སྔ་འགྱུར་སྨིན་གླིང་དཔེ་ཚོགས།

སྔ་འགྱུར་སྨིན་གླིང་དཔེ་ཚོགས།

པོད་གསུམ་པ།

རྩོམ་མཁན། གཏེར་ཆེན་འགྱུར་མེད་རྡོ་རྗེ། ལོ་ཆེན་དྷརྨ་ཤྲཱི།

Nitartha international

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

རིག་པ་འཛིན་པ་འགྱུར་མེད་རྡོ་རྗེའི་ཤིན་ཏུ་གསང་བ་ཉམས་སྣང་གི་རྟོགས་བརྗོད་སྒྱུ་འཕྲུལ་རྡོ་རྗེའི་རོལ་མོ།

― MLP003_Page_0001 ―

^{[མ་དཔེ་གཟིགས་ན་འདིར་གནོན།]}

[Full Size]

རིག་པ་འཛིན་པ་འགྱུར་མེད་རྡོ་རྗེའི་ཤིན་ཏུ་གསང་བ་ཉམས་སྣང་གི་རྟོགས་བརྗོད་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ་བཞུགས་སོ། །གཏེར་བདག་གླིང་པ་འགྱུར་མེད་རྡོ་རྗེ།

― MLP003_Page_0002 ―

^{[མ་དཔེ་གཟིགས་ན་འདིར་གནོན།]}

[Full Size]

རིག་པ་འཛིན་པ་འགྱུར་མེད་རྡོ་རྗེའི་གནས་ལུགས་དེ་བཞིན་ཉིད་ཀྱི་རྟོགས་པ་བརྗོད་པ་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ་བཞུགས་སོ།
ན་མོ་གུ་རུ་པདྨ་སམ་བྷ་ཝ་ཡེ། རིག་པ་འཛིན་པ་འགྱུར་མེད་རྡོ་རྗེའི་གནས་ལུགས་དེ་བཞིན་ཉིད་ཀྱི་རྟོགས་པ་བརྗོད་པ་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ། བླ་མ་ལ་ཕྱག་འཚལ་ལོ། །འགྱུར་མེད་དོན་དམ་མཁའ་ཁྱབ་མཁའི་རྡོ་རྗེ། །མཐའ་ཡས་དངོས་པོ་ཀུན་གྱི་དེ་བཞིན་ཉིད། །མཚན་མའི་སྤྲོས་པ་ཡོངས་དག་གདོད་མའི་མགོན། །རང་རིག་དཔལ་ལྡན་བླ་མ་རྒྱལ་གྱུར་ཅིག །གང་ཞིག་ཐོག་མཐའ་དབུས་མེད་ཆོས་ཀུན་གྱི། །གནས་ལུགས་སྤྲོས་བྲལ་གདོད་མའི་ཕྱག་རྒྱ་ཆེ། །རང་རིག་རྫོགས་སངས་རྒྱས་པ་ཆོས་ཀྱི་སྐུའི། །རྣམ་ཐར་འཁྱོངས་པའི་བཀའ་དྲིན་དྲན་པས་འདུད། །རྨོངས་པའི་རྣམ་འགྱུར་ཀུན་གྱིས་གཏན་ཕེབས་ཕྱིར། །ངོ་མཚར་སྒྲོག་པའི་རྩོལ་བ་ངལ་བའི་གནས། །དེ་ཕྱིར་སྒྲོ་དང་སྐུར་པའི་མཐའ་གཉིས་ལས། །འདས་པའི་ལོ་རྒྱུས་གསོང་པོར་བརྗོད་ན་རུང་། །ཆེས་དམན་གནས་ལུགས་གསལ་ཕྱིར་དམ་པ་ཞེས། །མཆོག་རློམ་གྲགས་པ་སྒྲོག་ཕྱིར་བརྗོད་མིན་གྱིས། །བློ་གསལ་དད་བརྩོན་ལྡན་པའི་སློབ་བུ་འགས། །མོས་པས་བསྐུལ་བའི་ངོ་མ་ལྡོག་ཕྱིར་གླེང་། །དེ་ཡང་རང་ཉིད་བཟང་པོར་མ་གྱུར་ན། །བླུན་དད་ཕྱོགས་ཞེན་ཙམ་གྱིས་སངས་རྒྱས་ཞེས། །བརྗོད་ཀྱང་ཅི་བྱ་རང་སེམས་འགྱུར་མེད་གདེང་། །ཐོབ་ན་བདུད་དུ་འབོད་ཀྱང་ཚིག་ཏུ་བས། །དེ་ཕྱིར་ཆོས་བརྒྱད་རྣམ་པར་རྟོག་པའི་མཐའ། །མཉམ་ཡངས་ཁྱབ་གདལ་ཆེན་པོར་རང་གྲོལ་བའི། །མ་བཅོས་དེ་བཞིན་ཉིད་ཀྱི་རྟོགས་བརྗོད་ལ། །མོས་ལྡན་དག་སྣང་ཅན་རྣམས་དགྱེས་པར་མཛོད། །དེ་ཡང་གདོད་མའི་མགོན་པོ་དེ་བཞིན་ཉིད། །ཟག་པ་མེད་དབྱིངས་ཆོས་ཉིད་ཀུན་ཏུ་འགྲོ། །

― MLP003_Page_0003 ―

^{[མ་དཔེ་གཟིགས་ན་འདིར་གནོན།]}

[Full Size]

བདེ་གཤེགས་སྙིང་པོ་རང་བཞིན་འོད་གསལ་བ། །ཀ་དག་དང་པོའི་སངས་རྒྱས་རྡོ་རྗེ་འཆང་། །དེ་སོགས་དུ་མའི་སྒྲ་ཡིས་སྙན་༼བསྙད༽བྱའི་གཞི། །སྐྱེ་འགག་གཉིས་མེད་རྩ་བ་བྱང་ཆུབ་སེམས། །མ་འདྲེས་ཡོངས་རྫོགས་རིག་པའི་སྐྱེས་བུ་དེའི། །རྨད་བྱུང་མཛད་ཕྲིན་རྣམ་པར་བྱང་བའི་ཆོས། །ཡོངས་སུ་སྤེལ་དང་རྒྱལ་བ་ཐམས་ཅད་ཀྱི། །སྐུ་དང་ཡེ་ཤེས་ཡོན་ཏན་ཕྲིན་ལས་ཀུན། །འདུས་བྱས་དབུས་སུ་ཉམས་པར་མི་འགྱུར་བའི། །སངས་རྒྱས་ས་བོན་ཉིད་དེ་ནམ་ཞིག་ན། །རིགས་སད་པ་ལས་རང་བཞིན་འདོད་དགུའི་གཏེར། །ཅིར་ཡང་འཆར་བ་སྲིད་དང་ཞི་བའི་དཔལ། །གང་གི་རྣམ་ཐར་འཕེལ་འགྲིབ་མི་མངའ་བ། །འཁོར་འདས་ཡོངས་ལ་ཁྱབ་པར་སྣང་བའོ། །དེ་ལྟ་ན་ཡང་མཁའ་ཁྱབ་མཁའི་རྡོ་རྗེ། །ཆ་མེད་ཀུན་འགྲོ་གདོད་མའི་ཡེ་ཤེས་དེ། །ལྷན་སྐྱེས་མ་རིག་སྒྲིབ་པས་མ་རྟོགས་ཤིང་། །ཀུན་བརྟགས་འཁྲུལ་སྣང་ལོག་པར་ཨ་འཐས་པས། །མ་རྟོགས་ལོག་རྟོག་སྲིད་པའི་རྒྱ་མཚོ་ནི། །ལས་དང་ཉོན་མོངས་རླབས་ཕྲེང་ཆེར་འཁྲུགས་པར། །རྟག་ཏུ་འཁོར་ཞིང་འཁྱམས་པའི་རྣམ་ཐར་ནི། །ཕ་མཐའ་མེད་ཕྱིར་བརྗོད་ཀྱིས་མི་ལང་ཞིང་། །མ་རིག་སྒྲིབ་གཡོགས་དབང་གིས་མཐོང་དུའང་ཅི། །མ་མཐོང་བཞིན་དུ་མི་ཆོས་བླ་མ་ཡིས། །མཐོང་ཞེས་གཡོ་སྒྱུའི་སྦྱོར་བས་བརྗོད་པ་ནི། །སྒྲིབ་པར་ལྕི་བས་བརྗོད་དུ་མ་སྤོབས་སོ། །དེ་ལྟ་ན་ཡང་སྔོན་ཚེ་རྒྱལ་བ་ལ། །ཅུང་ཟད་བྱ་བ་བྱས་ཤིང་སྨོན་ལམ་གྱི། །མཚམས་སྦྱོར་ལ་བརྟེན་ཚེ་འདིར་ཆོས་སྒྲུབ་པའི། །རིགས་སུ་སྐྱེས་ཤིང་དམ་པས་རྗེས་བཟུང་མཐུས། །བསྟན་པའི་སྒོར་ཞུགས་སྨིན་གྲོལ་གདམས་པ་ཐོབ། །ཐོས་བསམ་སྒོམ་ལ་ཅུང་ཟད་ཕྱོགས་པ་དང་། །རང་གཞན་བྱ་བ་ཆ་ཙམ་འགྲུབ་པ་སོགས། །ཕུལ་བྱུང་རྒྱན་གྱིས་གཞན་དུ་བརྗོད་ལས་མཁྱེན། །དེ་ཡང་སྔོན་གྱི་སྐྱེས་རབས་ཕྲེང་བ་རྣམས། །རྡོར་གླིང་ཉིད་ཀྱི་གཏེར་ལུང་ཞལ་གདམས་དང་། །མཆོག་ལྡན་རྣམ་ཐར་རང་གཏེར་ལུང་བསྟན་གྱི། །དོན་རྣམས་ཁུངས་དང་སྦྱར་ཏེ་བསྡེབས་པ་ལས། །དྲན་པའི་ལམ་ནས་བརྗོད་པ་མ་ཡིན་མོད། །འོན་ཀྱང་བཻ་རོ་ཟུར་ཆེན་རྡོར་གླིང་སོགས། །དམ་པ་འགའ་ཡི་སྔོན་རབས་ད་ལྟ་ཡི། །རྐྱེན་འགས་སད་ལས་འལ་འོལ་དྲན་པ་སྙམ། །གཞན་ཡང་ཀུན་

― MLP003_Page_0004 ―

^{[མ་དཔེ་གཟིགས་ན་འདིར་གནོན།]}

[Full Size]

མཁྱེན་ཆེ་དང་འགོས་ལོ་ཡི། །གསུང་རབ་མཐོང་ཚེ་རང་གིས་བྱས་སྙམ་དང་། །ཐོག་མའི་ཚིག་གིས་དེ་རྗེས་ཚིག་དོན་རྣམས། །རྩོལ་མེད་ཤུགས་འབྱུང་ར་རི་འཆར་བ་སྙམ། །ཕྱི་དུས་འཁོར་ལོ་ཐ་མ་ངེས་དོན་དུ། །ཐོགས་མེད་སྨྲ་བ་དེ་དང་བློ་ཆེན་པའི། །ལས་སྣང་འགའ་ཞིག་བག་ཆགས་སད་འདྲ་བ། །སྤྲུལ་པའི་རྣམ་རོལ་གཉིས་པ་ཡིན་པར་འཁུམས། །ཁྱད་པར་ཆ ོས་ཀྱི་གོ་ཆའི་གནས་དུས་དང་། །འཁོར་སློབ་ལོངས་སྤྱོད་བྱ་བྱེད་གནས་ལུགས་ཀུན། །འདས་པའི་རྨི་ལམ་བཞིན་དུ་ཆེས་གསལ་བ། །ད་ལྟའང་ཡིད་ཀྱི་ཡུལ་དུ་ལམ་མེར་སྣང་། །ལངྐའི་ཡུལ་དང་རྒྱ་གར་ལ་སོགས་ཀྱི། །གནས་ཚུལ་བཀོད་པའི་དོན་སྤྱི་འལ་འོལ་ཙམ། །གསལ་བ་སྙམ་དང་ད་ལྟའི་འཁོར་སློབ་སོགས། །སྔོན་ལས་སྨོན་ལམ་དབང་གིས་འབྲེལ་ཚུལ་གྱི། །རྣམ་བཞག་འཆར་འཆར་འདྲ་ཡང་འཁྲུལ་ཤེས་ལས། །ཡིད་ཆེས་དད་འཛིན་ཐུབ་པ་ག་ལ་ཞིག །ཁྱད་པར་ཡང་སྲིད་སྔ་མའི་ལུས་ཀྱི་རྟེན། །ཉེ་བར་བསྡུ་ཚེ་རང་རིག་སྐད་ཅིག་མ། །བདེ་དང་གསལ་བའི་སྣང་ཆ་མ་འགགས་པར། །སྤྲོས་བྲལ་སྟོང་ཉིད་ནམ་མཁའ་ལྟར་དག་པའི། །དབྱིངས་སུ་རོ་གཅིག་གྱུར་ཚེ་རང་རིག་གདངས། །དཔའ་བོ་མཁའ་འགྲོའི་གླུ་ཡིས་འདི་ལྟར་སད། །ཀྱེ་ཧོ་རྣལ་འབྱོར་རིག་པའི་རྡོ་རྗེ་ཀྱེ། །བྱང་ཕྱོགས་སྤུར་རྒྱལ་བོད་ཀྱི་རྒྱལ་ཁམས་ན། །ལས་དང་སྨོན་ལམ་གདུལ་བྱའི་རྟེན་འབྲེལ་འཛོམས། །དེ་རུ་གཤེགས་ཤིག་ངེད་རྣམས་སྟོངས་གྲོགས་སོ། །ཞེས་བརྗོད་རྐྱེན་གྱིས་མི་རྟོག་ངང་ཉིད་ལས། །རགས་པའི་རྣམ་རྟོག་ཝལ་གྱིས་ཤར་བའི་མོད། །ཚེ་འདིའི་ཕ་མ་སྤྱོད་ཡུལ་ལོངས་སྤྱོད་སོགས། །ཐམས་ཅད་མངོན་སུམ་ཇི་བཞིན་གསལ་ལེར་རྟོགས། །དེ་ཚེ་གཉུག་མའི་ལུས་རྟེན་ཧེ་རུ་ཀའི། །རྣམ་པར་ཤར་ཞིང་དཔའ་བོ་རྣལ་འབྱོར་མ། །དུ་མའི་གྲོགས་བཅས་མཁའ་ལ་བསྐྱོད་པ་ན། །ཕ་མཐའ་མེད་པའི་འཇིག་རྟེན་ཁམས་མང་པོ། །མེ་ལོང་གཟུགས་བཞིན་གསལ་བར་མཐོང་བའི་མཐར། །བཀོད་ལེགས་རིན་ཆེན་ཁང་བུར་བཞུགས་སྙམ་ཚེ། །སྔར་གྱི་འཛིན་རྟོག་ཐམས་ཅད་དབྱིངས་ནུབ་ནས། །སྐྱེ་བ་འདི་ཡི་ལུས་ཀྱི་རྟེན་བཟུང་ངོ་། །ནམ་ཞིག་བཙས་ཚེ་སྐྱེ་བའི་སྡུག་བསྔལ་ཉིད། །དྲན་མ་གྱུར་ཀྱང་ཕྱི་རོལ་ཡུལ་སྣང་རྣམས། །མཐོང་བ་དྲན་

― MLP003_Page_0005 ―

^{[མ་དཔེ་གཟིགས་ན་འདིར་གནོན།]}

[Full Size]

སྙམ་བགྱིད་མོད་དོན་སྤྱི་ཙམ། །རྣམ་རྟོག་འཕེལ་བའི་དབང་ལས་མ་གྱུར་ཏམ། །དེ་ཚེ་ཛོ་ཀི་སྔོ་སངས་ཐོར་ཚུགས་ཅན། །རུས་པའི་རྒྱན་ཅན་ཞིག་དང་མཛེས་སྡུག་གི །བུད་མེད་གཉིས་ཀྱིས་ཕལ་ཆེར་ཟླ་གྲོགས་ལྟར། །སྲི་ཞུའི་མེལ་ཚེ་བྱེད་པ་དངོས་སྣང་བཞིན། །ལོ་གསུམ་བར་དུ་བྱུང་མོད་དེ་རྗེས་ནས། །རེས་འབྱུང་རེས་མི་སྣང་མོད་ཉམ་ཐག་ཚེ། །ཤས་ཆེར་འབྱུང་ལས་ཕྱིས་ནས་རྨི་ལམ་དུ། །ཡང་ཡང་འབྱུང་བ་སྐྱོབ་བྱེད་ཡིན་ནམ་སྙམ། །ལོ་བཞིའི་དུས་ན་སྐྱབས་མཆོག་བླ་མ་ཡིས། །སྒྲུབ་ཆེན་བཀའ་བརྒྱད་གསང་རྫོགས་དཀྱིལ་འཁོར་དུ། །དབང་བསྐུར་མཛད་ཚེ་འཇུག་བྱའི་དཀྱིལ་འཁོར་གྱི། །གཙོ་བོ་བླ་མ་ཉིད་དང་དབྱེར་མེད་པའི། །དཔལ་ཆེན་སྐུ་རུ་སྐད་ཅིག་ལམ་མེར་སྣང་། །དཀྱིལ་འཁོར་ལྷ་དང་བླ་མ་དབྱེར་མེད་པའི། །གོ་རྟོགས་ཅུང་ཟད་རྐྱེན་འདིས་ཐོག་མར་སད། །དྲེགས་པའི་སྲོག་དབང་ཚེ་ན་གཟུགས་བརྙན་རྣམས། །དངོས་ཡིན་སྙམ་པའི་གསལ་སྣང་འགག་མེད་དུ། །ཤར་བའི་རྣམ་འགྱུར་དེར་འཁོད་ཕལ་གྱིས་གཟིགས། །མཐུ་ཆེན་གྲུབ་པའི་ལུང་བསྟན་དབུགས་དབྱུང་སྩལ། །གཞོན་ནུའི་དུས་ན་མཚན་མོའི་རྨི་ལམ་དུ། །སངས་རྒྱས་བྱང་ཆུབ་སེམས་དཔའ་རིག་འཛིན་ཚོགས། །བཀའ་བགྲོ་ལུང་སྟོན་རྗེས་འཛིན་མཛད་པ་སོགས། །དག་པའི་སྣང་བ་ཤས་ཆེར་འཆར་བ་བྱུང་། །ལོ་ལྔའི་ནང་དུ་ཇོ་ཤཱཀ་མཇལ་སོང་ཚེ། །གནས་དེ་སྔར་ཡང་མཇལ་བའི་སྣང་བ་དག །ཡལ་ཡུལ་དྲན་པ་སྙམ་བྱེད་སྔོན་རབས་ཀྱི། །བག་ཆགས་ཅུང་ཟད་སད་པ་ཡིན་ལ་རག །རང་ལོ་བཅུར་སོན་ཤིང་མོ་ལུག་ལོའི་སྟོན། །སྐྱབས་མཆོག་བླ་མ་ཉིད་ལས་དར་གླིང་དུ། །བཀའ་དགོངས་དབང་ལུང་མན་ངག་ནོད་པ་ལས། །ཁྱད་པར་བདེ་འདུས་དབང་བསྐུར་དངོས་གཞིའི་ནུབ། །ཡིད་འོང་ནགས་ཚལ་རབ་ཏུ་རྒྱས་པའི་དབུས། །སློབ་དཔོན་ཆེན་པོ་པདྨ་ཡིན་སྙམ་པའི། །རྣལ་འབྱོར་ཆ་ལུགས་གཟི་བརྗིད་མཚུངས་པ་མེད། །མཛེས་སྡུག་བུད་མེད་ལྔ་ཡིས་བསྐོར་བ་ལས། །བུད་མེད་ལྔ་པོས་བུམ་པ་ཆུས་བཀང་དང་། །ཐོད་པ་མར་ཁུས་གཏམས་དང་མར་མེའི་ཀོང་། །སྤུ་གྲི་མེ་ལོང་སོ་སོས་རིམ་པ་བཞིན། །གཏད་ཅིང་སྔགས་དང་ཕྱག་རྒྱས་བྱིན་བརླབས་ཚུལ། །མཛད་མཐར་གཅིག་ལ་གཅིག་ཐིམ་གཙོ་བོའི་བར། །དེ་ཉིད་

― MLP003_Page_0006 ―

^{[མ་དཔེ་གཟིགས་ན་འདིར་གནོན།]}

[Full Size]

མཐིང་ཞུན་ཐིག་ལེ་མཁའ་ཁྱབ་འདྲེས། །རྨི་ལམ་ཉིད་དུ་མཐོང་བ་མགོན་དེ་ཡིས། །བྱིན་བརླབས་སྔགས་ཀྱི་བརྡ་རུ་ཕྱིས་ནས་གོ། བཅུ་གཅིག་ལོ་ནང་ལྷ་མིའི་འདྲེན་པ་ཆེ། །ཐམས་ཅད་མཁྱེན་ཞབས་བཏུད་ཚེ་སྐྱིད་གྲོང་གི །འཕགས་པ་ཝ་ཏི་གནས་དེར་ཐོག་མ་རུ། །ཕེབས་དང་ལྷན་ཅིག་ཉིད་དུ་དུས་འགྲིག་ཚེ། །འཕགས་པའི་སྐུ་ཉིད་ཞི་འཛུམ་ཆགས་པའི་ཉམས། །མཚུངས་མེད་གཟི་བརྗིད་རབ་རྒྱས་ཐུགས་ཀ་ནས། །འོད་ཟེར་འཕྲོས་པ་རང་ལ་ཐིམ་པ་དང་། །དབུགས་དབྱུང་མཛད་པའི་སྣང་བ་ཡུད་ཅིག་ཤར། །གུང་ཐང་གནས་སུ་སྔོན་གནས་ར་རི་ཙམ། །དྲན་པའི་བག་ཆགས་སྣང་བ་ཡལ་ཡུལ་དང་། །འགྲོ་མགོན་ཞང་ལ་བཟོད་མེད་དད་པ་ནི། །ཤུགས་འབྱུང་སྐྱེས་ཚེ་བྱིན་བརླབས་སྣང་བ་ཐོབ། །གཙང་རོང་བོན་པོར་ནད་ཀྱིས་ཉམ་ཐག་ཚེ། །སྔར་གྱི་བུད་མེད་གཉིས་ཀྱིས་དབུགས་དབྱུང་ཞིང་། །རྣལ་འབྱོར་པ་དེས་བྱིན་བརླབས་དངོས་སུ་མཐོང་། །ནངས་པར་བདེན་གྱུར་ལྷ་ཡིས་བསྐྱབས་པར་གོ། བཅུ་གསུམ་ལོ་ནང་དཔལ་རིར་ཡབ་རྗེ་ལས། །ཡུལ་འཁོར་སྲུང་གི་དམག་བཟློག་ནོད་པའི་ཚེ། །དེ་ཡི་ཕྱག་མཚན་རག་དུང་བུས་པའི་སྒྲས། །ས་གཞི་ཁྱབ་པའི་དཔུང་ཚོགས་འདུས་པ་དང་། །རྣམ་ཐོས་སྲས་ཀྱིས་རྒྱལ་མཚན་ལག་ཏུ་གཏད། །རྐྱེན་དེས་མཁའ་ལ་ཐོགས་མེད་བགྲོད་པ་ཡི། །རྨི་ལམ་གསལ་བར་མཐོང་མོད་ཕྱི་དུས་འདིར། །བསྟན་སྲིད་ཕས་རྒོལ་བསྲུང་བའི་མཐུ་ཐོབ་སྙམ། །དེ་ཚེ་སྙིང་ཐིག་གདམས་པའི་དབང་ལུང་ཁྲིད། །ཐོབ་ཚེ་ཀ་དག་ཆོས་ཟད་གནས་ལུགས་དོན། །ཕྱིན་ཅི་མ་ལོག་ཇི་བཞིན་ཉིད་རྟོགས་པའི། །ས་བོན་གྲུང་པོ་ཐོག་མར་ཐེབས་པ་ཡིན། །སྐབས་ཤིག་ཉེར་དགུའི་མུན་པ་མི་བཟད་ནང་། །ཁྱབ་འཇུག་སྐུ་ཉིད་མཁའ་དང་དབྱེར་མེད་ལས། །སྤྱན་མིག་ཉི་མ་ལྟར་འབར་དུད་སྤྲིན་དང་། །མེ་སྟག་ཕྲོམ་ཕྲོམ་མཁའ་ལ་འགྲོ་བ་མཐོང་། །མི་བཟད་འཇིགས་ཟིལ་ཞུད་རྔམས་གཞན་གྱིས་ཀྱང་། །མངོན་སུམ་ཉིད་དུ་གཏན་ལ་ཕེབས་པ་བྱུང་། །འདི་ནི་སྲུང་མ་གཡེལ་མེད་འགོ་བ་སྟེ། །ཕྱིས་ཀྱང་ཡང་ཡང་ཡོང་བ་མངོན་སུམ་བཞིན། །བཅུ་དྲུག་ལོ་ནང་སྐྱབས་མཆོག་བླ་མ་ལས། །གསང་འདུས་བླ་མའི་དབང་བསྐུར་ནོད་པའི་ནུབ། །གཞལ་མེད་ཁང་བརྩེགས་ཡིད་འོང་སྒོར་ཞུགས་ནང་། །

― MLP003_Page_0007 ―

^{[མ་དཔེ་གཟིགས་ན་འདིར་གནོན།]}

[Full Size]

རིན་ཆེན་ཐེམ་སྐས་ཤིན་ཏུ་མཐོ་བའི་རྩེར། །བུད་མེད་མཛེས་མས་ཁྲིད་དེར་སོང་བ་ལས། །ཤིན་ཏུ་བཀོད་ལེགས་ཁྱོན་ཆེའི་ཁང་པ་ན། །བླ་མ་རྗེ་ཉིད་གཟི་བརྗིད་མཚུངས་མེད་སྐུའི། །མཐའ་སྐོར་གླེགས་བམ་མང་པོའི་བརྩིགས་རགས་དང་། །ལ་ལ་འགྱེལ་ནས་ཐང་མར་གདལ་བས་བསྐོར། །གུས་པས་བཏུད་ཚེ་འདི་རྣམས་བཀའ་གཏེར་གྱི། །ཟབ་ཆོས་ཡིན་ཡང་འགའ་ཞིག་འཁྲུགས་ནས་འདུག །ཁྱོད་ཀྱིས་སྒྲིག་པའི་ལས་སྐལ་གཏད་དོ་ཞེས། །དུང་དཀར་དར་དཔྱངས་གཡོ་བ་ལག་ཏུ་སྩལ། །དེ་ཚེ་འདི་རྣམས་ལོ་བརྒྱའི་བར་དུ་ཡང་། །འགྲུབ་པར་དཀའ་མོད་བདག་གིས་ཅི་བྱ་སྙམ། །རི་བོའི་ཁུར་གྱིས་ནོན་པ་བཞིན་དུ་ལྕི། །དེ་མཐར་བླ་མ་བཞེངས་ནས་ནུབ་ཕྱོགས་ཀྱི། །དཀར་གསལ་ལམ་ནས་མཁའ་ལ་ཐོགས་མེད་དུ། །སྒྲ་འོད་ཆོ་འཕྲུལ་དུ་མས་གཤེགས་པ་མཐོང་། །སྐྱོ་ཞིང་གདུང་བས་ཕྱི་ནས་སྙེག་བརྩམས་ཚེ། །གཉིད་སད་ཉམས་སྣང་མཁའ་ལ་བཅོམ་ལྡན་འདས། །རྡོ་རྗེ་གཞོན་ནུ་གཙོ་འཁོར་ཆེས་གསལ་བ། །སྒྲ་དང་འོད་ཟེར་ཆེན་པོའི་སྣང་བ་ཅན། །ཆུ་ཚོད་ཚད་ཙམ་གཡོ་མེད་གནས་པ་མཐོང་། །སྐབས་ཤིག་རྒྱུད་འགྲེལ་འགའ་ཡི་ལུང་ནོད་ཚེ། །ཆུ་གླིང་གྲོང་ཁྱེར་ནགས་ཀླུང་མེ་ཏོག་ཚལ། །རབ་རྒྱས་སིངྒ་ལ་ཡི་གླིང་ཡིན་སྙམ། །དེ་ན་བཀོད་ལེགས་ཁྲི་ལ་མ་ཕམ་པ། །ཉེ་ལོགས་ཐོགས་མེད་ཙན་དྲ་གོ་མི་སོགས། །ཡིན་སྙམ་དུ་མའི་འཁོར་བཅས་བྱིན་བརླབས་ཚུལ། །མཐོང་བའི་མོད་ལ་གཉིད་སད་དགའ་བདེས་ཁྱབ། །ཟབ་མོའི་ཚིག་དོན་གོ་བ་བོགས་ཆོད་དུ། །ནུས་པའི་ཤེས་རབ་སྔོན་ལས་འཕགས་པ་སྙམ། །བཅུ་བདུན་ལོ་ལ་ཆོས་འཁོར་བསམ་ཡས་སུ། །གངས་ཅན་སྐྱབས་གཅིག་ཐམས་ཅད་མཁྱེན་པ་ཡི། །སྤྱན་སྔར་སྙེགས་ཚེ་གང་སྐུ་སྤྱན་རས་གཟིགས། །དྲི་མེད་འོད་ཟེར་འཕྲོ་བར་ཡུད་ཅིག་མཐོང་། །རྐྱེན་དེས་སྔོན་གྱི་གནས་དུས་འབྲེལ་ཚུལ་སོགས། །བཟང་པོའི་བག་ཆགས་འགའ་ཞིག་གསལ་བར་སད། །ཤིན་ཏུ་བརྩེ་བའི་གསུང་གིས་དབུགས་དབྱུང་ཞིང་། །ཕྱི་མཐའ་གཟིགས་པའི་བླང་དོར་ལུང་བསྟན་མཛད། །དེ་ནས་ཡབ་རྗེའི་བདུན་ཚིགས་གཉིས་པའི་ནུབ། །ནམ་མཁའི་དབྱིངས་སུ་གང་གི་ཡེ་ཤེས་སྐུ། །ཉི་མ་བྱེ་བའི་དཔལ་དུ་འབར་བ་ཡིས། །འོད་ཟེར་སྦྲང་རྩི་ལྟ་བུ་ཁར་

― MLP003_Page_0008 ―

^{[མ་དཔེ་གཟིགས་ན་འདིར་གནོན།]}

[Full Size]

སྩལ་ནས། །བྱིན་བརླབས་དབུགས་དབྱུང་ནུབ་ཕྱོགས་མཁའ་དབྱིངས་སུ། །སྒྲ་དང་འོད་ཀྱི་སྣང་བ་མི་བཟད་པའི། །ངོ་མཚར་ཆོ་འཕྲུལ་ཆེན་པོས་གཤེགས་པ་མཐོང་། །སྐབས་ཤིག་ཨོ་རྒྱན་ཆེན་པོ་ཡབ་ཡུམ་གྱི། །སྤྲུལ་པའི་གར་གྱིས་ཐབས་ཤེས་དམ་རྫས་དང་། །ཟབ་གཏེར་ཁ་བྱང་གདམས་པའི་གཉེར་གཏད་པ། །རྨི་ལམ་ཉིད་དུ་གསལ་བར་མཐོང་གྱུར་ཅིང་། །སད་ཚེ་ཟག་མེད་དགའ་བདེས་ལུས་སེམས་ཁྱབ། །རིང་མིན་དུས་མཐར་ལྷོ་བྲག་འབྲོག་རི་ནས། །ཟབ་གཏེར་ཐོག་མའི་ཁ་བྱང་ཤོག་རིལ་ཉིད། །ཟླ་གྲོགས་ཀུན་གྱིས་མཐོང་བར་ལག་ཏུ་སོན། །དེ་སོགས་གཏེར་ཁ་སྔ་ཕྱིའི་ཁ་བྱང་དང་། །ཟབ་གཏེར་ལོན་དང་བྱིན་བརླབས་རྟགས་མཐོང་ཚུལ། །ཆོས་བདག་རྣམས་ལ་གཏད་རྒྱ་བགྱིས་པ་སོགས། །གཏེར་བྱུང་ལོ་རྒྱུས་ལོགས་སུ་བཀོད་ལ་གཟིགས། །བཅོ་བརྒྱད་ལོ་ལ་དར་གླིང་བསམ་གཏན་་རྩེར། །གསང་འདུས་བླ་མའི་བསྙེན་སྒྲུབ་བྱས་པའི་ཚེ། །ཨོ་རྒྱན་སློབ་དཔོན་པདྨ་སམྦྷ་ཝ། །མཁའ་འགྲོའི་འཁོར་དང་བཅས་པ་ཡུད་ཅིག་མཐོང་། །དེ་ཚེ་སླར་ཡང་ངོ་མཚར་གཞལ་མེད་ཁང་། །ཡབ་རྗེ་བླ་མ་སྔར་གྱི་ཆ་བྱད་ལ། །གཟི་བརྗིད་མཚུངས་མེད་འཁོར་དུ་ཛོ་ཀི་དང་། །རབ་བྱུང་སྔགས་འཆང་བུད་མེད་མང་པོས་བསྐོར། །དེ་དག་ཧཱུྃ་མཛད་སངས་རྒྱས་གསང་བ་དང་། །མི་ཏྲ་ཛོ་ཀི་ནམ་སྙིང་རྨ་གཉགས་སོགས། །རྒྱ་བོད་མཁས་གྲུབ་དེ་རྣམས་ཡིན་སྙམ་བགྱིད། །བླ་མ་མཆོག་དེ་རྒྱ་བོད་རྣལ་འབྱོར་གྱི། །གཙོ་བོར་བཞུགས་ལ་རབ་མོས་གདུང་ཤུགས་ཀྱིས། །རྐྱེན་བྱས་དེ་ཉིད་ཨོ་རྒྱན་ཆེན་པོ་ཡི། །སྐུར་བཞེངས་རྗེས་སུ་བརྩེ་བའི་རྣམ་འགྱུར་གྱིས། །ཧེ་རུ་ཀ་ཡི་འཁོར་ལོར་དབང་བསྐུར་ཞིང་། །སྔགས་དང་ཕྱག་རྒྱ་བརྡ་ཐབས་དུ་མ་ཡིས། །བྱིན་བརླབས་མཁའ་འགྲོའི་ཚོགས་ཀྱིས་ཅང་ཏེའུའི་སྒྲས། །མཚོན་པར་ནམ་མཁའ་གང་བའི་གར་བྱེད་དོ། །སད་པའི་མོད་ལ་ཟག་མེད་བདེ་བའི་ཉམས། །ཧད་དེའི་ངང་ནས་སྔར་གྱི་མོས་པ་ཡང་། །བཅོས་མའི་རྣམ་རྟོག་ཙམ་མོ་དེ་ཉིད་ནས། །སྙེམས་ཁྲིགས་མེད་པའི་དད་པ་བརྟན་པོ་ནི། །རང་སེམས་རིག་པའི་ངོ་བོར་རོ་གཅིག་པའི། །གནས་ལུགས་བརྗོད་བྲལ་འགྱུར་བ་མེད་པ་གང་། །འགག་མེད་རྩལ་སྣང་དད་པར་མི་ཕྱེད་པ། །གདོད་མའི་དེ་བཞིན་

― MLP003_Page_0009 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་དུ་རོ་མཉམ་མོ། །མཛེས་བྱེད་སྣྲོན་ཟླའི་བཅུ་ལ་བྲག་དམར་གྱི། །གཡའ་མ་ལུང་ནས་ཐུགས་ཐིག་བླ་སྒྲུབ་སྐོར། །མྱོང་གྲོལ་དམ་རྫས་སྐུ་ཚབ་རྣམ་གཉིས་སོགས། །ཟབ་མོ་གཏེར་གྱི་དངོས་གྲུབ་དང་པོ་ཐོབ། །རང་ལོ་བཅུ་དགུ་ཆུ་སྟོད་ཅན་གྱི་བཅུར། །མཆིམས་ཕུའི་གནས་སུ་གུ་རུ་བསྙེན་པའི་ཚེ། །ཉེར་ལྔའི་ཐོ་རེངས་སྒྲུབ་རྫས་སྟེང་གི་མཁར། །གུ་རུའི་སྐུ་ཉིད་ཡུད་ཅིག་གསལ་བར་མཐོང་། །སླར་ཡང་ཟླ་དྲུག་བར་དུ་དཔལ་ཆེན་པོ། །བསྙེན་ཚེ་སྐབས་ཤིག་འོད་ཀྱི་སྦུ་གུ་ནི། །རག་དུང་དབྱིབས་ཅན་ཕྱི་མཐའ་ཚད་མེད་ཅིང་། །རྩ་བ་ཆེས་ཕྲ་མིག་ཏུ་ཟུག་པའི་ནང་། །རྒྱ་བོད་གནས་ཡུལ་སྐྱེ་བོའི་བྱ་བྱེད་སོགས། །ཐམས་ཅད་མེ་ལོང་གཟུགས་བཞིན་གསལ་བ་དང་། །ཁྱད་པར་བོད་ཡུལ་ཙམ་དང་དབུས་གཞུང་གི །ཉེ་འཁོར་གནས་ལུགས་མངོན་སུམ་བཞིན་དུ་མཐོང་། །དེ་མཐར་རླབས་ཀྱིས་དཀྲུགས་པའི་ཆུ་ཟླ་བཞིན། །འགྲིབ་ནས་སླར་ཡང་ཞིང་ཁམས་འཇའ་འོད་ཀྱི། །བྲེས་པའི་ཐིག་ལེ་མུ་ཁྱུད་ཅན་གྱི་དབུས། །མཐིང་ཞུན་ལྟར་དང་ནང་དུ་རྡོ་རྗེ་སེམས། །དྲི་མེད་དུང་མདོག་མཚན་དཔེ་གསལ་འབར་བ། །གཡས་གཡོན་མཛེས་སྡུག་ལྷ་མོ་དཀར་དམར་གཉིས། །པི་ཝང་གླིང་བུ་བསྒྱུར་བའི་རོལ་མོའི་གདངས། །བརྡ་ཚིག་བཅུ་གཅིག་དབྱངས་སུ་སྒྲོག་པ་ཐོས། །དེ་ཉིད་སྔར་བཞིན་ཡལ་མཐར་ཡི་གེ་ཨ། །དཀར་གསལ་འཇིག་རྟེན་གང་བ་འོད་ཟེར་ཅན། །སླར་འདུས་དེ་ཉིད་ཐིག་ལེ་དཀར་པོ་ནི། །ཡུངས་འབྲུ་ཙམ་ཞིག་མིག་ཏུ་ཐིམ་པ་སྙམ། །སྐབས་ཤིག་ནམ་མཁར་དཔལ་ཆེན་ཧེ་རུ་ཀཿ། འཁོར་བཅས་ཤིན་ཏུ་གསལ་བ་སྒྲ་འོད་ཀྱི། །སྣང་བ་དང་བཅས་མཐོང་བ་དེ་ཉིད་ལ། །གཡོ་མེད་སེམས་གནས་དར་ཅིག་བར་དུ་བྱུང་། །སླར་ཡང་ཡུལ་གྲོང་ནགས་ཀླུང་མེ་ཏོག་ཚལ། །ཡིད་འོང་རབ་རྒྱས་དབུས་སུ་ཨོ་རྒྱན་རྗེ། །ཛོ་ཀི་རྣལ་འབྱོར་སྤྱོད་པའི་ཆ་ལུགས་ཅན། །གཟི་བརྗིད་མཚུངས་མེད་ཉི་མ་ལྟར་འབར་བ། །རིག་འཛིན་མཁའ་འགྲོའི་འཁོར་དང་ཁྱད་པར་དུ། །མཚོ་རྒྱལ་མཛེས་སྡུག་མོན་མོའི་ཆ་བྱད་ཅན། །གཡོན་དུ་འཁོད་པའི་རྣམ་པ་གསལ་བ་ལ། །གུས་པས་བཏུད་ཚེ་བྱིན་བརླབས་བརྡ་ཐབས་དང་། །མཚོ་རྒྱལ་ཉིད་ཀྱིས་གླེགས་བམ་ཆུང་ངུ་ཞིག །ཕུར་བུའི་ཟབ་ཆོས་ཡིན་ཞེས་བདག་ལ་གཏད། །

― MLP003_Page_0010 ―

^{[མ་དཔེ་གཟིགས་ན་འདིར་གནོན།]}

[Full Size]

ང་ནི་རྣལ་འབྱོར་བདུད་འདུལ་དྲག་མོ་རྩལ། །བུ་ཁྱོད་རྟག་ཏུ་བྱིན་གྱིས་རློབ་པ་ཡིན། །ཞེས་གསུངས་བདག་གིས་གླེགས་བམ་ཞལ་ཕྱེ་ནས། །ཀློག་པར་བརྩམས་ཚེ་མི་བཟད་རླུང་ཤུགས་ཀྱིས། །ཕྱོགས་བཅུར་ཁྱེར་བའི་སྒྲ་གདངས་ཀཱི་ལ་ཡར། །སྒྲོག་པའི་ངང་ནས་བདག་ཀྱང་བྱང་ཤར་གྱི། །མཁའ་ལ་བྱ་བཞིན་བསྐྱོད་དེ་སོང་བའི་ལམ། །ཤ་རུས་གཅོང་རོང་ཁྲག་གི་འབབ་ཆུ་ཅན། །དུར་ཁྲོད་འཇིགས་པའི་ནགས་ཚལ་དུ་མའི་མཐར། །སྣ་ཚོགས་མེ་ཏོག་རྒྱས་པའི་དགའ་བའི་ཚལ། །ཨསྨ་གཪྦྷའི་འགྲམ་སྟེགས་ཡིད་འོང་གི །དབུས་ན་ཡན་ལག་བརྒྱད་ལྡན་བཀོད་མའི་ཆུ། །ལྕང་ལོ་ཅན་གྱི་བདུད་རྩི་འདི་འོ་ཞེས། །ཐོས་པའི་མོད་ལ་འཐུང་བར་འདོད་པའི་བློས། །ལག་གིས་བཅུས་ཚེ་མཐིང་ཞུན་འདྲ་བའི་ཧཱུྃ། །སྙིམ་པ་གང་བ་ཁ་རུ་མིད་པ་ན། །རྒྱལ་ལོ་བར་ཆད་བདུད་རྩིའི་གཡུལ་ལས་རྒྱལ། །འགྲོ་དོན་བསྟན་པ་མཐའ་རུ་རྒྱས་པར་འགྱུར། །ཞེས་པའི་སྒྲ་གདངས་ནམ་མཁའ་གང་བ་ཙམ། །ཐོས་པའི་རྐྱེན་གྱིས་གཉིད་ལས་སད་པ་ན། །ལུས་སེམས་བདེ་བ་ཆེན་པོར་འབྱམས་ཀླས་པ། །ཡུན་རིང་བར་དུ་རྩོལ་མེད་གནས་པ་བྱུང་། །ནུབ་གཅིག་བུད་མེད་མང་པོས་མདུན་བསུས་ནས། །བཀོད་ལེགས་ཁང་བཟང་ནང་ཞུགས་རིན་ཆེན་ཁྲིར། །བླ་མ་རྗེ་བཞུགས་གུས་པས་ཕྱག་བགྱིས་ཚེ། །སྙིང་ཐིག་འདས་རྗེས་རྫོགས་པར་གསུང་སྙམ་བྱེད། །སྔར་གྱི་བུད་མེད་རྣམས་ཀྱིས་ཀ་པཱ་ལ། །ཤ་ཆང་ཟས་སྣས་གང་བ་གཏད་པའི་མཐར། །ཕྱི་མཐའི་གནས་དུས་བྱ་བྱེད་འགྱུར་ལྡོག་གི །གནས་ཚུལ་འགའ་ཞིག་ལུང་དུ་བསྟན་པ་རྨིས། །ཉི་ཤུ་ལོ་ལ་དར་གླིང་རི་བོའི་སྤོར། །རྟ་མགྲིན་བསྙེན་ཚེ་ནམ་མཁའི་སྤྲིན་གསེབ་ནས། །སྤྱན་རས་གཟིགས་དབང་མཛེས་འཛུམ་འོད་ཟེར་ཅན། །བྱོན་ནས་བདག་ལ་ཐིམ་སྙམ་བྱེད་པ་ན། །ལྷ་འདྲེ་མི་སོགས་རྣམ་འགྱུར་མ་ངེས་པའི། །འགྲོ་བ་མང་པོས་བདག་ལ་འདུད་པ་སོགས། །སྣང་ཉམས་ཤེས་ཉམས་ཟད་མི་ཤེས་པ་དང་། །གང་ཤར་སྒྱུ་མ་སྤྲོས་བྲལ་ཉིད་དུ་རྟོགས། །ཉེར་གཅིག་ལོ་ནང་གྲུ་འཛིན་ཕོ་བྲང་ཆེར། །ཐམས་ཅད་མཁྱེན་ཞབས་ཟབ་གཏེར་ཐོག་མ་ཡི། །བཀའ་གཏད་ཕུལ་ཚེ་རྗེ་ཉིད་ཆོས་རྒྱལ་གྱི། །རྣམ་པར་མཐོང་བས་རྐྱེན་བྱས་ཁྲི་སྲོང་དང་། །བཻ་རོའི་ལས་

― MLP003_Page_0011 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲེལ་སྔ་ཕྱིའི་སྐྱེ་བ་འགའ། །ཐོགས་མེད་ཡིད་ཤེས་ཙམ་དུ་གསལ་བར་ཤར། །བཟང་པོའི་ལས་ཀྱི་འཕྲོ་ཡི་བག་ཆགས་འགའ། །རྒྱུ་རྐྱེན་རྟེན་འབྲེལ་དབང་གིས་སད་པ་སྙམ། །སྐབས་ཤིག་ཉམས་གྲིབ་རྐྱེན་གྱིས་ཡུན་རིང་པོར། །སྲོག་ལ་འབབ་འདྲའི་ནད་ཀྱིས་མནར་བའི་ཚེ། །མཁའ་འགྲོའི་བསྐང་བཤགས་སྒྲུབ་ཚེ་ཝཱ་ར་ཧི། །བདག་འཛིན་ཞེན་ངོར་མི་སྡུག་ཁྲོ་ཚུལ་དང་། །འཛིན་མེད་རིག་རྩལ་ནང་གི་རྣལ་འབྱོར་མ། །འཆི་མེད་བུ་མོའི་འཇོ་སྒེག་ངོམ་པ་ནི། །སུ་ཁའི་ཉམས་དང་བརྡའ་ཚིག་གླུ་སྒྲ་ཡིས། །ན་བའི་རང་བཞིན་སྒྱུ་མར་ངོ་ཡང་སྤྲད། །སླར་ཡང་ནང་གི་མུན་པ་ཆེན་པོའི་མདངས། །འཕྲོག་བྱེད་ཞལ་ཅན་འཇིགས་པའི་རྣམ་འགྱུར་ནི། །གློག་ལྟར་འཁྱུག་པས་ནམ་མཁའི་ལམ་ཡངས་ནས། །བདུད་ལས་རྒྱལ་བའི་གད་རྒྱང་འབྲུག་བཞིན་ལྡིར། །དེ་ནས་གཟུང་འཛིན་གཅོད་པའི་རང་རིག་རྩལ། །རྣོ་དབལ་ཀརྟ་རི་ཡི་རྣམ་པ་ཅན། །སྙིང་ག་ནས་ཐོན་མདུན་གྱི་ནམ་མཁའ་ལ། །ཇེ་མཐོར་སོང་བ་མཁའ་དང་འཁྲུག་གིས་འདྲེས། །དེ་ཉིད་སྣང་བ་ཀུན་དང་རོ་གཅིག་པའི། །བདེ་གསལ་མི་རྟོག་ཉམས་རྩལ་རབ་འབར་བའི། །ངོ་བོ་འགྱུར་མེད་མཐར་སོན་སད་པ་ན། །ལུས་སེམས་བདེ་བའི་ཉམས་རྒྱས་ནད་ལས་གྲོལ། །ལོ་དེར་ནུས་འབྱིན་ས་ལེ་གཟུགས་གཞན་དུ། །སྨོན་ལམ་དུས་སུ་སད་པ་པདྨ་ཅན། །བདེ་བས་བདེ་བའི་མཐར་སོན་ཡ་མཚན་གྱི། །རི་མོ་ནམ་མཁའི་དབྱིངས་སུ་རང་གྲོལ་བའི། །གཟུགས་བརྙན་རྨི་ལམ་བྲག་ཆའི་དཔེས་མཚོན་པ། །གཉུག་མའི་འོད་གསལ་ཡེ་ཤེས་སྒྲོན་མེ་ལ། །གསལ་འགྲིབ་སྤངས་པ་གསལ་འགྲིབ་ཅན་དུ་ཤར། །དེ་ཡི་རྟེན་འབྲེལ་རྒྱུ་རྐྱེན་མངོན་དུ་མཐོང་། །དེ་ཡང་འདི་ལྟར་དར་གླིང་རི་བོའི་སྤོར། །ཐུགས་ཐིག་རིག་འཛིན་བླ་མའི་དཀྱིལ་འཁོར་དུ། །འཆི་མེད་བདུད་རྩིའི་སྒྲུབ་པ་བྱས་པའི་མཐར། །དད་འདུས་སྐལ་ལྡན་འགའ་ལ་བྱིན་བརླབས་ཚེ། །གུ་ཧྱ་ཛྙཱ་ན་བདེ་ཆེན་ཌཱ་ཀི་ནཱི། །ས་ལེའི་རྣམ་འགྱུར་ཤེས་རབ་གཟུགས་འཛིན་དེའི། །ཁུར་ཚོས་ལི་ཁྲིའི་ཨ་ཡིག་འབར་བ་ཡིས། །བདེ་དང་སྟོང་པའི་ཡེ་ཤེས་མཚོན་བྱས་ནུབ། །རྨི་ལམ་འཁྲུལ་ངོར་འཆི་མེད་གཞོན་ནུའི་ཚོགས། །སྙན་པའི་རོལ་མོ་གླུ་སྒྲའི་འགྱུར་ཁུགས་བཅས། །ནམ་མཁའི་ལམ་ལས་འཇའ་ཚོན་སྤྲིན་

― MLP003_Page_0012 ―

^{[མ་དཔེ་གཟིགས་ན་འདིར་གནོན།]}

[Full Size]

ཕུང་སྟེང་། །མེ་ཏོག་ཆར་ཟིམ་འབེབས་བཞིན་སོན་པ་ཉིད། །ཉེ་བར་སླེབས་ཚེ་ཤེས་རབ་ཡུམ་གྱུར་དེས། །རིན་ཆེན་སོར་གདུབ་ནོར་བུའི་ཕྲ་ཚོམ་ཅན། །བདེ་ཆེན་ཡེ་ཤེས་བསྐྱེད་པའི་རྟེན་ཉིད་དུ། །བྱིན་པའི་མོད་ལ་ནོར་བུའི་བྲག་སྟེང་ན། །གནས་པས་བདུད་ལས་རྒྱལ་བའི་མཚན་མ་ནི། །རིན་ཆེན་འབར་བའི་ཏོག་ཅན་བཟུང་བའི་མོད། །ནམ་མཁར་ཨོ་རྒྱན་ཆེན་པོ་གཙོ་འཁོར་བཅས། །བཞུགས་པས་བདུད་རྩིའི་བུམ་བཟང་སྩོལ་བ་ཐོབ། །དེ་ནས་ལྷ་ལྷན་སྤྲུལ་པའི་གཙུག་ལག་ཆེར། །བསྐོར་བ་བགྱིས་དུས་ཉིན་གཅིག་མཆོད་ཁང་གི །ལྕགས་ཁྲ་གདོང་ནས་ཇོ་བོ་མཇལ་བའི་ཚེ། །སྐུ་ཚད་ཉིས་འགྱུར་ཙམ་དུ་འཕགས་པ་ལ། །ལྟ་བས་མི་ངོམས་མཚན་དཔེའི་གཟི་བྱིན་ཅན། །ཞལ་གྱི་དཀྱིལ་འཁོར་འཛུམ་ཞིང་བཞད་པ་ལས། །དྲི་མེད་འོད་ཟེར་འཕྲོ་བས་གནས་ཁང་ཀུན། །ཉི་མ་ལྟ་བུར་གསལ་བར་བྱས་པའི་མཐར། །མུ་ནིའི་གཟུངས་ཀྱི་སྒྲ་དང་འོད་ཟེར་བཅས། །རང་གི་སྙིང་གར་ཐིམ་པའི་མོད་ཉིད་ལ། །འཛིན་མེད་མཉམ་ཉིད་ངང་དུ་རེ་ཞིག་འདས། །སད་ནས་ལུས་སེམས་བདེ་བས་ཡུན་རིང་འཚོ། །རྒྱལ་ཟླའི་ནང་དུ་འདུས་པ་སྟོང་ཚོ་ཙམ། །ཚོགས་སྒྲུབ་བླ་མའི་དཀྱིལ་འཁོར་ལ་བརྟེན་པའི། །དབང་བསྐུར་དུས་སུ་དཔའ་བོ་མཁའ་འགྲོ་ཡི། །ལྷ་རྫས་མཆོད་སྤྲིན་དུ་མས་བསྟི་སྟང་བྱས། །ནུབ་ཕྱོགས་མཁའ་ལ་ཐོགས་མེད་སོང་བ་མཐོང་། །འདུས་པས་བྱ་རྒོད་བསྐོར་བ་བྱེད་པ་དང་། །དབང་པོའི་གཞུ་འདྲའི་འཇའ་ཚོན་གུར་ཁང་ནས། །མེ་ཏོག་ཆར་ཟིམ་འབབ་པ་བསྙོན་མེད་མཐོང་། །ཉེར་གཉིས་ལོར་སོན་མཆུ་ཟླའི་བཅོ་ལྔ་ལ། །སྐལ་ལྡན་འགའ་ལ་ཐུགས་ཐིག་དབང་བགྱིས་ཚེ། །སྙན་པའི་རྔ་སྒྲ་སྒྲོག་དང་དྲི་བཟང་ངད། །འཐུལ་བ་དེར་ཚོགས་ཀུན་གྱིས་གཏན་ལ་ཕེབས། །ལོ་དེར་བསམ་ཡས་རྟ་མགྲིན་ལྷ་ཁང་གི །དབང་ཆེན་སྐུ་ཉིད་དངོས་སུ་དར་ཅིག་མཐོང་། །རྟ་སྐད་བཞད་སྒྲས་སྐྱི་བུང་སྙམ་བྱེད་ཅིང་། །ཞལ་ནས་བདུད་རྩི་བཟུང་དུ་བཏུབ་པ་བསྩལ། །སྐབས་ཤིག་དེ་ཡི་ཇོ་བོ་གཙོ་འཁོར་ལྔ། །གདོས་བཅས་མིན་པར་དངོས་སུ་བཞུགས་པ་ལས། །མཛེས་འཛུམ་འོད་ཟེར་སྤྲོ་ཞིང་གསུང་བགྲོ་བར། །ཤིན་ཏུ་གསལ་བ་སྐད་ཅིག་ཙམ་ཞིག་མཐོང་། །སླར་ཡང་ནག་ཟླའི་བཅུ་ལ་ཞིང་སྐྱོང་གི །ཌཱ་ཀི་རྣམ་བཀྲའི་

― MLP003_Page_0013 ―

^{[མ་དཔེ་གཟིགས་ན་འདིར་གནོན།]}

[Full Size]

གོས་ཀྱིས་ལྷབ་ལྷུབ་གོས། །གཡོ་བས་མ་ཧཱ་སུ་ཁའི་བརྡ་ཐབས་བསྟན། །འཇམ་དཔལ་ཆོས་ཀྱི་ཁ་བྱང་ལག་ཏུ་སོན། །སྐབས་དེར་དུང་ཅན་རྡོ་རྗེ་རེག་བྱ་མའི། །ཀཱ་ཡ་སུ་ཁས་གཉུག་མའི་སེམས་ཀྱི་གཤིས། །འགྱུར་མེད་བདེ་བར་མཚོན་པའི་མེ་ལོང་བཞིན། །གསལ་བས་རང་ལུས་རྩ་ཡི་འཆིང་བྱེད་བཀྲོལ། །མེ་ལུག་ཁྲུམས་ཟླའི་བརྒྱད་ལ་ཤེལ་རི་ནས། །འཇམ་དཔལ་ཁྲོ་བོའི་ཟབ་ཆོས་གདམས་པ་རྣམས། །རིག་རྩལ་འགག་མེད་ཤུགས་འབྱུང་རྣམ་རོལ་གྱིས། །སྤྱན་དྲངས་བསྟན་འགྲོར་ཕན་བདེའི་སྲོག་ཏུ་གྲུབ། །ཉེར་གསུམ་ལོ་ནང་སྐྱིད་ཤོད་བདེ་ཆེན་རྩེར། །སོང་བའི་ལམ་ཚིགས་སྒྲགས་ཕུར་ཞིང་སྐྱོང་མ། །མོན་མོའི་ཆས་ཀྱིས་ཀུན་མཁྱེན་བླ་མ་ཡི། །སྐུ་ཚེའི་འགལ་རྐྱེན་སེལ་བྱེད་རྟེན་འབྲེལ་བཅོས། །བསྟན་པའི་དོན་བཞིན་བསྒྲུབ་ན་འགལ་རྐྱེན་གེགས། །གཞན་དུ་འགྱུར་ཞེས་སྨྲས་པ་གསོང་པོ་རུ། །གསོལ་བའི་གནས་ཚུལ་རིང་མིན་དུས་ཉིད་དུ། །གཏན་ལ་ཕེབས་པས་ཡིད་ཆེས་གནས་སུ་འཛིན། །ཆོས་འཁོར་ལྷ་སར་ཚེ་སྒྲུབ་བགྱིས་པའི་སྐབས། །རང་བྱོན་ལྔ་ལྡན་ཐུགས་རྗེ་ཆེན་པོའི་སྐུ། །འཛུམ་ཞིང་བཞད་པའི་གསུང་གིས་དབུགས་དབྱུང་ཞིང་། །བྱིན་གྱིས་བརླབས་པའི་སྣང་བ་གསལ་བར་མཐོང་། །སྣྲོན་ཟླའི་ཉེར་གཅིག་གྲུ་འཛིན་ཕོ་བྲང་ཆེར། །འཇིག་རྟེན་དབང་ཕྱུག་བླ་མའི་ཞབས་པད་བསྙེན། །འཇམ་དཔལ་ཁྲོ་བོའི་ཆོས་བཀའ་དང་པོ་རུ། །ཕུལ་ཚེ་མེ་ཏོག་ཆར་ཆེན་འབེབས་པ་དང་། །དབང་གི་ནུབ་མོ་རྔ་ཡབ་དཔལ་རིའི་རྩེར། །ཨོ་རྒྱན་ཆེན་པོ་མཁའ་འགྲོའི་འཁོར་ཚོགས་དང་། །ཁྱད་པར་བཻ་རོ་ཆོས་རྒྱལ་ཡབ་སྲས་སོགས། །ལས་འབྲེལ་སྨོན་ལམ་མཐུན་པའི་ཚོམ་བུར་བཅས། །ཡེ་ཤེས་དཀྱིལ་འཁོར་ཆེན་པོའི་རྣམ་རོལ་དུ། །དབང་བསྐུར་བྱིན་བརླབས་དགའ་ཆེན་རོས་བརྩེན་ཅིང་། །འཆི་བདག་དྲེགས་པས་དམ་ནོས་འདུད་པ་སོགས། །ངོ་མཚར་སྣང་ཆ་རྨི་ལམ་ཆུ་མཚོར་གསལ། །ཕྱིར་འཁོར་གྲུབ་གནས་མེ་ཏོག་ཚལ་ནང་དུ། །བྱིན་བརླབས་སྦྲང་རྩི་འཐུང་པའི་མགྲིན་སྙན་ལས། །ལུང་སྟོན་གླུ་དབྱངས་སྒྲོག་པའི་བུང་བ་རྣམས། །འཕུར་ལྡིང་བསོད་ནམས་སྙེ་མའི་མགྲོན་དུ་ཁུགས། །རང་ལོ་ཉེར་བཞི་ཞི་བ་དབོ་ཟླའི་ནང་། །བསམ་གཏན་བདུད་རྩིའི་བདེ་བ་བསྟེན་པའི་ཚེ། །མཚོ་སྐྱེས་རྡོ་རྗེ་

― MLP003_Page_0014 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིད་བཟང་གཞོན་ནུའི་ཚུལ། །ལེགས་བྲིས་མཛེས་མའི་འཁོར་གྱིས་བསྟེན་པ་ཅན། །མཁའ་ལ་ཡུད་ཀྱིིས་སྣང་བ་གསལ་མཐོང་ཞིང་། །ཡིད་ཀྱི་མེ་ལོང་ནང་དུ་འབྱུང་འགྱུར་གཟུགས། །གསལ་པོར་ཤར་བའི་གནས་ལུགས་ཕྱི་དུས་སུ། །མངོན་སུམ་གྲུབ་པ་ཚངས་པའི་རི་མོ་བཞིན། །སྟོན་དུས་ལྷ་ལྡན་གྲུ་འཛིན་རི་བོའི་སྤོར། །འཇིག་རྟེན་མགོན་པོ་རྣམ་འདྲེན་བླ་མའི་དྲུང་། །རྡོ་རྗེ་ཐེག་པའི་ཆོས་ཚུལ་མཐའ་ཡས་པའི། །དབང་ལུང་མན་ངག་བདུད་རྩི་བསྟབ་པ་ལས། །སྙིང་ཐིག་སྤྲོས་བཅས་དཀྱིལ་འཁོར་སྟེང་གི་མཁར། །འོད་ལྔའི་གུར་ཁྱིམ་ཡི་གེའི་འཁོར་ལོ་ཅན། །རང་གདངས་རྡོ་རྗེའི་སྒྲ་དབྱངས་སྙན་སྒྲོག་པ། །བུང་བ་ཚང་ཞིག་ལྟ་བུར་སྣང་བ་ལ། །སེམས་འདྲེས་བདེ་དང་སྟོང་པ་རོ་གཅིག་པའི། །མི་རྟོག་ཏིང་འཛིན་ངང་དུ་འབྱམས་པ་དག །གཞན་རྐྱེན་བརྡ་ཡིས་བསྐུལ་ནས་སད་པ་ལས། །ཏིང་འཛིན་ཉམས་ཀྱིས་ཞག་འགའ་འཚོ་བར་གྱུར། །སྐབས་དེར་ཀུན་མཁྱེན་བླ་མ་ཞབས་འབམ་གྱིས། །བསྙུན་ཚུལ་བསྟན་པར་དྲག་དམར་ཟོར་སྒྲུབ་སོགས། །སྒྲུབ་ཚེ་རྗེ་ཡི་འོད་གསལ་གཟིགས་སྣང་ལ། །ཡི་གེ་བཀོད་པའི་ཤོག་དྲིལ་སྣ་ཚོགས་པ། །ཞབས་ལ་དཀྲིས་པ་གཞན་གྱིས་བཀྲོལ་བ་དང་། །དུས་མཚུངས་རག་དུང་དབྱིབས་འདྲའི་ཞབས་སྦུབས་ནས། །སྦྲུལ་གཟུགས་མཐིང་ནག་གོས་ཅན་སྔགས་འཆང་གིས། །ཕྱིར་ཕྱུང་བསྲེགས་སྦྱངས་བྱས་པ་བདག་ལ་རྨིས། །ནངས་པར་སྤྲིན་བྲལ་ཟླ་བཞིན་གྱུར་པ་དང་། །རིམ་བཞིན་དུས་ཅན་སྙུན་པའི་གེགས་བྲལ་བའི། །དགེ་མཚན་མངོན་དུ་གྱུར་པས་དབུགས་དབྱུང་ཞིང་། །རྗེས་སུ་བསྔགས་པའི་ཚུལ་ལ་སུ་ཞིག་བསྙོན། །སྐབས་ཤིག་ལྷོ་བྲག་སྨྲ་བོའི་དབེན་གནས་སུ། །མངའ་བདག་གདུང་ཐ་ཆོས་ཀྱི་དབང་པོ་ལ། །མཁའ་འགྲོ་ཆེན་མོའི་ཆོས་སྐོར་ནོད་པ་དང་། །གཏེར་རྫས་བླ་དཔེ་ལ་སོགས་མཇལ་བའི་ཚེ། །ནུབ་ཕྱོགས་མཁའ་ལ་རྡོ་རྗེ་བཙུན་མོའི་སྐུ། །དམར་གསལ་མེ་འོད་འཕྲོ་བ་གཟི་མདངས་ཅན། །ནམ་མཁའ་གང་བའི་ཡེ་ཤེས་སྐུར་གསལ་ཞིང་། །སྔགས་སྒྲ་འབྲུག་སྟོང་ལྟ་བུར་སྒྲོག་པའི་སྒྲས། །འཇིགས་སྐྲག་སྣང་བ་རང་ཤར་རིག་པའི་ངོར། །གྲོལ་ཚེ་སྐུ་ཡང་མེ་ལོང་ཧས་བཏབ་ལྟར། །བཾ་ཡིག་འོད་ཀྱི་ཐིག་ལེར་ཞུ་བ་ལས། །སྙིང་གར་ཐིམ་པའི་གསལ་སྣང་ཤིན་ཏུ་བརྟན། །

― MLP003_Page_0015 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ཚེ་མཚན་མོའི་འཁྲུལ་རྟོག་ཁང་བཟང་ནང་། །མངའ་བདག་བླ་མ་རལ་པའི་ཐོར་ཚུགས་ཅན། །མཚུངས་མེད་གཟི་མདངས་རྒྱས་པས་ཟབ་ཆོས་ཀྱི། །གདམས་པའི་བདུད་རྩིས་སྐལ་བཟང་མཛད་པ་རྨིས། །དེ་ཚེ་ལྷོ་ཕྱོགས་བརྒྱུད་ནས་ཕྱིར་འཁོར་ལམ། །འབྲོག་དགོན་མྱ་ངམ་ཐང་གི་ཞག་ལམ་དུ། །དུག་ལྔའི་རང་གདངས་རྟོག་ཚོགས་གཉིས་འཛིན་གདོན། །མི་བཟད་ཆ ོ་འཕྲུལ་ཅིར་ཡང་སྟོན་པ་ཡི། །འཇིགས་ཟིལ་སྣང་ཆ་རིག་པའི་རང་རྩལ་དུ། །རྟོགས་ནས་ཅུང་ཟད་མནལ་བའི་རྨི་ལམ་དུ། །སྨུག་ནག་མཁའ་འགྲོ་བརྗིད་པའི་གཟི་མདངས་ཅན། །རུས་པའི་རྒྱན་ཅན་མི་ཐོད་ཀླད་ཁྲག་གིས། །གང་བ་གསོལ་ཞིང་ན་རའི་ཁྲིར་འཁོད་ནས། །གཟུང་འཛིན་འཁྲུལ་གཅོད་གདམས་པའི་གནད་གསང་བསྟན། །སད་ནས་དེ་དོན་ཉམས་སུ་བསྟར་བ་ལས། །བར་གཅོད་ཡུལ་ལས་རྒྱལ་བའི་མཚན་མ་ཐོབ། །གྲུ་འཛིན་གནས་སུ་འཇིག་རྟེན་དབང་ཕྱུག་གི །དག་སྣང་ཟབ་དོན་གདམས་པ་རྒྱ་ཅན་རྣམས། །དབང་ལུང་ཆོས་ཀྱི་བདུད་རྩི་སྐལ་བ་བཞིན། །སྩལ་ཚེ་དྭངས་ཤེལ་ལྟ་བུའི་ཁང་བཟང་ནི། །ཕྱི་ནང་སྒྲིབ་མེད་བཀོད་ལེགས་ཡིད་འོངནང་། །སྤྱན་རས་གཟིགས་མགོན་འོད་ཀྱི་དྲ་བ་ཅན། །མཐོང་ཚེ་དད་པའི་སེམས་ཀྱིས་བཏུད་པ་ལས། །རང་ཉིད་བློ་ཡི་རྗེས་ཞུགས་གཉིས་མེད་འདྲེས། །སྐུ་ཡི་རྣམ་པ་སྔར་བཞིན་གསལ་བ་ལ། །ནམ་མཁའ་གང་བའི་ལྷ་དང་ལྷ་མོ་ཡིས། །དབང་བསྐུར་བཀྲ་ཤིས་མེ་ཏོག་ཆར་འབེབས་ཤིང་། །དབུགས་དབྱུང་གཟེངས་བསྟོད་མངའ་གསོལ་བྱས་པ་རྨིས། །དེ་ཚེ་མཚན་རྒྱུའི་འབྱུང་པོ་མི་བསྲུན་པ། །ཞེ་སྡང་གདུག་སེམས་རང་གི་ཉེ་དུ་ཡང་། །བཟའ་བར་རྩོམ་འདི་འདུལ་བར་གྱིས་ཤིག་ཅེས། །གསུང་གི་གནང་བས་རྗེས་སུ་བསྐུལ་བ་ན། །སྙིང་རྗེའི་རྩལ་སྣང་གཏུམ་དྲག་ལྷར་ཤར་བའི། །ཕྲིན་ལས་ཧོ་མའི་ལས་སྦྱོར་ལ་ཞུགས་ཚེ། །ཕོ་ཉའི་འཁོར་གྱིས་ལུས་མེད་ཞགས་པས་སྐེ། །བཅིངས་པ་ཁྲིད་ནས་བསྒྲལ་ཅིང་བཅོམ་པ་མཐོང་། །སླར་ཡང་གྲུ་འཛིན་གནས་སུ་སྣང་སྲིད་ཀྱི། །ལྷ་སྲིན་རྣམས་ལ་བཀའ་བསྒོ་དམ་བསྒྲགས་ཚེ། །སྡེ་བརྒྱད་དྲེགས་པས་བཀའ་ནོད་ལས་བསྒྲུབས་པའི། །རྣམ་འགྱུར་ཉམས་སྣང་ཡུལ་དུ་གསལ་བར་ཤར། །དེ་ཚེ་གདུག་བྱེད་འགའ་ལ་སྲེག་པ་དང་། །དྲག་པོའི་ཟོར་

― MLP003_Page_0016 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་བྱད་གདོན་འགྲོལ་བ་སོགས། །ལས་སྦྱོར་དུ་མའི་གྲུབ་འབྲས་མངོན་སུམ་དུ། །གྱུར་པའི་ངོ་མཚར་ཀུན་གྱིས་གསལ་བར་མཐོང་། །ཁྱད་པར་གངས་ཅན་ལྗོངས་འདིར་ཕན་དང་བདེའི། །ཐབས་དང་རྟེན་འབྲེལ་དུ་མའི་བླང་དོར་རྣམས། །ཡེ་ཤེས་ལྷ་དང་འཇིག་རྟེན་དྲེགས་པ་འགས། །གསལ་པོར་བསྟན་པ་མངོན་སུམ་བཞིན་དུ་གྲུབ། །ཆོས་འཁོར་ལྷ་སར་གྲུབ་ཆེན་ཀ་ཧྣ། །གཟི་མདངས་མཚུངས་མེད་རྣལ་འབྱོར་སྤྱོད་པའི་ཆས། །བརྡ་ཐབས་ཕྱག་རྒྱས་བྱིན་གྱིས་བརླབས་པའི་ཚུལ། །མངོན་སུམ་བཞིན་དུ་ཡུད་ཅིག་གསལ་བར་མཐོང་། །ཡང་རྫོང་གནས་སུ་ཚོགས་མཆོད་བགྱིས་པའི་ནུབ། །དྭངས་ཤེལ་བརྩེགས་འདྲའི་མཐོན་མཐིང་རྡོ་ཡི་ཕུག །བཀོད་ལེགས་སྒོ་དང་ཐེམ་སྐས་རིམ་པ་ཅན། །དེ་ནང་གནུབས་ཆེན་སྔགས་ཆས་བརྗིད་པའི་སྐུ། །རྒྱ་བན་གཞོན་ནུ་མཛེས་མའི་འཁོར་དང་བཅས། །བཞུགས་པས་འབྱུང་འགྱུར་འགའ་ཡི་ལུང་བསྟན་དང་། །ཁྱད་པར་ཕུག་པའི་ངོས་ཡང་མཐིང་ཞུན་ལྟར། །དྭངས་པར་ཟབ་དོན་ཡི་གེའི་འཕྲེང་བའི་ཚོགས། །གསེར་མདོག་སྣང་བ་བཀླགས་པས་དེ་ཡི་དོན། །བཀྲོལ་ནས་ཞིབ་མོར་གསུང་སྙམ་བྱེད་པ་རྨིས། །སད་ཚེ་བདེ་ཆེན་ཉམས་ཀྱི་སྣང་ཆའི་རྩལ། །ཟབ་དོན་དཀའ་གནད་འགའ་ཞིག་གོ་སྙམ་བགྱིད། །གྲུ་འཛིན་གནས་སུ་དཀོར་བདག་ཆོ་འཕྲུལ་རྣམས། །ཏིང་འཛིན་མཐུ་ཡིས་ཟིལ་གྱིས་མནན་པ་དང་། །ཟུར་ཕུད་ལྔ་པ་དཔལ་གྱི་ལྷ་མོ་སོགས། །བསྟན་སྲུང་དུ་མས་བཏུད་ཅིང་དམ་ཚིག་ནོས། །མ་འོངས་འབྱུང་འགྱུར་དུ་མའི་རྣམ་པ་རྣམས། །ལུང་དུ་བསྟན་པའི་རྨི་ལམ་འཁྲུལ་སྣང་ཡང་། །ཇི་བཞིན་འཆུགས་མེད་གཏན་ལ་ཕེབས་པ་ནི། །ཀུན་གྱིས་མཐོང་གསལ་གནས་སུ་གྱུར་པ་ཉིད། །དེ་ཚེ་ཟབ་ཡངས་བར་ཁང་བཀོད་པ་ནི། །མངོན་སུམ་བཞིན་ལས་ཡངས་ཤིང་ཆེར་འཕགས་པར། །བཀོད་ལེགས་ཁྲི་ལ་ཆོས་ཀྱི་དབང་ཕྱུག་དང་། །ཀུན་སྤངས་བསོད་རྒྱལ་རྣམ་གཉིས་བཞུགས་པའི་འཁོར། །རིག་འཛིན་རྣལ་འབྱོར་དུ་མས་བསྐོར་བའི་དབུས། །ཕྲིན་ལས་རྡོ་རྗེ་ཕུར་པའི་དཀྱིལ་འཁོར་ནི། །རྟེན་དང་བརྟེན་པར་བཅས་པ་མངོན་སུམ་བཞིན། །ཕྱི་ནང་སྒྲིབ་མེད་གསལ་བར་དབང་བསྐུར་ཞིང་། །སྔགས་དང་ཕྱག་རྒྱས་བྱིན་བརླབས་བཀའ་གཏད་ནས། །ཐམས་

― MLP003_Page_0017 ―

^{[མ་དཔེ་གཟིགས་ན་འདིར་གནོན།]}

[Full Size]

ཅད་མཐིང་ཞུན་ལྟ་བུའི་ཐིག་ལེར་ཞུ། །དེ་ཉིད་བདག་ཐིམ་བདག་ཀྱང་ནམ་མཁའ་ལྟར། །སྤྲོས་བྲལ་སྟོང་ཉིད་དབྱིངས་སུ་རེ་ཞིག་འདས། །གཞན་ཡང་ཆོས་ཀྱི་རྒྱལ་པོ་སྲོང་བཙན་དང་། །བི་མ་བཻ་རོ་ལ་སོགས་དམ་པ་འགས། །བྱིན་བརླབས་གདམས་པའི་གནད་དང་ལུང་བསྟན་སོགས། །མཛད་པའི་ཚུལ་རྣམས་ཤིན་ཏུ་གསལ་བར་རྨིས། །ཀུན་མཁྱེན་བླ་མར་འཇོམས་བྱེད་དབང་བསྐུར་དང་། །ཚེ་དབང་ཕུལ་ཚེ་དཀྱིལ་འཁོར་འཁོར་ལོར་བཅས། །མེ་ལོང་གཟུགས་བཞིན་གསལ་བས་བྱིན་བརླབས་པའི། །ངོ་མཚར་མཚན་མ་མངོན་སུམ་ཉིད་དུ་གཟིགས། །ཀུན་དགའི་ལོ་ཡི་ཆུ་སྟོད་ཉི་ཤུའི་ནུབ། །ཤིན་ཏུ་ཆེ་བརྗིད་མཁའ་ལྡིང་ལ་ཞོན་ནས། །ཐོགས་མེད་ནམ་མཁའི་ལམ་ཡངས་སོང་བ་ལས། །རིན་ཆེན་རི་དབང་དབྱིབས་ལེགས་བལྟ་ན་སྡུག །ལྗོན་ཤིང་ནགས་ཚལ་མེ་ཏོག་ཆུ་མཚོ་ཡིས། །རྣམ་པར་བསྐོར་བའི་ཁང་བཟང་བཀོད་ལེགས་ན། །གནོད་སྦྱིན་དབང་པོ་འཁོར་དང་བཅས་པ་ཡི། །ངོ་མཚར་བཀོད་པ་བསམ་མི་ཁྱབ་མཐོང་ནས། །སླར་ཡང་ཤར་ཕྱོགས་མཁའ་ལ་སོང་བའི་སྒྲས། །ཁོར་ཡུག་ཁྱོན་ཀུན་གཡོ་བ་སྙམ་བྱེད་པའི། །རྐྱེན་གྱིས་ས་གཞིའི་འགྲོ་བ་སྣ་ཚོགས་པས། །བདག་ལ་མཆོད་བསྟོད་སྲི་ཞུར་བྱེད་པ་རྨིས། །གུང་ཐང་མཁར་དུ་ཤར་ཕྱོགས་ནམ་མཁའི་དབྱིངས། །འོད་ཀྱི་ཐིག་ལེ་སྲན་མ་འཕོས་པ་ཙམ། །ཁ་དོག་སྣ་ཚོགས་གྲངས་མེད་འབྲེལ་བའི་ནང་། །སྐུ་དང་ཡིག་འབྲུའི་སྟོང་གཟུགས་སྣ་ཚོགས་པ། །ཤར་བ་གཅིག་ལ་གཅིག་ཐིམ་མཐིང་ཞུན་མདངས། །གསལ་ཞིང་འབར་བ་ཡུངས་འབྲུ་ལྟར་གྱུར་ནས། །སྨིན་ཕྲག་ཐད་ཀྱི་མཁའ་ལ་ཡལ་བའི་མཐར། །སྟོང་ཉིད་སྤྲོས་བྲལ་ངང་དུ་རེ་ཞིག་འདས། །དཀར་པོ་ཟངས་སུ་མཚོ་སྟེང་ཁྱབ་པ་ཡི། །ཐིག་ལེ་མུ་ཁྱུད་ཁ་དོག་སྣ་ཚོགས་པ། །དེ་ནང་སྟོང་གཟུགས་སྣང་བ་འབྱམས་ཀླས་པའི། །ངོ་མཚར་སྒྱུ་མ་དགའ་བའི་རོལ་མོར་ཤར། །ཁྱད་པར་མཁའ་འགྲོ་ལེགས་བྲིས་སྒེག་མོའི་གཟུགས། །མཛེས་སྡུག་ལང་ཚོ་ལྡན་པས་ལུང་བསྟན་པའི། །རྨི་ལམ་གསལ་བའི་ནངས་པར་ཟབ་གཏེར་གྱི། །ཁ་བྱང་ལྡེ་མིག་ཤོག་དྲིལ་ལག་ཏུ་སོན། །རྒྱལ་ཁབ་ཆེན་པོར་སྔར་སྨོས་ལུང་བསྟན་བཞིན། །ཡུལ་འཁོར་སྲུང་གི་རབ་གནས་སྒྲུབ་པ་ལ། །

― MLP003_Page_0018 ―

^{[མ་དཔེ་གཟིགས་ན་འདིར་གནོན།]}

[Full Size]

ཞུགས་ཚེ་འཆི་བདག་གཤིན་རྗེའི་རྒྱལ་པོ་ཉིད། །ཕོ་བརྒྱད་མོ་བརྒྱད་དྲེགས་པའི་འཁོར་ཚོགས་ཀྱིས། །བསྐོར་བ་དམག་གི་ཁྲོམ་བཞིན་འཁྲིགས་པ་ན། །རིག་རྩལ་དུས་དགྲ་གཉེན་པོའི་ལྷར་ཤར་བས། །ཟིལ་མནན་བཀའ་བསྒོ་དམ་ནོས་ཕྲིན་ལས་བཞི། །ཐོགས་མེད་སྒྲུབ་པའི་གསལ་སྣང་ཡུད་ཅིག་ཤར། །འདུམ་པོར་མེས་པོ་དོན་གྲུབ་དབང་གི་རྒྱལ། །ལྔ་པར་གྱུར་ཚེ་སྒྲིབ་སྦྱོང་བྱས་པའི་ནུབ། །རྡོ་རྗེ་བཙུན་མོ་མི་མོའི་རྣམ་པ་ཡིས། །མཁའ་སྤྱོད་གནས་སུ་བདེ་བར་ཁྲིད་པ་མཐོང་། །ཐར་གླིང་གནས་སུ་སྲིན་པོའི་མགོ་ཟླའི་བཅུར། །ཁོར་ཡུག་རི་ངོགས་གདུགས་དང་རྒྱལ་མཚན་སོགས། །རྣམ་མང་མཆོད་པའི་ཚོགས་ཀྱིས་སྤྲིན་གཏིབས་ཤིང་། །སྙན་པའི་སྒྲ་དབྱངས་འབྲུག་ལྟར་ལྡིར་བ་དང་། །ལྷན་ཅིག་རིན་ཆེན་མེ་ཏོག་ཆར་འབེབས་ཤིང་། །དབུས་ན་འཇའ་ཚོན་གུར་ཁྱིམ་འཁྲིགས་པའི་ཀློང་། །ཨོ་རྒྱན་ཆེན་པོ་མཁའ་འགྲོའི་འཁོར་བཅས་ཀྱིས། །བྱིན་བརླབས་ལུང་བསྟན་དབུགས་དབྱུང་མཛད་པ་རྨིས། །སླར་ཡང་གྲུ་འཛིན་རི་བོར་སྲིན་པོའི་ལོའི། །རྒྱལ་ཟླའི་སྟོང་ལ་མ་མགོན་སྤྲུལ་པ་ཡི། །སྐྱོན་རྣམས་མཚང་འདྲུའི་ཚུལ་དང་བླང་དོར་གྱི། །ལུང་བསྟན་དུ་མ་གསལ་པོར་གསུང་བ་རྨིས། །མེ་འབྲུག་མཆུ་ཟླའི་གསུམ་ལ་དེ་ཉིད་དུ། །ཡེ་ཤེས་མཁའ་འགྲོ་མཛེས་བརྗིད་ལང་ཚོ་མས། །གནས་མལ་གཞི་འཛིན་དུས་དང་རྟེན་འབྲེལ་གྱི། །བཅོས་ཁའི་རྣམ་གྲངས་དུ་མ་གསལ་པོར་བསྟན། །ས་གཟུང་དུས་སུ་དཔལ་ཆེན་ཀུ་མཱ་རའི། །གསལ་སྣང་རེག་མཐོང་ལྟ་བུར་འཆར་བ་དང་། །ཡིད་ཤེས་མ་འོངས་འབྱུང་འགྱུར་ཇི་སྙེད་ལས། །སྔོན་སོང་རྡོ་ཡི་རི་མོ་བཞིན་དུ་བཙན། །ཟངས་རིར་ནག་ཟླའི་ཚེས་བཅུའི་མཆོད་པའི་སྲོད། །མདུན་མཁར་ཨོ་རྒྱན་ཆེན་པོ་ཡབ་ཡུམ་སྐུ། །གསལ་བར་མཐོང་ཚེ་བཟོད་མེད་མོས་གུས་ཀྱིས། །རྩལ་སྣང་སྟོང་ཉིད་རིག་པའི་ངོ་བོར་འདྲེས། །ཕྱིར་ལམ་བསམ་ཡས་མཐོང་ཚེ་སྔོན་དུས་ཀྱི། །གནས་དུས་གྲོགས་འཁོར་སྤྱོད་ཚུལ་ལ་སོགས་པ། །རྣམ་འགྱུར་འལ་འོལ་མཐོང་བ་ལྟ་བུའི་ཉམས། །བཟང་པོའི་བག་ཆགས་དགེ་བ་ཉིད་དུ་སད། །སྐབས་ཤིག་གཙུག་ལག་ཁང་གི་ལས་གྲའི་སྐབས། །སྲུང་མའི་གནས་ཁང་དམ་ཅན་རང་ཉིད་ཀྱིས། །ས་འདིར་འོས་ཞེས་བདག་གིར་མཛད་པའི་

― MLP003_Page_0019 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ། །རྨི་ལམ་འཁྲུལ་ངོར་ཤིན་ཏུ་གསལ་བར་མཐོང་། །ལོ་དེར་སྒྲུབ་ཆེན་བཀའ་བརྒྱད་ཕྲིན་ལས་ལ། །འཇུག་འདོད་གདུང་ཤུགས་གསོལ་བ་བཏབ་པའི་ནུབ། །མངའ་བདག་བླ་མ་རལ་པའི་ཅོད་པན་ཅན། །དགྱེས་འཛུམ་གཟི་བརྗིད་འབར་བའི་ཕྱག་གཉིས་ནི། །ཟབ་ཆོས་གླེགས་བམ་བཟུང་བས་ལུང་བསྟན་གྱི། །བརྡ་སྦྱོར་མཛད་ནས་སློབ་དཔོན་རྣམ་པ་བཞིའི། །ཐུགས་ཀྱི་དཔལ་བེའུ་འདི་ཞེས་བྱིན་བརླབས་མཐར། །འོད་ཞུ་དྷཱིཿཡིག་གཟུགས་ཀྱིས་ཐིམ་པ་རྨིས། །མེ་འབྲུག་ཁྲུམས་ཟླའི་ཉེར་ལྔར་ཙཱ་རི་ཏྲར། །འགྲོ་བར་ཞུགས་ཚེ་སྐུ་ལྷ་ཤམྦྷོ་ཡིས། །བཞིན་བཟང་སྐྱེས་པའི་རྣམ་པས་གུས་བཏུད་ཅིང་། །འཕྲིན་ལས་སྒྲུབ་པའི་དམ་ཚིག་གཉེར་དུ་བླངས། །ཆོས་ཟམ་གནས་སུ་ཞིང་སྐྱོང་དཔའ་བོ་ཡིས། །ཉེར་བསུས་མཐུན་རྐྱེན་སྒྲུབ་པར་ཁས་བླངས་ཤིང་། །ལྷན་སྐྱེས་ཌཱ་ཀིས་བདེ་ཆེན་ཡེ་ཤེས་བསྐྱེད། །རྩ་ཁམས་སྒྲིབ་མེད་གསལ་བའི་ངོ་མཚར་མཐོང་། །གཅིག་ཅར་གནས་སུ་སླེབས་སྐབས་ཁ་བ་ཡིས། །ལམ་གྱི་རྒྱུན་བཅད་ཕལ་ཆེར་ཕྱིར་ལོག་ཚེ། །གནོད་སྦྱིན་དཔའ་བོས་གེགས་མེད་བགྲོད་འགྱུར་ཞེས། །ལུང་བསྟན་ལམ་སྣས་མཚོན་བཞིན་བདེ་བར་འཁོད། །གནས་ཆེན་སོ་སོར་ཚོགས་མཆོད་བགྱིས་པའི་ཚེ། །ཡེ་ཤེས་ལྷ་དང་དམ་ཅན་འདུས་པའི་བྱིན། །དེར་ཚོགས་སྐལ་ལྡན་རྒྱུད་ལ་ཞུགས་པ་དང་། །དཔའ་བོའི་བརྡ་སྐད་སྤྱུགས་གླུ་འབོད་པ་ཐོས། །དེ་ཚེ་དབང་པོའི་གཞུ་རིས་རྣམ་བཀྲའི་གུར། །ཁོར་ཡུག་ཕ་མཐར་བྲེས་པའི་སྤྲིན་རུམ་ནས། །མེ་ཏོག་ཆར་ཟིམ་འབེབས་དང་ལྷན་ཅིག་པར། །བསྲུང་ཞིམ་ངད་པས་ཀུན་ཡིད་ཚིམ་པ་ཐོབ། །ཁྱད་པར་ངོ་མཚར་བཀོད་ལེགས་ཁང་བཟང་ནང་། །པད་འབྱུང་བི་མ་མཁའ་འགྲོའི་འཁོར་ལྡན་པས། །བཅུ་ཕྲག་ལོ་ཡི་བར་ཆད་སེལ་བ་དང་། །ཟབ་མོ་གཏེར་གྱི་ལུང་བསྟན་དུས་གནད་སྩལ། །སྟག་ཚང་གནས་སུ་དུར་ཁྲོད་བཀོད་པའི་དབུས། །མ་ཚོགས་མཁའ་འགྲོས་གྲུབ་ཆེན་ཉེར་ལྔ་དང་། །ལྷན་ཅིག་བམ་ཆེན་ཚོགས་ཀྱིས་མཆོད་བྱས་ཤིང་། །བྱིན་བརླབས་དངོས་གྲུབ་ཐོབ་པའི་དགེ་མཚན་རྨིས། །སླར་ཡང་རྒྱལ་ཟླའི་ཉ་ལ་གནམ་ལྕགས་བྲག །གསང་བའི་ཕུག་ནས་ཟབ་གཏེར་སྤྱན་དྲངས་པའི། །ངོ་མཚར་རྟགས་དང་མཚན་མ་བཟང་པོའི་ཚུལ། །

― MLP003_Page_0020 ―

^{[མ་དཔེ་གཟིགས་ན་འདིར་གནོན།]}

[Full Size]

མངོན་གྱུར་གཏན་ལ་ཕེབས་པའི་ངོ་མཚར་ཐོབ། །དམར་སེར་དབོ་ཟླར་གྲུ་འཛིན་ཕོ་བྲང་ཆེར། །ཚེ་ལྷ་བསྙེན་ཚེ་འཆི་མེད་ཞིང་ཁམས་སུ། །ཡེ་ཤེས་ལྷ་ཡིས་ཚེ་བཅུད་དངོས་གྲུབ་དཔྱིད། །སྩལ་བར་རང་སྐལ་ཇི་བཞིན་སྤྱོད་པའི་ཚུལ། །སླར་ཡང་མུན་མཐོང་སྒྲོན་མེའི་སྣང་བ་དང་། །ཅ་ཅོའི་སྒྲ་ཡིས་མཚོན་མཐར་ནུབ་ཕྱོགས་སུ། །ཌཱ་ཀིས་འཁྱོགས་ལ་བསྟེན་ནས་སོང་བའི་མཐར། །མི་བཟད་དུར་ཁྲོད་ཧེ་རུ་ཀ་ཡི་ཞིང་། །འཇིགས་རུང་བཀོད་པའི་རྣམ་རོལ་མཐའ་ཡས་པར། །རྣམ་མང་ཌཱ་ཀི་རྩེ་བའི་དོ་ར་ན། །ཁྲག་འཐུང་དཔའ་བོར་སྙེམས་པའི་རྣམ་རོལ་གྱིས། །དམ་རྫས་བདུད་རྩིའི་དཔལ་ལ་རོལ་པའི་མཐར། །དབྱིངས་ཕྱུག་རེག་བྱའི་རྩེ་དགའ་གཏུམ་མོའི་མེས། །ཟླ་བ་བདུད་རྩིར་དྭངས་པ་དགའ་བཞིའི་འགྲོས། །ཡེ་ཤེས་རོལ་མོར་ཉམས་སུ་མྱོང་གྱུར་པའི། །བདེ་བའི་གསལ་སྣང་མེ་ལོང་གཟུགས་བཞིན་ཤར། །དེ་ཚེ་མཁའ་སྤྱོད་དགའ་མའི་མཛེས་སྡུག་གཟུགས། །ཟག་མེད་བདུད་རྩི་སྟོབ་པའི་རྣམ་འགྱུར་གྱིས། །བྱིན་བརླབས་བརྡ་ཐབས་ལུང་བསྟན་མཛད་བཞིན་པར། །ནུབ་ཕྱོགས་མཁའ་ལ་ཇེ་མཐོར་གཤེགས་པ་སྙམ། །སླར་ཡང་གྲུབ་མཆོག་དཔའ་བོའི་སྒྱུ་འཕྲུལ་གར། །གཞན་ལ་རྗེས་སུ་ཆགས་པའི་བརྡ་ཐབས་དང་། །བཞད་སྒྲས་གཉིད་ལས་སད་ཚེ་བདེ་ཆེན་གྱིས། །ལུས་སེམས་འཚོ་བ་ཞག་འགར་རྩོལ་མེད་བྱུང་། །དུས་ཀྱི་ཕོ་ཉའི་ཁྲུམས་ཟླ་ནས་བརྩམས་ཏེ། །བདེ་བའི་དཔྱིད་འཇོ་གྲུབ་པའི་ཕོ་ཉ་ནི། །གཞན་དུ་རབ་དགའི་བདུད་རྩི་སྦྱིན་བྱེད་གང་། །ཟླ་བཞིན་ལང་ཚོ་གསར་པའི་རྣམ་འགྱུར་ཅན། །འདབ་བརྒྱ་རྒོད་པ་སྦྲང་རྩིའི་ཟིལ་མངར་རོ། །ཀུ་མུད་གཉེན་དང་འགྲོགས་ཚེ་སུ་ཁའི་མེས། །རྣམ་རྟོག་ཚང་ཚིང་བུད་ཤིང་ཀུན་བསྲེགས་ནས། །འཇིགས་མེད་ཡེ་ཤེས་རྡོ་རྗེའི་གནས་ལ་སྦྱར། །གང་ཚེ་དྲི་མེད་ཤེལ་ལྟར་དྭངས་པའི་སེམས། །སྣ་ཚོགས་རྐྱེན་གྱིས་ཅིར་ཡང་འཆར་བྱེད་པའི། །རྣམ་འགྱུར་འདུ་བྱེད་སྤྲིན་དང་མཚུངས་པ་ཡང་། །རང་རིག་བདེ་ཆེན་ནམ་མཁའི་ངོ་བོར་གྲོལ། །དེ་ཚེ་ནམ་མཁའ་གང་བའི་དཔའ་བོ་དང་། །རྣལ་འབྱོར་མ་རྣམས་དགྱེས་དགུར་རོལ་པའི་སྤྲིན། །ངོ་མཚར་མཁའ་ཁྱབ་བདུད་རྩིའི་ཆར་འབེབས་པ། །གནས་ལུགས་ཡིད་མཚོར་རོ་གཅིག་གྱུར་པ་བཞིན། །

― MLP003_Page_0021 ―

^{[མ་དཔེ་གཟིགས་ན་འདིར་གནོན།]}

[Full Size]

སྐབས་ཤིག་གཏི་མུག་གདུག་པའི་ནད་གདོན་གྱི། །རྣམ་འགྱུར་ཚོར་བའི་མེ་ལོང་ནང་ཤར་ཚེ། །ནད་གདོན་ཡེ་ནས་རང་བཞིན་མ་གྲུབ་པའི། །གནས་ལུགས་ཅུང་ཟད་རྟོགས་པ་རིག་པའི་རྩལ། །རིག་རྒྱལ་ལྷ་ཡི་རྣམ་པར་ཤར་བ་ཡིས། །བཟླས་བརྗོད་བསྙེན་པའི་རྣལ་འབྱོར་ལ་ཞུགས་ཚེ། །མགོ་ཟླའི་བཅུ་བདུན་སྲོད་ཀྱི་ཐུན་རྗེས་སུ། །ཅུང་ཟད་བྱིང་ཉམས་ཐུག་ཆོམ་སྒྲས་སད་ཚེ། །མདུན་མཁར་མི་བཟད་དུད་སྤྲིན་འཁྲིགས་པའི་ཀློང་། །རིག་པའི་རྒྱལ་པོ་རྔམ་བརྗིད་ཁྲོས་པའི་གཟུགས། །སྣ་ཚོགས་འོད་ཟེར་འཕྲོ་བའི་གཟི་མདངས་ཅན། །མཐོང་བའི་མོད་ལ་དངངས་ཤིང་བརྒྱལ་བ་སྙམ། །དེ་ལས་སད་ཚེ་སྙན་བརྗིད་སྒྲར་བཅས་པས། །འུབ་ཀྱིས་འདུས་ནས་རང་ལ་ཐིམ་པ་ལྟར། །གྱུར་ཚེ་ལུས་སེམས་བདེ་བའི་ཉམས་གསལ་བ། །འཛིན་རྟོག་བྲལ་བའི་ངང་དུ་རེ་ཞིག་འདས། །དེ་ཚེ་རྨི་ལམ་སྣང་ཆར་གདུག་པའི་གདོན། །ལྟོ་འགྲོའི་གཟུགས་ཀྱིས་ལུས་ལས་ཐོན་རྨིས་པས། །ནངས་པར་ནད་གདོན་བགེགས་ཀྱི་གཡུལ་ངོ་ལས། །རྒྱལ་བ་གཟའ་ལས་གྲོལ་བའི་ཟླ་བ་བཞིན། །དོན་གྲུབ་མཆུ་ཟླར་དམ་འདྲེས་རྡོ་རྗེའི་མཆེད། །གྲགས་ལྡན་ཞིག་གིས་ངན་སྦྱོར་བྱས་པའི་ཚུལ། །མངོན་སུམ་བཞིན་མཐོང་སྟོང་ཉིད་རིག་པའི་རྩལ། །བྱམས་དང་སྙིང་རྗེར་ཤར་བས་ཟིལ་གྱིས་མནན། །རིང་མིན་ཚེ་ན་འཕྲིན་ལས་མགོན་པོ་ཡིས། །བྱད་མའི་མགོ་བོ་མགྲིན་པ་ནས་བཅད་པ། །ཁྲག་འཛག་བཞིན་པར་མདུན་དུ་བོར་བ་མཐོང་། །མི་རིང་དུས་ན་དེ་རྟགས་མངོན་དུ་གྱུར། །སླར་ཡང་ཆུ་སྟོད་ཅན་གྱི་ཚེས་གསུམ་ལ། །ཡེར་པར་ཚོགས་མཆོད་བགྱིས་ཚེ་ཡེ་ཤེས་བྱིན། །རྒྱུད་ལ་ཞུགས་པས་གནས་དུས་འཁོར་སློབ་ཀྱི། །ལས་སྨོན་འབྲེལ་བའི་ཚུལ་རྣམས་གསལ་པོར་མཐོང་། །དྲག་པོ་ཆུ་སྟོད་ཟླ་བར་རྗེ་བླ་མ། །ཕན་ཚུན་གདན་སར་བསྐྱོད་པའི་དངོས་གནས་རྣམས། །རྨི་ལམ་འཁྲུལ་ངོར་གང་ཤར་གསོལ་བ་ན། །ཇི་བཞིན་གཏན་ལ་ཕེབས་ཞེས་དབུགས་དབྱུང་མཛད། །དེ་ཚེ་གསལ་སྣང་འགའ་ཡི་རྣམ་འགྱུར་དང་། །རྟེན་འབྲེལ་རྟགས་རྣམས་རིང་མིན་དུས་ཉིད་དུ། །ལོ་ཟླའི་ངེས་པ་ཇི་བཞིན་འཕྱུག་མེད་དུ། །མངོན་སུམ་གྱུར་པའི་གནས་ལ་སོམ་ཉི་བྲལ། །གྲོ་བཞིན་ཅན་གྱི་གང་བའི་དུས་ཉིད་དུ། །ལྷོ་ཕྱོགས་གོམ་པའི་

― MLP003_Page_0022 ―

^{[མ་དཔེ་གཟིགས་ན་འདིར་གནོན།]}

[Full Size]

འདེགས་འཇོག་བཀོད་པ་ལས། །ཉེར་བརྒྱད་ཤ་འུག་སྟག་སྒོར་སླེབས་པའི་ནུབ། །ངོ་མཚར་དགེ་བའི་རྨི་ལྟས་གསལ་པོར་ཤར། །ནངས་པར་གནས་ཀྱི་ལྟེ་བ་དཔལ་ཆེན་པོའི། །གཟུགས་བརྙན་གོར་མའི་རྣམ་པར་ཤར་བ་ནས། །ཨོ་རྒྱན་ཐུགས་བཅུད་བདེ་གཤེགས་ཀུན་འདུས་ཀྱི། །ཟབ་གཏེར་སྐལ་ལྡན་ཚོགས་པའི་དབུས་སུ་བཏོན། །འདུས་པའི་འཁོར་ལ་བྱིན་རླབས་བགྱིས་པའི་ཚེ། །སྤྲིན་བྲལ་མཁའ་ལ་འཇའ་ཚོན་བྲེས་པ་ལས། །རྣམ་བཀྲའི་མེ་ཏོག་ཆར་སོགས་ངོ་མཚར་གྱི། །མཚན་མས་སྐལ་ལྡན་ཡིད་ཀྱི་ངལ་གསོ་བསྒྲུབས། །བློ་ངན་ནག་པོའི་དང་པོ་ནས་བཟུང་སྟེ། །གར་དབང་ཐུགས་རྗེ་ཆེན་པོ་བསྙེན་པའི་ཚེ། །དུས་གསུམ་ལས་འབྲེལ་འབྱུང་འགྱུར་ཇི་སྙེད་པ། །ཆུ་ནང་ཟླ་གཟུགས་བཞིན་དུ་གསལ་བ་དང་། །ཁྱད་པར་ཆོས་བདག་སྐྱེས་བུའི་སྐུ་ཚེ་ཡི། །འགལ་རྐྱེན་གཞན་དུ་བསྒྱུར་བའི་རྟེན་འབྲེལ་གྱི། །ཐབས་ཚུལ་བསྟན་པ་ཇི་བཞིན་བསྒྲུབས་པ་ལས། །རེ་ཞིག་འདོད་པའི་འབྲས་བུ་མངོན་གྱུར་ཅིང་། །སྲིད་པའི་གཅོང་རོང་ཉམ་ངའི་གཡང་ས་ལས། །ཞི་བའི་གྲོང་དུ་དགའ་མས་བདེར་དྲངས་ཚེ། །ངོ་མཚར་བཀོད་པའི་ཞིང་ཁམས་འཆི་མེད་ཀྱི། །གྲོང་ཁྱེར་གྱིས་ཀྱང་མཚོན་དུ་མེད་པའི་དབུས། །པད་འབྱུང་སྒྱུ་འཕྲུལ་རྡོ་རྗེའི་རྣམ་རོལ་གྱིས། །སྣང་སྲིད་དཀྱིལ་འཁོར་འཁོར་ལོར་ཡོངས་དྭངས་པར། །དབང་བསྐུར་ཐུགས་རྗེས་བདག་རྒྱུད་བྱིན་བརླབས་ནས། །བདེ་ཆེན་ཡེ་ཤེས་ཉམས་སུ་མྱོང་བ་སྩལ། །སླར་ཡང་ཡེ་ཤེས་ཌཱ་ཀིས་འཆི་མེད་ཀྱི། །བདུད་རྩིའི་ཤིང་འབྲས་བཅུད་ཀྱི་ཐིགས་པའི་ཚུལ། །བཅུ་གསུམ་གྲངས་དང་བདུན་དུ་སྩལ་བ་ཡིས། །རང་ལུས་མཚུངས་མེད་གཟི་མདངས་རྒྱས་པ་རྨིས། །སྐབས་ཤིག་འགག་མེད་ཉམས་ཀྱི་རྩལ་སྣང་དུ། །ཨོ་རྒྱན་ཡབ་ཡུམ་སྤྲུལ་པའི་རྣམ་རོལ་གྱིས། །བྱིན་བརླབས་མཛད་པའི་གསལ་སྣང་བརྟན་པོའི་མཐར། །བདེ་སྟོང་ཉམས་ཀྱི་སྣང་བས་རེ་ཞིག་འདས། །ཆུ་སྟོད་ཅན་གྱི་མར་ངོའི་ཚེས་བཅུའི་ནུབ། །ཌཱ་ཀིའི་ལམ་སྣས་མཚོན་པར་རྒྱ་མཚོ་དང་། །ནམ་མཁའི་ལམ་ལས་ཐོགས་མེད་སྐད་ཅིག་གིས། །ཨོ་རྒྱན་ཧེ་རུ་ཀ་ཡི་ཞིང་དུ་བགྲོད། །དུར་ཁྲོད་རོ་གླིང་ཀེང་རུས་གུར་ཁང་ནས། །ཌཱ་ཀི་མི་མོའི་གསང་ཡེས་

― MLP003_Page_0023 ―

^{[མ་དཔེ་གཟིགས་ན་འདིར་གནོན།]}

[Full Size]

ཚུལ་ཅན་མཁའ་དབྱིངས་ལས། །དམར་གསལ་ཐིག་ལེ་སྤྲོས་པ་སྙིང་གར་བསྟིམས། །གསལ་སྟོང་ནམ་མཁའི་ངང་དུ་འདྲེས་པ་རྨིས། །གྲོ་བཞིན་ཅན་གྱི་ཉེར་བཞིར་གངས་ཅན་གྱི། །གྲུ་འཛིན་རྒྱལ་པོའི་ཁབ་ཀྱི་རྩེ་མོ་རུ། །ཆོས་རྒྱལ་ཡབ་སྲས་རྩོད་དུས་འགྲོ་བའི་མགོན། །མཁྱེན་བརྩེ་ནུས་པའི་ཕུལ་གྱུར་རྣམ་གཉིས་སུ། །བདེ་གཤེགས་ཀུན་འདུས་དཀྱིལ་འཁོར་ཆེན་པོ་རུ། །དབང་དང་བྱིན་རླབས་གདམས་པ་གཏད་རྒྱའི་བཀའ། །དང་པོར་ཕུལ་ཚེ་དགེ་བའི་མཚན་མ་ཡིས། །ཐུགས་ལ་དགྱེས་པའི་ངོ་མཚར་ཅི་ཡང་སྤེལ། །དེ་ཚེ་མཚན་མོའི་ཐུན་གྱི་རྨི་ལམ་དུ། །མཚོ་སྐྱེས་རྡོ་རྗེ་ཐ་མལ་རྣལ་འབྱོར་གཟུགས། །མཛེས་སྡུག་མཁའ་འགྲོའི་ཕོ་ཉ་དང་བཅས་པས། །ཁྲོ་ཚུལ་བརྡ་ཡིས་ལུང་བསྟན་འགའ་ཞིག་མཛད། །གང་ཡང་སྨོན་ལམ་ས་བོན་དུས་སྨིན་པའི། །འབྲས་བུར་སྤྱོད་པ་དགེ་དང་མི་དགེ་བ། །རང་གཟུགས་འབྱུང་འགྱུར་དངོས་པོའི་གནས་ལུགས་ཀུན། །ཇི་བཞིན་བསྟན་པ་ཕྱིས་ན་མངོན་དུ་གྱུར། །དེ་ཚེ་ཐེག་ཀུན་རྩེ་མོ་ཨ་ཏིའི་ལམ། །གནས་ལུགས་ཀ་དག་རང་བཞིན་ལྷུན་གྲུབ་ཀྱི། །ངོ་སྤྲོད་ཕུལ་ཚེ་སྐུ་ཡི་གསལ་སྣང་ཉིད། །མཐིང་ཞུན་འོད་ཀྱི་གོང་བུར་འདྲེས་པ་མཐོང་། །སྐབས་ཤིག་ལྷ་ཚས་བཀྲ་ཤིས་མཚན་མའི་གཟུགས། །གསེར་འོད་ལང་ཚོས་སྒེག་དང་འགྱུར་མེད་ཁམས། །ཅིར་ཡང་འཆར་བ་མཚོན་པའི་མན་ཤེལ་སོགས། །བརྡ་ཐབས་རྟེན་འབྲེལ་སྐྱེས་སྩོལ་དབུགས་དབྱུང་མཛད། །དེ་ཚེ་སྐུ་དཀྱིལ་གསལ་སྣང་ཆུ་ཟླའི་གཟུགས། །རླབས་ཕྲེང་རྐྱེན་གྱིས་གསལ་འགྲིབ་ཇི་བཞིན་དུ། །རེས་གསལ་རེས་མི་གསལ་བར་སྣང་བའི་མཐར། །དང་པོའི་དབྱངས་ཡིག་འོད་ཀྱི་གོང་བུར་དྭངས། །དབྱུག་པ་ཅན་གྱི་དང་པོའི་ཚེས་བཅུའི་ནུབ། །རབ་ཏུ་རྒྱས་པའི་ལྗོན་ཤིང་སྡོང་པོ་ནི། །ལོ་འདབ་མེ་ཏོག་འབྲས་བུ་མཚར་བཞད་པ། །གཟུགས་མཛེས་སྙན་སྒྲ་སྒྲོག་པའི་མཁའ་འགྲོའི་ཚོགས། །གྲངས་མེད་འཕུར་ལྡིང་རྩེ་ཞིང་རོལ་བའི་མཐར། །མི་བཟད་རླུང་གིས་བསྐྱོད་པའི་སྐད་ཅིག་ལ། །ཁོར་ཡུག་ནམ་མཁའི་ཕ་མཐར་བྱེར་བ་དང་། །ཨ་ཧཾ་སྒྲ་ཡིས་སྲིད་གསུམ་གཡོ་བ་རྨིས། །རྔ་ཆེན་ནག་པའི་ཉ་ལ་བསམ་ཡས་ཀྱི། །བར་ཁང་གཡུ་ཞལ་ཅན་གྱི་གཙོ་འཁོར་ལྷ། །གཡོ་འགུལ་གསུང་བགྲོ་འོད་

― MLP003_Page_0024 ―

^{[མ་དཔེ་གཟིགས་ན་འདིར་གནོན།]}

[Full Size]

ཟེར་སྤྲོ་བསྡུའི་ཚུལ། །མཐོང་བས་བཟོད་མེད་བྱིན་རླབས་རྒྱུད་ལ་ཞུགས། །ལྐོག་གྱུར་དངོས་པོའི་གནས་ལུགས་ཇི་སྙེད་པ། །ཤེས་ཉམས་སྣང་ཆར་གནམ་ས་གཡོ་བ་ཙམ། །མཐོང་བ་ཇི་བཞིན་བརྗོད་པ་ཕྱི་དུས་སུ། །སྒྲིམ་པོའི་བློ་ཅན་བདེན་པའི་ཟུངས་སུ་འཛིན། །དབྱུག་ཟླའི་བཅོ་བརྒྱད་བྱིན་རླབས་མོས་པའི་མཐུ། །རྒྱུ་རྐྱེན་རྟེན་འབྲེལ་ཕུན་སུམ་ཚོགས་པ་ལས། །ཡིད་ཤེས་ལམ་དུ་ཇི་ལྟར་གསལ་བ་རྣམས། །ངག་གི་བརྗོད་པས་དོན་དང་ལྡན་པ་གྲུབ། །སྨིན་དྲུག་ཅན་གྱི་བཅུ་བཞིར་བདེ་འབྱུང་ལྷས། །དམར་འོད་ཆགས་པའི་བཞིན་བཟང་སྐྱེས་བུ་ཡི། །རྣམ་པས་ཁམས་གསུམ་སྲེག་བཅུད་རིན་ཆེན་གྱི། །སྒྲོམ་བུའི་རྣམ་པར་གཏད་པའི་དགེ་མཚན་མཐོང་། །བཅོ་བརྒྱད་སྲོག་གཏད་དགེ་བའི་མཚན་བཟང་གི །རྟེན་འབྲེལ་ཉིན་མོར་བྱེད་པའི་འོད་བརྒྱ་པ། །ལོག་སྨོན་ཆུ་འཛིན་རྐྱེན་གྱིས་མ་བསྒྲིབས་ན། །བོད་འབངས་ཕན་བདེའི་སྣང་བས་འགེངས་པར་ཤར། །རྒྱལ་ཟླའི་བརྒྱད་ལ་སྔོན་དུས་ཌཱ་ཀི་ནི། །ཟབ་ལམ་ཕོ་ཉའི་གྲོགས་སུ་དམ་བཅས་པ། །བགྲང་བྱའི་ཧེ་ཏུ་ཇི་བཞིན་གཏན་ཕེབས་པའི། །ངོ་མཚར་མཚན་མའི་སྐྱ་རེངས་དང་པོར་མཐོང་། །ཁྲག་སྐྱུག་སྣྲོན་ཟླའི་གསུམ་ལ་ཤངས་ཀྱི་ཕུར། །གངས་དཀར་མ་སོགས་ཡུལ་བདག་འཁོར་བཅས་ཀྱིས། །བཏུད་ཅིང་མཆོད་པའི་ཉམས་སྣང་ཆེས་གསལ་ཞིང་། །ཕྱི་ལྟར་ཆར་རླུང་འཚུབ་འཁོར་མཚར་བ་མཐོང་། །བཅོ་བརྒྱད་ཚེས་ལ་སྲམ་པ་སྒྲུབ་ཁང་དུ། །དཔལ་ཆེན་ཡེ་ཤེས་སྐུ་ཅན་མཇལ་བ་ན། །དད་དང་ངེས་འབྱུང་དྲག་པོས་རྒྱུད་བསྐུལ་ཞིང་། །ཚོགས་མཆོད་རྣལ་འབྱོར་ལམ་ལ་ཉེར་ཞུགས་ཚེ། །སྔོན་དུས་དགེ་བའི་བག་ཆགས་སད་འདྲ་བའི། །གསལ་སྣང་རྣམ་འགྱུར་འལ་འོལ་སྣ་ཚོགས་པས། །ཡིད་ཀྱི་ཁྱེའུ་ཆུང་ཀུན་རྟོག་གར་གྱིས་བྲེལ། །བཟང་པོའི་ལས་ཀྱི་འཕྲོ་ཙམ་ཡིན་དུ་རེ། །འདིའི་ཐོག་མ་སྔར་ཟུར་ཙམ་སྨོས་ཤིང་ལོ་འདིའི་གྲོ་བཞིན་ཟླ་བ་དང་དུས་སྒྲིག །འདི་དུས་ཆུ་ཕག་ཡིན། མཆན། དེ་ནས་གསང་བ་ཡེ་ཤེས་ཌཱ་ཀི་མ། །མཁའ་ཟླ་གཅིག་ཉིད་དུ་མའི་ཆུ་སྣོད་དུ། །འཆར་བའི་རྣམ་རོལ་ཕ་མཐའ་མི་སྤོབས་པའི། །ངོ་མཚར་སྨོན་ལམ་འབྲེལ་བའི་མཚམས་སྦྱོར་ལས། །འཁོར་སློབ་མཛའ་བཤེས་མཐུན་པའི་རྐྱེན་གང་དུ། །འབབ་པ་དེ་དང་དེར་འཆར་ནུས་འབྱིན་སོགས། །

― MLP003_Page_0025 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེ་བའི་ཕྲེང་བ་དུ་མའི་ཟློས་གར་ནི། །ཡོངས་སུ་གྲུབ་པ་གུ་ཎ་ཏཱ་རེ་སྟེ། །བདེ་ཆེན་ལམ་གྱི་ཕོ་ཉར་ཡོངས་གྲུབ་པས། །ཚོགས་དྲུག་སྣང་ཆ་བདེ་བར་འཆར་བ་ལས། །རྟོགས་པའི་བོགས་ཐོན་ལྷན་སྐྱེས་ཡེ་ཤེས་ཀྱི། །བདེ་ཆེན་ཉམས་ཀྱི་མྱོང་བ་གཏན་ལ་ཕེབས། །མིག་དམར་སྣྲོན་གྱི་ཉེ་བའི་འདུ་བ་ལ། །ག་ཎ་ཙཀྲའི་འཁོར་ལོར་སྤྱོད་པའི་ཚེ། །བཟོད་མེད་གནམ་ས་གཡོ་འདྲའི་ཡེ་ཤེས་བྱིན། །རྒྱུད་ལ་ཞུགས་པའི་རྣམ་འགྱུར་སྣ་ཚོགས་མཐོང་། །དེ་ཚེ་ཨེ་ཡིག་འབར་བའི་མེ་འོད་ཀྱིས། །ཝཾ་ཡིག་བདེ་ཆེན་བདུད་རྩིར་དྭངས་པའི་སྤྲིན། །དགའ་བཞིའི་བདེ་སྟོང་ཡེ་ཤེས་ཆར་འབབ་པ། །སྒྱུ་འཕྲུལ་རྡོ་རྗེའི་རྒྱ་མཚོར་རོ་གཅིག་འདྲེས། །ཀཱ་ཡའི་གྲོང་གི་མགྲོན་པོ་ཇི་སྙེད་པ། །ཥྚཱུ་ཏིའི་ཕོ་བྲང་འོད་གསལ་ཁྲི་ལ་འཛེགས། །རྣམ་མང་རྟོག་པའི་སྤྲིན་ཚོགས་ཇི་སྙེད་ཀྱང་། །མི་རྟོག་ནམ་མཁའི་རྡོ་རྗེ་ཉིད་དུ་གྲུབ། །དེ་ཚེ་རྨི་ལམ་བདེན་གཉིས་ཞལ་ལྡན་མ། །རབ་དམར་འཛུམ་ཁྲོ་ཆ ེ་བརྗིད་གཟི་མདངས་ཅན། །མཐོང་བས་འཇིགས་དང་དགའ་བའི་སྣང་བ་དག །བཟོད་མེད་ཆུ་ཀླུང་དྲག་ཏུ་འཁྲུགས་བཞིན་འབར། །གང་གི་ཐུགས་གསང་སྒོ་ལྟར་ཕྱེ་བའི་ནང་། །ནགས་ཚལ་མེ་ཏོག་ཆུ་ཀླུང་རི་བྲག་སོགས། །ངོ་མཚར་བཀོད་པའི་ཞིང་ཁམས་ཆེས་ཡངས་པའི། །དབུས་ན་པད་ཅན་ཡེ་ཤེས་ཌཱ་ཀི་མ། །མཛེས་འཛུམ་ལང་ཚོ་རྒྱས་པའི་འགྱུར་བག་ཅན། །རིགས་དང་ཆ་ལུགས་རྣམ་འགྱུར་སྣ་ཚོགས་པའི། །འཁོར་གཡོག་དུ་མའི་དབུས་ན་དགྱེས་རོལ་ཞིང་། །གླུ་གར་རོལ་མོའི་སྒྲ་དབྱངས་སྙན་སྒྲོག་པའི། །རྣམ་འགྱུར་སྣ་ཚོགས་འཆར་སྒོ་འགག་མེད་ཀྱི། །གསལ་སྣང་ངང་ལ་སེམས་འདྲེས་རྟོག་མེད་དུ། །ཆམ་གྱིས་སོང་སྙམ་བགྱིད་མཐར་འཁོར་ཚོགས་རྣམས། །གཅིག་ལ་གཅིག་ཐིམ་གཙོ་མོ་ཉིད་ལ་ཐིམ། །དེ་ཉིད་དགའ་བའི་རོལ་མོས་འཁྲིལ་བ་ལས། །སྙོམས་པར་ཞུགས་ཚེ་བདེ་བའི་ཡེ་ཤེས་ཉམས། །རྣོ་ལ་ངར་བ་གསལ་རིག་རྗེན་ནེ་བ། །མཁའ་ཁྱབ་སྤྲོས་བྲལ་རིག་པའི་ངོ་བོར་རྟོགས། །སླར་ཡང་ཤེལ་ལྟར་དྭངས་པའི་ལུས་ཀྱི་རྩར། །ཐིག་ལེ་གསལ་ཧྲིག་འགྲོ་འོང་བྱེད་པའི་ཚུལ། །ལྷ་སྐུ་ཡིག་འབྲུ་ལ་སོགས་སྟོང་གཟུགས་ཀྱི། །རྣམ་པ་མེ་ལོང་ནང་གི་གཟུགས་བཞིན་གསལ། །དེ་ནས་ཤེས་རབ་འོད་ཀྱི་གོང་བུ་ནི། །དཀར་གསལ་

― MLP003_Page_0026 ―

^{[མ་དཔེ་གཟིགས་ན་འདིར་གནོན།]}

[Full Size]

བཾ་ཡིག་དམར་པོས་མཚན་པར་ཞུ། །དེ་ཡང་ཡུད་ཀྱིས་བདག་ལ་ཐིམ་སྙམ་ཞིང་། །སྟོང་ཉམས་ནམ་མཁའ་ལྟ་བུར་དྭངས་པའི་མཐར། །གཉིད་ཀྱི་འོད་གསལ་བདེ་དང་སྟོང་པའི་ཉམས། །ཤིན་ཏུ་བརྟན་པ་ཡུན་རིང་གནས་པའི་མཐར། །སད་རྗེས་ཉིད་ནས་ཞག་འགའི་བར་དག་ཏུ། །བདེ་བའི་ཉམས་སྣང་རྩོལ་མེད་འཆར་བ་བྱུང་། །སྐལ་བཟང་དཔག་བསམ་སྙེ་མའི་ནགས་ནང་དུ། །རྡོ་རྗེ་བཙུན་མོའི་བྱིན་རླབས་བདུད་རྩིའི་བཅུད། །རང་རིག་འབབ་སྟེགས་ལས་འོངས་ངོ་མཚར་གྱི། །དགེ་མཚན་མངོན་དུ་གྱུར་པའི་སྐལ་བཟང་ཐོབ། །ཁྲོ་བོ་སྨིན་དྲུག་ཅན་གྱི་བཅུ་བདུན་ནུབ། །རྟ་མགྲིན་གླིང་དུ་རྨི་ལམ་གསལ་སྣང་ལ། །བཀོད་ལེགས་ཁང་བཟང་མཁའ་ལས་རོལ་མོའི་སྒྲ། །ཐོས་པའི་རྐྱེན་གྱིས་བལྟས་ཚེ་མདུན་གྱི་མཁར། །སྣ་ཚོགས་འཇའ་གུར་དྲྭ་བས་གཏིབས་པའི་ནང་། །མཐིང་ཞུན་ལྟ་བུར་གསལ་ཞིང་དྭངས་པའི་དབུས། །སངས་རྒྱས་བྱང་ཆུབ་སེམས་དཔའི་ཚོགས་མང་པོ། །ཏིལ་གྱི་གོང་བུ་བཞིན་དུ་གང་བའི་འོག །རྩིབས་ཤར་འཇའ་ཚོན་སྟེང་ན་འཕགས་ཆེན་གྱི། །གནས་བརྟན་བཅུ་དྲུག་ཆགས་བྲལ་ཉན་ཐོས་གཟུགས། །བྲེང་ཚར་དལ་གྱིས་གཤེགས་པའི་རྣམ་པ་དང་། །ལྷན་ཅིག་བཀྲ་ཤིས་མེ་ཏོག་ཆར་འབེབས་ཤིང་། །སེམས་ཅན་གང་དག་འགྲོ་དང་མི་འགྲོ་བ། །ཞེས་སོགས་དཀོན་མཆོག་གསུམ་གྱི་ཤིས་བརྗོད་རྣམས། །འུར་དིར་གསུངས་པའི་སྒྲ་ཡིས་ཁོར་ཡུག་ཀུན། །གཡོ་བ་ཙམ་དུ་ལྡིར་བས་སད་པའི་ཚེ། །དྲི་བཟང་ངད་དང་དབྱངས་ཀྱི་སྒྲ་གདངས་རྣམས། །མངོན་སུམ་དབང་པོའི་ཡུལ་ན་ལམ་མེར་སྣང་། །འདི་ལས་ཕྱིས་ཀྱི་རྟེན་འབྲེལ་རྟོགས་པ་དང་། །ཞག་འགར་རྩོལ་མེད་ཏིང་འཛིན་ངང་གིས་འཕེལ། །རབ་བྱུང་ནག་ཉར་འབྱུང་འཁྲུགས་ཀྱིས་མནར་བའི། །ཟུག་རྔུར་སེམས་བསྲེས་ཅུང་ཟད་མནལ་བའི་དུས། །ཤིན་ཏུ་དག་པའི་རྨི་ལམ་འོད་གསལ་གྱི། །སྣང་བ་དག་དང་འདྲེས་པའི་གསལ་སྣང་དུ། །རྨི་ལམ་རྟེན་གྱི་ནུབ་ཕྱོགས་ནམ་མཁའ་ལ། །སོང་མཐར་རིན་ཆེན་རི་བྲག་མེ་ཏོག་དང་། །ནགས་ཀླུང་དགའ་ཚལ་འདབ་ཆགས་རི་དྭགས་ཚོགས། །མཛེས་སྡུག་ངོ་མཚར་དུ་མས་ཁྱབ་པའི་དབུས། །སྣ་ཚོགས་རིན་ཆེན་དྭངས་པའི་ཁང་བཟང་མཆོག །རྒྱན་དང་བཀོད་པའི་ཁྱད་

― MLP003_Page_0027 ―

^{[མ་དཔེ་གཟིགས་ན་འདིར་གནོན།]}

[Full Size]

པར་མཐའ་ཡས་ཤིང་། །ལྷ་མིའི་འབྱོར་པ་རྒྱ་མཚོས་གང་བའི་དབུས། །རིན་ཆེན་དར་ཟབ་བརྩེགས་པའི་ཁྲི་སྟེང་ན། །ཨིནྡྲ་བྷོ་དྷི་མཚར་སྡུག་རྒྱལ་པོའི་ཆས། །མཚུངས་མེད་གཟི་མདངས་རྒྱས་པ་བཙུན་མོའི་འཁོར། །དུ་མར་བཅས་པའི་དྲུང་དུ་ཡུད་ཀྱིས་སླེབས། །བཟོད་མེད་མོས་གུས་དྲག་པོས་གསོལ་བཏབ་ཚེ། །གསེར་སྦྱངས་བུམ་པ་བདུད་རྩིའི་བཅུད་ཅན་དང་། །རིན་ཆེན་ཀོང་བུར་སྒྲོན་མེ་འབར་བ་བཅས། །གཏད་ནས་བྱིན་བརླབས་ངོ་སྤྲོད་མཛད་པ་རྨིས། །རྣམ་འབྱུང་ས་གའི་བདུན་གྱི་སྐྱ་རེངས་ཆར། །སིལ་སྙན་རོལ་མོའི་སྒྲ་དང་ལྷན་ཅིག་པར། །བུད་མེད་མཛེས་སྡུག་གསེར་གཡུའི་རྒྱན་ཆ་ཅན། །གློག་ལ་ཞོན་ནས་མཁའ་ལ་འགྲོ་བ་དང་། །ལྷན་ཅིག་དགྱེས་འཛུམ་ཉམས་ཀྱིས་འདི་སྐད་དོ། །ང་ནི་སློབ་དཔོན་པདྨའི་བཀའ་ཉན་མ། །དམ་ཚིག་ཅན་གྱི་ཕྲིན་ལས་ཕོ་ཉ་ཡིན། །ཆོས་བཞིན་སྤྱོད་ན་ས་ཕྱོགས་གང་དུ་ཡང་། །མཐུན་རྐྱེན་འདོད་པའི་ཕྲིན་ལས་སྒྲུབ་པར་བྱེད། །ཆགས་སྡང་བློ་ཡིས་སྐྱེད་འཕེལ་བྱེད་པའི་དོན། །འགྲུབ་པར་དཀའ་འོ་ཟེར་ནས་ནུབ་ཕྱོགས་ཀྱི། །མཁའ་ལ་རོལ་མོའི་སྒྲར་བཅས་ཡུད་ཀྱིས་སོང་། །རྡོ་རྗེ་གཡུ་ཡི་སྒྲོན་མ་ཡིན་སྙམ་བྱེད། །དཀར་པོ་མཆུ་ཟླའི་བཅོ་ལྔའི་གུང་ཐུན་གྱི། །རྨི་ལམ་འཁྲུལ་ངོར་རྡོ་ཤེལ་ལྟ་བུ་ཡི། །མཆོད་རྟེན་ཉིས་སྒྲིག་མཐའ་སྐོར་རྡོ་ལེབ་ཀྱིས། །བཅལ་དུ་བཀྲམ་པའི་འགྲམ་སྟེགས་གྲུ་བཞིའི་སྟེང་། །ཀུན་མཁྱེན་ཆོས་རྗེ་གཟི་བརྗིད་མཚུངས་མེད་སྐུ། །བགྲེས་ཉམས་ཤ་རགས་ཚེམས་ཕྲེང་ཚེག་གེ་བ། །ན་བཟའ་བེར་ཟླུམ་པཎ་ཞྭ་ཟླུམ་བརྗིད་ཅན། །བཞུགས་མཐོང་གུས་པས་བཏུད་ཚེ་དེ་ཉིད་ཀྱིས། །ཇི་ལྟར་རྟོགས་པའི་ངེས་པ་བདག་ཉིད་ཀྱི། །དགོངས་པ་བླ་ན་མེད་པའི་དོན་ལ་འབྱོར། །འདི་ནི་རྒྱལ་བ་ཀུན་གྱི་དགོངས་པར་གནས། །དེ་ཕྱིར་འདི་ཡི་འཕྲིན་ལས་རྒྱས་གྱུར་ཅིག །ང་རྒྱལ་དང་ནི་ཁེངས་པར་མ་བྱེད་ཅིག །སྙིགས་མའི་སེམས་ཅན་གདུལ་བར་དཀའ་བ་རྣམས། །བྱམས་དང་སྙིང་རྗེ་ཆེན་པོས་རྗེས་བཟུང་ལ། །ཕན་བདེའི་སྙིང་སྟོབས་སྐྱེད་ཅིག་གསུང་བ་རྨིས། །ནག་པའི་ཚེས་བཞིར་རྒྱུན་གྱི་གནས་ཁང་དང་། །འཁོར་གྲོགས་དངོས་སྣང་བཞིན་དུ་གསལ་རྨིས་པར། །ཀུ་ཅོའི་ཐུག་ཆོམ་སྒྲར་བཅས་སྐྱེས་པ་དང་། །བུད་མེད་གོ་ཞུབ་མང་པོས་བསྐོར་བ་མཐོང་། །སྐྲག་

― MLP003_Page_0028 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང་བག་ཁུམས་གྱུར་ཚེ་རྨི་ལམ་དུ། །ངོས་ཟིན་སྤྲུལ་བསྒྱུར་སེམས་ཀྱི་དགའ་མར་བཅས། །ཐོགས་མེད་མཁའ་ལ་འཕགས་ཚེ་ཏཱ་རེ་མ། །ནུབ་ཕྱོགས་ནམ་མཁའི་ཕ་མཐར་ཡུད་ཀྱིས་སོང་། །དེ་ཚེ་སྔར་གྱི་བག་ཆགས་ཡུལ་སྣང་རྣམས། །དངོས་མེད་ཞིག་པའི་སྐྱོ་འཇིགས་མི་བཟད་མེས། །སེམས་ཀྱི་བུད་ཤིང་བསྲེགས་པའི་འཁྲུལ་ངོ་ཀུན། །སྒྱུ་མའི་རྣམ་རོལ་འགག་མེད་རྩལ་དུ་ཤར། །ཆུ་སྟོད་ཅན་གྱི་ཡར་ཚེས་བཞི་ཡི་ནུབ། །གཡའ་གངས་ནགས་ཚལ་ལྡན་པའི་རི་བོའི་ངོགས། །རང་དང་ལྷན་ཅིག་རིགས་ལྡན་ཌཱ་ཀི་མ། །འགྲོ་བའི་མོད་ལ་དེ་ཉིད་སྐད་ཅིག་གིས། །རི་བོའི་རྩེ་མོར་ཡུད་ཀྱིས་བརྒལ་བ་ན། །མཛེས་སྡུག་བུད་མེད་མང་པོའི་འཁོར་ཚོགས་ཀྱིས། །གླུ་དབྱངས་རོལ་མོའི་རྣམ་འགྱུར་དུ་མར་བཅས། །མཁའ་ལ་ཐོགས་མེད་བགྲོད་པའི་སྣང་བ་རྨིས། །སླར་ཡང་ཕྱི་ནུབ་སྔར་གྱི་རྣམ་འགྱུར་གཟུགས། །ཁ་དོག་དམར་གསལ་དྭངས་ཤིང་ཆགས་ཚུལ་གྱིས། །ད་རེས་ལོག་པའི་སྨོན་ལམ་མཐུ་སྨིན་པའི། །དམ་སྲིའི་བར་ཆད་རྐྱེན་དབང་ཉིད་དུ་གྱུར། །ད་ནི་འདི་ནས་ལངྐའི་གླིང་དང་ནི། །དེ་བཱི་ཀོ་ཊར་འདུ་བའི་མཆོད་པ་དང་། །བྱ་བ་འགའ་ཞིག་བསྒྲུབས་ནས་ཨོ་རྒྱན་གྱི། །ཞིང་ཁམས་དྷུ་མ་ཐ་ལའི་གནས་སུ་འགྲོ། །སྔོན་དུས་གཡོར་པོའི་རྒྱུད་དུ་བྱིན་གྱིས་བརླབས། །དེ་ནས་ཕོ་ཉའི་གྲོགས་སུ་འདིར་མཆིས་ཀྱང་། །ལོག་སྤྱོད་འགོང་པོའི་སྨོན་ལམ་མཐུ་ཡིས་རྡིགས། །ད་རེས་ཟབ་མོའི་རྟེན་འབྲེལ་དོན་གྲུབ་ཀྱང་། །སྔར་བཞིན་བར་ཆད་ལོག་པའི་རྐྱེན་དབང་གིས། །སྤྲུལ་པའི་གཟུགས་བརྙན་རེ་ཞིག་དབྱིངས་སུ་བསྡུ། །རྨི་ལམ་སྣང་ཆར་བར་ཆད་སྐྱོབ་པའི་ཕྱིར། །ཐོགས་མེད་སྤྲུལ་པའི་གཟུགས་ཀྱིས་དབུགས་འབྱིན་བྱེད། །ཕྱི་དུས་སླར་ཡང་གཟུགས་ཀྱི་འདུ་བྱེད་ཀྱིས། །སྨོན་ལམ་ལས་ཀྱི་འབྲེལ་པས་མཚམས་སྦྱོར་འཐུས། །ཞེས་བརྗོད་དེ་མ་ཐག་པ་མཁའ་ལམ་ལས། །འུར་དིར་རོལ་མོའི་སྒྲར་བཅས་དབྱིངས་སུ་ནུབ། །དམར་ཆའི་བཅུ་ལ་རིགས་ལྡན་ཏཱ་རེ་མ། །བཞིན་མཛེས་ལང་ཚོ་བདེ་བའི་རྣམ་འགྱུར་ཅན། །སྨིན་དབུས་ལི་ཁྲིའི་ཚོམ་བུས་བཀྲ་བ་ནི། །བདག་གི་མདུན་དུ་ཁྲོང་གིས་འཁོད་ནས་ནི། །ང་ནི་བདེ་མཆོག་བདེ་བའི་རོལ་མོ་ཅན། །བརྡ་རྟགས་ཏི་ལ་ཌཱ་ཀིའི་ཕྱག་རྒྱ་སྟེ། །མཁའ་འགྲོའི་

― MLP003_Page_0029 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་དང་བར་གཅོད་རྩོད་པའི་གེགས། །སེལ་ཕྱིར་མི་འགྱུར་མཚན་མར་བཀོད་དོ་ལོ། །འོད་ཟེར་དཀར་པོས་སྦྲེལ་བའི་ཕ་མཐའ་ནས། །མཁའ་ལ་ཡེད་ཡེད་སྐྱོད་ཚེ་བར་ཐག་གིས། །འོད་ཟེར་གྲིམས་ཤིང་ཆད་པའི་སྐྲག་ཉམས་དང་། །ཕྱིས་ཀྱི་ལུང་བསྟན་འགའ་ཞིག་བརྗོད་པ་རྨིས། །གང་འདིར་བར་གཅོད་རྐྱེན་ལས་ཐར་བ་ན། །ཚེ་ཡི་ཚད་དང་འགྲོ་དོན་ཕྲིན་ལས་ཀྱང་། །ལེགས་པར་གྲུབ་མོད་ད་ནི་དེར་ཟད་པའི། །གཏམ་གྱི་སྦྱོར་བ་འགའ་ཞིག་འདི་ལ་བྲིས། །དེ་ཚེ་འཁོར་གཡོག་ཕོ་ཉའི་མཁའ་འགྲོ་དང་། །དཔའ་བོའི་ཆ་ལུགས་རྣམ་འགྱུར་སྣ་ཚོགས་པ། །གང་གི་ཕྱི་བཞིན་འགྲོ་བའི་གསལ་སྣང་དང་། །རྨི་ལམ་སྣ་ཚོགས་ཞག་འགའི་བར་དུ་བྱུང་། །རབ་མྱོས་དབོ་ཟླའི་ཚེས་བཅུར་སྐུ་འབུམ་གྱི། །ས་ཆོག་ཆུ་པྲའི་འཁྱིལ་རིས་གཡས་འཁོར་དབུས། །འདབ་བརྒྱད་པདྨའི་ལྟེ་བར་ཡི་གེ་སཾ། །རྣམ་པར་བཀྲ་བ་ལཱཉྩའི་གཟུགས་སུ་མཐོང་། །དེ་ཚེ་སངས་རྒྱས་བྱང་ཆུབ་སེམས་དཔའི་ཚོགས། །ནམ་མཁའ་གང་བས་བྱིན་གྱིས་བརླབས་པའི་ཚུལ། །ཉམས་ཀྱི་གསལ་སྣང་གཟི་བྱིན་རྒྱས་པ་སོགས། །ངོ་མཚར་མཚན་མ་བཟང་པོས་ཤིས་པ་དང་། །ས་རྡོ་ཆུ་སོགས་གང་འདོད་ཉེ་འདབས་ནས། །འབད་མེད་གཏེར་ཁ་བཞིན་དུ་རྡོལ་བ་དང་། །ལས་བྱེད་རྣམས་ཀྱང་དགའ་བཞིན་ཆེས་སྤྲོ་བས། །རང་རང་ལས་ལ་ངང་གིས་བརྩོན་པར་འཇུག །ཉིན་མོ་མི་ཡི་ལས་གྲྭ་ཇི་བཞིན་དུ། །མཚན་མོ་ལྷ་འདྲེས་བརྩིགས་པའི་རྣམ་འགྱུར་གྱིས། །སྟོབས་ཆེན་ལས་ཀྱང་ལས་མི་ཉུང་ངུ་ཡིས། །དབྱར་ངོ་གཅིག་ལ་གེགས་མེད་ལེགས་པར་གྲུབ། །ཁྱད་པར་སྣྲོན་ཟླའི་བཅུ་ལ་དྲི་མེད་ཀྱི། །ཆོ་གའི་སྒོ་ནས་སྲོག་ཤིང་བཙུགས་པའི་ཚེ། །ཆར་ཟིམ་འཇམ་པོས་ས་ཡི་རྡུལ་མནན་རྗེས། །སྤྲིན་བྲལ་མཁའ་ཡི་སྲོག་ཤིང་རྩེ་མོའི་ཆར། །དབང་པོའི་གཞུ་ཁྱིམ་གདུགས་ལྟར་ཕུབ་པ་ལས། །འཕན་དར་ལྟ་བུའི་འཇའ་ཚོན་འཕྱང་བ་དང་། །འདབ་ལྡན་མེ་ཏོག་དཀར་པོའི་ཆར་ཟིམ་གྱིས། །བར་སྣང་ཁྱབ་པའི་ངོ་མཚར་གསལ་བ་དང་། །འགྱུར་མེད་སྲོག་ཤིང་ཨོ་རྒྱན་ཆེན་པོས་བཙུགས། །མཁའ་འགྲོ་སྡེ་བཞིས་ཕྱོགས་བཞིའི་འདྲེན་ཐག་འཐེན། །མ་ཕམ་མགོན་སོགས་སངས་རྒྱས་སྲས་བཅས་ཀྱིས། །བྱིན་རླབས་བཀྲ་ཤིས་མེ་

― MLP003_Page_0030 ―

^{[མ་དཔེ་གཟིགས་ན་འདིར་གནོན།]}

[Full Size]

ཏོག་ཆར་དུ་བསྙིལ། །དཀར་ཕྱོགས་ལྷ་དང་སྲུང་མ་ཐམས་ཅད་ཀྱིས། །ཕྱོགས་བཅུ་ཀུན་ནས་མཆོད་སྤྲིན་སྤྲོ་བ་སོགས། །ཀུན་རྟོག་འཆར་སྒོའི་སྣང་ཆར་ངོ་མཚར་གཟུགས། །ཡིད་ཀྱི་མོས་མཚོར་ཐོགས་མེད་གསལ་ཤར་བ། །སྤྱིར་ན་ཡིད་བྱེད་འཁྲུལ་རྟོག་ཡིན་མོད་ཀྱང་། །རྩོལ་མེད་ཤུགས་འབྱུང་འགག་མེད་ཤར་བ་དང་། །སངས་རྒྱས་རྣམས་ཀྱི་སྨོན་ལམ་ཐུགས་རྗེའི་མཐུ། །འཕྲིན་ལས་འཇུག་ཚུལ་བསམ་མི་ཁྱབ་ཕྱིར་རོ། །ཆུ་སྟོད་མར་ངོའི་བཅུ་ལ་དམ་ཅན་གྱི། །རྟེན་འཛུགས་བྱས་ཚེ་སྒྲུབ་ཁང་སྒོ་དྲུང་ནས། །རྟེན་རྫས་ཕྱི་བཞིན་རླུང་འཚུབ་དྲག་འཁོར་བ། །གང་དུ་འཛུགས་རྒྱུའི་བར་དུ་འགྲོ་བ་དང་། །དམ་ཅན་མོན་པ་ཕོ་མོའི་གཟུགས་བཟུང་བ། །སྤྲུལ་པའི་བྱ་ཁྱི་མང་པོའི་འཁོར་དང་བཅས། །རྟེན་གྱི་གནས་སུ་ཡུད་ཀྱིས་ཐིམ་པ་ཡི། །གསལ་སྣང་མངོན་སུམ་བཞིན་དུ་ཤར་བར་གྱུར། །ཁྲུམས་ཀྱི་དམར་ཆའི་བརྒྱད་ལ་སྐུ་འབུམ་གྱི། །རབ་གནས་བྱས་ཚེ་མཁའ་ལ་འཇའ་གུར་ཕུབ། །ཕྱོགས་མཚམས་བཀྲ་ཤིས་རྟགས་ཀྱི་ཆུ་འཛིན་འཁྲིགས། །ཁོར་ཡུག་འོད་ཟེར་དཀར་པོའི་ཕྲེང་བས་བསྐོར། །ངོ་མཚར་དགེ་བའི་མཚན་མ་བཟང་པོ་རྣམས། །ཀུན་གྱི་མངོན་སུམ་གཏན་ལ་ཕེབས་པ་ཡིས། །བཟོད་མེད་བྱིན་ཕེབས་དག་སྣང་མོས་པའི་བློས། །སྐལ་བཟང་རྣམས་ལ་བཟང་པོའི་འབྲེལ་བ་བཞག །དེ་ཚེ་མཚན་མོའི་ཐུན་གྱི་རྨི་ལམ་དུ། །ཐེམ་སྐས་རིམ་བརྩེགས་རྩེ་མོར་གཞལ་མེད་ཁང་། །ཡིད་འོང་ཉམས་དགའི་ནང་དུ་ཞུགས་པ་ན། །འོད་ཀྱི་འཁོར་ལོ་གསལ་ཞིང་དྭངས་པའི་ནང་། །རིགས་བརྒྱའི་ལྷ་ཚོགས་ལམ་མེར་བཞུགས་པ་སྙམ། །ཤར་བར་རྩེ་གཅིག་མོས་པས་སེམས་འདྲེས་ཚེ། །དེ་དག་འུབ་འདུས་མགོན་པོ་འོད་དཔག་མེད། །དམར་གསལ་མཚན་དཔེའི་གཟི་བྱིན་འབར་བར་གྱུར། །དེ་ཡི་གསུང་ནས་ཁྱོད་ཀྱི་ཕྲིན་ལས་རྣམས། །གཞན་ཕན་གདུལ་བྱའི་ཡུལ་ལ་སྨིན་པ་དང་། །མྱུར་དུ་པདྨས་བརྒྱན་པའི་ཞིང་ཁམས་སུ། །རྫོགས་སངས་རྒྱས་ཀྱི་གོ་འཕང་འཐོབ་པར་འགྱུར། །འདི་ལྟར་དགེ་བའི་ལས་ལ་འབྲེལ་ཐོགས་ཀུན། །འདུས་པ་དང་པོར་སྐྱེ་བའི་རྟེན་འབྲེལ་འགྲིག །ཅེས་པའི་ལུང་བསྟན་དབུགས་དབྱུང་རྗེས་གནང་གི །སྐལ་བཟང་ཀུན་དགར་བྱས་པའི་ངོ་མཚར་རྨིས། །མདོར་ན་སྐྱབས་མགོན་བླ་

― MLP003_Page_0031 ―

^{[མ་དཔེ་གཟིགས་ན་འདིར་གནོན།]}

[Full Size]

མས་དབང་བསྐུར་ཞིང་། །སྐུ་བཞིའི་ས་བོན་རྒྱུད་ལ་ཐེབས་པ་གང་། །མྱོས་བྱེད་ནས་བཟུང་བྱིན་བརླབས་ནུས་སྟོབས་ཀྱིས། །བུམ་དབང་རྟོགས་པའི་ཉམས་མྱོང་རིམ་བཞིན་འཕེལ། །སྣང་སྟོང་མཉམ་ཉིད་སྒྱུ་མ་ལྟ་བུར་ཤར། །སྐུ་ཡི་འགྲོ་དོན་ཤས་ཆེར་སྤྱོད་པའི་དུས། །འཁོར་གྲོགས་རྟེན་ཅིང་འབྲེལ་འབྱུང་རྐྱེན་འགའ་ཡིས། །ལུང་དོན་མངོན་དུ་གྱུར་པར་མ་ནུས་སོ། །དམར་སེར་དབོ་ཟླ་ནས་བཟུང་བདེ་ཆེན་གྱི། །བྱིན་རླབས་གསང་བའི་དབང་གི་རྟོགས་པའི་ཉམས། །རིམ་བཞིན་གོམས་པས་གསལ་སྟོང་རྣལ་འབྱོར་ལམ། །གཟུང་འཛིན་གདོད་ནས་དག་པའི་གནས་ལུགས་རྟོགས། །གསུང་གི་འགྲོ་དོན་ཤས་ཆེར་སྤྱོད་པའི་དུས། །དངོས་བརྒྱུད་ཟབ་རྒྱས་དམ་ཆོས་ཉི་མ་ཡིས། །ཐར་འདོད་ཕན་བདེའི་པདྨོ་རྒྱས་བྱེད་ཅིང་། །རྣམ་གྲོལ་སྦྲང་རྩི་འཛིན་པའི་དགའ་སྟོན་གྲུབ། །ཁྲག་སྐྱུག་ཁྲུམས་ཟླར་ཤེས་རབ་ཨེ་དབྱིངས་སུ། །ཐབས་མཆོག་བདེ་ཆེན་ཡེ་ཤེས་དགྱེས་རོལ་བའི། །དགའ་བཞིའི་རོལ་མོ་རྣམ་པ་མཐའ་ཡས་པས། །རིག་སྟོང་བརྗོད་བྲལ་རྣལ་འབྱོར་ཉམས་སུ་མྱོང་། །ཐུགས་ཀྱི་འགྲོ་དོན་ཤས་ཆེར་སྤྱོད་པའི་དུས། །ཟབ་ལམ་ཕོ་ཉ་བདེ་མཆོག་བདེ་ཆེན་གྱིས། །སེམས་ཀྱི་མདུད་གྲོལ་རང་རིག་ཕྱག་རྒྱ་ཆེས། །འཁོར་འདས་ཆོས་ཉིད་རྣམ་དག་ངོ་བོར་ཐིམ། །དེས་ན་བླ་མའི་བྱིན་རླབས་སྙིང་ལ་ཞུགས། །སྒྲོ་འདོགས་མཚན་མའི་སྤྲོས་པ་ནང་ནས་ཆོད། །སྒོ་གསུམ་རྡོ་རྗེ་གསུམ་གྱི་ཆོས་ཉིད་ཤེས། །བྱ་བ་ཅི་བྱེད་རང་དོན་འཛིན་པ་བྲལ། །འཁོར་བའི་ས་བོན་འབྱིན་པའི་འཇུག་པ་ཟད། །ཕྲིན་ལས་འགྲོ་དོན་མཉམ་ཡངས་ཁྱབ་གདལ་དུ། །སྤྱོད་པའི་དུས་ཉིད་ཡིན་མོད་དེ་ལྟ་ནའང་། །ཆ་ཙམ་འགྲུབ་པའི་ལྷག་བསམ་བརྟན་པ་འོ། །དེ་དག་སྔར་བརྗོད་ཁོངས་སུ་གསེབ་ཚགས་སུ། །གནས་པ་ལམ་གྱི་ཉམས་མྱོང་རིམ་པ་བཞིན། །སྐྱེས་པའི་ཚུལ་དང་འཕྲིན་ལས་དུས་སྐབས་རྣམས། །སྡེ་ཚན་ཕྱོགས་སུ་བསྡོམས་པའི་ཚུལ་ཙམ་མོ། །དེ་ལྟར་རང་རིག་གདོད་ནས་འགྱུར་མེད་འདི། །སངས་རྒྱས་ཀུན་གྱི་ངོ་བོར་གནས་པའི་ཕྱིར། །གང་གི་རྩལ་སྣང་རྣམ་འགྱུར་སྣ་ཚོགས་ཀྱང་། །དེ་ཡི་རྣམ་ཐར་ཉིད་དུ་ངང་གིས་གྲུབ། །དེ་ཕྱིར་དག་དང་མ་དག་དངོས་སྣང་གི །སྤྱོད་ཚུལ་ཀུན་ཀྱང་མཉམ་ཡངས་ཁྱབ་གདལ་

― MLP003_Page_0032 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི། །ངོ་བོ་འགྱུར་མེད་ཀ་དག་དེ་བཞིན་ཉིད། །ལྷུན་གྲུབ་འདུས་མ་བྱས་པ་ཉིད་དུ་གནས། །འོན་ཀྱང་མ་རིག་འཁྲུལ་པའི་ལས་སྣང་ལ། །རྟག་ཏུ་ཞེན་ཅིང་ཨ་འཐས་འཛིན་པ་ཅན། །ཀུན་རྨོངས་སེམས་ཅན་རང་གི་མཚན་ཉིད་དུ། །གནས་པའི་རྣམ་འགྱུར་གཏན་ལ་ཕེབས་འདིའོ། །དེས་ན་སོལ་བ་བཀྲུ་སྦྱངས་ལ་འབད་ཀྱང་། །གང་གི་མཚན་ཉིད་དཀར་པོར་མི་འགྱུར་ཞིང་། །རྗོད་བྱེད་གཏམ་གྱི་སྦྱོར་བ་སྣ་ཚོགས་པ། །བསྒྲགས་ཀྱང་ཡ་མཚན་མངོན་དུ་ཅི་ཞིག་མཆིས། །ཁྱད་པར་དག་པའི་སྣང་བ་འབྱམས་ཀླས་པའི། །མཐོང་དང་རྟོགས་ཚུལ་འདི་ཞེས་འཁོར་གྱི་དབུས། །སྒྲོག་པའི་རྣམ་ཐར་ས་ཆེན་ཐོབ་རྣམས་ལས། །ཀུན་རྨོངས་བདག་ལྟའི་སྤྱོད་ཡུལ་ག་ལ་ཞིག །དེ་ཡང་དཔལ་ལྡན་གསང་བ་འདུས་པ་ཡི། །རྒྱུད་ལས་ཚངས་པ་དྲག་པོ་ལ་སོགས་ལྷས། །ནམ་ཡང་མཐོང་བར་མི་ནུས་ཞེས་གསུངས་པས། །ཡེ་ཤེས་སྐུ་ཉིད་མཐོང་བར་སུ་ཞིག་རེ། །འོན་ཀྱང་ཉམས་སྣང་འཆར་སྒོ་མ་འགགས་པས། །ཡིན་ལུགས་སྣོད་བཅུད་རྒྱལ་བའི་འཁོར་ལོ་དང་། །དྲི་མེད་རང་སེམས་རྗེན་པར་མཐོང་བ་འདི། །ཡ་མཚན་གཏམ་འདིའི་གཞི་རུ་གནས་པ་ཡིན། །མ་རིག་ལས་ཀྱི་འདུ་བྱེད་སྐྱེད་པ་ལས། །འཁོར་བ་ལུགས་འབྱུང་སྲེད་ལེན་རྟེན་འབྲེལ་གྱིས། །སྲིད་འདིར་ཕུན་ཚོགས་དལ་འབྱོར་ལྡན་པའི་རྟེན། །ཐོབ་འདི་བཟང་པོའི་ས་བོན་འབྲས་བུར་ངེས། །འདུས་བྱས་ཆོས་རྣམས་གློག་གི་རྩེ་དགའ་བཞིན། །སྐད་ཅིག་མི་རྟག་འགྱུར་ཞིང་གཡོ་བ་ཅན། །ཟག་བཅས་ཆོས་ཀྱི་མཚན་ཉིད་ལེགས་རྟོགས་ནས། །བདེན་འཛིན་ཨ་འཐས་ཞེན་པ་རང་སར་ཆོད། །སྡུག་བསྔལ་རྒྱ་མཚོ་ལས་ཀྱི་དབུ་བ་ཅན། །འགྱུར་དང་འདུ་བྱེད་དྲག་པོར་འཁྲུགས་པའི་རླབས། །མི་བཟད་འཇིགས་རུང་བརྒལ་དཀའི་གྲོང་ཁྱེར་ལས། །འགྲོ་ཀུན་སྒྲོལ་བའི་སྙིང་སྟོབས་བརྟན་པར་བྱས། །དེ་ཕྱིར་སྲིད་པའི་སྨག་རུམ་མི་བཟད་པ། །འཕྲོག་བྱེད་སྐྱབས་གསུམ་ཚད་མེད་ཐུགས་རྗེའི་འོད། །ཉི་མ་བྱེ་བའི་དཔལ་གྱིས་མི་མཚོན་ཕྱིར། །ངེས་འབྱུང་དད་པའི་པདྨོ་གཅིག་ཏུ་བཏུད། །རྒྱལ་གསུང་ཟབ་དང་རྒྱ་ཆེའི་ཆོས་རྣམས་ཀྱི། །ཆ་ཤས་ཕྲ་མོ་རེར་ཡང་ཕན་བདེའི་རོ། །བདུད་རྩིར་འཛག་པས་འཁོར་བའི་གཅོང་ནད་ཀུན། །མཐར་བྱེད་

― MLP003_Page_0033 ―

^{[མ་དཔེ་གཟིགས་ན་འདིར་གནོན།]}

[Full Size]

རང་སྐལ་དད་པའི་སྙིམ་པས་བླངས། །དང་པོར་ཚུལ་ཁྲིམས་བསླབ་པས་རང་རྒྱུད་བསྡམས། །བར་དུ་ཐོས་བསམ་སྒོམ་པའི་ཚུལ་ལ་འབད། །ཐ་མར་འཆད་རྩོམ་དགེ་བའི་ལས་ཐབས་ཀྱིས། །དལ་འབྱོར་དོན་མེད་ཉིད་དུ་མ་ལུས་ཙམ། །དེ་ཕྱིར་སྟོན་པས་གསུངས་ཤིང་རྒྱ་བོད་ཀྱི། །མཁས་གྲུབ་རྣམས་ཀྱིས་ཉན་བཤད་བསྒྲུབས་པ་ཡི། །བཀའ་བརྒྱུད་ད་ལྟའི་བར་དུ་མ་ཆད་པའི། །ཆོས་ཚུལ་ཀུན་ལ་དག་སྣང་མོས་གུས་སྦྱངས། །ཁྱད་པར་སྔ་འགྱུར་བཀའ་གཏེར་གཞུང་ལུགས་དང་། །མན་ངག་ལམ་གྱིས་མཚོན་ནས་མདོ་རྒྱུད་ཀྱི། །ཟབ་དོན་སྙིང་པོའི་དོན་ཀུན་འགལ་མེད་དུ། །ཕྱོགས་ཙམ་གོ་ཞིང་ཉམས་སུ་མྱོང་བར་གྱུར། །མདོ་སྒྱུ་སེམས་ཕྱོགས་བླ་རྫོགས་ཐུགས་གསུམ་སོགས། །བཀའ་གཏེར་ཟབ་མོའི་སྐྱེད་རྫོགས་ཆོག་ཕྲིན་གྱི། །ལག་ལེན་སྒྲིག་བསྐོས་མ་འདྲེས་གསལ་ཤར་ཞིང་། །བྱིན་རླབས་ཉམས་མྱོང་ཅུང་ཟད་ཐོབ་པ་ཙམ། །དམ་པ་རྣམས་ཀྱི་ཐུགས་རྗེའི་བྱིན་རླབས་ཀྱིས། །གནས་ལུགས་སྤྲོས་བྲལ་ཟབ་མོའི་དེ་བཞིན་ཉིད། །སྟོན་པའི་གཞུང་དང་དམ་པའི་རྣམ་ཐར་ལ། །མོས་གུས་མཆི་མ་འཁྲུག་པའི་དད་པ་ཐོབ། །ཀུན་རྫོབ་སྣང་ཆར་ཨ་འཐས་འཛིན་པ་ཡི། །རང་བློའི་འཁྲུལ་རྟོག་གྲུབ་མཐར་མ་བཟུང་ཞིང་། །རྒྱལ་བའི་གསུང་རབ་ཀུན་གྱི་དགོངས་པའི་གནད། །ཀུན་ཀྱང་འགལ་མེད་མདོ་དོན་གཅིག་ཏུ་གོ། བསྟན་པའི་སྲོལ་དང་དེ་འཛིན་གང་ཟག་ལ། །རང་གཞན་རིས་གཅོད་ཕྱོགས་སུ་མ་ལྷུང་ཞིང་། །ལྷ་སྔགས་རྫོགས་རིམ་རྣམ་པ་ཐ་དད་ཀྱང་། །རང་བཞིན་མཉམ་པ་ཉིད་དུ་གནས་པར་ཤེས། །ཕན་འདོད་ལྷ་འདྲེར་ཆགས་སྡང་རེ་དོགས་བྲལ། །བར་དུ་གཅད་བྱ་གཅོད་བྱེད་དབྱིངས་སུ་དག །བྱིན་གྱིས་བརླབ་བྱ་རློབ་བྱེད་སེམས་སུ་ཤེས། །ཐམས་ཅད་རིག་པའི་རང་རྩལ་ཉིད་དུ་རྫོགས། །བཙུན་པོའི་སྤྱོད་ཚུལ་གཙང་མས་མ་གོས་ཀྱང་། །སྡོམ་པ་གསུམ་གྱི་ཉེས་ལྟུང་ཕྲ་རགས་ལ། །སྤྱིར་བཏང་དམིགས་བསལ་བླང་དོར་མ་འཛོལ་བས། །ཆོས་དང་རང་སེམས་ཞུས་དག་ཕེར་བ་ཙམ། །བཟང་པོའི་རྣམ་ཐར་འཁྱོངས་པར་དཀའ་མོད་ཀྱང་། །གཡོ་སྒྱུས་སེམས་ཅན་བསླུ་བར་མ་བྱས་ཤིང་། །ཡུན་དུ་གནས་ལ་ཕན་པར་འགྱུར་མཐོང་ནས། །ཅི་ནུས་ཐབས་ལ་ཅི་འགྲུབ་བརྩོན་པ་བསྐྱེད། །སྣ་

― MLP003_Page_0034 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོགས་ཐ་སྙད་ཤེས་བྱའི་རྣམ་པ་རྣམས། །དོན་ལ་མི་སྦྱོར་མཁས་པར་རློམ་ཡང་ཅི། །ཚིགས་བཅད་གཅིག་གི་དོན་ཡང་དད་འདུན་གྱིས། །ཉམས་ལེན་སྙིང་པོར་དྲིལ་ན་ཟབ་པར་གོ། འཁོར་བ་ཡིན་ཕྱིར་སྡུག་བསྔལ་རང་བཞིན་དུ། །གྲུབ་མོད་ན་རྒ་འཆི་རྒུད་འཕོ་འགྱུར་ཆོས། །གང་བྱུང་ཆོས་ཉིད་ཡིན་པའི་རང་མཚང་རིག །གློ་བུར་འཁྲུལ་ངོ་ཆུ་ཟླ་ལྟ་བུར་རྟོགས། །དེས་ན་དགེ་བའི་ལས་ལམ་མཐའ་ཡས་ཀྱང་། །སྙིང་རྗེ་བྱང་ཆུབ་སེམས་དང་བདག་མེད་པ། །སྤྲོས་བྲལ་ལྟ་བས་ཟིན་པའི་ལས་རྣམས་ཀུན། །སངས་རྒྱས་ཐོབ་པའི་བླ་མེད་རྒྱུ་རུ་གནས། །དེས་མ་ཟིན་ཅིང་ཐར་འདོད་བློ་མེད་ན། །སྦྱིན་སོགས་ལས་ཀྱང་བྱང་ཆུབ་རྒྱུར་མ་ངེས། །ཚུལ་ཁྲིམས་བསྲུངས་ཀྱང་འཇིགས་སྐྱབས་ལེགས་སྨོན་ཙམ། །སེམས་གནས་ཏིང་འཛིན་བརྟན་ཀྱང་ས་མི་ཆོད། །མདོར་ན་ལས་འབྲས་བླང་དོར་མ་ནོར་བས། །ངེས་འབྱུང་བྱང་སེམས་སྟོང་ཉིད་རྟོགས་པ་ཡིས། །དགེ་བ་གང་བྱས་ཐར་པར་འགྱུར་བ་ལ། །དྲི་མེད་དམ་པའི་ལུང་ལ་ངེས་ཤེས་བསྐྱེད། །དེ་ཕྱིར་ཀ་དག་སྤྲོས་བྲལ་སྟོང་ཉིད་དང་། །ལྷུན་གྲུབ་བདེ་ཆེན་རྩལ་སྣང་མ་འགགས་པའི། །ཟུང་འཇུག་ལམ་གྱིས་འཁོར་འདས་རོ་མཉམ་དུ། །རྟོགས་པ་འདུས་མ་བྱས་ཀྱི་དགེ་བར་བཤད། །གང་གིས་སྲིད་པའི་འཁྲི་ཤིང་རྒྱུ་དང་བཅས། །ཡོངས་སུ་བཅད་མོད་དེ་ཡིས་ཟིན་གྱུར་ན། །དགེ་བའི་ལས་སྟོབས་ཆེ་ཆུང་གང་འགྲུབ་ཀྱང་། །འདུས་མ་བྱས་པའི་དགེ་བར་འགྱུར་མཐོང་ནས། །བདེ་བར་གཤེགས་པའི་སྐུ་དང་གསུང་གི་རྟེན། །ཆོས་སྐུའི་མཆོད་སྡོང་བཞེངས་སོགས་དགེ་བའི་ལས། །རྣམ་པ་དུ་མའི་ཐབས་དང་རྟེན་འབྲེལ་གྱིས། །རང་གཞན་དགེ་ལ་ཅི་ནུས་བསྐུལ་བ་བྱས། །བསྟན་པའི་སྙིང་པོ་གསང་ཆེན་རྙིང་མ་ཡི། །མདོ་སྒྱུ་སེམས་ཀློང་ལ་སོགས་བཀའ་མ་དང་། །བླ་རྫོགས་ཐུགས་གསུམ་གྱིས་མཚོན་གཏེར་མའི་ཆོས། །རྣམ་དག་བཀའ་སྲོལ་ཡོད་པ་ཕལ་ཆེར་ཐོས། །འགའ་ཞིག་ཆེས་དཀོན་ནུབ་ཏུ་ཉེ་བ་ཡང་། །དཀའ་བས་འབད་རྩོལ་བསྐྱེད་ནས་སྲོག་རྩ་འཐུད། །དབང་ལུང་ཁྲིད་སོགས་གདམས་པའི་སྒོ་མཐའ་ཡས། །འཆད་སྤེལ་དར་ཞིང་རྒྱས་པའི་སྙིང་སྟོབས་བསྐྱེད། །གཅམ་བུས་སེམས་བསྲུང་ཞེན་སྲེད་དད་མོས་སོགས། །སོ་སོའི་འདུད་ཚུལ་རྣམ་པ་དུ་མ་ཡི། །

