྱང་ཆུབ་ཏུ་སེམས་བསྐྱེད་ཀྱང་རྒྱལ་སྲས་ཀྱི་སྤྱོད་པ་ལ་མ་བསླབ་ན་འཚང་རྒྱ་མི་སྲིད་ཅིང༌། བྱང་སྡོམ་མ་བཟུང་ན་སྦྱིན་སོགས་ལ་བསླབ་ཀྱང་རྒྱལ་སྲས་ཀྱི་སྤྱོད་པར་མི་འགྱུར་བས། སྨོན་སེམས་ཆོ་གས་བརྟན་པོར་བཟུང་བ་དེས་སྤྱོད་པའི་རྟེན་སྡོམ་པ་བཟུང་དགོས་ཏེ། འཇུག་པའི་སེམས་ཀྱི་བདག་ཉིད་སྡོམ་པ་བཟུང་བ་མ་གཏོགས་པར་ཡང་དག་པ་མཆོག་ཉིད་དུ་སྨོན་པ་ཡི་སེམས་གོང་ནས་གོང་དུ་འཕེལ་བར་འགྱུར་བར་བ་མ་ཡིན་པའི་ཕྱིར། དེ་ལྟར་ན་དགོས་པ་འབྲས་མིང་རྒྱུ་ལ་བཏགས་པ་རྫོགས་པའི་བྱང་ཆུབ་ལ་དམིགས་པའི་སྡོམ་པ་སྨོན་པའི་སེམས་དེ་སྤེལ་ཞིང་མཐར་ཕྱིན་པར་འདོད་པས་བླང་དགོས་པ་ཡིན་ལ། རྒྱུ་མཚན་དེ་ཡི་ཕྱིར་ན་སྒྱིད་ལུག་པ་དང་ཞུམ་པ་མེད་པར་ཤིན་ཏུ་འབད་པས་འཇུག་པའི་སྡོམ་པ་འདི་ནི་ངེས་པར་བླང་བར་བྱའོ། །གཉིས་པ་
འཇུག་སྡོམ་ཇི་ལྟར་ལེན་པའི་ཚུལ་ལ་གསུམ། གང་གིས་ལེན་པའི་རྟེན། གང་ལས་བླང་བའི་ཡུལ། ཇི་ལྟར་ལེན་པའི་ཆོ་གའོ། །དང་པོ་ནི། དགེ་བསྙེན་ནས་དགེ་སློང་གི་སྡོམ་པའི་བར་གྱི་སོ་སོར་ཐར་པའི་རིས་བདུན་དངོས་སམ། དེ་དང་ཐུན་མོང་བའི་རང་བཞིན་གྱི་ཁ་ན་མ་ཐོ་བ་དུས་རྟག་ཏུ་སྤོང་བའི་ཇི་སྲིད་འཚོ་བའི་སྡོམ་པ་གཞན་དེ་དག་དང་ལྡན་པའི་རྟེན་ལ། བྱང་ཆུབ་སེམས་དཔའི་སྡོམ་པ་ཡི་སྐལ་བ་ཡོད་ཀྱིས། དེ་ལས་གཞན་དུ་བྱང་སྡོམ་ཕུན་སུམ་ཚོགས་པ་སྐྱེ་བ་མིན་ཏེ། བྱང་སྡོམ་ནི་དངོས་སམ་བརྒྱུད་པའི་སྒོ་ནས་གཞན་ལ་ཕན་འདོགས་ནུས་པ་གང་ཞིག །དེ་ལས་གཞན་གནོད་གཞི་བཅས་ལས་ལྡོག་དགོས་པའི་ཕྱིར། གལ་ཏེ་སོ་ཐར་གྱི་སྡོམ་པ་ནི་ཚེ་འཕོས་པས་གཏོང་བས། འདིའི་རྟེན་ཇི་ལྟར་རུང་སྙམ་ན། རྣལ་འབྱོར་པ་ཆེན་པོའི་ཞལ་ནས། རྒན་པོ་ལང་བའི་རྟེན་དབྱུག་པས་བྱེད་ཅིང༌། ཕྱིས་ནས་དབྱུག་པ་མི་འགྱེལ་བ་རྒན་པོས་མགོ་ནས་བཟུང་བས་བྱེད་པ་ལྟར། དང་པོར་སྐྱེ་བའི་རྟེན་སོ་ཐར་གྱིས་བྱེད་ལ། དེ་ནས་གཞན་གནོད་གཞི་བཅས་ལས་ལོག་པ་དེ་བྱང་ཆུབ་སྙིང་པོའི་བར་མི་འཆོར་བར་བྱང་སྡོམ་གྱིས་བྱེད་ཅེས་གསུངས་སོ། །སོ་ཐར་རིས་བདུན་ཅི་རིགས་ལ་གནས་པའི་རྟེན་ལ་བཟང་ངན་གྱི་ཁྱད་པར་ཡོད་དམ་མེད་ཅེ་ན། ཟླ་བ་སྒྲོན་མ་ལས། གསུམ་ལས་དགེ་སློང་མཆོག་ཡིན་འབྲིང༌། །ཞེས་སོགས་གསུངས་པ་ལྟར་རོ། །འོ་ན་སོ་ཐར་གྱི་སྡོམ་ལྡན་གྱིས་བྱང་སྡོམ་བཟུང་བའི་ཚེ་གནས་འགྱུར་རམ། གཉིས་ལྡན་གང་ཡིན་ཞེ་ན། ནག་ཚོའི་འགྲེལ་པར། དེ་གཉིས་སྡོམ་པ་གཅིག་གམ་ཐ་དད་ཅེ་ན། གཅིག་པའང་ཡིན། ཐ་དད་པའང་ཡིན་ཏེ། འདི་ལྟར་སྡོམ་པའི་ཚུལ་ཁྲིམས་བྱ་བ་ལ་སོགས་པ་གཞན་ན་མེད་ཀྱི། སོ་སོར་ཐར་པ་རིགས་བདུན་པོ་གང་ལ་གནས་པ་ཉིད་སྡོམ་པའི་ཚུལ་ཁྲིམས་ཡིན་པས་ན་གཅིག་པའང་ཡིན་ནོ། །ཐ་དད་པའང་ཡིན་ཏེ། སོ་སོར་ཐར་པ་རྫས་སུ་འདོད་པ་དང༌། གཞན་ལ་གནོད་པ་བྱེད་པ་ལས་ལོག་ནས་
གནོད་པ་མི་བྱེད་པ་དང༌། བྱང་སེམས་ཀྱི་སྡོམ་པ་རྫས་སུ་མི་འདོད་པ་དང༌། གཞན་ལ་ཕན་པ་ཉིད་སྒྲུབ་པས་ཐ་དད་པའང་ཡིན་ཞེས་བྱའོ་གསུངས་སོ། །གཉིས་པ་གང་ལས་བླང་བའི་ཡུལ་ནི། བྱང་ཆུབ་སེམས་དཔའི་སྡོམ་པའི་ཆོ་ག་སྟེ། ཡང་དག་པར་ལེན་པ་དང༌། མི་ཉམས་པར་བསྲུང་བ་དང༌། ཉམས་ན་ཕྱིར་བཅོས་པའི་ཐབས་ལ་མཁས་པའི་ཤེས་རབ་ཕུན་སུམ་ཚོགས་པ་དང༌། བདག་ཉིད་གང་ཞིག་བྱང་ཆུབ་སེམས་དཔའི་སྡོམ་པ་ཚུལ་ཁྲིམས་ཕུན་སུམ་ཚོགས་པ་ལ་གནས་པ་དང༌། བྱང་སེམས་ཀྱི་སྡོམ་པ་འབོགས་པར་བཟོད་པའི་ནུས་པའམ་སྤོབས་པ་ཕུན་སུམ་ཚོགས་པ་དང༌། སྙིང་རྗེ་དང་ལྡན་པའི་བསམ་པ་ཕུན་སུམ་ཚོགས་པ་སྟེ། བཞི་པོ་དེ་དག་དང་ལྡན་པ་ནི་བླ་མ་བཟང་པོར་ཤེས་པར་བྱ་ཞིང༌། དེ་དག་གི་ནང་ནས་སྔ་མ་གཉིས་གཙོ་ཆེ་བར་ཞང་རོམ་སོགས་ཀྱིས་བཞེད་དོ། །གསུམ་པ་ཇི་ལྟར་ལེན་པའི་ཆོ་ག་ལ་གཉིས། བླ་མ་ཡོད་པའི་དང༌། མེད་པའི་ཆོ་གའོ། །དང་པོ་ནི། འཕགས་པ་ཐོགས་མེད་ཀྱིས་མཛད་པའི་བྱང་ཆུབ་སེམས་དཔའི་ས་དག་གི་ནང་ཚན་ཚུལ་ཁྲིམས་ཀྱི་ལེའུ་ལས་གསུངས་པའི་ཆོ་ག་ཡིས། ཡང་དག་པའི་མཚན་ཉིད་ཕུན་སུམ་ཚོགས་པ་དང་ལྡན་པ་ཡི་བླ་མ་བཟང་པོ་དེ་ལས་འཇུག་པའི་སྡོམ་པ་སྦྱོར་དངོས་རྗེས་གསུམ་ཚང་བའི་སྒོ་ནས་བླང་ངོ༌། །དེའང་གསོལ་གདབ། སྤྲོ་བསྐྱེད། ཚོགས་བསགས། བསྐུལ་གདབ། བསམ་པ་ཁྱད་པར་ཅན་བསྐྱེད་པ། བར་ཆད་ཐུན་མོང་བ་དྲི་བ། བསླབ་པ་མདོར་བསྡུས་བརྗོད་པ་དང་བདུན་ནི། སྦྱོར་བ་དང༌། ཕྱོགས་བཅུ་དུས་གསུམ་གྱི་རྒྱལ་བ་སྲས་དང་བཅས་པའི་བསླབ་པ་ལན་གསུམ་གྱི་བར་དུ་ལེན་པ་ནི་དངོས་གཞི་དང༌། མཁྱེན་གསོལ། ཡེ་ཤེས་ཀྱི་གཟིགས་པ་འཇུག་པའི་ཕན་ཡོན། སྡོམ་པ་མནོས་པ་གྱ་ཚོམ་དུ་མི་བསྒྲགས་པ། བསླབ་པ་མདོར་བསྡུས་བརྗོད་པ། གཏང་རག་གི་མཆོད་པ་དང་ལྔ་ནི་མཇུག་གི་ཆོ་གའོ། །གཉིས་པ་བླ་མ་མེད་པའི་ཆོ་ག་ལ་གཉིས། སྤྱི་དང་བྱེ་བྲག་
གི་སྒོ་ནས་ལུང་བཞིན་དུ་བཤད་པར་དམ་བཅའ་བ་དང༌། མདོ་དེ་ལས་འབྱུང་བའི་སེམས་བསྐྱེད་དང་སྡོམ་པ་བཟུང་ཚུལ་སྟོན་པའོ། །དང་པོ་ནི། མཚན་ཉིད་དང་ལྡན་པའི་བླ་མ་དེ་འདྲ་བ་ལ་སྡོམ་པ་བླང་བར་གསུངས་པ་བཞིན་ཤིན་ཏུ་འབད་པས་བཙལ་ཡང༌། ཡུལ་དུས་ཀྱི་དབང་གིས་འདི་འདྲ་བའི་གལ་ཏེ་བླ་མ་གཏན་ནས་མ་རྙེད་ན་ཇི་ལྟར་བྱ་ཞེ་ན། བླ་མ་ཡོད་པ་དེ་ལས་གཞན་དམིགས་བསལ་རང་ཉིད་ཀྱིས་བླང་བའི་ཚུལ་ཡོད་དེ། བླ་མ་མེད་པའི་སྡོམ་པ་ནོད་པ་ཡི་ཆོ་ག་ལུང་ལས་གསུངས་པ་བཞིན་འདིར་ཡང་ཡང་དག་པར་བཤད་པར་བྱ་བ་ཡིན་པའི་ཕྱིར། ཞེས་སྤྱིར་བཤད་པར་དམ་བཅས་ནས། འོ་ན་ལུང་གང་ལས་བཤད་ཅེ་ན། དེ་ལ་སྔོན་བསྐལ་པ་དཔག་ཏུ་མེད་པའི་དུས་ཀྱི་ཚེ་འཇམ་པའི་དཔལ་འཁོར་ལོས་སྒྱུར་བའི་རྒྱལ་པོ་ཨཱམྦ་རཱ་ཛ་ཏེ། རྒྱལ་པོ་ནམ་མཁའ་ཞེས་བྱ་བར་གྱུར་པ་ཡིས། དེ་བཞིན་གཤེགས་པ་འབྲུག་སྒྲའི་དབྱངས་ཀྱི་རྒྱལ་པོ་ཞེས་བྱ་བའི་དྲུང་དུ། ཇི་ལྟར་བླ་ན་མེད་པའི་བྱང་ཆུབ་ཏུ་ཐུགས་བསྐྱེད་པ་ཡི་ཚུལ། འཇམ་དཔལ་གྱི་ནི་སངས་རྒྱས་ཀྱི་ཞིང་གི་རྒྱན་གྱི་བཀོད་པ་སྟོན་པའི་མདོ་ལས་བཤད་པ་ལྟར། དེ་བཞིན་དུ་གཞུང་འདིར་ནི་རབ་ཏུ་གསལ་བར་བྲི་བར་བྱའོ། །ཞེས་བྱེ་བྲག་ཏུ་བཤད་པར་དམ་བཅའ་བའོ། །གཉིས་པ་མདོ་དེ་ལས་འབྱུང་བའི་སེམས་བསྐྱེད་དང་སྡོམ་པ་བཟུང་ཚུལ་ལ་གཉིས། སེམས་བསྐྱེད་དང༌། སྡོམ་པ་བཟུང་ཚུལ་ལོ། །དང་པོ་ནི།སེམས་ཅན་ཐམས་ཅད་ཀྱི་མགོན་པོ་སངས་རྒྱས་བྱང་སེམས་རྣམས་ཀྱི་སྤྱན་སྔ་རུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱེད་ཅིང༌། ཆེད་དུ་བྱ་བ་ནམ་མཁའི་མཐས་གཏུགས་པའི་འགྲོ་བ་མ་ལུས་པ་ཐམས་ཅད་མགྲོན་དུ་གཉེར་བའམ་དེའི་དོན་དུ། འགྲོ་བ་དེ་དག་འཁོར་བའི་སྡུག་བསྔལ་གྱི་ཆུ་བོ་ལས་མ་བརྒལ་བ་སྒྲོལ་བ་དང༌། ཀུན་འབྱུང་གི་འཆིང་བ་ལས་མ་གྲོལ་བ་དགྲོལ་ལོ། །བདག་ལྟས་དབུགས་མ་ཕྱུང་ལམ་བདེན་གྱིས་དབུགས་དབྱུང་བ་དང༌།
