གདམས་ངག་མཛོད་པོད་བཅུ་དྲུག་པ།
བཅོམ་ལྡན་འདས་མགོན་པོ་ཚེ་དཔག་མེད་ཡོན་ཏན་གྱི་ཁྲིད་འཆི་མེད་རྡོ་རྗེའི་སྐུ་སྒྲུབ་པར་བྱེད་པ།
བཅོམ་ལྡན་འདས་མགོན་པོ་ཚེ་དཔག་མེད་ཡོན་ཏན་གྱི་ཁྲིད་འཆི་མེད་རྡོ་རྗེའི་སྐུ་སྒྲུབ་པར་བྱེད་པ་བཞུགས་སོ། །
རིན་ཆེན་བྱེ་བས་ཀུན་ནས་བརྒྱན་པའི་སྐུ། པདྨ་རཱ་གའི་ལྷུན་པོ་ལྟར་བརྗིད་ཅིང༌། །ཐུན་མཚམས་ཉི་མ་འབུམ་གྱི་གཟི་འོད་ཅན། འདྲེན་པ་འོད་དཔག་མེད་ལ་ཕྱག་འཚལ་ལོ། །ཆུ་སྐྱེས་ཟླ་བའི་སྐྱིལ་ཀྲུང་མཛོད་འཛིན་ཅིང༌། །མཉམ་བཞག་སྟེང་ན་བུམ་བཟང་བདུད་རྩིས་བཀང༌། །འཛུམ་བཅས་ཞི་བའི་ཞལ་བསྟན་མཚན་དཔེས་བརྒྱན། །མགོན་པོ་འོད་དཔག་མེད་དེས་བདག་སྐྱོངས་ཤིག །མགོན་པོ་དེ་ཡི་ཡེ་ཤེས་འོད་བྱེད་པས། །དཔལ་ལྡན་མི་ཏྲའི་འདབ་སྟོང་ཡོངས་རྒྱས་ཤིང༌། །མན་ངག་སྦྲང་རྩིའི་དགའ་སྟོན་གཅིག་བརྒྱུད་དུ། །མཁས་ལ་དབང་བ་ཤྲཱི་པུ་ཏྲས་སོ། །དེ་ནས་དེ་ཡི་བུམ་བཟང་བདུད་རྩིའི་མཆོག །གང་བྱོས་ཚུལ་དུ་གྲགས་པའི་མཚན་ཅན་ལ། །ལེགས་པར་བརྒྱུད་པའི་བདུད་རྩིའི་སྦྲང་རྒྱུན་ནི། །བདག་གིས་འཐུང་བས་བརྒྱུད་ཀྱི་བདུད་རྩི་བལྟམས། །ཞེས་བྱའོ། །དེ་ཡང་འདིར་བཅོམ་ལྡན་འདས་མགོན་པོ་ཚེ་དཔག་མེད་
ཡོན་ཏན་གྱི་ཁྲིད། འཆི་མེད་རྡོ་རྗེའི་སྐུ་སྒྲུབ་པར་བྱེད་པ་ལ་དོན་རྣམ་པ་བཞི་སྟེ། དང་པོ་གདམས་པའི་འདིའི་བརྒྱུད་པའི་བྱུང་ཚུལ་ནི། རྣལ་འབྱོར་གྱི་དབང་ཕྱུག་མི་ཏྲ་ཛཱ་ཀིས། སོ་ས་གླིང་གི་དུར་ཁྲོད་དུ་ཐུགས་དམ་ལྷ་ལྔ་བསྒྲུབས་པས། དེ་དག་གིས་ཞལ་མངོན་སུམ་དུ་གཟིགས་ཤིང༌། སོ་སོའི་ཁྲིད་ཀྱི་རིམ་པ་གསུངས་ནས། །མི་རབས་བདུན་གྱི་བར་དུ་བདག་ཅག་གིས་བྱིན་གྱིས་བརླབས་པའི་གང་ཟག་ལས་ཅན་ཤ་སྟག་འབྱུང་ངོ་ཞེས་གསུངས་པ་ཡིན་ནོ། །དེ་ནས་གདམས་པ་གཅིག་བརྒྱུད་དུ་བཅོམ་ལྡན་འདས་མགོན་པོ་ཚེ་དཔག་མེད་ཀྱིས་མི་ཏྲ་ཛཱ་ཀི་ལ་གསུངས། དེས་པཎྜིཏ་ཤྲཱི་པུ་ཏྲ་ལ། དེས་གྲགས་པ་རིན་ཆེན་ལ། དེས་བུདྡྷ་ཤྲི་ལའོ། །དེ་དག་གིས་བརྒྱུད་པའི་བྱུང་ཚུལ་སོངས་ནས། གཉིས་པ་སྔོན་འགྲོ་ལ་གཉིས། ཐུན་མོང་གི་སྔོན་འགྲོ་དང༌། ཁྱད་པར་གྱི་སྔོན་འགྲོའོ། །དང་པོ་ཐུན་མོང་གི་སྔོན་འགྲོ་ནི། དལ་འབྱོར་རྙེད་པར་དཀའ་བ། འཆི་བ་མི་རྟག་
པ། ལས་རྒྱུ་འབྲས་ཀྱི་དོན་བསམ་པ་འཁོར་བའི་ཉེས་དམིགས་བསྒོམས་པ་སྟེ་བཞི་ནི་ཐུན་མོང་གི་སྔོན་འགྲོའོ། །གཉིས་པ་ཁྱད་པར་གྱི་སྔོན་འགྲོ་ལ་བཞི། དང་པོ་ཅི་བྱས་ཐར་པའི་ལམ་དུ་འགྲོ་བར་བྱེད་པ་སྐྱབས་འགྲོ་སེམས་བསྐྱེད་ཀྱི་ཁྲིད་ནི། རང་གི་སྤྱི་གཙུག་གི་ནམ་མཁར་རིན་པོ་ཆེ་དུ་མ་ལས་གྲུབ་པའི་ཁྲི་ཡངས་ཤིང་རྒྱ་ཆེ་བ། རྨ་བྱས་བཏེགས་པའི་སྟེང་དུ། རབ་རྒྱས་པདྨ་འབུམ་ལྡན་དང་ཟླ་བའི་སྟེང་དུ་རང་གི་རྩ་བའི་བླ་མ་འོད་དཔག་མེད་ཀྱི་རྣམ་པ་ཅན། ལོངས་སྤྱོད་རྫོགས་པའི་སྐུའི་ཆ་ལུགས་ཀྱིས་གནས་པ་ལ་བཀའ་བརྒྱུད་བླ་མས་བསྐོར་བ། མདུན་དུ་ཡི་དམ་རྒྱ་མཚོ། གཡས་སུ་སངས་རྒྱས་རྒྱ་མཚོ། རྒྱབ་ཏུ་གསུང་རབ་རྒྱ་མཚོ། གཡོན་དུ་དགེ་འདུན་རྒྱ་མཚོ། འོག་ཏུ་མཁའ་འགྲོ་ཆོས་སྐྱོང་རྒྱ་མཚོས་གང་ཞིང༌། ཕྱོགས་དང་ཕྱོགས་མཚམས་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྲིན་ཕུང་འཐིབས་པ་ལྟར་གཏིབས་པའི་སྐྱབས་ཞབས་ན། བདག་དང་མཐའ་ཡས་པའི་སེམས་ཅན་ཐམས་ཅད་ཚུད་པར་བསམ་ཞིང༌། ཐམས་ཅད་མོས་པ་དང་ལྡན་པས་སྐྱབས་འགྲོ་ཀུ་དི་རི་རི་བྱེད་པར་བསྒོམས་ལ། སྐྱབས་སུ་འགྲོ་བར་བྱའོ། །བྱང་ཆུབ་མཆོག་ཏུ་སེམས་བསྐྱེད་དོ། །མཐར་དེ་དག་འོད་དུ་ཞུ་ནས་རང་ལ་ཐིམ་པས། ལུས་ངག་ཡིད་གསུམ་མ་བཅོས་པར་རྟོག་མེད་དུ་ཕྱམ་མེ་བ། འཛིན་མེད་དུ་ཤིག་གེ་བ། གསལ་སྟོང་དུས་ས་ལེ་བ། ཕྱག་རྒྱ་ཆེན་པོའི་ངང་ལ་བཞག་པ་ནི་དོན་གྱི་སྐྱབས་འགྲོའོ། །གཉིས་པ་སྡིག་སྒྲིབ་དག་བྱེད་ཧྲཱིཿཡིག་བཞི་སྦྱོར་གྱི་ཁྲིད་ནི། རང་གི་སྤྱི་བོའི་ཧྲཱིཿཡིག་དམར་པོ་ཚེག་དྲག་དང་བཅས་པ་ལ་བདུད་རྩི་འོ་མའི་རྒྱུན་ལྟ་བུ་དཀར་ནར་ར་ར་བབས་པས། ལུས་ཀྱི་ནང་