― MLP003_Page_0035 ―

^{[མ་དཔེ་གཟིགས་ན་འདིར་གནོན།]}

[Full Size]

རེ་བ་ཡུལ་དུས་གནས་སྐབས་དང་མཐུན་པར། །སྐོང་བའི་ལྷག་བསམ་བཟང་པོ་ཅི་ནུས་བསྐྱེད། །ཆོས་དང་ཟང་ཟིང་མི་འཇིགས་སྦྱིན་པའི་ཆ། །རང་གི་མཐུ་ཡིས་ཇི་ཙམ་ནུས་པ་བསྒྲུབས། །གཞན་དོན་ཁོ་ནར་འགྱུར་དང་མི་འགྱུར་བ། །འཕགས་པས་མཁྱེན་གྱི་བདག་བློའི་སྤྱོད་ཡུལ་མིན། །ཆེན་པོ་ཀུན་གྱིས་རྙེད་དང་བཀུར་སྟི་ཡིས། །མངོན་པར་བཏུད་ཀྱང་རློམ་པ་མ་སྐྱེས་ཤིང་། །མཆོག་དམན་སློབ་རིགས་ཡོན་བདག་དུ་མ་ཡང་། །འབད་རྩོལ་མེད་པར་རང་གི་ངང་གིས་འདུས། །གཙུག་ལག་གནས་རྟེན་དགེ་འདུན་འདུས་པའི་སྡེ། །བསྒྲུབས་ནས་མཆོད་ཅིང་སྲི་ཞུས་གུས་པར་བསྐྱངས། །དགེ་བའི་ལག་རྗེས་རང་གིས་ཅི་ནུས་པ། །འབད་པས་བསྒྲུབས་ཤིང་ཆ་ཙམ་འགྲུབ་པའང་ཡིན། །ཕྱི་མཐའི་བྱ་བ་འདི་ཉིད་མ་འགྲུབ་ཅེས། །འགྱོད་དང་བློ་ཡི་ལྷག་མ་བཅགས་པའང་མེད། །འོན་ཀྱང་ཇི་སྲིད་འཚོ་བ་དེ་སྲིད་དུ། །དགེ་བའི་ལས་ནི་ཅི་ནུས་སྒྲུབ་ལ་སྤྲོ། །དེ་ཡང་རང་ཉིད་གཅིག་པུའི་རྐྱེན་སེལ་སོགས། །ཚེ་འདིའི་བདེ་ཐབས་ཁོ་ནར་མ་དམིགས་ཏེ། །ཀུན་ཀྱང་རྒྱལ་བའི་བསྟན་པ་རྒྱས་པ་དང་། །མ་གྱུར་སེམས་ཅན་ཕན་བདེའི་ཆེད་དུའོ། །མདོར་ན་སངས་རྒྱས་ཀུན་དངོས་བླ་མ་ལ། །སྐྱབས་གནས་ཐམས་ཅད་འདུས་པའི་མོས་གུས་ཐོབ། །སྣང་གྲགས་ཐམས་ཅད་དག་པའི་འཁོར་ལོ་ལ། །བཟང་ངན་འབྱེད་ཆོས་མེད་པའི་དག་སྣང་འབྱོངས། །གཞུང་ལུགས་དུ་མའི་མདོ་དོན་རང་རིག་གི །ངོ་བོར་སྒྲོ་འདོགས་ཆོད་པའི་སྤོབས་པ་ཐོབ། །ལྟ་སྒོམ་སྤྱོད་པའི་འཛིན་ཞེན་དབྱིངས་སུ་ཟད། །གཞི་ལམ་འབྲས་བུའི་རྣམ་གཞག་རང་སར་གྲོལ། །ཆོས་བརྒྱད་རྣམ་རྟོག་དུག་ལྔའི་ཞེན་འཁྲིས་མཐའ། །གང་ཤར་གཅེར་གྲོལ་གཉིས་འཛིན་དབྱིངས་སུ་ནུབ། །རང་སེམས་དྲི་མེད་གནས་ལུགས་རྗེན་པར་མཐོང་། །རྒྱལ་བ་ཀུན་དང་དུས་གཅིག་མཇལ་བར་མཚུངས། །དེ་ཕྱིར་རང་སེམས་གསལ་རིག་བདེ་བའི་ཉམས། །ཕྱོགས་རིས་མེད་པའི་མཁའ་ལ་ཡངས་པར་གདལ། །དུས་གསུམ་ཀུན་ཏུ་འགྱུར་བ་མེད་པའི་དོན། །ཅང་མེད་མ་ཡིན་བདེ་བར་ཉམས་སུ་མྱོང་། །མྱོང་བྱེད་མཁན་པོ་རྡོ་རྗེ་རྣམ་གསུམ་དུ། །ཡེ་ནས་རྫོགས་པའི་ལྷན་ཅིག་སྐྱེས་པ་གང་། །རྩལ་སྣང་རྟེན་འབྲེལ་མ་འགགས་མཁའ་མཉམ་འགྲོའི། །ཕན་དང་བདེ་བའི་དཔལ་དུ་འཆར་

― MLP003_Page_0036 ―

^{[མ་དཔེ་གཟིགས་ན་འདིར་གནོན།]}

[Full Size]

བར་ཤོག །དེ་ཡང་རླབས་ཆེན་སྤྱོད་པས་བསྟན་པ་དང་། །འགྲོ་ལ་ཕན་པ་དམ་པའི་རྣམ་ཐར་ཡིན། །རྨོངས་ལས་ཆེས་རྨོངས་བདག་འདྲར་ངོ་མཚར་གྱི། །རྟོགས་བརྗོད་ཡོན་ཏན་བརྗོད་རྒྱུ་མ་མཆིས་མོད། །འོན་ཀྱང་ནན་ཆ ེའི་དྲི་བས་རྐུན་མ་ཡི། །ངོ་ལེན་བཞིན་དུ་རྩལ་སྣང་མ་འགགས་པའི། །འཁྲུལ་རྟོག་འཆར་སྒོའི་རྣམ་འགྱུར་ཇི་སྙེད་པ། །གང་ཤར་བྲག་ཆའི་དབྱངས་ཀྱི་རྗེས་འགྲོར་སྤེལ། །དཔེར་ན་སྤྲེའུའི་ཟློས་གར་མཚར་ཆེ་ཡང་། །བྱིས་པའི་སྐྱེ་བོ་ཉི་ཚེའི་བློ་འབྲིད་ལས། །འབྲས་ལྡན་ཉིད་དུ་སྤྱོད་ལྡན་སུ་ཡིད་རྟོན། །དེ་ཕྱིར་དེ་འདྲའི་ངང་ཚུལ་ཁོ་ན་སྟེ། །ཀུན་རྨོངས་སྤྱོད་ཚུལ་ཆུ་ཤིང་སྡོང་པོ་ལ། །སྣ་ཚོགས་བརྗོད་པའི་ལོ་འདབ་དུད་ཀྱང་ཅི། །རྒྱལ་བའི་མཛད་པ་ཡོངས་འདུའི་འཁྲི་ཤིང་གི །ངོ་མཚར་གཏམ་དུ་གླེང་ན་མི་ལེགས་སམ། །འོན་ཀྱང་དག་དང་མ་དག་བརྗོད་པའི་སྒྲ། །ཀུན་ཀྱང་གནས་ལུགས་ཆོས་སྐུའི་རང་སྒྲར་གནས། །དེ་ཕྱིར་རྟོགས་བརྗོད་དབྱངས་ཀྱི་རྒྱལ་མོའི་གླུ། །གྲགས་སྟོང་སྐྱེ་མེད་རྡོ་རྗེའི་ཚིག་ཏུ་བརྗོད། །ཐོས་བསམ་སྒོམ་པའི་ཉམས་རྟོགས་རྩལ་ཆུང་ཞིང་། །འདོད་སྲེད་འཆིང་བའི་ལམ་དུ་ལྷུང་གྱུར་ཀྱང་། །ལྷག་བསམ་དགེ་བའི་མཁར་བ་ལ་བརྟེན་ནས། །སངས་རྒྱས་མཛད་པ་རྒྱ་མཚོའི་རྗེས་སློབ་ཤོག །གང་གི་མཛད་པ་ངོ་མཚར་རྒྱ་མཚོའི་ཚུལ། །དོན་བཞིན་སྟོན་པ་ཀུན་ཏུ་བཟང་པོ་ཅན། །རིས་མེད་གདུལ་བྱའི་མོས་པའི་ཁྱད་པར་བཞིན། །འཇུག་པའི་ཕྲིན་ལས་སངས་རྒྱས་ཉིད་འདྲར་ཤོག །གཞན་རྣམས་མགུ་བའི་རྣམ་ཐར་མ་འཁྱོངས་ཀྱང་། །རང་ལ་གནོང་འགྱོད་མེད་པའི་བློ་གདེང་ཆུག །དེ་ཕྱིར་གང་ཤར་ཡི་གེར་བཀོད་པ་འདི། །རྗེས་འབྲང་མོས་ཞེན་ཅན་གྱི་གདུང་སེལ་མཛོད། །རིག་པ་འཛིན་པ་འགྱུར་མེད་རྡོ་རྗེའི་ཤིན་ཏུ་གསང་བ་ཉམས་སྣང་གི་རྟོགས་བརྗོད་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ་འདི་ནི། བླ་མ་ཐམས་ཅད་མཁྱེན་པའི་སྐུའི་སྲི་ཞུ་བ་སྡོམ་བརྩོན་ངག་དབང་དཀོན་ཅོག་དང་གཞུང་ལུགས་རབ་འབྱམས་སྨྲ་བའི་སྤོབས་པ་མཆོག་ཏུ་གྲུབ་པ་བཤེས་གཉེན་གཞོན་ནུ་ཆགས་པ་ཆོས་འཕེལ་བཟང་པོས་ནན་ཆེན་པོའི་གསུང་གིས་སྔ་ཕྱིར་བསྐུལ་བ་དང་། རང་དང་ལྷན་ཅིག་སྤྱོད་པའི་གཅུང་ཀུན་དགའ་ཚུལ་ཁྲིམས་རྒྱ་མཚོ་དང་། དགེ་སློང་བློ་གསལ་རྒྱ་མཚོས་

― MLP003_Page_0037 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་རྣ་བའི་བུ་ག་ཡང་ཡང་བཙེར་བའི་རྒྱུ་ལས། ཆུ་མོ་བྱའི་ལོ་ས་གས་ཉ་བའི་དུས་དགེ་བར་ཡི་གེར་སྤེལ་བ་སྟེ། ཆོས་ཀྱི་རྗེས་སུ་འབྲང་བའི་དད་པའི་བློ་ཅན་རྣམས་ལ་མོས་པའི་མཐུན་རྐྱེན་དུ་འགྱུར་བ་སྲིད། གཞན་དུ་སྒྲོ་སྐུར་གྱི་གཞིར་འགྱུར་བའི་ཕྱིར་གསང་ཞིང་སྦ་བ་ལ་ནན་ཏན་དུ་བྱའོ། །ས་མ་ཡ། རྒྱ་རྒྱ་རྒྱ། ༈ ཤྲི་ཡསྟུ།། །།དུས་གསུམ་རྒྱལ་ཀུན་ངོ་བོ་པདྨ་འབྱུང་། །གང་གི་རིང་ལུགས་ཆོས་ཀྱི་རྒྱལ་ཐབས་ལ། །དབང་འབྱོར་ཟབ་གཏེར་བདག་པོ་ཆོས་ཀྱི་རྒྱལ། །སྐལ་ལྡན་གླིང་བཞིའི་དབུས་ན་རི་དབང་བཞིན། །རིག་པའི་ཡེ་ཤེས་དངོས་འཛིན་ལས་གྲོལ་བས། །འགྱུར་མེད་བདེན་དོན་ཡོངས་གཟིགས་རྡོ་རྗེ་འཛིན། །གང་གི་ཡེ་ཤེས་སྒྱུ་དྲའི་རྟོགས་བརྗོད་ཀྱི། །ངོ་མཚར་ཡི་གེའི་བརྡ་ཡིས་གསལ་སྟོན་པ། །གཅིག་ལས་དུ་མར་ཆུ་ཟླ་བཞིན་འཆར་བའི། །འཕྲུལ་ཆེན་པར་གྱི་སྦྱིན་པོ་བསོད་ནམས་དང་། །བཟང་པོའི་སྨོན་ལམ་མཐུ་གྲུབ་རྣམ་དཔྱོད་ཅན། །རིན་ཆེན་དབང་གི་རྒྱལ་པོ་བཀྲ་ཤིས་ཀྱི། །འདོད་དགུ་ཆར་དུ་འབེབས་པ་གང་དེའོ། །ཚུལ་འདི་སྒྲུབ་ལ་བྲིས་བརྐོས་ཞུས་བྱེད་སོགས། །ལྷག་བསམ་མ་སྨད་སྦྱོར་བ་མཐུན་པ་ཀུན། །སྲས་བཅས་རྒྱལ་བའི་རྣམ་ཐར་རྗེས་ཞུགས་ནས། །དོན་གཉིས་བསམ་པ་ལྷུན་གྱིས་འགྲུབ་པར་ཤོག །ཅེས་པའང་འགྱུར་མེད་རྡོ་རྗེས་སོ། །སརྦ་མངྒ་ལཾ།། །།

གཏེར་ཆེན་ཆོས་ཀྱི་རྒྱལ་པོའི་ནང་གི་རྟོགས་པ་བརྗོད་པ་ཡོན་ཏན་མཐའ་ཡས་རྣམ་པར་བཀོད་པའི་རོལ་མོ།

― MLP003_Page_0039 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་ནང་གི་རྟོགས་པ་བརྗོད་པ་ཡོན་ཏན་མཐའ་ཡས་རྣམ་པར་བཀོད་པའི་རོལ་མོ་ཞེས་བྱ་བ་བཞུགས་སོ། །ལོ་ཆེན་དྷརྨ་ཤྲཱི།

― MLP003_Page_0040 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེ་བཙུན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་ནང་གི་རྟོགས་པ་བརྗོད་པ་ཡོན་ཏན་མཐའ་ཡས་རྣམ་པར་བཀོད་པའི་རོལ་མོ་ཞེས་བྱ་བ་བཞུགས་སོ། །ན་མོ་བྷ་ཊྚ་ར་ཀ་ཤྲཱི་མཱཾ་སརྒུ་ར་ཝེ། རྗེ་བཙུན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་རྨད་བྱུང་ངོ་མཚར་བའི་རྟོགས་པ་བརྗོད་པ་ཡོན་ཏན་མཐའ་ཡས་རྣམ་པར་བཀོད་པའི་རོལ་མོ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་དཔལ་ལྡན་བླ་མ་དམ་པའི་ཞབས་ཀྱི་པདྨོ་དྲི་མ་མེད་པའི་ཕྲེང་བ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །འགྲོ་ལ་ཕན་དགོངས་རྗེས་ཆགས་ཀྱིས། །འདུལ་མཛད་མཁྱེན་བརྩེའི་གཏེར་མངའ་བ། །རིགས་བདག་ལྷུན་པོ་སྲིད་དང་ཞིའི། །གླིང་དབུས་མངོན་པར་གསལ་ཞིང་འབར། །རང་བྱུང་ཡེ་ཤེས་རིག་པའི་ཉི་མ་སྒྲིབ་གཉིས་ཆུ་འཛིན་ལས་གྲོལ་བས། །གདོད་ནས་རྣམ་དག་མི་འགྱུར་དོན་དམ་འོད་གསལ་མཁའ་དབྱིངས་རྩེ་མོར་འཛེགས། །ཕན་བདེའི་ཟེར་ཕྲེང་རིས་མེད་འགྲོ་ལ་རྟག་འཆར་ཟུང་འཇུག་རྡོ་རྗེའི་གར། །ཅིར་ཡང་སྒྱུར་མཛད་རྒྱལ་ཀུན་ངོ་བོ་གཏེར་ཆེན་བླ་མར་ཕྱག་བགྱིའོ། །གང་ཞིག་རྒྱལ་བ་ཀུན་གྱི་ཡེ་ཤེས་གཅིག་བསྡུས་སློབ་དཔོན་ཚུལ་བཟུང་ནས། །དམ་ཆོས་བདུད་རྩིའི་འོད་དཀར་སྣང་བས་སྐལ་ལྡན་སྙིང་གི་གདུང་སེལ་ཞིང་། །གང་འདུལ་ཞི་ཁྲོའི་དཀྱིལ་འཁོར་སྤྲོ་ཡང་འོད་གསལ་རྡོ་རྗེའི་ཐུགས་ཉིད་ལས། །ནམ་ཡང་གཡོ་མེད་རིགས་ཀུན་ཁྱབ་བདག་བླ་མར་འདུད་དོ་བརྩེ་བས་སྐྱོངས། །རྒྱལ་རྣམས་བླ་མའི་གཟུགས་ཀྱིས་དོན་མཛད་པ། །གང་གི་སྐུ་དཀྱིལ་མཐོང་དང་གསུང་
ཐོས་པའི། །མིག་དང་རྣ་དབང་འདི་ནི་དོན་ལྡན་ཏེ། །ཡོན་ཏན་རྗོད་བྱེད་ལྕེ་འདིའང་འབྲས་བུར་བཅས། །དེ་ལྟས་བདག་ཀྱང་རྣམ་ཐར་ཆུ་གཏེར་ཆེའི། །དཔག་ཡས་གཏིང་མཐའ་འཚོལ་བར་འདོད་པ་སྐྱེས། །གང་གི་གཏིང་མཐའ་དཔོགས་པར་མ་ནུས་ཀྱང་། །དགོས་དོན་རྣམ་གྲོལ་རིན་ཆེན་ཅིས་མི་རྙེད། །རྨད་བྱུང་གྲུབ་མཆོག་གཅིག་ཉིད་ངོ་མཚར་བའི། །རྟོགས་པ་བརྗོད་པས་རྒྱལ་ཀུན་ཡོན་ཏན་སྤྲིན། །མཐའ་ཡས་རྣམ་པར་བཀོད་པར་འགྱུར་མཐོང་ནས། །སྙན་སྒྲོག་ཡི་གེའི་རོལ་མོ་ཅི་ཡང་འཁྲོལ། །ཇི་ལྟར་བྷྲ་མ་རཿཡི་འཕུར་ལྡིང་གིས། །ཀུན་གསལ་ཡངས་པའི་ཁྱོན་ལ་གཞལ་རྩོམ་པ། །རྒྱལ་རྣམས་གསང་གསུམ་ངོ་མཚར་སྤྱོད་པའི་མཐའ། །བྱིས་བློའི་འོལ་སྤྱིས་བགྲང་འདོད་དེ་འདྲའོ། །དེ་ལྟ་ན་ཡང་དད་པའི་གླེགས་བུ་ལ། །རྨད་བྱུང་ཚོན་རིས་གསར་པའི་རྣམ་འགྱུར་གྱིས། །སྐལ་བཟང་མིག་ལ་ཡ་མཚན་ལྟད་མོ་དང་། །ཡིད་ལ་རྣམ་གྲོལ་རིམ་པ་ཅི་དགར་བྱིན། །གང་ཞིག་ཐོས་པས་དད་པའི་མྱུ་གུ་དག །འཁྲུངས་པ་དེ་ལ་རིང་པོའི་དུས་མིན་པར། །གྲུབ་གཉིས་དཔག་བསམ་འབྲས་བུ་སྨིན་པར་འགྱུར། །དེ་སླད་འདི་བརྗོད་དོན་ལྡན་ཁོ་ན་ཡིན། །

སྐུ་ཚེ་སྔ་མའི་ཕྲིན་ལས་དང་སྐྱེ་བ་བཟུང་བའི་ཚུལ།

― MLP003_Page_0041 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལ་བདག་ཅག་རྣམས་ཀྱི་དཔལ་ལྡན་བླ་མ་དམ་པ་དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་ལ་རྗེས་སུ་འཇུག་པ་ཉིད་ཀྱིས་སྐྱེས་བུ་ཆེན་པོ་རྫོགས་པའི་སངས་རྒྱས་ཀྱི་ས་ལ་ཡང་དག་པར་བཞུགས་པ་འདིའི་རྣམ་པར་ཐར་པའི་ཡོན་ཏན་གྱི་ཚོགས་མཐའ་དག་རྫོགས་པར་བརྗོད་པ་ནི་བསམ་གྱིས་མི་ཁྱབ་པས། བག་ཆགས་ཤིན་ཏུ་སྲབ་པ་ས་བཅུ་པའི་བྱང་ཆུབ་སེམས་དཔའ་ལ་སོགས་པའི་ཡང་སྤྱོད་ཡུལ་མ་ཡིན་ན། བདག་ཅག་བྱིས་པ་སོ་སོའི་སྐྱེ་བོ་རྣམས་ཀྱི་བློ་ཡུལ་དུ་ལྟ་ག་ལ་འགྱུར། དེའི་ཕྱིར་དམ་པ་འདིའི་མཛད་པའི་ཆ་ཤས་ཙམ་ཡང་བདག་ལྟ་བུས་སྨྲ་བར་མི་སྤོབས་ཏེ། དེ་ཅིའི་ཕྱིར་ཞེ་ན། བདག་ཉིད་ཆེན་པོ་འདི་ནི་ཐོག་མ་མེད་པའི་དུས་ནས་གཞི་དབྱིངས་འགྱུར་བ་མེད་པའི་ཀློང་དུ་རང་རིག་པའི་ཡེ་ཤེས་རྣམ་པར་གྲོལ་བས་མངོན་པར་བྱང་ཆུབ་པ་བརྙེས་ཏེ། ཤིན་ཏུ་རྣམ་པར་དག་པ་ཆོས་ཉིད་འོད་གསལ་བའི་ཞིང་ཁམས་མཐའ་དང་དབུས་མེད་པར་སྐུ་དང་ཡེ་ཤེས་འདུ་འབྲལ་མེད་

― MLP003_Page_0042 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ངང་ལ་དུས་གསུམ་གྱི་སངས་རྒྱས་ཐམས་ཅད་དང་དགོངས་པ་རོ་གཅིག་ཏུ་བཞུགས་ཏེ། དེ་ཡང་རང་བཞིན་རྣམ་དག་གི་ཆ་སྤྲོས་པ་ཉེ་བར་ཞི་བའི་ཡེ་ཤེས་ཆོས་ཀྱི་སྐུ་དང་། དེ་གློ་བུར་རྣམ་དག་མཐར་ཐུག་པས་ཁྱད་པར་དུ་བྱས་པ་ན་ཆོས་ཐམས་ཅད་དག་པ་རབ་འབྱམས་སུ་སྣང་བའི་ཡེ་ཤེས་ཆོས་སྐུ་དང་ངོ་བོ་གཅིག་པའི་དཀྱིལ་འཁོར་གྱི་འཁོར་ལོར་རང་སྣང་བ་ལ་ལོངས་སྤྱོད་རྫོགས་པའི་སྐུ་དང་། དེ་ལ་མངའ་བའི་ཡོན་ཏན་གདུལ་བྱ་གཞན་སྣང་གི་ལོངས་སྤྲུལ་གཉིས་སྟོན་པར་ནུས་པའི་བརྩེ་བ་དང་ནུས་མཐུའི་ཡེ་ཤེས་ཀྱི་ཆ་ནི་སྤྲུལ་པའི་སྐུ་སྟེ། དེ་ལྟར་དེ་བཞིན་གཤེགས་པ་ཁོ་ནའི་སྤྱོད་ཡུལ་ལས་གདུལ་བྱ་གཞན་ལ་མི་སྣང་བས་རང་རྒྱུད་ཀྱིས་བསྡུས་པ་སངས་རྒྱས་རང་སྣང་གི་སྐུ་གསུམ་པོ་དེ་ངོ་བོ་དབྱེར་མི་ཕྱེད་པའི་ངང་དུ་བཞུགས་པ་ལས་མ་གཡོས་བཞིན་དུ། རང་སྣང་ལོངས་སྤྲུལ་གྱི་སྐུ་གཉིས་དང་གདུལ་བྱའི་སེམས་རྒྱུད་དག་པ་ཉིད་སྔོན་གྱི་སྨོན་ལམ་གྱི་རྐྱེན་ཉེ་བར་འཕྲད་པ་ལས། གདུལ་བྱ་གཞན་སྣང་གི་སྐུ་དག་པ་ས་བཅུ་པའི་བྱང་ཆུབ་སེམས་དཔའ་རྣམས་ལ་སྣང་བ་ལོངས་སྤྱོད་རྫོགས་པ་དང་། དག་པ་དང་མ་དག་པའི་གདུལ་བྱ་སྣ་ཚོགས་ལ་སྣང་བ་སྤྲུལ་པའི་རྣམ་རོལ་བསམ་གྱིས་མི་ཁྱབ་པ་གང་འདུལ་གྱི་ངོར་མངོན་པར་སྣང་བས་གདུལ་བྱ་སོ་སོའི་སྐལ་བ་དང་འཚམས་པར་ལམ་གྱི་རྟེན་དང་། ལམ་དང་འབྲས་བུ་ལ་འགོད་པའི་ཕྲིན་ལས་ཚད་མེད་པས་འདུལ་བར་མཛད་པ་ནི། བཻ་ཌཱུཪྱའི་ས་གཞི་ལ་ལྷ་དབང་གི་གཟུགས་བརྙན་འཆར་བའམ་ཆུ་སྣོད་ཇི་སྙེད་པར་ཟླ་བའི་གཟུགས་བརྙན་སྣང་བ་ལྟར་འགག་པ་མེད་པར་འཆར་བའི་ཕྲིན་ལས་ཐོག་མ་མེད་པའི་དུས་ནས་ཉེ་བར་གནས་པ་སྟེ། དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་ལས། ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་གསུངས་ཤིང་། རྒྱུད་བླ་མ་ལས་ཀྱང་། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་དང་། དག་དང་ཉེ་དང་རིང་རྣམས་ལ། །འཇིག་རྟེན་རྒྱལ་བའི་དཀྱིལ་འཁོར་དུ། །ཆུ་དང་ནམ་མཁའ་ཟླ་

― MLP003_Page_0043 ―

^{[མ་དཔེ་གཟིགས་ན་འདིར་གནོན།]}

[Full Size]

གཟུགས་བཞིན། །དེ་མཐོང་བ་ནི་རྣམ་པ་གཉིས། །ཞེས་གསུངས་པ་བཞིན་ནོ། །མདོར་ན་སྒྱུ་འཕྲུལ་རྩ་རྒྱུད་ལས། ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཐེག་པ་མཐོ་དམན་ཐམས་ཅད་དང་། །ཕྱིན་ཅི་ལོག་རྣམས་བསམ་ཡས་དང་། །ཞི་ཁྲོའི་ཚོགས་ཆེན་ཐམས་ཅད་པ། །སོ་སོར་མཐུན་བྱས་ཀུན་ཏུ་སྣང་། །ཞེས་དང་། ཕལ་པོ་ཆེ་ལས་ཀྱང་། ཀྱེ་རིགས་ཀྱི་བུ། དེ་བཞིན་གཤེགས་པའི་སྤྲུལ་པ་ནི་ཚད་མེད་དེ། འགྲོ་བ་གང་དང་གང་འདུལ་བ། དེ་དང་དེའི་གཟུགས་དང་ཁ་དོག་དང་མིང་གིས་དོན་མཛད་དོ། །ཞེས་གསུངས་པ་ལྟར་སངས་རྒྱས་ཀྱིས་འདུལ་བ་ལ་སངས་རྒྱས་དང་། བྱང་ཆུབ་སེམས་དཔས་འདུལ་བ་ལ་བྱང་ཆུབ་སེམས་དཔའི་རྣམ་པ་དང་། དེ་བཞིན་དུ་ཉན་ཐོས་དང་། རང་སངས་རྒྱས་དང་། ཚངས་པ་དང་། བརྒྱ་བྱིན་དང་། འཁོར་ལོ་སྒྱུར་བའི་རྒྱལ་པོ་དང་། དགེ་སྦྱོང་དང་། བྲམ་ཟེ་དང་། ཁྱིམ་བདག་དང་། བྱ་དང་རི་དྭགས་ལ་སོགས་པ་དང་། གྲུ་དང་ཟམ་པ་དང་སྨན་ལ་སོགས་ཏེ་གང་དང་གང་གིས་འདུལ་བ་ལ་དེ་དང་དེའི་ཚུལ་བརྟན་གཡོ་སྣ་ཚོགས་པའི་རྣམ་པར་བསྟན་ནས་མཐའ་ཡས་པའི་གདུལ་བྱའི་དོན་མཛད་པ་ལས། ༈ ཞིང་འདིར་བར་སྐབས་ཀྱི་མཛད་པ་གདུལ་བྱའི་ཆ་ཤས་འགའ་ཞིག་གི་མཐུན་སྣང་དུ་གྲུབ་པའི་ཁྱད་པར་ཅུང་ཟད་ཅིག་འཆད་པའི་དབང་དུ་བྱས་ན། རང་གཏེར་ཤ་འུག་གཏེར་བྱོན་གྱི་ལུང་ལས། འདི་ཉིད་འདོན་པའི་གང་ཟག་ནི༔ ལོ་ཙཱ་བཻ་རོ་ཙ་ན་འདི༔ སྔོན་འདས་བསྐལ་པ་གྲངས་མེད་དུས༔ བྱང་ཆུབ་མཆོག་ཏུ་ཐུགས་བསྐྱེད་ནས༔ སྐུ་གསུམ་ངོ་བོར་སངས་རྒྱས་ཀྱང༔ ཐབས་ལ་མཁས་པའི་སྙིང་རྗེ་ཡི༔ སྤྲུལ་པ་དུ་མར་སྣང་བ་སྟེ༔ ཞེས་གསུངས་པ་ལྟར། རྗེ་བཙུན་དམ་པ་འདི་སྔོན་སློང་བ་པོར་གྱུར་པ་ན། དེ་བཞིན་གཤེགས་པ་བཀོད་པའི་རྒྱལ་པོ་ལ་བདག་ཉིད་བཙོངས་པའི་རིན་བཤོས་སུ་བྱས་པ་ཕུལ་ནས་བྱང་ཆུབ་མཆོག་ཏུ་ཐུགས་བསྐྱེད་པ་ཡིན་ཏེ། ཇི་སྐད་དུ། དེ་བཞིན་གཤེགས་པ་སྣང་མཛད་སློང་པོའི་ཚེ། །དེ་བཞིན་གཤེགས་པ་བཀོད་པའི་རྒྱལ་པོ་ལ། །བཤོས་དག་བདག་ཉིད་བཙོངས་ཏེ་སྦྱར་ནས་ཀྱང་། །དང་པོར་བྱང་ཆུབ་མཆོག་ཏུ་ཐུགས་བསྐྱེད་དོ། །ཞེས་བསྐལ་པ་བཟང་པོའི་མདོ་

― MLP003_Page_0044 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་གསུངས་སོ།། ༈ དེ་ལྟར་ཐུགས་བསྐྱེད་ནས། དགེ་བའི་རྩ་བ་དང་། སྨོན་ལམ་གྱི་སྟོབས་དང་། སེམས་བརྟན་པས་མི་ལྡོག་པར་རབ་ཏུ་འགྲོ་བ་སྟེ། མ་ཞུམ་པའི་སྙིང་སྟོབས་མཆོག་གི་ཕ་རོལ་ཏུ་སོན་པས། སྤྲོ་ཞིང་བརྟུལ་ཕོད་ལ་བརྩོན་འགྲུས་ཆེན་པོ་རྨད་དུ་བྱུང་བས། བསྐལ་པ་ཆེན་པོ་གྲངས་མེད་པ་གསུམ་མམ་བདུན་དང་། བཅུ་དང་། སུམ་ཅུ་རྩ་གསུམ་ལ་སོགས་པ་མདོ་སྡེ་རྣམས་ལས་ཇི་སྐད་གསུངས་པའི་གྲངས་དེ་སྙེད་ཀྱི་ཡུན་དང་བཅས་པའམ། སྐད་ཅིག་མ་གཅིག་ལ་བསྐལ་པ་གྲངས་མེད་པའི་ཡང་གྲངས་མེད་དུ་བྱིན་གྱིས་རློབ་པར་མཛད་པའི་ཏིང་ངེ་འཛིན་གྱི་མཐུས། ཡུན་ཐུང་བའམ་རིང་བའང་མ་ཡིན་པར་མཐའ་གཅིག་ཏུ་མ་ངེས་པ། འགལ་བ་ལྟར་སྣང་ཡང་མི་འགལ་བའི་ཆོ་འཕྲུལ་གྱི་སྒོ་ནས་བསོད་ནམས་དང་ཡེ་ཤེས་ཀྱིས་བསྡུས་པའི་ཚོགས་མཐར་ཕྱིན་པར་མཛད་དེ། རྒྱུན་མཐའི་ཡེ་ཤེས་མངོན་པར་བྱང་ཆུབ་པ་ལྔའི་ཐབས་ཀྱིས་བླ་ན་མེད་པའི་གོ་འཕང་སྐུ་གསུམ་གྱི་ངོ་བོར་མངོན་པར་རྫོགས་པ་སངས་རྒྱས་སུ་ཟིན་ཀྱང་། དུས་འཁོར་འགྲེལ་ཆེན་ལས། སྲིད་པའི་འཆིང་ལས་ངེས་པར་གྲོལ་ཡང་སྲོག་ཆགས་རྣམས་ཀྱི་ལམ་གྱི་སླད་དུ་སྲིད་པ་སྟེ། །སྣ་ཚོགས་སྐྱེས་རབས་ཕྲེང་བ་ཡོན་ཏན་དང་ལྡན་སེམས་ཅན་དོན་གཉེར་རྣམས་ཀྱིས་མཐོང་གྱུར་པ། །དང་པོའི་སངས་རྒྱས་རྫུ་འཕྲུལ་ཆེ་ལྡན་སྤྱོད་པ་དག་སྟེ། ཞེས་དང་། རྒྱལ་ཚབ་མ་ཕམ་མགོན་པོས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །ཞེས་གསུངས་པ་ལྟར། ཞིང་འདིའི་གདུལ་བྱ་རྣམས་དྲང་བའི་སླད་དུ་ཐབས་ལ་མཁས་པའི་སྙིང་རྗེ་ཆེན་པོས་འདུལ་བའི་ཡུལ་ལ་མཐུན་པར་འཇུག་པའི་སྐྱེ་བའི་ཕྲེང་བ་ཇི་སྙེད་ཅིག་བཟུང་བའི་ཚུལ་ནི། རང་གཏེར་གབ་རྒྱ་ཅན་གྱི་ལུང་བྱང་ལས། བཻ་རོ་ཁྱོད་ནི་སྐྱེ་མཐའི་བྱང་སེམས་ཏེ༔ ཁྱོད་ཀྱི་འདི་གོང་སྐྱེ་བ་འདས་པ་ནི༔ སྨྲ་བསམ་བརྗོད་མེད་ཡེ་ཤེས་སྙིང་པོའི་དོན༔ སེམས་ཅན་སངས་རྒྱས་མཉམ་ཉིད་ཁྱབ་བརྡལ་ཡང༔ ཁམས་གསུམ་འགྲོ་བའི་འདྲེན་མཆོག་རྡོ་རྗེ་ཆོས༔ ཤཱཀྱའི་ཉེ་གནས་

― MLP003_Page_0045 ―

^{[མ་དཔེ་གཟིགས་ན་འདིར་གནོན།]}

[Full Size]

ཨཱ་ནནྟ་ཞེས་དང༔ རྒྱལ་པོ་ཛ་དང་ཤཱནྟིཾ་གཪྦྷ་དང༔ བོད་འདིར་སམྦྷོ་ཊ་སོགས་དག་པ་ཡི༔ སྐྱེ་བ་དེ་ཙམ་སྣང་གི་མ་དག་པའི༔ སྐྱེ་ཚུལ་བརྗོད་དུ་ལང་བའི་གནས་མ་ཡིན༔ དེ་ལྟར་དག་པའི་སྐྱེ་བ་དེ་དག་གིས༔ འགྲོ་ལ་སྙིང་རྗེ་ཆེན་པོའི་ཐུགས་བསྐྱེད་པས༔ བཻ་རོ་ཁྱོད་དུ་སྐྱེ་བ་བླངས་པ་ཡིན༔ ཁྱོད་ཀྱང་ཤྲཱི་སིདྷ་ཡེ་ཤེས་མདོ༔ པདྨ་བདག་སོགས་གཙུག་གི་བླ་མར་བསྟེན༔ གདམས་པའི་གནད་རྣམས་ཕུ་ཐག་བཅད་བྱས་ནས༔ ཆོས་སྐུའི་རང་ཞལ་མངོན་དུ་རྟོགས་གྱུར་པས༔ ལས་འཕྲོ་མ་དག་སྐྱེ་བ་ལེན་མི་སྲིད༔ འོན་ཀྱང་སེམས་བསྐྱེད་སྨོན་ལམ་བཟང་པོ་ཡིས༔ མཚམས་སྦྱར་མཐའ་ཡས་འགྲོ་བའི་དཔལ་ཉིད་དུ༔ དབང་ཕྱུག་འབར་དང་རཀྴག་རྡོ་རྗེ་གླིང་༔ ཀུན་སྐྱོང་གླིང་དང་མདོ་སྔགས་གླིང་པ་སོགས༔ པདྨ་བདག་གི་ཟབ་གཏེར་བདག་པོ་དང་༔ གཞན་ཡང་ཐེག་པ་ཆེ་ཆུང་སྣ་ཚོགས་ལ༔ དེ་དང་མཐུན་པའི་ངོ་མཚར་སྐྱེ་བའི་གྲངས༔ བཅུ་ཕྲག་གཅིག་དང་གསུམ་ཙམ་འདས་པའི་མཐར༔ ཞེས་དང་། སྔར་དྲངས་པའི་ཤ་འུག་གཏེར་བྱོན་གྱི་ལུང་བསྟན་དེ་ཉིད་ཀྱི་འཕྲོས་ལས། ཤཱཀ་ཐུབ་ཉེ་གནས་ཀུན་དགའ་བོ༔ ཨིནྡྲ་བྷཱུ་ཏི་རྒྱལ་པོ་ཛ༔ ཐུ་མི་པཱུརྞ་ལ་སོགས་པ༔ འགྲོ་འདུལ་སྐྱེ་སྲིད་དེ་དག་ལས༔ བཻ་རོ་འདི་རུ་འཕོས་པ་ཡིན༔ ཐུགས་བསྐྱེད་སྨོན་ལམ་སྟོབས་ཆེ་བས༔ ད་ལྟའི་དུས་ན་གངས་ཅན་འདིར༔ མདོ་སྔགས་བསྟན་པ་སྤེལ་བ་ལ༔ འགྲན་ཟླ་མེད་པའི་ལོ་ཙཱ་ཡིན༔ ད་དུང་སྨོན་ལམ་མཐའ་བཙན་པས༔ ཕན་པའི་སྐྱེས་ཆེན་སྤྲུལ་པ་ནི༔ རྣམ་པ་གཅིག་ཏུ་མ་ངེས་པ༔ གདུལ་བྱའི་བློ་དང་འཚམས་པར་འབྱུང་༔ ཞེས་གསུངས། གཞན་ཡང་རྡོ་རྗེ་གླིང་པའི་གཏེར་ལུང་ལས། ཉི་མ་སེང་གེ་ཁྱུང་པོ་རྣལ་འབྱོར་དང་༔ སུམ་སྟོན་ཇོ་དར་གྲྭ་པ་མངོན་ཤེས་དང་༔ བསྟན་པ་གཞུང་འཛིན་རོང་སྒོམ་ཆོས་བཟང་དང་༔ དགེ་བཤེས་ཉམས་བྲོ་གུ་རུ་རྣོན་རྩེ་དང་༔ ཁྱུང་གྲགས་ལྷ་འབུམ་ཤཱཀྱ་འབྱུང་གནས་དང་༔ གྲུབ་ཐོབ་དངོས་གྲུབ་གཡག་སྡེ་པཎ་ཆེན་དང་༔ མཚལ་ཐང་སྒོམ་སྡེ་སྤྲུལ་སྐུར་གྲགས་པའི་མཐར༔ ཞེས་གྲྭ་པ་མངོན་ཤེས་གཏེར་སྟོན་གྱི་སྐྱེ་ཕྲེང་ལྔའི་གྲངས་སུ་རང་གཏེར་ལུང་བྱང་དུ་བགྲངས་པའི་ལྷགཉི་མ་སེང་གེ་སོགས་བཅུ་གསུམ་འབྱུང་བས་གབ་རྒྱ་ཅན་ལས། བཅུ་ཕྲག་གཅིག་དང་གསུམ་ཙམ་འདས་པའི་མཐར༔

― MLP003_Page_0046 ―

^{[མ་དཔེ་གཟིགས་ན་འདིར་གནོན།]}

[Full Size]

ཞེས་གསུངས་པ་དང་ཡང་འབྱོར་བ་ཡིན་ནོ། །དེར་མ་ཟད་གསང་བའི་རྣམ་ཐར་ཞལ་གསུངས་མ་ལས། དེ་ཡང་སྔོན་གྱི་སྐྱེས་རབས་འཕྲེང་བ་རྣམས། །རྡོར་གླིང་ཉིད་ཀྱི་གཏེར་ལུང་ཞལ་གདམས་དང་། །མཆོག་ལྡན་རྣམ་ཐར་རང་གཏེར་ལུང་བསྟན་གྱི། །དོན་རྣམས་ཁུངས་དང་སྦྱར་ཏེ་བསྡེབས་པ་ལས། །དྲན་པའི་ལམ་ནས་བརྗོད་པ་མ་ཡིན་མོད། །འོན་ཀྱང་བཻ་རོ་ཟུར་ཆེན་རྡོར་གླིང་སོགས། །དམ་པ་འགའ་ཡི་སྔོན་རབས་ད་ལྟ་ཡི། །རྐྱེན་འགས་སད་ལས་འལ་འོལ་དྲན་པ་སྙམ། །གཞན་ཡང་ཀུན་མཁྱེན་ཆེ་དང་འགོས་ལོ་ཡི། །གསུང་རབ་མཐོང་ཚེ་རང་གིས་བྱས་སྙམ་དང་། །ཐོག་མའི་ཚིག་གིས་དེ་རྗེས་ཚིག་དོན་རྣམས། །རྩོལ་མེད་ཤུགས་འབྱུང་ར་རི་འཆར་བ་སྙམ། །ཕྱི་དུས་འཁོར་ལོ་ཐ་མ་ངེས་དོན་དུ། །ཐོགས་མེད་སྨྲ་བ་དེ་དང་བློ་ཆེན་པའི། །ལས་སྣང་འགའ་ཞིག་བག་ཆགས་སད་འདྲ་བ། །སྤྲུལ་པའི་རྣལ་རོལ་གཉིས་པ་ཡིན་པར་འཁུམས། །ཁྱད་པར་ཆོས་ཀྱི་གོ་ཆའི་གནས་དུས་དང་། །འཁོར་སློབ་ལོངས་སྤྱོད་བྱ་བྱེད་གནས་ལུགས་ཀུན། །འདས་པའི་རྨི་ལམ་བཞིན་དུ་ཆེས་གསལ་བ། །ད་ལྟའང་ཡིད་ཀྱི་ཡུལ་དུ་ལམ་མེ་སྣང་། །ཞེས་གསུངས་ཤིང་། འདིར་ཁུངས་སྨོས་པའི་རྡོར་གླིང་གི་ཞལ་གདམས་ནི། སློབ་དཔོན་ལེགས་པ་དཔལ་ལ་འདའ་ཀ་ཞལ་ཆེམས་སུ་གསུངས་པ་སྟེ། དེ་ལྟར་ཡང་། ང་རྟེན་ཡས་ཀྱིས་སྤྲུལ་པའི་གང་ཟག་ལ། །འཆི་བས་འཇིགས་པ་མ་ཡིན་ཏེ། །ད་ནི་ན་སོ་ཅུང་ཟད་རྒས། །མགོ་ལ་འཆི་སྐྲ་དཀར་པོ་སྐྱེས། །ལུས་ཀྱི་སྟོབས་ཟད་ཉམས་ཤེད་ཆུང་། །ད་ལྟ་དྲུག་ཅུ་ཐམ་པ་འགྲོ། །བདེ་ཆེན་མཁའ་སྤྱོད་གནས་ཡུལ་ནས། །བདག་ལ་གདན་འདྲེན་བསམ་མི་ཁྱབ། །ད་ལོ་ཅིས་ཀྱང་ཁོ་བོ་འགྲོ། །ཁྱེད་འདིར་བཞུགས་སྐུ་ཁམས་ཅི་བདེར་བཞུགས། །ད་ནས་མི་ལོ་བཅུ་གསུམ་ན། །རང་རེ་དཔོན་སློབ་མཇལ་བ་བྱེད། །དེ་ནས་ཕྱི་མའི་ཕྱི་མ་ནི། །ཡར་འབྲོག་དབུས་གཡོར་སྡེ་གཉིས་ཀྱི། །མཚམས་སུ་བདག་ནི་སྐྱེ་བ་ལེན། །འགྲོ་འདུལ་ཞེས་གྲགས་རྒྱལ་བའི་སྲས། །རྫུ་འཕྲུལ་མངོན་ཤེས་ལྡན་པ་འབྱུང་། །བན་བོན་གཏེར་ལྷག་མ་ལུས་འབྱིན། །སྨྱོན་སྤྱོད་བརྟུལ་ཞུགས་མཐར་ཕྱིན་ནས། །དུག་ལྔས་བསེ་ལྟར་རངས་པ་ཡི། །དཔོན་སྐྱ་མི་ཆེན་ཐམས་ཅད་དང་། །རྒྱ་ནག་ཧོར་གྱི་རྒྱལ་པོ་ཡང་། །

― MLP003_Page_0047 ―

^{[མ་དཔེ་གཟིགས་ན་འདིར་གནོན།]}

[Full Size]

ཞི་རྒྱས་དབང་དྲག་མངོན་སྤྱོད་ཀྱིས། །མ་ལུས་ཁོ་བོས་དབང་དུ་སྡུད། །དེ་དུས་ལུས་ངག་ཡིད་གསུམ་གྱི། །འབྲེལ་པ་གང་ལྟར་ཐོགས་པ་རྣམས། །རིགས་དྲུག་འཁོར་བ་དོང་སྤྲུགས་ནས། །པདྨས་བརྒྱན་པའི་ཞིང་ཁམས་སུ། །ཁོ་བོ་བླ་ན་མེད་པ་ཡི། །རྣམ་རོལ་མཐའ་ཡས་མགོན་པོ་ཆེར། །ཡང་དག་མངོན་འཚང་རྒྱ་བའི་ཚེ། །སྲས་འཁོར་རྒྱ་མཚོའི་ཐོག་མར་སྐྱེ། །སྐྱེ་མེད་ཆོས་ལ་བཟོད་ཐོབ་ནས། །དཔའ་འགྲོ་སྒྱུ་མ་རྡོ་རྗེ་ཡི། །ཏིང་འཛིན་རྣམ་གསུམ་མངོན་གྱུར་གྱི། །བྱང་ཆུབ་མཆོག་ལུང་དེ་རུ་ཐོབ། །མཐར་ཐུག་རྣམ་འདྲེན་མོས་པའི་ཚེ། །ཀུན་ཀྱང་ཕྱོགས་བཅུའི་ཞིང་ཁམས་སུ། །སངས་རྒྱས་མཆོག་ཐོབ་འཁོར་དོང་སྤྲུགས། །ཧ་ཧ་གང་ལྟར་བྱས་ཀྱང་བདེ། །ཐེ་ཚོམ་སྦྲུལ་གྱི་མདུད་པ་ཞིག །རང་སར་གྲོལ་བ་རྡོར་གླིང་ངའི། །བསམ་རྫོགས་འགྲོ་དོན་ལྷུན་གྱིས་གྲུབ། །དམ་སེལ་ཐེ་ཚོམ་མ་ཞུགས་པས། །སེམས་ལ་གང་ཤར་བཤད་པ་ལགས། །ཞེས་གསུངས་པ་བཞིན་ནོ། །དེ་ལྟར་ལུང་བྱང་ལེ་ཚན་གྱིས་ཇི་ལྟར་བསྟན་པའི་དོན་རྣམས་གུང་བསྒྲིགས་ནས་བཤད་པར་བྱ་སྟེ། དེ་ལ་བྱང་ཆུབ་སེམས་དཔའ་རྡོ་རྗེ་ཆོས་ནི། བདེ་འདུས་ཀྱི་ལོ་རྒྱུས་ལས། སྟོན་པ་ཀུན་ཏུ་བཟང་པོ་དང་ཐུགས་གཉིས་སུ་མེད་པ༔ བྱང་ཆུབ་སེམས་དཔའ་རྡོ་རྗེ་ཆོས་ཞེས་ཀྱང་བྱ༔ རྡོ་རྗེ་སེམས་དཔའ་ཞེས་ཀྱང་བྱ༔ ལག་ན་རྡོ་རྗེ་ཞེས་ཀྱང་བྱ༔ ཞེས་སོགས་གསུངས་པ་ལྟར། འཛམ་བུ་གླིང་ལས་ལོགས་སུ་གྱུར་པ་ཤར་ལྷོ་མཚམས་ཀྱི་གླིང་ཕྲན་ལངྐའི་ཡུལ་ལམ་སིདྒྷ་ལའི་གླིང་དུ་གྲགས་པ་དེར་བཅོམ་ལྡན་འདས་ཐུབ་པའི་དབང་པོ་ཉིད་ལངྐའི་བདག་པོ་སྒྲ་སྒྲོག་གི་བུ་མགྲིན་བཅུས་སྤྱན་དྲངས་ནས་ལངྐར་གཤེགས་པའི་མདོ་གསུངས་ཤིང་། གནས་དེར་ལི་ཙ་བཱི་དྲི་མེད་གྲགས་པ་སོགས་རིག་འཛིན་གྱི་འཁོར་རྣམས་ལ་རྒྱུད་སྡེ་མང་དུ་གསུངས་པ་ཕྱག་ན་རྡོ་རྗེ་ལ་གཏད་དེ་རྡོ་རྗེ་ཆོས་སུ་མིང་བཏགས་པར་བཤད་པ་དང་། ཉན་རང་ལ་གསང་བར་བྱ་བ་ནི་རྡོ་རྗེའི་ཐེག་པ་ཡིན་ལ། དེའི་སྡུད་པ་པོ་ཡིན་པས་གསང་བའི་བདག་པོ་ཞེས་ཀྱང་གྲགས་ཤིང་། གསང་བ་བསམ་གྱིས་མི་ཁྱབ་པའི་མདོ་སོགས་སུ་སངས་རྒྱས་སྟོང་ཐམས་ཅད་ཀྱི་བཀའི་བསྡུ་བ་པོར་ལུང་བསྟན་ཏོ། །དེ་ནས་འོ་སྐོལ་གྱི་སྟོན་པ་ཤཱཀྱ་ཐུབ་པ་འཇིག་རྟེན་དུ་

― MLP003_Page_0048 ―

^{[མ་དཔེ་གཟིགས་ན་འདིར་གནོན།]}

[Full Size]

བྱོན་པའི་ཚེ། །གསང་བའི་བདག་པོ་ཉིད་དེ་བཞིན་གཤེགས་པའི་རིམ་གྲོ་པ་ཐོས་པ་འཛིན་པའི་མཆོག་འཕགས་པ་ཀུན་དགའ་བོར་བསྟན་ཏེ། གསང་འདུས་ཀྱི་འགྲེལ་པ་སྒྲོན་གསལ་ལས། ཀུན་དགའ་བོ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་སྟེ་ཕྱག་ན་རྡོ་རྗེ་ཡིན་ལ། རྡོ་རྗེ་འཆང་ཆེན་པོའང་དེ་ཉིད་ལས་གཞན་མ་ཡིན་ཏེ། གཞན་དུ་ན་མདོ་སྡེ་ལ་སོགས་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་པོ་འདི་དག་དེ་བཞིན་གཤེགས་པ་ལས་ཐོས་ནས་ལྷག་ཆད་མེད་པར་ལན་གཅིག་གིས་ཇི་ལྟར་འཛིན་པར་ནུས། ཞེས་གསུངས་ཤིང་སྟོན་པས་མདོ་སྡེའི་བསྟན་པ་གཏད་པ་ལྟར་བཀའི་བསྡུ་བ་པོའང་མཛད་དོ། །དེའི་ཚེ་གཟུགས་སྐུའི་བཀོད་པ་གཉིས་པ་ནི། ནུབ་ཕྱོགས་ཨོ་ཌཱི་ཡ་ནའི་ཡུལ་དུ་རྒྱལ་པོ་ཨིནྡྲ་བྷཱུ་ཏི་ཆེན་པོར་གྱུར་ནས། བཅོམ་ལྡན་འདས་འཁོར་དགྲ་བཅོམ་པ་ལྔ་བརྒྱ་དང་བཅས་པ་ལ་མཆོད་དེ་འཚང་རྒྱ་བའི་ཐབས་ཞུས་པས། འདོད་ཡོན་སྤངས་ཏེ་བསླབ་པ་གསུམ་དང་ཕར་ཕྱིན་དྲུག་བསྟེན་ཅིག་པར་གདམས་པ་ན། འཛམ་བུའི་ཚལ་ནི་ཉམས་དགའ་བར། །ཝ་སྐྱེས་ཉིད་དུ་གྱུར་ཀྱང་སླའི། །འདོད་ཡོན་སྤངས་པའི་ཐར་པ་ནི། །ནམ་ཡང་མི་འདོད་གཽ་ཏ་མ། །ཞེས་ཞུས་པས། དེར་ཉན་ཐོས་ཀྱི་ཚོགས་མི་སྣང་བར་མཛད་ནས་དཀྱིལ་འཁོར་སྤྲུལ་ཏེ་རྒྱལ་པོ་ལ་དབང་བསྐུར་བས་དེ་ཉིད་དུ་ཟུང་འཇུག་གི་སྐུ་གྲུབ་ཅིང་རྒྱལ་པོ་འཁོར་དང་བཅས་པ་རྣམས་སུ་མ་ཟད། ཨོ་རྒྱན་གྱི་ཡུལ་འགྲོ་བ་སྲོག་ཆགས་ཕྲ་མོ་ཡན་ཆད་ཐམས་ཅད་བདེ་བ་ཆེན་པོའི་ལམ་གྱིས་དངོས་གྲུབ་ཐོབ་ཅིང་འཇའ་ལུས་སུ་སོང་། དེའི་ཚེ་གཞན་ཡང་དུས་འཁོར་རྩ་རྒྱུད་ལས། ཕྱག་ན་རྡོ་རྗེ་ཟླ་བཟང་ཁྱོད། །ཅེས་གསུངས་པ་ལྟར་གསང་བདག་གི་སྤྲུལ་པའི་སྐུ་རྒྱལ་པོ་ཟླ་བ་བཟང་པོར་གྱུར་ནས། ཆུ་བོ་ཤཱི་ཏའི་བྱང་ཤམྦྷ་ལ་ནས་ལྷོ་ཕྱོགས་དཔལ་ལྡན་འབྲས་སྤུངས་སུ་བྱོན་ཏེ། སྟོན་པ་ཤཱཀྱ་ཐུབ་པ་ལ་གསོལ་བ་བཏབ་པས། དེར་དུས་འཁོར་རྩ་རྒྱུད་དུ་མ་ཟད་གསང་སྔགས་ཀྱི་རྒྱུད་མཐའ་དག་ཀྱང་གསུངས་ཏེ། དམ་པ་དང་པོའི་རྒྱུད་ལས། སྟོན་པས་བྱ་རྒོད་ཕུང་པོ་རུ། །ཤེས་རབ་ཕ་རོལ་ཕྱིན་བསྟན་པ། །དེ་བཞིན་དཔལ་ལྡན་འབྲས་སྤུངས་སུ། །ཆོས་བསྟན་གསང་སྔགས་ཚུལ་རབ་གསུངས། །ཞེས་

― MLP003_Page_0049 ―

^{[མ་དཔེ་གཟིགས་ན་འདིར་གནོན།]}

[Full Size]

འབྱུང་ཞིང་། མི་དང་མི་མ་ཡིན་པ་གྲངས་ལས་འདས་པས་འདོད་པའི་དངོས་གྲུབ་ཐོབ་པར་གྱུར་ཏོ། །ཞེས་གྲགས་ཏེ། འདི་ཡང་འཕགས་པ་ཀུན་དགའ་བོ་དང་དུས་མཚུངས་པའི་གསང་བདག་གི་སྤྲུལ་པའི་སྐུའི་རྒྱལ་པོའོ། །དེ་ནས་རྒྱ་གར་ཤར་ཕྱོགས་ས་ཧོ་རའི་རྒྱལ་པོ་ཨུ་ཏ་ར་ཛྙཱ་ནའི་སྲས། སྐལ་ལྡན་རྒྱལ་པོ་ཛཿསྟེ། མཚན་གཞན་ཨིནྟྲ་བྷཱུ་ཏི་དང་། ལུང་བསྟན་རྡོ་རྗེ་ཞེས་ཀྱང་བྱ་ཞིང་། ཡོ་ག་བ་རྣམས་ལ་གྲགས་པའི་རྒྱལ་པོ་རབ་གསལ་ཟླ་བ་དང་ཡང་གཅིག་པར་འགའ་ཞིག་བཞེད་ལ། གང་ལྟར་ཡང་རྒྱལ་པོ་དེར་གྱུར་ཏེ། ཐུབ་པའི་དབང་པོ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན་དཔལ་ཕྱག་ན་རྡོ་རྗེའི་མཐུ་ལས། རྒྱལ་པོའི་ཁང་སྟེང་དུ། གསང་སྔགས་ཀྱི་རྒྱུད་སྡེའི་གླེགས་བམ་བབས་ཤིང་། རྣལ་འབྱོར་ཕྱི་ནང་གི་རྒྱུད་དོན་ཐུགས་སུ་ཆུད་དེ། རྒྱལ་པོ་ཉིད་དང་དེའི་སྲས་དང་སྲས་མོ་རྣམས་རང་རང་གི་ཚོམ་བུ་ཁྲི་ཕྲག་ལྔ་ལ་སོགས་པའི་འཁོར་དང་བཅས་ཏེ་བདེ་བ་ཆེན་པོའི་ལམ་གྱིས་རྡོ་རྗེ་འཆང་གི་སར་མངོན་དུ་གཤེགས་སོ། །དེ་ལྟར་ཡང་། རྒྱལ་པོ་ཉིད་ཀྱིས་མཛད་པའི་སྤྱི་མདོའི་འགྲེལ་པར། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །འཛམ་བུ་གླིང་གི་ཤར་ཕྱོགས་སུ། །རྒྱལ་པོ་ཛཿཞེས་བྱ་བ་ལ། །ཚེ་གཅིག་འདི་ལ་འགྲུབ་པ་ཡི། །གསང་བའི་ཐེག་པ་དམ་པ་ཞིག །ཕྱག་ན་རྡོ་རྗེས་སྟོན་པར་འགྱུར། །ཞེས་སྣང་ངོ་། །དེ་བས་ན་བདག་ཀྱང་སྐལ་ལྡན་དུ་ལུང་བསྟན་པ་ནི་ཐོབ་བོ། །ད་ལྟར་དུས་ལ་བབ་པ་ན་གདུང་བ་བཏོན་པ་དང་། ལོ་ཉི་ཤུ་རྩ་བརྒྱད་ལོན་པའི་ཕྱིར་རོ། །ཞེས་གསུངས་སོ། །དེའི་འོག་ཏུ་རིག་འཛིན་འདུས་པ་རྩ་བའི་རྒྱུད་ལས། ཞི་བ་སྙིང་པོ་ཞེས་བྱ་བས། །དྲག་སྔགས་སྤྱོད་པ་སྒྲུབ་ཅིང་སྟོན། །ཞེས་ལུང་བསྟན་པ་ལྟར་སྒྲུབ་སྡེ་བརྒྱད་ལས་དྲག་སྔགས་ཀྱི་བཀའ་བབས་སློབ་དཔོན་ཤཱིནྟཾ་གཪྦྷར་གྱུར་ཅིང་། དེའི་ཕྱི་མ་ལ་བོད་ཡུལ་དུ་ལོ་ཙཱ་ཆེན་པོ་ཐུ་མི་སམྦྷོ་ཊར་གྱུར་ནས་ཡི་གེ་འབྲི་ཀློག་དང་དམ་པའི་ཆོས་བསྒྱུར་བའི་སྲོལ་བཏོད། དེའི་འོག་ཏུ་ཤར་རྒྱལ་མོ་ཚ་བའི་རོང་དུ་རྒྱལ་པོ་ལེགས་གཞེར་དཔལ་གྱི་བུ་རབ་ཏུ་བྱུང་བའི་མཚན་དགེ་སློང་པཱུརྞ་ཞེས་བྱ་བར་སྐྱེ་བ་བཞེས་པའི་ཕྱི་མ་ལ། སྤྲུལ་པའི་ལོ་ཙཱ་བ་ཆེན་པོ་པ་གོར་བཻ་རོ་ཙ་ན་རཀྵི་ཏར་གྱུར་ཏེ། བོད་

― MLP003_Page_0050 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། རྒྱལ་མོ་རོང་། རྒྱ་ནགལི་ཡུལ་སོགས་སུ་འཇའ་ལུས་འཕོ་བ་ཆེན་པོའི་སྐུས་མཐའ་ཡས་པའི་འགྲོ་བའི་དོན་མཛད་ཅིང་། རྔོག་ལོ་ཆེན་པོས། བཻ་རོ་ཙ་ན་ནམ་མཁའི་མཐའ་དང་མཉམ། །ཀ་ཅོག་ཞང་གསུམ་ཉི་ཟླ་ཟུང་འབྲེལ་ཏེ། །རིན་ཆེན་བཟང་པོ་ཐོ་རེངས་སྐར་ཆེན་འདྲ། །ཁོ་བོ་དེ་དག་དྲུང་ན་སྐར་ཕྲན་ཙམ། །ཞེས་བསྔགས་པ་ལྟར་དོན་ལའང་གནས་ཏེ། འགྲན་ཟླ་དང་བྲལ་བའི་ལོ་ཙཱ་བའོ། །དེ་ནས་བསྟན་པ་ཕྱི་དར་གྱི་འགོ་བརྩམས་ནས་རིང་པོར་མ་ལོན་པ་ན། དགེ་བཤེས་གྲྭ་པ་མངོན་ཤེས་སུ་སྐྱེ་བ་བཞེས་ཏེ། དེ་ཡང་ཡམ་ཤུད་ལས་རབ་ཏུ་བྱུང་བའི་མཚན་ཤེས་རབ་རྒྱལ་བ་དང་། ཡོངས་སུ་གྲགས་པ་དབང་ཕྱུག་འབར་ཞེས་ཟེར། ཟབ་གཏེར་གྱི་བཀའ་བབས་ཤིང་གནས་གཞི་བརྒྱ་རྩ་བརྒྱད་བཏིང་བ་སོགས་ཕྲིན་ལས་རྒྱ་ཆེ། དུས་དེར་སྐུ་ཡི་བཀོད་པ་གཅིག་ནི་གསང་ཆེན་སྔ་འགྱུར་གྱི་བསྟན་པའི་སྤྱི་མེས་ལྷ་རྗེ་ཟུར་པོ་ཆེ་ཤཱཀྱ་འབྱུང་གནས་ཞེས་བྱ་བར་བསྟན་ཏེ། རྒྱལ་པོ་བཀའ་ཆེམས་ཆུང་བ་ཞིག་ནས། བཻ་རོ་ཙ་ན་ཟུར་ཚོ་རྒྱུད་དུ་འབྱོན་པར་ལུང་བསྟན་པ་དེ་ཡིན་ཞེས་གོང་མ་རྣམས་གསུངས་ཤིང་། རྡོར་གླིང་གི་གཏེར་ལུང་ལས་ཀྱང་བསྟན། ཁྱད་པར་སྲམ་པ་དཔལ་ཆེན་གྱི་སྐུ་མཇལ་བར་མཛད་པའི་ཚེ་མོས་གུས་ཀྱི་རྐྱེན་གྱིས་སྔོན་རབས་གསལ་བར་སད་པ་སོགས་ངོ་མཚར་བའི་རྒྱུ་མཚན་མང་། དེ་དག་ལས་དུས་སྔ་བ་ཙམ་ན། རྒྱ་གར་གྱི་ཡུལ་དུ་དཔལ་ནག་པོ་སྤྱོད་པ་ཞེས་བྱ་བའི་སྐུའི་བཀོད་པའང་བསྟན་ཏེ། གྲུབ་པའི་སྤྱོད་པ་རྨད་དུ་བྱུང་བས་རྡོ་རྗེ་ཐེག་པ་རྒྱས་པར་མཛད། དེའི་སྐྱེ་སྲིད་ཕྱི་མ་ནི་རུ་ལག་གཙང་སྨད་ཀྱི་སྣར་ལུང་རོང་དུ་རོང་ཟོམ་ལོ་ཙཱ་བ་ཆོས་ཀྱི་བཟང་པོར་འཁྲུངས་ཏེ། བྱིས་པའི་དུས་ནས་སློབ་མི་དགོས་པར་སཾ་སྐྲྀ་ཏའི་སྐད་ཕུལ་ཕྱིན་མཁྱེན་པ་དང་། ཆོས་ཐམས་ཅད་བརྡ་བསྟན་པ་ཙམ་གྱིས་མཁྱེན་པས་པཎྜི་ཏ་སྨྲྀ་ཏིའི་སྐྱེ་བ་ཡིན་ཡང་ཟེར། འགའ་ཞིག་པཎྜི་ཏ་ཕྲ་ལ་རིང་མོས་གྲོང་འཇུག་བྱས་པའང་འདོད། ཇོ་བོ་རྗེ་དཔལ་ལྡན་ཨ་ཏི་ཤས་ནག་པོ་སྤྱོད་པའི་སྐྱེ་བར་ལུང་བསྟན་ཏོ། །གཞན་ཡང་དེ་དག་དང་རགས་པར་དུས་མཚུངས་པ་ཙམ་ན་ཤངས་པ་བཀའ་བརྒྱུད་པའི་ཆུ་འགོ་ནི་གུ་རུས་རྗེས་སུ་བཟུང་བའི་གྲུབ་ཐོབ་ཁྱུང་པོ་རྣལ་འབྱོར་ཚུལ་ཁྲིམས་

― MLP003_Page_0051 ―

^{[མ་དཔེ་གཟིགས་ན་འདིར་གནོན།]}

[Full Size]

མགོན་དང་། རྟ་ནག་ཏུ་བྱོན་པའི་གཏེར་སྟོན་གུ་རུ་རྣོན་རྩེ་ཞེས་བྱ་བའང་བྱོན་ཏེ་སྐུ་ཡི་བཀོད་པ་མཐའ་ཡས་པའི་ཆོ་འཕྲུལ་གྱིས་འགྲོ་བའི་དོན་མཛད་པ་ཡིན། དེ་ནས་ཡར་འབྲོག་གཉན་དུ་མ་མོ་སྒང་ཤར་སོགས་ཟབ་གཏེར་གྱི་བཀའ་བབས་པ་རཀྴག་ཆོས་འབར་ཞེས་བྱ་བར་སྐྱེ་བ་བཞེས་ཤིང་། དེ་དང་རགས་པར་དུས་མཚུངས་པའི་སྔ་ཕྱི་ཅི་རིགས་པར་གཏེར་སྟོན་གྲུབ་ཐོབ་དངོས་གྲུབ་དང་། ཞི་བྱེད་བཀའ་བབས་ཕྱི་མའི་ཚིག་བརྒྱུད་རྫོགས་པས་བཀའ་རྒྱ་བཀྲོལ་ཏེ་ཕྱོགས་ཀུན་ཏུ་རྒྱས་པའི་ཆུ་འགོ་ལྟ་བུ་རོག་བན་སྐུ་མཆེད་གསུམ་གྱི་འབྲིང་པོ་ཞིག་པོ་ཉི་མ་སེང་གེ་ཞེས་བྱ་བར་གྱུར་ཏེ། དེས་མངའ་བདག་ཉང་དང་མཇལ་བའི་ཚེ་མགུར་བཞེངས་པ་ལས་ཀྱང་། སྔོན་གྱི་མཐའ་འཁོབ་རྒྱལ་པོ་དེ། །དུས་དེང་སང་ཉང་ཆུང་རལ་པ་ཅན། །སྔོན་གྱི་སྒྲ་བསྒྱུར་ལོ་ཙཱ་བ། །དུས་དེང་སང་སྨྱོན་པ་ང་འདྲ་བྱུང་། །ཞེས་གསུངས་པ་ཡིན་ནོ། །གཞན་ཡང་རྡོར་གླིང་གི་ལུང་བྱང་ལས། སུམ་སྟོན་ཇོ་དར། བསྟན་པ་གཞུང་འཛིན། དགེ་བཤེས་ཉམས་བྲོ་ཞེས་གསུམ་སྣང་ཡང་གང་དུ་བྱོན་གྱི་ལོ་རྒྱུས་མ་མཐོང་ཞིང་མ་ཐོས་ལ། གཞན་གཙང་རུ་མཚམས་ཀྱི་གཏེར་ལ་དབང་བར་ལུང་བསྟན་པའི་གཏེར་སྟོན་བོན་པོ་ལྷ་འབུམ་དང་། ཟུར་པཀྴི་ཤཱཀ་འོད་དང་ཐོག་མཚུངས་པའི་གཏེར་སྟོན་ཡེ་ཤེས་ཁྱུང་གྲགས་སོགས་དང་། མཆོག་ལྡན་མགོན་པོའི་རྣམ་ཐར་དུ་གཏེར་སྟོན་སངས་རྒྱས་བླ་མ། རྒྱ་ལོ་ཙཱ་བ། ལྡང་མ་ལྷུན་རྒྱལ། གཡག་འཕྱར་སྔོན་པོ་སོགས་གཏེར་སྟོན་གྱི་སྐྱེ་བའི་ཕྲེང་བ་ཇི་སྙེད་པའང་སྣང་ངོ་། །དེ་དག་གི་འོག་ཏུ་ཞང་མཚལ་པའི་གདན་རབས་བཞི་པ་སངས་རྒྱས་འབུམ་དུ་འཁྲུངས་ཏེ་བླ་དཔོན་བྱེ་ནས་ཕྲིན་ལས་ཟུར་དུ་བསྐྱངས་པ་ལ་སྒོམ་སྡེ་བྱུང་བས་མཚལ་ཐང་སྒོམ་སྡེ་སྤྲུལ་སྐུར་གྲགས། དེའི་སྐྱེ་བ་དེ་མ་ཐག་པ་ནི་གཏེར་ཆེན་རྡོ་རྗེ་གླིང་པ་ཡིན་ཏེ་ཟབ་མོའི་གཏེར་ཁ་མང་དུ་ཐོན། དེ་ལས་ལོ་སོ་བརྒྱད་ཙམ་གྱིས་བགྲེས་པ་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་ཞེས་གསང་བ་བླ་ན་མེད་པའི་རྒྱུད་ཐལ་འགྱུར་ལས། དེ་ནས་བློ་གྲོས་མཆོག་གིས་འཛིན། །ཞེས་ལུང་བསྟན་པའི་སྐྱེས་མཆོག་འགྲན་ཟླ་དང་བྲལ་བ་དེ་དང་། རང་བྱུང་རྡོ་རྗེ་དང་ཤ་གྲགས་སེང་གེའི་སློབ་མ་གཡག་སྡེ་པཎ་ཆེན་དང་། རྡོར་གླིང་

― MLP003_Page_0052 ―

^{[མ་དཔེ་གཟིགས་ན་འདིར་གནོན།]}

[Full Size]

ལས་ལོ་ཞེ་དྲུག་ཙམ་གྱིས་གཞོན་པར་འགོས་ལོ་ཙཱ་བ་ཆེན་པོ་གཞོན་ནུ་དཔལ་དང་། དེ་དག་ལས་སྔ་ཕྱི་ཅི་རིགས་པར་བྱོན་པ་ཆོས་ཀྱི་རྗེ་ས་སྐྱ་པཎྜི་ཏ་དང་། བྲག་ཐོག་པ་བསོད་ནམས་བཟང་པོ། པཎ་ཆེན་འཇིགས་མེད་གྲགས་པ་སོགས་བསྟན་པ་ཡོངས་རྫོགས་ཀྱི་བཤེས་གཉེན་མང་དུ་བྱོན་ཏེ། དེ་རྣམས་ཀྱང་གདུལ་བྱའི་ཡུལ་ལ་སྨོན་ལམ་མཐུན་པར་འཇུག་པའི་སྐུའི་རྣམ་རོལ་ལོ། །རྡོར་གླིང་ཤིང་བྱ་ལ་གཤེགས་པའི་ལོ་བཅུ་གསུམ་པ་མེ་བྱ་དེ་ལ་ཀུན་སྐྱོང་གླིང་པར་སྐྱེ་སྲིད་བཟུང་སྟེ་ཟབ་ཕུ་ལུང་སོགས་ནས་གཏེར་ཁ་མང་དུ་ཐོན། དེའི་ཕྱི་མ་ལ་མདོ་སྔགས་གླིང་པའམ་སྤྲུལ་སྐུ་མཆོག་ལྡན་མགོན་པོར་སྐྱེ་བ་བཞེས་ནས་གཏེར་གྱི་རྟེན་འབྲེལ་མ་འགྲིགས་ཀྱང་ཕྲིན་ལས་རྒྱ་ཆེ། དེ་རྟིང་ཕྱི་མའི་དུས་ཀྱི་མཐའ་འདིར་ཡང་ཕྱིར་མི་ལྡོག་པ་འཁོར་ལོའི་གཏམ་བདེ་གཤེགས་སྙིང་པོའི་སེང་གེའི་སྒྲ་སྒྲོག་པར་མཛད་པ་པོ་རྗེ་བཙུན་སྒྲོལ་བའི་མགོན་པོ་ཞེས་བྱ་བར་འཁྲུངས་པའི་སྔོན་རབས་ཀྱང་གསལ་བར་སད་ཅིང་། རྗེ་བཙུན་དེ་ཡི་གསང་བའི་རྣམ་ཐར་དུ་ཡང་། སྐྱེ་བ་འདིའི་འོག་ཏུ་བོད་ཡུལ་འདིར། སྡེ་དཔོན་སྟོབས་ལྡན་ཞིག་དང་། དགེ་བཤེས་ཕྲིན་ལས་ཅན་ཞིག་སྟེ་གཉིས་ཡོང་། ཞེས་པའི་ཕྱི་མ་དེ་ཉིད་ཡིན་པར་སྣང་ལ། དེ་དང་ཐོག་མཚུངས་པར་སྤྲུལ་པའི་རྣམ་རོལ་གཞན་ཡང་སྔ་འགྱུར་བསྟན་པའི་གསལ་བྱེད་ལྡོང་སྟོན་བློ་གྲོས་རྒྱལ་མཚན་ཞེས་བྱ་བར་གྱུར་པའི་བག་ཆགས་ཀྱང་གསལ་བར་སད་ཅིང་། དེའི་འོག་ཏུ་ལྷོ་ནུབ་རྔ་ཡབ་གླིང་དུ་སྲིན་པོའི་རིགས་ལས་མཆོག་གི་དངོས་གྲུབ་འཕོ་བ་ཆེན་པོའི་སྐུ་བརྙེས་པ་ཆོས་ཀྱི་གོ་ཆ་ཞེས་བྱ་བར་སྐྱེ་བ་བཞེས་པའི་ཕྱི་མ་ལ། པདྨ་བཀའ་ཐང་ལས། ཆོས་ལོག་ཁྲིམས་རལ་དམ་ཉམས་ལུང་པ་གང༔ ལྷ་མིའི་གནས་སུ་གཏམ་ངན་གྲགས་པས་ཁྱབ༔ ཤ་འུག་ལྟག་སྒོར་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེ་བསྟན་ནས་བྱུང་༔ གཏེར་སྟོན་གཏེར་བདག་གླིང་པ་ཞེས་བྱ་འབྱུང༔ ཞེས་ལུང་བསྟན་པའི་དོན་བཞིན་ད་ལྟའི་དུས་འདིར་ཡ་རབས་རྣམས་ངན་སྤྱོད་ལ་འཇུག་པས་དམངས་སུ་འབབས་པ་དང་། མ་རབས་རྣམས་ཆེན་པོའི་ལས་ལ་རང་ཤུགས་སུ་སྤྱོད་ཅིང་། ཆོས་པར་

― MLP003_Page_0053 ―

^{[མ་དཔེ་གཟིགས་ན་འདིར་གནོན།]}

[Full Size]

རློམ་པ་རྣམས་ཀྱང་ཆོས་ལོག་དྲི་མ་ཅན་ལ་ཁ་འཛིན་གྱིས་འཆད་ཉན་བྱེད་པ་སོགས་རང་རང་གི་ཆོས་ལུགས་ལས་ལྡོག་ཕྱོགས་སུ་སྤྱོད་པས་ཆོས་ལོག་དང་། ངང་ཚུལ་བཟང་པོས་ལུགས་ལྟར་མཐུན་པར་སྤྱོད་པ་རྣམས་ཚར་གཅོད་ཅིང་། མ་རུངས་པའི་སྐྱེ་བོ་གཡོ་སྒྱུས་ལོག་པར་སྤྱོད་པ་རྣམས་གཟེངས་བསྟོད་པ་སོགས་ལེགས་ཉེས་ཀྱི་སྟངས་འཆོལ་བར་གཅོད་པས་ཁྲིམས་རལ་བ་དང་། དམ་ཚིག་གཅིག་གིས་བསྡུས་པའི་དཔོན་སློབ་རྣམས་ལྟ་སྤྱོད་དང་འདོད་པ་མི་མཐུན་པས་འཁོན་རྩོད་ཀྱིས་དུས་འདའ་བ་སོགས་ཉམས་པའི་སྐྱེ་བོས་ཀུན་ཏུ་ཁྱབ་ཅིང་། དེ་ལྟ་བུའི་ངན་པའི་གྲགས་པས་ལྷ་དང་མི་ཡི་འཇིག་རྟེན་ཐམས་ཅད་མུན་ནག་སྟུག་པོས་ཁེབས་ཏེ། སྙིགས་མར་སྤྱོད་པའི་དུས་རྟགས་མངོན་དུ་གྱུར་པ་ནི་གཏེར་བདག་གླིང་པ་འབྱོན་པའི་དུས་ཡིན་པར་གསུངས་པ་ལྟར། དམུ་རྒོད་ཀྱི་གདུལ་བྱ་མ་རུངས་པ་རྣམས་ཐབས་ལ་མཁས་པའི་ཕྲིན་ལས་ཀྱིས་འདུལ་བའི་ཕྱིར། ཚད་མེད་པའི་ཐུགས་རྗེའི་བདག་ཉིད་ཆེན་པོ་འདི་ཉིད་དུ་སྐུ་འཕོས་པ་ཡིན་ཏེ། རང་གཏེར་ཤ་འུག་གཏེར་བྱོན་གྱི་ལུང་བྱང་དེའི་འཕྲོས་ལས། ཁྱད་པར་སུམ་ཅུར་ཉེ་བ་ན༔ རྨུ་རྒོད་སྐྱེ་བོ་གདུལ་དཀའི་དུས༔ འདུལ་བྱེད་ཐབས་མཁས་ཐུགས་རྗེའི་བདག༔ ཐོག་བབས་ཚུལ་དུ་འབྱུང་བར་འགྱུར༔ ཞེས་གསུངས་སོ། །མདོར་ན་འཕགས་ཆེན་རྣམས་ཀྱི་མཛད་པ་གཞན་དོན་དུ་བླ་ན་མེད་པའི་བྱང་ཆུབ་བརྙེས་པས་སྨོན་ལམ་རྫོགས་ནས་རང་གི་གདུལ་བྱ་རྣམས་སྒྲིབ་པ་དངོས་སུ་སྤང་རུང་དང་། གཉེན་པོ་དངོས་སུ་སྐྱེ་རུང་དུ་སྨིན་པར་མཛད་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བར་མཛད་པའི་སྒོ་ནས། ཞིང་ཁམས་མཐའ་ཡས་མུ་མེད་པར་རྣམ་འཕྲུལ་བསམ་གྱིས་མི་ཁྱབ་པ། གཅིག་ལས་དུ་མར་སྤྲོ་བ་དང་། དུ་མ་གཅིག་ཏུ་བསྡུ་བ་སོགས་དུས་སྐད་ཅིག་ལ་བདེ་སྟོང་འོད་གསལ་གྱི་སྣང་ཆ་མ་འགགས་པའི་རོལ་མོ་སྟོན་པར་མཛད་པའི་ཚུལ་ནི་ཟབ་པ་དང་རྒྱ་ཆེ་བའི་ཆོས་ཀྱི་སྤྱན་མངའ་བ་རྣམས་ཀྱིས་མཁྱེན་པར་ཟད་མོད། བདག་ཅག་བྱིས་པ་རྣམས་ཀྱིས་བརྗོད་པར་མི་ནུས་ཤིང་སྨོས་མི་ལོང་བས་སྐུ་ཚེ་སྔ་མའི་ཕྲིན་ལས་དང་སྐྱེ་བ་བཟུང་བའི་ཚུལ་ཟུར་ཙམ་མོ། །

སྐུ་ཚེ་འདིའི་མཛད་པ་བདག་ཅག་གདུལ་བྱ་དམན་པ་རྣམས་དང་མཐུན་པར་འཇུག་པ། རིགས་རུས་ཆོ་འབྲང་ཕུན་སུམ་ཚོགས་པར་སྐུའི་སྐྱེ་སྲིད་ཇི་ལྟར་བཟུང་བའི་ཚུལ།

― MLP003_Page_0054 ―

^{[མ་དཔེ་གཟིགས་ན་འདིར་གནོན།]}

[Full Size]

༈ ད་ནི་སྐུ་ཚེ་འདིའི་མཛད་པ་བདག་ཅག་གདུལ་བྱ་དམན་པ་རྣམས་དང་མཐུན་པར་འཇུག་པ་ཆེ་ལོང་ཙམ་ཞིག་སྒྲོ་འདོགས་དང་སྐུར་པའི་མཐའ་གཉིས་སྤངས་ཏེ་བརྗོད་པར་བྱ་བ་ལ་ལྔ་སྟེ། རིགས་རུས་ཆོ་འབྲང་ཕུན་སུམ་ཚོགས་པར་སྐུའི་སྐྱེ་སྲིད་ཇི་ལྟར་བཟུང་བའི་ཚུལ། སྐུ་སྐྱེད་རིམ་གྱིས་བསྲིངས་ཏེ་བསྟན་པ་ལ་ཞུགས་ནས་གསན་སྦྱོང་ཇི་ལྟར་མཛད་པའི་ཚུལ། ལས་འཕྲོ་བཟང་པོས་ཟབ་གཏེར་གྱི་བཀའ་བབས་ཤིང་སྒྲུབ་པ་ཐུགས་ཉམས་སུ་ཇི་ལྟར་བཞེས་ཚུལ། དབང་བཞིའི་རྟོགས་པའི་ཉམས་མྱོང་ཐུགས་རྒྱུད་ལ་རིམ་པར་འཕེལ་བས་སྐལ་བ་དང་འཚམས་པར་འགྲོ་དོན་མཛད་ཚུལ། དེ་ལྟར་མཛད་པས་རང་གི་གདུལ་བྱ་རྣམས་སྨིན་གྲོལ་ལ་འགོད་པའི་ཕྲིན་ལས་རྒྱ་ཆེ་རྒྱུན་མི་ཆད་པའི་ཚུལ་ལོ། །དང་པོ་ནི། རྒྱལ་ཚབ་མ་ཕམ་མགོན་པོས། རིགས་དང་རུས་དང་ཆོ་འབྲང་དང་། །འཁོར་དང་སྐྱེ་བ་དག་དང་ནི། །ངེས་འབྱུང་བྱང་ཆུབ་ཤིང་རྣམས་དང་། །ཡོན་ཏན་ཕུན་སུམ་ཚོགས་པ་ཡིན། །ཞེས་གསུངས་པ་ལྟར་ལྐོག་ཏུ་གྱུར་པའི་དོན་རྣམས་གཟིགས་པའི་མངོན་ཤེས་ཐོགས་པ་མེད་པ་མངའ་བས་རིགས་མཐོ་ཞིང་གཙང་བར་འཁྲུངས་ན་བསྟན་པ་དང་སེམས་ཅན་མང་པོ་ལ་ཕན་པར་འགྱུར་བ་གཟིགས་ནས་སྐུའི་སྐྱེ་སྲིད་བཟུང་བའི་ཕྱིར། རེ་ཞིག་ཐོག་མར་རིགས་རུས་ཕུན་སུམ་ཚོགས་པ་ཉིད་ཆོ་འབྲང་གིས་མ་སྨྲས་པའི་ཚུལ་བརྗོད་པར་བྱ་སྟེ། དེ་ཡང་རྗེ་འདིའི་རིགས་ནི་དང་པོ་འོད་གསལ་གྱི་ལྷ་ལས་ཆད་པ་ཡིན་ཏེ། སྔོན་གྱི་དུས་ན་ལྷ་ཡི་བུ་གཟུགས་མཛེས་ཤིང་ཡིད་དུ་འོང་བ་ཞིག་རྨུ་ཐག་ལ་བརྟེན་ནས། རུ་མཚམས་ཁ་རག་གི་རི་བོའི་རྩེར་བབས་ཀྱང་ཟེར། ཤུན་གྱི་བྲག་རྩེར་བབས་ཀྱང་ཟེར་ཏེ། གང་ལྟར་ཡང་མི་རྣམས་ཀྱིས་མཐོང་བས་ཡ་མཚན་དུ་གྱུར་ཏེ། བླ་ཡི་གནས་སུ་བཀུར་བ་ལས་མི་ཡི་གྲིབ་ཀྱིས་ལྷ་ཡི་བུ་ཉིད་སྨྱོས་པར་གྱུར་པ་ན། སྨྱོས་ཞེས་རིགས་རྒྱུད་ལ་མིང་དུ་ཆགས་ཤིང་། དེའི་མིང་ལ་སྨྱོས་བྱ་ཁྲུང་དཀར་པོ་ཞེས་གྲགས་ཏེ། དེས་རྨུ་ལྕམ་དིང་མོ་བཙུན་ཁབ་ཏུ་བཞེས་པ་ལ་སྲས་སྨྱོས་རྗེ་བཙན་པོ་བྱུང་། དེས་གདོང་བཟའ་དཀར་མོ་ལེགས་ཁབ་ཏུ་བཞེས་པ་ལ་སྲས་སེང་གེ་ཤཱཀ་བྱུང་། དེས་རྨུ་བཟའ་སྨན་མོ་བཙུན་ཁབ་ཏུ་བཞེས་པ་ལ་སྲས་གྲ་མཁར་རྗེ། རྗེ་

― MLP003_Page_0055 ―

^{[མ་དཔེ་གཟིགས་ན་འདིར་གནོན།]}

[Full Size]

ཕན། ཡགས་རྗེ། གུར་རྗེ་བཞི་བྱོན་པའི་དང་པོ་གྲ་མཁར་རྗེས་ཆབ་ལ་རྫིང་བཅོས་ཏེ་ཡུལ་གཡར་མོ་གཞུང་དུ་བྱོན། དེ་ལ་སྲས་ཐུགས་རྗེ་དང་ཞང་ངེ་གཉིས་བྱུང་བའི། ཞང་ངེས་གཡོར་སྟོད་ཞལ་གྱི་ཁྲིམས་མོ་གུར་མཁར་དུ་བྱོན། ཁ་རག་དང་འབྲང་སིལ་བཟུང་། དེའི་སྲས་འབྲི་ལྡེ། དེའི་སྲས་འབྲི་ཆུང་། དེའི་སྲས་དཔལ་གྱི་ཡོན་ཏན། དེའི་སྲས་སློབ་དཔོན་ཚུལ་ཡོན། དེའི་སྲས་གུ་རུ། དེའི་སྲས་ལྷ་ཕན། དེ་ཡན་ཆད་སྔགས་རྙིང་མ་སྒྱུ་འཕྲུལ་གྱི་བཤད་སྒྲུབ་ལ་གཙོ་བོར་མཛད། ཆོས་སྐྱོང་ལྷ་མོ་སྲོག་སྒྲུབ་ལྕགས་ཕུར་ཅན་བརྟེན་པ་སོགས་ཀྱི་རྒྱུན་མ་ཆད་པ་ཉིད་ལས། སློབ་དཔོན་ལྷ་ཕན་གྱི་སྲས། སྨྱོས་མཐུ་རྒྱལ་དང་། སྤང་ལ་མེ་ཤོར་ཞེས་པའི་མཆེད་གཉིས་བྱོན་ཞིང་། དེ་དུས་གསར་མའི་ཡོ་ག་ལ་སྦྱངས་པས་དེ་ཕྱིན་ཆད་གསར་རྙིང་འདྲེས་མར་སོང་། མཐུ་རྒྱལ་ལ་སྲས་དྲུག་བྱུང་བའི་ཆེ་ཤོས་སྨྱོས་ལོ་ཙཱ་བ་ཡོན་ཏན་གྲགས་ཀྱིས་ཆུང་ངུ་ནས་ཡབ་ཆོས་རྣམས་ལ་སྦྱངས་ཤིང་། ཁྱད་པར་མངའ་བདག་ཡེ་ཤེས་རྒྱལ་མཚན་སོགས་ལས་གསང་འདུས་ཡེ་ཤེས་ཞབས་ལུགས་བསླབ། རྒྱ་གར་དུ་ལན་གསུམ་བྱོན་ནས་འདུས་པ་ཡེ་ཤེས་ཞབས་ལུགས། དགྲ་ནགཏྲག་ཤད་སོགས་ཞུས། དེ་ལ་སྲས་བཞིའི་ཆེ་ཤོས་སྨྱོས་གཙང་ཚ་རྡོ་རྗེ་བླ་མ་ནི་ཕ་རྒྱུད་སྐོར་གསུམ་དང་བདེ་མཆོག་སོགས་ལ་མཁས། བོད་ཀྱི་མི་ཆེན་བཞིར་གྲགས་པའི་གཅིག་ཡིན། དེ་ལ་སྲས་གསུམ་གྱི་འབྲིང་པོ་དཔལ་གྱི་སེངྒེ། དེ་ལ་སྲས་གཉིས་ཀྱི་ཆེ་བ་སྨྱོས་ནག་གྲགས་པ་དཔལ་ཆོས་རྒྱལ་མྱ་ངན་མེད་ཀྱི་སྐྱེ་བར་ཞང་རིན་པོ་ཆེས་ལུང་བསྟན། དེ་ལ་སྲས་བདུན་བྱུང་བའི་གསུམ་པ་རྒྱལ་བ་ལྷ་ནང་པ་ཞེས་འབྲི་གུང་འཇིག་རྟེན་མགོན་པོའི་སློབ་མ། སྨྱོས་འགར་ཆོས་གསུམ་ཟེར་བའི་སློབ་མ་ཡ་གྱལ་གྱི་སྨྱོས་དེ་ཡིན། འདི་ཞང་རིན་པོ་ཆེས་ནག་པོ་སྤྱོད་པ་ཆུང་བའི་སྐྱེ་བར་ལུང་བསྟན། དེ་དང་ཡུམ་མི་གཅིག་པའི་མཆེད་ཡ་སྨྱོས་བཀྲ་ཤིས་དབང་ཕྱུག་སྟེ། དེ་རྣམས་ལ་ཕྱི་རུས་སུ་གྲགས། ནང་རུས་ནི་སྨྱོས་བཀྲ་ཤིས་དབང་ཕྱུག་གི་སྲས་སུ་མཐིང་མ་སྨྱོས་ཞིག་ཆེན་པོ་གྲགས་པ་རྡོ་རྗེ་དབུ་རུ་སྨད་ཀྱི་སྙེ་མདར་འཁྲུངས། ཆུང་ངུ་ནས་དད་པ་དང་བློ་གྲོས་ཕུལ་དུ་བྱུང་། ཁ་ཆེ་པཎ་ཆེན། མི་ཏྲཱ་ཛོ་ཀིརྡོ་རྗེ་གདན་པ། དཱ་ན་ཤཱི་ལ་སོགས་

― MLP003_Page_0056 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱ་གར་གྱི་པཎ་གྲུབ་དུ་མ་དང་། བོད་ཀྱི་གསང་སྔགས་རྙིང་མའི་བསྟན་པའི་བདག་པོ་གླན་ཉ་ཚལ་བ་དང་། གསར་མའི་བདག་པོ་ཏྲའོ་མགོན་པོ། ཙ་རི་སྒྱེར་སྒོམ། འབྲི་སྟག་གཉིས་སོགས་དབུས་གཙང་རུ་བཞིའི་མཁས་གྲུབ་ཐམས་ཅད་ལ་གཏུགས་ཏེ་ཐུགས་བཅུད་བླངས། ཁྱད་པར་གཏེར་ཆེན་ཉང་ཉི་མ་འོད་ཟེར་གྱི་གཏེར་ཆོས་ཐམས་ཅད་ཀྱི་བདག་པོར་གྱུར་ཅིང་། བྱང་ལས་ཀྱི་མཁའ་འགྲོའི་བཀའ་བབས་ཏེ། མངའ་བདག་ཉིད་ཀྱི་ལུང་བྱང་ལས། སྦར་རྗེས་ཅན་གྱི་བྱང་ཕྱོགས་སུ༔ ལས་ཀྱི་མཁའ་འགྲོས་བྱིན་བརླབས་པ༔ རུས་སྨྱོས་དམ་ཉམས་སྒྲོལ་ལ་བརྩོན༔ བྱ་མཐིང་མ་ཞེས་བྱ་བ་འབྱུང༔ ཞེས་པ་ལྟར་ཉང་རིན་པོ་ཆེ་ཡབ་སྲས་ཀྱི་ཐུགས་ཀྱི་སྲས་མཁས་ཤིང་གྲུབ་ལ་མཐུ་སྟོབས་འགྲན་ཟླ་མེད་པ་དེས་རྡོ་མཐིང་མ་དང་། ཡར་ཀླུང་གུ་རུ་དགོན་པ་བཏབ་ནས། སྐལ་ལྡན་གྱི་སློབ་མ་མང་པོ་སྨིན་གྲོལ་ལ་བཀོད། དེས་མཁའ་འགྲོའི་རིགས་ཅན་གྱི་ཇོ་མོ་བཞི་ཁབ་ཏུ་བཞེས་པ་ལ་སྲས་དྲུག་འཁྲུངས་པ་ལས། མཁའ་འགྲོས་བྱིན་པའི་སྲས་བཞིའི་ནང་ཚན། ཞང་ལྕམ་མའི་སྲས་ཚིག་གཉིས་པ་སྨྱོས་སྒོམ་ཆེན་པོ་པདྨ་རྡོ་རྗེ། དེའི་སྲས་སྨྱོས་སྟོན་ཨ་མི་ཀིརྟི། དེའི་སྲས་སྨྱོས་སྟོན་གྲགས་པ་བཀྲ་ཤིས། དེའི་སྲས་སྨྱོས་སྟོན་གྲགས་པ་རིན་ཆེན། དེའི་སྲས་སྨྱོས་གྲགས་པ་འོད་ཟེར་དང་། སྨྱོས་གྲགས་པ་རྒྱལ་མཚན་གཉིས་ཀྱི་དུས་ཧོར་རྒྱལ་པོའི་འཇའ་ས། རྒྱལ་བུའི་ལིང་ཇི། ཏི་ཤྲཱིའི་བཀའ་ཤོག་རྣམས་ཐོབ། གོང་མའི་ལུང་གིས་བོད་ཀྱི་སྔགས་པ་ཐམས་ཅད་ཀྱི་འགོ་ལ་བསྐོས། རྡོ་མཐིང་མ། ཡར་ཀླུང་གུ་རུ་དང་ཁྲ་ཚང་སོགས་ཡབ་མེས་ཀྱི་དགོན་པ་རྣམས་ད་ཀན་དུ་བཏོན། ཕག་མོ་གྲུབ་པའི་སྐུ་སྲུང་བའི་གཙོ་བོ་མཛད། ཀུན་མཁྱེན་ཀློང་ཆེན་པ་སོགས་སློབ་མ་ཁྱད་པར་ཅན་ཡང་མང་དུ་འཐོན། དེ་ལས་སྨྱོས་གྲགས་འོད་ཀྱི་སྲས་བརྒྱུད་དེང་སང་ཡར་ཀླུང་ན་ཡོད་པ་རྣམས་ཡིན། གྲགས་པ་རྒྱལ་མཚན་གྱི་སྲས་སྨྱོས་ཇོ་འབུམ་དཔལ་གྱིས་ཡར་རྒྱབ་ཏུ་བྱོན་ནས་ཕྲིན་ལས་བསྐྱངས། དེའི་སྲས་འཕགས་པ་དཔལ་ཞེས་ཆོས་རྫོང་ཇོ་གདན་པའི་གྲྭ་པ་མཛད་པ་ལས་ཕྱིས་སྲིད་སྤེལ་ཞིང་། ཀུན་སྤང་རྗེ་རབ་ཏུ་བྱུང་བའི་དཔང་པོ། ལྷའི་དཔང་པོ་དེ་ཞང་བློན་དང་། མིའི་དཔང་པོ་དེ་འཕགས་པ་དཔལ་ཡིན་ཞེས་བྱུང་

― MLP003_Page_0057 ―

^{[མ་དཔེ་གཟིགས་ན་འདིར་གནོན།]}

[Full Size]

བ་དེ་ཡིན། དེའི་སྲས་སྨྱོས་བསོད་ནམས་གྲགས་པ། དེའི་སྲས་དོན་གྲུབ་རྣམ་རྒྱལ། དེའི་སྲས་མགོན་པོ་ཚེ་དབང་། དེའི་སྲས་རྣམ་རྒྱལ་ལྷུན་གྲུབ། དེའི་སྲས་ཚེ་དབང་རྡོ་རྗེ་སྟེ། དེ་ཐམས་ཅད་ཀྱང་ཡབ་མེས་ཀྱི་ཆོས་ལ་སྦྱངས་ཤིང་། བསྙེན་སྒྲུབ་ལས་གསུམ་ལ་ནུས་པ་འཐོན་པའི་སྔགས་འཆང་རིམ་པར་བྱོན་པ་ལས། ཡབ་སྨྱོས་ཚེ་དབང་རྡོ་རྗེ་དང་། ཡུམ་སྤ་གོར་གྱི་རིགས་ཚེ་རིང་བུ་དགའ་གཉིས་ཀྱིས་སྲས་སུ་ལང་གྲོ་ལོ་ཙཱ་བའི་རྣམ་འཕྲུལ་ཀུན་མཁྱེན་མདོ་སྔགས་བསྟན་འཛིན་བཟང་པོ་འཁྲུངས་ཏེ། སྤྲུལ་སྐུ་སྣ་ཚོགས་རང་གྲོལ་གྱི་སྔོན་རབ་གསལ་བར་སད་པས་དར་རྒྱས་ཆོས་གླིང་གི་གདན་སར་སྤྱན་དྲངས། མདོ་སྔགས་རིག་གནས་དང་བཅས་པ་ལ་མཁས་ཤིང་སྨིན་གྲོལ་ཕྲིན་ལས་ཀྱིས་ཕྱོགས་ཀུན་ཁྱབ་པར་མཛད། དེས་ཡུགས་རྫོང་བའི་སྲས་མོ་དགོས་དགོས་འཛོམ་ཞེས་པ་ཁབ་ཏུ་བཞེས་པ་ལ་སྲས་ལྕམ་སྲིང་གཉིས་འཁྲུངས་པ་ལས། གཅེན་ནི་བདག་ཉིད་ཆེན་པོ་འདིའི་ཡབ་སྟེ། དེ་ཡང་གནུབས་ཆེན་སངས་རྒྱས་ཡེ་ཤེས་ཀྱི་ཡང་སྲིད་སྨྱོས་སྟོན་གསང་བདག་ཆེན་པོ་ཕྲིན་ལས་ལྷུན་གྲུབ་དཔལ་བཟང་པོའམ་ཨོ་རྒྱན་ཚེ་འཕེལ་ཞེས་སྔ་འགྱུར་བཀའ་གཏེར་ཐམས་ཅད་ཀྱི་བསྟན་པའི་བདག་པོ་མཁས་གྲུབ་ཆེན་པོར་གྱུར་ཅིང་། བཤད་སྒྲུབ་ཀྱི་ཕྲིན་ལས་བསྐྱངས་པའི་བུ་སློབ་མང་དུ་ཐོན་པ་སོགས་རྙིང་མའི་བསྟན་འཛིན་ཞིག་ལ་སུས་ཀྱང་འགྲན་པར་མི་ནུས་པ་ཡིན་ནོ། །དེ་ལྟར་རིགས་རུས་ཕུན་སུམ་ཚོགས་པ་དེ་ཡང་ཆོ་འབྲང་གིས་མ་སྨས་པའི་ཚུལ་ནི། རྗེ་འདིའི་ཡུམ་ཡང་ཤཱཀྱ་ལི་ཙ་བཱི་ལས་མཆེད་པ་བོད་ཆོས་རྒྱལ་གྱི་གདུང་དྲི་མ་མེད་པའི་རྒྱུད་དུ་འཁྲུངས་པ་སྟེ། དེ་ཡང་མངའ་བདག་གནམ་ལྡེ་འོད་སྲུང་གི་སྲས་དཔལ་འཁོར་བཙན། དེ་ལ་སྲས་གཉིས་ཀྱི་བགྲེས་པ་ཁྲི་བཀྲ་ཤིས་བརྩེགས་པ་དཔལ་གཙང་སྟོད་དུ་བཞུགས། དེ་ལ་སྲས་གསུམ་གྱི་འབྲིང་པོ་འོད་ལྡེ། དེ་ལ་སྲས་བཞིའི་གསུམ་པ་ཁྲི་ཆུང་ནི་ཡར་ཀླུང་དུ་བྱོན། དེའི་སྲས་འོད་སྐྱིད་འབར། དེ་ལ་སྲས་བདུན་གྱི་དང་པོ་ཁྲི་ལྡེ་འབར། དེ་ལ་སྲས་དྲུག་བྱུང་བའི་ནང་ནས། མངའ་བདག་གཡུ་ཐོག་པའི་བརྒྱུད་པ་བཞིར་གྱེས་པ་ལས། མངའ་བདག་སྣ་མོ་བ་དུམ་པོ་ཆེ་བའི་རྒྱུད་ཡར་རྒྱབ་ཏུ་མཆེད་དེ། ཐོག་མར་གྲྭ་ཡི་རྟགས་རྗེ་མཁར་བཟུང་།

― MLP003_Page_0058 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལས་བདེ་སྐྱིད་གླིང་པ་མཆེད། དེ་ལས་འཇད་ཟླུམ་པོ་བ་མཆེད་པ་ལས་རིམ་པར་བརྒྱུད་དེ། སྐར་ནག་གི་རྩིས་རིགས་རྒྱ་མཚོའི་ཕ་རོལ་དུ་སོན་པ་རྗེ་དོན་གྲུབ་དབང་རྒྱལ་སྐུ་མཆེད་ཀྱི་སྲས་མོ། ལྷ་འཛིན་དབྱངས་ཅན་སྒྲོན་མ་ཞེས་ཤེལ་དཀར་རྡོ་རྗེ་མཚོའི་སྤྲུལ་པར་ལུང་གིས་ཟིན་པའི་རང་བཞིན་གྱི་རྣལ་འབྱོར་མ། དེས་པ་དང་བག་ཡོད་པ་དང་གཏོང་བ་སོགས་དམ་པའི་ཡོན་ཏན་དུ་མས་བརྒྱན་པ་དེ་ནི་རྗེ་འདིའི་ཡུམ་ཡིན་ནོ། །དེ་ལྟར་རང་གཏེར་གབ་རྒྱ་ཅན་གྱི་ལུང་བྱང་ལས། སུམ་ཅུ་ཁ་རལ་སྙིགས་མ་ལྔ་བདོའི་དུས༔ བསམ་ཡས་ལྷོ་ནུབ་གྲྭ་ཞེས་གཡོ་རུའི་ས༔ ལུང་པ་བྱང་བལྟ་དོར་མ་བརྐྱང་འདྲའི་ཚིགས༔ སྲིན་མོ་འཛེགས་འདྲའི་དགེ་བསྙེན་སྔགས་ཞོལ་དུ༔ བུདྡྷ་ཛྙཱ་ནའི་སྤྲུལ་པ་ཚེ་མིང་ཕ༔ ཤེལ་དཀར་མཚོ་སྒྲོལ་སྤྲུལ་པ་དབྱངས་མིང་མས༔ བསྐྱེད་པའི་རྣལ་འབྱོར་སྔགས་ཀྱི་བརྟུལ་ཞུགས་ཅན༔ མེ་ཁམས་ཁྱི་ཡི་ལོ་པ་པདྨའི་མིང༔ གཟུགས་བྱད་ཧ་་ཅང་མི་རིང་མི་ཐུང་བ༔ མདོག་སྣུམ་རིན་ཆེན་རིགས་ཀྱི་རྟགས་འཆང་བ༔ པདྨ་ང་ལ་མོས་པ་ལྷག་པར་བྱེད༔ བཅོ་བརྒྱད་ལོ་ལ་གཏེར་སྒོ་དང་པོ་འབྱེད༔ ཅེས་ལུང་བསྟན་པ་ལྟར། ཡབ་རྗེ་རིག་འཛིན་ཆེན་པོ་དགུང་ལོ་སུམ་ཅུ་རྩ་ལྔ་དང་། ཡུམ་དགུང་ལོ་ཉི་ཤུ་རྩ་གཉིས་བཞེས་པ་ཤིང་མོ་བྱའི་ལོ་ལ་ལྷུམས་སུ་ཞུགས་ཏེ། དེའི་ཚུལ་ནི་སྐུ་ཚེ་སྔ་མའི་རྟེན་འཆི་སྲིད་འོད་གསལ་གྱི་དབྱིངས་སུ་བསྡུས་པས་རྣམ་ཐར་བཞི་ལྡན་གྱི་ཡེ་ཤེས་ནམ་མཁའ་ལྟར་དག་པའི་དབྱིངས་སུ་རོ་གཅིག་ཏུ་གྱུར་པའི་ཚེ། རང་རིག་གི་མདངས་མ་འགགས་པའི་རོལ་པ་དཔའ་བོ་དང་མཁའ་འགྲོར་སྣང་བའི་གླུས་འདི་སྐད་ཅེས། ཨ་ཧོ་རྣལ་འབྱོར་རིག་པའི་རྡོ་རྗེ་ཀྱཻ། །བྱང་ཕྱོགས་པུར་རྒྱལ་བོད་ཀྱི་རྒྱལ་ཁམས་ན། །ལས་དང་སྨོན་ལམ་གདུལ་བྱའི་རྟེན་འབྲེལ་འཛོམ། །དེ་རུ་གཤེགས་ཤིག་ངེད་རྣམས་སྡོང་གྲོགས་སོ། །ཞེས་བསྐུལ་བའི་རྐྱེན་གྱིས་སད་དེ་ལུགས་ལྡོག་གི་སྣང་གསུམ་ཡེ་ཤེས་ཀྱི་རླུང་དང་བཅས་པ་ལས། སྐད་ཅིག་ལ་འོད་གསལ་གྱི་སྣང་བའི་ཉེ་རྒྱུའི་དབང་གིས་རགས་པའི་ཡུལ་སྣང་འཆར་བ་དང་ལྷན་ཅིག་ཟུང་འཇུག་གཉུག་མའི་སྐུ་རྟེན་ཧེ་རུ་ཀའི་རྣམ་པར་བཞེངས་ནས་དཔའ་བོ་དང་རྣལ་འབྱོར་མ་དུ་མའི་འཁོར་དང་བཅས་ཏེ་མཁའ་ལ་བྱོན་

― MLP003_Page_0059 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ན། འཇིག་རྟེན་གྱི་ཁམས་ཚད་མེད་པ་མེ་ལོང་ནང་གི་གཟུགས་བརྙན་བཞིན་གསལ་ལ་མི་རྟོག་པའི་གཟིགས་ངོར་ས་ལེར་མ་འགགས་པར་སྣང་བའི་མཐར། ཡུམ་གྱི་མངལ་རིན་པོ་ཆེའི་ཕོ་བྲང་དག་པར་གཟིགས་ནས། དྲན་ཤེས་བཞིན་དང་ལྡན་པས་དེར་ཞུགས་ཤིང་། གཉིས་འཛིན་དབྱིངས་སུ་ནུབ་པས་སྡུག་བསྔལ་གྱི་སྣང་བ་མེད་པར་བདེ་བ་ཆེན་པོའི་ངང་ལ་གནས་ཏེ་ལྷུམས་སུ་ཞུགས་སོ། །དེའི་ཚེ་ཡབ་རྗེའི་མནལ་ལམ་དུ་བུད་མེད་མཚན་ལྡན་ཞིག་གིས་ཧྲཱིཿདམར་སྙིམ་པ་གང་ཕུལ་བ་ཞལ་དུ་གསོལ་བ་དང་། ཡུམ་གྱི་མནལ་ལམ་དུ་བུ་མོ་སྙིང་སྡུག་མ་བྱ་བས་མཆོད་རྟེན་ཁྲུ་གང་པ་ཙམ་ཞིག་གཏད་ནས། ངེད་རང་ཚོའི་རྟེན་གཙོ་ཡོང་བ་ཡོད་པས་གཉེར་ཚགས་དམ་པ་གྱིས་ཟེར་བ་དང་། ཡང་བུད་མེད་སྐྲ་རྒྱབ་ལྷས་མགྲོན་རྒྱན་ཅན་དང་དཔྲལ་གཡུ་ཅན་གཉིས་འོངས་ནས་ལྟོས་དང་ཟེར་བ་གཟིགས་པས་བྱིས་པ་མང་པོས་བསྐོར་བའི་དབུས་ན་གཞོན་ནུ་སྣུམ་བག་ཅན་སྐྱེ་མཆེད་མཚར་བ་བེར་ཟླུམ་ཅན་ཞིག་ཧོར་སྟེགས་ཀྱིས་འདུག་པ་སུ་ཡིན་དྲིས་པས། གཅིག་ན་རེ། འདི་ཁྱེད་རང་གི་བྱིས་པ་ཡིན་འདི་ཡི་བདག་ངེད་གཉིས་ཀྱིས་བྱེད་པ་ཡིན་ཟེར། གཞན་ཡང་ཉི་མ་ཤར་བ། གཙང་ཆབ་ལས་སྒྲོལ་འདོན་བྱེད་པ། རོལ་མོ་འཁྲོལ་བ་སོགས་ཡ་མཚན་པ་མང་པོ་རྨིས། སད་པའི་ཚེ་གསལ་སྟོང་བདེ་བས་བརྒྱན་པའི་ཉམས་དང་ཏིང་ངེ་འཛིན་གྱི་སྒོ་དུ་མ་ལ་འབྱམས་ཤིང་། དད་པ་དང་སྙིང་རྗེ་ཐུགས་ལ་རྩོལ་མེད་དུ་འཆར། སྐུ་ལུས་བདེ་ཞིང་ཡངས་བ་དང་ཟོ་མདོག་ཀྱང་བཟང་བར་གྱུར། ཟླ་གྲངས་ཐེམས་ཀྱི་བར་དུ་ལྷུམས་སུའང་མི་མ་ཡིན་གྱི་སེམས་ཅན་དུ་མའི་དོན་མཛད་དེ་ཐར་པའི་ས་བོན་བཞགདེ་ནས་མེ་ཕོ་ཁྱི་ཡི་ལོ་དཔྱིད་ཟླ་ར་བ་དབོས་ཉ་བའི་ཡར་ངོའི་ཚེས་དགུའི་མཚན་གྱི་ཐུན་ཐ་མར་ཉེ་བ་ཚེས་ཞག་བཅུ་པས་སླེབས་པ་སྐར་མ་ལག་གི་རྐང་པ་དང་པོའི་དུས་སུ། ས་གཡོ་བ་དང་། འོད་ཆེན་པོའི་སྣང་བ་དང་། མཁའ་ལ་འཇའ་ཚོན་འཁྲིགས་པ་སོགས་ངོ་མཚར་བའི་དགེ་མཚན་དུ་མ་དང་བཅས་ཏེ། གྲྭ་ནང་དར་རྒྱས་ཆོས་གླིང་གི་དགོན་པའི་གནས་ཀྱི་ཁྱད་པར་འོད་གསལ་རྩེ་ཞེས་བྱ་བའི་གཟིམས་སྤྱིལ་དུ་ཡུམ་ལ་གནོད་པ་མེད་པར་བདེ་
བར་སྐུ་བལྟམས། དེ་མ་ཐག་ཡབ་རྗེ་ཉིད་ཀྱིས་སྐུ་ཁྲུས་དང་དབང་རྗེས་གནང་བྱིན་རླབས་སོགས་བསྲུང་བའི་ཆོ་ག་དང་། བློ་རྣོ་བའི་རྟེན་འབྲེལ་ཡང་མཛད། མེས་པོ་མཁས་པ་དོན་འགྲུབ་དབང་རྒྱལ་གྱིས་བཙས་ཀླུང་བརྩི་བ་སོགས་རྩིས་ལས་བྱུང་བའི་རྟེན་འབྲེལ་དང་། འཁྲུངས་སྐར་ལག་གི་རྐང་པ་དང་པོའི་ཡི་གེ་ལ་གྲས་པའི་མཚན་ཀུན་དགའ་དངོས་གྲུབ་རིན་ཆེན་དབང་གི་རྒྱལ་པོ་ཞེས་གསོལ། དྲན་ཤེས་ཁྱད་པར་ཅན་མངའ་བས་འཁྲུངས་མ་ཐག་གི་ཡུལ་དུས་བྱ་སྤྱོད་ཀྱི་རྣམ་པ་རྣམས་དང་། དེ་ནས་བཟུང་ལོ་གསུམ་གྱི་བར་ཛོ་ཀི་སྔོ་སངས་ཐོར་ཚུགས་ཅན་རུས་རྒྱན་འཆང་བ་དང་། བུད་མེད་མཛེས་སྡུག་ཅན་གཉིས་ཀྱིས་སྲི་ཞུ་བྱས་པའི་སྔོན་གནས་རྣམས་ད་ལྟའང་ཐུགས་ལ་གསལ་བར་མངའ་ཞིང་། ལོ་གསུམ་ཕྱིན་ཆད་ནས་གལ་གེགས་ཆེ་དུས་ཕལ་ཆེར་འབྱུང་བ་ལྟར་ལས། རེས་སྣང་རེས་མི་སྣང་བ་དང་། ཕྱིས་སྐོར་མནལ་ལམ་དུ་ཡང་ཡང་འབྱུང་བས་དབུགས་དབྱུང་བར་བྱེད་ཅེས་གསུངས་སོ། །

སྐུ་སྐྱེད་རིམ་གྱིས་བསྲིངས་ཏེ་བསྟན་པ་ལ་ཞུགས་ནས་གསན་སྦྱོང་ཇི་ལྟར་མཛད་པའི་ཚུལ།

― MLP003_Page_0060 ―

^{[མ་དཔེ་གཟིགས་ན་འདིར་གནོན།]}

[Full Size]

༈ གཉིས་པ་སྐུ་སྐྱེད་རིམ་གྱིས་བསྲིངས་ཏེ་བསྟན་པ་ལ་ཞུགས་ནས་གསན་སྦྱོང་ཇི་ལྟར་མཛད་པའི་ཚུལ་ནི། གསོ་བའི་རིམ་གྲོ་པ་ལ་གཏད་དེ་འཇམ་ཞིང་བསོད་པའི་ཟས་དང་བཏུང་བས་ལེགས་པར་སྐྱོང་བའི་ཚེ་ནའང་། ཞབས་ཏོག་སྒྲུབ་སླ་ཞིང་བསྙུན་གཞི་དཀོན་པ་སོགས་ཀྱིས་ཞམ་རིང་པ་རྣམས་ཀྱང་ངལ་བ་ལས་སྐྱོབ་པར་མཛད་ནས། ཇི་ལྟར་རྫིང་ན་གནས་པའི་པདྨ་བཞིན་དུ་སྐུ་སྐྱེད་མྱུར་དུ་འཕེལ་བ་གྱུར་ལ། གཞོན་ནུ་རོལ་རྩེད་ཀྱི་ཚེ་ནའང་བཤད་སྒྲུབ་ལས་གསུམ་གྱི་མཛད་པ་ལ་དབང་འབྱོར་བའི་རྣམ་འགྱུར་དང་། འདུ་འཛི་ལ་མི་དགྱེས་ཤིང་། ཡོན་ཏན་སྒྲུབ་པ་ལ་བརྩོན་པ། ཐུགས་མཁྱེན་དང་རྫུ་འཕྲུལ་གྱི་ཆ་ཤས་སྟོན་པ། མཚན་མོ་མནལ་བའི་དུས་ནའང་སངས་རྒྱས་བྱང་སེམས་མང་པོ་བཀའ་བགྲོ་བ་དང་ལུང་བསྟན་པ་རྗེས་འཛིན་མཛད་པ་རྨི་ཞིང་། སད་དུས་དད་པ་དང་སྙིང་རྗེ་རྩོལ་མེད་དུ་འཁྲུངས་པ་སོགས་བྱིས་པའི་སྤྱོད་ཡུལ་ལས་ཡང་དག་པར་འདས་པ། སྦྱོར་བའི་སྔོན་དུ་སྙིང་རྗེ་དང་། །བཟོད་པ་དང་ནི་མོས་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཤེས་

― MLP003_Page_0061 ―

^{[མ་དཔེ་གཟིགས་ན་འདིར་གནོན།]}

[Full Size]

པར་བྱ། །ཞེས་མདོ་སྡེ་རྒྱན་ལས་གསུངས་པ་ལྟར་རྒྱལ་བའི་རིགས་སད་པའི་ངང་ཚུལ་དགེ་བས་བློ་དང་ལྡན་པ་རྣམས་དྭངས་པར་མཛད་དོ། །དེ་ལྟར་རིམ་གྱིས་སྐུ་སྐྱེད་བསྲིངས་ཏེ་མཁས་ཤིང་གྲུབ་པ་བརྙེས་པའི་བླ་མ་རྣམས་བསྟེན་ནས་གསན་སྦྱོང་མཛད་པའི་ཐོག་མ་ནི། དགུང་ལོ་བཞི་བཞེས་པ་ན་ཡབ་རྗེ་གསང་བདག་ཆེན་པོ་ལས་བཀའ་བརྒྱད་གསང་རྫོགས་ཀྱི་དབང་གསན། དེ་དུས་ཡུལ་སྣང་ཐམས་ཅད་ལ་ཚོམ་བུ་དགུའི་དཀྱིལ་འཁོར་གྱི་འཁོར་ལོས་རྒྱས་ཐེབས་པ་ལས། བླ་མ་ཉིད་དཀྱིལ་འཁོར་གྱི་གཙོ་བོ་དང་དབྱེར་མེད་དཔལ་ཆེན་པོའི་སྐུར་གཟིགས་པས། དེ་ཕྱིན་ཆད་ནས་ལྷ་དང་བླ་མ་རྣམ་དབྱེར་མེད་པའི་གོ་རྟོགས་འཁྲུངས་ཤིང་། དབང་གི་ས་བོན་ཐེབས་ཏེ་ཐུགས་རྒྱུད་སྨིན་པར་བྱས། དེའི་ནང་གི་དྲེགས་པའི་སྲོག་དབང་གི་དུས་གཟུགས་བརྙན་རྣམས་དྲེགས་པ་དངོས་སུ་གཟིགས་པ་རང་ཉིད་ལྷའི་སྙེམས་པ་བརྟན་པོའི་བརྟུལ་ཞུགས་ཀྱིས་བརྫི་བར་མཛད་པས། བླ་མའི་ཞལ་ནས་དྲེགས་པ་ལས་ལ་ཁོལ་བའི་ནུས་པའང་ཡོང་བར་འདུག་ཅེས་ལུང་བསྟན་དབུགས་དབྱུང་སྩལ། དེ་བསྟུན་གདན་སར་དཔེ་རྒྱུན་གང་བཞུགས་ཀྱི་རྙིང་མ་རྒྱུད་འབུམ་པུསྟི་བཅོ་བརྒྱད་ཀྱི་ལུང་རྣམས་ཡོངས་རྫོགས་དང་། དཀའ་སྤྱད་མཐར་ཕྱིན་སྤ་གྲོ་བ་ཆོས་དབང་ལྷུན་གྲུབ་ལ་རྡོར་གླིང་གི་ལྟ་བ་ཀློང་ཡངས་ཀྱི་དབང་ལུང་རྣམས་གསན། དགུང་ལོ་ལྔའི་དུས་ཡུམ་ལྷ་སར་ཐེགས་པའི་ཟླ་ལ་ཁྲིད་དེ་ཇོ་ཤཱཀ་མཇལ་བའི་ཚེ་སྔར་ཡང་ཡང་མཇལ་མྱོང་བ་ལྟ་བུའི་སྣང་བ་འཆར་བ་སོགས་སྔོན་རབས་ཀྱི་བག་ཆགས་མང་པོ་ཞིག་སད། དེ་སྟེང་ཡུམ་གྱི་ཨ་ནེའི་སར་ཐོད་དཀར་དུ་ཐེགས་ཏེ་ལོ་གཉིས་ཀྱི་ངོ་མཐོང་ཙམ་བཞུགས། དེ་སྐབས་ཆོས་སྡེར་ཡང་ཡང་ཡང་ཕེབས་ཏེ། མགོན་པོ་བསོད་ནམས་མཆོག་ལྡན་ལས་ཚེ་དབང་གྲུབ་རྒྱལ་མ་དང་། བཀའ་འགྱུར་ལས་ཉེར་མཁོའི་ལུང་ཕྲན་ཚེགས་གསན། གཞན་ཡང་བླ་མ་འདི་ལ་ཆོས་སྔ་ཕྱིར་གསན་པ་ལ། ཀྱཻ་རྡོར་མན་ངག་ལུགས་དང་། རྔོག་ལུགས་དགྱེས་རྡོར་ལྷ་དགུའི་དབང་། ཚེ་དཔག་མེད་ལྷ་དགུའི་དབང་། ལོ་མ་གྱོན་མའི་རྗེས་

― MLP003_Page_0062 ―

^{[མ་དཔེ་གཟིགས་ན་འདིར་གནོན།]}

[Full Size]

གནང་རྣམས་གསན། དེར་རྡོ་རྗེ་བྲག་རིག་འཛིན་སྤྲུལ་པའི་སྐུར། ཚེ་དཔག་མེད་ལྕགས་སྡོང་མའི་ཚེ་དབང་། བདེ་ཆེན་ཆོས་འཁོར་དུ་ལྷ་རྩེ་སྤྲུལ་པའི་སྐུར་བདེ་མགོན་གྱི་དབང་། སྐྱི་ནགས་སུ་ལྕགས་ཟམ་པ་ཀུན་དགའ་བསོད་ནམས་ལས་ཚེ་དབང་རྣམས་ཁྲོམ་ཆོས་དང་། གངས་ར་ལོ་ཆེན་ཤེལ་བྲག་ནས་ཕྱིར་ཕེབས་ཀྱི་ཞག་བཞུགས་སར་མཇལ་ཏེ་ཚེ་དབང་གསན་ཞིང་། རྒྱའི་ཤིང་འབྲས་མང་པོའི་གནང་སྦྱིན་དང་གསན་སྦྱོང་ལེགས་པོ་གནང་དགོས་པའི་ཞལ་ཏ་བཅས་ཐུགས་མཉེས་པར་མཛད་གསུང་། བླ་མ་འདི་ཉིད་དུས་དེ་ལས་མ་མཇལ་འདུག་ནའང་སྔོན་གྱི་ལས་སྨོན་འབྲེལ་བ་ལྟ་བུས་ཕྱིས་ཀྱང་ཤིན་ཏུ་དད་པར་མཛད། དེ་ནས་དགོན་པར་ཕེབས་ཏེ། ཡི་གེ་འབྲི་ཀློགརང་ལུགས་ཀྱི་ཆོས་སྤྱོད། བླ་མ་ཞི་དྲགཞི་ཁྲོ། དོང་སྤྲུགས། བཀའ་བརྒྱད། ཐུགས་རྗེ་ཆེན་པོ། ཚེ་དཔག་མེད་རྣམས་ཀྱི་ཕྲིན་སྒྲུབ། ཆོས་སྐྱོང་རྣམས་ཀྱི་གཏོར་བསྐང་། གུ་རུ་ཞི་དྲག་ཚེ་རྟ་ཕྱག་རྡོར་སོགས་ཀྱི་དབང་རྗེས་གནང་། གནས་ལུང་། སྦྱིན་སྲེགརབ་གནས། གཏམ་བསྔོ་སོགས་འདོན་ཆོས་སྐོར་རྣམས་གསལ་དག་ཐོན་པའི་ཚིག་འཛིན་དང་། ཕྱག་ལེན་གྱི་ཁྲིད་ཐམས་ཅད་བརྡ་བསྟན་པ་ཙམ་གྱིས་ཚེགས་མེད་པར་ཀུན་ཏུ་ཆུབ་པར་གྱུར་ཏེ་དགུང་ལོ་བརྒྱད་དགུ་ཙམ་ནས་ཡབ་རྗེའི་སྐུ་ཚབ་མཛད་ནས་ཆོས་འཆད་དང་། གཤིན་གསོན་གྱི་གྲོང་ཆོག་ཀྱང་ཅི་རིགས་སྐྱོང་བར་མཛད། དགུང་ལོ་དགུ་པ་ལ་ཡབ་རྗེ་རིག་འཛིན་ཆེན་པོ་ལས་སྐྱབས་གསུམ་འཛིན་པའི་དགེ་བསྙེན་དང་། ཕྱིས་ཀུན་མཁྱེན་རྒྱལ་བ་ལྔ་པ་ཆེན་པོ་ལས་ཡོངས་རྫོགས་དགེ་བསྙེན་གསན་ཏེ་ཉེས་སྤྱོད་སྤོང་བ་སོ་སོ་ཐར་པའི་སྡོམ་པ་དང་། ཡབ་རྗེ་ལས་བྱང་སྡོམ་བཀའ་སྲོལ་གསུམ་གསན་ནས་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་རིན་པོ་ཆེ་ཐུགས་རྒྱུད་ལ་འཁྲུངས། དེ་ནས་གནས་སྐབས་ཅི་རིགས་པར་སྤྲུལ་པའི་སྐུ་མཆོག་བཟང་པོ་དཔལ་དང་། རིག་འཛིན་སྤྲུལ་པའི་སྐུ་པདྨ་ཕྲིན་ལས་གཉིས་ལའང་སྲོལ་གཉིས་ཀྱི་ཐུགས་བསྐྱེད་གསན་ཞིང་། ཉིན་རེ་བཞིན་ཡང་རྟེན་གྱི་དྲུང་དུ་ཆགས་མེད་དུ་བཞེས་པས་ཐུགས་ལ་བོགས་ཆེན་པོ་ཐོན་ཏེ། གཞན་དོན་ཁོ་ནར་གཅིག་ཏུ་དགོངས་པའི་ཐུགས་ཀྱི་སྙིང་སྟོབས་ཆེན་པོ་བསྐལ་ཆེན་གྱི་མེ་

― MLP003_Page_0063 ―

^{[མ་དཔེ་གཟིགས་ན་འདིར་གནོན།]}

[Full Size]

འབར་བ་ལྟར་མངའ་བས་བསྟན་པ་དར་བ་དང་། སེམས་ཅན་གྱི་བདེ་སྐྱིད་སྒྲུབ་པའི་མཛད་པ་ཉིད་བདག་གིར་བཞེས་ཤིང་། གཞན་ལའང་བྱང་ཆུབ་མཆོག་སེམས་ཀྱི་བསྔགས་པ་དག་གསུང་བར་མཛད། སྔགས་སྡོམ་ནི་སྔར་སྨོས་པ་ལྟར་བཀའ་བརྒྱད་ཡོངས་རྫོགས་ཀྱི་དབང་བརྡ་དོན་འཕྲོད་པ་ཐོག་མའི་སྨིན་བྱེད་དུ་གསན་པས་ཐུགས་རྒྱུད་ལ་འཁྲུངས་པ་ཉིད། དགུང་ལོ་བཅུ་པ་ཤིང་ལུག་གི་སྟོན། ཡབ་རྗེ་གསང་བདག་ཆེན་པོ་ལ་བཀའ་བརྒྱད་བདེ་འདུས་ཀྱི་དབང་གསན་པའི་ནུབ་མོ་འོད་གསལ་གྱི་གཟིགས་སྣང་ལ། ནགས་ཚལ་ཡིད་དུ་འོང་བའི་དབུས་སུ་སློབ་དཔོན་ཆེན་པོ་པདྨ་ཡིན་སྙམ་པའི་རྣལ་འབྱོར་པ་གཟི་བརྗིད་མཚུངས་པ་མེད་པ་འཁོར་བུད་མེད་མཛེས་མ་ལྔས་བསྐོར་ཏེ་བཞུགས་པ་ལས། བུད་མེད་ལྔ་པོས་བུམ་པ་བདུད་རྩིའི་ཆུས་གང་བ་དང་། ཐོད་པ་མར་ཁུས་གང་བ། མར་མེའི་ཀོང་བུ། རལ་གྲི། མེ་ལོང་རྣམས་སོ་སོས་རིམ་པར་གཏད་ནས་སྔགས་རྒྱས་བྱིན་གྱིས་བརླབས་པའི་ཚུལ་མཛད། མཐར་གཅིག་ལ་གཅིག་ཐིམ་གྱིས་གཙོ་བོའི་བར་བསྡུས། དེ་ཉིད་མཐིང་ཞུན་ལྟ་བུའི་ཐིག་ལེར་གྱུར་ནས་ནམ་མཁའ་དང་འདྲེས་ཏེ། དབྱིངས་རིག་གཉིས་སུ་མེད་པའི་ཡེ་ཤེས་མཁའ་ཁྱབ་སྤྲོས་བྲལ་གྱི་ངང་ལ་རྗེན་གྱིས་དྭངས། མནལ་སད་ནས་ཀྱང་བདེ་སྟོང་གི་ཉམས་མ་ཞིག་པར་གནས་པ་བྱུང་སྟེ། བྱིན་གྱིས་བརླབས་པའི་ནུས་པ་དེས་སྔར་དབང་གི་ས་བོན་ཐུགས་རྒྱུད་ལ་ཐེབས་པ་ཉིད་ཆེས་ཆེར་འཕེལ་ཏེ་བུམ་དབང་གི་ཉམས་མྱོང་ཡུལ་སྣང་སྒྱུ་མ་ལྟ་བུར་གཏན་ལ་ཕེབས། དེ་ལྟར་སྡོམ་པ་གསུམ་གྱིས་ཐུགས་རྒྱུད་བསྡམས་ནས། སོ་སོའི་བསླབ་པར་བྱ་བའི་གནས་ཕྲ་ཞིང་ཕྲ་བ་ལའང་སྤྱན་གྱི་འབྲས་བུ་ལྟར་གཅེས་སྤྲས་དང་། སྒོ་གསུམ་ཉེས་སྤྱོད་ཀྱི་དྲི་མས་དབེན་པའི་ངང་ནས་གཞན་དོན་འབའ་ཞིག་སྒྲུབ་ཅིང་། སྣོད་བཅུད་དག་པའི་འཁོར་ལོར་འབྱོངས་པས་ཐུགས་རྒྱུད་ཀྱི་ཡོན་ཏན་མ་སྐྱེས་པ་བསྐྱེད་པ་དང་སྐྱེས་ཟིན་སྤེལ་བའི་གཞི་རྟེན་དུ་བཟུང་བར་མཛད་དོ། །དགུང་ལོ་བཅུ་གཅིག་པ་ལ་ཡབ་རྗེ་དང་ལྷན་ཅིག་དཔལ་ལྡན་འབྲས་སྤུངས་སུ་ཐེགས་ནས། ཁམས་གསུམ་པའི་གཙུག་གི་ནོར་བུ་ཀུན་མཁྱེན་རྒྱལ་བའི་དབང་པོ་ལྔ་པ་ཆེན་པོའི་

― MLP003_Page_0064 ―

^{[མ་དཔེ་གཟིགས་ན་འདིར་གནོན།]}

[Full Size]

དྲུང་དུ་གཙུག་ཕུད་ཕུལ་ཏེ་མཚན་ངག་དབང་པདྨ་བསྟན་འཛིན་ཞེས་སྩལ། དེ་སྐབས་གཟིམས་ཆུང་དུ་མཇལ་ཁར་ཕེབས་དུས་སྐྱིད་གྲོང་འཕགས་པ་ཝཱ་ཏི་ཕེབས་པ་དང་ཐུག་པས་རྗེ་ཐམས་ཅད་མཁྱེན་པའང་ཁྲིའི་སྟེང་བཞེངས་ཏེ་བཞུགས་འདུག་གསུངས། གོང་ནས་བསླབ་སྟོན་ལ། རང་བྱུང་འཕགས་པ་ཐོག་མར་ཕེབས་པ་དང་དུས་འགྲིག་པས་རྟེན་འབྲེལ་བཟང་ཞེས་དགྱེས་པའི་བཀའ་ལུང་བསྩལ་ཅིང་། འཕགས་པའི་སྐུ་ཉིད་ཞི་འཛུམ་ཆགས་པའི་ཉམས་གསལ་ཞིང་གཟི་བྱིན་རབ་ཏུ་རྒྱས་པའི་ཐུགས་ཀ་ནས་འོད་ཟེར་འཕྲོས་པ་རང་གི་སྐུ་ལ་ཐིམ་པ་དང་ལྷན་ཅིག་དབུགས་དབྱུང་མཛད་པའི་སྣང་བ་ཡང་ཤར་གསུངས། དེ་དུས་གུང་ཐང་དུ་ཟུར་ཆོས་དབྱིངས་རང་གྲོལ་ལ་བདུད་རྩི་བུམ་པ་དང་མོན་པ་ཀེ་ཏའི་སྐོར་གསན། གནས་གཟིགས་མཛད་པས་སྔོན་གནས་དྲན་པའི་བག་ཆགས་སད་ཅིང་འགྲོ་མགོན་ཞང་རིན་པོ་ཆེ་ལ་རྩོལ་མེད་ཀྱི་དད་པ་དྲག་པོ་འཁྲུངས་པའི་རྐྱེན་གྱིས་བྱིན་རླབས་ཀྱི་སྣང་བ་ཆེན་པོ་ཐོབ་ཅེས་གསུངས། དེ་ནས་སྟོད་ལུང་བརྒྱུད། སྣང་རྩེ། གནས་ནང་། མཚུར་ཕུ་རྣམས་ཀྱི་གནས་གཟིགས་དང་། རྒྱལ་ཚབ་གྲགས་པ་མཆོག་དབྱངས་མཇལ་ནས། ཐུགས་རྗེ་ཆེན་པོ་རྒྱལ་བ་རྒྱ་མཚོའི་སྒོམ་ལུང་དང་། སྐུ་གསུམ་ངོ་སྤྲོད་ཀྱི་ཁྲིད་གསན། གཙང་རོང་བོན་པོར་ཐེགས་ཏེ། གསུང་སྤྲུལ་ཚུལ་ཁྲིམས་རྡོ་རྗེ་ལ་ཕུར་པ་རོང་ལུགས། ཉང་ལུགས་ཞལ་གཟིགས་བརྒྱུད་པ། སྣ་ནམ་ལུགས་དྲག་སྔགས་མཆོག་ཏུ་གསང་བ་རྣམས་གསན། དེར་བཞུགས་དུས་སྐབས་ཤིག་སྐུ་ཅུང་ཟད་བསྙུང་བའི་ཚེ། སྔར་གྱི་བུད་མེད་གཉིས་ཀྱིས་དབུགས་དབྱུང་ཞིང་། ཛོ་ཀི་དེས་བྱིན་གྱིས་བརླབས་པའི་མཚན་ལམ་བྱུང་བའི་ནང་པར་ནད་བདེ་དྭངས་སུ་གྱུར། རོང་དུ་ལོ་གསུམ་གྱི་ངོ་མཐོང་ཙམ་དུ་བཞུགས། ཕྱིས་སུ་བཀའ་ལས། བར་དེར་དོན་མེད་དུ་ཡུན་རིང་འདས་གསུངས། དགུང་ལོ་བཅུ་གསུམ་པ་ལ་དབུས་སུ་ཕྱིར་ཕེབས། དེ་ནས་བཟུང་སྟེ། རྩ་རྒྱུད་གསང་བ་སྙིང་པོ། རྒྱུད་བླ་མ། སེམས་ཉིད་ངལ་གསོ། ཡིད་བཞིན་མཛོད་རྩ་འགྲེལ་རྣམས་ཐུགས་ལ་བཟུང་ནས། ཡབ་རྗེ་ལས་གསུང་བཤད་རིམ་པར་གསན་པས་ཚིགས་དོན་ཕལ་ཆེར་

― MLP003_Page_0065 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་སུ་ཆུད་ཅིང་འགྲེལ་པ་ལ་ལྟོས་མི་དགོས་པར་འཆད་ཐུབ་པ་བྱུང་། གཞན་ཡང་བཀའ་གཏེར་གྱི་གཞུང་ཕྲན་མང་པོའི་དཀའ་གནད་བསྡུས་པའི་བཤད་ཚོམས་ལེགས་ཁྱད་ཐོན་པ་ཡང་ཡང་གསན་པས་ཐུགས་བསྐྱེད་ཇེ་འཕེལ་དུ་སོང་། ཕྱིས་གནུབས་ཡབ་སྲས། ཟུར་མེས་དབོན། རོང་ཟོམ་རྣམས་ཀྱི་གསུང་རབ་དང་། ས་སྐྱ་པཎྜི་ཏའི་སྡོམ་གསུམ་རབ་དབྱེ། བཅོམ་ལྡན་རལ་གྲིའི་རྒྱུད་སྡེ་སྤྱི་རྣམ། རང་བྱུང་ཞབས་ཀྱི་ཟབ་མོ་ནང་དོན་རྣམས་ཀྱང་ཐུགས་ལ་བཙུད་ཅིང་། ཁྱད་པར་ཀུན་མཁྱེན་ཆེན་པོའི་གསུང་རབ་རྣམས་ལ་གཟིགས་རྟོག་ནན་ཏན་མཛད་པས་སྔར་ནས་གོ་བའི་གཞི་ལེགས་པར་ཐིངས་ཡོད་པའི་སྟེང་དུ་མཁྱེན་རབ་ཀྱི་རྩལ་དང་སྦྱོར་བརྩོན་འཛོམ་པས་གསུང་རབ་ཀྱི་གོ་དོན་ཐམས་ཅད་ས་སློག་གནམ་སློག་ཏུ་འཁྲུངས། ཐུན་མོང་གི་རིག་གནས་མཁྱེན་པར་ཞལ་གྱིས་མི་བཞེས་ཀྱང་། ཆུང་ངུའི་དུས། མེས་པོ་མཁས་པའི་དབང་པོ་ལས་སྐར་རྩིས་ཀྱི་ས་རིས་དང་། རྟ་ལོ་སྐུ་བསྙུན་པ་དྭངས་རྗེས། རྒྱུད་ཆུང་གསུམ་ཐུགས་ལ་བཟུང་ནས་གྲུབ་ཆེན་དམ་པ་ལས་མཛུབ་ཁྲིད་དང་འབེལ་གཏམ་མཛད་པས་སྨན་དཔྱད་ཚད་དུ་ཕྱིན་པ་མཁྱེན། གཅུང་རྒྱལ་བའི་སྲས་པོས་གུང་ཐང་པཎ་ཆེན་ལས་སྙན་ངག་གསན་པའི་ཚེ་ཞོར་ལ་གསན་པས་ཚེགས་མེད་པར་སྙན་ངག་པ་ཆེན་པོར་གྱུར་ཅིང་། སྒྲ་ཀཱ་ལཱ་པའི་མཚམས་སྦྱོར་གྱིས་ས་རིས་དང་། རྒྱ་ཡིག་ལཉྩ་ནའི་ཕྱག་ཁྲིད་ཀྱང་གསན། བཟོའི་གནས་ནི་ཆུང་ངུའི་དུས་སྐུ་རྩེད་ལ་ཁྲོ་སྐུ་སྤྲ་ལུགས་མཛད་པ་དང་། འདམ་ལ་འབུར་དང་། རྭ་ཤིང་ལ་བརྐོས་པ་སོགས་ཀྱི་བཟོ་གནས་མཚར་བ་མང་པོ་དང་། ཤེལ་ལུགས་པ་དང་། རི་མོའི་རྣམ་འགྱུར་ཡང་མཐའ་ཡས་པ་ཕྱག་བྲིས་སུ་མཛད་པ་ཡོད་ཅིང་། ད་ལྟའང་ཞལ་བཀོད་དང་ཕྱག་དྲས་མཛད་པ་ཙམ་གྱིས་བཟོ་པ་རྣམས་ཀྱི་བཟོ་གནས་རྣམ་འགྱུར་ཁྱད་པར་ཅན་དུ་འགྱུར་བ་སོགས་གཏན་ལ་ཕེབས་པ་འདི་ཡིན་ལ། དེར་མ་ཟད་ཐུགས་དམ་དང་ཆོས་འཆད་རྩོམ་གྱི་བར་ཐམས་ཅད་དུ་སྙོམ་ལས་སུ་མི་བཞུགས་པར་གྲུབ་མཐའ་རིས་མེད་པའི་ཆོས་འབྱུང་རྣམ་བཤད་སྤྱི་དོན་སྟོང་ཐུན་སོགས་ཀྱི་ཡིག་ཆ་ལ་གཟིགས་རྟོག་འཁོར་མོར་མཛད་པས་གཟིགས་རྒྱ་ཆེ་བ་ལ་ཚད་མེད། དེ་བས་ན་བློ་གྲོས་ཀྱི་རྣམ་པར་དཔྱོད་པའི་

― MLP003_Page_0066 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུ་ཐོགས་པ་མེད་པ་བརྙེས་ཏེ། ཇི་སྙེད་པའི་ཆོས་ཐམས་ཅད་ལ་སྒྲོ་འདོགས་ཆོད་པ་ཡིན་ནོ། །དེ་གོང་དགུང་ལོ་བཅུ་པའི་དབྱར་སྟོད་ཆག་བྱང་ཆུབ་གླིང་དུ་ཟླ་ཤས་བཞུགས་ཏེ། ཡབ་རྗེ་རིག་འཛིན་ཆེན་པོ་ལས་ཞི་ཁྲོ་དགོངས་པ་རང་གྲོལ་གྱི་དབང་ལུང་ཉམས་ཁྲིད་དང་། རི་མལ་དུ་སེམས་དཔའ་ཕྲིན་ལས་རྒྱ་མཚོ་ལས་འཇིགས་བྱེད་ཞེ་དགུ་མའི་དབང་། ལས་ཀྱི་གཤིན་རྗེའི་རྗེས་གནང་དང་བཅས་པ། ཚེ་དབང་གྲུབ་རྒྱལ་མ། རྟ་མགྲིན་གསང་སྒྲུབ་དང་། དམག་ཟོར་མའི་རྗེས་གནང་རྣམས་གསན། དེ་རྗེས་དབུས་སུ་ཕེབས་ཏེ་དབྱར་སྨད་ལ་ཡབ་རྗེ་ལས་བཀའ་བརྒྱད་བདེ་འདུས། བླ་མ་དགོངས་འདུས། དགུན་དེར་པད་གླིང་གི་གཏེར་ཆོས་ཡོངས་རྫོགས་རྣམས་ཀྱི་དབང་ཁྲིད་ལུང་ཕྱག་ལེན་དང་བཅས་པ། ལྷོ་ལས་འཕྲོ་གླིང་པའི་ཆོས་སྐོར་ཚང་མའི་དབང་ལུང་རྣམས་གསན། ནམ་ཞིག་མཚན་མོ་ཡང་ཐོག་ཏུ་ཕྱག་དཔེ་སྐྱོར་བཞིན་བཞུགས་པ་ན་དགུ་ཚིགས་འགྱུར་བ་གཟིགས་པ་ཅི་ཡིན་ནམ་དགོངས་ཏེ་ཡབ་རྗེར་ཞུས་པས་ལེགས་པའི་མཚན་མ་ཡིན་གསུངས། གཙང་རོང་ནས་ཕེབས་རྟིང་ཡབ་སྲས་ལྷན་ཅིག་གཅུང་རྒྱལ་བའི་སྲས་པོའི་གཟིམས་སྤྱིལ་འདེབས་པའི་སླད་དུ་དཔལ་རིར་ཕེབས་ནས། དེའི་ལས་བགྱིད་པའི་ཞལ་འཁོས་དང་ལྷན་ཅིག་མངའ་རིས་པཎ་ཆེན་དང་། ཞིག་གླིང་གི་གཏེར་ཆོས་ཡོངས་སུ་རྫོགས་པའི་དབང་ལུང་གསན་ཞིང་དེའི་ནང་གི་དམག་བཟློག་གསན་པའི་ནུབ་མོ་མནལ་ལམ་དུ། ཡུལ་འཁོར་སྲུང་གི་ཕྱག་མཚན་རག་དུང་བུས་པའི་སྒྲས་ས་གཞི་ཁེངས་པའི་དམག་དཔུང་འདུས་ཤིང་། རྣམ་སྲས་ཀྱིས་རྒྱལ་མཚན་ཕྱག་ཏུ་ཕུལ་བའི་རྐྱེན་གྱིས་ནམ་མཁའ་ལ་ཐོགས་མེད་དུ་གཤེགས་པ་བྱུང་། གཞན་ཡང་དེ་སྐབས་གྲུབ་མཐའ་མཛོད། ཡིད་བཞིན་མཛོད་རྩ་འགྲེལ། གཡུ་ཐོག་སྙིང་ཐིགསྨན་གྱི་རྒྱུད་བཞི་བདུད་རྩི་བུམ་པ་སོགས་གསན་ཞིང་། གཙོ་བོར་བླ་མ་ཡང་ཐིག་གི་དབང་ལུང་ཉམས་ཁྲིད་དང་བཅས་པ་སྨིན་པར་གསན་པས་ཀ་དག་ཆོས་ཟད་གནས་ལུགས་ཀྱི་དོན་ཇི་ལྟ་བ་ཉིད་རྟོགས་ཏེ། གཉིས་འཛིན་གྱི་འཁྲི་བ་ཆོད། སྣང་སྲིད་ལྷུན་གྲུབ་འོད་གསལ་ཡེ་ཤེས་ཀྱི་འཁོར་

― MLP003_Page_0067 ―

^{[མ་དཔེ་གཟིགས་ན་འདིར་གནོན།]}

[Full Size]

ལོར་འབྱམས་ཀླས། དེ་དུས་པཎ་ཆེན་ལུང་རིགས་རྒྱ་མཚོར་དྲག་དམར་འོ་བྲན་ལུགས། ཀར་ལུགས་ཀྱི་ཆོས་སྤྱོད་རབ་གསལ། ཀུན་རིགས་སྒྲུབ་དཀྱིལ་རྣམ་གྲོལ་སྒོ་ཅན། ཆ་ལག་ཕུང་པོ་རྣམ་པར་སྦྱོང་བ་དང་བཅས་པའི་ལུང་། ཆོས་སྐྱོང་མ་མགོན་འཁོར་ལྔའི་རྗེས་གནང་དང་བསྐང་གསོའི་ལུང་རྣམས་གསན། དར་གླིང་དུ་ཕྱིར་ཕེབས་ནས། ཡབ་རྗེ་གསང་བདག་ཆེན་པོ་ལས། རྒྱུད་ཀྱི་གསུང་བཤད་མཇུག་སྐྱོང་དང་། སྙིང་པོའི་རྒྱ་འགྲེལ་སྤར་ཁབ། བོད་འགྲེལ་གཡུང་ཊཱིཀདཀོན་མཆོག་འགྲེལ། ཕྱོགས་བཅུ་མུན་སེལ་རྣམས་གསན། སྐབས་ཤིག་མནལ་ལམ་དུ། སིངྒ་ལ་ཡི་གླིང་ཡིན་སྙམ་པའི་ཆུ་གླིང་གྲོང་ཁྱེར་ནགས་ཀླུང་མེ་ཏོག་གི་ཚལ་རབ་ཏུ་རྒྱས་པའི་དབུས་སུ་བཀོད་ལེགས་པའི་ཁྲི་སྟེང་མགོན་པོ་མ་ཕམ་པ་བཞུགས་པ་ལ། སློབ་དཔོན་ཐོགས་མེད་དང་ཙཎྜ་གོ་མི་ཡིན་སྙམ་པའི་འཁོར་དུ་མས་བསྐོར་བས་བྱིན་གྱིས་བརླབས་པར་རྨིས་པའི་མོད་ལས་མནལ་སད་པ་དང་དགའ་བདེས་ཁྱབ་ཅིང་ཟབ་མོའི་ཚིགས་དོན་གྱི་གོ་བ་བོགས་ཆོད་དུ་ནུས་པའི་ཐུགས་རབ་ཀྱི་རྩལ་སྔོན་ལས་འཕགས་པ་ཐོབ། གཞན་ཡང་ཐེག་མཆོག་མཛོད། ངལ་གསོ་སྐོར་གསུམ་རྩ་འགྲེལ། རང་གྲོལ་སྐོར་གསུམ། སེམས་ཉིད་རང་གྲོལ་གྱི་དོན་ཁྲིད། ཟབ་མོ་ཡང་ཐིགསྙན་བརྒྱུད་གསང་སྐོར་སོགས་ཀྱི་དབང་ལུང་དང་། ཀརྨ་གླིང་པའི་སྙན་རྒྱུད་ཀྱི་འཕོ་བ་གསན་པས་གནད་གསུམ་གཅུན་པ་ཙམ་གྱིས་དབུ་གཙུག་འཕར་བ་སོགས་འབྱོངས་པའི་རྟགས་མངོན་དུ་གྱུར། སྒོ་མོ་ཆོས་རྗེ་ཤཱཀྱ་རིན་ཆེན་ལ། ཞི་བྱེད་སོ་ལུགས་ཀྱི་དབང་ལུང་ཁྲིད་དང་བཅས་པ། མཁྱུད་སྤྱད་དཀར་ནག་ཁྲ་གསུམ། ཨ་གྷོ་རའི་སྐོར་རྣམས་གསན། ཟླ་བ་གཟས་ཟིན་པ་དང་བསྟུན། ཆོས་རྗེ་ཤཱཀ་རིན་པ་དང་མཉམ་དུ་འཇམ་དཀར་མ་ཏི་ལུགས་ཀྱི་མ་ཤའི་ལས་སྦྱོར་མཛད་པས་རྗེ་ཉིད་ཀྱི་དེ་ལ་མྱུ་གུ་རིང་པོར་ཐོན་པས་སྐུ་ཟླའང་ཆེས་ཆེ་བའི་ཡ་མཚན་སྐྱེས། དགུང་ལོ་བཅུ་བཞི་པ་ལ་ཡབ་རྗེ་དང་ལྷན་ཅིག་གཟིམས་སྤྱིལ་འོད་གསལ་རྩེར་སྐུ་མཚམས་བཅད་དེ་ཟླ་བ་གསུམ་ཐུགས་དམ་ལ་རྩེ་གཅིག་ཏུ་བཞུགས། སྐབས་ཤིག་ཉེར་དགུའི་ནུབ་གཟིམས་ཆུང་ཐེག་མཆོག་ཕོ་བྲང་གི་འཕྱོང་རྩེའི་མྱོས་བསྲུང་ནང་དུ་བཞུགས་

― MLP003_Page_0068 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཚེ། མུན་ནག་གི་ཁྲོད་ཁྱབ་འཇུག་རཱ་ཧུ་ལའི་སྐུ་ནམ་མཁའ་དང་དབྱེར་མེད་པ་ལས་སྤྱན་རྣམས་ཉི་མ་ལྟར་འབར་ཞིང་དུད་སྤྲིན་མེ་སྟག་འཕྲོ་བ་དང་བཅས་བར་སྣང་ལ་འགྲོ་བ་མངོན་སུམ་དུ་གཟིགས། སྐུ་དྲུང་ན་ཡོད་པ་ལའང་འཇིགས་ཟིལ་དང་ཞུད་ངམ་ཆེན་པོ་བྱུང་ཞེས་གྲགས། འདི་ནི་སྲུང་མ་འགོ་བའི་རྟགས་ཏེ་ཕྱིས་སུའང་ཡང་ཡང་འོང་བ་ཡིན་གསུང་། དགུང་ལོ་བཅོ་ལྔ་པ་ལྕགས་བྱིའི་སོས་རྒྱུད་འབུམ་གྱི་ཁ་སྐོང་གསན་བཞེད་ཀྱིས་ལྷོ་བྲག་ཏུ་ཐེགས། གུ་རུ་ལྷ་ཁང་དུ་གསུང་སྤྲུལ་རིན་པོ་ཆེས་ཀུན་བྱེད་ལེའུ་ལྔ་ཙམ་དང་། དེ་འཕྲོས་ནས་བརྩམས་ཏེ་བོན་ལུང་པ་ཚུལ་ཁྲིམས་རྒྱལ་མཚན་གྱིས་གནང་བའི་ཞག་བཅུ་སྐོར་ནས་ལྷོ་ནང་བཀྲ་ཤིས་ཆོས་གླིང་དུ་ཆོས་དབར་བཏེགདེར་རྙིང་མ་རྒྱུད་འབུམ་ཡོངས་རྫོགས་ཚར་བའི་གྲོལ་སྟོན་ཉིན། རྗེ་ཉིད་ཀྱིས་བཤད་འབུལ་མཛད་པས་དཔྱོད་ལྡན་ཐམས་ཅད་ཡི་རང་ཞིང་། ཁྱད་པར་གསུང་སྤྲུལ་རིན་པོ་ཆེ་ཤིན་ཏུ་མཉེས་ཏེ་གོས་ཆེན་ཏ་ཧུན་གྱི་འགན་སྦྱར་ཞིག་སྩལ། ཆོས་གཞི་གྲོལ་ནས། སྲས་མཁར། གྲོ་བོ་ལུང་། གཉའ་ཉ། སྦྲུལ་མཚོ་པདྨ་གླིང་སོགས་གནས་ངོ་མཚར་བ་རྣམས་མཇལ་ཏེ། སྨན་ཐང་བརྒྱུད་ཡབ་རྗེ་ཆག་བྱང་ཆུབ་གླིང་དུ་བཞུགས་པའི་སར་ཕེབས་ནས། ཡབ་སྲས་མཉམ་དུ་དབུས་སུ་བཏེགདར་རྒྱས་ཆོས་གླིང་དུ་ཡབ་རྗེ་རིག་འཛིན་ཆེན་པོར། མ་ཎི་བཀའ་འབུམ་དང་། རྒྱུད་བཅུ་བདུན་ཁྲོས་མའི་རྒྱུད་དང་བཅས་པ། བི་མ་སྙིང་ཐིགམཁའ་འགྲོ་ཡང་ཐིག་ལ་སོགས་པའི་དབང་ལུང་དང་ཉམས་ཁྲིད་གསན་པས་རང་གནས་ཀྱི་ཡེ་ཤེས་ལ་རང་དབང་འབྱོར་བའི་ཉམས་རྟོགས་ཕུལ་དུ་བྱུང་བ་འཁྲུངས། དེ་རྟིང་ཡབ་རྗེ་མཆིམས་ཕུ་སོགས་སུ་ཞབས་བསྐྱོད། དེ་བར་རྗེ་ཉིད་ཀྱིས་གདན་ས་རང་དུ་ཐུགས་དམ་ལ་རྩེ་གཅིག་ཏུ་བཞུགས་ནས་བར་མཚམས་རྣམས་སུ་གཞུང་ལུགས་ཀྱི་གཟིགས་རྟོག་དང་། ཡོན་བདག་སྐྱོང་བའང་ཅི་རིགས་མཛད། རྟོགས་ལྡན་པདྨ་ཡེ་ཤེས་ལ་ཀུན་མཁྱེན་མདོ་སྔགས་བསྟན་འཛིན་གྱི་རྣམ་ཐར་དང་བཀའ་འབུམ་གྱི་ལུང་རྣམས་ཀྱང་གསན། དགུང་ལོ་བཅུ་དྲུག་པའི་ནང་དུ་ཡབ་རྗེ་ལ་བླ་མ་གསང་འདུས་ཀྱི་དབང་གསན་པའི་

― MLP003_Page_0069 ―

^{[མ་དཔེ་གཟིགས་ན་འདིར་གནོན།]}

[Full Size]

ནུབ་མོ་འོད་གསལ་གྱི་གཟིགས་སྣང་ལ། གཞལ་ཡས་ཁང་བརྩེགས་པ་ཡིད་དུ་འོང་བའི་སྒོར་ཞུགས་པའི་ནང་དུ་རིན་པོ་ཆེའི་ཐེམ་སྐས་མཐོ་བ་ལ་བུད་མེད་མཛེས་མས་ཁྲིད་དེ་འཛེགས་པ་ལས། ཁང་བཟང་རྒྱ་ཆེ་བཀོད་ལེགས་པའི་དབུས་ན་ཡབ་རྗེ་ཉིད་གཟི་བརྗིད་མཚུངས་པ་མེད་པའི་སྐུའི་མཐའ་སྐོར་དུ། གླེགས་བམ་མང་པོ་བརྩིགས་པའི་རགས་དང་། ལ་ལ་འགྱེལ་ནས་ཐང་མར་བརྡལ་ཏེ་འདུགདེར་གུས་པ་ཆེན་པོས་ཞབས་ལ་བཏུད་པ་ན་བཀའ་ལས། འདི་རྣམས་བཀའ་གཏེར་གྱི་ཟབ་ཆོས་ཡིན་ཡང་འགའ་ཞིག་འཁྲུགས་འདུག་པས། ཁྱོད་ལ་བསྒྲིག་པའི་སྐལ་བ་གཏོད་པ་ཡིན་ནོ་ཞེས་དུང་དཀར་དར་དཔྱངས་བཏགས་པ་ཞིག་ཕྱག་ཏུ་གཏད། དེའི་ཚེ་འདི་སྙམ་དུ། གླེགས་བམ་གཏོས་ཆེན་འདི་འདྲ་ལོ་བརྒྱར་བསྒྲིགས་ཀྱང་འགྲིག་དཀའ་ན་བདག་གིས་ཇི་ལྟར་བྱ་སྙམ་པ་དགོངས། དེ་མཐར་ཡབ་རྗེ་ཉིད་བཞེངས་ཏེ་དཀར་གསལ་གྱི་ལམ་ནས་སྒྲ་དང་འོད་ཀྱི་ཆོ་འཕྲུལ་དུ་མས་ནམ་མཁར་ཐོགས་མེད་དུ་གཤེགས་པའི་མོད་ལ། སྐྱོ་ཞིང་གདུང་བས་ཞབས་ཕྱི་སྙེགས་པར་བརྩམས་པ་ན་མནལ་སད་པ་དང་ལྷན་ཅིག་ཉམས་ཀྱི་སྣང་བ་ལ། མདུན་མཁར་རྡོ་རྗེ་གཞོན་ནུ་གཙོ་འཁོར་རྣམས་ཆེས་གསལ་བ་སྒྲ་དང་འོད་ཟེར་འཕྲོ་བའི་སྣང་བ་ཆུ་ཚོད་གཅིག་གི་ཡུན་ཙམ་གཡོ་མེད་དུ་གནས་པ་གཟིགས། དགུང་ལོ་བཅུ་བདུན་པའི་དུས་ཡབ་རྗེ་རིག་འཛིན་ཆེན་པོ་ལྷོ་བྲག་ནས་སྐུ་བསྙུན་ཏེ་ཕྱིར་ཕེབས་པ་ལ། སྐུ་རིམ་སྨན་བཅོས་བརྟན་བཞུགས་སོགས་སྲི་ཞུ་ལྷོད་མེད་དུ་འབུལ་བར་མཛད་པ་ན་བཀའ་ལས། ཁྱེད་རྣམས་ངེད་རང་སྡོད་པ་ལ་འདུན་པ་རྗེས་སུ་ཡི་རང་། བྱིན་རླབས་ཀྱི་འཇུག་པ་འདྲེན་པ་ལ་གནད་ཆེ། གཞན་ད་རེས་འགྲོ་བའི་འདུན་པ་ཁ་སང་ནས་བཏང་ཟིན། ཕ་མ་ཤི་ན་བུ་མི་ཚར་ཟེར་བའི་དཔེ་བཞིན་ད་ཙམ་ན་ཁྱོད་ཀྱིས་སྙིང་སྟོབས་བསྐྱེད་དགོས་པ་ཡིན་གསུངས་པ་དང་། ཕྱི་མཐའ་གཟིགས་པའི་ཞལ་ཆེམས་ཀྱང་བསྩལ་ཏེ། དབོ་ཟླ་བའི་ཉེར་གཉིས་ཀྱི་ཉི་མ་ཕྱེད་ཡོལ་ཙམ་ལ་དབུ་གཙུག་ཕྱུར་བུར་འཕར་བ་ལས་ཟླ་བའི་ཟིལ་པ་སྐྱ་ཆིལ་ལེ་བ་དང་། སྤོས་དུད་ལྟ་བུའི་རླངས་པ་འཕྲོ་བཞིན་དུ་སྐུ་ཚེའི་འདུ་