རྣམ་རྟོག་གི་ཡོངས་སུ་མྱ་ངན་ལས་འདས་པ་འགོག་བདེན་གྱིས་མྱ་ངན་ལས་འདས་པ་ལ་འགོད་ཅིང་མགྲོན་དུ་གཉེར་བའོ། །འདིས་འཇུག་པའི་སྦྱོར་བ་དང༌། སྨོན་པའི་དངོས་གཞི་བསྟན་པར་ཤ་ར་བ་བཞེད་དོ། །གཉིས་པ་སྡོམ་པ་ཟུང་ཚུལ་ལ་གསུམ། ཉེས་སྤྱོད་སྡོམ་པའི། སེམས་ཅན་དོན་བྱེད་ཀྱི། དགེ་བ་ཆོས་སྡུད་ཀྱི་ཁྲིམས་ཁས་ལེན་པའོ། །དང་པོ་ནི།ཀུན་ནས་མནར་སེམས་པའི་རྒྱུ་དགུ་གང་རུང་ལ་བརྟེན་ནས། ཞེ་སྡང་གིས་གསོད་འདོད་པ་ལ་སོགས་པའི་གནོད་སེམས་དང༌། གཞན་ལ་འཕྲལ་དུ་སེམས་འཁྲུགས་པའི་ཁྲོ་བའི་སེམས་ཉིད་དང༌། ཡོ་བྱད་གཞན་ལ་བཏང་མི་ནུས་པའི་སེར་སྣ་དང་ནི། གཞན་གྱི་ཕུན་སུམ་ཚོགས་ལ་མི་བཟོད་པའི་ཕྲག་དོག་ཉིད་དེ། བཞི་པོ་དེ་དག་སྡོམ་པ་བླངས་པའི་ཉིན་དེང་ནས་ཟུང་སྟེ་བླ་ན་མེད་པའི་བྱང་ཆུབ་དག་མ་ཐོབ་ཀྱི་བར་དེ་སྲིད་དུ་མི་བྱའོ། །དབང་པོ་གཉིས་སྦྱོར་གྱི་འཁྲིག་པ་སྤངས་པའི་ཚངས་པར་སྤྱོད་པ་སྤྱད་པར་བྱ་ཞིང༌། སྡིག་པའི་ལས་དང༌། དེའི་རྒྱུ་འདོད་པའི་ཡུལ་ལ་ཆགས་པ་རྣམས་སྤང་བར་བྱའོ། །དེ་དག་སྤངས་པའི་ཚུལ་ཁྲིམས་ཀྱི་སྡོམ་པ་རྣམ་པར་དག་པ་ལ་དགའ་བས་སངས་རྒྱས་རྣམས་ཀྱི་སྤྱོད་པ་དམ་པའི་རྗེས་སུ་ལེགས་པར་བསླབ་པར་བྱའོ། །གཉིས་པ་ནི། བདག་ཉིད་མྱུར་བའི་ཚུལ་གྱིས་ཏེ་སེམས་ཀྱིས་ནི་བྱང་ཆུབ་ཐོབ་པར་མི་སྤྲོ་ཞིང་དགའ་བ་མེད་པར། སེམས་ཅན་གཅིག་གི་དོན་བྱ་བའི་རྒྱུ་ཡིས་ནི་ཕྱི་མའི་མུ་མཐར་ཐུག་པ་མེད་པར་འཁོར་བ་ཅི་སྲིད་ཀྱི་བར་དེ་སྲིད་དུ་གནས་པར་བགྱིད་དོ། །གསུམ་པ་ནི། དེ་ལྟར་གནས་ནས་ཅི་བྱེད་སྙམ་ན། གྲངས་ཚད་བཟུང་དུ་མེད་ཅིང་བསམ་གྱིས་མི་ཁྱབ་པའི་སངས་རྒྱས་ཀྱི་ཞིང་དག་གིས་ངམ་གྲོག་དང༌། ཚེར་མ་སོགས་སྐྱོན་རྣམས་རྣམ་པར་སྦྱང་བར་བྱ་ཞིང༌། འགྲོ་བ་རྣམས་ཀྱིས་བདག་གི་མིང་ཐོས་ནས་བཟུང་
བ་བྱས་པ་དང༌། མཐོང་ཐོས་དྲན་རེག་གིས་ཀྱང་སེམས་ཅན་རྣམས་ལ་ཕན་གདགས་པར་འདོད་པས་ཕྱོགས་བཅུ་ཐམས་ཅད་ཀྱི་ཞིང་དག་ཏུ། བདག་གི་མིང་གྲགས་ཤིང་རྣམ་པར་གནས་པར་བྱེད་པའི་སྒོ་ནས་སེམས་ཅན་གྱི་འཇིག་རྟེན་ཡང་སྦྱང་ཞིང་སྨིན་པར་བྱའོ། །ལས་དང་པོ་པས་སྡོམ་པའི་ཚུལ་ཁྲིམས་ཉིད་ལ་གཅེས་སྤྲས་བྱེད་དགོས་པས། སླར་ཡང་ཟློས་ཏེ་སྟོན་པ་ནི། བདག་གི་ལུས་དང་ངག་གི་ལས་དག་རྣམ་པ་ཐམས་ཅད་དུ་ནི་ལྟུང་བས་མ་གོས་པར་དག་པར་བྱ་ཞིང༌། ཡིད་ཀྱི་ལས་ཀྱང་ལྟུང་བས་དག་པར་བྱ་སྟེ། མདོར་ན་སྒོ་གསུམ་གྱི་མི་དགེ་བའི་ལས་རྣམས་རྣམ་པ་ཐམས་ཅད་དུ་བྱང་ཆུབ་མ་ཐོབ་ཀྱི་བར་དུ་ནམ་ཡང་མི་བྱའོ། །གསུམ་པ་སྡོམ་པ་བླངས་ནས་བསླབ་བྱ་ལ་སློབ་པར་བསྟན་པ་ལ་གསུམ། ཚུལ་ཁྲིམས་ཀྱི། སེམས་ཀྱི། ཤེས་རབ་ཀྱི་བསླབ་པ་ལ་སློབ་ཚུལ་ལོ། །དང་པོ་ལ་གཉིས། དངོས་དང༌། དེའི་ཆེ་བའོ། །དང་པོ་ནི། འོ་ན་སྒོ་གསུམ་དག་བྱེད་ཀྱི་རྒྱུ་གང་ཞེ་ན། དགོས་པ་བྱང་སེམས་རང་གི་ལུས་ངག་སེམས་གསུམ་པོ་ནི་ལྟུང་བས་རྣམ་པར་དག་ཅིང༌། སེམས་ཅན་གཞན་རྣམས་ལ་མཆོག་ཏུ་ཕན་པའི་རྒྱུ་ཡི་ཕྱིར་དུ་ཐེག་ཆེན་གྱི་རིགས་ཅན་འཇུག་པའི་སེམས་ཀྱི་བདག་ཉིད་ཀྱི་སྡོམ་པ་ལ་གནས་པས། ཡུལ་ཚུལ་ཁྲིམས་ཀྱི་བསླབ་པ་གསུམ་ལ། ཚུལ་དང་མཐུན་པར་ལེགས་པར་འབད་པས་བསླབས་ན། གོམས་སྟོབས་ཀྱིས་ཕྱིས་ནས་སྔར་བཤད་པའི་ཚུལ་ཁྲིམས་ཀྱི་བསླབ་པ་གསུམ་ལ་གཅེས་སྤྲས་སུ་འཛིན་པའི་གུས་པ་ཇེ་ཆེར་འགྱུར་རོ། །དེ་ལ་ལེགས་པ་ཞེས་བྱ་བའི་སྒྲ་ནི། དག་པ་དང༌། ཕྱིར་མི་ལྡོག་པ་དང༌། ཡོངས་སུ་རྫོགས་པ་གསུམ་ལ་འཇུག་པས། སྡོམ་པའི་ཚུལ་ཁྲིམས་ལ་བསླབ་པས་སྐྱེས་བུ་གཟུགས་ལེགས་པ་བཞིན་དུ་དག་པ་དང༌། དོན་བྱེད་ཀྱི་ཚུལ་ཁྲིམས་ལ་བསླབ་པས་རྫོགས་བྱང་ལས་ཕྱིར་མི་ལྡོག་ཅིང་མི་ཉམས་པས་རིམས་ནད་ཡོངས་སུ་བྱང་བ་བཞིན་དུ་འགྱུར། ཆོས་སྡུད་ཀྱི་ཚུལ་ཁྲིམས་ལ་བསླབས་པས་
བུམ་པ་ལེགས་པར་གང་བ་བཞིན་དུ་འགྱུར་རོ། །བྱང་ཆུབ་སེམས་དཔའ་ཆེན་པོ་ཞེས་པའི་སྒྲ་དོན་ཡང་གསུམ་པོ་དེ་ལས་འགྱུར་བ་ཡིན་ཏེ། སྡོམ་པའི་ཚུལ་ཁྲིམས་ཀྱིས་སྐྱོན་ཐམས་ཅད་བྱང༌། ཆོས་སྡུད་ཀྱི་ཚུལ་ཁྲིམས་ཀྱི་ཡོན་ཏན་མཐའ་དག་ཆུབ། དོན་བྱེད་ཀྱི་ཚུལ་ཁྲིམས་ཀྱིས་སེམས་དཔའ་ཆེན་པོར་འགྱུར་བའི་ཕྱིར། ཞེས་གསུངས་སོ། །གཉིས་པ་ནི། ཚུལ་ཁྲིམས་གསུམ་ལ་བསླབས་པས་ལུས་ངག་ཡིད་གསུམ་དག་པར་འགྱུར་བ་དེ་བས་ན། སྤང་བྱ་རྣམ་པར་དག་ཅིང་གཉེན་པོའི་ཕྱོགས་ཡོངས་སུ་རྫོགས་པ་ནི་འབྲས་བུ་བླ་ན་མེད་པའི་བྱང་ཆུབ་ཡིན་ལ། དེ་ཉིད་གཞན་དོན་དུ་ཐོབ་བྱར་དམིགས་ཤིང་སེམས་པའི་བྱང་ཆུབ་སེམས་དཔའ་རྣམས་ཀྱིས་སྡོམ་པའི་ཚུལ་ཁྲིམས་གཙོ་བོར་གྱུར་བའི་ཚུལ་ཁྲིམས་གསུམ་གྱི་སྡོམ་པ་རྣམ་པར་དག་ཅིང་སྲུང་བ་ལ་ནི། དྲན་ཤེས་བག་ཡོད་དང་ལྡན་པའི་སྒོ་ནས་གུས་པ་ཆེན་པོས་ནན་ཏན་གྱིས་འབད་པར་བྱས་པས་རྫོགས་པའི་བྱང་ཆུབ་ཀྱི་རྒྱུ་བསོད་ནམས་དང་ཡེ་ཤེས་ཀྱི་ཚོགས་གཉིས་ནི་ཡོངས་སུ་རྫོགས་པར་འགྱུར་བ་ཡིན་ནོ། །གཉིས་པ་སེམས་ཀྱི་བསླབ་པ་ལ་སློབ་ཚུལ་ལ་གཉིས། མངོན་ཤེས་འབྱུང་བའི་རྒྱུའི་ཕྱིར་ཞི་གནས་ལ་བསླབ་པ་དང༌། ཞི་གནས་ལ་ཇི་ལྟར་བསླབ་ཚུལ་དངོས་སོ། །དང་པོ་ནི། དེ་ལྟར་བསོད་ནམས་དང་ཡེ་ཤེས་ཀྱི་རང་བཞིན་གྱི་ཚོགས་གཉིས་པོ་ནི་ཡོངས་སུ་རྫོགས་ཤིང་མཐར་ཕྱིན་པ་ཡི་རྒྱུ་ཁྱད་པར་ཅན་ནི། དུས་གསུམ་གྱི་སངས་རྒྱས་ཐམས་ཅད་བདག་གིས་མངོན་པར་ཤེས་པ་དྲུག་བསྐྱེད་པ་ཉིད་དུ་བཞེད་ཅིང༌། གཞན་དོན་རྣམ་དག་སྒྲུབ་པའང་མངོན་ཤེས་ལ་རག་ལས་ཏེ། ཇི་ལྟར་ན་འདབ་གཤོག་ཡོངས་སུ་མ་རྫོགས་པའི་བྱ་ནི་ནམ་མཁའ་ལ་འཕུར་བར་མི་ནུས་པ་ཡིན་ལ། དཔེ་དེ་བཞིན་དུ་མངོན་པར་ཤེས་པའི་སྟོབས་དང་བྲལ་བས་རང་སྐལ་དང་འཚམས་པར་སེམས་ཅན་གྱི་དོན་རྒྱ་ཆེན་པོ་བྱེད་ནུས་པ་མ་ཡིན་པའི་ཕྱིར་ཏེ། ཡུམ་ལས། རབ་འབྱོར་དཔེར་ན་བྱ་འདབ་མ་མེད་པ་ནི་ནམ་མཁའ་ལ་འཕུར་མི་ནུས་སོ། །