གི་ནད་གདོན་སྡིག་སྒྲིབ་ཐམས་ཅད་དུད་ཁུ་སོལ་ཁུའི་རྣམ་པར་དེད་ནས། རྩ་སྒོ་ཆུ་སྒོ་སེན་མོའི་བར་ནས་བུད་དེ། ས་རིམ་པ་དགུའི་ཞབས་སུ་སོང་ཞིང༌། ལུས་ཐམས་ཅད་ཡེ་ཤེས་ཀྱི་བདུད་རྩིས་དཀར་ལྟེམ་གྱིས་གང་བར་བསྒོམ་པ་ནི་སྡིག་པ་དག་བྱེད་ཀྱི་སྦྱོར་བའོ། །གཉིས་པ་ནད་དག་པར་བྱེད་པའི་སྦྱོར་བ་ནི། ཚད་པའི་ནད་ལ་བདུད་རྩི་གངས་ཆུ་དང༌། ག་བུར་གྱི་ཆུ་ལྟ་བུ་བསིལ་བའི་རང་བཞིན་ཅན། གྲང་བའི་ནད་ལ་བདུད་རྩི་ཁྲོ་ཆུ་ཁོལ་མ་ལྟ་བུ་ཚ་བའི་ངད་དང་ལྡན་པ། འདུས་པའི་ནད་ལ་ཞུན་མར་ལྟ་བུ་བདོ་བའི་རང་བཞིན་ཅན་བབས་པས་ནད་ཐམས་ཅད་ཞི་བར་བསྒོམ་མོ། །གསུམ་པ་གདོན་དག་པར་བྱེད་པའི་སྦྱོར་བ་ནི་ཧྲཱིཿཡིག་ལས་རྟ་མགྲིན་སྐུ་ཆུང་ལ་ཡན་ལག་དོད་པ། ཕྱག་མཚན་དང་བཅས་པ། མེ་དཔུང་འབར་ཞིང་མང་པོ་བྱུང་ནས་ལུས་ཀྱི་ནང་གང་གདོན་ཐམས་ཅད་བསྲེག་བཅོམ་ནས། རྩ་སྒོ་ཆུ་སྒོ་བ་སྤུའི་སྒོ་རྣམས་ནས། སྡོམ་དང་སྡིག་པའི་རྣམ་པར་བུད་པར་བསྒོམ་མོ། །བཞི་པོ་འོད་ཟེར་གྱི་སྦྱོར་བ་བྱེད་པ་ནི་ཧྲཱིཿཡིག་ལས་འོད་ཟེར་ཁ་དོག་སྣ་ལྔ་དང་ལྡན་པས། ཉི་མ་སྟོང་གི་འོད་ལྟ་བུ་འཕྲོས། ལུས་ཀྱི་ནང་གང་ནས། ནད་གདོན་སྡིག་སྒྲིབ་ཐམས་ཅད་སྦྱངས་ཤིང་ཕྱི་རོལ་ཏུ་འཕྲོས་པས་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་རྣམས་སྦྱངས་བར་བསྒོམ། དེ་དག་གི་སྐབས་སུ་ངག་ཏུ་ཧྲཱིཿཞེས་འདོན་པར་བྱའོ། །མཐར་རང་ལུས་འོད་དུ་ཞུ་ནས་ཧྲཱིཿལ་ཐིམ། ཧྲཱིཿནམ་མཁའ་ལ་འཇའ་ཡལ་བ་ལྟར་དམིགས་མེད་ཀྱི་ངང་ལ། ལུས་གནད་ལྟ་སྟངས་དང་ལྡན་པར་བཞག་པ་ནི་དོན་གྱི་གཤགས་པའོ། །གསུམ་པ་ཚོགས་གཉིས་རྫོགས་པར་བྱེད་པ་མཎྜལ་
གྱི་ཁྲིད་ནི་གཉིས་ཏེ། དང་པོ་སྒྲུབ་པའི་མཎྜལ་ནི། གླིང་བཞི་གླིང་ཕྲན་བརྒྱད་ཀྱིས་བསྐོར་བའི་རི་བོ་མཆོག་རབ་ཀྱི་སྟེང་དུ། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གི་ནང་དུ། སྐྱབས་སུ་འགྲོ་བའི་དམིགས་ཡུལ་བསྒོམས་པ་ལྟར་བསྐྱེད་ལ་མེ་ཏོག་གི་ཚོམ་བུ་བཀོད། དེ་ནས་མཎྜལ་གཉིས་ཡོད་ན་དེ་ཉིད་དུ་བཞག་ལ། མཆོད་པའི་མཎྜལ་མདུན་དུ་མཆོད། གཉིས་མེད་ན། ལྷ་དེ་དག་བར་སྣང་ལ་བཏེགས་ལ། སྒྲུབ་པའི་མཎྜལ་བསྒྲུབ་སྟེ། རི་རབ་གླིང་བཞི། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་ཕྱི་ནང་གི་མཆོད་པའི་ལྷ་མོ་དུ་མ་བློས་སྤྲུལ་ནས། མཎྜལ་སྤྱི་ལྟར་ལན་ཉི་ཤུ་རྩ་གཅིག་གི་བར་དུ་འབུལ་ལོ། །དེས་ནི་བསོད་ནམས་ཀྱི་ཚོགས་རྫོགས་པར་བྱེད་དོ། །མཐར་མཆོད་ཡུལ་གྱི་ལྷ་རྣམས་འོད་དུ་ཞུ་ནས་རང་ལ་ཐིམ་པས་རང་གི་ལུས་ངག་ཡིད་གསུམ་དབྱེར་མེད་དུ་མ་བཅོས་པའི་ངང་ལ་མཉམ་པར་བཞག་གོ །དེ་ནི་ཡེ་ཤེས་ཀྱི་ཚོགས་སོ། །བཞི་པ་བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ནི། རང་གི་སྤྱི་བོའི་གཙུག་ཏུ་རིན་པོ་ཆེ་དུ་མ་ལས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ། སྣ་ཚོགས་པདྨ་འབུམ་ལྡན་དང་ཟླ་བའི་དཀྱིལ་འཁོར་གྱི་སྟེང་དུ་རྩ་བའི་བླ་མ་འོད་དཔག་མེད་ལོངས་སྤྱོད་རྫོགས་སྐུའི་ཆ་ལུགས་སུ་བཞུགས་པ། དེའི་སྤྱི་བོར་པཎ་ཆེན་ཤྲཱི་པུཏྲ། དེའི་སྤྱི་བོར་གྲུབ་ཐོབ་མིཏྲ་ཛྭ་ཀི གཡས་ཌཱ་མ་རུ། གཡོན་དྲིལ་བུ། སྤྱན་ནམ་མཁར་གཟིགས་པ། སྐུ་ལ་རས་ཀྱི་ཨངྒ་རག་སྨད་གཡོགས་ཅན། རུས་པའི་རྒྱན་དྲུག་འཁྲོལ་བ། དེའི་སྤྱི་བོར་སྤྱན་རས་གཟིགས་ཞལ་གཅིག་ཕྱག་བཞི་པ། རིན་པོ་ཆེའི་རྒྱན་གྱིས་བརྒྱན་