― MLP003_Page_0070 ―

^{[མ་དཔེ་གཟིགས་ན་འདིར་གནོན།]}

[Full Size]

བྱེད་བཏང་སྟེ་གཟུགས་སྐུའི་བཀོད་པ་འོད་གསལ་ཆོས་ཀྱི་དབྱིངས་སུ་བསྡུས། ཉེར་ལྔ་ནས་གདུང་ཆོག་དང་སྐུ་འདད་ཀྱི་མཆོད་སྦྱིན་རྒྱ་ཆེར་སྤྲོས་ཤིང་། གདུང་བཞུ་བའི་ཕྱག་ལེན་བོན་ལུང་རིན་པོ་ཆེ་དང་། དངོས་གཞིའི་གྲལ་དབུ་དང་ནང་རྟེན་རབ་གནས་ཐུགས་སྲས་སྤྲུལ་པའི་སྐུར་གསོལ། ཀུན་མཁྱེན་རྒྱལ་བའི་དབང་པོ་བསམ་ཡས་སུ་ཕེབས་པའི་ཞབས་དྲུང་དུ་བསྔོ་རྟེན་འབུལ་བར་རྗེ་ཉིད་ཀྱིས་ཕེབས་ཏེ་ཞལ་མཇལ་བའི་ཚེ། ཀུན་མཁྱེན་བླ་མ་ཉིད་སྤྱན་རས་གཟིགས་ཀྱི་སྐུ་དྲི་མ་མེད་པའི་འོད་ཟེར་འཕྲོ་བའི་རྣམ་པར་ཡུད་ཅིག་གཟིགས། དེའི་རྐྱེན་གྱིས་སྔོན་གྱི་གནས་དུས་འབྲེལ་ཚུལ་ལ་སོགས་པའི་བག་ཆགས་བཟང་པོ་སད་ཅིང་གོང་ནས་ཤིན་ཏུ་བརྩེ་བའི་གསུང་གིས་དབུགས་དབྱུང་བ་དང་། ཕྱི་མཐའ་གཟིགས་པའི་བླང་དོར་གྱི་བཀའ་ལུང་ཡང་སྩལ། ཡབ་རྗེའི་བདུན་ཚིགས་གཉིས་པའི་ནུབ་མོ་འོད་གསལ་གྱི་སྣང་བར། ཡབ་རྗེ་ཉིད་ཀྱི་ཡེ་ཤེས་ཀྱི་སྐུ་ཉི་མ་ལྟར་གཟི་བྱིན་འབར་བ་ལས་འོད་ཟེར་སྦྲང་རྩིའི་དྭངས་མ་ལྟ་བུ་རྗེ་འདི་པའི་ཞལ་དུ་སྩལ་ཅིང་བྱིན་རླབས་དབུགས་དབྱུང་མཛད་ནས་ནུབ་ཕྱོགས་ཀྱི་མཁའ་ལ་སྒྲ་དང་འོད་ཀྱི་སྣང་བའི་ཆོ་འཕྲུལ་གྱིས་གཤེགས་པ་ཞིག་བྱུང་། དེ་ལྟར་ཡབ་རྗེ་གསང་བདག་ཆེན་པོ་འདི་ནི། བདག་ཉིད་ཆེན་པོ་འདིའི་བཀའ་དྲིན་མཚུངས་པ་མེད་པའི་རྩ་བའི་བླ་མ་རྣམ་གཉིས་ཞེས་གསུངས་པའི་ཡ་གྱལ་གྱི་གཅིག་སྟེ། དགུང་ལོ་བཞི་ལྔ་ཙམ་ནས་བཟུང་ཡབ་རྗེ་ཉིད་མྱ་ངན་ལས་འདའ་ཁའི་བར་དུ་བསྟེན་ནས་གསན་པ་ནི་གནས་གང་དུ་དུས་གང་གི་ཚེ་གསན་ཚུལ་སྔར་བརྗོད་པ་དེ་ཙམ་དུ་མ་ཟད། གཞན་ཡང་དཔག་ཏུ་མེད་པ་ཞིག་གསན་ཏེ། འདིར་རགས་ཙམ་ཞིག་བརྗོད་ན། རྙིང་མ་བཀའ་མའི་སྐོར་ལ། སྙན་བརྒྱུད་གསང་སྐོར། ཞི་ཁྲོ་དོང་སྤྲུགས། བི་མའི་སྒྱུ་འཕྲུལ་ལེ་ལགགསང་ཐིག་རྩ་འགྲེལ། ཀློང་ལུགས་སྒྱུ་འཕྲུལ། གྲོལ་ལམ་སྙིང་པོའི་ཁྲིད། དྲག་དམར་འོ་བྲན་ལུགས། བཀའ་བརྒྱད་རྫོང་འཕྲང་། ཕུར་པ་རོག་ཉང་སྣ་ནམ་གསུམ་གྱི་ལུགས། བཻ་རོའི་འདྲ་འབགབསམ་གཏན་གླིང་པའི་ཨ་ཏིའི་སྐོར། ཀི་ཀང་ནག་པོ། སྡོམ་བཟང་རླུང་འཁོར། གནུབས་ལུགས་རྒྱལ་པོ་བྱེས་ཆས་ཀྱི་སྐོར་སོགས་སོ། །གཏེར་མའི་སྐོར་ལ། ཉང་གི་བླ་མ་

― MLP003_Page_0071 ―

^{[མ་དཔེ་གཟིགས་ན་འདིར་གནོན།]}

[Full Size]

དམར་ཁྲིད། དྲག་པོ་རྒྱས་འབྲིང་བསྡུས་གསུམ། ཟངས་གླིང་མ། འགྲོ་འདུལ་མཚོ་སྐྱེས་རྡོ་རྗེ། ཁྲོས་ནགལོཀྟྲི། མགོན་པོ་འབར་མ། བརྟན་མ། པེ་ཧར་གྱི་སྐོར་སོགས། ཆོས་དབང་གི་མཉམ་སྦྱོར། པདྨ་ལམ་རིམ། བླ་མ་གསང་འདུས། སྐུ་གསུམ་ཡོངས་རྫོགས། དྲག་པོ་ཐུགས་སྒྲུབ། བཀའ་བརྒྱད་གསང་རྫོགས། ཐུགས་རྗེ་ཆེན་པོ་ཡང་སྙིང་འདུས་པ་དང་འཁོར་བ་དོང་སྤྲུགས། ཉམས་ལེན་སྐོར་དགུ། ཕུར་པ་སྤུ་གྲི། རྫོང་ཆེན་ཚེ་སྒྲུབ། གོང་ཁུག་མ། འཇམ་དཔལ་རྫོགས་ཆེན། མཚོ་རྒྱལ་སྒྲུབ་སྐོར། རྟ་མགྲིན་དབུ་དགུ། རྟ་ནགགཏུམ་པོ། ནཱ་ག་རཀྵ། ལོཀྟྲི། འཆར་ཀམགོན་པོ་མ་ནིང་། ཛམ་དམར། ནོར་སྒྲུབ། བརྟན་མ། ཆོས་དྲུག་སྲས་མཁར་མ། རླུང་འཁོར། ཙཀྲ་བུ་ཆུང་། ཞིང་སེལ། མཁའ་རིའི་ཞུས་ལན། གཏེར་སྟོན་བཀའ་འབུམ་སོགས། སྙིང་ཐིག་ལས་རྫོགས་པར་རང་བྱུང་གི་དབང་བཀའ་རྒྱ་མ། མེ་ལོང་རྡོ་རྗེའི་ཡང་རྫོང་སྙིང་ཐིག་དང་རྣམ་ཐར་མགུར་འབུམ། ལས་འབྲེལ་རྩལ་གྱི་བླ་མ་སྤྱི་འདུས། མཁའ་འགྲོའི་སྙིང་ཐིགདྲེགས་འདུལ། གཉེན་པོ་ལྷ་གསུམ། གཏད་ཁྲམ། རླུང་ཞགས། ཁ་ལ་རྒྱས་འདེབས། གཟའ་བདུད་དུག་གྲི། བཤན་པ་དམར་ནག་གི་སྐོར་སོགས། ཤོ་བན་ལེགས་པའི་ཞིང་སྐྱོང་སྐོར། ཀུན་མཁྱེན་ཆེན་པོའི་བསྟན་བཅོས་ཡོངས་རྫོགས། རྒྱ་ཞང་ཁྲོམ་གྱི་ལྕགས་སྡིགཡང་བཟློགཀི་ཀང་དམར་ནགསྔགས་སྡེབ་ཀྱི་རྒྱུད་དང་གཤོར་སོགས། གྲྭ་པ་མངོན་ཤེས་ཀྱི་ཞང་བློན་དང་ཛམ་དམར་སྐོར། མཁོན་སྦྱོང་། ལྷ་ལྔ་མཆོད་པ་སོགས། རཀྴག་གི་མ་མོ་སྒང་ཤར། མདོས་བཅུ། གཏད་བཟློགསར་བན་ཕྱོགས་མེད་ཀྱི་འཇམ་དཔལ་རྫོགས་ཆེན། བཟང་པོ་གྲགས་པའི་ལེའུ་བདུན་མ། རྒོད་ལྡེམ་གྱི་ཐུགས་སྒྲུབ་རྣམ་གསུམ། གུ་རུ་སྤྱན་མང་། ཟང་ཐལ་སྤྱོད་དབང་། ཨེ་ཀ་ཛཱ་ཊི། རྡོར་ལེགས། དུག་དབང་སོགས། རིན་ཆེན་གླིང་པའི་ཨ་ཏི་ཆིག་ཆོད། ཚེ་དབང་མདའ་འཕེལ། ཚེ་སྒྲུབ་འོད་ཕྲེང་། ནཱ་ག་རཀྴའི་སྐོར། རཏྣ་གླིང་པའི་བླ་རྫོགས་ཐུགས་གསུམ། རྩ་གསུམ་འབྲས་བུའི་དོན་ཁྲིད། ཕྱག་ཆེན་མུན་སེལ། འདུས་པ་སྐོར་བཞི། ཚེ་སྒྲུབ་རྡོར་ཕྲེང་། རྟ་ཕག་གསང་སྒྲུབ། ཕུར་པ་ཡང་གསང་བླ་མེད། ཟབ་གཏེར་ཁ་འཐོར་བཅས། སངས་རྒྱས་གླིང་པའི་

― MLP003_Page_0072 ―

^{[མ་དཔེ་གཟིགས་ན་འདིར་གནོན།]}

[Full Size]

དྲག་དམར། ཚེ་སྒྲུབ་ཉི་ཟླ་ཁ་སྦྱོར། བཀའ་ཐང་། རྫོགས་ཆེན་སྙིང་པོ་བསྡུས་པ། ཐུགས་རྗེ་ཆེན་པོ་རྒྱལ་པོ་ལུགས། ཕུར་སྒྲུབ། འཇམ་དཔལ་སྐོར་གསུམ། རྟ་ནགམཁའ་འགྲོ་ལས་བརྒྱ། ལྷ་ཆེན། རྣམ་སྲས། དུག་མདའ་སྐོར་གསུམ་སོགས་ལས་ཕྲན་མང་པོ། ཨོ་རྒྱན་གླིང་པའི་བཀའ་ཐང་དང་སྡེ་ལྔ། རྫོང་ཆེན་ཚེ་དབང་། ཀུན་སྐྱོང་གླིང་པའི་རྡོར་སེམས་སྙིང་ཐིགགཤོར། བཀའ་བཟློགབསྟན་གཉིས་གླིང་པའི་སངས་རྒྱས་དགོངས་འདུས། ཚེ་སྒྲུབ་ཙིཏྟའི་རྒྱ་ཅན། རྫོགས་ཆེན་ཐིག་ལེ་ཉག་གཅིགཡང་ཐིག་ཡེ་ཤེས་མཐོང་གྲོལ། ཕག་མོ་ཟབ་རྒྱའི་སྐོར། རྒྱ་མ་ལས་འཕྲོ་གླིང་པའི་རྟ་མགྲིན་རྩ་གསུམ་འདུས་པ། སྤེལ་ཅོག་ལས་འཕྲོ་གླིང་པའི་རྫོགས་ཆེན་ཟབ་དོན་སྙིང་ཐིགའཇའ་ཚོན་པའི་དཀོན་མཆོག་སྤྱི་འདུས། ཞི་ཁྲོ། ཐུགས་རྗེ་ཆེན་པོ། ཚེ་སྒྲུབ། བཀའ་བརྒྱད། མ་ནིང་གཏེར་ཕྲན་དང་བཅས་པ། དྲི་མེད་ལྷུན་པོའི་དོན་ཏིག་རླུང་དམར་ཕྱག་ཁྲིད་དང་བཅས་པ། དྲི་མེད་ཀུན་དགའི་ཡེ་ཤེས་འོད་མཆོགཚེ་བརྟན་རྒྱལ་མཚན་གྱི་གུ་རུ་སྤྱན་མང་། རྟ་མགྲིན་གྱི་ལས་བརྒྱ་རྩ་བརྒྱད། ཤེས་རབ་མེ་འབར་གྱི་འཁོར་འདས་རང་གྲོལ། ཀུན་དགའ་འབུམ་གྱི་གསང་ལམ། དུང་མཚོ་རས་པའི་ཡང་ཏི། འཇམ་དབྱངས་བླ་མའི་རྩ་གསུམ་དྲིལ་སྒྲུབ། རྒྱ་པདྨ་དབང་ཕྱུག་གི་གུར་མགོན། སུམ་པ་བྱང་བློའི་དྲེགས་པ་ཉི་ཤུ་པ། བླ་མ་གྲུམ་དང་ནག་པོ་མཁར་གྱི་གཟའ། པདྨ་དབང་གི་དམ་ཅན་སྐྱེར་མདུང་ཅན། དམ་པ་དམར་པོའི་བདུད་རྩི་བཅུད་ལེན། ཡོལ་མོ་པའི་གཏེར་བྱང་། རིན་ཆེན་ཕུན་ཚོགས་ཀྱི་ཡང་ཟབ། ཛ་པིར་རླུང་ཁྲིད། སྒྲོལ་དཀར། ཤེས་རབ་འོད་ཟེར་གྱི་གྲོལ་ཐིགནག་པོ་སུམ་སྒྲིལ། མང་རོང་འཇམ་དཔལ་རྡོ་རྗེའི་ཐུགས་རྗེ་ཆེན་པོ། མགོན་པོ་རིན་ཆེན་གྱི་ཚེས་བཅུའི་ཕན་ཡོན། བྱིས་པ་གཏེར་སྟོན་གྱི་འབྲུམ་སྲུང་། གུ་རུ་ཇོ་ཚེའི་དབང་ཕྱུག་སྦྲུལ་ཐོད་མ། ཤ་བརྒྱ་ཟན་བརྒྱ། གཉལ་སྟོན་ཉི་སེང་གི་རླུང་ཞགས། གཙང་སྟོན་ཆོས་འབར་གྱི་སེར་སྲུང་། བལ་པོ་ཨ་ཧཱུྃ་གི་ཛམ་ནག་སྲོག་འཁོར། རྒྱ་བན་རྡོ་རྗེ་དབང་ཕྱུག་གི་བཅུད་ལེན། ཨ་ཇོ་དཔལ་སོའི་ཡང་གྷ་བཟའི་སྒྲུབ་ཐབས། བོན་རི་ཁྲོད་པའི་བཀའ་མཐུ། ལྕང་སྨན་དོན་གྲུབ་དར་གྱི་བདུད་རྩི་རྟ་རི་མ། ཟླ་བན་གྱི་སྔགས་སྡེབ།

― MLP003_Page_0073 ―

^{[མ་དཔེ་གཟིགས་ན་འདིར་གནོན།]}

[Full Size]

བཛྲ་མ་ཏིའི་གུ་རུ་མཐིང་ནགཕུར་བོན་མགོ་དམར་གྱི་དམ་ཅན་བྱེས་ཆས། ཁམས་སྟོན་གྱི་རྒྱལ་སྲུང་། གཞན་ཡང་ཇག་མཚོན་སད་སེར་ཆུ་འོད་སྲུང་བ་སོགས་ཕན་བྱེད། དབྱེ་བསྐྲད་སོགས་ཚར་གཅོད་ཀྱི་གདམས་ཕྲན་མང་པོ། ཐང་སྟོང་རྒྱལ་པོའི་དག་སྣང་འཆི་མེད་དཔལ་སྟེར། རས་ཆེན་གྱི་ཚེ་དབང་མདའ་འཕེལ་དང་འཕོ་བ་མཁའ་སྤྱོད་མ། བསྟན་པའི་འབྱུང་གནས་ཀྱི་རྩ་གསུམ་ཟབ་མོ་ཀུན་འདུས། ཡབ་རྗེ་ཉིད་ཀྱི་དག་སྣང་ལུང་བསྟན་བླ་སྒྲུབ་དང་བཅས་པ། གསུང་སྤྲུལ་ཚུལ་ཁྲིམས་རྡོ་རྗེའི་བཀའ་འབུམ་རྣམས་ཏེ། དེ་དག་སོ་སོའི་དབང་བཀའ། བྱིན་རླབས། རྗེས་གནང་། ལུང་དང་བཅས་པ་ཚང་མ་དང་། ཁྲིད་བཀའ་ཅི་རིགས་པའང་གསན། གསར་མའི་སྐོར་ལ། ཕག་མོ་ལྷན་ཅིག་སྐྱེས་མའི་བྱིན་རླབས་དང་སྒྲུབ་དཀྱིལ་གྱི་ལུང་། རྭ་ལུགས་འཇིགས་བྱེད་ཡི་གེ་བཞི་པའི་ཉིན་མཚན་ཞལ་བསྒྱུར་གྱི་སྒོམ་བཟླས་བཅས་པ། ཀུན་རིགས་ཀྱི་དབང་། ཚེ་དབང་གྲུབ་རྒྱལ་མ། སྒྲ་མི་སྙན་པའི་ཚེའི་རང་གཟུངས། མ་ཏི་ལུགས་འཇམ་དཀར་གྱི་རྗེས་གནང་དང་སྒྲུབ་སྐོར་གྱི་ལུང་། སྒྲོལ་དཀར་བཀའ་བབས་དགུ་ལྡན། བྱང་སེམས་ཟླ་རྒྱལ་གྱི་རྟ་ནགརས་ཆུང་ལུགས་གཏུམ་པོ་ཁྱུང་ལྔ། རྣམ་འཇོམས་མཐིང་གདབྱངས་ཅན་མ་དཀར་མོ། ཁྱུང་ཁྲ། སེང་གདོང་དམར་མོ། མགོན་པོ་ཕྱག་དྲུག་པ། དུད་སོལ་མ། ཞིང་སྐྱོང་། རྣམ་སྲས་སེར་ཆེན། མདུང་དམར་ཅན། ཕྱག་བཞི་པ། གཅོད་ཡུལ་ཟབ་དོན་སྐོར་རྣམས་ཀྱི་རྗེས་གནང་དང་ལུང་། གཅོད་སྟན་གཅིག་མ་དང་ཞག་བདུན་མའི་ཉམས་ཁྲིད། རྒྱལ་པོ་མདོ་ལྔ། བྱམས་སྨོན། སྟོན་པའི་སྐྱེས་རབས་སོ་བཞི་པ་རང་བྱུང་པའི་ཁ་སྐོང་དང་བཅས་པའི་བརྒྱ་རྩ། ཞི་འཚོའི་སྨན་བླའི་མདོ་ཆོགཞང་བཀའ་རྒྱ། གཙང་སྨྱོན་པས་བསྒྲིགས་པའི་མི་ལའི་རྣམ་མགུར། དྭགས་པོའི་ཐར་རྒྱན། ཟབ་མོ་ནང་དོན། མི་བསྐྱོད་རྡོ་རྗེའི་བླ་མའི་རྣལ་འབྱོར་ཐུན་བཞི་མ། གླིང་རས་བླ་མཆོད། རྒྱལ་དབང་རྗེའི་ཕྱག་ཆེན་ལྷན་ཅིག་སྐྱེས་སྦྱོར་གྱི་ཁྲིད་ཡིགཡང་དགོན་པའི་ཕྱག་ཆེན་རྒྱབ་ཆོས། དར་གླིང་ལུགས་ཀྱི་ཆབ་གཏོར་རྣམས་ཀྱི་ལུང་དང་། འོད་དཔག་མེད་ཀྱི་ཉལ་སྒོམ་སོགས་ཁྲིད་བཀའ་ཡང་མང་དུ་གསན་ཞིང་། དེ་ལ་ཡབ་རྗེ་རིག་འཛིན་ཆེན་པོ་འདི་ནི་སྔ་འགྱུར་གྱི་

― MLP003_Page_0074 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་འཛིན་ཐོག་མཉམ་ཞིག་ལ་ཆོས་ཀྱི་འཕྲིན་ལས་འགྲན་ཟླ་དང་བྲལ་ཏེ། ལུགས་ཐ་དད་པའི་ཆོས་ཀྱི་རྣམ་གྲངས་རྣམས་སོ་སོའི་རང་ལུགས་མ་འདྲེས་པར་སྐལ་པ་བཞིན་སྩོལ་བ་ལ་ཐོགས་པ་མེད། ཐུགས་ཆོས་ཉིད་མཉམ་པ་ཆེན་པོའི་གནས་ལུགས་ལས་ནམ་ཡང་མི་གཡོ་བཞིན་དུ་རྣམ་འགྱུར་རྡོ་རྗེ་སློབ་དཔོན་གྱི་དེ་ཉིད་བཅུ་ལ་དབང་འབྱོར་བས་དེ་དང་དེའི་ལས་ལ་ངེས་ཤེས་འདྲེན་ཞིང་། ཁྱད་པར་དབང་དུས་སུ་ཡེ་ཤེས་ཀྱི་བྱིན་ཕེབས་པས་དབང་དོན་རྒྱུད་ཐོག་ཏུ་འབྱོར། ཁྲིད་བཀའ་གསུང་དུས་སོ་སོའི་ཉམས་མྱོང་གི་སྣེ་ནས་ཁྲིད་མཁས་པས་ཟབ་ལམ་གྱི་རྟོགས་པ་ངོ་འཕྲོད་པ་དང་ཉམས་མྱོང་གི་དྲོད་ཚད་ཐོབ་པ་མང་དུ་ཐོན། ལས་བཞི་གང་སྒྲུབ་ལ་ཐོགས་པ་མེད་པ་སོགས་ཡོན་ཏན་མཐའ་ཡས་པ་མངའ་བས་གསན་ཡུལ་ཁྱད་པར་དུ་འཕགས་པར་མ་ཟད། འདི་ལ་གསན་པ་རྣམས་ཀྱི་ནང་ནས་ཀྱང་རྫོགས་རིམ་མཐར་ཐུག་སྙིང་ཐིག་རྣམ་གཉིས་ཀྱི་ཟབ་ཁྲིད། བླ་མ་གསང་འདུས་དང་། བཀའ་བརྒྱད་གོང་འོགཕུར་པ་སྤུ་གྲི་ལ་སོགས་པའི་དབང་དང་བསྙེན་སྒྲུབ་ལས་གསུམ། སྒྱུ་དྲྭའི་བཤད་པའི་བཀའ་རྣམས་ལ་བྱིན་རླབས་ཀྱི་མཚན་མ་ངོ་མཚར་བ་གཞན་ལས་ཆེས་ཆེ་བར་བྱུང་བ་བཞིན། ད་ལྟའི་དུས་སུའང་སྤྱིར་ཡབ་རྗེ་ལས་བརྒྱུད་པ་དང་། ཁྱད་པར་ཆོས་བཀའ་དེ་རྣམས་ལ་རྩིས་པོ་ཆེར་མཛད་ནས་ཉམས་བཞེས་དང་གཞན་ལ་རྒྱ་ཆེར་འཆད་པར་མཛད་པ་ཡིན་ནོ། །ཡབ་རྗེའི་དགོངས་རྫོགས་རྣམས་གྲུབ་རྗེས་གཙང་རོང་བྲེའི་བོན་པོ་ལུང་དུ་ཐེགས། དེར་གསུང་སྤྲུལ་ཚུལ་ཁྲིམས་རྡོ་རྗེ་ལ། བྱམས་ཆོས་སྡེ་ལྔ། པད་གླིང་ཐུགས་རྗེ་ཆེན་པོའི་སྒྲུབ་ཆེན་དང་འབྲེལ་བའི་དབང་། ནོར་བུ་རྒྱ་མཚོའི་དབང་རགས་རིམ། བཀའ་བརྒྱད་རང་བྱུང་རང་ཤར་གྱི་དབང་ལུང་། པད་གླིང་ཆོས་སྐྱོང་སྐོར་གྱི་སྲོག་གཏད། རྒྱལ་སྲས་ཐོགས་མེད་པའི་གསུང་འབུམ་ཐོར་བུ། གཞན་ཡང་སྔ་ཕྱིར་པད་གླིང་གཏེར་ཆོས་ཕལ་མོ་ཆེའི་དབང་ལུང་ཁྲིད་དང་བཅས་པའང་བསྐྱར་ནས་གསན། བླ་མ་འདི་ལ་སྤྱིར་མཁས་བཙུན་བཟང་གསུམ་དང་། ཁྱད་པར་བཟང་པོའི་ཡོན་ཏན་ཕུལ་དུ་བྱུང་བ་མངའ་ཞེས་མཐོང་བཀུར་ཆེན་པོ་མཛད། ཐུགས་སྲས་སྤྲུལ་པའི་སྐུ་བསྟན་འཛིན་འགྱུར་མེད་ལ་མཛོད་བདུན་

― MLP003_Page_0075 ―

^{[མ་དཔེ་གཟིགས་ན་འདིར་གནོན།]}

[Full Size]

དང་ངལ་གསོ་སྐོར་གསུམ་གྱི་ལུང་། ཕྱིས་ཚེ་དབང་རྡོ་རྗེ་རྒྱས་འདེབས། དྲག་པོའི་དབང་རེག་པ་དོན་ལྡན། རྟ་མགྲིན་ཡང་གསང་བླ་མེད་ཀྱི་དབང་རྣམས་དང་། བོན་ལུང་པ་ཚུལ་ཁྲིམས་རྒྱལ་མཚན་ལ་མཁའ་འགྲོ་སྙིང་ཐིག་དང་། སངས་རྒྱས་གླིང་པའི་གཏུམ་པོ་ཁྱུང་ཆེན། གསང་བ་ཡང་ཁོལ་གྱི་དབང་ལུང་རྣམས་ཀྱང་གསན། དེ་ནས་དབུས་སུ་ཕེབས་ཏེ་གཟིམས་སྤྱིལ་འོད་གསལ་རྩེར་དྲག་དམར་གྱི་བསྙེན་མཚམས་ཟླ་བ་གསུམ་མཛད། དེ་སྟེང་རས་ཆེན་ཀརྨ་གསང་སྔགས་ལ་གཤིན་རྗེ་མཱ་ར་ཁྲག་སྐྱུག་གམ་སྐུ་མཆོག་གྱད་དམར་དུ་གྲགས་པ་དང་། ཐོས་གྲོལ་གྱི་དབང་བཞི་འཕྲད་ཚད་རང་གྲོལ་གསན། བླ་མ་སྐུ་གསུམ་གྱི་སྒྲུབ་པ་མང་དུ་ཐེམས་ཤིང་། དཀོར་སྲུང་འདིའི་བསྙེན་སྒྲུབ་ལས་གསུམ་ལ་རྟགས་ཐོན་པ་ཡབ་རྗེའི་ཞལ་སློབ་བསྟན་འཛིན་ལུང་རིགས་ལ་རང་རེའི་བརྒྱུད་པ་འདིར་འགོ་ཞིང་མཐུ་རྩལ་མྱུར་བ་དཀོར་བདག་ཞིང་སྐྱོང་མ་མོའི་རྗེས་གནང་ལུང་དང་བཅས་པ་གསན་ནོ། །དགུང་ལོ་ཉི་ཤུ་པ་ལ་མཆིམས་ཕུར་ལོ་མཚམས་གནང་བ་གྲོལ་རྗེས། བཀའ་བཅུ་པ་ཀརྨ་ཚེ་མཆོག་ཅེས་སྟོན་སྒོམ་རི་པ་བཟང་པོ་ཞིག་ཡོད་པ་ལ། རྒྱལ་སྲས་ཐོགས་མེད་པའི་ཡི་གེ་ལས་བློ་སྦྱོང་དོན་བདུན་མ་དང་། སྐྱིད་སྡུག་ལམ་ཁྱེར་གྱི་ཁྲིད། ཕག་མོ་ལྷན་ཅིག་སྐྱེས་མའི་གསང་སྒྲུབ་རྒྱ་གཞུང་གི་ལུང་དང་། ལྷ་ཁྲིད། རྫོགས་རིམ་རླུང་སེམས་དབྱེར་མེད་ཀྱི་ཁྲིད་དང་ལུང་། རང་བྱུང་ཞབས་ཀྱི་ཁྲིད་ཡིག་ལས་གཅོད་ཡུལ་སྟན་ཐོག་གཅིག་མ། དབང་ཕྱུག་རྡོ་རྗེའི་ཁྲིད་ཡིག་ལས་ཕྱག་ཆེན་ལྷན་ཅིག་སྐྱེས་སྦྱོར། གསེར་ཞུན་མའི་སྟེང་ནས་ནཱ་རོ་ཆོས་དྲུག་རྣམས་ཀྱི་ཁྲིད་དང་ལུང་། མི་ཏྲ་ཛོ་ཀིའི་སྙིང་པོ་དོན་གསུམ་གྱི་ཁྲིད་རྣམས་གསན། དགུང་ལོ་ཉེར་གཅིག་པ་ལ་ཡུམ་དང་མཉམ་དུ་ལྷ་སར་ཞབས་སྐོར་གསོག་པ་ཡང་མཛད། དེ་དུས་ཉིན་གཅིག་ཆར་བབས་ནས་བར་སྐོར་དུ་ཞབས་སྐོར་གནང་བའི་ཚེ་ཞབས་དུབ་པ་བསལ་ཕྱིར་མཆོད་ཁང་དུ་མཇལ་ཁར་ཕེབས་པས། ཇོ་བོའི་སྐུ་ཉིས་འགྱུར་ཙམ་གྱིས་འཕགས་ཤིང་ལྟ་བས་མི་ངོམས་པའི་མཚན་དཔེའི་གཟི་བྱིན་འབར་བ་དང་། ཞལ་འཛུམ་ཞིང་བཞད་པ་ལས་འོད་ཟེར་འཕྲོས་པས་གནས་ཁང་ཐམས་ཅད་ལ་ཉི་མ་ཤར་བ་ལྟར་ལྷག་གེར་གསལ་

― MLP003_Page_0076 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་མཐར། མུ་ནེའི་གཟུངས་ཀྱི་སྒྲ་དང་བཅས་འོད་ཟེར་རང་གི་ཐུགས་ཀར་ཐིམ་པའི་མོད་ལས་འཛིན་མེད་མཉམ་ཉིད་ཀྱི་ངང་དུ་རེ་ཞིག་འབྱམས། དེ་ལས་སད་ནས་ཀྱང་ལུས་སེམས་བདེ་བ་ཟག་པ་མེད་པར་ཡུན་རིང་གནས་པ་བྱུང་། དཔལ་ལྡན་འབྲས་སྤུངས་སུ་ཀུན་མཁྱེན་རྒྱལ་བ་མཆོག་གི་ཞལ་དཀྱིལ་མཇལ། བཞུགས་གྲལ་དེ་གྲོལ་ནས་གཟིམས་ཆུང་རབ་གསལ་ཞིག་ཏུ་འགོལ་མཇལ་ངོས་བརྩེ་བས་གཟིགས་པའི་བླང་དོར་གྱི་བཀའ་ལུང་དང་། དངུལ་བྲེ་ཆེན་གྱི་འགོ་བྱས་པའི་གནང་སྦྱིན་བཟང་པོའང་སྩལ། དེ་ནུབ་ཀོང་པོ་སྤྱི་ཁང་དུ་བཞུགས། ནང་པར་ཚོགས་ཆེན་གྱི་ཚོགས་གཟིགས། ལྷ་སར་མི་དབང་ཆེན་པོར་ཕྱག་འབུལ། སེ་རའི་གནས་གཟིགས་རྣམས་མཛད་ནས་ཕྱིར་ཕེབས་ཏེ། དར་གླིང་དུ་རྒྱལ་ཟླ་ལ་དད་ཅན་གྱི་འདུས་པ་སྟོང་ཚོ་ཙམ་དང་བཅས་བླ་མའི་དཀྱིལ་འཁོར་ལ་བརྟེན་པའི་ཚོམ་བུ་ཚོགས་ཀྱི་སྒྲུབ་པ་དང་འབྲེལ་བར་དབང་བསྐུར་མཛད་དུས། དཔའ་བོ་དང་མཁའ་འགྲོ་དུ་མས་ལྷ་རྫས་ཀྱི་མཆོད་སྤྲིན་དཔག་ཏུ་མེད་པས་མཆོད་ནས་ནུབ་ཕྱོགས་ཀྱི་ནམ་མཁར་ཐོགས་མེད་ཏུ་སོང་བ་གཟིགས་ཤིང་། དེར་འདུས་པ་ཐམས་ཅད་ཀྱིས་ཀྱང་བྱ་རྒོད་ཀྱིས་བསྐོར་བ་བྱེད་པ་དང་། འཇའི་གུར་ཁྱིམ་གྱིས་མཐོ་ནང་ཚུན་ཆད་ཕུབ་པ་ལས་མེ་ཏོག་གི་ཆར་བབས་པ་མཐོང་བས་ཐམས་ཅད་དད་པར་གྱུར། དེ་དང་འབྲེལ་བར་སྐྱེ་བདུན་སྒྲུབ་པའི་ལས་སྦྱོར་མཛད་པས་འཕེལ་ཆེ་ཞིང་། ཕྱིས་རིལ་བུ་དེས་མཚོན་ཐུབ་པའང་མང་དུ་བྱུང་ངོ་། །དགུང་ལོ་ཉེར་གཉིས་པ་ལ་དཔོན་སློབ་ཉི་ཤུ་རྩ་ལྔ་སྐོར་བཅས་པས་བསམ་ཡས་སུ་གཞུང་གི་སྐུ་རིམ་སྒྲུབ་ཏུ་ཕེབས། དེ་དུས་རྟ་མགྲིན་གླིང་གི་དབང་ཆེན་གྱི་སྐུ་དེ་རྟ་མགྲིན་དངོས་སུ་དར་ཅིག་གཟིགས། རྟ་སྐད་ཀྱི་བཞད་སྒྲས་སྐྱི་བུང་སྙམ་བྱེད་ཅིང་། ཞལ་ནས་བདུད་རྩི་བཟུང་ཐུབ་པ་སྩལ་ཏེ། ཤེལ་དམར་པོའི་གོང་བུ་ལྟ་བུ་ཆེ་ཆུང་སྲན་མ་ཙམ་ཞིག་སྣང་། ཡང་སྐབས་ཤིག་ལྷ་ཁང་དེའི་ཇོ་བོ་གཙོ་འཁོར་ལྔ་པོ་སྐུ་རྡོས་བཅས་ཀྱི་རྣམ་པ་མེད་པར་གསོན་མ་ལྟ་བུར་བཞུགས་པ་ལས་འོད་ཟེར་སྤྲོ་ཞིང་། གསུང་ཕན་ཚུན་དུ་བགྲོ་བ་ཡུལ་ཙམ་ཞིག་གཟིགས། དེ་ནས་རྒྱ་མའི་ལ་བརྒྱུད་མལ་གྲོ་ཀ་ཚལ་དུ་ཕེབས་ཏེ་སྐུ་རིམ་བསམ་ཡས་ཇི་ལྟ་

― MLP003_Page_0077 ―

^{[མ་དཔེ་གཟིགས་ན་འདིར་གནོན།]}

[Full Size]

བ་ཞིག་མཛད། དེར་རིག་འཛིན་དཀོན་མཆོག་ལྷུན་གྲུབ་དང་མཇལ་ཞིང་། བླ་མ་འདི་ལ་དེ་དུས་དང་གཞན་ཡང་སྔ་ཕྱིར་ཆོས་མང་དུ་གསན་ཏེ་རྔོག་ལུགས་དགྱེས་རྡོར་ལྷ་དགུའི་དབང་དང་། ལོ་ཆེན་བསོད་ནམས་རྒྱ་མཚོས་མཛད་པའི་མངོན་དཀྱིལ་སྦྱིན་སྲེག་དང་བཅས་པའི་ལུང་། སྔགས་སྡེབ་སྙིང་གཟེར་ནག་པོའི་ཕྱག་ཁྲིད། ལོཀྟྲི་དང་ཡང་བཟློག་གི་དབང་རིག་གཏད་ལུང་ཕྱག་ཁྲིད་དང་བཅས་པ། ཁྲོ་ཆུའི་ཡིག་ཆ་འབྲི་གུང་ལུགས་དང་། བྱ་ཁྱུང་པའི་གཟའ་བཅོས་སྐོར་གྱི་ལུང་། ཕྱག་བཞི་པ་དང་ཆོས་ཀྱི་གྲགས་པའི་དག་སྣང་མགོན་བརྒྱད་ཀྱི་རྗེས་གནང་དང་ལུང་། ཐོག་སེར་ཤོ་འུག་བསྒྱུར་ཐབས་སོགས་འབྲི་ལུགས་ཀྱི་གདམས་ཕྲན་མང་པོའང་གསན། དེ་ནས་ལྷ་སར་གོང་ཞབས་ཡས་ཕྱིན་མཇལ་དུ་ཕེབས་ཏེ། ཀུན་མཁྱེན་རྒྱལ་དབང་མཆོག་ལ་ཞང་ཁྲོམ་གྱི་ཀི་ཀང་དམར་པོའི་ལུང་ཕྱག་ཁྲིད་དང་བཅས་པ། སྨེ་བརྩེགས་དང་གུ་རུའི་གསོལ་འདེབས་བཀའ་རྩོམ་མ་གཉིས་ཀྱི་ལུང་ཡང་གསན། དེ་ལ་རྗེ་བཙུན་དམ་པ་འདིའི་བཀའ་དྲིན་མཚུངས་པ་མེད་པའི་རྩ་བའི་བླ་མ་རྣམ་གཉིས་ཞེས་གསུངས་པའི་གཅིག་ནི་འཕགས་པ་འཇིག་རྟེན་དབང་ཕྱུག་ཀུན་མཁྱེན་རྒྱལ་མཆོག་ལྔ་པ་ཆེན་པོ་འདི་ཉིད་ཡིན་ཏེ། སྐུ་དངོས་ཀྱིས་རྗེས་སུ་བཟུང་བའི་བཀའ་དྲིན་གཞལ་དུ་མེད་པར་མ་ཟད། ཕྱིས་ཡེ་ཤེས་ཀྱི་སྐུས་ཀྱང་ཡང་ཡང་བྱིན་གྱིས་བརླབས་པའི་གནད་ཀྱིས་ཀུན་མཁྱེན་བླ་མ་དང་ཡབ་རྗེ་གཉིས་ལ་རྩ་བའི་བླ་མ་རྣམ་གཉིས་ཞེས་སངས་རྒྱས་དངོས་ཀྱི་འདུ་ཤེས་ཐུགས་ལ་བཞག་ནས་ཁྱད་པར་དུ་བསྔགས་པར་མཛད་པ་ཡིན་ནོ། །དེས་ན་རྗེ་རྒྱལ་བའི་དབང་པོ་ལྔ་པ་ཆེན་པོ་ལ་ཟབ་པ་དང་རྒྱ་ཆེ་བའི་ཆོས་སྔ་ཕྱིར་མང་དུ་གསན་པ་རྣམས་འདིར་རགས་ཙམ་བསྡུས་ཏེ་བརྗོད་ན། གཙོ་བོར་རྗེ་ཐམས་ཅད་མཁྱེན་པ་ཉིད་ཀྱི་དག་པ་རབ་འབྱམས་ཀྱི་གཟིགས་ངོར། རང་རིག་ཡེ་ཤེས་བདེ་སྟོང་གི་སྣང་ཆ་རྩ་བ་གསུམ་གྱི་རོལ་པར་རང་ཤར་བས་འགགས་མེད་རྡོ་རྗེའི་གསུང་གི་གསང་བ་བསམ་གྱིས་མི་ཁྱབ་པས་གདམས་པར་མཛད་པ་ལས། གདུལ་བྱའི་སྐལ་པ་དང་འཚམས་པར་ཆ་ཤས་ཙམ་ཞིག་གླེགས་བམ་དུ་འཁོད་པ། ཟབ་ཆོས་རྒྱ་ཅན་ཞེས་རྩ་བ་དུམ་དུམ་ཁྲིགས་ཁྲིགས་

― MLP003_Page_0078 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ཆོས་སྡེ་དང་། ཁ་སྐོང་གི་བུ་ཡིག་བཅས་པའི་ནང་བཞིན་གྱི་དབང་བཀའ། བྱིན་རླབས་རྗེས་གནང་ལུང་ཟབ་ཁྲིད་ཕྱག་བཞེས་དཔེའུ་རིས་ཀྱི་ངོ་སྤྲོད་དང་བཅས་པ་བུམ་པ་གང་བྱོའི་ཚུལ་གྱིས་ལྷག་མ་མེད་པར་དགྱེས་བཞིན་དུ་སྩལ་བ་རྡོ་རྗེ་བྲག་རིག་འཛིན་སྤྲུལ་པའི་སྐུ་དང་ལྷན་ཅིག་གསན་ཏེ། བྷྲུྃ་མཚན་རྭ་གདེངས་ཐོག་མདའི་རྒྱ་ཅན་ལས། དབང་གི་མིང་ཅན་ས་ཁམས་བཻ་རོའི་སྤྲུལ། །རྣལ་འབྱོར་རྡོ་རྗེའི་སྤྲུལ་པ་མེ་ཡི་ཁམས། །ལྷོའམ་ཤར་ལྷོའི་ཕྱོགས་ནས་འབྱུང་བར་ངེས། །ལས་ཅན་སྙིང་གི་བུ་གཉིས་འདི་བསྒྲུབས་ན། །བོད་འཕུང་དམ་སྲིའི་འཚུབ་ལྷོངས་ངེས་པར་འཇོམས། །ཞེས་གཉིས་ཀ་སྐུ་སྲོག་གི་ཁམས་དང་སྦྱར་ཏེ་ལུང་བསྟན་པ་ལྟར་ཆོས་བདག་ཏུ་དབང་བསྐུར་ཞིང་མངའ་གསོལ་ནས་བརྒྱུད་པ་གཏོད་པར་མཛད། དེ་དུས་གཟིགས་སྣང་ལ། དྭངས་ཤེལ་ལྟ་བུའི་ཁང་བཟང་བཀོད་ལེགས་སྒྲིབ་པ་མེད་པའི་ནང་དུ་སྤྱན་རས་གཟིགས་དབང་འོད་ཟེར་འཕྲོ་བའི་སྐུ་ཅན་བཞུགས་པ་ལ་དད་པ་དྲག་པོས་འདུད་པར་མཛད་པ་ན། དེ་ལ་རང་གི་ཐུགས་དབྱེར་མེད་ཞུགས་ཏེ་འདྲེས་པ་ལས། སྐུའི་རྣམ་པ་སྔར་ལྟར་གསལ་བ་ལ་མཁའ་ཁྱབ་ཀྱི་ལྷ་དང་ལྷ་མོ་མང་པོ་རྣམས་ཀྱིས་དབང་བསྐུར་བ་དང་ཤིས་བརྗོད་ཀྱི་མེ་ཏོག་འཐོར་བས་དབུགས་དབྱུང་ཞིང་གཟེངས་བསྟོད་པ་དང་མངའ་གསོལ་བའི་གཟིགས་སྣང་ངོ་མཚར་བ་ཤར། ཕྱིས་རྒྱ་ཅན་ཕྱི་མ་ཤོག་ཐོག་ཏུ་མ་ཕེབས་པ་རྣམས་ཀྱང་རྗེ་འདི་ཉིད་ལ་སམ་ཊའི་ཐོག་ནས་བཀའ་ལུང་རྣམས་གནང་ཞིང་། ལུང་བསྟན་གྱི་བླང་དོར་རྣམས་ཀྱང་འདི་དང་འདིའོ་ཞེས་ཤིན་ཏུ་དགྱེས་པ་ཆེན་པོས་ཐུགས་ལ་གཅགས་པའི་བསླབ་སྟོན་ལྷུག་པར་སྩལ་གསུང་། གཞན་ཡང་ཞི་འཚོའི་སྨན་བླའི་མདོ་ཆོགཇོ་བོ་རྗེའི་ལམ་སྒྲོན། ལམ་རིམ་གྱི་ཁྲིད་ཡིག་འཇམ་དཔལ་ཞལ་ལུང་རྣམས་ཀྱི་ལུང་དང་། དམིགས་པའི་ས་ཁང་གི་ལྗགས་བཤད། མཁས་གྲུབ་རྗེའི་ཡིག་ཆའི་སྟེང་ནས་འཇིགས་བྱེད་ཀྱི་འཁྲུལ་འཁོར་ཕྱག་ལེན་ལུང་དང་བཅས་པ། སྨན་བླ་ཀླུ་དབང་གི་རྒྱལ་པོ། འཇམ་དབྱངས་ཨ་ར་པ་ཙ་ན། འཇམ་དཔལ་ཡོན་ཏན་བཟང་པོ། འཇམ་དཀར་ཤེས་རབ་འཁོར་ལོ། མ་ཏི་ལུགས་ཀྱི་འཇམ་དཀར། སེང་ལྡེང་ནགས་སྒྲོལ་གཙོ་རྐྱང་། སྒྲོལ་དཀར་བཀའ་བབས་དགུ་ལྡན།

― MLP003_Page_0079 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་རྡོར་འབྱུང་འདུལ་རྣམས་ཀྱི་རྗེས་གནང་དང་སོ་སོའི་ཡིག་ཆའི་ལུང་། སྒྲོལ་དཀར་ཡིད་བཞིན་འཁོར་ལོའི་རྗེས་གནང་། ངག་དབང་གྲགས་པའི་འཆི་བསླུ་དང་སྒྲུབ་ཐབས་སོགས་ཀྱི་ལུང་། གུར་མགོན་ལྷ་བརྒྱད་མཁའ་འགྲོ་སྦགས་སྒྲུབ་དང་། དཔལ་མགོན་བསྙེན་དུས་ཀྱི་རྗེས་གནང་། དམག་ཟོར་མའི་རྗེས་གནང་ཐུན་མོང་མ་ཡིན་པ་དང་། གཏོར་ཆོག་བསྐང་བ་དགེ་འདུན་རྒྱ་མཚོའི་ལྗགས་བསྒྲིགས་མའི་ལུང་། རྗེ་ཙོང་ཁ་པའི་བཀའ་འབུམ་ནས་ལམ་རིམ་བརྒྱུད་འདེབས། གྲུབ་ཆེན་ཕྱག་རྡོར་བའི་གསོལ་འདེབས། མདུན་ལེགས་མ། ལམ་རིམ་བསྡུས་དོན། འདུལ་བ་རྒྱ་མཚོའི་སྙིང་པོ་རྣམས་དང་། དེབ་སྔོན་ནང་གི་རྙིང་མ་ཆོས་འབྱུང་། རྣམ་རྒྱལ། རྣམ་འཇོམས་རྣམས་ཀྱི་ལུང་། དཔལ་ལྷའི་རྗེས་གནང་། གྲུབ་ཐོབ་དངོས་གྲུབ་ཀྱི་འཁོན་སྦྱོང་ལག་འཁོར་མ། ཉང་གི་རྟ་མགྲིན་བདེ་གཤེགས་འདུས་པའི་དབང་ལུང་། པེ་ཧར་གྱི་སྲོག་གཏད་དང་རྒྱུད་གསུམ་ཕྲིན་ལས་དོན་བཅུ་མ། སྲིད་པའི་གཏེར་ཁྱིམ། འཁོན་སྦྱོང་ལག་གི་འདུ་བྱེད་མ་རྣམས་ཀྱི་ལུང་། ཆོས་དབང་གི་བཀའ་བརྒྱད་གསང་རྫོགས་དང་། ན་ག་རཀྵའི་དབང་ལུང་། འཆར་ཁའི་ཟོར་དབང་དང་ལུང་། ཀརྨ་གུ་རུ་དར་ནག་བེར་ཆེན་དང་རྒྱ་ནག་གཏིང་རྫོགས་ཀྱི་ལུང་། འཇམ་དཔལ་ཕྱག་རྒྱ་ཟིལ་གནོན་ཚེ་བདག་ལྕགས་སྡིག་དང་ལྕགས་འདྲ་གཉིས་ཀྱི་དབང་ལུང་བཅས་ཆོོག་སོགས་ཕྱག་བཞེས་ཆེ་ཕྲ་ཚང་མའི་ཕྱག་ཁྲིད། གཤིན་རྗེ་གཤེད་ཧྲཱིཿདམར། མཐུ་སྟོབས་དྲེགས་བདགཀུན་ཐུབ་སྒྲིབ་ཤིང་། གོང་ཁུགས་སྲོ་མ་ཅན། སྟག་བཞོན་སྲོག་དབང་བཀའ་གཏད་ལུང་དང་བཅས་པ། བཙན་རྒོད་ཡམ་ཤུད་དམར་པོའི་སྐོར། རྟ་མགྲིན་ཡང་གསང་ཁྲོས་པ་དང་། གཡུ་ཐོག་སྙིང་ཐིགསར་བན་ཕྱོགས་མེད་ཀྱི་འཇམ་དཔལ་རྫོགས་ཆེན་རྣམས་ཀྱི་དབང་ལུང་། བྱང་ལུགས་ལེའུ་བདུན་མའི་རྟེན་བསྐྱེད། རྗེ་འབངས་ཉེར་ལྔ་དང་གཏེར་སྟོན་བརྒྱ་རྩའི་གསོལ་འདེབས། འཁོར་ལོ་འབར་བ་སྒོམ་རིམ་དང་བཅས་པ། ལྕགས་སྡོང་མའི་ཚེ་དབང་། བྱང་གཏེར་ཕུར་པ་ལུགས་གསུམ་གྱི་དབང་ལུང་། བརྟན་མའི་མཆོད་ཕྲིན་སྒོས་མདོས་དང་བཅས་པའི་ལུང་། ཐང་ལྷའི་རྗེས་གནང་ལུང་བཅས། སྟོང་དབོན་གྱི་སྐོར་དང་། བརྡ་དོན་ཟབ་ལམ་བླ་མའི་

― MLP003_Page_0080 ―

^{[མ་དཔེ་གཟིགས་ན་འདིར་གནོན།]}

[Full Size]

རྣལ་འབྱོར་གྱི་ལུང་དང་། བྱང་ཆུབ་གླིང་པའི་ཀུན་བཟང་ཐུགས་གཏེར་དང་། རིན་ཆེན་གླིང་པའི་ནཱ་ག་རཀྴའི་དབང་ལུང་། ཀུན་སྐྱོང་གླིང་པའི་བཀའ་བཟློགཞིང་སྐྱོང་གི་ལས་སྣ་ཚོགས། ཚེ་བརྟན་རྒྱལ་མཚན་གྱི་དམག་བཟློགརྟ་མགྲིན་སྐྱེར་སྒང་ལུགས། འཇོམས་བྱེད་ཉི་ཟླ་ནག་པོ། པཎ་ཆེན་གྱི་དྲག་པོ་དབུ་དགུ་པ་དང་། གནོད་སྦྱིན་ཙི་དམར་བ། རིག་འཛིན་རྗེའི་ཚེ་སྒྲུབ་བདུད་རྩི་འཁྱིལ་བ་དང་། ཐུགས་རྗེ་ཆེན་པོ་འཁོར་བ་དབྱིངས་སྒྲོལ། ནམ་མཁའ་ཟས་སུ་ཟ་བའི་ཚེ་སྒྲུབ། དབང་པོའི་སྡེའི་མ་རྒྱུད་སྙིང་པོའི་དོན་གསུམ་དང་། ཀརྨ་གུ་རུ། རིན་ཆེན་ཕུན་ཚོགས་ཀྱི་གྲོ་ལོད་ཧཱུྃ་སྒྲུབ། གུ་རུ་ནུབ་ཕྱོགས་པའི་མཚོ་སྐྱེས་རྡོ་རྗེའི་སྐུ་གསུམ་སྒྲུབ་པ་རྩ་འགྲེལ་དང་། བྷུ་རླུང་། ཡང་བཟློགསྣ་ནམ་གྱི་རྒྱ་ནག་གཏིང་རྫོགས། རླུང་འཁོར་སྲོག་གི་ཆན་པ། བསོད་ནམས་གླང་པོ་སྟོབས་བསྐྱེད། གཏད་རུལ་སྦལ་འཁོར་ཁ་སྦྱོར་མ། ཕར་ཕྱིན་རྒྱལ་བའི་བཀའ་མཐུ། མགོ་འཁོར་རང་འཐག་མ། བྱད་བཟློགའཁོན་སྦྱོང་ལག་གི་འདུ་བྱེད་མ་དང་ལག་འཁོར་མ། གྲི་རྒྱུས་མ། ཡུངས་ཀར་ཇག་པ་འཆིང་དགྲོལ། འབྲུམ་སྲུང་ར་གྲོད་མ། པད་གླིང་གི་ཆུ་གཏད། ཚེ་དབང་འཆི་མེད་དཔལ་སྟེར། སྒྲ་མི་སྙན་པའི་ཚེ་དབང་། རྗེ་ཉིད་ཀྱི་གསུང་འབུམ་ནང་ནས་གསང་འདུས་ཐུགས་སྒྲུབ་སོགས་ལས་བྱང་གི་སྐོར་རྣམས་དང་། ཆབ་ཤོག་སྐོར་སོགས་མང་པོ་སྟེ། དེ་དག་གི་དབང་ལུང་ཆ་ཚང་དང་། ཁྲིད་བཀའ་ཆེ་ཆུང་མང་པོ་གསན་ཞིང་། འདི་དག་ལས། རྒྱ་ཅན་དང་། འཇམ་དཔལ་ཚེ་བདག་བཀའ་གཏེར། རྟ་མགྲིན་ཡང་གསང་རྣམས་ལ་བྱིན་རླབས་ཀྱི་མཚན་མ་ངོ་མཚར་བ་བྱུང་བས་རྩིས་པོ་ཆེར་མཛད་དོ། །དགུང་ལོ་ཉེར་གསུམ་པ་ལ་སྐྱི་ཤོད་བདེ་ཆེན་དུ་སྤྱན་དྲངས་པའི་ཕར་ལམ་སྒྲགས་ཀྱི་ཕུར་བཞུགས་པའི་ནུབ་མོ། ཞིང་སྐྱོང་གི་མཁའ་འགྲོ་མ་མོན་མོའི་ཆས་ཅན་གྱིས་ཀུན་མཁྱེན་རྒྱལ་བ་མཆོག་གི་སྐུ་ཚེའི་འགལ་རྐྱེན་སེལ་བྱེད་ཀྱི་སྐུ་རིམ་འདི་ལྟར་སྒྲུབ་ན་སྐུ་ཆག་གཞན་དུ་འགྱུར་ཞེས་ལུང་བསྟན་གྱི་མཚན་ལྟས་བྱུང་བ་གོང་དུ་གསོལ་བ་བཞིན། མི་རིང་བར་གཏན་ལ་ཕེབས། ལྷ་ལྡན་དཀྱིལ་འཁོར་ལྡིངས་སུ་གཞུང་གི་སྐུ་ཚེའི་སྒྲུབ་པ་མཛད་དུས།

― MLP003_Page_0081 ―

^{[མ་དཔེ་གཟིགས་ན་འདིར་གནོན།]}

[Full Size]

རང་བྱོན་ལྔ་ལྡན་ཐུགས་རྗེ་ཆེན་པོའི་སྐུ་འཛུམ་ཞིང་། བཞད་པའི་གསུང་གིས་དབུགས་དབྱུང་ཞིང་བྱིན་གྱིས་བརླབས་པའི་སྣང་བ་གསལ་བར་གཟིགས། དགུན་དེ་ཨེ་ཆོས་ལྡན་དུ་ཐེགས་ཏེ། ཉང་སྟོན་རཏྣ་ཕྲིན་ལས་བསྟན་འཛིན་ལ། རཏྣ་གླིང་པའི་གུ་དྲགཐུགས་རྗེ་ཆེན་པོ་གསང་འདུས། རྟ་མགྲིན་གསང་འདུས་རྣམས་ཀྱི་དབང་ལུང་དང་། མ་ནིང་གི་སྲོག་དབང་རྒྱས་པ། ཀློང་གསལ་གྱི་བཀའ་སྲུང་གཟའི་སྐོར་དང་། རླུང་དམར་རླུང་ཞགས་རྣམས་དང་། དེ་ནས་གཉལ་དགོན་ཆུང་དུ་ཐེགས་ཏེ། གུང་ཐང་པ་བཅོམ་ལྡན་ལྷོ་མཛེས་ཀྱི་དབོན་བརྒྱུད་མགོན་པོ་མཛེས་པའི་དབང་ཕྱུག་ལ། གྲུབ་ཆེན་ལས་ཀྱི་རྡོ་རྗེའི་ཕྱག་རྡོར་སྙན་བརྒྱུད་ཀྱི་དབང་ལུང་རྣམས་གསན། དགུང་ལོ་ཉེར་བཞི་པ་ལ་གཟིམས་ཆུང་འཆི་མེད་སྦུག་ཏུ་སྐུ་མཚམས་ལ་བཞུགས་པའི་ཚེ། སློབ་དཔོན་མཚོ་སྐྱེས་རྡོ་རྗེ་གཞོན་ནུའི་ཚུལ་ཅན་བུད་མེད་མཛེས་མའི་འཁོར་གྱིས་བསྐོར་བ་ནམ་མཁའ་ལ་ཡུད་ཀྱིས་སྣང་བ་གཟིགས་ཤིང་། དེའི་བྱིན་རླབས་ཀྱིས་འབྱུང་འགྱུར་འགའ་ཞིག་མེ་ལོང་ནང་གི་གཟུགས་བརྙན་བཞིན་ཐུགས་ལ་གསལ་པོ་ཤར་བ་ལྟར་ཕྱིས་མངོན་དུ་གྱུར། སྟོན་གྱི་དུས་ཕོ་བྲང་ཆེན་པོར་རྣལ་འབྱོར་གྱི་དབང་ཕྱུག་འཁྲུལ་ཞིག་དམ་པ་ཀློང་ཡངས་འོད་གསལ་ལ། རཏྣའི་ཚེ་སྒྲུབ་གསང་འདུས་ཀྱི་དབང་ལུང་དང་། རྟ་མགྲིན་གྱི་བཀའ་སྲུང་གནོད་སྦྱིན་དམར་ནག་གི་སྐོར་གསན་ཞིང་། གཞན་ཡང་འདི་ལ་སྔ་ཕྱིར་གསན་པ་ནི་རྡོ་རྗེ་སྙིང་པོའི་ཁྲིད་ཡིག་གི་སྟེང་ནས་བི་མ་སྙིང་ཐིག་གི་ཁྲིད། སེམས་སྡེ་ཁམས་ལུགས་ཨ་རོ་སྙན་བརྒྱུད་ཀྱི་རིག་པའི་རྩལ་དབང་དང་ཁྲིད་བཀའ་ལུང་དང་བཅས་པ། དོང་སྤྲུགས་པདྨ་བརྒྱ་ལྡན་གྱི་དབང་དང་ཁྲིད། ཆོ་ག་རྡོ་རྗེ་སེམས་དཔའི་ཞལ་ལུང་། དེའི་ཆ་ལག་གནས་ལུང་དང་བཅས་པའི་ལུང་། རོག་ལུགས་ཕུར་པ་ལྷ་ནག་དང་། ཚེ་དཔག་མེད་ལུང་ལུགས་ཀྱི་དབང་ལུང་། ལོ་ཆེན་བསོད་ནམས་རྒྱ་མཚོས་མཛད་པའི་ཞང་བློན་གྱི་ལས་བྱང་། རིག་འཛིན་སྲོག་སྒྲུབ་ནང་ནས་ཕག་མོའི་ལས་བྱང་། གཅོད་དང་གླུད་རབས། གཏུམ་མོའི་ཁྲིད། ལུང་བསྟན་སྐོར་རྣམས་ཀྱི་ལུང་ཡང་གསན་ནོ། །དགུང་ལོ་ཉེར་ལྔའི་དུས། སྐྱིད་ཤོད་དུ་ཕོ་

― MLP003_Page_0082 ―

^{[མ་དཔེ་གཟིགས་ན་འདིར་གནོན།]}

[Full Size]

བྲང་རྩེར། ཕྱི་ནང་གི་ཡོན་ཏན་དུ་མ་མངའ་བའི་རྡོ་རྗེ་འཛིན་པ་ཆེན་པོ་ཞྭ་ལུ་མཁན་ཆེན་རིན་ཆེན་བསོད་ནམས་མཆོག་གྲུབ་ལ། ཚར་གསུམ་ཁུགས་པ་དང་། ཆོས་དབང་གི་ཚེ་སྒྲུབ་བུ་སྟོན་ནས་བརྒྱུད་པ་གསན། གཞན་ཡང་བླ་མ་འདི་ལ་སྔ་ཕྱིར་ཆོས་གསན་པ་ནི། བུ་སྟོན་གྱི་འདུལ་བའི་ལས་ཆོགབདེ་མཆོག་ལྷ་ལྔ་དྲིལ་བུ་ལུགས་ཀྱི་དབང་བཞི། ཁ་ཆེ་པཎ་ཆེན་ལུགས་བདེ་མཆོག་དཀར་པོ་ལྷན་སྐྱེས་ཀྱི་བྱིན་རླབས་ཚེ་ཁྲིད་དང་བཅས་པ། ནཱ་རོ་མཁའ་སྤྱོད་ཀྱི་བྱིན་རླབས་ཉམས་ཁྲིད་ལུང་དང་བཅས་པ། མཻ་ཏྲི་མཁའ་སྤྱོད་ཀྱི་བྱིན་རླབས་དང་ལུང་། བཅུ་གཅིག་ཞལ་དཔལ་མོ་ལུགས། ཡི་གེ་དྲུག་པ་གཙོ་འཁོར་གསུམ། ཁ་སར་པ་ཎི་ནགས་རིན་ལུགས། འོད་ཟེར་ཅན་མ་ཞལ་གཅིག་ཕྱག་གཉིས་མ། ཤེར་ཕྱིན་དཀར་མོ། མི་གཡོ་བ་དཀར་པོ། ཕྱག་རྡོར་འགྲོ་བཟང་ལུགས། རྣམ་འཇོམས་ལྗང་སྔོན་བ་རི་ལུགས། སྨེ་བརྩེགས་དུད་ཁ་ཕྱག་དྲུག་པ། ཁྲོ་མོ་སྨེ་བརྩེགས། ཏྲཀྴད་དྭགས་ལུགས། ཏྲཀྴད། མ་ནིང་། ཛམ་སེར་ནག་རྣམས་ཀྱི་རྗེས་གནང་། ཚོགས་བདག་དམར་པོའི་རྗེས་གནང་ཐུན་མོང་མ་ཡིན་པ། ཏྲཀྴད་མྱོས་ལུགས་ཕྱག་བཞི་པའི་རྗེས་གནང་དང་སྒྲུབ་ཐབས་དགྲ་བགེགས་ཀུན་འཇོམས་ཀྱི་ལུང་། གྲྭ་པའི་ཕྱག་རྡོར་ཁང་བརྩེགས། རྣམ་སྲས་ལྗངས་ཡུལ་མ། གནུབས་ལུགས་རྟ་སྔོན་མ་རྣམས་ཀྱི་རྗེས་གནང་དང་ལུང་། རྣམ་སྲས་སེར་ཆེན་ཞི་དྲག་དང་འབྲེལ་པའི་ལུང་དང་རྗེས་གནང་། བུ་སྟོན་གྱིས་མཛད་པའི་གཏོར་ཆོག་བསྟོད་པ་དང་བཅས་པའི་ལུང་རྣམས་གསན་ནོ། །དེ་ནས་ཕྱིར་ལམ་རྡོ་རྗེ་བྲག་ཏུ་ཕེབས་ཏེ། སྔ་འགྱུར་བསྟན་པའི་མངའ་བདག་རིག་འཛིན་སྤྲུལ་པའི་སྐུ་ཀུན་བཟང་པདྨ་ཕྲིན་ལས་ལ་འདི་དུས་འཆི་མེད་འོད་སྣང་གི་དབང་གསན་ཞིང་། དུས་གནས་གཞན་དུ་གསན་པ་ལ་སྒྱུ་འཕྲུལ་ཞི་ཁྲོའི་དབང་། འདུས་པ་ཆེན་པོ་མདོའི་དབང་། ན་རག་དོང་སྤྲུགས་ཀྱི་དབང་། མདོ་མགོན་ལེགས་ལྡན་གྱི་རྗེས་གནང་དང་གསོལ་མཆོད་ཀྱི་ལུང་། ཆོས་དབང་གི་བླ་མ་གསང་འདུས་ཀྱི་རྩ་དབང་། ཟླུམ་པོ་བཞི་དབང་། ལས་བྱང་གི་ལུང་བཅས། སེམས་བསྐྱེད་བསྟན་པའི་སྙིང་པོ། ལས་འབྲེལ་གྱི་གཟའི་དབང་དང་ལས་བྱང་དོན་བདུན་པའི་ལུང་། ཞང་ཁྲོམ་གྱི་ཁྲོ་ཆུ་དུག་གདོང་

― MLP003_Page_0083 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། འཆར་ཁ་སྒྲོམ་བུ་མའི་དབང་ལུང་། འཇམ་དཔལ་ཚེ་བདག་གི་དབང་། ཐུགས་སྒྲུབ་ཀྱི་དབང་བཀའ་བསྡུས་པ་དང་། ལྕགས་སྡོང་མའི་ཚེ་དབང་། རིག་འཛིན་གདུང་སྒྲུབ་ཀྱི་དབང་ལུང་། བསྟན་སྲུང་ཡོངས་རྫོགས་ཀྱི་དབང་དང་ཕྲིན་ལས་སྐོར་གྱི་ལུང་། བྱང་གཏེར་ཚེ་གུར་སྦྲགས་མའི་དབང་ལུང་། པུ་ཏྲའི་རྗེས་གནང་ཟུར་བཀའ་དང་བཀའ་བཀོལ་མའི་ལུང་། འཇོམས་བྱེད་ཉི་ཟླ་ནག་པོའི་ཕྱག་བཞེས་དུག་ཁྲག་བུམ་ལྕགས་མ། བླ་མ་སྐུ་གསུམ་མའི་ཁྲིད། དབང་པོའི་སྡེའི་བླ་མ་མཚོ་སྐྱེས་རྡོ་རྗེ། ཡོལ་མོ་བའི་དག་སྣང་མཁའ་འགྲོའི་བརྡ་དབང་དང་། རྣམ་ཐར་ཞལ་གསུང་མ། བ་མཁར་སྨུག་པོའི་བར་ཆད་ལམ་སེལ་དང་། ཨོ་རྒྱན་མངལ་སྐྱེས་ཀྱི་རྣམ་ཐར། རིག་འཛིན་སྲོག་སྒྲུབ་ཀྱི་རྩ་དབང་། ཚེ་དབང་། རིག་པའི་རྩལ་དབང་དང་། བཀའ་སྲུང་སྡེ་བཞིའི་སྲོག་དབང་རྣམས་དང་ལུང་། ལས་བྱང་སྨད་ལས་ཧྲཱིཿཧཱུྃ་སྦྲེལ་མའི་ཚེ་སྒྲུབ། ངོར་ལུགས་ཀྱི་ཀྱཻ་རྡོར་ལམ་དབང་རྣམས་གསན་ནོ། །དབྱར་དེ་ལྷོ་བྲག་ཏུ་ཕེབས་ནས་སྨྲ་བོ་ལྕོག་ཏུ་མངའ་བདག་བསྟན་འཛིན་ཆོས་དབང་ལ་ཉང་གཏེར་མཁའ་འགྲོ་ཆེན་མོའི་སྐོར་གསན། དེ་དུས་ཉིན་ཞིག་གཏེར་རྫས་ཀྱི་བླ་དཔེ་སོགས་མཇལ་བའི་ཚེ། ནུབ་ཕྱོགས་ཀྱི་ནམ་མཁར་རྡོ་རྗེ་རྣལ་འབྱོར་མ་དམར་གསལ་མེ་འོད་འཕྲོ་བ་གཟི་མདངས་ཅན་ནམ་མཁའ་གང་བའི་སྐུ་གསལ་ཞིང་སྔགས་སྒྲ་འབྲུག་སྟོང་གི་སྒྲ་ལྟར་སྒྲོག་པའི་སྒྲས་འཇིགས་སྐྲག་གི་སྣང་བ་རང་ཤར་རིག་པའི་ངོར་གྲོལ་ཚེ། སྐུའི་སྣང་བ་དེའང་མེ་ལོང་ལ་ཧས་བཏབ་པ་ལྟར་བཾ་ཡིག་འོད་ཀྱི་ཐིག་ལེར་ཞུ་བ་རང་གི་ཐུགས་ཀར་ཐིམ་པའི་གསལ་སྣང་ཤིན་ཏུ་བརྟན་པའི་ཐུགས་ཉམས་ཤར། དེའི་ནུབ་མནལ་ལམ་ལ་ཁང་བཟང་ཡིད་དུ་འོང་བར་བླ་མ་མངའ་བདག་ཆེན་པོ་ཉིད་སྐུ་གཟི་བྱིན་རྒྱས་པ་རལ་པའི་ཐོར་ཚུགས་ཅན་གྱིས་མཁའ་འགྲོའི་གདམས་པ་རྣམས་རྫོགས་པར་གནང་བ་བྱུང་། བླ་མ་འདི་ལ་དུས་གཞན་དུ་རྫོགས་ཆེན་ཚེ་དབང་དང་། ཡང་རྫོང་སྙིང་ཐིག་གི་དབང་ལུང་། མགོན་པོའི་སྲོག་འཁོར་དང་ལྷ་མོ་པ་ཏྲའི་སྐོར་རྣམས་ཀྱང་གསན་ནོ། །ལྷོ་བྲག་ནས་ཕྱིར་ལམ་ཁྲ་བོ་བྱང་ཐང་དུ་ཞག་ས་ཕོག་པའི་མཚན་མོ་དམ་སྲིའི་ཆོ་འཕྲུལ་

― MLP003_Page_0084 ―

^{[མ་དཔེ་གཟིགས་ན་འདིར་གནོན།]}

[Full Size]

མི་བཟད་པ་འཇིགས་སུ་རུང་བ་བྱུང་བའི་ཚེ། རང་ངོ་ལ་གཟིགས་པས་འཇིགས་སྣང་རང་རིག་གི་རྩལ་དུ་རྟོགས་པའི་ངང་ལ་ཅུང་ཟད་མནལ་བ་ན། མཁའ་འགྲོ་སྨུག་ནག་གཟི་མདངས་རྒྱས་པ་རུས་རྒྱན་ཅན་མི་ཐོད་ཀླད་ཁྲག་གིས་གང་བ་ཞལ་དུ་གསོལ་ཞིང་། རོའི་སྟེང་ལ་འཁོད་པས་གཟུང་འཛིན་འཁྲུལ་གཅོད་ཀྱི་གདམས་པའི་གནད་གསང་སྩལ་བ་རྨིས་ནས་སད་པ་དང་། དེ་དོན་ཐུགས་ཉམས་སུ་བསྟར་བས་བར་གཅོད་ལས་རྒྱལ་བའི་མཚན་མ་བརྙེས་པར་གྱུར། དགུང་ལོ་ཉེར་བདུན་པ་ལ་ལྷ་ལྡན་དུ་རྒྱ་མཁར་དབུ་མཛད་རྡོ་རྗེ་ཚེ་བརྟན་ལ། འདར་ཕྱར་ལུགས་ཀྱི་སེར་སྲུང་ཉིན་འཚོལ་མ་དང་། ལྡོག་ཆུ་མིག་པ་ཟུར་སྟོན་ངག་དབང་ཕུན་ཚོགས་ལ་ན་རག་དོང་སྤྲུགས་ཀྱི་དབང་ལུང་། མདོ་མགོན་ལེགས་ལྡན་གྱི་དབང་ལུང་། ཕུར་པ་འབུམ་ནག་གི་ལུང་རྣམས་དང་། དུས་གཞན་དུ་འཆར་ཁ་སྒྲོམ་བུ་མའི་ཆོས་ཚན་ཁ་ཤས། གཏད་རུལ་མན་ངག་གའུ་ཁ་སྦྱོར། བཙན་སྲུང་། ཚེ་སྒྲུབ་བཅུད་ལེན་ཚེ་པྲ་བརྟགས་པ། ཨོ་རྒྱན་གླིང་པའི་ཁྱབ་འཇུག་རུས་སྦལ་མ་དང་། འབྲུམ་ནད་སྔགས་ཀྱིས་བཅོས་པའི་ཉམས་ཡིག་རྣམས་གསན། བཀྲ་བཟང་ཆོས་རྗེ་གྲུབ་པའི་དབང་པོ་སེ་སྟོན་ཐུགས་མཆོག་འོད་འབར་ལ་འདི་ནས་བརྩམས་ཏེ་སྔ་ཕྱིར་གསན་པ་ནི། མཁའ་འགྲོ་སྙིང་ཐིག་དང་བྱང་གཏེར་ཐུགས་སྒྲུབ་གཉིས་ཀྱི་དབང་ལུང་ཁྲིད་དང་བཅས་པ། ཐུགས་རྗེ་ཆེན་པོ་འགྲོ་བ་ཀུན་སྒྲོལ། ཚེ་དཔག་མེད་ལོངས་སྐུ། མངའ་དབང་རིན་ཆེན་འབར་བ། རྟ་མགྲིན་དྲེགས་པ་དབང་སྡུད། བསྟན་བསྲུང་ཡོངས་རྫོགས། སྔགས་སྲུང་ཨེ་ཀཱ་ཛ་ཊི། ཚེ་བརྟན་རྒྱལ་མཚན་གྱི་གུ་རུ་ཞི་དྲག་རྣམས་ཀྱི་དབང་ལུང་གསན། དགུང་ལོ་ཉེར་དགུ་པ་ཤིང་སྟག་ཟླ་བ་བཅུ་གཉིས་པ་ལ། བསྟན་འགྲོའི་དཔལ་མགོན་ས་སྐྱ་བདག་ཆེན་ཡབ་སྲས་གྲྭ་ཐང་དུ་ཕེབས་པ་མཇལ་དུ་ཐེགས་ཏེ། བདག་ཆེན་བསོད་ནམས་དབང་ཕྱུག་ལ་ས་ལོའི་ཕུར་ཆུང་། ཀྱེ་རྡོར་རྒྱུ་དབང་། ཀུན་རིགས་ཀྱི་དབང་རྣམས་དང་། གདུང་བརྒྱུད་རིན་པོ་ཆེ་ངག་དབང་ཀུན་དགའ་བཀྲ་ཤིས་ལ་དེ་དུས་ཕྱག་རྡོར་འབྱུང་

― MLP003_Page_0085 ―

^{[མ་དཔེ་གཟིགས་ན་འདིར་གནོན།]}

[Full Size]

འདུལ་གྱི་རྗེས་གནང་དང་། རྟིང་སོར་ཚེ་དཔག་མེད་ཆག་ལུགས། གུར་མགོན་ལྷ་བརྒྱད་མ། འཆི་མེད་དཔལ་སྟེར། འཇམ་དབྱངས་ཨ་རཱ་པ་ཙ་ན་རྣམས་ཀྱི་རྗེས་གནང་གསན། ཤིང་ཡོས་ཕོ་བྲང་ཆེན་པོར་སྤྲུལ་པའི་སྐུ་རྒྱ་སྟོན་འོད་གསལ་རང་གྲོལ་ལ་སྤྱི་མདོ་དགོངས་པ་འདུས་པའི་ལུང་། དུས་གནས་གཞན་ཅི་རིགས་པར། སྒྱུ་འཕྲུལ་ཞི་བ་དང་། ཁྲོ་བོའི་དབང་བཀའ། སྒྱུ་འཕྲུལ་ཚེ་དབང་། ཕུར་པ་དཔྱལ་ལུགས་དང་། གཤིན་རྗེ་གཤེད་རུ་མཚོན་དམར་པོའི་དབང་ལུང་། ཡང་དག་མེ་གཅིག་ཟུར་ལུགས་ཀྱི་ཡིག་ཆའི་ལུང་རྣམས་གསན། བླ་མ་བྱམས་པ་རིན་ཆེན་ཆོས་འཕེལ་ལ་གཟའ་བཅོས་རིན་ཆེན་ཕྲེང་བའི་ལུང་དང་ཕྱག་ཁྲིད། ས་རྟ་ལོ་གདན་སར་མངོན་པར་མཁྱེན་པ་མངའ་བ་གྲུབ་དབང་ཀུན་བཟང་ཆོས་རྒྱལ་ལ། རྫོགས་ཆེན་ཀློང་སྡེ་བཻ་རོ་ཙ་ནའི་སྙན་བརྒྱུད་རྡོ་རྗེ་ཟམ་པའི་དབང་ལུང་། མན་ངག་གི་བཀའ་རྣམས་དང་། ཕྱིས་རོག་ཤེས་རབ་འོད་ཀྱི་མཚོན་དཔེ་ཆེན་མོ་སྒྲུང་བརྒྱུད་དང་བཅས་པའང་གསན། ལོ་དེ་ནང་ནས་བརྩམས་ཏེ་དགོན་གསར་ཆོས་རྗེ་འབྲོམ་སྟོན་གཞན་ཕན་རྣམ་རོལ་སྔ་ཕྱིར་གསན་པར། རྡོ་རྗེ་གླིང་པའི་བླ་མ་བཀའ་འདུས་དང་གསང་འདུས། ཐུགས་རྗེ་ཆེན་པོ་རྒྱལ་བ་རྒྱ་མཚོ་དང་ངན་སོང་ཀུན་སྐྱོབ། ཐུགས་སྒྲུབ་རིག་པ་གཅེར་སྟོན་ལས་ཚོགས་ཉེར་གཅིག་དང་བཅས་པ། བླ་མ་དྲག་པོ་རྒྱས་འབྲིང་བསྡུས་གསུམ། ཀློང་ཡངས་མ་རྒྱུད་མཁའ་འགྲོའི་གསང་ཐིགརྡོར་སེམས་སྙིང་ཐིགགསང་སྔགས་སྤྱི་སྤུངས་ཀྱི་སྐོར། རྩ་གསུམ་སྒྲུབ་སྐོར། ཧཱུྃ་སྐོར་སྙིང་ཐིགརྫོགས་ཆེན་གསེར་ཐུར། ཐུགས་རྗེ་ཆེན་པོ་ཡང་ཟབ་གནད་སྐོར་དང་། ཡང་སྙིང་འདུས་པ། བཀའ་བརྒྱད་གསང་རྫོགས། རྡོ་རྗེ་ཕུར་པའི་སྐོར། རྟ་ནག་ལྕགས་རལ་ཅན་དྲེགས་འདུལ་རྣམས་ཀྱི་དབང་ལུང་། གསང་སྔགས་ལམ་རིམ། སྒྲོལ་མའི་སྐོར། སྨེ་བརྩེགས། གཤིན་རྗེ་ཕུང་བྱེད་འཁོར་ལོ་ནག་པོ། མ་གཤིན། ནཱ་ག་རཀྴ། ལོཀྟྲི་རྣམས་ཀྱི་ལུང་། ལྷ་ཆེན་གྱི་རྗེས་གནང་དང་ལུང་། གཏེར་ཁ་སྣ་ཚོགས་སྐོར། འབྲས་ལྗོངས་ལམ་ཡིག་འཕོ་ཁྲིད་འཁོར་བ་རྩད་གཅོད་སོགས་གཏེར་ཆོས་ཕྲན་ཚེགས་མང་བ། ཆོས་སྐྱོང་བཀའ་འདུས་མ་ནིང་སྐོར། སྡེ་དཔོན། རྣམ་སྲས་དམར་པོ། ཡུལ་འཁོར་སྲུང་། སྐྱི་མཐིང་མ། མཁའ་

― MLP003_Page_0086 ―

^{[མ་དཔེ་གཟིགས་ན་འདིར་གནོན།]}

[Full Size]

རི། ཐང་ལྷ་རྣམས་དང་། རྡོར་གླིང་བཀའ་འབུམ་སྐོར་བཅས་པའི་ལུང་། གླིང་པ་ལོ་ཆེན་དག་སྟོན་ཆོས་རྒྱལ་བསྟན་འཛིན་ལ་གཡུང་སྟོན་པའི་ཡི་གེའི་སྟེང་ནས། སེམས་སྡེ་རིག་པའི་རྩལ་དབང་བཅོ་བརྒྱད། དབང་ཆོག་རིན་ཆེན་ཕྲེང་བ་དང་། སྦྲང་རྩིའི་ཆུ་རྒྱུན་སྟེང་ནས་འདུས་པ་མདོའི་དབང་ཟུར་ལུགས་དང་ཁམས་ལུགས། དབང་ཆོག་སོ་སོའི་ལུང་དང་བཅས་པ། མདོ་དབང་གི་ཡིག་སྣ་གབ་པའི་དབང་ལེ་ཚན་དྲུགདབང་དོན་བསྡུས་པ། མན་ངག་གསང་བ་རྣམས་ཀྱི་ལུང་། གཙང་སྟོན་ནས་བརྒྱུད་པའི་ཞི་བའི་ཟབ་དབང་གི་རྒྱུན་མ་ཆད་པས་ཁྱད་པར་འཕགས་པ་སྒྱུ་འཕྲུལ་ཞི་ཁྲོའི་དབང་ཀཿཐོག་ལུགས། སྒྲོ་སྟོན་བཛྲ་རཏྣའི་ཡི་གེ་ལས་སྒྱུ་འཕྲུལ་གྱི་གྲོལ་ལམ་ཟབ་མོའི་ཁྲིད་རྣམས་གསན། ས་ལུག་ལོ་འབྲི་གུང་རྩེ་པར་རིག་འཛིན་སྤྲུལ་པའི་སྐུ་དཀོན་མཆོག་ཕྲིན་ལས་ལ། རྗེ་ཆོས་ཀྱི་གྲགས་པས་མཛད་པའི་ནཱ་རོ་ཆོས་དྲུག་གི་ཁྲིད་ཡིགརྟིང་སོར་ཞྭ་ལྷ་ཁང་དུ་དགོངས་གཅིག་གི་རྩ་བ་རྡོ་རྗེའི་ཚིག་རྐང་དང་། དེའི་རྣམ་བཤད་ཆོས་ཀྱི་གྲགས་པས་མཛད་པ་རྣམས་ཀྱི་ལུང་། ཡང་ཕོ་བྲང་ཆེན་མོར་བདེ་འདུས་ཁྲོ་བོའི་དབང་བཀའ་རྣམས་གསན་ཞིང་། གཞན་ཡང་འུག་བྱ་ལུང་པ་ཟུར་ཀུན་དགའ་རིག་འཛིན་ལ་སྒྱུ་འཕྲུལ་ཚེ་སྒྲུབ་ཟུར་ལུགས་ཀྱི་དབང་ལུང་། མདོ་པོ་ཆེ་པ་དཀོན་མཆོག་ལྷུན་གྲུབ་ལ་སྒྱུ་འཕྲུལ་རྡོ་རྗེ་ལས་རིམ་དང་། དམ་ཚིག་རྡོ་རྗེ་གསལ་བཀྲའི་ལུང་། ཏྲེ་བོ་སྤྲུལ་པའི་སྐུ་ཆོས་ཀྱི་དབང་པོ་ལ་རྗེ་བཙུན་ཀུན་དགའ་གྲོལ་མཆོག་གི་ཁྲིད་བརྒྱ་དང་། ཕྱིས་སུ་གསང་མདར་པེ་ཧར་གྱི་སྒྲུབ་ཐབས་སྤྲིན་ནག་འཁྲིགས་པའི་ལུང་། ལྕགས་སྤྲེལ་བཤད་སྒྲུབ་ཆོས་འཁོར་དུ་སྦྱོ་ར་འཇིགས་མེད་གྲུབ་པ་ལ། བོ་དོང་ལུགས་དབྱངས་ཅན་མའི་རྗེས་གནང་དང་ཡིག་ཆ་ཚང་མ། དེ་ཉིད་སྙིང་པོ། སྦས་དོན་ཀུན་གསལ་རྣམས་ཀྱི་ལུང་ཡང་གསན། ལྕགས་བྱ་ཤར་མཚམས་ཕོ་བྲང་ཆེན་མོར་བཅོ་བརྒྱད་ཆོས་རྗེ་མཁྱེན་རབ་བསྟན་འཛིན་ལ་འཇིགས་བྱེད་དཔའ་བོ་གཅིག་པའི་རྗེས་གནང་། རོང་དུ་ཉང་བན་ལེགས་བཤད་རྒྱ་མཚོ་ལ་ཕུར་པ་སྐྱི་ལུགས་གདམས་ངག་དྲུག་པར་གྲགས་པའི་དབང་ལུང་། གོང་དཀར་ཆོས་སྡེར་མདོ་པ་ཆོས་རྗེ་དགེ་བའི་དབང་པོར་ཕུར་པ་འཁོན་ལུགས་

― MLP003_Page_0087 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོད་ལས་ཀྱི་དབང་དང་། སྨད་ལས་དྲག་པོ་སྒྲོལ་དབང་། བླ་མ་དམ་པའི་ཡིག་ཆ་ཚན་བཞིའི་ལུང་དང་། ཆུ་ཁྱི་ལོར་རས་ཆེན་རིག་འཛིན་རྣམ་རྒྱལ་ལ་ཕག་མོ་ཟབ་རྒྱའི་འཁྲུལ་འཁོར་གྱི་ཕྱག་ཁྲིད། སྐྱི་སྟོན་རིག་འཛིན་པདྨ་དབང་ཆེན་ལ་ཆོས་དབང་གི་ཡང་དག་སྙིང་པོ་སྐོར་གྱི་དབང་ལུང་། སངས་རྒྱས་གསང་བའི་སྒྱུ་འཕྲུལ་ལམ་རིམ་ཆེ་བ། ཞི་བ་འབྲིང་པོའི་སྒྲུབ་ཐབས་རིན་ཆེན་དྲྭ་བ། མེ་ལོང་ལྟ་བུའི་སྒྲུབ་ཐབས་ཞི་བ་དྲྭ་ཆུང་། ཁྲོ་བོ་དམ་པ་རྒྱན། ཚོགས་ཀྱི་འཁོར་ལོ་ཐུགས་ཀྱི་སྒྲུབ་པ། ཞི་བ་རྟོག་པ་ལྷ་རྒྱུད་དེ་སྒྱུ་འཕྲུལ་ཕྲ་མོའི་སྐོར་དང་། གསོལ་འདེབས་ཆོས་དབྱིངས་སྤྲོས་བྲལ་མ། དེའི་འགྲེལ་པ་དང་། དོང་སྤྲུགས་ཀྱི་ཆོག་བསྒྲིགས་ནོར་བུའི་ཕྲེང་བ་གནས་ལུང་དང་བཅས་པ་སེ་སྟོན་གྱིས་མཛད་པ། ལེགས་ལྡན་གྱི་མགོན་པོད་རྣམས་ཀྱི་ལུང་། ཟབ་ལུང་བ་སྟོན་པ་རྡོ་རྗེ་ཆོས་དབྱིངས་ལ་ཡང་དག་སོ་ལུགས། འཇམ་དཔལ་གདོང་དྲུགཁ་ཐུན་རྣམས་ཀྱི་དབང་ལུང་། ལེགས་ལྡན་གྱི་མཆོད་ཕྲིན་དང་། ཟམ་ལུང་གཅེས་ཕྲེང་རྣམས་ཀྱི་ལུང་། ཁྱུང་སྟོན་གྲུབ་པ་རྡོ་རྗེ་ལ་རྫོགས་ཆེན་སེམས་སྡེ་ཉང་ལུགས་ཀྱི་ཁྲིད་དང་། ཁྲིད་ཡིག་གསོལ་འདེབས་བཅས་པའི་ལུང་རྣམས་གསན། ཆུ་ཕག་ལོར་མཐུ་ཆེན་ལྕགས་གཏུན་པ་རྣམ་རྒྱལ་བཟང་པོ་ལ་འཇམ་དཔལ་གཤིན་རྗེ་གཤེད་རུ་མཚོན་དམར་པོའི་དབང་ལུང་དང་། རུ་མཚོན་བཅས་ཆོག་གི་ཕྱག་བཞེས་སོགས་དྲག་སྔགས་ཀྱི་ཟབ་གནད་འགའི་ཕྲ་གཅོད། རྩེ་གདོང་དུ་ཞབས་དྲུང་ཁྲི་ཆེན་བསོད་ནམས་བསྟན་འཛིན་ལ་ཉང་གཏེར་རྟ་ནག་ལྕགས་རལ་ཅན་ཡང་ཕྱུང་ནག་པོའི་དབང་ལུང་། གཉན་སྒྲོལ་གྱི་རྗེས་གནང་དང་མཚན་བརྒྱའི་ལུང་། ཚེ་དཔག་མེད་དཀར་པོ་ཆག་ལུགས། ཐུབ་པ་རྡོ་རྗེ་གདན་པ། གཟུངས་གྲ་ལྔ་རྣམས་ཀྱི་རྗེས་གནང་། འུག་བྱ་ལུང་པ་ཟུར་ཤཱཀྱ་ཤེས་རབ་ལ་ཉང་གཏེར་རྟ་མགྲིན་བདེ་གཤེགས་འདུས་པའི་དབང་དང་ལས་བྱང་གི་ལུང་། ལེགས་ལྡན་གྱི་རྗེས་གནང་བར་པ་དང་ལུང་ཁ་ཤས། བསམ་སྡིངས་པ་བདེ་ཆེན་ཕྲིན་ལས་མཚོ་མོ་ལ་ཕག་དཀར་གྱི་རྗེས་གནང་རྣམས་གསན། ཤིང་གླང་ལོ་དིང་རི་ཆོས་རྗེ་འཆི་མེད་བློ་གྲོས་བརྟན་པ་ལ། བོ་ལུགས་དམག་ཟོར་མའི་

― MLP003_Page_0088 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲུབ་སྐོར་གྱི་ལུང་དང་། མེ་ཡོས་ལ་འབྲས་བུ་གླིང་པ་སྡོམ་བརྩོན་ངག་དབང་ཨོ་རྒྱན་ལ་རྡུལ་ཚོན་གྱི་དཀྱིལ་འཁོར་དུ་སངས་རྒྱས་མཉམ་སྦྱོར་རིགས་བསྡུས་ཀྱི་དབང་བཀའ་རྣམས་གསན། ས་སྦྲུལ་ལོ་སྐྱི་སྟོན་འཁོར་འདས་རང་གྲོལ་ལ། དོང་སྤྲུགས་སྐོར་གྱི་ཡིག་ཆ་འགྱོད་ཚངས་ཀྱི་གླེང་གཞི། པདྨས་མཛད་པའི་གཞུང་ཆུང་། ན་རག་འདོན་ཐབས། འགྱོད་ཚངས་ཀྱི་བསྡུས་དོན། དབང་ཆོག་བརྒྱ་ལྡན་ལས་རིམ། རྡོ་རྗེ་རིན་ཆེན་གྱི་སྐོང་འགྲེལ། ཕྱི་ནང་གསང་གསུམ་གྱི་བུམ་ཁྲུས་རྣམས་དང་། གྲུབ་ཐོབ་ཉི་མའི་སྙིང་པོའི་ཞལ་ལུང་གཉན་དཔལ་དབྱངས་ནས་བརྒྱུད་པའི་སྒྱུ་འཕྲུལ་ལམ་རིམ་གྱི་ཁྲིད། ལུང་ཕྲན་བཅུ་དྲུག་སོགས་སྒྱུ་འཕྲུལ་གནས་ལུང་སྐོར། བི་མ་ལའི་ཐིག་གི་པིཎྜཱརྠ། སྐུ་གདུང་ལས་ཕྲེང་། ནམ་སྙིང་གི་ཞི་ཁྲོ་གལ་ཕྲེང་། རབ་གནས་ཀྱི་རྩ་བ་རྣམ་པར་བསྲེས་པ་གསུམ་དང་སྦྱར་བ། ཟུར་ཚོ་སྟོད་པའི་ལུགས་ཀྱི་སྒྱུ་འཕྲུལ་གྱི་ལོ་རྒྱུས་དབང་རབ་དང་ཆ་གསུམ་རོ་སྲེག་གནས་ལུང་སོགས་ཀྱི་ཡིག་སྣ་དུམ་དུམ་ཁྲིགས་ཚན་སུམ་ཅུ། གཟའ་བཅོས་ལག་ལེན་སྦས་པ་མིག་འབྱེད་རྣམས་ཀྱི་ལུང་གསན། དགུང་ལོ་ཞེ་ལྔ་པ་ལྕགས་རྟའི་ལོ། ཞྭ་ལུ་བྱང་མ་བ་རིན་ཆེན་བཟང་པོ་ལ་གཙུག་ཏོར་དྲི་མེད་ལྷ་ལྔ་དང་། འོད་ཟེར་དྲི་མེད་ཀྱི་དབང་། དཀྱིལ་ཆོག་དང་མཆོད་རྟེན་སྒྲུབ་པའི་ཆོ་གའི་ལུང་། ཤིང་ཁྱིའི་ལོ་ལུང་མང་པ་སྡོམ་བརྩོན་ཀུན་དགའ་དར་རྒྱས་ལ་རྒྱལ་བའི་བཀའ་འགྱུར་རོ་ཅོག་གི་ལུང་ཡོངས་རྫོགས་དང་། ཕྱིས་མེ་ཕོ་བྱི་བའི་ལོར། འགྲེལ་ཆུང་དོན་གསལ། དབུ་མ་རྩ་འཇུག་བཞི་གསུམ། ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པ་སོགས་བསྟོད་ཚན་བཅུ་གཉིས། བཤེས་སྤྲིངས། ས་ལུ་ལྗང་པ་དང་། དགེ་ཚུལ་གྱི་ཚིག་ལེ། ཐེག་ཆེན་ཉི་ཤུ་པ། སྤྱོད་འཇུགབསླབ་བཏུས་ཚིགས་བཅད་མ་དང་། རྒྱས་པ་བམ་པོ་བཅུ་བཞི་པ། སྡོམ་པ་ཉི་ཤུ་པ། བླ་མ་ལྔ་བཅུ་པ། ཚད་མ་མདོ་དང་སྡེ་བདུན། མངོན་པ་ཀུན་ལས་བཏུས་པ། མངོན་པ་མཛོད། འདུལ་བ་མདོ་རྩ། མེ་ཏོག་འཕྲེང་རྒྱུད། སུམ་བརྒྱ་པ། རང་འགྲེལ་འོད་ལྡན། ཞི་འཚོའི་སྨན་བླའི་མདོ་ཆོག དུས་འཁོར་འགྲེལ་ཆེན་དྲི་མེད་འོད། གསང་འདུས་

― MLP003_Page_0089 ―

^{[མ་དཔེ་གཟིགས་ན་འདིར་གནོན།]}

[Full Size]

འགྲེལ་པ་སྒྲོན་གསལ། སྤྱོད་བསྡུས་སྒྲོན་མེ། དཔག་བསམ་འཁྲི་ཤིང་། སྐྱེས་རབས་སོ་བཞི་པ། ཇོ་བོའི་ཆོས་ཆུང་བརྒྱ་རྩ། བཀའ་གདམས་གླེགས་བམ། ཁྲོ་ཕུ་བའི་མན་ངག་གཅེས་བསྡུས་བརྒྱ་རྩ། རྩེ་མོའི་ཀྱཻ་རྡོར་དབང་ཆུ། རྗེ་བཙུན་གྱི་འགྲེལ་པ་དག་ལྡན། མངོན་རྟོགས་ལྗོན་ཤིང་། རྩ་ལྟུང་འཁྲུལ་སྤོང་། ལྟ་བ་འཁོར་འདས་དབྱེར་མེད་རྩ་འགྲེལ། ཀུན་རིགས་གཞན་ཕན་འོད་ཟེར། རབ་གནས་དོན་གསལ། སྒྲོལ་མ་མཎྜལ་བཞི་པའི་ལག་ལེན། ས་པཎ་གྱི་སྡོམ་གསུམ་རབ་དབྱེ། རིགས་གཏེར་རྩ་འགྲེལ། ཐུབ་པ་དགོངས་གསལ། གཞུང་ལུགས་ལེགས་བཤད། མཁས་པ་འཇུག་པའི་སྒོ། ལེགས་བཤད་རིན་པོ་ཆེའི་གཏེར། དམ་ཚིག་རྣམ་བཤད། ཚོགས་འཁོར་ཕྱག་བཞེས། རྗེ་བཙུན་གྲགས་པའི་རྣམ་ཐར། སེམས་བསྐྱེད་ཆེན་མོ། ཞུས་ལན་དང་ཆོས་ལ་འཇུག་ཚུལ། ལམ་འབྲས་རྡོ་རྗེའི་ཚིགས་རྐང་། བླ་མ་དམ་པས་མཛད་པའི་ལམ་འབྲས་ལོ་རྒྱུས། ལམ་དབང་ཉམས་ལེན། ཁྲིད་ཡིག་ལེ་ཚན་བཞི། རྣམ་བཤད་རྣམས་དང་། དུས་འཁོར་གྱི་བསྲུང་འཁོར་མངོན་དཀྱིལ་དཔེ་ཚན་བཞི། རོང་པོས་ཡུམ་ལ་སྤྲིང་བའི་འཕོ་བ་ཕྲིན་ཡིག་དང་བཅས་པ། དབུ་མའི་ལྟ་ཁྲིད་ཟབ་དོན་གནད་ཀྱི་ཟླ་ཟེར་དང་། ལྟ་ཁྲིད་ཆུང་བ། ཞི་བྱེད་ཕར་ཕྱིན་བཀའ་བབས་དྲུག་གི་ཁྲིད་ཡིགརྡོ་རྗེ་གདན་པའི་ཀྱཻ་རྡོར་རྣམ་བཤད་ཉིན་བྱེད་སྣང་བ། དཀོན་མཆོག་ལྷུན་གྲུབ་ཀྱི་དབང་ཆུ་མཛེས་རྒྱན། ཀུན་རིགས་སྒྲུབ་དཀྱིལ་གཞན་ཕན་མཐའ་ཡས། གུར་དང་ཞལ་གྱི་མགོན་པོད། ལྷ་མོའི་སྒྲུབ་སྐོར་ལ་སོགས་པ་རྣམས་གསན་ནོ། །ཡང་ཤིང་ཁྱི་ལོ་དེ་ལ་རྡོ་རྗེ་འཛིན་པ་ཀུན་དགའ་བསམ་གྲུབ་ལ་ཀྱཻ་རྡོར་མན་ངག་ལུགས། བདེ་མཆོག་ལཱུ་ཧི་པ། གསང་འདུས་མི་བསྐྱོད་པ། འཇིགས་བྱེད་རོ་ལང་བརྒྱད་བསྐོར། གཤེད་དམར་ལྷ་ལྔ། དགྲ་ནག་ལྷ་བཅུ་གསུམ་མ། ཀུན་རིགས་རྣམས་ཀྱི་དབང་བཀའ་དང་དེ་དག་གི་མངོན་དཀྱིལ་རྣམས་ཀྱི་ལུང་། གཞན་ཡང་ཐུབ་པ་དགོངས་གསལ། མཁས་འཇུགརབ་དབྱེ། ལེགས་བཤད་རྣམས་ཀྱི་ལུང་དང་། དགུང་ལོ་ང་གཅིག་པའི་ཐོག་དོན་གྲུབ་ཆོས་གླིང་པ་ཀུན་དགའ་བསྟན་པ་དར་རྒྱས་ལ། བདེ་མཆོག་ནག་པོ་པའི་དབང་དང་འཕགས་པའི་མངོན་དཀྱིལ་གྱི་ལུང་བཅས།

― MLP003_Page_0090 ―

^{[མ་དཔེ་གཟིགས་ན་འདིར་གནོན།]}

[Full Size]

རྔོག་ལུགས་གུར་རིགས་བསྡུས། གདན་བཞི་ཡབ་བཀའ་ལྷ་མང་། མ་ཧཱ་མཱ་ཡ་གསུམ་གྱི་དབང་དང་། དེ་དག་གི་སྒྲུབ་དཀྱིལ་གྱི་ལུང་། གསང་འདུས་འཇམ་རྡོར་ལྷ་བཅུ་དགུ་པ། འཇིགས་བྱེད་རྭ་ལུགས་ལྷ་བཅུ་གསུམ་མ། གཟའ་ཡུམ། གཟུངས་གྲ་ལྔ་རྣམས་ཀྱི་དབང་། ཀུ་རུ་ཀུ་ལེ། ཚོགས་བདག་དམར་པོ། འདོད་རྒྱལ་ཀག་ཆོལ་མ་གསུམ་གྱི་རྗེས་གནང་ཐུན་མོང་མ་ཡིན་པ་དང་། དེ་དག་གི་ཆོས་སྐོར་ཚང་མའི་ལུང་། གུར་མགོན་ལྷ་བརྒྱད་དང་། ཞལ་སྒྲུབ་དུས་གཙོ་འཁོར་ལྔ་པའི་རྗེས་གནང་། མགོན་པོ་མ་གཤིན་བཅུ་དྲུག་གིས་བསྐོར་བ་ཇི་ལྗོངས་ལུགས་ཀྱི་དབང་དང་མགོན་པོད་ཀྱི་ལུང་། ཨ་བྷ་ཡའི་ཕྲེང་བ་སྐོར་གསུམ། འཇིགས་བྱེད་རྭ་ལུགས་པོད། འཇམ་རྡོར་སྒྲུབ་དཀྱིལ་འཕགས་པས་མཛད་པའི་ལུང་རྣམས་གསན། དཔལ་རྣལ་འབྱོར་གྱི་དབང་ཕྱུག་བློ་གྲོས་རྒྱ་མཚོ་ལ་མེ་བྱི་ནས་བརྩམས་ཏེ་སྔ་ཕྱིར་གསན་པ་ལ། དུས་འཁོར་གྱི་དབང་ཡོངས་རྫོགས། སྦྱོར་དྲུག་གི་ཉམས་ཁྲིད། བདེ་མཆོག་ནག་པོ་པའི་དབང་། འཇིགས་བྱེད་རོ་ལང་བརྒྱད་སྐོར་གྱི་དབང་ཐུན་མོང་མ་ཡིན་པ། འཇིགས་བྱེད་ཀྱི་སྒྲུབ་ཐབས་སྙིང་པོ། རོ་ལང་བརྒྱད་སྐོར་གྱི་དབང་ཆོགདྲུག་ཅུ་པའི་གཏོར་བཟློག་རྣམས་ཀྱི་ལུང་། ནཱ་རོ་མཁའ་སྤྱོད་མའི་བྱིན་རླབས། རྗེ་བཙུན་གྱིས་མཛད་པའི་སྒྲུབ་དཀྱིལ་བསྙེན་ཡིགསྦྱིན་སྲེགབསྐྱེད་རིམ་རྣམ་ངེས། ཁྲིད་ཡིག་བཅས་པའི་ལུང་། རྡོ་རྗེ་ཤུག་སྲུང་མ་དྲུག་ཅུ་དང་བཅས་པ། སྣ་ཚོགས་ཡུམ་དཀར་མོ། ཏྲག་ཤད་མྱོས་ལུགས་ཕྱག་བཞི་པ་རྣམས་ཀྱི་རྗེས་གནང་། རྗེ་བཙུན་གྱི་ལམ་རིམ་ཁྲིད་ཡིག་བདུད་རྩིའི་ཉིང་ཁུ། བློ་སྦྱོང་གི་ཁྲིད་ཡིགནི་གུའི་ཁྲིད་ཡིག་ལེ་ཚན་གསུམ། སྦྱོར་དྲུག་གི་ལོ་རྒྱུས། ཁྲིད་ཡིགདེའི་ལྷན་ཐབས། སྟན་ཐོག་གཅིག་མ། ངོ་སྤྲོད་ཕྱི་ནང་། རྟགས་ཚད། གེགས་སེལ་རྣམས་དང་། རབ་གནས་འགྲོ་ཕན་རྒྱས་བྱེད་ལྷན་ཐབས་དང་བཅས་པ། ཏྲཀྴད་ཀྱི་གཏོར་བསྐང་བསྟོད་པ། རྗེ་བཙུན་དགུང་ལོ་བཞི་ཡན་གྱི་རྣམ་ཐར། རྣམ་ཐར་ཆེན་མོ་མ་བཅོས་ལྷུག་པའི་རྟོགས་བརྗོད། གསང་རྣམ་ལེ་ཚན་བཞི། མགུར་འབུམ་པར་མ། སྟོན་པའི་མཛད་བརྒྱ་མཐོང་བ་དོན་ལྡན། རྒྱ་གར་ཆོས་འབྱུང་། བཀའ་བབས་བདུན་ལྡན་གྱི་རྣམ་ཐར། དབུ་མ་ཆེན་མོའི་

― MLP003_Page_0091 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་ངེས། གཞན་སྟོང་དབུ་མའི་བརྒྱུད་འདེབས། སྒྲུབ་ཐབས་བརྒྱ་རྩའི་ལག་ལེན་གྱི་ཆིངས། ཇ་མཆོད་རིགས་ཀུན་མ། སྨོན་ལམ་རྒྱལ་བ་མ། སྒྲུབ་ཐབས་རིན་ཆེན་འབྱུང་གནས། དུས་འཁོར་ལྷ་དགུའི་སྒྲུབ་ཐབས། བདེ་མཆོག་དང་དུས་འཁོར་བསྟོད་ཆེན། བླ་མཆོད་བདེ་ལེགས་རབ་རྒྱས། ཤངས་ལུགས་བདེ་མཆོག་ལྷ་ལྔའི་མངོན་དཀྱིལ། རྣམ་འཇོམས་བུམ་ཆོགཚེ་དཔག་མེད་ལྷ་དགུའི་ཆོ་གཆ་གསུམ། དཀར་གཏོར་ཆ་བཞི། ཀུན་མཁྱེན་ཆེན་པོའི་རི་ཆོས་ངེས་དོན་རྒྱ་མཚོ། སྤྱོད་པ་སངས་རྒྱས་དཔལ་བའི་ཁྲིད་བརྒྱ། བྱ་པ་སྐལ་བཟང་པས་མཛད་པའི་མཛད་པ་འཁྲུལ་མེད། གཉག་དཔོན་གྱི་སྨྱུང་གནས་ཆོ་གབརྒྱུད་འདེབས། བརྒྱུད་པའི་རྣམ་ཐར་བཅས་པའི་ལུང་རྣམས་དང་། མེ་གླང་ལོ་སྒམ་པོ་སྤྲུལ་པའི་སྐུ་མཆོག་བཟང་པོ་དཔལ་ལ། དཀོན་མཆོག་སྤྱི་འདུས་ཀྱི་ཚེ་དབང་། ཏྲཀྴད་དྭགས་ལུགས་ཀྱི་རྗེས་གནང་། གཞན་ཡང་དེ་གོང་པོ་ཏོ་བའི་དཔེ་ཆོས་རིན་ཆེན་སྤུངས་པ་རྩ་འགྲེལ་གྱི་ལུང་ཡང་གསན། ལོ་དེའི་ནང་ནས་བརྩམས་ཏེ་སྔ་ཕྱིར་གནས་བརྟན་ལུང་རིགས་སྨྲ་བའི་ཞལ་སྔ་ནས་ངག་དབང་བསྟན་འཛིན་ལ་གསང་འདུས་མི་བསྐྱོད་པ། ཕྱག་རྡོར་འཁོར་ཆེན། འཇིགས་བྱེད་བཅུ་གསུམ་མ། བདེ་མཆོག་དྲུག་ཅུ་རྩ་གཉིས་ལཱུ་ཧི་པ། དྲིལ་བུ་ལུས་དཀྱིལ་རྣམས་ཀྱི་དབང་། གདུགས་དཀར་ལྷ་བཅུ་བདུན་མའི་དབང་དང་ལེགས་ལྡན་མཆེད་གསུམ་གྱི་རྗེས་གནང་། བྱ་རྒྱུད་རིགས་གསུམ་སྤྱི་དང་། ཇོ་བོའི་ཐུགས་དམ་རྟ་མགྲིན་ཤྭ་ན་བཞི་སྐོར་གྱི་དབང་། ངོར་ཐར་རྩེ་པའི་ཡིག་ཆ་ལས་རྡོ་རྗེ་ཕྲེང་བ་དཀྱིལ་འཁོར་ཞེ་གཉིས་ཀྱི་སྟེང་བྱ་བཏུས་ཀྱི་དགེ་ལེགས་སུ་བྱེད་པའི་དཀྱིལ་འཁོར་གསུམ་དང་བཅས་དཀྱིལ་འཁོར་ཞེ་ལྔའི་དབང་བཀའ། སྒྲུབ་ཐབས་རྒྱ་མཚོའི་རྗེས་གནང་། དེའི་རྒྱ་གཞུང་ཡིག་ཆ་ཞེ་གཅིག་པ་དང་། ངོར་ཐར་རྩེ་པའི་ཡིག་ཆའི་ལུང་། དཀོན་མཆོག་ལྷུན་གྲུབ་ཀྱི་ཐོ་ཡིག་སྟེང་ནས་སྒྲུབ་ཐབས་བརྒྱ་རྩའི་རྗེས་གནང་། དེའི་རྒྱ་གཞུང་དགུ་བཅུ་རྩ་དྲུག་དང་དཀོན་མཆོག་ལྷུན་གྲུབ་ཀྱི་ཡིག་ཆ་བཅས་པའི་ལུང་། དམ་པའི་ལུགས་འཇམ་དབྱངས་སྨྲ་སེང་དབྱངས་ཅན་མ་དང་སྦྲགས་སྒྲུབ། ཇོ་ལུགས་སྒྲོལ་མ་ཉེར་གཅིག སྣར་ཐང་བརྒྱ་རྩའི་ནང་གི་ཐུབ་པ་གཙོ་རྐྱང་། ཐུབ་པ་གནས་

― MLP003_Page_0092 ―

^{[མ་དཔེ་གཟིགས་ན་འདིར་གནོན།]}

[Full Size]

བརྟན་བཅུ་དྲུག་གིས་བསྐོར་བ། མི་འཁྲུགས་པ་གཙོ་རྐྱང་། ཕྱག་རྡོར་མདོ་ལུགས། མགོན་པོ་གྲི་གུག་རྣམས་ཀྱི་རྗེས་གནང་། མགོན་པོ་ཕྱག་དྲུག་པའི་གཏོར་དབང་བར་ཆད་ཀུན་སེལ། མགོན་དཀར། མགོན་དམར། མགོན་ལྗང་། འཇམ་དབྱངས་ཆོས་སྐོར་ནང་གི་ལས་གཤིན་ཕྱི་སྒྲུབ། བག་ཙེ་ལྕམ་སྲིང་། ཚེ་དབང་འཇམ་ལུགས། དུར་ཁྲོད་བདག་པོ། ཚེ་རིང་མཆེད་ལྔ་རྣམས་ཀྱི་རྗེས་གནང་། བཀའ་གདམས་གཞུང་དྲུག་གི་ནང་ཚན་བྱང་སའི་ལུང་། ཇོ་བོའི་མན་ངག་སྐྱེས་བུ་གསུམ་གྱི་ལམ་རིམ་གྱི་ཁྲིད། དབུ་མའི་ལྟ་ཁྲིད། དམིགས་བརྩེ་མར་བརྟེན་པའི་བླ་མའི་རྣལ་འབྱོར་གྱི་ཁྲིད། ཁྲོ་ཕུ་བའི་སྙིང་པོ་དོན་གསུམ་གྱི་ཁྲིད། དམར་ཁྲིད་ཚེམ་བུ་ལུགས། ཞང་བཀའ་རྒྱའི་རྒྱུ་དུས་དབང་མོ་ཆེ། ལམ་དུས་ཏིང་ངེ་འཛིན་གྱི་དབང་། ཚོམ་བུ་ཞེ་བདུན་མ། ལྷ་ས་མ། བསམ་ཡས་མ་རྣམས་ཀྱི་དབང་དང་། ཕྱག་བཞི་པའི་རྗེས་གནང་། ཞང་གི་བཀའ་འབུམ་ཕྱི་མ་སྐོར་ཚོ་བརྒྱད་པུསྟི་བཞི་ཚང་བའི་ལུང་། རྗེ་ཙོང་ཁ་པའི་གསུང་འབུམ་ལས་ལམ་རིམ་གྱི་ཁྲིད་གཞུང་ཆུང་བ། སྔགས་རིམ། རིམ་ལྔ་གསལ་སྒྲོན། རིམ་ལྔ་ལྡན་རྫོགས་ཀྱི་ཁྲིད་ཡིགནཱ་རོ་ཆོས་དྲུག་གི་ཁྲིད་ཡིག་ཡིད་ཆེས་གསུམ་ལྡན། བླ་མ་ལྔ་བཅུ་པའི་ཊཱི་ཀགསང་འདུས་ཀྱི་སྒྲུབ་དཀྱིལ་རྣལ་འབྱོར་དག་རིམ་དང་། དབང་དོན་རབ་གསལ། བདེ་མཆོག་སྒྲུབ་ཐབས་བདེ་ཆེན་གསལ་བ། དཀྱིལ་ཆོག་བདེ་ཆེན་རོལ་མཚོ་ཕྱི་རོལ་མཆོད་ཆོག་བཅས། བཅུ་གསུམ་མའི་དཀྱིལ་ཆོག་རིན་ཆེན་འཕྲེང་བ། སྦྱིན་སྲེག་དངོས་གྲུབ་རྒྱ་མཚོ། རྗེའི་གསུང་འབུམ་ཐོར་བུ། འཇམ་དབྱངས་ཆོས་སྐོར། ཕྱག་དྲུག་པའི་ཤོག་དྲིལ་བཅུ་གསུམ་ཡིག་ཆུང་དང་བཅས་པ། ལས་གསུམ་རྣམ་གཞགགཏོར་ཆོག་བསྐང་བཤགས་རྣམས་ཀྱི་ལུང་། རྒྱལ་མཆོག་ལྔ་པ་ཆེན་པོའི་བཀའ་འབུམ་སྐོར་གྱི་ལུང་ལ་རྣམ་ཐར་དུ་ཀུ་ལའི་གོས་བཟང་གླེགས་བམ་གཉིས། ཐམས་ཅད་མཁྱེན་པ་བསོད་ནམས་རྒྱ་མཚོ། རྡོ་རྗེ་འཆང་དཔལ་འབྱོར་ལྷུན་གྲུབ། འཇམ་དབྱངས་དཀོན་མཆོག་ཆོས་འཕེལ་གསུམ་གྱི་རྣམ་ཐར། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་གསང་རྣམ། ཚར་ཆེན་དབང་ཕྱུག་རབ་བརྟན། བསོད་ནམས་མཆོག་ལྡན། ཞྭ་ལུ་མཁན་ཆེན་རྣམས་ཀྱི་རྣམ་ཐར། ཡང་དག་དང་གཤེད་

― MLP003_Page_0093 ―

^{[མ་དཔེ་གཟིགས་ན་འདིར་གནོན།]}

[Full Size]

དམར་ལྷ་ལྔའི་མངོན་དཀྱིལ་གསན་ཡིག་གདྒཱའི་ཆུ་རྒྱུན་གླེགས་བམ་བཞི། ལྷ་སའི་དཀར་ཆགརྩིས་ཀྱི་དྲི་ལེན། འདུལ་བའི་བསླབ་བྱ་ཉུང་ངུ་རྣམ་གསལ། བསྙེན་གནས་འབོགས་ཆོག་ལག་ལེན་དང་བཅས་པ། སྒྲོལ་དཀར་དང་འབྲེལ་བའི་བརྟན་བཞུགས་འབུལ་ཚུལ། རྒྱལ་རབས་དེབ་ཐེར། སྙན་ངག་གི་འགྲེལ་པ། གཟུངས་འབུལ། གཏོར་མ་བརྒྱ་རྩ་གསུམ། ཀླུ་གཏོར་གཉིས། དཀར་ཆ་བཞི། གསུར་བསྔོ། བསང་བཀྲ་ཤིས་འཁྱིལ་པ། དབུ་མའི་ལྟ་ཁྲིད། གནས་བརྟན་མཆོད་པ། དབུ་མའི་ལྟ་བ་ཉམས་སུ་ལེན་ཚུལ། བླ་མཆོད་གཉིས། ཕྱག་རྫོགས་དབུ་གསུམ་གྱི་ངོ་སྤྲོད། ཡན་ལག་བདུན་པའི་ཚོགས་གསོགབླ་མའི་རྣལ་འབྱོར་ལེ་ཚན་བཅུ། དབེན་པ་སྙན་བརྒྱུད་ཀྱི་ཉམས་ལེན། སཱཙྪ་འདེབས་ཆོགཇ་མཆོད་གཉིས། དམིགས་བརྩེ་མའི་ཊཱི་ཀམི་འཁྲུགས་པའི་ཆ་ོགཐིག་ལེ་བཅུ་དྲུག་གི་རྒྱུན་ཁྱེར། རྣམ་རྒྱལ་མའི་སྒྲུབ་ཐབས། ཞལ་གདམས་མུ་ཐི་ལའི་འཁྲི་ཤིང་། བྱང་པའི་རྣམ་ཐར། པདྨ་ཡང་གསང་ཁྲོས་པའི་ལས་བྱང་དང་ལོ་རྒྱུས། རྒྱ་ཧོར་བསང་མཆོད། གཡུ་ཐོག་སྙིང་ཐིག་གི་ལས་བྱང་། བསྔོ་བའི་གཏམ་ལེགས་བཤད་གསེར་ཕྲེང་། བསྔོ་བ་ལེ་ཚན་གསུམ། ཞལ་གདམས་གསུམ། ཟུར་ཆེན་དང་སྨན་ལུང་པའི་རྣམ་ཐར། དཀར་ཆག་ཆེ་བརྗོད། རི་ཐུའི་འགོ་བཤད། བཀྲ་ཤིས་ལྷུན་པོའི་དངུལ་གདུང་དཀར་ཆག་སོགས་འགོ་བརྗོད་མང་བ། པར་བྱང་ཞལ་གདམས་སྨོན་ལམ་ཤིས་བརྗོད། ཆབ་ཤོགརྒྱབ་བྱང་། གསོལ་མཆོད་སྐོར། བླ་མའི་བསྟོད་ཚོགས། ཆོས་སྤྱོད་རབ་གསལ། ཡི་དམ་གྱི་སྒྲུབ་སྐོར་ཚེམ་པ་བཅོ་ལྔ་བཅས་མང་དུ་གསན་ཏེ་རེ་རེ་ནས་བརྗོད་པར་མ་ནུས་སོ། །གྲྭ་ཐང་མཁན་རིན་པོ་ཆེ་ངག་དབང་བསྟན་འཛིན་ཕུན་ཚོགས་ཀྱི་དྲུང་དུ་ས་ཕོ་བྱི་བ་ནས་བརྩམས་ཏེ་སྔ་ཕྱིར་གསན་པ་ལ་ནཱ་རོ་མཁའ་སྤྱོད་ཀྱི་ཆོས་ཉིད་དངོས་སྟོན་གྱི་བྱིན་རླབས། ཤངས་ལུགས་བདེ་མཆོག་ལྷ་ལྔའི་དབང་། རྗེ་བཙུན་ནས་བརྒྱུད་པའི་གུར་མགོན་ལྷ་བརྒྱད་ཀྱི་རྗེས་གནང་། དུད་སོལ་མའི་ཕྱི་སྒྲུབ་དང་གསང་སྒྲུབ་གཉིས་ཀྱི་རྗེས་གནང་ཐུན་མོང་མ་ཡིན་པ་རྔོག་ལུགས་དང་། སྒྲུབ་སྐོར་པུསྟི་ཚང་བའི་ལུང་། ཕྱི་སྒྲུབ་ཀྱི་རྗེས་གནང་གཏོར་

― MLP003_Page_0094 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོག་བཅས་མུས་པ་ནས་བརྒྱུད་པ། གཡའ་བཟང་པའི་ཉི་མ་མདུང་གང་མའི་སྒྲུབ་ཐབས་ཞྭ་ལུ་ལོ་ཆེན་གྱིས་མཛད་པ། དེའི་སྒོམ་ལུང་བྱེད་ཚུལ་ཞྭ་ལུ་བྱང་གླིང་པས་མཛད་པ། གསང་འདུས་སྒྲུབ་ཐབས་མདོར་བྱས་དང་། མདོ་བསྲེ། གཤེད་དམར་གྱི་སྒྲུབ་ཐབས་བིར་ཝ་པས་མཛད་པ། གནོད་སྦྱིན་བེག་ཙེའི་རྗེས་གནང་ཐུན་མོང་མ་ཡིན་པ་དང་སྒྲུབ་སྐོར་ཚང་མའི་ལུང་རྣམས་གསན། ཡང་ས་བྱི་ལོ་ནང་དུ་བཤེས་གཉེན་སྡོམ་བཙུན་ལྷུན་གྲུབ་རྒྱ་མཚོར་དམར་པོ་སྐོར་གསུམ་དང་གུར་ཞལ་གྱི་མན་ངག་རྒྱལ་མཆོག་ལྔ་པ་ཆེན་པོའི་ལྗགས་བསྒྲིགས་མའི་ལུང་། ལོ་དེ་ནང་དུ་བཀའ་ལུང་ལྟར་བདག་གིས་ཀྱང་དུས་འཁོར་གྱི་དབང་ཡོངས་རྫོགས། ཡང་དག་འཁོན་ལུགས་ཀྱི་དབང་དང་། དཀར་བདུད་ཀྱི་རྗེས་གནང་། རོག་ལུགས་ཕུར་པ་ལྷ་ནག་གི་དབང་རྣམས་དང་། ལྕགས་ཡོས་ལོ་བཅུ་གཅིག་ཞལ་དཔལ་མོ་ལུགས་ཀྱི་རྗེས་གནང་། ཤངས་ལུགས་ཕྱག་ཆེན་གའུ་མའི་ཁྲིད། ཞི་བྱེད་བཀའ་བབས་དང་པོ་སྒྲོན་མ་རྣམ་གསུམ་གྱི་དབང་། འཇམ་དཔལ་དང་སྒྲོལ་མའི་གཟུངས་གཉིས་འགྲེལ་པར་བཅས་པ། དམ་པས་མཛད་པའི་སྒྲོལ་མ་རྣམ་གསུམ་གྱི་གཞུང་ཕྱི་ནང་གསང་གསུམ་གྱི་མན་ངག་རྣམས་ཀྱི་ལུང་། བརྒྱུད་པ་ཕྱི་མ་ནས་དམ་པའི་བླ་སྒྲུབ་ཕྱི་ནང་གསང་གསུམ་གྱི་རྗེས་གནང་། ཞིག་པོས་མཛད་པའི་ལོ་རྒྱུས་གཙོ་བོར་བྱས་པའི་འཆད་ཐབས་ཡན་ལག་ལྔ་པ། དྲི་མེད་ཀྱི་ཆོས་སྡེ་དྲུག་ལས་ཟུག་པ་རྩ་བའི་ཆོས་སྡེའི་ནང་ཚན། སྐུ་གསུང་ཐུགས་ཡོན་ཏན་ཕྲིན་ལས་ལྔ་གནད་དང་བཅས་པ་དྲུག་གི་ཞུས་ལན་གྱི་ལུང་རྣམས་ཀྱང་ཕུལ། ཡང་ལྕགས་སྟག་ཆོས་རྗེ་རྨོར་ཆེན་ལ་དཔྱལ་ལུགས་ཕག་མོ་ཞལ་གཉིས་མའི་བྱིན་རླབས་དང་། རྡོ་རྗེ་རབ་བརྟན་མའི་སྲོག་གཏད་གསན། ཆུ་སྦྲུལ་གྱི་སྟོན་རྡོ་རྗེ་འཛིན་པ་བློ་གྲོས་དབང་ཕྱུག་ལ་ཡོ་ག་རྡོར་དབྱིངས། རྩེ་མོ་རིགས་བསྡུས། སྤྱོད་རྒྱུད་རྣམ་སྣང་མངོན་བྱང་། བདག་མེད་ལྷ་མོ་བཅོ་ལྔ་མ་བིར་ལུགས། ཀྱེ་རྡོར་མཚོ་སྐྱེས་ལུགས། ཛེ་ཏཱ་རིའི་ལུགས་ཚེ་དཔག་མེད་ལྷ་དགུ་རྣམས་ཀྱི་དབང་རྣམས་གསན་ནོ། །དེ་ལྟར་དགུང་ལོ་དྲུག་ཅུ་རེ་བརྒྱད་པ་ད་ལྟའི་ཆུ་མོ་སྦྲུལ་ལོ་འདི་ཡན་ཆད་ལ་དམ་པའི་

― MLP003_Page_0095 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་ཇི་ལྟར་གསན་པའི་རིམ་པ་མདོ་ཙམ་བརྗོད་པ་སྟེ། སྤྱིར་ཆོས་རྣམས་ཀྱི་གནས་ལུགས་ཇི་ལྟ་བ་བཞིན་གཏན་ལ་འབེབས་པར་བྱེད་པ་ནི་ཐོས་པའི་ཤེས་རབ་ཡིན་ལ། དེ་ཡང་བསམ་པས་ངེས་པར་བྱས་ནས་སྒོམ་པས་འདོད་པའི་འབྲས་བུ་སྒྲུབ་དགོས་པས་བསམ་སྒོམ་གྱི་ཤེས་རབ་གཉིས་ཀྱང་ཐོས་པའི་ཤེས་རབ་ལ་རག་ལས་པ་སྟེ། མ་ཐོས་པར་བསམ་པ་དང་སྒོམ་མི་ནུས་པའི་ཕྱིར་རོ། །དེ་ལྟར་ཡང་། ཤེས་རབ་མཆོག་ཡིན་དེའི་གཞི་ནི། །ཐོས་པ་དེ་བཞིན་ཐོས་པ་མཆོག །ཅེས་དང་། ཀླུ་སྒྲུབ་ཞབས་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལས་སྒོམ་པ་ཡང་ནི་རབ་ཏུ་འབྱུང་། །དེ་ལས་དངོས་གྲུབ་བླ་ན་མེད་པ་ཐོབ། །ཅེས་གསུངས་པ་བཞིན་ནོ། །དེ་ལྟ་ནའང་བདག་ཉིད་ཆེན་པོ་འདི་ནི་ཤེས་བྱའི་ཆོས་ཐམས་ཅད་ལ་གཟིགས་པ་རྣམ་པར་དག་པ་བརྙེས་པས་སོ་སོ་སྐྱེ་བོའི་སར་གནས་པ་ལྟར་གྱི་ཐོས་པ་ལ་དེ་ཙམ་གྱི་ལྟོས་དགོས་པ་མ་ཡིན་ཡང་། བསྟན་པ་ལ་ཞུགས་པའི་གང་ཟག་རྣམས་ཀྱི་མིག་རྐྱེན་བསྒྲུབ་པའི་ཆེད་དུ་ཐོས་པ་འཚོལ་བ་ལ་མི་ཞུམ་པ་དང་། དེའི་ཚེ་གནོད་པ་དང་ཉམ་ང་ཇི་ལྟར་ཆེ་ཡང་མི་ལྡོག་ཅིང་མི་འཁྲུགས་ལ། ལུང་དང་མན་ངག་རྒྱ་མཚོའི་ཕ་རོལ་ཏུ་སོན་ཡང་ཆོག་འཛིན་མི་མངའ་བས་སླར་ཡང་བརྩོན་པར་མཛད་པ་ཡིན་ཏེ། གྲོང་ཁྱེར་སྐྱིད་པའི་འབྱུང་གནས་ཀྱི་ཚོང་དཔོན་ནོར་རབ་ཏུ་བརྟན་པའི་བུ་ནོར་བཟང་གིས་ལྷོ་ཕྱོགས་ཀྱི་རྒྱུད་ཀུན་ཏུ་སོང་སྟེ་ཆོས་འཚོལ་བའི་ཚུལ་དང་། བྱང་ཆུབ་སེམས་དཔའ་རྟག་ཏུ་ངུས་ཤེས་རབ་ཀྱི་ཕ་རོལ་ཏུ་ཕྱིན་པ་འཚོལ་བའི་ཚེ་རང་ལུས་བཙོངས་ཏེ་གྲོང་ཁྱེར་སྤོས་ལྡན་དུ་སོང་ནས་བྱང་ཆུབ་སེམས་དཔའ་ཆོས་འཕགས་བསྟེན་པ་སོགས་དམ་པའི་ཆོས་ཀྱིས་མི་ངོམས་པ་ནི་འཕགས་ཆེན་རྣམས་ཀྱི་རྨད་དུ་བྱུང་བའི་རྣམ་པར་ཐར་པའོ། །དེ་ལྟ་བས་ན། མངོན་རྟོགས་རྒྱན་དུ་ས་གསུམ་པའི་ཡོངས་སྦྱོང་འཆད་པའི་སྐབས། ཐོས་པས་མི་ངོམས་ཉིད་དང་ནི། །ཞེས་གསུངས་པ་ལྟར་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་ཞིག་སྔར་གསན་པ་དེ་བཞིན་དུ། སླད་མའི་ཆར་ཡང་གདོན་མི་ཟ་བར་གསན་པར་འགྱུར་ལ། དེ་ཡང་ཆེན་པོའི་གོ་ས་དང་རིགས་རུས་ཀྱི་དྲེགས་པ་སྤངས་ཏེ་ཆོས་དཀོན་ཞིང་རྒྱུན་
དང་ལྡན་པའི་ཁུངས་གཟིགས་ན། གནས་སྐབས་གསན་ཡུལ་གྱི་གོ་འཕང་མཐོ་དམའི་རྩིས་གདབ་མེད་པར་གུས་པས་གསན་ཞིང་། རིས་མེད་པའི་ཆོས་ལུགས་ལ་དག་པའི་གཟིགས་པས་སྤོང་ལེན་མི་མཛད་པ་དང་། གསན་པ་དེ་དག་ཀྱང་འོལ་སྤྱི་ཙམ་དུ་མ་ལུས་པར་བསམ་བྱུང་གི་ཐུགས་རབ་ཞིབ་ཅིང་རྣམ་པར་འབྱེད་པའི་རྟོག་དཔྱོད་ཀྱིས་ངེས་ཤེས་འདྲེན་པ་ལ་ཤིན་ཏུ་བརྩོན་པར་བདག་གིར་བཞེས་ཤིང་། མདོར་ན་བསྟན་པའི་འཕེལ་འགྲིབ་ཀྱིས་སྔོན་གྱི་དུས་ཀྱི་དབང་དུ་བྱས་ན་ཆོས་མང་པོ་ཞིག་ནུབ་འདུག་ནའང་། ད་ལྟ་ཡོད་ཚད་ཐོབ་པ་ཞིག་བྱའོ་སྙམ་དུ་དགོངས་པའི་གོ་ཆ་ཆེན་པོ་ཐུགས་ལ་བཞེས་ཏེ། སྦྱོར་བ་ཕྱག་ལེན་དུ་བཏབ་པའི་གསན་པ་རྒྱ་ཆེ་ཞིང་ཁུངས་དག་སོ་སོའི་བཞེད་ཚུལ་ཐ་དད་པ་རྣམས་ཀྱང་མ་འདྲེས་པར་རེ་རེ་ནས་དཔྱིས་ཕྱིན་པར་མཛད་པས་ཐོས་བསམ་གྱི་སྒྲོ་འདོགས་ཡིན་ལུགས་སུ་ཆོད། ཇི་ལྟར་མཁྱེན་པའི་ཆོས་རྣམས་ཀྱང་བླང་དོར་གྱི་སྒོ་ནས་སྒྲུབ་ཅིང་ཉམས་སུ་བཞེས་ཏེ་ཐོས་བསམ་སྒོམ་གསུམ་སྟན་ཐོག་གཅིག་ཏུ་གྲུབ་པའི་ཕྱིར། ཡ་གྱལ་ཙམ་གྱིས་ཆོག་པར་མི་འཛིན་པར་དམ་པའི་ཆོས་ལ་ཡང་དག་པར་གནས་པ་ཞེས་བསྔགས་བྱའི་ཡུལ་བླ་ན་མེད་པར་གྱུར་པ་སྟེ། དམ་པའི་ཆོས་མངོན་པ་ལས། ཇི་ལྟར་ན། ཆོས་རྣམས་ཆོས་ལ་གནས་པ་ཡིན་ཞེ་ན། ཐོས་པ་དང་བསམ་པ་ལ་མ་བརྟེན་པར་སྒོམ་པའི་སྦྱོར་བ་འབའ་ཞིག་གིས་ཀྱང་ཆོས་ལ་གནས་པ་མ་ཡིན་ལ། སྒོམ་པ་ལ་མ་བརྟེན་པར་ཐོས་པ་དང་བསམ་པའི་སྦྱོར་བ་འབའ་ཞིག་གིས་ཀྱང་ཆོས་ལ་གནས་པ་མ་ཡིན་གྱི། གཉིས་ཀ་ལ་བརྟེན་ཅིང་གཉིས་ཀ་ལ་གནས་ན་ཆོས་ལ་གནས་པ་ཡིན་ནོ། །ཞེས་སོགས་རྒྱ་ཆེར་གསུངས་པ་བཞིན་ཕྱག་ལེན་དུ་ཐེབས་པས་ཇི་ལྟ་བའི་གནས་ལུགས་ཀྱི་དོན་གཟིགས་ཤིང་། ཇི་སྙེད་པའི་ཆོས་ཐམས་ཅད་ཀྱང་གསལ་ལ་མ་འདྲེས་པར་ཐུགས་སུ་ཆུད་དེ་ཆོས་ཀྱི་རྒྱལ་སྲིད་ལ་མངའ་དབང་བསྒྱུར་བར་གྱུར་ཏོ། །

ཟབ་གཏེར་གྱི་བཀའ་བབས་ཤིང་སྒྲུབ་པ་ཐུགས་ཉམས་སུ་ཇི་ལྟར་བཞེས་ཚུལ།

― MLP003_Page_0096 ―

^{[མ་དཔེ་གཟིགས་ན་འདིར་གནོན།]}

[Full Size]

༈ གསུམ་པ་ལས་འཕྲོ་བཟང་པོས་ཟབ་གཏེར་གྱི་བཀའ་བབས་ཤིང་སྒྲུབ་པ་ཐུགས་ཉམས་སུ་ཇི་ལྟར་བཞེས་ཚུལ་ནི། ཆུང་ངུ་ནས་ངེས་པར་འབྱུང་བའི་ཐུགས་ཤུགས་དྲག་པོ་དང་། རིས་མེད་པའི་འགྲོ་བ་ཐམས་ཅད་སྐྱོབ་པར་བཞེད་པའི་སྙིང་རྗེ་ཆེན་པོ་ཚད་མེད་པ་

― MLP003_Page_0097 ―

^{[མ་དཔེ་གཟིགས་ན་འདིར་གནོན།]}

[Full Size]

མངའ་ཞིང་། བླ་མ་དམ་པ་དང་ལྷག་པའི་ལྷ་རྣམ་དབྱེར་མི་ཕྱེད་པའི་མོས་གུས་བཟོད་མེད་དུ་སློང་པས་བསྐུལ་ཏེ། གསན་བསམ་མཛད་པའི་བར་མཚམས་རྣམས་སུའང་ཡབ་རྗེ་གསང་བདག་ཆེན་པོའི་ཞབས་ཕྱིར་ལྷན་ཅིག་ཏུ་འམ། རེས་སྐུ་རྐྱང་གིས་དབང་ཁྲིད་ཞུ་བ་དང་ཟབ་དོན་གྱི་ཕྲ་གཅོད་པར་མཛད་པའི་སྐབས་མ་གཏོགས་ཕལ་ཆེར་བཅད་རྒྱ་མཛད་པ་དང་། ཡབ་རྗེ་སྐུ་གཤེགས་རྟིང་ནས་གཟིམས་སྤྱིལ་འོད་གསལ་རྩེ་དང་། གཟིམས་ཆུང་བསམ་གཏན་སྦུག་རྣམས་སུ་ཟླ་བ་སྦྲེལ་མ་དང་ཟླ་རེ་ཙམ་གྱིས་མཐའ་བརྟེན་པའི་སྐུ་མཚམས་བཅད་ནས། གསོལ་ཟས་བཞེས་པའི་དུས་མ་གཏོགས་ཐུན་མཚམས་ཀྱི་ངེས་པའང་མེད་པར་ཆིག་སྒྲིལ་གྱི་ཡི་དམ་གྱི་ལྷའི་ལྗགས་བསྙེན་དང་གནས་ལུགས་སྐྱོང་བ་ལ་རྩེ་གཅིག་ཏུ་བཞུགས་ཤིང་། དེ་དག་གི་དུས་སུ་རྟགས་དང་གཟིགས་སྣང་གི་མཚན་མ་ངོ་མཚར་བ་དུ་མ་ཞིག་འཁྱོམ་ཚོ་ལྟ་བུར་ཐོར་རེ་གསུངས་པ་འདྲ་བྱུང་འདུག་ནའང་དོན་གཉེར་གྱིས་དྲན་པའི་གཟུངས་སུ་འཛིན་པའི་ཟིན་ཐོར་འཁོད་པ་སོགས་མ་བྱུང་བར་སྣང་ལ། དགུང་ལོ་བཅུ་བདུན་པ་ཆུ་སྟག་ཧོར་ཟླ་དགུ་པའི་ཚེས་བཅུའི་ནུབ་མོ་དར་གླིང་གཟིམས་ཆུང་བསམ་གཏན་སྦུག་ཏུ་བཞུགས་པའི་ཚེ་མནལ་ལམ་དུ། བསམ་ཡས་མཆིམས་ཕུ་ཡིན་རྒྱུ་བའི་ལྷ་ཁང་ཡིད་དུ་འོང་བ་ཞིག་གི་ནང་དུ། རྒྱ་བོད་ཀྱི་རིག་འཛིན་གྲུབ་ཐོབ་མང་པོ་གྲལ་རིམ་གྱིས་འཁོད་ནས་ཚོགས་མཆོད་མཛད་པའི་མཐའ་སྐོར་ན་བུད་མེད་རྒྱན་བཟང་མཛེས་སྡུག་ཅན་མང་པོ་གླུ་གར་རྩེ་བས་བསྐོར་ཏེ་འདུག་པའི་གྲལ་གྱི་གཤམ་དེར་རྗེ་ཉིད་རང་གཟིགས་མོའི་ཐུགས་སྣང་གིས་བཞུགས་འདུག་པ་ལ། གྲལ་དབུ་དེ་ན་གཏེར་སྟོན་རྡོ་རྗེ་གླིང་པ་ཡིན་སྙམ་པའི་རྣལ་འབྱོར་པ་རལ་པའི་ཐོར་ཚུག་ཅན་གཟི་མདངས་དང་ལྡན་པ་ཞིག་གི་སྐུ་མདུན་ན། སེང་ལྡེང་འདྲ་བའི་ཤིང་གི་བུམ་པ་དམར་སྨུག་ཁ་གཡེལ་ཤིང་། མཆུ་རིང་བ་བཅུད་ཀྱིས་གཏམས་པ་ཞིག་འདུག་པ་ལས། རྣལ་འབྱོར་པ་དེས་ཀ་པཱ་ལ་ཕྱི་དཀར་ལ་ནང་དམར་བ་གསེར་གྱི་ཆོས་འབྱུང་བསྣོལ་མ་ཧ་རི་ནི་སའི་ཡི་གེ་དང་བཅས་པ་བྲིས་པ་ཞིག་དར་དམར་གྱིས་འཕྱི་ཞིང་ལྕིབས་ཀྱིས་བླང་པའི་ནང་དུ། བུད་མེད་མཛེས་མ་ཞིག་གིས་སྔར་གྱི་བུམ་པ་ལས་འབྲས་ཆང་ཡིན་འདྲ་སྙམ་

― MLP003_Page_0098 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ཁ་དོག་དཀར་ཞིང་འོད་ཟེར་སོར་སྒྲ་དང་བཅས་ཏེ་འཕྲོ་བས་བཀང་བ་དང་། བུད་མེད་གཞན་ཞིག་གིས་བསེ་ཕོར་ཆེན་པོ་བཟའ་བའི་བྱེ་བྲག་སྣ་ཚོགས་པས་གང་བ་ཞིག་ཀྱང་དྲངས་སོང་བར་རྣལ་འབྱོར་པ་རྣམས་ཀྱིས་གྲལ་རིམ་བཞིན་བཟའ་བ་ནས་ཁམ་རེ་རེ་དང་། ཀ་པཱ་ལའི་བཏུང་བ་ནས་ཧུབ་རེ་གསོལ་ཀྱང་ཉུང་དུ་མ་སོང་བར་སྔར་བཞིན་གནས་པ་དེ་རྗེ་རང་ལ་ཕུལ་བྱུང་བ་ནས་ཅུང་ཟད་རོལ་པས་བདེ་སྟོང་གི་ཡེ་ཤེས་བཟོད་མེད་དུ་འབར་ཞིང་། མཐར་རས་དཀར་གྱི་སྣོད་དུ་བདག་གིར་བཟུང་ངོ་སྙམ་དུ་དགོངས་པ་ན། སྔར་གྱི་རྣལ་འབྱོར་པ་དེས་ཤོག་དྲིལ་ཆུང་ངུ་ཁ་དོག་དམར་སེར་ཞིག་བཤེས་གཉེན་གྲྭ་པའི་ཞྭ་གཟུངས་ཡིན་ཞེས་གཏད་པ་ལྗགས་ཀློག་མཛད་པར་བརྩམ་པ་ན། འགོར་ཨེ་མ་ཧོ་ཞེས་གསུམ་བསྟུད་དུ་སྣང་བ་ཙམ་ལས་གཞན་རྣམས་རྒྱ་ཡིག་ཏུ་འདུག་པས་མ་འཁྲོལ་རུང་མོས་གུས་སྤྱན་ཆབ་འཁྲིགས་པ་ལྟ་བུས་ཕྱག་ཏུ་བཟུང་པ་ན་རྣལ་འབྱོར་པ་དེ་ཀུན་ཀྱང་ཅོ་དིར་གྱིས་གྱེས། རྗེ་རང་ཡང་ཁང་པ་དེའི་ཕྱི་རོལ་གྱི་རྡོ་གཅལ་སྐྱ་ལིང་ངེ་བ་ཞིག་གི་སྟེང་དུ་ཕེབས་པ་དང་མནལ་སད་ཅིང་། སད་ནས་ཀྱང་ཟག་མེད་ཀྱི་དགའ་བདེས་ལུས་སེམས་ཁྱབ་པའི་ཉམས་བཟང་པོ་ལ་ཡུན་རིང་གནས་པར་གྱུར། དེ་དུས་མནལ་ལམ་གྱི་མཚན་མ་དེ་བཟང་བ་ཞིག་ཡིན་འདྲ་སྙམ་པ་ལས་ཐུགས་ཀྱིས་དཔྱོད་པར་མ་ནུས་ནའང་། ཕྱིས་འདི་ལྟར་དགོངས་པ་སྟེ། རྨི་ལམ་དེ་ཡི་བརྡ་ལས་ནི། །དོན་འདི་སྟོན་པ་ཡིན་ནམ་སྙམ། །གནས་ནི་ས་དེར་དངོས་གྲུབ་ཀྱི། །མཚན་མ་ཅུང་ཟད་ཐོབ་པའི་བརྡ། །རྣལ་འབྱོར་ཚོགས་པའི་དཀྱིལ་འཁོར་ནི། །གོང་མས་བྱིན་གྱིས་བརླབས་པའི་བརྡ། །ཚོགས་དཔོན་རྣལ་འབྱོར་ཆེན་པོ་ནི། །ཡེ་ཤེས་རིགས་རྒྱུན་དབྱེར་མེད་བརྡ། །བཟའ་བཏུང་སྣོད་བཅུད་ཁྱད་པར་ནི། །གསང་ཆེན་སྐལ་བར་ལྡན་པའི་བརྡ། །ཤོག་དྲིལ་ལག་ཏུ་གཏད་པ་ནི། །ཟབ་མོའི་གཏེར་ལ་སྤྱོད་པའི་བརྡ། །ཞྭ་གཟུངས་ཐ་སྙད་འདོགས་པ་ནི། །ཆེ་དགུས་བཏུད་ཅིང་བཀུར་བའི་བརྡ། །ངོ་མཚར་ཡི་གེ་ཀློག་པ་ནི། །རྩ་བའི་རྟེན་འབྲེལ་འགྲིག་པའི་བརྡ། །གཤམ་ཡིག་ཁྲོལ་བར་མ་གྱུར་པ། །གཞན་དབང་རྟེན་འབྲེལ་འཆོལ་བའི་བརྡ། །ཅོ་དིར་སྒྲ་ཡིས་གྱེས་པ་ནི། །འགྲོ་ཕན་འར་འུར་འབྱུང་བའི་བརྡ། །ཞེས་

― MLP003_Page_0099 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས་པ་ལྟར་རོ། །དེ་ནས་བརྩམས་ཏེ་ཞག་རེ་གཉིས་ཙམ་མཚན་མོ་མནལ་གྱི་ངོས་བཟུང་མེད་པར་ལྷ་དང་བླ་མས་བྱིན་གྱིས་རློབ་ཅིང་ལུང་སྟོན་པ་སོགས་འོད་གསལ་དག་པའི་སྣང་བ་སྣ་ཚོགས་ལ་འབྱམས་ཤིང་། སད་དུས་ཀྱི་སྣང་བ་ཀུན་ཀྱང་ཡ་མཚན་པས་བཞད་ཅིང་རྩེ་བར་འདོད་པ་སོགས་གཏད་མེད་ཀྱི་རིག་པ་ཟང་ཐལ་ཤུགས་འབྱུང་མ་འགགས་པའི་རོལ་པར་འཆར་བས་དུས་འདའ་བར་གྱུར། ཧོར་ཟླ་བཅུ་པའི་ནང་དུ་ཆག་བྱང་ཆུབ་གླིང་གི་དགོན་པར་ཐེགས་པ་ལས། ཉི་ཤུ་གཉིས་ཀྱི་ནུབ་མཚན་ལམ་དུ། ལོ་ཆེན་བཻ་རོ་ཙ་ན་ཡིན་སྙམ་པའི་དགེ་སློང་དབང་པོ་དུལ་བ་མཛེས་འཛུམ་ཆོས་གོས་ཅན་ཞིག་གིས་སློབ་དཔོན་ཆེན་པོ་པདྨའི་སྐུ་བརྙན་རྒྱ་གར་པཎ་ཆེན་གྱི་ཆ་ལུགས་ཅན་ཆུ་ཤེལ་ལས་གྲུབ་པ་ལྟ་བུ་ཞིག་བསྟན་ནས། འདི་གུ་རུའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་འདུས་པ་ཡིན་གསུངས་གཟིགས་པས་འོད་ཉི་མའི་ཟེར་ལྟར་བལྟ་བར་མི་བཟོད་པ་ཚ་ལམ་ལམ་བྱེད་པ་ཞིག་འདུགདེ་ལ་དད་པ་ཆེན་པོས་གསོལ་འདེབས་མཛད་པ་ན། འདི་བྱིན་རླབས་ཀྱི་སྒོ་དབྱེ་བ་ཡིན། བྱིན་རླབས་དངོས་ནི་བྲག་དམར་གྱི་གནས་སུ་མཐོང་བར་འགྱུར་རོ། །ཞེས་གསུང་པ་ཞིག་རྨིས། མནལ་སད་པ་ན་གང་ཤར་གྱི་སྣང་བ་ཐམས་ཅད་བདེ་བ་ཆེན་པོའི་རང་གདངས་སུ་མ་འགགས་པར་འཆར་བའི་ཉམས་བཟང་པོ་བཟོད་མེད་དུ་འབར། དེའི་སང་ཉེར་གསུམ་གྱི་ཉིན་བྱང་གླིང་གཟིམས་ཁང་གོང་གི་རྒྱབ་དེར་ཞབས་ཕྱི་དགེ་སློང་འབྱོར་ལྡན་དང་བཅས་སྐུ་ཁམས་བསེང་དུ་ཐེགས་པ་ན། འཕྲེད་ལམ་གྱི་གཡས་ཕྱོགས་བྲག་གི་བྱ་སྐྱིབས་ཆུང་ངུ་ཞིག་ཡོད་པ་དེར་སཱཙྪ་ཕུང་པོ་ཞིག་གི་ཁྲོད་ན། ཆོས་ཤོག་ཧྲལ་ཧྲུལ་འགའ་རེ་འདུག་པ་ཕྱག་དལ་དུ་གཡེང་བའི་ཁྲོད་ནས་སྨྱུག་དོང་སྦོམ་ཕྲ་མཛུབ་མོ་ཙམ་པ་སོར་བཞི་པ་ལ་དྲིལ་མ་ཞིག་རྙེད་པ་གནང་བ། ཕྱག་ཤན་གྱིས་གཤགས་པ་ན་དྲི་བཟང་པོའི་ངད་སྤོས་དྲི་ཕལ་གྱིས་མཚོན་དུ་མེད་པ་དང་། དེ་ནང་ཤོག་དྲིལ་དམར་སེར་སྐེད་པ་སྐྲས་དམ་པར་བཅིངས་པ་ཞིག་འདུག་པ་ན། ཞབས་ཕྱིའི་དགེ་སློང་ན་རེ། ཅི་ཡིན་པ་འདུག་དྲི་ཞིམ་པ་ལ་ཨང་ཟེར། ཐུགས་ལ་གཏེར་གྱི་ཆ་ཤས་ཤིག་ཡིན་

― MLP003_Page_0100 ―

^{[མ་དཔེ་གཟིགས་ན་འདིར་གནོན།]}

[Full Size]

ནམ་སྙམ་དུ་དགོངས་ནའང་། སྲུང་བ་རྙིང་པ་བོར་བ་ཞིག་ཡིན་པ་འདྲ་ཞེས་གསུངས་ནས། གཟིམས་ཁང་དུ་ཕེབས་ཏེ། ཡང་ཐོག་གི་འགོལ་ས་དེར་ཞལ་དབྱེ་བར་མཛད་པས་ཤོག་དྲིལ་དེ་སྐྲ་རིང་པོ་ཁྲུ་རེ་ཙམ་ཡོད་པ་ཉག་མ་བཅུ་ཙམ་གྱིས་དཀྲིས་པའི་ནང་ན། གུ་རུའི་དབུ་སྐྲ་རིང་ཐུང་སོར་གསུམ་པ་ཙམ་བམ་པོར་བྱས་པ་ལ་དཀྲིས་པའི་ཤོག་དྲིལ་དམར་སེར་དཀྱུས་མཐོ་གང་ཙམ་པ་ལ་ཡི་གེ་གཟབ་མ་གཤུར་ཕྲ་མོར་བྲིས་པའི་ཚིག་ལ། ཚེ་དབང་རིག་འཛིན་པདྨའི་སྐུ་ལ་འདུད༔ བདག་འདྲ་ལོ་ཙཱ་བཻ་རོ་ཙ་ན་ཡིས༔ ཟབ་གཏེར་སྦས་ཚེ་ཆོས་བདག་སྐྱེས་བུ་ལ༔ སྙིང་གཏམ་ཁ་བྱང་འདི་ཉིད་ཡི་གེར་གདམས༔ ཞེས་སོགས་ཟབ་གཏེར་གྱི་ཁ་བྱང་དུ་སྣང་བས་ཤིན་ཏུ་དགྱེས་ཆེས་པའི་ཐུགས་ཉམས་མི་ནོན་པ་ཙམ་བྱུང་ནའང་། རེ་ཞིག་གསང་དགོས་པའི་བཀའ་རྒྱ་སྣང་བས་ཤོག་དྲིལ་དེ་གའུའི་ནང་དུ་སྦས་ཏེ་གསང་དམ་པར་མཛད། དེ་ནས་མི་རིང་པར་དབུས་སུ་ཕེབས་ཏེ། ཡུམ་ཉིད་རང་བཞིན་གྱི་རྣལ་འབྱོར་མ་བྱིན་རླབས་ཀྱི་ཚན་ཁ་གཡོ་ནུས་པ་ཡིན་པས་ཤོག་དྲིལ་རྣམས་གཟིགས་འབུལ་དང་ལྷན་ཅིག་ལོ་རྒྱུས་རྣམས་ཞིབ་མོར་ཞུ་བར་མཛད་པས། ཡུམ་ཡང་གཞན་དང་མི་འདྲ་བའི་གཏེར་རྫས་ཀྱི་ཐུགས་ཉམས་མངའ་བའི་སྟོབས་ཀྱིས་བཀའ་ལས། ཟབ་གཏེར་གྱི་ཁ་བྱང་ཡིན་པ་ལ་འཁྲུལ་པ་མི་འདུག་པས་ངོ་མཚར་ཆེ། འོན་ཀྱང་རེ་ཞིག་གསང་རྒྱ་མུ་མཐུད་ཀྱི་སྒོ་ནས་གསོལ་འདེབས་དང་རིམ་གྲོ་ལ་འབད་དགོས། སླར་ལུང་བསྟན་གྱི་རྟགས་འདྲ་བྱུང་ན། རྟེན་འབྲེལ་གང་འགྲིག་གི་ཐབས་རྩོལ་བྱེད་དགོས་པ་ཡིན་གསུང་། དགུན་དེ་གཟིམས་ཆུང་བསམ་གཏན་སྦུག་ཏུ་བདག་ཀྱང་ཞབས་ཕྱིར་དཀྲིས་ཏེ་ཟླ་བ་གསུམ་ལ་ཉེ་བར་སྐུ་མཚམས་མཛད་ནས་ཐུགས་དམ་ལ་རྩེ་གཅིག་ཏུ་བཞུགས་ཤིང་། བསྐང་བཤགས་དང་གསོལ་འདེབས་སོགས་སྐུ་རིམ་ཡང་ཅི་འགྲུབ་མཛད། དེ་ནས་ཆུ་ཡོས་ཟླ་བ་གཉིས་པ་ནས་བཟུང་ཡབ་རྗེའི་ཕྱི་རྟེན་བཞེངས་པའི་བཟོ་གྲྭ་འཛུགས་པ་ཉེ་བར་བཅས་བླ་བྲང་དུ་སོ་མི་སོད་པར་དགོངས་ཏེ། དར་གླིང་བསམ་གཏན་རྩེའི་མཚམས་སྤྱིལ་དབེན་པ་ཞིག་ཏུ་རྣལ་འབྱོར་གྱི་དབང་ཕྱུག་དམ་པ་ཀློང་ཡངས་འོད་གསལ་ཞབས་ཕྱིར་བཟུང་སྟེ་གསང་འདུས་བླ་མའི་བསྙེན་སྒྲུབ་ཀྱི་

― MLP003_Page_0101 ―

^{[མ་དཔེ་གཟིགས་ན་འདིར་གནོན།]}

[Full Size]

བཅད་རྒྱ་དམ་པོར་བཞུགས། དེ་དུས་ཉིན་མཚན་གྱི་སྣང་བ་ཐམས་ཅད་དག་པའི་སྣང་བ་འབའ་ཞིག་ཏུ་ཤས་ཆེར་འབར་བ་དང་ཁྱད་པར་ཟླ་བ་གསུམ་པའི་ཉི་ཤུ་གཉིས་ཀྱི་ཉིན་སློབ་དཔོན་ཆེན་པོ་པདྨ་མཁའ་འགྲོའི་འཁོར་དང་བཅས་པ་ཡུད་ཙམ་ཞིག་གཟིགས། དེ་ནས་ཇེ་ཞིག་ན། མཚམས་ཁང་གི་གནམ་སྒོའི་སྟེང་དེར་ཡབ་རྗེ་གསང་བདག་ཆེན་པོ་སྐུ་ཡི་བྱི་བྱད་དང་ཆ་ལུགས་ཐམས་ཅད་སྔར་བཞིན་ལས་གཟི་མདངས་ལྷག་པར་རྒྱས་པ་ཕྱག་གཡས་ན་སྔར་གྱི་ཐོད་ཕྲེང་དེ་ཁ་བསྣམས་པ། འཁོར་ཧཱུྃ་མཛད། སངས་རྒྱས་གསང་བ། མི་ཏྲ་ཛོ་གི་ནམ་སྙིང་། རྨ་གཉགས་སོགས་རྒྱ་བོད་ཀྱི་མཁས་གྲུབ་དེ་རྣམས་ཡིན་སྙམ་པའི་ཛོ་གི་རབ་བྱུང་སྔགས་འཆང་བུད་མེད་མང་པོས་བསྐོར་ནས་ཁྲོང་གིས་ཕེབས་པ་གཟིགས་པ་དང་། ཐུགས་ལ་མོས་གུས་བཟོད་མེད་འབར་བའི་རྐྱེན་དེས་ཡབ་རྗེ་ཉིད་ཨོ་རྒྱན་ཆེན་པོའི་སྐུར་གྱུར་ཅིང་། གནས་ཁང་ཉིད་ཀྱང་ཡངས་ཤིང་གོ་སྐབས་དང་བྲལ་བའི་གཞལ་མེད་ཁང་འོད་ཀྱི་སྣང་བས་ཀུན་ཏུ་ཁྱབ་པར་སོང་བ་དང་། སྐད་ཅིག་དེ་ལ་ཨོ་རྒྱན་ཆེན་པོས་ཧེ་རུ་ཀའི་དཀྱིལ་འཁོར་དུ་དབང་བསྐུར་ཞིང་སྔགས་རྒྱ་བརྡ་ཐབས་དུ་མས་བྱིན་གྱིས་བརླབས། དེའི་ཚེ་མཁའ་འགྲོའི་ཚོགས་ཀྱིས་ཅང་ཏེའུའི་སྒྲས་མཚོན་པར་ནམ་མཁའ་གང་བའི་གར་བྱེད་པ་སོགས་ཀྱི་གསལ་སྣང་ལ་དར་ཅིག་གནས་པའི་མཐར་ཆུ་ནང་གི་གཟུགས་བརྙན་རླབས་ཀྱིས་དཀྲུགས་པ་ལྟར་ཡལ་བའི་མོད་ལ། ཟག་མེད་བདེ་བའི་ཉམས་ཧད་དེ་བའི་ངང་ནས། སྔར་གྱི་མོས་པ་ཡང་བཅོས་མའི་རྟོག་པ་ཙམ་དུ་དགོངས་པ་ན། སྙེམ་འཁྲིག་མེད་པའི་དད་པ་ཉིད་རང་རིག་སྤྲོས་བྲལ་གྱི་ངོ་བོར་གྲོལ། དེའི་རྩལ་སྣང་འགགས་མེད་དད་པའི་རོལ་པར་འཆར་བའི་ངེས་པ་བརྟན་པོ་ལ་གནས་པ་བྱུང་། ཡང་ཟླ་བ་བཞི་པའི་ཉེར་ལྔའི་ནུབ་མནལ་ལམ་དུ་རྗེ་ཉིད་རང་གི་སྐུ་ཡི་སྲིང་མོ་ཡིན་སྙམ་པའི་བུད་མེད་གཞོན་ནུ་ཞིག་གིས་མར་མེ་གསལ་ཞིང་དྭངས་པ་ཞིག་བཏེགས་ནས། སྔར་བྲག་དམར་གྱི་གནས་སུ་དངོས་གྲུབ་ཀྱི་ཕ་ཕོག་ཐོབ་པར་བསྟན་པའི་དུས་ནི་ཟླ་བ་ཕྱི་མའི་ཚེས་བཅུ་ལ་ཡིན་ནོ། །ཐེ་ཚོམ་དང་ཡིད་གཉིས་མེད་པར་སོངས་ཤིགགུ་རུ་ཆེན་པོ་ལ་གསོལ་བ་ཐོབ། གཏེར་བདག་མཁའ་འགྲོ་ལ་ཚོགས་གཏོར་ཕུལ།

― MLP003_Page_0102 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ལྟར་བྱས་ན་འདོད་དོན་འགྲུབ་པར་འགྱུར་རོ། །ཞེས་འབྱུང་བ་ལྟར། ནང་པར་དེའི་ལོ་རྒྱུས་རྣམས་ཡུམ་ལ་གསོལ་བས་དོ་གལ་དང་ནན་ཏན་མ་བྱས་ན་མི་རུང་། རེ་ཞིག་གསང་རྒྱ་གང་ཆེ་བྱེད་པ་གཟབ་གསུངས་ནས། སྐུ་ཆས་དང་ཆ་རྐྱེན་རྣམས་ཡུམ་ཉིད་ཀྱིས་མངོན་ཆུང་གིས་བསྒྲིགས་པར་མཛད་དེ། གནས་དེ་ཉིད་དུ་སྐུ་མཚམས་དམ་པོ་ལ་བཞུགས་པའི་རྫུ་མཛད་ནས་ཟླ་བ་ལྔ་པའི་ཚེས་ལྔའི་ནུབ་སྲོད་ཕྱི་ཡོལ་ཙམ་ལ་བྱང་ཆུབ་དབང་རྒྱལ་ཕྱག་ཕྱིར་ཁྲིད་དེ་ཞབས་ཐང་གིས་ཐེགས་པ་ལས། དགོན་པའི་ལྕགས་རིའི་ཤར་སྒོའི་ཕྱིར་ཐོན་པ་དང་མཉམ་དུ་འོད་ཀྱི་སྣང་བ་ཉི་མ་ལྟར་གསལ་བས་ཕྱག་རིས་ཚུན་ཆད་བཀྲ་སལ་ལེ་གཟིགས་པས་ལེགས་པའི་མཚན་མར་དགོངས་ཏེ་རིམ་པར་ཉི་མྱུར་ཙམ་ལ་ཡང་ཁའི་ཚུགས་ཁར་ཕེབས། དེར་འགྲུལ་པ་ཁ་ཤས་ལྷོ་ཁར་ཀོ་བས་བསྒྲལ་བའི་མཉན་པ་རྒན་པོ་ཞིག་འདུག་པར། བྱང་ཁར་སྒྲོལ་བར་བསྐུལ་བ་ན་སྒྲོལ་བ་ལྟ་ཅི་སྨོས། ཚིག་རྩུབ་མོས་སྤྱོ་བར་བྱེད་པས་ཐུགས་ཀྱིས་རེ་ཐག་བཅད་དེ་ཐེགས་པ་ལས། དེ་ནུབ་གྲྭ་ཕྱི་ཚོང་འདུས་སུ་ཞག་མལ་མཛད་པར་གནས་མོ་དཔོན་སར་གྲགས་པ་ཞིག་འདུག་པ་དེས་ཞབས་ཏོག་ལེགས་པར་བསྒྲུབས། དགེ་སྟེང་བླ་མ་ཁུ་དབོན་ཡང་དེར་གནས་མགྲོན་ལ་མཉམ་དུ་བྱུང་། སང་ཉིན་གྲྭ་ཕྱི་སྨོན་གྲུབ་པའི་གཡོག་རིགས་བསམ་ཡས་བསྐོར་དུ་འགྲོ་མི་རྣམས་ཀྱི་ཕྱི་བཞིན་ཐེགས་ཏེ། གཙང་ཆུའི་རྒྱབ་ཆུ་ཆུང་བ་རྣམས་ལས་བརྒལ་ཞིང་ཆེ་བ་རྣམས་ཀོ་གྲུས་བསྒྲལ། འགའ་ཞིག་ཏུ་བསྐོར་མི་དབང་ཆེ་བ་དག་ཀོ་གྲུའི་ནང་དུ་བསྡད་བཞིན་པར་རྗེ་ཉིད་ལ་སོགས་པས་དྲུད་དེ་ཐེགས་པ་ལས། ཀོ་བ་གཙང་གི་ཆུ་གཞུང་དུ་སླེབས་པའི་ཚེ་རླུང་དྲག་པོས་གཡོ་ཞིང་འབུབ་པར་ཉེ་བ་ན། ཐམས་ཅད་འཇིགས་ཤིང་སྐྲག་པས་རང་རང་གི་སྐྱབས་སུ་རེ་བའི་བླ་མ་དག་གི་མཚན་ནས་འབོད་ཅིང་། གཅིག་གིས་གཅིག་ལ་ཟུར་ཟ་བ་ལྟར་བྱེད་པ་ན། རྗེ་འདིས་དགོངས་པ་ལ། འཇིགས་པས་ཉེན་ནས་ཉི་ཚེའི་བློས་སྐྱབས་སུ་སྦྲོན་པ་ལའང་འདི་ལྟ་བུའི་ཆགས་སྡང་གིས་འཆིང་བ་འོང་བ་སྙམ། སྙིང་རྗེ་ཤུགས་དྲག་པོ་འཁྲུངས་པའི་མཐུས་སྐད་ཅིག་ལ་རླུང་ཞི་སྟེ་ཕ་རོལ་ཏུ་བདེ་བར་ཐོན་ནས། དེ་ནུབ་བསམ་ཡས་ཀྱི་གནས་རྟེན་

― MLP003_Page_0103 ―

^{[མ་དཔེ་གཟིགས་ན་འདིར་གནོན།]}

[Full Size]

ངོ་མཚར་ཅན་རྣམས་ཀྱང་མཇལ་བར་མཛད་པས་སྔོན་རབས་ཀྱི་བག་ཆགས་མང་པོ་ཞིག་སད། སང་ཉིན་རིམ་པར་ཐེགས་པ་ལས་རྒྱུན་དུ་ཆིབས་ལ་བརྟེན་པས་ཞབས་འགྲོས་ལ་མ་གོམས་པའི་དབང་གིས་ཞབས་བསྙུང་སྟེ་བཅག་མལ་གྱིས་བཞུགས་དགོས་པར་ཉེ་བ་ན། གཞུང་གི་ཆིབས་ཆེན་རྣམས་རྒོད་དཀར་གྱི་ལ་བརྒྱུད་ནས་འགྲོ་བ་དང་ཐུག་སྟེ་སྐྱེལ་མ་སྦྲན་པས། ཆིབས་དཔོན་དེས་སྤྲོ་བ་དང་བཅས་པས་མདུན་བསུས་ཏེ། ཆིབས་དཀར་པོ་བཟང་བ་སྒ་དང་བྲལ་བ་ཞིག་ལ་བསྐྱོན་ནས་སྔ་འགོའི་ཟམ་སྟེགས་བར་བསྐྱལ་བས་སྐུ་ངལ་གསོས། དེ་ནས་གཡའ་མ་ལུང་གི་དབེན་གནས་རིའི་རྩ་བར་ཕེབས་པ་ན། ཆར་རླུང་མི་བཟད་པའི་ཐུགས་ཆོམ་གྱིས་རི་བོའང་གཡོ་བ་སྙམ་བྱེད་པའི་འཚུབ་ལྷོངས་ཤིན་ཏུ་ཆེའང་ཐུགས་ཞུམས་པར་མ་གྱུར། དེ་ནུབ་གཟིམས་ཕུག་གི་བླ་གཡེ་ཆུང་ངུ་དེར་བཞུགས་པར། གནས་འཛིན་གྱི་བཙུན་མ་རྒན་མོ་ལྦ་བ་ཅན་ཞིག་གིས་བཟའ་བཏུང་གིས་མཆོད། དེའི་ནུབ་མོ་མནལ་རང་མཚན་པའི་སྣང་བ་མེད་པར་འོད་གསལ་གྱི་ངང་ལ་གནས་པ་བྱུང་། དེ་ནས་ཚེས་བརྒྱད་དང་དགུ་གཉིས་ལ་གསོལ་འདེབས་བསང་མཆོད་གཏོར་འབུལ་སོགས་མཛད་ནས་གཏེར་གནས་ཀྱི་ས་མིག་གཟིགས་པས་ཚེ་ཆུ་བྲག་གི་ལྷོ་ངོས་ཀྱི་སྟེང་དེ་ན་བྲག་དོ་ཆད་ཅིག་འདུག་པ་དེ་ཉིད་ཡིན་པར་ཐུགས་ངེས་འདྲོངས་ཀྱང་། གཏེར་སྒོའི་མཚན་མ་གཡུང་དྲུང་གི་རི་མོ་ཡོད་པར་གསུངས་པ་མ་རྙེད་པས་ཐུགས་ཞུམས་ཏེ། ད་རང་མི་ཐོབ་པ་ཡིན་ནམ་སྙམ་དུ་དགོངས་ཤིང་། དེའི་ཚུལ་ཞབས་ཕྱིར་གསུངས་པས། དེ་ཡང་སེམས་མྱ་ངན་གྱིས་གདུངས་ཤིང་། རེ་ཞིག་ཐུགས་ངང་བསྲིངས་ནས་གསོལ་འདེབས་སོགས་གནང་ན་དྲག་པ་ཨེ་ཡིན་ཟེར། དེ་ནས་ཚེས་བཅུའི་ཉི་ཤར་ཙམ་ནས་ཐུགས་དགའ་ཡ་ལེ་བའི་སྣང་བ་འགག་མེད་དུ་འཆར་བ་མི་ནོན་པ་ལྟ་བུའི་ངང་ནས། སྔར་གྱི་བྲག་དོ་ཆད་དེའི་ཤར་ཕྱོགས་སུ་རྗེ་ཉིད་ཀྱིས་གཏོར་མ་བསྔོ་བ་དང་། ཞབས་ཕྱིས་བསང་དུད་སྦྱོར་ཤིང་ཡོད་པའི་མུར། སྐུ་རྒྱབ་བརྟེན་པའི་བྲག་དེ་གས་པ་ལྟ་བུའི་ཏོག་སྒྲ་ཆེན་པོ་ཞིག་བྱུང་བ་ལ་གཟིགས་པ་ན། རྡོ་དྲེག་གི་སྤབས་ཆག་པ་ཞིག་སྣང་བ་རྡོས་བྲད་པའི་འོག་ནས་གཡུང་དྲུང་གི་རི་མོ་དམར་ཧྲིག་གེ་ཡོད་པ་གཟིགས་ཏེ།

― MLP003_Page_0104 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ནས་ལྷོར་མཐོ་གང་གཞལ་བའི་ཐང་མཚམས་ཀྱིས་ས་ཅུང་ཟད་བྲུས་པས་གཡམ་སྔོན་གས་མཚམས་ལ་རྩིས་ཞལ་ཞལ་དུ་སྦྱར་བ་ཞིག་གཟིགས། ལྕགས་གཟོང་གིས་བསྡིགས་པས་ཁྲོལ་དེ་ཞིག་པའི་ནང་ནས་བྱེ་སོལ་ནག་ཉིལ་གྱིས་བྱུང་བ་ཕྱིར་འདོན་པར་མཛད་པས། སྲོག་ཆགས་སྦོམ་ཕྲ་མཛུབ་མོ་ཙམ་རིང་ཐུང་སོར་བརྒྱད་ཙམ་གྱི་ཚོད་འབུ་འདྲ་བ་ཁྲ་ཤིག་གེ་བ་ཞིག་བྱུང་བར་ཅུང་ཟད་ཐུགས་འཇིགས་པས་ཤིང་བུས་ཕ་ཚད་དུ་བསྐྱལ་བར་མཛད་ནས་བྲུས་པས་བྲག་གི་ནང་ནུབ་ཀྱི་མཐར་ཐུག་པ་ཙམ་སྦུབས་ཡངས་པར་གྱུར་ཀྱང་གཏེར་རྫས་མི་སྣང་། སླར་ཡང་ཞིབ་ཏུ་གཟིགས་པས་སྦུབས་ནང་གི་བྱང་ངོས་སུ་ཕྱག་གིས་མྱུལ་ཚེ་རྡོ་གཞན་ལས་ངོས་འཇམ་པ་ཞིག་འདུག་པས། དེ་ལ་གཟིགས་པས་གཡམ་སྔོན་མཐའ་རྩིས་སྦྱར་བ་ཞིག་འདུག་པ་བཀོག་པའི་ནང་ནས་ག་པུར་གྱི་དྲི་བསུང་ཆིལ་གྱིས་འཐུལ་བ་དང་མཉམ་དུ་བྱེ་ནག་དང་སོལ་བ་ནག་ཉིལ་གྱིས་ཐོན་བྱུང་བར་ཕྱག་གིས་བསྙབས་པས་ལ་བསེའི་གཏེར་སྒྲོམ་དམར་སྨུག་ཆག་གང་པ་གཅིག་དང་། ལ་བསེའི་གའུ་གྲུ་བཞི་པ་མཁྱིད་གང་བ་ཞིག་ཐོན་བྱུང་བ་དང་། ཞབས་ཕྱི་ནི་ཨ་ལི་ཞེས་འཁྲབ་ཅིང་རྒོད། རྗེ་ཉིད་ཀྱང་ཐུགས་རིག་གི་ཉམས་རྩལ་མི་ནོན་པ་ལྟར་འབར་ཞིང་། དེ་ཉིད་དུ་བྱིན་རླབས་ཞུ་བ་དང་སྨོན་ལམ་འདེབས་པར་མཛད་ནས། རིན་པོ་ཆེ་འབྲུ་སྨན་སོགས་ཀྱི་དཀོར་ཆ་དང་བྱེ་སོལ་རྣམས་ནང་དུ་བཅུག་ཏེ་རྡོ་ཆོལ་རྣམས་བསྒྲིག་ལ་གཏེར་སྒོ་བཀག་ནས་འདམ་པས་ཞལ་ཞལ་དང་ཕྱིར་ས་སྐམ་གྱིས་གཏོར་ཏེ་མི་མངོན་པར་མཛད་ཅིང་གཏང་རག་གི་མཆོད་གཏོར་ཕུལ། གཏེར་རྫས་དར་རས་ཀྱིས་དྲིལ་ནས་དྲྭ་ཕད་དུ་འཇུག་པར་མཛད་ནས། སླར་གཟིམས་ཕུག་གི་བླ་གཡེར་དགྱེས་ཡ་ལེར་ཕེབས་པས་གནས་འཛིན་གྱི་སྒྲུབ་པ་མོ་དེ་ན་རེ། དཔོན་སློབ་གཉིས་གཞན་ལས་དགྱེས་ཉམས་ཆེ་ཞིང་ན་བཟའ་རྣམས་ཀྱང་རྡུལ་གྱིས་གོས་འདུག་པ་ཅི་ཡིན་ནམ་ཞུ་བ། བསང་ཤིང་བཀོག་པའི་རྡུལ་གྱིས་གོས་པ་ཡིན་ཞེས་གསུངས། འོ་ན། དེ་རིང་ངེད་ཚོ་ཚེས་བཅུའི་མཆོད་པ་བྱེད་པས་མཉམ་དུ་ཨེ་མཛད་ཟེར། དེ་བཞིན་རུང་གསུངས་ནས་བྱང་གཏེར་ཐུགས་སྒྲུབ་ཀྱི་ལས་བྱང་དེ་ཕྱག་དཔེའི་ཐོག་ནས་བཙུན་མ་སེར་ཉོག་འགའ་རེ་དང་

― MLP003_Page_0105 ―

^{[མ་དཔེ་གཟིགས་ན་འདིར་གནོན།]}

[Full Size]

མཉམ་དུ་ཆོ་ག་གནང་ནས། མཐར་དངོས་གྲུབ་ལེན་པ་དང་འབྲེལ་བར་དེར་འཁོད་རྣམས་ལ་གཏོར་དབང་ཡང་སྩལ། དེར་ཐུགས་ཉམས་མི་ནོན་པ་ལྟ་བུས་སྤྱོད་པ་ཤུགས་འབྱུང་དུ་ཐལ་བས་སྔར་གྱི་གསང་རྒྱ་དཀྲོལ་བ་ལྟ་བུར་སོང་བས་དེར་འཁོད་ཐམས་ཅད་ཀྱིས་ཕྱག་བཙལ། བྱིན་རླབས་ཞུས་སྐྱབས་སུ་མཆིའོ་ཟེར། འོན་ཀྱང་གཏེར་ཡིན་པ་ནི་སུས་ཀྱང་རིག་པ་མ་བྱུང་། དེ་ནུབ་མནལ་ཡང་ཆེར་མེད་པར་ཐུགས་དགྱེས་ཡ་ལེ་བའི་ངང་ནས་སྲབ་གཉིད་ཅུང་ཟད་ཅིག་ལ་མནལ་ལམ་མཚར་ཆེ་བ་ཞིག་བྱུང་ཡང་ཐོར་མ་འཁོད་པས་ད་ལྟ་མི་དྲན་གསུང་། དེ་ནས་ནང་པར་སྔ་བར་བཞེངས་ནས་སྒྲུབ་པ་མོས་ཇ་ཐུག་སོགས་ཀྱི་སྐྱེས་སྟོབ་པ་བཞེས་ཤིང་། གནས་འཛིན་པ་རྣམས་ཀྱིས་ཐང་མཚམས་བར་ཞབས་སྐྱེལ་ཞུས་ཏེ། དེ་ནུབ་ཟུར་མཁར་དུ་ཕེབས། སྔར་ཉིན་གསོལ་ཆས་གང་ཡོད་ལ་ཚོགས་མཆོད་མཛད་ནས། དེ་ནུབ་གསོལ་ཆས་མེད་པས་གནས་ཚང་གིས་སྒྲོལ་འདོན་མཛད་དུ་བཅུག་སྟེ་བག་ཐུག་གཅིག་དང་། ནང་པར་ཡང་བཞེས་འཇམ་ཞུས་པ་བཞེས་ནས་ཚུགས་བཏོན་ཏེ་དེ་ནུབ་གྲྭའི་དགེ་གསལ་དུ་བཞུགས། སང་དེ་ཐག་ཉེ་གཤིས་ཐེགས་སྟབས་མ་བདེ་ནས། གཡུ་གོང་བྲག་གི་སྐར་སྤུང་གི་འཁྱོག་དེར་ཉི་མ་ཕྱེད་ཡོལ་བར་བཞུགས་ནས་ར་མའི་ལ་བརྒྱུད་དགོན་པར་ཚེས་བཅུ་གཉིས་ཀྱི་སྲོད་ཡོལ་ལ་ཕེབས་པ་རེ་ཞིག་བྱང་ཆུབ་དབང་རྒྱལ་གྱི་སྤྱིལ་བུར་གབ་སྟེ་བཞུགས་ནས་བླ་བྲང་དུ་བརྡ་སྦྱོར་མཛད་པས། ཕྱི་ནང་གི་མི་འགྲུལ་ཆོད་པ་དང་ཡུམ་ཉིད་སྤྱན་འདྲེན་དུ་བྱོན་བྱུང་བ་ལྟར་བླ་བྲང་དུ་ཕེབས་ནས། སང་ཉིན་དེ་སྐུ་མཚམས་ཀྱི་ཁོངས་སུ་ཡོད་རྒྱུ་བས་ཡུམ་ཕེབས་ཏེ། དེའི་སྤྱན་སྔར་གཏེར་སྒྲོམ་ཧྲིལ་མོ་དེ་ཞལ་དབྱེ་བར་མཛད་པའི་ནང་ནས་ཚེ་སྒྲུབ་ཡང་སྙིང་ཀུན་འདུས་ཀྱི་ཤོག་དྲིལ་དང་ཚེའི་རིལ་བུ་ཧྲཱིཿརྒྱ་ཅན་རྣམས་བྱུང་བ་དེ་མ་ཐག་རིལ་བུ་གཅིག་ཡུམ་ལ་གནང་བ་བཞེས་པས་བདེ་སྟོང་གི་ཉམས་འབར་ཞིང་སྐུ་ལུས་འཕར་གཡོ་བྱེད་པ་བྱུང་། ཕྱིས་སུ་ཡུམ་གྱི་ཞལ་ནས། དེ་དུས་ཚེ་རིལ་མྱོང་བའི་སྐལ་བ་བཟང་པོ་བྱུང་བ་དེས་ཡིན་པ་འདྲ། མིང་སྲིང་ལྔའི་བདག་རང་རྒན་ཤོས་ཡིན་ཡང་། གཞན་བཞི་ཀ་འདས་སོང་། ངེད་རང་ལོ་བདུན་ཅུ་རྩ་གྲངས་འཚོ་བ་འདི་

― MLP003_Page_0106 ―

^{[མ་དཔེ་གཟིགས་ན་འདིར་གནོན།]}

[Full Size]

བྱུང་གསུངས། དེ་ཉིན་ཤོག་སེར་ཡང་བོད་ཡིག་ཏུ་སྣང་བས་ཐོར་ཀློག་ཙམ་མཛད་ནས་སྐུ་མཚམས་བཅད་རྒྱའི་མུས་དེ་ཉིད་དུ་ཚེ་ཡི་སྒྲུབ་པ་བདུན་ཕྲག་གཅིག་མཛད། དེ་རྟིང་བཅད་རྒྱ་བཀྲོལ་ནས་ཀྱང་གསང་དམ་པས་སུས་ཀྱང་རིག་པ་མ་བྱུང་ངོ་། །དེ་ནས་ཡབ་རྗེ་གསང་བདག་ཆེན་པོའི་ཕྱི་རྟེན་རྣམས་གྲུབ་པས་བཟོ་བོ་རྣམས་ལ་ཡོན་རྫོངས་བསྟབས་ནས་ཐུགས་སྲས་སྤྲུལ་པའི་སྐུ་སྤྱན་དྲངས་ཏེ་རབ་གནས་དགའ་སྟོན་ཆེན་པོ་མཛད་རྗེས་ཁོང་དཔོན་སློབ་རྣམས་དང་མཉམ་དུ་ལྷོ་བྲག་ཏུ་ཕེབས། དེར་གསུང་སྤྲུལ་རིན་པོ་ཆེ་ལ་ཆོས་མང་པོ་ཞིག་གསན་ཞིང་། ལྷོ་ནང་བཀྲ་ཤིས་ཆོས་གླིང་དུ་ཕྱག་ཕྱིའང་མ་བསྟེན་པར་ཟླ་བ་གཉིས་སྐུ་མཚམས་དམ་པར་མཛད། དེ་ནས་སྤྱན་འདྲེན་པ་འབྱོར་བ་ལྟར་དབུས་སུ་ཕེབས་ཏེ། དར་གླིང་དུ་ཟླ་བ་གཅིག་བར་སྐུ་མཚམས་མཛད་ནས། ཐུགས་དམ་ལ་རྩེ་གཅིག་ཏུ་བཞུགས། དགུང་ལོ་བཅུ་དགུ་པ་ཤིང་འབྲུག་ཧོར་ཟླ་དྲུག་པའི་འགོར་བསམ་ཡས་མཆིམས་ཕུར་ཐེགས་ཏེ། ཡུམ་དང་ལྷན་ཅིག་གནས་གཟིགས་མཛད་པའི་ཚེ་བྲག་དམར་ཀེའུ་ཚང་དུ་མཁའ་ལས་འཇའ་ཚོན་སྣ་ལྔ་རྣམས་ཐོག་བབས་སུ་བབས་ནས་དེ་སྐོར་དུ་འཇའ་འཁྱིལ་ཆེན་པོ་བྱུང་། ཚེས་བཅུའི་ཉིན་ཡུམ་ཉིད་གཞིས་སུ་ཕྱིར་ཐེགས། དེ་ཉིན་ནས་བཟུང་ཤིང་སྦྲུལ་བཤོལ་དང་བཅས་པའི་ཟླ་བ་དྲུག་པའི་ཚེས་བཅུའི་བར་ལོ་མཚམས་ཀྱི་བཅད་རྒྱ་དམ་པར་མཛད་དེ། ཐོག་མར་གུ་རུ་ཞི་བའི་ལྗགས་བསྙེན་མཛད་པའི་སྐབས་ཉེར་ལྔའི་དུས་ཆེན་ཞིག་གི་ཐོ་རེངས་ཀྱི་ཐུན་ཚུགས་པ་ན་སྒྲུབ་ཁང་གི་ནང་གཞན་རྣམས་མུན་པ་དང་བཅས་པ་ཉིད་ལས། སྒྲུབ་རྫས་ཀྱི་སྟེང་གི་ཐད་དེར་འོད་ཀྱི་གུར་ཁྱིམ་དམར་སེར་སྒོ་ང་ལྟ་བུ་གསལ་ཞིང་དྭངས་པའི་ནང་དུ། གུ་རུའི་སྐུ་ཉིད་ཤིན་ཏུ་གསལ་བ་ལ་རྗེ་ཉིད་རང་གི་ཐུགས་དང་རོ་གཅིག་ཏུ་གྱུར་པ་ལྟ་བུར་ཡུལ་མེད་རང་གསལ་དུ་སྣང་བའི་ངེས་ཤེས་བརྟན་པོ་འཆར་བ་དང་། ཡང་དེ་དུས་དཔལ་ཆེན་ཕུར་པའི་ལྷ་ཚོགས་བསྙེན་སྒྲུབ་ཟླ་བ་དྲུག་གི་བར་གནང་བའི་ཚེ། གཟིམས་སྤྱིལ་གྱི་རྩིག་སེང་མདའ་སྙུག་ཤོང་ཙམ་ཞིག་ཡོད་པ་དེར་དུད་པ་འདྲ་བ་ཞིག་སྔོ་ཕྱུར་གྱིས་བྱུང་བ་དེ་སྤྱན་ལ་མདུང་ཚུགས་སུ་ཟུགས་པའི་སྣེ་ཁབ་མིག་ལྟ་བུར་ཕྲ་ཞིང་ཇེ་ཆེར་སོང་བའི་

― MLP003_Page_0107 ―

^{[མ་དཔེ་གཟིགས་ན་འདིར་གནོན།]}

[Full Size]

འོད་ཀྱི་སྦུ་གུ་ཕྱི་མཐའ་ཚད་མེད་པ་རག་དུང་གི་དབྱིབས་ལྟ་བུའི་ནང་ན་རྒྱ་བོད་ཀྱི་གནས་ཡུལ་སྐྱེ་བོའི་བྱ་བྱེད་སོགས་ཐམས་ཅད་མེ་ལོང་གི་གཟུགས་བཞིན་གསལ་བ་དང་། ཁྱད་པར་བོད་ཡུལ་ཙམ་དང་དབུས་གཞུང་ཉེ་འཁོར་གྱི་གནས་ལུགས་ཐམས་ཅད་མངོན་སུམ་བཞིན་དུ་གཟིགས། ཇེ་ཞིག་ན་ཆུ་ནང་གི་གཟུགས་བརྙན་རླབས་ཀྱིས་དཀྲུགས་པ་བཞིན་འགྲིབ་ནས་སླར་ཡང་ཞིང་ཁམས་འཇའ་འོད་ཀྱིས་བྲེས་པའི་ཐིག་ལེ་མུ་ཁྱུད་ཀྱི་རྭ་བའི་ནང་མཐིང་ཞུན་ལྟར་དྭངས་པའི་ཀློང་དུ་རྡོ་རྗེ་སེམས་དཔའ་དཀར་གསལ་དྲི་མ་མེད་པའི་སྐུ་ཅན་མཚན་དཔེ་གསལ་རྫོགས་སུ་བཞུགས་པའི་གཡས་གཡོན་དུ་ལྷ་མོ་མཛེས་སྡུག་དཀར་དམར་གཉིས་དར་དང་རིན་པོ་ཆེས་བརྒྱན་པ། པི་ཝང་དང་གླིང་བུས་བསྒྱུར་བའི་རོལ་མོའི་གདངས་ལས་ཚིག་འདི་སྐད་ཅེས་འབྱུང་སྟེ། ཨ་ཧོ། འོག་མིན་གྱི་གནས་ན་ཟག་མེད་ཀྱི་བདུད་རྩི། །དགའ་ལྡན་གྱི་ལྷ་ལ་འཆི་མེད་ཀྱི་བདུད་རྩི། །འཛམ་གླིང་གི་མི་ལ་མྱོས་བྱེད་ཀྱི་བདུད་རྩི། །རོ་ཡི་ཁྱད་པར་ཡང་ཐ་དད་མང་པོ། །ནུས་པའི་ངོ་བོ་ལ་ཁྱད་པར་མི་འདུག །དེ་འཐུང་གི་ཌཱཀྐི་མི་བསྐྱོད་རྡོ་རྗེ། །སྙིང་སྟོབས་ཀྱི་གོ་ཆ་གསལ་བར་གདའ་ན། །ཤེས་རབ་ཀྱི་རལ་གྲི་རྣོ་ངར་འཛོམ་དགོས། །སྔོན་འདས་ཀྱི་ཚུལ་ལ་ཨ་ཧོ་ཨ་ཧོ། །ཕྱིན་ཆད་ཀྱི་ས་ལ་སེམས་ཀྱི་ས་བོན། །ཡུལ་དུ་གདབ་པ་ནི་ཡ་མཚན་ཡིན་ནོ། །ཞེས་སྒྲོགཡང་དེ་ཉིད་སྔར་བཞིན་ཡལ་མཐར་ཨ་ཡིག་དཀར་གསལ་འོད་ཟེར་འཕྲོ་བ་འཇིག་རྟེན་གང་བ་ཙམ་ཞིག་གཟིགས། དེ་ཧྲིལ་གྱིས་འགྲིལ་ནས་འོད་ཀྱི་རྩ་བ་ཕྲ་ས་དེར་འདུས་པའི་ཐིག་ལེ་དཀར་པོ་ཡུངས་འབྲུ་ཙམ་ཞིག་ཏུ་སོང་བ་སྤྱན་ལ་ཐིམ་པ་འདྲ་བ་ཞིག་བྱུང་། འཆར་སྒོའི་ཡུན་ལ་དཔག་ན་ཉི་ཕྱེད་ཙམ་སོང་སྙམ་པ་བྱུང་ཡང་ཉི་ཚད་ཆེར་མ་འཕོས་པ་འདུག་གསུང་། ཡང་སྐབས་ཤིག་ནམ་མཁར་དཔལ་ཆེན་པོ་ཧེ་རུ་ཀ་འཁོར་བཅས་ཤིན་ཏུ་གསལ་བ་སྒྲ་འོད་ཀྱི་སྣང་བ་དང་བཅས་གཟིགས་པ་དེ་ཉིད་ལ་ཐུགས་གཡོ་མེད་དུ་གནས་པ་དར་ཅིག་གི་བར་དུ་བྱུང་། སླར་ཡང་ཡུལ་གྲོང་ནགས་ཀླུང་མེ་ཏོག་གི་ཚལ་ཡིད་འོང་རབ་ཏུ་རྒྱས་པའི་དབུས་སུ། ཨོ་རྒྱན་སངས་རྒྱས་གཉིས་པ་ཉིད་ཛོ་ཀི་རྣལ་འབྱོར་སྤྱོད་པའི་ཆས་ཅན་གཟི་བརྗིད་ཉི་མ་ལྟར་འབར་བའི་

― MLP003_Page_0108 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་དུ་རིག་འཛིན་མཁའ་འགྲོའི་ཚོགས་དང་ཁྱད་པར་ཡེ་ཤེས་མཚོ་རྒྱལ་མཛེས་སྡུག་མོན་མོའི་ཆས་ཅན་གཡོན་དུ་འཁོད་པའི་རྣམ་པ་གསལ་བ་ལ་གུས་པས་བཏུད་པའི་ཚེ། བྱིན་གྱིས་བརླབས་པའི་བརྡ་ཐབས་དང་། མཚོ་རྒྱལ་གྱིས་གླེགས་བམ་ཆུང་ངུ་ཞིག་ཕུར་པའི་ཟབ་ཆོས་ཡིན་ཞེས་ཕྱག་ཏུ་གཏད་དེ། ང་ནི་རྣལ་འབྱོར་བདུད་འདུལ་དྲག་མོ་རྩལ། །བུ་ཁྱོད་རྟག་ཏུ་བྱིན་གྱིས་བརླབས་པ་ཡིན། །ཞེས་གསུང་། གླེགས་བམ་དེ་ཕྱག་ཏུ་བཞེས་པ་ཞལ་ཕྱེ་ནས་ལྗགས་ཀློག་གནང་བར་རྩོམ་པ་ན། རླུང་དྲག་པོས་དཔེ་རྣམས་ཕྱོགས་བཅུར་ཁྱེར་བའི་སྒྲ་གདངས་ཀཱི་ལ་ཡར་སྒྲོག་པའི་ངང་ནས། རྗེ་ཉིད་རང་ཡང་བྱང་ཤར་མཚམས་ཀྱི་མཁའ་ལ་བྱ་འཕུར་བ་ལྟར་ཐོགས་མེད་དུ་གཤེགས་པའི་ལམ་རྣམས་དུར་ཁྲོད་རབ་ཏུ་འཇིགས་པ་ཤ་རུས་ཀྱི་གཅོང་རོང་ཁྲག་རྒྱུན་གྱི་ཞམ་ཆུ་འབེབས་ཤིང་ནགས་ཚལ་མང་པོ་འདས་པའི་མཐར། མེ་ཏོག་སྣ་ཚོགས་རྒྱས་པའི་ཚལ་དུ་ཨསྨ་གརྦྷའི་འགྲམ་སྟེགས་ཡིད་དུ་འོང་བའི་དབུས་སུ་ཡན་ལག་བརྒྱད་དང་ལྡན་པའི་ལྷ་ཡི་ཆུ་བོས་ཡོངས་སུ་གང་བའི་རྫིང་བུ་གཟིགས་པ་ན། ལྕང་ལོ་ཅན་གྱི་བདུད་རྩི་ནི་འདི་ཡིན་ནོ། །ཞེས་པའི་སྒྲ་གྲགས་པ་གསན་པས། དེ་ལས་གསོལ་བར་བཞེད་ནས་ཕྱག་གིས་བཅུས་པའི་ཚེ་ཧཱུྃ་ཡིག་མཐིང་ཞུན་སྙིམས་པ་ཁེངས་པ་ཞལ་དུ་བཞེས་པ་ན། རྒྱལ་ལོ་བར་ཆད་བདུད་སྡེའི་གཡུལ་ལས་རྒྱལ། །འགྲོ་དོན་བསྟན་པ་མཐའ་རུ་རྒྱས་པར་འགྱུར། །ཞེས་པའི་སྒྲ་གདངས་ནམ་མཁའ་གང་བ་ཙམ་གསན་པའི་རྐྱེན་གྱིས་མནལ་སད་ཅིང་སད་ནས་ཀྱང་ཟག་མེད་བདེ་བའི་ཉམས་ཀྱིས་ལུས་སེམས་ཁྱབ་པའི་ངང་ལ་རྩོལ་མེད་རིང་དུ་གནས་པ་བྱུང་། ཡང་ནུབ་གཅིག་མནལ་ལམ་དུ། བུད་མེད་མང་པོས་སྔུན་བསུས་ཏེ་ཁང་བཟང་བཀོད་པ་ལེགས་པ་ཡིད་དུ་འོང་བའི་ནང་དུ་ཐེགས་པས། དེར་རིན་པོ་ཆེའི་ཁྲི་མཐོ་ཞིང་ཡངས་པར་ཡབ་རྗེ་གསང་བདག་ཆེན་པོ་བཞུགས་འདུག་པ་མཇལ་ཏེ་གུས་པས་ཕྱག་མཛད་པ་ན། སྙིང་ཐིག་གི་འདས་རྗེས་རྫོགས་པར་གསུངས་ཤིང་། སྔར་གྱི་བུད་མེད་རྣམས་ཀྱིས་ཀ་པཱ་ལ་ཤ་ཆང་ཟས་སྣས་བཀང་བ་ཕྱག་ཏུ་ཕུལ་བའི་མཐར། ཕྱི་མཐའི་གནས་དུས་ཀྱི་འགྱུར་ལྡོག་སོགས་མང་པོ་ཞིག་ལུང་དུ་བསྟན། ཡང་སྐབས་ཤིག་

― MLP003_Page_0109 ―

^{[མ་དཔེ་གཟིགས་ན་འདིར་གནོན།]}

[Full Size]

མནལ་དུ་སོང་བ་ནི་མེད། མངོན་སུམ་ལྟ་བུ་ལ་མཚན་འཛིན་གྱི་དྲན་རྟོག་རགས་པ་དེའང་མེད་པའི་འོད་གསལ་གྱི་རྩལ་སྣང་ལ་བཞུགས་པའི་ཁྱོན་དེ་ཀ་རིན་པོ་ཆེའི་ཁང་བཟང་ཕྱི་ནང་མི་སྒྲིབ་པ་ངོ་མཚར་ཆེ་བ་ཞིག་ཏུ་སོང་བ་ན། བུད་མེད་གཞོན་མཛེས་ཆས་གོས་དང་རྣམ་འགྱུར་སྣ་ཚོགས་པས་བསྐོར་བའི་དབུས་སུ། མཁའ་འགྲོ་མཚོ་རྒྱལ་གཞོན་མཛེས་དམར་མདངས་ཆགས་པ་རུས་པ་དང་མེ་ཏོག་གི་ཕྲེང་བའི་རྒྱན་ཅན་གཟི་མདངས་མཚུངས་པ་མེད་པ་ཞིག་བཞུགས་འདུག་པ་དེས་ཆང་ཐོད་ཕོར་གང་སྩལ་བ་བཞེས་པས་ལུས་སེམས་ལ་བདེ་བ་བཟོད་མེད་དུ་འབར་བ་སྙམ་བྱེད། ཡང་ཅུང་ཟད་མནལ་བ་ན། མཚོ་རྒྱལ་གྱིས་རུས་པའི་སྨྱུ་གུ་དང་ཤེལ་གྱི་གླེགས་བུ་ཞིག་ཕྱག་ཏུ་གཏད་དེ། གཏེར་ཤོག་གི་བམ་པོ་མང་པོ་ལས་ཁ་ཅིག་གུད་དུ་ཕྱེ་ནས་འདི་རྣམས་བྲིས་གསུངས། སྣག་ཚ་མེད་སྙམ་པ་ན། དེ་ཉིད་ཀྱི་ཞལ་ནས་མཚལ་ཁྲག་ཕྱུང་སྟེ་སྩལ་བས་འདྲི་བར་བརྩམ་པ་ན། ཆོས་ཚན་མང་པོ་ཡུད་ཙམ་ཞིག་ལ་བྲིས་ཚར་བ་སྙམ་མཛད་པ་དང་མནལ་སད། སད་ནས་ཀྱང་ཐུགས་ཉམས་དགྱེས་ཡ་ལེ་བར་འདུག་པས། ཤོག་སེར་འབེབས་པར་གནང་བ་བྱིན་པར་དགོངས་ཏེ། སང་ཉིན་དེ་ཚེ་སྒྲུབ་སྐོར་གྱི་ཤོག་སེར་འབེབས་པར་མཛད་པའི་དུས་ནམ་མཁའ་འཇའ་འོད་ཀྱིས་ཁེངས་པ་སོགས་ངོ་མཚར་བའི་རྟགས་མངོན་དུ་གཟིགས། དེའི་ཚེ་དཔལ་རི་སྤྲུལ་པའི་སྐུས་མོས་འདུན་དྲག་པོས་གསོལ་བ་བཏབ་པ་ལྟར། ཤོག་སེར་འབེབས་པའི་ལུང་བསྟན་དང་སྤྲུལ་པའི་སྐུས་སྙན་འབུལ་ཡང་སྟེས་འགྲིག་པས་དུས་ལ་བབས་པར་དགོངས་ནས་ཚེ་དབང་དང་ཚེ་སྒྲུབ་སྐོར་གྱི་ལུང་སྩལ་ཏེ། ལུང་བསྟན་ལྟར་ཆོས་བདག་གི་ཐོག་མའི་རྟེན་འབྲེལ་སྣེ་ཟིན་ཙམ་ཞིག་འགྲིག་ནའང་། ཕྱིས་གཞན་རྐྱེན་བར་ཆད་ཀྱི་དབང་དུ་ཐལ་བ་ཞིག་བྱུང་བར་སྣང་། སྐུ་མཚམས་དེའི་ཁོངས་སུ་གཏེར་སྒྲོམ་གྲུ་བཞི་པ་དེ་ཞལ་དབྱེ་བར་མཛད་པ་ལས་རིག་འཛིན་ཐུགས་ཐིག་གི་ཆོས་སྐོར་དང་། དམ་རྫས་ལེ་ཚན་གསུམ་གུ་རུའི་སྐུ་ཚབ་ཆེ་ཆུང་རྣམས་བྱོན་པ་ལས་ཆོས་སྐོར་ཕལ་ཆེ་བ་རྣམས་བུ་དཔེར་འབེབས་པར་མཛད་ཅིང་། ལྷ་སོ་སོའི་བསྙེན་སྒྲུབ་ཀྱང་གནང་སྟེ་དངོས་གྲུབ་ཀྱི་མཚན་མ་བཟང་པོ་གཟིགས་པས་ལེགས་ཚོགས་ཀྱི་རྟེན་

― MLP003_Page_0110 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲེལ་འགྲིག་ནས་ཤིང་སྦྲུལ་ཟླ་བ་དྲུག་པའི་ཚེས་བཅུའི་སྔ་དྲོ་ནང་མཚམས་བཀྲོལ་ཏེ། ཞག་ཤས་ངལ་གསོར་བཞུགས་སྐབས། དབུ་མཛད་ལྷུན་གྲུབ་རྣམ་རོལ་གྱིས་མོས་དུངས་ཆེན་པོས་གསོལ་བ་བཏབ་པ་ལྟར། ཚེའི་དབང་དང་རྩ་བའི་སྒྲུབ་སྐོར་ཙམ་གྱི་ལུང་བསྩལ། དེ་ནས་གཡའ་མ་ལུང་དུ་ཕེབས་ཏེ། སྐུ་ཚེའི་སྒྲུབ་པ་བདུན་ཕྲག་གཅིག་གནང་བས། བུམ་པའི་ཚེ་ཆུ་ཆུ་ནང་དུ་རྡོ་སྲེག་བཅུག་པ་ལྟར་ཁོལ་བའི་རླངས་པའི་ཁྲོད་ནས་ཧྲཱིཿཡིག་དམར་པོའི་རྣམ་པ་མང་པོ་གྱེན་དུ་འཕྱུར་བའི་གསལ་སྣང་ཤིན་ཏུ་ཆེ་བ་ཞིག་གཟིགས། ཟླ་བ་དྲུག་པའི་མཇུག་ལ་དར་གླིང་དུ་ཕྱིར་ཕེབས་ནས་ནང་འཁོར་རྣམས་ལ་གཏེར་རྫས་ཀྱི་བྱིན་རླབས་གནང་། དེ་ནས་ཟླ་བ་བདུན་པའི་ཉེར་ལྔའི་ནུབ་དར་གླིང་དབང་ཁང་དུ་གཅུང་རྒྱལ་བའི་སྲས་པོ། ཡུམ་ལྷ་འཛིན་དབྱངས་ཅན་སྒྲོལ་མ། སྐུ་ཞང་དོན་འགྲུབ་ཚེ་བརྟན་བཅས་ཉུང་འདུས་ལ་རིག་འཛིན་ཐུགས་ཐིག་རྡུལ་ཚོན་གྱི་དཀྱིལ་འཁོར་ལ་བརྟེན་པའི་དབང་བསྐུར་དང་ལུང་རྣམས་མཐའ་རྒྱས་སུ་སྩལ་སྐབས་ཁོ་བོས་ཀྱང་སྐལ་བཟང་གི་བཀའ་དྲིན་ཐོབ། དེའི་ཚེ་སྙན་པའི་སྒྲ་ལྡིར་ཞིང་ལྷས་མེ་ཏོག་གི་ཆར་ཕབ། བུམ་ནང་དུ་མེ་ཏོག་ལྷུང་བ་མྱུ་གུ་སྡོང་པོ་སྙེ་མའི་བར་དུ་སྨིན་པ་སོགས་ངོ་མཚར་བའི་མཚན་མ་བཟང་པོ་མངོན་དུ་སྣང་བར་མཛད། དེ་རྗེས་གཟིམས་ཆུང་བསམ་གཏན་སྦུག་ཏུ་བསྟན་འགྲོའི་ཕན་བདེ་སྤེལ་བའི་ཆེད་དུ་རྩ་གསུམ་བསྐང་བཤགས་སོགས་ཟླ་བ་གཅིག་གི་བར་དུ་སྐུ་མཚམས་དམ་པོས་བསྒྲུབས་པའི་མཐར་སྲེག་བླུགས་ཀྱི་མཆོད་པ་འབུལ་བར་མཛད་པ་ན། མེ་པདྨ་ལྟ་བུར་འབར་བ་ལས་སྙན་པའི་སྒྲ་ཏིང་ཤག་གི་སྒྲ་ལྟར་གྲགས་པའི་དགེ་མཚན་ཡང་གཟིགས། དགུན་དེ་བསམ་གཏན་སྦུག་ཏུ་ཟླ་ཤས་ཀྱི་བར་དུ་སྐུ་མཚམས་དམ་པར་བཅད་ནས་རྟ་མགྲིན་གྱི་ལྗགས་བསྙེན་མཛད་པ་ན། སྐབས་ཤིག་ནམ་མཁའི་སྤྲིན་གསེབ་ནས་སྤྱན་རས་གཟིགས་དབང་མཛེས་འཛུམ་འོད་ཟེར་འཕྲོ་བ་བྱོན་ནས་ཉིད་ཀྱི་སྐུ་ལ་ཐིམ་པ་དང་། ལྷ་འདྲེ་མི་སོགས་རྣམ་འགྱུར་མ་ངེས་པའི་འགྲོ་བ་མང་པོས་བཏུད་པ་སོགས་ཀྱི་སྣང་ཉམས་དང་ཤེས་ཉམས་ཟད་མི་ཤེས་པ་དང་། གང་ཤར་གྱི་སྣང་བ་ཐམས་ཅད་སྒྱུ་མའི་འཁྲུལ་འཁོར་ལྟར་སྣང་ཙམ་ནས་རང་བཞིན་སྤྲོས་བྲལ་

― MLP003_Page_0111 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་དབྱིངས་སུ་གྲོལ་བའི་སྣང་སྟོང་ཞེན་བྲལ་གྱི་གནས་ལུགས་རྗེན་པར་གཟིགས་པའི་རྟོགས་པ་ཁྱད་པར་ཅན་འཁྲུངས། སྐུ་མཚམས་གྲོལ་རྗེས་ལྷ་ལྡན་ཕྱོགས་སུ་ཆིབས་བསྐྱོད་དེ། རྒྱལ་ཟླའི་གནམ་གང་གི་ནུབ་མནལ་ལམ་དུ་བུད་མེད་གཟུགས་བཟང་སྐྲ་རིང་པོར་འཕྱང་བ་གསེར་གཡུས་བརྒྱན་པ་གཅིག་གིས་མདའ་དར་དཀར་པོ་ཞིག་ཕྱག་ཏུ་གཏད་ནས་གུས་ཕྱག་འབུལ་བའང་བྱུང་། དེ་ནས་མེ་རྟ་ཟླ་བ་དང་པོའི་ཚེས་གཉིས་ཀྱི་ཉིན་གྲུ་འཛིན་གྱི་ཕོ་བྲང་ཆེན་པོར་ལྷ་མིའི་སྟོན་པ་རྒྱལ་མཆོག་ལྔ་པ་ཆེན་པོ་མཇལ་དུ་ཐེགས་པ་ན། ཆེ་དགུ་མང་དུ་འཚོགས་པའི་བཞུགས་གྲལ་གྱི་དབུས་སུ་ཉིད་ཀྱིས་ཟབ་གཏེར་ཞིག་བཞེས་ཡོད་འདུག་པར་ཡོང་ལུགས་ཅི་འདྲ་བྱུང་ཞེས་བཀའ་འདྲི་ཕེབས་པར། ངེས་པ་འདྲོང་པའི་སྙན་འབུལ་ཞུ་འོས་ཤིག་མེད་ཀྱང་། སླར་བསླབ་སྟོན་ཞུ་དགོས་པར་འདུག་ཅེས་ཞུ་བར་མཛད་པས། བཞུགས་གྲལ་དེ་གྱེས་པ་དང་སང་སྔ་བར་གཏེར་རྫས་སོགས་བསྣམས་ནས་བྱོན་ཅིག་ཅེས་མགྲོན་གཉེར་གྱིས་བསྒྱུར་བྱུང་བ་བཞིན། སང་སྔ་ཆར་རྩེར་ཕེབས་པ་ན། དེ་མ་ཐག་སྐུ་ཞབས་སུ་གནང་བའི་དྲུང་ན་ཞབས་ཕྱི་སུ་ཡང་མེད་པའི་ཤིན་ཏུ་འགོལ་བར་ཁ་བྱང་བྱུང་ཚུལ་ནས་བཟུང་སྔ་ཕྱིའི་རྒྱུ་མཚན་རྣམས་བཀའ་འདྲི་ཞིབ་པར་སྩལ་ཕེབས་ལ། ཡིན་ལུགས་ཀྱི་ལན་དྲང་པོར་གསོལ་བར་མཛད་པས། གཏེར་རྫས་རྣམས་ལ་ཡང་ཞིབ་པར་གཟིགས་ཤིང་། གསོལ་ཇ་གཉིས་ཀྱི་བར་གནས་ཚུལ་གཞན་དག་ཀྱང་ལྷུག་པར་སྩལ་བའི་མཐར། རེ་ཞིག་གཏེར་རྫས་རྣམས་འདིར་འཇོག་པར་མཛད་ནས་ཁྱེད་རང་དཔོན་སློབ་རྣམས་ལྷ་སར་བཞུགས་ཤིག་ཅེས་གསོལ་ཆས་ཀྱི་ཕོག་བཟང་པོའང་གནང་། དེ་ནས་ཚེས་ལྔའི་ཉིན་སྤྱན་འདྲེན་པ་མངགས་པ་ལྟར་རྩེར་ཐེགས་པ་ལས། གོང་ཞབས་ཉིད་སྐུ་མཚམས་བཅད་རྒྱ་གནང་བའི་རྒྱ་གུར་ཞིག་ཏུ་བཞུགས་སྟན་སྟབས་བདེ་དམའ་བར་མཛད་པའི་ཤིན་ཏུ་ཉེ་བར། དྲེའུ་རྔོག་གི་བཞུགས་སྟན་བཟང་པོ་ལ་བཞུགས་སུ་བཅུག་ནས། མདང་སོང་བརྟག་པ་བགྱིད་པའི་རྟགས་དང་རྟེན་འབྲེལ་ཐམས་ཅད་ཀྱང་བཟང་། ཁྱད་པར་ཤོག་སེར་རྣམས་ཉང་རིན་པོ་ཆེའི་གཏེར་ཤོག་དང་དབྱེ་བ་མེད་པ་སོགས་གཏེར་རྫས་ཐམས་ཅད་ཀྱང་ངོ་མཚར་དང་ལྡན་པ་ཁོ་ནར་འདུག་

― MLP003_Page_0112 ―

^{[མ་དཔེ་གཟིགས་ན་འདིར་གནོན།]}

[Full Size]

ཅིང་། སྔ་སོར་ངེད་རང་གི་དག་སྣང་ནོར་བུའི་རྒྱ་ཅན་དུ། ཨོ་རྒྱན་ཐུགས་སྲས་སྦས་ཚུལ་མ་ངེས་པ། །བྱུང་དང་རྟེན་འབྲེལ་འགྲིག་ན་བོད་འདི་བདེ། །ལོ་གསུམ་ཚུན་ལ་བརྟག་དཔྱད་ཞིབ་ཏུ་ཆོད། །ཅེས་འདུག་པ་འདི་ལྕགས་བྱི་དེ་ནས་བརྩིས་པའི་སྟག་ལོ་བསམ་ཡས་སུ་མཇལ་བས་ལོ་ངོ་གསུམ་དང་། དེའི་ཕྱི་ལོ་ཡོས་ལོར་གཏེར་ཁ་བཞེས་པས་ལོ་རིལ་པོ་གསུམ་གྱི་དུས་འགྲིག་པ་སོགས་ངེས་ཤེས་འདྲོངས་པ་བྱུང་བ་བཅས། ད་རེས་ཐོག་མའི་རྟེན་འབྲེལ་མ་ལོགས་པ་ཞིག་གལ་ཆེ་བར་འདུག་པས། དེའི་དགོངས་པ་གཏོད་དགོས་ཞེས་དར་དཀར་རིང་པོ་ཞིག་སྩལ་ནས་གཏེར་རྫས་རྣམས་དབུ་ཐོག་ཏུ་བཞེས་པ་ལ་རྗེ་ཉིད་ཀྱི་ཕྱག་གིས་བཟུང་སྟེ་བརྒྱུད་པའི་བཤར་འདེབས་དང་། བཀའ་གཏད་ཀྱི་སྨོན་ལམ་འབུལ་བར་མཛད་ཅིང་དེ་དུས་གོང་ཞབས་ཉིད་ཆོས་རྒྱལ་ཁྲི་སྲོང་གི་རྣམ་པར་གཟིགས་པའི་རྐྱེན་གྱིས་ཆོས་རྒྱལ་དང་བཻ་རོའི་ལས་འབྲེལ་སོགས་སྔ་ཕྱིའི་འཁྲུངས་རབས་འགའ་ཞིག་ཐོགས་མེད་དུ་ཐུགས་ལ་སལ་ལེར་ཤར་བ་བྱུང་། དེ་རྗེས་བཀའ་ལས། ད་རེས་རྟེན་འབྲེལ་གྱི་སྣ་ཟིན་དེ་ཙམ་ཞུས་ཏེ། དབང་ལུང་རྣམས་རིན་པོ་ཆེ་སྨན་ལུང་པ་བརྒྱུད་ནས་ཞུ་དགོས་འདུག་ཅིང་། ཕྱིས་ཆོས་བཀའ་རྣམས་ངོས་ཀྱིས་ཞུ་བའི་རྟེན་འབྲེལ་བསྒྲིག་དགོས་འདུག་པ་ཐུགས་འདུན་གཏོད་དགོས་ཚུལ་དང་། གཞན་ཡང་འཕྲལ་ཡུན་གྱི་བསླབ་སྟོན་ཞིབ་རྒྱས་དགྱེས་བཞིན་དུ་སྩལ། དེ་ནས་ལྷ་སར་མི་དབང་ཆེན་པོར་མཇལ་ཕྱག་དང་། ཐུགས་སྲས་སྤྲུལ་པའི་སྐུ་ལྷ་སར་ཕེབས་འདུག་པའང་མཇལ་དུ་ཐེགས་པས། ཉིད་ཀྱིས་གཏེར་བཞེས་པ་ད་རེས་ཚུན་མ་ཚོར། རང་ལུགས་ཀྱི་བསྟན་པ་ལ་ཤ་ཐོག་མར་བརྩེགས་ཀྱི་ཕན་པ་ཆེན་པོར་གྱུར་ཅིང་། སླར་ཆོས་བཀའ་རྣམས་ཞུ་བའི་རྟེན་འབྲེལ་བྱེད་གསུང་། བཞེས་ཅན་བཅུད་ཀྱིས་གང་བ་ཞིག་འབུལ་བར་མཛད། ཕྱིས་ལྷོ་བྲག་གུ་རུ་ལྷ་ཁང་དུ་སྤྱན་དྲངས་ཏེ་རིག་འཛིན་ཐུགས་ཐིག་གི་དབང་ལུང་རྣམས་གསན་ཞིང་། ཉམས་བཞེས་མཛད་པས་རྟེན་འབྲེལ་ལེགས་ཚོགས་སུ་འགྲིགགནས་ཚང་དུ་བླ་སྨན་འབྲང་རྒྱས་པ་དང་། གཞི་ཤར་ལགས་ཨ་གུར་སོགས་ཉུང་འདུས་ལ་གཏེར་གསར་གྱི་དབང་ལུང་རགས་རིམ་གནང་བ་ལའང་ཅུང་ཟད་འཚུབ་པ་ཙམ་བྱུང་ཞིང་།

― MLP003_Page_0113 ―

^{[མ་དཔེ་གཟིགས་ན་འདིར་གནོན།]}

[Full Size]

ཚེས་དགུ་ལ་ཆིབས་བཏེག་སྟེ། རིམ་པར་ཆུ་བོ་རི་ཟེ་བོར་སྨན་ལུང་རིན་པོ་ཆེར་གཏེར་གསར་གྱི་དབང་ལུང་རྣམས་གང་མྱུར་འབུལ་བར་མཛད་པར་ཡང་ཤངས་ཁྲག་ཆད་མེད་དུ་ཟག་པ་སོགས་འཚུབ་ངོ་གསལ་བ་ཙམ་བྱུང་བས་མྱུར་ཁྱད་ཀྱིས་རང་གནས་སུ་ཕྱིར་ཕེབས་མཚམས་ནས། གྲིབ་ཚད་ལྟ་བུའི་བསྙུན་བབས་གཞི་ཆེ་བ་ལ་རེས་འགའ་ཤངས་ཁྲག་ཞག་རེ་ཙམ་སྦྲེལ་མར་འཛག་པ་སོགས་ཟླ་བ་གསུམ་དུ་ཉེ་བར་གཟིམས་མལ་དུ་ལྷུངས་པའི་ཤིན་ཏུ་བསྙུན་བབས་ལྕི་བས། སྨན་པ་རྣམས་ཀྱིས་ཀྱང་ཞལ་མི་བཞུགས་པར་ཐག་བཅད། འོན་ཀྱང་སྐུའི་རིམ་གྲོར་གཏེར་གསར་གྱི་སྲུང་མ་རྣམས་ལ་བསྐང་བཤགས་དང་བསུན་བཟློག་སོགས་བསྒྲུབས། ཁྱད་པར་ཟླ་བ་གསུམ་པའི་ཉེར་དགུའི་ཉིན། གཅུང་རྒྱལ་སྲས་རིན་པོ་ཆེ་དཔལ་རི་ནས་ཕེབས་ཏེ། དེ་འཕྲལ་གཅུང་དང་གྲུབ་ཆེན་དམ་པ་གཉིས་ཀྱིས་མཁའ་འགྲོ་གྲིབ་སེལ་ཞིག་འབུལ་བར་མཛད་ཅིང་། གཙོ་བོར་རྗེ་ཉིད་རང་གི་གསང་སྒོ་འཆོལ་བའི་ཉེས་པ་ལ་བཤགས་པ་ལན་མང་དུ་མཛད་པའི་མཐུས། ཉེར་དགུའི་སྲོད་ཀྱི་ཆ་ལ་མནལ་ལམ་དུ། བཞུགས་སའི་ནུབ་ངོས་ཀྱི་སྐྱ་ལོགས་དེ་ལ་ཐང་སྐུ་ཞིག་བཀྲམ་འདུག་པའི་ཡུལ་བཀོད་ལ་མཆོད་རྟེན་ཞིག་འདུག་པའི་དྲུང་ན། རྡོ་རྗེ་ཕག་མོ་ཉིད་བདག་འཛིན་གྱི་ཞེན་ངོར་བུད་མེད་མི་སྡུག་པའི་རྣམ་པར་བསྟན་ནས་ཁྲོ་ཚུལ་དང་མྱ་ངན་གྱི་རྣམ་པ་བྱེད་པ་དང་། ཡང་དེ་འཕྲལ་འཛིན་མེད་རིག་རྩལ་གྱིས་རྣལ་འབྱོར་མ་ལྷའི་བུ་མོའི་རྣམ་པ་འཇོ་སྒེག་བདེ་བའི་ཉམས་ཅན་མདའ་དར་ཐོགས་ནས་བརྡ་ཚིག་གིས་གླུས་ན་བའི་རང་བཞིན་སྒྱུ་མར་ངོ་སྤྲད། ཡང་ནང་གི་མུན་པ་ཆེན་པོའི་གདངས་སྤྲིན་གསེབ་ནས་མི་སེང་གེའི་གདོང་ཅན་འབྲུག་ལ་བཞོན་པ་ཞིག་མདུན་གྱི་ནམ་མཁར་གློག་འགྱུ་བ་བཞིན་དུ་བདུད་ལས་རྒྱལ་བའི་གད་རྒྱངས་འབྲུག་སྒྲ་ལྟར་སྒྲོག་བཞིན་པར་སོང་བ་དང་མནལ་སད། ཡང་དེ་འཕྲལ་ཅུང་ཟད་མནལ་བ་ན། གཟུང་འཛིན་གཅོད་པའི་རང་རིག་གི་རྩལ་ཐུགས་ཀ་ནས་གྲི་གུག་རྣོ་དབལ་ཅན་ཞིག་འཐོན་ཏེ་ཇེ་མཐོར་སོང་བ་ནམ་མཁའ་དང་ཁྲིག་གེ་འདྲེས་པའི་མོད་ལ། དེ་ཉིད་སྣང་བ་ཀུན་དང་རོ་གཅིག་ཏུ་འདྲེས་ནས་བདེ་གསལ་རྣམ་པར་མི་རྟོག་པའི་ཡེ་ཤེས་སུ་འབར་བར་གྱུར་ལ།

― MLP003_Page_0114 ―

^{[མ་དཔེ་གཟིགས་ན་འདིར་གནོན།]}

[Full Size]

དེའི་ངོ་བོ་རང་རིག་འགྱུར་མེད་ཀྱི་མཐའ་སོན་པ་དང་མནལ་སད་ཅིང་། སད་ནས་ཀྱང་སྐུ་ལུས་ལ་བདེ་ཉམས་རྒྱས་པས། ཟླ་བ་སྒྲ་གཅན་ལས་གྲོལ་བ་བཞིན་བསྙུན་གཞི་ལས་སྐད་ཅིག་གིས་གྲོལ་བས་ཐམས་ཅད་ཡ་མཚན་པར་གྱུར། དེ་ལྟར་རྗེ་རྒྱལ་བའི་དབང་པོར་ཟབ་ཆོས་འབུལ་བ་མཛད་པ་འདི་ལ། ཕྱིས་སུའང་བཀའ་ལས་ཕོ་ཉའི་བརྒྱུད་སྐོར་མེད་ན་རྟེན་འབྲེལ་གྱི་གཞི་ཆེ་བ་ཞིག་འགྲིག་ཏུ་ཡོད་ཀྱང་། དེ་ལས་ཆ་ཙམ་དམན་པར་གྱུར་མོད་འོན་ཀྱང་རྟེན་འབྲེལ་གྱི་རྩ་བ་ལེགས་པར་འགྲིག་པ་ཡིན་གསུངས། འདི་སྐབས་གོང་མའི་ལུང་བཞིན་སྐུ་རྟེན་དཀར་ཆས་སུ་བསྒྱུར་བའང་མཛད། དེ་ནས་མི་རིང་བར་ལུང་བསྟན་སོགས་ཆོས་སྐོར་འགའ་ཞིག་གི་གཏེར་ཤོག་ཀྱང་འབེབས་པར་མཛད་ཅིང་། མེ་རྟ་ལོ་ཟླ་བ་བཞི་པའི་ཚེས་གཅིག་ནས་བཟུང་དར་གླིང་དབང་ཁང་དུ་རིག་འཛིན་ཐུགས་ཐིག་གི་སྒྲུབ་པ་སྨན་སྒྲུབ་ཀྱི་ལས་སྦྱོར་དང་འབྲེལ་བ་ཞིག་གནང་བའི་ཚེས་བཅུའི་སྔ་དྲོ་གྲོལ་བའི་ཉིན་སྐལ་ལྡན་འགའ་ལ་དབང་བསྐུར་མཛད་པ་ན། གཏེར་ལུང་ལས། སྐྱེས་བུ་འདི་ཉིད་ཉེར་གཅིག་ལོན་པའི་ལོར༔ རིགས་ལྡན་ཡེ་ཤེས་ཌཱཀྐི་ཞིག་དང་འཕྲད༔ ཅེས་སོགས་གསུངས་པ་ལྟར་གསང་བ་ཡེ་ཤེས་ཀྱི་ཌཱཀྐི་མ། རྣམ་པ་ནུས་འབྱིན་ས་ལེའི་སྤྲུལ་པ་པདྨ་ཅན་གྱི་རིགས་སུ་བྱོན་པ་སྔ་མ་དེ་ཉིད་ཀྱང་། དེ་ཉིན་དེར་བྱུང་བའི་སྨིན་ཕྲག་ཏུ་དགའ་འཁྱིལ་དམར་སེར་འཁོར་བ་དང་མཁུར་ཚོས་གཡོན་པར་ཨ་ཡིག་དམར་པོ་འབར་བ་ཞིག་ཡུད་ཀྱིས་གཟིགས་པས་སྣང་བ་གཏད་མེད་དུ་བདེ་ཆམ་མེ་བ་ཤར། དེའི་ནུབ་མནལ་ལམ་དུ། བྲག་དམར་གཡའ་མ་ལུང་གི་གནས་དེ་ཉིད་ཇི་ལྟ་བ་ལ་ཁང་བཟང་བཀོད་པ་ཚར་དུ་དངར་བའི་ནང་ན་རྗེ་ཉིད་རང་བཞུགས་པའི་ལྷོ་ཕྱོགས་ཀྱི་ནམ་མཁར་འཇའ་སྤྲིན་ལས་མེ་ཏོག་གི་ཆར་ཟིམ་འབེབས་ཤིང་། རོལ་མོའི་འུར་དིང་སྣ་ཚོགས་དང་བཅས་པའི་ཁྲོད་ནས་བུད་མེད་གཞོན་ནུ་མང་པོ་ཐོགས་མེད་དུ་ཉིད་ཀྱི་དྲུང་དུ་འོངས་ནས། སླར་ཡང་ནུབ་ཕྱོགས་ཀྱི་མཁའ་ལ་ཡེར་གྱིས་འགྲོ་བ་ལས། གཅིག་གིས་རིན་པོ་ཆེའི་སོར་གདུབ་འོད་འབར་བ་ཞིག་གཏད་ནས་དེ་ཡང་ནམ་མཁར་སོང་བ་སྙམ་བྱེད། དེའི་མོད་ལ་ཉིད་རང་ནོར་བུའི་བྲག་སྟེང་དུ་གནས་པའི་མཆན་

― MLP003_Page_0115 ―

^{[མ་དཔེ་གཟིགས་ན་འདིར་གནོན།]}

[Full Size]

ཁུང་གཡོན་དུ་གོས་བཟང་པོའི་རྒྱལ་མཚན་རིན་པོ་ཆེའི་ཏོག་གིས་སྤྲས་པ་ཞིག་བསྣམས་པའི་རྩེར་འཇའ་སྤྲིན་འཁྲིགས་པའི་ཀློང་ན་ཨོ་རྒྱན་ཆེན་པོ་ཡབ་ཡུམ་བཞུགས་པའི་གཡས་སུ་བི་མ་ལ་མི་ཏྲ་དང་གཡོན་དུ་ལོ་ཆེན་བཻ་རོ་ཙ་ན་བཞུགས་པས། བདུད་རྩིས་གཏམས་པའི་བུམ་པ་སྩལ་ཅིང་བྱིན་གྱིས་བརླབས་པའི་སྣང་བ་རྨིས། མནལ་སད་ནས་ཀྱང་སྤྱན་ཆབ་འཁྲུགས་པའི་མོས་གུས་བདེ་ཆེན་གྱི་ཉམས་སུ་འབྱམས་ཀླས་པར་གྱུར། ལྟས་དེ་ལས་ལུང་བསྟན་དང་པོའི་དོན་ལ་སོམ་ཉི་མེད་ཀྱང་། རྟེན་འབྲེལ་ཕྱི་མའི་དོན་མངོན་དུ་གྱུར་པ་ཡིན་གསུང་། ༈ དེ་ནས་ཡར་ཀླུང་ཤེལ་བྲག་གི་ཟབ་གཏེར་ཇི་ལྟར་བཞེས་ཚུལ་ནི། དགུང་ལོ་ཉི་ཤུ་རྩ་གཉིས་པ་མེ་ལུག་ཤར་མཚམས་དར་གླིང་གཟིམས་ཆུང་བསམ་གཏན་སྦུག་ཏུ་ཟླ་བ་གསུམ་གྱི་བར་དུ་སྐུ་མཚམས་ཀྱི་བཅད་རྒྱ་དམ་པོར་མཛད་ནས་བཞུགས་པའི་ཚེ། ནག་པ་ཟླ་བའི་ཚེས་བཅུའི་ཐོ་རེངས་ཀྱི་མནལ་ལམ་དུ། ཞིང་སྐྱོང་གི་ཌཱཀྐི་མ་རྣམ་པ་བུད་མེད་གཞོན་ནུ་མཛེས་འཛུམ་ཤ་ཉམས་རྒྱས་པ་དར་ཁྲའི་གོས་ཀྱིས་ཀླུབས་ཤིང་རིན་པོ་ཆེའི་རྒྱན་གྱིས་བརྒྱན་པ་ཞིག་སྐུ་མདུན་དུ་ཁྲོང་གིས་འོངས་ནས། བདེ་བ་ཆེན་པོའི་བརྡ་དང་རྣམ་འགྱུར་སྣ་ཚོགས་སུ་སྟོན་པ་ལས་དེ་དང་སྙོམས་པར་ཞུགས་པས་བདེ་བ་ཆེན་པོའི་ཉམས་བཟོད་མེད་དུ་འབར་བའི་རང་བཞིན་སྤྲོས་བྲལ་གྱི་ཀློང་དུ་གྲོལ། བུད་མེད་དེ་ན་རེ། བདེ་བ་ཆེན་པོའི་ཡེ་ཤེས་ནི་འདི་ཁོ་ན་ལས་གཞན་དུ་མེད་པས་རྟེན་འབྲེལ་གྱི་སྒོ་ཐམས་ཅད་འགྲིགའབྲེལ་ཚད་དོན་ལྡན་དུ་ནུས་པའི་མཐུ་ཐོབ་པ་ཡིན་ནོ། །ཞེས་དང་། རིན་པོ་ཆེའི་སོར་གདུབ་ཕུད་དེ་སྐུ་མདུན་ན་ཞལ་དཀར་ཡོད་པ་དེའི་ནང་དུ་བཞག་ནས། འདི་དངོས་གྲུབ་ཀྱི་རྟགས་སུ་བཟུང་ནས་མ་འགྱུར་བ་གལ་ཆེའོ། །ཞེས་བརྗོད་ནས་ཕྱི་རོལ་དུ་ཐོན་སོང་བ་དང་མནལ་སད་ཅིང་། ནམ་མ་ལངས་པས་སྤྱན་གྱིས་མ་གཟིགས་ནའང་ཞལ་དཀར་ནང་དུ་ཕྱག་གིས་མྱུལ་བས་ཤོག་དྲིལ་འདྲ་བ་ཞིག་འདུགཅི་ཡིན་ནམ་དགོངས་ཏེ། དེ་ཁར་འཇོག་པར་མཛད་ནས། ནམ་ལངས་མ་ཐག་དཀར་ཁུང་གི་ཐད་དུ་བསྣམས་ཏེ་གཟིགས་པ་ན། ཤོག་དྲིལ་དམར་སྐྱ་ཡི་གེ་གཟབ་ཆུང་ཤིན་ཏུ་ཕྲ་བ་སྤུས་བྲིས་པ་འདྲ་བ་ཞིག་ལ། ཨེ་མ་འགྲོ་འདུལ་པདྨ་རྒྱལ་པོ་

― MLP003_Page_0116 ―

^{[མ་དཔེ་གཟིགས་ན་འདིར་གནོན།]}

[Full Size]

ང་༔ ད་ནི་སྲིན་པོ་འདུལ་དུ་འགྲོ༔ ཞེས་སོགས་ཟབ་གཏེར་གྱི་ཁ་བྱང་དུ་འདུག་པས་མོས་གུས་སྤྱན་ཆབ་འཁྲིགས་པ་ཙམ་དུ་འཁྲུངས་ཤིང་། མནལ་ལམ་གྱི་བདེ་བའི་ཉམས་སྣང་དེ་ཞག་ཤས་འཚོ་བའང་བྱུང་གསུང་། དེ་ནས་ཁྲུམས་ཟླའི་ཚེས་གསུམ་གྱི་ནུབ་མོའི་མནལ་ལམ་ལ། རྡོ་རྗེ་ལེགས་པ་སྐྱེས་པ་གཞོན་ནུ་མཛེས་འཛུམ་ཆས་གོས་དཀར་པོ་ཅན་གྱི་རྣམ་པར་དྲུང་དུ་འོང་ནས། ཕྱག་འབུལ་ཏེ། ཁ་བྱང་དུ། འདོན་དུས་མེ་མོ་ལུག་གི་ལོ༔ གཏེར་སྲུང་སྐུལ་བྱང་བྱུང་བ་ན༔ ཞེས་པའི་དུས་ནི་ད་ལོ་ལགས་མོད། སྐུལ་བ་པོ་བདག་མངགས་པ་ལགས་པས་ཚེས་ལྔ་དང་དྲུག་ལས་མ་འགྱང་བར་འབྱོན་དགོས། གཅིག་པུར་འབྱོན་མ་བཟོད་ན་དམ་ཚིག་དག་པའི་འཁོར་གཉིས་གསུམ་ཚུན་ལ་བཀག་པ་མེད་ཟེར་ནས་འོད་དཀར་པོ་སྣམ་བུ་བརྐྱང་པ་འདྲ་བ་ཞིག་གི་ལམ་ལས་ཤར་ཕྱོགས་སུ་ཡེར་གྱིས་བུད་དེ་སོང་། ནང་པར་ཡུམ་ལ་གནས་ཚུལ་རྣམས་གསོལ་ནས་སྐུ་ཆས་རྣམས་གྲབས་སུ་ཚུད་པར་མཛད་དེ། གཟིམས་ཆུང་བསམ་གཏན་སྦུག་རང་དུ་སྐུ་མཚམས་ཀྱི་མུར་བཞུགས་པའི་རྫུ་མཛད་ནས། རྗེ་ཉིད་དང་ཉེ་གནས་ཕྲིན་ལས་མཐར་ཕྱིན་གཉིས་ཀྱིས་ཨཾ་རགཔུས་འཁྱུད། པགས་གདན། རྐང་གླིང་། དྲྭ་ཕད་སོགས་རྣལ་འབྱོར་པའི་ཆས་སུ་ཞུགས། གཉེར་པ་བསྟན་རྒྱས་རང་ཆས་ཀྱིས་སྔ་འགྲོས་ཕྱི་སྣུར་གྱིས་ཞག་ས་འགྲིག་པའི་དབང་དུ་མཛད་ནས་ཟླ་བ་བརྒྱད་པའི་ཚེས་ལྔའི་ཐོ་རེངས་བླ་བྲང་གི་ནུབ་ཀྱི་གསང་སྒོ་ནས་དོག་བདེ་བདེ་འདྲ་བ་མཛད་དེ་ཕྱགས་བཏེགདེ་ནུབ་གྲྭ་ཕྱི་ཚོང་འདུས་སུ་བྱེ་རྫིང་ཚོགས་པའི་ཀུན་རར་ཐེགས་པ་ན། དེར་ཇོ་གདན་པ་རྣམས་རྔ་རོལ་གྱི་འུར་དིང་དང་བཅས་ཚོགས་མཆོད་ཀྱི་སྟོན་མོ་བྱེད་པའི་འདུ་ཁང་གི་སྒོ་དྲུང་དེར་བཞུགས་པ་ལས་ལ་ལ་ཆ་ལུགས་སོགས་ལ་ཡ་ཆ་བས་ལྟད་མོ་བལྟ་ཞིང་དགོད། ཁ་ཅིག་སློང་མོ་བར་དོགས་ནས་བཟའ་བཏུང་གི་ལྷག་རོལ་འདྲ་ཞུས། འགའ་ཞིག་གིས་ཆོས་ལུགས་དང་ཉམས་ལེན་སོགས་ཀྱི་དྲི་བ་ཞུས་པར་གསང་རྒྱ་མི་འཆོལ་བའི་ལན་ཅི་རིགས་འདེབས་པར་མཛད་པས། ཕ་ཡི། ཕ་ཡི། ཁམ་ཆེ་བ་ལ་ཨ། རྣལ་འབྱོར་པ་ཁྱད་འཕགས་རང་ཡིན་འདུག་ཟེར། དག་སྣང་གི་ཚིག་དང་རང་རང་གི་ཚོགས་སྐལ་དག་ཀྱང་

― MLP003_Page_0117 ―

^{[མ་དཔེ་གཟིགས་ན་འདིར་གནོན།]}

[Full Size]

ཕུལ། དེ་ནུབ་ཤག་ཆུང་ཞིག་གི་འཁོར་གཡབས་སུ་གནས་མལ་གཡར་བ་ན། བན་གཞོན་ཞིག་གིས་ཇ་ཆང་དང་ཐུག་པ་སོགས་ཅི་འདོད་དུ་ཞུས་ཏེ་གུས་པས་ཞབས་ཏོག་ལེགས་པར་བསྒྲུབས་པ་ནི་ཕྱིས་ཆོས་མཛད་ནོར་སྐྱོང་དུ་གྲགས་པ་དེ་ཡིན་པར་འདུག་གསུངས་། ནང་པར་སྔ་བར་བཞེངས་ཏེ་ཐེགས་ཀྱང་བྱེ་ཐང་ལ་ཚ་གདུང་ཆེས་པས་གཙང་ཆབ་ལ་སྐུ་ཁྲུས་ཀྱི་རྩེད་མོས་ཐུགས་གཡེང་པས་དེ་ནུབ་གཙང་ཆུང་གླིང་ཁར་མུན་པ་ཆལ་ཆིལ་ལ་ཕེབས་པ་ལས་མ་བྱུང་། དེར་གཡུལ་ཁང་ཞིག་ཏུ་ཞག་ས་གནང་བ་ལས། ནང་པར་བྱིས་པ་མང་པོས་འདི་ན་ཨ་ཙ་ར་འདུག་གོ། ལྟད་མོ་བལྟ་བ་ལ་ཤོག་ཟེར་སྦྲན་པས་བྱིས་པ་མང་དུ་ཚོགས་ནས་དགོད་ཅིང་མཚར་བར་བྱེད། དེ་ནས་རིམ་པར་བྱར་གྱི་ལུང་པའི་ནང་དུ་ཐེགས་པ་ན། གྲོང་ཐ་མ་དེར་བུད་མེད་རྒན་མོ་མྱ་ངན་གྱི་འོ་དོད་འབོད་པ་ཞིག་བྱུང་ནས་ངའི་བུ་གཅིག་ཡོད་པ་རིམས་དྲག་པོས་ཤི། ཁྱེད་རྣམས་རྣལ་འབྱོར་པ་བཟང་བཟང་འདྲ་བ་ཞིག་འདུག་པས། ཕྱེ་འདི་ལ་གཏོར་རྫས་མཛོད་ལ་ངའི་བུ་གཅིག་པུ་ངན་སོང་དུ་མི་འགྲོ་བ་ཁྱེད་མཁྱེན་ནོ། །ཞེས་གསོལ་བ་འདེབས་པ་ལ་ཞལ་གྱིས་བཞེས་པ་ལྟར། གཤིན་པོ་དེ་མཐོ་རིས་ཀྱི་རྟེན་བཟང་ཐོབ་པ་ནི་ད་ལྟ་ཞབས་ཕྱིའི་ཁྲིད་གཉེར་བ་ཞུ་མི་འདི་ཡིན་པར་གསུང་ཞེས་ཞབས་ཕྱི་ནང་མ་དག་གི་ངག་ལས་ཐོས། དེ་ནས་མུན་པ་སྲོས་ཙམ་ལ་བྱར་ཕུའི་ལ་རྩེར་ཕེབས། ལྟ་བའི་ངར་བསྐྱེད་ནས་ལྷ་འདྲེ་དབང་སྡུད་ཀྱི་ཏིང་ངེ་འཛིན་དང་ལྡན་པས་རྐང་གླིང་ཞིག་འབུད་པར་མཛད་པ་ན། སྐད་ཅིག་དེ་ཁར་འབྲུག་གི་སྒྲ་དང་གློག་འོད་འཁྱུག་ཅིང་སེར་བ་དྲག་པོ་འབབས་པའི་ཆོ་འཕྲུལ་ཆེ་ཡང་། ཡ་ང་དང་ཁུ་འཕྲིག་མེད་པའི་དཔའ་གདེང་དང་བཅས་ཏེ་ཐལ་གྱིས་ཐེགས་པས་ལམ་ཡིད་ལ་མེད་པའི་ངང་དུ་དགོན་ཁྲོད་དུ་བདེ་བར་ཕེབས། དེར་མ་ཇོ་ཞིག་ལ་གནས་མལ་གཡར་བར་མཛད་ཀྱང་མ་ཕུལ་ཏེ། དེ་ནུབ་བླ་བྲང་གི་སྒོ་ཁང་སྤྲང་ཚང་དེ་རང་དུ་གཟིམས་པས། བླ་མ་དེ་དམན་པ་ལ་བྱམས་སེམས་ཆེ་ཆེ་འདྲ་བ་ཞིག་སྣང་བས། སྤྲང་པོ་ཞིག་འདུག་སྙམ་ཚོད་མའི་ཕམ་ཕབས་ཁོག་མ་མེ་ཆ་དང་བཅས་པ་སྐྱེལ་དུ་བཏང་བྱུང་བ་བཞེས་ཏེ་གཟིམ་པས། མནལ་ཐུམ་ཞིག་བྱུང་བ་སད་པ་ན། སྐུ་ལུས་ཐམས་

― MLP003_Page_0118 ―

^{[མ་དཔེ་གཟིགས་ན་འདིར་གནོན།]}

[Full Size]

ཅད་རྔུལ་ཞིང་འཇིགས་སྐྲག་གི་སྣང་བ་བཟོད་དུ་མེད་པ་སྐུ་དབུགས་ཕྱི་ནང་དུ་རྒྱུ་བའང་དོག་པར་འཆར་བ་ཞིག་བྱུང་བ་ལས། ཇི་ཞིག་ན་འཇིགས་སྐྲག་རང་བཞིན་མེད་པར་གྲོལ་བའི་སྣང་བ་བདེ་བར་འཆར་བ་ཞིག་རྩོལ་མེད་དུ་ཐུགས་ལ་འཁྲུངས་པའི་ངང་ལ། ཅུང་ཟད་མནལ་དུ་སོང་བ་ན། གནས་རི་དེའི་བྲག་མགུལ་ཕན་ཚུན་དུ་མེ་ཏོག་གི་ཕྲེང་བ་འདྲ་བའི་ཐ་གུས་བྲེས་པའི་སྟེང་ན། བུད་མེད་མཛེས་སྡུག་མང་པོ་གླུ་ལེན་གར་བསྒྱུར་དང་བཅས་ཐོགས་མེད་དུ་འགྲོ་བ་ལས་ཉིད་ཀྱི་ཞལ་དབུགས་འབྱིན་འཇུག་གི་དལ་བྲེལ་ལས། དེ་དག་འཕར་གཡོར་འཆར་བའི་སྣང་བ་ཁོ་ནས་ནམ་ལངས་ཀྱི་བར་དུ་འདའ་བ་བྱུང་། ནང་པར་བླ་མའི་ཉེ་གནས་དེ་ཆུ་ལེན་པ་དང་མཉམ་དུ་མདང་གི་ཚོད་མའི་སྣོད་སྤྱད་ལེན་དུ་བྱུང་བས་སྐུའི་ཆ་ལུགས་སོགས་ལ་ཞིབ་མོར་བལྟ་ཞིང་། ཁྱེད་རྣམས་གནས་སྐོར་བ་དཀྱུས་མར་མི་འདུགསུ་འདྲ་ཞིག་ཡིན་ཞེས་རྟོག་པ་ཞུགས་པའི་དྲི་བ་ཞིབ་ཏུ་ཞུས་པ་ན། ངེད་རྣམས་ལྷོ་བྲག་ནས་བླ་མ་གསུང་སྤྲུལ་གྱི་སློབ་རིགས་ཤིག་ཡིན། ཞེས་ཟོལ་གྱིས་ལྡོག་ཀྱང་། དར་ཞིག་ན་རོགས་ཤིག་ཁྲིད་ནས་ཞིབ་ཏུ་རྟོག་ཅིང་དྲི་བ་མང་དུ་ཞུས་མཐར་ནང་དུ་སོང་བ་ལས་ཇེ་ཞིག་ན་སྒོ་ཁང་དེའི་སྒོ་གླེགས་དེ་ནང་ནས་ཕྱེ་སྟེ། བླ་མ་འཁོར་བཅས་དར་གྱི་ཕྱག་རྟེན་དང་བཅས་ཞབས་བསུར་འོང་ནས་ཕྱག་བཙལ་ཅིང་། མདང་ངོ་མ་ཤེས་པས་བཀུར་སྟི་གང་ཡང་མ་འབྱོར། ཐུགས་མ་ཁྲེལ་བ་མཛད་ནས་བླ་བྲང་དུ་ཕེབས་དགོས་ཞེས་ཞུ་བར་རྫུ་བག་གིས་ལྡོག་པར་མཛད་ཀྱང་། ཉེ་གནས་སྔར་མཇལ་མྱོང་གི་མི་ངོ་རྣོ་བ་ཞིག་གིས་ངོ་ཤེས་ཏེ་ལྡོག་ཐབས་མ་བྱུང་བས་སྟེང་དུ་ཕེབས་པ་ན། ཁྲི་གདན་བཀོད་པ་མཐོ་བར་བཞུགས་སུ་གསོལ་ནས་བསྙེན་བཀུར་ཕུན་སུམ་ཚོགས་པར་སྟོབ་སྟེ། ད་རེས་འདིར་ཕེབས་པ་བཀའ་དྲིན་ཆེ། སྐུ་དོན་ཅི་འདྲ་ཡིན་སོགས་ཞུ་བའི་ལན་དུ། རྐྱེན་སེལ་གྱི་ཚོགས་མཆོད་དང་གནས་མཇལ་ཞིག་རང་ཡིན་ཡང་གཡེང་བ་ཆུང་ཆེད་གསང་ཐབས་ཀྱིས་ཡོང་བ་ཡིན། ཞེས་གསུངས་པར། འོ་ན་སྐལ་བ་བཟང་ཕྱིར་ཚོགས་ཀྱི་ཆ་རྐྱེན་འདི་ནས་ཕུལ་ཆོག་པ་དགོས་ཞེས་ཚེས་བརྒྱད་ཀྱི་ཉི་ཕྱེད་ཙམ་ལ། ཁོང་དཔོན་སློབ་ཀྱིས་ཚོགས་ཀྱི་ཡོ་བྱད་དང་བཅས་ཏེ། གསང་ཕུག་ཏུ་ཚོགས་

― MLP003_Page_0119 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོད་ཀྱི་གསུང་ཆོག་ཤུར་ཙམ་ཞིག་མཛད་ཅིང་། རི་ཁྲོད་རྩེའི་སྒོམ་ཆེན་ཁ་ཤས་ཀྱང་དེར་འདུས་ནས་མི་ཚོགས་ཆེ་བར་བྱུང་ཞིང་། ཉི་མའང་ཕྱེད་ཡོལ་ཏུ་སོང་བས་ཐུགས་ཁོལ་ཆེ་རུང་གནང་ཐབས་ཟད་པ་ལྟ་བུར་གྱུར་ཀྱང་ཐུགས་རིག་ཧུར་ཕྱུང་སྟེ། ཁྱེད་རང་དཔོན་སློབ་རེ་ཞིག་འདིར་བཞུགས་ཤིགངེད་རྣམས་ཁམས་བསེང་བ་ཙམ་ལ་ཤར་ཕྱོགས་ཀྱི་བྲག་ལོགས་འདིར་འགྲོ་བ་ཡིན་གསུངས་ཏེ་སྐུ་ཆས་རྣམས་དེར་འཇོག་པར་མཛད་ནས་ཐེགས་པ་ལས། ཁོང་རྣམས་ན་རེ། དེ་རིང་ནམ་མཁའ་དྭངས་ཤིང་འཇའ་འོད་ཀྱི་གུར་རིམ་ཡང་འདི་དང་འདི་འདྲ་བ་འདུག་ཟེར་གཅིག་གིས་གཅིག་ལ་སྟོན་ཞིང་མོས་དུང་ཆེན་པོས། ངེད་རྣམས་ཤར་གྱི་མཐའ་རྩ་འདིར་གསོལ་འདེབས་དང་ཕེབས་སྒུགས་ཞུ་བ་ཡིན་པས་དངོས་གྲུབ་ཀྱི་སྐལ་བ་ཐུགས་རྗེས་འཛིན་དགོས་ཞེས་ཞུ་བར། དངོས་གྲུབ་འབུལ་བའི་ཏིག་ཏིག་མེད། རེ་ཞིག་བཞུགས་པས་ཆོགཅེས་གསུངས་ཏེ་ཐེགས་པ་ལས། ཁ་བྱང་ལྟར་གཏེར་གནས་ཀྱི་ས་མིག་བྲག་ལོགས་དེ་རྒྱལ་མཚན་གྱི་དབྱིབས་སུ་སྣང་བ་ལས། མེ་ལོང་འདྲ་བའི་བྲག་ངོས་ཟེར་བ་དེ་ཀུ་མཱ་རའི་གཟིམས་ཕུག་ཏུ་གྲགས་པའི་སྐྱིབས་དེའི་སྟེང་ངོས་བྱང་ཤར་དུ་བལྟ་བའི་ལོགས་དེར་འདུག་པ་ལས། བྲག་ཟུར་གྱི་ལམ་འཕྲེད་ཞབས་བརྟེན་ཐུབ་ཙམ་དེ་ནས་གཟིགས་པ་ན། ཐུར་དུ་ཐོག་སོ་བརྒྱས་ཀྱང་མི་ཚད་པའི་གཅོང་རོང་ཉམས་ང་བ་དང་། གྱེན་དུའང་ཐོག་སོ་བཞི་ལྔ་ཙམ་ཞིག་གི་ས་ན་འོད་འཁྱིལ་འཁྱིལ་འདུག་པ་ལ་གཟིགས་པ་ན་གཡུང་དྲུང་གི་མཚན་མའང་གཟིགས་པས་གཏེར་གྱི་ས་མིག་ཡིན་པར་ཐུགས་ངེས་འདྲོངས་ཀྱང་། དེར་ཐེགས་པ་ལྟ་ཅི་སྤྱན་གྱིས་གཟིགས་པར་ཡང་མི་བཟོད་པའི་འཇིགས་སྐྲག་གི་སྣང་བ་བཟོད་དུ་མེད་པ་ཐུགས་ལ་ཤར་བའི་མཐར་རྟོག་མེད་དུ་ཆམ་གྱིས་སོང་བའི་སྐད་ཅིག་ལ་བྲག་སྟེང་དེར་ཕེབས་འདུག་པ་ན། ཕུག་པ་གུར་ཕུབ་པ་ལྟ་བུའི་ནང་ངོས་རྣམས་བརྡར་ཤེལ་ལྟར་དྭངས་པ་ལ་གཟུགས་བརྙན་གྱི་ཚོན་རིས་སྣ་ཚོགས་བཀྲ་བ་ཞིག་གི་ནང་ན། བུད་མེད་གཞོན་ནུ་མཛེས་སྡུག་ཅན་ཞིག་དང་། སྐྱེས་པ་བཞིན་བཟང་ཆས་གོས་དཀར་པོ་གྱོན་པ་ཞིག་འདུག་པའི་མདུན་ན་ཟངས་ཀྱི་གའུ་གྲུ་བཞི་པ་མཁྱིད་གང་ཙམ་ནང་ཤོག་དྲིལ་གྱི་གཏེམས་

― MLP003_Page_0120 ―

^{[མ་དཔེ་གཟིགས་ན་འདིར་གནོན།]}

[Full Size]

བཙེར་གང་བ་ཞིག་འདུག་པ་ལས། བུད་མེད་དེས་ཤོག་དྲིལ་གཉིས་དང་སྐྱེས་པ་དེས་བསེའི་གའུ་གྲུ་གསུམ་པ་ཞིག་ཕྱག་ཏུ་ཕུལ་བྱུང་བ་བཞེས་ནས། ཕྱིར་ལྟས་གཟིགས་པ་ན། སྔར་གྱི་གཡང་དེའི་ཁར་ཕེབས་པས་གཡང་ཟ་ཆད་དེ་བའི་འཇིགས་སྐྲག་གི་སྣང་བ་ཐུགས་ལ་ལྷང་གིས་ཤར་བའི་སྐད་ཅིག་ལ་རྟོག་མེད་དུ་ཐིམ་ནས། དེ་ལས་སད་པ་ན་མཐིལ་གྱི་འཕྲེད་ལམ་གྱི་ཁ་དེར་ཕེབས་འདུགཡར་གཟིགས་པས་སྔར་གྱི་གཏེར་ཁུང་དུ་འཇུག་རྒྱུའི་དཀོར་ཆའི་སྣོད་ཀྱི་དར་དམར་དེ་བྲག་ངོས་ཀྱི་མཐོ་ས་དེར་དམར་ལྷབ་ཀྱི་སྡད་འདུགཞབས་ཕྱི་གཉིས་དང་བཅས་འབེབས་ཨེ་ཐུབ་གཟིགས་ཀྱང་ཐབས་དང་བྲལ་བས་དེ་ཁར་འཇོག་པར་མཛད་ནས། ཞབས་རིང་པ་གཉིས་ལ་གཏེར་རྫས་ཀྱི་བྱིན་རླབས་མཛད་དེ། ཤོག་དྲིལ་གཉིས་པོ་དར་གྱིས་དྲིལ་ནས་རྗེ་ཉིད་རང་གི་མགུལ་ལ་འདོགས་པར་མཛད། སྒྲོམ་བུ་དེ་ཕྲིན་ལས་མཐར་ཕྱིན་གྱི་སྐེད་ལ་མི་མངོན་པར་བསྡམས་ནས་ཕྱིར་ཕེབས་པ་ན་ཉི་མ་ནུབ་ཏུ་ཉེ་བ་ཙམ་དུ་གྱུར། བླ་མ་དང་སྒོམ་ཆེན་པ་རྣམས་རྗེ་ཉིད་དང་དཔོན་སློབ་ཀྱི་ཕྱོགས་སུ་ཕྱག་འཚལ་ཞིང་ཐལ་མོ་སྦྱར་ནས་སྡད་འདུགདེར་ཕེབས་པ་ན་ད་རེས་སྐལ་པ་ཤིན་ཏུ་བཟང་། བྱིན་རླབས་ཀྱི་སྐུ་སྐྱེས་གནང་དགོས་ཞེས་མཆི་མ་འཁྲིགས་བཞིན་དུ་ཞུ་བར། བཀའ་ལས་བྱིན་རླབས་བྱེད་པའི་དམིགས་མེད་ངེས་ཡིན། འོན་ཀྱང་ཁྱེད་རྣམས་ཨུ་ཚུགས་མཛད་ན། ང་རང་ལ་བྱིན་རླབས་ཞུ་བ་ལས་ཐབས་མེད་པ་འདྲ་ཞེས་གསུངས་པས། གྲུབ་ཆེན་དབང་འབྱོར་ན་རེ། བཀའ་དྲིན་ཆེ་དེ་ལ་མ་འདུས་པ་ཅི་ཡོད། ཅེས་ཐམས་ཅད་ཀྱིས་ཞབས་དབང་ཞུས་ཤིང་མོས་གུས་གདུང་ཤུགས་དྲག་པོས་སྨོན་ལམ་འདེབས་པར་བྱེད་དོ། །དེ་ནུབ་བླ་བྲང་དུ་བཞུགས་པར་བླ་མས་བསྙེན་བཀུར་གཟབ་པར་སྟོབ་ཅིང་དད་རྟེན་ཡང་སྩལ་ནས། ནངས་པར་ཡར་ཀླུང་བརྒྱུད་ཀྱི་ཚེ་ཆུ་འབུམ་པ་དང་། ཁྲ་འབྲུག་མཇལ་དུ་ཕེབས་པ་ལས། ཁྲ་འབྲུག་གི་ཁྱམས་ཕྱི་མ་དེར་ཡོ་འབོག་སྡོང་པོ་ཤིན་ཏུ་ཆེ་བ་ཞིག་འདུག་པ་དེའི་རྩ་བར་སྐུ་ངལ་གསོས་ནས་ཡར་གཟིགས་པ་ན། དེའི་རྩེ་མོ་དཔངས་དང་རྒྱ་ཁྱོན་ཚད་མེད་པའི་ལོ་འདབ་ཐམས་ཅད་ཀྱི་སྟེང་ན་སངས་རྒྱས་བྱང་སེམས་ཀྱི་སྐུ་ཕྲ་མོ་གྲངས་མེད་ཚད་མེད་བཞུགས་པ་ལས་

― MLP003_Page_0121 ―

^{[མ་དཔེ་གཟིགས་ན་འདིར་གནོན།]}

[Full Size]

ཆར་ཟིམ་ལྟ་བུའི་བྱིན་རླབས་ཀྱི་རྒྱུན་སྐུའི་སྟེང་དུ་བབས་པའི་དག་སྣང་ཡུད་ཙམ་ཞིག་གཟིགས་པའི་མོད་ལ་མི་སྣང་བར་གྱུར་ཅིང་། སྐུའི་ཉེ་ལོགས་ན་ཕྲིན་ལས་མཐར་ཕྱིན་འདུག་པར་མཐོང་ཚུལ་ཅི་འདྲ་བྱུང་ངམ་དགོངས་ཏེ། ཤིང་འདི་ཅིར་འདུག་གསུངས་པས། ཁོ་ན་རེ། རྩེ་མོ་འདི་ནི་སྦྱར་པར་འདུགརྩ་བ་ནི་ཡོ་འབོག་ཏུ་འདུག་ཅེས་ཟེར། དེ་ནས་ནང་གི་ལྷ་ཁང་རྣམས་མཇལ་བར་མཛད་པས་སྔར་ཕེབས་མྱོང་བ་ལྟ་བུའི་ཐུགས་ལ་བག་ཆགས་ཡལ་ཡུལ་དང་། ཁྱད་པར་དུ་རྟེན་གཙོ་དེ་ཉིད་རྡོས་བཅས་ཀྱི་རྣམ་པ་མེད་པར་སྐུ་དངོས་སུ་བཞུགས་པ་ལྟ་བུའི་གསལ་སྣང་ཡུད་ཙམ་ཞིག་ཤར་ཞིང་། དེ་ནས་བཀྲ་ཤིས་ཆོས་སྡེར་ཐེགས་ནས་གནས་མཇལ་རྣམས་གནང་བ་ལས། ཁོང་རྣམས་བསྐང་གསོ་གཏོང་བའི་སྲིད་ཞིའི་དཔལ་འབྱོར་མའི་ཚིགས་བརྗོད་པ་དང་། རྗེ་ཉིད་མགོན་ཁང་གི་སྒོ་ནང་དུ་ཞབས་བཞག་པ་དུས་འགྲིག་ཅིང་། སྐུའི་ཆ་ལུགས་སོགས་ལས་ཐེ་ཚོམ་གྱི་རྟོག་པ་ཞུགས་པའི་དྲི་བ་དང་དག་སྣང་གིས་མོས་པ་ལྟར་བྱེད། དེ་ནུབ་བྲང་ཁང་ཞིག་ཏུ་གནས་མལ་མཛད་པར། དེར་འགའ་ཞིག་གིས་ཆོས་འབྲེལ་ཞུ་བ་ལ། གུ་རུའི་རྣལ་འབྱོར་ཞིག་སྩལ་ནས། རྗེ་ཉིད་དཔོན་སློབ་གཉིས་ཕྱི་རོལ་ཏུ་གཟིམས། གཉེར་པ་ནང་དེར་འདུག་ནས་ཁོང་རྣམས་དང་སྐད་ཆ་སྣ་ཚོགས་བྱས་པའི་འཕྲོས་ཟུར་གྱིས་ཤེས་སམ། གང་ལྟར་ཡང་ནངས་པར་སྔ་ཆར་རྗེ་བཀའ་འགྱུར་བའི་ཉེ་གནས་བྱམས་པ་ཟེར་བ་བགྲེས་པོ་དེ་ཇ་ཏི་རི་གང་བསྣམས་ནས་བྱུང་སྟེ་ཕྱག་ཕུལ་ནས་མདང་ངོ་མ་ཤེས་པས་ཞབས་ཏོག་གང་ཡང་མ་འབྱོར་ཞིང་། སྔར་ནས་དཔོན་སློབ་ཐུགས་ཡིད་གཅིག་འདྲེས་ཡིན་པ་བཞིན་དབོན་རིན་པོ་ཆེའང་ཆོས་འབྲེལ་ཞིག་གསན་བཞེད་ཡིན་པས་བླ་བྲང་དུ་ཅི་ནས་ཀྱང་ཕེབས་དགོས་ཞུ་བར། དབོན་རིན་པོ་ཆེ་ཉིད་ཆོས་བདག་གི་གྲས་སུའང་སྣང་བས་རྟེན་འབྲེལ་འགྲིག་ཁ་ཡང་ཡིན་པ་སྲིད་དགོངས་ཏེ། ཞལ་གྱིས་བཞེས་ནས་ཕྱིའི་རྡོ་གཅལ་དེར་ཕེབས་པ་ན་གྲྭ་པ་ཐམས་ཅད་འུར་ལངས་པ་ལྟ་བུས་འདུས་ནས་བྱིན་རླབས་ཞུས་བྱུང་བས་སྐུའི་ཆ་ལུགས་ཀྱིས་ཐུགས་ངོ་འཚེར་པོ་བྱུང་གསུངས། དེ་ནུབ་བླ་བྲང་དུ་བཞུགས་ནས་དབོན་རིན་པོ་ཆེ་དང་། མཁྱེན་དྲུང་ནང་འཁོར་གཅིག་གཉིས་བཅས་

― MLP003_Page_0122 ―

^{[མ་དཔེ་གཟིགས་ན་འདིར་གནོན།]}

[Full Size]

པར་ཚེ་དབང་དང་ཐུགས་ཐིག་གི་ཆོས་ཚན་ཁ་ཤས་ཀྱི་ལུང་མཛད་དེ་རྟེན་འབྲེལ་གྱི་སྣེ་ཟིན་ཙམ་འགྲིག་ཀྱང་། ཕྱིས་ཉམས་བཞེས་མཛད་རྒྱུ་འགྱངས་པས་བར་ཆད་ཀྱི་དབང་དུ་གྱུར་པ་ཞིག་བྱུང་། དེ་ནས་རིམ་པར་འཕྱོངས་རྒྱས་ཞོལ་དང་། རྒྱས་མན་བོན་ཚན་དུ་ཞག་མལ་རེ་མཛད་པས། བོན་ཚན་ཏུ་གནས་མོའི་རྒྱན་བོར་བ་ཁྱེད་བྱ་བྲལ་བ་ལ་བྱུང་བ་ཡིན་ནམ་ཆས་རྣམས་གཡེང་དགོས་འདུག་ཟེར་བར། གཏེར་རྫས་རྣམས་སྟོན་དགོས་བྱུང་དོགས་ཅི་དྲག་གམ་དགོངས་ནས་ཚིག་གིས་ཤད་སྦྱངས་མཛད་པའི་མུར་གཞན་ནས་རྙེད་པས་ཐུགས་གཡེང་མ་དགོས། ནངས་པར་སྔ་བར་ཕུག་གུ་ལ་བརྒྱུད་མཁར་སྣ་རི་ཟུར་དུ་མུན་མཚམས་བར་གབ་ནས་བཞུགས་ཏེ། དགོན་པར་ཚེས་བཅུ་གཉིས་ཀྱི་སྲོད་ཡོལ་ལ་ཕེབས། དེའི་སང་ཉིན་སྐུ་མཚམས་འགྲོལ་བའི་རྫུ་མཛད་ནས། གཅུང་རྒྱལ་བའི་སྲས་པོ་སོགས་ནང་འཁོར་ཉུང་འདུས་ལ་གཏེར་རྫས་ཀྱི་བྱིན་རླབས་གནང་ཞིང་། དེ་ནས་ཟླ་བ་དེ་ཡི་ཚེས་ཉི་ཤུ་སྐོར་ནས་བརྩམས་ཏེ། ཟླ་བ་གཉིས་ཀྱི་བར་གཟིམས་ཆུང་བསམ་གཏན་སྦུག་ཏུ་འཇམ་དཔལ་ཁྲོ་བོའི་བསྙེན་སྒྲུབ་ཀྱི་སྐུ་མཚམས་ལ་བཞུགས། དེ་སྐབས་སྤྱིར་དངོས་ཉམས་མནལ་ལམ་གྱི་སྣང་བར་རྟགས་མཚན་བཟང་པོ་ཤས་ཆེ་བ་དང་། ཁྱད་པར་ཟླ་བ་དགུ་པའི་ཉེར་གསུམ་གྱི་ཉིན་མོའི་ཐུན་གྱི་སྣང་བ་ལ་ཅུང་ཟད་མནལ་སྲབ་མོའི་མནལ་ལམ་གྱི་སྣང་བས་སྣེ་ཁྲིད་པ་ལས། དངོས་གཞི་མནལ་གྱི་སྣང་བ་ལས་འདས་པའི་དངོས་སྣང་གི་གསལ་ཆར། ནུབ་ཕྱོགས་ཀྱི་ནམ་མཁར་ཐོགས་མེད་དུ་གཤེགས་པས་རྒྱ་མཚོ་ཆེན་པོ་མཐའ་མི་མངོན་པའི་དབུས་ན། ཡུལ་ལྗོངས་རི་བྲག་ནེའུ་སིང་ནགས་ཚལ་སྐྱེད་མོས་ཚལ་གྲོང་དང་གྲོང་ཁྱེར་གསས་མཁར་སོགས་སྣ་ཚོགས་པས་ཟམ་མ་ཆད་པར་བསྐོར་བའི་དབུས་སུ། རི་དེའུ་དམར་ཟང་ངེ་བ། རིའི་སྒང་རྣམས་མཆོང་དམར་འདྲ་བའི་བྲག་ངོས་དང་། སུལ་རྣམས་ནགས་ཚལ་དང་འབབ་ཆུ་ལྷུང་ལྷུང་འབབས་པ། བྱ་དང་རི་དྭགས་སྣ་ཚོགས་པ་རྩེ་བ་དང་། འགའ་ཞིག་ཏུ་མི་རོ་སྣ་ཚོགས་ཐར་ཐོར་དང་གཅན་གཟན་དང་མི་མ་ཡིན་པའི་གཟུགས་རྣམ་འགྱུར་སྣ་ཚོགས་པ་དག་ཀྱང་ལས་ཀྱི་བྱེ་བྲག་དུ་མ་ལ་འཇུག་པ། རི་དེའི་རྩེ་ན་པདྨ་འོད་ཀྱི་གཞལ་

― MLP003_Page_0123 ―

^{[མ་དཔེ་གཟིགས་ན་འདིར་གནོན།]}

[Full Size]

ཡས་ཁང་ཆེན་པོ་བཀོད་པ་ངོ་མཚར་བས་འཕགས་པའི་ནང་དུ་རིག་པ་འཛིན་པའི་འཁོར་ཚོགས་མཐའ་ཡས་པའི་དབུས་ན། རྗེ་བཙུན་འཇམ་དཔལ་དབྱངས་ཕྱག་བཞི་པའི་རྣམ་པ་ཅན་སྐུ་ལས་འོད་ཟེར་མཁའ་ཁྱབ་ཏུ་འཕྲོ་བ་ཞིག་མཇལ། ཨོ་རྒྱན་ཆེན་པོ་དེ་གང་ན་བཞུགས་སམ་དགོངས་པ་ལ། འཇམ་དཔལ་གྱི་ཞལ་ནས་པདྨ་བཛྲ་ནི་ང་ཡིན་ནོ། །ཞེས་གསུངས་པས། ཐུགས་རྩེ་གཅིག་པའི་མོས་གུས་དྲག་པོས་གསོལ་འདེབས་མཛད་པ་ལས། ནམ་མཁའ་ཐམས་ཅད་འཇམ་དཔལ་ཁྲོ་བོའི་དཀྱིལ་འཁོར་དུ་བཀྲ་ལམ་གྱིས་སོང་། མཁའ་འགྲོ་མཚོ་རྒྱལ་དང་། ལོ་ཆེན་བཻ་རོ་ཙ་ནས་དབང་བསྐུར་ཞིང་བྱིན་གྱིས་བརླབས། དཀྱིལ་འཁོར་གྱི་སྣང་བ་འོད་ཀྱི་ཐིག་ལེར་འདུས་པ་གཙོ་བོའི་སྐུར་བསྡུས། དེ་ཉིད་ཨོ་རྒྱན་ཆེན་པོ་རྣལ་འབྱོར་གྱི་ཆ་བྱད་གཟི་བྱིན་ཉི་མ་འབུམ་ལྟར་འབར་བར་གྱུར་པས། བཻ་རོ་དང་མཚོ་རྒྱལ་གཉིས་ཀྱིས་གདམས་པ་འདི་ཉིད་ཀྱི་དོན་རྣམས་དྲི་བ་དྲི་ལན་གྱི་སྒོ་ནས་མན་ངག་གི་ཟབ་དོན་ཐུགས་ལ་འགོད་པར་མཛད་མཐར་གསལ་སྣང་དེ་མེ་ལོང་ལ་ཧས་བཏབ་པ་ལྟར་ཡལ་བ་ལས། སད་ནས་ཀྱང་བདེ་སྟོང་གི་ཉམས་གསལ་ཞིང་འཐུག་པ་ལ་ཞག་བཅུ་སྐོར་ཙམ་གྱི་བར་གནས་པའི་ཏིང་ངེ་འཛིན་ཁྱད་པར་ཅན་ཐུགས་ལ་འཁྲུངས། དེ་ནས་བརྩམས་ཏེ་བསྐྱེད་རིམ་ལྷ་ཡི་གསལ་སྣང་གིས་ཐ་མལ་གྱི་སྣང་བ་འགོག་པ་ལ་བོགས་ཕྱིན་པར་གྱུར། དགུང་ལོ་ཉེར་གསུམ་བཞེས་པ་ས་སྤྲེལ་ཟླ་བ་བཞི་པའི་ནང་དུ་གོང་མའི་ལུང་བཞིན་ལྷ་ས་དཀྱིལ་འཁོར་སྟེང་དུ་ཚེ་སྒྲུབ་ཀྱི་སྐུ་རིམ་ཟླ་ཕྱེད་བར་སྒྲུབ་པར་མཛད་པ་གྲོལ་རྗེས། ཟླ་བ་ལྔ་པའི་ཚེས་བདུན་བརྒྱད་ནས་བཟུང་ཨེ་པ་དྲུང་ཡིག་དགེ་བཤེས་འཇམ་དབྱངས་བྱ་བའི་ཡིག་མཁན་དང་གསོལ་ཆས་སོགས་མཐུན་རྐྱེན་གང་དགོས་སྩལ་ནས། གཏེར་ཤོག་རྣམས་འབེབས་པར་མཛོད་ཅེས་བཀའ་ལུང་ཕེབས་པ་ལྟར། གཞིས་ཀ་ཤར་གྱི་ཡང་ཐོག་ཏུ་ཤོག་སེར་རྣམས་འབེབས་པར་མཛད་པ་ན། ངོ་མཚར་བའི་རྟགས་མཚན་བཟང་པོའང་ཤར། ཕོ་བྲང་ཞོལ་ཏུ་རྡོ་རྗེ་རྡོ་བྲག་རིག་འཛིན་སྤྲུལ་པའི་སྐུས་སྤྱན་དྲངས་པ་ལྟར་ཐེགས་ནས་རིག་འཛིན་ཐུགས་ཐིག་གི་དབང་ལུང་རྣམས་འབུལ་བར་མཛད་པ་ནས་བཟུང་ཐུགས་

― MLP003_Page_0124 ―

^{[མ་དཔེ་གཟིགས་ན་འདིར་གནོན།]}

[Full Size]

ཡིད་གཅིག་འདྲེས་ལེགས་ཚོགས་ཀྱི་རྟེན་འབྲེལ་འགྲིགཟླ་བ་དེའི་ཉེར་གཅིག་གི་ཉིན་ཕོ་བྲང་རྩེ་ནས་དབོན་པོ་གཡུང་དྲུང་བྱ་བ་ཞིག་ཆིབས་དང་བཅས་སྤྱན་འདྲེན་དུ་འབྱོར་བ་ལྟར། དེ་འཕྲལ་ཕོ་བྲང་གི་ལྟག་སྒོ་བརྒྱུད་དེ་ཕེབས་པ་ན། མཆོད་ཁང་རྩེའི་གཟིམས་ཆུང་ནུབ་ཏུ་གྲགས་པ་དེར་ཀུན་མཁྱེན་རྒྱལ་མཆོག་ལྔ་པ་ཆེན་པོ་བཞུགས་པའི་སྤྱན་སྔར་ཕེབས་པ་དང་། བཀའ་ལས་ཤེལ་བྲག་གི་ཟབ་གཏེར་གེགས་མེད་དུ་བཞེས་ཐུབ་པ་དང་ཤོག་སེར་འབེབས་པ་སོགས་གྲུབ་པ་ཤིན་ཏུ་ལེགས། ཆོས་བཀའ་རིམ་བརྒྱུད་ཀྱི་ཞུ་བ་འདི་ཡང་བརྒྱུད་པ་འཕར་བས་བྱིན་རླབས་ཀྱི་ཚན་ཁ་ཆུང་དུ་འགྲོ་བའི་སྐྱོན་དང་། རྟེན་འབྲེལ་གྱི་སྒོ་ཡང་གནོད་པར་གོ་བས། ད་རེས་ངོས་ཀྱིས་ཞུ་འདུན་ཡིན་པས། དེ་རིང་གཟའ་ཚེས་ཀྱང་བཟང་བར་ཡོད་པས་ཆོས་ཐུན་གྱི་དབུ་ཚུགས་པ་ཙམ་དགོས་ཞེས། བཀྲ་ཤིས་པའི་དར་དཀར་སྲིད་དུ་རིང་བ་དང་། སའི་སྙིང་པོ། བཟང་གོས་དབང་གི་མདངས་ལྡན་རྣམས་སྩལ་ནས་མཎྜལ་གནང་བ་ལྟར། ཁ་བྱང་ནས་བཟུང་སྟེ་ཆོས་ཚན་གསུམ་ཙམ་ཞིག་གི་ལུང་འབུལ་བ་གནང་རྗེས་ཐུགས་སུ་གཅགས་པའི་བཀའ་མཆིད་ཀྱང་ལྷུག་པར་སྩལ་གསུང་། ཟླ་བ་དྲུག་པའི་ཚེས་ལྔའི་ཉིན། གཤིན་རྗེ་གཤེད་ཀྱི་དབང་བཀའ་འབུལ་བར་མཛད་ཅིང་། དེ་ཉིན་ཕོ་བྲང་རྩེར་མེ་ཏོག་གི་ཆར་བཟུང་དུ་གཏུབ་པ་བབས་པའི་རྟགས་ངོ་མཚར་བ་དང་། དེའི་ནུབ་མོ་མནལ་ལམ་དུ་རྔ་ཡབ་དཔལ་རི་པདྨ་འོད་ཡིན་དགོངས་པའི་ཁང་བཟང་བཀོད་ལེགས་ཡིད་དུ་འོང་བ་ཞིག་ན། ཨོ་རྒྱན་ཆེན་པོ་རྒྱ་གར་པཎ་ཆེན་གྱི་ཆ་བྱད་ཅན་གྱི་འཁོར་དུ་ལོ་ཆེན་བཻ་རོ་དང་ཆོས་རྒྱལ་ཡབ་སྲས་རྣམས་གྲལ་རིམ་དུ་བསྟར་བའི་མཐའ་རིག་འཛིན་མཁའ་འགྲོ་མང་པོས་བསྐོར་ནས་བཞུགས་པའི་དབུས་དེར་འཇམ་དཔལ་ཁྲོ་བོའི་ཡེ་ཤེས་ཀྱི་དཀྱིལ་འཁོར་མངོན་སུམ་དུ་གསལ་བར་དབང་བསྐུར་ནས་བདེ་བ་ཆེན་པོའི་ཡེ་ཤེས་ཐུགས་རྒྱུད་ལ་ཉམས་སུ་མྱོང་བའི་ངོ་སྤྲོད་པར་མཛད་པའི་མཐར། སློབ་དཔོན་གྱིས་ལྕགས་ཀྱུའི་ཕྱག་རྒྱས་བཀུག་པས། འཆི་བདག་གཤིན་རྗེའི་རྒྱལ་པོ་གཟུགས་མི་སྡུག་ཅིང་ཞུད་པའི་ཕྱི་བཞིན་དུ་རྣམ་འགྱུར་སྣ་ཚོགས་པའི་གཟུགས་ཅན་གྲངས་ཆོད་རྒྱུ་མེད་པ་མཐའ་མེད་པའི་ཕ་རོལ་ནས་ཡོང་བཞིན་

― MLP003_Page_0125 ―

^{[མ་དཔེ་གཟིགས་ན་འདིར་གནོན།]}

[Full Size]

པ་ལྟ་བུ་ལ་བཀའ་བསྒོས་ཤིང་དམ་བསྒྲགས་ནས་ཕྲིན་ལས་ཀྱི་ཕོ་ཉར་དབང་བསྐུར་བ་ལས། དེས་ཀྱང་གུས་པས་ཁས་བླངས་པའི་མཐར། ཕྱི་ནས་འོང་བ་ཐམས་ཅད་སྔ་མ་ལ་རིམ་བཞིན་ཐིམ་པ་ལས་མཐར་དེ་ཡང་མི་གསལ་བར་གྱུར་པའི་སྐད་ཅིག་ལ་མནལ་སད་པར་གྱུར་ཅིང་། དགེ་མཚན་དེ་དག་ཀྱང་སྔོན་སློབ་དཔོན་ཆེན་པོ་པདྨ་འབྱུང་གནས་ཀྱིས་དཀྱིལ་འཁོར་གཅིག་ཏུ་བསྡུས་པའི་སྨོན་ལམ་གྱི་རྟེན་འབྲེལ་དུས་སུ་སད་པའི་མཐུ་སྟེ། འགྱུར་མེད་ཆོས་འདིའི་རྩ་བའི་བདག་པོའོ༔ ཁྱད་པར་ཆོས་འདིའི་འགྲོ་དོན་སྒོ་འབྱེད་འགྱུར༔ ཞེས་པའི་ལུང་དོན་གཏན་ལ་ཕེབས་པར་གྱུར་ཅིང་དེའི་མཐུས་སྐུ་ཚེའི་འགལ་རྐྱེན་ཞི་ཞིང་མངའ་ཐང་དང་ཆབ་སྲིད་རྒྱས་པས་བོད་འབངས་བདེ་ཞིང་སྐྱིད་པའི་བཀའ་དྲིན་གྱིས་སྐྱོང་བའི་ཕྲིན་ལས་ལྷུན་གྱིས་གྲུབ་པ་སོགས་རྟེན་འབྲེལ་ལེགས་ཚོགས་སུ་འགྲིག་པ་ཡིན་ནོ། །དེ་ལྟར་གོང་དུ་གཏེར་གསར་སྔ་ཕྱིའི་སྐོར་ཚང་མ་དང་། གཞན་ཡང་ཟླ་བ་གསུམ་དུ་ཉེ་བར་རྩེར་བཞུགས་ནས་ཆོས་བཀའ་མང་དུ་འབུལ་བར་མཛད་ཅིང་། རྙེད་པ་དང་བཀུར་སྟི་ཕུལ་དུ་བྱུང་བས་འཕྲལ་དང་ཡུན་དུ་མཆོད་པས་རྗེས་སུ་སྐྱོང་བར་མཛད་དོ། །དེ་ནས་ཆུ་ཤུར་བརྒྱུད་དར་གླིང་དུ་ཕྱིར་ཕེབས་ནས་གོང་མའི་ལུང་བཞིན་ཨེ་གཉལ་སོགས་སུ་ཆིབས་བསྐྱོད་པ་འཁོར་བ་གནང་རྗེས། ཟླ་ཤས་ཀྱི་བར་གཟིམས་ཆུང་བསམ་གཏན་སྦུག་ཏུ་སྐུ་མཚམས་དམ་པར་བཅད་དེ་བསྐྱེད་རྫོགས་ཀྱི་ཉམས་བཞེས་ལ་རྩེ་གཅིག་ཏུ་བཞུགས་པ་ལས། ས་བྱ་ཧོར་ཟླ་གཉིས་པའི་སྐབས་ཤིགཨོ་རྒྱན་ཆེན་པོ་ཡིད་བཟང་གཞོན་ནུའི་ཚུལ་ཅན་ལྷའི་བུ་མོ་མང་པོའི་འཁོར་དང་བཅས་པ་ནམ་མཁའ་ལ་ཡུད་ཀྱིས་སྣང་བ་གཟིགས་ཤིང་། དེའི་བྱིན་རླབས་ཀྱིས་མ་འོངས་འབྱུང་འགྱུར་གྱི་གནས་ལུགས་མང་པོ་ཞིག་མེ་ལོང་ནང་གི་གཟུགས་བརྙན་ལྟར་སྒྲིབ་མེད་དུ་གསལ་ལེར་གཟིགས་པ་ཕྱིས་དེ་ཁོ་ན་བཞིན་མངོན་གྱུར་ཐོག་ཏུ་ཁེལ་བ་བྱུང་ངོ་། །སྐུ་མཚམས་དེ་གྲོལ་ནས་གཅུང་རྒྱལ་བའི་སྲས་པོ་སོགས་ཉུང་འདུས་ལ་གཤིན་རྗེ་གཤེད་ཀྱི་དབང་ལུང་རྣམས་སྩལ། འདི་ཉིད་སྐལ་ལྡན་ཆོས་ཀྱི་བདག་པོར་ལུང་གིས་ཟིན་པ་དང་། མཁས་བཙུན་བཟང་པོའི་ཡོན་ཏན་དང་ལྡན་ཞིང་། བསྟན་འགྲོའི་དོན་ལ་སྙིང་སྟོབས་ཕུལ་

― MLP003_Page_0126 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་བྱུང་བ་མངའ་ཡང་། ཉམས་བཞེས་དུས་ལས་ཡོལ་བས་རྟེན་འབྲེལ་འཆུགས་ཏེ་དགུང་ལོ་ཉེར་བདུན་པ་ལ་སྐུ་ཚེའི་བར་ཆད་དུ་གྱུར་པ་ཞིག་བྱུང་ངོ་། ༈ དེ་ནས་ངམ་ཤོད་གནམ་ལྕགས་བྲག་གི་ཟབ་གཏེར་ཇི་ལྟར་བཞེས་ཚུལ་ནི། ཤིང་སྟག་ལོ་གཅུང་གི་གཤེགས་རྫོངས་རྣམས་གྲུབ་རྗེས་བན་པ་བསམ་འགྲུབ་དགོན་གྱི་དཔོན་སློབ་སྐུ་འབྲིང་གཤེགས་པའི་སྐུ་འདད་ཀྱི་གྲལ་དབུར་སྤྱན་དྲངས་པ་ལྟར་ལྷོ་བྲག་ཕྱོགས་སུ་ཕེབས་ཞོར་ལ། ཡུལ་ཕྱོགས་སོ་སོར་དད་ཅན་གྱི་བསོད་ནམས་ཞིང་དུ་ཞབས་བསྐྱོད་པ་ལས། མདོ་མཁར་ནས་མོན་གྱི་འགོ་རོང་གུང་ཐང་མཁར་དུ་ཕེབས་པའི་ཚེ། ཤར་ཕྱོགས་ཀྱི་ནམ་མཁའི་དབྱིངས་སུ་འོད་ཀྱི་ཐིག་ལེ་སྲན་མ་འཕོས་པ་ཙམ་ཁ་དོག་སྣ་ཚོགས་གྲངས་མེད་པ་འབྲེལ་བའི་ནང་དུ་སྐུ་དང་ཡིག་འབྲུ་སོགས་སྟོང་གཟུགས་ཀྱི་སྣང་བ་སྣ་ཚོགས་ཤར་བ་གཅིག་ལ་གཅིག་ཐིམ་ནས་མཐིང་ཞུན་ལྟར་གསལ་ཞིང་འབར་བའི་ཐིག་ལེ་ཡུངས་འབྲུ་ཙམ་ཞིག་ཏུ་གྱུར་ནས་སྨིན་ཕྲག་གི་ཐད་ཀྱི་ནམ་མཁའ་ལ་དེངས་པའི་མཐར་སྟོང་ཉིད་སྤྲོས་བྲལ་གྱི་ངང་དུ་དར་ཅིག་ལ་གནས་པར་གྱུར་ཅིང་། དེ་ནས་ཡར་ཕེབས་ཏེ། ཁེང་ལ་ལ་བྱས་མཚོ་སྣ་བརྒྱུད་དེ་ཟླ་བ་བཅུ་གཅིག་པའི་འགོར་དཀར་པོ་ཟངས་སུ་ཐེགས། དེར་ཚོགས་མཆོད་མཛད་པའི་ཚེ་མཚོ་སྟེང་ཡོངས་སུ་ཁྱབ་པའི་ཐིག་ལེ་མུ་ཁྱུད་ཁ་དོག་ལྔ་པས་བསྐོར་བའི་ནང་དུ་སྟོང་གཟུགས་ཀྱི་སྣང་བ་འབྱམས་ཀླས་པའི་གསལ་སྣང་རང་རིག་དང་རྣམ་དབྱེ་མེད་པར་ཤར་བའི་ནུབ་མོ་མནལ་ལམ་དུ། བུད་མེད་མོན་མོའི་ཆས་ཅན་མཛེས་སྡུག་མཚུངས་པ་མེད་པའི་རྣམ་པ་ཐུགས་ཡུལ་དུ་གསལ་བ་ཙམ་གྱིས་ཀྱང་བདེ་བའི་ཡེ་ཤེས་རྩོལ་མེད་དུ་འཆར་ནུས་པ་ཞིག་གིས། དར་གྱིས་དྲིལ་བའི་ཤོག་དྲིལ་ཞིག་ཁ་ཕྱེ་བ་ལས་འོད་ཟེར་ཕྲོམ་ཕྲོམ་འཆར་བ་སྙམ་བྱེད་པ་ཞིག་ཕྱག་ཏུ་ཕུལ་བྱུང་བ་རྨིས། ནང་པར་གཏེར་ཤོག་སྣ་ཚོགས་ཀྱི་དྲིལ་ཁ་ཞིག་ཡོད་པ་དེ་ཞལ་དབྱེ་བར་མཛད་པས། དེའི་ནང་ན་སྔར་མེད་པའི་ཤོག་དྲིལ་ཞིག་སྣང་བ་དེར་ལྗགས་ཀློག་གནང་བར། ཡི་གེ་སྡེ་ཚན་རིམ་པ་གཉིས་ཀྱི་དང་པོ་དེ་བསམ་ཡས་སྟེང་ཁང་གི་ཁ་བྱང་དང་། གཉིས་པ་དེ་གནམ་ལྕགས་བྲག་གི་ཁ་བྱང་དུ་སྣང་བ་ལས་

― MLP003_Page_0127 ―

^{[མ་དཔེ་གཟིགས་ན་འདིར་གནོན།]}

[Full Size]

དགུང་ལོ་སུམ་ཅུ་པ་ཤིང་ཡོས་ཟླ་བ་དང་པོར་བསམ་ཡས་མཆིམས་ཕུར་ཕེབས་ཏེ། དེར་སྐུ་མཚམས་ཀྱི་བཅད་རྒྱ་གནང་ཞིང་། དེ་དང་འབྲེལ་ཆགས་པའི་སྦྲུལ་གྱི་ཟླ་བ་དེ་ལ་སྟེང་ཁང་ནས། དཔལ་ཡང་དག་ཧེ་རུ་ཀའི་སྒྲུབ་ཐབས་སོགས་ཀྱི་ཟབ་གཏེར་ཡོད་པ་སྤྱན་འདྲེན་པའི་དུས་ཡིན་ཡང་། སྤྱིར་རྟེན་འབྲེལ་གྱི་སྒྲིག་ཕྱོགས་འགའ་ཞིག་རྐྱེན་མ་འཛོམ་པ་དང་། སྒོས་སྐབས་དེར་གློ་བུར་བའི་རྐྱེན་གྱིས་ལྷ་སར་ཆིབས་བསྐྱོད་དགོས་པའི་བར་ཆད་ཀྱི་དབང་ལས་དུས་ཡོལ་ཏེ་ཕྱག་ཏུ་མ་སོན། དེ་རྗེས་དངོས་ཉམས་མནལ་ལྟས་ཅི་རིགས་པར་གཏེར་སྲུང་དང་མཁའ་འགྲོ་རྣམས་འཁང་བའི་ལྟས་དང་། ཕྱི་ནང་དུ་འཚུབ་འགྱུར་གྱི་རྣམ་པ་སྣ་ཚོགས་འཆར་བ་སོགས་བྱུང་བ་ལས། དེ་དག་ཞི་བྱེད་དུ་ཚོགས་བརྒྱ་སོགས་སྐུ་རིམ་ཇི་སྙེད་པ་དང་། ཁྱད་པར་མེ་འབྲུག་ཟླ་བ་བདུན་པའི་ཚེས་བརྒྱད་ནས་གྲྭ་ཕྱིར་སྐུ་མཚམས་ཀྱི་བཅད་རྒྱ་བདུན་ཕྲག་གསུམ་མཛད་རྗེས། བླ་མ་མཁའ་འགྲོའི་ལུང་བསྟན་ལྟར་ཟླ་བ་བརྒྱད་པའི་འགོར། ཙ་རི་ཏྲར་ཐེགས་ཏེ་གནས་ངོ་མཚར་ཅན་སོ་སོར་ཚོགས་མཆོད་མཛད་པས་ལྷ་དང་མཁའ་འགྲོ་འདུ་བའི་རྟགས་དང་མཚན་མ་ཁྱད་པར་ཅན་མང་པོ་མངོན་དུ་སྣང་བས་དབུགས་ཕྱུང་ཞིང་། ཁྱད་པར་ཕོ་བྲང་ཆེན་མོར་ཚོགས་མཆོད་གནང་སྐབས་འཇའ་འོད་འཁྱིལ་པའི་གུར་ཁྱིམ་རྣམ་པར་བྲེས་པ་ལས་མེ་ཏོག་གི་ཆར་འབེབས་པ་སོགས་ངོ་མཚར་བའི་རྟགས་མངོན་སུམ་དུ་སྣང་བ་དང་། དེ་ནུབ་མནལ་ལམ་ལ། ཁང་བཟང་ཡིད་དུ་འོང་བ་ཞིག་གི་ནང་དུ་ཐེགས་པས། དེའི་ནང་ན་ཨ་ཙ་ར་རལ་པ་ཅན་ཞིག་དང་། པཎ་ཞྭ་ལུ་ཧང་བཞེས་པ་ཞིག་བུད་མེད་མང་པོའི་འཁོར་དང་བཅས་འདུག་པ་ལ་གུས་འདུད་དང་ལུང་བསྟན་ཞུ་བར་མཛད་པས་རལ་པ་ཅན་དེའི་ཞལ་ནས་སྔར་ལུང་ནས་བཤད་པའི་སྤང་བླང་རྣམས་ཇི་བཞིན་མ་བྱུང་བས་ཟབ་གཏེར་རྣམས་ཀྱང་རིམ་པར་འགྱངས་ཤིང་རྐྱེན་ངན་སྣ་ཚོགས་བྱུང་བ་དེ་ཡིན། ད་ལམ་ཚོགས་མཆོད་འདིས་རྟེན་འབྲེལ་ཉམས་པ་མང་པོ་གསོས་ཤིང་། ཕྱིས་ཀྱང་ལོ་བཅུ་ཚུན་གྱི་རྟེན་འབྲེལ་རྣམས་ལེགས་ཚོགས་སུ་འགྲིག་པ་ལ་ཕན། ཁྱད་པར་ཟླ་བ་བཅུ་གཅིག་པའི་ཉ་སྟོང་གང་རིགས་ལ་གནམ་ལྕགས་བྲག་ནས་སྔར་ཁ་བྱང་བྱུང་བའི་གཏེར་རྣམས་

― MLP003_Page_0128 ―

^{[མ་དཔེ་གཟིགས་ན་འདིར་གནོན།]}

[Full Size]

སྲུང་མར་མཆོད་གཏོར་ཕུལ་ནས་འཐོན་གསུང་། ཡང་པཎ་ཞྭ་ཅན་དེས། གཏེར་དེ་བཏོན་ན་བོད་སྤྱི་ལ་གནོད་པའི་འབྱུང་པོ་མང་པོའང་ཐུལ་བ་ཡོད། ཅེས་སོགས་ལུང་བསྟན་པ་ལྟར། ཁ་བྱང་དུ། སྟག་ཟླའི་ཉའམ་སྟོང་གི་ཚེ༔ ཟབ་གཏེར་འདོན་པའི་དུས་སུ་བསྟན༔ ཞེས་པའི་དུས་གནད་འཛོམ་པ་བཞིན། མེ་འབྲུག་ཟླ་བ་བཅུ་གཅིག་པའི་ཚེས་བཅུ་གསུམ་ནས་གཙུག་ལག་ཁང་གི་ཡང་ཐོག་གཟིམས་ཆུང་ཀུན་བཟང་ཡང་རྩེའི་སྦུག་ཏུ་སྐུ་མཚམས་ལ་བཞུགས་པའི་རྫུ་མཛད་ནས། ཚེས་བཅུ་བཞིའི་སྲོད་ཡོལ་ཙམ་ལ་ཞབས་ཕྱིར་གཟིམས་དཔོན་བསྟན་འཛིན་དཔལ་བཟང་དང་། དགེ་སློང་ངག་དབང་ཀུན་དགའ། ཆིབས་འཆང་པ་ཨ་བཀྲ་དང་། ཀུན་དགའ་བཅས་དཔོན་གཡོག་ལྔ་དགོན་པ་ནས་གསང་ཐབས་ཀྱིས་ཆིབས་བསྐྱོད་པ་ལས། འབྲོང་ཞོལ་གྱི་མ་ཚད་མགོན་པོ་གདོང་གི་བྲག་ཞོལ་དེར་ཆིབས་གཞོལ་ཏེ་གཟིམས་པའི་མནལ་ལམ་དུ། སྐྱེས་པ་ཆས་བཟང་རྟ་དམར་བཞོན་པ་ཞིག་དང་། བུད་མེད་རྟ་དཀར་བཞོན་པ་ཞིག་གཡོག་འགའ་དང་བཅས་ཤར་ཕྱོགས་ནས་འོངས་ཏེ། རྟ་ལས་བབས་ནས་ཕྱག་བཙལ་ཅིང་བཟའ་བ་སྣ་ཚོགས་དང་བདུད་རྩི་བསྟབས་ནས། དེ་རིང་མི་འགྱུར་བའི་དུས་ཚེས་སྔ་མ་ཡིན་པས་གང་སྔ་འབྱོན་དགོས། གཏེར་སྲུང་རྣམས་མ་འཛོམ་ན་འཐོན་དཀའ་བས། ངས་ཀྱང་འབོད་གྲོགས་བྱེད། ཁྱེད་རང་ཡང་མཆོད་གཏོར་བཤམས་ནས་གསོལ་མཆོད་མཛོད་ཟེར་ཏེ་སྔོན་ལ་སོང་སྙམ་བྱེད་པའི་མུར་བྲག་གསེབ་དེ་ནས་ཧི་ཧི་ཞེས་པའི་སྒྲ་རིང་པོ་ཞིག་ལྷང་གིས་བྱུང་བའི་རྐྱེན་གྱིས་མནལ་སད་པ་དང་ནམ་ལངས་པ་དུས་མཉམ་དུ་བྱུང་ཞིང་། དེ་མ་ཐག་ཐེགས་པ་ལས་ཨོ་དཀར་བྲག་གི་དགོན་ཞོལ་གྱི་གྲོང་ཁྱིམ་དང་ཉེ་བར་གྲོ་མཛད་ནས། ཆིབས་དང་ཨ་དྲུང་གཉིས་མོན་མཁར་དུ་སློག་སྟེ་ཕེབས་སྒུག་ཞུ་བར་བྱས། དཔོན་སློབ་གསུམ་གྱིས་གནས་རིའི་ངོགས་ལ་དལ་གྱིས་འཛེགས་པར་མཛད་དེ། ཉིན་གུང་མ་ཟིན་ཙམ་ལ་གནས་ནང་དུ་ཕེབས་པ་ན། ནམ་མཁའ་དྭངས་པ་ལ་ཁོར་ཡུག་རྣམས་འཇའ་སྤྲིན་མཚར་བས་འཁྲིག་པ་སོགས་ངོ་མཚར་བའི་ལྟས་དང་། གནམ་སྒོ་ཅན་དུ་གྲགས་པའི་ཕུག་པ་དེར་ཕེབས་དུས་ས་གཡོས་ལྟ་བུས་རི་བོ་གཡོ་ཞིང་འགུལ་བ་དང་འཇིགས་ཟིལ་ཆེན་

― MLP003_Page_0129 ―

^{[མ་དཔེ་གཟིགས་ན་འདིར་གནོན།]}

[Full Size]

པོས་སྐྱི་བུང་སྙམ་བྱེད། དེར་མཆོད་གཏོར་བཤམས་ནས་གཏོར་འབུལ་ཚོགས་མཆོད་དང་གསོལ་འདེབས་མཛད་ནས། ས་མིག་འཚོལ་བར་མཛད་པས་རིའི་དབྱིབས་ལ་ཐུགས་ངེས་འདྲོངས་ཀྱང་། ཕུག་པ་གང་ཡིན་མ་མཁྱེན་པ་ན་རྡུལ་རླུང་སྤོས་ཀྱི་དུད་སྤྲིན་འཁྲིགས་པ་ལྟ་བུ་ཞིག་གློ་བུར་དུ་འཕྱུར་བའི་རེག་བྱ་ཚ་ཞིང་ཉི་མ་ལྟར་གསལ་བས་ཕུག་པ་དེ་ཁེངས་པའི་དབུས་ན། མེ་ལོང་ངོས་ལ་གཟུགས་བརྙན་ཤར་བ་ལྟ་བུའི་བུད་མེད་དམར་ངམས་རས་གོས་སྨུག་ཁྲག་གྱོན་པ་སྐྲ་ལན་བུ་གཅིག་ཏུ་བྱས་པ་ལ་མགྲོན་རྒྱན་བཏགས་པ། དཔྲལ་བར་མིག་ཁྲག་ལྟར་དམར་བ་ཧུར་གྱིས་བལྟ་བ་ཞིག་ན་རེ། ཕུག་པ་འདི་མིན་སྟེང་དུ་དེངས་ཟེར་སོང་བ་ན་དུད་སྤྲིན་ཡང་རླུང་གིས་བསྐྱོད་པ་ལྟར་དེ་དང་མཉམ་དུ་འཁྱིལ་གྱིས་བྲག་ལམ་དེའི་ངོས་ལས་སོང་བའི་རྗེས་སུ་ཐེགས་ཏེ་ཕུག་པ་གོང་མ་དེར་ཕེབས་ཤིང་། དེར་བུད་མེད་དེ་མི་སྣང་བར་ཡལ་ཡང་དུད་སྤྲིན་སྔར་ལས་གསལ་ཉམས་ཆུང་བ་ཙམ་གྱིས་འཁྱིལ་ལེར་སྣང་། ཕུག་པ་དེ་ཡང་ཁ་ལྷོ་ནུབ་ཏུ་བལྟ་བ་ཕྱི་སྒོ་གཅིག་ལ་ནང་རལ་གཉིས་སུ་ཡོད་པའི་མར་བལྟའི་གཡོན་ལོགས་ན། རྡོ་ཆོལ་དཀྱུས་མཛུབ་གང་པ་ཞེང་སོར་བཞི་ཙམ་པ་བར་རྣམས་རྡོ་ཆོལ་དང་འབྱར་རྩིས་འཇམ་པོར་བྱུགས་པ་ཞིག་སྣང་ཞིང་དེར་རྗེ་ཉིད་རང་གིས་གཏེར་བདག་རྣམས་ལ་གཏོར་མ་དང་གསེར་སྐྱེམས་འབུལ་བར་མཛད། ཞབས་ཕྱི་གཉིས་ཀྱིས་བསམ་པ་ལྷུན་གྲུབ་ཀྱི་ལས་ཅན་འགྲོ་བ་མའི་གསོལ་འདེབས་འདོན་བཞིན་བསྡད་པ་ལས། བྲག་སྒོ་ཐོ་བས་བསྡིགས་པར་མཛད་པས་མཚམས་རྣམས་འཁྱགས་པ་གས་པ་བཞིན་གྲུམ་པ་དང་། རྡོ་ཆོལ་དེ་གཟོང་གིས་བཀོག་པ་ན་བུག་པ་ཧར་བྱུང་དུ་དོད་པ་ལས་ག་པུར་གྱི་དྲི་ངད་འཐུལ་ཞིང་བྱེ་ནག་དང་སོལ་བ་ནག་ཉིལ་གྱིས་འཐོན་པའི་མོད་ལ། ཐུགས་རིག་ཟི་བུན་ནེ་བའི་ཉམས་སྣང་དུ། གཏེར་སྒོ་ཚད་དེ་ག་ལ་སྦུག་དེ་ཁྱོན་ཤིན་ཏུ་ཡངས་པའི་ནང་ནས། སྔར་གྱི་བུད་མེད་དེ་ཁྲང་གིས་འོངས་ཏེ། གཏེར་སྒྲོམ་ཆེ་ཆུང་གཉིས་པོ་དྲོད་ཚ་ལྷང་གིས་ཕྱག་ཏུ་འབུལ་བ་དང་ལྷན་ཅིག་བརྡ་ཐིམ་ཞེས་བརྗོད་ནས་ནང་དུ་ལོག་སོང་བ་དང་ཐུགས་ཉམས་དེ་སད་ཅིང་། འཇིགས་ཟིལ་གྱིས་སྐུ་ལུས་ལས་རྔུལ་འཛག་ཅིང་གསུང་མི་ཐོན་པ་ལྟར་སྣང་ཡང་།

― MLP003_Page_0130 ―

^{[མ་དཔེ་གཟིགས་ན་འདིར་གནོན།]}

[Full Size]

གཏེར་རྫས་རྣམས་ཕྱག་ཏུ་ལོན་པས་ཐུགས་རིག་ཧུར་ཕྱུང་སྟེ་རང་གི་དབུ་གཙུག་ཏུ་བཞེས་ཤིང་ཞབས་ཕྱི་གཉིས་ལའང་བྱིན་རླབས་གནང་ནས། གཏེར་ཁུང་དུ་རིན་པོ་ཆེ་འབྲུ་སྨན་ཤིས་བརྗོད་སོགས་དར་གྱིས་བསྒྲིལ་བ་བཞུགས་པར་མཛད་ཅིང་། རྡོ་ཆོལ་བསྒྲིག་པའི་མཚམས་གྲུམ་པ་རྣམས་གཏོར་ཟན་གྱིས་སྦྱར་བ་ལ་ས་གཏོར་ཏེ་མི་མངོན་པར་མཛད་ནས། ཕུག་པའི་ཕྱིར་ཕེབས་དུས་ཉི་མ་དམར་ཐག་ཆོད་པ་ཙམ་དུ་གྱུར། དེ་ནུབ་ཕུག་པ་གནམ་སྒོ་ཅན་དུ་བཞུགས་པའི་མནལ་ལམ་དུ། ཆུ་བྲག་ལྗོན་ཤིང་མེ་ཏོག་སོགས་ཀྱིས་བཀྲ་བའི་ཡུལ་ལྗོངས་ཉམས་དགའ་བའི་དབུས་སུ་རིན་པོ་ཆེའི་ཁང་བཟང་བཀོད་ལེགས་ངོ་མཚར་ཅན་གྱི་ནང་དུ། རིན་པོ་ཆེའི་ཁྲི་སྟན་ཁྱད་པར་འཕགས་པའི་སྟེང་ན། མ་ཧཱ་གུ་རུ་ཉིད་པདྨ་རྒྱལ་པོའི་ཆ་ལུགས་ལྟ་བུ། གཡས་གཡོན་དུ་བུད་མེད་གཞོན་མཛེས་རེས་བརྟེན་པའི་མཐར་ལོ་པཎ་རྒྱལ་བློན་རིག་འཛིན་མཁའ་འགྲོའི་འཁོར་ཚོགས། ཁྲོམ་ཚོགས་པ་ལྟ་བུས་བསྐོར་བ་ལ། ཤིན་ཏུ་དད་པའི་འུར་ལངས་ཏེ་ཕྱག་དང་གསོལ་འདེབས་དྲག་པོ་གནང་བས་འཁོར་རྣམས་ཀྱང་དེ་ལྟར་མཛད་ཅིང་འདུགདེར་ཨོ་རྒྱན་ཆེན་པོ་ཉིད་སྙེས་སྟབས་ལས་ཁྲོང་གིས་བཞེངས་ནས་ཐུགས་ཀའི་ན་བཟའ་བསལ་བ་ལས་འོད་ཟླ་ཟེར་ལྟ་བུ་སྤྲོས་པ་གཡས་ངོས་སུ་འཁྱིལ་བའི་འོད་ཕུང་གསལ་ལ་དྭངས་པའི་གུར་ཁྱིམ་སྒོ་ང་ལྟ་བུའི་ནང་ན། རྡོར་སེམས་དང་བླ་མ་དྲག་པོའི་དཀྱིལ་འཁོར་རྟེན་དང་བརྟེན་པར་བཅས་པ་མེ་ལོང་ནང་དུ་གཟུགས་བརྙན་ཤར་བ་བཞིན་བཀྲ་གསལ་ལེར་སྣང་བ། གུ་རུས་ཕྱག་གིས་བསྟན་ཅིང་དེ་ལས་ཁྲོ་ཚོགས་སྤྲོས་པས་བགེགས་བསྐྲད་དེ་སྐུ་གསུང་ཐུགས་ཀྱི་ཕྱག་རྒྱ་མཚོ་ལ་ཁ་བ་ལྟར་བབས་པས་བདེ་ཆེན་གྱི་ཡེ་ཤེས་བཟོད་མེད་དུ་འབར་ཞིང་། དེ་ནས་བུམ་དབང་བསྐུར་ནས་བསྐྱེད་རིམ་གྱི་གདམས་པས་ཡུལ་སྣང་ཐམས་ཅད་སྣང་སྟོང་དག་པ་རབ་འབྱམས་ཀྱི་འཁོར་ལོར་སྦྱོངས་ཏེ། དཀྱིལ་འཁོར་གྱི་སྣང་ཆ་ཐུགས་ཀར་བསྡུས་ནས། སྐུ་གསལ་སྟོང་སྒྲིབ་ཐོགས་དང་བྲལ་བར་རྟེན་རྩའི་འཁོར་ལོར་བརྟེན་པ་ཐིག་ལེའི་ལྷ་ཚོགས་གསལ་འཚེར་འཕར་གཡོ་བྱེད་པ་ལྟར་གསལ་བ་བདེ་ཆེན་བྱང་ཆུབ་སེམས་ཀྱི་ངོ་བོར་ཞུ་བ་སྩལ་བས། རྩ་ཁམས་བདེ་བས་ཁྱབ་པའི་བདེ་

― MLP003_Page_0131 ―

^{[མ་དཔེ་གཟིགས་ན་འདིར་གནོན།]}

[Full Size]

སྟོང་གི་ཡེ་ཤེས་སྦར་ནས་གཏུམ་མོའི་ཟབ་ལམ་རྣམས་ལེགས་པར་གདམས། དེ་ནས་གཡོན་གྱི་བུད་མེད་དེ་ཕྱག་རྒྱར་གཏད་པ་ལ་སྙོམས་འཇུག་མཛད་པས་སྐུ་ལུས་ལྷ་སྐུར་དྭངས་པར་བྱང་སེམས་དགའ་བཞིའི་ཉམས་རྒྱས་པས་ལྷན་སྐྱེས་ཀྱི་ཡེ་ཤེས་འབར་བ་ལས། རང་རིག་ཀ་དག་དེ་ཁོ་ན་ཉིད་ཡེ་ཤེས་ལྷུན་གྲུབ་སྣང་བཞིར་རྫོགས་པའི་ངོ་སྤྲོད་གཅེར་མཐོང་མཛུབ་ཚུགས་སུ་གདམས་པའི་མཐར་བཀའ་སྲུང་རྣམས་བཀུག་ནས་ཕོ་ཉ་བཀའ་སྡོད་དུ་གཏད་པས་རང་ཉིད་ཆེ་བཙན་འགྲན་ཟླ་དང་བྲལ་བའི་དཔའ་གདེངས་ཆེན་པོ་བརྙེས་ཤིང་། གཞན་ཡང་གདམས་པའི་གནད་དང་། ལུང་བསྟན་གྱི་བླང་དོར་རྣམས་ཀྱང་ཅི་རིགས་སུ་གདམས་རྗེས། གཙོ་འཁོར་ཐམས་ཅད་ཀྱི་སྐུ་ལས་སྤྲུལ་པའི་ཕོ་ཉ་གྲངས་མེད་སྤྲོས་པས་བར་གཅོད་ཀྱི་གདོན་བགེགས་རྣམས་འདུལ་བའི་ཕྲིན་ལས་དང་། སླར་ཡང་འོད་ཟེར་དེ་དག་ལས་འདོད་ཡོན་ལྔའི་ལོངས་སྤྱོད་ཉི་ཟེར་གྱི་རྡུལ་ཕྲན་ལྟར་བུན་ལོང་ཟི་ཁོལ་ཁོལ་བྱེད་པའི་ངང་ལ་མནལ་སད་ཅིང་། སད་ནས་ཀྱང་སྤོས་རོལ་གྱི་སྣང་བ་རྣམས་ལམ་མེ་བར་སྣང་ཞིང་གཏད་མེད་བདེ་བའི་ངང་ལ་རེ་ཞིག་གནས་པའི་ཐུགས་ཉམས་བཟང་པོ་འཁྲུངས་པར་གྱུར་ཏོ། །དེ་ནས་ནངས་པར་མོན་མཁར་གྱི་ལ་བརྒྱུད་འབྲས་ཐང་གི་བར་ཞབས་འགྲོས་དང་། དེ་ནས་ཆིབས་ལ་བརྟེན་ཏེ་གདན་སར་སྲོད་ཡོལ་ཙམ་ལ་ཕེབས་ཤིང་། སང་ཉིན་དེ་ནང་འཁོར་རྣམས་ལ་བྱིན་རླབས་མཛད། དེ་འཕྲལ་གོང་མ་ཐམས་ཅད་མཁྱེན་པའི་སྤྱན་སྔར་གནས་ཚུལ་འབུལ་མི་ཆེད་དུ་མངགས་པར། ཤིན་ཏུ་དགྱེས་པའི་བཀའ་ཤོག་གསེར་དང་ཁ་ཐག་སྣ་ལྔའི་རྟེན་དང་བཅས་སྩལ་ཅིང་། མི་རིང་བར་གོང་ནས་སྤྱན་འདྲེན་གྱི་བཀའ་ཤོག་ཕེབས་པ་ལྟར་འབྲིའུ་སྣའི་གྲུ་བརྒྱུད་ཕོ་བྲང་ཆེན་པོར་ཐེགས་པ་ལས། གོང་མའི་ལུང་གིས་བསྐུལ་ཏེ་གཏེར་ཤོག་རྣམས་གནས་གསར་དྲུང་ཡིག་འཇམ་དབྱངས་བསྟན་འཛིན་གྱིས་ཡིག་མཁན་མཛད་ནས་བུ་དཔེར་འབེབས་པར་གནང་རྗེས། ཟླ་བ་བཅུ་གཉིས་པའི་ཚེས་དགེ་བར་རྗེ་ཐམས་ཅད་མཁྱེན་པ་ལྔ་པ་ཆེན་པོ་དང་མི་དབང་ཆོས་ཀྱི་རྒྱལ་པོ་ལྷན་རྒྱས་སུ། གཏེར་གསར་དྲག་དམར་གྱི་དབང་དང་། རྡོར་སེམས་ཀྱི་བྱིན་རླབས། གཏེར་ཤོག་རྣམས་ཀྱི་བཀའ་གཏད་བཅས་

― MLP003_Page_0132 ―

^{[མ་དཔེ་གཟིགས་ན་འདིར་གནོན།]}

[Full Size]

འབུལ་བར་མཛད་ཅིང་། ཉང་གི་ཕྱག་སྦུག་ཧོར་འཆོལ་ཁྱད་འཕགས་དང་། དངུལ་གྱི་མཎྜལ་ལ་གསེར་ཞོ་སོ་བདུན་གྱི་ཚོམ་བུ་བཀོད་པ། ཁྱད་གོས་ཕྱི་ནང་ཡུགན་བཟའ་ཆ་འགྲིག་སོགས་ཡོན་གྱི་དངོས་པོ་གྱ་ནོམ་པ་སྩལ་ཅིང་། ཤིན་ཏུ་མཉེས་པའི་བཀའ་ལུང་གིས་དབུགས་དབྱུང་བར་མཛད། དེའི་སང་ཉིན་ལུང་རྣམས་འབུལ་བར་མཛད་ནས། ཁྲིད་ཀྱི་དམིགས་རྐང་རྣམས་ཉིན་རེ་བཞིན་བཞེས་པ་སོགས་རྟེན་འབྲེལ་གྱི་སྒོ་རྣམས་བར་ཆད་མེད་པར་འགྲིག་པའི་དགེ་མཚན་མངོན་དུ་གྱུར་པ་ཡིན་ནོ། །དེ་ནས་མེ་སྦྲུལ་ཧོར་ཟླ་དང་པོའི་ཚེས་ལྔ་ནས་བརྩམས་ཏེ། ཕོ་བྲང་ཆེན་པོར་སྐུ་མཚམས་ཀྱི་བཅད་རྒྱ་དམ་པོར་བཞུགས་ནས། ཚེ་དཔག་མེད་ཀྱི་བསྐྱེད་རྫོགས་ཀྱི་དོན་ཟབ་མོ་ཐུགས་ཉམས་སུ་བཞེས་པ་ན། དབོ་ཟླ་ཤར་མཚམས་ཀྱི་སྐབས་ཤིག་འོད་གསལ་གྱི་གཟིགས་སྣང་ལ། མཱ་ར་ཏི་ཀ་ཡིན་དགོངས་པའི་བྲག་ཕུག་ཤར་ལྷོར་ཕྱོགས་པ་ཞིག་ཏུ་ཕེབས་འདུག་པར། འདི་འཆི་མེད་གྲུབ་པའི་གནས་ཀྱི་སྙིང་པོ་ཡིན་པས་ཚེ་སྒྲུབ་ཅིག་མཛད་དགོས་དགོངས། ཚེ་རྫས་རྣམས་བཤམས་ཏེ། གཏེར་གསར་གྱི་ཚེ་ཆོག་ཅིག་གནང་གི་འདུག་པར་སྒོ་འགྲམ་དེར་ལྷའི་བུ་གཞོན་མཛེས་ཤེལ་བུམ་བདུད་རྩི་དཀར་སེར་གྱིས་གང་བ་ཐོགས་པ་ཞིག་འོངས་ཏེ། འདི་ལྷ་ཡི་བདུད་རྩི་ཡིན། ཁྱོད་རང་མང་ཙམ་དང་། རོགས་རྣམས་ལ་ཐིགས་པ་རེ་བྱིན། འཇུ་དཀའ་ཡང་འཇུ་རྟིང་ལྷ་ཡི་ཚེ་ཡང་འདི་ལས་བྱུང་བ་ཡིན། ཁྱད་པར་འདི་ལྷ་སུ་ཁ་དྷཱ་རའི་ལོངས་སྤྱོད་འཕྲོ་ཡིན་ཞེས་བྱིན་བྱུང་བར། འདི་སྙམ་དུ་དགོངས་ཏེ། མི་ཡུལ་དུ་ལྷ་ཡི་བདུད་རྩི་ཡོང་བ་དཀའ། མི་སྲིད་པ་དེ་བཏུངས་ཀྱང་ཕན་མེད། གནོད་དུ་མི་འགྱུར་བའི་ངེས་པའང་མེད་དམ་སྙམ་ཐེ་ཚོམ་མེ་བའི་ངང་ནས་ཁྱོར་བ་གང་བཟེད་ནས་བཞེས་པ་ན། འོ་མ་ཀ་ར་དང་སྦྱར་བའི་རོ་འདྲ་རུང་ལ། དེས་ཀྱང་མཚོན་དུ་མེད་པ་ཞིག་སྣང་ཞིང་། ཞལ་དུ་སླེབས་པ་ཙམ་གྱིས་སྐུ་ལུས་རགས་པའི་དངོས་འཛིན་ཐམས་ཅད་དྭངས་ཏེ་གསལ་སྟོང་འཛིན་མེད་དུ་སྣང་བའི་སྐུའི་ལྟོ་བ་ན། འཆི་མེད་ཀྱི་བདུད་རྩི་དེ་དངུལ་ཆུ་འཁྱིལ་བ་ལྟར་སྐྱ་ཧྲིལ་ལེར་འདུགདེའི་ཚེ་དགོངས་པ་ལ། གནས་འདི་ཁྱད་པར་འཕགས་པར་མ་ཟད། བདུད་རྩི་

― MLP003_Page_0133 ―

^{[མ་དཔེ་གཟིགས་ན་འདིར་གནོན།]}

[Full Size]

འདིའི་ནུས་པས་འཕོ་མེད་འཇའ་ལུས་རྡོ་རྗེའི་སྐུ་འགྲུབ་པའང་སྲིད། དེ་གྲུབ་ན་ཆོ་འཕྲུལ་གྱི་བཀོད་པ་སྣ་ཚོགས་འདོད་དགུར་བསྒྱུར་ནུས་པ་ཞིག་དགོས་པས། ཇི་ལྟར་འོང་སད་པར་བྱའོ་སྙམ་དུ་འཕར་གཡོའི་ཐུགས་འདུན་གཏད་པས་གང་མོས་སུ་སྤྲུལ་བསྒྱུར་མཛད་པ་ལ་དཀའ་བ་མི་འདུག་པས་ངོ་མཚར་དུ་མཁྱེན་ཏེ། རོགས་རྣམས་ལའང་སྟེར་དགོས། ཚེ་སྒྲུབ་ཀྱི་བུམ་པ་འདིར་ཡང་བླུགས་དགོས་གསུངས་པས། སྔར་ཐེ་ཚོམ་སྐྱེས་པ་ལ་མི་དགའ་བའི་ཉམས་ཀྱིས་མི་སྟེར་བའི་ཚུལ་བྱེད། ནན་གྱིས་བསླངས་པས་བུམ་ནང་དུ་ཁྱོར་གང་ཙམ་དང་། རོགས་རྣམས་ལ་སྲན་རྡོག་ཙམ་རེ་བྱིན་སོང་བ་ལ་ལས་མིད། ལ་ལས་མི་འཇུ་ཞེས་སྐྱུགབུམ་ནང་དུ་གཟིགས་པས་བུམ་ཆུའི་དཀྱིལ་ན་དངུལ་ཆུ་བླུགས་པ་ལྟར་མ་འདྲེས་པར་ཧྲིལ་ལེར་འདུགདེར་དགོངས་པ་ལ། མི་ཡི་བདུད་རྩི་ཡེ་ཤེས་ཀྱི་བདུད་རྩིར་བསྒྲུབས་པ་ལས་ལྷ་ཡི་བདུད་རྩི་འདི་ངོ་མཚར་བར་སྣང་། ནུས་པའི་མཐར་ཐུག་བསྒྲུབས་པ་དེ་རང་ཆའམ་དགོངས་པ་ན། དེ་ཆུ་ནང་དུ་རྡོ་བསྲེགས་བཅུག་པ་ལྟར་སོར་གྱིས་ཁོལ་བའི་རླངས་པ་བུམ་ནང་ནས་ཐོལ་གྱིས་བྱུང་བའི་དཀྱིལ་ན། ཚེ་དཔག་མེད་ཀྱི་སྐུ་ཡུངས་འབྲུ་ཙམ་པ་ཞིག་གསལ་ཧྲིག་གེར་འདུགརླངས་པ་ཡལ་བ་ན་ལྷ་དེ་ཡང་ཡལ་སོང་། བུམ་ནང་དུ་གཟིགས་པས་བུམ་ཆུ་སྔར་ལས་གར་ཉམས་ཆེ་ཞིང་མདངས་ལི་ཁྲི་ལྟར་སྣང་། ལྷའི་བུ་དེ་ཕུག་པའི་གཡོན་ངོས་དེར་བུམ་པ་དེ་བཟུང་ནས་བསྡད་སོང་། དེར་ས་སྲིབ་ལྟ་བུའི་མུན་མཐོང་མར་མེའི་སྣང་བ་དང་ཅ་ཅོའི་སྒྲས་མཚོན་མཐར། ཌཱཀྐི་མ་མི་མོའི་རྣམ་པ་ཅན་རྣམས་ཀྱིས་ཁྱོགས་ལ་བཏེགས་ནས་ནུབ་ཕྱོགས་སུ་སྤྱན་དྲངས་ཏེ། མུན་པ་མི་ཟད་པའི་དུར་ཁྲོད་བྱ་བ་སྔོན་སློབ་དཔོན་པདྨ་འབྱུང་གནས་བརྟུལ་ཞུགས་ཀྱི་སྤྱོད་པ་མཛད་ཅིང་ད་ལྟ་ནག་པོ་སྤྱོད་པ་སོགས་སྤྱོད་པ་མཛད་པའི་གནས། ཐང་ཆེན་པོའི་དབུས་ན་བྲག་རི་དེའུ་ནགས་ཚལ་འཁྲིགས་པའི་དཀྱིལ་འཇིགས་རུང་དུར་ཁྲོད་ཀྱི་བཀོད་པ་མཐའ་ཡས་པའི་ལྟེ་བར་ཐང་ཤིང་འདྲ་བའི་ཤིང་སྡོང་ལྔ་དྲུག་ཙམ་པའི་འོག་ཏུ་འཇག་ཁྱིམ་ལྔ་དྲུག་ཙམ་ཕུབ་འདུག་པ་དེ་ཚོའི་ནང་དུ་སྤྱན་འདྲེན་གྱི་བུད་མེད་དེ་རྣམས་སོང་བ་དང་། རྗེ་ཉིད་རང་ཡང་འཇག་ཁྱིམ་གཅིག་ཏུ་ཐེགས་པ་ན། དེར་བུད་མེད་