དེ་བཞིན་དུ་བྱང་ཆུབ་སེམས་དཔས་ཀྱང་མངོན་པར་ཤེས་པ་ལ་མ་བསྟེན་པར་སེམས་ཅན་རྣམས་ལ་ཆོས་བསྟན་པར་མི་ནུས་ཏེ། ལམ་གོལ་སར་ཞུགས་པས་སེམས་ཅན་རྣམས་ལམ་དུ་གཟུད་པར་མི་ནུས་སོ། །ཞེས་སོ། །དེ་ཡང་རྫུ་འཕྲུལ་གྱི་མངོན་ཤེས་ཀྱིས་སངས་རྒྱས་ཀྱི་ཞིང་དང་གདུལ་བྱ་གར་ཡོད་པའི་ཞིང་དུ་འགྲོ། གཞན་སེམས་ཤེས་པས་ཁམས་དང་བསམ་པ་ཇི་ལྟ་བ་བཞིན་དུ་རྟོགས། ལྷའི་རྣ་བས་དེ་དག་གི་སྐད་རིག །སྔོན་གནས་ཤེས་པས་སྔོན་གྱི་རྒྱུ་རྟོགས། ལྷའི་མིག་གིས་མ་འོངས་པར་ཅི་འགྱུར་རིག །ཟག་ཟད་ཀྱིས་བྱང་གྲོལ་གྱི་ལམ་སྟོན་པས་ཐེག་པ་གསུམ་ལ་འདུན་པ་དང༌། སྨིན་ཅིང་གྲོལ་བར་བྱེད་པ་ཡིན་ནོ། །གཞན་ཡང་རྟེན་བྱང་སེམས་མཉམ་པ་ལའང་མངོན་ཤེས་དང་ལྡན་པའི་བྱང་སེམས་དེས་ཉིན་མཚན་ཕྲུགས་གཅིག་ལ་སྦྱང་བའི་རང་བཞིན་གྱི་བསོད་ནམས་ཀྱི་ཚོགས་བསགས་པ་དག་ནི་གང་ཡིན་པ་དེ། མངོན་ཤེས་དག་དང་བྲལ་བར་གྱུར་བ་ལ་སྐྱེ་བ་བརྒྱར་ཡང་ཡོད་པ་མ་ཡིན་ནོ། །འདིས་ནི་ཡེ་ཤེས་ཀྱི་ཚོགས་ཀྱང་མཚོན་ནོ། །རྒྱུ་མཚན་དེས་ན་དུས་མྱུར་དུ་རྫོགས་པའི་བྱང་ཆུབ་ཐོབ་པའི་རྒྱུ་ཚོགས་གཉིས་ཡོངས་སུ་རྫོགས་པར་འདོད་པར་གྱུར་པ་དེས་ནི། དེའི་ཐབས་མངོན་ཤེས་བསྐྱེད་དགོས་ལ། དེ་ཡང་དེའི་རྒྱུ་ལ་བརྩོན་འགྲུས་ཤུགས་དྲག་གིས་འབད་པ་ཆེར་བྱས་པས་མངོན་ཤེས་དྲུག་པོ་དག་འགྲུབ་པར་འགྱུར་གྱིས། ལེ་ལོས་དབང་དུ་བྱས་པས་འགྲུབ་པ་མིན་པས་བརྩོན་འགྲུས་རྩོམ་དགོས་སོ། །འོ་ན་དེའི་རྒྱུ་གང་ལ་འབད་ཅེ་ན། ཤིན་སྦྱངས་རྣམ་དག་གིས་ཟིན་པའི་ཞི་གནས་ཚུལ་བཞིན་དུ་གྲུབ་པ་མ་ཡིན་པས། བསྒོམས་སྟོབས་ལས་བྱུང་བའི་མངོན་ཤེས་ཁྱད་པར་ཅན་འབྱུང་བར་མི་འགྱུར་ལ། རྒྱུ་མཚན་དེ་ཡི་ཕྱིར་ཞི་གནས་བསྒྲུབ་པར་བྱ་བའི་ཕྱིར་དུ། སེམས་གནས་པའི་ཐབས་དགུ་ལ་ཡང་དང་ཡང་དུ་འབད་པར་བྱའོ། །གཉིས་པ་ཞི་གནས་ལ་ཇི་ལྟར་བསླབ་ཚུལ་དངོས་ལ་གསུམ། ཞི་གནས་ཀྱི་ཚོགས་བརྟེན་པ། ཞི་གནས་ཇི་ལྟར་སྒོམ་པའི་
ཚུལ། བསྒོམས་པའི་ཕན་ཡོན་ནོ། །དང་པོ་ནི། འོ་ན་བརྩོན་འགྲུས་གཅིག་པུས་ཞི་གནས་འགྲུབ་བམ་ཞེ་ན། མ་ཡིན་ཏེ་ཞི་གནས་ཀྱི་ཡན་ལག་རྒྱུ་ཚོགས་རྣམ་པར་ཉམས་པས་ནི་བརྩོན་འགྲུས་དྲག་པོས་རབ་ཏུ་འབད་དེ་ཡུན་རིང་དུ་བསྒོམ་པར་བྱས་ཀྱང་ལོ་ནི་མང་པོ་སྟོང་ཕྲག་དག་གིས་ཀྱང་ཞི་གནས་ཀྱི་ཏིང་ངེ་འཛིན་འགྲུབ་པར་མི་འགྱུར་རོ། །དེ་ལྟར་ཡན་ལག་ཉམས་ན་ཞི་གནས་མི་འགྲུབ་པ་དེ་ཡི་ཕྱིར། མདོ་སྡེ་ཏིང་ངེ་འཛིན་གྱི་ཚོགས་ཀྱི་ལེའུ་དང༌། ཉན་ས་ལ་སོགས་པ་ལས་ཇི་སྐད་གསུངས་པའི་ཡན་ལག་རྣམས་ལ་ལེགས་པར་གནས་ཤིང་བསྒྲུབས་པས་ཏིང་ངེ་འཛིན་བསྐྱེད་པར་བྱའོ། །གཉིས་པ་ནི། དེ་ལྟར་ཞི་གནས་ཀྱི་རྒྱུ་ཚོགས་ལ་གནས་པ་དེས་རྒྱལ་བས་གསུངས་པའི་བསྒོམ་བྱའི་དམིགས་པ་ཚད་ཐུབ་ཀྱི་མདོ་དང་བསྟན་བཅོས་ལས་འབྱུང་བའི་གང་ཡང་རུང་བ་གཅིག་དག་ལ། སྒོམ་བྱེད་ཀྱི་ཡིད་ནི་དགེ་བ་ལ་སྟེ་གཞན་དུ་མི་ཡེངས་པར་རྩེ་གཅིག་ཏུ་བཞག་པར་བྱའོ། །གསུམ་པ་ནི། སྔར་བཤད་པ་ལྟར་ཏིང་ངེ་འཛིན་ལ་ཆུ་བོའི་རྒྱུན་བཞིན་བརྩོན་པའི་རྣལ་འབྱོར་བས་ཞི་གནས་གྲུབ་པར་གྱུར་པ་ན། དེ་སྦྱངས་པ་ལས་མངོན་པར་ཤེས་པ་རྣམས་སྐྱེ་བར་མ་ཟད། མི་རྟོག་པའི་ཡེ་ཤེས་དག་ཀྱང་འགྲུབ་པར་འགྱུར་ཏེ། ཇོ་བོ་ཉིད་ཀྱི་ཞལ་ནས། མངོན་ཤེས་མཐུ་དང་ལྡན་བྱས་དང༌། །ཟག་མེད་ལམ་ནི་བསྐྱེད་པའི་ཕྱིར། །དང་པོར་ཞི་གནས་བསྐྱེད་པར་བྱ། །ཞེས་སོ། །གསུམ་པ་ཤེས་རབ་ཀྱི་བསླབ་པ་ལ་སློབ་པའི་ཚུལ་ལ་གཉིས། ཐབས་ཤེས་ཟུང་འབྲེལ་གྱི་འཐད་པ་བསྟན་པའི་སྒོ་ནས་ལྷག་མཐོང་ལ་བསླབ་པར་བསྟན་པ་དང༌། ལྷག་མཐོང་ལ་ཇི་ལྟར་སློབ་པའི་ཚུལ་ལོ། །དང་པོ་ལ་གསུམ། ལྷག་མཐོང་ཤེས་རབ་ལ་སློབ་དགོས་པའི་རྒྱུ་མཚན་དང༌། ཐབས་ཤེས་ཟུང་འབྲེལ་གྱི་སློབ་དགོས་པའི་རྒྱུ་མཚན་ཟུང་དུ་འབྲེལ་བའི་ལམ་དངོས་བཤད་པའོ། །དང་པོ་ནི། འོ་ན་ཞི་གནས་དང༌། དེས་དྲངས་པའི་མངོན་ཤེས་བསྐྱེད་པ་ཙམ་གྱིས་ཆོག་གམ་སྙམ་ན། འཇིག་རྟེན་པའི་བསམ་
གཏན་གྱིས་ཉོན་མོངས་མངོན་གྱུར་སྤོང་ན་ཡང་དེ་ཁོ་ན་ཉིད་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྦྱོར་བའམ་རྣལ་འབྱོར་དང་བྲལ་བས་སྒྲིབ་པ་གཉིས་པོ་གང་གི་ཡང་ས་བོན་ཟད་པར་མི་འགྱུར་ཏེ། སློབ་དཔོན་ཆེན་པོ་ཙནྡྲ་གོ་མཱིས། བསམ་གཏན་ནགས་མེས་ཡང་དང་ཡང་དུ་ནི། །ཉེས་པའི་ཚང་ཚིང་མང་པོ་བསྲེགས་བྱས་ཀྱང༌། །བདག་ལྟའི་རྩ་བ་བརྟན་པོ་མ་བྱུང་ན། །ཆར་གྱི་བརླན་བཞིན་མདུན་ནས་རབ་ཏུ་བསྐྱེད། །ཅེས་སོ། །རྒྱུ་མཚན་དེ་ཡི་ཕྱིར་ན་ཆགས་སོགས་ཉོན་མོངས་པ་དང༌། གཉིས་སྣང་འཁྲུལ་པའི་བག་ཆགས་ཤེས་བྱའི་སྒྲིབ་པ་མ་ལུས་པ་སྤང་བའི་ཕྱིར། དེ་ཉིད་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་དུས་རྟག་ཏུ་སྦྱིན་སོགས་ཀྱི་ཐབས་དང་བཅས་པའི་སྒོ་ནས་བསྒོམ་པར་བྱ་དགོས་ཏེ། སྤྱོད་འཇུག་ལས། ཉོན་མོངས་ཤེས་བྱའི་སྒྲིབ་པ་ཡི། །མུན་པའི་གཉེན་པོ་སྟོང་པ་ཉིད། །མྱུར་དུ་ཐམས་ཅད་མཁྱེན་འདོད་པས། །དེ་ནི་ཇི་ལྟར་སྒོམ་མི་བྱེད། །ཅེས་སོ། །དེ་ལ་རྐང་པ་སྔ་མ་གཉིས་ཀྱིས་དེ་ཁོ་ན་ཉིད་རྟོགས་པའི་ཤེས་རབ་དང་བྲལ་ན་ཉོན་མོངས་ཅི་ཡང་སྤོང་མི་ནུས་པས། ཉན་རང་ལའང་སྟོང་ཉིད་ཕྲ་མོ་རྟོགས་པ་ཡོད་པར་བསྟན། ཕྱི་མ་བཞིས་ཐེག་པ་ཆེ་ཆུང་ལྟ་བས་མི་འབྱེད་པས། ཐེག་པ་ཆེན་པོས་བགྲོད་པ་རྣམས་ཀྱིས་ཐབས་རྒྱ་ཆེན་པོས་ཟིན་པའི་ཤེས་རབ་ལ་སློབ་དགོས་པར་བསྟན་ནོ་གསུངས། གཉིས་པ་ནི། དེ་ལྟར་ན་ཐབས་དང་བྲལ་བའི་ཤེས་རབ་ཁོ་ན་དང༌། ཤེས་རབ་དང་བྲལ་བའི་ཐབས་གཅིག་པུ་ཉིད་ཀྱིས་ཀྱང་སངས་རྒྱས་མི་ཐོབ་པས། རྫོགས་བྱང་དོན་དུ་གཉེར་བའི་གང་ཟག་གིས་ཐབས་ཤེས་ཟུང་འབྲེལ་གྱི་ལམ་ལ་སློབ་དགོས་ཏེ། རྒྱུ་མཚན་གང་གི་ཕྱིར་ན། བཅོམ་ལྡན་འདས་ཀྱིས་དྲི་མ་མེད་པར་གྲགས་པས་བསྟན་པའི་མདོ་ལས། ཐབས་དང་བྲལ་བའི་ཤེས་རབ་ནི་འཆིང་བའོ། །ཤེས་རབ་དང་བྲལ་བའི་ཐབས་ནི་འཆིང་བའོ། །ཞེས་གསུངས་པ་དེ་བས་ན་གཉིས་ཀ་གང་ཡང་སྤང་ཞིང་དོར་བར་མི་བྱའོ། །གསུམ་པ་ཟུང་འབྲེལ་གྱི་ལམ་ཉིད་བཤད་
པ་ལ་གཉིས། མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི། འོ་ན་དེ་དག་སོ་སོའི་ངོ་བོ་གང་ཡིན་ཞེ་ན། ཤེས་རབ་ནི་གང་དང་ཐབས་ནི་གང་ཡིན་ཞེས་མ་རྟོགས་པ་དང༌། ལོག་པར་རྟོག་པ་དང༌། ཐེ་ཚོམ་དུ་གྱུར་པ་དག་ནི་སྤང་བའི་ཕྱིར། ཐབས་རྣམས་དང་ནི། ཤེས་རབ་ཀྱི་མཚན་ཉིད་འདྲེས་པ་ལྟ་བུར་སྣང་བ་དེ་ཕྱིན་ཅི་མ་ལོག་པར་ཡང་དག་པ་ཉིད་དུ་སོ་སོའི་དབྱེ་བའམ་ཁྱད་པར་མ་འདྲེས་པར་གསལ་བར་བྱའོ། །གཉིས་པ་རྒྱས་པར་བཤད་པ་ལ་གསུམ། ཐབས་ངོས་བཟུང་བ། དེ་གོམས་པའི་དགོས་པ། ཤེས་རབ་ངོས་བཟུང་བའོ། །དང་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྤངས་པའམ་ལོགས་སུ་བཀར་ནས། དེ་ལས་གཞན་བྱང་ཆུབ་ཀྱི་སེམས་ཀྱི་ཟིན་པའི་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པས་མཚོན་པའི་དཀར་པོ་དགེ་བའི་ཆོས་རྣམས་ཐམས་ཅད་པ་མཐའ་དག །དུས་གསུམ་གྱི་རྒྱལ་བ་རྣམས་ཀྱིས་ཐབས་ཀྱི་ཕྱོགས་སུ་གཏོགས་པ་ཡིན་པར་བཤད་དོ། །གཉིས་པ་ནི། མི་རྟག་པ་དང་ལས་འབྲས་ནས་བརྩམས་ཏེ་སྦྱིན་པ་ལ་སོགས་པའི་ཐབས་རྣམས་གོམས་པ་ཤིན་ཏུ་བརྟན་པར་བྱས་པའི་དབང་གིས། བྱང་སེམས་བདག་རང་ཉིད་ཀྱིས་ཕྱི་ནང་གི་དངོས་པོ་གང་ཡང་རུང་བ་ཞིག་ལ་དམིགས་ནས་མཚན་མར་འཛིན་པའི་དམིགས་གཏད་གཅོད་པའི་ཤེས་རབ་རྣམ་པར་བསྒོམ་པ་ཉིད་སྒྲིབ་པ་སྤོང་བ་ལ་ནུས་པ་ཤིན་ཏུ་ཆེ་བས་ན། དེས་ནི་བླ་ན་མེད་པའི་བྱང་ཆུབ་མྱུར་བ་ཉིད་དུ་ཐོབ་པར་འགྱུར་གྱིས། ཐབས་ཀྱི་ཆ་ཁྱད་དུ་བསད་ནས་བདག་མེད་གཅིག་པུ་བསྒོམ་པས་བླ་མེད་བྱང་ཆུབ་འགྲུབ་པ་མིན་ནོ། །གསུམ་པ་ནི། ཕུང་པོ་ལྔ་དང༌། ཁམས་བཅོ་བརྒྱད་དང༌། སྐྱེ་མཆེད་བཅུ་གཉིས་ཏེ། ཆོས་སུམ་ཅུ་རྩ་ལྔ་པོ་དེ་རྣམས་ནི་ཆོས་ཅན་ནམ་དམིགས་པའོ། །དེ་རྣམས་ཀྱི་སྟེང་དུ་ངེས་བྱའི་ཆོས་སམ་རྣམ་པ་ནི། རང་བཞིན་གྱིས་སྐྱེ་བ་མེད་པར་རྟོགས་ཤིང་ཤེས་པར་བྱ་བ་ཡིན་ཏེ། འཁོར་བར་འཁྱམས་པའི་རྒྱུའི་གཙོ་བོ་ནི་ཇི་ལྟར་སྣང་བའི་དངོས་པོ་འདི་
དག་ལ་བདེན་པར་ཞེན་པ་ཉིད་ཡིན་ལ། བདེན་ཞེན་རྣམས་ལས་ཀྱང་རང་བཞིན་གྱིས་སྐྱེ་བར་འཛིན་པ་ཉིད་དངོས་འཛིན་གཞན་གྱི་རྟེན་ཡིན་པས་ལྡོག་དགོས། དེ་ལ་རང་བཞིན་གྱིས་སྐྱེ་བ་མེད་པར་རྟོགས་དགོས་པའི་ཕྱིར། དེ་ལྟར་ན་སྔར་ཡོད་པ་ཞིག་ཕྱིས་མེད་དེ་སོང་བ་ལྟ་བུའང་མ་ཡིན་པར། གཟོད་མ་ནས་སྟོང་པ་ཡིན་པས་རང་བཞིན་གྱིས་སྐྱེ་བ་མེད་པར་རྟོགས་པར་གྱུར་པའི་ཆོས་ཐམས་ཅད་རང་བཞིན་གྱིས་སྟོང་པ་ཉིད་དུ་ཤེས་པ་ནི། ཐབས་ཤེས་གཉིས་ཀྱི་ནང་ནས་ཤེས་རབ་ཅེས་ནི་ཡོངས་སུ་བཤད་ལ། ཤེས་རབ་ཀྱི་བསླབ་པའི་གཙོ་བོ་ཡང་དེ་ཡིན་ནོ། །གཉིས་པ་ལྷག་མཐོང་ལ་སློབ་པའི་ཚུལ་ལ་གཉིས། རྒྱས་པར་བཤད་པ་དང༌། མཇུག་བསྡུ་བའོ། །དང་པོ་ལ་གསུམ། ལྷག་མཐོང་གི་ཚོགས་བརྟེན་པ། ལྷག་མཐོང་བསྒོམ་པའི་ཚུལ། བསྒོམ་པའི་འབྲས་བུའོ། །དང་པོ་ལ་གཉིས། རིག་པ་ལ་བརྟེན་པ་བསམ་བྱུང་གི་ཤེས་རབ་དང༌། ལུང་ལ་བརྟེན་པ་ཐོས་བྱུང་གི་ཤེས་རབ་བསྟན་པའོ། །དང་པོ་ལ་གསུམ། འབྲས་བུ་ལ་དཔྱོད་པ་ཡོད་མེད་སྐྱེ་འགོག་གི་གཏན་ཚིག །རྒྱུ་ལ་དཔྱོད་པ་རྡོ་རྗེ་ཟེག་མའི་གཏན་ཚིག །ངོ་བོ་ལ་དཔྱོད་པ་གཅིག་དང་དུ་བྲལ་གྱི་གཏན་ཚིག་གོ །དང་པོ་ནི། གོང་དུ་རང་བཞིན་གྱིས་སྐྱེ་བ་མེད་པར་བརྟགས་པའི་བློས་ཤེས་རབ་ཏུ་བསྟན་པ་ལ། དངོས་སྨྲ་བ་རྣམས་ན་རེ། མི་འཐད་དེ། དངོས་པོ་རྣམས་རང་བཞིན་གྱིས་སྐྱེ་འཇིག་མངོན་སུམ་དུ་གྲུབ་པའི་ཕྱིར་ཞེ་ན། འོ་ན་མྱུ་གུ་རང་བཞིན་གྱིས་སྐྱེ་ན། རྒྱུའི་དུས་ན་ཡོད་པའམ། མེད་པའམ་གཉིས་ཀའམ། གཉིས་ཀ་མ་ཡིན་པ་ཞིག་རང་བཞིན་གྱིས་སྐྱེ་བར་བརྟག་གྲང༌། དང་པོ་ལྟར་ན། མྱུ་གུ་ཆོས་ཅན། རྒྱུ་ཡི་དུས་སུ་ཡོད་པ་སྐྱེ་བ་རིགས་པ་མིན་ཏེ། ཡོད་པ་གྲུབ་ཟིན་པས་སྐྱེ་བ་དགོས་པ་མེད་པའི་ཕྱིར་དང༌། གྲུབ་ཟིན་སྐྱེ་ན་སྐྱེ་བ་ཐུག་མེད་དུ་འགྱུར་བའི་ཕྱིར། གཉིས་པ་ལྟར་ན། རྒྱུའི་དུས་སུ་མེད་པའང་རང་བཞིན་གྱིས་སྐྱེ་བ་རིགས་པ་མ་ཡིན་ཏེ། རྒྱུ་ནུས་པ་རི་ལྟར་ཆེ་