པ། བླ་མ་དེ་དག་འཇའ་འོད་ཀྱི་དབུས་ན་སྐུ་གཟི་མདངས་དང་བཅས་པ། གསུང་ཚངས་དབྱངས་དང་བཅས་པ། ཐུགས་བྱིན་རླབས་དང་བཅས་པའི་རང་བཞིན་དུ་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུྃ་མཐིང་ཁ། ལྟེ་བར་ཧོ་སེར་པོ་ལས་འོད་འཕྲོས་པས། ཕྱོགས་བཅུའི་རྩ་བརྒྱུད་ཀྱི་བླ་མ་རྣམས་དང༌། ཡི་དམ་དཀོན་མཆོག་གསུམ། མཁའ་འགྲོ་ཆོས་སྐྱོང་ཐམས་ཅད་འོད་ཟེར་གྱིས་སྤྱན་དྲངས་ནས། བླ་མ་དེའི་སྐུ་གསུང་ཐུགས་ཀྱི་སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་རྣམས་སུ་ཐིམ་པར་བསྒོམ། བླ་མ་ཀུན་འདུས་ཀྱི་ངོ་བོར་བསམ་ལ་མཎྜལ་ཕུལ། གསོལ་བ་གདབ་ནས་དབང་བསྐུར་ཞུ་བ་ནི་བཞི་ལས། དང་པོ་འོད་ཟེར་གྱི་སྦྱོང་བ་ནི། བླ་མ་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུྃ་ཡིག་སྔོན་པོ། ལྟེ་བར་ཧོ་ཡིག་སེར་པོ་བཞི་ལས་འོད་ཟེར་རིམ་པ་བཞིན་དུ་དཀར་དམར་མཐིང་སེར་ཕྱུང་ནས། རང་གི་གནས་བཞིར་ཕོག་པས། གནས་སྐབས་བཞིའི་སྒྲིབ་པ་ཐམས་ཅད་སྦྱོང་ནས་དབང་བཞི་ཐོབ་པར་བསྒོམ་མོ། །བླ་མའི་གནས་བཞིའི་ཡི་གེ་བཞི་ལས། བདུད་རྩི་འོ་མའི་རྒྱུན་ལྟ་བུ་དང༌། པདྨ་རཱ་ག་ཞུ་བའི་རྒྱུན་ལྟ་བུ་དང༌། མཐོན་མཐིང་ཞུ་བ་ལྟ་བུ་དང༌། གསེར་ཞུན་ལྟ་བུ་བཞི་བྱུང་ནས། རིམ་གྱིས་རང་གི་སྤྱི་བོ་ཚངས་བུག་ནས་ཞུགས། ལུས་ཀྱི་ནང་གང༌། སྒྲིབ་པ་བཞི་དག །དགའ་བ་བཞིའི་ཡེ་ཤེས། དབང་བཞི་ཐོབ། སྐུ་བཞི་མངོན་དུ་བྱས་པར་བསྒོམ་མོ། །གསུམ་པ་ཡིག་འབྲུ་བརྟན་པར་བྱེད་པ་ནི། ཡིག་འབྲུ་བཞི་
རིམ་གྱིས་གདན་དང་བཅས་པ་རྦད་ཀྱིས་ཆད་ནས་རང་གི་གནས་བཞིར་ཐིམ་པར་བསྒོམ་མོ། །དེས་ཀྱང་སྒྲིབ་པ་བཞི་དག །དགའ་བ་བཞི་སྐྱེས། དབང་བཞི་བརྟན། སྐུ་བཞི་མངོན་དུ་བྱས་པར་བསྒོམ་མོ། །བཞི་པ་ཡོངས་རྫོགས་ཀྱི་དབང་ནི། བརྒྱུད་པའི་བླ་མ་རྣམས་རིམ་གྱིས་འོད་དུ་ཞུ་ནས་རྩ་བའི་བླ་མ་ལ་ཐིམ། རྩ་བའི་བླ་མ་འོད་དུ་ཞུ་ནས་རང་ལ་ཐིམ་པས། བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་ནས། སེམས་ཉིད་མ་བཅོས་པའི་ངང་ལ་ལྷོད་ཀྱིས་གློད་ལ་རིག་པ་རྟོག་མེད་འཛིན་མེད་དུ་ཤིག་གེ་བཞག་གོ །དེ་ནི་བླ་མེད་དོན་གྱི་རྣལ་འབྱོར་རོ། །གསུམ་པ་བསྐྱེད་པའི་རིམ་པའི་ཁྲིད་ལ་བཞི་སྟེ། དང་པོ་སྲུང་བའི་འཁོར་ལོ་བསྒོམ་པ་ནི། སྟོང་པའི་ངང་ལས་ཧཱུྃ་ལས་སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བར་ཧྲཱིཿས་མཚན་པ། དེ་ལས་འོད་འཕྲོས། འོག་རྡོ་རྗེ་ས་གཞི། ཕྱོགས་རྡོ་རྗེའི་ར་བ་དང་དྲྭ་བ། སྟེང་རྡོ་རྗེའི་གུར་དང་བླ་རེ། ཕྱི་རོལ་མཚོན་ཆ་སྣ་ཚོགས་ཀྱིས་གང་ཞིང༌། ཡེ་ཤེས་ཀྱི་མེ་འབར་བའི་རང་བཞིན་དུ་གྱུར། དེའི་དབུས་སུ་ཧྲཱིཿལས་རང་ཉིད་རྟ་མགྲིན་དམར་པོ་ཞལ་གཅིག་ཕྱག་གཉིས། ཞབས་གཉིས་པད་ཉིའི་གདན་ལ་བརྐྱང་བསྐུམ་གྱིས་བཞུགས་པ། ཕྱག་གཡས་བེ་ཅོན་ནམ་མཁར་གདེངས་པ། གཡོན་པ་སྡིགས་མཛུབ་ཐུགས་ཀར་བསྒྲེངས་པ། ཞལ་གདངས་ཤིང་ལྗགས་འདྲིལ་བ། རྣོ་ཞིང་དཀར་བའི་མཆེ་བ་བཞི་གཙིགས་པ། སྤྱན་གསུམ་དམར་ལ་གཡོ་བ། སྨིན་མ་དབུ་སྐྲ་འབར་བ། སྤྱི་གཙུག་རྟ་མགོ་ལྗང་ཞུར་རྔོག་མ་ལེ་བརྒན་མེ་ལྟར་འབར་བ། སྟག་གི་པགས་པའི་ཤམ་ཐབས་ཅན། སྦྲུལ་དང་རིན་པོ་ཆེ་དུ་མས་བརྒྱན་པ།