― MLP003_Page_0134 ―

^{[མ་དཔེ་གཟིགས་ན་འདིར་གནོན།]}

[Full Size]

ཉི་ཤུ་རྩ་ལྔ་ཙམ་ཚོགས་པའི་གུང་དེར་ས་ཁྲི་སྟག་འབོལ་བཏིང་བ་ཞིག་གི་ཁར་བཞུགས་སུ་གསོལ། སྔར་རང་དང་ལྷན་ཅིག་ཡོང་བའི་བུད་མེད་ངོ་ཤེས་པ་འདྲ་བ་དེ་དང་། གཞན་གཅིག་སྟེ་གཉིས་ཀྱང་གདན་དེར་མཉམ་དུ་བསྡད་སོང་། གཞན་ཁྲོམ་ཚོགས་ཀྱིས་རང་ཉིད་རྟ་མཆོག་ཧེ་རུ་ཀའི་གསལ་སྣང་གི་སྙེམས་པས་ཚོགས་མཆོད་མཛད་པ་ན། བུད་མེད་བོང་ཆུང་ངེ་བ་ཞིག་གིས་རྗེ་ཉིད་རང་ལ་ཤ་དམར་སོལ་ཁྲག་ཐིགས་པ། ཤིང་ཐོག་སེར་པོ་ལྔ་སོགས་བཟའ་བ་དང་ཆང་ཀ་པཱ་ལ་གང་རྣམས་སྟོབ་བྱུང་། དེ་བཞིན་ཏུ་ཚོགས་པ་ཀུན་ལ་དྲངས་ནས་ལོངས་སྤྱད་རྗེས། རང་དང་མཉམ་དུ་འཁོད་པའི་བུད་མེད་དེ་ན་རེ་འདི་ཚོ་ཕྱི་ཡི་དམ་རྫས་ཡིན། ད་ཁྱད་པར་ནང་གི་མཆོད་པ་ལ་འདིར་འདུས་ཐམས་ཅད་ལ་རོལ་དགོས། སྔར་བཻ་རོ་ཙ་ན་དང་ཞི་བ་སྙིང་པོ་སོགས་ཀྱིས་ཀྱང་འདིར་གྲུབ་པ་བརྙེེས་པ་ཡིན་ཟེར། གལ་ཏེ་ཐམས་ཅད་ལ་རོལ་མ་ནུས་ནའང་། ངེད་བདུན་ལ་རོལ་དགོས་ཟེར། དེར་གཞན་ཚོ་གྱེས། བདུན་བསྡད་འདུག་པར་རིམ་བཞིན་སྙོམས་པར་ཞུགས་པས་ཙཎྜ་ལཱི་འབར་བའི་མེས་ཟླ་བ་བདུད་རྩིར་དྭངས་པའི་དགའ་བཞིའི་ཡེ་ཤེས་རེ་རེ་ལས་རེ་རེ་གོང་དུ་འཕེལ་བས་ལྷན་སྐྱེས་བདེ་སྟོང་གི་ཡེ་ཤེས་ཐུགས་ཉམས་སུ་བསྟར། དེ་ཚེ་རང་གི་སྐུའི་རྩ་དང་ཐིག་ལེ་རླུང་གིས་བསྐྱོད་པའི་འགྲོ་འོང་རྣམས་ཀྱང་གསལ་བར་གཟིགས། ཡང་བུད་མེད་གཅིག་གིས་ཀ་པཱ་ལ་བྱང་སེམས་དཀར་དམར་གྱིས་གང་བ་ཐོགས་ཏེ། བོ་དྷི་ཙིཏྟ་ཛྙཱ་ན་ཨ་མྲྀ་ཏ་སུ་ཁ་སིདྡྷི་ཨ་ཧཾ། ཞེས་ཞལ་དུ་བླུད་པས་བདེ་དྲོད་འགྱུར་མེད་ཀྱི་ཡེ་ཤེས་མཆོག་ཏུ་འབར་ཏེ་འཕར་གཡོའི་ཉམས་ཆེན་པོ་འཁྲུངས། དེ་ཚོ་གྱེས་རྗེས་འཇག་ཁྱིམ་གཞན་ཞིག་ཏུ་ཐེགས་པ་ན། དེར་བུད་མེད་བཅུ་གསུམ་ཙམ་མལ་གདང་གིས་ཉལ་བའི་ཐ་མ་དེ་ལོ་ཉི་ཤུ་སྐོར་འགྲོ་བ་ཤ་མདོག་དམར་སངས་ཁྲོ་ཉམས་ཅན་ཞིག་འདུག་པ་གཅེར་བུར་ཧར་གྱིས་ལངས་ནས་གསང་བའི་ཆོས་འབྱུང་ནས་ཉི་མའི་དྭངས་མ་འཛག་བཞིན་པར་ཀུ་བའི་ཕོར་པར་ཆང་དམར་སིང་གིས་གང་བ་དབང་མེད་དུ་བླུད་བྱུང་བས་གཟི་བ་ལྟ་བུའི་ཧང་ཧང་པ་ཞིག་ལ། བུད་མེད་དེ་མཁའ་ལ་འཕགས་ཏེ་ཆོ་འཕྲུལ་སྣ་ཚོགས་སྟོན་གྱིན་འདུག་པར་འདི་རྗེ་བཙུན་མའོ་སྙམ་དུ་མོས་གུས་དྲག་པོ་

― MLP003_Page_0135 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་པས་དེ་ཉིད་ཀྱི་མཁའ་གསང་ནས་བྱང་སེམས་དམར་པོ་བབས་པ་འཐུང་པས་ཡེ་ཤེས་ཀྱི་ཉམས་ལྷག་པར་འཕེལ། དེ་གའི་ངང་ནས་སྐུ་ལས་འོད་སྤྲོ་བཞིན་དུ་ནུབ་ཕྱོགས་ཀྱི་མཁའ་ལ་ཇེ་མཐོ་ཇེ་མཐོར་གཤེགས་པ་དང་ལྷན་ཅིག་གསུང་སྙན་པོས། དེ་རིང་མཐོང་བའི་བུད་མེད་ང་། །དུར་ཁྲོད་གནས་པའི་འདྲེ་མོ་ཡིན། །འཛམ་གླིང་མྱུལ་བའི་ཞིང་སྐྱོང་མ། །མ་རྟོགས་འཁྲུལ་པའི་དམ་སྲི་མ། །རྟོགས་ན་བདེ་ཆེན་ཌཱ་ཀི་མ། །རང་བྱུང་ལྷན་སྐྱེས་རིག་པའི་སེམས། །ང་ནི་ཀུན་གྱིས་མཐོང་བ་དཀའ། །མཐོང་བ་ལས་ཀྱང་ཤེས་པ་དཀའ། །ཤེས་ཀྱང་འབྲས་བུ་སྒྲུབ་པ་དཀོན། །ད་ནི་འདི་ནས་ལོ་ལྔ་ན། །ང་ནི་སྦྱོར་བའི་ཡུམ་དུ་འགྱུར། །སྤྲུལ་པ་བོད་ཡུལ་དབུས་ན་ཡོད། །སྤྲུལ་གཞི་བདེ་ཆེན་དབྱིངས་སུ་འགྲོ། །ཞེས་མི་མཐོང་བའི་སར་གཤེགས། སླར་ནང་དུ་ལོགས་ཕེབས་པས། རང་གིས་ངོ་མཁྱེན་པའི་བུ་མོ་དེ་བསྡད་འདུགདེའི་སྦུག་ན་རས་དམར་པོས་བཀབ་པའི་དམར་ལྡིར་ལྡིར་ཞིག་འདུག་པར། ཅི་ཡོད་དྲིས་པས། བུད་མེད་གཞན་ཆུང་ངུ་གཅིག་གིས། འདི་ནག་པོ་སྤྱོད་པ་བརྟུལ་ཞུགས་བསྐྱངས་པས་རླུང་བསྙུན་ནས་འོད་གསལ་ལ་གཟིམས་སོང་། ད་ལོ་ཉི་ཤུ་སོང་བ་ན་བོད་དུ་ཁོ་རང་གི་ངོ་ཤེས་ཡོད་པས་དེར་འབྱོན། གཞན་ཧཱུྃ་མཛད་དང་མི་ཏྲ་ཛོ་གི་དང་། ཌོམ་བྷི་པ་རྣམས་གོང་འདི་ན་ཡོད། ལ་ལ་ད་ལྟ་བོད་དང་བལ་པོ་ན་ཡོད། དེ་ཚོ་འཁོར་བ་དང་འདི་ཚོ་འབྱོན་པ་རེས་མོས་ཡིན་ཟེར། རས་ཀྱིས་བཀབ་པ་དེ་ལ་གཟིགས་པས་གཞོང་བ་ཞིག་ན་ཨཱ་ཙཱཪྱ་གཅེར་བུ་ཞིག་མནལ་བའི་བར་རྣམས་སིནྡྷུ་ར། ཁྲགསྦྲང་། རས་བལ་རྣམས་ཀྱིས་བཀབ་འདུག་པར། སྒྱོགས་དྲག་ཏུ་བཏང་བས། དེ་ཧར་གྱིས་བཞེངས་ཏེ། ཁྲག་དང་སིནྡྷུ་ར་སོགས་གཏོར་ཞིང་། ཧ་ཧའི་བཞད་སྒྲ་དྲག་ཏུ་སྒྲོག་པས་མནལ་སད་དེ། སད་ནས་ཀྱང་ཞག་འགར་བདེ་ཆེན་གྱི་ཉམས་ལ་རྩོལ་མེད་དུ་གནས་པ་བྱུང་། ཡང་ས་རྟ་ལོ་གྲྭ་ཕྱིར་འོག་གདོན་གྱི་བསྙུན་གཞིའི་ཐུགས་དོགས་བསལ་བར། ནད་གདོན་རང་བཞིན་མ་གྲུབ་པའི་གནས་ལུགས་རིག་རྩལ་གྱི་སྣང་བ་རིག་པའི་རྒྱལ་པོ་ནཱ་ག་རཀྴའི་ལྷའི་རྣམ་པར་བཞེངས་ནས་ལྗགས་བསྙེན་གྱི་སྐུ་མཚམས་དམ་པོ་ལ་བཞུགས་པ་ན། མགོ་ཟླའི་ཚེས་བཅུ་བདུན་གྱི་སྲོད་ཐུན་རྗེས་སུ་ཅུང་ཟད་བྱིང་

― MLP003_Page_0136 ―

^{[མ་དཔེ་གཟིགས་ན་འདིར་གནོན།]}

[Full Size]

ཉམས་ཐུག་ཆོམ་གྱི་སྒྲ་དྲག་པོས་སད་དེ། མདུན་གྱི་ནམ་མཁར་དུད་སྤྲིན་འཁྲིགས་པའི་ཀློང་ན། འཇམ་དཔལ་རིག་པའི་རྒྱལ་པོའི་སྐུ་འཇིགས་སུ་རུང་བ་ཁྲོས་པའི་རྣམ་པ་འོད་ཟེར་སྣ་ཚོགས་སྤྲོ་བ་གཟིགས་པའི་མོད་ལ་དངངས་ཤིང་བརྒྱལ་བ་ལས་སད་ཚེ་སྙན་བརྗིད་ཀྱི་སྒྲ་དང་བཅས་ཏེ་སྐུའི་སྣང་བ་འུབ་ཀྱིས་འདུས་ནས་རང་གི་སྐུར་ཐིམ་པས་བདེ་བའི་ཐུགས་ཉམས་གསལ་བ་ལ་འཛིན་རྟོག་དང་བྲལ་བའི་ངང་ལ་དར་ཅིག་གནས་པར་གྱུར། དེ་ནུབ་མནལ་ལམ་དུ་གདོན་ལྟོ་འགྲོའི་གཟུགས་ཀྱི་རྣམ་པ་སྐུ་ལས་འཐོན་སོང་བ་ལྟར། ནངས་པར་ཟླ་བ་སྒྲ་གཅན་ལས་ཐར་བ་བཞིན་ནད་གདོན་གྱི་གཡུལ་ངོ་ལས་རྒྱལ་བས་ངོ་མཚར་བར་གྱུར་ཏོ། །ས་ལུག་མཆུ་ཟླའི་ནང་དུ་ཐུགས་དམ་ལ་བཞུགས་པའི་སྐབས་ཤིག་རྡོ་རྗེའི་མཆེད་གྲགས་ལྡན་ཞིག་གིས་ངན་སྦྱོར་གྱི་བྱད་ཁ་བགྱིས་པའི་སྣང་ཚུལ་རྣམས་མེ་ལོང་ལ་པྲ་ཕབ་པ་ལྟར་མ་སྒྲིབ་པར་གསལ་པོར་གཟིགས་པ་ན། སྟོང་ཉིད་རིག་པའི་རྩལ་སྣང་བྱམས་སྙིང་རྗེར་ཤར་བས་ཟིལ་གྱིས་གནོན་པ་ལས་ཆེད་དུ་ཕྱིར་བཟློགས་སོགས་མ་མཛད་ཀྱང་། རིང་པོར་མ་སོང་བར་འཕྲིན་ལས་མགོན་པོས་བྱད་མ་མཁན་གྱི་མགོ་བོ་མགྲིན་པ་ནས་བཅད་པ་ཁྲག་འཛག་བཞིན་པ་སྐུ་མདུན་དུ་བོར་བ་གཟིགས་པ་ལྟར་རྟགས་མངོན་དུ་གྱུར། ༈ དེ་ནས་ཤ་འུག་ལྟག་སྒོའི་ཟབ་གཏེར་ཇི་ལྟར་བཞེས་པའི་ཚུལ་ནི། རང་གཏེར་གབ་རྒྱ་ཅན་གྱི་ལུང་བྱང་ལས། ཁྱད་པར་གནད་ཀྱི་རྟེན་འབྲེལ་འགྲིག་གྱུར་ན༔ སོ་ལྔའི་ལོ་ལ་མན་ངག་ཟབ་མོའི་གནད༔ པདྨ་བདག་གི་སྙིང་ཁྲག་གཏེར་སྒོ་འབྱེད༔ ཅེས་དགུང་ལོ་སོ་ལྔ་བཞེས་པ་ལྕགས་སྤྲེའི་ལོར་ཟབ་གཏེར་འདི་བཞེས་པའི་དུས་སུ་གསུངས་པ་ལྟར། ཟླ་བ་དང་པོ་ནས་བརྩམས་ཏེ། ཟབ་གཏེར་གྱི་འགལ་རྐྱེན་ཞི་ཞིང་ཐུགས་ཀྱི་བཞེད་དོན་ལྷུན་གྱིས་འགྲུབ་པའི་ཆེད་དུ་སྨིན་གྲོལ་གླིང་གི་གཙུག་ལག་ཁང་ཆེན་པོ་གྲྭ་ཚང་ཡོངས་རྫོགས་ཀྱི་ཐོགདར་གླིང་པ་དང་། སྙེ་མདོ་གྲྭ་ཚང་རྣམས་ཀྱིས་ཁ་བསྐངས་ཏེ་བསྡེབས་ཚོགས་ཀྱིས། སྐུ་རིམ་དུ་བཛྲ་གུ་རུ་དུང་ཕྱུར། བཀའ་ཐང་བརྒྱ་རྩ། བསམ་པ་ལྷུན་གྲུབ་མ་ཁྲི་ཚར། འབུམ་འུར་འདོན་སོགས་མཛད་ཅིང་། གཞན་ཡང་ཡེར་པ། མཆིམས་ཕུ། གཡའ་མ་ལུང་། ཡང་རྫོང་།

― MLP003_Page_0137 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེལ་བྲགགནམ་ལྕགས་བྲག་སོགས་གནས་ཆེན་མང་པོར་མཆོད་འབུལ་དང་ཚོགས་བརྒྱ། གདན་ས་རང་དུ་བསྐང་བཤགས་དང་། གཞོན་ནུ་མའི་མཆོད་པ་སོགས་བསྒྲུབས། ཁྱད་པར་རྗེ་ཉིད་རང་གི་གཟིམས་ཆུང་ཀུན་བཟང་ཡང་རྩེར་སྐུ་མཚམས་ཀྱིས་བཅད་རྒྱ་དམ་པོར་བཞུགས་ཏེ། ཟབ་མོའི་སྒོམ་བཟླས་དང་། ཚོགས་མཆོད་གསོལ་འདེབས་སོགས་ཕྱི་ནང་གསང་བའི་རྟེན་འབྲེལ་བསྒྲིག་ཐབས་རྣམས་ལ་ཐུགས་བརྩོན་ཆེ་ཐང་དུ་མཛད་པ་ལས། མཆུ་ཟླའི་ཉིན་ཞིག་ལྗགས་བཟླས་ལ་བཞུགས་པའི་སྐབས་མནལ་ར་རི་ཞིག་བྱུང་བ་ལས། སད་པའི་སྐད་ཅིག་མའི་གཟིགས་སྣང་ལ། ཞིང་ཁམས་མཐའ་མེད་ཕྱམ་བརྡལ་བའི་དབུས་སུ་འཇའ་འོད་ཀྱི་གུར་ཁྱིམ་འཁྲིགས་པའི་ནང་ན། ཨོ་རྒྱན་ཆེན་པོ་ཧེ་རུ་ཀའི་ཆ་བྱད་ཅན་ཡུམ་མཚོ་རྒྱལ་མ་དང་བཅས་པ་བཀྲ་ས་ལེར་བཞུགས་པ་གཟིགས་པས། མོས་ཤུགས་དྲག་པོ་ཐུགས་ལ་འཁྲུངས་པ་ལས། སྐུ་མདུན་གྱི་ཐད་ཉེ་སར་ཡུད་ཀྱིས་བྱོན་ནས། བརྡའི་དབང་བཞི་བསྐུར་ཞིང་ཟབ་ལམ་གྱི་གནད་འགའ་ཞིག་གདམས་པའི་མཐར། མཚོ་རྒྱལ་གྱིས་ཁ་བྱང་གི་ཤོག་དྲིལ་འོད་ཀྱི་ཐིག་ལེའི་རང་བཞིན་ཅན་ཕྱག་ཏུ་སྩལ་བ་བཞེས་ནས། སྤྱན་འབྱེད་འཛུམ་གྱི་རྐྱེན་ལས་ཐུགས་ཉམས་ཀྱི་སྣང་བ་དེ་འགགས་ཀྱང་། རང་གི་སྐུ་ལུས་དྭངས་གསལ་སྒྲིབ་ཐོགས་མེད་པར་སྟོང་གཟུགས་ཀྱི་ཐིག་ལེ་འཕར་ཞིང་གཡོ་བ་ལྟ་བུ་དང་། གང་ཤར་སྒྱུ་མའི་རྣམ་རོལ་བདེ་ཆེན་གྱི་རང་གདངས་སུ་མ་འགགས་པ། རང་རིག་སྤྲོས་བྲལ་འགྱུར་མེད་ཀྱི་ངོ་བོར་སོན་པ་སྙམ་བྱེད། ཐུགས་ཉམས་ཀྱི་སྣང་བ་དེ་འགགས་པའི་ཚེ་རང་གི་སྐུ་པང་ན་སྔར་གྱི་ཤོག་དྲིལ་དེ་འདུག་པ་ཕྱག་ཏུ་བཞེས་པས་དྲི་བཟང་པོའི་ངད་ཀྱིས་ཡོངས་སུ་གང་བར་གྱུར་ཅིང་། དེ་ལ་གཟིགས་པ་ན་ཤ་འུག་ཟབ་གཏེར་གྱི་ཁ་བྱང་དུ་སྣང་བས་འདོད་པའི་དོན་གྲུབ་བོ་སྙམ་དུ་དགོངས་ཏེ། ཐུགས་ལ་དགའ་བདེའི་ཉམས་ལྷང་གིས་ཤར་བའི་རྐྱེན་དེས། སྔར་གྱི་བདེ་སྟོང་གི་སྣང་བ་ཐུགས་ཉམས་སུ་མྱོང་བ་ལ་བོགས་ཐོན་པ་ལྟ་བུར་གྱུར། དེ་ནས་ཟླ་བ་དེའི་གཤམས་ལ་ཕོ་བྲང་ཆེན་པོར་ཆིབས་བསྐྱོད་དེ་རེ་ཞིག་སྟན་འཇག་པ་ལས། ཁྱད་པར་རྟེན་འབྲེལ་བསྒྲིག་ཐབས་སུ་དགོངས་པའི་སྤྲེལ་ཟླའི་ཚེས་བཅུའི་མཆོད་པར་གོང་

― MLP003_Page_0138 ―

^{[མ་དཔེ་གཟིགས་ན་འདིར་གནོན།]}

[Full Size]

མ་རྒྱལ་བའི་དབང་པོ་ཉིད་ཚོགས་དབུར་ཕེབས་པའི་ཞབས་ཕྱིར་ཕེབས་ཞེས་པའི་བཀའ་ལུང་སྩལ་བ་ལྟར་ཐེགས་ཏེ་ལྷན་ཅིག་ཏུ་གསུང་ཆོག་གསོལ་འདེབས་འདོད་དོན་འགྲུབ་པའི་སྨོན་ལམ་སོགས་གོང་ཞབས་ནས་དགོངས་རྩེ་གཏད་པ་ལྟར་ཐུགས་རྩེ་གཅིག་པས་གནང་ཞིང་། གོང་ནས་བརྩེ་བའི་ཞལ་འཁོས་ལྷུག་པར་སྩལ་བ་དང་ཕྱིས་ལམ་ཡིག་དང་གཏེར་ཚབ་ཀྱི་བུམ་གཏེར་སོགས་མཐུན་རྐྱེན་ཐམས་ཅད་ཕུན་སུམ་འཚོགས་པར་འགྲིག་པའི་བཀའ་དྲིན་སྩལ་བ་ལྟར། ཟླ་བ་དྲུག་པ་སྔ་མའི་ཚེས་འགོར་ཕྱིར་ཕེབས་ཀྱི་ལམ་དུ་ཞུགས་ནས་གདན་སར་ཕེབས་རྗེས། རེ་ཞིག་གཟིམས་ཆུང་ཀུན་བཟང་ཡང་རྩེར་སྐུ་མཚམས་བཅད་དེ་བཟླས་སྒོམ་སྦྱིན་སྲེག་སོགས་སྨིན་རྒྱས་སུ་མཛད་པས་ཐུགས་ཀྱི་འདོད་དོན་འགྲུབ་པའི་དུས་ཚོད་གནས་ལུགས་ཐམས་ཅད་གཏན་ལ་ཕེབས་པའི་མཚན་མ་བཟང་པོ་གཟིགས་པ་ནི། ཡང་བྱང་ལས། དེ་ལྟར་རྟེན་འབྲེལ་གནད་རྣམས་ཀུན༔ མ་འཆོལ་ལུང་བཞིན་འགྲིག་པ་ན༔ ཟབ་མོའི་གཏེར་འདི་འདོན་ལ་དབང་༔ དུས་ནི་གདུག་པ་སྤྲེའུའི་ལོ༔ དམ་ལྡན་སློབ་མའི་རྟེན་འབྲེལ་དང་༔ ཆོས་སྲུང་བསྐུལ་བྱང་འཛོམ་པ་ན༔ གཏེར་དེ་འདོན་པའི་དུས་ཡིན་ནོ༔ ཞེས་གསུངས་པའི་དོན་བཞིན་རྟེན་འབྲེལ་ཐམས་ཅད་ལེགས་ཕྱོགས་སུ་འགྲིགས་ནས་ཟླ་བ་བདུན་པའི་ཚེས་བཅོ་ལྔ་ལ་དཔོན་སློབ་ཉི་ཤུ་སྐོར་ཆིབས་ཁལ་སོགས་ཆ་རྐྱེན་རྣམས་འགྲིག་པར་མཛད་ནས་ཕེབས་ལམ་དུ་ཞུགས་ཏེ། རིམ་པར་ཐེགས་པ་ལས་ཡར་འབྲོག་སྔོ་ལུང་དུ་བཞུགས་པའི་ནུབ་མོ་ཆིབས་དྲེལ་རྣམས་བོར་ནས་ཞག་གསུམ་བཅག་མལ་གནང་དགོས་བྱུང་བར། གསོལ་ཆས་ཅུང་ཟད་འཛངས་པ་ན། འབྲོག་པ་ལས་འཕྲོ་ཟེར་བས་མར་ཕྱུར་དང་ལུག་ཤ་བཟང་པོ་ཞིག་ཕུལ་བ་སྐབས་བབས་ཀྱི་མཆོད་སྦྱིན་དུ་གྱུར་པའི་དགེ་ཚོགས་བླ་མེད་བྱང་ཆུབ་ཀྱི་རྒྱུར་བསྔོ་བ་མཛད། དེ་ནས་གྲི་གུ་དང་མཚོ་སྣ་བརྒྱུད་ཉེར་བརྒྱད་ཀྱི་གཟའ་སྐར་འཕྲོད་སྦྱོར་ཕུན་སུམ་ཚོགས་པ་ལ་ཤ་འུག་ལྟག་སྒོ་བདེ་ཆེན་ཡེ་ཤེས་ཀྱི་འཁོར་ལོར་ཕྱག་ཕེབས། རྩ་གསུམ་དཀྱིལ་འཁོར་རབ་འབྱམས་ཚོགས་ཀྱི་འཁོར་ལོས་དགྱེས་པ་བསྐྱེད་ནས། རང་རིག་སྤྲོས་བྲལ་མི་འགྱུར་བའི་ངང་ལ་གཟིམས་པས་ན། མནལ་འཐུག་པོའི་གནས་

― MLP003_Page_0139 ―

^{[མ་དཔེ་གཟིགས་ན་འདིར་གནོན།]}

[Full Size]

སྐབས་ཀྱི་མཚམས་འབྱོར་བས་འགགས་མེད་རྩལ་སྣང་འོད་གསལ་གྱི་གཟིགས་སྣང་ལ་ནགས་ཚལ་རབ་ཏུ་རྒྱས་པས་བསྐོར་བའི་དབུས་ན་ཟླ་བ་ལྟར་དཀར་བའི་རྡོ་ལེབ་བཅལ་དུ་བཀྲམ་པའི་སྟེང་། ཨོ་རྒྱན་ཆེན་པོ་དང་། བི་མ་ལ་མི་ཏྲ་གཉིས་ལ་རྗེ་འབངས་ཉི་ཤུ་རྩ་ལྔ་སོགས་ཀྱིས་བསྐོར་ནས་བཞུགས་པ་མཇལ་ཞིང་། བྱིན་རླབས་ཀྱི་བརྡ་ཐབས་དང་རྟེན་འབྲེལ་སྣ་ཚོགས་མཛད་པའི་གསལ་སྣང་མནལ་ལམ་དུ་མཁྱེན་བཞིན་པ་ལས། མ་འགགས་པའི་འཆར་སྒོ་ཇི་སྙེད་སྣང་བའི་མཐར། དེ་རྣམས་གཅིག་ལ་གཅིག་ཐིམ་ནས་འོད་དམར་སེར་འབར་བ་ཞིག་ཏུ་སོང་། དེ་ནུབ་ཕྱོགས་ན་རྔ་བོ་ཆེ་ཞིག་འདུག་པ་ལ་ཐིམ་པའི་རྐྱེན་གྱིས་བསྐུལ་བའི་སྒྲ་ལས། ཀུན་ཏུ་དགེ་བ་རྔ་ཡི་སྒྲ། །ཕྱོགས་བཅུ་ཀུན་ཏུ་རབ་བསྒྲགས་པས། །རིགས་གསུམ་ཐ་མར་འབྲས་སྟེར་བྱེད། །ཅེས་པའི་སྒྲ་འུར་གྱིས་སྣང་བཞིན་པར་ནུབ་ཕྱོགས་ཀྱི་ནམ་མཁར་ཡེར་གྱིས་སོང་བའི་རྐྱེན་གྱིས་མནལ་སད་པར་གྱུར་ཅིང་། དེ་ནས་ནངས་པར་ཚོགས་གཏོར། བསང་མཆོད། གསེར་སྐྱེམས་སོགས་རྒྱས་པར་གནང་ནས། གནས་ཀྱི་ལྟེ་བ་ལ། དཔལ་ཆེན་ཡབ་ཡུམ་གཉིས་ཀྱི་རྣམ་པ་ཅན་བྲག་ངོས་སུ་ཕེབས་ཏེ། དེར་ཁ་བྱང་བཞིན་དུ། གཏེར་སྲུང་སྤྱི་ལ་མཆོད་གཏོར། སྒོས་མཚོ་ལྷ་སྨན་བཙུན་མར་ཀླུ་སྨན་གཙང་གཏོར། དམ་ཅན་ལ་སྲོག་ཆགས་ཀྱི་མདངས་དང་དམར་གཏོར་ཕུལ་ནས་བཀའ་བསྒོ་དམ་བསྒྲགས་མཛད། ལམ་སྣ་འདྲེན་པའི་བུ་མོ་བྱ་སྤྲེལ་ལོ་མ་ནི་གོས་དྲི་མ་ཅན་གྱི་རྟེན་འབྲེལ་གྱིས་ཆོག་རྩིས་མཛད་ཀྱང་། ཨོ་རྒྱན་གླིང་པ་བླ་མ་དང་མཉམ་དུ་མོན་མོ་གཞོན་ནུ་སྤྲེལ་ལོ་མ་ཞིག་ཀྱང་རང་འགྲིག་ཏུ་བྱུང་། རྫི་དུག་བསྲུང་བའི་རྫས་རྗེ་ཉིད་རང་དང་འཁོར་སློབ་ཀུན་ལ་བྱུགས་ཏེ། ཁ་བྱང་བཞིན་ས་གནད་འཚོལ་བར་མཛད་པ་ན་ས་དམིགས་ངེས་པར་གཏན་ལ་ཕེབས་ནས་ཨོ་རྒྱན་ལ་གསོལ་འདེབས་མཛད་ཅིང་། བདེན་ཚིག་བཀའ་བསྒོ་དང་། ཐུགས་རིག་ལ་དཔའ་གདེང་གི་ངར་བསྐྱེད་དེ། བྲག་གསེང་མཚན་མ་འདྲ་བའི་ལྷོ་ངོས་སུ་མཐོ་གསུམ་གཞལ་བའི་ངོས་ལ་ཆུས་བྱུག་ཀྱང་འབྲུ་གསུམ་མ་གཟིགས། སླར་ཡང་ཆུས་དྲག་པོར་འཁྲུས་པར་མཛད་པས་ཧ་ཅང་མི་གསལ་བ་ཙམ་ཞིག་གཟིགས། དེ་ནས་ལྷོ་ཕྱོགས་ཀྱི་གྱེན་སྟེགས་

― MLP003_Page_0140 ―

^{[མ་དཔེ་གཟིགས་ན་འདིར་གནོན།]}

[Full Size]

སུ་མཐོ་བརྒྱད་གཞལ་བ་ན་རྡོ་ཆོལ་གས་རིས་ཁྱུག་གིས་སྣང་བ་གཟིགས་པས་རྐྱེན་བྱས། ཐུགས་རིག་གི་ངར་ཤུགས་མི་ནོན་པ་ལྟ་བུར་འབར་བས་བྲག་གི་སེར་སྲུབ་ལ་གཟོང་ཁ་བཅུག་ནས་ཐོ་བས་བསྡིགས་པར་མཛད་པས་རྡོ་ཆོལ་སྙིམ་པ་གང་ཙམ་ཞིག་འཐོན། དེ་ནས་ཀྱང་སྔར་བཞིན་བརྐོ་བར་མཛད་པས་རྡོ་ཆོལ་མཐའ་ནས་རིམ་བཞིན་ཞིག་པའི་བུག་པ་དབུ་ཤོང་བ་ཙམ་ཞིག་དོད་པའི་ནང་ངོས་རྣམས་ཆུ་རྡོ་རིལ་མོ་བྱིའུ་སྒོང་ཙམ་པ་དང་། བྱེ་ནག་སོལ་བ་སོགས་ཀྱིས་གཏམས་འདུག་པ་རྣམས་རིམ་གྱིས་བསལ་བའི་ལྷོ་ནུབ་ཏུ་ཁྲུ་གཉིས་གསུམ་ཙམ་སོང་བ་ན་གཡམ་པ་གྲུ་བཞི་སྒྲོམ་བསྒྲིགས་སུ་བྱས་པའི་མཚམས་རྣམས་ལ་བསེས་སྦྱར་བའི་འབྲུམ་བུ་ཤིག་གེ་བ་སྣང་བ་གཟོང་གིས་བསྡིགས་པར་མཛད་པས་ལོགས་གཅིག་བྱེ་བའི་ནང་ན་སོལ་བ་དང་སིནྡྷུ་རའི་བམ་པོ་ཁྲ་ཤིག་གིས་ཞིག་པས་དྲི་བཟང་ངད་ཆིལ་གྱིས་ལྡང་བའི་དབུས་ན། གཡུ་བྱ་སྒོང་ཙམ་ལེབ་ཆགས་ཀྱི་ངོས་ལ་གསེར་སྦྲམ་རྒྱ་སྲན་ཙམ་པ་གཉིས་ཟངས་སྐུད་ལྟ་བུས་སྦྲེལ་བ་ཞིག་བྱུང་། དེ་ནས་ཁྲོའི་སྦུག་རིལ་ཕྱག་གང་པ་ཙམ་ཞིག་བྱུང་བ་གཉིས་ཀ་གཡས་ཤིན་ཏུ་གོས་པའི་རྣམ་པ་ཅན་སྣང་། དེ་ནས་ཀྱང་ཅུང་ཟད་བྲུ་བར་མཛད་པ་ན། རང་གཏེར་གྱི་སྒྲོམ་བུ་གྲུ་བཞི་པ་ཕྱི་ངོས་རྣམས་སིནྡྷུ་རའི་བམ་པོས་བྱིལ་བྱིལ་པོར་བྱས་པ་དེ་ཕྱག་ཏུ་སོན་པ་ལས། ཐུགས་རིག་ཚུགས་མི་ཐུབ་པ་ལྟ་བུའི་མོས་གུས་ཀྱི་ཉམས་བཟོད་མེད་དུ་འབར་ཞིང་། གཏེར་སྒྲོམ་ཉིད་དབུ་གཙུག་ཏུ་བཞེས་ནས། སྨོན་ལམ་ཡུན་རིང་པོར་འདེབས་པར་མཛད་དེ་དབང་བཞེས་རྗེས། ཉམས་སྣང་དེའང་ཅུང་ཟད་ཞི་བར་གྱུར་པ་དང་། གཏེར་ཤུལ་དུ་ལེན་མི་རུང་བའི་ཁྲོའི་དོང་བུ་དང་གཏེར་བདག་གི་དཀོར་ཆ་རྣམས་འཇུག་པར་མཛད། དེ་རྗེས་གོང་ནས་གནང་བའི་རིན་པོ་ཆེའི་བུམ་གཏེར་དང་། ཟངས་ཀྱི་གའུ་དཀོར་ཆས་གཏམས་པ་རྣམས་མི་འཛད་པའི་གཏེར་དུ་བྱིན་གྱིས་བརླབས་ཏེ་འཇུག་པར་མཛད། རྫས་རྣམས་ཀྱིས་གཏམས། རྡོ་སྒྲོམ་བསྒྲིགས་ཏེ་ཆུ་རྡོ་དང་སོལ་བ་རྣམས་བླུགས་ཏེ། ཞབས་ཕྱི་ནང་འཁོར་རྣམས་དང་། བླ་མ་ཨོ་རྒྱན་གླིང་པ་མཆེད། གནས་པོ་བདེ་ལྡན། ཁམས་པ་ཡེ་ཤེས་རྣམས་ལ་བྱིན་རླབས་གནང་རྟིང་། ཞབས་ཕྱི་རྣམས་དང་མཉམ་

― MLP003_Page_0141 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་རྡོ་ཆོལ་ཞིབ་མོར་བསྒྲིགས་མཚམས་རྣམས་ས་སྤྱིན་པོས་ཕྱག་ཚག་དམ་པར་སྦྱར་ཏེ་སླར་ཡང་གཏེར་སྲུང་རྣམས་ལ་གསེར་སྐྱེམས་དང་མཆོད་གཏོར་སྟོབ་ནས། དེར་ཚོགས་མོན་བོད་ཀྱི་སྐྱེ་བོ་འདུས་པ་ཐམས་ཅད་ལ་བྱིན་རླབས་གནང་ཞིང་དེ་ཐམས་ཅད་ཨོ་རྒྱན་ཆེན་པོའི་མཚན་ནས་འབོད་ཅིང་ཐུགས་རྗེ་བསྐུལ་བའི་གསོལ་འདེབས་མཆི་མ་འཁྲུགས་བཞིན་ཏུ་འདེབས་པའི་འུར་སྒྲས་གནས་ནང་དེར་ཁེངས་པས་ཐམས་ཅད་སྣང་བ་འགྱུར་བ་བྱུང་ཞིང་། དེའི་ཚེ་ནམ་མཁའ་ལ་འཇའ་ཚོན་གྱི་གུར་རིམ་གསུམ་བསྒྲིགས་སུ་འཁྱིལ་བ་ལས་འཇའི་རྣ་ཆ་གཡས་གཡོན་དུ་འཕྱངས་ཤིང་། འདབ་མ་བརྒྱད་པ་དང་དྲུག་པའི་རྣམ་པ་ཅན་གྱི་མེ་ཏོག་གི་ཆར་ལག་པས་བཟུང་དུ་གཏུབ་པ་ལྟར་བབས་པས། དེར་འདུས་པ་ཐམས་ཅད་འབྲེལ་ཚད་དོན་ལྡན་དུ་ངེས་ཤེས་རྙེད་ནས་དད་མོས་ཀྱི་ཤུགས་དྲག་པོས་དྲངས་པའི་དགའ་མགུ་རངས་པའི་ཉམས་དང་གཏམ་གྱིས་དུས་འདའ་བར་གྱུར་ཏོ། །དེ་ནས་བཞུགས་སའི་མཆོད་ཁང་ཆུང་ངུ་དེར་ཕྱིར་ཕེབས་ཏེ། གཏེར་རྫས་རྣམས་མཆོད་ཡུལ་དུ་བཞུགས་སུ་གསོལ་ནས་ཚོགས་གཏོར་རྒྱ་ཆེར་ཕུལ་ཏེ། དབང་བཞི་བཞེས་གསེར་སྐྱེམས་བསྐངས་བ་སོགས་ཀྱིས་གཏེར་སྲུང་རྣམས་ལ་གཏང་རག་འབུལ་བར་མཛད་ནས་གཟིམས་པ་ལས། སྐུ་ལུས་རྔུལ་ཞིང་ཐུགས་ཞུམ་པ་ལ་དངངས་ཡེད་ཡེད་པ་དང་། མནལ་སྲབ་མོ་རེ་ཡོང་དུ་ཉེ་བ་ན་མཐའ་སྐོར་དེར་ཁྲོམ་མང་པོ་ཅོ་དིར་དིར་ཡོད་པ་ལྟ་བུའི་ཁྲོད་ནས་རེས་འགའ་བུད་མེད་རྒན་མོ་འོ་དོད་འབོད་པའི་ཚུལ་དང་། རེས་དུད་འགྲོའི་མགོ་བརྙན་ཅན་གྱི་རྣམ་པ་དང་། རེས་ཁྱི་དང་། སྤྱང་ཀི་དང་། ཀེང་རུས་སོགས་ཀྱི་རྣམ་པ་ལོགས་སུ་འཐོན་ནས་དབུ་སྔས་འགོར་འཁྲབ་ཅིང་གར་བྱེད་པ་ལྟ་བུས་ཡང་ནས་ཡང་དུ་སད་པའི་སྣང་བ་ཟ་ཟི་དེ་ནམ་ཕྱེད་ཡོལ་གྱི་བར་དུ་བྱུང་བར་སྣང་ཞིང་། དེ་ནས་ཨོ་རྒྱན་ཆེན་པོ་ལ་གསོལ་འདེབས་དང་། གཏེར་བདག་མཁའ་འགྲོ་ལ་དམ་ཚིག་བསྒྲགས་པ་མཛད་ནས། རིག་པའི་རང་ངོ་ལ་གཟིགས་པས་སྤྲོས་བྲལ་གྱི་ངང་དུ་ཆམ་གྱིས་སོང་། དེ་གའི་ངང་ལ་མནལ་དུ་ཐུམ་གྱིས་སོང་བའི་མནལ་ལམ་དུ། བུད་མེད་མཛེས་མ་ཞིག་ཁྲོང་གིས་འོང་ནས། ད་ཅི་ནས་འཇིགས་སྐྲག་གི་སྣང་བ་

― MLP003_Page_0142 ―

^{[མ་དཔེ་གཟིགས་ན་འདིར་གནོན།]}

[Full Size]

ཤར་བ་དེ་འདིས་ལན་པར་འདུག་ཟེར་སྐུ་ལུས་ལས་པགས་པ་བཤུས་པ་ལྟ་བུས་རིམ་པ་མང་པོ་ཞིག་ཁག་ཁག་བཀོག་ནས་ཕྱིར་སྐྱུར་བ་སྙམ་བྱེད་ཅིང་རྗེ་ཉིད་རང་དེ་ལ་གཟིགས་མོའི་ཐུགས་སྣང་ལས་འཇིགས་སྐྲག་སོགས་ནི་མ་འཁྲུངས། དེ་མ་ཐག་རང་གི་སྐུ་ལུས་ལ་གཟིགས་པའི་དགོངས་པ་ཤར་བ་ན། ཀེང་རུས་ཆེན་པོ་ཞིག་ཏུ་སྣང་བའི་སྐུའི་དབུས་ན་མེ་དམར་འུར་གྱིས་འབར་བས་སྐུའི་སྒོ་རྣམས་ནས་དམར་ཉུག་ཉུག་འབར་ཞིང་ལོག་པ་ལས་མེ་ཡི་ཕུང་པོ་གཅིག་ཏུ་གྱུར་པའི་མཐར་ཧེ་རུ་ཀ་དམར་པོ་བྱི་རུའི་སྡོང་པོ་འདྲ་བ་གསལ་ལ་དྭངས་པ་ཞིག་ཏུ་ཁྲོང་གིས་སོང་། སྔར་གྱི་བུད་མེད་དེས་རལ་གྲི་ཞིག་དང་པདྨའི་སྡོང་པོ་ཞིག་བསྣམས་ནས་མདུན་གྱི་ནམ་མཁར་ཕར་འཕུར་ཚུར་འཕུར་འགའ་ཞིག་བྱས་ནས་སྐུའི་སྤྱི་བོར་ཞུགས་པ་འོ་མ་ལྟ་བུའི་བདུད་རྩིའི་དྭངས་མར་གྱུར་ཏེ། སྐུ་ལུས་ཀྱི་ནང་ཐམས་ཅད་མེར་གྱིས་ཁེངས་པས་བདེ་བའི་ཡེ་ཤེས་བཟོད་མེད་དུ་འབར་བའི་ཤུགས་ཀྱིས་རང་ཡང་ནམ་མཁའ་ལ་ཡེར་གྱིས་ཐེགས་པས་ས་གཞིའི་གནས་ཡུལ་གྲོང་ཁྱེར་མཐའ་ཡས་པར་བཀྲ་ས་ལེར་གཟིགས་ཤིང་དེ་དག་གི་བྱ་བྱེད་ཐམས་ཅད་ཀྱང་མཁྱེན་པ་སྙམ་བྱེད། ནམ་ཞིག་ན་ཧ་ཅང་མཐོ་བའི་མཁའ་ལ་ལྷུང་གིས་དོགས་པའི་ཐུགས་སྣང་ལམ་གྱིས་འཁྲུངས་པའི་རྐྱེན་གྱིས་མནལ་སད་ཅིང་སད་ནས་ཀྱང་ལུས་སེམས་བདེ་སྟོང་གི་ཡེ་ཤེས་ཀྱི་ངང་ལ་ཡུན་རིང་གནས་པར་གྱུར། དེ་ནས་ནངས་པར་སླར་ཡང་གཏང་རག་གི་བསང་གསོལ་དང་། གཏེར་གནས་ཀྱི་བྲག་རྩེར་རྒྱལ་མཚན་དང་མཐའ་སྐོར་ཀུན་ཏུ་དར་འཕན་འཛུགས་པ་སོགས་ཀྱིས་མཛེས་པར་བརྒྱན་ཅིང་བཀྲ་ཤིས་དང་སྨོན་ལམ་གྱིས་མཐའ་རྒྱས་པར་མཛད་ནས་ཕྱིར་ཕེབས་ཏེ། གཙུག་ལག་ཁང་དུ་གྲགས་པའི་གཞི་དེར་བཞུགས་པ་ན། མོན་པའི་བུ་སློབ་ཐམས་ཅད་གདན་འདྲེན་དུ་བྱུང་ཡང་མི་ཕེབས་པར་ཐུགས་ཐག་བཅད་པས། ཡུལ་གསུམ་གྱི་བླ་མ་སློབ་དཔོན། ཇོ་བོ་གཙོ་རྒན་སོགས་དད་ཅན་གྱི་སྐྱེ་བོ་ཁྲི་ཕྲག་ཏུ་ལོངས་པ་ལུང་སྟོང་དེ་ཉིད་དུ་འདུས་ཏེ་སོ་སོའི་བདོག་དགུས་མཆོད་ཅིང་བཀུར་བ་ལ། སྐལ་བ་དང་འཚམས་པའི་ཆོས་དང་དམ་རྫས་ཀྱི་སྦྱིན་པས་རེ་བ་ཚིམས་པར་མཛད་ནས། རིམ་པར་མཚོ་སྣ་དང་གྲོ་ཤུལ་སོགས་ཡུལ་གྲོང་

― MLP003_Page_0143 ―

^{[མ་དཔེ་གཟིགས་ན་འདིར་གནོན།]}

[Full Size]

མང་པོར་དད་པ་ཅན་རྣམས་ཀྱིས་གུས་པས་སྟོབ་པའི་མཆོད་རྫས་རྣམས་ལ་བདག་གིར་མཛད་བཞིན་པར་དལ་འགྲོས་ཀྱིས་ཆིབས་བསྐྱོད་དེ་གདན་སར་འདུས་པའི་ཚོགས་ཀྱི་སེར་སྦྲེངས་ཀྱི་བཀོད་པ་ཚར་དུ་དངར་བས་མདུན་བསུས་ཏེ་ཕྱགས་ཕེབས་ནས། དམ་ཚིག་གཅིག་པའི་ནང་འཁོར་བ་ཉུང་འདུས་ལ། གཏེར་རྫས་ཀྱི་བྱིན་རླབས་ཀྱང་གནང་། དེ་ནས་ཟླ་བ་བརྒྱད་པའི་ཉེར་ལྔ་ལ་གཉུག་མར་གནས་པའི་འདུས་ཚོགས་ཀྱིས་བླ་མ་ཞི་དྲག་གི་ཕྲིན་ལས་དང་འབྲེལ་བར་ཚོགས་མཆོད་སྐོང་བཤགས། ཆོས་སྐྱོང་རྣམས་ལ་གཏང་རག་གི་བསྐང་གསོ་རྒྱས་པ་དང་། རྗེ་ཉིད་རང་གི་གཟིམས་ཆུང་ཀུན་བཟང་ཡང་རྩེར་ཚོགས་ཀྱི་འཁོར་ལོ་དང་གཏེར་སྲུང་རྣམས་ལ་མཆོད་གཏོར་འབུལ་བར་མཛད་ནས། ཟབ་གཏེར་གྱི་སྒྲོམ་བུའི་ནང་ན་གུ་རུའི་སྐུ་ཚབ་མཐོང་གྲོལ་དང་། གསང་སྒྲུབ་ཀྱི་སྐུ། ཆོས་སྐོར་ཆ་ལག་དང་བཅས་པའི་ཤོག་དྲིལ་བཅུ་གསུམ། ཐབས་ཤེས་བདེ་ཆེན་གྱི་རིལ་བུ་སུམ་སྟོང་ལྷག་བཅས་རྣམས་རྩ་དར་གྱིས་བསྒྲིལ་ཅིང་། དྲི་བཟང་སྨན་གྱི་འཕུར་མས་གཏམས་པ་རྣམས་ཞལ་དབྱེ་བར་མཛད་དེ། འདུས་པ་རྣམས་ལ་བྱིན་རླབས་ཀྱང་སྩལ། དེའི་ཚེ་ནམ་མཁའ་དྭངས་ཤིང་འབྲུག་སྒྲ་ལྟ་བུའི་སྒྲ་ཆེན་སྒྲོག་པ་སོགས་ངོ་མཚར་བའི་ལྟས་ཀྱང་མངོན་དུ་སྣང་བར་མཛད་ཅིང་། གོང་མ་ཀུན་མཁྱེན་རྒྱལ་བའི་དབང་པོ་དང་། མི་དབང་ཆེན་པོའི་སྤྱན་སྔར་དངོས་གནས་རྣམས་གསོལ་དུ་མངགས་པ་ལས། ཤིན་ཏུ་མཉེས་པའི་བཀའ་ཤོག་གནང་སྐྱེས་ཀྱི་དངོས་པོ་རིན་ཐང་ཆེ་བ་དུ་མ་དང་བཅས་ཏེ་སྩལ་བའང་ཕེབས། དེ་ནས་ཟླ་བ་བཅུ་གཅིག་པའི་ནང་དུ་རྟགས་ཅན་ཤོག་དྲིལ་གསུམ་བདག་གིས་ཡི་གེའི་ཞབས་ཕྱི་ཞུས་ཏེ་བུ་དཔེར་འབེབས་པར་མཛད་རྗེས་ཟླ་བ་གཅིག་གི་བར་དུ་སྐུ་མཚམས་ལ་བཞུགས་ནས་ཚོགས་གཏོར་མཆོད་འབུལ་སོགས་གཏེར་སྒྲུབ་ཀྱིས་ཆོས་ཞལ་དབྱེ་བར་མཛད། སླར་ཡང་ལྕགས་བྱ་གསར་པའི་ནང་དུ་གཏེར་སྒྲུབ་ཀྱི་སྐུ་མཚམས་དམ་པོར་བཞུགས་པ་ལས་དགེ་བའི་མཚན་མ་མངོན་དུ་གཟིགས་པ་ནི། སྐབས་རེ་རྗེ་ཉིད་རང་གི་སྐུ་ཕྲེང་སྔ་ཕྱིའི་སྐྱེ་སྤྲུལ་དང་མཛད་པ་ཕྲིན་ལས་ཐམས་ཅད་མནལ་ལམ་གྱི་སྣང་བ་ལྟར་ཐུགས་ཡུལ་དུ་གསལ་བ་དང་། དེ་དུས་ཀྱི་འཁོར་སློབ་སོགས་ཀྱང་ས་

― MLP003_Page_0144 ―

^{[མ་དཔེ་གཟིགས་ན་འདིར་གནོན།]}

[Full Size]

ལེར་གཟིགས་པ་ལྟ་བུ་ལ། ཆེད་འཛིན་གནང་ན་རང་འགགས་སུ་འགྲོ་བ་དེ་འདྲ་ཡང་ཡང་བྱུང་ཞིང་། ནུབ་ཅིག་མནལ་ལམ་དུ། རི་རོང་ནགས་ཚལ་དང་བྲག་རི་ཟང་ཟིང་ཤར་ནུབ་ཏུ་ཐལ་ལེར་བརྒྱུག་པའི་བར་ན་ཆུ་ཆེན་པོ་རྦ་ཀློང་འཁྲུགས་པ་ཞིག་གི་ལྷོ་འགྲམ་ན་རྗེ་ཉིད་རང་བཞུགས་པ་ལས། ཆུ་དེ་བརྒལ་ནས་བྱང་ངོས་སུ་ཐེགས་པར་བརྩམ་པ་ན། ཆུས་ཁྱེར་ལ་ཁད་ཀྱི་ངང་དེར། བུད་མེད་གཞོན་ནུ་མ་དམར་མདངས་ཆགས་པ་ཞིག་གིས་ཕྱག་ནས་འཐེན་ཏེ་བདེ་བར་ཐོན་པ་ན། དེ་ན་རེ། འདི་འཁོར་བའི་གཅོང་རོང་ཡིན་ཞེས་མཛུབ་མོས་བརྡའ་ཞུས་པ་ལ་གཟིགས་པས། ཤར་ལོགས་དེར་མུན་ནག་འཐིབས་པའི་ཁྲོད་མེ་ལྕེ་གློག་བཞིན་འཁྱུག་པས་འཇིགས་རྔམས་བཟོད་དཀའ་བ་ཞིག་སྣང་། ཡང་ནུབ་ཕྱོགས་དེར་མྱང་འདས་ཀྱི་ལམ་ཡིན་ཟེར་ལམ་དཀར་པོ་སྣམ་བུ་བརྐྱང་བ་ལྟ་བུ་སྐྱ་ཐ་ལེ་བ་ཞིག་གི་མཐའ་ཇེ་འཕེལ་དུ་སོང་བ་ཉི་མ་ལྟར་གསལ་ཞིང་དྭངས་པ་ཞིག་འདུག་པར། དེས་གུ་རུ་ལ་གསོལ་བ་འདེབས་བཞིན་པར་ལམ་སྣ་འཁྲིད་དེ་སྤྱན་དྲངས་པ་ལྟར་རྗེ་ཉིད་ཀྱིས་ཀྱང་གསོལ་འདེབས་ཀྱི་རམ་འདེགས་གནང་བཞིན་དུ་ཐེགས་པའི་མཐར། ཙནྡན་དང་རྒྱ་ཤུག་སོགས་ལྗོན་ཤིང་སྣ་ཚོགས་འཁྲིགས་པའི་ནགས་ཚལ་གྱི་དབུས་ན། བྲག་རི་རིན་པོ་ཆེའི་མདངས་འོད་དུ་འཚེར་བ། རྩེ་མོ་མཁའ་ལ་སྙེགས་པ་འདྲ་བ། རི་སུལ་རྣམས་ཤིང་དང་རྩྭ་ལྗང་མེ་ཏོག་ཆུ་ཀླུང་སོགས་ཀྱིས་མཛེས་པ་ལ་བྱ་དང་རི་དྭགས་མང་པོ་རྩེ་བ། རི་ངོགས་དེ་ལ་ལམ་འཁྱོག་རིས་སྐྱ་བྲེང་ངེ་ཡོད་པ་ལས། སྔར་གྱི་བུད་མེད་དེའི་ཕྱི་བཞིན་ཐེགས་པ་ན། རྩེ་མོར་ཤེལ་ལྟར་དྭངས་པའི་རྡོ་ཐེམ་རིམ་པ་ཅན་གྱི་སྒོ་ཁང་རྟ་བབས་ཀྱིས་མཛེས་པའི་ཁོར་ས་རིམ་པ་གསུམ་པ་བར་ཐམས་ཅད་རྡོ་ཤེལ་སྔོན་པོའི་ཕ་གུ་གྲུ་བཞི་པས་བཀྲ་བ་དང་། རིན་པོ་ཆེའི་སྐྱོར་ལ་བརྟེན་པའི་ཆུ་རྫིང་མེ་ཏོག་སྣ་ཚོགས་ཀྱིས་ཁེབས་པས་བསྐོར་བའི་དབུས་ན། རིན་པོ་ཆེའི་ཁང་བཟང་བཀོད་པས་ངོ་མཚར་ཁྱད་དུ་འཕགས་པ་ཁོར་ཡུག་ཐམས་ཅད་ལྷ་དང་དྲང་སྲོང་རབ་ཏུ་བྱུང་བ་དུ་མས་བསྐོར་ཞིང་། མཆོད་རྫས་སྣ་ཚོགས་ཀྱིས་ཟི་ཁོལ་ཁོལ་མཆོད་པ་ལས། རྗེ་ཉིད་རང་ཡང་དེ་རྣམས་དང་ཚུལ་མཐུན་པར་མཆོད་འབུལ་དང་གདུང་ཤུགས་

― MLP003_Page_0145 ―

^{[མ་དཔེ་གཟིགས་ན་འདིར་གནོན།]}

[Full Size]

དྲག་པོས་གསོལ་བ་འདེབས་བཞིན་དུ་ཐེགས་པས། ཕོ་བྲང་དེའི་དབུས་ན་རིན་པོ་ཆེའི་ཁྲི་ལ། སློབ་དཔོན་ཆེན་པོ་པདྨ་འཁོར་ཚོགས་བསམ་གྱིས་མི་ཁྱབ་པས་བསྐོར་ཏེ་བཞུགས་པ་མཇལ་བ་ན། ཐུགས་ལ་མོས་གུས་དྲག་པོ་རྒྱས་པའི་རྐྱེན་གྱིས། དེའི་ཕྱག་གཡས་གདེངས་པའི་སྡིགས་མཛུབ་ཀྱི་རྩེ་ལས་མེ་ལྕེ་ཚ་ཞིང་རྣོ་བ་འཁྱུག་གིས་བྱུང་བ་སྐུ་ལུས་ལ་རེག་པས་ཚ་རེག་བཟོད་དུ་མེད་པས་བསྲེག་སྟེ་ཐུགས་དྲན་མེད་དུ་སོང་བ་ལས་སད་པ་ན། མདུན་ངོས་སུ་ཐུགས་རྗེ་ཆེན་པོའི་དཀྱིལ་འཁོར་རྟེན་དང་བརྟེན་པར་བཅས་པ་རང་བཞིན་འབྲས་བུའི་དཀྱིལ་འཁོར་མངོན་སུམ་པ་ལྟ་བུར་གསལ་བའི་སྒོ་དྲུང་དུ་ཉིད་རང་ལྷའི་རྣམ་པ་ཅན་ཏུ་འཁོད་པ་དཀྱིལ་འཁོར་དུ་ཞུགས་པ་ལ། དབང་བཞི་རིམ་པར་བསྐུར་ཞིང་ཟབ་མོའི་གདམས་ངག་གི་གནད་རྣམས་བཀྲོལ་ཏེ་གདམས་པས། དེ་རྣམས་ཀྱི་རྟོགས་པ་ཐུགས་རྒྱུད་ལ་བཀྲ་ལམ་གྱིས་རྫོགས་པ་སྙམ་བྱེད། ཡང་སྤྱི་བོར་ཕྱག་བཞག་ནས་བྱིན་གྱིས་བརླབས་ཏེ་ཞལ་གདམས་འགའ་ཞིག་གསུངས་པས་ཟབ་ཆོས་ཀྱི་ཚིག་དོན་མཐའ་དག་ཐུགས་ལ་གསལ་བར་ཤར། ཡང་དེ་ལས་ནུབ་ཕྱོགས་སུ་ནགས་ཚལ་རབ་ཏུ་རྒྱས་པའི་དབུས་ན་མཚོ་སྔོ་དེང་ངེ་བ། དེའི་དབུས་ན་མཆོང་དམར་ལྟ་བུའི་བྲག་རི་དོ་ཆད་ཟང་ངེ་བ་ཞིག་གི་ངོས་སུ་ཕུག་པ་སྒོ་ང་བཀས་པ་འདྲ་བ་ཞིག་གི་ནང་ན། བུད་མེད་གཞོན་མཛེས་ཤ་ཉམས་རྒྱས་པ་རས་དམར་པོའི་ཤ་འགག་དང་། མེ་ཏོག་དམར་པོའི་རྒྱན་ཅན་གཟི་བྱིན་མཚུངས་པ་མེད་པས་བདེ་བའི་ཉམས་སྤོར་ནུས་པ་ཞིག་འདུགདེ་གསང་བ་ཡེ་ཤེས་མའོ་སྙམ་དུ་འདུད་པར་མཛད་པས། ཤིང་འབྲས་སྙིམ་པ་ཁ་སྦྱར་ཙམ་པ་དམར་སེར་བདུད་རྩིའི་ཟིལ་པ་ཕྲོམ་མེ་བ་ཞིག་བཟུང་ནས་རྗེ་ཉིད་ཀྱི་ཞལ་གྱི་ཐད་དུ་ཕྱག་གིས་བརྩིར་བ་ལས་བདུད་རྩིའི་དྭངས་མ་དམར་སྐྱ་མཆོག་ཏུ་བདའ་བ་ཐིགས་པ་བཅུ་གསུམ་བྲེང་ཆགས་སུ་སྩལ་རྗེས་དར་ཅིག་ཆད། ཡང་བདུན་སྩལ། ཡང་ཆད་རྗེས་འགའ་ཞིག་སྩལ་བ་སྙམ་བྱེད། དེས་སྐུ་ལུས་དྭངས་ཤེལ་གྱི་སྣོད་ལྟ་བུར་གྱུར་པ་བཅུད་དེས་གཏམས་པ་བཞིན་མེར་གྱིས་གང་བས་གཟི་བྱིན་མཆོག་ཏུ་འབར་བའི་གསལ་སྣང་བདེ་སྟོང་གི་ཐུགས་ཉམས་དང་དབྱེར་མི་ཕྱེད་པར་གྱུར་པའི་མཐར། ཕྱི་ནང་གསང་

― MLP003_Page_0146 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཚེ་སྒྲུབ་ཀྱི་ཟབ་གནད་རྣམས་བསྟན་རྗེས། གསལ་སྣང་དེ་སྤྲོས་བྲལ་མི་རྟོག་པའི་དབྱིངས་སུ་ནུབ་པར་གྱུར། ཡང་ཉིན་ཞིག་མནལ་དུ་སོང་བ་ནི་མིན། ཐུགས་ཉམས་ཀྱི་འཆར་སྒོར། ཨོ་རྒྱན་ཆེན་པོ་རྒྱ་གར་པཎ་ཆེན་གྱི་ཆ་ལུགས་གཟི་མདངས་མཚུངས་པ་མེད་པ་ཞིག་ཁྲོང་གིས་བྱོན་ནས། སྐུ་མདུན་དུ་ཁྲི་ལ་ཞབས་སྟེགས་ཀྱིས་བཞུགས་ཏེ། གཏེར་རྫས་རྣམས་དབུ་གཙུག་ཏུ་བཞག་ནས་བྱིན་རླབས་མཛད་པའི་ཚུལ་ཡུད་ཙམ་ཞིག་ཤར། ཡང་ལན་གཅིག་ཨ་ཙ་ར་བོང་ཆེ་བ་སྔོ་ནག་རལ་པ་སེར་པོ་རྟིང་པར་བསླེབས་པ། རི་དྭགས་ཀྱི་པགས་པའི་སྟོད་གཡོག་དང་། རས་ཀྱི་སྨད་དཀྲིས་ཅན་གཡས་དུང་དཀར་བསྣམས་པ་ཞིག་དང་། ཨ་ཙ་ར་མོ་གཞོན་མཛེས་དམར་མདངས་ཅན་ཀུ་ཤ་དང་དུར་བའི་ཆུན་པོ་ཐོགས་པ་རས་ལྗང་གི་གོས་གྱོན་པ་འཁོར་མང་པོ་དང་བཅས་པ་འཚངས་ཀྱིས་འོངས་ནས། ཕྲིན་ལས་སྒྲུབ་པའི་གཡར་དམ་ལེན་པ་དང་། དངོས་གྲུབ་ཀྱི་བགོ་སྐལ་བམ་ཆེན་གྱི་རྣམ་པར་འབུལ་བ་དང་། སྔགས་སྲུང་རག་གདོང་མས་མཆོག་གི་གོ་འཕང་བགྲོད་པའི་ཕོ་ཉར་སྤྲུལ་པ་དང་། གཏེར་སྲུང་སྨན་བཙུན་མས་འཇིག་རྟེན་གྱི་ཁམས་རྣམས་ནམ་མཁའི་ལམ་ནས་ཐོགས་མེད་དུ་སྟོན་པ་དང་། ཀེང་རུས་ཀྱི་གུར་ཁང་དུར་ཁྲོད་ཀྱི་ཁོར་ཡུག་ཅན་དུ་གསང་བ་ཡེ་ཤེས་མ་བདེ་བའི་ཉམས་ཤིན་ཏུ་རྒྱས་པས་བྷ་ག་ནས་འོད་དམར་པོ་འཆར་ཀའི་དམར་ཐག་འདྲ་བ་སྤྲོས་པ་རྗེ་ཉིད་རང་གི་ཐུགས་ཀར་ཐིམ་པས་བདེ་བའི་ཡེ་ཤེས་མཆོག་ཏུ་འབར་ཞིང་། རང་གི་སྐུ་ལུས་རགས་པའི་སྣང་བའང་འོད་དེ་དང་འདྲེས་པའི་རྐྱེན་གྱིས་གསལ་སྟོང་གི་ཐུགས་ཉམས་བཟོད་མེད་དུ་འཆར་བ་དང་། དེ་ཉིད་ཀྱིས་ཆོས་བཀའ་སྤེལ་བའི་དུས་གནད་སོགས་བླང་དོར་གྱི་གནས་དུ་མ་ལུང་དུ་སྟོན་པའང་མཛད་དོ། །དེ་ལྟར་ལྷ་སྔགས་ཆོས་ཉིད་ཀྱི་འཁོར་ལོའི་རྣལ་འབྱོར་ལས་མི་འདའ་བར་ཟླ་བ་གསུམ་གྱི་བར་སྐུ་མཚམས་ཀྱི་བཅད་རྒྱ་དམ་པར་མཛད་པས་དངོས་གྲུབ་ཀྱི་མཚན་མ་བརྙེས་པར་གྱུར་ནས། ཟླ་བ་དྲུག་པའི་འགོར་གོང་མའི་ལུང་བཞིན་གྲུ་འཛིན་གྱི་ཕོ་བྲང་ཆེན་པོར་ཆིབས་བསྐྱོད་ནས། ཀུན་མཁྱེན་རྒྱལ་མཆོག་དམ་པ་དང་མི་དབང་ཆོས་ཀྱི་རྒྱལ་པོའི་ཞབས་པད་ལ་འདུད་པར་མཛད་དེ། གཏེར་རྫས་རྣམས་

― MLP003_Page_0147 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱན་སྔར་བསྟར་བ་ལས་ཤིན་ཏུ་དགྱེས་པ་རབ་ཀྱི་མཐར་ཕྱིན་པའི་དབུགས་དབྱུང་གཟེངས་བསྟོད་པར་མཛད་ཅིང་། དབང་དང་ཕྲིན་ལས་སྐོར་གྱི་ཤོག་སེར་རྣམས་སྔོན་ནས་འབེབས་པ་གནང་ཟིན་པ་ལྟར། ཟླ་བ་དེ་ཡི་ཚེས་བཅུ་གསུམ་ལ་ཕོ་བྲང་རྩེའི་གཟིམས་ཆུང་ཉི་འོད་འཁྱིལ་པའི་སྦུག་ཏུ་བདེ་གཤེགས་ཀུན་འདུས་ཐུགས་རྗེ་ཆེན་པོའི་དཀྱིལ་འཁོར་དུ་གོང་ཞབས་ཡས་ཕྱིན་གཉིས་ཀྱི་ཞབས་ཕྱིར། སྐབས་དེའི་ཞབས་རིིང་གི་ཐུ་བོར་གྱུར་པ་གཉིས་གསུམ་དང་བཅས་པར་ཐུན་མོང་དང་ཐུན་མོང་མ་ཡིན་པའི་དབང་བཀའ་རྣམས་ཡོངས་རྫོགས་འབུལ་བར་མཛད་ཅིང་། དེ་དང་རྗེས་འབྲེལ་དུ་གཏེར་རྫས་རྣམས་སྤྱན་ལམ་དུ་ཞིབ་མོར་ཕབས་ཏེ། ཐུགས་རྗེ་ཆེན་པོའི་གསང་སྒྲུབ་ཀྱི་སྐུ་ཛྷཻ་ཀྵིམ་ལས་གྲུབ་པ་དང་ཐབས་ཤེས་བདེ་ཆེན་རིལ་བུ་བརྒྱ་ཕྲག་གཅིག་རྣམས་འབུལ་བར་མཛད་པས་མཆོག་ཏུ་ཐུགས་མོས་ཤིང་ངེས་ཤེས་འདྲོངས་པའི་དབུགས་དབྱུང་གི་བཀའ་སྩལ་དང་། དངུལ་གྱི་མཎྜལ་ལ་གསེར་གྱི་ཚོམ་བུ་སོ་བདུན་གྱིས་བཀྲ་བ་དང་། རིན་ཐང་ཅན་གྱི་གོས་ཕྱི་ནང་། ན་བཟའ་ཆ་ཚང་བ་སོགས་ཡོན་གྱི་གནང་སྦྱིན་ཡང་རྒྱ་ཆེ་དཔངས་མཐོ་བ་སྩལ། དེའི་ནུབ་མོ་མནལ་ལམ་ལ་དབང་ཁང་དེ་ག་ཡིན་དགོངས་པ་ཞིག་གི་གཡོན་ངོས་ཀྱི་ཀ་བའི་རྒྱབ་དེར་ཨ་ཙ་ར་གཞོན་ནུ་རས་ངུར་སྨྲིག་གི་འཕྱར་བུ་གྱོན་པ་གཟི་མདངས་ཤིན་ཏུ་རྒྱས་པ་ཞིག་ཁྲོ་ཚུལ་གྱི་རྒྱ་སྐད་འགའ་ཞིག་བརྗོད་པ་དང་། བུད་མེད་གཞོན་ནུ་ཞིག་གི་དེའི་བརྡ་སྦྱོར་བ་ལྟར་བྱས་ནས་ད་རེས་མངའ་བདག་ཡབ་སྲས་ཁོ་ན་ལས་འདུས་པ་གཞན་མེད་ན། སྐུ་ཚེ་རིང་པོར་སྲིང་། མཐའ་བཞི་ཟིལ་གྱིས་ནོན། སྐྱེ་བ་གཞན་གྱིས་བར་མ་ཆོད་པ་ལ་ཞིང་ཁམས་གཅིག་ཏུ་འཛོམ་ནས་འགྲོ་བ་མང་པོ་ལ་ཕན་པ་ཆེན་པོའི་རྟེན་འབྲེལ་འགྲིག་རྒྱུ་ལ། གཞན་དག་ཀྱང་དེར་འདུས་པའི་རྐྱེན་ལས་ཟབ་མོའི་གནད་འགའ་ཞིག་ཕྱིར་ལྡོག་ཏུ་གྱུར་པ་སོགས་སྤྱི་དང་བྱེ་བྲག་གི་བླང་དོར་ལུང་བསྟན་མང་དུ་གདམས་པ་ལྟར་ཕྱིས་དེ་དོན་མངོན་དུ་གྱུར་ཏོ། །སྐབས་དེ་དང་མི་རིང་བའི་རྗེས་འབྲེལ་དུ་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུར་ཡང་ཤ་འུག་གཏེར་བྱོན་གྱི་ཚེ་དབང་དང་དམ་རྫས་ཆོས་ཚན་ཅི་རིགས་ཀྱི་ལུང་རྣམས་ཤོག་སེར་སྟེང་ནས་གནང་

― MLP003_Page_0148 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིང་། ཕྱིས་ཆུ་ཕག་ལོར་ཐུབ་བསྟན་རྡོ་རྗེ་བྲག་ཏུ་ཐེགས་ཏེ་དབང་ལུང་ཡོངས་རྫོགས་སྩལ་བས་ཆོས་བདག་གི་རྟེན་འབྲེལ་ལེགས་པར་འགྲིགཆུ་ཁྱི་ཟླ་བ་དགུ་པའི་ནང་དུ་ཕོ་བྲང་ཆེན་པོར་ཕེབས་སྐབས་ལྷ་ཆེན་གྱི་སྲོག་འཁོར་བཞེངས་ཤིང་སྒྲུབ་པར་མཛད་ནས། དེ་དང་རྗེས་འབྲེལ་དུ་མི་དབང་ཆེན་པོར་སྲོག་གཏད་ཀྱང་འབུལ་བར་མཛད་ཅིང་། ཟབ་གཏེར་བཞེས་པའི་སྤྲེལ་ལོ་དེ་ནས་བརྩིས་པའི་ལོ་བདུན་པ་མེ་སྟག་ལ་སྐུ་གསུང་ཐུགས་ཀྱི་སྲས་མཆོག་པདྨ་འགྱུར་མེད་རྒྱ་མཚོ་མི་ཕམ་རྣམ་རྒྱལ་རྡོ་རྗེ་དཔལ་བཟང་པོ་བལྟམས་པ་ནི། ཆོས་བདག་ལོ་བདུན་ཁོངས་སུ་འབྱུང་། །ཞེས་ལུང་བསྟན་པ་ལྟར་ཆོས་ཀྱི་བདག་པོར་གྲུབ་པ་བཞིན་དབང་ལུང་མན་ངག་དང་བཅས་པ་གསན་ནས་བསྙེན་སྒྲུབ་མཐར་ཕྱིན་པར་མཛད་པས་རྟེན་འབྲེལ་ལེགས་ཚོགས་སུ་འགྲིག་པ་ཡིན་ནོ། །གཞན་ཡང་སྐུ་ཡི་སྲས་གདུང་བརྒྱུད་རིན་པོ་ཆེ་སྐུ་མཆེད་རྣམས་དང་། ཆོས་ཀྱི་སྲས་ཆོས་ཀྱི་བདག་པོར་ལུང་གིས་ཟིན་པ་རྣམས་ཀྱིས་ཐོག་དྲངས། སྐལ་ལྡན་གྱི་གདུལ་བྱ་རྣམས་ཟབ་མོའི་གདམས་པས་སྨིན་ཅིང་གྲོལ་བའི་གནས་ལ་འགོད་པར་མཛད་དོ། །ཡང་ལོ་དེ་ནས་གྱེན་དུ་བཞི་གྲངས་པའི་མེ་འབྲུག་གི་ལོ་ནག་ཟླ་ལ་བཀྲ་ཤིས་རབ་བརྟན་གྱི་གཞིས་ཀའི་སྟེང་དུ་འཕྱིང་གུར་ཕུབ་པར་ཟླ་གཅིག་གི་བར་དུ་སྐུ་མཚམས་ཀྱི་བཅད་རྒྱ་མཛད་དེ་བསྐྱེད་རྫོགས་ཟབ་མོའི་ཏིང་ངེ་འཛིན་ལ་རྩེ་གཅིག་ཏུ་བཞུགས་རྗེས་དེ་མུས་ཕྱི་མཚམས་ཀྱི་ཁོག་ཏུ་བདེ་འདུས་ལས་བྱང་གི་བཀའ་རྩོམ་གནང་བཞེད་ཀྱིས་གསོལ་འདེབས་གཏོར་འབུལ་སོགས་མཛད་པ་ན། མནལ་ལམ་དུ། བླ་མ་མངའ་བདག་ཆེན་པོ་ཉིད་དགྱེས་འཛུམ་གཟི་བྱིན་རྒྱས་པའི་རྣམ་པར་བྱོན་ནས། ང་ཡི་ཆོས་བརྒྱུད་འཛིན་པའི་གདུང་རིགས་སྟོང་པ་ན། བསྟན་པའི་མེ་རོ་གསོ་བར་ལུང་བསྟན་པ་དེ་ཁྱོད་ཡིན། འདི་སློབ་དཔོན་ཆེན་པོ་བཞིའི་ཐུགས་ཀྱི་དཔལ་བེའུ་དེ་ཡིན། བོད་ཀྱི་སྔགས་པ་གཞན་ལ་སྐལ་བ་མེད་པས་ཁྱོད་ལ་གཏོད་པ་ཡིན་གསུངས་ནས། བླ་དཔེའི་ཤོག་སེར་རྣམས་ཕྱག་གིས་དབུ་ཐོག་ཏུ་བཞག་སྟེ་བཀའ་གཏད་བྱིན་གྱིས་བརླབས་པའི་མཐར་པུསྟི་རྣམས་འོད་དུ་ཞུ་བ་དྷཱིཿཡིག་དམར་སེར་གྱི་རྣམ་པར་

― MLP003_Page_0149 ―

^{[མ་དཔེ་གཟིགས་ན་འདིར་གནོན།]}

[Full Size]

གྱུར་ཏེ་ཐུགས་ཀར་ཐིམ་པ་རྨིས་ཤིང་། སད་པ་ན་བདེ་འདུས་ཀྱི་ཚིག་དོན་ཐམས་ཅད་ཐུགས་ལ་ལམ་མེ་གསལ་བ་བྱུང་ངོ་། །ཡང་ཟད་པ་མེ་སྟག་གི་ལོ་མཇུག་ནས་བརྩམས་ཏེ་དུས་རིམ་ཆེན་མོ་དང་། མེ་ཡོས་ལོ་གསར་གྱི་དགྱེས་སྟོན་སོགས་ལའང་ཞབས་མ་བསྐྱོད་ཅིང་། མཇལ་མི་ངོ་ཆེན་འགའ་ལ་བུག་སྒོ་ནས་མཇལ་ཁ་རེ་གཉིས་ཙམ་མ་གཏོགས་ཐུགས་གཡེངས་ཐམས་ཅད་བཅད་དེ་སྐུ་མཚམས་ལ་བཞུགས། དེ་དུས་ནག་ཟླའི་འགོ་ནས་སྙན་ཅུང་ཟད་མ་བདེ་ཙམ་པ་ཇེ་ལོད་ཀྱིས་བསྙུན་བབས་ལྕི་བར་སོང་བ་ལས། བཅོ་ལྔའི་ནུབ་བསྙུན་གཞི་ཟུག་རྔུ་ལ་ཐུགས་བསྲེས་སྟེ་ཅུང་ཟད་གཟིམས་པ་ན་མནལ་ལམ་དག་པའི་འོད་གསལ་གྱི་སྣང་བ་དང་འདྲེས་པའི་གསལ་སྣང་དུ། ནུབ་ཕྱོགས་ཀྱི་མཁའ་ལ་ཐོགས་མེད་དུ་གཤེགས་པས་རིན་པོ་ཆེའི་བྲག་རི་ནགས་ཀླུང་མེ་ཏོག་གི་ཚལ་སོགས་ཡིད་དུ་འོང་བའི་དབུས་སུ་རིན་པོ་ཆེ་སྣ་ཚོགས་ཀྱི་ཁང་བཟང་བཀོད་པས་འཕགས་པར་གདན་ཁྲི་ལ་རྒྱལ་པོ་ཨིནྡྲ་བྷཱུ་ཏི་གཟི་མདངས་མཆོག་ཏུ་རྒྱས་པ་བཙུན་མོའི་འཁོར་དུ་མ་དང་བཅས་བཞུགས་པའི་དྲུང་དུ་ཡུད་ཀྱིས་ཕེབས་ཏེ། མོས་གུས་དྲག་པོས་གསོལ་འདེབས་མཛད་པ་ན། དེས་གསེར་གྱི་བུམ་པ་བདུད་རྩིས་གང་བ་དང་། རིན་པོ་ཆེའི་ཀོང་བུར་སྒྲོན་མེ་འབར་བཞིན་པ་དང་བཅས་ཕྱག་ཏུ་གཏད་དེ་བྱིན་གྱིས་བརླབས་ཤིང་། ཟབ་དོན་གྱི་གདམས་པས་ངོ་སྤྲོད་མཛད་པ་བྱུང་། ས་འབྲུག་ཟླ་བ་བཞི་པའི་ཚེས་བདུན་གྱི་ཉིན། འབྲས་ཕུ་བདེ་བ་ཅན་གྱི་སྒྲུབ་སྡེའི་ས་འདྲ་བར་ཕེབས། དེ་ནུབ་ཐོ་རངས་ཀྱི་ཆར་རྡོ་རྗེ་གཡུ་སྒྲོན་མ་རྣམ་པ་བུད་མེད་མཛེས་སྡུག་གསེར་གཡུའི་རྒྱན་ཅན་གློག་ལ་བཞོན་ནས་རོལ་མོའི་འུར་དིང་གི་སྒྲ་དང་བཅས་མཁའ་ལ་འགྲོ་བ་དང་ལྷན་ཅིག་འདོད་པའི་ཕྲིན་ལས་སྒྲུབ་པར་དམ་བཅས་ཏེ། ནུབ་ཕྱོགས་ཀྱི་མཁའ་ལ་སོང་བའི་མཚན་ལམ་དང་། དེའི་དགུན་རྒྱལ་ཟླའི་འགོ་ནས་བརྩམས་ཏེ་སྐུ་མཚམས་བཅད་རྒྱ་དམ་པོས་ལོ་མཇུག་དུས་རིམ་དང་། ས་སྦྲུལ་ལོ་གསར་གྱི་དགྱེས་སྟོན་སོགས་ལའང་མ་གྲོལ་བར་ཐུགས་དམ་ལ་རྩེ་གཅིག་ཏུ་བཞུགས། དེ་དུས་མཆུ་ཟླའི་བཅོ་ལྔའི་མཚན་གྱི་གུང་ཐུན་ལ་འོད་གསལ་ཡེ་ཤེས་ཀྱི་གཟིགས་ངོར། རྡོ་ཤེལ་ལྟ་བུའི་མཆོད་རྟེན་ཉིས་བསྒྲིགས་མཐའ་

― MLP003_Page_0150 ―

^{[མ་དཔེ་གཟིགས་ན་འདིར་གནོན།]}

[Full Size]

འཁོར་རྡོ་ལེབ་གཅལ་དུ་བཀྲམ་པའི་འགྲམ་སྟེགས་གྲུ་བཞི་པའི་སྟེང་ན། ཆོས་རྗེ་ཀུན་མཁྱེན་ཆེན་པོ་སྐུ་བགྲེས་ཉམས་ཚེམས་ཕྲེང་ཚག་གེ་བ་ན་བཟའ་བེར་འདུམ་དང་པཎ་ཞྭ་ཟླུམ་བརྗིད་ཅན་གཟི་བྱིན་མཚུངས་པ་མེད་པར་བཞུགས་པ་མཇལ་ཏེ་གུས་འདུད་དྲག་པོ་མཛད་པ་ན། དེ་ཉིད་དགྱེས་བཞིན་པས་འདི་སྐད་ཅེས། ཇི་ལྟར་རྟོགས་པའི་ངེས་པ་བདག་ཉིད་ཀྱི། །དགོངས་པ་བླ་ན་མེད་པའི་དོན་ལ་འབྱོར། །འདི་ནི་རྒྱལ་བ་ཀུན་གྱི་དགོངས་པར་གནས། །དེ་ཕྱིར་འདི་ཡི་ཕྲིན་ལས་རྒྱས་གྱུར་ཅིག །ང་རྒྱལ་དང་ནི་ཁེངས་པར་མ་བྱེད་ཅིག །སྙིགས་མའི་སེམས་ཅན་འདུལ་བ་དཀའ་བ་རྣམས། །བྱམས་དང་སྙིང་རྗེ་ཆེན་པོས་རྗེས་ཟུངས་ལ། །ཕན་དང་བདེ་བའི་སྙིང་སྟོབས་བསྐྱེད་པར་གྱིས། །ཞེས་གདམས་པའི་མཚན་ལམ་བྱུང་། སྐུ་མཚམས་དེ་མུས་དབོ་ཟླའི་མཇུག་ནས་བརྩམས་གཙོ་བོར་ཐུགས་དམ་ལས་མི་གཡོ་བར་རྩེ་གཅིག་ཏུ་བཞུགས་ཤིང་། ཉིན་མོ་གསོལ་ཚིགས་གྲོལ་རྗེས་ཀྱི་ཐུན་མཚམས་སུ་གསན་ཡིག་བསྒྲིག་པའི་བཀའ་རྩོམ་ཡང་ཐུན་རེ་ཆགས་མེད་དུ་གནང་། ནག་ཟླ་དང་ཆུ་སྟོད་ཅན་གྱི་ཚེས་བཞིའི་ནུབ་ཞབས་དྲུང་གདུང་བརྒྱུད་རིན་པོ་ཆེའི་ཡུམ་ལ་སྐུ་ཆག་བདོ་བའི་མནལ་ལྟས་སྤྱིར་འཚུབ་ཅིང་། ཁྱད་པར་སྤྲུལ་གཟུགས་ནུབ་ཕྱོགས་ཀྱི་མཁའ་ལ་ཆོ་འཕྲུལ་སྣ་ཚོགས་པའི་རོལ་མོ་དང་བཅས་ཏེ་གཤེགས་པ་དང་། ཕྱི་མའི་ཚེས་ལྔའི་ནུབ་ལངྐའི་ཡུལ་དང་དེ་ཝཱི་ཀོ་ཊར་འདུ་བའི་མཆོད་པ་བསྒྲུབས་ཏེ་དྷཱུ་མ་སྠུ་རའི་ཞིང་དུ་གཤེགས་ཏེ་སྤྲུལ་པ་རང་བཞིན་གྱི་དབྱིངས་སུ་བསྡུ་བ་དང་། ཕྱིས་མནལ་ལམ་གྱི་མཚན་མ་བརྟན་པོར་སྤྲུལ་པའི་ཆོ་འཕྲུལ་གྱིས་དབུགས་དབྱུང་ཞིང་ལུང་སྟོན་པར་ཞལ་གྱིས་འཆེས་པ་ལ་སོགས་མནལ་ལམ་ལྟར། ཟླ་བ་དེའི་ཉི་ཤུ་གཅིག་གི་སྲོད་འཁོར་ལ་ལྷན་ཅིག་སྐྱེས་མའི་ཞིང་ཁམས་ག་ལ་བ་དེར་སྤྲུལ་པ་བསྡུས་ཏེ་གཤེགས་པའི་ཚེ། རྗེ་ཉིད་ནས་རང་བཞིན་གྱི་འོད་གསལ་སྒྲིབ་བྲལ་རྣམ་པར་དག་པའི་ཡེ་ཤེས་ཤར་བ་ལ། གསལ་འདེབས་པ་སོགས་དུས་དེར་འཕྲོད་པའི་གདམས་པས་རྗེས་སུ་འཛིན་པ་དང་། འཇིག་རྟེན་གྱི་མཐུན་འཇུག་དང་བསྟུན་པའི་སྐུ་འདད་ཀྱི་མཆོད་སྦྱིན་ཡང་རྒྱ་ཆེར་སྒྲུབ་པར་མཛད་ཅིང་། དབུ་ཐོད་ལ་ཧྲཱིཿཡིག་དང་ཚེམས་

― MLP003_Page_0151 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་བཅུ་གཅིག་ཞལ་གྱི་སྐུ་རང་བྱོན་སོགས་ངོ་མཚར་བའི་མཚན་མའང་གསལ་བར་བསྟན། དེའི་དགུན་ཉེ་འཁོར་དུ་འབྲུམ་ནད་ཐོར་བུ་བསླེབས་པས་འབྲུམ་ཡོལ་ལ་བསྙད་ནས་སྨིན་དྲུག་ཟླ་བའི་ཚེས་བདུན་ལ་དར་གླིང་དུ་ཆིབས་བསྐྱོད། ཚེས་བཅུ་གཉིས་ནས་བཟུང་སྐུ་མཚམས་མཛད་དེ་རིམ་གཉིས་ཀྱི་ཐུགས་དམ་ལ་རྩེ་གཅིག་ཏུ་བཞུགས། མགོ་ཟླའི་འགོར་ནང་མཚམས་གྲོལ་ནས་ཕྱི་མཚམས་ཀྱི་ཁོག་ཏུ་ཉིད་ཀྱི་ཡུམ་དང་སྐུ་ཞང་སོགས་སྐལ་ལྡན་འགའ་ལ་ཟབ་ཁྲིད་དང་། དྲི་མེད་ཀྱི་གཟུངས་བཞུགས་པའི་སཙྪ་འབུམ་ཕྲག་གཉིས་སུ་ལོངས་པ། གཞན་ཡང་། འོད་དཔག་མེད། ཨོ་རྒྱན་ཆེན་པོ། སྒྲོལ་མ་རྣམས་ཀྱི་པར་སྐུ་ཆུང་ངུ་དང་། ཐུབ་དབང་གི་སྐུ་ལི་གཟུགས་མའི་པར་སྐུ་ཆེ་བ་མང་པོ་བཅས་སྨན་འདམ་ལ་ཕྱག་བསྟར་གྱིས་འདེབས་པར་མཛད་ཅིང་། གསེར་དངུལ་ཟངས་གསུམ་ཇི་ལྟར་འོས་པས་ན་བཟའ་གསོལ་ཏེ་སྐུ་འབུམ་ཆེན་མོའི་གཟུངས་སུ་སྒྲུབ་པར་མཛད། དེར་ས་གའི་ཟླ་སྒང་བར་གཙོ་བོར་ཐུགས་དམ་ལས་མི་གཡོ་བའི་ངང་ནས། ཐུན་མཚམས་སུ་ཚོགས་དབེན་གྱི་འདུས་པ་ཉུང་ཤས་ལ་ཆོས་སྦྱིན་དང་། གོང་མའི་སྐུ་མཆོད་ལ་དམིགས་ནས་དར་གླིང་སྤྱི་པར་ས་ཞིང་སྦྱོར་བ། བྱ་བ་ལས་ཀྱི་འཁོར་ལོ་སོགས་དོན་དུ་འགྱུར་པའི་མཛད་པ་བདག་གིར་བཞེས་ནས་གདན་སར་ཕྱིར་ཕེབས། ཡང་རྟིང་སོར་ས་བྱི་ཟླ་བ་དགུ་པའི་མཇུག་ནས་བརྩམས་ཏེ། གླང་ལོ་ཟླ་བ་བཅུ་གཉིས་པའི་ཟླ་སྒང་བར་འབྲུམ་འཛེམ་དང་བསྟུན་ངོ་ཆེ་བ་རེ་གཉིས་ལ་བག་བསངས་ཏེ་བུག་སྒོ་ནས་ཞལ་མཇལ་ཙམ་མ་གཏོགས་ལོ་གཅིག་ལྷག་ཙམ་གྱི་བར་སྐུ་མཚམས་བཅད་ནས། གཙོ་བོར་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ལས་མ་གཡོས་པར་བཞུགས་ཤིང་། གསོལ་ཚིགས་ཀྱི་སྟེང་ཕྱག་ཚ་གྲོལ་རྗེས་ཞབས་དྲུང་གདུང་རྒྱུད་རིན་པོ་ཆེ་སྐུ་མཆེད་དང་གཅུང་རྗེ་དབོན་སོགས་ཞམ་རིང་ནང་འཁོར་ཉུང་འདུས་ལ་རྫོགས་ཆེན་སེམས་སྡེའི་བཀའ་ཁྲིད་ལ་སོགས་ཏེ་ཟབ་ཆོས་དུ་མ་ཐུན་རེ་ཆགས་མེད་དུ་སྩལ་བ་དང་། རེས་སྤྱན་བལྟས་སོགས་དང་སྦྱར་ཏེ་ལྷག་པའི་ལྷ་དུ་མའི་ལྗགས་བཟླས་དང་། ལས་གང་ལ་བསྔགས་པ་དེ་དང་དེའི་སྔགས་དམིགས་ཀྱི་ཁ་བསྒྱུར་སོགས་ཀྱི་ལས་སྦྱོར། དེ་ལོ་ཡུལ་ཕྱོགས་ཐམས་ཅད་

― MLP003_Page_0152 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་སྐྱེ་བོ་མང་པོ་ཐོར་ནད་ཀྱིས་ལྔ་པའི་ལམ་དུ་ཕྱོགས་པའི་སྐྱབས་འཇུག་ཞུ་རྟེན་རྣམས་མཆོད་རྟེན་དུ་བཞེས་ནས། མིང་ཡིག་རྣམས་གསར་བཤུས་ཀྱི་ཕྲལ་ཕྲལ་སྙན་དུ་རིམ་བརྒྱུད་ཀྱིས་ཕུལ་བ་ལ་བསྔོ་བ་དང་སྐབས་སྐབས་སུ་བསྡེབས་བསྒྲིལ་གྱིས་སྒྲིབ་སྦྱོང་གི་བྱང་བཞུ་སོགས་དམིགས་ཡུལ་རྣམས་ལ་བརྩེ་བའི་སྤྱན་རས་ཀྱིས་གཟིགས་པས་རྗེས་སུ་འཛིན་པར་མཛད་ཅིང་། དེ་ནས་ཀྱང་ལོ་མཇུག་དུས་རིམ་གྱི་ཚོགས་དབུར་ཞབས་བསྐྱོད་པ་ཙམ་མ་གཏོགས་གཞན་མཆོག་དམན་ཀུན་ལ་ཞལ་མཇལ་ཙམ་ཡང་མ་གནང་བར་ཕྱི་ནང་གི་འགྲུལ་བཅད་མུས་ནས་ལྕགས་སྟག་ནག་ཟླའི་ཚེས་བདུན་ནས་བརྩམས་ཏེ་བཅོ་ལྔའི་བར་དུ་རྗེ་ཉིད་ཡབ་སྲས་གསུམ། སྤྲུལ་པའི་སྐུ་གཞན་ཕན་དབང་པོ། ཐང་འབྲོག་སྤྲུལ་པའི་སྐུ་སོགས་བདག་ཅག་ཞབས་ཕྱི་བཅུ་སྐོར་བཅས་པས། སྐུ་མཚམས་དེ་ཁའི་ཁོག་ཏུ་སྒྲུབ་ཆེན་བདེ་གཤེགས་འདུས་པའི་དཀྱིལ་འཁོར་ལ་བརྟེན་ནས་དམེ་རྫས་བདུད་རྩིའི་ཚོགས་སྒྲུབ་ཕྱག་བཞེས་རྒྱས་པའི་ལས་རིམ་ལྟར་ཐུན་བཞིའི་སྔགས་རྒྱུན་གསུང་མི་ཆད་ཀྱིས་ཤིན་ཏུ་སྨིན་པར་གནང་བས་སྨན་འཕེལ་ཆེ་ཞིང་དྲི་རོ་ཁ་དོག་བཟང་བ་དང་། སྒྲུབ་ཁང་གཟི་བྱིན་ཆེ་ལ་དངོས་གྲུབ་བླང་བའི་ཉིན་དབང་གཞུའི་འཇའ་སྤྲིན་ལས་ཆར་སིལ་བུར་བབས་པ་སོགས་སྒྲུབ་པའི་རྟགས་མཚན་དགེ་ཞིང་། དེའི་བྱིན་རླབས་ཀྱིས་ཉེ་འཁོར་གྱི་ཐོར་ནད་རྣམས་ཀྱང་ཆུ་ཆད་པ་ལྟར་གྱུར་པས། སྣོན་ཟླའི་ཚེས་བཅུ་མཆོད་པའི་དུས་དང་འབྲེལ་བར་ཕྱི་མཚམས་གྲོལ་བར་མཛད་དོ། །དེ་ལྟར་སྔར་སྨོས་པ་ལྟར་བྲག་དམར་མཆིམས་ཕུ་དང་། གཡའ་མ་ལུང་སོགས་གྲུབ་པའི་དབེན་རི་གནས་ཆེན་ངོ་མཚར་ཅན་རྣམས་དང་། དར་གླིང་གཟིམས་ཆུང་བསམ་གཏན་སྦུགགཟིམས་སྤྱིལ་འོད་གསལ་རྩེ་དང་། བསམ་གཏན་རྩེ། ལྷོ་བྲག་གི་བཀྲ་ཤིས་ཆོས་གླིང་། སྨིན་གྲོལ་གླིང་གཙུག་ལག་ཁང་གི་གཟིམས་ཆུང་ཀུན་བཟང་ཡང་རྩེ་མདོ་སྦུབས་དང་། འཆི་མེད་འོད་སྣང་གི་སྦུབས། བླ་བྲང་ཆོས་འཁོར་ལྷུན་པོའི་གཟིམས་ཆུང་ཀུན་བཟང་ཕོ་བྲང་མདོ་སྦུབས་སོགས་སུ་སྐུ་མཚམས་ལོ་སྦྲེལ་མ་དང་། ཟླ་དྲུག་མ། ཟླ་གསུམ། ཟླ་གཅིག་གི་མཐའ་བརྟེན་པ་ཡན་གྱི་བླ་མ་ཞི་དྲགརྡོར་སེམས། བཀའ་བརྒྱད། ཐུགས་རྗེ་ཆེན་པོ།

― MLP003_Page_0153 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་ཕུར། གཤིན་རྗེའི་གཤེད། རྟ་མགྲིན། ཚེ་དཔག་མེད། མཁའ་སྤྱོད་མ། ཕྱག་རྡོར། ལོཀྟྲི། ནཱ་ག་རཀྴ་སོགས་ཡི་དམ་གྱི་ལྷ་སུམ་ཅུ་རྩ་ལྔ་ཙམ་གྱི་བསྙེན་སྒྲུབ་དང་། རྫོགས་པ་ཆེན་པོའི་ཁྲེགས་གཅོད་ཀྱི་ཉམས་བཞེས་ལ་སྙིང་པོར་དྲིལ་ནས་ཐོད་བརྒལ་ཉིན་མཚན་གྱི་རྣལ་འབྱོར་དང་། རླུང་སྦྱོར་སོགས་དུས་གནད་དང་བསྟུན་ཏེ་ཐུགས་རྒྱུད་ལ་ཅི་འབྱོར་གྱིས་ཉམས་བཞེས་བར་མ་ཆད་དུ་གནང་བས། མ་དག་པའི་སྣང་བ་འགོག་པའི་བསྐྱེད་རིམ་ལ་གསལ་བརྟན་གྱི་ཉམས་མཐར་ཕྱིན་ཏེ། སྣང་སྲིད་ཐམས་ཅད་དག་པ་རབ་འབྱམས་རྒྱལ་བའི་དཀྱིལ་འཁོར་ཆེན་པོར་རྒྱས་ཐེབས་པས་ལས་བཞི་གང་ཡང་ཐོགས་མེད་དུ་གྲུབ། རྫོགས་རིམ་རྩ་རླུང་ཐིག་ལེའི་འགྲོས་དྷཱུ་ཏིར་དག་པས་ཞུ་བདེའི་ཡེ་ཤེས་ཕྱོགས་བརྒྱར་འབར། ཀ་དག་གཞི་རྫོགས་འཕོ་འགྱུར་མེད་པའི་དབྱིངས་སུ་བྱང་ཆུབ་པས་འཁོར་འདས་ཐམས་ཅད་གཞི་མེད་རྩ་བྲལ་མཉམ་ཡངས་ཁྱབ་བརྡལ་ཆེན་པོའི་ཀློང་དུ་གྲོལ། སྣང་སྤྱོད་ཐམས་ཅད་རང་སྣང་རིས་མེད་དུ་ཤར་བས་གཟུང་འཛིན་གྱི་མཚན་མ་དབྱིངས་སུ་དག་ནས་ཡེ་ཤེས་ཆེན་པོའི་རྩལ་རྫོགས། མཉམ་གཞག་འོད་གསལ་རྣམ་པར་མི་རྟོག་པའི་ངང་ནས་རྗེས་ཐོབ་གང་ཤར་རང་གྲོལ་གྱི་ཡེ་ཤེས་གསལ་ལ་མི་རྟོག་པའི་དགོངས་པ་རང་བྱུང་རང་བཞེངས་སུ་འཁྲུངས་པས་མཉམ་རྗེས་རེས་འཇོག་གི་ཤུན་པ་བུད་ནས་རིས་མེད་འོད་གསལ་འཁོར་ཡུག་གི་ཏིང་ངེ་འཛིན་ལ་དབང་འབྱོར་ཏེ། སློབ་དཔོན་ཆེན་པོ་པདྨ། བི་མ་ལ་མི་ཏྲ། ཧཱུྃ་མཛད། སངས་རྒྱས་གསང་བ། བཻ་རོ་ཙ་ན། མཁའ་འགྲོ་མཚོ་རྒྱལ། ཉང་། ཆོས་དབང་། ཀུན་མཁྱེན་ཆོས་རྗེ། རྒྱལ་བ་ལྔ་པ་ཆེན་པོ། ཡབ་རྗེ་རིག་འཛིན་ཆེན་པོ་སོགས་རྒྱ་བོད་ཀྱི་པཎ་གྲུབ་མང་པོའི་ཡེ་ཤེས་ཀྱི་སྒྱུ་མའི་སྐུ་མངོན་དུ་སྣང་བས་སྤྲུལ་པའི་དཀྱིལ་འཁོར་སྤྲོས་ཏེ་དབང་བསྐུར་བྱིན་གྱིས་བརླབས་ཤིང་། ཟབ་ལམ་གྱི་གནད་རྣམས་ལྷུག་པར་བཀྲལ་ནས་རྗེས་སུ་གདམས་པ་དང་། རྡོར་སེམས། ཡང་ཕུར། གཤིན་རྗེ་གཤེད། ཐུགས་རྗེ་ཆེན་པོ། ཞི་ཁྲོ། རྣལ་འབྱོར་མ། རིག་པའི་རྒྱལ་པོ་སོགས་ཡི་དམ་གྱི་ལྷ་དང་། སངས་རྒྱས་བྱང་སེམས་དུ་མས་ཀྱང་ཞལ་མངོན་ཏུ་བསྟན་ཏེ། བྱིན་རླབས་ལུང་སྟོན་པ་སོགས་ཀྱིས་དབུགས་དབྱུང་བ་དང་བདེ་བ་ཅན།

― MLP003_Page_0154 ―

^{[མ་དཔེ་གཟིགས་ན་འདིར་གནོན།]}

[Full Size]

རྔ་ཡབ་དཔལ་རི། ལྕང་ལོ་ཅན་སོགས་དག་པའི་ཞིང་ཁམས་མང་པོར་བགྲོད་པས་ཞིང་ཡོངས་སུ་འབྱོངས་པའི་ཏིང་ངེ་འཛིན་ལ་དབང་འབྱོར་བ་དང་། རྟོགས་པས་སྲིད་གསུམ་ཟིལ་གྱིས་ནོན་ཞིང་བྱིན་རླབས་ཀྱིས་མ་མོ་མཁའ་འགྲོ་ཐམས་ཅད་དབང་དུ་འདུས་པས་ཟབ་དོན་ཆོས་ཀྱི་བགྲོ་བའི་བཀའ་མོལ་མི་དང་མི་ལབ་པ་བཞིན་དུ་གྱུར་ལ། རྡོ་རྗེའི་ཆོས་སྐྱོང་སྤྱི་དང་། ཁྱད་པར་མ་མགོན། གཟའ། ལྷ་ཆེན། ལས་གཤིན། རྒྱལ་བཙན་སོགས་ཀྱིས་ཕྲིན་ལས་བསྒྲུབ་པར་དམ་ནོད་ཅིང་། བྲན་དུ་ཁོལ་བས་མི་དང་མི་མ་ཡིན་པ་ཐམས་ཅད་ཀྱིས་མཆོད་བསྔགས་བཀུར་བའི་གནས་སུ་གྱུར་པ་ཡིན་ཏེ་མང་དུ་སྨོས་པས་ཅི་ཞིག་བྱ། ཐོས་བསམ་གྱིས་ཇི་ལྟར་གཏན་ལ་ཕེབས་པའི་དོན་སྒོམ་བྱུང་གི་ཤེས་རབ་ཞི་གནས་ཀྱི་ཏིང་ངེ་འཛིན་དང་འབྲེལ་བའི་ལྷག་མཐོང་རྣམ་པར་མི་རྟོག་པ་བློ་བྲལ་གྱི་ཡེ་ཤེས་རང་གསལ་རྗེན་པར་གཟིགས་པས། ཡུལ་དུས་གང་ལའང་ཆགས་ཐོགས་མེད་པའི་མངོན་པར་མཁྱེན་པ་མ་བཙལ་ལྷུན་གྲུབ་ཏུ་མངའ་བས་ཉིན་རེ་བཞིན་དུ་གསུང་བརྟག་ཞུ་བ་མང་དུ་འབྱུང་བ་དེ་ཐམས་ཅད་ལ་མཚན་ལམ་སྒུག་པ་དང་མོ་ཕྱ་རྩིས་སོགས་ཀྱི་རྟེན་འབྲེལ་ལ་བལྟོས་མི་དགོས་པར་འཕྲལ་དུ་དྲུང་ཡིག་རྣམས་ལ་གསུང་སྤོད་མཛད་པ་བཞིན་འཆུག་པ་མེད་པ་ཐིག་བབ་པ་ལྟར་འབྱུང་བ་དང་། དུས་ཀྱི་འགྱུར་ལྡོག་ཀྱང་སྔར་ཆུ་ཕོ་བྱི་བའི་ནང་གི་མནལ་ལམ་དུ། ཆེ་བཙན་ཆེན་པོས་བསྔགས་འོས་དེ། །མེལ་ཚེ་བཞིར་ཕབ་ལྔ་པ་ལ། །ངོ་མཚར་ནམ་མཁའི་འཇའ་ཚོན་བཞིན། །ཞེས་དང་། ཡང་ཆུ་ཕོ་ཁྱི་ལོའི་མནལ་ལམ་དུ། བགྲང་བྱ་བཅོ་ལྔ་ནས་བཟུང་སྟེ། །ཉི་ཤུ་གཅིག་དང་ལྔ་ཡི་མཐར། །ཞེས་གོང་ས་རྒྱ་ཕེབས་ཀྱི་སྐུ་ཚེའི་འཕྲང་དང་། མེལ་ཚེ་བཞིར་ཕབ་དང་ལྔ་པར་ནམ་མཁའི་འཇའ་ཚོན་ཞེས་པ་ནི་ཉེར་བཞི་ལ་ཆབ་སྲིད་ཤོར་ཞིང་། ཉེར་ལྔ་ལ་གཤེགས་པར་གསལ་བར་བསྟན་པ་དང་། ལུང་བསྟན་སྔ་མའི་འཕྲོས་ནས། མ་མོ་སྲིད་པའི་རྒྱལ་མོ་ཡིས། །སྦྱིན་འགྱེད་དབུས་གཙང་ཡོངས་ལ་འགྱེད། །བཟློག་ཐབས་པདྨའི་བཀའ་བཞིན་ཏུ། །བསྒྲུབ་ན་དགའ་སྟེ་སྒྲུབ་པ་དཀའ། །ཞེས་དེ་དང་རྗེས་འབྲེལ་འབྲུམ་ནད་འབྱུང་བ་དང་། ཡང་ཤིང་ཕོ་ཁྱི་ལོའི་མནལ་ལམ་དུ། སྡུག་བསྔལ་དུག་མཚོ་མི་བཟད་རླབས། །

― MLP003_Page_0155 ―

^{[མ་དཔེ་གཟིགས་ན་འདིར་གནོན།]}

[Full Size]

དབུས་སུ་འཁྲུགས་པ་ཐག་མི་རིང་། །གསེར་འོད་འཚེར་བའི་རྒྱལ་མཚན་ཡང་། །ཕལ་ཆེར་གཡའ་ཡིས་མོག་པོར་བྱས། །ཁོར་ཡུག་འཁྲིགས་པའི་ཆར་སྤྲིན་ཡང་། །འདི་ན་དུག་སེར་འབེབས་པར་བྱེད། །ཕན་པར་སྨྲ་བའི་གཏམ་ཆ་ཀུན། །མྱ་ངན་སྐྱེད་པའི་གཅོང་སྐད་ཡིན། །ད་དེ་འདི་ནས་མི་རིང་བར། །ཕན་པར་རེ་བའི་ས་བོན་ལས། །གནོད་པའི་ལོ་འབྲས་ཅི་ཡང་སྐྱེད། །གཤིན་རྗེའི་ཕྱོགས་སུ་བུས་པའི་དུང་། །མི་བཟད་དུཿཁའི་སྐུལ་མར་འགྱུར། །སྟོབས་རྩལ་འཛོམས་པ་སའི་སྒྲ་ཡང་། །ནམ་མཁའི་དབྱིངས་སུ་འཇའ་ཚོན་བཞིན། །ཞེས་སའི་སྒྲ་ནི་སངས་རྒྱས་རྒྱ་མཚོའི་མཚན་ཟུར་དང་དེ་འཕྲོས་སུ། མུ་ཁྱུད་ཟད་པའི་བཙན་མཁར་ཉིད། །མཐོ་ཡང་བློ་གཏད་ཐུབ་པ་དཀའ། །དབང་དང་བཟང་པོ་ཅན་གྱི་མཐས། །གཤེད་བཞིའི་ལོ་ལ་ཕྱོགས་སུ་གཅུ། །དེ་ཕྱིར་བཅུ་ཕྲག་གཉིས་ཀྱི་མཐས། །སྟོན་པའི་རྣམ་འགྱུར་མི་འཁྲུལ་ལོ། །ཞེས་བཅུ་ཕྲག་གཉིས་ནི་བཅུ་གཉིས་ཏེ། ཤིང་ཁྱི་ནས་ཤིང་བྱའི་བར་ཡིན་ལ། དེ་རྟིང་གཤེད་བཞིའི་ལོ་ནི་མེ་ཁྱིའི་ལོའོ། །ཡང་སྔ་མོ་ཆུ་གླང་ལོའི་མནལ་ལམ་དུ། འབྲས་དཀར་སྤུངས་པའི་ཁ་ཟས་ནང་། །རྣོ་དབལ་མཚོན་གྱི་དབལ་སོ་ཆུད། །ཅེས་འབྲས་སྤུངས་སུ་དམག་གི་འཐབ་རྩོད་དང་། དེ་འཕྲོས་སུ། མུ་ཁྱུད་ཅན་གྱི་འཁོར་ལོའི་རྩིབས། །བརྒྱད་མཐར་ནུབ་བམ་ཤར་ནས་འགས། །དཔྱད་ཤེས་བློ་གྲོས་ཅན་མཆིས་ན། །བཅུ་ཕྲག་གཉིས་མཐར་གསུམ་གྱིས་འཐུད། །ཅེས་རྒྱལ་མཆོག་ལྔ་པ་ཆེན་པོ་ཆུ་ཁྱི་ལ་ཞི་བའི་དབྱིངས་སུ་གཤེགས་ནས་ལོ་ཉི་ཤུ་རྩ་གསུམ་འདས་པ་ཤིང་བྱའི་བར་གྱི་སྡེ་སྲིད་རིན་པོ་ཆེས་དཔོན་པོ་མཛད་པའི་ལོ་གྲངས་ཀྱང་གསལ་བར་བསྟན་པས་མཚོན་ཏེ། སྤྱི་སྒོས་ཀྱི་དུས་ཀྱི་འགྱུར་བ་སོགས་ལུང་བསྟན་རྣམས་ཀྱང་ཕྱིས་ཐོག་ཏུ་ཕེབས་པའི་ཡིད་ཆེས་ཀྱི་གནས་སུ་གྱུར་པ་ཡིན་ནོ།། ༈ མདོར་ན་བདག་ཉིད་ཆེན་པོ་འདི་ནི་རྒྱལ་བ་ཀུན་དང་རྣམ་དབྱེར་མེདཔའི་དགོངས་པ་མངའ་བས་ལས་དང་པོ་པ་ལམ་དུ་འཇུག་པ་ལྟར། ཐོས་བསམ་གྱིས་གཏན་ལ་ཕབ་པའི་དོན་སྒོམ་པའི་ཤེས་རབ་ཀྱིས་ཐུགས་ཉམས་སུ་བཞེས་པས་སྤངས་རྟོགས་ཀྱི་ཡོན་ཏན་གསར་དུ་སྒྲུབ་པ་ལ་ལྟོས་དགོས་པ་མ་མཆིས་རུང་། མདོ་སྡེ་རྒྱན་ལས། སྦྱིན་མཚུངས་དེ་སྟོན་ལེན་

― MLP003_Page_0156 ―

^{[མ་དཔེ་གཟིགས་ན་འདིར་གནོན།]}

[Full Size]

འཇུག་དང་། །བདག་ཉིད་རྗེས་སུ་འཇུག་རྣམས་ཀྱིས། །སྙན་པར་སྨྲ་དང་དོན་སྤྱོད་དང་། །དོན་མཐུན་ཉིད་དུ་འདོད་པ་ཡིན། །ཞེས་གསུངས་པ་ལྟར་སྦྱིན་པས་གདུལ་བྱ་འཁོར་དུ་མ་འདུས་པ་སྡུད། སྙན་པར་སྨྲ་བས་བློ་ཆོས་ལ་འདྲེན། དོན་སྤྱོད་པས་སོ་སོའི་བློའི་རིམ་པ་ལྟར་དམ་པའི་ཆོས་ལ་བཀྲི། དོན་མཐུན་པས་དེ་དག་དམ་པའི་ཆོས་ལ་འདྲེན་ཕྱིར་རང་ཡང་དོན་དེ་ལ་མཐུན་པར་བསླབ་དགོས་པ་ལྟར། གདུལ་བྱ་རྣམས་བསྡུ་བའི་དངོས་པོ་བཞིས་འདུལ་བའི་ཕྱིར་དོན་མཐུན་པའི་མཛད་པ་བདག་གིར་བཞེས་པ་སྟེ། དེ་ཡང་སྔར་སྨོས་པ་ལྟར་དུས་རྟག་ཏུ་ཟུང་འཇུག་གི་རྣལ་འབྱོར་ལས་གཡོ་བ་མེད་བཞིན་དུ། རྒྱུན་དུ་ཆག་མེད་མཛད་པའི་ཐུགས་དམ་གྱི་འཁྲིགས་རིམ་ཡང་། སྔ་ཕྱིར་བསྒྱུར་ཁ་ཅི་རིགས་མཛད་འདུག་ནའང་། ད་ལྟའི་དུས་མཛད་བཞིན་པའི་ལུགས་ནི། ཐོ་རེངས་དུས་བཞིའི་རྣལ་འབྱོར་ལས་རིག་པ་རང་གསལ་གདབ་པའི་མན་ངག་གིས་བཞེངས་ཏེ། རྣམ་པར་མི་རྟོག་པའི་ངང་ནས་སྐྱབས་སེམས་ཡན་ལག་བདུན་པ་སྔོན་དུ་འགྲོ་བས་ཐུགས་བསྐྱེད་བཞེས། དེ་ནས་རྡོར་སེམས་སྒོམ་བཟླས་ཡིག་བརྒྱ་ཉེར་གཅིག་རེས་ཉུང་མཐའ་མཛད་པ། བླ་མའི་རྣལ་འབྱོར་ཀུན་འདུས་ཨོ་རྒྱན་དུ་བསྒོམས་ནས་བླ་མ་སྐུ་གསུམ་མ་དང་། ཐུན་གྱི་གསོལ་འདེབས་ཉི་མ་ལྷོ་ནུབ་མ། ཚིག་བདུན་དང་དུས་གསུམ་སངས་རྒྱས་མའི་མཐར་བཛྲ་གུ་རུ་བརྒྱ་རྩས་མཐའ་བརྟེན་པ་གསོལ་འདེབས་ཀྱི་ཚུལ་དང་། འོད་ཟེར་སྤྲོ་བསྡུའི་དབང་བཞི་བཞེས་ནས་བླ་མ་འོད་གསལ་དུ་བསྡུས་རྗེས། སླར་ཡང་སྐད་ཅིག་གིས་སྲུང་འཁོར་དང་དྲག་དམར་གསལ་འདེབས་ཀྱིས་རྩ་སྔགས་བརྒྱ་རྩས་ཉུང་མཐའ་མཛད་པ་དང་། རེས་སྤྱན་ལྟས་སོགས་དང་སྦྱར་ཏེ་སྲུང་བཟློག་གི་སྔགས་དམིགས་བསྒྱུར་ཁ། དེ་རྗེས་སྒྱུ་འཕྲུལ་ཞི་བ་ཕྱག་རྒྱ་གཅིག་པའི་རྣལ་འབྱོར་དང་སྦྱར་ཏེ་གཙོ་སྔགས་བརྒྱ་རྩ་དང་སྤྱི་སྔགས་ལྔ་བཅུ། བཀའ་བརྒྱད་ལུས་དཀྱིལ་གྱི་རྣལ་འབྱོར་དང་འབྲེལ་བར་ཧཱུྃ་སུམ་བརྒྱའི་མཐར་གཙོ་སྔགས་ལྔ་བཅུ་དང་། དཔལ་བརྒྱད་པོར་ཉེར་གཅིག་རེ། དྲག་སྔགས་སོ་ལྔ་པ་ཅུང་ཟད་རེ་དང་བཅས་པ། དེ་ནས་ཇོ་ལུགས་སྒྲོལ་དཀར། རྒྱལ་སྲས་ཐོགས་མེད་པའི་ཡི་གེ་ལྟར་སྦྱོང་རྒྱུད་གཙོ་རྐྱང་། ས་བཟང་མ་ཏིའི་ཡི་གེ་ལྟར་ལྷན་

― MLP003_Page_0157 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱེས་ཀྱི་རྣལ་འབྱོར་དང་སྦྱར་ཏེ། དགྱེས་རྡོར་གྱི་དེ་བ་པི་ཙུ། བདེ་མཆོག་གི་ཡིག་བདུན། འཇིགས་བྱེད་ཀྱི་ཧྲཱིཿཥྚྲི། དུས་འཁོར་གྱི་རྣམ་བཅུ་དབང་ལྡན། སྣ་ཚོགས་ཡུམ་གྱི་ཕྲཻམ་བི་ཤྭ། དོང་སྤྲུགས་ཕྱག་རྒྱ་གཅིག་པའི་ཡིག་བརྒྱ་རྣམས་དང་། རེས་ཆོས་དབང་གི་ཚེ་དཔག་མེད་གོང་ཁུག་མ་རེ་ཡང་མཛད། གཞན་ཡང་འབྲུ་གསུམ་གྱི་འགོག་བཟླས་དང་། རྡོ་རྗེའི་བཟླས་པའང་ཅི་རིགས་མཛད་ནས་རྫོགས་རིམ་ལ་ཅུང་ཟད་མཉམ་པར་འཇོགདེ་ནས་ནམ་སེང་ལ་ཐུན་གྱི་གསོལ་འདེབས་སྤྲོས་བྲལ་བདེ་ཆེན་མ་དང་། རྡོ་རྗེ་རྣལ་འབྱོར་མའི་བསྐྱེད་རིམ་དང་སྦྱར་ཏེ་བཟླས་པ་བརྒྱ་རྩ་དང་། རྫོགས་རིམ་གཏུམ་མོ་རླུང་སྦྱོར་སོགས་ཅི་རིགས། དེ་ནས་དཀར་གཏོར་ཆ་བཞི། ཛམ་བྷ་ལ་སེར་ནག་དམར་གསུམ། ལོ་མ་གྱོན་མ། ལོཀྟྲི། ཆ་གསུམ་རྣམས་ཀྱི་གཏོར་མ་དང་། རྣམ་འཇོམས། བཅུ་གཅིག་ཞལ་གྱི་གཟུངས་རིང་། ཡེ་ཤེས་སྐུ་མཆོགདམ་བཅའ་ཉི་ཤུ་པ། རྩ་ལྟུང་བཤགས་པ། ཤེར་སྙིང་བདུད་བཟློག་བཅས་པ། བཟང་སྤྱོད། བྱམས་སྨོན། སྨོན་ལམ་སྟོབས་ཆེན་རྣམས་ཀྱི་ཞལ་འདོན་ཚར་རྗེས། ཉིན་མོའི་སྟན་ལ་ཕེབས་ཏེ། གཟིམས་ཆུང་རྟེན་མཆོད་ཀྱི་མདུན་ཏུ་སྐྱབས་སེམས། གནས་ཡོ་བྱིན་བརླབས། སྤྱན་འདྲེན་ཁྲུས་གསོལ། སོ་སོའི་སྒོས་ཕྱགལྟུང་བཤགས། གཙོ་རྒྱལ་མ། བཟང་སྤྱོད་ཀྱི་ཡན་ལག་བདུན་པ་རྣམས་དང་བསྟུན་ཕྱག་བརྒྱའམ་ལྔ་བཅུ་ཉུང་མཐའ་མཛད་པ་རེ་གནང་རྗེས། ཉིན་མོ་སྣང་བ་རྒྱས་འདེབས་པའི་རྣལ་འབྱོར་སྣང་སེམས་ཐམས་ཅད་ཡེ་གྲོལ་སོར་བཞག་ཆེན་པོའི་ངང་ལ་མཉམ་པར་འཇོག་པ་དང་། དེ་ལས་བཞེངས་ཏེ་ཐོག་མར་ཟབ་ཁྲིད་གསུང་དགོས་ཀྱི་དམིགས་ཐུན་རྣམས་རིམ་ཅན་དུ་གསུངས་པས། ཕལ་ཆེར་གསོལ་ཚིགས་ཡན་ཆད་འགོར་བ་ཤས་ཆེ། འོན་ཀྱང་ཁྲིད་ཁག་ཉུང་དུས་ཆོས་ཐུན་གྲོལ་ནས་གཟིགས་རྟོག་ལྟ་བུ་ཀུན་ཏུ་དོན་ཡོད་པའི་མཛད་པ་གང་འོས་ལ་འཇུག་པར་མཛད། གུང་ལ་ཐུན་མོང་པ་རྗེས་དྲན་ཡོན་སྦྱོང་སོགས་དང་ཐུན་མིན་ཟས་ཀྱི་རྣལ་འབྱོར་དང་འབྲེལ་བས་གསོལ་ཚིགས་མཛད་རྗེས། ཚིག་བདུན་གསོལ་འདེབས། གུང་ཐུན་གྱི་བསམ་པ་ལྷུན་གྲུབ་མ། དུས་གསུམ་སངས་རྒྱས་མ་སྨོན་ལམ་དང་བཅས་པ་མཛད་རྗེས། གནས་ཆེན་གྱི་ས་སྣ་

― MLP003_Page_0158 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་དང་སྦྱར་བའི་འཇིམ་ས་སྤྱིན་པོ་ལ་པར་སྐུ། འོད་དཔག་མེད། ཚེ་དཔག་མེད། ཐུགས་རྗེ་ཆེན་པོ་ཕྱག་བཞི་པ། རྡོར་སེམས། སྒྲོལ་དཀར་རྣམས་ཀྱི་སྐུ་ལྔ་རེ། ཨོ་རྒྱན་རིན་པོ་ཆེའི་སྐུ་བཅུ། གུ་དྲགཐུགས་རྗེ་ཆེན་པོ་བདེ་གཤེགས་ཀུན་འདུས། སྒྲོལ་ལྗང་། རྒྱལ་བ་ལྔ་པ་ཆེན་པོའི་སྐུ་རྣམས་རེ་རེ། སཱཙྪ་ཆེ་བ་དྲི་མེད་ཀྱི་གཟུངས་ཅན་ལྔ་དང་། ཆུང་བ་ལྔ། རེས་བྱིན་རྟེན་ལ་ཞུ་མི་དང་བསྟུན་རྗེ་ཉིད་རང་གི་སྐུ་རྣམས་ཀྱི་པར་འདེབས་མཛད། དེ་ནས་ཡང་ཐོག་ལ་ཞབས་འཆག་དང་བསྟུན་འོག་མིན་ཡང་རྩེའི་བློས་བསླངས་མདུན་དུ་ཕྱག་དང་སྨོན་ལམ་རེ་ཡང་མཛད། དེ་རྗེས་གཟིམས་ཆུང་དུ་ཕེབས་ཏེ། མཇལ་ཕྱག་ཞུ་མི་སོ་སོའི་རེ་བ་སྐོང་བ། བཀའ་ཤོག་གནང་དགོས། བཀའ་རྩོམ་གཟིགས་རྟོག་འབེལ་གཏམ། དབང་ལུང་སོགས་ཆོས་སྦྱིན། བྱ་བ་ལས་ཀྱི་འཁོར་ལོའི་ཞལ་འཁོས་སོགས་ཀྱི་མཛད་པ་ཇི་ལྟར་འོས་པས་དུས་འདའ་བའི་ངང་ནས། ཉི་མ་ནུབ་པ་དང་ཡང་ཐོག་ཏུ་ཞབས་འཆག་རེ་མཛད་རྗེས་གཟིམས་ཆུང་མགོན་ཁང་དུ་ཕེབས་ཏེ། གཉུག་མའི་ཧེ་རུ་ཀ་དཔལ་ཆེན་པོར་གསལ་བའི་ལྗགས་བཟླས་ཅུང་ཟད་ཙམ་དང་བཅས་པ་སྔོན་དུ་འགྲོ་བས། བླ་མ་ཡི་དམ་གྱི་འདས་གཏོར། ལེགས་ལྡན། ཕྱག་བཞི་པ། མ་ནིང་། ཞལ་བཞི་པ། སྔགས་སྲུང་། སྡེ་ལྔ། ལྷ་ཆེན། ཁྱབ་འཇུགརྣམ་སྲས། ཞིང་སྐྱོང་མ་མོ་རྣམས་དང་། རྗེས་འབྲང་སྐོར་གྱི་གཏོར་ཆོགགཞི་བདག་སྤྱི་གཏོར་དང་བཅས་པའི་གཏོར་བསྔོ། དེ་རྗེས་གཤིན་རྗེ་གཤེད་ཀྱི་རྣལ་འབྱོར་གྱི་སྙིང་པོ་ཉེ་སྙིང་རྩ་སྔགས་རྣམས་ཀྱི་ལྗགས་བཟླས་ཅི་རིགས་ཀྱི་མཐར། ཕྱིར་བཟློག་གི་སྒོམ་བཟླས་ཐུན་གཏོར་དང་བཅས་པ། དེ་ནས་གཟིམས་མལ་དུ་ཕེབས་ཏེ། རྡོ་རྗེ་ཕུར་པའི་རྣལ་འབྱོར་གྱི་ཀི་ལ་ཡ་ལྔ་བཅུ་རེ། ཐུགས་རྗེ་ཆེན་པོའི་རྣལ་འབྱོར་གྱི་ངག་བཟླས། འགོག་བཟླས། རྡོ་རྗེའི་བཟླས་པ་རྣམས་ཅི་རིགས་ནས། འོད་གསལ་དུ་བཅུག་པའི་ངང་ལ་མཉམ་པར་འཇོག་པ། དེ་ལས་བཞེངས་ནས་སྲོད་ཐུན་གྱི་གསོལ་འདེབས་དང་། སྲོད་དུས་ཤེས་པ་ནང་དུ་བཟུང་བའི་མན་ངག་གིས་བདེ་སྟོང་གི་ཡེ་ཤེས་ངོས་བཟུང་ནས་དེའི་ངང་བསྐྱང་བ། སྐབས་རེར་མཚན་ལམ་སོགས་དང་བསྟུན་ནས་ཚེ་སྒྲུབ། བསྲུང་བཟློག ཀུ་སུ་ལའི་ཚོགས་དཀར་འགྱེད་
ཀྱི་སྤྱན་དམིགས་རེའང་མཛད། དེ་ནས་གུང་ཐུན་གྱི་གསོལ་འདེབས་གནང་རྗེས་ནམ་གུང་ཤེས་བྱ་བུམ་པར་དྲིལ་བའི་མན་ངག་གིས་མཚན་མོའི་རྣལ་འབྱོར་དང་ལྡན་པས་མནལ་གྱི་འོད་གསལ་གྱི་ངང་ལ་གཟིམས་པ་ཡིན་ནོ། །

དབང་བཞིའི་རྟོགས་པའི་ཉམས་མྱོང་ཐུགས་རྒྱུད་ལ་རིམ་པར་འཕེལ་བས་སྐལ་བ་དང་འཚམས་པར་འགྲོ་དོན་མཛད་ཚུལ། བུམ་དབང་གི་རྟོགས་པའི་ཉམས་མྱོང་ཐུགས་རྒྱུད་ལ་འཕེལ་བས་གཙོ་བོར་སྐུའི་འགྲོ་དོན་མཛད་ཚུལ།

― MLP003_Page_0159 ―

^{[མ་དཔེ་གཟིགས་ན་འདིར་གནོན།]}

[Full Size]

༈ བཞི་པ་དབང་བཞི་རྟོགས་པའི་ཉམས་མྱོང་ཐུགས་རྒྱུད་ལ་རིམ་པར་འཕེལ་བས་སྐལ་བ་དང་འཚམ་པའི་འགྲོ་དོན་མཛད་ཚུལ་ལ་བཞི་ལས། དང་པོ། བུམ་དབང་གི་རྟོགས་པའི་ཉམས་མྱོང་ཐུགས་རྒྱུད་ལ་འཕེལ་བས་གཙོ་བོར་སྐུའི་འགྲོ་དོན་མཛད་ཚུལ་ནི། དགུང་ལོ་བཅུ་པ་མྱོས་བྱེད་ཅེས་པ་ཤིང་མོ་ལུག་གི་ལོའི་སྟོན་ཡབ་རྗེ་གསང་བདག་ཆེན་པོ་ལ་བཀའ་བརྒྱད་བདེ་འདུས་ཀྱི་དབང་གསན་པ་ནས་བརྩམས་ཏེ། དགུང་ལོ་སོ་གཅིག་པ་མེ་འབྲུག་གི་ལོ་ཡན་ཆོད་དུ་སྔར་ཐུགས་རྒྱུད་ལ་དབང་གི་ས་བོན་ཐེབས་པ་བྱིན་རླབས་ནུས་པའི་སྟོབས་ཀྱིས་བུམ་དབང་གི་རྟོགས་པའི་ཉམས་མྱོང་རིམ་གྱིས་འཕེལ་ཏེ་ཡུལ་སྣང་ཐམས་ཅད་གསལ་སྟོང་མཉམ་པ་ཉིད་དུ་གཏན་ལ་ཕེབས་པ་ཤས་ཆེར་སྐུའི་འགྲོ་དོན་སྤྱོད་པའི་དུས་ཡིན་པའི་ཕྱིར། གཉིས་མེད་ཀྱི་དགོངས་པ་ལས་མ་གཡོས་བཞིན་དུ་སྐུའི་བཀོད་པ་རྣམ་པར་འཕྲུལ་པ་ཆེན་པོས་ཤོད་ཆེན་སྐྱི་ལུང་སོགས་དབུས་གཙང་གི་ཡུལ་ལྷོ་བྱང་ཐ་དད་པ་དུ་མར་ཆིབས་བསྐྱོད་དེ། ཡུལ་དང་གང་ཟག་རབ་འབྲིང་ཐ་གསུམ་གྱི་གནས་ལུགས་ལ་ཡེ་ཤེས་ཀྱི་སྤྱན་གྱིས་གཟིགས་མོ་རྒྱ་ཆེར་མཛད་ཅིང་། གཞན་ཕན་མཁའ་ཁྱབ་ཀྱི་ཐུགས་རྗེ་ཆེན་པོ་ལྷོངས་པའི་རྐྱེན་གྱིས། རིས་མེད་པའི་གདུལ་བྱ་མཐའ་ཡས་པས་སྐུའི་དཀྱིལ་འཁོར་བསོད་ནམས་ཀྱི་མིག་གིས་མཐོང་བ་ཙམ་དང་། དེ་ལ་བརྟེན་ནས་བསྟོད་བསྔགས་མཆོད་བཀུར་སོགས་འབྲེལ་པ་ཇི་ལྟར་ཐོགས་པ་ཀུན་གྱི་རྒྱུད་ལ་རྣམ་གྲོལ་གྱི་ས་བོན་བཞག་པས་འཁོར་བ་མཐའ་ཅན་ཏུ་མཛད་པ་སྟེ། དེ་ཡང་སྐུ་གཞོན་ནུའི་དུས་སུ། ཆོས་ཀྱི་གསན་པ་དང་སྒྲུབ་པ་མཛད་པའི་ཕྱིར་ཡུལ་གཞན་དུ་ཐེགས་པ་དང་། ཕྱིས་གདུལ་བྱ་དད་ཅན་རྣམས་ཀྱིས་བསོད་ནམས་ཀྱི་ཞིང་དུ་སྤྱན་དྲངས་པ་སོགས་ཆེ་ལོང་ཙམ་སྔར་དུས་སྐབས་སོ་སོའི་ཐད་དུ་སྨོས་པར་མ་ཟད། ཐམས་ཅད་ནི་བརྗོད་ཀྱིའང་མི་ལང་བས་འདིར་གཙོ་ཆེ་བར་རགས་ཙམ་ཞིག་བརྗོད་

― MLP003_Page_0160 ―

^{[མ་དཔེ་གཟིགས་ན་འདིར་གནོན།]}

[Full Size]

ན། དགུང་ལོ་ཉེར་གཅིག་པ་མེ་སྟག་ཟླ་བ་དང་པོའི་འགོར་སྐྱི་ཤོད་དུ་ཐེགས་ཏེ། གྲུ་འཛིན་གྱི་ཕོ་བྲང་ཆེན་པོར་ལྷ་མིའི་སྟོན་པ་རྒྱལ་མཆོག་ལྔ་པ་ཆེན་པོའི་སྤྱན་སྔར་གཡའ་མ་ལུང་ནས་སྤྱན་དྲངས་པའི་གཏེར་རྫས་རྣམས་གཟིགས་འབུལ་མཛད་པ་ན་ཆགས་ཐོགས་མེད་པའི་ཡེ་ཤེས་ཀྱི་སྤྱན་གྱིས་ཟབ་གཏེར་རྣམ་དག་ཏུ་མཁྱེན་ཏེ། ཤིན་ཏུ་དགྱེས་པའི་བཀའ་ལུང་ལྟར་གཏེར་རྫས་ཀྱིས་བཀའ་གཏད་འབུལ་བར་མཛད་པས་རྟེན་འབྲེལ་གྱི་སྒོ་དང་པོར་འགྲིགདེ་ནས་ས་སྤྲེལ་ལོ་ས་གའི་ཟླ་བ་ལ་གོང་མའི་ལུང་བཞིན་སྐྱི་ཤོད་དུ་ཐེགས་ཏེ། ལྷ་ལྡན་དཀྱིལ་འཁོར་ལྡིངས་སུ་སྐུ་ཚེའི་སྒྲུབ་པ་མཛད་པའི་སྐབས་ཤིགརང་བྱོན་ལྔ་ལྡན་ཐུགས་རྗེ་ཆེན་པོའི་སྐུ་འཛུམ་ཞིང་བཞད་པའི་གསུང་གིས་དབུགས་དབྱུང་བ་དང་བྱིན་གྱིས་བརླབས་པའི་མཚན་མ་ངོ་མཚར་བ་གཟིགས། ཟླ་བ་ལྔ་པའི་ཉེར་གཅིག་གི་ཉིན་ཕོ་བྲང་རྩེར་ཕེབས་ནས་རིམ་པར་གཏེར་གསར་གཤིན་རྗེ་གཤེད་དྲེགས་འཇོམས་དང་། རིག་འཛིན་ཐུགས་ཐིག་གི་དབང་ལུང་མན་ངག་དང་བཅས་པ། གཞན་ཡང་ཟླ་བ་གསུམ་དུ་ཉེ་བར་རྩེར་བཞུགས་ནས། མཁའ་འགྲོ་སྙིང་ཐིགཐེག་མཆོག་མཛོད། ཚེའི་དབང་བཀའ་སོགས་ཆོས་བཀའ་མང་དུ་འབུལ་བར་མཛད་ཅིང་། བཟང་ཡུལ་བཀྲ་ཤིས་སྟེང་སྐོར་གྱི་ས་ཆ་སྦྱོར་འཇག་དང་། འཕྲལ་གྱི་བསྙེན་བཀུར་གྱ་ནོམ་པ། ཕྱིར་ལམ་ཞབས་སྐྱེལ་གྱི་ཆེབས་དྲེལ་མི་སྣ་དང་བཅས་སྩལ་ཏེ། ཆུ་ཤུར་བརྒྱུད་རང་གནས་སུ་ཕྱིར་ཕེབས། མི་རིང་བར་གོང་མའི་ལུང་བཞིན། ཨེ་ཆོས་ལྡན་དུ་རཏྣའི་ཆོས་སྐོར་འགའ་དང་། གཉལ་དགོན་ཆུང་དུ་ཕྱག་རྡོར་སྙན་བརྒྱུད་གསན་དུ་ཐེགས། དེ་ནས་ས་བྱ་ཧོར་ཟླ་བརྒྱད་པའི་འགོར་གོང་ནས་སྤྱན་འདྲེན་གྱི་བཀའ་ཤོག་ཕེབས་པ་ལྟར་སྐྱི་ཤོད་དུ་ཆིབས་བསྒྱུར་ཏེ། ཚེས་བཅུ་གཅིག་གི་ཉིན་ཕོ་བྲང་རྩེར་གོང་ཞབས་མཇལ་ཞིང་། དེ་ཉིན་ནས་བཟུང་ཞག་བཅུ་གཉིས་ཀྱི་ཁོངས་སུ། ཕྱག་རྡོར་སྙན་བརྒྱུད། མཛོད་བདུན། ངལ་གསོ་སྐོར་གསུམ་རྩ་འགྲེལ། ཟབ་མོ་ཡང་ཐིག་རྣམས་ཀྱི་ལུང་དང་། ཉི་ཤུ་གསུམ་ནས་འཕགས་པ་ལྷ་ཁང་དུ། པད་གླིང་དང་། རྡོར་གླིང་། རཏྣ་གླིང་པ་རྣམས་ཀྱི་གཏེར་ཆོས་དང་། ཕྱག་རྡོར་སྙན་བརྒྱུད་སོགས་གཙོ་བོར་གྱུར་པའི་དབང་བཀའ་ཆེ་བ་ཉིས་བརྒྱ་སྐོར་དང་། བྱིན་

― MLP003_Page_0161 ―

^{[མ་དཔེ་གཟིགས་ན་འདིར་གནོན།]}

[Full Size]

རླབས་དང་རྗེས་གནང་ཁ་ཤས་བཅས་ཞག་དགུའི་ཁོངས་སུ་རྫོགས་པར་འབུལ་བར་མཛད། དེ་སྐབས་སྙིང་ཐིག་གི་དབང་གི་དུས་སྤྲོས་བཅས་ཀྱི་དཀྱིལ་འཁོར་སྟེང་གི་ནམ་མཁར་འོད་ལྔའི་གུར་ཁྱིམ་ཡི་གེའི་འཁོར་ལོ་ཅན་རང་སྒྲ་སྒྲོག་པར་སྣང་བ་ལ་ཐུགས་རྩེ་གཅིག་ཏུ་འདྲེས་ཏེ། བདེ་སྟོང་རྣམ་པར་མི་རྟོག་པའི་ཏིང་ངེ་འཛིན་གྱི་ངང་དུ་འབྱམས་པ་གཞན་རྐྱེན་གྱི་བརྡས་སད་པར་གྱུར། སད་ནས་ཀྱང་ཏིང་ངེ་འཛིན་གྱི་ཉམས་དེས་ཞག་ཁ་ཤས་འཚོ་བ་བྱུང་། སྡེ་སྲིད་བློ་བཟང་མཐུ་སྟོབས་ཁྲི་ཕེབས་ཀྱི་ཐུགས་གཡེང་ཆོད་ནས། སླར་ཡང་གོང་ཞབས་སུ་རྙིང་མ་རྒྱུད་འབུམ། པད་གླིང་དང་། རཏྣའི་གཏེར་ཆོས་ཆ་ཚང་དང་། རྡོར་གླིང་། སངས་རྒྱས་གླིང་པ། ལས་འཕྲོ་གླིང་པ། ཤེས་རབ་མེ་འབར་སོགས་ཀྱི་གཏེར་ཆོས་རགས་རིམ་བཅས་པོད་ཆེན་བརྒྱ་ལྷག་ཙམ་གྱི་ལུང་དང་། ཐུགས་ཐིག་གི་མྱོང་ཁྲིད་ཤིན་ཏུ་སྨིན་པ་རྣམས་འབུལ་བར་མཛད་ཅིང་། གོང་ཞབས་ཉིད་ཞབས་འབམ་བསྙུན་པའི་ཚུལ་བསྟན་པར་སྐུ་རིམ་དུ་དྲག་དམར་གྱི་གཏོར་བཟློག་སོགས་དང་། ཁྱད་པར་ཀླུའི་གདོན་འགྲོལ་ཞིག་འབུལ་བར་མཛད་པའི་ཚེ། གོང་ཞབས་ཉིད་ཀྱི་འོད་གསལ་གྱི་གཟིགས་སྣང་ལ། རང་གི་ཞབས་ལ་ཤོག་རིལ་ཡི་གེ་ཅན་སྣ་ཚོགས་ཀྱིས་དཀྲིས་འདུག་པ་གཞན་གྱིས་རིམ་པར་བཀྲོལ་སོང་བ་བྱུང་ཞིང་། དེ་དང་དུས་མཚུངས་པར་རྗེ་འདི་ཉིད་ཀྱི་གཟིགས་སྣང་ལ། རྗེ་རྒྱལ་བ་མཆོག་གི་ཞབས་སྦུབས་ཅན་རག་དུང་གི་དབྱིབས་འདྲ་བ་ནས་སྔགས་པ་ཞིག་གིས་སྦྲུལ་གཟུགས་ཕྱིར་དབྱུང་བ་བསྲེག་སྦྱངས་བྱས་པའི་མཚན་མ་བྱུང་བ་ལྟར་ནངས་པར་བསྙུན་གཞི་མེད་དུ་དྭངས་པས་ཐམས་ཅད་ཡ་མཚན་པར་གྱུར་ཅིང་། དེ་ལྟར་ཟླ་བ་བརྒྱད་ཀྱི་བར་རྩེར་བཞུགས་ཏེ་ཚུར་ཡང་ཆོས་བཀའ་ཅི་རིགས་གསན་ནས་ལྕགས་ཁྱི་ནག་ཟླའི་འགོར་ཕེབས་རྫོངས་ཀྱི་གནང་སྦྱིན་དང་ཞབས་སྐྱེལ་གྱི་བཀུར་ཟོས་བཅས་དར་གླིང་དུ་ཕེབས་ཏེ། ས་ག་ཟླ་བའི་ཚེས་བཅུའི་ཉིན། གོང་ས་མཆོག་ནས་ཆོས་གཞིས་གྲྭ་རྒྱུན་སོགས་མཐུན་རྐྱེན་ཐམས་ཅད་ལྷུག་པར་སྩལ་ཏེ། འོག་མིན་ཨོ་རྒྱན་སྨིན་གྲོལ་གླིང་གི་གྲྭ་གཙང་གསར་དུ་ཚུགས་པའི་ཐོ་བཙུན་རྣམས་ཀྱི་གཙུག་ཕུད་བཞེས་རྗེས། སྡེ་སྲིད་ལྷོ་ཁར་ཆིབས་བསྒྱུར་བའི་ཆིབས་བསུར་

― MLP003_Page_0162 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་སར་ཐེགས། དེ་དུས་བྱམས་གླིང་མཁན་པོ་ནུབ་སྒོ་སྟེང་པ་དང་འབེལ་གཏམ་མཛད་པས་སྤོབས་པ་བཅོམ། དེ་ནས་ཟླ་བ་ལྔ་པའི་ཚེས་ལྔ་ལ་གྲྭ་ཚང་གི་ཚོགས་འདུ་བཅའ་སྒྲིག་སོགས་གཏན་ལ་ཕེབས་ཏེ་རང་གཏེར་གབ་རྒྱ་ཅན་གྱི་ལུང་བྱང་ལས། ཁྱད་པར་གཡོ་རུ་གཙང་མའི་སར༔ འདི་ཉིད་སྒྲུབ་ཅིང་འཆད་པའི་སྡེ༔ ཚོམ་བུ་གཅིག་ཏུ་འདུས་པ་དག༔ བརྩོན་པས་བསྒྲུབ་ན་འགྲུབ་འགྱུར་ཞིང༔ མ་འོངས་བསྟན་པ་ཆེར་འཕེལ་ནས༔ བོད་ཀྱི་བདེ་སྐྱིད་དགུང་དུ་འདེགས༔ ཞེས་ལུང་བསྟན་པའི་དོན་བཞིན་བཤད་སྒྲུབ་ཀྱི་ཆུ་བོ་མ་ལུས་པ་འདུ་བའི་གནས་སུམ་ལྡན་རིག་པ་འཛིན་པའི་འདུས་སྡེ་འདི་ཉིད་མངོན་དུ་གྱུར་ཏོ། །ལྕགས་ཕག་ཧོར་ཟླ་བཞི་པའི་མཇུག་ཏུ་གོང་མའི་ལུང་བཞིན་ཕོ་བྲང་རྩེར་ཐེགས་ཏེ། ཉང་གཏེར་མཁའ་འགྲོ་ཆེན་མོའི་ཆོས་སྐོར་རྣམས་འབུལ་བར་མཛད་ཅིང་། ཞབས་ཅུང་ཟད་བསྙུན་པའི་སྐུ་རིམ་དུ། བྱད་མ་གདོན་འགྲོལ། གྲིབ་སེལ། བསུན་བཟློག་སོགས་གནང་བས་གཞི་མེད་དུ་དྭངས། ཚུར་ཡང་དབང་རྗེས་གནང་འགའ་ཞིག་གསན་ནས་རང་གནས་སུ་ཕྱིར་ཕེབས། དེ་ནས་གྲྭ་ཕྱི་དང་འཕྱོངས་རྒྱས་རྒྱ་སྨན་རྣམས་སུ་སྤྱན་དྲངས་པ་ལྟར་རིམ་པར་ཞབས་བཅགས་ནས་དད་ཅན་མང་པོའི་རེ་བ་སྐོང་བར་མཛད། ཁྲུམས་ཟླའི་ནང་དུ་ནུབ་གཅིག་མནལ་ལྟས་ལ། དམ་སྲི་འགོང་པོའི་ཆོ་འཕྲུལ་ཡ་ང་བས་སྡིགས་སུ་བྱུང་བ་ལ་གང་ཤར་རང་སེམས་ཀྱི་རྩལ་སྣང་གཞི་མེད་རྩ་བྲལ་དུ་ཐག་ཆོད་པས། མི་ང་ཇི་ལྟར་ཞན་ཡང་པདྨའི་སྲས། །སྣང་སྲིད་ལྷ་སྐུར་ཤེས་པ་ཕྱག་རྒྱའི་གནད། །ཅིར་སྣང་སེམས་སུ་ངེས་པས་གདོད་མའི་གཤིས། །འཕོ་འགྱུར༵་མེ༵ད་པའི་རང་རིག་རྡོ༵་རྗེ༵་ཡིན། །དེ་ལ་ཁྱོད་ལས་ངས་ཀྱང་གནོད་མི་ནུས། །ནུས་ན་སྨྲ་བསམ་བརྗོད་མེད་དོན་དེ་གང་། །དེ་བས་རང་སེམས་ཀུན་གཞི་མེ་ལོང་ལྟོས། །ཕཊ་ཅེས་གསུངས་པས་ཆོ་འཕྲུལ་གྱི་སྣང་བ་བརྗོད་མེད་ཀྱི་དབྱིངས་སུ་གྲོལ་ལོ། །དེ་སོགས་མཚན་ལམ་འཚུབ་པ་མང་དུ་བྱུང་བར། ཡང་བསྐྱར་གྱི་བརྟག་པ་མཛད་པའི་གཟིགས་སྣང་ལ། རི་རོང་ནགས་ཚལ་དམ་པོའི་རྩ་བ་འདམ་རྫབ་ཀྱིས་ཁེངས་པ་ལ་མི་མང་པོ་མི་ཐར་བཞིན་དུ་བརྒལ་ནས་འགྲོ་གྱིན་འདུག་པར། རི་སྐེད་དེ་ནས་སྐད་ཕྲ་ལ་

― MLP003_Page_0163 ―

^{[མ་དཔེ་གཟིགས་ན་འདིར་གནོན།]}

[Full Size]

སྙན་པ་ཞིག་གིས། ཁྱོད་རང་དེར་འགྲོ་དོན་མེད། འདིར་ཤོག་ཟེར་བ་ལྟར་འཛེགས་ནས་ཕེབས་པས། ཕུག་པ་ཞིག་ཏུ་བུད་མེད་རས་དཀར་གྱི་གོས་དང་རུས་རྒྱན་ཅན་ཐོད་པ་བསྣམས་པ་ཞིག་བཞུགས་འདུག་པ་ལ། ཁྱེད་སུ་ཡིན་གསུངས་པས། དེ་ན་རེ། ཨེ་མ་ང་ནི་མཁའ་སྤྱོད་ཌཱ་ཀིའི་གཙོ། །ཤེས་རབ་སྒྱུ་འཕྲུལ་བདུད་འདུལ་དྲག་མོ་རྩལ། །པདྨའི་གཟུངས་མ་མཁར་ཆེན་བཟའ་རུ་གྲགས། །མིང་པོ་ཁྱོད་ཀྱིས་མི་ཤེས་ནོངས་པས་ལེན། །ཞེས་གསུངས་བར་ཕྱག་མཛད་ནས་གསོལ་བ་བཏབ་པས། སྤྱི་སྒོས་ཀྱི་ལུང་བསྟན་མང་པོ་བཤད་པའི་མཐར། ཕྱག་གི་ཐོད་པ་ནས་ཆང་ཐིགས་པ་ཞིག་གནང་བྱུང་བ་བཞེས་པས། རྣམ་པར་མི་རྟོག་པའི་རང་གདངས་བདེ་བ་ཆེན་པོས་ཁྱབ་པའི་ངང་ལ་མནལ་སད། དེ་ནས་ཆུ་ཕོ་བྱི་བའི་ལོ་ཧོར་ཟླ་དང་པོའི་འགོར། གོང་མའི་ལུང་བཞིན་ཕོ་བྲང་ཆེན་པོར་ཆིབས་བཏེག་སྟེ། ལོ་གཅིག་དང་ཟླ་བ་གསུམ་གྱི་ངོ་མཐོང་ཙམ་གྱི་བར་བཞུགས་ནས། གོང་ཞབས་སུ་ན་རག་དོང་སྤྲུགས་དང་ལེགས་ལྡན་གྱི་དབང་། ཕུར་པ་འབུམ་ནག་གི་ལུང་། ཐུགས་སྒྲུབ་ཀྱི་དབང་ལུང་སོགས་ཆོས་མང་དུ་འབུལ་བར་མཛད་ཅིང་། གཏོར་བཟློགསྐུ་ཚེའི་སྒྲུབ་པ། གདོན་འགྲོལ། བྱབ་ཁྲུས་སོགས་སྐུ་རིམ་ཡང་མང་པོ་མཛད། དེ་དུས་གོང་མ་ལྔ་པ་ཆེན་པོ་ལས་དག་སྣང་རྒྱ་ཅན་སྐོར་དང་། གསང་རྫོགས་སྒྲུབ་ཆེན་དང་འབྲེལ་བའི་རྩ་དབང་སྒྲུབ་དབང་། ཚེ་བདགཕུར་པ། འཇམ་དཔལ་རྫོགས་ཆེན་སོགས་རྙིང་མ་བཀའ་གཏེར་དང་། གསར་མའི་འཇིགས་བྱེད་ཀྱི་འཕྲུལ་འཁོར་སོགས་དབང་ལུང་མན་ངག་ཕྱག་བཞེས་དང་བཅས་པ་མཐའ་ཡས་པར་གསན་ཞིང་། གཞན་ཡང་ཞྭ་ལུ་མཁན་ཆེན་དང་། རྡོ་རྗེ་བྲག་རིག་འཛིན་ཆེན་པོ་སྤྲུལ་པའི་སྐུ་སོགས་གསར་རྙིང་གི་བླ་མ་མང་པོར་ཆོས་ཕར་གནང་ཚུར་གསན་དང་། གོང་གི་ཞབས་རིང་ནང་མ་དང་གྲྭ་ཚང་ཆེན་མོ་བཅས་པར་ཡང་ཆོས་མང་དུ་སྩལ། དེ་དུས་རྒྱལ་ཟླའི་ཚེས་གསུམ་གྱི་ནུབ་འོད་གསལ་གྱི་གཟིགས་སྣང་ལ། བུད་མེད་གཞོན་ནུ་མ་དར་དཀར་གྱི་གོས་དང་དུང་ཕྲེང་གྱོན་པ་ལྕང་ལོ་ཅན་ཞིག་བརྟན་མ་ཁང་དུ་འོངས་ནས་ཕྱག་བྱས། རིན་པོ་ཆེའི་སོར་གདུབ་ཅིག་ཕུལ་ཏེ། བསྟན་སྲིད་སྤྱི་ཆགས་དང་བཟློག་ཐབས་ཀྱི་ལུང་བསྟན་

― MLP003_Page_0164 ―

^{[མ་དཔེ་གཟིགས་ན་འདིར་གནོན།]}

[Full Size]

མང་དུ་ཞུས་རྗེས་ཁྲུང་ཁྲུང་ལ་བཞོན་ནས་ནུབ་ཕྱོགས་སུ་སོང་བ་དང་། ཡང་སྐབས་ཤིག་ནམ་མཁའི་དབྱིངས་སུ་ཉི་མའི་དཀྱིལ་འཁོར་འདྲ་བ་དམར་ངམས་འོད་འཕྲོ་བའི་དབུས་སུ་གདོང་གི་བྱད་གསལ་བས། བསྟན་སྲིད་སྤྱི་དང་སྒོས་ཀྱི་ལུང་བསྟན་ཚིགས་སུ་བཅད་པའི་དབྱངས་ཀྱིས་གསལ་བར་བསྟན། ཟླ་བ་གསུམ་པའི་འགོར། གོང་ནས་རྫོངས་བའི་གནང་སྦྱིན་ཞབས་སྐྱེལ་བཅས་འཁོས་སུ་ཕེབས་པས་སྐམ་པ་ལ་དང་ལུམ་པའི་གྲུ་བརྒྱུད་ནས་བཟང་ཡུལ་གྲོང་གསར་དུ་ཕེབས། སླར་ཡང་ཟླ་བ་བཞི་པའི་འགོར། གོང་ནས་སྤྱན་འདྲེན་འབྱོར་བ་བཞིན་རྡོ་རྗེ་བྲག་བརྒྱུད་ཕོ་བྲང་རྩེར་ཕེབས། དེར་རྒྱལ་མཆོག་དམ་པ་ཅུང་ཟད་བསྙུན་པའི་ཚུལ་བསྟན་པའི་སྐུ་རིམ་དུ། གྲྭ་ཚང་ཆེན་མོའི་གྲྭ་པ་བསྙེན་སོང་རྣམས་ཀྱིས་འབྱུང་པོ་མཐར་བྱེད་ཀྱི་ཆོ་ག་མཛད་པའི་སློབ་དཔོན་དུ་ཞབས་བསྐྱོད་ཅིང་། དེའི་སང་ཉིན་ཕོ་བྲང་རྩེར། བརྒྱགས་བརྔན་དང་རྗེས་འབྲེལ་དུ་ཨོ་རྒྱན་སྣང་སྲིད་ཟིལ་གནོན་གྱི་སྐུའི་བྱི་བྱད་དུ་ཞུགས་ཏེ། ལྷ་སྲིན་རྣམས་ལ་བཀའ་བསྒོ་དམ་བསྒྲགས་མཛད་པའི་ཚེ། སྡེ་བརྒྱད་དྲེགས་པ་མ་ལུས་པ་རང་རང་གི་དཔུང་དང་བཅས་འདུས་ནས་གུས་པས་བཀའ་ནོད་ཅིང་ལས་སྒྲུབ་པར་དམ་བཅས་པའི་རྣམ་འགྱུར་གསལ་བ་གཟིགས་པ་དང་། ཡང་གོང་མའི་ལུང་གིས་བསྐུལ་ཏེ། སྟོང་ཉིད་ཀྱི་རང་གདངས་སྙིང་རྗེ་ཆེན་པོའི་རྩལ་སྣང་བླ་མ་དྲག་པོ་གཏུམ་དྲག་འབར་བའི་སྐུར་བཞེངས་ནས་ཧོམ་མེའི་ལས་སྦྱོར་མཛད་པས་ལས་བྱེད་ཀྱི་ཕོ་ཉ་རྣམས་ཀྱིས་མཚན་རྒྱུའི་འབྱུང་པོ་མི་བསྲུན་པའི་རྐེ་ཞགས་པས་བཅིངས་ཏེ། དབང་མེད་དུ་འཁྲིད་ནས་བསྒྲལ་བཅོམ་ཞལ་དུ་སྟོབ་པ་མངོན་སུམ་དུ་གཟིགས་ཤིང་། དེ་དུས་སྨྲེ་སྔགས་འོ་དོད་ཀྱི་སྒྲ་དང་བསྲེགས་པའི་དྲི་མི་སྡུག་པ་སོགས་དེར་འཁོད་ཀུན་གྱིས་ཚོར་བ་བྱུང་། གཞན་ཡང་དྲག་པོའི་ཟོར་ལས་དང་བྱད་གདོན་འགྲོལ་བ་སོགས་སྐུ་རིམ་མཛད་པ་རྣམས་ལ་མཚན་ལྟས་ལེགས་པ་བྱུང་བ་ལྟར་གོང་གི་སྐུའང་གཞི་མེད་དུ་དྭངས། སྣྲོན་ཟླའི་ཚེས་གསུམ་གྱི་ཉིན་ལྷ་སའི་ཨེ་ཝཾ་དུ་ཕེབས་དུས་སྐད་ཅིག་དེར་གྲུབ་ཆེན་ནག་པོ་སྤྱོད་པ་རྣལ་འབྱོར་པའི་ཆ་བྱད་གཟི་མདངས་མཚུངས་པ་མེད་པས་བརྡའ་ཐབས་ཀྱི་ཕྱག་རྒྱས་བྱིན་གྱིས་བརླབས་པའི་ཚུལ་མངོན་སུམ་

― MLP003_Page_0165 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟ་བུར་ཡུད་ཅིག་གསལ་བར་གཟིགས། དེ་ནས་ཧོར་ཟླ་དྲུག་པའི་འགོར་གོང་ཞབས་སུ་མཁའ་འགྲོ་ཆེན་མོའི་བྱིན་རླབས་དང་། ཡང་རྫོང་སྙིང་ཐིག་གི་དབང་ལེ་ཚན། མ་ཅིག་གི་གཅོད་ཁྲིད་དབང་ལུང་དང་བཅས་པ་འབུལ་བར་མཛད་ཅིང་། གྲྭ་གཙང་ཚོགས་ཆེན་དང་གོང་མའི་ཞབས་ཕྱི་ནང་མ། ཕ་བོང་ཁ་ཞལ་སྔ་ནས་སོགས་ལ་དབང་ལུང་མང་པོ་དང་། ལྷ་སར་སྡེ་སྲིད་བདག་མོར་བཅས་པར་ཡང་རྐྱེན་སེལ་གྱི་དབང་བྱིན་རླབས་སོགས་མཛད་ནས། གོང་ནས་ཞབས་བསྐྱེལ་བཅས་ཕྱིར་ཕེབས་ཀྱི་ཞོར་ལ། རྡོ་རྗེ་བྲག་ཏུ་མདོ་དབང་སོགས་གསན་ཞིང་། ཕར་ཡང་པད་གླིང་དྲག་དམར་ཐེམ་མེད་ཀྱི་དབང་སོགས་སྩལ་ནས། རིམ་པར་ཡང་རྫོང་དུ་ཐེགས་ཏེ་ཉེར་ལྔའི་ཉིན་ཚོགས་བརྒྱའི་གསུང་ཆོག་མཛད་པའི་ནུབ་མོ་གཟིགས་སྣང་ལ། དྭངས་ཤེལ་བརྩེགས་འདྲའི་མཐོན་མཐིང་རྡོའི་ཕུག་པ་བཀོད་ལེགས་སྒོ་དང་ཐེམ་སྐས་རིམ་པ་ཅན་གྱི་ནང་དུ་གནུབས་ཆེན་སྔགས་འཆང་གཟི་བརྗིད་ཅན། འཁོར་རྒྱ་བན་གཞོན་ནུ་དང་། བུད་མེད་མཛེས་མ་མོན་མོའི་ཆས་ཅན་གྱི་འཁོར་དང་བཅས་པ་བཞུགས་པས་ཕྱི་གཏེར་ཐོན་པའི་ཟབ་གནད་ཀྱི་རྟེན་འབྲེལ་བདུན་དང་། གཅུང་གི་སྒོས་ལུང་སོགས་འབྱུང་འགྱུར་གྱི་ལུང་བསྟན་མང་དུ་གསུངས་ཤིང་། ཁྱད་པར་ཕུག་པའི་སྒོ་ངོས་ཡང་མཐིང་ཞུན་ལྟ་བུའི་དྭངས་པ་ཟབ་དོན་རྣམས་གསེར་གྱི་ཡི་གེའི་ཕྲེང་བར་སྣང་བ་བཀླགས་པས། དེའི་དོན་རྣམས་ཞིབ་མོར་བཀྲོལ་ནས་བརྡའ་སྤྲོད་པའི་མཚན་ལམ་བྱུང་ཞིང་། མནལ་སད་ནས་ཀྱང་བདེ་ཆེན་ཡེ་ཤེས་ཀྱི་ཉམས་མ་འགགས་པའི་རྩལ་སྣང་ལས་ཟབ་དོན་དཀའ་གནད་མང་པོ་གོ་བའི་ངེས་ཤེས་ཐུགས་ལ་རྩོལ་མེད་དུ་འཆར་བ་བྱུང་། ནངས་པར་ཡང་ཁའི་གྲུ་བརྒྱུད་བཟང་ཡུལ་དུ་ཕྱགས་ཕེབས་ནས་ཟླ་གཅིག་བར་བཞུགས་ཏེ་དར་གླིང་དུ་ཕེབས། ཡང་གོང་ནས་བ་སོའི་ཌཱ་མ་རུ་དང་གོས་ཕྱི་ནང་གི་གནང་སྐྱེས་བཅས་སྤྱན་འདྲེན་གྱི་བཀའ་ཤོག་ཕེབས་པ་ལྟར་ཟླ་བ་བཅུ་པའི་ཚེས་བཅུ་གསུམ་ལ་ཆིབས་བཏེག་སྟེ། ཕོ་བྲང་རྩེར་གོང་ཞབས་སུ་མཁའ་འགྲོ་གྲིབ་སེལ་སོགས་སྐུ་རིམ་འགའ་ཞིག་སྒྲུབ་པར་མཛད་དེ་དར་གླིང་དུ་ཕྱིར་ཕེབས་རྗེས། སླར་ཡང་སྡེ་སྲིད་རིན་པོ་ཆེ་སྐུ་བསྙུན་པའི་རྐྱེན་སེལ་དུ་སྤྱན་འདྲེན་གྱི་བཀའ་

