རྒྱ་ཆེན་བཀའ་མཛོད།

རྒྱ་ཆེན་བཀའ་མཛོད།

གླེགས་བམ་དང་པོ།

འཇམ་མགོན་ཀོང་སྤྲུལ་བློ་གྲོས་མཐའ་ཡས།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

བདག་ཅག་གི་སྟོན་པ་མཉམ་མེད་དོན་ཀུན་གྲུབ་པའི་དོན་གྱི་ཚུལ་ལ་ཅུང་ཟད་བསྔགས་པ་ཡངས་པའི་སྙིང་པོ་དྲི་མེད་འོད་བཟང་ཀུན་སྣང་ནོར་བུ་ཟབ་མོའི་རྒྱ་མཚོ།

― LT28_Page_0001 ―

^{[མ་དཔེ་གཟིགས་ན་འདིར་གནོན།]}

[Full Size]

འཇམ་མགོན་ཀོང་སྤྲུལ་རྒྱ་ཆེན་བཀའ་མཛོད། ཀ །སྟོན་པ་དོན་ཀུན་གྲུབ་པའི་བསྟོད་པ་ལྡེབ། ༥ ཉེ་སྲས་བརྒྱད་བསྟོད་ལྡེབ། ༣༧ སྒྲོལ་མའི་བསྟོད་པ་ལྡེབ། ༣༤ བདེ་མཆོག་བསྟོད་པ་ལྡེབ། ༥ སྒྲོལ་བསྟོད་ལྡེབ། ༣ ཕ་དམ་པའི་བསྟོད་པ་ལྡེབ། ༢ ཙནྜ་གོ་མིའི་བསྟོད་པ་ལྡེབ། ༡༥ མཁན་སློབ་ཆོས་གསུམ་བསྟོད་པ་སོགས་ལྡེབ། ༦ ཁྱུང་པོའི་གདུང་རབ་ལ་བསྔགས་པ་སོགས་ལྡེབ། ༦ རས་ཆུང་པ་ལ་བསྔགས་པ་ལྡེབ། ༡༦ ཀརྨ་པའི་སྐུ་བསྟོད་ལྡེབ། ༣ ཀརྨ་པར་ཀུན་བཟང་འཁོར་ལོས་བསྔགས་པ་ལྡེབ། ༡༣ སིངྡྷིྡྷི་དྷརྨ་ཀ་རའི་སྐུ་བསྟོད་ལྡེབ། ༡༤ བླ་མ་དགོངས་འདུས་ལྷ་ཚོགས་ལ་བསྟོད་སྨོན་ལྡེབ། ༡༠ ལམ་ཟབ་ཡོངས་འདུས་ལ་ལྡེབ། ༡༤ ཀར་རབ་བཅུ་བཞིའི་བླ་མཆོད་ཆོག་ལ་ལྡེབ། ༡༤ མར་པའི་བླ་སྒྲུབ་ལྡེབ། ༢༤ དེའི་དབང་ཆོག་ལྡེབ། ༨ མི་ལའི་བླ་སྒྲུབ་ལ་ལྡེབ། ༨ དེའི་དབང་ཆོག་ལ་ལྡེབ། ༡༠ དེའི་ཟིན་བྲིས་ལ་ལྡེབ། ༡༨ ཀརྨ་པའི་བླ་མའི་རྣལ་འབྱོར་ལ་ལྡེབ། ༡༨ སྙིང་ཐིག་མ་བུའི་བླ་མཆོད་ལྡེབ། ༢༦ བཅས་ཀ་པར་བསྡོམ་ལྡེབ་གྲངས་གསུམ་བརྒྱ་དང་བརྒྱད་བཞུགས། །དགེའོ། །

བདག་ཅག་གི་སྟོན་པ་མཉམ་མེད་དོན་ཀུན་གྲུབ་པའི་དོན་གྱི་ཚུལ་ལ་ཅུང་ཟད་བསྔགས་པ་ཡངས་པའི་སྙིང་པོ་དྲི་མེད་འོད་བཟང་ཀུན་སྣང་ནོར་བུ་ཟབ་མོའི་རྒྱ་མཚོ་ཞེས་བྱ་བ་བཞུགས་སོ། །

― LT28_Page_0002 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་ཤཱཀྱ་མུ་ན་ཡེ། །ཀུན་ཁྱབ་ཀུན་འགྲོ་རྡོ་རྗེའི་སྐུ། །བསོད་ནམས་བརྒྱ་ཡི་མཚན་འབར་བ། །དཔེ་ལས་འདས་པའི་ཁྱུ་མཆོག་སྟེ། །ཤཱཀྱའི་རྒྱལ་པོའི་ཞབས་ལ་འདུད། ༡ །འཇིག་རྟེན་དབང་ཕྱུག་རྡོ་རྗེ་འཛིན། །འཇམ་པའི་དབྱངས་སོགས་དབང་ཐོབ་པའི། །དཔའ་ཆེན་རྣམས་ཀྱིས་ཕྱག་བྱས་པ། །ཐུབ་པའི་དབང་ཕྱུག་ཁྱོད་ལ་འདུད། ༢ །ཚངས་དབང་བདུད་དང་དྲང་སྲོང་སོགས། །འཇིག་རྟེན་མཆོད་ཀུན་བསོད་ནམས་ཀྱིས། །བ་སྤུའི་ཆར་ཡང་མི་འགོང་བ། །ལྷ་ཡི་ལྷ་མཆོག་ཁྱོད་ལ་འདུད། ༣ །དེ་བཞིན་གཤེགས་པའི་སྤྱོད་ཡུལ་ནི། །ཇི་སྲིད་མཁའ་དང་སེམས་ཅན་མཐའ། །དེ་སྲིད་རྟག་ཁྱབ་ལྷུན་གྲུབ་ཀྱི། །ཕྲིན་ལས་འགྲོ་སྒྲོལ་མཛད་ལ་འདུད། །སྔོན་

― LT28_Page_0003 ―

^{[མ་དཔེ་གཟིགས་ན་འདིར་གནོན།]}

[Full Size]

ཚེ་དབང་པོའི་ཏོག་ལ་སོགས། །རྒྱལ་བ་འཇིག་རྟེན་ཕན་མཛད་པ། །བགྲང་ཡས་གངྒཱའི་བྱེ་མ་སྙེད། །ཡང་ནས་ཡང་དུ་སྟོན་ལ་འདུད། ༥ །རྒྱལ་བ་ཀུན་གྱིས་སྤངས་པ་ཡི། །རྩོད་ལྡན་ཤིན་ཏུ་གདུལ་དཀའི་འགྲོ། །ཡོངས་སུ་བཟུང་བའི་སྙིང་སྟོབས་ནི། །པད་དཀར་ལྟ་བུར་བསྔགས་ལ་འདུད། ༦ །བདེ་གཤེགས་རིན་ཆེན་སྙིང་པོའི་དྲུང་། །དམ་བཅའ་ཆེན་པོ་ལྔ་བརྒྱ་བཞེས། །མི་འཁྲུགས་འོད་མཐའ་ཡས་པ་སོགས། །ཞིང་བཀོད་འཛིན་ཏུ་སྩལ་ལ་འདུད། ༧ །ད་ལྟར་ཕྱོགས་བཅུའི་ཞིང་མགོན་རྣམས། །སློབ་ཚེ་ཁྱོད་ཀྱིས་བྱང་ཆུབ་ཏུ། །སྨིན་པར་མ་མཛད་མི་སྲིད་པ། །སངས་རྒྱས་སྤྱན་གྱིས་གཟིགས་ལ་འདུད། ༨ །ཁྱོད་ཐུགས་དང་པོར་བསྐྱེད་པས་ཀྱང་། །

― LT28_Page_0004 ―

^{[མ་དཔེ་གཟིགས་ན་འདིར་གནོན།]}

[Full Size]

སླད་མའི་བྱང་ཆུབ་སེམས་དཔའ་རྣམས། །སྙིང་རྗེ་ཆེན་པོ་འགྲུབ་འགྱུར་བའི། །ངོ་མཚར་བླ་མེད་དེ་ལ་འདུད། ༩ །སྐྱབས་མེད་བདག་ཅག་ཁོ་ནའི་ཆེད། །དབུ་དང་སྐུ་ལུས་གྲངས་མེད་སོགས། །གཏོང་དང་ཡོངས་གཏོང་གཏོང་བ་ཆེའི། །སྦྱིན་པའི་ཕ་རོལ་ཕྱིན་ལ་འདུད། ༡༠ དེ་བཞིན་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ལ་སོགས་པས། །བསྒྲུབས་པའི་ཡེ་ཤེས་ཕུང་པོ་ནི། །མཁའ་ལྟར་བསམ་མི་ཁྱབ་ལ་འདུད། ༡༡ །ཁ་ཅིག་འཕོ་དང་ལྷུམས་ཞུགས་དང་། །ལ་ལར་ངེས་འབྱུང་དཀའ་བ་སྤྱད། །དེ་བཞེན་བྱང་ཆུབ་ཆོས་འཁོར་སོགས། །མྱང་འདས་རྫོགས་པར་བསྟན་ལ་འདུད། ༡༢། གང་ཚེ་དཔའ་བའི་མཐུ་བསྟན་ཏེ། །བདུད་ལས་རྣམ་པར་རྒྱལ་བ་ན། །སེམས་ཅན་ཀུན་གྱི་ཁམས་གཟིགས་ནས། །གོ་འཕང་མཚུངས་པར་ཁྲིད་ལ་འདུད། ༡ །ཆོས་ཉིད་དབྱེར་མེད་དེ་བཞིན་ཉིད། །གློ་བུར་དྲི་མའི་སྦུབས་བཅོམ་སྟེ། །ཤེས་བྱའི་ཆོས་ཀུན་དབྱིངས་སུ་ནི། །མངོན་རྫོགས་བྱང་ཆུབ་བརྙེས་ལ་འདུད། ༡༤ །ཁམས་དབང་དུས་རིག་རྒྱུན་མཁྱེན་ཏེ། །བརྩེ་ལྡན་ལམ་སྟོན་ཐབས་ལ་མཁས། །འདུལ་བཞིའི་ཆོ་འཕྲུལ་སྣ་ཚོགས་པས། །མི་གནས་ཁ་ལོ་སྒྱུར་ལ་འདུད། ༡༥ །མཁྱེན་གསུམ་ཐུགས་ཆུབ་སྦྱོར་བ་བཞིའི། །ལམ་མཆོག་མཐར་

― LT28_Page_0005 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིན་མཁའ་ཁྱབ་སྐུ། །ཟབ་དང་རྒྱ་ཆེ་བདག་ཉིད་ཆེ། །རོ་མཉམ་མངོན་ཏུ་མཛད་ལ་འདུད། ༡༦ །གཙང་བདག་བདེ་དང་རྟག་མཐར་ཕྱིན། །སྲིད་ཞི་ལས་འདས་བརྡ་དང་དོན། །སྒྱུ་འཕྲུལ་རྣམ་པ་ཐམས་ཅད་པ། །བསམ་གྱིས་མི་ཁྱབ་དེ་ལ་འདུད། ༡༧ །རྣམ་རྟོག་འབད་རྩོལ་སྤྲོས་མེད་ཀྱང་། །དོན་ཆེན་པོ་ཡིས་ཉེ་བར་གནས། །སྲིད་པ་ཇི་སྲིད་བདེ་བར་གཤེགས། །མྱ་ངན་མི་འདའ་བཞུགས་ལ་འདུད། ༡༨ །སྟོབས་བཅུ་མི་འཇིགས་མ་འདྲེས་པ། །མཐོང་ན་ཚིམས་བྱེད་མཚན་དཔེ་སོགས། །བྲལ་དང་རྣམ་པར་སྨིན་པ་ཡི། །ཡོན་ཏན་བྱེད་པ་བརྒྱན་ལ་འདུད། ༡༩ །ལྟ་ལ་ཆགས་དང་རྫོགས་སངས་རྒྱས། །འབྱུང་མི་འགྱུར་ལ་སྲེད་མེད་བུ། །ཚངས་དབང་ཉི་ཟླ་ནམ་མཁའ་ལྡིང་། །དྲང་སྲོང་གཟུགས་ཀྱིས་འདུལ་ལ་འདུད། ༢༠ །བ་སྤུའི་ཁུང་བུ་ཇི་སྙེད་པ། །དེ་སྙེད་སྐྱེས་བུ་ཆེན་པོ་ཡི། །མཚན་འབར་ཆོས་སྒྲ་སྒྲོག་པའི་སྐུ། །ཞིང་ཁམས་ཀུན་ཏུ་སྤྲོ་ལ་འདུད། ༢༡ །ངེས་འབྱུང་བྱང་ཆུབ་ཆོས་འཁོར་སྟོབས། །ཟིལ་གནོན་མྱ་ངན་འདས་སྟོབས་མཆོག །དྲི་མ་ཅན་ངོར་གཟུགས་ཀྱི་སྐུས། །སྙིང་རྗེའི་དབང་གིས་བསྟན་ལ་འདུད། ༢༢ །གང་དག་ལྷ་དང་ས་སྟེང་སོགས། །འཇིག་རྟེན་ཀུན་ན་ཕན་བདེའི་རྒྱུ། །ཆོ་འཕྲུལ་གསུམ་དང་ཁྱད་པར་དུ། །ཆོས་ཆེན་

― LT28_Page_0006 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱངས་ཀྱིས་བསྙད་ལ་འདུད། ༢༣ །བདེན་བཞིའི་སྒྲ་ཡི་ཐབས་མཁྱེན་པས། །སྐྱེ་ལ་ངེས་པར་འབྱུང་ལམ་དང་། །ཞི་སོགས་མཐར་འཛིན་ལས་ལྡོག་པའི། །རྨད་བྱུང་ཆོས་འཁོར་བསྐོར་ལ་འདུད། ༢༤ །ཐེག་གསུམ་ཤིང་རྟའི་སྦྱིན་པ་ཡིས། །འཁོར་བའི་ཞུགས་ལས་བསྒྲལ་བརྩམས་ཏེ། །ཐེག་མཆོག་གྲོང་ཁྱེར་ཉག་གཅིག་གི། ཁང་བཟང་དམ་པར་ཁྲིད་ལ་འདུད། ༢༥ །སྒྲིབ་པ་ཀུན་སྤངས་ཡེ་ཤེས་ནི། །གཞན་ལ་ནམ་ཡང་མི་ལྟོས་པས། །ཕྱིར་མི་ལྡོག་པ་སེང་གེའི་སྒྲ། །རྒྱུན་ཆད་མེད་པར་སྒྲོག་ལ་འདུད། ༢༦ །རིགས་ཅན་གསུམ་གྱི་གདུལ་བྱ་རྣམས། །བྱང་ཆུབ་མཆོག་ཏུ་ལུང་སྟོན་པ། །དམ་ཆོས་པདྨ་དཀར་པོ་སོགས། །ཕྱི་མའི་མུ་མཐར་གསུངས་ལ་འདུད། ༢༧ །མིང་ཚིག་ལས་འདས་དེར་སྣང་ཞིང་། །སྣང་གྲགས་གཞན་གྱི་དོན་འགྱུར་བ། །འདུས་མ་བྱས་པས་ཕྱེ་བའི་ཆོས། །དུས་གསུམ་ནུབ་པ་མེད་ལ་འདུད། ༢༨ །སེམས་ཅན་སེམས་ཀྱི་རྒྱུད་ཚིག་པ། །མི་དགེའི་རྩ་བར་འགྲོགས་པ་ལ། །ཆོས་ཀྱིས་བརྩད་པའི་བསྟན་བཅོས་དང་། ཁ་ཏོན་གྱིས་ཀྱང་འདུལ་ལ་འདུད། ༢༩ །སུམ་ཅུ་རྩ་བདུན་རྒྱན་མཛེས་ཤིང་། །དགུ་བཅུ་རྩ་ལྔས་ཆོས་སྟོན་པ། །གཟུངས་དང་ཏིང་འཛིན་ཆོས་ཀྱི་སྒོ། །བསམ་ཡས་ཡུལ་དུ་གྱུར་ལ་འདུད། ༣༠ །སྐུ་གསུང་

― LT28_Page_0007 ―

^{[མ་དཔེ་གཟིགས་ན་འདིར་གནོན།]}

[Full Size]

། ཐུགས་ཀྱི་གསང་བ་གསུམ། །དྲང་ངེས་ཐབས་ཚུལ་དུ་མ་ཡང་། །མ་བསླུས་བསླུ་བར་མི་འགྱུར་བ། །ཕན་བདེ་འབའ་ཞིག་བསྩལ་ལ་འདུད། ༣༡ །གདུལ་བྱའི་སྣོད་ལ་བརྟེན་ནས་ནི། །དྲང་ངེས་རོ་ནི་ཐ་དད་ཀྱང་། །ཆོས་ཆར་ཡན་ལག་བརྒྱད་ལྡན་པ། །ངེས་དོན་ཁོ་ནར་ཕབ་ལ་འདུད། ༣༢ །སྒྱུ་འཕྲུལ་སྲས་པོའི་དབྱིངས་གང་ཡིན། །སངས་རྒྱས་ཀུན་གྱི་དེ་བཞིན་ཉིད། །སེམས་ཅན་ལ་ཡང་མཚུངས་པར་གཟིགས། །བདེན་པའི་མཐར་ཐུག་སྟོན་ལ་འདུད། ༣༣ །གལ་ཏེ་ཁྲོ་དང་གཡེང་བས་ཀྱང་། །རྒྱལ་ལ་སྐད་ཅིག་ཡིད་བྱེད་ན། །དེ་འབྲས་བྱང་ཆུབ་མཐར་འགྲོ་བ། །སྐྱེ་དགུའི་ཉེར་འཚོ་གྱུར་ལ་འདུད། ༣༤ །མཆོད་དང་མཆོད་རྟེན་བྱེད་ལ་སོགས། །འདུན་པས་འགྲོ་བ་ལྟ་ཅི་སྨོས། །རྩེ་ཕྱིར་སེན་མོས་གཟུགས་བྲིས་ཀྱང་། །རྣམ་གྲོལ་དབུགས་དབྱུང་མཛད་ལ་འདུད། ༣༥ །ཁྱོད་ཀྱི་རྗེས་སུ་རབ་བྱུང་ནས། །ཤིན་ཏུ་འཆལ་བར་གྱུར་རྣམས་ཀྱང་། །སྐལ་བཟང་འདི་ལས་མི་འདའ་བར། །འབྲས་ཐོབ་སྨོན་ལམ་རྫོགས་ལ་འདུད། ༣༦། ཁྱོད་ཀྱི་བསྟན་ལ་སྲོག་ཆགས་ཀུན། །རིང་པོར་མི་ཐོགས་དཀོན་མཆོག་གི། །གདུང་འཚོབ་མཆོག་ཏུ་ངེས་འབྱིན་པ། །འཁོར་བ་དོང་ནས་སྤྲུག་ལ་འདུད། ༣༧ །ཕྱོགས་བཅུའི་ཞིང་ན་རྒྱལ་བ་རྣམས། །ཁྱོད་བསྔགས་འབའ་ཞིག་གསུང་མཛད་

― LT28_Page_0008 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང་། །ཁྱོད་འདྲའི་སྙིང་སྟོབས་དུས་གསུམ་དུ། །མ་བྱུང་འབྱུང་མི་འགྱུར་ལ་འདུད། ༣༨ །དུས་ངན་ཚེ་ན་ཁྱོད་གསུང་གི། །ཚིགས་བཅད་གཅིག་ཙམ་འཛིན་པ་ཡི། །བསོད་ནམས་དེས་ནི་འདུས་བྱས་ཀྱི། །དགེ་ཀུན་ཟིལ་གྱིས་མནན་ལ་འདུད། ༣༩ །སྐྱེ་འགག་གནས་བྲལ་དེ་བཞིན་གཤེགས། །སྐལ་ངན་སྐལ་བཟང་བསྒྲིབས་པ་ཡིས། །བརྒྱ་ལམ་དུ་ནི་རེས་འགར་ཡང་། །ཀུན་གྱིས་མཐོང་བར་དཀའ་ལ་འདུད། ༤༠ །ད་ལྟ་ཆོས་སྐུའི་རིང་བསྲེལ་སོགས། །ཤིན་ཏུ་ཡངས་པར་རྒྱས་པས་ཀྱང་། །མོས་པ་བྱེ་བ་དུ་མ་ཡི། །འགྲོ་སྒྲོལ་བྱིན་གྱིས་བརླབས་ལ་འདུད། ༤༡ །མ་འོངས་པ་ན་རྡོ་རྗེའི་གདུང་། །ནོར་བུ་ཏོག་གི་བློ་གྲོས་སོགས། །རིན་ཆེན་མེ་ཏོག་ཆོས་སྤྲིན་གྱུར། །སངས་རྒྱས་མཛད་པ་མཛད་ལ་འདུད། ༤༢ །མཚོན་གྱི་བསྐལ་པར་ཨནྡ་རྙིལ། །མུ་གེའི་ཚེ་ན་རིན་ཆེན་ཟས། །ནད་ལ་སྨན་དུ་གྱུར་ནས་སླར། །གསེར་གྱི་ས་གཞིར་གནས་ལ་འདུད། ༤༣ །འགྲན་ཟླ་ཐམས་ཅད་སྤངས་བཞིན་ཏུ། །མ་དག་ཞིང་དུ་འགྲན་ཟླར་བཅས། །གདུལ་བྱ་འདུལ་ཐབས་བསམ་ལས་འདས། །ཐབས་མཁས་རྨད་དུ་བྱུང་ལ་འདུད། ༤༤ །དཔའ་རྣམས་ཞིང་འདིའི་ཚུལ་ལས་བརྩམས། །ཐུགས་བསྐྱེད་གོ་ཆ་སླར་ཡང་བརླིངས། །ཚོགས་ཆེན་བརྩོན་འགྲུས་ཡོངས་བསྐུལ་ཏེ། །

― LT28_Page_0009 ―

^{[མ་དཔེ་གཟིགས་ན་འདིར་གནོན།]}

[Full Size]

ཡེ་ཤེས་སྟོབས་མཆོག་བསྐྲུན་ལ་འདུད། ༤༥ །ཞིང་གཞན་བསྐལ་མང་ལེགས་སྤྱད་ལས། །ཞིང་འདིར་སྐད་ཅིག་བསོད་ནམས་མཆོག །དེས་ན་བསླབ་དང་ཏིང་འཛིན་སོགས། །འབྲེལ་ཚད་དོན་ལྡན་མཛད་ལ་འདུད། ༤༦ །སྙིགས་་མའི་དུས་མཐར་སྐྱེས་པ་ཡི། །མགོན་པོ་ཁྱོད་ཀྱི་འབངས་རྣམས་ཀྱིས། །ལུས་སྲོག་རྡུལ་སྙེད་བཏང་བྱས་ཀྱང་། །བཀའ་དྲིན་ཕྱོགས་ཙམ་ཅི་ཞིག་ལྡོན། ༤༧ །དེ་ཕྱིར་ཁྱོད་ཀྱིས་གཞན་དོན་ཏུ། །བྱང་ཆུབ་སྤྱོད་པ་གང་ཡིན་པ། །དེ་ལ་སྙིང་ནས་སློབ་པ་ཡིས། །དགོངས་པ་རྟག་ཏུ་སྐོང་བར་ཤོག ༤༨། ལུས་དང་སྲོག་ལ་མི་ལྟོས་པར། །དམ་ཆོས་སྤྱི་དང་ཐེག་ཆེན་ཚུལ། །ཆོས་ཁམས་མཐས་གཏུག་འཛིན་ནས་སུ། །ཤཱཀྱའི་གཙོ་བོ་མཉེས་བྱེད་ཤོག ༤༩ །ཁྱོད་ཀྱི་ཡོན་ཏན་ཇི་ལྟ་བར། །དེ་ལྟར་བདག་ལ་མྱུར་རྫོགས་ནས། །ཕྱོགས་དུས་གཤེགས་པའི་རྒྱལ་རྣམས་ཀྱིས། །ཁྱོད་བཞིན་རྟག་ཏུ་བསྔགས་མཛད་ཤོག ༥༠ །འདུན་བརྩོན་དྲན་དང་ཤེས་རབ་སོགས། །བསམ་མི་ཁྱབ་པའི་ཡུལ་གྱི་སྣོད། །རྟག་ཏུ་རྒྱུད་ལ་ཉེར་གནས་པས། །བདག་གཞན་ཕྱིར་མི་ལྡོག་འགྱུར་ཤོག ༥༡ །མཐའ་ཡས་ཚེ་འོད་མངའ་བའི་རྒྱལ། །མཐོང་ནས་ཆོས་མིག་རྡུལ་བྲལ་བརྙེས། །ཕྱོགས་བཅུའི་ཞིང་ན་རྒྱལ་རྣམས་ཀྱི། །ཕྲིན་ལས་མ་ལུས་སྒྲུབ་བྱེད་ཤོག ༥༢ །གྲངས་

― LT28_Page_0010 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་བསྐལ་པར་ལེགས་བསྒྲུབས་པའི། །ལུང་རྟོགས་དམ་ཆོས་རིན་པོ་ཆེ། །ཇི་སྲིད་ནམ་མཁའི་ཁམས་གནས་པ། །དེ་སྲིད་བསྟན་པ་འབར་གྱུར་ཅིག༥༣། དེ་བཞིན་གཤེགས་པའི་ཡོན་ཏན་ནི་ནམ་མཁའི་མཚན་ཉིད་ཅན་ཏེ་སོ་སྐྱེའི་ཁབ་ཀྱི་བུ་གའི་བློ་མིག་གིས་ཅུང་ཟད་ཀྱང་གཞལ་བར་མི་བཟོད་པ་ཞིག་ནའང་། བཀའ་དྲིན་ལ་རྗེས་སུ་བསམ་སྟེ་གུས་པའི་ཡིད་ཙམ་མཚོན་པར་བྱས་པ་ནི། རི་སུལ་ན་གནས་པའི་ཡོན་ཏན་རྒྱ་མཚོས། ས་ཟླའི་ཚེས་བཅོ་ལྔའི་ཐུན་མཚམས་སུའོ། །སརྦ་མངྒ་ལཾ།། །།དཔལ་སྤུངས་ཆོས་གྲྭར་རྗེ་སློབ་མངྒ་ལར་སྨིས་སྤར་དུ་བཀོད་པའོ།། །།

འཇམ་དཔལ་གཞོན་ནུར་གྱུར་པའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་དབྱེར་མེད་པའི་ཡེ་ཤེས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར།

― LT28_Page_0011 ―

^{[མ་དཔེ་གཟིགས་ན་འདིར་གནོན།]}

[Full Size]

འཇམ་དཔལ་གཞོན་ནུར་གྱུར་པའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་དབྱེར་མེད་པའི་ཡེ་ཤེས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ།། །

― LT28_Page_0012 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་ཨཱརྱ་མཉྫུ་ཤྲཱི་ཡེ། །རྒྱལ་བ་ཀུན་གྱི་ཐུགས་ལ་རྟག་བཞུགས་ཤིང་། །གཉིས་སུ་མེད་པའི་ཡེ་ཤེས་གང་ཡིན་པ། །དེ་ནི་འཇམ་དཔལ་ཡེ་ཤེས་སེམས་དཔའ་སྟེ། །བདག་གི་སྙིང་ལ་ཡེ་ཤེས་དབབ་ཏུ་གསོལ། །རྒྱལ་བ་ཀུན་གྱི་གསུང་གི་དབང་ཕྱུག་སྟེ། །བརྗོད་མེད་བརྗོད་པ་གཞོམ་དུ་མེད་པའི་རྒྱུ། །ཆོས་འཁོར་མ་ལུས་སྨྲ་བའི་ཚིག་གི་བདག །བདུད་རྩིའི་ཟེགས་མ་བདག་ལ་སྩལ་དུ་གསོལ། །རྒྱལ་ཀུན་ཡེ་ཤེས་སྐུ་སྟེ་འཇམ་པའི་དཔལ། །སྒྲིབ་པ་ཀུན་སྤངས་རང་བྱུང་གཞོན་ནུའི་ལུས། །མཚན་དཔེ་ཉི་མ་ཟླ་བ་སྣང་བའི་འོད། །བདག་ལ་ཞལ་གྱི་ཆ་ཤས་བསྟན་ཏུ་གསོལ། །མཁའ་ཁྱབ་འགོག་པའི་བདེན་པ་རྡུལ་སྤངས་པ། །རྣམ་གྲོལ་ལུས་ཀྱིས་གདོད་ནས་

― LT28_Page_0013 ―

^{[མ་དཔེ་གཟིགས་ན་འདིར་གནོན།]}

[Full Size]

མངོན་མཛད་ཀྱང་། །སྒྱུ་འཕྲུལ་དྲྭ་བ་ཁྱབ་ཅིང་རྟག་པ་ཡི། །ཁྱབ་བདག་ཆེན་པོས་བདག་གི་བླ་མ་མཛོད། །རྒྱལ་སྲས་ཡེ་ཤེས་ཡངས་པའི་གོ་འབྱེད་ཅིང་། །མཚན་མ་མེད་པ་ཅི་ཡང་མི་རྟོག་པའི། །རྣམ་ཐར་ཆོས་ཀྱི་དབྱིངས་དང་སྙོམས་པར་ཞུགས། །ནམ་མཁའ་འདྲ་བས་བདག་ལ་གོ་སྐབས་ཕྱེས། །བཏང་སྙོམས་ཆེན་པོས་འཁོར་འདས་ཁུར་ཁྱེར་ཞིང་། །བསྡུ་བ་རབ་ཡངས་འགྲོ་ཀུན་ཉེར་འཚོའི་གཞི། །ཡོན་ཏན་ལོ་ཏོག་དུ་མ་བསྐྱེད་མཛད་པའི། །ས་ཆེན་འདྲ་བས་བདག་ཀྱང་སྨིན་མཛད་གསོལ། །སྒྲིབ་པའི་སྤྲིན་དང་བྲལ་བའི་དཀྱིལ་འཁོར་ནི། ཁ་དོག་སྣ་ཚོགས་སྣང་བར་འབར་བ་ཡིས། །ཉོན་མོངས་རྒྱ་མཚོ་ཡུད་ཙམ་ཉིད་ལ་སྐེམས། །ཉི་མ་འདྲ་བས་སྡིག་པའི་མུན་པ་

― LT28_Page_0014 ―

^{[མ་དཔེ་གཟིགས་ན་འདིར་གནོན།]}

[Full Size]

སོལ། །ཤེས་རབ་དཀྱིལ་འཁོར་སྙིང་རྗེའི་བསིལ་ཟེར་ཅན། །ཆོས་ཉིད་མཁའ་ལ་ཆགས་པ་མེད་པར་ཤར། །བློ་ཆེན་སྐར་མའི་དབུས་ན་ཉ་རྒྱས་ཀྱི། །ཟླ་བ་འདྲ་བས་བདག་ལ་སྣང་བ་སྩོལ། །ཚོགས་གཉིས་དཔག་ཡས་རིན་ཆེན་མཛོད་མངའ་ཞིང་། །སྲིད་དང་ཞི་བའི་གླིང་ལ་རང་དབང་སྒྱུར། །མཉམ་མེད་རྣམ་ཐར་གསེར་གྱི་འཁོར་ལོས་འདྲེན། །ཆོས་ཀྱི་རྒྱལ་པོས་བདག་ལ་བཀའ་ལུང་སྩོལ། །བདེ་བའི་སྤྱད་པ་སྤྱོད་འདོད་དོན་མཐུན་གྱི། །རྒྱལ་སྲས་གཞོན་ནུ་སྲིད་ལམ་དུབ་པ་ལ། །ཤེས་རབ་གཏེར་ཁ་ཟད་པ་མེད་པར་སྦྱིན། །བུམ་བཟང་འདྲ་བས་བདག་གི་དབུལ་སེལ་མཛོད། །སྙིང་རྗེའི་རྩ་བ་འགྲོ་ཁམས་ས་གཞིར་ཟུག །སྨོན་ལམ་རྒྱ་མཚོའི་ལོ་མ་འབྲས་བུས་དུད། །འབད་མེད་ལྷུན་གྱིས་གྲུབ་པའི་འདོད་པ་འཇོ། །ལྗོན་ཤིང་འདྲ་བས་བདག་གི་གྲིབ་བསིལ་མཛོད། །དབང་བཅུའི་ཕ་མཐར་སོན་པའི་ཟིལ་དངར་དང་། །སྟོབས་བཅུའི་ནུས་པས་འཆི་བདག་ཚར་གཅོད་པ། །སར་གནས་ཉེ་དབང་ཚོགས་ཀྱིས་སྤྱད་བྱ་སྟེ། །བདུད་རྩི་འདྲ་བས་བདག་གི་འཆི་བ་སོལ། །མི་ཤེས་པ་དང་ལེ་ལོའི་གཉིད་སློང་ཞིང་། །བདེན་བཞིའི་སྒྲ་ཡིས་ལོག་ཞུགས་རྣལ་མར་འགོད། །གདུལ་དཀའ་ཚར་གཅོད་མི་སྲུན་བཏང་སྙོམས་མཛད། །རྔ་ཆེན་འདྲ་བས་བདག་གི་བག་

― LT28_Page_0015 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་སོལ། །བྱང་སེམས་བྱེ་བ་སྙེད་ལ་གཏམ་སྟོན་ཞིང་། །ལྷ་སོགས་མངོན་པར་དགའ་བའི་གྲགས་པ་ཅན། །འཇིག་རྟེན་གསུམ་ན་མཚན་གྱི་སྒྲ་གཅིག་པ། །འབྲུག་སྒྲ་འདྲ་བས་བདག་ལ་ཆོས་ཆར་སྩོལ། །གཟུང་འཛིན་རབ་ཏུ་བརྟན་པའི་ཁང་པ་ན། །སྡིག་ལྟའི་མུན་པས་ཉམས་པའི་བྱིས་པ་ལ། །ལྷག་པར་ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་གྱུར་པས་དྲང་དུ་གསོལ། །ཕུང་སོགས་དངོས་པོའི་ཚང་ཆིང་ཀུན་ཟ་བ། །མཁྱེན་རབ་དྲི་མེད་འབར་བའི་འོད་ཟེར་ཅན། །ཆགས་ཐོགས་མེད་པའི་ཡེ་ཤེས་མེ་ལྕེ་ཡིས། །བདག་གི་ལས་ཉོན་སྒྲིབ་པ་བསྲེག་ཏུ་གསོལ། །ཡང་དག་ལྟ་བས་འགྲོ་ལ་གཟིགས་གཟིགས་ནས། །ལས་ཀྱི་འཁྲུལ་འཁོར་སྒྱུ་མ་ལྟ་བུར་མཁྱེན། །རབ་རིབ་སྤངས་པས་ལྟ་བའི་སྐྱོན་མེད་པ། །ཡེ་ཤེས་མིག་གཅིག་བདག་ལ་གཟིགས་སུ་གསོལ། །ཏིང་འཛིན་བུད་མེད་ཁྲག་ཁྲིག་བརྒྱས་བསྐོར་ཡང་། །མི་གནས་ཚངས་པར་སྤྱོད་ལས་མ་ཉམས་པར། །བཅིང་གྲོལ་མེད་པའི་ཁྲིམས་ཀྱི་ལུང་འབོག་པ། །གཙང་གནས་དམ་པས་བདག་ལ་ཚངས་པ་སྩོལ། །འཁོར་བ་རྒྱུ་དང་བཅས་པ་ཐུགས་ཆུད་པས། །གང་གང་ཉེས་པའི་གསོག་ལྡང་དེ་དང་དེ། །གང་འདུལ་སྦྱོར་བ་བརྒྱ་པས་རྩད་ནས་ཕྱུང་། །སྨན་པ་ཆེན་པོས་བདག་གི་ཟུག་རྔུ་ཆོམས།

― LT28_Page_0016 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྲོས་པ་ཀུན་བྲལ་དེ་བཞིན་ཉིད་ཀྱི་མཚོར། །ཐབས་མཁས་ཐུགས་རྗེའི་གྲུ་ལ་རྟ་གཞོན་ཏེ། །འཁོར་བ་ཇི་སྲིད་འགྲོ་ཀུན་སྒྲོལ་ལ་ཞུགས། །དེད་དཔོན་ཆེན་པོས་བདག་ཀྱང་བསྒྲལ་དུ་གསོལ། །བྱམས་དང་བཟོད་པ་སྲ་བའི་གོ་མནབ་སྟེ། །ཤེས་བཅུའི་མཚོན་ཆས་བདུད་དང་གཤིན་རྗེ་སོགས། །མི་བཟད་གཡུལ་ངོ་ཟློག་མཛད་འཇིགས་ཆེན་དགྲ། །དཔའ་བོ་ཆེན་པོས་བདག་གི་འཇིགས་པ་སོལ། །དུས་སུ་བཏང་སྙོམས་སྐད་ཅིག་མི་མངའ་ཞིང་། །དུས་མིན་རྩོལ་བཅས་ཕྲིན་ལས་མི་མཛད་པར། །མཁྱེན་པའི་ཡེ་ཤེས་དུས་ལ་རྟག་ཏུ་དགོངས། །དུས་ཤེས་ཆེན་པོས་བདག་གི་དུས་མཁྱེན་མཛོད། །ལམ་གྱི་རྒྱུད་ལས་ཡང་དག་འདས་གྱུར་ཀྱང་། །ལམ་དང་ལམ་མ་ཡིན་ལ་ཤིན་ཏུ་མཁས། །དབང་ལམ་ཐ་དད་སྟོན་ལ་མི་བསྙེངས་པ། །བདག་ལའང་བྱང་ཆུབ་ཆེན་པོའི་ཤུལ་བསྟན་གསོལ། །འཁྲུལ་དང་གྲོལ་བ་འགའ་ཡང་མ་གཟིགས་ཀྱང་། །སྡུག་བསྔལ་འཁོར་ལོ་རྡོ་རྗེ་རྣོན་པོས་གཅོད། །འགྲོ་བ་རྒྱུད་ལྔ་དབེན་ལ་རབ་བཞག་པ། །བརྟན་པའི་འཁོར་ལོས་བདག་གི་འཁྲུལ་པ་སོལ། །ཀུན་ཏུ་དཔའ་བར་འགྲོ་བའི་ཏིང་འཛིན་དང་། །རྫུ་འཕྲུལ་རྣམ་པར་རྩེ་བའི་ཆོ་འཕྲུལ་གྱིས། །ཐེག་ཆེན་ཆོས་ཀྱི་རྒྱལ་མཚན་ཀུན་ཏུ་བཙུགས། །ཐེག་པ་དམ་པའི་བཞོན་

― LT28_Page_0017 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བདག་བསྐྱོན་གསོལ། །རྒྱལ་བ་ཀུན་གྱི་ཆོས་སྒོ་མཐའ་ཡས་པ། །སྟོང་པ་ཉིད་ལས་བརྩམས་ཏེ་སྨྲ་མཁས་པས། །སྨྲ་བའི་ཁྱུ་མཆོག་ཚིག་གིས་མི་འཕྲོག་པ། །བདག་ལ་ཟབ་མོ་རྟོགས་པའི་བློ་གྲོས་སྩོལ། །འདུ་བྱེད་མཁའ་ལྟར་མཉམ་པ་ཉིད་བརྙེས་པས། །ཆོས་རྣམས་ཀུན་ལ་དེ་བློ་མཉམ་པར་བཞག །དངོས་དང་དངོས་མེད་ཀུན་ལས་རྣམ་གྲོལ་བས། །བདག་ཀྱང་མཚན་མ་མེད་ལ་གཞུག་ཏུ་གསོལ། །བདག་མེད་རྟོགས་པ་སེང་གེའི་སྒྲས་བསྒྲགས་ནས། །མཚན་མ་བརྒྱ་ཕྲག་རྣམ་པ་ཀུན་ཏུ་བཤེགས། །སྒྱུ་མའི་ཆོས་ཏེ་སྒྱུ་མ་ལས་ཀྱང་གྲོལ། །བདག་སོགས་སྤྲོས་པའི་འཆིངས་ལས་དགྲོལ་བར་མཛོད། །རྐང་གཉིས་མཆོག་མ་སྔར་གཤེགས་ཐམས་ཅད་ཀྱིས། །ཁྱོད་ཀྱི་མཐུ་ནི་རྟག་ཏུ་བསྟན་པར་མཛད། །འབྱུང་དང་འབྱུང་འགྱུར་ཀུན་ཀྱང་དེ་བཞིན་ཏེ། །མཐུ་སྟོབས་ཆེན་པོས་ངན་འགྲོ་ལས་བསྐྱབ་གསོལ། །ཐུབ་པ་འདས་ནས་དམ་ཆོས་བསྲུང་བ་དང་། །འགྲོ་ལ་དབུགས་འབྱིན་ཆེན་པོ་སྩལ་འདོད་པས། །རྫུ་འཕྲུལ་རྐང་པས་དུས་ཀུན་རྒྱུ་ལགས་ན། །བདག་ཀྱང་འཁོར་བའི་མཚོ་ལས་དབུགས་དབྱུང་སྩོལ། །གང་དུ་འཇིག་རྟེན་འདྲེན་པས་དབེན་པ་ན། །བྱིས་པའི་གཟུགས་ཀྱིས་སངས་རྒྱས་མཛད་པ་མཛད། །དུས་

― LT28_Page_0018 ―

^{[མ་དཔེ་གཟིགས་ན་འདིར་གནོན།]}

[Full Size]

དང་དུས་སུ་རྒྱལ་བསྟན་ཁུར་བསྣམས་པས། །སྐལ་དམན་བདག་གི་འདྲེན་པ་མཛད་དུ་གསོལ། །དུས་མཐར་སེམས་ཅན་ཀུན་ལ་མཆོག་སྦྱིན་ཞིང་། །སྔགས་ཀྱི་གཟུགས་ཀྱིས་སྐྱེ་བོ་སྐྱབས་མེད་པ། །སྐྱོབ་པའི་གོ་ཆ་རྒྱལ་རྣམས་མདུན་བཞེས་པས། །སྒྲུབ་པོ་བདག་ལ་མཆོག་གི་གྲུབ་པ་སྩོལ། །སྟོབས་བཅུ་མངའ་བས་མགྲིན་གཅིག་གསོལ་བའི་མཚན། །འཇམ་དཔལ་ཞེས་བྱ་ཐོས་དང་དྲན་པ་ཡང་། །བསོད་ནམས་ཕུང་པོ་བསམ་གྱིས་མི་ཁྱབ་གསུངས། །བདག་ཀྱང་མཚན་གྱི་ཡི་གེས་བྱིན་བརླབ་མཛོད། །ཟབ་མོའི་ཤེས་རབ་བསམ་མི་ཁྱབ་བསགས་པས། །འཇིག་རྟེན་ཆོས་ལ་རྡུལ་ཙམ་མི་བསྟེན་པར། །ཆོས་ཀྱི་རྒྱལ་ཐབས་དབང་སྒྱུར་ཆེན་པོ་པ། །བདག་ཀྱང་ཆོས་ཀྱི་རྒྱལ་པོར་དབང་བསྐུར་གསོལ། །དབྱིབས་དང་ཁ་དོག་ཆ་ལུགས་མི་མངའ་ཡང་། །དྲི་མེད་དཔལ་འབར་གཟི་བརྗིད་ཕྲེང་བ་ཅན། །ཆུ་ཟླ་བཞིན་དུ་བཟུང་བ་མ་མཆིས་པས། །བདག་ལའང་བསོད་ནམས་ཆེན་པོའི་གཟི་བརྗིད་སྩོལ། །འདས་པའི་དུས་སུ་རྒྱལ་བ་འཇམ་པའི་ཏོག །མ་འོངས་དུས་ན་མགོན་པོ་ཀུན་ཏུ་གཟིགས། །ད་ལྟ་མོས་པ་རབ་དགའི་སྙིང་པོ་སོགས། །རྒྱལ་བ་རྒྱ་མཚོས་མ་རིག་སྦུབས་བརྟོལ་ཞིང་། །སངས་རྒྱས་སྤྱན་

― LT28_Page_0019 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་གཟིགས་པའི་རྡུལ་སྙེད་ཀྱི། །ཞིང་ཁམས་ཀུན་ཏུ་རྣམ་འཕྲུལ་ཚད་མེད་པས། །ངོ་མཚར་ཆེན་པོའི་སྤྱོད་ལ་རབ་ཞུགས་པ། །རྒྱལ་སྲས་རྒྱ་མཚོས་སྲིད་མཐའ་དབྱིངས་སུ་བརྟུལ། །མགོན་པོ་ཁྱོད་ནི་རྒྱལ་བ་ཀུན་གྱི་ཡབ། །ཡོན་ཏན་ཆོས་ཀྱི་དབྱིངས་དང་མཉམ་པས་བརྒྱན། །སྒྲུབ་པ་གཉིས་པོ་དག་གི་མཐར་གཤེགས་ཀྱང་། །ད་དུང་སེམས་ཅན་ཁོ་ནའི་དོན་ལ་དགྱེས། །རྒྱལ་བ་བྱེ་བས་གསུངས་ཀྱང་སྐྲ་རྩེ་ཡི། །ཟེག་མ་ཙམ་གྱུར་རྣམ་ཐར་རྒྱ་མཚོ་ལ། །བདག་ལྟས་བསྔགས་པའི་ཅལ་ཅོལ་འབུམ་སྒྲོགས་ཀྱང་། །ཕྱོགས་སུ་མི་ཉེ་ཆར་ཡང་མི་ཕྱིན་མོད། །ཉི་ཟླའི་སྣང་བས་གཞན་གྱི་མིག་ཕྱེ་ལ། །སྲིན་བུས་རང་གི་ཤུལ་ལམ་མཚོན་པ་ལྟར། །རང་ཉིད་ཁོ་ན་དད་པའི་ཤུལ་མཚོན་པའི། །ཚིག་གི་སྒྲོན་མེ་འཇམ་མགོན་ཐུགས་རྗེས་བཞེས། །འོད་ཀྱི་ཏོག་དང་ཡེ་ཤེས་བླ་མ་མཆོག །ཞི་བའི་དབང་པོ་སྨོན་ལམ་བློ་གྲོས་སོགས། །བློ་ཆེན་ཁྱོད་དང་མཚུངས་པར་སྤྱོད་པ་ལྟར། །བདག་ཀྱང་འཇམ་དཔལ་དཔའ་བོའི་རྗེས་སུ་སློབ། །མོས་པའི་དགེ་བས་སྙིང་གི་མུན་བཅོམ་ནས། །ད་ལྟ་ཉིད་དུ་འཇམ་དཔལ་གཞོན་ནུའི་སྐུ། །རྫུ་འཕྲུལ་ཆེ་ཞིང་ཁ་དོག་བཟང་པོ་ཅན། །མངོན་སུམ་དབང་པོའི་ཡུལ་དུ་གྱུར་པར་མཛོད། །སྲིད་པ་

― LT28_Page_0020 ―

^{[མ་དཔེ་གཟིགས་ན་འདིར་གནོན།]}

[Full Size]

ཤུལ་རིང་མགྲོན་པོའི་དབུགས་འབྱིན་ཅིང་། །བསོད་ནམས་བརྒྱ་པའི་རྩིབས་ཀྱི་རི་མོ་ཅན། །ཕྱག་མཐིལ་བདག་གི་མགོ་ལ་ཉུག་མཛད་ནས། །བྱང་ཆུབ་བར་དུ་བླ་མ་མཛད་དུ་གསོལ། །ཞེས་པ་འདི་ནི། རྗེ་བཙུན་མཁྱེན་པའི་གཏེར་ཆེན་གྱི་ཕོ་བྲང་དང་ཁད་ཉེ་ཞིང་མི་རྣམས་ཀྱང་རང་བཞིན་གྱིས་གཙུག་ལག་གི་བློ་གྲོས་གསལ་བ་ཤར་ཕྱོགས་རྣམ་དག་བཀོད་པའི་ལྗོངས་སུ་འདུ་གསུམ་པ་བློ་གྲོས་མཐའ་ཡས་ཀྱིས་དད་པས་བྲིས་པ་སྐྱེ་བ་ཀུན་ཏུ་འཇམ་དཔལ་དཔའ་བོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།རྗེ་བཙུན་སྤྱན་རས་གཟིགས་དབང་ཕྱུག་གི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མོ་མ་ཧཱ་ཀཱ་རུ་ི་ཀཱ་ཡ། བསོད་ནམས་ཡེ་ཤེས་གྲངས་མེད་གསེར་གྱི་རྡུལ། །རྒྱལ་ཀུན་མཁྱེན་དང་བརྩེབས་བསྡུས་པ་ལས། །ཞིང་ཁམས་རྒྱ་མཚོའི་མཆོད་སྡོང་གཅིག་པུ་པ། །མགོན་པོ་སྤྱན་རས་གཟིགས་ལ་ཕསཆཉཙསནས་འདུད། །ཆུ་ཀླུང་བྱེ་མ་སྙེད་ཀྱི་བཅོམ་ལྡན་འདས། །ལྷ་ཡི་བསྐལ་བར་རིམ་གྲོས་བསྙེན་བཀུར་བའི། །བསོད་ནམས་ཕུང་པོ་གཞལ་དུ་མེད་པ་ཡང་། །ཁྱོད་ཀྱི་སྤུ་རྩེ་ཉག་གཅིག་ལ་གནས་ཏེ། །དེ་ལྟའི་བསོད་ནམས་ཡོན་ཏན་

― LT28_Page_0021 ―

^{[མ་དཔེ་གཟིགས་ན་འདིར་གནོན།]}

[Full Size]

སྤོབས་པ་ནི། །དེ་བཞིན་གཤེགས་པ་ལ་ཡང་མ་མཆིས་ན། །བྱང་སེམས་གཞན་ལྟ་སྨོས་ཀྱང་ཅི་དགོས་ཞེས། །དུས་གསུམ་གཤེགས་པས་ཡང་ཡང་བསྔགས་ལ་འདུད། །འཇིག་རྟེན་འདི་ན་ཕུན་ཚོགས་གང་ཡིན་པ། །དེ་ཀུན་རྫོགས་པའི་སངས་རྒྱས་སྐྱེས་བུའི་མཐུ། །ཐུབ་པ་ཉི་མ་བརྒྱ་ཕྲག་བཅུ་སྙེད་ཀྱང་། །ཐུགས་རྗེའི་ཕྱག་གི་འོད་ཟེར་ཆ་གཅིག་གོ །གངྒཱའི་ཀླུང་བརྒྱ་རྒྱལ་བའི་མཚན་བརྗོད་ཅིང་། །ལ་ལས་སྤྱན་རས་གཟིགས་ཀྱི་མཚན་དྲན་པ། །ཡོན་ཏན་མཚུངས་པ་ལས་ཀྱང་ལྷག་པར་དེ། །བྱང་ཆུབ་ལག་པའི་མཐིལ་དུ་བསྩལ་ལ་འདུད། །ནམ་མཁའ་བཞིན་ཏུ་བཟུང་བ་མ་མཆིས་པ། །སྐུ་ཡི་རང་བཞིན་རྒྱལ་བས་མ་གཟིགས་ཤིང་། །བ་སྤུའི་ཁུང་བུ་གཅིག་གི་ཕ་མཐའ་ཡང་། །ཀུན་ཏུ་བཟང་པོས་འབད་པས་རྟོགས་མ་གྱུར། ཀ་ན་ཀ་དང་ཀྲྀཥྞ་ཉི་མའི་འོད། །དབང་པོའི་རྒྱན་སོགས་བ་སྤུའི་ཁུང་རེར་ཡང་། །རྒྱལ་སྲས་རྒྱ་མཚོའི་རྣམ་ཐར་བཀོད་གྱུར་པ། །ངོ་མཚར་ཆེན་པོའི་ཕ་རོལ་ཕྱིན་ལ་འདུད། །ཕྲ་རབ་རྡུལ་དང་མཉམ་པའི་ཏིང་འཛིན་སྒོ། །བ་སྤུ་རེ་རེ་ལ་ཡང་བརྒྱ་ཕྱེ་བས། །འཇུག་ལྡང་འགྲན་ཟླར་ཆས་པའི་ཀུན་ཏུ་བཟང་། །སྤོབས་པའི་ཆུ་རྒྱུན་བརྟུལ་བའི་ཚུལ་ཡང་

― LT28_Page_0022 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན། །རྒྱལ་བ་ཞིང་རྡུལ་གྲངས་ཀྱིས་བསྐལ་པའི་བར། །བསྔགས་པ་བརྗོད་ཀྱང་དེ་ཡི་ཡོན་ཏན་མཁའ། །སོར་མོས་གཞལ་ལྟར་ཟད་པར་མི་ནུས་གསུངས། །མི་སྲིད་སྲིད་པའི་ཆོས་ཅན་དེ་ལ་འདུད། །སེམས་ཅན་གང་དག་སྨིན་པར་གྱུར་པ་ལ། །སངས་རྒྱས་འབྱུང་བ་ཕྱོགས་བཅུར་བསྟན་མཛད་ཅིང་། །ཉན་རང་འཁོར་ལོས་སྒྱུར་དང་མིག་སྟོང་པ། །ལྷ་ཀླུ་གནོད་སྦྱིན་ཕ་དང་མ་ཡང་སྤྲུལ། །འདི་ལྟར་མཐུ་དང་གཟི་བརྗིད་ཆེ་བ་ཡི། །ཉི་ཟླ་གཉིས་པོ་སྤྱན་གྱི་མདངས་ལས་ཏེ། །ཚངས་དང་དབང་ཕྱུག་ཆུ་ལྷ་སྲེད་མེད་བུ། །དབྱངས་ཅན་མ་སོགས་སྐུ་ཡི་ཆ་ལས་ཕྱུང་། །མདོར་ན་ཤེས་བྱའི་གཤིས་ལ་སྲིད་ཚད་ཀྱིས། །གང་ལ་གང་འདུལ་ཕན་པ་རྟག་སྒྲུབ་པས། །སྲིད་གསུམ་ཆུ་བོ་བཞི་ལས་སྒྲོལ་བ་ཡི། །དགེ་བའི་ཟམ་པ་གཅིག་པུར་གྱུར་ལ་འདུད། །འགྲོ་བའི་དོན་ལ་རྒྱུན་ཏུ་ཐུགས་བྲེལ་ཅིང་། །ཞིང་མང་ཀུན་ཏུ་གཤེགས་ནས་རྒྱལ་བ་མཆོད། །རྒྱལ་སྲས་སྤྱོད་པ་ཕྱོགས་བཅུར་སྒྲུབ་བཞིན་ཏུ། །རྡུལ་བྲལ་འཇིག་རྟེན་བདེ་བའི་འབྱུང་གནས་སུ། །འདྲེན་པ་ཚེ་དཔག་མེད་པའི་སྣམ་ལོགས་ན། །དྲི་མེད་པདྨའི་སྙིང་པོར་རྟག་བཞུགས་ཏེ། །བསིལ་གཡབས་ཐོགས་ནས་རིམ་གྲོ་བརྩོན་མཛད་པ། །ཁྱོད་ཀྱི་སྒྱུ་

― LT28_Page_0023 ―

^{[མ་དཔེ་གཟིགས་ན་འདིར་གནོན།]}

[Full Size]

མ་འདི་ནི་ཡོངས་མི་ཤེས། །དམིགས་མེད་སྙིང་རྗེ་ག་བུར་ཆུས་བཀྲུས་ཤིང་། །དམ་པ་བསྩལ་བའི་སྤྱན་རས་ཟླ་བའི་འཛུམ། །བྲི་གང་མེད་པར་སྡུག་བསྔལ་སྨག་རུམ་དུ། །ཐམས་ཅད་བུ་དང་མཉམ་པར་གཟིགས་ལ་འདུད། །འཁོར་བའི་སེམས་ཅན་གཅིག་ཀྱང་མ་ལུས་པ། །ཉིད་དང་གོ་འཕང་མཚུངས་པར་བཞག་པ་ཡི། །གཡར་དམ་མཚན་མ་འོད་ཁྱིམ་དམར་པོའི་ནང་། །བདེ་གཤེགས་དབང་ཕྱུག་བཞུགས་པའི་གཙུག་ཏོར་མངའ། །ཇི་ལྟར་སྟོན་ཀའི་ལང་ཚོ་ལ་བབ་པའི། །ཟླ་བ་སྤྲིན་གྱི་གོས་དང་བྲལ་བ་ལྟར། །འཇིག་རྟེན་དགའ་སྐྱེད་ཕྱག་ན་པདྨོའི་སྐུ། །ཚད་བཟུང་མེད་ཀྱང་གདུལ་བྱའི་སྣང་ཚུལ་དུ། །རི་དྭགས་ལྤགས་པ་རལ་པའི་ཐོར་ཚུགས་དང་། །བགྲང་ཕྲེང་རིལ་བ་ཚངས་པའི་སྐུད་པ་སོགས། །དྲང་སྲོང་གཟུགས་ཀྱིས་ཕྱོགས་བཅུ་ཀུན་ཏུ་རྒྱུ། །མཐོང་ཐོས་ཐར་པའི་ཁ་ལོ་སྒྱུར་ལ་འདུད། །སྙིང་པོ་བཅུ་གཉིས་ལྡན་པའི་ཞིང་བཟུང་ཡང་། །དམན་དང་ཕོངས་ལ་ལྷག་པར་ཐུགས་བརྩེ་བས། །སྙིགས་མའི་མཐའ་དང་ངན་སོང་འགྲོ་གཟིགས་ན། །པདྨའི་མཚོ་ལ་ངང་མོ་བཞིན་ཏུ་འཇུག །བདེ་གཤེགས་ཐུགས་རྗེའི་མཐུ་ཡིས་མ་ཐུལ་ཞིང་། །ཐུར་དུ་བལྟས་ཏེ་ངན་འགྲོར་རབ་གཞོལ་བ། །

― LT28_Page_0024 ―

^{[མ་དཔེ་གཟིགས་ན་འདིར་གནོན།]}

[Full Size]

མི་མཇེད་ཞིང་ལས་སྙིགས་མའི་མཐར་ཐུག་པ། །གངས་ཅན་འགྲོ་བ་ཕྱག་མཚན་བཞེས་ལ་འདུད། །རིན་ཆེན་ཚོགས་ལ་སྣང་བའི་མཐུ་ཡོད་ཀྱང་། །བསོད་ནམས་དམན་ལ་འབྱུང་བ་དཀོན་པས་ན། །སྣང་བའི་སྒྲོན་མས་གཏན་ཏུ་སྤངས་པ་ལ། །ཐུགས་རྗེ་ཆེན་པོའི་ཉི་མ་གཅིག་པུར་ཤར། །ཡི་དྭགས་འགྲོ་བ་མཐོ་རིས་རྟེན་ཏུ་བསྒྱུར། །དམ་པའི་ཆོས་དང་ཟང་ཟིང་གཏེར་ཁ་ཕྱེ། །མངོན་མཐོ་ངེས་པར་ལེགས་པའི་ལམ་སྲོལ་གཏོད། །བཀའ་དྲིན་བླ་ན་མེད་པ་དེ་ལ་འདུད། །ལྷ་མོ་སྒྲོལ་མ་ཧ་ཡ་གྲཱི་བ་དང་། །ཡེ་ཤེས་མགོན་པོ་གནོད་གནས་དབང་པོ་སོགས། །སྐུ་དང་ཕྱག་རྒྱ་རིག་པའི་ཁྱད་པར་ཡང་། །རེ་བ་མྱུར་དུ་སྐོང་བའི་བྱིན་རླབས་ཅན། །རྡོ་རྗེ་སློབ་དཔོན་དགེ་བའི་བཤེས་གཉེན་དང་། །ཆོས་སྐྱོང་རྒྱལ་བློན་ཁྱིམ་བདག་བྲམ་ཟེ་སོགས། །ཞིང་ཁམས་སྤྱི་དང་ཁྱད་པར་བོད་ཡུལ་དུ། །སྤྲུལ་པའི་སྤྲིན་གྱིས་རྟག་ཏུ་ཁྱབ་ལ་འདུད། །ཇི་ལྟར་བདེ་འབྱུང་ནོར་བའི་སྐྱེད་ཚལ་དུ། །འཁོར་ལོས་སྒྱུར་རྒྱལ་བག་ཡངས་རྩེ་བ་བཞིན། །མེ་ཞུན་པར་མཚམས་མེད་པར་འབར་བའི་ནང་། །མནར་མེད་སེམས་ཅན་གདོན་པར་བརྩམ་པ་ན། །མེ་ཏོག་ཆར་པ་ཤིང་རྟའི་འཕང་ལོ་ཙམ། །སྙིང་རྗེའི་བསིལ་དང་ལྷན་ཅིག་ཕབ་པ་

― LT28_Page_0025 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིས། །སྡུག་བསྔལ་ཅན་རྣམས་གཏན་བདེའི་སར་བཞག་སྟེ། །དམྱལ་གནས་པདྨའི་རྫིང་བུར་བསྒྱུར་ལ་འདུད། །མགལ་དུམ་ལྟ་བུའི་འགྲོ་ལ་ཕན་བཏགས་ཕྱིར། །ཡི་དྭགས་གཤིན་རྗེའི་གྲོང་དུ་དེ་འཇུག་སྟེ། །རྡོ་རྗེའི་སེར་བ་བྱམས་པའི་རླུང་གིས་གཏོར། །ལྟོགས་པ་རྣམས་ལ་ལྷ་ཡི་ཟས་སུ་སྣང་། །དེ་ཚེ་སོར་མོའི་རྩེ་ལས་བདུད་རྩིའི་ཆུ། །མྱོང་བ་ཙམ་ནས་ལས་ཀྱི་སྒྲིབ་པ་དང་། །བཀྲེས་སྐོམ་ལྷན་ཅིག་སེལ་བའི་རྒྱུན་བསྩལ་ནས། །ལྷག་མེད་བདེ་ཆེན་ཞིང་དུ་ཁྲིད་ལ་འདུད། །གཤང་གཅི་ཟས་སུ་ཟ་བའི་སྲིན་བུའི་ཁྱུར། །སངས་རྒྱས་ཐོས་གྲོལ་ཆེན་པོའི་མཚན་གྱི་དབྱངས། །སྦྲང་འཐུང་མགྲིན་པའི་གླིང་བུས་བསྒྱུར་བ་ལས། །དེ་དག་ཀུན་ཀྱང་ཕྱིར་མི་ལྡོག་ལ་བཀོད། །ཚ་སྒོ་ཅན་ཏུ་ཁ་ཟས་མ་འཚལ་བས། །གཅིག་ཤ་གཅིག་གིས་ཟ་བར་གྱུར་རྣམས་ལ། །ཟས་གོས་ཆོས་ཀྱི་ཆར་པ་ཕབ་ནས་ཀྱང་། །སངས་རྒྱས་མཐོང་བའི་མྱུ་གུ་བསྐྱེད་ལ་འདུད། །གནོད་སྦྱིན་སྲིན་པོ་སྲོག་གི་འཚོ་བ་པ། །ཉི་ཟླས་མི་སྣང་མུན་པའི་མངལ་གནས་པར། །ནོར་བུ་དམ་པ་སྦྱིན་པའི་འོད་བཀྱེ་ནས། །བདེན་མཐོང་མིག་བུ་ཆོས་ཀྱི་གཏམ་གྱིས་ཕྱེ། །འདོད་པའི་ཚད་པས་གདུང་བའི་སྲིན་མོ་ལ། །འཕགས་པའི་ལམ་

― LT28_Page_0026 ―

^{[མ་དཔེ་གཟིགས་ན་འདིར་གནོན།]}

[Full Size]

དང་མཛེས་པའི་གཟུགས་བསྟན་ཏེ། །དེ་དག་སྙིང་ལ་ཞི་བའི་གཤེར་གྱིས་བརླན། །སྐྱེ་དགུར་སྲོག་གི་སྦྱིན་པ་བསྩལ་ལ་འདུད། །དོན་གཉེར་སླད་དུ་རྒྱ་མཚོར་ཞུགས་པ་ན། །འཇིགས་རུང་གཤིན་རྗེའི་བཞིན་རས་ལྟར་ཁྲོ་བ། །དུས་མིན་རླུང་གིས་ཕྱིན་ཅི་ལོག་ཏུ་བདས། །སྦྲུལ་་གདུག་ལྟ་བུའི་ཁ་རུ་ཆུད་པ་ཡང་། །ཅང་ཤེས་སྨན་གྱི་ལོ་མ་ཟ་བ་དེ། །གསེར་གྱི་བྱེ་མའི་ཐང་དུ་ལུས་སྤྲུགས་ནས། །ཛམ་གླིང་མི་རྣམས་རང་གི་ཁྱིམ་དུ་བསྐྱལ། །ཤི་བ་མངོན་སུམ་སློང་བར་མཛད་ལ་འདུད། །གསེར་གྱི་ས་ལ་སྤྱིའུ་ཚུགས་འདུག་རྣམས་དང་། །དངུལ་གྱི་ས་གཞིར་ཟུང་ལྡན་རྐང་པས་རྒྱུ། །རྡོ་རྗེའི་མངལ་གྱི་ཕུག་གནས་ལྷ་མིན་སོགས། །གཞན་གྱིས་མ་དུལ་བ་རྣམས་གདུལ་བྱ་མཛད། །ཕྲག་དོག་རླབས་ཀྱིས་རྣམ་པར་དཀྲུགས་པ་ཡི། །འཐབ་རྩོད་ཆུ་རྐ་བཏང་སྙོམས་ངོགས་སུ་སྒྱུར། །ལྷ་ཡང་བག་མེད་སྲུང་བའི་མེལ་ཚེ་བ། །འཇིག་རྟེན་མགོན་པོ་མཚན་དོན་མཐུན་ལ་འདུད། །མུན་པའི་ཁང་པར་ཆུད་ལ་སྒྲོན་མེ་སྟེ། །ཐན་པས་ཚིག་པ་རྣམས་ལ་སྤྲིན་གྱི་གདུགས། །སྐོམ་པས་གདུང་ལ་བསིལ་བའི་ཆུ་རྒྱུན་ཉིད། །ནད་ཀྱིས་བཏབ་ལ་སྨན་དང་སྨན་པར་གྱུར། །དམན་དང་ལྷག་པའི་ཡིད་ཀྱིས་མ་ཞི་དང་། །ལོག་པའི་

― LT28_Page_0027 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་གྱི་སྟོན་པར་གྲགས་རྣམས་ཀྱང་། །བདེ་བླག་ཉིད་དུ་ཐུགས་རྗེས་རྗེས་བཟུང་ནས། །བྱང་ཆུབ་མཆོག་ཏུ་ལུང་བསྟན་བསྩལ་ལ་འདུད། །གསོད་པའི་ཕྱིར་ནི་ཆེད་དུ་འོང་བ་ཡི། །རྡོ་རྗེའི་རི་བོའི་བར་དུ་འཐགས་ན་ཡང་། །ཁྱོད་མཚན་ཐེ་ཚོམ་མེད་པར་རྗེས་དྲན་ན། །བ་སྤུའི་རྩེ་ཡང་ཉམས་པར་མི་འགྱུར་གསུངས། །དེ་བཞིན་སྲིན་པོ་རོ་ལངས་བྱད་སྟེམས་དང་། །མེ་ཆུ་དུག་མཚོན་སྦྲུལ་གདུག་ཕ་རོལ་དཔུང་། །ཁྲི་མུན་ཆོམ་རྐུན་གནམ་ལྕགས་ལྟུང་སོགས་ལ། །དྲན་པ་ཁོ་ནས་ཟུག་རྔུ་་གཏིང་ནས་འབྱིན། །སྡུག་བསྔལ་ཁུ་སྒོར་ལས་ཀྱི་ཁོང་བསྒྲིལ་དང་། །ཉོན་མོངས་གདོས་ཀྱིས་བཅིངས་པའི་ལུས་ཅན་ལ། །འཇིགས་པ་གྲིབ་མ་བཞིན་ཏུ་འབྲང་ན་ཡང་། །མི་འཇིགས་སྦྱིན་པས་རྟག་ཏུ་བསྐྱབ་ལ་འདུད། །སཱ་ལའི་ས་བོན་ཤིན་ཏུ་ཕྲ་བ་ཡང་། །དྲོད་གཤེར་འཕྲད་པས་དགུང་ཞག་འགའ་འདས་ནས། །དཔག་ཚད་ཁྱབ་པའི་ལྗོན་ཤིང་རྒྱས་པ་ལྟར། །རྩེ་གཅིག་དད་པས་མཚན་ནས་བརྗོད་པ་དེ། །ངན་འགྲོ་ལོག་པར་ལྟུང་བའི་ལམ་ཆད་ཅིང་། །སངས་རྒྱས་ཞིང་དུ་གོམ་པ་བདེ་བླག་འགོད། །ཏིང་འཛིན་སྤོབས་པ་མུ་མཐའ་མེད་ལ་སྤྱོད། །ཇི་ལྟར་སྨོན་པ་ཚེ་འདིར་འགྲུབ་པ་སོགས། །ཁྱད་པར་གཞན་

― LT28_Page_0028 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་ཐོབ་པར་མ་གྱུར་ན། །བདག་ཉིད་བྱང་ཆུབ་སྙིང་པོར་མི་བཞུགས་ཞེས། །སྙིང་རྗེ་ཆེན་པོའི་གཟུངས་ཀྱི་མཐུ་བསྟན་ནས། །ཐོས་པས་ཚིམས་པའི་ཐུགས་བསྐྱེད་བཞེས་ལ་འདུད། །ལོ་ཏོག་འབྲས་བུ་སད་ཀྱིས་ཁྱེར་བ་ལ། །སོ་ནམ་འབད་རྩོལ་སུས་ཀྱང་མི་བྱེད་ལྟར། །སྡིག་པ་ཆེན་པོས་སེམས་ཀྱི་རྒྱུད་བསྲེགས་པས། །རྒྱལ་བ་སྲས་དང་བཅས་པས་རབ་སྤངས་པ། །འཕགས་ལ་སྐུར་འདེབས་ཆོས་ལ་དབང་ཟ་ཞིང་། །མཚམས་མེད་ལྔ་དང་དཀོན་མཆོག་དཀོར་ནོར་སྤྱོད། །ཤན་པ་ཕག་པ་ཉ་དང་རི་དྭགས་རྔོན། །ཚུལ་ཁྲིམས་འཆལ་དང་ལོག་པར་ཞུགས་རྣམས་ཀྱང་། །རྣ་བའི་དབང་པོར་མཚན་གྱི་ཟེར་ཕོག་སྟེ། །མགོན་པོ་ཁྱོད་ལ་དད་པའི་སེམས་རྙེད་ན། །ནོངས་པ་ལྕི་བའང་བ་མོ་ལྟར་ཞུ་ནས། །སྐྱོན་མེད་ཐར་པའི་ས་བོན་བསྐྲུན་ལ་འདུད། །ཆོས་ཀྱི་དབང་ཕྱུག་བརྙེས་པའི་རྒྱལ་རྣམས་དང་། །རྒྱལ་སྲས་དཔའ་བོ་ཤིན་ཏུ་གྲགས་ཆེན་པོ། །སྒྲིབ་པ་རྣམ་པར་སེལ་བ་ལ་སོགས་ཀྱང་། །ཁྱོད་ཀྱི་རིག་སྔགས་ཚོལ་བའི་ཚུལ་བསྟན་ཞིང་། །ཁྱོད་ཞལ་བལྟ་ལ་ཤིན་ཏུ་བརྐམ་ལགས་ན། །རིག་སྔགས་ནོར་བུ་སུག་པར་མཆིས་ན་ཡང་། །བོང་བ་བཞིན་ཏུ་བཏང་སྙོམས་བོར་ནས་སུ། །འབད་པས་ཆོས་མ་ཡིན་པ་

― LT28_Page_0029 ―

^{[མ་དཔེ་གཟིགས་ན་འདིར་གནོན།]}

[Full Size]

དོན་ཏུ་གཉེར། །ཁྱོད་ཞལ་མཐོང་བའི་ལས་ལས་ཕྱིར་ཕྱོགས་པ། །ལས་སྒྲིབ་ཁུར་པོས་ཧ་ཅང་ནོན་དྲག་པའི། །དེང་སང་སྐྱེ་བོ་བདུད་ཀྱིས་བསླུས་པ་རྣམས། །སླར་ཡང་ཁྱོད་ཀྱི་སྙིང་རྗེས་མ་གཟིགས་ན། །དྭ་ཕྲུག་ཕ་མས་བོར་ན་བཤེས་མེད་ལྟར། །སངས་རྒྱས་ཀུན་གྱི་གདུལ་བྱར་མ་གྱུར་ཏེ། །ངན་འགྲོའི་རྒྱ་མཚོར་མོད་ལ་བྱིངས་འགྱུར་བས། །མྱུར་དུ་ཐུགས་རྗེའི་ལྕགས་ཀྱུས་བཟུང་དུ་གསོལ། ཁ་ན་མ་ཐོ་བྱེ་བས་གཡོགས་ནས་སུ། །རང་རྒྱུད་ཆུ་ཤིང་བཞིན་ཏུ་རུལ་གྱུར་པ། །བདག་ནི་མགོན་པོ་ཁྱོད་ལས་སྐྱབས་མེད་པས། །ད་ལྟ་ཉིད་དུ་བྱམས་པའི་ཕྱག་རྐྱོངས་ལ། །ལས་ཀྱི་སྒྲིབ་པ་བྱིན་རླབས་འོད་ཀྱིས་སོལ། །དག་པའི་སེམས་ལ་ཡེ་ཤེས་གཟུགས་བརྙན་སྟོན། །ཆོས་ཀྱི་བདུད་རྩིས་ཐར་བའི་སྲོག་བརྟས་ནས། །དོན་གཉིས་ལྷུན་གྲུབ་མཆོག་གི་སྦྱིན་པ་སྩོལ། །ཕྱོགས་བཅུའི་རྒྱལ་ལས་ཐུགས་དམ་ནོད་པ་ལྟར། །ཁྱོད་མཚན་རྟག་ཏུ་ཡིད་ལ་བྱེད་པ་བདག །དྲི་མས་རེག་གམ་རླུང་རྫིས་ཕོག་རྣམས་ཀྱང་། །རང་གི་བཞུགས་གནས་བདེ་བ་ཅན་ཏུ་དྲོངས། །དེར་སྐྱེས་ནས་ནི་བྱང་ཆུབ་སྤྱོད་ལ་ཞུགས། །ལམ་གྱི་ཁྱད་པར་གོང་མ་རབ་ཐོབ་སྟེ། །འཇིག་རྟེན་དབང་ཕྱུག་རྣམ་ཐར་ཅི་འདྲ་བ། །

― LT28_Page_0030 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་འདྲ་ཁོ་ནས་འགྲོ་བ་འདྲེན་པར་ཤོག །རེ་ཞིག་ཤར་རོང་གི་ལྗོངས་རྒྱ་བ་ན་མེ་ཏོག་དཀར་དམར་གྱི་ལྡིང་ཁང་མངོན་པར་བཀྲ་ཞིང་། རི་བོ་ཏ་ལའི་ཕོ་བྲང་དུ་ཁ་ཕྱོགས་པའི་དབེན་རིའི་མགུལ་དུ་ཡོན་ཏན་རྒྱ་མཚོས་དད་པའི་སེམས་ཀྱིས་སྦྱར་བ་སྐྱེ་བ་ཀུན་ཏུ་འཇིག་རྟེན་མགོན་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།དཔལ་རྡོ་རྗེ་འཛིན་པའི་རྣམ་ཐར་ཕྱོགས་གཅིག་གི་ཆ་ཤས་བཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་གཟུངས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མོ་བཛྲ་པཱ་་ཡེ། །གསང་བའི་བདག་པོ་ཕྱོགས་བཅུའི་ཞིང་རྣམས་སུ། །རྒྱལ་བ་རྣམས་ཀྱི་གསང་བའི་མཛོད་གཏེར་ཞིང་། །ངེས་དོན་ཐོས་པ་འཛིན་པའི་སྙན་ཏུ་གྱུར། །ནམ་མཁའ་གཉིས་པ་གཟོད་ནས་མ་སྐྱེས་ལྟར། །ཟབ་མོའི་ཆོས་ཉིད་དབྱེ་བ་མེད་པ་ལ། །སངས་རྒྱས་ཀུན་དང་མཉམ་པ་ཉིད་ཐོབ་པས། །སྐུ་གསུང་ཐུགས་ཀྱི་གསང་བར་ཤིན་ཏུ་ཞུགས། །རྡོ་རྗེའི་རྣམ་པར་ཐར་པ་ལ་གནས་ནས། །ཆོ་འཕྲུལ་ཆེན་པོ་འཁོར་བའི་མཐར་ཐུག་སྟོན། །ཆོས་དབྱིངས་ཁྱབ་པར་རྣམ་པར་རོལ་པའི་སྐུ། །ཁྱུ་མཆོག་མཐུ་སྟོབས་བསམ་མི་ཁྱབ་པར་ཕྱུང་། །འཇིག་རྟེན་གསུམ་གྱི་ས་ལས་རྣམ་པར་རྒྱལ། །སེམས་ཀྱི་སྐད་ཅིག་ཐང་གཅིག་ཡུད་

― LT28_Page_0031 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་དུ། །འགྲོ་ཀུན་བསམ་དང་སྤྱོད་པའི་རྗེས་འགྲོ་བ། །སྣ་ཚོགས་ཆོས་སྒོ་རྫོགས་པ་བསྟན་པར་སྤོབས། །ཆོས་ཀྱི་དྲིལ་བུ་གསང་བའི་སྒྲ་སྙན་འཁྲོལ། །ཐབས་ལ་མཁས་པའི་མངོན་པར་ཤེས་པ་དང་། །བསྡུ་བའི་དངོས་པོ་དག་གི་ཕ་རོལ་ཕྱིན། །དྲག་ཤུལ་སེང་གེ་གང་ལའང་བསྙེངས་པ་མེད། །ཀུན་མཁྱེན་ཉག་གཅིག་རྒྱ་མཚོར་འབབ་པ་ཡི། །ཡི་གེའི་ཆར་པ་བདེན་པའི་སྤྲིན་ལས་ཕབ། །རྒྱལ་སྲས་དབང་བསྐུར་བརྙེས་རྣམས་རྣམ་དཔྱོད་ཀྱང་། །དེ་བཞིན་གཤེགས་པའི་གསང་བ་ལ་ཞུགས་ན། །གཞོན་ནུ་ཉི་ཞུར་དག་གིས་ཚིམས་པ་བཞིན། །ཕྱོགས་རེའི་གནས་ལ་ངོ་མཚར་མིག་ཐོབ་ཀྱང་། །ཁྱོད་ཀྱི་ཕུལ་དུ་བྱུང་བའི་ཤེས་རབ་ཀྱིས། །འཇིག་རྟེན་འཇིག་རྟེན་འདས་པ་སུ་དང་ཡང་། །ཐུན་མོངས་མིན་པ་ཟབ་མོའི་གཏིང་སླེབ་ནས། །གསང་བ་བདེ་བླག་རྟོགས་ཤིང་བསྟན་ནུས་པས། །ཀུན་བདག་ཀུན་ཏུ་བཟང་པོའི་གྲགས་པ་གསལ། །དུས་གསུམ་འདྲེས་པའི་མཐའ་ལ་རབ་བཞུགས་ཏེ། །རྒྱལ་བ་ཀུན་ལ་རྒྱུན་མཐའི་དབང་བསྩལ་ཞིང་། །བསམ་ཡས་གཟུགས་མངའ་སེམས་ཅན་དོན་མཛད་ཕྱིར། །རྣམ་པར་སྣང་མཛད་དབྱིངས་ལ་བཞུགས་པ་པོ། །དེ་དག་མདུན་ཏུ་གུས་པས་གཤེགས་ནས་ཀྱང་། །

― LT28_Page_0032 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཀུན་བདག་པོར་གྱུར་པའི་དབང་ཡང་ནོད། །གདོད་ནས་ཞི་ཞིང་རྟག་ཏུ་མ་སྐྱེས་ཀྱང་། །གཟུགས་བརྙན་ཚུལ་གྱིས་འཇིག་རྟེན་ཀུན་ཏུ་སྣང་། །སྲིད་པའི་ཉེ་བར་ལེན་པ་མི་མངའ་ཡང་། །སྲིད་པ་ཇི་སྲིད་སྲིད་པའི་རྒྱ་མཚོར་འཇུག །ཕུང་པོའི་མཚན་མ་ཡོངས་སུ་སྤངས་བཞིན་ཏུ། །རྒྱལ་སྲས་མཐུ་བོ་ཆེ་ཡི་ལུས་སུ་སྟོན། །སྟོང་པ་ཀུན་ནས་ཉོན་མོངས་སྤངས་པའི་གཏམ། །འཆད་ཀྱང་ལས་ཀྱི་འབྲས་བུ་འདོར་མི་མཛད། །མི་སྲུན་བརླངས་པོར་སྤྱོད་ལ་ཆེར་འབར་ཡང་། །དེ་དག་ཐུགས་རྗེའི་ཆབ་ཀྱིས་རྟག་ཏུ་བརླན། །བདག་དང་སེམས་ཅན་སུ་ཡང་མ་གཟིགས་ཀྱང་། །གསང་བའི་དམ་པས་འགྲོ་ལ་ཕན་པ་བཏགས། །རྟག་ཏུ་ཞི་བའི་དབྱིངས་སུ་མཉམ་བཞག་ཀྱང་། །གཏུམ་པོ་ཁྲོས་པས་ཁྲོ་བ་མ་ལུས་འཇོམས། །རིག་པ་དགོངས་པའི་མཐིལ་དུ་སྦེད་པ་ཡང་། །ཐུན་མོངས་འགྲོ་བའི་ཉེར་འཚོའི་སྤྱད་པར་གྱུར། །དེ་ལྟར་འཇིག་རྟེན་ཀུན་དང་མི་མཐུན་པའི། །རྣམ་ཐར་འདི་ལ་ངོ་མཚར་སུ་མི་ཐོབ། །སངས་རྒྱས་ཀུན་གྱི་ཐུགས་ཀྱི་གསང་བ་དང་། །སྤངས་རྟོགས་ཡེ་ཤེས་ཕུན་སུམ་ཚོགས་པ་དག །ཁྱོད་ཀྱི་ཐུགས་ལ་མངོན་སུམ་བཞིན་ཏུ་ཞུགས། །སྦྱིན་དང་དུལ་བ་ཡང་དག་སྡོམ་ལ་སོགས། །ཕ་རོལ་ཕྱིན་དང་

― LT28_Page_0033 ―

^{[མ་དཔེ་གཟིགས་ན་འདིར་གནོན།]}

[Full Size]

འཕགས་པའི་བདེན་པ་དང་། །བྱང་ཆུབ་ཡན་ལག་གཟུངས་དང་ཏིང་འཛིན་སྟོབས། །མ་འདྲེས་ཆོས་སོགས་འཇིག་རྟེན་ལས་འདས་དང་། །འཇིག་རྟེན་སྐྱོང་བ་ཀུན་གྱི་གཟི་བརྗིད་མདངས། །དྲང་སྲོང་གཙང་མ་ཚངས་བར་སྤྱོད་རྣམས་ཀྱི། །དཀའ་ཐུབ་བརྟུལ་ཞུགས་རང་གི་ལོངས་སྤྱོད་ལས། །གྲུབ་པའི་རྡོ་རྗེ་སྟོང་ཉིད་གཟུགས་གྱུར་པ། །ཚན་པོ་ཆེས་ཀྱང་བསྐྱོད་པར་དཀའ་བ་དེ། །རྒྱལ་བ་ཀུན་གྱིས་ཁྱོད་ཀྱི་ཕྱག་ཏུ་བསྩལ། །ཉན་ཐོས་ཚུལ་ཁྲིམས་བསམ་གཏན་སྙོམས་འཇུག་དང་། །བྱང་སེམས་སྙིང་རྗེས་དྲངས་པའི་ཕ་རོལ་ཕྱིན། །རྒྱལ་རྣམས་བླ་ན་མེད་པའི་ཆོས་ཀྱི་སྒོ། །རང་གི་རིགས་ཀྱི་རིག་པ་དེས་བྱེད་ཅིང་། །དྲག་པོ་ཉི་མའི་བུ་དང་ལུས་ངན་པོ། །རླུང་ལྷ་ནམ་མཁའ་ལྡིང་སོགས་གདུག་པ་འདུལ། །ཁྲོ་བོ་དྲག་པོར་ཁྲོས་རྣམས་རྨོངས་པར་མཛད། །གཡོན་ཅན་སྒྱུ་དང་ལྡན་པ་རབ་ཏུ་རྨུགས། །སྡང་བ་སྐྱོད་ཅིང་རྨོངས་རྣམས་རྣམ་པར་འཇིག །དམ་པོ་རྩད་གཅོད་རྒྱས་རྣམས་སྦུར་མར་བརླག །ཡོན་པོ་སྲུང་ཞིང་གཅད་པ་སྙིང་རྗེས་བསྐྱབས། །སྲིན་པོ་རེངས་ཤིང་འབྱུང་པོ་སྒྲག་པར་མཛད། །མ་གྲུབ་གྲུབ་པའི་ནུས་པ་རྫོགས་པར་སྟོན། །གྲུབ་པ་དག་ཀྱང་ཆུད་ཟོས་མེད་མཛད་པས། །

― LT28_Page_0034 ―

^{[མ་དཔེ་གཟིགས་ན་འདིར་གནོན།]}

[Full Size]

རང་གི་གསང་བའི་མཐུ་ནི་རབ་བསྐྱེད་ཅིང་། །གཞན་གྱི་སྔགས་ལ་རིག་པའི་ཕུར་བུས་འདེབས། །དུས་མིན་འཆི་སོགས་འཇིགས་པ་འཇིག་མཛད་ཅིང་། །གདུག་པའི་ཀླུ་སོགས་གསོད་བྱེད་གསོད་པར་མཛད། །ཁྱོད་སྔོན་གཞོན་ནུ་ཆོས་ལ་སེམས་པའི་དུས། །སྨོན་ལམ་ཡོངས་སུ་བཟུང་བའི་ཁྱད་པར་ལས། །མེ་ཏོག་གཞི་ཡི་སྙིང་པོའི་རྒྱན་བཀོད་པའི། །འཇིག་རྟེན་ཀུན་ཏུ་འདུལ་བའི་དབང་གཟིགས་ནས། །གནོད་སྦྱིན་གཟུགས་ཀྱིས་གདུལ་དཀའ་སྨིན་སླད་དུ། །འབྲོག་གནས་གནས་པར་སྡེ་དཔོན་ཚུལ་བཟུང་སྟེ། །འདྲེན་པ་སྟོང་གི་ཆོས་ཀྱི་མཛོད་སྲུང་ནས། །སྐྱེ་དགུ་འཚོ་བའི་བྱ་དཀའ་བསྒྲུབ་པར་མཛད། །རིན་ཆེན་བཀོད་པའི་སྙིང་པོ་ཇི་སྲིད་གནས། །དེ་སྲིད་ཆུ་ཡི་ཕུང་པོ་མི་སྐམ་ལ། །ནོར་བུ་དུ་མ་འབྱུང་བའི་རྟེན་བྱེད་ལྟར། །ཁྱོད་ཀྱི་མཐུ་ཡིས་འཇིག་རྟེན་ཁམས་དག་ཏུ། །རྒྱུད་དོ་ཅོག་གི་ཆུ་ཀླུང་འབབ་པ་དང་། །རིག་པ་ཕྱག་རྒྱའི་ཚོགས་ཀྱི་སྟོབས་སྐྱེད་ལ། །གལ་ཏེ་ཁྱོད་ཉིད་མངོན་དགར་གཤེགས་པ་ན། །ཟབ་ཅིང་རྒྱ་ཆེའི་ཆོས་ཚུལ་མ་ལུས་པ། །ལན་ཚྭའི་ཕུང་པོ་ཆུ་ལ་ཐིམ་པ་བཞིན། །ཆོས་ཀྱི་དབྱིངས་སུ་དམིགས་པ་མེད་པར་འགྱུར། །ཡེ་ཤེས་ཆེན་པོའི་གཟུངས་ཀྱི་དབང་བསྐུར་བས། །

― LT28_Page_0035 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་ནས་གཅིག་ཏུ་རྒྱུན་མི་འཆད་པ་ཡི། །སངས་རྒྱས་མཛད་པ་རླབས་པོ་ཆེ་སྒྲུབ་པས། །དཔེ་བྲལ་འཇམ་པའི་དབྱངས་ལ་སོགས་པས་ཀྱང་། །ཁྱོད་ལ་དེ་བཞིན་གཤེགས་པ་ཉིད་དུ་གཟིགས། །རབ་འབྱམས་རྒྱ་མཚོ་སངས་རྒྱས་ཞིང་ཀུན་ཏུ། །མངོན་པར་སྐྱེ་ཞིང་འབྱུང་དང་བྱང་ཆུབ་དང་། །མྱ་ངན་འདས་པའི་བར་གྱི་མཛད་སྟོན་པ། །མགོན་པོ་ཀུན་གྱི་དྲུང་ན་རྟག་རོལ་ཞིང་། །བཟོ་སྐྱེ་མཆོག་སོགས་རྒྱལ་བའི་སྤྱོད་ཡུལ་གྱི། །རྣམ་འཕྲུལ་ཇི་སྙེད་སྤྲུལ་པ་དེ་སྙེད་སྤྲུལ། །དང་པོའོ་ལས་ཅན་སེམས་བསྐྱེད་ནས་བརྩམས་ཏེ། །རྒྱལ་ཚབ་ཆེན་པོའི་ས་ལ་བཞུགས་བའི་བར། །ཕྱོགས་བཅུ་དག་ན་བྱང་ཆུབ་སྤྱོད་ཞུགས་པ། །རེ་རེའང་ལུས་དང་གྲིབ་མ་བཞིན་ཏུ་སྲུང་། །ཉན་རང་རང་བདེ་དོན་ཏུ་གཉེར་རྣམས་དང་། །འཁོར་བའི་ངམ་གྲོག་ཕ་མཐའ་མེད་པ་རུ། །འདུ་བྱེད་སྡུག་བསྔལ་རླུང་གི་ས་གཡེངས་གྱུར་པ། །སྲོག་ཆགས་རེ་རེའི་རྒྱབ་དང་མདུན་ཏུ་ཡང་། །ལག་ན་རྡོ་རྗེ་ཐོགས་པའི་གཟུགས་སྟོན་ཀྱང་། །འཇིག་རྟེན་པ་ལ་ཡེ་ཤེས་མིག་མེད་པས། །ཀུན་ཏུ་བཟང་པོའི་ལྟད་མོ་མཐོང་མ་གྱུར། །ཡེ་ཤེས་སྒྱུ་མས་ཆོས་ཀྱི་སྒྱུ་མ་སྤྲུལ། །ལས་ཀྱི་སྒྱུ་མའི་འཁྲུལ་འཁོར་རབ་ཏུ་འཇིག །སྒྱུ་མ་ཟབ་

― LT28_Page_0036 ―

^{[མ་དཔེ་གཟིགས་ན་འདིར་གནོན།]}

[Full Size]

མོ་རིག་པས་གཞོམ་མེད་པ། །ཁྱོད་ཀྱི་སྒྱུ་མ་འདི་ནི་བརྟག་པར་དཀའ། །འདོད་ཁམས་བདག་པོ་སྡིག་ཏོའི་ཡིད་ཅན་དང་། །ལོག་འདྲེན་འབྱུང་པོའི་བདག་པོ་མཁའ་འགྲོ་མ། །ཡི་དྭགས་གནོན་པོ་སྦྲུལ་དང་སྦྲུལ་འཛིན་སོགས། །ཉོན་མོངས་མྱོས་འགྱུར་བཏུང་བས་རབ་མྱོས་ཏེ། །བདེན་པའི་ཆོས་ཉིད་ཁོང་དུ་མ་ཆུད་པར། །མཐོ་རིས་ཐར་པའི་ལམ་ལས་ཕྱོགས་བསླད་དེ། །དེ་བཞིན་གཤེགས་དང་བསྟན་ལ་ཐོ་རྩོམ་ཞིང་། །འགྲོ་བའི་དགེ་རྩ་གཅོད་ལ་ཞུགས་པ་རྣམས། །ཚར་གཅོད་རྣམ་པར་འཐགས་ལ་ཕྱོགས་པ་ན། །སྟོབས་བཅུའི་སྙིང་པོ་བསྡུས་པའི་གཏུམ་པོའི་ལུས། །སྲེག་བྱེད་མེ་ལྕེའི་ཕྲེང་བས་རབ་གཡོགས་པ། །གློག་གི་འཁོར་ལོ་བར་མེད་འཁོར་བ་བཞིན། །རྒྱལ་བ་བྱེ་བ་སྙེད་ཀྱིས་བྱིན་བརླབས་ཤིང་། །ཆོས་ཉིད་ལས་གྲུབ་མི་ཕྱེད་རྡོ་རྗེའི་ཐོག །འོད་ཟེར་ཚ་ཚས་ཉི་མ་ཟིལ་གནོན་ཏེ། །སྟོང་གསུམ་ཐམས་ཅད་སྣང་བ་གཅིག་གྱུར་པས། །རྒྱ་མཚོ་མཆིལ་མ་བཞིན་ཏུ་སྐེམས་བྱེད་ཅིང་། །རི་རབ་ཐལ་བ་བཞིན་ཏུ་གཏོར་བ་དང་། །ལྷན་ཅིག་དྲག་པོ་རྣམ་པར་བསྒྱིངས་པའི་སྒྲ། །དུས་རླབས་རབ་ཏུ་འཁྲུགས་དང་ལྕེ་འབབ་པའི། །འབྲུག་སྟོང་དུས་གཅིག་བསྒྲགས་འདྲ་ཐོས་པའམ། །དྲན་པའི་མོད་ལ་ཡིད་སྲུབས་བཅུད་

― LT28_Page_0037 ―

^{[མ་དཔེ་གཟིགས་ན་འདིར་གནོན།]}

[Full Size]

བྲལ་མའི། །སྙིང་ཁྲག་མངལ་རྒྱས་ལ་ལྟུང་བར་བྱེད། །བྲོས་ཀྱང་འབར་བ་དུས་མཐའི་མེས་བཅིངས་ཤིང་། །གབ་པའི་སྐྱིབས་མེད་སྲོག་སྙིང་འཕར་བཞིན་ཏུ། །ཤི་ལ་ཐུག་པར་ལན་བརྒྱར་བརྒྱལ་དེ་རྣམས། །གཞར་ཡང་བརྩེ་བའི་ཞགས་པ་མི་གློད་པས། །སྐྱབས་སུ་འགྲོ་དང་བསླབ་པའི་གཞིར་བཀོད་ནས། །དཀོན་མཆོག་གདུང་བརྒྱུད་ཅི་ཡང་སྤེལ་བར་མཛད། །ཁྲོ་བར་སྣང་ཡང་བྱམས་པ་ཆེན་པོས་གདུལ། །ཕོལ་མིག་སྨན་གྱིས་གསོ་རུ་མི་གཏུབ་པ། །སྨན་པ་མཁས་པས་དབུག་ཅིང་དྲལ་བ་དང་། །སྲེག་པའི་དཔྱད་ཀྱིས་རྩད་ནས་གདོན་པ་བཞིན། །སེམས་དམྱལ་ངན་སོང་གསུམ་གྱི་འབྲས་བུ་ཅན། །འཇིགས་པ་དུས་ཀྱི་ཚེར་མ་གཏིང་ནས་འདོན། །སེམས་ཞུམ་བརྩོན་འགྲུས་བརྟན་པོ་མ་ཡིན་པའི། །བྱང་ཆུབ་ཐོག་མར་ཞུགས་རྣམས་གཟེངས་བསྟོད་ཅིང་། །བདུད་ཀྱི་སྐུང་འཕྲང་དག་ལས་དབུགས་དབྱུང་བསྩལ། །ཆོ་འཕྲུལ་འདུན་ས་སྲིད་པ་གསུམ་པོ་ན། །རྨད་བྱུང་དགེ་མཚན་ནམ་མཁའི་མཐར་བྲེས་པར། །ལྷ་མིའི་བླ་མ་མི་འཇིགས་གཟི་བརྗིད་ཅན། །འགྲོ་བའི་བསོད་ནམས་ཞིང་དུ་རབ་བཞུགས་ཏེ། །ཆོས་དང་ཟང་ཟིང་སྦྱིན་པས་རང་ཉིད་ཀྱིས། །སྐྱེ་བ་དུ་མར་མགྲོན་ཏུ་བོས་པ་རྣམས། །

― LT28_Page_0038 ―

^{[མ་དཔེ་གཟིགས་ན་འདིར་གནོན།]}

[Full Size]

སྣང་ནས་སྣང་བར་ཁྲིད་པའི་ངོ་མཚར་ལ། །འགྲན་ཟླར་ཆས་པའི་རྒོལ་ངན་མུ་སྟེགས་བྱེད། །ཕུག་རོན་སྤུ་བཏོགས་ལྟ་བུའི་གཅེར་བུ་པ། །རྨོངས་པས་བསྒྲུབས་པའི་བློ་ངན་བ་ཀུ་ལ། །དད་པའི་འདབ་མ་རྟག་ཏུ་ཟུམ་པའི་ཚེ། །གླང་ཆེན་མྱོས་པའི་སྐད་དང་ལྷན་ཅིག་ཏུ། །སེང་གེའི་ཁྲི་ལས་རྡོ་རྗེ་འཛིན་བྱུང་སྟེ། །འཐོར་རླུང་དྲག་པོར་གཡོས་པས་གླགས་ལྟའི་ཁྭ། །བསྡིགས་ཤིང་བསྐྲད་ནས་འཇིག་རྟེན་ལས་འདས་པའི། །ཆོ་འཕྲུལ་ཆེ་བའང་ཁྱོད་ཀྱི་མཐུ་ཡི་མ་བསྐྱེད། །དཔའ་བོ་ཉི་མའི་གཉེན་གྱི་སྲས་གཅིག་པུ། །འཁོར་བཞི་སྐྱོབས་པའི་རྫོང་བཙན་སྟོབས་པོ་ཆེ། །ཁྱབ་འཇུག་མིག་གསུམ་པ་དང་ལྷ་མ་ཡིན། །དེ་དག་གྲུབ་པའི་ཚོགས་ཀྱིས་ཕྱག་བྱས་པ། །མདོར་ན་ཆོས་ཀྱི་རྒྱལ་པོ་ཐམས་ཅད་ཀྱི། །གསང་བ་གསུམ་གྱི་གནས་ལས་ཁྱོད་བྱུང་ཞིང་། །གསང་བའི་ཡེ་ཤེས་རྒྱལ་དང་རྒྱུད་གཅིག་པས། །ཆོས་ཀྱི་ཅོད་པན་རྒྱལ་བ་རྣམས་ཀྱིས་བཏགས། །མུན་པའི་རུམ་ན་གློག་དམར་འགྱུ་བ་བཞིན། །གཏི་མུག་མལ་དུ་རྟག་པར་ཉལ་བ་བདག །བརྒྱ་ལམ་ཞིག་ན་ཁྱོད་ལ་དད་ཐོབ་པ། །དགེ་བའི་ཞུགས་ཆེན་སྙིང་ལ་འབར་བ་དེས། །བདུད་ཀྱིས་བཅིངས་པའི་དྲྭ་བ་བརྒྱ་དྲལ་ནས། །འཇིགས་པ་ལྔ་དང་བྲལ་བའི་ས་ཡི་སྤོར། །མི་གནས་

― LT28_Page_0039 ―

^{[མ་དཔེ་གཟིགས་ན་འདིར་གནོན།]}

[Full Size]

གནས་པ་ཆེན་པོས་དོན་བྱེད་ཅིང་། །རྒྱལ་ཀུན་གསང་བར་ལྐོག་ཏུ་མ་གྱུར་པ། །གསང་བའི་བདག་པོའི་རྣམ་ཐར་ཡོངས་རྫོགས་ཤོག །འདི་ནི་རྒྱལ་མོ་ཚ་བའི་རོང་གི་མཐར་ཐུག་པ་ཁྲོ་ཆུའི་ཡུལ། །རི་བྲག་གནོད་སྦྱིན་ཁྲོས་པ་འདྲ་བ་ལ་ཤིང་ལྟུག་པོའི་ཚལ་དུ་གཅན་གཟན་གཏུམ་པོ་རྒྱུ་བས་བརྒྱན་ཅིང་། མི་སྲུན་པའི་མི་དང་མི་མ་ཡིན་འབའ་ཞིག་པས་གང་བ་དེར། །ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་གསང་བའི་བདག་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།རྒྱལ་ཚབ་བྱམས་པ་མགོན་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་པ་རྗེས་སུ་སྒྲོགས་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མ་ཨཱརྱ་མཻ་ཏྲ་ཡེ། །འཇིག་རྟེན་སྣང་ལ་ཆས་པའི་ཉིན་མོར་བྱེད། །འཆར་ཀའི་ལི་ཁྲིའི་འོད་ཀྱིས་མཚོན་པ་ལྟར། །བྱང་ཆུབ་སྙིང་པོར་རབ་ཏུ་གཞོལ་བ་ལ། །སྐྱེ་བ་གཅིག་གིས་ཐོགས་པའི་མ་ཕམས་པ། །སངས་རྒྱས་ཆོས་ཀུན་ཕྱག་མཐིལ་བཞག་པ་ལྟར། །མགོན་པོ་ཁྱོད་ལ་ལྐོག་ཏུ་མ་གྱུར་པས། །ཤཱཀྱའི་ཏོག་སོགས་རྐང་གཉིས་གཙོ་རྣམས་ཀྱིས། །ཅོད་པན་དབུ་ལ་བཞག་ནས་དབང་བསྐུར་ཏོ། །སྔོན་གྱི་དེ་བཞིན་གཤེགས་རྣམས་གདུང་འཛིན་ཅིང་། །ད་ལྟ་ཉི་མའི་གཉེན་གྱི་ཆོས་སྲིད་སྐྱོང་། །

― LT28_Page_0040 ―

^{[མ་དཔེ་གཟིགས་ན་འདིར་གནོན།]}

[Full Size]

མ་འོངས་དཀོན་མཆོག་ཆུ་གཏེར་སྲིད་པའི་མཐར། །བྱམས་ཆེན་སྤྲིན་ལས་འབད་རྩོལ་མེད་པར་བཀྱེ། །སེམས་ཀྱི་སྐད་ཅིག་གཅིག་ལ་མཐའ་ཡས་པའི། །རྒྱལ་བ་རྣམས་དང་ཆོས་ཀྱི་བཀའ་བགྲོ་ཞིང་། །དེ་དག་བྱིན་གྱིས་བརླབས་ཀྱི་ཡེ་ཤེས་ཐོབ། །དེ་དང་མཚུངས་པར་རྣམ་འཕྲུལ་རྒྱ་མཚོ་བཀོད། །མི་འཇིགས་སེང་གེའི་སྟོབས་ཀྱིས་འཁོར་གནོན་ཞིང་། །རྒོལ་བའི་འདུས་པ་ངན་པ་རབ་ཏུ་བཅོམ། །སངས་རྒྱས་ཀུན་གྱིས་རྒྱལ་ཚབ་སར་བཀོད་པས། །གྲགས་པའི་རོལ་མོ་ཞིང་མང་རྣམས་སུ་འགྲོ། །བདུད་ཀྱི་སྤྱོད་ཡུལ་འབྲོག་དགོན་རབ་བརྒལ་ཏེ། །སངས་རྒྱས་ཡུལ་ལ་རང་གི་ཁྱིམ་བཞིན་འཇུག །མི་ཟད་གཟུངས་ཀྱི་སྒོ་མོ་བརྒྱ་ཕྱེ་ནས། །འགྲོ་ཀུན་དབང་པོ་ཚིམས་བྱེད་སྤོབས་པ་ཐོབ། །ཐུགས་མཆོག་དང་པོར་བསྐྱེད་ནས་རྒྱུན་མཐའི་བར། །ཀུན་སྙོམས་བྱམས་པ་ཆེན་པོའི་ཏིང་འཛིན་གྱིས། །ཚངས་པའི་ལམ་དང་བྱང་ཆུབ་ཕྱོགས་ཀྱི་ཆོས། །བདེ་བའི་ཐེག་པ་བདེ་བླག་ཉིད་དུ་བསྒྲུབས། །བྱང་སེམས་བྱེ་བས་བལྟ་བའི་བཞིན་རས་དང་། །ཚད་མེད་སྦྱིན་པ་ཆེན་པོ་བྱིན་པའི་ཕྱག །རྡུལ་སྙེད་རྒྱལ་ལ་བསྙེན་བཀུར་མཛང་མཛད་པའི། །སྐུ་མཆོག་ཡིད་དགའ་ཆོས་འཛིན་འདུན་སར་འཕགས། །བསྐལ་པ་བྱེ་བ་ཁྲག་ཁྲིག་གྲངས་

― LT28_Page_0041 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་པར། །ལམ་དང་འཇུག་པ་བདེ་བའི་ཐབས་མཁས་ཀྱིས། །སྦྱིན་སོགས་ཚོགས་གཉིས་ཕ་རོལ་ཕྱིན་པའི་སྐུ། །སྐྱེས་བུ་ཆེན་པོའི་མཚན་གྱིས་ལེགས་པར་བརྒྱན། །བསོད་ནམས་ཡེ་ཤེས་རིང་བསྲེལ་ཆོས་ཀྱི་གཏེར། །གཅིག་བསྡམས་གསེར་གྱི་གཏན་པ་ཕྱིས་འདྲ་བ། །ལྷག་བསམ་གཟི་འོད་དུས་གསུམ་འཕྲོ་བ་ཡི། །རིན་ཆེན་མཆོད་སྡོང་ཟུར་ཕུད་རྩེ་མོར་བཞེས། །དག་ཅིང་འོད་གསལ་ནོར་བུ་བཻ་ཌཱུརྱས། །ནོར་བུ་མཆིང་བུའི་རིན་ཐང་ཟིལ་གྱིས་གནོན། །རྒྱལ་ཚབ་ཅེས་བྱའི་མཚན་གྱི་རྔ་བོ་ཆེས། །རྒྱལ་སྲས་རྒྱ་མཚོའི་གྲགས་པ་ཟིལ་གྱིས་གནོན། །བདུད་འཇོམས་གཡུལ་ངོའི་ཐོག་མ་ལ་བཞུགས་ཏེ། །རྡོ་རྗེ་ལྟ་བུའི་མཚན་ཆ་ངར་མ་ཡིས། །སྲིད་རྩེའི་བར་གྱི་ཉོན་མོངས་ཕྲུ་མ་ལ། །མ་བཏབ་པར་ཡང་ཐལ་བར་བགྱིད་ལ་ཕྱོགས། །དྲན་བློ་རྟོགས་དང་དགའ་བའི་རླབས་འབར་ཞིང་། །སོ་སོ་ཡང་དག་རིག་ལ་འཇུག་མཁས་པས། །ཚིག་ཀུན་རྣམ་པར་ཕྱེ་སྟེ་བསྐལ་པའི་བར། །བསྟན་ཀྱང་ཐོགས་པ་མེད་པའི་བརྗོད་ལ་མཁས། །ཚིག་དང་ཡི་གེ་ཟབ་མོའི་གཏིང་སླེབ་པས། །དེ་དག་ཟད་པ་མེད་པའི་སྒོས་བརྗོད་ཅིང་། །ཚིག་གཅིག་ཁོངས་སུ་མདོ་སྡེ་རྒྱ་མཚོའི་ཚུལ། །མ་ཉམས་མ་གོད་

― LT28_Page_0042 ―

^{[མ་དཔེ་གཟིགས་ན་འདིར་གནོན།]}

[Full Size]

བརྗོད་པ་གཙང་བས་སྟོན། །ལུང་དང་རྟོགས་པའི་ཆོས་ཕུང་རྒྱ་མཚོའི་རྡུལ། །ཆོས་ཀྱི་གཟུངས་ཀྱིས་གཅིག་བཞིན་དྲན་ཞིང་སྤོབས། །དེ་དག་འགྲོ་བ་ཀུན་གྱིས་རྟོགས་འགྱུར་བའི། །འཁོར་ལོ་བསྐོར་ལས་རྟག་ཏུ་ཕྱིར་མི་ལྡོག །ཤེས་སྒྲིབ་ལྟ་བའི་མུན་པ་ཕྲ་མོ་ཡང་། །དཔའ་བར་འགྲོ་བའི་སྣང་བས་རབ་བསལ་ཏེ། །ཟབ་ཅིང་གཏིང་དཔག་དཀའ་བའི་མཐའ་དྲུག་པོ། །ལེགས་པར་རྣམ་འབྱེད་སེང་གེའི་སྒྲ་དབྱངས་སྒྲོགས། །དྲན་པ་འཁྲུལ་པ་མེད་པའི་སྣོད་མཆོག་ཏུ། །ལེགས་པར་གསུང་བའི་བདུད་རྩིའི་བཅུད་བཟུང་སྟེ། །ལྷག་པའི་བསམ་པ་རྣམ་པར་དག་པ་ཡིས། །ཐར་པའི་སྲོག་འཚོ་སེར་སྣ་མེད་པར་བསྟབས། །སྒྲིབ་ཅིང་ཆགས་པ་མེད་པའི་ཡེ་ཤེས་ཀྱི། །མཐོང་བ་མངོན་གྱུར་མངོན་པར་ཤེས་པ་དང་། །རིག་པ་ཆེན་པོས་འགྲོ་ཁམས་ཐ་དད་པ། །གཞན་དྲིང་མི་འཇོག་རྣམ་གྲོལ་ལམ་དུ་བཙུད། །བསམ་ཡས་བསྐལ་པར་དཀའ་བ་ཚད་མེད་པས། །ཕོངས་པའི་ནོར་བཞིན་བསྒྲུབས་པའི་ཆོས་ཀྱི་མཛོད། །ཚུལ་གཉིས་འབྱེད་པའི་རྣམ་དཔྱོད་མཐར་ཐུག་ཕྱིར། །ཤཱཀྱའི་རྒྱལ་པོས་ཁྱོད་ཀྱི་ཕྱག་ཏུ་ཕོག །ཚངས་པའི་དབང་པོའི་གཟུགས་འདྲ་ལུས་རྣམས་དང་། །སྨོན་ལམ་རབ་ཏུ་ཞི་བ་དག་པའི་གཟུགས། །འགྲོ་དང་བསྐལ་པ་

― LT28_Page_0043 ―

^{[མ་དཔེ་གཟིགས་ན་འདིར་གནོན།]}

[Full Size]

མཉམ་པས་ཕྱོགས་བཀང་སྟེ། །ཐུབ་པའི་དམ་ཆོས་ཐབས་ཚུལ་དུ་མས་སྲུང་། །འདི་ན་ཕྱུགས་ཀྱི་ཤིང་རྟས་འགྲོ་བ་དང་། །ཉི་མའི་རྟ་དང་ཉན་ཐོས་རྫུ་འཕྲུལ་གྱིས། །སྙིང་པོར་འགྲོ་བ་རྣམས་ལའང་སྙིང་པོའི་མིག །གཞན་དྲིང་མེད་པའི་མཐུ་ཡིས་རིང་ནས་བྱིན། །ཆུད་ཟོས་པ་ཡི་ཁམས་ལ་རབ་གཟིགས་ཤིང་། །སེམས་ཅན་རྣམས་ཀྱང་དེ་བཞིན་ལྟ་ལ་འགོད། །དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བའི། །དཔའ་བོ་ཆེན་པོ་མཁའ་ལྡིང་རྩལ་ལྡན་གྱུར། །སངས་རྒྱས་རྣམས་ལ་བྱ་བ་རབ་བྱས་ཤིང་། ཡུན་རིང་ཚངས་པར་སྤྱོད་པའི་ཆོས་ཀྱི་བློན། །ལྷུན་པོ་འདྲ་བའི་ལྷ་མཆོག་བརྒྱ་སྟོང་གིས། །དགའ་ལྡན་ཆོས་ཀྱི་རྒྱལ་པོ་མཆོད་ཅིང་བསྔགས། །བསོད་ནམས་བྱ་བའི་དངོས་ལྔ་ཤིན་ཏུ་བསྟེན། །དགེ་བའི་དཀའ་ཐུབ་བརྟུལ་ཞུགས་མཐར་ཕྱིན་ནས། །རྒྱུན་མཐའི་ཏིང་འཛིན་གསེར་གྱི་བུམ་ཆུ་ཡིས། །སྤྱི་བོར་དབང་བསྐུར་འཁོར་ལོས་སྒྱུར་བ་དེ། །བྱང་ཆུབ་ཡན་ལག་བདུན་གྱི་ནོར་དང་བཅས། །འགྲོ་བ་ཀུན་ལ་བུ་ལྟར་ཐུགས་སྙོམས་པས། །མངོན་མཐོའི་ལས་ལམ་སྒྲུབ་པའི་བཀའ་ཁྲིམས་ཀྱིས། །ངེས་དོན་གྱ་གྱུ་མེད་ལ་མཐར་གྱིས་བཞག །ཆོས་ཉིད་རྣམ་གྲོལ་ཡངས་པའི་མཁའ་ལམ་

― LT28_Page_0044 ―

^{[མ་དཔེ་གཟིགས་ན་འདིར་གནོན།]}

[Full Size]

ན། །སྨོན་ལམ་སྙིང་རྗེའི་ཤིང་རྟས་ཁ་དྲངས་པ། །ལྷ་མིའི་ནང་དུ་བསོད་ནམས་གཟི་བརྗིད་ཅན། །སྐྱེས་བུ་ཆེན་པོ་འགྲོ་བའི་ཉི་མ་དེ། །ཆོ་འཕྲུལ་འོད་ཀྱི་ཐུར་མ་རྣམ་རྩེ་བས། །ལྟ་བས་ཁེབས་པའི་ར་རི་ཀུན་བསལ་ཞིང་། །ཡང་དག་ལྟ་བས་ལྟ་བའི་མིག་བུ་ཕྱེ། །འགྲན་ཟླ་གཉིས་པས་དབེན་པར་ཕན་ལ་ཞུགས། །ནག་པོའི་ཕྱོགས་སྤངས་དཀར་པོའི་ཕྱོགས་རྫོགས་ཤིང་། །ལྷ་བྲན་རྒྱུ་སྐར་དབུས་སུ་མངོན་པར་འཕགས། །བལྟ་ན་སྡུག་པའི་འོད་ཀྱི་དྲྭ་བ་ཅན། །ས་བཅུའི་དབང་ཕྱུག་སྐྱེ་དགུའི་ཟླ་བ་དེ། །བསོད་ནམས་མཁའ་ལ་ཡང་དག་སྤྱོད་པས་འཛེགས། །དཔག་ཡས་རྣམ་པར་ཐར་པའི་འཕེལ་བ་རྫོགས། །སྐལ་ལྡན་བློ་ཡི་ཀུནྡ་ཁ་ཕྱེ་ཞིང་། །དཀར་པོའི་ཆུ་གཏེར་བདུད་རྩིའི་ཐིགས་པས་སྤེལ། །འཇིག་རྟེན་ཡོན་ཏན་ཀུན་གྱི་མཚོར་སྐྱེས་ཀྱང་། །འཇིག་རྟེན་ཆོས་ཀྱི་འདམ་གྱིས་མ་གོས་ཤིང་། །འཇིག་རྟེན་གསུམ་གྱི་གཙུག་གི་རྒྱན་གྱུར་པ། །འཇིག་རྟེན་ཀུན་དགར་བྱེད་པའི་པདྨ་དེ། །བརྩོན་འགྲུས་ཆོས་ཆུས་མངོན་པར་བརླན་པ་ལས། །མ་འདྲེས་ཆོས་ཀྱི་འདབ་མའི་མངལ་གྲོལ་ཞིང་། །ཐབས་མཁས་ཟེ་བ་ཏིང་འཛིན་སྙིང་པོ་ཅན། །ཚུལ་ཁྲིམས་བསུང་གིས་ཕྱོགས་ཀུན་ཤིས་པ་སྒྲུབ། །མུ་སྟེགས་ཅན་གྱི་གླང་ཆེན་མྱོས་པའི་དགྲ། །

― LT28_Page_0045 ―

^{[མ་དཔེ་གཟིགས་ན་འདིར་གནོན།]}

[Full Size]

མི་འཇིགས་སྟོབས་དང་ཉེ་བའི་སྟོབས་རྩལ་ཅན། །སྙོམས་པར་འཇུག་པའི་རི་ཡི་སུལ་འགྲིམ་ཞིང་། །འདུན་པའི་ནགས་སུ་སྐྱེས་པའི་སེང་གེ་དེ། །ཡེ་ཤེས་མཐོང་བ་མདུན་རྒྱབ་མེད་པར་དག །འཕགས་པའི་བདེན་བཞིའི་མཆེ་སྡེར་ཤིན་ཏུ་རྣོ། །རྣམ་ཐར་སྒོ་མོ་གསུམ་གྱི་གདོང་གླལ་ནས། །ཕྱིར་མི་ལྡོག་པའི་ང་རོ་ཆེན་པོ་སྒྲོག །ཐམས་ཅད་མཁྱེན་པའི་ཞལ་ལས་འོངས་པའི་ཆོས། །ཀུན་ཉོན་དྲི་མ་ཡོངས་སུ་འཁྲུད་བྱེད་པ། །ཐོས་པའི་ཆུ་ཀླུང་སྦུད་ལ་ད་དུང་ཡང་། །མི་ངོམས་གཏིང་དཔག་དཀའ་བའི་རྒྱ་མཚོ་དེ། །ཡོན་ཏན་རིན་ཐང་བྲལ་བའི་ནོར་བུས་གང་། །གདུལ་བྱའི་དུས་ཀྱི་མཚམས་ལས་མི་འདའ་ཞིང་། །འདུལ་བཞིའི་རླབས་ཕྲེང་ཟད་པ་མེད་པར་བརྐྱང་། །ཆོས་ཀྱི་ཆར་པ་འབེབས་ལ་དབང་དུ་གྱུར། །ཆོས་ཁམས་རིན་ཆེན་བརྟག་པའི་གཙུག་ལག་ལ། །བྱང་ཞིང་རྣམ་འབྱེད་དག་པའི་མིག་ཐོབ་པ། །བདེ་གཤེགས་སྙིང་པོའི་གཏེར་གྱི་རྒྱུས་ཤེས་ཏེ། །བསོད་ནམས་སྟོབས་ཀྱིས་ཅི་བདེར་འདོན་པ་དེས། །འགྲོ་སེམས་ས་གཞི་རིན་ཆེན་འབྱུང་གནས་ལ། །ཆོས་ཉིད་སྦས་པའི་གཏེར་ཆེན་ངོ་སྤྲད་ནས། །བསལ་བཞག་མེད་ཀྱང་རྟོག་པ་གློ་བུར་དྲི། །སྦྱོང་བྱེད་དགོངས་འགྲེལ་ཟབ་མོའི་ཆུ་རྒྱུན་ཕབ། །རབ་རིབ་

― LT28_Page_0046 ―

^{[མ་དཔེ་གཟིགས་ན་འདིར་གནོན།]}

[Full Size]

མུན་པ་ཀུན་དང་མི་འགྲོགས་པའི། །རྡུལ་བྲལ་རབ་ཏུ་སྣང་བའི་མིག་ཐོབ་པ། །ལ་ལ་ཞིག་གིས་མུན་པ་མུན་ནག་ཏུ། །ཚོགས་ཆེན་རྣམ་པ་ཐ་དད་མཐོང་བ་ལྟར། །མདོ་སྡེའི་ཚུལ་གྱི་གསུང་རབ་ཀླུང་གསོལ་ནས། །མཚན་མ་མེད་ལ་གཟིགས་པའི་སྤྱན་དག་པས། །སྟོང་ཉིད་རྗོད་པས་སྦས་པའི་མངོན་རྟོགས་ཀྱང་། །ཡན་ལག་བརྗོད་ལ་དྲངས་ཏེ་གཏན་ལ་ཕབ། །སྣོད་གྱུར་གང་དུ་ནོར་བུ་རིན་པོ་ཆེ། །བཞག་ན་དཔལ་དང་ལྡན་པར་འགྱུར་བ་བཞིན། །འཛམ་བུའི་རྒྱལ་མཚན་དུ་ནི་བལྟམས་པ་ན། །སུམ་རྩེན་བཀོད་པ་ས་ལ་འཕོ་བར་འགྱུར། །དེ་ཚེ་བླ་ན་མེད་པར་བྱང་ཆུབ་ནས། །སངས་རྒྱས་སྤྱན་གྱིས་ཕྱོགས་བཅུར་གཟིགས་པ་ན། །བསྟན་ལ་འབྲེལ་ཡང་ལས་ཀྱི་ཉེས་པ་ཡིས། །ངན་འགྲོའི་བཙོན་རར་ཆུད་པ་རྣམས་གཟིགས་ཏེ། །ཐུགས་རྗེའི་ཕྱག་གིས་སྡུག་བསྔལ་སྒྲོག་བརྡལ་ཞིང་། །ལྷ་མིའི་གྲོང་ཁྱེར་རྣམས་སུ་ངལ་གསོས་ཏེ། །སྐལ་པ་འཚམས་པའི་ཐེག་གསུམ་ལ་བཞག་པ། །རྒྱལ་ཚབ་ལྷ་བརྒྱའི་མགོན་པོའི་ཐུགས་དམ་ལགས། །ཤཱཀྱའི་བསྟན་ལ་དགེ་རྩ་ཆུང་ངུ་ཡི། །ས་བོན་རབ་ཏུ་ཕྲ་བ་བཏབ་པ་ཡང་། །བྱམས་པའི་ཉི་མས་འཇིག་རྟེན་སྣང་བའི་ཚེ། །འབྲས་བུའི་བར་དུ་འཕེལ་ཞིང་ཡངས་

― LT28_Page_0047 ―

^{[མ་དཔེ་གཟིགས་ན་འདིར་གནོན།]}

[Full Size]

པར་མཛད། །དཔལ་ལྡན་བླ་མ་མཆོག་དང་དབྱེར་མེད་པ། །མི་ཕམ་མགོན་པོས་ཚེ་འདིར་རྗེས་བཟུང་ནས། །ཚུལ་ཁྲིམས་ཕུང་པོ་ཡོངས་སུ་རྫོགས་པ་དང་། །གཟུངས་དང་སྤོབས་པ་ཐོབ་པར་བྱིན་གྱིས་རློབས། །མ་འོངས་དུས་སུ་ཀླུ་ཤིང་དབང་པོའི་དྲུང་། །འཇིག་རྟེན་འདྲེན་པ་མངོན་སུམ་མཐོང་གྱུར་ནས། །བྱང་ཆུབ་མཆོག་ཏུ་ལུང་བསྟན་ཐོབ་ནས་ཀྱང་། །བསྟན་ལ་བྱ་བ་བྱེད་པའི་མཆོག་གྱུར་ཤོག །གང་དུ་མི་དགེ་བའི་མུན་པ་དང་རྟག་ཏུ་འགྲོགས་པ་ལ་རྒྱལ་སྲས་གཞན་གྱི་ཕྲིན་ལས་འཇུག་པར་མ་གྱུར་པ་ན། །བྱམས་མགོན་ཏཱའི་སི་ཏུ་ཁོ་ནའི་ཐུགས་རྗེའི་སྣང་བ་ཕྱམ་བརྡལ་བས་ཐར་པའི་ལམ་ཡངས་པར་གྱུར་པ་རྒྱལ་རོང་ཁྲོ་ཆུ་ཤུ་བྷཾ་གྱི་ཆོས་གྲར་མགོན་པོ་གང་དེའི་བཀའ་འབངས་པ་ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་མགོན་པོ་བྱམས་པས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།བྱང་ཆུབ་སེམས་དཔའ་སའི་སྙིང་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་སྨོན་ལམ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མཿཀྵཾ་ཏི་གྷཱ་ཡ། །བྱང་ཆུབ་སེམས་དཔའ་རིན་ཆེན་ཕུང་པོའི་དབུས། །ས་ཡི་སྙིང་པོ་རྒྱལ་མཚན་ཏོག་ལྟར་འཕགས། །སེམས་ཅན་བསམ་པ་ཐ་དད་འདོད་འཇོ་ཞིང་། །

― LT28_Page_0048 ―

^{[མ་དཔེ་གཟིགས་ན་འདིར་གནོན།]}

[Full Size]

ཉེ་རིང་མེད་པར་ཕན་པ་རིན་ཆེན་བཞིན། །རྒྱལ་བའི་སྲས་རྣམས་སྔོན་གྱི་འདུ་བྱེད་ལས། །སྐྱེས་ཀྱང་རེ་བ་མོད་ལ་རྫོགས་བྱེད་པ། །སྐྱེས་བུ་འདི་ཡི་དོ་ཟླ་ཡོད་མ་ཡིན། །ཀུན་མཁྱེན་ཡེ་ཤེས་རྒྱ་མཚོའི་ཕ་རོལ་ཕྱིན། །ཐུན་མོངས་མིན་པའི་ཆོས་ལ་དབང་དུ་གྱུར། །པདྨ་རྒྱས་ལྟར་འབྲས་བུའི་དཔལ་དང་ཉེ། །མང་ཐོས་ཚུལ་ཁྲིམས་བག་ཡོད་ལ་གནས་ཏེ། །སྐྱེ་བོའི་ནང་ན་དམ་པར་གྱུར་རྣམས་ལ། །ཕྱིར་མི་ལྡོག་པའི་ཕྱག་རྒྱས་བཏབ་ནས་ཀྱང་། །བྱང་སེམས་མཐོང་བའི་དབང་པོ་དག་པར་སྒྲུབ། །ཉན་ཐོས་ཤེས་རབ་མཆོག་དང་རང་སངས་རྒྱས། །ལྷ་དང་བཅས་པའི་འཇིག་རྟེན་ཐམས་ཅད་ཀྱིས། །ཡོན་ཏན་ཕྲ་བའི་ཆར་ཡང་དཔོག་མི་ནུས། །གལ་ཏེ་སྐྱེས་བུ་ཆེན་པོའི་ཡོན་ཏན་དང་། །དགེ་རྩ་རྒྱས་པར་རྐང་གཉིས་གཙོས་བཤད་ན། །འགྲོ་བས་མི་རྟོགས་རྨོངས་ཤིང་མྱོས་པར་གསུངས། །བསྐལ་པ་རྒྱ་མཚོ་ཐོག་མའི་མཐའ་ནས་ཀྱང་། །ཚད་མེད་བཅོམ་ལྡན་འདས་ལ་དམ་བཅས་ཏེ། །ལུས་ཅན་ཕན་ལ་ཞུགས་པའི་སྙིང་རྗེ་དང་། །མི་འཕྲོག་བརྩོན་འགྲུས་ཆེན་པོའི་སྟོབས་བསྐྱེད་པའི། །བསོད་ནམས་གོང་དུ་འཕེལ་བའི་ཤུགས་ཆེན་པོས། །རྡུལ་སྙེད་ཞིང་དུ་ཆགས་པ་མེད་བགྲོད་དེ། །སོ་སོའི་སྐྱེ་བོ་ལྟ་ལ་ཆགས་པ་རྣམས། །སྡུག་

― LT28_Page_0049 ―

^{[མ་དཔེ་གཟིགས་ན་འདིར་གནོན།]}

[Full Size]

བསྔལ་རྣམ་པ་སྣ་ཚོགས་གཟེབ་ལས་བསྒྲལ། །མངོན་མཐོ་ངེས་པར་ལེགས་པའི་ལམ་སྣང་སྟོན། །རེ་བའི་ཡིད་ཀྱང་ཡོངས་སུ་བསྐང་བར་མཛད། །རྟག་ཆད་གཙུག་ལག་འཆང་ཞིང་མཚམས་མེད་དང་། །སྡིག་པ་བཅུ་སྤྱོད་འཕགས་དང་ཆོས་ལ་སྐུར། །ཉོན་མོངས་གོས་བགོ་གཡོ་སྒྱུའི་ཟས་ཀྱིས་འཚོ། །འཇིག་རྟེན་ཕྱི་མས་མི་འཇིགས་སྙིང་བསྲན་ཅན། །ངན་པར་སྤྱོད་ཀུན་ལྷན་ཅིག་འཚོགས་པ་ཡི། །རྙོགས་པ་ལྔས་རྙོགས་འདྲེན་པས་སྟོངས་པ་ལ། །སྨོན་ལམ་རླུང་གི་ཤིང་རྟས་ཁ་དྲང་བ། །ས་ཡི་དབང་ཕྱུག་ཉི་མ་ལྷག་པར་ཤར། །རྩོད་པ་ཅན་ཏུ་རྒྱུན་མི་ཆད་གཤེགས་ནས། །མི་སྲུན་གདུལ་བྱ་སྨིན་མཛད་དེ་ལྟ་བུའི། །སྙིང་སྟོབས་ཆེན་པོ་ནམ་ཡང་འབྱུང་བར་དཀའ། །སྙོམས་འཇུག་ཕྲ་བ་གཅིག་གི་མཐུ་བསྟན་ཚེ། །སངས་རྒྱས་ཞིང་ཀུན་མཆོད་སྤྲིན་གྱ་ནོམས་པས། །གུས་བཅས་དཀོན་མཆོག་མཆོད་པའི་སྐྱེ་བོས་གང་། །གཅིག་དང་འདྲ་བར་རྡུལ་སྙེད་རྒྱལ་བའི་ཞིང་། །ཏིང་འཛིན་གཅིག་གི་སྤྱོད་ཡུལ་མཚུངས་ལ་བཀོད། །དེ་བཞིན་འགྲོ་བ་སྨིན་པ་ཁོ་ནའི་ཕྱིར། །དྲོ་སྐད་ཅིག་གི་ནན་ཏན་ཚད་མེད་སྙེད། །དཔེ་ཡིས་མི་མཚོན་བགྲང་བ་མི་འཇུག་སྟེ། །ཟག་མེད་ཏིང་ངེ་འཛིན་གྱི་རྒྱ་མཚོ་

― LT28_Page_0050 ―

^{[མ་དཔེ་གཟིགས་ན་འདིར་གནོན།]}

[Full Size]

ལས། །ཟེག་མ་རེ་རེས་ཕྱོགས་བཅུའི་ཞིང་ཀུན་ཏུ། །ཇི་ལྟར་འོས་པའི་སྒྱུ་འཕྲུལ་འདུ་མཛད་པ། །ཐམས་ཅད་མཁྱེན་པ་ཁོ་ནའི་མཁྱེན་པའི་ཡུལ། །གང་ཞིག་ཐོས་པའི་ནོར་གྱིས་དབུལ་བ་ལ། །མང་ཐོས་དབྱིག་གི་སྙིང་པོ་ལྷུག་པར་བསྩལ། །ཚུལ་ཁྲིམས་ཕུང་པོ་དྲི་མར་གྱུར་པ་ཡང་། །འཕགས་པ་དགྱེས་པའི་ཟག་མེད་སྡོམ་ལ་བཀོད། །ལུས་ངག་ཡིད་གསུམ་རྣམ་པར་གཡེངས་པ་དག །བསམ་གཏན་ཞི་བ་དམ་པས་རྒྱུད་བརླན་ཞིང་། །ལྐོག་གྱུར་ལྟ་བའི་དབང་པོ་ཟུམ་པ་རྣམས། །མངོན་ཤེས་མཐོང་བ་ཤིན་ཏུ་དག་པར་སྒྲུབ། །ཤེས་རབ་རྨོངས་པའི་དྲི་མས་རྙོགས་པ་ཡང་། །ཀེ་ཏ་ཀ་ཡིས་གཙང་ཆབ་བཞིན་ཏུ་བགྲུང་། །བསོད་ནམས་བྱ་བའི་ཐབས་ལ་རྨོངས་པ་ན། །ཐབས་མཁས་སྤྱོད་པ་མཁའ་ལྟར་ཡངས་པར་མཛད། །ཁོར་མོ་ཡུག་ཏུ་ཟག་པའི་སྲེད་ལེན་གྱི། །མཚམས་སྦྱོར་ལེན་པ་མེད་པར་རྣམ་པར་དགྲོལ། །གཟུགས་སོགས་སྡུག་གུའི་འདོད་དང་བྲལ་བ་ལ། །ལྷ་ཡི་འདོད་པའི་མཆོག་གི་ཟིལ་དངར་སྟོབ། །བཟོ་དང་བསྟན་བཅོས་སྒྱུ་རྩལ་སློབ་པར་ཡང་། །ཚངས་དང་ཕུར་བུའི་རྣམ་དཔྱོད་དེ་ཡིས་སྟེར། །མདོར་ན་རྒྱལ་བས་རབ་བསྔགས་ས་ཡི་སྙིང་། །དམིགས་པའི་བསྟེ་སྟང་

― LT28_Page_0051 ―

^{[མ་དཔེ་གཟིགས་ན་འདིར་གནོན།]}

[Full Size]

བཅས་པས་སྐྱབས་གསོལ་ཞིང་། །རིན་ཆེན་མཆོག་ལྟར་དཀོན་པའི་མཚན་བཟུང་ན། །རེ་བ་མི་འགྲུབ་འགའ་ཡང་ཡོད་མིན་ཏེ། །ཤིན་ཏུ་སྦྱངས་པའི་ནོར་བུའི་རྒྱལ་པོ་དང་། །དཔག་བསམ་ཤིང་དང་བུམ་པ་བཟང་པོས་ཀྱང་། །སྲིད་ལས་འདས་པའི་དམ་པ་མི་སྦྱིན་པས། །བསམ་པ་རྫོགས་པར་སྐོང་བའི་མཐུ་མེད་ལ། །འཕགས་པའི་མཚན་ལ་བྱི་དོར་བྱེད་པའི་མི། །བྱང་ཆུབ་བར་དུ་འདོད་པས་མི་བྲེལ་ཞིང་། །གཞན་གྱི་འདོད་འཇོ་དེ་དང་མཚུངས་པར་འགྱུར། །གང་དག་བཟའ་བཏུང་བགོ་བ་རིན་ཆེན་རྒྱན། །ཁྲི་སྟན་ནད་ཀྱི་རྐྱེན་སྨན་སྐྱེད་མོས་ཚལ། །མེ་ཏོག་འབྲས་བུ་འབྲུ་དང་ནོར་གྱི་དབྱིག །ཁང་ཁྱིམ་ཡུལ་གྲུ་བཞོན་པ་བྲན་ཁོལ་དང་། །རིགས་བརྒྱུད་རྙེད་བཀུར་ཁེ་དང་གྲགས་པའི་དཔལ། །དབང་པོ་ཉམས་དང་མ་ཚང་ཐོབ་པ་སོགས། །བསོད་ནམས་ས་བོན་གང་ཞིག་མ་བཏབ་པས། །འཚོ་བའི་རྐྱེན་དང་བདེར་གནས་ཡོ་བྱད་ཀྱིས། །ཕོངས་པའི་དངོས་པོ་མང་ངམ་ཉུང་ཡང་རུང་། །ལེགས་པར་གསུངས་དང་ས་ཡི་དབང་ཕྱུག་གི། །སྨོན་ལམ་རིག་སྔགས་གྲུབ་དང་སྨན་ཆེན་གྱི། །མཐུ་བཞིན་བསམ་མི་ཁྱབ་ལ་ཡིད་ཆེས་པས། །དམ་པ་སློང་ན་རེ་བ་ལས་ལྷག་པའི། །

― LT28_Page_0052 ―

^{[མ་དཔེ་གཟིགས་ན་འདིར་གནོན།]}

[Full Size]

དགོས་དགུའི་གཏེར་ཁ་འབད་རྩོལ་མེད་པར་ཕྱེ། །བཙོན་གྱི་གོ་རར་བཅིང་བས་རབ་བཅིངས་ཤིང་། །ཆད་པའི་ལས་ཀྱིས་འཚོ་གཅིང་ནན་ལ་བོར། །གཡུལ་ངོར་ལྷུང་བའམ་མཛའ་བར་མ་གྱུར་པས། །འཐབ་ཕྱིར་འགྱེད་སོགས་སྐྱེ་བོའི་ལུས་སེམས་ལ། །མི་འདོད་གདུང་བའི་ཚོར་བ་ཅི་ཡང་རུང་། །ནེམ་ནུར་མེད་པར་ཡོན་ཏན་དཔག་མེད་མཚན། །དྲན་པའི་མོད་ལ་ཟུག་རྔུ་གཏིང་ནས་འབྱིན། །གདུག་པའི་སྦྲུལ་གྱིས་ཟིན་ལ་མ་གི་ཏ། །གཅན་གཟན་ཁྲོ་བས་ཉེན་ལ་གདོང་ལྔའི་སྒྲ། །ཚ་གྲང་འདུ་འཁྲུགས་གསོ་བའི་སྨན་ཆེན་པོ། །ཞུགས་ཀྱིས་ཚིག་ན་བསྐལ་པའི་ཆུ་རྒྱུན་ཏེ། །ཆུ་བོའི་དབུས་ན་གྲུ་ཟམ་བཞོན་པའི་མཆོག །རླུང་གིས་ཁྱེར་ན་བརྟོད་པའི་ཕུར་བུ་སྟེ། །རྦབ་ཏུ་ལྷུང་ན་འདེགས་པའི་གཤོག་རླབས་ཉིད། །སུ་མཐོང་དགྲ་ཡི་དྭངས་མར་འདུ་ཤེས་ཤིང་། །ཅི་སྣང་གསོད་པའི་མཚོན་ཆར་གྱུར་པའི་ཚེ། །སྐྱེས་བུ་ཆེན་པོ་ལྷག་པར་ཐུགས་བརྩེ་བས། །སྡིག་སེམས་འབར་བ་བྱམས་པའི་ཆབ་ཀྱིས་གཞོམ། །ཕན་ཚུན་མ་བུའི་གདུང་བས་འཚོ་བར་མཛད། །སྲེད་པས་ཐ་བར་བགྱིས་པའི་དགོན་དུང་ན། །བཅུད་ལྡན་ཏིལ་ཙམ་སྤྱོད་པ་ལྟ་ཅི་སྨོས། །ཀོ་ཊ་བ་དང་སྐྲ་ཡི་ལྭ་བས་ཀྱང་། །མི་འབྱོར་ཡི་

― LT28_Page_0053 ―

^{[མ་དཔེ་གཟིགས་ན་འདིར་གནོན།]}

[Full Size]

དྭགས་འབྲས་བུ་མྱོང་བ་ལ། །བཟའ་བཅའ་བཏུང་བ་གོས་ཀྱི་ཆར་ཕབ་ནས། །དབུལ་པོའི་གྲོང་དུ་རྫོགས་ལྡན་དགའ་སྟོན་འགྱེད། །འཆོས་མེད་ནད་རིམས་གཤིན་རྗེ་ཁྲོས་པའི་ཁར། །ལས་མཐུན་བཟའ་བ་བཞིན་ཏུ་འདེབས་པ་ན། །འགྲོ་བའི་སྨན་པར་གྱུར་པས་ཡུད་ཙམ་ལ། །དུས་ཀྱི་ཞགས་པ་བདེན་སྟོབས་རལ་གྲིས་བཅད། །སྲོག་གི་སྦྱིན་པས་འཚོ་བ་ཐུང་རྣམས་སྐྱོང་། །ཆགས་སྡང་རྨོངས་པ་དྲག་ལ་རྣོ་བ་ཡིས། །སྡིག་སེམས་དབྱར་གྱི་ཆུ་བཞིན་ཤུགས་རྒྱས་ནས། །མི་དགེའི་སྤྱོད་པ་འོག་ཏུ་གཞོལ་བའི་རྒྱུན། །བཟློག་ཏུ་མེད་པར་ཤ་ཐང་ཆད་པ་ན། །སྡིག་འཕྲོག་དགེ་སྦྱོང་ཆེན་པོའི་གཟུགས་ཅན་ལ། །དད་པ་ལས་བྱུང་དགེ་བའི་ཚ་ཟེར་གྱིས། །ལས་ཉོན་རྒྱུ་དང་བཅས་ལ་རྨང་ནས་སྐེམས། །ཤེས་རབ་ཕྲ་བ་ཟབ་པའི་མཐར་ཕྱིན་ནས། །འབྱུང་བ་ཆེན་པོའི་སྐྱེ་དང་འགག་པའི་རྒྱུ། །ཐོག་མཐའ་བར་མའི་མཚན་ཉིད་མཐུན་པ་དང་། །མི་མཐུན་ཕྱོགས་ཀུན་རྟོགས་ནས་དབང་དུ་མཛད། །གཞན་ཕན་སྨོན་ལམ་དབང་གིས་ས་འདི་ཡང་། །མཉན་པས་གྲུ་བོ་ཆེ་བཞིན་རྟག་ཏུ་འཛིན། །ལྗོན་ཤིང་རྩི་སྨན་ལོ་ཏོག་རྩྭ་སྔོན་སོགས། །རྩ་བ་འཕེལ་ཞིང་མྱུ་གུ་སྡོང་པོ་སྐྱེད། །འཇམ་

― LT28_Page_0054 ―

^{[མ་དཔེ་གཟིགས་ན་འདིར་གནོན།]}

[Full Size]

མཉེན་ལོ་མ་རྒྱས་ཤིང་མེ་ཏོག་བཀྲ། །འབྲས་བུ་སྣུམ་པོར་སྨིན་དང་དེ་དག་གི། །དྲི་བསུང་རོ་བདའ་ནུས་མཐུ་རྫོགས་པར་དུ། །ཁྲོས་པའི་ཀླུ་བཏུལ་དུས་ཀྱི་ཆར་པ་སྐུལ། །རྫུ་འཕྲུལ་མཁའ་ལ་སྣོད་བཅུད་ཀུན་བརྟེན་པས། །རྒྱུ་དང་མི་རྒྱུའི་ཉེར་འཚོའི་སྤྱད་པ་ཡང་། །ས་དང་ས་ཡི་དབང་ཕྱུག་ཐུན་མོངས་གྱུར། །ཞིང་ས་མི་གཤིམས་ན་ཡང་འབྲུ་འདོད་དེ། །ཞིང་པས་སོ་ནམ་ནན་ཏན་མ་བྱས་པར། །རྩེ་གཅིག་ས་ཡི་སྙིང་པོ་རབ་མཆོད་ན། །དེ་ཡི་ཏིང་འཛིན་དམ་པའི་ཡོན་ཏན་གྱིས། །རང་བྱུང་བཞིན་ཏུ་སྙེ་མའི་དོག་པས་ལྕི། །གལ་ཏེ་རེ་བའི་ཕྱིར་དུ་འགའ་ཞིག་གིས། །བྱམས་ཆེན་འཇམ་དབྱངས་འཇིག་རྟེན་དབང་ཕྱུག་དང་། །ཀུན་ཏུ་བཟང་སོགས་གངྒཱའི་བྱེ་སྙེད་ཀྱི། །རྒྱལ་བའི་མྱུ་གུ་བསྐལ་པ་ཁྲག་ཁྲིག་ཏུ། །མཆོད་ཅིང་གསོལ་བ་བཏབ་ལས་གང་སུ་དག །སྐད་ཅིག་གཅིག་ལ་ས་ཡི་སྙིང་པོའི་མཚན། །རྗེས་སུ་དྲན་ཏེ་བསྟི་སྟང་བཅས་མཆོད་ན། །མྱུར་དུ་རེ་བའི་ཤིང་རྟ་མིག་འཕྲུལ་བཞིན། །གང་བས་འཕགས་ཏེ་འགྲོ་བའི་སྨོན་ལམ་ཀུན། །ཡོངས་སུ་རྫོགས་བྱེད་ཡིད་བཞིན་ནོར་བུའི་གཏེར། །སྦྱིན་པ་རྣམ་པ་དུ་མའི་ཆར་འབེབས་ཤིང་། །བསོད་ནམས་མ་བསགས་པའི་ཡང་

― LT28_Page_0055 ―

^{[མ་དཔེ་གཟིགས་ན་འདིར་གནོན།]}

[Full Size]

མཛོད་གྱུར་པས། །ཤིན་ཏུ་འབད་པའི་ནན་ཏན་ཁྱད་པར་ལ། །འགྲོ་བའི་བླ་མ་སྲས་དང་བཅས་པས་བསྔགས། །ཞིང་བརྒྱར་སངས་རྒྱས་མཛད་པ་རྫོགས་པར་སྟོན། ཁ་ཅིག་ཉན་ཐོས་རང་རྒྱལ་འཁོར་ལོས་སྒྱུར། །ལ་ལར་འདོད་ཁམས་ས་དང་གནམ་གྱི་ལྷ། །སྟོང་གསུམ་བདག་པོ་དབང་ཕྱུག་ཆེན་པོར་སྤྲུལ། །མཐུ་བོ་ཆེ་དང་སྐྱེས་པ་བུད་མེད་གཟུགས། །སེང་གེ་ཁྱུ་མཆོག་སྤོས་ཀྱི་བ་ལང་དང་། །དམྱལ་བའི་སེམས་ཅན་དམྱལ་སྲུང་ལ་སོགས་པ། །སྐལ་པ་བཞིན་ཏུ་ཚད་མེད་ལུས་སྟོན་ཏེ། །རྩོལ་མེད་ཡེ་ཤེས་འདོད་དགུར་སྒྱུར་བ་ཡིས། །ཆོས་ཆེན་འཁོར་ལོ་རྒྱུན་ཆད་མེད་པར་སྐོར། །སེམས་ཅན་རང་རང་ལས་ལ་སྤྱོད་བཞིན་པར། །ཐེག་པ་གསུམ་གྱི་མྱང་འདས་གྲོང་ཁྱེར་དུ། །འགྲོ་བའི་དེད་དཔོན་ཁྱོད་ལ་སྐྱབས་སུ་མཆི། །ཐབས་ལ་མཁས་པས་བདག་ཅག་སྨིན་པ་དང་། །མངོན་པར་འདོད་པའི་སྨོན་ལམ་འགྲུབ་པར་མཛོད། །དཔའ་བོ་གང་ལ་སྦྱིན་པའི་མཐུ་ཡོད་ཀྱང་། །ལས་ངན་དབང་གིས་སྤྱོད་པའི་ནུས་མེད་པ། །ལེགས་བྱས་སྣོད་དུ་མ་གྱུར་བདག་འདྲ་ལ། །ལྷག་པར་དགོངས་ཤིག་སྙིང་རྗེ་ཆེན་པོ་ཀྱེ། །ཁྱོད་མཚན་ཐོས་པའི་

― LT28_Page_0056 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་བ་རྒྱ་མཚོ་ལ། །དད་པའི་གདེངས་ཀས་སྲུང་བའི་ལྷག་མ་ཅན། །ཆོས་ཆེན་རྒྱལ་སྲིད་དག་ལ་དབང་འབྱོར་ནས། །འགྲོ་བ་སྐྱོབ་པའི་བསོད་ནམས་མཐུ་ཆེན་གྱིས། །ཕན་བདེའི་ཆུ་ཀླུང་སྲིད་པའི་མཐར་བཀྱེ་བ། །མཚུངས་མེད་ས་ཡི་གཙོ་དང་མཚུངས་པར་ཤོག །སོ་སོའི་སྐྱེ་བོ་སྔོན་ལས་ཀྱིས་ཁ་དྲངས་བ་ལ་འགྲོ་དོན་ཏུ་བཏགས་པའི་མིང་སྙན་པས་བོད་དེ་ཤར་ཕྱོགས་ཀྱི་ལྗོངས་རྒྱུ་ཞིང་སོང་སོང་བ་ན། །འབྲས་སཱ་ལུ་དང་མ་རྨོས་པའི་ལོ་ཏོག་སོགས་འབྲུ་བཅུད་དུས་སྨིན་ནུས་པའི་ཡུལ། །སྐྱེ་བོའི་ཁྱིམ་རྣམས་འབྲུའི་བང་བས་གང་ཞིང་འཕགས་པའི་བཞུགས་གནས་ཀཱེུ་ཧཱུ་ཤན་དང་ཉེ་བའི་ལྗོངས་ག་ལ་བར་ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་འཕགས་པ་སའི་སྙིང་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།སྒྲིབ་པ་ཐམས་ཅད་རྣམ་པར་སེལ་བའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་ཏིང་འཛིན་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མཿསརྦཱ་བ་ར་་བི་སྐམྦྷཱ་ཡ། །མཚན་ཐོས་ཙམ་གྱིས་ལས་དང་ཉོན་མོངས་པའི། །སྒྲིབ་པ་ཐམས་ཅད་རྣམ་པར་སེལ་བ་དེ། །ད་ལྟ་ཕྱོགས་བཅུའི་ཞིང་ན་རྒྱལ་སྲས་ཚུལ། །སྤྲིན་མེད་ཉི་མ་བཞིན་ཏུ་ལྷམ་མེར་སྣང་། །ནམ་མཁའི་རྔ་ལས་བདེན་པའི་

― LT28_Page_0057 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲ་བྱུང་ན། །བག་མེད་མི་འདོད་ན་ཡང་སློང་བ་ལྟར། །དུས་གསུམ་གཤེགས་པས་ཁྱོད་མཚན་གསུང་མ་ཐག །སེམས་མེད་ས་ཡང་རྣམ་པ་དྲུག་ཏུ་གཡོ། །བསྐལ་པ་བྱེ་བ་ཁྲག་ཁྲིག་དུ་མ་རུ། །བློ་ཆེན་གཞན་གྱིས་འབད་ཀྱང་མི་འགྲུབ་པའི། །ཏིང་འཛིན་རྒྱ་མཚོ་འཇམ་དཔལ་དཔའ་བོ་ཡིས། །སེ་གོལ་གཏོགས་པའི་ཡུན་ལ་བདེ་བླག་སྒྲུབ། །གལ་ཏེ་སྟོང་གསུམ་འགྲོ་བ་འདི་དག་རྣམས། །བརྟན་པའི་འཁོར་ལོའི་གོ་འཕང་ལ་གནས་ཀྱང་། །ཐེ་ཚོམ་སེལ་བ་བྱང་ཆུབ་སེམས་མ་ཡི། །རྣམ་ཐར་བརྒྱ་ཕྲག་སྟོང་གི་ཆར་མི་ཕོད། །སྟོང་གསུམ་དག་ན་སྐྱེ་བོ་ཇི་ཡོད་པས། །གལ་ཏེ་སྲིང་མོ་དེ་ཡི་དཔལ་ཐོབ་ཀྱང་། །སྒྲིབ་པ་རྣམ་པར་སེལ་བའི་ཏིང་འཛིན་སྟོབས། །ཡེ་ཤེས་རྣམ་པར་འཕྲུལ་པའི་དཔེར་མི་བཟོད། །ཀླུ་ཡི་དབང་པོས་ཆུ་གཏེར་སྤེལ་བ་བཞིན། །དེ་ལས་ཉི་ཟླའི་དཀྱིལ་འཁོར་མཁར་ཐོན་པས། །འཇིག་རྟེན་སྣང་བཞིན་དེས་ཀྱང་པདྨ་དང་། །ཀུ་མུད་བཞད་པས་བུང་བ་འཚོ་བ་བཞིན། །རྡུལ་སྙེད་ཞིང་དུ་ཀུན་བཟང་སྤྱོད་ཞུགས་པ། །འཇམ་དཔལ་གཞོན་ནུས་བྱང་ཆུབ་ལ་བཙུད་དེ། །འཇམ་པའི་དབྱངས་དང་དེ་མཚུངས་ཚད་མེད་པ། །ཐེ་ཚོམ་སེལ་མས་དང་པོར་སྨིན་པར་

― LT28_Page_0058 ―

^{[མ་དཔེ་གཟིགས་ན་འདིར་གནོན།]}

[Full Size]

བྱས། །དེ་དང་དེ་འདྲ་གངྒཱའི་བྱེ་མ་སྙེད། །སྤྱོད་ཡུལ་ནམ་མཁའ་ལྟ་བུའི་བྱང་ཆུབ་སེམས། །འཇུག་སྲེད་རྒྱལ་པོ་རྒྱལ་བ་ལ་སོགས་པ། །ད་ལྟ་ཆོས་ཀྱི་འཁོར་ལོ་སྐོར་བ་དང་། །མྱ་ངན་འདས་དང་སླད་ནས་་གཤེགས་པ་ཡི། །མི་མཆོག་ཁ་ལོ་སྒྱུར་བ་གྲངས་འདས་ཀྱང་། །སྒྲིབ་སེལ་བླ་མའི་བླ་མར་གྱུར་པ་དེས། །བྱང་ཆུབ་སེམས་ཀྱི་རྩ་བ་ཐོག་མར་བཙུགས། །འགྲོ་བ་གང་གི་རྣ་བར་ལྷགས་གྱུར་ཀྱང་། །སྒྲིབ་པའི་དྲྭ་བ་མ་ལུས་དྲལ་ནས་ཀྱང་། །ངན་སོང་གསུམ་དང་བུད་མེད་དམན་ལ་སོགས། །སྲིད་པའི་སྡུག་བསྔལ་མྱོང་བའི་ཐ་མར་བྱེད། །བདེ་ནས་བདེ་བའི་འཇུག་ངོགས་ལ་གཞོལ་ཞིང་། །མཐར་གྱིས་ཐམས་ཅད་མཁྱེན་པའི་སར་བཞག་པ། །མཚན་ཙམ་གྱིས་ཀྱང་སངས་རྒྱས་མཛད་སྤྱོད་ན། །དཔག་པར་དཀའ་བའི་ཡོན་ཏན་ལྟ་ཅི་སྨོས། །ཁྱོད་ཀྱིས་བརྙེས་པའི་ཏིང་འཛིན་རྒྱ་མཚོའི་མཆིངས། །ཡེ་ཤེས་ཕུང་པོ་འཇམ་དཔལ་གཞོན་ནུས་ཀྱང་། །མིང་གི་རྣམ་གྲངས་ཙམ་ཡང་མི་མཁྱེན་ཞེས། །དེ་འདྲའི་རྣམ་ཐར་སུས་ཀྱང་བསམ་མི་ཁྱབ། །ཀུན་བརྟགས་བརྟེན་པ་གང་ལའང་མ་བརྟེན་པས། །གཟིགས་པ་མེད་པའི་ཐམས་ཅད་མཁྱེན་པ་ཡང་། །མིག་ཡོར་ཆོས་ཏེ་མངོན་པར་མི་འདོད་པས།

― LT28_Page_0059 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་མཛད་པ་ཆོས་དབྱིངས་མཐའ་རུ་གཞོལ། །སྲིད་པའི་རྒྱུད་དུ་སྐྱེས་ཀུན་མ་སྐྱེས་པ། །རྨི་ལམ་ཤེས་པས་འབྱུང་དེ་སྲིད་པའི་ཕྱིར། །ལེན་པ་མེད་པའི་བརྩོན་འགྲུས་བླང་བ་ཡིས། །བདུད་ཀྱི་དཀྱིལ་འཁོར་མ་ལུས་རྣམ་པར་དཀྲུགས། །འགྲོ་ཁམས་སྒྱུ་མར་སྒྱུ་མའི་སྐྱེས་བུ་དེས། །སྤྲོས་པར་སྣང་ཡང་འགྲོ་དང་འོང་མེད་པ། །གཅིག་པུའི་ལུས་ཀྱིས་ཞིང་རྡུལ་གྲངས་སྙེད་ཀྱི། །ཞིང་ཀུན་སྐུ་ཡིས་ཁྱབ་པ་ཉི་མ་འདྲ། །ཡེ་ཤེས་སྒྲུབ་པས་བསྒྲུབ་ཏུ་མ་མཆིས་པ། །སྨིག་རྒྱུའི་ཆུ་ལ་རི་དྭགས་སྲེད་པས་བསླུས། །མ་བསྒྲུབས་ཡེ་ཤེས་གྲུབ་པའི་ཁྱུ་མཆོག་དང་། །སེང་གེའི་ང་རོས་མི་ཤེས་རྣམ་པར་གནོན། །འཇིག་རྟེན་སྤྲུལ་པ་ལྟ་བུ་མ་སྤྲུལ་པ། །ཡེ་ཤེས་ཐ་མི་དད་པའི་སྒོར་གཞུག་པས། །ཕྲ་ཡང་སྣ་ཚོགས་བྱེད་པོ་བཞིན་ཏུ་ཆུབ། །གནས་མེད་ནམ་མཁའི་སྣང་བས་ཕན་ལ་གནས། །ཆོས་ཉིད་དཔེ་དང་ཚིག་གིས་མི་མཚོན་པས། །བརྗོད་དུ་མེད་ལ་རྒྱལ་བས་མ་གསུངས་པ། །སྟོང་ཉིད་འཁོར་ལོ་ཆོས་ཀྱི་སྤྲིན་གྱི་རྔ། །བ་སྤུའི་བུ་ག་ཀུན་ནས་རྟག་ཏུ་ཕྱུང་། །མཉན་དང་སྟོན་པ་གཞན་རིག་ལས་སྐྱེས་པ། །བརྗོད་པའི་སྒྲ་བརྙན་རྗོད་པས་མི་བརྗོད་ཀྱང་། །རྟག་ཏུ་རྗོད་པ་མང་པོས་དེ་ཉིད་

― LT28_Page_0060 ―

^{[མ་དཔེ་གཟིགས་ན་འདིར་གནོན།]}

[Full Size]

དོན། །བློ་གྲོས་དམན་པ་རྣམས་ལ་མཚོན་པར་མཛད། །འདུ་བྱེད་སྤྲིན་གྱི་ཚང་ཚིང་རབ་བརྡལ་བ། །སྐྱེ་བའི་རྒྱུད་ལ་མཐོང་མེད་བལྟས་ནས་སུ། །ངལ་གསོའི་ཐར་པའི་གྲོང་དུ་ཐེག་པའི་ཚུལ། །སྣ་ཚོགས་དགོད་པས་བགྲོད་གཅིག་བགྲོད་པར་མཛད། །དབང་པོ་གཅིག་ལ་དབང་པོ་ཐམས་ཅད་པ། །ཕན་ཚུན་རྣམ་གནས་ཕྲ་དང་བརྟན་པའི་ཚུལ། ཁམས་ཡིད་མོས་པ་དེ་དང་འདྲ་བ་བརྒྱ། །ཐོག་མཐའ་མེད་པ་ལག་མཐིལ་བཞིན་ཏུ་གཟིགས། །གང་ནས་མ་འཕོས་རྡུལ་ཙམ་མ་འདྲེས་པ། །ལས་དང་རྣམ་པར་སྨིན་པའི་གཟུགས་བརྙན་བརྒྱ། །སེམས་ཀྱི་མེ་ལོང་དོས་སུ་ཤར་གཟིགས་ནས། །མི་ལེན་མི་འདོར་བཏང་སྙོམས་ཆེན་པོས་དོར། །བདག་ཏུ་འཛིན་པ་མོ་གཤམས་བུས་བསགས་པའི། །ལས་ཀྱི་འབྲས་ལས་སྐྱེ་བ་མེད་སྐྱེས་པ། །སྡུག་བསྔལ་འཁྲུལ་འཁོར་སྡུག་བསྔལ་གྱིས་གཞོམ་ནས། །སྒྲིབ་པའི་འཆིང་བ་རྒྱུན་ཆད་མེད་པར་གཅོད། །ཕན་མཛད་ཞལ་ནི་རྟག་ཏུ་མཐོང་གྱུར་ཀྱང་། །འཇིག་རྟེན་པ་རྣམས་དོན་མེད་མུན་པར་འཁྱམས། །དམིགས་པའི་སྤྱོད་པས་ཅི་ཡང་མི་སྤྱོད་པ། །ཆགས་མེད་དེ་ནི་སེམས་ཅན་དོན་རབ་སྤྱོད། །འབྱུང་བ་བཞི་ཡི་གཟུགས་ལས་འདས་བཞིན་ཏུ། །གཟུགས་དང་མིང་གི་དབུ་བ་བརྡོལ་ཇི་སྙེད། །

― LT28_Page_0061 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་སྙེད་རྗེས་སུ་དངོས་མེད་གཟུགས་སོང་བ། །རང་རང་ལས་མཐས་སྲིད་པའི་ཉིང་མཚམས་བརྟུལ། །དེ་བཞིན་ཡེ་ཤེས་དག་པའི་མིག་ལམ་དུ། །ཚོར་སོགས་ཕུང་པོའི་རབ་རིབ་མི་འཛིན་ཀྱང་། །ཕུང་པོ་དགོད་པ་ལྕགས་ཀྱི་འཕྲུལ་ཐབས་དེས། །ཉེ་བར་ལེན་པའི་ཕུང་པོའི་ལྕགས་རིགས་གཅོད། །འདུ་ཤེས་གློག་གི་དྲྭ་བ་མཁར་ཁྱབ་ཀྱང་། །ཤེས་བྱ་ནམ་མཁའི་མེ་ཏོག་བྱེ་བྲག་ལ། །ཤེས་པས་མི་དཔྱོད་དཔྱད་པའི་བློ་གྲོས་དག །ཡེ་ཤེས་སྒོ་མོ་བྱེ་བ་དུས་གཅིག་ཕྱེ། །དངོས་བྲལ་དངོས་པོ་མེད་པའི་དངོས་ལ་གནས། །ཡོད་དང་མེད་པའི་མདུད་པ་ཐམས་ཅད་བཀྲོལ། །ཐབས་ལ་མཁས་པའི་ཡེ་ཤེས་མངོན་སུམ་པས། །ཐམས་ཅད་མཁྱེན་ཀྱང་ཡེ་ཤེས་ལ་མི་གནས། །གྲུབ་པ་མེད་པའི་ཆོས་ལ་བྱང་ཆུབ་དང་། །དེ་ལས་སྐྱེས་པ་ཉིད་ན་མ་སྐྱེས་སྲས། །དེས་ཀྱང་མ་བཅིངས་པ་རྣམས་དགྲོལ་བ་ཡི། །སྒྱུ་མའི་འཁོར་ལོ་བྱ་རྩོལ་མེད་པར་བསྐོར། །གཟུགས་སྐུ་མཐོང་ཡང་བསྐལ་པ་ཁྲག་ཁྲིག་ཏུ། །ངོམས་ཤིང་ཚིམས་པས་ཆོག་མི་ཤེས་འགྱུར་ན། །དཔེ་བྲལ་ཆོས་སྐུ་སྨོས་ཀྱང་ཅི་དགོས་པ། །མཐོང་བ་བྲལ་དེ་ཀུན་གྱི་སྙིང་ལ་བསྟན། །མི་མཐུན་ཕྱོགས་ཉིད་མཐུན་པའི་ཕུལ་དུ་གྲུབ། །བགྲོད་

― LT28_Page_0062 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་མེད་ལ་གཤེགས་པ་མི་མཛད་ཀྱང་། །གཏོང་བ་ལ་སོགས་ཕ་རོལ་ཕྱིན་པའི་སྐུ། །བཻ་ཌཱུརྱ་བཞིན་བསམ་པའི་ཚོན་གྱིས་བསྒྱུར། །དེ་བཞིན་གཤེགས་དང་མཚུངས་པའི་འགྲོས་ཐོབ་པས། །མི་སློབ་ལམ་དུ་རང་བཞིན་གནས་གྱུར་ཀྱང་། །བསླབ་པ་ཀུན་གྱི་མཐའ་རུ་སོན་པ་དེ། །མ་བསླབ་པ་རྣམས་བསླབ་པ་བཞིན་ཏུ་སྟོན། །ཚད་མེད་ནམ་མཁའི་དབྱིངས་དང་དུས་གསུམ་ཀུན། །རྒྱས་པར་འགེངས་པར་ཀུན་ནས་གནས་པའི་ལུས། །དཔེ་ལས་འདས་པའི་མི་མཆོག་ཐམས་ཅད་ཀྱི། །ཆོས་སྤྲིན་ཆེན་པོས་བར་མཚམས་མེད་པར་ཡོགས། །བྱང་སེམས་སྤྱོད་པ་ཐམས་ཅད་ལས་འདས་པའི། །ཆོས་དབྱིངས་རྣམ་འབྱེད་ཏིང་ངེ་འཛིན་གྱི་མཐུ། །མངོན་ཏུ་བསྟན་ཀྱང་མངོན་ཏུ་མི་མཛད་པར། །འཁོར་བའི་མུ་དང་ཁ་ད་ཆད་དུ་སྤྱོད། །ཕྱོགས་དང་རིས་སུ་མེད་པའི་ཆོས་དབྱིངས་སུ། །ཕྱོགས་ཀྱི་རྗེས་སུ་འབྲང་བས་རབ་ཏུ་ཞུགས། །ཕྱོགས་དང་ཆ་ཤས་རྣམ་པར་དབྱེ་བ་ཡིས། །ཡང་དག་དབྱིངས་ལ་གཞོལ་བ་ཤིན་ཏུ་ཕྲ། །མཉམ་ཉིད་དུས་ལ་ཆ་ཡིས་མི་འབྱེད་པས། །སྐད་ཅིག་ལ་ཡང་བསྐལ་པ་རྒྱ་མཚོ་སྟེ། །བསྐལ་པ་དེ་དག་སྐད་ཅིག་ནང་བསྡུས་ཀྱང་། །དུས་གསུམ་འཇུག་པ་རིང་དང་ཐུང་མི་འགྱུར། །མཉན་པ་ལྟ་བུར་སྨོན་ལམ་གྲུ་

― LT28_Page_0063 ―

^{[མ་དཔེ་གཟིགས་ན་འདིར་གནོན།]}

[Full Size]

བཟུང་ནས། །འཁོར་བ་རྨི་ལམ་ཆུ་མཚོར་ཉམ་ཉེས་པ། །ཡེ་ཤེས་གང་ཆེན་མཚོ་ཡི་ཐང་ཆེན་ཏུ། །སུ་ཡང་བརྒལ་བ་མེད་པར་རྣམ་པར་འདོན། །སྐད་ཅིག་གཅིག་ལ་དུས་གསུམ་གཤེགས་རྣམས་དང་། །དམ་པའི་ཆོས་བགྲོ་རྣམ་འཕྲུལ་མཐའ་ཡས་པས། །བསྐལ་མང་མཆོད་ཅིང་བྱེ་བ་ཁྲག་ཁྲིག་གི། །ཞིང་རྣམས་ཀུན་ཏུ་སེམས་བསྐྱེད་གཅིག་གིས་འཇུག །ཞིང་གི་བཀོད་པ་རྒྱ་མཚོའི་རྡུལ་སྒྲུབ་ཅིང་། །འགྲོ་བ་དེ་དང་མཉམ་པར་སྨིན་པ་ཀུན། །སྐྲ་རྩེ་ཕྲ་བའི་ཆ་ཤས་ལ་ཞུགས་ཀྱང་། །ཡེ་ཤེས་རྒྱ་མཚོར་འཕེལ་དང་འགྲིབ་མི་སྣང་། །ཚུལ་ཁྲིམས་གོས་བཟང་གཟུངས་མཆོག་གསེར་གྱི་གདུབ། །ཏིང་འཛིན་མེ་ཏོག་གསར་པའི་ཕྲེང་བ་དང་། །ཤེས་རབ་ནོར་བུའི་དོ་ཤལ་འོས་པའི་རྒྱན། །ཉེར་སྤྱད་ཐུན་མོངས་པས་ཀྱང་ཤིན་ཏུ་མཛེས། །མཐའ་དབུས་མེད་པའི་རྣམ་འཕྲུལ་ཀུན་ཏུ་ཟབ། །ཡེ་ཤེས་རྒྱ་ཆེན་རྒྱལ་བའི་སྤྱོད་ཡུལ་བ། །མཚན་མ་མེད་ལས་སྐྱེས་པའི་མཚན་ཉིད་ནི། །ཚེག་གི་ལམ་གྱིས་མི་དཔོག་དོན་དེ་ལ། །རྒྱལ་སྲས་མཆོག་དང་དགེ་རྩ་མི་མཚུངས་པའི། །ཉན་ཐོས་ཆེན་པོ་རྣམས་ཀྱང་མགོ་རྨོངས་ན། །ཟག་པས་ཀུན་ནས་དཀྲིས་པའི་སོ་སྐྱེའི་བློ། །ཁབ་ཀྱི་མིག་བུས་ནམ་མཁའ་ཇི་ལྟར་གཞལ། །

― LT28_Page_0064 ―

^{[མ་དཔེ་གཟིགས་ན་འདིར་གནོན།]}

[Full Size]

མ་རིག་བག་ལ་ཆགས་པའི་མུན་ཁང་དུ། །འཁོར་བ་ཐོག་མ་མེད་ནས་ཉལ་ན་ཡང་། །ཁྱོད་མཚན་ཟེར་ཙམ་རྣ་བར་མ་ཕོག་པས། །ད་དུང་སྒྲིབ་པའི་མལ་ནས་ལྡང་མ་ནུས། །བསོད་ནམས་སྒོ་མོ་རྒྱལ་བའི་ཐུགས་རྗེས་ཕྱེ། །སྒྲིབ་སེལ་གྲགས་པའི་གཟི་བརྗིད་ཕྱམ་བརྡལ་ན། །བདག་ཅག་མུན་པའི་རྫོང་ལས་སློང་བ་ཡི། །དུས་སྐབས་འདི་ཡིན་འཕགས་པས་མཁྱེན་ལགས་སམ། །རང་གི་ཡིད་ལ་རྟོག་པའི་ཆོམ་རྐུན་དང་། །ཕྲ་རྒྱས་བདུད་ཀྱི་བྱ་མ་རྟ་གབ་ནས། །སེམས་ཀྱི་རིན་ཆེན་སྙིང་པོའི་བར་དུ་ཡང་། །འཕྲོག་པ་འདི་དག་ལྡང་མེད་ཁྲིམས་འོག་ཆུག །སྨོན་ལམ་ཡེ་ཤེས་ཡོངས་སུ་བསྡུ་བ་དང་། །སྙིང་རྗེ་ཆེན་པོ་བདེ་གཤེགས་སྲས་ཀྱི་ནོར། །ཐ་མི་དད་ཀྱང་རྣམ་པར་འཕྲུལ་པའི་རྒྱན། །ཁྱོད་བཞིན་ཁྱད་པར་འཕགས་པའི་སྣོད་དུ་མཛོད། །དབྱངས་ཀྱི་དཀྱིལ་འཁོར་མིང་གི་ཆུ་ཀླུང་སྒྲ། །འོད་ཟེར་དྲྭ་བ་བཀྱེ་སོགས་མཐོང་ཐོས་དང་། །རྗེས་སུ་དྲན་པས་བསམ་པ་ཇི་ལྟ་བར། །སྨིན་དང་འདུལ་བ་མཁའ་དང་མཉམ་པར་ཤོག །ཅེས་པའང་ན་བུན་དང་ལྗོན་ཤིང་གི་ཕྲེང་བས་ཁེབ་པ་ལས་ཆུའི་ཟེག་མ་རྟག་ཏུ་འཐོར་བས་དྲི་མ་འཁྲུད་པའི་དག་བྱེད་རང་ཤུགས་སུ་གྲུབ་པ་ཤར་ཕྱོགས་ཀྱི་ལྗོངས་ག་ལ་བར། ཡོན་ཏན་རྒྱ་མཚོས་གུས་པ་ཆེན་པོས་བྲིས་པ་སྐྱེ་བ་ཀུན་ཏུ་དཔའ་བོ་ཆེན་པོ་སྒྲིབ་པ་

― LT28_Page_0065 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་པར་སེལ་བས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།རྒྱལ་སྲས་ནམ་མཁའི་སྙིང་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མ་ཨཱ་ཀཱ་ཤ་གྷཱ་ཡ། །ཆོས་ཀྱི་རྒྱལ་པོ་དུས་གསུམ་གཤེགས་པའི་བློན། །ཆོས་ཀྱི་མཛོད་ཀྱི་སྒོ་སྲུང་གཅིག་པུ་བ། །སྐྱེས་བུ་ཆེན་པོ་ནམ་མཁའི་སྙིང་པོ་ཞེས། །རྒྱལ་སྲས་དབུས་ན་ཨུ་དུམྦ་ར་དེ། །དུས་དང་ཕྱོགས་སུ་འབྱུང་བ་དཀོན་པའི་མཆོག །ནམ་མཁའ་ཆུ་ཡི་རླངས་པ་བྲལ་བའི་ངོས། །ཉི་མའི་སྙིང་པོ་ཆགས་དང་ཐོགས་མེད་པ། །སྣང་བའི་དམ་པས་འགྲོ་ལ་ཕན་བཏགས་ཀྱང་། །རྒྱགས་དང་དྲིན་ལ་ལན་གྱི་འདོད་མེད་དེ། །དམུས་ལོང་དམིག་བུ་མེད་པ་མ་གཏོགས་པར། །དེ་ཡི་སྣང་བ་ཕྱོགས་སུ་ལྷུང་མི་འགྱུར། །གང་བློ་ཤེས་རབ་ནམ་མཁའི་རང་བཞིན་ལ། །ཐབས་མཁས་སྙིང་པོ་དུས་ཀུན་གང་བྱུང་བ། །གཅིག་ཏུ་བསྡུས་ཀྱང་རློམས་པའི་སེམས་མེད་པ། །ཐུགས་རྗེ་ཆེན་པོ་དེ་ཡང་དེ་བཞིན་ཏེ། །ལོག་སྲེད་ཅན་མིན་སྐྱེ་བ་བཞིར་སྐྱེས་པ། །བྱང་ཆུབ་ལམ་

― LT28_Page_0066 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་འདྲེན་པའི་ཤིང་རྟ་མཆོག །ཆོས་ཀྱི་དབྱིངས་སུ་གཏོགས་པའི་རིན་ཐང་ཅན། །ཐམས་ཅད་ཁྱོད་ཀྱི་དགེ་བའི་གཏེར་ལ་ཆུད། །ཕོངས་པ་རྣམས་ཀྱི་བུམ་པ་བཟང་པོ་སྟེ། །དགེ་རྩའི་འབྲས་བུ་སྐྱེད་པའི་ས་ཡང་ཡིན། །འདུན་དང་དྲན་པས་དྲང་བའི་བསླབ་པ་ཡི། །ལྷུན་པོའི་གཏོས་སུ་བྱང་སེམས་ཆོས་ཀུན་གཞོལ། །ཤེས་བྱའི་ཆོས་སུ་གྱུར་པས་མི་ཕྱེད་པ། །ཆོས་ཀུན་བཟོད་པའི་རྡོ་རྗེའི་གོ་ཆས་གཡོགས། །སྲིད་དང་ཞི་བའི་མཐའ་ལ་མི་ཐོགས་པར། །བརྩོན་འགྲུས་རླུང་ཤུགས་འཁོར་འདས་ཀུན་ཏུ་གཡོ། །སེམས་ཅན་དོན་བྱེད་ཏིང་འཛིན་བྱེ་བའི་ཀླུང་། །ཏིང་འཛིན་རྒྱ་མཚོའི་འཇིངས་ལ་སྡུད་ཅིང་སྤྲོ། །གནས་ཆེན་པོ་སོགས་དམ་པ་ཅི་འདོད་པ། །སློང་ལ་དངོས་ཀུན་སྟེར་བའི་ཡོངས་འདུས་ལྗོན། །འཚོ་བ་ཡོ་བྱད་བདེ་བར་གནས་རྣམས་དང་། །མི་མཐུན་འཇིགས་ལས་སྐྱོབ་པའི་རྫོང་བཙན་མཆོག །ལམ་ཞུགས་དངོས་པོའི་རང་བཞིན་ཐ་དད་པ། །ཡེ་ཤེས་ནམ་མཁའ་ཡངས་པས་གོ་འབྱེད་ཅིང་། །སངས་རྒྱས་ཆོས་རྣམས་གང་ལ་བརྟེན་པའི་གནས། །རང་རྒྱལ་འཇུག་ལྡོག་བགྲང་བའི་ཕྲེང་བ་སྟེ། །ཉན་ཐོས་རྣམས་ལ་བསླབ་པའི་གོས་བཟང་ཉིད། །ཕ་རོལ་ཕྱིན་པ་རྣམས་ཀྱི་འབྲས་བུའི་བཅུད། །ས་བཅུ་བརྙེས་པའི་ཚོགས་

― LT28_Page_0067 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ཡིད་བཞིན་ནོར། །དཔའ་བར་འགྲོ་བ་རྣམས་ཀྱི་འཚོ་བའི་ཤིང་། །ལྟ་བའི་དྲྭ་བ་གཅོད་པའི་རྣོ་མཚོན་ཉེ། །བག་ཆགས་མཚམས་སྦྱོར་དྲལ་བའི་རལ་གྲི་དང་། །ཐབས་ཅན་རྣམས་ལ་ཚེས་གྱི་གྲངས་སུ་གྱུར། །ལྷ་ཡི་མིག་སྟེ་མི་རྣམས་ཀྱི་ནི་ལམ། །དུད་འགྲོའི་འཇིགས་སྐྱོབས་ཡི་དྭགས་རྣམས་ཀྱི་ཟས། །སེམས་དམྱལ་མགོན་ཏེ་སྦྱིན་གནས་རྣམས་ཀྱི་སྣོད། །ནད་ལ་རྐྱེན་སྨན་བཀྲེས་པ་རྣམས་ཀྱི་འཐུ། །སྒོམ་ལ་ཆུ་ཤེལ་ངལ་བ་རྣམས་ཀྱི་མལ། །སྙོམས་འཇུག་ལྡན་ལ་ཉི་མའི་ནོར་བུ་མཆོག །བསླབ་པ་འཁྲུགས་པ་རྣམས་ཀྱི་མིག་འབྱེད་ཅིང་། །སྡོམ་པ་སྤྱོད་རྣམས་བཞིན་རས་མཐོང་བའི་སྣོད། །སྒྲོ་སྐུར་ཚིག་གིས་གདུང་ལ་གྲིབ་མའི་གདུགས། །དགེ་རྩ་ཆད་དེ་ལྟུང་བའི་འཁར་བ་ཉིད། །མུན་ལ་ཉི་དང་ལམ་སྟོར་རྣམས་ཀྱི་ཟླ། །ཁྲེལ་དང་ངོ་ཚས་གཅེར་བ་རྣམས་ཀྱི་གོས། །རྒོལ་བའི་གླང་པོ་འཇོམས་པའི་གདོང་ལྔ་པ། །བདུད་ཀྱི་དགྲ་ལ་དཔའ་བའི་དཔུང་ཆེན་པོ། །མཐོ་རིས་སྐས་ཀ་ཕ་རོལ་འགྲོ་བའི་རྟ། །མྱ་ངན་བརྒལ་ཏེ་ཕྱིན་པའི་ཟམ་པ་དེ། །དེ་བཞིན་གཤེགས་པ་ཉག་གཅིག་མ་གཏོགས་པ། །དབང་ཐོབ་རྒྱལ་བའི་མྱུ་གུ་སོགས་པས་ཀྱང་། །མཆོད་ཅིང་རི་མོར་བྱ་བའི་གནས་ཡིན་ཞེས། །དཔལ་

― LT28_Page_0068 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་མགུར་ལས་བསྔགས་པའི་སིལ་སྙན་བཀྲོལ། །སྐྱབས་ངན་ལ་བསྟན་ལྟ་བའི་ཐིབས་འོག་ཏུ། །ཆུད་ནས་མཐོ་རིས་ཐར་པའི་སྐབས་བྲལ་བ། །གལ་ཏེ་ཁྱོད་མཚན་ཐོས་ནས་མོས་བྱེད་ན། །བག་ལ་ཉལ་དང་བསམ་པ་དེས་གཟིགས་ཏེ། །གང་ལ་དགེ་བའི་རྩ་བ་བསྐྱེད་པའམ། །སྦྱིན་སོགས་བསོད་ནམས་བྱ་བའི་དངོས་གཅིག་གིས། །དགེ་བའི་བཤེས་ཀྱི་ལམ་ནས་དབང་ཐོབ་ཅིང་། །སྤྱོད་དང་སྨོན་ལམ་བསམ་པ་དྲང་བ་ཡིས། །ལྟ་གྱུར་གཡང་ས་བྱེ་བ་ལས་ཟློག་པ། །པྲ་སེན་ཡི་གསལ་སྣང་བཞིན་ཏུ་སྟོན། །མཐོང་བ་ཉམས་དང་ལྕེ་བཅིངས་གྱུར་པ་སོགས། །གདོན་དང་འདུ་བ་འཁྲུགས་པས་གཙེས་རྣམས་ཀྱང་། །མོས་པའི་རྫིང་བུ་ཁྱོད་ཕྱིར་བགྲུང་བ་ལ། །བརྒྱ་བྱིན་བྲམ་ཟེ་སྨན་པའི་གཟུགས་ཤར་ཏེ། །སྦྱོར་བ་གཅིག་གིས་ཕན་པ་བརྒྱ་ཕྲག་བསྩལ། །བཟོ་གནས་འཚོ་བ་རིག་དང་ནོར་གྱི་དབྱིག། །དབང་ཕྱུག་གྲགས་སོགས་ཉེ་བར་སྤྱོད་རྣམས་དང་། །ཐོས་དང་དབེན་ལས་སྐྱེས་པའི་བསམ་གཏན་གྱི། །བདེ་བའི་ཡོངས་སུ་སྤྱད་པ་བསྒྲུབ་པའམ། །འགྲོ་མང་སྡུག་བསྔལ་རྒྱུ་དང་ཕྲལ་འདོད་ཅིང་། །བྱང་ཆུབ་སྤྱོད་ལ་འཇོག་པའི་བློ་ཆེན་པོས། །གཞན་ཕན་ཆེད་དུ་བདག་ཉིད་ཞུགས་རྣམས་ཀྱང་། །གང་ལ་དད་པའི་སྙིང་ཆུས་བྲན་པ་ཡི། །

― LT28_Page_0069 ―

^{[མ་དཔེ་གཟིགས་ན་འདིར་གནོན།]}

[Full Size]

མིག་གི་ཨུཏྤལ་གསར་དུ་འབུས་པ་ལ། །འཕགས་པས་སྐལ་པར་འཚམས་པའི་གཟུགས་བསྟན་ཏེ། །སྐྱེ་བོ་བྱེ་བ་ཁྲག་ཁྲིག་ཐབས་གཅིག་གིས། །སྨིན་པར་ནུས་པའི་གདམས་ངག་ཆེན་པོ་འབོག །ལམ་མ་ཞུགས་དང་ཐེག་པའི་བཞོན་པ་ཅན། །རང་འབྲས་ཁྱིམ་དུ་འབད་པས་བགྲོད་བྱེད་པ། །དེ་དག་ཕྱིར་མི་ལྡོག་པའི་གྲོང་ཁྱེར་དུ། །སྐད་ཅིག་ཡུད་ལ་ཅུང་ཟད་རྩོལ་བས་གཞོག །ལྷག་པའི་བསམ་པས་ནན་ཏན་འགྲོས་ལྡན་ཞིང་། །ལྟ་བ་མ་འཁྱོགས་རྒྱགས་དང་གཡོ་མེད་པ། །དེ་ལ་གྲགས་པ་ཆེན་པོ་ཐུགས་བརྩེ་སྟེ། །མཐུ་དང་བརྩོན་འགྲུས་བརྟུལ་བ་བརྟན་པོ་ཡིས། །བཟང་པོ་སྤྱོད་པའི་ཕ་རོལ་ཕྱིན་ལ་བཀོད། །རྒྱུ་མེད་སྨྲ་དང་ཕྱི་མ་མི་འཚལ་ཞིང་། །ཆོག་མི་ཤེས་དང་རྨོངས་པའི་མུན་པར་འཐམ། །ཁྲོ་སོགས་ཀུན་དཀྲིས་ཆེན་པོས་ཟག་བཅས་ཀྱི། །དགེ་རྩ་ཐམས་ཅད་སྤྲུགས་པར་བགྱིད་པ་དང་། །མོས་པའི་སྙིང་གི་སྣོད་ཆག་ཕས་ཕམ་པས། །ལྟུང་བའི་དངོས་ལས་ལྡང་བར་མ་ནུས་པ། །མཁས་པས་སྤངས་པའི་རྒྱལ་བློན་ཉན་ཐོས་དང་། །རྒྱལ་བའི་བརྒྱུད་དུ་དང་པོར་སྐྱེས་པ་རྣམས། །སྡིག་སེམས་གཟུགས་བརྙན་ཆུ་སྲིན་ཁྲོས་པའི་ཁར། །ལས་ཀྱི་རླུང་གིས་བདས་་

― LT28_Page_0070 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ཕྱིར་ལྷོན་ཏོ། །ངན་པར་འགྲོ་བའི་ལམ་གྱི་རྒྱུན་གཅོད་ཅིང་། །དཀར་པོའི་ཆོས་སྣོད་ཞིག་པ་སླར་ལ་འཆོས། །དེ་དག་ཕྱིར་དུ་དགེ་སྦྱོང་གཟུགས་སོགས་ཀྱིས། །མཐའ་འཁོབ་རྣམས་སུ་འབྱུང་ཞིང་གནས་པ་སྟོན། །ཐམས་ཅད་མཁྱེན་པས་བཤད་པའི་ཟབ་མོའི་མདོ། །གཟུངས་དང་བཟོད་པ་ས་རྣམས་སྟོན་བྱེད་པ། །སྔོན་ཆད་མ་ཐོས་ཆོས་ཀྱི་རྔ་བརྡུངས་ནས། །སྙིང་ལ་ཉལ་བའི་ཐེ་ཚོམ་ལས་སློང་སྟེ། །ངོ་མཚར་བཅས་པས་གཏོང་ཞིང་འཆགས་པའི་ཞུགས། །སྒྲིབ་པའི་ཚང་ཚིང་གང་ན་ཡོད་པར་བཀྱེ། །གལ་ཏེ་མོས་ལ་སོགས་པའི་འབབ་སྟེགས་ཅན། །ལྷག་པའི་བློ་ཡི་མེ་ལོང་ཕྱིས་ན་ཡང་། །ཟག་པའི་དྲི་མས་མིག་བུ་མ་དག་པ། །འཕགས་པ་མཐོང་བའི་སྐལ་པས་དམན་པ་ལ། །སེམས་དང་མཐུན་པའི་གཟུགས་སུ་དེ་གསལ་ནས། །ཐབས་དང་ལྡན་པའི་ཡེ་ཤེས་མིག་ཕྱེ་སྟེ། །མཐུ་ཆེན་བརྟུལ་བ་བརྟན་པོ་རང་ཉིད་ཀྱི། །རྒྱལ་ཐབས་བུམ་ཆུ་དེ་དག་སྤྱི་བོར་བླུགས། །ཐུན་མོང་མིན་པའི་ཡོན་ཏན་དེ་མཚོན་ཞིང་། །ཤིན་ཏུ་དཔའ་བ་ལས་བྱུང་ཡིད་བཞིན་གྱི། །ནོར་བུ་བརྒྱ་བྱིན་ཐོགས་པ་འོད་འབར་བ། །སྣང་བའི་དབུས་ན་ཉི་མའི་གཟི་འོད་ཅན། །དེ་ཡི་ཡན་ལག་དམ་པའི་རྒྱན་ཏུ་ཐོགས། །ཀུན་

― LT28_Page_0071 ―

^{[མ་དཔེ་གཟིགས་ན་འདིར་གནོན།]}

[Full Size]

རྫོབ་བདེན་པས་བསྒྲུབས་པའི་ཚོགས་བསྟན་ཀྱང་། །གནས་བརྟན་ཟག་པ་ཟད་དང་ས་ཐོབ་སོགས། །དབང་པོ་དྲུག་དང་རྣམ་གྲོལ་ལ་རྨོངས་ན། །དོན་དམ་སྐྱེ་བ་མེད་པའི་མཐུ་བསྟན་པས། །རྒྱུན་མཐའི་ས་ལ་གནས་པ་མ་གཏོགས་པ། །ལྷར་བཅས་འགྲོ་བ་རྨོངས་ཤིང་བསླད་པ་ཡི། །སྦྱོར་བའི་མཚན་མ་རྣམ་པར་བརྟག་པ་དཀའ། །འཇིག་རྟེན་དག་ན་ཕ་མཐའ་མི་རྙེད་པ། །ནམ་མཁའི་མཐའ་ནི་ལ་ལས་རྙེད་སྲིད་ཀྱི། །སྲིད་པའི་གཡུལ་ངོ་ཟློག་པའི་དཔའ་བོ་དེས། །བྱམས་དང་སྙིང་རྗེ་ཏིང་འཛིན་སྟོབས་བསྐྱེད་དེ། །ཡེ་ཤེས་ཐབས་ཀྱིས་སེམས་ཅན་ཡོངས་སྨིན་པ། །དེ་ཡི་ཚད་ནི་སུས་ཀྱང་བཟུང་དུ་མེད། །རྒྱ་མཚོའི་ཐིགས་པ་ཤིན་ཏུ་ཕྲ་བ་དང་། །གངྒཱའི་བྱེ་མའི་རྡུལ་ལས་ཆེས་མང་བའི། །དེ་བཞིན་གཤེགས་སོགས་སྣ་ཚོགས་འཕྲུལ་ཆེན་པོ། །དངོས་དང་རྨི་ལམ་ན་ཡང་སྤྲུལ་པར་མཛད། །ཁྱོད་མཚན་ཐོས་ནས་སུ་ཞིག་མོས་པའི་བློས། །ཚོན་གྱི་ཕྱེ་མས་བྲིས་པའི་གཟུགས་མཆོད་དམ། །བདག་གི་སྲོག་ཀྱང་གང་ལ་འབུལ་བྱེད་པ། །དེ་ལ་ཇི་སྲིད་འཚོ་ཡི་བར་དུ་ཡང་། །ལྟུང་བའི་རྩ་བས་ཉམས་པར་མི་འགྱུར་ཞིང་། །དུས་མིན་འཆི་སོགས་འཇིགས་པས་མི་འཇིགས་པར། །

― LT28_Page_0072 ―

^{[མ་དཔེ་གཟིགས་ན་འདིར་གནོན།]}

[Full Size]

དུས་ཀྱི་ས་རྣམ་ཤེས་ཐ་མ་རྒྱུ་བའི་ཚེ། །སྔོན་ཆད་འདྲིས་པའི་གཟུགས་ཀྱིས་ཆོས་བསྟན་ཏེ། །སྒྲིབ་པའི་ལྷག་མ་ཐུགས་རྗེའི་མཐུས་བསལ་ནས། །ད་ལྟར་འཚོ་གཞེས་རྙོགས་པ་བྲལ་བ་ཡི། །སངས་རྒྱས་ཞིང་ཁམས་རྣམས་སུ་ལམ་སྣ་འདྲེན། །ཇི་ལྟར་སྐལ་པ་དམན་ཀྱང་མཐོ་རིས་ཀྱི། །སྐྱེད་མོས་ཚལ་དུ་དགེ་བའི་སྐྱེད་བསྲིངས་ནས། །མཐར་གྱིས་ཐར་པའི་ལང་ཚོ་བརྟའ་བར་མཛད། །དེ་བཞིན་གཤེགས་པ་སྐྱེས་བུའི་མཐུ་ཆེན་པོས། །བདག་ཅག་ཁྱོད་མཚན་ཐོས་ནས་མོས་བྱེད་ཀྱང་། །ཧ་ཅང་མུན་པའི་རྒྱ་རུ་འཐུམ་དྲག་པས། །རྨི་ལམ་དུ་ཡང་ཁྱོད་ཞལ་མངོན་མ་གྱུར། །འགྲོ་ལ་ཕན་ཕྱིར་བྱང་ཆུབ་སེམས་བསྐྱེད་ཀྱང་། །དང་པོ་ལས་ཀྱང་དང་པོའི་ལས་ཅན་བདག །ལྟུང་བའི་ཁུར་གྱིས་ཡང་ཡང་ནོན་གྱུར་སྟེ། །འཕགས་པའི་ས་ལ་ལྡང་བའི་སྐབས་དབེན་པས། །ཐུགས་རྗེ་མཆིས་ན་ཕྱུང་བའི་དུས་ལགས་སོ། །སྡུག་བསྔལ་ཁུར་པོས་ཉིན་གཅིག་ནོན་གྱུར་ན། །དོར་བའི་ངལ་བ་བརྒྱ་ཕྲག་བསྟན་རྣམས་ཀྱང་། །ཡུན་རིང་སྡུག་བསྔལ་འབྱུང་གནས་ལྟུང་བའི་ཁུར། །རི་ཙམ་བརྩེགས་ཀྱང་ཡང་བ་བཞིན་ཏུ་ཁྱེར། །གདུགས་མཚན་གཅིག་ཏུ་སྙིང་ནས་ཁྱོད་དྲན་ན། །རྩ་བའི་ལྕི་བ་བདེ་

― LT28_Page_0073 ―

^{[མ་དཔེ་གཟིགས་ན་འདིར་གནོན།]}

[Full Size]

བླག་བོར་ནུས་ཀྱང་། །དམན་པའི་སྐལ་པར་དེ་ཡང་མ་ཤོང་བར། །དོན་མེད་སྤྱོད་པ་བདག་འདྲར་ཐུགས་རྗེས་དགོངས། །ཡེ་ཤེས་སྤྱན་ལ་སྒྲིབ་པ་མི་མངའ་བས། །མི་ཤེས་བྱིས་པའི་རང་བཞིན་འདི་གཟིགས་སམ། །སྙིང་རྗེའི་ཡུལ་དུ་བདག་ཀྱང་གཏོགས་པས་ན། །ཀྱེ་ལགས་ཐུགས་རྗེའི་དགབ་པ་སྩལ་དུ་གསོལ། །དམན་པའི་དུས་དང་སྐལ་པ་དབང་བཙན་པས་ལྟུང་བའི་ལྕིད་ཀྱིས་ཤིན་ཏུ་ནོན་ཀྱང་ལེགས་པར་ལྡང་བའི་བསམ་སྦྱོར་ལ་རྟག་ཏུ་ཞུགས་པའི་བློ་གྲོས་མཐའ་ཡས་ཀྱི་གོ་ཆ་ཅན་གྱིས། རྒྱལ་མོ་ཤིང་གི་རོང་དུ་དོན་གཉིས་བསྒྲུབ་པའི་གཟུགས་བརྙན་ལ་ཞུགས་པ་ན་དད་པས་བྲིས་པ་སྐྱེ་བ་ཀུན་ཏུ་རྒྱལ་སྲས་ནམ་མཁའི་སྙིང་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ། །འཕགས་པ་ཀུན་ཏུ་བཟང་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་རྣམ་ཐར་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཚར་ཞེས་བྱ་བ་བཞུགས་སོ། །ན་མ་སྶ་མནྟ་བྷ་དྲཱ་ཡ། །འཕགས་པ་ཀུན་ཏུ་བཟང་པོ་རྒྱལ་རྣམས་དང་། །ཡང་དག་མཐའ་ལ་གནས་པ་མཚུངས་མོད་ཀྱང་། །སེམས་ཅན་སྙིང་རྗེས་གཟིགས་པའི་ས་ལ་བཞུགས། ཁམས་གསུམ་ལས་འདས་ཉེས་པའི་རྡུལ་རྣམས་སྤངས། །མཁའ་མཉམ་རབ་གསལ་ཆོས་ཀྱི་སྣང་བ་བརྙེས། །

― LT28_Page_0074 ―

^{[མ་དཔེ་གཟིགས་ན་འདིར་གནོན།]}

[Full Size]

སུས་ཀྱང་མི་བརྫི་ཁྱུ་མཆོག་རླབས་པོ་ཆེ། །དཔེ་མེད་དཔེ་ལས་འདས་པ་ནམ་མཁའ་ལྟར། །ཡེ་ཤེས་སྤོབས་པའི་སྤྱོད་ཡུལ་བསམ་མི་ཁྱབ། །བ་སྤུའི་ཁུང་བུ་གཅིག་ན་ཆེས་ཕྲ་བའི། །ཡོན་ཏན་བྱེ་བའི་ཆར་ཡང་ཚད་མ་མཆིས། །དེ་འདྲ་རེ་རེར་ཡོངས་བཟུང་ཞིང་རྣམས་དང་། །སྐད་ཅིག་གཅིག་ལ་སྣ་ཚོགས་ཏིང་འཛིན་གྱིས། །ཀུན་ནས་སྒོ་རུ་འཇུག་པའི་བསམ་ཡས་ཐབས། །དུས་གསུམ་ཆགས་ཐོགས་བྲལ་བའི་ཤེས་རབ་དང་། །ཤིན་ཏུ་མྱུར་བའི་རྫུ་འཕྲུལ་ལྷན་ཅིག་ཞུགས། །བསམ་གྱིས་མི་ཁྱབ་རྣམ་པར་འཕྲུལ་བ་དང་། །བསྒྲུབ་པར་དཀའ་བའི་ཁྱུ་མཆོག་མཐུ་དང་ལྡན། །ཚད་མེད་སྤྱོད་ལ་འཇུག་པས་མངོན་པར་འབྱུང་། །འཁོར་བའི་མཐར་ཐུག་སྐྱོ་བ་མེད་པ་ཡི། །སྙིང་རྗེ་ཆེན་པོའི་སྨོན་ལམ་ཟད་མི་ཤེས། །མཐའ་ཡས་ཡེ་ཤེས་འཇུག་པས་རབ་ཏུ་ཞུགས། །སངས་རྒྱས་ཆོ་འཕྲུལ་བླ་ན་མེད་པ་ཐོབ། །ཆགས་མེད་མཐའ་ཡས་ རྒྱལ་བའི་སྟོབས་བཅུ་ཡིས། །རབ་བཀྲུས་ཆོས་དབྱིངས་དམ་པའི་ལུས་དང་ལྡན། །བདེ་གཤེགས་ཀུན་གྱི་བྱིན་གྱི་རླབས་ལ་གནས། །ཡེ་ཤེས་ཐ་མི་དད་པའི་རྒྱན་ཆས་སྒེག །འོད་ཟེར་དྲྭ་བས་ཆོས་དབྱིངས་རྒྱས་པར་འགེངས། །སེམས་ཀྱི་ཞེ་བརྙེས་ཤེས་རབ་མཁའ་

― LT28_Page_0075 ―

^{[མ་དཔེ་གཟིགས་ན་འདིར་གནོན།]}

[Full Size]

དང་མཚུངས། །ཏིང་འཛིན་སྟོབས་ཀྱིས་མི་འཇིགས་ཕ་རོལ་གནོན། །ཆོས་རྣམས་ཀུན་ལ་དམིགས་པ་མེད་པ་ཐོབ། །སེང་གེའི་ང་རོ་འཇིགས་པ་མེད་པར་བསྒྲགས། །སྨིན་དང་འདུལ་བ་མཐའ་དབུས་མེད་པར་རྫོགས། །སྐུ་གཅིག་འཇིག་རྟེན་ཁམས་ཀུན་རྒྱས་པར་འགེངས། །དབྱངས་གཅིག་འགྲོ་བ་ཀུན་གྱི་རྣ་བར་འབབ། །སྐྲ་སྦུབས་གཅིག་ཏུ་ཞིང་ཁམས་ཐམས་ཅད་བསྡུ། །རྡུལ་ཕྲན་གཅིག་ཏུ་སེམས་ཅན་ཀུན་ལུས་འགོད། །འགྲོ་གཅིག་ལུས་ལ་རྒྱལ་ཀུན་སྤྱོད་ཡུལ་བསྩལ། །ཏིང་འཛིན་གཅིག་ལ་ཏིང་འཛིན་སྒོ་བརྒྱ་བསྒྲུབས། །ཚིག་གཅིག་བསྟན་པས་འགྲོ་ཀུན་ཐེ་ཚོམ་བཅད། །ཡེ་ཤེས་གཅིག་གིས་ཆོས་ཀུན་དབྱིངས་ལ་འཇུག །བདེ་གཤེགས་ཀུན་གྱི་དྲུང་དུ་རྟག་འགྲོ་བས། །ལུས་མཐའ་ཡས་པར་སྐད་ཅིག་བྱིན་གྱིས་བརླབས། །ཕྱོགས་བཅུའི་སངས་རྒྱས་ཀུན་གྱི་ཞིང་མ་ལུས། །རྒྱས་བར་འགེངས་པར་སྤྱོད་ཡུལ་ཐོགས་པ་མེད། །རྒྱལ་བའི་རྣམ་འཕྲུལ་མཐའ་ཡས་ལ་དམིགས་པས། །སྤྱན་གྱི་དཀྱིལ་འཁོར་ཤིན་ཏུ་རྣམ་པར་དག །མངོན་པར་བྱང་ཆུབ་ཀུན་གྱི་སྒོར་འགྲོ་བ། །ཆད་པ་མེད་པས་ཚད་མེད་འགྲོས་དང་ལྡན། །ཆོས་ཚུལ་རྒྱ་མཚོ་གཏིང་ཕྱིན་མཁྱེན་པ་ཡི། །སྣང་བ་ནོད་པས་སྣང་བ་མཐའ་

― LT28_Page_0076 ―

^{[མ་དཔེ་གཟིགས་ན་འདིར་གནོན།]}

[Full Size]

ཡས་པ། །སོ་སོ་ཡང་དག་རིག་པ་རྣམ་དག་པས། །མཐའ་ཡས་བསྐལ་པར་ཡོན་ཏན་མི་ཟད་བསྟེན། །ཡེ་ཤེས་རྒྱ་མཚོའི་སྤྱོད་ཡུལ་རྣམ་དག་པས། །ནམ་མཁའི་ཁམས་ཀྱི་མཐའ་ཀླས་མཁྱེན་པས་ཁྱབ། །བསམ་པ་ཇི་ལྟ་བཞིན་ཏུ་འགྲོ་བའི་གཟུགས། །ཀུན་ཏུ་སྟོན་པས་གང་ལའང་གནས་པ་མེད། །སྲོག་དང་གང་ཟག་སེམས་ཅན་མེད་པའི་དབྱིངས། །ཡོངས་སུ་ཤེས་པས་རབ་རིབ་དྲུང་ནས་ཕྱུང་། །ཞིང་ཁམས་ཤིན་ཏུ་ཕྲ་བའི་རྡུལ་སྙེད་དུ། །རྒྱལ་བ་ཀུན་གྱི་དྲུང་དུ་རྟག་བཞུགས་ཏེ། །ཏིང་འཛིན་རྣམ་པར་འཕྲུལ་པ་དཔག་མེད་སྟོན། །བསམ་པ་བཞིན་ཏུ་སྐུ་ཡི་སྤྲིན་བཀྱེ་སྟེ། །ནམ་མཁའི་མཚན་ཉིད་ཅན་གྱི་རྒྱལ་སྲས་སྐུ། །གང་ལའང་མི་གནས་དེ་བཞིན་ཉིད་ལ་གནས། །འཁོར་གྱི་དཀྱིལ་འཁོར་རྣམ་ཐར་རྒྱ་མཚོ་ཅན། །ཐམས་ཅད་རྒྱལ་བའི་སྲས་ཀྱི་ལུས་སུ་ཆུད། །རྣམ་པར་སྣང་མཛད་སྨོན་ལམ་དབྱིངས་ལ་ཞུགས། །གང་ཆེན་མཚོ་ཡི་མཛོད་གནས་ནོར་བུའི་མཆོག །བཞིས་ནི་རྒྱ་མཚོ་རིན་ཆེན་འབྱུང་གནས་གྱུར། །དེ་བཞིན་གཤེགས་པའི་ཡེ་ཤེས་དཀོན་པའི་མཆོག །འཕགས་པའི་ཡེ་ཤེས་རིན་ཆེན་འབྱུང་བའི་གནས། །བཞི་པོ་ཆོས་ཀྱི་མཛོད་ན་འཁོད་པ་ཡང་། །བློ་ཆེན་ཁྱོད་དང་ཐུན་མོངས་ཉིད་དུ་གྱུར་

― LT28_Page_0077 ―

^{[མ་དཔེ་གཟིགས་ན་འདིར་གནོན།]}

[Full Size]

རིན་ཆེན་ཉི་མའི་སྙིང་པོ་ལ་སོགས་པས། །ཆུ་གཏེར་འཕེལ་འབྲི་མེད་པའི་དཔལ་སྐྱེད་ལྟར། །བསོད་ནམས་ཏིང་ངེ་འཛིན་དང་མངོན་ཤེས་སོགས། །ཀུན་མཁྱེན་ས་ལ་མཉམ་པ་ཉིད་སྡུད་པ། །མཐའ་དབུས་མེད་པ་ཡངས་པའི་ཡེ་ཤེས་ཀྱང་། །རྒྱལ་བ་རྣམས་དང་ལྷན་ཅིག་སྤྱོད་ལ་ཞུགས། །ཇི་ལྟར་ཚངས་པ་ཆེན་པོའི་གཞལ་མེད་ཁང་། །འགྲོ་ཀུན་རྒྱན་གྱི་དམ་པར་གྱུར་པ་ན། །སྟོང་གསུམ་གཟུགས་བརྙན་མ་འདྲེས་སྣང་བ་ལྟར། བ་སྤུའི་ཆ་ཤས་ཤིན་ཏུ་ཕྲ་བར་ཡང་། །བྱང་ཆུབ་སེམས་དཔའི་སྤྱོད་ཡུལ་རྣམ་འཕྲུལ་བའི། །རྒྱན་དང་བཀོད་པ་ཡོངས་སུ་རྫོགས་པར་སྣང་། །ཚད་མེད་ཡེ་ཤེས་རྡོ་རྗེའི་བློ་གྲོས་ཀྱིས། །ཆོས་དབྱིངས་མཐའ་དབུས་མེད་ལ་གནས་བཞིན་ཏུ། །འཇིག་རྟེན་ཀུན་ཏུ་གནས་པ་མེད་སྤྱོད་ཅིང་། །འགྲོ་ཀུན་ལུས་དང་གཟུགས་ཀྱི་རྗེས་སུ་ཞུགས། །དུས་གསུམ་སྐུ་ནི་མཉམ་པ་ཉིད་གྱུར་ཀྱང་། །ཡོན་ཏན་ཆེན་པོའི་རང་བཞིན་སྣ་ཚོགས་གཟུགས། །ས་ཡི་དཀྱིལ་འཁོར་ཀུན་ཏུ་མངའ་དབང་མཛད། །བྱང་ཆུབ་སྙིང་པོ་རྒྱ་ཆེར་རྟག་རོལ་ཀྱང་ །བདེ་གཤེགས་ལམ་ཆེན་སྟོན་མཛད་སྲས་ཀྱི་ཚུལ། །དག་པ་དབང་ཕྱུག་ཚིག་དང་བློ་ལ་སོགས། །

― LT28_Page_0078 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོན་ཏན་བྱེ་བ་ཀུན་ལ་རྟག་ཏུ་སྦྱིན། །ཏིང་འཛིན་རྒྱ་ཆེ་དུ་མའི་ཚུལ་གྱིས་ཀྱང་། །གསང་བ་གསུམ་གྱི་སྤྱོད་ལ་འཇུག་མི་ནུས། །མི་ལྡོག་བདག་ཉིད་ཆེན་པོའི་སྤྱོད་ལ་གནས། །གཞན་གྱིས་མི་སྤྱོད་པ་ལ་རྣམ་པར་སྤྱོད། །ཆོས་ཆེན་རྒྱལ་སྲིད་ཆེ་ལ་དབང་མཛད་ཕྱིར། །དབང་མཐའ་ཡས་པ་དུས་གསུམ་ཀུན་ཏུ་སྒྱུར། །ཡོན་ཏན་གཞལ་དུ་མེད་པའི་རིན་ཆེན་ཏེ། །བསམ་གྱིས་མི་ཁྱབ་འབྱུང་བའི་རྒྱ་མཚོ་ཆེ། །ཡོན་ཏན་ཆར་རྒྱུན་འཇོ་བའི་སྤྲིན་ཆེན་ཏེ། །ས་མཚམས་ལས་འདས་ནམ་མཁའི་མཐའ་དང་མཚུངས། །ནམ་མཁའ་སྐྲ་རྩེས་གཞལ་དུ་རུང་ཡང་སྲིད། །ཞིང་རྡུལ་གྲངས་སུ་བགྲང་བར་ནུས་སྲིད་ཀྱི། །གང་ལ་ཀུན་ཏུ་བཟང་ཞེས་མཚན་གསོལ་བའི། །རྒྱལ་སྲས་དེ་ཡི་ཡོན་ཏན་ཚད་མེད་ཅེས། །རྒྱལ་བ་སྲས་དང་བཅས་པས་རྟག་ཏུ་བསྔགས། །འཇིག་རྟེན་འདི་ན་བྱིས་པ་རྣམ་པར་རྨོངས། །རྣམ་རྟོག་ཆ་གཉེར་རྟག་ཏུ་མི་ཟད་ཀྱང་། དཔེ་ཟླ་བྲལ་བ་ཁྱོད་ཀྱི་ཡོན་ཏན་ལ། །ཅུང་ཟད་ཙམ་ཡང་བསམ་པར་ནུས་མ་གྱུར། །འཁོར་བ་རྒྱུན་རིང་འདི་སྙེད་དག་ཏུ་ནི། །ཟིན་མེད་འཁོར་མོ་ཡུག་ཏུ་ལས་སྤྱོད་ཀྱང་། །ཐ་ན་སེ་གོལ་གཏོགས་པའི་ཡུན་ཙམ་དུ། །ཁྱོད་ཀྱི་ཡུལ་ལ་འཇུག་པའི་སྐལ་པ་ཕྲ། །གངྒཱའི་བྱེ་མ་

― LT28_Page_0079 ―

^{[མ་དཔེ་གཟིགས་ན་འདིར་གནོན།]}

[Full Size]

སྙེད་དང་དེ་ལས་གཞན། །ཆོས་དབྱིངས་རྗེས་སུ་སོང་བའི་ཞིང་རྣམས་སུ། །རྒྱལ་བས་ཁྱོད་ཀྱི་བསྔགས་པ་ཡང་ཡང་གསུངས། །རྣམ་པར་ཐར་པ་མུ་མཐའ་མེད་པར་གྲགས། །ཕྱོགས་བཅུའི་ཞིང་ན་ཤིན་ཏུ་དབང་ཐོབ་པའི། །སྙིང་སྟོབས་ཆེན་པོ་དཔའ་བོ་གང་བཞུགས་པ། །དེར་ན་ཁྱོད་ཀྱི་རྗེས་སུ་འབད་པས་སློབ། །སྡིག་ཏོ་ཅན་ཡང་མཚན་གྱིས་ཟིལ་ནོན་ནས། །ལོག་པར་ཞུགས་པའི་བ་དན་རིང་དུ་བསྙལ། །ཐལ་བའི་རི་བོ་ཡེ་ཤེས་རླུང་གིས་གཏོར། །སྡིག་པའི་བག་ཆགས་བྱམས་པའི་ཆོས་ཆུས་བཀྲུ། །འཁོར་བའི་རྒྱ་མཚོར་བྱིངས་རྣམས་ཕ་རོལ་བསྒྲལ། །ཉོན་མོངས་གཟེབ་ཏུ་ཆུད་པའི་སྒྲོག་བརྡལ་ཞིང་། ཞི་བ་ཕྱོགས་གཅིག་པ་ཡི་འཆིང་བ་བཅད། །འདུན་པས་འགྲོ་རྣམས་གོང་དུ་དབུགས་དབྱུང་བ། །མཁས་ཤིང་ཟབ་པའི་མཚན་ཉིད་བརྟག་མི་བཟོད། །ཁྱོད་ནི་འབྱུང་བཞིའི་ནང་ནས་ནམ་མཁའ་སྟེ། །སྣང་བ་རྣམས་ལས་ཉིན་མོར་བྱེད་པའི་འོད། །མི་དབང་ཁྲོད་ན་གསེར་གྱི་འཁོར་ལོས་སྒྱུར། །རྒྱལ་སྲས་དབུས་སུ་ཁྱོད་ནི་ཐུ་བོ་ལགས། །འཕགས་པ་ཡིས་ཀྱང་ཕྱོགས་ཙམ་མི་མཚོན་པ། །ཁྱོད་ཀྱི་ཡོན་ཏན་སོ་

― LT28_Page_0080 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེས་ཇི་ལྟར་འཇལ། །འོན་ཀྱང་ཕན་ཡོན་མཐོང་བས་ཇི་ནུས་ཀྱིས། །སྐྱེ་བ་ཀུན་ཏུ་ཁྱོད་ལ་བསྔགས་པར་འདོད། །ས་བཅུའི་དབང་ཕྱུག་རྣམས་ཀྱང་བླ་མ་ལྟར། །བསྙེན་ཅིང་དཔེ་རུ་བྱ་བའི་སྤྱོད་ཡུལ་ལ། །བྱིས་པས་ཅུང་ཟད་ཞུགས་པར་ནུས་མིན་ཀྱང་། །ངོ་མཚར་ཆེན་པོའི་རྗེས་སུ་འབད་པས་སློབ། །ཏིང་འཛིན་སྒོ་བརྒྱ་ལྡན་པའི་ཁང་བཟང་དུ། །ས་བཅུའི་དབང་ཕྱུག་རྣམས་ཀྱི་ཚོགས་ཀྱི་དབུས། །འཇིག་རྟེན་མགོན་པོ་འཇིགས་པ་མེད་པར་བཞུགས། །དེ་བཞིན་རྡུལ་སྙེད་ཞིང་ན་དེ་སྙེད་སྐུ། །ཡོན་ཏན་བྱེ་བས་བརྒྱན་པའི་ཀུན་ཏུ་བཟང་། །རྟག་ཏུ་དད་པའི་ཡིད་ཀྱིས་བསམ་པར་བགྱི། །དབྱངས་གཅིག་གིས་ཀྱང་ཕྱོགས་དུས་ཐམས་ཅད་དུ། །ཡོན་ཏན་རྗེས་སུ་ཁྱབ་པའི་བསྔགས་པ་བརྗོད། །བདག་ལུས་ཞིང་ཁམས་རྒྱ་མཚོའི་རྡུལ་སྙེད་དང་། །དེ་སྙེད་འགྲོ་བ་རེ་རེའི་ལུས་བཏུད་དེ། །བསོད་ནམས་བརྒྱ་པའི་ཞབས་མཐིལ་སྤྱི་བོར་ལེན། །སྣ་ཚོགས་བཀོད་པའི་འོད་ཟེར་སྟོང་འབར་བས། །ཆོས་དབྱིངས་མཐའ་དབུས་མེད་པར་གཏམས་པ་ཡི། །ཕྱག་རྒྱའི་སྤྲིན་ལས་མཆོད་པའི་ཆར་ཕབ་པ། །ཇི་ལྟར་མཁས་པ་ཀུན་ཏུ་བཟང་པོ་ཡི། །བྱང་ཆུབ་སེམས་དང་རྣམ་པར་ཐར་པ་ཡིས། །བཀོད་

― LT28_Page_0081 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཁྱད་པར་མ་ཚང་མེད་པས་མཆོད། །རྨི་ལམ་དུ་ཡང་མི་དགེའི་རྩ་བ་དང་། །མི་འགྲོགས་རྣམ་སྨིན་རྣམ་པར་སུན་འབྱིན་ཅིང་། །དྲན་པས་ཉེས་སྤྱད་བསྡམས་པའི་སྒོ་གཏན་དང་། །ཤེས་བཞིན་སྒོ་གླེག་རྟག་ཏུ་དཔའ་བ་ཡིས། །དེང་ནས་ཀུན་ཏུ་བཟང་པོའི་སྤྱོད་ལ་འཇུག །བྱང་ཆུབ་ས་བོན་དངོས་དང་བརྒྱུད་པ་ནས། །དུས་གསུམ་བཟང་པོ་སྤྱོད་པས་གང་བཏབ་པ། །དེ་འབྲས་སྤྱོད་དང་ཆར་ཡང་གཏོགས་པ་ནི། །ཆོས་དབྱིངས་ཁོངས་སུ་མཆིས་སོ་ཅོག་ཀུན་ལ། །ཡི་རང་ནམ་ཟླ་ཕྱོགས་མེད་དྲོས་པས་བརླན། །སྲིད་པའི་སྐྱེ་རྒྱུན་རབ་ཏུ་གཅོད་བྱེད་པ། །དམ་ཆོས་འཁོར་ལོ་རྒྱ་ཆེན་བསྐོར་བཞིན་ཏུ། །མཁའ་དང་འགྲོ་ཁམས་ཇི་སྲིད་དེ་སྲིད་དུ། །གཟུགས་སྐུ་གདུལ་བྱའི་མིག་ལ་སྣང་མཛད་གསོལ། །སྲས་བཅས་རྒྱལ་བའི་ཡོངས་བསྔོ་རྒྱ་མཚོ་ལ། །བདག་གཞན་ལེགས་པར་སྤྱད་པའི་ཆུ་ཐིགས་ཀུན། །དམིགས་པ་མེད་པའི་སེམས་ཀྱིས་ལེགས་བསྲེས་པས། །ཀུན་ཏུ་བཟང་སོགས་རྒྱལ་དང་རྒྱལ་སྲས་ཀྱི། །རྣམ་ཐར་རྒྱ་མཚོ་གྲངས་མེད་བྱེ་བ་ཕྲག །གོང་ནས་གོང་དུ་འཕེལ་བ་བདག་རྒྱུད་ལ། །མྱུར་དུ་རྫོགས་ཏེ་མཚུངས་པ་མེད་གྱུར་ཅིག །སྲིད་པ་གཞན་ཏུ་ཉིང་མཚམས་མི་སྦྱོར་བར། །