ཡང་རང་བཞིན་གྱིས་གྲུབ་པའི་མྱུ་གུ་བསྐྱེད་མི་ནུས་པའི་ཕྱིར། དཔེར་ན་ནམ་མཁའི་མེ་ཏོག་བཞིན་ནོ། །རྒྱུའི་དུས་སུ་མེད་ན། སྤྱིར་མེད་མི་དགོས་ཀྱང༌། རང་བཞིན་གྱིས་གྲུབ་པ་ཞིག་རྒྱུའི་དུས་སུ་མེད་ན་རྣམ་པ་ཐམས་ཅད་དུ་མེད་དགོས་ཏེ། སྔོན་བྱུང་ད་ལྟ་མེད་ཅེས་པ། །དེས་ན་ཆད་པར་ཐལ་བར་འགྱུར། །ཞེས་པས་བསྟན་པའི་རིགས་པས་སོ། །གསུམ་པ་ལྟར་ན། སྔར་བཤད་པའི་ཉེས་པ་གཉིས་ཀར་ཐལ་བར་འགྱུར་བའི་ཕྱིར། རྒྱུའི་དུས་སུ་ཡོད་པ་དང་མེད་པ་གཉིས་ཀ་དག་ཀྱང༌། རང་བཞིན་གྱིས་འབྱུང་བ་རིགས་པ་མིན་ནོ། །བཞི་པ་ལྟར་ན་ཡང་མི་འཐད་དེ། རྒྱུའི་དུས་སུ་ཡོད་པའང་མ་ཡིན། མེད་པའང་མ་ཡིན་པའི་དངོས་པོ་ཕུང་གསུམ་པ་དེ་འདྲ་མི་སྲིད་པའི་ཕྱིར། དེ་ལྟར་ན་མྱུ་གུ་ཆོས་ཅན། རང་བཞིན་གྱིས་སྐྱེ་བ་མེད་དེ། ཡོད་པ་དང༌། མེད་པ་དང༌། གཉིས་ཀ་དང༌། གཉིས་ཀ་མ་ཡིན་པ་རང་བཞིན་གྱིས་མི་སྐྱེ་བའི་ཕྱིར། ཞེས་པས་ཤེས་རབ་ཀྱི་ཡུལ་སྐྱེ་མེད་རིགས་པས་སྒྲུབ་པ་ཡིན་ཏེ། སྟོང་ཉིད་བདུན་ཅུ་པ་ལས། ཡོད་པ་ཡོད་ཕྱིར་སྐྱེ་མ་མིན། །མེད་པ་མེད་ཕྱིར་སྐྱེ་མ་ཡིན། །ཆོས་མི་མཐུན་ཕྱིར་གཉིས་ཆོས་མིན། །སྐྱེ་བ་མེད་ཕྱིར་གནས་འགག་མིན། །ཅེས་སོ། །གཉིས་པ་ནི། ཕྱི་ནང་གི་དངོས་པོ་རྣམས་ཆོས་ཅན། རང་ལས་མི་སྐྱེ་སྟེ། དེ་ལྟར་ན་སྐྱེ་བ་དོན་མེད་དང་ཐུག་མེད་དུ་འགྱུར་ཞིང༌། རྒྱུ་དང་འབྲས་བུ་གཅིག་ཉིད་ན། །བསྐྱེད་བྱ་སྐྱེད་བྱེད་གཅིག་ཏུ་འགྱུར། །ཞེས་པའི་གནོད་བྱེད་ཀྱང་འཇུག་པའི་ཕྱིར། ངོ་བོ་ཉིད་ཀྱིས་གཞན་ལས་ཀྱང་མི་སྐྱེ་སྟེ། ངོ་བོ་ཉིད་ཀྱིས་གཞན་ཡིན་ན་ཕན་གདགས་བྱ་འདོགས་བྱེད་འབྲེལ་མེད་དུ་འགྱུར། དེ་ལྟར་ན་ཐམས་ཅད་ལས་ཐམས་ཅད་སྐྱེ་བར་འགྱུར་བའི་ཕྱིར་དང༌། རྒྱུ་དང་འབྲས་བུ་གཞན་ཉིད་ན། །རྒྱུ་དང་རྒྱུ་མིན་མཚུངས་པར་འགྱུར། །ཞེས་པའི་རིག་པས་གནོད་པའི་ཕྱིར། འདི་ནི་གཅིག་དུ་བྲལ་གྱི་རིགས་པའི་སྙིང་པོ་ཅན་ཡང་ཡིན་ཏེ། བདག་སྐྱེ་འགོག་པའི་གཅིག་དང༌། གཞན་སྐྱེ་འགོག་པའི་རང་བཞིན་གྱིས་ཐ་དད་ཡིན་པ་འགོག་པའི་ཕྱིར། བདག་གཞན་
གཉིས་ཀ་ལས་ཀྱང་སྐྱེ་བ་མིན་ཏེ། བདག་གཞན་རེ་རེ་བ་ལས་སྐྱེ་བ་ཁོག་པའི་ཕྱིར། རྒྱུ་མེད་ལས་ཀྱང་སྐྱེ་བ་མིན་ཏེ། དེ་ལྟར་ན་འཇིག་རྟེན་པ་རྣམས་འབྲས་བུ་སྟོན་ཐོག་འབྱུང་བའི་ཕྱིར། ཞིང་ལས་ལ་འབད་པའང་དོན་མེད་པའི་ཕྱིར་དང༌། རྒྱུ་མེད་གཞན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །ཞེས་པས་གནོད་བྱེད་ཐོག་ཏུ་འབབ་པའི་ཕྱིར། དེ་ལྟར་མཐའ་བཞི་ལས་སྐྱེ་བ་མི་འཐད་པ་དེ་ཡི་ཕྱིར། དངོས་པོ་རྣམས་ངོ་བོ་ཉིད་ཀྱིས་རང་བཞིན་མེད་དོ། །གསུམ་པ་ནི། ཡང་ན་ཆོས་རྣམས་ཐམས་ཅད་དག །གཅིག་དང་དུ་མས་རྣམ་དཔྱད་ན། །ངོ་བོ་ཉིད་ནི་མི་དམིགས་པས། །རང་བཞིན་མེད་པ་ཉིད་དུ་ངེས། །སྔར་བཤད་པ་ལས་ཡང་ན་རིགས་པའི་རྣམ་གྲངས་གཞན་ཕྱི་ནང་གི་ཆོས་རྣམས་ཐམས་ཅད་པ་དག་ནི་ཆོས་ཅན། རང་བཞིན་གྱིས་གྲུབ་པའི་གཅིག་དང༌། དེ་ལྟར་གྲུབ་པའི་དུ་མས་རྣམ་པར་དཔྱད་ན་ཡུལ་སྟེང་ནས་གྲུབ་པའི་ངོ་བོ་ཉིད་ནི་རྡུལ་ཙམ་ཡང་མི་དམིགས་པས་ན། རང་བཞིན་གྱིས་གྲུབ་པ་མེད་པ་ཉིད་དུ་ངེས་ཏེ། དཔེར་ན་མེ་ལོང་ནང་གི་གཟུགས་བརྙན་བཞིན་ནོ། །གཉིས་པ་ལུང་ལ་བརྟེན་ནས་ཐོས་བྱུང་གི་ཤེས་རབ་ནི། བློ་གྲོས་དང་ལྡན་པ་རྣམས་ཀྱིས་སྟོང་ཉིད་ཟབ་མོ་ལ་ངེས་པ་ཡང་དག་པར་དྲང་བའི་ཕྱིར། སྟོང་ཉིད་ངེས་དོན་གྱི་ལུང་གིས་བསྒྲུབ་པ་མདོ་ཀུན་ལས་བཏུས་པ་དང༌། རིགས་པས་བསྒྲུབ་པ་སྟོང་ཉིད་བདུན་ཅུ་པའི་གཞུང་ལས་འབྱུང་བའི་རིགས་པ་དང༌། སྟོང་ཉིད་ཟབ་མོ་རིགས་པའི་རྣམ་གྲངས་མཐའ་ཡས་པའི་སྒོ་ནས་གཏན་ལ་འབེབས་པ་དབུ་མ་རྩ་བ་ལ་སོགས་པའི་རིགས་པའི་ཚོགས་རྣམས་དང༌། ལྷག་པར་འཕགས་པའི་དགོངས་པ་འགྲེལ་བའི་མཆོག་སངས་རྒྱས་བསྐྱངས་དང་ཟླ་བའི་ཞབས། ཞི་བ་ལྷའི་གཞུང་རྣམས་ལས་ཀྱང་དངོས་པོ་རྣམས་ཀྱི་རང་བཞིན་ནམ་གནས་ཚུལ་ཉིད་གདོད་མ་ནས་སྟོང་པ་ཉིད་དུ་གྲུབ་པར་བཤད་པ་ལ། རྒྱ་ཆེར་བལྟ་ཞིང་ལྟ་བའི་ཕུ་ཐག་ཆོད་པར་བྱའོ། །འོ་ན་ལུང་དང་རིག་པ་རྒྱ་ཆེན་པོ་དེ་དག་རྒྱུ་མཚན་གང་གི་ཕྱིར་འདིར་མི་འགོད་ཅེ་ན། དེ་དག་འདིར་བཀོད་ན་གཞུང་ནི་ཤིན་ཏུ་མངས་པར་གྱུར་གྱིས་དོགས་ནས། རྒྱུ་མཚན་དེ་ཡི་ཕྱིར་འདིར་ནི་དེ་དག་མ་སྤྲོས་ལ། འོན་ཀྱང་ལུང་རིག་གིས་གྲུབ་པའི་གྲུབ་མཐའ་ཙམ་ཞིག་ཏུ་ཅུང་ཟད་
བསྟན་པ་ནི། བདག་མེད་བསྒོམ་པའི་དོན་དུ་རབ་ཏུ་བསྡུས་ཏེ་བཤད་པ་ཡིན་ནོ། །དེ་ཡང༌། སྟོང་ཉིད་བདུན་ཅུའི་རིག་པ་དང༌། ཞེས་པ་འདིས་རྟེན་འབྲེལ་ཆེན་པོའི་གཏན་ཚིགས་བསྟན་པར་བཞེད་པ་ལྟར་ན། བློ་གྲོས་རྒྱ་མཚོས་ཞུས་པ་ལས། གང་རྣམས་རྟེན་ཅིང་འབྲེལ་བར་འབད། །དེ་རྣམས་ངོ་བོ་ཉིད་ཀྱིས་མེད། །ཅེས་རྟེན་འབྱུང་གི་རྟགས་ཀྱིས་རང་བཞིན་གྱིས་གྲུབ་པ་འགོག་པ་གསལ་བར་གསུངས་ཤིང༌། མ་དྲོས་པས་ཞུས་པ་ལས་ཀྱང༌། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རགས་ལས་གང་དེ་སྟོང་པ་སྟེ། །གང་གིས་སྟོང་ཉིད་ཤེས་དེ་བག་ཡོད་ཡིན། །ཅེས་གསལ་བར་གསུངས་ཏེ། དེ་ཡང་རྐང་པ་དང་པོས་མ་སྐྱེས་ཞེས་གསུངས་པའི་དོན་ནི། རྐང་པ་གཉིས་པས་དེས་སྐྱེ་བའི་རང་བཞིན་ཡོད་མ་ཡིན། ཅེས་བཤད་པས། སྐྱེ་བ་འགོག་པ་ལ་དགག་བྱའི་ཁྱད་པར་སྦྱར་བ་ཡིན་ལ། རྐང་པ་གསུམ་པས་རྐྱེན་ཚོགས་པའི་རྟེན་འབྲེལ་ལ་རག་ལས་པ་གང་ཡིན་པ་དེ་ནི་སྟོང་པའི་དོན་དུ་གསུངས་ཏེ། དེའང་རང་བཞིན་གྱིས་གྲུབ་པས་སྟོང་པ་རྟེན་འབྱུང་གི་དོན་ཡིན་གྱི། སྐྱེ་ཙམ་བཀག་པའི་སྣང་ཙམ་དུ་དོན་བྱེད་པས་སྟོང་པ་མིན་པར་བསྟན་ནོ། །རྩ་ཤེས་ལས་ཀྱང༌། རྟེན་ཅིང་འབྱུང་བ་གང་ཡིན་པ། །དེ་ནི་ངོ་བོ་ཉིད་ཀྱིས་ཞི། །ཞེས་བརྟེན་ནས་འབྱུང་བའི་རྒྱུ་མཚན་གྱིས། ངོ་བོ་ཉིད་ཀྱིས་གྲུབ་པས་ཞི་བའམ་སྟོང་པར་གསུངས་སོ། །དེ་འདྲ་བའི་རྟེན་འབྱུང་གི་གཏན་ཚིགས་ལ་ཤིན་ཏུ་བསྔགས་ཏེ། མ་དྲོས་པས་ཞུས་པ་ལས། མཁས་པས་རྟེན་འབྱུང་ཆོས་རྣམས་རྟོགས་འགྱུར་ཏེ། །མཐར་ལྟ་བ་ལ་བརྟེན་པར་ཡོང་མི་བྱེད། །ཅེས་རྟེན་འབྱུང་ཇི་བཞིན་དུ་རྟོགས་པས་མཐར་འཛིན་གྱི་ལྟ་བ་ལ་མི་བརྟེན་པར་གསུངས་ཏེ། འདི་ནི་བདག་ཉིད་ཆེན་པོ་ཀླུ་སྒྲུབ་ཡབ་སྲས་ཀྱི་བྱད་ཆོས་བླ་ན་མེད་པའོ། །དེ་ཡང་འདི་ལྟར་ལྟ་བ་རྣམ་དག་གི་གེགས་དང་གོལ་སའི་གཙོ་བོ་ནི་གཉིས་ཏེ། ཆོས་རྣམས་ལ་བདེན་པར་འཛིན་པའི་བདེན་འཛིན་གྱི་དམིགས་གཏད་ཅན་གྱི་རྟག་ལྟ་སྒྲོ་འདོགས་ཀྱི་