བསྐལ་པའི་མེ་ཆེན་འབར་བའི་དབུས་ན་བཞུགས་པར་བསམ་ལ། སྐུ་དེ་ལས་དེ་ལྟ་བུའི་ཁྲོ་ཆུང་དཔག་ཏུ་མེད་པ་འཕྲོས་ནས། གདོན་བགེགས་ཐམས་ཅད་བཅོམ་ཞིང་བསྲེགས་ནས། སྲུང་འཁོར་གྱི་ཕྱི་རོལ་དུ། ཞལ་ཕྱིར་གཟིགས་ནས་བར་ཆད་བསྲུང་བའི་ཚུལ་དུ་ཐམ་འགགས་སུ་བཞུགས་པ། གཞན་རྣམས་ཞལ་ནང་དུ་གཟིགས་ནས། བསྲུང་བར་མཛད་ཅིང་ཐམ་འགགས་སུ་བཞུགས་པར་བསྒོམ་པ་ནི། སྲུང་འཁོར་གྱི་ཁྲིད་རིམ་མོ། །གཉིས་པ་དངོས་གཞིའི་སྒོ་ནས་འཆི་མེད་རྡོ་རྗེའི་ཚེ་བསྒྲུབ་པའི་ཁྲིད་ནི། ཚད་མེད་བཞི་སྔོན་དུ་འགྲོ་བས། རང་ཐ་མལ་པར་གནས་པའི་ལུས་ཀྱི་ནང་སྟོང་དམར་སེང་བ་བསྒོམ། སྤྱི་བོར་རིན་པོ་ཆེ་དུ་མ་ལས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ། པདྨ་འབུམ་ལྡན་དང་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿལས་འོད་འཕྲོས། དོན་གཉིས་བྱས་ཚུལ་འདུས་ཡོངས་སུ་གྱུར་པ་ལས་བཅོམ་ལྡན་འདས་མགོན་པོ་ཚེ་དཔག་མེད་སྐུ་མདོག་པདྨ་རཱ་ག་ལྟར་དམར་བ། ཞབས་རྡོ་རྗེ་སྐྱིལ་ཀྲུང་ཅན། ཕྱག་གཉིས་མཉམ་བཞག་གི་སྟེང་ན། འཆི་མེད་རྡོ་རྗེའི་ཚེའི་བུམ་པ་ཡེ་ཤེས་ཀྱི་བདུད་རྩིས་བཀང་བ་འཛིན་པ། སྤྱན་དཀྱུས་དང་སྨིན་དཀྱུས་རིང་ཞིང༌། མཛོད་སྤུ་དཀར་པོས་བརྒྱན་པ། དབུ་སྐྲ་རལ་པའི་ཐོར་ཅོག་དང་ཅོད་པན་ཅན། རིན་པོ་ཆེ་སྣ་ལྔའི་རྩེ་ཕྲན་དང་སྙན་ཆ། མགུལ་རྒྱན་དང་ཕྱག་གདུབ། འོག་པག་དང་ཞབས་གདུབ། དར་གྱི་ཅོད་པན་དང་མུ་ཏིག་སྣ་ལྔས་བརྒྱན་པ། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་མཛེས་པ། འཇིག་རྟེན་གྱི་ཁམས་ཐམས་ཅད་འོད་ཟེར་གྱིས་སྣང་བར་བྱེད་པའི་བདག་
ཉིད་དུ་བསམ་ལ། དེའི་སྤྱི་བོར་ཨོཾ་དཀར་པོ། མགྲིན་པར་ཨཱ་དམར་པོ། ཐུགས་ཁར་ཧཱུྃ་སྔོན་པོ་གསུམ་ལས་འོད་འཕྲོས། ཚེ་དཔག་མེད་ལ་ཕྱོགས་བཅུའི་རྒྱལ་བ་སྲས་བཅས་ཀྱིས་བསྐོར་བ་སྤྱན་དྲངས་ལ། ཚེ་དཔག་མེད་དེ་ལ་དབྱེར་མེད་དུ་ཐིམ་པར་བསྒོམ། བཅོམ་ལྡན་འདས་ཀྱི་ཕྱག་གི་བུམ་པའི་དབུས་སུ་ཧྲཱིཿདམར་པོ་ཚེག་དྲག་དང་བཅས་པ་ལས་འོད་ཟེར་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ལ་མཆོད་པའི་སྤྲིན་ཕུང་དུ་མས་མཆོད། དེ་དག་གི་རྡོ་རྗེའི་ཚེ་དང་བསོད་ནམས། དཔལ་དང་གཟི་བརྗིད་སྐུ་གསུང་ཐུགས་ཡོན་ཏན་ཕྲིན་ལས་ཡེ་ཤེས་ཐམས་ཅད་འོད་ཟེར་གྱིས་བསྡུས་ནས། བུམ་ནང་གི་ཧྲཱིཿལ་ཐིམ་པར་བསྒོམ། སླར་ཡང་ལྕགས་ཀྱུ་དང་ཞགས་པ་ལྟ་བུའི་འོད་ཟེར་སྣ་ལྔ་ཕྱོགས་བཅུར་འཕྲོས་པས། ཕྱོགས་བཅུའི་ལྷ་དང་ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ལ་སོགས་ཏེ། སེམས་ཅན་ཐམས་ཅད་ལ་ཕོག་དེ་དག་འོད་དཔག་མེད་ཀྱི་གོ་འཕང་ལ་བཀོད། དེ་དག་གི་ཚེ་དང་བསོད་ནམས། དཔལ་དང་འབྱོར་པ། གྲགས་པ་དང་ཡེ་ཤེས་ཡོན་ཏན་ཐམས་ཅད་འོད་ཟེར་གྱིས་བསྡུས་ནས་བུམ་ནང་གི་ཧྲཱིཿལ་ཐིམ་པར་བསྒོམ། ཡང་འོད་ཟེར་འཕྲོས་ནས་ཕྱོགས་བཅུའི་ས་ཆུ་མེ་རླུང༌། ནམ་མཁའ། ཉི་ཟླ་དང༌། དཔག་བསམ་གྱི་ཤིང༌། ནོར་བུ་རིན་པོ་ཆེ་སྣ་ལྔ་ལ་སོགས་པ་འབྱུང་བའི་བཅུད་ཐམས་ཅད་དང་ནུས་པ། བཀྲག་དང་གཟི་མདངས། འོད་དང་ཡོན་ཏན་ཐམས་ཅད་ཧྲཱིཿལ་ཐིམ་པར་བསྒོམ། དེ་ནས་བཅོམ་ལྡན་འདས་ལ་སྤྲུལ་པའི་མཆོད་པས་མཆོད་ལ། གསོལ་