― LT28_Page_0082 ―

^{[མ་དཔེ་གཟིགས་ན་འདིར་གནོན།]}

[Full Size]

སྣང་བ་མཐའ་ཡས་ཞིང་རབ་བདེ་ལྡན་ཏུ། །འདབ་བརྒྱ་མཛེས་པའི་ལྷུམས་ན་མཚན་དཔེའི་ལུས། །སངས་རྒྱས་ཆོས་ཀྱི་སྣོད་དུ་སྐྱེས་གྱུར་ནས། །ས་བཅུའི་དབང་ཕྱུག་རྣམས་དང་སྐལ་མཉམ་ཤོག །རྒྱལ་དང་རྒྱལ་སྲས་ཐུ་བོ་མ་ལུས་པས། །བྱིན་གྱིས་བརླབ་ཅིང་རྗེས་སུ་བཟུང་ནས་ཀྱང་། །འཆལ་དང་ང་རྒྱལ་སྙོམ་ལས་ཐེ་ཚོམ་སོགས། །བྱང་ཆུབ་སྤྱོད་ལ་བར་གཅོད་མི་འབྱུང་བར། །འཁོར་འདས་ཀུན་ན་མཉམ་པ་མེད་པ་ཡི། །རྣམ་ཐར་སྨོན་ལམ་ཕྲིན་ལས་འགྲུབ་གྱུར་ཅིག །འདི་ཡང་འཕགས་པ་ཉིད་གཟུགས་བརྙན་ཟོལ་གྱིས་རྟག་ཏུ་བཞུགས་པའི་མ་ཧཱ་ཚིན་གྱི་རི་བོ་འོ་མི་ཤན་དང་འདབ་ཆགས་པའི་ལྗོངས་སུ་ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་འཕགས་མཆོག་ཀུན་ཏུ་བཟང་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ། །སྐྱེས་ཐོབ་དམན་ཞིང་སྦྱངས་བའི་མཐུ་ཆུང་བས། །འཆད་རྩོད་རྩོམ་གསུམ་ནུས་པའི་གདིང་མེད་ཅིང་། །ཅུང་ཟད་ཤེས་པ་གཞན་གྱི་ཆགས་སྡང་རྒྱུ། །ཕན་པ་མེད་ལ་གནོད་པའི་སྣ་འདྲེན་པ། །སྙིགས་དུས་མཁས་པའི་བྱ་བས་ཅི་ཞིག་བྱ། །འོན་ཀྱང་རྒྱལ་སྲས་ཁྱུ་ཆོག་འདི་དག་གིས། །ཡོན་ཏན་མཐོང་ནས་མི་བཟོད་དད་པ་ཡིས། །བསྔགས་བརྗོད་རྒྱ་མཚོའི་སྤྲིན་ཆེན་གཡོ་བ་ལས། །རྣམ་ཐར་ནོར་བུའི་ཆར་པ་འདི་ཕབ་བོ། །རྒྱལ་བ་ཉིད་དང་ཉེ་བའི་

― LT28_Page_0083 ―

^{[མ་དཔེ་གཟིགས་ན་འདིར་གནོན།]}

[Full Size]

སྲས་འདི་རྣམས། །སྔགས་སུ་དཀྱིལ་འཁོར་གཙོར་ཡང་གསུངས་མོད་ཀྱི། །འདིར་ནི་ཕལ་ཆེར་མདོ་སྡེའི་ཚུལ་དག་དང་། མཐུན་པའི་བསྔགས་པ་ཇི་ལྟར་དཔོག་པ་བརྗོད། །འདོད་པའི་ཚེ་རས་བྲལ་ཞིང་ལྡོག་པ་མེད། །ཀུན་བཟང་སྨོན་ལམ་སྤྱོད་ལས་ངེས་བྱུང་བ། །བསམ་གྱིས་མི་ཁྱབ་རྒྱལ་སྲས་མཆོག་རྣམས་དང་། །བདག་གཞན་འགྲོ་བ་མཉམ་པ་ཉིད་བརྙེས་ཤོག །ཅེས་ཉེ་བའི་སྲས་ཆེན་བརྒྱད་ལ་བསྔགས་པ་བརྗོད་པའི་ཚིག་ཕྲེང་འདི་རྣམས་ཀརྨ་བཀའ་བརྒྱུད་ཀྱི་བཙུན་པ་ཡོན་ཏན་རྒྱ་མཚོས་ཤར་རོང་གི་ལྗོངས་རྒྱུ་བའི་སྐབས་ཅི་རིགས་པར་བསྟར་བ་བཀྲ་ཤིས་དཔལ་འབར་འཛམ་གླིང་མཛེས་པའི་རྒྱན་ཏུ་ཤོག །ཤུ་བྷཾ།། ༈ །།རྒྱལ་བས་ལུང་བསྟན་རྒྱལ་ཚབ་ཀུན་མཁྱེན་རྗེས། །རྒྱལ་བ་ཉིད་དང་རྒྱལ་སྲས་རྣམས་བསྔགས་སྤར། །རྒྱལ་ །སྲས་རྣམས་བཅས་རྒྱལ་བ་དགྱེས་བསྒྲུབས་དགེས། །རྒྱལ་བ་མིན་ཀུན་རྒྱལ་མཆོག་ཉིད་གྱུར་ཅིག །ཅེས་དཔལ་སྤུངས་ཆོས་གྲྭར་རྗེའི་གསུང་གི་བདུད་རྩིས་འཚོ་བ་ཀརྨ་མངྒ་རསྨིས་སྤར་དུ་བཀོད་པའོ། སརྦ་དཱ་ཀ་ལྱཱེ་ཾ། །

འཁོར་ལོའི་མགོན་པོའི་ངོ་བོར་བཞུགས་པའི་ལྷག་པའི་ལྷ་ཡིད་བཞིན་འཁོར་ལོ་ལ་བསྟོད་པའི་ཚོགས་ཕྲེང་བར་བསྟར་བ་ཡོངས་སུ་སྦྱངས་པའི་བཻདཱུརྱའི་ཕྲེང་བ།

― LT28_Page_0085 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་ལོའི་མགོན་པོའི་ངོ་བོར་བཞུགས་པའི་ལྷག་པའི་ལྷ་ཡིད་བཞིན་འཁོར་ལོ་ལ་བསྟོད་པའི་ཚོགས་ཕྲེང་བར་བསྟར་བ་ཡོངས་སུ་སྦྱངས་པའི་བཻདཱུརྱའི་ཕྲེང་བ་ཞེས་བྱ་བ་བཞུགས་སོ། །

― LT28_Page_0086 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོ་ལ་གསོལ་བ་འདེབས་པ་བདུད་རྩིའི་ལྗོན་ཤིང་ཞེས་བྱ་བ། ན་མ་ཨཱརྱཱ་ཏཱ་རཱ་ཡཻ། །སྐྱེ་འགགས་མེད་པའི་ནམ་མཁའ་ལ། །ཐུགས་རྗེའི་ཟླ་བ་ཤར་བ་ཡིས། །འཇིགས་པའི་ཚ་གདུང་གཞིལ་མཛད་པ། །འཕགས་མ་མཆོག་ལ་ཕྱག་འཚལ་ལོ། །འགྲེའོ། །གང་ལ་བསྟེན་པས་དོན་གཉིས་ཀྱི། །ནོར་བུ་འདོད་དགུར་འབྱུང་བ་ཡང་། །འབད་མེད་ལག་རྩེར་སྦྱིན་པ་པོ། །འཕགས་མ༴ །སྐད་ཅིག་དྲན་པ་ཙམ་གྱིས་ཀྱང་། །བརྒྱད་དང་བཅུ་དྲུག་འཇིགས་པ་འཇོམས། །ཚེ་དང་ཡེ་ཤེས་མཆོག་སྩོལ་བ། །འཕགས་མ༴ །ཉེས་པའི་ཚང་ཚིང་དཀྲིགས་གང་དེ། །རབ་འབར་ཐུགས་རྗེའི་ཞུགས་ཆེན་ལ། །ལྷག་མ་མེད་པར་བཞེན་མཛད་པ། །འཕགས་

― LT28_Page_0087 ―

^{[མ་དཔེ་གཟིགས་ན་འདིར་གནོན།]}

[Full Size]

མ༴ །མོས་པའི་འབབ་སྟེགས་མངོན་མཐོ་བ། །དེ་དེར་ཡེ་ཤེས་གཟིགས་པ་ལྷུང་། །མོས་པ་ཐ་དད་མཁྱེན་པ་པོ། །འཕགས་མ༴ །མོས་པ་དུ་མ་དགར་མཛད་པའི། །སྣ་ཚོགས་ཐབས་ཀྱི་དབྱིག་གིས་ནི། །རེ་བའི་ཤིང་རྟ་འགེང་བ་པོ། །འཕགས་མ༴ །བདག་དང་བདག་གིར་མེད་པ་ཡི། །ཤེས་རབ་དབུས་སུ་གནས་བཅས་ནས། །ཤེས་བྱའི་མཐའ་ལ་རྟོག་པ་པོ། །འཕགས་མ༴ །གང་ལ་མོས་པ་མེད་པར་ཡང་། །སྟེས་ཏེ་ཁྱོད་མཚན་གང་ཕྱིར་དྲན། །དེ་དེའི་འཇིགས་པ་མྱུར་དུ་འཕྲོག །འཕགས་མ༴ །སྙིང་རྗེའི་ཆུ་ཡིས་བྲན་གྱུར་པའི། །ཐུགས་ཀྱིས་སྲིད་པའི་ཁམས་ཀུན་ཏུ། །ཉིན་མཚན་རེར་ཡང་ལན་དྲུག་གཟིགས། །འཕགས་མ༴ །སྙིགས་མའི་མུན་པ་ཆེན་པོ་

― LT28_Page_0088 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་། །བསལ་བྱེད་ཉི་ཟླའི་འོད་སྣང་ཅན། །དགོངས་མཚོ་བསྲུབས་ལས་སྐྱེད་པ་པོ། །འཕགས་མ༴ །འཕགས་པའི་ཡུལ་དུ་ཟླ་བ་དང་། །ལྗོངས་འདིར་བསྟན་པའི་ཉིན་བྱེད་སོགས། །མཁས་གྲུབ་རྒྱ་མཚོ་སྤྲུལ་པ་པོ། །འཕགས་མ༴ །སངས་རྒྱས་དུས་གསུམ་དུ་གཤེགས་པ། །མཆོག་དམན་སྲས་བཅས་ཁྱོད་ལས་འཁྲུངས། །རྒྱལ་བ་རྒྱ་མཚོའི་རིགས་ཀྱི་བདག །འཕགས་མ༴ །ཁྱོད་ནི་ཤེས་རབ་ཕ་རོལ་ཕྱིན། །འཁོར་འདས་ཀུན་ལ་ཁྱབ་པ་པོ། །གང་དུའང་མི་དམིགས་བསམ་བརྗོད་བྲལ། །འཕགས་མ༴ །ཤེས་རབ་མཆོག་གི་རྩལ་གྱིས་ནི། །ཟག་བཅས་ཟག་བཅས་མ་ཡིན་པའི། །སྲིད་ཞིའི་དགེ་བ་མཐའ་དག་སྐྱེད། །འཕགས་མ༴ །ཁྱོད་ནི་རིག་པའི་ཡེ་ཤེས་ཏེ། །ཀློང་ཡངས་ཆེན་པོའི་སྦུབས་སུ་ཞུགས། །ངོ་བོ་རང་བཞིན་ཐུགས་རྗེའི་བདག །འཕགས་མ༴ །སྣང་བ་གཤིས་ལ་ཡོད་པ་དང་། །སྣང་ནས་སྣང་བར་འགྲོ་བ་ཀུན། །ཡེ་ཤེས་སྟོབས་ཀྱི་རོལ་པ་སྟེ། །འཕགས་མ༴ །མུན་ནས་མུན་པར་འཇུག་པར་ཡང་། །ཐབས་ཀྱིས་སྣང་བའི་སྒོ་འཕར་ཕྱེ། །འགྲོ་བ་མཐའ་དག་སྒྲོལ་བ་པོ། །འཕགས་མ༴ །ཁྱོད་ནི་གནས་ལུགས་ཕྱག་རྒྱ་ཆེ། །དུས་གསུམ་རྒྱལ་བའི་དགོངས་པ་སྟེ། །ཐོག་མ་དང་ནི་ཐ་མ་མེད། །འཕགས་མ༴ །ཁྱོད་ནི་མེ་ལོང་ཡེ་ཤེས་ཏེ། །ཡེ་ཤེས་ཀུན་གྱི་རྒྱུ་མཚན་ཕྱིར། །

― LT28_Page_0089 ―

^{[མ་དཔེ་གཟིགས་ན་འདིར་གནོན།]}

[Full Size]

མཉམ་པ་ཉིད་སོགས་རྟག་ཏུ་འཆར། །འཕགས་མ༴ །ཁྱོད་ནི་རྒྱུན་གྱི་མཐར་སྐྱེས་པའི། །རྡོ་རྗེ་ལྟ་བུའི་ཏིང་འཛིན་ཏེ། །དཔག་མེད་ཡོན་ཏན་ཀུན་གྱི་གཏེར། །འཕགས་མ༴། ཁྱོད་ནི་ཞིང་ས་འདྲ་བ་ཡི། །བླ་ན་མེད་པའི་བྱང་ཆུབ་སེམས། །འཕགས་བཞིའི་བྱང་ཆུབ་མ་ལུས་འཁྲུངས། །འཕགས་མ༴ །ཁྱོད་ནི་རང་བྱུང་འོད་གསལ་བ། །བརྗོད་མེད་ཁོངས་ནས་ཤར་བའི་དོན། །ནང་གསལ་རྒྱ་ཡན་ཟུང་དུ་འཇུག །འཕགས་མ༴ །སྣ་ཚོགས་ཁམས་དང་དབང་པོ་ལ། །སྣ་ཚོགས་སྐུ་དང་སྣ་ཚོགས་གསུང་། །དེ་བཞིན་སྣ་ཚོགས་ཐུགས་སུ་སྣང་། །འཕགས་མ༴ །ཁྱོད་ནི་དོན་དམ་བདེན་པ་སྟེ། །གཅིག་གིས་གར་གྱིས་དུ་མའི་ཉམས། །སྒྱུ་འཕྲུལ་གསང་བ་བསམ་མི་ཁྱབ། །འཕགས་མ༴ །ཀུན་རྫོབ་ཀུན་་རྫོབ་ཏུ་བདེན་པ། །ཕུན་སུམ་ཚོགས་ལྔས་བཟུང་བ་ཡང་། །ཁྱོད་ཀྱི་ཐུགས་རྗེའི་རང་འོད་ལགས། །འཕགས་མ༴ །གང་ཞིག་ལས་ཀྱི་འཇིགས་པ་ཡང་། །གཞོམ་ནུས་ལས་ལ་དབང་བ་ཡི། །སྟོབས་སོགས་དབང་ཕྱུག་གོ་ཆ་ཅན། །འཕགས་མ༴ །མདོར་ན་རྒྱལ་བ་སྲས་བཅས་ཀྱི། །ཡུམ་གྱུར་ཡིད་བཞིན་འཁོར་ལོ་སྟེ། །འགྲོ་ཀུན་སྲིད་མཚོ་ལས་སྒྲོལ་བའི། །ཐུགས་རྗེའི་གཏེར་ཆེན་ཁྱོད་ལས་སུ། །དེ་ཕྱིར་བདག་ནི་སྐྱེ་བ་ཀུན། །འཕགས་མ་ཨུཏྤལ་འཆང་བ་ཉིད། །མཉེས་ནས་རྗེས་བཟུང་མ་གྱུར་བར། །

― LT28_Page_0090 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱབས་གཞན་ཚོལ་བར་མ་གྱུར་ཅིག །ཙནྡྲ་གོ་མཱི་འཕགས་པ་དང་། །རྒྱལ་དབང་ཆོས་ཀྱི་འབྱུང་གནས་བཞིན། །བདག་ཀྱང་མྱུར་དུ་རྗེས་བཟུང་སྟེ། །དོན་གཉིས་ལྷུན་གྱིས་གྲུབ་པར་ཤོག །བསྟན་འཛིན་སྐྱེས་བུའི་ཞབས་པད་བརྟན། །བསྟན་པ་རིན་ཆེན་ཡུན་ཏུ་གནས། །གནས་སྐབས་ཆོས་མཐུན་དཔལ་གྱིས་འབྱོར། །བསམ་དོན་ཡོངས་རྫོགས་བཀྲ་ཤིས་ཤོག །ཅེས་པའང་རང་ལོ་ཉེར་གཉིས་རྒྱལ་ཟླའི་ཚེས་དགེ་བར་འདི་ཉིད་བསྙེན་པའི་ཐུན་མཚམས་ཞིག་ཏུ་སྙིང་ནས་གསོལ་བ་འདེབས་པ་པོ་ནི་ཀརྨ་ངག་དབང་ཡོན་ཏན་རྒྱ་མཚོའོ། །སརྦ་ཐཱ་མངྒ་ལཾ།། ༈ །།རྗེ་བཙུན་འཕགས་མ་སྒྲོལ་མ་ཡིད་བཞིན་འཁོར་ལོ་ལ་གསོལ་བ་འདེབས་པ་འཆི་མེད་གྲུབ་པའི་ལྗོན་ཤིང་ཞེས་བྱ་བ། རབ་དཀར་ཆུ་སྐྱེས་དབུས་འཁྲུངས་རྒྱལ་བའི་ཡུམ། །མཚན་ཐོས་ཙམ་གྱིས་འཇིགས་པ་ཀུན་སྒྲོལ་མ། །མུན་པའི་གོ་འཕང་བསྙིལ་འོད་རྣོ་ལྡན་པའི། །སྟོན་ཟླའི་སྟེང་དུ་རང་བྱུང་པདྨ་ཅན། །ཚུལ་ཁྲིམས་རྣམ་དག་བརྟན་ལྡན་བསུང་ངད་སྤྲོ། །པདྨའི་ཟེ་བ་ནོར་བུའི་འོད་ཟེར་འབར། །ཀུན་རྟོག་གཅིག་ཆར་སྡུད་བྱེད་མེ་ཏོག་མདའ། །འོ་མའི་ཆུ་གཏེར་རབ་དཀྲུགས་ཞི་བའི་ལུས། །མུ་ཏིག་འོད་ལྡན་རོལ་པའི་འཛུམ་རླབས་དཀར། །ག་པུར་དྲི་བསུང་ཉིད་དང་ལྷན་ཅིག་གཡོ། །པདྨ་གསར་པ་ལྟ་བུའི་ཞལ་རས་ལས། །རྟག་ཏུ་འཆི་མེད་བདུད་རྩིའི་རྡུལ་དམར་སྐྱུགས། །བཅུ་དྲུག་དར་ལ་

― LT28_Page_0091 ―

^{[མ་དཔེ་གཟིགས་ན་འདིར་གནོན།]}

[Full Size]

བབ་པའི་གཞོན་ནུ་མས། །ཉམས་དང་འགྱུར་བའི་ཁེངས་པ་བསྡུས་པ་ལས། །དགའ་ཆེན་སྐད་ཅིག་རྫོགས་པའི་གོ་སྐབས་ན། །འཕོ་མེད་རི་མོ་སྲོག་གི་དྭངས་མར་འབྲི། །མ་ལྟར་བྱམས་པའི་རང་བཞིན་ལི་བ་ཡི། །སྤྲོས་པའི་ལེན་བུ་སྤྲོས་མེད་ལྟག་པར་འཁྱིལ། །འཕགས་ནོར་བདུན་མཐར་སོན་པའི་སྟོབས་ལས་གྲུབ། །རིམ་པ་བདུན་པོ་གཅིག་ཆར་འབིགས་པ་དང་། །འཇིག་རྟེན་བདུན་ལ་འཛའ་བ་མི་ལྷོད་པའི། །ཨུཏྤལ་རྒྱས་པའི་སྤྱན་བདུན་ཅུང་ཟད་འཛུམ། །འདིས་མཆོག་མི་འཇིགས་སྦྱིན་ཅེས་སྐྱེ་དགུ་ཀུན། །ཉེར་འཚོར་བསྟི་བའི་སྟ་ཟུར་གཡས་ནས་རྒྱ། །ཉམ་ངའི་སྨན་ཏུ་པུས་སྟེང་རྩེ་དགར་བརྐྱང་། །ལྷག་མ་བསྒྲེངས་ཤིང་མཐེབ་སྲིན་དུད་པ་ལས། །པད་དཀར་འདབ་བརྒྱ་ཤར་བའི་མཚར་སྡུག་ལ། །སྙིང་རྗེར་བཅས་པའི་ཟུར་མིག་རྗེས་སུ་ཆགས། །གསེར་གྱི་གེ་སར་འཇམ་པའི་ཡུ་བ་འཁྱུགས། །མཐིང་གི་དཔལ་བེའུ་རྡོ་རྗེ་སྙིང་པོར་ཞུགས། །ཙྪིནྡྡ་མ་ིའི་ཁ་དོག་མཐིལ་ན་སྦས། །ཟླ་བ་ཉི་མ་མཚམས་སྤྲིན་ཨཉྫ་ན། །བསྲེས་པའི་མཁའ་སྣང་མཁའ་དང་མཉམ་པར་བཀོད། །བྱང་ཆུབ་སེམས་ཀྱི་ཆེ་བ་མི་དམན་པ། །འཇིག་རྟེན་ཀུན་ཏུ་རྣམ་པར་རྒྱས་པ་ཅན། །བསིལ་བའི་མུ་ཁྱུད་ངལ་འཚོར་བསྟེན་པ་དང་། །བརྒྱ་སྟོང་རི་བའི་དྲི་མེད་ཀཱ་ཤི་ཀ །དུཿཀཱུ་ལ་དང་པཉྩ་ལི་ཀཱ་ཡི། །གོས་ཟུང་ཕན་ཚར་བགྲན་པ་བཞིན་ཏུ་བགོས། །

― LT28_Page_0092 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་ལས་དུ་མར་འཕོ་བའི་རིན་ཆེན་དང་། མུ་ཏིག་དོ་ཤལ་མིག་འཕྲུལ་བཞིན་ཏུ་དཔྱངས། །གསར་དུ་ཁ་བྱེ་དྲི་ཞིམ་གཡོ་རྣམས་ཀྱིས། །ཚིམས་པས་བུང་བའི་ཕྲེང་བ་འཁོར་ལྡན་པ། །པུཎྜ་རཱཾ་ཀའི་དྲྭ་བ་དྲྭ་ཕྱེད་འཛིངས། །མཐིང་ཤུན་གསང་ཁེབས་གསེར་གྱི་པ་ཏྲ་འཁྱུགས། །ནམ་མཁའི་ངོས་སུ་གློག་གི་རྩེ་དགའ་ངོམས། །སྒྲ་ལ་རྣམ་བརྟགས་སིལ་སིལ་སྒྲོགས་ཁོ་ནས། །ཐོག་མར་དོན་རྣམས་གླག་ཅོར་སྨྲ་བྱེད་པ། །ནོར་བུའི་འོག་བག་གསེར་གྱི་དྲིལ་ཆུང་དང་། །ཕྱག་ཞབས་དག་ཏུ་གཡེར་ཁ་འཁྲོལ་ལྡན་པའི། །ཤེལ་དང་བཻཌཱུ་རྱ་ཡི་གདུབ་ཀོར་འཐབ། །ཏིང་འཛིན་བྱེ་བ་འབུམ་ཕྲག་ལང་ཚོ་ཡིས། །མྱོས་པའི་ཡན་ལག་རྫོགས་པར་འབར་མཐོང་ནས། །དམ་པ་སློང་བའི་ཆགས་ལྡན་མ་དུད་པའི། །ཡིད་ཀྱི་གནམ་རུ་རང་དབང་མེད་པར་བཀུག །བ་སྤུའི་ཁུང་བུ་བསོད་ནམས་བྱེ་བ་ལས། །གྲུབ་པ་རེ་རེ་ཞིང་ཡང་འཇིག་རྟེན་ཁམས། །རྣམ་པར་ཕྱེ་བ་རབ་འབྱམས་སྤྱོད་ཡུལ་ཀྱང་། །ཟླ་བ་ག་པུར་ཙནྡན་ཆུ་རྒྱུན་གྱིས། །ཀུན་ཏུ་བཀྲུས་པའི་འཚོ་བ་རངས་པར་བྱས། །རྟག་ཏུ་ཙནྡན་ཆུ་ཡིས་ལུས་གཤེར་ལ། །དཀར་མིན་ཨུཏྤལ་གཞོན་ནུ་རྣ་བར་འཛུད། །དྲི་ཡི་ཐིག་ལེ། །ཕྱི་ནང་གི་གནས་སུ་གྲུབ་པ་སྦྱིན་པ། །གནས་དང་གནས་སུ་བགོ། །ཙུམྦ་ན། ཁ་སྦྱོར་གྱི་བདེ་ཀློང་དུ་འཁྱིལ་ག་ ཡི་སྦྲང་། །སྙིང་རྗེ་ཆེན་པོ་དམིགས་པ་མེད་པས་བརླན་པ། ཆང་གཞིབ་བ་སོགས། །སྟོང་ཉིད་གསང་མཛོད་འཛིན་པའི་ཕྱིར། །

― LT28_Page_0093 ―

^{[མ་དཔེ་གཟིགས་ན་འདིར་གནོན།]}

[Full Size]

དྲི་ཟའི་ན་ཆུང་ཇི་འདྲ་དེ་འདྲའོ། །ཡོན་པོར་འཁྱོགས་ཤིང་དྲང་པོར་བསྲང་བ་སོགས། །རྡོ་རྗེའི་སྐུ་ལ་རྣམ་འགྱུར་ཅི་དགར་རྫོགས། །ཀུན་ནས་ཞལ་ཕྱག་ཕ་མཐའ་ཡས་མོད་ཀྱི། །མཐའ་གཉིས་ཞབས་ཀྱི་སྐྱིལ་ཀྲུང་སྲིད་དང་ཞིར། །སོ་སོར་མི་ཕྱེད་ནམ་མཁའི་ཀློང་དུ་བཅས། །མཛེས་པའི་གྲགས་ལྡན་དག་བྱེད་རྡུལ་དམར་སྐྱུགས། །བུང་བས་འཐུང་བའི་པདྨོ་རབ་མང་ཡང་། །འབྱེད་དང་གསོ་བ་ཟུང་སྡེབ་ཀརྤཱུ་རའི། །འོད་ཀྱི་ཐུར་མ་གཅིག་གིས་འཇིག་རྟེན་འདིར། །ལས་ཀྱི་བརླན་བཙས་དམུས་ལོང་ཐོབ་ཇི་སྙེད། །ཤེས་རབ་མིག་གི་ཀུ་མུད་ཁ་འབྱེད་པ། །བདུད་རྩིའི་ཐིག་ལེ་འདི་ཁོ་ན་ཡི་གསོས། །བསིལ་བའི་ཆབ་ཀྱིས་མ་བྲན་འགའ་མེད་པས། །མཛེས་པ་གཞན་ལས་ལྷག་པར་འཛེགས་བཞིན་ཏུ། །གཞན་གྱི་མཚར་སྡུག་སྒྲུབ་པ་ཁོ་ནར་གྱུར། །འདི་ལྟར་ཉོན་མོངས་ལྷན་ཅིག་སྐྱེས་ཀྱང་དགྲ། །མ་འདྲིས་ཁྱོད་ཀྱི་ཡེ་ཤེས་གཉེན་ཏུ་གྱུར། །ལྷན་སྐྱེས་ལུས་ཀྱི་འབྱུང་བ་ནད་གྱུར་ལ། །ཕན་བྱེད་དགོན་པར་འཁྲུངས་པའི་སྨན་བཞིན་ནོ། །ལེགས་བྱས་གྲུར་ཞུགས་དེད་དཔོན་བླ་ལྡན་བཅས། །འབད་བས་བཙལ་ན་མཚར་སྙམ་མི་བགྱིད་དེ། །མ་བསྒྲུབ་སྲིད་མཚོ་ཉམ་ངར་ཡིད་བཞིན་ནོར། །སྨོན་ལམ་ཡུལ་ཕྱིར་མགྲོན་ཏུ་ཁུགས་པ་འདི། །གང་དེར་ནུས་པའི་ཚོན་རིས་བཀྲག་ཙམ་དུ། །མ་ཟད་བསོད་ནམས་མེ་ལོང་དྭངས་པར་ངེས། །ཉམ་ངའི་གྲོང་དུ་

― LT28_Page_0094 ―

^{[མ་དཔེ་གཟིགས་ན་འདིར་གནོན།]}

[Full Size]

ཉེས་པའི་མེས་གདུང་བར། །བསིལ་བྱེད་དལ་འགྲོའི་ཚེས་དང་མཚུངས་གཞན་མེད། །འཇིག་རྟེན་འདི་ན་སྙིང་བརྩེའི་གཞན་དབང་ཅན། །བདག་ལ་ཉེ་བ་གང་དེར་མགུ་བྱ་ཡིན། །ཐར་འདོད་དངོས་པོར་བརྐམ་ཆགས་ཀྱིས་བསྙེགས་ཀྱང་། སྨིག་རྒྱུར་མགྲིན་པ་བཏེགས་པའི་ངལ་བ་ལས། །རེ་བ་མ་འཚལ་རི་སྐྱེས་བུ་མོ་རྣམས། །ཉེ་བའི་བུ་བཞིན་དགོངས་ནས་དུས་ཀུན་ཏུ། །མི་འཇིགས་སྦྱིན་ཞེས་དམ་བཅའ་ཐུགས་རྗེའི་ལྷ། །རྣམ་ཐར་རྒྱ་མཚོའི་རླངས་པ་གཡོ་བའི་ལྕེ། །ཆོས་ཁམས་མཁའ་ལ་ད་ཙམ་མི་དཀྲིགས་སམ། །ཤ་བ་རིས་བསྒྱུར་གླིང་བུ་རི་དྭགས་ཀྱིས། །མ་ཤེས་ཆགས་པས་བཀུགས་པའི་བསླུ་བྲིད་ལས། །སྲོག་གི་གཤེད་མ་སྐད་ཅིག་ལྷུང་བ་བཞིན། །སྤུ་གྲིར་རབ་ཆགས་སྦྲང་རྩིའི་མངར་བ་ལ། །མི་ཚེ་ཡུད་ཙམ་འབྲལ་བར་མ་ཕོད་ནས། །འདི་དང་གཞན་ཏུ་འཇིགས་པའི་ཁུར་དུ་མ། །ལས་བཞིན་སྐལ་པར་བབས་པ་ཁོ་ན་ཡིས། །ཆུ་གཏེར་རྣ་རྒྱན་ཅན་གྱི་ཁོངས་གཏམས་ཤིང་། །བདེ་འབྲས་རྒྱུ་སྤངས་འདི་གཟིགས་བརྩེ་ལྡན་འགའ། །ཡོད་ན་སྔོན་ཆད་བསྐལ་པ་དེ་སྙེད་དུ། །ངལ་བའི་འབྲས་བུས་དབུགས་དབྱུང་ད་ནི་དུས། །སེང་ལྡེང་ཆལ་སོགས་སྟུག་པོའི་ནགས་ཁྲོད་དང་། །གླིང་དང་གླིང་ཕྲན་གྲོང་ཁྱེར་གྲོང་རྡལ་དང་། །བྲག་རིའི་བྱ་སྐྱིབས་ལྗོངས་ཀྱི་ཚང་ཚིང་དབུས། །ཆུ་ཀླུང་གདེང་ཀ་རི་རྩེ་རི་རབ་ཟོམ། །ཕུག་དང་རི་ཁྲོད་འབྲོག་ཆེན་དགོན་པའི་

― LT28_Page_0095 ―

^{[མ་དཔེ་གཟིགས་ན་འདིར་གནོན།]}

[Full Size]

གནས། །སྨད་འཚོང་ཆང་འཚོང་གཡུང་མོ་ཀླ་ཀློ་སོགས། །རིགས་ངན་གྲོང་ཁྱེར་དེ་དག་ཐམས་ཅད་དུ། །རིག་འཛིན་སྔགས་འཆང་མོ་དང་མཁའ་འགྲོ་མ། །སྡུག་དང་མི་སྡུག་རྒན་གཞོན་བར་མའི་དབྱིབས། །བཟའ་བཏུང་འཁྲིག་པའི་དེ་ཁོ་ན་སྟེར་སོགས། །ཞི་ཆགས་གཏུམ་མོའི་དུམ་བུ་སྣ་ཚོགས་ཀྱིས། །དབང་མཛད་གཡོ་མཛད་མ་ལུས་འཇིག་རྟེན་འདིར། །གང་ཡང་དེ་འབྲེལ་ཕྲ་མོས་རྙེད་པ་མཆོག །ལག་རྩེར་རང་ནོར་བཞིན་ཏུ་གེགས་མེད་པར། །འོང་ཞེས་དཔལ་གྱི་མགུར་ནས་བདེན་པའི་ལྗགས། །ངེས་པར་དོན་ལྡན་གཡོ་བ་ཡིན་ན་ང་། །རྩེ་གཅིག་གུས་པའི་ཡིད་ཀྱི་ཤིང་རྟ་ལ། །རེ་བའི་རིན་ཆེན་ཅུང་ཟད་སྦྱིན་པར་འོས། །ཐལ་མོ་ཡ་གཅིག་བསྣུན་པས་སྟོབས་ཆེན་གྱད། །གཞན་སྟོབས་ནོངས་ལ་བསྔགས་པ་བསྒྲགས་ཐོས་ན། །གདེངས་པ་ཙམ་གྱིས་ཡིད་སྲུབས་དཔུང་དང་རིས། །གཅིག་ཆར་འཇོམས་བྱེད་འདི་ཙམ་ཡ་མཚན་བཞིན། །ངང་ཚུལ་མི་འཇའ་འབྱུང་པོ་བྲང་འགྲོ་བ། །གདུག་པའི་ཁ་རླངས་སྲིད་རྩེར་བརྐྱང་རྣམས་ལ། །མཐུ་སྟོབས་དྲག་པོར་འབེབས་པའི་མ་གི་ཏས། །མགོ་ལ་གནམ་ལྕགས་ལྷུང་བ་བཞིན་ཏུ་མཛོད། །རྙེད་དཀའ་མི་ཡི་ལུས་ཀྱི་རིན་ཆེན་གྲུ། །ཚུལ་མིན་རྣམ་གཡེང་རླུང་གིས་རབ་འཕུལ་ནས། །ངན་འགྲོ་ཆུ་སྲིན་ཁ་རུ་ཆུད་ལ་ཉེ། །སྐྲགས་ཤིང་སྡང་བས་བ་སྤུ་རབ་གཟིངས་ཏེ། །འདི་འདྲའི་ཅི་བྱ་བརྟོལ་དང་བྲལ་ལགས་ན། །

― LT28_Page_0096 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱེ་ཧུད་འཕགས་མ་བདག་གི་སྐྱབས་གནས་ཁྱོད། །ཐུགས་རྗེས་ཅུང་ཟད་མི་གཟིགས་གང་དུ་གཡེལ། །ཚེ་རབས་ཀུན་ཏུ་རྣམ་དཀར་གྱི་ན་ལ། །གོམས་པས་བྱང་ཆུབ་འཚོ་བ་བཀྲེན་པ་བདག །བརྟན་པ་ཕུན་ཚོགས་དགྱེས་བཞིན་མ་བསྩལ་ན། །སླད་ནས་ཡི་ཆད་མིག་གིས་བསྒྲིབ་པར་འགྱུར། །སྟེས་ཏེ་བླ་བཅོལ་སྨྲ་བ་མ་ལགས་ཀྱི། །ཅི་སླད་དུས་རིང་འདི་ལྟར་བཏང་སྙོམས་འདོར། །སྲིད་པའི་དགོན་པ་འདི་ལ་མི་འཇིགས་ཕྱག །ལྷུག་པར་བརྐྱང་བའི་བརྩེ་ལྡན་འགའ་ཡོད་དམ། །ཐུགས་རྗེའི་གྲིབ་བསིལ་ཡངས་པའི་ཁོར་ཡུག་ལ། །བདག་ནི་འབད་པས་རྩེ་གཅིག་སྙེགས་བྱས་ཀྱང་། །ལྗོན་ཤིང་ཙམ་གྱི་ཕོངས་པའང་མ་སྩལ་བས། །འཕགས་མ་ལ་ནི་ཕྱོགས་རིས་མ་མཆིས་ན། །ཅིག་བདག་ཉིད་བསྐལ་པ་བརྒྱ་རྣམས་སུ། །བྱས་པའི་འབྲས་བུ་གང་དེ་འདི་འདྲའོ། །སྡུག་བསྔལ་ཆོམ་རྐུན་དུ་མས་རྟག་མནར་བ། །འཁོར་བ་འཇིགས་སུ་རུང་བའི་འབྲོག་ཆེན་འདིར། །ཅུང་ཟད་ཙམ་ཡང་བསྟི་བར་མ་བྱས་པར། །བདག་གིས་སེམས་དམྱལ་མཐའ་མེད་ཡང་ནས་ཡང་། །མྱོང་ཤེས་དེ་རིང་ཡི་ག་རབ་ལྡོག་སྟེ། །འདྲེན་བྱེད་ངོགས་སུ་མ་ཆིས་མུ་ཏིག་གི། །འོད་ལྡན་དོག་པ་རིང་ཐུང་འདི་བཀུ་ནས། །འཁྱམས་པས་ཇི་ལྟར་མགྲོན་པ་ཡིད་བྱེད་ལྟར། །རྟག་ཏུ་ཁྱོད་ལ་ཡི་ག་རབ་ཤོར་བའི། །བདག་སྡུག་པ་ལ་དངོས་གྲུབ་འབྲས་བ་ཡི། །དབུགས་དབྱུང་ཅུང་ཟད་ད་ལྟ་མེད་གྱུར་ན། །ཕྱིས་ནས་ཁྱད་

― LT28_Page_0097 ―

^{[མ་དཔེ་གཟིགས་ན་འདིར་གནོན།]}

[Full Size]

པར་འགའ་ཡང་མ་ཐོབ་པར། །ཉོན་མོངས་གདུང་བས་མྱ་ངམ་ཐང་འདི་རུ། །འགྱོད་བཞིན་གདོན་མི་ཟ་བར་གུམ་པར་འགྱུར། །ཏིང་འཛིན་རྒྱ་མཚོ་ལྟ་བུ་བརྙེས་བཞིན་ཏུ། །ཐར་འདོད་ཡོངས་ལ་བསམ་གཏན་མི་སྩལ་བར། །འགའ་ཞིག་སྐམ་པ་སེལ་བས་ཅི་ལ་ཕན། །ཐུགས་རྗེ་ནམ་མཁའ་ལྟ་བུ་མངའ་བཞིན་ཏུ། །འགྲོ་ཀུན་སྲིད་ལས་མྱུར་དུ་མི་བསྒྲལ་བར། །འགའ་ལ་མཐོང་བ་སྩལ་བས་ཅི་ཞིག་བྱ། །རྟག་བརྟན་མི་ཤིགས་རྡོ་རྗེའི་ཚེ་བརྙེས་ནས། །ཀུན་ལ་བདུད་རྩིའི་བཅུད་ལེན་མི་སྦྱིན་པར། །རེ་རེས་འཆི་མེད་གྲུབ་ཀྱང་སུ་ཡིད་དགའ། །མཁྱེན་རབ་ཉི་ཟླའི་གཟི་འོད་སྟོང་འབར་བས། །འབད་མེད་མ་རིག་མུན་པ་མི་སེལ་བར། །འབད་པས་དམ་པ་རྙེད་ཀྱང་ཅི་སྟེ་ཚིམས། །ཁྱོད་ལས་ཆེ་བ་ཐོབ་པར་རེ་ན་ཡང་། །བདག་ལ་བདག་འཛིན་བུབ་ཁ་འདི་བྱུང་བས། །ཕྱིར་འགྱེད་ནན་ཏུར་ཅི་བྱས་ཚེ་འདི་རུ། །འབུང་གསུམ་བཏོན་པའི་སྡུག་བསྔལ་རྒྱུ་འབྲས་ལ། །བདེ་བའི་གོ་སྐབས་ཉི་ཚེར་མ་མྱོང་བས། །ཁྱོད་ཐུགས་ཟག་མེད་དགའ་བའི་ཆུས་བརླན་པའི། །བགོ་སྐལ་ཙམ་ཞིག་རྗེས་སུ་མི་སྩལ་ན། །སྲིད་ཞིའི་མཐའ་ལས་འཕགས་པའི་སྟོང་ཉིད་དང་། །སྙིང་རྗེ་གཟུགས་བརྙན་བཞིན་ཏུ་མ་གྱུར་ཏམ། །ཀྱེ་མ་རྗེ་བཙུན་ཐུགས་རྗེའི་བདག་ཉིད་གསོན། །འཇིག་རྟེན་མི་ཚེ་འདི་ནི་འདི་ལྟར་ཐུང་། །གློ་བུར་ན་ཚ་རྐྱེན་ངན་འདི་ཙམ་རྒོད། །ལས་དང་ཉོན་

― LT28_Page_0098 ―

^{[མ་དཔེ་གཟིགས་ན་འདིར་གནོན།]}

[Full Size]

མོངས་དྲག་པོས་འདི་ལྟར་ནོན། །དགེ་བའི་ལས་ལ་བརྩོན་འགྲུས་འདི་ཙམ་ཞན། །ལྷ་དང་བླ་མའི་ཐུགས་རྗེས་འདི་ལྟར་བཏང་། ཁམས་གསུམ་འཁོར་བའི་རྒྱ་མཚོར་འདི་ལྟར་འཁོར། །འཆི་ཀའི་གནད་གཅོད་སྡུག་བསྔལ་ཚབ་རེ་ཆེ། །བར་དོའི་མུན་པ་ནག་པོ་གཏིང་རེ་ཟབ། །འཇིགས་སྐྲག་ལོག་པའི་འཁྲུལ་སྣང་ཡ་རེ་བ། །འཇིག་རྟེན་འདིར་ཡང་ཅི་བྱ་བརྟོལ་མེད་ཅིང་། །ཕྱི་མ་གར་འགྲོའི་ཆ་ཡང་མ་འཚལ་བར། །ད་ལྟ་འཆི་ན་གཏད་སོ་ཅང་མེད་པར། །སྡུག་གུས་མ་མས་བོར་བའི་དྭ་ཕྲུག་གམ། །དམུས་ལོང་གཉེན་སྤངས་འདྲ་བའི་མགོན་མེད་བདག །ད་ནི་ཐུགས་རྗེས་ཟུངས་ཤིག་དུས་ལ་བབ། །རང་ལ་བལྟས་ན་རང་ཡིད་མ་ཆེས་ལ། །གཞན་ལ་བལྟས་ཀྱང་ཡི་མུག་ཁོ་ན་སྐྱེ། །ལྟ་སྤྱོད་མཐོང་ན་སྙིང་རླུང་གཏིང་ནས་འཁྲུགས། །རྣ་བས་ཐོས་ཀྱང་སྐྱོ་ཤས་ཁོང་ནས་ལྡང་། །འདི་འདྲ་དུས་ངན་བསྟན་པའི་མར་ཤམ་འདིར། །བདག་ནི་ཁྱེད་ལ་རེའོ་ཐུགས་རྗེ་ཅན། །བདག་ཅག་སེམས་ཅན་བསམ་བརླག་བྱིས་པའི་ངང་། །བདེ་བ་འདོད་ཀྱང་སྡུག་བསྔལ་ཐོག་ཏུ་བབ། །ཁྱོད་ལ་གཡར་དམ་བཙན་པོ་མཆིས་ཞེ་ན། །ཅུང་ཟད་ཙམ་ཞིག་བརྩེ་བ་མི་འབྱུང་ངམ། །ངན་སོང་འཁོར་བར་བཏང་ངམ་འཕགས་མ་མཁྱེན། །མཐོ་རིས་ཐར་པར་འཁྲིད་དམ་འཕགས་མ་མཁྱེན། །མི་ཚེ་སྟོང་ཟད་བཅོལ་ལམ་འཕགས་མ་མཁྱེན། །ཉམ་ངའི་བར་ཆད་བསལ་ལམ་འཕགས་མ་

― LT28_Page_0099 ―

^{[མ་དཔེ་གཟིགས་ན་འདིར་གནོན།]}

[Full Size]

མ་མཁྱེན། །བདུད་ལ་རྒྱལ་ཁ་བསྐུར་རམ་འཕགས་མ་མཁྱེན། །དཀོན་མཆོག་བདེན་རྟགས་བོར་རམ་འཕགས་མ་མཁྱེན། །སེམས་རྒྱུད་ཆོས་དང་བསྲེའམ་འཕགས་མ་མཁྱེན། །མཆོག་ཐུན་དངོས་གྲུབ་སྦྱིན་ནམ་འཕགས་མ་མཁྱེན། །ད་ལྟའི་དུས་དང་རྨུ་རྒོད་བདག་འདྲ་ལ། །ཐུགས་རྗེ་ནུས་པ་མངོན་སུམ་བསྟན་མེད་ན། །བློ་སེམས་ཆོས་དང་འདྲེས་ནས་གྲུབ་པ་གཉིས། །མངོན་བྱས་དུས་བཟང་བསྐལ་བཟང་སྐྱེ་བོ་རྣམས། །རྒྱལ་བ་རབ་འབྱམས་ཐུགས་རྗེ་འཇུག་པ་ལ། །སླར་ཡང་རྗེས་སུ་འཛིན་པས་ཅི་ཞིག་བྱ། །སྔོན་ཚེ་བདེ་གཤེགས་རྔ་སྒྲར་གཡར་ལམ་དུ། །རྒྱལ་བ་ཀུན་ལས་ཐུགས་བསྐྱེད་ལྷག་འཚལ་ན། །རྒྱལ་བ་ཀུན་གྱིས་མ་ཐུལ་བདག་ཡིན་པས། །ད་ལྟ་ཉིད་དུ་བརྩེ་བའི་ཕྱག་རྐྱོངས་ཤིག །ཉིན་མོ་རྣམས་སུ་ཆགས་སྡང་འཁོར་ལོ་འཁྲུགས། །མཚན་མོ་ཐམས་ཅད་གཏི་མུག་གཉིད་ཀྱིས་ནོན། །བར་སྐབས་ལོང་གཏམ་ལྡབ་ལྡིབ་གཡེང་བས་ཁྱེར། །རེས་འགའ་ཟ་ཞིང་རེས་འགའ་ལོང་འདུག་བྱེད། །སྐྱེས་ནས་མ་ཤིའི་བར་དུ་འདི་འདྲས་གཡེངས། །སྡིག་པའི་ལས་ནི་སྦྱོར་དངོས་རྗེས་གསུམ་ཚང་། །དགེ་བ་བྱས་ཀྱང་བྱིས་པའི་ཐལ་རྩེད་འདྲ། །ཀྱི་ཧུད་སྙིང་མེད་པོ་ལ་ད་གཟིགས་ཤིག །སྲིད་མཚོ་ཀུན་རྟོག་ན་ཀྲས་དཀྲུགས་བྱས་པར། །ཕ་མཐའ་ངེས་སྒྲོལ་ཏཱ་རེའི་སྙན་ཚིག་གི། །གདོས་པ་འཛིན་པ་ཞི་བསིལ་ཆུ་

― LT28_Page_0100 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱུན་ཅན། །ཟླ་བཞིན་མ་ཀྱེ་རང་གིས་སྔར་བསྒྲུབས་པ། །འཇིག་རྟེན་གསུམ་དུ་འཁོར་ལོས་སྒྱུར་བ་ཡི། །རྒྱལ་རིགས་སྤྱི་བོ་ཉིད་ནས་དབང་བསྐུར་བ། །བདུད་རྩིའི་ཐིགས་པ་གང་དེ་བདག་ལ་སྩོལ། །རེ་བས་བསྒྲིམས་ནས་སྔོན་ཆད་བསླད་གྱུར་གྲང་། །ད་ནི་ལུས་སེམས་ལྷོད་དེ་ཁྱོད་ཁོ་ནར། །མགོ་བོར་ཕྱོགས་གཏད་བགྱིད་ལས་བྱར་མེད་པས། །ཡུམ་ཆེན་ཆོས་སྐུའི་གོ་འཕང་མྱུར་ཐོབ་ཤོག །ཅེས་རང་ལོ་ཉེར་བཞི་བར་མེ་སྤྲེལ་ཆུ་སྟོད་ཟླ་བའི་ཡར་ཚེས་ལ་གུས་པས་གསོལ་བ་བཏབ་པ་དཔལ་སྤུངས་སྒྲུབ་ཁང་དུའོ། །༈། །འཕགས་མའི་གསོལ་འདེབས་གྲུབ་པའི་ངག་ཅེས་བྱ་བ། །ཨོཾ་སིངྡྷྡྷི་ར་སྟུ། དུས་གསུམ་རྒྱལ་བ་རྒྱ་མཚོ་སྐྱེད་པའི་ཡུམ། །ཞི་ལ་མི་གནས་སྙིང་རྗེའི་འཛུམ་རླབས་གཡོ། །སྲིད་པས་མ་གོས་འདམ་སྐྱེས་པདྨ་བཞིན། །གང་གི་རིན་ཆེན་མཚན་ཙམ་འཛིན་པས་ཀྱང་། །དུས་མིན་འཆི་སོགས་མི་བཟད་འཇིགས་པའི་ཚོགས། །བརྒྱད་དང་བཅུ་དྲུག་མཐའ་ཡས་སྲུང་མཛད་མ། །ཆོས་སྐུའི་ཞིང་ན་ཤེས་རབ་ཕ་རོལ་ཕྱིན། །ལོངས་སྐུའི་ཞིང་ན་རིགས་ལྔའི་ཡུམ་ཆེན་ལྔ། །སྤྲུལ་སྐུ་འཕགས་མ་སྒྲོལ་མ་ཐུགས་རྗེའི་གཏེར། །ཆོས་དབྱིངས་ནམ་མཁའི་མཐའ་དང་སེམས་ཅན་ཁམས། །ཇི་སྲིད་ལས་དང་ཉོན་མོངས་མཐར་ཐུག་བར། །བསམ་གྱིས་མི་ཁྱབ་རྣམ་འཕྲུལ་སྤྲིན་གྱིས་གང་། །བདེ་ཆེན་ཞིང་དུ་གོས་དཀར་

― LT28_Page_0101 ―

^{[མ་དཔེ་གཟིགས་ན་འདིར་གནོན།]}

[Full Size]

ཚེ་ཡི་ལྷ། །གྲུ་འཛིན་རི་ལ་ཡིད་བཞིན་འཁོར་ལོ་ཡུམ། །བསིལ་ལྡན་སྐྱེ་དགུའི་སྐྱབས་གནས་བཀའ་དྲིན་ཅན། །འཇའ་ལུས་ཌཱ་ཀི་ཡེ་ཤེས་མཚོ་རྒྱལ་མ། །ཇི་སྲིད་སེམས་ཅན་རེ་རེའི་མདུན་ན་ཡང་། །སྙིང་རྗེ་ནུས་པར་བཅས་ཏེ་རྟག་ཏུ་གནས། །ཕན་བདེ་གཅིག་གི་ཕྱིར་ཡང་འཁོར་བ་ན། །བརྩེ་བ་མི་ལྷོད་ཐབས་མཁས་ཕྱག་རིང་བརྐྱང་། །མཁའ་ཁྱབ་ཞིང་དུ་དཀོན་མཆོག་མ་ལུས་པའི། །ཡོན་ཏན་ཇི་སྙེད་ཁྱོད་ཀྱི་རོལ་པ་སྟེ། །འཕགས་བཞིའི་རྒྱུད་ཀྱི་རིགས་གཉིས་དཔལ་རྒྱ་མཚོ། །རྒྱུན་མཐའི་ཡེ་ཤེས་ཟབ་ཅིང་ཕྲ་བ་དང་། །སྲིད་ལམ་འདུས་བྱས་འདུས་མ་བྱས་པའི་དགེ། ཁམས་ཀྱི་རྒྱུན་ལས་རྣམ་པར་དཀར་གང་ཡིན། །དེ་དག་མ་ལུས་འཕགས་མའི་གར་ཡིན་པས། །མ་གཅིག་བྱིན་རླབས་རྣམ་འཕྲུལ་བསམ་མི་ཁྱབ། །སྤངས་རྟོགས་ཡོན་ཏན་ནམ་མཁའི་ཕ་མཐར་བརྒལ། །དུས་གསུམ་རྒྱལ་བའི་སྣང་བརྙན་རྫོགས་པར་བསྐྲུན། །རྒྱལ་བས་ཁྱོད་ཚུལ་ཆ་ཙམ་བརྗོད་པར་དཀའ། །སྐྱབས་གནས་མཐར་ཐུག་ཐུགས་རྗེའི་གཞན་དབང་ཅན། །ཁྱོད་ཉིད་ཁོ་ནར་སྙིང་ནས་མོས་པའི་བློས། །བྱང་ཆུབ་བར་དུ་བདག་སོགས་སྐྱབས་སུ་མཆི། །འཇིག་རྟེན་ཁམས་ན་དཔལ་འབྱོར་ཇི་སྙེད་དང་། །འགྲོ་ཀུན་དུས་གསུམ་བསགས་པའི་ལེགས་སྤྱད་དང་། །བདག་ལུས་ཡན་ཆད་ཆགས་མེད་བློ་ཡིས་འབུལ། །མི་དགེ་སྡིག་པའི་ལས་

― LT28_Page_0102 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་མཐོལ་ཞིང་བཤགས། །དགེ་ལ་ཡི་རང་ཆོས་འཁོར་བསྐོར་བར་བསྐུལ། །མྱ་ངན་མི་འདའ་ཡུན་རིང་བཞུགས་གསོལ་འདེབས། །དགེ་ཀུན་ཡུམ་གྱི་གོ་འཕང་མཆོག་ཏུ་བསྔོ། །པད་དཀར་མཛེས་སྡུག་ཡོངས་སུ་བསྟེན་པ་ཡི། །ཟླ་བའི་དབུས་ན་དྲི་མ་མེད་པའི་སྐུ། །འཆི་མེད་རྡོ་རྗེ་བདེ་བའི་ལང་ཚོ་ངོམས། །མི་འགྱུར་མི་ཤིགས་བདུད་རྩིའི་དྭངས་མ་རྒྱས། །ནོར་བུ་འབར་བའི་འོད་ཟེར་རྣོན་པོ་འཕྲོ། །འདོད་དགུའི་རེ་བ་མཐའ་དག་སྦྱིན་པར་མཛད། །རྩེ་གཅིག་གུས་པས་ཁྱོད་ལ་གསོལ་བ་འདེབས། །བདག་སོགས་འགྲོ་བའི་ལས་ཉོན་སྡིག་སྒྲིབ་དང་། །ནད་གདོན་བར་ཆད་ཞི་བའི་དངོས་གྲུབ་སྩོལ། །ཚེ་དང་བསོད་ནམས་དཔལ་འབྱོར་སྙན་གྲགས་དང་། །བློ་གྲོས་ཉམས་རྟོགས་རྒྱས་པའི་དངོས་གྲུབ་སྩོལ། །བྱིན་རླབས་ཐིག་ལེ་སྲིད་ཞིའི་དྭངས་མའི་བཅུད། །ཡིད་ལ་གང་འདོད་དབང་སྡུད་དངོས་གྲུབ་སྩོལ། །དུག་ལྔ་དུག་གསུམ་གཟུགས་ཅན་གཟུགས་མེད་ཀྱི། །མི་མཐུན་བསམ་སྦྱོར་ཚར་གཅོད་དངོས་གྲུབ་སྩོལ། །མདོར་ན་འདི་བཟུང་བྱང་ཆུབ་སྙིང་པོའི་བར། །མི་འབྲལ་ཁྱོད་དང་འགྲོགས་པའི་སྐལ་བཟང་གིས། །ཉེས་བརྒྱའི་ཆུ་འཛིན་གཞར་ཡང་མི་ལྡང་བར། །ལེགས་ཚོགས་ཡོན་ཏན་ཡར་ངོའི་ཟླ་ལྟར་རྒྱས། །རིང་མིན་ཟུང་འཇུག་ཤེས་རབ་ཕར་ཕྱིན་གྱི། །གོ་འཕང་མཆོག་གིས་བདག་གཞན་རྩེན་གྱུར་ཅིག །ཅེས་པའང་ས་ཁྱི་ཆོ་འཕྲུལ་ཟླ་བའི་བཅུ་བཞི་རྒྱལ་ཕུར་འཛོམ་པའི་འགྲུབ་

― LT28_Page_0103 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱོར་གྱི་སྔ་དྲོར་འོག་མིན་ཀརྨའི་གདན་ས་ནས་བཙུན་པ་ཡོན་ཏན་རྒྱ་མཚོས་གསོལ་བ་བཏབ་པའོ།། ༈ །།འཕགས་མའི་གསོལ་འདེབས་འཆི་མེད་རྡོ་རྗེའི་གླུ་ཞེས་བྱ་བ། །ཨོཾ་ཨ་མཱར་ི་ཛཱི་བནྟུ། མི་འགྱུར་རྡོ་རྗེའི་སྐུ་བརྙེས་མ། །བདུད་བཞིའི་གཡུལ་ལས་རྒྱལ་བ་མ། །མི་འཆེ་ཚེ་ཡི་མཆོག་སྦྱིན་མ། །བཅོམ་ལྡན་ཡིད་བཞིན་འཁོར་ལོར་འདུད། །ལྷག་པའི་ལྷ་དང་བླ་མའི་སྐུ། །དབྱེར་མེད་གཅིག་ཏུ་འདུས་པ་ནི། །བདག་སོགས་དད་པའི་མིག་ངོ་རུ། །འཕགས་མ་སྒྲོལ་མར་བསྟན་ལ་འདུད། །ཁྱོད་ཐུགས་ཞི་ལས་མ་གཡོས་ཀྱང་། །ཉམ་ཐག་འགྲོ་ལ་དབུགས་སྩོལ་ཕྱིར། །སྒྱུ་འཕྲུལ་དྲ་བའི་རོལ་པ་ནི། །རྣམ་འགྱུར་ཉེར་གཅིག་སྟོན་ལ་འདུད། །སྔོན་གྱི་ལས་ཀྱིས་བདས་པ་ཡི། །སྙིགས་མའི་སྐྱེ་ལ་འཇིགས་རྣམས་ཀྱིས། །མི་འདོར་ལུས་དང་གྲིབ་མ་བཞིན། །དེ་ཀུན་ཁྱོད་མཚན་དྲན་པས་བཟློག །དབྱིབས་དང་སྔགས་དང་བསམ་གཏན་གྱིས། །ཡུན་རིང་འདྲིས་པར་མ་བྱས་ཀྱང་། །ཁྱོད་མཚན་ཡིད་ལ་ཡོད་ཙམ་གྱིས། །འཇིགས་པ་བརྒྱད་ལ་སོགས་པ་འཇོམས། །སྐྱེ་ནས་ལས་ཀྱིས་འབྲེལ་བ་དང་། །རིགས་སྔགས་སྙིང་ལ་བཀོད་པ་དང་། །གསོལ་བ་རིང་དུ་བཏབ་པ་ལ། །ཕྲ་མོའི་འཇིགས་ལས་ཅིས་མི་སྐྱོབ། །དེ་ཕྱིར་ཡིད་བཞིན་ནོར་མཚུངས་པའི། །དལ་རྟེན་སྐྱེད་པའི་ཟ་མ་ཏོག །འཇིག་རྟེན་

― LT28_Page_0104 ―

^{[མ་དཔེ་གཟིགས་ན་འདིར་གནོན།]}

[Full Size]

གཞན་ཏུ་འགྲོ་བ་ཡི། །ལྟས་ཀྱི་མཚན་མ་ངན་པས་བཅིངས། །འཕགས་མའི་ཐུགས་རྗེའི་ཕྱག་བརྐྱང་ལ། །དོགས་པའི་དྲྭ་བ་བཅད་པ་དང་། །མི་འཇིགས་རིང་དུ་འཚོ་བ་ཡིས། །ཡིད་ལ་བདེ་བའི་དཔལ་བྱིན་ཅིག །གལ་ཏེ་དུས་ལ་བབ་གྱུར་ཏེ། །ཉི་སྲས་སྲོག་ལ་གཟས་གྱུར་གྲང་། །དབང་བཅུ་དང་ནི་སྟོབས་བཅུ་ཡིས། །བེ་ཅོན་གདོང་ནས་བཟློག་པར་མཛོད། །ཁྱོད་མཚན་ཡིད་ལ་བཀོད་པ་ཡིས། །བདུད་ཀྱི་ཕྲུ་མ་བྱེ་བས་ཀྱང་། །བ་སྤུའི་རྩེ་མོའང་གཡོ་མི་ནུས། །དེ་ལྟའི་ཐུགས་རྗེ་མངའ་ཞེས་གསུངས། །ནད་རིམས་འཆི་ལ་སོགས་པ་ཡི། །ཞགས་པས་ཇི་ལྟར་ཐེབས་གྱུར་ཀྱང་། །མྱུར་དུ་ནུས་པའི་རལ་གྲི་ཡིས། །གཅོད་པར་མཛོད་ཅིག་སྒྲོལ་མ་ཀྱེ། །ཁྱོད་མཚན་ཡིད་ལ་ཡོད་པ་ལ། །དུས་མ་ཡིན་པའི་འཇིགས་མི་འབྱུང་། །གཤིས་ངན་འཆི་བས་མི་འཆི་ཞིང་། །ཡིད་ལ་མི་བདེ་འབྱུང་བ་མིན། །བདག་ནི་རྩེ་གཅིག་ཁྱོད་དྲན་པས། །བརྩེ་ཆེན་ཟླ་བའི་འཛུམ་ཞལ་གྱིས། །འཇིགས་དང་མྱ་ངན་མུན་པ་བཅིལ། །ཕན་བདེའི་ཀུནྡ་ཁ་ཕྱེས་ཤིག །ཁྱོད་མཚན་ཡིད་ལ་བཀོད་པ་ལ། །དྲག་པོ་བིཥྞུ་ཚངས་སོགས་ཀྱི། །གཙུག་གིས་རྐང་པ་ལ་བཏུད་ཅིང་། །རྒྱལ་བ་རྣམས་ཀྱིས་དགོངས་པར་གསུངས། །ཆེ་དགུའི་རིགས་ཀྱིས་བྲོ་བོར་བ། །འཚལ་ཏེ་གདུག་པ་ཅན་ཀུན་སྲུངས། །སྲས་དང་བཅས་པའི་རྒྱལ་རྣམས་ཀྱིས། །བུ་གཅིག་བཞིན་ཏུ་

― LT28_Page_0105 ―

^{[མ་དཔེ་གཟིགས་ན་འདིར་གནོན།]}

[Full Size]

དགོངས་པར་མཛོད། །ཁྱོད་མཚན་ཡིད་ལ་བཀོད་པ་ལ། །རིགས་གཟུགས་ཚེ་དང་དབང་ཕྱུག་ལྡན། །ཕྱོགས་ལས་རྣམ་པར་རྒྱལ་བ་དང་། །སྡིག་པ་དག་ནི་རྟག་ཏུ་འཕྲོག །དྲིན་གྱིས་འཚོ་བའི་མ་གཙོ་གྱུར། །ཇི་སྙེད་མར་གྱུར་འགྲོ་བ་རྣམས། །མི་མཐུན་ཕྱོགས་ལས་རབ་རྒྱལ་ཞིང་། །སྡིག་ཟད་ཡོན་ཏན་ཀུན་རྫོགས་མཛོད། །ཚངས་སོགས་ཉི་ཚེའི་ལྷ་ལ་ཡང་། །གསོལ་བཏབ་བདེན་འབྲས་མི་བསླུ་ན། །དུས་གསུམ་གཤེགས་པའི་ཡུམ་གྱུར་མས། །འགྲོ་བ་མི་བསླུ་སྨོས་ཅི་དགོས། །བདག་དང་བདག་གི་སྐྱེད་བྱེད་ཀྱི། །གཙོ་གྱུར་ནམ་མཁས་ཁྱབ་པ་ཡི། །འགྲོ་བ་འཇིགས་པས་གཟིར་ཀུན་གྱི། །འཇིགས་པ་མྱུར་དུ་འཕྲོགས་ཤིག་ཀྲ། །མྱོང་བར་ངེས་པའི་རྣམ་སྨིན་གྱིས། །ཅིས་ཀྱང་བསལ་བར་མ་གྱུར་ན། །འདི་ལ་མཁའ་ཁྱབ་འགྲོ་ཀུན་གྱི། །འཇིགས་དང་སྡུག་བསྔལ་ཇི་སྙེད་ཐིམ། །ཕྱིན་ཆད་འགྲོ་བས་མི་མྱོང་ཞིང་། །བདག་གིའང་དེ་ལྟ་མྱོང་མ་གྱུར། །སྡུག་གུའི་མ་ཡང་སྡུག་བསྔལ་དང་། །བུད་མེད་ལུས་ཀྱི་ཐ་མར་མཛོད། །ཅི་སྟེ་འཚོ་བ་ཉིད་ན་ཡང་། །མི་ལྡོག་དགེ་བའི་བློ་སྐྱེས་ནས། །ཆོས་ཀྱི་འབྱོར་པ་རྒྱས་པ་དང་། །བདུད་ཀྱི་གཡང་ས་ཆེ་ལས་སྒྲོལ། །མི་སྐྱེའི་ཆོས་ལ་བཟོད་ཐོབ་ནས། །མཁའ་ཁྱབ་འགྲོ་བ་བསྒྲལ་བརྩམས་པའི། །ཆགས་ཐོགས་མེད་པའི་ཤེས་རབ་ཀྱིས། །

― LT28_Page_0106 ―

^{[མ་དཔེ་གཟིགས་ན་འདིར་གནོན།]}

[Full Size]

འཚོ་བ་དོན་དང་ལྡན་པར་མཛོད། །ནམ་ཞིག་དུས་ཀྱིས་གཏུག་པ་ན། །གནད་གཅོད་ཚོར་བ་མེད་པ་དང་། །ཡིད་དབང་རྣལ་དུ་གནས་པ་ཡིས། །བདེ་ནས་བདེ་བའི་ཞིང་དུ་ཁྲིད། །དུག་གསུམ་རྟོག་པ་འགགས་ནས་སུ། །འོད་གསལ་ནམ་མཁའི་དཀྱིལ་ལྟ་བུ། །མ་དང་བུ་འདྲེས་སྐད་ཅིག་ལ། །རྣམ་པར་གྲོལ་བའི་ངོ་སྤྲོད་མཛོད། །སྐུ་དང་ཐིག་ལེ་ཤར་ན་ཡང་། །མི་འཇིགས་ལྷ་དང་དབྱེར་མེད་ཐིམ། །འཁྲུལ་སྣང་འོད་ཀྱི་ལམ་ལ་སོགས། །འཁོར་བར་འཁྱམས་པའི་སྒོ་རྣམས་ཁོག །ལས་ཀྱིས་སྲིད་པ་བར་དོ་རུ། །འཁྱམས་ཀྱང་འཕགས་མའི་ཞལ་སྟོན་ལ། །བདེ་ལྡན་པདྨོ་བཀོད་ལ་སོགས། །དག་པའི་ཞིང་དུ་དབུགས་དབྱུངས་ཤིག །སྐྱེ་ནས་སྐྱེ་བ་ཐམས་ཅད་དུ། །བཅོམ་ལྡན་འདས་མས་རྗེས་བཟུང་སྟེ། །མི་ཟད་རྒྱན་གྱི་འཁོར་ལོ་དང་། །དབྱེ་བ་མེད་པར་བྱིན་གྱིས་རློབས། །འགྲོ་བ་རྣམས་ནི་མ་ལ་བྱམས། །ཁྱོད་ནི་འགྲོ་བ་རྣམས་ལ་བྱམས། །དེས་ན་བདག་གི་རེ་བ་འདི། །མི་བསླུ་འབྲས་བུ་ཡོད་པར་མཛོད། །ཚེ་རབས་དུ་མར་དགེ་བསགས་པས། །དལ་རྟེན་ལན་ཅིག་ཐོབ་པ་ལས། །སྙིང་པོ་ཅུང་ཟད་མ་ལོན་པར། །ཆོས་བཞིན་འཚོ་བའི་མཆོག་བྱིན་ཅིག །ཁྱད་པར་ཤཱཀྱའི་བསྟན་པ་དང་། །སྟེས་ཏེ་ཡུད་ཙམ་མཇལ་བའི་དུས། །རིན་ཆེན་གླིང་ནས་སྟོང་ལོག་ཏུ། །བཏང་བར་མ་མཛད་སྙིང་རྗེའི་བདག །མདོར་ན་ཤིའམ་གསོན་ཀྱང་རུང་། །བྱང་ཆུབ་

― LT28_Page_0107 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་ལས་མི་ལྡོག་པར། །ཆོས་ལྡན་འབྱོར་བའི་ཚལ་རྒྱས་པའི། །བྱིན་རླབས་སྦྲང་རྩིའི་ཆར་པ་ཕོབ། །བདག་གིས་རིང་ནས་བསྒྲུབས་པའི་ལྷ། །དུས་གསུམ་རྒྱལ་བའི་ཡུམ་གྱུར་མ། །ཡིད་བཞིན་འཁོར་ལོ་ཁྱོད་ཡིན་པས། །གསོལ་བཏབ་དོན་དང་ལྡན་པར་མཛོད། །བདག་དང་བདག་གི་སྐྱེད་བྱེད་མའི། །གཙོར་བྱས་མཁའ་ཁྱབ་འགྲོ་བ་ཀུན། །བཅོམ་ལྡན་འདས་མས་རྗེས་བཟུང་སྟེ། །རྟག་པ་དམ་པའི་སྐུ་ཐོབ་ཤོག །ཅེས་པའང་། །རང་ལ་ནང་གི་ཁམས་འདུས་དང་། ཕྱིའི་ཟིངས་ཆ། །སྐྱེད་བྱེད་དྲིན་མོ་ཆེ་ལའང་མི་དགེ་བའི་མཚན་མ་མངོན་གྱུར་དུ་ཤར་བའི་སྐབས་གསོལ་བ་འདེབས་པ་པོ་ནི་ཀརྨ་ངག་དབང་ཡོན་ཏན་རྒྱ་མཚོ་སྟེ་རང་ལོ་ཉེར་དྲུག་པ་ལའོ། །མངྒ་ལཾ།། ༈ །།འཕགས་མའི་སྙན་དབང་དུ་གསོལ་བ་སྙིང་གི་མེ་ཏོག་ཁ་བྱེ་བ་ཞེས་བྱ་བ། སྲིད་དང་ཞི་བའི་མཐའ་ལ་མི་གནས་ཕྱིར། །ལྐོག་ཏུ་གྱུར་པའི་ཤེས་བྱ་མ་མཆིས་པས། །རྗེ་བཙུན་མ་ཁྱོད་ཉམ་ཆུང་བདག་གི་ཚིག །ཐུགས་ཀྱི་དཀྱིལ་དུ་ད་ལྟ་འགྲོ་བར་རིགས། །ལུས་ཀྱི་བྱ་བ་ཚེ་འདིའི་ལྟོ་རྒྱབ་ཕྱིར། །ངག་གིས་སྨྲས་ཚད་རང་འདོད་ཆགས་སྡང་ཚིག །ཡིད་ཀྱི་མནོ་བའང་སྲིད་པའི་ཉེར་ལེན་ཏེ། །སྒོ་གསུམ་དོན་ཡོད་བྱས་པ་ཅང་མ་མཆིས། །ཁྱད་པར་དུ་ཡང་བསྟན་སྒོར་ཞུགས་རློམས་ནས། །ཆོས་ལ་བསྟེན་པའི་

― LT28_Page_0108 ―

^{[མ་དཔེ་གཟིགས་ན་འདིར་གནོན།]}

[Full Size]

སྡིག་པ་མི་བཟད་ལྕིང་། ཤིན་ཏུ་ལྕི་བའང་མ་ཚོར་འདིར་སྣང་གི། །ཟུག་རྔུ་ཕྲ་མོའང་སེམས་ཀྱི་གཅོང་དུ་ཚོར། །རྒྱལ་བས་ལུག་ལྟར་ལྐུག་སོགས་ཐ་ཆད་ཀྱི། །དགེ་སློང་མཚན་ཉིད་མང་པོ་གང་གསུངས་པ། །དེ་དག་ད་ལྟ་བདག་ལ་ཅིག་ཆར་ཚང་། །རང་རྒྱུད་བསྲེག་པའི་བསམ་སྦྱོར་ཅི་ཡང་བགྱིས། །ཐོག་མར་སྤང་བླང་ཇི་བཞིན་མ་ཤེས་ལ། །བར་དུ་ཤེས་ཀྱང་ཡིད་མི་ཆེས་པས་ལེན། །ད་ལྟ་ཉོན་མོངས་མང་བའི་ཚན་ཁ་ལ། །གཉེན་པོས་མ་ཐུབ་ཐ་མལ་ཉིད་དུ་འབྱམས། །སོ་ཐར་ནས་བརྩམས་བླ་མེད་རྒྱུད་སྡེ་མན། །ཞུས་ལོས་སྡོམ་དང་དམ་ཚིག་ཁས་བླངས་ཀྱང་། །སྐྱབས་སྡོམ་ཙམ་ཞིག་རྒྱུད་ལ་མི་ལྡན་པ། །བདག་ཅག་ཕྱི་མའི་གནས་སྐབས་ཇི་ལྟར་འགྱུར། །མཐོ་བའི་ཡོན་ཏན་ཐོས་ན་ཕྲག་དོག་སྐྱེ། །དམན་པའི་གནས་སྐབས་ཐོབ་ལ་སྡང་ཞིང་བརྙས། །ཡོན་ཏན་སྣེ་གཅིག་མེད་ཀྱང་ང་རྒྱལ་ཆེ། །རྨུ་རྒོད་བདག་འདྲ་ཐུལ་བ་སུ་ཞིག་ཡོད། །གཞན་དག་འབྱོར་ན་བརྣབ་སེམས་གཏིང་ནས་ལྡང་། །རང་ཉིད་འབྱོར་ན་སེར་སྣའི་མདུད་པ་དམ། །ཚིག་ངན་ཙམ་ལ་བཟོད་པའི་གོ་ཆ་ཤོར། །ཁྱིམ་པ་མགོ་བྲེག་བདག་གིས་ཅི་ཞིག་བྱ། །གོང་དུ་བཀུར་ཀྱང་ཡ་རབས་ཀུན་སྤྱོད་མེད། །དམན་པར་བཞག་ན་སྙོམས་ཆུང་འདུག་མི་ཚུག །བར་མ་ཙམ་གྱིས་རང་གཞན་ཟག་པ་སྤེལ། །མ་རབས་ཁྱི་དང་འདྲ་བར་གཟིགས་ལགས་སམ། །རང་ལ་དྲིས་ན་ལན་ལྡོན་སྤོབས་པ་

― LT28_Page_0109 ―

^{[མ་དཔེ་གཟིགས་ན་འདིར་གནོན།]}

[Full Size]

།།།།མེད། །གཞན་གྱིས་བཤད་ན་ཡིད་ཆེས་ངེས་ཤེས་མེད། །ཚིག་དོན་ཕྱེ་ཆུ་མ་འདྲེས་སྦོམ་ཡོར་གྱིས། །ཤེས་འདོད་རང་མགོ་བསྐོར་བ་རང་ལ་སྡིག །གོང་མའི་ཡོན་ཏན་མཐོང་ཡང་དད་པ་མེད། །དམན་པའི་སྡུག་བསྔལ་མཐོང་ཡང་སྙིང་རྗེ་མེད། །རང་རྒྱུས་རབ་ལ་ཆེ་ཡང་ངོ་ཚ་མེད། །ཀྱེ་མ་དུས་དང་བདག་སྐལ་ངན་པ་འཛོམས། །བླ་མའི་ཞབས་འདེགས་སྒྲུབ་ཚེ་དབེན་པ་བསྙག །དབེན་གནས་བསྟེན་ཚེ་ཙབ་ཙུབ་གཡེང་བས་ཁྱེར། །ལས་མ་ནུས་ལ་ཆོས་ཀྱང་མི་ནུས་པས། །འཇིག་རྟེན་མི་ཡི་གྲལ་དུ་ཚུད་ཐབས་ཅི། །བཟླས་བརྗོད་བྱས་ན་དབེན་གསུམ་མཉམ་བཞག་དྲན། །སྟོང་ཉིད་རྩེ་གཅིག་བསྒོམ་དུས་སྤྲོས་བཅས་སྤྱོད། །གང་ལའང་མ་ཟུག་སྤྲེའུའི་ཕྲུ་གུ་བདག །འབྲས་བུ་འདུ་ཤེས་གསུམ་ལས་ཅི་ཞིག་ཐོབ། །ཆོས་གོས་གྱོན་ཀྱང་ནང་ན་ཡོན་ཏན་མེད། །ཡིག་དྲུག་བཏོན་ཀྱང་གཞན་ལ་ཕན་སེམས་མེད། །སེམས་ལ་བལྟས་ཀྱང་རྟོགས་པའི་བོགས་སྐྱེད་མེད། །འདི་འདྲའི་ངང་ནས་མི་རིང་གཞན་ཏུ་འགྲོ། །ཁྱིམ་པ་བྱས་ཀྱང་བཙུན་ཆས་མགོ་སྤུ་བྲེག །རབ་བྱུང་བྱས་ཀྱང་ཆོས་དང་གང་ཟག་འགལ། །ཆོས་བརྒྱད་ལོག་འཚོ་ལྔ་ཡི་རིན་བཅལ་ནས། །དཀོར་རྫས་ཁྲོ་ཆུའི་བཏུང་བ་བག་མད་འཐུང་། །དམ་ཆོས་སྟོན་པའི་བླ་མའི་སྐྱོན་ལ་བརྟག །བརྒྱུད་པའི་བླ་མར་མོས་གུས་བསྒོམ་པ་སྐད། །ཡིད་ཆེས་དད་པས་

― LT28_Page_0110 ―

^{[མ་དཔེ་གཟིགས་ན་འདིར་གནོན།]}

[Full Size]

མཆི་ཐིགས་ཙམ་མེད་པར། །གསོལ་འདེབས་ཚར་རེ་བཀླགས་པས་ཆོག་པར་བརྩི། །མཐུན་རྐྱེན་འཛོམས་ཀྱང་དོན་མེད་གཡེང་བ་འཕེལ། །མཐུན་རྐྱེན་མེད་ན་རྩོལ་སྒྲུབ་རྟོག་པ་སྤུན། །བློ་ཐག་གཤའ་མ་ནང་ནས་མ་ཆོད་པས། །ཅི་ལྟར་བྱས་ཀྱང་དབེན་པའི་གོ་སྐབས་བྲལ། །རྒྱན་གོས་རྟགས་ཀྱིས་ཁྱིམ་པས་བླ་མར་མཐོང་། །ཆོས་ཀྱི་དྲིས་དབེན་དམ་པས་དུད་འགྲོར་མཐོང་། །རྒྱུ་འབྲས་འཆོལ་སྤྱོད་གཤིན་རྗེས་བཏག་བྱར་མཐོང་། །རང་སྣང་དགྲར་ལངས་ལྷས་ཀྱང་འདྲེ་རུ་མཐོང་། །གཞན་སེམས་ཤེས་པའི་མངོན་ཤེས་མི་ལྡན་ཞིང་། །རང་རྒྱུད་བརྟགས་པའི་བློ་མིག་ལྡང་བཞིན་ཏུ། །ཆོས་གཏམ་སྣ་ཚོགས་སྨྲ་བའི་སྙིང་ཁམས་ཅན། །རྗེ་བཙུན་འཕགས་མའི་ཐུགས་ཀྱིས་མ་ཁྲེལ་ལམ། །ད་དུང་གསོན་ཅིག་རྗེ་བཙུན་ཐུགས་རྗེའི་གཏེར། །དེ་སྔོན་འཁོར་བར་ཡུན་རིང་འཁོར་བ་ན། །དགེ་བའི་ལས་ནི་ཅི་ཡང་མ་བགྱིས་ཏེ། །ཅུང་ཟད་བགྱིས་པའང་གནས་སྐབས་འབྲས་བུར་ཟད། །ད་ནི་དགེ་ལ་བརྟུན་པར་མ་གྱུར་ན། །ཡིད་ལ་མེད་པར་དུས་ཀྱིས་ཟིན་པའི་ཚེ། །སྐྱོབ་པ་སུ་མཆིས་གླིང་དང་དཔུང་གཉེན་སུ། །རང་ལ་མེད་པར་གཞན་དག་སྦྱིན་པོའང་སུ། །དེ་ཕྱིར་བག་ཙམ་དགེ་ལ་བློ་བསྲལ་ཏེ། །སེམས་ན་བྲོད་པ་ཡང་དང་ཡང་བཏིང་མོད། །ལས་འདི་ཟིན་ཏེ་དེ་ནས་བྱའོ་ཞེས། །བློ་ངན་རྒྱུན་འདིས་ཕྱི་བཤོལ་ཁོ་ན་བཏབ། །འདི་ན་སྒྲིབ་གསུམ་སྙིང་པོར་བཅད་

― LT28_Page_0111 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་སུ། །ཞི་བསིལ་བདུད་རྩི་གཞན་ལ་ཕན་བརྩོན་པ། །མང་པོ་དག་ཀྱང་སྲིད་ལམ་མཆིས་པ་ན། །ཁྱོད་ཀྱི་ཡེ་ཤེས་མཐུ་ཡིས་དབུགས་དབྱུང་སྩལ། །དེ་ནས་བརྩམས་ཏེ་བྱང་ཆུབ་མཐར་ཐུག་པར། །འགྲོ་མང་སྨིན་ཅིང་ཞིང་ཁམས་སྦྱང་མཛད་ནས། །བསམ་གྱིས་མི་ཁྱབ་དཔལ་ལ་དབབ་འབྱོར་བ། །དེ་བཞིན་བདག་ལའང་ཐུགས་བརྩེ་སྩལ་བར་རིགས། །སྙིགས་མའི་དུས་དང་བདག་སྐལ་ངན་པས་ཀྱང་། །ཉེ་བར་ཐོབ་པའི་བློ་ངན་གང་ཡིན་པ། །བརྟུལ་བར་མཛད་པ་ཁྱོད་ལས་མ་མཆིས་ན། །རང་སྐལ་བབ་པར་གཡེལ་བར་མཛད་སྲིད་དམ། །འཁོར་ལོས་སྒྱུར་བའི་དཔལ་ལའང་སྤྱོད་སྲིད་ཀྱི། །ཆོས་ཀྱི་འབྱོར་པ་རྒྱས་པ་ད་རེས་ཙམ། །མི་ལུས་དོན་མཐུན་འགྲོག་བཞིན་གཏན་གྱི་ཁེ། །མ་ཐོབ་ངན་འགྲོར་ཆུད་ན་ཅི་ཞིག་བྱ། །ལུས་ནི་སྲིད་པའི་གཡུལ་དུ་འཕྱན་གྱུར་ཀྱང་། །སེམས་ནི་ཅང་ཤེས་མཛའ་བཤེས་གཞན་སྤངས་ནས། །དཀོན་མཆོག་འཁོར་ལོའི་བདག་པོ་མི་འདོར་བའི། །བརྟུལ་ཞུགས་དེ་ནི་སྲོག་ལྟར་བཙའ་ལགས་ན། །བདག་ཡིད་མི་དགེའི་ལམ་དུ་འཁྱོགས་བཞིན་ཏུ། །ལྟར་སྣང་ལེགས་སྤྱད་ཆ་ཙམ་བསྒྲུབ་པ་ལ། །འབད་པ་འབྲས་བུ་མེད་པ་འདི་ཅི་ཞེས། །ཡི་ཆད་སྨྲེ་སྔགས་བླབ་ཅོལ་འདོན་པ་སྣང་། །དེད་དཔོན་ཆེན་མོར་སྐྱབས་སུ་སོང་བཞིན་ཏུ། །བདག་ཅག་འཁོར་བའི་རྒྱ་མཚོར་ལྷུང་སྲིད་ན། །ཚོགས་གཉིས་གཏིང་

― LT28_Page_0112 ―

^{[མ་དཔེ་གཟིགས་ན་འདིར་གནོན།]}

[Full Size]

དཔག་དཀའ་བས་བསྒྲུབས་པ་ཡི། །སྙིང་རྗེའི་གདོས་པ་བྲལ་དང་ཁྱད་ཅི་ཡོད། །རྗེ་བཙུན་མ་ཁྱོད་སྤྱན་རས་གཟིགས་དབང་གི། སྤྱན་ཆབ་ལས་འཁྲུངས་བུད་མེད་གཟུགས་ཀྱིས་ནི། །སངས་རྒྱས་ཀུན་གྱི་མཛད་པ་རབ་མཛད་པ། །བརྟན་དང་སྙིང་རྗེ་ཆེ་ཞིང་དཔའ་བས་ལགས། །གསོལ་བ་བཏབ་ན་རེ་བ་མཆོག་སྩོལ་བས། །མཚུངས་བྲལ་བླ་མའི་ངོ་བོར་ཤར་བ་ཁྱོད། །གདུལ་བྱ་འདུལ་ལ་ཕྱོགས་རིས་མེད་མོད་ཀྱང་། །ཁྱད་པར་བོད་ཀྱི་ཡུལ་དུ་དགོངས་ཞེས་ཐོས། །དེ་ཕྱིར་གུས་པའི་ཡིད་ཀྱི་ཆུ་མཚོ་ན། །དྲི་མེད་མཛེས་མའི་གཟུགས་བརྙན་ལེགས་བྲིས་ཏེ། །མོས་པ་ཙམ་གྱིས་རྗེས་སུ་མ་བཟུང་ཡང་། ཡི་ཆད་མ་མཆིས་བུ་ཡིས་མ་འབོད་ལྟར། །ལྷ་སྐུ་བསྒོམས་ཀྱང་མཐོང་བ་མ་སྩལ་ཞིང་། །བཟླས་བརྗོད་བྱས་ཀྱང་ནུས་པའི་རྟགས་མ་ཐོན། །ཐུགས་ཡིད་བསྲེས་ཀྱང་བྱིན་རླབས་དྲོད་མ་ཕེབ། །འོན་ཀྱང་རང་གི་ཉེས་པས་བསྒྲིབས་པར་ཟད། །བྱང་བལྟས་ཕུག་པར་ཉི་མས་མི་སྣང་ཞིང་། །མཁྲིས་ནད་ཅན་གྱིས་དུང་མདོག་ལོག་པར་མཐོང་། །དཀོན་མཆོག་བདེན་པ་ལོག་སྲེད་ཅན་དག་ལ། །འཇུག་པར་དཀའ་བ་བསོད་ནམས་མིན་པའི་མཐུ། །གང་ལ་ཐོག་མཐའ་བར་མ་མ་གཟིགས་པས། །གཟིགས་པ་མཆོག་ཏུ་གྱུར་པའི་གདིང་ཚད་ཀྱིས། །སྐད་ཅིག་གཅིག་ལ་འགྲོ་ཀུན་བསྒྲལ་བརྩམ་པའི། །སྙིང་སྟོབས་ཁུར་ཆེན་དེ་ནི་སུ་ཡིས་ཐེག །ཏིང་འཛིན་བྱེ་

― LT28_Page_0113 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་འོད་དང་འགྲོགས་པ་ཡི། །མཚན་དཔེའི་ཉི་མ་ལན་གཅིག་འཕོས་པ་ཡིས། །ཐོགས་མེད་དུས་ཀྱི་སྒྲིབ་པའི་སྨག་བཅིལ་ནས། །ཡང་དག་ལྟ་བ་སྦྱིན་པའི་རྗེ་བཙུན་མ། །ཕྲ་རབ་རྡུལ་ལས་འདས་ཀྱང་རྣམ་བཅས་སྐུ། །པྲ་ཕབ་རང་བཞིན་བཙུན་མོའི་རོལ་པ་ཅན། །རྣམ་པ་ཀུན་མཆོག་དགའ་བས་ཐུགས་ཚིམས་ནས། །གཞོམ་མེད་ཡི་གེའི་སྤྲིན་གྱི་འཕྲོ་འདུ་སྤྲོ། །སྤང་བྱའི་ངོ་བོར་མ་གྲུབ་ཐ་སྙད་ཙམ། །དེ་ལ་གཉེན་པོའི་ཆོས་གཞན་མི་ལྡན་པས། །སྤྱད་དུ་མེད་པར་སྤྱོད་པའི་ཕ་རོལ་དུ། །སྒྱུ་མའི་འཕྲུལ་འཁོར་བཞིན་ཏུ་བདེ་བར་གཤེགས། །མཚན་མར་དམིགས་པའི་སྙིང་རྗེ་དེ་དང་ནི། །བློ་ཡིས་བརྟགས་པའི་སྟོང་པ་ལས་འདས་པ། །སྤྱོད་ཡུལ་ཤིན་ཏུ་དག་པའི་ཐབས་ཤེས་ཀྱི། །མངོན་རྟོགས་སོ་སྐྱེའི་བློ་ཡིས་བསམ་མི་ཁྱབ། །སྟོང་པ་ཉིད་དང་མཚན་མ་མེད་པ་དང་། །སྨོན་པ་མེད་པའི་རྣམ་ཐར་ལ་གནས་པས། །ཐུགས་བསྐྱེད་བསགས་སྦྱངས་མཛད་པའི་ཚུལ་གང་ཡིན། །བློ་ཡིས་བརྟགས་པས་མི་མཚོན་ནམ་མཁའ་འདྲ། །ཉོན་མོངས་རླབས་ཀྱིས་རྣམ་པར་དཀྲུགས་པ་ཡི། །བྱིས་པའི་སེམས་ཀྱི་ཆུ་མཚོ་ཇི་འདྲ་བ། །དེ་འདྲ་འཕགས་མས་མཁྱེན་ཅིང་བརྩེ་བའི་ཕྱིར། །སྐྱོན་བྲལ་ཐུགས་རྗེས་རབ་ཏུ་བགྲུང་དུ་གསོལ། །དེ་ནས་གཉེན་པོའི་སེམས་ལ་དབང་ཐོབ་སྟེ། །མི་དགེའི་རྩ་བ་ཆད་པས་འབྲས་བུ་ལྡོག །བྱང་ཆུབ་

― LT28_Page_0114 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་པ་རྒྱུན་ཆད་མེད་པ་ཡི། །གྲིབ་བསིལ་ཉམས་དགར་བསྟི་བའི་བཀའ་དྲིན་སྩོལ། །དཀོན་མཆོག་ཀུན་དངོས་རྗེ་བཙུན་འཕགས་མ་ལ། །སྐྱབས་སུ་མཆིས་པས་གཏན་གྱི་བློ་ཁེལ་ནས། །ནད་དུག་མཚོན་སོགས་སྲོག་གི་ཕྱིར་དུ་ཡང་། །གནས་སྐབས་སྐྱབས་ལ་ལྟོས་བློ་མེད་པར་མཛོད། །ངེས་འབྱུང་མེད་པས་དམ་ཆོས་སྒྲུབ་པ་ཡང་། །བྱེ་མའི་ཁང་བུ་བཞིན་ཏུ་མི་བརྟན་པས། །སྲིད་ལས་ངེས་པར་འབྱུང་བའི་བློ་ཡི་ཤུགས། །བཟློག་དཀའ་དུས་མཐའི་མེ་ལྟར་སྦར་དུ་གསོལ། །སྲིད་འབྱོར་ཆུ་བུར་ལྟ་བུར་ཡིད་ཆེས་ནས། །འདུ་ཤེས་མཆོག་གྱུར་མི་རྟག་སྙིང་ལ་གཟེར། །དགེ་སྡིག་ལས་ཀྱི་འབྲས་བུ་མི་བསླུ་བར། །ཤེས་ནས་སྤང་བླང་ནུས་པར་བྱིན་གྱིས་རློབས། །ཟུག་རྔུའི་འབྱུང་གནས་དུག་གི་ས་བོན་ལྟར། །ཆོས་བརྒྱད་ལོ་མ་སྡུག་བསྔལ་འབྲས་བུ་ཅན། །སྲིད་རྩ་བདག་འཛིན་དུག་གི་སྡོང་པོ་འདི། །ཡེ་ཤེས་རལ་གྲིས་རྩད་ནས་བཅད་དུ་གསོལ། །གང་ལ་བསྟེན་ན་ལས་ཀྱི་རྒྱུན་བཅད་ཅིང་། །འཆག་དང་སྨྲ་བ་ཚུན་ཆད་དག་ལ་བསྒྱུར། །བྱང་ཆུབ་ལག་རྩེར་གཏོད་པའི་ཡིད་བཞིན་ནོར། །སེམས་ཀྱི་དམ་པ་སྐྱེ་ཞིང་ཉམས་མེད་གསོལ། །ལྷ་དང་བླ་མ་ཐ་དད་མི་བལྟ་ཞིང་། །སྣོད་བཅུད་ཐ་མལ་བདེན་ཞེན་མི་སྐྱེ་བར། །མོས་གུས་དག་པའི་སྣང་བ་ཚད་ལ་ཕེབས། །རིག་པ་སྙིང་གི་དབུས་སུ་སད་པར་མཛོད། །གསལ་བས་དངོས་སྣང་ལྷ་ཡི་འཁོར་ལོར་ཤར། །བརྟན་པས་བདག་ཏུ་

― LT28_Page_0115 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟ་བའི་འདུ་ཤེས་སྟོང་། །རང་བཞིན་ཡོངས་ཤེས་ལྟ་བ་གྱད་དུ་གྱུར། །རིམ་པ་དང་པོར་དབང་འབྱོར་དངོས་གྲུབ་སྩོལ། །མི་རྟོག་རླུང་གིས་བུས་བ་དགའ་བའི་མེ། །ཨ་ཧཾ་མཉམ་འདྲེས་གནས་ལ་སོགས་པར་སོན། །ཞུགས་སོགས་རིམ་པས་བྱེ་བ་གྲངས་སྙེད་ཀྱི། །རྟོག་པའི་དྲྭ་བ་སྲོག་ཏུ་སྡོམ་པར་མཛོད། །གནས་འགྱུ་ལ་སོགས་ཚིག་གིས་མི་མཚོན་པ། །དྲི་མེད་རིག་པ་རྗེན་པ་ཐེར་ལ་བུད། །རྒྱུན་ཆད་མེད་པས་ཕྱི་ནང་འཛིན་སྟངས་བྲལ། །གནས་ལུགས་རྟོགས་པའི་བྱིན་རླབས་དབབ་ཏུ་གསོལ། །བདེ་གསལ་རོ་ལ་ཆགས་པའི་བསམ་གཏན་དང་། །སྟོང་པ་ཡུལ་དུ་བྱས་པའི་ལྷག་མཐོང་སྟེ། །རྒྱུ་འབྲས་ཆད་ལྟ་སྙིང་རྗེ་དགྲར་ལངས་སོགས། །གོལ་སའི་དྲི་མ་མཐའ་དག་བཀྲུ་བར་མཛོད། །དུས་མིན་འགྲོ་དོན་ཟང་ཟིང་འདུ་ལོང་དང་། །འཕྲལ་སྣང་ནུས་པ་སྙན་གྲགས་ཆེ་བ་སོགས། །དམ་ཆོས་སྒྲིབ་པའི་བསོད་ནམས་གང་སྐྱེས་ཀྱང་། །བདུད་ཀྱི་བར་གཅོད་ཉིད་ཕྱིར་བཟློག་ཏུ་གསོལ། །བདག་བློ་ཆོས་མིན་བྱ་བར་ཅུང་ཟད་དུ། །ཞུགས་ཀྱང་དེ་ཉིད་ཁོ་ནར་མ་བཟློག་ན། །རྟོག་ངན་སྔར་འདྲིས་མི་བཞིན་ཕྲལ་དཀའ་བས། །གཉེན་པོས་འབུར་འཇོམས་ནུས་པར་བྱིན་གྱིས་རློབས། །སྐྱེས་ཐོབ་བློ་གྲོས་སྙིང་ནས་སད་པ་ལས། །ཐོས་བསམ་སྒོམ་པ་རེས་འཇོག་ཅན་མིན་པར། །ཤེས་དང་ཤེས་བྱ་ཅིག་ཅར་ཁོང་ཆུབ་ནས། །

― LT28_Page_0116 ―

^{[མ་དཔེ་གཟིགས་ན་འདིར་གནོན།]}

[Full Size]

མཁས་དང་གྲུབ་པ་ཟུང་དུ་ཆུད་པར་མཛོད། །ཁྱོད་ལ་དད་དང་ལྷག་བསམ་དཀར་བའི་མཐུས། །བདག་གི་སྡིག་པ་མོད་ལ་རབ་ཟད་ནས། །ཙཱ་ཤའི་ཁྱུ་བཞིན་མཐོང་ན་དགེ་ཐོབ་པ། །རྗེ་བཙུན་འཕགས་མའི་ཞལ་བཟང་བསྟན་ཏུ་གསོལ། །རྗེ་བཙུན་འཕགས་མའི་ཞལ་བཟང་བསྟན་ནས་ཀྱང་། །འབྲལ་བ་མེད་པར་གཙུག་གི་རྒྱན་བཞུགས་ཏེ། །ཆོས་ཀྱི་བདུད་རྩི་ངོམས་མེད་སྩལ་བ་དང་། །མི་རིང་བྱང་ཆུབ་མཆོག་ཏུ་ལུང་སྟོན་ཅིག །སྐྱེ་བོ་མི་བཟད་ངན་འགྲོའི་སྦྲུལ་གདུག་གིས། །རྟག་ཏུ་གཙེས་པ་ཕུང་ལྔའི་འདོར་ལེན་ནི། །རྨ་དང་ཤུ་བ་ལྟ་བུའི་ཟུང་རྔུ་རྣམས། །འཇིག་རྟེན་གསོ་བྱེད་ཐུགས་རྗེའི་སྨན་གྱིས་གསོས། །ལེགས་པར་བསམ་ན་རང་ལ་མི་གཅེས་པ། །འགའ་ཡང་མེད་མོད་དེ་བཞིན་གཞན་གཅེས་པས། །ཀུན་ཀྱང་ཐེག་ཆེན་སྤྱོད་པ་རྫོགས་གྱུར་ཏེ། །ཞི་བའི་རྒྱལ་ཐབས་མཆོག་ཏུ་དབུགས་དབྱུང་མཛོད། །དམ་ཆོས་ཚུལ་བཞིན་སྒྲུབ་པར་མ་གྱུར་ན། །ཆོས་སྲིད་གང་ལའང་སྙིང་པོ་མི་སྣང་བས། །བློ་ཤུགས་མེ་ལྟར་འབར་བས་གཏན་གྱི་དོན། །ཚེ་འདིར་འགྲུབ་པར་ཐུགས་རྗེས་བཟུང་དུ་གསོལ། །ཅེས་དགེ་སྦྱོང་ལྟར་སྣང་བ་ཡོན་ཏན་རྒྱ་མཚོས། །རང་ལོ་ཉེར་བརྒྱད་པར་དཔལ་སྤུངས་ཀྱི་གདན་སར་འཕགས་མ་ལ་རྒྱུ་མཚན་གསོལ་ནས་གསོལ་བ་བཏབ་པའོ། །མངྒ་ལཾ།། ༈ །།འཕགས་མ་ཡིད་བཞིན་འཁོར་ལོའི་ཐུགས་དམ་གནད་ནས་

― LT28_Page_0117 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐུལ་བའི་གསོལ་འདེབས་མོས་གུས་ཀྱི་ཏམྦ་ུར་ཞེས་བྱ་བ། སྤྱན་རས་གཟིགས་དབང་སྙིང་རྗེའི་ཆུ་གཏེར་ལས། །ཕན་བདེའི་ཀུན་དུ་རྒྱས་པའི་དཔལ་འཁྲུངས་པ། །འཕགས་མ་སྒྲོལ་མ་བདུད་རྩིའི་འོད་སྣང་ཅན། །འཇིགས་བཅས་མུན་པའི་རླབས་འདི་ཞི་བར་མཛོད། །རྒྱལ་ཀུན་ཡུམ་གྱུར་གདུང་བ་སེལ་བའི་སྨན། །བྱམས་པའི་མ་མ་སྐྱེ་དགུའི་གཉེན་གཅིག་པུ། །ཚེ་རབས་ཕྲེང་བར་ཕུལ་དུ་མ་མཆིས་པའི། །སྐྱབས་ཁྱོད་སྙིང་པོའི་བར་དུ་སྐྱབས་སུ་བསྟེན། །བདག་སོགས་ལས་ཀྱིས་མནར་བའི་འགྲོ་བ་རྣམས། །གང་དུ་གནས་ཀྱང་ནད་མཚོན་མུ་གེ་སོགས། །མི་འདོད་དུ་མས་ཡང་ཡང་གཙེས་ལགས་ན། །སྡུག་བསྔལ་འདོམས་ནས་དྲོངས་ཤིག་རྗེ་བཙུན་མ། །བག་ཆགས་རྗེས་འབྲང་རྣམ་རྟོག་ཆུ་གཉེར་ལྟར། །སྐད་ཅིག་རེ་རེར་ངན་འགྲོའི་རྒྱུ་མང་བསགས། །འཁོར་བའི་ས་བོན་འཛད་དུ་མེད་པ་འདིའི། །གཞི་རྩ་ད་ལྟ་ཆོད་ཅིག་རྗེ་བཙུན་མ། །དེ་རྒྱུ་ཚོགས་ཆེན་སྔོན་ཏུ་མ་སོང་བས། །དད་པས་རྒྱལ་བའི་བསྟན་སྒོར་ཞུགས་རློམས་ཀྱང་། །དཀོན་མཆོག་གསུམ་ལ་བློ་གཏད་མ་ཁེལ་བའི། །ལས་སྒྲིབ་རྩད་ནས་ཕྱུང་ཞིག་རྗེ་བཙུན་མ། །མངོན་སུམ་དུ་ཡང་སྨིན་པར་གྱུར་མཐོང་ན། །ད་དུང་ལས་དང་ལས་ཀྱི་འབྲས་བུ་ལ། །ཡིད་ཆེས་མ་སྐྱེས་གཅན་གཟན་ངུར་སྨྲིག་མདོག །བདག་ཡིད་དགེ་ལ་དྲོངས་

― LT28_Page_0118 ―

^{[མ་དཔེ་གཟིགས་ན་འདིར་གནོན།]}

[Full Size]

ཤིག་རྗེ་བཙུན་མ། །ཉིན་མཚན་སྐད་ཅིག་མི་རྟག་མི་ཡི་ལུས། །ཡང་དག་འབྱོར་ལ་དོན་ཆེན་མ་འགྲུབ་བར། །བཟློག་པར་དཀའ་བ་འཆི་བདག་ཞགས་པའི་རྒྱུན། །ཡེ་ཤེས་རལ་གྲིས་ཆོད་ཅིག་རྗེ་བཙུན་མ། །གནས་སྐབས་སུ་ཡང་གདོན་དང་རིམས་དུག་མཚོན། །གློ་བུར་ཉིད་དུ་གཤིས་ངན་འཆི་བ་དང་། མེ་ཆུ་གཅན་སོགས་བརྒྱད་དང་བཅུ་དྲུག་གི། འཇིགས་ལས་མྱུར་དུ་སྐྱོབས་ཤིག་རྗེ་བཙུན་མ། །བདག་འཛིན་ངན་གོམས་སེམས་ཀྱི་རྒྱུན་ཇི་སྲིད། །དེ་སྲིད་སྡུག་བསྔལ་ཆུ་བོ་རྟག་འབབས་པས། །ཕུང་སོགས་རང་བཞིན་ཡོངས་སུ་ཤེས་པ་ཡི། །རྟོགས་པའི་སྒྲོན་མེ་སྤོར་ཞིག་རྗེ་བཙུན་མ། །འགྲོ་རྣམས་མར་ཤེས་བྱམས་དང་སྙིང་བརྩེ་བ། །ཚིག་ཙམ་མིན་པར་གཞན་གྱི་སྡུག་བསྔལ་དང་། །བདག་བདེ་དངོས་སུ་བརྗེ་བའི་དཔའ་རྣམས་ཀྱི། །སྙིང་སྟོབས་རླབས་ཆེན་སྐྱེད་ཅིག་རྗེ་བཙུན་མ། །ཚེ་རབས་ཀུན་ཏུ་ཕྱིན་ཅི་མ་ལོག་པའི། །དགེ་བའི་བཤེས་མཇལ་དེས་བསྟན་ཆོས་ཀུན་རྟོགས། །བྱང་ཆུབ་བར་དུ་ཚེ་དང་ཐར་སོགས་ལ། །བར་གཅོད་བདུད་དཔུང་གཞོམས་ཤིག་རྗེ་བཙུན་མ། །བློ་མིག་རྡུལ་བྲལ་ཟབ་མོའི་ཤེས་རབ་ལྡན། །ཉོན་མོངས་བགས་ཀྱིས་ཆུང་བའི་ཟོ་བཟང་བས། །བསླབ་ལ་རབ་གུས་དྲན་དང་ཤེས་བཞིན་པར། །བདག་རྒྱུད་ཆོས་དང་བསྲེས་ཤིག་རྗེ་བཙུན་མ། །ནམ་ཞིག་ཚེ་ཡི་འཕེན་པ་རྫོགས་པའི་ཚེ། །གནད་གཅོད་མེད་པར་འདུ་

― LT28_Page_0119 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་བཅུ་རྟོགས་ནས། །སྐྱེ་འགག་མཐའ་བྲལ་དབྱིངས་སུ་ལ་བཟླ་བའི། །འོད་གསལ་རང་ངོ་སྤྲོད་ཅིག་རྗེ་བཙུན་མ། །བར་དོ་སྐད་ཅིག་ཡུད་ཙམ་ཤར་ན་ཡང་། །དག་སྣང་དཀྱིལ་འཁོར་འཁོར་ལོའི་སྤྲོ་བསྡུ་རྫོགས། །མངོན་དགའ་བདེ་ལྡན་པདྨོ་བཀོད་ལ་སོགས། །དག་པའི་ཞིང་དུ་སྐྱོལ་ཞིག་རྗེ་བཙུན་མ། །བསམ་བཞིན་སྲིད་པར་འཇུག་པ་མ་གཏོགས་པ། །དབང་མེད་ལས་ཀྱིས་འཁོར་བར་མི་འཁོར་བར། །ཚེ་འོད་མཐའ་ཡས་རྒྱལ་བའི་ཞབས་དྲུང་དུ། །ལུང་སྟོན་ལམ་སྣ་དྲོངས་ཤིག་རྗེ་བཙུན་མ། །སངས་རྒྱས་འབྱོན་དང་མ་བྱོན་ཞིང་རྒྱ་མཚོ། །མཐའ་ཡས་ཀུན་ཏུ་དམ་ཆོས་སྲོག་ལྟར་བཟུང་། །བྱང་ཆུབ་སྤྱོད་མཆོག་རྫོགས་པར་སྟོན་བགྱིད་པའི། །སྨོན་ལམ་འགྲུབ་པར་མཛོད་ཅིག་རྗེ་བཙུན་མ། །ཐོག་མེད་ནས་བསགས་སྡིག་སྒྲིབ་ཉེས་ལྟུང་ཀུན། །ལུས་རྟེན་འདི་ལ་བྱང་ཞིང་དག་པ་དང་། །དེ་སྲིད་ཆོས་མཐུན་དཔལ་དང་འཆི་མེད་ཀྱི། །ཚེ་དབང་དངོས་གྲུབ་སྩོལ་ཞིག་རྗེ་བཙུན་མ། །རྨི་ལམ་དུ་ཡང་བྱང་ཆུབ་མཆོག་གི་སེམས། །མི་ཉམས་བདུད་ཀྱི་ལས་ཀུན་ཡོངས་སྤངས་ཏེ། །སྒོ་གསུམ་བྱ་བ་ཅི་བགྱིས་བསྟན་འགྲོ་ཡི། །ཕན་བདེའི་ཟུངས་སུ་སྤེལ་ཞིག་རྗེ་བཙུན་མ། །ཆོས་བརྒྱད་ཚེ་འདིའི་རྣམ་གཡེངས་རབ་སྤངས་ནས། །བས་མཐའི་ནགས་སུ་བར་གཅོད་མ་མཆིས་པར། །སྒྲུབ་ལ་སྙིང་པོར་

― LT28_Page_0120 ―

^{[མ་དཔེ་གཟིགས་ན་འདིར་གནོན།]}

[Full Size]

དྲིལ་བས་ཚེ་འདི་རུ། །མི་ལུས་དོན་ལྡན་མཛོད་ཅིག་རྗེ་བཙུན་མ། །བདག་གིས་ད་ལྟ་མྱོང་བའི་དུཿཁ་འདིས། །འགྲོ་བ་ཀུན་གྱི་སྡུག་བསྔལ་རྒྱུ་དང་འབྲས། །མྱུར་དུ་ཟད་ནས་ཕྱིན་ཆད་བདག་གཞན་ཀུན། །བདེ་ནས་བདེ་བར་ཁྲིད་ཅིག་རྗེ་བཙུན་མ། །ཕན་བདེའི་འབྱུང་གནས་རྒྱལ་བའི་བསྟན་པ་མཆོག །ནུབ་མེད་ཕྱོགས་བཅུ་ཀུན་ཏུ་དར་ཞིང་རྒྱས། །དེ་འཛིན་སྐྱེས་ཆེན་དམ་པ་མ་ལུས་པའི། །སྐུ་ཚེ་རིང་དུ་སྲིངས་ཤིག་རྗེ་བཙུན་མ། །ཁྱད་པར་ངེས་དོན་སྙིང་པོ་ཟབ་མོའི་དོན། །འགྲོ་ཀུན་རྣ་བར་འབབ་པའི་སྐལ་བཟང་ལྡན། །དེ་ལ་དགའ་བའི་ལྷ་ཀླུ་གནོད་སྦྱིན་ཚོགས། །དབུ་འཕང་དགུང་དུ་བསྟོད་ཅིག་རྗེ་བཙུན་མ། །རྒྱལ་ཁམས་ཀུན་ཏུ་མི་བདེའི་མིང་མེད་ཅིང་། །ཚེ་བསོད་དཔལ་རྒྱས་བསྟན་ལ་གུས་པ་སོགས། །རྫོགས་ལྡན་བདེ་སྐྱིད་ནོར་བུའི་སྤྲིན་ཆེན་ལས། །འདོད་རྒུའི་ཆར་པ་ཕོབ་ཅིག་རྗེ་བཙུན་མ། །རྒྱལ་བའི་བསྟན་དང་སེམས་ཅན་བདེ་སྐྱིད་ལ། །རྣམ་པར་འཚེ་བའི་མི་དང་མི་མ་ཡིན། །བསམ་སྦྱོར་ལོག་པར་ཞུགས་པའི་ཚང་ཚིང་ཀུན། །མཐུ་སྟོབས་མེ་ལྕེས་སྲེགས་ཤིག་རྗེ་བཙུན་མ། །མཁའ་མཉམ་མ་རྣམས་དུས་མིན་འཆི་སོགས་ཀྱི། །འཇིགས་བྲལ་དགེ་བཅུའི་དཔལ་ལ་ངང་གིས་སྤྱོད། །དཀོན་མཆོག་བསླབ་པའི་གཞིར་འགྲོགས་ཐར་པ་ཡི། ཁ་ལོ་གྱེན་ཏུ་སྒྱུར་ཞིག་རྗེ་བཙུན་མ། །ཁྱད་པར་བདག་དང་བདག་ལ་ལྟོས་

― LT28_Page_0121 ―

^{[མ་དཔེ་གཟིགས་ན་འདིར་གནོན།]}

[Full Size]

བཅས་རྣམས། །རྣམ་ཀུན་བར་ཆད་དབང་དུ་མི་འགྲོ་བར། །ཚེ་དང་སྒྲུབ་པ་མཐར་ཕྱིན་རྟག་བརྟན་གྱི། །སྲོག་གི་ཀ་བ་ཚུགས་ཤིག་རྗེ་བཙུན་མ། །འདི་ཕྱི་ཀུན་ཏུ་བློ་གཏད་བཅས་པའི་ལྷ། །དུས་གསུམ་རྒྱལ་བའི་ཡུམ་གྱུར་བཅོམ་ལྡན་མས། །སྨོན་པའི་འབྲས་བུ་གྲུབ་པར་མ་མཛད་ན། །སྐྱབས་གཞན་བདག་ལ་མེད་དོ་རྗེ་བཙུན་མ། །ཐོག་མེད་དུས་ནས་ཚོགས་གཉིས་བསྒྲུབས་པའི་སྟོབས། །བསམ་གྱིས་མི་ཁྱབ་ནམ་མཁའི་སྐུ་བརྙེས་པས། །རྩེ་གཅིག་གདུང་བས་གསོལ་བ་འདེབས་ལགས་ན། །བྱིན་རླབས་ཐུགས་རྗེ་མ་ཆུང་རྗེ་བཙུན་མ། །ཆུ་སྐྱེས་དབུས་ན་སྟོན་ཟླ་རྒྱས་པའི་སྐུ། །རྡོ་རྗེ་བདེ་བའི་ལང་ཚོ་ཤིན་ཏུ་རྫོགས། །དྲི་མེད་འོད་ཀྱི་དཀྱིལ་འཁོར་མཐའ་ཀླས་པས། །ལས་བཞིའི་ཕྲིན་ལས་སྩོལ་ཞིག་རྗེ་བཙུན་མ། །གང་ལ་རེག་པས་ཆོས་ནོར་འདོད་དང་ཐར། །བསམ་རྒུ་ཡིད་བཞིན་འཇོ་བའི་མཆོག་སྦྱིན་གྱི། །ཕྱག་མཐིལ་བསོད་ནམས་བརྒྱ་ལས་གྲུབ་པ་དེས། །བདག་གི་སྤྱི་བོར་བྱུགས་ཤིག་རྗེ་བཙུན་མ། །མཐེབ་སྲིན་བར་དུ་རིན་ཆེན་སྡོང་བུའི་རྩེར། །ཡིད་འོང་པདྨ་གསར་དུ་བཞད་པ་ལས། །མཆོག་ཐུན་སྦྲང་རྩི་ཅི་ཡང་འཇོ་བ་དེས། །བདག་ཡིད་སེམས་པ་སྐྱེད་ཅིག་རྗེ་བཙུན་མ། །མུ་ཏིག་དྲྭ་ཕྱེད་གསེར་གྱི་དྲིལ་ཆུང་ཅན། །ལྷ་རྫས་རྒྱན་སོགས་རོལ་སྒེག་རྣམ་པར་འཕྲུལ། །འཆར་ཁའི་གསེར་ཞུན་གཟི་

― LT28_Page_0122 ―

^{[མ་དཔེ་གཟིགས་ན་འདིར་གནོན།]}

[Full Size]

བརྗིད་སྟོང་འབར་བ། །དད་པའི་མིག་སྔར་སྟོན་ཅིག་རྗེ་བཙུན་མ། །རབ་འབྱམས་ཞིང་ན་ངལ་གསོ་སྦྱིན་པའི་ཕུལ། །ཟག་མེད་ཟླ་བ་རྒྱས་པའི་རྒྱབ་ཡོལ་ཅན། །མི་ཤིགས་རྡོ་རྗེའི་སྐྱིལ་མོ་ཀྲུང་བཅས་པ། །སྤྱི་གཙུག་རྒྱན་ཏུ་བཞུགས་ཤིག་རྗེ་བཙུན་མ། །ཆོས་གསུང་ཚངས་པའི་དབྱངས་ཀྱིས་ཟབ་པ་དང་། །རྒྱ་ཆེ་རྒྱུན་མི་འཆད་སྟོན་སྒྲིབ་གསུམ་གྱི། །དྲྭ་བ་ཀུན་བཅད་ཀུན་ཀྱང་བྱང་ཆུབ་ཀྱི། །རྒྱལ་སར་དབུགས་དབྱུང་སྩོལ་ཞིག་རྗེ་བཙུན་མ། །མདོར་ན་སྐྱབས་ཀྱི་སྙིང་པོ་ཁྱོད་ཡིན་པས། །བྱང་ཆུབ་མ་ཐོབ་བར་དུ་རྟག་པར་བདག །བར་གཅོད་བདུད་ཀྱི་དབང་དུ་མི་བཏང་བར། །དོན་གཉིས་མཐའ་རུ་ཕྱིན་པའི་བཀའ་དྲིན་སྩོལ། །ཅེས་ཡོན་ཏན་རྒྱ་མཚོ་བདག་རང་ལོ་སུམ་ཅུ་པར་བྲོ་ནད་ཚབ་པོ་ཆེས་ཉེན་ཅིང་རྒྱལ་ཁམས་སུའང་སྙིགས་མའི་རྒུད་པ་མངོན་ཏུ་གྱུར་པའི་སྐབས་གསོལ་བ་ཅི་དྲན་ཏུ་བཏབ་པ་དཀོན་མཆོག་གསུམ་གྱི་བདེན་པས་འགྲུབ་པར་གྱུར་ཅིག། ༈ །།རྗེ་བཙུན་མ་ལ་བསྟོད་པ་སྦྲང་རྩིའི་རླབས་ཕྲེང་ཞེས་བྱ་བ། །རྒྱལ་བ་སྲས་བཅས་སྐྱེད་པའི་ཡུམ། །འགྲོ་ལ་སྙིང་རྗེའི་སྤྱན་མྱུར་བ། །དོན་ཀུན་སྦྱིན་མའི་ཞབས་པད་ནི། །མི་འཕྲོག་དད་པའི་སྤྱི་བོར་མཆོད། །རྣམ་རྟོག་འཁོར་བའི་ཚུར་རོལ་ནས། །ཟག་པ་མེད་པའི་ཏིང་འཛིན་གྱིས། །མི་རྟོག་མྱང་འདས་ཕ་རོལ་དུ། །སྒྲོལ་མཛད་སྒྲོལ་མ་ཡུམ་ལ་འདུད། །ཟག་བཅས་ཉོན་མོངས་དྲྭ་བ་ནི། །རང་

― LT28_Page_0123 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུང་ཡེ་ཤེས་གྲིས་བཅད་དེ། །ཟག་མེད་ཞི་བའི་གྲིབ་བསིལ་དུ། །སྒྲོལ་མཛད་སྒྲོལ་མ་ཡུམ་ལ་འདུད། །སྡུག་བསྔལ་ཕུང་པོའི་གྲོང་ཁྱེར་ལས། །མི་གནས་རྣམ་པར་ཐར་པ་ཡིས། །བདེ་བ་རྟག་པའི་ཁང་བཟང་དུ། །སྒྲོལ་མཛད་སྒྲོལ་མ་ཡུམ་ལ་འདུད། །གཟུང་འཛིན་འཆི་བདག་མེ་ལྕེ་ནི། །སྟོང་ཞིང་བདག་མེད་ཆུ་བོས་གཞིལ། །སྐྱེ་འགག་མེད་པའི་རྒྱལ་ས་རུ། །སྒྲོལ་མཛད་སྒྲོལ་མ་ཡུམ་ལ་འདུད། །ཆགས་མེད་སྦྱིན་པའི་ཆུ་རྒྱུན་ལ། །རེ་སྐོང་མུ་ཏིག་དབུ་བ་འཁྲིགས། །འགྲོ་ཀུན་ཐར་པའི་འབྱུང་གནས་ཉིད། །དང་པོའི་ཕ་རོལ་ཕྱིན་ལ་འདུད། །ཚུལ་ཁྲིམས་ནོར་བུའི་རྒྱན་ཆས་སྒེག །དགེ་ལེགས་འདོད་པ་དུ་མ་འཇོ། །ལུང་དང་རྟོགས་པའི་ས་གཞི་ནི། །གཉིས་པའི་ཕ་རོལ་ཕྱིན་ལ་འདུད། །བཟོད་པའི་བླ་གོས་ཤིན་ཏུ་མཁྲེགས། །ཆོས་དང་ཆོས་ཅན་རོ་གཅིག་བགོས། །བདུད་ལ་རྡོ་རྗེའི་དབྱུག་པ་ཉིད། །གསུམ་པའི་ཕ་རོལ་ཕྱིན་ལ་འདུད། །བརྩོན་འགྲུས་གསེར་གྱི་ཤིང་རྟ་ཡིས། །འཇིགས་སར་འཆེལ་རྣམས་ཡང་ནས་ཡང་། །སྟོབས་དང་ལྡན་པར་འདྲེན་མཛད་མ། །བཞི་པའི་ཕ་རོལ་ཕྱིན་ལ་འདུད། །མི་བསྙེལ་བསམ་གཏན་བདུད་རྩིའི་ཟས། །ཏིང་འཛིན་ཡན་ལག་དུ་མའི་རོ། །ཚིམས་པར་རོལ་པའི་གཞོན་ནུའི་ལུས། །ལྔ་པའི་ཕ་རོལ་ཕྱིན་ལ་འདུད། །དྲི་མེད་ཤེས་རབ་

― LT28_Page_0124 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱན་ཡངས་པོས། །ཆོས་ཀུན་ཆགས་ཐོགས་བྲལ་བར་གཟིགས། །སྤྲོས་བྲལ་ངང་ལས་མི་གཡོ་བ། །དྲུག་པའི་ཕ་རོལ་ཕྱིན་ལ་འདུད། །ཐབས་མཁས་གྲུ་ཆེན་ལ་ཞོན་ཏེ། །ཡེ་ཤེས་རིན་ཆེན་གླིང་མཆོག་ཏུ། །སྣ་ཚོགས་སྣ་ཚོགས་ཚུལ་གྱིས་དཀྲིད། །བདུན་པའི་ཕ་རོལ་ཕྱིན་ལ་འདུད། །སྨོན་ལམ་ནོར་བུ་དཔག་བསམ་ཤིང་། །དམིགས་མེད་སྙིང་རྗེའི་རྩ་བ་ཅན། །རྟོག་མེད་འབྱོར་པའི་སླད་དུ་རྟག །བརྒྱད་པའི་ཕ་རོལ་ཕྱིན་ལ་འདུད། །སྤྱོད་ཡུལ་ཤིན་ཏུ་དག་པའི་སྟོབས། །སྤང་གཉེན་ཇི་ལྟར་མཚམས་པར་འཇུག །ཀུན་ནས་མྱུར་བའི་རྫུ་འཕྲུལ་སོགས། །དགུ་པའི་ཕ་རོལ་ཕྱིན་ལ་འདུད། །གང་ཡང་སྐྱེ་བ་མེད་མཁྱེན་པས། །གང་ཞིག་འགག་པ་མི་མངའ་བ། །གང་དུའང་མི་གནས་ཟབ་ཅིང་གསལ། །ཡེ་ཤེས་ཕ་རོལ་ཕྱིན་ལ་འདུད། །རྒྱལ་བ་ཀུན་གྱི་རྣམ་པར་ཐར། །ཁྱོད་ཀྱི་བ་སྤུ་གཅིག་ན་འཇུག །ཡོན་ཏན་ཡངས་པའི་རྡུལ་ཕྲན་ལ། །མོས་བློས་ཅུང་ཟད་བསམ་པའི་མཐུས། །བདག་སོགས་མཁའ་ཁྱབ་སེམས་ཅན་ཀུན། །བདུད་ལས་རྣམ་རྒྱལ་སྒྲོལ་མ་བཞིན། །སྐད་ཅིག་གཅིག་སྦྱོང་བྱེ་བྲག་ཀྱང་། །བསྐལ་པ་རྒྱ་མཚོ་ལ་འཇུག་ཤོག །མ་ཆགས་གཏོང་བ་ནམ་མཁའ་མཛོད། །འགྲོ་ལ་དམིགས་པ་མེད་ཕྱེ་བས། །བསོད་ནམས་དམ་པའི་རིན་ཆེན་ནི། །མི་ཟད་གཏེར་དང་ལྡན་པར་ཤོག །སྒོ་གསུམ་ཉེས་སྤྱོད་

― LT28_Page_0125 ―

^{[མ་དཔེ་གཟིགས་ན་འདིར་གནོན།]}

[Full Size]

བསྡམ་པ་ལ། །འཆལ་བའི་རྡུལ་གྱིས་མ་གོས་ཀྱང་། །སྡོམ་དང་རློམས་སེམས་སྤངས་པའི་གོས། །སྐྱེ་བ་ཀུན་ཏུ་བགོ་བར་ཤོག །བདག་མེད་ནམ་མཁའ་ལྟ་བུའི་སེམས། །སྐྱེ་མེད་ཆོས་ལ་རྟག་ཞུགས་པས། །ཁུང་ཆེན་ཅི་ཡང་ཐེག་པ་ཡི། །བཟོད་པའི་གོ་ཆ་ཐོབ་པར་ཤོག །རྒྱལ་སྲས་རྣམས་ཀྱི་ཞོན་པའི་མཆོག །བདུད་ཀྱིས་མི་བརྫི་བརྩོན་འགྲུས་རྟ། །ས་ལམ་མྱུར་དུ་བགྲོད་པ་ལ། །ལེ་ལོའི་སྒྲོག་དང་བྲལ་བར་ཤོག །ལུས་ངག་ཡིད་ལ་ཞི་ཐོབ་ཅིང་། །རྣམ་ཤེས་བདུན་པོ་དབང་དུ་གྱུར། །བྱང་ཆུབ་ཆོས་རྣམས་བརྟེན་པའི་གཞི། །བསམ་གཏན་ཞབས་དང་ལྡན་པར་ཤོག །ཕུང་སོགས་ལྟ་ལ་མི་གནས་པས། །ལེན་པའི་རྣམ་ཤེས་རྡུལ་སྤངས་ཏེ། །ཤེས་བྱའི་སྒྲིབ་པ་ཕྲ་བ་ཕྲལ། །ཤེས་རབ་རིག་པའི་སྤྱན་ཐོབ་ཤོག །ཐབས་སྟོབས་སྨོན་ལམ་ཏིང་འཛིན་སོགས། །སྤྱོད་ཡུལ་མཁའ་ལྟར་རྒྱ་ཆེ་ཞིང་། །འགྲོ་ལ་འཆི་མེད་དཔལ་སྟེར་བ། །སྒྲོལ་མའི་གོ་འཕང་མྱུར་ཐོབ་ཤོག །ཅེས་པའང་ཁྲོ་ཆུ་ཤུ་བྷཾ་དགོན་ཏུ་ལྷག་པའི་ལྷ་འདི་ཉིད་ཉེ་བར་བསྙེན་པའི་ཐུན་མཚམས་སུ་ཡོན་ཏན་རྒྱ་མཚོས་བྲིས་པ་སྟེ་རང་ལོ་སོ་བཞི་པ་ལ་དགེ། ༈ །།བྱིན་རླབས་ཉིན་བྱེད་བསྐུལ་བའི་བསྟོད་དབྱངས་སྐྱ་རེངས་ཀྱི་ཕྲིན་པ་ཞེས་བྱ་བ། སྟོབས་བཅུའི་ཉི་མ་བྱེ་བའི་གཟི་བརྗིད་ཀྱིས། །འཆི་བདག་མུན་སྟུག་

― LT28_Page_0126 ―

^{[མ་དཔེ་གཟིགས་ན་འདིར་གནོན།]}

[Full Size]

ཡུད་ལ་བསལ་ནས་ཀྱང་། །ཚེ་དབང་ཡེ་ཤེས་སྦྲང་རྩིས་གཏམས་པའི་ཚལ། །རྒྱས་མཛད་བཅོམ་ལྡན། ཐུགས་རྗེ་ཅན་མས་སྐྱོངས། །མཚུངས་པ་མེད་པ་ལྷ་ཡི་འབྱོར་པ་ཡིས། །རབ་མཛེས་ཞི་བའི་སྐུ་མཆོག་ཡིད་འོང་མ། །བྱིན་རླབས་ཟིལ་དངར་འབུམ་ཕྲག་འཇོ་བ་དེས། །བདག་དང་འགྲོ་ལ་ཚེ་དབང་མཆོག་དངོས་སྩོལ། །འཁོར་བའི་མཚོ་ནང་འདམ་སྐྱེས་པདྨོ་བཞིན། །སྙིང་རྗེའི་སྟོབས་ཀྱིས་མི་སྤོང་མི་ཆགས་པར། །ནམ་མཁའ་སྲིད་དུ་ཐུགས་རྗེའི་རྩལ་སྤྲུགས་ཀྱང་། །ནམ་མཁའ་བཞིན་ཏུ་ཐུགས་རྗེ་འཛད་པ་མེད། །འདི་ན་བཟང་ངན་བར་མའི་བློ་གྲོས་ཀྱིས། །ཡང་དག་ལོག་དང་འཆོལ་བར་སྤྱོད་མོད་ཀྱི། །འདྲེན་པའི་ཕྱག་གིས་སུ་ཡང་མི་འདོར་བས། །བཏང་སྙོམས་ཆེན་པོས་སངས་རྒྱས་མཛད་པ་སྒྲུབ། །ཐོག་མར་སྲིད་པའི་མཚོ་ལས་སྲིད་པ་བསྒྲལ། །བར་དུ་རྣམ་པར་ཐར་པའི་སྤྱོད་ཡུལ་བསྩལ། །ཐ་མར་ཞི་བའི་གཉིད་ལས་བསླངས་ནས་སུ། །རྒྱལ་བའི་སྲས་ནི་དུས་གསུམ་ཀུན་ཏུ་བསྐྲུན། །དལ་འབབས་པདྨས་གང་བའི་མཚོ་ངོགས་སུ། །ཁྲུས་ལ་ཞུགས་པའི་གཟུགས་ཅན་ཡོད་འོང་མ། །དེ་རིང་ཁྱོད་སྐུའི་ངོ་མཚར་དྲན་འདི་དང་། །གདུང་བ་འགོག་པའི་ཡིད་ནི་མཚུངས་པར་གྱུར། །ཆགས་མེད་མཛེས་མ་ཆགས་པའི་ཡིད་འཕྲོག་མ། །ཞི་བའི་འཛུམ་ལྡན་སྡང་བ་ཀུན་བཅོམ་མ། །ཡེ་ཤེས་ཐུགས་

― LT28_Page_0127 ―

^{[མ་དཔེ་གཟིགས་ན་འདིར་གནོན།]}

[Full Size]

མངའ་རྨོངས་ལ་རབ་བརྩེ་མ། །འཕྲུལ་ཆེན་འདི་འདྲས་རྒྱལ་རྣམས་དགྱེས་པར་ཤེས། །པད་དཀར་དགའ་ཚལ་ལྟ་བུར་སྙིང་དུ་སྡུག །ནོར་བུ་བཞིན་ཏུ་འདོད་དགུའི་དངོས་པོ་འཇོ། །རྡོ་རྗེ་དང་མཚུངས་མི་མཐུན་འཇིགས་བཅོམ་པ། །རྗེ་བཙུན་མ་ཁྱོད་བདག་གི་སྙིང་གི་དཔྱིད། །དག་པའི་ཤེལ་འདྲ་སྒྲིབ་བྲལ་འོད་ཀྱི་ལུས། །གཞོན་ཤ་རབ་ཆགས་འཆི་མེད་ན་ཆུང་མ། །ཡིད་ལ་བྱས་པའི་དགའ་བ་ཇི་འདྲ་བ། །དེ་འདྲ་བདུད་རྩིའི་ཟས་ཅན་སྙིང་ལའང་མེད། །ནམ་མཁའི་མཐས་གཏུགས་འགྲོ་ལ་གཟིགས་པ་ཡི། །སྤྱན་རས་པདྨའི་འདབ་མ་རབ་ཡངས་པ། །མི་ཟུམ་སྙིང་རྗེའི་ཆུ་ཡི་དོགས་པ་འཁྲིལ། །སྲིད་གསུམ་སྙིང་གི་དྲི་མ་བཀྲུ་བ་བཞིན། །གཡོ་རྩོལ་མི་མངའ་འཇིག་རྟེན་ཀུན་ཏུ་བསྐྱོད། །རྟོག་པ་ཀུན་སྤངས་མོས་པའི་རྗེས་སུ་འཇུག །ཉི་ལྟར་སྙོམས་ཀྱང་འཆི་བདག་མུན་པ་འཇོམས། །དེ་ཕྱིར་མ་གཅིག་མཚན་གྱི་སྙན་པ་ཆེ། །དྭངས་མ་སྡུད་ཀྱང་སྒྲུབ་ལ་བཅུད་སྩོལ་མ། །གཟི་བརྗིད་འབར་ཡང་སྙིང་ལ་རབ་བསིལ་མ། །རྣམ་འགྱུར་སྤངས་ཀྱང་སྒེག་པའི་འཛུམ་ཞལ་མ། །འཇིག་རྟེན་གསོ་བྱེད་སྨན་ཆེན་རྣམ་ཐར་མངའ། །གང་ཞིག་ཉི་མའི་དཀྱིལ་འཁོར་ལ་བརྟེན་པ། །དེ་ལ་མུན་པའི་གོ་སྐབས་འབྱུང་མི་འགྱུར། །དེ་བཞིན་དུས་གསུམ་རྒྱལ་ཡུམ་ཁྱོད་བསྟེན་པ། །དེ་ལ་

― LT28_Page_0128 ―

^{[མ་དཔེ་གཟིགས་ན་འདིར་གནོན།]}

[Full Size]

དུས་མིན་འཆི་སོགས་འཇིགས་མི་འབྱུང་། །ཆུས་ཁྱེར་ར་མདའ་སྐམ་ལ་སྦྲན་པ་བཞིན། །འཇིགས་པས་གཡེང་བའི་བདག་སོགས་འཁོར་བ་པ། །ཁྱོད་ལས་མྱུར་བའི་སྐྱབས་གཞན་མ་མཆིས་པས། །སྒྲོལ་མ་བདུད་བཞིའི་འཇིགས་ལས་བསྒྲལ་དུ་གསོལ། །མཆོག་གི་ཕྱིར་ན་རྟག་ཏུ་མངོན་འདོད་པས། །བསྒྲུབས་པའི་འབྲས་བུ་ཕྱི་དུས་མ་འགྱང་བར། །མཐོང་གྲོལ་བདུད་རྩིའི་ཟེར་བརྒྱ་འཛག་པའི་སྐུ། །མིག་ལ་ཟླ་བ་བཞིན་ཏུ་སྣང་བར་མཛོད། །ཚིག་ལས་འདས་པའི་སྒྲ་སྐད་ཐམས་ཅད་པ། །ཚངས་དབྱངས་གསུང་གི་གླིང་བུའི་སྙན་འཇེབས་ནི། །ཆད་མེད་རྣ་བའི་བཅུད་དུ་ཐོས་མཛད་ནས། །རིགས་དང་མི་རིགས་ལམ་ངོ་ཕྱེད་པར་གསོལ། །རྟག་ཏུ་བལྟས་ཀྱང་ཡང་དག་མ་མཐོང་བསྒྲིབས། །ཁྱོད་ཐུགས་བསམ་མི་ཁྱབ་དང་ཤིན་ཏུ་འགལ། །ཡང་དག་ཉིད་ན་བཟང་ངན་རྡུལ་ཙམ་མེད། །འཁོར་འདས་རོ་མཉམ་དེ་ཡང་དེ་རིང་སྟོན། །བློ་བྲལ་དཔེ་ལས་འདས་པའི་དེ་བཞིན་ཉིད། །དངོས་ཀུན་ཁྱབ་བདག་མ་གཅིག་ཆོས་ཀྱི་སྐུ། །བརྟན་གཡོའི་དྭངས་བཅུད་འདུས་པའི་ཐིག་ལེ་དེ། །བདག་གི་སྙིང་གར་འཕོ་འགྱུར་མེད་པར་བཞུགས། །སྔོན་ཆད་ས་སྟེང་རྟག་ཏུ་བསྡད་པ་མེད། །སླད་དང་ད་ལྟ་རྨི་ལམ་སྣང་མཚུངས་ཀྱང་། །ལུས་རྟེན་འདི་ལས་སྙིང་པོ་མ་ལོན་པར། །སྲོག་གི་ཀ་བ་རྡོ་རྗེ་ལྟ་བུར་ཚུགས། །ཟིན་

― LT28_Page_0129 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་འཁོར་བའི་བྱ་བ་ཆུ་གཉེར་ལ། །རྣམ་པར་གཡེང་བའི་བྱིས་པ་སྙིང་རེ་རྗེ། །སྐྱབས་མེད་སྐྱབས་སུ་བཞེངས་པ་འགྲོ་བའི་མས། །འདི་དག་འཁྲུལ་སྣང་འཇིགས་ལས་བསྒྲལ་དུ་གསོལ། །བདག་ཅག་ཐུགས་ཀྱིས་མ་འདོར་རྒྱལ་བའི་ཡུམ། །འཇིགས་སར་བཏང་སྙོམས་མ་མཛད་བདག་གི་སྐྱབས། །སྒྲོལ་མཛད་དམ་བཅའ་མ་གཡེལ་སྙིང་རྗེའི་ལྷ། །བློ་གཏད་བཅས་སོ་འཕགས་མ་སྒྲོལ་མ་མཁྱེན། །གང་གིས་ཐོབ་པས་འཆི་སོགས་འཇིགས་འཇོམས་ཤིང་། །མཐོ་རིས་ཐར་པའི་བདེ་ལ་ངལ་གསོ་བ། །ཁྱོད་ཀྱིས་བསྒྲུབས་པའི་རིང་འཚོའི་བཅུད་ལེན་དེ། །དེ་རིང་བདག་སོགས་རྣམས་ལ་བགོ་བཤའ་སྩོལ། །འོད་ཟེར་རྣོན་པོས་འཆི་བདག་སྙིང་ག་ཕུག །བྱིན་རླབས་ཐིགས་པ་མོས་པའི་སྣོད་དུ་གཏིགས། །ཆོས་སྐུའི་འདྲ་འབག་ཚངས་པའི་ཡུལ་ས་རུ། །བཞུགས་ནས་ཐེག་ཆེན་ཆོས་འཁོར་བསྐོར་དུ་གསོལ། །ཞེས་པའང་བག་ཡོད་ཆུ་གླང་དབོ་ཟླའི་གྲལ་ཚེས་འགྲུབ་པའི་སྦྱོར་བ་དང་ལྡན་པར་བསྙེན་པ་གྲུབ་པའི་ཚེ་ཡོན་ཏན་རྒྱ་མཚོས་གསོལ་བ་བཏབ་པ་བདག་གཞན་འབྲེལ་བཅས་རྗེས་སུ་འཛིན་པའི་རྒྱུར་གྱུར་ཅིག །སརྦ་སིངྡྷི་ྷ་བནྟུ། ལྷ་མོ་ལ་གུས་དམ་བཅས་རྒྱུན་འབབས་ཀྱི་ཚིག་ཕྲེང་བདུད་རྩིའི་ཐིགས་པ་ཞེས་བྱ་བ། ན་མོ་གུ་རུ་ཨཱརྱ་ཏཱ་རཱ་ཡ། །སྟོགས་ཆུ་མངའ་བའི་སྲས་ཀྱིས་བསྐོར་བའི་དབུས། །

― LT28_Page_0130 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོབས་བཅུའི་མངའ་བདག་ཡུམ་མཆོག་རྗེ་བཙུན་མ། །དྲི་མེད་ཟླ་ཤེལ་གསར་པའི་དཀྱིལ་འཁོར་ནི། །འཆི་བདག་མུན་པ་བཅོམ་ལ་ཕྱག་འཚལ་ལོ། །འཁོར་བ་དང་པོར་བསྐྱེད་པའི་རྒྱུ་དང་རྐྱེན། །འཁོར་བའི་གནས་སྐབས་རྒྱུ་འབྲས་མཚམས་སྦྱོར་གྱི། །གནས་དང་གནས་མིན་མཁྱེན་པའི་སྟོབས་མཆོག་གིས། །འགྲོ་བས་ཡང་དག་རྒྱུ་འབྲས་གནས་ཐོབ་མཛོད། །འདས་པའི་ལས་ནི་སྐྱེས་བུའི་རང་ནོར་བཞིན། །མ་འོངས་ལས་ཀྱང་དཔྱིད་བཏབ་ས་བོན་བཞིན། །ལས་དང་རྣམ་སྨིན་མཁྱེན་པའི་སྟོབས་ཀྱི་མེས། །བདག་སོགས་ལས་ངན་ཚང་ཚིང་སྲེག་པར་མཛོད། །བསམ་གཏན་རྣམ་ཐར་ཏིང་འཛིན་སྙོམས་འཇུག་དང་། །མི་མཐུན་ཀུན་ཉོན་གཉེན་པོའི་ཕྱོགས་འཕེལ་བ། །རྣམ་བྱང་འབྱུང་འཇུག་ལྡང་བ་མཁྱེན་སྟོབས་ཀྱིས། །འཁྲུལ་མེད་ལམ་གྱི་མངོན་རྟོགས་རྒྱུད་ལ་སྩོལ། །དམུས་ལོང་སྐྱོན་ལྡན་རྣམ་པར་དག་པའི་མིག །ཡུལ་ལ་འཇུག་པ་མཉམ་པ་ཉིད་མིན་ཏེ། །དབང་པོ་དམན་མཆོག་དེ་བཞིན་མཁྱེན་སྟོབས་ཅན། །བདག་དབང་ཤིན་ཏུ་རྣོ་བར་གོང་འཕོ་མཛོད། །བཟང་ངན་བར་མ་དེ་བཞིན་རྒྱ་ཆེ་ཆུང་། །མ་ངེས་དོན་གཉེར་དོན་སྤྱོད་ཐ་དད་པ། །མོས་པ་སྣ་ཚོགས་མཁྱེན་པའི་སྟོབས་མཆིས་པས། །མོས་ལྡན་གཟིགས་པ་ལྐོག་གྱུར་མི་མཛད་གསོལ། །ངེས་དང་མ་ངེས་ལོག་སྲེད་རིགས་ཆད་ཕྱིར། །

― LT28_Page_0131 ―

^{[མ་དཔེ་གཟིགས་ན་འདིར་གནོན།]}

[Full Size]

ཐེག་གསུམ་ཞིང་སར་ཆོས་ཀྱི་འབྲས་སྣ་ཚོགས། །འདེབས་ལ་ཁམས་རྣམས་མཁྱེན་པའི་སྟོབས་མངའ་བས། །བདག་རིགས་ཐེག་པ་ཆེན་པོར་སད་མཛད་གསོལ། །གང་ལ་གནས་ན་གང་དུ་འགྲོ་འགྱུར་བ། །སྔར་གོམས་ལམ་དུ་ཞུགས་པའི་སྐྱེ་བོ་བཞིན། །འཁོར་འདས་ཀུན་འགྲོའི་ལམ་མཁྱེན་སྟོབས་མངའ་བས། །མི་གནས་མངོན་བྱང་ཆེན་པོའི་ཤུལ་ལམ་སྟོན། །རྣམ་མཁྱེན་ཤེལ་གྱི་ར་བ་རྙོགས་པ་མེད། །སྲིད་པ་མ་བྲིས་གཟུགས་བརྙན་ཐོགས་མ་མེད། །སྔོན་གནས་རྗེས་དྲན་མཁྱེན་པའི་སྟོབས་མཆོག་གིས། །ལུས་ཅན་སྐྱེ་བའི་ཕྲེང་བར་ཡིད་འབྱུང་སྩོལ། །ཚེ་དང་ལས་ཀྱི་མཐའ་དང་ཡང་སྲིད་གཞན། །ཇི་ཙམ་འབབ་ཅིང་གང་དུ་འཇུག་པའི་ལུང་། །ཚད་མ་སྒྲོགས་མཛད་སྐྱེ་འཆི་མཁྱེན་སྟོབས་ཀྱིས། །བདག་སོགས་སྐྱེ་འཆིའི་ཆུ་རྒྱུན་བཟློག་པར་གསོལ། །གང་ལ་སྲེད་ལེན་ཉིད་མཚམས་སྦྱོར་མཆིས་དང་། །གང་གིས་ཡང་སྲིད་རྩ་བ་བཅད་པ་སྟེ། །ཟག་དང་ལྡོག་པའི་འགྲོས་མཁྱེན་དཔའ་བོའི་སྟོབས། །ཟག་པ་མཐར་བྱེད་དཔུང་ལ་འཇུག་པར་མཛོད། །རྒྱལ་དང་རྒྱལ་བའི་མྱུ་གུ་སྐྱེད་པའི་ཡུམ། །སྙིང་རྗེའི་ལུས་ཅན་མཐའ་དག་འཚོ་བའི་མ། །བདག་གི་སེམས་ཀྱི་མ་གཅིག་ཁྱོད་ལགས་པས། །བུ་སྡུག་མགོན་མེད་བརྩེ་བས་འདོར་ཕོད་དམ། །མཐོ་རིས་ཡོན་ཏན་བདུན་གྱི་བླ་ན་

― LT28_Page_0132 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱོར། །མ་ཡི་ཆོས་དང་གཟུགས་སྐུ་སྒྲིབ་མེད་མཐོང་། །བསྒྲལ་དང་སྐྱོབ་པའི་གཡར་དམ་ཅི་འཆལ་བ། །དེ་ལ་བདག་གི་སྟོབས་ཀྱང་འཇུག་པར་ཤོག །ཅེས་པའང་ཀུན་དགའ་ཤིང་སྟག་ཁྲུམས་ཀྱིས་ཉ་བའི་ཉིན། །བྱང་ཆུབ་སྒྲུབ་པའི་འགྲུབ་སྦྱོང་དང་ལྡན་པའི་ཐུན་མཚམས་སུ་བློ་གྲོས་མཐའ་ཡས་ཀྱིས་གསོལ་བ་བཏབ་པ་མངྒ་ལཾ། །༈། །རྗེ་བཙུན་ཐུགས་རྗེ་ཅན་མ་ལ་བསྟོད་ཅིང་ཕྱག་བྱ་བ་བདུད་རྩིའི་སྒྲ་དབྱངས་ཞེས་བྱ་བ། །ཚེ་དབང་བཀྲ་ཤིས་སྦྱིན་པའི་ཅོད་པན་ནི། །འོད་དཔག་མེད་བརྒྱན་དངོས་གྲུབ་བདུད་རྩིའི་རྒྱུན། །འགྲོ་ཀུན་གསོས་སུ་འབེབས་བའི་ལྷ་མོ་མཆོག །ཡིད་བཞིན་འཁོར་ལོའི་ཞབས་ཀྱི་པདྨོར་འདུད། །ཤིན་ཏུ་རྣམ་དག་སྤྲོས་པའི་མཐའ་ཀུན་ཞི། །གཙང་བདག་བདེ་བ་རྟག་པ་དམ་པའི་དངོས། །ཆོས་དབྱིངས་ཡེ་ཤེས་ནམ་མཁའི་ངོ་བོ་ཉིད། །དངོས་ཀུན་ཁྱབ་པའི་བདག་ལ་ཕྱག་འཚལ་ལོ། །གཟུང་འཛིན་ཀུན་སྤངས་རང་བཞིན་འོད་གསལ་བ། །སྐུ་དང་ཡེ་ཤེས་གཟུགས་བརྙན་བྱེ་བ་འཆར། །མེ་ལོང་ཡེ་ཤེས་ཉི་ཟླའི་དཀྱིལ་འཁོར་གྱིས། །ཤེས་བྱ་སྣང་བར་མཛད་ལ་ཕྱག་འཚལ་ལོ། །ཕྱོགས་དང་རིས་མེད་བརྡལ་བ་ཆེན་པོའི་ངང་། །འཁོར་འདས་ཀུན་སྙོམས་ཐུགས་རྗེའི་མུ་ཁྱུད་ཅན། །མཉམ་ཉིད་ཡེ་ཤེས་ས་ཆེན་ཡངས་པའི་གཞིར། །མཆོག་དམན་བར་མ་བརྟེན་ལ་ཕྱག་འཚལ་ལོ། །བསམ་གྱིས་མི་ཁྱབ་རྣམ་པར་

― LT28_Page_0133 ―

^{[མ་དཔེ་གཟིགས་ན་འདིར་གནོན།]}

[Full Size]

ཐར་བའི་སྒོར། །སྤྱི་དང་རང་མཚན་མ་འདྲེས་ས་ལར་སྣང་། །སོར་རྟོག་ཡེ་ཤེས་ལོ་འབྲས་ཚད་མེད་པ། །སྐྱེ་དགུའི་ཉེར་འཚོར་གྱུར་ལ་ཕྱག་འཚལ་ལོ། །ནོར་བུ་བུམ་བཟང་དཔག་བསམ་ལྗོན་ཤིང་ལྟར། །འབད་རྩོལ་མི་མངའ་གཞན་དོན་ལྷུན་གྱིས་གྲུབ། །ནན་ཏན་ཡེ་ཤེས་གཏིང་ཟབ་རྒྱ་མཚོའི་ཀླུང་། །འཁོར་བའི་མཐར་ཐུག་འབེབས་ལ་ཕྱག་འཚལ་ལོ། །སྲིད་རྩ་ཉེ་བར་ལེན་པའི་རྣམ་པར་ཤེས། །དེ་བཞིན་ཉིད་དང་རོ་གཅིག་གཉིད་སངས་པས། །མཚན་མའི་ཆོས་ཀུན་མི་ལེན་མི་འདོར་བ། །སྤངས་པ་ཕུན་སུམ་ཚོགས་ལ་ཕྱག་འཚལ་ལོ། །དྲི་མེད་མཁྱེན་རབ་པདྨ་ལྟར་རྒྱས་པས། །ཆོས་ཀུན་ནམ་མཁའ་ལྟ་བུར་ཐུགས་སུ་ཆུད། །སྐྱེ་འགག་གནས་དང་བྲལ་བའི་གཟིགས་པ་ཅན། །རྟོགས་པ་ཕུན་སུམ་ཚོགས་ལ་ཕྱག་འཚལ་ལོ། །གང་ གིས་འཁོར་བ་རང་བཞིན་མེད་གཟིགས་པ། །དེ་ཡིས་འཁོར་བའི་སྡུག་བསྔལ་དང་དུ་བཞེས། །སྲིད་པའི་མཐར་ཐུག་མྱ་ངན་མི་འདའ་བ། །ཐུགས་རྗེ་ཕུན་སུམ་ཚོགས་ལ་ཕྱག་འཚལ་ལོ། །འཕགས་མ་སྒྲོལ་མ་རྒྱལ་བ་ཀུན་གྱི་ཡུམ། །བརྩེ་ལྡན་འགྲོ་དྲུག་བུ་ལྟར་སྐྱོང་བའི་མ། །སྒོ་གསུམ་གུས་པས་འདུད་དོ་འཇིགས་ལས་སྐྱོབས། །སྙིང་ནས་གསོལ་བ་འདེབས་སོ་ཐུགས་རྗེས་ཟུང་། །མཚན་དཔེའི་སྐུ་ལས་ཟླ་བ་ཆུ་ཤེལ་འོད། །ཀུན་

― LT28_Page_0134 ―

^{[མ་དཔེ་གཟིགས་ན་འདིར་གནོན།]}

[Full Size]

གསལ་མེ་ལོང་ལྟ་བུའི་རང་བཞིན་གྱིས། །ལུས་ཅན་གདོས་བཅས་འཕོ་བའི་བག་ཆགས་བཅོམ། །འགྱུར་མེད་སྐུ་ཡི་རྡོ་རྗེར་བྱིན་གྱིས་རློབས། །ཚངས་དབྱངས་གསུང་ཟེར་པདྨ་རཱ་གའི་མདོག །ཀུན་འབྱེད་སོ་སོར་རྟོག་པའི་ཚ་གདུང་གིས། །བདག་སོགས་སྒྲ་ཚིག་འཕོ་བའི་མུན་པ་སོལ། །འགག་མེད་གསུང་གི་རྡོ་རྗེར་བྱིན་གྱིས་རློབས། །སྤྲོས་བྲལ་ཐུགས་ཀློང་ཨིནྡྲ་ནཱི་ལའི་མདངས། །ཀུན་ཁྱབ་ཆོས་དབྱངས་བདུད་རྩིའི་ཆུ་རྒྱུན་གྱིས། །འགྲོ་དྲུག་རྟོག་ཚོགས་འཕོ་བའི་དྲི་མ་བཀྲུས། །འཁྲུལ་མེད་ཐུགས་ཀྱི་རྡོ་རྗེར་བྱིན་གྱིས་རློབས། །བྲལ་སྨིན་ཡོན་ཏན་གཟི་བརྗིད་གསེར་སྦྱངས་དངོས། །ཀུན་སྙོམས་མཉམ་པ་ཉིད་དུ་ཁྱབ་པ་དེས། །སྲིད་གསུམ་སྙོམས་འཇུག་འཕོ་བའི་དབུགས་བཀག་ནས། །གཞོམ་མེད་ཡེ་ཤེས་རྡོ་རྗེར་བྱིན་གྱིས་རློབས། །རྟག་ཁྱབ་ཕྲིན་ལས་གཡུ་ཞུན་འབར་བའི་གཟི། །ཀུན་བྱེད་བྱ་བ་ལྷུན་གྱིས་གྲུབ་པ་ཡིས། །ལས་ཀྱི་སྒྲིབ་སྐྱེས་འཕོ་ཆེན་འཇིགས་པ་འཕྲོག །འཕོ་མེད་རྡོ་རྗེའི་སྐུ་རུ་བྱིན་གྱིས་རློབས། །བདེ་ཆེན་ཆུ་སྐྱེས་བཞད་པའི་སྦྲང་རྩིའི་རྡུལ། །བ་སྤུའི་མཐར་ཐུག་གཞོམ་དུ་མེད་སྤྲོས་པས། །འཆི་བའི་འཇིགས་བཅོམ་མི་ཤིགས་དྭངས་མའི་སྐུ། །ཚེ་འདི་ཁོ་ནར་གྲུབ་པས་རྗེས་འཛིན་མཛོད། །འཇིག་རྟེན་མ་རྣམས་བུ་ཡི་རེ་སྐོང་ན། །རྒྱལ་བ་ཀུན་སྐྱེད་ཐུགས་

― LT28_Page_0135 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་ཅན་གྱི་མས། །བློ་གཏད་སྙིང་ནས་བཅས་པའི་བུ་སྡུག་གི། །བསམ་པ་མྱུར་དུ་འགྲུབ་པར་མཛད་དུ་གསོལ། །ཞེས་པའང་སྟོད་ལུང་མཚུར་གྱི་ཕུ་མཁའ་སྤྱོད་ཐུགས་ཀྱི་འཁོར་ལོའི་ལྟེ་བ་གྲུབ་ཆེན་རིན་པོ་ཆེ་ཀརྨ་པགྴིའི་སྒྲུབ་གནས་པདྨ་ཁྱུང་གི་རྫོང་དུ་རྣལ་འབྱོར་ལ་གནས་པའི་ཐུན་མཚམས་སུ་བློ་གྲོས་མཐའ་ཡས་པའི་སྡེས་གསོལ་བ་བཏབ་པ་སིངྡྷྡྷི་ར་སྟུ།། ༈ །།རྒྱལ་བའི་ཡུམ་ལ་ཐུགས་དམ་སྐུལ་ཞིང་གསོལ་བ་འདེབས་པ་འཆི་བདག་གཡུལ་རྒྱལ་ཞེས་བྱ་བ། །ཐུགས་རྗེ་རབ་མྱུར་སྲས་བཅས་རྒྱལ་བའི་ཡུམ། །ཡུན་རིང་བརྩེ་བས་སྐྱངས་མཛད་འགྲོ་བའི་མ། །དྲན་པས་འཆི་བདག་གཡུལ་འཇོམས་དཔའ་བོའི་ཞབས། །དེ་རིང་བུ་ཡི་སྤྱི་བོར་བཀོད་དུ་གསོལ། །བསོད་ནམས་མཐའ་ཡས་ལས་འཁྲུངས་གཟུགས་ཀྱི་སྐུ། །སྐད་ཅིག་གཅིག་ལ་བྱེ་བར་རྣམ་འཕྲུལ་ཞིང་། །འགྲོ་བ་འཁོར་བའི་འཇིགས་ལས་སྒྲོལ་མཛད་མ། །སྙིང་གི་ཐིག་ལེར་རྟག་བཞུགས་བྱིན་གྱིས་རློབས། །ཆོས་ཀུན་སྐྱེད་མཛད་ཤེས་རབ་ཕ་རོལ་ཕྱིན། །ཆོས་དབྱིངས་ཀུན་ཁྱབ་འོད་གསལ་ཆོས་ཀྱི་སྐུ། །སྐྱེ་འགག་མཚན་བྲལ་རྟག་པ་དམ་པའི་དངོས། །རྐང་གཉིས་གཙོ་བོ་རྣམས་ཀྱིས་ཕྱག་བྱས་མ། །ཕྱག་རྒྱ་ཆེན་མོ་བརྟན་གཡོ་ཀུན་གྱི་སྲོག །བདེ་ཆེན་ཡེ་ཤེས་རྒྱས་པའི་གཟི་བརྗིད་ཅན། །སྲིད་ཞི་སྣ་ཚོགས་ཅིར་ཡང་རྣམ་པར་

― LT28_Page_0136 ―

^{[མ་དཔེ་གཟིགས་ན་འདིར་གནོན།]}

[Full Size]

འཕྲུལ། །དམིགས་མེད་རོ་མཉམ་སངས་རྒྱས་ཀུུན་གྱི་གསང་། །ཁྱོད་ནི་རབ་ཏུ་ཟབ་པས་བརྟག་པར་དཀའ། །ཐུགས་རྗེའི་རྩལ་ཤུགས་སུས་ཀྱང་འགྲན་ནུས་མིན། །བསམ་གྱིས་མི་ཁྱབ་འགྲོ་བའི་རེ་སྐོང་མ། །ནོར་བུ་ལྗོན་ཤིང་གཏེར་གྱིས་དཔེར་མི་བཟོད། །དྲི་མེད་ཡེ་ཤེས་ནམ་མཁའི་མུ་ཁྱུད་མཐའ། །མཉམ་པ་ཉིད་གྱུར་འགྲོ་ཁམས་དེ་སྙེད་ཀྱི། །མོས་པའི་བུ་གར་ཁམས་དབང་བཞིན་ཏུ་འཇུག །བདེ་བ་ཐར་པའི་རྒྱུ་འབྲས་གོ་སྐབས་འབྱེད། །མཁའ་ཁྱབ་སྐྱེ་དགུའི་ཉེར་འཚོར་འཁྱིལ་པ་ཡི། །རབ་རྒྱས་སྙིང་རྗེ་བདུད་རྩིའི་ཆུ་གཏེར་ནི། །འདོད་རྒུ་ཡིད་བཞིན་འཇོ་བའི་དབྱིག་གིས་གཏམ། །ཐུགས་རྗེའི་དུས་རླབས་ནམ་ཡང་ཡོལ་བ་མེད། །དགེ་ལེགས་མྱུ་གུ་མཐའ་དག་བསྐྲུན་པའི་གཞི། །ལུས་ཅན་མཐའ་དག་བདེ་བར་འཚོ་བའི་གནས། །མཐའ་ཡས་རྣམ་པར་ཐར་པའི་ས་ཆེན་ལ། །རྒྱལ་སྲས་རྣམ་ཐར་ཀུན་གྱི་སྨན་ལྗོངས་སྐྱེད། །བསྡུ་བ་བཞི་ཡི་བང་རིམ་ཤིན་ཏུ་ཡངས། །བློ་ལྡན་གསེར་རིའི་དབུས་ན་མངོན་པར་འཕགས། །དུས་གསུམ་གཤེགས་པའི་ལྷ་དབང་ཀུན་བསྟེན་པ། །ཁྱོད་མཚུངས་ལྷུན་པོ་རྒྱལ་བས་ཡོངས་མ་གཟིགས། །སྲིད་ཞིའི་མཁའ་ལ་ཐབས་ཤེས་ཤིང་རྟས་སྐྱོད། །ཆོ་འཕྲུལ་གསུམ་གྱི་སྣང་བ་རྟག་ཏུ་བཀྱེ། །འཆི་བདག་མུན་ཚོགས་གཞོམ་པའི་འོད་རྣོན་ཅན། །

― LT28_Page_0137 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲོ་བའི་ཉི་མ་བདག་གིས་དཔལ་དུ་ཤར། །དུས་ཀྱི་སྨག་རུམ་སེལ་མཛད་ཟླ་བའི་ཞལ། །རིང་འཚོའི་ཆུ་གཏེར་བདུད་རྩིའི་ཐིགས་པས་སྤེལ། །གང་སྐུའི་དཀྱིལ་འཁོར་འཆར་བའི་ཡིད་ཀྱི་མཁར། །རྟག་པ་དམ་པའི་དགའ་བ་ཉམས་མ་གྱུར། །སྲིད་ཞི་གཉིས་སུ་མཚན་ཙམ་དཀོན་པའི་ཕུལ། །བསོད་ནམས་ལྡན་པའི་སྐལ་པར་ལེགས་འོང་ཞིང་། །འདི་དང་གཏན་གྱི་ཕོངས་པ་མཐའ་དག་སེལ། །ཡིད་བཞིན་ནོར་བུ་བདག་སོགས་གཙུག་གི་རྒྱན། །གང་གིས་བསྟེན་པས་འཆི་བའི་འཇིགས་པ་འཕྲོག །རིང་འཚོའི་བཅུད་ལེན་སྦྱིན་ལ་མཐུ་ཆེ་བ། །བདེ་ཆེན་ཡེ་ཤེས་བདུད་རྩི་ཉོན་མོངས་ཀྱི། །ཟུག་རྔུ་བརྒྱད་ཁྲི་ཞི་བའི་ཟིལ་དངར་འཇོ། །འཇིགས་པའི་དངོས་པོ་ཕྲ་རགས་ཐམས་ཅད་བཅོམ། །ལྟ་བར་གྱུར་པའི་རི་བྲག་ཐལ་བར་འབིགས། །ཡིད་མྱུར་ཕྲིན་ལས་གང་ལའང་ཐོགས་པ་མེད། །རྡོ་རྗེའི་སྙིང་པོ་མཁྲེགས་པ་མཁའ་དང་མཚུངས། །མ་སྐྱེས་མ་འགགས་གཉིས་མེད་འདུས་མ་བྱས། །ཡི་གེ་མེད་ཅིང་སྒྲ་སྤངས་བརྗོད་དུ་མེད། །གཉེན་པོ་མ་མཆིས་མི་རྟོག་ལྷུན་གྱིས་གྲུབ། །ཤེས་རབ་ཕ་རོལ་ཕྱིན་མ་རྒྱལ་བའི་ཡུམ། །ཏིང་འཛིན་རྣམ་ཐར་བསམ་མི་ཁྱབ་ལ་གནས། །བློ་ལས་འདས་པའི་སྤྱོད་ཡུལ་མཐའ་ཡས་སྒྲུབ། །ངོ་མཚར་ཆེན་པོའི་བྱིན་གྱིས་བརླབ་མཛད་པ། །ལུས་ཅན་དགེ་རྩ་

― LT28_Page_0138 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོངས་སུ་སྨིན་སླད་དུའོ། །སྐུ་གཙང་འོད་ཟེར་སྟོང་གི་དྲྭ་བས་གཡོགས། །ཞལ་མཛེས་ལུས་ཅན་ཀུན་ཡོད་མ་ལྟར་འདྲེན། །ཐུགས་སྙོམས་ཉེ་རིང་མི་མངའ་བུ་བཞིན་གཟིགས། །ཕྱག་རིང་འཇིག་རྟེན་གསུམ་པོ་འཇིགས་ལས་སྐྱོབ། །ཏཱ་རེའི་སྒྲ་དབྱངས་སྲིད་ལས་སྒྲོལ་བའི་གྲུ། །སྲིད་པའི་ཐོག་མཐའ་མཉམ་པར་བཟུང་བ་ཡི། །བརྩོན་འགྲུས་གཡོ་མེད་ཞབས་ཀྱི་ཆུ་སྐྱེས་ལ། །མི་མཆོག་སློབ་མར་བཅས་པས་ཕྱག་བྱས་མ། །ཁྱོད་ལ་བསྟོད་པས་ཐུགས་དགྱེས་མ་མཆིས་ཤིང་། །རབ་ཏུ་སྨད་ཀྱང་ཁྲོ་ཞིང་འཁྲུགས་མི་འགྱུར། །འོན་ཀྱང་རང་གི་བསོད་ནམས་སྤེལ་སླད་དུ། །བསྟོད་ཚིག་ནོར་བུའི་ཕྲེང་བ་བརྒྱུས་ཏེ་འབུལ། །སྐྱབས་མེད་བདག་ཅག་འཁོར་བར་ཡུན་རིང་འཁྱམས། །ལས་དང་ཉོན་མོངས་དྲག་པོའི་གཅོང་གིས་ཟིན། །དུས་ཀྱི་འཇིགས་སོགས་སྡུག་བསྔལ་དུ་མས་གཟིར། །མྱུར་མཛད་དཔའ་མོའི་ཐུགས་རྗེས་བཟུང་རེ་རན། །ཕལ་པའི་འགྲོ་བ་སྙིང་བརྩེ་ལྡན་པ་ཡིས། །བྱིས་པ་ཐབས་ཀྱིས་ཉེས་ལས་ལྡོག་བྱེད་ན། །ཡུད་ཙམ་གཡེལ་བ་མེད་པའི་དམ་བཅའི་གོ། །བརྟན་ལྡན་སྙིང་རྗེའི་བདག་ཉིད་སྨོས་ཅི་དགོས། །བརྩེ་བ་བྲལ་བའི་འབྱུང་པོ་ཕལ་པ་ཡང་། །གུས་པས་མཆོད་པའི་འདོད་དོན་སྒྲུབ་བྱེད་ན། །རྩེ་གཅིག་དད་པས་བསྙེན་པའི་ཉམ་ཐག་བུ། །མ་གཅིག་ཐུགས་རྗེ་

― LT28_Page_0139 ―

^{[མ་དཔེ་གཟིགས་ན་འདིར་གནོན།]}

[Full Size]

ཅན་གྱིས་འདོར་ཕོད་དམ། །འོན་ཀྱང་རྣམ་ཤེས་འཁྲུལ་པའི་གཞན་དབང་གིས། །ཐུགས་རྗེ་འཇུག་པའི་ཡུལ་དུ་མ་གྱུར་པའི། །ནོངས་པ་ཅི་བྱས་སྙིང་ནས་འགྱོད་ཅིང་བཤགས། །བྱམས་པའི་ཡུམ་གྱུར་མ་ཡིས་ཚངས་པ་རྩོལ། །རྟག་ཏུ་བསྟེན་ཅིང་ཡུན་ཏུ་བསྒྲུབས་པའི་ལྷ། །དུས་གསུམ་རྒྱལ་བའི་ཡུམ་གཅིག་ཐུགས་རྗེ་ཅན། །བདག་ལ་བརྩེ་བའི་སྤྱན་གྱིས་གཟིགས་ནས་ཀྱང་། །བྱམས་པའི་ཕྱག་གིས་བསྐྱང་བར་མཛད་དུ་གསོལ། །ལས་དང་རྐྱེན་ལས་གྱུར་པའི་ནད་དང་གདོན། །ཉེར་འཚེའི་འཇིགས་ཀུན་མྱུར་དུ་བསལ་ནས་ཀྱང་། །དལ་འབྱོར་ཆོས་ལྡན་ལོ་བརྒྱར་འཚོ་བ་ཡི། །མངོན་པར་འདོད་པའི་མཆོག་སྩོལ་མཛད་དུ་གསོལ། །འཕྲལ་དང་ཡུན་ཏུ་སྡུག་བསྔལ་སྐྱེད་པ་ཡི། །ཉེས་བྱས་གཡང་ས་བརྒྱ་ཡིས་རབ་བསྐོར་བ། །ཕྱུགས་དང་མཚུངས་པའི་བློ་གྲོས་རྨོངས་པ་རྣམས། །འཇིགས་རུང་ཉམ་ངའི་གནས་ལས་བཟློག་ཏུ་གསོལ། །རང་གི་ལས་ལས་སྐྱེས་བའི་ཉེས་པ་ཡིས། །དོགས་པའི་དྲྭ་བ་བརྒྱ་ཡིས་རྟག་བཅིངས་པ། །བདག་དང་བདག་འདྲའི་བདག་འཛིན་དྲི་མ་ཀུན། །ཞི་བའི་ཆབ་ཀྱིས་བཀྲུ་བར་མཛད་དུ་གསོལ། །གཟུང་དང་འཛིན་པའི་བག་ཆགས་མཐུ་བརྟས་པས། །འཇིགས་པའི་གཤེད་མ་བརྒྱ་ཡིས་རབ་གཙེས་པ། །མགོན་མེད་བཤེས་མེད་གྱུར་པའི་སྐྱེ་བོ་ཀུན། །

― LT28_Page_0140 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུ་སྟོབས་གོ་ཆས་སྐྱོབ་པར་མཛད་དུ་གསོལ། །ལས་དང་ཉོན་མོངས་སྒྲིབ་པས་བཀབས་པ་ལ། །ལྟ་བའི་མུན་པ་བརྒྱ་ཡིས་རབ་གཡོགས་པ། །ལམ་སྟོར་གྱུར་པའི་འགྲོ་བ་ལོང་བ་ཀུན། །ཡེ་ཤེས་ཉི་མས་སྣང་བར་མཛད་དུ་གསོལ། །རྟག་ཏུ་ཞལ་མཐོང་གསུང་གི་བདུད་རྩི་ནོད། །བྱང་ཆུབ་བར་དུ་རྗེས་བཟུང་མཛད་ནས་ཀྱང་། །ཚེ་དབང་ཡེ་ཤེས་གྲུབ་པའི་དགའ་སྟོན་གྱིས། །མཁའ་མཉམ་སྐྱེ་དགུ་མཐའ་དག་འཚོ་བྱེད་ཤོག །ཅེས་པ་ནི་དྲག་པོ་ལྕགས་སྤྲེལ་གནམ་ལོ་གསར་དུ་བཞད་པའི་དཀར་ཕྱོགས་ཀྱི་དགའ་བ་དང་པོར་འགྲུབ་པའི་སྦྱོར་བ་ལ་ཙཱ་འདྲ་རིན་ཆེན་བྲག་གིས་གུལ་དུ་རྗེ་བཙུན་མའི་རྣལ་འབྱོར་ལ་གནས་པའི་ཚེ་གུ་ས་སོ།། ༈ །།འཕགས་མའི་ཐུགས་རྗེ་བསྐུལ་བ་དཔག་བསམ་གྲིབ་བསིལ་ཞེས་བྱ་བ། །ཚེ་དབང་ཡེ་ཤེས་དངོས་གྲུབ་སྦྱིན་མཛད་མ། །ཚེ་དང་ཐར་པའི་བར་ཆད་སེལ་མཛད་མ། །ཚེ་འོད་སྣང་བ་མཐའ་ཡས་དབུ་བརྒྱན་མ། །ཚེ་སྦྱིན་འཇིགས་པ་ཀུན་ལས་སྒྲོལ་མཛད་མ། །སྐྱེ་དགུ་ཀུན་ལ་བུ་བཞིན་གཟིགས་མཛད་མ། །ཉེ་རིང་མི་མངའ་ཀུན་ལ་སྙོམས་མཛད་མ། །འགྲོ་བ་མགོན་མེད་རྣམས་ཀྱི་མགོན་གྱུར་མ། །སྲས་བཅས་རྒྱལ་ལས། ཐུགས་རྗེ་མྱུར་བའི་མ། །མཚན་ཙམ་གྱིས་ཀྱང་བདུད་ལས་རྒྱལ་བའི་མ། །མ་གཡེལ་མ་གཡེལ་ཡེ་ཤེས་སྤྱན་གྱིས་གཟིགས། །གསོལ་བ་རྒྱུན་དུ་འདེབས་ལ་

― LT28_Page_0141 ―

^{[མ་དཔེ་གཟིགས་ན་འདིར་གནོན།]}

[Full Size]

། ཐུགས་རྗེས་དགོངས། །བདག་དང་བདག་ལ་སྙིང་ནས་ལྟོས་པ་དག །འདི་ཕྱི་བར་དོར་སྐྱེ་བ་ཀུན་ཏུ་ཡང་། །མ་གཅིག་ཁྱད་ལས་རེ་ས་གཞན་མེད་པས། །འཇིགས་སར་སྐྱེལ་མས་བོར་བའི་ཉམ་ཆུང་བཞིན། །འཇིགས་པའི་འཕྲང་དུ་ཐུགས་རྗེའི་སྤྱན་རས་ཀྱིས། །མི་གཟིགས་ཡལ་བར་འདོར་ན་མ་ཁྱེད་ཀྱི། །ཐུགས་བསྐྱེད་གོ་ཆ་ལྷོད་པར་མི་འགྱུར་རམ། །སྐལ་ངན་བདག་འདྲའི་དོན་ཏུ་དཔའ་བོ་རྣམས། །སྙིང་སྟོབས་ལྷག་པར་རྒྱས་པ་མ་ལགས་སམ། །སྐལ་བཟང་རྣམས་ལ་རྒྱལ་ཀུན་བྱིན་རླབས་འོད། །འཇུག་པར་གྱུར་ན་དེ་ལ་ཅི་ངོ་མཚར། །དེ་བས་འཇིགས་ལས་ཉེན་ལ་སྐྱོབ་བའི་གོ །སྐད་ཅིག་མི་གཡེལ་བྱམས་པའི་ཕྱག་རྐྱོངས་ལ། །བྱིན་རླབས་ཐུགས་རྗེ་ཡངས་པའི་གྲིབ་བསིལ་དུ། །ལས་དང་ལས་ཀྱི་རྣམ་པར་སྨིན་སྐྱེས་པའི། །ཚ་བས་གདུང་རྣམས་ངལ་གསོ་མྱུར་དུ་སྩོལ། །མ་གཅིག་ཁྱེད་ཀྱི་སྐྱབས་འོག་བསྟི་བཞིན་ཏུ། །འཇིགས་པ་བརྒྱ་ཡིས་རྟག་ཏུ་གཙེས་གྱུར་ན། །མྱུར་མ་དཔའ་མོའི་མཚན་སྙན་ཇི་ལྟར་འགྱུར། །སྐལ་པ་དམན་ཅེས་གཟིགས་པ་མི་འཇུག་ན། །སྟོབས་དང་དབང་བཅུའི་རྩལ་གྱིས་སུ་ལ་སྟོངས། །བསླབ་པ་མངོན་སུམ་བཞིན་ཏུ་བསྟན་ན་ཡང་། །ཐོག་མེད་མ་རིག་སྒྲིབ་པ་མཐུག་དྲགས་ཤིང་། །ཉོན་མོངས་གཞན་དབང་སྟོབས་སུ་ཆེ་བ་ཡིས། །འཁྲུལ་སྣང་

― LT28_Page_0142 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་སྤྱོད་ཕྱིན་ཅི་ལོག་ཏུ་གསོལ། །མ་གཅིག་ཐུགས་རྗེ་ཅན་ཐུགས་འགལ་བ་སྙམ། །འོན་ཀྱང་རྟག་གུས་རྩེ་གཅིག་མི་འབྲལ་ཞིང་། །ཡང་དག་ལྟ་ལ་ལྡོག་པས་མ་གོས་ན། །བྱིས་བློ་འཁྲུལ་པའི་དབང་དུ་གང་སོང་བ། །ཡེ་ཤེས་ཡངས་པའི་ཀློང་དུ་བཟོད་མཛད་གསོལ། །བདག་དང་བདག་འདྲ་འཁོར་བའི་རྒྱ་མཚོ་རུ། །སྡུག་བསྔལ་རྦ་རླབས་དུ་མས་ཐོག་མེད་ནས། །གཙེས་ཀྱང་ད་དུང་ལས་ལ་མི་འཇིགས་པར། །སྲས་བཅས་རྒྱལ་བའི་བཀའ་ལས་འགོངས་པ་རྣམས། །སྙིང་གི་དཀྱིལ་དང་རུས་པའི་གཏིང་ཁོངས་ནས། །ནོངས་པ་བདག་གིར་བཟུང་སྟེ་མཐོལ་བཤགས་ཀྱི། །གཟི་བརྗིད་ཆེན་མོས་མྱུར་དུ་ཚངས་པ་སྩོལ། །རྒྱལ་བའི་ཡུམ་གཅིག་ཐུགས་རྗེའི་རྩལ་མ་ཆུང་། །འགྲོ་བའི་མ་གཅིག་བྱམས་པའི་སྤྱན་མ་ཟུམས། །བདག་གི་སྐྱབས་གཅིག་གཟིགས་པ་མ་གཡེལ་བར། །བདག་དང་བདག་གི་བསྲུད་བྱར་དེས་གྱུར་པ། །ཐུགས་རྗེའི་སྐྱབས་ལས་ཡུད་ཙམ་མ་འདོར་ཅིག །གནས་སྐབས་བདུད་བགེགས་བར་ཆད་ཀེག་སྲི་སོགས། །འཇིགས་པའི་མུན་པ་མཐུ་སྟོབས་ཉི་ཟླས་སོལ། །ཚེ་བསོད་དཔལ་འབྱོར་དགེ་ལེགས་ཡོན་ཏན་ཀུན། །རི་ལྟར་བརྟན་ཅིང་ཆུ་ལྟར་རྒྱུན་མི་འཆད། །ཡར་ངོའི་ཟླ་ལྟར་རྒྱས་ཤིང་གོང་འཕེལ་མཛོད། །མཐར་ཐུག་རྗེ་བཙུན་འཕགས་མའི་གསང་གསུམ་དང་། །དབྱེར་མེད་

― LT28_Page_0143 ―

^{[མ་དཔེ་གཟིགས་ན་འདིར་གནོན།]}

[Full Size]

སྐད་ཅིག་རེ་རེར་ཆོས་དབྱིངས་སུ། །འགྲོ་བ་བྱེ་སྙེད་སྒྲོལ་བའི་ཕྲིན་ལས་ལ། །རྒྱལ་བ་སྲས་དང་བཅས་པའི་སྟོབས་རྫོགས་ཤོག །ཅེས་པའང་རྗེ་བཙུན་མ་ལ་རྩེ་གཅིག་གུས་པའི་ཡིད་ཅན་བློ་གྲོས་མཐའ་ཡས་པའི་སྡེས་གསོལ་བ་བཏབ་པ་ཡ་ཐཱ་སིངྡྷི་ྷ་བནྟུ།། ༈ །།རྗེ་བཙུན་བཅོམ་ལྡན་འདས་མའི་ཐུགས་དམ་བསྐུལ་བ་བསམ་དོན་ལྷུན་གྲུབ་ཅེས་བྱ་བ། །ཧེ་གུ་རུ་ཨཱརྱཱ་ཏཱ་རེ་ན་མོ་ན་མཱ་མི། །རྣམ་དག་དབྱིངས་སུ་རང་བཞིན་བྱང་ཆུབ་སྟེ། །སྤྲོས་པའི་མཚན་མ་མ་ལུས་མཁའ་ལྟར་དག །དུས་གསུམ་འགྱུར་བ་མེད་པའི་ཆོས་ཉིད་དུ། །ཆགས་ཐོགས་སྤངས་པའི་ཤེས་རབ་ཕ་རོལ་ཕྱིན། །གདོད་ནས་མ་སྐྱེས་ནམ་ཡང་འགགས་པ་མེད། །མི་གནས་མི་དམིགས་མཉམ་པ་ཉིད་ཀྱི་ངང་། །སྲིད་པའི་འཁྲུལ་པ་ཅི་ཡང་མ་གཟིགས་ཀྱང་། །འགྲོ་བ་རྨི་ལམ་ལྟ་བུར་འཁྲུལ་བ་ལ། །བརྩེ་བའི་ཐུགས་རྗེས་གཟུགས་ཀྱི་སྐུར་བཞེངས་ནས། །ཐབས་ལ་མཁས་པའི་མཛད་པ་བྱེ་སྙེད་ཀྱིས། །སྐད་ཅིག་རེར་ཡང་འགྲོ་མང་ཐར་གླིང་དུ། །སྒྲོལ་མཛད་བྱམས་པའི་མ་མ་སྐྱེ་དགུའི་གཉེན། །གློག་ལས་མྱུར་བའི་མཐུ་སྟོབས་ཤུགས་འཆང་བས། །ལུས་ཅན་ཀུན་གྱི་རེ་བ་སྐོང་མཛད་མ། །འཇིགས་ཆེན་གང་ལའང་བསྙེངས་པ་མི་མངའ་བས། །འཁོར་བའི་འཇིགས་པ་ཀུན་སྐྱོབས་དཔའ་མོའི་དབྱིངས། །

― LT28_Page_0144 ―

^{[མ་དཔེ་གཟིགས་ན་འདིར་གནོན།]}

[Full Size]

སྲས་བཅས་རྒྱལ་བའི་གསང་གསུམ་འབྱུང་བའི་གནས། །དཀོན་མཆོག་མཚན་གྱི་ཡི་གེ་འཕྲོ་བའི་གཞི། །སྲིད་ཞིའི་ཁམས་སུ་ཀུན་སྐྱེད་ཡུམ་གྱི་ཚུལ། །ཤེས་བྱའི་ཁོངས་ན་ཁྱོད་ཉིད་མངོན་པར་འཕགས། །ཞིང་ཁམས་རྒྱ་མཚོར་སྐུ་དང་མཛད་པས་ཁྱབ། །འགྲོ་རེའི་མདུན་ན་གང་འདུལ་རྣམ་པར་འཕྲུལ། །རིགས་དྲུག་གནས་སུ་སོ་སོའི་འདུལ་ཐབས་སྟོན། །སྲིད་གསུམ་སྡུག་བསྔལ་དྲྭ་བ་གཅོད་པ་ལ། །འཕགས་མའི། ཐུགས་རྗེའི་ཤུགས་མཚུངས་གང་ནའང་མེད། །ཐེག་པ་ཆེ་ཆུང་ཆོས་སྒོ་རབ་འབྱམས་རྣམས། །འཕགས་མའི་རང་བཞིན་ཁོ་ན་བསྟན་མཚུངས་པས། །རྗེ་བཙུན་མ་ཁྱོད་རྣམ་ཐར་བསམ་མི་ཁྱབ། །འགྲོ་ལ་དགོངས་པའི་བཀའ་དྲིན་ཚད་བཟུང་མེད། །རྒྱལ་རྣམས་ཡེ་ཤེས་སྤྱན་གྱིས་དུས་དྲུག་ཏུ། །འགྲོ་ལ་གཡེལ་མེད་གཟིགས་པ་ཆོས་ཉིད་ཀྱང་། །བདག་འདྲ་ཉོན་མོངས་བརྒྱ་ཡིས་རབ་བཙེས་ནས། །སྲས་བཅས་རྒྱལ་བས་ཡལ་བར་བོར་རྣམས་ལ། །མྱུར་མཛད་དཔའ་མོའི་ཐུགས་བསྐྱེད་ལྷག་པའི་མཐུ། །ནམ་ཡང་མི་བརྟུལ་གདུལ་བྱ་མཆོག་དམན་གྱི། །ཉེ་རིང་མེད་པར་མ་བསྒྲལ་བ་རྣམས་སྒྲོལ། །འོན་ཀྱང་བདག་འདྲ་ལས་ཀྱི་ཞགས་པས་བཅིངས། །སྡུག་བསྔལ་འཁོར་བའི་བཙོན་རར་རྟག་ཏུ་མནར། །མ་ཁྱོད་དྲན་ཅིང་སྙིང་ནས་སྐྱབས་ལགས་ན། །དྲི་མེད་ཡེ་ཤེས་གཟིགས་པ་གང་དུ་ཐལ། །

― LT28_Page_0145 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ངན་ལོག་པའི་ལམ་ལས་མི་སྐྱོབ་ན། །ལས་ཟད་ཚེ་ན་ཁྱེད་ཀྱི་ཐུགས་རྗེས་ཅི། །འཇིག་རྟེན་མས་ཀྱང་བུ་ཡི་ལོག་སྒྲུབ་ཞེས། །ཤིན་ཏུ་བཟོད་ཅིང་ཉེས་པ་ཟློག་ལ་གཟིགས། །གློ་བུར་ཐུག་འཕྲད་ཁྱེད་མཚན་དྲན་པས་ཀྱང་། །འཇིགས་ཆེན་དེ་མ་ཐག་ཏུ་སྐྱོབ་མཛད་ན། །ཡུན་རིང་བསྙེན་ཅིང་གསོལ་བ་འདེབས་པ་པོ། །དུས་ཀྱི་ཆད་པའི་འཇིགས་ལས་ཅིས་མི་སྐྱོབ། །བཅོམ་ལྡན་འདས་མའི་ཐུགས་རྗ་མཁའ་ལྟར་ཁྱབ། །གཡེལ་བ་མེད་པར་འགྲོ་ལ་རྩེ་གཅིག་དགོངས། །ཉེ་རིང་མི་མངའ་ཀུན་ལ་བུ་བཞིན་སྙོམས། །མགོན་མེད་གྱུར་ལ་ལྷག་པར་ཐུགས་བརྩེས་གཟིགས། །ཁྱོད་འདྲའི་བརྩེ་ཆེན་སུ་ཡང་མ་མཆིས་པས། །མྱུར་བ་ཉིད་དུ། ཐུགས་རྗེའི་ཕྱག་རྐྱོངས་ལ། །འཆི་བདག་ལ་སོགས་བདུད་བཞིའི་འཇིགས་པ་སོལ། །ཚེ་དང་ཐར་པའི་བར་ཆད་འཕྲང་ལས་སྐྱོབས། །ལྷག་པའི་ལྷ་མཆོག་སྙིང་རྗེའི་གཞན་དབང་ཅན། །ཡིད་འོངས་དཔའ་མོ་སྐྱེ་དགུ་གསོ་བའི་མ། །རིང་ནས་ཡེ་ཤེས་གཟིགས་པས་མི་འདོར་ཡང་། །ལྷག་པར་གལ་ཆེན་འགག་ལ་ཐུག་པའི་ཚེ། །བུ་གཅིག་མ་ལ་འབོད་པའི་ཚུལ་བཞིན་ཏུ། །བཀའ་དྲིན་དྲན་པས་སླར་ཡང་གསོལ་འདེབས་ཤིང་། །གདུང་ཤུགས་དྲག་པོས་སྙིང་ནས་ཁྱེད་འབོད་ན། །སྒྲིབ་པའི་དྲི་མ་དབང་བཅུའི་མཐུ་ཡིས་སོལ། །ཡེ་ཤེས་སྣང་བ་

― LT28_Page_0146 ―

^{[མ་དཔེ་གཟིགས་ན་འདིར་གནོན།]}

[Full Size]

བྱིན་རླབས་ཤུགས་ཀྱིས་སྦོར། །གཞོམ་མེད་རྟག་པ་དམ་པའི་ཚེ་དབང་སྩོལ། །མཆོག་སྦྱིན་ཕྱག་རྒྱ་བདག་གི་སྤྱི་བོར་ཞོག །མ་འཇིགས་གསུང་གིས་བདག་ཀྱང་དབུགས་དབྱུང་ཞིང་། །ཐུགས་རྗེའི་ཤས་ཀྱིས་མྱུར་དུ་རྗེས་སུ་ཟུང་། །དྲི་མེད་ཟླ་བ་རྒྱས་པའི་ཞལ་རས་ལས། །གསུང་མཆོག་བདུད་རྩིའི་ཐིགས་པའི་བཅུད་སྩལ་ནས། །འཆི་མེད་གྲུབ་པའི་རྒྱལ་པོར་བདག་སྒྲུབས་མཛོད། །ཅེས་པའང་རབ་ཚེས་ལྕགས་འབྲུག་གྲོ་བཞིན་ཟླ་བའི་དཀར་པོའི་ཕྱོགས་ཀྱི་ཚེས་བརྒྱད་ལ་བློ་གྲོས་མཐའ་ཡས་པའི་སྡེས་རྫོང་ཤོད་བདེ་གཤེགས་འདུས་པའི་ཕོ་བྲང་དུ་གསོལ་བ་བཏབ་པ་ཨ་མཱ་ར་ི་ཛཱི་བནྟི་སིངྡྷི་ྷ་བནྟུ།། ༈ །།རྗེ་བཙུན་ཨཱརྱཱ་ཏཱ་རེ་ལ་འདུད་ཅིང་གསོལ་བ་བར་ཆད་ཀུན་སེལ་ཅེས་བྱ་བ། །ན་མོ་གུ་རུ་ཏཱ་རཱ་ཙྪིནྡ་ཙཀྲཱ་ཡ། །རྣམ་པར་འདྲེན་མཆོག་རྩ་བ་བརྒྱུད་པར་བཅས། །ཡུམ་གཅིག་ཡེ་ཤེས་སྒྱུ་མའི་རོ་ལ་གར་ཏེ། །བྱིན་རླབས་འབྱུང་གནས་བླ་མ་ཀུན་གྱི་དངོས། །དགེ་བ་ཅན་མ་འཁོར་ལོའི་མགོན་པོར་འདུད། །ཕྱོགས་བཅུ་དུས་གསུམ་གཤེགས་པའི་རྫོགས་སངས་རྒྱས། །ཤེས་རབ་ཕ་རོལ་ཕྱིན་མའི་དབྱིངས་ལས་ཤར། །རྒྱལ་བ་རྒྱ་མཚོ་ཉིད་ལས་མི་གཞན་པ། །བཅོམ་ལྡན་འདས་མ་གཟི་བརྗིད་ཅན་ལ་འདུད། །ཞི་ཆགས་འབར་བའི་ཉམས་ལྡན་དཀྱིལ་འཁོར་ལྷ། །ཐབས་ཤེས་དབྱིངས་ཡེ་ཟུང་དུ་

― LT28_Page_0147 ―

^{[མ་དཔེ་གཟིགས་ན་འདིར་གནོན།]}

[Full Size]

འཇུག་པའི་རྩལ། །གྲུབ་གཉིས་འདོད་འཇོ་ནོར་བུ་དཔག་བསམ་ཤིང་། །འཁོར་ལོའི་འདྲེན་པ་རྣལ་འབྱོར་མ་ལ་འདུད། །གསུང་གཅིག་སྒྲ་དབྱངས་རྒྱ་མཚོའི་རྗེས་སུ་འཇུག །སྒྲ་ཀུན་དབང་པོར་འཚམས་པའི་ཆོས་ཆེན་དབྱངས། །རྒྱུན་ཆད་མི་མངའ་ཞི་བསིལ་བདུད་རྩིའི་གཏེར། །དམ་ཆོས་ཀུན་འབྱུང་རིག་པའི་རྒྱལ་མོར་འདུད། །རྒྱལ་སྲས་བྱང་ཆུབ་སེམས་ཀྱི་མྱུ་གུ་བསྐྲུན། །སྤྲོས་བྲལ་ངང་ལས་འཕགས་བཞིའི་མངོན་རྟོགས་བསྐྱེད། །ཚོགས་མཆོག་ཆུ་གཏེར་ཐུགས་རྗེའི་ཤུགས་ཀྱིས་སྤེལ། །འཇིག་རྟེན་གསོ་བྱེད་སྙན་པ་ཆེན་མོར་འདུད། །འགྱུར་མེད་བདེ་ཆེན་རྡོ་རྗེ་གསུམ་གྱི་རྩལ། །གནས་ཡུལ་དཔའ་བོ་མཁའ་འགྲོའི་འཕྲུལ་དགུར་སྒྱུར། །ལས་བཞི་ལྷུན་གྲུབ་མཆོག་གི་ཉེ་རྒྱུར་སྤྱོད། །གནས་གསུམ་ཕོ་ཉའི་དབང་ཕྱུག་མ་ལ་འདུད། །ནག་པོའི་རྩ་ལག་འཇོམས་ལ་ཆེས་དཔའ་བ། །མཐུ་རྩལ་ཐོགས་མེད་དམ་ཅན་སྡེ་དཔུང་ཡང་། །བསྟན་འགྲོ་ཕན་བདེས་སྲུང་ཕྱིར་མ་ཡི་འཕྲུལ། །ཆོས་སྐྱོང་ཆེན་མོ་ཕ་རོལ་གནོན་ལ་འདུད། །སྲིད་ཞིའི་ཁམས་ན་དགེ་ལེགས་ཇི་སྙེད་པ། །བཅོམ་ལྡན་འདས་མའི་ཐུགས་རྗེ་ཆེན་པོའི་སྟོབས། །དུས་གསུམ་གཤེགས་པས་རྟག་ཏུ་ཕྱག་མཛད་པ། །དེད་དཔོན་ཆེན་མོ་སྙིང་རྗེས་འཇུག་ལ་

― LT28_Page_0148 ―

^{[མ་དཔེ་གཟིགས་ན་འདིར་གནོན།]}

[Full Size]

འདུད། །སྡུག་བསྔལ་མཚོ་ལས་འགྲོ་ཀུན་རྟག་སྒྲོལ་བའི། །སྙིང་སྟོབས་དེ་འདྲ་ནམ་ཡང་མ་བྱུང་བས། །ངོ་མཚར་མཚན་གྱིས་བརྗིད་པའི་རྗེ་བཙུན་མ། །འཇིག་རྟེན་གསུམ་མགོན་སྒྲོལ་མ་ཡུམ་ལ་འདུད། །སྐྱེ་བོ་གང་ཞིག་འཇིགས་པས་ཉེན་པ་དག །ཁྱོད་མཚན་དྲན་པའི་མོད་ལ་བདེ་བར་སྐྱོབ། །ཐུགས་རྗེའི་རྩལ་ཤུགས་གློག་དང་མཚུངས་པ་ཡི། །གདུང་སེལ་ཡིད་མགྱོགས་མྱུར་མཛད་མ་ལ་འདུད། །ཡིད་སྲུབས་བྱེ་བའི་དཔུང་གི་རུ་མཚོན་ཀྱང་། །ཏིང་འཛིན་སྟོབས་ཀྱིས་དྲོ་སྐད་རེ་ལ་བསྙིལ། །བྱང་ཆུབ་སྒྲུབ་ལ་འཚེ་བྱེད་བདུད་བཞི་ཡི། །གཡུལ་ལས་རྣམ་རྒྱལ་དཔའ་མོ་ཆེན་མོར་འདུད། །ནམ་མཁའ་དང་མཚུངས་འཕགས་མའི་ཡོན་ཏན་མཐའ། །ཕྱོགས་དུས་སྲས་བཅས་རྒྱལ་བས་གཞལ་བར་དཀའ། །བྱིས་བློ་དད་པའི་མཐུས་སྦྱར་བསྔགས་ཚིག་གི། རིན་ཆེན་དོ་ཤལ་སྙིང་རྗེའི་རྒྱན་ཏུ་བཞེས། །སྐྱེ་དགུ་ཀུན་ལ་བུ་བཞིན་གཟིགས་མཛད་ཀྱང་། །ལས་ཀྱི་ཉེས་པས་བསྒྲིབས་པའི་ཉམ་ཆུང་བདག །དེ་ཙམ་གདུལ་བྱའི་ཡུལ་དུ་མ་གྱུར་ཏམ། །ད་ནི་མྱུར་དུ་བྱམས་པའི་སྤྱན་གྱིས་གཟིགས། །ཕྱོགས་རིས་མེད་པའི་ཐུགས་རྗེའི་ཕྱག་རྐྱོངས་ལ། །འཇིགས་རུང་འཁོར་བའི་གཡང་ལས་

― LT28_Page_0149 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐྱབ་ཏུ་གསོལ། །ཆགས་ཐོགས་མེད་པའི་ཡེ་ཤེས་རལ་གྲི་ཡིས། །བདག་འཛིན་ལྗོན་པ་རྨངས་ནས་བསྒྱེལ་དུ་གསོལ། །ཟབ་ཞི་སྤྲོས་བྲལ་འོད་གསལ་ཐུར་མ་ཡིས། །མཐའ་གཉིས་ལྟ་བའི་རབ་རིབ་བསལ་དུ་གསོལ། །ཚད་མེད་བྱིན་རླབས་སྟོན་ཟླའི་འཛུམ་ཟེར་གྱིས། །སྟོང་ཉིད་སྙིང་རྗེའི་ཆུ་གཏེར་སྤེལ་དུ་གསོལ། །སྟོབས་བཅུའི་རྩལ་ཤུགས་བསྐལ་པའི་མེ་ལྕེ་ཡིས། །འཇིགས་དང་ལྟས་ངན་ཚང་ཚིང་བསྲེག་ཏུ་གསོལ། །དུས་ཀྱི་མུན་འཇོམས་དུས་ཆེན་ཉིན་བྱེད་ཀྱིས། །དུས་ཀྱི་ཆད་པའི་སྨག་རུམ་གཞོམ་དུ་གསོལ། །ཚེ་སོགས་དབང་བཅུ་གྲུབ་པའི་བཅུད་ལེན་གྱིས། །རིང་འཚོའི་སྲོག་རྩ་རྡོ་རྗེར་བསྒྲུབ་ཏུ་གསོལ། །ལྷ་ཡི་རྣལ་འབྱོར་ཚུལ་བཞིན་སྒོམ་པ་ལ། །ཡེ་ཤེས་སྣང་བརྙན་མངོན་སུམ་བསྟན་ཏུ་གསོལ། །བཟླས་པའི་རིམ་པས་རྟག་ཏུ་བསྙེན་པ་ལ། །ཟབ་རྒྱས་གདམས་པའི་བདུད་རྩི་སྩལ་དུ་གསོལ། །ཞི་ལྷག་ངང་དུ་མཉམ་པར་འཇོག་པ་ལ། །དགོངས་པ་རྩལ་གྱི་བྱིན་ཆེན་དབབ་ཏུ་གསོལ། །རྟག་ཏུ་ཁྱོད་ལ་རྩེ་གཅིག་མོས་པའི་བུ། །མ་གཅིག་བཞིན་ཏུ་གཡེལ་མེད་བསྐྱང་དུ་གསོལ། །ཉོན་མོངས་དབང་

― LT28_Page_0150 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར་ནོངས་པ་གང་བགྱིས་པ། །ཆོས་དབྱིངས་ཀློང་དུ་ཚངས་པ་སྩལ་དུ་གསོལ། །ཉིད་དང་དབྱེར་མེད་མཁའ་མཉམ་འགྲོ་བ་ཀུན། །བདེ་བླག་སྒྲོལ་བའི་དབང་མཆོག་བསྐུར་དུ་གསོལ། །མདོར་ན་གནས་སྐབས་མཐར་ཐུག་ཐམས་ཅད་དུ། །བསམ་དོན་ལྷུན་གྲུབ་དོན་གཉིས་མཐར་ཕྱིན་པའི། །བཀྲ་ཤིས་སྣང་བ་ཉི་ཟླའི་དཀྱིལ་འཁོར་མཆོག །རྟག་བརྟན་ཀུན་ཁྱབ་ཆེན་པོའི་དགེ་ལེགས་སྩོལ། །ཅེས་སྣ་ཚོགས་ཆུ་བོ་རྟ་ལོ་ཉི་མ་བྱང་བགྲོད་ཀྱི་ཐོག་མར་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་བློ་གྲོས་མཐའ་ཡས་ཀྱིས་གསོལ་བ་བཏབ་པ་སིངྡྷི་ར་སྟུ།། ༈ །།ན་མོ་གུ་རུ་ཨཱ་རྱཱ་ཏཱ་རཱ་ཡཻ། །མཚན་ཙམ་ཐོས་པས་འཇིགས་པ་ཀུན་སྐྱོབ་ཅིང་། །གསོལ་བ་བཏབ་ན་དངོས་གྲུབ་རྣམ་གཉིས་སྩོལ། །རབ་འབྱམས་རྒྱལ་བ་སྲས་བཅས་སྐྱེད་པའི་ཡུམ། །རྗེ་བཙུན་སྒྲོལ་མའི་ཞབས་ལ་གསོལ་བ་འདེབས། །མགོན་པོ་གཞན་ལས་ཐུགས་རྗེའི་བྱིན་རླབས་མྱུར། །རྟོག་འཁྲུལ་བདུད་བགེགས་འདུལ་ལ་ཆེས་དཔའ་ཞིང་། །འགྲོ་ལ་བུ་གཅིག་མ་བཞིན་བརྩེ་བས་གཟིགས། །འཕགས་མ་སྒྲོལ་མར་སྙིང་ནས་གསོལ་བ་འདེབས། །རྒྱལ་དང་རྒྱལ་བའི་མྱུ་གུ་ཀུན་ལས་ཀྱང་། །ཐུགས་བསྐྱེད་རྣམ་ཐར་ཕྲིན་ལས་ཁྱད་པར་འཕགས། །ཉམ་ངའི་གཡང་སར་ཕྲིན་ལས་གློག་ལྟར་

― LT28_Page_0151 ―

^{[མ་དཔེ་གཟིགས་ན་འདིར་གནོན།]}

[Full Size]

མྱུར། །ཤེས་རབ་ཕར་ཕྱིན་ཁྱོད་ལ་གསོལ་བ་འདེབས། །གུས་པས་ཕྱག་འཚལ་སྙིང་ནས་སྐྱབས་སུ་མཆི། །ལུས་དང་ལོངས་སྤྱོད་དགེ་ཚོགས་མཆོད་སྤྲིན་འབུལ། །སྡིག་པ་བཤགས་ཤིང་དགེ་ལ་རྗེས་ཡི་རང་། །ཚེས་འཁོར་བསྐོར་ཞིང་རྟག་པར་བཞུགས་སུ་གསོལ། །དགེ་བས་བདག་དང་མ་གྱུར་འགྲོ་བ་ཀུན། །འཕགས་མ་ཁྱོད་ཀྱི་གོ་འཕང་ཐོབ་ཕྱིར་བསྔོ། །གནས་སྐབས་འཇིགས་པ་བརྒྱད་སོགས་མི་མཐུན་ཞི། །འབྱོར་དྲུག་ལེགས་ཚོགས་ཡར་ཟླའི་དཔལ་ལྟར་རྒྱས། །ཚེ་འདིར་མངོན་སུམ་རྗེས་སུ་བཟུང་བ་དང་། །ཞལ་མཐོང་བྱིན་གྱིས་བརླབ་པར་མཛད་དུ་གསོལ། །ནམ་ཞིག་འཕོས་ཚེ་འཕགས་མ་བཞུགས་པའི་གནས། །མ་དག་མིང་མེད་རྟག་ཏུ་བདེ་སྐྱིད་ལྡན། །ངོ་མཚར་བཀོད་པ་ཕུན་ཚོགས་རྒྱ་ཆེ་བ། །གཡུ་ལོ་བཀོད་པའི་ཞིང་དུ་སྐྱེས་ནས་ཀྱང་། །བྱང་ཆུབ་སྤྱོད་པ་རྒྱ་མཚོ་མཐར་ཕྱིན་ནས། །མངོན་པར་སངས་རྒྱས་དོན་གཉིས་ལྷུན་གྲུབ་ཤོག །ཅེས་པའང་སྟག་གཟིག་མཛོ་རྫོང་དགོན་གྱི་ཡོན་གནས་མཆོག་གྱུར་བླ་གྲྭ་སྤྱི་ཡིས་གསུང་བསྐུལ་ངོར་བློ་གྲོས་མཐའ་ཡས་ཀྱིས་དཔལ་སྤུངས་ཡངས་ཁྲོད་ནས་སྤེལ་བ་སིངྡྷི་ར་སྟུ། །དགེ་ལེགས་འཕེལ།། །།

དཔལ་ཧེ་རུ་ཀ་ལ་བསྟོད་ཕྱག་འཚལ་བ་བདེ་ཆེན་རོལ་བ།

― LT28_Page_0153 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་ཧེ་རུ་ཀ་ལ་བསྟོད་ཕྱག་འཚལ་བ་བདེ་ཆེན་རོལ་བ་ཞེས་བྱ་བ་བཞུགས་སོ། །

― LT28_Page_0154 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་དང་དཔལ་ཧེ་རུ་ཀ་ལ་ཕྱག་འཚལ་ལོ། །སྤྲོས་པའི་མཚན་མ་ཀུན་ལས་གྲོལ། །དངོས་པོ་ཀུན་ཁྱབ་བདེ་བ་ཆེ། །སེམས་ཀྱི་རྡོ་རྗེར་ཟུང་འཇུག་པ། །དཔལ་ལྡན་བདེ་བ་མཆོག་ལ་འདུད། །བདག་མེད་རོལ་པ་ཆེན་པོའི་དབྱིངས། སྙིང་རྗེའི་རྗེས་སུ་ཆགས་པའི་མདངས། དམ་པའི་བདག་ཏུ་རོ་གཅིག་པ། ཧེ་རུ་ཀ་ལ་གུས་པས་འདུད། །གཞོམ་མེད་དཔྱིད་ཀྱི་ཤྲཱི་དཔའ་བོ་ནི། །རྣལ་འབྱོར་མ་དཔལ་གཏུམ་མོར་འཁྱུད། །ཞུ་བདེས་འཁོར་ལོ་གསུམ་ཁྱབ་པ། ཧེ། དཔའ་བོའི་དབང་ཕྱུག་ལ་ཕྱག་འཚལ། རུ་ ཀ་ །དཀར་དམར་སྣང་བའི་དྲྭ་བ་ནི། ཁ་སྦྱོར་ནམ་མཁའི་རྡོ་རྗེར་བསྡོམས། །ལྷན་ཅིག་སྐྱེས་དངོས་མཁའ་འགྲོ་མའི། །དྲྭ་བ་སྡོམ་ལ་ཕྱག་འཚལ་ལོ། །ཀུན་བརྟག་གཞན་དབང་འཁོར་ལོ་ནི། །ཡོངས་གྲུབ་ཕྱག་རྒྱ་ཆེན་པོར་བསྡོམས། །སྲིད་ཞི་མཁའ་ལྟར་མཉམ་པར་གཟིགས། །འཁོར་ལོ་སྡོམ་པ་ལ་ཕྱག་འཚལ། །བདེ་གཤེགས་སྙིང་པོ་དག་པའི་གཞི། །དཀར་པོ་གཅིག་ཐུབ་ལམ་གྱི་མཆོག །ལྷན་ཅིག་སྐྱེས་པ་འབྲས་བུའི་སྐུ། །གཅིག་གི་བདག་ཉིད་ལ་ཕྱག་འཚལ། །གཤིས་ལུགས་ཀུན་རྫོབ་དོན་དམ་དྲི། །བསྐྱེད་དང་རྫོགས་པའི་སྦྱོར་བས་སྦྱངས། །ཐབས་ཤེས་ཨེ་ཝཾ་ཟུང་འཇུག་སྐུ། །གཉིས་ཀྱི་བདག་ཉིད་ལ་ཕྱག་འཚལ། །རྩ་རླུང་ཐིག་ལེ་རྡོ་རྗེའི་ཁམས། །རྣལ་འབྱོར་གསུམ་གྱི་བྱེད་པས་བཅིངས། །འཁོར་ལོ་གསུམ་གྱི་འདྲེན་པ་སྟེ། །གསུམ་གྱི་བདག་ཉིད་ལ་ཕྱག་འཚལ། །གནས་སྐབས་

― LT28_Page_0155 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་ཡི་ཆར་ཡང་ནི། །རྡོ་རྗེ་བཞི་ཡི་ལྷུམས་སུ་ཞུགས། །སྐུ་བཞིར་མངོན་པར་བྱང་ཆུབ་པ། །བཞི་ཡི་བདག་ཉིད་ལ་ཕྱག་འཚལ། ཁམས་དང་ཕུང་པོར་རྣམ་རྟོག་པ། །ཡེ་ཤེས་ལྔ་ཡི་ཏིང་འཛིན་གྱིས། །རྟག་པ་ལ་སོགས་ཕྱག་རྒྱར་གྲུབ། །ལྔ་ཡི་བདག་ཉིད་ལ་ཕྱག་འཚལ། །འབྱུང་བཞི་མཁའ་དང་ཡེ་ཤེས་ཁམས། །ཟབ་ལམ་རྣལ་འབྱོར་དྲུག་གིས་བཅིངས། །རིགས་དྲུག་ཁྱབ་བདག་བཅོམ་ལྡན་འདས། །དྲུག་གི་བདག་ཉིད་ལ་ཕྱག་འཚལ། །སྦྱང་བྱ་ཚོགས་དྲུག་ཀུན་གྱི་གཞི། །སྦྱོང་བྱེད་བྱང་ཆུབ་ཡན་ལག་སོགས། །སྦྱངས་འབྲས་ལྷ་སྐུ་བདེ་བ་ཆེ། ཁ་སྦྱོར་བདུན་ལྡན་ལ་ཕྱག་འཚལ། །ཚོགས་བརྒྱད་འཁོར་བའི་བག་ཆགས་ཀུན། །འཕགས་ལམ་བརྒྱད་ལ་སོགས་པས་བཅོམ། །ཡོན་ཏན་བརྒྱད་ལྡན་རྡོ་རྗེ་འཆང་། །མི་བསྐྱོད་རིགས་སུ་བཞེངས་ཕྱག་འཚལ། །ལུགས་འབྱུང་རྟེན་ཅིང་འབྲེལ་འབྱུང་བ། །བདེན་དོན་རྣམ་པས་ལུགས་སུ་ལྡོག །འཕོ་ཆེན་བཅུ་གཉིས་དག་པའི་སྐུ། །ཐབས་ཤེས་རིགས་དྲུག་ལ་ཕྱག་འཚལ། །བདེན་དངོས་དེ་ཉིད་བཅུ་དྲུག་དྲི། །སྐད་ཅིག་རྣམ་པའི་རིམ་ལས་དག །དགའ་བ་བཅུ་དྲུག་མཐར་སྐྱེས་པ། །འགྱུར་བ་མེད་ལ་ཕྱག་འཚལ་ལོ། །ཕུང་ཁམས་སྐྱེ་མཆེད་ཚོགས་ལ་སོགས། །བྱང་ཆུབ་ཕྱོགས་ཆོས་རང་བཞིན་ནི། །སོ་བདུན་ལྷ་ཡི་དཀྱིལ་འཁོར་བ། །དངོས་གྲུབ་བདག་ཉིད་ལ་ཕྱག་འཚལ། །ལཱུ་ཡི་དྲིལ་བུ་ཀཧྞ་པ། །ཏེ་ལོ་ཛྙཱ་ན་སིངྡྷིྡྷི་སོགས། །གྲུབ་པ་དཔའ་བོ་རྣལ་

― LT28_Page_0156 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱོར་མ། །བདེ་བ་མཆོག་ཏུ་རོལ་ཕྱག་འཚལ། །རྡོ་རྗེ་ནང་གི་མཆོད་སྤྲིན་ནི། །ཟག་མེད་བདེ་ཆེན་བདུད་རྩིར་སྦར། །ལྷན་སྐྱེས་ལང་ཚོ་རྒྱས་བྱེད་པ། །བདག་པོར་ལོངས་སྤྱོད་ཐིམ་པར་བཞེས། །འདོད་ཁྲོའི་རྩ་བ་རྨོངས་པའི་སེམས། །དྲི་བྲལ་རང་གསལ་མི་བསྐྱོད་པར། །བསལ་བཞག་བྲལ་བས་གློ་བུར་གྱི། །ཉེས་པ་རང་བཞིན་ཚངས་པར་མཛོད། །འཁོར་འདས་སྣང་སྟོང་ཟུང་འཇུག་དངོས། །བསོད་ནམས་ཡེ་ཤེས་འཕོ་མེད་ཀྱི། །ཚོགས་གསུམ་ལྷུན་གྱིས་གྲུབ་པ་ཉིད། །རྟོགས་པས་གྲོལ་ལ་རྗེས་ཡི་རང་། །མི་ཤིགས་ནཱ་དའི་རང་སྒྲ་སྟེ། །ལོངས་སྤྱོད་ཡོངས་སུ་རྫོགས་ལས་སྐྱེས། །རྩོལ་མེད་རྡོ་རྗེ་ཆོས་ཀྱི་དབྱངས། །དུས་གསུམ་བར་མ་ཆད་བསྒྲག་གསོལ། །སྤྲོས་པས་གཙང་ཞིང་རྒྱུན་གྱིས་རྟག །ཁ་སྦྱོར་བདེ་ཆེན་དམ་པའི་བདག །མི་འགྱུར་བརྟན་གཡོ་ཀུན་གྱི་སྲོག །སྲིད་མཐའ་ཐུག་པར་དེར་སྣང་གསོལ། །འཁོར་ལོ་སྡོམ་པའི་དཀྱིལ་འཁོར་དུ། །དངོས་ཀུན་བཏུད་དེ་སྐྱབས་སུ་མཆི། །ཐུགས་རྗེའི་ཆབ་ཀྱིས་བརླན་པ་དང་། །རྣལ་འབྱོར་མ་རྣམས་རྗེས་བརྩེར་མཛོད། །དེ་རིང་མགོན་པོ་དཔང་བཞག་ནས། །བདག་གིས་རྡོ་རྗེའི་སེམས་མཆོག་བསྐྱེད། །རྡོ་རྗེའི་ལམ་ལ་བདག་ཞུགས་ཏེ། །འགྲོ་ཀུན་ཆོས་ཀྱི་དབྱིངས་སུ་བསྒྲལ། །སྐྱེ་འདི་ཉིད་ནས་བྱང་ཆུབ་བར། །རྡོ་རྗེ་ཐེག་པའི་རིགས་སུ་ངེས། །དཔལ་ལྡན་བླ་མ་གཙུག་ཏོར་གྱི། །ནོར་བུའི་རྒྱན་དང་མི་འབྲལ་ཤོག །གསང་བའི་བརྟུལ་ཞུགས་སྒྲ་བཞིན་སྤྱོད། །དམན་དང་ལོག་པའི་ཕྱོགས་