ལྟ་བ་དང༌། རྒྱུ་འབྲས་རྟེན་འབྱུང་གི་ངེས་པ་རང་ལུགས་ལ་དྲང་དུ་མེད་པར་སོང་ནས་འདི་ཡིན་དང་མིན་གྱི་ངོས་བཟུང་བྱས་མེད་པ་ཆད་ལྟ་སྐུར་འདེབས་ཀྱི་ལྟ་བའོ། །དེ་གཉིས་ནི་རྒྱུ་རྐྱེན་འདི་ལས་འབྲས་བུ་འདི་འབྱུང་ལ་ངེས་པ་དྲངས་པའི་གཏན་ཚིགས་ལ་བརྟེན་ནས། རང་བཞིན་གྱིས་གྲུབ་པ་བཀག་པ་ན་མ་ལུས་པ་སྤོང་བ་ཡིན་ཏེ། གཏན་ཚིགས་ཀྱི་དོན་ངེས་པས་ཆད་ལྟ་དང༌། དམ་བཅས་པའི་དོན་ངེས་པས་ནི་རྟག་ལྟ་རྩ་བ་ནས་སུན་འབྱིན་པའི་ཕྱིར་རོ། །དེས་ན་མྱུ་གུ་ལ་སོགས་པར་ཕྱི་དང༌། འདུ་བྱེད་ལ་སོགས་པ་ནང་གི་དངོས་པོ་རྣམས་རིམ་པ་བཞིན་དུ་ས་བོན་ལ་སོགས་པ་དང༌། མ་རིག་པ་ལ་སོགས་པ་ལ་བརྟེན་ནས་འབྱུང་ལ། དེ་ལྟ་ཡིན་ན་དེ་དག་ལ་རང་གིས་མཚན་ཉིད་ཀྱིས་གྲུབ་པ་མི་འཐད་དེ། རང་གི་ངོ་བོ་ཉིད་ཀྱིས་གྲུབ་ན་ནི། རང་ལ་དབང་བའི་ཚུགས་ཐུབ་ཀྱི་རང་བཞིན་གྲུབ་དགོས་པས། རྒྱུ་རྐྱེན་ལ་རག་ལས་པ་འགལ་བའི་ཕྱིར། འདིས་ནི་གང་ཟག་དང་བུམ་པ་སོགས་ཀྱང་རང་གི་ཚོགས་པ་བརྟེན་ནས་བཏགས་པ་ཡིན་པས་རང་བཞིན་མེད་པར་ཤེས་པར་བྱའོ། །བརྟེན་ནས་སྐྱེས་པ་དང༌། བརྟེན་ནས་བཏགས་པ་ཡིན་ན། གང་ལ་བརྟེན་པ་དེ་དང་ངོ་བོ་ཉིད་ཀྱིས་གྲུབ་པའི་གཅིག་ཏུ་མེད་དོ། །གཅིག་ཏུ་ཡོད་ན་བྱ་བྱེད་ཐམས་ཅད་གཅིག་ཏུ་འགྱུར་རོ། །དེ་གཉིས་ངོ་བོ་ཉིད་དུ་གྲུབ་པའི་གཞན་དུའང་མེད་དེ། ཡོད་ན་འབྲེལ་པ་འགོག་ནུས་པས། དེ་ལ་ལྟོས་པ་འགལ་བའི་ཕྱིར་རོ། །རྩ་ཤེས་ལས་ཀྱང༌། གང་ལ་བརྟེན་ཏེ་གང་འབྱུང་བ། །དེ་ནི་རེ་ཞིག་དེ་ཉིད་མིན། །དེ་ལས་གཞན་པའང་མ་ཡིན་ཏེ། །དེ་ཕྱིར་ཆད་མིན་རྟག་མ་ཡིན། །ཞེས་སོ། །དེ་ལྟར་མཚན་འཛིན་གྱི་དམིགས་གཏད་མཐའ་དག་གིས་སྟོང་པའི་སྟོང་ཉིད་ཀྱི་ངེས་པ་དྲངས་ནས། ལས་འབྲས་ཀྱི་འབྲེལ་བའི་ངེས་པ་མི་འདོར་བས། འདོར་ལེན་བསྟེན་པ་ལ་ཤིན་ཏུ་བསྔགས་ཏེ། བྱང་ཆུབ་སེམས་འགྲེལ་ལས། ཆོས་རྣམས་སྟོང་པ་འདི་ཤེས་ནས། །ལས་དང་འབྲས་བུ་བསྟེན་པ་གང༌། །ངོ་མཚར་བས་ཀྱང་འདི་ངོ་མཚར། །རྨད་བྱུང་བས་ཀྱང་འདི་རྨད་བྱུང༌། །ཞེས་གསུངས་
སོ། །དེ་ལྟར་འོང་བ་ལ་ནི་རང་བཞིན་གྱིས་ཡོད་པ་དང༌། ཡོད་ཙམ་དང༌། རང་གི་མཚན་ཉིད་ཀྱིས་མེད་པ་དང༌། མེད་པའི་ཁྱད་པར་ཕྱེད་དགོས་ཏེ། འཇུག་འགྲེལ་ལས། གཟུགས་བརྙན་རང་བཞིན་མེད་པའི་རྒྱུ་དང་འབྲས་བུའི་རྣམ་པར་གཞག་པ་ཡང་ཤེས་བཞིན་དུ། མཁས་པ་སུ་ཞིག་གཟུགས་དང་ཚོར་བ་ལ་སོགས་རྒྱུ་དང༌། འབྲས་བུ་ལས་ཐ་དད་མེད་པར་གནས་པ་རྣམས་ཡོད་པ་ཙམ་ཞིག་ཏུ་དམིགས་པས་རང་བཞིན་དང་བཅས་པར་ངེས་པར་བྱེད། དེའི་ཕྱིར་ཡོད་པར་དམིགས་ཀྱང་རང་བཞིན་གྱིས་སྐྱེ་བ་མེད་དོ། །ཞེས་གསུངས་པ་ལྟར་རོ། །དེ་དག་མ་ཕྱེད་ན་དངོས་པོ་ཡོད་ཕྱིན་ཆད་རང་གི་ངོ་བོས་ཡོད་པ་དང༌། རང་གི་ངོ་བོས་མེད་ཕྱིན་ཆད་ཡེ་མེད་དུ་སོང་ནས། སྒྲོ་འདོགས་དང་སྐུར་འདེབས་ཀྱི་མཐའ་གཉིས་ལས་མི་འདའ་བར་གསུངས་སོ། །དེས་ན་རང་གི་ངོ་བོས་མེད་པས་ཡོད་མཐའ་ཐམས་ཅད་དང༌། དེ་ཉིད་ལ་རང་བཞིན་མེད་པའི་རྒྱུ་འབྲས་འཇོག་ནུས་པས་མེད་མཐའ་ཐམས་ཅད་ལས་གྲོལ་ལོ། །མདོར་ན་ཆོས་རྣམས་བདེན་པར་འཛིན་པ་དང༌། ཅིར་ཡང་མ་གྲུབ་པ་དང་ཡོད་པ་མིན་པར་འཛིན་པ་ནི། ཡང་དག་པའི་དོན་གྱི་བཟློག་ཕྱོགས་ཀྱི་རྟག་ཆད་ཀྱི་མཐར་ལྟུང་བ་ཡིན་གྱི། ཆོས་རྣམས་དོན་དམ་པར་མེད་པ་དང༌། ལས་འབྲས་སོགས་ཐ་སྙད་དུ་ཡོད་པར་འཛིན་པ་སོགས་ནི་མཐར་འཛིན་མིན་ཏེ། གཟུང་བ་ལྟར་དུ་ཡུལ་དེ་སྣང་ཙམ་དུ་དེ་ལྟར་གནས་པའི་ཕྱིར་ཏེ། སྟོང་ཉིད་བདུན་ཅུ་པ་ལས། འདི་རྟེན་འདི་འབྱུང་ཞེས་བྱ་བའི། །འཇིག་རྟེན་ཚུལ་འདི་འགོག་མི་མཛད། །ཅེས་གསུངས་པའི་ཕྱིར་རོ། །གཉིས་པ་ལྷག་མཐོང་སྒོམ་ཚུལ་ནི། ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་ཐམས་ཅད་བདེན་མེད་དུ་གཏན་ལ་ཕབ་པ་དེ་བས་ན་གང་ཟག་དང་ཕུང་པོ་སོགས་ཀྱི་ཆོས་རྣམས་ལྷག་མ་མ་ལུས་པའི་རང་བཞིན་དག་ནི་ཡོད་ན། ལུང་དང་རིག་པས་བཙལ་བའི་ཚེ་རྙེད་དགོས་པ་ལས། རྡུལ་ཙམ་ཡང་མི་དམིགས་པས་ན། གང་ཟག་དང་ཆོས་ལ་ངོ་བོས་གྲུབ་པའི་བདག་མེད་པ་ཉིད་ནི་ཡིན་ནོ། །ཞེས་རིགས་པས་རྣམ་པར་དཔྱད་ཅིང་སྒོམ་པ་གང་ཉིད་ཡིན་པ་
དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ཡིན་ཏེ། སྒོམ་རིམ་བར་མ་ལས། ཤེས་རབ་ཀྱིས་དངོས་པོ་མཐའ་དག་གི་ངོ་བོ་ཉིད་ལ་སོ་སོར་བརྟགས་ནས་གང་གི་ཕྱིར། མི་དམིགས་པར་བསམ་གཏན་བྱེད་པ་དེའི་ཕྱིར། ཤེས་རབ་མཆོག་གི་བསམ་གཏན་པ་ཞེས་བྱ་སྟེ། ཞེས་གསུངས་པས་སོ། །འོ་ན་དེ་ལྟར་རྟོགས་མཁན་གྱི་ཤེས་རབ་ཉིད་ལ་འཛིན་པ་ཇི་ལྟར་སྤོང་ཞེ་ན། སོ་སོར་རྟོགས་པའི་ཤེས་རབ་ཀྱིས་ནི་གང་ཟག་དང་ཆོས་རྣམས་ཀུན་ལ་དཔྱད་པའི་ཚེ་གང་གི་ཡང་རང་བཞིན་བདེན་གྲུབ་ཏུ་མ་མཐོང་བ་བཞིན་དུ། ཤེས་རབ་དེ་ཉིད་ཀྱང་རིག་པས་རྣམ་པར་དཔྱད་པ་ན་རང་བཞིན་གྱིས་བདེན་གྲུབ་ཏུ་མེད་དོ། །བདེན་པའི་གཅིག་དང༌། བདེན་པའི་དུ་མ་དང་བྲལ་བའི་ཕྱིར། དེ་ལྟར་ཡུལ་ཅན་སྐྱེ་མེད་དུ་རྟོགས་པ་གང་ཡིན་པ་དེ་ཉིད་རྣམ་པར་རྟོག་པ་མེད་པར་གནས་པ། མི་རྟོགས་པའི་ཡེ་ཤེས་ཀྱི་རྒྱུར་ངེས་པས་དེ་བསྒོམ་པར་བྱའོ། །གཉིས་པ་ལྷག་མཐོང་བསྒོམ་པའི་འབྲས་བུ་ལ་གཉིས། དངོས་ཀྱི་དོན་དང༌། དེ་ཉིད་ལུང་གིས་སྒྲུབ་པའོ། །དང་པོ་ནི། བདེན་འཛིན་གྱི་རྣམ་པར་རྟོག་པ་ལས་བྱུང་ཞིང་དེའི་རྩ་བ་ཅན་གྱི་ཁམས་གསུམ་གྱི་སྲིད་པ་འཁོར་བ་འདི་ཐམས་ཅད་རྣམ་པར་རྟོག་པས་སྒྲོ་བཏགས་ནས་བཞག་པའི་བདག་ཉིད་དོ། །དེ་ཡི་ཕྱིར་ན་མ་ལུས་ཤིང་ལུས་པ་མེད་པའི་རྣམ་པར་རྟོག་པ་བག་ཆགས་དང་བཅས་ཀུན་སྤངས་པ་ནི། མི་གནས་པའི་མྱ་ངན་ལས་འདས་པ་ཐར་པའི་མཆོག་ཐོབ་པ་རང་གཞན་གྱི་དོན་ཐམས་ཅད་འགྲུབ་པ་ཡིན་ནོ། །གཉིས་པ་ནི། འོ་ན་འཁོར་བ་རྣམ་རྟོག་ལས་བྱུང་བ་དང༌། བདག་མེད་བསྒོམས་པས་དེ་ཉིད་སྤོང་ནུས་པའི་ཁུངས་ཇི་ལྟར་ཡིན་ཞེ་ན། བཅོམ་ལྡན་འདས་ཀྱིས་སམྦུ་ཊའི་རྒྱུད་ལས། དངོས་པོར་འཛིན་པའི་རྣམ་པར་རྟོག་པ་འདི་ནི་སྲིད་པའི་རྩ་བར་གྱུར་པའི་མ་རིག་པ་ཆེན་པོ་ཞེས་བྱ་སྟེ། གཏིང་མཐའ་མེད་པའི་འཁོར་བའི་རྒྱ་མཚོར་ལྟུང་བར་བྱེད་པ་པོ་ཡིན་པའི་ཕྱིར། བདེན་འཛིན་གྱི་རྣམ་རྟོག་གི་གཉེན་པོར་བདག་མེད་པའི་དོན་རིགས་པས་དཔྱད་དེ། ངེས་པ་རྙེད་པའི་ཚེ་དཔྱད་