― MLP003_Page_0166 ―

^{[མ་དཔེ་གཟིགས་ན་འདིར་གནོན།]}

[Full Size]

ཤོག་སྩལ་བ་ལྟར་མགོ་ཟླའི་འགོར་ཕོ་བྲང་ཆེན་པོར་ཐེགས་ཏེ་གོང་ཞབས་མཇལ། དེ་ནས་ལྷ་སར་ཕེབས་ཏེ་སྡེ་སྲིད་རིན་པོ་ཆེར་རྐྱེན་སེལ་གྱི་དབང་བྱིན་རླབས་འཆི་བསླུ་གདོན་འགྲོལ་སོགས་མཛད་པས་མི་རིང་བར་སྐུ་དྭངས་ཤིང་། རྩེར་གོང་ཞབས་སུའང་གྲིབ་སེལ། གདོན་འགྲོལ། འཆི་བསླུ་སོགས་དང་གྲྭ་ཚང་ལ་མཁའ་འགྲོ་གྲིབ་སེལ། དཔའ་གྲོར་ཞྭ་ལུ་མཁན་རིན་པོ་ཆེར་ལོཀྟྲིའི་རིག་གཏད་སོགས་དང་། སླར་ཡང་ཕོ་བྲང་རྩེར་འཇོམས་བྱེད་ཀྱི་གཏོར་བཟློག་ཅིག་མཛད། རྒྱལ་ཟླའི་ཚེས་གསུམ་གྱི་ནུབ་མོ་མཚན་ལམ་དུ་དཀོར་བདག་གི་ཆོ་འཕྲུལ་རྣམས་ཏིང་ངེ་འཛིན་གྱི་མཐུས་ཟིལ་གྱིས་མནན་ཞིང་། ཚེས་དྲུག་གི་ནུབ་མོ་མ་གཅིག་དཔལ་ལྷ་སོགས་བསྟན་སྲུང་དུ་མས་གུས་པས་བཏུད་དེ་དམ་ཚིག་ནོས་ནས། བོད་སྤྱི་དང་བྱེ་བྲག་གི་གནས་ཚུལ་ཐམས་ཅད་གསལ་པོར་སྟོན་པའི་འབྱུང་འགྱུར་གྱི་ལུང་བསྟན་ཕུལ་བ་ཕྱིས་འཆུག་པ་མེད་པ་ཐིག་ཕེབས་ལྟར་གྱུར། ཡང་ཚེས་བརྒྱད་ཀྱི་ནུབ་བསམ་ཡས་དབུ་རྩེ་བར་ཁང་གི་བཀོད་པ་མངོན་གསུམ་པ་བཞིན་ལས་ཡངས་ཤིང་ཆེར་འཕགས་པའི་གུང་དུ་བཀོད་ལེགས་ཀྱི་ཁྲི་གཉིས་གཤིབ་ལ་གུ་རུ་ཆོས་ཀྱི་དབང་ཕྱུག་དང་། བླ་མ་དམ་པ་བསོད་ནམས་རྒྱལ་མཚན་གཉིས་བཞུགས་པའི་འཁོར་དུ་རིག་འཛིན་རྣལ་འབྱོར་མང་པོས་བསྐོར་བའི་དབུས་སུ་ཕྲིན་ལས་རྡོ་རྗེ་ཕུར་པའི་དཀྱིལ་འཁོར་རྟེན་དང་བརྟེན་པར་བཅས་པ་མངོན་སུམ་པ་ཇི་ལྟ་བ་བཞིན་ཕྱི་ནང་སྒྲིབ་མེད་དུ་གསལ་བར་ཕུར་པ་བཀའ་གཏེར་དགོངས་དོན་གཅིག་པའི་དབང་བླ་མ་གཉིས་ཀྱིས་མགྲིན་གཅིག་ཏུ་བསྐུར་ཞིང་སྔགས་རྒྱས་བྱིན་གྱིས་བརླབས་ཏེ་བཀའ་གཏད་མཛད་པའི་མཐར། བླ་མ་གཉིས་དཀྱིལ་འཁོར་སྒྲུབ་རྫས་དང་བཅས་ཐམས་ཅད་འོད་སྔོན་པོར་ཞུ་བ་མཐིང་ཞུན་ལྟ་བུའི་ཐིག་ལེར་གྱུར་ནས་ཉིད་ཀྱི་སྐུ་ལ་ཐིམ་པའི་རྐྱེན་གྱིས་རང་ཉིད་ཀྱི་སྐུའང་ནམ་མཁའ་དང་ཁྲིག་གེ་འདྲེས་པས་སྤྲོས་བྲལ་སྟོང་ཉིད་ཀྱི་ངང་ལ་རེ་ཞིག་འདས་ཏེ་མནལ་སད། ཡང་དེའི་སང་ནུབ་འོད་གསལ་གྱི་སྣང་བ་ལ། བུད་མེད་གཞོན་ནུ་ཞིག་གིས་ལམ་སྣ་བྱས་ཏེ་ཕྱིར་ཕེབས་པས། རྡོ་སྐས་སྔོན་པོ་ཞིག་འཛེགས་པའི་སྟེང་ན་ཕྱི་ཁང་བརྩེགས་ཀྱི་རྣམ་པ་ལ་ནང་གི་སྦུབས་བྲག་ཕུག་ཏུ་འདུག་པའི་དབུས་སུ་

― MLP003_Page_0167 ―

^{[མ་དཔེ་གཟིགས་ན་འདིར་གནོན།]}

[Full Size]

རྡོ་ལེབ་དཀར་པོ་གྲུ་བཞི་པའི་ཁར་ཀྲིཥྞ་ས་རའི་པགས་པ་བཏིང་བའི་སྟན་ལ་ཆོས་རྒྱལ་སྲོང་བཙན་སྒམ་པོ་ཉིད་ཕྱག་གཡས་གཞོན་ནུ་མའི་དཔུང་པར་བཀལ་ཞིང་། གཡོན་སྦ་འཁར་བཟུང་བ། དེའི་གཡོན་ངོས་ཀྱི་བྲག་ཐེམ་ལ་འཛེགས་པའི་བྲག་གི་བྱ་སྐྱིབས་ཀྱི་མདུན་དུ་ལྗོན་ཤིང་སྡོང་པོའི་དྲུང་ན་བི་མ་ལ་མི་ཏྲ་རྒྱ་གར་པཎ་ཆེན་དང་། བཻ་རོ་ཙ་ན་བོད་བཙུན་གྱི་ཆས་ཅན། བུད་མེད་ཨཾ་རག་རུས་རྒྱན་ཅན་གཅིག་རྣམས་བཞུགས་འདུག་པར་གུས་འདུད་མཛད་པས། བི་མ་ལས། འདུ་འཛིའི་སྤྲོས་པ་ཀུན་ཆོད་སྒོ་གསུམ་པོ། །ཡང་དག་སྒྱུ་འཕྲུལ་འཁོར་ལོའི་ཕྱག་རྒྱས་ཆིངས། །རིག་པ་བཙོན་བཟུང་འཛིན་པའི་སྲོག་རྩ་ཆོད། །རླུང་སེམས་དྷཱུ་ཏིར་འདྲེས་ནས་ཟད་པའི་མཐའ། །ནམ་མཁའི་ལམ་དུ་ཉི་མའི་འོད་བཞིན་འཆར། །ཞེས་ཟབ་མོའི་གནད་ཀྱིས་གདམས་ཤིང་བསྟན་སྲིད་སྤྱི་དང་སྒོས་རྗེ་ཉིད་རང་གི་འབྱུང་འགྱུར་བླང་དོར་གྱི་ལུང་བསྟན་དུ་མ་བཤད། ཡང་སྐས་དེ་བབས་ནས་ཕེབས་པས། སྲོང་བཙན་གྱིས་བོད་སྤྱིའི་བླང་དོར་གྱི་ལུང་བསྟན་གསུངས་ནས་མཐར་སྔར་གྱི་འཆར་སྒོ་དེ་རྣམས་ཐང་ཁའི་རི་མོ་ལྟ་བུར་སོང་བའི་མོད་ལ་མནལ་སད། ཡང་དེའི་སང་ནུབ་གསུང་གི་རྒྱལ་པོ་རྡོ་རྗེ་གྲགས་ལྡན་གྱིས་རང་གཟུགས་ཆོ་འཕྲུལ་གྱི་བཀོད་པ་སྣ་ཚོགས་དང་བཅས་བསྟན་ནས་བླང་དོར་གྱི་ལུང་བསྟན་དང་ཕྲིན་ལས་སྒྲུབ་པར་དམ་ཚིག་ནོས། ཚེས་བཅོ་བརྒྱད་ཀྱི་ཉིན་གོང་ཞབས་སུ་གཏེར་གསར་གཤིན་རྗེ་གཤེད་ཀྱི་དབང་དང་ཚེ་དབང་འབུལ་བར་མཛད་པའི་ཚེ། རྒྱལ་མཆོག་དམ་པར་གཟིགས་སྣང་ཁྱད་པར་ཅན་བྱུང་བ་ནི། དཔལ་བེའུའི་རྒྱ་ཅན་ལས། དྲིན་ཅན་རྩ་བའི་བླ་མ་སྤྲུལ་པའི་སྐུ་མཆོག་ཆོས་རྒྱལ་གཏེར་བདག་གླིང་པའི་དྲུང་ནས་སུ་གཏེར་གསར་འཇམ་དཔལ་གཤིན་རྗེ་གཤེད་པོ་དྲེགས་པ་འཇོམས་བྱེད་ཀྱི་དབང་ཡང་བསྐྱར་གྱི་ཚུལ་དུ་ཞུས་པའི་ཚེ། བྱིན་འབེབས་ཀྱི་སྐབས་བསྐྱེད་རིམ་གྱི་གསལ་སྣང་ཤིན་ཏུ་ཆེ་ཞིང་། ཁྱད་པར་རྩ་བའི་ཞལ་རེག་མཐོང་ལྟ་བུ་དང་། བུམ་དབང་དུས་དཀྱིལ་འཁོར་ཡོངས་སུ་རྫོགས་པའི་རྟེན་བརྟེན་པ་ཐམས་ཅད་ཤིན་ཏུ་གསལ་བ་དེ་འདྲ་སྔོན་ཆད་ཡོང་མ་མྱོང་། གཏེར་གསར་ཚེ་དཔག་མེད་ཡང་སྙིང་ཀུན་འདུས་ཀྱི་ཚེ་བུམ་གྱི་བྱིན་རླབས་

― MLP003_Page_0168 ―

^{[མ་དཔེ་གཟིགས་ན་འདིར་གནོན།]}

[Full Size]

སྐབས། རྡོ་རྗེ་སློབ་དཔོན་ད་ལྟའི་སྐུའི་སྣང་བ་ཇི་ལྟ་བ་དྭངས་ཤེལ་གྱི་ངོས་འཇའ་ཚོན་ཤར་བ་ལྟ་བུའི་ནང་དུ་སློབ་དཔོན་ཆེན་པོ་ཟ་ཧོར་མའི་གཡས་སུ་ལྷ་ལྕམ་ལྷ་མོའི་ཆ་བྱད་དང་། གཡོན་དུ་མཁར་ཆེན་བཟའ་རྣལ་འབྱོར་མའི་ཆ་ལུགས་ཅན། མདུན་དུ་ལོ་ཆེན་བཻ་རོ་ཙ་ན་གསང་གོས་སྔོན་པོའི་སྟེང་དུ་ཆོས་གོས་དང་པཎ་ཞུ་དམར་པོའི་ལྡེམ་ཡར་སློག་ཕྱག་གཡས་སྡིགས་མཛུབ་ཀྱི་རྩེ་ལས་ཐོག་འཕེན་པའི་རྣམ་པ་ཅན། གཡོན་དཀུར་བརྟེན་པ། སྟག་ལྤགས་ཀྱི་སྟན་ལ་བཞུགས་པ་གསལ་ཞིང་། ཚེ་ཆང་གནང་བའི་དུས་མཚོ་རྒྱལ་གྱི་ཕྱག་གི་ཐོད་པ་ལས་བདུད་རྩི་བབས་ཏེ་ཚེ་ཆང་གི་བདུད་རྩི་ལ་འདྲེས། ཚེ་མདའི་རྒྱས་གདབ་ཀྱི་ཚེ། སྙིང་གར་རྟ་མགྲིན་ཡང་གསང་ཁྲོས་པ་ཞལ་གསུམ་ཕྱག་དྲུག་པར་གསལ་བའི་སྐུ་ལས་འཕྲོས་པའི་མེས་རྩ་ནང་བརྒྱུད་དེ་རྩ་སྒོ་ནས་ཡར་མེ་ལྕེའི་རྩེ་ལ་སྡིག་པའི་ཚྭ་ཚྭ་འཕྲོ་བའི་ཉམས་ཤར་རོ། །ཞེས་གསུངས་སོ། །དེ་བཞིན་དུ་གཞན་ཡང་པད་དཀར་རྒྱ་ཅན་དུ། གནས་བཞི་ནས་ༀ་ཨཱཿཧཱུྃ་ཧྲཱིཿབཞིའི་ཡི་གེའི་འཕྲོ་འདུས་དབང་བཞི་འགའ་ཞིག་ལ་བསྐུར། དེའི་རྐྱེན་གྱིས་ཆོས་རྒྱལ་གཏེར་བདག་གླིང་པ་ཐོད་ཕྲེང་རྩལ་དུ་སོང་། དེའང་ཟ་ཧོར་མར་གནས་འགྱུར། ཞེས་དང་། དུང་དཀར་རྒྱ་ཅན་དུ། གཏེར་བདག་གླིང་པ་ད་ལྟའི་སྐུའི་ཆ་ལུགས་ཇི་ལྟ་བ་སྐྱིལ་ཀྲུང་གིས་བཞུགས་པའི་དབུ་སྐྲ་ཐོར་ཚུགས་ཞྭ་མེད་ཞལ་མདངས་དཀར་ཞིང་སྤྱན་ཧུ་རེ་གཟིགས་པ། དེའི་ངང་ནས་སློབ་དཔོན་ཟ་ཧོར་མ་རྡོ་རྗེ་འཆང་དུ་གནས་འགྱུར། ཞེས་དང་། དེ་ནས་མཚན་བརྒྱད་སོགས་བླ་མ་བརྒྱུད་པ་ཁྲོམ་ཚོགས་སུ་རམ་རམ་གསལ་ཞིང་། དེའི་ནང་ནས་གཏེར་བདག་གླིང་པ་ཞལ་དཀྱིལ་ཤིན་ཏུ་གསལ་ཞིང་ཞལ་འཛུམ་པ་ཚེམས་དཀར་པོ་སྐྱ་ཁྲིག་གེ་བ་གསལ་བ་ཤར། ཞེས་དང་། རྒྱལ་མཚན་གྱི་རྒྱ་ཅན་དུ། དེ་ནས་ཇོ་མོ་དང་མཉམ་དུ་གཏེར་བདག་གླིང་པ་ད་ལྟའི་སྐུའི་རྣམ་པ་ཅན་བྱོན། ཇོ་མོའི་ཞལ་ནས། ཆོས་རྣམས་ཀ་ནས་དག་པ་སྟེ། །གཞི་གདོད་མ་གནས་ལུགས་ཆོས་སྐུ་ཡིན། །ཕྱི་དབྱིངས་ཀྱི་སྣ་ཚོགས་ཤར་བ་རྣམས། །དེ་གཏད་མེད་ཟང་ཐལ་ལོངས་སྐུ་ཡིན། །ལར་རྟོག་པའི་འཕྲོ་འདུ་གང་ཤར་བ། །དེ་རང་ངོ་འཕྲོད་པ་སྤྲུལ་སྐུ་ཡིན། །ཞེས་གསུངས་པའི་མུས་ལ་འོད་ཟེར་ཞིག་

― MLP003_Page_0169 ―

^{[མ་དཔེ་གཟིགས་ན་འདིར་གནོན།]}

[Full Size]

འཕྲོས་པས་རྐྱེན་བྱས་མདུན་གྱི་བླ་མ་རྣམས་རང་གི་སྙིང་དབུས་སུ་འཇའ་ཤེལ་ལྟ་བུའི་ཁ་དོག་ལྔ་པ་སོར་གང་ཙམ་ཞིག་གསལ་སིང་ངེ་བའི་ཉམས་ཤར། ཞེས་དང་། གསེར་ཉའི་རྒྱ་ཅན་ཏུ། ཟུར་ཆེན་དང་གཏེར་བདག་གླིང་པ་གཉིས་ཀྱི་སྐུལ་ཚིག་སྐབས་ཞལ་དཀར་ཞིང་འཛུམ་པ་ཙམ་ལས་འདི་ཡིན་མ་བྱུང་། ཞེས་དང་། ཤྭ་ནའི་རྒྱ་ཅན་ཏུ། བྱ་གླང་སྦྲུལ་དང་ཁྱི་ལོ་པ། །བྱང་དང་ཤར་དང་ལྷ་ོཕྱོགས་འབྱུང་། །ཁྱད་པར་གོས་དཀར་ལྕང་ལོ་ཅན། །ན་ཚོད་ཡར་རྒན་མི་ཞིག་དང་། །ཐོག་མར་རྟེན་འབྲེལ་འགྲིག་ན་ཤིས། །ཞེས་པ་ལ་སོགས་པས་མཚོན་ཏེ་དག་པའི་གཟིགས་སྣང་སྔ་ཕྱིར་དུ་མ་སྣང་ནའང་ཐམས་ཅད་བརྗོད་པར་མ་ནུས་སོ། །ཟླ་མཇུག་དེར་གོང་ནས་གནང་སྦྱིན་ཞབས་སྐྱེལ་བཅས་དར་གླིང་དུ་ཕྱིར་ཕེབས། ཡང་ཤིང་སྟག་ནག་ཟླའི་མཇུག་ལ་གོང་མའི་ལུང་བཞིན་ཕོ་བྲང་ཆེན་པོར་ཐེགས་ཏེ། ཟླ་གཅིག་ལྷག་ཙམ་བཞུགས་ནས། གོང་ཞབས་སུ་འཇོམས་བྱེད་ལ་སོགས་པའི་དབང་དང་། བར་ཆད་ལམ་སེལ་གྱི་ལུང་སོགས་ཆོས་བཀའ་ཅི་རིགས་འབུལ་བར་མཛད་ཅིང་། བྱད་འགྲོལ། གདོན་འགྲོལ། བྱབ་ཁྲུས། འཆི་བསླུ། མཁའ་འགྲོ་གྲིབ་སེལ། བསུན་བཟློག་དང་འབྲེལ་བའི་ཞབས་བརྟན། དྲག་དམར་གྱི་སྒྲུབ་པ་སྔོན་འགྲོའི་སྲེག་འཕང་། འཇོམས་བྱེད་ཀྱི་གཏོར་བཟློགཀླུ་ཆོག་སོགས་སྐུ་རིམ་ཇི་སྙེད་པ་དང་། སྡེ་སྲིད་བདག་མོ་ཡུམ་སྲས་བཅས་པར་ཡང་དབང་བྱིན་རླབས་སོགས་འགྲོ་དོན་ཅི་རིགས་མཛད། ཉེར་བཞིའི་ཉིན་རྗེ་འདི་པར་སྡེ་སྲིད་རིན་པོ་ཆེ་ནས་ཞབས་བརྟན་གྱིི་གསོལ་འདེབས་བསྒྲུབས་ཤིང་། ཉེར་ལྔ་ལ་ཆིབས་བཏེག་པའི་ལམ་ཞོར་འབྲུག་པ་སྤྲུལ་སྐུ་རིན་པོ་ཆེ་རྣམ་རྒྱལ་སྒང་དུ་བཞུགས་སྒར་གྱི་སར་བཀུར་སྟི་ཆེན་པོས་སྤྱན་དྲངས་ཏེ། ཚེ་རྟའི་དབང་ཞུས་ཤིང་། རིམ་པར་ལུམ་པའི་གྲུ་བརྒྱུད་དར་གླིང་དུ་ཕེབས་ནས་གྲྭ་ཚང་དུ་ཕུར་པ་སྤུ་གྲིའི་ཚོགས་སྒྲུབ་དང་། ན་རག་དོང་སྤྲུགས་ཀྱི་ཆོ་གའང་འཛུག་པར་མཛད། ཆུ་སྟོད་ཟླ་བའི་ཉི་ཤུའི་ནུབ་འོད་གསལ་གྱི་གཟིགས་སྣང་ལ་མཁའ་ལྡིང་ལ་ཆིབས་ཏེ་ནམ་མཁའི་དབྱིངས་ལ་ཕེབས་པ་ལས། རིན་པོ་ཆེའི་རི་དབང་དབྱིབས་ལེགས་ལྷུན་ཆགས་པ་ནགས་ཚལ་མེ་ཏོག་ཆུ་མཚོས་བསྐོར་བར་རིན་པོ་ཆེ་སྣ་བདུན་

― MLP003_Page_0170 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་ཁང་བཟང་བལྟ་བས་མི་ངོམས་པ་ན། གནོད་སྦྱིན་གྱི་དབང་པོ་འཁོར་དང་བཅས་པའི་ངོ་མཚར་བཀོད་པ་བསམ་གྱིས་མི་ཁྱབ་པ་གཟིགས་ནས། སླར་ཡང་ཤར་ཕྱོགས་ཀྱི་ནམ་མཁའ་ལ་འཕུར་ཏེ་སོང་བའི་སྒྲས་ཁོར་ཡུག་ཀུན་གཡོ་བ་སྙམ་བྱེད་པའི་རྐྱེན་གྱིས་ས་གཞིར་འཁོད་པའི་འགྲོ་བ་སྣ་ཚོགས་པས་རྗེ་ཉིད་རང་ལ་དད་གུས་ཆེན་པོས་མཆོད་བསྟོད་སྲི་ཞུ་འབུལ་བ་གཟིགས། དེ་ནས་ལྷོ་བྲག་བོན་པོ། མོད་མཁར། མོན་གྱི་ཆུ་འགོ་རོང་། མཚོ་སྣ། ཤ་འུག་སོགས་སུ་རིམ་གྱིས་ཕེབས་ཏེ། དེ་དག་ཀུན་ཏུ་དབང་བྱིན་རླབས་སོགས་ཀྱིས་མོན་བོད་ཀྱི་དད་ཅན་མང་པོར་ཐར་པའི་ལམ་ལ་ས་བོན་བཞག་ནས་དབུས་སུ་ཕེབས། ཤིང་ཡོས་མཆུ་ཟླའི་འགོར་བྲག་དམར་མཆིམས་ཕུའི་དབེན་རིར་ཐེགས་ཏེ། སྐུ་མཚམས་ཀྱི་བཅད་རྒྱར་བཞུགས་པ་ན། གོང་ནས་བཀའ་ཤོག་ཕེབས་པ་ལྟར་ཟླ་མཇུག་ལ་སྐུ་མཚམས་གྲོལ་ནས་ཕོ་བྲང་རྩེར་ཕེབས་ཏེ་གོང་ཞབས་མཇལ། དེ་ནས་སྡེ་སྲིད་ཤུན་དུ་དམ་རྩིར་བཞུགས་པའི་སར་ཐེགས་ཏེ་ཐུགས་གསོ་ཞིང་དབུགས་དབྱུང་བའི་ཞུ་བ་དང་སླར་རྩེར་གོང་ཞབས་སུ་སྡེ་སྲིད་རིན་པོ་ཆེའི་སྙན་འབུལ་རྣམས་གསོལ་ཞིང་། སྐུ་ངོའི་ཞུ་བ་དངོས་བརྒྱུད་དུ་མ་ནས་འབུལ་བར་མཛད་པས་བཀའ་བཞེས་བཟང་པོ་བྱུང་བ་ལྟར་མི་རིང་བར་དགོངས་པ་གྲོལ། དེ་དུས་ཕོ་བྲང་རྩེར་གུ་དྲག་གི་གཏོར་བཟློག་དང་ཧོམ་མེའི་ལས་སྦྱོར། གཤིན་རྗེ་དྲེགས་འཇོམས་ཀྱི་གཏོར་བཟློག་དང་མནན་པ། གནས་ཆུང་ལྕོག་ལ་གྲིབ་སེལ། ཕུར་པའི་སྒོ་ནས་དམ་སྲི་མ་རུངས་པ་ལ་སྲེག་པའི་ལས་སྦྱོར། གཞན་ཡང་གོང་དུ་བྱབ་ཁྲུས་གྲིབ་སེལ། འཆི་བསླུ་བསུན་བཟློག་རྣམས་ཀྱི་སྐུ་རིམ་མཛད། སྡེ་སྲིད་བློ་བཟང་སྦྱིན་པ་ཁྲི་ཕེབས་ཀྱི་ཐུགས་གཡེང་རྣམས་ཆོད་ནས། གོང་ཞབས་སུ་སྤྱི་མདོ་དགོངས་འདུས། མགོན་པོ་གཡུལ་བཟློགགཟའ་བཅོས་རིན་ཆེན་ཕྲེང་བ་རྣམས་ཀྱི་ལུང་། རཏྣའི་དྲག་དམར་གྱི་དབང་ལུང་། འཆི་མེད་འོད་སྣང་དང་། ཡང་སྙིང་ཀུན་འདུས་ཀྱི་ཚེ་དབང་སོགས་ཆོས་བཀའ་མང་པོ་འབུལ་བར་མཛད་ཅིང་། སྐུ་ཞབས་གྲྭ་ཚང་སོགས་ཚོགས་ཆེན་དང་གྲྭ་པ་དོན་གཉེར་ཅན་སོ་སོ། རྩེའི་ཞམ་རིང་ནང་མ་འགའ་རེ་བཅས་པར་དབང་ལུང་མན་ངག་མང་པོ་དང་། བཤེས་གཉེན་

― MLP003_Page_0171 ―

^{[མ་དཔེ་གཟིགས་ན་འདིར་གནོན།]}

[Full Size]

འགའ་ལ་ཆོས་ཚུར་གསན་ཕར་གནང་སོགས་མཛད། དེ་དུས་གཟིགས་སྣང་གི་དོན་བཞིན་འཇོམས་བྱེད་ཀྱི་སྐུ་དང་ཡུལ་འཁོར་སྲུང་གི་སྐུ་བརྙན་ལ་གོང་མའི་ལུང་ལྟར་རབ་གནས་གནང་བའི་ཚེ། འཆི་བདག་ལས་ཀྱི་གཤིན་རྗེ་ཕོ་བརྒྱད་མོ་བརྒྱད་སོགས་དྲེགས་པའི་འཁོར་ཚོགས་དཔག་ཏུ་མེད་པས་བསྐོར་བ་དམག་གི་ཁྲོམ་ལྟ་བུར་ལྷགས་པ་ན། རྗེ་ཉིད་རིག་རྩལ་གཉེན་པོའི་ལྷ་དུས་དགྲའི་དབང་པོར་ཤར་བའི་སྙེམས་པས་ཟིལ་གྱིས་མནན་ཞིང་བཀའ་བསྒོས་པས་ལས་རབ་འབྱམས་ཐོགས་མེད་དུ་སྒྲུབ་པར་དམ་ནོད་པའི་གསལ་སྣང་ཡུད་ཅིག་ཏུ་ཤར་གསུང་། ཟླ་བ་བཅུ་པའི་འགོར་གོང་ནས་ཞབས་སྐྱེལ་སོགས་མཐུན་རྐྱེན་འཛོམ་པས་ཕྱིར་ཕེབས་ཀྱི་ལམ་ཞོར་འགག་གྲོང་དུ་འབྲུག་པ་སྤྲུལ་སྐུ་རིན་པོ་ཆེས་སྤྱན་དྲངས་ཏེ། གཏེར་གསར་གཤིན་རྗེ་གཤེད་ཀྱི་དབང་ལུང་དང་། ཞབས་ཕྱིར་ལྷ་ཁང་གི་ཡུམ་སྲས་ལྔ་དང་བཅས་པས་ཐུགས་ཐིག་གི་དབང་ལུང་རྣམས་གསན་ཞིང་། རིམ་པར་དར་གླིང་དུ་ཕེབས། དེ་དུས་འདུམ་པོར་མེས་པོ་དོན་འགྲུབ་དབང་རྒྱལ་སྐུ་གཤེགས་པའི་སྒྲིབ་སྦྱོང་གསལ་འདེབས་མཛད་པའི་ནུབ་མོ་འོད་གསལ་གྱི་གཟིགས་སྣང་ལ། མེས་པོ་ཉིད་རྡོ་རྗེ་རྣལ་འབྱོར་མ་མི་མོའི་རྣམ་པ་ཅན་གྱིས་མཁའ་སྤྱོད་ཀྱི་གནས་སུ་བདེ་བར་ཁྲིད་པ་གཟིགས། སླར་ཡང་མེས་པོའི་ནང་རྟེན་རབ་གནས་ལ་སྤྱན་དྲངས། དེའི་ཚེ་སྔ་སོར་གོང་ཞབས་མཆོག་ནས་གདན་སའི་གཞིར་གྲྭ་ཕྱི་འབྲས་ཀྱི་ཕུ་ཐར་པ་གླིང་གི་དགོན་པ་ལྷ་འབངས་དང་བཅས་པ་སྩལ་བ་ལྟར། མགོ་ཟླའི་ཚེས་ལྔ་ལ་ཟླུམ་པོ་ནས་ལམ་བསྐྱང་སྟེ་རྗེ་ཉིད་གྲྭ་ཚང་དང་བཅས་ཐབས་ཅིག་ཏུ་བཏེག་ནས། དེ་ནུབ་ཆིབས་རགས་རྣམས་ལྡིང་པོ་ཆེར་སྤྱན་དྲངས་ཏེ་བཀུར་སྟི་ཆེན་པོས་མཆོད། ནངས་པར་ཚེས་དྲུག་གི་ཉིན་དཀར་ཕྱོགས་ལ་དགའ་བའི་ཡུལ་བདག་རྣམས་ཀྱིས་ངོ་མཚར་བའི་ལྟས་མངོན་དུ་གྱུར་པའི་སྣང་བ་སོགས་ལྷ་མི་ཀུན་གྱིས་བསུ་བའི་བཀོད་པ་དང་བཅས་པས་མདུན་བསྟར་ཏེ་ཐར་པ་གླིང་དུ་ཕེབས། དེར་ཚེས་བཅུའི་ནུབ་མནལ་ལམ་དུ་དགོན་པའི་རྒྱབ་རིའི་རྩེ་མོར་རྣམ་པར་བཀྲ་བའི་གདུགས་ཆེན་པོ་འཁོར་བ་དང་། གཡས་གཡོན་གྱི་རི་རྩེར་རྒྱལ་མཚན་ཆེན་པོ་རེ་བཙུགས་འདུག་པའི་བར་རྣམས་དར་སྣ་ཚོགས་ཀྱི་ལྡ་ལྡི་

― MLP003_Page_0172 ―

^{[མ་དཔེ་གཟིགས་ན་འདིར་གནོན།]}

[Full Size]

དང་། ཆུན་འཕྱངས་མེ་ཏོག་གི་ཕྲེང་བ་རྣམས་ཀྱིས་བྲེས་པའི་བར་ཐམས་ཅད་རྔ་ཡབ་དང་དྲིལ་གཡེར་དཔྱངས་པ་ལས་སྒྲ་སྙན་པར་སྒྲོག་པ། ཉེ་འདབས་ཀྱི་ས་གཞི་ཐམས་ཅད་ཀྱང་ཁོད་སྙོམས་པ་ལ་མེ་ཏོག་སྣ་ཚོགས་ཀྱི་ཚལ་བཀྲ་བ་ལས་འོད་ཟེར་ཉི་མ་ལྟར་འབར་བས་ནམ་མཁའི་མདངས་འགྱུར་བ། བར་སྣང་འཁོར་ཡུག་ཐམས་ཅད་འཇའ་ཚོན་དང་ཆུ་འཛིན་གྱིས་མཛེས་པར་བྲེས་པ་ལས་མེ་ཏོག་གི་ཆར་ཟིམ་འབེབས་པ། བྱ་དང་རི་དྭགས་མི་དང་མི་མ་ཡིན་པ་སོགས་མཛེས་སྡུག་ཅན་བདེ་ཞིང་སྐྱིད་པའི་རྣམ་འགྱུར་བག་ཕེབས་པར་སྤྱོད་པ། ནམ་མཁའི་དབྱིངས་ནས་འཇའ་ཚོན་གྱི་གུར་ཁྱིམ་ཕུབ་པའི་དབུས་སུ། སློབ་དཔོན་ཆེན་པོ་པདྨའི་སྐུའི་སྣང་བརྙན་གསལ་ཉམས་ཧ་ཅང་མི་ཆེ་བ་ལས་འོད་ཟེར་མུ་མེད་པར་འཕྲོ་བས་སྒྲིབ་པ་ལྟ་བུར་བཞུགས་པ་ལ་ཤིན་ཏུ་དད་པའི་གདུང་ཤུགས་དྲག་པོས་གསོལ་འདེབས་མཛད་པ་ན། ལྷོ་རིའི་རྒྱལ་མཚན་གྱི་རྩ་བར་བུད་མེད་རབ་བྱུང་ཆས་མཛེས་ཆགས་ཀྱི་ཉམས་འགྱུར་གཡོ་བས། ཕྲ་ཞིང་སྙན་པའི་སྐད་གདངས་ཀྱིས་ཞིང་འདི་ནི་ངོ་མཚར་དཔལ་གྱི་ཞིང་། །གནས་འདི་ནི་བདེ་ལྡན་པདྨ་འོད། མགོན་འདི་ནི་འགྲོ་འདུལ་པདྨ་རྩལ། །འཁོར་དག་པ་ཞིང་སྐྱེས་མཁའ་འགྲོའི་ཚོགས། །ཆོས་ཐེག་མཆོག་ལམ་གྱི་མྱུར་ལམ་ཡིན། །ལས་སྐལ་བ་བཟང་ངམ་མི་བཟང་ཡང་། །དུས་ལན་གཅིག་འབྲེལ་ན་དོན་ལྡན་ཡིན། །དེ་གོའམ་ཆགས་མེད་རྡོ་རྗེ་རྩལ། །ཞེས་ཟེར་བ་དང་། ཡང་བྱང་རིའི་རྒྱལ་མཚན་གྱི་རྩ་བའི་བུ་མོ་མཛེས་མ་དར་གོས་དང་མེ་ཏོག་གི་རྒྱན་ཅན་ཞིག་གིས། ཞིང་འདིར་དཀའ་བའི་འཕྲང་དམ་པོས། །འབད་པས་སྒྲུབ་པ་དོན་ལྡན་ཡིན། །འདི་ནས་བཅུ་ཕྲག་འགའ་འདས་མཐའི། །སྒྲ་སྒྲོག་ཅན་གྱི་ལོ་ཚུན་ལ། །དབྱར་གྱི་དུས་ཀྱི་ཆུ་བོ་བཞིན། །རྒྱས་པར་འགྱུར་ལ་པདྨའི་བསྟན། །ཕྱོགས་མཐར་འདྲེན་པའི་ཆུ་འགོ་བྱེད། །དེ་ནས་ལོག་ཅན་སྨོན་ལམ་མཐུས། །ཅུང་ཟད་ཉམས་པ་ལྟར་བྱེད་ཀྱང་། །སླར་ཡང་སྒྲ་གཅན་ལས་ཐར་བའི། །ཉི་ཟླ་བཞིན་དུ་འགྱུར་བ་འཆར། །སྔོན་དུས་པདྨ་སཾ་བྷ་ཝས། །བྱིན་བརླབས་ཞབས་ཀྱིས་བཅགས་པའི་རི། །བག་ཕེབས་བདེ་བ་འཕེལ་བའི་ས། །ངོ་མཚར་གཏེར་གྱིས་གང་བའི་མཛོད། །དཔལ་འབྱོར་ཆུ་བོ་འདུ་བའི་

― MLP003_Page_0173 ―

^{[མ་དཔེ་གཟིགས་ན་འདིར་གནོན།]}

[Full Size]

རྫིང་། །ཐེག་མཆོག་འབྲས་བུ་སྨིན་པའི་ཚལ། །གངས་ཅན་ཡུལ་གྱི་ལྟེ་བ་ལས། །གཡོ་རུ་གཙང་མའི་ས་གཞི་ཡིན། །ཁྱོད་ཀྱི་རིང་ལུགས་རྒྱས་པར་འགྱུར། །ཞེས་སོགས་ལུང་བསྟན་དང་། གཞན་ཡང་ངེས་བཟུང་མེད་པའི་མཁའ་ཁྱབ་ཀྱི་ལྷ་ཚོགས་མང་པོས་ཤིས་པ་བརྗོད་པའི་ཚུལ་དང་། མཐར་དེ་ཐམས་ཅད་འཇའ་ཟེར་འོད་ལྔའི་གོང་བུར་ཞུ་ནས་ད་ལྟའི་གནས་གཞི་འདི་ཉིད་ཀྱི་ཐད་དུ་ཐིམ་པའི་ཉམས་སྣང་དང་ལྷན་ཅིག་མནལ་སད་ཅིང་། མནལ་ལམ་འདི་ལ་བལྟས་ནས་འདིར་སློབ་དཔོན་པདྨའི་བསྟན་པ་ལ་འཕེལ་རྒྱས་ཅུང་ཟད་འོང་ངམ་སྙམ་དུ་བསམས་གསུངས་། དེ་ནས་སྣེའུ་གདོང་རྩེར་སྤྱན་དྲངས་ཏེ། ཞབས་དྲུང་དགའ་ལྡན་དང་། བདག་མོ་ཡུམ་སྲས་ནང་འཁོར་བཅས་པས་ཐུགས་ཐིག་དང་། འཇོམས་བྱེད་ཀྱི་དབང་ལུང་། རྫོགས་རིམ་ངེས་དོན་སྙིང་པོའི་ཉམས་ཁྲིད་རྣམས་ཀྱིས་སྨིན་པར་གསན་ཞིང་། ལྷ་གཟིགས་ཞབས་དྲུང་ནས་ཕྱག་དར་རྩེ་སྤྲོད་དང་། ཇ་སྣ་སྔོན་གཏོད་སོགས་བཀུར་སྟི་ཆེན་པོས་མཆོད། གདན་སར་ཕྱིར་ཕེབས་མཚམས་གོང་མའི་ལུང་བཞིན་ཕོ་བྲང་ཆེན་པོར་ཐེགས་ཏེ། རྒྱལ་མཆོག་དམ་པ་ཞབས་བསྙུན་པའི་སྐུ་རིམ་གནད་དུ་འགྲོ་བ་འགའ་ཞིག་མཛད་པས་མི་རིང་བར་དྭངས། དེ་སྐབས་སྨིན་གྲོལ་གླིང་གཙུག་ལག་ཁང་གི་ཨར་ལས་ལོ་སྔ་རྟིང་གང་ལ་ལེགས་བརྟག་པ་མཛད་བཞེད་ནས། མེ་འབྲུག་མཆུ་ཟླའི་ཚེས་གསུམ་གྱི་ནུབ་མོ་གསོལ་འདེབས་དང་ཕྲིན་བཅོལ་མཛད་དེ་མནལ་བའི་གཟིགས་སྣང་ལ། ཡེ་ཤེས་ཀྱི་ཌཱཀྐི་མ་མི་མོའི་རྣམ་པ་ཅན་གྱིས་གཙུག་ལག་ཁང་གི་ཨར་ལས་ད་ལོ་རང་གནང་ན་བར་ཆད་ཉུང་ཞིང་། འགྲུབ་སླ་བ་དང་། སྤྱི་སྒོས་ལ་ཕན་ཕྱིར་རྟེན་འབྲེལ་གྱི་ཐབས་བཅོས་དུ་མ་བསྒྲུབ་དགོས་པའི་ལུང་གསལ་པོར་བསྟན་པ་ལྟར་ཨར་ལས་འཕྲལ་དུ་གནང་བཞེད་ཀྱིས་དགོན་པར་ཕྱིར་ཕེབས་ཏེ། མཆུ་ཟླའི་ཉེར་དགུའི་ཉིན་རྡོ་རྗེ་ཕུར་པའི་སྒོ་ནས་གཙུག་ལག་ཁང་གི་ས་ཆོག་མཛད་པ་ན། ས་བཟུང་གི་ཚེ་དཔལ་ཆེན་རྡོ་རྗེ་གཞོན་ནུའི་སྐུའི་གསལ་སྣང་རེག་མཐོང་ལྟ་བུར་འཆར་བའི་སྙེམས་པ་བརྟན་པོས་ཕྱི་ནང་གི་བདུད་རྣམས་གཞོམ་པར་མཛད་ཅིང་། དེ་དུས་མ་འོངས་འབྱུང་འགྱུར་གྱི་རྣམ་པ་དུ་མའང་ཆགས་ཐོགས་མེད་པར་ཐུགས་ལ་གསལ་

― MLP003_Page_0174 ―

^{[མ་དཔེ་གཟིགས་ན་འདིར་གནོན།]}

[Full Size]

བར་ཤར། ས་འདྲ་བར་ཕེབས་སྐབས་ཐེམ་སྐས་ཀྱི་མཇུག་ཏུ་འགྱུར་མེད་ཀྱིས་ཆང་བུམ་གང་བ་ཁུར་ཡོང་བ་དང་ཐུགས་པས་ལ་ཉེ་བཟང་ཞིང་། སྐབས་འདི་ཚོར་བུད་མེད་ལོ་ཉི་ཤུ་སྐོར་འགྲོ་བ་མཛེས་ཆགས་ཀྱི་རྣམ་འགྱུར་ཅན་སྨིན་མཚམས་སུ་དགའ་འཁྱིལ་གྱི་རི་མོ་ཡོད་པ་ཞིག་གཟིགས་པ་རྣལ་འབྱོར་མའི་རིགས་ཅན་གྱི་མཁའ་འགྲོ་ཞིག་ཡིན་པར་འདུགགཟུགས་ཅན་གཟུགས་མེད་གང་ཡིན་གྱི་ངེས་པ་མ་རྙེད་གསུངས། དབོ་ཟླའི་འགོར་སྡེ་སྲིད་ཟུར་པས་ཟངས་རིར་སྤྱན་དྲངས་པའི་ཚེ་ཀླུ་ཁང་གི་གྲུར་རླུང་ནག་མི་བཟད་པ་བྱུང་བ་ན་ལས་མགོན་གྱིས་བསྐྱབས་པའི་གཟིགས་སྣང་ཤར་བ་དང་ལྷན་ཅིག་གིས་ཞི་བར་གྱུར། དེར་སྡེ་སྲིད་རིན་པོ་ཆེར་ཕྲལ་སེལ་གྱི་དབང་རྗེས་གནང་དང་སྐུ་རིམ་གྱི་རྟེན་འབྲེལ་དུ་མ་མཛད་ཅིང་ཡར་ངོའི་ཚེས་བཅུ་མཆོད་པའི་སྲོད་ཀྱི་དུས་སུ་ལེའུ་བདུན་མའི་གསོལ་འདེབས་དཔོན་སློབ་ཐམས་ཅད་ཀྱིས་མགྲིན་གཅིག་ཏུ་གནང་བས། དད་པའི་གདུང་ཤུགས་དྲག་པོས་ཐུགས་ཉམས་ཀྱི་སྣང་བ་བདེན་མེད་དུ་བུན་ལོང་གིས་སོང་བ་དང་ལྷན་ཅིག་མདུན་གྱི་ནམ་མཁར་ཨོ་རྒྱན་ཆེན་པོ་སྐུ་མདོག་དཀར་པོ་གཞོན་མཛེས་རུས་པའི་རྒྱན་ཅན་གཡས་ཌཱ་མ་རུ་ཁྲོལ་ཞིང་གཡོན་ཐོད་པ་བསྣམས་པ་ཞབས་གཡོན་བརྐྱངས་པའི་གར་སྟབས་ཡུམ་མཁའ་འགྲོ་དམར་མོ་དང་འཁྲིལ་བ། སྐུ་ལས་མུ་མེད་པའི་འོད་ཟེར་འཕྲོས་པའི་རྩེ་ནས་མཁའ་འགྲོ་མ་ཉི་ཟེར་གྱི་རྡུལ་ལྟར་འཕྲོ་ཞིང་། ཐམས་ཅད་ཀྱི་ཞལ་ནས་སྔགས་ཀྱི་སྒྲ་གདངས་བུང་བ་ཚང་བཤིག་པ་ལྟར་སྒྲོག་པ། བླ་མའི་གནས་གསུམ་གྱི་འོད་ཟེར་འཕྲོ་འདུས་དབང་བསྐུར་ཞིང་བྱིན་གྱིས་བརླབས་པ་དང་ལྷན་ཅིགདེའི་ཞལ་ནས། ལུས་ནི་སྣང་སྟོང་ཕྱག་རྒྱ་སྒྱུ་མའི་སྐུ། །ངག་ནི་གྲགས་སྟོང་གཞོམ་མེད་རྡོ་རྗེའི་སྒྲ། །སེམས་ནི་རིག་སྟོང་བརྗོད་མེད་ཀ་དག་ངང་། །འཕོ་འགྱུར་དྲི་བྲལ་ཆོས་དབྱིངས་ཁྱབ་བརྡལ་ཀློང་། །སྤྲོས་ཀུན་ཞི་བ་རྒྱ་མཚོའི་རྦ་རླབས་བཞིན། །རྟོགས་པ་གང་དེ་ཨ་ཧོ་ལམ་གྱི་མཆོག །ཨེ་མ་དེ་རིང་ཁྱོད་དང་ང་ཞེས་བཟུང་། །གཟུང་བའི་ཡུལ་མེད་ཆུ་ནང་ཟླ་གཟུགས་འདྲ། །འཛིན་པའི་སེམས་ཀྱང་འཛིན་མེད་རྩ་བ་བྲལ། །དེ་ཕྱིར་ཐ་དད་མ་བལྟ་འོད་གསལ་བ། །ཆོས་ཀུན་འབྱུང་གནས་གདོད་མའི་ངོ་བོ་ཡིན། །ཞེས་གདམས་

― MLP003_Page_0175 ―

^{[མ་དཔེ་གཟིགས་ན་འདིར་གནོན།]}

[Full Size]

པའི་ངང་ལ་སྤྲུལ་པ་འོད་ཟེར་དང་བཅས་པ་བསྡུས་ནས། ཡབ་ཡུམ་འོད་དཀར་གསལ་འཚེར་བ་ཞིག་ཏུ་ཞུ་ནས་ཉིད་ཀྱི་སྐུ་ལ་ཐིམ་པས་རིག་སྟོང་འགྱུར་མེད་ཀྱི་ངོ་བོར་འདྲེས་ཤིང་། དེ་ནས་ཞག་འགའི་བར་དེ་ཉིད་ཀྱི་ངང་ལས་མི་གཡོ་བའི་རྩལ་སྣང་སྙིང་རྗེ་སྒྱུ་མའི་རོལ་པ་འགག་མེད་དུ་འཆར་བ་བྱུང་ལ། ཕྱིར་ལམ་མོན་མཁར་མདའ་ནས་བསམ་ཡས་གཟིགས་པའི་ཚེ། སྔོན་ལོ་པཎ་རྒྱལ་བློན་འཛོམས་པའི་དུས་ཀྱི་བག་ཆགས་སད་ནས་དེ་དུས་ཀྱི་གནས་གྲོགས་འཁོར་དང་སྤྱོད་ཚུལ་སོགས་གཟིགས་པའི་ཉམས་སྣང་ཤིན་ཏུ་གསལ་བར་ཤར། དགོན་པར་ནག་ཟླའི་ཚེས་ལྔའི་ནུབ་ཨ་ཙ་ར་གཅེར་བུ་མདོག་ནག་མི་ལྤགས་ཕྲག་ལ་བཀལ་ཞིང་ཁྱི་ནག་འཁྲིད་པ་ཞིག་འོངས་ནས། དཔལ་ཆེན་ཁྲོ་བོའི་ཁང་པ་འདི་ནུབ་བྱང་ནས་ཞལ་ལྷོར་གཟིགས་ན་དྲག་པོའི་ལས་སྒྲུབ་པ་ལ་སྐབས་སུ་ལོས་བབས་ཟེར་བ་ལ། དེ་ལྟར་བྱས་པས་ཆོག་ཅེས་གསུངས་པ་ན་དེ་བཞིན་བྱེད་རྟིང་ཁྱི་དེ་འདིར་འདོགས་པ་ཡིན་ཟེར་ནུབ་བྱང་གི་ཡོ་འབོག་སྡོང་པོ་དེ་ལ་བཏགས་སོང་བ་དང་མནལ་སད་པ་བཞིན། སྔ་མའི་ཆར་མགོན་ཁང་གཞལ་ཡས་ཁང་གི་ས་དམིགས་འདིར་གནང་རྩིས་ལ། སྲུང་མ་རང་ཉིད་ཀྱིས་གནས་ཁང་བདག་གིར་མཛད་པ་ལ་དགོངས་ནས་བཀོད་པ་བསྒྱུར་བར་མཛད། དེ་ནས་ཁྲུམས་ཟླའི་ཚེས་ལྔ་ལ་ཙ་རིར་བཏེགས་ཏེ། ཕོ་བྲང་གི་མདུན་གྱི་ན་ཐང་དེར་བཞུགས་པའི་ཚེ་ཡར་ལྷ་ཤམ་པོ་སྐྱེས་པ་བཞིན་བཟང་གི་རྣམ་པས་གུས་པར་བཏུད་ཅིང་ཕྲིན་ལས་སྒྲུབ་པར་དམ་ནོད། ཆོས་ཟམ་དུ་ཞིང་སྐྱོང་གིས་བསུས་ཏེ་ཕྲིན་ལས་སྒྲུབ་པར་ཁས་བླངས་ཤིང་། ཞིང་དེའི་ལྷན་ཅིག་སྐྱེས་མ་མི་མོའི་རྣམ་པར་བསྟན་ནས་བདེ་ཆེན་གྱི་ཡེ་ཤེས་བསྐྱེད་པས་སྐུའི་རྩ་ཁམས་རྣམས་སྒྲིབ་མེད་དུ་གཟིགས་པ་དང་། དེའི་སང་ཉིན་ནས་བདེ་ཉམས་རྩལ་ཤུགས་འགོག་པ་མེད་པར་འཆར་ཞིང་། ཕེབས་ལམ་ཀུན་ཏུ་འཇས་ལུང་པ་ཁེངས་པ་དང་འཇའ་མདུང་ཚུགས་སུ་སྐུ་ལ་ཟུག་པ་སོགས་ངོ་མཚར་བ་ཀུན་གྱིས་མཐོང་། ཅིག་ཆར་དུ་ཕེབས་སྐབས་ཁ་བས་ལམ་བཅད་དེ་སྐོར་མི་རྣམས་ཕྱིར་ལོག་བྱུང་བ་དང་། དེ་ནུབ་གཟིམས་ལམ་དུ། གནོད་སྦྱིན་དཔའ་བོས་ལ་ལ་མི་ཐར་བའི་ཉེན་མེད་ཅེས་ལུང་བསྟན་པ་ལྟར་སང་ཉིན་ནས་ནམ་

― MLP003_Page_0176 ―

^{[མ་དཔེ་གཟིགས་ན་འདིར་གནོན།]}

[Full Size]

མཁའ་དྭངས་ཤིང་ཕེབས་ལམ་དབྱར་གུང་ལས་ཀྱང་བདེ་བར་བྱུང་། གནས་ངོ་མཚར་ཅན་སོ་སོར་བདེ་སྟོང་གི་ཡེ་ཤེས་འོད་གསལ་ལས་མི་གཡོ་བའི་ངང་ནས་ཚོགས་མཆོད་སོགས་མཛད་པས། ཡེ་ཤེས་ཀྱི་ལྷ་དང་ཌཱ་ཀི་དམ་ཅན་འདུས་པའི་གཟི་བྱིན་དེར་ཚོགས་ཀུན་གྱི་རྒྱུད་ལ་ཕེབས་པའི་རྟགས་དང་། དཔའ་བོའི་བརྡའ་སྐད་སྤྱུག་གླུ་འབོད་ཅིང་རྣམ་བཀྲའི་འཇའ་གུར་བྲེས་པ་ལས་མེ་ཏོག་གི་ཆར་འབེབས་པ་དང་། དྲི་ཞིམ་པོའི་ངད་འཐུལ་བས་ཀུན་གྱི་ཡིད་ཚིམ་པར་བྱེད་ལ། ཁྱད་པར་ཕོ་བྲང་ཆེན་མོར་ཁང་བཟང་བཀོད་ལེགས་པའི་ནང་དུ་སློབ་དཔོན་ཆེན་པོ་པདྨ་དང་བི་མ་ལ་མཁའ་འགྲོའི་འཁོར་དང་བཅས་པས། ད་རེས་ཕྱི་ནང་གི་ཚོགས་ཀྱི་འདུ་བའི་རྟེན་འབྲེལ་འདིས། སྔར་རྟེན་འབྲེལ་ཉམས་པ་མང་པོ་ཞིག་གསོས་ཤིང་ལོ་བཅུ་ཚུན་ཆོད་ཀྱི་བར་ཆད་རྣམས་སེལ་བ་དང་། ཟབ་གཏེར་འདོན་པའི་དུས་གནད་སོགས་ལུང་བསྟན། དེའི་སང་ནུབ་སྟག་ཚང་དུ། སྐད་ཕྲ་ལ་སྙན་པ་ཞིག་གིས་བོས་བྱུང་བ་ལྟར་ཐེགས་པས། ཨོ་ཌཱི་ཡ་ནའི་ཡུལ་ཡིན་ཟེར་བ་དུར་ཁྲོད་དང་གྲོང་ཁྱེར་རི་རོང་ནགས་ཚལ་དང་བཅས་པ་འདུག་པ་དེར་བུ་མོ་ཞིག་གིས་ལམ་སྣ་དྲངས་ཏེ་ཕེབས་པ་གྲོང་ཁྱེར་གྱི་དབུས་ན་ཚོང་འདུས་ལྟ་བུའི་ཁྲོམ་དང་། དེའི་ཤར་ལྷོ་ངོས་སུ་ཁང་པ་སྒོ་མང་པོ་དོད་པ་ཞིག་འདུག་པས་ནང་དུ་གཟིགས་པས། ཌཱཀྐི་མི་མོའི་རྣམ་པ་ཅན་གྱིས་བམ་རོ་དུམ་བུར་འདྲལ་ཞིང་བཀྲམས་པ་དང་གཡོས་བྱེད་པ། སྒོ་ནང་དེར་ཐེགས་འདོད་པ་ན་མིའུ་ཐུང་བེར་དབྱུག་ཐོགས་པ་ཞིག་གིས་བསྲུངས་ཏེ་མ་བཏང་བ་ལ། བྱིས་པ་གཞོན་ནུ་ཞིག་གིས་ངོ་ཆེན་བྱས་ཏེ་ནང་དུ་ཁྲིད། དེར་བུ་མོ་གཡོས་བྱེད་མི་དེའི་རྩར་བཞུགས་ནས་ཅི་བྱེད་དྲིས་པས། འདིར་རྒྱ་བོད་ཀྱི་གྲུབ་ཐོབ་ཉི་ཤུ་རྩ་ལྔ་མགྲོན་དུ་འབྱོན་པས་གཡོས་བྱེད་པ་ཡིན་ཟེར། ནམ་འབྱོན་གསུངས་པས་ད་ལྟ་འབྱོན་ཟེར། དེ་མ་ཐག་སྐྱེས་པ་དེས་ད་བྱོན་བྱུང་ངོ་ཟེར། བསུ་བ་བྱེད་དགོས་དགོངས་ཏེ་ཕེབས་པ་ན་ཆས་ངེས་མེད་བདུན་ཙམ་རིམ་པར་བྱོན་བྱུང་བ་སོ་སོར་བཏུད་དེ་ནང་དུ་ལོག་ཕེབས་པས་གཞན་རྣམས་དེར་བྱོན་ཚར་ནས་ཆ་ལུགས་རྣམ་འགྱུར་མི་འདྲ་ཞིང་གཟི་བྱིན་མཚུངས་པ་མེད་པར་བཞུགས་འདུག་པ་ལ། རྗེ་ཉིད་རང་ཡང་བུད་

― MLP003_Page_0177 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་དེ་དང་ལྷན་ཅིག་གནས་པའི་ཁུལ་གྱིས་བཟའ་བཏུང་རྣམས་རིམ་པར་སྟོབ་པའི་གྲོགས་མཛད་དེ་ཐམས་ཅད་ཀྱིས་ལོངས་སྤྱད་པའི་མཐར། གསར་རྙིང་ངེས་མེད་ཀྱི་སྔགས་དང་རྒྱ་བོད་ཀྱི་སྐད་སྣ་ཚོགས་པས་ཉམས་གླུ་ཅི་དགར་ལེན་ཞིང་། འོད་ཟེར་སྤྲོ་བ། སྐུ་མི་སྣང་བ་འོད་ཀྱི་གོང་བུར་རྫུ་བ་སོགས་ཆོ་འཕྲུལ་ངོ་མཚར་བ་དུ་མ་སྟོན་བཞིན་དུ་འདུག་པ་ལ། དད་གུས་དྲག་པོས་ཕྱག་དང་གསོལ་འདེབས་མཛད་པས། ཐམས་ཅད་ཀྱིས་བྱིན་རླབས་དང་སྨོན་ལམ་སོགས་མཛད་དེ། ལ་ལ་སྒོ་ལ་འཐོན། ལ་ལ་རྒྱ་མཐོངས་ནས་འཕུར་ཏེ་གཤེགས། ད་ཅིའི་གྲལ་དེ་ན་རབ་བྱུང་དང་གྲུབ་ཐོབ་ཆས་ཏེ་གཉིས་བཞུགས་འདུག་པར་འདི་གཉིས་ཀྱི་ཕྱིར་འབྲང་ན་མཁའ་སྤྱོད་དུ་འགྲོ་བ་ལ་ཚེགས་མི་འདུག་དགོངས་ཏེ་མོས་གུས་དྲག་པོས་གྲུབ་ཐོབ་དེ་ལ་འཇུས་པས་རབ་བྱུང་དེ་གྲུབ་ཐོབ་དེ་ལ་ཐིམ། དེ་ཉིད་ནམ་མཁར་ཡེར་གྱིས་གཤེགས་པ་ན་རྗེ་རང་ཡང་ནམ་མཁར་ཡེར་གྱིས་བཏེགས་མ་ཐག་ཐུགས་མི་རྟོག་པའི་ངང་ལ་ཐུམ་གྱིས་སོང་། དེ་སད་པ་ན་སྔར་གྱི་ཁང་པ་དེ་ན་ཕེབས་འདུགདེར་བུད་མེད་དེས་འདི་ཁྱོད་རང་གི་སྐལ་བ་ཡིན་ཟེར་བྱིས་པའི་རོ་དེའི་སྨད་ཤ་གསང་གནས་ཀྱི་དུམ་བུ་འཇགས་པ་ཞིགའབྲས་ཟན་གོང་བུ། འཁུར་བ་གཅིག་རྣམས་ཕུལ་བྱུང་བ་ཕྱག་ཏུ་བཞེས་པ་དང་མནལ་སད། ཙ་རི་འཁོར་ནས་ཕྱིར་ལམ་རྩེ་ལེ་དགོན་དང་སྒམ་པོ་རྣམས་སུ་རིམ་པར་སྤྱན་དྲངས། སྒམ་པོ་སྤྲུལ་སྐུ་རིན་པོ་ཆེར་ཐུགས་ཐིག་དང་དྲེགས་འཇོམས་ཀྱི་དབང་ལུང་སྩལ། དེ་ནས་རྒྱལ་དུ་ཐེགས་ཏེ་ཞག་གཉིས་བཞུགས་པའི་རྟིང་མའི་མནལ་ལམ་དུ། རྒྱལ་གྱི་བྱང་ཤར་གྱི་རི་རྒྱུད་དེར་གངས་དང་རྫའི་རྣམ་པས་བསྐོར་བའི་ཁུགས་སུ་ལྷ་མོའི་བླ་མཚོ་ཡིན་དགོངས་པའི་མཚོ་སྔོ་ནག་མི་ལྤགས་བཀྲམ་པ་ལྟ་བུ་རྒྱ་ཁྱོན་ཚད་མེད་པའི་དབུས་སུ་མཁར་དམར་སྨུག་རྩེ་མོ་ནམ་མཁའི་མཐོངས་སུ་སླེབ་པ་བར་གྱི་སྒོ་དང་སྐར་ཁུང་རྣམས་ནས་ཁྲག་ཞག་འབབས་ཤིང་སྒོ་རྣམས་སུ་ཐེམ་སྐས་བང་རིམ་གསུམ་བཞི་ཙམ་རེ་ཡོད་པ། དེའི་ཕྱིར་འདོད་སྣམ་ལྟ་བུའི་སྟེགས་བུའི་མཐར་མུ་རན་གྱིས་བསྐོར་བ་ལ་ཤ་ཁྲག་ནང་ཁྲོལ་སོགས་བདལ་བ། དེ་ནས་མཚོ་འགྲམ་གྱི་བར་ཟམ་པ་དལ་ལེར་ཡོད་པ། མཚོ་མཐའ་ཀུན་ཏུ་འཇིག་

― MLP003_Page_0178 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་གྱི་བྱ་བྱེད་སྣ་ཚོགས་ཀྱིས་བུན་ལོང་དུ་བསྐོར་བ། མཁར་གྱི་བར་རྣམས་ནས་མེ་སྟག་དང་ན་བུན་དུད་སྤྲིན་རླུང་འཚུབ་སོགས་འཇིགས་པའི་ཆོ་འཕྲུལ་གྱི་རྣམ་པ་གཟིགས་པའི་མོད་ལ་མནལ་སད། དེ་ནས་ལྕགས་ཟམ་བརྒྱུད་བཤད་སྒྲུབ་གླིང་དང་། སྤུ་ཐང་ལ་ལ་བྱས་རིམ་པར་ཨེ་ཡི་ཆབ་ཚན་བརྟེན་ནས་ཕྱིར་ལམ་གཟིམས་ཤག་ལྷོ་པའི་བཀའ་འགྱུར་སོགས་ལ་རབ་གནས་དང་། རྒྱ་རི་ཞབས་དྲུང་མ་ཆེན་ལ་ཐུགས་ཐིག་གི་དབང་ལུང་། མཆེད་མཁར་རྫོང་དུ་ཞབས་དྲུང་སྙིང་སྙིང་ལ་ཚེ་དབང་། ཟངས་རིར་རབ་གནས། སྣེ་གདོང་རྩེར་ཞབས་དྲུང་ཡབ་སྲས་ལ་ཚེ་དབང་སོགས་མཛད་དེ་གདན་སར་ཕེབས། དེ་ནས་མི་རིང་བར་རྒྱལ་ཟླའི་ནང་དུ་གོང་མའི་ལུང་ལྟར་ཕོ་བྲང་ཆེན་མོར་ཞབས་བསྐྱོད་ནས། གོང་ཞབས་སུ་ཚེ་དབང་དང་པད་གླིང་གུ་དྲག་གི་དབང་གིས་མཚོན་དབང་བྱིན་རླབས་རྗེས་གནང་གྲིབ་སེལ་བྱབ་ཁྲུས་སོགས་དང་གནམ་ལྕགས་བྲག་གི་གཏེར་ཤོག་རྣམས་བུ་དཔེར་ཕབ་རྗེས་དེའི་དབང་ལུང་ཁྲིད་དང་བཅས་པ་འབུལ་བར་མཛད་ཅིང་། མེ་སྦྲུལ་མཆུ་ཟླ་ཤར་མཚམས་སྐུ་ཚེ་སྒྲུབ་པའི་བཅད་རྒྱ་གནང་བ་གྲོལ་རྟིང་། དབོ་ཟླའི་འགོར་གདན་སར་ཕྱིར་ཕེབས་ནས་གཙུག་ལག་ཁང་གི་ཞལ་བ་དང་དྲི་གཙང་ཁང་མགོན་ཁང་སོགས་ཀྱི་འབུར་བཟོའི་ལས་གྲྭ་རྣམས་བཙུགས་ཏེ། ས་གའི་ཟླ་བར་གོང་མའི་ལུང་བཞིན་ཁྲ་འབྲུག་ཏུ་ཐེགས། དེར་བཀའ་བརྒྱད་ཀྱི་དཀྱིལ་འཁོར་ལ་བརྟེན་ནས་རབ་གནས་དང་། སྣེའུ་གདོང་རྩེར་ཞབས་དྲུང་ཡིད་བཞིན་ནོར་བུ་ལ་ཚེ་གུར་རྟ་མགྲིན་ལ་སོགས་པའི་དབང་། དེ་ནས་ཟངས་རིར་ཡང་སྤྱན་དྲངས་ཏེ་སྡེ་སྲིད་སྟངས་དཔྱལ་ལ་ཚེ་དབང་བྱབ་ཁྲུས་གདོན་འགྲོལ་སོགས་མཛད་ནས་རིམ་པར་གདན་སར་ཕེབས། དེ་ནས་མདོ་མཁར་དུ་སྡེ་པ་དགོས་དགོས་གཤེགས་པའི་འདད་ཀྱི་གྲལ་དབུ་དང་། ཤེལ་བྲག་དུར་ཁྲོད་དུ་སྐུ་མེས་ནོར་བུ་དར་རྒྱས་ཀྱི་པུར་སྲེགའདུམ་པོར་སྐུ་ཞང་འབྲིང་པོ་གཤེགས་པའི་འཕོ་བའི་མཚམས་སྦྱོར་རྣམས་ལ་སྤྱན་དྲངས་པ་ལྟར་ཐེགས་ནས་རྗེས་སུ་བཟུང་། མགོ་ཟླའི་ཡར་ངོའི་དུས་དགེ་བར་གོང་ཞབས་མཆོག་ནས་སྟན་དཀར། འབུལ་བ་གྱ་ནོམ་པ། འདུས་ཚོགས་སུ་མང་འགྱེད། བརྟན་བཞུགས་རབ་དཀར་ལྷག་བསམ་

― MLP003_Page_0179 ―

^{[མ་དཔེ་གཟིགས་ན་འདིར་གནོན།]}

[Full Size]

མའི་བཀའ་རྩོམ་དང་བཅས་ཏེ། ཞབས་པད་རིང་འཚོའི་རྟེན་འབྲེལ་བསྒྲིག་པའི་མི་སྣ་ཆེད་དུ་སྩལ་བ། རུང་ཁང་གསར་པའི་ཐབ་ཞལ་བསྲོའི་མང་ཇ་འདེབས་མ་རག་པ་དང་འགྲིག་པའི་རྟེན་འབྲེལ་ལེགས་ཚོགས་སུ་གྱུར་ཅིང་། ས་རྟ་ཧོར་ཟླ་བཞི་པའི་འགོར་གོང་མའི་ལུང་བཞིན་ཕོ་བྲང་ཆེན་མོར་ཐེགས་ཏེ་གོང་ཞབས་སུ་ཚེ་དབང་དང་། གུ་དྲག་གི་དབང་། འཆར་ཀ་གནུབས་ལུགས་ཀྱི་དབང་ལུང་རྣམས་འབུལ་བར་མཛད་ཅིང་། སྐུ་རིམ་དུ་གདོན་འགྲོལ། བྱད་འགྲོལ། འཆི་བསླུ། མཁའ་འགྲོ་དང་སྡེ་བརྒྱད་ཀྱི་གྲིབ་སེལ་རྣམས་མཛད། དེར་རྡོ་རྗེ་བྲག་རིག་འཛིན་སྤྲུལ་པའི་སྐུ་སོགས་བཤེས་གཉེན་མང་པོ་དང་། སྐུ་ཞབས་གྲྭ་གཙང་གི་གྲྭ་པ་འགའ་རེར་ཡང་དབང་ཆོས་སྩལ། དེ་ནས་ལྷ་སར་རྨེ་རུ་རྙིང་པར་ཆོག་རོགས་ཞབས་ཕྱི་སུམ་ཅུ་སྐོར་དང་བཅས་ཏེ་ཁྲོ་རོལ་ཁྱུང་དགུ་མའི་གཏོར་བཟློགདཀྱིལ་འཁོར་སྡིངས་སུ་བཀའ་བརྒྱད་ལ་བརྟེན་པའི་རབ་གནས་དང་། ཚོགས་བརྒྱ། ཞི་བའི་སྲེག་བླུགས་བརྒྱ་རྩ་རྣམས་མཛད་རྗེས་རྩེར་ཞག་ཤས་བཞུགས་ནས་ཕྱིར་ཕེབས། མི་རིང་བར་ཁྲ་འབྲུག་ཏུའང་བསྟན་སྲིད་ཀྱི་སྐུ་རིམ་སྔ་མ་དང་འདྲ་བའི་སྟེང་ཕུར་པའི་སྒྲུབ་ཆེན་བཅས་མཛད། དེ་ནས་རིམ་པར་སྣེའུ་གདོང་རྩེར་ཞབས་དྲུང་ཡབ་སྲས་ལ་དབང་བཀའ། ཟངས་རིར་ཡང་སྤྱན་དྲངས་ཏེ་སྡེ་སྲིད་རིན་པོ་ཆེར་ཚེ་གུར་གྱི་དབང་། རྫོངས་དང་རྟེན་གསུམ་མང་པོར་རབ་གནས་མཛད་ཅིང་། གདན་ས་ཐེལ་དུ་ཞབས་དྲུང་དགའ་ལྡན་གྱིས་སྤྱན་དྲངས་ཏེ་གནས་རྟེན་ངོ་མཚར་ཅན་རྣམས་མཇལ་ཏེ་ཕྱིར་ཕེབས། དེ་ནས་ས་ལུག་ཆོ་འཕྲུལ་གྱི་དུས་ཆེན་ཐོག་རྗེ་ཉིད་འདུས་པར་བཅས་པས་གཙུག་ལག་ཁང་རྟེན་དང་བརྟེན་པ་རྣམས་ལ་དོང་སྤྲུགས་ཀྱི་དཀྱིལ་འཁོར་ལ་བརྟེན་ཏེ་རབ་གནས་ཀྱི་ཆོ་ག་ཉིན་གཉིས་པའི་ལུགས་སུ་མཛད། སྣྲོན་ཟླའི་འགོར་གོང་མའི་ལུང་བཞིན་ལུམ་པའི་གྲུ་བརྒྱུད་ཞོར་ལ་གཞོང་པ་ལྷ་ཆུ་མཇལ་བར་མཛད་ནས་ཕོ་བྲང་རྩེར་ཕེབས། གོང་ཞབས་ཀྱི་བཀའ་ལས་རེ་ཞིག་གཡེང་བས་ལྷོད་ཆགས་ཤིག་མི་ཡོང་འདུག་པས་འབྲི་གུང་གི་སྤྱན་འདྲེན་ལྟར་ཐོག་མར་དབུར་སྟོད་དུ་ཕེབས་ན་འཐད་པའི་བཀའ་ལུང་བཞིན་རྩེར་ཞག་གསུམ་བཞུགས་ཏེ་ཆིབས་བཏེག་པའི་ལམ་དུ་རིམ་པར་ལ་མོ་དང་ཀ་ཚལ་

― MLP003_Page_0180 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་སུ་སྤྱན་དྲངས་ནས་མཆོད་ཅིང་། ཞྭ་ལྷ་ཁང་མཇལ་དུ་ཐེགས་སྐབས་དྭངས་པའི་མཁའ་ལ་འཇའ་སྤྲིན་འཁྲིགས་པ་དང་། ཁྱད་པར་དུ་ནུབ་ཕྱོགས་ཀྱི་མཁའ་ལ་འཇའ་ཚོན་སྣ་ལྔའི་སྡོང་པོ་དལ་གྱིས་བྱུང་། དེ་ནུབ་ཕྱག་མཆོད་དང་བསྐང་གསོ་མཛད་ནས། ནངས་པར་བསུ་བའི་བཀོད་པ་ཚར་དུ་དངར་བའི་བཀུར་སྟིས་སྤྲོ་ལུང་དུ་སྤྱན་དྲངས་ཏེ་ཐོག་མའི་མཇལ་འཛོམ་དང་། དེ་ནས་སྤྲུལ་སྐུ་རིན་པོ་ཆེ་སྔོན་ལ་ཕེབས་ཏེ་རྩེ་བར་སྤྱན་དྲངས་ནས་བཀུར་སྟི་ཆེན་པོས་མཆོད་ཅིང་། མཆོག་སྤྲུལ་ཉིད་ལ་གཏེར་གསར་སྐོར་གྱི་དབང་ལུང་རྒྱ་ཅན་གྱི་དབང་བཀའ་བཅུ་བདུན་ཙམ་དང་རྩ་བའི་ཆོག་བསྒྲིགས་བཅས་པའི་ལུང་རྣམས་འབུལ་བར་མཛད་དེ། ཕྱིར་ཕེབས་ཀྱི་ལམ་དུ་ཡེར་པར་ཚོགས་མཆོད་གནང་སྐབས། ཡེ་ཤེས་ཀྱི་བྱིན་ཐུགས་རྒྱུད་ལ་ཞུགས་པས་གནས་དུས་འཁོར་སློབ་ཀྱི་ལས་དང་སྨོན་ལམ་གྱི་འབྲེལ་པ་རྣམས་སྒྲིབ་མེད་དུ་ས་ལེར་གཟིགས། ཆུ་སྟོད་ཟླ་བའི་ཚེས་བཞིར་ཕོ་བྲང་ཆེན་པོར་ཕེབས། དེ་ཉིན་སྡེ་སྲིད་སངས་རྒྱས་མཚོ་ཁྲིར་འཁོད་པའི་དགྱེས་སྟོན་ཐོག་མའི་དུས་དང་འགྲིགདེ་སྐབས་གཟིམས་ཆུང་ཁམས་གསུམ་རྣམ་རྒྱལ་དུ་གོང་ཞབས་ཡས་ཕྱིན་ལྷན་རྒྱས་སུ་ཕེབས་པའི་ཐོག་སྡེ་སྲིད་རིན་པོ་ཆེར་བགེགས་སྐྲོད་དང་ཁྲུས་གསོལ་སྔོན་དུ་འགྲོ་བས་ཁྲིར་བཞུགས་སུ་གསོལ་ལ་མངའ་དབང་རིན་ཆེན་འབར་བ་འབུལ་བར་མཛད་ཅིང་། རྒྱལ་བ་སྲས་དང་བཅས་པ་རྣམས་དང་ལྷན་ཅིག་གོང་མ་རྒྱལ་བའི་དབང་པོ་ལྔ་པ་ཆེན་པོས་ཀྱང་ཤིས་བརྗོད་ཀྱི་མེ་ཏོག་འཐོར་བས་མངའ་གསོལ་བར་མཛད་དོ། །ཁྲི་འབུལ་བཞེས་རྟིང་། བླ་མ་དགེ་བཤེས་དཔོན་ཆེན་དཔོན་སྐྱ་དྲུང་འཁོར་སོགས་མང་པོར་སོ་སོའི་རེ་བ་སྐོང་བའི་ཆོས་འབྲེལ་དང་། བཤེས་གཉེན་འགའ་ལས་ཚུར་ཡང་ཆོས་བཀའ་ཅི་རིགས་གསན་ཞིང་སྐུ་ཞབས་གྲྭ་ཚང་གི་གྲྭ་པ་ལྔ་བཅུ་སྐོར་ལ་ཞལ་འདོན་ཆོ་ག་ཚང་མའི་དབང་བཀའ་རྗེས་གནང་སྲོག་གཏད། དེ་རྗེས་བཀའ་འགྱུར་ཁང་དུ་གྲྭ་གཙང་ཚོགས་ཆེན་ལ་རྒྱ་ཅན་གྱི་དབང་དང་བྱིན་རླབས་ཀྱི་བཀའ་བརྒྱ་ཕྲག་ཏུ་ཉེ་བ་ལུང་དང་བཅས་པ་མཛད། གཞན་ཡང་གོང་ཞབས་སུ། རྡོར་གླིང་གི་བླ་མ་བཀའ་འདུས་དང་གསང་འདུས། ཐུགས་རྗེ་ཆེན་པོ་རྒྱལ་བ་རྒྱ་མཚོ་དང་ངན་སོང་ཀུན་

― MLP003_Page_0181 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱོབ་རྣམས་ཀྱི་དབང་ལུང་། ཡས་ཕྱིན་ཐུན་མོང་དུ་ཚེ་གུར་གྱི་དབང་དང་བྱད་གདོན་འགྲོལ་བ་འཆི་བསླུ་སོགས་སྐུ་རིམ་ཡང་མང་དུ་མཛད་དེ། གོང་ནས་ཞབས་སྐྱེལ་བཅས་གདན་སར་ཕྱིར་ཕེབས། ཡང་ལྕགས་སྤྲེལ་ནག་ཟླའི་ནང་དུ་གོང་མའི་ལུང་བཞིན་ཕོ་བྲང་རྩེར་ཐེགས་ཏེ། གོང་ཞབས་ཡས་ཕྱིན་གདན་འཛོམ་པར་ཚེ་གུར་རྟ་མགྲིན་གཟའ་དབང་རྣམས་དང་། འཆི་བསླུ་བྱད་གདོན་འགྲོལ་བ། དེ་རྗེས་གོང་ཞབས་སུ་རྡོར་གླིང་གཏེར་ཆོས་ཀྱི་དབང་ལུང་འཕྲོ་རྣམས་ཡོངས་རྫོགས་འབུལ་བར་མཛད་ནས། སྤྲེལ་ཟླའི་ཚེས་བཅུར་མཆོད་པའི་ཚོགས་དབུར་རྗེ་རྒྱལ་བའི་དབང་པོ་ཞབས་པད་བསྐྱོད་པའི་ཞབས་ཕྱིར་གོང་མའི་ལུང་བཞིན་ཕེབས་ཏེ་གསུང་ཆོག་ལྷན་ཅིག་ཏུ་གནང་ཞིང་། གོང་ནས་ཞབས་སྐྱེལ་བཅས་ཕྱིར་ཕེབས་ཀྱི་ལམ་ཞོར་དཔལ་དེའུའི་སྡེ་པ་གཤེགས་པའི་སྐྱབས་གནས་སུ་སྤྱན་དྲངས་པ་ལྟར་ཐེགས་ཏེ། རིམ་པར་གདན་སར་ཕེབས། དེ་ནས་གཟིམས་ཆུང་ཀུན་བཟང་ཡང་རྩེར་སྐུ་མཚམས་ལ་བཞུགས་པའི་ཚེ་ཀུན་མཁྱེན་རྒྱལ་བའི་དབང་པོ་ལྔ་པ་ཆེན་པོ་ཉིད་སེར་འབྲས་སུ་ཆིབས་བསྐྱོད་པའི་དངོས་གནས་རྣམས་གསལ་པོར་མནལ་ལམ་དུ་ཤར་བ་གོང་དུ་གསོལ་བ་ན་ཇི་བཞིན་གཏན་ལ་ཕེབས་ཞེས་དབུགས་དབྱུང་བའི་ལུང་སྩལ་ཅིང་། དེ་དུས་གཟིགས་སྣང་གི་རྣམ་འགྱུར་དང་རྟེན་འབྲེལ་གྱི་བརྟག་དཔྱད་ཤར་བ་རྣམས་རིང་པོར་མ་སོང་བར་ཕྱིས་ལོ་ཟླའི་ངེས་པ་ཇི་བཞིན་འཆུག་པ་མེད་པར་མངོན་དུ་གྱུར་། དེ་ནས་ཟླ་བ་བདུན་པའི་ཚེས་བཅོ་ལྔ་ལ་རིམ་བཞིན་གྲི་གུ་བརྒྱུད་ཤ་འུག་ཏུ་ཞབས་བསྐྱོད་དེ་ཟབ་གཏེར་སྤྱན་དྲངས། དེར་མོན་བོད་ཀྱི་སྐལ་ལྡན་ཁྲི་ཕྲག་ཙམ་ལ་ཁྲོམ་དབང་མཛད་པའི་ཚེ་འཇའི་འོད་ཁྱིམ་གྱིས་ཁྲོམ་མཐའ་བསྐོར་བའི་སྣེ་གཉིས་ཁྲི་ཡི་གཡས་གཡོན་དུ་ཟུག་པའི་ངོ་མཚར་གྱི་ཆོ་འཕྲུལ་བསྟན། ཕྱིར་ལམ་མཚོ་སྣ་མདོ་མཁར་སོགས་ཡུལ་སོ་སོར་གཞན་དོན་སྐྱོང་བཞིན་དུ་གདན་སར་ཕེབས་ཤིང་། གོང་ཞབས་ཡས་ཕྱིན་ནས་སྐྱིད་རུ་དང་དར་རྒྱས་ཁང་གསར་སྐོར་གྱི་ས་རིས་རྣམས་མཆོད་གཞིས་སུ་སྦྱོར་འཇགས་ཀྱི་བཀའ་དྲིན་སྩལ། དེ་རྟིང་ཟླ་བ་བཅུ་གཅིག་འགོར་ཡར་འབྲོག་ཁྲི་དཔོན་ནས་རི་བོ་བྲག་ཏུ་སྤྱན་དྲངས་ཏེ། གཏིང་ཁེབས་ཁྲི་ལྕམ་ལ་ཚེ་གུར་གྱི་དབང་ལ་

― MLP003_Page_0182 ―

^{[མ་དཔེ་གཟིགས་ན་འདིར་གནོན།]}

[Full Size]

སོགས་པ། གླིང་ཞབས་དྲུང་ཡབ་ཡུམ་སྲས་ལྕམ་སྲིང་བཅས་པར་དབང་བྱིན་རླབས་མང་པོ་དང་། ཁྱད་པར་གཏེར་གསར་སྐོར་གྱི་དབང་ལུང་རྣམས་དང་ཨ་ཏིའི་ཁྲིད་བཀའ། སྟག་ལུང་དུའང་དཔོན་སློབ་རྣམས་ལ་ཚེ་གུར་གྱི་དབང་སོགས་ཡུལ་དེ་དག་གི་ཆེ་ཕྲ་ཚང་མས་བཏུད་ཅིང་། སོ་སོའི་རེ་བ་ཆོས་བཞིན་ཏུ་སྐོང་བར་མཛད་དེ་ཕྱིར་ཕེབས། ལྕགས་བྱ་ཧོར་ཟླ་དྲུག་པའི་འགོར་གོང་མའི་ལུང་བཞིན་གྲུ་འཛིན་གྱི་ཕོ་བྲང་ཆེན་པོར་ཐེགས་ཏེ། ཡས་ཕྱིན་ལྷན་རྒྱས་སུ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་དབང་བཀའ་དང་། ཤོག་སེར་རྣམས་འབེབས་པར་གནང་གྲུབ་བསྟུན་ལུང་རྣམས་ཚང་མ་དང་། གོང་ཞབས་ཉིད་དུ་གཤིན་རྗེ་གཤེད་རུ་མཚོན་དམར་པོ། ཕུར་པ་སྤུ་གྲིའི་དབང་ལུང་། ཡང་ཏིག་གཅེས་སྒྲོན་གྱི་ཉམས་ཁྲིད། ཁྱད་པར་མཁའ་འགྲོ་སྙིང་ཐིག་གི་ཁྲིད་བཀའ་ཤིན་ཏུ་སྨིན་པར་འབུལ་བར་མཛད་དུས་རུ་ཤན་དབྱེ་བ་སོགས་ལུས་ངག་གི་གནད་དང་། གནས་ལུགས་ཀྱི་དྲི་བ་ལ་ཞུན་མཐར་གཅོད་པ་སོགས་བདག་གིར་བཞེས་ཤིང་། གཞན་ཡང་དེ་དག་གི་བར་མཚམས་རྣམས་སུའང་ཞབས་རིམ་ནང་མ་དང་བཤེས་གཉེན་མང་པོར་སྣང་མུན་འཁོར་ཡུག་ཏུ་དབང་ལུང་མང་དུ་སྩལ། དེ་དུས་མཁའ་འགྲོ་སྙིང་ཐིག་གི་ཁྲིད་ཀྱི་ངོ་སྤྲོད་འབུལ་བར་མཛད་པའི་ཚེ་རྗེ་ཐམས་ཅད་མཁྱེན་པའི་སྐུའི་གསལ་སྣང་ཉིད་མཐིང་ཞུན་ལྟར་འོད་ཀྱི་གོང་བུར་འདྲིལ་བ་དང་། ཡང་རྡོ་རྗེ་འཛིན་པའི་རྒྱན་དང་ཕྱག་ཆས་དབང་བསྐུར་ཞིང་བསྟན་པ་དྲི་མེད་ཡུན་རིང་དུ་སྐྱོངས་ཤིག་པའི་བརྡའ་ཐབས་རྟེན་ཅིང་འབྲེལ་འབྱུང་གི་གནང་སྐྱེས་སྩལ་ཏེ་ཤིན་ཏུ་དགྱེས་པ་ཆེན་པོས་དབུགས་དབྱུང་དང་བཀའ་ཆེམས་ལྟ་བུའི་ཞལ་གདམས་ལྷུག་པར་སྩལ་བའི་ཚེ། མོས་གུས་ཀྱི་རྐྱེན་ལས་གོང་ཞབས་ཀྱི་སྐུ་ཡི་དཀྱིལ་འཁོར་གྱི་གསལ་སྣང་ཆུ་ཟླའི་གཟུགས་བརྙན་རླབས་ཀྱིས་བསྐྱོད་པའི་གསལ་འགྲིབ་ལྟར་རེས་གསལ་རེས་མི་གསལ་བར་སྣང་བའི་མཐར་ཨ་ཡིག་འོད་ཀྱི་གོང་བུར་དྭངས་བའི་གཟིགས་སྣང་མཚར་ཞིང་འཚུབ་པའི་རྣམ་པ་གསལ་བ་ནི་མི་རིང་བར་གཟུགས་སྐུའི་བཀོད་པ་ཆོས་སྐུའི་དབྱིངས་སུ་བསྡུ་བའི་རྟགས་སུ་སྣང་གསུངས་། དེ་ནས་ཕེབས་གདོང་ལོ་རོ་བཀྲ་ཤིས་མཐོང་སྨོན་པ་རྣམས་ཀྱིས་གཞུང་དུ་བླ་མ་

― MLP003_Page_0183 ―

^{[མ་དཔེ་གཟིགས་ན་འདིར་གནོན།]}

[Full Size]

ཞུས་པ་ལ་བརྟེན་དགོན་མ་ལག་དང་བཅས་པ་སོགས་གནང་སྦྱིན་ཕུལ་དུ་བྱུང་བ་དང་འཁོས་སུ་ཕེབས་པའི་ཞབས་སྐྱེལ་བ་དང་བཅས་པས་གདན་སར་ཕེབས། དེ་ནས་ཟླ་བ་བཅུ་པའི་མཇུག་ལ་ཏྲེ་བོ་སྤྲུལ་པའི་སྐུས་སྤྱན་དྲངས་པ་ལྟར་དཔལ་དེའུ་ནས་རོང་ཆེན་བརྒྱུད། སྒོ་མོ་རབ། སྐྱིད་གཤོང་ནང་པ། བྱམས་ཆེན། རིན་སྤུང་རྫོང་རྣམས་སུ་རིམ་པར་ཞབས་བསྐྱོད་ནས་དཀར་པོ་ལྕོག་ཏུ་ཕེབས་ཏེ། སྤྲུལ་པའི་སྐུའི་ཡབ་ཀྱི་སྒྲིབ་སྦྱོངས་བྱང་བཞུའི་ཆོ་ག་དང་སྤྲུལ་སྐུ་རིན་པོ་ཆེ་དཔོན་སློབ་རྣམས་ལ་གཏེར་གསར་བླ་མ་ཞི་དྲག་འཇོམས་བྱེད་རྡོར་སེམས་རྣམས་ཀྱི་དབང་ལུང་དང་། ཀུན་རིགས་ཀྱི་དབང་དང་སྒྲོལ་དཀར་གྱི་རྗེས་གནང་། ཟབ་མོ་ནང་དོན་གྱི་ལུང་སོགས་དང་ཡུལ་པར་ཁྲོམ་དབང་སོགས་སྩལ་ཅིང་ཞབས་ཏོག་དང་འབུལ་ནོད་རྒྱ་ཆེར་བསྒྲུབས། དེ་ནས་ཆོས་གཏེར་གླིང་དང་། འབྲས་ཡུལ་སྐྱེད་ཚལ་དུ་སྤྱན་དྲངས་ནས་མཆོད་དེ། འདུ་ཁང་དང་ཕྱིའི་ཆོས་ཁྲིའི་ཐོག་ནས་འདུས་པར་ཚོགས་ཆོས་ཀྱང་སྩལ། ཕྱིར་ལམ་བོན་ལུང་དང་སྙེ་མོ་སོགས་རོང་ཆུང་བརྒྱུད། གོང་དཀར་ཆོས་སྡེ་དང་རྫོང་། བདེ་ཆེན་ཆོས་འཁོར་སོགས་སུའང་རིམ་གྱིས་ཕེབས་ནས་མཆོག་དམན་ཀུན་གྱིས་བཀུར་ཞིང་། སོ་སོའི་རེ་བ་སྐོང་བའི་ཆོས་སྦྱིན་རྒྱ་ཆེར་སྩོལ་བཞིན་པར་གདན་སར་ཕེབས། དེ་ནས་ཆུ་ཁྱི་ཧོར་ཟླ་དང་པོའི་ཚེས་དགུའི་ཉིན་བླ་མ་ལྷ་ཁང་གི་རབ་གནས་མཛད་པས་ཡབ་རྗེ་གསང་བདག་ཆེན་པོའི་སྐུས་མེ་ཏོག་བཟུང་། ཚེས་བཅུའི་ནུབ་འོད་གསལ་གྱི་གཟིགས་སྣང་ལ། ལྗོན་ཤིང་རབ་ཏུ་རྒྱས་པའི་སྡོང་པོ་ལོ་འདབ་མེ་ཏོག་འབྲས་བུ་མཚར་དུ་བཞད་པས་དུད་པ་ལ། མཛེས་པའི་བྱ་ཚོགས་སྙན་པའི་སྒྲ་དང་བཅས་འཕུར་ལྡིང་གི་རྩེད་འཇོས་རོལ་པའི་མཐར་མི་བཟད་པའི་རླུང་དྲག་པོས་སྐད་ཅིག་ལ་བསྒྱེལ་ཏེ། བྱ་ཚོགས་རྣམས་ཁོར་ཡུག་ནམ་མཁའི་ཕ་མཐར་བྱེར་བ་དང་ལྷན་ཅིག་ཨ་ཧཾ་གི་སྒྲས་སྲིད་གསུམ་གཡོ་བའི་མཚན་ལམ་འཚུབ་པ་དང་། དབོ་ཟླའི་ཉི་ཤུ་ལྔ་ཡི་ཉིན་དཔལ་འབྱོར་གླིང་དུ་རབ་གནས་ཀྱི་གྲལ་དབུར་སྤྱན་དྲངས་ཏེ་གསུང་ཆོག་གནང་བའི་ཚེ། སྒྲིབ་མེད་ཡེ་ཤེས་ཀྱི་སྤྱན་གྱིས་ཆགས་ཐོགས་མེད་པའི་གཟིགས་ངོར། གོང་མ་ཐུགས་རྗེའི་བདག་ཉིད་རྗེ་ཐམས་ཅད་མཁྱེན་པ་ལྔ་པ་ཆེན་པོའི་གཟུགས་སྐུའི

― MLP003_Page_0184 ―

^{[མ་དཔེ་གཟིགས་ན་འདིར་གནོན།]}

[Full Size]

་བཀོད་པ་བདེ་གསལ་རྣམ་པར་མི་རྟོག་པའི་བདག་ཉིད་རང་བཞིན་གྱི་འོད་གསལ་བ་ཤིན་ཏུ་རྣམ་པར་དག་པ་ཆོས་སྐུའི་དབྱིངས་སུ་བསྡུས་པའི་གནས་ལུགས་ཐམས་ཅད་མེ་ལོང་ལ་པྲ་ཕབ་པ་ལྟར་ས་ལེར་གཟིགས་པ་བཞིན། དེ་འཕྲལ་གོང་དུ་མཚན་ལྟས་འཚུབ་མོ་བྱུང་ཚུལ་གྱི་ཞུ་ཡིག་འབུལ་མི་ཆེད་གཏད་གནང་བར། ཚུར་གྱི་བཀའ་ལན་དུ། མཚན་ལྟས་དེ་རྣམས་འཚུབ་པ་ཞིག་ཡིན་འདྲ་རུང་། སྐུ་རིམ་གང་འགབ་ཀྱི་ཞིབ་ཆ་མགྱོགས་ཙམ་འདི་ཁར་ཕེབས་དགོས་འདུག་པས་དེ་དུས་ཞུ་ཞེས་གསང་རྒྱའི་རྫུ་བག་མི་འཆོར་བའི་བསླབ་སྟོན་ཕེབས། དེ་ནས་ཟླ་བ་གསུམ་པའི་འགོར་གོང་མའི་ལུང་བཞིན་བསམ་ཡས་སུ་ཆིབས་བསྐྱོད་དེ། དབུ་རྩེ་བར་ཁང་དུ་གཏོར་བཟློགཚོགས་བརྒྱ། བསྐངས་བཤགས། མཁའ་འགྲོའི་མེ་མཆོད། སྐུ་ཚེའི་སྒྲུབ་པ་སོགས་མཛད། དེ་དུས་ཚེས་བཅོ་ལྔའི་ཉིན་བར་ཁང་གཡུ་ཞལ་གྱི་ལྷ་གཙོ་འཁོར་རྣམས་གཡོ་འགུལ་དང་གསུང་ཕན་ཚུན་དུ་བགྲོ་ཞིང་འོད་ཟེར་སྤྲོ་བསྡུའི་ཆོ་འཕྲུལ་གྱི་བཀོད་པ་གཟིགས་པས་བཟོད་མེད་ཀྱི་བྱིན་རླབས་ཐུགས་རྒྱུད་ལ་ཞུགས་ཏེ། ལྐོག་གྱུར་གྱི་དངོས་པོའི་གནས་ལུགས་ཇི་སྙེད་པར་ཐུགས་ཀྱི་སྣང་ཆར་ཤར་བ་བཞིན་མ་སྦས་པར་གསོལ་བ་ཕྱིས་ཐིག་ཐོག་ཏུ་ཁེལ་བས་མིའི་དབང་པོ་ཉིད་ཀྱང་ཐུགས་ཡིད་ཤིན་ཏུ་ཆེས་པར་གྱུར། སྟག་རྩེ་ཞབས་དྲུང་གིས་ཕོ་བྲང་དུ་སྤྱན་དྲངས་ནས་བསྙེན་བཀུར་རྒྱ་ཆེན་པོ་སྟོབ་ཅིང་། ལྷ་ཁང་རྣམས་ཞིབ་མཇལ་མཛད་དེ་གདན་སར་ཕེབས། དེ་ནས་ས་ག་ཟླ་བའི་དུས་ཆེན་ཐོག་གཙུག་ལག་ཁང་རྟེན་དང་བརྟེན་པར་བཅས་པ་ལ་རབ་གནས་ཀྱི་ཆོ་ག་མཛད་དེ། ཚེས་དགུའི་ཉིན་སྒྲུབ་ཆེན་བདེ་གཤེགས་འདུས་པའི་དཀྱིལ་འཁོར་གྱི་ས་ཆོག་དང་འབྲེལ་བར་རྗེ་ཉིད་གཙོ་བོར་ཕེབས་ནས་ཁྲག་འཐུང་རྩ་འཆམས་གནང་བ་ནས་བརྩམས་སྟ་གོན་ཕྱི་ནང་གི་མཚམས་གཅོད་སོགས་སྒྲུབ་ཆེན་གྱི་ལས་རིམ་རྒྱས་པས་ཁོག་ཕུབ་པའི་ཚོགས་སྒྲུབ་དང་སྦྲེལ་ཏེ། བཅོ་ལྔ་ལ་རབ་གནས་ཀྱི་སྟ་གོན་དང་། བཅུ་དྲུག་ལ་དངོས་གཞིའི་མེ་ཏོག་འཐོར་བའི་དུས་སྣམ་སྦྱར་ཅན་གྱི་སེར་སྦྲེངས་ཀྱི་བཀོད་པ་ཚར་དུ་དངར་ཞིང་། ཙཱ་རུའི་དགའ་སྟོན་གྱིས་ཀྱང་དེར་འདུས་ཁྲོམ་པ་རྣམས་ཚིམ་པར་མཛད། དེ་ཉིན་ཡེ་ཤེས་པ་སྤྱན་འདྲེན་དང་མེ་

― MLP003_Page_0185 ―

^{[མ་དཔེ་གཟིགས་ན་འདིར་གནོན།]}

[Full Size]

ཏོག་འཐོར་བའི་ཚེ་ཡེ་ཤེས་ཕེབས་པའི་གཟི་བྱིན་འབར་ཞིང་། ཕྱི་རོལ་དུའང་ནམ་མཁའ་བཻ་ཌཱུཪྻ་ལྟར་དྭངས་བ་ལ་འཇའ་ཚོན་སྣ་ཚོགས་ཀྱིས་སྤྲས་པ་ལས་མེ་ཏོག་གི་ཆར་ཟིམ་དང་། ཕྱི་དྲོ་གནོད་པ་མེད་པའི་འཇམ་ཆར་གཤིན་པའི་ངང་ནས་མཚན་ལ་ཆར་ཆེན་པོ་བབས་པས་ཀུན་དགའ་ཞིང་རངས་པར་གྱུར། དེའི་སང་ཉིན་བདེ་ཡངས་སུ་རྒྱས་པའི་སྲེག་བླུགས་ཀྱི་མཆོད་སྦྱིན། བཅོ་བརྒྱད་ཀྱི་སྔ་དྲོ་ཁྲོམ་ཁྲི་ཕྲག་བརྒལ་བར་དབང་སྦྱིན་དང་བཟའ་བཏུང་། ཕྱི་དྲོ་སྨད་ལས་རྒྱས་པའི་ལས་རིམ་དང་འབྲེལ་བར་རྔ་འཆམས་དང་བྲུབ་འཆམས། བཅུ་དགུ་ལ་གྲྭ་གཙང་འདུས་ཚོགས་ཀྱི་སྟེང་དུ་གྲྭ་ནང་དང་མོན་མཁར་ཁུལ་གྱི་རང་དགོན་རྣམས་དང་། བྱེ་རྫིང་ཚོགས་པ་སོགས་གྲྭ་ནང་ཕྱིའི་དགོན་ཆེ་ཆུང་མ་ལུས་པའི་སེར་ཚོགས། ནང་བཟན་དང་མི་སེར་དུད་ཆེ་ཆུང་ཐམས་ཅད་དེ་སྐྱ་སེར་གྱི་འདུས་པ་ཚོགས་ཆེ་བ་ལ་སྟོན་མོ་སྤྱི་འགྱེད་ལག་འགྱེད་དང་བཅས་པ་རྒྱ་ཆེར་སྒྲུབ་པར་མཛད་ཅིང་། གྲྭ་ནང་གི་དགོན་གཞན་རྣམས་དང་། འཕྱོངས་རྒྱས་དང་ལྷོ་བྲག་གི་དགོན་རང་དང་ཆོས་སྲིད་ཅི་རིགས་པར་འབྲེལ་བ་རྣམས་ལ་མང་ཇ་སྦྱོར་སྦྲེལ་སྤྱི་འབུལ་གྲྭ་འགྱེད་དང་བཅས་པ་ཆེད་དུ་སྩལ་མི་མངགས་ཤིང་། ཉེར་གཉིས་ལ་རྡུལ་ཚོན་ཆུ་བོར་གཤེགས་པའི་བར་མཐའ་རྒྱས་སུ་མཛད་ནས་ཆུ་སྟོད་ཟླ་བའི་ནང་ལ་གོང་མའི་ལུང་བཞིན་བསམ་ཡས་སུ་ཐེགས་ཏེ་འཇོམས་བྱེད་ཀྱི་མནན་སྲེག་འཕང་གསུམ། ཞི་བའི་སྲེག་བླུགས་བརྒྱ་རྩ། རབ་གནས་དང་བཅས་པ་མཛད་དེ་ཕྱིར་ཕེབས། ཟླ་བ་དགུ་པའི་ཚེས་བཅོ་བརྒྱད་ལ་བྱིན་རླབས་མོས་པའི་མཐུ་རྒྱུ་རྐྱེན་རྟེན་འབྲེལ་ཕུན་སུམ་ཚོགས་པས་སད་པ་ལས་ཆགས་ཐོགས་མེད་པའི་ཡེ་ཤེས་ཀྱི་གཟིགས་ངོར་གནས་ལུགས་ཇི་བཞིན་གསལ་བ་རྣམས་སྦ་གསང་མེད་པར་གསུང་ངག་ནས་གསོལ་བའི་དོན་མངོན་དུ་གྱུར། དེ་ནས་གོང་དུ་སྤྱན་འདྲེན་བྱུང་བ་ལྟར་བྱེ་ལ་བརྒྱུད་ཆིབས་བསྐྱོད་དེ། ཉེར་བརྒྱད་ཀྱི་ཉིན་ཕོ་བྲང་རྩེར་ཕེབསདེ་འཕྲལ་ཞམ་རིང་ནང་མ་དག་སྐུ་མདུན་དུ་ཕྱག་འབུལ་དུ་ཕེབས་པར་རྨི་ལམ་གྱི་མཚན་བལྟས་གང་ལ་བརྟགས་ཀྱང་བློ་བདེ་པོ་མ་བྱུང་ཚུལ་སྩལ་བར། ཐུགས་ཁོལ་དགོས་པ་མེད་ནངས་པར་སྐུ་ཞབས་སུ་ཕེབས་དུས་མཁྱེན་འགྱུར་ལ་རྫུན་

― MLP003_Page_0186 ―

^{[མ་དཔེ་གཟིགས་ན་འདིར་གནོན།]}

[Full Size]

ཅི་ལ་ཞུ་ཞེས་གསང་རྒྱའི་རྫུ་བག་ཆེས་ཟབ་ཅིང་། བྱད་ངོ་དང་འཕྲལ་གྱི་བྱ་བྱེད་ལ་བརྟགས་ཀྱང་བཞུགས་ཡོད་ཡོད་འདྲ་བ་འདུག་གསུང་། དེའི་སང་ཉིན་སྡེ་སྲིད་སྐུ་ཞབས་ཀྱང་རྩེར་ཕེབས་ཐོགདགེ་སློང་འཇམ་དབྱངས་གྲགས་པ་བྱོན་ནས་སྐུ་མཚམས་ཁོག་ཏུ་ཡས་ཕྱིན་ཐུན་མོང་དུ་མཇལ་ཁ་གནང་གི་ཡིན་ཞེས་སྤྱན་འདྲེན་དུ་བྱུང་བ་ལྟར་སྐུ་རྐྱང་གིས་ཕེབས་པར། གཟིམས་ཆུང་ཁམས་གསུམ་གྱི་འཆོང་རྩེའི་སྒོ་མང་མདུན་དུ་བཞུགས་སྟན་བཏིང་སྟེ། ད་ལྟ་ཡས་ཕྱིན་གཉིས་བཀའ་བགྲོས་ཀྱི་སྐབས་ན་འདུག་པས། རེ་ཞིག་འདིར་སྐུ་ངལ་བསྟེན་པ་ཞུ་གསུང་བ་ལྟར་བཞུགས་པ་ལ་གསོལ་ཇ་ཞིག་ཞུས་རྗེས། དགེ་སློང་ལགས་ཀྱིས་གསང་རྒྱ་བཀྲོལ་ཞིང་། དེར་སྡེ་པ་བཀྲས་རབ་པའང་ངེད་དཔོན་གཡོག་རྣམས་གནས་སྐབས་འདི་འདྲར་ཡོད་ཅེས་སྤྱན་ཆབ་བསིལ་བཞིན་ཏུ་བྱོན་བྱུང་གསུངས། དེ་ནས་སྡེ་སྲིད་རིན་པོ་ཆེ་དང་མཇལ་ཏེ། ཞི་དབྱིངས་སུ་སྙོམ་པར་ཞུགས་པའི་མཛད་པ་ཐ་མ་བསྟན་ཚུལ་གྱི་གནས་ལུགས་རྣམས་ཞིབ་མོར་སྩལ་ཅིང་གསང་རྒྱའི་འགག་བསྡམས་ཀྱང་བཞེས། ཟླ་བ་བཅུ་པའི་ཚེས་དགུའི་ཉིན་གསང་རྒྱའི་དགག་དགོས་ལ་དགོངས་ཏེ། ཡས་ཕྱིན་ལྷན་རྒྱས་སུ་འབུལ་བའི་ཚུལ་གྱིས་རྣམ་པར་རྒྱལ་བའི་གྲྭ་ཚང་ཆེན་མོ་འདུས་ཚོགས་ཀྱིས་དྭངས་མ་བཅུད་འདྲེན་དང་འབྲེལ་བར་བརྟན་བཞུགས་ཀྱི་གསུང་ཆོག་མཛད་པའི་ཐོག་འབུལ་བ་ཕྱག་འགྱེད་སྣེ་བཞག་སོགས་ཕུལ་དུ་བྱུང་བ་སྒྲུབ་པར་མཛད་ཅིང་། དེའི་ཕྱི་དྲོ་ཡས་ཕྱིན་ཐུན་མོང་དུ་འབུལ་བའི་ཟོལ་གྱིས་མི་དབང་ཆེན་པོར་ཚེ་དབང་བརྒྱ་རྩ་སྩལ། བཅུ་གསུམ་ལ་ཚོམས་ཆེན་དུ་བྲིས་ཐང་མང་པོར་རབ་གནས་ཉིན་གཉིས་མའི་གསུང་ཆོག་མཛད་པའི་དངོས་གཞིའི་ནུབ་མོ་འོད་གསལ་གྱི་གཟིགས་སྣང་ལ། ལྷ་ཆེན་བདེ་འབྱུང་ཉིད་དམར་འོད་ཆགས་པའི་སྐྱེས་བུ་བཞིན་བཟང་གི་རྣམ་པར་འོངས་ནས་ཁམས་གསུམ་གྱི་སྲོག་བཅུད་རྣམས་རིན་པོ་ཆེའི་སྒྲོམ་བུའི་རྣམ་པར་ཕུལ་བའི་དགེ་མཚན་གཟིགས། ཚེས་བཅོ་བརྒྱད་ཀྱི་སྔ་དྲོ་གཟིམས་ཆུང་ཉི་འོད་རྩེར་སྡེ་སྲིད་སྐུ་ཞབས་སུ་གྲིབ་སེལ་དང་དབང་བཀའ་འབུལ་བའི་ཟོལ་གྱིས་སྐུ་གདུང་རིན་པོ་ཆེའི་དྲུང་དུ་ཕེབས་ཏེ། མཆོད་འབུལ་དང་གསོལ་འདེབས་སྨོན་ལམ་མཁའ་འགྲོའི་

― MLP003_Page_0187 ―

^{[མ་དཔེ་གཟིགས་ན་འདིར་གནོན།]}

[Full Size]

གྲིབ་སེལ་སོགས་རྟེན་འབྲེལ་བསྒྲིག་ཐབས་ཀྱི་ཆོ་གའང་མང་དུ་མཛད། དེ་དུས་གདུང་ཤུགས་དྲག་པོས་གསོལ་འདེབས་གནང་བའི་ཚེ་བྱིན་རླབས་སློང་པས་མོས་གུས་རང་རིག་འོད་གསལ་ཏུ་དྭངས་ཏེ། ཐ་མལ་གྱི་སྣང་བ་འགག་པའི་མི་རྟོག་པ་ལས། རྗེ་ཐམས་ཅད་མཁྱེན་པའི་སྐུའི་སྣང་བ་གཟི་བྱིན་འབར་ཞིང་ཆོ་འཕྲུལ་གྱི་བཀོད་པ་མཐའ་ཡས་པ་སྟོན་པ་དང་། མ་འོངས་འབྱུང་འགྱུར་གྱི་གནས་མང་པོའང་མེ་ལོང་ནང་དུ་གཟུགས་བརྙན་ཤར་བ་བཞིན་སྒྲིབ་མེད་དུ་གསལ་ལེར་གཟིགས་ཤིང་། དེ་ཉིད་དུ་སྡེ་སྲིད་རིན་པོ་ཆེར་རྒྱ་ཅན་གྲོ་ལོད་ཀྱི་དབང་ཡང་སྩལ། དེའི་ཕྱི་དྲོ་ནས་བརྩམས་ཏེ་མགོ་ཟླའི་ཚེས་གསུམ་གྱི་བར་ཉིན་རེ་བཞིན་གཟིམས་ཆུང་ཁམས་གསུམ་དུ་ཡས་ཕྱིན་ལྷན་རྒྱས་ལ་འབུལ་བའི་རྫུས་སྡེ་སྲིད་སྐུ་ཞབས་སུ་དབང་བྱིན་རླབས་རྗེས་གནང་བྱབ་ཁྲུས་བྱད་གདོན་འགྲོལ་བ་སོགས་རྐྱེན་སེལ་མང་པོ་འབུལ་བར་མཛད། གཞན་ཡང་རྩེའི་ཞམ་རིང་ནང་མ་དང་། གཞིས་ཀལྷ་ས་རྣམས་སུའང་མཆོག་དམན་མང་པོའི་དོན་མཛད་ནས་བྱེ་ལ་བརྒྱུད་གདན་སར་ཕྱིར་ཕེབས་རྗེས། སྐུ་ཞང་འདུམ་པོ་བ་དང་སྙེ་མདོ་བ་རྣམས་ཀྱིས་རང་རང་གི་གནས་སུ་སྤྱན་དྲངས་ཏེ་ཕུན་སུམ་ཚོགས་པའི་བསྟི་སྟང་གིས་མཆོད། རྒྱལ་ཟླའི་བཅོ་ལྔའི་ནུབ་འོད་གསལ་གྱི་གཟིགས་སྣང་ལ། ཕོ་བྲང་གྲུ་འཛིན་གྱི་གཟིམས་ཆུང་བདེ་བ་ཅན་གྱི་སྒོའི་ནུབ་འཁྲིས་སུ་འཕགས་མཆོག་འཇིག་རྟེན་དབང་ཕྱུག་བཞུགས་པ་ལ། འདོད་དོན་གལ་ཆེ་བ་ཞིག་ཞུ་སྙམ་དུ་དགོངས་པ་ན། ལས་དབང་ཆེ་བའི་ཞབས་ཕྱི་ཟུང་ཞིག་འོང་བས་ཞུ་བར་རྔོ་མ་ཐོགས། ཇེ་ཞིག་ན་དེ་གཉིས་ཕྱིར་འཐོན་སོང་བ་དང་། ཞུ་བ་ལ་མ་ལྟོས་པར་ཤིན་དུ་དགྱེས་པ་ཆེན་པོས་ལུང་བསྟན་སྩལ་བའི་མཐར་སྤུ་གྲི་རྣོན་པོས་སྐུ་ལུས་འདྲལ་བར་མཛད་པ་ན་དེ་ལས་འོད་ཟེར་སྤོས་དུད་ལྟ་བུས་གནས་ཁང་ཁྱབ་པའི་དབུས་སུ་ཕྱི་མཐའ་འབྱུང་འགྱུར་གྱི་གཟུགས་བརྙན་སྣ་ཚོགས་གསལ་ལེར་ཤར་བ་གཟིགས། དེ་ནས་ཆུ་ཕག་གི་ལོ་ལ་རྡོ་རྗེ་བྲག་ཏུ་བསུ་བའི་བཀོད་པ་སོགས་བཀུར་སྟི་ཆེན་པོས་སྤྱན་དྲངས་ཏེ་རིག་འཛིན་སྤྲུལ་པའི་སྐུར་དབང་ལུང་མང་དུ་སྩལ་ཅིང་། ནག་ཟླའི་འགོར་རྩེ་གདོང་དུ་གདན་འདྲེན་འབྱོར་བ་ལྟར་རིམ་བཞིན་གན་པ་ལ་ནས་དཔལ་དེའུ་དང་རོང་ཆེན་

― MLP003_Page_0188 ―

^{[མ་དཔེ་གཟིགས་ན་འདིར་གནོན།]}

[Full Size]

བརྒྱུད། ཁུ་ལུང་མཁར་གདོང་། ཕུང་པོ་རི་བོ་ཆེ་རྣམས་ཀྱི་གནས་གཟིགས་དང་ཚོགས་བརྒྱ་མེ་མཆོད་སོགས་མཛད་ནས་རྩེ་གདོང་དུ་ཕེབས་ཏེ། ཞབས་དྲུང་ཁྲི་ཆེན་གྱིས་སྒོ་ནང་དུ་ཞབས་བསུ་དང་ཕྱག་དར་རྩེ་སྤྲོད་ཁྲི་མཉམ་རྒྱག་སོགས་ཀྱི་བཀུར་སྟིས་མཆོད་ཅིང་། དེར་ཁྲི་ཆེན་ཉིད་ལ་གཏེར་གསར་སྐོར་གྱི་དབང་ལུང་ཁྲིད་བཅས། མཁའ་འགྲོ་སྙིང་ཐིགཚེ་བདགབླ་མ་གསང་འདུས་སོགས་ཀྱི་དབང་ལུང་དང་། ཞབས་དྲུང་རྒྱན་རིན་པོ་ཆེར་ཡང་ཚེ་དབང་བརྒྱ་རྩ་རྣམས་ཀྱང་འབུལ་བར་མཛད་ཅིང་བླ་བྲང་ཕན་ཚུན་ཐམས་ཅད་ཀྱིས་བསྙེན་བཀུར་འབུལ་ནོད་ཕུན་སུམ་ཚོགས་པར་བསྟབས། དེ་ནས་རྣམ་གླིང་རྫོང་། སྟག་སྣར་ཆིབས་བསུ་སེར་སྦྲེངས་ཀྱི་བཀོད་པ་ཚར་དུ་དངར་བས་ལྷ་ཕུ་ཀླུ་ལྡིང་བཅས་པར་སྤྱན་དྲངས་ཤིང་། ཟན་ཐང་ཆུ་ཚན་མེ་མཚོར་རྣམས་སུའང་རིམ་གྱིས་ཕེབས་ནས་ཟབ་ཕུ་ལུང་དུ་མཆོད་འབུལ་ཚོགས་བརྒྱ། མེ་མཆོད་དང་། རི་མཐིལ་གྱི་གནས་ངོ་མཚར་ཅན་ཐམས་ཅད་མཇལ་ཞིང་འུ་ཡུག་བྱང་འབྲོག་སོགས་ནས་ཆེད་དུ་ལྷགས་པའི་མཆོག་དམན་མཐའ་ཡས་པའི་དོན་མཛད། ཕྱིར་ལམ་རྒྱ་མཚོའི་མདར་ཕེབས་དུས་ཇོ་མོ་གངས་དཀར་མ་སོགས་ཡུལ་བདག་འཁོར་བཅས་ཀྱིས་བཏུད་ཅིང་མཆོད་པའི་ཐུགས་ཉམས་ཆེས་གསལ་ཞིང་། ཕྱི་ལྟས་ཆར་རླུང་དྲག་པོའི་འཚུབ་འཁོར་ཡ་མཚན་པའང་བྱུང་། སྟག་སྣར་ཞག་བརྒྱད་བཞུགས་ཏེ་སྤྲུལ་པའི་སྐུ་དཔོན་སློབ་ལ་དབང་ལུང་མང་དུ་སྩལ་བར་ཞབས་ཏོག་ཕུལ་དུ་བྱུང་བ་སྒྲུབ། དེ་ནས་རྣམ་གླིང་ཀླུ་ཁང་དུ་ཞག་གསུམ་གྱི་བར་དུ་ཡུལ་པ་རྣམས་ཀྱིས་སངས་རྒྱས་འཇིག་རྟེན་དུ་བྱོན་པ་ལྟར་མཆོད་ཅིང་བཀུར། ཚེས་བཅོ་བརྒྱད་ལ་སྲམ་པ་སྒྲུབ་ཁང་དུ་དཔལ་ཆེན་པོ་ཡེ་ཤེས་ཀྱི་སྐུ་ཅན་མཇལ་བ་ན། དད་པ་དང་ངེས་འབྱུང་གིས་ཐུགས་རྒྱུད་བསྐུལ་ཞིང་ཚོགས་མཆོད་དང་རྣལ་འབྱོར་གྱི་ས་མ་དྷཱིཿལ་བཞུགས་པའི་ཚེ། སྔོན་ལྷ་རྗེ་ཟུར་པོ་ཆེར་འཁྲུངས་དུས་ཀྱི་དགེ་བའི་བག་ཆགས་བཟང་པོ་སད་དེ། དེ་དུས་ཀྱི་འཁོར་སློབ་བཤད་སྒྲུབ་ཀྱི་ཕྲིན་ལས་བསྐྱངས་ཚུལ་སོགས་སྒྲིབ་མེད་དུ་ས་ལེར་གཟིགས། ནངས་པར་སྡེ་པ་ཉུག་པས་སྤྱན་དྲངས་ཏེ་མཆོད་ཅིང་། རི་བཞི་མའི་གྲུ་ཁར་རྩེ་གདོང་གདུང་རྒྱུད་ཁྲི་རྒྱན་ཡུམ་དང་བཅས་པས་ཕྱག་དར་རྩེ་སྤྲོད་དང་

― MLP003_Page_0189 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྲི་གུང་གཤིབས་ཀྱི་དབུས་སུ་བཀུར་ཞིང་མཆོད་པར་ཆོས་འབྲེལ་ཡང་སྩལ་ནས། འུག་པ་ལུང་དང་གསེར་མདོག་ཅན་རྣམས་སུའང་སྤྱན་དྲངས་ཏེ། ཟུར་པའི་བླ་མ་ཡབ་སྲས་ལ་དབང་དང་གསེར་མདོག་ཅན་གྱི་བྱ་རྒོད་ཕུང་པོའི་ཆོས་ཁྲིའི་སྟེང་ནས་ཚོགས་ཆོས་ཀྱང་སྩལ། དེ་ནས་གཞིས་རྩེའི་རྫོང་བཞུགས་ཞོལ་བ་བཅས་པས་སྤྱན་དྲངས་པ་བཞིན་ཕེབས་ལམ་རྣམས་སུ་མི་ཁྲོམ་མི་ཤོག་པ་ལྟ་བུས་ཕེབས་ཏེ་ཕུན་ཚོགས་དགའ་ཚལ་དུ་བཞུགས་ནས་ཁྲོམ་དབང་དང་སྒོས་དབང་བསྔོ་བྱང་སོགས་ཀྱིས་སོ་སོའི་རེ་བ་སྐོང་བ་དང་། བཀྲ་ཤིས་ལྷུན་པོར་མཆོག་སྤྲུལ་རིན་པོ་ཆེ་མཇལ་དུ་ཕེབས་པར་བཞུགས་གདན་སོགས་ཀྱི་བཀུར་ཟོས་དང་སྟོན་མོ་གནང་སྦྱིན་བཅས་རྒྱ་ཆེར་སྩལ་ཅིང་། གནས་རྟེན་རྣམས་ཀྱང་ཞིབ་མཇལ་མཛད། དེ་ནས་གསང་སྔགས་གླིང་པ་རྣམས། འབྲོང་རྩེ་བ། རྒྱལ་རྩེ་རྫོང་རྣམས་སུ་རིམ་བཞིན་སྤྱན་དྲངས་ཏེ་བཀུར་ཞིང་ཆོས་སྦྱིན་ཡང་ཅི་དགར་སྩལ་ནས། རྭ་ལུང་གི་གནས་མཇལ་དུ་ཕེབས་ཤིང་། མཁའ་རོའི་ལ་བརྒྱུད་སྣ་དཀར་རྩེ། འཛམ་གླིང་ཆོས་འཁོར། བསམ་སྡིངས་རྣམས་སུ་སྤྱན་དྲངས་ཏེ་རྗེ་བཙུན་མར་ཚེ་རྟའི་དབང་བཀའ་མཛད། སྟག་ལུང་རྫོང་རི་བོ་བྲག་གླིང་རྣམས་སོ་སོའི་དཔོན་སློབ་དང་། སྒྲུབ་སྡེ་བསམ་གཏན་རྫོང་པ་རྣམས་ཀྱིས་བསྟི་སྟང་ཆེན་པོས་བཀུར་ཞིང་རང་སྐལ་གྱི་ཆོས་སྦྱིན་རྒྱ་ཆེར་སྩོལ་བ་སོགས་རིམ་པར་འགྲོ་དོན་སྐྱོང་བཞིན་པས་གདན་སར་ཕེབས། མི་རིང་བར་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུ་ཕེབས་པར། བླ་མ་དགོངས་འདུས། གནུབས་ལུགས་གཤེད་དམར། ཡང་དག་སྙིང་པོ། གཡུ་ཐོག་སྙིང་ཐིག་སོགས་དབང་ལུང་རྒྱ་ཆེར་སྩལ། དེ་ནས་མགོ་ཟླའི་མཇུག་ཏུ་གོང་མའི་ལུང་བཞིན་ཕོ་བྲང་ཆེན་མོར་ཕེབས་ཏེ། རྒྱལ་ཟླའི་ཚེས་གཅིག་ནས་བཟུང་། ཡས་ཕྱིན་ཐུན་མོང་དུ་འབུལ་བའི་ཚུལ་གྱིས་སྡེ་སྲིད་རིན་པོ་ཆེར་ཚེ་དབང་བརྒྱ་རྩ། རཏྣའི་གུར་དྲགརྟ་ནགཕྱག་རྡོར་རྡོ་རྗེ་གྲོ་ལོད་སོགས་ཀྱི་དབང་དང་། བྱད་གདོན་འགྲོལ་བ། བྱབ་ཁྲུས། གྲིབ་སེལ་རྣམས་འབུལ་བར་མཛད་ཅིང་། ཤིང་བྱི་ཟླ་བ་དང་པོའི་ཚེས་དགུ་ལ་བྲིས་ཐང་མང་པོར་རབ་གནས་ཉིན་གཉིས་མའི་ཆོ་ག །གྲྭ་ཚང་ཆེན་མོའི་གྲྭ་གསར་སུམ་ཅུ་སྐོར་ལ་ཞལ་འདོན་ཚང་མའི་དབང་

― MLP003_Page_0190 ―

^{[མ་དཔེ་གཟིགས་ན་འདིར་གནོན།]}

[Full Size]

རྗེས་གནང་སོ་སོའི་འཕྲིན་ལས་ཀྱི་ལུང་དང་བཅས་པ། མཆོད་དཔོན་ཆེན་མོ་དང་གཞིས་ཀའི་ཡུམ་སྲས་སོགས་ལའང་དབང་བྱིན་རླབས་མང་དུ་སྩལ་ནས་གནང་སྦྱིན་ཞབས་སྐྱེལ་དང་བཅས་མཐུན་རྐྱེན་འཛོམ་པས་གདན་སར་ཕྱིར་ཕེབས། ནག་ཟླའི་ཚེས་བཅུ་གཉིས་ཀྱི་ནམ་སེང་ལ་བླ་བྲང་ཆོས་འཁོར་ལྷུན་པོའི་ས་ཆོག་དང་འགྲམ་རྡོ་གཞུག་པ་སོགས་མཛད་ཅིང་། དེ་ཉིན་རས་ཆེན་རིག་འཛིན་རྣམ་རྒྱལ་གྱིས་གནས་ཆེན་གྱི་ས་རྡོ་དང་། གུར་གུམ་གྱི་གེ་སར། ཁམས་པ་གནས་སྐོར་བ་འགས་རྒྱ་གར་འཁོར་བའི་གནས་ཆེན་གྱི་ས་རྡོ་དང་ཤིང་སྣ། ཁྱད་པར་བྱང་ཆུབ་ལྗོན་ཤིང་གི་ཡལ་ག་ལག་ངར་ཙམ་པ་ལོ་མ་མང་པོ་དང་བཅས་པ་ཕུལ་བས་རྟེན་འབྲེལ་གྱི་ལ་ཉེ་བཟང་། ཟླ་བ་དགུ་པའི་འགོར་ལྷོ་བྲག་ཏུ་གུ་རུ་ལྷ་ཁང་དུ་སྤྱན་དྲངས་པ་ལྟར་ཐེགས་ནས། ཐུགས་སྲས་སྤྲུལ་པའི་སྐུར་བདེ་གཤེགས་ཀུན་འདུས་ཀྱི་དབང་ལུང་རྣམས་སྩལ་བར་བསྙེན་བཀུར་དང་འབུལ་ནོད་ཕུལ་དུ་བྱུང་བས་མཆོད། གཞིས་བྱེས་ཆབས་ཅིག་པར་གུ་རུ་ལྷ་ཁང་དུ་ཐེགས་ཏེ། གསུང་སྤྲུལ་རིན་པོ་ཆེའི་སྤྲུལ་པའི་སྐུའང་ངོས་འཛིན་ལེགས་ཚོགས་ཀྱི་རྟེན་འབྲེལ་བསྒྲིགས་པར་མཛད་ནས་ཕྱིར་ཕེབས། ཤིང་གླང་ཟླ་བ་ལྔ་པའི་འགོར་སྟག་རྩེ་ཞབས་དྲུང་གིས་བསམ་ཡས་སུ་སྤྱན་དྲངས་པ་ལྟར་ཆིབས་བསྐྱོད་དེ། ཚེས་བཅུ་དྲུག་གི་སྔ་དྲོ་ཕོ་བྲང་དུ་ཞབས་དྲུང་རྡོ་རྗེ་རྣམ་རྒྱལ་ལ་ཚེ་དབང་མཛད་ཅིང་། དེའི་ཕྱི་དྲོ་དཀར་ཆལ་ཐང་དུ་རྒྱ་གུར་ཕུབ་པར་སྒྲུབ་ཆེན་བདེ་གཤེགས་འདུས་པའི་དཀྱིལ་འཁོར་ལ་བརྟེན་ནས་བྱམས་པའི་གོས་སྐུ་ལ་རབ་གནས་ཀྱི་སྟ་གོན་དང་། ནངས་པར་དངོས་གཞིའི་ཆོ་ག་མཛད་པའི་ཡོན་བདག་བསྐོ་བཞག་ལ་ཐལ་ཇི་ཉིད་ངོས་ཕེབས་དང་། རབ་སྟོན་ཡང་རྒྱས་པར་བསྟབས། དེ་ནས་ཕོ་བྲང་གི་ཚོམས་སུ་ཚེ་སྒྲུབ་ཞག་ལྔ་མཛད་དེ་གུ་རུའི་ཞབས་རྗེས་ཀྱི་དྲུང་དུ་ཞབས་དྲུང་ལ་འཆི་བསླུ་དང་ཚེ་དབང་བརྒྱ་རྩ་སྩལ་ནས་གདན་སར་ཕྱིར་ཕེབས། དེ་ནས་ཟླ་བ་དགུ་པའི་མཇུག་ཏུ་གོང་མའི་ལུང་བཞིན་བསམ་ཡས་སུ་ཐེགས་ཏེ། མནན་ཟོར་བསྟན་མདོས་ལྷ་སྲིན་དམ་འདོགས་རབ་གནས་རྣམས་མཛད་ནས་ཕྱིར་ཕེབས་ཏེ་བླ་བྲང་གི་བྱ་འདབས་ཕུབ་པར་མཛད་རྗེས། སླར་ཡང་བསམ་ཡས་སུ་ཐེགས་ཏེ། རྟ་མགྲིན་

― MLP003_Page_0191 ―

^{[མ་དཔེ་གཟིགས་ན་འདིར་གནོན།]}

[Full Size]

གླིང་དུ་རྡོ་རྗེ་གྲོ་ལོད་ཀྱི་སྒོ་ནས་མནན་པ་མཛད། དེར་ཟླ་བ་བཅུ་པའི་ཚེས་བཅུ་བདུན་གྱི་ནུབ་མོ་འོད་གསལ་གྱི་གཟིགས་སྣང་ལ། ཁང་བཟང་གི་བཀོད་པ་ཡ་མཚན་པའི་ནམ་མཁའ་ལས་རོལ་མོའི་སྒྲ་གྲགས་པ་གསན་པའི་རྐྱེན་གྱིས་གཟིགས་པའི་ཚེ། མདུན་གྱི་ནམ་མཁར་འཇའ་འོད་ཀྱི་གུར་ཁྱིམ་རྣམ་པར་བཀྲ་བའི་ནང་མཐིང་ཞུན་ལྟར་གསལ་ཞིང་དྭངས་པའི་དབུས་སངས་རྒྱས་བྱང་སེམས་དཔག་ཏུ་མེད་པ་ཏིལ་གྱི་གོང་བུ་བཞིན་དུ་གང་བའི་འོག་ཏུ་རྩིབ་ཤར་ལྟ་བུའི་འཇའ་ཚོན་གྱི་སྟེང་ན་འཕགས་པའི་གནས་བརྟན་བཅུ་དྲུག་ཆགས་བྲལ་ཉན་ཐོས་ཀྱི་གཟུགས་ཕྲེང་ཚར་དུ་དལ་གྱིས་གཤེགས་པའི་རྣམ་པ་དང་ལྷན་ཅིག་ཏུ་བཀྲ་ཤིས་ཀྱི་མེ་ཏོག་ཆར་ལྟར་དབབ་བཞིན་དུ། སེམས་ཅན་གང་དག་འགྲོ་དང་མི་འགྲོ་བ། །ཞེས་སོགས་དཀོན་མཆོག་གསུམ་གྱི་བཀྲ་ཤིས་རྣམས་གསུང་བའི་འུར་དེང་གི་སྒྲས་གནམ་ས་གཡོ་བ་ཙམ་དུ་ལྡིར་བའི་རྐྱེན་གྱིས་མནལ་སད་པའི་ཚེའང་དྲི་བསུང་གི་ངད་དང་སྒྲ་གདངས་རྣམས་ཐུགས་ཡུལ་དུ་ལམ་མེར་སྣང་ཞིང་། ཞག་འགའི་བར་དུ་རྩོལ་མེད་ཀྱི་ཏིང་ངེ་འཛིན་ངང་གིས་འཕེལ་བ་དང་། འདི་ལས་ཕྱིས་ཀྱི་རྟེན་འབྲེལ་མང་པོའང་རྟོགས་པར་གྱུར་གསུངས། འཆར་ཁའི་སྲུང་བཟློག་གི་སྒྲུབ་པ་བདུན་ཕྲག་གཅིག་མཛད་ནས་ཉེར་དགུ་ལ་མདོས་ཟོར་འཕངས་ཏེ་གདན་སར་ཕྱིར་ཕེབས། མགོ་ཟླའི་ཚེས་བཅོ་བརྒྱད་ལ་གོང་མའི་ལུང་བཞིན་ཆིབས་བཏེགས་ཏེ་ཕོ་བྲང་ཆེན་པོར་ཕེབས། དེ་མ་ཐག་སྐུ་རྐྱང་གིས་གོང་ཞབས་མཇལ་བའི་ཚུལ་དང་། ཉེར་བཞི་ལ་རྩེར་སྡེ་སྲིད་རིན་པོ་ཆེ་མཇལ་ཞིང་དེ་ཉིན་ནས་བཟུང་རྩེ་ཤོད་ལྷན་རྒྱས་སུ་འབུལ་བའི་ཟོལ་གྱིས་སྡེ་སྲིད་སྐུ་ཞབས་སུ་ཚེ་གུར། རྟ་མགྲིན། རྡོ་རྗེ་གྲོ་ལོད་སོགས་ཀྱི་དབང་བྱིན་རླབས་མང་པོ་དང་། འཆི་བསླུ། བྱད་འགྲོལ། བྱབ་ཁྲུས། གྲིབ་སེལ་རྣམས་འབུལ་བར་མཛད། ལྷ་སར་ཡང་སྡེ་སྲིད་རིན་པོ་ཆེར་ཀླུའི་གདོན་འགྲོལ་དང་། རྩེར་བྲིས་འབུར་གྱི་རྟེན་མང་པོར་རབ་གནས་ཀྱི་ཆོ་ག་ཉིན་གཉིས་མ་རྣམས་རིམ་པར་མཛད་ཅིང་གཞན་ཡང་གྲྭ་གཞིར་ཡུམ་སྐུ་མཆེད་དང་། ཆུ་བཟང་དུ་གཞིས་ཀའི་ཞལ་ངོ་རྣམས་ལ་སོ་སོར་དབང་བྱིན་རླབས་དང་། ཡུམ་མཆེད་ལ་ཁྲིད་ཀྱི་དམིགས་སྐྱོར། ལ་མོ་རྩེའི་གྲྭ་པ་ཉི་ཤུ་

― MLP003_Page_0192 ―

^{[མ་དཔེ་གཟིགས་ན་འདིར་གནོན།]}

[Full Size]

སྐོར་ལ་གསང་རྫོགས་ཀྱི་མགྱོགས་དབང་དང་། འཁོར་བ་དབྱིངས་སྒྲོལ་གྱི་དབང་རྣམས་སྩལ་ནས་མེ་སྟག་མཆུ་ཟླའི་ཉ་ལ་གོང་ནས་ཕུལ་དུ་བྱུང་བའི་གནང་སྦྱིན་དང་ཞབས་སྐྱེལ་བཅས་ཕྱིར་ཕེབས་ཀྱི་ལམ་ཞོར་ནོར་བུ་ཚེ་རིང་གིས་རྣམ་རབ་ཏུ་སྤྱན་དྲངས་ཏེ་སྤྱི་དབང་སྒོས་དབང་སོགས་སྩལ་ཅིང་། སྦྲེ་ཤིང་དུ་མར་པའི་གདུང་ཁང་མཇལ་དུ་ཐེགས་ཏེ་ཕྱག་མཆོད་སྨོན་ལམ་མཛད་ནས་རིམ་པར་གདན་སར་ཕེབས། ཟླ་བ་བདུན་པའི་ཚེས་བཅུའི་ཉིན་ཞབས་དྲུང་གདུང་རྒྱུད་རིན་པོ་ཆེ་བླ་བྲང་དུ་ཐོག་མར་ཕེབས་ནས་མཚན་འདོགས་དང་དྲག་དམར་གྱི་དབང་སྩལ་ཏེ། བླ་བྲང་དུ་དབང་བསྐུར་མཛད་པའི་ཐོག་མའང་འདི་ཡིན་ནོ། །དེ་དག་གི་ཚེ་བསམ་ཡས་ཁྲ་འབྲུག་རྣམས་སུ་གཞུང་གི་སྐུ་རིམ་དུ་སྔ་ཕྱི་ཅི་རིགས་པར་ཞབས་བསྐྱོད། དེ་ནས་རྒྱལ་གྱི་ཟླ་བ་ལ་བླ་བྲང་ཆོས་འཁོར་ལྷུན་པོའི་རབ་གནས་རྗེ་ཉིད་འདུས་པར་བཅས་པས་སྒྲུབ་ཆེན་བདེ་གཤེགས་འདུས་པའི་དཀྱིལ་འཁོར་ལ་བརྟེན་ནས་ཚེས་བཅུ་ལ་སྟ་གོན་དང་། བཅུ་གཅིག་ལ་དངོས་གཞིའི་མེ་ཏོག་འཐོར་བའི་དུས་སྣམ་སྦྱར་ཅན་གྱི་སེར་སྦྲེངས་ཀྱི་བཀོད་པས་ཀུན་གྱི་ཡིད་འཕྲོག་པར་མཛད་ཅིང་། སྔ་དྲོ་ཡེ་ཤེས་པ་བཞུགས་པའི་ཚེ་བྱིན་ཕེབས་པའི་གཟི་བྱིན་མཆོག་ཏུ་འབར་བ་དང་ལྷན་ཅིག་པའི་དཀྱིལ་འཁོར་གཡོས་ཤིང་། ནམ་མཁའ་བཻ་ཌཱུཪྱ་ལྟར་དྭངས་པ་ལ་འཇའ་ཚོན་གྱི་སྡོང་པོ་རྣམ་པར་བཀྲ་བས་ཐམས་ཅད་ངོ་མཚར་བར་གྱུར། ས་འབྲུག་དབོ་ཟླའི་འགོར་ཐུགས་སྲས་སྤྲུལ་པའི་སྐུ་ཡབ་སྲས་ཕེབས་པར་དག་པའི་ཐུགས་བསྐྱེད་རྨད་དུ་བྱུང་བས་གསུང་སྤྲུལ་ཀུན་བཟང་རྡོ་རྗེ་ཀུན་གྱིས་རྩོད་མེད་དུ་གོང་མའི་ཁྲི་ལ་མངའ་དབང་བསྐུར་ཞིང་སྡོམ་པ་གསུམ་གྱིས་ཐུགས་ཀྱི་རྒྱུད་ཡོངས་སུ་གཏམས་པར་མཛད། ལྕགས་རྟ་དབྱུག་ཟླའི་འགོར་སྐུ་ཞང་འདུམ་པོ་བས་རྗེ་ཉིད་འདུས་པར་བཅས་པ་སྤྱན་དྲངས་ནས་རབ་གནས་ཉིན་གཉིས་མ་དང་དོང་སྤྲུགས་ཀྱི་གསུང་ཆོག་སོགས་མཛད། ཕྱིར་ལམ་ཚོགས་ཀྱི་ཀུན་རར་སྤྱན་དྲངས་ནས་སྤྱི་སྒེར་ཐམས་ཅད་ཀྱིས་མཆོད་ཅིང་བྱམས་པ་གླིང་མཆོད་རྟེན་ཡང་མཇལ་དུ་ཕེབས། དེ་ནས་ཕྱི་ལོ་སྐུ་འབུམ་བཞེངས་རྒྱུའི་ས་གཞིར་ཚེས་བཅུ་གཅིག་གི་ཉི་ཤར་སྦོམ་གཏའ་སྡོམ་པའི་སྐར་

― MLP003_Page_0193 ―

^{[མ་དཔེ་གཟིགས་ན་འདིར་གནོན།]}

[Full Size]

འཛིན་ཙམ་མཛད་རྗེས། ནམ་མཛོད་སྒྲུབ་སྡེ་བའི་གྲྭ་པ་བསྙེན་སོང་བཞིས་བདུན་ཕྲག་གཅིག་གྱི་བར་ཀྱེ་རྡོར་གྱི་སྒོ་ནས་ཞི་པའི་སྲེག་བླུགས་དང་གྲྭ་ཚང་གི་གྲྭ་པ་བསྙེན་པ་ཐེམ་པ་ཞལ་གྲངས་ཀྱིས་འཇོམས་བྱེད་ཀྱི་སྒོ་ནས་དྲག་པོའི་སྦྱིན་སྲེག་རྣམས་མཛད། ལྕགས་ལུག་མཆུ་ཟླའི་ཟླ་སྒང་ལ་རྡོ་རྗེ་བྲག་ཏུ་སྤྱན་དྲངས་ཏེ་རིག་འཛིན་སྤྲུལ་པའི་སྐུར་ཚེ་གུར་བྱང་ཆུབ་སེམས་དཔའི་སྤྱོད་དབང་སོགས་འབུལ་བར་མཛད་ཅིང་། ཚུར་ཡང་པཱུ་ཏྲའི་སྲོག་གཏད་སོགས་གསན་ནས་ཕྱིར་ཕེབས། དབོ་ཟླའི་ཚེས་བཅུའི་སྔ་དྲོ་སྐུ་འབུམ་གང་དུ་བཞེངས་བའི་གཞིར་གྲྭ་ཚང་གིས་བཀྲ་ཤིས་ཀྱི་གསོ་སྦྱོང་མཛད་པ་ན། གཎྜཱི་བརྡུང་བ་དང་ལྷན་ཅིག་འབྲས་ཕུའི་རི་རྩེ་དང་། སྙན་པའི་བ་དན་འཇིག་རྟེན་གསུམ་དུ་གྲགས་ཞེས་པའི་མདོ་ཚིག་འདོན་པའི་ཚེ། ས་དེར་ཉི་མ་ལྷག་གིས་ཤར་ཞིང་། རྗེ་ཉིད་གཟིམས་ཆུང་ནས་ཞབས་བསྐྱོད་པ་དང་མཉམ་དུ་ཞོགས་ཚོགས་ཀྱི་དུང་བུས་པ་སོགས་མ་བསྒྲིག་པར་འགྲིག་པའི་དགེ་མཚན་དང་། དེ་ནས་རྗེ་ཉིད་ཀྱིས་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྒོ་ནས་ས་ཆོག་དང་། གྲྭ་པ་བརྒྱད་ཀྱིས་འོད་ཟེར་དྲི་མེད་ཀྱི་ས་ཆོགགཞན་ཡང་བསང་མཆོད། ཆུ་གཏོར། འབུམ་ལྔ་སྒྲོག་པ། རྨང་གི་ཐིག་བྲེས་ནས་གཏེར་དང་འགྲམ་རྡོ་གཞུག་པ་སོགས་མཛད་པ་ལས། ཆུ་སའི་སྒོ་ནས་པྲ་བརྟག་པའི་ཚེས་བཟང་ཞིང་འཐས་པ་དང་། ཆུ་པྲ་གཡས་སུ་འཁྱིལ་བའི་དབུས་པདྨ་འདབ་མ་བརྒྱད་ཀྱི་ལྟེ་བར་བཾ་ཡིག་ལཱཉྩ་ནའི་གཟུགས་སུ་གསལ་བར་ཤར་ལ། དེའི་ཚེ་སངས་རྒྱས་དང་བྱང་ཆུབ་སེམས་དཔའི་ཚོགས་ནམ་མཁའ་གང་བས་བྱིན་གྱིས་བརླབས་པ་དང་ཐུགས་ཉམས་ཀྱི་རྩལ་སྣང་གཟི་བྱིན་རྒྱས་པ་སོགས་ངོ་མཚར་བའི་མཚན་མ་བཟང་པོ་གཟིགས་ཤིང་། དཀར་ཕྱོགས་ཀྱི་ལྷ་རྣམས་ཀྱིས་མཐུན་པའི་རྐྱེན་སྦྱར་ཏེ་ཉེ་འདབས་ནས་ས་རྡོ་ཆུ་སོགས་འབད་མེད་དུ་བརྡོལ་བ་དང་། ལས་མི་རྣམས་ཀྱང་དགའ་ཞིང་སྐྱིད་པའི་གླུ་གཞས་འཁྱིལ་ལེ་བའི་ངང་ནས་རང་རང་གི་ལས་ལ་བརྩོན་པས། ལས་མི་ཉུང་ངུས་དབྱར་ངོ་གཅིག་ལ་གེགས་མེད་དུ་འགྲུབ་པའི་ཆོ་འཕྲུལ་བསྟན་ཞིང་། ཁྱད་པར་ས་གའི་ཚེས་བཞི་ནས་བརྩམས་ཏེ་རིམ་པར་བྲེའི་ཐད་ཀྱི་འོག་གཞིར་ཀླུའི་བུམ་གཏེར་དང་དེའི་སྟེང་ས་བདག་

― MLP003_Page_0194 ―

^{[མ་དཔེ་གཟིགས་ན་འདིར་གནོན།]}

[Full Size]

གི་རྟེན་འཛུགས་མཛད་པའི་ཚེ་ནམ་མཁའ་དྭངས་པའི་མུར་སྐད་ཅིག་གིས་འཇམ་ཆར་གཤིན་པར་བབས། དེ་ནས་བྲེ་གཤམ་དུ་གནོད་སྦྱིན་གྱི་བུམ་གཏེར་དང་བྲེ་རྩིག་ནང་དུ་ཁྲོ་ཆེན་དཀོར་ཆས་གཏམས་པའི་ལྟེ་བར་གནོད་སྦྱིན་གྱི་འཁོར་ལོ་དང་བང་རིམ་གྱི་གཟུངས་རྣམས་ཀྱང་རིམ་པར་ཕུལ་ཏེ། སྣྲོན་ཟླའི་ཚེས་བརྒྱད་ལ་བུམ་རྟེན་གྱི་ནང་དུ་གཙུག་ཏོར་དྲི་མེད་ཀྱི་དཀྱིལ་འཁོར་བཞེངས་སྒྲུབ་དང་། དགུ་ལ་འོད་ཟེར་དྲི་མེད་ཀྱི་སྟ་གོན་མཛད་ནས་བཅུ་ལ་དཀྱིལ་འཁོར་བཞེངས་པའི་དབུས་སུ་སྲོག་ཤིང་བཙུགས་ཏེ་སྒྲུབ་མཆོད་དང་སྲོག་ཤིང་བརྟན་པའི་ཆོ་ག་གནང་བའི་ཚེ་ཐོག་མར་ཆར་ཟིམ་འཇམ་པོས་རྡུལ་རྣམས་མནན་རྗེས་ནམ་མཁའ་དྭངས་པ་ལས་སྲོག་ཤིང་གི་རྩེ་མོའི་ཐད་ཀར་འཇའ་ཁྱིམ་གདུགས་ལྟར་ཕུབས་པ་ལས་འཕན་དར་ལྟ་བུའི་འཇའ་ཚོན་འཕྱང་བ་དང་། མེ་ཏོག་དཀར་པོའི་ཆར་བར་སྣང་ཁྱབ་པར་ལྡིང་བར་ཀུན་གྱི་མཐུན་སྣང་དུ་བྱུང་ཞིང་། དེ་དུས་དག་པའི་གཟིགས་སྣང་ལ་ཨོ་རྒྱན་ཆེན་པོས་སྲོག་ཤིང་འཛུགས་པ་དང་། མཁའ་འགྲོ་སྡེ་བཞི་ས་ཕྱོགས་ཀྱི་འདྲེན་ཐག་འཐེན་པ། རྒྱལ་བ་མ་ཕམ་པ་སོགས་སངས་རྒྱས་སྲས་དང་བཅས་པ་གྲངས་མེད་པས་བྱིན་བརླབས་བཀྲ་ཤིས་ཀྱི་མེ་ཏོག་ཆར་དུ་བསྙིལ་བ། དཀར་ཕྱོགས་ཀྱི་ལྷ་དང་སྲུང་མས་ཕྱོགས་བཅུ་ཀུན་ནས་མཆོད་སྤྲིན་མཐའ་ཡས་པ་སྤྲོ་བ་སོགས་ངོ་མཚར་བ་དང་། ཟླ་བ་དྲུག་པའི་ཉེར་ལྔ་ལ་ཆོས་སྐྱོང་རྣམས་ཀྱི་རྟེན་འཛུགས་གནང་བའི་ཚེ་སྒྲུབ་ཁང་ནས་རྟེན་རྫས་ཀྱི་ཕྱི་བཞིན་རླུང་འཚུབ་དྲག་པོ་འཁོར་བཞིན་དུ་འཛུགས་པའི་བར་འགྲོ་བ་ཀུན་གྱི་མཐུན་སྣང་དང་། དག་པའི་གཟིགས་ངོར་དམ་ཅན་མོན་པ་ཕོ་མོའི་གཟུགས་བཟུང་ནས་སྤྲུལ་པའི་བྱ་ཁྱི་དུ་མའི་འཁོར་དང་བཅས་ཏེ་རྟེན་གྱི་གནས་སུ་ཡུད་ཀྱིས་ཐིམ་པའི་གཟིགས་སྣང་ངོ་མཚར་བ་བྱུང་། ཁྲུམས་ཟླའི་ཚེས་བདུན་ནས་ཞབས་དྲུང་གདུང་བརྒྱུད་རིན་པོ་ཆེས་དབུས་གྲྭ་གཙང་ཡོངས་རྫོགས་དང་། ཏྲེ་བོ་སྤྲུལ་པའི་སྐུ། རབ་འབྱམས་པ་ཆག་པ་ཆོས་འཕེལ་སོགས་ཕྱོགས་འདུས་པ་སྟེ། འདུས་པ་ཕྱེད་སུམ་བརྒྱ་ཙམ་ལ་འདུས་པ་ཆེན་པོ་མདོའི་དབང་རྒྱུད་དང་མན་ངག་གི་ལུགས་གཅིག་ཏུ་སྒྲིལ་བའི་ཕྱག་བཞེས་རྣམ་པར་དག་པ་ཞག་བཅུ་གཅིག་གི་ཁོངས་སུ་

― MLP003_Page_0195 ―

^{[མ་དཔེ་གཟིགས་ན་འདིར་གནོན།]}

[Full Size]

རྫོགས་པར་སྩལ་རྗེས། སྐུ་འབུམ་གྱི་བྲེ་དང་འཁོར་ལོའི་གཟུངས་འབུལ་རྣམས་གྲུབ་ནས། བཅུ་དགུའི་ཉིན་རྒྱལ་མཚན་འཛུགས་པའི་ཆོ་གས་ཆར་ཁེབས་གན་ཇི་ར་དང་བཅས་སྒྲོན་ཞིང་ཤིས་བརྗོད་ཀྱི་མེ་ཏོག་འཐོར་བའི་ཚེ་འབྲུག་སྐད་གྲགས་ཤིང་ཆར་ཟིམ་བབས་པའི་དགེ་མཚན་དང་། ཉེར་གསུམ་ལ་བུམ་ཐོག་ཏུ་རྗེ་ཉིད་ཀྱི་ཞབས་ཕྱིར་དབུ་ཆེ་དང་བསྙེན་སོང་སུམ་ཅུ་སྐོར་གྱིས་བླ་མ་ཞི་བ། བར་ཁང་དུ་སྤྲུལ་པའི་སྐུ་གཞན་ཕན་དབང་པོས་དབུ་མཛད་ཆེ་བགྲེས་སུམ་ཅུ་སྐོར་གྱིས་ཞི་ཁྲོ་རིགས་བསྡུས། འོག་ཁང་དུ་བདག་ཅག་གྲྭ་པ་བཞི་བཅུ་སྐོར་གྱིས་བདེ་འདུས་ཏེ། དཀྱིལ་ཁག་གསུམ་ལ་བརྟེན་པའི་རབ་གནས་ཀྱི་ཆོ་ག་སོ་སོ་དང་། གྲྭ་པ་བརྒྱད་ཅུ་སྐོར་གྱིས་རྟེན་འབྲེལ་སྙིང་པོས་མེ་ཏོག་སྒྲུབ་པ་རྣམས་མཛད་ནས། ཆོག་གྲྭ་ཐམས་ཅད་བསྒྲིལ་བའི་སེར་སྦྲེངས་ཀྱི་གཙོ་བོར་རྗེ་ཉིད་ཞབས་བསྐྱོད་པས་མེ་ཏོག་འཐོར་བ་དང་། ཕྱོགས་སོ་སོ་ནས་བརྟན་བཞུགས་ཀྱང་མཛད། དེའི་ཚེ་མཁའ་ལ་འཇའ་ཚོན་གྱི་གུར་ཁྱིམ་ཕུབ་ཅིང་། ཕྱོགས་མཚམས་རྣམས་སུ་ཆུ་འཛིན་བཀྲ་ཤིས་རྟགས་བརྒྱད་ཀྱི་རྣམ་པར་འཁྲིགས་པའི་ཁོར་ཡུག་འོད་ཟེར་དཀར་པོའི་ཕྲེང་བས་བསྐོར་བའི་དགེ་མཚན་བཟང་པོ་ཀུན་གྱི་མཐུན་སྣང་དུ་མངོན་པར་བསྟན། དེ་ནུབ་དག་པའི་གཟིགས་སྣང་ལ། རིན་པོ་ཆེའི་ཐེམ་སྐས་ལ་འཛེགས་ནས། ཁང་བཟང་ཡིད་དུ་འོང་བའི་ནང་དུ་ཐེགས་པ་ན། དེར་དྭངས་གསལ་འོད་ཀྱི་འཁོར་ལོའི་དབུས་སུ་རིགས་བརྒྱའི་ལྷ་ཚོགས་རྣམས་ལྷམ་མེར་བཞུགས་པ་ལ་མོས་གུས་རྩེ་གཅིག་པས་ཐུགས་ཡིད་འདྲེས་པའི་ཚེ། ལྷ་ཚོགས་ཐམས་ཅད་འུབ་ཀྱིས་འདུས་པ་མགོན་པོ་འོད་དཔག་ཏུ་མེད་པ་དམར་གསལ་མཚན་དཔེའི་གཟི་བྱིན་མཆོག་ཏུ་འབར་བར་གྱུར་ནས་འདི་སྐད་དུ། ཁྱོད་ཀྱི་ཕྲིན་ལས་གཞན་ཕན་གདུལ་བྱའི་ཡུལ་ལ་སྨིན་པས་མྱུར་དུ་པདྨས་བརྒྱན་པའི་ཞིང་ཁམས་སུ་རྣམ་རོལ་མཐའ་ཡས་ཞེས་བྱ་བའི་དེ་བཞིན་གཤེགས་པར་ཁྱོད་འགྱུར་ལ། དེའི་ཚེ་འདི་ལྟར་དགེ་བའི་ལས་ལ་འབྲེལ་བ་ཐོགས་པ་ཀུན་ཀྱང་འདུས་པ་དང་པོར་སྐྱེ་བར་འགྱུར་བའི་རྟེན་འབྲེལ་འགྲིག་པ་ཡིན་ནོ། །ཞེས་ལུང་བསྟན་དབུགས་དབྱུང་སྩལ་བའི་མནལ་ལམ་ཆེས་ངོ་མཚར་བ་སྣང་བར་གྱུར་ཏོ། །

― MLP003_Page_0196 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ནས་དབྱུག་ཟླའི་ཉེར་གཅིག་ལ་ཡབ་སྲས་ལྷན་ཅིག་ཏུ་ལུམ་པའི་གྲུ་བརྒྱུད། ཉེར་ལྔ་ལ་སྐྱེ་ཆུའི་རབ་ཁར་ཡུམ་སྐུ་མཆེད་ཀྱི་ཐབ་བསུ་དང་བཅས་ཕོ་བྲང་ཆེན་པོར་ཕེབས། དེ་འཕྲལ་རྗེ་ཉིད་སྐུ་རྐྱང་གིས་གོང་ཞབས་ཀྱི་མཇལ་ཕྱག་ཞུ་བའི་ཚུལ་དང་། ནངས་པར་ཡས་ཕྱིན་ལྷན་རྒྱས་སུ་འབུལ་བའི་རྫུས་སྡེ་སྲིད་སྐུ་ཞབས་ལ་སྔ་དྲོ་ཚེ་དབང་དང་། ཕྱི་དྲོ་རྟ་མགྲིན་གསང་སྒྲུབ་ཀྱི་བྱིན་རླབས་འབུལ་བར་མཛད་ཅིང་། དེ་ཉིན་དཔོན་སློབ་ཐམས་ཅད་ཀྱིས་ཤོད་ཀྱི་མཇལ་ཕྱག་ཀྱང་ཞུ་བར་མཛད། དེ་རྗེས་གསང་རྒྱའི་དགག་དགོས་ལ་དགོངས་ཏེ་ཟླ་བ་བཅུ་པའི་ཚེས་གཉིས་ཀྱི་སྔ་དྲོ་གཟིམས་ཆུང་ཁམས་གསུམ་རྣམ་པར་རྒྱལ་བར་གསང་ཁོག་ཏུ་ཡབ་སྲས་ལྷན་ཅིག་ཏུ་ཕེབས་ནས་གོང་ཞབས་བཞུགས་པའི་ཚུལ་གྱིས་གདུང་རྒྱུད་རིན་པོ་ཆེའི་གཙུག་ཕུད་ཕུལ་བར། སྡེ་སྲིད་སྐུ་ཞབས་ཀྱི་བསླབ་སྟོན་ལྟར་མཚན་རྗེ་ཉིད་རང་གི་ཕྱག་བྲིས་སུ་མཛད་པ་འདོགས་པའི་ཚུལ་དང་། གཙུག་ཕུད་ཀྱང་གོང་མའི་སྐུ་ཚབ་ཀྱིས་དབུ་སྐྲ་ནས་བཟུང་སྟེ། རྗེ་ཉིད་རང་གཅོད་དུ་འཇུག་པར་མཛད་གསུངས། དེ་བཞིན་གཤེགས་པའི་འཕེལ་གདུང་ལ་སོགས་བའི་བྱིན་རྟེན་མང་པོ་ཕྱག་ལས་བསྟར་ཏེ་སྩལ་བའི་ཚུལ་དང་རྒྱ་ཡི་ཤིང་འབྲས་སོགས་བཞེས་སྤྲོ་ཁྱད་མཚར་དུ་མའང་སྩལ་ཅིང་ཕྱིར་ཕེབས་ཀྱི་གཟིམས་ཆུང་འགག་ཏུ་ཞབས་ཕྱི་ནང་མ་རྣམས་ཀྱིས་མགུལ་དར་དང་། དེ་ནས་ཀྱང་སྐུ་ཞབས་གྲྭ་ཚང་སྤྱི་སོ་དང་སྒེར་པ་ཅི་རིགས། གཞིས་ཁའི་ཡུམ་སྐུ་མཆེད། དྲུང་འཁོར་དང་ལྷ་ས་གནས་ཆེན་པ་མང་པོས་ཀྱང་ལེགས་སྐྱེས་ཀྱི་ཞལ་གསོ་རིམ་པར་ཕུལ། དེ་ཉིན་ནས་བཟུང་གྲྭ་ཚང་ཆེན་མོའི་གྲྭ་གསར་གཙོར་གྱུར་གྱི་བརྒྱད་ཅུ་སྐོར་ལ་ཚོམས་ཆེན་དུ་བླ་མ་གསང་འདུས། བཀའ་བརྒྱད་གསང་རྫོགས། འགྲོ་བ་ཀུན་སྒྲོལ། ཁྲོ་ཆུ། ཡང་བཟློགརྒྱ་ཅན་སྐོར་སོགས་ཀྱི་དབང་བྱིན་རླབས་དང་། ཆོས་སྐྱོང་སྐོར་གྱི་རྗེས་གནང་སྲོག་གཏད་མང་པོ་ཉིན་ལྔའི་བར་འབྲེལ་ཆགས་སུ་སྩལ་ཅིང་། དེ་དུས་ཡས་ཕྱིན་ཐུན་མོང་དུ་འབུལ་བའི་ཚུལ་གྱི་ཤོད་དུ་རིམ་པར་སྒྲ་མི་སྙན་གྱི་ཚེ་དབང་། རྒྱ་ཅན་གྲོ་ལོད་ཀྱི་དབང་། གཡུ་ཐོག་སྙིང་ཐིག་དང་བདུད་རྩི་བུམ་པའི་དབང་ལུང་། སྐུ་གསུམ་རིགས་འདུས་དང་འཆི་མེད་དཔལ་སྟེར་གྱི་ཚེ་དབང་། ནཱ་

― MLP003_Page_0197 ―

^{[མ་དཔེ་གཟིགས་ན་འདིར་གནོན།]}

[Full Size]

ག་རཀྴའི་རྗེས་གནང་། ལོཀྟྲིའི་རིགས་གཏད། གཟའི་དུག་འབྱིན། བྱད་འགྲོལ། གདོན་འགྲོལ། གྲིབ་སེལ། འཆི་བསླུ་སོགས་འབུལ་བར་མཛད། ཚེས་བཅོ་ལྔ་ནས་བཟུང་སྒྲུབ་པ་ལ་བཞུགས་ཏེ་ཉེར་དགུའི་ཉི་ཤར་ནས་གནམ་གང་གི་ཐོ་རེངས་བར་གསེར་གདུང་ཆེན་མོའི་འོག་སོགས་སུ་ཀི་ཀང་རླུང་བྲུབས་ཀྱི་ལས་སྦྱོར་དང་ཟོར་འཕེན་མཛད། དེ་དུས་ཉེར་དགུའི་སྲོད་ལ་ལྷོ་ནུབ་ཀྱི་ཟུར་གྱི་རྩིག་སྟེང་ནས་གྲྭ་པ་བསྟན་འཛིན་བསམ་འགྲུབ་ཟེར་བ་ཐོག་སོ་ལྔར་ལྷུངས་ཀྱང་ཅི་ཡང་མ་སྐྱོན། གྲྭ་ཚང་གི་གྲྭ་པ་མང་པོར་ལོཀྟྲི་དང་རླུང་བྲུབས་སོགས་དྲག་སྔགས་མང་པོའི་ལུང་དང་ཕྱག་ཁྲིད། གོང་གི་ཞམ་རིང་ནང་མ་དང་། སེར་འབྲས་ཀྱི་གྲྭ་པ་དྲུང་འཁོར་ལྷ་སའི་བསྙེན་གནས་པ་སོགས་དོན་གཉེར་ཅན་མང་པོར་དབང་ལུང་ཁྲིད་བཀའ། ཆུ་བཟང་དུའང་སྤྱན་དྲངས་ནས་རྐྱེན་སེལ་གྱི་དབང་བྱིན་རླབས། ཕྱིར་ལམ་ཕ་བོང་ཁར་གྲུབ་རྒྱ་དགེ་སློང་ལ་གེགས་སེལ་བོག་འདོན་རྣམས་སྩལ་ཏེ་རྩེར་ཕེབས། ཉེར་བཞི་ལ་ཆབ་མདོ་རྒྱལ་བ་འཕགས་པ་ལྷའི་ཞལ་སྔ་ནས་ཀྱིས་འབུལ་སྐྱེས་ཕུལ་དུ་བྱུང་བ་དང་བཅས་ཆེད་དུ་ཕེབས་པར་བསྟི་སྟང་ཆེན་པོས་མཇལ་འཛོམ་གནང་ཞིང་། དཔོན་སློབ་ཐུན་མོང་ལ་ཚེ་དཔག་མེད་དང་རྟ་མགྲིན་གྱི་དབང་མཛད་པ་ནས་བཟུང་ཕན་ཚུན་ཐུགས་ཡིད་གཅིག་འདྲེས་སུ་གྱུར་པས་ལོ་རེ་བཞིན་འཚམས་འདྲིའི་ཞུ་ཡིག་འཕུལ་ལེན་དང་། དེ་དུས་སྔགས་ཀྱི་ལག་ལེན་བྱང་བའི་གྲྭ་པ་ཞིག་གཏོང་དགོས་ཚུལ་གྱི་བཀའ་ལུང་ལྟར། སླར་དགེ་སློང་ཨོ་རྒྱན་བསོད་ནམས་ཅན་ཞབས་ཕྱིར་རྫོང་སྟ་མཛད། རྒྱལ་ཟླའི་བཅུ་དགུའི་སྔ་དྲོ་གོང་ཞབས་ཡས་ཕྱིན་ཐུན་མོང་དུ་འབུལ་བའི་ཚུལ་གྱི་མི་དབང་ཆེན་པོར་གཅོད་ཡུལ་སྟན་ཐོག་གཅིག་མའི་ཁྲིད་དམིགས། རྡོར་སེམས་དང་ཚེ་དཔག་མེད་ཀྱི་སྒོམ་རིམ་རྣམས་འབུལ་བར་མཛད་ཅིང་། དེ་ཉིན་ཕུན་སུམ་ཚོགས་པའི་གནང་སྦྱིན་དང་ཞབས་སྐྱེལ་བ་སོགས་མཐུན་རྐྱེན་འཛོམ་པའི་ཆིབས་བཏེགས་ཏེ། ལམ་ཞོར་དངོས་གྲུབ་དགོན་དུ་སྤྱན་དྲངས་ཤིང་མཆོད་ནས། ལུམ་པའི་གྲུ་བརྒྱུད་ཉེར་ལྔ་ལ་གདན་སར་ཕེབས། དེ་ནས་བཀྲ་ཤིས་མཐོང་སྨོན་པས་སྤྱན་དྲངས་སྔ་ཕྱིར་བྱུང་བ་ལྟར་ཆུ་སྤྲེལ་ཟླ་བ་དང་པོའི་ཉེར་གཅིག་ལ་ཆིབས་བཏེགས་ཏེ།