― LT28_Page_0157 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་རྒྱལ། །འཇིགས་མེད་ཧེ་རུ་ཀ་དཔལ་གྱི། །བདེ་བས་དངོས་ཀུན་སྡོམ་པར་ཤོག །རྟག་ཏུ་བོལླ་ཀཀྐོ་ལ། །མི་འབྲལ་བདེ་བས་ལུས་ཕུག་ནས། །འཕོ་མེད་སྲོག་གི་ཐིག་ལེ་ནི། །ལྷན་ཅིག་སྐྱེས་དགར་རྟག་བརྟན་ཤོག །དངོས་ཀུན་ནམ་མཁའ་ལྟ་བུར་རིག །ཟབ་མོའི་ཆོས་ཀུན་སྙིང་རྗེས་འདོམས། །གནས་གསུམ་ཕོ་ཉའི་འདུ་བ་དང་། །ཚོགས་ཀྱི་འཁོར་ལོར་རབ་སྤྱོད་ཤོག །འདའ་དཀའ་རྡོ་རྗེའི་དམ་ཚིག་ལས། །རྨི་ལམ་དུ་ཡང་ཉམས་མེད་པར། །ཕྱོགས་བཅུ་དུས་གསུམ་གསང་བའི་མཛོད། །ཇི་སྙེད་འཛིན་པའི་བདག་པོར་ཤོག །དགེ་འདིས་བདེ་མཆོག་རྡོ་རྗེ་སེམས། །ཚེ་འདིར་བདག་གིས་མྱུར་གྲུབ་སྟེ། །མཁའ་མཉམ་འགྲོ་ཀུན་ཧེ་རུ་ཀའི། །གོ་འཕང་མཆོག་ལ་འགོད་པར་ཤོག །ལྗོངས་ཁ་བ་ཅན་གྱི་དབུས་འགྱུར་འཆང་། །དྲང་སྲོང་སྲིན་པོ་རི་རང་བྱུང་ཧེ་རུ་ཀའི་ལྷ་ཁང་དུ། །དཔལ་འཁོར་ལོ་སྡོམ་པའི་རྣལ་འབྱོར་ལ་གནས་ཏེ་ག་་ཙཀྲར་ལོངས་སྤྱོད་པའི་སྐལ་པ་བཟང་པོའི་རྗེས་སུ་འབྲེལ་བར། །ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་གང་དྲན་ཡུད་ཙམ་ལ་ཤུར་མར་བྲིས་པ་ཡ་ཐཱ་སིངྡྷིྡྷི་རསྟུ། །དགེ་ལེགས་འཕེལ།། ༈ །།འཕགས་མ་གདུགས་དཀར་ཅན་ལ་བསྟོད་པ་བྱིན་རླབས་ཀྱི་སྣང་བ་ཞེས་བྱ་བ་བཞུགས་སོ། །དུས་གསུམ་སངས་རྒྱས་ཐམས་ཅད་ཀྱི། །གཙུག་ཏོར་ལས་འཁྲུངས་གདུགས་དཀར་འཛིན། །རིག་སྔགས་རྒྱལ་མོ་སྟོབས་པོ་ཆེ། །གཞན་གྱིས་མི་ཐུབ་བཅོམ་ལྡན་འདས། །འཁོར་

― LT28_Page_0158 ―

^{[མ་དཔེ་གཟིགས་ན་འདིར་གནོན།]}

[Full Size]

དང་བཅས་པས་བདག་ཅག་ལ། །ཡེ་ཤེས་སྤྱན་གྱིས་གཟིགས་སུ་གསོལ། །ཆོས་བཟང་ལྷ་ཡི་འདུན་ས་ན། །བཞུགས་པའི་བཅོམ་ལྡན་ཤཱཀྱ་ཐུབ། །གདུང་བདུན་ལ་སོགས་རྫོགས་སངས་རྒྱས། །ཆོས་དང་བྱང་སེམས་ཉན་རང་གི། །དགེ་འདུན་ཚོགས་ལ་གུས་ཕྱག་འཚལ། །རིག་སྔགས་འཆང་དང་དྲང་སྲོང་དང་། །ཚངས་དབང་ལེགས་ལྡན་གསུམ་ལ་སོགས། །ཀུན་ལ་དད་པས་བདག་འདུད་ན། །གཙུག་ཏོར་རྒྱལ་མོ་འགྲུབ་གྱུར་ཅིག །རྡོ་རྗེ་གཙུག་ཏོར་ཕྱིར་བཟློག་ཚེ། །ཕྱག་སྟོང་དང་ནི་དབུ་སྟོང་མངའ། །བྱེ་བ་བརྒྱ་སྟོང་སྤྱན་རས་ཅན། །མི་ཕྱེད་འབར་བའི་མཚན་རྟགས་མངའ། །རྡོ་རྗེ་ཡངས་པ་ཆེན་པོ་ཡི། །ས་གསུམ་དཀྱིལ་འཁོར་མ་ལུས་པར། །བདག་དང་སེམས་ཅན་བདེ་ལེགས་མཛོད། །རིག་པ་དང་ནི་ཕྱག་རྒྱ་དང་། །སྔགས་ཀྱི་ཚོགས་ཀྱིས་བསྲུང་དུ་གསོལ། །སངས་རྒྱས་བྱང་སེམས་ཐམས་ཅད་ཀྱིས། །གུས་པས་ཕྱག་བྱས་རྒྱལ་བའི་ཡུམ། །དཀར་དམར་མཐིང་བའི་ཁ་དོག་འཚེར། །དུག་གསུམ་མུན་ཆེན་བཅོམ་མཛད་མ། །སྒེག་གཤེ་དྲག་ཤུལ་རྒོད་ལ་སོགས། །ཉམས་ལྡན་སྣ་ཚོགས་ཞལ་རས་ལ། །རྡོ་རྗེའི་མཚན་རྟགས་སྤྱན་གསུམ་གསུམ། །དུ་མའི་སྤྱན་རྣམས་བགྲད་པ་དང་། །ཟུར་མིག་གློག་འགྱུ་དྲག་ཏུ་གཟིགས། །རྡོ་རྗེའི་གདུགས་དང་ཕུར་བུ་མདའ། །རལ་གྲི་ལ་སོགས་ཕྱག་མཚན་འབར། །འཇིགས་ཚོགས་ལྔ་བརྒྱ་ཟ་བ་པོ། །ལྔ་བརྒྱ་གཡས་གཡོན་ཞབས་ཀྱིས་མནན། །བ་སྤུ་རྡོ་རྗེའི་མེ་མཚོན་འཁྲུགས། །བྱེ་བ་ཕྲག་

― LT28_Page_0159 ―

^{[མ་དཔེ་གཟིགས་ན་འདིར་གནོན།]}

[Full Size]

བདུན་སངས་རྒྱས་ཀྱི། །ཅོད་པན་རྣམ་པར་འཆང་བ་མོ། །ཞི་ཁྲོ་འཆོལ་བའི་ཆ་ལུགས་ཅན། །ཁྲོ་མོའི་དཀྱིལ་འཁོར་འཁོར་ལོ་ན། །རྣམ་པར་རྒྱལ་མའི་དཔའ་ཆས་རྫོགས། །བདེར་གཤེགས་ཀུན་གྱི་གཙུག་ཏོར་གྱི། །འཁོར་ལོས་སྒྱུར་མ་འཁོར་བཅས་ལ། །སྒོ་གསུམ་གུས་པས་སྐྱབས་གསོལ་ཞིང་། །གཟུངས་དང་མོས་པའི་མཐུ་དག་ལས། །བྱུང་བའི་མཆོད་སྤྲིན་རྒྱ་མཚོས་མཆོད། །འགལ་འཁྲུལ་ཉེས་བྱས་ཅི་མཆིས་བཤགས། །དགེ་ཚོགས་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་བ་དང་། །མྱ་ངན་མི་འདའ་བཞུགས་པར་གསོལ། །དགེ་བ་བྱང་ཆུབ་མཆོག་ཏུ་བསྔོ། །རིག་པ་དང་ནི་ཕྱག་རྒྱ་ཡིས། །མཉེས་ཤིང་བདག་ལ་ཉེ་བར་མཛོད། །ཚེ་རབས་ཀུན་ཏུ་རྗེས་བཟུང་ནས། །ཕྱག་རྒྱའི་ཚོགས་དང་དབྱེར་མེད་མཛོད། །བདག་གི་གུས་པས་བཅོམ་ལྡན་འདས། །རིགས་སྔགས་རྒྱལ་མོར་གསོལ་འདེབས་ཀྱི། །ཡེ་ཤེས་ཐུགས་རྗེས་རྗེས་སུ་ཟུང་། །རྒྱལ་དང་རྐུན་པོ་མེ་དང་ཆུ། །དུག་མཚོན་ལ་སོགས་འཇིགས་པའི་ཚོགས། །ཐམས་ཅད་བཟློག་པར་མཛད་དུ་གསོལ། །ལྷ་ཀླུ་གནོད་སྦྱིན་སྲིན་པོ་སོགས། །སྟོང་ཕྲག་བརྒྱད་ཅུ་རྩ་བཞི་ཡི། །གདོན་དང་གཟའ་ཀུན་འཇིགས་པར་མཛོད། །རྒྱུ་སྐར་ཐམས་ཅད་དགའ་བར་གྱིས། །མདངས་དང་མངལ་སོགས་ཟ་བ་པོའི། །གདོན་ལས་རྟག་ཏུ་བསྲུང་དུ་གསོལ། །དེ་དག་ཀུན་དང་ཆེན་པོ་གཞན། །འདོད་ཆགས་བྲལ་དང་མ་བྲལ་བས། །བྱས་པའི་

― LT28_Page_0160 ―

^{[མ་དཔེ་གཟིགས་ན་འདིར་གནོན།]}

[Full Size]

རིག་སྔགས་ཀུན་བཅད་ཅིང་། །ཕུར་བུས་གདབ་པར་མཛད་དུ་གསོལ། །འབྱུང་པོའི་གདོན་ཀུན་ཚར་ཐག་ཆོད། །དུས་མིན་འཆི་བ་བཟློག་པར་མཛོད། །སེམས་ཅན་གསོད་དང་འཆིང་ལས་དགྲོལ། །མ་རུངས་དགྲ་དང་སྡང་བ་དང་། །ལྟས་ངན་བར་ཆད་ཐམས་ཅད་ཟློག །ཉིན་གཅིག་པ་སོགས་རིམས་རྣམས་དང་། །ཉེས་གསུམ་འདུས་པའི་ནད་རྣམས་སོལ། །དཔག་ཚད་བཅུ་གཉིས་ནང་ཚུན་སྲུངས། །མཚམས་དང་གཟི་བརྗིད་བཅིངས་པར་མཛོད། །གཟུགས་ཅན་དང་ནི་གཟུགས་མེད་ཀྱི། །ཐུན་ཟོར་གཏད་ཁྲོམ་མནན་བསྲེག་སོགས། །བྱད་ཕུར་རྦོད་གཏོང་བཟློག་ནས་ཀྱང་། །རང་གཤེད་རང་ལ་དབབ་པར་མཛོད། །དྲག་ཤུལ་སྡིག་དང་འཁྲུགས་པ་དང་། །སྡང་བའི་སེམས་ལྡན་མ་ལུས་པ། །བྱམས་པའི་སེམས་དང་ལྡན་པར་མཛོད། །ལོ་བརྒྱ་འཚོ་ཞིང་སྟོན་བརྒྱ་མཐོང་། །བགེགས་དང་ལོག་འདྲེན་ཀུན་དགར་མཛོད། །རྡོ་རྗེའི་རིགས་དང་ཕོ་ཉ་མོ། །གྲུབ་པའི་ལྷ་མོ་ཐམས་ཅད་ཀྱིས། །སྲུང་ཞིང་ཡིད་དུ་འོང་བར་མཛོད། །མི་ཁོམས་པ་ཡི་སྐྱེ་གནས་ལས། །ནམ་ཡང་བཟློག་པར་མཛད་དུ་གསོལ། །གྲངས་མེད་རྫོགས་པའི་སངས་རྒྱས་ཀྱི། །བསོད་ནམས་ཕུང་པོ་དང་ལྡན་ཞིང་། །སངས་རྒྱས་བྱང་ཆུབ་སེམས་ཀུན་གྱི། །ཐུགས་སུ་བྱོན་ཞིང་དགྱེས་པར་མཛོད། །བདག་དང་སེམས་ཅན་མ་ལུས་པ། །མི་གཙང་བ་རྣམས་གཙང་བ་དང་། །མ་སྨྱུང་བ་ཡང་སྨྱུང་སོགས་ཀྱི། །ཡོན་ཏན་མ་ལུས་དང་ལྡན་ཞིང་། །མཚམས་མེད་ལྔ་སོགས་ལས་སྒྲིབ་

― LT28_Page_0161 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན། །མྱུར་དུ་ཟད་ཅིང་བྱང་ནས་ཀྱང་། །ངན་འགྲོའི་འཇིགས་པ་ལས་བསྒྲལ་ཏེ། །བདེ་བ་ཅན་གྱི་ཞིང་ཁམས་སུ། །ལམ་སྟོན་ལམ་སྣ་འདྲེན་མཛད་ཅིང་། །སྐྱེ་གཞན་བར་དུ་མ་ཆོད་པར། །ཕྱིར་མི་ལྡོག་པའི་མཆོག་སྦྱིན་མཛོད། །དེར་ཡང་འཕགས་མ་གོས་དཀར་མོས། །རྗེས་བཟུང་རིགས་ཀྱི་བདག་པོ་མཛད། །རིག་སྔགས་འབྲས་བུ་གྲུབ་པར་མཛོད། །རྡོ་རྗེ་ལྟ་བུའི་ཏིང་འཛིན་གྱིས། །འཁོར་འདས་ཆོས་ཀུན་སྒྱུ་མར་རྟོགས། །རྒྱུ་འབྲས་གཉིས་སུ་མ་ཕྱེད་པའི། །རྡོ་རྗེ་འཛིན་པར་བདག་བསྒྲུབ་མཛོད། །རིགས་གཉིས་ཚོགས་ལས་བྱུང་བ་ཡི། །ཟབ་ཅིང་གསལ་བ་རྟག་ཁྱབ་ཆེ། །རྒྱ་ཆེ་རྒྱུན་མི་འཆད་པའི་སྐུ། །རྡོར་སེམས་གོ་འཕང་ཐོབ་པར་མཛོད། །བུམ་བཟང་དཔག་བསམ་ཤིང་བཞིན་ཏུ། །མཁའ་ཁྱབ་སྲིད་པའི་མཐའ་བརྟུལ་བ། །དེ་སྲིད་ཕྲིན་ལས་མི་ཟད་པས། །འགྲོ་བ་མ་ལུས་འདྲེན་པར་ཤོག །ཅེས་པ་འདིའང་ཉིང་འཁྲུལ་དུ་བཅོམ་ལྡན་འདས་མ་གཙོ་འཁོར་གྱིས་བྱིན་གྱིས་བརླབས་པའི་མཚན་མ་ཅུང་ཟད་མཐོང་བས་གསོལ་བ་བཏབ་པ་པོ་ནི་གུ་འོ། །དགེ་ལེགས་འཕེལ།། །།

སྒྲོལ་བསྟོད།

― LT28_Page_0163 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་ཨཱརྱཱ་ཏཱ་རཱ་ཙྪིནྡ་ཙ་ཀྲཱ་ཡ། །ཐུགས་བསྐྱེད་སྨོན་ལམ་རྣམ་ཐར་ཟླ་བྲལ་བ། །དུས་གསུམ་ཕྱོགས་བཅུར་མ་བྱུང་མི་འབྱུང་བས། །རྒྱུ་སྐར་དབུས་ན་ཉ་རྒྱས་ཟླ་བ་ལྟར། །འདྲེན་པ་སྲས་བཅས་དབུས་ན་རབ་འཕགས་པ། །སྒྲོལ་མ་མྱུར་མ་དཔའ་མོ་ཤེར་ཕྱིན་སོགས། །ངོ་མཚར་བསམ་ཡས་མཚན་གྱི་སྙན་པས་ཁྱབ། །གང་ཞིག་སྐྱེད་པའི་ཡུམ་མཆོག་ཉིད་གཟིགས་ནས། །ཕྱོགས་བཅུའི་འདྲེན་མཆོག་རྣམས་ཀྱིས་བསྟི་སྟང་འབུལ། །དཔའ་ཆེན་རྒྱལ་བའི་སྲས་དང་མཁའ་འགྲོའི་དབང་། །རིག་འཛིན་གྲུབ་པའི་ཚོགས་ཀྱིས་མདུན་ནས་བསྔགས། །ལྷ་ཀླུ་མི་དབང་འཇིག་རྟེན་སྐྱོང་རྣམས་དང་། །མ་རུངས་བདུད་སྲིན་འབྱུང་པོས་ཞབས་ལ་བཏུད། །འཇིགས་པའི་འཕྲང་ལས་སྒྲོལ་འདོད་ས་གསུམ་གྱི། །ལུས་ཅན་ཇི་སྙེད་གསོལ་འདེབས་དབྱངས་སུ་ལེན། །ཆོས་དབྱིངས་རྟག་པ་དམ་པའི་མཁའ་ཀློང་དུ། །བསོད་ནམས་བརྒྱ་པའི་མཚན་དཔའི་གཟི་བརྗིད་འབར། །འོད་ཀྱི་དཀྱིལ་འཁོར་ནམ་མཁའི་ཕར་མཐར་འགྲོ། །ཚངས་པའི་གསུང་དབྱངས་འཁོར་འདས་ཀུན་ལ་ཁྱབ། །དགོངས་པ་ཆོས་ཀྱི་དབྱིངས་དང་སྙམས་པར་ཞུགས། །ཚད་མེད་ཐུགས་རྗེ་མཁའ་མཉམ་འགྲོ་ལ་དགོངས། །དུས་གསུམ་རྒྱལ་བ་སྲས་བཅས་ཁྱོད་ལས་འཁྲུངས། །སྲས་བཅས་རྒྱལ་བས་ཁྱོད་ཉིད་གཅིག་པུར་སྐྱེད། །

― LT28_Page_0164 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་གྱི་ཡི་གེས་བདུད་དཔུང་བྲིལ་གྱིས་གནོན། །རིག་པའི་གཟི་ཡི་འཆི་བདག་སྨག་རུམ་བསྙིལ། །དྲན་པ་ཙམ་གྱིས་འཇིགས་པ་ཀུན་ལས་སྐྱོབས། །གསོལ་བ་བཏབ་པས་དངོས་གྲུབ་ཐོགས་མེད་སྩོལ། །སྙིང་རྗེའི་དབང་གྱུར་འཕགས་རྣམས་ཆོས་ཉིད་ཀྱང་། །ཐུགས་རྗེ་མྱུར་མ་ཁྱོད་ཀྱི་མཚུངས་ཟླ་བྲལ། །སྡུག་བསྔལ་རྒྱ་མཚོར་བྱིང་བའི་ལུས་ཅན་རྣམས། །ཕྲིན་ལས་གྲུ་བོས་རྟག་ཏུ་སྒྲོལ་མཛད་མ། །སྐད་ཅིག་རེར་ཡང་ཡིད་སྲུབས་བྱེ་བ་ཕྲག །བདེ་བླག་བཏུལ་མཛད་འཇིགས་བྲལ་དཔའ་མོ་ཆེ། །འཇིགས་སོགས་མི་བདེ་གང་དུ་མཆིས་པ་དེར། །ཐུགས་རྗེའི་རྩལ་ཤུགས་གློག་ལྟར་མྱུར་བ་མོ། །ཆུ་ཤེལ་མདངས་འཚེར་རབ་ཞི་ཟླ་བའི་གདོང་། །མི་བཟད་ཚ་གདུང་སེལ་བའི་གཉེན་དུ་ཤར། །ནོར་སྦྱིན་ཛམྦུ་ཆུ་བོའི་གསེར་གྱི་མདོག །འཛད་མེད་འདོད་རྒུ་རིན་ཆེན་གྲུ་ཆར་འབེབས། །པད་རག་ལྷུན་པོའི་དཔལ་འཛིན་ཕུག་གནས་མས། །སྲིད་གསུམ་སྙིང་ལ་དབང་གི་ལྕགས་ཀྱུས་འདེབས། །དྲག་ཤུལ་ཆེན་མོ་བསྐལ་མེའི་གཟི་བརྗིད་ཀྱིས། །བདུད་བགེགས་འཆི་བདག་རྡུལ་ཚོགས་ཐལ་བར་སྲེག །ཡིད་བཞིན་འཁོར་ལོ་སྟོན་ཟླའི་དཔལ་འཛིན་མས། །ཚེ་དབང་ཡེ་ཤེས་བདུད་རྩིའི་ཟིལ་དངར་སྦྱིན། །མཚན་དང་སྐུ་ཡི་བཀོད་པ་བསམ་མི་ཁྱབ། །དེ་སྙེད་གང་འདུལ་ཕྲིན་ལས་རྣམ་པར་རོལ། །དྲི་མེད་ཡེ་ཤེས་ཆོས་ཀུན་

― LT28_Page_0165 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱིངས་སུ་ཞུགས། །སྙིང་རྗེའི་འོད་ཟེར་འཁོར་བའི་ཕ་མཐར་ཁྱབ། །བྱམས་པའི་འཛུམ་ཞལ་སྒྲུབ་པ་པོ་ལ་སྟོན། །བརྩེ་ཆེན་ཕྱག་གིས་འགྲོ་ཀུན་དབུགས་འབྱིན་མཛད། །འཇིགས་པས་ཉེན་ཀུན་དེ་མ་ཐག་ཏུ་བསྐྱབས། །ཁྱོད་འདྲེའི་འདྲེན་མཆོག་ཕྱོགས་བཅུ་དུས་གསུམ་དུ། །ཨུ་དུམྦ་རའི་མེ་ཏོག་བཞིན་ཏུ་དཀོན། །ལྟ་བ་ལོག་དང་ནག་ཕྱོགས་བདུད་རིགས་སོགས། །སུས་ཀྱང་མདུལ་བ་རྣམས་གདུལ་བར་མཛད། །བླ་མ་མཆོག་དང་དབྱེར་མེད་ལྷག་པའི་ལྷ། །སྲས་བཅས་རྒྱལ་ཀུན་འདུས་ཞལ་ཡེ་ཤེས་སྐུ། །ཤེས་རབ་ཕ་རོལ་ཕྱིན་ཡུམ་རྗེ་བཙུན་མ། །འདི་ཕྱི་ཀུན་ཏུ་བློ་གཏད་གཅིག་ཆོག་གིས། །རྟག་ཏུ་གུས་པས་སྙིང་ནས་གསོལ་འདེབས་ཤིང་། །སྐྱབས་སུ་བསྙེན་ཏེ་རྣལ་འབྱོར་བརྩོན་པ་པོ། །བདག་དང་བདག་ལ་བློ་གཏད་བཅས་རྣམས་ལ། །མཁྱེན་བརྩེ་ཡེ་ཤེས་སྤྱན་གྱིས་གཟིགས་སུ་གསོལ། །དམིགས་མེད་ཐུགས་རྗེས་དབྱེར་མེད་དགོངས་མཛོད་ལ། །མཐུ་སྟོབས་ནུས་པའི་རྩལ་རྫོགས་ཆེན་པོ་ཡིས། །འཆི་བདག་བདུད་ཀྱི་གཡུལ་ངོ་མྱུར་དུ་ཟློག །འཆི་མེད་བདུད་རྩིའི་རྒྱུན་གྱིས་དབང་བསྐུར་སྩོལ། །མི་ཤིགས་རྡོ་རྗེའི་སྐུ་རུ་བྱིན་གྱིས་རློབས། །གཞོལ་མེད་རང་བྱུང་སྔགས་ཀྱི་སྒྲ་རུ་སྨིན། །བདེ་སྟོང་འོད་གསལ་དབྱིངས་དང་དབྱེར་མེད་མཛོད། །འཇིགས་ལས་སྒྲོལ་བའི་

― LT28_Page_0166 ―

^{[མ་དཔེ་གཟིགས་ན་འདིར་གནོན།]}

[Full Size]

།ཐུགས་དམ་དེང་བསྐུལ་ན། །ངན་སོང་འཁོར་བའི་རྒྱ་མཚོ་གཏིང་ཟབ་དང་། །འཇིགས་ཆེན་མཐར་ཐུག་དུས་ཀྱི་ཆད་པ་ལས། །མྱུར་མ་དཔའ་མོས་སྒྲོལ་ཞིང་བསྐྱབ་ཏུ་གསོལ། །སྲོག་གི་ཀ་བ་རྡོ་རྗེའི་ཆོས་སུ་བརྟེན། །སྐྱེ་འཆི་མེད་པའི་ཚེ་ལ་དབང་མཆོག་ཐོབ། །འབད་མེད་གཞན་ཕན་ལྷུན་གྱིས་གྲུབ་པ་ཡིས། །བསམ་དོན་ཡིད་བཞིན་འགྲུབ་པར་མཛད་དུ་གསོལ། །དེང་ནས་བཟུང་ཏེ་རྨི་ལམ་རྩམ་དུ་ཡང་། །ཁྱོད་ཞབས་སྙིང་གི་པདྨོར་མི་འབྲལ་བར། །འཆི་མེད་ཡེ་ཤེས་གྲུབ་པའི་ཟིལ་དངལ་ཀྱིས། །བྱང་ཆུབ་བར་དུ་ལུས་སེམས་འཚོ་བར་མཛོད། །འགྲོ་མགོན་སྟོབས་བཅུ་མངའ་བ་དེ་སྲས་བཅས། །ཁྱད་པར་གངས་ཅན་མགོན་པོ་པད་དཀར་འཆང་། །སྙིགས་འགྲོའི་སྐྱབས་གཅིག་གུ་རུ་ཡབ་ཡུམ་སོགས། །དབྱིངས་ཡེ་ཕྲིན་ལས་གཅིག་གྱུར་རྗེ་བཙུན་མས། །སྙིགས་མའི་རྣམ་འགྱུར་ཤིན་ཏུ་མི་བཟད་པས། །གཅེས་པའི་ཉམ་ཐག་འགྲོ་རྣམས་ཐུགས་རྗེས་སྐྱོབས། །སྐལ་དམན་གདུལ་བྱ་ཡལ་བར་མ་འདོར་བར། །སྒྲིབ་མེད་ཡེ་ཤེས་སྤྱན་གྱིས་རྟག་ཏུ་གཟིགས། །དུས་རིང་ཐོག་མ་མེད་ནས་འཁོར་བར་འཁྱམས། །ད་རུང་མཐའ་མེད་སྡུག་བསྔལ་རྒྱ་མཚོར་བྱིངས། །བདག་དང་བདག་འདྲ་ལས་ངན་དབང་གྱུར་རྣམས། །ཡུམ་མཆོག་ཁྱོད་ལས་ངེས་གཞན་མེད་པས། །ཕྱོགས་དུས་འདྲེན་པ་ཀུན་ལས་ཁྱད་འཕགས་པའི། །

― LT28_Page_0167 ―

^{[མ་དཔེ་གཟིགས་ན་འདིར་གནོན།]}

[Full Size]

། ཐུགས་བསྐྱེད་རྩལ་སྤྲུགས་ཐུགས་རྗེའི་ཕྱག་རྐྱོངས་ལ། །མི་ལྡོག་ཐར་པའི་སྐལ་པར་དྲངས་ནས་ཀྱང་། །གཏན་བདེའི་རྒྱལ་སྲིད་མྱུར་དུ་ཐོབ་པར་མཛོད། །དགེ་ལེགས་འཕེལ། །

ཕ་དམ་པ་སངས་རྒྱས་ལ་བསྔགས་པ་བརྗོད་པ་དཔའ་བོའི་རོལ་མོ།

― LT28_Page_0169 ―

^{[མ་དཔེ་གཟིགས་ན་འདིར་གནོན།]}

[Full Size]

ཕ་དམ་པ་སངས་རྒྱས་ལ་བསྔགས་པ་བརྗོད་པ་དཔའ་བོའི་རོལ་མོ་ཞེས་བྱ་བ། །འཕགས་པའི་ཡུལ་དུ་སྐུ་འཁྲུངས་ཤིང་། །ཕྱོགས་མེད་གནས་སུ་བརྟུལ་ཞུགས་གྲུབ། །རྒྱ་བོད་གཉིས་སུ་འགྲོ་དོན་མཛད། །དམ་པ་སངས་རྒྱས་ཞབས་ལ་འདུད། །སྦྱངས་པའི་ཡོན་ཏན་དཔག་ཏུ་མེད། །གྲུབ་ཐོབ་ཕོ་མོ་ལྔ་བཅུ་བཞིའི། །བྱིན་རླབས་གདམས་པའི་བདུད་རྩི་གསོལ། །སྐྱེས་མཆོག་མི་ཡི་སེང་གེར་འདུད། །བདེ་གཤེགས་གནམ་གྱི་སྐར་མ་ཙམ། །ཞལ་གཟིགས་རྗེས་སུ་གནང་བ་སྩལ། །མདོ་རྒྱུད་གཉིས་ལ་རང་དབང་ཐོབ། །འཇིགས་མེད་སྤྱོད་འཆང་དེ་ལ་འདུད། །བདུད་བཞི་སྐྱེ་མེད་དབྱིངས་སུ་གཅོད། །ཐུག་ཕྲད་ཤེས་པ་རང་སར་གྲོལ། །འཁོར་འདས་གཉིས་ཀྱི་འཁྲུལ་བ་ཞིག །དཔའ་བོ་ཆེན་པོ་དེ་ལ་འདུད། །རྟོགས་པའི་ཡེ་ཤེས་མཁའ་དང་མཉམ། །བྱིན་རླབས་གཟི་བརྗིད་ཉི་བཞིན་འབར། །དོན་བརྒྱུད་ཆཀླུང་བྱེ་བའི་ཕུག །གྲུབ་པའི་སྤྱི་མེས་དེ་ལ་འདུད། །སྐྱེ་འཆི་མེད་པའི་བཙན་ས་ཟིན། །གནས་གསུམ་མཁའ་འགྲོའི་ཚོགས་ཀྱི་རྗེ། །དོན་ཆེན་གསང་བ་ཀུན་གྱི་བདག །སྐུ་བཞིའི་དབང་ཕྱུག་དེ་ལ་འདུད། །སྒྲིབ་པ་ཀུན་སྤངས་གཅེར་བུའི་ཚུལ། །ཆོས་ཉིད་དོན་སྟོན་ནག་པོ་ཆེ། །རྟེན་འབྲེལ་ཀུན་མཁྱེན་བལ་ཐུལ་གསོལ། །རང་བྱུང་རྣལ་འབྱོར་རྒྱལ་པོར་འདུད། །ཨཱ་ལི་ཀཱ་ལིའི་སྒྲ་དོན་རྟོགས། །བརྗོད་མེད་དོན་ལ་སྤོབས་པ་བརྙེས། །བརྗོད་པའི་ཆོས་སྒོར་མཚུངས་པ་མེད། །སྨྲ་བའི་སེང་

― LT28_Page_0170 ―

^{[མ་དཔེ་གཟིགས་ན་འདིར་གནོན།]}

[Full Size]

གེ་དེ་ལ་འདུད། །བརྡ་དང་ཐབས་ཀྱི་གསང་བ་འཚད། །འབྲེལ་ཚད་རྟོགས་གྲོལ་དུས་མཉམ་མཛད། །གྲུབ་ཐོབ་ལྔ་བརྒྱའི་གཙུག་གི་རྒྱན། །ཕ་གཅིག་དམ་པ་དེ་ལ་འདུད། །སྐྱེ་འགག་མེད་པའི་དགོངས་པ་རྟོགས། །སྡུག་བསྔལ་ཞི་བྱེད་ཆོས་འཁོར་བསྐོར། །སྡུག་བསྔལ་གསུམ་གྱི་འཆིང་བ་དགྲོལ། །འགྲོ་བའི་སྨན་པ་དེ་ལ་འདུད། །འབྱུང་བ་ལྔ་ལ་དབང་དུ་མཛད། །རྒྱ་བོད་ཀུན་ཏུ་ཞབས་ཀྱིས་བཅགས། །རྫུ་འཕྲུལ་རོལ་མོ་མཐའ་ཡས་སྒྱུར། །འགྲན་གྱིས་ཟླ་མེད་དེ་ལ་འདུད། །ཁྱོད་སྐུ་རྗེ་བཙུན་སྨྲ་བའི་སེང་། །གསུང་དབྱངས་སྐྱེ་མེད་ནཱ་དའི་སྒྲ། །ནམ་མཁའ་ལྟ་བུའི་ཡེ་ཤེས་ཐུགས། །རྟོགས་ངོར་རོ་མཉམ་སྣང་བས་འདུད། །སྣང་ཚད་ཡེ་ཤེས་ཆེན་པོར་མཆོད། །འཁྲུལ་པ་ཅེར་གྲོལ་ཉིད་དུ་བཤགས། །ལམ་ལྔ་བགྲོད་མེད་རྗེས་ཡི་རང་། །སྟོང་ཉིད་རྟེན་འབྱུང་འཁོར་ལོ་སྐུལ། །རང་ཤར་ཟུང་འཇུག་རྟག་བརྟན་གསོལ། །ཤར་གྲོལ་བརྗོད་མེད་དབྱིངས་སུ་བསྔོ། །ཡེ་ཤེས་སྐུ་ལ་ཕྱོགས་རིས་མེད། །ཐུགས་རྗེའི་སྤྱན་ལ་ཉེ་རིང་མེད། །ཉམ་ཆུང་མོས་པའི་བུ་ལ་དགོངས། །རྟོགས་པའི་བྱིན་གྱིས་བདག་ལ་རློབས། །ཉམས་རྟོགས་རྒྱ་མཚོ་འཕྱུར་བ་དང་། །མཁའ་མཉམ་འགྲོ་སྒྲོལ་དངོས་གྲུབ་སྩོལ། །ལམ་ལྔའི་མངོན་རྟོགས་མཐར་ཕྱིན་ནས། །རྡོ་རྗེ་ལྟ་བུའི་ཏིང་འཛིན་བརྙེས། །རྗེ་བཙུན་ཁྱོད་དང་མཉམ་པ་ཡི། །གོ་འཕང་དེ་རིང་སྩལ་དུ་གསོལ། །འདི་ནི་རྩི་སྟོད་དཔའ་རྒོད་ཀྱི་གངས་དཀར་པོའི་

― LT28_Page_0171 ―

^{[མ་དཔེ་གཟིགས་ན་འདིར་གནོན།]}

[Full Size]

གཡས་ཟུར། ཕ་དམ་པས་ལྷ་འདྲེ་གདུག་པ་ཅན་རྣམས་དམ་ལ་བཞག་ཅིང་རྒྱུད་སྨིན་གྲོལ་དུ་མཛད་པའི་བྲག་གི་བ་གམ་དང་ཁད་ཉེ་བའི་སྤང་ལྗོངས་མཛེས་པའི་མཎྜལ་དུ་སྐྱིལ་མོ་ཀྲུང་གཅིག་ལ་ཐོལ་བྱུང་ཚིག་གི་རོལ་མོ་འཁྲོལ་བ་པོ་རང་བྱུང་བློ་གྲོས་མཐའ་ཡས་པའི་སྡེའོ། །དགེ་ལེགས་འཕེལ།། །།

རྨད་དུ་བྱུང་བའི་སློབ་དཔོན་ཆེན་པོ་ཟླ་བའི་ཞབས་ཀྱི་རྟོགས་པ་བརྗོད་པ་དབྱངས་ཀྱི་ཡན་ལག་བརྒྱ་ལྡན།

― LT28_Page_0173 ―

^{[མ་དཔེ་གཟིགས་ན་འདིར་གནོན།]}

[Full Size]

རྨད་དུ་བྱུང་བའི་སློབ་དཔོན་ཆེན་པོ་ཟླ་བའི་ཞབས་ཀྱི་རྟོགས་པ་བརྗོད་པ་དབྱངས་ཀྱི་ཡན་ལག་བརྒྱ་ལྡན་ཞེས་བྱ་བ་བཞུགས་སོ། །

― LT28_Page_0174 ―

^{[མ་དཔེ་གཟིགས་ན་འདིར་གནོན།]}

[Full Size]

ཨོཾ་སྭ་སྟི་སིངྡྷི། །དངོས་ཀུན་ཁྱབ་ཅིང་རྟག་པའི་སྐུ་ནི་མཁའ་ཁྱབ་མཚན་དཔེས་སྤྲས། །ཟླ་བ་ཉིད་ཀྱང་ཞི་བསིལ་ཆོས་ཀྱི་བདུད་རྩིའི་འོད་སྣང་སྤྲོ། །མཚུངས་པ་མེད་པ་རྣམ་གྲོལ་ལམ་གྱིས་མཁན་མཆོག་གཅིག་པུ། །གྲུབ་པ་བྱེ་བའི་གཙུག་རྒྱན་གང་དེར་བདག་ནི་སྙིང་ནས་དད། ༡ །དེ་བས་གདུང་ཤུགས་མི་ཕྱེད་པའི། །རླན་གྱིས་བྲན་པའི་ལག་པད་ནི། །ཁྱོད་ཞབས་ཟླ་བའི་མེ་ལོང་དུ། །ཁེངས་པ་བསྙིལ་ནས་ཟུམ་པར་བགྱི། ༢ །དོན་མཐུན་གྱིས་ནི་རིན་ཆེན་དང་། །རྨང་པོས་བུ་ལ་ཇི་ལྟར་འདོད། །དེ་ལྟར་ཁྱོད་ཀྱི་ཡོན་ཏན་གྱི། །དཔལ་ལ་འདོད་པས་མ་ངོམས་པར། ༣ །རྒྱལ་བ་དགྱེས་པའི་རིན་ཆེན་སེམས། །ཤེས་རབ་ཟབ་མོའི་རྗེས་སོང་བ། །དྲི་ཟའི་ལག་པས་བསྣུན་པ་ཡི། །འཕངས་འགྲོའི་དབྱངས་སྙན་བརྡུང་བར་བྱ། ༤ །འཁོར་བར་རིགས་ཀྱི་ནུས་པ་

― LT28_Page_0175 ―

^{[མ་དཔེ་གཟིགས་ན་འདིར་གནོན།]}

[Full Size]

ནི། །ཏིལ་ལ་ཁྱབ་པའི་མར་བཞིན་དུ། །རྒྱུ་འབྲས་རྣམ་དབྱེར་མེད་པར་ཡང་། །བྲལ་བའི་རྐྱེན་ལ་ལྟོས་གྱུར་པས། ༥ །མེ་ཤེལ་ནུས་པས་མེ་འབྱིན་ལ། །རླན་གྱིས་སཱ་ལུའི་ལྗོང་པ་འབྱིན། །དད་པས་དཀར་པོའི་ཕྱོགས་ཀྱི་ཆོས། །ལྷག་མ་མེད་པར་རྫོགས་པར་དྲན། ༦ །དེ་ཕྱིར་རྣམ་པར་ཐར་པའི་གཏམ། །དབྱར་གྱི་དཔལ་མོས་གསོས་པ་ཡི། །ཉམས་འགྱུར་ལང་ཚོའི་སྒེག་འཆང་བ། །སྙན་ཚིག་འདབ་བརྒྱ་ཁོང་ནས་རྒོད། ༧ །གང་གི་རྨད་བྱུང་གྲགས་པ་ནི། །འཇིག་རྟེན་ཀུན་ཏུ་ཁྱབ་པའི་དུང་། །དཔལ་གྱི་བདག་པོས་བུས་པ་ལས། །ངོ་མཚར་གཏམ་འདི་རྗེས་སུ་ཐོས། ༨ །བསྙེན་དང་ཉེ་བར་བསྙེན་པ་ཡིས། །ཤིན་ཏུ་ཉེ་བའི་མཚན་མ་མཐོང་། །པདྨ་ལྟ་བུར་འཛུམ་པའི་ཞལ། །གྲུ་འཛིན་དབང་དང་གཏམ་སྨྲ་བ། ༩ །འཕགས་པའི་

― LT28_Page_0176 ―

^{[མ་དཔེ་གཟིགས་ན་འདིར་གནོན།]}

[Full Size]

ཡུལ་དུ་སྔོན་བྱུང་བའི། །བློ་ལྡན་ཆོས་ལ་བཟོད་ཐོབ་པས། །ཆད་པར་ལྟ་བུ་སུན་ཕྱུང་ནས། །བློ་ངན་རྒྱུན་དེ་ལྡོག་པའི་སླད། ༡༠ །གང་ལ་སྐྱེ་བ་ཡོད་མ་མཆིས། །དེ་ལ་འགག་པ་ག་ལ་ཡོད། །དཔལ་གྱི་མགུར་ནས་བདེན་གསུངས་པའི། །མངོན་སུམ་ཚུལ་ལ་ད་ལྟོས་ཤིག༡༡། བློ་ཐག་ཆོད་པའི་མཁས་པ་དེས། །ཡིད་ཆེས་ཚིག་ནི་དེ་འདྲ་བསྟན། །ལུས་ལ་བདེན་པའི་རྟགས་བཀོད་ནས། །འཆི་འཕོ་མངོན་པར་སྐྱེ་བ་བརྩམས། ༡༢ །ནམ་ཞིག་ས་ཡི་ཐིག་ལེ་རུ། །རྒྱུ་འབྲས་མྱུ་གུ་འཁྲུངས་པ་ན། །བཟློག་པར་དཀའ་བའི་ལྟ་ངན་ཡང་། །སྙེམས་པའི་རོ་དང་ལྷན་ཅིག་ཞི། ༡༣ །དགེ་བ་ཅན་གྱི་སྙིང་པོའི་ཡུལ། །དབུས་འགྱུར་འཆང་ལ་མངོན་ཕྱོགས་པའི། །འཆར་ཀའི་ཉི་མས་མཚན་པ་ན། །མཆོག་གི་བདག་ཅེས་བྱ་བ་ཡོད། ༡༤ །འབྱོར་པད་མའི་གྲོང་ཁྱེར་ལ། །རྐང་སྟེགས་བཀོད་པའི་མིའམ་ཅི། །དྲེགས་པ་སྨད་པའི་ལན་བུ་ཡིས། །མཆོད་འོས་ཉིད་དུ་བསྒྲུབས་པ་དེར། ༡༥ །རྣམ་དཀར་པིར་གྱིས་ལེགས་བྲིས་པས། །མཚར་སྡུག་རེ་ཁཱ་རྫོགས་པ་མོ། །པདྨ་སྦྲུམ་པའི་ཀཻ་ས་རཿ །གཞོན་ནུའི་མཆོག་ཅིག་རྒོད་པར་གྱུར། ༡༦ །ལས་ཀྱིས་བྱས་པའི་འབྲས་བུ་དང་། །ཤིན་ཏུ་གོམས་པའི་གནས་ཅན་རིག །འབད་པས་བསྒྲུབས་པ་མཛོད་ཀྱི་ནོར། །གང་ཡིན་བདག་པོའི་མདུན་ན་གནས། ༡༧ །རྒྱལ་རིགས་མཁས་ལས་སྐྱེས་པའི་བུ། །རྒྱལ་སྲས་རྣམས་ཀྱིའང་སྲས་གྱུར་པ། །བརྟུལ་ཞུགས་དང་ནི་སྙིང་སྟོབས་

― LT28_Page_0177 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། །ཆོས་ཀྱི་འབྱོར་པས་འབྱོར་པ་དེ། ༡༨ །བརྡ་སྤྲོད་རྟོག་གེ་འཚོ་ཐབས་སོགས། །གཞན་དག་ངལ་བརྒྱས་ལྷུར་ལེན་པ། །སྐྱེ་བར་བཏབ་པའི་ས་བོན་ནི། །འབད་པ་མེད་པར་སྨིན་པ་ལས། ༡༩ །གང་གི་སྣང་བརྙན་རྫོགས་པ་དང་། །ཡི་གེའི་འདུ་བྱེད་གསལ་བ་དང་། །རྣམ་དཔྱོད་དཔལ་གྱིས་སྒེག་པ་སྟེ། །གསུམ་པོ་འདི་ནི་མཉམ་དུ་བྱང་། ༢༠ །རེ་ཞིག་གྲུབ་པའི་མཐར་ཞུགས་པ། །ཐ་སྙད་སྨྲ་བའི་དབང་ཕྱུག་ནི། །ས་སྟེང་སྨྲ་བ་ལས་རྒྱལ་བས། །བསྟན་ལ་རྨ་ག་གཏོད་པར་བརྩམས། ༢༡ །ཟློག་པའི་སྦྱོར་ལྡན་པི་ཤེ་ས། །བརྒལ་བརྟག་བློ་གྲོས་འཛིངས་པ་ཡིས། །ངལ་བའི་ཁུར་ཅན་དེ་མཐོང་ནས། །གཞོན་ནུ་སྨྲ་བའི་ཉི་མས་སྨྲས། ༢༢ །འདི་ཡི་རྒྱུ་ཅི་འདི་ནི་ཅི། །སྡེབ་སྦྱོར་མཁན་དེ་རངས་བརྩད་ནས། །རྣམ་པར་འཐག་ཅེས་སེང་གེའི་སྒྲ། །མ་བཟོད་རིན་ཆེན་སྙིང་པོའང་འདར། ༢༣ །དེ་ནས་ས་བླའི་ལྷ་དག་གིས། །མེ་ཏོག་བླ་བྲེ་བྲེས་པ་དང་། །སྐྱེ་བོས་ཡོངས་བསྐོར་ས་ཡི་བདག །གཟུར་གནས་གནས་པའི་མདུན་ས་དེར། ༢༤ །དུས་ཀྱི་དང་པོར་བྱུང་གྱུར་པ། །པདྨ་ལྟ་བུའི་གཞོན་ནུ་དེ། །སེང་གེས་བཏེགས་པའི་ཆོས་ཀྱི་ཁྲིར། །ཞུམ་པ་མེད་པར་འཛེགས་པ་ན། ༢༥ །བདག་ལ་ཆགས་པས་ཡིད་བཏེགས་ཤིང་། །འཇིག་རྟེན་མཚམས་ལས་བརྒལ་གྱུར་པའི། །ངོ་མཚར་བློ་ལ་མ་ཤོང་བས། །བརླངས་པོའི་ཚིག་གིས་འབར་ཞིང་སྤྱོས། ༢༦ །ཀྱེ་མ་སྐྱོན་ཡོན་མི་འབྱེད་སྨྲ་བ་དང་། །རང་

― LT28_Page_0178 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་མ་རྟོགས་གཞན་གྱི་གཤགས་འགྱེད་དང་། །གཡོ་སྒྱུ་ཅན་གྱི་མཛའ་བོ་དགྲོས་བཏབ་པ། །སྐད་ཅིག་གཉིས་པར་རང་མཚང་མངོན་ཏུ་ངོམས། ༢༧ །སྙིང་རྗེའི་འཛུམ་རླབས་གཡོ་བའི་བཞིན་གྱི་ཟླ། །འཇིགས་མེད་རྒྱུ་ལས་བྱུང་བའི་འབྲས་བུ་ཅན། །ངོ་ཚའི་གདོང་གི་པདྨ་ཟུམ་བྱེད་པ། །ཞལ་གྱི་གྲ་ནས་ལྡོག་པར་དཀའ་བའི་ཚིག ༢༨ །ལྕགས་ཀྱུ་གླང་ཆེན་ཙམ་མིན་རྡོ་རྗེ་རི་བོའི་གཏོས་མ་ལགས། །མར་མེ་སྨག་དང་མཉམ་མིན་མེ་འདགས་ནགས་ཀྱི་ཚད་མ་ལགས། །ནུས་པའི་རྣམ་དཔྱོད་མཆོག་གི་རགས་པའི་ལུས་ལ་སུ་ཡིད་རྟོན། །མཐར་བྱེད་བྱེད་པོའི་ཚུལ་ལ་དངོས་པོའི་སྟོབས་ཀྱི་སྒྲུབ་བྱེད་དཀོད། ༢༩ །ཚད་མར་གྱུར་པའི་རིག་པ་ཡི། །བྱིན་ཟའི་དཔལ་ལ་རེག་ལྡན་པ། །ལྟ་ངན་ལ་ཞེན་སྦྲང་བུ་དེ། །བརྟན་པ་ཤིན་ཏུ་བྲལ་བ་ཡིས། ༣༠ །འདི་ནི་རབ་སྟོབས་སྐྱེད་བྱེད་དེ། །ཞི་བ་དེ་ནི་འདིའམ་ཅི། །གལ་ཏེ་ལྷ་ཡིས་དེ་འཚལ་ན། །བདག་ཀྱང་དེ་ལྟ་ཉིད་དུ་ཟུངས། ༣༡ །ཕན་པ་ཆོས་སུ་སྨྲ་བ་ལ། །ཡིད་ཆེས་ཐོབ་དེས་དེ་སྨྲས་པས། །འཇིག་རྟེན་གསུམ་ལས་རྒྱལ་བའི་རྔ། །ལྷུན་པོའི་ཁོངས་སུ་བརྡུང་བར་གྱུར། ༣༢ །མི་ཡི་ལུས་ཀྱི་རིན་ཆེན་གྲུ། །བསམ་པའི་ཁྱད་པར་ལྷ་ཡིས་ཀྱང་། །མ་རྙེད་རྣམ་དཀར་ལས་ཀྱི་འབྲས། །སུ་ཞིག་འབྲས་བུ་མེད་པར་བྱེད། ༣༣ །གྲོང་དང་གྲོང་བརྡལ་འབྱོར་པའི་འདུ་ལོང་ཅན། །པདྨའི་རྫིང་བུར་རོ་ལྡན་ཆུས་གང་བ། །སྐྱེད་ཚལ་མེ་ཏོག་དྲི་དང་ལྷན་ཅིག་ཏུ། །མཛེས་མའི་དབུགས་

― LT28_Page_0179 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་དཔལ་ལ་སྣོམ་པ་ཡང་། ༣༤ །མལ་སྟན་རྙིང་པ་བཞིན་དུ་སྡུ་གུ་ཡི། །ཉེ་དུའི་དབུས་ན་འཇིགས་བཅས་བོར་བྱས་ཏེ། །བདག་གཅིག་དཀར་ནག་ལས་ཀྱི་ཤུགས་དག་གིས། །དབང་མེད་འཇིག་རྟེན་ཕ་རོལ་འཕེན་པར་འགྱུར། ༣༥ །མི་འདོད་བཞིན་ཏུ་མཐོ་རིས་དཔལ་ཉམས་ཏེ། །མདུན་ནས་གཤིན་རྗེའི་ཕོ་ཉ་འཇིགས་འཇིགས་ལྟས། །རྒྱུ་འབྲས་ཁྲིམས་རར་བཀུག་སྟེ་རྣོ་བའི་མཚོན། །བརྩེ་མེད་སྲོག་གི་གཤེད་དུ་གཟེངས་ལ་ལྟོས། ༣༦ །ནམ་ཞིག་ས་འདི་དུག་ཅན་མར་གྱུར་ལ། །དེ་ན་བྱིངས་པའི་སྲོག་ལ་ཆགས་པ་ཡོད། །སུ་དག་ཐང་ག་དགའ་བ་ཇི་ལྟར་མྱོང་། །གདོས་པ་འཛིན་པ་བྱམས་པའི་དཔལ་ལས་རྟོགས། ༣༧ །འབྱུང་བའི་ཟུག་རྔུས་མི་མཚོན་ཉོན་མོངས་ཀྱི། །དགྲ་བོ་ཆུ་བཞིས་ཡོངས་གཏམས་འཁོར་བའི་མཚོར། །ལན་བརྒྱར་སྲུབ་པ་ལྷན་སྐྱེས་སེམས་ཀྱི་ནད། །སྨན་མཆོག་དམ་པའི་ཆོས་ལས་གང་ཞིག་ཡོད། ༣༨ །འོད་ལ་ཆགས་པས་བདག་གི་ལུས་བོར་ཞིང་། །འགའ་ཞིག་བརྩོན་པས་རྒྱ་མཚོའི་མཐར་དོང་སྟེ། །དབྱིག་གིས་འཇིག་རྟེན་ཕན་པ་སྒྲུབ་པ་ཡང་། །བྱ་བའི་གནས་ལ་བློ་ཡི་ཁྱད་པར་ཡིན། ༣༩ །བྱང་ཆུབ་སེམས་ཀྱི་བདག་པོས་བཟུང་བ་ཡི། །སྔོན་ཆད་བསྒྲུབས་པ་རྣམ་དཀར་མཛོད་ཀྱི་ནོར། །བསླང་བའི་ཆོགས་དག་ནས་དཔལ་དང་རྩིའི། །གྲུ་ཆར་འཇོ་བའི་བློ་གྲོས་ཅན་དེས་རིག ༤༠ །ལུང་གི་ཁ་ཡིས་རྟོགས་པའི་རོ་མྱོང་བས། །མ་འདྲིས་པར་ཡང་ལུང་དུ་སྟོན་པའི་

― LT28_Page_0180 ―

^{[མ་དཔེ་གཟིགས་ན་འདིར་གནོན།]}

[Full Size]

ལྕེ། །གསུང་རབ་གངྒཱ་འཐུང་བའི་དྲང་སྲོང་ཡང་། །གཞི་རྟེན་ཉིད་ཕྱིར་བསླབ་པའི་འཁར་བར་འཆེལ། ༤༡། འབད་ནས་ས་ལུའི་ལྗོང་པ་སར་བཅུགས་པ། །ཞིང་པའི་ཁེ་ནི་ལག་ཏུ་སོན་པ་བཞིན། །མི་སྣང་སེམས་ལ་བཏབ་པ་ཆོས་ཀྱི་འབྲུ། །དགེ་བའི་འཕེལ་ཁ་དུས་ཀྱིས་མཛད་མ་ཡིན། ༤༢ །རིག་པའི་གནམ་ལྕགས་མུར་འདུག་སྙིང་ལ་གཟེར་བ་དྲི་མེད་བློ་གྲོས་བརྟན་པའི་དཔལ། །འདུལ་མངོན་མདོ་སྡེའི་ཆུ་ཀླུང་འབུམ་ཕྲག་འགྱེད་པའི་གདེངས་ཀ་ཅན་དེས་བཟུང་བ་ལས། །ཤིན་ཏུ་ཡངས་པའི་བློ་ཡིས་གཞིར་རྣམ་དཔྱོད་སྨན་ལྗོངས་རྒྱས་པས་གསོ་བ་ཡི། །ནུས་པའི་རང་བཞིན་འཁོར་བའི་མཐའ་ལ་ཕན་པས་འཁོར་བ་བཞིན་ཏུ་རྫོགས་མ་གྱུར། ༤༣ །སཱ་ལའི་ནགས་སུ་བསྟི་བ་ཡི། །ཏིང་འཛིན་མདའ་ཡིས་བསྣུན་པའི་དགྲ། །ཉོན་མོངས་རི་དྭགས་འཚེ་བ་ཡིས། །ཡིད་ལ་མྱ་ངན་མེད་པའི་དཔལ། ༤༤ །དེ་ཡིས་བྱིན་པའི་རིག་སྔགས་ཀྱི། །ནོར་བུའི་ཞགས་པས་བཏབ་པ་ཡི། །ཡིད་འཕྲོག་ལྷ་མོ་ཏཱ་རེ་ཡང་། །མཛའ་འམ་སྲིང་མོའི་བརྟུལ་ཞུགས་བཟུང་། ༤༥ །སྙིང་རྗེས་ཀུན་ཏུ་གཟིགས་པ་ཡང་། །གྲུ་འཛིན་རི་ནས་འཕོས་པ་བཞིན། །གང་ལ་འབྲལ་བ་མེད་གཟིགས་པས། །སྤྱན་རས་ཕྱོགས་སུ་ལྷུང་བ་བཞིན། ༤༦ །སྐྱེ་བས་ཐོབ་པའི་བློ་གྲོས་ལ། །སོ་སྐྱེ་སྒྲིན་ཡང་བསམ་ནུས་མིན། །སྐྱེ་བར་ལྷ་ཡིས་བྱིན་པའི་མཆོག །གྲུབ་པ་ཆུང་ངུས་མཚོན་ནུས་མིན། ༤༧ །རིག་པའི་རིན་ཆེན་མཛོད་ཕྱེ་བས། །

― LT28_Page_0181 ―

^{[མ་དཔེ་གཟིགས་ན་འདིར་གནོན།]}

[Full Size]

ངག་གི་དཔལ་གྱིས་མ་འབྱོར་བའི། །མི་ཤེས་བློ་ཡི་ལག་སྦྲེང་བ། །ཤཱཀྱའི་ཞིང་ན་ཅང་སྲིད་དམ། ༤༨ །ས་སྐྱོང་དགྱེས་པའི་ཉི་འོད་ཀྱིས། །བསྲུང་བའི་ཡུལ་འཁོར་པདྨའི་ཁ། །གསར་དུ་བྱེ་བ་ལྟ་བུ་ན། །རིག་ལམ་བུང་བའི་དབྱངས་འཐེན་ཏེ། ༤༩ །སཱ་ལ་ལྟ་བུའི་རྒྱལ་རིགས་ཀྱི། །མི་མོ་ལྷ་ཡི་ན་ཆུང་མ། །ས་ལ་འཕོས་འདྲའི་མཚར་སྡུག་གི། །སྒེག་པའི་སྦྲང་ཆང་འཐུང་བ་ན། ༥༠ །འབངས་མོས་བསྐུལ་བའི་ཚིག་ཐོས་པས། །དོན་གྱི་རླུང་ནི་ཐ་དད་ཀྱང་། །མིང་གི་རོ་ཙམ་མཐུན་གྱུར་པ། །ལྷ་དང་གྲོགས་ལ་ཁྱད་པར་ཡོད། ༥༡ །ལྕགས་རིགས་འདོད་པ་མི་འཇོ་ཡང་། །རིན་ཆེན་ཞེས་པའི་མིང་མི་འདོར། །དེ་མིང་མཆོག་ཏུ་མི་འཛིན་ན། །ནོར་བུའང་རྡོ་བའི་རང་བཞིན་ཉིད། ༥༢ །རིགས་ཀྱི་རང་བཞིན་མཚུངས་གྱུར་ལ། །དེ་ཡི་དགའ་བ་དག་ཀྱང་མཐུན། །སྐྱེད་བྱེད་སྲིང་དང་མཛའ་ན་མོ། །བྱིས་པ་ཡིས་ཀྱང་ཐ་དད་བསྟེན། ༥༣ །དམ་པ་རྣམས་ནི་ཤི་བ་ལས། །འཇིགས་པ་ཁྲེལ་དང་ངོ་ཚ་ཆེ། །ལྟར་སྣང་ཙམ་གྱི་བསོད་ནམས་ལ། །ཡིད་མི་རྟོན་པ་སྨོས་ཅི་དགོས། ༥༤ །པདྨའི་མལ་སྟན་འཇམ་པོ་ལ། །གཞོན་ཤ་ཆགས་པའི་རྒྱལ་སྲས་མོར། །ལྷན་ཅིག་དགའ་མགུར་སྤྱོད་པ་ཡང་། །སྦྲུལ་གདུག་བཞིན་ཏུ་སྤངས་བྱས་ཏེ། ༥༥ །ཁྱིམ་གྱི་འདུ་ལོངས་བྲལ་བ་ཡི། །ཞི་བའི་ཚལ་ནི་ཉམས་དགའ་བར། །བགྲོད་ལ་མངོན་པར་ཕྱོགས་པའི་བློ། །མཐོང་བས་ཁྲོས་པའི་ས་

― LT28_Page_0182 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་གིས། ༥༦ །རྩུབ་མོས་ཆད་པས་བསྡིགས་པ་ཡང་། །ལྷ་ཡི་མཐུ་རྩལ་ངོམས་པ་བཞིན། །གངྒཱའི་རྒྱུན་ལ་བསྐྱུར་བ་ཡང་། །མངོན་འདོད་འཕྲལ་ལ་སྒྲུབ་པ་བཞིན། ༥༧ །གཏིང་མེད་འཁྲུགས་པ་རྒྱ་མཚོའི་ངོགས། །ཤིན་ཏུ་འཇམ་པའི་ས་གཞི་ནི། །ལག་མཐིལ་ལྟར་མཉམ་ཙནྡྲའི་གླིང་། །དགེ་བའི་འབྱུང་གནས་དཔའ་མོས་བྱིན། ༥༨ །གང་དུ་སོང་ཡང་ཕུན་ཚོགས་དང་། །མི་འབྲལ་དགེ་བ་སེམས་ཀྱི་གཏེར། །འདོད་ལས་ཐར་པའི་འབྲས་འབྱིན་པ། །ཀླུ་རྒྱལ་གདེངས་ཀས་མཚོན་མ་ཡིན། ༥༩ །མ་བོས་བར་ཡང་སྐྱེ་བོ་འདུས། །མ་བྲིས་རྫོགས་ལྡན་རི་མོ་བཀྲ། །བསྐུལ་བ་མེད་པར་བསོད་ནམས་ལ། །བརྩོན་ལྡན་ཆོས་བཟང་གཉིས་པ་བྱུང་། ༦༠ །འབབས་སྟེགས་ནོར་བུའི་རྡོ་བ་ལ། །དག་པའི་གཟུགས་བརྙན་ཟུང་ཤར་བ། །བྱེད་པོས་མ་བྱས་སྒྱུ་མའི་འཕྲུལ། །བེམས་པོའི་ཆོས་ལས་འདས་སམ་སྙམ། ༦༡ །དེར་ཡང་ཆོས་ཀྱི་དགབ་པ་ཡིས། །ཡང་སྲིད་ཀུན་ཏུ་དགབ་པའི་ཟུང་། །བསྟན་པའི་རིམ་པས་གང་གསོ་བ། །འཕགས་མཆོག་ལུང་གི་སྒྲ་སྙན་འཁྲོལ། ༦༢ །མིག་ལྡན་མིག་གི་བྱ་བ་ལ། །སྣང་བས་ཀྱང་ནི་དཔལ་སྟེར་བྱེད། །འཇིག་རྟེན་ན་ནི་རྒྱུ་དང་འབྲས། །འཕྲད་པ་རྐྱེན་ལ་རག་ལས་ཉིད། ༦༣ །པདྨའི་ཕྲེང་བས་ཡོངས་བཀབ་པའི། །དུག་མཚོར་གོམས་པ་བགོད་པ་བཞིན། །འདོད་སོགས་གཡེང་བས་སེམས་བསླུས་པ། །འཁོར་བ་དུག་གི་རྒྱ་མཚོར་བྱིངས། ༦༤ །ཡུན་རིང་བདེ་

― LT28_Page_0183 ―

^{[མ་དཔེ་གཟིགས་ན་འདིར་གནོན།]}

[Full Size]

དགའ་མྱོང་བའི་ལྷ། །སེམས་དམྱལ་མཐའ་མེད་མྱོང་ལ་ལྟོས། །རྣམ་པར་འགྱུར་ཞིང་ཞིག་པའི་ཆོས། །བདེ་འདི་གྲངས་སུ་མི་བརྩིའོ། ༦༥ །འབྲས་ཆན་དུག་གིས་སྦགས་པའི་ཟས། །ཟོས་པའི་མཐའ་ནི་འཆི་བ་ཉིད། །སྲེད་པའི་ཞགས་པས་བཅིངས་པ་ཡི། །བདེ་བའི་མཐའ་ཡང་ངན་འགྲོར་འཆི། ༦༦ །སྡུག་བསྔལ་བྲལ་བའི་བདེ་ཆེན་པོ། །སྤྲོས་པས་མ་སྤྲོས་ཞི་གཅིག་པུ། །གང་གི་སྙིང་ལ་དེ་ཡོད་པ། །དེ་ཡང་རྟོག་པའི་གཟེབ་ལས་གྲོལ། ༦༧ །ཤེས་པས་སྲིད་དང་སྙིང་རྗེས་ཞི། །མཐའ་གཉིས་མ་ཆགས་དགའ་བའི་ཚལ། །ཤིན་ཏུ་སྦྱངས་པའི་བློ་ལྡན་དང་། །ཐུབ་པ་སྐྱེས་མཆོག་རྣམས་ཀྱིས་བསྟེན། ༦༨ །ཆོས་རྣམས་ངང་གིས་དགེ་བས་ན། །བསླབ་པས་བསྡེམས་པ་རང་མཚན་ཉིད། །གཞན་དུ་ཐར་པའི་ཁང་བཟང་དུ། །འཇུག་ལ་སྐས་ཀྱི་གདང་བུར་གསུངས། ༦༩ །སེམས་ཀྱི་ཀུན་ཏུ་སྡོམ་པ་ལ། །བསླབ་པའི་ཆུ་བོ་རོ་གཅིག་ཀྱང་། །སྤྲོས་པའི་དབྱེ་བསྡུའི་རྒྱུན་སོ་སོ། །རྒྱལ་སྲས་གཞན་དོན་སྤྱོད་པའི་སྒོ། ༧༠ །བྱང་ཆུབ་སེམས་ཀྱིས་བཟུང་བའི་ཁྲིམས། །ལྔ་པོ་གཏན་དུ་བླངས་མཚོན་པ། །མུན་པའི་གོ་འཕང་བསྙིལ་བའི་གོས། །ཟླ་ཞུན་དྭངས་མས་བྱུག་པ་འདྲ། ༧༡ །མི་བརྟན་ཐུར་དུ་གཞོལ་བ་འབྱོར་པའི་ཆུས། །བྱིས་པ་འཁོར་བ་གཏིང་མཐའ་མེད་དྲངས་པས། ཕ། གོ་མའི་ རོལ་རིན་ཆེན་མཆོག་གཅིག་བསྒྲུབ་པའི་བློ། །གཞན་ཕན་གྲུ་བོར་ཡང་ནས་ཡང་དུ་

― LT28_Page_0184 ―

^{[མ་དཔེ་གཟིགས་ན་འདིར་གནོན།]}

[Full Size]

ཞུགས། ༧༢ །སྔོན་གོམས་བྱམས་པས་དྲངས་པའི་སྙིང་རྗེའི་མིག །སྐྱབས་བྲལ་ངལ་བའི་ལྟ་བ་མི་བཟོད་པས། །བཟོད་དཀའི་འཇིགས་པས་བསྟེན་པའི་དགོན་པ་ཡང་། །སྙིང་སྟོབས་མཆོག་ལ་ལྷ་ཡི་དགའ་ཚལ་ཉིད། ༧༣ །དེ་ཚེ་སྦྱིན་པའི་འབྲས་ལྡན་སིང་ག་ལ། །གླང་པོ་མུ་ཏིག་པད་ཅན་མཛེས་མ་ཡིས། །ནགས་ཚལ་ཆུ་དང་ཁྱིམ་གྱི་དཔལ་བྱེད་པ། །གྲགས་པའི་དྲི་བསུང་ཡིད་ཀྱི་ཤིང་རྟས་བསྐྱོད། ༧༤ །ཀུན་རྟོག་གདོན་གྱིས་བསླད་པའི་གྲིབ་མ་ནི། །མི་འབྲལ་སོ་སྐྱེ་རྣམས་ལ་ཟུག་རྔུ་སྐྱེད། །དེར་ཡང་གདེངས་ཅན་འཕྱོས་པའི་ཁ་ཡི་རླངས། །ལས་ཀྱི་ཤིང་སྐམ་དམྱལ་བའི་མེ་རུ་འབར། ༧༥ །སྤྲུལ་ཁས་བསྡིགས་པའི་མཐུས་ཀྱང་མི་ཁྲོལ་ཞིང་། །སྨན་མཆོག་ལན་ལག་བརྒྱད་པས་མི་འཚོ་བ། །རླན་བྲལ་བྱེ་མའི་ཐང་དུ་འགྲེ་བའི་ཉ། །གདུང་སེལ་ཟླ་བ་བདུད་རྩིའི་ཆུ་རྒྱུན་བབ། ༧༦ །རབ་རིབ་ཁོང་ན་ཉལ་བ་བྲང་འགྲོའི་གླང་། །དེ་དང་ཕྱི་མའི་མུ་མཐའ་གཡོ་བའི་རླབས། །བྱམས་པས་མཐར་བྱེད་བྱམས་ཆེན་སེང་གེའི་སྒྲ། །རིན་ཆེན་གཟུགས་བརྙན་ཟོལ་དུ་བཞག་པར་མཐོང་། ༧༧ །ཙནྡན་བསིལ་ཁང་གསེར་གྱི་བག་མ་ཅན། །མུ་ཏིག་འཕྱང་འཕྲུལ་ཤེལ་གྱི་ས་གཞི་བསྟར། །པདྨ་ཅན་གྱི་གླུ་དང་རོལ་མོའི་སྒྲས། །འཕགས་པའི་འདུན་ས་མཛེས་པ་དེ་རྨད་བྱུང་། ༧༨ །རབ་སྟེར་སྐྱེ་བོའི་ཡིད་ནི་ཀུན་དགའ་ཡིས། །འབྱོར་པའི་གྲིབ་བསིལ་ངལ་གསོའི་སྣུམ་བག་

― LT28_Page_0185 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། །ཐེག་མཆོག་སིནྡྷུའི་གྲོང་འཛིན་ལྷག་མ་ཅན། །རིག་པའི་ལྦུ་ཕྲེང་མུ་ཏིག་དོགས་པ་ཡང་། ༧༩ །གྲུབ་པས་བསྙེམས་པའི་གཟི་བྱིན་མ་བཟོད་པ། །ནོར་བདག་ཁེངས་པའི་ལན་བུ་བསྙིལ་བའི་གཏེར། །བདག་པོ་ལྷགས་པའི་བྲན་གྱི་མངའ་ཐང་བཞིན། །འཁྲུལ་པ་བརྟོལ་བས་འཁྲུལ་པ་དབང་དུ་མཛད། ༨༠ །རིན་ཆེན་ལྡན་པ་རིན་ཆེན་འབྱུང་གནས་ནི། །ཚོགས་མཆོག་གཏེར་དང་མཚུངས་པའི་ཆོས་གཞན་མེད། །སྐད་ཅིག་གཡོ་བ་སྤྲིན་གྱི་རྣམ་འགྱུར་ཅན། །ལེགས་པར་རིག་ནས་དྲངས་པོར་ཞུགས་པའི་ཕུལ། ༨༡ །དད་པས་བསྟེན་པ་ཞི་བའི་ཆུ་བསིལ་ཅན། །དཀའ་ཐུབ་གནས་ཀྱི་སྐྱེད་ཚལ་གསར་པ་བརྒྱ། །འཚོ་བས་མི་བྲེལ་མི་མིན་སྦྱིན་པའི་གནས། །ཐོས་པ་བཞིན་ཏུ་ཕྱོགས་ཀྱི་རྣ་རྒྱན་བྱས། ༨༢ །རྣམ་འདྲེན་སྟོང་གི་པདྨོ་ཡིས། །འཕགས་པའི་བུང་བ་སྡུད་པའི་ཡུལ། །གང་དེར་ཆོས་ཀྱི་ཁུར་བཞེས་པས། །སླར་ཡང་བྱ་བ་བྱེད་ལ་ཆས། ༨༣ །རླུང་འཇམ་དལ་བུས་བསྐྱོད་པའི་དྲིས། །བྲལ་བའི་གདུང་སེལ་མ་ལ་ཡར། །ཡོན་ཏན་ཁྱད་པར་འགྲན་པ་བཞིན། །ལྷན་ཅིག་གྲགས་པའི་བསུང་ཞིམས་འཐུལ། ༨༤ །གང་ཚེ་བ་ར་རུ་ཙ་ཡི། །གྲུབ་པས་མཛའ་བའི་ལྷག་མ་ཅན། །བརྡ་སྤྲོད་ཆུ་གཏེར་ལ་ཞུགས་ན། །ཆུ་བདག་ཉིད་ཀྱང་བེམས་སོར་མཚུངས། ༨༥ །ཕྲ་བ་སོ་སོར་རྟོགས་པའི་མེ། །རབ་རིབ་གནས་དང་མི་འཛའ་བས། །མུན་ཅན་རིན་ཆེན་སྒོམ་འབྱེད་ཀྱང་། །

― LT28_Page_0186 ―

^{[མ་དཔེ་གཟིགས་ན་འདིར་གནོན།]}

[Full Size]

འཆིང་བུ་ཐོབ་པ་དངོས་པོའི་ཆོས། ༨༦ །དོན་ཟབ་ལྷུག་པར་མི་བཀྲལ་བའི། །བཤད་པ་ཚིག་གི་ན་ཡོམ་ཉིད། །ཚེ་དང་བརྩོན་པའི་སྦྱོར་དམན་པ། །མི་ཚེ་ཐོས་པ་ཙམ་གྱིས་འདའ། ༨༧ །ཚིག་སྦྱོར་ཉུང་ལ་བརྗོད་པ་གསལ། །དཀའ་བའི་ལུས་ནི་ཡོངས་རྫོགས་པ། །སློང་བ་ཚིམས་བྱེད་རིན་ཆེན་ བྷཱ་ཥ་ གཏེར། བརྡ་སྤྲོད་སྒོ་ནི་ངས་དབྱེའོ། ༨༨ །མི་འཇིགས་དམ་བཅས་བཟུང་བའི་གཞུང་། །ཡན་ལག་དུ་མའི་རོལ་སྒེག་ཅན། །གྲུབ་མཐའ་སྨྲ་ལ་འདྲེན་བྱེད་ཀྱི། །བྱ་བ་དང་སང་དུས་ཀྱང་ངོ་། ༨༩ །སྡོབ་ལེགས་ཚིག་སྦྱོར་ཀུན་ཏུ་བཟང་། །པདྨའི་ཕྲེང་བ་བསྟར་བ་དེས། །དོན་བཟང་མུ་ཏིག་དོ་ཤལ་ཡང་། །འབངས་མོའི་རྒྱན་བཞིན་གྱུར་མཐོང་ནས། ༩༠ །བྱིས་པ་ཚིག་ལ་རྟོན་པས་ན། །དོན་གྱི་རོ་ནི་སུ་ཞིག་མྱོང་། །བདག་པོ་མེད་པའི་ཨནྡྲ་རྙིལ། །ཁྲོན་པའི་ཆབ་ཀྱི་ཉེར་སྤྱད་འོས། ༩༡ །དེ་ཕྱིར་དེ་ཡི་སྦྱོར་ལྡན་པས། །མཐོང་བ་ཙམ་གྱིས་དབྱེ་བྱེད་ཀྱི། །ལྡེ་མིག་བྲལ་བའི་དཔྱོད་པ་སར། །ཕན་བརྩོན་ཏཱ་རེའི་ལུང་གིས་བསྐུལ། ༩༢ །ང་རྒྱལ་དུག་གི་སྐྱངས་ནུལ་ཅན། །སྡེབ་སྦྱོར་འོ་མས་དུག་འཕེལ་བྱེད། །གཞན་ཕན་གྲིབ་མའི་གདུགས་ནི་མཐར། །ཁྱོད་ཀྱི་བྱམས་པས་བཟུང་འདི་འགྲོ། ༩༣ །དེ་ཚིག་སྤྲོ་བས་ཕྱུངས་ཀྱང་ཆུ། །བུ་རམ་བཀྲུས་པའི་མངར་བ་བཞིན། །ཟེགས་མས་འཐུང་བའི་བླུན་པོ་ཡང་། །སྤོབས་པའི་ཁོང་ནས་རིག་པ་སྐྱུག ༩༤ །ཉི་འོད་སྦྲང་རྩི་

― LT28_Page_0187 ―

^{[མ་དཔེ་གཟིགས་ན་འདིར་གནོན།]}

[Full Size]

གནས་ལྔའི་བཅུད། །ཆུ་སྐྱེས་བུང་བ་བློ་ཡི་གསོས། །ཤེས་ནས་འབད་པས་མི་བསྟེན་པ། །དེ་བློ་ཕྱུགས་སམ་རྡོ་བ་དངོས། ༩༥ །དེ་ཚེ་རིག་གྲོལ་འདབ་མ་ཅན། །འཕགས་ཚོགས་ངང་པ་འདུ་བའི་དོག །ཆོས་ཆུ་འབབས་པའི་མ་དྲོས་པ། །འདམ་བུའི་དབང་པོའི་དགའ་ཚལ་ནི། ༩༦ །མཛེས་བྱེད་ཟླ་བ་གྲགས་པའི་འོད་རིས་ཀྱིས། །བློ་ཡི་མུན་བྲལ་འདོད་དགུ་འཇོ་བའི་བ། །མི་ཉུང་ནུབ་ཀྱི་གླིང་ནས་འོད་མཚུངས་པ། །ཁྱུ་མཆོག་མཁས་པས་མདུན་གྱིས་བལྟས་པ་ན། ༩༧ །སྨྲ་བར་མི་བཟོད་ཚངས་པའི་བུ་མོའི་མགྲིན། །མ་བསྐུལ་མི་འབྱིན་རྒྱུད་མངས་བེམ་པོའི་དངོས། །ངང་པའི་སྒྲ་ལྡན་མཛུབ་མོས་བསྡུན་པའི་ཟོལ། །ཆགས་བྲལ་བརྟན་པ་ཕྲལ་ལ་བརྩོན་པ་བཞིན། ༩༨ །གཏན་ཚིགས་འོད་ཀྱི་ཕྲེང་བར་གྲུབ་མཐའ་པའི། །འགྲན་ཟླ་གཉིས་པ་མི་གནས་རྣམ་སད་ཀྱི། །ཐུབ་པས་ཡོངས་བཟུང་ལྟ་ན་སྡུག་པ་དེར། །ཤིན་ཏུ་འཇིགས་མེད་སེང་གེའི་ཟོལ་གྱིས་ཞུགས། ༩༩ །དེ་ཚེ་ཟླ་བ་ལ་ཡང་ཉི་མས་བཞིན། །ཡོངས་གྲུབ་གྲུབ་པའི་གཟི་བྱིན་བཟོད་དཀའ་བས། །འདི་ཅི་རི་དྭགས་འཇོམས་པའི་གདོང་ལྔ་པ། །ཁེངས་པ་བརྟོལ་བའི་དབྱར་རྔ་དེ་མིན་ནམ། ༡༠༠ །ཚོགས་ཀྱི་དབུས་ན་སྔོན་ཆད་མ་མྱོང་བ། །ནེམ་ནུར་འཁྱོགས་ལ་བཏེགས་པའི་སློབ་དཔོན་དེས། །མིང་དང་རྒྱུ་ཅི་རིག་པའི་ནོར་ཡང་ཅི། །འདྲི་ལ་དགའ་སྐྱེད་པདྨ་ལྟ་བུའི་ངག ༡༠༡ །རྒྱགས་པའི་རྒྱུ་སྤངས་མངོན་རློམས་

― LT28_Page_0188 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲས་མི་འབྱིན། །ཚིག་གསུམ་ཙམ་གྱིས་དམ་པའི་རང་བཞིན་མཚོན། །འཐུང་བས་མི་ངོམས་བདུད་རྩིའི་བུམ་པ་ཡང་། །ཐིགས་པས་ཟིལ་དངར་ཤེས་དེ་ལྷན་སྐྱེས་ཡིན། ༡༠༢ །ཚིག་དོན་བརྡ་སྤྲོད་མིག་བུས་བཟུང་བའི་རིག་པའི་ལུས་ཀྱང་ཡོངས་རྫོགས་ཉིད། །འཇིག་རྟེན་མཛེས་བྱེད་བསྟོད་པའི་པདྨོར་ཆོས་དོན་ཡོངས་སྨོས་སྦྲང་རྩི་རྒྱས། །གླུར་བླངས་རྒྱུད་ཀྱི་རྒྱ་མཚོར་མི་འབབས་སྔགས་རྒྱུད་ཆུ་ཀླུང་མེད་རྟོགས་པས། །བཀུར་སྟིར་འོས་པའི་བརྡས་མཚོན་དེ་ནི་ཞབས་ཀྱི་པདྨོ་སླད་རོལ་བཀོད། ༡༠༣ །དེ་ཚེ་རྐང་པ་བརྒྱད་མཚུངས་པས། །དྲངས་པའི་རིན་ཆེན་ཤིང་རྟ་ལ། །སྒྲིབ་པའི་སྤྱོད་ཡུལ་མ་གྱུར་པས། །གཟུགས་བརྙན་ཟོལ་གྱིས་བཞུགས་པའི་ལྷ། ༡༠༤ །ཡེ་ཤེས་མེ་ལོང་ངོས་ལྟ་བའི། །འཇིག་རྟེན་སྣང་བྱེད་ཟླ་བ་ཟུང་། །རྔ་ཡབ་ནོར་བུའི་ཡུ་བ་ཅན། །སྤྲིན་དཀར་དུམ་བུའི་བསིལ་གཡབ་གཡོབ། ༡༠༥ །འཆར་ཀའི་དམར་འོད་ཕོག་པའི་སྡེ། །ཞི་ཞིང་དུལ་བའི་རོལ་མོའི་སྒྲ། །རིན་ཆེན་གདུགས་མཛེས་ལ་སོགས་སྤྲིན། །ས་གཞི་གཡོ་དང་ལྷན་ཅིག་པར། ༡༠༦ །ལྷ་རྣམས་ལྷ་ཡི་རོལ་མོ་དང་། །མེ་ཏོག་ཙནྡན་ཕྱེ་མའི་ཆར། །དུས་ཀྱི་རྗེས་འབྲང་བདུག་པའི་ངད། །མི་ལི་གླུ་གར་འགྲན་པའི་དབུས། ༡༠༧ །བྱང་ཆུབ་སེམས་དང་དཔའ་ཆེན་པོར། །དད་པའི་ཤུགས་རྒྱས་མཆི་མའི་ཆུས། །གདོང་གི་པདྨོ་བཀྲུས་པ་དེས། །མེ་ཏོག་ལྟ་བུའི་སྙན་ཚིག་འཐོར། ༡༠༨ །བེམས་ཆོས་ལས་འདས་ཡེ་

― LT28_Page_0189 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་སྐུ། །མངོན་སུམ་ཉིད་དུ་འཛུམ་པའི་ཞལ། །ཡོན་པོར་ཀྱོགས་ཏེ་མོས་གུས་དང་། །སྙན་ངག་སྦྲང་རྩིའི་རོ་མཆོག་གཞི་བ། ༡༠༩ །སྐྱེ་ལ་ལྐོག་ཏུ་གྱུར་པ་ཡང་། །དམ་པ་རྣམས་ལ་མངོན་སུམ་བཞིན། །མུན་དང་ཉི་མ་འཛའ་མིན་པས། །བྱིས་རོར་སྐྱེངས་པ་ལྟར་དུ་ལོག ༡༡༠ །དོན་མཐུན་རྣམས་ལ་རིན་ཆེན་གླིང་། །ཡུལ་འཁོར་འཛིན་ལ་སྤྲིན་གྱི་བཅུད། །མང་ཐོས་རྣམས་ཀྱང་ཚུལ་གནས་ཀྱི། །དགའ་ཚལ་མཛེས་པ་དེར་དགའོ། ༡༡༡ །དངོས་སྨྲའི་ཚང་ཚིང་ཀུན་ཟ་བ། །ངོ་བོ་ཉིད་མེད་མེ་ལྕེ་དང་། །རྣམ་དབྱེར་མེད་པའི་ཡོན་ཏན་གསུམ། །སྣང་བའི་ཚུལ་བཟུང་རྣམ་རིག་ཉི། ༡༡༢ །རྣལ་འབྱོར་ཅན་ངོར་རོ་གཅིག་ཀྱང་། །རང་བཞིན་དཔྱད་པར་མི་བཟོད་པས། །བྱིས་བློར་འགལ་བ་ཆོས་ཉིད་ཕྱིར། །མཁས་པས་བརྒལ་བརྟག་ལམ་དུ་ཞུགས། ༡༡༣ །དམ་བཅའ་བྲལ་བའི་གསོབ་དང་ནི། །ཐལ་འགྱུར་རྫོང་ལ་མི་ཞེན་པས། །བགྲང་བྱ་བདུན་ཏུ་ལུང་རིགས་མཚོན། །ཇི་ཙམ་འཕངས་ཀྱང་བརྗི་མ་ནུས། ༡༢༤ དག་བྱེད་ཛཧཱུའི་བུ་མོ་ལ། །བགྲོད་པའི་མཉེན་པ་སྙེམས་མ་བྱེད། །དུག་ཅན་བརྒལ་བ་ཆུའི་ཤིང་རྟ། །བ་དན་མཐུན་པའི་རླུང་ལྡན་ཡོད། ༡༡༥ །འཕགས་པ་ཀླུ་དང་ཐོགས་མེད་གཞུང་། །རྒྱ་མཚོར་གནས་བཅས་གདེངས་ཀ་ཅན། །གཏིང་དཔག་དཀོང་ལ་སྤྱོད་མཚུངས་ཀྱང་། །རིགས་ཁམས་ནོར་བུས་སྤྲས་དེ་ཕྱུག ༡༡༦ །རྡོ་ཡི་སྙིང་པོ་བཞུས་མིན་ཅིང་། །མ་ཁྲེགས་

― LT28_Page_0190 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ངར་ཆུ་མ་བླུད་པར། །ཉི་ཚེ་སྨྲ་བའི་རྟོག་གེ་བ། །འཇོམས་པའི་ཐོ་བར་གྱུར་འདི་ཅི། ༡༡༧ །གཏན་ཚིགས་ཁོང་ནས་རྒྱས་པའི་སྒྲས། །བེམས་སྟོང་བསྟན་ལས་སྨ་ཕབ་པས། །སྐྱེངས་པ་ཐོབ་པ་ནམ་མཁས་ཉི། །བྲལ་བའི་སྟོང་པ་སྟོན་བཞིན་རྒྱུ། ༡༡༨ །སྤོབས་པའི་རླབས་ནི་རབ་འཆོལ་བས། །མྱ་ངམ་ཐང་དུ་འཕྱན་པ་ཡང་། །རྨི་ལམ་ཡུལ་གྱི་རྒྱལ་སྲིད་བཞིན། །གཞུང་ལུགས་ཟེགས་མ་མྱོང་བའི་གླུ། ༡༡༩ །ཀྱེ་མ་ཀླུ་ཞབས་རྗེས་འབྲང་ཚིག །སྟོང་ལྟའི་སྨན་ལ་གཞན་གྱི་དུག །མ་ཕམ་ངེས་དོན་བདུད་རྩིའི་རོ། །རིགས་ཅན་ཀུན་གྱི་དབུགས་འབྱིན་ནོ། ༡༢༠ །འཕགས་པའི་ས་ལ་འཕགས་པ་ཡིས། །ཆོས་ཀྱི་བགོ་བཤའ་བསྩལ་བས་ན། །རིན་ཆེན་ལས་བྱས་པད་དཀར་འཆང་། །མངོན་སུམ་རིག་པ་བསླབ་མཐོང་ནས། ༡༢༡ །གང་ལ་བུ་ནི་གཉིས་ཡོད་པའི། །མ་མ་ཉེ་རིང་བྱེད་ན་ཀོ། །བསམ་པའི་ཁྱད་ལས་སུ་ཞིག་ལན། །ཕྱོགས་སུ་ལྷུང་ངམ་འཇིག་རྟེན་མགོན། ༡༢༢ བ་ལང་མིག་གི་ལྟད་མོ་ལས། །སྨྲེང་ཚིག་སྐབས་ཐོབ་ཟླ་བ་གྲགས། །གཟིགས་པས་མཛུབ་མོ་བསྒྲེང་བའི་ལྷ། །ངོ་ཚས་དུད་དམ་བེམས་པོར་གྱུར། ༡༢༣ །དེ་ཚེ་སྦྱིན་འབྲས་སྨིན་བཟོད་པ། །འབྱོར་པས་ཕོངས་པའི་རི་དྭགས་མིག །རྩེ་དགའི་མགྲོན་ཏུ་བོས་པའི་རྒྱན། །མ་རྙེད་བགྲེས་མོ་ལག་རྐྱོང་བྱུང་། ༡༢༤ །ཁྱོད་ཀྱི་གྲགས་པའི་བ་དན་ནི། །སྲིད་པའི་རྩེ་ལས་ཤིན་ཏུ་འགོང་། །སྙན་གྲགས་ལྕགས་ཀྱུས་དྲངས་པའི་ཡིད། །གོམས་

― LT28_Page_0191 ―

^{[མ་དཔེ་གཟིགས་ན་འདིར་གནོན།]}

[Full Size]

སྟབས་འཁྱོར་དང་ལྷན་ཅིག་འོང་། ༡༢༥ །འདོད་པའི་ཁོལ་པོ་བཟེ་རེ་ཅན། །འབྲས་བུ་མ་སྨིན་འཁྲི་ཤིང་ནི། །འདར་ལྡན་གཞན་གྱི་གདོང་པ་ལ། །ལྟ་བ་ཐོབ་པ་དེ་ཡིན་ནོ། ༡༢༦། མི་འདོད་འབྱོར་པས་འབྱོར་གྱུར་ལ། །འདོད་པས་ལག་བྲེལ་ཆོས་ཀྱི་མཛོད། །སློང་བའི་ཚིག་གི་ཁུར་ཐོབ་པས། །སྙིང་རྗེའི་ལྦུ་ཕྲེང་དཀྲུགས་པ་བཞིན། ༡༢༧ །བརྟུལ་ཞུགས་ཕྱག་རྒྱའི་རྒྱས་བཏབ་པས། །སྦྱངས་པའི་ནོར་གྱིས་ཕྱུག་པ་ཡང་། །ཟང་ཟིང་སྤྱད་པས་བཀྲེན་པ་ཉིད། །ཆོག་ཤེས་ཕ་རོལ་ཕྱིན་པས་སོ། ༡༢༨ །སྤྱི་བོ་སྐྱེས་ཀྱི་རྒྱལ་ཐབས་ཀྱང་། །ཆུ་བུར་སྨྲིག་རྒྱུ་སྤྲིན་དང་གློག །མི་བརྟན་གཡོ་དང་འདོད་ཅན་ལ། །སྤུ་གྲིས་གཏམས་པའི་ཚལ་དུ་གཟིགས། ༡༢༩ །དེས་ན་ཆོས་ཀྱི་དགབ་པ་དང་། །རྒྱལ་བའི་ཡུམ་གྱུར་རིན་ཆེན་གྱི། །གླེགས་བམ་ཕྱག་འོས་ཕྱག་བྱས་པ། །བསེ་རུའི་ཡོངས་བཟུང་གཉིས་པ་མེད། ༡༣༠ །དེ་ན་འཇིག་རྟེན་ཕོངས་སྐྱིབ་མ། །སློང་ལ་དམ་པར་འགྱུར་མཐོང་ནས། །བྱེད་པོས་ཆེད་དུ་བྲིས་འདྲ་བར། །དངོས་སྣང་སྒྱུ་མར་རྟོགས་དེས་མཆིད། ༡༣༡ །ནོར་སྦྱིན་འཇིག་རྟེན་ཕན་མཛད་ཀྱི། །རེ་བའི་ཡོལ་གོ་ཐོགས་པ་འཆིས། །བྲལ་བས་ཉེན་ལ་ཙནྡན་ཆུས། །དེ་རིང་སྐོམ་པའི་གདུང་སེལ་མཛོད། ༡༣༢ །དམུས་ལོང་རྣམས་ཀྱི་དམིགས་པུ་སྟེ། །སློང་ལ་གཏེར་དང་ལྗོན་ཤིང་ཉིད། །འཇིགས་པར་ཕ་རོལ་གནོན་པ་ཞེས། །སྐལ་པ་ཅན་ལ་མངོན་ཏུ་གྱུར། ༡༣༣ །ཅོད་པན་ཕུད་

― LT28_Page_0192 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱུ་ཀརྞི་ཀཱ། །དོ་ཤལ་གདུབ་ཀོར་འོག་པགས་ཀྱང་། །རྡོ་རྗེ་དབང་སྔོན་ཆུ་ཤེལ་གཞན། །རིན་ཐང་མེད་པའི་རིན་ཆེན་ནི། ༡༣༤ །མུ་ཏིག་དྲྭ་ཕྱེད་གཡེར་ཁ་ཅན། །པཉྩ་ལི་ཀཱའི་བླ་གོས་སོགས། །གཏམ་དུ་གྲགས་པའི་ལུས་ངན་མཛོད། །དབུལ་བའི་ཐ་མར་གྱུར་ལ་ཕྱེས། ༡༣༥ །འདི་ཡི་སྦྱིན་པའི་གྲིབ་བསིལ་གྱིས། །ངལ་ཅན་བཏུང་བའི་འབབས་སྟེགས་བྱས། །དེ་ཡི་གྲགས་པའི་དྲི་བསུང་གིས། །ཕྱོགས་ཀྱི་མཐར་ཡང་སྙོམས་པར་བགོས། ༡༣༦ །ངོ་མཚར་བྱུང་བ་རི་དྭགས་བཞིན། །ངོམས་པ་མིན་ནམ་ཕྲ་ཕབ་སྐུ། །ཡེ་ཤེས་སྒྱུ་མའི་གར་མཛད་པ། །བྲིས་པའི་རི་མོའི་རྒྱན་ཀྱང་སྤངས། ༡༣༧། ལས་དྲུག་སྤྱོད་པ་ཚངས་པའི་བུ། །མ་ཡིན་ཕྲེང་བརྒྱུད་མཁན་མིན་པར། །རྟོག་ ཟླ་བའི་ གེའི་ཚིག་ཕྲེང་མལླི་ཀཱ །སྨྲ་བ་ཀུན་གྱི་མགུལ་ན་བཅིངས། ༡༣༨ །ཤེས་བྱས་འཇུག་པ་མཐོ་རིས་འཛིན། །འཆོས་སྐྱོབ་འོད་ཅན་བཀང་ནས་ཅི། །ཚིགས་བཅད་གཅིག་གི་དངོས་ཤུགས་ཀྱི། །གཏིང་མཐའ་དཔོགས་པ་སུ་ཞིག་མཆིས། ༡༣༩ །བརྡ་སྤྲོད་ཚད་མ་བཟོ་གནས་རྒྱན་དང་སྙན་དངགས་ལུགས་ཀྱི་ཚུལ། །སྡེབ་སྦྱོར་ཟློས་གར་དེ་བཞིན་ཐོར་བུ་ཁྱད་པར་བླ་མ་ཡི། །རིམ་པ་ལས་འོང་མདོ་དང་སྔགས་ཀྱི་དགོངས་པ་བཀྲལ་དང་སྒྲུབ་པའི་ཐབས། །དམན་དང་བར་མ་མཆོག་ལ་མེ་ཏོག་ཙནྡན་རིན་ཆེན་རིགས། ༡༤༠ །བྱང་ཆུབ་སེམས་ཀྱི་སྙིང་ཆུས་བརླན་པས་སེམས་ཀྱི་བཟང་སྤྱོད་

― LT28_Page_0193 ―

^{[མ་དཔེ་གཟིགས་ན་འདིར་གནོན།]}

[Full Size]

འདོམས་པའི་དབྱངས། །སྐུ་གསུམ་ཚུལ་དུ་གོམས་པ་བགོད་པ་གྲོང་ཁྱེར་ཆེན་པོའི་ལམ་སྲང་སྟེ། །ཐེག་མཆོག་སྨྲ་བའི་ཁ་རྒྱན་དེ་དང་གཞན་ཡང་སོ་སོ་རིག་པ་ནི། །དཔྱིད་ཀྱིས་བརྟོལ་བའི་ཆོས་ཀྱི་དགའ་ཚལ་ཡིད་ཀྱི་འདོད་པ་མི་འཇོ་མེད། ༡༤༡ །རྒྱལ་བ་ཉི་མ་བརྒལ་ནས་འདིར། །རིག་དང་སྒྱུ་རྩལ་སྡེ་སྣོད་ཀྱི། །སྣང་བའི་ཟླ་བ་འཇིག་རྟེན་གསུམ། །གྲགས་པའི་དོ་ཟླ་དེ་ནི་འདི། ༡༤༢ །སྐྱེ་ནས་སྐྱེ་བར་འཐམས་པའི་བློ། །ཤེས་བྱའི་རིན་ཆེན་མུ་མེད་པས། །དབུལ་བའི་སྣོད་ནི་འདི་སྙེད་པ། །གཅིག་ཆར་བསྟབ་པའི་སྙིང་སྟོབས་དང་། ༡༤༣ །ཚིག་འབྲུ་རེར་ཡང་ལན་བརྒྱ་སྙེད། །དོགས་པའི་མདུད་པ་མི་ཁྲོལ་བར། །ཕལ་ཆེར་གཡེང་བས་རང་བསླུས་ཏེ། །མུན་པའི་ཁྲོན་པར་འཆོད་པ་འགལ། ༡༤༤ །འཆི་བ་འཇིགས་བཅས་གཤེད་མའི་དཔུང་། །སྐྱེ་བ་དགའ་དང་ལྷན་ཅིག་འོང་། །བདེ་སྡུག་དབྲག་ན་ཞེན་པའི་ལུས། །འདུས་བྱས་མཐའ་ནི་རིང་པོར་མེད། ༡༤༥ །གཡོན་ཅན་བློ་གྲོས་སྦས་པའི་མེ། །རང་དོན་ལས་གཞན་འཁྱོགས་པོ་ཉིད། །འདོད་དང་སྡང་བའི་རྐྱེན་འཕྲད་ན། །འབར་བས་རང་དང་གཞན་རྒྱུད་བསྲེག ༡༤༦ །ཕན་སེམས་འོ་མས་བྲན་པའི་རྒྱུན། །བླུན་པོའི་ཚིག་གི་ཆུས་བསླད་པས། །རྙིད་དང་གྲགས་ཕྱིར་ཞུགས་པ་རྣམས། །ཐུར་དུ་ཁྱེར་བ་དངོས་པོའི་ཆོས། ༡༤༧ །རྟོག་གེས་ཐམས་ཅད་མཁྱེན་ཐོབ་ཅེས། །དུས་ཀྱི་དགོངས་

― LT28_Page_0194 ―

^{[མ་དཔེ་གཟིགས་ན་འདིར་གནོན།]}

[Full Size]

པ་གཞན་ཏུ་ཡིན། །ཆུ་རྒྱུན་དཀྲུགས་པ་ལྦུ་བའི་མར། །བཀྲེན་པ་སུ་ཞིག་སྲོག་འཚོ་བྱེད། ༡༤༨ །དེས་ན་འཇིག་རྟེན་ཕན་བརྩོན་མ། །ཐུགས་རྗེའི་དུས་རླབས་མི་ཡོལ་བས། །དྲི་ཟའི་དབྱངས་དང་བསྲེས་འདྲ་བ། །ཡིད་འཕྲོག་ལུང་གི་གླིང་བུ་བསྒྱུར། ༡༤༩ །ཟླ་བ་སྒྲོན་མེ་ས་བཅུ་པ། །སྡོང་པོས་བརྒྱན་དང་ལང་ཀར་འཇུག །རྒྱལ་བའི་ཡུམ་གྱུར་ཀློགས་ཤིག་ཀྱེ། །སྡེབ་སྦྱོར་ངན་གཡོའི་སྦྱོར་བས་ཅི། ༡༥༠ །བདུད་རྩི་མྱོང་བའི་ལྷ་མིན་དགྲ། །སྲིད་མཐའ་བརྟུལ་ལ་དཔའ་བ་དེས། །དེ་ཐོས་རྨད་བྱུང་མདོ་ལྔ་པོ། །གོ་ཆ་བཞིན་ཏུ་གཡར་དམ་བླངས། ༡༥༡ །བྲམ་ཟེ་རྣམས་ལ་འོད་དཀར་ཅན། །རྨ་བྱ་རྣམས་ལ་དབྱར་གྱི་རྔ། །ཐོས་པ་དོན་ཡོད་ཆོས་ཀྱི་དཔྱིད། །སྐལ་བཟང་རྣམས་ལ་དེ་ཚེ་བྱུང་། ༡༥༢ །བྱང་ཆུབ་ཤིང་རྟ་སོང་བ་དང་། །འོངས་དང་འགྲོ་བ་སྨོན་ལམ་གྱི། །འདྲེན་པས་ཤུལ་མཚོན་ལམ་པོ་ཆེར། །སློབ་མའི་ཚོགས་བཅས་ཁ་ལོ་སྒྱུར། ༡༥༣ །མེས་བྱིན་ཐུབ་པ་ག་རྒ་སོགས། །བརྟད་པའི་བློ་ཡིས་མ་དཔོགས་པ། །བཏགས་པའི་འདུ་བྱེད་ཏིལ་གྱི་རྫང་། །རོ་མཉམ་འདམ་བུའི་ཚལ་དུ་གཟིགས། ༡༥༤ །ཆོས་ཉིད་མ་བྱུང་བ་ཡི་བྱུང་བ་དང་། །འགགས་པའི་ཐ་མ་ཅན་མིན་མཐར་འགགས་པ། །ད་ལྟ་དབུས་གནས་རྩོལ་བས་རྙེད་མིན་ན། །མཁའ་ལ་བྱ་རྗེས་ཚོལ་དང་ཁྱད་པར་ཅི། ༡༥༥ །སྐྱེ་རྒ་ན་དང་འཆི་བའི་ཆུ་བོ་ཡིས། །ཅུང་ཟད་བསྟིར་མེད་ངན་འགྲོའི་མཆེད་བྲག་ཏུ། །

― LT28_Page_0195 ―

^{[མ་དཔེ་གཟིགས་ན་འདིར་གནོན།]}

[Full Size]

ལན་བརྒྱར་འབབས་ཀྱང་ད་དུང་སྡུག་བསྔལ་རྒྱུ། །མ་ཤེས་སྡུག་བསྔལ་ཚོལ་བའི་བྱིས་པ་ངལ། ༡༥༦ །བཏགས་པས་སྟོང་པ་སྒྱུ་མའི་རྒྱལ་སྲིད་ནི། །མིང་གཟུགས་རུས་སྦལ་སྦུ་ལས་བྱས་པའི་གོས། །མོ་གཤམ་བུས་བགོས་ནམ་མཁའི་མེ་ཏོག་འཚང་། །མ་རིག་སྒོ་ངའི་སྦུབས་དེ་རྟོགས་པས་བརྟོལ། ༡༥༧ །སྐད་ཅིག་འབྲལ་མེད་འོད་གསལ་དེ་བཞིན་ཉིད། །ཤེས་ནས་ཐོབ་བྱའི་ཚུལ་གྱིས་བགྲོད་མེད་པར། །སྤང་གཉེན་འཇུག་སྒོ་དུ་མས་དཀྲིས་ཏེ་མཐར། །བྱང་ཆུབ་འགལ་འདུ་འདི་ཡང་སུ་ཡི་སྤྲུལ། ༡༥༨ །དེ་ནས་འདྲེན་པས་ཡོངས་བཟུང་སྦྲང་རྩི་ཅན། །གྲུབ་པའི་རྣ་རྒྱན་ནོར་གྱི་དཔལ་གླིང་དུ། །མཐོང་བས་གསལ་བ་པདྨའི་རྩ་ལག་དེ། །མ་བོས་པར་ཡང་སྙིང་རྗེའི་སྟོབས་ཀྱིས་ཆས། ༡༥༤ །འདི་ཅི་ས་ལ་ལྷུང་བའི་མཁའ། །བཻཌཱུརྱ་ཕྱིས་མེ་ལོང་ངམ། །མུ་ཏིག་རླབས་ཕྲེང་བརྐྱངས་པ་ལས། །གངྒཱ་འཛིན་ཏུ་ངེས་ནས་དེར། ༡༦༠ །གྲུ་ལ་ཞོན་པའི་ཚོང་པ་བཅས། །ངང་མོ་བཞིན་ཏུ་འཇུག་པ་ན། ཁ་ཡི་མདུང་གིས་ཕུག་པའི་ཀླུ། །མ་བཟོད་འཁོན་བླན་དུས་རིག་པས། ༡༦༡ །མི་སྙན་ཚིག་གིས་དྲངས་པའི་རླབས། །དུས་མཐའི་རླུང་བཅས་གཡོ་བ་ཡང་། །འགྲོ་ལ་བུ་ལྟར་བརྩེ་བའི་མ། །བུ་གཅིག་སྨྱོ་ལ་མི་ཁྲོ་བར། ༡༦༢ །རྟག་ཏུ་འཛའ་བའི་དཔའ་མོ་ལྔ། །རྡོ་རྗེ་མཆུས་བརྟེན་མེ་ལྟར་དུ། །འབར་དང་རབ་ཏུ་འབར་བ་ཡིས། །གླགས་ལྟ་བྱ་རོག་བཞིན་ཏུ་བསྐྲད། །

― LT28_Page_0196 ―

^{[མ་དཔེ་གཟིགས་ན་འདིར་གནོན།]}

[Full Size]

༡༦༣ །སྔར་མའི་གཡུལ་དང་རྩལ་ཆུང་འཕོང་། །མི་མཁས་རིག་པ་བྱེ་མའི་མཁར། །མ་རྟོགས་མྱོང་བ་འཆད་པ་ལྔ། །རང་མཚང་སྟོན་པའི་མེ་ལོང་ཉིད། ༡༦༤ །གྲུབ་པའི་གཟི་བརྗིད་ཆེར་འབར་བས། །འགྲན་ཟླ་སྐད་ཅིག་བཅིངས་བའི་ཟིལ། །མ་བཟོད་རི་མཚོ་ཁོར་ཡུག་བཅས། །སེམས་ལྡན་བཞིན་ཏུ་རེ་ཞིག་འདར། ༡༦༥ །རྙེད་པའི་མཆོག་ཕྱིར་ཕན་པ་ཡི། །སེམས་ལྡན་དེ་དང་དོན་མཐུན་རྣམས། །འབྲས་བུ་འབྱིན་ལ་མངོན་ཕྱོགས་པའི། །སྤྲོ་དང་ཡུལ་གྱི་དགེ་མཚན་འགྲན། ༡༦༦ །ཆུ་གཏེར་དབུས་ན་རིན་ཆེན་གྱི། །མཆོད་སྡོང་ལྷུན་པོ་གཉིས་པ་ནི། །སྣ་ཚོགས་ཚོན་བརྒྱ་འཛིན་པའི་ནོར། །སོ་ཕག་ཐང་གིས་ཁ་བསྒྱུར་བ། ༡༦༧ །དེ་ན་ཤེལ་ལ་མེ་ཏོག་དང་། །མུ་ཏིག་དྲྭ་བའི་མདངས་འཕོས་པས། །ཆུ་མཚོ་གཞན་པ་པདྨ་ཅན། །གཏིང་མཐའ་བརྟགས་པའི་ནེམ་ནུར་བྱེད། ༡༦༨ །དེ་བཞིན་བཀོད་པའི་ཁྱད་པར་ནི། །དག་པའི་མཚན་ཉིད་མི་མཚོན་ཏེ། །སྒྱུ་འཕྲུལ་དྲྭ་བ་རྡུལ་སྤངས་པ། །རྣམ་པ་ཐམས་ཅད་གཟུགས་སུ་སྣང་། ༡༦༩ །ཞབས་སེན་ནོར་བུའི་ཁ་རིས་ཀྱིས། །རྡོ་རྗེ་འཛིན་དང་ཚངས་སོགས་གཙུག །མཛེས་བྱས་དཔལ་ལྡན་རྒྱུ་སྐར་གྱི། །འཁོར་ལོའི་མགོན་པོ་ལྷ་ཡི་ལྷས། ༡༧༠ །སྲིད་གསུམ་དང་བར་མཛད་པ་དེར། །དཔེ་ལས་འདས་པའི་གདུགས་བརྩེགས་སོགས། །ཡིད་བྱུང་ནམ་མཁའ་མཛོད་ཀྱི་སྒོ། །ཀུན་བཟང་སྤྱོད་ལ་ཞུགས་པས་ཕྱེས། ༡༧༡ །ཆོག་

― LT28_Page_0197 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་འཁོར་ལོ་འཕགས་ནོར་ནི། །མི་བདག་ལེགས་བྱས་རྒྱལ་སྲིད་ཉིད། །མ་འབད་པར་ཡང་ཕྲིན་ལས་ནི། །རླབས་ཆེན་དགེ་བར་གྱུར་དེ་མཚར། ༡༧༢ །དད་དང་སྡང་ལ་ཉེ་རིང་གི། །རྟོག་པ་མི་མངའ་བེམས་པོ་ཡི། །ཟོལ་དུ་བརྫུས་འདྲ་འཇིག་རྟེན་མགོན། །འཇིག་རྟེན་དབང་སྲས་དགེ་མ་ཟུང་། ༡༧༣ །རིན་ཆེན་ལས་བྱས་རིན་ཆེན་གྱི། །སྣང་བརྙན་ལས་སྣ་ཚོགས་པའི་འཕྲུལ། །བཅུ་དྲུག་ལྷག་པའི་བརྒྱ་ཕྲག་གཉིས། །གྲུ་འཛིན་གཞན་དུ་འཕོས་འདྲ་བསྒྲུབས། ༡༧༤ །དེ་དག་ནོར་བུའི་གཞལ་མེད་ཁང་། །དག་པའི་ལོགས་སུ་འཕོས་གྱུར་པ། །ཕྱོགས་བཅུ་ནས་ལྷག་འདྲེན་པ་སྟོང་། །རྣམ་འགྱུར་གཅིག་ཏུ་སྟོན་པར་འཕྲུལ། ༡༧༥ །མཁའ་ལ་མཆོད་ཕྱིར་འོང་བའི་ལྷ། །ཕྱོགས་ཀུན་མེ་ཏོག་དོགས་པས་ཏེ། །ས་གཞིར་གཟུགས་ཀྱི་སྐུ་མཛེས་པས། །མཚོ་ལ་གཟའ་སྐར་ལས་ཀྱང་བཀྲ། ༡༧༦ །གསེར་གྱི་པདྨོ་སྤོས་མཆོག་སོགས། །འོད་ཟེར་རབ་བཀོད་མཆོད་སྤྲིན་སྤྲོས། །དེ་བཞིན་དམ་པའི་ཆོས་འཛིན་ཞིང་། །བྱང་ཆུབ་རྫོགས་པར་སྤྱོད་པས་སོ། ༡༧༧ །འཕགས་དང་རོ་གཅིག་དག་པའི་ཞིང་། །ཐེག་ཆེན་རྟག་ཏུ་ལོངས་སྤྱོད་པ། །གང་དེ་རྩོད་པའི་མེ་འོབས་སུ། །སྙིང་སྟོབས་གོ་ཆབ་གོས་ནས་བྱུང་། ༡༧༨ །སྨིན་ནས་གྲོལ་བའི་དཔལ་བྱིན་ཅིང་། །ཐརཔའི་ས་བོན་མ་བཏབ་པའི། །ལུས་ཅན་འཛིན་མའི་ཁྱོན་འདི་ན། །སྲིད་པ་ཡིན་ནམ་འཕྱང་མོ་ཉུག ༡༧༩ །ཇི་ལྟར་ཞབས་ཀྱི་རེ་ཁཱ་

― LT28_Page_0198 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིས། །ས་ལ་མི་འདེབས་འཁོར་ལོས་སྒྱུར། །དེ་བཞིན་ཉིང་མཚམས་སྦྱོར་སྤངས་པའི། །འཕགས་པ་ཞིང་ནས་ཞིང་དུ་འགྲོ། ༡༨༠ །རྣམ་འཕྲུལ་དབྱིངས་སུ་ཐིམ་རྩོམ་པ། །བྲལ་བས་ཉེན་པའི་ཡིད་ཅན་ཡིད། །ཀྱེ་མ་རྩོད་ལྡན་བསྟན་པའི་གཞུག །སྐལ་ལྡན་གདུལ་བྱས་དམན་ཞེས་བྲིད། ༡༨༡ །ས་ལས་རྒྱལ་བ་ཕོ་བྲང་དང་། །རྒྱ་མཚོའི་དོན་གྲུབ་གྲོང་ཁྱེར་དུ། །འཇུག་པའི་སྤྲོ་བས་བརྟས་པ་དེ། །འཕགས་པའི་ཁབ་ན་དལ་གྱིས་སོང་། ༡༨༢ །འདོད་ལ་ཆགས་པས་མི་འཆིང་ཞིང་། །འཇིགས་མེད་འབྱོར་ལ་མི་སྲེད་པར། །མུན་པ་བཏང་བའི་ཟླ་བ་ཡང་། །ཞིང་གི་དཔལ་གྱིས་ངོམས་པ་འདྲ། ༡༨༣ །དེ་ཡང་བྱང་ཆུབ་སེམས་དཔའ་ཡི། །རྫུ་འཕྲུལ་འོད་མཐའ་ཡས་པའི་ཞིང་། །བ་སྤུའི་བུ་གའི་རྗེས་སོང་བ། །ཡིད་འཐད་རི་བོ་གྲུ་འཛིན་ཡོད། ༡༨༤ །དྲི་མེད་འོད་ཕྲེང་གཡོ་བ་ཡི། །ནེམ་ཞིང་འཕར་བའི་ས་གཞི་ནི། །རྫིང་དང་ཐེམ་སྐས་དུ་མ་དང་། །ལྷུན་པོ་བལྟ་ན་སྡུག་པས་མཛེས། ༡༨༥ །ངོགས་རྣམས་ཡན་ལག་བརྒྱད་ལྡན་ཆུ། །རྣམ་པ་དུ་མའི་ཚེས་སྒྲ་ཅན། །ཙནྡན་ལྗོན་པའི་བསིལ་གྲིབ་དུ། །སྤོས་ཀྱི་གླང་པོའི་ཁྱུ་དག་རྒྱུ། ༡༨༦ །གཞན་དག་ཤིལ་དང་དངུལ་ལ་སོགས། །ཤིང་མཆོག་ཁ་དོག་ཐ་དད་པ། །འདོད་རྒུར་སྒྱུར་བའི་བྱ་རྣམས་ཀྱང་། །སྣ་ཚོགས་ཆོས་ཀྱི་སྒྲ་སྙན་འབྱིན། ༡༨༧ །འོད་ཟེར་འབར་བའི་འདབ་སྟོང་བ། །བུང་བ་མྱོས་པའི་གླིང་བུ་ཅན། །ཚུལ་ཁྲིམས་ངད་པས་ཁྱབ་པ་ཡིས། །ལྷ་

― LT28_Page_0199 ―

^{[མ་དཔེ་གཟིགས་ན་འདིར་གནོན།]}

[Full Size]

མིའི་དྲི་བསུང་ཟིལ་གྱིས་མནན། ༡༨༨ །དེ་ན་སྐར་ཁུང་རྟ་བབས་དང་། །ནོར་བུའི་ཀ་བ་སྟོང་ཕྲག་ཅན། །ཆུ་ཤེལ་གཞལ་ཡས་གྲུ་བཞི་པ། །ཚད་ནི་བསམ་པའི་རྗེས་སུ་འགྲོ། ༡༨༩ །གསེར་གྱི་སྐུད་པར་བརྒྱུས་པ་ཡི། །མུ་ཏིག་དཀར་དམར་དྲྭ་ཕྱེད་དཔྱངས། །རྔ་ཡབ་ཟླ་བའི་མེ་ལོང་དང་། །གཡེར་ཁའི་ཕྲེང་བ་སྒྲ་སྙན་འཇོ། ༡༩༠ །སྤོས་མཆོག་དུ་མའི་ངད་ལྡང་ཞིང་། །ཡན་ལག་ལྔ་ལྡན་རྔ་སྒྲ་དང་། །གླུ་གར་སིལ་སྙན་པི་ཝཾ་གི། །བསྟོད་དབྱངས་ཉམས་བརྒྱས་སྒེག་པ་སྒྲོགས། ༡༩༡ །བྱེད་པོས་བྲིས་འདྲའི་རིན་ཆེན་གྱི། །འཇའ་སྤྲིན་ལྷ་རྫས་ཆར་འབེབས་པས། །ཉི་འོད་སྟོང་འབར་ནོར་བུའི་ཏོག །གློག་འགྱུའི་སྣང་བར་སྒྲིབ་ལ་བརྩོན། ༡༩༢། ཨུད་པལ་བུཎྜ་རཱི་ཀ་སོགས། །རིན་ཆེན་མེ་ཏོག་འཁྲིགས་པ་ན། །གོས་བཟང་དུ་མའི་རྒྱན་བཀོད་པ། །རྒྱལ་མཚན་མཛེས་པའི་ཡིད་བཞིན་ནོར། ༡༩༣ །གྲུབ་པ་ལྷ་དང་རིག་འཛིན་དང་། །བདུད་དང་ཚངས་དབང་ཅོད་པན་ལ། །ཞབས་སྟེགས་བཀོད་པའི་པད་དཀར་འཆང་། །སྙིང་རྗེའི་རོལ་པས་རྩེ་བ་དེས། ༡༩༤ །འགྲོ་བའི་བསམ་པ་ཇི་ལྟ་བར། །རྟོག་པ་མེད་པར་དབུགས་དབྱུང་བའི། །ཐེག་མཆོག་ཀ་ལ་པིང་ཀའི་གླུས། །ངལ་བས་སྟེགས་དེ་དབུགས་འབྱིན་མཛད། ༡༩༥ །དེར་ནི་ནོར་བུས་བགྲུངས་པའི་མཚོར། །ངང་པའི་རྒྱལ་པོ་དགའ་བ་ལྟར། །རྣམ་པ་མེད་པའི་སྒྱུ་ཐབས་ཀྱང་། །རྣམ་བཅས་གཉིས་སྣང་ཟོལ་གྱི་བརྩེ། ༡༩༦ །བསམ་གཏན་དུལ་བའི་བཞོན་པ་

― LT28_Page_0200 ―

^{[མ་དཔེ་གཟིགས་ན་འདིར་གནོན།]}

[Full Size]

འདིས་ཞོན་ཏེ། །འཁོར་བར་དབེན་པ་ཐར་པ་ཞི་བའི་གྲོང་། །མྱ་ངན་མེད་པའི་མེ་ཏོག་དགའ་ཚལ་དེར། །སྐྱེ་ལ་བག་ཡོད་བསྐུལ་བའི་སླད་དུ་རྒྱུ། ༡༩༧ །ལག་པས་སྣོད་བཞིན་ཆུ་གཏེར་ཆེན་པོ་ལ། །བཟུང་བ་གོམས་པའི་དེད་དཔོན་གཞན་པ་དེས། །གཞན་དོན་རིན་ཆེན་སྒྲུབ་ཕྱིར་ཡང་ནས་ཡང་། །འཁོར་བའི་རྒྱ་མཚོར་སྤྲོ་བའི་ཚུལ་གྱིས་ཞུགས། ༡༩༨ །དེ་ཚེ་རྒྱལ་རིགས་རིན་ཆེན་གྲགས་པའི་འོད། །བསླབ་པའི་དྲི་མས་མོག་པོར་གྱུར་པ་དེ། །སྤྲིང་ཡིག་གསར་པས་བྱི་དོར་མཛད་པ་ཡང་། །བག་མེད་གྱུར་ལ་རྔ་སྒྲའི་དཔལ་ཡོན་བཟུང་། ༡༩༩ །དུས་སུ་ལྷགས་པས་པདྨའི་ཁ་བྱེ་ཞིང་། །དུས་ཀྱིས་ཁུ་བྱུག་བུ་མོས་མགྲིན་གླུ་ལེན། །བསྐལ་མང་བྱེ་བར་བསྒྲུབས་པའི་ཕྲིན་ལས་ཀྱང་། །དུས་ལས་མི་ཡོལ་དུས་ཀྱི་རླབས་དང་མཚུངས། ༢༠༠ །ས་སྟེང་དགེ་བའི་ཆུ་རླུང་ཇི་སྙེད་པ། །འགྲོ་འོང་རྙོགས་པ་ཀུན་ཞི་བདུད་རྩིའི་གཏེར། །ལུས་ཅན་ཐར་པའི་སྲོག་འཚོ་མཁས་རྣམས་ཀྱིས། །སྙན་ཚིག་ཆུན་པོས་དབྱངས་དེརཕྱག་བགྱིའོ། ༢༠༡ །ཐོག་མཐའ་དབུས་བྲལ་ལྷུན་གྲུབ་ཞི། །དཔེ་མེད་རང་གིས་རྣམ་མཁྱེན་བརྙེས། །ལམ་སྟོན་ནུས་པས་རང་གཞན་གྱི། །དོན་མཛད་ཁྱོད་ལ་ཕྱག་འཚལ་ལོ། ༢༠༢ །དག་གསལ་གཉན་པོའི་ལམ་མཐར་ཕྱིན། །བརྟག་པར་མི་ནུས་ སངས་རྒྱས། ངེས་ཚིག་དང་། །གཉིས་མེད་གཉིས་སུ་རྟོག་པ་ལས། །རྣམ་གྲོལ་ཁྱོད་ལ་ཕྱག་འཚལ་ལོ། ༢༠༣ །དྲི་ ཚོགས། མེད་རང་བཞིན་འོད་གསལ་ཉིད། ཆོས།

― LT28_Page_0201 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་ཅན་ཀུན་ལ་རྗེས་ཞུགས་པ། །མཐོང་བའི་ཡེ་ཤེས་ཆགས་ཐོགས་ཀྱི། །སྒྲིབ་བྲལ་ཁྱོད་ལ་ཕྱག་འཚལ་ལོ། ༢༠༤ །རིགས་དང་རང་བཞིན་ཆོས་སྐུའི་ཁམས། །གནས་སྐབས་གསུམ་དུ་གཙང་བདག་བདེ། །རྟག་པར་བསྟན་ནས་སྐྱོན་ལྔ་པོ། །སྤོང་མཛད་ཁྱོད་ལ་ཕྱག་འཚལ་ལོ། ༢༠༥ །དག་ཐོབ་བྲལ་དང་དོན་གཉིས་རྟེན། །ཟབ་ཅིང་རྒྱ་ཆེ་བདག་ཉིད་ཆེ། ཁམས། ཤེས་གསུམ་ལས་འདས་བསམ་ཡས་ཡུལ། །དབང་བརྙེས་ཁྱོད་ལ་ཕྱག་འཚལ་ལོ། ༢༠༦ །འཇིག་རྟེན་འཇིག་རྟེན་ལས་འདས་པས། །དབྱེར་མེད་བྱང་ཆུབ་བྲལ་དང་སྨིན་པ་ཡི། །རྒྱུ་འབྲས་རྟོགས་ནས་སྟོན་པ་ལ། །མི་བསྙེངས་ཁྱོད་ལ་ཕྱག་འཚལ་ལོ། ༢༠༧ །ཐུགས་གསུང་སྐུ་ཡི་གསང་བ་སོགས། །ཁྱབ་བདག་རྟག་ཏུ་ལྷུན་གྲུབ་པ། ཡོན་ཏན། །ཆོས་དཀར་སྨན་ལྗོངས་བསྐྱེད་པའི་ས། །རྟོག་མེད་ཁྱོད་ལ་ཕྱག་འཚལ་ལོ། ༢༠༨ །གང་དུ་འཕགས་པའི་ཤེས་པ་ནི། །རྡོ་རྗེའི་ཡེ་ཤེས་སྟོབས། །ཕྲིན་ལས། བསྐྱེད་པས། །ཡེ་ཤེས་མདུད་པ་ཆེན་པོ་བསལ། །འདུ་ཤེས་འཆིང་བ་ཡོངས་སུ་བཅད། ༢༠༩ །དེ་ཡིས་འགྲོ་ལ་དུས་གསུམ་དུ། །བྱང་ཆུབ་དམ་པ་བདུད་རྩིའི་རླུང་། །ཐུན་མོང་སྤྱད་པར་ཕབ་པ་ཡི། །མི་མཆོག་བླ་མེད་དེ་ལ་འདུད། ༢༡༠ །སྙན་དངགས་ཚུན་པོ་གསར་པ་དབྱངས་ཅན་རྣ་རྒྱན་བསྔགས་འོས་ཚལ་ལས་བླང་། །དེ་ཡི་སྤྱོད་བཟང་ཆུ་རྒྱུན་འཇིག་རྟེན་འདའ་བར་འབབ་པའི་འཇུག་ངོགས་ན། །ལྗོན་པ་བཞིན་ཏུ་ཡོན་ཏན་བྱེ་བ་རྫོགས་བྱེད་འཁྲི་ཤིང་ཅན། །ཟླ་

― LT28_Page_0202 ―

^{[མ་དཔེ་གཟིགས་ན་འདིར་གནོན།]}

[Full Size]

བས་བཟུང་བའི་གྲུ་འཛིན་ཚལ་གྱི་པདྨ་དཀར་པོ་ཉིད་གྱུར་ཅིག ༢༡༡ །པདྨའི་སྤྱན་རས་ཡང་པས་པདྨོ་ཅན་གྱི་ས་གཞི་ལ། །སྤྲོ་དང་ལྷན་ཅིག་ཆོས་སྙན་སྣང་བས་ལུང་བསྟན་སར་བཟུང་སྟེ། །ཆོས་དབྱིངས་ཀུན་ཏུ་གྲགས་པའི་རྔ་སྒྲ་སྨོན་ལམ་མཐར་སོན་པ། །སེམས་ཀྱི་དེ་ཉིད་འགྲོ་ཁམས་རྒྱ་མཚོས་རྟག་ཏུ་མཐོང་བར་ཤོག༢༡༢། རྣམ་ཐར་སྒྲོན་མེའི་སྣང་བ་ལ། །དད་དང་དཔྱོད་དང་ཡི་རངས་པས། །སྒྲིབ་པའི་རྡུལ་ནི་རབ་སྤངས་ཏེ། །འཁོར་བ་ཡུན་རིང་སྣང་བར་འགྱུར། ༢༡༣ །འཕགས་པའི་རྣམ་ཐར་པདྨ་གཞོན་ནུའི་ནགས་ཀླུང་འཐུག་པ་བར་མེད་པ་ཞིག་ན། །ཕྲེང་བརྒྱུད་མཁན་པོ་ཡང་བསྟར་བ་ལ་མངོན་ཏུ་ཕྱོགས་པའི་མཐུན་དཔེ་རིག་སྟེ། །བྱང་ཆུབ་སེམས་དཔའི་སྤྱོད་པ་ལ་ཤིན་ཏུ་འདུན་པས་འགྲོ་ཞིང་ནགས་ཀྱི་རི་དྭགས་དང་ཕན་ཚུན་ད་ཚུལ་མཚུངས་པ་བློ་གྲོས་མཐའ་ཡས་གྱིས་མེ་ཏོག་རྒྱས་པའི་དུས་འཕགས་པའི་བྱིན་གྱིས་བརླབས་པ་ན། །མེ་ཏོག་ཆུང་ངུ་ཞིག་དད་པས་བླངས་ཏེ་ཐོས་པ་ཅན་གྱི་རྣ་རྒྱན་ཏུ་བསྟར་བའོ། །སརྦ་དཱཀ་ལྱཱ་ཾ་བྷ་བནྟུ། །ཤུ་བྷཾ། ཤུབྷཾ། ཤུབྷཾ། ཤློ་ཀ་ང་བརྒྱད་ཡན་ཆད་སྔ་མོ་བརྩམས་ནས་འཕྲོས་སྙོམ་ལས་སུ་ཡུན་རིང་ལུས་པར། སླད་ནས་ཡེ་ཝཾ་ཐར་རྩེ་མཆོག་སྤྲུལ་མཁྱེན་རྟོགས་དབང་ཕྱུག་བཀས་བསྐུལ་རྗེས་སུ་དྲན་ཏེ་འཕྲོ་མཐུད་པའོ། །སརྦ་མངྒ་ལཾ།། །།

མཁན་སློབ་ཆོས་གསུམ་བསྟོད་པ་སོགས།

― LT28_Page_0203 ―

^{[མ་དཔེ་གཟིགས་ན་འདིར་གནོན།]}

[Full Size]

ཨེ་མ་ཧོ། །རབ་འབྱམས་རྒྱལ་བའི་སྤྱི་གཟུགས་པདྨ་འབྱུང་། །ཐུབ་དབང་གཉིས་པ་མཁན་ཆེན་ཞི་བ་འཚོ། །ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན་ལ། །གུས་པས་ཕྱག་འཚལ་སྙིང་ནས་གསོལ་བ་འདེབས། །གངས་ཅན་ལྗོངས་སུ་ཐུབ་བསྟན་ཉིན་མོར་བྱེད། །ཐོག་མར་འདྲེན་མཛད་ཆོས་རྒྱལ་མེས་དབོན་གྱི། །ངོ་མཚར་ཕྱག་རྗེས་ཆོས་འཁོར་རྣམ་པ་གསུམ། །རྟེན་དང་བརྟེན་པར་བཅས་ལ་གསོལ་བ་འདེབས། །ཁྱད་པར་མཁན་སློབ་ཆོས་གསུམ་ཞལ་འཛོམ་སྟེ། །ཛམ་གླིང་རྒྱན་གྱུར་སྤྲུལ་པའི་གཞལ་མེད་ཁང་། །བསམ་ཡས་མི་འགྱུར་ལྷུན་གྲུབ་གཙུག་ལག་ཁང་། །ས་གསུམ་སྙན་པར་གྲགས་ལ་གསོལ༴། འདུལ་བར་གཙུག་ལག་མདོ་སྡེར་ཞིང་ཁམས་ཚུལ། །མངོན་པ་ལྟར་ན་སྣོད་བཅུད་གཅིག་ཏུ་གྲུབ། །སྔགས་ཀྱི་ལུགས་སུ་དཀྱིལ་འཁོར་ཆེན་པོར་རྫོགས། །ངོ་མཚར་འགྲན་ཟླ་བྲལ་ལ༴ །དབུ་རྩེ་རིམ་གསུམ་ལུགས་གསུམ་བཀོད་པ་ཅན། །བསྐོར་ཁང་འཁོར་ས་ལྷོ་བྱང་ནུབ་ཀྱི་མཛོད། །རི་དབང་ལྷུན་པོར་ཉི་ཟླས་བརྒྱན་པའི་ཚུལ། །ཡཀྴ་ལྟག་འོག་བཅས་ལ༴། འཇམ་དཔལ་གླང་དང་ཨཱརྱ་པ་ལོའི་གླིང་། །དགའ་ལྡན་བྱམ་པ་གླིང་དང་བྱང་ཆུབ་ཏུ། །སེམས་བསྐྱེད་གླིང་སྟེ་གླིང་ཆེན་བཞི་ཡི་ཚུལ། །ཕྱོགས་བཞིར་བཞུགས་པ་རྣམས་ལ༴ །རྣམ་དག་ཁྲིམས་ཁང་བརྡ་སྦྱོར་ཚང་མང་གླིང་། །བདུད་འདུལ་སྔགས་པ་སྒྲ་སྒྱུར་རྒྱ་གར་གླིང་། །ལུང་བསྟན་བཻཙ་མི་གཡོ་བསམ་གཏན་

― LT28_Page_0204 ―

^{[མ་དཔེ་གཟིགས་ན་འདིར་གནོན།]}

[Full Size]

གླིང་། །རིན་ཆེན་སྣ་ཚོགས་བཻ་ཧར་དཀོང་་མཛོད་བཅས། །གླིང་ཕྲན་བརྒྱད་དང་བཀའ་རྟགས་མཆོད་རྟེན་བཞི། ཁམས་གསུམ་ཟངས་ཁང་བུ་ཚལ་གསེར་ཁང་གླིང་། །དགེ་རྒྱས་ལྷ་ཁང་ཇོ་མོ་གླིང་གསུམ་དང་། །དེར་བཞུགས་དཀོན་མཆོག་རྣམས་ལ༴ །འཕགས་བོད་མཁས་གྲུབ་བསམ་ཡས་བྱོན་པའི་གནས། །མདོ་རྒྱུད་བསྟན་བཅོས་བསམ་ཡས་བསྒྱུར་བའི་གནས། །ཉན་བཤད་སྒོམ་སྒྲུབ་བསམ་ཡས་མཛད་པའི་གནས། །མཚན་མཆོག་དོན་དང་མཐུན་ལ༴ །ཡེ་ཤེས་སེམས་དཔའི་དཀྱིལ་འཁོར་དངོས་སུ་བཞུགས། །ཁྱད་འཕགས་རིང་བསྲེལ་རྣམ་བཞིས་ཕྱུར་བུར་གཏམས། །གཏེར་ཆེན་གཏེར་ཕྲན་བསམ་མི་ཁྱབ་པའི་མཛོད། །ལྷ་མིའི་མཆོད་གནས་མཆོག་ལ༴ །བརྒྱུད་གསུམ་རིག་འཛིན་བླ་མའི་བྱིན་རླབས་འཐིབས། །ཡི་དམ་ཞི་ཁྲོ་རབ་འབྱམས་དངོས་གྲུབ་སྟེར། །གནས་གསུམ་མཁའ་འགྲོ་ཚོགས་ཀྱི་འདུ་བར་སྤྱོད། །ཆོས་སྲུང་མཐུ་རྩལ་ལྡན་ལ༴ །མཇལ་ཚད་ངན་སོང་གསུམ་གྱི་སྐྱེ་སྒོ་གཅོད། །དད་པས་ཐོས་ཚད་བྱང་ཆུབ་ས་བོན་ཐེབས། །ཚོགས་བསགས་ཐར་པའི་ལམ་ལས་ཕྱིར་མི་ལྡོག །འབྲེལ་ཚད་དོན་དང་ལྡན་ལ་གསོལ་བ་འདེབས། །འཇིག་རྟེན་གསུམ་གྱི་བསོད་ནམས་ཞིང་གྱུར་པ། །གངས་ཅན་ཕན་བདེའི་འབྱུང་གནས་རྟེན་གྱི་མཆོག །འབྱུང་བཞི་སོགས་ཀྱིས་ནམ་ཡང་འཇིག་མེད་པར། །བསྐལ་བརྒྱར་རྟག་བརྟན་ཆེན་པོར་བཞུགས་གསོལ་འདེབས། །དད་མོས་གསོལ་བ་བཏབ་པའི་བྱིན་

― LT28_Page_0205 ―

^{[མ་དཔེ་གཟིགས་ན་འདིར་གནོན།]}

[Full Size]

རླབས་ཀྱིས། །མི་མཐུན་ཀུན་ཞི་མཐུན་རྐྱེན་ལེགས་ཚོགས་རྒྱས། །སྒྲིབ་གཉིས་བྱང་ཞིང་ཚོགས་གཉིས་ཡོངས་སུ་རྫོགས། །དོན་གཉིས་ལྷུན་གྲུབ་སངས་རྒྱས་མྱུར་ཐོབ་ཤོག །ཅེས་པའང་དཔལ་བསམ་ཡས་ཆོས་འཁོར་ཆེན་པོའི་ཞབས་ཏོག་ཕུལ་དུ་ཕྱིན་པའི་སྡེ་པ་པདྨ་དར་རྒྱས་ནས་ཆེད་དུ་བསྐུལ་ངོར་ཀུ་སཱ་ལི་བློ་གྲོས་མཐའ་ཡས་ཀྱིས་དཔལ་དེ་བཱི་ཀོ་ཊིའི་སྒྲུབ་གནས་སུ་བགྱིས་པ་དགེ་ལེགས་འཕེལ།། ༈ །།ཨེ་མ་ཧོ། །མཁའ་ཁྱབ་མཁའ་ཡི་ཡེ་ཤེས་རོལ་པ་ལས། །དག་པའི་ཞིང་གི་གནས་མཆོག་རབ་ཏུ་འབྱམས། །འོག་མིན་གསང་ཆེན་རོལ་པའི་དུར་ཁྲོད་ཀྱི། །ཞིང་སྐུའི་བཀོད་པ་རྒྱ་མཚོ་ལ་གསོལ་བ་འདེབས། །དྲག་པོ་འཇིགས་བྱེད་དང་ནི་དུས་མཚན་གྱི་ས། །བདག་ཏུ་བཟུང་བའི་གནས་ཡུལ་སུམ་ཅུ་གཉིས། །ཧེ་རུ་ཀ་དཔལ་ཡབ་ཡུམ་རྡོ་རྗེའི་གར། །དག་སྣང་ཁྱབ་བརྡལ་ཆེན་པོ་ལ་གསོལ༴ །རྒྱལ་བས་ལུང་བསྟན་དེ་བི་ཀོ། ཊིའི་ཡུལ། །བོད་སྐྱོང་ལྷན་སྐྱེས་བསྟི་བ་གྲུབ་པའི་ཁྱིམ། །ཉེ་བའི་འཐུང་གཅོད་རང་བྱུང་ཙཱ་རི་ཏྲ། །རྣམ་རོལ་འདུ་བའི་སྤྲིན་ཆེན་ལ༴ །གནས་དེར་བཞུགས་པའི་རྩ་གསུམ་ལྷ་ཚོགས་དང་། །ཁྱད་པར་དཔལ་ལྡན་འཁོར་ལོ་སྡོམ་པ་ཆེ། །རྣལ་འབྱོར་མ་དང་དཔའ་བོའི་འཁོར་ཚོགས་བཅས། །དྲུག་ཅུ་རྩ་བཞིའི་དཀྱིལ་འཁོར་ལ༴ །གྲུབ་པའི་རིག་པ་འཛིན་དང་མཁའ་འགྲོ་མ། །རྡོ་རྗེ་མཧཱ་ཀཱ་ལ་སེང་གེའི་གདོང་། །བཅུ་གསུམ་ལྷ་ཡི་འཁོར་ལོ་གཙོར་གྱུར་པའི། །བཀའ་སྡོད་དམ་ཅན་རྒྱ་མཚོ་ལ༴ །

― LT28_Page_0206 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོག་གི་གནས་སུ་བསྟི་བའི་གཟུགས་ཅན་དང་། །གཟུགས་མེད་ཐམས་ཅད་བདེ་སྟོང་རྡོ་རྗེའི་སྐུར། །གདོད་ནས་གྲུབ་པ་ཡིན་ལ་ཡིན་བཞིན་ཏུ། །སྣང་སྲིད་དག་པ་རབ་འབྱམས་ལ་གསོལ་བ་འདེབས། །ཀྱེ་མ་རྩ་གསུམ་ལྷ་རབ་འབྱམས། །ཁྱད་པར་བཀའ་བརྒྱུད་བླ་མའི་ཚོགས། །བྱིན་རླབས་དམ་བཅའ་དེང་འདིར་བསྐུལ། །བདག་རྒྱུད་སྲིད་གྲོལ་དངོས་གྲུབ་སྩོལ། །ཞེས་མོས་གུས་ཀྱི་གདེང་དང་ལྡན་པའི་ངང་ནས་སྣང་གྲགས་རིག་གསུམ་ལྷ་སྔགས་ཆོས་སྐུའི་རོལ་པར་ཤེས་པས། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊཿ ཞེས་ཅི་ནུས་བཟླ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །གནས་སྐབས་འགལ་རྐྱེན་མཐའ་དག་ཞི་བ་དང་། །ཚེ་དང་བསོད་ནམས་དཔལ་འབྱོར་སྙན་གྲགས་སོགས། །ཆོས་མཐུན་ལེགས་ཚོགས་ཡར་ཟླ་ལྟར་རྒྱས་ཤོག །ཐོག་མེད་ནས་བསགས་སྡིག་སྒྲིབ་ཀུན་ཞི་ཞིང་། །བསོད་ནམས་ཡེ་ཤེས་ཚོགས་ཆེན་རབ་རྫོགས་ཏེ། །རྩ་གསུམ་ལྷ་ཡི་བྱིན་རླབས་རྒྱུད་ལ་འཇུག །དབང་དོན་རྟོགས་པ་མཐར་ཐུག་སྐྱེ་བར་ཤོག །སྐྱེ་བ་འདིའམ་བར་དོའི་གནས་སྐབས་སུ། །མཁའ་སྤྱོད་རིག་པ་འཛིན་པའི་གྲལ་ཞུགས་ནས། །རྣམ་སྨིན་རྒྱ་གྲོལ་ཡེ་ཤེས་སྐུ་བརྙེས་ཏེ། །ཟུང་འཇུག་རྡོ་རྗེ་འཆང་ཆེན་འགྲུབ་གྱུར་ཅིག །ཅེས་པ་འདིའང་དགེ་སློང་ཀརྨ་ལེགས་པའི་ངོར་ཀར་བརྒྱུད་ཀྱི་བཙུན་པ་ཡོན་ཏན་རྒྱ་མཚོས་སྒར་ཆེན་ནས་སྤེལ་བ་དགེ་ལེགས་འཕེལ།། ༈ །།ཡོན་ཏན་ཐུགས་ཀྱི་གནས་མཆོག་ཙཱ་འདྲ་རིན་ཆེན་བྲག་གི་གསོལ་འདེབས་རྒྱས་པ་

― LT28_Page_0207 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་སྤྱོད་རོལ་མོ་ཞེས་བྱ་བ་བཞུགས་སོ། །ཨེ་མ་ཧོ། །ཀུན་བཟང་སྣང་བ་མཐའ་ཡས་མཁའ་ཀློང་ནས། །རྣམ་སྣང་སྤྱན་རས་གཟིགས་དབང་ལོངས་སྤྱོད་རྫོགས། །ཞིང་ཁམས་རབ་འབྱམས་འགྲོ་འདུལ་སྤྲུལ་པའི་སྐུ། །པདྨ་ཐོད་ཕྲེང་རྩལ་ལ་གསོལ་བ་འདེབས། །ཞིང་འདིར་རྡོ་རྗེ་ཐེག་པ་འབྱུང་བའི་གནས། །རྒྱལ་བ་རྣམས་ཀྱིས་གདུལ་དཀའ་འདུལ་བ་ལས། །གནས་ཡུལ་དུར་ཁྲོད་རྣམས་སུ་ལྷུན་གྱིས་གྲུབ། །དེར་བཞུགས་ལྷ་ཚོགས་བཅས་ལ༴ །འཇིག་རྟེན་དབང་ཕྱུག་བྱིན་གྱིས་བརླབས་པའི་ཞིང་། ཁ་བ་ཅན་ཏུ་ལུང་ལྔ་ལྗོངས་གསུམ་དང་། །སྦས་ཡུལ་ཆེ་ཆུང་གནས་ཆེན་གནས་ཕྲན་གྱི། །རྟེན་དང་བརྟེན་པར་བཅས་ལ༴ །རྡོ་རྗེ་ཐོད་ཕྲེང་རྩལ་གྱི་སྒྲུབ་པའི་གནས། །སྐུ་གསུང་ཐུགས་ཡོན་ཕྲིན་ལས་ཁྱད་པར་མཆོག །གངས་ཆེན་བཞི་དང་བྲག་ཕུག་ཆེན་པོ་བརྒྱད། །ཕྱོགས་བཞིའི་བྲག་སོགས་ས་སྟེང་ཀུན་ཁྱབ་པའི། །གནས་གཏེར་ཡེ་ཤེས་འཁོར་ལོར༴ །མངའ་རི་སྐོར་གསུམ་གངས་བྲག་བཅུ་ཕྲག་གཉིས། །དབུས་གཙང་སྟོད་སྨད་སྒྲུབ་གནས་དྲུག་ཅུ་ལྔ། །མདོ་ཁམས་གནས་ཆེན་ཉེར་ལྔ་གཙོར་གྱུར་པའི། །གང་འདུལ་འགྲོ་ཕན་མཛད་ལ༴ །ཀུན་གྱི་སྤྱི་རྗེ་དཔལ་གྱི་ཙཱ་རི་ཏྲ། །མཁའ་སྤྱོད་གྲོང་ནས་རྡོ་རྗེའི་ཁོར་ཡུག་བར། །ཡན་ལག་གནས་ཕྲན་སྟོང་དང་རྩ་གཉིས་ཀྱི། །དཀྱིལ་འཁོར་ཡོངས་སུ་རྫོགས་ལ༴ །ཙཱ་རི་གཉིས་པ་ཙཱ་འདྲ་རིན་ཆེན་བྲག །དཔལ་ཆེན་ཧེ་རུ་ཀ་ཡི་

― LT28_Page_0208 ―

^{[མ་དཔེ་གཟིགས་ན་འདིར་གནོན།]}

[Full Size]

ཕོ་བྲང་ཆེ། །ཡོན་ཏན་ཐུགས་ཀྱི་གནས་མཆོག་འགྲན་ཟླ་བྲལ། །ཡན་ལག་གནས་ཕྲན་བཅས་ལ༴ །དགྱེས་མཛད་མར་པ་ལོ་ཙཱས་ལུང་བསྟན་གནས། །དེ་བཱི་ཀོ་ཊི་གསུམ་པ་ཡེ་ཤེས་སྤྱན། །རྡོ་རྗེ་ཐུགས་ཀྱི་མཁར་ཞེས་ཡོངས་གྲགས་པ། །འབྲེལ་ཚད་དོན་དང་ལྡན་ལ༴། གཞན་གྱི་གནས་སུ་ལོ་གཅིག་བསྒོམས་པ་བས། །འདི་རུ་ཐུན་གཅིག་ཏིང་འཛིན་སྐྱོང་བས་ཟབ། །རྩེ་གཅིག་སྒྲུབ་ན་མཁའ་སྤྱོད་གནས་འགྲོ་ཞེས། །ཨོ་རྒྱན་ལུང་བསྟན་མཛད་ལ༴ །ས་རྡོ་རི་བྲག་འཇའ་ཟེར་ཐིག་ལེའི་གཟུགས། །ངེས་པ་བརྡ་ཡི་བཀའ་རྟགས་བསམ་མི་ཁྱབ། །ཚེ་ཆུ་ཁྲུས་ཆབ་སྨན་གྱི་རྫིང་བུ་སོགས། །ངོ་མཚར་དུ་མས་བརྒྱན་ལ༴། རྩ་གསུམ་དམ་ཅན་རྒྱ་མཚོ་རྟག་ཏུ་འདུ། །དཔའ་བོ་མཁའ་འགྲོ་སྣ་ཚོགས་གཟུགས་ཀྱིས་གནས། །དམ་ལྡན་མཆོག་ཐོབ་དམ་མེད་ཚར་གཅོད་པའི། །བྱིན་རླབས་དྲག་རྩལ་ལྡན་ལ༴ །ཕྱི་བལྟས་ལྷུན་ཆགས་ཡུལ་གྱི་དགེ་བཅུ་ཚང་། །ནང་དུ་རྩ་གསུམ་རབ་འབྱམས་འདུ་བའི་གནས། །གསང་བ་རྡོ་རྗེ་བཀོད་པའི་གཞལ་མེད་ཁང་། །ས་སྤྱོད་འོག་མིན་མཆོག་ལ༴ །དེར་བཞུགས་ཧཱུྃ་ཆེན་ཀ་ར་བི་མ་ལ། །ཨོ་རྒྱན་ཡབ་ཡུམ་བཻ་རོ་ནམ་མཁའི་སྙིང་། །བྱང་ཆུབ་གླིང་པ་རྒྱལ་བ་ཡབ་སྲས་སོགས། །བཀའ་བརྒྱུད་བླ་མ་རྣམས་ལ༴ །རྡོར་སེམས་ཡང་དག་བདེ་དགྱེས་དུས་འཁོར་ལོ། །སྤྱན་རས་གཟིགས་དབང་རྟ་མགྲིན་སྒྲོལ་མ་ཡུམ། །རྡོ་རྗེ་འོད་ལྡན་ལྷན་ཅིག་སྐྱེས་མ་སོགས། །ཡི་

― LT28_Page_0209 ―

^{[མ་དཔེ་གཟིགས་ན་འདིར་གནོན།]}

[Full Size]

དམ་མཁའ་འགྲོའི་ཚོགས་ལ༴ །ཡེ་ཤེས་མགོན་པོ་ཕྱག་དྲུག་ཕྱག་བཞི་པ། །བེར་ཅན་ཡབ་ཡུམ་ལས་མགོན་རྣམ་ཐོས་སྲས། །སྔགས་སྲུང་ཞིང་སྐྱོང་མགར་བ་དམར་ནག་སོགས། །གནས་གཏེར་སྲུང་མ་རྣམས་ལ༴། སྟོད་ན་ཀུན་བཟང་བདེ་ཆེན་འོད་གསལ་གླིང་། །ས་ཡི་མེ་བཙའ་ཡུལ་གྱི་ཕན་བདེའི་གཞི། །ཧེ་རུ་ཀ་ཡི་སྐུ་གསུང་ཐུགས་རྟེན་བཅས། །ལུང་བསྟན་དུས་བབས་ཉིད་ལ༴ །བར་ན་སྒྲུབ་ཁང་བསམ་གཏན་ཆོས་ཀྱི་གླིང་། །སྒྲུབ་བརྒྱུད་བསྟན་པའི་སྲོག་རྩ་གནས་པའི་གཞི། །ཨོ་རྒྱན་ཞལ་ཚབ་པདྨའི་མཚན་ཅན་གྱི། །བྱིན་རླབས་སྤྲིན་ཕུང་འཁྲིགས་ལ༴ །རྨངས་སུ་དཔལ་སྤུངས་ཐུབ་བསྟན་ཆོས་འཁོར་གླིང་། །བཀའ་བརྒྱུད་ཡོངས་ཀྱི་ཆུ་འགོ་གངས་ཅན་ལྗོངས། །གྲགས་པ་དོན་ལྡན་བྱམས་མགོན་དགྱེས་པའི་གནས། །རྟེན་དང་བརྟེན་པར་བཅས་ལ་གསོལ་བ་འདེབས། །ཕྱག་འཚལ་མཆོད་བསྟོད་གསོལ་བ་བཏབ་པའི་མཐུས། །འཇིག་རྟེན་ཁམས་སུ་ནད་མུག་འཁྲུགས་རྩོད་ཞི། །བདེ་སྐྱིད་དབྱར་མཚོ་ལྟར་འཕེལ་ཆོས་ལྡན་གྱི། །བསམ་དོན་འབྱོར་པ་ལྷུན་གྱིས་གྲུབ་པར་ཤོག །རྒྱལ་བསྟན་སྤྱི་དང་ཁྱད་པར་སྒྲུབ་བརྒྱུད་ཀྱི། །བསྟན་པ་འཇིག་རྟེན་ཁམས་སུ་འབར་བ་དང་། །བསྟན་འཛིན་ཐམས་ཅད་ཡུན་རིང་ཞབས་བརྟན་ཅིང་། །འཁོར་ལོ་གཉིས་ཀྱི་ཕྲིན་ལས་རྒྱས་པར་ཤོག །བདག་ཅག་ཚེ་འདིར་བསམ་དོན་ཆོས་བཞིན་འགྲུབ། །ཐར་པའི་ལམ་ལ་བར་ཆད་མི་འབྱུང་བར། །མཁའ་སྤྱོད་བདེ་བ་

― LT28_Page_0210 ―

^{[མ་དཔེ་གཟིགས་ན་འདིར་གནོན།]}

[Full Size]

ཅན་སོགས་དག་པའི་ཞིང་། །བགྲོད་ནས་བྱང་ཆུབ་ཆེན་པོ་མངོན་བྱེད་ཤོག །ཡང་གསོལ་འདེབས་བསྡུས་པ་ནི། ཧྲཱིཿ། ཡོན་ཏན་ཀུན་འབྱུང་འོད་གསལ་ཐུགས་ཀྱི་གནས། །ཙཱ་རི་གཉིས་པ་ཙཱ་འདྲ་རིན་ཆེན་བྲག །རྡོ་རྗེ་དེ་བཱི་ཀོ་ཊར་བཞུགས་པ་ཡི། །བརྒྱུད་པ་དགུ་ལྡན་རིག་འཛིན་གྲུབ་ཐོབ་དང་། །བཀའ་བརྒྱུད་བླ་མ་ཡི་དམ་ཞི་ཁྲོའི་ཚོགས། །དཔའ་བོ་མཁའ་འགྲོ་དམ་ཅན་སྲུང་མ་ལ། །གུས་པས་ཕྱག་འཚལ་མཆོད་བསྟོད་གསོལ་བ་འདེབས། །འགལ་རྐྱེན་ཀུན་ཞི་མཐུན་རྐྱེན་མྱུར་འགྲུབ་ནས། །མཁའ་སྤྱོད་བདེ་ཅན་ཞིང་དུ་བགྲོད་པ་དང་། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། །ཞེས་པ་འདི་ནི་སྒྲུབ་བརྩོན་བླ་མ་ཀརྨ་བཀྲ་ཤིས་དགེ་ལེགས་ཀྱིས་བསྐུལ་ངོར། །ཀརྨ་ངག་དབང་ཡོན་ཏན་རྒྱ་མཚོས་གནས་མཆོག་གང་དེའི་ཤར་སྒོ་ཡེ་ཤེས་ཀྱི་འཁོར་ལོར་བྲིས་པ་དགེ་ལེགས་འཕེལ།། ༈ །།ན་མོ་གུ་རུ་དེ་བ་ཌཱ་ཀི་ནཱི་ཡེ། །ཆོས་ཉིད་དབྱིངས་ལས་གང་འདུལ་རྣམ་པར་རོལ། །རབ་འབྱམས་ཞིང་དང་སྐུ་ཡི་སྤྲིན་ཆེན་པོས། །ནམ་མཁའི་མཐའ་ཁྱབ་འགྲོ་བ་སྒྲོལ་མཛད་པའི། །རྒྱལ་བའི་ཕྲིན་ལས་མཆོག་ལ་གསོལ་བ་འདེབས། །མ་དག་སྣང་ངོར་ཐ་མལ་བེམས་པོའི་གཟུགས། །དག་པའི་ཡེ་ཤེས་དཀྱིལ་འཁོར་རྟེན་བརྟེན་པ། །ཐབས་མཁས་འགྲོ་དོན་རྟག་ཁྱབ་ལྷུན་གྱིས་གྲུབ། །སྤྲུལ་པའི་གནས་མཆོག་ཆེ་ལ་གསོལ་བ་འདེབས། །ངོ་བོ་རིན་འབྱུང་རྣམ་སྣང་མཛད་ཀྱི་ཞིང་། །

― LT28_Page_0211 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་པ་སྤྱི་བོ་ཛཱ་ལནྡྷ་ར་ཡི། །ཐིག་རླུང་རྣམ་དག་བྱང་ཆུབ་སེམས་ཀྱི་དབྱིངས། །ཡོན་ཏན་སྐུ་ཡི་གནས་ལ་གསོལ་བ་འདེབས། །རྩ་བ་ཞི་ཁྲོ་རིགས་བརྒྱའི་ཞིང་ཁམས་ལས། །འགྲོ་འདུལ་ཡན་ལག་ཚུལ་དུ་འཕྲོས་པའི་གནས། །རྫོང་ཆེན་ཁམས་ཕུག་འོད་གསལ་གྲུབ་པའི་རྩེ། །དེར་བཞུགས་དཀྱིལ་འཁོར་ལྷ་ལ་གསོལ་བ་འདེབས། །ཨོ་རྒྱན་རྗེ་འབངས་སྤྲུལ་འཁོར་བཅས་པ་ཡིས། །ཟླ་བ་གཅིག་བཞུགས་གསང་ཆེན་རོལ་པའི་ཞིང་། །མཁའ་འགྲོ་སྒྱུ་འཕྲུལ་དྲྭ་བའི་ཕོ་བྲང་ཆེ། །གནས་མཆོག་གཙོ་བོ་ཉིད་ལ་གསོལ་བ་འདེབས། །རྫོང་ཆེན་འཕགས་པ་ཐུགས་རྗེ་ཆེན་པོའི་ཞིང་། ཁམས་ཕུག་རིག་འཛིན་བླ་མའི་གཞལ་མེད་ཁང་། །བཀའ་སྲུང་རེ་ཏེ་ཀུན་འཁྱིལ་མཆེད་གསུམ་གནས། །ཡན་ལག་བཅས་པ་ཀུན་ལ་གསོལ་བ་འདེབས། །གུས་པས་ཕྱག་འཚལ་མཆོད་སྤྲིན་རྒྱ་མཚོས་མཆོད། །སྡིག་སྒྲིབ་ཉམས་ཆག་ཐམས་ཅད་མཐོལ་ལོ་བཤགས། །ཐབས་མཁས་རྣམ་པར་རོལ་ལ་རྗེས་ཡི་རང་། །རྟག་ཏུ་བཞུགས་ཤིང་གང་འདུལ་ཆོས་སྟོན་གསོལ། །དགེ་བ་མི་གནས་བྱང་ཆུབ་ཆེན་པོར་བསྔོ། །འཇིག་རྟེན་བདེ་ཞིང་བསྟན་པ་དར་བ་དང་། །གནས་སྐབས་བསམ་པའི་དོན་ཀུན་ཆོས་བཞིན་འགྲུབ། །མཐར་ཐུག་རིན་འབྱུང་སྐུ་ཡི་ཞིང་ཁམས་སུ། །འབྲེལ་ཚད་འགྲོ་ཀུན་མངོན་པར་བྱང་ཆུབ་ཤོག །ཅེས་པའང་འཆི་མེད་གྲུབ་པའི་སློབ་དཔོན་རྣམ་གཉིས་ཀྱི་རྒྱལ་ཚབ་རྡོ་རྗེ་འཆང་པདྨ་འོད་གསལ་མདོ་སྔགས་གླིང་པའི་བཀའ་ཡིས་

― LT28_Page_0212 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེས་སུ་གནང་བ་ལྟར་རྟེན་འབྲེལ་ལེགས་ཚོགས་ཕུན་སུམ་ཚོགས་པས་གནས་ཞལ་ཐོག་མར་འབྱེད་པའི་སྐབས་སུ་འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་བྲིས་པ་དགེ་ལེགས་འཕེལ།། ༈ །།སངས་རྒྱས་གཉིས་པ་གུ་རུ་པདྨ་ཡིས། །གསང་བ་གསུམ་གྱིས་བྱིན་གྱིས་བརླབས་པའི་གནས། །ཞི་མཛད་རྡོ་རྗེ་རིགས་ཀྱི་ཕོ་བྲང་གི། །བྱང་ཕྱོགས་དཔལ་གྱི་དེའུར་གདོད་མ་ནས། །ཡོངས་གྲུབ་ཡེ་ཤེས་རྩ་གསུམ་རབ་འབྱམས་ལྷ། །ཁྱད་པར་གནོད་སྦྱིན་གཏེར་འཆང་དབང་པོ་ལ། །སྒོ་གསུམ་རྩེ་གཅིག་གུས་པས་གསོལ་བ་འདེབས། །གནས་སྐབས་ཆོས་མཐུན་དཔལ་འབྱོར་རྒྱས་པ་དང་། །མཐར་ཐུག་དོན་གཉིས་ལྷུན་གྱིས་གྲུབ་པར་ཤོག །ཅེས་པའང་བསྟན་རྒྱས་ངོར་བློ་གྲོས་མཐའ་ཡས་ཀྱིས་སྤེལ་བ་དགེ་ལེགས་འཕེལ།། ༈ །།ཨེ་མ་ཧོཿ བོན་ཉིད་དབྱིངས་ལས་ལོངས་སྤྱོད་རྫོགས་པའི་ཞིང་། །འགྲོ་འདུལ་སྤྲུལ་པ་དཀར་ནག་བཀྲ་གསལ་ཞེས། །རྣམ་པར་རྒྱལ་བའི་གསས་ཁང་གཉིས་པ་ནི། །གཡུང་དྲུང་རྣམ་པར་བཀོད་པ་ལ་གསོལ་བ་འདེབས། །ཀུན་བཟང་རྒྱལ་འདུས་འཆི་མེད་ཡབ་ཡུམ་སྲས། །རྩ་བའི་ལྷ་བཅུ་དཔལ་མགོན་བརྒྱ་རྩ་བརྒྱད། །ཚེ་ལྷ་དགྲ་བཅོམ་སྲིད་རྒྱལ་སྐུ་ལྔ་སོགས། །དེར་བཞུགས་རྩ་གསུམ་ལྷ་ཚོགས་ལ་གསོལ་བ་འདེབས། །ཡན་ལག་ཞི་རྒྱས་དབང་དྲག་མཆོག་

― LT28_Page_0213 ―

^{[མ་དཔེ་གཟིགས་ན་འདིར་གནོན།]}

[Full Size]

གི་གནས། །རྟེན་དང་རྟེན་པར་བཅས་ལ་གསོལ་བ་འདེབས། །འགལ་རྐྱེན་སྡིག་སྒྲིབ་ཀུན་ཞི་ཚེ་བསོད་རྒྱས། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། །ཞེས་གནས་མཆོག་དམ་པའི་གསོལ་འདེབས་སུ། །འཆི་མེད་རྡོ་རྗེ་གཡུང་དྲུང་གླིང་པ་རྩལ་གྱིས་བྲིས་པ་སིངྡྷིརསྟུ། དགེ་ལེགས་འཕེལ།། །།

ཁྱུང་པོའི་གདུང་རབས་རགས་བསྡུས་ཀྱི་གསོལ་འདེབས་བཀྲ་ཤིས་དབྱངས་སྙན།

― LT28_Page_0215 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱུང་པོའི་གདུང་རབས་རགས་བསྡུས་ཀྱི་གསོལ་འདེབས་བཀྲ་ཤིས་དབྱངས་སྙན་ཅེས་བྱ་བ་བཞུགས་སོ། །

― LT28_Page_0216 ―

^{[མ་དཔེ་གཟིགས་ན་འདིར་གནོན།]}

[Full Size]

ཨེ་མ་ཧོ། །མི་མངོན་དབྱིངས་ནས་ཀུན་བཟང་རིག་སྣང་རྒྱལ། །འགྲོ་དོན་ཁྱུང་ཆེན་སྤྲུལ་པའི་གདུང་བརྒྱུད་ནི། །ལྷ་ཁྱུང་མུ་ཁྱུང་ཁྱུང་རྒོད་ཐོག་ལ་འབར། །སྟག་སྒྲ་དུང་གཙུག་བཙན་སྒྲ་དུང་གཙུག་སོགས། །སྤྲུལ་པའི་སྐུ་མཆོག་རྣམས་ལ་གསོལ་བ་འདེབས། །གྱེར་ནམ་ཟུ་ཙེ་དཔལ་གྱི་གིར་ཏི་དང་། །མཆོག་གི་སྒྲོན་མ་སྤུངས་དང་ཟུ་ཙེ་སོགས། །ཀུན་ལས་ཁྱད་འཕགས་མཁས་ཤིང་གྲུབ་པ་ཡི། །གདུང་རབས་རིན་ཆེན་ཕྲེང་བར༴ །སྟོང་རྒྱུད་རིང་མོ་ཁྱུང་འཕགས་ཁྲ་མོ་དང་། །དམ་པ་ཁྱུང་སྒོམ་མཁས་པ་ཁྱུང་དབུས་དང་། །དབུས་ཁྱུང་ཆེན་པོ་དཔོན་དགེ་དཔོན་དབུས་སོགས། །ཀུན་བཟང་ཐུགས་སྤྲུལ་རྣམས་ལ༴ །ཞྭ་དཀར་བསྟན་བདག་ནང་ཆེན་གྲགས་རྒྱལ་མཚན། །རང་གྲོལ་བླ་མ་བློ་གྲོས་རྒྱལ་མཚན་དང་། །གྲུབ་ཆེན་ཤ་བ་རང་གྲོལ་ལ་སོགས་པ། །སྟོང་རྒྱུད་སྤྲུལ་པ་རྣམས་ལ༴ །ཡེ་ཤེས་རྒྱལ་མཚན་ལེགས་པ་རྒྱལ་མཚན་དང་། །བསོད་ནམས་རྒྱལ་མཚན་ནམ་མཁའ་རྒྱལ་མཚན་དང་། །རྒྱལ་མཚན་དར་དང་གཡུང་དྲུང་རྒྱལ་མཚན་སོགས། །སར་གནས་རིག་འཛིན་རྣམས་ལ༴ །གཞན་ཡང་རྣམ་འཕྲུལ་དཔའ་བོ་དཔའ་མོ་དང་། །བྱ་ཡི་རིགས་ལས་གྲུབ་ཐོབ་བརྒྱད་ཅུ་བྱོན། །མི་ལ་རས་པ་ཁྱུང་པོ་རྣལ་འབྱོར་སོགས། །འགྲོ་འདུལ་སྐྱེས་མཆོག་རྣམས་ལ༴ །སྤྲུལ་པའི་སྐུ་མཆོག་བློ་ལྡན་སྙིང་པོ་དང་། །ཟབ་གཏེར་སྒོ་འབྱེད་བཀྲ་ཤིས་རྒྱལ་མཚན་སོགས། །སྙན་བརྒྱུད་མངའ་བདག་གསང་སེམས་གཏེར་གྱི་བདག །གཤེན་བསྟན་གསལ་བྱེད་རྣམས་ལ༴ །

― LT28_Page_0217 ―

^{[མ་དཔེ་གཟིགས་ན་འདིར་གནོན།]}

[Full Size]

གཡུང་དྲུང་ཡེ་ཤེས་གཡུང་དྲུང་བསྟན་འཛིན་ཞབས། །གསང་སྔགས་གྲགས་པ་ནམ་མཁའ་དབང་ལྡན་སོགས། །མཁྱེན་བརྩེ་ནུས་པས་མཐའ་འཁོབ་གདུལ་བྱ་འདུལ། །རྒྱལ་ཁྱུང་མཁས་གྲུབ་རྣམས་ལ༴ །ནམ་མཁའ་འོད་ཟེར་རིན་ཆེན་ལྷུན་གྲུབ་དང་། །བསྟན་པ་ལྷུན་གྲུབ་བསྟན་པ་རྣམ་རྒྱལ་ཞབས། །ཚུལ་ཁྲིམས་མཆོག་ལེགས་ཉི་མ་བསྟན་འཛིན་སོགས། །འདན་ཁྱུང་རིམ་བརྒྱུད་རྣམས་ལ༴། མཁས་གྲུབ་བླ་མའི་བྱིན་རླབས་རྒྱུད་ལ་ཞུགས། །གཤེན་བསྟན་རིན་ཆེན་དར་རྒྱས་ཡུན་ཏུ་གནས། །འཇིག་རྟེན་ཁམས་སུ་དགེ་ལེགས་དཔལ་འབྱོར་རྒྱས། །བསམ་དོན་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པ་འདིའང་དད་དམ་ལྷག་བསམ་དགེ་བ་ཚུལ་ཁྲིམས་རྒྱལ་མཚན་གྱིས་བསྐུལ་ངོར་འདན་ཁྱུང་གི་རིགས་སྐྱེས་བློ་གྲོས་མཐའ་ཡས་སམ། །འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་མཁས་གྲུབ་ཆེན་པོ་བློ་གྲོས་རྒྱལ་མཚན་གྱིས་གསུང་ཉིད་གཞིར་བྱས་ནས། ཞེ་དགོན་བདེ་ལྡན་གཡུང་དྲུང་གླིང་དུ་བྲིས་པ་དགེ་ལེགས་འཕེལ།། ༈ །།སྨོན་རྒྱལ་པད་སྤྲུལ་རིན་པོ་ཆེའི་སྐྱེས་རབས་གསོལ་འདེབས་ལྷའི་རྔ་བོ་ཆེའི་སྒྲ་དབྱངས་ཞེས་བྱ་བ་བཞུགས་སོ། །ན་མོ་གུ་ར་བེ། མ་བཅོས་གཉུག་མར་བཞག་པས་དུས་གསུམ་གྱི། །རྣམ་རྟོག་སྒྲིབ་ཚོགས་བྲལ་བའི་རྫིང་བུ་རུ། །འགྲོ་འོང་མེད་པ་ཁྱབ་བདག་བླ་མའི་སྐུ། །ཆུ་ཟླ་བཞིན་ཏུ་དད་པའི་ངོར་གསལ་མཛོད། །སྙིང་གའི་ཆུ་སྐྱེས་སྒྲག་ཅན་དབུས་སོན་པའི། །དཀར་དམར་འབར་ཞུ་ཟླ་ཉིའི་གདན་སྟེང་དུ། །དྲངས་མ་ལྔ་འདུས་མི་ཤིགས་ཏི་ལ་ཀ །དབྱེར་མེད་དཔལ་ལྡན་བླ་མ་དགྱེས་

― LT28_Page_0218 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བཞུགས། །ནམ་མཁའི་མཐར་ཐུག་ལས་དང་ཉོན་མོངས་ཀྱིས། །འཁོར་བའི་ཤིང་རྟར་འཁྲུལ་བའི་སེམས་ཅན་ཏེ། །དེ་དག་རང་གི་རིགས་པས་གདོད་ནས་ཁྱབ། །སྣང་ཤེས་རོ་གཅིག་ངང་དུ་གསོལ་བ་འདེབས། །བོན་དབྱིངས་མཉམ་ཉིད་མདྨོ་བཀོད་པའི་ཞིང་། །བོན་ཅན་མཚན་བྲལ་སེམས་དཔའ་རྒྱ་མཚོའི་དབུས། །སོར་རྟོག་ཡེ་ཤེས་འོད་སྣང་མཐའ་ཡས་སྐུ། །ཤེས་དང་ཤེས་བྱ་ཀུན་མཁྱེན་ལ༴ །བྱམས་མས་ལུང་བསྟན་དཔལ་གྱི་ཕུར་ནག་གྲུབ། །རོང་ཅན་གནས་སུ་མཆོག་གི་དངོས་གྲུབ་བརྙེས། །སངས་རྒྱས་ཐུགས་སྤྲུལ་དཔལ་གཤེན་སྟག་མེ་འབར། །བླ་མ་ཡི་དམ་དབྱེར་མེད་ལ༴ །བདེན་པའི་དོན་གཟིགས་གྲུབ་པ་མཐར་ཕྱིན་ནས། །ས་འོག་འགྲོ་བ་མ་ལུས་སྨིན་གྲོལ་མཛད། །རྒྱལ་བས་ལུང་བརྙེས་སློབ་དཔོན་འཕགས་པ་ཀླུ། །མདོ་སྔགས་སྨྲ་བའི་དབང་པོ་ལ། །རྒྱལ་ཀུན་མཁྱེན་བརྩེ་གཅིག་བསྡུས་རིག་པ་འཛིན། །དཀྱིལ་འཁོར་རྒྱ་མཚོའི་ཁྱབ་བདག་ཧེ་རུ་ཀ །གསང་ཆེན་སྟོན་པ་གཡུང་དྲུང་མཐོང་གྲོལ་རྩལ། །གངས་ལྗོངས་བསྟན་འགྲོའི་དཔལ་མགོན་ལ༴ །གསང་བའི་བདག་པོ་གཡུང་དྲུང་གླིང་པ་ཡི། །རིགས་དང་བོན་གྱི་སྲས་གྱུར་ཞིང་འདི་ན། །མཚུངས་མེད་རིག་སྔགས་འཆང་བའི་པདྨ་རྒྱལ། །མཁྱེན་བརྩེ་ནུས་པའི་མངའ་བདག་ལ༴ །རབ་འབྱམས་སྲས་བཅས་རྒྱལ་བའི་ཐུགས་རྗེའི་མཚོར། །བསྲུབས་སྐྱེས་ཤེས་བྱ་ཀུན་མཁྱེན་ཚ་ཟེར་གྱིས། །སྐལ་བཟང་བློ་ཡི་པདྨོ་རྒྱས་མཛད་པ། །སྤྲུལ་སྐུ་དྲུང་མུ་ཝེར་ཞི་ལ། །ལྔ་བརྒྱའི་འགྲོ་བ་རྨུ་རྒོད་གདུལ་

― LT28_Page_0219 ―

^{[མ་དཔེ་གཟིགས་ན་འདིར་གནོན།]}

[Full Size]

དཀའ་བར། །རྒྱལ་འབགས་གཞན་གྱི་ཐུགས་རྗེ་བརྟུལ་བའི་དུས། །བསམ་བཞིན་མི་ཡི་སྲིད་པ་ཉེར་བཞེས་ནས། །འགྲོ་འདུལ་ཐབས་ལ་མཁས་པ་ལ༴ །བསྟན་པའི་གཞི་མ་སོ་སོར་ཐར་པ་ཡི། །བཅས་ཁྲིམས་རྨ་མེད་མཆོག་ཏུ་རྣམ་པར་དག །གཤེན་བསྟན་ཉི་མའི་འོད་བཞིན་བརྡལ་བར་མཛད། །གཤེན་གྱི་དྲང་སྲོང་ཆེན་པོ་ལ༴། རིས་མེད་སྙིང་རྗེ་ཟླ་བའི་འཛུམ་རླབས་ཀྱིས། །ལྷར་བཅས་སྲིད་པ་གསུམ་ན་མ་འདྲིས་པའི། །སྐྱེ་རྒུའི་ཡིད་ཀྱི་དགེ་བའི་ཆུ་གཏེར་སྤེལ། །གཡུང་དྲུང་སེམས་དཔའ་ཆེན་པོ་ལ༴ །ལྷ་སྐུ་ཕྱག་རྒྱས་ཐ་མལ་ཞེན་པ་བཅིལ། །རང་བྱུང་སྒྲ་བརྙན་དག་པའི་སྔགས་སུ་ཤར། །རིག་སྟོང་འཁོར་ལོ་འཁོར་འདས་བོན་སྐུར་ཐིམ། །རིམ་གཉིས་རྣལ་འབྱོར་ཆེན་པོ་ལ༴ །བཟོ་དང་གསོ་བས་སྐལ་ལྡན་རྗེས་སུ་འཛིན། །སྒྲ་དང་ཚད་མས་ལྟ་ངན་ཚར་ཐག་བཅད། །ནང་དོན་རིག་པས་ཀུན་མཁྱེན་ལམ་བཟང་སྟོན། །གནས་ལྔ་སྨྲ་བའི་སེང་གེ་ལ༴ །པེ་ཙེ་རྣམ་གསུམ་བོན་གྱི་འཁོར་ལོ་ཡིས། །རིགས་ཅན་གསུམ་གྱི་གདུལ་བྱ་སྨིན་གྲོལ་མཛད། །སྙིགས་མའི་དུས་སུ་བཀའ་དྲིན་མཚུངས་པ་མེད། ཁམས་གསུམ་འཁོར་བ་དོང་སྤྲུགས་ལ༴ །ཀློང་དུ་ལྟ་བ་མཇལ་བས་ཕྱག་བགྱིའོ། །སྣང་ཡུལ་རོ་མཉམ་ཀུན་བཟང་མཆོད་པས་མཆོད། །གདོད་ནས་སྒྲིབ་བྲལ་བཅིང་གྲོལ་མེད་པར་བཤགས། །མ་བྱས་རིགས་ཀྱི་དགེ་ལ་རྗེས་ཡི་རང་། །སྨྲ་བསམ་བརྗོད་མེད་བོན་འཁོར་བསྐོར་བ་བསྐུལ། །སྐྱེ་འགག་གཉིས་

― LT28_Page_0220 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་རྟག་བརྟན་ཆེན་པོར་བཞུགས། །འཁོར་གསུམ་དམིགས་མེད་ངང་དུ་བསྔོ་བར་བགྱི། །ཁྱད་པར་ཁྱེད་སྐུ་ཡེ་ནས་གཡུང་དྲུང་གི། །རང་བཞིན་འཕོ་འགྱུར་མེད་པར་བཞུགས་ལགས་ཀྱང་། །བདག་སོགས་བྱིས་བློས་སྐྱོན་གྱི་ནོངས་པ་ཡིས། །བསླད་མིན་བསྐལ་བརྒྱའི་བར་དུ་བཞུགས་གསོལ་འདེབས། །འདུ་ཤེས་གསུམ་གྱི་མལ་ན་གཏི་མུག་གིས། །རབ་བསྡོམས་སྒྲིབ་པ་གསུམ་གྱི་ཁུར་ལྕི་བ། །བདག་འདྲའི་སྙིང་མེད་པོ་ལ་ཐུགས་རྗེ་ཅན། །མ་གཡེལ་ཡེ་ཤེས་སྤྱན་གྱིས་ད་གཟིགས་འཚལ། །ཉོན་ཤེས་སྒྲིབ་པའི་མུན་པ་རབ་དྭངས་ཏེ། །ཤེས་བྱའི་ཀློང་ནས་རིག་པའི་ཡེ་ཤེས་སད། །ཤེས་དང་ཤེས་བྱ་རོ་གཅིག་གཟིགས་པ་ཡི། །ཀུན་མཁྱེན་ཡེ་ཤེས་ཕུང་པོར་བྱིན་གྱིས་རློབས། །འཁྲུལ་མེད་ཡོངས་འཛིན་དམ་པ་ལེགས་བསྟེན་ནས། །སྨིན་གྲོལ་གདམས་པའི་བདུད་རྩི་ངོམས་མེད་འཐུང་། །མདོ་སྔགས་ཐོས་བསམ་སྒོམ་པས་རྒྱུད་གྲོལ་ཏེ། །ལྟ་སྒོམ་སྤྱོད་འབྲས་མཐར་ཕྱིན་བྱིན་གྱིས་རློབས། །ཨ་ཧཾ་ཞུ་བདེ་དགའ་བཞིའི་ཡེ་ཤེས་ཀྱིས། །འཕོ་འཛག་མེད་པའི་ཚུལ་ཁྲིམས་མཆོག་ཐོབ་སྟེ། །བདེ་སྟོང་མཆོག་ཏུ་མི་འགྱུར་གསང་ལམ་ནས། །དྭངས་མའི་འོད་སྐུ་འགྲུབ་པར་བྱིན་གྱིས་རློབས། །དབེན་གསུམ་མལ་དུ་ཟག་མེད་ཏིང་འཛིན་གྱིས། །རྒྱུད་བརླན་མཉམ་པར་བཞག་བཞིན་བོན་གྱི་སྒོ། །གྲངས་མེད་འདོམས་པས་སྐལ་ལྡན་རྒྱུད་གྲོལ་བའི། །ཕྲིན་ལས་རྩོལ་མེད་ལྷུན་གྲུབ༴ །འཁྲུལ་པའི་དེ་ཉིད་ཤེས་པའི་རྣམ་དཔྱོད་ཀྱིས། །

― LT28_Page_0221 ―

^{[མ་དཔེ་གཟིགས་ན་འདིར་གནོན།]}

[Full Size]

ཐ་མལ་ཤེས་པ་རང་ངོ་མཐོང་བའི་ཚེ། །གསལ་སྟོང་འཛིན་མེད་སེམས་སུ་ཐག་ཆོད་ནས། །ཅི་སྣང་ཆོས་སྐུར་འཆར་བར༴ ཀ་དག་ནང་གསལ་གཞོན་ནུ་བུམ་སྐུའི་ངང་། །ལྷུན་གྲུབ་སྣང་བཞིའི་གསང་ལམ་མཐར་ཕྱིན་ནས། །སྲིད་ཞིའི་བོན་ཀུན་གཞི་རྫོགས་ཟད་སར་སྐྱོལ། །གཉུག་མའི་འཇའ་ལུས་འགྲུབ་པར༴ །མདོར་ན་འདི་བཟུང་སྙིང་པོར་མཆིས་ཀྱི་བར། །དཔལ་ལྡན་བླ་མ་དམ་པས་རྗེས་བཟུང་ཞིང་། །གསང་གསུམ་རྣམ་ཐར་རྒྱ་མཚོར་མངའ་བརྙེས་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་སྩོལ། །ཞེས་པ་འདིའང་གཤེན་གྱི་དྲང་སྲོང་རིམ་པ་གཉིས་ཀྱི་རྣལ་འབྱོར་པ་ཆེན་པོ་ཐང་བདེའི་བླ་མ་དྲུང་མུའི་མཚན་ཅན་གྱིས་བཀའ་ཡིས་བསྐུལ་བ་ལྡོག་ཏུ་མ་སྤོབས་ཏེ། །བོན་ཆོས་རིས་མེད་ལ་དག་པའི་དགེ་བློ་ལྷུར་ལེན་པ་ལྔ་རིག་སྨྲ་བ་ཤཱཀྱའི་དགེ་སྦྱོང་འདན་ཁྱུང་གི་རིགས་ལས་སྤྲུལ་པའི་ལུས་གོག་ནར་སོན་ཤིང་བཏགས་མིང་དུ་ཀརྨ་ངག་དབང་ཡོན་ཏན་རྒྱ་མཚོ་ཞེས་བྱ་བས་མཆོག་གི་བླ་མའི་གདན་སར་བྲིས་ནས་གསོལ་བ་བཏབ་པ་དགེ་ལེགས་འཕེལ།། ༈ །།ས་བཅུའི་དབང་ཕྱུག་གཡུང་དྲུང་སེམས་དཔའ་ཆེ། སྐྱེས་སྦྱངས་ཕུན་ཚོགས་ཡེ་ཤེས་རང་བཞིན་ཉིད། །སྐུ་དང་ཞིང་ཁམས་སྒྱུ་འཕྲུལ་རོལ་བའི་བདག །དཔལ་ལྡན་བླ་མའི་ཞབས་ལ་གསོལ་བ་འདེབས། །གཞི་རྒྱུད་རྟག་བརྟན་གཡུང་དྲུང་གསེར་གྱི་ཁམས། །ལམ་རྒྱུད་བསགས་སྦྱང་ཕུན་ཚོགས་རྩིབས་སྟོང་བཀྲ། །འབྲས་རྒྱུད་དོན་གཉིས་ལྷུན་གྲུབ་འཁོར་ལོས་སྒྱུར། །སྐུ་བཞིའི་དབང་ཕྱུག་ཞབས་ལ༴ །

― LT28_Page_0222 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱལ་གཤེན་ལུང་རྟོགས་བསྟན་པའི་གདུགས་དཀར་པོ། །བསླབ་གསུམ་རིན་ཆེན་གསེར་གྱི་ཡུ་བས་བཏེགས། །གྲུབ་པའི་ནོར་བུའི་ཏོག་ཆེན་སྲིད་ན་འབར། །ལྷར་བཅས་འགྲོ་བའི་མགོན་པོར༴ །དད་པའི་ས་གཞི་ཚུལ་ཁྲིམས་མེ་ཏོག་མཛེས། །སྦྱིན་པའི་ཆུ་རྒྱུན་མང་ཐོས་ནོར་བུས་ཕྱུག །ངོ་ཚ་ཁྲེལ་ཡོད་རི་དབང་ལྷུན་པོའི་སྤོར། །ཤེས་རབ་ཉི་ཟླ་འབར་དེར༴ །ཐོས་པའི་མིག་སྟོང་བསམ་པའི་ས་སྲུང་ལྡན། །རིམ་གཉིས་ཟབ་ལམ་སྒོམ་པའི་རྩེ་བརྒྱ་ལས། །ཀུན་དཀྲིས་ལྷ་མིན་གཡུལ་ངོ་ཟློག་ལ་བརྩོན། །སྐྱེས་ཆེན་ལྷ་ཡི་དབང་པོར༴ །ལྟ་བས་འཁོར་འདས་སོན་ཀུན་སེམས་སུ་རྟོགས། །འཛིན་མེད་ཡེངས་མེད་སྒོམ་པ་གཉུག་མའི་ངང་། །སྤྲོས་བྲལ་སྒྱུ་མའི་སྤྱོད་པ་འཁོར་ཡུག་གིས། །སྣང་སེམས་བོན་སྐུར་འཆར་ལ༴ །གཟུགས་སྣང་གདན་གསུམ་ལྷ་ཡི་འཁོར་ལོར་དག །སྒྲ་གྲགས་གཞོམ་མེད་ཨཱ་ལི་ཀཱ་ལིའི་གདངས། །དྲན་རིག་རྣམ་པར་མི་རྟོགས་བོན་གྱི་དབྱིངས། །དོན་དམ་རྣལ་འབྱོར་མཆོག་དེར། །གནས་པ་རྩ་མདུད་རང་བཞིན་དབྱིངས་སུ་གྲོལ། །གཡོ་བ་རླུང་བཅུ་ཨ་བ་དྷཱུ་ཏིར་ཐིམ། །བཀོད་པའི་ཐིག་ལེ་འཕོ་འགྱུར་མེད་པར་བརྟན། །ཨ་ཧཾ་མཉམ་སྦྱོར་དཔལ་ལ༴ །ཞི་ལྷག་དབྱེར་མེད་རིག་སྟོང་ཁྱབ་བརྡལ་ཆེ། །མཉམ་རྗེས་དབྱེར་མེད་ནམ་མཁའ་ལྟ་བུའི་ངང་། །སྣང་སེམས་དབྱེར་མེད་གཅིག་ཤེས་ཀུན་གྱི་དོན། །འཁོར་འདས་དབྱེར་མེད་རྟོགས་ལ༴། སྟོང་ཉིད་རྩལ་རྫོགས་སྙིང་རྗེའི་གཞན་དབང་ཅན། །སྐལ་

― LT28_Page_0223 ―

^{[མ་དཔེ་གཟིགས་ན་འདིར་གནོན།]}

[Full Size]

ལྡན་མཐའ་དག་སྨིན་གྲོལ་དཔལ་ལ་བཀོད། །བསྡུ་དངོས་བཞི་ཡིས་འགྲོ་དོན་ལྷུན་གྱིས་གྲུབ། །འབྲེལ་ཚད་དོན་དང་ལྡན་ལ༴ །མཐའ་འཁོབ་མུན་པའི་རུམ་ན་མཁྱེན་དང་བརྩེའི། །འོད་ཀྱི་དྲ་བས་ཐར་ལམ་སྣང་མཛད་པ། །འགྲོ་བའི་སྒྲོན་མེ་དཔལ་ལྡན་བླ་མ་ཡིས། །སྐྱེ་བ་ཀུན་ཏུ་རྗེས་སུ་འཛིན་མཛད་གསོལ། །མགོན་ཁྱེད་དག་པའི་ཞིང་ཁམས་གར་བཞུགས་ཀྱང་། །དམིགས་མེད་ཐུགས་རྗེའི་སྤྱན་གྱིས་འདིར་གཟིགས་ལ། །གདུལ་བྱར་གྱུར་པའི་འགྲོ་བ་མ་ལུས་ཀུན། །བོན་ཉིད་གཡུང་དྲུང་ས་ལ་དྲང་དུ་གསོལ། །གཤེན་བསྟན་ཉི་མའི་དཀྱིལ་འཁོར་རབ་འབར་ཞིང་། །བསྟན་འཛིན་པདྨོའི་དགའ་ཚལ་ཕྱོགས་བརྒྱར་རྒྱས། །རིག་གྲོལ་བདུད་རྩིའི་བཅུད་འཐུང་མཁའ་མཉམ་འགྲོ། །རྟག་པ་དམ་པའི་གོ་འཕང་བརྙེས་གྱུར་ཅིག །ཅེས་པ་འདིའང་མོས་ལྡན་ཁ་ཅིག་གི་བཞེད་སྐོང་དང་། རང་ཉིད་ཀྱིས་ཀྱང་དད་མོས་འདུན་པས་མཚམས་སྦྱར་ཞབས་བརྟན་གསོལ་འདེབས་སུ་བགྱིས་པ་ལ། །སླད་ནས་གཏེར་ཆེན་རིན་པོ་ཆེ་ཀུན་གྲོལ་གསང་བ་རྩལ་གྱིས་བཀའ་བཞིན་ཐུགས་དམ་སྐུལ་བའི་གསོལ་འདེབས་སུ་ཞལ་སྒྱུར་པ་པོ་ནི་རྒྱལ་བསྟན་རིས་མེད་ལ་དག་པའི་སྣང་བ་དཀར་བ་བ་དན་ཁྱུང་གི་རིག་པ་འཛིན་པ་འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་བགྱིས་པ་དགེ་ལེགས་འཕེལ།། ༈ །།བོན་ཉིད་དབྱིངས་སུ་མངོན་པར་སངས་རྒྱས་ཏེ། །གཞན་དོན་གཟུགས་སྐུ་གང་ལ་གང་འདུལ་གྱིས། །འཁོར་བ་མ་སྟོངས་བར་དུ་འགྲོ་དོན་མཛད། །སྙིགས་མའི་མགོན་

― LT28_Page_0224 ―

^{[མ་དཔེ་གཟིགས་ན་འདིར་གནོན།]}

[Full Size]

ཏུ་རིག་འཛིན་ལུང་གིས་བསྔགས། །བློ་ལྡན་དངོས་བྱོན་གུ་རུའི་རྒྱལ་ཚབ་མཆོག །ཟབ་གཏེར་བཀའ་བབས་མི་འགྱུར་ཚེ་དབང་གྲགས། །ཀུན་གྲོལ་གསང་བ་རྩལ་ལ་གསོལ་བ་འདེབས། །བསྐལ་བརྒྱར་ཞབས་བརྟན་བོན་གྱི་འཁོར་ལོ་བསྐོར། །ཕྲིན་ལས་ཛམ་གླིང་ཐ་གྲུ་ཁྱབ་པ་དང་། །སྐྱེ་ཀུན་མགོན་པོ་ཁྱེད་ཀྱིས་རྗེས་བཟུང་སྟེ། །རང་གཞན་དོན་གཉིས་ལྷུན་གྱིས་གྲུབ་པར་ཤོག །ཅེས་པའང་བློ་གསལ་གཡུང་དྲུང་དོན་ལྡན་གྱིས་བསྐུལ་ངོར་འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་བྲིས་པ་དགེ་ལེགས་འཕེལ། ༈ །།མཆོག་གསུམ་རྩ་བ་གསུམ་གྱི་ལྷ། །ཀུན་འདུས་རྩ་བའི་བླ་མ་དང་། །རང་རིག་སྟོང་གསལ་དབྱེར་མེད་པ། །མི་འབྲལ་སྙིང་གི་པདྨོར་བསྟེན། །གསང་སྔགས་འཇུག་སྒོ་དབང་ནོས་ཤིང་། །ལམ་གྱི་སྲོག་རྩ་དམ་ཚིག་ལ། །འགལ་ཉམས་སྐད་ཅིག་མི་འབྱུང་བས། །ཡེ་ཤེས་སུ་མཆོག་མངོན་བྱེད་ཤོག །སོ་སོ་ཐར་པའི་སྡོམ་པ་དང་། །བྱང་ཆུབ་སེམས་ཀྱི་བསླབ་པ་དང་། །སྔགས་རྒྱུད་ཕྱི་ནང་ལས་གསུངས་པའི། །སྤྱི་ཡི་དམ་ཚིག་རྣམ་དག་ཤོག །རྩ་བ་སྐུ་གསུང་ཐུགས་གསུམ་དང་། །ཡན་ལག་དམ་ཚིག་ཉི་ཤུ་ལྔ། །འབུམ་སྡེ་ས་མ་ཡས་བསྡུས་པའི། །ཁྱད་པར་དམ་ཚིག་མི་ཉམས་ཤོག །བསྙེན་སྒྲུབ་བརྩོན་པའི་རྣལ་འབྱོར་ལ། །དངོས་གྲུབ་མྱུར་བའི་ཐབས་ཆེན་པོ། །བརྡ་ཡིས་མཚོན་པ་ཉི་ཤུ་

― LT28_Page_0225 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས། །བསླབ་པའི་དམ་ཚིག་རབ་སྲུང་ཤོག །སྨིན་གྲོལ་ལམ་མཆོག་མཐའ་རུ་ཕྱིན། །བདེ་སྟོང་ཡེ་ཤེས་རྩལ་ཆེན་རྫོགས། །འཁོར་འདས་མཉམ་པ་ཉིད་དུ་ཤར། །རྟོགས་པའི་གདིང་ཆེན་མྱུར་ཐོབ་ཤོག །བསླབ་དང་སྡོམ་ལས་རྣམ་པར་གྲོལ། །མི་སྲུང་སྲུང་བ་ཆེན་པོའི་ངང་། །རྟགས་མེད་རྟགས་ཀྱི་རྒྱལ་པོ་གྲུབ། །ཀུན་བཟང་གདོད་མའི་སར་ཕྱིན་ཤོག །ཅེས་སྨོན་རྒྱལ་རིག་འཛིན་ཆེན་པོ་ཀུན་གྲོལ་གྲགས་པའི་ཡང་སྲིད་ལྔ་པའི་ཐུགས་བཞེད་ལྟར་བློ་གྲོས་མཐའ་ཡས་པའི་སྡེས་རྫོང་གསར་བཀྲ་ཤིས་ལྷ་རྩེར་བགྱིས་པ་དགེ་ལེགས་འཕེལ།། །།

རྗེ་བཙུན་རས་ཆུང་པ་རྡོ་རྗེ་གྲགས་པ་ལ་བསྔགས་པ་རྡོ་རྗེའི་རྒྱུད་མངས།

― LT28_Page_0227 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་རས་ཆུང་པ་རྡོ་རྗེ་གྲགས་པ་ལ་བསྔགས་པ་རྡོ་རྗེའི་རྒྱུད་མངས་ཞེས་བྱ་བ་བཞུགས་སོ།། །།

― LT28_Page_0228 ―

^{[མ་དཔེ་གཟིགས་ན་འདིར་གནོན།]}

[Full Size]

བཀའ་བརྒྱུད་གྲུབ་པའི་ཆུ་ཀླུང་འབབས་པའི་གཞི། །གངས་ཅན་རྣ་བའི་རྒྱན་གྱི་ཁ་བའི་རིར། །མི་ཡི་སེང་གེ་སྐྱེས་མཆོག་རས་ཆུང་པ། །གདོད་ནས་སྨོན་ལམ་སྟོབས་ཀྱིས་འབྲེལ་ལ་འདུད། །གསང་བའི་བདག་པོ་རྒྱལ་བ་ཀུན་གྱི་སྙན། །རྒྱ་བོད་ཀུན་ཏུ་གསང་བ་འཛིན་པ་ལས། །མཚར་སྡུག་ཁྱེའུའི་གཟུགས་ཅན་གུང་ཐང་པ། །རྗེ་བཙུན་ཐུགས་ཀྱི་བུ་གཅིག་དེ་ལ་འདུད། །ཝ་ལ་ཙཎྜའི་གདམས་པའི་བསིལ་བྱེད་ཀྱིས། །གཟོད་ནས་གཏུམ་པོར་གྲུབ་པའི་མེ་སྦར་བས། །གདུག་ཅན་ཚང་ཚིང་མཐའ་དག་བསྲེགས་པའི་རྒྱུན། །རྣལ་འབྱོར་སྤྱོད་ཡུལ་ལྷན་ཅིག་བཟུང་ལ་འདུད། །ཚེ་དབང་ཡེ་ཤེས་ཌཱ་ཀིའི་ཐུགས་ཀྱི་མཛོད། །བརྟོལ་ནས་བཅུ་ཕྲག་གཅིག་ལ་བརྒྱད་ལྷག་པ། །འགྲོ་དོན་ཤམ་བུ་ཅན་གྱི་ཟབ་མོའི་ཆོས། །གངས་རིའི་ལྗོངས་སུ་ཐང་མར་བརྡལ་ལ་འདུད། །ཁྱད་པར་མཁའ་འགྲོ་རྒྱ་མཚོའི་སྲོག་གི་སྙིང་། །ཞག་བདུན་ཙམ་གྱིས་མཆོག་ཐུན་འགྲུབ་བྱེད་པ། །གངས་རིའི་མགོན་པོ་ཐུན་མིན་ཕྲིན་ལས་ཀྱི། །ཉི་མའི་ཤིང་རྟ་གསར་དུ་དྲངས་ལ་འདུད། །ནཱ་རོའི་རིམ་པ་དྲི་མེད་བཤེས་གཉེན་ལས། །ལེགས་འོང་གསང་འཛིན་རྣམས་ཀྱི་རྣ་བའི་བཅུད། །ལུས་མེད་མཁའ་འགྲོའི་ཆོས་དྲུག་གསང་བའི་རྒྱ། །བཀྲོལ་མཛད་བླ་མའི་བླ་མར་གྱུར་ལ་འདུད། །ཟུང་འཇུག་ཡེ་ཤེས་སྐུ་ཅན་རྗེ་བཙུན་ཆེ། །སྐུ་དང་གྲིབ་མ་བཞིན་ཏུ་མཉེས་པ་དགུས། །བསྟེན་ཚུལ་མཐར་ཕྱིན་རྣམ་ཐར་གཅིག་གྱུར་པ། །

― LT28_Page_0229 ―

^{[མ་དཔེ་གཟིགས་ན་འདིར་གནོན།]}

[Full Size]

།ཐུགས་སྲས་ཟླ་བ་ལྟ་བུར་གྲགས་ལ་འདུད། །སྙན་བརྒྱུད་ནོར་བུ་རྣམ་གསུམ་གསང་བའི་མཛོད། །གཞན་ལ་མཚན་ཙམ་དཀོན་པའི་རིན་ཐང་ཅན། །ཁྱོད་ལ་རང་ནོར་བཞིན་ཏུ་ཕོག་པ་ཡིས། །སྒྲུབ་བརྒྱུད་རྒྱལ་མཚན་ཏོག་ཏུ་གྱུར་ལ་འདུད། །ཆགས་བྲལ་འདོད་ཆགས་ཆེན་པོའི་གར་གྱིས་སྒེག །ཞི་ཡང་ཞེ་སྡང་ཆེན་པོའི་གཟི་བརྗིད་འབར། །གཏི་མུག་སྤངས་པའི་རྨོངས་ཆེན་ཕ་རོལ་ཕྱིན། །རྡོ་རྗེའི་ས་མཐར་སོན་པ་དེ་ལ་འདུད། །གསུང་གི་གླིང་བུའི་ཆ་ཤས་ལྷུང་བ་ཡིས། །ཡིད་ཀྱི་རི་དྭགས་རྣམ་གྲོལ་ས་ལ་རྩེ། །གསང་བའི་ཐེག་པས་མི་དང་མི་མ་ཡིན། །གྲངས་མེད་རྡོ་རྗེའི་རྒྱལ་སར་འཁྲིད་ལ་འདུད། །འཕོ་མེད་དགའ་བཞིའི་མདངས་ཀྱིས་སྒེག་པའི་སྐུ། །མཁའ་སྤྱོད་མཛེས་མའི་དཀྱིལ་འཁོར་མཛེས་པའི་རྒྱན། །གྲུབ་པའི་རིག་འཛིན་ཡོངས་ཀྱིས་ཕྱག་བྱས་པ། །ཧེ་རུ་ཀ་དཔལ་དཔའ་བོ་ཆེ་ལ་འདུད། །དུས་གསུམ་གཤེགས་དང་དེ་སྲས་བློ་ཆེན་གྱི། །ཆོས་ཀྱི་མཛོད་དང་གེགས་བྱེད་སྲུང་བའི་གོ། །བགོས་པའི་འཕྲུལ་ཆེན་ནམ་ཡང་མི་ཟད་པས། །ཞིང་ཁམས་རྒྱ་མཚོ་མངོན་པར་འགེངས་ལ་འདུད། །འདྲེན་པ་སྟོང་གི་ཚེ་ན་བསྟི་བའི་གནས། །ལྕང་ལོ་ཅན་གྱི་རྡོ་རྗེའི་ཁང་བརྩེགས་སུ། །རྣམ་སྨིན་འཇའ་ཚོན་སྐུ་རུ་གནས་བསྒྱུར་ཏེ། །ནམ་མཁའི་ལམ་ནས་གྱ་གྱུར་གཤེགས་ལ་འདུད། །སྐྱེས་མཆོག་ཁྱེད་ཀྱི་སྒྲུབ་བརྒྱུད་མི་ཉམས་ཤིང་། །ཁྱོད་ཀྱི་རྣམ་པར་ཐར་དང་རོ་

― LT28_Page_0230 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་པར། །བདག་གྱུར་གསང་བ་གངྒཱའི་རྒྱུན་སྤེལ་བས། །མཁའ་སྤྱོད་དབང་ཕྱུག་ས་གཞི་ཀུན་ཁྱབ་ཤོག །ཅེས་པའང་བཀའ་བརྒྱུད་རིན་པོ་ཆེའི་རྗེས་འཇུག་རྟགས་ཙམ་འཛིན་པ་བློ་གྲོས་མཐའ་ཡས་ཀྱིས། །སྐྱེས་མཆོག་རས་ཆུང་རྡོ་རྗེ་གྲགས་པའི་སྒྲུབ་གནས་བྱིན་རླབས་དང་མཁའ་འགྲོའི་སྤྲིན་ཕུང་འདུ་བའི་གནས་སུ་དགེ་སྦྱོར་བློ་ནུས་དང་སྦྱར་བ་བགྱིས་པའི་རྗེས་ཐོག་ཏུ་དད་པ་ཆེན་པོས་གསོལ་བ་བཏབ་པ་དགེ་ལེགས་འཕེལ།། ༈ །།མཁས་གྲུབ་ཁྱུང་པོ་རྣལ་འབྱོར་ལ་བསྔགས་པ་ཨུ་དུམྦ་རའི་འཛུམ་ཟེར་ཅེས་བྱ་བ། །ཉན་ཐོས་རྫུ་འཕྲུལ་ཆེན་པོར་ལུང་བསྟན་ཅིང་། །ཡེ་ཤེས་ཌཱ་ཀི་རྣམ་གཉིས་ཐུགས་ཀྱི་སྲས། །མཁས་གྲུབ་བརྒྱ་དང་ལྔ་བཅུའི་གདུང་འཚོབ་པ། །ཁྱུང་པོ་རྣལ་འབྱོར་ཞབས་ལ་གསོལ་བ་འདེབས། །དང་པོ་སྒོ་བཞི་མཛོད་ལྔའི་བོན་སྒོར་ཞུགས། །གཞུང་ལུགས་མཐར་ཕྱིན་ཡི་དམ་ལྷ་ཞལ་མཐོང་། །བཤད་སྒྲུབ་སྡེ་བཙུགས་གཤེན་གྱི་བསྟན་འཛིན་ལ། །འགྲན་ཟླ་སྤངས་བར་མཛད་དེར་གསོལ་བ་འདེབས། །བར་དུ་ཐུབ་བསྟན་སྒོར་ཞུགས་ཐུན་མོང་དང་། །ཐུན་མིན་རིག་པའི་གནས་ཀུན་བདེ་བླག་མཁྱེན། །སེམས་ཕྱོགས་གཙོར་གྱུར་རྫོགས་ཆེན་བསྟན་པའི་བདག །བཻ་རོའི་བག་ཆགས་སད་དེར་གསོལ༴ །ཐ་མར་སྨོན་ལམ་སྟོབས་ཀྱིས་འཕགས་ཡུལ་བགྲོད། །མཁས་གྲུབ་བརྒྱ་དང་ལྔ་བཅུའི་ཐུགས་བཅུད་ལོངས། །མདོ་སྔགས་ཆོས་ཚུལ་རྒྱ་མཚོར་རང་བྱང་ཆུབ། །སྟོན་པ་གཉིས་པར་གྱུར་ལ༴ །ཁྱད་པར་ཡེ་ཤེས་ཌཱ་ཀི་

― LT28_Page_0231 ―

^{[མ་དཔེ་གཟིགས་ན་འདིར་གནོན།]}

[Full Size]

ཞལ་གཉིས་ཀྱིས། །རྗེས་བཟུང་རྡོ་རྗེ་འཆང་གི་གསང་ཚིག་བསྩལ། །བརྒྱུད་པར་བཅས་ལ་དངོས་སུ་བྱིན་རློབ་པ། །ལུང་བསྟན་ཞལ་བཞེས་ཐོབ་ལ༴ །འཕགས་ཡུལ་མཁས་གྲུབ་བྱེ་བས་མགྲིན་གཅིག་བསྔགས། །ཚངས་དང་བརྒྱ་བྱིན་ནོར་བུའི་ཐོད་ཀྱི་བཏུད། །ལྷ་རྣམས་ཀུན་གྱིས་མེ་ཏོག་ཆར་ཆེན་བསྙིལ། །ངོ་མཚར་བསམ་ལས་འདས་ལ༴ །སྤྱན་དང་མངོན་ཤེས་ཏིང་འཛིན་རྒྱ་མཚོ་མངའ། །རྫུ་འཕྲུལ་རྣམ་རྩེའི་ཆོ་འཕྲུལ་ཆེན་པོ་བསྟན། །མཐའ་ཡས་འགྲོ་བའི་ཁམས་དང་མོས་པ་མཁྱེན། །སྲིད་མཐར་ཞལ་གྱིས་འཆེས་ལ༴ །གནས་ལྔར་རྒྱུད་སྡེ་ལྔ་ཡི་དཀྱིལ་འཁོར་སྤྲུལ། །བཀོད་པ་བརྒྱ་དང་རྩ་བརྒྱད་དུས་གཅིག་བསྟན། །སྲིད་གསུམ་འབྱུང་པོའི་ཚོགས་ཀྱིས་བྲན་བཞིན་བཏུད། །མཁའ་འགྲོའི་ཚོགས་རྗེར་གྱུར་ལ༴ །སྤྲུལ་པའི་དཀྱིལ་འཁོར་རྣམས་སུ་དབང་བསྐུར་ཞིང་། །ཐེག་ཆེན་ཆོས་འཁོར་རྒྱུན་ཆད་མེད་པར་བསྐོར། །གདུལ་བྱ་ཁྲི་ཕྲག་བརྒྱད་སོགས་སྨིན་གྲོལ་མཛད། །སངས་རྒྱས་མཛད་པ་སྒྲུབ་ལ༴ །བརྒྱ་དང་ལྔ་བཅུར་འགྲོ་མང་ཐབས་ཀྱིས་འདུལ། །རྣམ་ཐར་རྒྱ་མཚོའི་སྤྲིན་གྱིས་ཞིང་ཀུན་ཁྱབ། །འདི་ནས་བདེ་ལྡན་ཞིང་གི་འདྲེན་པར་གྱུར། །དབང་བཅུ་རྫོགས་པར་བརྙེས་ལ༴ །རྒྱལ་ཚབ་དམ་པ་ཆོས་ཀྱི་གདུང་འཛིན་པ། །མོག་ལྕོག་སྐྱེར་སྒང་གཉན་སྟོན་འགྲོ་མགོན་སོགས། །སྲིད་མཐའི་བྱང་སེམས་དུ་མ་རིམ་བྱོན་ཏེ། །ས་སྟེང་གྲུབ་པས་བཀང་ལ༴ །གྲུབ་ཆེན་

― LT28_Page_0232 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱུང་པོའི་རྣམ་ཐར་མཁའ་ལྡིང་གི། གཤོག་རླབས་ཤེས་བྱའི་མཁའ་མཐར་བསྐྱོད་པའི་ཚེ། །གངས་ཅན་མཁས་དང་གྲུབ་པའི་གཉིས་སྐྱེས་ཚོགས། །རང་ཚུགས་བཏང་ནས་ཁྱོད་ཀྱི་རྗེས་སུ་རྩོལ། །མགོན་པོ་ཁྱོད་ལ་རྩེ་གཅིག་གསོལ་བཏབ་མཐུས། །ཁྱོད་ཀྱི་རྣམ་ཐར་མ་ལུས་འགྲུབ་ནས་ཀྱང་། །ས་ཡི་སྟེང་ན་ཉི་ཟླ་ལྟར་གྱུར་ཏེ། །ཁྱོད་བསྟན་སྲིད་པ་གསུམ་དུ་སྣང་བྱེད་ཤོག །ཅེས་པའང་ཁྱུང་རིགས་ལ་ས་བོན་དང་། རྙིང་མ་དང་བཀའ་བརྒྱུད་ཀྱི་ཆོས་སྐོར་རིམ་པར་ཞགས་ཤིང་། །གྲུབ་ཆེན་འདི་ཉིད་ཀྱི་གསེར་ཆོས་ལ་མོས་པའི་གཡར་དམ་འཆའ་བ་སྤོང་བ་པ་ཡོན་ཏན་རྒྱ་མཚོས་དབེན་པའི་རི་ངོགས་སུ་བྲིས་ཏེ་གསོལ་བ་བཏབ་པ་སིངྡྷི་ར་སྟུ།། ༈ །།དཔལ་ལྡན་ཕག་མོ་གྲུ་པ་ལ་བསྔགས་པ་སངས་རྒྱས་དགྱེས་པའི་རོལ་མོ་ཞེས་བྱ་བ། །ཤིན་ཏུ་ཞི་བའི་བདུད་རྩིས་རབ་དགྱེས་པ། །ལོག་པར་དད་་སེལ་སྲིད་ལ་ཆགས་པ་ན། །ཞིང་བརྒྱ་མངོན་པར་གཡོ་བའི་རྫུ་འཕྲུལ་ཅན། །འགྲོ་མགོན་རིན་པོ་ཆེ་ལ་ཕྱག་འཚལ་ལོ། །སྲིད་ཞི་ཀུན་ཏུ་བཟང་པོའི་ནགས་ཁྲོད་དུ། །རང་བྱུང་རྡོ་རྗེ་རྒྱལ་པོས་བྱིན་བརླབས་པས། །འཁྲུལ་མཚན་གདོད་ནས་གྲོལ་བའི་སྐྱེ་དགུ་ཀུན། །མཁའ་འགྲོའི་དྲྭ་བར་སྡོམ་ལ་ཕྱག་འཚལ་ལོ། །ཡང་དག་མཐའ་ལ་གདོད་ནས་རྣམ་པར་གནས། །རིགས་ཅན་གསུམ་ལ་བྱང་ཆུབ་རྩ་བ་བཙུགས། །སངས་རྒྱས་མཛད་པའི་གར་གྱིས་རྣམ་རོལ་བ། །མཐའ་ཡས་གདུལ་བྱ་འདུལ་ལ་ཕྱག་འཚལ་ལོ། །རྡོ་རྗེ་ཕག་མོ་དཔའ་བོའི་དབང་ཕྱུག་བཅས། ཁ་སྦྱོར་སྡུག་བསྔལ་

― LT28_Page_0233 ―

^{[མ་དཔེ་གཟིགས་ན་འདིར་གནོན།]}

[Full Size]

ནུབ་པའི་གྲུ་བོ་ཆེ། །སྲིད་པ་བདེ་བར་འདྲེན་ལ་སྙིང་གི་སྟོབས། །དགའ་བཞིའི་མཐར་ཐུག་འབར་ལ་ཕྱག་འཚལ་ལོ། །དྲི་མེད་བསམ་གཏན་བདུད་རྩིའི་ཕྱག་རྒྱ་ནི། །ཅིས་ཀྱང་མི་ཕྱེད་གསང་བའི་སྙིང་པོར་བཅིངས། །ཤེས་རབ་རྟག་པའི་གཟི་བརྗིད་བཟོད་དཀའ་བས། །ལྷན་སྐྱེས་མུན་པ་འཕྲོག་ལ་ཕྱག་འཚལ་ལོ། །འདྲེན་པར་གྲགས་དང་མ་འདྲེས་ཆོས་ལྡན་ཞིང་། །སྣང་སེམས་དབང་དུ་སྒྱུར་བའི་སྟོབས་རྣམས་མངའ། །འཇིག་རྟེན་ཁམས་ན་འཇིགས་པ་མི་མངའ་བ། །སངས་རྒྱས་ཆོས་ཀུན་རྫོགས་ལ་ཕྱག་འཚལ་ལོ། །བརྟུལ་ཞུགས་རབ་ཏུ་བརྟན་པའི་རྡོ་རྗེ་ནི། །བདུད་ཀྱི་དཔུང་ལ་ལྷ་མིན་གོ་འཕང་སྦྱིན། །དྲེགས་པ་ཟིལ་གནོན་སྟན་གཅིག་རྡོ་རྗེའི་གདན། །སྐྱིལ་ཀྲུང་གཅིག་གིས་མནན་ལ་ཕྱག་འཚལ་ལོ། །རྡོ་རྗེ་ལྟ་བུའི་ཏིང་འཛིན་ཤིན་ཏུ་བརྟན། །དཔའ་བར་འགྲོ་བས་གཞན་སྣང་དབང་དུ་མཛད། །སྒྱུ་མ་ལྟ་བུས་ཆོ་འཕྲུལ་མཐའ་ཡས་བཀྱེ། །རྣམ་ཐར་རྒྱལ་བས་བསྔགས་ལ་ཕྱག་འཚལ་ལོ། །སྐད་རིགས་མི་གཅིག་འཛམ་གླིང་ཁྱོན་ཡངས་ཀུན། །ཐར་པར་འགུགས་པ་གྲུབ་པའི་ཕོ་ཉ་བཀྱེ། །འཁོར་བ་དོང་ནས་སྤྲུགས་ལ་དབང་ཐོབ་པས། །བདེ་གཤེགས་མཚན་གྱིས་བརྗིད་ལ་ཕྱག་འཚལ་ལོ། །འོད་ཟེར་རབ་འཕྲོ་ནོར་བུའི་ཏོག་ལྡན་པ། །ཐུར་མ་བརྒྱ་པའི་གྲིབ་མར་ངལ་འཚོ་བའི། །སྐྱེས་མཆོག་མི་ཡི་སེང་གེ་ལྔ་བརྒྱའི་དབུས། །བླ་མེད་ཆོས་འཁོར་བསྐོར་ལ་ཕྱག་འཚལ་ལོ།

― LT28_Page_0234 ―

^{[མ་དཔེ་གཟིགས་ན་འདིར་གནོན།]}

[Full Size]

ཁམས་དབང་མོས་པ་མངོན་པར་མཁྱེན་པ་ཡིས། །གདུལ་བྱ་རྣམས་ལ་སོ་སོའི་སྒོ་བསྟན་ནས། །བགྲོད་གཅིག་འབྲས་བུ་བདེ་བླག་ཐོབ་པར་མཛད། །ཐབས་མཁས་ཐུགས་རྗེ་ཅན་ལ་ཕྱག་འཚལ་ལོ། །ཁྱོད་མཚུངས་སྐྱེས་བུ་ཨུ་དུམྦ་ར་ལྟར། །སྙིགས་མའི་དུས་སུ་ཤིན་ཏུ་དཀོན་པས་ན། །མཚུངས་མེད་བདེ་གཤེགས་འགྲོ་མགོན་རིན་པོ་ཆེ། །ས་གསུམ་ཀུན་ཏུ་གྲགས་ལ་ཕྱག་འཚལ་ལོ། །ཁྱོད་ནི་ཚད་མར་གྲུབ་པས་རྣམ་ཐར་བདེན། །བདེན་པའི་བྱིན་རླབས་བསམ་གྱིས་མི་ཁྱབ་པས། །བདག་ཀྱང་མྱུར་བར་ཁྱོད་ཀྱི་གོ་འཕང་མཆོག །ལྷུན་གྲུབ་མཁའ་མཉམ་འགྲོ་བ་འདྲེན་པར་ཤོག །ཅེས་པའང་བཀའ་བརྒྱུད་རིན་པོ་ཆེའི་རྗེས་འཇུག་གི་རྟགས་ཙམ་འཛིན་པ་ཀུན་ལས་ཀྱང་ཐ་ཤལ་གྱི་གོ་འཕང་བ། ཀརྨ་ངག་དབང་ཡོན་ཏན་རྒྱ་མཚོས་དཔལ་ཕག་མོ་གྲུ་ཀུན་ཏུ་བཟང་པོའི་ནགས་ཁྲོད་དུ་ཤུར་མར་བྲིས་པ་དགེ་ལེགས་འཕེལ།། ༈ །།དཔལ་ས་སྐྱ་པ་ཆེན་པོ་ཀུན་དགའ་སྙིང་པོ་ལ་བསྔགས་པ་ངོ་མཚར་མེ་ཏོག་ཅེས་བྱ་བ། །རྡོ་རྗེའི་རྣལ་འབྱོར་ཆེ་བརྙེས་པས། །བདེ་སྟོང་འཕོ་འགྱུར་མེད་པའི་སྲོག །གྲུབ་པའི་དབང་ཕྱུག་ས་སྐྱ་པ། །ཀུན་དགའ་སྙིང་པོར་དད་པས་བསྔགས། །དཔལ་ལྡན་ཟབ་གསང་རིག་སྔགས་འཆང་། །འཁོན་སྟེན་རྡོ་རྗེ་འཛིན་དབང་པོའི། །གྲུབ་རིགས་ཐིག་ལེར་ཆས་གྱུར་པའི། །བདག་ཉིད་ཆེ་དེར་ཡིད་རབ་དང་། །སྔོན་རབས་བགྲང་མཐའ་ཡས་པ་ནས། །ཚོགས་གསུམ་སྙིང་པོར་ཆས་པ་གང་། །བརྟུལ་ཞུགས་བླ་ན་མེད་གྲུབ་པའི། །

― LT28_Page_0235 ―

^{[མ་དཔེ་གཟིགས་ན་འདིར་གནོན།]}

[Full Size]