བ་བཏབ་པ་ནི། བཅོམ་ལྡན་འདས་འོད་དཔག་མེད་ཀྱིས་བདག་དང་སེམས་ཅན་ཐམས་ཅད་ལ། སྐུ་གསུང་ཐུགས་ཡོན་ཏན་ཕྲིན་ལས་ཚེ་དང་ཡེ་ཤེས་ཀྱིས་དབང་བསྐུར་ཞིང༌། དངོས་གྲུབ་སྩལ་དུ་གསོལ། ཞེས་གསོལ་བ་བཏབ་པས། བུམ་པའི་ནང་ནས་བདུད་རྩིའི་རྒྱུན་འོ་མ་ལྟ་བུ་སྤྱི་བོ་ཚངས་པའི་བུ་ག་ནས་མར་བབས་པ་ལ་རིག་པ་གཏད་ནས། རླུང་རོ་ལན་གསུམ་བུས་ལ། རླུང་ཚུར་རྔུབ་པ་དང༌། སྟབས་སུ་མཆིལ་མ་ཞིག་མིད་བཏང་ལ། རླུང་དེ་ལྟེ་བར་མནན་ནས་འོག་རླུང་འཐེན་ལ་བུམ་པ་ཅན་བཟུང་ལ། བདུད་རྩིའི་རྒྱུན་གྱིས་གསང་གནས་ཡན་ཆད་དཀར་ལྟེམ་གྱིས་གང་བར་བསམ་ལ། དམིགས་པ་ཐེབས་རེ་བྱ། དེ་བཞིན་དུ་ལྟེ་བ། སྙིང་ཁ། མགྲིན་པ། སྤྱི་བོ་མན་ཆད་དཀར་ལྟེམ་གྱིས་གང་བར་བསམ་ལ། དམིགས་པ་ཐེབས་རེ་བྱ་གསུངས། དེ་ལྟར་དམིགས་ཐེབས་རྒྱས་པ་བསྒོམ། འབྱོང་ན་རླུང་ཐེབས་རེ་དང་རྩ་འཁོར་གང་བའི་དམིགས་པ་སྦྲག་ནས། དམིགས་པ་ཐེབས་གཅིག་ལ་རྩ་འཁོར་ལྔ་ལྔ་གང་བར་ཡང་ཡང་བསྒོམ། ཡང་དམིགས་ཐེབས་ལྷག་མ་བཞི་ནི། འོད་དཔག་མེད་བསྐྱེད་ཅིང་བུམ་ནང་གི་ཧྲཱིཿལས་འོད་ཟེར་སྤྲོ་བསྡུ་བྱེད་པ་གོང་དང་འདྲ་བ་ལ། བདུད་རྩིའི་རྒྱུན་དམར་པོ་པདྨ་རཱ་ག་ཞུ་བ་ལྟ་བུ་དང༌། སྔོན་པོ་བཻཌཱུརྻ་ཞུན་མ་ལྟ་བུ་དང༌། སེར་པོ་གསེར་ཞུན་མ་ལྟ་བུ་དང༌། ལྗང་ཁུ་མར་གད་ལྟ་བུ་དང་ལྔ་པོ་སྤྱི་གཙུག་ཚངས་བུག་ནས་མར་བབས་པར་བསམས་ལ་རླུང་རོ་ལན་གསུམ་བསལ་ནས་མཆིལ་མ་ཞིག་མིད། དེ་ལྟེ་བའི་འོག་ཏུ་བསྒྱུར་ལ་སྟེང་རླུང་ཆིལ་གྱིས་མནན། འོག་རླུང་ཡར་འཐེན་ལ་བུམ་པ་ཅན་བཟུང༌།
བདུད་རྩི་ལྔ་པོས་གསང་གནས་གང་བ་དང༌། ལྟེ་བ། སྙིང་ཁ། མགྲིན་པ། སྤྱི་བོར་གང་བར་བསྒོམ། རྒྱས་པར་བྱེད་ན་དམིགས་ཐེབས་རེ་རེ་བྱས། མ་འབྱོང་ན་དམིགས་ཐེབས་རེས་བདུད་རྩི་ཁ་དོག་རེ་རྫོགས་པར་བྱེད། དེས་བདུད་རྩི་དམར་པོ་རྒྱུན་བབས་པས་ལུས་ཐམས་ཅད་དམར་ལྟེམ་གྱིས་གང་བར་བསམ། དེ་བཞིན་སྔོན་པོ་དང་སེར་པོ། ལྗང་ཁུའི་བདུད་རྩིའི་རྒྱན་བབས་པའི་ཚེ་སོ་སོའི་ཁ་དོག་ལྟར། རང་ལུས་ཀྱང་འོད་དཔག་མེད་རིགས་ལྔའི་རྣམ་པར་གསལ་ཞིང༌། འཆི་མེད་རྡོ་རྗེའི་ཚེ་ཐོབ་སྙམ་དུ་བསྒོམ། དེ་དག་རྫོགས་ནས་འོད་དཔག་མེད་འོད་ཞུ་ནས་རང་ལ་ཐིམ་པས། ལུས་ཀྱི་ནང་ཐམས་ཅད་འོད་དཔག་མེད་ཡུངས་འབྲུ་ཙམ་གྱིས་ཐམ་འགགས་སུ་གང་ཞིང༌། ཕྱི་རོལ་བ་སྤུའི་རྩ་བ་ཐམས་ཅད་ཀྱང་སྐུ་གང་བར་བསྒོམ་ལ། ལུས་ངག་ཡིད་གསུམ་མ་བཅོས་པའི་ངང་ལ་བཞག་གོ །གཉིས་པ་གསུང་གི་སྒོ་ནས་འཆི་མེད་གསུང་བསྒྲུབ་པའི་ཁྲིད་ནི། རང་གི་སྤྱི་བོར་ཤེལ་ཕོར་ཡུ་བ་ཅན། ཐེམ་ཞབས་སུ་ཡོད་པ་ལྟ་བུ། ཁ་གྱེན་དུ་གདེང་བའི་དབུས་སུ་ཡི་གེ་ཨཱཿདཀར་པོ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུར་ཕྱོགས་བཅུར་འཕྲོས། སངས་རྒྱས་སྲས་བཅས་མཆོད་ཅིང༌། སླར་དེ་དག་ཚེ་དང་བསོད་ནམས་བསྡུས། རིགས་དྲུག་གི་སེམས་ཅན་ལ་ཕོག །འོད་དཔག་མེད་ཀྱི་ས་ལ་བཀོད་ནས་དེ་དག་གི་ཚེ་དང་བསོད་ནམས། འབྱུང་བའི་བཅུད་བསྡུ་བ་རྣམས་ཀྱི་དམིགས་པ་གོང་དང་འདྲ་ལ། དེ་བཞིན་དུ་གོང་ལྟར་གསོལ་བ་བཏབ་པས། ཨཱཿལས་བདུད་རྩིའི་རྒྱུན་དཀར་པོ་ཐེམ་བུ་རྡོལ་བ་ལྟར་བབས་པས་གསང་གནས་ཕྱིན་གང༌། དེ་བཞིན་དུ་