― MLP003_Page_0198 ―

^{[མ་དཔེ་གཟིགས་ན་འདིར་གནོན།]}

[Full Size]

ཕེབས་ལམ་རྣམས་སུ་གཞན་དོན་སྐྱོང་བཞིན་པས་གནམ་གང་གི་ཉིན་ཐབ་བསུ་ཆིབས་བསུ་སེར་སྦྲེངས་རྣམས་ཀྱིས་ཞབས་བསུས་ཏེ་ཀུན་བཟང་ཆོས་གླིང་དུ་ཕེབས། དབོ་ཟླའི་ཚེས་གཅིག་གི་ནུབ་མི་དབང་ཆེན་པོའི་ཡུམ་ལ་འཕོ་བའི་གསལ་འདེབས་མཛད་པའི་མནལ་ལྟས་བྱུང་བ་ལྟར་ཚེས་བཅུ་གཅིག་གི་ཉིན་བསྔོ་རྟེན་འབུལ་མི་འབྱོར་ཞིང་གཤེགས་དུས་འཕོ་བ་འབྱོངས་པའི་རྟགས་མཚན་གསལ་བའི་ལོ་རྒྱུས་བྱུང་བས་ཐམས་ཅད་གཟིགས་སྣང་ལ་ཡིད་ཆེས་པར་གྱུར། ཚེས་གཉིས་ནས་བཟུང་རིམ་པར་མགོན་ཁང་དུ་ཕེབས་ཏེ་གཏོར་འབུལ་ཕྲིན་བཅོལ་དང་། འདུ་ཁང་གི་ཁྲོ་ཐོག་ཏུ་སྤྱན་དྲངས་ནས། གྲྭ་ཚང་སྒྲུབ་སྡེ་བཅས་པས་ཞབས་བརྟན་རྒྱས་པར་བསྟབས། དེའི་སང་ཉིན་རྔ་འཆམས་དང་བྲུབ་འཆམས་ཀྱི་ཕྱག་ལེན་རྣམས་གཟིགས་ལམ་དུ་ཕུལ་ཞིང་། ཚེས་དྲུག་ལ་གྲྭ་གཙང་ཡོངས་ལ་གཏེར་གསར་གྱི་བླ་མ་ཞི་དྲག་དང་། གཤིན་རྗེ་གཤེད་ཀྱི་དབང་། ཕྲིན་ལས་སྐོར་གྱི་ལུང་དང་བཅས་པ་སྩལ་ནས་ཚེས་བདུན་ལ་སྦྱོར་ཡོན་མཆོད་ཀྱི་སྤྱན་འདྲེན་བྱུང་བ་ལྟར། རྒྱལ་བུ་དཔོན་བློན་དང་རྩེའི་དྲུང་འཁོར་རྣམས་ཀྱིས་ཆིབས་བསུ། ཆོས་སྡེའི་སེར་སྦྲེངས་དང་བཅས་པས་མདུན་བསུས་ཏེ་བླ་བྲང་དུ་སྤྱན་དྲངས་ནས། སྤྲུལ་སྐུ་རིན་པོ་ཆེར་གཏེར་གསར་གྱི་ཆོས་བཀའ་འགའི་ལུང་དང་། ཞོལ་དུ་སྡེ་པས་སྤྱན་དྲངས་ཏེ་ཚེ་གུར་གྱི་དབང་ཞུས་ཤིང་། སྲིད་ཀྱི་རྟེན་འབྲེལ་བྱིན་རླབས་མཛད་པས་ལོ་དུས་ལས་མ་འགྱང་བར་རྒྱལ་བུའང་བྱུང་བར་སྣང་། ཡོན་མཆོད་ཐམས་ཅད་ཀྱིས་བསྙེན་བཀུར་འབུལ་ནོད་ཕུལ་དུ་བྱུང་བས་མཆོད་ནས་ཕྱིར་ཕེབས། བཅུ་གསུམ་ལ་ཀུན་བཟང་ཆོས་གླིང་གྲྭ་ཚང་དུ་བླ་མ་དྲག་པོའི་ཆོ་ག་ཚུགས་པའི་གྲལ་དབུར་ཞབས་བསྐྱོད་དེ་དངོས་གྲུབ་ལེན་པ་དང་རྗེས་འབྲེལ་དུ་གཏོར་དབང་ཡང་སྩལ། བཅུ་བཞི་ལ་བྱ་ས་ཞབས་དྲུང་གིས་བསྟི་སྟང་ཆེན་པོས་སྒྲོ་གཞིས་ཀར་སྤྱན་དྲངས་ནས་མཆོད་ཅིང་ཚེ་དབང་དང་ལེའུ་བདུན་མའི་ལུང་སྩལ། སླར་ཡང་ཕྱིར་ཕེབས་ཏེ། གྲྭ་ཚང་གི་སློབ་དཔོན་དང་གཉེར་པའི་ལས་ཚན་བསྐོ་བ་སོགས་མཛད་ནས། ཕྱིར་ལམ་གྲུབ་དབང་སྤྲུལ་སྐུ་རིན་པོ་ཆེས་དྲེའུ་ལྷས་དང་། སྡེ་པ་སྐྱིད་ཕུག་པས་ལྷུན་རྩེ་རྫོང་དུ་སྤྱན་དྲངས་ཏེ་སོ་སོས་བཀུར་སྟི་ཕུལ་དུ་བྱུང་བས་

― MLP003_Page_0199 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོད་ཅིང་། རིམ་པར་ཡར་སྟོད་བརྒྱུད་ལམ་དུ་དད་ཅན་མང་པོའི་དོན་མཛད་བཞིན་པས་གདན་སར་ཕེབས། དེ་ནས་བླ་བྲང་གི་ཡང་ཐོག་སྤར་བའི་ཨར་ལས་བསྟབས། གཙུག་ལག་ཁང་དུ་སྟན་སྤོས་ཏེ་དབྱར་ངོ་བཞུགས་ནས་སྒྱུ་འཕྲུལ་ཞི་ཁྲོ་དང་། འདུས་མདོ། ཡང་དག་རྣམས་ཀྱི་སྒྲུབ་དཀྱིལ་དང་། ཕྱག་རྒྱ་ཟིལ་གནོན་གྱི་ལས་བྱང་རྣམས་བཀའ་རྩོམ་མཛད་ཅིང་། མངའ་རིས་ཁམས་ཀོང་སོགས་ཕྱོགས་འདུས་པ་མཆོག་དམན་མང་པོར་དབང་ལུང་གཏོས་ཆེ་བ་དང་། སྟོན་ཀར་གཉུག་མར་གནས་པ་དང་ཕྱོགས་འདུས་པ་སོགས་ཉིས་བརྒྱ་བརྒལ་བར་ཀུན་མཁྱེན་ཆེན་པོའི་བསྟན་བཅོས་ཡོངས་རྫོགས་ཀྱི་ལུང་སོགས་ཆོས་འཁོར་བར་མེད་དུ་བསྐོར། ཆུ་བྱ་ཟླ་བ་དང་པོའི་ནང་དུ་གཞུང་ས་མཆོག་ནས་སྡིངས་པོ་ཆེའི་དགོན་མ་ལག་དང་བཅས་པ་འཛིན་སྐྱོང་གི་ལུང་སྩལ་བ་ལྟར། དེའི་གྲྭ་སློབ་རྣམས་ཀྱིས་སྤྱན་དྲངས་ཏེ་ཞབས་ཏོག་ཕུལ་དུ་བྱུང་བ་བསྒྲུབས། ཁྲུམས་ཟླའི་འགོར་སྣ་དཀར་རྩེའི་ཞབས་དྲུང་གཤེགས་པའི་སྐྱབས་གནས་སུ་སྤྱན་དྲངས་ཏེ་སྒྲིབ་སྦྱོངས་ཀྱི་ཆོ་གས་རྗེས་སུ་བཟུང་། དེ་ནས་ཕེབས་ཞོར་གླིང་དང་སྨོན་མདའི་ལ་བརྒྱུད་གུ་རུ་ལྷ་ཁང་དུའང་སྤྱན་དྲངས་ཏེ་བཀུར་སྟི་ཆེན་པོས་མཆོད་ཅིང་། སོ་སོའི་ཐུགས་ཀྱི་བཞེད་པ་སྐོང་བའི་ཆོས་སྦྱིན་ཡང་སྩལ་ནས་ཕྱིར་ལམ་ཡང་ཡུལ་སོ་སོར་འགྲོ་བ་དཔག་ཏུ་མེད་པའི་དོན་མཛད་བཞིན་པས་གདན་སར་ཕེབས། དབྱུག་ཟླའི་ཚེས་བཅུ་གཅིག་ནས་བཟུང་གྲྭ་ཚང་དུ། མདོ་སྒྱུ་ཡང་དག་གི་ཆོག་གྲྭ་བཞི་པོ་ཚུགས་པ་དེ་ཉིད་ཕྱི་ལོ་ནས་ས་གའི་དུས་ཆེན་ཐོག་སྤོ་བར་མཛད་ཅིང་། ཕྱིས་མཉམ་སྦྱོར་རིགས་བསྡུས། དོང་སྤྲུགས་པདྨ་བརྒྱ་ལྡན། ཚེ་དཔག་མེད་ལུང་ལུགས། ཆ་གསུམ་དཔལ་སྡོམ་པ་རྣམས་བསྣན་ནས་དཀྱིལ་ཆེན་དྲུག་དང་དཀྱིལ་ཆུང་གཉིས་ཏེ་དཀྱིལ་འཁོར་ཁག་བརྒྱད་ཀྱི་སྒྲུབ་མཆོད་ཀྱི་ཕྱག་སྲོལ་དང་འབྲེལ་བར་ངོ་མཚར་བའི་ལྟད་མོ་ལན་ལྔ་མཛད་པ་ནི། ཚེས་བཞིའི་ས་ཆོག་གི་དུས་ཁྲག་འཐུང་རྩ་འཆམས། བཅོ་ལྔའི་དུས་ཆེན་ལ་མཆོད་གར། བཅུ་དྲུག་ལ་སྒྱུ་འཕྲུལ་ཁྲོ་བོའི་གདབ་ལས་ཀྱི་བྲུབ་འཆམས། བཅུ་བདུན་ལ་ལས་བཞིའི་སྦྱིན་སྲེག་གི་

― MLP003_Page_0200 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོམ་བུ་སྤྱན་འདྲེན་དང་། བཅོ་བརྒྱད་ལ་རྡུལ་ཚོན་ཆུ་བོར་གཤེགས་པ་དང་སྦྲེལ་ཏེ་གོས་སྐུ་ཞལ་འབྱེད་ཀྱི་སེར་སྦྲེངས་རྣམས་ཀྱི་ཕྱག་བཞེས་བསྟར་ཆགས་པའི་སྲོལ་ཚུགས། ཟླ་མཇུག་གོང་མའི་ལུང་བཞིན་ཁྲ་འབྲུག་ཏུ་མནན་པ་ཞག་བཅུ་དགུའི་བར་དུ་བསྒྲུབས་ཏེ་ལས་ལ་སྦྱར་ནས་ཕྱིར་ཕེབས། མགོ་ཟླའི་ཉེར་བཞིའི་ནུབ་འོད་གསལ་གྱི་གཟིགས་སྣང་ལ། དཀོར་སྲུང་ཞིང་སྐྱོང་མ་མོས་འགལ་བྱེད་ཆམས་ལ་ཕབས་པའི་མཚན་མ་ཡ་མཚར་བའང་གཟིགས། ཤིང་ཕོ་ཁྱི་ལོ་ནས་བཟུང་དབོ་ཟླའི་ནང་དུ་ལོ་བཞིན་གོང་མ་ཐམས་ཅད་མཁྱེན་པ་རྒྱལ་མཆོག་ལྔ་པ་ཆེན་པོའི་ལོ་དུས་ཀྱི་སྐུ་མཆོད་ལ་དམིགས་ཏེ། དཔལ་ལྡན་མིའི་དབང་པོ་ཉིད་གཏོང་བ་ལ་ལྷག་པར་གོམས་པའི་ཐུགས་མངའ་བས་རིས་མེད་པའི་དགེ་འདུན་ཐམས་ཅད་ལྷ་ལྡན་སྤྲུལ་པའི་གཙུག་ལག་ཁག་དུ་སྤྱན་དྲངས་ནས་རྙེད་པ་དང་བཀུར་སྟིའི་སྟོན་མོའི་ཕྱག་འགྱེད་བཅས་ཕུལ་དུ་བྱུང་བ་དང་། ངོ་མཚར་བའི་ལྟད་མོ་སོགས་ཀྱི་དུས་སྟོན་ཚོགས་མཆོད་ཆེན་མོར་གྲགས་པ་འཛུགས་པར་མཛད་པ་དང་རྗེས་འབྲེལ་དུ། གྲྭ་ཚང་ལ་ཐུགས་རྗེ་ཆེན་པོའི་སྒྲུབ་མཆོད་དང་འབྲེལ་བར་ཚོགས་བརྒྱ། དོང་སྤྲུགས་ཀྱི་བསྐངས་བཤགས་མཁའ་འགྲོའི་མེ་མཆོད་རྣམས་ཇི་སྲིད་བར་ཚུགས་པའི་གྲལ་དབུར་ཞབས་བསྐྱོད་པར་ཕོག་ཡོན་གྱི་རྙེད་པ་བཟང་ཞིང་བསྟར་ཆགས་པའི་རྒྱུན་དང་། ལྷ་ལྡན་ཚོགས་མཆོད་ཀྱི་འགྱེད་སྐལ་ཡང་སྩལ་ཅིང་། ཁྱད་པར་འདི་ལོ་དངུལ་སྲང་བཞི་བརྒྱ་དང་བདུན་ཅུའི་རིན་ཐང་ཅན་གྱི་བསྔོ་རྟེན་ཕུལ་དུ་ཕྱིན་པར་སྩལ་བར། བསྔོ་བའི་སྟོང་ཐུན་གྱི་གསུང་བཤད་སྔོན་དུ་འགྲོ་བས་དགོངས་བཞེད་ལེགས་ཚོགས་སུ་འགྲུབ་པའི་མཆོད་བསྔོ་རྒྱས་པར་མཛད། ཤིང་ཕག་ཁྲུམས་ཟླའི་མཇུག་ཏུ་མཆོད་སྡོང་ཆེན་མོའི་རབ་གནས་ལ་གོང་མའི་ལུང་བཞིན་སྒྲགས་ལ་བརྒྱུད་ཐེགས་པ་ཉེར་བཞི་ལ་ཕོ་བྲང་ཆེན་མོར་ཕེབས་ཏེ། ཕོ་བྲང་གསར་པའི་གཟིམས་ཆུང་དགའ་འཁྱིལ་དུ་ཕྱགས་ཕེབས་ནས། དེ་འཕྲལ་སྐུ་རྐྱང་གིས་གོང་ཞབས་མཇལ་བའི་ཚུལ་དང་ཉེར་ལྔའི་སྔ་དྲོ་ཡས་ཕྱིན་ལྷན་རྒྱས་སུ་འབུལ་བའི་ཟོལ་གྱིས་སྡེ་སྲིད་སྐུ་ཞབས་སུ་ཚེ་དབང་འབུལ་བར་མཛད་ཅིང་། དེ་ཉིན་དཔོན་སློབ་ཐམས་ཅད་ཀྱིས་ཤོད་ཀྱི་མཇལ་

― MLP003_Page_0201 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱག་ཀྱང་ཞུ་བ་གནང་། དེ་ནུབ་ནས་དཔོན་སློབ་བཅུས་བདུན་ཕྲག་གཅིག་གིས་བར་གཡང་ཁང་དུ་སྐུ་མཚམས་བཅད་ནས་ལྗགས་བསྙེན་ཞལ་གསོ་དང་། དེ་གྲོལ་ནས་ཡས་ཕྱིན་ཐུན་མོང་དུ་འབུལ་བའི་ཚུལ་གྱིས་སྡེ་སྲིད་རིན་པོ་ཆེར་གུར་དྲག་གི་དབང་སྩལ་ཅིང་ཚེས་བཞི་ལ་ཆོག་རོགས་ཞབས་ཕྱིར་གྲྭ་ཚང་འདུས་ཚོགས་རྣམས་ཀྱང་རྩེར་འབྱོར་བ་དང་། དེ་འཕྲལ་ཚོམས་ཆེན་སྲིད་ཞི་ཕུན་ཚོགས་སུ་སྒྲུབ་ཆེན་བདེ་གཤེགས་འདུས་པའི་དཀྱིལ་འཁོར་བཞེངས་པའི་གཞིར་ས་ཆོག་དང་འབྲེལ་བར་ཕྱི་ནང་གི་མཚམས་གཅོད་དང་། མ་ཊཾ་བསྒྲལ་བའི་ཁོག་པ་བྲོས་སྦྱངས་པར་ཆག་ཆག་དང་ཐིག་བཏབ་རྗེས་ལྷ་བུམ་སྟ་གོན། ཚེས་ལྔ་ལ་རྡུལ་ཚོན་གྱི་དཀྱིལ་འཁོར་བཞེངས་ཏེ་ནངས་པར་རྒྱན་བཀོད་རྣམས་གྲུབ་པར་མཛད་ཅིང་། དེ་ནས་བཟུང་ཚེས་བཅུ་གཅིག་གི་བར་དུ་སྒྲུབ་མཆོད་དང་། བཅུ་གཉིས་ཀྱི་ཐོ་རེངས་སྐུ་ཚེའི་སྒྲུབ་པ་མཛད་དེ། ཞོགས་པ་གཟིམས་ཆུང་ཁམས་གསུམ་དུ་ཡས་ཕྱིན་ལྷན་རྒྱས་ལ་འབུལ་ཚུལ་གྱིས་ཟང་ཟིང་གི་འབུལ་བ་རྒྱས་པ་དང་བཅས་ཞབས་བརྟན་གྱི་གསུང་ཆོགདེ་ནུབ་དང་། སྒྲུབ་མཆོད་ཀྱི་དངོས་གྲུབ་བླང་བའི་བར་ཏེ། དེ་ལྟར་བསྙེན་སྒྲུབ་ཡན་ལག་བཞིས་ཁོག་ཕུབ་པའི་ཚོགས་སྒྲུབ་ཀྱི་ཆོ་ག་མཐར་ཕྱིན་པར་མཛད་ནས། བཅུ་གསུམ་ལ་རབ་གནས་ཀྱི་སྟ་གོན་དང་། བཅུ་བཞི་ལ་དངོས་གཞིའི་ཆོ་ག་མཛད་པའི་མངའ་དབུལ་གསུམ་པའི་དུས་རྗེ་ཉིད་འཁོར་ལོ་སྒྱུར་བའི་ཆ་བྱད་དུ་བཞུགས་ཏེ་རྒྱས་པའི་སྲེག་བླུགས་དང་རྗེས་འབྲེལ་ཙཱ་རུ་བསྒྲུབས་ནས་འབུལ་བ་དང་། མེ་ཏོག་འཐོར་དུས་སྣམ་སྦྱར་ཅན་གྱི་སེར་སྦྲེངས་ཚར་དུ་དངར་ཞིང་། ཡོན་བདག་བསྒོ་བའི་དུས་དཔལ་ལྡན་མིའི་དབང་པོ་ཉིད་ཁྲི་ལ་སྤྱན་དྲངས་ཏེ་ཟང་ཟིང་གི་དངོས་པོའི་སྐྱེས་ཅུང་ཟད་བསྟབས་རྗེས་ཚིག་དོན་བཟང་པོའི་སྟོང་ཐུན་གྱི་བཤད་འབུལ་སྔོན་དུ་འགྲོ་བས་ཡོན་གྱི་བདག་པོར་མངའ་གསོལ་ཞིང་བཀྲ་ཤིས་པའི་རྫས་ཕུལ་བས་དགེ་ཞིང་ཤིས་པར་མཛད་ནས། དགའ་སྟོན་གྱི་ཁྱད་པར་རྒྱུན་གྱི་ཞབས་ཏོག་བཟང་ཞིང་བསྟར་ཆགས་པ་དང་། དེ་ཉིན་གྲོལ་སྟོན་གྱི་བསྙེན་བཀུར་ཕུལ་དུ་བྱུང་བའི་ཐོགརབ་ཡོན་ཡང་དངུལ་ཐོག་ཏུ་ཕབ་ན། རྗེ་ཉིད་ལ་དངུལ་སྲང་བརྒྱད་བརྒྱ་དང་བརྒྱད་ཅུ་རྩ་

― MLP003_Page_0202 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི། ཞབས་དྲུང་གདུང་བརྒྱུད་རིན་པོ་ཆེར་དངུལ་སྲང་ཞེ་ལྔ། ཚོགས་པ་བྱིང་ལ་དངུལ་སྲང་བཅུ་གསུམ་དང་ཞོ་དྲུག་རེ། ལས་སྣེ་རྣམས་ལ་གོ་རིམ་བཞིན་དངུལ་སྲང་སོ་གཉིས་ནས་སྲང་དགུ་ཞོ་དོའི་བར་གྱི་རིན་ཐང་ཅན་གྱི་སྣེ་གཞག་དང་བཅས་པ་སྟེ། རྙེད་པ་དང་བཀུར་སྟིའི་དུས་སྟོན་བློའི་ར་བ་ལས་འདས་པའི་བཟང་ཞིང་རྒྱ་ཆེ་བ་ཕུལ་དུ་བྱུང་བ་སྩོལ་བ་དང་ལྷན་ཅིགཤེས་བྱའི་དཀྱིལ་འཁོར་ཀུན་ལ་གཟིགས་པ་རྣམ་པར་ཡངས་པའི་དཔལ་ལྡན་མི་དབང་མཆོག་གི་གསུང་ནས། གནས་བྱའི་རྟེན་དང་། དེ་ལ་རབ་གནས་བྱེད་པ་པོའི་གང་ཟག་གི་ཆེ་བ། ཇི་ལྟར་བྱ་བའི་ཆོ་གའི་རྣམ་གཞག་སོགས་ལས་བརྩམས་པའི་ལྗགས་བཤད་ཀྱི་མཐའ་འཕགས་ཆེན་རྣམས་ཀྱིས་བསྔོས་ན་ཇི་ལྟར་སྨོན་པ་བཞིན་འགྲུབ་པའི་ཕྱིར། འདིས་མཚོན་པའི་དགེ་ཚོགས་རྣམས་བླ་ན་མེད་པའི་བྱང་ཆུབ་ཏུ་བསྔོ་སྒྱུར་གནང་དགོས་པའི་བཀའ་ལུང་གིས་གླེང་བསླང་བ་ལྟར། རྗེ་ཉིད་ནས་དོན་བཟང་ལ་ཚིག་སྙན་ཞིང་འཇེབས་པའི་བསྔོ་བའི་སྟོང་ཐུན་སྔོན་དུ་འགྲོ་བས་ཐུགས་ཀྱི་བཞེད་དོན་ཇི་བཞིན་འགྲུབ་པའི་མཆོད་བསྔོ་འབུལ་བར་མཛད་ཅིང་། ཁྱད་པར་སྔོན་ཆད་གཞན་དུ་མ་གྲགས་པའི་སྲིད་ཞིའི་གཙུག་རྒྱན་གོང་མ་རྒྱལ་བའི་དབང་པོ་ཉིད་གང་གི་ཕྲིན་ལས་པ་དང་བཅས་པ་མདོ་དང་གཏེར་ལུང་རྣམས་ནས་ལུང་བསྟན་ཚུལ་བསྒྲིགས་པའི་གཏམ་ས་བཅད་འབྲུ་བསྣོན་དང་བཅས་པ་རྒྱས་པར་གནང་བས་དཔྱོད་ལྡན་རྣམས་ཀྱི་ཡིད་འཕྲོག་པར་གྱུར། དེ་ནས་ཀྱང་ཤིས་པ་བརྗོད་ཅིང་དཀྱིལ་འཁོར་བསྡུ་བ་དང་། ཁ་སྐོང་གི་ཞི་བའི་སྲེག་བླུགས་འབུལ་བའི་བར་དེ་ནུབ་ཚར་རྗེས་ནངས་པར་རྡུལ་ཚོན་ཆུ་བོར་གཤེགས་པ་རྣམས་མཛད། དེ་དུས་ཟླ་བ་བརྒྱད་པའི་མཇུག་ཏུ་ཁ་བ་ཆེན་པོ་བབས་པ་སོགས་ནམ་གཞུག་བསྡུས་ཀྱང་། སྒྲུབ་མཆོད་ཚུགས་པ་ནས་ནམ་ཟླ་ལྷུག་པར་དྲོས་ཤིང་ཚེས་བརྒྱད་ཀྱི་སྒང་འབྲུག་སྒྲ་ཆེན་པོ་དང་བཅས་ཏེ་འཇམ་ཆར་གཤིན་པ་བབས་པ་དང་། ཉིན་མོ་ནམ་མཁའ་དྭངས་པ་ལ་འཇའ་སྤྲིན་མིག་མང་རིས་དང་ཀུ་ཤའི་ཆུན་པོ་ལྟ་བུའི་དྲྭ་བས་བྲེས་ཤིང་ཁྱད་པར་རབ་གནས་ཀྱི་ཉིན་སྔ་རྟིང་གཉིས་ཀར་ནམ་མཁའ་རྡུལ་བྲལ་བཻ་ཌཱུཪྱ་ལྟར་དྭངས་པ་ལས་ཉི་མའི་དཀྱིལ་འཁོར་འོད་རབ་ཏུ་

― MLP003_Page_0203 ―

^{[མ་དཔེ་གཟིགས་ན་འདིར་གནོན།]}

[Full Size]

གསལ་བ་དང་རླུང་རྣམས་ཞི་བའི་ངང་ཚུལ་འཛིན་ཅིང་བགེགས་སྐྲོད་ཀྱི་དུས་སུ་འཇིགས་ཟིལ་ཚད་མེད་པ། ཡེ་ཤེས་པ་སྤྱན་འདྲེན་དང་མེ་ཏོག་འཐོར་བའི་ཚེ་ཡེ་ཤེས་ཕེབས་པའི་གཟི་བྱིན་འབར་བ་སོགས་ཀུན་གྱི་མཐུན་སྣང་དུ་བསྟན་ཅིང་དེ་དུས་དག་པའི་གཟིགས་སྣང་ལ། སྟ་གོན་གྱི་བགེགས་སྐྲོད་གནང་ཁར་ཐུགས་འཇིགས་པའི་ལྷོངས་དང་། བགེགས་སྐྲོད་ལ་ཕེབས་སྐབས་ཐུགས་ལ་དཔའ་གདེངས་རྩོལ་མེད་དུ་ཤར་ཞིང་། འཁྲུངས་རབས་ལྷ་ཁང་གི་སྒོ་ནུབ་མའི་གདོང་ཙམ་ནས་བགེགས་རྣམས་ཨ་ཙ་ར་དང་བནྡྷེ་ཧྲུལ་པོའི་རྣམ་པས་བྲེད་ཉམས་ཀྱིས་འབྲོས་པའི་རྣམ་པ་གསལ་བ་དང་། དངོས་གཞིའི་ཡེ་ཤེས་པ་སྤྱན་འདྲེན་གྱི་ཚེ་ཡེ་ཤེས་པ་གྲངས་མེད་པ་མཚོ་ལ་ཁ་ཆར་བབས་པ་ལྟར་མཆོད་སྡོང་ཆེན་པོ་ལ་ཐིམ་པའི་ཐུགས་ཉམས་ཤིན་ཏུ་གསལ་བར་ཤར། སྟ་གོན་གྱི་ནུབ་འོད་གསལ་གྱི་གཟིགས་སྣང་ལ། སྐྱབས་མཆོག་གོང་མ་རྒྱལ་བའི་དབང་པོ་ཉིད་སྐུའི་གཟི་བྱིན་མཚུངས་པ་མེད་པས་མཆོད་སྡོང་ཆེན་པོའི་བང་རིམ་བཞི་པའི་སྟེང་ན་ཕར་ཞབས་སྐོར་དུ་ཕེབས་ནས་རྟེན་རྣམས་ཀྱི་རྟེན་བཤད་དང་བྱིན་རླབས་གནང་བའི་རྣམ་འགྱུར་ཤིན་ཏུ་གསལ་བ་ད་ལྟ་ཐུགས་དྲན་གྱི་ཡུལ་དུ་གསལ་བའི་ཚེའང་བདེ་བའི་ཉམས་རྩོལ་མེད་དུ་འཆར་བ་ཞིག་བྱུང་གསུངས། དེ་དག་གི་ཚེ་གོང་མའི་ཞབས་རིམ་པ་ལས་ཚན་རྣམས་དང་། སྐུ་ཞབས་གྲྭ་ཚང་སྤྱི་སོ་རྣམས་སོ་སོས་འབུལ་བ་མང་འགྱེད་སྣེ་གཞག་དང་བཅས་པའང་རྒྱས་པར་བསྟབས། དེ་ནས་གྲྭ་ཚང་ཚུར་བཏེགས་རྗེས་ཆེ་བཙན་ཁང་དུ་བཞུགས་ས་སྤོ་བར་མཛད་དེ། རྡོ་རྗེ་བྲག་རིག་འཛིན་སྤྲུལ་པའི་སྐུ་དང་འབྲུག་པ་སྤྲུལ་སྐུ་རིན་པོ་ཆེ་སོགས་ཕེབས་པ་དང་མཇལ་འཛོམ་མཛད། གཞན་ཡང་དེ་དུས་སྔ་ཕྱིར་མཆོག་དམན་མང་པོ་ལ་དབང་རྗེས་གནང་སོགས་ཆོས་སྦྱིན་ཡང་ཅི་རིགས་པར་སྩལ་ཅིང་། བྱད་འགྲོལ་གྱི་བུམ་སྒྲུབ་བདུན་ཕྲག་གཅིག་གནང་བའི་ཞག་གསུམ་པའི་ནུབ་བྱད་ཁ་ཕྱིར་བཟློག་པའི་མནལ་ལམ་ཤིན་ཏུ་གསལ་བ་དང་། དེའི་སང་ནུབ་ཆིབས་ལ་བརྟེན་ནས་ནུབ་ཕྱོགས་སུ་ཐེགས་པ་ལས་བྲག་རི་དོ་ཆད་ལོགས་ཤིང་ནགས་བན་བུན་ཡོད་པ་ཞིག་གི་རྩེར་ལྕགས་རི་སྟག་སོ་རིས་ཀྱིས་བསྐོར་བའི་ཁང་བརྩེགས་ལྔ་ཐོག་རྒྱ་ཕིབས་

― MLP003_Page_0204 ―

^{[མ་དཔེ་གཟིགས་ན་འདིར་གནོན།]}

[Full Size]

གསེར་འཕྲུས་བརྒྱན་པའི་ལྷ་ཁང་ཨོ་རྒྱན་ཆེན་པོའི་གནས་ཁྱད་པར་ཅན་ཞིག་ཡིན་རྒྱུ་བའི་ནུབ་ཀྱི་མདུན་ན་རྡོ་གཅལ་སྐྱ་ལྷེབ་བེ་བ་ཧ་ཅང་མི་ཆེ་བའི་ནུབ་ངོས་སུ། དམ་ཅན་གྱི་མཁར་ཡིན་ཁུལ་གྱི་མཁར་ཕྲ་རིང་རྩེ་མོར་དར་ལྕོག་དང་རྒྱལ་མཚན་མང་པོ་ཟང་ཟིང་དུ་ཡོད་པའི་ནང་དུ་སྐས་ཤིག་འཛེགས་ཏེ་ཕེབས་པ་ན། ཁང་པ་ཀ་བཞི་རྒྱ་མཐོངས་ཅན་སྤྱན་གཟིགས་སྣ་ཚོགས་ཀྱིས་བག་གྲོ་ཐིབས་སེ་བའི་ནུབ་ཕྱོགས་ཀྱི་དབུས་སུ་ཨོ་རྒྱན་ཆེན་པོའི་སྐུས་གཙོ་བྱས་པའི་རྟེན་མཆོད་དང་། ལྷོ་ནས་བྱང་དུ་ཕྱོགས་པར་སྟག་ལྤགས་མང་དུ་བཏིང་བའི་ཁར་གདན་ཁྲི་རྒྱ་ཆེ་བའི་སྟེང་དུ་དམ་ཅན་སྐྱེས་བུ་རྡོ་རྗེ་ལེགས་པ་མི་གཟུགས་ཀྱི་རྣམ་པ་ཅན་རྒྱ་དང་སྨ་ར་ཞོ་ལེ་བ་གོས་དམར་སེར་འབྲུག་རིས་ཀྱི་ལྷོག་པ་བརྩེགས་མ་གྱོན་པ། དར་དམར་གྱིས་ཐོད་བཅིངས་པའི་སྐྲ་མཚམས་སྦྲུལ་གཟུགས་ཀྱིས་བསྡམས་པའི་སྦྲུལ་མགོ་གདེངས་ཀའི་རྣམ་པ་ཡོད་པ། གདོང་ལ་ཁྲག་གི་ཐིག་ལེ་སྣ་ཚོགས་བྱུག་པ། ལག་གཡས་པུས་སྟེང་ས་གནོན་དང་གཡོན་གོས་ཚོན་ཁྲའི་རྒྱབ་ཤ་ཅན་གྱི་དེབ་ཆེན་པོ་བཟུང་ནས་མང་པོར་ལུང་བསྟན་འཆད་ཅིང་འདུག་པར་ལྷའི་དཔའ་གདེངས་ཀྱི་སྙེམས་པས་བརྟག་པ་མཛད་པ་ན། དེས་ཀྱང་མངོན་ཤེས་ཀྱིས་རྟོགས་པ་ལྟ་བུས། ང་ཨོ་རྒྱན་པདྨའི་བཀའ་ཉན། དམ་ཚིག་འཛིན་པའི་ཕོ་ཉ། རྡོ་རྗེ་ལེགས་པ། རྡོ་རྗེ་ཁྱུང་གཤོགརྡོ་རྗེ་ཐིག་ལེ་རྩལ་སོགས་ཐེ་ཚོམ་སེལ་བའི་སྒྲུབ་བྱེད་མང་པོ་བཀོད་པས་ཐུགས་ཡིད་ཆེས་ཏེ། དྲི་བ་མཛད་པ་ན། དེས་དེབ་ཐོག་ནས་ཀློག་པ་ལྟ་བུས་ཡུལ་གཞན་དང་གཞན་དུ་འཐབ་རྩོད་དང་། ཁྱད་པར་བོད་འདིའི་དུས་ཀྱི་འགྱུར་བའི་དུས་ངེས་སོགས་སྤྱི་སྒོས་ཀྱི་ལུང་བསྟན་མང་དུ་ཕུལ་བ་ཕྱིས་ཐོག་ཏུ་ཁེལ་བ་དང་། ཡང་ཟླ་བ་བཅུ་པའི་ཚེས་གཅིག་ནས་སྐུ་ཚེའི་སྒྲུབ་པ་བདུན་ཕྲག་གཅིག་གནང་སྐབས་འོད་གསལ་གྱི་གཟིགས་སྣང་ལ། མ་གཅིག་དཔལ་ལྷ་བུད་མེད་གོས་རྒྱན་གཟབ་འཕྱོར་གྱི་རྣམ་པ་ཅན་གྱིས་གུས་པས་བཏུད་དེ། དངུལ་གྱི་ཡོལ་གོ་བཟའ་བ་སྣ་ཚོགས་ཀྱིས་གཏམས་པ་དང་། མདའ་དར་ཚོན་སྣ་ལྔ་བཏགས་པ་ཞིག་ཕུལ་བའི་དར་གྱི་ཁ་དོག་གི་བརྡས་འབྱུང་འགྱུར་གྱི་ལུང་སྟོན་པ་སོགས་མནལ་ལྟས་མཚར་བ་མང་པོ་བྱུང་། དེ་ནས་ཡས་ཕྱིན་ལྷན་

― MLP003_Page_0205 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱས་སུ་འབུལ་བའི་ཚུལ་གྱིས་རྩེར་མི་དབང་ཆེན་པོར་བྱད་འགྲོལ་དང་། ཚེ་དབང་། དྲེགས་འདུལ་གྱི་དབང་། གཟའི་གཏོར་དབང་སོགས་དབང་རྗེས་གནང་དང་བྱབ་ཁྲུས་སོགས་སྐུ་རིམ་ཡང་མང་དུ་མཛད། ཆུ་བཟང་དུ་རབ་གནས་དང་གཞིས་ཀའི་ཞལ་ངོ་ཕན་ཚུན་རྣམས་ཀྱིས་སོ་སོའི་གནས་སུ་སྤྱན་དྲངས་ཏེ་བཀུར་སྟི་ཆེན་པོས་མཆོད་ཅིང་། དབང་རྗེས་གནང་སོགས་ཀྱི་ཆོས་སྦྱིན་ཡང་རྒྱ་ཆེར་སྩལ། མགོ་ཟླའི་ཚེས་བཞི་པ་སངས་དང་ཆུ་སྨད་འཛོམ་པ་དངོས་གྲུབ་ཀྱི་སྦྱོར་བའི་དུས་དགེ་བར་བཀྲ་ཤིས་ཆོས་སྡེ་བ་རྣམས་ཀྱིས་རབ་གནས་ཀྱི་ཆོ་ག་མཛད་པའི་མཐའ་རྒྱས་ཀྱི་ཡོན་བདག་བསྐོ་བཞག་སྐབས། སྡེ་སྲིད་རིན་པོ་ཆེ་ཁྲིར་ཕེབས་གཤིས་བསྔོ་བ་གནང་བར་ཕེབས་དགོས་པའི་བཀའ་ལུང་ལྟར་ཆོས་སྡེ་བའི་གྲལ་དབུར་ཐེགས་ཏེ། མངའ་གསོལ་གྱི་བཀྲ་ཤིས་རྫས་བརྒྱད་འབུལ་བ་སོགས་གྲུབ་རྗེས་དགའ་སྟོན་དང་འབྲེལ་བར་རྗེ་ཉིད་ལ་གཏེར་ཆེན་ཏི་ཤྲཱི་ཆོས་ཀྱི་རྒྱལ་པོར་མངའ་དབང་བསྐུར་བའི་ལུང་དང་། ཕྱག་རྟགས་ཀྱི་ཐམ་ཁ་ཤུབས་བཅས། བཟང་གོས་དཀར་པོ་ཡུག་རིང་གྲང་གསེར་གྱིས་འབྲུག་རིས་བྲིས་པའི་གཞི་ལ་བྲིས་པའི་འཇའ་ས་རྣམས་དང་། ཡས་ཕྱིན་སོ་སོ་ནས་གནང་སྦྱིན་བཟང་ཞིང་ཕུལ་དུ་བྱུང་བ་སྩལ་བར། ཚིག་དོན་གསལ་དག་འབྲེལ་ཆགས་པའི་སྟོང་ཐུན་སྔོན་དུ་འགྲོ་བའི་མཆོད་བསྔོ་འབུལ་བར་མཛད་པས་དཔྱོད་ལྡན་ཐམས་ཅད་མཉེས་པར་གྱུར་ཅིང་། ཚེས་དགུའི་ཉིན་ཕོ་བྲང་ཆེན་མོ་ནས་ཆིབས་བཏེགས་ཏེ་གདན་སར་ཕེབས། རྒྱལ་ཟླའི་ཚེས་བརྒྱད་ཀྱི་ནུབ། སྤྱིར་མནལ་ལྟས་མཚར་བ་མང་པོ་དང་ཁྱད་པར་གྱང་འཁྲིས་ཤིག་ན་འབྲི་གུང་ཆོས་ཀྱི་གྲགས་པ་ཡིན་དགོངས་པ་ཞིག་བཞུགས་འདུག་པ་ལ་དག་སྣང་འཁྲུངས་པ་ན། དེ་རྒྱལ་མཆོག་ལྔ་པ་ཆེན་པོའི་སྐུར་འགྱུར་སོང་བའི་མོད་ལ་གཤིན་རྗེ་གཤེད་དྲེགས་པ་འཇོམས་བྱེད་ཀྱི་དབང་ཡོངས་རྫོགས་འབུལ་བར་མཛད་པ་སོགས་བྱུང་། དེ་ནས་མེ་ཕོ་བྱི་བའི་ལོ་དབྱར་སྟོད་གྲྭ་ཚང་དུ་ཚེས་བཅུའི་ཕྱག་བཞེས་སྤྲོས་བཅས་ཅན་འཛུགས་པར་བཞེད་ནས་འཆམས་དབྱངས་སློབ་དཔོན་ལ་རབ་འབྱམས་པ་བློ་བཟང་བཀྲ་ཤིས་གོང་དུ་ཞུས་ཏེ་ཕེབས་པ་ལྟར་གྲྭ་པ་རགས་བསྡུས་ལ་འཆམས་དབྱངས་ཀྱི་སློབ་གྲྭ་ཚུགས།

― MLP003_Page_0206 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ཡང་སྔ་སོར་མཆོད་སྡོང་ཆེན་མོའི་རབ་གནས་ལ་ཕེབས་དུས་འཆམས་དབྱངས་ཀྱི་སློབ་དཔོན་ཞུ་བའི་ཆར་དོད་པ་ན། སྐུ་ཞབས་གྲྭ་གཙང་གི་གྲྭ་པ་འགའ་རེས་བློ་གྲོས་རྒྱ་མཚོ་རང་ཞུས་ན་འགབ་ཚུལ་གསུང་བ་ལྟར། ཉིད་ཀྱི་ཞམ་རིང་པ་རྣམས་ཀྱང་དེ་ཁ་ལེགས་པའི་ཞུ་བ་འབུལ་ནའང་། རྗེ་ཉིད་རང་གི་དགོངས་པས་བློ་བཟང་བཀྲ་ཤིས་སྐབས་བབས་ཀྱིས་ཞུ་བར་མཛད་པ་བཞིན། འདིར་འཆམས་དབྱངས་སློབ་དུས་བློ་གྲོས་རྒྱ་མཚོ་འདས་ཚར་སོང་བས་བཀའ་ལས། ད་རེས་གཞན་གྱི་ཟེར་དབང་དུ་མ་བཏང་བས་ངེད་རང་གི་ཞེ་འདོད་མ་བསླུས་པ་ཡིན་གསུང་ཞིང་། ཞབས་ཕྱི་སྒྲིམ་པོའི་བློ་ཅན་རྣམས་ཀྱང་ཐུགས་མཁྱེན་ལ་ཡིད་ཆེས་པར་བྱེད། སློབ་དཔོན་ཐུགས་བསྐྱེད་བཟང་ཞིང་སློབ་མཁས་པ་དང་། སློབ་གྲྭ་བ་རྣམས་ཀྱང་ཞེ་བཞུན་པའི་སྟོབས་ཀྱིས་སློབ་སྦྱངས་རྣམས་ཚེགས་མེད་པར་གྲུབ་སྟེ། གསང་འདུས་ལས་བྱང་དང་འབྲེལ་བའི་ཚེས་བཅུའི་མཆོད་པ་ཚུགས་པའི་གྲལ་དབུར་ཞབས་པད་བསྐྱོད་ཅིང་། གུང་ཚིགས་གྲོལ་ནས་གཙུག་ལག་ཁང་གི་མདུན་ངོས་ལག་མཐིལ་ལྟར་སྙོམས་པའི་རྡོ་གཅལ་དུ་གར་འཆམས་ཀྱི་ཟློས་གར་ཡིད་འཕྲོག་པའི་ཕྱག་བཞེས་མཛད་པར་ཞོད་ཆེ་བའི་མུ་ཡིན་ཡང་། དེ་ཉིན་རངས་པོ་ནམ་མཁའ་བཻ་ཌཱུཪྱ་ལྟར་དྭངས་པས་ཐམས་ཅད་ངོ་མཚར་བར་གྱུར། དེ་ནས་ཁྲུམས་ཟླའི་ནང་དུ་ཡུམ་རིན་པོ་ཆེ་ཉིད་རང་གི་སྐུ་ཡི་ཉེར་སྤྱད་ལས་འོག་མིན་ཡང་རྩེའི་འཕྱུར་བུའི་དབུས་སུ་བདེ་གཤེགས་ཀུན་འདུས་ཀྱི་བློས་བསླངས་བཞེངས་པ་གྲུབ་སྟེ། དེ་དང་ཕྱོགས་མཚུངས་གསེར་དངུལ་གྱི་བཀའ་འགྱུར་དང་། སྐུ་འབུམ་སེང་ཁྲིའི་བྱམས་ཆེན་བཅས་པར་རབ་གནས་སྟབས་ཅིག་ཏུ་མཛད་པར་ས་ཡུལ་གྱི་ཁྱད་པར་ལས། བདེ་གཤེགས་ཀུན་འདུས། བཀའ་བརྒྱད། བླ་མ་ཞི་བ་སྟེ་དཀྱིལ་འཁོར་ཁག་གསུམ་ལ་བརྟེན་ནས། ཉེར་བཞི་ལ་རབ་གནས་སྟ་གོན་དང་། ཉེར་ལྔ་ལ་དངོས་གཞིའི་ཆོ་ག་མཛད་པའི་མངའ་དབུལ་དང་འབྲེལ་བར་བླ་བྲང་བདེ་ཡངས་སུ་རྗེ་ཉིད་འཁོར་ལོ་སྒྱུར་བའི་ཆས་སུ་བཞུགས་ཏེ་ཕྱག་ཕྱིའི་ཆོག་རོགས་པ་དང་བཅས་བདེ་གཤེགས་ཀུན་འདུས་ཀྱི་སྲེག་བླུགས་ཀྱི་ཆོ་ག་མཛད་པའི་ཕྱི་རོལ་དུ་ལྷའི་བྱི་བྱད་དུ་ཞུགས་པའི་གར་པས་བསྐོར་ཏེ་གླུ་གར་གྱིས་

― MLP003_Page_0207 ―

^{[མ་དཔེ་གཟིགས་ན་འདིར་གནོན།]}

[Full Size]

མཆོད་ཅིང་། མེ་ཏོག་འཐོར་དུས་ཆོག་ཁག་གསུམ་པོ་སྦྲེལ་བའི་སྣམ་སྦྱར་ཅན་གྱི་སེར་སྦྲེངས་ཚར་དུ་དངར་བ། དེ་ནུབ་བླ་མ་ཞི་བའི་ཆོ་ག་གྲྭ་པ་རྣམས་ཀྱིས་ཁ་སྐོང་གི་ཞི་བའི་སྲེག་བླུགས་འབུལ་བ་རྣམས་དང་། དེ་ནས་ཉི་མ་གསུམ་པ་ལ་བབས་པ་ན་གསང་འདུས་བླ་མའི་ལས་བྱང་དང་འབྲེལ་བའི་གར་འཆམས་སོགས་ཚེས་བཅུའི་མཆོད་པ་སྔ་མ་ཇི་ལྟ་བ་བཞིན་མཛད་ཅིང་། དེ་དག་གི་ཚེ་བསྙེན་བཀུར་དང་མཆོད་རྫས་རྣམས་ཀྱང་ཚོགས་གསོག་ལ་དམིགས་ཏེ་ཡུམ་ཉིད་རང་གི་སྐུའི་ཉེར་སྤྱད་ཁོ་ནས་བསྒྲུབ་པའི་ལོངས་སྤྱོད་ཕུལ་དུ་བྱུང་བས་མཆོད་པར་མཛད་དེ། གཞུང་ས་མཆོག་གི་སྐུ་རིམ་དུ་ངོས་ཀྱི་ཞབས་བསྐྱོད་དགོས་པ་རྣམས་སྔར་བསམ་ཡས་དང་ཁྲ་འབྲུག་གཉིས་ཅི་རིགས་པ་ལས། འདི་ལོ་ནས་བརྩམས་ཏེ་ཤིང་ཕོ་སྤྲེའུའི་ལོའི་བར་དུ་ལོ་བསྟར་གྱི་ཧོར་ཟླ་བཅུ་པའི་ནང་ལ་ཁྲ་འབྲུག་ཏུ་ངོས་ཕེབས་ཀྱིས་མནན་པ། ཡང་གསང་གི་ཟོར་འཕེན། ཁྲོ་བོ་རོལ་པ་སོགས་སྐུ་རིམ་སྒྲིག་བཅད་མའི་ཐོག་རེས་དམིགས་བསལ་གྱི་འཕར་ཆག་བཅས་པ་མཛད་ཅིང་། དེ་དག་དང་བསྟུན་ཏེ་གྲྭ་གྲངས་བརྒྱ་ལོངས་ཀྱིས་ལྷ་མིན་གཡུལ་བཟློག་གི་མདོས་རྣམས་སྒྲིག་ཆུག་གི་སྲོལ་རྣམས་ཚུགས་ཤིང་། གཞན་ཡང་གྲྭ་གྲངས་མང་ཉུང་དང་དུས་སྔ་ཕྱི་ཅི་རིགས་པར་ཁྲོ་འཆར་མནན་སྲེག་སོགས་མི་ཡི་དབང་པོ་ཉིད་གཏོང་བ་ལ་གོམས་ཤིང་བསྟན་འགྲོའི་བདེ་སྐྱིད་སྤེལ་བའི་དགོངས་པ་མཁའ་ལྟར་ཡངས་པས་བླ་ནས་ཕོགས་ཡོན་གྱི་ཟང་ཟིང་ལྷུག་པར་སྩལ་ཏེ། བསྟན་པ་རིན་པོ་ཆེ་སྙེད་པ་དང་བཀུར་སྟིར་བཅས་པས་ཆེས་ཆེར་གསལ་བར་མཛད་དོ། །དེ་དག་གི་ཚེ་སྣེ་གདོང་རྫོང་དཔོན་དང་གྲྭ་པ་ཡས་མན། ནང་པ་སོགས་ཡུལ་དེའི་སྐྱ་སེར་ཆེ་ཕྲ་ཐམས་ཅད་དང་། རྒྱབ་ཆོས་ཀྱི་དགེ་འདུན་རྣམས་ཀྱིས་ཀྱང་བསྟི་སྟང་ཆེན་པོས་མཆོད་ཅིང་། རེ་བ་སྐོང་བའི་ཆོས་སྦྱིན་ཡང་ཅི་དགར་སྩལ། མེ་གླང་ཟླ་བ་གཉིས་པའི་མཇུག་ཏུ་སྒམ་པོ་སྤྲུལ་སྐུ་རིན་པོ་ཆེ་དགོན་པར་ཕེབས་པ་ལ་བཀུར་སྟི་ཆེན་པོས་མཆོད་པར་མཛད་ཅིང་། དགོངས་བཞེད་བཞིན་གཏེར་གསར་ཚེ་གུར་གྱི་དབང་། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་དབང་ལུང་། ཉང་གི་དྲག་པོའི་བྱིན་རླབས་ལུ་གུ་རྒྱུད་སོགས་སྩལ་ནས་ཕྱིར་

― MLP003_Page_0208 ―

^{[མ་དཔེ་གཟིགས་ན་འདིར་གནོན།]}

[Full Size]

ཕེབས། དེ་ནས་གོང་ཞབས་སྐུ་ཕྲེང་དྲུག་པ་མཚོ་སྣ་ནས་སྣ་དཀར་རྩེར་ཕེབས་པར་གོང་མའི་ལུང་དང་ཞབས་བསུ་མཇལ་ཕྱག་ཞུ་བའི་དགོངས་པ་བཅས་ཁྲུམས་ཟླའི་བཅུ་དགུ་ལ་ཆིབས་བཏེགས་ཏེ། མི་ལའི་ལ་བརྒྱུད་ཉེར་བཞི་ལ་ཕོ་བྲང་སྣ་དཀར་རྩེར་ཕེབས། དེའི་སང་ཉིན་ཉེར་ལྔ་ལ་རྡོ་རྗེ་བྲག་རིག་འཛིན་ཆེན་པོ་སྤྲུལ་པའི་སྐུ་དང་ལྷན་ཅིག་ཐོག་མའི་མཇལ་ཕྱག་ཞུ་བར་མཛད་དུས་ཤིན་ཏུ་དགྱེས་པ་ཆེན་པོས་སྔོན་གནས་གསལ་བ་ལས་བརྩམ་པའི་བཀའ་ལུང་ལྷུག་པར་སྩལ་ཅིང་དེ་ཉིན་གོང་དུ་གཏེར་གསར་བླ་མ་དྲག་པོའི་དབང་ཆེ་བ་དང་། ཉེར་དྲུག་ནས་བརྩམས་ཏེ་རིམ་པར་རྒྱ་ཅན་རྡོ་རྗེ་གྲོ་ལོད་དང་། རྟ་མགྲིན་གསང་སྒྲུབ་ཀྱི་དབང་། ལོཀྟྲིའི་རིག་གཏད་དམག་ཟོར་མའི་རྗེས་གནང་། དྭངས་མ་བཅུད་འདྲེན་གྱི་ཚེ་དབང་། དམིགས་བརྩེ་མའི་བླ་མའི་རྣལ་འབྱོར། བརྡའ་དོན་ལམ་ཟབ། འཁོན་སྦྱོངས། ལོཀྟྲིའི་དམིགས་སྐོར་ལ་སོགས་པ་རྣམས་དང་། ཉེར་བདུན་གྱི་ཉིན་ཕུལ་དུ་བྱུང་བའི་འབུལ་བ་དང་བཅས་ཏེ་ཞབས་བརྟན་གྱི་ཆོ་ག་དང་རྗེས་འབྲེལ་དུ་ཡང་སྙིང་ཀུན་འདུས་ཀྱི་ཚེ་དབང་ཡང་འབུལ་བར་མཛད་ཅིང་། ཚུར་ཡང་བརྟན་བཞུགས་ཀྱི་ཚིགས་བཅད་བཀའ་རྩོམ་ཕྱག་རིས་མ་ཤིན་ཏུ་དྭངས་བའི་ཚུལ་གྱིས་སྩལ། དེ་དུས་ཡབ་བླ་མ་བཀྲ་ཤིས་བསྟན་འཛིན་ཆབ་འབམ་གྱིས་བསྙུན་གཞི་བབས་ལྕི་བས་འཚོ་ཐབས་མི་འདུག་ཀྱང་། ཐུགས་ངང་སྲིང་ཕྱིར་དགོངས་བཞེད་ལྟར་དབང་དང་བྱད་གདོན་འགྲོལ་བ་སོགས་མཛད་ཅིང་། གནམ་གང་ལ་གཤེགས་པར་འཕོ་བའི་མཚམས་སྦྱོར་དང་བྱང་བཞུའི་ཆོ་གས་རྗེས་སུ་བཟུང་། དེ་ནུབ་རྡོ་རྗེ་བྲག་རིག་འཛིན་སྤྲུལ་པའི་སྐུ་དང་ལྷན་ཅིག་གོང་ནས་གནང་སྦྱིན་གྱ་ནོམ་པ་དང་བཅས་ཐོན་ཕྱག་བཙལ་ཞིང་། ནངས་པར་ཡང་སྐུ་ཞབས་སུ་གནང་སྟེ་མཉེས་པ་ཆེན་པོས་བརྩེ་བའི་བསླབ་སྟོན་ཡུན་རིང་པོའི་བར་གནང་ནས། ཕེབས་གདོང་ཁ་བཏགས་ཁྱད་མཚར་དང་། གན་གོས་དམར་པོ་ཡུག་བཅས་སྩལ། དེ་ནས་ཕྱིར་ཕེབས་ཀྱི་ལམ་དུ་སྟག་ལུང་རྫོང་དཔོན། གླིང་གི་དཔོན་སྔོན། དགའ་ལྡན་རི་ཁྲོད། དར་གླིང་ཚོགས་ཀྱི་ཀུན་ར་རྣམས་སུ་སྤྱན་དྲངས་ཏེ་རིམ་གྱིས་འགྲོ་དོན་སྐྱོང་བཞིན་པར་གདན་སར་ཕེབས་ནས། དེ་འཕྲལ་བསྟན་སྲིད་སྤྱིའི་དུས་རིམ་ལ་

― MLP003_Page_0209 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྲ་འབྲུག་ཏུ་ཞབས་བསྐྱོད་རྗེས། སྨིན་དྲུག་ཟླ་བའི་ཚེས་བཅོ་བརྒྱད་ལ་གོང་མའི་ལུང་བཞིན་ཆིབས་བཏེགས་ཏེ། རྡོ་རྗེ་བྲག་གི་གྲུ་བརྒྱུད་ཕོ་བྲང་ཆེན་མོའི་འདབས་འབྲེལ་ཆེ་བཙན་ཁང་དུ་ཕེབས། ཉེར་ལྔའི་ཉིན་དགེ་འདུན་རྣམས་ཀྱི་སེར་སྦྲེངས་དང་སྐྱེ་བོའི་ཚོགས་ཀྱིས་རྩེད་སྣའི་རྣམ་འགྱུར་ཇི་སྙེད་པའི་བསུ་བའི་བཀོད་པ་ངོ་མཚར་བ་སོགས་མི་རྟའི་འདུ་བ་ལམ་མི་ཤོག་པ་ལྟ་བུའི་ཁྲོམ་ཆེན་པོས་མདུན་བསུས་ཏེ་ཡས་ཕྱིན་ལྷན་རྒྱས་སུ་ཕོ་བྲང་ཆེན་པོར་ཕེབས་ནས། ཚོམས་ཆེན་སྲིད་ཞི་ཕུན་ཚོགས་སུ་གོང་མའི་ཆོས་ཀྱི་ཁྲི་ལ་མངའ་དབང་བསྒྱུར་བའི་དགྱེས་སྟོན་གྱི་ཐོག་རྣམ་པར་རྒྱལ་བའི་གྲྭ་གཙང་ཆེན་མོས་བཀྲ་ཤིས་ཀྱི་ཚིགས་སུ་བཅད་པ་རྣམས་ཞལ་འདོན་དུ་མཛད་པ་ལ། རྡོ་རྗེ་བྲག་རིག་འཛིན་སྤྲུལ་པའི་སྐུས་རྒྱལ་སྲིད་སྣ་བདུན་དང་། རྗེ་འདི་ཉིད་ཀྱིས་བཀྲ་ཤིས་རྫས་རྟགས་ཀྱི་རྫས་རྣམས་ཚིག་དོན་བཟང་པོའི་སྟོང་ཐུན་དང་བཅས་གོང་ཞབས་ཀྱི་ཕྱག་ཏུ་འབུལ་བར་མཛད་ཅིང་། དཔལ་ལྡན་མི་ཡི་དབང་པོ་ཉིད་ཀྱིས་ཀྱང་ལུང་རིགས་དང་འབྲེལ་བའི་འབེལ་མཆིད་ཀྱི་མཆོད་སྤྲིན་རྒྱ་ཆེར་སྤྲོ་བར་མཛད་པ་སོགས་ཆོས་དང་ཟང་ཟིང་ཕུན་སུམ་ཚོགས་པའི་དགའ་སྟོན་རྒྱ་ཆེན་པོ་ལ་སྤྱོད་པར་མཛད་དོ། །དེ་ནས་མགོ་ཟླ་ཤར་བ་ནས་རིམ་པར་གོང་ཞབས་ཡས་ཕྱིན་ལྷན་རྒྱས་སུ། རཏྣ་གླིང་པའི་དྲག་དམར་གྱི་དབང་ལུང་དང་། དགོངས་འདུས་ཀྱི་བཟླས་བརྗོད་ནུས་པ་སྟོབས་འབྱིན་གྱི་ལུང་དམིགས་སྐོར་དང་བཅས་པ། སྐུ་གསུམ་རིགས་འདུས་ཀྱི་ཚེ་དབང་། འཆི་མེད་དཔལ་སྟེར་གྱི་ཚེ་དབང་བརྒྱ་རྩ། ཐུགས་རྗེ་ཆེན་པོ་འགྲོ་བ་ཀུན་སྒྲོལ་གྱི་དབང་ལུང་། འཇམ་དཔལ་གཤིན་རྗེ་གཤེད་དྲེགས་འཇོམས་ཀྱི་དབང་། ཉང་གཏེར་གུར་དྲག་ལུ་གུ་རྒྱུད་ཀྱི་དབང་། ཐང་ལྷའི་སྲོག་གཏད་རྣམས་འབུལ་བར་མཛད་ཅིང་། ཚེས་དགུའི་ཉིན་རྗེ་ཉིད་གྲྭ་གཙང་འདུས་ཡས་པར་བཅས་པས་ཡང་སྙིང་ཀུན་འདུས་ཀྱི་ཚེ་ཆོག་དང་འབྲེལ་བར་གོང་ཞབས་ཡས་ཕྱིན་ལྷན་རྒྱས་སུ་ཞབས་བརྟན་གྱི་ཆོ་ག་འབུལ་བ་ཕུལ་དུ་ཕྱིན་པ་དང་བཅས་པ་བསྒྲུབས། དེ་དག་གི་སྔ་ཕྱི་ཅི་རིགས་པར་ལྕང་གསེབ་ཏུ་གོང་གི་དབོན་མོ་གཤེགས་པ་ལ་འཕོ་བའི་མཚམས་

― MLP003_Page_0210 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྱོར་དང་སྒྲིབ་སྦྱོང་མཛད་ཅིང་། གོ་མཛོད་རྡོ་རྗེ་གླིང་དུ་པཎ་ཆེན་མཆོག་གི་སྤྲུལ་པའི་སྐུ་བཞུགས་པའི་སར་མཇལ་དུ་ཕེབས་པ་ན་བཞུགས་གདན་གྱི་བཀུར་ཟོས་དང་གནང་སྦྱིན་ཡང་རྒྱ་ཆེར་སྩལ། གཞན་ཡང་འབྲི་གུང་། རི་བོ་ཆེ་པ། སྒམ་འབྲུགཏྲེ་བོ། ཐུགས་སྲས་སྤྲུལ་པའི་སྐུ་སོགས་བླ་ཆེན་མང་པོ་ལ་སོ་སོའི་དགོངས་བཞེད་བཞིན་གཏེར་གསར་གཙོ་བོར་གྱུར་པའི་དབང་ལུང་ཟབ་ཁྲིད་མང་པོ་དང་། གོང་མའི་ཞམ་རིང་ནང་མ། གྲྭ་གཙང་གི་གྲྭ་པ། རྒྱལ་ཡུམ་རྗེ་དབོན་བཅས་པ། གཞིས་ཀའི་ཞལ་ངོ་ཕན་ཚུན་སོགས་ལྷ་ས་སྐོར་གྱི་དད་ཅན་མང་པོ། སྟག་རྩེ་ལྷ་བྱ་གླིང་པ་སོགས་སྡེ་དཔོན། རྩེ་ཤོད་ཀྱི་དྲུང་འཁོར་དང་། སེར་འབྲས་ཀྱི་གྲྭ་པ་སོགས་དོན་གཉེར་ཅན་མང་པོར་དབང་བྱིན་རླབས་རྗེས་གནང་བཀའ་ལུང་སེམས་བསྐྱེད་སོགས་ཆོས་སྦྱིན་གང་ལ་གང་འཚམས་སུ་སྩལ་ཅིང་། གོང་ཞབས་ཡས་ཕྱིན་ནས་ཟླ་ཤས་ཕོ་བྲང་དུ་བཞུགས་དགོས་པའི་བཀའ་ལུང་ཕེབས་ཀྱང་འོད་གསལ་གྱི་གཟིགས་སྣང་ལ་མྱུར་དུ་ཕྱིར་ཕེབས་ན་ལེགས་པའི་མཚན་མ་བྱུང་བ་བཅས་སྐུ་ཅུང་ཟད་མ་བདེ་བ་ལ་སྙད་ནས་དགོངས་པ་ཞུ་བར་མཛད་པས་ཁྲོལ་ཏེ། རྒྱལ་ཟླའི་ཚེས་བཅུ་དགུ་ལ་རྩེ་ཤོད་གཉིས་ཀ་ནས་གནང་སྦྱིན་དཔངས་བསྟོད་པ་དང་། ཕེབས་གདོང་གོང་གི་སྐུ་ཞབས་ནས་ཤིན་ཏུ་བརྩེ་བའི་བཀའ་ལུང་དང་ཁ་བཏགས་ཁྱད་མཚར་ཕྱག་ལས་བསྟར་ནས་གནང་ཞིང་། ཆིབས་བཏེགས་པའི་ཕེབས་ཞོར་ལྕགས་པོ་རིའི་གནས་རྟེན་ལ་རབ་གནས་དང་གྲྭ་གཙང་ལ་ཞང་བློན་གྱི་རྗེས་གནང་སྩལ་ཏེ། བྱེ་ལ་བརྒྱུད་གདན་སར་ཕེབས། དེ་ནས་ས་ཕོ་སྟག་ལོ་སྣྲོན་ཟླའི་ཉེར་ལྔའི་ཉིན་ས་སྐྱ་བདག་ཆེན་འཇམ་པའི་དབྱངས་ངག་དབང་ཀུན་དགའ་བཀྲ་ཤིས་དཔོན་སློབ་བརྒྱ་སྐོར་བཅས་དགོན་པར་ཕེབས་པ་ལ་ཆིབས་བསུ་དང་སེར་སྦྲེངས་སོགས་ཀྱི་བཀུར་སྟིས་སྤྱན་དྲངས་ཏེ། དེ་ནུབ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྟ་གོན་དང་། ནངས་པར་དབང་དངོས་གཞི་མཆོག་དབང་དང་བཅས་པ། གར་དབང་ཚེ་དཔག་མེད་ཀྱི་ཚེ་དབང་ལྷ་ཆེན་གྱི་སྲོག་གཏད། ཆོས་སྐོར་ཚང་མའི་པོད་ལུང་། བླ་མ་གསང་འདུས་ཀྱི་དབང་དང་ལས་བྱང་གི་ལུང་བྱབ་ཁྲུས་བཅས་འབུལ་བར་མཛད་ཅིང་། ཚུར་ཡང་ཚེ་དབང་

― MLP003_Page_0211 ―

^{[མ་དཔེ་གཟིགས་ན་འདིར་གནོན།]}

[Full Size]

ཆག་ལུགས་དང་གུར་གྱི་རྗེས་གནང་གསན། བསྙེན་བཀུར་དང་འབུལ་ནོད་ཕུལ་དུ་ཕྱིན་པས་མཆོད་ནས་ཉེར་དགུ་ལ་ཕྱིར་ཐེགས། ས་ཡོས་དབོ་ཟླའི་ཉེར་དགུ་ལ་ཏེ་གྲོར་ཆབ་ཚན་ལ་ཕེབས་བཞེད་ཀྱིས་ཆིབས་བཏེགས་ཏེ། སྒྲགས་ལ་བརྒྱུད་ལམ་ཞོར་ཕོ་བྲང་ཆེན་པོར་ཚེས་གཉིས་ལ་ཕེབས་ནས། དེ་ཉིན་ཡས་ཕྱིན་ལྷན་རྒྱས་སུ་ཡང་སྙིང་ཀུན་འདུས་ཀྱི་ཚེ་དབང་དང་། ལོཀྟྲིའི་རིག་གཏད་འབུལ་བར་མཛད་ཅིང་། རྩེར་ཞག་བཅུ་གཅིག་གི་བར་བཞུགས་ནས་རིམ་པར་གོང་ཞབས་སུ་ཐུགས་སྒྲུབ་ཀྱི་དབང་གསུམ་དང་། གཟའ་དབང་། གཟའ་པོད་ཀྱི་ལུང་། ཕུར་པའི་དབང་། དམག་ཟོར་མའི་རྗེས་གནང་ཐུན་མོང་མ་ཡིན་པ། ཚེ་བདག་གི་དབང་། ཡང་བཟློག་རྣོན་པོ་ནང་གཅོད། བླ་མ་གསང་འདུས། རྟ་མགྲིན་གསང་འདུས། དྲག་པོ་དབུ་དགུ་པ་རྣམས་ཀྱི་དབང་། ཉང་གཏེར་ལུ་གུ་རྒྱུད་དང་། རིག་བྱེད་མའི་བྱིན་རླབས། ཐུགས་ཐིག་གི་རྩ་དབང་། བདེ་འདུས་རྣལ་འབྱོར་རྒྱུན་དབང་། འཁོར་བ་དབྱིངས་སྒྲོལ་དང་གནུབས་ལུགས་གཤེད་དམར་གྱི་དབང་། ནཱ་ག་རཀྴ་དང་ཁྱུང་ཁྲའི་རྗེས་གནང་། མ་ནིང་། ཞིང་སྐྱོང་། རྡོར་ལེགས། རྒྱལ་པོ་རྣམས་ཀྱི་སྲོག་གཏད། བེ་བུམ་སྐོར་པུསྟི་གཉིས་དང་ཞལ་འདོན་སྐོར་གྱི་ལུང་། ཡས་ཕྱིན་ཐུན་མོང་དུ་ཀྱེ་རྡོར་མན་ངག་ལུགས་ཀྱི་དབང་། རྟ་མགྲིན་ཁམས་གསུམ་ཟིལ་གནོན་གྱི་དབང་། འཇམ་དཀར། སྤྱན་རས་གཟིགས། སྒྲོལ་མ་དཀར་ལྗང་གཉིས། ཆགས་ལུགས་ཚེ་དཔག་མེད་དཀར་པོ། ཕྱག་རྡོར་འབྱུང་འདུལ་གྱི་རྗེས་གནང་རྣམས་འབུལ་བར་མཛད་ཅིང་། སྐུ་ཞབས་གྲྭ་གཙང་ཚོགས་ཆེན་ལ་འཇོམས་བྱེད་ཀྱི་དབང་། དྭངས་མ་བཅུད་འདྲེན་གྱི་ཚེ་དབང་། དམག་ཟོར་མའི་རྗེས་གནང་རྣམས་དང་། གྲྭ་པ་སྒེར་ཁག་འགའ་རེར་མཁའ་སྤྱོད་མའི་བྱིན་རླབས་སོགས། རྒྱལ་ཡུམ་དབོན་རིན་པོ་ཆེ་བཅས་པར་ཚེ་དབང་རྣམས་སྩལ། བཅུ་གསུམ་གྱི་སྔ་དྲོ་གོང་ཞབས་སུ་འཆི་མེད་དཔལ་སྟེར་གྱི་ཚེ་དབང་བརྒྱ་རྩ་འབུལ་བར་མཛད་ཅིང་། ཤིན་ཏུ་ཐུགས་ལ་གཅགས་པའི་བསླབ་སྟོན་ཡུན་རིང་པོའི་བར་གནང་ནས། ཕུལ་དུ་བྱུང་བའི་གནང་སྦྱིན་ཡང་སྩལ་ཏེ་ཆིབས་བཏེགས། རིམ་པར་ཆུ་བྱང་བརྒྱུད་ཀྱི་སྟག་རྩེར་ཀླུ་ཁང་དུ་ཆིབས་བཤོལ་གྱི་བསྙེན་བཀུར་དང་། ང་རུར་ཡང་

― MLP003_Page_0212 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱན་དྲངས་ཏེ་མཆོད་ནས་ཐེལ་གྱི་གནས་རྟེན་རྣམས་ཞིབ་མཇལ་གནང་བར་ངོ་མཚར་བའི་བྱིན་རླབས་ཀྱི་མཚན་མའང་གཟིགས། བཅུ་དགུར་ཏི་སྒྲོའི་ཆབ་ཚན་ཁར་ཕེབས། དེའི་སང་ནུབ་གོང་མའི་བཀའ་ཡིན་ཁུལ་གྱིས་དགེ་སློང་འཇམ་དབྱངས་གྲགས་པས་ཤར་ཕྱོགས་ཀྱི་བསྟན་འགྲོའི་ཕན་བདེར་དགོངས་པ་གཏད་ནས་ཕེབས་དགོས་ཚུལ་གྱི་ལུང་བསྒྱུར་དུ་སྩལ་བ་སོགས་ཀྱི་མཚན་ལམ་དང་། ཉེར་གཅིག་གི་ཐོ་རེངས་ཀྱི་ཆར་ཡང་མནལ་ལམ་ངོ་མཚར་བ་མང་དུ་བྱུང་སྣང་སྟེ། ཞམ་རིང་པ་དག་ལ་གསང་རྣམ་ལས་བཤད་པའི་རྟེན་འབྲེལ་གྱི་དུས་ལ་བབས་པ་ནི་མིན་ལས་ཆེ་ཞེས་གསུང་། དེར་ཞག་གསུམ་གྱི་བར་ཆབ་ཀྱི་འཕྲོད་བཞེས་མཛད་ནས། ཉེར་གཉིས་ཀྱི་ཉིན་འབྲོང་ངུར་སུམ་མདོར་ཕེབས་ཏེ། ཚོགས་བརྒྱ་དང་རབ་གནས་ཀྱི་ཆོ་གགནས་རྟེན་རྣམས་ལ་མཆོད་འབུལ་ས་ཕན་འཛུགས་པ་སོགས་མཛད། ནངས་པར་ཆིབས་བསྐྱོད་ནས་སྤྲོ་ལུང་དུ་བསུ་བའི་བཀོད་པས་སྤྱན་དྲངས་ཏེ། འདུ་ཁང་གི་ཁྲི་ཐོག་ནས་འདུས་པར་ཚོགས་ཆོས་ཀྱང་སྩལ། སང་ཉིན་ལ་དུན་དུ་སྒམ་པོ་སྤྲུལ་པའི་སྐུ་དང་མཇལ་འཛོམ་མཛད་ཅིང་། འབྲི་གུང་ནས་ཆིབས་བསུའི་བསྟི་སྟང་དང་བཅས་པས་ཞྭ་ལྷ་ཁང་དུ་སྤྱན་དྲངས་ནས་ཕུལ་དུ་བྱུང་བའི་བསྙེན་བཀུར་གྱིས་མཆོད་ཅིང་། དེ་ནུབ་གཟའ་ཁང་དུ་བསྐང་གསོ་དང་ཕྲིན་བཅོལ་གནང་། ནངས་པར་འབྲི་གུང་སྤྲུལ་པའི་སྐུར་གཏེར་གསར་ཚེ་དབང་དང་། བྱད་འགྲོལ། སྒམ་པོ་སྤྲུལ་པའི་སྐུར་ཚེ་རྟའི་དབང་འབུལ་བར་མཛད་ཅིང་། འབྲི་གུང་ནས་ཆོ་ག་དང་འབྲེལ་བའི་ཞབས་བརྟན་དང་ཕེབས་རྫོངས་ཀྱི་འབུལ་ནོད་བསྙེན་བཀུར་རྒྱས་པར་བསྟབས་ནས། ཉེར་དགུའི་ཉིན་སྤྲུལ་སྐུ་རིན་པོ་ཆེ་དཔོན་སློབ་དང་ལྷན་དུ་བྱ་ཡུལ་མང་ར་མཇལ་དུ་ཐེགས། དེ་ནས་ཀྱང་ཡིབ་ཕྱི་དང་། ཀ་ཚལ། རྒྱ་མ་ཁྲི་གོང་རྣམས་སུ་རིམ་གྱིས་ཆིབས་བསྐྱོད་ཅིང་། ཕེབས་ལམ་དེ་རྣམས་སུའང་མི་ཁྲོམ་མི་ཤོག་པ་ལྟ་བུའི་དད་ཅན་རྣམས་ཀྱི་རེ་བ་སྐོང་བཞིན་དུ་རྒྱ་མའི་ལ་བརྒྱུད། བསམ་ཡས་ཀྱི་གནས་རྟེན་རྣམས་ཀྱང་ཞིབ་མཇལ་གྱིས་མཆོད་འབུལ་དང་སྨོན་ལམ་མཛད་ནས་གདན་སར་ཕེབས། དབྱུག་ཟླའི་ཉི་ཤུའི་ནུབ་བསམ་ཡས་དཀོར་མཛོད་གླིང་དུ་གནོད་སྦྱིན་ཙིཏྟ་དམར་པོ་ཆ་ལུགས་མི་ལ་ཞུགས་པའི་

― MLP003_Page_0213 ―

^{[མ་དཔེ་གཟིགས་ན་འདིར་གནོན།]}

[Full Size]

བཙན་ཆས་ཇི་ལྟ་བ་ལ་འབག་དམར་པོ་གྱོན་པ་ཞིག་གིས་སྒོ་ནང་དུ་ཞབས་བསུ་དར་དཀར་གྱི་ཕྱག་རྟེན་དང་བཅས་ཕུལ་ནས་བཏུད་པ་ལ། ཕར་ཡང་སྙན་དར་ཞིག་དཔུང་པ་གཡོན་པར་བཏགས་རྗེས། མཚན་གྲངས་ཤིག་བཏང་སོང་བར། ཆོས་སྐྱོང་ལྷོར་གཟིགས་སྟན་མེད་པ་དང་། རྗེ་ཉིད་རང་བྱང་གཟིགས། སྟག་སྟན་ཞིག་ལ་བཞུགས་པ་ན། དེས་མཆོག་གི་སྤྲུལ་སྐུ་དང་ས་སྐྱ་དགེ་བཤེས་མེད་ཀྱི་བར་དེ་ལ་གཟུགས་མེད་ཀྱང་ཤིན་ཏུ་དཀའ་ཚེགས་ཆེ་བ་བྱུང་ཞེས་ཡུས་ཀྱི་རྣམ་པ་བྱས་པ་ལ། གཞུང་གི་ཆབ་སྲིད་མངའ་ཐང་སྤེལ་བའི་ཕྲིན་ལས་གསོལ་བ་ན། དེ་བཞིན་བྱེད་དེ། གཟུགས་མེད་ཀྱང་དཀའ་ལས་ཆེ་ཙམ་འདུག་ཅེས་སོགས་ཟེར་ཞིང་། རྗེ་ཉིད་རང་གི་ཐུགས་ཀྱི་བཞེད་དོན་གལ་ཆེ་བ་ཞིག་ཡོད་པ་འདི་ཁྱོད་ཀྱིས་གེགས་མེད་དུ་འགྲུབ་པ་བྱེད་དགོས་གསུངས་པས། དེ་འགྲུབ་པར་བྱེད་གཟུགས་མེད་ཡིད་ལ་དྲན་པར་གྱིས་ལ། གལ་གེགས་ཆེ་སྐབས་གཏོར་མ་རེ་བཤམས་ནས་གཉེར་གཏད་ཀྱིས་འགྲུབ་བོ་ཟེར་བ་སོགས་སྤྱི་སྒོས་ཀྱི་ལུང་བསྟན་དང་ཕྲིན་ལས་སྒྲུབ་པའི་གཡར་དམ་ཁས་བླང་པའི་མནལ་ལམ་བྱུང་། ཡང་རྒྱལ་ཟླའི་བཅུ་དགུའི་ནུབ་ཞབས་དྲུང་ཐུགས་སྲས་རིན་པོ་ཆེ་གཤེགས་པའི་བསྔོ་རྟེན་ཡིན་ཟེར་བའི་སྒམ་ཆུང་ཞིག་ཁ་དབྱེ་བར་མཛད་པའི་ནང་ན། ཕྱག་དྲིལ་ཤུབས་ཙིང་གི་རི་མོ་བྱས་པ་ཞིག་འདུག་པ་དེ་རྗེ་ཉིད་རང་དང་། དྲིལ་བུ་གཞན་ཞིག་འདུག་པ་དེ་གདུང་བརྒྱུད་རིན་པོ་ཆེ་དང་མཁན་པོ་སུ་རིགས་ལ་ཡིན་ཟེར་བའི་མོད་ལ་མནལ་སད། དེ་འཕྲལ་ལྷོ་བྲག་ཏུ་བརྟན་བཞུགས་འབུལ་མི་ཆེད་དུ་གནང་བའི་ཚེ། འབུལ་ཚན་གྲས་ནས་དར་ཡུག་དམར་སེར་གཉིས་ལུས་འདུག་པ་རྟེན་འབྲེལ་གྱི་ལ་ཉེ་ངན་གསུངས་ཤིང་། ཕྱིས་རྣམ་སྤྲུལ་རིན་པོ་ཆེ་དང་གསུང་བགྲོས་བྱུང་བར། འདིར་མནལ་ལྟས་བྱུང་བའི་ཉིན་དེར་ཕ་གིར་ཞལ་ཆེམས་གནང་བ་དང་དུས་འགྲིག་འདུག་ཅེས་གསུངས། ཡང་གནམ་གང་གི་ཐོ་རེངས་ལོ་གསར་གྱི་གྲྭ་པའི་ཇ་ཞུ་ཕལ་ཆེར་རྫོགས་པའི་དགེ་བསྐོས་ཀྱི་ཇ་ཞུའི་རྗེས་སུ་མནལ་ཐུམ་པ་ཞིག་བྱུང་བའི་གཟིགས་སྣང་དུ། ད་ལྟའི་གཟིམས་ཆུང་གི་གཟིམས་སྒྲོམ་ནང་འདི་ཁར་བཞུགས་འདུག་པ་ལ། སྒོ་ཤག་གིས་ཕྱེ་བའི་ནང་ནས་བུད་མེད་ཁ་དོག་སྔོ་བ་ཨ་ཙ་ར་

― MLP003_Page_0214 ―

^{[མ་དཔེ་གཟིགས་ན་འདིར་གནོན།]}

[Full Size]

འདྲ་བ་རས་ཁྲའི་གོས་དང་རིན་པོའི་རྒྱན་འཕྱོར་བ་ལྔ་ཐལ་གྱིས་འོང་ནས། ངེད་རྣམས་ཞིང་སྐྱོང་གི་ཌཱཀྐི་ནཱི་ཡིན། ད་ལྟ་རྔ་ཡབ་གླིང་པ་ཐམས་ཅད་རྒྱ་འདྲེ་ཤོར་སོང་བས་མ་ཕེབས་པའི་ཐབས་མེད་ཟེར། གཟིམས་སྒྲོམ་དུ་ལག་བཏང་སྟེ་ཕྱག་ནས་འཐེན་ཞིང་ད་ལྟ་རང་ཕེབས་ཞེས་ཨུ་ཚུགས་ཞུ་འདུག་པ་ལ། གཟིམས་གཞུག་ན་དེ་དུས་ཀྱི་དགེ་བསྐོས་བྱེད་མི་དགེ་སློང་ངག་དབང་ཀུན་དགའ་ཡིན་རྒྱུ་བའི་བཙུན་པ་ཞིག་འདུག་པ་དེས། གཟིམས་སྒྲོམ་ནང་དུ་མར་མནན་ནས། རེ་ཞིག་ཐེགས་ན་གཏན་ནས་མི་འོང་ཟེར། དེར་རྗེ་རང་གིས། ད་ལྟ་ཚེ་ཚད་ལ་དགའ་མོ་ཡོད། རེ་ཞིག་མི་འགྲོ། ཡོང་རན་པ་དང་ཁྱེད་རང་རྣམས་བསུ་བ་ལ་ཡོང་མི་དགོས། ཤར་མར་སླེབ་འོང་གསུངས་སོ། །དེར་བཙུན་པ་དེས་བུད་མེད་ལྔ་པོ་དེ་ཨུ་ཚུགས་ཀྱིས་བརྫངས་ནས་ཕྱིར་ལོག་སོང་བ་དང་། ཡང་ཨ་ཙ་ར་ལྔ་ཤར་གྱིས་འོང་ནས། ད་ལམ་རང་ཕེབས་དགོས་ཟེར་བ་ལ། ཐུགས་ཀྱི་དགོངས་པར། ད་ནི་ལོ་ཡང་ལྔ་བཅུ་ང་ལྔ་ཙམ་སླེབས་སོང་བས་ཕྱིན་ཀྱང་ཡོང་བ་འདྲ་སྙམ་དུ་དགོངས་ཤིང་། ཞལ་ནས་རེ་ཞིག་ང་མི་འགྲོ་བོད་འདིར་སངས་རྒྱས་ཀྱི་བསྟན་པ་རྒྱ་ཆེ་བ་ཞིག་མི་འདུགདེའི་ནང་ནས་ཀྱང་རྙིང་བསྟན་ཉག་ཕྲ་བར་འདུག་པས་ཨོ་རྒྱན་ཆེན་པོའི་དྲིན་གསོར་ཕྲིན་ལས་སྤེལ་ཕྱིར་རེ་ཞིག་སྡོད་དགོས་འདུག་གནང་སོང་། དེ་སྐད་དུ་ཞལ་ནས་ཨོ་རྒྱན་ཆེན་པོའི་མཚན་བརྗོད་པར་མཛད་པ་ཙམ་གྱིས་ཐུགས་དད་པའི་གདུང་ཤུགས་དྲག་པོས་མྱོས་ཏེ། ཨོ་རྒྱན་གྱི་མཚན་བརྗོད་བཞིན་ཏུ་སྤྱན་ཆབ་འཁྲུག་པ་དང་བཅས་ཐུགས་བརྒྱལ་བ་ལྟ་བུའི་མུར་མནལ་སད། དེ་དུས་སྤྱན་ཆབ་མངོན་སུམ་དུའང་ཟག་འདུག་གསུང་། དེ་ལྟར་སྤྱན་ལྟས་འཚུབ་པ་ལ་བསུན་བཟློག་དང་། འཆི་བསླུ་སོགས་གནད་དུ་འགྲོ་བའི་རྟེན་འབྲེལ་གྱི་ཆོ་ག་མང་པོ་བསྒྲུབས་ཤིང་། གྲྭ་པ་སྤྱི་སྒེར་ཐམས་ཅད་དང་མཆོག་དམན་གྱི་དད་ཅན་མང་པོས་ཀྱང་ཞབས་བརྟན་གྱི་རིམ་པ་ཕུལ། ཁྱད་པར་གོང་ཞབས་ཡས་ཕྱིན་ནས་བརྟན་བཞུགས་གསོལ་འདེབས་ཚིགས་བཅད་མ་དང་འབྲེལ་བར། སྟན་དཀར་རྡོ་རྗེའི་རེ་ཁཱ་ཅན་དང་། འབུལ་ནོད་ཕུལ་དུ་ཕྱིན་པ། འདུས་པར་མང་འགྱེད་བཅས་རྒྱས་པར་སྩལ། ཉེར་གཉིས་ཀྱི་ནུབ་ལྷོ་ནང་ཡིན་ཁུལ་ཞིག་ཏུ་ཞབས་དྲུང་

― MLP003_Page_0215 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་སྲས་རིན་པོ་ཆེ་སྐུ་བསྙུན་ནས་འདུག་པའི་སར་ཕེབས། དེར་མཐའ་ཤིང་ནགས་ཀྱིས་བསྐོར་བའི་ནགས་ཆུང་ཞིག་ན་ཞལ་ལྷོ་ནུབ་ལ་ཕྱོགས་ནས་བཞུགས་འདུག་པའི་མུར་སྤྱན་ཟིམ་མེར་གཤེགས་སོང་བར། ངེད་རང་གིས་སྤྲུལ་པའི་སྐུ་མྱུར་དུ་ཕེབས་དགོས་སོ་ཞེས་ཞུས་པས། ཡང་སྐུ་སོས་པ་ལྟ་བུས། ད་ལམ་རིམ་གྲོའི་དུས་རྟེན་འབྲེལ་ལ་ཉེ་ལེགས་པ་ཞིག་མ་བྱུང་བས། ད་ཅི་འདྲ་འགབ་སོགས་སྣ་ཚོགས་གསུངས་པའི་མཐར། ད་ཆ་རྗེ་ཉིད་ལ་འདི་ཕྱི་ཐམས་ཅད་བློས་ལྗིད་འགེལ་བ་ཡིན་གཤིས། རྗེས་མྱུར་མཇལ་གྱི་སྨོན་ལམ་ཞུ་བས་སྐྱབས་འཇུག་ཐུགས་རྗེས་གཟིགས་དགོས་ཞེས་གསུངས་བྱུང་བའི་མོད་ལ་མནལ་སད། དེ་འཕྲལ་ལྷོ་བྲག་ཏུ་གནས་ཚུལ་འབུལ་མི་ཆེད་དུ་གནང་ཞིང་། དེ་ནས་མི་རིང་བར་ལྕགས་འབྲུག་དབོ་ཟླའི་ཚེས་བརྒྱད་ལ་ཐུགས་སྲས་སྤྲུལ་པའི་སྐུ་ཞི་བར་གཤེགས་པ་རེ་ཞིག་གསང་ཁོག་ནས་སྤྱན་འདྲེན་འབྱོར་བ་ལྟར་ཆིབས་བསྐྱོད་དེ། རིམ་པར་ཚེས་ཉི་ཤུ་ལ་ལྷ་ལུང་དུ་ཕེབས། དེའི་ནངས་པར་གསང་རྒྱ་བཀྲོལ་ཏེ། རྗེ་ཉིད་ཀྱི་ཐུགས་དམ་གསལ་འདེབས་དང་། གདུང་བཞུ་བའི་ཕྱག་ལེན། ལྷོ་ནང་དུའང་ཞབས་བསྐྱོད་ནས་དངུལ་གདུང་ལ་རབ་གནས་སོགས་མཛད་པར་ཞབས་ཏོག་འབུལ་ནོད་ཕུལ་དུ་བྱུང་བ་སྤྱི་སྒོས་ཐམས་ཅད་ནས་བསྒྲུབས་ཤིང་ནག་ཟླའི་འགོར་ཆིབས་བཏེགས་ཏེ་ཕྱིར་ལམ་གླིང་དུ་ནང་སོ་དཔལ་འབྱོར་འདས་པའི་སྐྱབས་གནས་སུ་སྤྱན་དྲངས་པ་ལྟར་ཐེགས་ནས་རིམ་པར་གདན་སར་ཕེབས་ཏེ། ཚེས་བཅུ་བདུན་གྱི་སྔ་དྲོའི་ཆར་གསང་སྔགས་ཕོ་བྲང་གི་རྩིག་རྨང་འདིང་བར་མཛད་ཅིང་། གྲོ་བཞིན་ཟླ་བའི་ཚེས་བཅོ་བརྒྱད་ཀྱི་དུས་ཚེས་བཟང་པོ་ནས་སྐར་འཛིན་གྱི་གྲྭ་ཚང་གི་དབྱར་དགུན་གྱི་ཆོས་ཐོག་གཉིས་ཀྱི་དུས། བློ་གསལ་དྲུག་ཅུ་སྐོར་ལ་དཔལ་གསང་བ་སྙིང་པོའི་རྒྱུད་བཤད་ཀྱི་སྲོལ་ཚུགས་པར་མཛད། ཟླ་བ་དགུ་པའི་ཚེས་བཅུ་དགུའི་ནུབ། རྗེ་བཙུན་ཏཱ་ར་ནཱ་ཐ་ཡིན་ཟེར་བའི་བླ་མ་སྐུ་ན་གཞོན་ཞིང་མཚར་བ་གཅིག་བཞུགས་འདུག་པར་སངས་རྒྱས་མཉམ་སྦྱོར་གྱི་དོགས་གནས་འགའ་རེ་ཞུ་བར་མཛད་པ་ལ། འདི་དང་འདིའོ་ཞེས་ལན་ལྷུག་པར་སྩལ་བར་མཛད་པ་ན་ཐུགས་ཀྱི་དོགས་པ་སངས་བའི་མནལ་ལམ་ངོ་མཚར་བ་བྱུང་། དེ་ནས་

― MLP003_Page_0216 ―

^{[མ་དཔེ་གཟིགས་ན་འདིར་གནོན།]}

[Full Size]

སྒམ་པོ་སྤྲུལ་པའི་སྐུ་ཞི་བར་གཤེགས་པའི་དགོངས་རྫོགས་གྲལ་དབུར་སྤྱན་དྲངས་པ་ལྟར། རྒྱལ་ཟླའི་བཅུ་གཅིག་ལ་ཆིབས་བཏེག་ནས་རིམ་པར་འགྲོ་དོན་མཛད་བཞིན་པས་རུའི་ཀོ་ལྕགས་བརྒྱུད། བཅོ་བརྒྱད་ཀྱི་སྔ་དྲོ་གདར་རིའི་རྩེར་འཇའ་འོད་ངོ་མཚར་བ་མངོན་དུ་སྣང་ཞིང་། ཆིབས་བསུ་དང་། ཐབ་བསུའི་བསྟི་སྟང་ཆེན་པོའི་བསུ་བ་དང་བཅས་ཏེ། དེའུའི་མདུན་གྱི་ཁྲི་ཐོག་ནས་ཁྲོམ་འདུས་པ་ལ་བྱིན་རླབས་མཛད་དེ། སྒོམ་སྡེའི་གཟིམས་ཆུང་ཞལ་ནག་ཏུ་ཕྱགས་ཕེབས། ནངས་པར་སྐུ་གདུང་རིན་པོ་ཆེ་ཡི་དྲུང་དུ་ཐུགས་དམ་གསལ་འདེབས་དང་། ཉེར་གཉིས་ལ་ཞབས་ཕྱི་རྣམས་དང་བཅས་ཏེ་གསུང་ཆོགཉེར་བདུན་ལ་སྐུ་གདུང་ཞུགས་འབུལ་གྱི་ཕྱག་ལེན། གནམ་གང་ལ་སེར་འཚོགས་ཀྱི་གྲལ་དབུར་བདེ་ཡངས་ཀྱི་ཆོས་ཁྲིར་སྤྱན་དྲངས་ཏེ། འབུལ་ནོད་ཕུལ་དུ་བྱུང་བ་བསྒྲུབས་པར་ཚིག་དོན་བཟང་པོའི་སྟོང་ཐུན་སྔོན་དུ་འགྲོ་བས་མཆོད་བསྔོ་འབུལ་བ་རྣམས་མཛད་ཅིང་། དེ་དུས་ཉེར་ལྔའི་ནུབ་སྒམ་པོའི་ཁྱམས་སྟེང་ནས་གཟིགས་པས་ཁྱི་ནག་པོ་འཇིགས་སུ་རུང་པ་ཞིག་གིས་མི་མང་པོ་འདེད་ཀྱིན་འདུག་པས། ཅུང་ཟད་ཐུགས་ལ་ཡ་ང་བར་འཁྲུངས་ནའང་ཁྱི་དེས་རྗེ་ཉིད་རང་ལ་ཤིན་ཏུ་དགའ་བའི་ཉམས་བྱེད་པའི་མནལ་ལྟས་དང་། དེའི་སང་ཉིན་བཟང་ལུང་དུ་ཕེབས་པར་བྱ་རོག་སྣུམ་བག་ཅན་ཞིག་ཆིབས་པའི་གཡས་གཡོན་དུ་ལྡིང་ཞིང་སྐུ་དྲུང་དུ་འབབས་ནས་དགའ་བའི་སྐད་བསྒྱུར་བ་དང་། གུས་པའི་རྣམ་འགྱུར་བྱེད་པ་ཞིག་བྱུང་བ་ནི་ཏྲཀྴད་མཉེས་པའི་རྣམ་པ་གསལ་བར་གོ་གསུངས། ཡང་ལྕགས་སྦྲུལ་ཟླ་བ་དང་པོའི་ཚེས་གཅིག་གི་ནུབ་སྒམ་པོ་ལ་རྒྱར་བལྟ་བ་ཡིན་པ་འདྲ་དགོངས་པའི་སྤྱན་ལྟས་མཚར་ཞིང་འཚུབ་པའང་གཟིགས། ནངས་པར་ཕེབས་ཞོར་ལ་མཆོད་ཁང་རྙིང་པ་མཇལ་བར་མཛད་ཅིང་། ཀླུང་མཁར་རྫོང་དུའང་སྤྱན་དྲངས་ནས་མཆོད། ཞབས་དྲུང་རྣམས་ཀྱིས་ཚུགས་ཁའི་བར་ཞབས་སྐྱེལ་ཞུས་ཏེ་རིམ་པར་རྣམ་རྒྱལ་ཀླུ་ཁང་དང་། རྩེ་ལེ་དགོན་རྣམས་སུ་བཀུར་སྟི་ཆེན་པོས་སྤྱན་དྲངས་ནས་མཆོད་ཅིང་། ལྷ་ཁང་དང་ཡར་སྟོད་བརྒྱུད་འགྲོ་དོན་སྐྱོང་བཞིན་པས་གདན་སར་ཕེབས། ནག་ཟླའི་འགོར་སྐུ་ཞང་འདུམ་པོ་བའི་གཞིས་སུ་གྲྭ་གཙང་གི་ཚོགས་དབུར་སྤྱན་དྲངས་ཏེ་བྲིས་ཐང་

― MLP003_Page_0217 ―

^{[མ་དཔེ་གཟིགས་ན་འདིར་གནོན།]}

[Full Size]

མང་པོར་རབ་གནས་དང་། ཞབས་པད་བརྟན་པའི་གསོལ་འདེབས་ཀྱང་བསྒྲུབས། ཕྱིར་ལམ་སྡིངས་པོ་ཆེར་སྤྱན་དྲངས་ནས་སྤྱི་སྒེར་སོ་སོས་མཆོད། ཟླ་བ་ལྔ་པའི་མཇུག་ཏུ་བྱུས་རིམ་གྱི་བརྟན་གསོལ་གནང་བར། ཉེར་དྲུག་གི་ཉིན་བརྟན་མ་མཆོད་ཅིང་ཕྲིན་ལས་གཉེར་གཏད་ཀྱི་སྐབས་ཤིག་ཐུགས་ཡིད་བྱེད་ཀྱི་ཡུལ་དུ། བརྟན་མ་བཅུ་གཉིས་བུད་མེད་གཟུགས་རིང་ཆས་བཟང་གི་རྣམ་པ་ཅན་འཁོར་དཔག་ཏུ་མེད་པ་དང་བཅས་པས་མདུང་དར་ཁྲ་ཆེམ་ཆེམ་བོད་ཀྱི་མངའ་འབངས་ལ་བསྐོར་བ་ལྟ་བུར་ལམ་ལམ་གཟིགས་པ་ལས། ད་རེས་དམག་གིས་སྐྱོན་མི་ཡོང་བ་འདུག་པས་དར་ལྕོག་རྣམས་བསྡུས་ཞེས་བསྡུས་པ་འདྲ་ཞིག་གི་གསལ་སྣང་ཤིན་ཏུ་ཆེ་བ་བྱུང་བས། དེ་སྐབས་དམག་གི་སྒྲ་ཆེ་ཡང་གཟིགས་སྣང་ཐོག་ཏུ་ཁེལ་བའི་ཡ་མཚན་པ་བྱུང་། ཡང་ཟླ་བ་བཅུ་པའི་ནང་དུ་ནུབ་ཅིག་རྫོང་ལྟ་བུའི་རི་རྩེ་ན་ཁང་པ་རོང་རོང་མང་པོ་ཡོད་པའི་རྡོ་ཐེམ་རྟ་ལམ་ལྟ་བུ་ཞིག་གི་འཁྲིས་ན། རྫའི་མཆོད་རྟེན་ཐོག་ཚད་ཙམ་ཞིག་འདུག་པར། མི་ཞིག་གིས་འདི་ལ་དཀར་ཆག་ཅིག་རྩོམ་པ་ཞུ་ཟེར། དེ་གའི་མུར་མཆོད་རྟེན་དེའི་བུམ་པར་མཐིང་བྱུག་པ་ལྟར་སྔོ་ལམ་ལམ་ཞིག་འདུག་པའི་ངོས་ལ་རྡོ་དཀར་གྱིས། བཀྲ་ཤིས་དགེ་བའི་ས་གཞི་གཙང་མ་རུ། །བཀྲ་ཤིས་ཀུན་གྱི་རེ་བ་སྐོང་བའི་ཕྱིར། །བཀྲ་ཤིས་སྒོ་མང་ཆོས་སྐུའི་སྣང་བརྙན་ནི། །བཀྲ་ཤིས་ཀུན་གྱི་སྙིང་པོར་བརྟན་པར་ཤོག །ཅེས་བྲིས་པའི་མནལ་ལམ་ཤིན་ཏུ་གསལ་ཞིང་། གཞན་འགའ་རེ་བྲིས་སོང་ཡང་ད་ལྟ་དྲན་ཡུལ་དུ་མི་འདུག་གསུངས། ཡང་ཟླ་བ་བཅུ་གཅིག་པའི་ཉེར་བཞིའི་ནུབ་འོད་གསལ་གྱི་སྣང་བར། བསམ་གཏན་རྩེའི་བདག་མོ་དབུ་མཛད་མ་དེ་ཡིན་སྙམ་པ་ཞིག་གིས། ཡེ་ཤེས་གཙོ་མོ་ནི་སྒྲུབ་གནས་མཁར་ཆུ་ལ་ཆས་འགྲོ། །ཨ་ཀྱང་མ་གཅིག་ནི་དག་པའི་རང་སྣང་ལ་ཆས་འགྲོ། །འཛམ་གླིང་གི་སྒྲོན་མེ་གཅིག་པུ་ཁྱོད། །བསྟན་པ་དང་སེམས་ཅན་གྱི་དོན་ཆེད་དུ། །འགྱུར་མེད་ཀྱི་ཁྲི་ལ་བརྟན་པར་བཞུགས། །ཞེས་ཟེར་བའི་མོད་ལ་མནལ་སད། མནལ་ལྟས་འདི་ནི་དེ་ནས་མི་རིང་བར་ཆུ་རྟ་ཟླ་བ་གཉིས་པའི་ཚེས་བཅོ་ལྔ་ལ་ཡུམ་སྐུ་གཤེགས་པ་དེ་ལ་བལྟ་བ་འདྲ་སྟེ། དེའི་སྤྲུལ་གཞི་ཤེལ་དཀར་རྡོ་རྗེ་མཚོའི་སྒྲུབ་གནས་མཁར་ཆུ་ཡིན་པའི་ཕྱིར་

― MLP003_Page_0218 ―

^{[མ་དཔེ་གཟིགས་ན་འདིར་གནོན།]}

[Full Size]

རོ། །དེ་ཡང་ཡུམ་རིན་པོ་ཆེ་འདི་ཟླ་བ་དང་པོའི་མཇུག་ཏུ་སྔར་གྱི་ཡི་གེ་རྣམས་དབྱེ་བ་ཕྱེ་སྟེ། མི་དགོས་པ་རྣམས་བསྲེགས་པ་དང་། དེ་སྐབས་འགོལ་བཞུགས་ཀྱིས་ངོ་གསར་གྱི་འགྲིམ་འགྲུལ་མི་མཛད་ཀྱང་། རྣམ་སྤྲུལ་རིན་པོ་ཆེ་གསན་སྦྱང་ལ་ཕེབས་པ་རྒྱང་ཙམ་བཞུགས་གཤིས། སླར་མཇལ་བ་གནང་ན་ཡོང་འདྲ་ཞེས་ཞབས་ཕྱི་རྣམས་ཀྱིས་ཞུའང་། སླར་མཇལ་མི་མཇལ་མི་ཤེས་པས་འཕྲལ་དུ་མཇལ་བ་བློ་ཁ་རྫོགས་པ་འདུག་གསུངས་ནས་བཀྲ་ཤིས་རབ་བརྟན་དུ་སྤྱན་འདྲེན་གནང་སྟེ་མཇལ། ཁྱད་པར་དབོ་ཟླ་ཉིས་བརྩེགས་ཀྱི་སྔ་མའི་ཚེས་བཅོ་ལྔའི་སྔ་དྲོ། ཆིབས་ར་དང་སྣེ་གདོང་དུ་ཨ་བར་རྣམས་ལ་ཕྱག་བྲིས་མཛད་དགོས་པ་རྣམས་ཀྱང་ད་རེས་རང་ཐོན་པ་གྱིས་གསུངས་ནས་བརྫངས་ཤིང་། འདི་ཁར་ཡང་གཞན་ལ་གནང་དགོས་ཐམས་ཅད་ཚར་བར་མཛད་ནས། དགུང་ལོ་དོན་དགུ་པའི་ཐོག་ཆུ་རྟ་དབོ་ཟླའི་ཉའི་སྔ་དྲོ་ཞལ་ཆེམས་ཀྱང་གནང་། དེ་རྟིང་གསོལ་གུང་གི་དུས་ཞབས་ཕྱི་ལ་བོས་ཏེ། དེ་རིང་འདིར་ཐུགས་སྲས་རིན་པོ་ཆེའི་སྲས་མོ་དེ་སྐུ་རྒྱན་འཕྱོར་པོ་བཅས་བྱོན་བྱུང་གསུངས། དེ་ནས་ཉི་མ་གུང་ཕྱེད་ཡོལ་ལ་བསྙུང་བ་མེད་པར་སྐུ་གཤེགས། དེའི་ཚེ་རྗེ་ཉིད་ཀྱིས་འཕོ་བའི་མཚམས་སྦྱོར་སྩལ་ཅིང་། ནམ་མཁའ་དྭངས་བ་ལ་འཇའ་འོད་འཕྲོ་བ་སོགས་གཤེགས་རྟགས་ཀྱང་མཚར་བ་བྱུང་། དེ་ནུབ་ནས་བརྩམས་ཏེ་གདུང་ཆོག་དང་གཞིས་བྱེས་ཀུན་ཏུ་སྐུ་འདད་ཀྱི་མཆོད་སྦྱིན་ཕུལ་དུ་བྱུང་བ་སྒྲུབ་པར་མཛད་ཅིང་། དངོས་གཞིའི་གྲལ་དབུར་གསུང་སྤྲུལ་རིན་པོ་ཆེ་གསོལ། སྐུ་གདུང་གཡང་ཆས་ཀྱིས་ལོ་གཉིས་ལྷག་ཙམ་བཞུགས་སུ་གསོལ་ཏེ་ཕྱིས་གདུང་བཞུ་བའི་ཕྱག་ལེན་ཡང་རྗེ་ཉིད་ཀྱིས་མཛད་དོ། །ཟླ་བ་བཅུ་པའི་མཇུག་ཏུ་ཁྲ་འབྲུག་ཏུ་བསྟན་སྲིད་སྤྱི་རིམ་ལ་ཕེབས་པའི་ས་ནས་ཟངས་རིར་རྒྱལ་ཡུམ་རིན་པོ་ཆེས་སྤྱན་དྲངས་ཏེ། ཞབས་ཏོག་ཕུལ་དུ་བྱུང་བ་བསྒྲུབས་ཤིང་དབང་བྱིན་རླབས་ཀྱང་མང་དུ་སྩལ། ཆུ་ལུག་དབོ་ཟླའི་སྒྲུབ་མཆོད་དང་སྦྲེལ་ཏེ་དཀྱིལ་འཁོར་དེའི་སྟེང་ནས་གསང་སྔགས་ཕོ་བྲང་གི་རྟེན་བརྟེན་པ་རྣམས་ལ་ནག་ཟླའི་ཚེས་གསུམ་གྱི་ཉིན་རྗེ་ཡབ་སྲས་ཐམས་ཅད་ཚོགས་དབུར་ཞབས་པད་བསྐྱོད་ནས་རབ་གནས་ཀྱི་ཆོ་ག་སྨིན་རྒྱས་

― MLP003_Page_0219 ―

^{[མ་དཔེ་གཟིགས་ན་འདིར་གནོན།]}

[Full Size]

སུ་མཛད་པར། རབ་སྟོན་འབུལ་འགྱེད་སོགས་ཕུལ་དུ་བྱུང་བ་དང་། མི་སེར་ནང་བཟན། ཕྱོགས་འདུས་ཀྱི་ཆོས་ཞུ་བ་སོགས་ལའང་སྟོན་མོ་དང་འགྱེད་རྒྱས་པར་སྩལ། ཟླ་བ་བཞི་པའི་འགོར་རྒྱལ་ཡུམ་གྱིས་ཟངས་རིར་བསྟི་སྟང་ཆེན་པོས་སྤྱན་དྲངས་ཏེ། ཨོ་རྒྱན་གླིང་གྲྭ་གཙང་ལ་ཚེས་བཅུ་མཆོད་པའི་གར་འཆམས་ཀྱི་ཕྱག་ལེན་རྒྱས་པ་ཚུགས་པའི་ཉིན་སྔ་རྟིང་གི་གྲལ་དབུར་ཞབས་བསྐྱོད་ཅིང་དངོས་གྲུབ་ལེན་པ་དང་རྗེས་འབྲེལ་དུ་གཏོར་དབང་ཡང་སྩལ། རྒྱལ་ཡུམ་དཔོན་བློན་གྲྭ་གཙང་བཅས་པས་ཞབས་བརྟན་ཡང་རྒྱས་པར་ཕུལ་ཞིང་། བསྙེན་བཀུར་དང་འབུལ་ནོད་ཕུལ་དུ་བྱུང་བས་མཆོད་ནས་ཕྱིར་ལམ་ཡང་འགྲོ་དོན་སྐྱོང་བཞིན་པར་གདན་སར་ཕེབས། ཟླ་བ་ལྔ་པའི་ཚེས་བཅུ་དྲུག་གི་ནུབ་མོ་མནལ་ལམ་དུ། ཟངས་རི་དཔོན་ཚང་ལྷུན་གྲུབ་ལ་སྨན་སྦྱོར་རྒྱུ་ཞིག་གཏད་ཁུལ་ལ་དཔོན་ཚང་གིས་སྨན་སྦྱོར་བྱས་པ་ཐུན་བཞི་ལྔ་ཙམ་དང་། སྦྱར་ལྷག་གི་ལི་ཤི་དང་ཁ་ཆེ་སོགས་ཁ་ཤས་གཏད་བྱུང་བས། བློ་རྒྱུ་གཙང་པོ་ཡིན་འདུག་དགོངས་པ་གནང་། དེ་དང་མཉམ་དུ། རྟ་མགོ་གཅིགར་མགོ་གཅིགརི་བོང་གི་མགོ་གཅིགབྱི་བའི་མགོ་གཅིགཅེ་སྤྱང་གི་མགོ་ཡིན་ཟེར་བ་གཅིག་བཅས་མགོ་ལྔ་པོ་ཕྱིའི་ཤ་ལྤགས་ཀྱང་ཕུད། ནང་གི་ཀླད་པའང་བཏོན་པ་ལ། སོ་མ་ལྟ་བུའི་དྲི་ཆེ་བ་ཞིག་གཏད་བྱུང་། སྐད་ཆར་གཟིམས་ཞུ་བའི་མགོ་རྨས་དེ་རང་སོས་པ་འདུག་ཀྱང་སྟོད་ཀྱི་རྨ་དེའི་རོ་དེ་སླར་མི་ལྡང་ལས་ཆེ་ཟེར། ཡང་དེ་རང་རེ་ཞིག་དགའ་རབ་ཡོང་ཤས་ཆེའང་དེའི་ཕབས་ཀྱིས་ཐམས་ཅད་སྡུག་བསྔལ་ལ་སྦྱོར་བ་འདྲ་ཟེར་བྱུང་བ་ལྟར། མནལ་ལྟས་དེའི་དོན་མི་རིང་བར་གཏན་ལ་ཕེབས་པར་གྱུར། ཡང་ཟླ་བ་བརྒྱད་པའི་ཉེར་དགུའི་ནུབ་གོང་ཞབས་གོང་མ་དང་མཇལ་ཏེ། སྟོབས་ཆེན་མཆོད་རྟེན་གྱི་དྲི་བ་མང་པོ་ཞུ་བར་མཛད་པ་ལས་འདི་དང་འདིའོ་ཞེས་བསླབ་སྟོན་ཕྲ་རྒྱས་སུ་སྩལ་བས་དོགས་གནས་ཐམས་ཅད་སེལ་བར་གྱུར་གསུང་། ཤིང་སྤྲེལ་ནག་ཟླའི་ནང་དུ་རྟ་ར་མདོ་མགྲོན་གཉེར་གཤེགས་པའི་སྐྱབས་གནས་སུ་ཆིབས་བསྐྱོད་པའི་ཡར་ལམ་ཆོས་སྡེར་སྤྱན་དྲངས་ཏེ་མཆོད་ཅིང་གུར་གར་ཡང་གཟིགས། རྟ་ར་མདོར་བྱང་བཞུའི་ཆོ་གས་རྗེས་སུ་བཟུང་ཞིང་བསྙེན་བཀུར་འབུལ་ནོད་རྒྱ་ཆེར་བསྟབ།

― MLP003_Page_0220 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱིར་ལམ་བདེ་ཆེན་ཆོས་འཁོར། འོར་སྦུགལྷུན་གྲུབ་རབ་བརྟན། ཆོས་སྡེ་རྣམས་སུ་རིམ་བཞིན་ཞབས་གཅགས་ཏེ་གདན་སར་ཕེབས། དེ་ནས་ཟླ་བ་དྲུག་པའི་ནང་དུ་སྡེ་སྲིད་རིན་པོ་ཆེ་ཁྲི་གསར་འོལ་ཁའི་ཆབ་ཚན་དུ་ཕེབས་ཞོར་ལྷོ་ཁ་བརྒྱུད་རིམ་གྱིས་ཆིབས་བསྐྱོད་པར་ཐབ་བསུ་དང་ངོས་ཕེབས་ཀྱི་ཆིབས་བསུ། སེར་སྦྲེངས། བྲོ་གཞས་ཀྱི་རྩེད་སྣ་སོགས་ཀྱིས་ཞབས་བསུས་ཏེ། ཉེར་གཅིག་གི་ཉིན་དགོན་པར་ཕེབས་པ་ལ་རྒྱུན་དང་འཕར་མའི་སྟོན་མོ་བསྙེན་བཀུར་སོགས་འབུལ་བ་རྒྱ་ཆེར་བསྟབས་ཤིང་། སྐུ་རྐྱང་ལ་དགོངས་བཞེད་ལྟར། རྟ་མགྲིན་ཡང་གསང་ཁྲོས་པའི་དབང་། སྒྲ་མི་སྙན་པའི་ཚེ་དབང་། དུར་ཁྲོད་མ་མོ་དང་རྡོར་ལེགས་ཀྱི་སྲོག་གཏད། དེ་དག་གི་ཕྲིན་ལས་སྐོར་གྱི་ལུང་རྣམས་དང་། གནས་རྟེན་ཐམས་ཅད་ཞིབ་གཟིགས་ཀྱི་ཕྱགས་ཕྱིར་ཡང་ཐེགས་ཤིང་། ཕྱིར་ཕེབས་ཀྱི་དུས་ཀྱང་སྔར་ལྟར་ཆིབས་སྐྱེལ་ལ་ངོས་ཕེབས་སོགས་བསྟི་སྟང་ཆེན་པོ་འབུལ་བར་མཛད། ཟླ་བ་བདུན་པའི་ནང་ལ་དར་གླིང་དགོན་དུ་སྤྱན་དྲངས་ཏེ་བསྙེན་བཀུར་འབུལ་ནོད་ཕུལ་དུ་བྱུང་བ་བསྒྲུབས་ཤིང་། གྲྭ་སློབ་ཡོན་བདག་སོགས་མཆོག་དམན་མང་པོར་སྤྱི་དབང་སྒོས་དབང་སོགས་སོ་སོའི་རེ་བ་སྐོང་བའི་ཆོས་སྦྱིན་རྒྱ་ཆེར་མཛད་དེ་ཕྱིར་ཕེབས། ཟླ་བ་དགུ་པའི་ཚེས་བརྒྱད་ཀྱི་ནུབ་གཟིགས་སྣང་ལ། རི་ནགས་ཚལ་ཡོད་པ་ཞིག་གི་འདབས་ན། ལྕགས་རི་གྲུ་བཞི་པ་ཐོག་སོ་གཅིག་ཙམ་པ་ནང་དམའ་བའི་ཉིས་རིམ་གྱི་སྟེང་ན་མཆོད་ཀོང་གང་ཙམ་པ་འབྲས་བུས་གང་བ་རིམ་པར་བསྒྲིགས་པའི་སྟེང་ན་ཞབས་གོམ་སྤོས་ཏེ་ཕེབས་པ་དང་། གྲུ་བཞིའི་ནང་དེ་ཆུས་གང་བར་ལྷུང་དོགས་གནང་བཞིན་དུ། དེའི་ཤར་ལྷོ་ནས་སྟེང་དུ་འཛེགས་ཏེ་ཐེགས་པ་ན་ཁང་པ་ཀ་བ་བཞི་པའི་ཁྱོན་ཙམ་པ་ཞིག་གི་ནུབ་ནས་ཤར་དུ་བལྟ་བ་ལ་རྟེན་ཁྲི་བང་རིམ་བཞི་པའི་སྟེང་ངོས་ཀྱི་ཞལ་བར་རི་མོ་ཤིན་ཏུ་ལེགས་པ་མང་པོ་དང་། དེའི་མདུན་དུ་ཤིང་ཁྲི་ལྔ་ཚར་གྱི་སྟེང་ན་བླ་སྐུ་བྱོན་མཚར་བ་ལྔ་གྲལ་བསྒྲིགས་པའི་ལྷོའི་མཐའ་མ་དེ་བྲག་ཐོག་པ་དང་། དེའི་བྱང་མ་དེ་ཐེག་ཆེན་ཆོས་རྗེ་ཡིན་ཁུལ། དེའི་བྱང་མ་དེའི་ཁྲི་རྒྱབ་ལ་རྡོ་རྗེ་འཆང་ཏིལླི་ནཱ་རོ་མར་མི་བཅས་ཆུང་ངུ་རེ་སྣང་བས་གཙོ་བོ་དེ་དྭགས་པོ་ལྷ་རྗེ་ཡིན་སྙམ་པ་མཛད། དེའི་

― MLP003_Page_0221 ―

^{[མ་དཔེ་གཟིགས་ན་འདིར་གནོན།]}

[Full Size]

བྱང་མ་གཉིས་སུ་ཡིན་མ་མཁྱེན། དེའི་མུར་ལྷོ་མའི་བྲག་ཐོག་པ་ཡིན་རྒྱུ་བ་དེས་སྐུ་ཡ་ཡོ་དང་ཞལ་འཛུམ་ཤིན་ཏུ་མཚར་བས་བུང་བའི་སྐད་ལྟར་སྙན་པའི་གདངས་ཀྱིས། པདྨས་བརྒྱན་པའི་ཞིང་ཁམས་ན། །བཞུགས་པའི་བདེ་གཤེགས་རྣམ་སྣང་དེ། །ང་དང་ཁྱོད་དང་གཉིས་མེད་དེ། །དྲག་པོ་འདས་ནས་བརྩིས་པ་ལས། །འཁྲུལ་པའི་སྣང་བ་ལོག་པའི་མདངས། །མེ་ལོང་གསལ་བར་གཟུགས་བཞིན་འཆར། །ཞེས་གསུང་པའི་མནལ་ལམ་མཚར་ཆེ་བའང་བྱུང་། དེ་དག་གི་སྐབས་སུ་དྲེས་སྤྲུལ་སྐུ་དང་། སྟག་ལུང་འདོད་འཇོ་སྤྲུལ་སྐུ། ཀཿཐོག་རྒྱལ་སྲས་པ་སོགས་ཕྱོགས་འདུས་བཤེས་གཉེན་མང་པོར་ཆོས་སྦྱིན་མཐའ་ཡས་པའང་བར་མེད་དུ་སྩལ། སྟོན་མཇུག་ནས་གོང་ཞབས་རིན་པོ་ཆེ་དང་། སྡེ་སྲིད་ཁྲི་གསར་བཅས་ཡས་ཕྱིན་ལྷན་རྒྱས་སུ་ལྷོ་མོན་གྱི་བར་དུ་ཞབས་བཅགས་ནས། ལྷོ་ཁ་ཡར་རྒྱབ་ཁུལ་དུ་རིམ་གྱིས་ཞབས་པད་བསྐྱོད་པ་ལས། མགོ་ཟླའི་ཚེས་དགུར་དགོན་པར་ཕེབས་པ་ལ། བུད་ཀོག་ལྕང་གསེབ་ཏུ་གསོལ་ཐབ་ཕེབས་བསུའི་སར་གཟིམས་གུར་ཁྲི་སྟན་གྱི་བཀོད་པས་མཛེས་པ་དང་། ཆིབས་བསུ་རྒྱས་པ་དགོན་ཀླུངས་ཐམས་ཅད་ཀྱིས་བསང་རོལ་དར་འཕྱར་རང་དགོན་མ་བུ་ཐམས་ཅད་བསྡུས་པའི་སེར་སྦྲེངས་སྐྱེ་བོའི་ཚོགས་ཀྱིས་རྩེད་སྣའི་རིགས་རྣམ་འགྱུར་གྱི་གཟིགས་མོ་སོགས་བསུ་བའི་བཀོད་པ་ཚར་དུ་དངར་བས་ཞབས་བསུས་ཏེ་ཕེབས། དེ་དུས་ཆིབས་བསུར་ངོས་ཕེབས་གནང་རྩིས་ལ། ཕེབས་ལམ་ནས་བཀའ་ཤོག་ཕྱག་བྲིས་མ་ཕེབས་པར། གཏེར་སྟོན་རིན་པོ་ཆེ་སྐུ་ན་མཐོ་བར་མ་ཟད། གོང་མ་ལྔ་པ་ཆེན་པོས་བླ་མར་བཀུར་ཞིང་ངེད་རང་གིའང་རྩ་བའི་བླ་མར་ཡིན་པ་བཅས་བསུ་བར་ཕེབས་པ་སྐབས་སུ་མ་ཆེས་པས། ཆིབས་བསུར་ངོས་ཕེབས་མི་འགབ་ཐག་ཆོད་ཀྱི་བཀའ་ལུང་དང་། དེ་ནས་ཐབ་བསུས་ས་ནས་ཆིབས་དཔོན་བརྒྱུད་བསླབ་སྟོན་སྒྱུར་མི་རྟ་ཤད་ཀྱིས་གནང་བར་ཡང་། གཏེར་སྟོན་རིན་པོ་ཆེ་རྒྱལ་སྒོའི་ཕྱི་རོལ་དུ་བསུ་བར་ངོས་ཕེབས་གཏན་མི་འགབ་ཅིང་། ཕྱག་དབང་ཡང་གཟིམས་ཆུང་དུ་ཕེབས་གྲུབ་ནས་ཞུ་བ་གནང་བ་དང་། ཕེབས་སྟོན་གྱི་བཞུགས་གྲལ་ལ་ད་ལྟ་ངོས་ཕེབས་གནང་རྩིས་མེད་ཡོད་འདུག་པ་རྟེན་འབྲེལ་ལ་མི་གཏུབ་འདུག་པས་

― MLP003_Page_0222 ―

^{[མ་དཔེ་གཟིགས་ན་འདིར་གནོན།]}

[Full Size]

གདན་གཉེར་བ་རྣམས་ཀྱིས་བཞུགས་སྟན་ཡང་རྒྱག་ཏུ་ཆུག་ཅིག་པའི་བསླབ་སྟོན་ཕེབས་པའི་དགོངས་གཞི་ལྟར། བླ་བྲང་བདེ་ཡངས་སུ་ངོས་ཕེབས་ཀྱི་ཞབས་བསུ་དང་། དབང་ཁང་དུ་ཐོག་མའི་མཇལ་ཕྱག་ཞུ་བ་གནང་དུས་ཀྱང་། བཞུགས་ཁྲིར་མ་ཕེབས་པར་། ཁྲིར་གདོང་དུ་དབུ་ཞྭ་བསིལ་ནས་ཕྱག་ཐལ་སྦྱར་གྱིས་བཞེངས་ཏེ་བཞུགས་པའི་བཀུར་གཟོ་དཔེ་ཟླ་དང་བྲལ་བའི་བཀའ་དྲིན་སྩལ། དེ་ནས་ཚོམས་ཆེན་དུ་ཕེབས་སྟོན་གྱི་བཞུགས་གྲལ་ལ་ཕེབས་པ་གྲོལ་རྗེས། རྩེད་སྣའི་གཟིགས་འབུལ་རྣམས་བཞེས། ནངས་པར་ཚེས་བཅུའི་སྔ་དྲོ་ཡས་ཕྱིན་ལྷན་རྒྱས་སུ་གཏེར་གསར་གུ་དྲག་དང་། ཉང་གཏེར་ཁྲོས་ནག་གི་དབང་ལུང་འབུལ་བ་གནང་ཞིང་། འདི་ཉིན་ཚོམས་ཆེན་དུ་བཞུགས་གྲལ་ལ་སྤྱན་དྲངས་ཏེ། བསྙེན་བཀུར་གྱི་སྟོན་མོ་སྤྱི་སྒོས་ཀྱི་འབུལ་བ་སོགས་ཡོད་དགུ་རྩལ་སྤྲུགས་ལྟ་བུར་ཕུལ་དུ་ཕྱིན་པ་སྒྲུབ་པར་མཛད་ཅིང་དེ་དུས་གོང་གིས་བསླབ་སྟོན་ལ། གཏེར་སྟོན་རིན་པོ་ཆེ་སྟན་ལས་བཞེངས་པ་མི་འགབ་པས་འབུལ་བ་རྣམས་ཕྱག་མཛོད་ཀྱིས་ཕུལ་བས་ཆོག་ཅེས་བསྒྱུར་བ་ལྟར་འབུལ་བ་རྣམས་གཅུང་རྗེ་དབོན་ཀུན་དགའ་ཚུལ་ཁྲིམས་ཀྱིས་འབུལ་བར་མཛད། བཞུགས་གྲལ་གྲོལ་བསྟུན་གསང་སྔགས་ཕོ་བྲང་དང་། གཙུག་ལག་ཁང་གི་གནས་གཟིགས་ཐོག་ལི་མ་ལྷ་ཁང་ནས་གྲྭ་གཙང་གི་གར་འཆམས་དང་རྗེས་འབྲེལ་དར་གླིང་པའི་འཆམས་ཕུད་ཀྱི་གཟིགས་འབུལ་བཅས་པར་གཟིགས་། བཅུ་གཅིག་གི་ཉིན་རྩེ་ཤོད་ལྷན་རྒྱས་སུ་ཕྱག་རྡོར་གཏུམ་པོའི་གདོན་འགྲོལ། མ་ཏི་ལུགས་ཀྱི་འཇམ་དཀར་དང་། འཇམ་དཔལ་ནཱ་ག་རཀྴའི་རྗེས་གནང་རྣམས་འབུལ་བར་མཛད་རྗེས་བླ་བྲང་སྐོར་གྱི་གནས་གཟིགས་རྣམས་གནང་། འདི་ནུབ་གོང་ཞབས་རིན་པོ་ཆེ་སྐུ་རྐྱང་གཟིམས་ཆུང་སྦུག་ཏུ་ཚུར་ཞབས་བསྐྱོད་དེ་ནམ་གུང་ཡོལ་ངེས་ཀྱི་བར་དུ་ཤིན་ཏུ་ཐུགས་ལ་གཅགས་པའི་གསུང་གླེང་ལྷུག་པར་སྩལ། བཅུ་གཉིས་ཀྱི་ཉིན་ཡས་ཕྱིན་དུ་སྐུ་རྟེན། ན་བཟའ། ཆིབས་ཆེན་སོགས་ཀྱི་འབུལ་བ་དང་། དཀར་སྤྲོའི་གསོལ་སྟོན་བསྟབས་རྗེས་ཞབས་སྐྱེལ་དུའང་ངོས་ཕེབས་མ་གནང་ཞེས་བསླབ་སྟོན་བྱུང་རུང་། མཆོད་རྟེན་བར་ཕེབས་ཏེ། གནས་གཟིགས་གནང་རྗེས་མདུན་གྱི་བཞུགས་ཁྲིའི་པད་

― MLP003_Page_0223 ―

^{[མ་དཔེ་གཟིགས་ན་འདིར་གནོན།]}

[Full Size]

གདན་སྟེང་ནས་ཕྱག་དབང་སྩལ་ཅིང་། དེ་དུས་ཀྱང་སྐུ་ལ་བཅལ་བའི་སྟན་ལ་བཞུགས་སུ་གསོལ་ཞིང་ཕྱག་འབུལ་གནང་དུས་བཞེངས་ནས་དབུ་ཞྭ་བསིལ་བ། ཆིབས་བསྒྱུར་གནང་གདོང་ཡང་ཕྱག་ལ་བཅང་སྟེ་སྐུའི་འཕྲོད་བཞེས་ཀྱི་བསླབ་སྟོན་སོགས་དགྱེས་བཞིན་པའི་བཀའ་ལུང་ལྷུག་པར་སྩལ་ནས་ཆིབས་བཏེགརྒྱལ་ཟླའི་ནང་ལ་ཁྲ་འབྲུག་ཏུ་བསྟན་སྲིད་སྤྱི་རིམ་ལ་ཕེབས་དུས། ཚེས་གསུམ་གྱི་ནུབ་སྐུ་ཞང་ཆིབས་དཔོན་ལ་སྤྱན་ལྟས་འཚུབ་ཅིང་རིམ་གྲོས་བཟློག་པའི་མཚན་མ་གཟིགས་པ་ལྟར། ནངས་པར་སྐུ་རིམ་འཕྲལ་སྒྲུབ་བགྱིད་དུ་སྩལ། དེ་དུས་ཚེས་ལྔ་ལ་གོང་ཞབས་མཚལ་དུ་ཕེབས་པའི་ཆིབས་བསྒྱུར་གདོང་ཆིབས་དཔོན་ལ་ཆིབས་ཀྱིས་འཁྲ་བས་མཁུར་ཚོས་རྨས་ཀྱང་རིམ་གྲོས་རྒྱབ་འཆོར་བས་སྐྱོན་ཆེ་བ་མ་བྱུང་ཚུལ་གྱི་ཞུ་ཡིག་ཚེས་བརྒྱད་ལ་འབྱོར་བས་མནལ་ལྟས་ལ་ཡིད་ཆེས་པར་གྱུར། ཡང་འདུམ་པོ་ནས་གསུང་བརྟག་བསྐྱར་མར་ཞུས་པ། ད་དུང་འཚུབ་སངས་པོ་རང་མི་འདུག་པས། ཡིད་ཤེས་ཀྱི་འཆར་སྒོར་འདུམ་པོའམ་ཕུན་རབ་གང་རིགས་སུ་དོགས་ཆ་ཆེ་ཞེས་ཕེབས་པ་ལྟར། རྣམ་གླིང་དུ་ཕུན་རབ་ཀྱི་བུ་རྒན་པ་འདས་པ་དང་། སྨོན་འགྲུབ་པ་རིན་ཆེན་བཀྲ་ཤིས་གཞིས་རྩེ་ནས་དགོངས་པ་འཕྲལ་ཁྲོལ་རེས་རྗེའི་དྲུང་དུ་མཁའ་འགྲོ་སྙིང་ཐིག་གི་ཁྲིད་ཞུ་བར་ཤིན་ཏུ་དུང་བའི་མུར། སྔ་སོར་གསུང་བརྟག་ཞུས་པར་ཚེ་ཉམས་པའི་རྟགས་གསལ་བས་འཆི་བསླུ་དང་སྲོག་བསླུ་གང་འགྲུབ་དང་། མཁའ་འགྲོ་སྙིང་ཐིག་གི་ཁྲིད་ཀྱང་རེ་ཞིག་ཡུལ་དུས་ཀྱི་བསྐལ་བས་ངེད་རང་གི་སློབ་མ་བློ་ལྡན་ལྷུན་གྲུབ་ལ་གསན་ན་འཐད་པའི་བསླབ་སྟོན་རྩལ་བ་ལྟར་ཁྲིད་གསན་པ་གྲུབ་རྗེས་འཆམས་ཚད་ཀྱིས་བསྙུན་ནས། ཤིང་བྱ་ཟླ་བ་དང་པོའི་ཚེས་བཅུ་དྲུག་གི་ཉིན་འདི་གར་སྐུ་རིམ་གྱི་མང་འགྱེད་བསྔོ་རྟེན་བཅས་འབྱོར་བར། ཞམ་རིང་པ་རྣམས་ཀྱིས་སྐུ་རིམ་གྱི་ཁྱད་དོ་ནུབ་རང་མང་སྔ་སྦྱར་ན་ཞུས་པར། རྨི་ལམ་གྱི་མཚན་མ་ལ་ལྟས་ན་དོ་ནུབ་ད་ཆ་དེ་ཙམ་གྱི་ཁྱད་པར་མི་འདུག་པས་སང་ཉིན་བྱས་པས་ཆོག་གསུང་བ་དང་། སྐུ་རིམ་ཡང་ཞེན་པ་ལྡོག་ཕྱིར་ཤེར་སྙིང་རང་ཕན་ཡོན་ཆེ་ཞེས་སྩལ་བ་ལྟར། དེའི་སང་ཉིན་གཞིས་རྩེ་ནས་བང་ཕྱིན་སླེབས་པར། ཚེས་བཅུ་ལ་གཤེགས་གྲུབ་འདུག་པས་

― MLP003_Page_0224 ―

^{[མ་དཔེ་གཟིགས་ན་འདིར་གནོན།]}

[Full Size]

ཐུགས་མཁྱེན་ལ་ཐམས་ཅད་མོས་པར་གྱུར། དེ་དུས་མཆོད་ཡོན་ཐུགས་ནང་མ་གཤིན་པའི་ནང་ཞིག་ལ་བརྟེན་རྒྱལ་ཞབས་བྱང་དུ་ཕེབས་དགོས་པ་བྱུང་བར། རྒྱ་ཅན་དང་རྗེ་ཉིད་རང་གི་མནལ་ལམ་སྐོར་སོགས་ཀྱི་དོགས་གནས། རཏྣ་གླིང་པའི་སྤྱི་ལུང་། གཙང་དུས་ཀྱི་ཟླ་སྲི་སོགས་གང་ལ་བརྟགས་ཀྱང་ཡ་ང་བ་ཐུགས་ཀྱིས་མ་བཟོད་ནས། ཡས་ཕྱིན་གཉིས་ཀར་ཞུ་ཡིག་གི་ངོས་ནས་རྒྱུ་མཚན་རིམ་འབུལ་གནང་ཡང་ཁྲིགས་ཐོག་ཏུ་ཁེལ་བའི་བཀའ་གསལ་གྱི་ལན་མ་གནང་བ་དང་། སྤྱན་ལྟས་སོགས་མཚན་མ་རྣམས་འཚུབ་ཅིང་། སྣྲོན་ཟླའི་ཚེས་བཅུ་མཆོད་པའི་དུས་ནམ་མཁའ་འཇམ་པའི་མུར་མཚན་བརྒྱད་སྒོས་བསྟོད་ཀྱི་མཇུག་ཏུ་ཆར་གློ་བུར་དུ་བབས་པས་སྡུད་དགོས་པ་དང་། གོང་མའི་ལུང་བཞིན་བྱུས་རིམ་གྱི་བསྟན་གསོལ་ཞིག་གནང་སྐབས་ཀྱང་ཆོ་ག་ཚུགས་པ་དང་རང་བཞིན་གྱིས་ཐུགས་ཉོགས་ཏེ་མནལ་ཁུགས་པས་གནད་དུ་མི་འགྲོ་བ་སོགས་པྲ་རྟགས་མི་ལེགས་པའི་མཚན་མ་དང་། ཁྱད་པར་སྔར་ཤིང་ཕོ་ཁྱི་ལོ་མགོ་ཟླའི་ཚེས་དགུའི་ནུབ་འོད་གསལ་གྱི་གཟིགས་སྣང་ལ། ཧ་ཅང་མི་རིང་དུས་ཀྱི་ངེས་པ་ནི། །རྣམ་པ་གཉིས་ཀྱི་དམིགས་དང་ལྡན་པ་ལ། །མཐའ་འཁོབ་སྐད་རིགས་མི་གཅིག་དཔའ་བོ་ཡི། །བརྗོད་པ་ཚིག་གིས་དབུས་སུ་རྒྱས་འདེབས་བྱེད། །དེ་དོན་འགྱུར་བ་དུང་སྐྱོང་ལྷ་མོ་ཡི། །སྙན་འཇེབས་ཞི་བས་སྦྱངས་ཀྱང་མི་འདག་གིས། །འཇོམས་བྱེད་མཐུ་སྟོབས་ཐོག་གིས་མཐར་བྱེད་ཀྱང་། །རྒྱུ་རྐྱེན་རྟེན་འབྲེལ་གཞན་དུ་འགྱུར་བས་དཀའ། །ཞེས་པའི་རྣམ་པ་གཉིས་ཀྱི་དམིགས་ཞེས་པ་ནི་གཉིས་སྐྱེས་ཏེ་བྱའི་མངོན་བརྗོད་ཡིན་པས་བྱ་ལོ་འདིར་འགྲིག་པ་ལྟར། བསྟན་འཛིན་ཇིང་གིར་རྒྱལ་པོའི་དམག་གིས་ནག་ཆུ་ཁ་སོགས་བཅོམ་ནས་རིམ་གྱིས་ལྷགས་པ་ན། མྱོང་འགྱུར་གྱི་ལས་ལ་ལྡོག་ཏུ་མ་མཆིས་པ་བཞིན། བོད་དམག་རྣམས་བཏེག་པར་ཁ་ཉེས་ཅུང་ཟད་ཙམ་ལས་མ་བྱུང་ཡང་ལྷ་འདྲེའི་གདོང་རྔུར་ལྟ་བུའི་སྐྲག་ཆོམ་གྱིས་བག་འཁུམ་པ་དང་། ཐུགས་བསྐྱེད་བཟང་བའི་སྤྱི་མིའི་མདུན་ཁྲིགས་མཛད་པ་པོའང་ཡུལ་དུས་ཀྱིས་དཀའ་ཞིང་གཡོན་ཅན་དག་བར་དུ་ཞུགས་པའི་འཕྲུལ་ལས། སྡེ་སྲིད་རིན་པོ་ཆེ་གངས་དཀར་དུ་ཕེབས་པའང་དཔུང་ཤུགས་ཀྱིས་སྤྱན་

― MLP003_Page_0225 ―

^{[མ་དཔེ་གཟིགས་ན་འདིར་གནོན།]}

[Full Size]

དྲངས་ཏེ། སྟོད་ལུང་སྣང་རྩེར་བཀྲོངས་ནས། རེ་ཞིག་རྒྱལ་ཞབས་རིན་པོ་ཆེ་དམག་སྡེའི་དཔུང་དང་བཅས་པའང་བྱང་དུ་ཕེབས། ཁྲུམས་ཟླའི་ཟླ་སྒང་ལ་གོང་གི་ལུང་བཞིན་སྡེ་སྲིད་ཀྱི་སྐུའི་བསགས་སྦྱང་དུ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་དཀྱིལ་འཁོར་ལ་བརྟེན་པའི་བྱང་བཞུའི་ཆོ་ག་དང་། གྲྭ་ཚང་འདུས་ཚོགས་སུ་མང་འགྱེད་བསྔོ་རྟེན་བཅས་གྱ་ནོམ་པ་སྩལ་བར་སྨོན་ལམ་གྱི་ཞལ་འདོན། དེ་རྟིང་མཆོད་པ་སྟོང་མཆོད་དང་བསྙེན་བཀུར་གྱི་ཡོ་བྱད་ཕུན་སུམ་ཚོགས་པ་བླ་ནས་གནང་བ་བཞིན་འདུས་ཚོགས་ཀྱིས་རྡོར་སེམས་སྒྲུབ་མཆོད་དང་འབྲེལ་བར་ཡིག་བརྒྱ་བསོགས་པ་རྣམས་སྨིན་རྒྱས་སུ་མཛད། དེ་ནས་ཟླ་བ་བཅུ་པའི་ཚེས་གསུམ་གྱི་ཉིན་གོང་ཞབས་ནས་མགྲོན་གཉེར་ཟུར་ཁང་པ་མི་སྣར་མངགས་ཏེ། བླ་ན་མེད་པའི་བྱང་ཆུབ་ཡེ་ཤེས་ཀྱི། །ཞེས་སོགས་ཀྱི་བརྟན་བཞུགས་གསོལ་འདེབས་ཚིགས་བཅད་མ་དང་སྟན་དཀར་འབུལ་བ་འདུས་པར་སྟོན་མོ་ལག་འགྱེད་ཕུལ་དུ་བྱུང་བ་དང་བཅས་ཏེ་ཞབས་པད་རིང་འཚོའི་རྟེན་འབྲེལ་སྒྲིག་པའི་བཀའ་དྲིན་སྩལ། ཟླ་བ་བཅུ་གཅིག་པའི་ཚེས་བརྒྱད་ལའང་གོང་མའི་ལུང་བཞིན་སྡེ་སྲིད་བདེ་བར་གཤེགས་པའི་སྐུའི་སྒྲིབ་སྦྱོང་གི་བྱང་བཞུ་བསྐྱར་མ་མཛད། དེ་དག་གི་ཚེ་སྤྱིར་དུས་འཁྲུག་གིས་རྒྱལ་ཁྲིམས་སྔ་མའི་ལུང་བག་ལ་ཞ་ཞིང་ཕྱི་མའི་བཀའ་ཁྲིམས་ཀྱང་གཏན་ལ་མ་ཕེབས་པས་ཕྱོགས་ཀུན་ཏུ་རྐུན་ཇག་དང་། སོག་འགྲུལ་གྱི་ཨལ་ཕྱི། སློང་མོར་བརྟགས་པའི་བཙན་པོའི་འཕྲོག་བཅོམ་སོགས་ཀྱིས་ཡུལ་ཁམས་ཐམས་ཅད་འཁྲུགས་ཏེ་རྣལ་དུ་མི་ཕེབས་པར་མ་ཟད། ཁྱད་པར་རྒྱལ་བ་གོང་མ་ཐམས་ཅད་གཟིགས་པ་ལྔ་པ་ཆེན་པོས་པདྨའི་གཏེར་ལུང་རྣམས་དང་རྒྱ་ཅན་གྱི་ལུང་བསྟན་བཞིན་བོད་ཁམས་བསྟན་འགྲོའི་བདེ་ཐབས་སུ་དགོངས་ཏེ། ལྷ་ས་བསམ་ཡས་ཁྲ་འབྲུག་ལ་སོགས་པའི་གནས་ཆེན་གྱི་ས་གནད་རྣམས་སུ་ལས་བཞི་དང་རྗེས་སུ་འབྲེལ་བའི་སྐུ་རིམ་གང་ལ་ཤིས་པའི་དུས་དང་བསྟུན་ནས་འཛུགས་པའི་སྲོལ་བཟང་པོ་གཏོད་པར་མཛད་པ་ལས། དྲག་པོ་མངོན་སྤྱོད་དང་རྗེས་སུ་འབྲེལ་བའི་ལས་མནན་སྲེག་འཕང་བའི་བསྙེན་སྒྲུབ་ལག་ལེན་གྱི་སྲོལ་སྔ་འགྱུར་ལ་བཀའ་བབས་པ་ལྟར་རྙིང་མ་པ་རྣམས་ལ་བགྱིད་དུ་སྩལ་

― MLP003_Page_0226 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ལུང་གིས་བཅད་པ་བཞིན། ཁྲ་འབྲུག་ཏུ་ལོ་རེ་བཞིན་བསྟན་སྲིད་སྤྱི་རིམ་དང་། སྒོས་མཚོ་སྔོན་དཔོན་ཁག་གི་སྐུ་རིམ་སོགས་ཀྱི་མནན་པའི་ལས་སྦྱོར་མཛད་པ་ལས། རྒྱལ་ཟླའི་ནང་དུ་བཀའ་བཅུ་རིན་པོ་ཆེ་མི་སྣར་མངགས་ཏེ་མཆོད་ཡོན་ཐུགས་ནང་མ་གཤིན་པ་ཚུན་ཆད་མནན་པའི་སྲི་གནོན་ལེ་ཚན་གཉིས་ཡོད་པ་བཏོན་ཅིང་། དེ་ཕྱིན་ཆད་ནས་མནན་པའི་ལས་སྦྱོར་གྱི་ལག་ལེན་བྱེད་མི་ཆོག་པའི་འགག་སྡོམ་བཞེས་པས་ཉེས་སྐྱོན་སངས་ཁུལ་ལ་དེ་རྟིང་ཆོས་ཀྱི་རྒྱལ་པོ་ཉིད་བསྟན་པ་རིས་མེད་པར་སྐྱོང་བའི་དགོངས་པ་མཁའ་ལྟར་ཡངས་པར་གྱུར་ཀྱང་མཐའ་འདྲེས་རྒྱུད་བསྐུལ་བའི་སྐྱ་སེར་མང་པོའི་ཅལ་སྒྲོག་གི་ཐུགས་དོགས་ལ་བརྟེན། སླར་ཡང་བཀའ་བཅུ་བློ་བཟང་ཕུན་ཚོགས་མི་སྣར་མངགས་ཏེ་སྔགས་པ་དང་ཡུལ་གྱི་གཙོ་བོ་རྒྱུས་ཅན་ཐམས་ཅད་བསྡུས་པས་གནས་གཞིའི་ཁོར་ཡུག་གི་ས་ཁྱོན་མཆོད་རྟེན་གྱི་འོག་སོགས་མནན་དུ་རུང་བའི་ས་ཐམས་ཅད་ཐེར་མེད་དུ་རློག་ནས་མནན་པ་ཡོད་དོ་ཅོག་འདོན་དགོས་བྱུང་བས། གནས་སྐབས་སུ་སྔགས་པ་རྣམས་ལ་ཞེར་ནོངས་པ་མེད་ཀྱང་མཐའ་གང་དུ་འགྱུར་རྟོགས་དཀའ་བའི་འཇིགས་སྐྲག་གིས་མནར་ཞིང་རིག་སྔགས་ཀྱི་བྱད་འགྲོལ་ཆོ་ག་ལ་མ་ལྟོོས་པར་གྱ་ཚོམ་དུ་བཏོན་པས་ལྷ་སྲུང་ཁྲོས་འཁྲུགས་ཀྱིས་མི་འདོད་པ་སྐྱེད་པ་སོགས་དང་། མཐར་གྱི་ས་གནད་རྣམས་ཀྱི་མེ་བཙའ་ཉམས་པ་ལས་རྒྱལ་ཁམས་སྤྱིར་བདེ་སྐྱིད་ལ་སྒང་གཤོང་འབྱུང་བའི་བརྟག་དཔྱད་ཀྱིས་ཐུགས་ཀྱི་ཟུག་རྔུར་གྱུར་ཀྱང་། རྐྱེན་ངན་ལ་ཇི་མི་སྙམ་ཞིང་སྐྱོ་བ་མེད་པར་དང་དུ་བཞེས་པའི་བཟོད་པ་མངའ་བར་མ་ཟད། སླར་བྱམས་པ་དང་ཐུགས་རྗེ་ཆེན་པོའི་གྲོགས་སུ་འགྱུར་བས་ཡལ་འདབ་རླུང་གིས་བསྐྱོད་པའི་ལྗོན་ཤིང་ཆེན་པོའི་རྩ་བ་ལྟ་བུར་ཐུགས་གཞན་དུ་གཡོ་བ་མེད་པར་བཞུགས་སོ། །དེ་ནས་མེ་ཁྱིའི་སོས་གོང་མ་རྒྱལ་པོའི་གསེར་ཡིག་པ་འདམ་དུ་ལྷགས་ཏེ། རྒྱལ་ཞབས་རིན་པོ་ཆེར་བོད་ཁམས་སྐྱོང་བའི་ལུང་དང་འཇའ་ས་ཐམ་ཀ་བཅས་སྩལ་ནས། མི་རིང་པར་རྒྱ་སོག་གི་མི་སྣ་དང་ལྷན་ཅིག་ལྷ་ལྡན་དུ་ཕེབས་ཏེ། སྣྲོན་ཟླའི་འགོར་གོང་ཞབས་ཕོ་བྲང་རྩེ་ནས་རྫོང་རྒྱབ་ཏུ་གདན་དྲངས་པ་ལ་རྒྱ་ནག་ཏུ་ཕེབས་དགོས་པའི་ལུང་བསྒྲགས་པར།

― MLP003_Page_0227 ―

^{[མ་དཔེ་གཟིགས་ན་འདིར་གནོན།]}

[Full Size]

དགེ་འདུན་རྣམས་ཀྱིས་ཕེབས་ལམ་ནས་འབྲས་སྤུངས་སུ་སྤྱན་དྲངས་ཏེ་བསྲུངས་ཀྱང་། རྒྱལ་ཞབས་རིན་པོ་ཆེ་དཔུང་ཤུགས་ཀྱིས་བྱང་ལམ་བརྒྱུད་རིམ་གྱིས་སྤྱན་དྲངས་པ་ལས་མཚོ་ཁར་སྐུ་གཤེགས། མགོ་ཟླའི་ཚེས་གཅིག་ལ་ཕོ་བྲང་ཆེན་པོར་ཐེགས་ཏེ། སྐུ་རིམ་ཁང་དུ་ཕྱགས་ཕེབས་པ་ལ་བཟན་ཤིང་ལག་གཡོག་སོགས་བླ་ནས་སྔར་རྒྱུན་བཟང་པོ་ལྟར་གནང་། ཚེས་ལྔའི་ཉིན། རྒྱལ་ཞབས་རིན་པོ་ཆེ་ཕོ་བྲང་ཆེན་པོའི་ཁྲིར་ཐོག་མར་ཞབས་བསྐྱོད་པ་ལ། ཞལ་གསོའི་འབུལ་བ་ཕུལ་དུ་བྱུང་བ་བསྟབས་པའི་ཐོག་མའི་སྐུ་རྟེན་དང་ཁ་བཏགས་ངོས་ཀྱིས་འབུལ་བར་མཛད་པ་རྒྱལ་ཞབས་ཀྱིས་ཕྱག་གིས་བཞེས་རྗེས། དེ་ཕྱིན་ཕྱག་མཛོད་ཀྱིས་ཕུལ་ཆོག་པའི་ལུང་བསྒྱུར་བ་ལྟར། རྗེ་ཉིད་སྟན་ལ་བཞུགས་ནས་འབུལ་ཚན་བྱིང་གཅུང་རྗེ་དབོན་གྱིས་འབུལ་བར་མཛད། ཚེས་བརྒྱད་ཀྱི་ཉིན་ལྷ་སར་དཔལ་གསོལ་ཐོག་ཐོན་ཕྱག་ཞུར་ཕེབས་པར་ཤིན་ཏུ་མཉེས་པའི་བསླབ་སྟོན་དང་། སྐུ་ཞབས་རྒྱ་ཕེབས་ཀྱི་ཆིབས་ཆེན་རྒྱ་རི་ངང་པས་གཙོས་གནང་སྦྱིན་ཡང་དགྱེས་པར་སྩལ། མཁན་པོ་རྣམ་གཉིས་སོགས་མཆོག་དམན་མང་པོའི་རེ་བ་བསྐངས་ཏེ། ཕྱིར་ལམ་རྡོ་རྗེ་བྲག་ཏུ་བསྟི་སྟང་ཆེན་པོས་སྤྱན་དྲངས་པ་ལྟར་ཐེགས་ནས་རིམ་པར་གདན་སར་ཕེབས། སླར་ཡང་མེ་ཕག་ནག་ཟླའི་ནང་དུ་བསྟན་འཛིན་བརྩོན་མཛད་རྒྱལ་པོའི་ལུང་གིས་བོད་ཁམས་ཐམས་ཅད་ལ་དབང་བསྒྱུར་བའི་ཁྲིམས་ཡིག་དང་ལྷན་ཅིག་རྒྱལ་བ་རྒྱ་ཕེབས་ཉིད་གོང་མ་ལྔ་པ་ཆེན་པོའི་ཡང་སྲིད་མིན་པའི་ལུང་ཡོངས་སུ་བསྒྲགས་ནས། མཆོག་སྤྲུལ་སྐུ་ཕྲེང་དྲུག་པ་ངག་དབང་ཡེ་ཤེས་རྒྱ་མཚོ་ངོས་འཛིན་མཛད་དེ། གོང་མའི་ཆོས་ཀྱི་ཁྲི་ཆེན་པོ་ལ་མངའ་དབང་བསྒྱུར་བའི་ཞལ་དཀར་ལེགས་ཚོགས་འབུལ་བ་དང་བསྟུན་མཇལ་ཕྱག་ཞུ་བར་ཕེབས་བཞེད་ཀྱིས་ལུམ་པའི་གྲུ་བརྒྱུད་ཆིབས་བསྐྱོད་པ་ལས་ནག་ཟླའི་ཚེས་གཉིས་ལ་ཕོ་བྲང་ཆེན་པོའི་འདབས་ཞོལ་སྐུ་རིམ་ཁང་དུ་ཕྱགས་ཕེབས། ཚེས་བདུན་ལ་རྩེ་ཤོད་ལྷན་རྒྱས་སུ་མཇལ་ཕྱག་དང་། པཎ་ཆེན་མཆོག་གི་སྤྲུལ་པའི་སྐུའི་མཇལ་ཁའང་ཞུ་བར་མཛད། ཚེས་དགུ་ལ་གོང་དཀར་རྫོང་འོག་གི་ཁྲི་འབུལ་དང་བཞུགས་གྲལ་ལ་ཕེབས། དེ་དག་གི་ཚེ་རྒྱུན་གྱི་ལག་གཡོགམེ་ཤིང་གི་རྒྱུགས། མཇལ་ཕྱག་དང་

― MLP003_Page_0228 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས་གྲལ་གྱི་དུས་བཞུགས་གདན་གྱི་བཀུར་སྟི་སོགས་རྣམས་སྔར་རྒྱུན་བཟང་པོ་ལྟར་བཀའ་དྲིན་དུ་སྩལ། བཅོ་བརྒྱད་ལ་གོང་ཞབས་ཀྱི་ཐུགས་རྫོགས་བཞེས་པའི་ལེགས་འབུལ་ཞུ་བར་ལྷ་སར་ཐེགས། ཉེར་གསུམ་ལ་རྫོང་རྒྱབ་ཏུ་མཆོག་དམན་མཐའ་དག་འདུས་པའི་བཞུགས་གྲལ་གྱི་ཐོག་རྒྱལ་ཞབས་རིན་པོ་ཆེ་ནས་གྲུབ་མཐའ་རིས་མེད་དུ་སྐྱོང་བའི་ལུང་བཟང་པོ་བསྒྲགས་པ་ལ། ལུགས་གཉིས་དང་རྗེས་སུ་འབྲེལ་བའི་བཀའ་དྲིན་ཆེ་ཚུལ་གྱི་སྙན་འབུལ་ལུང་རིགས་ཀྱི་ལམ་ནས་དྲངས་ཏེ་གསོལ་བས་རྒྱལ་ཞབས་རིན་པོ་ཆེའང་ཐུགས་ཤིན་ཏུ་མཉེས་པའི་ཚུལ་དང་། གྲལ་དུ་འཁོད་པའི་དཔྱོད་ལྡན་ཐམས་ཅད་ཀྱང་ཡི་རངས་བར་གྱུར། ཉེར་བཞིའི་ཉིན་སྐུ་ཞབས་རྩེ་ཤོད་དང་། མཆོག་སྤྲུལ་རིན་པོ་ཆེས་གནང་སྦྱིན་རྒྱ་ཆེར་སྩལ་ཅིང་། དེ་དུས་ཞོལ་དུ་སྟན་འཇག་རིང་སྐུ་ཞབས་གྲྭ་གཙང་། ཕྱོགས་འདུས་ཀྱི་བླ་མ་སློབ་དཔོན། དཔོན་ཆེན། དཔོན་སྐྱ། དྲུང་ནང་། དེ་སྐོར་གྱི་ཡུལ་པའི་དད་ཅན་མང་པོར་ཆོས་སྦྱིན་སོགས་ཀྱིས་སོ་སོའི་རེ་བ་སྐོང་བར་མཛད་ནས། ཡང་དགོན། གསང་སྔགས་མཁར། ལ་མོ། དགའ་ལྡན་གྱི་གནས་གཟིགས་རྣམས་སུ་རིམ་པར་ཞབས་བསྐྱོད་དེ་ཕྱིར་ལམ་ཡང་དལ་འགྲོས་ཀྱིས་འགྲོ་དོན་མཛད་བཞིན་པར་སྒྲགས་ལ་བརྒྱུད། ས་གའི་ཚེས་དྲུག་ལ་དགོན་པར་ཕེབས། ཉེར་དྲུག་ལ་ས་སྐྱ་བདག་ཆེན་ངག་དབང་ཀུན་དགའ་བཀྲ་ཤིས་དཔོན་སློབ་བརྒྱ་སྐོར་ཕེབས་པ་ལ་ཆིབས་བསུ་སེར་སྦྲེངས་སོགས་བསྟི་སྟང་ཆེན་པོས་སྤྱན་དྲངས་ཏེ་བདག་ཆེན་རིན་པོ་ཆེར་ཡང་སྙིང་ཀུན་འདུས་ཀྱི་ཚེ་དབང་བརྒྱ་རྩ་སོགས་འབུལ་བར་མཛད་ཅིང་། ཚུར་ཡང་འཆི་མེད་དཔལ་སྟེར་གྱི་ཚེ་དབང་དང་། འཇམ་དབྱངས་ཨ་ར་པ་ཙ་ནའི་རྗེས་གནང་གསན། བསྙེན་བཀུར་འབུལ་ནོད་རྒྱས་པས་མཆོད་དེ་ཕྱིར་ཐེགས། དབྱུག་ཟླའི་ནང་དུ་གོང་ཞབས་རྒྱལ་ནས་རིམ་གྱིས་ཁྲ་འབྲུག་ཏུ་ཕེབས་པ་མཇལ་དུ་ཐེགས་པར། ཚེས་བཅུ་གཅིག་གི་ཉིན་བཞུགས་གདན་སོགས་བཀུར་བཟོས་ཆེན་པོས་རྗེས་སུ་བཟུང་སྟེ་མཇལ་ཁ་ལྷོད་ཆགས་པ་བྱུང་། དེར་ཕ་བོང་ཁ་ཞལ་སྔ་ནས་སོགས་མཆོག་དམན་མང་པོ་མཇལ་དུ་བྱུང་བར་ཡང་མཉེས་གཤིན་པའི་གསུང་གླེང་ཆོས་འབྲེལ་གྱི་བྱིན་རླབས་སོགས་གང་ལ་

― MLP003_Page_0229 ―

^{[མ་དཔེ་གཟིགས་ན་འདིར་གནོན།]}

[Full Size]

གང་འཚམས་ཀྱིས་འགྲོ་དོན་མཛད་ནས་གདན་སར་ཕྱིར་ཕེབས་ཏེ། ལ་སྟོད་རྒྱལ་པོའི་སྐུ་ཚ་རང་རིག་སྤྲུལ་པའི་སྐུ་སོགས་མངའ་རིས་ཧོར་མོན་ཁམས་ཀོང་གཙང་སོགས་ནས་རིམ་པར་འདུས་པའི་དད་ཅན་མང་པོར་ཆོས་འཁོར་བར་མེད་དུ་བསྐོར། ས་བྱི་ཟླ་བ་དགུ་པའི་མཇུག་ནས་བརྩམས་ཏེ་གླང་ལོ་ཕལ་ཆེར་ཐུགས་དམ་གྱི་བཅད་རྒྱ་ལ་བཞུགས། ས་གླང་ཟླ་བ་བཅུ་གཅིག་པའི་འགོར་རྒྱ་ནག་གོང་མའི་མི་སྣ་བླ་མ་ཀུན་དགའ་ཆོས་བཟང་དང་། ལི་དར་སྦྱར་གོ་ཆེ། རྒྱལ་ཞབས་ཀྱིས་དུ་རལ་དབོན་པོ་བཅས་མངགས་ཏེ། ཡས་ཕྱིན་སྔ་མའི་དུས་སྐུ་རིམ་སྒྲུབ་པའི་མནན་སྐོར་ལ་དགོངས་པ་དྭངས་པའི་ལུང་བཟང་པོ་བསྒྱུར་དུ་སྩལ་ཞིང་། རྒྱལ་ཟླའི་མཇུག་ཏུ་ལོ་མཇུག་དུས་རིམ་ལ་ཞབས་བསྐྱོད་པ་ཙམ་ལས་ལྕགས་སྟག་གི་ལོ་ནང་དུའང་ཕལ་ཆེར་ཕྱི་མཚམས་ཀྱི་བཅད་རྒྱའི་མུ་ནས་སྐལ་ལྡན་འགར་ཆོས་སྦྱིན་ཅི་རིགས་པར་མཛད། མགོ་ཟླའི་ཚེས་གསུམ་ལ་ལྷ་ལྡན་ཕྱོགས་སུ་ཆིབས་བཏེག་སྟེ། ལུམ་པའི་གྲུ་བརྒྱུད། ཚེས་བདུན་ལ་སྐུ་ཞབས་གྲྭ་གཙང་གིས་དབུས་པའི་ཆིབས་བསུ་བཅས་ཕོ་བྲང་ཆེན་པོའི་ཉེ་འདབས་འདོད་འཇོ་དཔལ་འཁྱིལ་དུ་ཕྱག་ཕེབས་པར། གོང་ནས་བཟན་ཤིང་ལག་གཡོག་སོགས་སྔར་རྒྱུན་བཞིན་དང་། སྐུ་ཞབས་གྲྭ་གཙང་ནས་གཞི་བ་གདན་འདིང་གི་དགོས་བྱད་གང་ལ་ཅི་དགོས་ཐམས་ཅད་ལྷུག་པར་འབུལ་བའི་ཞབས་ཏོག་བསྒྲུབས། ཚེས་བཅུ་གཉིས་ཀྱི་ཉིན་རྩེའི་གཟིམས་ཆུང་ཉི་འོད་འཁྱིལ་པར་གྲྭ་ཚང་ཆེན་མོས་ཚེ་ཆོག་དང་འབྲེལ་བར་རྩེ་ཤོད་ལྷན་རྒྱས་སུ་འབུལ་བ་ཕྱག་འགྱེད་ཕུལ་དུ་ཕྱིན་པའི་སྒོ་ནས་ཞབས་བརྟན་འབུལ་བར་མཛད་ཅིང་། གསོལ་སྟོན་གྲོལ་ནས་ཡས་ཕྱིན་གྱི་སྒེར་མཇལ་རྣམས་ཞུ་བ་གནང་བར། ཐོག་མར་མགྲོན་ཁང་དུ་བཞུགས་གདན་དང་མགྲོན་གཉེར་གྱིས་ཞབས་བསུ། གསོལ་ཐབ་ནས་ཇ་རྒྱུགསྤྱི་སྒོས་ཀྱི་མཇལ་ཁའི་དུས་བཞུགས་གདན་དང་། བཀའ་འདྲི་སོགས་ཤིན་ཏུ་མཉེས་པའི་བཀུར་བཟོས་ཆེན་པོ་སྩལ། དེ་ཞོར་གསེར་གདུང་ཆེན་མོ་སོགས་མཇལ་བར་མཛད་ནས་གྲྭ་ཁང་དུ་སྤྱན་དྲངས་ཏེ་གོས་ཐང་སོགས་རྟེན་གསར་བཞེངས་རྣམས་ལ་ཕྱག་ནས་འཐོར་ཞིང་། སྤྱི་སྒེར་ཚང་མས་ཤིན་ཏུ་དྭངས་བའི་དད་གུས་ཆེན་པོས་མཆོད། ཚེས་