སྒོ་འཕར་ཐོག་མར་ཕྱེས་ལགས་གྲང་། །ལྗོངས་འདིར་བདེན་གསུང་རྡོ་རྗེའི་ལུང་། །ཡིད་ཅན་ཀུན་གྱི་སྤྱོད་ཡུལ་དུ། །བསྙོན་འདོར་མེད་པར་བྱིན་དེ་ཡིས། །སྟོན་པའི་རྒྱལ་ཐབས་འཛིན་པར་ཟད། །སྡེ་སྣོད་པདྨ་རྒྱས་པའི་མཚོར། །རྟག་གུས་དང་པའི་སྦྱོར་བ་ཡིས། །དགོངས་དོན་རླབས་ཀྱིས་གཅོད་ནས་སུ། །ཐེག་ཆེན་པད་རྩའི་རོ་མཆོག་མྱོང་། །ཟབ་གསང་སྙིང་པོར་དྲིལ་བའི་གླུ། །མི་ཤིགས་ནཱ་དའི་སྒྲས་བཟུང་བ། །སྔགས་རྒྱུད་རྒྱ་མཚོ་བཏུང་དེ་ཕྱིར། །གསང་བའི་བདག་པོའི་ནུས་མཐུར་གྲུབ། །ཁྱད་པར་དགོངས་དོན་མཐར་ཐུག་པ། །ཕྱིར་མི་ལྡོག་པ་སྙིང་པོའི་གཏམ། །ཤིང་རྟ་གཉིས་ཀྱི་ལམ་སྲོལ་ཡང་། །ཟུང་འཇུག་མཁྱེན་པའི་རྣམ་དཔྱོད་ངོམས། །ཡོངས་འཛིན་ཡེ་ཤེས་ཕུང་པོ་ལས། །སྙན་བརྒྱུད་ཚད་མ་བཞི་ལྡན་པ། །གདམས་ངག་ལམ་དང་འབྲས་བུ་བཅས། །སྲིད་མཐར་འགྲོ་དོན་རྫོགས་མ་གྱུར། །སྲོག་རྩོལ་ཟོས་པའི་ཕྲ་མོའི་ལུས། །དག་པའི་ཐིག་རླུང་རྒྱས་གྱུར་པས། །གཏིང་མཐའ་མེད་པའི་བདེ་བའི་རོས། །དབུ་མའི་ས་ལ་རབ་ཏུ་མྱོས། །འཁོར་ལོའི་བགྲོད་པ་དག་ནས་ཀྱང་། །ནང་གི་ལམ་ནས་དབྱེར་མེད་པའི། །ཁྱབ་བདག་མ་ནིང་གོ་འཕང་ལས། །རྡོ་རྗེ་འཛིན་པའི་མཚན་སྙན་ལེན། །དབང་ཕྱུག་ཆེན་པོའི་རྒྱལ་ཐབས་པ། །གོས་དཀར་ལྕང་ལོའི་ཕྲེང་བ་འཛིན། །ཐོད་རྒལ་སྤྱོད་པས་ས་འཕར་བ། །འབྲེལ་ཚད་གཏན་བདེར་འཁྲིད་དེར་བསྔགས། །

― LT28_Page_0236 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱོད་ནི་རྡོ་རྗེ་འཆང་དབང་པོ། །ཧེ་རུ་ཀ་དཔལ་ཆེ་བའི་མཆོག །ཡོན་ཏན་བརྗོད་ཀྱིས་ག་ལ་ལོངས། །མདོར་བསྡུས་ཚིགས་སུ་བཅད་པའི་དགེས། །འགྲོ་ཀུན་ཚེ་འདིར་ཧེ་རུ་ཀ །ཁ་སྦྱོར་ཡན་ལག་བདུན་ལྡན་པའི། །གོ་འཕང་མཆོག་ལ་དབང་བསྒྱུར་ཏེ། །འཁོར་བ་དོང་ནས་སྤྲུགས་པར་ཤོག །ཅེས་པའང་སྒོ་སྟོད་ནས་དཔལ་ལྡན་ས་སྐྱ་པའི་བསྟན་འཛིན་མཆོག་གི་གསུང་བསྐུལ་ངོར་ཡོན་ཏན་རྒྱ་མཚོས་ཁྲི་འབུའི་སྒར་ཆེན་ཏུ་བྲིས་པ་དགེ་ལེགས་འཕེལ།། ༈ །།གངས་ཅན་གྱི་གསང་ཆེན་བསྟན་པའི་བདག་པོ་ཁུ་དབོན་བརྒྱུད་པར་བཅས་པ་ལ་བསྔགས་པ་བརྗོད་པ་གཟི་བརྗིད་མཐའ་ཡས་ཞེས་བྱ་བ། །རྒྱུད་སྡེ་གངྒཱའི་ཀླུང་གིས་མ་ཁེངས་པར། །བི་རཱུའི་ཞལ་གྱི་བདུད་རྩི་ལྟོར་བསྐྱིལ་བ། །བརྩེ་ཆེན་པདྨ་དཀར་འཛིན་དྲང་སྲོང་དེས། །དག་བྱེད་རྒྱུན་གྱིས་གངས་ཅན་ཉེས་པ་བཀྲུས། །ཚངས་པའི་ཡི་གེས་འཕགས་ཡུལ་ཆོས་ཀྱི་གླར། །བསྔགས་པའི་གླིང་བུས་མཁའ་སྤྱོད་རི་དྭགས་མིག །བསླུས་སམ་མཁའ་སྤྱོད་བདེ་ཆེན་ཚོགས་ཀྱི་རྗེར། །ཆོས་ཁྲིའི་སྟེང་ནས་བསོད་ནམས་རྩེ་མོ་བསུས། །རྡོ་རྗེ་དྲིལ་བུ་ནམ་མཁར་འཇོག་པ་དང་། །ལྷན་ཅིག་གདུག་པའི་འབྱུང་པོ་བསྐྲད་པའི་ཟིལ། །མ་བཟོད་གངས་ཅན་རྡོ་རྗེ་འཛིན་ཀུན་གྱི། །གཙུག་གིས་རབ་བཏུད་གྲགས་པའི་རྒྱལ་མཚན་མཐོ། །ཀུན་མཁྱེན་གཉིས་པ་ལྗོངས་འདིར་བྱོན་པ་ན། །བསྟན་ལ་དགའ་བའི་ལྷ་ཡིས་ག་ཞ་འབྱིན། །ཕྱོགས་ལས་རྣམ་རྒྱལ་ས་

― LT28_Page_0237 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱ་པ་ཆེན་ཞེས། །ཡ་མཚན་སྙན་གྲགས་ནམ་མཁའི་མུ་ཁྱུད་བརྒལ། །བློ་ལས་འདས་པའི་ཆོ་འཕྲུལ་མཐའ་ཡས་པས། །ཛམ་གླིང་སྐྱེ་དགུ་འདུལ་ལ་ཐུབ་ཆེན་བཞིན། ཁམས་གསུམ་ཆོས་ཀྱི་རྒྱལ་པོ་འཕགས་པའི་མཚན། །འཇིག་རྟེན་དག་ན་ཉི་མ་བཞིན་ཏུ་གསལ། །ཐེ་ཚོམ་དྲྭ་བ་འཕགས་པ་ཀླུས་བཅད་པས། །སྤྲོས་པའི་མཐའ་བྲལ་ཨ་བདྷཱུ་ཏི་པ། །དཔལ་ལྡན་བླ་མའི་ཡོན་ཏན་རྡོ་རྗེའི་ཚིག །ཇི་སྙེད་བརྗོད་ཀུན་ཁྱོད་ལུང་བསྟན་པར་ངེས། །ས་གཞིའི་དབང་ཕྱུག་ནོར་བུའི་ཅོད་པན་གྱིས། །ཞབས་སེན་ཟླ་བའི་མེ་ལོང་ཕྱིས་པ་ལས། །འཇམ་དབྱངས་རྩེ་ལྔའི་རི་ལས་གདན་བསྐྱོད་པ། །ཐེག་ཆེན་ཆོས་རྗེའི་རྣམ་པར་ཐར་པས་རྟོགས། །མཁྱེན་པའི་རླབས་ཀྱིས་ཤེས་བྱ་ནམ་མཁའི་མཐའ། །ནུས་པའི་ཤུགས་ཀྱིས་བདུད་སྡེའི་བྲང་འགྲོ་ལ། །འཇིགས་མེད་མཐུ་ཆེན་གྲུབ་པའི་མཁའ་ལྡིང་དབང་། །ཀུན་དགའ་རྣམ་རྒྱལ་འགྲན་ཟླའི་གཉིས་སྐྱེས་དབེན། །རྣམ་ཐར་པདྨ་གཞོན་ནུ་བཞིན་ཏུ་གཙང་། །གྲགས་པ་དབྱར་གྱི་རྔ་ཆེན་བཞིན་ཏུ་གསལ། །ཕྲིན་ལས་དལ་འགྲོའི་རྒྱུན་བཞིན་རྟག་འབབས་པས། །བསྟན་ལ་བྱ་བ་བྱས་སོ་ངོར་ཆེན་རྗེ། །སྙན་བརྒྱུད་རིན་ཆེན་གྲམ་བུར་བརྡལ་བའི་ངོགས། །བློ་གསལ་ངང་མོ་འདུ་བའི་རྒྱ་མཚོ་ལས། །ཉི་ཟླའི་དཀྱིལ་འཁོར་གསར་པ་བརྡལ་དེས་ཀྱང་། །ཡུན་རིང་འཇིག་རྟེན་མུན་པ་བསྙིལ་ལ་བརྩོན། །

― LT28_Page_0238 ―

^{[མ་དཔེ་གཟིགས་ན་འདིར་གནོན།]}

[Full Size]

གསེར་གྱི་སྐུད་པར་མུ་ཏིག་ཕྲེང་བ་བཞིན། །པདྨས་ལུང་བསྟན་གདུང་རབ་རིམ་བྱོན་དང་། །ཐུབ་པའི་རྒྱལ་མཚན་ལྟུང་བའི་བུག་པས་དབེན། །ཐུབ་བསྟན་སྲོག་འཛིན་མཁན་རབས་རིམ་བྱོན་དང་། །ཟབ་དགུའི་བཅུད་སྡུད་རྒྱལ་པོའི་བང་མཛོད་བཞིན། །གསང་ཆེན་སྙན་བརྒྱུད་བསྟན་འཛིན་ཟོལ་མེད་པ། །དེ་ཀུན་ཁ་བའི་ལྗོངས་ཀྱི་འདྲེན་མཆོག་ཏུ། །ངེས་པའི་ཤེས་པས་འདུད་ཅིང་ཕྱག་བགྱིའོ། །སེམས་ཅན་གཅིག་ཙམ་དགྲོལ་བའི་ཕྲིན་ལས་ཀྱང་། །དུས་གསུམ་གཤེགས་པས་རྟག་ཏུ་དགོངས་མཛད་ཅིང་། །གསང་བའི་སྒྲ་ཅོམ་གང་ན་ཡོད་པ་དེ། །དམ་ཅན་གཙུག་གི་ནོར་བུའི་རྒྱན་འགྱུར་ན། །མཐའ་ཡས་འགྲོ་ལ་ཐར་ལམ་དྲང་པོ་སྟོན། །གསང་ཆེན་སྙིང་པོའི་སྲོག་རྩ་བཟུང་བ་དེ། །དཔྱད་དུ་ཅི་ཡོད་བཙོ་མའི་གསེར་བཟང་ལྟར། །ཐུབ་བསྟན་འབྱོར་པ་རྒྱས་པའི་དབྱིག་བྱེད་དོ། །རྒྱལ་བས་གསུངས་ཤིང་འཕགས་ཡུལ་འགྲེལ་པས་བཀྲལ། །མཁས་པས་བཤད་ཅིང་གྲུབ་པས་ཉམས་སུ་བླངས། །དེ་འདྲའི་གཞུང་ལ་ཐོས་བསམ་སྒོམ་བརྩོན་པ། །བརྩེ་ཆེན་སློབ་མར་བཅས་པའི་གྲུབ་པའི་མཐའ། །རྒྱ་མཚོ་ལས་བྱུང་དེད་དཔོན་མཁས་པས་བླངས། །བྱི་དོར་ལེགས་བྱས་དགོས་འདོད་ཀུན་འཇོ་བ། །མཆོད་ཅིང་དབྱིག་གི་སྙིང་པོར་བསྟེན་ནུས་པ། །འཇིག་རྟེན་འདི་ན་བསོད་ལྡན་རེས་འགའ་ཞིག །གཏན་ཚིགས་འདི་ཡིས་རྒྱལ་བསྟན་ཡོངས་ལ་མོས། །ཁྱད་པར་ས་སྐྱའི་རྗེ་བཙུན་ཞབས་ལ་དད། །དེ་ལ་ཟོལ་ཟོག་མེད་པའི་

― LT28_Page_0239 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་རྩ་ཡིས། །རྣམ་དག་རྒྱལ་བསྟན་ཡོངས་རྫོགས་འཛིན་ནུས་ཤོག །ཕྱོགས་རིས་ཀྱི་ཕོ་ཙུགས་ཞིག་ཅིང་ཆོས་སྤོང་གི་སྙིང་ཁམས་ཆུང་བའི་སྤྲང་བན་བླུན་སྒོམ་ཡོན་ཏན་རྒྱ་མཚོས་དབེན་པར་གནས་པའི་ཚེ། །རྗེ་བཙུན་དེ་དག་གི་ཡོན་ཏན་ཏུར་གྱིས་དྲན་ཏེ་རྗེ་བཙུན་གོང་མས་བྱིན་གྱིས་བརླབས་པའི་དུས་ཆེན་སྨལ་བོ་ཟླ་བའི་ཚེས་ལ་དད་གུས་ཀྱི་སོར་མོས་བསྐུལ་བའི་གླིང་དུ་ཅུང་ཟད་ཅིག་བསྒྱུར་བའོ།། ༈ །།ཆོས་རྗེ་ས་སྐྱ་པ་ཆེན་ལ་བསྔགས་པའི་ཚིག་ཕྲེང་མཚོ་བྱུང་མགྲིན་གླུ་ཞེས་བྱ་བ། །རྣམ་དག་མཁའ་ལྟར་ཁྱབ་པའི་ཡེ་ཤེས་ཀྱིས། །ཤེས་བྱ་རབ་གསལ་སྨྲ་བའི་སེང་གེ་མཆོག །གངས་རིའི་ཁྲོད་ཀྱི་ཐུབ་བསྟན་མཛེས་པའི་རྒྱན། །ཀུན་དགའ་རྒྱལ་མཚན་ཞབས་ལ་ཕྱག་འཚལ་ལོ། །མཚན་དཔེ་རྗེས་མཐུན་གསལ་བའི་ཟླ་གཞོན་ནི། །ལེགས་བྱས་ཤར་རིའི་ཕྲག་གོང་ཚེས་མ་ཐག །ལེགས་པར་སྦྱར་བའི་བརྡ་སྐད་བདུད་རྩིའི་ཟེར། །བློ་ལྡན་ཀུ་མུད་བཞད་པའི་གཉེན་ཏུ་ཟག །སྐྱེ་བ་དུ་མར་གསན་ཀྱང་མ་ངོམས་པ། །སྐྱེས་བུ་མཆོག་དེ་ཐོས་ལ་ཞུགས་པ་ན། །མང་དུ་གསན་མིན་གསན་པ་ཉུང་བའང་མིན། །ལན་རེ་གསན་པས་ཆོས་ཀུན་ཁོང་དུ་ཆུད། ཁ་ཆེ་བསོད་སྙོམས་པ་སོགས་མཁས་གྲུབ་ཀྱི། །གསང་མཛོད་དུ་མ་དངོས་སུ་བརྟོལ་བཞིན་ཏུ། །འཇམ་པའི་རྡོ་རྗེ་དབྱིག་གི་གཉེན་སོགས་ཀྱིས། །ཆོས་སྒོ་དུ་མའི་ལྡེ་མིག་ལྐོག་ཏུ་བསྩལ། །ལྷ་ཡི་བཟོ་བོའི་རིགས་སུ་བསྐྲུན་པ་མིན། །བྱེད་པོའི་རྗེས་སུ་སློབ་མིན་དེ་ཡི་ལུགས། །

― LT28_Page_0240 ―

^{[མ་དཔེ་གཟིགས་ན་འདིར་གནོན།]}

[Full Size]

གཏན་ལ་ཕབ་ཚེ་ལས་སྣ་ཚོགས་པ་བཞིན། །ཐོས་མ་མྱོང་བའི་ལེགས་བཤད་མཚོ་ལྟར་བརྡོལ། །གཞན་ཕན་རྨི་ལམ་དུ་ཡང་མ་བརྗེད་ན། །དངོས་སུ་ཕན་པའི་དབང་གྱུར་སྨོས་ཅི་དགོས། །ལུས་སྲོག་འཚོ་བའི་བདུད་རྩིའི་བུམ་པ་བཟང་། །འདི་འདྲ་བདེ་སོགས་བདག་པོའི་གྲོང་ན་མེད། །དོན་དང་ཚིག་གི་འགྱུར་ཁྱད་པ་རླིང་ལ་གསལ། །བརྡ་དང་སྐད་ཀྱི་བརྗོད་ཚུལ་གཙང་ལ་དག །དབྱངས་ཀྱི་ཡན་ལག་རྒྱ་མཚོས་བརྡ་སྤྲོད་ན། །སྐད་གཉིས་ཐོགས་མེད་སྨྲ་ལ་མཚར་དུ་ཅི། །རིག་པའི་དབང་ཕྱུག་གཞུང་ལུགས་ཉལ་བ་ལས། །བསླངས་ཏེ་སྔོན་མེད་རིག་པའི་ཐོག་འཕེན་ཚེ། །རང་གཞན་རྟོག་གེའི་རིག་པའི་རྫོང་བཅོམ་པ། །འཕགས་ཡུལ་དུ་ཡང་དབྱར་གྱི་རྔ་བཞིན་གྲགས། །ཆོས་ཀྱི་མདོ་དང་རྒྱས་པ་ནང་གི་དོན། །ཐུབ་གསུང་དབང་དུ་བཀོད་ཆོ་ཁྱོད་ཀྱི་ལུགས། །ཐུབ་གསུང་ཇི་བཞིན་ཚད་མར་གྱུར་པས་ན། །མཁས་པ་ཀུན་གྱི་ལུང་གི་ཁུངས་སུ་འགྲོ། །སྙན་ཚིག་མགྲིན་བླུ་མངོན་བརྗོད་འགྱུར་ཁུག་དང་། །སྡེབ་ལེགས་མེ་ཏོག་ཆུན་པོའི་རྣ་ཤལ་ཅན། །གྲངས་ཀྱི་གནས་སོགས་འཇོ་སྒེག་མིག་ཡངས་མས། །མཁས་རྣམས་ཡིད་ཀྱི་བརྟན་པ་དུས་གཅིག་འཕྲོག །འཆད་པའི་དབྱངས་གཅིག་ཆོས་སྒོ་རྒྱ་མཚོར་འཇུག །ཆོས་ཀུན་ཚིག་གཅིག་ཁོངས་སུ་བསྡུ་བར་སྤོབས། །ཟུར་ཕུད་ལྔ་དང་རལ་གྲིའི་རྟགས་སྦས་ཀྱང་། །གཞོན་ནུའི་ལང་ཚོགས་ལ་བར་ངོམས་པ་བཞིན། །རྩོད་པའི་ཁྱུ་མཆོག་ས་སྲུང་མྱོས་པའི་

― LT28_Page_0241 ―

^{[མ་དཔེ་གཟིགས་ན་འདིར་གནོན།]}

[Full Size]

མགོར། །ལུང་རིག་སྡེར་སེན་འདེབས་པའི་ཁ་ལྔ་པ། །ལོག་སྨྲའི་སྤྲིན་སྒྲ་སྒྲོག་པར་མི་བཟོད་པས། །སྒྲ་རློམས་རི་དྭགས་ཀུན་གྱི་སྙིང་རྩ་འདར། །རྩོམ་ཚུལ་དེ་འདྲ་སྔོན་ཆད་མ་ཤེས་པས། །རྩོམ་པ་མཁན་རྣམས་ཁྱོད་རྗེས་ཆུ་བཞིན་རྒྱུག །སྨྲ་སྒོ་ཚིག་གི་བདག་འདིས་མ་ཕྱེས་ན། །གངས་ཅན་སྨྲ་བའི་ཤིང་རྟ་གང་དུ་འདྲེན། །དཔྱད་གསུམ་དག་པས་ཤཱཀྱའི་བསྟན་པ་ལ། །བྱི་དོར་མཛད་ཀྱི་མངོན་པའི་ང་རྒྱལ་མིན། །ཡེ་ཤེས་མེ་ལོང་ངོས་སུ་ཤེས་བྱའི་གཟུགས། །རང་བཞིན་འཆར་གྱི་རྟོག་དཔྱོད་མཁས་པས་མིན། །ཁྱོད་ཀྱི་ལེགས་གསུང་དག་དང་གངྒཱའི་ཀླུང་། །ཐུབ་བསྟན་རྒྱ་མཚོ་སྲིད་པ་འཁོར་ཞིང་འབབ། །རྙོགས་པ་ཅན་དང་ནམ་ཡང་མི་འདྲེ་བས། །གཟུར་གནས་རྣམས་ལ་དག་བྱེད་ཚད་མར་གྱུར། །འཛམ་གླིང་བདག་པོའི་ཐོར་ཚུགས་ནོར་བུ་ལ། །ཞབས་སེན་བཀོད་པ་གྲུབ་པའི་ཆོ་འཕྲུལ་ཏེ། །དེ་ཡི་ཞལ་རས་ལྟ་བའི་སྐབས་རྙེད་པ། །འགའ་ཡང་གྲུབ་པ་བཞིན་ཏུ་སྐྱེ་དགུས་མཆོད། །སྒྱུ་མས་སྤྲུལ་པའི་མིག་འཕྲུལ་རྡོ་རྗེ་ཡི། །ཆོས་སུ་བྱིན་གྱིས་བརླབས་ལ་ཅི་ངོ་མཚར། །དམ་ཆོས་བསྲུངས་པས་ཡིད་སྲུབས་སྡེ་དང་བཅས། །སྨ་ཕབ་བསྟན་པའི་སྲོག་རྩ་བསྲིངས་འདི་རྨད། །གྲུབ་པ་ཧེ་རུ་ཀ་དང་རྣལ་འབྱོར་མས། །ནམ་མཁའི་ལམ་ནས་སྲིད་མཐའི་བྱང་ཆུབ་སེམས། །རྒྱལ་བ་དྲི་མེད་དཔལ་དུ་ལུང་བསྟན་པ། །ཐུན་མིན་མཆོག་གི་གྲུབ་པ་ཁྱོད་

― LT28_Page_0242 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་འཚལ། །དེ་འདྲའི་རྣམ་ཐར་བྱིས་བློས་བསམ་མི་ཁྱབ། །ཡོན་ཏན་ཆ་ཙམ་བརྗོད་པར་ནུས་མིན་ཀྱང་། །ཅུང་ཟད་བརྗོད་འདི་ས་སྐྱ་པཎྜི་ཏ། །མོས་པའི་ཡིད་མཁར་ཤར་བའི་མཐུ་ལས་སོ། །ཁྱོད་ནི་རྒྱལ་བའི་དགོངས་པ་ཕྱོགས་མེད་རྟོགས། །དམ་ཆོས་མཐའ་དག་འགལ་མེད་འཆད་པར་ནུས། །འོན་ཀྱང་དགོངས་ཏེ་གསུངས་པའི་ཟུར་ཕྲ་མོ། །མ་རྟོགས་བློ་ཆུང་རྩོད་པའི་ཅ་ཅོ་འཕེལ། །དགོངས་གཞི་ཇི་བཞིན་རྟོགས་ན་འགལ་འདུ་ཡི། །དབྱེ་ན་ཟླུམ་མཆོད་རྟེན་ཁྱོད་ཀྱི་གསུང་རབ་བཟང་། །ལེགས་པར་རྟོགས་ནས་དོན་བཞིན་འགྲེལ་པའི་ཚུལ། །རྒྱན་དྲུག་གཞུང་དང་འདྲ་བས་རིགས་པ་ཉིད། །རྒྱལ་ཚབ་མཆོག་དང་འཕགས་ཞབས་ས་ཐོབ་ཕྱིར། །ཆོས་ཉིད་མངོན་སུམ་གྱུར་པས་འགལ་མི་སྲིད། །དོན་དེ་ཁྱེད་ཀྱིས་མཁྱེན་ནས་བསྟན་མོད་ཀྱང་། །རྗེས་འཇུག་ཕལ་ཆེར་ལྟ་བའི་མུན་པས་འཐུམས། །ལོག་པར་རྟོག་དང་དོན་བཞིན་མ་རྟོགས་པའི། །བརྒྱུད་འཛིན་བླུན་པོའི་གོ་འཕང་ཐོབ་མོད་ཀྱི། །ཇི་བཞིན་རྟོགས་ནས་ལེགས་པར་གསུངས་པ་ཡི། །གྲུབ་མཐའ་རང་བློས་བསླད་པ་ལས་ཀྱི་སྐྱོན། །རྟོག་གེ་བ་དག་རྣམ་པར་འཁྱམས་མོད་ཀྱང་། །མཁྱེན་པའི་གཏེར་གྱིས་ཐུབ་ཚུལ་དཀྲུགས་མི་སྲིད། །རི་འོར་མ་རབས་གདོལ་བར་སྤྱོད་མོད་ཀྱང་། །འཁོར་ལོས་སྒྱུར་བ་ལུགས་ལས་འདའ་བ་མིན། །དེང་ནས་ནམ་ཡང་ཁྱོད་བསྟན་མི་བསླད་པར། །དགོངས་ཟབ་

― LT28_Page_0243 ―

^{[མ་དཔེ་གཟིགས་ན་འདིར་གནོན།]}

[Full Size]

འཁྲུལ་མེད་རྙེད་ནས་སྟོན་པ་ཡིས། །སྲིད་ན་ཆོས་ཀྱི་ཉིན་བྱེད་གཅིག་པུ་བ། །ཀུན་དགའ་རྒྱལ་མཚན་གོ་འཕང་མྱུར་ཐོབ་ཤོག །གངས་རིའི་བསྐོར་བའི་སྨན་ལྗོངས་སུ། །ཕྱི་དར་ཆོས་ཀྱི་ཉི་མ་འཆར་བ་དེ་སྲིད་དུ། མཁས་པ་ཀུན་གྱི་འབྱུང་ཁུངས་སམ་ཕྱི་མོ་གཅིག་པུ་བ་འཇམ་པའི་དབྱངས་དགེ་བའི་བཤེས་སུ་སྟོན་པ་གང་ལ། དད་པ་ཆེན་པོས་གཅམ་བུ་མིན་པའི་བསྟོད་དབྱངས་མཚོ་བྱུང་མགྲིན་པའི་དབྱངས་བློ་གྲོས་མཐའ་ཡས་ཀྱིས། །གང་དེས་བྱིན་གྱིས་བརླབས་པའི་དུས་ཆེན་དགེ་བར་བླངས་བ་ཤུ་བྷཾ།། ༈ །།ཆོས་རྗེ་ཀུན་མཁྱེན་དོལ་པོ་ལ་བསྔགས་པ་གཞོམ་མེད་སྒྲ་དབྱངས་ཞེས་བྱ་བ། །མཁྱེན་པ་གཉིས་ལྡན་ལྟ་ངན་མུན་པ་བསལ། །དོན་གཉིས་ལྷུན་གྲུབ་རྫོགས་ལྡན་ཆོས་འཁོར་བསྐོར། །ཕྱོགས་དུས་རྒྱལ་བ་སྲས་བཅས་ཕྲིན་ལས་བསྒྲུབས། །ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །འཛམ་གླིང་མཛེས་པའི་རྒྱན་དྲུག་རྣམ་དཔྱོད་དང་། །རྣལ་འབྱོར་བརྒྱད་ཅུའི་གྲུབ་པའི་ཡོན་ཏན་རྣམས། །གཅིག་ཏུ་བསྡུས་པ་ཀུན་མཁྱེན་ཆེན་པོ་ཞེས། །ཐུབ་མཚན་འཆང་བའི་དགེ་སློང་དེ་ལ་འདུད། །ཆོས་ཀྱི་རྒྱལ་པོར་དབང་བསྐུར་རྒྱལ་བའི་ལུང་། །ཐོད་དུ་བཅིངས་ནས་ཁ་བ་ཅན་ལྗོངས་ཀྱི། །རི་བྲག་ཁྲོད་དུ་འཁོར་ལོས་སྒྱུར་བ་བཞིན། །མི་སྲིད་པ་ཡི་ཡ་མཚན་ཆེན་པོ་བྱོན། །འཕོ་མེད་ཚུལ་ཁྲིམས་བདེ་བས་ལུས་གང་ཞིང་། །ཟག་མེད་ཏིང་འཛིན་སྒོ་བརྒྱའི་ལང་ཚོས་སྒེག །དྲི་མེད་ཤེས་རབ་ཟབ་མོའི་ཤ་ཚུགས་རྒྱས། །ཐུབ་དབང་གཉིས་པ་

― LT28_Page_0244 ―

^{[མ་དཔེ་གཟིགས་ན་འདིར་གནོན།]}

[Full Size]

།ཐུབ་པའི་རྒྱལ་མཚན་འཛིན། །ཇི་ལྟ་ཇི་སྙེད་ཇི་བཞིན་གཟིགས་པ་ཡིས། །ཀུན་མཁྱེན་གྲགས་ལྡན་ཀུན་གྱི་བླ་མ་རུ། །རྒྱལ་ཚབས་གཅིག་པུར་རྒྱལ་བས་མངའ་གསོལ་ཕྱིར། །འཇིགས་མེད་གྲགས་པ་འཇིག་རྟེན་གསུམ་ན་འབར། །ཆོས་དང་དོན་དང་ཡེ་ཤེས་ངེས་དོན་ལ། །དབང་ཐོབ་སྐྱེས་བུ་ཆོས་ཀྱི་ཉིན་བྱེད་ནི། །གང་ཟག་ཚིག་སོགས་སྲིན་བུའི་སྒྲོན་མེ་ལ། །མི་རྟོན་རྟོན་པ་བཞི་ལྡན་མཚན་གྱིས་ལྕི། །འཁོར་ལོ་གསུམ་པོ་དགོངས་དོན་གཅིག་ཏུ་བསྒྲུབས། །དྲང་ངེས་གཉིས་ཀྱི་གཤག་རལ་ཆེན་མོ་ཕྱེས། །གངས་ཅན་ལྗོངས་སུ་བཀའ་བསྡུ་བཞི་བ་མཛད། །བདེ་གཤེགས་ལུང་ཆེན་ཚད་མར་ཞལ་བཞེས་སོ། །ཐེག་མཆོག་ཕྱིར་མི་ལྡོག་པའི་ཆོས་འཁོར་བསྐོར། །མདོ་སྔགས་མཚམས་སྦྱོར་དབུ་མའི་ལམ་སྲོལ་དབྱེ། །རྒྱུད་དོན་མཐར་ཐུག་གསང་བའི་མཛོད་ཁང་དུ། །སྐལ་བཟང་རྣམས་ཀྱང་རང་དགར་སྤྱོད་པར་མཛད། །གྲུབ་པ་ཡོངས་ཀྱིས་ཐུགས་མཚོར་རྒྱས་བཏབ་ཅིང་། །མཁས་པ་ཕལ་གྱིས་རང་དབང་མ་བརྙེས་པ། །རྒྱལ་བའི་དགོངས་ཟབ་དྲི་མེད་བཻ་ཌཱུརྱ། །ཁྱོད་དང་མ་ཕམ་པ་ལས་སུ་ཞིག་སྤྱོད། །བ་སྤུའི་མཐར་ཐུག་གཞོམ་མེད་བདེ་བ་སྤྲོ། །ཀུན་རྟོག་སྲོག་རྩོལ་རྒྱུ་བ་མཐའ་དག་འགག །ཡེ་ཤེས་རིག་མའི་བདག་པོ་རྡོ་རྗེའི་ལུས། །པད་དཀར་འཆང་དང་ཐ་དད་འབྱེད་ཆོས་གང་། །ཕྱོགས་ཞེན་ཁེངས་པས་བསླད་པ་མ་གཏོགས་པ། །སེམས་ལྡན་སུ་ཞིག་ཁྱོད་ལ་གུས་མི་

― LT28_Page_0245 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད། །ཁྱོད་ནི་བླ་མ་ཁྱོད་ནི་སྟོན་པ་ཉིད། །ཁྱོད་དང་འདྲ་བའི་བཤེས་གཉེན་ཡོངས་མེད་དོ། །ཁྱོད་ཀྱི་རྣམ་ཐར་བསམ་མི་ཁྱབ་པ་ལ། །བདག་གཞན་འགྲོ་བས་བདེ་བླག་འཇུག་ནུས་ཏེ། །སྲས་དང་བཅས་པའི་རྒྱལ་བ་རྒྱ་མཚོ་ཡི། །དགོངས་པ་མཐའ་དག་མྱུར་དུ་སྐོང་གྱུར་ཅིག །འགྲོ་འདིས་ཆོས་ཉིད་མཐོང་བའི་སྐལ་མེད་ཀྱང་། །རྒྱལ་བའི་ཡེ་ཤེས་ཡོད་པར་ཡིད་ཆེས་ནས། །ཕྱུགས་དང་འདྲ་བའི་བློ་གྲོས་ངན་པ་ཡིས། །མཐོ་རིས་རྟེན་བཟང་ཆུད་གསན་མ་གྱུར་ཅིག །ཆགས་ཐོགས་མེད་པའི་ཡེ་ཤེས་རྡོ་རྗེ་ཡིས། །འཇིགས་ཚོགས་ལྟ་བའི་རི་བོ་ཀུན་བཅོམ་སྟེ། །དོན་དམ་མཁའ་ཁྱབ་ཡེ་ཤེས་རྒྱལ་ཁམས་སུ། །ཕྱིར་མི་ལྡོག་པའི་སྒྲ་དབྱངས་སྒྲོག་པར་ཤོག །ཅེས་པའང་སྨིན་དྲུག་ཟླ་བའི་དཀར་ཕྱོགས་ཀྱི་དགའ་བ་གཉིས་པར་ཀུན་མཁྱེན་རྒྱལ་བ་གཉིས་པ་འོད་གསལ་མཁའ་ཁྱབ་ལ་སྙོམས་པར་ཞུགས་པའི་དུས་དྲན་གྱི་མཆོད་པར་དཔལ་དུས་ཀྱི་འཁོར་ལོའི་རྣལ་འབྱོར་ལ་གནས་པ་དང་རྗེས་སུ་འབྲེལ་བར་བློ་གྲོས་མཐའ་ཡས་ཀྱིས་བྲིས་པ་སྐྱེ་བ་ཐམས་ཅད་དུ་ཆོས་རྗེ་ཐམས་ཅད་མཁྱེན་པས་རྗེས་སུ་བཟུང་ནས་རྡོ་རྗེ་བཞི་དང་དབྱེར་མེད་དུ་འགྲུབ་པར་གྱུར་ཅིག། ༈ །།ཀུན་མཁྱེན་བུ་སྟོན་ཆོས་རྗེ་ལ་བསྔགས་པ་རཏྣཀ་མ་ལ་ཞེས་བྱ་བ། །ཡོངས་རྫོགས་བསྟན་པའི་རྒྱལ་མཚན་མཛེས་པའི་ཏོག །དྲི་མེད་ལུང་རྟོགས་ཆར་འབེབས་རིན་པོ་ཆེ། །རང་དང་གཞན་གྱི་དོན་ཆེན་ལྷུན་གྱིས་གྲུབ། །བུ་སྟོན་ཆོས་རྗེའི་ཞབས་ལ་གསོལ་བ་འདེབས། །ཚུལ་ཁྲིམས་མཐར་ཕྱིན་པདྨོའི་

― LT28_Page_0246 ―

^{[མ་དཔེ་གཟིགས་ན་འདིར་གནོན།]}

[Full Size]

དྲྭ་བས་བཀབ། །བྱང་ཆུབ་ཕྱོགས་ཆོས་རིན་ཆེན་དུ་མས་གང་། །ཚོགས་གཉིས་ལྷུན་གྲུབ་ཆོས་ཀྱི་རྒྱ་མཚོ་འཁྱིལ། །འདོད་དགུའི་འབྱུང་གནས་བུ་སྟོན་ཞབས་ལ་འདུད། །མང་ཐོས་གདེངས་ཅན་བྱེ་བས་ཕྱག་བྱས་ཤིང་། །ལུང་རིག་རིན་ཆེན་དབང་རྒྱལ་ཟུར་ཕུད་མཛེས། །སྲུབ་མཐའ་ཆུ་བཞི་འབབས་པའི་བདག་པོ་ཆེ། །བུ་སྟོན་ཚད་མའི་སྐྱེས་བུའི་ཞབས་ལ་འདུད། །སྐྱེས་སྦྱངས་ཤ་ཚུགས་འགྲན་ཟླ་མེད་པར་རྒྱས། །རྣམ་དཔྱོད་རིན་ཆེན་དྲྭ་བས་མཛེས་པར་བཀབ། །བཅུ་ཕྲག་རིག་སྨྲའི་ཁྱུ་མཆོག་གཟོད་ནས་གྲུབ། །རྒྱལ་བསྟན་ཁུར་འདེགས་ཆོས་རྗེའི་ཞབས་ལ་འདུད། །ལྷག་བསམ་རིན་ཆེན་བརྒྱས་གང་ཡོན་ཏན་མཚོ། །གཞན་ཕན་རླབས་ཕྲེང་འཛད་པ་མེད་པར་འཆིལ། །ཡོངས་གྲུབ་དགོངས་པའི་མཚམས་ལས་མི་འདའ་བ། །ཕན་བདེའི་གཏེར་མཛོད་བུ་སྟོན་ཞབས་ལ་འདུད། །ཡོངས་འཛིན་དེད་དཔོན་དུ་མས་མ་བརྙེས་པ། །རྣལ་འབྱོར་རྒྱུད་མཆོག་རིན་ཆེན་བཻཌཱུརྱ། །བྱི་དོར་ལེགས་མཛད་གྲུབ་པའི་ལམ་སྲོལ་བཏོད། །ཤིང་རྟ་ཆེན་པོ་བུ་སྟོན་རྗེ་ལ་འདུད། །མདོ་སྔགས་གཞུང་བརྒྱའི་པདྨོའི་ཀླུང་འབྱེད་པ། །འཆད་རྩོད་རྩོམ་པ་རིན་ཆེན་འོད་ཀྱི་ཟེར། །སུས་ཀྱང་མི་འཕྲོག་སྨྲ་བའི་ཉི་མར་གྲུབ། །ངག་གི་དབང་ཕྱུག་བུ་སྟོན་ཆོས་རྗེར་འདུད། །ཆོས་ཀྱི་འཁོར་ལོས་སྒྱུར་བའི་རྒྱལ་ཐབས་ཅན། །འཕགས་ནོར་རིན་ཆེན་བདུན་གྱི་འབྱོར་པས་ཕྱུག །དམ་པའི་སྐྱེས་བུ་སྟོན་པ་

― LT28_Page_0247 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་པར་གྲུབ། །ཐམས་ཅད་མཁྱེན་པ་ཆོས་ཀྱི་རྗེ་ལ་འདུད། །མདོ་རྒྱུད་རིན་ཆེན་རིན་ཐང་བྲལ་བའི་དབྱིག། བཤད་སྒྲུབ་རྒྱལ་མཚན་རྩེ་མོར་རབ་མཆོད་པས། །གྲུབ་གཉིས་དགོས་རྒུ་ཆར་དུ་བསྙིལ་མཛད་པ། །བརྩེ་བ་ཆེན་པོ་བུ་སྟོན་ཞབས་ལ་འདུད། །རིན་ཆེན་ཁྲོད་དུ་དབང་གི་རྒྱལ་པོ་བཞིན། །མཁས་གྲུབ་ཚོགས་སུ་བུ་སྟོན་ཆོས་ཀྱི་རྗེ། །གངས་ཅན་མཛེས་པའི་རྒྱན་ཏུ་གྲགས་པ་གསལ། །འགྲན་ཟླ་ཀུན་བྲལ་ཆོས་ཀྱི་རྒྱལ་པོར་འདུད། །བསྐལ་བཟང་སྒྲོན་མེ་བདུན་པ་རབ་གསལ་ཞབས། །ཤཱཀྱའི་བསྟན་ལ་བཟང་པོ་སྤྱོད་པའི་ཚུལ། །བསམ་གྱིས་མི་ཁྱབ་སྤྱོད་ཡུལ་མཁའ་ལྟར་ཟབ། །ས་བཅུའི་དབང་ཕྱུག་རྒྱལ་བའི་མྱུ་གུར་འདུད། །ཐུན་མོང་མ་ཡིན་རང་གི་ཁྱད་པར་ཆོས། །འཕགས་པའི་མཆོག་དང་མཉམ་པ་ཉིད་གྱུར་པ། །རྣམ་ཐར་གང་དེ་བྱིས་བློས་མི་དཔོགས་ཀྱང་། །དད་པའི་རྒྱུ་འདིས་བསྐལ་པ་གཅིག་གྱུར་ཤོག །ད་དུང་ཁྱོད་འདྲའི་སྐྱེས་བུས་གངས་ཅན་གྱི། །འཛིན་མ་ལེགས་བལྟམས་ཐུབ་བསྟན་སྒྲོན་མེ་སྦར། །སྙིགས་ལྔའི་མུན་པ་བཅིལ་ནས་ཕན་དང་བདེའི། །ཉིན་མོའི་སྣང་བས་སྐྱེ་དགུ་བསྲུང་གྱུར་ཅིག །ཅེས་པའང་ཐམས་ཅད་མཁྱེན་པ་གང་གི་རིང་ལུགས་ལ་དད་པའི་སྐལ་པ་བཟང་པོ་རྙེད་པས་རྒྱུད་སྡེ་འོག་མ་གསུམ་ལ་སྐལ་ཆད་དུ་མ་གྱུར་ཅིང་། རྒྱལ་བསྟན་ཡིན་ནོ་ཅོག་ལ་མོས་ཤིང་གུས་པའི་བརྟུལ་ཞུགས་འཛིན་པ་བློ་གྲོས་མཐའ་ཡས་ཀྱིས་དཔལ་སྤུངས་དབེན་རིར་བྲིས་པ་དགེ། །།

― LT28_Page_0248 ―

^{[མ་དཔེ་གཟིགས་ན་འདིར་གནོན།]}

[Full Size]

བོ་དོང་འཇིགས་བྲལ་ཆེན་པོ་ལ་བསྔགས་པ་དབྱངས་ཅན་རྒྱུད་མངས་ཞེས་བྱ་བ། །དཔལ་དབྱངས་ཅན་དགའ་བ་ལ་ཕྱག་འཚལ་ལོ། །འཕགས་ཡུལ་མཁས་པའི་དབང་ཕྱུག་རལ་པའི་ནགས། །འཇིགས་བྲལ་ལ་ཟླ་བས་མཛེས་བྱས་གྲགས་པའི་འོད། །ཕྱོགས་སུ་འགྲོ་ཡང་སྨོན་ལམ་ཤིང་རྟའི་ཁ །བསིལ་ལྡན་བོ་དོང་སྨན་གྱི་ལྗོངས་སུ་བསྒྱུར། །གཞོན་ནུ་གསུང་རབ་གླེགས་བམ་འབུམ་ཕྲག་བརྒྱ། །གཟིགས་པ་ཁོ་ནས་མགྲིན་པའི་མཛོད་བརྒྱན་ཏེ། །ཉི་མའི་གཉེན་གྱིས་རང་བཞིན་ཐུགས་ཆུབ་པས། །ཐམས་ཅད་མཁྱེན་པའི་ཚུལ་ལ་ཁྱད་པར་ཕྱེད། །རྒྱུད་མངས་གླུ་ཡིས་རྣམ་མཁྱེན་རྩལ་སད་པས། །གཟུངས་དང་སྤོབས་པ་རྣམ་དཔྱོད་སྒོ་བྱེ་སྙེད། །དུས་གཅིག་བྱེ་བའི་བུ་དེ་ཡུན་རིང་མ། །དབྱངས་ཅན་མཆོག་ཏུ་དགའ་བས་འཚོ་བ་སྙམ། །འཇོག་པོའི་གཙུག་རྒྱན་གྲགས་ལྡན་ཆོས་ཀྱི་ཁྲི། །འབུམ་ཕྲག་གསུམ་པ་བཏེགས་པའི་རྒྱལ་ཐབས་ལ། །སྤྱན་རས་གཟིགས་དབང་ལུང་གིས་བསྐོས་པ་ན། །ས་སྟེང་འཁོར་ལོས་སྒྱུར་བའི་བཀའ་རྟགས་འགྲོ། །འཇམ་དཔལ་རྣམ་པར་རོལ་བའི་ཆོ་འཕྲུལ་ལ། །རྒོལ་བའི་སྐྱེ་བོ་ཇི་སྙེད་རི་མོའི་གཟུགས། །སྐྱབས་སུ་སོང་ལ་མི་ཟད་བློ་ཡི་གཏེར། །མ་ལུས་ཕྱོགས་ལས་རྣམ་པར་རྒྱལ་དེས་སྦྱིན། །ཐེ་ཚོམ་དྲྭ་བ་ཐུབ་པའི་དབང་པོ་དང་། །རྣལ་འབྱོར་མས་བཅད་གསང་བ་རྒྱ་མཚོའི་མཛོད། །ཡང་ཡང་ཡང་བྱིན་ལ་དགྱེས་པའི་

― LT28_Page_0249 ―

^{[མ་དཔེ་གཟིགས་ན་འདིར་གནོན།]}

[Full Size]

འཛུམ་ཞལ་ནི། །སྲས་བཅས་རྒྱལ་བས་སྟོན་ཅིང་རིམ་གྲོ་མཛད། །སྐྱེ་འཕགས་རབ་ཏུ་བྱུང་དང་མཁས་པའི་བློ། །གྲུབ་པའི་བརྟུལ་ཞུགས་འཛིན་མར་འཛིན་ཅི་མཆིས། །མ་བསྒྲལ་བསྒྲལ་དང་དབུགས་ཆེན་དབྱུང་ལ་སོགས། །སངས་རྒྱས་འཇིག་རྟེན་བྱོན་ནས་སྐྱོང་བ་བཞིན། །ལེགས་གསུང་ནོར་བུའི་སྒོ་གླེགས་བཞི་ཕྱེ་ན། །ཆོས་ཕུང་བརྒྱད་ཁྲིའི་རིན་ཆེན་གཏེར་བརྡོལ་བས། །བཤད་སྒྲུབ་ལྷབ་ལྷུབ་གང་ན་གཡོ་བ་དེར། །ཏོག་ཏུ་འཚམས་པས་ཆོས་ཀྱི་རྒྱལ་མཚན་བསྒྲེངས། །དེ་ཉིད་འདུས་པའི་འཁོར་ལོ་བཞི་པ་ནི། །ཆོས་ཀྱི་དུང་གིས་བསྒྲགས་མོད་གཞན་ཏུ་ན། །རྩོམ་པར་སྤོབས་པ་ནམ་མཁའི་པདྨོ་སྟེ། །འདྲི་དང་ཀློག་པའི་ངལ་བའང་རི་བོའི་ཁུར། །ཡ་རབས་ལུགས་ཤེས་རྣམས་ཀྱི་དམིགས་བུ་སྟེ། །མཁས་པའི་ཉེ་དབང་དབུས་ན་བདེ་སོགས་བདག །གྲུབ་པའི་ཁྲོམ་ན་འཇིགས་མེད་གྲུབ་པའི་རྒྱལ། །ཤེས་བྱའི་དཀྱིལ་འཁོར་གྲགས་པའི་ཁྱུད་མོས་འཁྱུད། །སྟོང་ཆེན་བཞི་ལས་འདས་པའི་ཡེ་ཤེས་ནི། །མི་ཤིགས་ཁྱད་པར་གསུམ་ལྡན་ཁྱབ་བརྡལ་ཆེ། །སྔ་ན་མེད་པའི་རྨད་གཅིག་སྟོན་པ་ན། །གང་བློ་མཁའ་དང་ཆོས་ཀྱི་དབྱིངས་སུ་སྦྱོར། །ཤིང་རྟར་གྲགས་པའི་སྤྲིང་ཡིག་གདུགས་གཅིག་ཏུ། །སྦྱིན་རྣམས་བདེ་བར་གཤེགས་གསུངས་བྱེ་མ་སྙེད། །རང་དབང་འགྲེལ་ལ་སྤོབས་པའི་རླབས་འཆེལ་ན། །བློ་གྲོས་མི་ཟད་པ་དེའི་

― LT28_Page_0250 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེས་སུ་བྱེད། །རང་དབང་བྱས་སོ་གང་གིས་དྭངས་མ་གསུམ། །གླང་ཆེན་ལྕགས་ཀྱུའི་འཁྲུལ་འཁོར་ཚུལ་གྱིས་ཏེ། །འགྲོས་བཞི་ཐིམ་ལས་རྡོ་རྗེའི་སྐུ་དེ་བཞིན། །འཆི་མེད་ཞི་བའི་དཔུང་གིས་བདུད་སྡེ་བཅོམ། །རྒྱལ་བ་མོས་པ་བྱང་ཆུབ་སྤྱོད་ལ་ཞུགས། །རྣམ་སྣང་རྣམ་པར་འཕྲུལ་བའི་འཕྲུལ་ཆེན་མཁའ། །བརྗོད་པས་མི་མཚོན་བསམ་པས་མི་དཔོགས་ཀྱང་། །བརྗོད་པའི་ཆུ་སྐྱེས་མོས་གུས་མཚོ་ལས་བརྡོལ། །བྱང་ཆུབ་སེམས་དཔའི་བློ་གྲོས་སེམས་ཅན་དང་། །རྟག་ཏུ་མཇའ་བས་རྣམ་ཐར་རྒྱ་ཆེ་བ། །བདག་སོགས་འགྲོ་ལ་བགོ་བཤའ་བསྩལ་མཛད་དེ། །ཀུན་ཀྱང་ཀུན་བཟང་སྤྱོད་པ་ཉིད་འགྱུར་ཤོག །ཤིན་ཏུ་ངོ་མཚར་བའི་རྣམ་པར་ཐར་བ་ལ་བེམ་བ་པོ་དག་ཀྱང་བདུད་པ་སྙམ་བྱེད་ན་སེམས་ལྡན་སུ་ཞིག་གུས་པ་མི་འགྱུར། འདོན་པར་དད་པའི་སྙན་ཚིག་གི་ཆུན་པོ་ཆུང་ངུ་འདིའང་བློ་གྲོས་མཐའ་ཡས་ཀྱིས་ཐལ་བྱུང་དུ་བསྟར་པ་སྟེ། །ཐམས་ཅད་མཁྱེན་པའི་བཤེས་གཉེན་དེ་ལྟ་བུ་དང་སྐལ་བ་མཉམ་པའི་རྒྱུར་གྱུར་ཅིག། ༈ ༈ །།གྲུབ་པའི་དབང་ཕྱུག་བརྩོན་འགྲུས་བཟང་པོ་ལ་ཁྱུང་བའི་གསེར་ཆོས་དང་མཐུན་པར་བསྔགས་པ་ཡི་ཤིགས་རང་སྒྲ་ཞེས་བྱ་བ། །པདྨའི་མགོན་པོ་མངལ་གྱི་པདྨོ་ལས། །གྲོལ་བ་རང་བྱུང་གྲུབ་པས་མཚར་བརྟོལ་པས། །སྙན་པའི་བ་དན་སྲིད་ན་ནུབ་པ་མེད། །མཚོ་སྐྱེས་གཉིས་པའི་ཞབས་པད་གཙུག་ན་བཅིངས། །ཨ་ཡིག་སྐྱེ་མེད་རྟག་པའི་བདུད་རྩིའི་ཆུས། །ལུས་སེམས་འཕོ་བའི་དྲི་མ་ཀུན་བཀྲུས་པས། །འཆི་

― LT28_Page_0251 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་དངས་མའི་སྲོག་ཏུ་གྲུབ་པའི་སྐུ། །གཟི་བརྗིད་ཚད་མེད་འབར་ལ་ཕྱག་འཚལ་ལོ། །ཨ་ཧཾ་ཞུ་བདེས་གཉུག་མའི་ལུས་ཟུངས་གསོས། །རྩ་ཡི་མདུད་གྲོལ་འཕོ་ཆེན་དྷཱུ་ཏིར་བསྟིམས། །ཆོས་ཆེན་དབྱངས་ཀྱི་དཔལ་མོས་འཁྱུད་པའི་གསུང་། །གཞོམ་མེད་རང་སྒྲ་སྒྲོགས་ལ་ཕྱག་འཚལ་ལོ། །རྟོག་མེད་སྙིང་ཀའི་དཔའ་བོ་འབར་བའི་འོད། །བརྟན་གཡོའི་སྣང་མུན་ཀུན་ལ་གསལ་ཁྱབ་པས། །ལྷན་སྐྱེས་འཆར་ནུབ་བྲལ་བར་སད་པའི་ཐུགས། །ཆོས་ཅན་མཚན་མ་སྤངས་ལ་ཕྱག་འཚལ་ལོ། །ཆོས་ཉིད་སྒྱུ་མའི་སྐྱེས་བུ་རྩལ་རྫོགས་པས། །འཁྲུལ་སྣང་སྒྱུ་མའི་དཔུང་ལ་ཤེ་མོས་སྒྱུར། །སྒྱུ་འཕྲུལ་རྒྱ་མཚོའི་རང་བཞིན་ཡོན་ཏན་ནི། །རྒྱལ་བ་ཀུན་དང་མཉམ་ལ་ཕྱག་འཚལ་ལོ། །མགྲིན་པའི་སྒྲོན་མེས་ཉིད་འཁྲུལ་མུན་ཁང་བརྟོལ། །རྡུལ་ཕྲན་གོ་ན་དཀྱིལ་འཁོར་གསལ་རྫོགས་པ། །སྤྲུལ་སྒྱུར་མུ་མཐའ་ཡས་པའི་ཕྲིན་ལས་ནི། །ཡོངས་གྲུབ་འབད་རྩོལ་བྲལ་ལ་ཕྱག་འཚལ་ལོ། །ཡེ་ཤེས་ཟང་ཐལ་གོང་འཕོ་འདའ་ཀའི་ལམ། །ཆོས་ཀུན་བར་མ་དོར་འདུས་གསང་བའི་གནད། །མ་བསྒོམས་མངོན་འཚང་རྒྱ་ལ་ཟབ་མོའི་ཐབས། །ཀུན་མཐུན་ཀུན་ལས་འཕགས་ལ་ཕྱག་འཚལ་ལོ། །དུས་གསུམ་རྒྱལ་བས་རྟོགས་མཛད་ལྷན་ཅིག་སྐྱེས། །ནམ་མཁའི་རྡོ་རྗེ་རང་བབ་གསུམ་གྱིས་གྲུབ། །དངོས་དང་

― LT28_Page_0252 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་མེད་འཁོར་དང་འདས་པའི་སྲོག །བྱིན་རླབས་ཆགས་ཐོགས་བྲལ་ལ་ཕྱག་འཚལ་ལོ། །ཨེ་ཡིག་སྟོང་པ་སེམས་ཉིད་རྣལ་འབྱོར་མ། །ཝཾ་ཡིག་བདེ་ཆེན་སྣང་བའི་ཡི་དམ་ལྷ། །ཟུང་འཇུག་བླ་མའི་ལམ་དུ་ཕྱི་ནང་ཀུན། །སྐུ་གསུམ་རོལ་པར་ཁྱེར་ལ་ཕྱག་འཚལ་ལོ། །ཟླ་བ་ཉིན་བྱེད་མདངས་ཅན་ཐབས་ཤེས་གཟུགས། །ལྷན་སྐྱེས་རྡོ་རྗེ་བཙུན་མོའི་བྷ་གའི་མཁར། །རླུང་སེམས་ཟག་མེད་བདེ་བ་ཆེར་སྤྱོད་པ། །ཌཱ་ཀིའི་མིང་གཅིག་པོ་ལ་ཕྱག་འཚལ་ལོ། །གདོས་བཅས་འཆི་མེད་དྭངས་མའི་མགོན་པོར་བཞེངས། །ཤེས་བྱ་འཆུག་མེད་ཡེ་ཤེས་ཕྱག་རྒྱས་བསྡམས། །དངོས་ཀུན་ཁྱབ་བདག་འགྱུར་མེད་བདེ་བ་ཆེ། །གཙང་རྟག་དམ་པའི་བདག་ལ་ཕྱག་འཚལ་ལོ། །གཤེགས་ཁྲོ་སེམས་དཔའ་བཀའ་ཡི་རྟགས་བསྡུས་པ། །སྲོག་གི་བུམ་སྐུར་གདོད་གནས་ནག་པོ་ཆེ། །གྲུབ་གཉིས་མྱུར་བར་སྟེར་མཛད་ཐུགས་རྗེ་ཅན། །བླ་མ་མགོན་པོ་དབྱེར་མེད་ལ་ཕྱག་འཚལ། །རྡོ་རྗེ་འཆང་གིས་རྡོ་རྗེའི་རྒྱལ་ཐབས་བསྩལ། །ཡེ་ཤེས་མཁའ་འགྲོས་གསང་མཛོད་ལན་གསུམ་གཏད། །སྐྱེ་འཆི་འབྱུང་བ་བཞི་ལ་རང་དབང་བསྒྱུར། །ཐང་སྟོང་རྒྱལ་པོའི་ཞབས་ལ་ཕྱག་འཚལ་ལོ། །འཇའ་ཚོན་སྐུ་ཡིས་འཁོར་འདས་ནམ་མཁར་ཁྱབ། །དག་པའི་དབང་པོས་རོལ་རྩེད་གར་ཡང་མཐོང་། །བྱིན་རླབས་དཔལ་དུ་འབར་བ་གྲུབ་པའི་རྗེ། །མཚན་མཆོག་ལྔ་དང་ལྡན་ལ་ཕྱག་འཚལ་ལོ། །ཁྱོད་སྐུ་མཐོང་

― LT28_Page_0253 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིང་ཁྱོད་གསུང་བདུད་རྩི་ཐོབ། །ཁྱོད་ཐུགས་ཡེ་ཤེས་ཆེ་དང་མི་ཕྱེད་པའི། །དངོས་གྲུབ་མཆོག་གིས་བདག་རྒྱུད་ཚིམས་མཛད་ནས། །ཐོག་མཐའ་བྲལ་བའི་བདག་ཉིད་ཆེ་འགྲུབ་མཛོད། །བཅུད་འདུལ་གྲུབ་པའི་དབང་ཕྱུག་གིས་ཆོ་འཕྲུལ་གྱི་རོལ་རྩེད་ངོ་མཚར་བས་རྒྱུན་ཆད་མེད་པར་བྱིན་གྱིས་བརླབས་པའི་གནས་མཆོག་ལྕགས་ཟམ་ཆུ་བོ་རིའི་རྩ་མོ་ནམ་མཁའ་ལྡིང་གི་ངོགས། པདྨ་དབང་གི་ཕུག་པར་བློ་གྲོས་མཐའ་ཡས་པའི་སྡེས་གསོལ་བ་བཏབ་པའོ།། ༈ །།རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ་ལ་བསྔགས་པ་ངོ་མཚར་མཐའ་ཡས་ཞེས་བྱ་བ། །ཁྱབ་བདག་འདོད་པ་ཀུན་གྱི་དབང་ཕྱུག་གཙོ། །འཁོར་ལོ་སྡོམ་པ་རྡོ་རྗེ་སློབ་དཔོན་ཚུལ། །བརྟུལ་ཞུགས་ཉམས་བརྒྱས་སྒེག་པའི་ཧེ་རུ་ཀ །སྒྲོལ་བའི་མགོན་པོའི་ཞབས་ལ་གུས་ཕྱག་འཚལ། །ཚངས་སྤྱོད་དྲི་མེད་ལམ་གྱིས་མངོན་པར་བརྒྱན། །ཡིད་འོང་བུད་མེད་ཁྲག་ཁྲིག་ཀུན་སེམས་རྒྱུ། །ཆོས་རྔ་དབྱངས་ཆེན་སྲིད་ན་སྙན་པར་སྒྲོགས། །ཆོ་འཕྲུལ་ཆེན་པོའི་གར་ནི་ཀུན་ཏུ་བསྒྱུར། །བསྟན་ལ་རིམ་གྱིས་འཇུག་པའི་བརྟུལ་ཞུགས་དང་། །ཤེས་བྱ་ཐམས་ཅད་གཟིགས་པའི་རྣམ་དཔྱོད་དང་། །ངོ་མཚར་མཛད་པ་འབྱམས་སུ་ཀླས་པ་ཡིས། །གངས་ཅན་མཁས་གྲུབ་ཡོངས་ཀྱི་རྣམ་ཐར་བཟླུམས། །འཕྲུལ་སྣང་རི་མོ་འགོད་པའི་ཀ་ར་། །མུན་ཅན་ལྟོ་བར་བཙོན་ཏུ་བཟུང་བ་ལས། །བྱང་ཆུབ་སེམས་ཀྱིས་གང་བ་མཐར་ཐུག་སྟེ། །གང་གི་རྒྱུ་བ་

― LT28_Page_0254 ―

^{[མ་དཔེ་གཟིགས་ན་འདིར་གནོན།]}

[Full Size]

ཡེ་ཤེས་དབུ་མར་འཕབ། །ཀུན་འོད་བདུད་རྩི་ནམ་མཁའི་འོད་ལ་སོགས། །བློ་རབ་རྣམས་ངོར་འཕགས་པའི་འགྲོས་ཀྱིས་ཏེ། །བྱིས་ལ་སྒྲུབ་པོ་བཞིན་ཏུ་སྦྱོར་བའི་ལམ། །བཅུ་གཉིས་རྡོ་རྗེའི་གནས་པས་བདག་བྱིན་བརླབས། །གཞོམ་བྲལ་རྡོ་རྗེའི་སྐུ་དང་རོ་གཅིག་པ། །སེམས་ཀྱི་འགྱུར་མེད་རང་བཞིན་མངོན་སུམ་ཉིད། །རྟེན་དང་བརྟེན་པ་ཐོག་མ་མེད་དུས་ནས། །འོངས་པའི་འབྲེལ་དེ་བཅད་ལ་དཔའ་བོ་བཞིན། །དྭངས་ཤིང་རྟོག་བྲལ་དངོས་པོ་ཐམས་ཅད་ཀྱི། །རྣམ་པ་གསལ་བར་ཤར་བའི་ཡེ་ཤེས་ནི། །ཡུལ་དུས་ཀུན་ལ་སྣ་ཚོགས་ཚུལ་འཇུག་ཕྱིར། །མཚན་གྱི་རྣམ་གྲངས་འཇམ་དཔལ་གཞོན་ནུར་གྲགས། །སྟོབས་འབྱོར་ཟང་ཟིང་སྡེ་ཚན་མང་བའི་རྗེས། །མི་ཟློ་རང་ཚུགས་གསེར་བཟང་ལྟར་བརླིང་བས། །ཕྱིར་མི་ལྡོག་པ་སེང་གེའི་སྒྲ་བསྒྲགས་ཏེ། །བྱམས་པ་ཐོགས་མེད་མཆེད་ཀྱི་དགོངས་པ་སྐོང་། །མཐུ་སྟོབས་གནམ་ལྕགས་ཞུན་མའི་ཆར་ཆེན་ཏུ། །ལྟ་ངན་བདུད་སྡེ་ཉེར་ཡང་མི་བཟོད་པའི། །དྲག་ཤུལ་འཁྲུལ་འཁོར་སྙིང་རྗེའི་ཀློང་ནས་བསྐོར། །འཇིགས་མཛད་རྡོ་རྗེའི་ཟིལ་གྱིས་སྲིད་གསུམ་གནོན། །རིག་མའི་སྐྱེས་བུ་གྲུབ་པའི་ཕུན་ཚོགས་ཅན། །མངོན་བྱང་ལྷུམས་སུ་ཚུད་པའི་རྡོ་རྗེ་འཛིན། །རྡོ་རྗེ་བཞི་ཡི་དབྱིབས་སུ་རབ་ཆགས་པས། །ཕྱོགས་དུས་རྒྱལ་བ་ཀུན་གྱི་གསང་བ་འདུས། །འདོད་ལ་འདོད་པའི་ནོར་བུའི་དཔལ་གྱིས་གང་། །སངས་རྒྱས་

― LT28_Page_0255 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྲིན་ལས་ཆུ་བོའི་རྒྱུན་འབབས་པས། །གསང་བ་རྒྱ་མཚོའི་མཛོད་དེ་འཛིན་པ་ལས། །སྒྲོལ་མའི་དཀྱིལ་འཁོར་མགོན་པོར་གདོད་ནས་གྲུབ། །རིགས་ཀྱི་རྟགས་འཆང་གསང་སྔགས་རྒྱལ་པོ་སྒྲོགས། །གསང་བའི་པདྨོར་བཙུན་མོའི་ཤུ་ཀྲར་སྤྱོད། །རྡོ་རྗེ་དབང་མོའི་བདག་པོའི་གནས་ཐོབ་པས། །དཔའ་བོ་མཁའ་འགྲོའི་དྲྭ་བ་སྡོམ་པར་མཛད། །གཙུག་ཏོར་དབུས་སུ་ཟླ་བ་ཉ་རྒྱས་ཤིང་། །ནོར་བུའི་རྩེ་མོར་ཉི་མའི་དཀྱིལ་འཁོར་བརྟན། །རྣམ་ཀུན་མཆོག་ལྡན་མི་འགྱུར་བ་དེས་འཁྱུད་པ། །ཕྱི་ནང་གཞན་གསུམ་དུས་ཀྱི་འཁོར་ལོ་སྒྱུར། །གསང་དོན་འགྲེལ་ལ་འཇིགས་མེད་རང་དབང་ཐོབ། །གསང་བ་སྒྲ་བཞིན་སྤྱོད་པའི་ནུས་པ་བསྟན། །གསང་མཆོག་ཉི་མའི་ཤིང་རྟ་གསར་དུ་དྲངས། །རྡོ་རྗེ་འཆང་དབང་རྒྱལ་ཚབ་དུས་འདིར་བྱོན། །རང་གཞུང་གཙང་ལ་གཞན་གཞུང་མ་འདྲེས་འཆད། །རང་སྲོལ་ལེགས་བཙུགས་གཞན་སྲོལ་རྒྱུན་ཡང་སྐྱོང་། །རང་ཉིད་མཆོག་བརྙེས་གཞན་པ་སུན་མི་འབྱིན། །དེ་འདྲའི་དཔལ་གྱིས་ཆེན་པོར་གྲགས་རྣམས་བསྙིལ། །རྒྱལ་འཕགས་རྣམས་དང་དམ་པའི་ཆོས་བགྲོ་ཞིང་། །གྲུབ་པ་རྣམས་དང་ཉམས་ཀྱི་གླེང་མོ་འཆད། །མཁའ་འགྲོ་རྣམས་དང་ཚོགས་ཀྱི་འདུ་བར་རོལ། །སྐལ་ལྡན་རྣམས་ལ་ཆོས་ཀྱི་ཆར་ཕབ་ཏོ། །ངེས་གསང་སྙིང་པོའི་ཆོས་རྔ་རྡུང་བཞིན་ཏུ། །སྤྱོད་འཆང་དབང་པོ་གངས་ཅན་བྱོན་པའི་སྒྲས། །སྐལ་མེད་ནང་ཁྲོལ་ཁ་རུ་ལྡུག་བྱེད་ཅིང་། །སྐལ་ལྡན་རྣམས་

― LT28_Page_0256 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་མཆོག་གི་ཕ་ཕོག་བསྩལ། །ཁོ་བོ་རྒྱལ་བ་པདྨའི་རྗེས་ཞུགས་ཀྱང་། །ཁྱོད་ཀྱི་བསྟན་པ་འདི་ལ་ཤིན་ཏུ་དད། །འོན་ཀྱང་བསྟན་པ་སྤེལ་བའི་མཐུ་མེད་པས། །སྨོན་ལམ་བཏབ་ཀྱང་རེ་བ་ཉིད་དུ་ཟད། །ཉི་མའི་སྣང་བས་སྲིན་བྱའི་མིག་ལྡོངས་ཤིང་། །ཡི་དྭགས་རྣམས་ལ་བདུད་རྩི་དུག་ཏུ་འགྱུར། །སྐལ་དམན་རྣམས་ཀྱིས་རྒྱལ་བའི་ཕྲིན་ལས་ཀྱང་། །ལོག་པར་མཐོང་བ་རང་གི་ཉེས་པའི་མཐུ། །སྙིགས་མའི་ཆུ་རླབས་རབ་འཁྲུགས་དུག་གི་མཚོ། །ལྟ་བའི་སྙིགས་མས་ཡང་དག་ལྟ་བ་བཀབ། །བསོད་ནམས་སྙིགས་མས་མཆོད་ཡུལ་དམན་ལ་མོས། །མཆོག་གི་བཤེས་གཉེན་ཕྲིན་ལས་ཞི་བར་གཟིམས། །སྙིང་པོའི་རྒྱལ་མཚན་བསྙོལ་མ་མཐུ་ཆེ་ཞིང་། །ཡིད་སྲུབ་བ་དན་སྒྲེང་ལ་དབང་བཙན་པ། །རྒྱལ་བསྟན་ཉི་འོད་ནུབ་ཀར་སྐར་མ་ལྟར། །དཔལ་གྱི་མགུར་ནས་ལུང་གིས་བསྟན་དེ་བཀྲ། །སྐྱེས་བུ་ཆེན་པོ་ཐོས་པའི་ཡུལ་དུ་གཤེགས། །བསྟན་པ་མེ་ཆེན་མནལ་བའི་དུད་པ་བཞིན། །བསྟན་འཛིན་ཉིན་མོའི་རྒྱུ་སྐར་དང་མཚུངས་པ། །སྐྱེ་དགུའི་བསོད་ནམས་སྐལ་པས་ཐོབ་འདི་སྐྱོ། །འདི་ལྟར་གྱུར་ན་དམ་པ་དམན་གྱིས་འཕྱ། །ཐུགས་བསྐྱེད་སྨོན་ལམ་འབྲས་བུས་སྟོང་པར་འགྱུར། །ལོག་རྟོག་བཅུད་མི་ལྡན་གྱི་གཡུལ་བཟློག་སྟེ། །རང་བསྟན་དཔག་བསམ་རྩ་བ་བསྲུང་དུ་གསོལ། །གདུལ་བྱའི་བསོད་ནམས་བྲི་གང་ཡོད་གྱུར་ཀྱང་། །རྒྱལ་བའི་ཐུགས་རྗེར་བྲི་གང་མ་མཆིས་པས། །ད་དུང་བསྟན་པའི་མི་རོ་ལྡངས་

― LT28_Page_0257 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་སུ། །བདུད་ཀྱི་ཚང་ཚིང་བསྲེག་པར་མཛད་དུ་གསོལ། །སྐལ་དམན་དམུས་ལོང་ཁྱུ་ལ་བསྙད་བཏགས་ནས། །མཁའ་སྤྱོད་དགའ་མའི་རྩེད་འཇོས་མི་གཡེང་བར། །ཆོ་འཕྲུལ་སྐྱ་རེངས་གསར་པ་དང་འགྲོགས་པའི། །སྤྲུལ་པའི་ཉིན་བྱེད་རྩོད་མེད་འཆར་དུ་གསོལ། །སྤངས་རྟོགས་སྲིན་བུའི་འོད་ལས་རབ་དམན་ཀྱང་། །ལྷག་བསམ་སྣང་བའི་མུ་ཁྱུད་ལ་འགྲན་པ། །བདག་ཅག་མྱུར་དུ་རྗེས་སུ་བཟུང་ནས་ཀྱང་། །མཁྱེན་བརྩེ་ནུས་པའི་པདྨོ་འབྱེད་དུ་གསོལ། །སྙིང་པོའི་ཚུལ་འདི་ཟབ་ཅིང་གཏིང་དཔག་བཀའ། །འགྲོ་འདིས་རྟོགས་པའི་སྐལ་པ་མེད་གྱུར་ཀྱང་། །ཐོས་སོགས་བསོད་ནམས་དཔག་ཡས་གསུངས་པས་ན། །དེ་བཞིན་གཤེགས་པའི་དམ་ཆོས་འཛིན་ཏུ་གསོལ། །དཔའ་བོ་ཆེན་པོའི་ཆོ་འཕྲུལ་དཔག་མེད་ལྟར། །བདག་ཀྱང་ཆོ་འཕྲུལ་ཆེན་པོའི་གནས་ཐོབ་སྟེ། །སྲིད་ཞིར་མི་གནས་འདོད་དགུར་སྒྱུར་བའི་སྐུས། །སྲིད་པའི་འགྲོ་བ་མ་ལུས་སྒྲོལ་བར་ཤོག །ཅེས་པའང་དབོ་ཟླའི་དམར་ཕྱོགས་ཀྱི་རྒྱལ་བ་གསུམ་པར་རྗེ་ཉིད་ཀྱི་དུས་དྲན་འཁོར་ལོ་སྡོམ་པའི་རྣལ་འབྱོར་ལ་གནས་པའི་ཚེ་མོས་པའི་ཚིག་གི་མེ་ཏོག་གུ་འི་མགྲིན་མཚོ་ལས་ཐལ་བྱུང་དུ་འཐོར་བའོ། །དགེ་ལེགས་འཕེལ། །

རྒྱལ་དབང་ཀརྨ་པའི་སྐུ་བསྟོད།

― LT28_Page_0259 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱལ་བ་ཀུན་གྱི་ཕྲིན་ལས་གཟུགས་ཅན་ལ། །ཀརྨ་པ་ཞེས་གྲགས་པའི་རྔ་བོ་ཆེས། །ཞིང་ཁམས་རྒྱ་མཚོའི་མ་རིག་གཉིད་སློང་བ། །རྒྱལ་བ་བླ་ན་མེད་པ་ལ་ཕྱག་འཚལ། ༡ །རབ་འབྱམས་ཞིང་ན་མུ་མཐའ་མེད་པ་ཡི། །ཐེག་པ་གསུམ་དང་དེ་ཡི་བྱང་ཆུབ་སོགས། །དཔག་པར་དཀའ་བའི་ཆོ་འཕྲུལ་སྣ་ཚོགས་པས། །འཁོར་བ་དོང་ནས་སྤྲུགས་པ་ལ་ཕྱག་འཚལ། ༢ །འཇིག་རྟེན་དབང་ཕྱུག་སྙིང་རྗེའི་ཆུ་གཏེར་ལས། །སྐྱེ་དགུའི་མོས་པའི་མཁའ་ལ་ཀརྨ་པའི། །ཟླ་བ་གཞོན་ནུ་འཐོན་པའི་མོད་ཉིད་ནས། །རྩོལ་མེད་ཐར་པའི་མིག་འབྱེད་ལ་ཕྱག་འཚལ། ༣ །འཕགས་པའི་ཡུལ་དུ་ས་ར་ཧ་པ་དང་། །ལྗོངས་འདིར་རྒྱལ་བ་མཆོག་གི་དབྱངས་ལ་སོགས། །རྣམ་རོལ་ཉི་ཚེའི་གཟུགས་ཀྱིས་མཐའ་ཡས་འགྲོ། །གྲུབ་པའི་རྒྱལ་སར་འཁྲིད་པ་ལ་ཕྱག་འཚལ། ༤ །ཐོག་མེད་དུས་ནས་ཚོགས་གཉིས་དཀྱིལ་འཁོར་རྒྱས། །མཁྱེན་བརྩེ་ནུས་པའི་སྣང་བྱེད་འབུམ་བརྡལ་བས། །ཐུབ་ཆེན་བསྟན་པ་ཉིན་མོར་མཛད་པའི་ཕྱིར། །སྟོན་པ་གཉིས་པར་གྲགས་པ་ལ་ཕྱག་འཚལ། ༥ །ཤེས་བྱ་སྲིད་ཚད་མཁྱེན་པའི་རྣམ་དཔྱོད་དང་། །གྲུབ་པའི་ཆོ་འཕྲུལ་འཛམ་གླིང་ཁྱབ་སྟོན་པས། །མིང་ཙམ་མ་ཡིན་ཤེས་བྱའི་ཁོངས་འདི་ན། །ཕྱོགས་ལས་རྣམ་པར་རྒྱལ་བ་

― LT28_Page_0260 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཕྱག་འཚལ། ༦ །འཆད་ན་སྔོན་མེད་ལེགས་བཤད་སྒོ་བརྒྱ་ཕྱེ། །རྩོད་ན་རྒོལ་ངན་ལུང་རིག་ཕྱེ་མར་འཐག །རྩོམ་ན་ཐུབ་པའི་དགོངས་ཟབ་ལྷུག་པར་དཀྲོལ། །མཁྱེན་གཉིས་མཁའ་ལྟར་ཡངས་པ་ལ་ཕྱག་འཚལ། ༧ །མདོ་དང་སྔགས་ཀྱི་ལྟ་སྒོམ་སྤྱོད་པ་ལ། །འཇིགས་པ་མེད་པའི་དམ་བཅའ་སྔོན་འགྲོ་བས། །གྲུབ་མཐའི་རྒྱལ་མཚན་གསར་དུ་འཛུགས་པ་ཡིས། །ཐུབ་བསྟན་ཁང་བཟང་མཛེས་བྱེད་ལ་ཕྱག་འཚལ། ༨ །དོན་དམ་ཕྱག་རྒྱ་ཆེན་མོའི་བཙུན་མོ་དང་། ཁ་སྦྱོར་རྟག་བདེའི་ཡན་ལག་ཡོངས་རྫོགས་པས། །འཁོར་ལོ་ཀུན་གྱི་སྲོག་བཞུགས་ཧེ་རུ་ཀ །ཟུང་འཇུག་ཡེ་ཤེས་སྐུ་ཅན་ལ་ཕྱག་འཚལ། ༩ །གསང་བ་གསུམ་གྱི་ཟླ་བ་གཅིག་ཤར་བས། །ཡུལ་ཁམས་སྐད་རིགས་མི་གཅིག་དུ་མ་ཡི། །མོས་པའི་ཆུ་སྣོད་བྱེ་བ་བཟུང་ནས་སུ། །མཐོང་ཐོས་དན་རེག་གྲོལ་བ་ལ་ཕྱག་འཚལ། ༡༠ །མི་མ་ཡིན་དང་སེམས་མེད་བེམས་པོས་ཀྱང་། །ཁྱོད་ཀྱི་བཀའ་སྒྲུབ་ཁྱོད་ལ་འདུད་བྱེད་ན། །སེམས་ལྡན་གཞན་ལྟ་སྨོས་ཀྱང་ཅི་ཞིག་འཚལ། །སྣང་སེམས་དབང་དུ་མཛད་པ་ལ་ཕྱག་འཚལ། ༡༡ །བཟང་ངན་འབྲེལ་དང་བར་མའི་ཡིད་ཅན་ཀུན། །བཏང་སྙོམས་ཆེན་པོའི་ངང་ནས་བྱང་ཆུབ་པར། །ཆམ་གཅིག་འགོད་པའི་གོ་ཆ་རབ་བཞེས་པ། །བྱང་ཆུབ་སེམས་ཀྱི་བདག་

― LT28_Page_0261 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ལ་ཕྱག་འཚལ། ༡༢། གསེར་གྱི་སྐུད་པར་མུ་ཏིག་བརྒྱུས་པ་བཞིན། །སྐྱེས་རབས་རིན་ཆེན་ཕྲེང་བར་བྱོན་རྣམས་ལ། །རྩེ་གཅིག་གུས་པ་ཆེན་པོས་གསོལ་བ་འདེབས། །རྟག་ཏུ་རྗེས་འཛིན་རྣམ་ཐར་ཡོངས་འགྲུབ་ཤོག༡༣། ཅེས་པའང་ལུང་དང་རྟོགས་པའི་མངའ་བདག་ཆོས་རྒྱལ་བླ་མ་རིན་པོ་ཆེ་ཚེ་དབང་ཕུན་ཚོགས་བསྟན་སྐྱོང་མཆོག་གི་བཀའ་སྩལ་ལྟར། །ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཐུབ་བསྟན་ཆོས་འཁོར་གླིང་དུ་བྲིས་པ་དགེ་ལེགས་འཕེལ།། ༈ །།དཔལ་ལྡན་འགྱུར་མེད་སྙིང་པོའི་བསྟན་པ་འཛིན། །ཀུན་བརྟགས་ཕྱོགས་ལས་རྣམ་གྲོལ་པདྨ་ཡི། །རྒྱལ་ཚབ་བསྟན་འགྲོར་ཉིན་བྱེད་དབང་པོའི་སྡེ། །གང་ལ་མི་ཕྱེད་དད་པའི་ཡིད་ཀྱིས་བསྔགས། ༡ །བྱང་ཆུབ་སྤྱོད་པ་རྒྱ་མཚོ་གཏིང་བྲལ་བ། །ཆོས་ཁམས་སྣོད་དུ་གཟོད་ནས་ཡོངས་གང་བས། །ཟབ་རྒྱས་དམ་ཆོས་ཆུ་ཀླུང་བྱེ་བ་སྙེད། །འགྱེད་མཛད་ས་བཅུའི་དབང་ཕྱུག་མ་ཕམ་པ། ༢ །རང་གི་ཞིང་ཁམས་ཡོངས་སུ་སྦྱོང་་བ་དང་། །ཤཱཀྱའི་བསྟན་ལ་རི་མོར་མཛད་པའི་སླད། །སྲིད་ལས་འདས་ཀྱང་སྲིད་པའི་རྣམ་པ་དང་། །མཚུངས་པའི་ཆོ་འཕྲུལ་ཡང་ཡང་སྟོན་ལ་འདུད། ༣ །རྒྱལ་ཀུན་སྤྱི་གཟུགས་པདྨ་དཀར་འཛིན་དང་། །སྟོན་འཁོར་དབྱེ་བ་མེད་པའི་ཕྲིན་ལས་ཀྱིས། །འཁོར་བ་ཇི་སྲིད་འགྲོ་སྒྲོལ་བརྟུལ་ཞུགས་ཅན། །བསམ་གྱིས་མི་

― LT28_Page_0262 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱབ་སྤྱོད་ཡུལ་མངའ་དེར་འདུད། ༤ །བསྟན་འཛིན་བྱེ་བའི་དབུས་ན་ཟླ་མེད་པའི། །མཁྱེན་རྟོགས་ཆོས་ཆེན་རྒྱལ་སྲིད་དར་དྲགས་བས། །སི་ཏུ་པ་ཞེས་འཇིག་རྟེན་གསུམ་གྱི་ཁོངས། །མཚན་གྱི་ཡི་གེས་རབ་ཏུ་བརྗིད་ལ་འདུད། ༥ །འཛམ་གླིང་མཛེས་པར་བྱེད་པའི་རྒྱན་དྲུག་གི། །དཔལ་ལ་འགྲན་པ་བསྟན་པའི་ཉིན་མོར་བྱེད། །རྩོད་པའི་དུས་མཐར་འགྲོ་བའི་སྒྲོན་མེ་རུ། །སླར་ཡང་བསམས་བཞིན་སྐྱེ་བ་བཞེས་ལ་འདུད། ༦ །ཚད་མེད་ཐུགས་རྗེའི་འོད་ཀྱི་མཚོན་ཆ་ཡིས། །ཡིད་སྲུབ་མུན་པའི་ཕྲུ་མ་འཐག་པ་ཡི། །ལུང་གི་སྤྲིངས་ཡིག་ཁ་བ་ཅན་ལྗོངས་སུ། །མཚོ་སྐྱེས་རྡོ་རྗེས་ཟོལ་མེད་བྱིན་ལ་འདུད། ༧ །རྒྱལ་བས་ཇི་སྐད་གསུངས་པའི་བསླབ་པ་གསུམ། །དྲི་མེད་སློབ་པའི་ཚུལ་ལ་རབས་ཞུགས་པས། །ཆར་གྱིས་གསོས་པའི་པདྨ་རྙིངས་པ་བཞིན། །བསྟན་པའི་ལང་ཚོ་གཞོན་ནུར་གྱུར་ལ་འདུད། ༨། རྡོ་རྗེའི་བརྡ་ཐབས་ལ་བརྟེན་གཞི་ལུས་སུ། །སྨིན་གྲོལ་རྟེན་འབྲེལ་བདེ་བླག་འགྲིག་པ་ཡིས། །བདེ་སྟོང་ཕྱག་རྒྱ་ཆེན་པོ་བཅུ་དྲུག་ཆ། །གཙུག་ཏོར་འཁོར་ལོར་ཡོངས་སུ་གང་ལ་འདུད། ༩ །རྒྱུ་རྐྱེན་ལས་འདས་གདོད་མའི་ཡེ་ཤེས་ཀྱི། །རྩལ་ཆེན་རྫོགས་པས་བློ་འདས་གྲུབ་མཐའ་སྙོགས། །འཁོར་འདས་རྟོག་པའི་ལྕགས་ཁམས་གཉུག་མའི་རྩིས། །སྤང་བླང་མེད་

― LT28_Page_0263 ―

^{[མ་དཔེ་གཟིགས་ན་འདིར་གནོན།]}

[Full Size]

པར་གསེར་དུ་བསྒྱུར་ལ་འདུད། ༡༠ །དོན་དམ་མཐའ་བྲལ་བདེན་པ་གཟིགས་པ་ཡིས། །རྡོ་རྗེའི་དབང་བསྐུར་སྩོལ་ལ་མཐུ་གྲུབ་ཅིང་། །གནས་ལུགས་ཆོས་ཀྱི་མཛོད་ལ་རང་དབང་ཅན། །ཆོས་ཀྱི་རྒྱལ་པོ་དཔལ་ལྡན་བླ་མར་འདུད། ༡༡ །བློ་བྲལ་ཆེན་པོའི་དབྱིངས་སུ་ལ་ཟློས་པས། །མི་འཇིགས་སྤོབས་པའི་གཟི་བརྗིད་ངོམས་བཞིན་ཏུ། །རྒྱུ་འབྲས་རྟེན་འབྲེལ་བསླུ་བ་མེད་འདོམས་པས། །འབྲེལ་ཚད་དོན་དང་ལྡན་པར་མཛད་ལ་འདུད། ༡༢ །ཐུབ་བསྟན་སྲོག་ཟུང་འཚོ་བའི་བསྟན་འཛིན་མཆོག །རྡོ་རྗེ་སློབ་དཔོན་ཆེན་པོའི་གོ་འཕང་བ། །བླ་ན་མེད་པའི་བླ་མ་མཆོག་ཁྱོད་ཀྱིས། །བྱང་ཆུབ་བར་དུ་རྗེས་འཛིན་སྩལ་དུ་གསོལ། ༡༣ །ཅེས་པའང་སྡེ་བཞིའི་རྒྱལ་ཐབས་ལ་དགེ་བཅུའི་འཁོར་ལོས་སྒྱུར་བ་ལྷ་རིགས་བླ་མ་རིན་པོ་ཆེས་བཀའ་བསྐུལ་གནང་བ་ལྟར། །ཀརྨ་ངག་དབང་ཡོན་ཏན་རྒྱ་མཚོ་དཔལ་སྤུངས་ཀྱི་གདན་སར་བྲིས་པ་མངྒ་ལཾ། །དགེ་ལེགས་འཕེལ།། །།

ཀརྨ་པར་བསྔགས་པ་ཀུན་བཟང་འཁོར་ལོའི་རེའུ་མིག་ཚངས་སྲས་དགྱེས་པའི་རོལ་མོ།

― LT28_Page_0265 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིག་རྟེན་དབང་ཕྱུག་དཔལ་ལྡན་ཀརྨ་པའི་ཞབས་ཀྱི་པདྨོར་ཅུང་ཟད་བསྔགས་པ། །ཀུན་བཟང་འཁོར་ལོའི་རེའུ་མིག་ཚངས་སྲས་དགྱེས་པའི་རོལ་མོ་ཞེས་བྱ་བ་བཞུགས་སོ། །།

― LT28_Page_0266 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་གཉིས་མཐར་ཕྱིན་ཟུང་འཇུག་གཟིགས་པ་ཡིས། །ཆོས་ཀུན་དབྱིངས་སུ་མངོན་པར་བྱང་ཆུབ་པ། །།

― LT28_Page_0267 ―

^{[མ་དཔེ་གཟིགས་ན་འདིར་གནོན།]}

[Full Size]

ཁམས་གསུམ་འགྲོ་བའི་བླ་མ་ཐམས་ཅད་མཁྱེན། །ཐེག་པ་མཆོག་གི་རྡོ་རྗེ་རྒྱལ་གྱུར་ཅིག །།

― LT28_Page_0268 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་ལྡན་ཆོས་ཉིད་འདུ་མི་མཛད་པར་རིགས་ཀུན་འཁོར་ལོའི་ཡོན་ཏན་བཀོད་པ་ལྷུན་གྲུབ་པ། །ཐེག་པ་མཆོག་གི་ཤིང་རྟ་ལ་བརྟེན་ཆོས་འདུལ་མུ་ཁྱུད་གྲུབ་པའི་རྡོ་རྗེའི་འོད་སྟོང་འབར། །སྒྲིབ་གསུམ་ཕྱོགས་དང་ཆ་ལས་རྣམ་གྲོལ་སྙིང་པོར་རབ་རྒྱལ་ངེས་དོན་བསྟན་པའི་ཉི་མ་ཆེ། །རྟག་ཁྱབ་ཕྲིན་ལས་ཀུན་ཏུ་དགའ་བ་པདྨ་རྒྱས་པའི་སྡེ་བཞིའི་དཔལ་འབར་དེ་ལ་འདུད། །འཁོར་དང་མྱ་ངན་འདས་པའི་གོ་ས་ན། །ཐམས་ཅད་མཁྱེན་ཅེས་གྲགས་པ་དོན་ལྡན་པའི། །བསྟན་པ་འདི་ལ་དཔལ་ལྡན་ཀརྨ་པ། །མཚན་གྱི་ཡི་གེ་རི་བོའི་ཁོངས་སུ་གསལ། །སྣང་བཅས་ཆགས་སྤངས་མཁའ་ལྟར་ཐམས་ཅད་པ། །མཉམ་པར་གནས་ཀྱང་ལྷག་བསམ་གཞན་དབང་ཅན། །ཟབ་གསང་རྣམ་ཐར་ཡན་ལག་མཐའ་ཡས་པས། །རྟག་ཆད་འཕྲང་བསྒྲལ་རྒྱལ་སྲས་པད་དཀར་འཆང་། །སྲིད་པའི་འདམ་དུ་སྙིང་རྗེའི་རླན་ཆགས་པ། །བརྩེ་བས་ཁ་དྲངས་པདྨ་རྒྱས་པའི་ཞལ། །ཆགས་ཐོགས་མེད་པ་ཐབས་མཁས་ཆུ་ལོན་གྱིས། །འཁོར་བའི་ཆུ་རྒྱུན་བཟློག་ལ་བརྩོན་པ་བཞིན། །ཡང་དག་ཉིད་དུ་དྲི་མས་འཕགས་པའི་ས་དང་ལམ་རྣམས་སུན་ཕྱུང་སྟེ། །སྤངས་པ་ཕུན་ཚོགས་ནོར།།།རབ་ཟད་ཉི་མཁར་མཉམ་པའི་ཡེ་ཤེས་ཀྱི། །གཞི་བརྟེན་མངོན་གྱུར་རྒྱུན་གྱིས་རྟག་གང་གཉིས་མེད་གཟིགས་པ་སྤྲོས་ཞི་ཡང་། །སྣང་བར་དངོས་བརྟགས་ཞིང་སྐུའི་སྤྲིན་ཆེན་རྒྱ་མཚོར་སྙོམས་པར་རོལ་ཞིང་ལྡང་བ་དང་། །ཤེས་བྱ་ཚད་མེད་རྣམ་པར་བརྟག་པའི་བློ་ཡིས་དབྱེ་བའི་ཁྱད་པར་ལས། །ཡོངས་སུ་སྦྱོང་བའི་རྒྱལ་ཐབས་དབང་

― LT28_Page_0269 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐུར་གཟུངས་དང་ཏིང་འཛིན་མཁའ་ཡི་རྡུལ། །འདུན་དང་ལས་སོགས་འདོད་དགུར་བསྒྱུར་བའི་སྤྱོད་ཡུལ་ཤིན་ཏུ་རྣམ་དག་པ། །རྒྱུ་མཐའ་ཡས་པས་མི་མཉམ་བྲལ་འབྲས་ཞིང་རྡུལ་ཕྲ་རབ་འདུ་མཛད་ནས། །བྱམས་པས་ཡོངས་བགོས་ནུས་རྟོགས་སྐྱེ་བ་དཔག་དཀའི་ཁྱད་པར་སླར་བཟུང་སྟེ། །ཚངས་དང་དབང་ཕྱུག་རབ་མཐའ་བྲལ་སོགས་དབང་བསྒྱུར་དགེ་རྩ་སྨིན་པའི་ཕྱིར། །ཆགས་དང་འཇིགས་ལྟ་མུན་པའི་འཁོར་སར་རྣམ་འཕྲུལ་འཇིགས་པ་ལྔ་སྤངས་པ། །ཉི་འོད་བརྒྱ་ཕྲག་བདེན་པས་གྲོལ་བ་ལམ་ཤེས་པདྨའི་ནགས་ཚལ་མཛེས། །གཞན་ཕན་བྱ་དཀའ་ངལ་བ་ཁྱད་གསད་ནས། །མཐའ་བྲལ་ཁམས་བརྒྱ་སད་དང་དག་པ་ལ། །རྟག་ཁྱབ་སྣང་བ་གཞར་ཡང་མ་འགགས་པས། །པདྨ་རབ་བཞད་རྟ་ལྗང་ཅན་ལ་འཕྱ། །བ་སྤུའི་ཁུང་བུ་རེ་རེར་སྐད་ཅིག་གིས། །བསོད་ནམས་བརྒྱ་ལས་གྲུབ་པའི་མཚན་འབར་བ། །སྨོན་ལམ་ལུས་ཅན་ཞིང་གི་འདུ་འཕྲོ་དང་། །སྣ་ཚོགས་གཟུགས་བརྒྱས་ལས་ཀྱི་ཐོག་མཐའ་འདུམ། །མིང་ཚིག་གཟིངས་ཀྱིས་རིག་པའི་རྫིང་རིང་གི། མཐིལ་ཕྱིན་མི་འཇིགས་ཞི་བའི་དབྱིག་སྦྱིན་ཞིང་། །སྒྲོ་འདོགས་སྤྲོས་བཟོད་བློ་གྲོས་འོད་རྣོན་པོས། །དངོས་བཅོམ་ཆོས་ནོར་འདོད་སོགས་མཆོག་ཚོགས་འཇོ། །རྒྱུད་གསུམ་གཞུང་ལུགས་ཕུལ་བྱུང་ཆུ་ཀླུང་འབུམ། །ཐུགས་ཆུད་བརྟུལ་ཞུགས་གྲུབ་ཀུན་ཟུར་ཕུད་དུ། །མཛེས་བྱེད་མཁྱེན་བརྩེ་མེ་ཤེལ་ཕྲེང་དེ་སྙེད། །ངེས་སྟེར་ཐེག་ཆེན་འགྲེལ་བྱེད་བདེན་ཞེན་བསྲེགས། །དེ་ཕྱིར་དེ་

― LT28_Page_0270 ―

^{[མ་དཔེ་གཟིགས་ན་འདིར་གནོན།]}

[Full Size]

ཡི་མཚན་ཙམ་འཛིན་པ་རིན་ཐང་མེད་པའི་རིན་ཆེན་གྱིས། །བསྐལ་མང་རྣམ་དཀར་གཏིང་མེད་སྡིག་ཟད་དཔལ་དང་བདུད་རྩིར་སྒྲུབ་ཉིད་ན། །ལྷག་བསམ་སྔོན་འགྲོ་སྙན་ཚིག་དོག་པས་ཡོན་ཏན་རྒྱ་མཚོར་མཛེས་པ་ལས། །བྱང་ཆུབ་སྙིང་པོར་རྒྱལ་བ་ཉིད་ཕྱིར་ཅུང་ཟད་བསྔགས་པས་བསྙེན་བཀུར་བྱ། །

― LT28_Page_0271 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0272 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0273 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0274 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0275 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0276 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0277 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0278 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0279 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0280 ―

^{[མ་དཔེ་གཟིགས་ན་འདིར་གནོན།]}

[Full Size]

― LT28_Page_0281 ―

^{[མ་དཔེ་གཟིགས་ན་འདིར་གནོན།]}

[Full Size]

སླར་ཡང་སྨྲས་པ། །བཟང་བཟང་མཁས་དང་གྲུབ་པ་པདྨོའི་ཚལ་ན་ལྷང་ལྷང་གྲགས་སྙན་སྲིད་ཞིར་རབ་འབར་བ། །མཛེས་མཛེས་ཨུ་དུམ་ཝཱ་ར་རིགས་བརྒྱའི་གཙུག་ན་ལམ་ལམ་བཅིངས་གང་དཔལ་ལྡན་ཀརྨ་པ། །ཡང་ཡང་དྲན་པས་སྙིང་གི་མུན་སེལ་དེ་ཕྱིར་མཁས་མཁས་ཚངས་པའི་ངག་དང་བློས་དྲངས་པས། །ཟབ་ཟབ་རྣམ་ཐར་སྒོ་བརྒྱ་ནམ་མཁའི་ཕ་མཐའ་སྙན་སྙན་དགུ་ཚིག་དཀྱུས་སུ་བཅིངས། །རྒྱལ་མཛད་ཕན་མཚུངས་ཉི་དང་འོད་ལྡན་མཁྱེན། །མཐའ་ཡས་དཔག་དཀའ་བརྟག་བྲལ་ཚིག་དོན་ཟབ། །ཟབ་དོན་ཚིག་བྲལ་བརྟག་དཀའ་དཔག་ཡས་མཐའ། །མཁྱེན་ལྡན་ཉི་དང་འོད་མཚུངས་ཕན་མཛད་རྒྱལ། །ཟག་པར་བཅས་པ་ཐ་དད་ཁམས་དབང་ལྕགས། །ཟབ་གསང་ཐབས་མཁས་བཱ་ར་དེས་སྦྱངས་པས། །བསམ་ཡས་བྲལ་འབྲས་མཁའ་ཁྱབ་ཀ་ན་ཀཿ གཙང་བདག་རྟག་པ་དམ་པར་སྣང་བར་བྱས། །དགའ་བ་བརྒྱ་པ་ཁམས་ཀྱི་ཟག་པ་སྤངས། །སྣ་ཚོགས་གཟུགས་ཀྱིས་སྟོབས་ལྡན་བསླུ་མི་བྱེད། །ས་དཱ་ཤི་བའང་སྡང་དང་སྲེད་ལས་གྲོལ། །གཞན་བསྙེམས་བཟོད་ཀྱང་བཅུད་མི་ལྡན་ལ་བརྩེ། །རྟག་ཏུ་ཞི་བའི་རལ་ཀླུང་ཉིད་དུ་འཁྱིལ་ཡང་ལྷག་བསམ་སོར་མོས་ལེགས་དྲངས་ཤིང་། །སྔོན་མེད་དག་བྱེད་ཚད་མས་འཇིག་རྟེན་ལམ་གསུམ་མུན་སྲེད་སྡང་བའི་ཉེས་བཀྲུ་བ། །མཚན་ཙམ་འཛིན་པས་འཁོར་བའི་འཁྲུལ་འཁོར་རབ་ཟློག་སྲས་བཅས་རྒྱལ་བའི་ཕྲིན་ལས་པ། །ལས་ཀྱིས་བསྟར་བ་འགྲོ་སེམས་ས་གཞིར་

― LT28_Page_0282 ―

^{[མ་དཔེ་གཟིགས་ན་འདིར་གནོན།]}

[Full Size]

ཇི་སྙེད་རྣམ་འཕྲུལ་གཟུགས་བརྒྱ་འཕོས་གང་དེར། །མི་འཕྲོག་སྒོ་གསུམ་ཤིན་ཏུ་གུས་པ་དང་། །ཆོས་ཀུན་རྒྱལ་བའི་གཤིས་སུ་ཁྱབ་དག་པས། །སྤྲོས་པའི་འདུ་འགོད་རྣམ་པར་གནས་པ་མེད། །རོ་མཉམ་ཆེན་པོར་བསྟོད་དབྱངས་བཅས་ཏེ་འདུད། །བདག་མེད་ལྷག་བསམ་མཁའ་དང་མཉམ་པར་གཟུང་། །ལུང་རྟོགས་དམ་ཆོས་སྲོག་གི་ཕྱིར་ཡང་འཛིན། །འགྲོ་ཕན་གཡོ་སྒྱུ་བྲལ་བར་སྒྲུབ་པ་ཡི། །བླ་མེད་མཆོད་པའི་སྤྲིན་གྱི་བླ་བྲེ་བྲེས། །འཇིགས་དང་གུས་ལྡན་ངོ་ཚར་བཅས་ནས་ནི། །མུན་པར་དུབ་ལས་ཉེས་བྱས་ཇི་སྙེད་པ། །ཚངས་པའི་ཕྱིར་དུ་གཡར་ལམ་རབ་མཐོལ་ནས། །ཤེས་བཞིན་རྣལ་དུ་འབྱོར་བའི་དམ་བཅའ་ལེན། །ཡི་རང་བདུད་རྩིའི་འོད་ཀྱི་ཐིགས་པས་འདིར། །ཟུང་འཇུག་བདེ་གཤེགས་སྙིང་པོ་དགེ་བའི་མཐུ། །འཇིག་རྟེན་འཇིག་རྟེན་འདས་པའི་ལེགས་སྤྱད་དང་། །ཡན་ལག་ཀུནྡའི་ཚལ་བརྒྱ་བརླན་པར་བགྱི། །གང་ཞིག་ཟབ་ཞིའི་ཡེ་ཤེས་ལ་རོལ་བས། །སྲིད་ཞིའི་མཐའ་བཅད་སྒྲིབ་པའི་གཉེན་པོ་རུ། །རྣམ་དཀར་འཁོར་ལོ་རྟག་ཏུ་བསྐོར་ལགས་གྲངས། །རྫོང་བྱེད་ཁམས་དང་འཚམས་པར་རྣ་བར་ཕོབ། །སྣ་ཚོགས་འཛིན་པའི་བློ་འདི་འགྲོ་འོང་མེད། །སྣང་ཡང་དེ་བཞིན་དུས་གསུམ་རྒྱུན་གྱིས་རྟག །དེ་ཕྱིར་མཁའ་ཁྱབ་མཁའ་ཡི་རྡོ་རྗེ་རུ། །བརྟན་པར་གྱུར་ཅིག་གཉིས་མེད་གཟིགས་པའི་རྒྱལ། །ཡོངས་བསྔོ་དྲི་མེད་ས་བོན་ཕྲ་རབ་ཀྱང་། །བྱང་ཆུབ་སཱ་ལ་ཆེན་པོའི་ཤིང་རྒྱས་པ། །བཟང་པོ་སྤྱོད་ལ་

― LT28_Page_0283 ―

^{[མ་དཔེ་གཟིགས་ན་འདིར་གནོན།]}

[Full Size]

དད་པའི་བློས་བཟུང་བས། །ལྟ་སྤྱོད་འབྲས་བཅས་ཡོངས་སུ་དག་པར་གསོལ། །གང་འདིར་མཁས་པའི་ཉིས་བསྐོར་རྒྱལ་རྟགས་བཞིས། །བདེན་དོན་རྟེན་འབྲེལ་འཕོ་མེད་ཐུགས་ཆུད་པས། །ཕྱོགས་དང་ཆ་ལས་མི་འཇིགས་སྤོབས་པ་ཡིས། །ཚངས་དབྱངས་ཡན་ལག་བཅུ་གཉིས་བསྙད་པར་ངེས། །གླིང་བཞིའི་དབུས་ན་རེ་ཁཱ་རི་དབང་བཞིན། །ཁོར་ཡུག་མུ་ཁྱུད་གཅིག་ཏུ་གང་གཞོལ་བ། །ས་ལ་མཁྱེན་ནུས་བརྩེ་བ་མཚུངས་མེད་པས། །སྣང་སེམས་ཨེ་ཝཾ་ཕྱག་རྒྱས་བསྡོམས་པར་མཚོན། །འདི་ལས་ནོངས་པ་བྱིས་བློའི་སྐྱོན་ཏེ་མཁས་པའི་གཡར་ལམ་བཟོད་བྱས་དང་། ལྷག་བསམ་དག་པས་བརྗོད་པ་རབ་གཙང་དེ་བྱུང་རྣམ་དཀར་དགེ་བའི་ཆུས། །རྨོངས་སྲེད་སྡང་བའི་དྲི་མ་ཀུན་བཀྲུས་རྫོགས་པའི་སངས་རྒྱས་ཀརྨ་པའི། །གསང་གསུམ་མི་ཟད་རྣམ་ཐར་རྒྱ་མཚོ་མཁའ་མཉམ་འགྲོ་ལ་རྫོགས་གྱུར་ཅིག །དེ་ལྟར་བདག་ཅག་གི་སྟོན་པ་རྫོགས་པའི་སངས་རྒྱས་དཔལ་ལྡན་ཀརྨ་པའི་ཞབས་ཀྱི་པདྨོར་ཐུན་མོང་གི་རྣམ་ཐར་རྒྱ་མཚོ་ནས་བླངས་པའི་བསྔགས་བརྗོད་ཆུ་ཐིགས་འདི་ནི། རྗེ་ཉིད་ཀྱི་རིགས་ཀྱི་དཔོན་དང་ཆོས་ཀྱི་སྲས་སུ་གྱུར་པ་སྐུ་བཅར་མཁན་ཆེན་བླ་མ་ཀརྨ་བསྟན་པ་རབ་རྒྱས་ནས་བཀྲ་ཤིས་པའི་སྐྱེས་དང་བཅས་བཀའ་ཡིས་བསྐུལ་མ་གནང་བ་བཞིན། །རང་གཞན་ཚོགས་རྫོགས་པའི་ཆེད་དུ་སྙོམ་ལས་པ་ཀརྨ་ངག་དབང་ཡོན་ཏན་རྒྱ་མཚོའམ། །པཎྜི་ཏ་ཟེ་ཆེན་པའི་ལུང་གིས་བརྡ་སྤྲོད་ཀུན་བཤད་ཀྱི་

― LT28_Page_0284 ―

^{[མ་དཔེ་གཟིགས་ན་འདིར་གནོན།]}

[Full Size]

བཏགས་མིང་དུ། །བློ་གཏེར་རབ་དགའ་ཚངས་བྱུང་སྙེམས་པའི་ལང་ཚོའི་ཟླ་སྣང་ཞེས་ཀྱང་བགྱི་བས། །དཔལ་ཀརྨའི་གདན་ས་ཆེན་པོར་ཆོ་འཕྲུལ་ཟླ་བའི་དུས་ཆེན་རྒྱལ་ཕུར་གྱི་འགྲུབ་སྦྱོར་དང་ལྡན་པར་བྲིས་ནས་གསོལ་བ་བཏབ་པའོ། །སརྦ་ཐཱ་ཀ་ལྱཱ་ནཾ་བྷ་བནྟུ།། །།

དཔལ་ཆོས་ཀྱི་རྒྱལ་པོ་དྷརྨཱ་ཀ་ར་ལ་མོས་གུས་ཀྱི་བདེན་གཏམ་དུ་བསྔགས་པ།

― LT28_Page_0285 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་ཆོས་ཀྱི་རྒྱལ་པོ་དྷརྨཱ་ཀ་ར་ལ་མོས་གུས་ཀྱི་བདེན་གཏམ་དུ་བསྔགས་པ་བཞུགས་སོ། །

― LT28_Page_0286 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱ་གར་སྐད་དུ། ཤྲངྡྷཱ་སདྱ་ཀ་ཐཱ་ནཱ་མ། །བོད་སྐད་དུ། མོས་གུས་གྱི་བདེན་གཏམ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཐམས་ཅད་མཁྱེན་པ་ཉག་གཅིག་གི། རྣམ་པར་ཐར་པའི་དཔལ་བཟུང་བ། །ཆོས་ཀྱི་འབྱུང་གནས་ཞབས་པད་ལ། །གུས་པས་ལན་བརྒྱར་བཏུད་པར་བགྱི། ༡ །བསམ་མི་ཁྱབ་པའི་རང་བཞིན་ཅན། །བསམ་པའི་སྤྱོད་ཡུལ་མ་ཡིན་ཀྱང་། །དད་པ་ཁོ་ནའི་རྗེས་འགྲོ་བས། །ཇི་ལྟར་ནུས་བཞིན་བསམ་པར་བྱ། ༢ །སངས་རྒྱས་བསྟན་པའི་ཉིན་བྱེད་ཀྱི། །རྣམ་ཐར་སྣང་བ་བརྡལ་བ་ལ། །མདྨོ་བཞིན་ཏུ་དད་པའི་བློ། །རྟག་ཏུ་རབ་ཏུ་རྒྱས་པར་འགྱུར། ༣ །

― LT28_Page_0287 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱོད་ཚུལ་ཁོ་ནར་བརྣག་པའི་ཡིད། །བསྐལ་པས་བྱིན་འདིས་གཞན་གྱི་ཚུལ། །རབ་དང་ཕུལ་དུ་བསྒྲགས་ན་ཡང་། །རི་མོར་བྲིས་པ་ཙམ་དུ་བྱས། ༤ །ཁྱོད་ལ་འདི་ཙམ་མོས་པ་དང་། །འདི་ཙམ་གུས་པ་དང་ལྡན་པས། །བདག་ནི་མྱུར་དུ་གཙོ་བོ་ཡི། །བྱང་ཆུབ་རོ་གཅིག་གདོན་མི་ཟ། ༥ །གཞན་གྱིས་གཞན་ལ་བསྔགས་པ་ཡི། །ཚིག་དེ་ཕལ་ཆེར་ངོ་སོའི་ཕྱིར། །ཡང་ན་ཕྱོགས་ཞེན་ཟོལ་བསྟོད་དམ། །བླུན་པོ་གྲགས་རྗེས་རྒྱུག་པར་ཟད། ༦ །བདག་གིས་ཁྱོད་ཚུལ་གང་གླེང་བ། །བསྟོད་པར་མ་ལགས་སྨད་མ་ལགས། །འོན་ཀྱང་རང་བཞིན་བརྗོད་པ་སྟེ། །དེ་ཡང་ཆ་ཤས་ཙམ་ལགས་གྲང་། ༧ །ཁྱོད་ལ་ཕྱོགས་འགོ་ཙམ་བསྔགས་པས། །

― LT28_Page_0288 ―

^{[མ་དཔེ་གཟིགས་ན་འདིར་གནོན།]}

[Full Size]

།།རྒྱལ་ཀུན་བསྔགས་པར་འགྱུར་བ་སྟེ། །རྒྱལ་རྣམས་རྣམ་ཐར་བརྗོད་པས་ཀྱང་། །ཁྱོད་ཚུལ་ཁོ་ནར་བརྗོད་པར་འགྱུར། ༨ །བླུན་པོ་རྣམས་ཀྱིས་སྦྱར་བའི་ཚིག །ལེགས་ལེགས་ལྟར་དུ་འདུག་ན་ཡང་། །ཆགས་སྡང་གཡོ་སྒྱུའི་དབང་སོང་བས། །གཡོན་ཅན་ཚོང་པའི་བསླུ་ཚིག་འདྲ། ༩ །འདི་ནི་དེ་ལྟར་མ་ཡིན་ཏེ། །ཁྱོད་ཚུལ་དྲང་པོའི་ས་བོན་ལ། །དྲང་པོའི་གཏམ་གྱི་སྦྱོར་བ་ཡིས། །འཇིག་རྟེན་གསུམ་ཡང་མགུ་བར་ནུས། ༡༠ །གང་གི་རྣམ་ཐར་རྒྱ་མཚོ་ལ། །བདག་གི་འདི་ཙམ་མ་བས་ཏེ། །དཔྱོད་ལྡན་ཀུན་དགའི་མེ་ཏོག་གི། །དོགས་པ་ཆལ་ཆིལ་གཡོ་བར་ཟད། ༡༡ །དེ་ལྟ་མོད་ཀྱི་ངང་ཚུལ་དེའི། །དཔལ་ལ་མུ་མཐའ་མ་མཆིས་པས། །གཏམ་གྱི་ཟླ་བས་བློ་གྲོས་ཁ། །གསར་པའང་མང་དུ་འབྱེད་པར་འགྱུར། ༡༢ །གཏམ་ལ་འཇིག་རྟེན་འདི་བརྟེན་ནས། །རྨོངས་པ་མ་ལུས་བསལ་དེ་ཡིས། །ལེགས་ཉེས་གནས་ཀུན་མཐོང་ནས་དེས། །སྲིད་དང་ཞི་བའི་དཔལ་ཡང་མཐོང་། ༡༣ །ཁྱོད་ཀྱི་རྣམ་པར་ཐར་པ་ནི། །རྒྱལ་བ་ཀུན་དང་རོ་གཅིག་ཕྱིར། །མཐའ་དག་གླེང་བས་རྟོགས་མིན་ཀྱང་། །མཐའ་ཡས་བརྗོད་པས་དེ་རྟོགས་འགྱུར། ༡༤ །ཟབ་ཅིང་ཞི་བ་སྤྲོས་བྲལ་བའི། །དབྱིངས་འདི་སྔོན་ཆད་མ་ངེས་པས། །ཁྱོད་ཚུལ་ཕྱོགས་རེ་ཙམ་བཟུང་ནས། །ཆུང་ངུའི་

― LT28_Page_0289 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་ལའང་ངོ་མཚར་བྱས། ༡༥ །ད་ནི་ཕྱོགས་ཙམ་གོ་བ་ཡིས། །ཁྱོད་ཞལ་མ་མཐོང་ཡི་མུག་དང་། །ཁྱོད་ཚུལ་མ་འཇལ་ནེམ་ནུར་སོགས། །གཅིག་ཅར་འཇོམས་པ་བཞིན་ཏུ་གྱུར། ༡༦ །འདི་ན་འགའ་ཞིག་མཆིས་རྣམས་ཀྱིས། །ཁྱོད་ལ་འཕགས་པ་ཙམ་དུ་མཐོང་། །བདག་ནི་མོས་པའི་ཁྱད་པར་གྱིས། །ཁྱོད་ལ་བསམ་མི་ཁྱབ་པར་མཐོང་། ༡༧ །བསམ་མི་ཁྱབ་ལ་མཐོང་མེད་པས། །དོན་ཏུ་ཅི་ཡང་མ་མཐོང་མོད། །མ་མཐོང་བ་ཡི་གནས་ལུགས་དེ། །མཐོང་བ་རྣམས་ཀྱི་མཆོག་ཏུ་གསུངས། ༡༨ །མཁའ་མཐའ་འདོམ་གྱིས་གཏུགས་པ་མིན། །ཁྱོད་ཚུལ་དེ་བཞིན་བསམ་པས་མིན། །རྒྱ་མཚོ་ཧུབ་ཀྱིས་ཟད་པ་མིན། །ཁྱོད་ཚུལ་དེ་བཞིན་བརྗོད་པ་མིན། ༡༩ །དེ་ལྟ་ཉིད་ནའང་བླུན་པོ་འགས། །འགའ་ཡང་བརྗོད་བྱར་མེད་དོ་ལོ། །མཚན་མའི་ཚུལ་ཡང་མི་ཤེས་ན། །མཚན་མ་མེད་པ་ཇི་ལྟར་རྟོགས། ༢༠ །ཟབ་མོ་འདི་ཚུལ་མི་ཤེས་པའི། །མི་མཁས་བྱིས་པའི་རང་བཞིན་ནི། །སྣང་དང་ཡུལ་གྱི་ཚིམས་པ་སྟེ། །དེ་ལ་ཚིམས་པ་བསྐྱེད་སླད་དུ། ༢༡ །ཉི་ཚེ་མིན་ཀྱང་ཉི་ཚེའི་གཟུགས། །ཕྱོགས་རེར་མིན་ཀྱང་ཕྱོགས་གཅིག་གི། །མཛད་པའི་རློ་རྩེད་གང་བསྒྱུར་བ། །བདག་གི་བརྗོད་པའང་དེ་བཞིན་ནོ། ༢༢ །ཀྱེ་མ་ཁྱོད་ཚུལ་ཅི་ཡང་སྣང་། །ཆོས་ཀྱི་དབྱིངས་

― LT28_Page_0290 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་ཅི་ཡང་སྲིད། །ནམ་མཁའི་ཁོང་འདིར་ཅི་ཡང་ཤོང་། །རྣམ་པར་དག་པའི་མཐུ་ལ་ལྟོས། ༢༣ །ནམ་མཁར་སྤྲིན་གྱིས་གོས་པ་མེད། །རྦ་རླབས་རྒྱ་མཚོར་རོ་གཅིག་གྱུར། །དེ་བཞིན་ཁྱོད་ཐུགས་ཆོས་ཀྱི་དབྱིངས། །མཚན་མས་གོས་མིན་རོ་གཅིག་གྱུར། ༢༤ །གང་ལ་མཚན་མ་མེད་པ་ནི། །ཆོས་རྣམས་ཀུན་གྱི་གཞི་ཡིན་ཏེ། །མེད་བཞིན་སྣ་ཚོགས་སྣང་བ་ཡང་། །ཆོས་རྣམས་ཀུན་གྱི་གཞི་ཡིན་ནོ། ༢༥ །མཚན་མ་མེད་པ་ཆོས་སྐུ་ཏེ། །མཚན་མ་ཡང་ནི་ཆོས་ཀྱི་སྐུ། །ཁྱོད་ཀྱི་རང་བཞིན་དེ་ལྟ་བུ། །ངོ་བོ་ཡང་ནི་དེ་ཉིད་ལགས། ༢༦ །ཆོས་ཀྱི་དབྱིངས་ལ་ཚད་མེད་པས། །སྤྲུལ་པ་ལ་ཡང་ཚད་གཟུང་མེད། །སེམས་ཅན་གངྒཱའི་བྱེ་སྙེད་ལ། །གང་འདུལ་རིན་ཆེན་གསུམ་རང་བཞིན། ༢༧ ཁྱད་པར་པདྨོ་སྣང་བ་འདིར། །སྒྲོན་མེ་སྟོང་ལས་ཤཱཀྱ་ཡི། །སྲས་ཀྱི་ཆོས་ཚུལ་མཐར་ཐུག་ཅིང་། །འོ་མ་ཡི་ནི་མར་གྱུར་པ། ༢༨ །བྱང་གི་ཕྱོགས་ཀྱི་འགྲོ་བློའི་ཆུ། །ལེགས་བྱས་ཀེ་ཏ་ཀས་བགྲུངས་པས། །སྔོན་མེད་ཀརྨ་བཀའ་བརྒྱུད་ཀྱི། །ཟླ་སྣང་ཤར་ནས་རིང་ཞིག་ལོན། ༢༩ །འོན་ཀྱང་རེ་ཞིག་ཀརྨ་པའི། །བསྟན་པ་མེ་ཤིའི་དུད་པའམ། །རྫིང་བུ་སྐམ་པའི་ཡུར་ཆུ་བཞིན། །གཟུགས་བརྙན་ཙམ་ཡང་མི་གསལ་བས། ༣༠ །འཇིག་རྟེན་གསུམ་པོ་མཐའ་དག་འདི། །མིག་བྲལ་སྨག་ལ་འཕྱན་པའམ། །ཕ་མས་

― LT28_Page_0291 ―

^{[མ་དཔེ་གཟིགས་ན་འདིར་གནོན།]}

[Full Size]

བཏང་བའི་དྭ་ཕྲུག་བཞིན། །ཉམ་ཐག་དགོན་པར་འཕྱན་པའི་དུས། ༣༡ །གང་ཁྱོད་བསམས་བཞིན་སྲིད་པ་ཉེར་བླངས་ནས། །ས་ཡི་ཁྱོན་འདིར་སངས་རྒྱས་མཛད་པ་ཡིས། །དོན་ཆེན་བསྒྲུབ་ཕྱིར་ངེས་དོན་བསྟན་འདིར་ཡང་། །འཆི་ཀའི་སྲོག་གི་མཐུད་མ་ལྟ་བུར་གྱུར། ༣༢ །འཕགས་རྣམས་གང་དུ་སྐྱེས་ཀྱང་ཐབས་མཁས་ཀྱི། །བྱ་བས་འགྲོ་ཕན་སྒྲུབ་པ་ཆོས་ཉིད་དེ། །ཟླ་བའི་ཀུན་དགའ་ཉི་མའི་རབ་གསལ་དང་། །ནོར་བུའི་འདོད་སྟེར་དག་ཀྱང་ལྷན་སྐྱེས་ཡིན། ༣༣ །གཞོན་ནུར་རོལ་པའི་སྐྱེད་ཚལ་ཉམས་དགའ་བར། །དམ་པའི་རང་བཞིན་མེ་ཏོག་ཐོག་མ་ནས། །དགོད་པའི་ཡ་མཚན་དེ་ལ་དེ་མ་ཐག །དཔྱོད་ལྡན་ཡི་ག་དབང་མེད་འགུགས་པར་བྱས། ༣༤ །རང་གིས་བརྙེས་པ་དེ་ལ་གཞན་འཁྲིད་ཕྱིར། །ཐབས་མཁས་ཉིད་ཀྱིས་སྤྲོས་བཅས་མང་སྤྱོད་པ། །འདིས་ནི་རྒྱལ་བའི་སྲས་ཀྱིས་མི་བསླབ་པའི། །དངོས་འགའ་ཡོད་པ་མིན་ཞེས་དཔེ་ཚུལ་རྟོགས། ༣༥ །གཏན་གྱི་ཕན་བདེ་རྒྱལ་བསྟན་ལས་འབྱུང་ཞིང་། །དེ་ཉིད་གང་ཟག་རྒྱུད་ལ་གནས་ཤེས་བྱ། །སླད་ནས་བསྡམ་བྱའི་ཟག་པ་མ་མཆིས་ཀྱང་། །བསྟན་འཛིན་ཉིད་ཕྱིར་དེ་ལྟའི་བརྟུལ་ཞུགས་བླངས། ༣༦ །བག་མེད་པ་སོགས་ལྟུང་བའི་སྒོ་བཅད་ནས། །ངེས་པར་འབྱུང་བ་ཁོ་ནའི་རྗེས་སོང་བ། །འཕགས་པ་དགྱེས་པའི་ཚུལ་ཁྲིམས་ཉི་འོད་ཀྱིས་

― LT28_Page_0292 ―

^{[མ་དཔེ་གཟིགས་ན་འདིར་གནོན།]}

[Full Size]

བཙུན་པར་རློམས་རྣམས་མོག་མོག་པོ་རུ་གྱུར། ༣༧ །ཚུལ་ཁྲིམས་ལྡན་པ་ཆོས་ཀྱི་ས་གཞི་སྟེ། །བསྟན་པའི་གྲོང་ཁྱེར་ཉམས་དགའ་འདི་ལ་བསྟེན། །ཚུལ་ཁྲིམས་ལྡན་པ་སྨན་གྱི་ཆུ་ཀླུང་སྟེ། །འགྲོ་བའི་ལུས་འཚོ་མཆོག་ཏུ་གསོ་བར་བྱེད། ༣༨ །བྱང་ཆུབ་འཁོར་བ་ལས་གྲོལ་མྱང་འདས་ཏེ། །ཚུལ་འཆལ་ཞི་ལས་ཕྱིར་ཕྱོགས་སྲིད་པར་འཁོར། །དེ་ཕྱིར་དེ་མེད་དེ་ལ་དེ་མི་སྐྱེ། །དེ་ཉིད་སྤངས་པས་དམ་ཆོས་ཀུན་སྤང་འགྱུར། ༣༩ །མིག་མེད་ལང་ཚོ་རྒྱས་པ་སྐྱེས་བུ་ཡི། །བྱ་བ་མཐའ་དག་རྫོགས་པར་ནུས་མིན་ལྟར། །རྩ་བ་འདི་ཉིད་མེད་ལ་རྣམ་བྱང་གི། ལོ་འདབ་འབྲས་བཅས་འབྱུང་མིན་འདི་གཟིགས་ནས། ༤༠ །ཕྲ་སྤྱོད་ཁོ་ན་ཙམ་མིན་ལྷག་སེམས་ཀྱི། །གཞན་དབང་ནང་གི་ཟབ་མོའི་འདུལ་བ་ཡིས། །ཁྱོད་ཀྱི་རྗེས་འབྲང་བཅས་ལ་གསུང་རབ་དང་། །འགལ་བའི་ཉེས་པས་འགྱོད་ལ་སྦྱར་བ་མེད། ༤༡ །རྩྭ་ཆུ་ལོ་མ་ཙམ་གྱིས་མི་ཞུམས་ཤིང་། །ལུས་ངན་འབྱོར་པ་ཡིས་ཀྱང་ཁེངས་མིན་པར། །འདོད་དང་འདུ་འཛི་དག་ལ་ཆོག་ཤེས་པའི། །འཕགས་པའི་ནོར་གྱིས་འཛད་པ་མེད་པར་གཏམས། ༤༢ །རྣམ་རིག་བྱེད་མིན་གཟུགས་ཀྱིས་རྣམ་རིག་གི། །ཉེས་པ་འདུལ་བ་སྟོན་བསྟན་གཉིས་ཆར་གྱི། །བདུད་རྩིས་རབ་བརླན་བསྟན་པའི་ལུས་ཟུངས་ཀྱང་། །རེ་ཞིག་དར་ལ་བབ་པའི་ངང་ཚུལ་འཛིན། ༤༣ །འགྲོ་བའི་

― LT28_Page_0293 ―

^{[མ་དཔེ་གཟིགས་ན་འདིར་གནོན།]}

[Full Size]

དྲི་མ་ཆགས་པ་འདྲ་བ་མེད། །གཞན་ལ་གནོད་པ་ཕྲག་དོག་འདྲ་བ་མེད། །ཕུང་བྱེད་ང་རྒྱལ་དང་མཚུངས་ཡོད་མིན་ཞེས། །འདི་འདྲ་རྗེས་སུ་བསྟན་ནས་འགྲོ་མང་བཏུལ། ༤༤ །ཤེས་རབ་རྒྱས་བྱེད་པ་ནི་ཐོས་པ་སྟེ། །དེ་ལས་སྒོམ་པ་ཡང་ནི་རབ་ཏུ་འབྱུང་། །དེ་ལས་བྱང་ཆུབ་བླ་ན་མེད་འཐོབ་ཅེས། །འདི་ལ་ངེས་པ་ཐུན་མིན་འབྲང་བར་མཛད། ༤༥ །ཤེས་རབ་དང་མཉམ་མིག་མེད་ལ། །རྨོངས་པ་དང་མཉམ་མུན་པ་མེད། །ཐོས་དང་མཉམ་པའི་ནོར་མེད་ལ། །བརྩོན་དང་མཉམ་པའི་བཞོན་པ་མེད། ༤༦ །ཐོས་མང་གང་དུ་འགྲོ་འགྱུར་བ། །གྲགས་པའི་འོད་དང་ལྷན་ཅིག་ཏུ། །འཇིག་རྟེན་ཉེ་བར་གསལ་འགྱུར་གྱི། །རྨོངས་པའི་ཚུལ་ནི་དེ་མ་ཡིན། ༤༧ །ཐོས་དང་བསམ་དང་སྒོམ་པ་དག །རྨོངས་པས་རྨོངས་པ་ཐོབ་འགྱུར་ལ། །ཤེས་རབ་ཀྱིས་ནི་རང་ནོར་བཞིན། །མ་འཁྲུལ་བ་དེ་ཐོབ་པར་འགྱུར། ༤༨ །དེ་ཕྱིར་དེ་ལྟའི་ཚུལ་ཉིད་ལ། །རྟག་དད་གུས་པའི་སྦྱོར་བ་ཡིས། །རང་ཉིད་ཀུན་མཁྱེན་ལ་ཞུགས་ཏེ། །ཕྱིས་ནས་འཇིག་རྟེན་རབ་གསལ་བྱས། ༤༩ །བསོད་ནམས་ཆེན་པོའི་རིན་གྱིས་ནི། །རྣམ་པར་དཔྱོད་པའི་གྲུ་ཉོས་ལ། །ཤེས་བྱའི་ཕ་མཐར་གཤེགས་ཟིན་པས། །རིགས་པའི་དབྱིག་ནི་ཅི་ཡང་སྦྱིན། ༥༠ །རྒྱལ་བའི་སྐུ་བརྙན་སྣ་ཚོགས་དང་། །རྒྱ་བོད་ཡི་གེའི་རྣམ་འགྱུར་དང་། །དཀྱིལ་འཁོར་གྱི་ནི་

― LT28_Page_0294 ―

^{[མ་དཔེ་གཟིགས་ན་འདིར་གནོན།]}

[Full Size]

རིམ་པ་དང་། །གར་སོགས་ལུས་ལ་གཏོགས་པའི་བཟོ། ༥༡ །སྙན་བརྗིད་རོལ་མོ་འབུད་བཀྲོལ་དང་། །དྲུག་ལྡན་དབྱངས་ཀྱི་འགྱུར་ཁུག་དང་། །འཆད་དང་རྩོད་དང་རྩོམ་པ་སོགས། །ངག་གི་ལས་སུ་གཏོགས་པའི་བཟོ། ༥༢ །ས་གཞི་རིན་ཆེན་རྟ་བརྟགས་སོགས། །རིག་པའི་གནས་ཆེན་བཅོ་བརྒྱད་དང་། །ཐོས་དང་བསམ་དང་སྒོམ་པ་སྟེ། །ཡིད་ལ་གཏོགས་སོ་ཅོག་གི་བཟོ། ༥༣ །མདོར་ན་བཟོ་ཡི་རིག་བྱེད་ལ། །ལས་སྣ་ཚོགས་པ་སོགས་ཀྱིས་ཀྱང་། །བརྒྱ་ཡི་ཆར་ཡང་མི་ཕོད་པའི། །ངོ་མཚར་ཕྲེང་བས་མགུལ་པ་མཛེས། ༥༤ །གཞུང་ལུགས་རྒྱ་མཚོར་མ་རྙོགས་ནས། །ཟབ་རློམས་ཁྲོན་པ་ལོག་སྤྱོད་ཀྱིས། །ཉམ་ཆུང་སྲོག་དབུགས་རབ་ལེན་པའི། །རུ་སྦལ་མི་ཟན་དེ་མིན་པར། ༥༥ །གསོ་བྱ་གསོ་བྱེད་གསོ་ཚུལ་སོགས། །ཆོ་གའི་ཡན་ལག་ཀུན་མཁས་པས། །རྒྱུ་དྲུག་ཚོགས་པའི་སློབ་མར་བཅས། །འགྲོ་བའི་སྲོག་འཚོ་གཅིག་པུར་གྱུར། ༥༦ །རྒྱུ་ནི་ཉེས་པ་གསུམ་ལས་ཏེ། །རྐྱེན་ནི་འབྱུང་བ་བཞི་ཡིས་བསྐྱེད། །དེ་ཡང་རྐྱང་ལྡན་གང་འདུས་པ། །རྣམ་དཔྱོད་དུ་མས་སོ་སོར་དབྱེ། །སྨན་ལ་རོ་ནུས་ཞུ་རྗེས་དང་། །དཔྱད་ལ་དྲག་དང་འཇམ་བཙལ་སོགས། །འབྱུང་བཞིའི་བསྡེབ་པའི་གཉེན་ལ་ཡང་། །དམན་ལྷག་ལོག་པའི་ཕྱག་མི་བརྐྱང་། ༥༨ །དེ་བཞིན་རྣམ་གྱུར་གསོ་

― LT28_Page_0295 ―

^{[མ་དཔེ་གཟིགས་ན་འདིར་གནོན།]}

[Full Size]

བ་དང་། །རྣམ་པར་མ་གྱུར་རིང་འཚོ་བའི། །སྨན་དཔྱད་ཟས་སྤྱོད་ཐབས་གང་ཡང་། །མ་རྨོངས་སྨན་པའི་རྒྱལ་པོ་སྟེ། ༥༩ །དེ་སླད་སྔོན་གྱི་དྲང་སྲོང་གིས། །མེ་ཏོག་རྙིད་པ་ཆུས་བྲན་བཞིན། །འདི་བསྟན་ཁོལ་བུར་གསལ་འགྱུར་ཞེས། །དེང་སང་ཁྱོད་ལ་བསྙད་པ་འདྲ། ༦༠ །བཀླགས་དང་མ་བཀླགས་བྱིངས་ཀྱི་མཐར། །རང་དོན་རྒྱུ་དངོས་ལས་དག་ལ། །རྐྱེན་ལས་མིང་གི་རང་བཞིན་ཀྱང་། །ཕོ་མོ་མ་ནིང་དུ་གྲུབ་པ། ༦༡ །དེ་ལ་བྱེད་དངོས་ལས་གསུམ་ཕྱིར། །སུཔྲ་དང་ཁམས་ལ་ཏིང་རྣམས་ཀྱིས། །ལྟོས་དང་ལྟོས་མིན་ཚིག་གི་མཐའ། །གཅིག་ལའང་རྣམ་འགྱུར་དུ་མ་སྟེ། ༦༢ །གཞུང་དོན་སེང་གེའི་མིག་གིས་བལྟ། །བརྗོད་པ་ཡང་བརྗོད་མི་བྱ་ཞིང་། །མ་བརྗོད་པ་ནི་སླར་ཡང་བརྗོད། །སྟོབས་མཚུངས་འགལ་སོགས་དབྱེར་ཕྱེད་པས། ༦༣ །ཚིག་གི་དྲིན་གྱིས་དོན་གསལ་བ། །སྒྲ་ཡི་རིག་པ་རྒྱ་མཚོ་ཙམ། །འཐུངས་ཕྱིར་གཞུང་ལུགས་གང་ལ་ཡང་། །འཁྲུལ་པའི་དྲི་མ་གཏན་ནས་ཟད། ༦༤ །གནའ་བོའི་ལོ་ཙཱས་གང་བསྒྱུར་བ། །དེ་དེར་བཏགས་པ་ཙམ་ཤེས་ཀྱི། །ཁམས་དང་རྐྱེན་ནུས་སོ་སོར་གྱིས། །གང་འགྱུར་ཅི་བྱེད་མ་འཚལ་བཞིན། ༦༥ །གཞུང་ལས་བརྒལ་བའི་སྒྲ་མཁན་གྱི། །ཚང་ཚིང་ལྗོངས་འདིར་དཀྲིགས་པ་ལ། །ཁྱོད་ཀྱི་རྣམ་དཔྱོད་མེ་ཆེན་གྱིས། །སྔར་ཉིད་ལྷག་མེད་ཐལ་བྱས་ནས། ༦༦ །ཕྱིས་

― LT28_Page_0296 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་ལེགས་བཤད་ཆར་ཕབ་པའང་། །བྱིངས་ནས་བུད་མེད་ཚིག་སྡུད་ཕྲད། །དེ་ཕན་མཐའ་དཔྱོད་བཅས་འཇལ་བས། །སྐད་གཉིས་ཀྱི་ཡང་སྨྲ་བ་བྱིན། ༦༧ །འདི་ན་ཆགས་སྡང་འཁོར་ལོ་ཡིས། །རྟོག་གེའི་ཚིག་སྐམ་ལ་ཞེན་ནས། །འཐབ་རྩོད་ཁོ་ནས་ཚད་མའི་དོན། །གཏན་ལ་འགའ་ཡང་ཕེབ་མ་གྱུར། ༦༨ །ཚད་མས་ཚད་མ་མེད་པའི་དོན། །བདེ་བླག་ཉིད་དུ་ཅིས་མི་དགོས། །གང་ལའང་མངོན་པར་ཞེན་ཡོད་ན། །དེ་དག་བསྟན་འདིར་མུ་སྟེགས་ཡིན། ༦༩ །བྱར་ཡོད་བྱེད་པོ་ཅི་སྟེ་མེད། །དེ་ཡོད་དེ་འགོག་འགྱུར་བས་ཕམ། །འཇིག་རྟེན་ན་ནི་རང་ཚིག་གིས། །འགྱུར་གྱིས་གཞན་མིན་མ་གསུངས་སམ། ༧༠ །ཕན་མཛད་ཚད་མར་གྱུར་འདིས་ནི། །འདི་ལྟར་ཚད་མིན་འགའ་མེད་ལ། །ཚད་མ་ཞེས་བྱ་འགའ་ཡང་མེད། །འདི་ཤེས་དེ་ཉིད་མཐོང་བར་བསྟན། ༧༡ །དམ་བཅའ་སྒྲུབ་བྱེད་ལྟར་སྣང་མེད། །དེ་ཕྱིར་སུན་འབྱིན་བྱར་མེད་པས། །ཚིག་གི་བུད་ཤིང་ཅི་བསྣན་ཀྱང་། །ལུང་རིག་བསྲེ་གཟའི་རྒྱུ་བཞིན་གྱུར། ༧༢ །པི་ཝཾ་སྒྲ་ནི་ཚོགས་ལས་བཞིན། །ཟབ་མོ་སྟོང་པ་ཉིད་མཐོང་བ། །དགེ་རྩ་དུ་མའི་བདག་ཉིད་དེ། །དེས་ཁྱོད་ཚད་མ་མེད་པར་ལྟ། ༧༣ །རྨད་བྱུང་སྤོབས་པའི་སྤྲིན་ཆེན་ལས། །གཏན་ཚིགས་གཅིག་གི་མཚོན་ལྷུང་བས། །ལོག་པར་ཞེན་པའི་གཏན་ཚིགས་དང་། །དམ་བཅའི་ས་སྐྱེས་གཅིག་ཆར་

― LT28_Page_0297 ―

^{[མ་དཔེ་གཟིགས་ན་འདིར་གནོན།]}

[Full Size]

འཇོམས། ༧༤ །རྒོལ་བའི་རྒྱུ་ཟད་ཁྱུ་མཆོག་ནི། །རླབས་པོ་ཆེ་རུ་དམ་བཅས་ཤིང་། །ཆོས་མཐུན་སྨྲ་བའི་འཁོར་གྱི་དབུས། །མི་འཇིགས་སེང་གེའི་སྒྲ་ཆེན་བསྒྲགས། ༧༥ །ཕྱོགས་དང་རྩོད་པ་མ་མཆིས་པས། །དེ་ལ་གཞན་ཕྱོགས་ག་ལ་ཡོད། །མངོན་སུམ་ལ་སོགས་དོན་འགའ་ཡང་། །མ་དམིགས་ཀླན་ཀ་ཡོད་མིན་ཀྱང་། ༧༦ །མུར་འདུག་བྱེ་མདོ་རྣམ་རིག་དང་། །དབུ་མའི་གྲུབ་མཐའ་ཀུན་མཁྱེན་པས། །སྨྲ་ལ་ཐལ་འགྱུར་ལྗགས་རྐྱོང་ཞིང་། །བསླབ་ལ་ཕྲ་བའི་དབུ་མ་འཆད། ༧༧ །དེ་བས་ཁྱོད་ཉིད་མི་གནས་ཀྱང་། །འདིར་ནི་ཡང་དག་ལམ་གསལ་བས། །ཇི་ལྟར་འདས་ཀྱང་སྡིག་སེལ་བ། །མཁའ་ལྡིང་མཆོད་སྡོང་བཞིན་ཏུ་གྱུར། ༧༨ །གཞི་དང་རྒྱུ་མཚན་མ་མཆིས་པ། །འདོད་རྒྱལ་ཐོག་མའི་མིང་དེ་དང་། །རྗེས་གྲུབ་ཉིད་ཀྱི་མིང་འདོད་རྒྱལ། །དོན་ལྡན་གཉིས་སམ་རྣམ་དབྱེ་གཞན། ༧༩ །ཐོག་མ་རྗེས་གྲུབ་དོན་ཡོད་པའི། །དངོས་མིང་དང་ནི་བཏགས་མིང་ལ། །འདྲ་འབྲེལ་གཉིས་བཟློག་རྒྱུ་མཚན་ཅན། །འབྲེལ་ལ་རྒྱུ་མིང་འབྲས་བཏགས་དང་། ༨༠ །རྒྱུ་འབྲས་གོ་བཟློག་ཚོགས་པའི་མིང་། །ཡ་གྱལ་ལ་བཏགས་དེ་བཟློག་སོགས། །མངོན་བརྗོད་དད་པའི་ཤིང་རྟ་ཡིས། །འདེགས་ཚེ་གསེར་མངལ་ཅན་དུ་དྲན། ༨༡ །དགོས་པ་བརྒྱད་ཕྱིར་དོན་གཅིག་མིང་། །མང་དུ་བསྙད་

― LT28_Page_0298 ―

^{[མ་དཔེ་གཟིགས་ན་འདིར་གནོན།]}

[Full Size]

དང་མིང་གཅིག་དོན། །དུ་མར་འཇུག་སོགས་ཚུལ་འདི་ལ། །གཟིགས་པའི་སྤྱན་དཀྱུས་ཕྲ་ཞིང་རིང་། ༨༢ །རྒྱན་གྱི་བསྟན་བཅོས་མཐའ་དག་ལ། །ཆགས་ཐོགས་མེད་པའི་རྩལ་མངའ་བས། །ངག་གི་གླིང་བུ་གང་ལ་ཡང་། །ཉམས་འགྱུར་དུ་མ་ཅན་དུ་བསྒྱུར། ༨༣ །ལུས་གང་བཅད་ལྷུག་སྤེལ་མ་དང་། །ཙམྤཱུའི་རྒྱན་གྱིས་མཛེས་དེ་ཡང་། །གྲོལ་བ་དང་ནི་རིགས་དང་མཛོད། །འདུས་པ་ཞེས་བྱ་དེ་རྣམ་བཞི། ༨༤ །ཁྱད་པར་རྒྱན་གསུམ་ལམ་ལས་དྲངས། །ས་རྒས་བཅིངས་པ་སྙན་ངག་ཆེ། །སྨྲ་བའི་ངོ་མཚར་འདི་ཀས་ཀྱང་། །ཚངས་སྲས་མགྲིན་པར་རྩེན་པར་རྟོགས། ༨༥ །རང་བཞིན་བརྗོད་ན་གསལ་ལ་འཐུས། །འཁྱོགས་པོར་བརྗོད་ན་སྙན་འགྱུར་རྫོགས། །གང་ལའང་ཟློས་སོགས་སྐྱོན་སྤངས་པ། །འདི་འདྲའི་བརྗོད་པ་རྣམ་པར་དག ༨༧ །ཡི་གེ་གཅིག་ནས་རྒྱུན་ཆགས་པར། །རྐང་བཞིར་ཚིགས་སུ་བཅད་པ་ཡི། །སྡེབ་སྦྱོར་སྙན་ངག་རྒྱ་མཚོས་ནི། །ཟབ་མོ་བརྒལ་འདོད་རྣམས་ཀྱི་གྲུ། ༨༨ །མཉམ་དང་མི་མཉམ་ཕྱེད་མཉམ་གི། བྲྀ་ཏྟ་ངོ་མཚར་རྟོག་བྱེད་བཅས། །འཕགས་མ་དམར་སེར་བེ་ཏཱ་ལིའི། །ཚུལ་ཅན་ཛཱ་ཏིའི་ཕྲེང་བ་ལ། ༨༩ །སྒྲ་དོན་གྲོང་པ་མ་ཞུགས་ཤིང་། །ལྕི་ཡང་དང་ནི་སྡོད་པ་དང་། །མང་དང་ཉུང་སོགས་སྐྱོན་བྲལ་བར། །བྱ་སླ་བྱ་དཀའི་པྲསྟཱ་ར། ༩༠ །འགོད་ལ་ལེགས་སྦྱར་ཡན་ལག་ཚུན། །མ་མཉམ་

― LT28_Page_0299 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་འགྱུར་ངོ་མཚར་བ། །མཐོང་ན་སྲིན་བུའི་རི་མོ་གཞན། །རང་ཉིད་ངལ་བ་སྒྲུབ་པར་ཟད། ༩༡ །སཾ་སྐྲྀ་ཏ་དང་པྲ་ཀྲྀ་ཏ། །ཨ་བ་བྷྲཾ་ཤ་པི་ཤཱ་ཙི། །ནཻ་པཱ་ལ་དང་ཀ་སྨཱི་ར། །མ་ཧཱ་ཙི་ན་མོ་གོལ་སོགས། ༩༢ །སྐད་རིགས་རྣམས་དང་ཡུལ་གྱི་ཆོས། །སོ་སོའི་ཚུལ་ལ་མ་རྨོངས་པས། །འཕགས་བོད་ལི་ཡི་ཡུལ་ལྗོངས་སོགས། །གང་དུ་ཞབས་པད་བཀོད་པའམ། ༩༣ །ལེགས་བྱས་མིག་དང་རྣ་བ་ཡིས། །ཁྱོད་ཞལ་མཐོང་དང་གསུང་ཐོས་ན། །མཐོང་གྲོལ་ཆེན་པོའི་ཟློས་གར་གྱི། །གང་འདུལ་ཡིད་ཀྱི་བདུད་རྩིར་སྒྲུབ། ༩༤ །ནང་གི་ཁམས་དང་དུས་སྦྱོར་གྱིས། །ཕྱི་ན་མངོན་སུམ་ལྟར་སྣང་བ། །སྦས་པའི་དེ་ཉིད་དབང་འབྱོར་ཕྱིར། །མ་བསླབ་པར་ཡང་བདེ་བླག་བྱས། ༩༥ །གནམ་སའི་གོ་ལར་རྐང་པའི་ཆ། །ཉི་ཁྱིམ་ཚེས་ཞག་ཏུ་བགྲོད་པའི། །དབུགས་ནས་དབྱུག་གུ་དུས་སྦྱོར་བར། །ཆ་བཅས་སྐར་འབྱུང་ཚུལ་གྱིས་ནི། ༩༦ །འདི་ན་ལུང་དུ་སྟོན་པ་ལ། །ཡོ་གལ་མེད་པའི་ཐིག་ཉིད་དེ། །འཕོ་བས་སྟོང་པར་འཇུག་པ་སོགས། །ཞིབ་མོའང་འཁྲུལ་མེད་ཞར་ལས་གྲུབ། ༩༧ །དེ་ཕྱིར་བྱེད་གྲུབ་རྩིས་རིགས་དང་། །དབྱངས་འཆར་རྒྱ་ནག་སྤོར་ཐང་གི། །གསེར་རྩིས་ཁབ་སོ་ཟངས་ཀྱམ་སོགས། །གང་ལའང་མཁྱེན་པའི་སྣང་བ་རྒྱས། ༩༨ །ལུང་ནི་མིང་ཚིག་ཚོགས་པའི་ཆོས། །དེ་སྨྲ་བྱེད་པས་དེ་རྟོགས་འགྱུར། །

― LT28_Page_0300 ―

^{[མ་དཔེ་གཟིགས་ན་འདིར་གནོན།]}

[Full Size]

མིང་ཚིག་བརྗོད་པ་ཐམས་ཅད་ཀྱང་། །ཡི་གེའི་སྦྱོར་བས་རབ་གསལ་བྱེད། ༩༩ །སྟོང་ཆེན་ཐིག་ལེ་སྟོང་པ་ཡི། །ཡི་གེའི་དེ་ཉིད་ཁོང་ཆུད་ཕྱིར། །སྒྲ་དང་སྡེབ་སྦྱོར་ནས་བཤད་པའི། །སྦྱོར་བ་ཉིད་ལ་མཚུངས་པ་མེད། ༡༠༠ །ལྗོངས་འདིར་ཐུ་མིའི་བསྟན་བཅོས་བཅས། །ཟླ་བ་བཞིན་ཏུ་སྣང་བྱས་པ། །སླར་ཡང་ཁྱོད་ཀྱི་ལེགས་བཤད་ཀྱིས། །ཚུལ་དེ་ཉིད་བཞིན་སྣང་བར་བྱས། ༡༠༡ །ཆོས་ཀྱི་མ་མོའི་མཛོད་དང་ཕར་ཕྱིན་སོགས། །ལེགས་པར་གསུངས་དང་དེའི་དགོངས་འགྲེལ་ལ། །ཆོས་རབ་རྣམ་པར་འབྱེད་པའི་ཤེས་རབ་ཀྱིས། །སྤོབས་པའི་ཆུ་གཏེར་རི་བོའི་ཁོངས་ན་འཕྱུར། ༡༠༢ །མདོར་ན་གཞུང་ལུགས་ཆེན་པོ་གང་ལ་ཡང་། །ཐོག་མར་དེ་སྟོན་བྱེད་དང་མཚུངས་པར་བསྟན། །དེ་བས་ཀུན་མཁྱེན་ཆོས་ཀྱི་ཉི་མ་ཡི། །མཁྱེན་རབ་སྣང་བར་མུ་མཐའ་ཡོད་པ་མིན། ༡༠༣ །དེ་སླད་འཕགས་བོད་ཚིན་དུ་གྲགས་པ་ཡི། །ཡི་གེ་གསལ་ལྡན་མཁས་པའི་སྐྱེ་བོ་ཡིས། །མགྲིན་ཅིག་རབ་བསྔགས་མེ་ཏོག་དོགས་པ་ནི། །རྣམ་ཐར་རྒྱ་མཚོའི་རྣ་རྒྱན་བྱས་པ་བཞིན། ༡༠༤ །སྙིགས་མའི་དུས་འདིར་འབྱོར་པ་རྒྱས་པ་དང་། །རྫུན་དང་གྲགས་པའི་ཕྱོགས་སུ་བློ་འཆེལ་ནས། །ཚད་ལྡན་དགེ་བའི་བཤེས་རྣམས་རྩྭ་བཞིན་དོར། །ཆོས་མིན་སྤྱོད་ལ་འབད་པས་སྐྱབས་སུ་བསྙེན། ༡༠༥ །ཕན་མཛད་དགེ་བའི་

― LT28_Page_0301 ―

^{[མ་དཔེ་གཟིགས་ན་འདིར་གནོན།]}

[Full Size]

བཤེས་གཉེན་ཁྱོད་འདྲ་བ། །དེང་སང་འཇིག་རྟེན་ཁམས་འདིར་མ་མཆིས་པས། །ཟོལ་ཟོག་མེད་པར་ཕན་པ་ལྷུར་མཛད་ཀྱི། །གསུང་ཟུར་ཙམ་ཡང་ཚད་མར་བཞུགས་ལགས་གྲང་། ༡༠༦ །མི་ཤེས་པས་ནི་བཏང་སྙོམས་གནས་སུ་བྱེད། །ཅུང་ཟད་ཤེས་ན་འདྲ་མིན་ཞིག་ཏུ་འཆོས། །མཁས་པར་རློམས་རྣམས་གང་ལའང་ཡིད་མི་ཆེས། །ཇི་ལྟར་བྱས་ཀྱང་དུག་གསུམ་ཁོ་ནས་བསླད། ༡༠༧ །ཀྱེ་མ་བྱིས་པས་རྒན་ཞུགས་བློ་ལྡན་ལ། །རྩེ་དང་སྡང་དང་ཡ་མཚན་བྱེད་པ་ལྟར། །རང་ཉིད་གཏོལ་མེད་ལོང་བའི་ཚུལ་བཟུང་ནས། །ལམ་སྟོན་མཁན་ལའང་ཡིད་ཆེས་མི་སྐྱེ་བར། ༡༠༨ །བཤད་ན་མཁས་པའི་ཚིག་ཅེས་སུན་འབྱིན་ལ། །སྒྲུབ་ན་མ་ནུས་པ་ཞེས་འཕྱས་འདོགས་ཤིང་། །བཟང་ལ་རོ་མྱོང་མེད་པར་གང་དགར་བོར། །ངན་ལ་ཆགས་སྡང་དྲན་པ་འབྲལ་མེད་བསྟེན། ༡༠༩ །མི་ཤེས་པ་ནི་མུན་པ་ཆེན་པོ་སྟེ། །དེ་བས་ཕུང་ཀྲོལ་ཆེ་བ་མཁས་འདོད་ལགས། །མཁས་པས་འདི་གཉིས་རྣམ་པར་སྤངས་ནས་ནི། །ཁྱོད་གསུངས་མྱོང་བས་བློ་གྲོས་ལུས་ཟུངས་རྒྱས། ༡༡༠ །གཞན་དག་ལེགས་པར་འཁྲིད་པའི་མཐུ་མེད་ཀྱང་། །དེ་ཡི་ལྷག་བསམ་བཟང་པོ་རྟག་འཆང་ཞིང་། །རང་ཉིད་ལོགས་པའི་ལམ་དུ་མི་འཕྱན་པ། །འདི་ཡང་ཁྱོད་ཀྱིས་ཆེད་དུ་བྱིན་པ་བཞིན། ༡༡༡ །རང་ཉིད་བགྱིའམ་གཞན་

― LT28_Page_0302 ―

^{[མ་དཔེ་གཟིགས་ན་འདིར་གནོན།]}

[Full Size]

དག་དཀྲི་ན་ཡང་། །རྒྱལ་བའི་བཀའ་དང་མཐུན་དེ་མཁས་པ་སྟེ། །གྲུབ་པའང་ཚུལ་དེ་ཉིད་ལས་ཡོད་མིན་པས། །གཞན་ནི་གཞན་དུ་ལགས་མོད་འདིར་མ་ཡིན། ༡༡༢། དེ་ཕྱིར་ཁྱོད་བསྟན་སློབ་མར་བཅས་པ་ཡང་། །དཔལ་དེས་བཟུང་བ་དེ་ཡང་ཁྱོད་ཀྱི་མཐུ། །གང་ཞིག་གསེར་གྱི་རི་ལ་གནས་བཅས་པ། །དེ་ཡི་འདབ་ཆགས་རྣམས་ཀྱང་གསེར་དུ་འགྱུར། ༡༡༣ །གྲགས་པར་རེ་བས་བཀའ་ལ་ཁྱད་བསད་དེ། །སྔོན་ཆད་མ་བྱུང་བ་ཞིག་གཙོར་བཟུང་ནས། །ཕྱིན་ཅི་ལོག་གིས་རྙེད་པ་འཚོལ་བ་ལ། །ཕྱུགས་དང་མཚུངས་པས་སངས་རྒྱས་ཙམ་དུ་བལྟ། ༡༡༤ །ཁྱོད་ཀྱིས་སངས་རྒྱས་བསྟན་དང་མི་འགལ་ཞིང་། །མཁས་པས་ཚད་མར་བྱས་པའི་ལྟ་དང་སྤྱོད། །གང་ན་མཆིས་དེར་བདག་ཉིད་བྲན་བཞིན་ཏུ། །རི་མོར་བགྱི་བའི་བརྟུལ་ཞུགས་གོ་ཆ་ལེན། ༡༡༥ །དེང་སང་འདོད་པས་མིང་ཐོས་ཙམ་ལ་བརྟེན། །མཁས་རྣམས་ཡིད་ལ་དགའ་སྐྱེད་མི་ནུས་པའི། །རྒྱུས་མེད་དཀོར་གཉེར་རྒན་པོའི་རྟེན་བཤད་བཞིན། །བསྐྱར་ཟློས་ཁོ་ནའི་མུ་ཅོར་སྤེལ་བར་སྣང་། ༡༡༦ །སྨྲ་བའི་ཁྱུ་མཆོག་འདི་ཡི་ཞལ་གྱི་གྲྭ། །གཞུང་ལུགས་གང་དང་གང་དུ་གཡོན་ཡང་། །བླུན་པོས་སྔོན་ཆད་གཞར་ཡང་མ་མྱོང་བའི། །ལེགས་བཤད་རོ་བརྒྱའི་ཐང་མ་ཁོ་ན་བརྡལ། ༡༡༧ །འཇིགས་འཇིགས་ལྟར་དུ་འདུག་ནས་སུ། །སངས་རྒྱས་བསྟན་ལ་རྨ་འབྱིན་པའི།

― LT28_Page_0303 ―

^{[མ་དཔེ་གཟིགས་ན་འདིར་གནོན།]}

[Full Size]

གཡོ་ཅན་རྣམས་ཀྱི་སྨིག་རྒྱུ་ཡིས། །བསྟན་པ་སོས་ཀའི་ཐང་བཞིན་བྱས། ༡༡༨ །གང་གི་ཐུགས་རྗེའི་དྲི་བཞོན་ལས། །གང་འདུལ་ཐབས་མཁས་སྦྲང་རྩི་ཡི། །ཆར་གྱིས་བྲན་པའི་མཐུ་ཁོ་ནས། །རེ་ཞིག་དབྱར་གྱི་དཔལ་ཡོན་འཛིན། ༡༡༩ །ཨེ་མ་སྙིང་རྗེའི་མཐུ་ཆེན་པོ། །དུས་དང་བསྟུན་པའི་སྟོན་པར་ཤར། །གསོལ་བ་བཏབ་པ་གསལ་བར་མཁྱེན། །འདུན་དང་གུས་བཅས་གདུང་བསིལ་མཛད། ༡༢༠ །ཉི་དང་ནོར་བུ་སྨན་ཆེན་བཞིན། །དམ་པ་གང་དུ་མཆིས་པ་དེར། །ཕན་བདེ་འབྱུང་བ་ཆོས་ཉིད་དེར། །དེ་ལ་རློམས་པ་ཡང་མི་མངའ། ༡༢༡ །ཉན་ཐོས་ཐེག་པས་ཞུགས་པ་ལ། །བྱང་ཆུབ་སེམས་དང་སྨོན་ལམ་དང་། །སྤྱོད་པ་ཡོངས་བསྔོ་མི་ཤེས་པས། །ཡོན་གནས་མཆོག་ཏུ་མིན་རྟོགས་ནས། ༡༢༢ །དྲིན་ཏུ་བཟོ་བའི་སྐྱེས་བུ་ཡིས། །སྡུག་གུའི་མ་ལ་ཇི་ལྟ་བར། །ཉམ་ཐག་འཁོར་བའི་འགྲོ་རྣམས་ལ། །ཕྱོགས་རིས་མེད་པར་བརྩེ་བས་བརླན། ༡༢༣ །བདག་བདེ་འདོད་ལས་སྡུག་བསྔལ་འབྱུང་། །གཞན་བདེ་འདོད་ལས་བདེ་བ་འབྱུང་། །འདིས་ནི་བསྐལ་པ་མང་གོམས་ཕྱིར། །གཞན་ཕན་ཁོ་ན་ཐོག་མར་སྒྲུབ། ༡༢༤ །བདག་གཞན་མཉམ་ཉིད་ལ་གོམས་ནས། །བྱང་ཆུབ་སེམས་ནི་རབ་བརྟན་པ། །འདི་ནི་བདེ་བར་གཤེགས་པའི་སྲས། །ཉམ་ཐག་རྣམས་ཀྱི་ཕ་མར་གྱུར། ༡༢༥ །སྐྱེ་བ་ཀུན་ཏུ་བྱང་ཆུབ་

― LT28_Page_0304 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས། །རྨི་ལམ་ན་ཡང་དོར་མིན་ན། །མངོན་སུམ་ཉིད་དུ་གྱུར་པ་ལ། །ཕན་ལྟ་སྨོས་ཀྱང་ཅི་ཞིག་འཚལ། ༡༢༦ །རྟག་ཏུ་གཞན་ལ་རབ་དགོངས་པའི། །རྒྱལ་རྣམས་འདི་དེ་ཕན་པར་གཟིགས། །དེ་བས་འདི་ལ་གཟུགས་མཆིས་ན། །ནམ་མཁའི་ཁམས་སུའང་ཤོངས་མི་འགྱུར། ༡༢༧ །གང་ལ་བྱང་ཆུབ་སེམས་མངའ་བ། །དེ་དག་སྐྱེས་བུ་ཆེན་པོ་སྟེ། །ལྷ་དང་བཅས་པའི་སྐྱབས་ཡིན་ལ། །ཡོན་གནས་མཆོག་ཀྱང་དེ་ཡིན་ནོ། ༡༢༨ །ཆོས་ཀྱི་དེ་ཉིད་རྟོགས་གྱུར་ཅིང་། །འཁོར་བའི་གནས་ནས་རབ་སད་དེ། །དེ་ཡིས་སེམས་ཅན་སད་བྱེད་པ། །འདི་ནི་བྱང་ཆུབ་སེམས་དཔར་བརྗོད། ༡༢༩ །འདི་ལ་རང་འཁྲིས་མི་མངའ་བས། །ཅི་མཛད་རླབས་ཆེན་སྤྱོད་ཉིད་ཀྱང་། །མཉམ་གཞག་ལངས་པའི་རྣལ་འབྱོར་གྱིས། །ཚོགས་ལམ་བརྟན་པའི་ཚུལ་དུ་སྒྲུབ། ༡༣༠ །འཁོར་གསུམ་རྣམ་པར་མི་རྟོག་པས། །ཆོས་ཉིད་འདོར་བ་མི་མཛད་ལ། །ཀུན་གྱི་དོན་ཀུན་སྒྲུབ་བྱེད་ཕྱིར། །ཀུན་རྫོབ་དང་ཡང་རྗེས་སུ་མཐུན། ༡༣༡ །ཟང་ཟིང་ཆོས་དང་མི་འཇིགས་བྱམས། །སྦྱིན་པ་རྣམ་མང་ལེན་འཇུག་ཅིང་། །དེ་བཞིན་སྙན་སྨྲ་དོན་སྤྱོད་གཞན། །བདག་ཉིད་རྗེས་སུ་དོན་མཐུན་གཞུག ༡༣༢ །ས་སྟེང་ཚེར་མས་གང་བ་ལ། །དེ་ཉིད་གཡོགས་པས་ག་ལ་ལོངས། །རྐང་མཐིལ་གང་གི་ཀོ་བ་ཡིས། །ས་སྟེང་གཡོགས་དང་ཅི་མ་ཁྱད། །

― LT28_Page_0305 ―

^{[མ་དཔེ་གཟིགས་ན་འདིར་གནོན།]}

[Full Size]

༡༣༣ །དེ་བཞིན་ཉོན་མོངས་འདི་གཟིགས་ནས། །བཟོད་པའི་གོ་ཆ་རྟག་ཏུ་བཞེས། །ཁྲོ་ཡང་འབྱུང་པོའི་བཟུང་བ་ལ། །སྨན་པ་འཁྲུགས་པ་མིན་བཞིན་ནོ། ༡༣༤། འདིར་ནི་སེམས་ཅན་སྐྱོན་མིན་གྱི། །འདི་རུ་ཉོན་མོངས་རྣམས་སྐྱོན་ཞེས། །རྣམ་པར་དཔྱད་ནས་མཁས་པ་ཡིས། །སྡོང་དུམ་ལ་ཡང་ཁྲོ་མི་འགྱུར། ༡༣༥ །ཞེ་སྡང་ལྟ་བུའི་སྡིག་མེད་ཅིང་། །བཟོད་མཉམ་དཀའ་ཐུབ་ཡོད་མིན་ཞེས། །སྙིགས་མའི་རྣམ་འགྱུར་འདི་གཟིགས་ནས། །ཁྱོད་ཀྱིས་འབད་པས་བསྙད་པ་འདྲ། ༡༣༦ །མི་ཡི་ཆོས་ལས་འཕགས་པའི་དོན་རྣམས་ཀྱིས། །ཡོན་ཏན་ཨུཏྤ་ལ་བཞིན་རྣམ་རྒྱས་པ། །ཡོངས་སུ་སྐྱོ་མེད་བརྩོན་འགྲུས་ཆེ་ལྡན་པས། །མ་ཐོབ་རྣམ་པ་འགའ་ཡང་ཡོད་པ་མིན། ༡༣༧ །བརྩོན་འགྲུས་ཀྱིས་ནི་ཕ་རོལ་ཕྱིན་ཀུན་འགྲུབ། །བརྩོན་འགྲུས་ཀྱིས་ནི་འཇིགས་ཚོགས་འདས་ནས་གྲོལ། །བརྩོན་འགྲུས་ཀྱིས་ནི་གཞན་དོན་འབད་མེད་འབྱུང་། །བརྩོན་འགྲུས་ཀྱིས་ནི་བྱང་ཆུབ་མྱུར་འཚང་རྒྱ། ༡༣༨ །འདི་ཡིས་ཁྱོད་ཀྱིས་ཏིང་འཛིན་མཆོག་ཀུན་བརྙེས། །ཉིན་མཚན་དུས་རྣམས་འབྲས་བུ་ཡོད་པས་འདའ། །མི་མ་ལགས་པ་རྣམས་ཀྱང་ཕན་པར་དགའ། །ཡོན་ཏན་ཚོགས་ཀྱིས་དམའ་བ་འགྱུར་བ་མེད། ༡༣༩ །ལྷ་དབང་ཕྱིར་ཡང་ངོ་ཚ་བོར་ནས་ནི། །ཡིད་ལ་ཆོས་དང་འགལ་བར་བྱེད་པ་ལས། །གྱོ་མོའི་སྣོད་ཐོགས་

― LT28_Page_0306 ―

^{[མ་དཔེ་གཟིགས་ན་འདིར་གནོན།]}

[Full Size]

གོས་ངན་གྱོན་ནས་ནི། །དགྲ་བོའི་ཁྱིམ་དུ་འབྱོར་པར་མཐོང་ཡང་བླ། ༡༤༠ །ཐོས་བརྩོན་དད་ལྡན་བགྲོད་ཅིག་ལམ་གནས་ཀྱང་། །ཤེས་བཞིན་བསྒྲིམས་ནས་མངོན་པར་མི་སྲུང་ན། །དྲན་པ་ཉམས་པས་ཆོས་ཀུན་འཇིག་འགྱུར་ཞེས། །མཉམ་པར་མ་བཞག་མེད་པས་དེ་སྐད་འདོམས། ༡༤༡ །ཤེས་བཞིན་མེད་པའི་ཆོམ་རྐུན་དག །དྲན་པ་ཉམས་པའི་རྗེས་འབྲངས་ནས། །རྟག་ཏུ་ཚུལ་མིན་ལ་སྦྱོར་བ། །འདི་ནི་ཁྱོད་ལ་སྲིད་མ་ཡིན། ༡༤༢ །སྣང་བས་ལས་ལམ་མི་འདོར་ཞིང་། །སྟོང་པས་དངོས་ཞེན་མི་སྐྱེ་བར། །མ་ནོར་ཟུང་འཇུག་དབུ་མའི་ལམ། །ཟབ་མོའི་སྤྱོད་ཡུལ་འདི་འདྲ་མཁྱེན། ༡༤༣ །བདེན་པ་གཉིས་ཀྱི་ཚུལ་ཤེས་པ། །དེ་ཡིས་བསྟན་པའི་དེ་ཉིད་ཤེས། །སྡུག་བསྔལ་རྩ་བ་ཐེར་ཟུག་ཏུ། །བདེན་པར་རྟོགས་པའང་འགག་པར་འགྱུར། ༡༤༤ །ཁམས་གསུམ་སེམས་ཙམ་ཞེས་བསྟན་པ། །འཇིགས་སྤངས་ཕྱིར་ཡིན་དེ་ཡོད་མིན། །ཐམས་ཅད་སྟོང་པར་གང་གསུངས་པ། །བདག་བཟློག་ཕྱིར་ཡིན་ཅང་མེད་མིན། ༡༤༥ །དེ་ཕྱིར་སེམས་ལས་གཞན་མེད་ཅིང་། །དེ་ནས་དེ་ཡང་མེད་རྟོགས་ཏེ། །གཉིས་ཀ་ལ་ཡང་མི་གནས་པས། །ཆོས་ཀྱི་དབྱིངས་སུ་གནས་པར་གསུངས། ༡༤༦ །ཇི་ལྟར་སྣང་བ་འདི་ཁོ་ན། །ཀུན་རྫོབ་གཞན་ནི་ཅིག་ཤོས་ཏེ། །མེད་བཞིན་སྣང་དང་གཉིས་མེད་ཀྱི། །ཡེ་ཤེས་བདེན་པ་ཉིད་དུ་བཞེད། །

― LT28_Page_0307 ―

^{[མ་དཔེ་གཟིགས་ན་འདིར་གནོན།]}

[Full Size]

༡༤༧ །སྣོད་ཀྱིས་མཁའ་ལ་དབྱེར་མེད་བཞིན། །ཅི་ཡང་མིན་པའི་གནས་ལུགས་ལ། །འདི་བདེན་གཞན་ནི་ཅིག་ཤོས་ཞེས། །དངོས་ཀྱིས་བྱེ་བ་བྱར་མེད་པས། ༡༤༨ །འདུ་བྱེད་དོན་དམ་མཚན་ཉིད་ལ། །གཅིག་དང་དུ་མར་བྲལ་དེའི་ཕྱིར། །དེ་དག་ཉིད་དུ་གང་སེམས་པ། །ཚུལ་མིན་སེམས་ལ་ཞུགས་པར་ཤེས། ༡༤༩ །ཕན་ན་ཇི་ལྟར་སྨྲས་ཀྱང་བདེན། །སླུ་དང་ལྡན་ན་དེ་མིན་ཕྱིར། །གང་ལ་གང་གིས་གྲོལ་འགྱུར་པ། །དེ་ཡི་འདོད་པ་སྔར་བཤད་མཛད། ༡༥༠ །མཁས་པས་བདག་ཉིད་ཤིན་ཏུ་ནི། །དུལ་བས་ཐར་པ་ཐོབ་དེའི་ཕྱིར། །ང་དང་ང་ཡིར་འཛིན་བྲལ་བ། །ཁྱོད་མཐོང་བ་ཡང་དུལ་བར་འགྱུར། ༡༥༡ །གང་ལ་རྣམ་པར་འགྱུར་ཡོད་པ། །རྟག་རུང་མིན་ཀྱང་ཚུལ་དེར་ཞེན། །དེ་བཞིན་ལོག་པའི་འཛིན་སྟང་གིས། །ཆུ་བཞིས་འཁོར་བའི་འཁྲི་ཤིང་དག ༡༥༢ །བདག་དང་སེམས་ཅན་གང་ཟག་དང་། །ཟ་དང་བྱེད་པོ་ཤེད་ཤེད་བདག །ཕྱི་ནང་གཉིས་ཀར་མི་དམིགས་པའི། །ཤེས་རབ་རལ་གྲིས་འདིར་བཅད་དོ། ༡༥༣ །ཇི་ལྟར་ཡན་ལག་ཚོགས་པ་ལ། །བརྟེན་ནས་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་བསྟེན་ནས། །བདག་དང་སེམས་ཅན་འཛིན་པ་གང་། ༡༥༤ །རབ་རིབ་མཐུ་ཡིས་སྐྲ་ཤད་སོགས། །ངོ་བོ་ལོག་པར་བརྟགས་ན་ཡང་། །གཞན་ཏུ་བདག་ཉིད་མིག་དག་པས། །ཚོགས་པའི་རང་བཞིན་མཐོང་བ་ལྟར། །

― LT28_Page_0308 ―

^{[མ་དཔེ་གཟིགས་ན་འདིར་གནོན།]}

[Full Size]

༡༥༥ །ནང་ལྟར་སྣང་བ་གཞན་མིན་ལ། །ཕྱི་རོལ་ཆ་ཡང་གཞན་མིན་ཏེ། །ཇི་ལྟར་མར་མེའི་སྙིང་པོ་བཞིན། །བདེན་དང་རྫུན་པ་མེད་ཅེས་བསྟན། ༡༥༦ །རང་ཉིད་ངེས་པས་གཞན་དག་གི། །ངེས་པ་བསྐྱེད་པར་བྱ་དགོས་ཕྱིར། །ཁྱོད་ལ་མ་ངེས་འགའ་མེད་པས། །གསུང་ཟེར་གྱིས་ཀྱང་ངེས་པ་སྐྱེད། ༡༥༧ །རྟོག་པའི་ཚུལ་གྱིས་དེ་མེད་ཀྱང་། །ཕྱི་དང་ནང་གི་བདག་ཉིད་ཅན། །ས་བོན་ཀུན་ལྡང་ཀུན་གྱི་གཞི། །བཏགས་པའི་གནས་སྐབས་གསུམ་པ་ཅན། ༡༥༨ །ཐམས་ཅད་བདག་ཉིད་རྒྱུའི་རྒྱུ་ལ། །བྲལ་བྱའི་ཚུལ་དུ་ནོག་པ་གང་། །མྱུར་དུ་ཐབས་ཀྱིས་མངོན་བྱེད་ཕྱིར། །ཟབ་གསང་སྔགས་ཀྱི་རྣལ་འབྱོར་ལྡན། ༡༥༩ །གཏེར་དང་འབྲས་བུའི་ཤིང་བཞིན་དུ། །རིགས་གཉིས་ཐམས་ཅད་ལ་ཡོད་པས། །མ་བཅོས་ལྷུན་གྱིས་གྲུབ་པ་ཡི། །སངས་རྒྱས་འདིར་ནི་ལམ་བྱེད་ཕྱིར། ༡༦༠ །རྟེན་འབྲེལ་ལུས་ལ་བསྒྲིགས་པ་ཡིས། །རྟོགས་པ་སེམས་ལ་འཆར་བྱེད་པ། །བརྡ་དང་ཐབས་ཀྱི་ཚུལ་དག་གིས། །དབང་རྣོན་སྨིན་ཅིང་གྲོལ་བར་བྱས། ༡༦༡ །གང་དུ་དེ་ཡི་བརྡ་བསྟན་པས། །དེ་རུ་ཡེ་ཤེས་འཆར་ནས་ཀྱང་། །རང་དང་གཞན་དོན་ནུས་གྱུར་པ། །དབང་གི་ཆུ་བོ་ཆེན་པོ་ཕབ། ༡༦༢ །དད་མེད་སྡོམ་ལ་མི་གནས་པའང་། །འཇུག་པ་འདི་ལ་དགག་མི་མཛད། །ཅི་ཕྱིར་སངས་རྒྱས་ཐབས་མཁས་ཕྱིར། །མཐོང་

― LT28_Page_0309 ―

^{[མ་དཔེ་གཟིགས་ན་འདིར་གནོན།]}

[Full Size]

བས་དག་པ་འགྲུབ་པར་གསུངས། ༡༦༣ །མི་སྲུན་བདག་ཉིད་ངན་པ་དང་། །ཁྲོ་ཞིང་ཤིན་ཏུ་གཤེ་བ་དང་། །བཞད་གད་འཕྱར་ཀ་བཏང་ཡང་རུང་། །དེ་ཉིད་འདི་ཡི་རྒྱུ་རུ་མཛད། ༡༦༤ །ཉི་མ་དམུས་ལོང་ཡུལ་མིན་ལྟར། །དོན་དམ་རྟོག་གེའི་ཡུལ་མིན་པས། །གལ་ཏེ་བློ་ཡིས་ལེགས་རྙེད་ཀྱང་། །གསོར་མི་རུང་བའི་ལྟ་ཅན་འགྱུར། ༡༦༥ །གཅིག་དང་དུ་མར་བྲལ་བ་ཡི། །སྐད་ཅིག་གཅིག་ལ་མཆོག་དགའ་བ། །ངག་གི་ལམ་འདས་སྤྱོད་ཡུལ་ཏེ། །འདི་ནི་བྱིན་རླབས་རིམ་པའི་ཕྱིར། ༡༦༦ །བླ་མའི་དུས་ཐབས་བསྟན་པ་དང་། །བདག་གི་རིགས་ཀྱི་བསོད་ནམས་ཀྱིས། །ཀུན་མཁྱེན་ཡེ་ཤེས་དེ་ལྟ་བུ། །སྐད་ཅིག་གཅིག་གིས་ཁོང་དུ་ཆུབ། ༡༦༧ །སྤྲོས་པ་ཀུན་ལ་དམིགས་ནས་ནི། །སྤྲོས་པ་སྤྲོས་པ་མེད་པར་སྤྱོད། །གཞན་ནི་དེ་དག་མི་ཤེས་པས། །སྤྲོས་པ་མེད་ལ་སྤྲོས་པས་འཁོར། ༡༦༨ །འདིར་ནི་དུ་མས་ཉོན་མོངས་ཤིང་། །ཤིན་ཏུ་གདུལ་དཀར་གྱུར་པ་ལ། །ལྷག་པར་བརྩེ་བའི་གཞན་དབང་གིས། །ཀུན་ཏུ་བཟང་པོའི་སྤྱོད་པ་བླངས། ༡༦༩ །རྣལ་འབྱོར་ཐབས་ཀྱི་ཚུལ་མིན་ཞིང་། །ཤེས་རབ་གཅིག་པུ་ཉིད་ཀྱང་མིན། །སྙོམས་འཇུག་དེ་དེ་གང་གསུངས་པ། །ཁྱོད་སྐྱེས་སློབ་མར་བཅས་པས་རྟོགས། ༡༧༠ །ཐབས་ཀྱིས་འཁོར་བར་འཁོར་འགྱུར་ལ། །ཤེས་

― LT28_Page_0310 ―

^{[མ་དཔེ་གཟིགས་ན་འདིར་གནོན།]}

[Full Size]

རབ་ཁོ་ནས་གཞན་དུ་གོལ། །འདབ་མ་གཉིས་ཀྱིས་བྱ་འཕུར་བཞིན། །ཟུང་དུ་འཇུག་པས་བདེ་བར་སྦྱོར། ༡༧༡ །བདག་ལ་ལྟོས་ནས་གཞན་བཞག་པས། །ཕན་ཚུན་ལྟོས་འཇོག་རྟེན་འབྲེལ་གྱིས། །གཉིས་ཀྱིས་བསྡུས་པའི་ཆོས་ཐམས་ཅད། །འདི་ཤེས་འབད་པ་མེད་པར་གྲོལ། ༡༧༢ །དེ་ཕྱིར་ཐབས་གཙོ་ཕ་རྒྱུད་དང་། །ཤེས་རབ་གཙོར་བསྟན་མ་རྒྱུད་སོགས། །གཉིས་མེད་ཨ་ཝཾ་སྡོམ་པ་ཡིས། །འདྲིལ་ནས་ཁམས་དང་བསྟུན་པར་འཆད། ༡༧༣ །གཞི་ལམ་འབྲས་བུར་རྒྱུན་ཆགས་པ། །འདྲ་བ་ལམ་དུ་བྱེད་པ་ཡི། །ལྷ་སྐུ་ཞུ་བདེའི་ཁྱད་པར་ཅན། །དབྱིབས་ཀྱི་རྣལ་འབྱོར་འདི་གོམས་པས། ༡༧༤ །འཁོར་ལོ་གསུམ་གྱི་བདག་ཉིད་ཅན། །ཕྱི་ནང་གཞན་གསུམ་དཀྱིལ་འཁོར་ཡང་། །གདོད་ནས་གྲུབ་པ་ལྷའི་འཁོར་ལོར། །མ་བྱས་རང་བཞིན་གསལ་བར་དག ༡༧༥ །སྣང་བ་འདི་ཀ་ལྷ་ཡིན་ལ། །དེ་བཞིན་བརྗོད་པ་ནཱ་དའི་སྔགས། །རྣམ་རྟོག་ཆོས་སྐུའི་རང་བཞིན་ཕྱིར། །རྒྱས་གདབ་ང་རྒྱལ་ཁྱོད་ལ་མེད། ༡༧༦ །འོན་ཀྱང་སེམས་ཉིད་ལྷར་ཤར་ཕྱིར། །དེ་ཡི་སྣང་ཆར་མ་དག་པས། །བསླང་མིན་གསལ་སྣང་ཆེན་པོ་ཡིས། །སྐུ་དང་ཞིང་ཁམས་ཁོ་ནར་འཆར། ༡༧༧ །གཟུང་དང་འཛིན་པ་དོན་ཡོད་མིན། །ལྟར་སྣང་ཙམ་ཡང་རིགས་འདུས་ཀྱི། །དཀྱིལ་འཁོར་ཐིག་ལེ་གཅིག་ཉིད་དུ། །

― LT28_Page_0311 ―

^{[མ་དཔེ་གཟིགས་ན་འདིར་གནོན།]}

[Full Size]

དག་པའི་ཚུལ་འདི་མ་མཐོང་ནས། ༡༧༨ །རང་གི་གྲིབ་མ་ཕྱི་རོལ་དུ། །སྣང་བར་དགྲ་རུ་མངོན་ཞེན་ནས། །རིངས་པར་བྲོས་ཀྱང་ཕྱི་ཕྱིར་ཞིང་། །མི་འདོར་རྟག་ཏུ་འདོད་པ་ལྟར། ༡༧༩ །ཤིན་ཏུ་མ་རུངས་སྡང་སེམས་ཅན། །སེམས་དམྱལ་མཐའ་མེད་མྱོང་ཤེས་ནས། །བྱང་ཆུབ་སེམས་ནི་བརྟན་པ་ཡིས། །རིག་སྔགས་ཆད་པ་ཅུང་ཟད་འབེབས། ༡༨༠ །ཇི་ལྟར་སྨན་པས་སེམས་ཅན་གྱི། །ནད་ལ་དཔྱད་ཀྱིས་བཅོས་པ་བཞིན། །གཟིར་བ་ཉེས་པ་མ་མཆིས་ཤིང་། །འདི་ནི་རྒྱལ་བས་རབ་ཏུ་བསྔགས། ༡༨༡ །དེ་བཞིན་རབ་འབྱམས་ལས་བཞི་ཡི། །འཁོར་ལོས་སྲིད་འདིར་དབང་བསྒྱུར་བས། །དམན་རྣམ་དབུལ་འཕོང་རབ་བསླངས་ཤིང་། །ཁེངས་རྣམས་དྲེགས་པ་གཅིག་ཆར་བསྙིལ། ༡༨༢ །སངས་རྒྱས་རྟོག་པས་རྒྱ་མི་འགྱུར། །རང་སེམས་རྟོགས་ན་འཚང་རྒྱ་ཕྱིར། །བློ་ལྡན་ཉོན་མོངས་བཅས་གྱུར་ཀྱང་། །དེས་ནི་དེ་ཉོན་མོངས་མི་འགྱུར། ༡༨༣ །ཇི་ལྟར་པདྨ་མདངས་མཛེས་པ། །འདམ་གྱི་ནང་དུ་དག་པ་ལྟར། །འདོད་ཁྲོ་རྨོངས་པ་སོགས་དེ་བཞིན། །དེ་ལྡན་ཡེ་ཤེས་དག་པར་འགྱུར། ༡༨༤ །གང་དང་གང་གིས་འཆིང་འབྱུང་བ། །དེ་ཉིད་ཐབས་དང་བཅས་ལྡན་པས། །སྲིད་པའི་འཆིང་ལས་རྣམ་གྲོལ་ཞེས། །ལམ་འདི་རྩལ་དུ་བཏོན་པར་མཛད། ༡༨༥ །ཆགས་

― LT28_Page_0312 ―

^{[མ་དཔེ་གཟིགས་ན་འདིར་གནོན།]}

[Full Size]

པས་འཇིག་རྟེན་འཆིང་འགྱུར་ལ། །འདོད་ཆགས་ཉིད་ཀྱིས་དེ་གྲོལ་འགྱུར། །དེ་བཞིན་བཟློག་པའི་སྒོམ་པ་ཡིས། །རིམ་པ་མང་པོའི་རྣལ་འབྱོར་གསུངས། ༡༨༦ །འདོད་ཆགས་ཀྱིས་ནི་འཁོར་བ་ན། །དཀར་དམར་རྫས་ཀྱི་ཐིག་ལེ་སྟེ། །ཞེ་སྡང་ཆེ་ལ་ཀུན་བརྟགས་པའི། །སྔགས་ཀྱི་ཐིག་ལེའི་རིམ་པ་དང་། ༡༨༧ །མུན་པས་དུད་པ་ལས་སྐྱོབ་ཕྱིར། །གྲུབ་ཆེན་བརྒྱད་ཕྱིར་ཡེ་ཤེས་ཕྱིར། །རླུང་གི་ཐིག་ལེའི་ཐབས་མཁས་ནི། །བསམ་མི་ཁྱབ་པ་ཆུབ་ཅིང་བསྟན། ༡༨༨ །ཕྱག་རྒྱ་བཞི་ཡི་ཐབས་ལྡན་པས། །འཁོར་ལོ་བཞི་རུ་ཐིག་རླུང་སེམས། །གནས་སྐབས་བཞི་པོར་མ་འཁྲུལ་བར། །སྐུ་དང་ཡེ་ཤེས་རྣམ་བཞིར་བཅིངས། ༡༨༩ །ཕྲ་བའི་ཡེ་ཤེས་ཞིང་ཀུན་དུ། །སྒྱུ་མ་ལྟ་བུར་སྦྱོང་ཞིང་འཇུག །རྒྱལ་དང་གྲུབ་པའི་སྐྱེ་བོ་ལ། །རྟག་ཏུ་ཆོས་ཀྱི་འགྲོ་བ་གླེང་། ༡༩༠ །གཞོམ་མེད་ཧཾ་གི་རྣམ་པ་ཅན། །བཅོམ་ལྡན་ཐོད་པའི་དུམ་བུ་དཔྱིད། །དེ་ཡི་བདེ་བ་འདོད་པ་མོ། །རབ་གཏུམ་འབར་ཞུའི་མཐར་ཐུག་པ། ༡༩༡ །ཕྲ་བ་བྱང་ཆུབ་སེམས་ཀྱི་གནས། །སྣང་མཆེད་ཐོབ་གསུམ་ཉེར་དག་པ། །བྱང་ཆུབ་སྙིང་པོ་རྡོ་རྗེའི་གདན། །གནས་པ་མེད་པར་བརྟེན་པ་ན། ༡༩༢ །དཀར་དམར་ཡུལ་དང་ཡུལ་ཅན་ཆ། །མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་བ་དེ་དེ་ཉིད། །བདེ་བ་ཆེན་པོར་རྣམ་པར་དག ༡༩༣ །ཕྲ་མོའི་གཟུགས་

― LT28_Page_0313 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་རྩ་རྣམས་ཟོས། །ཇོ་ཊ་ཁྱ་སོགས་འགྲོ་ལྡོག་བྲལ། །ཆར་ཡང་འཕོ་འཛག་ཀུན་བྲལ་བ། །རྡོ་རྗེ་བཙུན་མོའི་བདག་པོ་མཆོག ༡༩༤ །མཆོག་ཏུ་མི་འགྱུར་བདེ་བ་ཆེ། །བྲལ་དང་ཟད་པ་ཞེ་སྡང་ཆེ། །མ་རིག་ཟད་པ་གཏི་མུག་ཆེའི། །ཉེ་བར་ཐོབ་པས་དངོས་ཀུན་སྡུད། ༡༩༥ །གདོད་ནས་དག་པའི་རིགས་དང་ནི། །ཡུམ་ལྔ་ནང་གི་སྐྱེ་བདུན་གྱི། །སྨན་ཆེན་པོ་ཡི་སྦྱོར་བ་ཡིས། །རྟོག་པའི་ཟུག་རྔུ་རྣམ་ཀུན་བཅིལ། ༡༩༦། སངས་རྒྱས་རྣམས་ཀྱི་ཡེ་ཤེས་དང་། །བྱང་སེམས་བརྟན་པ་གང་ཡིན་པ། །དེ་ནི་གཙོ་བོ་རྡོ་རྗེ་འཛིན། །དེ་བཞིན་གཤེགས་པ་ཀུན་གྱི་བདག ༡༩༧ །རྟོག་པ་ཐམས་ཅད་དང་བྲལ་ཞིང་། །ཆོས་སུ་འཛིན་པ་རྣམ་སྤངས་པ། །ཆོས་རྣམས་ཀུན་གྱི་དེ་བཞིན་ཉིད། །རྡོ་རྗེ་སེམས་དཔའ་དེ་མངོན་མཛད། ༡༩༨ །མ་བཅིངས་ཞེས་བཟུང་དེ་འཆིང་འགྱུར། །གྲོལ་ན་གྲོལ་བ་མིན་པར་འགྱུར། །གང་དེ་ཁྱོད་ལ་མ་མཆིས་པས། །འདུ་ཤེས་འཁོར་ལོ་ཟད་མོད་ཀྱང་། ༡༩༩ །དེ་ལྡན་ཉིད་ལ་དེ་སྟོན་ཕྱིར། །ཕྲ་རྒྱས་སྒོམ་པས་སྤང་བ་དང་། །ཡིད་ཀྱིས་པ་མཐོང་སྤངས་སོགས། །སྒྲིབ་པ་གསུམ་པོ་དྲུང་ནས་འབྱིན། ༢༠༠ །དངོས་ཀུན་གྱི་ནི་དེ་བཞིན་ཉིད། །མཐོང་དང་སེམས་པའི་སྤྱོད་ཡུལ་མིན། །སྤྱོད་ཡུལ་གྱི་ནི་དོན་དམ་དེ། །སྒྱུ་བཞིན་ཤིན་ཏུ་གསོག་གསོབ་གྲང་། ༢༠༡ །མིན་པ་ཉིད་ཀྱང་དེར་བཟློག་ནས། །འདི་ལྟར་རྟོག་

― LT28_Page_0314 ―

^{[མ་དཔེ་གཟིགས་ན་འདིར་གནོན།]}

[Full Size]

པས་བཏགས་པའི་ཆོས། །ཐམས་ཅད་བཏང་བས་མྱ་ངན་ལས། །འདས་ཤེས་རྡོ་རྗེ་ཅན་ཁྱོད་གསུངས། ༢༠༢། འབད་པས་འདི་དག་འཁོར་གྱུར་ལ། །མ་འབད་པས་ཀྱང་འཁོར་བར་འགྱུར། །དེ་ཕྱིར་ཆོས་ལ་མི་འབད་ཅིང་། །ཆོས་མ་ཡིན་པའང་མི་འབད་ངོ་། ༢༠༣ །ཇི་ལྟར་སྦུར་འགྲོ་འདོད་པ་ལ། །བལ་ལ་འཐུམ་ནས་དེ་གཡེངས་ལྟར། །གྲོལ་བའི་ཕྱིར་དུ་མཚན་མར་སྤྱོད། །མཚན་མས་གྲོལ་བ་ག་ལ་འགྱུར། ༢༠༤ །མཚན་བཅས་མཚན་མ་འགྲུབ་འགྱུར་ལ། །མཚན་མེད་ཀྱིས་ནི་གཉིས་ཀ་འགྲུབ། །དེ་བས་རྣམ་ཀུན་མཚན་མ་མེད། །སྤྱོད་དུ་མེད་པས་སྤྱད་པར་མཛད། ༢༠༥ །འཁོར་བ་ཐོག་མ་མེད་ཡིན་ཐ་མ་མིན། །འདི་ཤེས་དེ་ལ་དེ་ཉིད་ཐ་མར་འགྱུར། །མྱ་ངན་འདས་ལ་ཐོག་མཐའ་གཉིས་མེད་པའི། །སྐད་ཅིག་འདི་ཤེས་དེ་ཡིས་དེ་ཐོབ་གསུངས། ༢༠༦ །མཁའ་ལྟར་དྲི་མེད་ངོ་བོ་ཉིད་མེད་པ། །རྐྱེན་ལ་རག་ལས་ཟབ་ཅིང་བལྟ་བར་དཀའ། །འགྲོ་བ་རྣམས་ལ་རྟག་ཅིང་ཁྱབ་པ་རུ། །རྣམ་མང་ཡེ་ཤེས་དག་ནི་སྦྱིན་བྱེད་པ། ༢༠༧ །ཇི་ལྟར་ནམ་མཁའ་ཆགས་མེད་སྤྱོད་ཡུལ་ཅན། །འགྲོ་བ་ཀུན་གྱི་གནས་སུ་གྱུར་པ་ལྟར། །སྲིད་གསུམ་མ་ལུས་འབྱོར་པའི་དཔལ་མངའ་བ། །རྣམ་པར་དག་པའི་ཆོས་ཉིད་འདི་གཟིགས་ནས། ༢༠༨ དབུལ་པོའི་ཁྱིམ་གྱི་གཏེར་དང་གྱད་ཀྱི་མགོར། །ནོར་སོགས་དཔེ་ཚུལ་དགུ་ཡིས་བདེ་གཤེགས་སྙིང་། །སེང་གེའི་སྒྲ་ཡིས་

― LT28_Page_0315 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་གྱི་དབུས་དག་ཏུ། །བྲལ་དང་སྨིན་པའི་རང་བཞིན་རྒྱས་པར་བསྒྲགས། ༢༠༩ །རྩ་བར་གྱུར་པ་སེམས་ཀྱི་མཚན་ཉིད་འདི། །བརྟགས་ནས་སྒོམ་དུ་མེད་པར་ལྷུག་བའི་ངང་། །ཡིད་ལ་མི་བྱེད་ནམ་མཁའི་དཀྱིལ་ལྟ་བུ། །བློ་འདས་ཕྱག་རྒྱ་ཆེན་པོའི་རྣལ་འབྱོར་པ། ༢༡༠ །ལྟ་བས་བལྟར་མེད་སྣང་བ་སེམས་སུ་འདུས། །སྒོམ་མེད་དྲན་རིག་རྒྱུན་ཆད་མེད་པར་གསལ། །མི་སྤྱོད་ཤུགས་འབྱུང་སྙིང་གི་དཀྱིལ་ནས་བརྡོལ། །རེ་དོགས་ཟད་པ་འབྲས་བུའི་མཆོག་བརྙེས་གྱུར། ༢༡༡ །གཉུག་མའི་དོན་ལ་རྩལ་རྒྱས་ནས། །གཉིས་སུ་འཛིན་པ་ཟད་སར་བསྐྱལ། །སྣང་སྲིད་ཆོས་སྐུའི་རོལ་པར་ཤར། །འཁོར་འདས་མཉམ་པ་ཉིད་དུ་ཐིམ། ༢༡༢ །མཐའ་བྲལ་ལྟ་བ་བློས་བྱས་དང་། །སྒོམ་པ་གཉིས་འཛིན་མ་བྲལ་དང་། །སྤྱོད་པ་ཞེན་ཆགས་ཡིད་བྱེད་དང་། །འབྲས་བུ་ཕྱིས་སུ་རེ་བ་སོགས། ༢༡༣ །ཉེས་པ་མང་པོ་རབ་བཀག་ནས། །གང་སྐྱེས་གཉུག་མ་ཉིད་ཀྱི་ཕྱིར། །གང་ཤར་དྲན་པས་སོར་བཞག་ནས། །གཏད་མེད་ཉིད་ལ་གོམས་པ་སློབ། ༢༡༤ །གཉེན་པོའི་ལྷན་པས་གདབ་པ་དང་། །དྲན་འཛིན་རྟོད་ལ་མནན་པ་དང་། །ཤར་གྲོལ་རྩིས་ལ་གཞལ་བ་སོགས། །བློ་ཡི་ཡུལ་དུ་མི་གནས་པ། ༢༡༥། བསྟན་དུ་མེད་ཅིང་གོ་རུ་མེད། །བདེ་གསལ་མི་རྟོག་རྐྱེན་གྱིས་མིན། །ངེས་ཤེས་ཉམས་མྱོང་གིས་མ་སྦགས། །སུས་

― LT28_Page_0316 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་མ་བཅིངས་མ་གྲོལ་བ། ༢༡༦ །ལྐུགས་པས་བུ་རམ་རོ་མྱོང་བཞིན། །ཚིག་ཏུ་འདས་ཀྱང་མྱོང་བྱ་བ། །བློ་ལས་འདས་ཀྱང་བསྟན་བྱའི་དོན། །ཟབ་མོའི་ཚུལ་འདི་མངོན་དུ་མཛད། ༢༡༧ །དེ་ཡི་སྐད་ཅིག་རེ་རེར་ཡང་། །ཏིང་འཛིན་དུ་མར་འཇུག་ལྡང་དང་། །དབང་སྟོབས་མངོན་པར་ཤེས་པ་སོགས། །ཡོན་ཏན་ཕ་མཐའ་མཁའ་དང་མཚུངས། ༢༡༨ །ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །བསམ་གྱིས་མི་ཁྱབ་ཐམས་ཅད་པ། །འདི་འདྲ་ཁྱོད་ཀྱི་གཤེགས་ཤུལ་ལགས། ༢༡༩ །མདོར་ན་ཀུན་མཁྱེན་བླ་མ་ནི། །ཇི་ལྟ་ཇི་སྙེད་མཁྱེན་པ་རྒྱས། །སྙིང་རྗེའི་ཆུ་གཏེར་རབ་ཏུ་འཕྱུར། །རྣམ་ཐར་གསུམ་གྱི་ཕྱག་རྒྱ་འཛིན། ༢༢༠ །ཡོངས་རྫོགས་བསྟན་པའི་མངའ་བདག་མཆོག །ས་ལ་སངས་རྒྱས་གཉིས་པ་སྟེ། །སྤྲུལ་པས་སྤྲུལ་པའི་བརྒྱུད་འཛིན་ཕྱིར། །མཐུན་སྣང་འདི་ཙམ་བསྟན་པར་ཟད། ༢༢༡ །བསྟན་པའི་པད་ཚལ་རྒྱས་བྱེད་ཉི་མ་སྟེ། །ནང་གི་མུན་པ་སེལ་བྱེད་མཚན་མོའི་མགོན། །དགོས་འདོད་མ་ལུས་སྟེར་བའི་ནོར་བུ་དང་། །ཐར་བདེའི་སྲོག་སྦྱིན་བདུད་རྩིའི་བུམ་བཟང་ཡིན། ༢༢༢ །འཁོར་བའི་ཆུ་བོ་སྒྲོལ་བའི་གྲུ་ཆེན་སྟེ། །བདག་ལྟའི་གླང་པོ་འཇོམས་བྱེད་ཤ་ར་བྷ། །སྣ་ཚོགས་རིག་པའི་ནོར་སྟེར་རྒྱ་མཚོ་དང་། །བསམ་གྱིས་མི་ཁྱབ་ནམ་མཁའ་ཉིད་དུ་འཁུམ། ༢༢༣ །དུས་ཀྱི་མུན་

― LT28_Page_0317 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་རུམ་ན་རྟགས་ཙམ་ཡང་། །ཤིན་ཏུ་འཆོལ་བ་གནས་སྐབས་འདི་ལྟ་བུར། །བསྟན་པའི་ཉིན་བྱེད་ཁྱོད་འདྲ་སྔོན་ཆད་དུ། །མ་བྱུང་སླད་ནས་འབྱུང་བར་མི་འགྱུར་རོ། ༢༢༤ །རྒྱལ་བ་རྣམས་ཀྱི་ཟབ་གསང་ངོ་མཚར་བ། །དེ་འདྲ་བདག་གི་སྤྱོད་ཡུལ་མ་ཡིན་པས། །དེང་སང་རི་བོའི་ཁོངས་འདིར་རླུང་ལྟར་དུ། །ཡོངས་གྲགས་ཆེ་ལོངས་ཙམ་ཞིག་བསྡུས་ནས་འཆད། ༢༢༥ །དམ་པས་རང་ཚུལ་རང་གིས་བསྡགས་མིན་ཞིང་། །སློབ་མས་སྦྱར་བའང་དམན་དང་ལྷག་པ་ཡིས། །འཇིག་རྟེན་མཚམས་ལས་བརྒལ་མཐོང་ཚིག་རྒྱན་གྱིས། །མ་བཀླུབས་དོན་གྱི་བཞིན་རས་རྗེན་པར་ངོམས། ༢༢༦ །མཐོང་སྐར་ཉི་ཞུང་ཙམ་ལ་རྣམ་བརྟགས་ནས། །བུ་ཆུང་གིས་ནི་ཉི་མ་དེར་སྨྲ་བཞིན། །ཕྱོགས་ཙམ་དད་པས་འབད་ནས་བསྒྲགས་འདི་ཡང་། །དབང་རྣོན་ཆོས་རྗེས་འབྲངས་ལ་དོན་ལྡན་ཡིན། ༢༢༧ །ཇི་ལྟར་དྲི་ཚོར་ཙམ་གྱིས་ས་མཆོག་དང་། །དུམ་བུས་གསེར་གྱི་རང་བཞིན་ཤེས་པ་ལྟར། །ཆུ་ཐིགས་ཙམ་གྱི་བརྗོད་པ་འདི་མྱོང་བས། །མཁས་པས་རྣམ་ཐར་རྒྱ་མཚོའི་རོ་མྱོང་འགྱུར། ༢༢༨ །འདི་ཐོས་ནས་ནི་དགའ་བ་རྒྱས་འགྱུར་ཏེ། །རང་གི་ཁེངས་པ་རྣམ་པར་བསྙིལ་བ་དང་། །དད་པའི་མདོངས་ཐ་ལྷན་ཅིག་བཀྲམ་འགྱུར་བ། །རྨ་བྱ་དགའ་བའི་འབྲུག་སྒྲ་འདི་ལགས་སོ། ༢༢༩ །དུས་གསུམ་སངས་རྒྱས་རྒྱས་འདུས་པའི་སྐུ། །རྗེ་བཙུན་བླ་མ་འཇམ་པའི་

― LT28_Page_0318 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱངས། །དཀྱིལ་འཁོར་བདག་པོ་རྡོ་རྗེ་འཆང་། །ཀུན་མཁྱེན་བསྟན་པའི་ཉིན་བྱེད་ཞབས། ༢༣༠ །གདོང་ནས་རང་སེམས་ལྷན་ཅིག་སྐྱེས། །གཤེགས་བཞུད་མཚན་མ་མ་མཆིས་པར། །བཟུང་འཛིན་སྤང་བླང་རང་སར་དག །འཁོར་འདས་མཉམ་པ་ཉིད་དུ་འདུད། ༢༣༡ །བདག་དང་བདག་གིར་འཛིན་པ་ཟད། །ཐམས་ཅད་གཉུག་མ་ཁྱབ་བརྡལ་ཆེ། །མ་སྐྱེས་འགག་པར་མི་འགྱུར་བར། །གཉིས་མེད་ཤར་གྲོལ་ངང་དུ་མཆོད། ༢༣༢ །སྐད་ཅིག་འདུ་འབྲལ་མ་མཆིས་ཤིང་། །སྒྲིབ་པས་བསྒྲིབས་པར་མ་ནུས་ཀྱང་། །རང་གིས་གཞན་དུ་རྟོག་པས་ནོངས། །ཡིད་ལ་མི་བྱེད་པ་རུ་བཤགས། ༢༣༣ །དགེ་སྡིག་སུས་ཀྱང་མ་གོས་ཤིང་། །ཕན་གནོད་གང་ཡང་མ་ཡིན་པ། །རྒྱུ་རྐྱེན་ལས་འདས་ནམ་མཁའི་ངང་། །ངེས་ཤེས་བྲལ་བས་ཡི་རང་ངོ་། ༢༣༤ །ཐམས་ཅད་ལྷན་ཅིག་ཟུང་འཇུག་ཅིང་། །སོ་སོ་རང་གིས་མྱང་བྱ་ཡང་། །སྨྲ་བསམ་བརྗོད་མེད་ཆོས་འཁོར་ལོ། །རྒྱུན་ཆད་མེད་པར་བསྐོར་བར་བསྐུལ། ༢༣༥ །སྐྱེ་དང་འཆི་བ་རྣམ་སྤངས་ཤིང་། །ཟབ་ཅིང་གསལ་བ་དེ་བཞིན་ཉིད། །བརྟན་གཡོ་ཀུན་ཁྱབ་ཀུན་འགྲོ་བར། །རང་གསལ་ཆེན་པོར་བཞུགས་སུ་གསོལ། ༢༣༦ །སངས་རྒྱས་སེམས་ཅན་མ་དམིགས་ཤིང་། །འཁྲུལ་སྣང་ཙམ་དུའང་ཕྱག་རྒྱ་ཆེ། །ཐམས་ཅད་ཆོས་སྐུར་རོ་གཅིག་ཉིད། །ཡུལ་དང་ཡུལ་ཅན་མེད་པར་བསྔོ། ༢༣༧ །མདོར་ན་ལྷན་སྐྱེས་

― LT28_Page_0319 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་ལ། །མ་བཅོས་གཅེར་གྱིས་མཐོང་བས་འདུད། །སྣང་སྟོང་ཉེ་རིང་མེད་པར་མཆོད། །གང་ཤར་རང་གྲོལ་ཀློང་དུ་བཤགས། ༢༣༨ །མ་བྱས་དགེ་ལ་རྗེས་ཡི་རང་། །འགག་མེད་བློ་འདས་ཆོས་འཁོར་བསྐུལ། །ཅིས་ཀྱང་འཕོ་འགྱུར་མེད་པར་བཞུགས། །རེ་དོགས་འཛིན་མེད་ལྷུག་པར་བསྔོ། ༢༣༩ །གནས་ལུགས་ཅི་ཡང་མ་ཡིན་ཀྱང་། །སྒྱུ་མ་ཙམ་འདི་མ་རྟོགས་པའི། །སྡུག་བསྔལ་འཁོར་བའི་སེམས་ཅན་རྣམས། །ཁྱོད་ཀྱིས་རྗེས་སུ་འཛིན་པར་ཤོག ༢༤༠ །དམིགས་པ་མེད་པའི་སྙིང་རྗེའི་མཐུས། །ཁྱོད་ཐུགས་བདག་དང་སེམས་ཅན་གྱི། །རྒྱུད་ལ་མྱུར་དུ་འཕོས་གྱུར་ནས། །སྟོང་ཉིད་སྙིང་རྗེ་སད་པར་ཤོག ༢༤༡ །དེ་ཡི་དྲིན་གྱིས་སྐྱེ་བོ་ཀུན། །ཞི་ལ་ཆགས་པར་མི་འགྱུར་ཞིང་། །སྲིད་པས་འཆིང་བར་མི་འགྱུར་བ། །ཁྱོད་ཀྱི་རྣམ་ཐར་མཆོག་བརྙེས་ཤོག ༢༤༢ །རྟག་ཏུ་འཁོར་བས་ཡིད་བྱུང་ནས། །རྨི་ལམ་དུ་ཡང་ཆོས་མིན་ལས། །སྤྱོད་པར་མ་གྱུར་དམ་པའི་ཆོས། །འཚོ་བ་བཞིན་དུ་འདོད་པར་ཤོག ༢༤༣ །བྱས་པ་ལམ་དུ་འགྲོ་བ་དང་། །འབད་པ་མཐའ་རུ་ཕྱིན་པ་ཡི། །བར་ཆད་ཞི་ནས་མཐུན་རྐྱེན་འགྲུབ། །ཆོས་ཀྱི་རྒྱལ་པོར་འགྱུར་བར་ཤོག ༢༤༤ །ཀུན་མཁྱེན་བླ་མའི་བདེན་པ་ཡིས། །རང་སེམས་རང་ངོ་ཤེས་གྱུར་ཏེ། །གྲོག་སྦུར་ཙམ་ཡང་མ་ལུས་པ། ཁམས་གསུམ་འཁོར་བ་སྟོང་པར་ཤོག ༢༤༥ །

― LT28_Page_0320 ―

^{[མ་དཔེ་གཟིགས་ན་འདིར་གནོན།]}

[Full Size]

དང་པོར་བློ་སེམས་བཅོས་སླ་ཞིང་། །བར་དུ་ངམ་ངམ་ཤུགས་ཀྱིས་འབྱུང་། །ཐ་མ་མ་བཅོས་རང་ལུགས་སུ། །བཞག་པས་ཆོག་པའི་གདིང་རྙེད་ཤོག ༢༤༦ །དེ་སྲིད་ཡངས་པའི་རྒྱལ་ཁམས་འདིར། །རྣམ་དཀར་དགེ་བ་སྟོབས་གྱུར་པས། །བདེ་སྐྱིད་བདུད་རྩི་ཁོ་ན་ལ། །ཡང་དང་ཡང་དུ་སྤྱོད་པར་ཤོག ༢༤༧ །སྐྱེ་དང་ཚེ་རབས་ཐམས་ཅད་དུ། །དཔལ་ལྡན་བསྟན་པའི་ཉིན་བྱེད་ཀྱིས། །བདག་ནི་རྗེས་སུ་བཟུང་གྱུར་ནས། །གསུང་གི་བདུད་རྩིར་འཐུང་བར་ཤོག ༢༤༨ །ལུས་སྲོག་ཡལ་བར་འདོར་ནས་སུ། །མཉེས་པའི་ཞབས་ཏོག་སྒྲུབ་པ་ཡི། །བྱིན་རླབས་ཡོངས་རྫོགས་ཐོབ་ནས་ཀྱང་། །ཐུགས་ཡིད་གཅིག་ཏུ་འདྲེ་བར་ཤོག ༢༤༩ །ཡུན་དང་ཚེགས་ལ་མི་ལྟོས་པར། །སྐད་ཅིག་ཅིག་ལ་བྱང་ཆུབ་ནས། །མཁྱེན་བརྩེ་ནུས་པ་མཐར་ཕྱིན་ཏེ། །ཁྱོད་དང་གོ་འཕང་མཉམ་གྱུར་ཅིག ༢༥༠ །བདག་ནི་སྲིད་པ་ཇི་སྲིད་དུ། །ཁྱོད་ཀྱི་ཕྲིན་ལས་པར་གྱུར་ནས། །བསྟན་པ་འཛིན་སྐྱོང་སྤེལ་ལ་སོགས། །རླབས་ཆེན་སྤྱད་པ་སྤྱོད་གྱུར་ཅིག ༢༥༡ །གང་ཚེ་བལྟ་བར་འདོད་པའམ། །ཅུང་ཟད་འདྲི་བར་འདོད་ན་ཡང་། །རྒྱལ་དབང་ཆོས་ཀྱི་འབྱུང་གནས་ཉིད། །གེགས་མེད་པར་ཡང་མཐོང་བར་ཤོག༢༥༢། བདག་གི་བྱང་ཆུབ་སྤྱོད་པ་དང་། །སེམས་དང་སྨོན་ལམ་ཡོངས་བསྔོ་སོགས། །ཁྱོད་ཀྱི་མཛད་པ་ཇི་འདྲ་བ། །དེ་འདྲ་ཁོ་ནར་རེད་གྱུར་ཅིག ༢༥༣ །བྱང་

― LT28_Page_0321 ―

^{[མ་དཔེ་གཟིགས་ན་འདིར་གནོན།]}

[Full Size]

ཆུབ་སྙིང་པོར་མཆིས་ཀྱི་བར། །རེ་ས་གཞན་དུ་མ་མཆིས་པས། །འདི་ཕྱི་བར་དོའི་གནས་ཀུན་ཏུ། །སྐྱབས་སུ་མཆིའོ་ཐུགས་རྗེས་ཟུངས། ༢༥༤ །གཞན་གྱིས་སྤངས་པའི་སྐལ་ངན་བདག །ཅི་མཛད་བསྟན་པའི་ཉིན་བྱེད་མཁྱེན། །དེ་ཕྱིར་ཁྱད་མཉེས་མ་གྱུར་བར། ༢༥༥ །སྐྱབས་གཞན་ཚོལ་བ་མ་གྱུར་ཅིག ༢༥༥ །ཁྱད་པར་བདག་སོགས་མགོན་གྱུར་པ། །བརྩེ་གཏེར་ཕྱག་ན་པདྨོ་འཆང་། །བསྟན་པའི་བདག་པོ་ཀརྨ་ཀ །རྒྱལ་དབང་ཐེག་མཆོག་རྡོ་རྗེ་དང་། ༢༥༦ །བདེ་ཆེན་གྲུབ་པའི་ཐིག་ལེ་ཅན། །རིགས་ཀུན་ཁྱབ་བདག་རྡོ་རྗེ་འཆང་། །པདྨ་ཉིན་བྱེད་དབང་པོ་ཡི། །གསང་གསུམ་བསྐལ་བརྒྱར་འཚོ་གཞེས་ཤོག ༢༥༧ །བཞེད་དོན་མཐའ་དག་ལྷུན་གྲུབ་ཅིང་། །གདུལ་བྱའི་བསམ་པ་དག་པ་དང་། །མཉེས་པ་ཁོ་ན་སྒྲུབ་པ་ཡིས། །ཁྱོད་དང་དབྱེར་མེད་མཉམ་གྱུར་ཤོག ༢༥༨ །ཐུབ་ཆེན་བླ་མ་ཀརྨ་པའི། །བསྟན་པའི་ཁུར་ཆེན་ཁྱེར་བར་ཤོག །མི་ནུས་པས་ཀྱང་བསྟན་པ་ལ། །སེམས་ཁྲལ་ཙམ་ཡང་འབྱུང་བར་ཤོག ༢༥༩ །བྱང་ཆུབ་སེམས་བློ་འབྱོང་བ་དང་། །རང་སེམས་མངོན་སུམ་རྟོགས་གྱུར་ནས། །དོན་གཉིས་འབད་མེད་འགྲུབ་པ་ཡིས། །བདག་གི་བསམ་པ་རྫོགས་གྱུར་ཅིག ༢༦༠ །བསོད་ནམས་གསེར་གྱི་སྤྲིན་གྱི་བླ་བྲེ་ལས། །དགེ་ལེགས་མནྡཱ་ར་བའི་ཆར་ལྷུང་བས། །བཀྲ་ཤིས་རྟག་པ་དམ་པའི་ཕན་བདེ་ཡི། །ནོར་བུའི་སྙེ་མ་གཡུར་དུ་ཟ་བར་ཤོག །

― LT28_Page_0322 ―

^{[མ་དཔེ་གཟིགས་ན་འདིར་གནོན།]}

[Full Size]

༢༦༡ །ཇི་ཙམ་ན། ན་ཚོད་དང་བློ་གྲོས་ཀྱི་ཆུ་གཏེར་ཧ་ཅང་་རྒྱས་པར་མ་གྱུར་ཀྱང་། དད་པ་དང་སྤོབས་པའི་རླབས་ཕྲེང་གོམས་པའི་དབང་གིས་ཅུང་ཟད་འཆེལ་བ་ལས། རྡོ་རྗེ་འཆང་ཏཱ་ཡི་སི་ཏུ་ཡབ་སྲས་ཀྱི་བསྟན་པ་ལ་ཞུགས་ཤིང་མི་ཕྱེད་པའི་འདུན་པ་ཅན། ཡུལ་མཐའ་མཁོབ་ཏུ་རིག་པར་སྨྲ་བའི་བཙུན་པ་ཡོན་ཏན་རྒྱ་མཚོས། བགྲང་བྱ་ཉེར་གསུམ་ལ་མངོན་ཏུ་ཕྱོགས་པ་ན་མདོ་རྒྱུད་དང་མཐུན་པར་གསེར་ལྡན་ཆུ་ཀླུང་གི་ཀུ་སཱ་ལིའི་དབེན་པའི་མལ་སྐྱིབས་ན། སྐབས་འགར་འབང་ནས་བྲིས། སྐབས་འགར་ལྷུག་པར་བྲིས་ཏེ། །ཐམས་ཅད་མཁྱེན་པའི་རིན་པོ་ཆེའི་མཆོད་སྡོང་གི་མདུན་ཏུ་མངོན་པར་ཤེས་བཞིན་ཏུ་གསོལ་བ་བཏབ་པའོ། །དགེ་ལེགས་འཕེལ། ཤུ་བྷཾ།། །།

བླ་མ་དགོངས་པ་འདུས་པའི་ལྷ་ཚོགས་ལ་བསྟོད་སྨོན་ཏུ་སྦྱར་བ་བསམ་དོན་ཀུན་འགྲུབ།

― LT28_Page_0323 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་དགོངས་པ་འདུས་པའི་ལྷ་ཚོགས་ལ་བསྟོད་སྨོན་ཏུ་སྦྱར་བ་བསམ་དོན་ཀུན་འགྲུབ་ཅེས་བྱ་བ་བཞུགས་སོ། །

― LT28_Page_0324 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་པདྨ་བཛྲཱ་ཡ། །གསུང་གི་རྡོ་རྗེ་བདེ་བ་ཆེན་པོའི་དཔལ། །སྐད་ཅིག་དྲན་པས་འདི་ཕྱིའི་བདེ་བ་འཇོ། །ཚེ་དང་ཡེ་ཤེས་འོད་སྣང་མཐའ་ཡས་པ། །མགོན་པོ་ཆོས་ཀྱི་སྐུ་ལ་ཕྱག་འཚལ་ལོ། །འཁོར་བ་མ་སྟོངས་བར་དུ་གཞན་དོན་མཛད། །མཚན་ཙམ་ཐོས་པས་ངན་འགྲོའི་སྐྱེ་སྒོ་བཅད། །མི་འཇིགས་སྦྱིན་པ་བཅོམ་ལྡན་འཇིག་རྟེན་དབང་། །ཐུགས་རྗེ་ཆེ་ལྡན་ཞབས་ལ་གུས་པས་འདུད། །སྐྱེ་འཆི་ཀུན་སྤངས་མི་ཤིགས་རྡོ་རྗེའི་སྐུ། །འཁོར་བ་དོང་སྤྲུགས་པདྨ་ཐོད་ཕྲེང་རྩལ། །སངས་རྒྱས་ཀུན་ལས་ལྷག་པའི་བཀའ་དྲིན་ཅན། །རིགས་ཀྱི་བདག་པོས་དུས་འདིར་བྱིན་རླབས་སྩོལ། ཧྲཱིཿ །ཕྱོགས་བཅུ་དུས་གསུམ་རྒྱལ་བ་རྒྱ་མཚོ་ཡི། །གསང་གསུམ་མི་ཟད་རྒྱན་གྱི་འཁོར་ལོའི་སྤྲིན། །གཅིག་ཏུ་རྫོགས་པ་འཁོར་ལོའི་བདག་པོ་སྟེ། །དགོངས་པ་ཀུན་འདུས་དཀྱིལ་འཁོར་ལྷ་ལ་འདུད། །ཕྱི་ལྟར་དྷུ་མ་ཐ་ལ་མཁའ་འགྲོའི་གྲོང་། །ནང་ལྟར་རྣམ་དག་བཀོད་པའི་དཀྱིལ་འཁོར་མཆོག །གསང་བ་རྡོ་རྗེ་བཙུན་མོའི་བྷ་ག་སྟེ། །ཐར་པ་ཆེན་པོའི་གཞལ་ཡས་ཡངས་པ་ན། །རང་བྱུང་རྒྱལ་བ་མགོན་པོ་འོད་དཔག་མེད། །གཉེན་པོས་མ་བཅོས་ངོ་བོ་ཉིད་རང་བཞིན། །སོང་རྟོགས་ཡེ་ཤེས་འདུས་མ་བྱས་པའི་སྐུ། །རིགས་ཀུན་ཁྱབ་བདག་པདྨ་བཛྲ་རྩལ། །འགྱུར་མེད་བདེ་དང་སྟོང་པ་འདྲེས་པའི་སྐུ། །དམར་གསལ་དྭངས་པ་པདྨ་རཱ་གའི་མདོག །སྤྱན་