ལྟེ་བ། སྙིང་ཁ། མགྲིན་པ། སྤྱི་བོ་རྣམས་གང་བར་བསམ་ཞིང༌། འཇམ་རླུང་མཆིལ་མ་དང་བཅས་པ་སྟབས་སུ་ལྟེ་འོག་ཏུ་མནན། འོག་རླུང་ཡར་འཐེན་ནས་བུམ་པ་ཅན་བཟུང༌། དམིགས་པ་གཉིས་ནི། ཨཱཿལས་བདུད་རྩིའི་རྒྱུན་དམར་པོ་བབས་པར་བསམ་ལ་རླུང་སྔར་དང་འདྲ། རྩ་འཁོར་ལྔ་རིམ་གྱིས་གང་བར་བསྒོམ་ལ། རླུང་བཟུང་བ་དང་དམིགས་པ་སྟབས་སུ་བྱའོ། །མཐར་འཇོག་པའི་ཚེ། ཨཱཿདཀར་པོ་ལས་ཨཱཿ་དཀར་པོ་ཆར་བབས་པ་ལྟར་ཆད་ནས། ལུས་ཀྱི་ནང་ཐམས་ཅད་ཨཱཿས་ཐམ་འགགས་སུ་གྱུར་ནས་ཕྱི་རོལ་བ་སྤུའི་རྩ་བ་ཐམས་ཅད་ལས་ཀྱང་ཨཱཿས་གང་བར་བསམ་ལ་ངག་ཏུ་ཨཱཿཞེས་བརྗོད་ཀྱང་རུང་གསུངས་སོ། །མཐར་ལུས་ངག་ཡིད་གསུམ་མ་བཅོས་པའི་ངང་ལ་མཉམ་པར་བཞག་གོ །གསུམ་པ་ཐུགས་ཀྱི་སྒོ་ནས་འཆི་མེད་རྡོ་རྗེའི་ཚེ་བསྒྲུབ་པའི་ཁྲིད་ནི། རང་ལུས་ཐ་མལ་བར། སྟོང་ར་དམར་སེང་བསྒོམ་པའི་སྤྱི་བོར་པདྨ་དམར་པོ་འདབ་མ་བརྒྱད་པའི་ཟེའུ་འབྲུའི་སྟེང་དུ། ཐིག་ལེ་དམར་ལ་འཚེར་བ། སྣུམ་ལ་འདྲིལ་བ། དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་ཕྱོགས་བཅུར་འཕྲོས། ཕྱོགས་བཅུའི་རྒྱལ་བ་སྲས་བཅས་མཆོད། དེ་དག་གི་ཚེ་དང་བསོད་ནམས་འབྱུང་བའི་བཅུད་བསྡུ་བའི་དམིགས་པ་རྣམས་སྐུའི་ཁྲིད་དང་མཚུངས་ཤིང༌། སླར་གསོལ་འདེབས་གོང་དང་མཚུངས་སོ། །དེ་ནས་རླུང་རོ་ལན་གསུམ་འབུད་ལ། དམིགས་པ་བསྒོམ་པ་ནི། ཐིག་ལེ་ལས་བདུད་རྩིའི་རྒྱུན་དམར་ན་རང་བྱུང་བས། གསང་གནས་ཕྱིན་གང༌། དེ་བཞིན་དུ་ལྟེ་བ་དང༌། སྙིང་ཁ། མགྲིན་པ། སྤྱི་བོ་རྣམས་སུ་རིམ་
གྱིས་གང་བར་བསྒོམ་ལ། འཇམ་རླུང་མཆིལ་མ་དང་སྟབས་སུ་ལྟེ་འོག་ཏུ་མནན། འོག་རླུང་འཐེན་པ་བུམ་པ་ཅན་བཟུང་ངོ༌། །མཐར་ཐིག་ལེ་ལ་ཐིག་ལེ་དཔག་ཏུ་མེད་པ་ཆད་ནས། ཆར་བབས་པ་ལྟར་ལུས་ཀྱི་ནང་ཐམས་ཅད་གང༌། ཐིག་ལེ་དམར་པོས་ཐམ་འགགས་སུ་གང་བར་བསྒོམ། ཕྱི་རོལ་བ་སྤུའི་རྩ་བ་ཐམས་ཅད་ཀྱང་ཐིག་ལེ་དམར་པོས་ཐམ་འགགས་སུ་གང་བར་བསམ་ལ་ལུས་ངག་ཡིད་གསུམ་མ་བཅོས་པའི་ངང་ལ་མཉམ་པར་བཞག་གོ །བཞི་པ་རྫོགས་རིམ་ལ་གསུམ་སྟེ། ཞི་གནས། ལྷག་མཐོང༌། འཕོ་བའོ། །དང་པོ་ཞི་གནས་ཀྱི་དོན་ལ་བཞི་སྟེ། དང་པོ་ཕྱི་ཡུལ་ལ་སེམས་བཟུང་བ་ལ་གཉིས་ཏེ། དང་པོ་མ་དག་པ་ཀ་བ་བུམ་པ་སོགས་ལ་སེམས་བཟུང་བ་ནི་མདུན་དུ་ཀ་བ། བུམ་པ། ཤིང་བུ། རྡེའུ་ལ་སོགས་པ་གང་ཡང་རུང་བ་ཞིག་ལ། ལུས་གནད་ལྟ་སྟངས་དང་བཅས་ལ་མ་ཡེངས་པར་སེམས་བཟུང༌། དེ་ལ་ཡེངས་སུ་ཡང་མི་འཇུག །རྟོག་པ་ཡང་མི་འགྱེད་དོ། །དེ་བཞིན་དུ་བྱིང་རྒོད་བྱུང་ན་སྟེང་འོག་ཏུ་སེམས་འཛིན་པ་དང༌། གཡས་གཡོན་དུའང་ཤེས་པར་བྱའོ། །གཉིས་པ་དག་པ་རྒྱལ་བའི་སྐུ་ལ་སེམས་བཟུང་བ་ནི། མདུན་དུ་འོད་དཔག་མེད་ཀྱི་སྐུ་གཟུགས་བཞག་པའམ། མེད་ན་བསྒོམ་ལ། དེ་ལ་རྟོག་པ་ཡང་མི་སྤྲོ། ཡེངས་སུ་ཡང་མི་འཇུག་གོ །དེ་ཐོག་ཏུ་མ་ཡེངས་ཙམ་དུ་གློད་ནས་འཇོག་པ་ནི་རྒྱལ་བའི་སྐུ་ལ་སེམས་འཛིན་པའོ། །གཉིས་པ་ནང་ན་སེམས་བཟུང་བ་ལ་ཡང་གཉིས་ཏེ། དང་པོ་མ་དག་པའི་ཐིག་ལེ་ལ་སེམས་བཟུང་བ་ནི། རང་གི་སྙིང་ཁང་ཐིག་ལེ་དཀར་ལ་འཚེར་བ། སྲན་འབྲུ་ཙམ་ལ་སེམས་བཟུང་བའོ། །
གཉིས་པ་དག་པ་རྒྱལ་བའི་སྐུ་ལ་སེམས་བཟུང་བ་ནི། རང་གི་སྙིང་ཁར་པད་ཟླའི་སྟེང་དུ། འོད་དཔག་མེད་ཚོན་གང་བ་འོད་ཟེར་དང་བཅས་པ་ཞིག་ལ་སེམས་བཟུང་བའོ། །བྱིང་རྒོད་བྱུང་ན་གོང་བཞིན་བྱའོ། །གསུམ་པ་རྟོག་པ་ལ་སེམས་བཟུང་བ་ནི། རྣམ་པར་རྟོག་པ་ཐོལ་གྱིས་སྐྱེས་པ་ངོས་བཟུང་ནས་རྟོག་པ་དེ་ཉིད་ལ་ཅེར་ཅེར་བལྟས་པ་ན་འཛིན་མེད་དུ་ཞིག་ནས་རིག་སྟོང་དུ་གསལ་གསལ་འཆར་བ་སྟེ། རྣམ་རྟོག་གང་སྐྱེས་པ་དེ་ཉིད་ལ་གཏད་ནས་བསྒོམ། དེས་ནི་རྟོག་པ་མ་སྤངས་ལམ་དུ་ཁྱེར་བ་མན་ངག་གོ །བཞི་པ་འབྲས་བུའི་ཞི་གནས་མཐར་ཐུག་རྟོག་མེད་ལ་སེམས་བཟུང་བ་ནི། གནས་དབེན་པར་མུན་ཁང་གི་ནང་དུ་འབོལ་བའི་གདན་ལ། ལུས་རྣམ་སྣང་གི་ཆོས་བདུན་དང་ལྡན་པས། མིག་ནམ་མཁར་ཧད་དེ་གཏད་ལ། ཡིད་ལ་ཅི་ཡང་མི་བྱེད་པར་ནམ་མཁའ་སྟོང་པའི་ངང་ལ་མ་བཅོས་པ་རྟོག་མེད་དུ་གསལ་ལེ་ཧྲིག་གེ་མཉམ་པར་འཇོག་པ་ནི། རྟོག་མེད་ལ་སེམས་འཛིན་པའོ། །དེ་དག་གིས་ཞི་གནས་སོང་བའོ། །གཉིས་པ་ལྷག་མཐོང་ལ་དོན་གསུམ་སྟེ། དང་པོ་ལྷག་མཐོང་གི་རྒྱུ་ལ་རྣམ་པར་བརྟག་ཅིང་དཔྱད་པ་ནི། འདི་ལྟར་བདག་གི་སེམས་འདི་གང་ནས་བྱུང་ཞིང་གང་དུ་གནས། གང་དུ་འགྲོ་བར་འགྱུར། ཞེས་སྐྱེ་འགག་གནས་གསུམ་གྱི་ངོ་བོ་ལ་བརྟག་ཅིང་དཔྱད། འབྱུང་བ་ལྔ་རང་ལུས་ལས་བྱུང་ངམ་སྙམ་དུ་བརྟག་ཅིང་དཔྱད་པར་བྱའོ། །གཞན་ཡང་སེམས་ལ་ཁ་དོག་དཀར་དམར་སྔོ་སེར་ལྗང་ཁུ་ལ་སོགས་པའི་ཁ་དོག་ཡོད་པ་ཞིག་གམ། འོན་ཏེ་མེད་པ་ཞིག་སྙམ་དུ་བརྟག་ཅིང་དཔྱད། གང་དུ་བདག་གི་སེམས་ནི་ས་ཆུ་
མེ་རླུང་ནམ་མཁའི་དབྱིབས་སམ། ཟླུམ་པོ། གྲུ་བཞི། ཟླ་གམ། གྲུ་གསུམ། ནར་མོ། འཇོང་མོ་ལ་སོགས་པའི་དབྱིབས་སུ་གྲུབ་པ་ཞིག་ཡིན་ནམ། དབྱིབས་མེད་པ་ཞིག་ཡིན། ཅེས་བརྟག་ཅིང་དཔྱད། སེམས་ལས་རྣམ་པར་རྟོག་པ་ལོག་ཅིག་ཡིན། འོན་ཏེ་རྣམ་པར་རྟོག་པ་སེམས་ཡིན་ཅེས་བརྟག་ཅིང་དཔྱད་པར་བྱའོ། །ཕྱི་རོལ་གྱི་སྣང་བ་འདི་སེམས་ལས་བྱུང་ངམ། འོན་ཏེ་སེམས་ལས་ཕྱི་རོལ་གྱི་སྣང་བ་བྱུང་ཞེས་བརྟག་ཅིང་དཔྱད་པར་བྱའོ། །སླར་ཡང་བརྟག་མཁན་གྱི་སེམས་ལ་ཡང་བརྟག་ཅིང་དཔྱད་དེ། སེམས་འདི་ཉིད་ཀྱང་ཡོད་པ་ཞིག་གམ་འོན་ཏེ་མེད་པ་ཞིག །གསལ་བ་ཞིག་གམ་འོན་ཏེ་མི་གསལ་བ་ཞིག །བདེ་བ་ཞིག་གམ་འོན་ཏེ་སྡུག་བསྔལ་བ་ཞིག །རྟག་པ་ཞིག་གམ་འོན་ཏེ་མི་རྟག་པ་ཞིག །སྣང་བ་ཞིག་གམ་འོན་ཏེ་མི་སྣང་བ་ཞིག །རིག་པ་ཞིག་གམ་འོན་ཏེ་མ་རིག་པ་ཞིག །བདག་ཡོད་པ་ཞིག་གམ་འོན་ཏེ་བདག་མེད་པ་ཞིག་ཅེས་བརྟག་ཅིང་དཔྱད་པར་བྱའོ། །དེའི་ཚེ་སེམས་ཀྱི་ངོ་བོ་སྟོང་པ་ནམ་མཁའ་ལྟ་བུ་ལ་རང་བཞིན་འོད་གསལ་ཞིང༌། རིག་པ་འགག་མེད་ཅིར་ཡང་འཆར་ཞིང་སྣང་བ་འདི། སྐྱེ་བ་མེད་པར་རོ་མཉམ། གནས་པ་མེད་པར་རོ་མཉམ། འགགས་པ་མེད་པར་རོ་མཉམ་ཞིང༌། གསལ་རིག་སྟོང་གསུམ་སྣང་སྟོང་དབྱེར་མེད་པ། བློ་འདས་ནམ་མཁའ་ལྟ་བུའི་དོན་མཐོང་ན་དེ་ཁོ་ན་ཉིད་དོ་ཞེས། གཞི་ལམ་འབྲས་བུའི་ཡོན་ཏན་ཐམས་ཅད་རྫོགས་པར་ངོ་སྤྲད་པར་བྱའོ། །གཉིས་པ་ལམ་གྱི་ལྷག་མཐོང་ཅིག་ཅར་དུ་ཉམས་སུ་བླངས་པར་བྱ་བ་ནི། སེམས་ཉིད་སྐྱེ་འགག་གནས་གསུམ་གྱི་མཐའ་
དང་བྲལ་བ་བདག་དང་བདག་གིར་འཛིན་པ་མཚན་མའི་གཟུང་འཛིན་དང་བྲལ་ཞིང༌། མཐོང་བྱ་མཐོང་བྱེད་མེད་པ། ངོ་བོ་སྟོང་ཞིང་རང་བཞིན་གསལ་བ། རྣམ་པ་འགག་མེད་ཀྱི་རིག་པ་ཡུལ་མེད་དུ་མར་གསལ་ཞིང་སྣང་བ་བཅོས་བསླད་གྱིས་མ་གོས་པས་གསལ་ལེ་བ། རང་ངོ་རང་གིས་ཤེས་པས་ཧྲིག་གེ་བ། རྣམ་རྟོག་གཟུང་འཛིན་གྱིས་མ་གོས་པས་རྗེན་ནེ་བ། རིག་པ་ལ་བཟོ་བཅོས་མ་བྱས་པ་ཐ་མལ་གྱི་ཤེས་པ། རྣམ་རྟོག་ལུ་རྒྱུད་དུ་སྙིང་མི་འཇུག་པས་སོ་མ་ཞེས་བྱ་སྟེ། ལྷག་མཐོང་གི་ངོ་བོ་ཉམས་སུ་བླངས་བྱའི་དངོས་གཞིར་ངོ་སྤྲད་པར་བྱའོ། །གསུམ་པ་འབྲས་བུའི་མཐར་ཐུག་ཞི་ལྷག་ཟུང་འཇུག་ཉམས་སུ་བླང་བར་བྱ་བ་ནི། དེ་ཡང་མོས་གུས་བླ་མའི་རྣལ་འབྱོར་ལ་སེམས་གནས་པ་ཞི་གནས་ཡིན་ལ། ངོ་བོ་སྟོང་ཞིང་གྲུབ་པ་མེད་པར་མཐོང་བ་ནི་ལྷག་མཐོང་ངོ༌། །བསྐྱེད་རིམ་ཆུ་ཟླ་ལྟ་བུ་ལ་སེམས་གནས་པ་ནི་ཞི་གནས་ཡིན་ལ། ངོ་བོ་སྟོང་པ་སྐྱེ་འགག་གནས་གསུམ་དང་བྲལ་བ་ནི་ལྷག་མཐོང་ངོ༌། །སེམས་ཅན་ཐམས་ཅད་ལ་ཁྱབ་པའི་བྱམས་པ་དང་སྙིང་རྗེའི་དམིགས་པ་ལ་སེམས་གནས་པ་ནི་ཞི་གནས་ཡིན་ལ། རང་བཞིན་སྟོང་པ་ཉིད་ལ་སེམས་གནས་པ་ནི་ལྷག་མཐོང་ངོ༌། །ཐབས་བསོད་ནམས་ཀྱི་ཚོགས་སྒྱུ་མ་ལྟ་བུ་ལ་སེམས་གནས་པ་ཞི་གནས་ཡིན་ལ། དེ་དག་རང་བཞིན་མེད་པ་སྟོང་པ་ཉིད་དུ་མཐོང་བ་ནི་ལྷག་མཐོང་ངོ༌། །སྣང་བ་ཐམས་ཅད་སེམས་ཀྱི་རང་གཟུགས་ཆུ་ཟླ་ལྟ་བུ་ལ་སེམས་གནས་པ་ཞི་གནས་ཡིན་ལ། དེ་དག་རྗེན་ནེ་བ་སྐྱེ་མེད་ཆུ་ཟླ་ལྟ་བུ་མཐོང་བ་ལྷག་མཐོང་ངོ༌། །སེམས་ཀྱི་རང་བཞིན་འོད་གསལ་བར་སེམས་གནས་པ་ཞི་གནས། ངོ་བོ་སྤྲོས་བྲལ་གསལ་