མཐར་རྣམ་རྟོག་དང་བྲལ་བའི་རྟོག་མེད་ཀྱི་ཏིང་ངེ་འཛིན་ལ་གནས་ཤིང་གོམས་པར་བྱས་པས། གོམས་པ་རབ་ཀྱི་མཐར་ཕྱིན་པ་ན། སྟོན་དུས་ཀྱི་སྤྲིན་དང་བྲལ་བའི་ནམ་མཁའ་བཞིན་དུ་རྟོག་པ་མེད་པའི་སེམས་ཀྱི་ཆོས་ཉིད་གསལ་བར་མངོན་སུམ་དུ་མཐོང་བ་ཡིན་ནོ། །ཞེས་གསུངས་ཏེ། ཇི་སྐད་དུ། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བར་བྱེད། །རྟོག་མེད་ཏིང་འཛིན་ལ་གནས་ན། །ནམ་མཁའ་བཞིན་དུ་རྟོག་མེད་གསལ། །ཅེས་སོ། །གཞན་ཡང་རྣམ་པར་མི་རྟོག་པ་ལ་འཇུག་པའི་གཟུངས་ལས་ཀྱང༌། ཐེག་པ་ཆེན་པོའི་དམ་པའི་ཆོས་ཟབ་མོ་འདི་ལ། ཐོས་བསམ་གྱི་ཤེས་རབ་སྔོན་དུ་འགྲོ་བའི་རྒྱལ་བའི་སྲས་པོས། མཚན་འཛིན་གྱི་ཡིད་བྱེད་དང་འགལ་བའི་མི་མཐུན་ཕྱོགས་ནི་རྣམ་པར་མི་རྟོག་པའི་ཏིང་ངེ་འཛིན་ཡིན་ལ། དེ་བསམས་ཤིང་གོམས་པར་གྱུར་ན། མཚན་མ་ལ་སྤྱོད་པའི་རྣམ་རྟོག་གི་དྲྭ་བ་བགྲོད་པར་དཀའ་བ་རྣམས་ལས་རྣམ་པར་འདས་ཏེ། རིམ་གྱིས་རྣམ་པར་མི་རྟོག་པའི་ཡེ་ཤེས་ཐོབ་པར་འགྱུར་རོ། །ཞེས་གསུངས་ཏེ། དམ་ཆོས་འདི་ལ་རྒྱལ་བའི་སྲས། །རྣམ་པར་མི་རྟོག་བསམས་གྱུར་ན། །རྣམ་རྟོག་བགྲོད་དཀའ་རྣམས་འདས་ཏེ། །རིམ་གྱིས་མི་རྟོག་ཐོབ་པར་འགྱུར། །ཞེས་མདོ་རྒྱུད་གཉིས་ཀྱི་ལུང་གིས་བསྒྲུབ་པར་མཛད་དོ། །གཉིས་པ་མཇུག་བསྡུ་བ་ནི། དེ་ལྟར་ངེས་དོན་གྱི་ལུང་དང༌། དྲི་མ་མེད་པའི་རིག་པའི་ཚོགས་དག་གིས་ནི། གང་ཟག་དང་ཕུང་པོ་སོགས་ཀྱིས་བསྡུས་པའི་ཆོས་རྣམས་ཐམས་ཅད་བདེན་པར་སྐྱེ་བ་མེད་པའམ་སྐྱེ་བའི་རང་བཞིན་མེད་པར་ངེས་ཤིང་སྒྲོ་འདོགས་ཆོད་པར་བྱས་ནས། ཡིན་ལུགས་ཀྱི་དོན་ལ་མཚན་འཛིན་གྱི་རྣམ་པར་རྟོག་པ་མེད་པར་རྩེ་གཅིག་ཏུ་བསྒོམ་པར་བྱ་སྟེ། ཐོས་པའི་རྗེས་འཇུག་སྒྲུབ་པ་སྙིང་པོར་བྱ། །སྐྱེ་བའི་རྫོང་ལས་ཚོགས་ཆུང་ཐར་བར་འགྱུར། །ཞེས་གསུངས་པའི་ཕྱིར་རོ། །གཉིས་པ་འབྲས་བུའི་ཆོས་བཤད་པ་ནི། དེ་ལྟར་སྐྱབས་འགྲོ་ཐུན་མོང་བ་ནས་བཟུང་སྟེ།
སྐྱེས་བུ་ཆུང་འབྲིང་གི་ལམ་ལ་བློ་ལེགས་པར་སྦྱངས་ནས། སྨོན་འཇུག་གི་སེམས་གཉིས་བསྐྱེད་དེ། ཐབས་རྒྱ་ཆེན་པོས་ཟིན་པའི་སྒོ་ནས། ཞི་གནས་དང༌། ལྷག་མཐོང་གི་དེ་ཁོ་ན་ཉིད་བསྒོམ་པར་བྱས་ན། ཚོགས་ལམ་ཆུང་འབྲིང་ཆེན་པོ་གསུམ་ལེགས་པར་བགྲོད་དེ། རིམ་གྱིས་དྲོད་ལ་སོགས་པ་ངེས་པར་འབྱེད་པའི་ཆ་དང་མཐུན་པ་བཞི་ཐོབ་པར་བྱས་ནས། ས་དང་པོ་རབ་ཏུ་དགའ་བ་དང༌། གཉིས་པ་དྲི་མ་མེད་པ་ལ་སོགས་པ་ནས་བཟུང་སྟེ། བཅུ་པའི་རྡོ་རྗེ་ལྟ་བུའི་ཏིང་ངེ་འཛིན་གྱི་བར་གྱི་གནས་སྐབས་ཀྱི་འབྲས་བུ་ཐོབ་པར་འགྱུར་ཏེ། དེ་ལས་མཐར་ཐུག་གི་འབྲས་བུ་སངས་རྒྱས་ཀྱི་བྱང་ཆུབ་ཆེན་པོ་སྐུ་གསུམ་ཡེ་ཤེས་ལྔ་ལྡན་ཀྱི་གོ་འཕང་ཡང་ཡུན་མི་རིང་བར་མྱུར་བ་ཉིད་དུ་ཐོབ་ནས། སྐལ་བ་དང་ལྡན་པའི་འགྲོ་བ་མཐའ་ཡས་པ་སྨིན་ཅིང་གྲོལ་བར་བྱེད་པའི་ཕྲིན་ལས་ལྷུན་གྱིས་གྲུབ་པ་དང༌། རྒྱུན་མི་ཆད་པར་འཁོར་བ་ཇི་སྲིད་དུ་འབྱུང་བ་ཡིན་ཏེ། དེ་བཞིན་འཁོར་བ་ཇི་སྲིད་དུ། །ལས་ནི་རྒྱུན་མི་ཆད་པར་འདོད། །ཅེས་གསུངས་སོ། །གཉིས་པ་སྔགས་ལ་འཇུག་པའི་ཚུལ་མདོ་ཙམ་བསྟན་པ་ལ་གསུམ། རྡོ་རྗེ་ཐེག་པ་ལ་འཇུག་པས་དབང་ཐོབ་དགོས་པར་བསྟན་པ། རྟེན་གྱི་ཁྱད་པར་གྱིས་དབང་གོང་མ་གཉིས་བྱར་རུང་མི་རུང་གི་ཚུལ། དབང་གོང་མ་གཉིས་མ་ཐོབ་ན་རྒྱུད་ཉན་བཤད་སོགས་བྱར་རུང་མི་རུང་དཔྱད་པའོ། །དང་པོ་ལ་གསུམ། རྟེན་གྱི་གང་ཟག །དེ་ལ་སྨིན་བྱེད་ཀྱི་དབང་བསྐུར་བ། དབང་བསྐུར་བའི་ཆེ་བ་བསྟན་པའོ། །དང་པོ་ནི། དེ་ལྟར་ཕར་ཕྱིན་ཐེག་པའི་ལུགས་ཀྱི་ཕྱིན་དྲུག་བསྡུ་བཞིའི་ཉམས་ལེན་གྱིས་དོན་ཡོངས་སུ་རྫོགས་པར་འགྱུར་བ་བཞིན་དུ། རྡོ་རྗེ་ཐེག་པའི་ས་ལམ་གྱིས་བགྲོད་པའི་རྟེན་ཇི་ལྟར་དགོས་ན། སྔགས་བཟླས་པའི་མཐུ་ཉིད་ལས་གྲུབ་པ་ཡིན་ནོ། །ཞི་བ་དང༌། རྒྱས་པ་ལ་སོགས་པའི་ཕྲིན་ལས་རྣམ་པ་བཞི་པོ་རྣམས་ཀྱིས་དང༌། འདོད་དགུ་འབྱུང་བའི་བུམ་པ་བཟང་པོ་གྲུབ་པ་ལ་སོགས་པ་དང༌། གྲུབ་པ་ཆེན་པོ་བརྒྱད་
ལ་སོགས་པའི་སྟོབས་ཀྱིས་ཀྱང༌། ལམ་བདེ་བ་དང༌། མྱུར་བ་ཡིས་ནི་རང་གི་བྱང་ཆུབ་ཆེན་པོའི་ཚོགས་ཡོངས་སུ་རྫོགས་ཤིང༌། གཞན་དོན་ཐམས་ཅད་སྒྲུབ་པར་འདོད་པ་དང༌། བྱ་བ་དང་སྤྱོད་པ་ལ་སོགས་པའི་རྒྱུད་སྡེ་རྣམས་ལས་ཇི་སྐད་གསུངས་པའི་གལ་ཏེ་གསང་སྔགས་ཀྱི་སྤྱོད་པ་ཐམས་ཅད་ཚུལ་བཞིན་དུ་ཉམས་སུ་བླང་བར་འདོད་པ་དང་ལྡན་ན། དེ་ཉིད་གསང་སྔགས་ཀྱི་རྟེན་དུ་རུང་བར་རིག་པར་བྱའོ། །གཉིས་པ་ནི། རྡོ་རྗེ་ཐེག་པའི་ལམ་རྟེན་གྱི་གང་ཟག་དེ་ཉིད་གསང་སྔགས་ལ་འཇུག་པར་འདོད་པ་དེའི་ཚེ། མཚན་ཉིད་དང་ལྡན་པའི་བླ་མ་དམ་པ་མཉེས་པར་བྱ་སྟེ། དགོས་པ་གང་གི་དོན་དུ་ན། རྡོ་རྗེ་སློབ་དཔོན་གྱི་དབང་བསྐུར་ཐོབ་པའི་ཕྱིར་དུའོ། །འདིས་ནི་མཆོག་དབང་གོང་མ་གསུམ་ཡང་མཚོན་ནོ། །ཚུལ་ཇི་ལྟར་ན། ལུས་ངག་གིས་བསྙེན་བསྐུར་བ་དང༌། རིན་ཆེན་དང༌། བགོ་བ་དང༌། བཟའ་བཏུང་དང༌། རྐང་བྲན་ལ་སོགས་པ་ཇི་ལྟར་འདོད་པ་བཞིན་གྱི་ཡོ་བྱད་སྦྱིན་པ་དང༌། བཀའ་སྩལ་དང་དུ་བླངས་ནས་ཚུལ་བཞིན་དུ་བསྒྲུབ་པ་ལ་སོགས་པ་སྒོ་གསུམ་གྱི་དངོས་པོ་ཐམས་ཅད་ཀྱིས་བླ་མ་དམ་པ་དེ་ཉིད་མཉེས་པར་བྱ་བ་ཡིན་ཏེ། བཀུར་སྟི་རྙེད་པ་དག་དང་རིམ་གྲོ་དང༌། །སྒྲུབ་པའི་སྒོ་ནས་བཤེས་གཉེན་བསྟེན་པར་བྱ། །ཞེས་པ་ལྟར་རོ། །དེ་ལྟར་བླ་མ་མཉེས་པར་གྱུར་པ་ན། སློབ་མ་དེ་ཡིས་དབང་དོན་དུ་གསོལ་བ་བཏབ་ནས། མཐའ་རྟེན་རྗེས་གནང་དང་བཅས་པ་ཡོངས་སུ་རྫོགས་པའི་རྡོ་རྗེ་སློབ་དཔོན་གྱི་དབང་བསྐུར་བས། སློབ་མ་རང་ཉིད་གསང་སྔགས་ཀྱི་སྣོད་རུང་དུ་བྱའོ། །གསུམ་པ་ནི། གོང་དུ་བཤད་པ་ལྟར་དབང་བཞི་རྫོགས་པར་བསྐུར་བས། སྒོ་གསུམ་གྱི་སྡིག་སྒྲིབ་བག་ཆགས་དང་བཅས་པ་ཀུན་རྣམ་པར་དག་ཅིང༌། སློབ་མ་བདག་ཉིད་ནི་ཐུན་མོང་དང་མཆོག་གི་དངོས་གྲུབ་ཐམས་ཅད་སྒྲུབ་པའི་སྐལ་བ་དང་ལྡན་པར་འགྱུར་རོ། །གཉིས་པ་རྟེན་གྱི་ཁྱད་པར་གྱིས་དབང་གོང་མ་གཉིས་བྱར་རུང་མི་རུང་གི་ཚུལ་ནི། འོ་ན་དབང་བསྐུར་དེ་དག་