― LT28_Page_0325 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་མཆེ་བཞིས་མཚན་པའི་ཁྲོ་འཛུམ་ཞལ། །དཀར་མཐིང་དམར་བར་བསྟན་ལ་ཕྱག་འཚལ་བསྟོད། །ལས་སྒྲིབ་ཀུན་བསྲེག་སྨར་སྨིན་མེ་ཡི་མདངས། །འཁྱིལ་ཞིང་འཕྱང་བ་ལྕང་ལོའི་ཟར་བུ་ནི། །མཐོན་མཐིང་ཡང་དག་ལྟ་བ་མཐར་ཕྱིན་རྟགས། །ཡོན་ཏན་ཡོངས་སུ་རྫོགས་ལ་ཕྱག་འཚལ་བསྟོད། །དགོངས་པ་མི་འགྱུར་རྡོ་རྗེ་རྩེ་ལྔ་པ། །ཉོན་མོངས་རྩད་གཅོད་ཤེས་རབ་རལ་གྲི་འབར། །སྙིང་པོའི་དབང་སྩོལ་བཅུད་ལྡན་རིན་ཆེན་གྱི། །བུམ་པས་གཡས་ཕྱག་མཚན་ལ་ཕྱག་འཚལ་བསྟོད། །ཚངས་པའི་དྲིལ་བུ་ཐེག་ཆེན་ཆོས་དབྱངས་སྒྲོགས། །བནྡྷ་བཅུད་བཀང་དངོས་གྲུབ་ཆར་རྒྱུན་འབེབས། །དུག་གསུམ་དྲུང་འབྱིན་ཁ་ཊཱཾྭ་གཡོན་ན་བསྣམས། །འགྲོ་དྲུག་ཕྱག་རྒྱས་སྒྲོལ་ལ་ཕྱག་འཚལ་བསྟོད། །མུ་ཏིག་བཀྲམ་པ་པདྨའི་ཟེའུ་འབྲུལ། །ཨཏྨ་གྷའི་མགོ་བོ་ནོར་བུས་སྤྲས། །རྩེ་གསུམ་རྩེ་ལྔ་རྩེ་དགུ་རྡོ་རྗེའི་བྲག །པདྨ་ཉི་ཟླས་མཚན་ལ་ཕྱག་འཚལ་བསྟོད། །དགུ་རྫོགས་གདན་ལ་དྲེགས་པ་བྱོལ་སོང་དང་། །སྲིད་པ་ལུགས་བཟློག་འཁོར་ལོ་མནན་པའི་ཞབས། །བདུད་བཞི་ཟིལ་གནོན་བརྐྱང་བསྐུམ་འདོར་སྟབས་བསྒྲད། །མཚན་དཔེའི་གཟི་བརྗིད་འབར་ལ་ཕྱག་འཚལ་བསྟོད། །རུས་པའི་རྒྱན་དྲུག་རིན་ཆེན་འཕྱང་འཕྲུལ་མཛེས། །གླང་ཆེན་ཀོ་རློན་སྟག་གི་ཤམས་་ཐབས་མནབས། །ཕྱག་ཞབས་སྤྲུལ་དང་ཞིང་ཆེན་སྐེད་པར་དཀྲིས། །ཕྲིན་ལས་འགྲོ་འདུལ་སྟོན་ལ་ཕྱག་འཚལ་བསྟོད། །ཁྲག་ཐིག་རྩིབས་

― LT28_Page_0326 ―

^{[མ་དཔེ་གཟིགས་ན་འདིར་གནོན།]}

[Full Size]

ཐལ་མཁུར་ཚོས་སོར་རིས་སོགས། །དུག་གསུམ་དབང་སྡུད་སྤངས་རྟོགས་འདུལ་ཐབས་རྫོགས། །ཐོད་སྐམ་དབུ་རྒྱན་རིན་ཆེན་རྩེ་བྲན་ཅན། །ཐོད་རློན་དོ་ཤལ་མཛད་ལ་ཕྱག་འཚལ་བསྟོད། །དར་སྣའི་ཅོད་པན་ཆེ་བའི་ཡོན་ཏན་རྒྱས། །ཆགས་ཐོགས་མེད་པར་འགྲོ་དོན་མཛད་པའི་ཚུལ། །འགྱིངས་བག་གར་དགུའི་ཉམས་ཀྱིས་དགྱེས་རོལ་བ། །དགོངས་སྤྱོད་ཀློང་དུ་གྱུར་ལ་ཕྱག་འཚལ་བསྟོད། །སྤྱི་གཙུག་ནོར་བུ་དབང་གི་རྒྱལ་པོ་ལ། །ལེ་བརྒན་དར་གྱི་ལྕེའུས་མཛེས་པའི་ཏོག །རིགས་བདག་མགོན་པོ་འོད་མི་འགྱུར་བས་མཚན། །དཀྱིལ་འཁོར་འཁོར་ལོའི་མགོན་ལ་ཕྱག་འཚལ་བསྟོད། །གཉིས་མེད་བདེ་རོལ་ལྷ་ལྕམ་མནྡཱ་ར། །དགའ་བཞིའི་ཡེ་ཤེས་སྐྱེད་མཛད་རྣལ་འབྱོར་མ། །དམར་གསལ་མདངས་ལྡན་འདོད་ཆགས་མ་སྤངས་དག །མཉམ་སྦྱོར་འཛུམ་ཞལ་སྟོན་ལ་ཕྱག་འཚལ་བསྟོད། །མ་རིག་གཉིད་སློང་ལྟག་སྤྲོད་རྗེའུ་ཆུང་བརྡུང་། །དམར་བཀང་ཆགས་པའི་དུང་ཆེན་ཡབ་ལ་སྟོབ། །རིན་ཆེན་རུས་རྒྱན་དར་དམར་ཅོད་པན་འཕུར། །གཞོན་ཚུལ་ལང་ཚོ་རྫོགས་ལ་ཕྱག་འཚལ་བསྟོད། །གསང་བ་ཡེ་ཤེས་གསང་གསུམ་བརྒྱུད་འཛིན་མ། །ཚེ་དབང་དངོས་གྲུབ་སྟེར་མཛད་བདེ་ཆེན་རྒྱལ། །དུར་ཁྲོད་མཁའ་འགྲོ་སྡུད་ཅིང་བླན་ཏུ་འཁོལ། །དབྱིངས་ཕྱུག་སྨན་གཅིག་མ་ལ་ཕྱག་འཚལ་བསྟོད། ཧྲཱིཿ །དུ་མ་རོ་གཅིག་གཙོ་དང་འཁོར་གྱི་ཚུལ། །ཉིད་ལས་མི་གཞན་ཚོགས་བརྒྱད་རྣམ་པར་དག །ཕྱོགས་

― LT28_Page_0327 ―

^{[མ་དཔེ་གཟིགས་ན་འདིར་གནོན།]}

[Full Size]

མཚམས་ལིང་རྩེ་བརྒྱད་ཀྱི་དབུས་བཞུགས་པ། །དཔལ་ཆེན་ཡབ་ཡུམ་རྣམས་ལ་ཕྱག་འཚལ་བསྟོད། །ཆོས་ཀྱི་དབྱིངས་ལས་མཚན་མའི་ཕྱག་རྒྱར་སྣང་། །ཆ་ལུགས་མ་ངེས་གང་ལ་གང་འདུལ་ཚུལ། །རབ་འབྱམས་དཀྱིལ་འཁོར་འཁོར་ལོ་སྤྲོ་ཞིང་བསྡུ། །ཡབ་ཡུམ་སྲས་འཁོར་བཅས་ལ་ཕྱག་འཚལ་བསྟོད། །མཁའ་ཁྱབ་ཏིང་འཛིན་བདུད་དཔུང་ཟིལ་གྱིས་གནོན། །རྣམ་འཕྲུལ་དུ་མས་སྐལ་ལྡན་རྗེས་སུ་འཛིན། །བདེ་སྟོང་ཉམས་ཀྱིས་ཤེས་དང་ཤེས་བྱའི་དབྱིངས། །ཀུན་ཏུ་གར་མཛད་ཁྱོད་ལ་ཕྱག་འཚལ་བསྟོད། །རྡུལ་དང་རྡུལ་སྙེད་རོ་མཉམ་བརྟག་དཀའི་ཞིང་། །ཕུན་ཚོགས་ལྔ་ལྡན་སྲིད་ཞིའི་ཐིག་ལེ་ནི། །མ་འདྲེས་ལོངས་སུ་སྤྱོད་པ་བུམ་པ་སྐུའི། །ཡེ་ཤེས་ཞིང་ཀུན་ཁྱབ་ལ་ཕྱག་འཚལ་བསྟོད། །སྣ་ཚོགས་ལུས་དང་དེ་བཞིན་སྣ་ཚོགས་ངག །སྣ་ཚོགས་སེམས་ཏེ་མི་ཕྱེད་རྡོ་རྗེ་གསུམ། །ཤིན་ཏུ་གསང་བ་ཟབ་མོའི་ཡེ་ཤེས་སྐུར། །ཞིང་ཁམས་རབ་འབྱམས་རྫོགས་ལ་ཕྱག་འཚལ་བསྟོད། །རྣམ་ཐར་སྒོ་བཞི་རྡོ་རྗེ་བཙུན་མོའི་མཁར། །རྣམ་པ་ཀུན་ལྡན་བཅུ་དྲུག་ཆ་རྫོགས་པ། །བཏགས་པའི་ཆོས་རྣམས་འདུས་མ་བྱས་པས་ཕྱེ། །ཨེ་ཝཾ་རང་བཞིན་ཁྱོད་ལ་ཕྱག་འཚལ་བསྟོད། །རང་བྱུང་རང་བཞིན་འཇའ་ཟེར་ཐིག་ལེའི་སྦུབས། །རིག་པ་རང་གྲོལ་རྡོ་རྗེ་ལུ་གུ་རྒྱུད། །བྱ་རྩོལ་ལས་འདས་ཟང་ཐལ་འོད་ཀྱི་ལུས། །ཐོག་མའི་མགོན་པོ་ཁྱོད་ལ་ཕྱག་འཚལ་བསྟོད། །མདོར་ན་སངས་རྒྱས་

― LT28_Page_0328 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་གྱི་གསང་བའི་མཛོད། །བྱིན་རླབས་དངོས་གྲུབ་ཕྲིན་ལས་ཡོངས་ཀྱི་གཏེར། །རིགས་ཀུན་ཁྱབ་བདག་པདྨ་བཛྲ་གྱི། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད། །མདོ་རྒྱུད་ཡང་སྙིང་ཐེག་དགུའི་དོན་གྱི་བཅུད། །མཐོང་ཐོས་དྲན་རེག་མཆོག་གི་དངོས་གྲུབ་སྩོལ། །མཁའ་འགྲོའི་སྙིང་ཁྲག་རྩ་གསུམ་དགོངས་འདུས་ཀྱི། །ལུང་དང་རྟོགས་པའི་ཆོས་ལ་ཕྱག་འཚལ་བསྟོད། །སྨོན་ལམ་དབང་གིས་རྡོ་རྗེའི་རྒྱ་བཀྲོལ་ཞིང་། །གཞུང་བཞིན་སྤྱོད་པས་ཉིད་སྤྲུལ་ལུང་བསྟན་བརྙེས། །སྲིད་མཐའི་བར་དུ་རྒྱལ་བའི་མཛད་པ་ཅན། །རྩ་བརྒྱུད་བླ་མ་རྣམས་ལ་ཕྱག་འཚལ་བསྟོད། །གནས་ཡུལ་དཔའ་བོ་ཌཱ་ཀི་དམ་ཅན་ཚོགས། །འདོད་དགུར་བསྒྱུར་བའི་ཆོ་འཕྲུལ་མཐའ་ཀླས་པས། །དམ་ལྡན་རྣལ་འབྱོར་ཕོ་མོའི་གྲོགས་མཛད་ཅིང་། །ས་ལམ་བར་ཆད་སེལ་ལ་ཕྱག་འཚལ་བསྟོད། ཧྲཱིཿ །བླ་མ་ཡི་དམ་མཁའ་འགྲོའི་ཚོགས་བཅས་ལ། །བདག་ལུས་ཞིང་གི་རྡུལ་སྙེད་སྤྲུལ་པ་ཡིས། །མཁའ་ཁྱབ་སེམས་ཅན་བསམ་འོག་བཅུག་ནས་ནི། །སྒོ་གསུམ་རབ་གུས་གདུང་བས་ཕྱག་བགྱིའོ། །ཀུན་བཟང་མཆོད་སྤྲིན་བསམ་མི་ཁྱབ་པས་མཆོད། །དུག་གསུམ་མི་དགེའི་རིགས་གྱུར་མཐོལ་ལོ་བཤགས། །དེ་བཞིན་དགེ་བར་གྱུར་ལ་རྗེས་ཡི་རང་། །ཟབ་གསང་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་རྡོ་རྗེའི་སྐུར་བཞུགས་གསོལ། །དགེ་རྩ་བྱང་ཆུབ་ཆེེན་པོར་བསྔོ་བར་བགྱི། །ཇི་ལྟར་རྒྱལ་རྣམས་བསགས་སྦྱངས་ཕུན་

― LT28_Page_0329 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་པ། །དེ་ལྟར་བྱང་ཆུབ་སྤྱོད་པ་ཡོངས་རྫོགས་ཤོག །བདག་གི་དུས་གསུམ་དགེ་བ་ཇི་སྙེད་པ། །རིགས་དྲུག་འགྲོ་བའི་ལས་ངན་ཟད་ནས་ཀྱང་། །བསླུ་མེད་བྱང་ཆུབ་སྤྱོད་ལ་འཇུག་པ་དང་། །མྱུར་དུ་ཟུང་འཇུག་གོ་འཕང་ཐོབ་ཕྱིར་བསྔོ། །མ་སྐྱེས་སེམས་ཀྱི་རང་བཞིན་ནམ་མཁའ་ལྟར། །བྱ་བྱེད་ལས་དང་འཁོར་གསུམ་མི་དམིགས་པར། །སྒྱུ་མ་ཙམ་དུ་བསྔོས་ཤིང་སྨོན་པ་ཡིས། །རྣམ་དག་འབྲས་བུ་ཡོངས་སུ་འགྲུབ་པར་ཤོག །རྒྱལ་བ་ཀུན་དངོས་པདྨ་སཾ་བྷ་བས། །ཚེ་རབས་ཀུན་ཏུ་ཡོངས་འཛིན་མཛད་གྱུར་ཅིག །འོད་གསལ་རྡོ་རྗེ་ཐེག་པའི་སྣོད་གྱུར་ནས། །མཆོག་ཐུན་དངོས་གྲུབ་སྐད་ཅིག་ཐོབ་པར་ཤོག །དལ་འབྱོར་ཐོབ་པ་དོན་མེད་མ་གྱུར་ཅིང་། །དཀོན་མཆོག་འབྱུང་བ་མི་མཉེས་མི་བགྱིད་པར། །ནམ་མཁའི་མཐའ་ཀླས་འགྲོ་བ་མ་ལུས་པ། །རྒྱལ་བས་བསྔགས་པའི་ལམ་བཟང་ལ་འཇུག་ཤོག །མི་རྟག་སྙིང་ལ་གཟེར་བས་ཞེན་ལོག་དང་། །ངེས་འབྱུང་དྲག་པོས་ཤེས་རྒྱུད་ཆོས་དང་འདྲེས། །སྡོམ་དང་དམ་ཚིག་རྒྱུ་འབྲས་སྤང་བླང་ནི། །སྲོག་ལྟར་བཙའ་བའི་བརྟུལ་ཞུགས་ཐོབ་གྱུར་ཅིག །བདེ་བའི་འབྱུང་གནས་ཀུན་རྫོབ་དོན་དམ་གྱི། །བྱང་ཆུབ་སེམས་མཆོག་སྐྱེས་བརྟན་གོང་དུ་འཕེལ། །བགྲོད་པ་གཅིག་པའི་ལམ་བཟང་རྨད་བྱུང་བ། །དག་སྣང་མོས་གུས་ཕྱོགས་མེད་འབྱོང་བར་ཤོག །སྒོ་གསུམ་སྒྲིབ་པ་དབང་བཞིའི་ཆུ་བོས་བཀྲུས། །པདྨ་བཛྲ་རྩལ་གྱི་གསང་གསུམ་དང་། །རོ་མཉམ་རྡོ་རྗེའི་རྣལ་འབྱོར་མཐར་

― LT28_Page_0330 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིན་ནས། །གྲུབ་པའི་རིག་འཛིན་ཆེན་པོར་བདག་གྱུར་ཅིག །གསལ་བརྟན་ཚད་བརྒྱད་ལྷ་སྣང་གྱད་དུ་གྱུར། །ཡན་ལག་བཞི་ལྡན་རྡོ་རྗེའི་བཟླས་པ་ཐེམས། །ལས་བཞི་གྲུབ་བརྒྱད་རྣམ་པར་སྨིན་པའི་རིག །དབང་བསྒྱུར་མ་ཧཱ་ཡོ་ག་མཐར་ཕྱིན་ཤོག །རྩ་ཡི་མདུད་གྲོལ་རླུང་བཅུ་དབུ་མར་ཐིམས། །དཀར་དམར་ཐིག་ལེའི་ཞུ་བདེ་ཚད་དུ་སྨིན། །གཉུག་མའི་ཕུང་ཁམས་རྡོ་རྗེའི་སྲོག་གྲུབ་ནས། །ཚེ་དབང་ཨ་ནུའི་རྣལ་འབྱོར་མཐར་ཕྱིན་ཤོག །པད་འབྱུང་བླ་མའི་བྱིན་རླབས་སྙིང་ལ་འཕོས། །རིག་པ་རྗེན་པར་བུད་པས་མཉམ་རྗེས་ཀྱི། །ཐ་སྙད་ལས་འདས་འོད་གསལ་རྫོགས་པ་ཆེ། །ཁྲེགས་ཆོད་ཕྱག་རྒྱའི་རིག་འཛིན་མཐར་ཕྱིན་ཤོག །འཆར་ཚུལ་བརྒྱད་ཀྱི་ཡིན་ལུགས་ངོ་འཕྲོད་ནས། །རང་བཞིན་ཤིན་ཏུ་སྟོང་དང་སྟོང་ཆེན་ཏེ། །སྣང་མཆེད་ཐོབ་པའི་འོད་གསལ་མངོན་གྱུར་ནས། །ཡེ་ཤེས་གསུམ་སྒྲིབ་རྟོག་ཚོགས་རང་དག་ཤོག །འཁོར་འདས་རུ་ཤན་ཕྱེད་ནས་དགུ་ཕྲུག་གི། བྱ་བ་ཀུན་བཏང་སྣང་བཞིའི་རྩལ་ཆེན་རྫོགས། །ཐོབ་གསུམ་གཟེར་ཐེབ་གདིང་བཞིའི་དྲོད་རྙེད་དེ། །རགས་པ་ཉི་ཤུ་ཟག་མེད་ལུས་འགྲུབ་ཤོག །མངོན་ཤེས་རྗེས་དྲན་དྲུག་པོར་དབང་འབྱོར་ནས། །ཐིམ་ལུགས་བརྒྱད་ཀྱིས་གདོད་མའི་གྲོལ་གཞིར་ཕྱིན། །འཕོ་ཆེན་བུམ་སྐུའི་གཏན་སྲིད་ཚེ་འདིར་ཟིན། །ཨ་ཏི་ལྷུན་གྲུབ་རིག་འཛིན་མཐར་ཕྱིན་ཤོག །ལས་ཀྱི་ལྷག་མས་ཚེ་འདིར་མ་གྲོལ་ཀྱང་། ཀ་དག་དགོངས་པས་འཆི་བ་ཆོས་སྐུར་རྟོགས། །གཞི་སྣང་འོད་གསལ་ཟུང་འཇུག་ཚོམ་བུ་དང་། །

― LT28_Page_0331 ―

^{[མ་དཔེ་གཟིགས་ན་འདིར་གནོན།]}

[Full Size]

ཡེ་ཤེས་བཞི་སྦྱོར་ལྷུན་གྲུབ་ཆེར་གྲོལ་ཤོག །ཁྱད་པར་གནད་གཅོད་སྡུག་བསྔལ་མི་འབྱུང་ཞིང་། །རྡོར་སེམས་གསང་བའི་ལམ་ནས་རང་རིག་པ། །སྐད་ཅིག་ཉིད་ལ་ཡར་གྱི་ཟང་ཐལ་དུ། །འཆུག་མེད་ཆོས་ཉིད་མ་བུ་འདྲེས་པར་ཤོག །ཇི་ལྟར་དམན་ཀྱང་རླུང་སེམས་ལྷ་ཡི་སྐུ། །བཙན་ཐབས་འཕོ་བས་བདེ་ཆེན་པད་འོད་སོགས། །དག་པའི་ཞིང་དུ་མཁའ་འགྲོའི་སྐྱེལ་བསུ་བཅས། །མཐའ་ཡས་པདྨའི་སྲས་ཀྱི་མཆོག་གྱུར་ཤོག །མི་བསྐྱོད་ཞལ་མཐོང་རིན་འབྱུང་དབང་བསྐུར་ཐོབ། །སྣང་མཐས་ལུང་བསྟན་དོན་གྲུབ་དབུགས་དབྱུང་སྩལ། །མདུན་མཁར་ཁྲོ་བོའི་དཀྱིལ་འཁོར་རང་སྣང་དུ། །ངོ་ཤེས་ཀུན་བཟང་རྒྱལ་ས་ཟིན་པར་ཤོག །དེ་སྲིད་ལྷ་འདྲེ་མི་གསུམ་བར་ཆད་ཀྱིས། །མི་ཚུགས་བསམ་དོན་མཐའ་དག་ཆོས་བཞིན་འགྲུབ། །རྗེ་བཙུན་པདྨའི་ཕྲིན་ལས་སྤེལ་བ་ལ། །ཞུམ་པ་མེད་པའི་བརྟུལ་ཞུགས་བརྙེས་པར་ཤོག །རྒྱལ་བསྟན་སྤྱི་དང་གསང་ཆེན་ཟབ་མོ་ཡི། །བསྟན་དང་བསྟན་འཛིན་དར་རྒྱས་ཡུན་རིང་བརྟན། །ཁྱད་པར་ཨོ་རྒྱན་རྗེ་དང་བི་མ་ལའི། །ཐུགས་ཏིག་བསྟན་པ་དབྱར་མཚོ་ལྟར་འཕེལ་ཤོག །འགྲོ་བ་ཀུན་ཀྱང་དེ་ལ་གུས་ཤིང་འདུན། །གྲོགས་མཛད་དཀར་ཕྱོགས་ཡོངས་ཀྱི་དབུ་འཕང་མཐོ། །འཇིག་རྟེན་ཁམས་སུ་ནད་མུག་འཁྲུགས་རྩོད་ཞི། །བསྟན་པ་ངང་ངམ་ཤུགས་ཀྱིས་རྒྱས་པར་ཤོག །སྐྱབས་གནས་བསླུ་མེད་པདྨ་བཛྲ་ལ། །སྒོ་གསུམ་གུས་པས་བདག་ཉིད་བྲན་ཏུ་

― LT28_Page_0332 ―

^{[མ་དཔེ་གཟིགས་ན་འདིར་གནོན།]}

[Full Size]

འབུལ། །འཕྲལ་ཡུན་རེ་ལྟོས་གཞན་ཏུ་མ་མཆིས་པས། །ཐུགས་རྗེ་མ་ཆུང་ཉམ་ཐག་འགྲོ་ལ་དགོངས། །བདག་སོགས་དུས་མིན་འཆི་ལས་རབ་རྒྱལ་ཏེ། །རྟག་བརྟན་རྡོ་རྗེའི་ཚེ་དབང་མཆོག་བརྙེས་ཤིང་། །མཐོ་རིས་ཡོན་ཏན་བདུན་གྱི་དཔལ་དང་འབྱོར། །འབད་པ་མེད་པར་ལྷུན་གྱིས་གྲུབ་པར་མཛོད། །རྒྱལ་བསྟན་རྟགས་ཙམ་འཛིན་པའི་མཐའ་ལ་ཐུག །མདོ་སྔགས་གཟུགས་བརྙན་ཙམ་ཡང་མི་གསལ་ཞིང་། །བོད་འབངས་ཡོངས་ཀྱི་བདེ་སྐྱིད་ཟད་པའི་དུས། །སྔོན་གྱི་དམ་བཅའ་མ་བསྙེལ་ཐུགས་རྗེས་གཟིགས། །ཁྱད་པར་ནག་ཕྱོགས་འབྱུང་པོ་ཁ་དར་བས། །ཚེ་ནོར་འདོད་དང་ཐར་ལ་བར་ཆད་ཀྱི། །མུན་པའི་དྲྭ་བར་བྱིན་རླབས་ཉི་ཟླ་ཡི། །འོད་ཟེར་མཚོན་ཆ་ད་ལྟ་ཉིད་དུ་ཕོབ། །སངས་རྒྱས་ཀུན་འདུས་མཚོ་སྐྱེས་རྡོ་རྗེ་མཁྱེན། །བདག་སོགས་འགྲོ་ཀུན་རྗེས་སུ་བཟུང་ནས་ཀྱང་། །རྫུ་འཕྲུལ་ནུས་མཐུ་དཔག་མེད་ཐོབ་པར་མཛོད། །བོད་འབངས་ཡལ་བར་མདོར་བཀའ་དྲིན་ཅན། །མདོར་ན་བདག་སོགས་སྒྲིབ་བྱང་ཚོགས་རྫོགས་ཤིང་། །སྣང་སེམས་དབང་འདུས་འབྲེལ་ཚད་དོན་དང་ལྡན། །འབྱུང་བཞིས་གར་ཁྱབ་སྤྲུལ་པ་སྣ་ཚོགས་ཀྱིས། །འཁོར་བ་དོང་སྤྲུགས་དོན་གཉིས་མཐར་ཕྱིན་ཤོག །འཁོར་འདས་ཀུན་ཀྱང་པདྨ་བཛྲ་དང་། །དབྱེར་མེད་སྐུ་དང་ཡེ་ཤེས་འབྱམས་ཀླས་པས། །རང་སྣང་རིས་མེད་ཐར་པ་ཆེན་པོའི་གྲོང་། །ཐེག་ཆེན་ཆོས་ཀྱི་རྒྱལ་སྲིད་བརྟན་གྱུར་ཅིག །ཅེས་པའང་། །རིགས་

― LT28_Page_0333 ―

^{[མ་དཔེ་གཟིགས་ན་འདིར་གནོན།]}

[Full Size]

འདུས་བླ་མའི་དཀྱིལ་འཁོར་འདི་ཉིད་ལ་མི་ཕྱེད་པའི་དད་པ་ཅན་རིག་འཛིན་གྱི་བཙུན་པ་ཡོན་ཏན་རྒྱ་མཚོས་ཆུ་སྟག་ལོའི་གྲལ་ཚེས་བཅོ་ལྔ་ཤར་བ་ཅན་གསུམ་ལ་ཐུན་རེ་སྦྱར་བ་དགེ་ལེགས་འཕེལ།། ༈ །།གདོད་མའི་མགོན་པོ་འགྲོ་བའི་དོན་ཏུ་བྱོན། །འོད་གསལ་རྡོ་རྗེ་སྙིང་པོའི་སྟོན་པ་མཆོག །ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་པ། །མི་ཕྱེད་དད་པས་སྙིང་གི་པདྨོར་བསྙེན། །གཞོན་ནུ་བུམ་སྐུའི་དབྱིངས་ལས་ལྷུན་གྲུབ་རྩལ། །སྲིད་དང་ཞི་བའི་ཐིག་ལེར་རང་ཤར་བས། །དུས་བཞིར་གྲོལ་བ་བཞི་ཡི་རྣམ་པར་ཐར། །ཆོས་དབྱིངས་སྲིད་པའི་མཐའ་དང་སྙོམས་པར་ཞུགས། །ཁྱད་པར་གངས་ཅན་གདུལ་བྱ་སྨིན་པ་དང་། །སངས་རྒྱས་ལས་ཀྱང་ངེས་པར་དཀོན་པའི་ལམ། །རྩོལ་མེད་ཨ་ཏིའི་གསང་བ་སྤེལ་བའི་ཕྱིར། །དྲི་མེད་བཤེས་གཉེན་མི་ཡི་ཟོལ་དུ་འཁྲུངས། །མང་དུ་ཐོས་ཤིང་དྲི་མེད་ལུང་གིས་ཕྱུག །སྒྲོ་འདོགས་ཆོད་ཅིང་སྤོབས་པའི་གཏེར་ཁ་བྱེ། །ཚུལ་ཁྲིམས་དྲི་ལྡན་བློ་གྲོས་གཟི་བརྗིད་འབར། །ཀུན་མཁྱེན་གཉིས་པ་གངས་རིའི་ལྗོངས་སུ་བྱུང་། །བློ་ཡི་མཆོག་ནི་ལྷག་པའི་ལྷ་ཡིས་བྱིན། །རྒྱལ་བའི་དགོངས་པ་སྐྱེས་སྦྱངས་སྟོབས་ཀྱིས་རྙེད། །ཆོས་ཉིད་ཟད་སར་སྣང་བཞིའི་ལམ་ནས་གཤེགས། །ཀུན་ཏུ་བཟང་པོའི་མཛད་པའི་གར་མཛད་དོ། །དགོངས་པའི་རྩལ་ཆེན་ཡོངས་སུ་རྫོགས་པ་ལས། །ཀུན་བཟང་དགོངས་ཟབ་ལྷུག་པར་བཀྲོལ་བ་ལ། །ཁྱོད་ཀྱི་རྣམ་དཔྱོད་རླབས་ཆེན་ཇི་འདྲ་བ། །

― LT28_Page_0334 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་འདྲ་འཕགས་བོད་མཁས་པ་སུ་ལའང་མེད། །ཐུན་མོང་གྲུབ་མཐའི་གཡའ་དྲིས་མ་སྦགས་པར། །འོད་གསལ་རྡོ་རྗེ་ཐེག་པ་བཻ་ཌཱུརྱ། །བཤད་སྒྲུབ་རྒྱལ་མཚན་རྩེ་མོར་ལྷོངས་ཕུད་པའི། །དེད་དཔོན་ཁྱོད་ནི་ཨུདུམྦ་ར་འདྲ། །འཇམ་དཔལ་ཡབ་ཡུམ་བསྟི་བའི་ཐུགས་མཚོ་ན། །ཚར་གཅོད་རྗེས་འཛིན་བདག་ཉིད་ཀུན་ཤེས་དང་། །ཡན་ལག་ལྔར་བཅས་རིག་པའི་པད་ཚལ་དུ། །བློ་ལྡན་བུང་བའི་ན་ཆུང་རྩེད་འཇོས་བྲེལ། །རྩོལ་བཅས་ཐེག་པའི་རྐང་འགྲོས་ངལ་དུབ་ལ། །མ་ལྟོས་རྩོལ་མེད་ལྟ་སྒོམ་གཤོགས་རྒྱངས་ཀྱིས། །སྤྱི་རྒྱ་རླབས་ཀྱིས་གཅོད་པའི་མཁའ་ལྡིང་ཞིག །ཡེ་ཤེས་བླ་མའི་ས་མཐར་བདེ་བར་བསྙེགས། །ཀུན་བཟང་དགོངས་པའི་གཏེར་ཆེན་མཚོ་བཞིན་བརྡོལ། །རྡོ་རྗེ་རྩེ་མོའི་གཤེགས་ཤུལ་ཡངས་པར་མཛད། །སྙན་གྲགས་ལྷ་ཡི་རྔ་ཆེན་ཞིང་ཀུན་འགྲོ། །སྐྱེས་བུ་ཉི་མ་སངས་རྒྱས་ཞིང་འདིའི་རྒྱན། །ཁྱོད་ཀྱི་བླ་མ་དགེ་སློང་དཔལ་དང་ལྡན། །ཁྱོད་ནི་རྡོ་རྗེའི་སྒྲ་མཁས་དཔལ་འཛིན་ཏེ། །ཁྱོད་ཀྱི་བརྒྱུད་འཛིན་དགེ་སློང་མ་དཔལ་མོས། །ཐལ་འགྱུར་ལུང་བཞིན་ཨ་ཏིའི་སྣང་བ་བརྡལ། །སོ་སྐྱེའི་མཁས་པ་བློ་ལ་སྐྱོན་ཆགས་པས། །ཁྱོད་ཀྱི་གྲུབ་མཐའ་ཕྱོགས་ལྷུང་ལམ་དུ་འཁྲིད། །བཀའ་དང་དཔེ་དཔང་ཚད་མར་མི་འཛིན་པ། །འདི་དག་མྱུར་དུ་ཚར་བཅད་མི་མཛད་དམ། །མཁས་པའི་བྱ་བས་རྒྱལ་བསྟན་རབ་གསལ་ཞིང་། །གྲུབ་པའི་རྒྱལ་སར་ཁམས་གསུམ་ཡོངས་སྒྲོལ་བ། །ཀུན་ཏུ་བཟང་པོ་དྲི་མེད་འོད་ཟེར་གྱི། །རྣམ་ཐར་བདག་སོགས་འགྲོ་

― LT28_Page_0335 ―

^{[མ་དཔེ་གཟིགས་ན་འདིར་གནོན།]}

[Full Size]

བས་བརྙེས་གྱུར་ཅིག །ཅེས་པའང་རྗེ་འདི་ཉིད་ཀྱི་བཀའ་གསང་མཛོད་ཆེན་བདུན་དང་། །སྙིང་ཐིག་མ་བུ་སོགས་ལས་འོད་གསལ་རྡོ་རྗེ་ཐེག་པ་ལ་གོ་ཉམས་ཅུང་ཟད་ཤར་བ་བློ་གྲོས་མཐའ་ཡས་ད་རི་དྲཱས་ཀུན་བཟང་བདེ་ཆེན་འོད་གསལ་གླིང་དུ་ཚིགས་སུ་བཅད་དེ་སྨྲས་པའོ།། ༈ །།སྣང་མཛད་སྲུང་བའི་རྡོ་རྗེའི་སྒྱུ་འཕྲུལ་ལས། །གངས་ཅན་བསྟན་འགྲོ་རིང་འཚོའི་དཔྱིད་དཔལ་དུ། །ཡོངས་རྫོགས་བཤེས་གཉེན་དམ་པའི་སྐུར་སྣང་བ། །ལྷ་མིའི་གཙུག་གི་རྒྱན་གཅིག་དེ་ལ་འདུད། །ཤེས་བྱ་རབ་འབྱམས་གནས་ལ་སྤོབས་པའི་གཏེར། །གྲོལ་བས་འཆད་རྩོད་རྩོམ་པའི་པདྨོའི་ཀླུང་། །མཐོ་རིས་ཚལ་མཚུངས་མཚུངས་མེད་འབྱེད་པ་ལ། །བློ་གྲོས་འོད་ཟེར་ཉི་བཞིན་བརྡལ་དེར་འདུད། །འགྲོ་བའི་ཁམས་ལ་ཉེ་དང་རིང་མེད་པར། །ཐུགས་བསྐྱེད་བཟུང་ཡང་ཕྱོགས་སུ་ལྷུང་བ་བཞིན། །འཇམ་པའི་དབྱངས་དེ་ཁྱོད་ཐུགས་སྐྱེད་ཚལ་ན། །གཞོན་ནུའི་རོལ་རྩེད་མཛད་བཞིན་བཞུགས་སམ་སྙམ། །འཆལ་བའི་དྲི་སྤངས་ཚུལ་ཁྲིམས་ཕ་རོལ་དུ། །སོན་ཀྱང་ལུང་རྟོགས་ལང་ཚོའི་གཞོན་ཤ་ནི། །ཤིན་ཏུ་མཛེས་ལ་ཆགས་པའི་མཚོ་ལྡན་མ། །མགྲིན་པའི་འཁོར་ལོར་དལ་གྱིས་ཡིབ་པ་འདྲ། །གང་ཟག་གཞན་ལ་རྨི་ལམ་ཙམ་དུ་ཡང་། །དབུགས་འབྱིན་མི་མཛད་ཐོད་ཕྲེང་རྩལ་ཡབ་ཡུམ། །ཁྱོད་དང་འབྲལ་མི་ཕོད་པར་བྱིན་རློབ་ཅིང་། །ལུང་སྟོན་རྩོལ་བའི་ཐུགས་རྗེ་དེ་ཅི་ཞིག །གཞན་གྱིས་སྨྲས་པའི་རྗེས་སུ་མི་ཟློས་པར། །རང་གི་བློ་གྲོས་སྟོབས་ཀྱིས་གྲུབ་པའི་མཐའི། །ལྟ་

― LT28_Page_0336 ―

^{[མ་དཔེ་གཟིགས་ན་འདིར་གནོན།]}

[Full Size]

སྒོམ་སྤྱོད་ཚུལ་སྔོན་དང་མི་འགལ་བར། །སྔོན་མེད་ལེགས་བཤད་འབྱིན་དེ་ཁྱད་པར་ཆོས། །བསླབ་གསུམ་གསེར་གྱི་ཀ་བས་བཏེགས་པ་ཡི། །རྣམ་ཐར་ནོར་བུའི་གཞལ་ཡས་ཉམས་དགའ་བར། །དམ་པའི་སྐྱེ་བོ་བྱེ་བ་ངལ་གསོའི་གནས། །རྣམ་རྒྱལ་ཁང་བཟང་གཉིས་པ་ས་འདིར་བྱུང་། །དམ་པའི་སྐྱེ་བོ་བྱེ་བ་ངལ་གསོའི་གནས། །རྣམ་རྒྱལ་ཁང་བཟང་གཉིས་པས་འདིར་བྱུང། །དམ་པའི་རྣམ་ཐར་ལྷ་ཡི་རྔ་བོ་ཆེ། །སྐལ་མེད་ས་སྤྱོད་རྣ་བར་ལྷུང་དཀའ་ཡང་། །དམ་པ་རྣམས་ཀྱི་སྙིང་ལ་བདུད་རྩི་དང་། །རྣ་བའི་བུ་གར་དྲི་ཟའི་གླུ་བཞིན་གྱུར། །ངེས་པར་འབྱུང་བས་དབེན་གསུམ་བདུད་རྩི་གྲུབ། །རྨི་ལམ་དུ་ཡང་ཆོས་བརྒྱད་སྒྲོག་ལས་གྲོལ། །མདོ་སྔགས་ཚུལ་ལ་མི་འཇིགས་སློབས་པ་ཐོབ། །སྙིང་པོའི་ལམ་བཟང་འཁྲུལ་མེད་སྟོན་པར་མཛད། །གཟུང་འཛིན་རྟོག་པའི་སྤྲིན་རིས་ཀུན་ཟོས་པས། །འོད་གསལ་དྷཱུ་ཏིའི་མཁའ་སྔོན་དྭངས་པ་ལ། །སྒྱུ་འཕྲུལ་རྒྱན་གྱི་བཀོད་པའི་དབང་གཞུ་བྲེས། །ཧེ་རུ་ཀ་དཔལ་མཚན་གྱི་ཅོད་པན་དཔྱངས། །གཞན་ལ་སྦས་པ་ཕྱི་དང་ནང་གི་གཏེར། །སྐལ་ལྡན་ལག་པའི་མཐིལ་དུ་འདུག་པ་བཞིན། །ཁྱོད་ལ་གྲུབ་པའི་རྟགས་སུ་ཨོ་རྒྱན་རྗེས། །ཐུན་མོང་མིན་པའི་མནོག་ནོར་ཉིད་དུ་བསྩལ། །ཚིག་སྟོང་སྦུ་བས་བསྙེམས་པའི་མཁས་པ་དང་། །བླུན་སྒོམ་ཡིད་དཔྱོད་ཅན་གྱི་གྲུབ་པ་དང་། །རང་བཟོས་བསླད་པའི་གཏེར་ཆོས་སྨྲིག་རྒྱུའི་ཕྲེང་། །ཁྱོད་ཀྱི་རྣམ་ཐར་འཇམ་ཆར་ཟེགས་མས་བསྙིལ། །བདག་ཀྱང་སྐྱེ་བར་ཁྱོད་འདྲའི་བཤེས་བསྟེན་ཅིང་། །ཁྱོད་དང་རྣམ་ཐར་མཉམ་པ་ཉིད་གྱུར་ནས། །ཕྲིན་ལས་མི་ཟད་

― LT28_Page_0337 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱན་གྱི་འཁོར་ལོའི་སྤྲིན། །མཁའ་དང་འགྲོ་ཁམས་མཐར་ཐུག་བཀོད་བྱེད་ཤོག །ཅེས་པའང་ཀུན་གཟིགས་སྤྲུལ་པའི་གཏེར་ཆེན་པྲཛྙ་ར་སྨིའི་རྣམ་ཐར་ལ་སྨོན་པ་བློ་གྲོས་མཐའ་ཡས་ཀྱིས་སོ།། ༈ །།སྔ་འགྱུར་བསྟན་པའི་མེ་རོ་གཞི་བཞེངས་སུ། །སློང་ལ་སྨོན་ལམ་མཐུ་གྲུབ་རིག་པ་འཛིན། །པདྨ་གར་དབང་འགྱུར་མེད་རྡོ་རྗེ་རྩལ། །གསང་ཆེན་འཁོར་ལོས་སྒྱུར་ལ་གུས་ཕྱག་འཚལ། །རྡོ་རྗེ་ཆོས་སུ་གྲགས་པའི་རྒྱལ་བའི་སྙན། །དབང་པོའི་སྣོད་དང་མཚམས་པའི་གཟུགས་ཀྱི་གར། །དབུས་འགྱུར་ས་ཡི་ཐིག་ལེར་ཤར་ཙམ་ནས། །གངས་ལྗོངས་མཐའ་དག་སྣང་བས་བྲན་དེར་འདུད། །བཀོད་པའི་རྒྱལ་སོགས་དེ་བཞིན་གཤེགས་རྣམས་ལས། །ཐུགས་བསྐྱེད་མཁའ་མཐར་སོན་པའི་གོ་ཆ་ནི། །རབ་མཁྲེགས་རྡོ་རྗེའི་ཞུབ་ཆེན་ལྟར་བཞེས་ནས། །སངས་རྒྱས་སྟོང་གི་རྣམ་ཐར་བཟླུམས་ལ་འདུད། །རྒྱལ་བའི་གསུང་རབ་འཛིན་ཞིང་སྡུད་པ་དང་། །བོད་ཡུལ་བརྡ་དང་ཡི་གེའི་ལམ་སྲོལ་གཏོང་། །ཆོས་ཀྱི་ཤིང་རྟ་ཐོག་མར་འདྲེན་ལ་སོགས། །སྐབས་དང་འཚམས་པའི་འཕྲུལ་ཆེན་སྒྱུར་ལ་འདུད། །ཆོས་ཀྱི་བང་མཛོད་འཛིན་ལ་བདག་པོའི་གནས། །བརྙེས་ཀྱང་ཆོས་མཆོག་འོད་གསལ་རྡོ་རྗེ་ཐེག །རྩལ་དུ་བཏོན་ནས་ཆོས་ཀྱི་རྒྱལ་མཚན་བསྒྲེངས། །ངེས་གསང་བསྟན་པའི་ཆུ་མགོར་གྱུར་ལ་འདུད། །བཀའ་མའི་བཤད་སྒྲུབ་འགྱེལ་བ་རྨངས་ནས་བསླངས། །ཟབ་གཏེར་སྨིན་གྲོལ་སྐམ་པའི་རྒྱུན་སྲོལ་མཐུད། །སེམས་

― LT28_Page_0338 ―

^{[མ་དཔེ་གཟིགས་ན་འདིར་གནོན།]}

[Full Size]

ཀློང་མན་ངག་ཉམས་ལེན་བརྒྱུད་སྤེལ་ནས། །ཡོ་ག་རྣམ་གསུམ་སྲོག་རྩ་བཟུང་དེར་འདུད། །ལོ་ཙཱ་ཆེན་པོའི་ཐུགས་བསྐྱེད་ཤིང་རྟ་ཡིས། །གསང་ཆེན་ཉི་མ་གསར་དུ་དྲངས་ཙམ་ནས། །མཁན་སློབ་ཆོས་གསུམ་རྒྱལ་ཚབ་ལྷན་ཅིག་ཏུ། །བོད་ཡུལ་དབུས་སུ་འཇོམས་པར་གྱུར་ལ་འདུད། །རྩོད་བྲལ་རང་གཏེར་ནོར་བུའི་མཆོག་བླངས་ཤིང་། །བསྟན་འགྲོར་སྙིགས་མའི་རྒུད་པ་རིང་དུ་འཕྲོག །ཟོལ་མེད་བརྟུལ་ཞུགས་སྤྱོད་པའི་གར་བརྒྱ་ཡིས། །དོན་ཆེན་མཛད་པ་འབའ་ཞིག་བསྒྲུབས་ལ་འདུད། །ལུང་བསྟན་དུས་བབ་ཨོ་རྒྱན་མཁའ་འགྲོའི་གནས། །གཉིས་པ་སྨིན་གྲོལ་རྒྱུན་བཟང་ཐུབ་བསྟན་མཐར། །མཉམ་དུ་འབབ་པ་མཁས་གྲུབ་ངང་མོའི་གནས། །གཏིང་དཔག་དཀའ་བའི་མཚོ་གླིང་བསྐྱིལ་ལ་འདུད། །ལུང་ཁུངས་བཙུན་ལ་མན་ངག་ཤིན་ཏུ་ཟབ། །ཕྱག་བཞེས་གཙང་ཞིང་རྣམ་དཔྱོད་ཆེ་ལྡན་པས། །འཕགས་བོད་མཁས་པའི་ལེགས་ཆ་ཕྱོགས་གཅིག་ཏུ། །བསྡུས་པ་ལྟ་བུའི་བཀའ་སྲོལ་བཙུགས་ལ་འདུད། །མཁས་པ་མང་ཡང་གསང་དོན་ཕིག་པ་ཁྱོད། །གྲུབ་པ་མང་ཡང་ཕྱག་རྗེས་ཐོན་པ་ཁྱོད། །གཏེར་སྟོན་མང་ཡང་བསྟན་ལ་ཕན་པ་ཁྱོད། །གཟུར་གནས་བློ་ངོར་ཁྱོད་ནི་ཟླ་ལྟར་བསིལ། །སྙིགས་མའི་སྐྱེ་བོའི་བློ་མུན་སྟུག་དྲག་པས། །ཁྱོད་ཀྱི་བསྟན་པའང་ཧ་ཅང་མི་གསལ་བས། །མཁྱེན་བརྩེ་ནུས་པའི་གདིང་ཚད་རྩལ་སྤྲུགས་ལ། །ཕྲིན་ལས་ཉི་མ་བྱེ་བའི་རླབས་འབར་མཛོད། །བདག་ཀྱང་ཁྱེད་དང་དབྱེར་མེད་

― LT28_Page_0339 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་གྱུར་ནས། །དོན་གཉིས་ལྷུན་གྱིས་གྲུབ་པས་གནས་སྐབས་དང་། །མཐར་ཐུག་བདེ་ལེགས་སྣང་བ་འོད་པོ་ཆེ། །མི་ནུབ་སྲིད་ཞིའི་ཁམས་ཀུན་བརྡལ་གྱུར་ཅིག །ཅེས་པའང་པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་སྨྲས་པ་སྟེ། །ཐུགས་རྗེའི་གོ་སྐབས་ལ་འགགས་པས་སྨོན་ལམ་གྱི་མཐུ་ལས་བྱིན་རླབས་ཆ་ཙམ་འཇུག་པའང་སྲིད་པའི་ཕྱིར་དང་། །ངོ་མཚར་བའི་མཛད་པ་ལ་སྙིང་ནས་གུས་པ་ཆེན་པོ་ལྷན་སྐྱེས་སུ་མཆིས་པས་སོ།། ༈ །།འཇིག་རྟེན་དབང་ཕྱུག་བཤེས་གཉེན་ཚུལ་བསྟན་པ། །ཐུགས་རྗེའི་རང་གཟུགས་སྙིགས་དུས་འགྲོ་བའི་མགོན། །མཁྱེན་བརྩེ་ནུས་པའི་ཕུང་པོ་བླ་ན་མེད། །ཀརྨ་ཆགས་མེད་ཞབས་ལ་གུས་ཕྱག་འཚལ། །སྔོན་རབས་སྐྱེ་བའི་ཕྲེང་བ་དུ་མ་རུ། །ཚོགས་གཉིས་གོམས་ཤིང་སྨོན་ལམ་རྒྱུན་དག་པས། །བསྟན་ལ་ཞུགས་ནས་གྲུབ་པའི་སར་གཤེགས་པར། །དགོངས་སྤྱོད་ཆོས་བཞིན་ལྷུན་གྱིས་གྲུབ་ལ་འདུད། །ལྷག་པའི་བསམ་པ་གསེར་ལྟར་ཕུན་སུམ་ཚོགས། །ཀུན་ཏུ་སྤྱོད་པར་ཁ་ན་མ་ཐོ་སྤངས། །སྒྲུབ་པའི་རྒྱལ་མཚན་ཐད་ཀློད་མེད་པར་བཙུགས། །ཕྲིན་ལས་ནམ་མཁའི་མཐའ་དང་མཉམ་ལ་འདུད། །རྩ་བརྒྱུད་བླ་མ་རྣམས་ཀྱིས་བྱིན་རླབས་བསྩལ། །ཡི་དམ་མཁའ་འགྲོའི་ཚོགས་ཀྱིས་ལུང་བསྟན་ཐོབ། །ཆོས་སྐྱོང་དམ་ཅན་རྒྱ་མཚོས་བྲན་བཞིན་ཉན། །བདེན་པ་གྲུབ་ཅིང་མངོན་ཤེས་ལྡན་ལ་འདུད། །གྲགས་ཕྱིར་མ་ཡིན་གཞན་ཕན་འབའ་ཞིག་ཕྱིར། །རྩོལ་མེད་གསུང་

― LT28_Page_0340 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་དོན་བཟང་གོ་སླ་ཞིང་། །བྱིན་རླབས་དད་ཆགས་ཚིགས་བཅད་རེ་རེས་ཀྱང་། །འགྲོ་ཕན་གངྒཱའི་རྒྱུན་ལྟར་མཛད་ལ་འདུད། །ཡུལ་དུས་དབང་པོར་འཚམས་བའི་ཆོས་སྟོན་ཅིང་། །གདུལ་བྱ་སྣ་ཚོགས་འདུལ་བའི་ཐབས་མཁས་ཅན། །འབྲེལ་ཚད་བདེ་ཆེན་ཞིང་དུ་སྐྱིལ་བ་ལ། །སྔ་ན་མེད་པའི་ལམ་མཁན་གྱུར་ལ་འདུད། །རྒྱལ་བའི་མྱུ་གུ་ཀུན་གྱི་སྙིང་རྗེའི་གར། །ཞིང་འདིར་ཀརྨ་ཆགས་མེད་མཚན་གྱི་དབྱངས། །དཔྱིད་ཀྱི་སྐྱེ་བོར་དུས་ཀྱི་ཁུ་བྱུག་བཞིན། །ཐོས་པ་ཙམ་གྱིས་ཀུན་དགའ་སྟེར་ལ་འདུད། །སྙིགས་མའི་སྐྱེ་བོ་བློ་གྲོས་སྣོད་ཆུང་ཞིང་། །འདོད་པའི་དྲྭ་བ་རབ་ཏུ་འཛིངས་པ་ལ། །སོ་སོར་འཚམས་པའི་ཆོས་སྒོ་སྣ་ཚོགས་པས། །རེ་སྐོང་ཡིད་བཞིན་དབང་གི་རྒྱལ་པོར་འདུད། །རྣམ་དག་མཛད་པའི་ཆ་ཤས་ཕྲ་མོས་ཀྱང་། །འཕྲལ་དང་ཡུན་གྱི་ཕན་བདེ་སྟེར་བ་ལ། །ནོར་བུ་བུམ་བཟང་དཔག་བསམ་ཤིང་གིས་ཀྱང་། །མི་བསྐྲུན་དབྱིག་གི་སྙིང་པོ་དེ་ལ་འདུད། །ཀཾ་ཚང་བསྟན་པའི་ཆུ་རྒྱུན་རིང་དུ་བསྲིངས། །ཟབ་གཏེར་ཆོས་ཀྱི་ནུས་བྱིན་རྣོ་སོ་ཕྱུང་། །གཏོ་དཔྱང་རྣམས་ཀྱང་བྱང་ཆུབ་ལམ་དུ་བསྒྱུར། །ཀུན་ཀྱང་གོ་སླ་འཇུག་བདེར་མཛད་ལ་འདུད། །ཁྱོད་ཀྱི་ངོ་མཚར་ཕྲིན་ལས་རྒྱ་ཆེ་བ། །གང་ཟག་ཕལ་གྱིས་ནམ་ཡང་བསྒྲུན་མེད་པས། །སྤྱན་རས་གཟིགས་དབང་

― LT28_Page_0341 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྲིན་ལས་འབའ་ཞིག་ཕྱིར། །བསམ་མི་ཁྱབ་པའི་རྣམ་ཐར་ལྡན་ལ་འདུད། །མགོན་པོ་ཁྱོད་ལ་སྙིང་ནས་དད་པའི་མཐུས། །བདག་ཀྱང་ཁྱོད་ཀྱི་རྣམ་ཐར་ཀུན་འགྲུབ་ཅིང་། །སྲིད་པ་འདི་ནས་བདེ་བ་ཅན་ཞིང་དུ། །ལམ་སྣ་དྲོང་ཞིང་རྗེས་སུ་འཛིན་གྱུར་ཅིག །ཅེས་པའང་ཀར་རྙིང་ཟུང་འཇུག་གི་དགེ་སྦྱོང་ལྟར་སྣང་བ་ཡོན་ཏན་རྒྱ་མཚོས་སྙིང་ནས་གུས་པས་བྲིས་པ་སིངྡྷི་ྷ་བནྟུ། །དགེ་ལེགས་འཕེལ།། །།

རྡོ་རྗེའི་ཡེ་ཤེས་འབེབས་པའི་བྱིན་རླབས་ལམ་ཟབ་ཀྱི་ཕྲེང་བ་ཡོངས་འདུས་ལྗོན་པའི་སྐྱེད་ཚལ།

― LT28_Page_0343 ―

^{[མ་དཔེ་གཟིགས་ན་འདིར་གནོན།]}

[Full Size]

རྡོ་རྗེའི་ཡེ་ཤེས་འབེབས་པའི་བྱིན་རླབས་ལམ་ཟབ་ཀྱི་ཕྲེང་བ་ཡོངས་འདུས་ལྗོན་པའི་སྐྱེད་ཚལ་ཅེས་བྱ་བ་བཞུགས་སོ། །

― LT28_Page_0344 ―

^{[མ་དཔེ་གཟིགས་ན་འདིར་གནོན།]}

[Full Size]

གསུང་གི་དབང་ཕྱུག་སྤྲུལ་པའི་སྐུ་རྡོ་རྗེའི་རིགས་ལྡན་བླ་མའི་ངོ་བོར་མཆོད་ཅིང་གསོལ་བ་གདབ་པ་བདེ་ཆེན་ལྷན་སྐྱེས་རོལ་པ་ཞེས་བྱ་བ་བཞུགས་སོ།། ༈ །།གུར་གུམ་གཞོན་ནུས་ཁེབས་པའི་གསེར་གྱི་རིར། །ཉི་འོད་སྟོང་གི་དྲྭ་བས་འཁྱུད་པ་བཞིན། །ཡེ་ཤེས་སྐུ་ཁྱོད་ཡིད་མཁར་ཤར་ཙམ་གྱིས། །མུན་པའི་བརྟན་པ་གཅིག་ཅར་འཕྲོག་ལ་འདུད། །ས་བཅུ་པའི་དབང་ཕྱུག་ཐམས་ཅད་ལས་ཀྱང་ཁྱད་པར་གྱི་རྣམ་ཐར་འཆང་བ་རྒྱལ་བ་ཀུན་གྱི་ཡེ་ཤེས་མེ་ལོང་མིའི་བདག་པོ་བླ་མའི་སྐུར་བསྟན་པ་དེ་ལ་ཕུར་ཚུགས་སུ་གསོལ་བ་འདེབས་པ་ནི་ཡེ་ཤེས་དང་སྙིང་རྗེའི་རྟོགས་པ་རྒྱུད་ལ་སྐྱེ་བའི་ཉེ་ལམ་མཐར་ཐུག་ཅིང་། ཁྱད་པར་རྡོ་རྗེའི་རྣལ་འབྱོར་ལ་སྐྱེ་བ་ནས་སྐྱེ་བར་རྣལ་འབྱོར་དུ་བྱེད་པའི་སྐལ་པ་ཐོབ་སྟེ་ཐུན་མོང་མ་ཡིན་པའི་ཡེ་ཤེས་འབེབས་པ་ལ་མཚུངས་པ་མེད་པས། །དེ་ལྟ་ན། སྐྱབས་སུ་འགྲོ་བས་རྣལ་འབྱོར་གྱི་གཞི་བསྒྲུབ་པ་ནི། མི་བཟད་འཁོར་བས་འཇིགས་པ་བདག་ནི་དེ་རིང་ཉིད་ནས་རྒྱལ་བ་རྣམས་ལ་སྐྱབས་སུ་ལྷག་པར་

― LT28_Page_0345 ―

^{[མ་དཔེ་གཟིགས་ན་འདིར་གནོན།]}

[Full Size]

མཆི། ཁྱོད་ཀྱི་ཞབས་ཀྱི་ཆུ་སྐྱེས་ངེས་པར་སྲིད་པའི་འཇིགས་འཕྲོག་དག་ལ་ལུས་ངག་སེམས་ནི་དག་པས་སོ། །སེམས་བསྐྱེད་པས་རྣལ་འབྱོར་ལམ་དུ་འགྱུར་བ་བྱ་སྟེ། །མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་གྱི། །གོ་འཕང་ཚེ་འདིར་འཐོབ་པར་འགྱུར། ཁམས་གསུམ་རྡུལ་བྲལ་བདེ་གཤེགས་སྙིང་པོའི་དབྱིངས། །རྒྱུ་རྒྱུད་དང་པོའི་སངས་རྒྱས་འགྱུར་མེད་ཉིད། །རང་སྣང་ཁུ་རྡུལ་ཁམས་ཀྱིས་རྙོགས་པ་ལས། །འཇིག་རྟེན་རྨོངས་པ་འཛག་བདེའི་བག་ཆགས་དེ། །སྦྱང་ཕྱིར་འགྱུར་མེད་བདེ་ཆེན་བསྒྲུབ་པར་བྱ། །གསོལ་བ་གདབ་པའི་རྟེན་བསྒྲུབ་པ་ནི། །དངོས་པོ་མེད་ལ་བསྒོམ་པ་མེད། །བསྒོམ་པ་སྒོམ་པ་ཉིད་མ་ཡིན། །དེ་ལྟར་

― LT28_Page_0346 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་པོ་དངོས་མེད་པས། །བསྒོམ་པ་དམིགས་སུ་མེད་པའོ། །གློ་བུར་གྱི་དྲི་མའི་ཚོགས་སྟོང་ཉིད་ཡེ་ཤེས་རྡོ་རྗེས་སྦྱངས། འོད་གསལ་གཉུག་མའི་ལུས་སེམས་སྐད་ཅིག་གིས་དཔལ་དུས་ཀྱི་འཁོར་ལོ་ཤེས་རབ་མ་དང་བཅས་པའི་སྐུར་གྱུར་པའི་སྤྱི་གཙུག་ཏུ་སྙིང་པོའི་དཀྱིལ་འཁོར་ཕྱོགས་ཀུན་ཏུ་ཡེ་ཤེས་ཀྱི་འོད་ཟེར་མཐའ་ཡས་པ་འཕྲོ་བ། རང་གི་སེམས་ཉིད་ཀྱིས་སོ་སོར་སྣང་བ། གཞོམ་དུ་མེད་ཅིང་རྡུལ་ཕྲ་རབ་ཀྱི་ཆོས་ལས་འདས་པའི་དབུས་སུ་རྡོ་རྗེ་སེང་གེའི་ཁྲི་སྣ་ཚོགས་པདྨ་དང་། ཟླ་བ་ཉི་མ་སྒྲ་གཅན་བརྩེགས་པའི་གདན་ལྔ་ཚོམ་གྱི་དབུས་སུ། རྩ་བའི་བླ་མ་དང་དབྱེར་མེད་པའི་རིགས་ལྡན་སྨྲ་བའི་དབང་ཕྱུག་འཇམ་དཔལ་གྲགས་པ་གུར་གུམ་གཞོན་ནུའི་ལང་ཚོ་ཅན། ཕྱག་གཉིས་ཆོས་འཆད་ཀྱི་ཕྱག་རྒྱས་ཨུཏྤལ་སྔོན་པོས་བཏེགས་པའི་རལ་གྲི་དང་གླེགས་བམ་འཛིན་པ། གཡས་ཀྱི་ཁྲི་ལ་འཇིག་རྟེན་དབང་ཕྱུག་པདྨ་དཀར་པོ་པུཎྜ་རཱི་ཀའི་མདངས་ཅན། ཕྱག་གཡས་མཆོག་སྦྱིན། གཡོན་ཐུགས་ཀར་མཐེབ་སྲིན་སྦྱར་བས་པད་དཀར་གྱི་སྡོང་བུ་བསྣམས་པ། རྒྱབ་ཏུ་གསང་བའི་བདག་པོ་ཟླ་བ་བཟང་པོ་ཨིནྡྲ་ནཱི་ལའི་ཁ་དོག་ཅན་རྡོ་རྗེ་དང་དྲིལ་བུ་འཛིན་པ། གཡོན་ཏུ་དགྱེས་པའི་ཡུམ་ལྷ་མོ་སྒྲོལ་མ་པ་ལཱ་ཤའི་མདངས་ལྡན་མཆོག་སྦྱིན་དང་སྐྱབས་སྦྱིན་གྱིས་ཨུཏྤལ་བསྣམས་པ། བཞི་ཀའང་སྒེག་པའི་རྒྱན་གྱིས་རྣམ་པར་སྤྲས་ཤིང་ཞབས་སེམས་དཔའི་སྐྱིལ་ཀྲུང་གིས་

― LT28_Page_0347 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས་པ་རྡོ་རྗེའི་གར་མཁན་ནོ། །མདུན་གྱི་ཁྲི་ལ་ཀུན་མཁྱེན་དུས་གསུམ་སངས་རྒྱས་དོལ་པོ་པ་རྡོ་རྗེའི་སྐུ་ཉམས་ཤིན་ཏུ་རྒྱས་པ། ཕྱག་གཉིས་ས་གནོན་གྱི་ཕྱག་རྒྱས་པད་དཀར་བསྣམས་ཤིང་ཞབས་རྒྱལ་པོ་རོལ་པའི་འདུག་སྟངས་ཅན། ན་བཟའ་ཆོས་གོས་རྣམ་གསུམ་གསོལ་ཞིང་སྤྱན་གྱི་ལྟ་སྟངས་བར་སྣང་ལ་ཧྲིག་གེར་གཟིགས་པ། ཐམས་ཅད་ཀྱང་དམིགས་པ་མེད་པའི་སྙིང་རྗེ་ཆེན་པོ་ལྷན་ཅིག་སྐྱེས་པའི་དགའ་བ་དང་། མཆོག་ཏུ་མི་འགྱུར་བའི་ཡེ་ཤེས་དོན་དམ་པའི་བདེ་བ་ཟུང་དུ་འཇུག་པའི་ངོ་བོ། །མཚན་ཐོས་པ་ཙམ་གྱིས་འཁོར་བ་དང་ངན་འགྲོའི་སྡུག་བསྔལ་ལས་སྐྱོབ་པར་མཛད་པ། གཙོ་བོའི་ཐུགས་ཆོས་ཀྱི་འཁོར་ལོའི་དབུས་སུ་ཐུགས་རྡོ་རྗེ་ཡབ་ཡུམ། འདབ་མ་བརྒྱད་ལ་ནུས་མ་བརྒྱད། གཙུག་ཏོར་གྱི་རྩ་ལ་གཙོ་བོ་ཡབ་ཡུམ། འདབ་མ་བཞི་ལ་མཚན་མ་བཞི། དཔྲལ་བ་བདེ་ཆེན་འཁོར་ལོར་སྐུ་རྡོ་རྗེ་ཡབ་ཡུམ། འདབ་མ་བཅུ་དྲུག་ལ་གཤེགས་པ་དང་གཤེགས་མ་ལུས་བསམ་གྱིས་ཕྱེ་བ། མགྲིན་པ་ལོངས་སྤྱོད་འཁོར་ལོར་གསུང་རྡོ་རྗེ་ཡབ་ཡུམ། འདབ་མ་སོ་གཉིས་ལ་སེམས་དཔའ་སེམས་མ་ཁྲོ་བོ་བཞི་ལུས་བསམ་གྱིས་ཕྱེ་བ། ལྟེ་བ་སྤྲུལ་པའི་འཁོར་ལོར་ཡེ་ཤེས་རྡོ་རྗེ། ནང་སྐོར་གྱི་རྩ་འདབ་བརྒྱད་ལ་རྣལ་འབྱོར་མ་བརྒྱད། ཕྱི་སྐོར་འདབ་མ་དྲུག་ཅུ་རྩ་བཞིར་ལྷ་མོ་རེ་བཞི། ཚིགས་ཆེན་བཅུ་གཉིས་

― LT28_Page_0348 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ལྟེ་བར་ལྷ་ཆེན་བཅུ་གཉིས། རྩ་འདབ་སུམ་བརྒྱ་དྲུག་བཅུར་ཚེས་ཀྱི་ལྷ་མོ། །གསང་གནས་བདེ་སྤྱོད་འཁོར་ལོ་རྩ་འདབ་སོ་གཉིས་ལ་སྐུ་དཀྱིལ་གྱི་ཁྲོ་བོ་ཡབ་ཡུམ་གཟུངས་མ་བཅུ་གཉིས་བུམ་པ་དང་བཅས་པ། ཞབས་སོར་བཅུ་ཀླུ་བཅུ། ཕྱག་སོར་བཅུ་རབ་གཏུམ་མ། ས་ཉི་ཁྲི་ཆིག་སྟོང་གྲུབ་པ། ཕྱེད་དང་བཅས་པའི་བ་སྤུ་བྱེ་བ་ཕྲག་གསུམ་འབྱུང་པོ་རྣམས་ཏེ་སྣང་ལ་རང་བཞིན་མེད་པ། དབང་པོའི་གཞུ་དང་མེ་ལོང་གི་གཟུགས་བརྙན་དང་པྲ་ཕབ་བརྒྱད་དང་མཚུངས་པ། གཙོ་བོའི་དབུ་གཙུག་པད་ཟླའི་སྟེང་དུ་སྤྲུལ་པའི་སྐུ་ཤཱཀྱ། ཐུབ་པ། །དེའི་སྤྱི་བོར་པད་ཉི་ལ་ལོངས་སྐུ་དུས་ཀྱི་འཁོར་ལོ། །དེའི་སྤྱི་བོར་པད་ཉི་ལ་ཆོས་སྐུ་རྡོ་རྗེ་འཆང་། དེའི་སྤྱི་བོར་དམ་པ་དང་པོའི་སངས་རྒྱས། སྟེང་དང་འོག་གི་ཆ་མཐའ་བསྐོར་རྣམས་སུ་ཆོས་རྒྱལ་རིགས་ལྡན་བརྒྱུད་པའི་བླ་མ་ཡི་དམ་ལྷ་ཚོགས་སངས་རྒྱས་བྱང་སེམས་མཁའ་འགྲོ་ཆོས་སྐྱོང་དཔག་ཏུ་མེད་པས་བསྐོར་བ། ཉི་མའི་ཤིང་རྟ་ལ་སོགས་ཚངས་པའི་དྲང་སྲོང་བྱེ་བ་ཕྲག་ཕྱེད་དང་བཞིས་ཞལ་ལ་ལྟ་ཞིང་འཇིག་རྟེན་སྐྱོང་བ་རྣམས་དང་མི་བདག་གསེར་གྱི་ཐོད་ལྡན་དག་གིས་ཞབས་ལ་བཏུད་པ། ཐམས་ཅད་ཀྱང་ཡེ་ཤེས་སྒྱུ་མའི་རྣམ་རོལ་གང་འདུལ་གྱི་རོལ་མོར་འཆུར་ཞིང་ཆོས་ཀྱི་སྐུ་མཁའ་ཁྱབ་ཀྱི་ངོ་བོར་བཞུགས་པའི་གནས་བཞིར་ཟླ་བ་ཉི་མ་སྒྲ་གཅན་དུས་མེའི་གདན་ལ་སྐུ་གསུང་ཐུགས་ཡེ་ཤེས་རྡོ་རྗེ། དེ་དག་ཁ་སྦྱར་

― LT28_Page_0349 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ལས་རྡོ་རྗེ་ལྕགས་ཀྱུ་དྲི་མ་མེད་པའི་འོད་ཟེར་འཕྲོ་བ་སྤྲོས། ཡེ་ཤེས་སྒྱུ་འཕྲུལ་དྲྭ་བའི་དཀྱིལ་འཁོར་བཀུག་ནས་མཉམ་པ་ཉིད་དང་པོའི་སངས་རྒྱས་ཀྱི་རང་བཞིན་ཏུ་གྱུར། སྐྱེས་མཆོག་གཉིས་མེད་ཡེ་ཤེས་སྤྱན་ཅན་རྣམས། །ཆོས་ཀྱི་སྐུ་ལ་གཤེགས་འབྱོན་མི་མངའ་ཡང་། །གཟུགས་སྐུ་བརྩེ་བ་ཆེན་པོའི་རྣམ་འཕྲུལ་གྱིས། །འདིར་གཤེགས་ཐུགས་རྗེས་དགོངས་པར་མཛད་དུ་གསོལ། །གང་གིས་གང་ལ་དད་པའི་དམིགས་རྟེན་ཡོད། །དེ་ཡིས་དེ་ལ་འབྲེལ་བས་མི་འབྲལ་བ། །གཉིས་མེད་གསུང་པས་ཡང་ཡང་གསུངས་ལགས་ན། །སྙིང་པོའི་བར་དུ་འདུ་འབྲལ་མེད་པར་བཞུགས། །གཞི་ཡི་དུས་སུ་བདེ་གཤེགས་སྙིང་པོ་སྟེ། །ལམ་དུས་བྱང་ཆུབ་ཕྱོགས་ཀྱི་ཆོས་སུ་སྣང་། །འབྲས་བུ་སྐུ་དང་ཞིང་ཁམས་ཐམས་ཅད་པར། །སྟོན་མཛད་བླ་མ་འཇམ་པའི་དཔལ་ལ་འདུད། །ཚོགས་བསགས་པའི་རིམ་པ་ནི། ཁྱོད་ནི་མ་དང་ཁྱོད་ནི་ཕ་སྟེ་ཁྱོད་ནི་འགྲོ་བའི་བླ་མ་ཁྱོད་ནི་གཉེན་དང་གྲོགས་བཟང་ཡང་། །ཁྱོད་ནི་མགོན་པོ་ཁྱོད་ནི་བྱེད་པོ་ཕན་དང་སྡིག་འཕྲོགས་ཁྱོད་ནི་གོ་འཕང་ཕུན་སུམ་ཚོགས་པ་ཡང་། །ཁྱོད་ནི་འབའ་ཞིག་གནས་དང་ཁྱོད་ནི་ཡོན་ཏན་མཆོག་གི་གནས་ཏེ་སྐྱོན་རྣམས་བཅོམ་པ་ཁྱོད་ཉིད་དོ། །ཁྱོད་ནི་དམན་པ་རྣམས་ཀྱི་མགོན་དང་ཡིད་བཞིན་ནོར་བུ་རྒྱལ་བའི་དབང་པོ་ཁྱོད་ལ་བདག་སྐྱབས་མཆི། །རྣམ་པར་བཅས་ཀྱང་རྣམ་མེད་བཅོམ་ལྡན་

― LT28_Page_0350 ―

^{[མ་དཔེ་གཟིགས་ན་འདིར་གནོན།]}

[Full Size]

འདས་མ་ཤེས་རབ་མ་སྟེ་དེ་ཡིས་འཁྱུད། །སྐྱེ་འཇིག་སྤངས་པའི་འགྱུར་མེད་བདེ་བ་དང་ལྡན་བཞད་པ་ལ་སོགས་བདེ་བ་སྤངས། །སངས་རྒྱས་རྣམས་ཀྱི་སྐྱེད་མཛད་སྐུ་གསུམ་དག་དང་ལྡན་ཞིང་དུས་གསུམ་ཡང་དག་རིག །ཀུན་མཁྱེན་མཆོག་གི་དང་པོའི་སངས་རྒྱས་བཅོམ་ལྡན་གཉིས་མེད་དེ་ཉིད་ལ་ཕྱག་འཚལ། །སངས་རྒྱས་སེང་གེའི་ཁྲིར་བཞུགས་རྡོ་རྗེའི་རྣལ་འབྱོར་རྣམ་པར་དག་པ་སྲིད་པ་གསུམ་གྱིས་མཆོད། །དེ་ཉིད་གཅིག་པུ་སྐུའི་རབ་ཏུ་དབྱེ་བས་རྣམ་པ་བཅུ་དྲུག་སྲིད་མེད་སྲིད་པར་གནས། །ཤེས་དང་ཤེས་བྱ་གཅིག་གྱུར་རྒྱལ་བ་མཆོག་གི་དམ་ཚིག་ཡན་ལག་རྣམ་པ་བཅུ་གཉིས་ཀྱི། །བདེན་དོན་བྱང་ཆུབ་སེམས་ནི་རྒྱལ་བའི་རྡོ་རྗེའི་ཚིག་གྱུར་དུས་ཀྱི་འཁོར་ལོ་ལ་ཕྱག་འཚལ། ཀུན་མཁྱེན་ཡེ་ཤེས་སྐུ་ནི་རྒྱལ་བའི་བདག་པོའི་ལྷན་ཅིག་སྐྱེས་དང་དེ་བཞིན་ཆོས་ཀྱི་སྐུ། །ལོངས་སྤྱོད་རྫོགས་དང་སྤྲུལ་པའི་སྐུ་ནི་ཉིན་བྱེད་སྐུ་དང་པདྨ་འདབ་མ་རྒྱས་པའི་སྤྱན། །རྣམ་པར་ཐར་དང་སྐུ་གསུང་ཐུགས་ཆགས་སྲིད་འདས་འབྱོར་པ་རྣལ་འབྱོར་དག་པ་ཤེས་རབ་དང་། །ཐབས་ནི་གཉིས་མེད་གང་ཞིག་ལྷ་མི་ལྷ་མིན་གྱིས་བསྟོད་དང་པོའི་སངས་རྒྱས་དེ་ལ་འདུད། །ཞབས་གཅིག་རྡོ་རྗེ་ནོར་བུར་རྡུལ་དང་ཉི་མ་དང་། །གཉིས་པ་གཙུག་ཏོར་ཁུ་བ་རི་བོང་ཅན་ལ་ནི། །རྟག་ཏུ་མི་ཆོད་དབྱེར་མེད་འདོད་པར་བཀོད་གྱུར་པ། །འཇིག་རྟེན་གསུམ་གྱིས་མཆོད་པའི་གཙོ་འཁོར་ལ་ཕྱག་འཚལ། །བདེ་

― LT28_Page_0351 ―

^{[མ་དཔེ་གཟིགས་ན་འདིར་གནོན།]}

[Full Size]

གཤེགས་སྙིང་པོའི་ས་གཞི་ལེགས་བསྟར་བར། །བྱང་ཆུབ་སེམས་གཉིས་དྲི་མེད་ཡོན་ཆབ་གཏམས། །དཀར་པོ་དགེ་བཅུའི་མེ་ཏོག་སིལ་མར་བཀྲམ། །སྡོམ་གསུམ་རྣམ་དག་སྤོས་སྤྲིན་གཏིབས་པས་མཆོད། །སྤྱན་དང་མངོན་ཤེས་རིན་ཆེན་སྒྲོན་མེ་འབར། །ཚངས་པའི་གནས་བཞིའི་དྲི་མཆོག་ཀུན་ནས་འཁྱིལ། །སྙོམས་འཇུག་རྣམ་དགུའི་ཞལ་ཟས་རོ་བརྒྱ་སྤུངས། །འཆད་རྩོད་རྩོམ་པའི་སིལ་སྙན་སྒྲོགས་པས་མཆོད། །ཐར་པའི་རིམ་གཉིས་འབྱུང་བཞིའི་དཀྱིལ་འཁོར་ཏེ། །བྱང་ཕྱོགས་སོ་བདུན་རི་གླིང་བཀོད་པ་མཛེས། །སྟོང་ཉིད་སྙིང་རྗེའི་ཉི་ཟླ་སྒྲིབ་མེད་གསལ། །ཚོགས་གཉིས་མུ་ཁྱུད་ཀུན་ནས་བསྐོར་བས་མཆོད། །ཚེ་སོགས་དབང་བཅུའི་རིན་ཆེན་གཏེར་ཁ་ཕྱེ། །ལམ་ལྔ་ས་བཅུའི་མ་རྨོས་ལོ་ཏོག་རྒྱས། །ཕ་རོལ་ཕྱིན་བཅུ་དཔག་བསམ་ལྗོན་བཟང་འཁྲིགས། །བསྡུ་དངོས་བཞི་ཡི་འདོད་འཇོའི་བ་མོས་མཆོད། །གཟུངས་སྤོབས་མཚན་དཔེའི་ལྷབ་ལྷུབ་གོས་རྒྱན་དབྱངས། །ཟག་མེད་ཕུང་པོའི་འདོད་ཡོན་སྣ་ལྔ་བཀྲམ། །འཕགས་ནོར་བདུན་གྱི་རྒྱལ་སྲིད་རིན་ཆེན་བཀོད། །རྣམ་ཐར་བཀྲ་ཤིས་རྫས་མཆོག་བརྒྱད་ཀྱིས་མཆོད། །སྐུ་བཞིའི་ཏོག་ལྡན་སྟོབས་བཅུའི་རྒྱལ་མཚན་བསྒྲེངས། །མི་འཇིགས་བཞི་ཡི་རིན་ཆེན་གདུགས་དཀར་འཁྱིལ། །མ་འདྲེས་བཅོ་བརྒྱད་སྣ་ཚོགས་བ་དན་ཕྱར། །ཟད་པར་ཟིལ་

― LT28_Page_0352 ―

^{[མ་དཔེ་གཟིགས་ན་འདིར་གནོན།]}

[Full Size]

གནོན་རྔ་ཡབ་གཡོ་བས་མཆོད། །རིམ་གཉིས་སྨིན་གྲོལ་ལང་ཚོས་རབ་བརྗིད་པ། །དགའ་བ་བཅུ་དྲུག་དཔའ་བོས་གར་བྱེད་ཅིང་། །བདེ་སྟོང་རྣམ་འགྱུར་བྱེ་བའི་དཔལ་འབར་བའི། །སྟོང་ཉིད་བཅུ་དྲུག་རིག་མ་མཛེས་པས་མཆོད། །གྲུབ་ཆེན་བརྒྱད་ཀྱི་རྒྱན་གྱིས་རབ་བརྒྱན་ཅིང་། །དབང་ཕྱུག་བརྒྱད་ཀྱི་དཔལ་ལ་དབང་འབྱོར་པ། །ཕྲིན་ལས་རྣམ་བཞིའི་འཁོར་གྱིས་རབ་བསྐོར་བའི། །མཆོག་གི་དངོས་གྲུབ་འཁོར་ལོས་སྒྱུར་བས་མཆོད། །ཀུནྡ་རབ་ཏུ་ཁྱབ་བྱེད་དྲི་བཟང་དང་། །རྣམ་དག་ཉི་མས་དག་བྱེད་མེ་ཏོག་ཕྲེང་། །གཏུམ་མོ་འབར་བས་ཀུན་རྟོག་བསྲེགས་པའི་སྤོས། །སྙིང་ནང་གཞོམ་མེད་འབར་བའི་སྣང་གསལ་ཚོགས། །འདོད་ཡོན་གཞན་མཆོག་བདུད་རྩི་ཞལ་ཟས་ལྔ། །ཐིག་ལེ་ནོར་བུར་བཅིངས་པའི་མ་ཉམས་འབྲུ། །མ་དག་གནས་འགྱུར་ཡེ་ཤེས་སྒེག་མོའི་ལུས། །ལས་རླུང་དྷཱུ་ཏིར་ཐིམ་པ་བཞད་སྒྲའི་དབྱངས། །གཞོམ་མེད་ནཱ་དའི་རོལ་མོ་སིལ་སྙན་མཆོག །རྣམ་གསུམ་ཕྱག་རྒྱའི་རོལ་པ་བདེ་བའི་གར། །སྒྲ་དབྱངས་རྒྱ་མཚོ་ཆོས་ཉིད་རྡོ་རྗེའི་གླུ། །མི་འགྱུར་བདེ་སྒྲུབ་ཕྱག་ཆེན་འདོད་པ་མོ། །དོན་དམ་དབྱིངས་ཀྱི་ལྷ་ཚོགས་རྣམས་ལ་འབུལ། །གཞན་ཡང་ཐེག་གསུམ་གཞི་ལམ་འབྲས་བུ་ཡི། །སྤངས་རྟོགས་ཡོན་ཏན་ཇི་སྙེད་དེ་དག་ཀུན། །དད་འདུན་བློ་ཡིས་བླངས་ཤིང་སྤྲུལ་བྱས་ནས། །ཆོས་ཀྱི་རྒྱལ་པོ་སྲས་དང་བཅས་པ་མཆོད། །སྲིད་འགྲོ་ཉམ་ངར་

― LT28_Page_0353 ―

^{[མ་དཔེ་གཟིགས་ན་འདིར་གནོན།]}

[Full Size]

བྱིས་པའི་བློ་ཡིས་ནི། །ཤིན་ཏུ་མི་བཟད་སྡིག་པ་གང་བགྱིས་པ། །སྟོབས་བཅུ་མངའ་བའི་སྤྱན་སྔར་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་རྣམས་དང་འཕགས་པའི་ཚོགས་ཀྱིས་རྣམ་མང་དགེ་བ་གང་མཛད་པ། །དེ་དག་མཐའ་དག་ལ་ནི་སྡིག་པ་རྣམ་བྲལ་བྱང་ཆུབ་སྤྱོད་ལ་རྗེས་སུ་གནས་པས་རྗེས་ཡི་རང་། །སངས་རྒྱས་ཆོས་དང་དགེ་འདུན་སྲིད་པའི་འཇིགས་འཕྲོག་ལ་ཡང་བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གི་ལུས་འབུལ་ཆོས་ཀྱི་འཁོར་ལོ་བསྐོར་ཞིང་མྱ་ངན་མི་འདའ་ཡུན་རིང་བཞུགས་པར་གསོལ་བ་འདེབས། །རྫོགས་སངས་རྒྱས་སུ་བདག་གྱུར་ཅིག་ཅེས་འདིར་ནི་སྨོན་ལམ་སེམས་ཅན་དོན་གྱི་སླད་དུ་བདག་བགྱིད་དོ། །དེ་ནས་ལམ་རྒྱུད་ལ་བསྟེན་ཏེ། །བྱང་ཆུབ་མཆོག་གི་སེམས་དང་ནི། །ལྷག་བསམ་རྣམ་པར་དག་པ་དང་། །བདག་དང་བདག་གིར་འཛིན་སྤངས་པའི། །རྩ་བ་བསྟེན་བགྱི་ཚོགས་གསུམ་ཕྱིར། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཐབས་དང་ནི། །སྨོན་ལམ་སྟོབས་དང་ཡེ་ཤེས་ཀྱི། །ཕ་རོལ་བྱིན་བཅུ་རྫོགས་པར་བགྱི། །བྱམས་དང་སྙིང་རྗེ་དགའ་བ་དང་། །བཏང་སྙོམས་རྣམས་ལ་གནས་བགྱི་ཞིང་། །སྦྱིན་དང་སྙན་པར་སྨྲ་བ་དང་། །དོན་སྤྱོད་པ་དང་དོན་མཐུན་སྤྱད། །འགྱོད་དང་གཉིད་རྨུགས་རྒོད་དང་ཐེ་ཚོམ་སྟེ། །སྒྲིབ་པ་ལྔ་པོ་ཡོངས་སུ་

― LT28_Page_0354 ―

^{[མ་དཔེ་གཟིགས་ན་འདིར་གནོན།]}

[Full Size]

སྤང་བགྱི་ཞིང་། །འདོད་ཆགས་ཞེ་སྡང་གཏི་མུག་ང་རྒྱལ་གྱི། །ཉོན་མོངས་བཞི་རྣམས་བདག་གིས་ཀུན་ཏུ་སྤང་། །འདོད་དང་སྲེད་པ་མ་རིག་ལྟ་བ་ཡི། །ཟག་པ་བཞི་ཡང་ཡོངས་སུ་སྤང་བགྱིའོ། །སྲིད་པའི་འཇིགས་པ་འཇོམས་མཛད་པའི། །བརྟུལ་ཞུགས་ཉི་ཤུ་རྩ་ལྔ་པོ། །སྣ་ཚོགས་གཙོ་བོའི་གསུང་ཇི་བཞིན། །བདག་གིས་བརྟན་པོར་གཟུང་བར་བགྱི། །དུས་འདི་ནས་ནི་བཟུང་ནས་སུ། །བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་དང་ནི་བྱང་ཆུབ་སེམས། །དཔལ་ལྡན་བླ་མ་ཁྱེད་སྤངས་ནས། །བླ་མ་གཞན་དག་རྨི་ལམ་དུའང་། །སྲོག་དོར་ནས་ནི་བསྟེན་མི་བྱ། །གཞན་ཡང་དེ་བཞིན་དུས་ཀུན་ཏུ། །གཡོ་སྒྱུ་མེད་པར་ནུས་ཚད་ཀྱིས། །ལུས་ངག་སེམས་དང་གསུམ་པོ་ནི། །གཙོ་བོའི་སྤྱན་སྔར་དབུལ་བར་བགྱི། །འདིར་ནག་ཟླའི་ཉས་མཚོན་བའི་དུས་ཆེན་ལྟ་བུར། །ཆོས་རྗེ་ཀུན་མཁྱེན་ཆེན་པོས་མཛད་པའི་དུས་འཁོར་བསྟོད་ཆེན། །སྦྱོར་དྲུག་བརྒྱུད་འདེབས། ཇོ་ནང་རིགས་ལྡན་སྤྲུལ་པའི་སྐུ་ཡབ་སྲས་རྣམས་ཀྱི་གསོལ་འདེབས་རྒྱས་བསྡུས་དང་། ཁོ་བོས་བྱས་པའི་བརྒྱུད་འདེབས་རྡོ་རྗེ་འབེབས་པ་སོགས་ཅི་ནུས་བྱ། །རྒྱུན་ཁྱེར་ལྟ་བུར། ཁྱབ་བདག་དང་པོའི་སངས་རྒྱས་རྡོ་རྗེ་འཆང་། །དུས་ཀྱི་འཁོར་ལོ་ཤཱཀྱའི་སྐྱེས་མཆོག་དང་། །ཆོས་རྒྱལ་རིགས་ལྡན་རྩ་བརྒྱུད་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རབ་འབྱམས་རྒྱལ་བ་ཡོངས་ཀྱི་སྐུ་རྡོ་རྗེ། །ཕྲེང་འཛིན་སྦྱོར་བས་བསྡུས་པའི་རྒྱུད་སྟོན་པ། །རྡོ་རྗེའི་རིགས་ལྡན་འཇམ་དཔལ་གྲགས་

― LT28_Page_0355 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རབ་འབྱམས་རྒྱལ་བ་ཡོངས་ཀྱི་གསུང་རྡོ་རྗེ། །འཁྲུལ་མེད་རྡོ་རྗེའི་ཚིག་གི་ངེས་གསང་འགྲེལ། །སྙིང་རྗེའི་དབང་ཕྱུག་པདྨ་དཀར་པོ་ལ། །གསོལ་བ་འདེབས་སོ༴། རབ་འབྱམས་རྒྱལ་བ་ཡོངས་ཀྱི་ཐུགས་རྡོ་རྗེ། །རྩ་བའི་རྒྱུད་ཆེན་ཞུ་ཞིང་སྡུད་མཛད་པ། །གསང་བདག་རྡོ་རྗེ་ཟླ་བའི་འོད་བཟང་པོར། །གསོལ་བ༴ །རྒྱལ་བ་ཀུན་གྱི་ཡེ་ཤེས་རྡོ་རྗེའི་དངོས། །བདེན་གཉིས་གཤགས་འབྱེད་ཆོས་འཁོར་བཞི་པ་བསྐོར། །འཇིག་རྟེན་མགོན་པོ་ཀུན་མཁྱེན་ཆོས་རྗེ་ལ། །གསོལ་བ༴ །རབ་འབྱམས་རྒྱལ་བ་མ་ལུས་སྐྱེད་བའི་ཡུམ། །དཀྱིལ་འཁོར་དབང་ཕྱུག་ཀུན་གྱི་འདྲེན་པ་མོ། །འཇིགས་པ་ཀུན་སྐྱོབ་ལྷ་མོ་སྒྲོལ་མ་ལ། །གསོལ་བ༴ །དཔལ་ལྡན་རྒྱུ་སྐར་དཀྱིལ་འཁོར་ལྷ་ཚོགས་དང་། །ཡི་དམ་མཁའ་འགྲོ་ཆོས་སྐྱོང་ཕྱི་ནང་གཞན། །གཉིས་མེད་ཡེ་ཤེས་ཕྱག་རྒྱར་གྲུབརྣམས་ལ། །གསོལ་བ༴ །གཞི་རྒྱུད་བདེ་གཤེགས་སྙིང་པོའི་རིགས་སད་ནས། །ལམ་རྒྱུད་རྡོ་རྗེའི་རྣལ་འབྱོར་མཐར་ཕྱིན་ཏེ། །འབྲས་རྒྱུད་གཉིས་སུ་མེད་པའི་ཡེ་ཤེས་སྐུ། །ཚེ་འདིར་བདེ་བླག་འགྲུབ་པར་བྱིན་གྱིས་རློབས། །ཕུར་ཚུགས་གསོལ་འདེབས་གྲངས་གསོག་པར་སྤྲོན་སྦྱོར་དྲུག་སྔོན་འགྲོ་ལྟར་བྱས་ལ། །ལྷ་བདེ་གཤེགས་སྙིང་པོའི་བཀའ་དྲིན་གྱིས། །ཡིད་རྣམ་རྟོག་འགྱུ་བ་སོ་སོར་བཅད། །ཉམས་འོད་གསལ་རྟགས་བཅུ་མངོན་གྱུར་ནས། །ལམ་སོར་སྡུད་འབྱང་

― LT28_Page_0356 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བྱིན་གྱིས་རློབས། །ཕ་དྲིན་ཅན་བླ་མ་ལ་གསོལ་བ་འདེབས། །རིགས་ལྡན་ཡབ་སྲས་རྣམས་ཀྱི་བྱིན་གྱིས་རློབས། །ལྷ་བདེ་གཤེགས༴ །ཡིད་རླུང་སེམས་ངག་རྣམས་མི་གཡོ་ཞིང་། །ཉམས་ཤེས་རབ་རྟོག་དཔྱོད་དགའ་བདེ་འཕེལ། །ལམ་བསམ་གཏན་འབྱང་༴ །ཕ་དྲིན་ཅན༴ །རིགས་ལྡན༴ །ལྷ་བདེ༴ །རྩ་རོ་རྐྱང་རླུང་བཅུ་དབུ་མར་ཆུད། །ཉམས་གཏུམ་མེ་འབར་བས་ཧཾ་ཡི་གཞུ། །ལམ་སྲོག་རྩོལ་འབྱང་༴ །ཕ་དྲིན༴ །རིགས་ལྡན༴ །ལྷ་བདེ༴ །ཁམས་འཛག་མེད་ཐིག་ལེ་དཔྲལ་བར་བརྟན། །ཉམས་ཞུ་བདེ་འགྱུར་མེད་རྒྱུད་ལ་སྐྱེས། །ལམ་འཛིན་པ་འབྱང་༴ །ཕ་དྲིན༴ །རིགས་ལྡན༴ །ལྷ་བདེ༴ །ལུས་རྩ་འདབ་བདེ་ཆེན་ཐིག་ལེས་གང་། །ཉམས་ཕྱག་རྒྱ་གསུམ་ལ་མངའ་བརྙེས་པ། །ལམ་རྗེས་དྲན་འབྱང་༴ ཕ་དྲིན༴ །རིགས་ལྡན༴ །ལྷ་བདེ༴ །རྩ་འཁོར་ལོ་དྲུག་པོ་བདེ་བས་གང་། །ཉམས་སྤྲོས་པ་མེད་ལ་དབང་འབྱོར་བའི། །ལམ་ཏིང་འཛིན་འབྱང་༴ །ཕ་དྲིན༴ །རིགས་ལྡན༴ །ལྷ་བདེ་གཤེགས༴ །ལུས་བྱེད་བཅིང་གནད་དང་མ་བྲལ་ཞིང་། །ཆོས་མ་ནོར་མན་ངག་ཟབ་མོ་ཡིས། །ལམ་སྦྱོར་དྲུག་འབྱང་༴ །ཕ་དྲིན་ཅན་བླ་མ༴ །རིགས་ལྡན་ཡབ་སྲས༴ །དེ་ནས་དབང་བཞི་ལེན་པ་ནི། །དེ་ལྟར་གསོལ་བ་བཏབ་པས་འཁོར་གྱི་ལྷ་ཚོགས་རྟེན་དང་བརྟེན་པར་བཅས་པ་འོད་དུ་ཞུ་ནས་གཙོ་བོ་ལ་ཐིམ། །གཙོ་བོ་འཇམ་པའི་རྡོ་རྗེ་གྲགས་པ་མིའི་དབང་པོའི་ལུས་དཀྱིལ་གྱི་གནས་བཞིར་ཡི་གེ་བཞི་དང་། །

― LT28_Page_0357 ―

^{[མ་དཔེ་གཟིགས་ན་འདིར་གནོན།]}

[Full Size]

བཅས་པ་གསལ་བ། །བདག་ལ་དགྱེས་པའི་ཐུགས་ཀྱིས་རྩེ་གཅིག་ཏུ་དགོངས་ཤིང་བྱིན་གྱིས་རློབ་པར་གྱུར། །ཨོཾ་ཨཱཿཧཱུྃ་ཧོཿ དཔལ་ལྡན་བླ་མ་ཐུགས་རྗེ་སྤྲུལ་པའི་སྐུ། །བདག་དང་སྲིད་གསུམ་སེམས་ཅན་ཐམས་ཅད་ཀྱི། །སྤྱི་བོའི་འཁོར་ལོ་ལུས་ཀྱི་ཐིག་ལེ་ལ། །རྟག་ཏུ་བཞུགས་ནས་བྱིན་གྱིས་བརླབ་ཏུ་གསོལ། །བུམ་པའི་དབང་གིས་མངོན་པར་དབང་བསྐུར་ཏེ། །ལུས་ཀྱི་ལོངས་སྤྱོད་ཀུན་ལ་མེ་ལྟོས་པར། །བསྙེན་པའི་ཡན་ལག་དབྱིབས་ཀྱི་རྣལ་འབྱོར་དང་། །འདུ་མི་བྱེད་པའི་རྣམ་པར་ཐར་པ་ཡིས། །སད་པའི་གནས་སྐབས་ལུས་ཀྱི་སྒྲིབ་བྲལ་ནས། །དགའ་བའི་དགའ་བ་སྐུ་ཡི་རྡོ་རྗེ་འཛིན། །དྲི་བྲལ་འབྲས་བུ་པད་འདབ་ཡངས་པའི་སྤྱན། །སྒྱུ་འཕྲུལ་དྲྭ་བས་མངོན་པར་བྱང་ཆུབ་སྟེ། །སྣ་ཚོགས་གཟུགས་བརྙན་ངེས་པ་མེད་པའི་དབྱིབས། །རྣམ་པ་ཀུན་ཏུ་རྫུ་འཕྲུལ་བགྲོད་པ་ཅན། །གང་ལ་གང་འདུལ་ཅིར་ཡང་སྤྲུལ་པའི་སྐུ། །དམ་ཚིག་སེམས་དཔར་དེང་བདག་གྲུབ་པར་མཛོད། །དཔལ་ལྡན་བླ་མ་ལོངས་སྤྱོད་རྫོགས་པའི་སྐུ། །བདག་དང་སྲིད་གསུམ་སེམས་ཅན་ཐམས་ཅད་ཀྱི། །མགྲིན་པའི་འཁོར་ལོ་ངག་གི་ཐིག་ལེ་ལ། །རྟག་ཏུ་བཞུགས་ནས་བྱིན་གྱིས་བརླབ་ཏུ་གསོལ། །གསང་བའི་དབང་གིས་མངོན་པར་དབང་བསྐུར་ཏེ། །ངག་གི་ལོངས་སྤྱོད་ཀུན་ལ་ལྟོས་མེད་པར། །ཉེ་བར་སྒྲུབ་པ་སྔགས་ཀྱི་རྣལ་འབྱོར་དང་། །སྨོན་པ་མེད་པའི་རྣམ་པར་ཐར་པ་ཡིས། །

― LT28_Page_0358 ―

^{[མ་དཔེ་གཟིགས་ན་འདིར་གནོན།]}

[Full Size]

རྨི་ལམ་གནས་སྐབས་ངག་གི་སྒྲིབ་བྲལ་ནས། །མཆོག་དགའི་དགའ་བ་གསུང་གི་རྡོ་རྗེ་འཛིན། །སྐྱེས་བུ་བྱེད་འབྲས་ཉིན་མོར་བྱེད་པའི་སྐུ། །རྣམ་པ་ཉི་ཤུས་མངོན་པར་བྱང་ཆུབ་སྟེ། །གཞོམ་དུ་མེད་པའི་རང་སྦྲ་མི་ཟད་དབྱངས། །ཐམས་ཅད་སྐད་ཀྱིས་ཇི་ལྟར་མོས་བཞིན་ཏུ། །ཐེག་པ་ཀུན་སྟོན་ལོངས་སྤྱོད་རྫོགས་པའི་སྐུ། །སེམས་དཔའ་ཆེན་པོར་དེང་བདག་གྲུབ་པར་མཛོད། །དཔལ་ལྡན་བླ་མ་འོད་གསལ་ཆོས་ཀྱི་སྐུ། །བདག་དང་སྲིད་གསུམ་སེམས་ཅན་ཐམས་ཅད་ཀྱི། །སྙིང་གའི་འཁོར་ལོ་ཡིད་ཀྱི་ཐིག་ལེ་ལ། །རྟག་ཏུ་བཞུགས་ནས་བྱིན་གྱིས་བརླབ་ཏུ་གསོལ། །གསུམ་པའི་དབང་གིས་མངོན་པར་དབང་བསྐུར་ཏེ། །ཡིད་ཀྱི་ལོངས་སྤྱོད་ཀུན་ལ་མི་ལྟོས་པར། །སྒྲུབ་པའི་ཡན་ལག་ཆོས་ཀྱི་རྣལ་འབྱོར་དང་། །མཚན་མ་མེད་པའི་རྣམ་པར་ཐར་པ་ཡིས། །གཉིད་མཐུག་གནས་སྐབས་ཡིད་ཀྱི་སྒྲིབ་བྲལ་ནས། །ཁྱད་པར་དགའ་བ་ཐུགས་ཀྱི་རྡོ་རྗེ་འཛིན། །རྣམ་སྨིན་འབྲས་བུ་ཡེ་ཤེས་ཆེན་པོའི་སྐུ། །རྣམ་པ་ལྔ་ཡིས་མངོན་པར་བྱང་ཆུབ་སྟེ། །སེམས་ཀྱི་རང་བཞིན་གདོད་ནས་འོད་གསལ་ཆེ། །མཁའ་དབྱིངས་ཀུན་ཁྱབ་གཏི་མུག་ཆེན་པོའི་བདག །རྣམ་པར་མི་རྟོག་སྤྲོས་བྲལ་ཆོས་ཀྱི་སྐུ། །བྱང་ཆུབ་སེམས་དཔར་དེང་བདག་གྲུབ་པར་མཛོད། །དཔལ་ལྡན་བླ་མ་ལྷན་ཅིག་སྐྱེས་པའི་སྐུ། །བདག་དང་སྲིད་གསུམ་སེམས་ཅན་ཐམས་ཅད་ཀྱི། །ལྟེ་བའི་འཁོར་ལོ་ཡེ་ཤེས་ཐིག་ལེ་ལ། །རྟག་ཏུ་

― LT28_Page_0359 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས་ནས་བྱིན་གྱིས་བརླབ་ཏུ་གསོལ། །བཞི་པའི་དབང་གིས་མངོན་པར་དབང་བསྐུར་ཏེ། །འཕོ་བའི་ལོངས་སྤྱོད་ཀུན་ལ་མི་ལྟོས་པར། །སྒྲུབ་པ་ཆེན་པོ་དག་པའི་རྣལ་འབྱོར་དང་། །སྟོང་པ་ཉིད་ཀྱི་རྣམ་པར་ཐར་པ་ཡིས། །ཆགས་པའི་གནས་སྐབས་ཡེ་ཤེས་སྒྲིབ་བྲལ་ནས། །ལྷན་ཅིག་སྐྱེས་དགའི་ཡེ་ཤེས་རྡོ་རྗེ་འཛིན། །རྒྱུ་མཐར་འབྲས་བུ་ཐམས་ཅད་མཁྱེན་པའི་སྐུ། །སྐད་ཅིག་གཅིག་གིས་མངོན་པར་བྱང་ཆུབ་སྟེ། །འགྱུར་བ་མེད་པ་མཆོག་གི་བདེ་བ་ཆེ། །སྣང་སྲིད་ཀུན་ཁྱབ་འདོད་ཆགས་ཆེན་པོའི་བདག །ལྷན་ཅིག་སྐྱེས་པའི་ཡེ་ཤེས་དག་པའི་སྐུ། །རྡོ་རྗེ་སེམས་དཔར་དེང་བདག་གྲུབ་པར་མཛོད། །ཅེས་བརྗོད་ཅིང་ཕྱི་བྱིས་པ་འཇུག་པ་སོགས་དང་། །ནང་ཡིག་འབྲུ་སྤྲོ་བ། །གསང་བ་ཟབ་མོའི་རིམ་པ། ཡང་གསང་དགའ་བཞིའི་གར་མཁན། །དེ་ཁོ་ན་ཉིད་ལ་བརྟེན་པ་སོགས་ལམ་དུས་ཀྱི་དབང་བློ་ནུས་དང་འཚམས་པར་བླངས་ནས། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་ཟེའུ་འབྲུ་ལ། །འབྲལ་བ་མེད་པར་རྟག་པར་བཞུགས་ནས་ཀྱང་། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། གསོལ་བ་བཏབ་པས་བླ་མ་འཇམ་པའི་རྡོ་རྗེ་འོད་དུ་ཞུ། །རང་གི་སྤྱི་བོ་ནས་སྙིང་གར་ཞུགས། །བླ་མའི་སྐུ་གསུང་ཐུགས་ཡེ་ཤེས་རྡོ་རྗེ་དང་རང་གི་སྒོ་གསུམ་དབྱེར་མི་ཕྱེད་པར་གྱུར་པར་མོས་ལ་འོད་གསལ་ཕྱག་རྒྱ་ཆེན་པོའི་ངང་དུ་མཉམ་པར་བཞག །མཐར་རྣལ་འབྱོར་སྤྱད་པའི་དགེ་རྩ་སྤེལ་བ་ནི། །བསོད་

― LT28_Page_0360 ―

^{[མ་དཔེ་གཟིགས་ན་འདིར་གནོན།]}

[Full Size]

ནམས་འདི་ཡིས་འགྲོ་རྣམས་དུ་བ་ལ་སོགས་ལམ་གྱི་ལྷན་སྐྱེས་བདེ་བ་མཆོག་སྒོམ་སྟེ། །འགྲོ་བའི་བླ་མ་སུམ་ཅུ་རྩ་གཉིས་མཚན་ལྡན་སྐུ་འདི་ཆོས་ཀྱི་འཁོར་ལོར་ཡང་དག་གནས། །ལྷ་རྣམས་མགོ་ཡི་གཙུག་གི་ནོར་བུའི་འོད་ཟེར་ཚོགས་ཀྱིས་ཞབས་ཀྱི་པདྨ་ལ་གཏུགས་ཤིང་། །དམ་པའི་ལམ་སྟོན་ཉིན་བྱེད་བཞིན་ཏུ་མུན་པ་ཀུན་འཇོམས་དུས་ཀྱི་འཁོར་ལོ་ཉིད་གྱུར་ཅིག །གང་ཚེ་བལྟ་བར་སོགས། ཕྱོགས་བཅུ་ནམ་མཁའི་སོགས། དགེ་བ་འདི་ཡིས་མྱུར་དུ་བདག །ཕྱག་རྒྱ་ཆེན་པོ་འགྲུབ་གྱུར་སོགས་བྱའོ། །རྒྱལ་བས་ལུང་བསྟན་སྨྲ་བའི་རྒྱལ། །རྡོ་རྗེའི་རིགས་ལྡན་འཇམ་དཔལ་ལ། །བརྟེན་ནས་རིགས་གསུམ་དཀྱིལ་འཁོར་པའི། །བྱིན་རླབས་ཆུ་བོ་འབེབས་པའི་ཐབས། །ཉམས་སུ་གང་བླངས་སྐྱེ་བོ་ཀུན། །རིགས་གསུམ་མགོན་དང་སྐལ་མཉམ་སྟེ། །རྣམ་ཀུན་མཆོག་ལྡན་སྟོང་པ་ཉིད། །འགྱུར་མེད་བདེ་དང་ཟུང་འཇུག་ཤོག །ཅེས་པ་འདིའང་རང་སློབ་ངེས་གསང་ལ་མི་འཇིགས་པའི་བཟོད་པ་ཅན་སྤང་ཕུག་བླ་མ་ཀརྨ་ངེས་དོན་ནས་ཆེད་དུ་བསྐུལ་ངོར་བརྗོད་ན་བྱིན་རླབས་འཇུག་པའི་རྡོ་རྗེའི་གསུང་རྣམས་གོ་བསྒྲིགས། །ཆོས་རྗེ་རིགས་ལྡན་ཀུན་མཁྱེན་ཆེན་པོ་ཡབ་སྲས་ཀྱི་མན་ངག་གིས་བརྒྱན་ཏེ། །དུས་ཀྱི་འཁོར་ལོ་ལ་མོས་པའི་ངེས་པ་གཏིང་ཚུགས་རྙེད་པ་ཀརྨ་ངག་དབང་ཡོན་ཏན་རྒྱ་མཚོས་ནག་པ་ཟླ་བའི་དུས་ཆེན་ལ་དཔལ་སྤུངས་ཡང་ཁྲོད་དུ་བྲིས་པ་དགེ་ལེགས་འཕེལ། གལ་ཏེ་རྒྱུན་ཁྱེར་ལྟ་བུར་བསྡུ་བར་འདོད་ན་སྐྱབས་སེམས་ནས། །སྡུག་བསྔལ་ལས་སྐྱོབ་པར་མཛད་པའོ། །སྐྱེས་མཆོག་གཉིས་མེད་ནས། །རྒྱལ་བའི་དབང་པོ་ཁྱོད་ལ་བདག་སྐྱབས་མཆི། །ཀུནྡ་རབ་ཏུ་ཁྱབ་བྱེད་ནས། སེམས་ཅན་དོན་གྱི་སླད་དུ་བདག་བགྱིད་དོ། །ཁྱབ་བདག་དང་

― LT28_Page_0361 ―

^{[མ་དཔེ་གཟིགས་ན་འདིར་གནོན།]}

[Full Size]

པོའི་ནས། །བྱིན་གྱིས་རློབ་པར་གྱུར། དབང་ལེན་པའི་དམིགས་པ་དང་བཅས་འབྲུ་བཞི་བརྗོད། དཔལ་ལྡན་རྩ་བའི་བླ་མ་སོགས་བརྗོད་ལ་མཐར་དབྱུང་ངོ་།། ༈ །།རིག་འཛིན་ཆེན་པོ་བི་མ་ལ་མི་ཏྲའི་བླ་མའི་རྣལ་འབྱོར་ཕྱི་ནང་གསང་བ་སྒྲོན་མ་འཕྲུལ་འབྱེད་ཅེས་བྱ་བ་བཞུགས་སོ། །པ་ཆེན་ལྔ་བརྒྱའི་དབུས་ན་མཁས་པའི་མཆོག །གཞོན་ནུ་བུམ་པར་གཤེགས་ཀྱང་འཕོ་ཆེན་སྐུས། །བསྐལ་པ་མ་སྟོང་བར་དུ་འགྲོ་དོན་མཛད། །ཕྱག་རྒྱ་རྒྱ་ཆེན་ཞབས་ལ་སྤྱི་བོས་འདུད། །འབྲེལ་བས་བོད་ལ་གཟིགས་པ་འཇུགས་གསོལ་བཏབ་ཨ་ཏིའི་རྟོགས་པ་སྐྱེད། །རྒྱལ་བ་ཀུན་དངོས་སྤྲུལ་པའི་སྐུའི། །རྣལ་འབྱོར་སྙིང་ཏིག་ལུང་བཞིན་བཀོད། །འདི་ལ་གསུམ། ཕྱི་ནང་གསང་བའི་གསོལ་བ་གདབ་ཅིང་བསྒྲུབ་པའོ། །དང་པོ་ནི། སྐུ་བརྙན་གྱི་སྤྱན་སྔར་མཎྜལ་དང་མཆོད་བཤམ་འབྱོར་ན་ལེགས། མ་འབྱོར་ན་ཡིད་ཀྱིས་དམིགས་པས་ཁྱབ་ཅིང་རྫས་མཆོག་དཀར་པོ་གཅིག་ཐུབ་ཉིད་འདིར་མེད་དུ་མི་རུང་སྟེ། གང་ཞེ་ན། རྩེ་གཅིག་པའི་དད་མོས་སོ། །དེ་ལ་ཐུན་མོང་མ་ཡིན་པའི་སྐྱབས་སེམས་ནི། །རླུང་ལྔ་རྣམ་དག་དྭངས་མའི་རླུང་། །ཉོན་མོངས་རྣམ་དག་ཡེ་ཤེས་ལྔ། །སྐུ་གསུམ་མཛད་པ་མཐར་ཕྱིན་པའི། །དཀོན་མཆོག་གསུམ་ལ་རྟོགས་པས་འདུད། ཨེ་མ་ཧོཿ མ་རིག་འཇིག་རྟེན་མུན་པའི་ཀློང་། །རང་གི་ཐབས་ཤེས་སྒྲོན་མེ་ཡིས། །རང་ལ་གནས་པའི་ཡེ་ཤེས་དེ། །བླ་མའི་དྲིན་གྱིས་རྟོགས་པར་བྱའོ། །དངོས་གཞི་ནི། རང་གི་སྤྱི་བོར་པདྨ་དཀར་པོ་དང་ཉི་ཟླའི་སྟེང་དུ་ཨ་དཀར་པོ་ལས་འོད་ཟེར་འཕྲོས། རང་བཞིན་གྱི་གནས་དང་རྒྱ་ནག་རི་བོ་རྩེ་ལྔ་ནས་རྩ་བའི་བླ་མ་དང་དབྱེར་མ་མཆིས་པའི་

― LT28_Page_0362 ―

^{[མ་དཔེ་གཟིགས་ན་འདིར་གནོན།]}

[Full Size]

གུ་རུ་བི་མ་ལ་མི་ཏྲ་ལྗང་སེར་རབ་ཏུ་བྱུང་བའི་ཆ་ལུགས་ཅན་གླེགས་བམ་བསྣམས་པ་སྤྱན་དྲངས། གདན་གྱི་སྟེང་དུ་ཨལ་ཐིམ་སྟེ་སྐྱིལ་ཀྲུང་ཕྱེད་པས་བཞུགས་པ་ལས་འོད་འཕྲོས། བརྒྱུད་པའི་བླ་མ་དང་ཆོས་འབྲེལ་ཐོགས་ཚད་སྤྱན་དྲངས་ཏེ་ཐིམ། གཞན་ཡང་ཡི་དམ་དཀྱིལ་འཁོར་མཁའ་འགྲོ་དམ་ཅན་རྒྱ་མཚོས་སྤྲིན་གཏིབས་པ་ལྟར་བསྐོར་ཏེ་བཞུགས་པར་གྱུར། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་ཀུན་གུས་པས་སྐྱབས་སུ་མཆི། །གདོད་མའི་གནས་སུ་རང་སར་གྲོལ། །ཐུགས་རྗེ་ལྷུན་གྲུབ་འགྲོ་བའི་དཔལ། །རིག་པ་འཛིན་པ་ཀུན་གྱི་རྗེ། །བི་མ་མི་ཏྲ་ལ་ཕྱག་འཚལ། །བསྐལ་བཟང་འདྲེན་པ་སྟོང་གི་བར། །གཞན་དོན་འཕོ་བ་ཆེན་པོའི་སྐུ། །རི་བོ་རྩེ་ལྔར་རྟག་ཏུ་བཞུགས། །བི་མ་མི་ཏྲ་ལ་ཕྱག་འཚལ། །མཁྱེན་བརྩེའི་ཕྲིན་ལས་ལྷུན་གྲུབ་ཀྱིས། །འགྲོ་བའི་དོན་རྣམས་རྫོགས་མཛད་ཅིང་། །ཟག་མེད་ལྷུན་རྫོགས་རྡོ་རྗེའི་སྐུ། །དྲི་མེད་བཤེས་གཉེན་ལ་ཕྱག་འཚལ། །ངོ་བོ་བརྗོད་འདས་ནམ་མཁའི་ཀློང་། །རང་བཞིན་འོད་གསལ་མཉམ་སྦྱོར་ཞིང་། །ཐུགས་རྗེས་འགྲོ་ཀུན་ཡོངས་ལ་ཁྱབ། །སྐྱབས་མཆོག་རྣམས་ལ་ཕྱག་འཚལ་ལོ། །རིན་ཆེན་མཎྜལ་ཡིད་འོང་མཆོད་པའི་སྤྲིན། །རྒྱལ་བའི་འབྱོར་ཚོགས་དཔག་མེད་དང་ལྡན་པ། །དཔག་ཡས་ནམ་མཁའི་རྒྱན་

― LT28_Page_0363 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར་འདི་ཕུལ་བས། །རང་བཞིན་སྤྲུལ་སྐུའི་ཞིང་ལ་སྤྱོད་པར་ཤོག །འོག་མིན་བདེ་ཆེན་རིན་ཆེན་གཞལ་ཡས་ཁང་། །སྣ་ཚོགས་མཆོད་པའི་སྤྲིན་གྱི་བླ་རེ་ཅན། །ནམ་མཁའ་གང་བར་དམིགས་ཏེ་ཕུལ་བ་ཡིས། །ལྷུན་གྲུབ་ལོངས་སྐུའི་ཞིང་ལ་སྤྱོད་པར་ཤོག །འོད་གསལ་ལྷུན་གྲུབ་ཡེ་ཤེས་རིགས་ལྔའི་ཞིང་། །སྐུ་དང་ཐིག་ལེས་ཡེ་ནས་བརྒྱན་པ་འདི། །རང་སྣང་དག་པས་ལེགས་པར་ཕུལ་བ་ཡིས། །ཀུན་བཟང་ཆོས་སྐུའི་ཞིང་ལ་སྤྱོད་པར་ཤོག །ཐམས་ཅད་ཀུན་བཟང་རོལ་པའི་ངང་། །མཆོད་པར་མི་འོས་གང་ཡང་མེད། །སྣང་སྟོང་མཆོད་སྤྲིན་རོལ་པ་ཡིས། །ཀུན་ལ་དེ་བཞིན་མཆོད་པར་བགྱི། །དྲི་མ་གློ་བུར་དང་ལྡན་ཞིང་། །ཡོན་ཏན་ཡེ་ནས་རྫོགས་པའི་ངང་། །འཁྲུལ་པའི་བག་ཆགས་ཇི་མཆིས་པ། །ཐམས་ཅད་ཀུན་བཟང་རོལ་པར་བཤགས། །བླ་ན་ཡོད་མེད་དགེ་བའི་ཚོགས། །བགྱིད་དང་བགྱིད་སྩལ་བགྱིས་པ་ལའང་། །དགའ་བས་རྗེས་སུ་ཡི་རང་ཞིང་། །རང་གྲོལ་ཆོས་ཀྱི་འཁོར་ལོ་བསྐོར། །ཀུན་ཀྱང་ཡེ་ནས་སྐྱེ་འཆི་མེད། །འདུ་འབྲལ་མེད་པའི་ཀློང་ཡངས་ལ། །མྱ་ངན་མི་འདའ་རྟག་པར་ཡང་། །སྒྱུ་མ་ཙམ་དུ་གསོལ་བ་འདེབས། །གདོད་ནས་ཁྱབ་བདལ་རོལ་བ་ཆེ། །རང་གྲོལ་ཀུན་བཟང་ཆོས་སྐུ་ཡི། །འགྲོ་ཀུན་མ་སྤངས་རང་གྲོལ་དུ། །དགེ་བ་གཉུག་མར་བསྔོ་བར་བགྱི། །དེང་ནས་བདག་དང་འགྲོ་བ་ཀུན། །སེམས་དང་སེམས་ཉིད་ཀུན་བཟང་

― LT28_Page_0364 ―

^{[མ་དཔེ་གཟིགས་ན་འདིར་གནོན།]}

[Full Size]

ཀློང་། །གདོད་མའི་ངང་དུ་རབ་རྫོགས་ནས། །འགྲོ་བའི་དོན་ཀུན་འགྲུབ་པར་ཤོག །སྤྲོ་ན་འདིར་རྣམ་ཐར་གསོལ་འདེབས་སོགས་བྱ། །ཨོཾ་ཨཱཿཧཱུྃ་མ་ཧཱ་གུ་རུ་སིངྡྷི་ཕ་ལ་ཧཱུྃ། ཞེས་བཟླས་པ་མཐར། བླ་མ་རྡོ་རྗེ་འཛིན་པ་ནི། ཁམས་གསུམ་འཁོར་བའི་གཉེན་གཅིག་པོ། །འགྲོ་བ་མགོན་མེད་རྣམས་ཀྱི་སྐྱབས། །ཐར་པའི་ལམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབས། །དུག་གསུམ་མེ་ཡིས་གདུངས་བ་ལ། །རང་བྱུང་རླན་གྱིས་བསིལ་བར་མཛོད། །མ་རིག་འཁྲུལ་པས་བཅིངས་པ་ཡི། །གདོས་བཅས་ལུས་དག་སེམས་རྣམས་ཀུན། །རང་དེངས་འོད་ཀྱི་རང་བཞིན་ཏུ། །ལྷག་མེད་མྱ་ངན་འདས་ཐོབ་མཛོད། །བླ་མ་སངས་རྒྱས་རིན་པོ་ཆེ། །བདག་ལ་རེ་ས་གཞན་ན་མེད། །ཐུགས་རྗེའི་སྤྱན་གྱིས་གཟིགས་མཛོད་ལ། །འཁོར་བའི་མཚོ་ལས་བསྒྲལ་དུ་གསོལ། །ཚེ་འདིར་ལེགས་པ་ཀུན་འགྲུབ་ཅིང་། །བགེགས་དང་བར་ཆད་མེད་པ་དང་། །འཆི་ཁར་ཟབ་མོའི་འོད་གསལ་ཟིན། །བར་དོའི་འཕྲང་ལས་སྒྲོལ་བར་མཛོད། །ལུས་དང་ངག་དང་ཡིད་རྩོལ་ཀུན། །རྟག་ཏུ་གཞན་ལ་ཕན་པ་དང་། །རྐྱེན་རྣམས་བྱང་ཆུབ་ལམ་མཆོག་ཏུ། །དེ་རིང་ཉིད་ནས་བསྒྱུར་དུ་གསོལ། །བདག་གིས་འབད་ཀྱང་ཐར་པ་དཀའ། །མགོན་པོ་ཁྱེད་ཀྱི་ཐུགས་རྗེའི་གྲུས། །མགོན་མེད་བདག་

― LT28_Page_0365 ―

^{[མ་དཔེ་གཟིགས་ན་འདིར་གནོན།]}

[Full Size]

དང་འགྲོ་བ་ཀུན། །ཐར་པའི་གླིང་དུ་ཕྱིན་པར་མཛོད། །གང་དག་བདག་ལ་དད་གྱུར་ཏམ། །སྨོད་དམ་སྐུར་པ་འདེབས་ཀྱང་རུང་། །དེ་དག་སྡིག་ཟད་ཉོན་མོངས་མེད། །སྲིད་པའི་ཆུ་བོ་སྤངས་པར་ཤོག །ནམ་ཞིག་བདག་གི་མིང་ཙམ་གྱིས། །འགྲོ་བའི་འདོད་རྒུ་རབ་འགྲུབ་ཅིང་། །ཕྱོགས་བཅུ་གང་བའི་ཞིང་རྣམས་སུ། །མཆོད་པའི་སྤྲིན་གྱི་ཆར་འབེབས་ཤོག །དགེ་བ་འདི་ཡིས་ལུས་ཅན་ཀུན། །ཐམས་ཅད་སྲིད་ལས་རྣམ་གྲོལ་ནས། །ཡེ་ཤེས་དམ་པ་གཉིས་ཐོབ་སྟེ། །དོན་གཉིས་ལྷུན་གྱིས་གྲུབ་པར་མཛོད། །ཅེས་གསོལ་བ་བཏབ་པས་བླ་མའི་སྐུ་ལས་བདུད་རྩིའི་རྒྱུན་བབས། བདག་གཞན་སེམས་ཅན་ཐམས་ཅད་ཀྱི་ལུས་ཀྱི་ཕྱི་ནང་ཁྱབ། ནད་གདོན་སྡིག་སྒྲིབ་དག །དངོས་གྲུབ་རྣམ་གཉིས་ཐོབ། ལྟ་དགོངས་ཏིང་འཛིན་གོང་འཕེལ་དུ་སྐྱེས། མཐར་བླ་མ་འཁོར་བཅས་འོད་དུ་ཞུ་ནས་རང་གི་སྤྱི་བོར་ཐིམ་པར་གྱུར། གཉིས་པ་ནང་ལྟར་གསོལ་བ་གདབ་པ་ནི། སྟོང་པའི་ངང་ལས་པད་ཟླའི་གདན་ལ་རང་ཉིད་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་ཅིང་དར་དང་རིན་པོ་ཆེས་བརྒྱན་པ། ཞབས་སྐྱིལ་མོ་ཀྲུང་གིས་བཞུགས་པའི་སྤྱི་བོར་པདྨ་ཉི་ཟླའི་གདན་ལ། ཨ་ལྗང་སེར་ལས་མཁས་པ་ཆེན་པོ་བི་མ་ལ་མི་ཏྲ་སྐུ་མདོག་དཀར་སྔོ་འོད་ལྗང་སེར་འཕྲོ་བ། དབུ་ལ་པ་ཞུ་དང་སྐུ་ལ་ཆོས་གོས་རྣམ་གསུམ་གསོལ་བ། ཕྱག་གཉིས་མཉམ་བཞག་གི་སྟེང་དུ་ཀ་

― LT28_Page_0366 ―

^{[མ་དཔེ་གཟིགས་ན་འདིར་གནོན།]}

[Full Size]

པཱ་ལ་བདུད་རྩིས་གང་བའི་ནང་འཆི་མེད་ཚེའི་བུམ་པ་གསེར་གྱི་རྡོ་རྗེ་རྩེ་ལྔ་པས་མཚན་པ་བསྣམས་པ། ཞབས་རྡོ་རྗེའི་སྐྱིལ་ཀྲུང་ཅན། ཤངས་ཀྱི་རྩེ་མོར་ཨ་དཀར་ལྗང་ཐིགས་ལ་ཁད་པ་ལས་འོད་འཕྲོས། རྩ་བརྒྱུད་ཀྱི་བླ་མ་རྣམས་དང་། ཁྱད་པར་རྒྱ་ནག་རི་བོ་རྩ་ལྔ་ནས་རང་འདྲ་བའི་ཡེ་ཤེས་སེམས་དཔའ་ལ་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་དཔག་ཏུ་མེད་པས་བསྐོར་བ་སྤྱན་དྲངས། ཧཱུྃ། ཤར་ཕྱོགས་རི་བོ་རྩེ་ལྔ་དང་། །བྷ་སིང་ཆེན་པོའི་དུར་ཁྲོད་ནས། །གུ་རུ་བི་མ་མི་ཏྲ་ལ། །འཁོར་དུ་མཁའ་འགྲོ་མང་པོས་བསྐོར། །གདུགས་དང་རྒྱལ་མཚན་ཐིབས་སེ་ཐིབ། །རིན་ཆེན་རྒྱན་ཆ་ཁྲོ་ལོ་ལོ། །རོལ་མོ་མང་པོ་དི་རི་རི། །སིལ་སྙན་མང་པོ་སི་ལི་ལི། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དངོས་གྲུབ་སྩོལ། །སྤྱི་གཙུག་གི་བླ་མ་ལ་ཐིམ་པས་འོད་དང་འོད་ཟེར་འབར། ཕྱི་སྣོད་དག་པའི་ཞིང་ཁམས། ནང་བཅུད་དཔའ་བོ་མཁའ་འགྲོ། སྣང་བ་ཐམས་ཅད་འོད་གདངས་སུ་འཁྱིལ་བར་གྱུར། བླ་མའི་ཕྱོགས་བཞིར་རྡོ་རྗེ་རིན་ཆེན་པདྨ་ལས་ཀྱི་མཁའ་འགྲོ་དཀར་སེར་དམར་ལྗང་གི་ཁ་དོག་ཅན། གྲི་གུག་དང་ཐོད་པ་བདུད་རྩིས་བཀང་བ་འཛིན་ཅིང་གྲུ་མོ་ན་ཁ་ཊྭཱཾ་ག་ཡོད་པ། ཞབས་གཡས་བསྐུམ་གཡོན་བརྐྱང་བས་པདྨ་ཉི་མ་རོའི་སྟེང་ན་གར་སྟབས་ལིང་ལིང་བྱེད་པ། །ཕྱོགས་མཚམས་སྟེང་འོག་དཔའ་བོ་མཁའ་འགྲོས་གང་བ་རྣམས་ཀྱིས་

― LT28_Page_0367 ―

^{[མ་དཔེ་གཟིགས་ན་འདིར་གནོན།]}

[Full Size]

ཧཱུྃ་ཕཊ་དང་ཧ་རི་ནི་སའི་སྒྲ་དིར་དིར་སྒྲོགས་པར་གྱུར་པར་མོས་ལ་རླུང་ཁ་སྦྱོར་དུ་བཅིང་སྟེ་ཇི་སྲིད་མི་སྐྱོའི་བར་དུ་བསྒོམ་མོ། །བཟླས་པ་བྱེད་ན། བླ་མའི་ཐུགས་ཀར་པད་ཉི་ལ་ཨ་དཀར་ལྗང་། མཁའ་འགྲོ་བཞིའི། ཐུགས་ཀར་ཧ་རི་ནི་ས། །སྔགས་ཀྱི་རང་སྒྲ་དིར་དིར་བྱུང་བས་ནམ་མཁའི་དབྱིངས་ཐམས་ཅད་ཁྱབ་པར་གྱུར། ཨོཾ་ཨཱཿཧཱུྃ་གུ་རུ་བི་མ་ལ་ཧ་རི་ནི་ས་ཙིཏྟ་ཧྲི༚་ཧྲི༚་སིངྡྷིཕ་ལ་ཧཱུྃ། ཞེས་ཅི་འགྲུབ་བཟླས་ལ་ཡིད་ཀྱིས་གསོལ་བ་བཏབ་ཅིང་རང་ལ་བསྟིམས་བས་བླ་སྒྲུབ་ཏུ་འགྱུར་ཞིང་། གལ་ཏེ་དབང་ལེན་པར་སྤྲོ་ན། ཐལ་མོ་སྦྱར་ལ། ཨེ་མ་ཧོཿ སྐྱེ་ཤི་ཀུན་བྲལ་ཚེ་ལ་དབང་ཐོབ་པའི། །མཁས་པ་ཆེན་པོ་བི་མ་ལ་མི་ཏྲ། །དགོངས་པ་གཡོ་མེད་མཁའ་ལྟར་རྣམ་དག་ཅིང་། །འབྱུང་བ་རང་དེངས་ཟག་མེད་དབྱིངས་བཞུགས་ཀྱང་། །སྔོན་གྱི་ཐུགས་རྗེ་ཆེན་པོ་ཉིད་གཡོས་ལ། །ཐུགས་རྗེས་དགོངས་ཤིག་བདག་ལ་བྱིན་གྱིས་རློབས། ཨོཾ་ཨཱཿཧཱུྃ་གུ་རུ་སརྦ་སིངྡྷི་ཧཱུྃ། ཨོཾ་ཨཱ་ཧཱུྃ། རྒྱལ་བའི་གདུང་འཛིན་མཁས་བློར་སྐྱེ་བ་གྲངས་མེད་སྦྱངས། །མཁྱེན་རབ་མཆོག་གྱུར་སྡེ་སྣོད་ཀུན་ལ་རྨོངས་པ་མེད། །སྐྱེ་ཤིའི་འཇིགས་བྲལ་སྤྲུལ་པས་འགྲོ་བའི་དོན་མཛད་པ། །དམ་པ་བདེ་གསལ་མྱུ་གུ་ཉིད་ལ་ཕྱག་འཚལ་བསྟོད། ས་མ་ར་ཐཱ་ཡ་སིང་། མཧཱ་སིངྡྷི་ས་མ་ཡཱ། བི་མ་ལ་མི་ཏྲ་གུ་རུ་ན་མོ། །ཨོཾ་ཨཱཿཧཱུྃ། མཁྱེན་རབ་རྨད་བྱུང་སྒྲ་ཚིག་རྣམ་པ་མང་པོ་ཡིས། །འགྲོ་མགོན་ཡེ་ཤེས་ཉི་མའི་འོད་ཀྱིས་འཛམ་གླིང་

― LT28_Page_0368 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་ཏུ་ཁྱབ། །བི་མ་མི་ཏྲ་སྐྱེ་ཤི་ཀུན་བྲལ་རྡོ་རྗེའི་ཞལ། །བདག་བློའི་ཉོན་མོངས་དྲི་མ་ཟད་མཛད་བསྟན་དུ་གསོལ། །ཨོཾ་ཨཱཿཧཱུྃ་སྭཱ་ཧཱ། འཁོར་རྣམས་འོད་དུ་ཞུ་མཁའ་འགྲོ་བཞི་ལ་ཐིམ། བཞི་པོ་གཅིག་ཏུ་འདུས། བླ་མ་དཔལ་ཆེན་པོ་དང་སྦྱོར་བ་མཛད་པའི་སྦྱོར་མཚམས་ནས་ཐིག་ལེ་བྱང་སེམས་ཀྱི་རྒྱུན་བབས། བདག་གི་ཚངས་བུག་ནས་ཞུགས། ལུས་ཁེངས། ལུས་ངག་ཡིད་གསུམ་ལྷན་སྐྱེས་དང་བཅས་པའི་སྒྲིབ་པ་དག །བདེ་བ་གསུམ་དང་ངོ་བོ་སྟོང་ལ་གསལ་བས་དབང་བཞི་ཐོབ། འཇམ་རླུང་བཟུང་ལ། སྟེ་པའི་ཨ་ཤད་འབར་སྤྱི་བོའི་ཧཾ་ཞུ་བ་དང་བླ་མ་ཡབ་ཡུམ་གྱི་བདུད་རྩི་ཞུ་བ་བབས། སྤྱི་མགྲིན་སྙིང་ག་ལྟེ་བའི་བར་རིམ་བཞིན་ཁེངས། དགའ་བ་བཞི་དང་སྟོང་པ་བཞིའི་འོད་གསལ་རྒྱུད་ལ་སྐྱེས། མཐར་བླ་མ་ཡབ་ཡུམ་བདེ་བའི་ངོ་བོར་ཞུ་ནས་རང་གི་སྙིང་གར་ཐིམ་པས་བླ་མའི་གསང་བ་གསུམ་དང་། རང་གི་སྒོ་གསུམ་དབྱེར་མེད་དུ་གྱུར་བར་མོས་ལ་འོད་གསལ་གཉུག་མའི་རང་འགྲོས་བསྐྱང་། གསུམ་པ་གསང་བ་ལྟར་ན། རང་གི་སྙིང་གར་པདྨ་ཉི་ཟླའི་སྟེང་དུ་ངོ་བོ་རྩ་བའི་བླ་མ་དང་དབྱེར་མེད་པའི་སློབ་དཔོན་བི་མ་ལ་ཡིན་པ་ལ་རྣམ་པ་ཀུན་བཟང་ཡབ་ཡུམ་མཐིང་ག །རྒྱན་མེད་པ། མཉམ་བཞག་སྐྱིལ་མོ་ཀྲུང་གིས་བཞུགས་པར་གྱུར། སྤྲོ་ན་ནང་སྒྲུབ་ཀྱི་གསོལ་འདེབས་བྱས་པས། སྐུ་ལས་འོད་ཟེར་སྔོ་སེར་དམར་ལྗང་དཀར་པོ་ལྔ་རིམ་པར་སྤྲོས། ཐོག་མར་ལུས་ཁེངས། །ནད་གདོན་སྡིག་

― LT28_Page_0369 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲིབ་དག །ཡེ་ཤེས་ལྔའི་དོན་རྟོགས་གདོས་བཅས་ཀྱི་སྒྱུ་ལུས་འོད་གསལ་དུ་གྲོལ། ཡང་འོད་ཟེར་ལྔ་འཕྲོས། སྣོད་བཅུད་འོད་གསལ་གྱི་ངང་དུ་གྲོལ། ནམ་མཁའི་མཐའ་ཀླས་པ་ཐམས་ཅད་ཡེ་ཤེས་ལྔའི་ཞིང་ཁམས་སུ་གྱུར་བར་མོས་པ་ལ་རིག་པ་གཏད་དེ་ཡུན་རིང་དུ་བསྒོམ། མཐར། སྣོད་བཅུད་འོད་དང་བཅས་པ་ཚུར་འདུས་སྙིང་གའི་བླ་མ་ལ་ཐིམ། ཡུམ་ཡབ་ལ། ཡབ་ཀྱང་འོད་གསལ་གྱི་ངང་དུ་ཐིམ་པར་གྱུར། ཞེས་མོས་ལ་ནང་དབྱིངས་ཀ་དག་གི་དགོངས་པ་སྟོང་གསལ་མཐའ་དབུས་མེད་པའི་རང་ངོ་བསྐྱང་། རྗེས་ཤེས་སྣང་སྟོང་ཟང་ཐལ་རྗེན་པར་སྦྱང་། དུས་ཐམས་ཅད་དུ་སྣང་སྲིད་བླ་མའི་རོལ་པར་མོས་ལ་བཅོས་མིན་གྱི་མོས་གུས་དང་མ་བྲལ་བས་གང་སྣང་རང་གྲོལ་གྱི་སྤྱོད་པ་སྤྱད་ཅིང་། བཟའ་བཏུང་གོས་རྒྱན་གྱི་ཕུད་ཀྱིས་བླ་མ་མཆོད། སྤྱོད་ལམ་རྣམ་བཞིར་སྤྱི་དང་མཐུན་པར་ལམ་དུ་ཁྱེར་ཉིང་ཁྱད་པར་རང་གྲོལ་ཆོས་ཉིད་ཀྱི་ངང་ནས་བྱ། ཐུན་མཐར་དགེ་བ་བསྔོ་བའང་། །བླ་མ་གདོད་མའི་མགོན་པོ་ལ། །དད་པས་དགེ་བསགས་དངོས་ཀུན་གྱིས། །འགྲོ་ཀུན་རང་གྲོལ་གཉུག་མའི་ངང་། །ཀུན་བཟང་ཀློང་དུ་རྫོགས་པར་ཤོག །ཅེས་སོགས་ཐུན་མོང་མ་ཡིན་པའི་བསྔོ་སྨོན་གྱི་རྒྱས་གདབ་བོ། །འདི་ལ་རྒྱུན་ཏུ་འབད་པས་སྣང་བ་དབང་དུ་འདུ། །ཚེ་དང་དཔལ་དང་ཏིང་འཛིན་ཁྱད་པར་ཅན་ཐོབ་སྟེ་མཐར་སྐྱེ་ཤི་མེད་པ་རྡོ་རྗེའི་སྐུ་འཐོབ་པར་འགྱུར་ལ། ཁྱད་པར་རྫོགས་པ་ཆེན་པོའི་རྒྱུད་ལུང་མན་ངག་ལ་ཐོས་བསམ་སྒོམ་གསུམ་དང་། །གཞན་རྗེས་སུ་འཛིན་པའི་སྐལ་པ་མཆོག་དང་ལྡན་པར་འགྱུར་བར་གསུངས་སོ། །དོན་བཟང་བརྗོད་པ་སྙན་རློམས་

― LT28_Page_0370 ―

^{[མ་དཔེ་གཟིགས་ན་འདིར་གནོན།]}

[Full Size]

པའི། །ཕལ་ཚིག་བསྒྲིགས་ན་ཤེས་མོད་ཀྱང་། །ཆོས་འདོད་དངོས་གྲུབ་མི་བསླུའི་ཕྱིར། །རྡོ་རྗེའི་གསུང་ལ་བརྟེན་ནས་བཀོད། །འཁོར་འདས་ཀུན་ཁྱབ་དྲི་མེད་བཤེས་གཉེན་གྱིས། །དད་ཅིང་མོས་པའི་ཡུལ་ལ་རྗེས་དགོངས་ཏེ། །ལས་ཀྱི་མཐའ་ཟད་འཁོར་བ་དོང་སྤྲུགས་ཤིང་། །ཉིད་དང་དབྱེར་མེད་གཞི་ཐོག་གྲོལ་མཛད་གསོལ། །ཚུལ་འདིའང་ལས་སྨོན་དཀར་པོའི་འཕྲོ་ཅན་པདྨ་རྣམ་པར་རྒྱལ་བས། རྟག་ཏུ་དུས་ཆོས་འཕགས་ཚོལ་བའི་རྣམ་ཐར་ལ་རྐང་བཀོད་དེ་རིང་མོ་ནས་ཡང་ཡང་བསྐུལ་བའི་ངོར། རྗེ་འདིའི་རིང་ལུགས་ལ་ཡི་དམ་འཆའ་བ་པདྨ་གར་དབང་བདེ་བའི་རྡོ་རྗེས། གདོད་མའི་མགོན་པོ་ཀུན་མཁྱེན་རྡོ་རྗེ་གཟི་བརྗིད་ཀྱི་མན་ངག་ལ་བརྟེན་ནས་ཁྱེར་བདེར་བཀོད་པ་འབྲེལ་ཚད་ཕྱག་རྒྱ་རྒྱ་ཆེན་གྱི་རིག་པ་འཛིན་པར་གྱུར་ཅིག །དགེ་ལེགས་འཕེལ།། །།

འཇིག་རྟེན་དབང་ཕྱུག་རྒྱལ་མཆོག་བཅུ་བཞི་པ་གཙོ་བོར་གྱུར་པའི་དཔལ་ལྡན་བླ་མའི་དཀྱིལ་འཁོར་མཆོད་ཅིང་གསོལ་བ་གདབ་པ་ངེས་དོན་ལམ་འཇུག

― LT28_Page_0371 ―

^{[མ་དཔེ་གཟིགས་ན་འདིར་གནོན།]}

[Full Size]

འཇིག་རྟེན་དབང་ཕྱུག་རྒྱལ་མཆོག་བཅུ་བཞི་པ་གཙོ་བོར་གྱུར་པའི་དཔལ་ལྡན་བླ་མའི་དཀྱིལ་འཁོར་མཆོད་ཅིང་གསོལ་བ་གདབ་པ་ངེས་དོན་ལམ་འཇུག་ཅེས་བྱ་བ་བཞུགས་སོ། །

― LT28_Page_0372 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་ཤྲཱི་མཱཾ་བཛྲ་དྷ་རཱ་ཡ། རིགས་དྲུག་ཁྱབ་བདག་རྡོ་རྗེ་འཆང་། །གཙོ་འཁོར་ཚུལ་དུ་རྣམ་རོལ་པ། །དངོས་གྲུབ་མ་ལུས་འབྱུང་བའི་གནས། །དཔལ་ལྡན་བླ་མའི་ཚོགས་ལ་འདུད། །རྡོ་རྗེའི་ཐེག་ལ་ཞུགས་པ་རྣམས། །གསང་ལམ་བགྲོད་པ་གཅིག་པ་ནི། །བྱིན་རླབས་རིམ་པ་ཁོ་ན་སྟེ། །དེ་ཉིད་སྐུལ་བའི་ཐབས་མཆོག་བཤད། །དེའང་སྡོམ་པ་འབྱུང་བའི་རྒྱུད་ལས། །མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཅེས་སོགས་ལུང་དང་རིགས་པ་དྲི་མ་མེད་པ་ལ་བརྟེན་ཏེ་བླ་མ་མཆོད་ཅིང་སྒྲུབ་པའི་རིམ་པ་གསང་སྔགས་གསར་རྙིང་རྣམས་ཀྱི་ཕྱག་སྲོལ་དུ་རྒྱ་ཆེ་དར་བ་ལས། སྐབས་སུ་བབ་པའི་དོན་འདི་ལ་གཉིས། །ཅུང་ཟད་སྤྲོས་པ་དང་བཅས་པར་བྱེད་ན་དཔལ་ལྡན་བླ་མ་མཆོག་གི་རྡོ་རྗེ་ཅན་རྣམས་ཀྱི་སྣང་བརྙན་སོགས་རྟེན་མངོན་པར་བཀྲམ་པའི་སྤྱན་སྔར། །མཆོད་པའི་བཀོད་པ་རིན་པོ་ཆེའི་མཎྜལ་དང་། མེ་ཏོག་བདུག་སྤོས་སྣང་

― LT28_Page_0373 ―

^{[མ་དཔེ་གཟིགས་ན་འདིར་གནོན།]}

[Full Size]

གསལ་གྱི་ཕྲེང་བ། ཞལ་ཟས་བཟའ་བཅའ་བཏུང་བའི་བྱེ་བྲག །ཚོགས་ཀྱི་ཡོ་བྱད་ལ་སོགས་པ་ཇི་ལྟར་འབྱོར་པ་གཙང་ཞིང་དག་པར་བཤམ། སྤྲོས་མེད་ཀྱི་ཚུལ་ལ་ཡིད་མངོན་པར་གཞོལ་བ་དག་གིས་ནང་གི་ཏིང་ངེ་འཛིན་ལ་རྣལ་འབྱོར་དུ་བྱེད་པ་ཁོ་ནས་དོན་འགྲུབ་ཅིང་། གང་ལྟར་ཡང་མཁའ་ཁྱབ་ཀྱི་སེམས་ཅན་མ་བསྒྲལ་བར་འདོད་པའི་རིས་མེད་སྙིང་རྗེའི་ཀུན་སློང་། དཔལ་ལྡན་བླ་མའི་རྣམ་ཐར་ལ་ཡིད་ཆེས་པའི་བཅོས་མིན་མོས་གུས་ཀྱི་གདུང་ཤུགས། གང་ལའང་བདེན་འཛིན་དང་རེ་དོགས་སྤངས་པ་སྟོང་ཉིད་ཟབ་མོའི་དོན་ཡིད་ལ་བྱས་ཏེ། ཆོ་གའི་རིམ་པ་ལ་དོན་བཅུ། སྐྱབས་སེམས་སྒྲིབ་སྦྱོང་ཚོགས་རྟེན་སྒྲུབ། །ཡན་ལག་བདུན་འབུལ་གསོལ་བ་གདབ། །རྒྱུད་བསྐུལ་ཚོགས་དང་དབང་བཞི་བླང་། །ཞུ་བསྟིམ་རྗེས་ཀྱི་བྱ་བའོ། །དེ་ལ་དང་པོ་སྐྱབས་སུ་འགྲོ་ཞིང་སེམས་བསྐྱེད་པ་ནི། །ཆོས་དབྱིངས་ཀྱི་ཁམས་ཡེ་ཤེས་ཆེན་པོས་ཁྱབ་པའི་བླ་མ་སྐུ་གསུམ་གྱི་བདག་ཉིད་རྣམས་སྐྱབས་སུ་འགྲོ་བའི་ཡུལ་དང་བསྒྲུབ་བྱར་བྱས། རང་དང་མར་གྱུར་

― LT28_Page_0374 ―

^{[མ་དཔེ་གཟིགས་ན་འདིར་གནོན།]}

[Full Size]

ལུས་ཅན་མཐའ་དག་བྱང་ཆུབ་བར་དུ་སྐྱབས་ཞུ་ཞིང་མཐའ་གཉིས་ལ་མི་གནས་པའི་ཟུང་འཇུག་ཆེན་པོ་བསྒྲུབ་པར་འདོད་པ་ལྷག་པ་བྱང་ཆུབ་ཏུ་སེམས་བསྐྱེད་པས། །སངས་རྒྱས་ཆོས་དང་དགེ་འདུན་དང་། །བླ་མ་ཡི་དམ་མཁའ་འགྲོ་མ། །ཀུན་འདུས་དཔལ་ལྡན་བླ་མ་ལ། །མི་ཕྱེད་གུས་པས་སྐྱབས་སུ་མཆི། །འགྲོ་ཀུན་སངས་རྒྱས་སར་འགོད་ཕྱིར། །རྡོ་རྗེ་སློབ་དཔོན་མཆོག་བསྒྲུབས་ཏེ། །བྱང་ཆུབ་རྡོ་རྗེའི་དམ་ཚིག་བཟུང། །འགྲོ་བའི་འདྲེན་པར་བདག་གྱུར་ཅིག །ཅེས་ལན་ཁ་ཤས་བརྗོད། གཉིས་པ་ལམ་གྱི་མངོན་རྟོགས་རྒྱུད་ལ་སྐྱེ་བའི་འགལ་རྐྱེན་སྡིག་སྒྲིབ་སྦྱོང་བྱེད་རིགས་འདུས་ཡེ་ཤེས་རྡོ་རྗེའི་བསྒོམ་བཟླས་ནི། །ཆོས་ཀུན་སེམས་ཀྱི་རོལ་པའི་རང་བཞིན་ལས། །སྐད་ཅིག་དྲན་རྫོགས་བདག་ཉིད་རྡོ་རྗེ་སེམས། །དཀར་འཚེར་རྡོར་དྲིལ་ཕྱག་རྒྱ་ལོངས་སྐུའི་ཚུལ། །ཐུགས་ཀར་ཧཱུྃ་ལ་ཡིག་བརྒྱས་བསྐོར་བར་གྱུར། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏེྭ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྷོ་མེ་བྷ་ཝ། སརྦ་སིངྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ལཿཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱ་ན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ ལོངས་སྐབས་དང་བསྟུན་ནས་བཟླ། །འཁོར་བ་ཐོག་མཐའ་མེད་པའི་བག་ཆགས་དང་། །ལས་ཉོན་དམ་སྡོམ་ཉམས་ཆགས་ཉེས་ལྟུང་རིགས། །མ་ལུས་སྔགས་དང་ཏིང་འཛིན་བྱིན་རླབས་ཀྱིས། །ཡོངས་དག་འགྲོ་བ་ཀུན་ཀྱང་དེ་བཞིན་གྱུར། །ཞེས་མོས། གསུམ་པ་ཚོགས་རྟེན་སྒྲུབ་པ་ལ་གསུམ། དང་པོ་གནས་

― LT28_Page_0375 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོ་བྱིན་གྱིས་བརླབ་པ་ནི། བདག་ཉིད་རྡོར་སེམས་ཐུགས་ཀའི་ཧཱུྃ་ཡིག་ལས། །ཡེ་ཤེས་འོད་འཕྲོས་སྣོད་བཅུད་ཀུན་ལ་ཕོག །གནས་ཡུལ་གདོས་བཅས་མ་ཡིན་ཆོས་དབྱིངས་ཞིང་། །མཆོད་རྫས་ཡོ་བྱད་ཀུན་བཟང་སྨོན་ལམ་ལས། །ལེགས་གྲུབ་བློ་ལས་འདས་པའི་མཆོད་སྨིན་ཚོགས། །ཟག་མེད་རྒྱུན་མི་ཆད་ཅིང་རབ་འབྱམས་ཞིང་། །མ་ལུས་ཡོངས་སུ་ཁྱབ་པའི་སྒྱུ་འཕྲུལ་ཆེ། །ཕྱི་ནང་གསང་བ་དེ་བཞིན་ཉིད་རྫོགས་གྱུར། ཨོཾ་ཨཱཿཧཱུྃ་བཛྲ་སརྦ་པཱུ་ཛ་མེ་གྷ་ས་མུ་དྲ་སྦ་ར་་ས་མ་ཡེ་ཧཱུྃ་སྭཱ་ཧཱ། གཉིས་པ་རྟེན་བསྐྱེད་པ་ནི། སྣང་སྲིད་གདོད་ནས་རྣམ་དག་སངས་རྒྱས་ཞིང་། །ཡེ་ཤེས་རང་སྣང་རྒྱན་མཆོག་སྟུག་པོ་བཀོད། །ངོ་མཚར་རྨད་བྱུང་མཆོད་པའི་སྤྲིན་ཕུང་གཏིབས། །དེ་དབུས་བསམ་ཡས་དཔེ་མེད་དཀྱིལ་འཁོར་དབུས། །རྡོ་རྗེའི་ཁྲི་མཆོག་པདྨ་ཟླ་གདན་ལ། །གངས་ཅན་མགོན་པོ་རྒྱལ་དབང་ཀརྨ་པ། །རིགས་ཀུན་ཁྱབ་བདག་ཐེག་མཆོག་རྡོ་རྗེ་འཆང་། །ཐུགས་རྗེའི་རང་གཟུགས་སྤྱན་རས་གཟིགས་ཀྱི་ཚུལ། །དཀར་གསལ་དར་དང་རིན་ཆེན་རྒྱན་གྱིས་ཀླུབས། །དབང་རྟགས་ཞྭ་ནག་གསེར་གྱི་མདངས་ཅན་གསོལ། །ཕྱག་གཡས་མཆོག་སྦྱིན་གཡོན་པ་ངལ་གསོའི་རྒྱས། །པད་དཀར་སྡོང་བུ་ཚེ་བུམ་མཚན་པ་བསྣམས། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །གཡས་སུ་རྒྱལ་ཚབ་བྱམས་ཆེན་སྤྲུལ་པའི་སྐུ། །མཐོང་གྲོལ་ཞྭ་དམར་གསེར་མདངས་དབུ་ལ་གསོལ། །གཡས་གཡོན་རྡོ་རྗེ་བདེ་

― LT28_Page_0376 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱོང་ཚེ་བུམ་འཛིན། །གཡོན་ཏུ་འགྲོ་བའི་མགོན་པོ་འབྲུག་པ་རྗེ། །སྒོམ་ཞྭ་གཙུག་བཅིངས་མཉམ་བཞག་ཐོད་ཞལ་བསྣམས། །རྒྱབ་ཏུ་དཔལ་ལྡན་དཔའ་བོའི་དབང་ཕྱུག་ནི། །སྔགས་འཆད་ཆ་ལུགས་རྡོ་རྗེ་ཕུར་བུ་གདེངས། །བརྗིད་ལྡན་པདྨ་མཐོང་གྲོལ་གཙུག་ཏུ་བཅིངས། །མདུན་ཏུ་པདྨ་གར་དབང་པ་ཞུ་འཛིན། །གཡས་པས་མཆོག་སྦྱིན་ཚེ་བུམ་བདུད་རྩིས་བཀང་། །གཡོན་པས་ཆོས་འཆད་ཨུཏྤལ་རལ་པོད་མཚན། །ཤར་ལྷོར་ཆགས་མེད་མཆོག་སྤྲུལ་སྒོམ་ཞྭ་གསོལ། །མཆོག་སྦྱིན་སྐྱབས་སྦྱིན་པད་དཀར་འདབ་རྒྱས་བསྣམས། །ལྷོ་ནུབ་མཆོག་གྱུར་གླིང་པ་མཐོང་གྲོལ་མནབས། །སྔགས་ཆས་ཆོས་འཆད་མཉམ་བཞག་གཏེར་སྒྲོམ་བསྣམས། །ནུབ་བྱང་འཇམ་དབྱངས་མཁྱེན་བརྩེ་པ་ཞུ་གསོལ། །ཆོས་འཁོར་ཕྱག་རྒྱས་ཨུཏྤལ་རལ་པོད་བསྣམས། །བྱང་ཤར་ཟླ་བཟང་མཆོག་གི་སྤྲུལ་པའི་སྐུ། །སྒོམ་ཞྭ་གཙུག་བཅིངས་མཉམ་གཞག་ནོར་བུ་བསྣམས། །དེ་རྒྱབ་མདུན་ནས་བརྩམས་ཏེ་གཡས་བསྐོར་དུ། །མཆོག་སྤྲུལ་གསང་སྔགས་བསྟན་འཛིན་པད་ཞྭ་མནབས། །ཕྱག་གཉིས་ཌཱ་མ་རུ་དང་དྲིལ་བུ་བསྣམས། །ཐུགས་རྗེའི་མངའ་བདག་ཡེ་ཤེས་ཉི་མའི་སྡེ། །ཆོས་འཆད་མཉམ་བཞག་ཕྱག་རྒྱས་གླེགས་བམ་བསྣམས། །སྒྲུབ་བརྒྱུད་བསྟན་འཛིན་ཕྲིན་ལས་དབང་ཕྱུག་ནི། །ཐབས་ཤེས་ཕྱག་རྒྱ་རྡོ་རྗེ་དྲིལ་བུ་འཛིན། །རྗེ་དཔོན་བསམ་གཏན་མཆོག་གི་སྤྲུལ་པའི་སྐུ། །ས་གནོན་ཕྱག་རྒྱས་རིན་ཆེན་བགྲང་ཕྲེང་བསྣམས། །གསུམ་ཀ་བརྗིད་ལྡན་སྒོམ་ཞྭས་དབུ་

― LT28_Page_0377 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་མཚན། །དར་རྒྱས་རྒྱ་མཚོ་སྒྲུབ་ཆེན་གཡུ་བྲག་པ། །ཚུལ་ཁྲིམས་རྒྱ་མཚོ་ཀརྨ་འོད་འཕྲོ་རྣམས། །ཞྭ་ཁྲ་གསོལ་ཞིང་མཉམ་བཞག་ཕྱག་རྒྱ་མཛད། །གཙོ་འཁོར་ཀུན་ཀྱང་ཆགས་བྲལ་རབ་བྱུང་ཆས། །ཞི་འཛུམས་ལྷུན་ཆགས་རྡོ་རྗེ་སྐྱིལ་ཀྲུང་བཞུགས། །སྟེང་ཕྱོགས་ཆོས་སྐུ་དྲུག་པ་རྡོ་རྗེ་འཆང་། །གཡས་ཕྱོགས་ནམ་མཁར་པདྨ་ཐོད་ཕྲེང་རྩལ། །གཡོན་ཕྱོགས་རྗེ་བཙུན་ཡིད་བཞིན་འཁོར་ལོ་ཡུམ། །འོག་ཕྱོགས་ནག་པོ་ཆེན་པོ་ལྕམ་དྲལ་སོགས། །ཡེ་ཤེས་ཚོམ་བུ་རྡོ་རྗེའི་དཀྱིལ་འཁོར་བ། །བྱིན་རླབས་འོད་ཟེར་མུ་མཐའ་མེད་པར་འཁྲིགས། །བརྟན་གཡོ་འཁོར་འདས་སྒྱུ་འཕྲུལ་རོལ་པས་ཁྱབ། །མཐོང་ཐོས་དྲན་པས་འཁོར་བ་དོང་ནས་སྤྲུགས། །གང་འདུལ་བཀོད་པ་བསམ་མི་ཁྱབ་པར་སྟོན། །མོས་པའི་ཡུལ་ལ་བརྩེ་བའི་ཐུགས་རྗེས་དགོངས། །དད་གུས་གདུང་བའི་ལྕགས་ཀྱུས་བསྐུལ་བ་ཡི། །དགོངས་པ་ཆོས་ཀྱི་དབྱིངས་ལས་མ་གཡོས་ཀྱང་། །དམིགས་མེད་སྙིང་རྗེའི་རང་གཟུགས་མཚན་མའི་སྐུ། །མཁའ་ལ་སྤྲིན་ཕུང་བཞིན་ཏུ་གཏིབས་པར་གྱུར། གསུམ་པ་ཐུགས་དམ་བསྐུལ་བ་ནི། ཨོཾ་ཨཱཿཧཱུྃ། ཆོས་དབྱིངས་གདོད་ནས་དག་པ་འོག་མིན་ཞིང་། །ལྷུན་གྲུབ་ཡེ་ཤེས་རང་གསལ་ཕོ་བྲང་ནས། །སྐུ་གསུམ་ཡོངས་རྫོགས་བླ་མ་སྤྱན་འདྲེན་ན། །དད་གུས་དམ་ཚིག་གནས་འདིར་གཤེགས་སུ་གསོལ། །ཞིང་རྣམས་སྐུས་ཁྱབ་གཤེགས་བཞུད་མི་དམིགས་ཀྱང་། །ཐུགས་རྗེའི་སྒྱུ་འཕྲུལ་ཅིར་ཡང་སྟོན་མཛད་ན། །གདུལ་བྱའི་ཡུལ་དང་། །

― LT28_Page_0378 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུན་པའི་བཀོད་སྤྲུལ་གྱི། །ཟློས་གར་ཡང་དག་བསྒྱུར་བས་གཤེགས་སུ་གསོལ། །ཆོས་སྐུ་གཅིག་དང་དུ་མའི་སྤྲོས་བྲལ་ཡང་། །གཟུགས་སྐུ་ཡེ་ཤེས་རང་གདངས་འགག་མེད་ལས། །སྤྲུལ་སྐུ་གདུལ་བྱའི་གྲངས་མཉམ་དེ་སྲིད་ཀྱི། །རྣམ་འདྲེན་བླ་མའི་ཚོགས་རྣམས་གཤེགས་སུ་གསོལ། །རྡོ་རྗེ་འཆང་ཆེན་པདྨ་ཐོད་ཕྲེང་རྩལ། །ཡིད་བཞིན་འཁོར་ལོ་རྒྱལ་དབང་ཀརྨ་པ། །ཡབ་སྲས་གཙོ་དང་འཁོར་དུ་རྣམ་རོལ་བ། །རྡོ་རྗེའི་ཆོས་སྐྱོང་ཚོགས་བཅས་གཤེགས་སུ་གསོལ། །སྣང་གྲགས་བླ་མའི་ངོ་བོར་རོ་གཅིག་ཀྱང་། །གང་འདུལ། ཐུགས་རྗེའི་རྣམ་འགྱུར་སྣ་ཚོགས་པའི། །སངས་རྒྱས་སྲས་བཅས་ལྷ་དང་མཁའ་འགྲོའི་ཚོགས། །མ་ལུས་མཆོད་པའི་གནས་འདིར་གཤེགས་སུ་གསོལ། །ཨོཾ་སརྦ་ཏ་ཐཱ་ག་ཏ་མ་ཧཱ་གུ་རུ་རཏྣ་ས་པ་རི་ཝཱ་ར་བཛྲ་ས་མཱ་ཛ༔ ཛ༔ཧཱུྃ་བཾ་ཧོཿ ཆོས་དབྱིངས་ཡེ་ཤེས་སྒྱུ་མའི་སྐུར་སྣང་བའི། །བླ་མ་མཆོག་ལ་གཉིས་འཛིན་མི་དམིགས་ཀྱང་། །བདག་སོགས་འགྲོ་བའི་གཉིས་འཛིན་ཞི་སླད་དུ། །སྐུ་དང་ཡེ་ཤེས་དབྱེར་མེད་བརྟན་པར་བཞུགས། །ཛྙཱ་ན་ཀ་ཡ་ཏིཥྛ་བཛྲ་ཧཱུྃ། བཞི་པ་ཡན་ལག་བདུན་གྱི་དང་པོ་ཕྱག་འཚལ་བ་ནི། གང་སྐུ་མཚན་དཔེའི་ཆ་ཤས་གདུལ་བྱའི་མཁར། །འགྲིབ་མེད་རྟག་པར་གསལ་བའི་འོད་སྣང་གིས། །ཐར་ལམ་ངེས་ལེགས་སྟོན་པའི་སྒྲོན་མ་མཆོག །ཕན་བདེའི་ཟླ་བ་ཁྱོད་ལ་ཕྱག་འཚལ་ལོ། །གང་གསུང་དགེ་བ་འབུམ་གྱི་བདུད་རྩིའི་ཆར། །ཉོན་མོངས་ཚ་གདུང་ཞི་མཛད་ཡེ་ཤེས་རྒྱུན། །བྱང་ཆུབ་མྱུ་གུ་སྐྱེད་

― LT28_Page_0379 ―

^{[མ་དཔེ་གཟིགས་ན་འདིར་གནོན།]}

[Full Size]

མཁས་ཐུགས་རྗེའི་བཅུད། །ཡིད་བཞིན་འདོད་འཇོ་ཁྱོད་ལ་ཕྱག་འཚལ་ལོ། །གང་ཐུགས་ཟབ་ཞི་སྤྲོས་བྲལ་རྟོག་མེད་ལས། །གུས་ལྡན་ཡིད་ལ་ཇི་ལྟར་བསམ་པའི་དོན། །མཆོག་ཐུན་དངོས་གྲུབ་འབྱུང་གནས་ཟླ་མེད་པའི། །རིན་ཆེན་གཏེར་མཛོད་ཁྱོད་ལ་ཕྱག་འཚལ་ལོ། །བསྡུ་ན་དེ་ཙམ་གྱིས་མཐུས། ཅུང་ཟད་སྤྲོ་ན། །ཡོན་ཏན་ཀུན་གྱི་གཏེར་གྱུར་པས། །གང་གི་མཚན་ཙམ་དྲན་པས་ཀྱང་། །བདག་བློའི་རྒུད་པ་ཞི་མཛད་པ། །དཔལ་ལྡན་བླ་མ་ལ་ཕྱག་འཚལ། །དྲི་མེད་ཡོན་ཏན་རབ་རྒྱས་པས། །འགྲོ་ཀུན་གཙུག་གི་རྒྱན་གྱུར་པའི། །དགོས་འདོད་འབྱུང་བའི་རིན་པོ་ཆེ། །བླ་མའི་ཞབས་ལ་ཕྱག་འཚལ་ལོ། །བླང་དོར་རྟོགས་པའི་སྣང་བ་ཡིས། །འགྲོ་ཀུན་མི་ཤེས་མུན་སེལ་བ། །དྲི་མེད་ཉི་མའི་དཀྱིལ་འཁོར་མཆོག །བླ་མའི་ཞབས་ལ་ཕྱག་འཚལ་ལོ། །བསོད་ནམས་ཡེ་ཤེས་བསིལ་ཟེར་གྱིས། །ཕན་བདེའི་ཚལ་རབ་རྒྱས་མཛད་པ། །རྣམ་དག་ཟླ་བའི་དཀྱིལ་འཁོར་མཆོག །བླ་མའི་ཞབས་ལ་ཕྱག་འཚལ་ལོ། །དམ་ཆོས་བདུད་རྩིའི་སྨན་མཆོག་གིས། །ཉོན་མོངས་སྡུག་བསྔལ་ནད་སེལ་བ། །ཐབས་མཁས་འགྲོ་བའི་སྨན་པ་མཆོག །བླ་མའི་ཞབས་ལ་ཕྱག་འཚལ་ལོ། །ཐབས་དང་ཤེས་རབ་གྲུ་ཆེན་གྱིས། །སྲིད་ཞིའི་རྒྱ་མཚོའི་མཐར་སྒྲོལ་བ། །སྟོབས་ལྡན་འགྲོ་བའི་དེད་དཔོན་མཆོག །བླ་མའི་ཞབས་ལ་ཕྱག་འཚལ་ལོ། །གནོད་པ་ཀུན་ལས་སྐྱོབ་བྱེད་ཅིང་། །ཕན་པ་དཔག་མེད་སྒྲུབ་མཛད་པའི། །བྱམས་མགོན་འགྲོ་བའི་གཉེན་གཅིག་

― LT28_Page_0380 ―

^{[མ་དཔེ་གཟིགས་ན་འདིར་གནོན།]}

[Full Size]

པོ། །བླ་མའི་ཞབས་ལ་ཕྱག་འཚལ་ལོ། །གཉིས་པ་མཆོད་པ་ལ། ཕྱི་མཆོད་ནི། །ཞིང་ཁམས་རབ་འབྱམས་བྱེ་བ་ཕྲག་བརྒྱ་ཀུན། །མཆོད་ཡོན་བདུད་རྩི་ཡན་ལག་བརྒྱད་ལྡན་གྱིས། །ཡོངས་བཀང་བླ་མ་མཆོག་ལ་འབུལ་ལགས་ཀྱི། །འགྲོ་ཀུན་བསམ་གཏན་རྒྱ་མཚོར་དབང་འབྱོར་ཤོག །ཨོཾ་རཏྣ་གུ་རུ་ཀརྨ་ཀ་ས་པ་རི་བཱ་ར་བཛྲ་ཨརྒྷཾ་པྲ་ཏཱིཙྪ་ཧཱུྃ་སྭཱ་ཧཱ། འདབ་སྟོང་གེ་སར་རྒྱས་པའི་པདྨོའི་ཚོགས། །དབང་པོའི་གཞུ་ལྟར་བཀྲ་བའི་མདངས་ཅན་གྱིས། །ནམ་མཁའ་ས་གཞི་ཀུན་བཀང་འབུལ་ལགས་ན། །འགྲོ་ཀུན་བརྩོན་འགྲུས་མཆོག་ལ་སྦྱོར་བར་ཤོག །སྔགས་ཐོག་མཐའ་སྔ་མས་འགྲེས་ཏེ། །བཛྲ་པུཥྤེ༴ སྤོས་ཀྱི་ཕྱེ་ཕུར་རི་རབ་མཉམ་པ་དང་། །ཡིད་འོང་བསུང་ཞིམ་བདུག་པའི་སྤྲིན་ཚོགས་བཅས། །དཔག་ཚད་བྱེ་བར་ཁྱབ་པའི་དྲི་བཟང་མཆོག །ཕུལ་བས་འགྲོ་ཀུན་ཚུལ་ཁྲིམས་རྣམ་དག་ཤོག །བཛྲ་དྷཱུ་པེ༴ །གང་གིས་མི་སྒྲིབ་རིན་ཆེན་སྣང་བའི་འོད། །ཉིན་མཚན་ཀུན་ཏུ་གསལ་དང་རྩི་མཆོག་འབྲུའི། །སྒྲོན་མ་འཇིག་རྟེན་མཐའ་དག་སྣང་བྱེད་འོད། །ཕུལ་བས་འགྲོ་ཀུན་ཤེས་རབ་གསལ་འབར་ཤོག །བཛྲ་ཨཱ་ལོ་ཀེ༴ །འཁོར་བའི་ཚ་གདུང་ཀུན་སེལ་དྲི་ཡི་ཆབ། །མ་རིག་རྨོངས་པའི་ཐིབ་པོ་ཞི་བ་དང་། །མངོན་མཐོ་ངེས་ལེགས་བདེ་ཆེན་སྐྱེད་བྱེད་པ། །ཕུལ་བས་འགྲོ་ཀུན་བཟོད་པའི་གོ་ལྡན་ཤོག །བཛྲ་གནྡྷེ༴ ལྷ་ཡི་ཞལ་ཟས་རོ་བརྒྱའི་ཡོན་ཏན་གྱིས། །ཏིང་འཛིན་སྒོ་བརྒྱ་འབྱེད་ནུས་ཟས་མཆོག་བཤོས། །སྟོང་གསུམ་ཡོངས་བཀང་བླ་མ་རྗེ་

― LT28_Page_0381 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དབུལ། །འགྲོ་ཀུན་སྦྱིན་པའི་དཔལ་ལ་ལོངས་སྤྱོད་ཤོག །བཛྲ་ནཻ་ཝི་དྱ༴། ཟིན་དང་མ་ཟིན་རྣམ་པར་གྲགས་པའི་སྒྲ། །གཏི་མུག་གཉིད་སློང་ལོག་ལྟའི་སྡེ་ཚོགས་སྐྲག །ཆོས་སྒྲས་འཇིག་རྟེན་ཁྱབ་བྱེད་རོལ་མོའི་ཚོགས། །ཕུལ་བས་འགྲོ་ཀུན་ཆོས་དབྱངས་ཐོབ་པར་ཤོག །བཛྲ་ཤབྡ༴ ནང་མཆོད་ནི། །འཇིག་རྟེན་གཟུགས་ཀྱི་སྣང་བ་ཇི་སྙེད་པ། །མཛེས་དང་མི་མཛེས་བརྟགས་པ་སེམས་ཀྱི་འཕྲུལ། །གང་སྣང་ངོ་བོས་སྟོང་པའི་མཆོད་འབུལ་བས། །འགོ་ཀུན་གཏི་མུག་རྣམ་སྣང་སྐུར་གྲོལ་ཤོག །བཛྲ་རཱུ་པ༴ །ཇི་ལྟར་གྲགས་པའི་སྒྲ་རུ་གང་བཟུང་བ། །སྙན་དང་མི་སྙན་འཛིན་པས་ཕྱེས་པ་ཙམ། །ཐམས་ཅད་གྲགས་སྟོང་རང་གྲོལ་མཆོད་པར་འབུལ། །འགྲོ་ཀུན་ཞེ་སྡང་མི་བསྐྱོད་སྐུར་གྲོལ་ཤོག །བཛྲ་ཤབྡ༴ །ཚོར་བ་བཟང་དང་ངན་པར་བཟུང་བའི་དྲི། །གང་ཡང་རྣམ་པར་རྟོག་པས་བཏགས་པ་ན། །བློ་ཡིས་མ་བསླད་ཚོར་སྟོང་མཆོད་པ་ཡིས། །འགྲོ་ཀུན་ང་རྒྱལ་རིན་འབྱུང་སྐུར་གྲོལ་ཤོག །བཛྲ་གནྡྷེ༴ །ཐོག་མེད་བག་ཆགས་མཐུ་བརྟས་ཞིམ་མངར་རོ། །གང་ལ་སྤོང་ལེན་འཁྲུལ་བའི་འཁོར་ལོ་ནི། །རྒྱུན་བཅད་མྱོང་སྟོང་རོ་མཉམ་མཆོད་ཕུལ་བས། །འགྲོ་ཀུན་འདོད་ཆགས་སྣང་མཐའི་སྐུར་གྲོལ་ཤོག །བཛྲ་རཱ་ས༴ །ཅིར་སྣང་སྒྱུ་མར་མ་ཤེས་ཨ་འཐས་ཀྱི། །རང་གཟུགས་རེག་བྱ་བཟང་ངན་དགག་སྒྲུབ་ཀུན། །ཆོས་ཉིད་ཀློང་དུ་ལ་ཟློའི་མཆོད་པ་ཡིས། །འགྲོ་ཀུན་ཕྲག་དོག་དོན་གྲུབ་སྐུར་གྲོལ་ཤོག །བཛྲ་སྤརེྴ༴ །

― LT28_Page_0382 ―

^{[མ་དཔེ་གཟིགས་ན་འདིར་གནོན།]}

[Full Size]

གསང་མཆོད་ནི། །གང་ཞིག་འཁོར་བའི་གཞི་རྩ་ཆགས་སྡང་གི། །རྒྱུ་རྐྱེན་འབྲས་བུས་ཉོན་མོངས་ཀུན་བསྐྱེད་པའི། །མཚན་ཉིད་ཇི་བཞིན་རིག་པ་ལྷན་སྐྱེས་ཀྱི། །དགའ་བ་བཅུ་དྲུག་མཆོད་པ་ཀུན་གྱི་རབ། །ཐབས་ཤེས་ཟུང་འཇུག་འགྱུར་བྲལ་བདེ་བའི་མཆོག །ཟག་མེད་ཏིང་འཛིན་དབང་སྒྱུར་བླ་མ་རྣམས། །བདེ་སྟོང་ཡེ་ཤེས་མཆོད་པའི་དགའ་སྟོན་ཆེར། །རོལ་ནས་སེམས་ཅན་སྡུག་བསྔལ་ཞི་བར་མཛོད། །གུ་ཧྱཛྙཱ་ན་ས་ཧ་ཛ་མ་ཧཱ་པཱུ་ཛ་ཧོཿདེ་ཁོ་ན་ཉིད་དོན་དམ་གྱི་མཆོད་པ་ནི། །ཆོས་རྣམས་ཀུན་གྱི་རང་བཞིན་མ་བཅོས་པ། །ཐོག་མཐའ་དབུས་མེད་འཁོར་དང་མྱང་འདས་ཞེས། །མཚན་མས་མ་བཅིངས་འཕོ་འགྱུར་བྲི་གང་བྲལ། །འདི་ནི་མཆོད་པའི་ནང་ནས་མཆོད་ཆེན་པོ། །མཆོད་ཡུལ་བླ་མ་གདོད་མའི་ཆོས་ཀྱི་སྐུ། །མཆོད་བྱེད་རང་གསལ་རང་རིག་རྣལ་འབྱོར་པ། །མཆོད་བྱའི་དངོས་ཀུན་རང་རྩལ་སྒྱུ་མའི་འཕྲུལ། །མཐའ་དག་གཟོད་ནས་ཡང་དག་མཆོད་པའོ། །སརྦ་དྷརྨཱཿམ་ཧཱ་ཤཱུ་ནྱ་དཱ་པཱུ་ཛ་ཧོཿ དེ་ནས་མཎྜལ་ཚོམ་བུ་སོ་བདུན་མ་བཀོད་ཅིང་ཕུལ་ལ། །ས་གཞི་སྤོས་བྱུགས། ཕྱོགས་བཅུ་དུས་གསུམ་སོགས་གྲངས་གསོག་ཅིང་། མཐར། མཉེས་བྱེད་མཎྜལ་སོགས་ཀྱིས་འདོད་དོན་གསོལ་ལོ། །གསུམ་པ་ཕྱག་མཆོད་མདོར་བསྡུས་དང་ཆབ་གཅིག་ཡན་ལག་ལྷག་མ་སྡོམ་བཟུང་དང་བཅས་པ་ནི། །བླ་མ་མཆོག་དང་ཕྱག་འོས་ཐམས་ཅད་ལ། །ཞིང་རྡུལ་གྲངས་དང་མཉམ་པའི་ལུས་བཏུད་ནས། །ཡོན་ཏན་བརྗོད་པའི་ངག་གིས་བསྟོད་བྱེད་ཅིང་། །ལྷག་བསམ་གུས་པའི་ཡིད་ཀྱིས་ཕྱག་འཚལ་ལོ། །

― LT28_Page_0383 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་གི་ལུས་དང་ལོངས་སྤྱོད་དགེ་བ་སོགས། །འཇིག་རྟེན་འཇིག་རྟེན་འདས་པའི་དཔལ་འབྱོར་ཀུན། །ཕྱི་ནང་མཆོད་སྤྲིན་རྒྱ་མཚོར་བློས་སྤྲུལ་ནས། །མཆོད་འོས་དཔལ་ལྡན་བླ་མའི་ཚོགས་ལ་འབུལ། །ཐོག་མེད་དུས་ནས་ཉོན་མོངས་དབང་གྱུར་པས། །སྒོ་གསུམ་སྒོ་ནས་རང་བཞིན་བཅས་པའི་སྡིག །བགྱིས་དང་བགྱིད་སྩལ་ཡིད་རང་བགྱིས་པ་ཀུན། །གནོང་འགྱོད་སྡོམ་པའི་སེམས་ཀྱིས་མཐོལ་ཞིང་བཤགས། །སྐྱེས་མཆོག་སྲས་དང་བཅས་པའི་རྣམ་ཐར་དང་། །གཞན་ཡང་འགྲོ་ཀུན་སྒོ་གསུམ་དགེ་བའི་ཚོགས། །བྱས་དང་བྱེད་འགྱུར་ད་ལྟ་མཛད་རྣམས་ལ། །རབ་ཏུ་དགའ་བའི་ཡིད་ཀྱིས་ཡི་རང་ངོ། །འགྲོ་ཀུན་ཕན་ཅིང་དགེ་བར་བགྱིད་པའི་སླད། །ཆོས་ཀྱི་རྒྱལ་པོ་སྲས་དང་བཅས་རྣམས་ཀྱིས། །གང་ལ་གང་འདུལ་ཟབ་དང་རྒྱ་ཆེ་བའི། །ཆོས་ཀྱི་འཁོར་ལོ་རྒྱུན་དུ་བསྐོར་དུ་གསོལ། །ཆོས་ཀྱི་སྐུ་ལ་སྐྱེ་འཇིག་མི་མངའ་ཡང་། །གཟུགས་སྐུ་ཞིང་གཞན་དོན་ལ་མི་གཤེགས་པར། །མགོན་མིད་སྙིག་མའི་འགྲོ་ལ་རྗེས་བརྩེ་བས། །མྱ་ངན་མི་འདའ་ཡུན་རིང་བཞུགས་པར་འཚལ། །འགྲོ་ཀུན་བླ་མེད་བྱང་ཆུབ་ཐོབ་དོན་ཏུ། །སྐྱབས་མཆོག་ཁྱེད་ལ་རྟག་པར་སྐྱབས་མཆི་ཞིང་། །ཐུན་མོང་ཁྱད་པར་དམ་ཚིག་སྡོམ་པ་རྣམས། །དེང་ནས་བླངས་ཏེ་ཚུལ་བཞིན་བསྒྲུབ་པར་བགྱིའོ། །བདག་གིས་དུས་གསུམ་བསགས་པའི་དགེ་བའི་མཐུས། །འགྲོ་ཀུན་སྲིད་པའི་འཆིང་བ་ལས་གྲོལ་ཏེ། །དཔལ་ལྡན་བླ་མ་མཆོག་གིས་རྗེས་བཟུང་ནས། །ཀུན་མཁྱེན་མཆོག་གི་

― LT28_Page_0384 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་གྲུབ་མྱུར་ཐོབ་ཤོག །སྤྲོས་པ་བསྡུ་བའི་སྐབས་གོང་གི་བཞུགས་གསོལ་འཕྲོས་འདི་ཙམ་སྦྱར་བས་འཐུས་སོ། །ལྔ་པ་བསྟོད་ཅིང་གསོལ་བ་གདབ་པ་ནི། །གང་གིས་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཉེས་པའི་སྐྱོན་ཀུན་རབ་སྤངས་ཤིང་། །ལེགས་པའི་ཡོན་ཏན་ཀུན་ལྡན་པས། །ཕན་བདེ་དཔལ་འབྱོར་ཀུན་འབྱུང་བའི། །དཔལ་ལྡན་བླ་མ་ཁྱེད་ལ་བསྟོད། །གདུལ་བྱ་སྨིན་ཅིང་གྲོལ་བའི་ཕྱིར། །དུས་གསུམ་སངས་རྒྱས་ཐམས་ཅད་ཉིད། །འདྲེན་པའི་ཚུལ་དུ་རྣམ་འཕྲུལ་པའི། །དཔལ་ལྡན་བླ་མ་ལ་ཕྱག་འཚལ། །ཁྱེད་སྐུ་ཤ་དང་རུས་བྲལ་ཡང་། །ཡེ་ཤེས་གཟུགས་སུ་སྣང་བའི་སྐུ། །དད་པའི་མིག་རྐྱེན་མཆོག་གྱུར་པ། །སྐུ་ཡི་དབང་ཕྱུག་ཁྱེད་ལ་འདུད། །བརྗོད་འདོད་རྩོལ་བ་མི་མངའ་ཡང་། །ཡན་ལག་དྲུག་ཅུའི་གསུང་དབྱངས་ཀྱིས། །ཟབ་ཅིང་རྒྱ་ཆེའི་དོན་སྟོན་པ། །གསུང་གི་དབང་ཕྱུག་ཁྱེད་ལ་འདུད། །ཤེས་དང་ཤེས་བྱའི་སྤྲོས་བྲལ་ཡང་། །ཤེས་བྱའི་དཀྱིལ་འཁོར་གསལ་བའི་ཐུགས། །སྙིང་རྗེ་གཟུངས་སྦོབས་དུ་མའི་གཏེར། །ཐུགས་ཀྱི་དབང་ཕྱུག་ཁྱེད་ལ་འདུད། །ཡོན་ཏན་ཆ་ཙམ་འགྲོ་ཀུན་གྱིས། །བསྐལ་པར་བརྗོད་ཀྱང་མི་ཟད་པའི། །སྤྱན་དང་མངོན་ཤེས་རྫུ་འཕྲུལ་སོགས། །ཡོན་ཏན་དབང་ཕྱུག་ཁྱེད་ལ་འདུད། །མཐོང་ཐོས་དྲན་པས་དོན་ལྡན་ན། །བསྟེན་ན་གྲོལ་བ་ཅི་སྨོས་པ། །ལྷུན་གྲུབ་རྒྱན་ཆད་མི་མངའ་བའི། །ཕྲིན་ལས་དབང་ཕྱུག་ཁྱེད་ལ་འདུད། །འཁོར་འདས་ཕུན་ཚོགས་ཇི་སྙེད་

― LT28_Page_0385 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན། །དམ་པའི་ཆོས་ལས་བྱུང་བ་སྟེ། །དེའང་ཁྱེད་ལས་བྱུང་གྱུར་པ། །ཕན་བདེའི་འབྱུང་གནས་ཁྱེད་ལ་བསྟོད། །ཇི་ལྟ་ཇི་སྙེད་ཀུན་མཁྱེན་གྱིས། །ཉོན་མོངས་ཤེས་བྱའི་སྒྲིབ་སྤངས་པས། །རྐང་གཉིས་རྣམས་ཀྱི་མཆོག་གྱུར་པ། །རྫོགས་པའི་སངས་རྒྱས་ཁྱེད་ལ་བསྟོད། །ཁྱེད་ཐུགས་རྟོགས་པའི་དམ་ཆོས་ཏེ། །གསུང་གི་རྒྱུ་མཐུན་ལུང་གི་ཆོས། །རྣམ་གྲོལ་འཇུག་དོགས་མཆོག་གྱུར་པ། །དམ་ཆོས་རིན་ཆེན་ཁྱེད་ལ་བསྟོད། །རང་བཞིན་འོད་གསལ་མངོན་གྱུར་ཅིང་། །གཉིས་འཛིན་རྟོག་པ་ལས་གྲོལ་བས། །བསོད་ནམས་ཞིང་རབ་མཆོག་གྱུར་པ། །ཚོགས་མཆོག་གཙོ་བོ་ཁྱེད་ལ་བསྟོད། །འདོད་པའི་འཆིང་བ་ཀུན་སྤངས་ནས། །དྲི་མེད་བསླབ་གསུམ་བརྟུལ་ཞུགས་ཅན། །སྡོམ་བརྩོན་ངུར་སྨྲིག་འཛིན་པའི་གཙོ། །ཤཱཀྱའི་སྲས་མཆོག་ཁྱེད་ལ་བསྟོད། །སྟོང་ཉིད་སྙིང་རྗེའི་སེམས་མཆོག་གིས། །གཅིག་ཏུ་གཞན་ཕན་བརྩོན་པ་ཅན། །རྒྱལ་སྲས་སེམས་དཔའ་རྣམས་ཀྱི་ཡབ། །བརྩེ་ལྡན་དཔའ་བོ་ཁྱོད་ལ་བསྟོད། །སྨིན་གྲོལ་ལམ་ལ་རབ་སྦྱངས་པས། །རིམ་གཉིས་རྣལ་འབྱོར་དབང་ཕྱུག་ཅན། །རིག་པ་འཛིན་པ་ཀུན་གྱི་རྗེ། །རྡོ་རྗེ་འཛིན་རྒྱལ་ཁྱོད་ལ་བསྟོད། །ཅེས་པ་ཙམ་མམ། སྤྲོ་ན། །ཆོས་ཉིད་གདོད་མའི་གནས་ལུགས་དེ་བཞིན་ཉིད། །ཆོས་ཅན་ཀུན་ཁྱབ་སྤྲོས་བྲལ་ནམ་མཁའི་དང་། །ཐབས་ཤེས་ཟུང་འཇུག་ཁ་སྦྱོར་བདེ་བ་ཆེ། །དཔལ་ལྡན་རྡོ་རྗེ་འཆང་ལ་གསོལ་བ་འདེབས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །

― LT28_Page_0386 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེ་འཆི་གཉིས་སྤངས་འགྱུར་མེད་རྡོ་རྗེའི་སྐུ། །གདུལ་དཀའ་འདུལ་མཛད་འགྲོ་བའི་སྐྱབས་གཅིག་པུ། །པདྨ་ཐོད་ཕྲེང་རྩལ་ལ་གསོལ་བ་འདེབས། །མཚན་ཙམ་དྲན་པས་འཇིགས་པ་ཀུན་ལས་སྐྱོབ། །གསོལ་བ་བཏབ་ན་དགོས་འདོད་ཐམས་ཅད་སྩོལ། །ཕྱོགས་དུས་རྒྱལ་བ་སྲས་བཅས་སྐྱེད་པའི་ཡུམ། །འཕགས་མ་ཡིད་བཞིན་འཁོར་ལོར༴། ཚད་མེད་སྙིང་རྗེའི་གཏེར་ཆེན་སྤྱན་རས་གཟིགས། །གངས་ཅན་མགོན་ཏུ་སྤྲུལ་པའི་སྐུ་རུ་བཞེངས། །རིགས་ཀུན་ཁྱབ་བདག་རྒྱལ་དབང་ཀརྨ་པ། །ཐེག་མཆོག་རྡོ་རྗེའི་ཞབས་ལ༴ །སྐལ་བཟང་རྣམ་འདྲེན་ལྔ་པ་བྱམས་ཆེན་མགོན། །སྒྲུབ་བརྒྱུད་མངའ་བདག་དགྱེས་མཛད་མར་པ་རྗེ། །རྒྱལ་བའི་ཕྲིན་ལས་དབང་ཕྱུག་སྐུར་སྣང་བ། །པདྨ་ཀུན་ཏུ་བཟང་པོར༴ །མཁས་མཆོག་ནཱ་རོ་ཏཱ་པའི་སྒྱུ་འཕྲུལ་གར། །རྣམ་ཐར་ཕྲིན་ལས་བསམ་མི་ཁྱབ་པར་སྟོན། །འགྲོ་བའི་མགོན་པོ་ཆོས་རྗེ་འབྲུག་པའི་ཞབས། །མི་འགྱུར་དབང་གི་རྒྱལ་པོར༴ །འཕགས་ཡུལ་པ་ཆེན་ཤེས་རབ་འབྱུང་གནས་དང་། །པདྨའི་རྒྱལ་ཚབ་རིན་ཆེན་གླིང་བ་སོགས། །ཡེ་ཤེས་གཅིག་བསྡུས་དཔལ་ལྡན་དཔའ་བོ་མཆོག །གཙུག་ལག་ཆོས་རྒྱལ་ཞབས་ལ༴ །པདྨའི་སྤྱན་སྔར་ལྕོག་རོ་ཀླུའི་རྒྱལ་མཚན། །ད་ལྟ་བདེ་ཆེན་ཞིང་ན་སེམས་དཔའི་ཚུལ། །འགྲོ་མགོན་ཀརྨ་ཆགས་མེད་སྤྲུལ་པའི་སྐུ། །ཚེ་དབང་རབ་བརྟན་ཞབས་ལ༴ །ལྷ་སྲས་དམ་འཛིན་ཆོས་ཀྱི་བློ་གྲོས་ཉིད། །སྨོན་ལམ་ཐུགས་བསྐྱེད་དུས་སུ་སོན་པ་ལས། །སྙིགས་མའི་འགྲོ་

― LT28_Page_0387 ―

^{[མ་དཔེ་གཟིགས་ན་འདིར་གནོན།]}

[Full Size]

འདུལ་གཏེར་ཆེན་ཆོས་ཀྱི་རྒྱལ། །མཆོག་གྱུར་བདེ་ཆེན་གླིང་པར༴ །འཇམ་དབྱངས་ཁྲི་ལྡེ་དགེ་བའི་བཤེས་ཀྱི་ཚུལ། །ཐུབ་བསྟན་ཡོངས་སུ་རྫོགས་པའི་བདག་ཉིད་ཅན། །མཁས་ཤིང་གྲུབ་པ་ཡོངས་ཀྱི་འཁོར་ལོས་སྒྱུར། །མཁྱེན་བརྩེའི་དབང་པོའི་ཞབས་ལ༴ །ཨོ་རྒྱན་སྤྱན་སྔར་དྲི་མེད་ཟླ་ཤར་རྩལ། །གྲུབ་པའི་དབང་ཕྱུག་སངས་རྒྱས་ཡེལ་པ་རྗེ། །བསྟན་པའི་དཔལ་དུ་བསམ་བཞིན་སྐུར་སྤྲུལ་པ། །མཁན་ཆེན་ཟླ་བ་བཟང་པོར༴ །རྣམ་སྣང་བཻ་རོ་ཙ་ནས་བྱིན་རླབས་པར། །དུས་གསུམ་ཀུན་མཁྱེན་པདྨས་ལུང་བསྟན་ཅིང་། །པདྨའི་རྒྱལ་ཚབ་རྣམས་ཀྱིས་རྗེས་བཟུང་བ། །པདྨ་གར་གྱི་དབང་ལ༴ །མི་འགྱུར་རྡོ་རྗེ་དྲག་པོ་ནུས་ལྡན་རྩལ། །འགྲོ་འདུལ་སྐྱེས་རབས་བཞི་པར་རྣམ་རོལ་བ། །ངོ་མཚར་སྤྲུལ་པའི་སྐུ་མཆོག་གདུལ་བྱའི་མགོན། །གསང་སྔགས་བསྟན་འཛིན་ཞབས་ལ༴ །གྲུབ་ཆེན་གསལ་སྟོང་ཤོ་སྒོམ་ཡེ་ཤེས་འཕྲུལ། །ཡང་སྲིད་ཀུན་ཏུ་མཁྱེན་བརྩེ་ནུས་གསུམ་གྱིས། །དོན་བརྒྱུད་བསྟན་པ་སྤེལ་མཛད་ཁྲ་ལེབ་པ། །ཡེ་ཤེས་ཉི་མའི་ཞབས་ལ༴། སྤྲུལ་པའི་གཏེར་ཆེན་ཀློང་གསལ་སྙིང་པོའི་ཞབས། །སྒྲུབ་བརྒྱུད་བསྟན་པའི་ཕྲིན་ལས་བསམ་བཞིན་ཏུ། །སྐྱེ་བཞེས་མཛད་པ་རྨད་བྱུང་རྒྱལ་བའི་སྲས། །བསྟན་འཛིན་ཕྲིན་ལས་ཞབས་ལ༴ །གཡུ་ཐོག་མགོན་པོ་ཐང་རྒྱལ་ལ་སོགས་པའི། །རྣམ་འཕྲུལ་ཡོངས་གྲགས་རྗེ་དབོན་འཚོ་བྱེད་མཆོག། སྐྱེ་མེད་སྐྱེ་བའི་གར་སྟོན་རྣམ་པར་འདྲེན། །བསྟན་འཛིན་རབ་རྒྱས་ཞབས་

― LT28_Page_0388 ―

^{[མ་དཔེ་གཟིགས་ན་འདིར་གནོན།]}

[Full Size]

ལ༴ །རྣམ་དག་ཁྲིམས་ཀྱི་ས་གཙང་དགེ་བ་ལ། །སེམས་དང་ཏིང་འཛིན་ནོར་བུའི་ལྗོན་བཟང་རྒྱས། །གདུལ་བྱ་ཐར་བའི་དབུལ་བ་སེལ་མཛད་པ། །དར་རྒྱས་རྒྱ་མཚོའི་ཞབས་ལ༴ །འདིར་སྣང་འབྱོར་པ་རྨི་ལམ་ལྟར་གཟིགས་ནས། །ཞེན་ལོག་ངེས་འབྱུང་བཅོས་མིན་མོས་གུས་ཀྱིས། །ཚེ་གཅིག་བྱང་ཆུབ་སྒྲུབ་པའི་གཡུ་བྲག་པ། །ངག་དབང་ཡེ་ཤེས་ཞབས་ལ༴ །བླ་མ་མཉེས་པའི་བྱ་བ་མཐར་ཕྱིན་པས། །ཐུགས་རྗེའི་བྱིན་ཞུགས་ལྷག་ལྷས་རྫས་སུ་བཟུང་། །ཚུལ་ཁྲིམས་ལ་སོགས་བསླབ་གསུམ་རྒྱ་མཚོ་ཆེ། །སུམ་ལྡན་རྡོ་རྗེ་འཛིན་པར༴ །དཀར་པོ་གཅིག་ཐུབ་མོས་གུས་དཀྱིལ་འཁོར་རྒྱས། །སྙིང་རྗེ་བྱང་ཆུབ་སེམས་ཀྱི་འོད་ཟེར་འཕྲོ། །དད་ལྡན་སྙིང་གི་མུན་པ་སེལ་མཛད་པ། །དྲིན་ཅན་བླ་མ་རྗེ་ལ༴ །ངོ་བོ་དགྱེས་མཛད་ཧེ་རུ་ཀ་དཔལ་ཉིད། །རྣམ་པ་བདུད་དགྲ་འདུལ་མཛད་ནག་པོ་ཆེ། །སངས་རྒྱས་ཀུན་གྱི་ཕྲིན་ལས་སྒྲུབ་མཛད་པ། །ཡེ་ཤེས་ཆོས་སྐྱོང་མཆོག་ལ༴ །དུས་གསུམ་སངས་རྒྱས་མ་ལུས་འདུས་པའི་དངོས། །རྡོ་རྗེ་འཆང་དབང་བཤེས་གཉེན་སྐུར་སྟོན་པ། །དཔལ་ལྡན་བླ་མ་རྣམས་ལ་གསོལ་བ་འདེབས། །བྱིན་རླབས་སྤྲིན་བཞིན་གཏིབས་པར་མཛད་དུ་གསོལ། །སྣ་ཚོགས་སྒྱུ་འཕྲུལ་དྲྭ་བའི་རོལ་པ་ཡིས། །རིགས་ལྔའི་གདུལ་བྱ་འདུལ་བའི་དཀྱིལ་འཁོར་པ། །ཡི་དམ་ལྷ་ཚོགས་རྣམས་ལ༴ །དངོས་གྲུབ་ཆར་ལྟར་འབེབས་པར་མཛད་དུ་གསོལ། །ཆོས་དབྱིངས་མཁའ་ལ་ཐུགས་རྗེའི་ཤུགས་ཀྱིས་འགྲོ། །རྫུ་འཕྲུལ་སྟོབས་

― LT28_Page_0389 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་སངས་རྒྱས་བསྟན་པ་སྲུང་། །མཁའ་འགྲོ་དམ་ཅན་རྣམས་ལ༴ །ཕྲིན་ལས་ཐོགས་མེད་སྒྲུབ་པར་མཛད་དུ་གསོལ། །བརྩེ་ཆེན་སྐྱབས་ཀྱི་མཆོག་གྱུར་ཁྱེད་རྣམས་ལ། །རྩེ་གཅིག་མོས་པས་གསོལ་བ་བཏབ་པའི་མཐུས། །མྱུར་བ་ཉིད་དུ་དོན་གཉིས་མཐར་ཕྱིན་ནས། །འགྲོ་མགོན་ཁྱེད་དང་མཉམ་པར་བྱིན་གྱིས་རློབས། །དྲུག་པ་ཐུགས་རྒྱུད་བསྐུལ་བ་ནི། །སྤྱིར་མནམ་བཞི་སྐོར་གྲངས་ཅི་ནུས་དང་། །བྱེ་བྲག་ཏུ། ཀརྨ་པ་མཁྱེན་ནོ། །ཞེས་པ་དང་། ཨོཾ་ཨཱཿགུ་རུ་རཏྣ་སརྦ་སིངྡྷི་ཧཱུྃ། ཞེས་མོས་གུས་གདུང་ཤུགས་དྲག་པོ་དང་ལྡན་པས། །རྩ་བ་གསུམ་གྱི་སྐུ་གསུང་ཐུགས་དང་རང་སེམས་གཤིས་སྐྱེ་མེད། གདངས་འགག་མེད། རྩལ་སྣ་ཚོགས་སུ་འཆར་བ་རྣམས་དབྱེར་མེད་རོ་མཉམ་དུ་གདོད་ནས་དག་པར་ཤེས་པའི་རང་བྱུང་རང་བབ་གཤིས་ལུགས་ཀྱི་ངོ་བོ་བསྐྱང་བཞིན་པས་བཟླས་པའི་མཐར། ཐལ་སྦྱར་མོས་གུས་དྲག་པོས། །ཕྱོགས་དུས་རྒྱལ་བ་ཐུགས་རྗེའི་མངའ་བདག་ཀུན། །ཡོངས་བཟླུམ་བདག་སོགས་སྙིགས་དུས་གདུལ་བྱའི་ཚོགས། །འདུལ་མཛད་རྗེ་བཙུན་བླ་མ་ཚར་དངར་རྣམས། །མཁྱེན་བརྩེ་ཡེ་ཤེས་གཟིགས་པ་སྒྲིབ་མེད་ལ། །བདག་སོགས་རྨོངས་པས་སྙན་བསྐུལ་མི་འཚལ་ཡང་། །ལྔ་བརྒྱ་ཐ་མའི་དུས་ཀྱི་ངང་ཚུལ་དང་། །རིན་ཆེན་བསྟན་པ་གཟུགས་བརྙན་ལ་སྤྱོད་པའི། །རྣམ་འགྱུར་མི་བཟད་ངན་པའི་སྣང་ཚུལ་འདི། །མཁྱེན་པའི་སྤྱན་ལྡན་རྣམས་ཀྱིས་གཟིགས་བཞིན་དུ། །ཐུགས་རྗེའི་ནུས་སྟོབས་བཏང་སྙོམས་མི་འཇོག་ཅིང་། །རྨུ་རྒོད་གདུལ་བྱ་ཡལ་བར་

― LT28_Page_0390 ―

^{[མ་དཔེ་གཟིགས་ན་འདིར་གནོན།]}

[Full Size]

མ་དོར་བར། །གདུལ་དཀའ་འདུལ་བའི་ཕྲིན་ལས་དུས་ལ་བབས། །སྣོད་བཅུད་འབྱུང་འཁྲུགས་འཕོ་འགྱུར་རྦ་ཀློང་གིས། །སྐྱེ་འགྲོ་བཟོད་དཀའི་སྡུག་བསྔལ་དུ་མས་གཟིར། །ནད་མུག་འཁྲུགས་རྩོད་འབྱུང་པོའི་འཚེ་བ་སོགས། །མ་ལུས་མྱུར་དུ་ཞི་བར་བྱིན་གྱིས་རློབས། །བསྟན་ལ་ཞུགས་རྣམས་ཆགས་སྡང་ཀུན་སློང་གིས། །རྒྱུད་དཀྲུགས་སྡོམ་གསུམ་རིང་དོར་བག་མེད་ཀྱི། །སྦྱོར་བས་དུས་འདའ་ཐོས་བསམ་སྒོམ་མི་བརྩོན། །མཐའ་དག་ཆོས་བཞིན་སྤྱོད་བར་བྱིན་གྱིས་རློབས། །རྒྱུ་འབྲས་དམ་སྡོམ་རིམ་གཉིས་རྒྱང་བསྲིང་ཞིང་། ཁ་ན་མ་ཐོའི་ཟས་དང་སྤྱོད་པས་གཡེང་། །དུག་གསུམ་མི་འབར་རང་གཞན་རྒྱུད་བསྲེགས་པའི། །ཆོས་གཟུགས་ཆོས་ལ་འགྱུར་བར་བྱིན་གྱིས་རློབས། །སྒྲུབ་བརྒྱུད་རྣལ་འབྱོར་སྤྱོད་པའི་གང་ཟག་རྣམས། །ཟག་བཅས་ལམ་དང་སྟོང་ལྟས་མི་བསླུ་བར། །བདེ་སྟོང་ཟུང་འཇུག་ཡེ་ཤེས་ཕྱག་རྒྱ་ཆེ། །མ་ནོར་མངོན་ཏུ་འགྱུར་བར་བྱིན་གྱིས་རློབས། །ཡོན་ཏན་ལྟར་སྣང་ལམ་རྟགས་ཕྲ་མོ་ལ། །ཞེ་འདོད་ངར་འཛིན་ཁོང་སྐྲན་མི་ཞུགས་པར། །ས་ལམ་རྣལ་འབྱོར་བཞི་འབྲས་མཐར་ཕྱིན་ཏེ། །སྐུ་བཞི་དབྱེར་མེད་འགྲུབ་པར་བྱིན་གྱིས་རློབས། །ཚེ་འདིའི་འདོད་དོན་དངོས་གྲུབ་ཕྲ་མོ་དང་། །ཆོས་བརྒྱད་ཁོང་དུ་བཅངས་པའི་འགྲོ་དོན་སོགས། །དོན་གཉིས་འདྲ་མིན་བདུད་ཀྱིས་མི་བསླུ་བར། །མཆོག་དངོས་ཡང་དག་འགྲུབ་པར་བྱིན་གྱིས་རློབས། །ཞེས་འདོད་དོན་གྱི་གསོལ་བ་གདབ་ཅིང་ཐུགས་དམ་ཕྲིན་ལས་བསྐུལ་ལོ། །བདུན་པ་ཚོགས་ཀྱི་

― LT28_Page_0391 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོད་པ་འབུལ་བར་སྤྲོ་ན། །ཐབས་ཤེས་ཀྱི་རྫས་གཙོ་བོར་གྱུར་པའི་བཟའ་བཏུང་གང་འབྱོར་བཤམ། །ཨོཾ་ཨཱཿཧཱུྃ་ཧ་ཧོཿཧྲཱིཿས་བྱིན་གྱིས་བརླབས་པའི་ཐོད་པའི་བདུད་རྩི་བྲན་ལ། ཨོཾ་བཛྲ་ཨ་མྲི་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། བདག་ཉིད་ཐུགས་ཀའི་ཧཱུྃ་ལས་རཾ་ཡཾ་ཁཾ། །འཕྲོས་པ་ལས་བྱུང་ཡེ་ཤེས་མེ་རླུང་ཆུས། །ཚོགས་ཀྱི་འབག་བཙོག་དྲི་མ་བསྲེགས་གཏོར་བཀྲུས། །ཨོཾ་ཨཱཿཧཱུྃ་འཕྲོས་སྦྱང་རྟོགས་སྦར་བ་ཡིས། །ཚོགས་རྫས་ངོ་བོ་ཡེ་ཤེས་བདུད་རྩི་ལ། །རྣམ་པ་གཟུགས་སྒྲ་དྲི་རོ་རེག་བྱ་ཆོས། །ཟག་མེད་འདོད་པའི་ཡོན་ཏན་བསམ་ཡས་ཀྱིས། །སྐྱབས་མཆོག་བླ་མའི་ཚོགས་རྣམས་མཉེས་བྱེད་གྱུར། ཨོཾ་ཨཱཿཧཱུྃ། ལན་གསུམ། བྱིན་རླབས་འབེབས་པ་ནི། །གནས་འོག་མིན་ཆོས་དབྱིངས་ཞིང་ཁམས་ནས། །དཔལ་རྡོ་རྗེ་འཆང་ཆེན་གཤེགས་སུ་གསོལ། །གནས་པདྨ་འོད་ཀྱི་ཕོ་བྲང་ནས། །རྗེ་པདྨ་ཐོད་ཕྲེང་གཤེགས་སུ་གསོལ། །གནས་གྲུ་འཛིན་འཆི་མེད་དགའ་ཚལ་ནས། །ཡུམ་ཡིད་བཞིན་འཁོར་ལོ་གཤེགས་སུ་གསོལ། །གནས་གང་འདུལ། ཐུགས་རྗེའི་གཞལ་ཡས་ནས། །དཔལ་རྒྱལ་བའི་དབང་ཕྱུག་ཀརྨ་པ། །རྗེ་ཏཱ་ཡི་སི་ཏུ་འབྲུག་པ་རྗེ། །མཆོག་དཔའ་བོའི་དབང་ཕྱུག་ལ་སོགས་པ། །སྐྱབས་བཀའ་བརྒྱུད་བླ་མ་ཡབ་དང་སྲས། །འཕྲུལ་སྒྱུ་མའི་གར་སྟོན་གཙོ་དང་འཁོར། །ཆོས་སྐྱོང་བའི་དམ་ཅན་རྒྱ་མཚོར་བཅས། །སྐུ་བྱིན་རླབས་གཟི་བརྗིད་ལམས་སེ་ལམ། །གསུང་རྡོ་རྗེའི་ཆོས་དབྱངས་ལྷངས་སེ་ལྷང་། །ཐུགས་བདེ་སྟོང་འོད་གསལ་ཡ་ལ་ལ། །འཁོར་དཔའ་བོ་མཁའ་འགྲོ་

― LT28_Page_0392 ―

^{[མ་དཔེ་གཟིགས་ན་འདིར་གནོན།]}

[Full Size]

ཐིབས་སེ་ཐིབ། །རྒྱན་རིན་ཆེན་རུས་པ་ཁྲ་ལ་ལ། །སྒྲ་དྲིལ་བུ་གཡེར་ཁ་སི་ལི་ལི། །མཆོག་བྱིན་རླབས་སྤྲིན་ཕུང་ཐིབས་སེ་ཐིབ། །ཉམས་རྟོགས་པའི་ཆར་ཆེན་ཤ་ར་ར། །གནས་འདིར་གཤེགས་ཚོགས་ཀྱི་མཆོད་པ་བཞེས། །བདག་རྗེས་འཇུག་བུ་ལ་བརྩེ་བས་དགོངས། །དོན་རྡོ་རྗེའི་ཡེ་ཤེས་འབེབས་པ་ཡི། །མཐུ་བྱིན་རླབས་ནུས་པ་ད་ལྟ་སྩོལ། །གུ་རུ་དེ་བ་ཌཱ་ཀི་ནཱི་ས་མ་ཡ་ཨཱ་བེ་ཤ་ཡ་ཧྲི༚་ཧྲི༚་ཛ༔ཛཿ དེ་ནས་ཚོགས་ཀྱི་ཡོ་བྱད་ཚན་གསུམ་དུ་བཅད་པའི་དང་པོ་བླ་མའི་དཀྱིལ་འཁོར་ལ་འབུལ་ཏེ། ཧོ་རྗེ་བཙུན་བླ་མ་མཆོག་དང་སྤྲུལ་པའི་ལྷ། །ཡི་དམ་མཁའ་འགྲོ་ཆོས་སྲུང་བཅས་རྣམས་ལ། །འདོད་ཡོན་རྨད་བྱུང་ཚོགས་ཀྱི་མཆོད་པ་འབུལ། །ཟག་མེད་དགྱེས་པ་ཆེན་པོར་རོལ་པར་མཛོད། །རྩ་བརྒྱུད་བླ་མའི་ཐུགས་དམ་བསྐངས་ནས་ཀྱང་། །ཚེ་གཅིག་སངས་རྒྱས་དངོས་གྲུབ་སྩལ་དུ་གསོལ། །ཡི་དམ་ལྷ་ཚོགས་ཐུགས་དམ་བསྐངས་ནས་ཀྱང་། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །དཔའ་བོ་མཁའ་འགྲོའི་ཐུགས་དམ་བསྐངས་ནས་ཀྱང་། །རྣམ་བཞིའི་ཕྲིན་ལས་ཐོགས་མེད་སྒྲུབ་མཛད་གསོལ། །ཆོས་སྐྱོང་སྲུང་མའི་།ཐུགས་དམ་བསྐངས་ནས་ཀྱང་། །བསྟན་ལ་གནོད་པའི་དགྲ་བགེགས་སྒྲོལ་མཛད་གསོལ། །ག་་ཙཀྲ་པཱུ་ཛ་ཁཱ་ཧི། བར་པ་རྣལ་འབྱོར་པ་རྣམས་ནང་གི་ཚོགས་འཁོར་གྱིས་ལོངས་སྤྱད། གྲུབ་ཐོབ་གོང་མ་རྣམས་ཀྱི་གསུང་མགུར་སོགས་རྡོ་རྗེའི་གླུ་བླངས་ཤིང་ཉམས་བསྐྱང་། །ཐ་མ་བདུད་རྩིས་བྲན་ལ་འབྲུ་གསུམ་དང་། ཨ་ཀཱ་རོའི་སྔགས་ཀྱིས་བྱིན་བརླབས་ལ། ཧཱུྃ། །སྔོན་གྱི་རྒྱལ་བ་རིག་འཛིན་གྲུབ་མཆོག་གི། །སྤྱན་སྔར་ཁས་

― LT28_Page_0393 ―

^{[མ་དཔེ་གཟིགས་ན་འདིར་གནོན།]}

[Full Size]

བླངས་དམ་ཚིག་གཉེར་བཞེས་པའི། །གནས་ཡུལ་དུར་ཁྲོད་རྒྱུ་བའི་ཌཱ་ཀི་མ། །ཡེ་ཤེས་ལས་དང་འཇིག་རྟེན་སྣ་ཚོགས་ཀྱི། །མཁའ་འགྲོ་ཤུགས་འགྲོ་བྲན་དང་ཡང་གཡོག་བཅས། །གཞན་ཡང་འཇིག་རྟེན་ཁམས་སྐྱོང་མཐུ་བོ་ཆེ། །བསྟན་པ་སྲུང་ཞིང་རྣལ་འབྱོར་སྐྱོང་བའི་ཚོགས། །མ་ལུས་རྡོ་རྗེའི་ཕམ་ཕབ་ཚོགས་ཀྱི་ལྷག །དམ་ཚིག་བདུད་རྩི་འདོད་ཡོན་ཕུན་ཚོགས་འདི། །བཞེས་ནས་སངས་རྒྱས་བསྟན་པ་དྲི་མེད་སྐྱོངས། །ཆོས་བཞིན་སྤྱོད་པའི་གང་ཟག་མཐུན་རྐྱེན་སྒྲུབས། །རྒྱལ་ཁམས་བདེ་ཞིང་སྦྱིན་བདག་བར་ཆད་ཞི། །བསྟན་ལ་གནོད་པའི་བདུད་སྡེ་ཐལ་བར་རློག །རྣལ་འབྱོར་བདག་གིས་ཇི་ལྟར་བཅོལ་བ་ཡི། །ཕྲིན་ལས་མ་གཡེལ་མྱུར་དུ་གྲུབ་མཛོད་ལ། །སྒྲུབ་བརྒྱུད་བསྟན་པ་སྲུང་ཞིང་སྐྱོང་མཛོད་ཅིག །བཛྲ་ཨཱ་ར་ལི་ཌཱ་ཀི་ནཱི་སརྦ་ས་མ་ཡ་ཨུ་ཙིཥྚ་བ་ལི༚་ཏ་ཁཱ་ཧི། །ཞེས་བརྗོད་ལ་གཙང་སར་འབུལ་ཞིང་བཤལ་ཆུ་བསྔོའོ། །བརྒྱད་པ་དབང་བཞི་ལེན་ཅིང་ནོངས་པ་བཤགས་པ་ནི། །དཔལ་ལྡན་བླ་མ་དམ་པ་ཁྱེད་རྣམས་ཀྱིས། །བདག་ལ་སྨིན་བྱེད་དབང་བཞི་སྐུར་དུ་གསོལ། །རྒྱུད་བཞི་མྱུར་དུ་སྨིན་པར་བྱིན་གྱིས་རློབས། །ཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། །ཞེས་པའི་གསོལ་བ་བཏབ་པའི་མོད་ཉིད་ལ། །འཁོར་རྣམས་འོད་ཞུ་གཙོ་བོའི་སྐུ་ལ་ཐིམ། །གཙོ་བོ་དཀོན་མཆོག་ཀུན་འདུས་བདག་ཉིད་ལ། །རྣམ་པ་བླ་མ་དངོས་སུ་གསལ་གྱུར་པའི། །མཛོད་སྤུའི་གནས་ནས་འོད་ཟེར་དཀར་པོ་འཕྲོས། །རང་གི་དཔྲལ་བར་ཐིམ་པས་ལུས་སྒྲིབ་དག །བུམ་པའི་དབང་ཐོབ་

― LT28_Page_0394 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐྱེད་རིམ་བསྒོམ་ལ་དབང་། །འབྲས་བུ་སྤྲུལ་སྐུ་འགྲུབ་པའི་སྐལ་ལྡན་གྱུར། །མགྲིན་པའི་གནས་ནས་འོད་ཟེར་དམར་པོ་འཕྲོས། །རང་གི་མགྲིན་པར་ཐིམ་པས་ངག་སྒྲིབ་དག །གསང་བའི་དབང་ཐོབ་རྩ་རླུང་བསྒོམ་ལ་དབང་། །ལོངས་སྤྱོད་རྫོགས་སྐུ་འགྲུབ་པའི་སྐལ་ལྡན་གྱུར། །ཐུགས་ཀའི་གནས་ནས་འོད་ཟེར་སྔོན་པོ་འཕྲོས། །རང་གི་སྙིང་གར་ཐིམ་པས་ཡིད་སྒྲིབ་དག །ཤེར་དབང་ཐོབ་ཅིང་སྙོམས་འཇུག་བསྒོམ་ལ་དབང་། །འབྲས་བུ་ཆོས་སྐུ་འགྲུབ་པའི་སྐལ་ལྡན་གྱུར། །གནས་གསུམ་འོད་ཟེར་དཀར་དམར་མཐིང་གསུམ་འཕྲོས། །གནས་གསུམ་ལ་ཐིམ་སྒོ་གསུམ་དྲི་མ་དག །བཞི་པའི་དབང་ཐོབ་ཕྱག་ཆེན་བསྒོམ་ལ་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །ཅེས་བརྗོད་ཅིང་དོན་བསྒོམ། བདག་ཅག་མ་རིག་འཁྲུལ་པའི་བག་ཆགས་མཐུས། །བླ་མ་མཆོད་པའི་ལས་ལ་འགལ་འཁྲུལ་དང་། །སྒོ་གསུམ་ཉེས་དང་ཡོ་བྱད་མ་དག་སོགས། །ཅི་མཆིས་ཆོས་དབྱིངས་ཀློང་ད་བཟོད་པར་གསོལ། །ཞེས་དང་ཡི་གེ་བརྒྱ་བ་བརྗོད་ལ་ནོངས་པ་བཤགས། །དགུ་པ་ཚོགས་རྟེན་ཞུ་ཞིང་བསྟིམ་པ་ནི། །དཔལ་ལྡན་བླ་མའི་དཀྱིལ་འཁོར་རྣམས། །མོས་གུས་ཤུགས་ཀྱིས་འོད་དུ་ཞུ། །ཐམས་ཅད་གཙོ་བོ་ཉིད་ལ་ཐིམ། །དེ་ཉིད་སྐར་མདའ་རྒྱུག་པ་བཞིན། །ཚུར་བྱོན་བདག་གི་སྤྱི་བོར་ཐིམ། །དེ་ནས་རང་ཉིད་རྡོར་སེམས་ཀྱང་། །མཐའ་ནས་རིམ་འདུས་ཧཱུྃ་ལ་བསྡུ། །ཧཱུྃ་ཡང་གྱེན་རྫོགས་ཐིག་ལེ་དང་། །དེ་ཡང་མཁའ་ལ་སྤྲིན་ཡལ་ལྟར། །བསམ་བརྗོད་