སྟོང་སྐྱེ་མེད་དུ་མཐོང་བ་ལྷག་མཐོང་ངོ༌། །བཅོས་བསླད་དང་བྲལ་བའི་རིག་པ་སོ་མ་ལ་སེམས་གནས་པ་ཞི་གནས། བདག་མེད་རིག་སྟོང་དབྱེར་མེད་དུ་མཐོང་བ་ལྷག་མཐོང་ངོ༌། །མདོར་ན་ཆུ་ཟླ་དང་མེ་ལོང་གི་གཟུགས་བརྙན་དང་བྲག་ཅ་ལྟར་སྣང་བ་ལས་གཞན་པའི་སྟོང་པ་མེད། སྟོང་པ་ལས་གཞན་པའི་སྣང་བ་མེད། སྣང་སྟོང་དབྱེར་མེད་ནམ་མཁའ་ལ་འཇའ་ཤར་བ་ལྟ་བུར་རྟོགས་ནས་དེའི་ངང་ལ་གནས་ཤིང༌། གཉིས་འཛིན་མཐའ་དག་སངས་ནས། རང་རིག་ཡེ་ཤེས་རྒྱས་པ་ལ་སངས་རྒྱས་ཤེས་བྱའོ། །ཟུང་འཇུག་ཅེས་ཀྱང་བྱ་སྟེ། མཐར་ཐུག་པའི་དོན་ནོ། །དེ་དག་ནི་ལྷག་མཐོང་ངོ༌། །གསུམ་པ་འཆི་ཁ་འཕོ་བའི་གདམས་ངག་ལ་དོན་གཉིས་ཏེ། དང་པོ་སྦྱང་བ་དང་གཉིས་པ་ལས་ལ་སྦྱར་བའོ། །དང་པོ་ནི་རང་གི་ལུས་སྟོང་རང་བསྒོམ་ལ། ལུས་ཀྱི་དབུས་སུ་རྩ་དབུ་མ་ཕྱི་དཀར་ལ་ནང་དམར་བ། ཁོང་སྟོང་སྦ་ལྕག་ཙམ། མར་སྣེ་ཕཊ་ཀྱིས་བཀག་པ། ཡར་སྣེ་ཚངས་བུག་རྒྱ་མཐོང་ཁ་བྱེ་བ་ལྟར་གསལ་ཧ་རེ་ཡོད་པ་བསམ་པའི་སྤྱི་བོའི་ཐད་ཀྱི་ནམ་མཁར་འདོམ་གང་ཙམ་གྱི་ཐད་སོར། སངས་རྒྱས་ཀྱི་ཞིང་ཁམས་རྣམ་པར་དག་པ། བདེ་བ་ཅན་གྱི་ཞིང་གི་བཀོད་པ་རྫོགས་པའི་དབུས་སུ། རིན་པོ་ཆེའི་ཁྲི་པདྨས་བཏེགས་པའི་སྟེང་དུ། རང་གི་རྩ་བའི་བླ་མ་འོད་དཔག་མེད་ལོངས་སྤྱོད་རྫོགས་པའི་ཆ་ལུགས་སུ་བཞུགས་པ་ལ། འཁོར་ཕྱོགས་བཅུའི་རྒྱལ་བ་སྲས་བཅས་ཀྱིས་བསྐོར་བ། མཚོ་དྭངས་པ་ལ་ཟླ་བ་ཤར་བ་ལྟ་བུ་གསལ་བར་བསྐྱེད། དེ་ནས་རང་གི་སེམས་ཀྱི་ངོ་བོ་ལྟེ་འོག་ཏུ་ཐིག་ལེ་དཀར་དམར་གཉིས་སུ་བསམ་ལ། ཐིག་ལེ་དཀར་པོ་དེས་དམར་པོ་ལ་བསྐོར་བ་གསུམ་བྱས་ནས། སྐར་མདའ་འཕང་
བ་ལྟར་སྐྱ་རྩེར་གྱིས་སྤྱི་བོར་ཐོན་པར་བསམ་ལ། འོད་དཔག་མེད་ཀྱི་ཐུགས་ཁར་རེག་པ་རེ་བྱས་པར་བསམ། དེའི་ཚེ་ངག་ཏུ་ཧིཀ་ཅེས་བརྗོད། ཡང་ཀ་ཞེས་བརྗོད་པས་ཕྱིར་བབས་ནས། ཐིག་ལེ་དམར་པོ་ལ་བསྐོར་བ་གསུམ་བྱས་སླར་ཡང་ཧིག་ཅེས་བརྗོད་པས། ཡར་ལ་སྔར་བཞིན་འཁོར་བར་བསྒོམ། དེ་བཞིན་ཡར་འགྲོ་མར་འགྲོ་གཅིག་ཏུ་བརྩིས་ནས་ཐུན་རེ་ལ་བརྒྱ་རྩ་བརྒྱད་དང༌། སྟོང་རྩ་ལ་སོགས་པ་མ་འབྱོངས་བར་དུ་སྦྱོང༌། གཉིས་པ་ནི། འཆི་བའི་རྟགས་ཚང་ནས། ཞེན་ཆགས་མཐའ་དག་སྤང་ལ། སེམས་མ་ཡེངས་པར་བྱམས་སྙིང་རྗེ་སྔོན་དུ་འགྲོ་བས་སྤྱི་བོར་བླ་མ་གསལ་གདབ། ལུས་ཀྱི་དབུས་སུ་རྩ་གསལ་གདབ་ནས། ཐིག་ལེ་གཉིས་པོ་གཅིག་ཏུ་གྱུར་པར་བསམ་ལ། ཧིཀ་ཅེས་རླུང་སེམས་སྤྱི་བོར་དྲག་ཏུ་གཏད་པའི་སྦྱོར་བས་རིག་པ་སྐར་མདའ་བཏང་བ་ལྟར། འོད་དཔག་མེད་ཀྱི་ཐུགས་ཀར་འཕོ་མ་ཐུབ་ཀྱི་བར་དུ་རིག་པ་བ་རྩེ་གཅིག་ཏུ་ཡང་ནས་ཡང་དུ་དམིགས་པ་བསྒོམ་མོ། །དེ་ནས་བླ་མ་འོད་དཔག་མེད་བདེ་བ་ཅན་དུ་བྱོན་པར་བསམ་མོ། །དེས་ངེས་པར་བདེ་བ་ཅན་ཏུ་འཕོ་བར་འགྱུར་རོ། །དེ་ལྟར་ལེགས་པར་བཤད་པའི་རིན་ཆེན་གྲུ། །རབ་འབྱོར་ཡིད་བཞིན་དགོས་འདོད་ཀུན་འབྱུང་བ། །མན་ངག་སྙིང་པོ་བླ་མས་གསུངས་པ་བཞིན། །བྲིས་པའི་དགེ་བས་འགྲོ་ཀུན་སངས་རྒྱས་ཤོག །ཚེ་དཔག་མེད་ཡོན་ཏན་གྱི་ཁྲིད་འཆི་མེད་རྡོ་རྗེའི་སྐུ་བསྒྲུབ་པ་ཞེས་བྱ་བ། བླ་མའི་ཞལ་ནས་གསུངས་པ་ལྟར་རྣལ་འབྱོར་པ་འོད་དཔག་རྡོ་རྗེས་ཡི་གེར་བཀོད་པའོ།། །།ཤུབྷཾ།