དངོས་གྲུབ་འདོད་པའི་གང་ཟག་ཐམས་ཅད་ཀྱིས་བླང་བ་ཡིན་ནམ་ཞེ་ན། དང་པོའི་སངས་རྒྱས་དུས་ཀྱི་འཁོར་ལོའི་རྩ་བའི་རྒྱུད་ཆེན་པོ་ལས། བཅོམ་ལྡན་འདས་ཀྱིས་རབ་ཏུ་འབད་པས་བཀག་པ་ཆེན་པོ་མཛད་པའི་ཕྱིར། གསང་བ་དང༌། ཤེས་རབ་ཡེ་ཤེས་ཀྱི་དབང་གཞན་ལ་བསྐུར་བ་ཚངས་པར་སྤྱོད་པའི་དགེ་བསྙེན་དང༌། རབ་བྱུང་སྡེ་ལྔ་གང་རུང་གི་ཚུལ་ཁྲིམས་ལ་གནས་པས་མི་བྱ་ཞིང༌། རང་ཉིད་ཀྱིས་ཀྱང་དངོས་སུ་བླང་བར་མི་བྱའོ། །འོ་ན་སྐྱོན་ཅི་ཞིག་གཟིགས་ནས་དབང་དེ་གཉིས་ཚངས་སྤྱོད་སོགས་ལ་བཀག་ཅེ་ན། གལ་ཏེ་དབང་བསྐུར་བ་གཉིས་པོ་དེ་དག་གང་ཟག་དེ་རྣམས་ཀྱིས་དངོས་སུ་འཛིན་ཅིང་བླངས་པ་སོགས་བྱས་ན། ཚངས་སྤྱོད་ཀྱི་དཀའ་ཐུབ་དང༌། རབ་བྱུང་གི་སྡོམ་པ་ལ་གནས་པས་ནི། སྟོན་པས་བཀག་པ་སྤྱད་པར་གྱུར་བ་དེའི་ཕྱིར་ཚངས་སྤྱོད་ཀྱི་དཀའ་ཐུབ་དང༌། རབ་བྱུང་གི་སྡོམ་པ་དེ་ཉམས་པར་གྱུར་ཏེ། ཚུལ་ཁྲིམས་ཀྱི་བརྟུལ་ཞུགས་ཅན་དེ་དག་ལ་ཕམ་པ་དང༌། ཕམ་པ་དང་འདྲ་བ་ཡི་རྩ་བའི་ལྟུང་བ་དག་ནི་འབྱུང་བར་འགྱུར་ཞིང༌། ལྟུང་བས་ཉམས་པའི་གང་ཟག་དེ་དག་ནི་ངན་སོང་གསུམ་དུ་ངེས་པར་ལྟུང་བར་འགྱུར་བས་ན། དངོས་གྲུབ་འགྲུབ་པ་ཡང་དུས་ནམ་ཡང་ཡོད་པ་མ་ཡིན་ཏེ། ཇོ་བོ་ཉིད་ཀྱི་ཞལ་ནས། གསང་བ་དང་ཤེས་རབ་ཡེ་ཤེས་ཀྱི་དབང་ནི་ཚངས་པར་སྤྱོད་པ་གྲོལ་བའི་ལམ་པས་མི་བསྐུར་ཞིང༌། སློབ་མས་ཀྱང་མི་བླང་ངོ༌། །དེ་ནི་ཚངས་པར་སྤྱོད་པ་ཟད་པར་བྱེད་པ་དང༌། སངས་རྒྱས་ཀྱི་བསྟན་པ་ནུབ་པར་བྱེད་པས་སེམས་ཅན་དམྱལ་བར་སློབ་དཔོན་དེ་དང༌། སློབ་མ་གཉིས་ཐེ་ཚོམ་མེད་པར་འགྲོ་བར་འགྱུར་རོ། །ཞེས་གསུངས་སོ། །གསུམ་པ་དབང་གོང་མ་གཉིས་མ་ཐོབ་ན་རྒྱུད་བཤད་ཉན་སོགས་བྱར་རུང་མི་རུང་གི་དགོས་པ་སྤང་བ་ནི། གལ་ཏེ་ཚངས་པར་སྤྱོད་པས་དབང་དེ་གཉིས་དངོས་སུ་བླང་དུ་མི་རུང་ན་གསང་སྔགས་སྤྱོད་པའི་སྐལ་བ་མེད་པར་འགྱུར་རོ་ཞེ་ན། སྐྱོན་མེད་དེ། བྱ་བ་ལ་སོགས་པའི་
རྒྱུད་སྡེ་བཞི་པོ་ཀུན་ལ་སློབ་མས་ཉན་པ་དང༌། སློབ་དཔོན་གྱིས་འཆད་པ་དང༌། ཐུན་མོངས་སུ་གཉིས་ཀས་སྦྱིན་སྲེག་དང༌། མཆོད་སྦྱིན་དང༌། རབ་གནས་དབང་བསྐུར་ལ་སོགས་པ་བྱེད་པ་ལ། སློབ་དཔོན་གྱིས་དབང་བསྐུར་བ་རྗེས་འབྲང་དང་བཅས་པ་བརྙེས་པའམ་ཐོབ་པར་གྱུར་ཅིང་དེ་ཁོ་ན་ཉིད་བཅུ་རིག་པའི་གང་ཟག་དག་ལ་ཉེས་པ་མེད་པའི་ཕྱིར་རོ། །གསུམ་པ་རྒྱུ་གང་ལ་བརྟེན་ནས་བརྩམས་པ་ནི། སྡེ་པ་བཅོ་བརྒྱད་པོ་ཐམས་ཅད་ཀྱི་གཙུག་གི་ནོར་བུ། བསྙེན་པར་རྫོགས་ནས་སྡོམ་རྒྱུན་རྣམ་དག་བར་མ་ཆད་དུ་ལོ་སུམ་ཅུ་ལྷག་ཙམ་བཞེས་པས་གནས་བརྟན་ཆེན་པོ་མར་མེ་མཛད་དཔལ་གྱིས་མདོ་དང༌། སོགས་ཁོངས་ནས་རྒྱུད་དང༌། མན་ངག་གི་བསྟན་བཅོས་ཏེ། དམ་པའི་ཆོས་རྣམས་ལས་བཤད་པ་ཇི་ལྟ་བ་བཞིན་མཐོང་བས་དང༌། བོད་ཡུལ་གྱི་བསྟན་པའི་ཁུར་བཞེས་པའི་ལྷ་རིག་དགེ་སློང་བྱང་ཆུབ་འོད་ཀྱིས། བསྟན་པ་སྤྱི་ཁྱབ་ཀྱི་དོན་དུ་ཐེག་པ་ཆེན་པོའི་ཤིང་རྟར་གྱུར་པའི་གཞུང་ཞིག་ཅིས་ཀྱང་གནང་དགོས་ཞེས་གསོལ་བ་བཏབ་པ་ལ་བརྟེན་ནས། ལས་དང་པོ་པའི་ས་ནས་བྱང་ཆུབ་མཆོག་གི་བར་དུ་བགྲོད་པའི་ཐེག་པ་ཆེན་པོའི་ལམ་རྣམ་པར་བཤད་པ་འདི་ཡང༌། ཚེ་འདི་ཡུན་ཐུང་ཤེས་བྱའི་རྣམ་པ་མང༌། །ཚེ་ཡི་ཚད་ཀྱང་ཅི་ཙམ་མི་ཤེས་པས། ངང་པས་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་དུ་བླངས་ན་ལེགས། །ཞེས་གསུངས་པ་ལྟར། དགག་སྒྲུབ་ཀྱི་སྤྲོས་པ་རྒྱ་ཆེན་པོ་དོར་ནས། ཐམས་ཅད་མཁྱེན་པ་དོན་གཉེར་གྱི་ཉམས་ལེན་མ་ཚང་བ་མེད་པ་བསྒྲུབ་པའི་ཆ་རྐྱེན་དུ་གྱུར་པ་ཙམ་ཞིག་ཚིག་མདོར་བསྡུས་ནས་བྱས་སོ། །བཞི་པ་མཇུག་གི་དོན་ལ་གཉིས། གང་གིས་མཛད་པ་དང་སུས་བསྒྱུར་བའོ། །དང་པོ་ནི། བྱང་ཆུབ་ལམ་གྱི་སྒྲོན་མ་ཞེས་བྱ་བའི་གཞུང་འདི་ནི་ལྔ་བརྒྱ་པ་རྣམས་ཀྱི་གཙུག་གི་ནོར་བུར་གྱུར་པ་སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱིས། སྐལ་ལྡན་གྱི་གདུལ་བྱ་བགྲང་བ་ལས་འདས་པའི་
དོན་དུ། ཐུགས་བརྩེ་བ་ཆེན་པོས་མཛད་པ་རྫོགས་སོ། །ཞེས་པའོ། །གཉིས་པ་ནི། རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། བོད་ཀྱི་ལོ་ཙྪ་བ་འཇིག་རྟེན་གྱི་མིག་དགེ་སློང་དགེ་བའི་བློ་གྲོས་ཀྱིས་རྒྱ་སྐད་ལས་བོད་སྐད་དུ་བསྒྱུར་ཞིང༌། ཚིག་དོན་གྱི་ཞུ་ཆེན་བགྱིས་ནས་འཆད་ཉན་མཛད་པའོ། །ཕྱོགས་བཅུའི་རྒྱལ་ཀུན་བདེ་བར་གཤེགས་པའི་ཤུལ། །བྱང་སེམས་རྣམས་ཀྱི་བགྲོད་པ་གཅིག་པའི་ལམ། །བསྟན་པ་ཡོངས་སུ་རྫོགས་པའི་གཞུང་བཟང་འདི། །ཐར་འདོད་སྐྱེ་བོས་སྙིང་གི་བཅུད་དུ་ལོངས། །སྐྱེ་ཀུན་དགེ་བའི་བཤེས་ཀྱིས་རྗེས་སུ་བཟུང༌། །རྣམ་དག་ལེགས་པའི་ལམ་བཟང་འདིར་ཞུགས་ནས། །བྱང་ཆུབ་སེམས་མཆོག་སྐྱེས་བརྟན་གོང་དུ་འཕེལ། །བཟང་པོ་སྤྱོད་པ་རྒྱ་མཚོ་ཡོངས་རྫོགས་ཤོག །དཔལ་ལྡན་མར་མེ་མཛད་ཀྱི་ཐུགས་བསྐྱེད་དང༌། །སྨོན་ལམ་སྟོབས་ཀྱིས་བྱང་ཆུབ་ལམ་གྱི་རིམ། །བདག་སོགས་རྒྱུད་ལ་དཀའ་བ་མེད་པར་རྫོགས། །ཚེ་འདིར་དོན་གཉིས་ལྷུན་གྱིས་འགྲུབ་གྱུར་ཅིག །ཡོངས་སུ་གྲགས་པའི་གཞུང་ལུགས་ཆེན་པོ་འདི་ལ་འགྲེལ་ཟིན་གྱི་ཞབས་ཏོག་འདི་ལྟར་བགྱིས་ན་ལེགས་ཞེས་རྗེ་བཙུན་བླ་མ་ཀུན་མཁྱེན་བརྩེ་བ་ཆེན་པོས་བཀའ་གནང་བ་ལྟར། ཐུབ་བསྟན་རིས་སུ་མ་ཆད་པའི་རྗེས་སུ་སློབ་ཅིང་རྒྱལ་བའི་སྲས་པོའི་རྟགས་ཙམ་འཛིན་པ་བློ་གྲོས་མཐའ་ཡས་ཀྱིས་དགེ་བའི་བཤེས་གཉེན་དམ་པ་རྣམས་ཀྱི་གསུང་གི་བཅུད་ཕྱུངས་ཏེ་བཀོད་པ་དགེ་ལེགས་འཕེལ།། །།