― LT28_Page_0395 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྲོས་དང་བྲལ་བར་ཐིམ། །དེ་ཡི་ངང་ནས་དུས་གསུམ་གྱི། །རྟོག་ཚོགས་སྤྲིན་བྲལ་མཁའ་བཞིན་བཞག །བླ་མ་ཆོས་སྐུའི་རང་ཞལ་མཇལ། །སླར་ཡང་རྗེས་ཐོབ་རིག་གདངས་ལས། །སྒོ་གསུམ་ལྷ་དང་བླ་མ་ནི། །དབྱེར་མེད་རང་རིག་ཡེངས་མེད་བསྐྱང་། ཨ་འཐས་འཁྲུལ་ཕྱིར་མི་འབྲང་ཞིང་། །ཆོས་བརྒྱད་ཞེན་འཁྲིས་རྦད་ཀྱི་བཅད། །ཚེ་འདིའི་བྱ་བ་ལིངས་ཀྱི་བཏང་། །སྐྱིད་སྡུག་གང་བྱུང་ཐུགས་རྗེར་བསམ། །མོས་གུས་རྒྱུན་ཆད་མེད་པར་ནི། །བླ་མ་སྒྲུབ་པའི་དམ་ཚིག་གོ། །བཅུ་པ་རྗེས་ཀྱི་བྱ་བ་ལ། བསྔོ་སྨོན་ནི། །བདག་གི་དགེ་བ་ཀུན་ལས་མཆོག་རབ་ཕུལ། །དཔལ་ལྡན་བླ་མའི་གསང་གསུམ་དཀྱིལ་འཁོར་ཆེ། །བསྒྲུབས་ཤིང་མཆོད་པའི་དགེ་འབྲས་བླ་ན་མེད། །འདི་དང་འཁོར་འདས་ལམ་གསུམ་རྣམ་དཀར་ཀུན། །གཅིག་བསྡོམས་ཆོས་མིན་བསམ་པས་མ་བསླད་པར། །མཁའ་ཁྱབ་འགྲོ་ཀུན་རྫོགས་བྱང་ཐོབ་ཕྱིར་བསྔོ། །ལྷག་བསམ་མཐུ་དང་བླ་མའི་བྱིན་རླབས་ཀྱིས། །ནམ་མཁས་གར་ཁྱབ་དྲིན་ཆེན་ཕ་མའི་ཚོགས། །ལས་ཉོན་འཁྲུལ་འཁོར་སྡུག་བསྔལ་ཤུགས་དྲག་གི། རྒྱུ་རྐྱེན་འབྲས་བུར་བཅས་པ་རྒྱུན་ཆད་ནས། །སྐུ་བཞི་ཡེ་ཤེས་རྡོ་རྗེ་བླ་མ་ཡི། །གོ་འཕང་མྱུར་ཐོབ་སྲིད་ཞི་གཏན་སྒྲོལ་ཤོག །ཅེས་དང་། །སྤྲོ་ན། །བདག་དགེ་མ་སོགས་བྱའོ། །ཤིས་བརྗོད་ནི། །ཆོས་དབྱིངས་མི་འགྱུར་རྡོ་རྗེའི་དཀྱིལ་འཁོར་གྱི། །ཁྱབ་བདག་རིགས་མཆོག་རྡོ་རྗེ་འཆང་དབང་གི། ཐུགས་རྗེ་ཡེ་ཤེས་རྡོ་རྗེ་ཀུན་ཁྱབ་ཀྱི། །བཀྲ་ཤིས་དེས་ཀྱང་

― LT28_Page_0396 ―

^{[མ་དཔེ་གཟིགས་ན་འདིར་གནོན།]}

[Full Size]

དེང་འདིར་བདེ་ལེགས་ཤོག །དུས་གསུམ་སངས་རྒྱས་ཀུན་གྱི་གསང་བ་འཛིན། །འཁོར་བ་མ་སྟོངས་བར་དུ་གཞན་དོན་མཛད། །སྐྱ་འཆི་གཉིས་སྤངས་གུ་རུ་པདྨ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐུགས་རྗེ་ཨུཏྤལ་རྒྱས་པའི་ལྡིང་ཁང་དུ། །འཆི་མེད་ཚེ་དང་ཡེ་ཤེས་ཟིལ་དངར་འབེབས། །རྒྱལ་བའི་ཡུམ་གྱུར་ཡིད་བཞིན་འཁོར་ལོ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྲིད་ལས་འདས་ཀྱང་སྲིད་པའི་སྒྱུ་ཐབས་ཀྱིས། །དུས་གསུམ་སངས་རྒྱས་ཀུན་གྱི་ཕྲིན་ལས་མཛད། །གངས་ཅན་མགོན་པོ་རྒྱལ་མཆོག་ཀརྨ་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཤད་སྒྲུབ་བརྒྱུད་པའི་བླ་མ་ཐུགས་རྗེའི་གཏེར། །དྲིན་ཅན་རྩ་བའི་བླ་མ་ཡིད་བཞིན་ནོར། །དབྱེར་མེད་རང་རིག་བླ་མ་མངོན་གྱུར་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་དང་། གཞན་ཡང་ཤིས་བརྗོད་ཀྱི་ཚིགས་ཕྲེང་ཅི་རིགས་སྤེལ་བས་བདེ་ལེགས་སུ་བྱའོ། །འདི་ན་ལ་ལ་འཕགས་པར་ཡོངས་སུ་གྲགས། ཁ་ཅིག་སྐལ་མཉམ་སོ་སྐྱེ་ལྟར་སྣང་བས། །ཚོམ་བུ་གཅིག་ཏུ་མཆོད་ཅིང་སྒྲུབ་པ་ལ། །རྟོག་གེ་བ་རྣམས་ཁྲེལ་བའི་རྒྱུར་འགྱུར་ཡང་། །དོན་དམ་ཀུན་ཀྱང་སེམས་ཉིད་གཅིག་བུའི་འཕྲུལ། །འཁོར་འདས་ཀུན་ལ་བདེ་གཤེགས་སྙིང་པོས་ཁྱབ། །ཆོས་ཀྱི་དབྱིངས་སུ་བཟང་ངན་ཐ་དད་མེད། །ལྷག་བསམ་ས་བོན་བཏབ་ཚད་སངས་རྒྱས་རྒྱུ། །སྨིན་གྲོལ་དོན་ལྡན་མ་འོངས་སངས་རྒྱས་ཉིད། །ཁྱད་པར་རང་ལ་དྲིན་ལྡན་བླ་མ་མཆོག །རྫོགས་

― LT28_Page_0397 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་སམ་ཐ་མལ་ཡིན་ཀྱང་རུང་། །རྡོ་རྗེ་འཆང་དུ་ལྟ་ཞིང་མཆོད་པའི་ཚུལ། །གསང་སྔགས་རྒྱུད་ལུང་ཀུན་ལས་རྒྱ་ཆེར་གསུངས། །དེ་ཕྱིར་དབང་རྣོན་དོན་ལ་རྟོན་པ་ལ། །འདི་ལྟ་བུ་ཡང་སྐྱོན་མེད་ཡོན་ཏན་ལྡན། །དེ་ཚུལ་ཟབ་མོའི་གནས་ལ་ངེས་རྙེད་པ། །སྒྲུབ་བླ་ཀརྨ་སྦྱིན་པས་ནན་བསྐུལ་ངོར། །ཀརྨ་ངག་དབང་ཡོན་ཏན་རྒྱ་མཚོའི་སྡེས། །ཙཱ་འདྲ་རིན་ཆེན་བྲག་གི་དབེན་གནས་སུ། །གོང་མའི་གསུང་ལ་བརྟེན་ནས་སྦྱར་བའི་དགེས། །འབྲེལ་ཐོགས་འགྲོ་ཀུན་རྩ་གསུམ་དཀྱིལ་འཁོར་དང་། །དབྱེར་མེད་བྱིན་རླབས་དངོས་གྲུབ་ཕྲིན་ལས་ཀྱི། །གཏེར་ཆེན་འཇིག་རྟེན་ཀུན་ཏུ་བརྡོལ་བར་ཤོག །དགེ་ལེགས་འཕེལ།། །།

མངའ་བདག་མར་པ་ལོ་ཙཱ་ཆེན་པོ་ལ་བརྟེན་པའི་བླ་མའི་རྣལ་འབྱོར་ཕྱི་ནང་གསང་སྒྲུབ་སྨིན་བྱེད་དང་བཅས་པ་ཟབ་གསང་སྒོ་འབྱེད།

― LT28_Page_0399 ―

^{[མ་དཔེ་གཟིགས་ན་འདིར་གནོན།]}

[Full Size]

མངའ་བདག་མར་པ་ལོ་ཙཱ་ཆེན་པོ་ལ་བརྟེན་པའི་བླ་མའི་རྣལ་འབྱོར་ཕྱི་ནང་གསང་སྒྲུབ་སྨིན་བྱེད་དང་བཅས་པ་ཟབ་གསང་སྒོ་འབྱེད་ཅེས་བྱ་བ་བཞུགས་སོ།། །།

― LT28_Page_0400 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་མ་ཧཱ་ལོ་ཙཱ་དྷརྨ་མ་ཏཻྱ། སྟོང་ཉིད་སྙིང་རྗེ་ཟུང་འཇུག་དངོས་ཀུན་བདག །བདེ་ཆེན་དགྱེས་པ་རྡོ་རྗེའི་གསང་བ་གསུམ། །དངོས་སུ་སྣང་བ་ལོ་ཙཱ་ཆེན་པོ་དང་། །དབྱེར་མེད་ཁྱབ་བདག་པདྨའི་མཚན་ལ་འདུད། །འདུས་པ་ལ་སོགས་དཔལ་ལྡན་ཧེ་རུ་ཀ །སྙིགས་དུས་འགྲོ་ངོར་གྲུབ་པ་མཆོག་གི་ཚུལ། ཀ་ཆེན་རྣམ་བཞི་བརྒྱུད་པར་བཅས་རྣམས་ལ། །གུས་པས་བཏུད་ནས་དེ་ཡི་རྣལ་འབྱོར་བྲི། །སྔོན་ཆད་འདི་གཞུང་དམིགས་སུ་མ་བྱུང་ཞིང་། །རང་བཟོ་ཕལ་ཆེར་ལོག་པའི་ལམ་མཁན་ཉིད། །འོན་ཀྱང་སྐལ་ལྡན་སློབ་མས་ནན་བསྐུལ་ཕྱིར། །མངའ་བདག་ཐུགས་བཅུད་གསང་བའི་སྙན་བརྒྱུད་དང་། །ལམ་ཟབ་སོགས་ཀྱི་དགོངས་དོན་བསྒྲིལ་བ་ལ། །བཀའ་བརྒྱུད་བླ་མས་བྱིན་གྱིས་རློབས་པ་དང་། །ཌཱ་ཀི་ཆོས་སྲུང་ཀོ་ལོང་མི་མཛད་ཅིང་། །གནང་བའི་སྐབས་ཕྱེས་གྲུབ་གཉིས་མཆོག་སྩོལ་མཛོད། །འདིར་བསྟན་པ་ཐམས་ཅད་ཀྱི་ཡང་སྙིང་གསང་སྔགས་རིག་པ་འཛིན་པའི་སྡེ་སྣོད་འཆང་

― LT28_Page_0401 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ཐམས་ཅད་ཀྱིས་བསྒྲུབ་པར་བྱ་བའི་གཙོ་བོ་ནི་བླ་མ་དངོས་དང་བརྒྱུད་ནས་མཆོད་ཅིང་སྒྲུབ་པ་ཉིད་ཡིན་ལ། །ཁྱད་པར་རྗེ་བཙུན་མར་མི་དྭགས་གསུམ་གྱི་སྒྲུབ་བརྒྱུད་རིན་པོ་ཆེ་འདི་ཉིད་མོས་གུས་ཀྱི་བཀའ་བབས་པ་ཡིན་པས་འདི་ལ་ཆེ་ཐད་དུ་བརྩོན་པར་རིགས་ཤིང་། དེའང་བླ་མ་མཆོད་པའི་ཚུལ་ཐུན་མོང་བ་ནི་ཚིག་གི་སྤྲོས་པ་རྒྱས་བསྡུས་ཙམ་ལས་དོན་ཏུ་ཡན་ལག་བདུན་པའི་བསགས་སྦྱོང་དང་གསོལ་འདེབས་གུ་རུ་ལུགས་སུ་གདབ་པ་ཙམ་ཡིན་པས་གྲུབ་མཐའ་ཐམས་ཅད་ལ་གྲགས་ཆེ་སྟེ་དེ་ལྟར་ཡང་བླ་མའི་ཡོན་ཏན་ཡོངས་བཟུང་གི་རྒྱུད་ཀྱི་དགོངས་དོན་སོགས་དང་འབྲེལ་བར་མངོན་ལ་རྒྱ་གཞུང་ཕྲན་ཚེགས་ཀྱང་སྣང་། བླ་མ་སྒྲུབ་པའི་ཚུལ་ནི་རྙིང་ལུགས་སུ་གུ་རུ་རིན་པོ་ཆེའི་བླ་སྒྲུབ་དར་རྒྱས་ལྷག་པར་ཆེ་ཞིང་དེའི་ཁུངས་ནི་གཏེར་ཆོས་རྣམས་ཡིན་ལ། གསར་མའི་ཕྱོགས་སུ་དེ་འདྲའི་རྒྱུན་སྲོལ་རྐང་ཚུགས་མ་བྱུང་ཡང་ས་པ་དང་རྗེ་རིན་པོ་ཆེ་སོགས་ཀྱི་བླ་སྒྲུབ་དག་སྣང་དུ་བྱུང་བ་ཅི་རིགས་མཆིས་ཤིང་། ལྷག་པར་

― LT28_Page_0402 ―

^{[མ་དཔེ་གཟིགས་ན་འདིར་གནོན།]}

[Full Size]

མི་ལའི་སྙན་བརྒྱུད་ཆེ་ཆུང་གི་བླ་མའི་རྣལ་འབྱོར་ཐུན་མོང་མ་ཡིན་པ་རྣམས་དང་། ཀཾ་ཚང་མོས་གུས་ཆེན་མོ། འབྲུག་ལུགས་ལམ་ཟབ་སོགས་ནི་མཚན་གྱི་བཏགས་ཕྱོགས་ལས་དོན་ཏུ་བླ་སྒྲུབ་རྐང་ཚུགས་པ་ཡིན་ཅིང་། །མཉམ་མེད་དྭགས་པོ་རིན་པོ་ཆེའི་གསང་ལམ་བླ་སྒྲུབ་ནི་ཡོངས་སུ་གྲགས་པ་དང་། དེ་དག་གི་སྨིན་གྲོལ་རྒྱུན་མ་ཉམས་པར་བཞུགས་པ་ཁོ་བོས་ཀྱང་སྐལ་པ་བཟང་པོའི་དཔྱིད་དུ་ནོས་ཤིང་ལམ་ཟབ་ལ་རྒྱ་གཞུང་གི་ཁུངས་ཀྱང་བཞུགས་པར་སྣང་བས་འདིར་ཡང་དེ་དག་གི་རྗེས་སུ་འབྲངས་ཏེ་མདོར་དྲིལ་བའི་རྣལ་འབྱོར་འཆད་པ་ལ་གསུམ། ཕྱི་བླ་མ་ཁྲོམ་ཚོགས་ལ་བརྟེན་ཏེ་མོས་གུས་གསོལ་འདེབས་ཀྱི་བསྙེན་པ་དང་། ནང་ཡི་དམ་དཀྱིལ་འཁོར་ལ་བརྟེན་ཏེ་བསྒོམ་བཟླས་རླུང་སྦྱོར་གྱི་སྒྲུབ་པ་དང་། གསང་བ་རྒྱལ་བ་རིགས་ལྔ་ལ་བརྟེན་ཏེ་དོན་གཉིས་ཀྱི་ཕྲིན་ལས་ལ་སྦྱར་བའོ། །དང་པོ་ནི། གནས་དབེན་པར་མཎྜལ་སོགས་མཆོད་པའི་བཀོད་པ་ཇི་ལྟར་འབྱོར་བའམ་ཡིད་སྤྲུལ་ཁོ་ནས་ཀྱང་ཆོག་སྟེ། སྲིད་པ་གསུམ་ལས་ངེས་པར་འབྱུང་བའི་བློས་བསྐུལ། །འཁོར་བའི་རྒྱ་མཚོར་མཐའ་མེད་དུ་འཁྱམས་པའི་མ་རྒན་འགྲོ་བ་སྡུག་བསྔལ་ཤ་སྟགས་ཀྱིས་གཟིར་བ་རྣམས་ལ་མི་བཟོད་པའི་སྙིང་རྗེས་དྲང་། རྡོ་རྗེ་འཆང་བཤེས་གཉེན་གྱི་རྣམ་པར་ཤར་བ་ཐར་ལམ་སྟོན་པའི་བླ་མ་དམ་པ་ལ་མི་ཕྱེད་པའི་དད་གུས་ལ་ཐོག་མཐའ་ཀུན་ཏུ་གཞི་བཅས་ཏེ། དང་པོ་མདུན་གྱི་ནམ་མཁར་བླ་མ་འཁོར་བཅས་མངོན་སུམ་བཞིན་བཞུགས་པར་མོས་ལ་སྐྱབས་སུ་འགྲོ་བ་ནི། །སངས་རྒྱས་ཆོས་དང་དགེ་འདུན་གསུམ་གྱི་དངོས། །བླ་མ་ཡི་དམ་མཁའ་འགྲོ་ཀུན་འདུས་པ། །རྗེ་བཙུན་མར་པ་ཆོས་ཀྱི་བློ་གྲོས་ལ། །བྱང་ཆུབ་སྙིང་པོའི་བར་དུ་སྐྱབས་

― LT28_Page_0403 ―

^{[མ་དཔེ་གཟིགས་ན་འདིར་གནོན།]}

[Full Size]

སུ་མཆི། སེམས་བསྐྱེད་པ་ནི། ལམ་ཟབ་བླ་མའི་རྣལ་འབྱོར་འདིར་བརྟེན་ནས། །བདག་གིས་ཚེ་གཅིག་བྱང་ཆུབ་མཆོག་བསྒྲུབ་ཅིང་། །ནམ་མཁའི་མཐའ་མཉམ་ཕ་མ་སེམས་ཅན་ཀུན། །དགྱེས་མཛད་རྡོ་རྗེའི་གོ་འཕང་ལ་འགོད་བྱ། །རྒྱུད་དག་པར་བྱེད་པ་ནི། །རང་གི་སྤྱི་བོར་པདྨ་ཉི་མའི་སྟེང་། །ཧཱུྃ་ལས་བླ་མ་རྡོར་སེམས་ཧེ་རུ་ཀ། སྐུ་མདོག་དཀར་པོ་ཞལ་གཅིག་སྤྱན་གསུམ་པ། །ཁྲོ་འཛུམ་དབུ་སྐྲ་གྱེན་བརྫེས་ཐོད་སྐམ་བརྒྱན། །རྡོ་རྗེ་ཕྱར་ཞིང་བནྡྷ་ཐུགས་ཀར་འཛིན། །རུས་རྒྱན་སྟག་ཤམ་གླང་ཀོའི་ཆོས་གོས་གསོལ། །སྙེམས་མ་དམར་མོ་གྲི་ཐོད་འཛིན་པས་འཁྱུད། །ག་ཡས་བསྐུམ་གཡོན་བརྐྱང་རང་འོད་མེ་ཀློང་བཞུགས། །ཐུགས་ཀར་ཟླ་སྟེང་ཧཱུྃ་དཀར་སྔགས་ཀྱིས་བསྐོར། །འོད་འཕྲོས་རྩ་བ་གསུམ་པོ་སྤྱན་དྲངས་ཐིམ། །ཡབ་ཡུམ་བདེ་རྒྱས་སྦྱོར་མཚམས་བྱང་སེམས་རྒྱུན། །ཚངས་བུག་ནས་ཞུགས་རང་ལུས་ལྟེམས་ཀྱིས་གང་། །སྡིག་སྒྲིབ་ཀུན་དག་བདེ་སྟོང་སྐྱེས་པར་གྱུར། ཨོཾ་ཤྲཱི་ཧེ་རུ་ཀ་སཏྭ་ས་མ་ཡ་ཞེས་སོགས་ཧེ་རུ་ཀའི་ཡིག་བརྒྱའམ། ཨོཾ་ཨཱཿགུ་རུ་བཛྲ་སཏྭ་ཧཱུྃ། ཞེས་པ་གང་རུང་ཅི་ནུས་བཟླས་པའི་མཐར་སྤྲོ་ན། །མགོན་པོ་བདག་ནི་སོགས་ཀྱིས་གསོལ་བ་གདག །བླ་མ་རྡོར་སེམས་འོད་ཞུ་རང་ཐིམ་གྱུར། །དེ་ནས་རྟེན་བསྐྱེད་པ་ནི། གཟུང་འཛིན་རྣམ་དག་རང་སྣང་ཆོས་ཀྱི་དབྱིངས། །ཚད་མེད་སངས་རྒྱས་ཞིང་གི་བཀོད་པ་རྫོགས། །ཀུན་བཟང་སྨོན་ལམ་རྒྱ་མཚོའི་སྤྲིན་ཕུང་ལས། །འདོད་རྒུ་

― LT28_Page_0404 ―

^{[མ་དཔེ་གཟིགས་ན་འདིར་གནོན།]}

[Full Size]

ནམ་མཁའ་མཛོད་ཀྱི་ཆར་འབེབས་པའི། །མདུན་མཁར་ཐར་པ་ཆེན་པོའི་གཞལ་མེད་ཁང་། །ཆོས་ཀྱི་འབྱུང་གནས་ཡེ་ཤེས་རང་འོད་ཅན། །རྡོ་རྗེའི་ཁང་བརྩེགས་དཔེ་མེད་རབ་འབྱམས་དབུས། །མི་འཇིགས་སེང་ཁྲི་མ་ཆགས་པདྨའི་གདན། །དཀར་དམར་རྣམ་དག་ཉི་ཟླའི་དཀྱིལ་འཁོར་དུ། །རྩ་བའི་བླ་མ་དགྱེས་མཛད་ཧེ་རུ་ཀ །རྣམ་པ་བཀའ་བརྒྱུད་སྤྱི་མེས་ལྷོ་བྲག་པ། །དམར་སྨུག་སྐུ་ཉམས་རབ་རྒྱས་ཧུར་བག་ཅན། །ཕྱག་གཉིས་ས་གནོན་ཕྱག་རྒྱས་བདུད་ཚོགས་འདུལ། །ལྕང་ལོ་གྱེན་བརྫེས་ཞབས་གཉིས་རོལ་པའི་སྟབས། །ཕྱོགས་བཞིར་པདྨ་ཟླ་བ་རྒྱས་པ་ལ། །ཤར་དུ་མཚུར་སྟོན་དབང་གི་རྡོ་རྗེའི་ཞབས། །ལྷོ་རུ་རྔོག་སྟོན་ཆེན་པོ་ཆོས་རྡོར་བ། །ནུབ་ཏུ་མེས་སྟོན་བསོད་ནམས་རྒྱལ་མཚན་རྣམས། །རྡོ་རྗེ་དྲིལ་འཛིན་སྐྱིལ་མོ་ཀྲུང་གིས་བཞུགས། །གཙོ་འཁོར་ཐམས་ཅད་སྔགས་གྲུབ་རྣལ་འབྱོར་ཆས། །འདུད་མ་དཀར་པོ་བེར་ཕྱམ་དམར་ཟླུམ་གསོལ། །འཛུམ་ཁྲོའི་ཉམས་ལྡན་ལྕང་ལོ་ཟར་བུ་འཕྱངས། །ཧེ་རུ་ཀ་དཔལ་མངོན་སུམ་བྱོན་འདྲ་བ། །རྡོ་རྗེའི་ཟིལ་ཆེན་བརྗིད་ལྡན་ལྷུན་ཆགས་བཞུགས། །གཡོན་ཏུ་གྲུབ་པའི་དབང་ཕྱུག་མི་ལ་རྗེ། །བཟང་པོའི་སྟབས་ཅན་རས་དཀར་བླ་གོས་འཆང་། །མཐོང་ཐོས་དྲན་པས་གྲོལ་བའི་ངང་ཚུལ་ཅན། །རང་རང་། ཐུགས་སྲས་བརྒྱུད་འཛིན་ཚོགས་ཀྱིས་བསྐོར། །དེ་རྒྱབ་མདུན་ཕྱོགས་མཉམ་མེད་འཛམ་གླིང་གྲགས། །ལས་ཅན་ས་ཐོབ་ལྔ་བརྒྱ་དང་པོ་སྤྲོ། །གཡས་ཕྱོགས་མཆོག་གི་སྤྲུལ་སྐུ་དུས་

― LT28_Page_0405 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་མཁྱེན། །སངས་རྒྱས་ཕྲེང་བ་རིམ་བྱོན་ཚར་དུ་དངར། །རྒྱབ་ཕྱོགས་འགྲོ་བའི་མགོན་པོ་རྡོ་རྗེ་རྒྱལ། །ཟུང་བཞི་ཡ་བརྒྱད་གྲུབ་པའི་ཁྱུ་ཆེན་འཁྲིགས། །གཡོན་ཕྱོགས་བྱམས་མགོན་བསྟན་པའི་ཉིན་མོར་བྱེད། །སྒྲུབ་བརྒྱུད་སྐྱེས་མཆོག་དུ་མ་ཉམས་སུ་དགའ། །གཙོ་བོའི་དབུ་གཙུག་རྗེ་བཙུན་ནཱ་རོ་པ། །དེ་སྟེང་ཏེ་ལོ་པ་དང་རྡོ་རྗེ་འཆང་། །བཀའ་བརྒྱུད་བླ་མ་སངས་རྒྱས་བྱང་སེམས་བསྐོར། །བར་ཕྱོགས་གསང་བདག་རས་ཆུང་རྡོ་རྗེ་གྲགས། །མཆོག་གྲུབ་རྣལ་འབྱོར་ཕོ་མོ་གཟི་བྱིན་འབར། །ཡི་དམ་རྒྱུད་སྡེ་བཞི་ཡི་ལྷ། །འོག་ཕྱོགས་མཧཱ་ཀཱ་ལ་ལྕམ་དྲལ་རྣམས། །རང་འཁོར་དང་བཅས་གཟི་བརྗིད་འོད་དུ་འབར། །བྱིན་རླབས་གཟི་མདངས་ཆོས་དབྱིངས་རྒྱས་པར་འགེངས། །རྡོ་རྗེའི་ཆོས་སྒྲ་འགྲོ་དྲུག་སྐད་དུ་སྣང་། །ཐུགས་རྗེའི་དགོངས་པ་སྐལ་ལྡན་བུ་ལ་གཏད། །ཡེ་ཤེས་བྱིན་ཆེན་བརྟན་གཡོ་ཀུན་ལ་འབེབས། །མོས་པའི་སྣང་ངོར་མངོན་སུམ་བཞུགས་པར་གྱུར། །གཤེགས་བཞུགས་སྤྲོས་པ་མེད་པའི་ངེས་པ་བརྟན་པོའི་ངང་སྣང་ཚུལ་ཙམ་དུ་སྤྱན་འདྲེན་པ་ནི། ཨོཾ། །ཁྱབ་བདག་དངོས་པོ་ཀུན་གྱི་ངོ་བོ་ཉིད། །གནས་མེད་འགྲོ་འོང་བྲལ་བ་ནམ་མཁའ་བཞིན། །གཤེགས་དང་བཞུགས་པའི་མཚན་མ་མི་མངའ་ཡང་། །ཆུ་ཟླ་བཞིན་ཏུ་གར་དམིགས་དེར་སྣང་བ། །བདུད་དཔུང་འཇོམས་མཛད་དཔལ་ལྡན་ཧེ་རུ་ཀ །བླ་མ་ཡི་དམ་མཁའ་འགྲོ་འཁོར་དང་བཅས། །བདག་གིས་དད་པས་དེང་འདིར་གསོལ་འདེབས་ན། །དམིགས་མེད་སྙིང་རྗེའི་དབང་གིས་འདིར་གསལ་མཛོད། །རང་སྣང་འོག་མིན་དག་པའི་ཞིང་རྣམས་དང་། །མཁའ་སྤྱོད་ཐར་པ་མཆོག་

― LT28_Page_0406 ―

^{[མ་དཔེ་གཟིགས་ན་འདིར་གནོན།]}

[Full Size]

གི་ཕོ་བྲང་ནས། །དགྱེས་མཛད་མར་པ་ཐུགས་སྲས་ཀ་ཆེན་བཞི། །བཀའ་བརྒྱུད་གྲུབ་ཐོབ་རྒྱ་མཚོ་ཡི་དམ་ལྷ། །མཁའ་འགྲོ་ཆོས་སྲུང་དམ་ཅན་འཁོར་ལོའི་ཚོགས། །ཁྱབ་བདག་བླ་མའི་ཡེ་ཤེས་རོལ་པའི་གར། །ངོ་བོ་གཅིག་ལ་རྣམ་པ་ཐ་དད་སྟོན། །པྲ་ཕབ་གཟུགས་བརྙན་དབང་པོའི་གུར་ཁྱིམ་བཞིན། །མོས་པའི་ཡིད་མཁར་མངོན་སུམ་སྣང་མཛད་གསོལ། །བཞུགས་པར་གསོལ་ནས་བསགས་སྦྱོང་བྱ་བ་ནི། །ཡེ་ཤེས་སྐུ་ལ་འགྲོ་འོང་མ་མཆིས་ཀྱང་། །བདག་ཅག་མོས་པའི་རེ་བ་མ་སྐོང་བར། །འགྲོ་བའི་བླ་མ་ཡེ་ཤེས་སྤྱན་ལྡན་རྣམས། །དགྱེས་པར་བཞུགས་ལ་དམིགས་མེད་ཐུགས་རྗེས་དགོངས། །རིགས་རྣམས་ཀུན་གྱི་ཁྱབ་བདག་ཧེ་རུ་ཀ །བཅོམ་ལྡན་རྡོ་རྗེ་འཆང་ལ་ཕྱག་འཚལ་ལོ། །སངས་རྒྱས་དངོས་ཀྱིས་རྗེས་བཟུང་མཆོག་བརྙེས་པ། །གྲུབ་ཆེན་ཏེ་ལོ་པ་ལ༴ །བཅུ་གཉིས་དཀའ་སྤྱད་བར་དོར་མཁའ་སྤྱོད་འགྲུབ། །པ་ཆེན་ནཱ་རོ་པ་ལ༴ །དགྱེས་མཛད་དངོས་བྱོན་བཀའ་བརྒྱུད་སྤྱི་མེས་ཆེ། །རྗེ་བཙུན་ལྷོ་བྲག་པ་ལ༴། འོད་གསལ་བཀའ་བབས་རྡོ་རྗེ་གསུམ་གྱི་དངོས། །མཚུར་སྟོན་དབང་རྡོར་ཞབས་ལ༴ །བཤད་རྒྱུད་བཀའ་བབས་མཁའ་སྤྱོད་སྐུ་དངོས་གཤེགས། །རྔོག་སྟོན་ཆོས་རྡོར་ཞབས་ལ༴ །གསང་ལམ་བཀའ་བབས་སངས་རྒྱས་དགྱེས་པའི་དཔལ། །མེས་སྟོན་བསོད་རྒྱལ་ཞབས་ལ༴ །གཏུམ་མོའི་བཀའ་བབས་གངས་ཅན་འགྲན་ཟླ་བྲལ། །བཞད་པ་རྡོ་རྗེའི་ཞབས་ལ༴ །དྭགས་པོ་དུས་མཁྱེན་འགྲོ་མགོན་ཆོས་ཀྱི་འབྱུང་། རས་ཆུང་པ།

― LT28_Page_0407 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་ཡི་དམ་མཁའ་འགྲོ་ཆོས་སྲུང་ལ། །ཞིང་རྡུལ་གྲངས་སྙེད་སྒོ་གསུམ་གུས་པ་ཡིས། །ཕྱག་འཚལ་བསྟོད་ཅིང་གསོལ་བ་སྙིང་ནས་འདེབས། །ཕྱི་ལྟར་མཚན་དཔེའི་སྣང་བརྙན་དད་པས་རྟོགས། །ནང་ལྟར་རྡོ་རྗེའི་གསང་གསུམ་གསལ་གདབ་ཅིང་། །གསང་བ་རང་སེམས་བླ་མ་ལྟ་བས་མཇལ། །རྟག་ཏུ་གསང་བ་བསམ་གྱིས་མི་ཁྱབ་པའི། །རྣམ་ཐར་བསམ་ཞིང་དེ་ཡི་རྗེས་སུ་སློབ། །བླ་མ་སངས་རྒྱས་དངོས་སུ་འགྲུབ་ཀྱི་བར། །མི་ཕྱེད་རྩེ་གཅིག་གུས་པའི་གདུང་ཤུགས་ཀྱིས། །དཔལ་ལྡན་བླ་མའི་ཚོགས་ལ་སྐྱབས་སུ་མཆི། །རྗེ་བཙུན་ལྷོ་བྲག་པ་ཡིས་བྱིན་གྱིས་རློབས། །བཀའ་བརྒྱུད་གྲུབ་ཐོབ་རྒྱ་མཚོས་ཐུགས་རྗེས་ཟུང་། །འཁོར་བར་འཁྱམས་པ་རྣམས་ཀྱི་ལམ་སྣ་དྲོངས། །བདག་གིས་རེ་ཞིང་ལྟོས་པ་ཁྱེད་ལ་བཅའ། །སངས་རྒྱས་གཞན་ན་མེད་པའི་ཐག་ཆོད་ཀྱིས། །འདི་ཕྱིའི་སྐྱབས་གནས་གུང་དུ་མི་འཚོལ་བར། །བློ་སྙིང་བྲང་གསུམ་མར་པ་རྗེ་ལ་གཏད། །ལུས་སེམས་རྗེ་བཙུན་བླ་མའི་བྲན་ཏུ་འབུལ། །བདོག་པ་ཐམས་ཅད་བླ་མའི་ཕྱོགས་སུ་བཏད། །ལེགས་པ་ཅི་མཆིས་རྗེ་ཡི་སྲི་ཞུར་བསྔོ། །བྱ་བ་ཅི་བྱེད་སྐུ་ཡི་རིམ་གྲོར་བགྱི། །བརྗོད་པའི་ཚིག་ཀུན་བཀའ་དྲིན་ཅན་ཁྱོད་བསྔགས། །ལུས་དང་སྲོག་ལའང་ཕོངས་པ་མ་མཆིས་པར། །དཔལ་ལྡན་བླ་མའི་བཞེད་པ་སྐོང་བགྱི་བས། །ཚེ་འདིར་ཁྱེད་ཀྱི་གོ་འཕང་ལ་འཁོད་ནས། །འགྲོ་བའི་དོན་ཀུན་ཁྱེད་བཞིན་འགྲུབ་པར་མཛོད། །ཟག་མེད་སྐུ་ལ་སྲེད་ལེན་སྐྱོན་

― LT28_Page_0408 ―

^{[མ་དཔེ་གཟིགས་ན་འདིར་གནོན།]}

[Full Size]

སྤངས་ཀྱང་། །བདག་སོགས་འགྲོ་ཀུན་བསོད་ནམས་ཚོགས་རྫོགས་ཕྱིར། །ཕྱི་ནང་གསང་བ་དེ་ཉིད་བློས་སྦྱར་བས། །ཡེ་ཤེས་ཚོམ་བུ་བདེ་བས་མཉེས་གྱུར་ཅིག །ཆུ་གཉིས་ཉེར་སྤྱོད་འདོད་པའི་ཡོན་ཏན་ལྔ། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །བུམ་བཟང་ནོར་བུ་དཔག་བསམ་འདོད་འཇོའི་བ། །སྨན་ལྗོངས་རིན་ཆེན་རི་བོ་མ་རྨོས་འབྲུ། །བདག་པོས་བཟུང་དང་མ་བཟུང་མཁའ་ཁྱབ་ཀྱི། །ལྷ་མིའི་དཔལ་འབྱོར་བདེ་བའི་ཡོ་བྱད་དང་། །བདག་གཞན་ལུས་དང་ལོངས་སྤྱོད་དུས་གསུམ་གྱི། །དགེ་རྩར་བཅས་ཀུན་ཞེན་མེད་དམིགས་མེད་བློས། །ཆོས་ཀྱི་རྒྱལ་པོ་སྲས་དང་བཅས་ལ་འབུལ། །འགྲོ་ཀུན་བསོད་ནམས་ཡེ་ཤེས་ཚོགས་རྫོགས་ཤོག །སྐབས་འདིར་མཎྜལ་རྒྱས་པ་ལྕོགས་ན་འབུལ་ཞིང་བསྡུས་པ་གྲངས་ཅི་ནུས་བྱ། །དཀྱུས་སུ་བསྟན་པ་ནི། རིན་ཆེན་ས་གཞི་ཞིང་གི་བཀོད་པ་ཅན། །རབ་འབྱམས་རྒྱ་མཚོ་རི་གླིང་ཉི་ཟླས་བརྒྱན། །ལྷ་མིའི་དཔལ་འབྱོར་ཕྱུར་བུར་བཀང་བ་འདི། །བླ་མ་སངས་རྒྱས་སྤྲུལ་པའི་སྐུ་ལ་འབུལ། །རང་ལུས་སྲིད་གསུམ་བཀོད་པར་ལྷུན་གྱིས་གྲུབ། །རྩ་རླུང་ཐིག་ལེ་ཕྱི་ནང་སྣོད་བཅུད་རྫོགས། །ཕུང་ཁམས་སྐྱེ་མཆེད་འདོད་ཡོན་སྤྲིན་ཕུང་གཏིབས། །བླ་མ་ལོངས་སྤྱོད་རྫོགས་པའི་སྐུ་ལ་འབུལ། །ཀུན་གཞི་གདོད་ནས་དག་པ་ཆོས་ཀྱི་དབྱིངས། །ཚོགས་བརྒྱད་འཁོར་འདས་ཞིང་ཁམས་ཅི་ཡང་འཆར། །རྟོག་ཚོགས་མི་ཟད་རྒྱན་གྱི་འཁོར་ལོར་འཕྲོ། །བླ་མ་སྤྲོས་བྲལ་ཆོས་ཀྱི་སྐུ་ལ་འབུལ། །མཉེས་བྱེད་མཎྜལ་སོགས་བརྗོད། བླ་མ་

― LT28_Page_0409 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོད་པ་རྐྱང་པའི་སྐབས་འདི་དག་ཏུ་ཕྱག་དང་། མཆོད་པའི་ཚིག་ཇི་ལྟར་རིགས་པ་རྒྱས་པར་སྦྱར་ན་ལེགས་སོ། །ཡན་ལག་ལྷག་མ་རྣམས་ནི། །བདག་སོགས་འགྲོ་རྣམས་འཁྲུལ་པའི་དབང་གྱུར་པས། །བཅས་དང་རང་བཞིན་ཁ་ན་མ་ཐོ་བ། །ཐོག་མེད་དུས་ནས་ཇི་སྙེད་བསགས་པ་དང་། །ཁྱད་པར་རྡོ་རྗེ་ཐེག་པའི་དམ་ལས་འགལ། །ཐར་པའི་སྲོག་རྩ་བླ་མ་བསྟེན་པ་ལ། །ཚུལ་བཞིན་མ་བགྱིས་ནོངས་པ་གང་མཆིས་པ། །གནོང་འགྱོད་དྲག་པོས་སྙིང་ནས་བཤགས་ཤིང་བསྡམ། །འཁོར་འདས་ཀུན་གྱི་དགེ་བའི་རྩ་བ་དང་། །མཆོག་ཏུ་དཔལ་ལྡན་བླ་མའི་རྣམ་ཐར་ལ། །དད་ཅིང་དགའ་བ་ཆེན་པོས་ཡི་རང་ངོ་། །དབང་པོར་འཚམས་པའི་ཆོས་སྒོ་སྣ་ཚོགས་དང་། །ལྷག་པར་རྡོ་རྗེ་ཐེག་པའི་སྨིན་གྲོལ་གྱི། །ཆོས་འཁོར་རྒྱུན་ཆད་མེད་པར་བསྐོར་དུ་གསོལ། །ཇི་སྲིད་འཁོར་བ་དོང་ནས་མ་སྤྲུགས་པར། །དེ་སྲིད་ཞི་བའི་དབྱིངས་སུ་མི་གཞོལ་བར། །འགྱུར་མེད་རྡོ་རྗེའི་སྐུ་རུ་བཞུགས་སུ་གསོལ། །འདིས་མཚོན་དུས་གསུམ་དགེ་རྩ་ཅི་མཆིས་པ། །བྱང་ཆུབ་རྡོ་རྗེ་བཀའ་བརྒྱུད་སྲས་བཅས་ཀྱི། །རྣམ་ཐར་ཕྲིན་ལས་མྱུར་དུ་འགྲུབ་ཕྱིར་བསྔོ། །དེ་ནས་སླར་ཡང་རྗེ་དུས་གསུམ་མཁྱེན་པའི་རྡོ་རྗེའི་གསུང་། འོག་མིན་ཆོས་ཀྱི་དབྱིངས་ཀྱི་ཕོ་བྲང་སོགས་ཡན་ལག་བདུན་པ་སྨོན་ལམ་བཅས་ཅི་ནུས་བྱའོ། །དེ་ནས་གསོལ་འདེབས་ཀྱི་བསྙེན་པ་བྱ་བ་ནི། ཡིད་གཞན་ཏུ་མ་ཡེངས་བར་མོས་གུས་ཀྱི་གདུང་ཤུགས་དྲག་པོས་མནམ་བཞི་སྐོར་ཁོ་ན་ལ་གྲངས་བཟུང་། །གཞན་ཡང་གང་ཟག་མཆོག་རྣམས་ཀྱིས་མཛད་པའི་གསོལ་འདེབས་ཇི་ལྟར་རིགས་པ་དང་། ཁོ་བོས་བྱས་པའི་རྗེ་མར་པའི་གསོལ་འདེབས་

― LT28_Page_0410 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་ཀྱང་སྤྲོ་ན་བཀླག་པར་བྱའོ། །མཐར། བདག་དང་སེམས་ཅན་ཐམས་ཅད་ཀྱི་བློ་ཆོས་སུ་འགྲོ་བར་བྱིན་གྱིས་བརླབ་ཏུ་གསོལ། །ཆོས་ལམ་དུ་འགྲོ་བར༴ །ལམ་འཁྲུལ་བ་སེལ་བར༴ །འཁྲུལ་བ་ཡེ་ཤེས་སུ་འཆར་བར༴ །བདག་གི་ལས་དང་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་དང་བག་ཆགས་ཀྱི་སྒྲིབ་པ་ཐམས་ཅད་ད་ལྟ་ཉིད་དུ་དག་པར་བྱིན་གྱིས་བརླབ་ཏུ་གསོལ། འདུགས་འདི་ཉིད་དུ་དག་པར༴ །ཐུན་འདི་ཉིད་དུ༴ །བདག་གི་རྒྱུད་འདི་དག་པར༴ །རྒྱུད་འདི་རྣམ་པར་གྲོལ་བར་བྱིན་གྱིས༴ །ད་ལྟ་ཉིད་དུ་གྲོལ་བར༴ །འདུགས་འདི་ཉིད་དུ༴ །ཐུན་འདི་ཉིད་དུ༴ །བདག་གི་རྒྱུད་ལ་ཏིང་ངེ་འཛིན་མཆོག་ཏུ་གྱུར་པ་ཕྱིན་ཅི་མ་ལོག་པར་སྐྱེ་བར༴ །ད་ལྟ་ཉིད་དུ༴ །འདུགས༴ །ཐུན་འདི་ཉིད༴ །ཡེ་ཤེས་མཆོག་ཏུ་གྱུར་པ་ཕྱིན་ཅི་མ་ལོག་པ་སྐྱེ་བར༴ །ད་ལྟ་ཉིད་དུ༴ །འདུགས༴ །ཐུན་འདི་ཉིད་དུ་སྐྱེ་བར་བྱིན་གྱིས་བརླབ་ཏུ་གསོལ། ཞེས་པའང་ལན་ཅི་རིགས་བརྗོད་ལ། །ཚད་མེད་ཐུགས་རྗེའི་མངའ་བདག་རིན་པོ་ཆེ། །སྲས་དང་བཅས་ལ་ཞུ་ཞིང་གསོལ་བ་ནི། །བསྟན་པའི་ཡང་སྙིང་སྒྲུབ་བརྒྱུད་རིན་པོ་ཆེ། །དར་རྒྱས་ཡུན་རིང་གནས་པར་མཛད་དུ་གསོལ། །དེར་འཛིན་སྐྱེས་བུ་དམ་པ་མ་ལུས་པ། །སྐུ་ཚེ་བརྟན་ཅིང་མཛད་ཕྲིན་འཕེལ་བ་དང་། །འཇིག་རྟེན་ཁམས་ཀུན་ནད་མུག་འཁྲུགས་རྩོད་ཞི། །སྙིང་པོའི་བསྟན་པས་འདུལ་བར་མཛད་དུ་གསོལ། །འདུད་རིས་འབྱུང་པོའི་ལོག་པའི་བསམ་སྦྱོར་ཞི། །མི་དང་མི་མིན་མཐུ་བོ་ཆེ་རྣམས་ཀྱང་། །ཁྱོད་དང་ཁྱོད་ཀྱི་བསྟན་ལ་དད་ཅིང་འདུན། །

― LT28_Page_0411 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲོ་དྲུག་ཐར་པའི་ཁ་ལོ་བསྒྱུར་དུ་གསོལ། །བདག་ཅག་ཚེ་འདིར་བསམ་དོན་ཆོས་བཞིན་འགྲུབ། །ཐར་པ་སྒྲུབ་པའི་འགལ་རྐྱེན་བར་ཆད་ཞི། །རང་གཞན་དོན་གཉིས་ལྷུན་གྱིས་གྲུབ་པ་རུ། །རྗེ་བཙུན་ཐུགས་རྗེ་ཅན་གྱིས་བྱིན་གྱིས་རློབས། །ཆོས་བརྒྱད་འཆིངས་གྲོལ་ཉོན་མོངས་ཟུག་རྔུ་ཞི། །ཚད་མེད་བྱང་ཆུབ་སེམས་ཀྱི་གཏེར་ཁ་བརྡོལ། །ཡེ་ཤེས་ཉི་མ་ཁོངས་ནས་འཆར་བ་ཡི། །མངའ་བདག་ལོ་ཙཱ་ཆེན་པོའི་དངོས་གྲུབ་སྩོལ། །རྡོ་རྗེའི་ལམ་མཆོག་དཀའ་བ་མེད་པར་བགྲོད། །བདེ་སྟོང་ལྷན་སྐྱེས་ཡེ་ཤེས་ཕྱག་རྒྱ་ཆེ། །མཆོག་གི་དངོས་གྲུབ་ཚེ་འདིར་མྱུར་ཐོབ་པར། །དགྱེས་མཛད་ཧེ་རུ་ཀ་ཡིས་ཐུགས་རྗེས་ཟུང་། །ཟབ་ལམ་བླ་མའི་མོས་གུས་མཐར་ཕྱིན་ནས། །རང་རིག་ཆོས་སྐུ་གཉུག་མ་མངོན་ཏུ་གྱུར། །སྟན་ཐོག་འདི་རུ་ཟུང་འཇུག་ཡེ་ཤེས་སྐུ། །རྡོ་རྗེ་འཆང་དངོས་འགྲུབ་པར་མཛད་དུ་གསོལ། །དེ་ནས་དབང་བཞི་ལེན་པ་ནི། །དཔལ་ལྡན་བླ་མ་དམ་པ་ཁྱེད་རྣམས་ཀྱིས། །བདག་ལ་སྨིན་བྱེད་དབང་བཞི་བསྐུར་དུ་གསོལ། །རྒྱུད་བཞི་མྱུར་དུ་སྨིན་པར་བྱིན་གྱིས་རློབས། །ཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། །ཞེས་པའི་གསོལ་བ་བཏབ་པའི་མོད་ཉིད་ལ། །འཁོར་རྣམས་འོད་ཞུ་གཙོ་བོ་ཉིད་ལ་ཐིམ། །གཙོ་བོ་དཀོན་མཆོག་ཀུན་འདུས་བདག་ཉིད་ལ། །རྣམ་པ་བླ་མ་དངོས་སུ་གསལ་གྱུར་པའི། །མཛོད་སྤུའི་གནས་ནས་འོད་ཟེར་དཀར་པོ་འཕྲོས། །རང་གི་དཔྲལ་བར་ཐིམ་པས་ལུས་སྒྲིབ་དག །བུམ་པའི་དབང་ཐོབ་བསྐྱེད་རིམ་བསྒོམ་ལ་དབང་། །

― LT28_Page_0412 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲས་བུ་སྤྲུལ་སྐུ་ཐོབ་པའི་སྐལ་ལྡན་གྱུར། །མགྲིན་པའི་གནས་ནས་འོད་ཟེར་དམར་པོ་འཕྲོས། །རང་གི་མགྲིན་པར་ཐིམ་པས་ངག་སྒྲིབ་དག །གསང་བའི་དབང་ཐོབ་རྩ་རླུང་བསྒོམ་ལ་དབང་། །འབྲས་བུ་ལོངས་སྐུ་ཐོབ་པའི་སྐལ་ལྡན་གྱུར། །ཐུགས་ཀའི་གནས་ནས་འོད་ཟེར་སྔོན་པོ་འཕྲོས། །རང་གི་སྙིང་གར་ཐིམ་པས་ཡིད་སྒྲིབ་དག །ཤེར་དབང་ཐོབ་ཅིང་སྙོམས་འཇུག་བསྒོམ་ལ་དབང་། །འབྲས་བུ་ཆོས་སྐུ་ཐོབ་པའི་སྐལ་ལྡན་གྱུར། །གནས་གསུམ་འོད་ཟེར་དཀར་དམར་མཐིང་གསུམ་འཕྲོས། །གནས་གསུམ་ལ་ཐིམ་སྒོ་གསུམ་དྲི་མ་སྦྱངས། །བཞི་པའི་དབང་ཐོབ་ཕྱག་ཆེན་བསྒོམ་ལ་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །གཞི་ནས་མ་བཅོས་ཡེ་ནས་ལྷུན་གྲུབ་ལ། །ཐ་མལ་རང་ལུགས་ཆེན་པོར་བཞག་པ་ན། །སྐྱེ་འཆི་མེད་པ་ནམ་མཁའི་ཀློང་ཡངས་སུ། །འཕོ་འགྱུར་མེད་པ་ཆོས་སྐུའི་ལུས་མཐོང་འགྱུར། །སྐྱེ་མེད་རང་སྒྲས་གཉུག་མའི་ངོ་སྤྲོད་དུ། །སྩལ་ནས་བླ་མ་འོད་ཞུ་རང་ལ་ཐིམ། །རང་གི་ལུས་ངག་ཡིད་གསུམ་བླ་མ་ཡི། །རྡོ་རྗེ་གསུམ་པོ་དབྱེར་མེད་རོ་གཅིག་ཅིང་། །ཁྱེར་སོ་སུམ་ལྡན་ལྷུན་གྲུབ་རང་གྲོལ་ལོ། །ཞེས་མོས་གུས་ཀྱི་ནུས་པར་ཐུགས་ཡིད་གཅིག་ཏུ་འདྲེས་པའི་ཆོས་སྐུའི་རང་ངོ་དེ་ཉིད་བཟོ་མེད་དུ་བསྐྱངས་ལ། ཐུན་མཚམས་སུ་སྣང་གྲགས་རྟོག་གསུམ་བླ་མའི་སྐུ་གསུང་ཐུགས་ཀྱི་རོལ་པ་ལམ་དུ་ཁྱེར་བར་བྱའོ། །གཉིས་པ་ལ་གཉིས། །ཡི་དམ་བླ་མའི་རྣལ་འབྱོར་དངོས་དང་། །སྐུ་གསུམ་ལམ་དུ་ཁྱེར་བའོ། །དང་པོ་ནི། །སྟོང་པའི་ངང་ལས་པད་ཉི་བདུད་བཞིའི་སྟེང་། །རང་ཉིད་དགྱེས་པ་རྡོ་རྗེ་སྐུ་

― LT28_Page_0413 ―

^{[མ་དཔེ་གཟིགས་ན་འདིར་གནོན།]}

[Full Size]

མདོག་ནག། ཞལ་བཞི་སྤྱན་གསུམ་ཁྲོ་འཛུམ་ཆགས་པའི་ཉམས། །དབུ་སྐྲ་གྱེན་བརྫེས་སྣ་ཚོགས་རྡོ་རྗེས་མཚན། །གཡས་བརྒྱད་གཡོན་བརྒྱད་བཅུ་དྲུག་ཕྱག་རྣམས་ཀྱི། །ཐོད་པ་བཅུད་ལྡན་བསྣམས་ཤིང་དང་པོ་གཉིས། །བདག་མེད་ནག་མོ་གྲི་ཐོད་འཛིན་ལ་འཁྱུད། །དུར་ཁྲོད་ཆས་གསོལ་གར་གྱི་ཉམས་དང་ལྡན། །ཞབས་བཞི་མདུན་མ་སྐྱིལ་ཀྲུང་ཕྱེད་པའི་གར། །རྒྱབ་མ་གཡས་བརྐྱང་གཡོན་བསྐུམ་སྟབས་ཀྱིས་བཞུགས། །ཡེ་ཤེས་རང་འོད་མེ་ཕུང་འབར་བ་ཡི། །སྤྱི་བོར་སྣ་ཚོགས་པདྨ་འདབ་མ་བཞི། །ཟེའུ་འབྲུ་སྔོན་པོར་ཉི་མའི་དཀྱིལ་འཁོར་ལ། །ངོ་བོ་རྗེ་བཙུན་མར་པ་ལོ་ཙཱ་བ། །རྣམ་པ་རིགས་ཀུན་ཁྱབ་བདག་རྡོ་རྗེ་འཆང་། །ནམ་མཁའི་མདངས་ཅན་ཐབས་ཤེས་ཕྱག་རྒྱ་བསྣོལ། །རྣལ་འབྱོར་དམར་མོར་བདེ་སྟོང་སྙོམས་པར་འཇུག །འདབ་བཞིར་ངོ་བོ་ཐུགས་སྲས་ཀ་ཆེན་བཞི། །རྣམ་པ་ཧེ་རུ་ཀ་དཔལ་སྐུ་རུ་བཞེངས། །ཤར་དུ་གསང་འདུས་ཨིནྡྲ་ནཱི་ལའི་མདངས། །སྔོ་སངས་རེག་བྱ་རྡོ་རྗེ་མ་དང་སྦྱོར། །ལྷོ་རུ་དགྱེས་པ་རྡོ་རྗེ་བུང་བའི་མདོག །བདག་མེད་ལྷ་མོ་རང་འདྲའི་མདངས་ཅན་འཁྱུད། །ནུབ་ཏུ་དུས་ཀྱི་འཁོར་ལོ་འོད་ལྔའི་མདངས། །གསེར་མདོག་སྣ་ཚོགས་ཡུམ་གྱིས་དགྱེས་པར་འཁྲིལ། །བྱང་དུ་དཔལ་ལྡན་མཁའ་འགྲོ་དྲྭ་བ་སྡོམ། །ལྷན་སྐྱེས་གསང་བ་ཡེ་ཤེས་དམར་མོར་རོལ། །ཡབ་རྣམས་རྡོར་དྲིལ་ཡུམ་རྣམས་གྲི་ཐོད་འཛིན། །གཙོ་འཁོར་ཀུན་ཀྱང་གཅེར་བུ་རུས་པ་དང་། །རིན་པོ་ཆེས་བརྒྱན་ཞབས་གཉིས་བརྐྱང་བསྐུམ་

― LT28_Page_0414 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ། །ཡེ་ཤེས་རང་འོད་མཁའ་ཁྱབ་མཁའ་ལ་འབར། །བདེ་སྟོང་དྲྭ་བས་འཁོར་འདས་བརྟན་གཡོ་སྡོམ། །སྒྱུ་འཕྲུལ་ཆེན་པོ་མིག་འཕྲུལ་ཀུན་གྱི་བདག །བླ་མ་ཡི་དམ་ཌཱ་ཀི་ཆོས་སྲུང་ཚོགས། །སྤྲིན་ལྟར་གཏིབས་པའི་གནས་གསུམ་རྡོ་རྗེ་གསུམ། །འོད་འཕྲོས་ཆོས་ཀྱི་དབྱིངས་ནས་ཡེ་ཤེས་པ། །འཁོར་བཅས་སྤྱན་དྲངས་བཛྲ་ས་མཱ་ཛཿ ཨརྒྷཾ་ནས། ཤབྡ་པྲ་ཏཱིཙྪ་སྭཱཱ་ཧཱ། ཛཿཧཱུྃ་བྃ་ཧོཿ དམ་ཚིག་ཡེ་ཤེས་གཉིས་སུ་མེད་པར་གྱུར། །དངོས་པོ་ཀུན་ལས་རྣམ་གྲོལ་ཞིང་། །སྐྱེ་འགགས་རྟག་ཆད་མཐའ་དབུས་དང་། །འགྲོ་འོང་གནས་པ་མི་མངའ་བའི། །ཕྱག་འཚལ་ཆོས་སྐུ་རྡོ་རྗེ་ལའོ། །ཞི་དང་ཁྲོ་བོའི་སྐུར་སྟོན་ཅིང་། །གར་གྱི་ཉམས་དགུ་ལ་སོགས་པས། །འཁོར་གྱི་སེམས་དཔའ་འདུལ་མཛད་པའི། །ཕྱག་འཚལ་ལོངས་སྐུ་རྡོ་རྗེ་ལའོ། །སྐུ་གསུང་ཐུགས་ཀྱི་ཕྲིན་ལས་ཀྱིས། །ཇི་སྲིད་འཁོར་བ་དེ་སྲིད་དུ། །འགྲོ་དོན་མཉམ་དུ་མཛད་པ་པོ། །ཕྱག་འཚལ་སྤྲུལ་སྐུ་རྡོ་རྗེ་ལའོ། །ཆུ་ཀླུང་རྒྱ་མཚོར་འབབས་པ་ལྟར། །སངས་རྒྱས་སྐུ་གསུམ་བདག་ཉིད་ཀྱང་། །ཆོས་ཉིད་རྒྱ་མཚོར་གཤེགས་གྱུར་པའི། །ཕྱག་འཚལ་ངོ་བོ་ཉིད་སྐུ་ལའོ། །མཐོང་ཐོས་དྲན་པ་ཙམ་གྱིས་ཀྱང་། །སྒྲིབ་པའི་ཚོགས་ཀུན་བསལ་གྱུར་ཏེ། །ཡོན་ཏན་རྒྱུད་ལ་སྐྱེད་མཛད་པ། །ཕྱག་འཚལ་དཔལ་ལྡན་བླ་མ་ལའོ། །སངས་རྒྱས་ཀུན་འདུས་བླ་མའི་དྲུང་། །གླིང་བཞི་རི་རབ་བཅས་པ་དང་། །གླིང་བཞི་བྱེ་བ་ཕྲག་བརྒྱ་དང་། །བྱེ་བ་འབུམ་དང་དུང་ཕྱུར་ཏེ། །མཎྜལ་གཅིག་ཏུ་བསྡུས་ནས་ནི། །མོས་

― LT28_Page_0415 ―

^{[མ་དཔེ་གཟིགས་ན་འདིར་གནོན།]}

[Full Size]

བློས་གོང་མ་རྣམས་ལ་འབུལ། །འགྲོ་ཚོགས་སྒོ་གསུམ་ལོངས་སྤྱོད་དང་། །དགེ་ཚོགས་འབུལ་གྱིས་བཞེས་སུ་གསོལ། །ཕྱི་ཡི་མཆོད་པ་སྣ་ཚོགས་དང་། །སྟོང་ཆེན་རྟོགས་པར་བྱེད་པའི་རོ། །དྲི་ཆེན་དྲི་ཆུ་རཀྟ་དང་། །ཁུ་ཀླད་བདེ་ཆེན་འབར་བའི་རོ། །མི་རྟ་ཁྱི་བ་གླང་པོའི་ཤ །ཡེ་ཤེས་བདུད་རྩིར་དག་པ་ཅན། །དཔལ་ལྡན་བླ་མ་མཆོག་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །མཆོད་ལྷ་བླ་མའི་ཡུམ་ལ་ཐིམ། །ཡབ་ཡུམ་གཉིས་མེད་སྦྱོར་བ་ཡིས། །གསང་བ་བདེ་སྟོང་མཆོད་པས་དགྱེས། །མཚར་སྡུག་འོད་དུ་འབར་བར་གྱུར། །ལྟ་བ་འཁོར་འདས་དབྱེར་མེད་ལ། །མ་རིག་དབང་གིས་རིས་སུ་བཟུང་། །གཉིས་མེད་གཉིས་སུ་འཁྲུལ་པ་ཀུན། །སྤྲོས་བྲལ་ཆེན་པོའི་ཀློང་དུ་བཤགས། །སྒོམ་པ་སྣང་སྲིད་ཆོས་སྐུ་ལ། །ཉེ་རིང་བཅོས་མའི་བློ་ཡིས་བསྒྲིབས། །བསྒོམ་འདོད་རྩོལ་བས་བཅིངས་བ་ཀུན། །མ་བཅོས་གཉུག་མའི་ཀློང་དུ་བཤགས། །སྤྱོད་པ་བྱར་མེད་ལྷུན་གྲུབ་ལ། །སྤང་དང་བླང་བྱ་སོ་སོར་འཛིན། །ཨ་འཐས་ཞེན་པའི་རྒྱ་རུ་འཐུམ། །བྱ་བྲལ་བློ་འདས་ངང་དུ་བཤགས། །འབྲས་བུ་སེམས་ཉིད་རིན་ཆེན་གཏེར། །སྤངས་ནས་གཞན་ཏུ་རྩོལ་སྒྲུབ་བྱས། །ཡང་དག་དོན་ལས་གོལ་བ་རྣམས། །བླ་མ་སངས་རྒྱས་སྤྱན་སྔར་བཤགས། །བཤགས་བྱ་བཤགས་བྱེད་མ་མཆིས་ཀྱང་། །ཀུན་རྫོབ་ཙམ་དུ་བཤགས་བགྱིས་བས། །ལྷན་སྐྱེས་ཡེ་ཤེས་བདེ་བ་ཆེ། །འགྲོ་ཀུན་སྙིང་ལ་སད་པར་ཤོག །ཅེས་ཕྱག་མཆོད་བཤགས་པ་བཅས་

― LT28_Page_0416 ―

^{[མ་དཔེ་གཟིགས་ན་འདིར་གནོན།]}

[Full Size]

བྱས་ནས། སླར་ཡང་། འོག་མིན་ཆོས་ཀྱི་དབྱིངས་ཀྱི་སོགས་གོང་ལྟར་ཡན་ལག་བདུན་པའང་བྱའོ། །དེ་ནས་གསོལ་བ་གདབ་པ་ནི། ལ་ལཱ་ར་སཱ་དྷཱུ་ཏིར་དག་པའི་མཐུས། སོགས་རྗེ་བརྒྱད་པའི་གསུང་ཉིད་ཚར་གྲངས་ཇི་ལྟར་རིགས་པའི་མཐར། །ཕུར་ཚུགས་སུ་གསོལ་བ་གདབ་པ་ནི། །བླ་མ་ཆོས་ཀྱི་སྐུ་ལ་གསོལ་བ་འདེབས་སོ། །བླ་མ་ལོངས་སྤྱོད་རྫོགས་པའི་སྐུ་ལ༴ །བླ་མ་སྤྲུལ་པའི་སྐུ་ལ༴ །སྐུ་གསུམ་དབྱེར་མེད་རྡོ་རྗེ་འཆང་ལ༴ །མ་རིག་མུན་སེལ་བླ་མ་རིན་པོ་ཆེ་ལ༴ །དུག་ལྔའི་ནད་སེལ་བླ་མ༴ །དགོས་འདོད་ཀུན་འབྱུང་བླ་མ༴ ཞེས་པ་ཙམ་ཚིག་ཙམ་མ་ཡིན་པའི་མོས་གུས་དྲག་པོས་གསོལ་བ་ནན་ཏན་དུ་གདབ། གཞན་ཡང་། །ཕ་དྲིན་ཅན་རྩ་བའི་བླ་མ་ལ་གསོལ་བ་འདེབས་སོ། །ཁྱབ་བདག་མར་པ་ལོ་ཙཱ་ལ༴ །མཚུར་སྟོན་གསང་བ་འདུས་པ་ལ༴ །དགྱེས་མཛད་ཆོས་སྐུ་རྡོ་རྗེ་ལ༴ །མེས་སྟོན་དུས་ཀྱི་འཁོར་ལོ་ལ༴ །བདེ་མཆོག་བཞད་པ་རྡོ་རྗེ་ལ༴། མཉམ་མེད་དྭགས་པོ་བཀའ་བརྒྱུད་ལ༴ །དུས་གསུམ་བདེ་བར་གཤེགས་པ་ལ༴ །ཡི་དམ་དཀྱིལ་འཁོར་ལྷ་ཚོགས་ལ༴ །གནས་གསུམ་དཔའ་བོ་མཁའ་འགྲོ་ལ༴ །བསྟན་སྲུང་དམ་ཅན་རྒྱ་མཚོ་ལ་གསོལ་བ་འདེབས་སོ། །ཞེས་པ་ལན་གསུམ་གྱི་མཐར། །རྗེ་དུས་གསུམ་གྱི་སངས་རྒྱས་བླ་མ་རིན་པོ་ཆེ། །མགོན་པོ་ཁྱོད་ལ་མཁྱེན་པའི་ཡེ་ཤེས། །བརྩེ་བའི་ཐུགས་རྗེ། མཛད་པའི་ཕྲིན་ལས་རྒྱ་ཆེ་ལ་རྒྱུན་མི་འཆད་པ་མངའ་བ་ལགས་པས་བདག་སོགས་འགྲོ་ཀུན་བློ་ཆོས་དང་མཐུན་པར་བྱིན་གྱིས་བརླབ་ཏུ་གསོལ། །ཆོས་

― LT28_Page_0417 ―

^{[མ་དཔེ་གཟིགས་ན་འདིར་གནོན།]}

[Full Size]

མིན་གྱི་རྣམ་རྟོག་སྐད་ཅིག་ཀྱང་མི་སྐྱེ་བར༴ །ཅི་བྱས་ཆོས་སུ་འགྱུར་བར༴ །བདག་བས་གཞན་གཅེས་རྒྱུད་ལ་སྐྱེ་བར༴ །རྐྱེན་ངན་གྲོགས་སུ་འཆར་བར༴ །ཉོན་མོངས་ལམ་དུ་སློང་བར༴ །སྣང་བ་ཆོས་སྐུར་འཆར་བར༴ །ཆོས་ཐམས་ཅད་ཀྱི་གནས་ལུགས་ཕྱིན་ཅི་མ་ལོག་པ་རྟོགས་པར༴ །བདག་ཅག་གི་རྒྱུད་སྨིན་ཅིང་གྲོལ་བར༴ །སྐུ་བཞིའི་གོ་འཕང་ད་ལྟ་ཉིད་དུ་ཐོབ་སྟེ་ཕྲིན་ལས་ནམ་མཁའ་དང་མཉམ་པས་སེམས་ཅན་ཐམས་ཅད་སྐད་ཅིག་ལ་རྒྱལ་བ་སྐུ་བཞིའི་གོ་འཕང་ལ་འགོད་ནུས་པར་བྱིན་གྱིས་བརླབ་ཏུ་གསོལ། །ཅེས་ལན་ཅི་རིགས་བརྗོད། དེ་ནས་ཐུན་མོང་མ་ཡིན་པའི་ཟབ་དབང་ཞུ་བའི་ཕྱིར་དུ། ཨེ་མའོ་ཨེ་མའོ་ཆོས། །ཨེ་མའོ་ཆོས་ཀྱི་དོན་འབྱུང་བ། །ཆོས་དོན་དག་པ་བདག་མེད་པ། །རྡོ་རྗེ་རྒྱལ་པོར་ཕྱག་འཚལ་འདུད། །ནམ་མཁའི་རྡོ་རྗེ་དེང་བདག་སྩོལ། །གསོལ་བ་བཏབ་པས་འཁོར་རྣམས་འོད་དུ་ཞུ། །གཙོ་བོ་བླ་མ་རྡོ་རྗེ་འཆང་ལ་ཐིམ། །ཁྱབ་བདག་ཡབ་ཡུམ་སྙོམས་འཇུག་བདེ་བའི་སྒྲས། །རྒྱལ་བ་ནམ་མཁའ་གང་བ་སྤྱན་དྲངས་ཏེ། །ཡབ་རྣམས་ཡབ་དང་ཡུམ་རྣམས་ཡུམ་ཞལ་ཞུགས། །དཀར་དམར་བྱང་ཆུབ་སེམས་ཞུ་ཡབ་ཡུམ་གྱི། །སྦྱོར་མཚམས་ནས་བྱོན་རང་གི་ཚངས་བུ་གནས། །ཞུགས་ཏེ་རྩ་ཀུན་ཁྱབ་པས་རྩ་ཁམས་དག །བུམ་པའི་དབང་ཐོབ་འབྲས་བུ་སྐུ་རྡོ་རྗེ། །མངོན་བྱས་ཆུ་ཞབས་སྤྱི་བོར་བརྟེན་པ་ལས། །བླ་མ་ཡབ་ཡུམ་མཚར་སྡུག་འོད་དུ་འབར། །སླར་ཡང་འདོད་ཆགས་སྒྱུ་རྩལ་ཆེན་པོ་ཡིས། །རྡོ་རྗེས་པདྨ་

― LT28_Page_0418 ―

^{[མ་དཔེ་གཟིགས་ན་འདིར་གནོན།]}

[Full Size]

དཀྲུགས་པའི་བྱང་ཆུབ་སེམས། །ཆུ་བོའི་རྒྱུན་བཞིན་བྱོན་ཏེ་མགྲིན་པ་ནས། །ཞུགས་ཤིང་རླུང་ཀུན་ཁྱབ་པས་ལས་རླུང་དག །གསང་བའི་དབང་ཐོབ་འབྲས་བུ་གསུང་རྡོ་རྗེ། །མངོན་བྱས་ཆུ་ལྷག་སྤྱི་བོར་འཕྱུར་བས་དགྱེས། །བླ་མའི་ཡུམ་ལས་ཡུམ་འཕྲོས་རང་ཉིད་ཀྱི། །ཡུམ་ལ་ཐིམ་པ་དེ་དང་སྙོམས་ཞུགས་པས། །སྤྱི་བོའི་ཧཾ་ལས་བྱང་སེམས་འཁོར་ལོ་བཞིར། །རིམ་པར་བབས་པས་དགའ་བཞིའི་ཡེ་ཤེས་མྱོང་། །ནོར་བུའི་རྩེར་བྱིན་སླར་ཡང་གྱེན་ལྡོག་པས། །མས་བརྟན་དགའ་བ་བཅུ་དྲུག་མངོན་ཏུ་བྱས། །གཞོམ་མེད་བདེ་བ་བ་སྤུའི་མཐར་ཐུག་པར། །ཁྱབ་པས་ཐིག་ལེའི་འགྱུར་སྒྲིབ་ཀུན་དག་ནས། །ཤེར་ཡེའི་དབང་ཐོབ་འབྲས་བུ་ཐུགས་རྡོ་རྗེ། །མངོན་བྱས་ཡབ་ཡུམ་དགོངས་པ་བདག་ལ་གཏད། །དཔེ་ལ་བརྟེན་ནས་དོན་གྱི་ཡེ་ཤེས་མཐོང་། །རང་སེམས་གཉུག་མ་ཆོས་སྐུ་རྗེན་པ་རུ། །རྟོགས་པས་ཤེས་བྱའི་སྒྲིབ་པ་ཕྲ་བ་དག །བཞི་པའི་དབང་ཐོབ་ཡེ་ཤེས་རྡོ་རྗེ་ཉིད། །མངོན་བྱས་ཕྱག་མཚན་རྡོར་དྲིལ་གར་སྟབས་བསྒྱུར། །རྡོ་རྗེ་ཐུགས་ཀྱི་དམ་ཚིག་སྤྱི་བོ་སྙིང་། །དྲིལ་བུ་གསུང་གི་དམ་ཚིག་ལྟེ་མགྲིན་དང་། །ཕྱག་རྒྱ་སྐུ་ཡི་དམ་ཚིག་དབུ་མ་རུ། །བརྟན་པར་མཛད་ནས་ཡབ་ཡུམ་འོད་དུ་ཞུ། །རང་ལ་ཐིམ་པས་རང་གི་སྤྱི་བོ་རུ། །རྡོ་རྗེ་འཆང་ལ་བཀའ་བརྒྱུད་བླ་མས་བསྐོར། །མགྲིན་པར་གསང་འདུས་སྙིང་གར་ཧེ་བཛྲ། །ལྟེ་བར་བདེ་མཆོག་གསང་གནས་དུས་འཁོར་ལོ། །བ་སྤུ་དུས་གསུམ་སངས་རྒྱས་ཡན་ལག་རྣམས། །དཔའ་བོ་དཔའ་མོ་ཉིད་ལག་ཆོས་སྐྱོང་བའི། །

― LT28_Page_0419 ―

^{[མ་དཔེ་གཟིགས་ན་འདིར་གནོན།]}

[Full Size]

སྲུང་མའི་ཚོགས་རྣམས་གདོད་ནས་གསལ་བར་བཞུགས། །ཞེས་མོས་ལ་འབྲུ་གསུམ་པོ་ཡིད་བཟླས་སམ་རྡོ་རྗེའི་བཟླས་པ་ཇི་ལྟར་འོས་པ་ཅི་ནུས་སུ་བྱ་ཞིང་། ནུས་ན་བུམ་ཅན་ལ་བརྟེན་པའི་རྡོར་བཟླས་གཙོར་བྱ། །ཡང་བུམ་ཅན་དྲག་ཏུ་དགང་། འབར་འཛག་ལ་སེམས་གཏད། འཁོར་ལོ་ལྔའི་ལྷ་རྣམས་བདེ་བས་ཚིམས་པར་མོས། མཐར་ལྷ་དང་བླ་མ་རང་གི་སྒོ་གསུམ་དབྱེར་མེད་དུ་འདྲེས། སེམས་དུས་གསུམ་གྱི་སྤྲོས་པ་བཅད་ལ་གསལ་སྟོང་འཛིན་མེད་སྤྲོས་པའི་མཐའ་ཐམས་ཅད་དང་བྲལ་བ་མ་བཅོས་གཉུག་མ་ཕྱག་རྒྱ་ཆེན་པོའི་རང་མདངས་ཅི་ནུས་སུ་བསྐྱང་ངོ། །གཉིས་པ་སྐུ་གསུམ་ལམ་ཁྱེར་ལ་གསུམ་ལས། །དང་པོ་སྤྲུལ་སྐུའི་བླ་མའི་རྣལ་འབྱོར་ནི། །རང་ལུས་བཅོམ་ལྡན་དགྱེས་པ་རྡོ་རྗེའི་སྐུ། །སྣང་ལ་རང་བཞིན་མེད་པའི་ཐུགས་ཀ་རུ། །སེང་ཁྲི་པད་ཉི་ཟླ་བའི་གདན་གྱི་སྟེང་། །དཔལ་ལྡན་བླ་མ་སྤྲུལ་སྐུ་ཤཱཀྱ་ཐུབ། །གསེར་མདོག་ས་གནོན་མཉམ་གཞག་ཕྱག་རྒྱ་ཅན། །ཆོས་གོས་གསུམ་གསོལ་རྡོ་རྗེའི་སྐྱིལ་ཀྲུང་བཞུགས། །གནས་གསུམ་འབྲུ་གསུམ་འོད་འཕྲོས་སྐལ་བཟང་གི། །སངས་རྒྱས་སྟོང་སོགས་སྤྲུལ་སྐུ་སྤྱན་དྲངས་ཐིམ། །ཞེས་མོས་ལ་མ་ནམ་བཞི་སྐོར་གྱི་སྤྲུལ་སྐུའི་གསོལ་འདེབས་གཅིག་པོ་ཅི་ནུས་བཟླས་ལ། མཐར། བཅོམ་ལྡན་ཤཱཀ་ཐུབ་འོད་ཞུ་རང་ལ་ཐིམ། དེ་ཡིས་ཚུལ་ཁྲིམས་གཙང་ཞིང་བསྟན་འགྲོའི་དོན་འབྱུང་བའི་རྟེན་འབྲེལ་འགྲིགས་པ་ཡིན་ནོ། །གཉིས་པ་ལོངས་སྐུ་བླ་མའི་རྣལ་འབྱོར་ནི། །ཚིག་རྐང་དང་པོ་གསུམ་སྔར་ལྟར་ལ། །སེང་ཁྲི་པདྨ་ཟླ་བའི་གདན་གྱི་སྟེང་། །དཔལ་ལྡན་བླ་མ་ལོངས་སྐུ་རྣམ་སྣང་མཛད། །དཀར་པོ་བྱང་ཆུབ་མཆོག་གི་ཕྱག་རྒྱ་ཅན། །དར་དང་རིན་ཆེན་རྒྱན་ལྡན་སྐྱིལ་ཀྲུང་

― LT28_Page_0420 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས། །གནས་གསུམ་འཐུ་གསུམ་འོད་འཕྲོས་རིགས་ལྔ་སོགས། །རྒྱལ་བ་ལོངས་སྐུ་ཐམས་ཅད་སྤྱན་དྲངས་ཐིམ། །མ་ནམ་བཞི་སྐོར་ལས་ལོངས་སྐུའི་གསོལ་འདེབས་བཟླ། །རྣམ་སྣང་འོད་ཞུ་རང་ལ་ཐིམ་པར་གྱུར། ཞེས་བསྒོམས་པས་ས་ནོན་ཞིང་སྡོད་ཚུགས། ཚེ་རིང་ཞིང་བདེ་སྟོང་གི་ཡེ་ཤེས་སྐྱེ་བའི་རྟེན་འབྲེལ་འགྲིག་གོ། །གསུམ་པ་ཆོས་སྐུ་བླ་མའི་རྣལ་འབྱོར་ནི། ཚིག་རྐང་གསུམ་ལོངས་སྐུ་ལྟར་ལ། དཔལ་ལྡན་བླ་མ་ཆོས་སྐུ་རྡོ་རྗེ་འཆང་། །རྒྱན་ཆས་ཡོངས་རྫོགས་ནམ་མཁའ་དང་བའི་མདོག །རྡོར་དྲིལ་བསྣོལ་འཛིན་ཞབས་གཉིས་སྐྱིལ་ཀྲུང་བཞུགས། །གནས་གསུམ་འབྲུ་གསུམ་མཚན་ལས་འོད་འཕྲོས་པས། །ཆོས་སྐུའི་སངས་རྒྱས་ཐམས་ཅད་སྤྱན་དྲངས་ཐིམ། །མ་ནམ་བཞི་སྐོར་ལས་ཆོས་སྐུའི་གསོལ་འདེབས་བྱ་སྟེ། །གསོལ་འདེབས་དེ་རྣམས་རྒྱང་འབོད་ཚུལ་དུ་གྲུབ་ན་ལེགས། །བླ་མ་འོད་ཞུ་རང་སེམས་དབྱེར་མེད་གྱུར། ཞེས་མོས་ལ་གང་ཤར་གྱི་རང་ངོར་བཅོས་བསླད་མེད་པར་ཀློང་ནས་བཞག་པས་རིག་པ་དྭངས་སྙིགས་ཕྱེད་ཅིང་གསལ་སྟོང་རྗེན་པའི་ཉམས་རྟོགས་འཆར་བར་འགྱུར་རོ། །གསུམ་པ་ལ་བཞི། རང་དོན་ཏུ་སྒྲུབ་ཅིང་མཆོད་ལ་བདག་ཉིད་འཇུག་པ་དང་། གཞན་དོན་སློབ་མ་རྗེས་སུ་བཟུང་བ་དང་། རྗེས་ཀྱི་ཆོ་ག་བྱ་བ། འཕྲོས་དོན་ཅུང་ཟད་སྨོས་པའོ། །དང་པོ་ནི། སྦྱོར་བ་གནས་གཙང་ཞིང་བཀོད་པས་མཛོམ་ན་རས་བྲིས་ཀྱི་དཀྱིལ་འཁོར་བཀྲམ། མ་འཛོམ་ན་མཎྜལ་ལ་འབྲུའི་ཚེམ་བུ་ལྔ་བཀོད་པའི་ཁར་སྤྲོས་བཅས་བྱེད་ན་བུམ་པ་མགུལ་ཆིངས་རྫས་ལྡན་བཀོད་པའི་ཁར་ཐོད་པའི་བདུད་རྩི་དང་། དབུ་རྒྱན་རྡོར་དྲིལ་རིག་ཙག་སོགས་ཅི་བདེར་བཞག །འབུལ་གཏོར་ལྔ་ཚར། ཕྱི་མཆོད་ཆུ་གཉིས་དང་། །ཉེར་་སྤྱོད་འབྱོར་ནས་ལྔ་བསྐོར། །

― LT28_Page_0421 ―

^{[མ་དཔེ་གཟིགས་ན་འདིར་གནོན།]}

[Full Size]

མ་འབྱོར་ན་ཆ་གཅིག་ཕྲེང་ཚར་དུ་བཤམ། སྔོན་གཏོར་ཚོགས་ཀྱི་ཡོ་བྱད། མིག་དང་མེ་ཏོག །ཌ*ཌཱ་དྲི*་སོགས་ཉེར་མཁོའི་ཡོ་བྱད་འཚོགས་པར་བྱས་ལ། སྐྱབས་སེམས་སྔོན་ཏུ་འགྲོ་བས་བདག་གི་རྣལ་འབྱོར་ནི། ཨོཾ་སྭ་བྷཱ་བ་ཤུངྡྷཿསརྦ་དྷརྨཱཿསྭབྷཱ་བ་ཤུངྡྷོ྅ཧཾ། །སྟོང་ལས་ཆོས་འབྱུང་འབྱུང་བ་རིམ་བརྩེགས་རི། །པདྨ་སྲུང་འཁོར་སྣ་ཚོགས་རྡོ་རྗེའི་གཞིར། །ཡེ་ཤེས་གཞལ་ཡས་མཚན་ཉིད་རྫོགས་པའི་ནང་། །སྣ་ཚོགས་པདྨ་འདབ་ལྔའི་ལྟེ་བ་རུ། །སེང་ཁྲི་པདྨ་ཟླ་ཉིའི་གདན་གྱི་སྟེང་། །སེམས་ཉིད་རྒྱུ་དུས་བླ་མ་ཀུན་ཏུ་བཟང་། །ཐུགས་རྗེའི་དབང་གིས་སྲིད་གསུམ་དོན་མཛད་ཕྱིར། །ཧཱུྃ་ལས་འབྲས་བུའི་བླ་མ་རྡོ་རྗེ་འཆང་། །མཐིང་སྔོན་ཞི་འཛུམ་རལ་པའི་ཐོར་ཚུགས་ལ། །སྣ་ཚོགས་རྡོ་རྗེ་ཟླ་བ་ཕྱེད་པས་སྤྲས། །ཕྱག་གཉིས་རྡོ་རྗེ་དྲིལ་འཛིན་ཡུམ་ལ་འཁྱུད། །རིན་ཆེན་རྒྱན་དང་ཕྱག་རྒྱ་དྲུག་གིས་སྤྲས། །དར་གྱི་གོས་གསོལ་རྡོ་རྗེ་སྐྱིལ་ཀྲུང་བཞུགས། །སྙེམས་མ་དམར་མོ་གྲི་ཐོད་འཛིན་པས་འཁྱུད། །མདུན་ནས་གཡས་བསྐོར་གྱད་དང་གླང་ཆེན་རྟ། །རྨ་བྱ་ཤང་ཤང་པད་ཉིའི་ཁྲི་གདན་སྟེང་། །གཙོ་བོའི་དབྱིངས་ལས་ཨོཾ་ཧཱུྃ་ཏྲཱྃ་ཧྲཱིཿཨཱཿ། འཕྲོས་པ་ཡོངས་གྱུར་རྣམ་སྣང་མི་བསྐྱོད་པ། །རིན་འབྱུང་མཐའ་ཡས་དོན་གྲུབ་ཡབ་ཡུམ་རྣམས། །དཀར་སྔོ་སེར་དམར་ལྗང་གུའི་ཁ་དོག་ཅན། །ཡབ་རྣམས་རྡོར་དྲིལ་ཡུམ་རྣམས་གྲི་ཐོད་འཁྱུད། །འཁོར་ལོས་སྒྱུར་བའི་ཆས་ལྡན་སྐྱིལ་ཀྲུང་བཞུགས། །ཐམས་ཅད་ཡེ་ཤེས་རང་འོད་མུ་མེད་འཕྲོ། །སྤྱི་མགྲིན་ཐུགས་ཀར་

― LT28_Page_0422 ―

^{[མ་དཔེ་གཟིགས་ན་འདིར་གནོན།]}

[Full Size]

ཨོཾ་ཨཱཿཧཱུྃ་གིས་མཚན། །འོད་འཕྲོས་བླ་མ་ཡེ་ཤེས་འཁོར་ལོ་ལ། །དཔའ་བོ་རྣལ་འབྱོར་མས་བསྐོར་སྤྱན་དྲངས་གྱུར། ཕེ༚། ཛཿཧཱུྃ་བྃ་ཧོཿདམ་ཡེ་་གཉིས་མེད་གྱུར། ཐུགས་ཀར་ཉི་མ་ལ་ཧཱུྃ་ཡིག་སྔོན་པོ་གསལ། །རིགས་ལྔ་ལ་སོ་སོའི་ས་བོན་དང་དེ་དག་ལས་འོད་ཟེར་འཕྲོ་འདུས་དོན་གཉིས་བྱས་པར་མོས་ལ། ཨོཾ་བཛྲ་གུ་རུ་ཌཱ་ཀི་ནཱི་སིངྡྷི་ཧཱུྃ། ཞེས་བཟླ། སྤྲོ་ན་ཕྲ་ཐིག་གི་རྣལ་འབྱོར་སྤྱི་ལྟར་བསྒོམ། དེ་ནས་མདུན་བསྐྱེད་སྒྲུབ་ཅིང་མཆོད་པ་ནི། རྡོ་རྗེ་བླངས་ལ། ཨོཾ་མ་ཧཱ་བཛྲ་ཧཱུྃ། དྲིལ་བུ་བླངས་ལ། ཨོཾ་བཛྲ་གྷཱཎྚེ་ཨཱཿཐལ་མོ་མཉམ་པར་སྦྱར། སྔོན་གཏོར། ཨོཾ་ཨཱཿཧཱུྃ་གིས་བྱིན་བརླབ། ཨོཾ་ཨ་ཀཱ་རོ་ལན་གསུམ་གྱིས་བསྔོས་ལ། ཧཱུྃ་ང་ནི་དཔལ་ལྡན་སྙིང་རྗེའི་སྟོབས། །སྲུང་བའི་འཁོར་ལོ་རབ་སྦྱོར་བས། །ལུས་སྲུལ་ལ་སོགས་གང་ཡང་རུང་། །བགེགས་ཀྱི་ཚོགས་རྣམས་གཞན་ཏུ་དེངས། །ཅི་སྟེ་ངས་བསྒོ་སུ་ཞིག་འདའ། །རྡོ་རྗེའི་བདག་པོའི་བཀའ་ཡིས་ནི། །ལུས་སྲུལ་ལ་སོགས་འགས་བྱ་སྟེ། །འདིར་ནི་བརླག་འགྱུར་གཞན་ཏུ་མིན། ཧཱུྃ་བཞིའི་སྔགས་ཀྱིས་བསྐྲད་ལ་གཏོར་མ་དོར། བཛྲ་རཀྵ་རཀྵ། ཞེས་པས་སྲུང་འཁོར་བསྒོམ། མཆོད་རྫས་རྣམས། སྭ་བྷཱ་བས་སྦྱང་། སྟོང་པའི་ངང་ལས་མཆོད་རྫས་ཡེ་ཤེས་ཀྱི། །རང་བཞིན་ཀུན་བཟང་རྣམ་འཕྲུལ་ལས་བྱུང་བ། །ཟག་མད་བདེ་བསྐྱེད་ནམ་མཁའི་མཐའ་དང་མཉམ། །འཁོར་བ་མ་སྟོང་བར་དུ་འབྱུང་གྱུར་ཅིག །ཨོཾ་ཨཱཿབཛྲ་པུཥྤེ་ཧཱུྃ་ནས། ཤབྡ་ཧཱུྃ་གི་བར་གྱིས་བྱིན་བརླབ། མདུན་རྟེན་དཀྱིལ་འཁོར། སྭ་བྷཱ་བས་སྦྱང་། སྟོང་

― LT28_Page_0423 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ཆོས་འབྱུང་ཞེས་པ་ནས། ཟླ་ཉིའི་གདན་གྱི་སྟེང་། །རྒྱུ་དུས་བླ་མ་ཁྱབ་བདག་ཀུན་ཏུ་བཟང་། ཞེས་བསྒྱུར་ལ། སྤྱན་དྲངས་གྱུར། ཕེ༚་ཞེས་པའི་བར་གོང་ལྟར་བརྗོད་ཅིང་བསྒོམས་ལ། ཧཱུྃ་འགྲོ་མགོན་ཐུགས་རྗེའི་སྤྱན་ལྡན་རྣམས། །ཆོས་སྐུ་སྤྲོས་དང་བྲལ་བ་ལས། །གཟུགས་སྐུའི་རྣམ་པར་བཞེངས་ནས་ཀྱང་། །འགྲོ་བའི་དོན་ཏུ་གཤེགས་སུ་གསོལ། །ཨོཾ་གུ་རུ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ི་ཀཱཧོཿ ས་མ་ཡ་ཛཿ ས་མ་ཡ་སྟཾ། ཛཿཧཱུྃ་བྃ་ཧོཿ ཞེས་དམ་ཚིག་པ་ལ་བསྟིམ། སླར་ཡང་ཐུགས་ཀའི་འོད་ཀྱིས་དབང་གི་ལྷ། །སྤྱན་དྲངས་བདུད་རྩིའི་རྒྱུན་གྱིས་དབང་བསྐུར་བས། །སྐུ་གང་སྒྲིབ་དག་ཆུ་ལྷག་ཡར་ལུད་པས། །གཙོ་འཁོར་ཀུན་ལ་རྡོར་སེམས་དབུ་བརྒྱན་གྱུར། །ཨོཾ་གུ་རུ་སརྦ་ཏ་ཐཱ་ག་ཏ་བྲ་བར་སཧྐ་ར་མ་ཧཱ་ཨརྠི་ཨརྒྷཾ་པྲ་ཏཱི་ཙྪ་ཧཱུྃ་སྭཱ་ཧཱ། ཨོཾ་གུ་རུ་སརྦ་ཏ་ཐཱ་ག་ཏ་མཧཱ་པཱ་དྱཾ་པྲ་ཏཱི་ཙྪ་ཧཱུྃ་སྭཱ་ཧཱ། ཨོཾ་གུ་རུ་སརྦ་ཏ་ཐཱ་ག་ཏ་པདྨ་ཀ་མ་ལཱ་ཡ་སྟྭཾ། ཞེས་དབང་བསྐུར་རྒྱས་གདབ་པ་དང་ཆུ་གཉིས་ཕུལ་ལ་བཞུགས་སུ་གསོལ། དེ་ནས་ཕྱག་བྱ་བ་ནི། གང་གིས་འཁོར་བའི་ཉེས་པ་ནི། །དྲན་པ་ཙམ་གྱིས་འཇོམས་མཛད་ཅིང་། །བླ་མེད་བྱང་ཆུབ་འཐོབ་མཛད་པའི། །བླ་མ་རྣམས་ལ་ཕྱག་འཚལ་ལོ། །གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །དེ་ནས་མཆོད་པས་གཉིས་འབུལ་བ་ནི། ཧཱུྃ་ཡན་ལག་བརྒྱད་ལྡན་དྲི་མ་མེད་པའི་ཆབ། །བཀྲ་ཤིས་སྣ་ཚོགས་འོ་མའི་ཆུ་རྒྱུན་གྱིས། །རྒྱལ་

― LT28_Page_0424 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཞལ་ལ་ཞལ་བསིལ་འདི་ཕུལ་བས། །འགྲོ་ཀུན་བཀྲ་ཤིས་ཕུན་སུམ་ཚོགས་པར་ཤོག། སྤོས་དང་ཙནྡན་ལ་སོགས་སྦྱར་བ་ཡི། །ལས་ཀུན་བྱེད་པའི་ཆུ་གཙང་དམ་པ་ཡིས། །རྒྱལ་བའི་ཞབས་ལ་ཞབས་བསིལ་འདི་ཕུལ་བས། །འགྲོ་ཀུན་གློ་བུར་དྲི་མ་དག་པར་ཤོག །ཆུ་སྐྱེས་ཐང་སྐྱེས་ཡིད་ལས་གྱུར་པ་ཡི། །བྱང་ཆུབ་ཡན་ལག་མཛེས་པའི་མེ་ཏོག་འདི། །སྦྱིན་པའི་རང་བཞིན་རྒྱལ་བའི་དབུ་ལ་འབུལ། །འགྲོ་ཀུན་འབྱོར་བ་ཕུན་སུམ་ཚོགས་པར་ཤོག །ལྷན་ཅིག་སྐྱེས་དང་ཡོངས་སུ་སྦྱར་བ་ཡི། །རབ་ཏུ་ཚིམས་བྱེད་བདུག་སྤོས་དམ་པ་འདི། །ཚུལ་ཁྲིམས་རང་བཞིན་རྒྱལ་བའི་ཤངས་ལ་འབུལ། །འགྲོ་ཀུན་དལ་འབྱོར་ཡོན་ཏན་རྫོགས་པར་ཤོག །གསལ་ཞིང་མིག་ལ་མཛེས་པར་སྣང་བ་ཡི། །མ་རིག་མུན་སེལ་སྣང་བྱེད་སྒྲོན་མེ་འདི། །བཟོད་པའི་རང་བཞིན་རྒྱལ་བའི་སྤྱན་ལ་འབུལ། །འགྲོ་ཀུན་མཚན་དང་དཔེ་བྱད་རྫོགས་པར་ཤོག །ཙནྡན་ག་བུར་གུར་གུམ་ལ་སོགས་པའི། །རྣམ་མང་དྲི་ཞིམ་བྱུགས་པ་དམ་པ་འདི། །བརྩོན་འགྲུས་རང་བཞིན་རྒྱལ་བའི་ཐུགས་ལ་འབུལ། །འགྲོ་ཀུན་ཡོན་ཏན་གོང་དུ་འཕེལ་བར་ཤོག །རོ་མཆོག་བརྒྱ་དང་ལྡན་པའི་ཞལ་ཟས་མཆོག །ཕུན་ཚོགས་ཐམས་ཅད་འབྱུང་བ་བདུད་རྩིའི་རིགས། །བསམ་གཏན་རང་བཞིན་རྒྱལ་བའི་ལྗགས་ལ་འབུལ། །འགྲོ་ཀུན་ཏིང་འཛིན་ཟས་ཀྱིས་འཚོ་བར་ཤོག །ཡན་ལག་ལྔ་ལྡན་རོལ་མོ་སིལ་སྙན་འདི། །ཤེས་རབ་རང་བཞིན་རྒྱལ་བའི་སྙན་ལ་འབུལ། །བསོད་ནམས་

― LT28_Page_0425 ―

^{[མ་དཔེ་གཟིགས་ན་འདིར་གནོན།]}

[Full Size]

འདི་ཡིས་ཟག་མེད་ཆོས་རྣམས་ཀུན། །འགྲོ་བ་ཀུན་གྱི་རྒྱུད་ལ་འཆར་བར་ཤོག །ཨོཾ་གུ་རུ་སརྦ་ཏ་ཐཱ་ག་ཏ་བཛྲ་ཨརྒྷཾ་བཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནེ་བིདྱ་ཤབྡ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྦ་ར་་ས་མ་ཡེ་ཨཱཿཧཱུྃ། །དབང་པོ་ཚིམས་བྱེད་འདོད་པའི་ཡོན་ཏན་ལྔ། །ཕུན་སུམ་ཚོགས་པ་མཆོག་གི་ལོངས་སྤྱོད་རྣམས། །ཐབས་ཀྱི་རང་བཞིན་རྒྱལ་བ་རྣམས་ལ་འབུལ། །འགྲོ་ཀུན་ཟག་མེད་ཕུང་པོ་ལྔ་ཐོབ་ཤོག །སྔགས་ཐོག་མཐའ་འདྲ་བ་ལས། བཛྲ་དཱུ་བ་ཤབྡ་གནྡྷེ་རཱ་སསྦརྴེ་ཀཱ་མ་གུ་། ཞིང་སྐྱེས་སྔགས་སྐྱེས་རང་བཞིན་ལྷན་ཅིག་སྐྱེས། །ཡིད་ལས་བྱུང་བ་སྤྲུལ་པའི་ལྷ་མོའི་ཚོགས། །སྟོབས་ཀྱི་རང་བཞིན་རྒྱལ་བའི་གཟུངས་མར་འབུལ། །འགྲོ་བ་ཀུན་གྱི་བདེ་བ་མཆོག་ཐོབ་ཤོག །བཛྲ་སརྦ་མུ་དྲ། རྒྱལ་བའི་ཡོན་ཏན་མ་ལུས་དགེ་བའི་ཚོགས། །དད་པའི་ཡིད་ཀྱིས་བསྐུལ་ཞིང་བརྗོད་པ་འདི། །སྨོན་ལམ་རང་བཞིན་རྒྱལ་བའི་སྙན་ལ་འབུལ། །འགྲོ་ཀུན་སངས་རྒྱས་ཡོན་ཏན་ཐོབ་པར་ཤོག །བཛྲ་སྟུ་ཏི་གཱི་ཏཾ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །ཡང་དག་པར་ནི་མཉམ་པར་བཞག་པའི་དོན། །ཡེ་ཤེས་རང་བཞིན་རྒྱལ་བའི་ཐུགས་ལ་འབུལ། །འགྲོ་བ་ཀུན་གྱིས་ཆོས་ཉིད་དོན་རྟོགས་ཤོག །དེ་ནས་བསྟོད་པ་བྱ་སྟེ། ཧཱུྃ། །སྐྱེས་མཆོག་ཁྱེད་ཀྱི་སྤངས་པ་དང་། །ཡེ་ཤེས་ཆེ་བའི་བདག་ཉིད་ལ། །སངས་རྒྱས་ལྔ་རུ་གྲགས་པ་སྟེ། །ཕྱག་འཚལ་དཔལ་ལྡན་བླ་མ་ལའོ། །གཏི་མུག་ཆོས་དབྱིངས་ཡེ་ཤེས་ཆེ། །

― LT28_Page_0426 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱིངས་ཕྱུག་མ་དང་རྣམ་རོལ་ཞིང་། །གཟུགས་ཀྱི་ཕུང་པོ་རྣམ་དག་པ། །ཕྱག་འཚལ་རྣམ་པར་སྣང་མཛད་ལའོ། །ཞེ་སྡང་མེ་ལོང་ཡེ་ཤེས་ཆེ། །མ་མཱ་ཀི་དང་རྣམ་རོལ་ཞིང་། །རྣམ་ཤེས་ཕུང་པོ་རྣམ་དག་པ། །ཕྱག་འཚལ་མི་བསྐྱོད་རྡོ་རྗེ་ལའོ། །ང་རྒྱལ་མཉམ་ཉིད་ཡེ་ཤེས་ཆེ། །སངས་རྒྱས་སྤྱན་དང་རྣམ་རོལ་ཞིང་། །ཚོར་བའི་ཕུང་པོ་རྣམ་དག་པ། །ཕྱག་འཚལ་རིན་ཆེན་འབྱུང་ལྡན་ལའོ། །འདོད་ཆགས་ཀུན་རྟོག་ཡེ་ཤེས་ཆེ། །གོས་དཀར་མོ་དང་རྣམ་རོལ་ཞིང་། །འདུ་ཤེས་ཕུང་པོ་རྣམ་དག་པ། །ཕྱག་འཚལ་སྣང་བ་མཐའ་ཡས་ལའོ། །ཕྲག་དོག་བྱ་གྲུབ་ཡེ་ཤེས་ཆེ། །དམ་ཚིག་སྒྲོལ་དང་མཉམ་རོལ་ཞིང་། །འདུ་བྱེད་ཕུང་པོ་རྣམ་དག་པ། །ཕྱག་འཚལ་དོན་ཡོད་གྲུབ་པ་ལའོ། །རྣམ་དག་ཡེ་ཤེས་ལྔ་དང་ལྡན། །ཕུང་པོ་ལྔ་ལ་རྣམ་རོལ་ཞིང་། །ཐབས་ཤེས་ཟུང་འཇུག་རྡོ་རྗེའི་སྐུ། །ཕྱག་འཚལ་ཀུན་འདུས་རྡོ་རྗེ་ལའོ། །དེ་ནས་སྡིག་པ་བཤགས་པ་སོགས་ཡན་ལག་ལྷག་མ་རྣམས་སྤྲོ་ན་གཞན་ནས་འབྱུང་བ་ལྟར་ལ། བསྡུ་ན། འོག་མིན་ཆོས་ཀྱི་དབྱིངས་ཀྱི་སོགས་ནས། །སྐུ་གསུམ་དབྱེར་མེད་འཆར་བར་བྱིན་གྱིས་རློབས། བར་བྱས། མདུན་བསྐྱེད་ལ་དམིགས་ཏེ་བསྙེན་པ་ཅི་འགྲུབ་བཟླ། དེ་ནས་བུམ་ཐོད། སྭ་བྷཱ་བས་སྤྱང་། སྟོང་ལས་བུམ་ཐོད་མཚན་ཉིད་ཡོངས་རྫོགས་པའི། །འོག་གི་ཆ་ལ་བདུད་རྩིའི་རྒྱ་མཚོ་འཁྱིལ། །དེ་དབུས་རབ་རྒྱས་པདྨའི་སྡོང་པོའི་རྩེར། །ཡེ་ཤེས་གཞལ་ཡས་སོགས་ནས་རྡོར་སེམས་དབུ་བརྒྱན་གྱུར། །བར་མདུན་བསྐྱེད་སྐབས་ལྟར་བྱ། དེ་ནས་

― LT28_Page_0427 ―

^{[མ་དཔེ་གཟིགས་ན་འདིར་གནོན།]}

[Full Size]

སྔགས་ཙམ་གྱིས་མཆོད། །ཆོས་སྐུ་ནམ་མཁའ་སོགས་ཀྱིས་བསྟོད། །སྔགས་ཀྱི་འོད་ཟེར་གཟུངས་ཐག་འཁྲིལ་ནས་སོང་། །ཐོད་པའི་ལྷར་ཕོག་འོད་ཞུ་བདུད་རྩིའི་རྒྱུན། །བུམ་ལྷར་ཐིམ་པས་བུམ་ལྷ་ཡེ་ཤེས་ཀྱི། །བདུད་རྩིར་ཞུ་བས་བུམ་པ་ཁེངས་པར་གྱུར། །ཞེས་མོས་ལ་སྔགས་བཟླ། ལས་བུམ་སུམྦྷ་ནིའི་སྔགས་ཀྱིས་བྱིན་བརླབ། །དེ་ནས་བདག་ཉིད་འཇུག་པ་ནི། ཁྲུས་བྱས། མཎྜལ་ལམ་ཟབ་མོ་བླ་མའི་དཀྱིལ་འཁོར་དུ་འཇུག་ཅིང་དབང་བཞི་རྫོགས་པར་ཞུ་བའི་ཡོན་ཏུ་འབུལ། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་མགོན་ལ་བདག་སྐྱབས་མཆི། །གཙོ་བོ་མཁའ་འགྲོ་མར་བཅས་པའི། །ལྷ་རྣམས་ཀུན་ལ་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་གསོལ་བ་ལན་གསུམ་གདབ། ཨོཾ་ཨཱཿཧཱུྃ་གིས་མིག་དར་བཅིང་། །དཀོན་མཆོག་གསུམ་ལ་བདག་སྐྱབས་མཆི། སོགས་ཀྱིས་རྒྱུད་སྦྱང་། །ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། ཞེས་ཐམས་ཅད་རྣལ་འབྱོར་དུ་སེམས་བསྐྱེད། ཨོཾ་སུ་ར་ཏེ་ས་མ་ཡ་སྟཾྭ་ཧོཿསིངྡྷི་བཛྲ་ཡ་ཐཱ་སུ་ཁཾ་གིས་བརྟན་པར་བྱས། ཨོཾ་ཨཱཿཁཾ་བཱི་ར་ཧཱུྃ། ལན་གཉིས་ཀྱིས་མེ་ཏོག་བཟུང་ལ་དཀྱིལ་འཁོར་དུ་བཅུག །སློབ་མ་རྒྱུ་དུས་བྱང་ཆུབ་སེམས་ཀྱི་རང་བཞིན་རྡོ་རྗེ་འཆང་དུ་གྱུར། །བླ་མ་དཀྱིལ་འཁོར་གྱི་གཙོ་བོའི་ཐུགས་ཀ་ནས་སྐུ་གསུང་ཐུགས་ཡེ་ཤེས་རྡོ་རྗེའི་རང་བཞིན་གྱི་འོད་ཟེར་སྣ་ཚོགས་པ་སློབ་མའི་ལུས་བཞུགས་པས་ཟུང་འཇུག་འབྲས་བུའི་བླ་མ་རིགས་ཐམས་ཅད་ཀྱི་ཁྱབ་བདག་དང་དབྱེར་མི་

― LT28_Page_0428 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱེད་པར་གྱུར། ཨོཾ་བཛྲ་ཨཱ་བེ་ཤ་ཡ་ཨ་ཨཱཿགུ་གུལ་ཟླ་མཚན་འདྲེས་པ་བསྲེག །རོལ་མོའི་སྒྲ་དྲག་པོ་བཅས་བྱིན་དབབ། །ཏིཥྛ་བཛྲ་ས་བརྟན་པར་བྱ། པྲ་ཏཱིཙྪ་བཛྲ་ཧོཿས་སློབ་དཔོན་གྱི་སྐུ་ལུས་ལ་མེ་ཏོག་དོར་བས་གནས་ལྔ་སོ་སོའི་རིགས་ངེས་པར་བྱ། །པྲ་ཏི་གྲྀཧྞ་སྟཾྭ་ཨི་མཾ་སཏྭ་མ་ཧཱ་བ་ལ། ཞེས་པས་ཕྲེང་བ་སྦྱིན། ཨོཾ་ཨཱཿཧཱུྃ་གིས་མིག་དར་དབྱེ། རིག་པའི་དབང་ལྔའི་དོན་ཏུ་མཎྜལ་ཕུལ། །བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་གསོལ་བ་གདབ། །སློབ་མ་དང་དབང་རྫས་བུམ་ཆུ་ལས་བུམ་གྱི་དྲིའི་ཆུས་བསད། །སྭ་བྷཱ་བ་སོགས་ཀྱིས་སྦྱང་། སྟོང་ལས་པད་ཉིར་སློབ་མ་དབང་གི་རྫས། །ཧཱུྃ་ཡིག་སྔོན་པོ་སོ་སོར་ཡོངས་གྱུར་ལས། །མི་བསྐྱོད་རྡོ་རྗེ་འཆང་ཆེན་སྐུ་མདོག་སྔོ། །རྒྱན་རྫོགས་རྡོ་རྗེ་དྲིལ་འཛིན་སྐྱིལ་ཀྲུང་བཞུགས། །ཐུགས་ཀའི་ས་བོན་འོད་ཀྱིས་ཡེ་ཤེས་པ། ཛཿཧཱུྃ་བཾ་ཧོཿདབང་རྫས་རྡོ་རྗེ་འཆང་། །འོད་དུ་ཞུ་བ་བུམ་པའི་བདུད་རྩིར་གྱུར། །དཀྱིལ་འཁོར་དེ་བཞིན་གཤེགས་རྣམས་དགོངས་པ་མཛད། །རིག་པའི་ལྷ་མོ་རྣམས་ཀྱིས་དབང་བསྐུར་ཞིང་། །དབང་ཡུལ་སེམས་དཔའ་སེམས་མས་བཀྲ་ཤིས་བརྗོད། །ལས་དབང་ཁྲོ་བོ་ཁྲོ་མོས་བགེགས་བསྐྲད་གྱུར། །བུམ་པས་དབང་བསྐུར་བུམ་ཆུ་སྦྱིན་ལ། །རྡོ་རྗེ་ཆེན་པོས་དབང་བསྐུར་བས། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་བཛྲ་ཨ་

― LT28_Page_0429 ―

^{[མ་དཔེ་གཟིགས་ན་འདིར་གནོན།]}

[Full Size]

བྷི་ཥིཉྩ་མི། ཅོད་པན་བསང་སྦྱང་། སྭ་བྷཱ་བ་སོགས་གོང་ལྟར་ལ། ཏྲཱྃ་ཡིག་སེར་པོ་སོགས་དང་། རིན་འབྱུང་རྡོ་རྗེ་འཆང་ཆེན་སྐུ་མདོག་སེར། ཞེས་དང་། འོད་དུ་ཞུ་བ་རིན་ཆེན་དབུ་རྒྱན་གྱུར། སོགས། རལ་པའི་ཐོར་ཚུགས་ཀྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་གི་དབུ་རྒྱན་དང་། །དར་དབྱངས་དབང་བསྐུར་སྦྱིན་པར་བྱ། ཨོཾ་རཏྣ་ཨ་བྷི་ཥིཉྩཱ་མཱི། །མགོལ་བཀོན། རྡོ་རྗེ་བསང་སྦྱང་བ་སོགས་གོང་ལྟར། ཧྲཱི་ཡིག་དམར་པོ། །མཐའ་ཡས་རྡོ་རྗེ་འཆང་ཆེན་སྐུ་མདོག་དམར། ཞེས་དང་། འོད་དུ་ཞུ་བ་རྡོ་རྗེ་རྩེ་ལྔར་གྱུར། །སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ནི་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་པདྨ་ཨ་བྷི་ཥིཉྩཱ་མི། ལག་གཡས་པར་གཏད། དྲིལ་བུ་བསང་སྦྱང་བ་ནས། ཨཱཿཡིག་ལྗང་གུ། དོན་གྲུབ་རྡོ་རྗེ་འཆང་ཆེན་སྐུ་མདོག་ལྗང་། །ཞེས་དང་། །འོད་དུ་ཞུ་བ་དྲིལ་བུ་སྒྲ་ལྡན་གྱུར། །སངས་རྒྱས་ཀུན་གྱི་དྲིལ་བུའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ནི་རབ་གྲུབ་ཕྱིར། །དྲིལ་བུ་འདི་ནི་ཁྱོད་ཀྱིས་ལོང་། ཨོཾ་ཀརྨ་ཨ་བྷི་ཥིཉྩཱ་མི། ལག་གཡོན་དུ་གཏད། སློབ་མ་བསང་སྦྱང་། །སྟོང་ལས་པད་ཉིར་སློབ་མ་ཨོཾ་ཡིག་ལས། །རྣམ་སྣང་རྡོ་རྗེ་འཆང་ཆེན་སྐུ་མདོག་དཀར། །རྒྱན་རྫོགས་ནས། ཛཿཧཱུྃ་བྃ་ཧོཿལྷ་རྣམས་དབང་བསྐུར་གྱུར། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩཱ་མི། བཛྲ་ནཱ་མ་ཨ་བྷི་ཥེ་ཀཏ། །

― LT28_Page_0430 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱེ་དཔལ་གསང་མཚན་དྲན་པར་བྱ་བ། དབང་བསྐུར་ཕུང་པོ་ཁམས་ལྔ་མ་རིག་པའི། །དྲི་སྦྱངས་ཡེ་ཤེས་ལྔ་པོ་རྒྱུད་ལ་སྐྱེས། །རྡོ་རྗེ་སློབ་དཔོན་གྱི་དབང་གི་དོན་ཏུ་མཎྜལ་ཕུལ། །དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་བགྱིད། སློབ་མ་བསང་སྦྱང་། །དཀྱིལ་འཁོར་ཤར་ཁྱམས་སེང་གེས་བཏེགས་པའི་ཁྲིར། །སློབ་མ་རིགས་རྣམས་ཀུན་གྱི་བདག་པོར་གྱུར། རྡོར་དྲིལ་འཁྱུད་རྒྱ་བཅས། །རྡོ་རྗེ་རབ་གནས་རྡོ་རྗེ་ཉིད། །ཆེ་དང་དྲིལ་བུ་ཆེན་པོ་ཟུང་། །དེ་རིང་རྡོ་རྗེ་སློབ་དཔོན་གྱུར། །སློབ་མ་བསྡུ་བ་ཉིད་དུ་གྱིས། །རྡོ་རྗེ་དྲིལ་བུ་ཕྱག་རྒྱ་ཐུགས་གསུང་སྐུའི། །བརྟུལ་ཞུགས་གསུམ་དང་འབྲལ་མེད་དོན་གྱིས་ཤིག །དེ་ལྟར་ལུས་ཀྱི་སྒྲིབ་དག་བུམ་དབང་ཐོབ། །བསྐྱེད་རིམ་ལ་དབང་སྤྲུལ་སྐུའི་སྐལ་ལྡན་གྱུར། །དབང་གོང་མ་གསུམ་གྱི་དོན་ཏུ་མཎྜལ་ཕུལ། །ཁྱབ་བདག་བདག་ལ་སྨན་པ་དང་། །བདག་དོན་བདག་ལ་ཐུགས་བརྩེའི་ཕྱིར། །སྒྱུ་འཕྲུལ་དྲྭ་བས་མངོན་རྫོགས་པའི། །བྱང་ཆུབ་ཅི་ནས་བདག་ཐོབ་མཛོད། ཅེས་གསོལ་བ་གདབ། བླ་མ་ཡབ་ཡུམ་སྙོམས་ཞུགས་རྡོ་རྗེ་བཞིའི། །ལྷ་ཚོགས་ཞུ་བའི་བྱང་སེམས་སྩལ་བར་གྱུར། །ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །དེ་བཞིན་བྱང་ཆུབ་སེམས་རྒྱུན་གྱིས། །དེ་རིང་ཁྱོད་ལ་དབང་བསྐུར་རོ། །ཨ་ཧོ་མཧཱ་སུ་ཁ། ཞེས་བདུད་རྩི་མྱོང་། དེ་ལྟར་

― LT28_Page_0431 ―

^{[མ་དཔེ་གཟིགས་ན་འདིར་གནོན།]}

[Full Size]

ངག་གི་སྒྲིབ་དག་གསང་དབང་ཐོབ། །བདག་བྱིན་རླབས་དང་ལོངས་སྐུའི་སྐལ་ལྡན་གྱུར། །སློབ་མ་རྡོ་རྗེ་འཆང་དུ་གསལ་བ་ལ། །རིག་མ་སྙེམས་མའི་རང་བཞིན་སྩལ་བར་གྱུར། །ལྷ་མོ་དགའ་སྦྱིན་གནས་སྦྱིན་མ། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། །དེ་དང་སྙོམས་ཞུགས་དགའ་དང་མཆོག་དགའི་མཐར། །ལྷན་སྐྱེས་དཔེ་ཡི་ཡེ་ཤེས་ཉམས་སུ་མྱོང་། །དེ་ལྟར་ཡིད་ཀྱི་སྒྲིབ་དག་ཤེར་དབང་ཐོབ། །ཕོ་ཉའི་ལམ་དང་ཆོས་སྐུའི་སྐལ་ལྡན་གྱུར། །ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་རང་ཡང་ནི་དེ་ནི་ཕ། །དེ་ལྟར་ཆ་སྙོམས་སྒྲིབ་དག་ཚིག་དབང་ཐོབ། །ལམ་དུས་ཕྱག་རྒྱ་ཆེན་པོ་བསྒོམ་ལ་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །འདིར་སློབ་མ་དབང་བསྐུར་སོགས་ལ་ཅུང་ཟད་རྒྱས་པར་སྤྲོ་ན། དབང་གོང་མ་གསུམ་ལ་མཎྜལ་གསོལ་གདབ་སོ། །ཐོག་མཐར་མིག་དར་བཅིང་གྲོལ་ཡང་བྱའོ། །དེ་ནས། །ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པར་ཡང་ཁྱོད་ཀྱིས་ལོངས། །གཞན་གྱི་བུད་མེད་བསྟེན་པར་གྱིས། །ཞེས་ཐུན་མོང་མ་ཡིན་པའི་དམ་ཚིག་འབོགས། རྗེས་དམ་ཚིག་ཁས་ལེན་པ། །གཏོང་རག་མཎྜལ་སོགས་སྤྱི་ལྟར་བྱའོ། །གཉིས་པ་གཞན་དོན་དབང་བསྐུར་བའི་ཚུལ་ནི་བདག་བསྐྱེད་ཁོ་ན་ལ་བརྟེན་ནས་དབང་བསྐུར་བ་གཞུང་དོན་ཡིན་ཀྱང་། །ལས་དང་པོ་པའི་བླ་སློབ་འཚོགས་སྐབས་བདག་

― LT28_Page_0432 ―

^{[མ་དཔེ་གཟིགས་ན་འདིར་གནོན།]}

[Full Size]

མདུན་སྒྲུབ་མཆོད་བདག་འཇུག་བྱས་ཀྱང་ཆོག་ལ། གང་ལྟར་རྩ་བ་བདག་འཇུག་ཉིད་ལ། མཚམས་སྦྱོར་རྒྱས་པ་དང་དོན་དམ་མི་འགལ་བའི་ཚིག་ཕྲེང་ཇི་ལྟར་འོས་པ་བརྗོད་ཅིང་ཉན་བདེ་བར་སྦྱར་བས་འགྲུབ་བོ། །གསུམ་པ་རྗེས་ཀྱི་བྱ་བ་ལ་ཚོགས་མཆོད་བྱ་བར་སྤྲོ་ན་སྐབས་འདིའམ། །བདག་འཇུག་དབང་བསྐུར་རྣམས་ཀྱི་ཐོག་མཐའ་གང་དུའང་རུང་ལ་དེའི་ཚུལ་ནི་འོག་ནས་འབྱུང་བ་ལྟར་རོ། །ཚོགས་མཆོད་མ་གྲུབ་ན་གཏོར་འབུལ་ཁོ་ནས་ཀྱང་ཆོག་པས། དེ་ལྟར་ན། གཏོར་མ། ཨོཾ་ཨཱཿཧཱུྃ་ཧ་ཧོཿཧྲཱིཿ ལན་གསུམ་གྱིས་བྱིན་བརླབ། །རང་གི་སྙིང་གའི་འོད་ཀྱིས་བརྟན་གཡོ་ཀུན། །ཐམས་ཅད་བླ་མའི་རྡོ་རྗེ་གསུམ་སྣང་བའི། །ལྗགས་ཀྱི་འོད་ཟེར་རྡོ་རྗེའི་སྦུ་གུ་ཡིས། །གཏོར་མའི་བཅུད་གསོལ་བདེ་བས་དགྱེས་པར་གྱུར། །བསྙེན་་སྔགས་ལ། ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། ལན་གསུམ་གྱི་མཐར། །བདག་དང་སེམས་ཅན་ཀུན་གྱིས་ཕྱག་རྒྱ་ཆེ། །མཆོག་གི་དངོས་གྲུབ་ཐོབ་པར་བྱིན་གྱིས་རློབས། །ཞེས་པ་སྟེ་ཚོགས་མཆོད་དང་གཏོར་འབུལ་གཉིས་ཀ་བྱེད་ན་འདི་ཉིད་ཚོགས་ཀྱི་གོང་དུ་སྦྱར་བ་ཡིན་ནོ། །ཚོགས་མཆོད་ནི། །སྟེགས་བུ་ཞིང་གི་ཁེབས་དང་ལྡན་པའི་དབུས་སུ་ཐོད་པ་མཚན་ལྡན་མྱོས་བྱེད་བདུད་རྩི་རིལ་བུ་སྦྱར་བས་བཀང་བའི་མཐའ་བསྐོར་དུ་མཱྃ་ས་དང་བ་ལ་གཙོ་བོར་གྱུར་པའི་དམ་ཚིག་གི་རྫས་ཇི་ལྟར་འབྱོར་བས་བསྐོར། །དུད་སོལ་མའི་མཆོད་གཏོར་སྤོས་མར་མེ་བཅུག་པའང་བཤམས་ཤིང་། །བྱིན་གྱིས་བརླབས་པའི་བདུད་རྩིས་བྲན་ལ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཨོཾ་སྭ་བྷཱ་བ་སོགས་ཀྱིས་བསང་སྦྱང་། སྟོང་པའི་ངང་ལས་ཡཾ་རཾ་རླུང་མེའི་སྟེང་། །

― LT28_Page_0433 ―

^{[མ་དཔེ་གཟིགས་ན་འདིར་གནོན།]}

[Full Size]

ཨ་ལས་ཐོད་པའི་ནང་དུ་ཤ་ལྔ་དང་། །བདུད་རྩི་ལྔ་པོ་ཕྱི་ཡི་རྣམ་པ་ཨོཾ། །སྲོག་ལ་ཨཱཿས་མཚན་དེ་སྟེང་ཟླ་ཕྱེད་དང་། །རྡོ་རྗེ་ཧཱུྃ་མཚན་མགོ་བོ་མཐར་དུ་བསྟན། །རླུང་གཡོས་མེ་སྤར་རྫས་ཞུ་ཨོཾ་དང་ཨཱཿའི། །འོད་ཀྱིས་ཧཱུྃ་ལས་ཡེ་ཤེས་བདུད་རྩི་བབས། ཨོཾ་ཨཱཿཧཱུྃ། གསུམ། ཟླ་ཕྱེད་རྡོ་རྗེ་དང་བཅས་ལྟུང་སྟེ་ཞུ། །དམ་ཡེ་གཉིས་མེད་བདུད་རྩིའི་རྒྱ་མཚོར་གྱུར། ན་མོ། ཐབས་དང་ཤེས་རབ་གཉིས་སུ་མེད་པའི་ཚོགས་ཀྱི་འཁོར་ལོ་རྒྱ་ཆེན་པོ། །རང་བཞིན་རྣམ་པར་དག་པ་སྐྱེ་བ་མེད་པ། ངོ་བོ་རྣམ་པར་དག་པ་ཨཱ་ལི་ཀཱ་ལི། མཚན་ཉིད་རྣམ་པར་དག་པ་ཤ་ལྔ་བདུད་རྩི་ལྔས་རྒྱས་བཏབ་པ་འདི་ཉིད། བཀའ་བརྒྱུད་བླ་མ། ཡི་དམ་ལྷ་ཚོགས། །དཔའ་བོ་མཁའ་འགྲོ། །ཆོས་སྐྱོང་སྲུང་མ་རྣམས་ཀྱི་ཞལ་དུ་ཁཱ་ཧི། བཉྩ་ཨ་མྲྀ་ཏ་ལ་ཁཱ་ཧི། ག་་ཙཀྲ་ལ་ཁཱ་ཧི། ལན་གསུམ། གནས་གསང་བ་མཆོག་གི་དགྱེས་པ་ནས། །དཔལ་རྡོ་རྗེ་འཆང་ཆེན་གནས་འདིར་བྱོན། །གནས་ཁ་སྦྱོར་ལོངས་སྐུའི་ཞིང་ཁམས་ནས། །བཀའ་བཞི་བརྒྱུད་པའི་བླ་མ་གནས་འདིར་བྱོན། །གནས་རྡོ་རྗེ་བཙུན་མོའི་བྷ་ག་ནས། །དགྱེས་མཛད་མར་སྟོན་ཆེན་པོ༴ །གནས་སྒྱུ་འཕྲུལ་དྲྭ་བའི་ཕོ་བྲང་ནས། །རྗེ་མཚུར་སྟོན་ཡབ་སྲས༴ །གནས་མཁའ་སྤྱོད་བཙུན་མོའི་ཚོགས་དབུས་ནས། །རྗེ་རྔོག་སྟོན་ཡབ་སྲས༴ །གནས་ཟག་མེད་འོད་གསལ་མཁའ་ཁྱབ་ནས། །རྗེ་མེས་སྟོན་ཡབ་སྲས༴ །གནས་མངོན་པར་དགའ་བའི་ཞིང་

― LT28_Page_0434 ―

^{[མ་དཔེ་གཟིགས་ན་འདིར་གནོན།]}

[Full Size]

ཁམས་ནས། །རྗེ་མི་ལ་ཡབ་སྲས༴ །གནས་སྣང་སྲིད་ཕྱག་རྒྱ་ཆེན་པོ་ནས། །དགེ་སློང་འཚོ་བྱེད་ཡབ་སྲས༴ །གནས་འཁོར་ལོ་གསུམ་གྱི་ཚོགས་ཁང་ནས། །རྗེ་དུས་གསུམ་མཁྱེན་པ༴ །དཔལ་ཀུན་ཏུ་བཟང་པོའི་ནགས་ཁྲོད་ནས། །འགྲོ་མགོན་ཕག་གྲུ་ཡབ་སྲས༴ །གནས་ཡིད་དགའ་ཆོས་འཛིན་འདུན་ས་ནས། །ཀུན་མཁྱེན་བསྟན་པའི་ཉིན་བྱེད༴ །ཨེ་བྃ་ཟུང་འཇུག་དཀྱིལ་འཁོར་ནས། །ཡི་དམ་རྒྱུད་སྡེའི་ལྷ་ཚོགས༴ །གནས་ཡུལ་དུར་ཁྲོད་སོ་སོ་ནས། །མཁའ་འགྲོ་ཆོས་སྐྱོང་སྲུང་མ༴ །ཕ་བཀའ་བརྒྱུད་བླ་མ་དབྱིངས་ནས་གཤེགས། །བུ་བཟོད་མེད་གདུང་བའི་མོས་གུས་འབར། །མཆོག་ཡེ་ཤེས་བྱིན་ཆེན་སྤྲིན་ལྟར་འཐིབས། །སྲིད་ཞི་ཀུན་ཆོས་ཀྱི་དབྱིངས་སུ་ཐིམ། །སྣང་གྲགས་རྟོག་ཕྱག་རྒྱ་ཆེན་པོར་ཤར། །གཉུག་མ་འོད་གསལ་གྱི་གཟི་མདངས་ལས། །ཞུ་བདེ་ཡི་བདུད་རྩིས་བརྟན་གཡོ་ཁྱབ། །འཛིན་རྟོག་དག་པའི་མྱང་གྲོལ་ལ། །ལོངས་སྤྱད་པས་ཟུང་འཇུག་བདེ་བ་ཆེ། །ཅིར་སྣང་ཀུན་བླ་མ་ཆོས་ཀྱི་སྐུ། །གྲུབ་གཉིས་ཀློང་བརྡོལ་གྱི་བྱིན་ཆེན་ཕོབ། ཅེས་བྱིན་རླབས་འབེབས་པ་སྔོན་ཏུ་འགྲོ་བས་ཚོགས་ཕུད་གཏོར་མ་ལ་སྦྲོན་ཅིང་བདུད་རྩིས་བྲན་ལ། ཕེ༚། བཛྲ་ཨཱ་རལླི་ཧོཿཛཿཧཱུྃ་བྃ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱཧོཿ ལན་གཅིག །ཨོཾ་ཨཱཿཧཱུྃ་གུ་རུ་དེ་བ་ཌཱ་ཀི་ནཱི་དྷརྨ་པཱ་ལ་ས་པཱ་རི་བཱ་ར་ག་་ཙཀྲ་པཱུ་ཛ་ཁ་ཁ་ཁཱ་ཧི། ལན་གསུམ། ཧོཿ ཟག་མེད་ཆོས་སྐུའི་ཕོ་བྲང་ནས། །རྡོ་རྗེ་འཆང་ཆེན་རྣལ་

― LT28_Page_0435 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱོར་མ། །བཀའ་བཞི་བརྒྱུད་པའི་བླ་མའི་ཚོགས། །དགྱེས་མཛད་དངོས་བྱོན་ལྷོ་བྲག་པ། །ཐུགས་སྲས་རྣམ་བཞི་བརྒྱུད་པར་བཅས། །ཕ་མ་གཉིས་མེད་རྒྱུད་སྡེའི་ལྷ། །གནས་གསུམ་མཁའ་འགྲོ་ཆོས་སྐྱོང་རྣམས། །སྐུ་ཡི་སྤྲུལ་པས་ཞིང་ཀུན་ཁྱབ། །ཅིར་སྣང་ཡེ་ཤེས་ཚོགས་སུ་འབུལ། །གཞོམ་མེད་རྡོ་རྗེ་ནཱ་དའི་དབྱངས། །སྒྲ་གྲགས་རང་བྱུང་སྔགས་སུ་བསྐང་། །བདེ་སྟོང་དགོངས་པ་མཁའ་དང་མཉམ། །འཁྲུལ་རྟོག་རང་གྲོལ་གཉུག་མར་བཤགས། །དད་མོས་བསམ་ཡས་ཚོགས་ཁང་དུ། །དམ་ཚིག་རྣམ་དག་རྣལ་འབྱོར་པས། །སྣང་སྲིད་ཚོགས་ཀྱི་འཁོར་ལོར་བསྒྱུར། །བཟའ་བཏུང་བདུད་རྩིར་ཆེན་པོར་བརླབས། །བླ་མེད་མཆོད་པའི་སྤྲིན་ཕུང་འདིས། །བཀའ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་ཐུགས་དམ་བསྐང་། །ཉམས་ཆགས་ཉེས་ལྟུང་མཐོལ་ཞིང་བཤགས། །བྱང་ཆུབ་སྒྲུབ་པའི་བར་ཆད་ཞི། །གཟུང་འཛིན་རྣམ་རྟོག་དབྱིངས་སུ་གྲོལ། །མཆོག་དང་ཐུན་མོང་དངོས་གྲུབ་བརྙེས། །སྣང་སེམས་སྐྱེ་མེད་ཆོས་སྐུར་རྟོགས། །ཚེ་འདིར་ཟུང་འཇུག་མཆོག་ཐོབ་མཛོད། །དུད་སོལ་མའི་གཏོར་མ་ལ་ཚོགས་ཕུད་བསྟབ། བདུད་རྩི་བྲན་ལ། ཨོཾ་བེ་ཏཱ་ལི་བེ་ཏཱ་ལི་ཚེ་ཚེ་ལྷ་མོ་ཞལ་གཅིག་ཕྱག་བཞི་མ་བོང་བུ་གྭ་པ་ལ་ཆིབས་པ་སྤྱན་དྲངས་ཤིང་གཏོར་མ་གསོལ་བར་གྱུར། ཨོཾ་ཧཱུྃ་ཤྲཱི་ཡ་དེ་བཱི་ཀཱ་ལི་ཀཱ་ལི་མཧཱ་ཀཱ་ལི་ཧཱུྃ་བྷྱོ་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་འབུལ། བྷྱོ།

― LT28_Page_0436 ―

^{[མ་དཔེ་གཟིགས་ན་འདིར་གནོན།]}

[Full Size]

དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དྭགས་ཁ། །དམ་ཚིག་སྲུང་མ་ཁྲག་དགའ་མ། །ཀི་ལིའི་སྒྲ་སྒྲོགས་སྦྱོར་ཟིན་མ། །དུར་ཁྲོད་རོ་ཡི་ཚོགས་དབུས་སུ། །ཚོགས་དང་པེ་ཉར་བཅས་པ་རུ། །གཙིགས་བྱེད་གཏུམ་མོ་དུད་སོལ་མ། །གསོལ་ཅིག་བཞེས་ཤིག་དམ་ཚིག་ལྷ། །གནས་སུ་གནས་པར་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱོད་ཀྱིས་གྲུབ་པར་གྱིས། །བདག་གིས་ལས་ནི་གང་བྱེད་ཀྱང་། །དེ་ལ་ཀུན་གྱིས་གྲོགས་མཛོད་ཅིག །ཧཱུྃ་གྲྀཧྞ་གྲྀཧྞ་སརྦ་དུཥྚཱན་བྷཀྵ་བྷཀྵ་ཕྲེ༚་ཕྲུཾ་ཕྲི༚་ཕྲོཾ་ཕཊ་སྭཱ་ཧཱ། ཞེས་སེ་གོལ་གཏོགས། གཏོར་མ་འབུལ། ཚོགས་རྫས་ནང་གི་སྲེག་བླུགས་སུ་ལོངས་སྤྱད་ལ་དོ་ཧ་རྡོ་རྗེའི་གླུ་ཇི་ལྟར་ནུས་པ་བླངས་ཏེ་ཉམས་རྟོགས་སྤང་། །གསང་བའི་བདེ་ཆེན་བསྐུལ་བ་ནི། །པདྨ་ལ་ནི་རྡོ་རྗེ་གནས། །པདྨ་ཉིད་ནི་ཞིང་ཡིན་ནོ། །རྒྱུན་ཏུ་ཅང་ཏེའུ་བརྡུང་བྱ་སྟེ། །སྙིང་རྗེས་ཀུ་ཅོ་བསྒྲག་མི་བྱ། །དེ་རུ་སྟོབས་ལྡན་འབད་པས་བཟའ། །ཆང་ཡང་མང་པོ་བཏུང་བར་བྱ། །གྲོགས་པོ་སྐལ་ལྡན་གཞུག་པར་བྱ། །སྐལ་པ་མེད་པ་རྣམ་པར་སྤང་། །བཞི་མཉམ་གླ་རྩི་སོཧླ་དང་། །ག་པུར་རྣམས་ཀྱིས་བྱུགས་པར་བྱ། །རུས་པའི་རྒྱན་གྱིས་ལུས་ལ་བརྒྱན། །དེ་རུ་རོ་ནི་གཞུག་པར་བྱ། །འདུས་ཕྱིར་གཉིས་ནི་སྦྱོར་བར་བྱ། །དེར་ནི་རེག་མིན་སྤང་མི་བྱ། །སྨོན་ལམ་གདབ་པ་ནི། །སྣང་སྲིད་བླ་མའི་དཀྱིལ་འཁོར་དུ། །ཕྱི་ནང་གསང་བའི་ཚོགས་ཕུལ་བས། །རྩོལ་མེད་རྡོ་རྗེའི་ལམ་བགྲོད་དེ། རང་སེམས་ཆོས་སྐུ་མངོན་

― LT28_Page_0437 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར་ཤོག །ལྷག་མ་ཆུ་གཙང་གིས་བྲན་ལ། ཨོཾ་ཨཱཿཧཱུྃ། ལན་གསུམ་གྱིས་བྱིན་བརླབ། ཧེ་རུ་ཀ་དཔལ་ཚོགས་ཁང་དུ། །གསང་བའི་འདུ་བར་མི་དབང་བ། །སྲིད་གསུམ་འབྱུང་པོ་མཐུ་ཆེན་རྣམས། །ལྷག་མའི་གཏོར་མས་ཚིམས་གྱིས་ལ། །བར་ཆད་ཀུན་སོལ་ཕྲིན་ལས་སྒྲུབས། །ཨོཾ་ཁ་ཁ་ཁཱ་ཧི་ཁ་ཧི་ཨུཙྪིཥྚ་ཙྪིནྡ་བྷིནྡ་པ་ནེ་ཧཱུྃ་སྭཱ་ཧཱ། ཞེས་ལྷག་གཏོར་ཕྱི་རོལ་དུ་དོར་ཞིང་སུམྦྷ་ནིའི་སྔགས་ཀྱིས་མཚམས་བཅད་པར་བྱའོ། །དེ་ནས་མཆོད་པ་ཁ་གསོས། །བྱིན་བརླབས་ལ་སྔགས་ཙམ་གྱིས་མཆོད། ཆོས་སྐུ་ནམ་མཁའ་སོགས་སྤྱི་ལྟར་ཤློ་ཀ་གཅིག་གིས་བསྟོད། ཡིག་བརྒྱ་ལན་གསུམ་དང་། །བདག་བློ་གཏི་མུག་རྨོངས་པའི་དབང་གྱུར་ཏེ། །ལེགས་སྤྱད་འདི་ལ་ཉེས་པར་གྱུར་པ་རྣམས། །སྐྱེས་མཆོག་རིན་ཆེན་རྣམས་དང་དེ་ཡི་སྲས། །བདག་ཉིད་ཆེན་པོ་ཁྱོད་ལ་བཟོད་པར་གསོལ། །ཞེས་བཟོད་པར་གསོལ། བདག་དང་འགྲོ་ལ་སོགས་ཀྱིས་མདུན་བསྐྱེད་ཡེ་ཤེས་པ་བརྟན་བཞུགས་བྱ། དམ་ཚིག་པ་ཨོཾ་ཨཱཿཧཱུྃ་གིས་བདག་ལ་བསྡུ། བསྒོམས་པའི་དཀྱིལ་འཁོར་རྟེན་དང་བརྟེན་པར་བཅས། །རིམ་བཞིན་འོད་དུ་ཞུ་ནས་རང་ལ་ཐིམ། །རང་ཉིད་དབྱིངས་ཐིམ་སླར་ཡང་རྡོ་རྗེ་སེམས། །སྣང་ལ་རང་བཞིན་མེད་པའི་སྐུ་རུ་གྱུར། །ཞེས་བདག་བསྐྱེད་བསྡུ་ལྡངས་བྱ། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་སོགས་དགེ་བསྔོ་དང་། ཤེས་བྱའི་

― LT28_Page_0438 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་ལ་སོགས་བཀྲ་ཤིས་ཀྱི་ཚིགས་བཅད་ཇི་ལྟར་རིགས་པ་བརྗོད་དོ། །བཞི་པ་ནི། འདི་དག་ལ་ལས་ཚོགས་སྦྱར་བར་འདོད་ན་བླ་མའི་ལས་ཚོགས་སྤྱི་གཞུང་གང་ཡང་རུང་བ་སྦྱར་ཆོག །དེ་བཞིན་རྣལ་འབྱོར་གྱི་ཡན་ལག་རྣམས་ཀྱང་སྤྱི་ལྟར་ཤེས་པར་བྱ། འདི་དག་ལ་ཕྱི་ནང་གསང་སྒྲུབ་ཀྱི་ཐ་སྙད་སྦྱར་ཡང་སོ་སོ་གཞུང་རྐང་ཆུགས་པ་རེ་ཡིན་པས་ཉམས་ལེན་སོ་སོར་བྱས་ཀྱང་ཆོག་ལ། དེ་ལྟར་ན་ཐོག་མའི་སྐྱབས་སེམས་དང་རྡོར་སེམས་བསྒོམ་བཟླས། མཇུག་གི་བསྔོ་སྨོན་ཤིས་བརྗོད་ནི་སྤྱི་འགྲོ་ཡིན་ཅིང་། ཡན་ལག་བདུན་པའི་ཚིག་ཕྲེང་དང་གསོལ་འདེབས་རྣམས་ཀྱང་རྩ་བའི་གཞུང་དམ་རིགས་མཐུན་ནས་བླངས་ཏེ་རྒྱས་པར་སྤྲོས་པས་ཆོག་གོ། །ཡང་དཀྱུས་གཅིག་ཏུ་ཉམས་སུ་ལེན་ཚེ་བསྡུ་བར་འདོད་ན་ཕྱི་སྒྲུབ་ལ་དཔེར་མཚོན་ན། སྐྱབས་སེམས། དག་བྱེད། རྟེན་བསྐྱེད། སྤྱན་འདྲེན་ཐོག་མའི་ཤློ་ཀ་གཉིས་ཀྱི་འཕྲོས་སུ་ཡན་ལག་བདུན་པ། འོག་མིན་ཆོས་དབྱིངས་མ་ཁོ་ན། མ་ནམ་བཞི་སྐོར། འདོད་གསོལ་ཚིག་ལྷུག་མཐར་དབང་ལེན་དང་། །ནང་སྒྲུབ་རྟེན་བསྐྱེད་ལ་འཇུག་པས་ཆོག་ཅིང་དེ་ཡིས་གཞན་ལའང་མཚོན་པར་བྱའོ། །དེ་སྐད་ངག་སྣང་མ་ཡིན་དགོངས་གཏེར་མིན། །གྲུབ་ཐོབ་བརྒྱུད་པའི་གདམས་ངག་གཅིག་ཏུ་བསྡེབས། །བརྡོལ་ཐབས་སྨྲས་མིན་སྨིན་གྲོལ་རྒྱུན་བཟང་མཆིས། །ཆོས་འདོད་རྣམས་ཀྱིས་གཡར་དམ་མཛད་ཀྱང་རུང་། །མཁས་འདོད་ངག་གིས་བཀག་ཀྱང་ཁོང་ཁྲོ་མེད། །འདི་བགྱིས་དགེ་བས་མངའ་བདག་མར་པའི་བསྟན། །ཡངས་པའི་ལྗོངས་

― LT28_Page_0439 ―

^{[མ་དཔེ་གཟིགས་ན་འདིར་གནོན།]}

[Full Size]

སུ་དར་ཞིང་རྒྱས་པ་དང་། །འབྲེལ་ཚད་མར་པ་རྗེ་དང་མཉམ་གྱུར་ཅིག །ཅེས་པ་འདིའང་བསླབ་པ་གསུམ་གྱི་ནོར་ལྡན་གཞུང་ལུགས་རབ་འབྱམས་སྨྲ་བ་སྒྲུབ་བླ་མ་ཀརྨ་བཀྲ་ཤིས་འོད་ཟེར་ནས་ཆེད་དུ་བསྐུལ་ངོར། དགྱེས་མཛད་ལོ་ཙཱ་དངོས་སྣང་སི་ཏུ་པདྨའི་མཚན་ཅན་གྱི་གསང་བ་གསུམ་གྱི་བྱིན་རླབས་ཐོབ་ཅིང་བཀའ་བརྒྱུད་རིན་པོ་ཆེ་ལ་མི་འཕྲོགས་པའི་དད་པ་བརྟན་པ། ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོས། མར་པ་རྗེ་ཡིས་ལུང་བསྟན་པའི་གནས་ཆེན་དེ་བཱི་ཀོཊིའི་སྒྲུབ་གནས་སུ་སྦྱར་བ་དགེ་ལེགས་འཕེལ།། །།

རྗེ་བཙུན་མར་པ་ལོ་ཙའི་བླ་སྒྲུབ་ལས་གསང་སྒྲུབ་དབང་གི་ཆོག་བཀླགས་ཆོག་ཏུ་བཀོད་པ་བྱིན་རླབས་སྒོ་འབྱེད།

― LT28_Page_0441 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་མར་པ་ལོ་ཙའི་བླ་སྒྲུབ་ལས་གསང་སྒྲུབ་དབང་གི་ཆོག་བཀླགས་ཆོག་ཏུ་བཀོད་པ་བྱིན་རླབས་སྒོ་འབྱེད་ཅེས་བྱ་བ་བཞུགས་སོ། །

― LT28_Page_0442 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་མཧཱ་ལོ་ཙཱ་མ་ཏཻྱ། ཁ་བ་ཅན་ལྗོངས་འདུལ་བའི་རྒྱལ་ཚབ་ཏུ། །མཁས་གྲུབ་ནཱ་རོ་མི་ཏྲིས་མངའ་གསོལ་བ། །མར་པ་ཆོས་ཀྱི་བློ་གྲོས་གསང་གསུམ་གྱི། །བྱིན་རླབས་བདག་གཞན་སྒོ་གསུམ་རྒྱུད་ལ་སྩོལ། །རྒྱ་གཞུང་ཁུངས་དང་བྱིན་རླབས་རྒྱུན། །མ་ཉམས་ལམ་ཟབ་སྨིན་བྱེད་ལུས། །མཚམས་སྦྱོར་གསེར་གྱི་རྒྱན་བཟང་སྤྲས། །ཐར་འདོད་སྙིང་གི་དཔྱིད་དུ་གྲུབ། གྲུབ་ཆེན་ཏཻ་ལོ་པའི་གདམས་ངག་བརྒྱུད་པའི་བཀའ་སྲོལ་མ་ཉམས་པར་བྱོན་པའི་ལམ་ཟབ་བླ་མ་སྒྲུབ་པ་ཉིད་མངའ་བདག་མར་པའི་གསང་སྒྲུབ་ཏུ་སྦྱར་བའི་དབང་གི་ཆོ་གས་སྐལ་ལྡན་རྗེས་སུ་བཟུང་བ་ལ་གསུམ། སྔོན་ཏུ་བྱ་བ། དངོས་གཞིའི་ལས་རིམ། རྗེས་ཀྱི་ཆོ་གའོ། །དང་པོ་ནི། འདིའི་ཁུངས་ཚར་གསུམ་ཁུག་པའི་གདམས་ངག་ཉིད་ཡིན་པས་ཀུན་སྤངས་ལ་ཚིག་ཙམ་གྱིས་སྦྱིན་པར་བྱ་བ་དང་། གཞན་ཏུ་ཕྱི་དཀྱིལ་ལ་མི་ལྟོས་པར་བུམ་པ་སོགས་དབང་རྫས་འདུ་བྱས་ཏེ་སློབ་དཔོན་གྱིས་བདག་བསྐྱེད་བཟླས་པ་དང་བཅས་པའི་

― LT28_Page_0443 ―

^{[མ་དཔེ་གཟིགས་ན་འདིར་གནོན།]}

[Full Size]

མཐར་དབང་བསྐུར་བ་ཙམ་གྱིས་གྲུབ་པ་ཡིན་ཀྱང་། ལས་དང་པོ་པ་བློ་དམན་སྤྲོས་པ་ལ་དགའ་བའི་དབང་དུ་བྱས་ཏེ་ད་ལྟའི་ཕྱག་རྒྱུན་ལྟར་འཛོམས་ན་རས་བྲིས་ཀྱི་དཀྱིལ་འཁོར་སྒོ་དང་རྒྱན་རྫོགས་རྡོ་ར་མི་རི་དང་བཅས་པའི་དབུས་སུ་སྣ་ཚོགས་པདྨ་འདབ་མ་ལྔ་བལྟེ་བ་མཐིང་ནག་གེ་སར་ཟེའུ་འབྲུ་དང་བཅས་པ་ལ་རྡོ་རྗེ་དང་རིགས་ལྔ་ཡབ་ཡུམ་གྱི་སྐུའམ་ཕྱག་མཚན་བྲིས་པའམ་མ་འཛོམ་ན་འབྲུའི་ཚོམ་བུ་གཙོ་འཁོར་ལྔ་བཀོད་པའི་སྟེང་དུ་སྟེགས་བུ་ལ་བུམ་པ་བདུད་རྩི་ལྔ་དང་དྲི་བཟང་གི་ཆུས་བཀང་བ་མགུལ་ཆིངས་སྔོན་པོ་ཅན་གྱི་ཁར་བདུད་རྩི་རིལ་བུ་དང་སྦྱར་བའི་ཐོད་ཆང་། མཐའ་བསྐོར་དུ་དབུ་རྒྱན་རིགས་ལྔ་དར་དཔྱངས་དང་བཅས་པ། རྡོ་རྗེ། དྲིལ་བུ། ལས་ཐམས་ཅད་པའི་བུམ་པ། རིག་མའི་ཙཀླི་རྣམས་བཀོད། །ཕྱི་མཆོད་གཡས་བསྐོར། རྒྱབ་ངོས་སུ་འབུལ་གཏོར། ཚོགས་ཀྱི་ཡོ་བྱད་སོགས་རྒྱས་པར་བཤམ། མིག་དར། མེ་ཏོག་སོགས་ཉེར་མཁོའི་ཡོ་བྱད་ཚོགས་པར་བྱའོ། །གཉིས་པ་ལ་གཉིས། དབང་དོན་སྒྲུབ་མཆོད། དབང་བསྐུར་བ་དངོས་སོ། །དང་པོ་ནི། གསོལ་འདེབས་དང་སྐྱབས་སེམས་སྔོན་དུ་འགྲོ་བས། གསང་སྒྲུབ་ལྟར་བདག་བསྐྱེད། མདུན་བསྐྱེད། བུམ་བསྐྱེད་བཟླས་པ་བདག་འཇུག་དང་བཅས་པ་ཚང་བ་བཏང་། གཉིས་པ་ནི། སློབ་མ་རྣམས་ལ་ཁྲུས་དང་།

― LT28_Page_0444 ―

^{[མ་དཔེ་གཟིགས་ན་འདིར་གནོན།]}

[Full Size]

མཎྜལ་བཀྱེ་བསྡུ་བྱས་ལ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་མ་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ། དེའི་ཆེད་དུ་ལམ་ཟབ་མོ་བླ་མ་སྒྲུབ་པའི་དབང་བསྐུར་གསན་ནས་དོན་ཉམས་སུ་ལེན་པར་བགྱིའི་སྙམ་པའི་ཐུགས་བསྐྱེད་གསལ་བཏབ་ནས་གསན་པར་ཞུ། དེའང་རྒྱལ་བ་ཐམས་ཅད་མཁྱེན་པས་གསུངས་པའི་ཆོས་ཐམས་ཅད་ཀྱི་ཉིད་ཁུ་ནི་གསང་སྔགས་རྡོ་རྗེ་ཐེག་པ་ཡིན་ལ། དེའི་དཀྱིལ་འཁོར་འཁོར་ལོའི་མགོན་པོ་ནི་དཔལ་ལྡན་བླ་མ་མཆོག་གི་རྡོ་རྗེ་ཅན་ཉིད་ལས་གཞན་ཏུ་མ་དམིགས་པའི་ཕྱིར་ལམ་ཟབ་མོ་བླ་མའི་རྣལ་འབྱོར་ཅེས་འཕགས་བོད་ཀུན་ཏུ་རླུང་ལྟར་གྲགས་པ་ལས། དཔལ་ལྡན་ན་དཱོ་ཏཱ་པའི་བཀའ་བརྒྱུད་འདི་ཉིད་ལམ་ཟབ་མོས་གུས་ཀྱི་བཀའ་བབས་པས་བཤད་པ་ཚིག་ཙམ་དུ་མ་ལུས་པར་ཚུལ་བཞིན་ཐུགས་ཉམས་སུ་ལོན་པས་བརྒྱུད་པའི་གང་ཟག་མཐའ་དག་མ།།།ཀ་གི་དངོས་གྲུབ་ཉམས་འོག་ཏུ་ཆུད་པ་ཤ་སྟག་བྱོན་པར་འདུག །དེའང་གྲུབ་ཐོབ་རྣལ་འབྱོར་གྱི་དབང་ཕྱུག་སོ་སོ་ལ་བརྟེན་པའི་མོས་གུས་ལམ་དུ་ཁྱེར་ཚུལ་ཇི་སྙེད་ཅིག་མཆིས་པ་ལས། །འདིར་བཀའ་བརྒྱུད་ཡོངས་ཀྱི་སྤྱི་མེས་དགྱེས་མཛད་མར་པ་ལོ་ཙཱ་ལ་བརྟེན་པའི་ལམ་ཟབ་བླ་མ་སྒྲུབ་པའི་དབང་བསྐུར་བ་སྐབས་སུ་བབས་པ་སྟེ། མར་སྟོན་ཆོས་ཀྱི་བློ་གྲོས་འདི་ཉིད་ངོ་བོ་བཅོམ་ལྡན་འདས་དགྱེས་པ་རྡོ་རྗེ་དང་ཐ་དད་མེད་པ་ལས། རྣམ་པ་གདུལ་བྱ་མཐའ་ཡས་པ་ལ་གང་འདུལ་དེར་སྟོན་གྱི་ཚུལ་དུས་བཅུའི་དབང་ཕྱུག་བྱང་ཆུབ་སེམས་དཔའ་ཀུན་ཏུ་བཟང་པོ། །འཕགས་པའི་ཡུལ་དུ་གྲུབ་ཆེན་ཌོ་མཱི་ཧེ་རུ་ཀ་སོགས་རྣམ་པར་རོལ་པའི་ཆོ་འཕྲུལ་རྒྱ་མཚོས་མ་བརྒལ་པའི་འགྲོ་བ་མཐའ་དག་བསྒྲལ་བར་མཛད་ཅིང་། ཁྱད་

― LT28_Page_0445 ―

^{[མ་དཔེ་གཟིགས་ན་འདིར་གནོན།]}

[Full Size]

པར་གངས་རིའི་ལྗོངས་སུ་རྡོ་རྗེ་ཐེག་པ་བླ་མེད་ངེས་དོན་སྙིང་པོའི་བསྟན་པ་སྤེལ་བའི་སླད་དུ་བོད་ཡུལ་ལྷོ་བྲག་ཏུ་མར་པའི་རིགས་སུ་སྐུ་འཁྲུངས། དགུང་ལོ་བཅུ་གཉིས་ནས་ཆོས་སྒོར་ཞུགས་ཤིང་འབྲོག་མི་ལོ་ཙཱ་ལས་རྒྱ་སྐད་མཐར་ཕྱིན་པ་བསླབས། ལས་འཕྲོས་དཔའི་སྟོབས་ཀྱིས་རྒྱ་གར་དུ་ཕེབ་པའི་ལམ་ཞོར་བལ་པོ་སྤྱི་ཐེར་བ་དང་པེན་ཏ་པ་སྐུ་མཆེད་ལས་གསང་འདུས་དང་གདན་བཞི་སོགས་ནཱ་རོ་པ་ལས་བརྒྱུད་པའི་གཞུང་གདམས་མང་དུ་གསན། །དཀའ་སྤྱད་ཆེན་པོས་འཕགས་ཡུལ་དུ་བྱོན་ཏེ་བྱང་ཕྱོགས་སུཥྤ་ཧ་རིའི་དགོན་པར་དཔལ་ནཱ་རོ་ཏཱ་པ་མཇལ་ཞིང་། དེས་ཀྱང་བླ་མ་ཏེ་ལོ་པས་ལུང་བསྟན་པའི་ཐུགས་ཀྱི་སྲས་སུ་དགོངས་ཏེ་བརྩེ་བ་ཆེན་པོས་རྗེས་སུ་བཟུང་། སྔ་ཕྱི་བར་གསུམ་ལ་ལོ་བཅུ་དྲུག་དང་ཟླ་བ་བདུན་བསྟེན། །སྤྱིར་རྒྱ་གར་དུ་འབྱོན་ཐེབས་ལན་གསུམ་མཛད་པའི་དང་པོ་ལ་ལོ་བཅུ་གཉིས། བར་པ་ལོ་དྲུག །རྗེས་མར་ལོ་གསུམ་དུ་བཞུགས་ཤིང་། མངའ་བདག་མཻ་ཏྲི་པ་ཆེན་པོ། །པ་ཆེན་ཡེ་ཤེས་སྙིང་པོ། ནག་པོ་ཤཱནྟི་བྷ་དྲ། །རྣལ་འབྱོར་མ་མི་རུས་ཀྱི་རྒྱན་ཅན། དཔལ་སིངྒ་གླིང་པ་མཆེད་སོགས་མཁས་ཤིང་གྲུབ་པ་ཐོབ་པའི་བླ་མ་མང་དུ་བསྟེན་ནས་མཉེས་པ་དགུ་ཕྲུགས་སུ་བསྒྲུབས། དགྱེས་གསང་གཙོ་བོར་གྱུར་པའི་རྒྱུད་སྡེ། བཀའ་བཞི་བརྒྱུད་པས་ཐོག་དྲངས་པའི་གདམས་ངག །ཕྱག་རྒྱ་ཆེན་པོ་སྙིང་པོའི་དོན་སྐོར། །རྫོགས་རིམ་ཁ་འཐོར་དང་བསྟན་སྲུང་གི་རིགས། ལས་ཕྲན་ཚེགས་ཀྱི་སྦྱོར་བ་དུ་མ་གསན་ཅིང་། ཁྱད་པར་འབྱོན་ཐེབས་རྗེས་མར་ནཱ་རོ་པ་སྤྱོད་པ་ལ་གཤེགས་ཟིན་པས་གདུལ་བྱ་ཐུན་

― LT28_Page_0446 ―

^{[མ་དཔེ་གཟིགས་ན་འདིར་གནོན།]}

[Full Size]

མོང་བ་རྣམས་ཀྱིས་མཇལ་དུ་མེད་ཀྱང་། །རྗེ་འདིས་མོས་གུས་དང་དགའ་སྤྱད་ཆེན་པོས་བཙལ་བས་ཞལ་མངོན་སུམ་དུ་མཇལ་ཞིང་བདེ་མཆོག་མཁའ་འགྲོ་སྙན་བརྒྱུད་ཡོངས་སུ་རྫོགས་པ་གནང་། དུས་དེར་འཕགས་ཡུལ་ཙམ་ན་འགྲན་ཟླ་བྲལ་བའི་བླ་མ་ནཱ་རོ་པ་དང་མཻ་ཏྲི་རྣམ་པ་གཉིས་ཀྱིས་བྱང་ཕྱོགས་ཁ་བ་ཅན་རྣམས་འདུལ་བའི་རྒྱལ་ཚབ་ཏུ་མངའ་གསོལ། ཐོས་སྒོམ་སྟབས་གཅིག་ཏུ་མཛད་པས་རླུང་སེམས་ལ་རང་དབང་ཐོབ། འོད་གསལ་གྱི་སྩལ་འབྱངས། དགྱེས་རྡོར་དང་གདན་བཞི་སོགས་ཡི་དམ་ལྷའི་དཀྱིལ་འཁོར་ཡང་ཡང་མཇལ། །ཡེ་ཤེས་ཀྱི་མཁའ་འགྲོ་མ་རྣམས་ལས་དབང་དང་གདམས་པ་གསན། ཁྱད་པར་དཔལ་ས་ར་ཧ་པའི་ཡེ་ཤེས་ཀྱི་སྐུས་རྗེས་སུ་བཟུང་ཞིང་ཕྱག་རྒྱ་ཆེན་པོའི་ངོ་སྤྲོད་ཐུན་མོང་མ་ཡིན་པ་སྩལ། སྐྱེ་བ་གསུམ་གྱི་འོག་ཏུ་མངོན་པར་རྫོགས་པར་འཚང་རྒྱ་བའི་ལུང་བསྟན་ཐོབ། །སྣོད་ལྡན་ཐུན་མོང་མ་ཡིན་པ་རྣམས་ཀྱི་སྣང་ངོར། དགྱེས་རྡོར། བདེ་མཆོག །གསང་འདུས་སོགས་རྒྱུད་སྡེའི་ལྷར་སྤྲུལ་པ་དང་། ཟད་པར་ཟིལ་གནོན་སོགས་ངོ་མཚར་བའི་ཆོ་འཕྲུལ་བསྟན་པས་སྤྲོ་བ་བསྐྱེད་ཅིང་། ཐུན་མོང་བ་རྣམས་ལ་གྲོང་འཇུག་སོགས་བློ་དང་འཚམས་པའི་རྫུ་འཕྲུལ་གྱིས་དད་པ་ལ་སྦྱོར་བས་འཕགས་ཡུལ་དུའང་གྲུབ་ཐོབ་ཀྱི་སྙན་པས་ཁྱབ་པ་སོགས་སྐུ་ཆེ་བའི་ཡོན་ཏན་བསམ་གྱིས་མི་ཁྱབ་པ་མངའ་ཡང་། བོད་ཡུལ་གདུལ་བྱ་སྤྱི་མཐུན་གྱི་སྣང་ངོར་སྦས་ཚུལ་གཙོ་བོར་བསྟན་ཏེ་འདོད་པའི་ཡོན་ཏན་ལྔ་ལ་ཅི་དགར་སྤྱོད་པའི་རྣམ་པས་རྡོ་རྗེ་ཐེག་པའི་ཆོས་ཀྱི་འཁོར་ལོ་བསྐོར་ནས། ཐུགས་སྲས་ཀྱི་གཙོ་

― LT28_Page_0447 ―

^{[མ་དཔེ་གཟིགས་ན་འདིར་གནོན།]}

[Full Size]

བོ་ཀ་ཆེན་བཞི། ལས་ཅན་གྱི་སློབ་མ་བཞིའི་གཙོར་བྱས་སྐལ་ལྡན་གྱི་གདུལ་བྱ་མང་པོ་སྨིན་གྲོལ་ལ་བཀོད། སྒྲུབ་བརྒྱུད་རྟོགས་པའི་བསྟན་པ་མཁའ་ཁྱབ་ཏུ་སྤེལ། བཀའ་བརྒྱུད་གྲུབ་ཐོབ་རྒྱ་མཚོའི་ཆུ་འགོ་བཙུགས། །སྐུ་ཚེ་དང་མཛད་པ་མཐར་ཕྱིན་པའི་སྐབས་སུ་ཚོགས་ཀྱི་འཁོར་ལོ་མཛད་པའི་ཚེ་ཡབ་ཡུམ་རྣམས་དགྱེས་རྡོར་སྤྲུལ་པའི་ལྷ་དགུའི་དཀྱིལ་འཁོར་དུ་དངོས་སུ་བཞེངས་ནས། །ཇོ་མོ་བརྒྱད་པོ། །བདག་མེད་ལ་བསྡུས། བདག་མེད་མ་འོད་ཀྱི་ཐིག་ལེར་བྱས་ནས་ཉིད་ཀྱི་ཐུགས་ཀར་བསྡུས་ཏེ་ངོ་མཚར་བའི་ལྟས་དཔག་ཏུ་མེད་པ་དང་བཅས་མཁའ་སྤྱོད་ཀྱི་གྲོང་ཁྱེར་ཆེན་པོར་གཤེགས་པ་སྟེ། དེ་ལྟར་བཀའ་བརྒྱུད་ཡོངས་ཀྱི་སྤྱི་མེས་ཆེན་པོ་སྲས་དང་བཅས་པ་གསང་བ་རྒྱལ་བ་རིགས་ལྔའི་ཚུལ་དུ་སྒྲུབ་པའི་ལམ་ཟབ་བླ་མའི་དཀྱིལ་འཁོར་དུ་དབང་བསྐུར་བ་བགྱི་བ་ལ། སློབ་དཔོན་གྱི་བྱ་བའི་རིམ་པ་རྣམས་གྲུབ་ཟིན། སློབ་མའི་བྱ་བ་དཀྱིལ་འཁོར་དུ་འཇུག་པ་དང་། ཞུགས་ནས་དབང་བསྐུར་བ་གཉིས་སུ་ཡོད་པ་ལས་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་དམིགས་ཏེ་མཎྜལ་ཞིག་འབུལ་བར་ཞུ། ཞེས་མཎྜལ་འབུལ་དུ་གཞུག །ཐལ་མོ་མེ་ཏོག་དང་བཅས་གསོལ་བ་འདེབས་པ་འདིའི་རྗེས་ཟློས་མཛོད། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་མགོན་ལ་སྐྱབས་སུ་མཆི། །གཙོ་བོ་མཁའ་འགྲོ་མར་བཅས་པའི། །ལྷ་རྣམས་ཀུན་ལ་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། ལན་གསུམ། སྔོན་ཆད་ལྷན་ཅིག་སྐྱེས་པའི་མ་རིག་གིས་རིག་པ་ཡེ་ཤེས་ཀྱི་མིག་

― LT28_Page_0448 ―

^{[མ་དཔེ་གཟིགས་ན་འདིར་གནོན།]}

[Full Size]

བསྒྲིབས་པས་དོན་དམ་རྡོ་རྗེའི་དཀྱིལ་འཁོར་མ་མཐོང་བར་མཚོན་པའི་གདོང་གཡོགས་འཆིང་མཛོད། ཨོཾ་ཨཱཿཧཱུྃ། ཞེས་མིག་དར་འཆིང་། རིགས་ཀྱི་སྐལ་པ་བརྟག་པའི་སླད་དུ་མེ་ཏོག་གི་ཆུན་པོ་ཐོགས་པར་མོས་ཤིག །འབྲུ་གསུམ་བརྗོད་ལ་མེ་ཏོག་སྦྱིན། རྒྱུད་རྣམ་པར་དག་པར་བྱ་བའི་སླད་དུ། བླ་མ་རྡོ་རྗེ་འཆང་ཡེ་ཤེས་རིགས་ལྔའི་དཀྱིལ་འཁོར་པ་རྩ་གསུམ་རྒྱལ་བ་སྲས་དང་བཅས་པའི་དྲུང་དུ་བདུན་རྣམ་དག་སྔོན་ཏུ་འགྲོ་བ་ཅན་གྱི་བྱང་ཆུབ་མཆོག་ཏུ་ཐུགས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བྱང་ཆུབ་སེམས་སུ་འདི་བགྱིད་དེ། །བདག་དང་གཞན་དོན་རབ་སྒྲུབ་ཕྱིར། །བདག་གིས་བྱང་ཆུབ་སེམས་མཆོག་བསྐྱེད། །ཨེ་མ་ཧོ་སེམས་ཅན་ཀུན་མགྲོན་གཉེར། །བྱང་ཆུབ་སྤྱོད་མཆོག་མཛད་བཞིན་སྤྱད། །འགྲོ་ལ་ཕན་ཕྱིར་སངས་རྒྱས་ཤོག །ཅེས་ལན་གསུམ་གྱིས་རྒྱུད་སྦྱང་། ཁྱེད་རང་གི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ་ལ། དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པས་རྒྱས་བཏབ་པར་མོས་ལ་འདིའི་རྗེས་ཟློས། །ཨོཾ་སརྦ་ཡོ་ག་ཙིཏྟ་ཨུཏྤ་དྭ་ཡ་མི། ལན་གསུམ། ཐམས་ཅད་རྡོ་རྗེའི་རྣལ་འབྱོར་དུ་སེམས་བསྐྱེད་པ་དེ་ཉིད་བརྟན་པར་བྱས་པའི་མོས་པར་མཛོད། །རྡོ་རྗེ་སྙིང་གར་བཞག་ལ། ཨོཾ་སུ་ར་ཏེ་ས་མ་ཡ་སྟཾྭ་ཧོ་སིངྡྷི་

― LT28_Page_0449 ―

^{[མ་དཔེ་གཟིགས་ན་འདིར་གནོན།]}

[Full Size]

བཛྲ་ཡ་ཐཱ་སུ་ཁཾ། ཞེས་བརྗོད། ལས་ཀྱི་རྡོ་རྗེའི་ཕྱག་གི་རྡོ་རྗེ་ལ་འཇུས་ནས་དཀྱིལ་འཁོར་གྱི་ནང་དུ་ཞུགས་པའི་མོས་པ་མཛོད། ཨོཾ་ཨཱ་ཁཾ་བཱིར་ཧཱུྃ། ཡེ་ཤེས་པ་དབབ་བ་ལ་ལུས་གནད་དྲང་པོར་བསྲང་། རླུང་ཁ་སྦྱོར་དུ་འཆིངས། །ཡིད་གཞན་ཏུ་མ་ཡེངས་པར་དམིགས་པ་འདི་བཞིན་ཏུ་མཛོད། ཁྱེད་རང་རྣམས་གང་དུ་གནས་པའི་གོ་སར་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་པདྨ་ཟླ་ཉི་བརྩེགས་པའི་གདན་ལ། ཁྱེད་རང་རྣམས་ཀྱི་སེམས་རྒྱུ་དུས་ཀྱི་བླ་མ་རྡོ་རྗེ་སེམས་དཔའ་ཐོག་མ་ཐ་མ་མེད་པའི་ཀུན་ཏུ་བཟང་པོ་བརྟན་གཡོ་ཐམས་ཅད་ཀྱི་ཁྱབ་བདག་ཏུ་གྱུར་པ་དེ་ཉིད་ཐུགས་རྗེ་ཆེན་པོའི་དབང་གིས་ཁམས་གསུམ་གྱི་སྲིད་པ་ན་འགྲོ་བའི་དོན་མཛད་པའི་ཕྱིར། ཧཱུྃ་ཡིག་གི་སྤྲུལ་པའི་འབྲས་བུའི་བླ་མ་རྡོ་རྗེ་འཆང་རིགས་ཐམས་ཅད་ཀྱི་བདག་པོ་བལྟ་བས་ཆོག་མི་ཤེས་པར་མཛེས་པ་མཚན་དཔེས་སྤྲས་པའི་སྐུ་ཨིནྡྲ་ནཱི་ལ་བཅག་བའི་འཕྲོ་ལྟར་སྔོ་བ། ཤིན་ཏུ་ཞི་ཞིང་འཛུམ་པ་རལ་པའི་ཟུར་ཕུད་ལ་སྣ་ཚོགས་རྡོ་རྗེ་དང་ཟླ་བ་ཕྱེད་པ་འཛིན་པ། རིན་པོ་ཆེའི་ཅོད་པན་ལ་སོགས་པའི་རྒྱན་དང་ཕྱག་རྒྱ་དྲུག་གིས་བརྒྱན་པ་དར་གྱི་སྟོད་གཡོགས་དང་ཤམ་ཐབས་ཅན་རྡོ་རྗེ་སྙེམས་མ་དམར་མོ་མཛེས་སྡུག་གི་ཕུལ་དུ་བྱོན་པ་བཅུ་དྲུག་པའི་ལང་ཚོ་ཅན་ཕྱོགས་ཀྱི་གོས་མ་ཕྱག་རྒྱ་ལྔས་བརྒྱན་ཅིང་གྲི་ཐོད་འཛིན་པ་ལ་རྡོ་རྗེ་དང་དྲིལ་བུ་འཛིན་པའི་ཕྱག་དག་གིས་འཁྱུད་དེ་སྐྱིལ་མོ་ཀྲུང་གིས་འོད་ཀྱི་ཕྲེང་བ་འཁྲིགས་པའི་དབུས་ནང་ཞུགས་པར་གྱུར་པ་ལ་བླ་མ་དཀྱིལ་འཁོར་གྱི་གཙོ་བོའི་ཐུགས་ཀ་ནས་སྐུ་གསུང་ཐུགས་ཡེ་ཤེས་རྡོ་རྗེའི་རང་བཞིན་གྱི་འོད་ཟེར་སྣ་ཚོགས་པ་སློབ་མའི་ལུས་ལ་ཞུགས་པས་ཟུང་འཇུག་

― LT28_Page_0450 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲས་བུའི་བླ་མ་རིགས་ཐམས་ཅད་ཀྱི་ཁྱབ་བདག་དང་དབྱེར་མི་ཕྱེད་པར་གྱུར་པའི་མོས་པ་རྩེ་གཅིག་ཏུ་མཛོད་ཅིག །གུ་གུལ་ཟླ་མཚན་འདྲེས་པ་བསྲེག་ཅིང་རོལ་མོའི་སྒྲ་དང་བཅས་པས། ཨོཾ་བཛྲ་ཨཱ་བེ་ཤ་ཡ་ཨཱཿཨཱཿཞེས་བྱིན་དབབ། ཡེ་ཤེས་པ་དེ་ཉིད་བྱང་ཆུབ་མ་ཐོབ་ཀྱི་བར་དུ་རྒྱུད་ལ་བརྟན་པར་མོས་ཤིག། རྡོ་རྗེ་མགོར་བཞག་ལ། ཏིཥྛ་བཛྲ་བརྗོད། སྔར་བྱིན་པའི་མེ་ཏོག་དེ་ཉིད་སློབ་དཔོན་གྱི་ལུས་ལ་ཕུལ་བཞིན་པར་སྔགས་འདིའི་རྗེས་ཟློས། པྲ་ཏཱིཙྪ་བཛྲ་ཧོཿཞེས་དོར་དུ་གཞུག་པས་གནས་ལྔ་གང་དུ་ཕོག་པའི་རིགས་ངེས་པར་བྱ། རིགས་ཀྱི་ལྷས་མེ་ཏོག་གི་ཕྲེང་བ་དེ་ཉིད་ཁྱེད་རང་རྣམས་ཀྱི་སྤྱི་བོར་དབང་རྟགས་ཅོད་པན་གྱི་ཚུལ་དུ་སླར་འཆིང་བར་མོས་ཤིག །མེ་ཏོག་སྤྱི་བོར་བཞག་ལ། པྲ་ཏི་གྲིཧྞ་སྟཾྭ་ས་ཏྭ་མ་ཧཱ་བ་ལ། མིག་དར་གྱི་མཚོན་ནས་མ་རིག་པའི་སྒྲིབ་པ་བསལ་བས་གདོད་གནས་རང་བྱུང་ཡེ་ཤེས་ཀྱི་དཀྱིལ་འཁོར་ཆེན་པོ་མངོན་སུམ་དུ་མཐོང་བར་མོས་ཤིག །ཨོཾ་ཨཱཿཧཱུྃ། ཞེས་མིག་དར་དབྱེ། དེ་དག་གི་འཇུག་པའི་ཆོས་རྣམས་གྲུབ་པ་ལགས། ཞུགས་ནས་མངོན་པར་དབང་བསྐུར་བ་ལ་བུམ་གསང་ཤེས་རབ་ཚིག་དབང་རིན་པོ་ཆེ་བཞི་ལས། ཐོག་མར་བུམ་པ་དང་རྗེས་སུ་འབྲེལ་བའི་རིག་པའི་དབང་ལྔ་ཞུ་བའི་ཡོན་ཏུ་མཎྜལ་ཕུལ། །གསོལ་བ་འདེབས་པ་འདིའི་རྗེས་ཟློས། །བྱང་ཆུབ་རྡོ་རྗེས་སངས་རྒྱས་ལ། །མཆོད་སྦྱིན་ཇི་ལྟར་སྩལ་བ་ལྟར། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ལན་གསུམ། ལས་རྡོར་གྱིས་རྣམ་བུམ་བཏེགས་པ་དང་སློབ་མ་གཉིས་ཀ་ལས་བུམ་གྱི་ཆུ་དང་། །སུམྦྷ་ནིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས། པད་ཉིའི་གདན་ལ་སློབ་མ་དང་དབང་རྫས་

― LT28_Page_0451 ―

^{[མ་དཔེ་གཟིགས་ན་འདིར་གནོན།]}

[Full Size]

བུམ་པའི་ཆུ་གཉིས་ཀ་ཧཱུྃ་ལས་མི་བསྐྱོད་རྡོ་རྗེ་སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པ། རྒྱན་ཐམས་ཅད་ཀྱིས་བརྒྱན་ནས་སྐྱིལ་ཀྲུང་གིས་བཞུགས་པའི་ཐུགས་ཀའི་ས་བོན་ལས་འོད་འཕྲོས་ཡེ་ཤེས་པ་ཛཿཧཱུྃ་བཾ་ཧོཿ དབང་རྫས་མི་བསྐྱོད་པ་འོད་དུ་ཞུ་བ་བུམ་པའི་བདུད་རྩིར་གྱུར། དཀྱིལ་འཁོར་གྱི་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། རིག་པའི་ལྷ་མོ་རྣམས་ཀྱིས་དབང་བསྐུར། དབང་ཡུལ་གྱི་སེམས་དཔའ་སེམས་མས་བཀྲ་ཤིས་བརྗོད་ཅིང་མཆོད། །ལས་དབང་གི་ཁྲོ་བོ་ཁྲོ་མོས་བགེགས་སྐྲོད་པར་མོས་ཤིག །རྡོ་རྗེ་ཆེན་པོས་དབང་བསྐུར་བ། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། ཨོཾ་བཛྲ་ཨ་བྷི་ཥིཉྩ་མི། ཞེས་བུམ་པས་དབང་བསྐུར་ཞིང་བུམ་ཆུ་འཐུང་དུ་གཞུག་གོ། །དབུ་རྒྱན་དང་སློབ་མ་སྔར་ལྟར་བསང་སྦྱང་། སྟོང་པའི་ངང་ལས་པད་ཉིའི་གདན་ལ་སློབ་མ་དང་དབང་རྫས་ཅོན་པན་གཉིས་ཀཏྲཱྃ་ལས་རིན་འབྱུང་རྡོ་རྗེ་འཆང་སྐུ་མདོག་སེར་པོ་རྡོ་རྗེ་དང་ནས། དབང་རྫས་ཀྱི་རིན་འབྱུང་འོད་དུ་ཞུ་བ་ཅོད་པན་ཏུ་གྱུར། རྒྱས་པར་སྤྲོ་ན། དཀྱིལ་འཁོར་གྱི་སོགས་ནས། བགེགས་སྐྲོད་པར་མོས་ཤིག །བར་བུམ་དབང་སྐབས་ལྟར་སྦྱར་བ་འདི་ཕྱིན་གཞན་རྣམས་ལའང་འགྲེ། བསྡུ་ན་མི་དགོས། རལ་པའི་ཐོར་ཚུགས་ཀྱིས་བརྒྱན་པའི། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་གི་དབུ་རྒྱན་དང་། །དར་དཔྱངས་དབང་བསྐུར་སྦྱིན་པར་བྱ། །ཨོཾ་རཏྣ་ཨ་བྷི་ཥིཉྩ་མི། ཞེས་དབུ་རྒྱན་མགོ་ལ་བཀོན། རྡོ་རྗེ་དང་སློབ་མ་བསང་སྦྱང་། སྟོང་པའི་ངང་ལས། པད་ཉིའི་གདན་ལ་སློབ་མ་དང་

― LT28_Page_0452 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་རྫས་རྡོ་རྗེ་གཉིས་ཀ་ཧྲཱིཿལས་སྣང་བ་མཐའ་ཡས་རྡོ་རྗེ་འཆང་སྐུ་མདོག་དམར་པོ་རྡོ་རྗེ་དང་སོགས་ནས། དབང་རྫས་ཀྱི་སྣང་བ་མཐའ་ཡས་འོད་དུ་ཞུ་བའི་རྡོ་རྗེར་གྱུར། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ནས་རབ་སྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །ཨོཾ་པདྨ་ཨ་བྷི་ཥིཉྩ་མི། ཞེས་ལག་གཡས་པར་རྡོ་རྗེ་གཏད། དྲིལ་བུ་དང་སློབ་མ་བསང་སྦྱང་། སྟོང་པའི་ངང་ལས། པད་ཉིའི་གདན་ལ་སློབ་མ་དང་དབང་རྫས་དྲིལ་བུ་གཉིས་ཀ་ཨཱཿལས་དོན་གྲུབ་རྡོ་རྗེ་འཆང་སྐུ་མདོག་ལྗང་གུ་ནས། དོན་གྲུབ་འོད་དུ་ཞུ་བའི་དྲིལ་བུར་གྱུར། །སངས་རྒྱས་ཀུན་གྱི་དྲིལ་བུའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་གྲུབ་ཕྱིར། །དྲིལ་བུ་འདི་ནི་ཁྱོད་ཀྱིས་ལོངས། ཨོཾ་ཀརྨ་ཨ་བྷི་ཥིཉྩ་མི། ཞེས་ལག་གཡོན་པར་དྲིལ་བུ་གཏད། སློབ་མ་བསང་སྦྱང་། སྟོང་པའི་ངང་ལས། པད་ཉིའི་གདན་ལ་སློབ་མ་རྣམ་སྣང་རྡོ་རྗེ་འཆང་སྐུ་མདོག་དཀར་པོ་རྡོ་རྗེ་དང་སོགས་ནས། ཛཿཧཱུྃ་བཾ་ཧོཿདཀྱིལ་འཁོར་གྱི་སོགས་ནས། བགེགས་སྐྲོད་པར་མོས་ཤིག །རྡོར་དྲིལ་ལྷན་ཅིག་སྤྱི་བོར་དཀྲོལ་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་མི། བཛྲ་ནཱ་མ་ཨ་བྷི་ཥེ་ཀ་ཏ་ཀྱེ་དཔལ། གསང་བའི་མིང་སོ་སོའི་མཐར། རྡོ་རྗེ་ཞེས་བྱ་བའོ། །དེ་རྣམས་ཀྱིས་ཕུང་པོ་དང་ཁམས་ལྔའི་དྲི་མ་སྦྱངས་ཤིང་། མ་རིག་པ་ལྔ་ལས་བཟློག་ནས་རིག་པའི་ཡེ་ཤེས་ལྔ་བསྐྱེད་པས་རིག་པའི་དབང་ཞེས་བྱའོ། །དེ་ནས་རྡོ་རྗེ་སློབ་དཔོན་གྱི་དབང་བསྐུར་ཞུ་བའི་ཡོན་ཏུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་

― LT28_Page_0453 ―

^{[མ་དཔེ་གཟིགས་ན་འདིར་གནོན།]}

[Full Size]

སྩོལ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་བདག་ནི་སློབ་དཔོན་གྱུར། ལན་གསུམ། སློབ་མ་བསང་སྦྱང་། ཁྱེད་རང་དཀྱིལ་འཁོར་གྱི་ཤར་བྱམས་སུ་སེང་གེས་བཏེགས་པའི་ཁྲི་ལ་རྡོ་རྗེ་འཆང་རིགས་ཐམས་ཅད་ཀྱི་བདག་པོ་སོགས་གང་གི་བྱིན་འབེབས་སྐབས་བཞིན་ལ། དབུས་ན་བཞུགས་པ་གྱུར་པ་ལ་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་དམ་ཚིག་སྩལ་བར་མོས་ཤིག །རྡོ་དྲིལ་གཏད་ཅིང་འཁྱུད་ཚུལ་བྱེད་དུ་གཞུག་ལ། །རྡོ་རྗེ་རབ་གནས་རྡོ་རྗེ་ཉིད། །ཆེ་དང་དྲིལ་བུ་ཆེན་པོ་ཟུངས། །དེ་རིང་རྡོ་རྗེ་སློབ་དཔོན་གྱུར། །སློབ་མ་བསྡུ་བ་ཉིད་དུ་གྱིས། རྡོ་རྗེ་ཐུགས་ཀྱི་དམ་ཚིག །དྲིལ་བུ་གསུང་གི་དམ་ཚིག །ཕྱག་རྒྱ་སྐུའི་དམ་ཚིག་སྟེ་བརྟུལ་ཞུགས་དམ་ཚིག་གསུམ་དང་མི་འབྲལ་བའི་སྒོ་ནས་སེམས་ཅན་གྱི་དོན་གྱིས་ཤིག །ཅེས་རྗེས་སུ་གནང་བ་སྦྱིན། དེ་རྣམས་ཀྱིས་ལུས་ཀྱི་དྲི་མ་དག །བུམ་པའི་དབང་ཐོབ། ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་སྐལ་པ་ཅན་ཏུ་བྱས་པ་ཡིན་ནོ། །གཉིས་པ་གསང་བའི་དབང་བསྐུར་ཞུ་བའི་ཡོན་ཏུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། །ཁྱབ་བདག་བདག་ལ་སྨན་པ་དང་། །བདག་དོན་བདག་ལ་ཐུགས་བརྩེའི་ཕྱིར། །སྒྱུ་འཕྲུལ་དྲྭ་བས་མངོན་རྫོགས་པའི། །བྱང་ཆུབ་ཅི་ནས་བདག་ཐོབ་མཛོད། ལུས་ཀྱི་དཀྱིལ་འཁོར་མ་མཐོང་བའི་བརྡར་གདོང་གཡོགས་བཅིང་། ཨོཾ་ཨཱཿཧཱུྃ། བླ་མ་རྡོ་རྗེ་འཆང་ཡབ་ཡུམ་སྙོམས་པར་ཞུགས། །སྐུ་གསུང་ཐུགས་ཡེ་ཤེས་རྡོ་རྗེའི་ལྷ་ཚོགས་ཐམས་ཅད་ཞུ་བའི་བདུད་རྩི་བྱང་ཆུབ་ཀྱི་སེམས་དཀར་དམར་འདྲེས་པའི་ཐིག་ལེ་པདྨར་བབས་པ་ལྕེས་བླངས་བར་མོས་ཤིག །ཐོད་པའི་

― LT28_Page_0454 ―

^{[མ་དཔེ་གཟིགས་ན་འདིར་གནོན།]}

[Full Size]

བདུད་རྩི་སྦྱིན་ལ། །ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །དེ་བཞིན་བྱང་ཆུབ་སེམས་རྒྱུན་གྱིས། །དེ་རིང་ཁྱོད་ལ་དབང་བསྐུར་རོ། །ཨ་ཧོ་མཧཱ་སུ་་ཁ། བྱང་སེམས་བདུད་རྩིའི་རྒྱུན་གྱིས་ཕུང་ཁམས་སྐྱེ་མཆེད་ཐམས་ཅད་ལ་ཁྱབ་པས་རྩ་རླུང་ཐིག་ལེ་ཡེ་ཤེས་སུ་བྱིན་གྱིས་རླབས། གསལ་སྟོང་རྣམ་པར་མི་རྟོག་པའི་ཏིང་ངེ་འཛིན་རྒྱུད་ལ་སྐྱེས་པར་མོས་ལ་གདོང་གཡོགས་སོལ། འབྲུ་གསུམ་བརྗོད། དེས་དག་གི་དྲི་མ་དག །གསང་བའི་དབང་ཐོབ། ལམ་རྩ་རླུང་ཐིག་ལེ་བསྒོམ་པ་ལ་དབང་འབྲས་བུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་ཐོབ་པའི་སྐལ་པ་ཅན་ཏུ་བྱས་པ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་བསྐུར་ཞུ་བའི་ཡོན་ཏུ་མཎྜལ་ཕུལ། །གསོལ་བ་འདེབས་པ་འདིའི་རྗེས་ཟློས། ཁྱབ་བདག་བདག་ལ་སོགས། བྷ་གའི་དཀྱིལ་འཁོར་མ་མཐོང་བའི་བརྡར་གདོང་གཡོགས་བཅིང་། ཨོཾ་ཨཱཿཧཱུྃ། ཁྱེད་རང་རྣམས་རྡོ་རྗེ་འཆང་ཆེན་པོར་གསལ་བ་ལ། སངས་རྒྱས་རྣམས་ཀྱི་དཔང་པོར་བཅས་པའི་བླ་མས་མཚན་ཉིད་དང་ལྡན་ཅིང་ཡོངས་སུ་དག་པའི་རིག་མ་རྡོ་རྗེ་སྙེམས་མའི་ངོ་བོར་བྱིན་གྱིས་བརླབས་པ་ཕྱག་ཏུ་བསྩལ་བར་མོས་ཤིག །རིག་ཙཀ་སྦྱིན་ལ། ལྷ་མོ་དགའ་སྦྱིན་གནས་སྦྱིན་མ། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེད་ལ་མཆོད་པ་རྟག་ཏུ་གྱིས། ཕྱག་རྒྱ་དང་སྙོམས་པར་ཞུགས་པས་དགའ་བ་དང་མཆོག་དགའི་མཐར། ལྷན་ཅིག་སྐྱེས་པའི་སྐད་ཅིག་མར་སོ་སོ་རང་གིས་རིག་པར་བྱ་བ་བདེ་ཆེན་དཔེའི་ཡེ་ཤེས་ཉམས་སུ་མྱོང་བར་མོས་ལ་གདོང་གཡོགས་སོལ། འབྲུ་གསུམ་བརྗོད། དེས་ཡིད་ཀྱི་དྲི་མ་དག །ཤེས་རབ་ཡེ་ཤེས་ཀྱི་དབང་ཐོབ་

― LT28_Page_0455 ―

^{[མ་དཔེ་གཟིགས་ན་འདིར་གནོན།]}

[Full Size]

ཕོ་ཉའི་ལམ་བསྒོམ་པ་ལ་དབང་། འབྲས་བུ་ཐུགས་རྡོ་རྗེ་ཆོས་ཀྱི་སྐུ་ཐོབ་པའི་སྐལ་བ་ཅན་ཏུ་བྱས་པ་ཡིན་ནོ། །བཞི་པ་ཚིག་དབང་རིན་པོ་ཆེ་ཞུ་བའི་ཡོན་ཏུ་མཎྜལ་ཕུལ། །གསོལ་བ་འདེབས་པ་འདིའི་རྗེས་ཟློས། ཁྱབ་བདག་བདག་ལ་སོགས། དེ་ཁོ་ན་ཉིད་ཀྱི་དཀྱིལ་འཁོར་མ་མཐོང་བའི་བརྡར་གདོང་གཡོགས་བཅིང་། ཨོཾ་ཨཱཿཧཱུྃ། སྔར་རྩོལ་བཅས་ཐབས་ཀྱི་ལམ་ལ་བརྟེན་ནས་ལྷན་སྐྱེས་དཔེའི་ཡེ་ཤེས་ཉམས་སུ་མྱོང་བ་དེས་མཚོན་བྱེད་དུ་བྱས་ནས་རྩོལ་མེད་དོན་དམ་རང་བྱུང་གི་ཡེ་ཤེས་ཚིག་གི་སྒོ་ནས་ངོ་སྤྲོད་པ་འདི་ལ་གསན་ཅིང་ཕྱག་རྒྱ་ཆེན་པོ་རྣམ་པར་མི་རྟོག་པའི་ངང་དུ་མཉམ་པར་འཇོག་པར་ཞུ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱེད་རང་ཡང་ནི་དེ་ཡི་ཕ། སྣང་སྲིད་ཕྱག་རྒྱ་ཆེན་པོ་ཅི་སྣང་ཆོས་སྐུའི་རང་བཞིན་མངོན་ཏུ་གྱུར་པར་མོས་ལ་གདོང་གཡོགས་སོལ། འབྲུ་གསུམ་བརྗོད། དེས་ལུས་ངག་ཡིད་གསུམ་ཐ་དད་དུ་འཛིན་པའི་དྲི་མ་དག །དབང་བཞི་པ་ཐོབ། ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་ཀྱི་སྐུ་ཐོབ་པའི་སྐལ་པ་ཅན་ཏུ་བྱས་པའོ། །དེ་ནས་ཐུན་མོང་མ་ཡིན་པའི་དམ་ཚིག་བསྒྲག་པ་འདི་ལ་གསན་པར་འཚལ། ཁྱོད་ཀྱིས་སྲོག་ཆགས་བསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པ་ཡང་ཁྱོད་ཀྱིས་ལོངས། །གཞན་གྱིས་བུད་མེད་བསྟེན་པར་གྱིས། དེ་ལྟར་ཡང་ལས་དང་པོས་དམ་ཚིག་བཞི་པོ་སྦས་དོན་སྒྲ་ཇི་བཞིན་མིན་པ་ལ་གཙོ་བོར་ཉམས་སུ་ལེན་ཅིང་། དྲོད་ཐོབ་ཀྱི་རྣལ་འབྱོར་པས་ཚིག་དོན་སྒྲ་ཇི་བཞིན་པའི་བརྟུལ་ཞུགས་ལ་སྤྱོད་པར་རྗེས་སུ་གདམས་པ་ལགས་སོ། སྤྲོ་ན་ཤིས་

― LT28_Page_0456 ―

^{[མ་དཔེ་གཟིགས་ན་འདིར་གནོན།]}

[Full Size]

བརྗོད་བྱ། དེ་དག་རྣམས་ཀྱིས་མངའ་བདག་མར་པའི་གདམས་ཟབ་ཐུན་མོང་མ་ཡིན་པ་ལམ་ཟབ་བླ་མ་སྒྲུབ་པའི་སྨིན་བྱེད་ཕྱག་བཞེས་ལྟར་ཕུལ་གྲུབ་བ་ཡིན་པས་རྩ་བ་དང་ཡན་ལག་གིས་བསྡུས་པའི་དམ་ཚིག་རྣམས་ལེགས་པར་བླངས་ནས་ཚུལ་བཞིན་ཏུ་བསྲུང་ངོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་དང་། གཏང་རག་མཎྜལ་ཕུལ། ལུས་ལོངས་སྤྱོད་འབུལ་བ་དང་། དགེ་བསྔོ་བྱས་ནས་སློབ་མ་རྣམས་རང་གནས་སུ་བཏང་ངོ། གསུམ་པ་ནི། གཞུང་གི་གཤམ་ནས་འབྱུང་བ་ལྟར་གཏོར་འབུལ། །ཚོགས་མཆོད། གཏང་རག་མཆོད་བསྟོད། ནོངས་བཤགས། །མདུན་བསྐྱེད་རྟེན་ཡོད་མེད་དང་བསྟུན་ཡེ་ཤེས་པ་བརྟན་བཞུགས་སམ། །གཤེགས་གསོལ་བྱས་ནས་དམ་ཚིག་པ་རང་ལ་བསྡུ། བདག་བསྐྱེད་འོད་གསལ་དུ་བསྡུ་ཞིང་ཟུང་འཇུག་གི་སྐུར་ལྡང་། བསྔོ་སྨོན་བཀྲ་ཤིས་རྒྱས་པར་སྤེལ་བར་བྱའོ། །དགྱེས་མཛད་ལོ་ཙཱའི་བྱིན་རླབས་ཉི་འོད་ཀྱིས། །བདག་གཞན་འཁྲུལ་པའི་མུན་ཁང་བརྟོལ་ནས་ཀྱང་། །ཡེ་ཤེས་སྙིང་གི་པདྨ་ཁ་ཕྱེ་ནས། །གྲུབ་གཉིས་སྦྲང་རྩིའི་སྐལ་ལྡན་ཚིམ་བྱེད་ཤོག །ཅེས་པའང་བསླབ་གསུམ་མངའ་བདག་མཁན་བླ་མ་བཀྲ་ཤིས་འོད་ཟེར་རབ་ཏུ་རྒྱས་པའི་སྡེས་གསུང་བསྐུལ་མཛད་དོ། མངའ་བདག་མར་པའི་བཀའ་བརྒྱུད་ཀྱི་གྲལ་མཐར་སྙེགས་པ་ཀརྨ་ངག་དབང་ཡོན་ཏན་རྒྱ་མཚོས་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་བགྱིས་པ་དགེ་ལེགས་འཕེལ། །སརྦ་དཱ་མངྒ་ལཾ།།།

རྗེ་བཙུན་རས་པ་ཆེན་པོ་ལ་བརྟེན་པའི་བླ་མའི་རྣལ་འབྱོར་ཚོགས་མཆོད་དང་བཅས་པ་ཡེ་ཤེས་དཔལ་འབར།

― LT28_Page_0457 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་རས་པ་ཆེན་པོ་ལ་བརྟེན་པའི་བླ་མའི་རྣལ་འབྱོར་ཚོགས་མཆོད་དང་བཅས་པ་ཡེ་ཤེས་དཔལ་འབར་ཞེས་བྱ་བ་བཞུགས་སོ།། །།

― LT28_Page_0458 ―

^{[མ་དཔེ་གཟིགས་ན་འདིར་གནོན།]}

[Full Size]

རྡོ་རྗེ་འཆང་གི་གོ་འཕང་ནི། །སྐུ་ཚེ་གཅིག་གིས་མངོན་མཛད་པ། །གངས་ཅན་གྲུབ་པའི་དབང་ཕྱུག་ལ། །བཏུད་ནས་དེ་ཡི་རྣལ་འབྱོར་འཆང་། །བསམ་གཏན་དང་རྗེས་སུ་མཐུན་པའི་གནས་སུ་ངེས་འབྱུང་དང་སྐྱོ་ཤས་དྲག་པོས་རྒྱུད་བསྐུལ། །མོས་གུས་དུས་མཐའི་མེའི་ཤུགས་བཞིན་ཏུ་སྦར། །བྱང་ཆུབ་ཀྱི་སེམས་རིན་པོ་ཆེ་རྣམ་པར་གཉིས་ལ་བློ་མངོན་ཏུ་བཞག་སྟེ། འབྱོར་ན་སྟེགས་གཙང་མར་མཎྜལ་ཚོམ་བུས་སྦས་པ་དང་ཉེར་སྤྱོད་མཆོད་པའི་བཀོད་པ་ཇི་ལྟར་ཚོགས་པ་བཤམ། མ་འབྱོར་ན་ཏིང་ངེ་འཛིན་ཁོ་ནས་ཀྱང་འགྲུབ་ལ། ཚོགས་མཆོད་འབྲེལ་ན་དེའི་ཡོ་བྱད་ཐབས་ཤེས་ཀྱི་རྫས་སོགས་ཉེ་བར་བསྔོགས། དེའི་ཚེ་ཐོག་མར་སྔོན་གཏོར་བཤམས་ལ། །རང་ཉིད་སྐད་ཅིག་རྡོ་རྗེ་རྣལ་འབྱོར་མ། །དམར་མོ་གྲི་ཐོད་ཕྱག་རྒྱས་སྤྲས་པར་གྱུར། བདུད་རྩི་རིལ་བུ་དང་ལྡན་པའི་མྱོས་བྱེད་ཀྱིས་གང་བའི་ཀ་པཱ་ལ་མདུན་ཏུ་བཞག་པ་ལ་དམིགས་ཏེ། ཨོཾ་ཨཱཿབིགྷྣཱནྟ་ཀྲྀ་ཏ་ཧཱུྃ་

― LT28_Page_0459 ―

^{[མ་དཔེ་གཟིགས་ན་འདིར་གནོན།]}

[Full Size]

ཕཊ་ཀྱིས་བསང་། ཨོཾ་སྭ་བྷཱ་བ་ཤུངྡྷཿསརྦ་དྷརྨཱཿསྭ་བྷཱ་བ་ཤུངྡྷོ་྅ཧཾ། གིས་སྦྱང་། སྟོང་པའི་ངང་ལས་རླུང་མེ་ཐོད་སྒྱེད་སྟེང་། །མཚན་ལྡན་བྷཉྫར་གོ་ཀུ་ད་ཧ་ན། །བི་མུ་མ་ར་ཤུ་ལས་ཤ་ལྔ་དང་། །བདུད་རྩི་ལྔར་གྱུར་རླུང་མེས་ཞུ་ཞིང་བསྐོལ། །འབྲུ་གསུམ་འོད་ཀྱིས་ཡེ་ཤེས་བདུད་རྩི་བཀུག །དམ་ཡེ་གཉིས་མེད་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ་ཧ་ཧོཿཧྲཱིཿལན་གསུམ། གཏོར་མའང་དེ་ལྟར་བརླབས་ལ། འབར་བའི་རྒྱས། ཕེ༚། ཞེས་མགྲོན་བཀུག །ཨོཾ་ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཀྵ་ས་བྷཱུ་ཏ་པྲེ་ཏཱ་པི་ཤཱ་ཙ་ཨུནྨཱ་ད་ཨ་པསྨཱ་ར་ཌཱ་ཀ་ཌཱ་ཀི་ནྱཱ་ད་ཡ། ཨི་དཾ་བ་ལི༚་གྲྀཧྞ་ནྟུ། ས་མ་ཡ་རཀྵནྟུུ། མ་མ་སརྦ་སིངྡྷི་མྨེ་པྲ་ཡཙྪནྟུ། ཡཐཻ་བྃ། ཡ་ཐེཥྚ། དྷུཉྫ་ཐ། ཛི་གྷྲ་ཐ། པི་བ་ཐ། །

― LT28_Page_0460 ―

^{[མ་དཔེ་གཟིགས་ན་འདིར་གནོན།]}

[Full Size]

མ་ཏི་ཀྲ་མ་ཐ། མ་མ་སརྦ་ཀཱ་ར་ཏ་ཡ་སཏྶུ་ཁཾ་བི་ཤུངྡྷ་ས་ཧཱ་ཡི་ཀཾ་བྷ་བནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྔགས་ལན་གསུམ་གྱིས་བསྔོས་ལ་གཏོར་མ་དོར། །གང་དག་ནག་པོའི་ཕྱོགས་གྱུར་པའི། །གསང་སྔགས་ཟབ་མོའི་ཆོ་ག་ལ། །ཉན་དང་ལྟ་བར་མི་དབང་བ། །དེ་དག་ཐམས་ཅད་གཞན་ཏུ་དེངས། །གལ་ཏེ་བཀའ་ལས་འདའ་བྱེད་ན། །རྡོ་རྗེ་ཁ་ཊྭཱཾ་རབ་འབར་བས། །མགོ་བོ་ཚལ་པ་བརྒྱར་འགས་འགྱུར། ཨོཾ་སུམྦྷ་ནི་སོགས་ཀྱིས་བགེགས་བསྐྲད། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ། ཞེས་སྲུང་བའི་འཁོར་ལོ་གསལ་གདབ། རྒྱུན་གྱི་རྣལ་འབྱོར་ལྟ་བུར་དེ་ཡན་ཆད་མི་དགོས་སོ། །སྐྱབས་སེམས་ནི། བདག་གཞན་མཁའ་མཉམ་འགྲོ་བ་ཀུན། །དཀོན་མཆོག་རྩ་བ་གསུམ་གྱི་དངོས། །དབང་ཕྱུག་བཞད་པ་རྡོ་རྗེ་ལ། །བྱང་ཆུབ་བར་དུ་སྐྱབས་སུ་མཆི། ལན་གསུམ། །མ་གྱུར་སེམས་ཅན་མཐའ་དག་རྣམས། །རྗེ་བཙུན་རས་པ་ཆེན་པོ་ཡི། །གོ་འཕང་བླ་མེད་འཐོབ་བྱའི་ཕྱིར། །སྒོ་གསུམ་དགེ་ལ་བཀོལ་བར་བྱ། ལན་གསུམ། །རང་སེམས་བླ་མར་རྟོགས་པས་གུས་ཕྱག་འཚལ། །ཚོགས་དྲུག་ཞེན་པ་བྲལ་བའི་མཆོད་པ་འབུལ། །གཉིས་འཛིན་ཨ་འཐས་རང་རིག་ཀློང་དུ་བཤགས། །ཐུགས་རྗེ་རྒྱུན་ཆད་མེད་ལ་ཡི་རང་ངོ་། །ཁྱབ་བདལ་ཡེ་ཤེས་ཆོས་འཁོར་བསྐོར་དུ་གསོལ། །མཆོག་ཏུ་མི་འགྱུར་ཆོས་སྐུར་བཞུགས་གསོལ་འདེབས། །མཁའ་ཁྱབ་འགྲོ་ཀུན་སྐུ་གསུམ་ཐོབ་ཕྱིར་བསྔོ། །འཁོར་བ་དོང་སྤྲུགས་འགྲོ་དོན་འགྲུབ་པར་ཤོག །

― LT28_Page_0461 ―

^{[མ་དཔེ་གཟིགས་ན་འདིར་གནོན།]}

[Full Size]

ཅེས་ཡན་ལག་བདུན་པ་བྱ། རང་བྱིན་གྱིས་བརླབ་པ་ནི། ཨོཾ་ཨཱཿཧཱུྃ། །རང་སྣང་རྣམ་དག་མཁའ་སྤྱོད་ཨོ་རྒྱན་ཞིང་། །ཆོས་འབྱུང་པད་ཉི་རོ་སྟེང་སྐད་ཅིག་གིས། །རྒྱལ་ཡུམ་རྡོ་རྗེ་ཕག་མོ་ལི་ཁྲིའི་མདངས། །གྲི་གུག་ཐོད་ཁྲག་ཕྱག་རྒྱ་ལྔ་ཡིས་སྤྲས། ཁ་ཊཾྭཱཱ་གཡོན་བརྟེན་ཞབས་གཉིས་བརྐྱང་བསྐུམ་ཚུལ། །མེ་དཔུང་དབུས་བཞུགས་ལྟེ་བར་ཨེ་དབུས་སུ། །དོན་ཀུན་སྒྲུབ་བྱེད་འཁོར་ལོ་འོད་འབར་བའོ། །ཞེས་ལྟེ་བར་ཆོས་འབྱུང་དབུས་སུ་པདྨ་འདབ་བཞིའི་ལྟེ་བར་ཧྲཱིཿ འདབ་བཞིར་ཧ་རི་ན་ས། ཧྲཱིཿམཐར་སྔགས་ཕྲེང་གི་འོད་ཀྱིས་དོན་གཉིས་སྒྲུབ་པར་མོས་ལ། ཨོཾ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ཧཱུྃ་ཧཱུྃ་ཕཊ་སྭཱ་ཧཱ། ཞེས་རླུང་དང་སྦྱར་བའི་འགོག་བཟླས་བྱ། དེ་ནས་རང་གི་ཐུགས་ལས་ཡེ་ཤེས་འོད་ཟེར་འཕྲོས། །དངོས་འཛིན་མཚན་བཅས་འོད་གསལ་དབྱིངས་སུ་སྦྱངས། །ཕྱི་སྣོད་ཆོས་དབྱིངས་འོག་མིན་སྟུག་པོ་བཀོད། །གནས་ཁང་ཐར་པ་ཆེན་པོའི་གཞལ་མེད་ཁང་། །མཆོད་པའི་ཡོ་བྱད་ཀུན་བཟང་སྨོན་ལམ་འཕྲུལ། །ཕྱི་ནང་གསང་བ་དེ་ཉིད་བཀོད་པའི་སྤྲིན། །ཟག་མེད་བདེ་སྐྱེད་ནམ་མཁའ་གང་བར་གྱུར། ཨོཾ་ཨཱཿཧཱུྃ་བཛྲ་སརྦ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཧཱུྃ་སྭཱ་ཧཱ། རྟེན་བསྐྱེད་པ་ནི། གདོད་ནས་རྣམ་དག་སངས་རྒྱས་ཞིང་། །རླུང་ལྔ་དག་པ་སེང་གེའི་ཁྲི། །རྩ་ལྔ་དག་པ་པདྨའི་གདན། ཁམས་ལྔ་དག་པ་ཉི་ཟླའི་སྟེང་། །སེམས་ཉིད་སྟོང་པ་བླ་མའི་སྐུ། །ཡེ་ཤེས་ལུས་ཅན་རྡོ་རྗེ་འཆང་། །མངོན་

― LT28_Page_0462 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེས་དྲུག་ལྡན་ཏེ་ལོ་པ། །སྒྱུ་འཕྲུལ་དྲྭ་བ་ནཱ་རོ་པ། །དགྱེས་མཛད་རྡོ་རྗེ་ལྷོ་བྲག་པ། །འགྲོ་བའི་མགོན་པོ་འཛམ་གླིང་གྲགས། །བཀའ་བརྒྱུད་ནོར་བུའི་ཕྲེང་བ་རྣམས། །གཅིག་འདུས་འཁོར་ལོའི་མགོན་པོའི་དངོས། །རྗེ་བཙུན་བཞད་པ་རྡོ་རྗེའི་ཞབས། །སྔོ་སངས་རས་དཀར་བླ་གོས་ཅན། །དབུ་སྐྲ་ཕྱི་དབུ་སྐུ་རྒྱབ་གྲོལ། །ཕྱག་གཡས་སྙན་གྱི་ཐད་ཀར་བསྟེན། །གཡོན་པས་མཉམ་བཞག་ཐོད་ཞལ་བསྣམས། །ཞབས་གཉིས་ཕྱེད་པའི་སྐྱིལ་ཀྲུང་མཛད། །སྟོང་ཉིད་ཤེས་རབ་རྣལ་འབྱོར་མ། །སྒོམ་ཐག་ཚུལ་གྱིས་སྐུ་ལ་འཁྱུད། །ཡེ་ཤེས་འོད་ལྔའི་གཟི་བྱིན་འབར། །གཞོམ་མེད་རྡོ་རྗེའི་མགུར་དབྱངས་སྒྲོགས། །ཐུགས་རྗེས་མོས་པའི་བུ་ལ་དགོངས། །བཀའ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་སྲུང་མའི་འཁོར། །སྤྲིན་ལྟར་འཁྲིགས་པའི་དབུས་ན་བཞུགས། །རྡོ་རྗེ་གསུམ་གྱི་འོད་ཟེར་གྱིས། །མངོན་པར་དགའ་སོགས་ཞིང་རྣམས་ནས། །སྤྱན་དྲངས་གཉིས་སུ་མེད་པར་གྱུར། ཅང་ཏེའུ་དྲིལ་བུའི་སྒྲས་བསྐུལ། །དད་མོས་གདུང་བའི་ཤུགས་བསྐྱེད་ལ། ཧཱུྃ། ཆོས་སྐུ་མཁའ་ཁྱབ་གཤེགས་བཞུད་མི་དམིགས་ཀྱང་། །ཐུགས་རྗེའི་སྒྱུ་འཕྲུལ་གང་འདུལ་གཟུགས་ཀྱི་སྐུ། །མོས་པའི་བློ་དང་འཚམས་པར་རྣམ་རོལ་བ། །དད་ལྡན་བསོད་ནམས་ཞིང་དུ་གཤེགས་སུ་གསོལ། །མངོན་དགའ་ལ་སོགས་དག་པའི་ཞིང་ཁམས་ནས། །དབང་ཕྱུག་བཞད་པ་རྡོ་རྗེ་མཁའ་འགྲོའི་གཙོ། །བཀའ་བརྒྱུད་གྲུབ་

― LT28_Page_0463 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོབ་རྒྱ་མཚོ་ཡི་དམ་ལྷ། །མཁའ་འགྲོ་ཆོས་སྐྱོང་འཁོར་བཅས་གཤེགས་སུ་གསོལ། ཨེ་ཨཱ་ལླི་ཕེ༚། བཛྲ་ས་མཱ་ཛཿརྗེ་བཙུན་རས་པ་རྒྱལ་བ་སྲས་དང་བཅས། །གདུལ་བྱའི་ཡུལ་ལ་སྙིང་རྗེས་བརྩེར་དགོངས་ཏེ། །མཆོད་པའི་ཡུལ་དུ་བརྟན་པར་བཞུགས་ནས་ཀྱང་། །ལུས་ངག་ཡིད་ལ་རྡོ་རྗེའི་བྱིན་ཆེན་ཕོབ། །ཏིཥྛ་བཛྲ་ཧཱུྃ། ས་མ་ཡ་སྟཾྭ་ཧོ། །རྡོ་རྗེའི་སྐུ་གསུང་ཐུགས་མཆོག་ཡོན་ཏན་དང་། །ཕྲིན་ལས་མི་ཟད་རྒྱན་གྱི་འཁོར་ལོའི་བདག །སྐྱབས་གནས་ཀུན་འདུས་རྡོ་རྗེ་རྒྱལ་མཚན་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ན་མོ་ན་མཿཧཱུྃ། །ཞིང་ཁམས་རབ་འབྱམས་རྒྱ་མཚོ་མཐའ་ཡས་ཀུན། །ལྷ་རྫས་ཡིད་འོང་ཕྱི་ཡི་མཆོད་པའི་སྤྲིན། །ཀུན་བཟང་རྣམ་པར་རོལ་པས་བཀང་སྟེ་འབུལ། །ཚོགས་གཉིས་ཡོངས་རྫོགས་ཆོས་ཀྱི་རྒྱལ་པོར་ཤོག །ཕུང་ཁམས་སྐྱེ་མཆེད་འདོད་པའི་ཡོན་ཏན་ལྔ། །རང་བཞིན་རྣམ་དག་རྡོ་རྗེའི་ཕོ་ཉ་མོ། །ནམ་མཁའ་གང་བས་བླ་མའི་འཁོར་ལོར་མཆོད། །དུག་ལྔ་རང་གྲོལ་སྐུ་ལྔ་ཐོབ་པར་ཤོག །ཐབས་ཤེས་ཟུང་འཇུག་འགྱུར་མེད་ལྷན་ཅིག་སྐྱེས། །བདེ་སྟོང་ཡེ་ཤེས་ཆེན་པོའི་དགའ་སྟོན་ལ། །ཟག་མེད་ཏིང་འཛིན་རོལ་པས་དབང་བསྒྱུར་ནས། །སྲིད་པའི་སྡུག་བསྔལ་འཆིང་ལས་གྲོལ་བར་མཛོད། །གང་ལ་ཐོག་མཐའ་དབུས་མེད་འཁོར་འདས་མེད། །ཆོས་ཀུན་རང་བཞིན་གཉུག་མ་ཕྱག་རྒྱ་ཆེ། །ཡིད་བྱེད་ལས་འདས་

― LT28_Page_0464 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་གསུམ་རྣམ་པར་དག །རང་བཞིན་ལྷུན་གྲུབ་མཆོད་པ་ཆེན་པོའོ། །ཨོཾ་བཛྲ་སརྦ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཨཱཿཧཱུྃ། །ཕྱི་ནང་གསང་བའི་མཎྜལ་ནི། ཨོཾ་ཨཱཿཧཱུྃ། །གླིང་བཞིའི་འཇིག་རྟེན་རབ་འབྱམས་རྒྱུད་མཚམས་སྦྱོར། །རབ་འབྱམས་རྒྱ་མཚོའི་ཞིང་གི་འབྱོར་པའི་ཚོགས། །མ་ལུས་བློ་ཡིས་བླངས་ཏེ་འབུལ་ལགས་ན། །དེ་སྙེད་འགྲོ་ཀུན་ཐུགས་རྗེས་བཟུང་དུ་གསོལ། །བདག་ལུས་ལོངས་སྤྱོད་བདོག་པ་ཅི་མཆིས་དང་། །ཕུང་ཁམས་སྐྱེ་མཆེད་འཕྲལ་ཡུན་འདུན་མར་བཅས། །བདག་ཏུ་བཟུང་བའི་དངོས་པོར་གྱུར་ཚད་ཀུན། །འབུལ་གྱིས་བདག་འཛིན་ཞི་བར་བྱིན་གྱིས་རློབས། །དངོས་དང་དངོས་མིན་མཐའ་ལས་ཡོངས་གྲོལ་ཞིང་། །སྐྱེ་འགག་གནས་གསུམ་འགྲོ་འོང་རྟག་ཆད་ཀྱི། །མིང་མཚན་ལས་འདས་གནས་ལུགས་མཎྜལ་མཆོག །ཕུལ་བས་རྗེ་བཙུན་ཁྱེད་དང་དབྱེར་མེད་ཤོག །ཨོཾ་གུ་རུ་རཏྣ་མ་ཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཨཱཿཧཱུྃ། བསྟོད་པ་ནི། གུ་རུ་ན་མོ་ཧཱུྃ། །སྙིང་རྗེ་ཆེན་པོ་སེམས་ཆེན་པོ། །དམིགས་པ་ཆེན་པོ་བློ་ཆེན་པོ། །གོ་ཆ་ཆེན་པོ་མཚོན་ཆེན་པོ། །དཔའ་ཆེན་ཁྱོད་ལ་ཕྱག་འཚལ་བསྟོད། །དད་པ་ཆེན་པོ་གུས་ཆེན་པོ། །དམ་ཚིག་ཆེན་པོ་བརྟུལ་ཞུགས་ཆེ། །བརྩོན་འགྲུས་ཆེན་པོ་སྟོབས་ཆེན་པོ། །སྐྱེས་མཆོག་ཁྱོད་ལ་ཕྱག་འཚལ་བསྟོད། །ཤེས་རབ་ཆེན་པོ་ཐབས་ཆེན་པོ། །བདེ་བ་ཆེན་པོ་གསལ་བ་ཆེ། །སྟོང་པ་ཆེན་པོ་རྒྱ་ཆེན་པོ། །ཐུབ་ཆེན་ཁྱོད་ལ་

― LT28_Page_0465 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་འཚལ་བསྟོད། །ཐེག་པ་ཆེན་པོ་ས་ཆེན་པོ། །ལམ་ཆེན་ཡེ་ཤེས་ཆེན་པོ་སྟེ། །ཡོན་ཏན་ཆེན་པོ་སྙན་གྲགས་ཆེ། །བདག་ཆེན་ཁྱོད་ལ་ཕྱག་འཚལ་བསྟོད། །ཞིང་ཁམས་ཆེན་པོ་སྣང་བ་ཆེ། །རྫུ་འཕྲུལ་ཆེན་པོ་གདུལ་བྱ་ཆེ། །བྱིན་རླབས་ཆེན་པོ་དོན་ཆེན་པོ། །སྐྱབས་ཆེན་ཁྱོད་ལ་ཕྱག་འཚལ་བསྟོད། །སྐུ་ཆེན་གཟི་བརྗིད་ཆེན་པོ་པ། །གསུང་དབྱངས་ཆེན་པོ་འོད་པོ་ཆེ། །མཁྱེན་པ་ཆེན་པོ་མཐུ་སྟོབས་ཆེ། །དཔལ་ཆེན་ཁྱོད་ལ་ཕྱག་འཚལ་བསྟོད། །བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བ། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་ཕྱག་འཚལ་བསྟོད། །སླར་ཡན་ལག་བདུན་གྱིས་ཚོགས་བསགས་པ་ནི། །འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུ་མངོན་སུམ་སྟོན་མཛད་པ། །དཔལ་ལྡན་བླ་མ་དམ་པ་ལ་ཕྱག་འཚལ། །ལུས་དང་ལོངས་སྤྱོད་ཡིད་ཀྱིས་སྤྲུལ་པ་ཡི། །མཆོད་པ་ཀུན་གྱིས་མཆོད་ཅིང་བསྟོད་པར་བགྱི། །སྔར་བྱས་སྡིག་པ་མ་ལུས་སོ་སོར་བཤགས། །སྡིག་པ་གཞན་ཡང་སླན་ཆད་མི་བགྱིད་དོ། །འགྲོ་ཀུན་དགེ་བ་ཀུན་ལ་རྗེས་ཡི་རང་། །བྱང་ཆུབ་མཆོག་གི་རྒྱུར་ནི་བསྔོ་བར་བགྱི། །མྱ་ངན་མི་འདར་བཞུགས་པར་གསོལ་བ་འདེབས། །ཐེག་མཆོག་བླ་མེད་ཆོས་འཁོར་བསྐོར་བར་བསྐུལ། །བྱམས་དང་སྙིང་རྗེ་ཕྱོགས་མེད་འབྱོངས་པ་དང་། །དོན་དམ་ལྷན་ཅིག་

― LT28_Page_0466 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེས་པའི་ཡེ་ཤེས་དེ། །རྒྱལ་བ་སྲས་བཅས་རྣམས་ཀྱིས་རྟོགས་པ་ལྟར། །བདག་གིས་མངོན་སུམ་རྟོགས་པར་བྱིན་གྱིས་རློབས། །སྒྱུ་ལུས་སྤྲུལ་སྐུར་རྟོགས་པར་བྱིན་གྱིས་རློབས། །སྲོག་རྩོལ་ལོངས་སྐུར་རྟོགས་པ་རེ་བྱིན་གྱིས་རློབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །སྐུ་གསུམ་དབྱེར་མེད་འཆར་བར་བྱིན་གྱིས་རློབས། །དེ་ནས་བླ་མའི་དཀྱིལ་འཁོར་དང་རང་གི་སེམས། །གཉུག་མ་གཤིས་ཀྱི་གནས་ལུགས་གསུམ་པོ་དབྱེར་མེད་ཕྱག་རྒྱ་ཆེན་པོའི་ལྟ་བ་རང་བྱུང་རང་བབ་བཅོས་མེད་དུ་བསྐྱར་ལ། ཨོཾ་ཨཱཿགུ་རུ་ཧཱ་ས་བཛྲ་ཧཱུྃ། ཞེས་ཅི་ནུས་བཟླ། གཞན་ཡང་གསོལ་འདེབས་ཀྱི་བཟླས་པ་བཀའ་བརྒྱུད་རིན་པོ་ཆེའི་གསུང་བྱིན་རླབས་དང་ལྡན་པ། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །ཚིག་འགོ་འགྲེས་སྦྱང་ལ། །བླ་མ་ཀུན་ཁྱབ་ཆོས་ཀྱི་སྐུ་ལ་གསོལ༴ །བླ་མ་བདེ་ཆེན་ལོངས་སྤྱོད་རྫོགས་པའི་སྐུ་ལ༴ །བླ་མ་ཐུགས་རྗེ་སྤྲུལ་པའི་སྐུ་ལ༴ ཞེས་མ་ནམ་བཞི་སྐོར་ཅི་ནུས་བསགས་ལ་མོས་གུས་ཀྱི་རྩལ་བསྐྱེད། བདག་དང་སེམས་ཅན་ཐམས་ཅད་བློ་ཆོས་སུ་འགྲོ་བར་བྱིན་གྱིས་བརླབ་ཏུ་གསོལ། །ཆོས་ལམ་དུ་འགྲོ་བར་བྱིན་གྱིས༴ །ལམ་འཁྲུལ་པ་སེལ་བར་བྱིན་གྱིས༴ །འཁྲུལ་པ་ཡེ་ཤེས་སུ་འཆར་བར་བྱིན་གྱིས༴ །བདག་གི་ལས་དང་ཉོན་མོངས་པའི་སྒྲིབ་པ་དང་། །ཤེས་བྱའི་སྒྲིབ་པ་དང་། བག་ཆགས་ཀྱི་སྒྲིབ་པ་ཐམས་ཅད་ད་ལྟ་ཉིད་དུ་དག་པར་བྱིན་གྱིས་བརླབ་ཏུ་གསོལ། །འདུགས་

― LT28_Page_0467 ―

^{[མ་དཔེ་གཟིགས་ན་འདིར་གནོན།]}

[Full Size]

འདི་ཉིད་དུ་དག་པར༴ །ཐུན་འདི་ཉིད་དུ༴ །བདག་གི་རྒྱུད་འདི་དག་པར་བྱིན་གྱིས་བརླབ་ཏུ་གསོལ། །རྒྱུད་འདི་རྣམ་པར་གྲོལ་བར༴ །ད་ལྟ་ཉིད་དུ་གྲོལ་བར༴ །འདུག་ས་འདི༴ །ཐུན་འདི་ཉིད༴ །བདག་གི་རྒྱུད་ལ་ཏིང་ངེ་འཛིན་མཆོག་ཏུ་གྱུར་པ་ཕྱིན་ཅི་མ་ལོག་པ་སྐྱེ་བར་བྱིན༴ །ད་ལྟ་ཉིད་དུ་སྐྱེ༴ །འདུག་ས༴ །ཐུན་འདི་ཉིད༴ །ཡེ་ཤེས་མཆོག་ཏུ་གྱུར་པ་ཕྱིན་ཅི་མ་ལོག་པ་སྐྱེ་བར་བྱིན་གྱིས་བརླབ༴ །ད་ལྟ༴ །འདུག་ས༴ །ཐུན་འདི་ཉིད་དུ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གོང་དང་སྤྲེལ་ལ་ཚར་གྲངས་གང་ནུས་ཀྱིས་གསོལ་བ་གདབ། རྒྱས་པར་སྤྲོ་ན་འདིར་རྗེ་བཙུན་མི་ལའི་གསོལ་འདེབས་དམིགས་གསལ་རྒྱས་བསྡུས་གང་ཤེས་བྱ། །སྙིང་པོ་ལྟ་བུ་རྗེ་བརྒྱད་པའི་གསུང་ནི། །བྱང་ཕྱོགས་རྒྱུད་དུ་སྐུ་འཁྲུངས་ཤིང་། །འཇིག་རྟེན་སྐྱོན་གྱིས་མ་གོས་པར། །དཀའ་བ་སྤྱད་པའི་ངོ་མཚར་ཅན། །མི་ལ་མཆོག་ལ་གསོལ་བ་འདེབས། །བདེ་ཆེན་བརྗོད་མེད་རོ་ཡིས་མྱོས། །སྲིད་གསུམ་དག་པའི་ཕྱག་རྒྱས་བཅིངས། །བསྲེགས་བཞུའི་ལམ་ནས་ལྷན་ཅིག་སྐྱེས། །མི་ལ༴། རགས་སྣང་ཕྲ་ཐིག་ཟབ་མོ་བརྟེན། །ཕྲ་མྱོང་བདག་བྱིན་བརླབ་པ་ར་མཛད། །གསང་བའི་དཀྱིལ་འཁོར་རིགས་ཀྱི་བདག །མི་ལ༴ །འཛག་མེད་གཙོ་མོར་ས་བོན་བཀྲོལ། །སྲིད་དག་ལམ་དུ་སྙིང་རྗེས་ལེན། །ནུས་པ་དྲག་པོའི་སྐུར་བཞེངས་པ། །མི་ལ་མཆོག་ལ༴ །བདག་ཀྱང་འཁོར་བ་མི་སྤོང་ཞིང་། །མྱང་འདས་ཞི་བར་མི་འཇུག་པར། །

― LT28_Page_0468 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་སྤྱོད་དབང་ཕྱུག་མི་ལ་ཡི། །མཆོག་གི་དངོས་གྲུབ་འགྲུབ་གྱུར་ཅིག །ཞེས་དང་། །རྗེ་མི་ལ་བཞད་པ་རྡོ་རྗེ་ལ་གསོལ་བ་འདེབས་སོ། །ཞེས་གདུང་ཤུགས་དྲག་པོས་ཕུར་ཚུགས་གསོལ་བ་ཅི་ནུས་གདབ། མཐར། །རྗེ་སྐུ་ཚེ་གཅིག་ལ་སངས་རྒྱས་ནས། །མཚན་ཐོས་ཚད་འཁོར་བ་དོང་སྤྲུགས་པ། །རྣལ་འབྱོར་གྱི་དབང་ཕྱུག་རིན་པོ་ཆེ། །དཔལ་བཞད་པ་རྡོ་རྗེ་སྤྲུལ་པའི་སྐུ། །ཕ་རྗེ་བཙུན་རས་པ་ཆེན་པོ་ལ། །བུ་མོས་གུས་གདུང་བས་གསོལ་བ་འདེབས། །ཡིད་ཐེ་ཚོམ་མེད་པའི་བློ་གཏད་ཞུ། །དུས་འདི་ཕྱི་ཀུན་ཏུ་ཐུགས་རྗེས་ཟུང་། །ཚེ་ལོང་མེད་མི་རྟག་སྐྱོ་ཤས་སྐྱེས། །བློ་དམ་པའི་ཆོས་སུ་འགྲོ་བ་དང་། །ལམ་དམན་དང་ལོག་པར་མི་གོལ་བར། །ཆོས་བྱས་ཚད་ལམ་དུ་འགྲོ་བ་དང་། །ལས་རྒྱུ་འབྲས་བླང་དོར་མི་འཆོལ་ཞིང་། །རྒྱུད་སྡོམ་པ་དམ་ཚིག་རྣམ་པར་དག །ཚོགས་ཟག་བཅས་ཟག་མེད་ཡོངས་སུ་རྫོགས། །ཕྱི་ཆོས་བརྒྱད་ཉོན་མོངས་འཆིང་ལས་གྲོལ། །ནད་ཞུ་བདེའི་ལམ་གསང་མཐའ་རུ་ཕྱིན། །དོན་རང་རིག་གཉུག་མ་ཕྱག་རྒྱ་ཆེ། །གཤིས་སྐུ་གསུམ་རྩལ་སྣང་ཆོས་ཉིད་རྒྱན། །རྗེ་རས་པ་ཆེན་པོའི་གསང་གསུམ་དང་། །དབྱེར་མི་ཕྱེད་རང་རིག་སྙིང་དབུས་སད། །དུས་སྐད་ཅིག་མངོན་པར་སངས་རྒྱས་ཏེ། །མ་མཁའ་ཁྱབ་འགྲོ་བ་འདྲེན་ནུས་པའི། །མཆོག་ཐུན་མོངས་དངོས་གྲུབ་མ་ལུས་པ། །སྟན་འདི་རུ་ཐོབ་པར་བྱིན་གྱིས་རློབས། ཨོཾ་ཨཱཿཧཱུྃ་གུ་རུ་རཏྣ་སརྦ་སིངྡྷི་ཧཱུྃ། སྐབས་འདིར་སྤྲོ་ན་ཚོགས་ཀྱི་ཡོ་བྱད་གང་འབྱོར་

― LT28_Page_0469 ―

^{[མ་དཔེ་གཟིགས་ན་འདིར་གནོན།]}

[Full Size]

བསང་སྦྱང་། མ་དག་དྲི་སྦྱངས་ཡེ་ཤེས་བྷནྡྷའི་ནང་། །ཚོགས་རྫས་དམ་ཡེ་དབྱེར་མེད་བདུད་རྩིའི་མཚོ། །འདོད་ཡོན་རྣམ་པར་དཔག་མེད་འཆར་བ་ཡིས། །བླ་མེད་བླ་མའི་དཀྱིལ་འཁོར་མཉེས་བྱེད་གྱུར། ཨོཾ་ཨཱཿཧཱུྃ་ཧ་ཧོཿཏྲཱིཿ ལན་གསུམ། བྱིན་རླབས་འབེབས་པ་ནི། གནས་རང་བཞིན་རྣམ་དག་ཆོས་ཀྱི་དབྱིངས། །ཡུལ་དངོས་འཛིན་བྲལ་བའི་ཞིང་ཁམས་ནས། །དོན་ཆོས་སྐུ་སྤྲོས་དང་བྲལ་བའི་གདངས། །རྗེ་ཡེ་ཤེས་སྒྱུ་འཕྲུལ་རས་པ་ཆེ། །ཕ་བཀའ་བརྒྱུད་བླ་མ་ཡི་དམ་ལྷ། །མ་གནས་གསུམ་ཌཱ་ཀི་ཆོས་སྐྱོང་བཅས། །གནས་དམ་ཚིག་གཙང་མའི་ཚོགས་ཁང་འདིར། །བུ་མོས་གུས་གདུང་བས་སྤྱན་འདྲེན་ན། །སྐུ་གསལ་སྟོང་འཇའ་འོད་ལམས་སེ་ལམ། །གསུང་རྡོ་རྗེའི་མགུར་དབྱངས་ཀྱུ་རུ་རུ། །ཐུགས་བདེ་སྟོང་ཏིང་འཛིན་ཡ་ལ་ལ། །མཆོག་ཐུན་མོངས་དངོས་གྲུབ་ཤ་ར་ར། །མཆོག་ཡེ་ཤེས་བྱིན་ཆེན་ཐིབས་སེ་ཐིབ། །ཚོགས་འཁོར་ལོའི་འདུ་བར་གཤེགས་སུ་གསོལ། །ཕྱི་གནས་ཁང་འོག་མིན་འབར་སྤྱོད་ཞིང་། །ནང་མཆེད་ལྕམ་དཔའ་བོ་རྣལ་འབྱོར་མ། །བཅུད་ཟག་མེད་ཡེ་ཤེས་བདུད་རྩི་ཆེ། །དོན་ལྷན་སྐྱེས་ཆོས་སྐུ་རྗེན་པ་རུ། །དུས་སྟན་ཐོག་འདི་རུ་བྱིན་གྱིས་རློབས། །ཚོགས་རྫས་རྣམས་ཆ་གསུམ་དུ་བགོས་པའི་ཕུད་བླ་མའི་མཎྜལ་གྱི་དྲུང་དུ་ཕུལ་ལ། ཧོ། ཚོགས་མཆོད་ཟག་མེད་བདུད་རྩིའི་མཚོ། །ཡེ་ཤེས་རོལ་པའི་མཆོད་སྤྲིན་འདི། །སྐྱབས་གནས་ཀུན་འདུས་འགྲོ་བའི་མགོན། །མཁའ་

― LT28_Page_0470 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲོའི་དབང་ཕྱུག་རས་པ་ཆེ། །རྗེ་བཙུན་བཞད་པ་རྡོ་རྗེ་དང་། །ཡི་དམ་དཔའ་བོ་རྣལ་འབྱོར་མ། །ཆོས་སྲུང་བཀའ་སྡོད་བཅས་ལ་འབུལ། །བཀའ་བརྒྱུད་གྲུབ་ཐོབ་རྒྱ་མཚོ་བསྐང་། །ཚེ་གཅིག་མངོན་འཚང་རྒྱ་བར་མཛོད། །རྒྱུད་སྡེ་བཞི་ཡི་ལྷ་ཚོགས་བསྐང་། །མཆོག་དང་ཐུན་མོང་དངོས་གྲུབ་སྩོལ། །གནས་གསུམ་དཔའ་བོ་མཁའ་འགྲོ་བསྐང་། །ཕྲིན་ལས་རྣམ་བཞི་ཐོག་མེད་སྒྲུབས། །ཆོས་སྐྱོང་བཀའ་སྡོད་འཁོར་བཅས་བསྐང་། །བསྟན་ལ་གནོད་པའི་དགྲ་བགེགས་སྒྲོལ། །དམ་ཚིག་ཆགས་ཉམས་སོར་ཆུད་ནས། །སྐྱེ་མད་ཆོས་སྐུ་མངོན་གྱུར་ཤོག །ག་་ཙཀྲ་པཱུ་ཛ་ཁཱ་ཧི། བར་པ་དམ་ཚིག་གི་རྫས་སུ་རོལ་ལ། ཧོ། རང་ལུས་གདན་གསུམ་ཚང་བའི་ལྷར། །ནང་གི་སྲེག་བླུགས་ཕུལ་བ་ཡིས། །མྱུར་དུ་རྡོ་རྗེའི་ལམ་བགྲོད་ནས། །ཕྱག་རྒྱ་ཆེན་པོ་འགྲུབ་གྱུར་ཅིག །ལྷག་མ་རྣམས། ཨོཾ་ཨཱཿཧཱུྃ་གིས་བྱིན་བརླབས་ནས། །ཚོགས་ལྷག་ཡེ་ཤེས་བདུད་རྩིའི་རྒྱ་མཚོ་འདི། །གནས་ཡུལ་དུར་ཁྲོད་འཇིག་རྟེན་ཁམས་ཉུལ་བའི། །བསྟན་སྲུང་རྣལ་འབྱོར་སྐྱོང་བའི་ཚོགས་ལ་འབུལ། །ཐ་ཚིག་མ་བསྙེལ་རྣལ་འབྱོར་གྲོགས་མཛོད་ཅིག །ཅེས་བསྔོའོ། །རྗེས་ཀྱི་བྱ་བ་ནི། རྗེ་བཙུན་རས་པ་རྩ་གསུམ་ལྷ་ཚོགས་ཀྱིས། །བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས། །གསོལ་བ་བཏབ་པས་འཁོར་རྣམས་འོད་དུ་ཞུ། །གཙོ་བོའི་སྐུར་ཐིམ་དེ་ཡི་གནས་གསུམ་ནས། །བྱིན་རླབས་འོད་ཟེར་དཀར་དམར་མཐིང་གསུམ་འཕྲོས། །

― LT28_Page_0471 ―

^{[མ་དཔེ་གཟིགས་ན་འདིར་གནོན།]}

[Full Size]

བདག་གི་གནས་གསུམ་ལ་ཐིམ་སྒོ་གསུམ་གྱི། །སྒྲིབ་དག་བུམ་གསང་ཤེར་ཡེའི་དབང་མཆོག་ཐོབ། །སྐུ་གསུམ་མངོན་ཏུ་བྱེད་པའི་སྐལ་ཅན་བྱས། །མོས་གུས་ཤུགས་ཀྱིས་རྗེ་བཙུན་འོད་དུ་ཞུ། །སྤྱི་བོ་ནས་ཞུགས་རང་དང་དབྱེར་མེད་འདྲེས། །ལྷན་སྐྱེས་སྒྲིབ་དག་དོན་གྱི་དབང་བཞི་ཐོབ། །ངོ་བོ་ཉིད་སྐུའི་ས་བོན་རྒྱུད་ལ་བཞག །གསང་གསུམ་སྒོ་གསུམ་དབྱེར་མེད་རོ་གཅིག་གྱུར། །དོན་དམ་ཆོས་སྐུ་བློ་བྲལ་བདེ་བ་ཆེ། །ཡིད་ལ་མི་བྱེད་གཉུག་མ་ལྷན་ཅིག་སྐྱེས། །སྣང་སྲིད་ཕྱག་རྒྱ་ཆེན་པོ་ཨེ་མ་ཧོ། །ཞེས་མ་བཅོས་ཐ་མལ་གཉུག་མའི་ཤེས་པ་ཅི་གནས་སུ་བསྐྱང་ཞིང་། རྗེས་ཐོབ་ཏུ་སྣང་སྲིད་བླ་མ་ཆོས་སྐུའི་རོལ་པར་ལམ་དུ་ཁྱེར། ཆོས་བརྒྱད་ལ་ཐོག་བརྗིས་བཏང་། འདིར་སྣང་གི་འཁྲི་བ་བཅད། དག་སྣང་དང་མོས་གུས་རྒྱུན་ཆད་མེད་པས་བསྒོམ་མེད་ཡེངས་མེད་ཀྱི་དྲན་ཤེས་ཆུ་བོའི་རྒྱུན་བཞིན་ཏུ་བརྟེན་ནས། གནས་ལུགས་ཕྱག་རྒྱ་ཆེན་པོའི་གཏན་སྲིད་ཚེ་གཅིག་ལ་ཟིན་པར་བྱའོ། །བསྔོ་སྨོན་ནི། །དགེ་བ་འདི་དང་དུས་གསུམ་བསགས་པ་ཡི། །དགེ་ཀུན་སྲས་བཅས་རྒྱལ་བས་བསྔོས་པ་ལྟར། །མི་གནས་བྱང་ཆུབ་ཆེན་པོར་བསྔོ་བར་བགྱི། །ཟུང་འཇུག་གོ་འཕང་ཚེ་འདིར་འཐོབ་པར་ཤོག །སྒྲུབ་ལ་བརྩོན་པ་མཐར་ཕྱིན་ཞིང་། །འཁྲུལ་པའི་ས་བོན་རྒྱུན་ཆད་ནས། །རྗེ་བཙུན་རས་པ་ཆེན་པོ་དང་། །རྣམ་ཐར་ཕྲིན་ལས་མཉམ་གྱུར་ཅིག །ཤིས་པ་བརྗོད་པ་ནི། བཀའ་བརྒྱུད་བླ་མའི་བྱིན་རླབས་སྤྲིན་ཆེན་འཁྲིགས། །ཡི་དམ་ལྷ་ཚོགས་དངོས་གྲུབ་ཆར་རྒྱུན་འབེབས། །མཁའ་འགྲོ་ཆོས་སྐྱོང་

― LT28_Page_0472 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྲིན་ལས་འབྲས་བུ་སྨིན། །དོན་གཉིས་ལྷུན་གྱིས་འགྲུབ་པའི་བཀྲ་ཤིས་ཤོག །དཀྱིལ་འཁོར་ཀུན་གཙོ་བླ་མ་སྒྲུབ་པ་ནི། །རྒྱལ་བས་རྒྱུད་སྡེ་ཀུན་ནས་ཡང་ཡང་བསྔགས། །བླ་མ་གྲུབ་པའི་དབང་ཕྱུག་མི་ལ་རྗེ། །མཚན་ཙམ་ཐོས་ཀྱང་སྐྱེ་བ་བདུན་བརྒྱུད་དུ། །ངན་སོང་སྐྱེ་སྒོ་གཅོད་པར་ཞལ་གྱིས་བཞེས། །ད་ལྟ་ཟུང་འཇུག་ཆེན་པོའི་རྒྱལ་སར་བཞུགས། །འཁོར་འདས་བརྟན་གཡོ་མ་ལུས་བྱིན་གྱིས་བརླབ། །གསོལ་བ་བཏབ་ན་ཐུགས་རྗེས་ངེས་པར་གཟིགས། །བྱིན་རླབས་ཟིལ་ཆེན་དད་ལྡན་ཡོངས་ལ་འབེབས། །དེ་ཕྱིར་སྒྲུབ་བརྩོན་རྣལ་འབྱོར་དབང་ཕྱུག་མཆོག །སྣང་རྩེ་རི་ཁྲོད་ཞབས་ཀྱིས་རིང་མོ་ནས། །བསྐུལ་ངོར་རྗེ་བཙུན་རས་པའི་བཀའ་བརྒྱུད་པ། །ཀརྨ་ངག་དབང་ཡོན་ཏན་རྒྱ་མཚོ་ཡིས། །དཔལ་སྤུངས་ཡང་ཁྲོད་དེ་བཱི་ཀོ་ཊིའི་ཚལ། །ཙཱ་འདྲ་རིན་ཆེན་བྲག་གི་སྒྲུབ་གནས་སུ། །སྦྱར་འདིར་འབྲེལ་ཚད་འགྲོ་བ་མ་ལུས་པ། །རྗེ་བཙུན་རས་པ་ཆེན་པོས་རྗེས་འཛིན་ཤོག །དགེ་ལེགས་འཕེལ།། །།

རྗེ་བཙུན་བཞད་པ་རྡོ་རྗེའི་དབང་བསྐུར་བྱིན་རླབས་དང་འབྲེལ་བ་ཡེ་ཤེས་བཅུད་སྦྱིན།

― LT28_Page_0473 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་བཞད་པ་རྡོ་རྗེའི་དབང་བསྐུར་བྱིན་རླབས་དང་འབྲེལ་བ་ཡེ་ཤེས་བཅུད་སྦྱིན་ཅེས་བྱ་བ་བཞུགས་སོ། །

― LT28_Page_0474 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་རས་པ་ཆེན་པོ་ལ། །སྙིང་ནས་གུས་པས་གསོལ་འདེབས་ན། །གསང་གསུམ་བྱིན་རླབས་བདག་སོགས་ལ། །མྱུར་ཐུགས་རྟོགས་གྲོལ་དུས་མཉམ་མཛོད། །འདིའི་བླ་མའི་རྣལ་འབྱོར་ལ་བརྟེན་ཏེ་བྱིན་རླབས་ཀྱི་རིམ་པས་སྐལ་ལྡན་རྗེས་སུ་འཛིན་པར་འདོད་པའི་རྣལ་འབྱོར་པ་བྱིན་རླབས་ཀྱི་རིམ་པ་ཟམ་མ་ཆད་པར་ཐོབ་པ་དག་གིས། །སྟེགས་བུའི་ཁར་གཙང་ཞིང་དག་པའི་མཎྜལ་ལ་རྡུལ་ཚོན་གྱིས་པདྨ་འདབ་བརྒྱད་བྲིས་པའི་དབུས་མེ་ཏོག་གི་ཚོམ་བུ་གཅིག་འགོད། དེའི་སྟེང་འཕྲུལ་སྟེགས་ལ་རྗེ་བཙུན་ཆེན་པོའི་སྐུ་བརྙན་བྲིས་འབུར་གང་རུང་བཞུགས་པའི་གཡས་ཕྱོགས་སུ་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པ། གཡོན་ཕྱོགས་སུ་ཐོད་ཆང་བདུད་རྩི་རིལ་བུ་སྦྱར་བ་དང་རིག་མའི་ཙཀླི། མཐའ་སྐོར་དུ་མཆོད་པའི་ཡོ་བྱད་དང་ཚོགས་རྫས་སོགས་བཀོད། །སློབ་དཔོན་གྱི་མདུན་ཏུ་ནང་མཆོད་འཐོར་ནས། ལས་བུམ། སྔོན་གཏོར་སོགས་མཁོ་བའི་ཆས་རྣམས་འདུ་བྱས་ལ་བླ་མའི་རྣལ་འབྱོར་ཡེ་ཤེས་

― LT28_Page_0475 ―

^{[མ་དཔེ་གཟིགས་ན་འདིར་གནོན།]}

[Full Size]

དཔལ་འབར་ལྟར་ནང་མཆོད་བྱིན་རླབས་དང་འབྱུང་གཏོར་བཏང་ལ། སྐྱབས་སེམས་ཡན་ལག་བདུན་པ་སྔོན་ཏུ་འགྲོ་བས་བདག་བསྐྱེད་རྡོ་རྗེ་ཕག་མོའི་བསྒོམ་བཟླས་ཅི་འགྲུབ། དེ་ནས་མཆོད་པ་བྱིན་རླབས་མདུན་རྟེན་བསྐྱེད་པ་ནས་གསོལ་འདེབས་མཇུག་གི། སརྦ་སིངྡྷི་ཧཱུྃ་ཡན་གྲུབ་ནས། རྣམ་བུམ་དང་ཐོད་པའི་རྫས་ལ་དམིགས་ཏེ། ཨོཾ་ཨཱཿཧཱུྃ་སྭཱ་ཧཱ། ཞེས་ལན་ཅི་འགྲུབ་དང་། །ལས་བུམ་འཁྱིལ་བའི་སྔགས་ཀྱིས་བྱིན་བརླབ། ལོག་ནས་ཇི་ལྟར་འབྱུང་བའི་དབང་རྣམས་བདག་འཇུག་གི་ཚུལ་དུ་རང་གིས་རྫོགས་པར་བླང་། དེ་ནས་དད་གུས་དང་ལྡན་པའི་སློབ་མ་རྣམས་ཕྱི་རོལ་དུ་ཁྲུས་བྱས། སྔོན་གཏོར་བཏང་བ་དང་མཚམས་བཅད་སྲུང་འཁོང་གཞུང་ལྟར་བྱ། ནང་དུ་འཁོད་ནས་མེ་ཏོག་བཀྱེ་བསྡུ་གྲུབ་པ་དང་། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ཏུ་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་མྱུར་དུ་ཐོབ་པར་བྱ། །དེའི་ཆེད་དུ་

― LT28_Page_0476 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་རྣལ་འབྱོར་གྱི་དབང་ཕྱུག་མི་ལ་བཞད་པ་རྡོ་རྗེའི་དབང་དང་བྱིན་རླབས་ཀྱི་རིམ་པ་ཞུ་སྙམ་པའི་སེམས་བསྐྱེད་པ་གསལ་བཏབ་ནས་གསན་འཚལ། དེའང་སྡུད་པ་ལས། སངས་རྒྱས་ཆོས་རྣམས་དགེ་བའི་བཤེས་ལ་བརྟེན་ཏོ་ཞེས། གཡོན་ཏན་ཀུན་གྱི་མཆོག་མངའ་རྒྱལ་བ་དེ་སྐད་གསུངས། ཞེས་དང་། རྒྱུད་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་གྱི། །གོ་འཕང་ཚེ་འདིར་ཐོབ་པར་འགྱུར། ཅེས་མདོ་ལུགས་སུ་དགེ་བའི་བཤེས་གཉེན་ལ་སངས་རྒྱས་ཀྱི་ཆོས་ཐམས་ཅད་བསྟེན་ཅིང་རྫོགས་པར་གསུངས་པ་དང་། སྔགས་སུ་རིགས་དང་དཀྱིལ་འཁོར་ཐམས་ཅད་ཀྱི་བྱ་བ་བདག་ཡིན་པའི་ཕྱིར་བླ་མ་སྒྲུབ་ཅིང་མཆོད་པ་ནི་ལམ་ཐམས་ཅད་ཀྱི་སྙིང་པོར་གྱུར་པ་ཡིན་པས་འཕགས་བོད་རྣལ་འབྱོར་གྱི་དབང་ཕྱུག་མ་ལུས་པ་ཐམས་ཅད་ལམ་ཟབ་མོ་འདི་ཁོ་ན་ལ་བརྟེན་ནས་གྲུབ་པའི་གོ་འཕང་མཐོན་པོར་བདེ་བླག་ཏུ་གཤེགས་པ་ཤ་སྟག་ཡིན་ལ། བླ་མ་ཚད་མར་གྱུར་པ་འཕགས་བོད་ཀྱི་ལྗོངས་སུ་ཇི་སྙེད་ཅིག་བྱོན་པའི་ནང་ནས་རྗེ་བཙུན་ཆེན་པོ་མེ་ལ་རས་པ་ནི། ཐོག་མར་བླ་མ་བསྟེན་པའི་མོས་གུས་དང་དཀའ་སྤྱད། བར་དུ་སྒྲུབ་པ་ཉམས་ལེན་གྱི་བརྩོན་འགྲུས་དང་དཀའ་ཐུབ། མཐར་གྲུབ་པ་ཆེན་པོ་མངོན་ཏུ་གྱུར་ཏེ་རྡོ་

― LT28_Page_0477 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་ཐེག་པའི་ལས་ནས་སྐུ་ཚེ་གཅིག་གིས་མཆོག་གི་དངོས་གྲུབ་སྒྲ་ཇི་བཞིན་ཏུ་བརྙེས་པའི་ཚུལ་ལ་གངས་ཅན་གྱི་ལྗོངས་ན་སུས་ཀྱང་འགྲན་ཟླ་དང་བྲལ་བས། འཕགས་ཡུལ་གྱི་པ་ཆེན་ནཱ་རོ་པ་ལྟ་བུས་ཀྱང་ཉི་མ་དང་ཟླ་བ་ལྟར་བསྔགས་ཤིང་ཕྱག་གིས་བཏུད་པ་དང་། གྲུབ་ཆེན་དམ་པ་སངས་རྒྱས་སོགས་ཀྱིས་ཀྱང་རྩོད་མེད་ཀྱི་གྲུབ་ཐོབ་ཏུ་བསྔགས་པས་མཚོན་ཛ་མྦུའི་གླིང་ན་ཡོངས་སུ་གྲགས་ཤིང་བཀའ་བརྒྱུད་གྲུབ་ཐོབ་ས་ཆེན་པོའི་རྡུལ་ལྟ་བུ་དུས་གསུམ་དུ་གཤེགས་པ་ཐམས་ཅད་ཀྱི་འབྱུང་ཁུངས་སུ་གྱུར་པ་དང་། ཉིད་ཀྱི་ཞལ་ནས། ཁོ་བོའི་མིང་ཐོས་པ་དང་། ཁོ་བོའི་ཕྱོགས་ལ་རེག་པ་ཐམས་ཅད་སྐྱེ་བ་བདུན་བརྒྱུད་དུ་ངན་སོང་དུ་མི་འགྲོ་ཞེས་དང་། ཁྱེད་རང་རྣམས་ཀྱིས་གང་མོས་སུ་གསོལ་བ་ཐོབ་དང་། གསོལ་བ་འདེབས་པ་དེའི་མདུན་ན་ང་ཡོད་ཅིང་། གང་འདོད་པའི་དོན་སྩལ་བ་ཡིན་པས་གསོལ་བ་ཞེ་ཐག་པ་ནས་ཐོབ་ཅིག་སོགས་མི་འཇིགས་པ་སྦྱིན་པའི་རྡོ་རྗེའི་བཀའ་ཡང་ནས་ཡང་དུ་སྩལ་བ་མ་ཟད། ད་ལྟ་ཟུང་འཇུག་ཡེ་ཤེས་ཆེན་པོའི་སྐུ་ནམ་མཁའི་རང་བཞིན་བརྟན་གཡོ་ཀུན་ཁྱབ་ཏུ་བཞུགས་པས་གསོལ་བ་འདེབས་པ་པོའི་རྒྱུད་ལ་རྡོ་རྗེའི་ཡེ་ཤེས་སྩོལ་མེད་དུ་སྐྱེད་པར་ངེས་པ་ཡིན་པས། དེ་ལྟ་བུའི་གྲུབ་པའི་འཁོར་ལོས་སྒྱུར་བ་ཆེན་པོའི་དབང་བསྐུར་བྱིན་རླབས་ཀྱི་རིམ་

― LT28_Page_0478 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ཟབ་མོ་བསྒྲུབ་པར་བགྱི་བ་ལ་སློབ་དཔོན་གྱི་བྱ་བ་རྣམས་གྲུབ་ཟིན། སློབ་མའི་བྱ་བ་ལ་ཐོག་མར་མཎྜལ་འབུལ་བར་ཞུ། ཞེས་མཚམས་སྦྱར་ནས་མཎྜལ་འབུལ་གཞུག །དེ་ནས་ཀྲིང་རྩེ་གཅིག་པས་དམིགས་པ་འདི་བཞིན་ཏུ་མཛོད། མདུན་གྱི་མཎྜལ་འདི་ཉིད་མངོན་པར་དགའ་བའི་ཞིང་གི་བཀོད་པ་ལྟ་བུ་དག་པ་ཡེ་ཤེས་ཀྱི་རང་བཞིན་རྒྱ་ཁྱོན་ཚད་མེད་པ་ངོ་མཚར་གྱི་བཀོད་པ་འབྱམས་སུ་ཀླས་ཤིང་རང་སྣང་མཆོད་པའི་སྤྲིན་ཕུང་མཐའ་ཡས་པས་བརྒྱན་པའི་དབུས་སུ་སེང་ཁྲི་པདྨ་ཉི་ཟླའི་སྟེང་དུ། ངོ་བོ་དུས་གསུམ་སངས་རྒྱས་ཐམས་ཅད་ཀྱི་ཡེ་ཤེས་རང་གཟུགས་རྩ་བའི་བླ་མ་དང་དབྱེར་མེད་པ་རྗེ་བཙུན་བཞད་པ་རྡོ་རྗེ་ཉིད། །རྣམ་པ་རིགས་ཐམས་ཅད་ཀྱི་ཁྱབ་བདག་དྲུག་པ་རྡོ་རྗེ་འཆང་ཆེན་པོ་ཨིནྡྲ་ནཱི་ལའི་ལྷུན་པོ་ལྟར་མཐིང་སྔོན་འོད་ཟེར་འབར་བ། ཤིན་ཏུ་ཞི་ལ་སྒེག་ཅིང་འཛུམ་པའི་ཉམས་ཅན་མཚན་དང་དཔེ་བྱད་གསལ་ལ་རྫོགས་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ཐབས་སུ་འཛིན་ཅིང་རང་སྣང་ཤེས་རབ་མཆོག་གི་བདེ་བར་སྤྱོད་པ། །དར་དང་རིན་པོ་ཆེའི་རྒྱན་གྱིས་སྤྲས་ཤིང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། །དྲན་པ་ཙམ་གྱིས་བདེ་བ་ཆེན་པོའི་ཡེ་ཤེས་སྐྱེད་པར་ནུས་པའི་བདག་ཉིད་རྩ་གསུམ་རྒྱ་མཚོའི་སྤྱི་གཟུགས་སུ་བཞུགས་པའི་སྤྱན་སྔར་རང་རང་གི་ལུས་ལོངས་

― LT28_Page_0479 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་དུས་གསུམ་དགེ་ཚོགས་དང་བཅས་པ་སྣོད་བཅུད་རྟེན་དང་བརྟེན་པར་ཕྱི་ནང་གསང་བའི་མཆོད་སྤྲིན་གྱིས་བཀང་བའི་ཚུལ་དུ་འབུལ་བའི་མོས་པས་ཞིང་ཁམས་འབུལ་བར་ཞུ། །ཨོཾ་ཨཱཿཧཱུྃ། གླིང་བཞིའི་འཇིག་རྟེན་སོགས་གཞུང་ལྟར་ཕྱི་ནང་གསང་བའི་མཎྜལ་འབུལ། དེ་ནས་ཁྱེད་རང་རྣམས་ཀྱི་ལུས་ཞིང་རྡུལ་གྱི་གྲངས་དང་མཉམ་པར་སྤྲུལ་ཏེ་བླ་མའི་ཞབས་ཀྱི་པདྨོར་སྤྱི་བོས་གཏུགས་ཏེ་གུས་པས་ཕྱག་འཚལ་བའི་མོས་པས་ཐལ་མོ་སྦྱར་ཏེ་འདིའི་རྗེས་ཟློས་མཛོད། །གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ལན་གསུམ། དེ་ལྟར་ཕྱག་བྱས་ཏེ་དད་མོས་གདུང་ཤུགས་དྲག་པོས་གསོལ་བ་བཏབ་པའི་རྐྱེན་གྱིས་བླ་མ་རྡོ་རྗེ་འཆང་ཆེན་པོས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བ་བསྣམས་ཏེ་ཁྱེད་རང་རྣམས་ཀྱི་སྤྱི་བོ་ནས་མངོན་པར་དབང་བསྐུར་བའི་མོས་པ་མཛོད། །ཞེས་བུམ་པ་སྤྱི་བོར་བཞག་ལ། །དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཇི་ལྟར་བལྟམས་པ་སོགས་དང་། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ། ཞེས་དབང་བསྐུར་ཞིང་བུམ་ཆུ་སྦྱིན།

― LT28_Page_0480 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལྟར་དབང་བསྐུར་བས་བདུད་རྩིའི་ཆུ་རྒྱུན་གྱིས་ལུས་ཐམས་ཅད་གང་། །དྲི་མ་བག་ཆགས་དང་བཅས་པ་དག་ནས་ཁྱེད་རང་ཡང་རྡོ་རྗེ་འཆང་ཆེན་པོའི་སྐུ་སྣང་སྟོང་སྒྱུ་མའི་ཚུལ་ཅན་ཏུ་ལམ་སྟེ་གྱུར་པར་མོས་མཛོད། །དེས་བུམ་པའི་དབང་ཐོབ། ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་ནུས་པ་ཁྱད་པར་ཅན་བཞག་པ་ཡིན་ནོ། །བླ་མ་རྡོ་རྗེ་འཆང་རང་སྣང་གི་ཡུམ་རྡོ་རྗེ་སྙེམས་མ་དང་མཉམ་པར་སྦྱོར་བའི་དགའ་བའི་སྒྲ་དང་བདེ་བའི་འོད་ཟེར་གྱིས་ཕྱོགས་བཅུའི་སངས་རྒྱས་རྣམས་སྤྱན་དྲངས་ཏེ་ཞལ་དུ་ཞུགས། རྗེས་སུ་ཆགས་པས་ཞུ་ནས་དཀར་དམར་བྱང་སེམས་བདུད་རྩིའི་རང་བཞིན་ཏུ་མཁའ་གསང་ལས་བབས། ཐོད་པའི་བདུད་རྩི་དང་རོ་གཅིག་ཏུ་འདྲེས་པ་དེ་ལྗགས་ཐོག་ཏུ་སྦྱིན་པར་མོས་མཛོད། །ཐོད་པའི་བདུད་རྩི་ཁྱོར་བ་གཡོན་པར་སྦྱིན་ལ། །ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །དེ་བཞིན་བྱང་ཆུབ་སེམས་རྒྱུན་གྱིས། །དེ་རིང་ཁྱོད་ལ་དབང་བསྐུར་རོ། །ཨོཾ་ཨཱཿཧཱུྃ། ཞེས་བརྗོད། སློབ་མས། ཨ་ཧོ་མ་ཧཱ་སུ་ཁཾ། ཞེས་བརྗོད་ཅིང་མྱང་། བྱང་ཆུབ་ཀྱི་སེམས་མགྲིན་པའི་ལམ་བརྒྱུད། རྩ་གནས་ཐམས་ཅད་དུ་ཁྱབ་ཅིང་སོན་པས་བདེ་བ་ཆེན་པོ་བརྗོད་བྲལ་གྱི་ཡེ་ཤེས་ཉམས་སུ་མྱང་བར་མོས་ཤིག །

― LT28_Page_0481 ―

^{[མ་དཔེ་གཟིགས་ན་འདིར་གནོན།]}

[Full Size]

དེས་གསང་བའི་དབང་ཐོབ། ངག་གི་དྲི་མ་དག། ལམ་རང་ལུས་ཐབས་ལྡན་བསྒོམ་བ་ལ་དབང་། འབྲས་བུ་གསུང་རྡོ་རྗེ་ལོངས་སྐུ་འགྲུབ་པའི་ནུས་པ་ཁྱད་པར་ཅན་བཞག་པ་ཡིན་ནོ། །བླ་མའི་ཐུགས་ཀ་ནས་ཡེ་ཤེས་ཀྱི་རིག་མ་གཟུགས་དང་ལང་ཚོ་ཕུན་སུམ་ཚོགས་པ་ཞིག་བྱུང་ནས་ཁྱེད་རང་རྣམས་ལ་ཕྱག་རྒྱའི་དངོས་གྲུབ་ཀྱི་དོན་ཏུ་གཏད་པར་མོས་ཤིག །རིག་མའི་ཙཀྲི་གཏད་ལ། །དགའ་སྟེར་གནས་སྟེར་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། ཁྱེད་རང་རྡོ་རྗེ་འཆང་ཆེན་པོར་གསལ་བ་ལ་ད་ལྟར་གཏད་པའི་རིག་མ་དེ་ཉིད་ཡུམ་རྡོ་རྗེ་སྙེམས་མའི་ངོ་བོར་གནས་པའི་གནས་གསུམ་འབྲུ་གསུམ་དང་མཁའ་གསང་རྡོ་རྗེ་དང་པདྨར་གསལ་བས། མཆོག་ཏུ་མི་འགྱུར་བའི་བདེ་བ་ཆེན་པོ་ལ་སེམས་ཅན་ཐམས་ཅད་བསྒྲལ་བར་འདོད་པའི་འདུ་ཤེས་དང་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པས། བྱང་སེམས་གནས་བཞིར་ཡས་ནས་བབ་པ་དང་། སླར་ལྡོག་པའི་རིམ་པས་མས་བརྟན་པའི་དགའ་བཞི་ཉམས་སུ་མྱང་བར་མོས་ལ་བདེ་སྟོང་དབྱེར་མེད་པའི་རང་ངོ་ལ་མཉམ་པར་ཞོག་མཛོད། དེས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ལམ་གཞན་ལུས་ཕོ་ཉ་བསྟེན་པ་

― LT28_Page_0482 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་དབང་། འབྲས་བུ་ཐུགས་རྡོ་རྗེ་ཆོས་སྐུ་འགྲུབ་པའི་ནུས་པ་ཁྱད་པར་ཅན་བཞག་པར་མོས་མཛོད། དེ་ནས་ཁྱེད་རང་རྣམས་ལུས་གནད་ལྟ་སྟངས་ག་ལོ་བ་མེད་པའི་ངང་། དབང་གསུམ་པའི་སྐབས་སུ་ཉམས་སུ་མྱོང་བའི་དཔེའི་ཡེ་ཤེས་དེས་མཚོན་ནས་དོན་གྱི་གནས་ལུགས་རིག་པའི་ངོ་བོ་རང་བཞིན་གྱིས་འདུས་མ་བྱས་པ་འཁོར་འདས་ཐམས་ཅད་ཀྱི་སྲོག་ཏུ་གནས་པ་དེ་རང་ངོ་ཚུལ་བཞིན་ཏུ་ཤས་པའི་སྐད་ཅིག་ལ་གློ་བུར་བག་ཆགས་ཀྱི་དྲི་མ་སངས་ནས་བྲལ་འབྲས་ཆོས་སྐུ་མངོན་ཏུ་བྱེད་པ་ཡིན་པས། སངས་རྒྱས་ཐམས་ཅད་ཀྱི་ཆོས་སྐུ་རང་རིག་གཅེར་མཐོང་དུ་ངོ་སྤྲད་པ་རྡོ་རྗེའི་ཚིག་འདིའི་དོན་ལ་མཉམ་པར་འཇོག་པར་ཞུ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་ཀྱི་ཕ་ནི་ཁྱོད་ཉིད་དོ། །ཞེས་དར་ཅིག་མཉམ་པར་བཞག །དེས་དབང་བཞི་པ་ཐོབ། །སྒོ་གསུམ་ཆ་སྙོམས་ཀྱི་དྲི་མ་བག་ཆགས་དང་བཅས་པ་དག །ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་འགྲུབ་པའི་ནུས་པ་ཁྱད་པར་ཅན་བཞག་པར་མོས་མཛོད། དེས་འཇུག་སྒོའི་དབང་བསྐུར་ཐུན་མོང་བ་གྲུབ་པ་ལགས། དེ་ནས་ཐུན་མོང་མ་ཡིན་པའི་བྱིན་རླབས་ཟབ་མོ་སྒྲུབ་པར་བྱེད་པ་ལ་མོས་པ་འདི་བཞིན་ཏུ་མཛད་འཚལ། མདུན་ཏུ་

― LT28_Page_0483 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས་པའི་བླ་མ་རྡོ་རྗེ་འཆང་དེ་ཉིད་སྐད་ཅིག་ལ་གནས་འགྱུར་ཏེ་རྗེ་བཙུན་རྣལ་འབྱོར་གྱི་དབང་ཕྱུག་མི་ལ་བཞད་པ་རྡོ་རྗེ་སྐུ་མདོག་སྔོ་སང་ཡེ་ཤེས་ཀྱི་གཟི་བྱིན་ཚད་མེད་པར་འབར་བ། འཛུམ་པའི་མདངས་ཅན་དགྱེས་པའི་སྤྱན་གྱིས་སྒྲུབ་པ་པོ་ལ་གཟིགས་པ། དབུ་སྐྲ་ཕོད་ཀ་ལིང་ངེ་བ། རྒྱབ་ཕྱིང་བུ་ལོག་གེ་བ། སྐུ་ལ་རས་དཀར་གྱི་བླ་གོས་གསོལ་ཞིང་སྒོམ་ཐག་གིས་སེ་རལ་ཁར་འཁྱུད་པ། ཕྱག་གཡས་སྙན་ལ་བརྟེན་ཅིང་རྡོ་རྗེའི་མགུར་དབྱངས་ལྷང་ལྷང་སྒྲོག་པ། གཡོན་མཉམ་བཞག་ཐོད་པ་བདུད་རྩིས་བཀང་བ་བསྣམས་ཤིང་ཞབས་གཉིས་རོལ་པའི་སྟབས་ཀྱིས་བཞུགས་པ། བཀའ་བརྒྱུད་གྲུབ་ཐོབ་རྒྱ་མཚོས་སྤྲིན་འཁྲིགས་པ་ལྟར་བསྐོར་བ། ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོ་རྒྱས་པའི་ཡེ་ཤེས་ཀྱི་སྐུ་བཀྲག་མདངས་གཟི་བརྗིད་བཟོད་པར་དཀའ་བ་ཉི་མའི་སྙིང་པོ་ལྟ་བུ། གསུང་ཐེག་ཆེན་གསང་སྔགས་རྡོ་རྗེ་ནཱ་དའི་རང་སྒྲ་རུ་འཇོ་བ། ཐུགས་ཟབ་གསལ་གཉིས་མེད་ཕྱག་རྒྱ་ཆེན་པོ་བདེ་སྟོང་ཟུང་འཇུག་ཆེན་པོར་རྟག་ཏུ་མཉམ་པར་བཞག་བཞིན་པ། ཡོན་ཏན་སངས་རྒྱས་ཐམས་ཅད་དང་རྣམ་དབྱེར་མེད་ཅིང་། མཛད་པ་ཕྲིན་ལས་མ་ངེས་ཅིར་ཡང་སྟོན་པ་དཔག་པར་དཀའ་བའི་སྒྱུ་འཕྲུལ་ཅན་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་

― LT28_Page_0484 ―

^{[མ་དཔེ་གཟིགས་ན་འདིར་གནོན།]}

[Full Size]

གནོན་པ། ལྷ་དང་ལྷ་མོ་དཔག་ཏུ་མེད་པས་མཆོད་པའི་བཀོད་པ་བསམ་གྱིས་མི་ཁྱབ་པས་མཆོད་པར་གསལ་བའི་སྤྱན་སྔར། ཁྱེད་རང་རྣམས་ཀྱི་སྐུ་ལུས་རྣམ་སྨིན་གྱི་ཕུང་པོ་འདི་ཉིད་ཀྱི་དབུའི་ཡ་ཐོད་ཧག་གིས་བཀོག་པའི་ནང་དུ་སྐུ་ལུས་ལྷག་མ་རིལ་པོར་བཅུག་པ་ལ། ཨོཾ་ཨཱཿཧཱུྃ། ལན་གསུམ། ཞེས་བརྗོད་པས་ཡེ་ཤེས་ཀྱི་བདུད་རྩི་རོ་བརྒྱ་དང་ལྡན་པ་དཀར་ལ་དམར་བའི་མདངས་ཅན་ཏུ་མེར་གྱིས་ཞུ་བ། བླ་མ་རྗེ་བཙུན་ཆེན་པོའི་ལྗགས་རྡོ་རྗེའི་འོད་ཟེར་གྱི་སྦུ་གུས་དྲངས་ཏེ་གསོལ་བའི་མོས་པ་དང་བཅས་འདིའི་རྗེས་ཟློས་མཛོད། །ཞལ་ཟས་རོ་བརྒྱ་ལྡན་ཅིང་ཡིད་འཕྲོག་པ། །ལེགས་སྦྱར་འདི་ནི་བཞད་པ་རྡོ་རྗེ་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ཨོཾ་ཨཱཿཧཱུྃ་གུ་རུ་ཧཱ་ས་བཛྲ་ག་་ཙཀྲ་ས་པ་རི་ཝཱ་རེ་བྷྱཿཨི་དཾ་བ་ལི༚་གྲྀཧྞནྟུ་མ་མ་སརྦ་སིངྡྷི་མྨི་པྲ་ཡཙྪ། ཞེས་ནང་གི་ཚོགས་འབུལ། དེ་ནས་ལུས་ཞིང་གི་རྡུལ་སྙེད་དུ་སྤྲུལ་ནས་མཁའ་ཁྱབ་སེམས་ཅན་ཐམས་ཅད་དང་ལྷན་ཅིག་སྒོ་གསུམ་གུས་པ་ཆེན་པོས་ཕྱག་འཚལ་བའི་མོས་པས་ཐལ་མོ་སྦྱར་ཏེ་དད་གུས་དྲག་པོས་འདིའི་རྗེས་ཟློས་མཛོད། བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་གུས་

― LT28_Page_0485 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་འཚལ། ལན་གསུམ། དེ་ལྟར་དད་མོས་གདུང་ཤུགས་དྲག་པོས་ཕྱག་འཚལ་ཞིང་གསོལ་བ་བཏབ་པའི་རྐྱེན་གྱིས། རྗེ་བཙུན་རྣལ་འབྱོར་གྱི་དབང་ཕྱུག་རས་པ་ཆེན་པོའི་དཔྲལ་བ་ནས་སྐུའི་བྱིན་རླབས་ཀྱི་རང་བཞིན་གཡོན་རྐྱང་མ་དང་རྗེས་སུ་འབྲེལ་བའི་ཀུནྡ་བྱང་སེམས་དཀར་པོའི་རྒྱུན་བྱུང་། ཁྱེད་རང་རྣམས་ཀྱི་དཔྲལ་བར་ཐིམ། ལུས་རྩའི་དྲི་མ་དག །བུམ་པའི་དབང་ཐོབ། མགྲིན་པ་ནས་གསུང་གི་བྱིན་རླབས་ཀྱི་རང་བཞིན་གཡས་རོ་མ་དང་རྗེས་སུ་འབྲེལ་བའི་རཀྟ་བྱང་སེམས་དམར་པོའི་རྒྱུན་བྱུང་། ཁྱེད་རང་རྣམས་ཀྱི་མགྲིན་པར་ཐིམ། །ངག་རླུང་གི་དྲི་མ་དག །གསང་བའི་དབང་ཐོབ། སྨིན་མཚམས་ནས། ཐུགས་ཀྱི་བྱིན་རླབས་ཀྱི་རང་བཞིན་དབུ་མ་དང་རྗེས་སུ་འབྲེལ་བའི་ཁུ་ཁྲག་འདྲེས་པའི་བྱང་སེམས་ཀྱི་རྒྱུན་བྱུང་། ཁྱེད་རང་རྣམས་ཀྱི་སྨིན་མཚམས་སུ་ཐིམ། ཡིད་ཐིག་ལེའི་དྲི་མ་དག །ཤེས་རབ་ཡེ་ཤེས་ཀྱི་དབང་ཐོབ་པར་མོས་མཛོད། དེ་དག་ནི་འདྲ་བས་འདྲ་བ་ལམ་དུ་བྱེད་པ་གོང་མའི་བརྡ་དབང་རྣམ་པ་གསུམ་ཡིན་ནོ། །དེ་བཞི་པ་ཡེ་ཤེས་རྡོ་རྗེའི་དབང་བསྐུར་བ་ལ། ཐོག་མར་མོས་གུས་དྲག་པོས་ཕུར་ཚུགས་སུ་གསོལ་བ་འདེབས་པ་འདི་ཉིད་ལྷན་ཅིག་དབྱངས་སུ་ལེན་པར་ཞུ། རྗེ་མི་ལ་བཞད་པ་རྡོ་རྗེ་ལ་གསོལ་བ་འདེབས་

― LT28_Page_0486 ―

^{[མ་དཔེ་གཟིགས་ན་འདིར་གནོན།]}

[Full Size]

སོ། །ཞེས་ལན་བདུན་དབྱངས་དང་བཅས་དཔོན་སློབ་ལྷན་ཅིག་བརྗོད། དེ་ནས་ཁྱེད་རང་རྣམས་ལུས་གནད་རྣམ་སྣང་གི་ཆོས་བདུན་དང་ལྡན་པས་ལྟ་སྟངས་གཡོ་བ་མེད་པའི་ངང་། སེམས་དུས་གསུམ་གྱི་རྣམ་རྟོག་གི་སྤྲོ་བསྡུས་མ་བསླད་པར་རང་རིག་གཉུག་མ་བཟོ་བཅོས་བྲལ་བ་བདེ་སྟོང་བརྗོད་མེད་ཕྱག་རྒྱ་ཆེན་པོའི་ངང་དུ་མཉམ་པར་འཇོག་པར་ཞུ། དེ་ལ་གནས་ལུགས་ཀྱི་དོན་ངོ་སྤྲོད་པའི་ཚུལ་དུ་རྗེ་བཙུན་རྣལ་འབྱོར་གྱི་དབང་ཕྱུག་རས་པ་ཆེན་པོའི་ཞལ་ནས་དོ་ཧ་རྡོ་རྗེའི་གླུས་གདམས་པ་སྩལ་ཞིང་དགོངས་པའི་དྲོད་གཏད་པས་དོན་གྱི་རྟོགས་པ་རྒྱུད་ལ་འཕོས་པའི་མོས་པ་མཛོད། སྣང་དང་སྟོང་དང་དབྱེར་མེད་གསུམ། །འདི་གསུམ་ལྟ་བའི་མདོར་བསྡུས་ཡིན། །གསལ་དང་མི་རྟོག་ཡེངས་མེད་གསུམ། །འདི་གསུམ་སྒོམ་པའི་མདོར་བསྡུས་ཡིན། །མ་ཆགས་མ་ཞེན་ལྷུག་པ་གསུམ། །འདི་གསུམ་སྤྱོད་པའི་མདོར་བསྡུས་ཡིན། །ཆོས་སྐུ་ལོངས་སྐུ་སྤྲུལ་སྐུ་གསུམ། །འདི་གསུམ་འབྲས་བུའི་མདོར་བསྡུས་ཡིན། །གཉིས་སུ་མེད་པ་ལྟ་བའི་དོན། །ཡེངས་པ་མེད་པ་སྒོམ་པའི་དོན། །ཟུང་དུ་འཇུག་པ་སྤྱོད་པའི་དོན། །འདི་གསུམ་དབྱེར་མེད་འབྲས་བུའི་དོན། །ལྟ་བ་འདི་ལ་གཟེར་གསུམ་གདའ། །སྒོམ་པ་འདི་ལ་གཟིར་གསུམ་གདའ། །

― LT28_Page_0487 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་པ་འདི་ལ་གཟེར་གསུམ་གདའ། །འབྲས་བུ་འདི་ལ་གཟེར་གསུམ་གདའ། །ལྟ་བའི་གཟེར་གསུམ་བཤད་ཙ་ན། །སྣང་སྲིད་སེམས་སུ་འདུས་པར་གདའ། །སེམས་ཉིད་གསལ་བའི་ངང་དུ་གདའ། །དེ་ལ་ངོས་བཟུང་མེད་པར་གདའ། །ལྟ་བའི་གཟེར་གསུམ་དེ་ལ་མཛོད། །སྒོམ་པའི་གཟེར་གསུམ་བཤད་ཙ་ན། །རྣམ་རྟོག་ཆོས་ཀྱི་སྐུ་རུ་གདའ། །རིག་པ་གསལ་བའི་ངང་དུ་གདའ། །མ་བཅོས་ལྷུག་པར་བཞག་པར་གདའ། །སྒོམ་པའི་གཟེར་གསུམ་དེ་ལ་མཛོད། །སྤྱོད་པའི་གཟེར་གསུམ་བཤད་ཙ་ན། །དགེ་བཅུ་སྤྱད་དུ་མེད་པར་གདའ། །སྡིག་བཅུ་སྤང་དུ་མེད་པར་གདའ། །གཉེན་པོས་སྤང་དུ་མེད་པར་གདའ། །སྤྱོད་པའི་གཟེར་གསུམ་དེ་ལ་མཛོད། །འབྲས་བུའི་གཟེར་གསུམ་བཤད་ཙ་ན། །འཁོར་བ་སྤང་དུ་མེད་པར་གདའ། །མྱང་འདས་བསྒྲུབ་ཏུ་མེད་པར་གདའ། །རང་སེམས་སངས་རྒྱས་ཡིན་པར་གདའ། །འབྲས་བུའི་གཟེར་གསུམ་དེ་ལ་མཛོད། །གཟེར་བཅུ་གཉིས་ལོགས་ནས་གཟེར་གཅིག་འདེབས། །གཟེར་ནི་ཆོས་ཉིད་སྟོང་པའི་གཟེར། །འདེབས་མཁན་བླ་མ་རིན་ཆེན་མཛད། །མ་རྟོགས་བར་དུ་ཡང་མི་ཐེབས། །ལྷན་གྱིས་རྟོགས་ན་ཐེབས་པ་ཡིན། །

― LT28_Page_0488 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལྟར་རྗེས་སུ་གདམས་པ་སྩལ་བར་མོས་མཛོད། སླར་མོས་གུས་དྲག་པོས་བདག་གི་རྒྱུད་བྱིན་གྱིས་བརླབ་ཏུ་གསོལ། སྙམ་པ་བྱས་པའི་རྐྱེན་གྱིས་བླ་མ་རྗེ་བཙུན་རྣལ་འབྱོར་གྱི་དབང་ཕྱུག་རས་པ་ཆེན་པོ་ཉིད་སྐུ་འོད་ཕུང་གི་རྣམ་པར་ལྟེམ་གྱིས་ཞུ་ནས་ཁྱེད་རང་རྣམས་ལ་སིབ་ཀྱིས་ཐིམ་པས་སྐུ་གསུང་ཐུགས་ཀྱི་ཡོན་ཏན་དང་བྱིན་རླབས་མ་ལུས་པ་ཐུགས་རྒྱུད་ལ་སྤར་བཏབ་པ་བཞིན་འཕོས་པར་མོས་མཛོད། སྐུ་བརྙན་ནམ་མེད་ན་ཚོམ་བུ་མགོ་བོར་འཇོག་ཅིང་དྲིལ་བུ་གསིལ། དྲི་ཞིམ་པོའི་སྤོས་བཏུལ་ཞིང་ངག་ཏུ། རྒྱལ་བ་རིགས་ཐམས་ཅད་ཀྱི་ཁྱབ་བདག་དྲུག་པ་རྡོ་རྗེ་འཆང་ཆེན་པོ་བཀའ་བཞི་བརྒྱུད་པའི་བླ་མ། གྲུབ་ཆེན་ཏཻ་ལོ་ནཱ་རོ་མར་པ་ལོ་ཙཱ་རྣམས་ཀྱི་བྱིན་གྱིས་རློབས་ཤིག །ཁྱད་པར་རྗེ་བཙུན་རྣལ་འབྱོར་གྱི་དབང་ཕྱུག་ཆེན་པོ་མི་ལ་བཞད་པ་རྡོ་རྗེས་རྡོ་རྗེའི་སློབ་མ་འདི་རྣམས་ལ་བྱིན་གྱིས་རློབས་ཤིག །ལུས་ལ་རྡོ་རྗེའི་སྐུའི་སྒོ་ནས་བྱིན་གྱིས་རློབས་ཤིག །ངག་ལ་རྡོ་རྗེའི་གསུང་གི་སྒོ་ནས་བྱིན་གྱིས་རློབས་ཤིག །ཡིད་ལ་རྡོ་རྗེའི་ཐུགས་ཀྱི་སྒོ་ནས་བྱིན་གྱིས་རློབས་ཤིག །ཡོན་ཏན་མི་ཟད་པ་རྒྱན་གྱི་འཁོར་ལོའི་སྒོ་ནས་བྱིན་གྱིས་རློབས་ཤིག །ཕྲིན་ལས་རྣམ་པ་བཞིའི་སྒོ་ནས་བྱིན་གྱིས་རློབས་ཤིག །གསང་བ་བསམ་གྱིས་མི་ཁྱབ་པའི་སྒོ་ནས་བྱིན་གྱིས་རློབས་ཤིག །ད་ལྟ་ཉིད་

― LT28_Page_0489 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་བྱིན་གྱིས་རློབས་ཤིག །མྱུར་བ་ཉིད་དུ་བྱིན་གྱིས་རློབས་ཤིག །སྟན་ཐོག་འདི་ཉིད་དུ་བྱིན་གྱིས་རློབས་ཤིག །ཛཿཧཱུྃ་བྃ་ཧོཿ དེས་གྲུབ་པའི་དབང་ཕྱུག་ཆེན་པོ་མི་ལ་བཞད་པ་རྡོ་རྗེ་ལ་བརྟེན་པའི་དབང་བསྐུར་བྱིན་རླབས་ཀྱི་རིམ་པ་ལེགས་པར་གྲུབ་པ་ཡིན་པས་སྐུ་གསུང་ཐུགས་ཀྱི་དམ་ཚིག་སྤྱི་དང་། །ཁྱད་པར་ལམ་ཟབ་མོ་བླ་མའི་རྣལ་འབྱོར་འབྲལ་མེད་གཡར་དམ་དུ་བཟུང་བར་བགྱིའོ་སྙམ་པས་འདིའི་རྗེས་ཟློས་མཛོད། །གཙོ་བོས་ཇི་ལྟར་སོགས་དང་། གཏང་རག་མཎྜལ། ལུས་ལོངས་སྤྱོད་འབུལ་བ། །དགེ་བསྔོ་སྤྱི་ལྟར་བྱའོ། །དེ་ནས་ཚོགས་ཀྱི་མཆོད་པ་སོགས་རྗེས་ཀྱི་རིཔ་པའང་གཞུང་ལྟར་བྱས་པས་གྲུབ་བོ། །འདིར་བློ་དམན་ཐོས་ཆུང་ཁ་གཅིག་འདི་སྙམ་དུ་སེམས་ཏེ། དབང་བསྐུར་འདི་བཀའ་བརྒྱུད་སྤྱི་ལ་མ་གྲགས་པས་ཁུངས་དང་དགོས་པ་མེད་དམ་སྙམ་པ་དང་། བརྒྱུད་པ་མེད་དམ་སྙམ་པ་དང་། རང་བཟོ་མིན་ནོ་སྙམ་པའི་ལོག་རྟོག་གསུམ་འབྱུང་བར་འགྱུར་རོ། །དེ་ལ་དང་པོའི་སྐྱོན་སེལ་ནི། སློབ་དཔོན་དཔའ་བོ་འོད་གསལ་གྱི་ལུགས་ཀྱི་གྲུབ་ཐོབ་བརྒྱད་ཅུ་རྩ་བཞིའི་བྱིན་རླབས་གྲོལ་མཆོག་ཞབས་ཀྱི་ཕྱག་བཞེས་ལས་འབྱུང་བའི་རྩ་བའི་བླ་མ་རྡོ་རྗེ་འཆང་གི་སྤྱི་དབང་ཉིད་འདིའི་དབང་ལ་སྦྱར་བ་ཡིན་པས། རྡོ་རྗེ་འཆང་ནི་རིགས་ཐམས་ཅད་ཀྱི་ཁྱབ་བྱེད་ཡིན་པས་འདི་ཙམ་དུ་མ་ཟད་ལྷ་དང་བླ་མ་ཇི་སྲིད་ལ་ཁ་སྤོ་ཆོག་པ་ལུང་རིག་གིས་གྲུབ་པ་དང་། བྱིན་

― LT28_Page_0490 ―

^{[མ་དཔེ་གཟིགས་ན་འདིར་གནོན།]}

[Full Size]

རླབས་ཀྱང་གྲུབ་བརྒྱའི་བྱིན་རླབས་སྦྱར་བ་སྟེ་དེའང་ལམ་དུས་སྤྲོས་མེད་འོད་ཟེར་ལ་བརྟེན་པའི་ཟབ་དབང་ཙམ་ཡིན་པས་འདིར་སྦྱར་བ་ལ་འགལ་བ་མེད་པའི་སྟེང་འདི་ཙམ་གྱིས་ཀྱང་དད་ལྡན་སྐལ་པ་ཅན་རྣམས་ལ་རྗེ་བཙུན་ཆེན་པོའི་བྱིན་རླབས་འཇུག་པའི་ཉེར་ལེན་ཁྱད་པར་ཅན་ཏུ་འགྱུར་བ་མ་ཟད། འདི་ལྟ་བུ་ལ་བརྟེན་ཏེ་དད་པ་སྐད་ཅིག་ཙམ་སྐྱེས་ཀྱང་ཐུགས་རྗེས་འཛིན་པར་འགྱུར་བས་ཁུངས་དང་དགོས་པ་ནི་དེ་ཡིན་ནོ། །གཉིས་པ་ནི། དེ་ལྟ་ནའང་མི་ལ་རས་པའི་དབང་བསྐུར་ཟེར་བ་བཀའ་བརྒྱུད་ནས་བརྒྱུད་པ་མེད་དོ་སྙམ་ན་དེའང་ཡོད་པ་ཙམ་མ་ཟད་རྩལ་དུ་བཏོན་མ་བཏོན་མ་གཏོགས་ཁྱད་པར་འཕགས་པ་ཡོད་དེ། སྤྱིར་ཏེ་ལོ་ནཱ་རོ་ནས་བཟུང་བདག་ཅག་གི་འདྲེན་མཆོག་དམར་མཐིང་ཅོད་པན་འཆང་བ་ཟུང་གི་བར་དུ་སྤང་རྟོགས་ཡོན་ཏན་བུམ་པ་གང་བྱོའི་ཚུལ་དུ་བྱོན་པ་ཟམ་མ་ཆད་ཅིང་། དཔལ་ལྡན་བླ་མ་དེ་དག་གི་སྐུ་གསུང་ཐུགས་ཀྱི་བྱིན་རླབས་ཐུན་མོང་དང་ཐུན་མོང་མ་ཡིན་པ་ཡང་ནས་ཡང་དུ་ཐོབ་པ་དང་། ཁྱད་པར་ཇོ་མོ་བཀྲ་ཤིས་ཚེ་རིང་མའི་འཇིག་རྟེན་ལས་འདས་པའི་རྗེས་གནང་གི་སྐབས་སུ་རྗེ་རས་པ་ཆེན་པོ་ལ་བརྟེན་པའི་དབང་བཞི་འདིར་བཀོད་པ་དང་ཚིག་མི་གཅིག་ཀྱང་དོན་གཅིག་པར་བཞུགས་པ་དམ་པ་དེ་དག་ལས་ཡང་ཡང་ནོས་པ་ཡིན་པས་ཐེ་ཚོམ་མི་དགོས་སོ། །གསུམ་པའི་སྐྱོན་ནི་དེ་དག་གིས་སེལ་མོད། བོད་ཀྱི་མི་གསར་འགྲོགས་ཆེ་བའི་དབང་གིས་བརྡོལ་ཆོས་ལ་ཡིད་བརྟོན་བ་ཆེས་མང་བས། དེ་ལྟར་བརྟོན་ཕྱིན་ཆད་དག་སྣང་དགོངས་གཏེར་སྙན་བརྒྱུད་སོགས་སུ་གྲགས་པ་ཕལ་མོ་ཆེ་ཞིག་

― LT28_Page_0491 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ནི་འདི་ལྟ་བུ་ཆོས་སྤྱན་ལྡན་པ་རྣམས་ཀྱི་སྤྱན་སྔར་འབད་པ་ཆེན་ཞིང་ཐེ་ཚོམ་ཆུང་བ་ཡིན་ཏེ། ལྐོག་གྱུར་གནས་དེ་དག་གང་ཡིན་མངོན་ཤེས་མེད་པས་མི་རྟོགས་ལ། འདི་ལྟ་བུ་ལ་ལུང་དང་མན་ངག་མངོན་སུམ་ཚད་མས་གྲུབ་པའི་ཕྱིར་རོ། །འདིས་ཀྱང་རྗེ་བཙུན་བཞད་པ་རྡོ་རྗེ་ཡི། །བྱིན་རླབས་མཁའ་མཉམ་འགྲོ་ལ་འབད་མེད་དུ། །ཞུགས་ནས་རྟོགས་གྲོལ་དུས་མཉམ་མི་སློབ་པའི། །ཟུང་འཇུག་རྒྱལ་སར་མངོན་བྱང་ཆུབ་པར་ཤོག །ཅེས་པ་འདིའང་འབྲེལ་ཚད་དོན་ལྡན་གྱི་སྐྱེས་བུ་ཆེན་པོ་ཁྲི་འདུ་སྣང་རྩེ་རི་ཁྲོད་པ་ཀུན་དགའ་ཆོས་ཀྱི་དབང་པོས་རིང་ནས་བསྐུལ་མ་གནང་བ་དང་། ཉེ་ཆར་སྒྲུབ་བརྩོན་དམ་པ་འཇམ་དབྱངས་རྒྱལ་མཚན་གྱིས་མཚམས་སྦྱར་བ་ལྟར་བཀའ་བརྒྱུད་རིན་པོ་ཆེའི་རྗེས་འཇུག་སྤོང་བ་པའི་རྟགས་ཙམ་འཛིན་པ་ཡོན་ཏན་རྒྱ་མཚོའི་མིང་ཅན་བློ་གྲོས་མཐའ་ཡས་པའི་སྡེས་དེ་བཱི་ཀོ་ཊིའི་དབེན་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ།། །།

རྗེ་བཙུན་རས་པ་ཆེན་པོ་ལ་བརྟེན་པའི་བླ་མའི་རྣལ་འབྱོར་གྱི་ཟིན་བྲིས་ཡེ་ཤེས་གསལ་བྱེད།

― LT28_Page_0493 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་རས་པ་ཆེན་པོ་ལ་བརྟེན་པའི་བླ་མའི་རྣལ་འབྱོར་གྱི་ཟིན་བྲིས་ཡེ་ཤེས་གསལ་བྱེད་བཞུགས་སོ། །

― LT28_Page_0494 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་རས་པའི་བྱིན་རླབས་འོད་བཀྱེས་ཏེ། །འཁོར་བ་རྨོངས་པའི་སྙིང་གི་མུན་པ་སལ་ནས། །དྲི་མེད་ཡེ་ཤེས་རྒྱས་པར་གསོལ་བཏབ་ནས། །དོན་ཆུང་ན་ཡང་དམ་པའི་གསུང་བཞིན་བྲི། །བླ་མའི་རྣལ་འབྱོར་ཚོགས་མཆོད་དང་འབྲེལ་བ་འདི་ལ་སྔོན་འགྲོ། དངོས་གཞི། རྗེས་ཀྱི་བྱ་བ་གསུམ་ཡོད། དང་པོ་ལ་བདུད་རྩི་བྱིན་རླབས། འབྱུང་གཏོར་བཏང་ཞིང་སྲུང་འཁོར་བསྒོམ་པ། སྐྱབས་སེམས། ཚོགས་བསགས་བཅས་བཞིར་ཡོད་པའི་དང་པོ་ནི། བླ་མེད་ཀྱི་སྒོར་ཞུགས་པའི་རྣལ་འབྱོར་པས་དུས་རྟག་ཏུ་ཐ་མལ་གྱི་འདུ་ཤེས་དང་འགྲོགས་པར་བྱ་བ་མ་ཡིན་ལ། ཁྱད་པར་ཐ་མལ་དུ་འདུ་ཤེས་པས་སྔགས་ཀྱི་བྱ་བ་ལ་འཇུག་མི་རུང་ཞིང་ཐ་མལ་པས་བདུད་རྩི་བརླབ་པ་དང་བགེགས་བསྐྲད་པ་སོགས་

― LT28_Page_0495 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་ནུས་པ་མ་ཡིན་པས། རང་ཉིད་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མ་ཞལ་གཅིག་ཁྲོ་འཛུམ། ཕྱག་གཡས་རྡོ་རྗེས་མཚན་པའི་གྲི་གུག་ཕྱར་ཞིང་གཡོན་ཐོད་ཁྲག་ཐུགས་ཀར་འཛིན་པ། སྐུ་མདོག་དམར་པོ་རུས་པའི་ཕྱག་རྒྱ་ལྔས་བརྒྱན་ཅིང་གྲུ་མོ་གཡོན་ན་རྡོ་རྗེའི་ཁ་ཊྭཱཾ་ག་བསྣམས་པ། ཞབས་བརྐྱང་བསྐུམས་ཀྱིས་པད་ཉི་བམ་རོ་ལ་བཞེངས་ཤིང་ཡེ་ཤེས་ཀྱི་རང་འོད་དང་བཅས་པ་གསལ་བཏབ་ལ་ང་རྒྱལ་བཟུང་། མདུན་གྱི་ནང་མཆོད་ཀྱི་བགེགས་བསང་ཞིང་སྣོད་བཅུད་མི་དམིགས་པ་སྟོང་པར་སྦྱང་། སྟོང་པའི་ངང་ལས་མདུན་ཏུ་ཡཾ་ལས་རླུང་གི་དཀྱིལ་འཁོར་ལྗང་གུ་ཟླ་གམ། རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེ་སྟེང་ཀཾ་ལས་ཐོད་པའི་སྒྱེད་པུ་གསུམ་

― LT28_Page_0496 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་སྟེང་དུ་ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་དབུས་སུ་ན་ལས་མི། ཤར་ལྷོར་གོ་ལས་བ་ལང་། ལྷོ་ནུབ་ཏུ་ཀུ་ལས་ཁྱི། ནུབ་བྱང་དུ་དེ་ལས་གླང་པོ་ཆེ། བྱང་ཤར་དུ་ཧ་ལས་རྟ་རྣམས་ཀྱི་ཤ །ཡང་དབུས་སུ་མཱུ་ལས་དྲི་ཆུ། ཤར་དུ་བི་ལས་དྲི་ཆེན། ལྷོར་ར་ལས་རཀྟ། ནུབ་ཏུ་ཤུ་ལས་ཁུ་བ། བྱང་དུ་མ་ལས་ཀླད་པ་རྣམས་ཡིག་འབྲུ་དེ་རྣམས་ཀྱིས་མཚན་པ། བདག་གི་ཐུགས་ཀའི་འོད་ཟེར་གྱིས་རླུང་དཀྱིལ་གཡོས། དེས་མེ་དཀྱིལ་སྦར། ཐོད་པ་དྲོས་ཤིང་བཅུད་རྣམས་ཞུ་སྟེ་ཁོལ་བས་ཉེས་པའི་སྐྱོན་རྣམས་སྤུ་བའི་ཚུལ་དུ་ཕྱིར་ལུད། སྟེང་དུ་རླངས་པ་ལས་གྲུབ་པའི་ཧཱུྃ་ཨཱཿཨོཾ་གསུམ་ཡས་རིམ་གྱིས་བརྩེགས་མར་གནས་པ་ལས་འོད་ཟེར་འཕྲོས་པས་རྩ་བ་གསུམ་གྱི་ཐུགས་གནས་ཡེ་ཤེས་ཀྱི་བདུད་རྩི་འོད་ཟེར་གྱི་རྣམ་པར་སྤྱན་དྲངས། བདུད་རྩིའི་རྒྱ་མཚོ་ལ་ཐིམ་པས་ཁ་དོག་དྲི་རོ་ནུས་བཅུད་ཕུན་སུམ་ཚོགས་པར་དམིགས་ལ་གཡོན་པའི་མཐེབ་སྲིན་གྱིས་མྱང་བས་ངག་གི་དྲི་མ་དག །རྩ་རླུང་ཐིག་ལེ་བྱིན་གྱིས་རློབ་པར་གྱུར། དེ་ལྟར་བསྒྲུབས་པའི་བདུད་རྩི་དེས་གནས་ཁང་མཆོད་རྫས་སོགས་ལ་འཐོར་བས་བགེགས་དང་བར་གཅོད་སྐྲོད་ཅིང་སྲུང་ལ་དེ་དག་བྱིན་གྱིས་རློབ་པ་སོགས་ཀྱི་དགོས་པ་ཡོད་དོ། །གཉིས་པ་ནི། དམིགས་

― LT28_Page_0497 ―

^{[མ་དཔེ་གཟིགས་ན་འདིར་གནོན།]}

[Full Size]

པ་དེ་ལྟ་བུས་སྔོན་གཏོར་བྱིན་བརླབ། གཏོར་མ་ནི་ཀར་ལུགས་པ་རྣམས་ཀྱིས་ཕག་མོའི་སྔོན་འགྲོར་གྲུ་གསུམ་དམར་པོ་འདིར་བ་ཞིག་བཅའ་སྲོལ་ཡོད་ཀྱང་རང་རང་ལུགས་ཀྱིས་འཐུས། །སྔགས་རྒྱ་དང་རང་རྗེ་བཙུན་མའི་ཐུགས་ཀའི་འོད་ཟེར་གྱིས་ཞིང་སྐྱོང་སུམ་ཅུ་རྩ་གཉིས་སོགས་སྲིད་པ་གསུམ་གྱི་འབྱུང་པོ་ཐམས་ཅད་སྐད་ཅིག་གིས་མདུན་ཏུ་བཀུག་པ་འོད་གསལ་དུ་ཞུ། ཐམས་ཅད་ཀྱང་རྗེ་བཙུན་མའི་སྐུར་གྱུར་པས་ལྗགས་འོད་ཟེར་གྱི་སྦུ་གུས་གཏོར་མ་བདུད་རྩིའི་བཅུད་དྲངས་ཏེ་གསོལ་བས་མཉེས། རྣམ་བཞིའི་ཕྲིན་ལས་བསྒྲུབ་པར་ཞལ་གྱིས་བཞེས་ནས་རང་གནས་སུ་གཤེགས། ནག་པོའི་ཕྱོགས་སུ་གྱུར་པའི་གསང་སྔགས་ཟབ་མོ་ལྟ་ཉན་ལ་མི་དབང་བ་དང་། བར་གཅོད་རྩོམ་པའི་གདུག་སེམས་ཅན་ཐམས་ཅད་རང་གི་སྐུ་ལས་ཁྲོ་ཆུང་དང་རྡོ་རྗེའི་ཁ་ཊྭཱཾ་སོགས་མཚོན་ཆའི་ཆར་ཆེན་པོ་སྤྲོས་ནས་ནམ་མཁའི་མཐར་བསྐྲད། སྤྲོས་པ་དེ་དག་ཚུར་འདུས་པས་འོག་རྡོ་རྗེའི་ས་གཞི། བར་རྡོ་རྗེའི་རབ། སྟེང་རྡོ་རྗེའི་གུར་དང་བླ་བྲེ་སྲ་ཞིང་བརྟན་པའི་ཕྱི་རོལ་དུ་ཁྲོ་བོ་ཕྲ་མེན་མཚོན་ཆ་སྣ་ཚོགས་མེ་པུང་གི་གུར་དུ་གྱུར་ནས་བར་དུ་གཅོད་པ་གང་གིས་ཀྱང་གླགས་མི་རྙེད་པར་མོས། །འདི་ནི་གསང་སྔགས་མྱུར་ལམ་ཟབ་མོ་དངོས་གྲུབ་ཆེ་ཡང་བར་གཅོད་ཀྱང་མང་བ་ཡིན་པས་དེ་ཉིད་མི་འབྱུང་ཞིང་སྲུང་བའི་ཐབས་

― LT28_Page_0498 ―

^{[མ་དཔེ་གཟིགས་ན་འདིར་གནོན།]}

[Full Size]

སོ། །གསུམ་པ་ནི། མདུན་གྱི་ནམ་མཁར་པད་ཟླའི་གདན་ལ་དཀོན་མཆོག་རྩ་གསུམ་ཀུན་འདུས་ཀྱི་ངོ་བོ་རྗེ་བཙུན་བཞད་པ་རྡོ་རྗེ་གསལ་བཏབ། དེ་ཉིད་སྐྱབས་གནས་ཀུན་འདུག་གཅིག་ཆོག་ཏུ་མོས་པ་འདི་ནི་སྐྱབས་ཡུལ་སྒོམ་ཚུལ་མང་དུ་ཡོད་པ་ལས་ཀུན་འདུས་ནོར་བུ་ལུགས་ཞེས་ཟབ་ཅིང་བྱིན་རླབས་ཆེ་ལ་དམིགས་པ་ཟིན་སླ་བ་ཡིན་ནོ། །དེ་ལ་བདག་གཞན་ནམ་མཁས་ཁྱབ་ཚད་ཀྱི་སེམས་ཅན་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྙིང་ཁོང་རུས་པའི་གདིང་ནས་སྐྱབས་སུ་མཆི་ན་ཅི་མཛད་ཁྱེད་མཁྱེན་ནོ་སྙམ་པ་དང་། སེམས་ཅན་ཐམས་ཅད་བདག་གི་ཕ་མར་མ་གྱུར་པ་གཅིག་ཀྱང་མེད་པ་དྲིན་ཆེན་ཤ་སྟག་ཡིན་ཀྱང་མ་རིག་པའི་དབང་གིས་འཁོར་བའི་རྒྱ་མཚོར་ཐོག་མཐའ་མེད་པར་འཁྱམས་ཤིང་ཐར་པའི་དུས་མེད་པ་འདི་རྣམས་ཤིན་ཏུ་སྙིང་རེ་རྗེ། འདི་ཐམས་ཅད་ཟུང་འཇུག་ཡེ་ཤེས་སྐུ་ཅན་རྗེ་བཙུན་རས་པ་ཆེན་པོའི་གོ་འཕང་ལ་འགོད་པར་བྱ། དེའི་ཕྱིར་དུ་སྒོ་གསུམ་དགེ་བའི་ལས་ལ་བཀོལ་ཞིང་ཁྱད་པར་ལམ་ཟབ་མོ་བླ་མའི་རྣལ་འབྱོར་ལ་རྩེ་གཅིག་ཏུ་འབད་པར་བགྱིའོ་སྙམ་པ་སྟེ། སྐྱབས་འགྲོ་ནི་ཐེག་པ་ཆེ་ཆུང་གི་ཆོས་ཐམས་ཅད་ཀྱི་གཞི་རྟེན། ཕྱི་པ་ནང་པའི་ཁྱད་འབྱེད་ཡིན་ཅིང་། སེམས་བསྐྱེད་པ་ནི། རྫོགས་པའི་སངས་རྒྱས་ཐོབ་པའི་ས་བོན། ཐེག་པ་ཆེ་ཆུང་གི་ཁྱད་འབྱེད་ཡིན་ནོ། །བཞི་པ་ནི།

― LT28_Page_0499 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར་དངོས་བསྟན་ནང་དོན་དང་སྦྱར་བ་ཡིན་ཀྱང་གནས་ལུགས་མ་རྟོགས་པ་རྣམས་ཀྱིས་སྤྱི་མཐུན་མཚན་བཅས་ཀྱི་དམིགས་པ། །སངས་རྒྱས་ཀུན་འདུས་བླ་མ་རྗེ་བཙུན་རས་པ་ཆེན་པོ་དེ་ལ། བདག་གཞན་སེམས་ཅན་ཐམས་ཅད་ལུས་ཞེང་གི་རྡུལ་སྙེད་དུ་སྤྲུལ་ནས་ཕྱག་འཚལ་བ། ལུས་ལོངས་སྤྱོད་དགེ་ཚོགས་དང་བཅས་པ་ཀུན་བཟང་མཆོད་སྤྲིན་རྒྱ་མཚོར་སྤྲུལ་ནས་འབུལ་བ། ཐོག་མ་མེད་པ་ནས་སྒོ་གསུམ་དུ་བསགས་པའི་སྡིག་པ་མི་དགེ་བ་རྒྱུ་དང་བཅས་པ་ལ་གནོང་འགྱོད་དྲག་པོས་བཤགས་པ། འཁོར་འདས་ལམ་གསུམ་གྱིས་བསྡུས་པའི་ཟག་བཅས་ཟག་མེད་ཀྱི་དགེ་བའི་རྩ་བ་ཐམས་ཅད་ལ་རྗེས་སུ་ཡི་རང་བ། ཕྱོགས་བཅུའི་རྒྱལ་བ་སྲས་དང་བཅས་པའི་ངོ་བོ་རྗེ་བཙུན་རྣལ་འབྱོར་གྱི་དབང་ཕྱུག་ལ་ཟབ་རྒྱས་ཆོས་ཀྱི་འཁོར་ལོ་བསྐོར་བར་བསྐུལ་བ། སངས་རྒྱས་ཐམས་ཅད་ཀྱི་ཡེ་ཤེས་སྐུ་གཅིག་པུ་རྗེ་བཙུན་རས་པ་སྲས་དང་བཅས་པ་མྱ་ངན་ལས་མི་འདའ་བར་མཁའ་དང་འགྲོ་ཁམས་ཇི་སྲིད་པར་བཞུགས་པར་གསོལ་བ། དེ་ལས་བྱུང་བའི་དགེ་བ་སོགས་དགེ་རྩ་ཐམས་ཅད་བྱང་ཆུབ་རྡོ་རྗེ་རས་པ་ཆེན་པོའི་གོ་འཕང་ཐོབ་པའི་ཆེད་དུ་བསྔོ་བ་རྣམས་བྱ་ཆོག་ཅིང་། །ཡན་ལག་བདུན་པ་འདི་ནི་མདོ་སྔགས་བསགས་སྦྱོང་ཐམས་ཅད་ཀྱི་གནད་དང་སྙིང་པོ་བསྡུས་པ་ཡིན་ལ། སྤྱིར་སྒྲིབ་པ་མ་བྱང་ཞིང་། །

― LT28_Page_0500 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་མ་རྫོགས་པ་ལ་ལམ་གྱི་མངོན་རྟོགས་མི་སྐྱེ་ཞིང་བླ་མ་ལྷའི་བྱིན་རླབས་འཇུག་པར་དཀའ་བས་ལམ་ཉམས་སུ་ལེན་པའི་སྔོན་འགྲོར་མེད་ཐབས་མེད་པ་ཡིན་ནོ། །ཁྱད་པར་ཐུན་མོང་མ་ཡིན་པའི་བསགས་སྦྱོང་གི་དོན་ནི། ཆོས་ཐམས་ཅད་རང་སེམས་ཁོ་ནའི་ཆོ་འཕྲུལ་ཡིན་པས་བླ་མའང་རང་གི་སེམས་ཉིད་ཀྱི་ངོ་བོ་ལས་གཞན་ཏུ་མེད་པར་རྟོགས་ནས་རང་རིག་གཉུག་མའི་རང་ཞལ་ལ་ལྟ་བ་གནས་ལུགས་ལྟ་བ་མཇལ་བའི་ཕྱག །མིག་གི་ཡུལ་དུ་གཟུགས་སོགས་ཚོགས་དྲུག་གི་ཡུལ་དུ་ཅི་སྣང་ཅི་ཤར་ཐམས་ཅད་ལ་མ་ཞེན་མ་སྤང་དགག་སྒྲུབ་ཀྱི་བློ་དང་བྲལ་བ་ནི་གཏོང་བ་ཆེན་པོ་དོན་གྱི་མཆོད་པ། དགེ་སྡིག་གི་རང་བཞིན་གདོད་ནས་མ་གྲུབ་པ་ལ་མཚན་མར་ཞེན་པའི་བདག་འཛིན་ཨ་འཐས་འཛིན་མེད་རང་རིག་པའི་ཀློང་དུ་ཞི་བས་འཁོར་གསུམ་རྣམ་པར་མི་རྟོག་པ་བརྗོད་མེད་དོན་གྱི་བཤགས་པ། ངོ་བོ་སྟོང་ཞིང་རང་བཞིན་གསལ་བ་ལས་འགགས་མེད། ཐུགས་རྗེ་རྒྱུན་ཆད་མེད་པར་སྣང་བའང་རིག་པའི་རང་རྩལ་དུ་ཤེས་ནས་ཡི་རང་བ། གདོད་ནས་འཁོར་འདས་ཀུན་ལ་ཁྱབ་ཅིང་ཕྱམ་བདལ་བའི་ཡེ་ཤེས་ཀྱི་རང་བཞིན་བརྗོད་མེད་བརྗོད་པ་ཀུན་གྱི་གཞིར་གྱུར་པ་མི་ཤིག་ནཱ་དའི་ཆོས་སྒྲ་བསྐུལ་བ། །བརྟན་གཡོ་ཀུན་གྱི་སྲོག་ཏུ་ཞུགས་ཤིང་མཆོག་ཏུ་མི་འགྱུར་བ་ཆོས་རྣམས་ཀྱི་དེ་བཞིན་ཉིད་ཆོས་སྐུ་རྒྱུན་གྱི་རྟག་པར་

― LT28_Page_0501 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས་སུ་གསོལ་བ། རང་བཞིན་མ་གྲུབ་པའི་དགེ་རྩ་འཁོར་གསུམ་དམིགས་པ་མེད་པའི་ངང་ནས་འགྲོ་ཀུན་རང་གནས་ཀྱི་སྐུ་གསུམ་རང་ཞལ་མཇལ་ཕྱིར་བསྔོ་བ་སོགས་སོ། །གཉིས་པ་དངོས་གཞི་ལ་བདག་མདུན་གཉིས་ལས་དང་པོ་བདག་བྱིན་གྱིས་བརླབ་པ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་།ཐུགས་རྡོ་རྗེའི་ས་བོན་འབྲུ་གསུམ་བརྗོད་པའི་རྐྱེན་གྱིས་སྣོད་རྣམ་པར་དག་པ་མཁའ་སྤྱོད་ཆེན་པོ་ཨོ་རྒྱན་དྷུ་མ་ཐ་ལའི་ཞིང་གི་བཀོད་པ་དང་ལྡན་པའི་དབུས་སུ། བཅུད་རྣམ་པར་དག་པ་ཆོས་འབྱུང་གྲུ་གསུམ་པ་གདན་ཐབས་ཀྱི་སྟེང་དུ། །ང་ཐབས་ཀྱི་ཆོས་འབྱུང་གྲུ་གསུམ་ཕྱི་དཀར་ལ་ནང་དམར་བ། རྩ་བ་ཕྲ་བ་གདན་ལ་ཟུག་ཅིང་ཁ་གདེངས་གཡེལ་བ་གྱེན་ཏུ་བསྟན་པ། གཉིས་ཀའི་ཟུར་དྲུག་ལ་དགའ་བ་འཁྱིལ་བས་མཚན་པའི་དབུས་པདྨའི་ལྟེ་བར་བམ་རོ་མགོ་གཡས་སུ་བསྟན་པའི་སྙིང་གར་ཉི་མའི་དཀྱིལ་འཁོར། བེའི་སྟེང་དུ་སྐད་ཅིག་གིས་བདག་ཉིད་རྒྱལ་ཡུམ་རྡོ་རྗེ་ཕག་མོ་ལི་ཁྲི་སྟེ་སིནྷཱུ་རའི་མདངས་ཅན་ཁྲོ་ཞིང་འཛུམ་ལ་སྤྱན་གསུམ་དང་ལྡན་པ་དབུ་སྐྲ་ཁམ་སེར་གྱེན་ཏུ་བརྫེས་པ་ལ་ཐོད་སྐམ་ལྔས་བརྒྱན་ཅིང་། ཐོད་རློན་ལྔ་བཅུའི་དོ་ཤལ་དང་མེ་ཏོག་དམར་པོའི་ཕྲེང་བས་བརྒྱན་པ། ཕྱག་གཡས་རྡོ་རྗེས་ཡུ་བ་བྱས་པའི་གྲི་གུག་ནམ་མཁར་ཕྱར་ཞིང་གཡོན་ཐོད་ཁྲག་ཐུགས་

― LT28_Page_0502 ―

^{[མ་དཔེ་གཟིགས་ན་འདིར་གནོན།]}

[Full Size]

ཀར་འཛིན་པ། གྲུ་མོ་གཡོན་ཏུ་རྡོ་རྗེས་མཚན་པའི་ཁ་ཊཾྭཱ་ག་བརྟེན་པ། སྤྱི་བོར་འཁོར་ལོ། །རྣ་ཆ། མགུལ་རྒྱན། ཕྱག་ཞབས་ཀྱི་གདུ་བུ། སྐ་རགས་ཏེ་རྣམ་གྲངས་ལྔ་ཀ་མི་རུས་ལས་བྱས་པའི་ཕྱག་རྒྱ་ལྔས་སྤྲས་པ། ཞབས་གཡས་བསྐུམ་པའི་རྟིང་པ་བྷ་ག་ལ་གཏད་ཅིང་གཡོན་བརྐྱང་ནས་བཞེངས་པ། མེ་ཕུང་འབར་བའི་དབུས་ན་རང་ལུས་དམ་ཚིག་སེམས་དཔའ་དང་ཡེ་ཤེས་སེམས་དཔའ་གཉུག་མའི་ལུས་སེམས་ལྷ་དང་ཆོས་ཉིད་ཀྱི་རང་བཞིན་གདོད་ནས་རྫོགས་པའི་གསལ་སྣང་དང་ང་རྒྱལ་རྣམ་པར་དག་པ་ཚང་པའི་སྐུའི་ལྟེ་བར་ཆོས་འབྱུང་དམར་པོ་ཁང་ཐབས་ཀྱི་ནང་དུ་པདྨ་འདབ་བཞི་ཕྱོགས་མདོག་ཅན་གྱི་ལྟེ་བར་ཧྲཱིཿདམར་པོ། འདབ་བཞིའི་ཤར་དུ་ཧ་སྔོན་པོ། ལྷོར་རི་སེར་པོ། ནུབ་ཏུ་ནི་དམར་པོ། བྱང་དུས་ལྗང་གུ་བཞི་པོ་ངོ་ནང་དུ་ལྟ་བ་ཧྲཱིཿའི་མཐར་མདུན་ནས་བརྩམས་པའི་ངོ་ནང་བསྟན་དུ། ཨོཾ་བཛྲ་བཻ་རོ་ཙ་ནཱི་ཡཻ་ཧཱུྃ་ཧཱུྃ་ཕཊ་སྭཱ་ཧཱ། ཞེས་པས་བསྐོར་བ་ལ་ཡིད་རྩེ་གཅིག་ཏུ་གཏད་དེ་བཟླས་པས་སྔགས་ཕྲེང་གཡོན་བསྐོར་དྲག་ཏུ་འཁོར་བའི་འོད་ཟེར་གྱིས་རྩ་གསུམ་རྒྱལ་བ་སྲས་བཅས་མཆོད། བྱིན་རླབས་འོད་ཟེར་གྱི་རྣམ་པར་བསྡུས་ནས་ཐིམ། སེམས་ཅན་གྱི་སྡིག་སྒྲིབ་སྦྱང་། ཕྱི་སྣོད་ནང་བཅུད་ཐམས་ཅད་དག་པ་ལྷའི་འཁོར་ལོར་གྱུར་པར་བསམ་ལ་ཤུབ་བུར་བཟླ་བ་ངག་བཟླས་ཐུན་མོང་བ་དང་། །

― LT28_Page_0503 ―

^{[མ་དཔེ་གཟིགས་ན་འདིར་གནོན།]}

[Full Size]

རླུང་བུམ་པ་ཅན་ནམ་བར་རླུང་ཅི་རིགས་པ་བཟུང་ནས་སྔགས་ཕྲེང་ལ་སེམས་གཏད་དེ་ཡིད་ཀྱིས་བཟླ་བ་འགོག་བཟླས་དང་། རླུང་ནང་དུ་འཇུག་པའི་ཚེ་ཨོཾ་བཛྲ། གནས་པའི་ཚེ་བཻ་རོ་སོགས། དབྱུང་བའི་ཚེ་ཧཱུྃ་ཧཱུྃ་སོགས་ལ་དམིགས་ཏེ་བཟླ་བ་རྡོར་བཟླས་ཏེ་གསུམ་ཀའམ་ཅི་རིགས་བྱ། ལྷན་སྐྱེས་མ་ལ་ཐུན་མོང་མ་ཡིན་པ་ནཱ་རོའི་སྙན་བརྒྱུད་རླུང་སེམས་དབྱེར་མེད་ཀྱི་མན་ངག་རྣམས་ནི་འདིར་སྦྱོར་མི་དགོས་པས་སྤྱི་མཐུན་འདི་ཙམ་གྱིས་སྐབས་དོན་འགྲུབ་པ་ཡིན་ནོ། །འདིས་ནི་བདག་གི་མ་དག་པའི་སྒོ་གསུམ་རྡོ་རྗེ་བཙུན་མོའི་སྐུ་གསུང་ཐུགས་སུ་བྱིན་གྱིས་བརླབས་པས་ཐུགས་རྗེ་ཡུལ་དུ་འཇུག་པའི་སྣོད་དུ་རུང་བའི་རྟེན་འབྲེལ་ཁྱད་པར་ཅན་འགྲིགས་པ་ཡིན་ནོ། །གཉིས་པ་དངོས་གཞིའི་བསྟན་དོན་གཙོ་བོ་མདུན་བསྐྱེད་ལ་བརྟེན་ནས་ཚོགས་བསགས་བྱིན་རླབས་བསྐུལ་བ་ལ་བདུན། གནས་ཡོ་བྱིན་རླབས། རྟེན་བསྐྱེད་ཅིང་ཡེ་ཤེས་པ་གཞུག་པ། ཕྱག་སོགས་ཀྱིས་མཆོད་པ། བསྟོད་པ་བྱ་བ། ཁྱད་པར་གྱི་ཚོགས་བསགས་པ། གསོལ་འདེབས་དང་བཟླས་པས་ཐུགས་རྒྱུད་བསྐུལ་བ། འདོད་དོན་ཞུ་བའོ། །དང་པོ་ནི། རང་གི་ཐུགས་ཀའི་འོད་ཟེར་གྱིས་མཚན་འཛིན་གདོས་བཅས་ཀྱི་དངོས་པོ་ཐམས་ཅད་སྦྱངས་ཏེ་སྟོང་ཉིད་སྤྲོས་བྲལ་དུ་གྱུར་པའི་འོད་གསལ་གྱི་རང་མདངས། ཕྱི་སྣོད་

― LT28_Page_0504 ―

^{[མ་དཔེ་གཟིགས་ན་འདིར་གནོན།]}

[Full Size]

ཐམས་ཅད་འོག་མིན་སྟུག་པོ་བཀོད་པའི་ཞིང་ཁམས་རྒྱ་ཚད་དབྱིབས་དང་རྒྱན་བཀོད་དཔག་ཏུ་མེད་པའི་དབུས་སུ། གནས་ཁང་ཐར་པ་ཆེན་པོའི་གཞལ་མེད་ཁང་ཡངས་ཤིང་རྒྱ་ཆེ་ལ་མཚན་ཉིད་བཀོད་པ་ཡོངས་སུ་རྫོགས་པ། ཕྱི་ནང་ཀུན་ཏུ་མཆོད་པའི་སྤྲིན་རབ་འབྱམས་རྒྱ་མཚོ་ཀུན་ཏུ་བཟང་པོའི་སྨོན་ལམ་དང་ཏིང་ངེ་འཛིན་གྱི་རྣམ་པར་འཕྲུལ་པ་ལས་བྱུང་བ་ལྟ་བུས་ཡོངས་སུ་གང་བ། དེ་ཡང་ཕྱི་མཆོད་ཉེར་སྤྱོད་ལྔ། བཀྲ་ཤིས་རྫས་རྟགས། རྒྱལ་སྲིད་སྣ་བདུན་ནང་མཆོད་འདོད་པའི་ཡོན་ཏན་ལྔ། །གསང་མཆོད་རྡོ་རྗེའི་རིག་མ་བཅུ་དྲུག་ལ་སོགས་པ་སྲིད་ཞིའི་ཁམས་ན་བདེ་བའི་ཡོ་བྱད་ཀྱི་འབྱོར་པ་གང་ཡོད་པ་ཐམས་ཅད་མ་ཚང་བ་མེད་པར་བསམས་ལ། ནམ་མཁའ་མཛོད་ཀྱི་ཕྱག་རྒྱ་དང་སྔགས་དང་རོལ་མོའི་སྒྲས་བྱིན་བརླབ་བོ། །གཉིས་པ་ནི་སྣོད་བཅུད་གདོད་ནས་རྣམ་པར་དག་པ་སངས་རྒྱས་པདྨ་དམ་པ་དང་མི་འཁྲུགས་པ་ལ་སོགས་པའི་ཞིང་གི་བཀོད་པ་ལྟ་བུ་ཕུན་སུམ་ཚོགས་པའི་མདུན་གྱི་ནམ་མཁར་འཇའ་སྤྲིན་དང་མཆོད་པའི་ལྷ་མོ་དུ་མས་བརྒྱན་པའི་དབུས་སུ་སྲོག་འཛིན་སོགས་རྩ་བའི་རླུང་ལྔ་རྣམ་སྐབས་འདིའི་ཚིག་ཁ་ཤས་རྗེ་བཙུན་ཉིད་ཀྱི་གསུང་ཡིན་པས་འདིར་བཀོད་པའོ། པར་དག་པ་སེང་གེ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་ལྷ་རྫས་ཀྱི་གོས་ཀྱིས་བཀབ་པའི་སྟེང་དུ། །འཁོར་ལོ་ལྔའི་རྩ་ཡན་

― LT28_Page_0505 ―

^{[མ་དཔེ་གཟིགས་ན་འདིར་གནོན།]}

[Full Size]

ལག་དང་བཅས་པ་རྣམ་པར་དག་པ་པདྨ་འདབ་སྟོང་གི་ལྟེ་བར། རླུང་སེམས་ཁམས་ཀྱི་དྭངས་མ་འཁོར་ལོ་ལྔའི་མི་ཤིགས་པའི་ཐིག་ལེ་རྣམ་པར་དག་པ་ཉི་ཟླའི་གདན་ལ། རང་གི་སེམས་ཆོས་ཐམས་ཅད་ཀྱི་དེ་བཞིན་ཉིད་སྤྲོས་པ་ཐམས་ཅད་ཀྱིས་སྟོང་ཞིང་འོད་གསལ་བ་དཔལ་ལྡན་བླ་མའི་སྐུར་སྣང་བ་ནི། བཀའ་བརྒྱུད་བླ་མ་དངོས་སུ་སྨོས་པ་རྣམས་ཀྱིས་མཚོན་ནས་ཕྱོགས་བཅུ་དུས་གསུམ་གྱི་རྩ་གསུམ་རྒྱལ་བ་སྲས་བཅས་གཅིག་ཏུ་འདུས་པའི་ངོ་བོ་རྗེ་བཙུན་རས་པ་ཆེན་པོ་སྐུ་ཡེ་ཤེས་འོད་ལྔའི་གཟི་བརྗིད་མཁའ་ཁྱབ་ཏུ་འཕྲོ་ཞིང་གསུང་རྡོ་རྗེ་ནཱ་དའི་མགུར་དབྱངས་ལྷང་ལྷང་སྒྲོག་པ། ཐུགས་མཁྱེན་བརྩེ་ཡེ་ཤེས་ཆེན་པོས་དད་མོས་གསོལ་བ་འདེབས་པ་ལ་རྩེ་གཅིག་ཏུ་དགོངས་པའི་མཐའ་བསྐོར་གྱི་སྟེང་དུ་བཀའ་བརྒྱུད་བླ་མ། བར་དུ་རྒྱལ་བ་སྲས་བཅས་ཡི་དམ་ལྷ་ཚོགས་འོག་ཏུ་དཔའ་བོ་མཁའ་འགྲོ་དམ་ཅན་སྲུང་མའི་ཚོགས་དང་བཅས་པ་ནམ་མཁའི་དབྱིངས་སུ་སྤྲིན་ཆེན་གྱི་ཕུང་པོ་གཏིབས་པ་ལྟར་བཞུགས་པའི་གཙོ་བོའི་གནས་གསུམ་དུ་རྡོ་རྗེ་གསུམ་གྱི་ངོ་བོ་ཨོཾ་དཀར་ཨཱཿདམར་ཧཱུྃ་སྔོན་པོ་གསུམ་དུ་གསལ་བའི་འོད་ཟེར་དང་རང་ཉིད་རྣལ་འབྱོར་མའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་ཡེ་ཤེས་པ་སྤྱན་དྲངས་པར་མོས་ལ་ཅང་ཏེའུ་དྲིལ་བུ་སོགས་རོལ་མོའི་སྒྲ་

― LT28_Page_0506 ―

^{[མ་དཔེ་གཟིགས་ན་འདིར་གནོན།]}

[Full Size]

བསྒྲག །དྲི་བཟང་གི་སྤོས་བཏུལ། དད་མོས་ཀྱི་གདུང་ཤུགས་དྲག་པོས་བསྐུལ་ཏེ་སྤྱན་འདྲེན་གྱི་ཚིག་བརྗོད་པས། རང་སྣང་རྣམ་དག་ཆོས་ཀྱི་དབྱིངས་ཤར་ཕྱོགས་མངོན་པར་དགའ་བ། མཁའ་སྤྱོད་རྡོ་རྗེ་བཙུན་མོའི་ཚོགས་ཁང་སོགས་དག་པའི་ཞིང་ཁམས་རྣམས་ནས་ཐུགས་རྗེས་མ་བཟོད་པའི་ཚུལ་གྱིས་སྐད་ཅིག་ལ་མདུན་གྱི་ནམ་མཁར་བྱོན་པ་འདི་ཉིད་ལ་རྩ་གསུམ་རྒྱལ་བ་སྲས་དང་བཅས་པའང་འཁོར་དུ་འདུས་ཏེ་དགྱེས་པས་བཞུགས་པར་མོས། ཨེ་ཨཱ་རལླི་ཕེ༚་ཞེས་པའི་སྔགས་ཀྱིས་བསྐུལ་བའི་ཚེ་ཙོག་པུའི་འདུག་སྟངས་བྱས་ལ་རྐང་པ་གཡས་ཀྱི་མཐོ་བོས་གཡོན་མཐེབ་མནན། ལག་གཉིས་ཀྱི་མཐེབ་མཛུབས་ཞི་མདུད་ཅིང་ལྷག་མ་གཟེང་པ་འབར་བའི་རྒྱ་དཔྲལ་བར་བསྐོར་ཅིང་མིག་གྱེན་ཏུ་བལྟ། བཛྲ་ས་མཱ་ཛཿཞེས་པ་ལ་རྡོ་རྗེ་བསྡུ་རྒྱ་བྱའོ། །གསུམ་པ་ཕྱག་དང་མཆོད་པ་མཎྜལ་གསུམ་ལས། དང་པོ་ནི། བདག་གཞན་སེམས་ཅན་ཐམས་ཅད་ཀྱི་ལུས་ཞིང་གི་རྡུལ་སྙེད་དུ་སྤྲུལ་ནས་ཐལ་མོ་གནས་གསུམ་དུ་སྦྱར་ཞིང་གནས་ལྔ་ས་ལ་ཕབ། ངག་གིས་བསྟོད་དབྱངས་ཡན་ལག་འབུམ་ལྡན་བརྗོད། ཡིད་ཀྱིས་སྐྱབས་གནས་གཞན་ཏུ་མི་འཚོལ་བའི་མོས་གུས་དྲག་པོས་ཕྱག་བྱ་བར་མོས། གཉིས་པ་ནི། རང་གི་ཐུགས་ཀ་ནས་མཆོད་པའི་ལྷ་མོ་གཞོན་མཛེས་ཡིད་འོང་དཔག་ཏུ་མེད་པ་སྙན་པའི་གླུ་དང་ལྡན་པ་

― LT28_Page_0507 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམས་སྤྲོས་ནས་སྔར་བྱིན་གྱིས་བརླབས་པའི་མཆོད་པ་དེ་དག་ཕུལ་བས། ཕྱི་མཆོད་རྣམས་གདུགས་དང་བླ་བྲེ་དང་ཁང་བརྩེགས་དང་ཉེ་བར་སྤྱོད་པའི་བྱེ་བྲག་ཏུ་གྱུར། །ནང་གཟུགས་རྡོ་རྗེ་མ་སྤྱན་ལ་ཐིམ་པས་རྡོ་རྗེའི་སྤྱན་རྣམ་པ་ཐམས་ཅད་པ་ཟག་པ་མེད་པའི་བདེ་བའི་ལོངས་སྤྱོད་ཀྱིས་ཚིམས་པར་མོས་པས་རིགས་འགྲེས་ཏེ་མདོར་ན་ཕུང་ཁམས་སྐྱེ་མཆེད་དབང་ཡུལ་དུ་རྣམ་པར་དག་པས་མཆོད། གསང་བ་རྡོ་རྗེའི་རིག་མ་རྣམས་རེ་རེ་བཞིན་སྐུ་ལ་འཁྱུད་པ་དང་འཁྲིལ་བ་སོགས་སྒྱུ་རྩལ་དང་ལྡན་པས་སྙོམས་པར་ཞུགས་པ་ལས་ལྷན་སྐྱེས་འགྱུར་མེད་ཀྱི་བདེ་བ་ཆེན་པོས་ཐུགས་མཉེས། མཐར་མཆོད་བྱ་མཆོད་བྱེད་མཆོད་ཡུལ་གསུམ་ཀའང་རང་བཞིན་མ་གྲུབ་པར་ཤེས་པས་གཉུག་མ་ལྷན་སྐྱེས་ཕྱག་རྒྱ་ཆེན་པོ་དོན་གྱི་བླ་མའི་རང་ཞལ་ལ་བལྟས་ཏེ་མཉམ་པར་འཇོག་པ་དེ་ཁོ་ན་ཉིད་ཀྱི་མཆོད་པའོ། །ཕྱིའི་མཎྜལ་རི་རབ་གླིང་བཞི་གླིང་ཕྲན་ཉི་ཟླ་བྱེ་བ་ཕྲག་བརྒྱ་ནི་སྟོང་གསུམ་གྱི་འཇིག་རྟེན། དེ་བྱེ་བ་ཕྲག་བརྒྱ་སྟོང་གསུམ་རབ་འབྱམས། དེ་བྱེ་བ་ཕྲག་བརྒྱ་སྟོང་གསུམ་རྒྱུད། དེ་བྱེ་བ་ཕྲག་བརྒྱ་སྟོང་གསུམ་མཚམས་སྦྱོར། དེ་བྱེ་བ་ཕྲག་བརྒྱ་རབ་འབྱམས་རྒྱ་མཚོའི་འཇིག་རྟེན་ཅེས་བྱ་བ་སྟེ་དེ་ཐམས་ཅད་སྲིད་དང་ཞི་བའི་འབྱོར་པའི་ཁྱད་པར་ཇི་སྙེད་པས་བཀང་སྟེ་འབུལ་བར་མོས་པ་དང་། ནང་གི་མཎྜལ་ཕྱིའི་བཀོད་པ་དེ་དག་ནང་གི་རྡོ་

― LT28_Page_0508 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེའི་ལུས་ལ་རང་བཞིན་གྱིས་ཚང་བར་ཤེས་པ་ཙམ་མམ། མགོ་རྣམ་རྒྱལ་ཁང་བཟང་། མིག་ཉི་ཟླ། སྒལ་ཚིགས་རི་རབ། སྙིང་ཡིད་བཞིན་ནོར་བུ་སོགས་རེ་རེ་བཞིན་གསལ་བཏབ་ལ། རང་གི་ལུས་ལོངས་སྤྱོད་ཕུང་ཁམས་སྐྱེ་མཆེད་བདག་ཏུ་བཟུང་བའི་དངོས་པོ་ཅི་ཡོད། དུས་གསུམ་གྱི་དགེ་རྩ་དང་བཅས་པ་བློས་ལིང་གིས་བླངས་ནས་ལྟོས་པ་མེད་པར་འབུལ་བ་དང་། གསང་བ་དོན་གྱི་མཎྜལ་སེམས་ཉིད་སྐྱེ་འགག་གནས་གསུམ་དང་བྲལ་བ་ཆོས་དབྱིངས་སྟོང་པ་ཉིད་ཀྱི་དཀྱིལ་འཁོར་དུ། རང་རིག་འོད་གསལ་ལོངས་སྤྱོད་རྫོགས་པར་ལྷུན་གྱིས་གྲུབ་པ་ཉིད་བྱ་བྱེད་ལས་གསུམ་གྱི་མིང་དང་མཚན་ལས་འདས་པར་ཤེས་ནས་གནས་ལུགས་ཀྱི་ངང་དུ་ལ་ཟློ་བའོ། །མཆོད་པའི་སྐབས་སུ་རྒྱས་པར་སྤྲོ་ན་གཞན་ནས་འབྱུང་བའི་མཆོད་ཕྲེང་གི་ཚིག་ཚོགས་ཇི་ལྟར་རིགས་པ་སྦྱར་བ་དང་། །མཎྜལ་གྱི་ཐོག་མར་ཚོམ་བུ་སོ་བདུན་མ་སྤྱི་ལྟར་བཀོད་ཅིང་འབུལ་བ། མཎྜལ་ཚིགས་བཅད་གཞན་ཡང་ཅི་རིགས་པ་ལན་གྲངས་འབུལ་བ་ནི་ཤིན་ཏུ་གལ་ཆེའོ། །བཞི་པ་བསྟོད་པ་ནི་ལམ་ཟབ་ནས་འབྱུང་བའི་རྒྱ་གཞུང་ལ་གྲུབ་པའི་གསུང་གིས་བརྒྱན་པ་སྟེ། ཐོག་མར་གུ་རུ་ན་མོ་ནི་བླ་མ་ལ་ཕྱག་འཚལ་ལོ་ཞེས་པ་དང་། ཧཱུྃ་ནི་དངོས་གྲུབ་ཀྱི་དོན་ཏུ་ཐུགས་རྒྱུད་བསྐུལ་བའོ། །དམིགས་པ་ནི་སྔར་སྤྲོས་པའི་ལྷ་མོ་རྣམས་

― LT28_Page_0509 ―

^{[མ་དཔེ་གཟིགས་ན་འདིར་གནོན།]}

[Full Size]

དང་རང་གཞན་སེམས་ཅན་ཐམས་ཅད་ཀྱིས་ཚངས་དབྱངས་འབུམ་ལྡན་གྱིས་བསྟོད་པའི་ཚིག་བརྗོད་ཅིང་གུས་པ་ཆེན་པོས་ཡོན་ཏན་རྗེས་སུ་དྲན་བཞིན་པས་བསྟོད་པར་མོས། །བསྟོད་པའི་དོན་ལ་བདུན། རྒྱུ། ཐུགས་སྐྱེད་ཁྱད་འཕགས། རྐྱེན་སྦྱོར་བརྩོན་ཁྱད་འཕགས། གྲོགས་ཐབས་ཤེས་ཁྱད་འཕགས། ས་ལམ་གྱི་བགྲོད་པ་ཁྱད་འཕགས། གྲུབ་པའི་འབྲས་བུ་ཁྱད་འཕགས། མཐར་ཐུག་སྐུ་གསུམ་རང་བཞིན། སྟོད་བྱེད་ཀྱི་ཚིག་ཁྱད་པར་འཕགས་པས་བསྔགས་པ་རྣམས་སོ། །དེ་ལ་དང་པོ་ནི། ཐོག་མ་ཉིད་ནས་ཐེག་པ་ཆེན་པོའི་རིགས་སད་པས་མཁའ་ཁྱབ་ཀྱི་སེམས་ཅན་རྣམས་ཕ་མ་ཡིན་པའི་ངེས་པས་དྲངས་ཏེ་དེ་ཐམས་ཅད་འཁོར་བའི་རྒྱ་མཚོར་རྟག་ཏུ་གཡེང་བ་ལ་མི་བཟོད་པའི་སྙིང་རྗེ་ཆེན་པོས་བསྐུལ་ནས། ཕན་པ་མཐར་ཐུག་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་ལ་རང་ཉིད་ཁོ་ནས་འགོད་པར་འདོད་པའི་སེམས་བསྐྱེད་རྒྱ་ཆེན་པོ་མངའ་བ་སྟེ། དེ་དག་ནི་སེམས་ཅན་ལ་དམིགས་པའི་སྙིང་རྗེ། མོས་པས་སྤྱོད་པ་དང་སྨོན་པའི་སེམས་བསྐྱེད་ཕུལ་དུ་བྱུང་བ་བསྟན་པའོ། །ཆོས་ཐམས་ཅད་ཀྱི་རང་བཞིན་གདོད་ནས་སྐྱེ་བ་མེད་པ་ཡིན་པ་ལ་གཉིས་སྣང་རྨི་ལམ་གྱི་འཁྲུལ་བ་ལྟ་བུར་ཤེས་ནས་ཐུགས་བསྐྱེད་ལ་ཉེ་རིང་མི་མངའ་བ་དམིགས་པ་ཆེན་པོ་དང་། དེ་ལྟར་

― LT28_Page_0510 ―

^{[མ་དཔེ་གཟིགས་ན་འདིར་གནོན།]}

[Full Size]

མ་རྟོགས་པའི་སེམས་ཅན་མ་བསྒྲལ་བ་སྒྲོལ་བའི་ཐབས་ཟབ་མོ་ཐུན་མོངས་མ་ཡིན་པའི་བསགས་སྦྱང་རྒྱ་མཚོའི་ཕ་རོལ་དུ་སོན་པ་བློ་གྲོས་ཆེན་པོ་སྟེ། དེ་ནི་ཆོས་ལ་དམིགས་པའི་སྙིང་རྗེ། ལྷག་བསམ་དག་པ་དང་འཇུག་པ་སེམས་བསྐྱེད་ཕུན་སུམ་ཚོགས་པ་བསྟན་པའོ། །གདོད་མ་ཉིད་ནས་བྱང་ཆུབ་ཏུ་ཐུགས་བསྐྱེད་ཅིང་སྤྱོད་པ་རྒྱ་མཚོ་མཐར་ཕྱིན་པའི་སྟོབས་ཀྱིས་ནམ་ཡང་མི་ལྡོག་པའི་གོ་ཆ་ཆེན་པོ་བགོས་པ་དང་། ཆོས་ཉིད་ཀྱི་བདེན་པ་ཇི་བཞིན་ཏུ་གཟིགས་པས་བདག་དང་སེམས་ཅན་བྱང་ཆུབ་གང་དུའང་དམིགས་པ་མེད་པའི་ཤུགས་འབྱུང་སྙིང་རྗེའི་མཚོན་ཆེན་པོས་སྲིད་ཞིར་འཛིན་པའི་དྲྭ་བ་བཅད་པས་བྱམས་པའི་གོ་ཆ་སྙིང་རྗེའི་ཡ་ལད་ཅན་ཏུ་གྱུར་པ་སྟེ། དེ་ནི་དམིགས་པ་མེད་པའི་སྙིང་རྗེ། རྣམ་པར་སྨིན་པ་དང་དོན་དམ་པའི་སེམས་བསྐྱེད་མཐར་ཕྱིན་པ་བསྟན་པའོ། །དེ་དག་གི་གྲུབ་འབྲས་ཤེས་པས་སྲིད་དང་སྙིང་རྗེས་ཞི་བའི་མཐའ་ལ་མི་གནས་པར་དཔའ་བོ་ཆེན་པོའི་བློ་གྲོས་ཀྱིས་སྲིད་པ་ཇི་སྲིད་པ་གཞན་དོན་ཁོ་ནར་སྤྱོད་པ་ནི་སྒྲིབ་པ་ཀུན་སྤངས་པའི་སེམས་བསྐྱེད་དེ་དེ་ལྟ་བུ་དང་ལྡན་པ་ལ་ཕྱག་འཚལ་བའོ། །གཉིས་པ་ནི། རྡོ་རྗེ་འཆང་ནས་མཆོག་གི་དངོས་གྲུབ་བརྙེས་པའི་བཀའ་བརྒྱུད་གསེར་གྱི་ཕྲེང་བ་བཞི་པར་བྱོན་པའི་མངའ་བདག་མར་པ་ལོ་ཙཱ་བ་གཅིག་ཆོག་གི་བླ་མར་

― LT28_Page_0511 ―

^{[མ་དཔེ་གཟིགས་ན་འདིར་གནོན།]}

[Full Size]

བཟུང་ནས། དང་བ་དང་འདོད་པ་དང་ཡིད་ཆེས་པའི་དད་པ་དུས་འཐའི་མེ་ཆེན་པོ་བཞིན་ཐང་ལྷོད་མེད་པར་འབར་བས། བླ་མས་དྲང་ངེས་ཀྱི་བཀའ་ཇི་ལྟར་སྩལ་བ་ཐམས་ཅད་ཟུར་ཙམ་ཡང་མི་བཅག་པའི་གུས་པ་ཆེན་པོས་དཀའ་བ་ཆེན་པོ་བརྒྱད་སོགས་ཀྱི་མཐར་དཔེར་བྱ་བ་འོས་པས་མཉེས་པ་བསྒྲུབས་པས་རྒྱུད་གདམས་ངག་དང་བཅས་པ་བུམ་པ་གང་བྱོར་ཐོབ། བླ་མ་བརྒྱུད་པའི་བྱིན་རླབས་ཞུགས། བཀའ་བརྒྱུད་ཀྱི་རྒྱལ་རབས་ཟིན་པ་དང་། སྡོམ་པ་འོག་མའི་བསྲུང་མཚམས་ཐམས་ཅད་རྡོ་རྗེ་ཐེག་པར་ཡར་ལྡན་ཏུ་རྫོགས་པའི་དམ་ཚིག་སྲོག་གི་ཕྱིར་ཡང་མི་བཏང་བའི་སྲུང་བ་ཆེན་པོ་དང་ལྡན་ཅིང་། འཁོར་བར་ཕྱི་ཕྱག་འཚལ། ཆོས་བརྒྱད་རྒྱང་དུ་བོར། འཁྲུལ་སྣང་ཐོག་བརྫིབ་བཏང་ནས་གངས་དཀར་གྱི་ཁྲོད་དུ་འཇིགས་མེད་སེང་གེའི་བརྟུལ་ཞུགས་ཆེན་པོས་རྟག་ཏུ་གནས་པ་དང་། ལུས་སྲོག་ཐེད་ལ་བོར་བའི་དཀའ་སྤྱད་སྙིང་རུས་ཀྱིས་རིམ་པ་གཉིས་ཀྱི་སྒྲུབ་པའི་རྒྱལ་མཚན་བཙུགས་པ་ལ་ཉིན་མཚན་གཡེལ་བ་མེད་པའི་བརྩོན་འགྲུས་ཆེན་པོས་སྐུ་ཚེ་གཅིག་གིས་ཟུང་འཇུག་རྡོ་རྗེ་འཆང་གི་རྒྱལ་སར་རྩོད་མེད་དུ་གཤེགས་པའི་མཐུ་སྟོབས་ཆེན་པོ་དང་ལྡན་པ། འཇིག་རྟེན་གྱི་ཁམས་ན་འགྲན་ཟླས་དབེན་པའི་སྐྱེས་མཆོག་མིའི་སེང་གེ་ཁྱོད་ལ་

― LT28_Page_0512 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་འཚལ་བའོ། །གསུམ་པ་ནི། དབེན་པ་གསུམ་གྱི་ལམ་ལས་རྣམ་རྟོག་ཞི་བར་གནས་པའི་རྩེ་གཅིག་གསུམ་པོ་མཐར་ཕྱིན་ནས་མོས་གུས་ཟབ་མོའི་སྟོབས་ཀྱིས་རྡོ་རྗེའི་ཡེ་ཤེས་རྒྱུད་ལ་ཕེབ་པས་སྤྲོས་བྲལ་དེ་ཁོ་ན་ཉིད་ཕྱག་རྒྱ་ཆེན་པོའི་རྟོགས་པ་མངོན་ཏུ་གྱུར་པའི་ལྷག་མཐོང་འཇིག་རྟེན་ལས་འདས་པའི་ཤེས་རབ་ཆེན་པོའི་སྟོབས་ཀྱིས་མཐོང་སྒོམ་གྱི་སྤང་བྱ་རྣམ་པར་དག །བདག་མེད་པ་གཉིས་ཁོང་དུ་ཆུད། འཁོར་འདས་རོ་གཅིག་ཏུ་ཐིམ། །སྒོམ་དུ་མེད་པའི་རྣལ་འབྱོར་མངོན་ཏུ་གྱུར་པ་དང་། བླ་མེད་སྤྱིའི་རྫོགས་རིམ་མཐར་ཐུག་ཟབ་ལམ་ནཱ་རོ་ཆོས་དྲུག་ལ་སྦྱང་བརྩོན་རྟོགས་གོམས་ཀྱི་གདིང་ཐོབ་ནས་རླུང་སེམས་དབུ་མར་དག་པའི་ཐབས་ཆེན་པོ་དང་ལྡན་པས། ཐུན་མོང་གི་ཉམས་གསུམ་ལས་འདས་པ་ཞུ་བདེ་ལས་སྐྱེས་པ་འཛག་མེད་ཀྱི་བདེ་བ་ཆེན་པོ་དང་། ཉིན་མཚན་འོད་གསལ་དུ་འབྱམས་པའི་གསལ་བ་ཆེན་པོ་དང་། སྣང་གསུམ་ལུགས་ཟློག་ཏུ་ཐིམ་པའི་སྟོང་པ་ཆེན་པོའི་རྣལ་འབྱོར་གྲུབ་པས། རྟགས་བཅུ་ཡོན་ཏན་བརྒྱད་ཟད་པར་ཟིལ་གནོན་སོགས་ཐུན་མོང་དང་ཐུན་མོང་མ་ཡིན་པའི་ཡོན་ཏན་རྒྱ་ཆེན་པོ་མཐུན་སྣང་དུ་བརྙེས་པ། སུས་ཀྱང་ཐུབ་པར་དཀའ་བའི་བདུད་བཞི་བཅོམ་པར་མཛད་པའི་ཐུབ་པ་ཆེན་པོ་དེ་ལ་ཕྱག་འཚལ་

― LT28_Page_0513 ―

^{[མ་དཔེ་གཟིགས་ན་འདིར་གནོན།]}

[Full Size]

།། །བའོ། །བཞི་པ་ནི། ཟབ་མོའི་ལམ་ལ་གང་གིས་བགྲོད་པའི་ཐབས་ཐུན་མོང་ཐེག་པ་ལས་ཁྱད་པར་དུ་མས་འཕགས་པ་གསང་སྔགས་རྡོ་རྗེ་ཐེག་པ་བླ་མེད་མ་རྒྱུད་ཀྱི་ཡང་སྙིང་དཔལ་འཁོར་ལ་སྡོམ་པ་སོགས་མཆོག་སྒྲུབ་པའི་ཐབས་དང་བྱིན་རླབས་ཆེན་པོ་དང་ལྡན་པ་ཉམས་སུ་བཞེས་པས། དབུ་མའི་མར་སྣ་རྒྱལ་མཚན་རྩ་བཞི་ནས་བརྩམས་ལས་རླུང་བརྒྱ་ཕྲག་བཅོ་བརྒྱད་རིམ་གྱིས་འགགས། རྩའི་མདུད་པ་རྣམས་གྲོལ་བས་རྡོ་རྗེའི་ས་ཆེན་པོ་བཅུ་གསུམ་བགྲོད། །ཁུ་རྡུལ་མི་གཡོ་བར་བརྟན་པས་མྱུར་བ་དང་བདེ་བའི་ནང་གི་ལམ་ཆེན་པོ་ལྔའི་མཐར་བགྲོད་ནས་མི་སློབ་བའི་ཟུང་འཇུག་གི་སྐུ་དང་ཡེ་ཤེས་ཆེན་པོ་ལྔ་མངོན་ཏུ་གྱུར། །བྲལ་བ་དང་རྣམ་པར་སྨིན་པའི་ཡོན་ཏན་ཆེན་པོ་རྣམས་གདུལ་བྱ་ལས་དག་པ་ལ་སྣང་དུ་རུང་ཞིང་ཐོས་གྲོལ་དུས་མཉམ་དུ་བྱེད་པའི་དོ་ཧ་མི་ཤིགས་པའི་གླུ་དབྱངས་འཇིག་རྟེན་གསུམ་དུ་ཁྱབ་པའི་སྙན་གྲགས་ཆེན་པོ་སངས་རྒྱས་ཀྱི་ཞིང་རབ་འབྱམས་སུ་ཁྱབ་པར་མཛད་པའི་བདག་ཉིད་ཆེན་པོ་དེ་ལ་ཕྱག་འཚལ་བའོ། །ལྔ་པ་ནི། འབྲས་བུ་གཞན་ལ་མི་བཙལ་བར་སངས་རྒྱས་ཀྱི་དགོངས་པ་རང་ལ་རྙེད་པས་སྲིད་ཞི་མཉམ་ཉིད་སྣང་སྲིད་དག་པ་རབ་འབྱམས་སུ་གྱུར་ཏེ་གང་དུ་བཞུགས་པའི་ཞིང་ཁམས་ཆོས་དབྱིངས་སྟུག་པོ་བཀོད་པ་ཆེན་པོར་ལྷུན་གྱིས་གྲུབ་པ་དང་། རང་

― LT28_Page_0514 ―

^{[མ་དཔེ་གཟིགས་ན་འདིར་གནོན།]}

[Full Size]

སྣང་རྣམ་པར་དག་པ་ལ་གཞན་རྟོག་གིས་མཚན་མས་གཡོ་བླ་མེད་པར་ངེས་པ་ལྔ་ལྡན་ཆེན་པོར་གྲུབ་པ་དང་། །གང་ལ་གང་འདུལ་གྱི་ཐབས་ལ་མཁས་པའི་རྫུ་འཕྲུལ་ཆེན་པོ་སྐྲའི་རྩེ་མོར་སངས་རྒྱས་ཀྱི་ཞིང་རྒྱ་མཚོ་སྟོན་པ་ལ་སོགས་པ་ལ་མངའ་བརྙེས་པ་དང་། སྐུ་གསུང་ཐུགས་ཀྱི་བྱིན་རླབས་ཆེན་པོ་འཁོར་འདས་བརྟན་གཡོ་ཐམས་ཅད་ལ་ཁྱབ་པས་མཚན་ཙམ་གྱིས་ཀྱང་སངས་རྒྱས་ཀྱི་མཛད་པ་སྒྲུབ་ནུས་པ་དང་། རྣམ་ཐར་དང་ཕྲིན་ལས་མཐའ་དག་གྲོལ་བ་བཞི་དང་ལྡན་པས་འབྲེལ་ཚད་རྣམ་གྲོལ་དུ་དབུགས་དབྱུང་བའི་དོན་ཆེན་པོ་འབའ་ཞིག་ཏུ་གྱུར་པ། དེ་ལྟ་བུའི་སྐྱེ་དགུ་མ་ལུས་པའི་མཐར་ཐུག་གི་སྐྱབས་གནས་ཆེན་པོ་དེ་ལ་ཕྱག་འཚལ་བའོ། །དྲུག་པ་ནི། རྩ་རྣམ་པར་དག་པ་སྐུ་རྡོ་རྗེ་སྤྲུལ་པའི་སྐུ་ཆེན་པོ་མཚན་དཔེའི་གཟི་བརྗིད་དང་ལྡན་ལ་འདུལ་བཞིའི་ཆོ་འཕྲུལ་ཆེན་པོ་སྟོན་པ། རླུང་རྣམ་པར་དག་པ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་གཞོམ་མེད་སྒྲ་དབྱངས་ཆེན་པོ་རྒྱུན་མི་འཆད་ཅིང་སྐུ་དང་ཞིང་ཁམས་རྒྱ་མཚོ་སྣང་བའི་འོད་པོ་ཆེ་དང་ལྡན་པ། ཐིག་ལེ་རྣམ་པར་དག་པ་ཐུགས་རྡོ་རྗེ་ཆོས་ཀྱི་སྐུ་གནས་ལུགས་སྒྲིབ་མེད་མངོན་ཏུ་གྱུར་པའི་མཁྱེན་པ་ཆེན་པོའི་རྩལ་ལས་རྟག་ཅིང་ཁྱབ་པའི་ཕྲིན་ལས་ཀྱི་མཐུ་སྟོབས་ཆེན་པོས་འཁོར་བ་ཇི་སྲིད་དེ་སྲིད་དུ་འགྲོ་དོན་རྒྱུན་མི་འཆད་པ། སྲིད་ཞི་ཀུན་གྱི་སྤྱི་དཔལ་ཆེན་

― LT28_Page_0515 ―

^{[མ་དཔེ་གཟིགས་ན་འདིར་གནོན།]}

[Full Size]

པོ་དེ་ལ་གུས་པས་ཕྱག་འཚལ་ཞིང་ཆེ་བའི་ཡོན་ཏན་རྗེས་སུ་དྲན་པས་བསྟོད་བསྔགས་འབུལ་བའོ། །བདུན་པ་ནི། ཚིག་དོན་གོ་སླ། མར་པ་རྒྱ་གར་དུ་ལན་རྗེས་མ་བྱོན་པའི་སྐབས་སུ་ནཱ་རོ་པ་སྤྱོད་པ་ལ་གཤེགས་ནས་ཡུན་རིང་སོང་། གསོལ་བ་བཏབ་པས་བྱང་བུཥྤ་ཧ་རིའི་དགོན་པར་མངོན་སུམ་མཇལ་ཏེ་བདེ་མཆོག་མཁའ་འགྲོ་སྙན་བརྒྱུད་གནང་བའི་སྐབས་སུ་ལུས་མེད་མཁའ་འགྲོའི་ཆོས་སྐོར་གནང་བར་གསོལ་བ་བཏབ་པས། དེ་སུ་ལའང་ཆ་རྒྱུས་མེད་པ་ལ་ཁྱོད་ལ་སུས་ཟེར་གསུངས་པས། བོད་ན་ངའི་སློབ་མ་མི་ལ་ཐོས་པ་དགའ་བྱ་བ་ཡོད་པ་དེ་ལ་མཁའ་འགྲོས་ལུང་བསྟན་བྱུང་ཚུལ་ཞུས་པས། བསྟོད་པ་འདི་གསུངས་ནས་ཕྱག་ཐལ་མོ་སྦྱར་ཏེ་བོད་ཀྱི་ཕྱོགས་སུ་འདུད་པར་མཛད་པས་དེའི་རི་དང་རྩི་ཤིང་ཐམས་ཅད་ཀྱང་བོད་ལ་འདུད་པའི་རྣམ་པར་བྱུང་བར་གྲགས་པའི་བྱིན་རླབས་ཅན་ཡིན་ནོ། །ལྔ་པ་ཡན་ལག་བདུན་པའི་སྒོ་ནས་བསག་སྦྱོང་བྱ་བ་ནི། དམིགས་པ་གོང་དུ་སྨོས་པའི་ཐུན་མོང་བ་ལྟར་ལ། ཚིགས་བཅད་འདི་རྣམས་དཔལ་ལྡན་དུས་གསུམ་མཁྱེན་པས་མཉམ་མེད་དྭགས་པོ་ཐོག་མར་མཇལ་བའི་ཚེ་ཐོལ་བྱུང་དུ་གསུང་བར་གྲགས་པའི་བྱིན་རླབས་ཅན་ཡིན་ལ། འདི་ཉིད་ཚར་མང་དུ་བྱ་བ་དང་། སྐབས་འདིར་ཡན་ལག་བདུན་པ་སྤྱི་འགྲོ་ཅི་རིགས་པ་གྲུབ་ནའང་ལེགས་

― LT28_Page_0516 ―

^{[མ་དཔེ་གཟིགས་ན་འདིར་གནོན།]}

[Full Size]

སོ། །དྲུག་པ་གསོལ་འདེབས་ཀྱི་བཟླས་པས་ཐུགས་རྒྱུད་བསྐུལ་བ་ནི། ཐོག་མར་རྗེ་རས་པ་ཆེན་པོའི་རྣམ་ཐར་དང་ཡོན་ཏན་དྲན་པས་བ་སྤུ་གཡོ་ཞིང་མཆི་མ་འཁྲུགས། ལུས་ངག་ཡིད་གསུམ་རང་དབང་མི་འདུ་བ་ཙམ་གྱི་མོས་གུས་སྙིང་ཁོང་རུས་པའི་གཏིང་ནས་ཁ་ཙམ་མིན་པར་བསྐྱེད། བཟོད་མེད་ཀྱི་མོས་གུས་བཅོས་མིན་ཏུ་སྐྱེ་བ་ན་དེའི་རང་ངོ་ལ་བཟོ་མེད་དུ་བཞག་པས་བླ་མ་དང་རང་སེམས་གཉུག་མའི་གནས་ལུགས་དབྱེར་མེད་དུ་འདྲེས་པ་ལ་མཉམ་པར་བཞག་སྟེ། དེ་ཉིད་གསུམ་སྤེལ་གྱི་མཚན་སྔགས་ཇི་ལྟར་འོས་པ་བཟླ། ནམ་མཁས་གར་ཁྱབ་ཀྱི་སེམས་ཅན་ཐམས་ཅད་ཀྱིས་རང་དང་ལྷན་ཅིག་ཏུ་གུས་པ་ཆེན་པོས་གསོལ་བ་འདེབས་པར་མོས་པ་དང་། དེར་མ་ཟད་ས་ཆུ་མེ་རླུང་གི་རྡུལ་ཕྲན་རེ་རེ་ལས་ཀྱང་གསོལ་འདེབས་ཀྱི་སྒྲ་དི་རི་རི་སྒྲོག་པར་མོས་ལ་མ་ནམ་བཞི་སྐོར་ལ་ཐུན་གྱི་དངོས་གཞི་བྱ། ཐུན་མཇུག་ཏུ་བློ་ཆོས་སུ་འགྲོ་བ་སོགས་ཀྱི་བྱིན་རླབས་བསྐུལ་བའང་བྱ་སྟེ་འདིའང་མཉམ་མེད་དྭགས་པོ་རིན་པོ་ཆེའི་གསུང་བྱིན་རླབས་དང་ལྡན་པའོ། །དེ་ནས་རྗེ་བཙུན་མི་ལའི་གསོལ་འདེབས་བྱ་བ་ལ། སྤྱིར་གར་དབང་ཐམས་ཅད་མཁྱེན་པ་ཆོས་ཀྱི་དབང་ཕྱུག་གིས་མཛད་པའི་རྣམ་ཐར་གསོལ་འདེབས་སོགས་རྒྱས་བསྡུས་མང་དུ་མཆིས་པ་ལས། སྐབས་

― LT28_Page_0517 ―

^{[མ་དཔེ་གཟིགས་ན་འདིར་གནོན།]}

[Full Size]

འདིར་རྒྱལ་བའི་དབང་པོ་ཐམས་ཅད་མཁྱེན་པ་བརྒྱད་པ་མི་སྐྱོད་རྡོ་རྗེས་མཛད་པ་ཉིད་ཚིག་ཉུང་ལ་དོན་ཟབ་བས་བཀོད་པ་སྟེ། འདི་ནི་རྡོ་རྗེའི་ཚིག་རྐང་ཡིན་པས་རྒྱས་པར་སྤྲོ་ན་ཚུལ་བཞིའི་སྒོ་ནས་བཤད་དུ་ཡོད་པས་མཐའ་ཡས་ཀྱང་། བརྗོད་བྱའི་གཙོ་བོ་སྤས་དོན་དང་མཐར་ཐུག་ཡིན་པས་དེ་ཉིད་གཙོར་བཏོན་ཏེ་གོ་སླའི་ངག་གིས་ཅུང་ཟད་བཤད་ན་འདི་ལ་དོན་བཞིས་བསྡུས་པ་སྟེ། རྒྱུ་ཕུན་སུམ་ཚོགས་པ། ཐབས་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ་སྟེ་རྣམ་ཐར་ལ་བསྔགས་པ་གསུམ། རྣམ་ཐར་དེ་ཉིད་འགྲུབ་པར་སྨོན་པ་རྣམས་སོ། །དང་པོ་ནི། བྱང་ཕྱོགས་རྒྱུད་དུ་སོགས་ཤློ་ཀ་གཅིག་སྟེ། དོན་དམ་པར་མངོན་བྱང་ལྔས་གསང་འདུས་སྤྲུལ་པའི་དཀྱིལ་འཁོར་དུ་མངོན་པར་བྱང་ཆུབ་སྟེ་འཕགས་པའི་ཡུལ་དུ་གྲུབ་པའི་སློབ་དཔོན་འཇམ་དཔལ་བཤེས་གཉེན་སོགས་སྤྲུལ་པའི་རྣམ་རོལ་དཔག་ཏུ་མེད་པས་མཐའ་ཡས་པའི་འགྲོ་བ་རྣམས་ཀྱི་དོན་མཛད་པ་ལས། སྨོན་ལམ་དང་ཐུགས་བསྐྱེད་ཟབ་མོས་བྱང་ཕྱོགས་རྒྱུད་དུ་སྐུ་འཁྲུངས་པར་བསྟན་ཏེ་འཁོར་ལོ་བཞི་ལྡན་གྱི་རྟེན་དེས་རྡོ་རྗེ་ཐེག་པ་བསྟོན་པའི་འཁྲུལ་མེད་ཀྱི་ཡོངས་འཛིན་གྲུབ་པའི་དབང་ཕྱུག་མཉེས་པ་དགུ་ཕྲུགས་ཀྱིས་མཉེས་པར་མཛད་ཅིང་གདམས་ངག་བུམ་པ་གང་བྱོར་བ་ཞེས། ཚེ་འདིའི་སྣང་ཤས་གཞན་

― LT28_Page_0518 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟ་ཅི་སྨོས། །ལུས་སྲོག་ལའང་ལྟོས་པ་མེད་པར་བྱ་བ་སྙིང་ནས་བཏང་བའི་བརྟུལ་ཞུགས་མཐར་ཕྱིན་པས་འཇིག་རྟེན་གྱི་སྐྱོན་དང་ཉེས་པས་རྡུལ་ཙམ་ཡང་མ་གོས་པར། ཆོས་ཕྱིར་དཀའ་ཐུབ་དང་བརྩོན་འགྲུས་དྲག་པོ་བར་མ་ཆད་པར་སྤྱད་ནས་ཟབ་མོའི་མྱུར་ལམ་རྩེ་གཅིག་ཏུ་བསྒྲུབས་པས་མཆོག་གི་དངོས་གྲུབ་ཉམས་འོག་ཏུ་ཚུད་པ་ལ་བསྔགས་པའོ། །གཉིས་པ་ལ་གཉིས། རྣལ་འབྱོར་མ་རྒྱུད་ཀྱི་ལམ་མཐར་ཕྱིན་པ་དང་། ཕ་རྒྱུད་ཀྱི་ལམ་མཐར་ཕྱིན་པ་ལ་བསྔགས་པའོ། །དང་པོ་ནི། བདེ་ཆེན་བརྗོད་མེད་སོགས་ཤློ་ཀ་གཅིག་སྟེ། ཕར་ཕྱིན་ཏུ་བདེ་བར་གཤེགས་པ་དང་བདེ་བ་དམ་པ་སོགས་མཚན་ཙམ་བསྟན་པ་དེ་ཉིད་སྔགས་སུ་བདེ་བ་ཆེན་པོ་ཞེས་གསུངས་པ་སྟེ། འདིར་ཀུན་རྫོབ་ཏུ་བྱམས་པ་དང་སྙིང་རྗེའི་མཐར་སོན་པ་དང་། ངེས་དོན་ཏུ་འགྱུར་བ་མེད་པའི་བདེ་བ་ཆེན་པོ་བརྙེས་པ་སྟེ་ཐབས་སྣང་བའི་ཕྱོགས་དང་། སྨྲ་བསམ་བརྗོད་དུ་མེད་པའི་སྟོང་པ་ཉིད་རྣམ་པ་ཀུན་གྱི་མཆོག་དང་ལྡན་པ་མངོན་ཏུ་གྱུར་པ་ཤེས་རབ་སྟོང་པའི་ཕྱོགས། དེ་གཉིས་ཟུང་འཇུག་ཆེན་པོར་ཉམས་སུ་མྱོང་བའི་ལྷན་ཅིག་སྐྱེས་པ་བདེ་བའི་ཡེ་ཤེས་ཀྱི་རོས་མྱོས་ཤིང་། དེའང་ཕྱི་སྲིད་པ་གསུམ། ནང་ལུས་ངག་ཡིད་གསུམ་རྟེན་རྩ་རླུང་ཐིག་ལེ་དང་བཅས་པ་འཆིང་བྱེད་ཀྱི་ཐབས་ལས་རྒྱ་ཡེ་རྒྱ་ཕྱག་ཆེན་གསུམ་ཡོད་པ་ལས་འཕོ་འགྱུར་

― LT28_Page_0519 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་སྤྲོས་པས་རྣམ་པར་དག་པའི་ཕྱག་རྒྱ་ཆེན་པོའི་རྣལ་འབྱོར་གྱིས་གཞན་མཆོག་རྡོ་རྗེ་གསུམ་གྱི་རང་བཞིན་སྒྲིབ་བྲལ་དུ་བཅིངས་པ་ལས་བྱུང་བ་དང་། དེ་ཉིད་མྱུར་དུ་རྒྱུད་ལ་སྐྱེད་པའི་ཐབས་ཟབ་མོ་ཙཎྜ་ལཱིའི་དམ་ཚིག་གི་ཕྱག་རྒྱ་སྦར་བས་ཕུང་ཁམས་ཀྱི་སྙིགས་མ་བསྲེག་ཅིང་དྭངས་མ་བྱང་ཆུབ་ཀྱི་སེམས་བཞུ་བའི་བདེ་བ་འཕོ་མེད་དུ་བརྟན་པ་ལས་ལྷན་ཅིག་སྐྱེས་དགའི་ཡེ་ཤེས་ཀྱིས་གཉུག་མའི་ལུས་སེམས་རྒྱས་པ་ལ་བསྔགས་པའོ། །དེའི་དོན་བསྡུ་ན། ཐིག་རླུང་སེམས་གསུམ་གྱི་འཕོ་བ་གཏུམ་མོ་འབར་འཛག་གི་རྣལ་འབྱོར་གྱིས་བཅིངས་པས་ཕྱག་རྒྱ་ཆེན་པོ་ལྷན་ཅིག་སྐྱེས་པའི་ཡེ་ཤེས་ཐུགས་ལ་འཁྲུངས་ཤིང་བདེ་སྟོང་འགྱུར་མེད་ཀྱི་རོས་མྱོས་པ་འགྱུར་ཏོ། །ཞེས་པའོ། །གཉིས་པ་ནི། རག་སྣང་ཕྲ་ཐིག་སོགས་ཤློ་ཀ་གཅིག་སྟེ། མ་དག་པ་རག་པའི་འཁྲུལ་སྣང་ཐམས་ཅད་ཕྲ་མོའི་རྣལ་འབྱོར་དང་ཐིག་ལེའི་རྣལ་འབྱོར་སྟེང་འོག་གི་སྣ་རྩེ་ལ་བརྟེན་པ་རྣམས་དང་། ཟབ་གསལ་གཉིས་སུ་མེད་པའི་ཟབ་མོའི་རྣལ་འབྱོར་ལ་བརྟེན་ནས་དག་པའི་འཁོར་ལོར་སྦྱངས་པ་སྟེ། སྣང་མཆེད་ཐོབ་གསུམ་ཉེར་ཐོབ་དང་བཅས་པ་འོད་གསལ་དུ་དག་ནས་ཤིན་ཏུ་ཕྲ་བའི་རླུང་སེམས་ཙམ་ལས་རྡོ་རྗེའི་རང་བཞིན་གྱི་སྐུར་ཤར་བ་ཕྲ་མོའི་ཉམས་སམ་མྱོང་བ་དེ་ཡིས་བདག་དང་མཚན་མར་འཛིན་པའི་

― LT28_Page_0520 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་བའི་ཆོས་ཐམས་ཅད་ལ་བྱིན་གྱིས་བརླབས་པར་མཛད་པས། དེ་ཐམས་ཅད་ཀྱི་སྤྲོས་པ་ཉེ་བར་ཞི་བའི་སྟོང་ཉིད་ཀྱི་རྩལ་རྟེན་འབྱུང་མ་འགག་པ་སྒྱུ་མའི་དཔེ་བཅུ་གཉིས་ཀྱིས་མཚོན་པའི་གསང་བའི་དཀྱིལ་འཁོར་རབ་འབྱམས་སུ་ཤར། དེ་ཐམས་ཅད་ཀྱང་སྤྲོ་བ་དང་བསྡུ་བ་ལ་དབང་འབྱོར་བས་ཀུན་གྱི་ཁྱབ་བདག་དྲུག་པའི་ངོ་བོར་གྲུབ་པ་ལ་བསྔགས་པའོ། །དེའི་དོན་བསྡུ་ན་ཟབ་གསལ་གཉིས་སུ་མེད་པའི་རྣལ་འབྱོར་མཐར་ཕྱིན་པའི་འོད་གསལ་ཡེ་ཤེས་ཆེན་པོས་སྣང་གྲགས་ཐམས་ཅད་ཆོས་ཉིད་སྒྱུ་མར་རོལ་བའི་དཀྱིལ་འཁོར་དུ་བྱིན་གྱིས་བརླབས་ནས་རིགས་ཐམས་ཅད་ཀྱི་བདག་པོར་གྱུར་ཏོ། །ཞེས་པའོ། །གསུམ་པ་ནི། འཛག་མེད་གཙོ་མོར་སོགས་ཤློ་ཀ་གཅིག་སྟེ། ཟག་བཅས་ཀྱི་སྒྲིབ་གཉིས་བག་ཆགས་དང་བཅས་པ་སྤངས་པའི་མཆོག་ཡིན་པས་འཛག་མེད་གཙོ་མོ་སྟོང་ཉིད་འོད་གསལ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་རྟག་ཏུ་སྙོམས་པར་ཞུགས་པའི་ངང་ལས་སངས་རྒྱས་ཀྱི་སྐུ་དང་ཞིང་ཁམས་ཕྲིན་ལས་ཐམས་ཅད་འཆར་བའི་ས་བོན་དམིགས་པ་མེད་པའི་སྙིང་རྗེ་བསྡམས་པ་ཀློད་་ནས་བཀྲོལ་བ་ལྟར་ཕྱོགས་མེད་དུ་ཤར་བ་སྟེ། དེ་ལྟ་ན་སྒྲིབ་པ་གསུམ་གྱི་རྩ་བ་རྩད་ནས་བཅད་ནས་སྲིད་པ་དག་པས་འཁོར་བར་འཆིང་བའི་མཐའ་སྤངས་ལ། དེ་ཉིད་རང་བཞིན་མི་དམིགས་པར་གཟིགས་ནས་སྲིད་པའི་ལམ་དུ་སྙིང་རྗེ་ཆེན་པོས་

― LT28_Page_0521 ―

^{[མ་དཔེ་གཟིགས་ན་འདིར་གནོན།]}

[Full Size]

འཇུག་པ་དང་དུ་ལེན་པས་ཞི་བདེར་ཆགས་པའི་མཐའ་སྤངས་ཤིང་། གདུལ་བྱའི་སྣང་ངོར་སྤྲུལ་པའི་ཆོ་འཕྲུལ་བསྟན་པ་དེའང་སངས་རྒྱས་གཞན་ལས་ཐབས་མཁས་ཤིང་ཐུགས་རྗེའི་ནུས་སྟོབས་ཕུལ་དུ་གྱུར་པ་སྟེ། ཇི་ལྟར་ཞི་བའི་ངང་ལས་དྲག་པོའི་སྐུར་བཞེངས་པ་རྣམས་ཀྱིས་གདུལ་དཀའ་འདུལ་བའི་ཆོ་འཕྲུལ་རྨད་དུ་བྱུང་བ་དེ་བཞིན་ཏུ་ཞིང་ཁམས་སྙིགས་མ་ཅན་གྱི་གདུལ་དཀའ་འདུལ་བ་ལ་ལྷག་པའི་སྒོ་ནས་བསྔགས་པའོ། །མདོར་ན་སྟོང་ཉིད་སྙིང་རྗེ་ཟུང་འཇུག་མཐར་ཕྱིན་ནས་འཁོར་འདས་ཀྱི་མཐའ་གཉིས་ལ་མི་གནས་པའི་ཐུགས་རྗེའི་སྟོབས་ཁྱད་པར་དུ་འཕགས་པས་སངས་རྒྱས་ཀྱི་ཕྲིན་ལས་མཛད་དོ། །ཞེས་པའོ། །བཞི་པ་ནི། བདག་ཀྱང་འཁོར་བ་སོགས་ཤློ་ཀ་གཅིག་སྟེ། བདག་དང་སེམས་ཅན་ཐམས་ཅད་ཀྱང་ཤེས་རབ་ཆེན་པོས་འཁོར་བ་རང་བཞིན་མ་གྲུབ་པར་ཤེས་ནས་མི་སྤངས་ཤིང་། སྙིང་རྗེ་ཆེན་པོས་ཞི་བ་ཕྱོགས་གཅིག་པའི་མྱང་འདས་ལ་བདག་གཅིག་པུར་མི་འཇུག་པར་མཐའ་གཉིས་ལས་རྣམ་པར་གྲོལ་བའི་སངས་རྒྱས་ཀྱི་ཕྲིན་ལས་ཁྱབ་ཅིང་རྟག་པས་འཁོར་བ་མ་སྟོང་གི་བར་འགྲོ་བའི་དོན་བྱེད་པ། ཡེ་ཤེས་ཆེན་པོའི་ནམ་མཁའ་མཐའ་དང་དབུས་མེད་པ་ལ་སྤྱོད་པའི་རྒྱལ་བ་རྣམས་ཀྱི་དབང་ཕྱུག་རྗེ་བཙུན་མི་ལ་རས་པའི་སྐུ་གསུང་། ཐུགས་མི་ཟད་པ་རྒྱན་གྱི་

― LT28_Page_0522 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་ལོ་མཆོག་གི་དངོས་གྲུབ་དེ་ཉིད་མྱུར་དུ་འགྲུབ་པར་གྱུར་ཅིག །ཅེས་པའོ། །དེ་ནས་ཕུར་ཚུགས་སུ་གསོལ་བ་འདེབས་པ་ནི་གསང་བའི་མཚན་ནས་འབོད་ཅིང་བསྐུལ་བ་སྟེ་གསར་རྙིང་ཀུན་གྱིས་རྒྱང་འབོད་ཅེས་བྱ་བ་དེ་ཡིན་ལ། དེ་ནི་རྗེ་མར་པས་འཁོར་ལོ་སྡོམ་པའི་དབང་བསྐུར་བའི་སྐབས་སུ་ཡི་དམ་དང་མཁའ་འགྲོས་མགྲིན་གཅིག་ཏུ་གསོལ་བའི་མཚན་ཡིན་པས་བྱིན་རླབས་དང་ལྡན་པ་སྟེ། གདུང་ཤུགས་དྲག་པོ་བསྐྱེད་ལ་དབྱངས་རྟ་རིང་ཐུང་གང་ཤེས་དང་བཅས་ཏེ་ལན་གྲངས་སུ་གསོལ་བ་གདབ་བོ། །བདུན་པ་འདོད་དོན་གསོལ་བ་གདབ་པ་ནི། དོན་གོ་སླ་ལ་སེམས་མ་ཡེངས་པར་དོན་དེ་དག་རྩེ་གཅིག་ཡིད་ལ་བྱེད་ཅིང་གསོལ་བ་འདེབས་དགོས་པ་ཡིན་ནོ། །དེ་དག་གི་རྗེས་འབྲེལ་དུ་ཚོགས་ཀྱི་མཆོད་པ་འབུལ་ན། ཤ་ཆང་གཙོ་བོར་གྱུར་པའི་དམ་ཚིག་གི་རྫས་ཚོགས་པར་བྱས་ལ། རང་རྣལ་འབྱོར་མར་གསལ་བའི་ཐུགས་ཀའི་འོད་ཟེར་གྱིས་ཚོགས་རྫས་དངོས་འཛིན་གྱི་དྲི་མ་སྦྱངས། སྟོང་པའི་ངང་ལས། ཡེ་ཤེས་ཀྱི་བནྡྷ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་དང་བདུད་རྩི་ལྔ་ཞུ་ཞིང་འདྲེས། གདོད་ནས་རྣམ་པར་དག་པ་དམ་ཡེ་གཉིས་སུ་མེད་པའི་བདུད་རྩིའི་རྒྱ་མཚོ་ཉི་མ་འཆར་ཀའི་མདངས་ཅན་དྲི་ཞིམ་ཞིང་རོ་བརྒྱ་ནུས་པ་སྟོང་ལྡན་ཏུ་གྱུར་པའི་རླངས་པ་ལས་འདོད་ཡོན་རྣམ་པ་ལྔའི་མཆོད་སྤྲིན་ནམ་མཁའ་

― LT28_Page_0523 ―

^{[མ་དཔེ་གཟིགས་ན་འདིར་གནོན།]}

[Full Size]

གང་བ་འཕྲོ་བས་བླ་མ་སངས་རྒྱས་དཀྱིལ་འཁོར་ལྷ་ཚོགས་མཉེས་པར་བྱེད་པའི་རང་བཞིན་ཏུ་མོས་ལ་སྔགས་རྒྱ་ལན་གསུམ་གྱིས་བྱིན་བརླབ། བྱིན་རླབས་འབེབས་པའི་ཚེ་གནས་ཁང་དག་པ་མཁའ་སྤྱོད་འོག་མིན་གྱི་ཞིང་ཁམས། བདག་གཞན་མཆེད་ལྕམ་ཐམས་ཅད་དཔའ་བོ་དང་རྣལ་འབྱོར་མ། ཚོགས་ཀྱི་རྫས་ཟག་མེད་ཡེ་ཤེས་ཀྱི་བདུད་རྩི། ཐམས་ཅད་ཀྱང་བདེ་སྟོང་གཉིས་མེད་ལྷན་སྐྱེས་ཆོས་སྐུའི་རང་བཞིན་ཏུ་མོས། བླ་མ་རྒྱལ་བ་སྲས་བཅས་ནམ་མཁའ་གང་བ་བྱིན་རླབས་ཡེ་ཤེས་ཀྱི་རོལ་པ་བསམ་གྱིས་མི་ཁྱབ་པ་དང་བཅས་ཏེ་བྱོན་པ་ཐམས་ཅད་སྔར་གསལ་བཏབ་པའི་ཚོགས་ཞིང་རྣམས་དང་དབྱེར་མེད་དུ་བཞུགས་པར་མོས་ལ་ཚོགས་ཕུད་ཕུལ་བས་དགྱེས་པར་བཞེས་ཏེ་ཐུགས་དམ་བསྐངས་ཤིང་རང་གི་དམ་ཚིག་ཉམས་ཆགས་སོར་ཆུད་པར་མོས་པ་ནི་ཕྱིའི་ཚོགས་མཆོད་ཡིན་ལ། རང་ལུས་ཕུང་ཁམས་སྐྱེ་མཆེད་དང་བཅས་པ་གདན་གསུམ་ཚང་བའི་ལྷར་ཤེས་པས་ཚོགས་བར་པ་བདུད་རྩིའི་རང་བཞིན་ནང་གི་སྦྱིན་སྲེག་ཏུ་རོལ་པས་ལྷ་རྣམས་ཚིམས། ཁྱད་པར་བདུད་རྩིའི་དྭངས་མས་གཏུམ་མོ་སྦར་བའི་འོད་ཀྱིས་སྤྱི་བོའི་བྱང་སེམས་ཞུ། འབར་འཛག་གི་བདེ་བས་ལུས་ཀྱི་ལྷ་ཚོགས་ཚིམས་པར་མོས་པས་ནང་དང་གསང་བའི་ཚོགས་སུ་འགྱུར་རོ། །ཚོགས་འཁོར་གྱི་སྐབས་སུ་རང་གཞན་ཚོགས་

― LT28_Page_0524 ―

^{[མ་དཔེ་གཟིགས་ན་འདིར་གནོན།]}

[Full Size]

རྫས་ཐམས་ཅད་ལ་ཐ་མལ་གྱི་འདུ་ཤེས་སྤངས། ཚོགས་རྫས་ལ་ཧ་ཅང་སྲེད་པ་དང་། གཙང་དམེའི་རྟོག་པས་དང་དུ་མི་ལེན་པ་དང་། ཚོགས་རྫས་རྩིས་མེད་དུ་བོར་བ་སོགས་ཚུལ་མིན་སྤྱོད་པ་སྤངས་ལ། ཟོས་ལྷག་འབྲུ་གསུམ་གྱིས་བདུད་རྩིར་བརླབས་ནས་ལྷག་མ་ལ་དབང་བ་རྣམས་ལ་འབུལ་ལོ། །གསུམ་པ་རྗེས་ཀྱི་བྱ་བ་ལ་གསུམ། དབང་བཞི་ལེན་པ། བསྔོ་སྨོན། ཤིས་བརྗོད་རྣམས་སུ་ཡོད་པ་ལས་དང་པོ་ནི། སླར་ཡང་མོས་གུས་ཀྱི་ཤུགས་བསྐྱེད་ལ་དབང་བསྐུར་ཞིང་བྱིན་གྱིས་བརླབ་པར་གསོལ་བ་བཏབ་པས་ཐུགས་རྒྱུད་བསྐུལ་ཏེ་གཙོ་བོ་ལས་འོད་ཟེར་འཕྲོས། ནམ་མཁའ་གང་བའི་ལྷ་ཚོགས་འོད་དུ་ཞུ་ནས་གཙོ་བོ་ལ་ཐིམ་པས་དེ་ཉིད་སྐུའི་གཟི་བརྗིད་ཉི་མ་འབུམ་ལས་ལྷག་པར་གྱུར་བའི་གནས་གསུམ་དུ་སངས་རྒྱས་ཐམས་ཅད་ཀྱི་རྡོ་རྗེ་གསུམ་འདུས་པའི་འབྲུ་གསུམ་པོའང་གཟི་བརྗིད་འོད་དུ་འབར་བར་གྱུར། དེ་ནས་དཔྲལ་བའི་ཨོཾ་ལས་འོད་ཟེར་དཀར་པོ་ཟླ་བ་ཤར་བ་ལྟ་བུ་འཕྲོས། རང་རྣལ་འབྱོར་མར་གསལ་བའི་དཔྲལ་བར་ཞུགས། བུམ་པའི་དབང་ཐོབ། ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་པའི་སྐུ་ཐོབ་པའི་སྐལ་བ་ཅན་ཏུ་བྱས། མགྲིན་པའི་ཨཱཿལས་འོད་ཟེར་དམར་པོ་འཆར་ཁའི་ཟེར་ཐག་ལྟ་བུ་འཕྲོས། རང་གི་མགྲིན་པར་ཞུགས། གསང་བའི་དབང་ཐོབ། ངག་གི་དྲི་མ་དག །

― LT28_Page_0525 ―

^{[མ་དཔེ་གཟིགས་ན་འདིར་གནོན།]}

[Full Size]

ལམ་རྩ་རླུང་བསྒོམ་པ་ལ་དབང་། འབྲས་བུ་ལོངས་སྐུ་ཐོབ་པའི་སྐལ་པ་ཅན་ཏུ་བྱས། ཐུགས་ཀའི་ཧཱུྃ་ལས་འོད་ཟེར་སྔོན་པོ་མཐིང་ཤུན་གྱི་མདངས་ལྟ་བུ་འཕྲོས། རང་གི་སྙིང་གར་ཐིམ། །ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ཁ་མ་ཐིག་ལེའི་རྣལ་འབྱོར་བསྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་པ་ཅན་ཏུ་བྱས། སླར་ཡང་མོས་གུས་དྲག་པོས་བདག་གི་རྒྱུད་བྱིན་གྱིས་བརླབ་ཏུ་གསོལ་སྙམ་པ་བྱས་པས་བླ་མ་རྗེ་བཙུན་ཆེན་པོ་བོད་དུ་ཞུ་ནས་རང་ལ་ཐིམ་པས་དབང་བཞི་པ་ཐོབ། ལྷན་སྐྱེས་འཕོ་བའི་དྲི་མ་དག །ལམ་ཕྱག་ཆེན་བསམ་གྱིས་མི་ཁྱབ་པ་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་ཏུ་བྱས། རྗེ་བཙུན་གྱི་སྐུ་གསུང་ཐུགས་དང་རང་གི་སྒོ་གསུམ་དབྱེར་མེད་ཆུ་ལ་ཆུ་བཞག་པ་ལྟར་གྱུར་པར་མོས་ལ་སེམས་ཉིད་གཉུག་མའི་རང་ངོ་བཟོ་མེད་ཅི་གནས་སུ་མཉམ་པར་བཞག །དེ་ལས་ལྡངས་པའི་ཚེ་སྣང་ཚད་ཐམས་ཅད་བླ་མ་རས་པ་ཆེན་པོའི་སྐུའི་རྣམ་རོལ། གྲགས་པ་ཐམས་ཅད་གསུང་རྡོ་རྗེའི་རང་སྒྲ། རྟོག་ཚོགས་ཐམས་ཅད་ཐུགས་འོད་གསལ་ལྷན་ཅིག་སྐྱེས་པའི་རང་བཞིན། སྤྱོད་ལམ་ཅི་བྱེད་བླ་མའི་ཞབས་ཏོག །འགྲོ་འདུག་སྐོར་བ། བཟའ་བཏུང་ཚོགས་མཆོད། སྨྲ་བརྗོད་གསོལ་འདེབས་སུ་ཤེས་པ་སོགས་མདོར་ན་དྲན་ཤེས་ཡེངས་མེད་དུ་

― LT28_Page_0526 ―

^{[མ་དཔེ་གཟིགས་ན་འདིར་གནོན།]}

[Full Size]

བརྟེན་ནས་སྤྱོད་ལམ་ཐམས་ཅད་དོན་ཡོད་པར་སྦྱང་ངོ་། གཉིས་པ་ནི། འདི་ལྟར་བསྒྲུབས་པའི་དགེ་བས་མཚོན་རང་གཞན་དུས་གསུམ་དུ་བསགས་པའི་དགེ་བའི་རྩ་བ་ཅི་ཡོད་པ་ཐམས་ཅད་གཅིག་ཏུ་བསྡུས་ནས། སྔོན་གྱི་རྒྱལ་བ་སྲས་དང་བཅས་པས་ཇི་ལྟར་ཡོངས་སུ་བསྔོ་བ་མཛད་པ་དེ་བཞིན་ཏུ་བདག་གིས་ཀྱང་མཐའ་གཉིས་ལ་མི་གནས་པའི་བྱང་ཆུབ་ཆེན་པོར་ཡོངས་སུ་བསྔོ་བར་མོས་པ་དང་། དེའི་མཐུ་ལས་མི་སློབ་པའི་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་ཚེ་འདི་ཉིད་ལ་ཐོབ་པ། རྗེ་བཙུན་རས་པ་ཆེན་པོའི་རྣམ་ཐར་ཕྲིན་ལས་ཇི་ལྟ་བ་དེ་བཞིན་ཏུ་འགྲུབ་པར་སྨོན་པ་སྟེ། འདི་ནི་དགེ་བའི་ལས་བྱས་པ་བར་མ་དོར་ཆུད་མི་ཟ་ཞིང་གོང་ནས་གོང་དུ་འཕེལ་བའི་དགོས་པ་ཡོད་ལ། བསྔོ་བའང་འཁོར་གསུམ་རྣམ་དག་གི་བསྔོ་བ་དགོས་ཀྱང་ཆོས་ཉིད་ཀྱི་བདེན་པ་མ་མཐོང་བར་དུ་ཇི་བཞིན་མི་འབྱུང་བས། རྒྱལ་བ་སྲས་བཅས་ཀྱི་རྗེས་སུ་བསྔོ་བ་དེས་རྗེས་མཐུན་གྱི་བསྔོ་བ་རྣམ་དག་ཏུ་འགྱུར་བ་ཡིན་ནོ། །གསུམ་པ་ནི། བླ་མ་རྒྱལ་བ་སྲས་དང་བཅས་པ་རྣམས་ཀྱིས་མདུན་གྱི་ནམ་མཁར་ཤིས་པའི་ཚིགས་བཅད་དབྱངས་སུ་ལྡིར་ཞིང་མེ་ཏོག་ཆར་དུ་བསྙིལ་བས་ཕྱོགས་དུས་གནས་སྐབས་ཐམས་ཅད་དུ་མི་མཐུན་པའི་ཉེས་པ་ཐམས་ཅད་ཞི། མཐུན་རྐྱེན་བཀྲ་ཤིས་དགེ་ལེགས་ཀྱི་སྣང་བ་རབ་ཏུ་རྒྱས། དེའང་རྟག་ཏུ་ཉམས་པ་མེད་པར་བྱིན་གྱིས་བརླབས་པར་བསམས་ལ་ཤིས་བརྗོད་ཀྱི་ཚིགས་

― LT28_Page_0527 ―

^{[མ་དཔེ་གཟིགས་ན་འདིར་གནོན།]}

[Full Size]

བཅད་དབྱངས་སུ་གྱེར་ཅིང་འབྲུ་སིལ་མ་འཐོར་བ་དང་རོལ་མོའི་སྒྲ་ཆེར་བསྒྲག་པ་སོགས་བྱའོ། །དེ་ལྟར་གངས་ཅན་གྱི་ལྗོངས་སུ་རྩོད་པ་མེད་པར་ཡོངས་སུ་གྲགས་པའི་གྲུབ་ཐོབ་ཡོངས་ཀྱི་འཁོར་ལོས་སྒྱུར་བ་འདི་ཉིད་མཚན་ཐོས་པ་ཙམ་གྱིས་སྐྱེ་བ་བདུན་ཏུ་ངན་སོང་དུ་མི་འགྲོ་ཞིང་སྐྱེ་བ་དྲན་ཏེ་རིམ་གྱིས་བྱང་ཆུབ་ཐོབ་པར་ཞལ་གྱིས་བཞེས་པ་ཡིན་པ་དང་། སངས་རྒྱས་ལ་ཉེ་རིང་མེད་ཀྱང་དད་མོས་ཅན་ལ་ཐུགས་རྗེའི་འཇུག་པ་མྱུར་བ་ཡིན་པས་འབྲེལ་ཚད་དོན་ལྡན་གྱི་ཟབ་ལམ་འདི་ལ་སྐལ་ལྡན་རྣམས་ཀྱིས་འབྲེལ་བ་འཇོག་པའང་གལ་ཆེ་བར་གདམས་པ་ལགས་སོ། །འདི་ལྟའི་ཡིག་ཆུང་བགྱིས་པས་ཀྱང་། །གཞན་ལ་ཅུང་ཟད་ཕན་སྲིད་ན། །དེ་ཡིས་བདག་གཞན་འགྲོ་བ་ཀུན། །རྗེ་བཙུན་ཉིད་འགྲུབ་རྒྱུར་གྱུར་ཅིག །འདི་ལྟར་མཁས་གྲུབ་ཀྱི་གཞུང་བཟང་ཆེན་པོ་རྣམས་ལ་འགྲེལ་ཟིན་གྱི་ཞབས་ཏོག་མེད་པར་རང་བྲི་རང་ཀློག་གི་ཡིག་ཆུང་ཁྱབ་ཆུང་གི་བྱ་བ་ཁོ་ནར་ཟད་ཀྱང་། སྐྱེས་ཆེན་བླ་མ་དམ་པ་ཀུན་དགའ་ཆོས་ཀྱི་དབང་པོས་རིང་ནས་བསྐུལ་མ་གནང་བ་དང་། ཉེ་ཆར་སྒྲུབ་བརྩོན་འཇམ་དབྱངས་རྒྱལ་མཚན་སོགས་ཀྱིས་དོན་གཉེར་ངོར། ཀརྨ་ངག་དབང་ཡོན་ཏན་རྒྱ་མཚོའམ། བློ་གྲོས་མཐའ་ཡས་པའི་སྡེས་དཔལ་དེ་བཱི་ཀོཊིའི་དབེན་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ། །

གངས་ཅན་མགོན་པོ་དཔལ་ལྡན་ཀརྨ་པ་སྐུ་ཕྲེང་བཅུ་བཞིའི་རྣལ་འབྱོར་དང་འབྲེལ་བའི་གསོལ་འདེབས་ཟུང་འཇུག་ལམ་བཟང་།

― LT28_Page_0529 ―

^{[མ་དཔེ་གཟིགས་ན་འདིར་གནོན།]}

[Full Size]

གངས་ཅན་མགོན་པོ་དཔལ་ལྡན་ཀརྨ་པ་སྐུ་ཕྲེང་བཅུ་བཞིའི་རྣལ་འབྱོར་དང་འབྲེལ་བའི་གསོལ་འདེབས་ཟུང་འཇུག་ལམ་བཟང་ཞེས་བྱ་བ་བཞུགས་སོ།། །།

― LT28_Page_0530 ―

^{[མ་དཔེ་གཟིགས་ན་འདིར་གནོན།]}

[Full Size]

ན་མོ་གུ་རུ་བཛྲ་དྷ་རཱ་ཡ། འདིར་སྐལ་པ་དང་ལྡན་པ་དག་གི་སྤྱོད་ཡུལ་མོས་གུས་བྱིན་རླབས་ཀྱི་ལམ་ཟབ་མོ་བླ་མའི་རྣལ་འབྱོར་བགྱིད་པར་སྤྲོ་བས། མི་རྟག་པའི་ཚུལ་བསམ། འཁོར་བའི་གནས་སྣང་ལ་སྐྱོ་བ་བསྐྱེད། བྱང་ཆུབ་ཁོ་ན་དོན་ཏུ་གཉེར་བར་འདོད་པའི་བློ་དུང་དེ་བས། །མཆོག་གསུམ་ཀུན་འདུས་བླ་མ་རྡོ་རྗེ་འཆང་། །རྩ་རླུང་ཐིག་ལེའི་རང་བཞིན་བྱང་ཆུབ་སེམས། །འགྱུར་མེད་གསལ་རིག་སྟོང་པའི་གནས་ལུགས་ལ། །བྱང་ཆུབ་སྙིང་པོར་རོ་གཅིག་སྐྱབས་སུ་མཆི། །ཅེས་སྐྱབས་སུ་འགྲོ། །འཛིན་མེད་ཆུ་ཟླ་ལྟ་བུའི་འགྲོ་བ་རྣམས། །སྣང་རིག་ཟུང་འཇུག་གདོད་ནས་དེ་བཞིན་ཉིད། །ཤུགས་འབྱུང་སྟོང་ཉིད་སྙིང་རྗེའི་སྙིང་པོ་ཅན། །མཐའ་བྲལ་འཁོར་བ་དོང་སྤྲུགས་སེམས་

― LT28_Page_0531 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐྱེད་དོ། །ཞེས་སེམས་བསྐྱེད། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། །ཡིད་ཆོས་གདོད་ནས་རྣམ་དག་སྟོང་པ་ཉིད། །དངོས་པོའི་གནས་ལུགས་ཁྱབ་བདག་བླ་མ་མཆོག །སྟོང་གསལ་ཟུང་འཇུག་ལྷ་སྐུ་ཕྱག་རྒྱར་ཤར། །རང་ལུས་ཁམས་དྲུག་ལྡན་པའི་རྡོ་རྗེའི་གཞི། །སྤྱི་བོར་མུ་མཐའ་མེད་པའི་སངས་རྒྱས་ཀྱི། །ཞིང་སྐུའི་ཐིག་ལེ་འོད་ཕུང་འཁྲུགས་པའི་དབུས། །རིགས་ཀུན་ཁྱབ་བདག་དཔལ་ལྡན་ཀརྨ་པ། །ཐེག་མཆོག་རྡོ་རྗེ་དགེ་སློང་ཆ་ལུགས་ཅན། །ཆོས་གོས་རྣམ་གསུམ་ཞྭ་ནག་གསེར་མདངས་གསོལ། །ཕྱག་གཡས་མཆོག་སྦྱིན་ཚེ་བུམ་ཤིང་ལོས་མཛེས། །གཡོན་པ་ཆོས་འཆད་

― LT28_Page_0532 ―

^{[མ་དཔེ་གཟིགས་ན་འདིར་གནོན།]}

[Full Size]

པད་དཀར་སྡོང་བུ་བསྣམས། །པད་ཟླའི་གདན་ལ་རྡོ་རྗེ་སྐྱིལ་ཀྲུང་བཞུགས། །ཕྱོགས་དང་ཕྱོགས་མཚམས་མཆོག་གི་སྤྲུལ་པའི་སྐུ། །རྫོགས་པའི་སངས་རྒྱས་ཞྭ་ནག་ཅོད་པན་ཅན། །རིམ་པར་བྱོན་པ་བཅུ་གསུམ་གཙོར་གྱུར་པའི། །སྟེང་ན་བཀའ་བརྒྱུད་བླ་མ་སྤྲིན་ལྟར་གཏིབས། །བར་ན་ཡི་དམ་ཞི་ཁྲོ་འཇའ་ལྟར་གསལ། །འོག་ཏུ་ཆོས་སྐྱོང་སྲུང་མ་རླུང་ལྟར་འཚུབས། །སྣང་སྲིད་བླ་མ་ཆོས་སྐུའི་རོལ་པར་ཤར། །བྱིན་རླབས་འཇའ་ཟེར་ཆོས་སྒྲ་རབ་ཏུ་འཁྲུགས། །སྐུ་དང་ཐིག་ལེ་ཐིག་ཕྲན་ཤིག་ཤིག་གང་། །དྲན་པ་ཙམ་གྱིས་བཟོད་མེད་མོས་གུས་འབར། །མཆོག་གི་རྟོགས་པ་རྒྱུད་ལ་བསྐྱེད་ནུས་གྱུར། །ཅེས་གསལ་བཏབ་ནས། །རྒྱལ་དབང་མཚུངས་མེད་ཀརྨ་པ་ལ་གསོལ་བ་འདེབས་སོ། །དཀྱིལ་འཁོར་འཁོར་ལོའི་ཁྱབ་བདག་མཆོག་ལ་གསོལ་བ་འདེབས་སོ། །ཞིང་ཁམས་སྤྲུལ་པས་ཁྱབ་པ་ལ་གསོལ་བ་འདེབས་སོ། །རབ་འབྱམས་ཞིང་གི་བདག་པོ་ལ་གསོལ་བ་འདེབས་སོ། །བཟོད་མེད་སྙིང་རྗེའི་བདག་ཉིད་ལ་གསོལ་བ་འདེབས་སོ། །དོན་བརྒྱུད་རྟོགས་པའི་དབང་ཕྱུག་ལ་གསོལ་བ་འདེབས་སོ། །སངས་རྒྱས་ཀྱི་བྱིན་རླབས་ཀྱི་མཐར་ཐུག་ལ་གསོལ་བ་འདེབས་སོ། །ཀུན་མཁྱེན་ཡེ་ཤེས་ཀྱི་ཕུང་པོ་ལ་གསོལ་བ་འདེབས་སོ། །སྐྱབས་གནས་

― LT28_Page_0533 ―

^{[མ་དཔེ་གཟིགས་ན་འདིར་གནོན།]}

[Full Size]

ཟུང་འཇུག་གི་ཆོས་སྐུ་ལ་གསོལ་བ་འདེབས་སོ། །གྲོལ་བ་བཞི་ལྡན་མཚུངས་མེད་ཆོས་ཀྱི་རྗེ་ལ་གསོལ་བ་འདེབས་སོ། །ཁམས་གསུམ་མགོན་པོ་སངས་རྒྱས་མི་གཟུགས་སུ་བྱོན་པ་ལ་གསོལ་བ་འདེབས་སོ། །རིན་ཆེན་ཀུན་འདུས་རྡོ་རྗེ་འཆང་ཆེན་པོ་ལ་གསོལ་བ་འདེབས་སོ། །བློ་ཆོས་སུ་འགྲོ་བར་བྱིན་གྱིས་རློབས་ཤིག །ཆོས་ལམ་དུ་འགྲོ་བར་བྱིན་གྱིས་རློབས་ཤིག །ལམ་འཁྲུལ་པ་སེལ་བར་བྱིན་གྱིས་རློབས་ཤིག །འཁྲུལ་སྣང་ཡེ་ཤེས་སུ་འཆར་བར་བྱིན་གྱིས་རློབས་ཤིག །ཚེ་གཅིག་ལུས་གཅིག་ལ་ཟུང་འཇུག་རྡོ་རྗེ་འཆང་གི་གོ་འཕང་མངོན་ཏུ་ཐོབ་པར་བྱིན་གྱིས་རློབས་ཤིག །ཅེས་མང་དུ་བརྗོད་པའི་མཐར། །དཀྱིལ་འཁོར་འཁོར་ལོའི་ལྷ་ཚོགས་འོད་ཞུ་ནས། །འཁོར་ལོའི་བདག་པོ་གཙོ་བོའི་སྐུ་ལ་ཐིམ། །དེ་ཡི་གསང་གསུམ་རྡོ་རྗེ་ཡེ་ཤེས་ཀྱི། །བྱིན་རླབས་ངོ་བོ་དཀར་དམར་མཐིང་གའི་འོད། །རང་གི་གནས་ལྔར་ཐིམ་པས་སྒྲིབ་དག་ཅིང་། །དབང་དོན་རྟོགས་པ་རྒྱུད་ལ་སྐྱེས་པར་གྱུར། །བླ་མ་དགྱེས་པའི་ཞལ་གྱི་འཛུམ་མདངས་བཅས། །གཞི་ནས་མ་བཅོས་ཡེ་ནས་ལྷུན་གྲུབ་ལ། །ཐ་མལ་རང་ལུགས་ཆེན་པོར་བཞག་པ་ན། །སྐྱེ་འཆི་མེད་པ་ནམ་མཁའི་ཀློང་ཡངས་སུ། །འཕོ་འགྱུར་མེད་པ་ཆོས་སྐུའི་ལུས་མཐོང་འགྱུར། །ཞེས་

― LT28_Page_0534 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཟབ་གསང་བཀའ་ཡི་གནང་བ་ཐོབ། །ལམ་དུས་ཟུང་འཇུག་རྣལ་འབྱོར་མཐར་ཐུག་གྲུབ། །སྐད་ཅིག་རང་ལུས་རྣལ་འབྱོར་མར་གསལ་བའི། །རྩ་གསུམ་འཁོར་ལོ་བཞི་ལྡན་འཁོར་ཕྲན་བཅས། །ཨ་ཧཾ་ཞུ་བ་དེ་ཡེ་ཤེས་རླུང་སྦྱོར་གྱིས། །སྤྱི་བོའི་དཔལ་ལྡན་བླ་མ་འོད་དུ་ཞུ། །དབུ་མའི་ནང་བྱོན་སྙིང་གའི་དབུས་སུ་ཞུགས། །ཚོགས་བརྒྱད་རྣམ་དག་པདྨ་འདབ་མ་བརྒྱད། །ཟེའུ་འབྲུའི་དབུས་སུ་ཉི་མ་ལ་ཆགས་པའི། །ཧེ་རུ་ཀ་དཔལ་བཅོམ་ལྡན་ཀརྨ་པ། །ཐེག་མཆོག་རྡོ་རྗེ་དཔའ་བོའི་ཆ་བྱད་ཅན། །སྐུ་མདོག་སྔོ་བསང་ཁྲོ་འཛུམ་སྤྱན་གསུམ་པ། །རྡོ་རྗེ་དྲིལ་བུ་འཁྱུད་པའི་སྟབས་ཀྱིས་འཛིན། །གླང་ཆེན་བླ་གོས་སྟག་ལྤགས་ཤམ་ཐབས་གྲོལ། །ཕ་རོལ་ཕྱིན་རྫོགས་ཕྱག་རྒྱ་དྲུག་གིས་སྤྲས། །ཐོར་ཚུག་ཟླ་ཕྱེད་སྣ་ཚོགས་རྡོ་རྗེས་བརྒྱན། །གཡས་བརྐྱང་གཡོན་བསྐུམ་གཟི་བརྗིད་ལྡན་པར་བཞུགས། །ཐུགས་ཀར་ཡེ་ཤེས་སེམས་དཔའི་ངོ་བོ་ནི། །རྗེ་བཙུན་བདུད་ཚོགས་འདུལ་བའི་རྡོ་རྗེ་འཆང་། །བསྒྲེས་ཉམས་འཁྱུད་རྒྱས་རྡོ་རྗེ་དྲིལ་བུ་འཛིན། །བདེ་ཆེན་འཁོར་ལོར་དཔལ་ལྡན་དུས་གསུམ་མཁྱེན། །བསྒྲེས་ཚུལ་ཕྱག་གཉིས་བྱང་ཆུབ་མཆོག་གི་རྒྱ། །རོ་མར་གྲུབ་ཆེན་ཀརྨ་པཀྴི་ནི། །ཁྲོ་འཛུམ་ཨག་ཚོམ་ཟུར་གསུམ་བདུད་

― LT28_Page_0535 ―

^{[མ་དཔེ་གཟིགས་ན་འདིར་གནོན།]}

[Full Size]

འདུལ་རྒྱ། །ལོངས་སྤྱོད་འཁོར་ལོར་རང་བྱུང་ཐམས་ཅད་མཁྱེན། །ལྟ་སྟངས་དབྱིངས་གཟིགས་ཕྱག་གཉིས་ས་གནོན་མཛད། །རྐྱང་མར་འཛམ་གླིང་རོལ་པའི་རྡོ་རྗེའི་ཞབས། །མཆོག་སྦྱིན་ཆོས་འཆད་ཨུཏྤལ་རལ་པོད་བསྣམས། །གཡས་ཀྱི་པདྨར་ཐུབ་ཆེན་དེ་བཞིན་གཤེགས། །མཚན་དཔེའི་དཔལ་འབར་ས་གནོན་མཉམ་བཞག་མཛད། །གཡོན་པད་མཐོང་བ་དོན་ལྡན་གཡས་གཡོན་གྱིས། །མཁའ་ལ་གར་བསྒྱུར་མཉམ་བཞག་འཁོར་ལོ་འཆང་། །རྒྱབ་ཀྱི་པདྨར་ཆོས་གྲགས་རྒྱ་མཚོ་ནི། །ཆོས་འཆད་མཉམ་བཞག་ཡིད་བཞིན་ནོར་བུས་མཚན། །མདུན་གཡས་པདྨར་དབང་ཕྱུག་རྡོ་རྗེའི་དཔལ། །ས་གནོན་བགྲང་ཕྲེང་བསྣམས་ཤིང་མགུལ་ཕུར་འཆང་། །མདུན་གཡོན་པདྨར་ཆོས་དབྱིངས་རྡོ་རྗེ་མཆོག །འགྱིང་བག་སྐྱབས་སྦྱིན་ཆོས་འཆད་པད་དཀར་འཛིན། །རྒྱབ་གཡས་པདྨར་ཡེ་ཤེས་རྡོ་རྗེའི་ཞབས། །གཞོན་མཛེས་ཆོས་འཆད་དཔལ་བེའུ་ཐུགས་ཀར་བརྩེ། །རྒྱབ་གཡོན་པདྨར་བྱང་ཆུབ་རྡོ་རྗེ་ཅན། །གཡས་གཡོན་ས་གནོན་མཉམ་བཞག་པུ་སྟི་བསྣམས། །ཀུན་ཀྱང་སྐུ་ལ་ཆོས་གོས་རྣམ་གསུམ་བཀླུབས། །མཐོང་གྲོལ་ཞྭ་ནག་ཅོད་པན་གཙུག་ཏུ་བཅིངས། །པད་ཟླར་རྡོ་རྗེའི་སྐྱིལ་མོ་ཀྲུང་གིས་

― LT28_Page_0536 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས། །མཚན་དཔེའི་སྐུ་མཆོག་གཟི་བརྗིད་ལྷམ་མེར་འབར། །ཚངས་དབྱངས་གསུང་གིས་ཆོས་སྒྲ་ལྷང་ངེར་སྒྲོགས། །བདེ་སྟོང་ཐུགས་དགོངས་ཡེ་ཤེས་ལྷན་ནེའི་ངང་། །དམིགས་མེད་སྙིང་རྗེ་མུ་མཐའ་མེད་པར་གཡོ། །ཞི་འཛུམ་སྤྱན་རས་ཟིམ་བུར་ཕྱོགས་བཅུར་གཟིགས། །མདུན་གྱི་པདྨར་བྱིན་རླབས་རྒྱ་མཚོའི་གནས། །ཀུན་མཁྱེན་མི་བསྐྱོད་རྡོ་རྗེ་དགའ་བའི་དབྱངས། །འཇིག་རྟེན་དབང་ཕྱུག་སེམས་ཉིད་ངལ་གསོའི་ཚུལ། །དཀར་གསལ་མཛེས་འཛུམ་གཡས་པ་མཆོག་སྦྱིན་རྒྱ། །གཡོན་པ་ངལ་གསོའི་སྟབས་ཀྱིས་པད་དཀར་འཛིན། །སྤྱན་གསུམ་དབྱིངས་གཟིགས་ཞྭ་ནག་གསེར་མདངས་གསོལ། །ལོངས་སྤྱོད་རྫོགས་སྐུ་དར་དང་རིན་ཆེན་བརྒྱན། །སྐྱིལ་ཀྲུང་ཕྱེད་པས་པད་ཟླའི་གདན་ལ་རོལ། །སྤྲུལ་པའི་འཁོར་ལོར་རྡོ་རྗེ་རྣལ་འབྱོར་མ། །དམར་མོ་གྲི་ཐོད་ཕྱག་རྒྱ་མཁའ་ལ་བསྒྱུར། །བདེ་སྤྱོད་འཁོར་ལོར་མ་ཧཱ་ཀཱ་ལ་ཆེ། །སྲིན་པོའི་གཟུགས་ཅན་གྲི་གུག་ཐོད་ཁྲག་རྔུབ། །བྱིན་རླབས་གཟི་བརྗིད་ཚད་མེད་འོད་དུ་འབར། །དམ་ཡེ་དབྱེར་མེད་གདོད་ནས་ལྷུན་གྱིས་གྲུབ། །སྣང་སྲིད་དག་པ་རབ་འབྱམས་འཁོར་ལོ་ཤར། །ཕྱོགས་བཅུའི་བླ་མ་རྒྱལ་བའི་ཞིང་ཀུན་ནས། །བྱིན་རླབས་ངོ་བོ་འོད་དང་འོད་ཟེར་ཚུལ། །སྐུ་དང་ཕྱག་

― LT28_Page_0537 ―

^{[མ་དཔེ་གཟིགས་ན་འདིར་གནོན།]}

[Full Size]

མཚན་ཡིག་འབྲུ་ཆར་ལྟར་བབ། །རྡོ་རྗེ་བཞི་ཡི་ངོ་བོར་དབྱེར་མེད་འདྲེས། །རང་རིག་བླ་མ་ཆོས་སྐུའི་མོས་གུས་ཤར། །འཁྲུལ་སྣང་ཡེ་ཤེས་ཕྱག་རྒྱས་ཐེབས་པར་གྱུར། །སྣང་རིག་ཟུང་འཇུག་གི་རྟོགས་པའི་ཀློང་ནས་ཆོས་སྐུའི་མོས་གུས་ཀྱི་ཤུགས་དྲག་པོར་བསྐྱེད་དེ། །དཔལ་རྡོ་རྗེ་འཆང་ཆེན་སྤྲུལ་པའི་སྐུ། །རྗེ་སངས་རྒྱས་མི་གཟུགས་བྱོན་པ་ཅན། །རིགས་ཀུན་གྱི་ཁྱབ་བདག་ཀརྨ་པ། །སྐྱེས་རབས་ཀྱི་ཕྲེང་བར་བྱོན་པ་རྣམས། །སངས་རྒྱས་མངོན་སུམ་དུ་ངེས་པ་ཡིས། །སྙིང་རུས་པའི་གདིང་ནས་གསོལ་བ་འདེབས། །ཐུགས་ཡིད་གཅིག་འདྲེས་སུ་བྱིན་གྱིས་རློབས། །ཁྱེད་མི་བཟོད་སྙིང་རྗེའི་དབང་ཕྱུག་སྟེ། །ཐུགས་བསྐྱེད་ཀྱི་དམ་བཅའ་རྩལ་སྤྲུག་ལ། །བདག་སྙིགས་དུས་སུ་སྐྱེས་པའི་ལས་ངན་ལ། །བྱིན་རླབས་ཀྱི་དངོས་གྲུབ་མྱུར་དུ་སྩོལ། །ཐུགས་རྗེའི་ནུས་པ་ད་བསྐྱེད་ལ། །བདེ་ཆེན་ཁ་སྦྱོར་གྱི་རོས་མྱོས་པའི། །དཔལ་ཧེ་རུ་ཀ་ཡི་ཡེ་ཤེས་ཕོབ། །བདེན་གཉིས་ཟུང་འཇུག་གི་རྟོགས་པ་སྦོར། །ས་ལམ་གཅིག་ཆོད་དུ་བྱིན་གྱིས་རློབས། །བདུད་བཞི་རང་སར་གྲོལ་བར་མཛོད། །བཟོད་མེད་སྙིང་རྗེའི་དགོངས་པ་བསྐུལ། །ཐུགས་མཁྱེན་ནུས་བརྩེ་བའི་བདག་ཉིད་ཅན། །བདག་ངན་སོང་གི་གཡང་སར་ལྷུང་ལགས་ན། །བཏང་སྙོམས་ཀྱི་གནས་སུ་འདོར་

― LT28_Page_0538 ―

^{[མ་དཔེ་གཟིགས་ན་འདིར་གནོན།]}

[Full Size]

ཕོང་དམ། །སྐྱབས་གཞན་གྱིས་སྤངས་པའི་ལས་ངན་བདག །ཅི་མཛད་རྒྱལ་བའི་དབང་པོ་མཁྱེན། །ཀུན་མཁྱེན་རྒྱལ་པོས་ལམ་སྣ་དྲོངས། །དགྲ་ཆོས་བརྒྱད་ཀྱི་རྟོགས་པ་ཞི་བ་དང་། །དུག་ལྔ་རང་སར་གྲོལ་བ་དང་། །གནས་ལུགས་རང་ངོ་ཤེས་པ་རུ། །རྗེ་ཐམས་ཅད་མཁྱེན་པས་བྱིན་གྱིས་རློབས། །བཀའ་དྲིན་སུམ་ལྡན་བླ་མ་རྗེ། །སངས་རྒྱས་ལག་བཅད་དུ་གནང་བར་མཛོད། །མཆོག་ཐུན་མོང་གི་དངོས་གྲུབ་མྱུར་དུ་སྩོལ། །ཞེས་དང་། ཀརྨ་པ་མཁྱེན་ནོ། ཞེས་ཅི་ནུས་སུ་བཟླས། །བདེ་སྟོང་ལྷན་ཅིག་སྐྱེས་པའི་དོན་མ་རྟོགས་པའི་མ་རྒན་སེམས་ཅན་རྣམས་ལ་སྙིང་རྗེ་ཚད་མེད་པ་རྒྱུད་ལ་བཞག་སྟེ། རླུང་ཕར་འགྲོ་བ་དང་མཉམ་དུ། བདག་གི་ཐོགས་མེད་ནས་བསགས་པའི་བདེ་དགེ་མ་ལུས་པ་སེམས་ཅན་རྣམས་ལ་བྱིན་པས་ཀུན་ཀྱང་བདེ་བ་ཚད་མེད་པ་དང་ལྡན་པར་བསམ་མོ། །རླུང་ཚུར་འོང་བ་དང་མཉམ་དུ་དེ་དག་གིས་ཐོགས་མེད་ནས་བསགས་པའི་སྡིག་སྡུག་ཇི་སྙེད་རང་ལ་བསྟིམ་པས་སྡུག་བསྔལ་མཐའ་དག་དང་བྲལ་ནས་རང་ལུས་མེ་དཔུང་ལ་ཤིང་བསྣན་པ་ལྟར་སྔར་ལས་འབུམ་འགྱུར་གྱི་གཟི་བརྗིད་འཕེལ་བར་བསྒོམ་མཐར། ཀྱེ་མ། སངས་རྒྱས་དྭགས་པོ་བཀའ་བརྒྱུད། །མཐར་ཐུག་ཀརྨ་ཀཾ་ཚང་། ཁྱད་པར་རྒྱལ་དབང་ཀརྨ་པ་ཡི་དམ་ཆོས་སྐྱོང་གི་ཚོགས་དང་བཅས་པ་ལ་སྙིང་ཐག་པ་ནས་གསོལ་བ་འདེབས་སོ། །བདག་སོགས་འཁྲུལ་པ་རྒྱ་འབྱམས་ཀྱི་དབང་དུ་སོང་བ་རྣམས་ལ་རེ་ས་ཁྱེད་རང་ལས་མེད་དོ། །ཐུགས་ཡིད་གཅིག་ཏུ་འདྲེས་པར་བྱིན་གྱིས་

― LT28_Page_0539 ―

^{[མ་དཔེ་གཟིགས་ན་འདིར་གནོན།]}

[Full Size]

རློབས་ཤིག །ཟུང་འཇུག་གི་སྐུ་རྣལ་འབྱོར་ཆེན་པོ་ལ་གསལ་སྣང་ཐེབས་པར་བྱིན་གྱིས་རློབས་ཤིག །འགལ་རྐྱེན་དངོས་གྲུབ་ཏུ་ཤེས། ཅི་སྣང་ཆོས་སྐུ་རུ་མཐོང་། ཉོན་མོངས་པ་ཡེ་ཤེས་སུ་འཆར་ནས་རྫོགས་པའི་སངས་རྒྱས་དཔལ་ལྡན་ཀརྨ་པ་ཆེན་པོའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ལ་མངའ་བརྙེས་པར་བྱིན་གྱིས་རློབས་ཤིག །ཅེས་གསོལ་བ་ལན་གསུམ་བཏབ་པས། །བླ་མ་རྣམས་ཀྱི་སྐུ་ལས་བྱིན་རླབས་ཀྱི། །བདུད་རྩི་འོ་མའི་རྒྱུན་ལྟར་རབ་བབས་པས། །སྡིག་སྒྲིབ་ནད་གདོན་བག་ཆགས་བཅས་པ་བཀྲུས། །རྣམ་སྨིན་ལུས་པོར་འཇའ་ལུས་རྡོ་རྗེར་སྨིན། །ལུས་གནས་རྩ་འཁོར་བདུད་རྩིའི་རྒྱུན་གྱིས་གང་། །བདེ་སྟོང་རྟོགས་པ་མཐར་ཐུག་སྐྱེས་པར་གྱུར། །བླ་མའི་དཀྱིལ་འཁོར་ལྷ་ཚོགས་འོད་དུ་ཞུ། །གཙོ་བོ་བླ་མ་ཡི་དམ་སྲུང་མར་ཐིམས། །གཙོ་བོའི་སྐུ་ལས་འོད་ཟེར་སྣང་སྲིད་ཁྱབ། །སྣོད་བཅུད་འོད་ཞུ་རང་ལ་ཐིམས་པར་གྱུར། །ཞེས་སོགས་ཀྱི་དམིགས་པའི་འདུ་འཕྲོ་དང་བཅས་རྩ་བ་གསུམ་སོ་སོ་ལ་དམིགས་ཏེ་དབུགས་དབྱུང་རྔུབ་གནས་གསུམ་དང་སྦྱར་བའི་འབྲུ་གསུམ་རྡོ་རྗེའི་བཟླས་པ་ཅི་རིགས་དང་། མཐར་བུམ་ཅན་དྲག་ཏུ་དགང་སྟེ་ཡིད་ཀྱིས་གསོལ་འདེབས་དང་བཟླས་པ་བྱས་ནས། །སྣང་སྲིད་སྣོད་བཅུད་ཐམས་ཅད་མོས་གུས་ཀྱི་འཁོར་ལོར་ཤར། །བླ་མ་ཆོས་སྐུའི་རོལ་པར་འདྲེས་།

― LT28_Page_0540 ―

^{[མ་དཔེ་གཟིགས་ན་འདིར་གནོན།]}

[Full Size]

བདེ་བ་ཆེན་པོའི་རྩལ་རབ་ཏུ་རྒྱས་པར་གྱུར་ཏེ། ཨ་ཧཾ་གཉིས་སུ་མེད་པའི་རྡོ་རྗེ་ནཱ་དའི་སྒྲ་ཆེན་པོ་གྲགས་པ་དང་ཆབ་གཅིག་པར། ཆོས་སྐྱོང་ཡི་དམ་ལ་ཐིམ། ཡི་དམ་བླ་མ་ལ་ཐིམ། བླ་མ་འོད་དུ་ཞུ་སྟེ་རང་སེམས་ཀྱི་ངོ་བོར་ཆུ་ལ་ཆུ་བཞག་པ་ལྟར་གྱུར། །ཞེས་མོས་གུས་དྲག་པོའི་སེམས་ཀྱི་ངོ་བོས་མ་ཉམས་པ་དེ་ཉིད་རང་བབས་སུ་སྦྱོར་བས་གེགས་གོལ་ཐམས་ཅད་དང་བྲལ་བའི་དོན་དམ་པའི་གནས་ལུགས་མཐོང་བ་ཡིན་ནོ། །སླར་སྣང་སྲིད་བླ་མའི་རོལ་པར་ལམ་དུ་ཁྱེར་བའི་བབས་སྣ་ཚོགས་པར་ལ་བཟླ་བས། དགེ་འདིས་འགྲོ་བ་མ་ལུས་རྡོ་རྗེ་སེམས། །རྟག་བདེའི་ཐབས་ཤེས་སྦྱོར་བས་འཆི་མེད་ཅིང་། །ནང་གི་ལམ་ནས་རྡོ་རྗེར་འགྲོ་བ་ཡི། །སངས་རྒྱས་ཉིད་ཀྱི་གོ་འཕང་ཐོབ་ཕྱིར་བསྔོ། །ཞེས་དང་། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་ནས། །སོགས་འཁོར་གསུམ་ཡོངས་དག་གི་བསྔོ་སྨོན་གྱིས་རྒྱས་ཐེབས་པར་བྱའོ། །ཞེས་པ་འདིའང་རག་ཤུལ་མི་ཡི་དབང་པོ་དཔལ་ལྡན་ཚེ་བརྟན་རྡོ་རྗེའི་བཞེད་ངོར་པད་དཀར་འཆད་པ་་ཉིད་ཀྱིས་བཀའ་ཡིས་རྗེས་སུ་གནང་སྟེ། །བཙུན་པས་ཡོན་ཏན་རྒྱ་མཚོས་སྒར་ཆེན་ཆོས་ཀྱི་ཕོ་བྲང་དུ་སྨྲས་པ་དགེ་ལེགས་འཕེལ།། ༈ །།གྲུབ་ཆེན་ཀརྨ་པཀྴི་ལ་བརྟེན་པའི་བླ་མའི་རྣལ་འབྱོར་དོན་གཉིས་འདོད་འཇོ་ཞེས་བྱ་བ་བཞུགས་སོ། །འཕགས་བོད་གྲུབ་པ་ཡོངས་ཀྱི་གཙུག །བྱིན་རླབས་གཏེར་ཆེན་མཐུ་སྟོབས་བདག །རྒྱལ་ཀུན་ཕྲིན་ལས་དབང་བསྒྱུར་དེར། །བཏུད་ནས་སྙིང་པོའི་རྣལ་འབྱོར་བྲི། །

― LT28_Page_0541 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱིར་དཔལ་ལྡན་བླ་མའི་གསང་གསུམ་ཡོན་ཏན་ཕྲིན་ལས་དང་བཅས་པ་རྒྱལ་བ་སྲས་དང་བཅས་པའི་མི་ཟད་རྒྱན་འཁོར་ལྔའི་རོལ་པར་ཡིད་ཆེས་ཏེ་མོས་ཤིང་གུས་པས་གསོལ་བ་བཏབ་པ་ཁོ་ནས། །སྒྲིབ་གཉིས་མ་ལུས་པ་བྱང་། ཚོགས་གཉིས་ཡོངས་སུ་རྫོགས། ལོ་ཟླ་ཙམ་གྱིས་སངས་རྒྱས་ཀྱི་ས་ལ་རེག་པར་འགྱུར་བས་མྱུར་ལམ་ཟབ་མོ་དཀར་པོ་གཅིག་ཐུབ་མོས་གུས་ཕྱག་རྒྱ་ཆེན་པོའི་ལམ་དུ་གྲགས་པ་ཡིན་ཞིང་། བྱེ་བྲག་གྲུབ་ཆེན་ཆོས་ཀྱི་བླ་མ་ལྟ་བུའི་གྲུབ་ཐོབ་འཕགས་པའི་ཡུལ་ནའང་དཀོན་པར་གསུངས་ཤིང་དོན་ལའང་གནས་པའི་དགོངས་རྟོགས་བྱིན་རླབས་ཁྱད་པར་འཕགས་པ་ཡིན་པས་དེ་ཉིད་ལ་གསོལ་བ་གདབ་པར་འདོད་པས། ཁམས་གསུམ་སྡུག་བསྔལ་གྱི་རང་བཞིན་ལ་ངེས་པར་འབྱུང་བ་དང་། འགྲོ་དྲུག་ཕ་མར་ཤེས་པའི་སྙིང་རྗེ་དང་། བླ་མ་སངས་རྒྱས་ཀུན་འདུས་སུ་ཤེས་པའི་མོས་གུས་ལ་བློ་རྩེ་གཅིག་ཏུ་གནས་པས་ལུས་བསླང་། རིག་པ་གཟེངས་བསྟོད་དེ། །བདག་སོགས་མཁའ་མཉམ་འགྲོ་ཀུན་བྱང་ཆུབ་བར། །རྩ་གསུམ་ཀུན་འདུས་ཆོས་ཀྱི་བླ་མ་ལ། །སྐྱབས་སུ་མཆིའོ་སྒོ་གསུམ་དགེ་སྤྱད་རྣམས། །བྱང་ཆུབ་ལམ་དུ་འགྱུར་བར་བྱིན་གྱིས་རློབས། །ལན་གསུམ་གྱིས་སྐྱབས་སེམས་བྱ། །ཆོས་རྣམས་མི་དམིགས་སྟོང་པའི་ངང་ཉིད་ལས། །རང་ཉིད་ཡི་དམ་ལྷར་གསལ་མདུན་གྱི་མཁར། །སྣ་ཚོགས་པདྨ་ཉི་ཟླའི་དཀྱིལ་འཁོར་སྟེང་། །སངས་རྒྱས་ཀུན་དངོས་རྩ་བའི་བླ་མ་དང་། །དབྱེར་མེད་གྲུབ་ཆེན་ཀརྨ་པཀྴི་ནི། །སྨུག་ནག་རྡོ་རྗེའི་ལྟ་སྟངས་

― LT28_Page_0542 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་ལ་གཟིགས། །ཁྲོ་འཛུམ་ཉམས་ལྡན་ཨག་ཚོམ་ཟུར་གསུམ་ཚུལ། །དགེ་སློང་ཆས་ལྡན་ཞྭ་ནག་གསེར་མདངས་མནབས། །ཕྱག་གཉིས་ས་གནོན་ཞབས་གཉིས་སྐྱིལ་ཀྲུང་བཞུགས། །གཟི་བརྗིད་རབ་འབར་འཇའ་འོད་ཟེར་ཀློང་དུ། །རྩ་གསུམ་རབ་འབྱམས་འདུས་པའི་ངོ་བོར་གསལ། ཨོཾ། མཁའ་ཁྱབ་ཆོས་སྐུའི་ངོ་བོར་རོ་གཅིག་ཀྱང་། །ལོངས་སྤྱོད་ཡོངས་རྫོགས་བདེ་སྟོང་གསང་བ་ཆེ། །གདུལ་བྱའི་ཡིད་མཚོར་གང་འདུལ་སྤྲུལ་པའི་གཟུགས། །འགྲོ་འོང་མེད་པའི་ཚུལ་གྱིས་གཤེགས་ནས་ཀྱང་། །བྱང་ཆུབ་བར་དུ་རིགས་བདག་གཙུག་གི་རྒྱན། །སྙིང་དབུས་གེ་སར་པདྨོའི་ཟེའུ་འབྲུའི་བཅུད། །མདུན་མཁར་བསོད་ནམས་བསགས་པའི་ཞིང་མཆོག་ཏུ། །འདུ་འབྲལ་མི་མངའ་བརྟན་པར་བཞུགས་སུ་གསོལ། ན་མོ་གུ་རུ། རྗེ་སངས་རྒྱས་ཐམས་ཅད་འདུས་པའི་སྐུ། །བཀའ་བརྒྱུད་པ་ཡོངས་ཀྱི་གཙུག་གི་རྒྱན། །མཚན་ཐོས་པས་བར་ཆད་ཀུན་སེལ་ཞིང་། །མཆོག་ཐུན་མོང་དངོས་གྲུབ་སྩོལ་མཛད་པ། །རྗེ་གྲུབ་ཆེན་ཀརྨ་པཀྴི་ལ། །ཡིད་རྩེ་གཅིག་མོས་གུས་གདུང་ཤུགས་བཅས། །ཕྱག་འཚལ་ཞིང་མཆོད་སྤྲིན་རྒྱ་མཚོས་མཆོད། །སྡིག་མི་དགེ་འགྱོད་པས་བཤགས་ཤིང་བསྡམ། །དགེ་ཡི་རང་ཆོས་འཁོར་བསྐོར་བར་

― LT28_Page_0543 ―

^{[མ་དཔེ་གཟིགས་ན་འདིར་གནོན།]}

[Full Size]

བསྐུལ། །སྐུ་མྱ་ངན་མི་འདའ་རྟག་བཞུགས་གསོལ། །རྒྱུ་དེ་བསགས་དགེ་བས་བདག་གཞན་ཀུན། །རྗེ་ཀརྨ་པཀྴི་མྱུར་འགྲུབ་ཤོག །ཡི་དམ་དབང་གྱུར་སྣང་སྲིད་དབང་དུ་འདུས། །སོག་པོ་མུ་སྟེགས་རྒྱལ་པོའི་དྲེགས་པ་བཏུལ། །མེ་ཆུ་དུག་མཚོན་འབྱུང་པོའི་ནུས་པ་བཅོམ། །ཀརྨ་པཀྴིའི་ཞབས་ལ་གསོལ་བ་འདེབས། གྲངས་བསོགས་ན་ཤློ་ཀ་དེ་བསྙེན་ནོ། །སྟོང་ཉིད་སྙིང་རྗེའི་རྩལ་ཆེན་རྫོགས། །ཐིག་རླུང་སེམས་གསུམ་རང་དབང་འདུས། །བདེ་སྟོང་ཕྱག་རྒྱ་ཆེན་པོ་གྲུབ། །ཀརྨ་པཀྴིའི་ཞབས་ལ་འདུད། །ཆོས་ཀྱི་བླ་མས་ཐུགས་རྗེས་ཟུངས། །གྲུབ་པའི་དབང་པོས་བྱིན་གྱིས་རློབས། །བདག་སོགས་འཁོར་བར་འཁྱམས་པ་རྣམས། །ཐར་པའི་གནས་སུ་དྲང་དུ་གསོལ། །ལམ་གོལ་ལམ་ལོག་ཞུགས་པ་རྣམས། །ཡང་དག་ལམ་ལ་ཁྲིད་དུ་གསོལ། །གནས་སྐབས་མཐར་ཐུག་འཇིགས་པ་དང་། །བར་གཅོད་ཀུན་ལས་བསྐྱབ་ཏུ་གསོལ། །ལོང་མེད་རྒྱུད་ལ་སྐྱེས་ནས་ཀྱང་། །བློ་སྣ་བཙན་ཐབས་བསྒྱུར་དུ་གསོལ། །ངེས་འབྱུང་སྙིང་རྗེ་དག་སྣང་དང་། །མོས་གུས་དགེ་བློ་བསྐྱེད་དུ་གསོལ། །ཉམས་དང་རྟོགས་པའི་ཡོན་ཏན་ནི། །ཡར་ངོའི་ཟླ་ལྟར་སྤེལ་དུ་གསོལ། །གནས་ལུགས་གཉུག་མ་ཕྱག་རྒྱ་ཆེའི། །རང་ངོ་མངོན་སུམ་

― LT28_Page_0544 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྲད་དུ་གསོལ། །མཆོག་དང་ཐུན་མོང་དངོས་གྲུབ་ཀུན། །མྱུར་དུ་ཐོབ་པར་མཛད་དུ་གསོལ། །དོན་གཉིས་མཐར་ཕྱིན་རྫོགས་སངས་རྒྱས། །ཁྱེད་དང་མཉམ་པར་མཛད་དུ་གསོལ། །ཞེས་གསོལ་བ་གདབ་ཅིང་འདོད་དོན་གསོལ། ཀརྨ་པ་མཁྱེན་ནོ། །ཞེས་རྒྱང་འབོད་ཚུལ་དུ་ཅི་ནུས་བརྗོད། མཐར་དབང་བཞི་ལེན་པ་ནི། །རྗེ་གྲུབ་པའི་དབང་ཕྱུག་ཧེ་རུ་ཀ །དཔལ་ཆོས་ཀྱི་བླ་མའི་ཞབས་པད་ལ། །སྙིང་རུས་པའི་གཏིང་ནས་གསོལ་བ་འདེབས། །བློ་ཐེ་ཚོམ་མེད་པའི་སྐྱབས་གནས་ཞུ། །དུས་འདི་ཕྱི་བར་དོར་ཁྱེད་རང་མཁྱེན། །བདག་མོས་པའི་བུ་ལ་ཐུགས་རྗེས་གཟིགས། །དབང་བཞི་ཡི་བྱིན་རླབས་སྩལ་ནས་ཀྱང་། །རྒྱུད་སྨིན་ཅིང་གྲོལ་བར་མཛད་དུ་གསོལ། །ཞེས་གསོལ་བཏབ་དགྱེས་པར་རབ་དགོངས་ཏེ། །གནས་གསུམ་ནས་འོད་ཟེར་དཀར་དམར་མཐིང་། །རིམ་འཕྲོས་པས་ལུས་ངག་ཡིད་སྒྲིབ་སྦྱངས། །བུམ་པ་དང་གསང་བ་ཤེར་དབང་ཐོབ། །ལམ་བསྐྱེད་རིམ་རླུང་ཐིག་བསྒོམ་ལ་དབང་། །སྐུ་གསུམ་གྱི་ས་བོན་གསོས་ཐེབས་གྱུར། །སླར་འོད་ཟེར་གསུམ་པོ་གཅིག་ཆར་འཕྲོས། །གནས་གསུམ་ཐིམ་ལྷན་སྐྱེས་སྒྲིབ་པ་དག །ལམ་ཕྱག་རྒྱ་ཆེན་པོ་བསྒོམ་ལ་དབང་། །འབྲས་ངོ་བོ་ཉིད་སྐུ་ཐོབས་པར་གྱུར། །མཐར་མོས་གུས་ཤུགས་ཀྱིས་ཀརྨ་པ། །འོད་ཐིག་ལེར་ཞུ་ནས་རང་ལ་ཐིམ། །གསང་

― LT28_Page_0545 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་དང་སྒོ་གསུམ་རོ་གཅིག་གྱུར། །བློ་མ་བཅོས་ཐ་མལ་ཤེས་པ་ཉིད། །གདོད་གནས་ཀྱི་ཆོས་སྐུ་ཕྱག་རྒྱ་ཆེ། །སེམས་གཏད་སོ་མེད་པའི་རང་བབ་བསྐྱང་། །འཁོར་འདས་ཀྱི་ཆོས་ཀུན་སེམས་སུ་རྫོགས། །སེམས་ངོ་བོ་སྟོང་པ་ཆོས་ཀྱི་སྐུ། །གདངས་འགག་མེད་གསལ་བ་སྤྲུལ་པའི་སྐུ། །དེ་གཉིས་མེད་ཟུང་འཇུག་ལོངས་སྤྱོད་རྫོགས། །དོན་སྐུ་གསུམ་ངོ་སྤྲོད་ཀྱི་དགོངས་པ་སྟེ། །དཔལ་ཀརྨ་པ་ཡི་ཟབ་ཆོས་ཡིན། །ཆོས་བརྒྱད་ཁྲི་བཞི་སྟོང་སྙིང་པོའི་བཅུད། །བཀའ་བརྒྱུད་པ་ཡོངས་ཀྱི་གཤེགས་པའི་ཤུལ། །འབྲས་ཕྱག་རྒྱ་ཆེན་པོ་མངོན་གྱུར་ནས། །མ་མཁའ་མཉམ་འགྲོ་བ་འདྲེན་ནུས་ཤོག །ཅེས་མཉམ་བཞག་རང་ངོ་བསྐྱང་། །སྨོན་ལམ་ནི། །འདིས་མཚོན་དུས་གསུམ་དགེ་བ་ཅི་བསགས་མཐུས། །དཔལ་ལྡན་ཀརྨ་པ་ཡི་སྐུ་གསུང་། ཐུགས། །ཡོན་ཏན་ཕྲིན་ལས་བདག་ཉིད་མྱུར་གྲུབ་ནས། །འགྲོ་རྣམས་དེ་ཡི་ས་ལ་འགོད་བྱེད་ཤོག །བློ་རྒྱུད་ལས་རུང་ཟབ་མོའི་ལམ་ལ་ཞུགས། །དམ་ཆོས་སྒྲུབ་ལ་བར་ཆད་མི་འབྱུང་བར། །མྱུར་དུ་སྟོང་ཉིད་སྙིང་རྗེའི་རྩལ་ཆེན་རྫོགས། །ཟུང་འཇུག་རྡོ་རྗེ་འཆང་དབང་འགྲུབ་གྱུར་ཅིག །ཅེས་མཁྱེན་དཔྱོད་དད་པའི་དཔལ་མངའ་ར་རུ་ཤེས་ལྡན་ནས་བསྐུལ་ངོར་ཀརྨ་ངག་དབང་ཡོན་ཏན་རྒྱ་མཚོས་རྫོང་སར་བཀྲ་ཤིས་ལྷ་རྩེའི་ཆོས་གྲྭ་ནས་གང་དྲན་

― LT28_Page_0546 ―

^{[མ་དཔེ་གཟིགས་ན་འདིར་གནོན།]}

[Full Size]

ཡུད་ཙམ་ལ་བྲིས་པ་དགེ་ལེགས་འཕེལ།། ༈ །།རྒྱལ་དབང་བཅུ་བཞི་པའི་བླ་མའི་རྣལ་འབྱོར་ཉུང་འདུས་བཞུགས་སོ། །ན་མོ་གུ་རུ་ཤྲཱི་ཀརྨ་ཀཱ་ཡ། །རང་ཉིད་རྣལ་འབྱོར་མ་དཔལ་གསལ་བ་ཡི། །སྤྱི་བོར་སེང་ཁྲི་པདྨ་ཉི་ཟླའི་སྟེང་། །སྤྱན་རས་གཟིགས་དངོས་དཔལ་ལྡན་ཀརྨ་པ། །ཆོས་གོས་གསུམ་གསོལ་ཞྭ་ནག་གསེར་མདངས་ཅན། །ཐབས་ཤེས་ཟུང་འཇུག་རྡོར་དྲིལ་ཕྱག་རྒྱ་བསྣོལ། །སྐྱིལ་མོ་ཀྲུང་བཞུགས་ཞི་འཛུམ་གཟི་བརྗིད་འབར། །དཀོན་མཆོག་རྩ་གསུམ་ཀུན་འདུས་སྐུ་རུ་བཞུགས། །འཁོར་འདས་བརྟན་གཡོའི་ཁྱབ་བདག་བདེ་བ་མཆོག །ཡེ་ཤེས་དབྱིངས་ལས་གཡོ་བ་མི་མངའ་ཡང་། །དམིགས་མེད་སྙིང་རྗེས་དབང་གིས་འདིར་དགོངས་ལ། །དད་མོས་གསོལ་འདེབས་བུ་ལ་བྱིན་གྱིས་རློབས། །གསོལ་བ་འདེབས་སོ་དཔལ་ལྡན་ཀརྨ་པ། །གསོལ་བ་འདེབས་སོ་ཐེག་མཆོག་རྡོ་རྗེ་འཆང་། ཁ་ཙམ་མ་ཡིན་སྙིང་ཁོང་རུས་པའི་གཏིང་། །མོས་གུས་གདུང་ཤུགས་དྲག་པོས་གསོལ་འདེབས་ན། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡི། །བྱིན་རླབས་དངོས་གྲུབ་ལུས་ངག་ཡིད་ལ་སྩོལ། །སངས་རྒྱས་རྣམ་རོལ་ཞིང་ཀུན་ཁྱབ་པ་ལས། །གངས་ཅན་ལྗོངས་སུ་ཡོངས་གྲགས་སྤྲུལ་པའི་སྐུ། །དུས་གསུམ་མཁྱེན་པ་ཀརྨ་པཀྴིའི་ཞབས། །རང་བྱུང་རྡོ་རྗེ་འཛམ་

― LT28_Page_0547 ―

^{[མ་དཔེ་གཟིགས་ན་འདིར་གནོན།]}

[Full Size]

གླིང་ཆོས་ཀྱི་གྲགས། །དེ་བཞིན་གཤེགས་པ་མཐོང་བ་དོན་ལྡན་རྗེ། །ཆོས་གྲགས་རྒྱ་མཚོ་མི་བསྐྱོད་དགའ་བའི་དབྱངས། །དབང་ཕྱུག་རྡོ་རྗེ་ཆོས་དབྱིངས་རྡོ་རྗེ་དང་། །ཡེ་ཤེས་རྡོ་རྗེ་བྱང་ཆུབ་རྡོ་རྗེའི་སྡེ། །བདུད་འདུལ་རྡོ་རྗེ་ཐེག་མཆོག་རྡོ་རྗེ་ཞེས། །སངས་རྒྱས་ཕྲེང་བ་བརྒྱུད་མར་བྱོན་རྣམས་ལ། །སྒོ་གསུམ་རྩེ་གཅིག་གུས་པས་གསོལ་བ་འདེབས། །ཁྱད་པར་བདག་སོགས་གདུལ་བྱའི་མགོན་གཅིག་པུ། །འཇིག་རྟེན་དབང་ཕྱུག་བཤེས་གཉེན་མཆོག་གི་ཚུལ། །ཐམས་ཅད་མཁྱེན་པ་རྒྱལ་དབང་བཅུ་བཞི་པ། །ཐེག་པ་མཆོག་གི་རྡོ་རྗེར་གསོལ་བ་འདེབས། །དབང་བཞི་སྐུར་ཞིང་རྒྱུད་བཞི་སྨིན་པ་དང་། །སྐུ་བཞིའི་གོ་འཕང་མྱུར་འགྲུབ་བྱིན་གྱིས་རློབས། །ཀརྨ་པ་མཁྱེན་ནོ། །ཞེས་ཅི་ནུས་བརྗོད། །སྐུ་གསུང་ཐུགས་ལས་འོད་ཟེར་དཀར་དམར་མཐིང་། །བདག་གི་གནས་གསུམ་ལ་ཐིམ་སྒྲིབ་གསུམ་བྱང་། །བུམ་གསང་ཤེར་ཡེའི་དབང་ཐོབ་བླ་མ་ཉིད། །འོད་ཞུ་རང་ལ་ཐིམ་པས་དོན་དབང་ཐོབ། །ལྷན་སྐྱེས་སྒྲིབ་དག་གནས་ལུགས་ཕྱག་རྒྱ་ཆེ། །བླ་མ་ཆོས་སྐུའི་རང་ཞལ་མཐོང་བར་གྱུར། །དགེ་བས་བདག་གཞན་མཁའ་མཉམ་འགྲོ་བ་ཀུན། །དཔལ་ལྡན་ཀརྨ་པ་ཡི་གསང་གསུམ་དང་། །དབྱེར་མེད་ཇི་སྲིད་འཁོར་བ་མ་སྟོང་བར། །སངས་

― LT28_Page_0548 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་ཕྲིན་ལས་ཆེན་པོ་སྒྲུབ་ནུས་ཤོག །ཅེས་པ་འདི་ནི་སྒོ་སྟོད་ཞེ་འཛེང་དགོན་གྱི་བྱང་འདྲེན་དགེ་བཤེས་ངོར། ཀརྨ་ངག་དབང་ཡོན་ཏན་རྒྱ་མཚོས་སྤེལ་བ་དགེ་ལེགས་འཕེལ།། ༈ །།བླ་མའི་རྣལ་འབྱོར་འོད་གསལ་གཅེར་མཐོང་བཞུགས་སོ། །ན་མོ་གུ་རུ། བདེ་ཆེན་འོད་གསལ་ཆོས་སྐུའི་ཞལ། །བྱིན་རླབས་སྟོབས་ཀྱིས་མཐོང་མཛད་པ། །རྗེ་བཙུན་བླ་མ་ལ་བཏུད་དུ། །གསོལ་བ་འདེབས་པའི་རྣལ་འབྱོར་འཆང་། །བདེ་བའི་གདན་ལ་བསམ་གཏན་གྱི་ཆོས་དང་ལྡན་པས་དྲན་པ་མངོན་དུ་བཞག་སྟེ། །འཁོར་འདས་ཀུན་གྱི་ཁྱབ་བདག་ནམ་མཁའི་དངོས། །རང་རིག་བླ་མར་འབྲལ་མེད་སྐྱབས་གསོལ་ཞིང་། །ཡེ་ནས་འཁྲུལ་མ་མྱོང་བའི་འགྲོ་བ་ཀུན། །བཅིང་གྲོལ་མེད་པའི་གཉུག་མར་ལ་ཟླའོ། །དྷརྨདྷཱ་ཏུ་ཤུངྡྷ་ཨོཾ་ཨཱཿཧཱུྃ། །རང་བཞིན་འོད་གསལ་ཆོས་སྐུའི་ནམ་མཁའ་ལ། །རྩོལ་མེད་ཐུགས་རྗེའི་རང་གཟུགས་སྒྲིབ་བྲལ་སྐུ། །གང་འདུལ་མོས་པའི་རྣམ་འཕྲུལ་ཅི་ཡང་འཆར། །མི་འཇིགས་སེང་གེའི་ཁྲི་སྟེང་པད་ཟླ་ལ། །སངས་རྒྱས་ཀུན་འདུས་དཔལ་ལྡན་ཀརྨ་པ། །འཇིག་རྟེན་དབང་ཕྱུག་ཁ་སརྦ་འི་ཚུལ། །མཐོང་གྲོལ་ཞྭ་ནག་གསེར་མདངས་གཙུག་ཏུ་འཆང་། །གཡས་སུ་ཁྱབ་བདག་པདྨ་ཉིན་མོར་བྱེད། །ས་བཅུའི་དབང་ཕྱུག་བྱམས་མགོན་རྣམ་པར་བཞེངས། །དབང་རྟགས་ཞྭ་དམར་གསེར་གྱི་

― LT28_Page_0549 ―

^{[མ་དཔེ་གཟིགས་ན་འདིར་གནོན།]}

[Full Size]

མདངས་ཅན་བཞེས། །གཡོན་ཏུ་དྲིན་ཆེན་བླ་མ་ཟླ་བ་བཟང་། །དགེ་སློང་ཆ་ལུགས་ཆོས་འཆད་མཉམ་བཞག་རྒྱ། །ཏིང་འཛིན་གཟིགས་ཚུལ་སྒོམ་ཞྭའི་ཅོད་པན་བཅིངས། །གཉིས་ཀ་དྲི་མེད་པད་ཟླའི་གདན་ལ་བཞུགས། །རང་བྱུང་ཡེ་ཤེས་འོད་ལྔའི་གུར་ཁང་འཁྲིགས། །རྟོགས་པ་དོན་གྱི་བྱིན་རླབས་གཟི་བརྗིད་འབར། །གང་གིས་རྒྱལ་ལ་དད་པས་ཡིད་བྱེད་པ། །དེ་མདུན་གདོད་ནས་རང་བཞིན་གཉུག་མར་བཞུགས། །རྡོ་རྗེ་གསུམ་གྱི་ངོ་བོར་ལྷུན་གྲུབ་གྱུར། ཛཿ སྙིང་རྗེའི་ལྕགས་ཀྱུས་ཐུགས་དམ་དབྱིངས་ནས་བསྐུལ། ཧཱུྃ། བྱམས་པའི་ཞགས་པས་མོས་པའི་ཡུལ་དུ་དྲངས། བྃ། དགའ་བའི་སྒྲོག་གིས་སྣང་ཤེས་རོ་མཉམ་བསྡོམ། ཧོཿ བཏང་སྙོམས་དྲིལ་བུས་ཟག་མེད་དགྱེས་པ་སྐྱེད། །རིགས་བརྒྱའི་དབང་ཕྱུག་སྲས་དང་བཅས་པ་ལ། །དོན་དམ་ལྷ་མཐོང་རྟོགས་པ་དོན་ཕྱག་འཚལ། །མི་གནས་ཡེ་ཤེས་ཆེན་པོའི་མཆོད་སྤྲིན་འབུལ། །ལུགས་འབྱུང་རྟེན་འབྲེལ་སྐྱེ་བ་མེད་པར་བཤགས། །ཚོགས་ཆེན་རང་བཞིན་རྫོགས་ལ་རྗེས་ཡི་རང་། །ཆོས་ཆེན་དབྱངས་ཀྱི་འཁོར་ལོ་བསྐོར་བཞིན་ཏུ། །རྟག་བརྟན་གཡུང་དྲུང་ཐེར་ཟུག་ཆེན་པོར་བཞུགས། །འཁོར་གསུམ་སྤྲོས་བྲལ་བདེ་བ་ཆེན་པོར་བསྔོ། །འཐུག་པོ་

― LT28_Page_0550 ―

^{[མ་དཔེ་གཟིགས་ན་འདིར་གནོན།]}

[Full Size]

བཀོད་པར་གཟི་བརྗིད་འོད་དཔག་མེད། །བདེ་བ་ཅན་ན་སྙིང་རྗེའི་དབང་ཕྱུག་ཚུལ། །འཇིག་རྟེན་མགོན་པོ་རྒྱལ་དབང་ཀརྨ་པ། །ཐེག་པ་མཆོག་གི་རྡོ་རྗེར་གསོལ་བ་འདེབས། །མ་འོངས་སངས་རྒྱས་ལྔ་པ་བྱམས་ཆེན་མགོན། །བཀའ་བརྒྱུད་ཆུ་འགོ་དགྱེས་མཛད་མར་པའི་ཞབས། །བདུད་འདུལ་ནག་པོ་ཆེ་དང་དབྱེར་མེད་པ། །པདྨ་ཉིན་བྱེད་དབང་པོར་གསོལ་བ་འདེབས། །དྲི་མེད་ཡེ་ཤེས་དབྱིངས་ལས་རྣམ་རོལ་གྱི། །ཟླ་བ་གཞོན་ནུ་བསླབ་གསུམ་ཆ་ཤས་གང་། །གཞན་ཕན་བསིལ་བའི་ཟེར་འཕྲོ་ངེས་དོན་གྱི། །བསྟན་པ་རབ་རྒྱས་མཛད་ལ་གསོལ་བ་འདེབས། །རྡོ་རྗེ་འཆང་དབང་བཤེས་གཉེན་གཟུགས་སུ་བྱོན། །འགྲོ་བ་སྒྲོལ་བའི་ཐབས་མཁས་རྨད་བྱུང་ལྡན། །དུས་གསུམ་རྒྱལ་ལས་བཀའ་དྲིན་ཆེས་ལྷག་པའི། །དཔལ་ལྡན་བླ་མ་རྣམས་ལ་གསོལ་བ་འདེབས། །སྐུ་གསུམ་བདག་ཉིད་བླ་མ་རྗེ། །མི་ཕྱེད་དད་པས་བདག་གསོལ་འདེབས། །ཐོག་མེད་དུས་ནས་ལྷན་ཅིག་སྐྱེས། །མ་རིག་མུན་པའི་སྒྲིབ་གཡོགས་སོལ། །སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་ཕྱག་རྒྱ་རབ་ཏུ་སྩོལ། །རྡོ་རྗེ་ཡེ་ཤེས་དབང་བསྐུར་གྱིས། །རྟོགས་གྲོལ་དུས་མཉམ་བྱིན་ཆེན་ཕོབ། །རྣམ་ཤེས་རྒྱལ་ཁམས་ལས་འདས་པའི། །ཡེ་ཤེས་བདེན་གྲུབ་མཐོང་བར་མཛོད། །

― LT28_Page_0551 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུང་འཛིན་བློ་ལས་འདས་པའི་གཤིས། །མི་བསྐྱོད་རྡོ་རྗེར་དེང་བདག་སྒྲུབས། །འོད་གསལ་རྣམ་པ་ཐམས་ཅད་པ། །ཕྱག་རྒྱ་ཆེན་པོའི་དངོས་གྲུབ་སྩོལ། །ཁྱབ་དང་རྟག་པའི་ཕྲིན་ལས་ཀྱིས། །མཁའ་མཉམ་འགྲོ་བ་སྒྲོལ་བྱིན་རློབས། མ་ནམ་བཞི་སྐོར་ཅི་ནུས་བརྗོད་པས་ཕུར་ཚུགས་སུ་གསོལ་བ་བཏབ་ལ། མཐར། གསོལ་བ་བཏབ་པས་བཟོད་མེད་ཐུགས་རྗེ་བསྐུལ། །མཆོག་ཏུ་མི་འགྱུར་བདེ་ཆེན་དགྱེས་པ་བསྐྱེད། །འདྲེན་པ་གཡས་གཡོན་གཙོ་བོའི་སྐུ་ལ་ཐིམ། །འཇིག་རྟེན་དབང་ཕྱུག་གནས་བཞིར་རྡོ་རྗེ་བཞིའི། །རང་གཟུགས་ཡིག་འབྲུའི་འོད་དང་བདུད་རྩིའི་རྒྱུན། །རང་གི་གནས་བཞིར་ཐིམ་པས་སྒྲིབ་བཞི་དག །དབང་བཞི་ཐོབ་ཅིང་ལམ་བཞི་སྒོམ་ལ་དབང་། །སྐུ་བཞི་གྲུབ་པའི་ས་བོན་གསོས་ཐེབས་གྱུར། །སྙིང་རྗེའི་འཛུམ་ཞལ་གཡོ་བའི་འཇིག་རྟེན་མགོན། །མོས་གུས་ཤུགས་ཀྱིས་འོད་ལྔའི་གོང་བུར་ཞུ། །རང་གི་དངོས་པོའི་གནས་ལུགས་གཉིས་ལ་ཁྱབ། །ལྷན་སྐྱེས་ཆོས་སྐུ་ཉག་གཅིག་བདེ་བ་ཆེ་ཧོ། །བླ་མའི་བྱིན་རླབས་འགྲོ་ཀུན་རྒྱུད་ལ་ཞུགས། །གཞི་ལམ་འབྲས་བུ་བདེ་བ་ཆེན་པོར་སྡོམ། །སངས་རྒྱས་ཀུན་དང་དགོངས་སྤྱོད་མཉམ་པ་ཡི། །བསམ་དོན་ཚེ་འདི་ཉིད་ལ་ཡོངས་འགྲུབ་ཤོག། སླར་

― LT28_Page_0552 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་སྣང་གྲགས་རྟོག་གསུམ་དཔལ་ལྡན་བླ་མའི་རྡོ་རྗེ་གསུམ་པོར་རྣལ་དུ་འབྱོར་བས་སྤྱོད་ལམ་རྣམ་བཞི་རྡོ་རྗེ་ཅན་གྱི་གསང་ལམ་དུ་བསྒྱུར་བར་བྱའོ། །བསྒོམ་བཟླས་ཀུན་གྱི་སྙིང་པོ་ནི། །རྡོ་རྗེ་འཛིན་པས་རབ་བསྔགས་ཕྱིར། །འདི་བྲིས་བསོད་ནམས་མཐུ་ཡིས་ཀྱང་། །ཕྱག་རྒྱ་ཆེན་མོར་ལོངས་སྤྱོད་ཤོག །ཅེས་པའང་དད་སོགས་འཕགས་ནོར་གྱིས་ཕྱུག་པ་རྒིས་རྣ་བླ་མ་ཀརྨ་རྣམ་དག་གི་བཞེད་པ་བསྐང་ཕྱིར། ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས། །ལྕི་ཆུ་སྔོན་མོ་དལ་གྱིས་འབབས་པའི་འགྲམ། །སྭང་ཐང་གསེར་གཡུའི་མདངས་ཅན་གྱི་ཕོང་བ། ཀཱ་ཤི་ཀཱའི་གུར་ཁྱིམ་གྲུ་བཞི་པའི་ལྡིང་ཁང་དུ་ཡུད་ཙམ་ལ་ཅི་ཐོད་དུ་སྨྲས་པ་དགེ་ལེགས་འཕེལ།། ༈ །།བྱམས་མགོན་བླ་མ་དབྱེར་མེད་དུ་སྒྲུབ་པའི་ཐབས་བྱམས་ཆེན་དགྱེས་པའི་སྣང་བ་ཞེས་བྱ་བ་བཞུགས་སོ། །བྱམས་ཆེན་བླ་མ་འཇམ་པའི་དབྱངས། །མཁྱེན་གཉིས་ཡེ་ཤེས་གཟི་འབར་བས། །སྙིང་གི་མུན་པ་རབ་བསལ་ནས། །རྣལ་འབྱོར་ལམ་བཟང་སྣང་བར་མཛོད། །ལྷག་པའི་ཚུལ་ཁྲིམས་རྣམ་པར་དག་ཅིང་ཡེ་ཤེས་ཀྱི་སྣང་བ་རྒྱས་པར་འདོད་པས། །མི་ཕམ་བྱམས་པ་མགོན་པོ་དང་འཇམ་མགོན་བླ་མ་དབྱེར་མེད་དུ་བསྒྲུབ་པར་བྱ་སྟེ། སྐུ་བརྙན་གྱི་སྤྱན་སྔར་མཎྜལ་ཚོམ་བུ་གཅིག་པ་མཆོད་པའི་ཡོ་བྱད་གཙང་ལ་དག་པར་བཤམ། །སྐྱབས་སུ་འགྲོ་བ་ནི་དཀོན་མཆོག་གསུམ་དངོས་རྒྱལ་ཚབ་རྗེ། །རྩ་གསུམ་ཀུན་འདུས་བླ་མའི་ཚུལ། །ཀུན་མཁྱེན་བསྟན་པའི་ཉིན་བྱེད་ལ། །བྱང་ཆུབ་བར་དུ་སྐྱབས་སུ་མཆི། །སེམས་བསྐྱེད་པ་ནི། །བྱམས་ཆེན་

― LT28_Page_0553 ―

^{[མ་དཔེ་གཟིགས་ན་འདིར་གནོན།]}

[Full Size]

ཏིང་འཛིན་ཟབ་མོ་ཡིས། །འགྲོ་ཀུན་སྲིད་མཚོ་ལས་བསྒྲལ་ཏེ། །བྱམས་མགོན་བླ་མའི་གོ་འཕང་ལ། །འགོད་ཕྱིར་རྣལ་འབྱོར་བསྒོམ་པར་བྱ། །བདག་བསྐྱེད་ནི། ཨོཾ་སྭ་བྷཱ་བ་ཤུངྡྷཿསརྦ་དྷརྨཱཿསྭ་བྷཱ་བ་ཤུངྡྷོ྅ཧཾ། །སྟོང་པའི་ངང་ལས་པད་ཟླའི་སྟེང་། །རང་སེམས་མེ༚་ཡིག་གསེར་མདོག་ལས། །འོད་འཕྲོས་རྒྱལ་བ་སྲས་བཅས་མཆོད། །ཐུགས་དམ་རྒྱུད་བསྐུལ་བྱིན་རླབས་བསྡུས། །ཡོངས་གྱུར་བདག་ཉིད་བྱམས་པ་མགོན། །སྐུ་མདོག་བཙོ་མ་གསེར་གྱི་མདོག །ཞལ་གཅིག་ཞི་འཛུམ་མཚན་དཔེས་སྤྲས། །ཕྱག་གཉིས་ཆོས་འཆད་ཕྱག་རྒྱ་ཡིས། །ཨུཏྤལ་སྡོང་བུ་བསྣམས་པ་ཡི། །མེ་ཏོག་སྙན་ཐང་བྱེ་བའི་སྟེང་། །གཡས་གཡོན་བུམ་པ་ཀླུ་ཤིང་མཚན། །ལྷ་རྒྱལ་དྲང་སྲོང་ཆེན་པོའི་ཚུལ། །འཁོར་ལོས་སྒྱུར་བའི་ཆ་བྱད་རྫོགས། །ཞབས་གཉིས་ཕྱེད་སྐྱིལ་རོལ་པས་བཞུགས། །ལྟ་བས་ཆོག་མི་ཤེས་པའི་སྐུ། །འོད་དང་འོད་ཟེར་དཔག་མེད་འཕྲོ། །གནས་གསུམ་འབྲུ་གསུམ་མཚན་པ་ལས། །འོད་འཕྲོས་རང་འདྲའི་ཡེ་ཤེས་པ། །སྤྱན་དྲངས་བཛྲ་ས་མཱ་ཛཿ ཛཿཧཱུྃ་བྃ་ཧོཿ། སླར་ཡང་དབང་ལྷ་སྤྱན་དྲངས་ཏེ། །དབང་བསྐུར་སྐུ་གང་དྲི་མ་དག །ཆུ་ལྷག་ཡར་ལུད་རིགས་ཀྱི་བདག །གསེར་གྱི་མཆོད་རྟེན་འབར་བས་བརྒྱན། །ཐུགས་

― LT28_Page_0554 ―

^{[མ་དཔེ་གཟིགས་ན་འདིར་གནོན།]}

[Full Size]

ཀར་ཟླ་སྟེང་མེ༚་ཡིག་ལ། །སྔགས་ཕྲེང་གསེར་མདོག་གཡས་སུ་འཁོར། །འོད་འཕྲོས་འཕགས་མཆོད། ཐུགས་དམ་བསྐུལ། །འགྲོ་ཀུན་ལས་སྒྲིབ་ཀུན་བསལ་ནས། །བྱང་ཆུབ་སེམས་གཉིས་བསྐྱེད་པར་གྱུར། ཅེས་མོས་ལ། ཨོཾ་བུངྡྷ་མེ་ཏྲི་མེ༚་སྭཱ་ཧཱ། །ཞེས་འབུམ་ཕྲག་བརྒྱད་དང་བྱེ་བ་ནི་རྩ་བའི་བསྙེན་པ་ཡིན་ལ། ཨོཾ་མ་ཏི་མ་ཏི་སྨྲྀ་ཏི་སྭཱ་ཧཱ། ཞེས་བཟླས་པས་ཤེས་རབ་ཕུན་སུམ་ཚོགས་པ་བསྐྱེད་པ་དང་། ཨོཾ་མོ་ཧི་མོ་ཧི་མོ་ཧི་མ་ཧཱ་མོ་ཧི་སྭཱ་ཧཱ། །ཞེས་བཟླས་པས་འགྲོ་དོན་ཆེན་པོར་འགྱུར་བར་གསུངས་སོ། །མཆོད་རྫས་རྣམས་བསང་སྦྱང་། །སྟོང་པའི་ངང་ལས་ཨོཾ་ཡིག་ལས། །རིན་ཆེན་སྣོད་མཆོག་ཡངས་པའི་ནང་། །ཨོཾ་ལས་ལྷ་རྫས་མཆོད་པའི་སྤྲིན། །ཀུན་བཟང་སྨོན་ལམ་ལས་གྲུབ་པ། །རྒྱ་ཆེ་རྒྱུན་མི་འཆད་པར་གྱུར། །ཨོཾ་སརྦ་བིངྦཱུ་ར་པཱུ་ར་སུ་ར་སུ་ར་ཨཱ་བརྟ་ཡ་ཧོཿ ཨོཾ་བཛྲ་སྥ་ར་་ཕཊ། ཞེས་བྱིན་བརླབ། མདུན་བསྐྱེད་ཀྱི་རྟེན་བསང་སྦྱང་། སྟོང་པའི་ངང་ལས་སངས་རྒྱས་ཞིང་། །རྣམ་དག་བཀོད་པ་ཕུན་ཚོགས་ཀྱི། །གཞལ་མེད་ཁང་དབུས་པད་ཟླའི་སྟེང་། །མེ༚་ཡིག་གསེར་གྱི་མདོག་ཅན་ལས། །འོད་འཕྲོས་རྒྱལ་བ་སྲས་བཅས་མཆོད། །ཐུགས་དམ་རྒྱུད་བསྐུལ་བྱིན་རླབས་བསྡུས། །ཡོངས་གྱུར་རྗེ་བཙུན་བྱམས་པ་མགོན། །དབྱེར་མེད་བསྟན་པའི་ཉིན་མོར་བྱེད། །སྐུ་མདོག་བཙོམ་གསེར་གྱི་མདོག །

― LT28_Page_0555 ―

^{[མ་དཔེ་གཟིགས་ན་འདིར་གནོན།]}

[Full Size]

ཞལ་གཅིག་ཞི་འཛུམ་མཚན་དཔེས་སྤྲས། །མཐོང་གྲོལ་དམར་པོ་གསེར་མདངས་ཅན། །ནོར་བུའི་ཏོག་གིས་སྤྲས་པ་གསོལ། །ཕྱག་གཉིས་ཆོས་འཆད་ཕྱག་རྒྱ་ཡིས། །ཨུཏྤལ་སྡོང་བུ་བསྣམས་པ་ཡི། །མེ་ཏོག་སྙན་ཐད་བྱེ་བའི་སྟེང་། །གཡས་གཡོན་བུམ་པ་ཀླུ་ཤིང་མཚན། །ལྷ་རྒྱལ་དྲང་སྲོང་ཆེན་པོའི་ཚུལ། །འཁོར་ལོས་སྒྱུར་བའི་ཆ་བྱད་རྫོགས། །ཞབས་གཉིས་ཕྱེད་སྐྱིལ་རོལ་པས་བཞུགས། །ལྟ་བས་ཆོག་མི་ཤེས་པའི་སྐུ། །འོད་དང་འོད་ཟེར་དཔག་མེད་འཕྲོ། །གནས་གསུམ་འབྲུ་གསུམ་མཚན་པ་ལས། །འོད་འཕྲོས་རང་འདྲའི་ཡེ་ཤེས་པ། །སྤྱན་དྲངས་བཛྲ་ས་མཱ་ཛཿ དགའ་ལྡན་ཆོས་ཀྱི་འདུན་ས་སོགས། །ཕྱོགས་བཅུའི་སངས་རྒྱས་ཞིང་ཁམས་ནས། །བྱམས་མགོན་བླ་མ་ཆོས་ཀྱི་འབྱུང་། །ཐུགས་རྗེའི་དབང་གིས་འདིར་གཤེགས་གསོལ། །ཛཿཧཱུྃ་བྃ་ཧོཿ། དད་ཅིང་མོས་པས་རྣམ་འཕྲུལ་པའི། །ཡིད་དགའ་ཆོས་འཛིན་སྙིང་པོར་ཁྲིར། །ཞབས་ཀྱི་པདྨ་རབ་བཀོད་ལ། །མཁྱེན་དང་བརྩེ་བས་དགྱེས་པར་དགོངས། །པདྨ་ཀ་མ་ལཱ་ཡ་སྟཾྭ། །སླར་ཡང་དབང་ལྷ་སྤྱན་དྲངས་ཏེ། །དབང་བསྐུར་སྐུ་གང་དྲི་མ་དག །ཆུ་ལྷག་ཡར་ལུད་རིགས་ཀྱི་བདག །མཐོང་གྲོལ་ཅོད་པན་དབྱེར་མེད་གྱུར། །ཕྱག་འཚལ་བ་ནི། །གང་གིས་

― LT28_Page_0556 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་བའི་ཉེས་པ་ནི། །དྲན་པ་ཙམ་གྱིས་འཇོམས་མཛད་ཅིང་། །བླ་མེད་བྱང་ཆུབ་ཐོབ་བྱེད་པའི། །བླ་མའི་ཞབས་ལ་ཕྱག་འཚལ་ལོ། །བྱམས་ཆེན་མེ་ཡིས་ཞེ་སྡང་བུད་ཤིང་བསྲེག །ཡེ་ཤེས་འོད་ཀྱིས་མ་རིག་མུན་པ་སེལ། །ཆོས་ཀྱི་རྒྱལ་ཚབ་འགྲོ་བའི་མགོན་གྱུར་པའི། །དགའ་ལྡན་བཞུགས་པ་དེ་ལ་ཕྱག་འཚལ་ལོ། །ཇི་ལྟ་ཇི་སྙེད་གཟིགས་པའི་ཐམས་ཅད་མཁྱེན། །མཁའ་ཁྱབ་འགྲོ་བ་འདུལ་མཛད་བརྩེ་བ་ཆེ། །འཁོར་བ་དོང་སྤྲུགས་ནུས་པ་གྲུབ་པའི་གཙོ། །ཆོས་ཀྱི་འབྱུང་གནས་ཞབས་ལ་ཕྱག་འཚལ་ལོ། །ན་མོ་ན་མཱ་མི། །མཆོད་པ་ནི། །གླིང་བཞིའི་འཇིག་རྟེན་བྱེ་བ་བརྒྱ། །བཀྲ་ཤིས་རྫས་རྟགས་རིན་ཆེན་བདུན། །ཉེར་སྤྱོད་འདོད་ཡོན་རྣམ་པ་ལྔ། །ལྷ་མིའི་འབྱོར་པས་བཀང་སྟེ་འབུལ། །བདག་པོས་བཟུང་དང་མ་བཟུང་བའི། །བདེ་བའི་ཡོ་བྱད་ཇི་སྙེད་དང་། །ལུས་དང་ལོངས་སྤྱོད་དུས་གསུམ་གྱི། །དགེ་བའི་དངོས་ཀུན་འབུལ་བར་བགྱི། །བྱང་ཆུབ་མཆོག་ཏུ་སེམས་བསྐྱེད་དོ། །འགྲོ་ཀུན་བསྒྲལ་བར་དམ་བཅའ་ཞིང་། །བདེན་གཉིས་དབྱེར་མེད་རྟོགས་པ་ཡི། །བླ་མེད་མཆོད་པ་ཆེན་པོས་མཆོད། །བསྟོད་པ་ནི། །བདེ་བ་ཅན་ན་ཆོས་ཀྱི་འབྱུང་། །དགའ་ལྡན་གནས་སུ་མ་ཕམས་པ། །སོ་ས་གླིང་ན་ཤྲཱི་སི༚་ཧ། །གསང་བར་དགྱེས་པར་ཧེ་བཛྲ། །

― LT28_Page_0557 ―

^{[མ་དཔེ་གཟིགས་ན་འདིར་གནོན།]}

[Full Size]

བཀའ་བརྒྱུད་སྤྱི་མེས་ལྷོ་བྲག་པ། །འགྲོ་མགོན་རས་པ་ཆེན་པོ་ཉིད། །སྙིགས་དུས་ཐམས་ཅད་མཁྱེན་ཏུ་བཞེངས། །སྒྲུབ་བརྒྱུད་བསྟན་པའི་ཉིན་མོར་བྱེད། །འཇམ་མགོན་ཆོས་ཀྱི་འབྱུང་གནས་ཀྱི། །གསང་གསུམ་ཡོན་ཏན་མཛད་པར་བཅས། །ཡེ་ཤེས་བསམ་མི་ཁྱབ་པའི་འཕྲུལ། །རྨད་དུ་བྱུང་ལ་གུས་པས་བསྟོད། །དེ་ནས་ཐུགས་རྒྱུད་བསྐུལ་བའི་བཟླས་པ་ནི། །ཐུགས་ཀར་ཟླ་སྟེང་སོགས་དམིགས་པའི་འཕྲོ་འདུ་དང་། བསྙེན་བཟླས་གསུམ་པོ་གོང་ལྟར་བྱ། །གཞན་ཡང་ཕན་ཡོན་ཆེན་པོ་དང་ལྡན་པ་བྱམས་པས་དམ་བཅས་པའི་གཟུང་ས་ནི། ན་མོ་རཏྣ་ཏྲ་ཡཱ་ཡ། ཨོཾ་ན་མོ་བྷ་ག་པ་ཏེ་ཤཱཀྱ་མུ་ན་ཡེ་ཏ་ཐཱ་ག་ཏཱ་ཡ་ཨརྷཏེ་སམྱཾཀྶཾ་བུངྡྷ་ཡ། ཏ་དྱ་ཐཱ། ཨོཾ་ཨ་ཛི་ཏེ། ཨ་ཛི་ཏེ། ཨ་པ་རཱ་ཛི་ཏེ། ཨ་ཛི་ཏེ་ཉྫ་ཡ། ཧ་ར་ཧ་ར། མ་ཧཱ་ས་མ་ཡ་སིངྡྷི། བྷ་ར་བྷ་ར། མ་ཧཱ་བོ་དྷི་མཎྜ་བཱི་ཛེ། སྨ་ར་སྨ་ར། ཨཱཏྨ་ཀཾ་ས་མ་ཡ། བོ་དྷི་བོ་དྷི། མཧཱ་བོ་དྷི་སྭཱ་ཧཱ། ཨོཾ་མོ་ཧི་མོ་ཧི་མ་ཧཱ་མོ་ཧི་སྭཱ་ཧཱ། །ཨོཾ་མུ་ནི་མུ་ནི་སྨ་ར་སྭཱ་ཧཱ། ཞེས་པའང་བརྗོད། །བཟླས་པ་གྲུབ་པ་དང་སེམས་ཅན་ཐམས་ཅད་ལ་བྱམས་པའི་སེམས་ཉེ་བར་བཞག་སྟེ་ཚད་མེད་བཞི་ཡུན་རིང་དུ་བསྒོམ། མཐར། །སངས་རྒྱས་ཀུན་ལ་ཕྱག་འཚལ་ལོ། །སོགས་ནས། རབ་གནས་ཤོག །བར་བྱམས་པའི་སྨོན་ལམ་གྱི་རྒྱལ་པོས་བསགས་སྦྱངས་ཡན་ལག་བདུན་པ་དང་བྱང་ཆུབ་སྤྱོད་

― LT28_Page_0558 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྨོན་ལམ་སྙིང་ཐག་པ་ནས་གདབ། །སྤྲོ་ན་རྗེ་ཆོས་ཀྱི་འབྱུང་གནས་ཀྱི་གསོལ་འདེབས་མཁའ་ཁྱབ་ལ་སོགས་ཀྱང་བརྗོད་ལ། །རྗེ་བཙུན་མི་ཕམ་མགོན་པོ་དང་། །དབྱེར་མེད་ཀུན་མཁྱེན་བླ་མ་ལ། །རྩེ་གཅིག་གུས་པས་གསོལ་འདེབས་ན། །དམིགས་མེད་ཐུགས་རྗེས་རྗེས་དགོངས་ལ། །སྐུ་གསུང་ཐུགས་ཀྱི་བྱིན་གྱིས་རློབས། །སྒོ་གསུམ་སྨིན་ཅིང་གྲོལ་བར་མཛོད། །ཞིང་མཆོག་དགའ་བ་ལྡན་པ་རུ། །ས་བཅུའི་དབང་ཕྱུག་ཞལ་མཐོང་ནས། །ཆོས་ཀྱི་བདུད་རྩིར་ལོངས་སྤྱོད་དེ། །བྱང་ཆུབ་སྤྱོད་པ་མཐར་ཕྱིན་པའི། །ཡེ་ཤེས་འོད་ཀྱིས་ལམ་སྣ་དྲོངས། །དོན་གཉིས་ལྷུན་གྲུབ་མཛད་དུ་གསོལ། །བླ་མའི་གསང་གསུམ་ཡེ་ཤེས་ཀྱི། །འོད་ཟེར་བདུད་རྩིའི་རྒྱུན་བབས་པས། །བདག་གི་གནས་གསུམ་རིམ་པར་དང་། །གཅིག་ཆར་ཚུལ་གྱིས་ཐིམ་པ་ཡིས། །སྒྲིབ་དག་ཡེ་ཤེས་སྐྱེས་པར་གྱུར། །བྱམས་མགོན་དགྱེས་པའི་མཛོད་སྤུ་ནས། །དཀར་གསལ་འོད་ཀྱི་སྦུ་གུ་བྱུང་། །སྨིན་མཚམས་ནས་བརྒྱུད་སྙིང་གར་ཟུག །རང་སེམས་ཐིག་ལེ་དཀར་པོའི་ཚུལ། །ལིངས་ཀྱིས་འཕར་ནས་འོད་ལམ་ཞུགས། །བྱམས་ཆེན་ཐུགས་ཀྱི་ཐིག་ལེར་ཐིམ། །བླ་མ་རང་སེམས་ཆོས་ཀྱི་སྐུ། །དབྱེར་མེད་འོད་གསལ་སྙིང་པོར་འདྲེས། །བློ་འདས་ཆོས་སྐུ་ཨེ་མ་ཧོ། །ཞེས་མོས་ལ་ཅི་གནས་སུ་མཉམ་པར་བཞག །བདག་མདུན་སོགས་ཀྱིས་འཁོར་

― LT28_Page_0559 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་གྱི་འཛིན་རྟོག་ཐམས་ཅད་སྤྲོས་བྲལ་གཉུག་མའི་དབྱིངས་སུ་བསྐྱལ་བར་བྱའོ། །རྗེས་དགེ་བ་བསྔོ་བ་ནི། འདིས་མཚོན་དུས་གསུམ་དགེ་བའི་མཐུས། །བྱམས་མགོན་བླ་མ་མཆོག་འགྲུབ་ནས། །འགྲོ་ཀུན་ས་བཅུའི་དབང་ཕྱུག་ཏུ། །བཀོད་ནས་ལུང་བསྟན་ཐོབ་བྱེད་ཤོག །ཅེས་དང་། །འདི་ལྟར་བགྱིས་པའི་བསོད་ནམས་དཔག་མེད་ཀྱིས། སོགས་དང་། །རབ་འབྱམས་རྒྱལ་བ་རྒྱ་མཚོའི་རིགས་ཀྱི་བདག །སོགས་བསྔོ་སྨོན་ཤིས་བརྗོད་གང་འོས་བྱའོ། བྱམས་ཆེན་དགྱེས་པའི་ཟླ་ཟེར་གྱིས། །སྙིང་པོའི་ཀུ་མུད་རབ་བཞད་དེ། །ཡེ་ཤེས་སྦྲང་རྩིའི་དགའ་སྟོན་གྱིས། །ལུས་ཅན་བུང་བ་འཚོ་གྱུར་ཅིག །ཅེས་པ་འདི་ནི་འཕགས་པའི་ནོར་གྱིས་མ་།།།པའི་སྐལ་པ་དགེ་བ་ཅན་ཀརྨ་ཤེས་རབ་ནས་ཆེད་དུ་བསྐུལ་ངོར། བྱམས་མགོན་བླ་མའི་ཞབས་པད་སྤྱི་བོའི་རྒྱན་ཏུ་བྱེད་པ་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོས་ཀུན་བཟང་བདེ་ཆེན་འོད་གསལ་གླིང་དུ་སྦྱར་བ་དགེ་ལེགས་འཕེལ།། །།བླ་མ་མགོན་པོ་དབྱེར་མེད་ཀྱི་རྣལ་འབྱོར་རིགས་འདུས་མཆོག་གསང་་བདེ་བར་སྒྲུབ་པའི་མན་ངག་བཞུགས་སོ། །རྒྱལ་ཀུན་གསང་གསུམ་ཡེ་ཤེས་ནི། །ཕྲིན་ལས་མི་ཟད་གར་མཛད་པ། །དཔལ་ལྡན་མགོན་པོ་པདྨའི་མཚན། །ཁྱོད་ཞབས་བྱང་ཆུབ་བར་དུ་བསྙེན། བླ་མ་མགོན་པོ་དབྱེར་མེད་དུ་གསོལ་བ་འདེབས་ཤིང་བསྒྲུབ་པར་འདོད་པས། སྐྱབས་སུ་འགྲོ་བ་དང་། གཞན་དོན་བྱང་ཆུབ་ཏུ་སེམས་བསྐྱེད་པ་སྔོན་ཏུ་བཏང་ནས། མདུན་གྱི་ནམ་མཁར་པདྨ་ཉི་ཟླའི་

― LT28_Page_0560 ―

^{[མ་དཔེ་གཟིགས་ན་འདིར་གནོན།]}

[Full Size]

གདན་གྱི་སྟེང་དུ་རྩ་བའི་བླ་མ་རྡོ་རྗེ་འཆང་པདྨ་ཉིན་བྱེད་དབང་པོ་དགེ་སློང་གི་ཆ་ལུགས་མཐོང་གྲོལ་གསེར་གྱི་མདངས་ཅན་བཞེས་པ། ཕྱག་གཉིས་བདུད་འདུལ་གྱི་ཕྱག་རྒྱ་མཛད་པ། །སྐུ་གཟི་བརྗིད་འོད་དུ་འབར་ཞིང་། གསུང་ཚངས་དབྱངས་ཆོས་སྒྲ་སྒྲོགས་པ། ཐུགས་ཏིང་ངེ་འཛིན་གྱི་སྒོ་དུ་མ་ལ་འཇུག་ཅིང་ལྡང་བ། །བདག་སོགས་ལ་དགྱེས་པ་ཆེན་པོས་རྩེ་གཅིག་ཏུ་དགོངས་ཤིང་བྱིན་གྱིས་རློབ་པའི་སྤྱི་བོར་ཟླ་བ་ལ་ཧཱུྃ་དཀར་པོ། མགྲིན་པར་ཉི་མ་ལ་ཧཱུྃ་དམར་པོ། །ཐུགས་ཀར་པདྨ་ལ་ཧཱུྃ་སྔོན་པོ། སྐུ་གསུང་ཐུགས་ཀྱི་སྙིང་པོས་བསྐོར་བ་ལས་འོད་འཕྲོས། །མཆོག་གསུམ་རྩ་གསུམ་དམ་ཅན་སྲུང་མ་དང་བཅས་སྤྱན་དྲངས་ཏེ་ཐིམ་པས་དཀོན་མཆོག་ཀུན་འདུས་ཀྱི་ངོ་བོར་གྱུར། ན་མོ་གུ་རུ། ཕྱི་ལྟར་མར་པ་ལ་ཙཱ་བ། །ནང་ལྟར་ཌོམ་བི་ཧེ་རུ་ཀ །གསང་བ་དགྱེས་མཛད་ཧེ་རུ་ཀ །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་སི་ཏུ་སྤྲུལ་པའི་སྐུ། །ནང་ལྟར་འགྲོ་མགོན་རས་པ་ཆེ། །གསང་བ་རྡོ་རྗེ་བེར་ནག་ཅན། །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་ཆོས་ཀྱི་རྒྱལ་མཚན་པ། །ནང་ལྟར་རྗེ་བཙུན་རི་འགོ་བ། །གསང་བ་དམ་ཅན་རྒྱ་མཚོའི་གཙོ། །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་རྒྱལ་སྲས་མྱུ་གུའི་ཚུལ། །ནང་ལྟར་ཆོས་

― LT28_Page_0561 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་གོ་ཆ་སྟེ། །གསང་བ་དཔལ་ལྡན་མགོན་པོ་ཉིད། །གསོལ་བ༴ །ཕྱི་ལྟར་ཆོས་ཀྱི་འབྱུང་གནས་མཚན། །ནང་ལྟར་རྗེ་བཙུན་འཇམ་དཔལ་དབྱངས། །གསང་བ་མི་ཕམས་བྱམས་པ་མགོན། །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་པདྨ་ཉིན་བྱེད་དབང་། །ནང་ལྟར་མཚོ་སྐྱེས་རྡོ་རྗེ་འཆང་། །གསང་བ་བཛྲ་གྲོ་བོ་ལོད། །གསོལ་བ་འདེབས་སོ་བྱིན་གྱིས་རློབས། །རྒྱལ་བ་རྒྱ་མཚོ་སྤྱན་རས་གཟིགས། །རྒྱ་མཚོ་ལྔ་ཡི་དཀྱིལ་འཁོར་གྱི། །འོག་ཕྱོགས་དམ་ཅན་རྒྱ་མཚོ་ཡི། །གཙོ་བོ་རྡོ་རྗེ་བེར་ཅན་ལ། །གསོལ་བ་འདེབས་སོ་བྱིན་གྱིས་རློབས། །བསྟན་དང་རྣལ་འབྱོར་བདག་ཅག་ལ། །བར་ཆད་ཐམས་ཅད་བསལ་དུ་གསོལ། །ཕྲིན་ལས་ཐམས་ཅད་སྒྲུབ་ཏུ་གསོལ། །སྔོན་གྱི་ཐུགས་དམ་མ་གཡེལ་ཅིག། རྟགས་དང་མཚན་མ་དངོས་སུ་སྟོན། །ལེ་ལོ་བཏང་སྙོམས་མ་མཛད་པར། །དུས་ལ་བབ་བོ་ས་མ་ཡ། །མཆོག་དང་ཐུན་མོང་དངོས་གྲུབ་སྩོལ། ཞེས་གསོལ་བ་ལན་གྲངས་དྲག་ཏུ་བཏབ་པས་བླ་མ་ཉིད་ཡེ་ཤེས་མགོན་པོ་གང་རུང་དུ་གནས་འགྱུར་བ་མོས་ཏེ། །དེའང་འདིར་རིགས་བསྡུས་ལྟར་ན། བླ་མ་དགྱེས་པ་ཆེན་པོས་འོད་དུ་ཞུ་ནས་ཡོངས་སུ་གྱུར་པ་ནི། །དབུས་སུ་རྡོ་རྗེ་མཧཱ་ཀཱ་ལ་ནོར་བུ་ཐོན་ཀ་ཆེན་པོའི་མདོག་ཅན། ཤར་དུ་སྐུའི་མགོན་པོ། ལྷོར་

― LT28_Page_0562 ―

^{[མ་དཔེ་གཟིགས་ན་འདིར་གནོན།]}

[Full Size]

ཡོན་ཏན་གྱི་མགོན་པོ། ནུབ་ཏུ་གསུང་གི་མགོན་པོ། བྱང་དུ་ཕྲིན་ལས་ཀྱི་མགོན་པོ། སྐུ་མདོག་དཀར་སེར་དམར་ལྗང་། ཕྱག་གཡས་པ་རྣམས་རང་རྟགས་ཀྱིས་མཚན་པའི་གྲི་གུག །གཡོན་པས་ཐོད་ཁྲག་འཛིན་པ། དར་གྱི་ལྷབ་ལྷུབ། སྟག་ལྤགས་ཀྱི་ཤམ་ཐབས། །རུས་པ་དང་རིན་པོ་ཆེ་དང་མགོ་ཕྲེང་སྦྲུལ་གྱིས་བརྒྱན་ཅིང་ཞབས་གཡོན་བརྐྱང་པས་རོལ་པ་ལ་ཐུགས་གསུང་སྐུ་དང་ཡོན་ཏན་ཕྲིན་ལས་ཀྱི་ཌཱ་ཀི་བྱེ་བ་དུང་ཕྱུར་གྱིས་བསྐོར་བར་གྱུར། །ཞེས་མོས་ལ། ཨོཾ་གུ་རུཛྙཱ་ན་མ་ཧཱ་ཀཱ་ལི་ཡེ་ཧཱུྃ། ཞེས་པའི་སྔགས་ཅི་ནུས་སུ་བཟླས་པས་གསོལ་བ་དྲག་ཏུ་གདབ། མཐར། བླ་མ་མགོན་པོའི་ཐུགས་ཀ་ནས་འོད་ཟེར་དང་ཐིག་ལེ་དཔག་ཏུ་མེད་པ་འཕྲོས། སྣང་སྲིད་ཐམས་ཅད་བླ་མའི་ཐུགས་ཡེ་ཤེས་ཆེན་པོའི་རོལ་པར་བྱས། མགུར་གྱི་འོད། སྔགས་ཀྱི་གཟུགས་བརྙན་སྒྲ་དང་བཅས་པས་ཐམས་ཅད་བླ་མའི་གསུང་གྲགས་སྟོང་སྔགས་ཀྱི་རོལ་མོར་བྱས། སྨིན་མཚམས་ཀྱི་འོད་དང་སྐུའི་ཚོགས་ཆེ་ཕྲ་དུ་མས་ཐམས་ཅད་བླ་མའི་སྐུ་མི་ཕྱེད་པའི་ཕྱག་རྒྱར་བྱས། བླ་མ་ཡེ་ཤེས་མགོན་པོ་འཁོར་བཅས་འོད་དུ་ཞུ། རང་ལ་ཐིམ་པས་བླ་མའི་རྡོ་རྗེ་གསུམ་དང་རང་གི་སྒོ་གསུམ་དབྱེར་མི་ཕྱེད་པར་གྱུར། བར་མོས་ལ་མཉམ་པར་བཞག་ཅིང་། ལམ་ཁྱེར་དང་ལྡན་པས་དགེ་བ་བསྔོ། །ཐུན་མོང་མ་ཡིན་པའི་

― LT28_Page_0563 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་དང་དམ་ཚིག་ལྡན་པས། གོང་དུ་མདུན་འབྱེད་དུ་སྨོས་པ་དེ་ཉིད་བདག་བསྒོམ་དུ་སྦྱར་བ་བྱ་སྟེ་བྱིན་རླབས་ཤིན་ཏུ་ཆེའོ། །འདི་ནི་དཔལ་མངའ་སྤྱོད་པས། ཡེ་ཤེས་མགོན་པོ་བླ་མར་བསྒྲུབ་པས། བར་ཆད་སེལ། ཉམས་རྟོགས་འཕེལ། །ཕྲིན་ལས་འགྲུབ་པ་སྟེ། མཆོག་ཏུ་ཟང་ཅེས་གསུངས་པའི་གཞུང་ལ། ཆགས་མེད་རིན་པོ་ཆེའི་དག་སྣང་དུ་བྱུང་བའི་སི་ཏུའི་གསོལ་འདེབས་འདོན་ན་མགོན་པོ་བླ་མ་དབྱེར་མེད་དུ་འགྲུབ་པའི་རྟེན་འབྲེལ་ཡོད་ཅེས་གསུངས་པའི་སྐྱེ་ཕྲེང་ཕྱི་མ་རྗེ་པདྨའི་ཞབས་དང་ཆགས་མེད་མཆོག་སྤྲུལ་གྱིས་ཁ་བསྐངས་མཛད་པ་ཉིད་ཀྱིས་བརྒྱན་ཏེ་བཀླག་ཆོག་ཏུ། ཛྙཱ་ན་ནཱ་ཐཱ་པདྨའི་བཀའ་འབངས་མུ་ཏོ་པ་གུ་ས་དཔལ་སྤུངས་གདན་སར་བྲིས་པ་དགེ་ལེགས་འཕེལ།། །།

རྫོགས་པ་ཆེན་པོ་མན་ངག་སྙིང་ཐིག་གི་བླ་མ་བརྒྱུད་པའི་རིམ་པ་མཆོད་པའི་ཆོ་ག་ཀུན་བཟང་རྣམ་པར་རོལ་པའི་རྒྱན།

― LT28_Page_0565 ―

^{[མ་དཔེ་གཟིགས་ན་འདིར་གནོན།]}

[Full Size]

རྫོགས་པ་ཆེན་པོ་མན་ངག་སྙིང་ཐིག་གི་བླ་མ་བརྒྱུད་པའི་རིམ་པ་མཆོད་པའི་ཆོ་ག་ཀུན་བཟང་རྣམ་པར་རོལ་པའི་རྒྱན་ཅེས་བྱ་བ་བཞུགས་སོ། །

― LT28_Page_0566 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་དང་རང་རིག་གདོད་མའི་ཀློང་ལ་ཕྱག་འཚལ་ལོ། །སྐུ་ཚེ་གཅིག་གིས་གདོད་མའི་མགོན་པོ་དང་། །དབྱེར་མེད་གྲོལ་གཞིར་ཟག་པ་ཟད་རྣམས་དང་། །དྭངས་མའི་འོད་སྐུར་གཤེགས་ནས་འཕོ་བ་ཆེས། །ནམ་མཁའ་ཇི་སྲིད་གཞན་གྱི་དོན་མཛད་པ། །དྲི་མེད་བཤེས་གཉེན་མཁས་པའི་གཙུག་རྒྱན་དང་། །སྐྱེ་འཆི་གཉིས་སྤངས་མཚོ་སྐྱེས་རྡོ་རྗེ་འཆང་། །ཀུན་བཟང་དྲི་མེད་འོད་ཟེར་ལ་སོགས་པ། །རྩ་བརྒྱུད་བླ་མའི་ཞབས་ལ་གུས་བཏུད་ནས། །དེ་དག་མཆོད་ཅིང་གསོལ་བ་འདེབས་པའི་ཐབས། །ཁུངས་མེད་བསྡུ་དང་རང་བཟོ་མ་ཡིན་པ། །རྡོ་རྗེའི་གསུང་གསང་བྱིན་རླབས་གཟི་བརྗིད་ཅན། །རང་དང་སྐལ་མཉམ་ཚོགས་ཆེན་སྤེལ་ཕྱིར་འགོད། །དེའང་ཨ་ཏི་བཀོད་པ་ཆེན་པོའི་རྒྱུད་ལས། །གང་གི་ལྷ་སྐུ་འབུམ་ཕྲག་བསྒོམ་པ་ལས། །བླ་མའི་སྐུ་ལ་དམིགས་པ་མ་ཡེངས་ན། །བརྒྱ་ཕྲག་སྟོང་གི་ཆར་ཡང་མི་འགྲོ་ཞིང་། །བསྙེན་སྒྲུབ་བཟླས་པ་ས་ཡ་དུང་ཕྱུར་ལས། །བླ་མར་གསོལ་འདེབས་ལན་གསུམ་

― LT28_Page_0567 ―

^{[མ་དཔེ་གཟིགས་ན་འདིར་གནོན།]}

[Full Size]

བརྩོན་གྱུར་ན། །ནུས་པ་འབུམ་ཕྲག་ཆར་ཡང་མི་ཉེ་ཞིང་། །གང་གིས་རྫོགས་རིམ་བསྐལ་པར་བསྒོམས་པ་བས། །བླ་མ་རང་སེམས་དཀྱིལ་དུ་ཤར་ཙམ་གྱིས། །སྟོང་ཕྲག་ཉི་ཤུའི་ཆ་ཡང་མི་ཕོད་དོ། །ཞེས་དང་། །གཞན་ཡང་ལུང་ལས། །མཆོད་པ་ཐམས་ཅད་ཡང་སྤངས་ནས། །བླ་མ་མཆོད་ལ་བརྩོན་པར་བྱ། །དེ་མཉེས་པས་ནི་ཀུན་མཁྱེན་གྱི། །གོ་འཕང་ཚེ་འདིར་འཐོབ་པར་འགྱུར། །ཞེས་གསུངས་པ་ལྟར་བླ་མ་བསྙེན་པ་དང་མཆོད་པ་ནི། རྡོ་རྗེ་ཐེག་པའི་ལམ་ལ་ཞུགས་པ་དག་གིས་བསྒྲུབ་བྱའི་སྙིང་པོ་ཡིན་ལ། དེ་དག་ལས་ཐེག་པ་དང་གྲུབ་མཐའ་ཐམས་ཅད་ཀྱི་རྩེ་མོ་འོད་གསལ་རྡོ་རྗེའི་སྙིང་པོའི་ལམ་ལས་ཐོག་མའི་མགོན་པོ་ཀུན་ཏུ་བཟང་པོའི་གོ་འཕང་མངོན་ཏུ་མཛད་པ་བར་མ་ཆད་དུ་བྱོན་པ་འདི་དག་གི་མཚན་ཙམ་ཐོས་པའང་བསྐལ་པ་བརྒྱར་ཡང་རྙེད་པར་དཀའ་ན་དད་ཅིང་རྗེས་སུ་སློབ་པ་ལྟ་ཅི་སྨོས་པས། ལམ་འདི་ལ་ཞུགས་ཤིང་བརྒྱུད་པ་འདི་

― LT28_Page_0568 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཀྱི་རྗེས་སུ་སློབ་པའི་སྐལ་པ་བཟང་པོ་ཅན་རྣམས་ཀྱིས་གཡར་དམ་དུ་བྱ་བ་ནི་འདི་ཡིན་ཏེ། དེའང་ཀུན་མཁྱེན་ཀློང་ཆེན་རབ་འབྱམས་ཀྱི་དུས་ཆེན་རྒྱལ་ཟླ་བའི་ཚེས་བཅོ་བརྒྱད་སོགས་བླ་མའི་དུས་ཀྱི་མཆོད་པ་བཟུང་བ་ལྟ་བུ་སྤྲོས་བཅས་དང་འབྲེལ་བའི་སྐབས་སུ། །གནས་ཁང་བྱི་དོར་ལེགས་པར་བྱས་ཤིང་རྒྱན་གྱི་བཀོད་པ་ཅི་འབྱོར་པས་བརྒྱན། །བླ་མ་དང་དཀོན་མཆོག་གི་རྟེན་བཀྲམ་པའི་མདུན་དུ་སྟེགས་གཙང་མར་སྒྲུབ་པའི་མཎྜལ་ཚོམ་བུ་ལྔ་འམཉྫིའི་སྟེང་བཀོད། མཐའ་བསྐོར་དུ་ཆུ་གཉིས་ཉེར་སྤྱོད་བརྒྱ་རྩ་སོགས་ཇི་ཙམ་འབྱོར་བའམ། །དཀྱུས་སུ་ཕྱོགས་བཞིར་ཆ་བཞི་གཡས་བསྐོར་དུ་བཤམ། མཆོད་པའི་མཎྜལ། དུང་ཞལ། མེ་ཏོག་རྣམས་དང་སྤྲོ་ན་ཚོགས་ཀྱི་ཡོ་བྱད་ཀྱང་ཉེ་བར་བསྔོགས། རྒྱུན་གྱི་རྣལ་འབྱོར་རམ་སྤྲོས་འབྱོར་ཆུང་བས་ནི། མཎྜལ་དང་མཆོད་པ་ཆ་གཅིག་གིས་མཚོན་ཅི་འབྱོར་ལ་བརྟེན་ཅིང་། སྤྲོས་མེད་རྣལ་འབྱོར་པ་རྣམས་ཀྱིས་ཏིང་ངེ་འཛིན་ཁོ་ནས་བསྒྲུབ་པར་བྱ་བ་ཡིན་ནོ། །དེ་ལ་ཐོག་མར་སྐྱབས་སུ་འགྲོ་བ་ནི། ཆོས་ཐམས་ཅད་ཡེ་ནས་སངས་རྒྱས་པ་ཡིན་ཀྱང་། །དེ་ལྟར་མ་རྟོགས་པའི་དབང་གིས་འཁོར་བར་འཁྱམས་པའི་སེམས་ཅན་སྙིང་རེ་རྗེ། དེ་ཐམས་ཅད་རྫོགས་པའི་སངས་རྒྱས་ཀྱི་ས་ལ་དགོད་པར་བྱ། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་ཀུན་གུས་པས་སྐྱབས་སུ་མཆི། །ཞེས་ལན་གསུམ་བརྗོད་ལ། མ་ནམ་མཁའ་དང་མཉམ་པའི་སེམས་ཅན་ཐམས་ཅད། །བླ་མ་ལ་སྐྱབས་སུ་མཆིའོ། །སངས་

― LT28_Page_0569 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་ལ༴ །ཆོས་ལ༴ །དགེ་འདུན་ལ་སྐྱབས་སུ་མཆིའོ། ལན་གསུམ་གྱི་འོག་ཏུ། །བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ། །བླ་མ་ལོངས་སྤྱོད་རྫོགས་པའི་སྐུ་ལ༴ །བླ་མ་ཅིར་ཡང་སྤྲུལ་པའི་སྐུ་ལ༴ །བླ་མ་མངོན་པར་བྱང་ཆུབ་སྐུ་ལ༴ །བླ་མ་མི་འགྱུར་རྡོ་རྗེའི་སྐུ་ལ༴ །དྲིན་ཆེན་རྩ་བའི་བླ་མ་ལ་སྐྱབས་སུ༴ །ཡི་དམ་དཀྱིལ་འཁོར་ལྷ་ཚོགས་རྣམས་ལ༴ །མཁའ་འགྲོ་དམ་ཅན་རྒྱ་མཚོའི་ཚོགས་ལ༴ །ལས་ངན་སྡིག་སྒྲིབ་དག་པར་བྱིན་གྱིས་རློབས། །རྐྱེན་ངན་བར་ཆད་ཞི་བར་བྱིན༴ །ཆོས་ཉིད་མངོན་སུམ་མཐོང་བར༴། ཉམས་སྣང་གོང་དུ་འཕེལ་བར༴ །རིག་པ་ཚད་ལ་ཕེབས་པར༴ །ཆོས་ཉིད་ཟད་སར་འཁྱོལ་བར་བྱིན་གྱིས་རློབས། །ཞེས་བརྗོད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། བདག་གི་རྣལ་འབྱོར་ནི། གསང་སྙིང་ལས། མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་བསྒོམ། །རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་པར་ནི་སྒོམ་པར་འགྱུར། །ཞེས་པས་རང་སེམས་མ་སྐྱེས་པའི་ངོ་བོ་ལ་བློ་བཞག་སྟེ། །རྩ་བ་མེད་པའི་སེམས་ཉིད་འདི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེའི་ཕྲེང་བ་ཉིད་ལ་གནས། །ཨ་ཨ་ཨ་ཞེས་བརྗོད་པས། །ཆོས་ཐམས་ཅད་

― LT28_Page_0570 ―

^{[མ་དཔེ་གཟིགས་ན་འདིར་གནོན།]}

[Full Size]

གཅིག་དང་དུ་མ་མེད་པའི་ངང་ལས་ནམ་མཁའི་དབྱིངས་སྤྲིན་དང་བྲལ་བའི་དཀྱིལ་བསྒྲིབས་པ་མེད་པ་ལ། ཉི་མ་དང་ཟླ་བ་འོད་ཟེར་རབ་ཏུ་འཕྲོ་བའི་དཀྱིལ་དུ་དཔལ་ཀུན་ཏུ་བཟང་པོ་དང་བཟང་མོ་གཉིས་སུ་མེད་པ། མཉམ་པར་བཞག་པའི་ཕྱག་རྒྱ་ཅན་ཆོས་སྐུའི་རང་བཞིན་རྒྱན་ཆ་ལུགས་མེད་པ་ལས། འོད་ཟེར་ཁ་དོག་ལྔའི་རྭ་བ་དང་གུར་ཁྱིམ་གྱི་དབུས་ཁང་བུ་བརྩེགས་པའི་འོད་ཀྱིས་ནམ་མཁའི་དབྱིངས་མ་ལུས་པར་ཁྱབ་བས་སྣང་སྲིད་ཐམས་ཅད་འོད་དུ་འབར་བར་བསྒོམས་ལ། ཨོཾ་ཨཱཿཧཱུྃ་ཨ་ཨ་ཨ། ཞེས་ཅི་ནུས་སུ་བརྗོད་ནས་མཐར་ནམ་མཁའི་ངང་ལ་གཞག་པར་བྱའོ། །དེས་ནི་སངས་རྒྱས་ཀྱི་དཀྱིལ་འཁོར་མ་ལུས་པར་སྒོམ་པར་འགྱུར་ཏེ། དཀྱིལ་འཁོར་ཐམས་ཅད་ཀྱི་འབྱུང་གནས་བསྒོམས་པའི་ཕྱིར་རོ། །དེའི་ངང་ལས་སྐད་ཅིག་གིས་ལྷར་སྣང་གསལ་བར་བལྟས་ཏེ། དེའང་། ཕྱི་དང་ནང་གི་ཆོས་ཐམས་ཅད་མཉམ་པ་ཆེན་པོའི་ཚུལ། །རྡོ་རྗེའི་དབྱིངས་སུ་གདོད་མ་ནས་སྐྱེ་བ་མེད་པ། །རང་བཞིན་རྫོགས་པ་ཆེན་པོའི་ངང་ལས། །པདྨ་དཀར་པོ་དང་ཟླ་བའི་སྟེང་དུ། རང་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། །གཡས་རྡོ་རྗེ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། དར་གྱི་ན་བཟའ་དང་རིན་པོ་ཆེའི་རྒྱན་ཅན། །ཞབས་རྡོ་རྗེའི་སྐྱིལ་ཀྲུང་དུ་བཞུགས་པའི་མཛོད་སྤུར་འོད་ལྔའི་ཐིག་ལེའི་ནང་དུ་ཨོཾ་དཀར་པོ། མགྲིན་པར་འོད་ལྔའི་ཐིག་ལེའི་ནང་དུ་ཨཱཿདམར་པོ། སྙིང་གར་འོད་ལྔའི་ཐིག་ལེའི་ནང་དུ་ཧཱུྃ་སྔོན་པོ་གསལ་བར་

― LT28_Page_0571 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར། ཕྱི་དང་ནང་ཀུན་འོག་མིན་དག་པའི་ཞིང་། །ཐམས་ཅད་རྣམ་དག་ལྷ་དང་ལྷ་མོའི་ངང་། །སྐྱེ་མེད་ལྷུན་རྫོགས་འོད་གསལ་ཆེན་པོ་ལ། །བདག་གཞན་མ་ལུས་ངང་གིས་གནས་པར་གྱུར། ཅེས་སྣོད་བཅུད་ལྷ་དང་གཞལ་ཡས་མཆོད་པའི་རྫས་རང་བྱུང་ལྷུན་རྫོགས་ཡེ་ཤེས་ཆེན་པོའི་རྣམ་རོལ་དུ་བསམ། རྟེན་སྒྲུབ་པ་ནི། ཀ་དག་ཡེ་སངས་རྒྱས་པའི་མཁའ་དབྱིངས་སུ། །ལྷུན་གྲུབ་འཇའ་ཟེར་ཐིག་ལེ་འཁྲིགས་པའི་དབུས། །རིག་པ་སྐུ་རུ་སྨིན་པ་གདོད་མའི་མགོན། །ངོ་བོ་མངོན་སུམ་ལམ་སྟོན་བླ་མ་རྗེ། །རྣམ་པ་དྲི་མེད་བཤེས་གཉེན་འོད་ཀྱི་སྐུ། །དཀར་ལྗང་རབ་བྱུང་ཆས་ལྡན་པ་ཞུ་གསོལ། །ཏིང་འཛིན་ཕྱག་རྒྱ་ཚེ་བུམ་རྡོ་རྗེས་མཚན། །རྡོ་རྗེ་སྐྱིལ་ཀྲུང་པད་ཟླའི་གདན་ལ་བཞུགས། །སྤྱི་བོར་དགའ་རབ་རྡོ་རྗེ་སྤྲུལ་སྐུའི་ཆས། །ཟླ་བའི་མདངས་ཅན་ཆོས་འཆང་ཕྱག་རྒྱ་མཛད། །དེ་ཡི་སྤྱི་བོར་དཔལ་ལྡན་རྡོ་རྗེ་སེམས། །དབུ་གཙག་ཀུན་བཟང་འོད་མི་འགྱུར་བ་བཞུགས། །གཙོ་བོའི་མདུན་ཏུ་པདྨ་སཾ་བྷ་བ། །གཡས་རྒྱབ་གཡོན་ཏུ་འཇམ་དཔལ་བཤེས་གཉེན་དང་། །ཤྲཱི་སིང་ཧ་ཛྙཱ་ན་སུ་ཏྲ་གསལ། །དེ་མདུན་ཀུན་མཁྱེན་རྡོ་རྗེ་གཟི་བརྗིད་རྩལ། །ཆོས་གོས་རྣམ་གསུམ་པ་ཞུ་ཟླུམ་པོར་གསོལ། །ས་གནོན་ཕྱག་རྒྱས་ཨུཏྤལ་རལ་བོད་བསྣམས། །མཐའ་བསྐོར་བཻ་རོ་མཚོ་རྒྱལ་ཏིང་འཛིན་བཟང་། །ཆོས་རྒྱལ་ཡབ་སྲས་ལྡང་མ་ལྕེ་བཙུན་ཆེ། །པདྨ་ལས་འབྲེལ་རང་བྱུང་རྡོ་རྗེ་སོགས། །བཀའ་གཏེར་སྙིང་ཐིག་བརྒྱུད་

― LT28_Page_0572 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་བླ་མ་རྣམས། །ཆ་ལུགས་མ་ངེས་གཟི་མདངས་འོད་དུ་འབར། །སྐྱེ་མེད་རྡོ་རྗེའི་ལྟ་སྟངས་མཁའ་ལ་གཟིགས། །འོད་གསལ་ཏིང་འཛིན་བསམ་མི་ཁྱབ་པའི་ངང་། །མོས་པའི་བུ་ལ་བརྩེ་བས་དགོངས་ཏེ་བཞུགས། །གཞན་ཡང་ཕྱོགས་བཅུ་དུས་བཞིའི་དཀོན་མཆོག་དང་། །རྩ་གསུམ་ཆོས་སྐྱོང་དམ་ཅན་མ་ལུས་པ། །རང་གསལ་ལྷུན་རྫོགས་ཡེ་གདལ་ཆེན་པོར་བཞུགས། དེ་ནས་ཕྱག་མཆོད་སོགས་ཚོགས་གསོག་གི་ལས་རིམ་ལ་འཇུག་ཀྱང་ཆོག་མོད། གཉིས་སྣང་གི་རྟོག་པ་སེལ་སླད་ཡེ་ཤེས་པ་བཞུགས་པ་སོགས་སྤྲོ་ན། ཨོཾ་ཨཱཿཧཱུྃ། །ཆོས་ཀྱི་དབྱིངས་ཀྱི་ཕོ་བྲང་ནས། །སྐྱེ་མེད་བླ་མ་གཤེགས་སུ་གསོལ། །ལོངས་སྤྱོད་རྫོགས་སྐུའི་ཕོ་བྲང་ནས། །གསལ་དག་བླ་མ་གཤེགས་སུ་གསོལ། །སྤྲུལ་པ་སྐུའི་ཕོ་བྲང་ནས། །ཐུགས་རྗེ་ཅན་རྣམས་གཤེགས་སུ་གསོལ། །འཇའ་དང་འོད་དུ་ཀྱི་ལི་ལི། །སྐུ་དང་ཐིག་ལེ་ཤིགས་སེ་ཤིག །སྤྱི་གཙུག་ཉི་ཟླའི་གདན་སྟེང་དུ། །བདག་དང་དབྱེར་མེད་བརྟན་པར་བཞུགས། །ལུས་ངག་ཡིད་གསུམ་གུས་ཕྱག་འཚལ། །ཕྱི་ནང་གསང་གསུམ་མཆོད་པར་འབུལ། །སྐུ་གསུང་ཐུགས་ཀྱི་ཉམས་ཆགས་བཤགས། །སྨིན་གྲོལ་དབང་དང་གདམས་པ་ཞུ། ཨོཾ། སྐུ་སྐྱེ་བ་མེད་པར་གསལ་ལ་དྭངས། །རྡོ་རྗེའི་སྐུ་ལ་གསོལ་བ་འདེབས། །ལུས་ལ་བདེ་བར་བྱིན་གྱིས་རློབས། ཨཱཿགསུང་འགགས་པ་མེད་པ་ཆོས་ཀྱི་སྒྲ། །ཨཱ་ལི་ཀཱ་ལིར་གསོལ་བ་འདེབས། །ངག་ལ་ནུས་པར་

― LT28_Page_0573 ―

^{[མ་དཔེ་གཟིགས་ན་འདིར་གནོན།]}

[Full Size]

བྱིན་གྱིས་རློབས། ཧཱུྃ། ཐུགས་ཀ་དག་ཆེན་པོར་ཀུན་བཟང་ཀློང་། །ཅིར་མི་དགོངས་ལ་གསོལ་བ་འདེབས། །ཟད་སར་འཁྱོལ་བར་བྱིན་གྱིས་རློབས། །དེ་ནས་ཕྱག་གིས།།།བ་ནི། ཨོཾ་ཨཱཿཧཱུྃ། །སངས་རྒྱས་ཐམས་ཅད་ཀྱི་འབྱུང་གནས། དཔལ་ཀུན་ཏུ་བཟང་པོའི་རང་བཞིན་ཚད་མེད་པའི་མཁྱེན་རབ་ཐུགས་རྗེ་དང་ལྡན་པ། དཔལ་མགོན་བླ་མ་དམ་པའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། །གདོད་མའི་མགོན་པོ་འོད་མི་འགྱུར། །དཀྱིལ་འཁོར་ཀུན་གྱི་འབྱུང་གནས་གཙོ། །མཁྱེན་རབ་ཡེ་ཤེས་རྒྱ་མཚོ་བརྙེས། །ཀུན་བཟང་ཡབ་ཡུམ་ལ་ཕྱག་འཚལ། །མི་གནས་མི་དམིགས་ཆོས་སྐུའི་ངང་། །འོད་གསལ་ཡེ་ཤེས་ལོངས་སྤྱོད་རྫོགས། །ཡིད་བཞིན་རིན་ཆེན་གཏེར་མངའ་བ། །ཞི་ཁྲོ་རབ་འབྱམས་ལ༴། མི་འགྱུར་ཀུན་འགྲོ་ཡེ་ཤེས་བདག །བདེ་ཆེན་ཆོས་མཆོག་མི་གཡོ་བ། །བླ་མེད་ཡིད་བཞིན་རིན་ཆེན་གཏེར། །རྡོ་རྗེ་འཆང་ཆེན་ལ༴ །འོད་གསལ་ཡེ་ཤེས་སྒྱུ་མའི་ལྷ། །མཚན་རྫོགས་དཔེ་བྱད་དཔལ་འབར་ཞིང་། །སྐུ་གསུམ་ལྷུན་གྲུབ་རྫོགས་སངས་རྒྱས། །རྡོ་རྗེ་སེམས་དཔའ་ལ༴ །རྒྱལ་བ་ཀུན་གྱི་གསང་ཆེན་གྱི། །སྐུ་གསུང་ཐུགས་ཀྱི་རྡོ་རྗེ་འཛིན། །མཐུ་སྟོབས་དབང་ཕྱུག་འགྲོ་བའི་ཡབ། །ཕྱག་ན་རྡོ་རྗེ་ལ༴ །ཐབས་དང་ཤེས་རབ་ཕ་རོལ་ཕྱིན། །རྣམ་གྲོལ་ཡེ་ཤེས་རྒྱ་མཚོ་བརྙེས། །འགྲོ་བའི་རྩ་ལག་མཆོག་གྱུར་པ། །

― LT28_Page_0574 ―

^{[མ་དཔེ་གཟིགས་ན་འདིར་གནོན།]}

[Full Size]

དགའ་རབ་རྡོ་རྗེ་ལ༴ །བླ་མ་གྲུབ་པ་མཆོག་བརྙེས་ཤིང་། །གསུང་རབ་ཡིད་བཞིན་འབྱུང་བའི་མཛོད། །འགྲོ་ལ་ཆོས་ཀྱི་ཆར་འབེབས་པའི། །འཇམ་དཔལ་བཤེས་གཉེན་ལ༴ །མཁྱེན་བརྩེ་བརྩོན་པའི་ནམ་མཁའ་ལ། །ཡེ་ཤེས་ཉི་མའི་འོད་བརྡལ་བས། །ཕྱོགས་བཅུའི་མུན་པ་སེལ་མཛད་པ། །ཤྲཱི་སི་ཧ་ལ༴ །རྣམ་དག་ཐུགས་རྗེའི་དཀྱིལ་འཁོར་ལས། །ཕན་བདེའི་ཡེ་ཤེས་འོད་འཕྲོ་བས། །འགྲོ་བའི་ལམ་བཟང་སྣང་མཛད་པ། །ཛཱྙ་ན་སཱུ་ཏྲ་ལ༴ །མཁྱེན་བརྩེའི་འོད་སྟོང་བླ་མེད་ཀྱིས། །གསུང་རབ་པདྨོ་ཁ་འབྱེད་ཅིང་། །འགྲོ་བའི་མ་རིག་མུན་སེལ་བ། །བི་མ་མི་ཏྲ་ལ༴ །རང་བྱུང་པདྨའི་སྡོང་པོ་ལ། །ཉི་ཤར་སངས་རྒྱས་པདྨ་སྐྱེས། །མཁའ་འགྲོ་འབར་བའི་སྤྲིན་འཕྲོ་བ། །པདྨ་འབྱུང་གནས་ལ༴ །ས་མཆོག་ཆེན་པོ་དཀྱིལ་འཁོར་བརྙེས། །མཁྱེན་བརྩེའི་བརྩོན་པ་དཔག་ཡས་ཤིང་། །རྣམ་འཕྲུལ་དུ་མས་འགྲོ་ཀུན་སྐྱོང་། །ཆོས་རྒྱལ་ཁྲི་སྲོང་ལ༴ །ཏིང་ངེ་འཛིན་དང་གཟུངས་རྣམས་ཀྱི། །གཏེར་གྱུར་འོད་གསལ་སྒྱུ་མའི་སྐུ། །མངོན་ཤེས་རྫུ་འཕྲུལ་དབང་བསྒྱུར་བའི། །ཏིང་འཛིན་བཟང་པོ་ལ༴ །ཟབ་མོའི་དམ་ཆོས་མཛོད་འཛིན་ཅིང་། །བར་དོར་འོད་གསལ་སྙིང་པོ་བརྙེས། །བརྩེ་ཆེན་ཐབས་མཁས་ཐུགས་རྗེའི་བདག །ལྡང་མ་ལྷུན་རྒྱལ་ལ༴ །རྣམ་གྲོལ་བརྩོན་པའི་སྟོབས་ཆེན་གྱིས། །ཟག་མེད་ཡེ་ཤེས་བདུད་རྩི་བརྙེས། །འོད་སྐུར་ཡོན་ཏན་ལྷུན་རྫོགས་པའི། །སེང་གེ་དབང་ཕྱུག་ལ༴ །ཐབས་དང་ཤེས་

― LT28_Page_0575 ―

^{[མ་དཔེ་གཟིགས་ན་འདིར་གནོན།]}

[Full Size]

རབ་མཉམ་སྦྱོར་ཞིང་། །རྟག་ཏུ་ཟག་མེད་འོད་གསལ་དང་། །མི་འགྱུར་ལྷུན་གྲུབ་རྫོགས་པར་བཞུགས། །རྒྱལ་བ་ཞང་སྟོན་ལ༴ །ས་ཆེན་གཟུངས་སྤྲིན་སྙིང་པོ་ཅན། །རྣམ་གྲོལ་ཡེ་ཤེས་མཆོག་རབ་བརྙེས། །འགྲོ་བའི་མ་རིག་མུན་པ་སེལ། །མཁས་པ་ཉི་འབུམ་ལ༴ །བླ་མེད་ཚོགས་ཆེན་རབ་རྫོགས་ཤིང་། །རྣམ་ཀུན་མཆོག་ལྡན་སྟོང་པའི་གཟུགས། །ངེས་དོན་སྙིང་པོའི་དོན་རྟོགས་པའི། །གུ་རུ་ཛེ་འབེར་ལ༴ །ཡང་དག་སྒྱུ་མའི་ཚུལ་བརྙེས་ཤིང་། །སྟོང་ཉིད་སྙིང་རྗེའི་བདག་ཉིད་ཅན། །རང་བཞིན་སྤྲུལ་སྐུའི་ཞིང་བགྲོད་པ། །སེང་གེ་རྒྱབ་པ་ལ༴ །ཆོས་ཉིད་བདེན་པ་རབ་གཟིགས་ཤིང་། །ཡེ་ཤེས་རོལ་པའི་བརྟུལ་ཞུགས་ཀྱིས། །དཔག་མེད་འགྲོ་བའི་དོན་མཛད་པ། །གྲུབ་ཆེན་མེ་ལོང་༴ །རྣམ་དག་འོད་གསལ་སྙིང་པོའི་ཞིང་། །རྟག་ཏུ་རང་བཞིན་ལྷུན་གྲུབ་ཅིང་། །མངོན་ཤེས་གཟུངས་སྤྲིན་ཡིད་བཞིན་གཏེར། །ཀུ་མཱ་རཱ་ཛ་ལ༴། ཤེས་བྱའི་དཀྱིལ་འཁོར་རབ་གཟིགས་ཤིང་། །དམ་ཆོས་རིན་ཆེན་མཛོད་འཛིན་པ། །ཟབ་མོའི་དགོངས་གཏེར་རྒྱས་མཛད་པ། །ཀུན་མཁྱེན་ཆོས་རྗེ་ལ༴ །བྱམས་དང་སྙིང་རྗེའི་དཀྱིལ་འཁོར་ནས། །ཕན་བདེའི་འོད་ཟེར་སྤྲོ་མཛད་ཅིང་། །མངོན་སུམ་དབང་པོའི་ཡུལ་སྟོན་པ། །ཁྱབ་བརྡལ་ལྷུན་གྲུབ༴ །ཟག་མེད་ཡེ་ཤེས་སྒྱུ་མའི་སྐུ། །འགྲོ་འོང་རྟག་ཆད་མཐའ་ལས་འདས། །ཤེས་བྱའི་དཀྱིལ་འཁོར་མངོན་གཟིགས་པ། །གྲགས་པ་འོད་ཟེར་ལ༴ །འགྲོ་བ་ཀུན་

― LT28_Page_0576 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་བུ་ལྟར་བུར། །བརྩེ་བ་ཆེན་པོའི་ཐུགས་རྗེ་ཡིས། །རྟག་པར་རྗེས་སུ་འཛིན་མཛད་པ། །འཁྲུལ་ཞིག་ཆེན་པོ་ལ༴ །རིག་གནས་ཤེས་བྱའི་གནས་ཀུན་མཁྱེན། །ཐུགས་རྗེས་གཞན་ཕན་ཕྲིན་ལས་མཛད། །སྤྱན་རས་གཟིགས་སྤྲུལ་འགྲོ་བའི་ཡབ། །ཟླ་བ་གྲགས་པ༴ །སྒྲིབ་པ་ཀུན་ལས་རྣམ་གྲོལ་ཞིང་། །བསམ་གཏན་ཏིང་འཛིན་མཆོག་དང་ལྡན། །སྣང་བཞི་མཐར་ཕྱིན་ཆོས་ཀྱི་སྐུ། །ཀུན་བཟང་རྡོ་རྗེ་ལ་ཕྱག་འཚལ། །དམ་ཆོས་རིན་ཆེན་རྒྱལ་མཚན་འཛིན། །སྨིན་གྲོལ་འདོད་རྒུའི་ཆོས་ཆར་འབེབས། །དཔལ་ལྡན་སྐལ་བཟང་ཀུན་དགའི་གཉེན། །རྒྱལ་མཚན་དཔལ་བཟང་༴ །རང་གཞན་དོན་གཉིས་ལྷུན་གྱིས་གྲུབ། །ཐེག་མཆོག་ཆོས་ཀྱི་རྒྱལ་སྲིད་སྐྱོང་། །སྙིང་པོའི་ལམ་བཟང་གསལ་མཛད་པ། །སྣ་ཚོགས་རང་གྲོལ༴ །གཉིས་འཛིན་འཁྲུལ་པ་རང་སར་ཞིག །སྤང་བླང་རེ་དོག་དབྱིངས་སུ་གྲོལ། །འགྱུར་མེད་བདེ་ཆེན་ཡེ་ཤེས་བརྙེས། །བསྟན་འཛིན་གྲགས་པ་ལ༴ །མདོ་སྔགས་རྒྱ་མཚོའི་མཐར་སོན་ནས། །ངེས་གསང་བསྟན་པའི་ཡིད་བཞིན་ནོར། །འདོད་རྒུར་རྩོལ་མཛད་རིག་པ་འཛིན། །མདོ་སྔགས་བསྟན་འཛིན་ལ༴ །རྒྱལ་བ་ཀུན་གྱི་སྙིང་པོའི་ལམ། །མ་ནོར་སྟོན་མཛད་རྡོ་རྗེ་འཆང་། །འགྲན་ཟླ་ཀུན་བྲལ་ཆོས་ཀྱི་རྗེ། །ཕྲིན་ལས་ལྷུན་གྲུབ་ལ༴ །འགྱུར་མེད་ཡེ་ཤེས་སྤྱི་ཡི་གཟུགས། །རྡོ་རྗེའི་ཐེག་མཆོག་སྟོན་པ་ཆེ། །འཇིགས་བྲལ་ཕྱོགས་ལས་རྒྱལ་བའི་ལྷ། །འགྱུར་མེད་རྡོ་རྗེ་ལ་ཕྱག་འཚལ། །ལྟ་སྤྱོད་ཟུང་དུ་

― LT28_Page_0577 ―

^{[མ་དཔེ་གཟིགས་ན་འདིར་གནོན།]}

[Full Size]

འཇུག་པ་ཡིས། །ཏིང་འཛིན་མཆོག་གི་དངོས་གྲུབ་བརྙེས། །བླ་མེད་སྙིང་པོའི་བསྟན་པ་འཛིན། །རིན་ཆེན་རྣམ་རྒྱལ༴ །རང་བྱུང་ཡེ་ཤེས་སྒོམ་པ་ཉིད། །བར་མཚམས་མེད་པར་རབ་རྟོགས་ནས། །འགྲོ་ཀུན་སངས་རྒྱས་སར་འགོད་པ། །མི་འགྱུར་དཔལ་སྒྲོན་ལ༴ །ཐུགས་རྗེ་རང་ཤར་རིག་པ་ཉིད། །རང་གྲོལ་ཆོས་སྐུར་རབ་རྟོགས་ནས། །ཚད་མེད་ཕྲིན་ལས་གཞན་དོན་འགྲུབ། །ཨཽ་ཌི་ཡཱ་ན་ལ་ཕྱག་འཚལ། །རང་བྱུང་གདོད་ནས་དག་པའི་ཀློང་། །འཁོར་འདས་གཞི་གྲོལ་མཉམ་པ་ཉིད། །རྟོགས་པ་མཆོག་གྱུར་འགྲོ་བ་འདྲེན། །ཕྲིན་ལས་རྣམ་རྒྱལ་ལ༴ །ཕྱོགས་བྲལ་རྟོགས་པའི་ནམ་མཁའ་ལ། །འོད་གསལ་ཉི་ཟླའི་དཀྱིལ་འཁོར་གསལ། །འགྲོ་བའི་མ་རིག་མུན་པ་བསལ། །དྷརྨ་ཏཱ་རཱ་ལ༴ །ཇི་ལྟ་ཇི་སྙེད་མཁྱེན་པ་རྒྱས། །བརྩེ་བས་མཁའ་མཉམ་རབ་བསྒྲལ་ནས། །ཐམས་ཅད་གདོད་མར་འཁྲིད་མཛད་པ། །རྡོ་རྗེ་གཟི་བརྗིད་ལ༴ །ཡེ་གྲོལ་བློ་འདས་ངང་ཉིད་ནས། །རང་བབ་ལྷུག་པར་ཉམས་བླངས་ཤིང་། །འགྲོ་ལ་སྙིང་རྗེས་མ་ལྟར་བརྩེ། །རྩ་བའི་བླ་མ་ལ་ཕྱག་འཚལ། །རིན་རྣམ་ནས་འདིའང་རྫོགས་ཆེན་གསང་སྐོར་གྱི་ཕྱག་འཚལ་ཅུང་ཟད་ཁ་བསྒྱུར་བའོ། །ངོ་བོ་བརྗོད་འདས་ནམ་མཁའི་ཀློང་། །རང་བཞིན་འོད་གསལ་ལོངས་སྤྱོད་རྫོགས། །ཐུགས་རྗེས་འགྲོ་ཀུན་ཡོངས་ལ་ཁྱབ། །སྐྱབས་མཆོག་ཁྱོད་ལ༴ །སྙིང་རྗེའི་ཀློང་དུ་ཡེ་ནས་གྲོལ། །གསལ་སྣང་ཞིང་ཁམས་ཆེན་པོར་རྒྱས། །ཐམས་

― LT28_Page_0578 ―

^{[མ་དཔེ་གཟིགས་ན་འདིར་གནོན།]}

[Full Size]

ཅད་མཉམ་སྦྱོར་ནམ་མཁའི་ངང་། །དཔེ་བྲལ་ཁྱོད་ལ༴ །ཡེ་ནས་ཀུན་བཟང་རོལ་པའི་ངང་། །ཁྱོད་ནི་རྟག་ཏུ་མཉམ་བཞག་ཀྱང་། །ནོར་བུ་ཇི་བཞིན་གཞན་དོན་མཛད། །ཡིད་བཞིན་ཁྱོད་ལ༴ །ཏིང་ངེ་འཛིན་དང་མངོན་ཤེས་ཀྱིས། །གདུལ་བྱའི་འཇིག་རྟེན་མ་ལུས་ཀུན། །གདོད་མའི་དབྱིངས་སུ་ཁྲིད་མཛད་པ། །དེད་དཔོན་ཁྱོད་ལ༴ །འཁོར་བ་མགོན་མེད་རབ་འཁྱམས་ཤིང་། །སྡུག་བསྔལ་རྒྱ་མཚོའི་ཀློང་ཡངས་ལས། །སྒྲོལ་བར་མཛད་པའི་གྲུ་བོ་ཆེ། །བརྩེ་ཆེན་ཁྱོད་ལ༴ །ལས་དང་ཉོན་མོངས་འཁྲུལ་འཁོར་གྱིས། །ཡུན་རིང་སྲིད་པ་དུབས་པ་ལ། །སྡང་གཉེན་རང་གྲོལ་མངོན་སུམ་ལམ། །སྟོན་མཆོག་ཁྱོད་ལ༴ །གང་ཞིག་མཐོང་བས་རབ་དད་ཅིང་། །ཐོས་པས་ཐེ་ཚོམ་དྲ་བ་གཅོད། །རེག་པས་བྱིན་རླབས་དངོས་གྲུབ་འབྱུང་། །མཚུངས་བྲལ་ཁྱོད་ལ༴ །གང་ཞིག་ཁྱོད་སྐུ་མཐོང་བ་དང་། །ཁྱེད་གསུང་ཐོས་དང་འཛིན་པ་ཡི། །འགྲོ་བ་དེ་དག་ཀུན་ལ་ཡང་། །རྟག་ཏུ་བདག་ནི་ཕྱག་འཚལ་ལོ། །གཞན་ཡང་ཕྱོགས་བཅུའི་སངས་རྒྱས་དང་། །དཀྱིལ་འཁོར་ལྷུན་གྲུབ་བྱང་ཆུབ་སེམས། །ཆོས་དང་འཕགས་པའི་ཚོགས་མཆོག་ལ། །རབ་ཏུ་གུས་པས་ཕྱག་འཚལ་ལོ། །སྐུ་གཟུགས་མཆོད་རྟེན་ལ་སོགས་པ། །འགྲོ་བའི་བསོད་ནམས་ཞིང་གི་མཆོག །མ་ལུས་ཇི་སྙེད་ཐམས་ཅད་ལ། །ཀུན་ནས་དང་བས༴། འཁོར་འདས་ཀུན་གྱི་བྱང་ཆུབ་སེམས། །བླ་མེད་འོད་གསལ་སྙིང་པོ་མཆོག །བདེ་གཤེགས་སྙིང་པོའི་

― LT28_Page_0579 ―

^{[མ་དཔེ་གཟིགས་ན་འདིར་གནོན།]}

[Full Size]

ཁམས་ཉིད་ལ། །ངོ་མཚར་ཆེན་པོས༴ །ཐར་པའི་ལམ་དུ་ཞུགས་རྣམས་དང་། །དཀོན་མཆོག་སྒྲ་དབྱངས་ཐོས་སོ་འཚལ། །སེམས་ཅན་ཀུན་གྱི་རིགས་ཀུན་ལ། །རྣམ་གྲོལ་སླད་དུ༴ །སྣང་སྲིད་སྣོད་བཅུད་ཐམས་ཅད་ཀུན། །ཡེ་ཤེས་ཀུན་བཟང་རོལ་པའི་ངང་། །གདོད་ནས་རང་བཞིན་རྣམ་དག་པས། །གཉིས་མེད་ངང་དུ་ཕྱག་འཚལ་ལོ། །བླ་མ་བཤེས་གཉེན་དམ་པ་ཁྱོད། །བདག་ཅག་རྣམས་ཀྱི་མགོན་ལགས་སོ། །མི་ཤེས་རྨོངས་པའི་བློ་གྲོས་མཁན། །ལམ་སྟོར་རྣམས་ཀྱི་ལམ་མཁན་ལགས། །མུན་ཁུང་འཁྱམས་པའི་སྒྲོན་མ་སྟེ། །གདུང་བ་སེལ་བའི་རིན་པོ་ཆེ། །ཉི་མའི་ཞབས་ལ་ཕྱག་འཚལ་འདུད། །ཟླ་བའི་སྐུ་ལ་ཕྱག་འཚལ་འདུད། །པདྨའི་ཞབས་ལ༴ །འདི་ལྟར་དགའ་དང་གུས་པ་ཡིས། །བསྔགས་དང་འདུད་པས་ཕྱག་བགྱིའོ། ཧོ། རྫོགས་སངས་རིན་ཆེན་དག་པའི་སེམས་ཉིད་དང་། །རྟོག་པའི་དྲི་མ་རབ་བྲལ་དམ་པའི་ཆོས། །བརྟུལ་ཞུགས་བཟང་པོའི་ཚོགས་ལ་སྐྱབས་མཆི་ཞིང་། །སྲེད་དང་བྲལ་བ་རྣམས་ལ་གུས་ཕྱག་འཚལ། །དེང་ནས་བདག་ནི་འགྲོ་ཀུན་ཉེར་འཚོའི་ཕྱིར། །མགོན་རྣམས་འབངས་སུ་བདག་ཉིད་འབུལ་ལགས་ཀྱིས། །བརྩེ་བའི་ཐུགས་ཀྱི་བཞེས་པར་མཛད་དུ་གསོལ། །བྱམས་པའི་ཞལ་བཟང་དུས་འདིར་གཟིགས་ནས་ཀྱང་། །འགལ་འཁྲུལ་ཉམས་ཆགས་ཐམས་ཅད་སྐོང་གྱུར་ཅིག །དེ་ནས་མཆོད་པ་རྣམས་ཀྱི་གཙོ་བོར་ཐོག་མར་སྐུ་གསུམ་གྱི་མཎྜལ་

― LT28_Page_0580 ―

^{[མ་དཔེ་གཟིགས་ན་འདིར་གནོན།]}

[Full Size]

འབུལ་བ་ནི། མཎྜལ་ལེགས་པར་ཕྱིས་ཏེ་དྲི་བཟང་གི་ཆབ་ཀྱིས་བྱུག །དང་པོ་ལ་ཚོམ་བུ་བཅོ་ལྔ། །བར་ལ་དགུ། ཐ་མ་ལ་ལྔ་བཀོད་ལ་རིམ་པར་འབུལ་བ། ཨོཾ་ཨཱཿཧཱུྃ། དབང་ཆེན་གསེར་གྱི་ས་གཞི། རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན། །ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། །སྒྲ་མི་སྙན་དང་སྒྲ་མི་སྙན་གྱི་ཟླ། གསེར་གྱི་རི་བདུན། རོལ་བའི་མཚོ་བདུན། །རྒྱལ་སྲིད་རིན་པོ་ཆེ་སྣ་བདུན། བཀྲ་ཤིས་ཀྱི་རྫས་བརྒྱད། གཏེར་གྱི་བུམ་པ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཏོག །ཡིད་དུ་འོང་བའི་འདོད་ཡོན། ཤིན་ཏུ་མཛེས་པའི་ལྷ་མོ། ཉི་མ། ཟླ་བ། དབུས་སུ་ལྷ་དང་མིའི་འདོད་པའི་ཡོན་ཏན་མ་ཚང་བ་མེད་པ། འཇིག་རྟེན་གྱི་ཁམས་རྒྱ་མཚོ་ལེགས་པར་བཀོད་དེ། བཅོམ་ལྡན་དཔལ་རྣམ་པར་སྣང་མཛད་ལ་སོགས་པ་ཕྱོགས་བཅུའི་དེ་བཞིན་གཤེགས་པ་རིགས་ལྔ་གང་ཆེན་མཚོའི་སྐུ་དང་གསུང་དང་ཐུགས་མི་ཟད་པ་རྒྱན་གྱི་འཁོར་ལོ་ལ་བརྟེན་པའི་ཞིང་ཁམས་འབྱམས་ཀླས་ཚངས་ཆེན་གྱི་བསྐལ་པ་ཆེན་པོའི་ལེགས་པར་བརྒྱན་པ་འདི་ཉིད། བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའི་ཚོགས་དང་བཅས་པ་རྣམས་ལ་ཀུན་ཏུ་བཟང་པོའི་མཆོད་པའི་སྤྲིན་ཕུང་ཆེན་པོ་བསམ་གྱིས་མི་ཁྱབ་པར་དམིགས་ཏེ་འབུལ་ལོ། །ཕྱོགས་བཅུའི་ཞིང་ཁམས་རྒྱ་མཚོའི་རྡུལ་

― LT28_Page_0581 ―

^{[མ་དཔེ་གཟིགས་ན་འདིར་གནོན།]}

[Full Size]

རྙེད་རི་རབ་གླིང་བཞིའི་འཇིག་རྟེན་ཁམས། །ལྷ་དང་མིའི་འདོད་ཡོན་ཕུན་ཚོགས་བདེ་གཤེགས་མཆོད་པའི་སྤྲིན་ཕུང་ཅན། །ཚངས་ཆེན་བསྐལ་པས་ལེགས་པར་བརྒྱན་ཏེ་དགེ་ལེགས་རྒྱ་མཚོའི་བསོད་ནམས་ཞིང་། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་ཚོགས་ལ་འབུལ། །རིན་ཆེན་མཎྜལ་ཡིད་འོང་མཆོད་པའི་སྤྲིན། །རྒྱལ་བའི་འབྱོར་ཚོགས་དཔག་མེད་དང་ལྡན་པ། །དཔག་ཡས་ནམ་མཁའི་རྒྱན་གྱུར་འདི་ཕུལ་བས། །རང་བཞིན་སྤྲུལ་སྐུའི་ཞིང་ལ་སྤྱོད་པར་ཤོག །ཨོཾ་ཨཱཿཧཱུྃ། འོག་མིན་གྱི་གནས་རྣམ་དག་སྟུག་པོ་བཀོད་པ་བདེ་བའི་ཞིང་། །ཐམས་ཅད་ཀྱང་སྣང་ལ་རང་བཞིན་མེད་པའི་ཞིང་ཁམས་ན། །ཤིན་ཏུ་ཡིད་དུ་འོང་བའི་གཞལ་མེད་ཁང་ཆེན་པོ། །གྲུ་བཞི་སྒོ་བཞི་རྟ་བབ་བཞི་དང་ལྡན་པ་ལ། རིན་པོ་ཆེའི་གདུགས། ཆོས་ཀྱི་འཁོར་ལོ། ཤིན་ཏུ་མཛེས་པའི་རི་དྭགས། ལྷ་ཡི་གོས་རྣམ་པར་རྒྱལ་བའི་རྒྱལ་མཚན། ཡིད་དུ་འོང་བའི་འཕན་ཟླ་བ་རླུང་གིས་བསྐྱོད་པ། རྔ་ཡབ་ནོར་བུའི་ཡུ་བ་ཅན། གསེར་གྱི་དྲིལ་བུ་གཡེར་ཁའི་ཕྲེང་བ། རྡོ་རྗེ་དང་ནོར་བུ་རིན་པོ་ཆེའི་ཏོག །རྩིག་པ་ལྔ་དང་ལྡན་པའི་སྟེང་ན་རིན་པོ་ཆེའི་ཕ་གུ། ནོར་བུ་སྣ་ཚོགས་ཀྱི་དྲྭ་ཕྱེད། རྔོ་ཀྲ་མ་ཤིརྵའི་མདའ་ཡབ། རིན་པོ་ཆེའི་དྲྭ་མིག །སེང་མའི་སྤུ་ཤུ། རབ་ཏུ་མཐོ་བའི་ཕྱུར་བུ། འདོད་ཡོན་གྱི་སྣམ་བུ། སྒེག་མོ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ།

― LT28_Page_0582 ―

^{[མ་དཔེ་གཟིགས་ན་འདིར་གནོན།]}

[Full Size]

ཞལ་ཟས་མ། སིལ་སྙན་མ། མཆོད་པའི་སྤྲིན་ཕུང་ཆེན་པོ་བསམ་གྱིས་མི་ཁྱབ་པས་ཕྱི་ནང་ཀུན་ཏུ་ཡང་ལེགས་པར་བཀོད་པའི་གནས་ཚངས་པ་རྔ་སྒྲའི་ཞིང་ཁམས་ཆེན་པོ་ཡེ་ཤེས་རིན་པོ་ཆེའི་སྤྲིན་གྱི་དྲྭ་བས་ལེགས་པར་བརྒྱན་པ་འདི་ཉིད་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའི་ཚོགས་དང་བཅས་པ་རྣམས་ལ་ཇི་སྲིད་འཁོར་བ་མ་སྟོངས་ཀྱི་བར་དུ་རྟག་པ་རྒྱུན་གྱི་འཁོར་ལོ་འབུལ་ལོ། །བདེ་ཆེན་གནས་ནི་ཤིན་ཏུ་མཐའ་ཡས་བཀོད་པའི་སྤྲིན་གྱི་འོད་ཟེར་ཅན། གྲུ་བཞི་སྒོ་བཞི་རྟ་བབ་བཞི་ལྡན་ཡེ་ཤེས་རྣམ་ལྔའི་རྩིག་པས་བརྒྱན། སྒེག་མོ་ཕྲེང་ཐོགས་རིན་ཆེན་གླུ་གར་མཆོད་པའི་སྤྲིན་གྱི་འོད་འཕྲོ་བ། བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་ཚོགས་ལ་འབུལ། །འོག་མིན་བདེ་ཆེན་རིན་ཆེན་གཞལ་ཡས་ཁང་། །སྣ་ཚོགས་མཆོད་པའི་སྤྲིན་གྱི་བླ་བྲེ་ཅན། །ནམ་མཁའ་གང་བར་དམིགས་ཏེ་ཕུལ་བ་ཡིས། །ལྷུན་གྲུབ་ལོངས་སྐུའི་ཞིང་ལ་སྤྱོད་པར་ཤོགཨོཾ་ཨཱཿཧཱུྃ། ཆོས་ཉིད་འོད་གསལ་གྱི་ཞིང་ཁམས་གདོད་མ་ནས་ངོ་བོ་ཉིད་རྣམ་པར་དག་ཅིང་། ནམ་མཁའ་ལྟར་སྟོང་ལ་མཐའ་དབུས་མེད་པ། ཉི་ཟླ་ལྟར་བཀྲ་ཞིང་ལྷུན་གྱིས་གྲུབ་པ་འཁོར་བ་དང་མྱ་ངན་ལས་འདས་པ་གང་དུ་ཡང་མ་ཕྱེ་མི་འབྱེད་འབྱེད་པ་མེད་པའི་རང་བཞིན་སངས་རྒྱས་ཀྱི་ཞིང་དང་འགྲོ་བ་དྲུག་གི་རྣམ་པར་འཕྲུལ་པ་དཔག་ཏུ་མེད་པའི་འབྱུང་གནས་ཆེན་པོ། ལྷུན་གྲུབ་རིན་པོ་ཆེའི་སྦུབས་སྐུ་གསུམ་འདུ་

― LT28_Page_0583 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲལ་མེད་པའི་ཀློང་དུས་བཞི་མཉམ་པ་ཉིད་ཀྱི་ཡེ་ཤེས། །གཞོན་ནུ་བུམ་པ་སྐུའི་ཞིང་ཁམས། །ཕྱི་དང་ནང་མེད་པར་ཀུན་ཏུ་ཡང་ནང་དུ་གྱུར་པ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལྗང་གུའི་འོད་ཟེར་ཕྱོགས་བཅུར་འཕྲོ་ཞིང་། ནམ་མཁའི་མཐའ་ཀླས་པར་སྐུ་དང་ཡེ་ཤེས་ཀྱི་སྣང་བ་ཆེན་པོས་ལེགས་པར་བརྒྱན་པའི་བཀོད་པ་ཚད་མེད་པའི་མངའ་ཐང་ཆེན་པོ་ལ་དབང་འབྱོར་བ། འོད་གསལ་རྡོ་རྗེ་སྙིང་པོའི་ཞིང་ཁམས་རང་བཞིན་གྱིས་རྣམ་པར་དག་ཅིང་ལྷུན་གྱིས་གྲུབ་པ་འདི་ཉིད། བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའི་ཚོགས་དང་བཅས་པ་རྣམས་ལ། དགོངས་ཀློང་རྣམ་པར་དག་པའི་ངང་དུ་ཡེ་ཤེས་ཀྱི་མཆོད་པ་དམ་པ་འབུལ་ལོ། །གདོད་ནས་རྣམ་དག་འོད་གསལ་ཞིང་ནི་མ་སྐྱེས་ལྷུན་རྫོགས་འདུས་མ་བྱས། །སྣ་ཚོགས་མི་དམིགས་སྤྲོས་ཀུན་ཉེར་ཞི་ཡེ་ཤེས་རྣམ་ལྔའི་གཞལ་ཡས་ཁང་། །སྐུ་གསུམ་མཛད་པའི་འོད་ཟེར་དང་བཅས་རང་བཞིན་ལྷུན་གྱི་གྲུབ་པའི་གནས། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་ཚོགས་ལ་འབུལ། །འོད་གསལ་ལྷུན་གྲུབ་ཡེ་ཤེས་རིགས་ལྔའི་ཞིང་། །སྐུ་དང་ཐིག་ལེས་ཡེ་ནས་བརྒྱན་པ་འདི། །རང་སྣང་དག་པས་ལེགས་པར་ཕུལ་བ་ཡིས། །ཀུན་བཟང་ཆོས་སྐུའི་ཞིང་ལ་སྤྱོད་པར་ཤོག །ཅེས་དང་། སླར་ཡང་ཐུན་མོང་བའི་མཎྜལ་འབུལ་བ་ནི། ཡང་མཎྜལ་ལན་གསུམ་ཕྱིས་པས་སྒོ་གསུམ་གྱི་དྲི་མ་དག་ནས། བྷྲཱུྃ་ལས་

― LT28_Page_0584 ―

^{[མ་དཔེ་གཟིགས་ན་འདིར་གནོན།]}

[Full Size]

སངས་རྒྱས་ཀྱིས་ཞིང་ཁམས་དག་པ་གསེར་གྱི་རི་དང་། །གླིང་དང་ས་གཞི་མཛེས་པ་ལས། འདོད་པ་དང་གཟུགས་ཁམས་ཀྱི་ལྷ་དང་མིའི་འདོད་ཡོན་དཔག་ཏུ་མེད་པ་དང་། གཟུགས་མེད་པའི་ཏིང་ངེ་འཛིན་གྱི་དགའ་བདེ་དང་། ཞིང་དག་པའི་གཞལ་ཡས་ཁང་རིན་པོ་ཆེའི་ཤིང་ལྗོན་པ་ལ་སོགས་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་དང་བྱང་ཆུབ་སེམས་དཔའ་དང་། སངས་རྒྱས་ཀྱི་དགའ་བདེ་དཔག་ཏུ་མེད་པས་གང་བར་བསམས་ལ། ཚོམ་བུ་ལྔ་དང་། བརྒྱད་དང་། བཅུ་གཉིས་བཀོད་པ་འབུལ་བ་ནི། ཨོཾ་ཨཱཿཧཱུྃ། ཕྱོགས་བཅུའི་འཇིག་རྟེན་སྣ་ཚོགས་ཁམས་ཅན་སེམས་ཅན་དབྱིངས་མཐའ་ཇི་སྲིད་མ་ལུས་ཀུན་ཁྱབ་གཟུགས་དང་བཀོད་པ་དཔག་ཡས་རྒྱ་མཚོའི་སྙིང་པོའི་གངས་ཅན་མཚོས་བརྒྱན་ལྷ་མིའི་བཀོད་སྤྲིན་ནམ་མཁའི་དབྱིངས་ཙམ་དེ་སྙེད་རྒྱལ་བ་རྒྱ་མཚོའི་ཚོགས་བཅས་མཆོད་འོས་རྣམས་ལ་གུས་པས་འབུལ། །གསེར་གྱི་ས་གཞི་རི་དབང་ལྷུན་པོས་བརྒྱན། །གླིང་བཞི་གླིང་ཕྲན་ཉི་ཟླ་གཟའ་སྐར་བཀྲམ། །ལྷ་མིའི་འདོད་ཡོན་ཕུན་ཚོགས་དང་ལྡན་པ། །གླིང་བཞིའི་འཇིག་རྟེན་རྒྱན་གྱུར་རྣམས་ཀྱིས་མཆོད། །རིན་ཆེན་ཆུ་མཚོ་མེ་ཏོག་གིས་བཀྲམ་རྣམ་དག་པདྨའི་གཞལ་ཡས་ཆུ་དབང་ཡིད་བཞིན་དབང་པོས་ཉེར་བསྟན་ས་འོག་ས་སྟེང་ས་བླ་བར་སྣང་ལ་གནས་ཁང་བརྩེགས་ཡིད་འོང་རྣམ་མང་ལྷ་ཡི་སྐྱེད་ཚལ་འོད་དང་གཟི་བརྗིད་དཔལ་དུ་འབར་བས་འགྲོ་བའི་བླ་མ་སྲས་བཅས་མཆོད། །གསེར་དང་དངུལ་དང་རིན་ཆེན་ཨིནྡྲ་རྙིལ། །མ་རྒད་མུ་ས་གར་བྷ་བཻཌཱུརྱ། །ཡིད་བཞིན་ནོར་བུ་སྣ་

― LT28_Page_0585 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་མཛེས་འབར་བ། །བུམ་བཟང་དཔག་བསམ་ཤིང་ཆེན་རྣམས་ཀྱིས་མཆོད། །པདྨ་ཀུ་མུ་ཏ་དང་ཨུཏྤལ་དྲི་ལྡན་མདངས་བཀྲ་ཡིད་འོང་ཁ་བྱེ་ལྷག་གེར་གསལ་གྱུར་ནོར་བུའི་གདུབ་བུ་ཡིད་འོང་ཁྲོལ་བས་མཛེས་བྱས་ལྷ་མིའི་བུ་མོ་བསྟོད་དབྱངས་སྒྲོགས་ལྡན་གདུགས་དང་རོལ་མོའི་སྒྲ་དབྱངས་མཐོ་རིས་ས་སྟེང་དཔལ་འབྱོར་རྣམས་ཀྱིས་མཆོད། །རིན་ཆེན་བདུན་དང་བཀྲ་ཤིས་རྣམ་པ་བརྒྱད། །གཞལ་མེད་ཁང་མཛེས་ཡིད་འོང་ཉམས་དགའ་བ། །མི་དབང་དཔལ་ཕྲེང་ཕུན་ཚོགས་འདི་ཕུལ་བས། །རྒྱལ་བའི་འབྱོར་ཚོགས་ལྷུན་གྱིས་གྲུབ་གྱུར་ཅིག །བསམ་གཏན་ལྷ་གནས་ཤིན་ཏུ་ཉམས་དགའ་དྭངས་པ་འོད་ཀྱི་གཞལ་ཡས་ཁང་བཀྲམ་གཟུགས་བཟང་ལྷ་མང་གིས་མཛེས་བསམ་གཏན་ཞི་བའི་སྐྱེད་མོས་ཚལ་གཅིག་མི་གཡོ་གཟུགས་དང་གཟུགས་མེད་ཡེ་ཤེས་རོལ་པའི་ཏིང་ངེ་འཛིན་ལ་རེག་སྲིད་གསུམ་སྣོད་བཅུད་དངོས་དང་དངོས་མེད་བདེ་དགའ་རྒྱ་མཚོ་རྣམས་ཀྱིས་མཆོད། །ཉན་ཐོས་རང་སངས་རྒྱས་དང་བྱང་ཆུབ་སེམས། རྒྱལ་བའི་གཟུངས་སྤྲིན་སྙིང་པོ་ལས་འཐོན་པ། །ཕྱི་ནང་གསང་བའིམཆོད་སྤྲིན་རྒྱ་མཚོ་ཡིས། །བླ་མ་ཡི་དམ་དཀྱིལ་འཁོར་ལྷ་ཚོགས་མཆོད། །དག་པའི་ཞིང་ཁམས་རྒྱལ་སྲས་འབྱོར་པས་ཡོངས་གང་ལྷ་མིའི་བདེ་འབྱུང་རྒྱལ་བ་རྒྱ་མཚོའི་སྤྲིན་ཕུང་དང་བཅས་ཡེ་ཤེས་ལས་གྲུབ་གཞལ་ཡས་ནམ་མཁའི་དབྱིངས་ཁྱབ་ལོངས་སྐུའི་ཞིང་གི་དཔལ་འབྱོར་ཆོས་

― LT28_Page_0586 ―

^{[མ་དཔེ་གཟིགས་ན་འདིར་གནོན།]}

[Full Size]

སྐུའི་ཞིང་གི་སྙིང་པོ་མ་ལུས་ཡོངས་བཀོད་བདེ་ཆེན་རྒྱ་མཚོར་འགྲོ་ཀུན་ཕྱམ་གཅིག་བགྲོད་པར་ཤོག །རིན་ཆེན་མཎྜལ་ཀུན་བཟང་མཆོད་པའི་སྤྲིན། །སྲིད་ཞིའི་འབྱོར་ཚོགས་དཔག་མེད་དང་ལྡན་པ། །ཕུན་ཚོགས་བསོད་ནམས་ཞིང་ལ་སྤྱོད་པ་ཡིས། །འགྲོ་ཀུན་ཐར་པའི་གྲོང་དུ་ཕྱིན་པར་ཤོག །ཅེས་ཕུལ་བས་ཐུན་མོང་གི་ཚོགས་གཉིས་རྫོགས་ནས་ཞིང་ཁམས་དག་པ་ལ་སྤྱོད་པའི་དགོས་ཆེད་ཡོད་དོ། །དེ་ནས་ཁྱད་པར་གྱི་ཚོགས་གཉིས་རྫོགས་ནས་ཡེ་ཤེས་ལྔའི་ཞིང་ཁམས་ལ་སྤྱོད་པར་བྱ་བའི་ཕྱིར། ལྔ་ཚན་ལྔའི་མཎྜལ་ཚོམ་བུར་བཀོད་ལ་ཞིང་ཁམས་ཐམས་ཅད་སྤོས་ཀྱི་དྲི་དང་། སྣ་ཚོགས་དང་། རིན་པོ་ཆེ་དང་། མེ་ཏོག་སྣ་ཚོགས་ཀྱིས་གང་བར་དམིགས་ལ། ཨོཾ་ཨཱཿཧཱུྃ། ཡིད་བཞིན་རིན་པོ་ཆེའི་སྤྲིན་གྱི་དྲྭ་བ་ཀུན་ནས་བརྒྱན་པའི་ཞིང་ཁམས། གསེར་གྱི་ས་གཞི་རིན་པོ་ཆེའི་རི་བོ། སྨན་གྱི་ནགས་ཚལ། སྤོས་ཀྱི་སྤྲིན་ཕུང་། འབྲུའི་བང་མཛོད། མེ་ཏོག་གི་སྐྱེད་མོས་ཚལ། དཔག་བསམ་གྱི་ཤིང་། ཡིད་བཞིན་གྱི་ནོར་བུ་ལ་སོགས་པ་ལྷ་དང་མིའི་མཆོད་པའི་སྤྲིན་ཕུང་དཔག་ཏུ་མེད་པ་ནམ་མཁའི་མཐའ་ཀླས་པས་བཀང་སྟེ་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོའི་ཚོགས་དང་བཅས་པ་རྣམས་ལ་ཇི་སྲིད་འཁོར་བ་མ་སྟོངས་ཀྱི་བར་དུ་རྟག་པ་རྒྱུན་གྱི་འཁོར་ལོར་འབུལ་ལོ། །ཞིང་ཁམས་ཐམས་ཅད་གསེར་གྱི་ས་གཞི་ཀུན་ནས་མཛེས་པའི་སྙིང་པོ་ལ། །རིན་ཆེན་སྣ་ཚོགས་སིལ་མ་བཀྲམ་ཞིང་ཡིད་འོང་ནོར་བུའི་འོད་འབར་བས། །མཐའ་དང་དབུས་མེད་ནམ་མཁའི་

― LT28_Page_0587 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱིངས་ཁྱབ་དཔག་ཡས་མཆོད་པའི་སྤྲིན་ཕུང་འདི། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་ཚོགས་ལ་འབུལ། །ཀུན་ནས་མཛེས་པའི་རིན་ཆེན་སྣ་ཚོགས་ཀྱིས། །ནམ་མཁའི་མཐའ་ཀླས་བཀང་ཏེ་ཕུལ་བ་ཡིས། །འགྲོ་ཀུན་གནས་སྐབས་དགོས་འདོད་ལྷུན་གྲུབ་ཅིང་། །མཐར་ཐུག་ཡེ་ཤེས་ལྔ་ལ་སྤྱོད་པར་ཤོག །ཞིང་ཁམས་ཐམས་ཅད་སྣ་ཚོགས་འབྲུ་མང་ཀུན་ནས་བཀྲམ་པའི་ས་གཞི་ལ། །སྨན་ཤིང་མེ་ཏོག་ལོ་ཏོག་རབ་རྒྱས་དུད་པའི་འབྲས་བུས་རབ་ཏུ་ཕྱུག །ཁང་བརྩེགས་འབུ་མང་འབྱོར་པས་ཡོངས་གང་ཡིད་འོང་གཞལ་ཡས་ཁང་། །བསམ་གཏན་རོ་བརྒྱའི་ཟས་ཀྱི་རྗེས་འགྲོ་འདོད་རྒུའི་དཔལ་འབྱུང་དམ་པ་འདི། །བླ་མ་ཡི་དམ་དཀྱིལ་འཁོར༴ །འབྲུ་མང་འབྱོར་པ་ཤིན་ཏུ་དཔག་ཡས་ཀྱིས། །ནམ་མཁའི་མཐའ་ཀླས་བཀང་ཏེ་ཕུལ་བ་ཡིས། །འགྲོ་ཀུན་གནས་སྐབས་འབྱོར་བ་མཐའ་ཡས་ཤིང་། །མཐར་ཐུག་སྐུ་ལྔའི་ཞིང་ལ་སྤྱོད་པར་ཤོག །ཞིང་ཁམས་ཐམས་ཅད་དྲི་གཙང་གིས་ཁྱབ་སེམས་ཀྱི་ས་གཞི་བསྟར་བ་ལ། །ཙནྡན་སྣ་ཚོགས་ཕྱེ་མ་ཕུར་མ་རི་རབ་མཉམ་པ་བཀོད་གྱུར་ཅིང་། །སྤོས་ཀྱི་དཔག་བསམ་ཆུ་མཚོ་རབ་བརྒྱན་དྲི་ཞིམ་དྭངས་བའི་མཆོད་སྤྲིན་འདི། །བླ་མ་ཡི་དམ་དཀྱིལ་འཁོར༴ །སྤོས་དང་སྨན་སྦྱར་བདུད་རྩིའི་སྤྲིན་ཕུང་འདི། །ནམ་མཁའི་མཐའ་ཀླས་བཀང་ཏེ་ཕུལ་བ་ཡིས། །འགྲོ་ཀུན་གནས་སྐབས་དབང་པོ་རབ་

― LT28_Page_0588 ―

^{[མ་དཔེ་གཟིགས་ན་འདིར་གནོན།]}

[Full Size]

གསལ་ཞིང་། །མཐར་ཐུག་ཀུན་བཟང་ཞིང་ལ་སྤྱོད་པར་ཤོག །ཞིང་ཁམས་ཐམས་ཅད་སྨན་གྱི་ས་གཞི་རབ་ཏུ་དྭངས་པས་བརྒྱན་པ་ལ། །སྨན་གྱི་རི་བོ་ཤིན་ཏུ་དཔག་མེད་ཀུན་ནས་བཀོད་པས་མཛེས་པར་བཀང་། །བཀྲ་ཤིས་གཟི་བརྗིད་དཔལ་དུ་འབར་བས་ནད་ཀུན་ཞི་བར་བྱེད་པ་འདི། །བླ་མ་ཡི་དམ་དཀྱིལ་འཁོར༴ སྨན་མཆོག་བདུད་རྩིའི་མཆོད་སྤྲིན་དམ་པ་འདི། །ནམ་མཁའི་མཐའ་ཀླས་བཀང་ཏེ་ཕུལ་བ་ཡིས། །འགྲོ་ཀུན་གནས་སྐབས་ཚེ་རིང་ནད་མེད་ཅིང་། །མཐར་ཐུག་བདེ་ཆེན་ཞིང་ལ་སྤྱོད་པར་ཤོག །ཞིང་ཁམས་ཐམས་ཅད་རིན་ཆེན་སིལ་མས་བཀང་བར་གྱུར་པ་ལ། །པདྨའི་མཚོ་དང་མེ་ཏོག་ཁང་བརྩེགས་ཨུཏྤལ་དྲྭ་བས་སྤྲེལ་ལེགས་པ། །དུས་འདིར་ལྷ་ཡི་མེ་ཏོག་ཆར་བབས་ས་དང་བར་སྣང་བརྒྱན་པ་འདི། །བླ་མ་ཡི་དམ་དཀྱིལ་འཁོར་ལྷ་ཚོགས་དམ་ཅན་རྒྱ་མཚོའི་ཚོགས་ལ་འབུལ། །ཡིད་འོང་སྣ་ཚོགས་རིན་ཆེན་མཛེས་འབར་བས། །ནམ་མཁའི་མཐའ་ཀླས་བཀང་སྟེ་ཕུལ་བ་ཡིས། །འགྲོ་ཀུན་གནས་སྐབས་ཤེས་རབ་རྒྱ་ཆེ་ཞིང་། །མཐར་ཐུག་འོད་ལྔའི་ཞིང་ལ་སྤྱོད་པར་ཤོག །ཅེས་འབུལ་ལོ། །འདིས་ནི་ཚེ་རིང་བ་དང་། །ནད་མེད་པ་དང་། ལོངས་སྤྱོད་དང་ལྡན་པ་དང་། སྣང་བ་བཞིའི་ཡེ་ཤེས་གོང་དུ་འཕེལ་བ་ལ་སོགས་པ་ཡོན་ཏན་དཔག་ཏུ་མེད་པར་གསུངས་སོ། །དེ་ལྟར་མཎྜལ་རིགས་གསུམ་མ་ལྕོགས་ན་ཐུན་མོང་གི་མཎྜལ་ཙམ་མམ། སྐུ་གསུམ་མཎྜལ་ཁོ་ན་བྱའོ། །གང་ལྟར་དེའི་རྗེས་འབྲེལ་དུ་མཆོད་པའི་ཡོ་བྱད་སྣ་ཚོགས་པ་

― LT28_Page_0589 ―

^{[མ་དཔེ་གཟིགས་ན་འདིར་གནོན།]}

[Full Size]

འབུལ་བ་ནི། ཨོཾ་ཨཱཿཧཱུྃ། འབྱུང་བ་ཆེན་པོ་ནམ་མཁའ་ཆེ། །འབྱུང་བ་ཆེན་པོ་ལྔ་ཡི་མཛོད། །ནམ་མཁའ་ལ་ནི་འདོད་པ་འབྱུང་། །འདོད་པའི་མཆོད་པ་འབྱུང་གྱུར་ཅིག །ན་མོ་རཏྣ་ཏྲ་ཡཱ་ཡ། ཨོཾ་ན་མོ་བྷ་ག་ཝ་ཏེ། བཛྲ་སྭ་ར་པྲ་མདྷ་ནེ། ཏ་ཐཱ་ག་ཏཱ་ཡ་ཨརྷ་ཏེ་སམྱཀྶཾ་བུངྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཧེ་ཛོ་བཛྲེ། མ་ཧཱ་བིདྱབཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་་བཛྲེ་སརྦ་ཀརྨ་ཨཱ་བར་་བི་ཤོ་དྷ་ན་བཛྲེ་སྭཱ་ཧཱ། །ཞེས་སྔགས་ལན་གསུམ་གྱིས་བྱིན་བརླབས་ལ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །མཆོད་པ་བླ་མེད་རྒྱ་ཆེན་རྣམས་ཀྱིས་མཆོད། །མེ་ཏོག་སྤོས་དང་མར་མེ་ཞལ་ཟས་ཆུ། །བླ་རེ་འཕན་ལྡིང་གདུགས་དང་རོལ་མོའི་སྒྲ། །རྒྱལ་མཚན་རྔ་ཡབ་རྫ་ལྔ་ལ་སོགས་དང་། །ལུས་དང་ལོངས་སྤྱོད་མཁོ་དགུའི་ཡོ་བྱད་ཀྱིས། །འགྲོ་བའི་བླ་མ་དཀོན་མཆོག་སྲས་བཅས་མཆོད། །ལྷ་སོགས་འཇིག་རྟེན་ཀུན་ན་ཡིད་འོང་བའི། །གཞལ་མེད་ཁང་བརྩེགས་རིན་ཆེན་དྲྭ་བ་ཅན། །གླུ་གར་སིལ་སྙན་བསྟོད་དབྱངས་ཆར་འབབ་ཅིང་། །རྒྱན་མཆོག་བརྒྱ་ཕྲག་མངའ་བ་རྣམས་ཀྱིས་མཆོད། །རིན་ཆེན་རི་བོ་ནགས་ཚལ་པདྨའི་མཚོ། །ངང་མོའི་འགྲོས་ཀྱིས་གཉེར་བ་དེ་དག་དང་། །སྨན་སོགས་དྲི་ཞིམ་དང་ལྡང་དཔག་བསམ་ཤིང་། །མེ་ཏོག་འབྲས་བུ་དུད་པའི་ཚོགས་ཀྱིས་མཆོད། །འདབ་སྟོང་གཡོ་བས་བུང་བ་བཟང་

― LT28_Page_0590 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ཡི། །ལག་པའི་གདུ་བུ་ཀུ་མུ་ཏས་མཚན་ཞིང་། །སྤྲིན་བྲལ་ཉི་ཟླའི་ཟེར་གྱིས་རབ་ཕྱེ་བའི། །ཨུཏྤལ་ལ་སོགས་ཡིད་འོང་རྣམས་ཀྱིས་མཆོད། །ཙནྡན་བསིལ་བས་ཁ་ཡི་སྦུབས་བསྐྱོད་པའི། །དྲི་ཞིམ་སེར་བུ་བདེ་བའི་དད་རྣམས་དང་། །ཕུག་དང་བྲག་རི་སྨན་ལྗོངས་ཉམས་དགའ་བ། །ཆུ་བསིལ་རྫིང་བུས་གང་བ་རྣམས་ཀྱིས་མཆོད། །སྟོན་ཀའི་མཚན་མོ་དཀར་བའི་རི་བོང་འཛིན། །གཟའ་བྲལ་རྒྱུ་སྐར་ཕྲེང་བས་བསྐོར་བ་དང་། །ཉིན་བྱེད་འོད་སྟོང་དྲྭ་བས་མཛེས་འབར་བ། །གླིང་བཞིའི་འཇིག་རྟེན་རྒྱན་གྱུར་རྣམས་ཀྱིས་མཆོད། །ཁོར་ཡུག་རི་བཅས་བྱེ་བ་ཕྲག་བརྒྱའི་ཞིང་། །མ་ལུས་ཡོངས་བཀོད་འདོད་དགུས་འབྱོར་བ་དང་། །ཕྱོགས་བཅུའི་ཞིང་ཁམས་རྒྱ་མཚོའི་རྡུལ་སྙེད་ཀུན། །བློ་ཡིས་བླངས་ཏེ་ཐུབ་དབང་སྲས་བཅས་མཆོད། །བུམ་བཟང་དཔག་བསམ་ཤིང་དང་འདོད་འཇོའི་བ། །རྒྱལ་སྲིད་བདུན་དང་བཀྲ་ཤིས་རྫས་བརྒྱད་དང་། །ཉེ་བའི་རིན་ཆེན་བདུན་སོགས་རྒྱ་ཆེ་བས། །ཡོན་གནས་དམ་པ་ཐུགས་རྗེ་ཆེ་རྣམས་མཆོད། །ཏིང་འཛིན་ཡིད་ཀྱིས་ནམ་མཁའི་དབྱིངས་ཁྱབ་པར། །ཕྱི་ནང་གསང་བའི་མཆོད་སྤྲིན་རྒྱ་མཚོས་མཆོད། །མེ་ཏོག་སྤྲིན་མཛེས་ལྡིང་ཁང་མཛེས་འབར་བ། །སྤོས་དང་སྨན་སྦྱར་བདུད་རྩིའི་སྤྲིན་ཕུང་དང་། །གཟི་ལྡན་སྒྲོལ་མ་ཞལ་ཟས་རོལ་མོའི་སྤྲིན། །བསྟོད་དབྱངས་ཡན་ལག་རྒྱ་མཚོའི་སྤྲིན་གྱིས་མཆོད། །འཇུག་

― LT28_Page_0591 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་སྤྲིན་ཅན་ཤིན་ཏུ་མཐའ་ཡས་པ། །སྒེག་མོ་ཕྲེང་ཐོགས་རིན་ཆེན་གླུ་གར་སོགས། །མཆོད་པའི་ལྷ་མོ་སྣ་ཚོགས་སྤྲིན་འཕྲོ་བས། །རྒྱལ་བ་སྲས་བཅས་མ་ལུས་མཉེས་གྱུར་ཅིག །དེ་ནས་སྡིག་པ་བཤགས་པ་ནི་ཉེས་པའི་ལས་ལ་འགྱོད་སེམས་མཆི་མ་འཁྲུགས་པ་ཙམ་དུ་བསྐྱེད་ལ། ཀྱེ་ཀྱེ་བླ་མ་རིན་པོ་ཆེ། །བདག་ལ་རེ་ས་གཞན་ན་མེད། །མགོན་མེད་བདག་ལ་སྐྱབས་མཛོད་ལ། །ཐུགས་རྗེའི་སྤྱན་གྱིས་གཟིགས་སུ་གསོལ། །བདག་ནི་མི་ཤེས་གཏི་མུག་པས། །མ་རིག་འཐིབས་པའི་བདུད་ཀྱིས་མནན། །མགོན་པོ་ཁྱོད་དང་ཁྱོད་ཀྱི་སྲས། །རྡོ་རྗེ་སྤུན་ལ་སོགས་པ་ལ། །བརྙས་ཤིང་མ་དད་སེམས་ལ་སོགས། །རྩ་བ་ཡན་ལག་ཉམས་ལ་སོགས། །སྡོམ་པ་གསུམ་དང་འགལ་བ་རྣམས། །འགྱོད་ཚངས་ཆེན་པོས་དུས་འདིར་བཤགས། །སྐད་ཅིག་ཉིད་ལ་བྱང་བར་མཛོད། །ཀྱེ་མ་འཁོར་བ་ཐོག་མེད་ནས། །མ་འཚལ་བཞིན་ཏུ་སྡིག་བགྱིས་པས། །སྔར་ཡང་འཁོར་བར་རབ་ཏུ་འཁྱམས། །ད་ཡང་འཁྱམས་པར་གྱུར་པ་ལ། །སྐྱབས་དང་སྐྱོབ་པར་མཛད་དུ་གསོལ། །འདི་ལྟར་མི་ཤེས་བྱིས་པ་ལ། །སྐྱོན་གྱུར་མཐོང་ཚེ་ལྷག་པར་ཡང་། །ཐུགས་རྗེས་གཟིགས་པ་འཇུག་པར་རིགས། །འདི་ལྟར་འཇིག་རྟེན་ཕལ་པ་ཡང་། །བུ་ཡིས་ཉེས་པ་གང་བགྱིས་པ། །མ་ཡིས་སེལ་ཞིང་སྐྱོང་ལ་གཟིགས། །ཐུགས་རྗེ་མངའ་དབང་འགྲོ་བའི་ཡབ། །བདག་

― LT28_Page_0592 ―

^{[མ་དཔེ་གཟིགས་ན་འདིར་གནོན།]}

[Full Size]

ཅག་འགྲོ་དྲུག་སེམས་ཅན་རྣམས། །གཟིགས་ནས་ཐུགས་རྗེས་མི་འཛིན་ན། །ཁྱོད་ཀྱི་ཕྲིན་ལས་གདུལ་བྱ་ལ། །ཕན་ཅེས་གྲགས་པ་ཇི་ལྟར་རུང་། །སྔོན་གྱི་རྒྱལ་བ་གྲངས་མེད་ཀྱང་། །བདག་ཅག་སྤངས་ནས་ཐར་པར་གཤེགས། །ཉན་ཐོས་རང་སངས་རྒྱས་རྣམས་ཀྱང་། །གཅིག་པུར་ཞི་ལ་རབ་ཏུ་གཞོལ། །ཁྱོད་ཀྱང་དེ་ལྟར་གཤེགས་མཛད་དམ། །ཕྱོགས་བཅུའི་རྒྱལ་བ་ཐམས་ཅད་ཀྱིས། །ཁྱོད་ལ་བསྐུལ་ནས་བདག་ཅག་གི །དོན་ཏུ་བླ་མར་རྣམ་འཕྲུལ་ན། །ཁྱོད་ཀྱིས་བདག་ཅག་འདོར་ཕོད་དམ། །འཇིགས་པར་སྐྱེལ་མས་བསླུས་པ་བཞིན། །ཁྱོད་ཀྱིས་དེ་རིང་བསླུ་མཛད་དམ། །དེ་ལྟར་ན་ཡང་རང་གི་ལས། །རྣམ་པར་སྨིན་ཅེས་དགོངས་མཛད་ན། །ལས་དང་བྲལ་བ་དེ་དག་ལ། །ཐུགས་རྗེས་དགོངས་ཀྱང་ཅི་ཞིག་འཚལ། ཤ་ཟ་རྣམས་ཀྱང་མཆོད་སྦྱིན་དང་། །བདེན་པའི་ཚིག་ནི་བརྗོད་མ་ཐག །སྔོན་གྱིས་ཁྲོ་བ་འདོར་བགྱིད་ན། །ཁྱོད་ནི་བརྩེ་ཆེན་འགྲོ་བའི་ཡབ། །ཉེས་པ་བཤགས་ལ་ཅིས་མི་དགོངས། །ཡིད་བཞིན་ནོར་བུ་རིན་ཆེན་ཀྱང་། །གསོལ་བ་བཏབ་ན་འདོད་དགུར་སྦྱིན། །ཁྱོད་ནི་བརྩེ་ཆེན་ཐབས་མཁས་ལ། །ཅི་སླད་རེ་བ་སྐོང་མི་མཛད། །ཀྱེ་མ་མགོན་པོ་ཐུགས་རྗེ་ཅན། །བདག་གི་སྡིག་ཀུན་མ་བྱང་བར། །སྐྱེ་བ་གཞན་ཏུ་སོང་གྱུར་ན། །དམྱལ་མེ་བཟོད་ཀས་ཡུན་རིང་བསྲེགས། །དེ་ལྟར་གྱུར་ཀྱང་མི་སྐྱོབ་ན། །སྙིང་རྗེའི་བདག་

― LT28_Page_0593 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཇི་ལྟར་ལགས། །ཀྱེ་མ་ཀྱེ་ཧུད་བདག་གི་སྡིག། མ་ལུས་བྱང་བར་མཛད་དུ་གསོལ། །སྐད་ཅིག་འདི་ལ། །ཐུགས་དགོངས་ལ། །བདག་ལ་དབང་བསྐུར་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །བགེགས་དང་ལོག་འདྲེན་བར་ཆད་སོལ། །ཚེ་འདིར་བསམ་པ་ཀུན་འགྲུབ་ཅིང་། །ཉིན་མཚན་ཆོས་ཀྱིས་འདའ་བ་དང་། །དུས་མིན་འཆི་བ་བཟློག་པ་དང་། །འཆི་ཁར་ནད་གཅོད་མེད་པ་དང་། །བར་དོའི་འོད་གསལ་འབྱོངས་པ་དང་། །མཁའ་སྤྱོད་གནས་སུ་འཁྲིད་པར་མཛོད། །ཅེས་གདུང་བའི་གསོལ་བ་བཏབ་པས། །བདག་གི་ཉམས་ཆགས་བསྐང་ནས་ཤིན་ཏུ་དགྱེས་པར་བསམ་མོ། །ཡན་ལག་ལྷག་མ་ནི། །ཐོག་མེད་དུས་ནས་གོམས་པའི་བག་ཆགས་ཀྱིས། །ལས་དང་ཉོན་མོངས་སྡིག་པ་ཅི་བགྱིས་པ། །སྲིད་པའི་རྒྱུར་གྱུར་དེ་ཀུན་བཤགས་པར་བགྱི། །འགྲོ་བའི་བསོད་ནམས་ཕུང་པོ་མཐའ་ཡས་ལ། །རྟག་པར་བདག་ནི་རྗེས་སུ་ཡི་རང་ངོ་། །མ་ལུས་སྐྱེ་དགུའི་ཚོགས་རྣམས་བསྒྲལ་བའི་ཕྱིར། །ཆོས་ཀྱི་འཁོར་ལོ་བླ་མེད་བསྐོར་བར་བསྐུལ། །དེང་ནས་སྲིད་པའི་རྒྱ་མཚོ་མ་སྟོངས་བར། །མྱ་ངན་མི་འདའ་རྟག་ཏུ་བཞུགས་པར་གསོལ། །དགེ་བ་འདི་ཡིས་བདག་དང་འགྲོ་བ་ཀུན། །མ་ལུས་ཕྱམ་གཅིག་སངས་རྒྱས་འགྲུབ་པར་ཤོག །དེ་ནས་བསྟོད་ཅིང་གསོལ་བ་འདེབས་པ་ནི་གཏེར་ཆེན་རིན་པོ་ཆེས་མཛད་པའི་པ་ཆེན་བི་མ་ལ་དང་ཨོ་རྒྱན་ཆེན་པོ། །ཀུན་མཁྱེན་ཀློང་ཆེན་པའི་གསོལ་

― LT28_Page_0594 ―

^{[མ་དཔེ་གཟིགས་ན་འདིར་གནོན།]}

[Full Size]

འདེབས་ཀྱིས་མཚོན་བླ་མ་སོ་སོའི་སྐུ་བསྟོད་གསོལ་འདེབས་ཀྱི་རིགས་དང་། སྤྱི་ལ་སྙིང་ཐིག་དང་ཡང་ཏིག །སེམས་ཀློང་བརྒྱུད་པའི་གསོལ་འདེབས་ཇི་ཙམ་ནུས་པ་བྱ། ཐམས་ཅད་མ་ནུས་ན་ཡང་ཏིག་ཡིད་བཞིན་ནོར་བུའི་གསོལ་འདེབས་ཡིད་བཞིན་སྤྲིན་ཕུང་བརྒྱད་པའི་ཁ་སྐོང་དང་བཅས་པ་འདི་ཙམ་ཞིག་བྱ་སྟེ། ཨོཾ་ཨཱཿཧཱུྃ། །གདོད་མའི་མགོན་པོ་ཀུན་བཟང་ཡབ་ཡུམ་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །རང་བྱུང་སེམས་ཉིད་འོད་གསལ་སྙིང་པོའི་དོན། །ད་ལྟ་ཉིད་དུ་རྟོགས་པར་བྱིན་གྱིས་རློབས། །ལྷུན་གྲུབ་རྒྱལ་བ་ཞི་ཁྲོ་རབ་འབྱམས་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །རང་གསལ་ཡེ་ཤེས་སྒྲོན་མེ་འོད་པོ་ཆེ། །ད་ལྟ་ཉིད་དུ་མཐོང་བར་བྱིན་གྱིས་རློབས། །བདེ་ཆེན་རྒྱལ་པོ་རྡོ་རྗེ་འཆང་ཆེན་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །འཁོར་འདས་གཞི་གྲོལ་སེམས་ཉིད་ཆོས་སྐུའི་དོན། །ད་ལྟ་ཉིད་དུ་རྟོགས་པར་བྱིན་གྱིས་རློབས། །ཡེ་ཤེས་སྒྱུ་མ་རྡོ་རྗེ་སེམས་དཔའ་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །མི་འགྱུར་ལྷུན་གྲུབ་བདེ་ཆེན་འོག་མིན་ཏུ། །ད་ལྟ་ཉིད་དུ་བགྲོད་པར༴ །དཀྱིལ་འཁོར་མངའ་བདག་ཕྱག་ན་རྡོ་རྗེ་ལ། །གསོལ་བ་འདེབས་སོ༴ །གསང་སྔགས་རྒྱལ་པོ་ཚེ་གཅིག་སངས་རྒྱས་ལམ། །ད་ལྟ་ཉིད་དུ་བགྲོད་པར༴ །རྒྱལ་བའི་རྣམ་སྤྲུལ་དགའ་རབ་རྡོ་རྗེ་ལ། །གསོལ་བ༴ །གདོས་བཅས་ཕུང་པོ་ཡེ་ཤེས་འོད་ལུས་

― LT28_Page_0595 ―

^{[མ་དཔེ་གཟིགས་ན་འདིར་གནོན།]}

[Full Size]

སུ། །ད་ལྟ་ཉིད་དུ་གྲོལ་བར༴ །མཁྱེན་རབ་སྤྲུལ་པ་འཇམ་དཔལ་བཤེས་གཉེན་ལ། །གསོལ་བ༴ །ལས་དང་ཉོན་མོངས་སྡུག་བསྔལ་རྒྱ་མཚོ་ལས། །ད་ལྟ་ཉིད་དུ་སྒྲོལ་བར༴ །བློ་མཆོག་མངའ་བ་ཤྲཱི་སི༚་ཧ་ལ། །གསོལ་བ༴ །ཆོས་ཚུལ་རྒྱ་མཚོ་གསུང་རབ་ནོར་བུའི་གླིང་། །ད་ལྟ་ཉིད་དུ་བགྲོད་པར༴ །དངོས་གྲུབ་མཆོག་བརྙེས་ཛྙཱ་ན་སཱུ་ཏྲ་ལ། །གསོལ་བ༴ །མཆོག་དང་ཐུན་མོང་དངོས་གྲུབ་ཡིད་བཞིན་སྤྲིན། །ད་ལྟ་ཉིད་དུ་འགྲུབ༴ །མཁས་གྲུབ་ཆེན་པོ་བི་མ་མི་ཏྲ་ལ། །གསོལ་བ༴ །མངོན་སུམ་འོད་གསལ་སྣང་བ་རྣམ་པ་བཞི། །ད་ལྟ་ཉིད་དུ་འབྱོངས་པར༴ །རང་བྱུང་ཆེན་པོ་པདྨ་འབྱུང་གནས་ལ། །གསོལ་བ་འདེབས་སོ༴ །བགེགས་དང་ལོག་འདྲེན་བར་ཆད་མ་ལུས་པ། །ད་ལྟ་ཉིད་དུ་ཞི་བར༴ །སེམས་ཉིད་དབང་ཐོབ་ཏིང་འཛིན་བཟང་པོ་ལ༴ །གསོལ་བ༴ ཉིན་མཚན་གཉིས་མེད་འོད་གསལ་ཆེན་པོའི་ངང་། །ད་ལྟ་ཉིད་དུ་འབྱོངས་བར༴ །ཚོགས་ཆེན་གཉིས་རྫོགས་ཆོས་རྒྱལ་ཆེན་པོ་ལ། །གསོལ་བ༴ །འཕགས་པའི་ནོར་བདུན་ཡོན་ཏན་རྒྱལ་སྲིད་མཆོག །ད་ལྟ་ཉིད་དུ་ཐོབ་པར༴ །ཐར་གླིང་སྣང་མཛད་ལྡང་མ་ལྷུན་རྒྱལ་ལ། །གསོལ་བ༴ །འགྲོ་ཀུན་ཕྱམ་གཅིག་བྱང་ཆུབ་སྙིང་པོའི་སར། །ད་ལྟ་ཉིད་དུ་སྒྲོལ་བར༴ །འོད་གསལ་ལུས་གྲུབ་སེང་གེ་དབང་ཕྱུག་ལ། །གསོལ་བ་འདེབས་སོ༴ །འཁྲུལ་སྣང་རང་ཟད་

― LT28_Page_0596 ―

^{[མ་དཔེ་གཟིགས་ན་འདིར་གནོན།]}

[Full Size]

གདོད་མའི་གཞི་དབྱིངས་སུ། །ད་ལྟ་ཉིད་དུ་འཇུག་པར༴ །ལྷུན་གྲུབ་རྒྱལ་པོ་རྒྱལ་བ་ཞང་སྟོན་ལ། །གསོལ་བ༴། སྐུ་དང་ཡེ་ཤེས་འདུ་འབྲལ་མེད་པའི་དོན། །ད་ལྟ་ཉིད་དུ་རྟོགས་པར༴། གསུང་རབ་མཛོད་བརྙེས་མཁས་པ་ཉི་འབུམ་ལ། །གསོལ་བ༴ །ཡེ་ཤེས་ཉི་མས་མ་རིག་མུན་པའི་ཚོགས། །ད་ལྟ་ཉིད་དུ་སངས་པར༴ །དམ་ཆོས་རྒྱས་མཛད་གུ་རུ་ཇོ་འབེར་ལ། །གསོལ་བ༴ །གཞན་དོན་རྫོགས་པའི་ཕྲིན་ལས་རླབས་པོ་ཆེ། །ད་ལྟ་ཉིད་དུ་འགྲུབ་པར་བྱིན་གྱིས་རློབས། །གཟུང་འཛིན་འཁྲུལ་ཞིག་སེང་གེ་རྒྱབ་པ་ལ། །གསོལ་བ༴ །འཁོར་བའི་འཁྲུལ་སྣང་ཚེ་འདིའི་ཞེན་པ་ཀུན། །ད་ལྟ་ཉིད་དུ་ཟད་པར༴ །དངོས་གྲུབ་མཆོག་བརྙེས་གྲུབ་ཆེན་མེ་ལོང་ལ། །གསོལ་བ༴ །དོན་གཉིས་ལྷུན་གྲུབ་འོད་གསལ་ཆོས་ཉིད་དང་། །ད་ལྟ་ཉིད་དུ་ཕྱིན་པར༴ །རིག་འཛིན་ཆེན་པོ་ཀུ་མ་རཱ་ཛ་ལ། །གསོལ་བ༴ །རྟོགས་པའི་འོད་འབར་ཐུགས་རྗེའི་སྤྲིན་ཕུང་མཆོག །ད་ལྟ་ཉིད་དུ་འཆར་བར༴ །འོད་གསལ་སྒྱུ་མ་སྣ་ཚོགས་རང་གྲོལ་ལ། །གསོལ་བ༴ །སྣང་སྲིད་སྣོད་བཅུད་རྨི་ལམ་སྒྱུ་མ་རུ། །ད་ལྟ་ཉིད་དུ་འབྱོངས་པར༴ །མཁས་གྲུབ་ཆེན་པོ་ཁྱབ་བརྡལ་ལྷུན་གྲུབ་ལ། །གསོལ་བ༴ །བྱམས་དང་སྙིང་རྗེའི་བྱང་ཆུབ་སེམས་མཆོག་འདི། །ད་ལྟ་ཉིད་དུ་འབྱོངས༴ །རྒྱལ་སྲས་སྤྲུལ་སྐུ་གྲགས་པ་འོད་ཟེར་ལ། །གསོལ་བ༴ །འོད་གསལ་རྡོ་རྗེ་སྙིང་པོའི་བསྟན་པ་འདི། །

― LT28_Page_0597 ―

^{[མ་དཔེ་གཟིགས་ན་འདིར་གནོན།]}

[Full Size]

ད་ལྟ་ཉིད་དུ་རྒྱས་པར༴ །འཁྲུལ་ཞིག་ཆེན་པོ་སངས་རྒྱས་དབོན་པོ་ལ། །གསོལ་བ༴ །སྙིང་པོ་མེད་པ་ཚེ་འདིའི་བྱ་བ་ཀུན། །ད་ལྟ་ཉིད་དུ་ཐོབ་པར༴ །རྟ་མཆོག་སྤྲུལ་པ་ཟླ་བ་གྲགས་པ་ལ། །གསོལ་བ༴ །འཁོར་འདས་ཆོས་ཀུན་ཐིག་ལེ་ཉག་གཅིག་ཏུ། །ད་ལྟ་ཉིད་དུ་རྟོགས་པར༴ །མཚུངས་མེད་གྲུབ་ཆེན་ཀུན་བཟང་རྡོ་རྗེ་ལ། །གསོལ་བ༴ །དབྱིངས་རིག་དབྱེར་མེད་འོད་གསལ་ཆོས་སྐུའི་དོན། །ད་ལྟ་ཉིད་དུ་རྟོགས་པར༴ །ཟབ་ལམ་རྒྱས་མཛད་ཀུན་དགའ་རྒྱལ་མཚན་ལ། །གསོལ་བ༴ །ཆོས་ཀུན་མཉམ་ཉིད་འོད་གསལ་ཀློང་ཡངས་སུ། །ད་ལྟ་ཉིད་དུ་གྲོལ་བར༴ །བསྟན་པའི་སྒྲོན་མེ་སྣ་ཚོགས་རང་གྲོལ་ལ། །གསོལ་བ༴། གཟུང་འཛིན་འཁྲུལ་རྟོག་གདོད་མའི་མཁའ་དབྱིངས་སུ། །ད་ལྟ་ཉིད་དུ་དྭངས་པར༴ །འཁྲུལ་ཞིག་ཆེན་པོ་བསྟན་འཛིན་གྲགས་པ་ལ། །གསོལ་བ༴ །སྣང་བཞི་མཐར་ཕྱིན་ཡེ་ཤེས་འོད་ཀྱི་ལུས། །ད་ལྟ་ཉིད་དུ་འགྲུབ་པར༴ །ཤེས་བྱ་ཀུན་གཟིགས་མདོ་སྔགས་བསྟན་འཛིན་ལ། །གསོལ་བ༴ །རང་དོན་རྫོགས་ནས་ཕྲིན་ལས་རླབས་པོ་ཆེ། །ད་ལྟ་ཉིད་དུ༴ །གནུབས་ཆེན་ཡང་སྲིད་ཕྲིན་ལས་ལྷུན་གྲུབ་ལ། །གསོལ་བ༴ སྣང་གསལ་ཀ་དག་ཆོས་ཉིད་ཟད་ས་རུ། །ད་ལྟ་ཉིད་དུ་འཁྱོལ་བར༴ །ཁམས་གསུམ་ཆོས་ཀྱི་རྒྱལ་པོ་གཏེར་བདག་གླིང་། །གསོལ་བ༴ །དོན་གཉིས་མཐར་ཕྱིན་ཕྲིན་ལས་རྣམ་པ་བཞི། །ད་ལྟ་

― LT28_Page_0598 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་དུ་འགྲུབ་པར༴ །བི་མའི་རྣམ་འཕྲུལ་རིན་ཆེན་རྣམ་རྒྱལ་ལ། །གསོལ་བ༴ །བསྟན་འགྲོར་ཕན་པའི་བསམ་སྦྱོར་རླབས་པོ་ཆེ། །ད་ལྟ་ཉིད་དུ་སྐྱེ་བར༴། མཚོ་རྒྱལ་དངོས་སྣང་མི་འགྱུར་དཔལ་སྒྲོན་ལ། །གསོལ་བ༴ །འཁྲུལ་རྟོག་རླུང་སེམས་ཆོས་ཉིད་ཟད་པའི་ངང་། །ད་ལྟ་ཉིད་དུ་སྟོང་པར༴ །གཡུ་སྒྲའི་སྒྱུ་འཕྲུལ་ཨཽ་ཌཱི་ཡཱ་ན་ལ། །གསོལ་བ༴ །གཟུང་རྟོག་ཡུལ་སྣང་བདེན་མེད་གཞི་བྲལ་དང་། །ད་ལྟ་ཉིད་དུ་གྲོལ་བར༴ །འཇམ་དཔལ་རྣམ་རོལ་ཕྲིན་ལས་རྣམ་རྒྱལ་ལ། །གསོལ་བ༴ །འཛིན་རྟོག་རིག་པ་སྟོང་གསལ་ཟང་ཐལ་དང་། །ད་ལྟ་ཉིད་དུ་གྲོལ་བར༴ །ཉམས་རྟོགས་དབང་ཕྱུག་ཕྲིན་ལས་ཆོས་སྒྲོན་ལ། །གསོལ་བ༴། བྱ་བྲལ་ཆོས་ཉིད་ཀློང་དུ་བདག་འཛིན་ཀུན། །ད་ལྟ་ཉིད་དུ་ཞིག་བར༴ །ཐམས་ཅད་མཁྱེན་པ་མཉྫུ་གྷོ་ཥ་ལ། །གསོལ་བ༴ །མ་ངེས་སྤྲུལ་པས་མཁའ་ཁྱབ་འགྲོ་བའི་དོན། །ད་ལྟ་ཉིད་དུ་འགྲུབ་པར༴ །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ༴ །ཡེ་གྲོལ་གཉུག་མ་བློ་ལས་འདས་པའི་ཞལ། །ད་ལྟ་ཉིད་དུ་མཇལ་བར༴ །དཀྱུས་སུ་མི་དགོས་ཀྱང་བླ་མ་མཆོད་པའི་སྐབས་བརྒྱུད་པ་གཞན་མདོར་བསྡུས་ཏེ་ཁ་བསྐང་བར་སྤྲོ་ན། །ཏིང་འཛིན་བཟང་པོ་བློ་གྲོས་དབང་ཕྱུག་དང་། །རིན་ཆེན་འབར་བ་ལྷུན་གྱི་རྒྱལ་མཚན་སོགས། །གསང་སྐོར་བརྒྱུད་པའི་བླ་མར་གསོལ་བ༴། །ཆོས་ཉིད་ཟད་སར་འཁྱོལ་བར་བྱིན༴ །བཻ་རོ་ཙ་ན་

― LT28_Page_0599 ―

^{[མ་དཔེ་གཟིགས་ན་འདིར་གནོན།]}

[Full Size]

སྤང་སྟོན་མེ་ཕམ་མགོན། །བྱང་ཆུབ་རྒྱལ་མཚན་རིན་ཆེན་དབྱིག་ལ་སོགས། །ཀློང་སྡེ་བརྒྱུད་པའི་བླ་མར༴ །གདོས་བཅས་འོད་དུ་དེངས་པར་བྱིན༴ །བཻ་རོ་གཡུ་སྒྲ་ཆོས་རྒྱལ་ཁྲི་ལྡེའི་ཞབས། །གཉགས་དང་གནུབས་སོ་ཟུར་པ་མེས་དབོན་སོགས། །སེམས་སྡེ་བརྒྱུད་པའི་བླ་མར༴། འཁྲུལ་སྣང་གཞི་ཐོག་གྲོལ་བར༴ །པདྨ་ལས་འབྲེལ་རྒྱལ་སྲས་ལེགས་པ་དང་། །ངག་གི་དབང་པོ་རང་བྱུང་རྡོ་རྗེ་སོགས། །སྙིང་ཐིག་བརྒྱུད་པའི༴། སྣང་བཞི་མཐའ་རུ་ཕྱིན་པར་བྱིན་གྱིས་རློབས། །ཁྱབ་བརྡལ་ལྷུན་གྲུབ་ནས་འདི་པར་ཁ་སྐོང་དུ་བགྱིས་པའོ། །གཞན་ཡང་ཕྱོགས་བཅུའི་རྒྱལ་བ་སྲས་བཅས་དང་། །ཉན་ཐོས་རང་རྒྱལ་འཕགས་པའི་ཚོགས་རྣམས་དང་། །ཆོས་མཛད་ཡོངས་ལ་གུས་པས་གསོལ༴ །ཐུགས་རྗེས་གཟིགས་ཤིང་བྱིན་གྱིས་བརླབ་ཏུ་གསོལ། །ཀྱེ་མ་ཀྱེ་ཧུད་ཉམ་ཐག་བདག་ལྟ་བུ། །ལས་དང་ཉོན་མོངས་བཟོད་དཀས་ཡུན་རིང་མནར། །འདི་ལ་བརྩེ་ཆེན། ཐུགས་རྗེའི་ཕྱག་རྐྱོངས་ལ། །ད་ལྟ་ཉིད་དུ་དྲངས་བར་མཛད་དུ་གསོལ། །རང་ཉིད་ཡེ་ནས་སངས་རྒྱས་ཡིན་མོད་ཀྱང་། །མ་རིག་འཁྲུལ་པས་སྲིད་པ་འདིར་འཁྱམས་ཏེ། །རྨི་ལམ་ལྟ་བུའི་འཁོར་བ་ཉམ་རེ་ཐག །འདི་ལ་སྐྱོབ་དང་བསྐྱབ་པར་མཛད་དུ་གསོལ། །བདག་དང་མཐའ་ཡས་སེམས་ཅན་ཐམས་ཅད་ཀྱི། །འཁོར་བའི་རྒྱ་མཚོ་མཐའ་མེད་བརྒལ་དཀའ་བར། །ཡེ་ཤེས་གྲུ་ཆེན་བླ་ན་མེད་པ་ཡིས། །སྡུག་

― LT28_Page_0600 ―

^{[མ་དཔེ་གཟིགས་ན་འདིར་གནོན།]}

[Full Size]

བསྔལ་ཆུ་བོ་སྒྲོལ་བར་མཛད་དུ་གསོལ། །ཡུན་རིང་དུས་ནས་གོམས་པའི་བག་ཆགས་གཟུགས། །འཁྲུལ་སྣང་གཟུང་འཛིན་རི་རྒྱལ་ལྷུན་མཐོ་བ། །རྣམ་གྲོལ་མཆོག་གི་ཡེ་ཤེས་རྡོ་རྗེ་ཡིས། །ད་ལྟ་ཉིད་དུ་གཞིག་པར་མཛད༴། མ་རིག་མུན་པ་ཤིན་ཏུ་འཐིབས་པ་ཆེ། །རྒྱུན་རིང་རྟག་དཀའ་ཕ་མཐའ་མི་མངོན་ཞིང་། །འོད་གསལ་སྙིང་པོའི་སྒྲིབ་པ་རླབས་ཆེན་འདི། །ཡེ་ཤེས་ཟེར་གྱིས་བསལ་བར༴ །ཇི་ཙམ་འབད་ཀྱང་ཉོན་མོངས་སྡུག་བསྔལ་རྒྱུ། །སྙིང་པོ་མེད་པའི་འཇིག་རྟེན་བྱ་བ་ལས། །བདག་གི་ཡིད་ནི་རབ་ཏུ་བཟློག་ནས་ཀྱང་། །ཉིན་མཚན་ཆོས་ཀྱིས་འདའ་བར་མཛད་དུ་གསོལ། །ཚུལ་མིན་ཡིད་བྱེད་ཆུ་རླབས་གཉེར་འདྲ་བ། །ཀུན་རྟོག་སྣ་ཚོགས་ཡུལ་ལྔའི་རྗེས་སུ་འབྲང་། །ཚོགས་བརྒྱད་བག་ཆགས་ཀུན་གཞིར་བཅས་པ་ཀུན། །ཆོས་ཀྱི་དབྱིངས་སུ་ཞི་བར་མཛད་དུ་གསོལ། །རྟོག་བཅས་བག་ཆགས་འདོད་པའི་སེམས་ཉོན་མོངས། །གསལ་བ་གཟུགས་དང་མི་རྟོག་གཟུགས་མེད་ཀྱི། །སྲིད་པའི་སེམས་གང་བག་ཆགས་རྗེས་འབྲེལ་བ། །དེ་དག་ཐམས་ཅད་དག་པར་མཛད༴། རང་དོན་གོམས་པ་ལྷུར་ལེན་དམན་པའི་བློ། །གཅིག་པུ་ཞི་བ་གཉེར་ལས་བཟློག་ནས་ཀྱང་། །ཕྱི་ནང་གསང་བའི་ཆོས་མཆོག་ལམ་ཞུགས་པ། །རླབས་ཆེན་གཞན་དོན་འགྲུབ་པར༴ །ལམ་གོལ་ལོག་དང་དམན་པའི་འགྲོ་ཀུན་གྱི། །ལས་དང་ཉོན་མོངས་བག་ཆགས་རབ་སྦྱངས་ཏེ། །

― LT28_Page_0601 ―

^{[མ་དཔེ་གཟིགས་ན་འདིར་གནོན།]}

[Full Size]

སེམས་རྟ་ཡིད་བཞིན་ཐར་པའི་གྲོང་ཁྱེར་དུ། །མ་ལུས་ཕྱམ་གཅིག་བགྲོད་པར་མཛད༴ །སྒྲིབ་པའི་རྒྱ་མཚོ་ཤིན་ཏུ་རྙོག་པ་ཅན། །དུས་རིང་ཐོག་མཐའ་མེད་ནས་ཉེར་གནས་པ། །བདག་ཅག་མཐུ་ཡིས་ཐར་པའི་སྐབས་མེད་པས། །བརྩེ་ཆེན་ཁྱོད་ཀྱིས་སྒྲོལ་བར༴ །ཤུགས་དྲག་བཟོད་པར་དཀའ་བའི་ཉོན་མོངས་དང་། །སྡུག་བསྔལ་མང་ལྡན་སྲིད་པའི་ཟུག་རྔུ་དང་། །བག་མེད་གཞན་དབང་ལེ་ལོའི་འཇིགས་པ་ལས། །དེ་རིང་ཉིད་ནས་ངེས་པར་བསྐྱབ་ཏུ་གསོལ། །སྙིང་ནས་སྙིང་པོ་མེད་པའི་ཆོས་རྣམས་ལ། །མི་རྟག་མི་བརྟན་སྒྱུ་མའི་བསླུ་བྲེད་དུ། །ངེས་པར་རྟོགས་ནས་ངེས་འབྱུང་སྐྱོ་ཤས་སྐྱེས། །ཉིན་མཚན་ཀུན་ཏུ་འདའ་བར་མཛད་དུ་གསོལ། །འཕགས་པའི་རི་ངོགས་དབེན་ཞིང་ཉམས་དགའ་བར། །རིག་དང་མངོན་ཤེས་ཏིང་འཛིན་མཆོག་གྲུབ་ནས། །དོན་གཉིས་ལྷུན་གྲུབ་བདེ་ཆེན་མཁའ་སྤྱོད་དུ། །ཚེ་འདི་ཉིད་ལ་ཕྱིན་པར་མཛད་དུ་གསོལ། །གཅིག་པུར་བསྲན་ཚུགས་སྒྲུབ་ལ་བརྩོན་པ་དང་། །ཚེ་འདིའི་ཕྱོགས་སུ་སྐད་ཅིག་མ་ཡེངས་ཤིང་། །གོང་མའི་རྗེས་སྙོགས་དངོས་གྲུབ་མཐར་ཕྱིན་ཏེ། །རྟག་ཏུ་བླ་མ་མཉེས་པར་མཛད༴ །དམ་ཚིག་སྡོམ་པ་ཉམས་ཆགས་མེད་པ་དང་། །ལྟ་སྒོམ་སྤྱོད་འབྲས་མ་ནོར་དོན་རྟོགས་ནས། །ཉིན་མཚན་འོད་གསལ་ངང་ལས་མི་གཡོ་ཞིང་། །རང་གཞན་དོན་གཉིས་འགྲུབ་པར༴ །སྣང་སྲིད་རྣམ་དག་བསྐྱེད་

― LT28_Page_0602 ―

^{[མ་དཔེ་གཟིགས་ན་འདིར་གནོན།]}

[Full Size]

རྫོགས་མཐར་ཕྱིན་ཞིང་། །མཁའ་འགྲོ་དམ་ཅན་རྒྱ་མཚོ་སྤྲིན་བཞིན་འདུ། །དངོས་གྲུབ་རྣམ་གཉིས་ཆར་བཞིན་འབབ་པ་དང་། །ཕྲིན་ལས་རྣམ་བཞི་འགྲུབ་པར༴ །དག་སྣང་མོས་གུས་ཕྱོགས་མེད་འཆར་བ་དང་། །བྱམས་དང་སྙིང་རྗེ་རྒྱུན་ཆད་མེད་པ་དང་། །ལྟ་སྒོམ་ཉམས་རྟོགས་ཡོན་ཏན་འབར་བ་དང་། །འགྲོ་དོན་ཕྱོགས་མེད་འགྲུབ་པར༴ །བདག་གི་མོས་དགེ་ཕུན་ཚོགས་འདི་ཡིས་ནི། །འགྲོ་ཀུན་མ་ལུས་ཕྱམ་གཅིག་ཡོངས་གྲོལ་ནས། །བདེ་ཆེན་ལྷུན་གྲུབ་ཀུན་ཏུ་བཟང་པོའི་ཞིང་། །ཚེ་འདི་ཉིད་ལ་བགྲོད་པར་མཛད་དུ་གསོལ། །ཞེས་པ་འདིའང་ལོངས་སྐབས་སོགས་ཀྱིས་མ་ལྕོགས་ན་ཡང་ཏིག་དང་སྙིང་ཐིག་བརྒྱུད་འདེབས་གཏེར་ཆེན་རིན་པོ་ཆེས་མཛད་པ་ཙམ་བྱས་ཀྱང་ཆོག་གོ། །དེ་ནས་དམ་ཚིག་བཟུང་བ་ནི་ཐལ་མོ་སྦྱར་ཏེ། །བླ་མ་རྡོ་རྗེ་འཛིན་པ་དང་། །རིགས་ལྔ་བདེ་བར་གཤེགས་པ་ནི། །ཐམས་ཅད་བདག་ལ་དགོངས་སུ་གསོལ། །དེང་ནས་བྱང་ཆུབ་སྙིང་པོའི་བར། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །བླ་མ་ལ་ཡང་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །དགེ་བ་ཀུན་ལ་རྗེས་ཡི་རང་། །བྱང་ཆུབ་སེམས་ནི་བསྐྱེད་པར་བགྱི། །རིགས་ལྔའི་དམ་ཚིག་ལེགས་བཟུང་སྟེ། །རྡོ་རྗེ་དྲིལ་བུ་ལ་སོགས་པ། །དམ་ཚིག་རྫས་རྣམས་བཟུང་བར་བགྱི། །བླ་ན་མེད་པའི་དཀོན་མཆོག་གསུམ། །ནམ་དུ་ཡང་ནི་མི་གཏོང་ཞིང་། །

― LT28_Page_0603 ―

^{[མ་དཔེ་གཟིགས་ན་འདིར་གནོན།]}

[Full Size]

རྡོ་རྗེ་སློབ་དཔོན་མི་སྤང་ངོ། །རྡོ་རྗེ་སྤུན་སྲིང་རྣམས་ལ་ཡང་། །ནམ་ཡང་སྨད་པར་མི་བྱའོ། །སེམས་ཅན་རྣམས་ལ་འཚེ་བ་སྤང་། །འཕགས་པ་རྣམས་ལ་སྨད་མི་བགྱི། །ཐེག་པ་དམན་ལ་མི་བརྙས་ཤིང་། །སྔགས་འཆང་སྤང་བར་མི་བྱའོ། །བསྙེན་སྒྲུབ་ལས་ཀྱི་མཐའ་གཟུང་ཞིང་། །དཀྱིལ་འཁོར་འཁོར་ལོ་བསྒོམ་པར་བགྱི། །དམ་ཚིག་སྡོམ་པ་ལ་གནས་ཤིང་། །འཁྲུལ་པའི་བྱ་བ་མི་བགྱིད་དོ། །རང་གི་སེམས་ནི་ཡོངས་འདུལ་ཞིང་། །ཕྱོགས་མཐར་གཏུགས་པའི་སེམས་ཅན་གྱི། །དོན་ནི་བླ་མེད་བདག་གིས་བསྒྲུབ། །མ་གྲོལ་བ་རྣམས་དགྲོལ་བ་དང་། །མ་བརྒལ་བ་རྣམས་བསྒྲལ་བར་བགྱི། །དབུགས་མ་ཕྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་བྱ། །དེ་ནས་རྗེས་ཀྱི་ཡན་ལག་བདུན་པ་ལ་འཇུག་ཀྱང་ཆོག་ལ། །གལ་ཏེ་ཚོགས་ཡོད་ན་བྱིན་གྱིས་བརླབ་པ་ནི། ཨོཾ་ཨཱཿཧཱུྃ་གིས་བྱིན་གྱིས་བརླབས་པའི་ནང་མཆོད་འཐོར་ལ། །རིག་པའི་ཡེ་ཤེས་མེ་རླུང་ཆུ་བྱུང་བས། །མཚན་འཛིན་དྲི་མ་ཀུན་སྦྱངས་སྟོང་གསལ་སྣོད། །མཁའ་མཉམ་ནང་དུ་ཡེ་ཤེས་འོད་གསལ་ཚོགས། །ལྷུན་རྫོགས་འདོད་ཡོན་ཅི་ཡང་འཆར་བར་གྱུར། ཨོཾ་ཨཱཿཧཱུྃ། ལན་གསུམ་བརྗོད་ལ་ཚོགས་ཀྱི་བྱིན་འབེབས་པ་ནི། ཨོཾ་ཨཱཿཧཱུྃ། །འཁོར་འདས་མཉམ་ཉིད་ཐིག་ལེ་བརྡལ་བ་ཆེ། །ལྷུན་གྲུབ་རིག་པ་དོན་གྱི་འོག་མིན་ནས། །སྐུ་དང་ཡེ་ཤེས་འདུ་

― LT28_Page_0604 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲལ་མེད་པའི་དཔལ། །རིག་འཛིན་བླ་མ་རྒྱལ་བའི་དཀྱིལ་འཁོར་རྣམས། །སྣང་གསལ་དབྱིངས་ལ་གཤེགས་བཞུགས་མི་མངའ་ཡང་། །ཐུགས་རྗེའི་གདུང་ཐག་མོས་པའི་བུ་ལ་དགོངས། །བྱིན་ཆེན་ཕོབས་ལ་དབང་ཆེན་རབ་འབྱམས་སྐུར། །སྣོད་བཅུད་ཐམས་ཅད་རང་སྣང་ལོངས་སྐུའི་ཞིང་། །དམ་རྫས་ཡེ་ཤེས་འཁོར་ལོར་བྱིན་གྱིས་རློབས་ཤིག །བཛྲ་ས་མ་ཡ་ཨཱ་བེ་ཤ་ཡ་ཨ་ཨཱཿ ཛཿཧཱུྃ་བྃ་ཧཱུྃཿ དེ་ནས་ཚོགས་ཕུད་འབུལ་ལ། ཨོཾ་ཨཱཿཧཱུྃ། ཚངས་ཆེན་ཞིང་གི་ཕྱི་སྣོད་ཡངས་པ་རུ། །དག་དང་མ་དག་སྣང་བ་ཚོགས་སུ་གྲུབ། །བླ་མ་སྤྲུལ་སྐུ་རང་བྱུང་ཀློང་དུ་འབུལ། །འཁྲུལ་སྣང་གཞི་ཐོག་གྲོལ་བར་མཛད་དུ་གསོལ། །རླུང་ལྔའི་དྭངས་བཅུད་འདུས་པའི་དབུ་མ་རུ། །བདེ་ཆེན་དགའ་བ་བཅུ་དྲུག་དམ་རྫས་བསྐྱིལ། །བླ་མ་ལོངས་སྐུ་རང་གསལ་ཀློང་དུ་འབུལ། །ཟག་མེད་ཡེ་ཤེས་རྒྱས་པར་མཛད་དུ་གསོལ། །ཆོས་ཅན་རྩ་བྲལ་ནམ་མཁའི་ཀློང་ཡངས་སུ། །ཡེ་གྲོལ་ཆོས་ཉིད་རིས་མེད་མཆོད་པའི་སྤྲིན། །བླ་མ་ཆོས་སྐུ་རང་གྲོལ་ཀློང་དུ་འབུལ། །སྐྱེ་འཆིའི་གཞི་རྩ་སྟོང་པར་མཛད་དུ་གསོལ། །མངོན་སུམ་རང་སྣང་སྒྲོན་མ་འབར་བ་རུ། །ཉམས་སྣང་གོང་འཕེལ་ཡེ་ཤེས་འདོད་ཡོན་འཕྲོ། །རིག་པ་སྐུར་སྨིན་བླ་མའི་ཚོགས་ལ་འབུལ། །ཆོས་ཟད་བློ་ལས་འདས་པའི་དངོས་གྲུབ་སྩོལ། ཨོཾ་ཨཱཿཧཱུྃ། །ཕྱོགས་བཅུ་དུས་བཞིའི་རྩ་བ་དང་བརྒྱུད་པར་

― LT28_Page_0605 ―

^{[མ་དཔེ་གཟིགས་ན་འདིར་གནོན།]}

[Full Size]

བཅས་པའི་བླ་མ་དམ་པ། རྒྱལ་བ་དགོངས་པས་བརྒྱུད་པ། རིག་འཛིན་བརྡ་ཡིས་བརྒྱུད་པ། གང་ཟག་སྙན་ཁུང་བརྒྱུད་པ་ཐམས་ཅད་དང་། ཡི་དམ་དཀྱིལ་འཁོར་གྱི་ལྷ་ཚོགས། མཁའ་འགྲོ་སྡེ་ལྔ་དམ་ཅན་རྒྱ་མཚོའི་ཚོགས་དང་བཅས་པ་འཁོར་བ་དང་མྱ་ངན་ལས་འདས་པའི་མགྲོན་ཐམས་ཅད་ཀྱི་ཞལ་དུ་ག་་ཙཀྲ་ཁཱ་ཧི། ལན་གསུམ་འབུལ། བདག་ཅག་མ་རིག་འཁྲུལ་བའི་དབང་གྱུར་བས། །སྐུ་གསུང་ཐུགས་དང་རྩ་བ་ཡན་ལག་གི། དམ་ལས་འགལ་ཞིང་ཉམས་པ་གྱུར་ཏོ་འཚལ། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །ཐོག་མེད་བག་ཆགས་འཁྲུལ་པའི་དབང་གྱུར་པས། །ཚོར་དང་མ་ཚོར་ཉམས་ཆགས་ཅི་མཆིས་པ། །ཐུགས་རྗེ་ཆེན་པོའི་སྤྱན་སྔར་བཤགས་པར་བགྱི། །ཚངས་པ་དོན་གྱི་དངོས་གྲུབ་སྩལ་དུ་གསོལ། །བསྙེན་སྒྲུབ་མ་ཚང་ཕུད་དང་གཙང་སྦྲ་ཉམས། །དུས་སུ་མ་མཆོད་ལེ་ལོ་གསོག་འཇོག་བགྱིས། །ལྟ་བ་མ་རྟོགས་སྒོམ་པ་མ་གསལ་ཞིང་། །སྤྱོད་པ་བག་མེད་བགྱིས་པ་མཐོལ་ལོ་བཤགས། །བླ་མ་མཆེད་ལྕམ་རྡོ་རྗེ་སྤུན་ལ་སྨད། །སྡིག་དང་ཉོན་མོངས་རང་གར་གྱུར་ཏོ་འཚལ། །འཕྲལ་དང་ཡུན་གྱི་སྒྲིབ་པ་ཅི་མཆིས་པ། །རང་གནོང་འགྱོད་པའི་སེམས་ཀྱིས་མཐོལ་ལོ༴ །ཚངས་པ་དོན་གྱི་དངོས་གྲུབ་སྩལ་དུ་གསོལ། ཧོཿརང་བཞིན་ངང་ལ་ཉེས་པའི་སྐྱོན་མེད་པས། །བཤགས་དང་བཤགས་

― LT28_Page_0606 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བྱ་བ་ཅུང་ཟད་མེད། །ཀུན་རྫོབ་སྒྱུ་མ་ཙམ་དུ་བཤགས་ན་ཡང་། །གཉིས་མེད་སེམས་ཀྱི་ངང་དུ་དག་གྱུར་ཅིག །གཉིས་སུ་བཟུང་བ་རང་བཞིན་ཉམས་པའི་རྒྱུ། །གཉིས་མེད་དབྱིབས་སུ་ཡེ་ནས་ལྷུན་གྲུབ་པས། །ཐམས་ཅད་མཁའ་མཉམ་རྫོགས་པ་ཆེན་པོའི་ངང་། །མ་སྐྱེས་རྣམ་པར་དག་པའི་ཆོས་ཉིད་དོ། །ཞེས་ནོངས་པཱ་བཤགས། བརྡ་དང་བརྡའི་འབུལ་ལེན་དང་བཅས་པས་རྣལ་འབྱོར་པ་རྣམས་ནང་གི་སྦྱིན་སྲེག་མངོན་ཏུ་བྱས་ཏེ་ཚོགས་ལ་རོལ་བ་ནི། ཧོཿ བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚང་བའི་ངོ་བོ་སྟེ། །དམ་པ་རིགས་བརྒྱའི་དཀྱིལ་འཁོར་ལྷ། །འགུལ་བསྐྱོད་ཐམས་ཅད་བདེ་བ་ཆེ། །རྡོ་རྗེའི་དམ་ཚིག་བླ་ན་མེད། །བྱང་ཆུབ་སེམས་ཀྱི་སྤྲིན་ཆེན་པོ། །གཉིས་མེད་མཉམ་པའི་ངང་དུ་རོལ། །རྣལ་འབྱོར་ལམ་གྱི་ཚོགས་རྫོགས་ནས། །ཟས་ཀྱི་སྒྲིབ་པར་མི་འགྱུར་ཞིང་། །གཏན་པ་མེད་པའི་སྦྱིན་བདག་ཀྱང་། །ཐེག་ཆེན་འབྲས་བུར་སྤྱོད་པར་ཤོག །ཅེས་བརྗོད་ཅིང་བསམས་ལ་ཆོས་ཉིད་བརྡལ་ཁྱབ་ཆེན་པོའི་ངང་དུ་ལོངས་སྤྱོད། །བླ་མ་བརྒྱུད་པ་རྣམས་ཀྱི་གསུང་མགུར་སོགས་རྡོ་རྗེའི་གླུ་ཅི་རིགས་པ་བླང་ཞིང་། བསྡུ་ན་ཉི་ཟླ་ཁ་སྦྱོར་ཆེན་པོའི་རྡོ་རྗེའི་ཚིག་བླང་བ་ནི། ཨེ་མ་ཀི་རཱི་ཀི་རཱི། མཥྚ་བཱ་ལི་བཱ་ལི། །ས་མི་ཏྲ་སུ་རུ་སུ་རུ། །ཀུ་ཏཱ་ལི་མ་སུ་མ་སུ། ཨེ་ཀ་ར་སུ་ལེ་བྷ་ཏ་ཡེ། ཙ་ཀི་ར་བྷུ་ལི་ས་ལ་ཡེ། ས་མུནྟ་ཙ་རྱ་གྷ་ཡཻ། བྷེ་ཏ་ས་ན་བྷྱཿཀུ་ལི་ཡཻ། ས་ཀ་རི་དྷཱུ་ཀ་ན། མ་ཏ་རི་བཻ་ཏ་ན། བར་ལི་ཧི་ས་ན། མཁརྟ་ཀི་ལ་ནཱི། སཾ་བྷ་

― LT28_Page_0607 ―

^{[མ་དཔེ་གཟིགས་ན་འདིར་གནོན།]}

[Full Size]

ར་ཏ་མེ་ཀ་ཙ་རྟཾ་པ། སུ་རྱབྷ་ར་ཨེ་པ་ཤ་ན་ས། དྲན་བྷི་ཏི་བ་གྷུ་རཱ་ལ་ས། མ་སྨིན་པ་གུ་ལི་ཏ་ཡ་པ། འགུ་རཱ་འགུ་རཱ་སག་ཁ་ར་ན་ལཱི། ན་ར་ནཱ་ར། ཨི་ཐ་ར་པ་ཊ་ལཾ། སིར་ན་སིར་ན་བྷེ་ས་རས་པ་ལམ། །བྷུན་དྷ་བྷུན་དྷ་ཚིཥཱ་པ་ཀེ་ལམ། ས་སཱ། རི་རཱི། ལི་ལཱི། ཨི་ཨཱི། མི་མཱི། ར་ར་རཱ། ཞེས་དང་། མ་སྐྱེས་པས་ན་མི་འགག་ཅིང་། །འགྲོ་དང་འོང་མེད་ཀུན་ཏུ་ཁྱབ། །བདེ་ཆེན་ཆོས་མཆོག་མི་གཡོ་བ། །མཁའ་མཉམ་རྣམ་གྲོལ་གོས་པ་མེད། །རྩ་བ་མེད་ཅིང་རྟེན་མེད་ལ། །གནས་མེད་ལེན་མེད་ཆོས་ཆེན་པོ། །ཡེ་གྲོལ་ལྷུན་མཉམ་ཡངས་པ་ཆེ། །བཅིངས་མེད་རྣམ་པར་བཀྲོལ་མེད་པ། །ཁྱབ་བརྡལ་ཁང་བཟང་ཡེ་ཡོད་ཉིད། །ཁྱབ་མཉམ་པ་ལས་རྣམ་འདས་པ། །ཡངས་སོ་ཆེའོ་ནམ་མཁའི་དབྱིངས། །ཆོས་ཆེན་འབར་བ་ཉི་ཟླའི་དཀྱིལ། །ལྷུན་གྱིས་གྲུབ་དང་མངོན་སུམ་པ། །རྡོ་རྗེ་རི་བོ་པདྨ་ཆེ། །ཉི་མ་སེང་གེ་ཡེ་ཤེས་སྐུ། །སྒྲ་ཆེན་རོལ་མོ་མཚུངས་པ་མེད། །ནམ་མཁའི་མཐའ་ལ་ལོངས་སྤྱོད་པ། །སངས་རྒྱས་སངས་རྒྱས་ཀུན་མཉམ་ཞིང་། །ཀུན་བཟང་ཡངས་པ་ཆོས་ཀྱི་རྩེ། །མཁའ་དབྱིངས་བཟང་མོའི་དབྱིངས་རུམ་དུ། །ཀློང་གསལ་ལྷུན་གྲུབ་ཡེ་རྫོགས་ཆེ་ཧོཿ། ཞེས་བླངས་ཤིང་ཟབ་མོའི་དོན་ལ་མཉམ་པར་བཞག །མཐར་ལྷག་མ། རྃ་ཡྃ་ཁྃ་གྱིས་སྦྱངས། ཨོཾ་ཨཱཿཧཱུྃ་གིས་བྱིན་བརླབས་ལ། །འོད་གསལ་ཡེ་ཤེས་ཡངས་པའི་ཚོགས་

― LT28_Page_0608 ―

^{[མ་དཔེ་གཟིགས་ན་འདིར་གནོན།]}

[Full Size]

ཁང་འདིར། །ཀུན་རྟོག་ཡུལ་ལ་ཤར་བའི་ལྷག་མའི་མགྲོན། །དབང་ཕྱུག་མ་མོ་གིང་དང་ལངྐའི་་ཚོགས། །སྒྱུ་འཕྲུལ་རོལ་པའི་ཚོགས་ཀྱི་ལྷག་མ་བཞེས། །འཁོར་བ་རུ་ལྡོག་སྲིད་པ་གཏིང་སྤྲུགས་ནས། །ཀུན་ཀྱང་ཀ་དག་ཀློང་དུ་གྲོལ་བར་མཛོད། །མ་མ་ཧྲི༚་ཧྲི༚་བ་ལི༚་ཏ་ཁཱ་ཧི། ཞེས་རོལ་མོའི་སྒྲ་དང་བཅས་ཏེ་ཕྱི་རོལ་དུ་བཏང་ངོ་། །རྗེས་ལ་ཐོག་མར་ཡན་ལག་བདུན་པ་བསྡུས་ཏེ་བྱ་བ་ནི། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །དངོས་དང་ཡིད་ལས་བྱུང་བ་ཡི། །ཕྱི་ནང་གསང་བའི་མཆོད་སྤྲིན་ནི། །དཔག་མེད་ནམ་མཁའི་དབྱིངས་ཁྱབ་པས། །མཆོད་འོས་ཀུན་ལ་མཆོད་པར་བགྱི། །རང་བཞིན་མཉམ་པའི་མཆོད་ཆེན་པོ། །མཁའ་མཉམ་དྲི་མ་མེད་པ་ཡིས། །རྒྱལ་བ་ཀུན་ལ་རབ་མཆོད་ཅིང་། །དགྱེས་མཉམ་བྱང་ཆུབ་ཆེས་མཆོག་མཆོད། །བདག་གི་ལུས་དང་ལོངས་སྤྱོད་དང་། །དགེ་བ་ཀུན་དང་དངོས་ཀུན་གྱིས། །འགྲོ་ཀུན་ཡོངས་མཆོད་སེམས་ཅན་ཀུན། །ཡོངས་གྲོལ་ཡེ་ཤེས་མཆོད་པས་མཆོད། །ཕྱོགས་བཅུའི་སངས་རྒྱས་ཞིང་རྣམས་སུ། །སངས་རྒྱས་སེམས་ཅན་གནས་ཀྱི་བར། །བདག་གི་ཡིད་བཞིན་མཆོད་སྤྲིན་གྱིས། །རྒྱུན་མི་འཆད་པའི་མཆོད་སྤྲིན་ཤོག །ལུས་དང་ངག་ཡིད་སྒྲིབ་པ་ཀུན། །མཆོད་འོས་ཀུན་གྱི་སྤྱན་སྔར་བཤགས། །སླན་ཆད་རབ་

― LT28_Page_0609 ―

^{[མ་དཔེ་གཟིགས་ན་འདིར་གནོན།]}

[Full Size]

ཏུ་འགྱོད་སེམས་ཀྱིས། །སྲོག་གི་སླད་དུའང་མི་བགྱིད་དོ། །ཉན་ཐོས་བྱང་ཆུབ་སེམས་དཔའ་དང་། །གསང་སྔགས་རིག་པ་འཛིན་པ་ཡི། །སྡོམ་པ་གསུམ་དང་འགལ་བ་ཀུན། །ཐམས་ཅད་བདག་གིས་སོ་སོར་བཤགས། །ལུས་དང་ངག་དང་ཡིད་སྒོ་ནས། །སྐུ་དང་གསུང་དང་ཐུགས་རྡོ་རྗེ། །གསང་བ་གསུམ་དང་འགལ་གྱུར་བ། །ཐམས་ཅད་མ་ལུས་བཤགས་པར་བགྱི། །ཤེས་དང་མི་སྤངས་དང་དུ་བླངས། །སྒྲུབ་དང་སྤྱད་པ་ལྔ་ལྔ་སྟེ། །རྩ་བ་ཡན་ལག་ཉམས་ཆགས་ཀུན། །གནོང་འགྱོད་ཆེན་པོས་སོ་སོར་བཤགས། །བདག་ནི་མི་མཁས་གཏི་མུག་པས། །འཁོར་བ་ངན་སོང་རྒྱུར་གྱུར་ཏེ། །ཐར་པའི་སྒྲིབ་པར་གྱུར་ཏོ་འཚལ། །ཐམས་ཅད་བཤགས་ཀྱིས་དག་གྱུར་ཅིག །མཁའ་མཉམ་ཡངས་པ་ཆེན་པོའི་ངང་། །ཆོས་རྣམས་རང་བཞིན་རྣམ་དག་པས། །སྤང་བླང་མེད་པའི་བྱང་ཆུབ་སེམས། །ཆོས་ཉིད་དབྱིངས་སུ་རྫོགས་གྱུར་ཅིག །རྒྱལ་བ་ཀུན་དང་སེམས་ཅན་གྱི། །དགེ་བ་ཀུན་ལ་ཡི་རང་ཞིང་། །འགྲོ་བ་ཀུན་གྱི་བསམ་པ་བཞིན། །ཆོས་ཀྱི་འཁོར་ལོ་བསྐོར་དུ་གསོལ། །རྒྱལ་དང་རྒྱལ་སྲས་བྱང་ཆུབ་སེམས། །འགྲོ་བའི་བླ་མ་མཆོག་ཀུན་གྱིས། །མ་ལུས་སེམས་ཅན་གནས་ཀྱི་བར། །རྣམ་གྲོལ་མཛད་པར་གསོལ་བ་འདེབས། །སྐུ་ཚེ་ལྷུན་པོ་ལྟར་བརྟན་ཞིང་། །རི་དངང་རྒྱལ་པོ་ལྟར་བཞུགས་ནས། །ནམ་མཁའ་མཉམ་པའི་

― LT28_Page_0610 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲོ་བ་ཀུན། །སྲིད་ནས་ཞི་བར་དྲང་དུ་གསོལ། །ལས་དང་ཉོན་མོངས་རྒྱ་མཚོར་འདིར། །དབང་མེད་བྱིང་བའི་འགྲོ་བ་ཀུན། །ཁྱེད་ཀྱི་ཐུགས་རྗེའི་གྲུ་ཆེན་གྱིས། །ཡངས་སུ་སྒྲོལ་བར་མཛད་དུ་གསོལ། །མ་རིག་མུན་པའི་ཚོགས་ཆེན་པོ། །ཡེ་ཤེས་ཟེར་གྱིས་སོལ་མཛོད་ལ། །སྡུག་བསྔལ་ཀུན་འབྱུང་མེ་ཚོགས་ཀྱིས། །ཡོངས་སུ་གདུང་བ་ཞི་བར་མཛོད། །མགོན་མེད་སྲིད་པའི་སེམས་ཅན་གྱི། །འཁོར་བའི་འཁྲུལ་འཁོར་ཀུན་གྱི་གཞི། །རྟེན་འབྲེལ་བཅུ་གཉིས་ཤིང་རྟ་ཡི། །འཕང་ལོ་འདྲ་བ་གཞིག་ཏུ་གསོལ། །ཚུལ་མིན་ཡིད་ཀྱིས་སྤྲུལ་པ་ཡི། །སྤྲོས་པའི་འཁོར་ལོ་གཞོམ་པ་དང་། །དོན་མེད་འཇིག་རྟེན་བྱ་བ་ལས། །བདག་གི་ཡིད་ནི་ལྡོག་ཏུ་གསོལ། །ཉིན་དང་མཚན་མོ་དུས་ཀུན་ཏུ། །སྡིག་སེམས་ཡིད་ལ་མི་འགྱུ་ཞིང་། །ཐར་པའི་དགེ་ལ་རབ་བརྩོན་པས། །བྱང་ཆུབ་ཐོབ་པར་མཛད་དུ་གསོལ། །བསྐལ་པ་རྒྱ་མཚོའི་རྡུལ་སྙེད་དུ། །རྒྱལ་བ་ཀུན་ལ་མཆོད་པ་དང་། །དཔལ་མགོན་བླ་མ་མཉེས་བྱེད་ཅིང་། །ཟབ་མོའི་དམ་ཆོས་འཛིན་པར་ཤོག །རང་གཞན་དོན་གཉིས་ལྷུན་གྲུབ་ཕྱིར། །ཐོས་བསམ་སྒོམ་པ་ལྷུར་ལེན་ཞིང་། །ནོར་བདུན་ཡོན་ཏན་ཕུན་ཚོགས་ཏེ། །རྟག་ཏུ་གཞན་ལ་ཕན་བརྩོན་ཤོག །བདག་ནི་དེང་ནས་དུས་ཀུན་ཏུ། །འགྲོ་ཀུན་ཉེར་འཚོའི་གཞིར་གྱུར་ཏེ། །མཐོང་ཐོས་དྲན་རེག་གྱུར་པ་ཀུན། །བླ་མེད་བྱང་ཆུབ་ཐོབ་པར་ཤོག །འགའ་ཞིག་

― LT28_Page_0611 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྲོའམ་དམོད་གྱུར་ཏམ། ཁ་ཟེར་སྐུར་པ་འདེབས་ཀྱང་རུང་། །དེ་དག་བྱང་ཆུབ་རྒྱུར་གྱུར་ནས། །བདག་གི་གདུལ་བྱའི་ཐོག་མར་ཤོག །གང་ཞིག་དད་པས་བསྟོད་གྱུར་ཏམ། །མོས་པས་རྗེས་སུ་དྲན་ཀྱང་རུང་། །དངོས་གྲུབ་རིན་ཆེན་མཛོད་བརྙེས་ནས། །མཁའ་འགྲོས་བྱིན་གྱིས་རློབས་པར་ཤོག །བདག་ལ་བརྟེན་ནས་གཞན་དག་གི། །ཉེས་ཀུན་ཟད་པའི་གཞིར་གྱུར་ཏེ། །ཐར་པའི་ལམ་སྣ་ཟིན་གྱུར་ནས། །དགེ་བ་འབའ་ཞིག་འཕེལ་བར་ཤོག །བདག་གི་མིང་ཙམ་བསྒྲགས་པས་ཀྱང་། །སེམས་ཅན་ཀུན་གྱི་སྐྱོབ་བྱེད་ཅིང་། །གོས་དང་སྐྲ་སེན་ཙམ་གྱིས་ཀྱང་། །ཡོངས་སུ་བསྲུང་བ་ཆེན་པོར་ཤོག །གང་གི་རྗེས་སུ་དྲན་ཙམ་གྱིས། །ཆོམ་རྐུན་ལ་སོགས་འཇིགས་མེད་ཅིང་། །ཇི་ལྟར་འདོད་པའི་དོན་རྣམས་ཀུན། །སྐད་ཅིག་ཉིད་ལ་འགྲུབ་པར་ཤོག །བདག་ནི་དེང་ནས་ཕྱི་མའི་མཐར། །སེམས་ཅན་ཀུན་གྱི་མགོན་དང་སྐྱབས། །དཔུང་གཉེན་བྱེད་པ་ཉིད་གྱུར་ཏེ། །རེ་བ་ཐམས་ཅད་སྐོང་བར་ཤོག །བདག་ནི་སེམས་ཅན་ཐམས་ཅད་ཀྱི། །ཡིད་བཞིན་ནོར་བུ་ཉིད་གྱུར་ནས། །དབུལ་ཕོངས་ཐམས་ཅད་སེལ་བྱེད་ཅིང་། །བསམ་དགུའི་རེ་བ་འགྲུབ་པར་ཤོག །བདག་གི་ལུས་དང་ལོངས་སྤྱོད་དང་། །དགེ་བ་ཀུན་དང་ཐུན་མོང་དུ། །ཡོངས་སུ་སྤྱད་པའི་གཞིར་གྱུར་ཏེ། །གཞན་དོན་ཕན་པ་མཐའ་ཡས་ཤོག །བདག་གི་བསམ་པ་ཐམས་ཅད་ཀུན། །སེམས་

― LT28_Page_0612 ―

^{[མ་དཔེ་གཟིགས་ན་འདིར་གནོན།]}

[Full Size]

ཅན་ཀུན་གྱི་དོན་གྱུར་ཏེ། །དཔག་མེད་དཀའ་བ་བཟོད་པ་དང་། །གནོད་ལན་ཕན་པ་བསྒྲུབ་པར་ཤོག །སེམས་ཅན་ཇི་སྲིད་གནས་ཀྱི་བར། །བདག་གིས་བརྩོན་པས་དོན་བྱེད་ཅིང་། །ཐམས་ཅད་འཁོར་བ་ལས་བསྒྲལ་ནས། །བདག་གི་བྱང་ཆུབ་ཐོབ་པར་ཤོག །འོད་གསལ་རྡོ་རྗེ་སྙིང་པོའི་ལམ། །སྣང་བ་བཞི་པོ་མཐར་ཕྱིན་ནས། །འཕོ་བ་ཆེན་པོའི་ལུས་བཟུང་སྟེ། །གཞན་དོན་མཐའ་ཡས་སྤྱོད་པར་ཤོག །བདག་ལ་བརྟེན་པའི་འགྲོ་བ་ཀུན། །ཚེ་འདི་ཉིད་དམ་བར་དོའམ། །ཕྱི་མ་སྤྲུལ་སྐུའི་ཞིང་བགྲོད་དེ། །ཐམས་ཅད་གདོད་མར་གྲོལ་བར་ཤོག །བདག་གི་རྩོམ་པ་ཐམས་ཅད་ཀུན། །སེམས་ཅན་རྣམས་ཀྱི་དོན་གྱུར་ཏེ། །སྲིད་པའི་རྒྱ་མཚོ་རབ་བརྒལ་ནས། །ཚེ་གཅིག་སངས་རྒྱས་འགྲུབ་པར་ཤོག །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་འདི། །ཇི་ལྟར་མཁའ་ལ་ཉི་ཤར་བཞིན། །རྒྱལ་ཁམས་ཀུན་ཏུ་དར་རྒྱས་ཤོག །དེ་ནས་ཐུགས་དམ་བསྐུལ་ཞིང་དབང་བླངས་བ་ནི། བླ་མ་རྡོ་རྗེ་འཛིན་པ་ནི། ཁམས་གསུམ་འཁོར་བའི་གཉེན་གཅིག་པོ། །འགྲོ་བ་མགོན་མེད་རྣམས་ཀྱིས་སྐྱབས། །ཐར་པའི་ལམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་དག་སྐྱབས་སུ་མཆི། །འཁོར་བ་འདམ་གྱི་མཚོ་ནང་དུ། །བྱིང་བ་སྐྱབས་མེད་བདག་ལ་སྐྱོབས། །དུག་གསུམ་མེ་ཡིས་གདུངས་བ་ལ། །རང་བྱུང་

― LT28_Page_0613 ―

^{[མ་དཔེ་གཟིགས་ན་འདིར་གནོན།]}

[Full Size]

རླན་གྱིས་བསིལ་བར་མཛོད། །མ་རིག་འཁྲུལ་པས་བཅིངས་པ་ཡི། །གདོས་བཅས་ལུས་ངག་ཡིད་རྣམས་ཀུན། །རང་དེངས་འོད་ཀྱི་རང་བཞིན་ཏུ། །ལྷག་མེད་མྱ་ངན་འདས་ཐོབ་མཛོད། །བླ་མ་སངས་རྒྱས་རིན་པོ་ཆེ། །བདག་ལ་རེ་ས་གཞན་ན་མེད། །ཐུགས་རྗེའི་སྤྱན་གྱིས་གཟིགས་མཛོད་ལ། །འཁོར་བའི་མཚོ་ལས་བསྒྲལ་དུ་གསོལ། །ཚེ་འདིར་ལེགས་པ་ཀུན་འགྲུབ་ཅིང་། །བགེགས་དང་བར་ཆད་མེད་པ་དང་། །འཆི་ཁར་ཟབ་མོའི་འོད་གསལ་ཟིན། །བར་དོའི་འཕྲང་ལས་སྒྲོལ་བར་མཛོད། །ལུས་དང་ངག་ཡིད་བརྩམས་པ་ཀུན། །རྟག་ཏུ་གཞན་ལ་ཕན་པ་དང་། །རྐྱེན་རྣམས་བྱང་ཆུབ་ལམ་མཆོག་ཏུ། །དེ་རིང་ཉིད་ནས་བསྒྱུར་དུ་གསོལ། །བདག་གིས་འབད་ཀྱང་ཐར་པ་དཀའ། །མགོན་པོ་ཁྱེད་ཀྱི་ཐུགས་རྗེའི་གྲུས། །མགོན་མེད་བདག་དང་འགྲོ་བ་ཀུན། །ཐར་པའི་གླིང་དུ་ཕྱིན་བར་མཛོད། །གང་དག་བདག་ལ་དད་གྱུར་ཏམ། །སྨོད་དམ་སྐུར་པ་འདེབས་ཀྱང་རུང་། །དེ་དག་སྡིག་ཟད་ཉོན་མོངས་མེད། །སྲིད་པའི་ཆུ་བོ་སྤང་བར་ཤོག །ནམ་ཞིག་བདག་གི་མིང་ཙམ་གྱིས། །འགྲོ་བའི་འདོད་དགུ་རབ་བསྒྲུབ་ཅིང་། །ཕྱོགས་བཅུ་གང་བའི་ཞིང་རྣམས་སུ། །མཆོད་པའི་སྤྲིན་གྱིས་ཆར་འབེབས་ཤོག །དགེ་བ་འདི་ཡིས་ལུས་ཅན་ཀུན། །ཐམས་ཅད་སྲིད་ལས་རྣམ་གྲོལ་ནས། །ཡེ་ཤེས་དམ་པ་གཉིས་ཐོབ་སྟེ། །དོན་གཉིས་

― LT28_Page_0614 ―

^{[མ་དཔེ་གཟིགས་ན་འདིར་གནོན།]}

[Full Size]

ལྷུན་གྱིས་གྲུབ་པར་མཛོད། །ཅེས་གསོལ་བ་བཏབ། །སྣང་སྲིད་བླ་མའི་དཀྱིལ་འཁོར་གྱི་འཁོར་ལོ་ཐམས་ཅད་འོད་དུ་འདུས་ཏེ་འཁོར་རྣམས་ལ་ཐིམ། །འཁོར་རྣམས་གཙོ་བོ་ལ་ཐིམ། །དེ་ཉིད་དགྱེས་པ་ཆེན་པོས་རང་གི་སྤྱི་བོར་བྱོན། །ཞབས་ཀྱི་མཐེ་བོང་ལས་བདུད་རྩིའི་རྒྱུན་བབས། །བདག་དང་སེམས་ཅན་ཐམས་ཅད་ཀྱི་སྤྱི་བོ་ནས་ལུས་ཕྱི་ནང་ཐམས་ཅད་ལ་ཁྱབ་པས་ལུས་ཀྱི་སྒྲིབ་པ་དག །སྐུའི་དངོས་གྲུབ་ཐོབ། །མགྲིན་པར་བབས། །ངག་གི་སྒྲིབ་པ་དག །གསུང་གི་དངོས་གྲུབ་ཐོབ། །སྙིང་ཁར་བབས། ཡིད་ཀྱི་སྒྲིབ་པ་དག །ཐུགས་ཀྱི་དངོས་གྲུབ་ཐོབ། །ལྟེ་བར་བབས། དྲི་མ་དག །ཡོན་ཏན་གྱི་དངོས་གྲུབ་ཐོབ། །གསང་བར་བབས། ཕྲིན་ལས་ཀྱི་དངོས་གྲུབ་ཐོབ། །བླ་མ་དགྱེས་པ་ཆེན་པོས་འོད་དུ་ཞུ་སྟེ་རང་ལ་ཐིམ་པས་བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་པར་མོས་ལ་ཀ་དག་རང་གསལ་ཆེན་པོའི་དགོངས་པའི་ཀློང་དུ་མཉམ་པར་བཞག་གོ། །དེ་ལས་ལྡང་བ་ན། །སྣང་བ་ཐམས་ཅད་བླ་མའི་སྐུ། །གྲགས་པ་ཐམས་ཅད་བླ་མའི་གསུང་། །དྲན་རིག་ཐམས་ཅད་བླ་མའི་ཐུགས། །སྣོད་བཅུད་ཡེ་ཤེས་རོལ་པའོ། །ཞེས་མོས་ལ། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་སོགས། བསྔོ་བ་ཇི་ལྟར་རིགས་པས་རྒྱས་གདབ། ས་གཞི་དང་བར་སྣང་ཐམས་ཅད་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོ་སྤྲིན་ཕུང་འཁྲིགས་པས། མེ་ཏོག་གི་ཆར་འབེབས་ཤིང་ཤིས་པ་

― LT28_Page_0615 ―

^{[མ་དཔེ་གཟིགས་ན་འདིར་གནོན།]}

[Full Size]

བརྗོད་པར་བསམས་ལ་མགྲིན་གཅིག་ཏུ། །བཀྲ་ཤིས་གང་ཞིག་དབྱིངས་ལས་མི་གཡོ་ལྷུན་གྱིས་གྲུབ། །སྐུ་དང་ཡེ་ཤེས་འདུ་འབྲལ་གཉིས་མེད་རྫོགས་སངས་རྒྱས། །གདོད་མའི་མགོན་པོ་འཁོར་འདས་ཀུན་གྱི་དཔལ་གྱུར་པ། །ཀུན་ཏུ་བཟང་པོ་རིགས་ལྔའི་རྒྱལ་བ་རྒྱ་མཚོར་བཅས། །མ་ལུས་ཡོངས་དག་བཀྲ་ཤིས་དེས་ཀྱང་བདེ་ལེགས་ཤོག །འོད་གསལ་སྙིང་པོ་སྤྲོས་ཀུན་ཉེར་ཞི་མཆོག་གི་ལམ། །རྣམ་པར་དཀར་ལ་སོ་སོར་མ་འདྲེས་དྲི་མ་བྲལ། །སོ་སོ་རང་རིག་ཡེ་ཤེས་སྤྱོད་ཡུལ་རྒྱ་ཆེ་བ། །དམ་ཆོས་ཉི་མའི་བཀྲ་ཤིས་དེས་ཀྱང་བདེ་ལེགས་ཤོག །རྣམ་གྲོལ་ཡིད་བཞིན་མཛོད་མངའ་འགྲོ་བའི་བསོད་ནམས་ཞིང་། །འཕགས་པའི་དགེ་འདུན་རིག་འཛིན་དམ་ཅན་རྒྱ་མཚོར་བཅས། །འཇིག་རྟེན་ལས་གྲུབ་མཁའ་འགྲོ་འབར་བའི་སྤྲིན་འཕྲོ་བ། །དངོས་གྲུབ་མཆོག་སྩོལ་བཀྲ་ཤིས་དེས་ཀྱང་བདེ་ལེགས་ཤོག །ཅེས་པ་ལ་སོགས་པ་བརྗོད་པའི་མཚམས་སུ་མེ་ཏོག་གི་ཆར་དབབ་ཅིང་རོལ་མོའི་སྒྲ་དང་བཅས་བྱའོ། །འདི་ཕྱིའི་བདེ་ལེགས་བླ་མ་མཆོད་ལས་འབྱུང་། །དམ་ཚིག་སྡོམ་པ་ཀུན་གྱི་རྩ་བ་ཡིན། །ཉམས་རྟོགས་ཡར་ངོའི་ཟླ་བཞིན་རྒྱས་པར་བྱེད། །དགེ་སྦྱོར་ཀུན་གྱི་གཙོ་བོར་འདིར་འབད་རིགས། །དེ་ཕྱིར་གྲུབ་མཐའ་ཀུན་ལ་གྲགས་ཆེ་བའི། །ཐུན་མོང་བླ་མ་མཆོད་པའི་ཚུལ་འདི་ནི། །ཀུན་མཁྱེན་ངག་གི་དབང་པོའི་གསུང་རབ་ལས། །སྐལ་བཟང་རྣམས་ཀྱིས་ཉམས་སུ་བླངས་བདེར་བསྡེབས། །དགེ་བས་བདག་གཞན་འགྲོ་བ་མ་ལུས་པ། །ཡང་དག་

― LT28_Page_0616 ―

^{[མ་དཔེ་གཟིགས་ན་འདིར་གནོན།]}

[Full Size]

བླ་མ་མཆོག་གིས་རྗེས་བཟུང་སྟེ། །ཚེ་ལུས་གཅིག་གིས་གདོད་མའི་སར་གྲོལ་ནས། །དཔག་མེད་སྤྲུལ་པས་མཁའ་མཉམ་འགྲོ་སྒྲོལ་ཤོག །ཅེས་པའང་རང་གཞན་ཚོགས་གསོག་པའི་ཆ་རྐྱེན་ཉེར་མཁོར་གྱུར་བ་དང་། །ཀུན་མཁྱེན་རྡོ་རྗེ་གཟི་བརྗིད་གཉིས་པས་ཀྱང་དམིགས་པ་མེད་པའི་ཐུགས་རྗེས་བཀའ་ལུང་བསྩལ་བ་ལས། །ངེས་དོན་བསྟན་པའི་བདག་པོ་ཀརྨ་ཏཱའི་སི་ཏུའི་འབངས་ཐ་ཀུན་བཟང་བཀའ་བརྒྱུད་ལ་གདོད་ནས་སྨོན་ལམ་གྱིས་འབྲེལ་བ་ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་དཔལ་ཆེན་པོའི་འོད་གསལ་ཐུགས་ཀྱི་དཀྱིལ་འཁོར་དེ་བཱི་ཀོ་ཊིའི་སྙིང་པོ་ཙ་འདྲ་རིན་ཆེན་བྲག་གི་སྒྲུབ་གནས་སུ་ཀུན་མཁྱེན་དྲི་མེད་འོད་ཟེར་གདོད་མའི་གྲོལ་སར་མངོན་པར་བྱང་ཆུབ་པའི་དུས་ཆེན་བཟང་པོར་སྦྱར་བ་དགེ་ལེགས་འཕེལ། །ཤུབྷཾ།། །།