― MLP003_Page_0230 ―

^{[མ་དཔེ་གཟིགས་ན་འདིར་གནོན།]}

[Full Size]

བཅོ་ལྔའི་ཉིན་རྒྱལ་ཞབས་མཆོག་ནས་གནང་སྦྱིན་གྱ་ནོམ་སྩལ་ཅིང་། གོང་གི་ཡུམ་དང་། རྒྱལ་སྲས་སྐུ་མཆེད་རྣམས་སོ་སོར་མཇལ་ཕྱག་གནང་བར་ཚུར་ཡང་མཇལ་ལེན་རྒྱས་པར་བསྟབས། དེར་སྟན་འཇགས་རིང་གྲྭ་ཚང་གི་གྲྭ་པ་སོ་སོ་དང་སྡེ་ཚན། ཡུལ་པའི་ཚེས་བཅུ་བ་དང་བསྙེན་གནས་པ་སོགས་དད་ཅན་མང་པོར་དབང་བྱིན་རླབས་ཀྱི་འདོད་ཆོས་ཅི་དགར་སྩལ་ནས་ཉི་ཤུའི་ཉིན་ཆིབས་བཏེག་པར། ར་མ་སྒང་དུ་སྐུ་ཞབས་གྲྭ་གཙང་ཆེན་མོའི་སྡེ་པ་ངོས་ཕེབས་ཀྱིས་གུར་གཡབ་བཞུགས་སྟན་གྱི་བཀོད་པས་མཛེས་པར་ཐབ་སྐྱེལ་ཞུས་ནས། དེ་ནུབ་གསང་མདར་བཞུགས་ཏེ། སང་ཉིན་གཅགས་མལ་ཐོག་གསང་ཕུ་ནས་སྒྲོལ་མ་གཙོ་རྒྱལ་མ་སྤྱན་དྲངས་ཏེ། སྙན་དར་མཆོད་འབུལ་དང་གསོལ་འདེབས་རྒྱས་པར་མཛད་ནས། རིམ་པར་ཆོས་སྦྱིན་སོགས་འགྲོ་དོན་སྐྱོང་བཞིན་པས་འཕྲང་གོང་། འཕྲང་བཙན་རྣམས་སུ་ཞག་བཞུགས་ཀྱིས། རྡོ་རྗེ་བྲག་ཏུ་ཆིབས་བསུ་དང་ཐབ་བསུ་སོགས་ཀྱིས་ཞབས་བསུས་ཏེ་སྤྱན་དྲངས་ཤིང་། རིག་འཛིན་སྤྲུལ་པའི་སྐུ་དང་ཕན་ཚུན་ཐུགས་ཡིད་གཅིག་འདྲེས་ཀྱི་གསུང་མོལ་ཁོ་ནས་དུས་འདས། ཉེར་ལྔའི་ཉིན་རྡོ་རྗེ་བྲག་ཏུ་འབུལ་བ་ཕྱག་འགྱེད་སྙན་དར་སྣེ་གཞག་བཅས་རྒྱས་པས་ཞབས་པད་བརྟན་པའི་གསོལ་འདེབས་དང་སྲིད་པའི་གཏེར་ཁྱིམ་གྱི་ལུང་འབུལ་བར་མཛད་ཅིང་། ཚུར་ཡང་རྫོགས་ཆེན་ཀ་དག་གི་ཤར་ཁྲིད་གསན་ནས་འགར་ཚར་ཞག་བཞུགས་ཀྱིས་གདན་སར་ཕེབས། གསང་སྔགས་ཕོ་བྲང་གི་བྲེ་འཇོག་གི་བར་རྣམས་སུ་ཕུག་རོན་ཁྱུ་ཚོགས་ཀྱིས་གནོད་པ་ཆེ་བར་ལྕགས་ཡོས་ས་གའི་ཚེས་དགུའི་ཉིན་གླིང་སྐོར་ཞབས་འཆག་ཏུ་ཕེབས་སྐབས་གནས་སྲུང་ལ་བཀའ་བསྒོ་གཉེར་གཏད་དང་བཅས་ཕྱག་ནས་འཐོར་བས་སྔར་ཚེར་མ་སོགས་ཀྱིས་བསྲུངས་ཀྱང་མི་ཐུབ་པ་ལ། དེ་ནས་བརྩམས་ཏེ་བསྲུང་མི་དགོས་པ་འདི་བྱུང་བས་ཐམས་ཅད་ངོ་མཚར་བར་གྱུར། དེ་ནས་དབྱར་ངོ་འདིར་འབྲས་ལྗོངས་རྒྱལ་པོ་ལ་སོགས་པའི་ཕྱོགས་འདུས་ཀྱི་སྐལ་ལྡན་མང་པོ་ལ་ཆོས་སྦྱིན་བར་མེད་དུ་སྩལ་ཅིང་། ཆུ་འབྲུག་ས་གའི་མཇུག་ཏུ་འཕྱོངས་རྒྱས་རྒྱ་སྨན་དུ་ལྷ་སྡེ་མི་སྡེ་རྣམས་ཀྱིས་སྤྱན་དྲངས་པ་ལྟར་ཆིབས་བསྐྱོད་དེ། ན་ར་ཀླུ་ཁང་དུ་ཁྲོམ་དབང་དང་། དོན་
གཉེར་ཅན་འགའ་ལ་ཚེ་དབང་དང་། སྤྱན་རས་གཟིགས་དང་སྒྲོལ་མའི་རྗེས་གནང་། སྤྱན་ཡས་སུ་སྤྱན་དྲངས་ཏེ་འདུས་ཚོགས་ལ་ཞང་བློན་གྱི་རྗེས་གནང་གིས་མཚོན་ཆོས་འབྲེལ་བསྔོ་སྨོན་བྱིན་བརླབས་སོགས་གང་ལ་གང་འཚམས་ཀྱིས་འགྲོ་དོན་དཔག་ཏུ་མེད་པ་མཛད་ནས་ཕྱིར་ཕེབས། དགུན་དེ་རྣམ་སྲས་གླིང་གི་རྒྱལ་བུ་དང་། ལེགས་གླིང་དུ་སྡེ་པ་རྡོ་རྗེ་བཀྲ་ཤིས་གཉིས་གཤེགས་པའི་སྐྱབས་མགོན་དུ་ཕེབས། འདུམ་པོར་ཡུམ་བསྙུན་པའི་རྐྱེན་སེལ་དུ་སྤྱན་དྲངས་པ་ལྟར་ཐེགས་རྟིང་། ཆུ་སྦྲུལ་ཤར་ནས་ད་ལྟའི་བར་ཐག་ཉེ་རིང་ལ་མ་ལྟོས་པའི་ཡུལ་གཞན་དུ་གདན་འདྲེན་མི་ངོ་ཇི་ལྟར་ཆེ་ཡང་ཕེབས་བསྐྱོད་མ་མཛད་པར་གདན་ས་རང་དུ་གདུལ་བྱ་སྐལ་ལྡན་མཐའ་ཡས་པ་ལ་ཆོས་སྦྱིན་ཅི་དགར་སྩོལ་བཞིན་དུ་བཞུགས་ཏེ། དེ་ལྟར་ན་སྐུའི་མཛད་སྤྱོད་ངོ་མཚར་རྨད་དུ་བྱུང་བའི་ཏིང་ངེ་འཛིན་གྱི་བྱེ་བྲག་དང་རྣམ་པར་ཐར་པའི་ཆོ་འཕྲུལ་མཐའ་ཡས་པའི་སྒོ་ནས་གདུལ་བྱ་རྣམས་ཀྱི་ཉེ་བར་འཚོ་བའི་བསམ་པ་ཡོངས་སུ་གང་བར་མཛད་པའི་འཕྲིན་ལས་རྒྱ་ཆེ་རྒྱུན་མི་ཆད་པའི་ཚུལ་ལས་མདོ་ཙམ་བརྗོད་པའོ། །

གསང་དབང་གི་རྟོགས་པའི་ཉམས་མྱོང་ལ་ཐུགས་རྒྱུད་དུ་རིམ་གྱིས་གོམས་པས་གཙོ་བོར་གསུང་གི་འགྲོ་དོན་མཛད་ཚུལ།

― MLP003_Page_0231 ―

^{[མ་དཔེ་གཟིགས་ན་འདིར་གནོན།]}

[Full Size]

༈ གཉིས་པ་གསང་དབང་གི་རྟོགས་པའི་ཉམས་མྱོང་ལ་ཐུགས་རྒྱུད་དུ་རིམ་གྱིས་གོམས་པས་གཙོ་བོར་གསུང་གི་འགྲོ་དོན་མཛད་ཚུལ་ནི། དགུང་ལོ་སོ་གཉིས་པ་དམར་སེར་ཞེས་པ་མེ་མོ་སྦྲུལ་གྱི་ལོ་དབོའི་ཟླ་བ་ལ་ཧེ་རུ་ཀའི་ཞིང་ཁམས་མུན་པ་མི་ཟད་པའི་དུར་ཁྲོད་དུ་ཁྲག་འཐུང་དཔའ་བོའི་སྙེམས་པས་མཁའ་སྤྱོད་དགའ་མར་རྗེས་ཆགས་ཀྱི་ཙཎྜ་ལཱི་འབར་བས་ཟླ་བ་བདུད་རྩིར་དྭངས་བ་དགའ་བཞིའི་ཡེ་ཤེས་ཀྱི་རོལ་མོར་ཤར་ཞིང་། དེའི་ཚེ་ཡེ་ཤེས་ཀྱི་ཌཱཀྐི་མས་ཡེ་ཤེས་སྒྱུ་མའི་རང་བཞིན་ཉི་ཟླ་བྱང་ཆུབ་ཀྱི་སེམས་དམ་རྫས་བདུད་རྩིའི་རྣམ་པར་བསྟབས་ཏེ་བྱིན་གྱིས་བརླབས་པས། དེ་ནས་བཟུང་སྟེ་གསང་དབང་གི་ཉམས་མྱོང་རང་རིག་གསལ་སྟོང་དུ་ཤར་བ་རིམ་བཞིན་གོམས་ཏེ། གཟུང་འཛིན་དབྱིངས་སུ་གྲོལ་བས་གསུང་གི་འགྲོ་དོན་ལ་གཙོ་བོར་སྤྱོད་པའི་དུས་ཡིན་པའི་ཕྱིར། གསུང་གི་ཕྲིན་ལས་འཆད་རྩོམ་ཇི་ལྟར་མཛད་ཚུལ་བཤད་པ་ལ་གཉིས་ལས། དང་པོ་བསྟན་པ་གསལ་བའི་ཆེད་

― MLP003_Page_0232 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་དཔེ་མཁྱུད་ཅུང་ཟད་ཀྱང་མི་མངའ་བས་གདུལ་བྱ་སོ་སོའི་བློ་དང་འཚམས་པར་ཟབ་རྒྱས་ཀྱི་ཆོས་འཁོར་བར་མེད་དུ་བསྐོར་བར་མཛད་པའི་དེ་དག་གི་སྔ་རོལ་དུའང་ཆོས་སྦྱིན་མང་དུ་སྩོལ་བ་བཅས། ད་ལྟའི་ཆུ་སྦྲུལ་འདི་ཡན་ཆད་ལ། ཆོས་འཁོར་བསྐོར་བ་རྣམས་རགས་རིམ་ཙམ་ཞིག་ཕྱོགས་གཅིག་ཏུ་བསྡོམས་ནས་བཀོད་པ་ལ། སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་ཉིས་སྟོང་ཆིག་བརྒྱ་གོ་ལྔ། མདོ་སྡེ་པའི་ལུགས་ཀྱི་བསྙེན་གནས་ཀྱི་སྡོམ་པ་ཉི་ཤུ་རྩ་དགུ། དོན་ཞགས་ལས་གསུང་པའི་ཐེག་ཆེན་གྱི་གསོ་སྦྱོང་བཅུ་གཅིགདབུ་མ་ལུགས་ཀྱི་སེམས་བསྐྱེད་དྲུག་ཅུ་རེ་གཅིགསེམས་ཙམ་ལུགས་ཀྱི་སྨོན་སེམས་དང་འཇུག་སྡོམ་བདུན། མ་ཎིའི་བཟླས་ལུང་གཅིག་སྟོང་སུམ་བརྒྱ་བདུན་ཅུ་དོན་གཉིས། ཡིག་བརྒྱའི་བཟླས་ལུང་དགུ་བཅུ་གོ་གསུམ། ཆོས་སྤྱོད་ཐར་ལམ་རབ་གསལ་གྱི་ལུང་བཅུ་གསུམ། མཚན་བརྗོད་ཀྱི་སྒོས་ལུང་བཅུ་བཞི། བཟང་སྤྱོད། བྱམས་སྨོན། ཀུན་བཟང་སྨོན་ལམ་རྣམས་ཀྱི་སྒོས་ལུང་བཅོ་བརྒྱད་རེ། ལྟུང་བཤགས་ཀྱི་ལུང་བཅུ་བདུན། བརྒྱད་སྟོང་པ་དང་། ཐོགས་མེད་ཀྱི་བྱང་སའི་ལུང་ཚར་རེ། ཆོས་སྤྱོད་ཉེར་མཁོ་སྣ་ཚོགས་ཀྱི་ལུང་བཅུ་བཞིའོ། །དེ་ཡང་སྔ་འགྱུར་བཀའ་མའི་སྐོར་ལ། རྙིང་མ་རྒྱུད་འབུམ་གྱི་ལུང་ཡོངས་རྫོགས་ཚར་གཉིས། རྒྱུད་སྡེའི་སྐོར་ལས། སྒྱུ་འཕྲུལ་ཞི་བའི་ཕན་ནུས་དང་། ཁྲོ་བོའི་ཕན་ནུས་ཟབ་མོའི་དབང་རྣམས་ཚར་ལྔ་དང་། ཞི་བའི་ཟབ་དབང་ཀཿཐོག་ལུགས་ཚར་གཅིགརྩ་རྒྱུད་གསང་བ་སྙིང་པོའི་ལུང་བཅུ་དྲུགབརྒྱད་ཅུ་པའི་ལུང་ལྔ། རྒྱུད་ཀྱི་བཤད་པ་དང་། རྒྱ་འགྲེལ་སྤར་ཁབ། བོད་འགྲེལ་རོང་ཊིཀ་དང་གཡུང་ཊིཀ་བཅས་གསུམ་རེ། སངས་རྒྱས་གསང་བའི་སྒྱུ་འཕྲུལ་ལམ་རིམ་ཆེ་བ། ཞི་བ་རྡོ་རྗེ་ལས་རིམ། མེ་ལོང་ལྟ་བུའི་སྒྲུབ་ཐབས་དྲྭ་བ་ཆེ་ཆུང་། ཁྲོ་བོ་དམ་པ་རྒྱན། ཚོགས་ཀྱི་འཁོར་ལོ་ཐུགས་ཀྱི་སྒྲུབ་པ། དམ་ཚིག་གསལ་བཀྲ་རྣམས་ཀྱི་ལུང་བཞི་རེ། སྒྱུ་འཕྲུལ་ཁྱད་པར་གྱི་རྫོགས་རིམ་གསང་ཐིག་རྩ་འགྲེལ་གྱི་ལུང་དྲུགཞི་བ་ལྷ་རྒྱུད་གཉན་དཔལ་དབྱངས་ནས་བརྒྱུད་པའི་སྒྱུ་འཕྲུལ་ཁྲིད་ཡིག་གི་ལུང་། སྒྱུ་འཕྲུལ་ཚེ་དབང་ཟུར་ལུགས་རྣམས་ཚར་གསུམ་རེ། རྒྱུད་དང་མན་ངག་གི་ལུགས་གཅིག་ཏུ་བསྒྲིལ་

― MLP003_Page_0233 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་འདུས་པ་མདོའི་དབང་དང་། སྤྱི་མདོ་དགོངས་འདུས། མདོའི་ཡིག་སྣ་གབ་པའི་དབང་ལེ། དབང་དོན་བསྡུས་པ། མན་ངག་གསང་བ། དབང་ཆོག་སྦྲང་རྩིའི་ཆུ་རྒྱུན། དབང་ཆོག་རིན་ཆེན་ཕྲེང་བ་རྣམས་ཀྱི་ལུང་ཚར་རེ། ན་རག་དོང་སྤྲུགས་པདྨ་བརྒྱ་ལྡན་གྱི་དབང་ཚར་དགུ་དང་། ཁྲོམ་དཀྲུགས་ཀྱི་དབང་དང་། ཆོག་བསྒྲིགས་ཀྱི་ལུང་བཅས་ཚར་བཞི་རེ། དྲི་མེད་བཤགས་རྒྱུད་ཀྱི་ལུང་བཅོ་ལྔ། ཕྱག་གི་བཀོལ་བྱང་། རུ་ཆེན་བཞིའི་བཤགས་པ་རྣམས་ཀྱི་སྒོས་ལུང་བདུན་རེ། རོག་པ་ནས་བརྒྱུད་པའི་ཚེ་དབང་ལུང་ལུགས་ཚར་བཞི། རྫོགས་ཆེན་སེམས་སྡེ་ཨ་དོན་བཅོ་བརྒྱད་ཀྱི་དབང་ཚར་ལྔ། ཨ་རོ་སྙན་བརྒྱུད་ཀྱི་དབང་ལན་གཉིས་དང་ལུང་གཅིགཀློང་སྡེ་སྙན་བརྒྱུད་རྡོ་རྗེ་ཟམ་པའི་དབང་ལུང་ལྔ། བཻ་རོའི་འདྲ་འབག་གི་ལུང་གཉིས། སྒྲུབ་སྡེའི་སྐོར་ལ་དྲག་དམར་འོ་བྲན་ལུགས་ཀྱི་དབང་ཚར་གསུམ། བཀའ་བརྒྱད་རྫོང་འཕྲང་གི་དབང་ལུང་ཚར་གཅིགཡང་དག་སོ་ལུགས་ཀྱི་དབང་ཚར་ལྔ། མར་མེ་གཅིག་པའི་ཡིག་ཆ་ཟུར་ལུགས་སྐོར་གྱི་ལུང་རྣམས་གསུམ་རེ། ཧཱུྃ་ཀཱ་རའི་ཡང་དག་རྩ་བ། འབུམ་སྨུག་ལུང་། རུ་ལུ་གསེར་ཕྲེང་རྣམས་ཀྱི་ལུང་ཚར་རེ། སངས་རྒྱས་མཉམ་སྦྱོར་གྱི་རིགས་བསྡུས་ཀྱི་དབང་དང་། སྒྲུབ་དཀྱིལ་གྱི་ལུང་ཚར་གཅིགཕུར་པ་རོང་ལུགས་དང་ཇོ་ལུགས་ཉང་ནག་ནས་བརྒྱུད་པ་ཆུ་བོ་གཉིས་འདྲེས་ཀྱི་དབང་ཚར་གསུམ་དང་། བཀའ་སྲོལ་གཉིས་པོའི་སྟེང་སྣ་ནམ་ལུགས་དྲག་སྔགས་མཆོག་ཏུ་གསང་བ་དང་བཅས་པའི་ལུང་རྣམས་གཉིས་རེ། ཕུར་པ་སྐྱི་ལུགས་གདམས་ངག་དྲུག་པར་གྲགས་པ་དང་ཇོ་རོང་བརྒྱུད་པ་ཉིས་ལྡན་དཔྱལ་ལུགས་སུ་གྲགས་པ་གཉིས་ཀྱི་དབང་ལུང་། བསམ་གཏན་གླིང་པའི་ཕུར་པའི་གཏོར་དབང་རྣམས་ཚར་རེ། ཕུར་པ་འཁོན་ལུགས་ཀྱི་སྟོད་ལས་ཀྱི་དབང་ཚར་བཞི་དང་། སྨད་ལས་དྲག་པོ་སྒྲོལ་དབང་ཚར་གཉིས། བླ་མ་དམ་པའི་སྒྲུབ་དཀྱིལ་ཡིག་ཆ་བཞི་དང་ས་ལོའི་སྒྲུབ་ཐབས་བསྡུས་པ་རྣམས་ཀྱི་ལུང་ཚར་རེ། ཕུར་པའི་རྣམ་བཤད་འབུམ་ནག་ཏུ་གྲགས་པའི་ལུང་གསུམ། འཇམ་དཔལ་ཕྱག་རྒྱ་ཟིལ་གནོན་བཀའ་གཏེར་གཉིས་ལྡན་ལྕགས་འདྲའི་དབང་ཚར་བཅུ་གསུམ་དང་པུསྟིའི་ལུང་བརྒྱད། འཇམ་དཔལ་གཤིན་རྗེ་

― MLP003_Page_0234 ―

^{[མ་དཔེ་གཟིགས་ན་འདིར་གནོན།]}

[Full Size]

གཤེད་གདོང་དྲུག་གི་དབང་གཉིས་དང་ལུང་གཅིགགནུབས་ལུགས་གཤེད་དམར་གྱི་དབང་ལུང་ཚར་དྲུགགཤིན་རྗེ་གཤེད་ནག་པོ་ཁ་ཐུན་གྱི་དབང་ལུང་ཚར་གཉིས། གཤོར་གསང་ཀི་ཀང་ནག་པོའི་དབང་གཅིག་དང་ལུང་བཅུ་དྲུགསྐུ་མཆོག་གྱད་དམར་གྱི་དབང་ལུང་ཚར་གཅིགཡེ་ཤེས་ཀྱི་མགོན་པོ་ལེགས་ལྡན་ཚོགས་ཀྱི་བདག་པོའི་དབང་ཆེ་བ་ལྔ་དང་འབྲིང་པོ་བཅུ་བདུན། ཆུང་བ་གཏོར་དབང་བཞི། མགོན་པོད་ཀྱི་ལུང་ཚར་གསུམ། རྣམ་སྲས་སྤྲིན་གསེབ་མའམ་འཇང་ཡུལ་མར་གྲགས་པའི་རྗེས་གནང་དང་ལུང་གསུམ་རེ། གནུབས་ལུགས་ནང་སྒྲུབ་མདུང་དམར་ཅན་རྟ་སྔོན་མ། གསང་སྒྲུབ་དྲག་པོ་རྟ་སྔོན་མ་གཉིས་ཀྱི་རྗེས་གནང་གཉིས་རེ་དང་ལུང་ཚར་རེ། ཡང་གསང་ཕྱག་མཚན་བཞི་པའི་རྗེས་གནང་བཅུ་གསུམ་དང་ལུང་བཞི། རྒྱལ་པོ་བྱེས་ཆས་པའི་སྐོར་གྱི་ལུང་གསུམ། ཨ་ཙ་ར་དམར་པོའི་སེར་སྲུང་དང་ཟོ་ལུང་གཅེས་འཕྲེང་གདམས་པ་ཉེར་གཅིག་པའི་ལུང་བཞི་རེ་རྣམས་སོ། །གཏེར་མ་རྗེས་འབྲང་དང་བཅས་པའི་སྐོར་ལས། རང་གཏེར་བླ་མ་ཞི་བ་ཐུགས་ཐིག་གི་རྩ་དབང་ཉིས་བརྒྱ་དང་བཅོ་ལྔ། པོད་ལུང་གཅིག་བརྒྱ་དང་བཅུ་གཅིགཡང་སྙིང་ཀུན་འདུས་ཀྱི་ཚེ་དབང་དྲུག་བརྒྱ་དང་དགུ་བཅུའམ་བརྒྱ་རྩ་གནང་བ་རྣམས་བརྩིས་ཏེ་བསྡོམས་ན་ཉི་ཁྲི་སུམ་སྟོང་དྲུག་བརྒྱ་དགུ་བཅུ། དཔལ་མགོན་ཞལ་བཞི་པའི་རྗེས་གནང་ཐུན་མོང་བ་སོ་གསུམ། གསང་མགོན་ཐུན་མོང་མ་ཡིན་པའི་དབང་ལུང་ཚར་གཅིགའཇམ་དཔལ་གཤིན་རྗེ་གཤེད་དྲེགས་པ་འཇོམས་བྱེད་ཀྱི་དབང་ཆིག་བརྒྱ་དང་གྱ་གཅིགལས་གཤིན་གྱི་རྗེས་གནང་བཅུ་བདུན། དྲེགས་འཇོམས་པོད་ལུང་བདུན་ཅུ་དོན་གཅིགརྡོར་སེམས་ཀྱི་དབང་ཆིག་བརྒྱ་སོ་ལྔ་དང་སྒོས་ལུང་ཉེར་བདུན། གུ་རུ་དྲག་པོའི་དབང་ཆེ་ཆུང་བསྡོམས་པ་སུམ་བརྒྱ་དང་གོ་དྲུགསྒོས་ཀྱི་ལུང་བཅུ་དགུ། ཨ་ཏི་ཟབ་དོན་སྙིང་པོའི་རྩལ་དབང་ཉི་ཤུ། ཨ་ཏིའི་སྒོས་ལུང་བཅུ་གཉིས་དང་ཤོག་སེར་ཕྱིས་ཕབས་པ་རྣམས་ཀྱི་ལུང་ལྔ། སྔགས་སྲུང་མའི་རྗེས་གནང་སུམ་ཅུ་སོ་བརྒྱད་དང་། སྒོས་ལུང་བཞི། གནམ་ལྕགས་བྲག་གཏེར་བྱོན་གྱི་སྤྱི་པོད་ལུང་ལྔ་བཅུ་ང་དགུ། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་རྩ་དབང་

― MLP003_Page_0235 ―

^{[མ་དཔེ་གཟིགས་ན་འདིར་གནོན།]}

[Full Size]

གཏོར་དབང་དང་བཅས་པ་བརྒྱད་ཅུ་གྱ་ལྔ། གཏོར་དབང་རྐྱང་པ་བཅུ་གསུམ། མཆོག་དབང་བཞི་བཅུ་ཞེ་གཉིས། གར་དབང་ཚེ་དཔག་མེད་ཀྱི་ཚེ་དབང་བཞི་བཅུ། ལྷ་ཆེན་གྱི་སྲོག་གཏད་ཞེ་དགུ། ཆོས་སྐོར་ཡོངས་རྫོགས་ཀྱི་པོད་ལུང་སུམ་ཅུ་སོ་བརྒྱད་རྣམས་སོ། །རྗེ་ཉིད་རང་གི་བཀའ་འབུམ་བཀའ་རྩོམ་གང་རིགས་ཟིན་ནས་རིམ་པར་སྩལ་བའི་ལུང་ཚར་བཅུ་གཅིགདེའི་ནང་ནས་ཟུར་བཏོན་གྱི་གཏེར་གསར་ཁ་སྐོང་སྐོར་བཅུ། བདེ་འདུས་ལས་བྱང་། ཁྲོ་རོལ་ལག་ལེན་བཅས་པའི་ལུང་བཅུ་དྲུགགཏེར་བྱུང་ལོ་རྒྱུས་བཅུ་བདུན། གསང་བའི་རྣམ་ཐར་བཅུ་བཞི། དག་སྣང་ཆུ་ཟླའི་རོལ་རྩེད་ཚར་གཉིས། བདེ་གཤེགས་ཀུན་འདུས་ཀྱི་ཆོ་གའི་ལྷན་ཐབས་བདུན། ཐུགས་ཐིག་གི་བསྙེན་ཡིག་བཅུ་གསུམ། སྒྲུབ་ཐབས་འདོད་འཇོའི་ལུང་གསུམ། རྒྱུ་འབྲས་ཆོས་བཤད་ཚར་བརྒྱད། གྲྭ་གཙང་གི་འདོན་ཆོས་སྐོར་ཚང་མ་ལྔ། བསང་མཆོད་བདུད་རྩིའི་སྤྲིན་ཕུང་བདུན། བརྒྱ་བཞིའི་ཆོ་ག་བཞི། ཀླུའི་གདོན་འགྲོལ་གྱི་ལག་ལེན་ཚར་ལྔ་སོགས་ཀྱིས་མཚོན་པ་ཙམ་སྟེ་ཟིན་བྲིས་སུ་འཁོད་པ་དེ་ཙམ་མོ། །དཔལ་ལྷའི་རྗེས་གནང་བརྒྱད། རྒྱལ་པོ་བཀའ་འབུམ་གཏེར་ཁ་གསུམ་ཕྱོགས་གཅིག་ཏུ་བསྒྲིགས་པའི་ལུང་ཚར་གསུམ་རྣམས་སོ། །གཏེར་ཆེན་མངའ་བདག་ཉང་གི་གཏེར་ཆོས་ལས། བླ་མ་ཡོངས་རྫོགས་ཀྱི་དབང་ཚར་བཞི། བླ་མ་དམར་ཁྲིད་ཀྱི་ལུང་ཚར་གཅིགགུར་དྲག་གི་དབང་རྒྱས་པ་བཞི། རྡོ་རྗེ་སྤྱི་བླུགས་དང་འབྲིང་པོ་མེའི་སྤུ་གྲིའི་དབང་བཅུ་གསུམ་རེ། ཆུང་བ་ལུ་གུ་རྒྱུད་ཀྱི་དབང་དང་རྒྱས་འབྲིང་བསྡུས་པའི་སྐོར་ཡོངས་རྫོགས་ཀྱི་པོད་ལུང་བཞི། རྣམ་ཐར་ཟངས་གླིང་མའི་ལུང་ཚར་གསུམ། བཀའ་བརྒྱད་བདེ་འདུས་ཀྱི་ཞི་བ་རིགས་བརྒྱའི་དབང་ཚར་བཞི། ཁྲོ་བོའི་དབང་ཆེན་ཚར་བདུན། རྣལ་འབྱོར་རྒྱུན་དབང་ཉི་ཤུ་རྩ་དགུ། སྡེ་དཔོན་གྱི་མཐུ་དབང་ཚར་གཉིས། རྒྱུད་ལུང་མན་ངག་སྐོར་ཡོངས་རྫོགས་ཀྱི་པོད་ལུང་ཚར་གསུམ། ཐུགས་རྗེ་ཆེན་པོ་འགྲོ་འདུལ་

― MLP003_Page_0236 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་དབང་ལུང་ཚར་གཉིས། ཚེ་སྒྲུབ་མཚོ་སྐྱེས་རྡོ་རྗེའི་དབང་གསུམ། རྫོང་ཆེན་ཚེ་དབང་དང་ཆོས་སྐོར་གྱི་ལུང་། རྟ་མགྲིན་བདེ་འདུས་ཀྱི་དབང་གཉིས་དང་ལུང་གཅིགརྟ་མགྲིན་ཡང་ཕྱུང་ནག་པོའི་དབང་བདུན། མཁའ་འགྲོ་ཆེན་པོ་ཞལ་གཉིས་མའི་བྱིན་རླབས་ཚར་བརྒྱད། དོན་གྲུབ་མ་དང་དབུ་བཅད་མའི་བྱིན་རླབས་ལྔ་རེ། ཆོས་སྐོར་ཚང་མའི་ལུང་གསུམ། ཕག་མོ་ཁྲོས་མ་ནག་མོའི་རྩ་སྒྲུབ་ཀྱི་བྱིན་རླབས་དང་ལྷ་ལྔའི་རྗེས་གནང་ཉི་ཤུ་རྩ་གཅིག་རེ་དང་པོད་ལུང་ཚར་དྲུགལོཀྟྲི་སྐོར་གྱི་ལུང་བཅུ་གཅིགགཉེན་པོ་ལྷ་གསུམ་གྱི་དབང་ལུང་དང་འཆར་ཁ་སྲིན་སྦར་མའི་ལུང་རྣམས་ཚར་གཉིས་རེ། མགོན་པོ་ཕྱག་བཞི་པའི་རྩ་དབང་ཉེར་གཅིགམགོན་དཀར་གྱི་ཚེ་དབང་བཅུ་གསུམ། མགོན་པོད་ཀྱི་ལུང་བརྒྱད། བདུད་དཔུང་གཡུལ་བཟློག་གི་མདོས་ཆོག་གི་ལུང་དང་། རྡོ་རྗེ་གཤོག་རྒོད་མའི་རྗེས་གནང་གཉིས་རེ། དཀོར་སྲུང་ཞིང་སྐྱོང་མ་མོའི་རྗེས་གནང་ཉི་ཤུ་རྩ་དགུ་དང་པོད་ལུང་ལྔ། བརྟན་མ་བཅུ་གཉིས་ཀྱི་སྒྲུབ་ཐབས་ཕུད་སྐོང་བཅས་པའི་ལུང་གསུམ། དཀོར་སྲུང་རྒྱལ་པོ་པེ་ཧ་རའི་སྲོག་གཏད་བཅུ་གསུམ་དང་། ཤེལ་གཡུ་ལྕགས་ཀྱི་རྒྱུད་ཕྲེང་བ་གསུམ་གྱི་ལུང་ཚར་རེ་དང་། ཕྲིན་ལས་དོན་བཅུ་མའི་ལུང་ཉི་ཤུ། སྲིད་པའི་གཏེར་ཁྱིམ་གྱི་ལུང་གསུམ། ཐུགས་རྗེ་ཆེན་པོའི་མིག་འབྱེད་ཀྱི་གདམས་པའི་ལུང་བཞི། གཟའ་བཅོས་རིན་ཆེན་ཕྲེང་བའི་ལུང་ཚར་གཅིགདྲག་པོ་ལྷ་བཞིའི་སེར་སྲུང་དང་། རྣམ་ཐར་དྲི་མེད་ཀྱི་ལུང་གཉིས་རེ་རྣམས་སོ། །གུ་རུ་ཆོས་དབང་གི་གཏེར་ཆོས་ལས། བཀའ་རྩིག་ཐེམ་བྱང་སྐོར་གྱི་ལུང་གཅིགརྫོགས་ཆེན་སངས་རྒྱས་མཉམ་སྦྱོར་གྱི་དབང་ལུང་གཉིས། བླ་མ་གསང་འདུས་ཀྱི་དབང་བཞི་གཏོར་དབང་དང་བཅས་པ་བཅུ་དགུ། ཐོད་ཕྲེང་རྩལ་སྒོས་ཀྱི་བྱིན་རླབས་ཟླུམ་པོ་བཞི་དབང་སུམ་ཅུ་སོ་གསུམ། གཏོར་དབང་གནད་ཀྱི་ཤོག་གཅིག་མ་ཉེར་གསུམ། གསང་འདུས་པོད་ལུང་བརྒྱད། ལས་བྱང་ལེ་བརྒྱད་མ་ཆོག་བསྒྲིགས་གསར་རྙིང་གི་ལུང་བསྡོམས་པ་བཞི་བཅུ་ཞེ་བཞི། གུར་དྲག་ཐུགས་སྒྲུབ་དྲེགས་པ་ཚར་གཅོད་ཀྱི་དབང་ལུང་གཅིགབཀའ་བརྒྱད་གསང་རྫོགས་ཀྱི་རྩ་དབང་བརྒྱད། མགྱོགས་དབང་བུམ་རྒྱ་ཅན་བཅུ་དགུ། བཀའ་བརྒྱད་ཀྱི་པོད་

― MLP003_Page_0237 ―

^{[མ་དཔེ་གཟིགས་ན་འདིར་གནོན།]}

[Full Size]

ལུང་བཞི། སྔགས་སྡེབས་སྙིང་གཟེར་ནག་པོའི་སྒོས་ལུང་དྲུག་ཕྱག་ཁྲིད་གསུམ། ཐུགས་རྗེ་ཆེན་པོ་ཡང་སྙིང་འདུས་པ་དང་འཁོར་བ་དོང་སྤྲུགས་གཉིས་ཀྱི་དབང་ལུང་གཉིས་རེ། ཇོ་མོའི་ཉམས་ལེན་སྐོར་དགུའི་ལུང་ཚར་གཅིགཡང་དག་སྙིང་པོའི་དབང་ལུང་ཚར་བཞི། ཕུར་པ་སྤུ་གྲིའི་དབང་བཅུ་བཞི་དང་ལུང་གསུམ། གུ་རུ་དར་ནག་བེར་ཆེན་གྱི་དབང་ལུང་གཅིགརྫོང་ཆེན་ཚེ་དབང་དགུ། ཚེ་སྒྲུབ་གོང་ཁུག་མའི་ལུང་དང་། རྟ་མགྲིན་དབུ་དགུ་པའི་སྐོར་གྱི་ལུང་ཚར་རེ། རྟ་ནག་ལྕགས་རལ་ཅན་གྱི་དབང་ལུང་གཉིས། ཕྱག་རྡོར་གཏུམ་པོའི་དབང་གསུམ། སྒྲོལ་དཀར་གྱི་ལུང་ཚར་གཅིགདྲང་སྲོང་ལོཀྟྲིའི་རིག་གཏད་ཉིས་བརྒྱ་བདུན་ཅུ་དང་ལུང་བཅུ་དགུ། འཆར་ཁ་གནམ་སྐས་མའི་ཟོར་དབང་བཅོ་ལྔ་དང་ལུང་བཅུ་དྲུགདཔལ་མགོན་མ་ནིང་གི་སྲོག་དབང་བཀའ་གཏད་དང་བཅས་པ་བཅུ་བཞི་དང་ལུང་གསུམ། བསྟན་མའི་སྲོག་གཏད་དགུ། ཁ་འབར་མ་དཀར་ནག་ཁྲ་གསུམ་གྱི་ལུང་གསུམ། སེམས་བསྐྱེད་བསྟན་པའི་སྙིང་པོ། མཁའ་རིའི་ཞུས་ལན། རྣམ་ཐར་སྐོར་གྱི་ལུང་རྣམས་ཚར་རེ། ཆོས་དྲུག་སྲས་མཁར་མའི་ལུང་ཚར་གཉིས་རྣམས་སོ། །པཎ་ཆེན་བི་མ་ལ་མི་ཏྲའི་མན་ངག་རྫོགས་པ་ཆེན་པོ་སྙིང་ཐིག་གི་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་རྣམས་ཀྱི་དབང་ཚར་བཅུ་དགུ། རྫོགས་པ་རང་བྱུང་གི་དབང་བཀའ་རྒྱ་མ་ལན་གཅིགརྒྱུད་བཅུ་བདུན་གྱི་ལུང་ལྔ། ཁྲོས་མ་གསང་རྒྱུད་ཀྱི་ལུང་གཉིས། ཟབ་པ་པོད་བཞིའི་ལུང་དང་། མན་ངག་བརྒྱ་བཅུ་དགུ་ལས་རྒྱུན་གང་བཞུགས་ཀྱི་ལུང་བཅུ། སྔགས་སྲུང་མའི་སྲོག་དབང་སྙན་བརྒྱུད་མ་ཚར་གཉིས། ཡང་རྫོང་སྙིང་ཐིག་གི་དབང་ལུང་དང་མེ་ལོང་རྡོ་རྗེའི་མགུར་འབུམ་གྱི་ལུང་ཚར་རེ། ཀུན་མཁྱེན་དྲི་མེད་འོད་ཟེར་གྱི་གསུང་རབ་སྐོར་ལས་བླ་མ་ཡང་ཏིག་གི་ལུང་ཚར་བཅུ་བདུན། བཏགས་གྲོལ་གྱི་དབང་བཅུ་གསུམ་དང་ལུང་དགུ། མཁའ་འགྲོ་ཡང་ཐིག་གི་ལུང་བཅོ་ལྔ། རང་གྲོལ་སྐོར་གསུམ་གྱི་ལུང་དང་། སྙན་བརྒྱུད་གསང་སྐོར་གྱི་དབང་ཚར་གསུམ་རེ། གསང་སྐོར་གྱི་ལུང་གཉིས། དབྱངས་ཅན་མའི་རྗེས་གནང་བཅུ་དྲུག གསུང་འབུམ་

― MLP003_Page_0238 ―

^{[མ་དཔེ་གཟིགས་ན་འདིར་གནོན།]}

[Full Size]

ཐོར་བུའི་ལུང་བདུན། དེའི་ནང་ནས་ཆོས་སྤྱོད་ལམ་རིམ་གྱི་སྒོས་ལུང་གཉིས། སྡེ་བདུན་གྱི་རྗེས་གནང་ཚར་ལྔ། སྡེ་ལྔའི་རྗེས་གནང་བརྒྱད། གཟའི་དུག་འབྱིན་གྱི་གཏོར་དབང་བཅོ་བརྒྱད། བསང་མཆོད་བརྒྱགས་བརྔན་ལག་ལེན་དང་བཅས་པའི་ལུང་ལྔ། མཛོད་བདུན་ཡོངས་རྫོགས་ཀྱི་ལུང་ཚར་བཞི། དེའི་སྟེང་ཐེག་མཆོག་མཛོད་ཀྱི་ལུང་གསུམ། ངལ་གསོ་སྐོར་གསུམ་རྩ་འགྲེལ་ཁྲིད་ཡིག་བསྡུས་དོན་དཀར་ཆག་བཅས་པའི་ལུང་དྲུག་དང་། སེམས་ཉིད་ངལ་གསོ་རྩ་བའི་སྒོས་ལུང་ལྔ། སྙིང་འགྲེལ་ཕྱོགས་བཅུ་མུན་སེལ་གྱི་ལུང་བཞི། མདོ་ཁམས་པས་བརྩམས་པའི་ཀུན་མཁྱེན་ཆེན་པོའི་རྣམ་ཐར་གྱི་ལུང་གསུམ་རྣམས་སོ། །པདྨ་ལས་འབྲེལ་རྩལ་གྱི་གཏེར་ཆོས་ལས། བླ་མ་སྤྱི་འདུས་འཁོར་ལོའི་དབང་ལུང་ལན་གཅིགམཁའ་འགྲོ་སྙིང་ཐིག་གི་དབང་བཀའ་སུམ་ཅུ་སོ་དགུ་དང་ལུང་ཉི་ཤུ། སྲོག་སྒྲུབ་མའི་གཏོར་དབང་དྲུགཕྱག་རྡོར་དྲེགས་འདུལ་གྱི་དབང་བཅུ་བཞི་དང་ལུང་བཅུ་གཅིགགཉེན་པོ་ལྷ་གསུམ་གྱི་དབང་གསུམ་དང་ལུང་གཅིགལྷ་ཆེན་རླུང་ཞགས་ཀྱི་རྗེས་གནང་སྲོག་གཏད་གཏོར་དབང་བཅས་པ་གཉིས། དེའི་ལུང་དང་གཏོ་ནག་ཁ་ལ་རྒྱས་འདེབས་ཀྱི་ལུང་ཚར་རེ། བཀའ་སྲུང་གཟའ་བདུད་ཀྱི་རྩ་དབང་གཏོར་དབང་བཀའ་གཏད་དང་བཅས་པ་སུམ་ཅུ་སོ་གཉིས། གཟའ་པོད་ཀྱི་ལུང་ཚར་གཉིས། གནོད་སྦྱིན་དམར་ནག་གི་སྲོག་གཏད་བཞི་དང་ལུང་གཉིས། ཤོ་བན་རྒྱལ་སྲས་ལེགས་པའི་གཏེར་མ་ཞིང་སྐྱོང་སེང་གདོང་གི་སྲོག་གཏད་བཅུ་དང་ལུང་གཉིས་སོ། །རྒྱ་ཞང་ཁྲོམ་རྡོ་རྗེ་འོད་འབར་གྱི་གཏེར་ཆོས་ལས་འཇམ་དཔལ་ཚེ་བདག་ལྕགས་སྡིག་གི་མུ་ཏིག་ཕྲེང་བའི་དབང་བཞི་དང་། པུསྟིའི་ལུང་བཅུ་དྲུགབྱད་འགྲོལ་གསེར་ལྡེ་ལག་ལེན་ཁྲིགས་མ་དང་བཅས་པའི་ལུང་ལྔ། ཡང་བཟློག་མེའི་སྤུ་གྲི་རྣོན་པོ་ནང་གཅོད་ཀྱི་གཏོར་དབང་བཅོ་བརྒྱད་དང་ཆོས་སྐོར་མ་བུའི་ལུང་བཞི། ཕྲིན་ལས་སྐོར་གྱི་སྒོས་ལུང་ཟུར་བཏོན་དྲུགའཇམ་དཔལ་ཁྲོ་ཆུ་དུག་སྡོང་གི་དབང་ཚར་བཞི། དེའི་ལུང་དང་། འཆར་ཁ་སྒྲོམ་བུ་མའི་དབང་ལུང་ཚར་རེ། ཀི་ཀང་དམར་པོ་རླུང་བྲུབས་ཀྱི་ལུང་ཞེ་བདུན། གཤིན་རྗེ་གཤེད་

― MLP003_Page_0239 ―

^{[མ་དཔེ་གཟིགས་ན་འདིར་གནོན།]}

[Full Size]

ཧྲཱིཿདམར་དང་མཐུ་སྟོབས་དྲེགས་བདག་གི་ལུང་ཚར་རེ། གཏེར་ཁ་གཉིས་ལྡན་གྱི་མགོན་པོ་སྟག་བཞོན་གྱི་སྲོག་དབང་བཀའ་གཏད་བཅུ་དང་ལུང་གཉིས། བཙན་རྒོད་ཡམ་ཤུད་ཀྱི་སྒྲུབ་ཐབས་ལུང་ཚར་གཅིག་རྣམས་སོ། །གྲྭ་སྟོན་དབང་ཕྱུག་འབར་གྱི་གཏེར་ཆོས་ལས་ཕྱག་རྡོར་ཁང་བརྩེགས་ཀྱི་རྗེས་གནང་དང་སྒྲུབ་ཐབས་ཀྱི་ལུང་བདུན་རེ། ཞང་བློན་ཕྱི་ནང་གསང་གསུམ་གྱི་རྗེས་གནང་ཉི་ཤུ་རྩ་གསུམ་དང་པོད་ལུང་བཅུ། ཛམྦྷ་ལ་དམར་པོའི་རྗེས་གནང་བཅུ་བཞི་དང་ལུང་བཞི། ཆུ་སྦྱིན་གྱི་སྒོས་ལུང་དགུའོ། །རཀྴག་གཏེར་སྟོན་ཆོས་འབར་གྱི་གཏེར་ཆོས་ལས་སྲིད་པ་མ་མོ་སྒང་ཤར་གྱི་དབང་ལུང་ཡོངས་རྫོགས་ཚར་གཅིག་དང་། མདོས་བུ་ཆུང་ཉེར་གཅིག་གི་ལུང་གཉིས། མདོས་བཅུ་སྟོད་སྨད་ཀྱི་འཕྱོངས་བཅས་པའི་ལུང་དྲུག་གོ། རྡོར་འབུམ་ཆོས་གྲགས་ཀྱི་གཏེར་ཆོས་བདུད་རྩི་བུམ་པའི་དབང་དྲུག་དང་ལུང་གསུམ། གཟའ་བཅོས་སྦས་པ་མིག་འབྱེད་ཀྱི་ལུང་གཉིས། གཏེར་སྟོན་བརྐྱང་སུམ་འདྲེ་གསུམ་གྱི་གཏེར་མ་གྲུབ་ཐོབ་འདར་ཕྱར་ལ་བཀའ་བབས་པ་རྟ་མགྲིན་ཡང་གསང་ཁྲོས་པའི་རྩ་དབང་བདུན། རྫོང་ཆུང་ཚེ་དབང་བཞི། གིང་ལྔ་གཟའ་གདོང་གི་སྲོག་གཏད་ལྔ། རྟ་པོད་ཀྱི་ལུང་གསུམ་མོ། །སར་བན་ཕྱོགས་མེད་ཀྱི་གཏེར་མ་འཇམ་དཔལ་རྫོགས་ཆེན་གྱི་དབང་ལུང་ཡོངས་རྫོགས་བདུན། རི་ཁྲོད་པ་བཟང་པོ་གྲགས་པའི་གཏེར་མ་ཨོ་རྒྱན་ཆེན་པོའི་གསོལ་འདེབས་ལེའུ་བདུན་མའི་ལུང་བརྒྱ་དྲུག་ཅུ་རེ་ལྔ་དང་། བསམ་པ་ལྷུན་གྲུབ་མའི་སྒོས་ལུང་དོན་ལྔ། འཁོར་ལོ་འབར་བའི་ལུང་ལྔ་བཅུ་རྣམས་སོ། །རིག་འཛིན་རྒོད་ལྡེམ་གྱི་གཏེར་ཆོས་ལས། བླ་མ་ཞི་བ་གདུང་སྒྲུབ་ཀྱི་དབང་ལུང་གསུམ་ཐུགས་སྒྲུབ་དྲག་པོ་རྩལ་གྱི་དབང་ཆེ་བ་བདུན། འབྲིང་པོ་བཅུ་བཞི། བསྡུས་པ་བྱིན་རླབས་ཐུགས་དབང་བཅུ་དྲུག ཆོས་སྡེ་ཉེར་ལྔ་རྗེས་འབྲང་བཅས་པའི་ལུང་ལྔ། སེར་སྲུང་དང་ཕྱྭ་

― MLP003_Page_0240 ―

^{[མ་དཔེ་གཟིགས་ན་འདིར་གནོན།]}

[Full Size]

འཕྲིན་གྱི་སྒོས་ལུང་ཉེར་བཞི། ལྕགས་སྡོང་མའི་ཚེ་དབང་བཅོ་བརྒྱད། ཐུགས་རྗེ་ཆེན་པོ་འགྲོ་བ་ཀུན་སྒྲོལ་གྱི་དབང་བཅུ་གསུམ་དང་ལུང་དགུ། རྫོགས་ཆེན་ཟང་ཐལ་གྱི་དབང་ལུང་ཡོངས་རྫོགས་གསུམ། ཚེ་དཔག་མེད་ལོངས་སྐུ་མའི་དབང་ལུང་ཚར་བརྒྱད། འཆི་མེད་འོད་སྣང་གི་ཚེ་དབང་དང་ལུང་བཞི་རེ། བྱང་སེམས་སྤྱོད་དབང་གསུམ་དང་ལུང་གཅིགབཀའ་བརྒྱད་རང་བྱུང་རང་ཤར་གྱི་དབང་ལུང་ཡོངས་རྫོགས་གསུམ། ཕུར་པ་ཆེ་མཆོག་གི་དབང་ཚར་བཞི། སྤུ་གྲི་ལྷ་ནག་གི་དབང་དྲུགཕུར་པའི་སྐོར་གྱི་ལུང་གསུམ། མངའ་དབང་རིན་ཆེན་འབར་བའི་དབང་ལུང་གསུམ། རྟ་མགྲིན་དྲེགས་པ་དབང་སྡུད་ཀྱི་དབང་ལུང་དང་། བསྟན་སྲུང་ཡོངས་རྫོགས་ཀྱི་དབང་ལུང་གཉིས་རེ། སྔགས་སྲུང་མའི་རྗེས་གནང་གཉིས། དམ་བསྲེ་དང་བཅས་པ་ཚར་བཞི། རྡོར་ལེགས་ཀྱི་སྲོག་དབང་ཉི་ཤུ། ཐང་ལྷའི་རྗེས་གནང་དམ་བསྲེ་དང་བཅས་པ་བརྒྱད། དུག་དབང་རྡོ་རྗེ་ཕ་ལམ་ཉེར་ལྔ། བརྡ་དོན་ལམ་ཟབ་ཚར་གསུམ་རྣམས་སོ། །གཏེར་སྟོན་བྱང་ཆུབ་གླིང་པ་དཔལ་རྒྱལ་མཚན་གྱི་གཏེར་མ་ཀུན་བཟང་ཐུགས་གཏེར་གྱི་དབང་ལུང་ཚང་མ་གཅིགཕྱག་རྡོར་གསང་སྒྲུབ་ཀྱི་དབང་ལྔ་བཅུ་ང་བདུན་དང་ལུང་བཅུ་བཞིའོ། །རྡོ་རྗེ་གླིང་པའི་གཏེར་ཆོས་ཡོངས་རྫོགས་ཀྱི་དབང་ལུང་ཚར་གཅིག་དང་། དེའི་སྟེང་བླ་མ་གསང་འདུས་ཀྱི་དབང་ལུང་གཉིས། གུར་དྲག་རྒྱས་པ་ཟིལ་གནོན་བཀའ་བརྒྱད་མ་དང་། འབྲིང་པོ་རྡོ་རྗེ་སྤྱི་བླུགས་གཏོར་དབང་དང་བཅས་པ་གསུམ་རེ་དང་ལུང་ཚར་རེ། ཆུང་བ་ཕུར་ཞབས་མ་ཚར་གཉིས། རྫོགས་ཆེན་ལྟ་བ་ཀློང་ཡངས་ཀྱི་དབང་ལུང་ཡོངས་རྫོགས་གཉིས། རྫོགས་རིམ་ཐེག་པ་ཡང་བཅུད། རྫོགས་ཆེན་གསེར་ཐུར། ཐུགས་རྗེ་ཆེན་པོ་རྒྱལ་བ་རྒྱ་མཚོ། ངན་སོང་ཀུན་སྐྱོབ། ཡང་ཟབ་གནད་སྐོར། རྡོ་རྗེ་ཕུར་པའི་སྐོར། སྒྲོལ་མ་རྣམས་ཀྱི་དབང་ལུང་ཚར་རེ། བཀའ་བརྒྱད་གསང་རྫོགས་ཀྱི་དབང་གསུམ། རྣམ་སྲས་ཀྱི་དབང་གཅིག་དང་ལུང་གཉིས་རྣམས་སོ། །

― MLP003_Page_0241 ―

^{[མ་དཔེ་གཟིགས་ན་འདིར་གནོན།]}

[Full Size]

ཆོས་རྒྱལ་རིན་ཆེན་གླིང་པའི་གཏེར་མ་ནཱ་ག་རཀྴའི་བྱིན་རླབས་གཏོར་དབང་དང་བཅས་པ་ཆིག་བརྒྱ་ཞེ་གཉིས་དང་། ལུང་ཚར་བཅོ་བརྒྱད། གཏེར་སྟོན་རཏྣ་གླིང་པའི་གཏེར་ཆོས་ཡོངས་རྫོགས་ཀྱི་དབང་ལུང་ཚར་གཅིག་དང་། དེའི་སྟེང་ཐུགས་སྒྲུབ་ཡང་སྙིང་འདུས་པའི་དབང་ལུང་ཚར་གསུམ་དང་། མ་ནིང་གི་སྲོག་དབང་ཆེ་ཆུང་བཞི་དང་། སྒོས་ལུང་ཚར་གཅིགབླ་མ་དྲག་པོའི་དབང་ཆེ་འབྲིང་གཉིས་དགུ་རེ་དང་། ཆུང་བ་བཅུ་བདུན། རྫོགས་ཆེན་ཀློང་གསལ་གྱི་རྩ་དབང་དབང་ཕྲན་དང་བཅས་པ་དང་ལུང་ཚར་གཉིས། ཐུགས་རྗེ་ཆེན་པོ་གསང་འདུས་ཀྱི་དབང་ལུང་དང་། ཚེ་སྒྲུབ་གསང་འདུས་ཀྱི་དབང་ཚར་རེ། དམ་ཅན་གྱི་རྗེས་གནང་ཉི་ཤུ་དང་ལུང་བཞི། རྟ་མགྲིན་གསང་འདུས་ཀྱི་རྩ་དབང་དགུ་དང་ལུང་བདུན། འཇིགས་བྱེད་ཀྱི་དབང་། མཚོ་རྒྱལ་གྱི་བྱིན་རླབས། ཨེ་ཀ་ཛཱ་ཊིའི་སྲོག་གཏད་རྣམས་ཚར་རེ། རྟ་ནག་གི་དབང་དྲུགཕུར་པ་ཡང་གསང་བླ་མེད་ཀྱི་དབང་གསུམ་དང་ལུང་ཚར་གཅིག་གོ། རིག་འཛིན་པདྨ་གླིང་པའི་གཏེར་ཆོས་ཡོངས་རྫོགས་ཀྱི་དབང་ལུང་ཚར་གསུམ། དེའི་སྟེང་ནོར་བུ་རྒྱ་མཚོའི་དབང་ལུང་ཚར་གཉིས། རྩ་དབང་ཚར་ལྔ། ཟླུམ་པོ་བཞི་དབང་བཅུ་དགུ། ལས་བྱང་ལེའུ་གསུམ་མ་མ་བུའི་ལུང་སུམ་ཅུ་སོ་དགུ། དྲག་པོ་ཡང་གསང་བླ་མེད་ཀྱི་དབང་བཅུ་དང་། འགྲོ་འདུལ་གྱི་དབང་བཅུ་གསུམ། རྫོགས་ཆེན་ཀུན་བཟང་དགོངས་འདུས་ཀྱི་དབང་ལུང་ཚང་མ་གཅིག་དང་། རྩ་དབང་ལྔ། ཀློང་གསལ་དང་རྒྱུད་བུ་ཆུང་གི་དབང་ཆ་ཚང་ཚར་རེ། ཐུགས་རྗེ་ཆེན་པོ་མུན་སེལ་སྒྲོན་མེའི་དབང་གསུམ་དང་ལུང་གཉིས། རྟ་ནག་གི་དབང་གསུམ། ཚེ་ཁྲིད་རྡོར་ཕྲེང་གི་རྩ་དབང་བདུན་དང་། གསུང་རྒྱུན་མར་གྲགས་པ་བཞི་བཅུ། པོད་ལུང་ལྔ། ཚེ་སྒྲུབ་ནོར་བུ་ལམ་ཁྱེར་གྱི་དབང་གཉིས། ཕྱག་རྡོར་དྲེགས་འདུལ་གྱི་དབང་དགུ། གཏུམ་པོའི་དབང་དྲུགབཀའ་བརྒྱད་ཐུགས་ཀྱི་མེ་ལོང་གི་དབང་ལྔ། དྲེགས་པའི་སྲོག་དབང་དང་སྨན་དབང་ཚར་རེ། ཕུར་པ་སྤུ་གྲིའི་དབང་བདུན། མ་ནིང་གི་རྩ་དབང་ཚར་གཅིག་དང་། སྡེ་དགུའི་སྲོག་དབང་བཅུ་གཉིས། རྣམ་སྲས་མདུང་དམར་ཅན་གྱི་རྗེས་གནང་བདུན། མདོ་སྔགས་བསྟན་འཛིན་གྱི་རྣམ་ཐར་ཞལ་གསུང་མ། གསུང་

― MLP003_Page_0242 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྲུལ་ཚུལ་ཁྲིམས་རྡོ་རྗེའི་བཀའ་འབུམ། རིག་འཛིན་ཕྲིན་ལས་ལྷུན་གྲུབ་ཀྱི་དག་སྣང་དང་བཀའ་འབུམ་གྱི་ལུང་རྣམས་གསུམ་རེའོ། །གྲུབ་ཐོབ་ཀརྨ་གླིང་པའི་གཏེར་ཆོས་ཞི་ཁྲོ་དགོངས་པ་རང་གྲོལ་གྱི་དབང་ལུང་ཆ་ཚང་ལན་གཉིས་སོ། །སྤྲུལ་པའི་སྐྱེས་མཆོག་སངས་རྒྱས་གླིང་པའི་གཏེར་ཆོས་ལས། བླ་མ་དགོངས་འདུས་ཀྱི་དབང་ཆེ་ཕྲ་ཚང་མ་ཚར་དྲུག་དང་། ཆོས་སྐོར་ཡོངས་རྫོགས་ཀྱི་ལུང་བཞི། དེའི་སྟེང་བློ་འཕེལ་ཤེས་རབ་རལ་གྲིའི་རྗེས་གནང་གསུམ། གཅོད་ཀྱི་དབང་། ལམ་འབྲས་དང་བཟླས་བརྗོད་ནུས་པ་སྟོབས་འབྱིན་གྱི་ལུང་རྣམས་ཚར་རེ་དང་། མེ་རྟ་བཙན་གསུམ་གྱི་ལུང་བཅོ་ལྔ། དྲག་དམར་གྱི་དབང་ལུང་། རྫོགས་ཆེན་སྙིང་པོ་བསྡུས་པའི་དབང་ལུང་། ཐུགས་རྗེ་ཆེན་པོ་རྒྱལ་པོ་ལུགས་ཀྱི་རྗེས་གནང་རིག་གཏད་དང་ལུང་། ཕུར་སྒྲུབ་ཐུགས་ཀྱི་སྙིང་ཁུའི་དབང་ལུང་། འཇམ་དཔལ་སྐོར་གསུམ་གྱི་དབང་ལུང་། རྟ་ནག་ལྕགས་རལ་ཅན་གྱི་རྗེས་གནང་དང་ལུང་། མཁའ་འགྲོའི་ལས་བརྒྱ་རྩ་ལྔའི་རྗེས་གནང་དང་ལུང་། ཀླུ་སྲུང་དཀར་པོ་གཅིག་ཐུབ་ཀྱི་ལུང་། ལྷ་ཆེན་རླུང་ཞགས་ཀྱི་ལུང་དང་། དབང་ཕྱུག་མེ་ལྕེ་ལྕགས་ཀྱུའི་སྲོག་གཏད་དང་ལུང་། ཤོག་སེར་ཞལ་འབྱེད་ཀྱི་དབང་། གཏེར་སྒྲུབ་གསལ་བའི་མེ་ལོང་གི་ལུང་། བྱ་ཁྱུང་པ་ངག་དབང་པདྨའི་དགོངས་འདུས་དཀྱིལ་ཆོག་དང་། གཟའ་བཅོས་ཀྱི་ཡི་གེ་ལྔའི་ལུང་རྣམས་ཚར་རེའོ། །སྤྲུལ་སྐུ་ཨོ་རྒྱན་གླིང་པའི་གཏེར་ཆོས། པདྨ་བཀའ་ཐང་གི་ལུང་བཅུ་བཞི། ཐང་ཡིག་སྡེ་ལྔའི་ལུང་དང་། རྫོང་ཆེན་ཚེ་དབང་ཚར་གཉིས་རེའོ། །གཏེར་སྟོན་ཀུན་སྐྱོང་གླིང་པའི་གཏེར་ཆོས་རྡོར་སེམས་སྙིང་ཐིག་གི་དབང་ལུང་ཚར་གཉིས། རྫོགས་ཆེན་སྙིང་པོ་སྙིང་ཐིག་གི་དང་། བཀའ་བཟློག་གི་ལུང་ཚར་རེའོ། །སྤྲུལ་སྐུ་བསྟན་གཉིས་གླིང་པའི་གཏེར་ཆོས་ལས། ལྟ་བ་སངས་རྒྱས་དགོངས་འདུས། ཡང་དགདུས་འཁོར། བོན་དགོངས་འདུས། ཚེ་སྒྲུབ་ཙིཏྟའི་རྒྱ་ཅན། དེའི་ནང་གི་ལྷ་ཆེན། ཚེ་དཔག་མེད་དཀར་པོ། ཡང་ཐིག་ཡེ་ཤེས་མཐོང་གྲོལ་རྣམས་ཀྱི་དབང་ལུང་ཆ་ཚང་ཚར་

― MLP003_Page_0243 ―

^{[མ་དཔེ་གཟིགས་ན་འདིར་གནོན།]}

[Full Size]

རེ། ཕག་མོ་ཟབ་རྒྱའི་དབང་ཉི་ཤུ་དང་ལུང་བདུན། ཚེ་སྒྲུབ་སྲོག་འཛིན་གྱི་དབང་ཚར་གཅིག་གོ། སྤྲུལ་སྐུ་ཞིག་པོ་གླིང་པའི་གཏེར་ཆོས་ལས། རྒྱལ་བ་འདུས་པའི་དབང་བདུན་དང་ལུང་གསུམ། བླ་མ་ཞི་དྲག་གི་དབང་ལུང་ཚར་རེ། ཤ་ཟ་ཁ་མོ་ཆེའི་སྲོག་དབང་གཉིས་དང་ལུང་གཅིགཟབ་པ་སྐོར་བདུན་གྱི་དབང་ཚར་གཉིས། རྫོགས་ཆེན་སྙིང་པོ་བསྡུས་པའི་དབང་ལུང་ཚར་གཅིགཐུགས་རྗེ་ཆེན་པོ་འཁོར་བ་ལས་སྒྲོལ་གྱི་དབང་ལུང་ཚར་གཉིས། བདེ་མཆོག་དམར་པོ་དང་ཕྱག་རྡོར་སྟོབས་པོ་ཆེའི་དབང་ལུང་རེ་རེ། རྟ་མགྲིན་ནག་པོའི་དབང་བཅུ་གཉིས་དང་ལུང་བཞི། དམག་བཟློག་ཉེར་ལྔའི་དབང་ལུང་ཚར་གཉིས། འཇམ་དཔལ་ནག་པོའི་ལུང་དང་། རྫོགས་ཆེན་སྐུ་གསུམ་སྙིང་ཐིག་གི་དབང་ལུང་ཚར་གཉིས་རེ། གཏེར་སྟོན་གྱི་རྣམ་ཐར། སོག་བཟློག་པའི་བླ་སྒྲུབ་དང་། བཀའ་འབུམ་སྐོར་གྱི་ལུང་ཆ་ཚང་ཚར་རེའོ། །གཏེར་སྟོན་ལས་འཕྲོ་གླིང་པའི་གཏེར་ཆོས་ཆ་ཚང་དབང་ལུང་ཚར་གཅིགའཇའ་ཚོན་སྙིང་པོའི་གཏེར་ཆོས་ལས། དཀོན་མཆོག་སྤྱི་འདུས་ཀྱི་དབང་བཅུ་དགུ་དང་ལུང་བརྒྱད། ཞི་ཁྲོ་ངེས་དོན་སྙིང་པོའི་དབང་ལུང་ཚར་གཉིས། ཐུགས་རྗེ་ཆེན་པོ་ངན་སོང་རང་གྲོལ་དང་། རྟ་ཕག་ཡིད་བཞིན་ནོར་བུའི་དབང་གཉིས་རེ་དང་ལུང་ཚར་རེ། མ་ནིང་གི་སྲོག་དབང་ཆེ་ཆུང་ཚར་གསུམ་ལུང་ཚར་གཅིགདེ་མོའི་རྗེས་གནང་ཚར་གཅིག་གོ། གཏེར་སྟོན་དྲི་མེད་ལྷུན་པོའི་དོན་ཐིག་གི་དབང་ལུང་དང་རླུང་དམར་གྱི་ལུང་ཡོངས་རྫོགས་ཚར་རེ། གཏེར་སྟོན་དྲི་མེད་ཀུན་དགའི་ཐུགས་རྗེ་ཆེན་པོ་ཡེ་ཤེས་འོད་མཆོག་གི་དབང་ལུང་ཚར་གཅིགགཏེར་སྟོན་ཚེ་བརྟན་རྒྱལ་མཚན་གྱི་གཏེར་མ་བླ་མ་ཞི་དྲག་གི་དབང་ཆ་ཚང་ཚར་གཉིས། པུསྟིའི་ལུང་གཅིགསྙེ་མོ་རྒྱ་གངས་རི་བའི་གཏེར་མ་དང་སྐྱེར་སྒང་པའི་དག་སྣང་རྟ་མགྲིན་གསང་སྒྲུབ་ཀྱི་དབང་བྱིན་རླབས་ཆིག་བརྒྱ་གོ་ལྔ་དང་ཆོས་སྐོར་གྱི་ལུང་ཞེ་བདུན་ནོ། །

― MLP003_Page_0244 ―

^{[མ་དཔེ་གཟིགས་ན་འདིར་གནོན།]}

[Full Size]

གཏེར་སྟོན་ཤེས་རབ་མེ་འབར་གྱི་རྫོགས་ཆེན་འཁོར་འདས་རང་གྲོལ་གྱི་དབང་ལུང་ཚར་གཉིས། མ་གཅིག་ཀུན་དགའ་འབུམ་གྱི་མཁའ་འགྲོ་གསང་བ་ལམ་ཁྱེར་གྱི་དབང་ལུང་ཚར་གཅིགདུང་མཚོ་རས་པའི་ཡང་ཏི་ནག་པོའི་དབང་ལུང་ཚར་གཅིགའཇམ་དབྱངས་བླ་མའི་གཏེར་མ་རྩ་གསུམ་དྲིལ་སྒྲུབ་སྐོར་ཀྱིས་ལུང་དང་། རྒྱ་པདྨ་དབང་ཕྱུག་གི་གཏེར་མ་གུར་མགོན་གྱི་སྒྲུབ་ཐབས་ཟབ་གནད་ལྔ་པའི་ལུང་ཚར་རེ། ལྷ་བཙུན་བྱང་ཆུབ་འོད་ཀྱི་གཏེར་མ་པུ་ཏྲ་བཀའ་བཀོལ་མའི་ལུང་གསུམ། གྲུ་གུ་ཡང་ཝན་གྱི་གཏེར་མ་འཇོམས་བྱེད་ཉི་ཟླ་ནག་པོའི་བཀའ་གཏད་དང་མ་བུ་ལྷན་ཐབས་བཅས་པའི་ལུང་། པདྨ་དབང་གི་གཏེར་མ་དམ་ཅན་སྐྱེར་མདུང་ཅན་གྱི་ལུང་། དམ་པ་དམར་པོའི་གཏེར་མ་བདུད་རྩི་བཅུད་ལེན་སྐོར་གྱི་བྱིན་རླབས་དང་ལུང་། མངའ་རིས་པཎ་ཆེན་གྱི་གཏེར་ཆོས་རིག་འཛིན་ཡོངས་འདུས་ཀྱི་དབང་ལུང་གཉིས་རེ་དང་། དེའི་ནང་གི་བསམ་པ་ལྷུན་གྲུབ་མའི་དབང་ཚར་དྲུགདྲག་པོ་དབུ་དགུ་པའི་དབང་ཚར་གཅིགགནོད་སྦྱིན་གྱི་སྲོག་གཏད་དགུ་དང་ལུང་གསུམ། པཎ་ཆེན་གྱི་བསྟན་བཅོས་སྡོམ་གསུམ་རྣམ་ངེས་ཀྱི་ལུང་གཉིས་རྣམས་སོ། །རིག་འཛིན་ལེགས་ལྡན་རྗེའི་གཏེར་མ་ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་དབང་སུམ་ཅུ་དང་ལུང་བཅུ། ཆོས་རྒྱལ་དབང་པོའི་སྡེའི་གཏེར་མ་ཀརྨ་གུ་རུའི་དབང་དགུ་དང་ལུང་བརྒྱད། སྐུ་གསུམ་རིགས་འདུས་ཀྱི་ཚེ་དབང་བཅུ་དགུ། ཡོལ་མོ་སྤྲུལ་སྐུ་བསྟན་འཛིན་ནོར་བུའི་རྣམ་ཐར་ཞལ་གསུང་མའི་ལུང་ཚར་གསུམ། དུག་ཁྲག་བུམ་ལྕགས་བྱང་ལུགས་ཀྱི་དབང་ལུང་ཚར་ལྔ། འབྲི་གུང་རིན་ཆེན་ཕུན་ཚོགས་ཀྱི་གཏེར་མ་དགོངས་པ་ཡང་ཟབ་ཀྱི་དབང་ལུང་། ཛ་བེར་གྱི་རླུང་ཁྲིད་ཀྱི་ལུང་། འཕྲེང་པོ་གཏེར་སྟོན་ཤེས་རབ་འོད་ཟེར་གྱི་གྲོལ་ཐིག་གི་དབང་རྣམས་དང་། ནག་པོ་སུམ་དྲིལ་གྱི་དབང་ལུང་། སྡེ་བདུན་གྱི་དབང་། གཏེར་སྟོན་བཀའ་འབུམ་གྱི་ལུང་། འཇམ་དཔལ་རྡོ་རྗེའི་གཏེར་མ་ཐུགས་རྗེ་ཆེན་པོ་འགྲོ་བ་ཀུན་འདུལ་གྱི་དབང་ལུང་རྣམས་ཚར་རེ། བ་མཁལ་སྨུག་པོའི་གཏེར་མ་བར་ཆད་ལམ་སེལ་གྱི་ལུང་བཅུ་གསུམ་དང་། ཨོ་རྒྱན་རྣམ་ཐར་གྱི་ལུང་གཉིས། གཡུ་ཐོག་སྙིང་ཐིག་གི་

― MLP003_Page_0245 ―

^{[མ་དཔེ་གཟིགས་ན་འདིར་གནོན།]}

[Full Size]

དབང་རྣམས་བཅུ་བདུན་དང་། ལུང་བཅུ་བཞི། སྨན་གྱི་རྒྱུད་བཞིའི་ལུང་ཚར་བཞི། བྱིས་པ་གཏེར་སྟོན་གྱི་འབྲུམ་སྲུང་བཅུད་འཁོར་ནག་པོའི་ལུང་ལྔ། གུ་རུ་ཇོ་ཚེའི་དབང་ཕྱུག་སྦྲུལ་ཐོད་མའི་ལུང་གཉིས་དང་། ཤ་བརྒྱ་ཟན་བརྒྱའི་ལུང་བཞི། ཟུར་མཁར་ཨ་ཇོ་དཔལ་སོའི་གཏེར་མ་བསོད་ནམས་གླང་པོ་སྟོབས་བསྐྱེད་ཀྱི་ལུང་བདུན་དང་། ཇོ་མོ་ཡང་གྷ་བཟའི་སྒྲུབ་སྐོར་གྱི་ལུང་གསུམ། ཨོ་རྒྱན་ནས་ཐང་དཀར་རས་པ་ལ་བརྒྱུད་པའི་ཀོང་བཙུན་དེ་མོའི་སྐོར་གྱི་ལུང་ཚར་གཅིགལྕང་སྨན་དོན་གྲུབ་དར་གྱི་གཏེར་མ་བདུད་རྩི་རྟ་རི་མའི་སྦྱོར་བའི་ལུང་གཉིས། ཕུང་བོན་མགོ་དམར་གྱི་གདམས་པ་དམ་ཅན་བྱེས་ཆས་སྐོར་གྱི་ལུང་གཅིགམན་ངག་ཡིག་ཕྲན་གྱི་སྐོར་ལ་དགྲ་བོ་མགོ་འཁོར་རང་འཐག་ལ་བརྟེན་པའི་མྱོང་གྲུབ་མ་དང་། མདུན་བཤིག་གའུ་ཆུ་སྐྱུར་མའི་ལུང་དང་། ཕྱག་ཁྲིད་རྣམས་བཞི་རེ། མཚོན་སྲུང་མན་ངག་ལག་ལེན་མ། ལྟས་ངན་བཟློག་པ་རྒྱ་ནག་རྡོག་དྲིལ། སྦ་ལྕགས་ལ་བརྟེན་པའི་ཇག་ཆིངས་དམག་བཟློག་བཅས་པའི་ཕྱག་བཞེས་རྣམས་ཚར་རེ། མན་ངག་བེ་བུམ་སྣ་ཚོགས་ཕྱོགས་གཅིག་ཏུ་བསྡུས་པ་པུསྟི་གཉིས་ཀྱི་ལུང་ཚར་གསུམ་མོ། །ཟབ་མོ་དག་སྣང་གི་སྐོར་ལ་རྒྱལ་བ་གཡའ་བཟང་པ་ལ་དྲང་སྲོང་གིས་དངོས་སུ་ཕུལ་བའི་གཟའ་བཅོས་སྐོར་ཚོ་བཞིའི་ལུང་ཕྱག་ཁྲིད་དང་བཅས་པ་བཞི་དང་བཟླས་ལུང་དགུ། གྲུབ་ཆེན་ཐང་སྟོང་རྒྱལ་པོའི་དག་སྣང་འཆི་མེད་དཔལ་སྟེར་གྱི་ཚེ་དབང་སུམ་བརྒྱ་ཉེར་གསུམ་མམ་བརྒྱ་རྩ་རྣམས་བརྩིས་ཏེ་བསྡོམས་ན་ཁྲི་དྲུག་སྟོང་བཞི་བརྒྱ་ཉེར་གསུམ། རས་ཆེན་དཔལ་འབྱོར་བཟང་པོའི་ཟབ་ཁྱད་ཆོས་གསུམ་གྱི་ནང་ཚན་ཚེ་དབང་མདའ་འཕེལ་མར་གྲགས་པའི་དབང་ཉེར་དགུ། རྒྱལ་སྲས་བསྟན་པའི་འབྱུང་གནས་ཀྱི་དག་སྣང་རྩ་གསུམ་ཟབ་མོ་ཀུན་འདུས་ཀྱི་རལ་དབང་བཞི། ཀོང་པོ་རྫོགས་ཆེན་པ་ཀུན་བཟང་རྣམ་རྒྱལ་གྱི་དག་སྣང་རིག་འཛིན་སྲོག་སྒྲུབ་ཀྱི་རྩ་དབང་དང་ཚེ་དབང་ཚར་རེ། འབྲི་གུང་ཆོས་ཀྱི་གྲགས་པའི་དག་སྣང་སྒྲ་མི་སྙན་པའི་ཚེ་དབང་བདུན། ཀུན་མཁྱེན་རྒྱལ་བའི་དབང་པོ་ལྔ་པ་ཆེན་པོའི་དག་སྣང་ཟབ་མོ་རྒྱ་ཅན་སྐོར་གྱི་དབང་བྱིན་རླབས་རྗེས་གནང་སྲོག་གཏད་དང་བཅས་

― MLP003_Page_0246 ―

^{[མ་དཔེ་གཟིགས་ན་འདིར་གནོན།]}

[Full Size]

པ་རྣམ་གྲངས་བཞི་བཅུ་པོ་ཡོངས་སུ་རྫོགས་པ་ཚར་གཉིས་དང་། རྒྱ་ཅན་རྩ་བའི་ལུང་བཅུ་བཞི། ཆོག་ཁྲིགས་སྐོར་དཔེ་ཚན་དྲུག་གི་ལུང་ལྔ། གསང་བའི་རྣམ་ཐར་མཐོང་བ་དོན་ལྡན་གྱི་ལུང་གཉིས། དེ་དག་གི་སྟེང་དུ་དབང་ལུང་ཟུར་དུ་བཏོན་ནས་གནང་བ་ལ་བླ་མ་བདེ་ཆེན་དབང་ཕྱུག་གི་བྱིན་རླབས་གཉིས། ཐུགས་སྒྲུབ་ཡང་སྙིང་འདུས་པའི་དབང་བརྒྱད། རྡོ་རྗེ་གྲོ་ལོད་ཀྱི་དབང་བཅོ་བརྒྱད་དང་སྒོས་ཀྱི་ལུང་ཚར་གཉིས། ཇོ་མོའི་བྱིན་རླབས་གསུམ། ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་དབང་དྲུགབདེ་ཆེན་ངལ་གསོའི་དབང་ཚར་གཅིགཡང་གསང་ཀརྨ་དྲག་པོའི་དབང་བཅུ་དགུ་དང་དེའི་ལས་གཞུང་གི་ལུང་བདུན། བཀའ་བརྒྱད་ཞི་ཁྲོ་རྣམ་རོལ་གྱི་དབང་གཉིས། དྭངས་མ་བཅུད་འདྲེན་གྱི་ཚེ་དབང་ཉེར་ལྔ་དང་སྒོས་ལུང་བཅོ་ལྔ། ཕྱག་རྡོར་བདུད་སྡེ་ཕྱེར་འཐག་གི་དབང་གཉིས། རྟ་མགྲིན་ཁམས་གསུམ་ཟིལ་གནོན་གྱི་དབང་བཅུ། ནཱ་ག་རཀྴ་འོག་གདོན་མཐར་བྱེད་ཀྱི་དབང་གདོན་འགྲོལ་དང་བཅས་པ་ཚར་གཅིགཡང་གསང་དྲག་མོའི་དབང་ལྔ་དང་ལུང་གཅིགལས་བཞི་ལྷ་མོའི་རྗེས་གནང་ཚར་གཅིགཞི་བའི་ལྷ་མོའི་ཚེ་དབང་གཉིས་རྣམས་སོ། །རྒྱལ་དབང་མཆོག་གི་བཀའ་རྩོམ་འཁོར་བ་དབྱིངས་སྒྲོལ་གྱི་ཁྲིད་ཡིག་རིག་འཛིན་ཞལ་ལུང་གི་ལུང་ལྔ་དང་། ཕན་བདེ་ལེགས་བཤད་གླིང་པའི་ཞལ་འདོན་སྐོར་ཡོངས་རྫོགས་ཀྱི་ལུང་བཞི། རྨད་བྱུང་ཀལྤ་མའི་ལུང་གཉིས་རྣམས་སོ། །གསར་མའི་སྐོར་ལ། ས་ལུགས་ཀྱཻ་རྡོར་གྱི་རྒྱུད་དབང་གཅིགརྔོག་ལུགས་དགྱེས་རྡོར་གྱི་དབང་གཉིས། དགེ་ལུགས་བདེ་མཆོག་ལུ་ཧི་པའི་དབང་དང་། ས་ལུགས་དྲིལ་བུ་ལྷ་ལྔའི་དབང་གཉིས་རེ། ནཱ་རོ་མཁའ་སྤྱོད་མའི་བྱིན་རླབས་ཉི་ཤུ་རྩ་ལྔ་དང་། ལུང་ཡོངས་རྫོགས་དྲུགཀུན་རིགས་ཀྱི་དབང་གསུམ། མི་འཁྲུགས་པ་ལྷ་དགུའི་དབང་བཞི། གྲུབ་རྒྱལ་མའི་ཚེ་དབང་ལྔ། ཆག་ལུགས་ཚེ་དཔག་མེད་དཀར་པོའི་རྗེས་གནང་གཉིས། འཇམ་དབྱངས་ཨ་ར་པ་ཙ་ནའི་རྗེས་གནང་གསུམ། མ་ཏི་ལུགས་འཇམ་དཀར་གྱི་རྗེས་གནང་བཅུ་དྲུག་དང་ཆོས་སྐོར་གྱི་ལུང་དགུ། དམ་པའི་ལུགས་འཇམ་དབྱངས་དམར་སེར་དབྱངས་ཅན་མ་

― MLP003_Page_0247 ―

^{[མ་དཔེ་གཟིགས་ན་འདིར་གནོན།]}

[Full Size]

དང་སྦྲགས་སྒྲུབ་ཀྱི་རྗེས་གནང་ལྔ། སྤྱན་རས་གཟིགས་དཔལ་མོ་ལུགས་ཀྱི་རྗེས་གནང་སོ་བདུན། སྤྱན་རས་གཟིགས་གཙོ་འཁོར་གསུམ་པའི་རྗེས་གནང་ལྔ། སྒྲོལ་དཀར་གྱི་རྗེས་གནང་བཅུ་བདུན། སྒྲོལ་ལྗང་གི་རྗེས་གནང་བཅོ་བརྒྱད། ཕྱག་རྡོར་འབྱུང་འདུལ་གྱི་རྗེས་གནང་བཞི། ཁྱུང་ཁྲའི་རྗེས་གནང་གསུམ། འཇམ་དཔལ་ནག་པོའི་རྗེས་གནང་གཅིགཕག་དཀར་ཤེས་རབ་གསལ་བྱེད། སྣ་ཚོགས་ཡུམ། རྣམ་རྒྱལ་མ་རྣམས་ཀྱི་རྗེས་གནང་གཉིས་རེ། རྣམ་འཇོམས་ཀྱི་རྗེས་གནང་ཉེར་གཉིས། བ་རི་ལུགས་སྨེ་བརྩེགས་ཀྱི་རྗེས་གནང་ལྔ། སྨེ་བརྩེགས་དུད་ཀའི་རྗེས་གནང་གཉིས། ཁྲོ་མོ་སྨེ་བརྩེགས་ཀྱི་རྗེས་གནང་ཉེར་གཅིགསྨན་བླའི་རྗེས་གནང་བདུན་དང་མདོ་ཆོག་ཡིད་བཞིན་དབང་རྒྱལ་གྱི་ལུང་ལྔ། སོར་འབྲང་། ལོ་མ་གྱོན་མ། སེང་གདོང་མ་རྣམས་ཀྱི་རྗེས་གནང་གཉིས་རེ། ས་ལུགས་ཀུ་རུ་ཀུལླེའི་རྗེས་གནང་ལྔ་དང་ལུང་གཅིགའདོད་རྒྱལ་དང་། ཚོགས་བདག་གི་རྗེས་གནང་ཚར་རེ། གུར་མགོན་ལྷ་བརྒྱད་ཀྱི་རྗེས་གནང་བཞི། ཞལ་བསྙེན་དུས་ཀྱི་རྗེས་གནང་གསུམ། སྒྲུབ་དུས་ཀྱི་རྗེས་གནང་དང་། ཞལ་གྱི་བེ་བུམ་གྱི་ལུང་ཚར་རེ། བེག་ཙེའི་རྗེས་གནང་གཅིག་དང་ལུང་གཉིས། གོང་མ་ལྔ་པ་ཆེན་པོས་མཛད་པའི་གུར་ཞལ་དང་། དམར་པོ་སྐོར་གསུམ་གྱི་མན་ངག་ཟིན་རིས་གཉིས་པོའི་ལུང་ཚར་རེ། ཕྱག་དྲུག་པའི་གཏོར་དབང་བར་ཆད་ཀུན་སེལ་བཅོ་བརྒྱད། མཁས་གྲུབ་རིན་པོ་ཆེའི་མགོན་པོའི་ཤོག་དྲིལ་བཅུ་གསུམ་དང་། ལས་གསུམ་རྣམ་བཤད་ཀྱི་ལུང་ཚར་གསུམ་རེ། དམག་ཟོར་མའི་རྗེས་གནང་སུམ་ཅུ་སོ་དྲུག་དང་ལུང་བཅུ་བཞི། འཇིགས་བྱེད་འཕྲུལ་འཁོར་གྱི་ཕྱག་ཁྲིད་དང་ཡིག་ཆ་མ་བུ་གསུམ་གྱི་ལུང་གཉིས་རེ། ཨ་འགོ་རའི་རྗེས་གནང་། ཆོས་སྐོར་ཚང་མ་དང་བསྐང་གསོ་གཟི་བརྗིད་བསྟོད་དབྱངས་བཅས་པའི་ལུང་། མགོན་པོ་བེང་གི་རྗེས་གནང་རྣམས་གཉིས་རེ། ཏྲག་ཤད་མྱོས་ལུགས་ཀྱི་རྗེས་གནང་དྲུགདྭགས་ལུགས་ཀྱི་རྗེས་གནང་གཉིས། དེ་གཉིས་ཀའི་ལུང་ཚར་རེ། ཏྲཀྴད་མ་ནིང་གི་རྗེས་གནང་དང་ལུང་། དུད་སོལ་མའི་རྗེས་གནང་དང་ལུང་རྣམས་གཉིས་རེ། རང་བྱུང་མའི་རྗེས་གནང་གསུམ། རྡོ་རྗེ་རབ་བརྟན་མའི་རྗེས་གནང་གཉིས།

― MLP003_Page_0248 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་སྲས་སེར་ཆེན་གྱི་རྗེས་གནང་བདུན། ཛམྦྷ་ལ་སེར་ནག་གཉིས་ཀྱི་རྗེས་གནང་། ཀར་ལུགས་ཕག་མོའི་བྱིན་རླབས། ཐུགས་རྗེ་ཆེན་པོ་རྒྱལ་བ་རྒྱ་མཚོའི་དབང་། མ་མགོན་འཁོར་ལྔའི་རྗེས་གནང་རྣམས་ཚར་ལྔ་རེ། ཟབ་མོ་ནང་དོན་གྱི་ལུང་ལྔ། ཀུན་རིགས་ཆོ་ག་རྣམ་གྲོལ་སྒོ་ཅན་ཆ་ལག་ཕུང་པོ་རྣམ་པར་སྦྱོང་བ་དང་བཅས་པའི་ལུང་ཚར་གཅིགཞལ་བཀའ་རྒྱའི་དབང་ལུང་ཡོངས་རྫོགས་ཚར་ལྔ། དེའི་ནང་ནས་བཀའ་རྒྱའི་ལུང་གསུམ། ཚོམ་བུ་ཞེ་བདུན་མའི་དབང་། ཞང་གི་རྣམ་ཐར་གྱི་ལུང་། མཚལ་ལུགས་ཕྱག་བཞི་པའི་རྗེས་གནང་རྣམས་ཚར་གཉིས་རེ། མ་གཅིག་གི་གཅོད་དབང་ཉི་ཤུ་རྩ་ལྔ་དང་ལུང་བཞི་བཅུ། རྒོད་ཕྲུག་པའི་ཁྲིད་ཡིག་གི་ལུང་བདུན། འཇམ་དབྱངས་མགོན་པོའི་ལུགས་ཀྱི་གཅོད་དབང་གསུམ་དང་། ཟབ་དོན་སྐོར་གྱི་ལུང་ལྔ། གྲུབ་ཆེན་ལས་ཀྱི་རྡོ་རྗེའི་ཕྱག་རྡོར་སྙན་བརྒྱུད་ཀྱི་དབང་ལུང་ཡོངས་རྫོགས་ཚར་བརྒྱད། ཚེ་དབང་ཟུར་བཏོན་གཉིས། དངུལ་ཆུ་ཆོས་རྫོང་པའི་བློ་སྦྱོང་དོན་བདུན་མའི་ཁྲིད་ཡིག་དང་། ཀུན་དགའ་གྲོལ་མཆོག་གི་ཁྲིད་བརྒྱའི་ལུང་རྣམས་ཚར་གཉིས་རེའོ། །འདི་དག་ནི་ད་ལྟའི་ཆུ་མོ་སྦྲུལ་ལོ་ཡན་ལ་ཆོས་གསུངས་པའི་ཚུལ་ཏེ། སླད་ནས་ཀྱང་རིས་མེད་པའི་གདུལ་བྱ་རྣམས་ལ་ཟབ་རྒྱས་ཀྱི་ཆོས་འཁོར་རྒྱ་ཆེ་རྒྱུན་མི་ཆད་པ་བར་མེད་དུ་བསྐོར་བར་གདོན་མི་ཟ་བ་ཉིད་དོ། །དེ་ལྟར་གདུལ་བྱ་ལ་ཐུགས་ལྷག་པར་བརྩེ་བ་དང་། རྒྱལ་བའི་བསྟན་པ་རིན་པོ་ཆེ་སྤེལ་བའི་ཐབས་ཁོ་ན་ལ་གཅིག་ཏུ་དགོངས་ཏེ། སྐལ་ལྡན་རྗེས་སུ་འཛིན་པའི་ཕྲིན་ལས་དབང་བྱིན་རླབས་ཇི་ལྟར་མཛད་པའི་ཚུལ་ཞམ་རིང་པ་དག་གིས་ཟིན་ཐོར་བཏབ་པ་རྣམས་ཕྱོགས་གཅིག་ཏུ་བསྡེབས་ནས་བཀོད་པ་འདི་ནི་མཚོན་པ་ཙམ་སྟེ། དེའི་རྒྱུ་མཚན་སྐྱེས་བུ་དམ་པ་འདིས་གདུལ་བྱ་སྐྱོང་བ་ལ་ཐུགས་གཡེལ་བ་མ་མཆིས་པས། དད་ཅན་གྱི་སློབ་བུ་ཉམ་ཆུང་རེ་རེ་ཙམ་ལའང་བློའི་རེ་བ་བཞིན་སྩོལ་བ་ལས། ཆོས་ཞུ་བའི་གྲོགས་གཞན་གཡབ་མོས་བསགས་ནས་ཁྲོམ་ཆོས་མི་མཛད་པར། མི་རེ་ངོ་རེ་ལ་ཆོས་རེ་སྩོལ་བའི་རྒྱུ་མཚན་གྱིས་ཧ་ཅང་འབྱམས་ཀླས་པའི་ཕྱིར། ཟིན་ཐོར་མ་འཁོད་པའང་མང་དུ་སྣང་བས་མཐའ་དག་སུ་
ཞིག་གིས་བརྗོད་པར་ནུས། དེ་ལས་གཞན་དུ་གཏེར་སྟོན་སྣང་རིག་གཉིས་ཀྱི་ཐུགས་ནང་མ་གཤིན་པའི་ཕྱོགས་རྗེས་འཇུག་རྣམས་ཀྱིས་ཕ་རུས་ཀྱི་བཟུང་བ་ལ་བརྟེན་ནས། སྔ་འགྱུར་བཀའ་གཏེར་གྱི་ཆོས་འགང་ཆེ་བ་གཙང་བརྒྱུད་ལས་འོང་བ་མང་པོ་ཞིག་བར་སྐབས་སུ་དོན་གཉེར་གྱི་ཞུ་བ་པོ་དཀོན་པས་མཐའ་རྒྱས་སུ་འཕེལ་བར་མ་གྱུར་ཀྱང་། བསྟན་རྒྱུན་ལ་དགོངས་ཏེ་བཤེས་གཉེན་འཆད་ཉན་འཕེར་བ་འགའ་ལ་མདུན་བསུས་ནས་སྩོལ་བ་སོགས་དམ་པའི་ཆོས་ཀྱི་སྒྲོན་མེ་ཡུན་རིང་དུ་གསལ་བ་ཁོ་ན་ཐུགས་ལ་བཅགས་པ་དང་། རྒྱུན་གྱི་གསུང་འགྲོས་འབེལ་གཏམ་ཙམ་གྱིས་ཀྱང་རྒྱུ་འབྲས་ཀྱི་བླང་དོར་དང་། ཆོས་རྣམས་ཀྱི་དྲང་ངེས་ཀྱི་གནས་རྣམས་མ་འདྲེས་པར་ཕྱེད་ཅིང་། དེ་ལ་དཔྱོད་ལྡན་སུས་ཀྱང་དོན་དང་མཐུན་པའི་སྐྱོན་འདོགས་ཀྱིས་རྒོལ་བར་མི་ནུས་པ་དང་། བཀའ་ལུང་ཕྲ་མོ་རེ་རེ་ཙམ་ལའང་། དེ་ཡིན་ངེས་སྙམ་དུ་བློ་རྩེ་གཏད་གཏུབ་པས་ཐེ་ཚོམ་གྱི་དྲྭ་བ་གཅོད་ནུས་ཤིང་། དབང་བསྐུར་དང་བྱིན་རླབས་མཛད་པའི་ཚེ། བརྒྱུད་པའི་ལོ་རྒྱུས་ཙམ་གྱིས་ཀྱང་བ་སྤུ་གཡོ་བའི་མོས་གུས་བཅོས་མིན་དུ་འཁུལ་བ་དང་། བྱིན་རླབས་ཀྱི་གཟི་བྱིན་རྒྱས་པས་ཡེ་ཤེས་བཙན་ཐབས་སུ་ཕེབས་ཤིང་། དབང་གི་བརྡའ་དོན་འཕྲོད་པའི་སྒོ་ནས་སྐུ་བཞིའི་ས་བོན་འདེབས་པ་ལ་མཁས་པས་རྒྱུད་སྨིན་པ་ལ་སྦྱོར། ཕྲལ་གྱི་ཕྱག་ལེན་ཕྲ་རགས་ཐམས་ཅད་མ་འདྲེས་གཙང་དག་གིས་སྐུ་ཚེ་རིལ་པོར་སློབ་མ་དེར་གང་འདོད་ཀྱི་ཆོ་ག་དེ་ཁོ་ནར་སྦྱངས་པ་ལྟ་བུས་ངེས་ཤེས་འདྲེན་པ་སོགས་མཐའ་ཡས་པའི་ཡོན་ཏན་མངའ་བ་ཡིན་ནོ། །

བསྟན་པ་ཡུན་རིང་དུ་གནས་པའི་ཕྱིར་གསུང་གི་ཕྲིན་ལས་བསྟན་བཅོས་བརྩམ་པར་མཛད་པའི་ཚུལ།

― MLP003_Page_0249 ―

^{[མ་དཔེ་གཟིགས་ན་འདིར་གནོན།]}

[Full Size]

༈ གཉིས་པ་བསྟན་པ་ཡུན་རིང་དུ་གནས་པའི་ཕྱིར་གསུང་གི་ཕྲིན་ལས་བསྟན་བཅོས་བརྩམ་པར་མཛད་པའི་ཚུལ་ནི། སྤྱིར་སྟོན་པའི་བཀའ་མདོ་རྒྱུད་ཀྱི་ཚིག་དོན་རྣམས་སྔར་ལས་མི་གསལ་དུ་མ་སོང་ཡང་། དུས་དབང་གིས་གདུལ་བྱའི་བློ་མཐུ་རིམ་གྱིས་ཇེ་ཆུང་དུ་བྲི་བ་ལ་བརྟེན་ནས་གསུང་རབ་ཀྱི་དགོངས་པ་རྣམས་དུས་དང་བསྟུན་པའི་གདུལ་བྱ་རྣམས་ཀྱི་གོ་ཚོད་ཙམ་དུ་བཀྲལ་དགོས་པ་དང་། དེའང་བློ་དམན་རྣམས་ཀྱིས་རྒྱ་བོད་ཀྱི་འགྲེལ་པ་རྣམས་ཀྱང་བཀླགས་པ་ཙམ་གྱིས་གོ་མི་ནུས་པར། སློབ་དཔོན་གྱིས་བཤད་པའི་ངག་སྒྲོས་

― MLP003_Page_0250 ―

^{[མ་དཔེ་གཟིགས་ན་འདིར་གནོན།]}

[Full Size]

དང་མཛུབ་ཁྲིད་སོགས་ལ་ལྟོས་དགོས་པ་ཇི་ལྟ་བ་བཞིན་ཏུ། བསྐྱེད་རྫོགས་གཏན་ལ་འབེབས་པའི་ཡིག་ཆའང་སྔོན་གྱི་སྔགས་འཆང་ཆེན་པོ་རྣམས་རྒྱུད་འགྲེལ་ལ་རང་བྱན་ཆུབ་པར་སྦྱངས་པས་ཚིག་ཟབ་བརླིང་ཉུང་ངུ་ཙམ་གྱིས་གོ་ནུས་པར་གྱུར་ཀྱང་། ཕྱིས་ཀྱི་གང་ཟག་རྣམས་ལ་དེ་ལྟར་མ་འཚལ་བས། དམིགས་པ་རྣམས་ཀྱང་གྱེར་ཚིག་གིས་གསལ་ནུས་པ་ཞིག་དགོས་པ་ལ་དགོངས་ཏེ། བཀའ་རྩོམ་རྣམས་ཀྱང་སྤྱི་རྒྱ་རླབས་ཀྱིས་གཅོད་པའི་རྣམ་བཤད་སོགས་ཁྲོམ་ཤོག་གཙོ་བོར་མ་སྟོན་པར་ད་ལྟའི་དུས་ཀྱི་གདུལ་བྱ་རྣམས་ཀྱི་བློ་དང་འཚམས་པར་མཛད་ནས། སྒྲུབ་དཀྱིལ་ཁྲིད་ཡིག་སོགས་ཚིག་སྦྱོར་བརྗོད་པ་བདེ་ཞིང་དོན་གསལ་དག་ཏུ་སྟོན་པའི་ཉེར་མཁོའི་ཡིག་ཆ་ཕུལ་དུ་བྱུང་བ་མང་པོ་ཞིག་དང་། བསྐུལ་བ་པོ་སོ་སོའི་རེ་བ་སྐོང་བའི་ཞལ་གདམས་སོགས་ད་ལྟའི་ཆུ་སྦྲུལ་འདི་ཡན་ལ་བཀའ་རྩོམ་མཛད་པ་རྣམས་རགས་ཙམ་ཕྱོགས་གཅིག་ཏུ་བསྡོམས་ན་སྐོར་ཚོ་བཅུ་གསུམ་ལས། དང་པོ་ལོ་རྒྱུས་རྣམ་ཐར་སྐོར་ལ། གསན་ཡིག་རིན་ཆེན་འབྱུང་གནས། དེའི་ཁ་སྐོང་ཕན་བདེའི་ཆུ་རྒྱུན། རྡོ་རྗེ་ཕྲེང་བའི་བརྒྱུད་པའི་དོགས་གནས་ལ་དཔྱད་པ། སྤྱོད་པ་སངས་རྒྱས་དཔལ་གྱི་ཁྲིད་བརྒྱ་ཚང་མ་མ་གསན་གོང་དུ་ཉེར་མཁོ་གསན་ཚུལ་གྱི་ཡི་གེབི་མ་ལའི་སྙིང་ཐིག་མ་བུའི་ལོ་རྒྱུས་ཁ་སྐོང་ངེས་ཤེས་འདྲེན་བྱེད། ལོ་ཆེན་གཞན་ཕན་རྡོ་རྗེའི་རྣམ་ཐར་བདུད་རྩིའི་ཐིག་ལེ། ཡབ་རྗེའི་རྣམ་ཐར་སྐལ་བཟང་གདུང་སེལ། རྗེ་ཉིད་ཀྱི་གསང་བའི་རྣམ་ཐར་སྒྱུ་འཕྲུལ་རྡོ་རྗེའི་རོལ་མོ། གཏེར་བྱུང་ལོ་རྒྱུས་སྐལ་བཟང་དགའ་བྱེད། ཀུན་སྤངས་ལྷ་བཙུན་གྱི་རྣམ་ཐར་ཡོན་ཏན་རྒྱ་མཚོའི་སྙེ་མ་རྣམས་སོ། །གཉིས་པ་བསྟོད་ཚོགས་སྨོན་ལམ་དཀར་ཆག་གི་སྐོར་ལ། བདག་བསྟོད་ཀྱི་སྐོར་གསང་གསུམ་མཛེས་རྒྱན། བཤེས་གཉེན་གཞན་གྱི་བསྟོད་པ་དང་བརྟན་བཞུགས་སུ་སྤེལ་བ་དག་སྣང་དད་པའི་མེ་ཏོགཡུལ་ཁྱད་པར་ཅན་ལ་གསོལ་འདེབས་སོགས་བྱེ་བྲག་ཏུ་བཀོད་པ་བསྟོད་སྤྲིན་རྒྱ་མཚོའི་རོལ་མོ། ཟབ་རྒྱས་གདམས་པ་དུ་མའི་བླ་བརྒྱུད་གསོལ་འདེབས་ཡོན་ཏན་གངྒཱའི་རླབས་ཕྲེང་། བྲིས་ཐང་དང་སྙན་ཤལ་གྱི་ཞལ་བྱང་ཚོགས་གཉིས་ལྗོན་པའི་མྱུ་

― MLP003_Page_0251 ―

^{[མ་དཔེ་གཟིགས་ན་འདིར་གནོན།]}

[Full Size]

གུ། གནས་རྟེན་གྱི་ཆེ་བརྗོད་དཀར་ཆག་གནས་ལུགས་རབ་ཏུ་གསལ་བའི་མེ་ལོང་རྣམས་སོ། །གསུམ་པ་འཕྲིན་ཡིག་དང་དྲིས་ལན་གྱི་སྐོར་ལ། འཕྲིན་ཡིག་སྙན་ཚིག་ཏུ་སྤེལ་བ་རྡོ་རྗེ་སྒྲ་མའི་རྒྱུད་མང་། འཕྲིན་ཡིག་ལྷུག་མ་གློག་གི་རོལ་རྩེད། དྲི་བ་སྣ་ཚོགས་པའི་ལན་རིམ་པར་སྤེལ་བ་རྣམས་སོ། །བཞི་པ་ཐེག་པ་སྣ་ཚོགས་པའི་འཇུག་སྒོ་དང་མན་ངག་གནད་ཀྱི་སྐོར་ལ། ཐུན་མོང་སྔོན་འགྲོའི་ཆོས་བཤད་རིན་ཆེན་ཐེམ་སྐས། ཁྱིམ་པ་རྗེས་འཛིན་གྱི་ཆོ་ག་ཐར་ལམ་རབ་གསལ། དབུ་མ་ལུགས་ཀྱི་བྱང་སྡོམ་འབོག་ཆོག་རྒྱལ་སྲས་ལམ་བཟང་། བླ་མའི་རྣལ་འབྱོར་གྱི་རིམ་པ་གྲུབ་གཉིས་མཆོག་སྩོལ། མཁའ་འགྲོ་སྙིང་ཐིག་གི་ཁྲིད་ཡིག་ཟབ་ལམ་གསལ་བྱེད། དེའི་བརྒྱུད་འདེབས། སྲོག་སྒྲུབ་མ་དང་ལྡང་ལྷའི་གཏོར་འབུལ་ཁྱེར་བདེ། ཀུན་བཟང་དགོངས་འདུས་ཀྱི་ཁྲིད་ཡིག་སྙིང་པོ་རབ་གསལ། ཡང་ཐིག་གཅེས་སྒྲོན་གྱི་ཁྲིད་ཐུན་རྐང་གྲངས། གཅོད་ཁྲིད་དཔའ་བོའི་གད་རྒྱང་། ཟུར་གནད་ལྷན་ཐབས། གཅོད་ཁྲིད་འཁོར་འདས་རང་གྲོལ། གཅོད་དབང་འཁོར་འདས་གཞི་གྲོལ། འཕོ་བ་སྙན་བརྒྱུད་མའི་ཟིན་རིས། སྙིང་གཏམ་བསླབ་བྱའི་ཞལ་གདམས་བདུད་རྩིའི་ཐིག་པ་རྣམས་སོ། །ལྔ་པ་སྔ་འགྱུར་བཀའ་མའི་སྐོར་ལ། སྒྱུ་འཕྲུལ་དྲྭ་བ་ཞི་བའི་སྒྲུབ་ཐབས་ཡེ་ཤེས་ཆར་འབེབས། དཀྱིལ་ཆོག་རིན་ཆེན་ཕྲེང་བ། སྒྱུ་འཕྲུལ་དྲྭ་བ་ཁྲོ་བོའི་སྒྲུབ་ཐབས་བདེ་ཆེན་ཆར་འབེབས། དཀྱིལ་ཆོག་རྡོ་རྗེའི་ཕྲེང་བ། འདུས་པ་མདོའི་སྒྲུབ་ཐབས་དངོས་གྲུབ་ཆར་འབེབས། དཀྱིལ་ཆོག་དྲི་མེད་འོད་ཕྲེང་། མདོ་དབང་གི་དོགས་གནས་ལ་དྲི་བའི་ཚེགས་བཅད་ཤོག་གཅིག་མ། མཉམ་སྦྱོར་རིགས་བསྡུས་ཀྱི་སྒྲུབ་ཐབས་བདེ་ཆེན་འདོད་འཇོ། དཀྱིལ་ཆོག་ཀུན་ཏུ་བཟང་པོའི་ཞལ་ལུང་། དབང་ཆོག་བྱིན་རླབས་ཆར་འབེབས། ཡང་དག་ཟླ་གམ་དགུ་པའི་སྒྲུབ་ཐབས་བདེ་ཆེན་ཐིག་ལེ། དཀྱིལ་ཆོག་བདུད་རྩིའི་ཉིང་ཁུ། དབང་ཆོག་བདེ་ཆེན་འཇུག་ངོགས། ཚེ་དཔག་མེད་ལུང་ལུགས་ཀྱི་སྒྲུབ་ཐབས་འཆི་མེད་མཆོག་སྟེར། ན་

― MLP003_Page_0252 ―

^{[མ་དཔེ་གཟིགས་ན་འདིར་གནོན།]}

[Full Size]

རག་དོང་སྤྲུགས་ཀྱི་ཆོ་ག་འཁོར་བ་ཀུན་སྒྲོལ། དོང་སྤྲུགས་པད་མ་བརྒྱ་ལྡན་གྱི་ཆོ་ག་བདེ་ཆེན་ལམ་བཟང་། གནུབས་ལུགས་གཤེད་དམར་གྱི་ལས་བྱང་བདུད་དཔུང་མཐར་བྱེད། འཇམ་དཔལ་ཚེ་བདག་ནག་པོའི་ལས་བྱང་རྡོ་རྗེའི་མེ་ཕྲེང་། གཏོར་བཟློག་བདུད་དཔུང་མཐར་བྱེད། ལེགས་ལྡན་ཚོགས་ཀྱི་བདག་པོའི་སྒྲུབ་ཐབས་རྒྱས་པ་ལས་བཞི་རྣམ་རོལ། བསྡུས་པ་ལས་བཞི་སྙེ་མ། འཆམ་ཡིག་རྣམས་སོ། །དྲུག་པ་སྔ་འགྱུར་གཏེར་མའི་སྐོར་ལ། བླ་མ་གསང་འདུས་ཀྱི་ལས་བྱང་སྙིང་པོ་རབ་གསལ། དབང་ཆོག་དབང་དོན་རབ་གསལ། བསྙེན་ཡིག་ཉུང་གསལ། པད་གླིང་དྲག་པོ་ཡང་གསང་བླ་མེད་ཀྱི་གསང་སྒྲུབ་བསྙེན་པའི་གསལ་བྱེད། བཀའ་བརྒྱད་བདེ་འདུས་ཀྱི་ལས་བྱང་བདེ་ཆེན་རྣམ་རོལ། མངོན་རྟོགས་ཆེ་ཆུང་གི་ཡི་གེསྒྲུབ་ཁོག་དངོས་གྲུབ་གཏེར་མཛོད། རྣལ་འབྱོར་རྒྱུན་དབང་གི་དབང་ཆོག་བདུད་རྩིའི་ཐིག་ལེ། བདུད་རྩི་སྨན་གྱི་སྒྲུབ་ཐབས་གསང་ཆེན་མཆོག་གི་མྱུར་ལམ། ཁྲོ་རོལ་གཏོར་བཟློག་བདུད་དཔུང་ཟིལ་གནོན། ལག་ལེན་མན་ངག་གསལ་བྱེད། འཁོར་ལོའི་རབ་གནས་བྱ་ཚུལ། ཡང་དག་སྙིང་པོའི་ལས་བྱང་ཉུང་གསལ། བསྙེན་ཡིག་ཉུང་གསལ། ཕུར་པ་སྤུ་གྲིའི་ལས་བྱང་ཀུན་བཟང་རོལ་མཚོ། གདབ་ཁའི་ཟུར་འདེབས་ཟིན་རིས་སུ་བཀོད་པ། སྒྲུབ་ཁོག་དངོས་གྲུབ་དགའ་སྟོན། དམར་ཆེན་གཏོར་བཟློག་གི་ལས་རིམ་བདུད་འཇོམས་རྣམ་རོལ། ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་སྒྲུབ་མཆོད་ལ་མཁོ་བའི་ཟུར་འདེབས། དཀྱིལ་འཁོར་དེ་ལ་བརྟེན་པའི་རོ་སྲེག་གི་ཆོ་ག་སྒྲིབ་གཉིས་མུན་སེལ། ཉང་གཏེར་རྟ་མགྲིན་ནག་པོའི་ལས་བྱང་དྲེགས་པ་ཚར་གཅོད། ཁྲོས་ནག་གི་ཚེ་འདས་རྗེས་འཛིན་གནས་ལུང་རོ་སྲེག་དང་བཅས་པ་སྒྲིབ་གཉིས་མུན་སེལ། སྔགས་རྒོད་ལོཀྟྲིའི་ལས་བྱང་སྙིང་པོའི་དོན་གསལ། སྲུང་བཟློག་བསད་པའི་མན་ངག་རྡོ་རྗེའི་ཐོག་འབེབས། པད་གླིང་ལུགས་ཀྱི་ཆོག་ཁྲིགས་ཟིན་ཐོ་རྙོག་པའི་དྲི་བྲལ། རྡོ་རྗེའི་ཆོས་སྐྱོང་རྣམས་ཀྱི་ལས་བྱང་དངོས་གྲུབ་རོལ་མཚོ། དེ་ལས་མ་མགོན་གྱི་ལས་བྱང་གུད་དུ་ཕྱུང་བ། མ་ནིང་གི་ལས་བྱང་ལས་བཞི་མྱུར་འགྲུབ། ཞིང་སྐྱོང་མ་མོའི་ལས་བྱང་འདོད་པའི་རེ་

― MLP003_Page_0253 ―

^{[མ་དཔེ་གཟིགས་ན་འདིར་གནོན།]}

[Full Size]

སྐོང་། དེའི་གཏོར་འབུལ་ཁྱེར་བདེ། གཏོར་མ་རུ་མཚོན་ཟུང་འཇུག་རྣམས་ཀྱི་མན་ངག་ཉུང་གསལ་གོ་བདེ། ཉང་གཏེར་ཕྱག་བཞི་པའི་མདོས་ཆོག་ཁམས་གསུམ་ཟིལ་གནོན། ཞིང་སྐྱོང་མ་མོའི་བསྐང་མདོས་ནམ་མཁའི་མཛོད་རྣམས་སོ། །བདུན་པ་ཟབ་མོ་དག་སྣང་མའི་སྐོར་ལ། གཡའ་བཟང་བའི་ལུགས་ཕྱག་རྡོར་གྱི་སྒྲུབ་ཐབས་སྙིང་པོར་དྲིལ་བ། ཕྱག་རྡོར་སྙན་བརྒྱུད་ཀྱི་གཏུམ་པོའི་སྒྲུབ་ཐབས་ལུས་དཀྱིལ་དང་བཅས་པ། རྒྱ་ཅན་གྱི་ནང་ཚན་འཇིག་རྟེན་དབང་ཕྱུག་གི་དཀྱིལ་ཆོག་ལྷན་ཐབས་ངོ་མཚར་སྣང་བ། བསྙེན་ཡིག་ཉུང་གསལ། བསྙེན་པའི་ཁ་སྐོང་ལ་མཁོ་བའི་སྦྱིན་སྲེག་ཟིན་རིས། དུས་ཐ་མའི་ཆོ་ག་སྒྲིབ་གཉིས་མུན་སེལ། ཡང་གསང་དྲག་པོའི་ཞི་རྒྱས་ཀྱི་སྦྱིན་སྲེག་འདོད་དོན་ལྷུན་གྲུབ། ཕྱག་རྡོར་བདུད་སྡེ་ཕྱེར་འཐག་གི་བརྒྱུད་འདེབས། ལས་བྱང་སྙིང་པོའི་བཅུད་དྲིལ། བསྙེན་ཡིག་སྐལ་བཟང་རེ་སྐོང་། བསྙེན་པའི་ཁ་སྐོང་ལ་མཁོ་བའི་སྦྱིན་སྲེག་སྒྲིབ་གཉིས་མུན་སེལ་རྣམས་སོ། །བརྒྱད་པ་གཏེར་གསར་ཁ་སྐོང་གི་སྐོར་ལ། གཡའ་མ་ལུང་གི་གཏེར་བྱོན་ལ་ཐུགས་ཐིག་གི་སྔོན་འགྲོ་ཕན་བདེའི་ཆར་རྒྱུན། ལས་བྱང་པདྨའི་དགོངས་རྒྱན། དེའི་བུམ་སྒྲུབ་ཟིན་རིས། ལས་བཞིའི་ཛབ་དབྱངས། ཡང་ལས་བྱང་སྙིང་པོར་དྲིལ་བ། བསྙེན་ཡིག་གསལ་བྱེད་སྙིང་པོར་དྲིལ་བ། གསང་སྒྲུབ་ལས་བྱང་སྙིང་པོའི་བཅུད་དྲིལ། ཧཱུྃ་སྒྲུབ་དྲེགས་པ་ཟིལ་གནོན། ཐུགས་རྗེ་ཆེན་པོའི་རྒྱུན་ཁྱེར། ཚེ་སྒྲུབ་ཧྲཱིཿགཅིག་མའི་ཉམས་ལེན་སྙིང་པོར་དྲིལ་བ། ཡང་སྙིང་ཀུན་འདུས་ཀྱི་ལས་བྱང་འཆི་མེད་འདོད་འཇོ། དེའི་རྒྱུན་ཁྱེར། དབང་ཆོག་འཆི་བདག་བདུད་འཇོམས། བརྟན་བཞུགས་ཀྱི་ཁྲིད་རིམ་འཆི་མེད་གྲུབ་པའི་དགའ་སྟོན། ཚེ་ཁྲིད་རྩ་ཐོ། ཞལ་བཞི་པའི་ལས་བྱང་ལས་བཞི་ལྷུན་གྲུབ། བསྟོད་པ་ཀ་ཕྲེང་མ། བསྐང་བ་དཔག་བསམ་སྙེ་མ། དྲག་གཏོར་ལས་རིམ་རྡོ་རྗེའི་ཐོག་མདའ། ཞིང་སྐྱོང་གི་གཏོར་ཆོག་དང་། བསྐང་བ་ཕྲིན་ལས་མྱུར་འགྲུབ། གནམ་ལྕགས་བྲག་གི་གཏེར་བྱོན་ལ། གུ་དྲག་གི་བརྒྱུད་འདེབས། ལས་བྱང་དངོས་གྲུབ་ཆར་འབེབས། ལས་བུམ་སྒྲུབ་ཆོག དྲག་སྒྲུབ་རྒྱུན་

― MLP003_Page_0254 ―

^{[མ་དཔེ་གཟིགས་ན་འདིར་གནོན།]}

[Full Size]

ཁྱེར། བསྙེན་ཡིག་ཉུང་གསལ། བྱིན་རླབས་མཚམས་སྦྱོར་ངག་གི་དཔལ་བསྐྱེད། གཏོར་མའི་ལས་རིམ་དགྲ་བགེགས་ཀུན་འཇོམས། རྒྱལ་འགོང་ཨར་གཏད་ཀྱི་བྱ་ཐབས། སྲེག་པ་གདུག་པ་མཐར་བྱེད། ཧོམ་གྱི་ཡིག་ཆུང་། ཧོམ་མཆོད་དམོད་བྱང་། གཏེར་སྲུང་གི་གསོལ་ཁ། རྡོར་སེམས་ཀྱི་ཆོ་ག་རྣམ་གྲོལ་ལམ་བཟང་། བརྒྱུད་འདེབས་དང་འཕོ་བའི་གསོལ་འདེབས། སྔགས་སྲུང་མའི་ཕྲིན་ལས་དངོས་གྲུབ་འབྱུང་གནས། གཏོར་འབུལ་ཁྱེར་བདེ། རྗེས་གནང་གི་ཆོ་ག་བཀླག་ཆོག་མ། ཤ་འུག་གཏེར་བྱོན་ལ། ཐུགས་རྗེ་ཆེན་པོའི་བརྒྱུད་འདེབས། ཆོ་གའི་ལྷན་ཐབས་སྙིང་པོའི་མཛེས་རྒྱན། བསྙེན་ཡིག་བཀླགས་པས་ཀུན་ཤེས། སྒྲུབ་རྫས་རིལ་བུའི་སྦྱོར་ཚུལ། རྒྱུན་ཁྱེར་ཟབ་ལམ་སྙིང་པོར་དྲིལ་བ། འཕོ་བའི་གསོལ་འདེབས་དང་དམིགས་རིམ། རབ་གནས་ཡེ་ཤེས་བྱིན་འབེབས་ཀྱི་ཆོ་གའི་གསལ་བྱེད། སྦྱིན་སྲེག་གི་ཆོ་ག་འདོད་དོན་མྱུར་འགྲུབ། གར་དབང་ཚེ་དཔག་མེད་ཀྱི་ཕྱི་སྒྲུབ་ཚེ་དབང་དང་བཅས་པ་བདུད་རྩིའི་ཆར་འབེབས། འཆི་བསླུའི་ཆོ་ག་འཆི་བདག་དཔུང་འཇོམས། ལྷ་ཆེན་གྱི་ལས་བྱང་དཔག་བསམ་སྙེ་མ། གཏོར་ཆོག་ཁམས་གསུམ་མྱུར་འགུགས། བསྐང་བཤགས་འདོད་པའི་རེ་སྐོང་། རྗེས་གནང་གི་ཡི་གེ་ཐུན་མོང་མ་ཡིན་པ། གཏོར་འབུལ་ཁྱེར་བདེ། སྨན་བཙུན་མའི་མཆོད་འཕྲིན་སྒྲུབ་པའི་རེ་སྐོང་། གཏེར་སྲུང་གཉིས་ཀྱི་གཏོར་འབུལ་ཁྱེར་བདེ། ཤེལ་བྲག་གཏེར་བྱོན་ལ། གཤིན་རྗེ་གཤེད་ཀྱི་བརྒྱུད་འདེབས། ལས་བྱང་བདུད་ལས་རྣམ་པར་རྒྱལ་བའི་དགའ་སྟོན། རྒྱུན་ཁྱེར་སྙིང་པོ་བསྡུས་པ། བསྙེན་ཡིག་འདོད་འཇོའི་བུམ་བཟང་། བསྙེན་སྒྲུབ་ལས་གསུམ་གྱི་གོ་དོན་མདོར་བསྡུས། དཀྱིལ་ཆོག་ཁྲག་འཐུང་རྣམ་རོལ། དབང་ཆོག་བདེ་ཆེན་འདོད་འཇོ། མནན་པའི་མན་ངག་བསྟན་དགྲ་ཚར་གཅོད། སྲེག་པའི་མན་ངག་དུས་མཐའི་མེ་ཆེན། ཟོར་གྱི་མན་ངག་རྡོ་རྗེའི་ཐོག་མདའ། གཏོར་བཟློག་གི་ལག་ལེན་གནད་ཀྱི་གསེར་ཐུར། མཁྱེན་དགོངས་དམོད་བཅོལ། ལས་གཤིན་གྱི་ཕྲིན་ལས་ཕོ་ཉ་མྱུར་མགྱོགས། རྗེས་གནང་གི་ཆོ་གའི་གསལ་བྱེད་རྣམས་སོ། །དགུ་པ་ལྷག་པའི་ལྷ་སྣ་ཚོགས་ཀྱི་སྒྲུབ་སྐོར་ལ། སྒྲུབ་ཐབས་འདོད་འཇོའི་བུམ་བཟང་

― MLP003_Page_0255 ―

^{[མ་དཔེ་གཟིགས་ན་འདིར་གནོན།]}

[Full Size]

བརྒྱུད་ཡིག་དང་བཅས་པ། ཆོས་སྐྱོང་གི་སྲོག་གཏད་རྗེས་གནང་གི་བཀའ་བསྒོའི་དཔེར་བརྗོད། རྩ་གསུམ་རབ་འབྱམས་ཀྱི་སྒྲུབ་ཐབས་ནོར་བུའི་ཕྲེང་བ། ཐུགས་རྗེ་ཆེན་པོ་རྒྱལ་པོ་ལུགས་ཀྱི་སྒྲུབ་ཐབས་རིལ་སྒྲུབ་དང་བཅས་པ། སྒྲོལ་དཀར་གྱི་སྒྲུབ་ཐབས་འཆི་མེད་མཆོག་རྩོལ། དབྱངས་ཅན་མའི་སྲེག་ཆོག་སྙིང་པོར་དྲིལ་བ། ཞང་བློན་གྱི་རྗེས་གནང་གྲུབ་པའི་ཞལ་ལུང་། ཛམ་དམར་གྱི་སྒྲུབ་ཐབས་འདོད་དགུའི་གཏེར་མཛོད། ཆུ་སྦྱིན་བསམ་འཕེལ་ནོར་བུ། གཡུ་སྒྲོན་མའི་ཕྲིན་ལས་འདོད་འཇོའི་སྙེ་མ། ཚངས་པའི་གསོལ་མཆོད། རོང་ལྷ་རྒྱལ་མཚན་གྱི་མཆོད་ཕྲིན། སྐུ་འབུམ་བརྟན་མའི་གསོལ་མཆོད་རྣམས་སོ། །བཅུ་པ་བླང་དོར་བཅའ་སྒྲིག་གི་སྐོར་ལ། བཤེས་པའི་གཏམ་དུ་བྱ་བ་བདེ་སྐྱིད་འབྱུང་གནས། སྨིན་གྲོལ་གླིང་འདུས་སྡེའི་བཅའ་ཡིག་མ་བུ། འདུས་སྡེ་དུ་མའི་བཅའ་ཡིག་ཀུན་ལས་བཏུས་པ་རྣམས་སོ། །བཅུ་གཅིག་པ་རྐྱེན་སེལ་ཕན་བྱེད་སྐོར་ལ། བཀའ་བསྒོ་བྱེད་ཚུལ། སྨེ་བརྩེགས་ཀྱི་ཁྲུས་ཆོགརྣམ་འཇོམས་ཀྱི་སྒྲུབ་ཐབས་ཁྲུས་ཆོག་དང་བཅས་པ་རྒྱས་བསྡུས། གཏུམ་པོའི་དུག་སྦྱོང་། བྱད་འགྲོལ་གསེར་ལྡེའི་སྒྲུབ་ཐབས་དང་ལག་ལེན་གསལ་བྱེད། བརྒྱ་བཞིའི་ཆོ་ག་རྣམས་སོ། །བཅུ་གཉིས་པ་ཕྲིན་ལས་རྗེས་འཛིན་གྱི་སྐོར་ལ། གཤིན་པོ་རྗེས་འཛིན་གྱི་ཆོ་ག་ཐར་པའི་མྱུར་ལམ། བར་དོའི་ཆོས་བཤད་ཐོས་པས་རྣམ་གྲོལ། རབ་གནས་ཀྱི་ཆོ་ག་རྒྱས་པ་དགེ་ལེགས་འདོད་འཇོ། འབྲིང་པོ་རྒྱུད་དོན་རབ་གསལ། བསྡུས་པ་རྒྱུད་དོན་སྙིང་པོ། ཡོན་བདག་བགོ་བའི་སྟོང་ཐུན་རྒྱས་བསྡུས། ཞི་རྒྱས་ཀྱི་སྦྱིན་སྲེག་དངོས་གྲུབ་རྒྱ་མཚོ། ཞི་བ་ལས་ཐམས་ཅད་པའི་སྲེག་ཆོག་ཕྲིན་ལས་འདོད་འཇོ། བསིལ་གཏོར་གྱི་ཆོ་ག་གངྒའི་ཆུ་རྒྱུན། བུ་ཡིག་བདུད་རྩིའི་སྤྲིན་ཕུང་། བྲུལ་གཏོར་ཆ་ལྔ་པ། ཀླུ་གཏོར་གདེངས་ཅན་འདོད་འཇོ། ཆབ་གཏོར་འཇམ་དཔལ་མའི་གཏོར་ཆོག་སྙིང་པོར་དྲིལ་བ། དེའི་རྫས་ཀྱི་ལག་ལེན། ཆ་གསུམ་གྱི་ཆོ་ག་ཡིད་བཞིན་འདོད་འཇོ་རྣམས་སོ། །
བཅུ་གསུམ་པ་གསུང་ཐོར་བུ་སྣ་ཚོགས་ཀྱི་སྐོར་ལ། བསང་མཆོད་བདུད་རྩིའི་སྤྲིན་ཕུང་དང་། འཁྲུལ་རྟོག་རང་སངས། གསུར་མཆོད་འདོད་ཡོན་སྤྲིན་ཕུང་། ཇ་མཆོད་ཀུན་བཟང་མཆོད་སྤྲིན། ཆང་མཆོད་དང་ནང་མཆོད་སྙིང་པོར་དྲིལ་བ། ཚོགས་བརྒྱའི་ལག་ལེན། དྭངས་མ་བཅུད་འདྲེན་གྱི་དངོས་གྲུབ་ལེན་པའི་ཟིན་རིས། ཨོ་རྒྱན་གླིང་གི་གྲྭ་ཚང་ལ་གནང་བའི་ཕྲིན་བཅོལ། རྡུལ་ཚོན་ཆུ་བོར་གཤེགས་པའི་ཆོ་གསྤོས་སྦྱོར་ཡོངས་འདུའི་དྲི་བསུང་། མགོན་པོ་དང་རྣམ་སྲས་ཀྱི་སྤོས་སྦྱོར། མཆོད་སྡོང་ཆེན་མོའི་རབ་གནས་གནང་ཚུལ། བཀའ་རྩོམ་ཐོར་བུའི་སྐོར་འདོད་དགུའི་སྒོ་འཕར་འབྱེད་པའི་ལྡེ་མིགཞིང་སྐྱོང་མ་མོར་གནས་གཏད་ཀྱི་ཕྲིན་བཅོལ་རྣམས་ཏེ། སླད་མའི་ཆར་ཡང་གདུལ་བྱ་འདུལ་བའི་ཡུལ་དུས་དང་འཚམས་པར་འཇུག་པའི་བཀའ་རྩོམ་ཟབ་རྒྱས་རྒྱུན་ཆགས་སུ་མཛད་པར་འགྱུར་རོ། །ཤེར་དབང་ཞུ་བདེའི་ཡེ་ཤེས་ཀྱི་དཔེས་དབང་བཞི་པ་དོན་གྱི་ཡེ་ཤེས་ཀྱི་རྟོགས་པའི་ཉམས་མྱོང་རིམ་གྱིས་གོམས་པས་གཙོ་བོར་ཐུགས་ཀྱི་འགྲོ་དོན་མཛད་ཚུལ།

དབང་བཞི་པའི་རྟོགས་པའི་ཉམས་མྱོང་གོམས་པས་ཐུགས་ཀྱི་འགྲོ་དོན་མཛད་ཚུལ།

― MLP003_Page_0256 ―

^{[མ་དཔེ་གཟིགས་ན་འདིར་གནོན།]}

[Full Size]

༈ གསུམ་པ་ཤེར་དབང་ཞུ་བདེའི་ཡེ་ཤེས་ཀྱི་དཔེས་དབང་བཞི་པ་དོན་གྱི་ཡེ་ཤེས་ཀྱི་རྟོགས་པའི་ཉམས་མྱོང་རིམ་གྱིས་གོམས་པས་གཙོ་བོར་ཐུགས་ཀྱི་འགྲོ་དོན་མཛད་ཚུལ་ནི། དགུང་ལོ་སོ་བརྒྱད་པ་ཁྲག་སྐྱུགས་ཞེས་པ་ཆུ་མོ་ཕག་ལོ་ཁྲུམས་ཀྱི་ཟླ་བ་ལ་གསང་བ་ཡེ་ཤེས་ཀྱི་ཌཱཀྐི་མ་སྒྱུ་འཕྲུལ་ངོ་མཚར་གྱི་རྣམ་རོལ་དུ་འཆར་བའི་རང་གཟུགས་ནུས་འབྱིན་ས་ལེ་སོགས་སྐྱེས་རབས་ཀྱི་ཕྲེང་བར་སྨོན་ལམ་གྱི་འབྲེལ་པས་མཚམས་སྦྱར་ནས། བདེ་ཆེན་ཡེ་ཤེས་འདྲེན་པའི་ལམ་གྱི་ཕོ་ཉར་ཡོངས་སུ་གྲུབ་སྟེ། ཤེས་རབ་ཨེ་དབྱིངས་སུ་ཐབས་མཆོག་རོལ་པའི་རྗེས་ཆགས་ཀྱི་རླུང་གཡོས་པས་དམར་ཆ་འབར་བའི་དྲོད་ཀྱིས། དཀར་ཆ་ཝཾ་ཡིག་བདུད་རྩིར་ཞུ་བ་དགའ་བཞིའི་འགྲོས་ཀྱིས་རླུང་སེམས་དབུ་མར་འགགས་པའི་ཞུ་བདེ་ཁྱད་པར་ཅན་ལ་བརྟེན་ནས་དོན་གྱི་ཡེ་ཤེས་བསམ་གྱིས་མི་ཁྱབ་པའི་ལྷན་ཅིག་སྐྱེས་པའི་དེ་ཁོ་ན་ཉིད་སྐུ་དང་ཡེ་ཤེས་ཟུང་དུ་འཇུག་པ་དབྱེར་མེད་བདེ་བ་ཆེན་པོ་མཆོག་གི་ཏིང་ངེ་འཛིན་བརྙེས་པས་རྟོག་པའི་སྤྲིན་ཚོགས་མི་རྟོག་ནམ་མཁའི་རྡོ་རྗེ་ཉིད་དུ་གྲུབ་ཅིང་། དེའི་ཚེ་མནལ་ལམ་འོད་གསལ་ཡེ་ཤེས་ཀྱི་སྣང་བ་ལ་རྡོ་རྗེ་རྣལ་འབྱོར་མ་བདེན་གཉིས་ཞལ་ཅན་སྐུ་མདོག་དམར་མོ་འོད་ཟེར་འཕྲོ་བ་འཛུམ་ཁྲོ་གཟི་མདངས་རྒྱས་པའི་སྐུའི་རྣམ་པ་གཟིགས་པས་ཐུགས་

― MLP003_Page_0257 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་འཇིགས་སྐྲག་དང་དགྱེས་པའི་སྣང་བ་ཕན་ཚུན་འགྲན་པ་ལྟར་བཟོད་མེད་དུ་འབར་བ་ལས། དེའི་ཐུགས་གསང་སྒོ་ཕྱེ་བ་ལྟ་བུའི་ནང་ཆེས་ཡངས་པའི་ཞིང་ཁམས་ནགས་ཀླུང་རི་བྲག་མེ་ཏོག་གི་ཚལ་སོགས་ངོ་མཚར་བཀོད་པས་མཛེས་པའི་དབུས་ན། ཡེ་ཤེས་ཀྱི་ཌཱ་ཀི་ནཱི་པདྨ་ཅན་མཛེས་སྡུག་རྒྱས་པའི་འགྱུར་བག་དང་ལྡན་པ། སྐུ་དང་ཆ་ལུགས་རྣམ་འགྱུར་སྣ་ཚོགས་པའི་འཁོར་ཚོགས་དུ་མའི་དབུས་སུ་དགྱེས་པར་རོལ་ཞིང་། གླུ་གར་རོལ་མོའི་སྒྲ་སྙན་འཁྲོལ་ཞིང་རྩེད་འཇོའི་རྣམ་འགྱུར་གྱིས་སྒྱུ་འཕྲུལ་འགག་མེད་དུ་འཆར་བའི་གསལ་སྣང་གི་ངང་ལ་ཐུགས་འདྲེས་ཏེ་རྟོག་མེད་དུ་ཆམ་གྱིས་སོང་བའི་མཐར། འཁོར་རྣམས་གཅིག་ལ་གཅིག་ཐིམ་གྱིས་གཙོ་མོ་ཉིད་ལ་བསྡུས་ཤིང་། དེ་ཉིད་ལ་དགྱེས་པ་ཆེན་པོའི་རྗེས་ཆགས་ཀྱི་རོལ་མོས་སྙོམས་པར་ཞུགས་པའི་ཚེ། བདེ་བ་ཆེན་པོའི་ཡེ་ཤེས་ཀྱི་ཉམས་རྣོ་ལ་ངར་བ་གསལ་རིག་རྗེན་ནེ་བའི་གཤིས་མཁའ་ཁྱབ་སྤྲོས་བྲལ་རང་རིག་གི་ངོ་བོར་རྟོགས་པའི་ཡེ་ཤེས་ལ་དབང་འབྱོར་ཞིང་། སླར་ཡང་སྐུ་ལུས་དྭངས་གསལ་སྒྲིབ་ཐོགས་མེད་པ་ཤེལ་ལྟར་དྭངས་པར་རྟེན་རྩའི་ཕོ་བྲང་དུ་བརྟེན་པ་བྱང་ཆུབ་སེམས་ཀྱི་ཐིག་ལེ་འགྲོ་འོང་བྱེད་པའི་ཚུལ་གྱིས་ཞུ་བདེའི་ཡེ་ཤེས་འབར་བའི་ཤེས་ཉམས་དང་། འོད་གསལ་གྱི་རང་གདངས་སྒྱུ་ལུས་ཀྱི་དཀྱིལ་འཁོར་རྣམ་ཀུན་མཆོག་ལྡན་གྱི་སྟོང་གཟུགས་སྐུ་དང་ཡིག་འབྲུ་ལ་སོགས་པའི་རྣམ་པ་པྲ་ཕབ་པའི་མེ་ལོང་གི་གཟུགས་བརྙན་ལྟར་གསལ་བར་ཤར་བའི་སྣང་ཉམས་རབ་འབྱམས་ཀྱི་ངང་ནས། ཤེས་རབ་མ་འོད་ཀྱི་གོང་བུ་དཀར་གསལ་ཝཾ་ཡིག་དམར་པོས་མཚན་པར་ཞུ་བ་ཡུད་ཀྱིས་སྐུ་ལ་ཐིམ་པས། སྟོང་ཉམས་ནམ་མཁའ་ལྟར་དྭངས་པའི་མཐར། གཉིད་འཐུག་གི་འོད་གསལ་བདེ་སྟོང་ཟུང་འཇུག་གི་ཉམས་ཤིན་ཏུ་བརྟན་པ་ལ་ཡུན་རིང་གནས་པའི་ངང་ནས་སད་པར་གྱུར་ཅིང་། སད་ནས་ཀྱང་ཞག་འགའི་བར་ཐུགས་ལ་བདེ་སྟོང་གི་ཉམས་དང་སྟོང་གཟུགས་ཀྱི་རོལ་པ་རྩོལ་མེད་དུ་འཆར་བ་བྱུང་། དེ་ལྟར་རླུང་སེམས་དབུ་མར་འགག་པའི་ཞུ་བདེ་ཁྱད་པར་ཅན་ཐོབ་པ་དེ་ཉིད་རིམ་གྱིས་གོམས་པས་གཏུམ་མོ་འབར་བའི་སེམས་ཉིད་དང་རོ་གཅིག་ཏུ་འདྲེས་པའི་རྣམ་ཀུན་མཆོག་ལྡན་གྱི་སྟོང་གཟུགས་ཕྱག་

― MLP003_Page_0258 ―

^{[མ་དཔེ་གཟིགས་ན་འདིར་གནོན།]}

[Full Size]

རྒྱ་ཆེན་པོར་གྱུར། དེ་དང་རྗེས་ཆགས་ཀྱི་རྐྱེན་གྱིས་འཛག་མེད་ཀྱི་ཞུ་བདེ་ཤར་བའི་སྐད་ཅིག་གཉིས་པར་ཞུ་བདེའི་རྟེན་ཐིག་ལེ་དེ་ཡང་འབྱུང་ལུས་སུ་སྣང་བ་དག་ནས་སྟོང་གཟུགས་ཕྱག་རྒྱ་ཆེན་པོར་གྱུར་པས། བརྟེན་པ་སེམས་ཀྱི་བདེ་བའང་མཆོག་ཏུ་མི་འགྱུར་བའི་བདེ་བ་ཆེན་པོར་གྱུར་ཏེ། ལས་རླུང་འབྱུང་འཇུག་དང་ཉི་ཟླའི་རྒྱུ་བ་འཕོ་མེད་དུ་དགའཁོར་འདས་གཉིས་འཛིན་གྱི་འཁྲི་བ་གཞི་དབྱིངས་སུ་ཆོད། སྣང་སྲིད་ཐམས་ཅད་དག་པར་རབ་འབྱམས་རྒྱལ་བ་ཞི་ཁྲོའི་དཀྱིལ་འཁོར་ཆེན་པོར་འབྱམས་ཀླས་པར་ཤར་བས་མ་དག་པའི་ལས་སྣང་ནུབ། ཆོས་ཐམས་ཅད་ཀྱི་རང་བཞིན་ཀ་དག་གཞི་རྫོགས་འཕོ་འགྱུར་མེད་པའི་དབྱིངས་སུ་བྱང་ཆུབ་པས་མཉམ་རྗེས་རེས་འཇོག་གི་ཤུན་པ་བུད། རྣམ་རྟོག་གི་འཆིང་བའི་སྤྲིན་ཚོགས་ཐམས་ཅད་རྣམ་པར་མི་རྟོག་པའི་ཡེ་ཤེས་མཉམ་ཡངས་ཁྱབ་བརྡལ་ཆེན་པོའི་ངང་རང་གྲོལ་བས་ཐུགས་ཀྱི་འགྲོ་དོན་ལ་ཤས་ཆེར་སྤྱོད་པའི་དུས་ཡིན་པའི་ཕྱིར། དེ་ཕྱིན་ཆད་ནས་སྤྱིར་གདུལ་བྱའི་བློ་དང་བསྟུན་པའི་ཆོས་བཀའ་ཟབ་རྒྱས་རིས་མེད་དུ་སྩོལ་བ་ཡིན་ནའང་ཁྱད་པར་ཟབ་ཁྲིད་ཀྱི་གདམས་པ་ཉིད་གོ་ཡུལ་གྱི་ཚིག་བཤད་ཙམ་མིན་པར་ལྟ་སྒོམ་གྱི་མྱོང་བ་མངོན་སུམ་རིག་ཐོག་ཏུ་ངོ་སྤྲོད་པར་མཛད་པས་སྐལ་ལྡན་རྣམས་རང་བྱུང་གི་ཡེ་ཤེས་ཞལ་བལྟ་བ་ལ་བཙན་ཐབས་སུ་དཀྲི་བའི་ཕྲིན་ལས་ཁོ་ན་གཙོ་བོར་བདག་གིར་བཞེས་པས། ཐུགས་རྗེའི་བྱིན་རླབས་གདུལ་བྱའི་རྒྱུད་ལ་ཞུགས་པས། དུས་ཀྱི་ཐ་མ་འདི་ལྟ་བུར་ཡང་སྐྱོ་ཤས་དང་། ངེས་འབྱུང་དང་། དག་སྣང་གི་མོས་གུས་ཕུལ་དུ་བྱུང་བ་མངའ་བའི་སྐལ་ལྡན་གྱི་འདུས་པ་མང་དུ་འཚོགས་ཏེ། དེ་ཡང་མཁའ་འགྲོ་སྙིང་ཐིག་གི་ཁྲིད་མོ་ཆེས་མཚོན་ཁྲིད་ཞུ་མི་མང་དུས་ཉིས་བརྒྱ་ཙམ་དང་། ཕལ་ཆེར་བརྒྱ་ཕྲག་ཙམ། ལྔ་བཅུ་དང་། བཞི་བཅུ་ཙམ་ནས། ཉུང་དུས་བཞི་ལྔ་རེའི་མཐའ་བརྟེན་པའི་བར་གྱི་ཚོགས་པ་ནར་མར་འབྱུང་ཞིང་། དེའང་ཉིན་རེ་བཞིན་ཁྲིད་ཁག་གི་གྲངས་ཀྱང་། ཟབ་ཁྲིད་ཐ་དད་པ་མང་དུས་ཁག་ལྔ་རེ་ཙམ་དང་། ཐ་ནའང་གཉིས་གསུམ་རེའི་བར་འབྱུང་བ་ལས། ད་ལྟའི་ཆུ་མོ་སྦྲུལ་ལོ་འདི་ཡན་ཆད་ལ་ཟབ་ལམ་གྱི་ཁྲིད་ཇི་ལྟར་འདེབས་པར་མཛད་པའི་གྲངས་ཞམ་རིང་རྣམས་ཀྱིས་ཟིན་ཐོར་

― MLP003_Page_0259 ―

^{[མ་དཔེ་གཟིགས་ན་འདིར་གནོན།]}

[Full Size]

ཐེབས་པ་རགས་ཙམ་ཞིག་འདིར་ཕྱོགས་གཅིག་ཏུ་བསྡོམས་ནས་བཀོད་པ་ལ། སྔ་འགྱུར་བཀའ་མའི་སྐོར་ལ། གཉན་དཔལ་དབྱངས་ནས་བརྒྱུད་པའི་སྒྱུ་འཕྲུལ་ལམ་རིམ་གྱི་ཁྲིད། འདུས་པ་མདོའི་ཐེག་རིམ་གྱི་ཁྲིད། རྫོགས་ཆེན་སེམས་སྡེའི་གཞུང་ཁྲིད་དང་། ཨ་རོ་སྙིང་ཐིག་གི་ཁྲིད་རྣམས་ཚར་གཉིས་རེ། སེམས་སྡེ་མ་བུ་བཅོ་བརྒྱད་ཀྱི་དབང་དོན་གྱི་ཁྲིད་ལྔ། ཀུན་མཁྱེན་ཆེན་པོའི་ལུགས་སྒྱུ་འཕྲུལ་ཟབ་ལམ་གྱི་ཁྲིད། ན་རག་དོང་སྤྲུགས་ཀྱི་ཁྲིད། ཀློང་སྡེ་རྡོ་རྗེ་ཟམ་པའི་ཁྲིད་རྣམས་གསུམ་རེ། གཏེར་མའི་སྐོར་ལ། རང་གཏེར་རིག་འཛིན་ཐུགས་ཐིག་གི་རྫོགས་རིམ་ངེས་དོན་སྙིང་པོའི་ཁྲིད་ཉིས་བརྒྱ་དང་བདུན་ཅུ་དོན་དགུ། རྡོ་རྗེ་སེམས་དཔའི་ཐུགས་ཀྱི་སྒྲུབ་པའི་རྩ་ཁྲིད་ཉི་ཤུ་རྩ་བརྒྱད། ཁྱད་པར་གྱི་རྫོགས་རིམ་གྱི་ཁྲིད་བཅོ་ལྔ། རྨི་ལམ་གྱི་ཁྲིད་གཉིས། གཅོད་ཁྲིད་བརྒྱད། འཕོ་ཁྲིད་སུམ་བརྒྱ་དང་ལྔ་བཅུ་ང་ལྔ། ཨ་ཏི་ཟབ་དོན་སྙིང་པོའི་ཁྲིད་བདུན་ཅུ་དོན་བརྒྱད། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་རྩ་ཁྲིད་དྲུག་ཅུ་རེ་བདུན། གཏུམ་མོ་ཟབ་རྒྱ་བཅུ་གཅིག་པའི་ཁྲིད་ཉི་ཤུ་རྩ་བཞི། ཐབས་ལམ་བདེ་ཆེན་སྙིང་པོའི་ཁྲིད་བཅུ་གཅིགཟབ་དོན་ཐུགས་ཀྱི་རྫོགས་རིམ་ཨ་ཏིའི་ཁྲིད་བཞི། དུས་གསུམ་སངས་རྒྱས་མའི་གསོལ་འདེབས་དང་སྦྱར་བའི་བླ་མའི་རྣལ་འབྱོར་གྱི་ཁྲིད་སུམ་བརྒྱ་དང་དྲུག་ཅུ་རེ་གཉིས། གཏེར་རྙིང་ལ། བི་མ་ལའི་སྙིང་ཐིག་མ་བུའི་ཁྲིད་བཅུ་དགུ། མཁའ་འགྲོ་སྙིང་ཐིག་གི་ཁྲིད་བཞི་བཅུ་ཞེ་གཅིགཐུགས་རྗེ་ཆེན་པོ་རྒྱལ་པོ་ལུགས་ཀྱི་ཁྲིད་ཉི་ཤུ་རྩ་བརྒྱད། བཀའ་བརྒྱད་བདེ་འདུས་ཀྱི་བསྐྱེད་རིམ་གྱི་ཁྲིད་དང་། ཉང་གཏེར་ཁྲོས་ནག་གི་ཁྲིད་གཉིས་བཞི་རེ། ཆོས་དབང་བླ་མ་གསང་འདུས་ཀྱི་ཁྲིད། པད་གླིང་ཀུན་བཟང་དགོངས་འདུས་ཀྱི་ཁྲིད། ནོར་བུ་རྒྱ་མཚོའི་ཁྲིད། ཚེ་ཁྲིད་རྡོར་ཕྲེང་གི་ཁྲིད། སངས་རྒྱས་གླིང་པའི་རྫོགས་ཆེན་སྙིང་པོ་གསེར་ཞུན་གྱི་ཁྲིད། རྫོགས་ཆེན་ཡང་ཏི་ནག་པོའི་ཁྲིད་རྣམས་ཚར་གསུམ་རེ། འཇམ་དཔལ་རྫོགས་ཆེན་གྱི་ཁྲིད་བདུན། བྱང་གཏེར་ཡང་ཐིག་གཅེས་སྒྲོན་གྱི་ཁྲིད་བཅུ། ཕག་མོ་ཟབ་རྒྱའི་གཏུམ་མོའི་ཁྲིད་ལྔ། ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་ཁྲིད་བཅུ་དྲུགབྱང་གཏེར་བླ་མ་སྐུ་གསུམ་མའི་ཁྲིད་བཞི། ཉི་ཟླ་སངས་རྒྱས་ཀྱི་

― MLP003_Page_0260 ―

^{[མ་དཔེ་གཟིགས་ན་འདིར་གནོན།]}

[Full Size]

འཕོ་བ་སྙན་རྒྱུད་མའི་ཁྲིད་བརྒྱད་ཅུ། རྒྱ་ཅན་དྭངས་མ་བཅུད་འདྲེན་གྱི་ཚེ་ཁྲིད་ཚར་གཉིས། ནཱ་རོ་མཁའ་སྤྱོད་མའི་རྣལ་འབྱོར་ཁྲིད་བཅུ་གཅིགརྩ་དབུ་མའི་ཁྲིད་བཅུ་བདུན། མ་གཅིག་གི་གཅོད་ཁྲིད་ལྔ་བཅུ་ང་གསུམ། བློ་སྦྱོང་དོན་བདུན་མའི་ཁྲིད་ཚར་གསུམ། སྙིང་པོ་དོན་གསུམ་གྱི་ཁྲིད་དང་། ཀར་ལུགས་ཕྱག་ཆེན་ལྔ་ལྡན་གྱི་ཁྲིད་གཉིས་རེ། བཀའ་གདམས་ལྷ་བཞིའི་ནང་གི་སྒྲོལ་མའི་ཁྲིད་ཚར་གཅིག་རྣམས་སོ། །གཞན་ཡང་བསྙེན་སྒྲུབ་བྱེད་མི་རྣམས་ཀྱི་དམིགས་སྐོར་ལྗགས་ཁྲིད་དུ་མཛད་པའི་ཡི་དམ་མང་པོའི་ལྷ་ཁྲིད་དང་། དེ་དག་དང་རྗེས་འབྲེལ་གྱི་ངག་བཟླས། འགོག་བཟླས། རྡོ་རྗེའི་བཟླས་དམིགས། རྗེས་གཞིག་གི་རྣལ་འབྱོར་དང་། ཕྲ་ཐིག་གི་རྫོགས་རིམ། གདུལ་བྱའི་བློ་དང་འཚམས་པའི་གྲུབ་མཐའ་རིས་མེད་ཀྱི་བླ་མའི་རྣལ་འབྱོར་དང་ཡི་དམ་གྱི་ལྷ་ཡི་སྒོམ་བཟླས་མང་པོ། འོད་དཔག་མེད་ཀྱི་ཉལ་སྒོམ་དང་། སྤྱན་རས་གཟིགས་ཀྱི་དམར་ཁྲིད་སོགས་ཁྲིད་ཆུང་ཆོས་ཐུན་རེ་རེ་གཉིས་གཉིས་སུ་མཛད་པ་མཐའ་ཡས་པ་ཞིག་སྣང་མོད་ཀྱང་། ཕྲན་ཚེགས་རྣམས་ཟིན་ཐུན་དུ་མ་འཁོད་པས་འདིར་འགོད་པར་མ་ནུས་ཤིང་། སླད་ནས་ཀྱང་རང་གནས་རང་བྱུང་གི་ཡེ་ཤེས་ཞལ་བལྟ་བ་ལ་དཀྲི་བའི་ཟབ་ལམ་གྱི་གདམས་ཁྲིད་འཁོར་བ་ཇི་སྲིད་པ་དེ་སྲིད་དུ་སྟོན་པར་མཛད་པའི་དོན་ལ་བསྙེལ་བ་མ་མཆིས་པ་ཡིན་ནོ། །དེ་ལྟར་ཟབ་ལམ་གྱི་ཁྲིད་འདེབས་པར་མཛད་པ་རྣམས་ཀྱང་། ཟོག་མའི་འུར་ཁྲིད། འདོད་པོ་ཆེའི་སྤུངས་ཁྲིད། ཆེན་པོའི་མོལ་ཁྲིད། གོ་ཡུལ་ཅན་གྱི་དཔྱད་སྒོམ་རྣམས་དང་། ཁྲིད་དཔེ་བློ་ལ་བཟུང་བའི་བཤར་སྦྱངས་ལྟ་བུ་མ་ཡིན་པར། གདུལ་བྱའི་བློ་དང་འཚམས་པར་སོ་སོའི་ཉམས་མྱོང་གི་སྣེ་ནས་ཁྲིད་མཁས་པས། སྒོམ་བློ་བསམ་གཏན་གྱི་འཆིང་བས་མ་བཅིངས་པར། རིག་པ་རྗེན་ལ་འབུད་པའི་གནད་ཀྱིས་གཞི་ཐོག་ནས་བསླང་སྟེ་བཞི་ཆ་གསུམ་བྲལ་གྱི་ཆོས་སྐུ་གཅེར་མཐོང་མཛུབ་ཚུགས་སུ་རང་ངོ་སྤྲོད་པར་མཛད་པའི་ཐབས་ལ་མཁས་པའི་ཕྱིར། བཙན་ཐབས་སུ་ངོ་འཕྲོད་པར་འགྱུར་ལ། དེའི་གནད་ཀྱི་རྗེ་འདི་ལ་ཁྲིད་ཞུས་པ་ལ་དགེ་སྦྱོར་གྱི་སྣེ་མ་ཟིན་པ་མི་འབྱུང་ཞིང་། གནས་སྐབས་ཁྲིད་གྲྭར་འདུ་བའི་

― MLP003_Page_0261 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱོད་ལམ་ཡང་། ཆོས་བརྡ་བྱུང་བ་དང་རིམ་གྱིས་འདུས་ཏེ། ཆོས་ཐུན་རྣམས་རིམ་པར་སྩོལ་བ་ལས། ཁྲིད་ཁག་རྟིང་མ་རྣམས་སྒུག་པའི་ཚེའང་རང་རང་གི་སྡེ་ཚན་འདུས་ནས་དད་པ་དང་གདུང་ཤུགས་ཀྱིས་གསོལ་འདེབས་འུར་དིང་དིང་འདོན་པས་ཐམས་ཅད་སྣང་བ་འགྱུར་འགྲོ་བ་དང་། རྗེ་བཙུན་འདིའི་ཞབས་དྲུང་དུ་སེམས་ཁྲིད་ཐོབ་པ་ཐམས་ཅད་ཀྱང་། སྤྱོད་རྩིང་ཁ་ལྟ་མཁན་དུ་མི་འགྲོ་བར་སྐྱོ་ཤས་དང་ངེས་འབྱུང་བྱམས་སྙིང་རྗེའི་ལྷག་བསམ་དག་སྣང་དང་མོས་གུས། རྒྱུ་འབྲས་ཀྱི་བླང་དོར་རྣམས་ལ་བློ་འབྱོངས་པས་སེམས་རྒྱུད་དུལ་ཞིང་། ཁྱད་པར་སྐལ་ལྡན་ཟབ་ལམ་གྱི་རྟོགས་པ་ངོ་འཕྲོད་པས་ཉམས་མྱོང་ལ་དྲོད་ཚད་ཐོབ་པ་མང་དུ་ཐོན་པ་ཡིན་ནོ། །དེ་ལྟར་བླ་མ་དམ་པའི་བྱིན་རླབས་ཐུགས་རྒྱུད་ལ་ཞུགས་པས་སྒྲོ་འདོགས་མཚན་མའི་སྤྲོས་པ་ཐམས་ཅད་ནང་ནས་ཆོད་དེ། འཁོར་བའི་ས་བོན་འབྱིན་པའི་འཇུག་པ་ཟད་ཅིང་། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་དང་སྐུ་གསུང་ཐུགས་རོ་མཉམ་པའི་བདག་ཉིད་ཅན་དུ་གྱུར་པས་ཕྲིན་ལས་ཀྱི་འགྲོ་དོན་མཁའ་མཉམ་ཁྱབ་བརྡལ་དུ་སྤྱོད་པའི་དུས་ཡིན་པའི་ཕྱིར། མཛད་སྤྱོད་ཐམས་ཅད་རང་དོན་གྱི་འཁྲི་བ་ལས་རྣམ་པར་གྲོལ་ནས་བསྟན་འགྲོའི་ཕན་བདེ་འབའ་ཞིག་ཐུགས་སུ་གཅགས་པའི་སྙིང་སྟོབས་རྨད་དུ་བྱུང་བས་བཤད་སྒྲུབ་ལས་གསུམ་གྱི་ཕྲིན་ལས་འགྲན་ཟླ་དང་བྲལ་བ་བདག་གིར་བཞེས་པའི་བྱང་ཆུབ་སེམས་ཀྱི་རྟེན་འབྲེལ་གྱིས་སྙན་པའི་གྲགས་པ་ཟླ་རེ་ཞག་རེས་ཇེ་ཆེ་ཇེ་ཆེར་སོང་ནས་ཕྱོགས་ཀྱི་འཁོར་ལོར་ཡོངས་སུ་ཁྱབ་པས་མཁས་ཤིང་གྲུབ་པ་བརྙེས་པའི་སྐྱེས་ཆེན་དང་། འཇིག་རྟེན་གྱི་མི་ཆེན་སོགས་ཆེ་དགུ་ཐམས་ཅད་ཀྱིས་ཀྱང་ཞབས་ལ་བཏུད་ཅིང་གསུང་གི་བདུད་རྩི་བཞེས་པས་མཚོན་ཞལ་སློབ་ཏུ་གྱུར་པའི་སྐལ་ལྡན་གྱི་གྲངས་ནི་བགྲང་བར་མི་སྤྱོད་པ་ཡིན་ཏེ། དེ་ལྟར་ཡང་རང་གཏེར་ཤ་འུག་གཏེར་བྱོན་གྱི་ལུང་བྱང་ལས། རིགས་སྲས་རྟ་མགྲིན་སྤྲུལ་པ་ནི༔ རྡོ་རྗེའི་མིང་གིས་འགྲོ་དོན་སྤྱོད༔ དམ་ལྡན་ཆོས་བདག་སློབ་མ་ནི༔ ད་ལྟའི་མངའ་བདག་ཡབ་སྲས་སོགས༔ ས་ཐོབ་རྗེ་འབངས་སྐྱེ་བའི་མཐའ༔ འགྲོ་དོན་

― MLP003_Page_0262 ―

^{[མ་དཔེ་གཟིགས་ན་འདིར་གནོན།]}

[Full Size]

ནུས་པ་སུམ་ཅུ་ལྔ༔ རང་དོན་གྱུར་པ་བརྒྱ་རྩ་བརྒྱད༔ ཆོས་ཀྱི་འབྲེལ་པ་སྟོང་ཚོ་གཉིས༔ སྨོན་ལམ་འབྲེལ་པ་ཁྲི་ཕྲག་ལྔ༔ ལས་ཀྱིས་འབྲེལ་པ་དྲུག་ཅུ་བདུན༔ གདུགས་ཐོགས་བདུན་གྱིས་ཞབས་ནས་འདེགས༔ མི་ཆེན་གསུམ་གྱིས་མངའ་ཐང་སྤེལ༔ བཟང་པོའི་འབྲེལ་ཅན་ཁྲི་ཕྲག་གཉིས༔ ཞེས་སོགས་གསུང་ཤིང་། ཐུགས་ཐིག་གི་ལུང་བྱང་ལས། དེ་སོགས་རྩ་བའི་ཆོས་བདག་ལྔ་པོ་ལ༔ འཁོར་གྱི་ཚུལ་དུ་རིག་འཛིན་བུ་བཅུ་གཅིག༔ གདམས་པས་སྨིན་གྲོལ་ནུས་པ་སུམ་ཅུ་ལྔ༔ ཕྱིར་མི་ལྡོག་པའི་ས་ཐོབ་དཔག་མེད་འབྱུང་༔ ཞེས་དང་། གབ་རྒྱ་ཅན་གྱི་ལུང་བྱང་དུ། རྩ་བའི་ཆོས་བདག་དྲུགསྐུ་ལྔ་མཚོན་པ་ཕྱིའི་ཆོས་བདག་ལྔ། ཕ་རོལ་ཕྱིན་དྲུག་མཚོན་པ་ནང་གི་ཆོས་བདག་དྲུགཚད་མེད་བཞི་མཚོན་པ་གསང་བའི་ཆོས་བདག་བཞི་རྣམས་སོ་སོའི་སྤྲུལ་གཞི་དང་མཚན་ཟུར། ཡུལ་ཕྱོགས་སོགས་ཀྱི་སྒོ་ནས་ལུང་གསལ་བར་བསྟན་ཅིང་། ཡང་གབ་རྒྱ་ཅན་གྱི་ལུང་བྱང་སྙིང་གཏམ་གསང་བའི་ཡི་གེ་ལས་ཀྱང་། འགྱུར་མེད་རྩ་བའི་ཆོས་ཀྱི་བདག༔ བྱང་སེམས་རིག་འཛིན་རྣམ་པར་ལྔ༔ ཚུལ་བཞིན་དྲོད་ཐོབ་བཅུ་གཅིག་སྟེ༔ གཞན་དོན་ནུས་པ་སུམ་ཅུ་ལྔ༔ ཕྱིར་མི་ལྡོག་པའི་ས་ཐོབ་པ༔ ལས་དང་ལྡན་པ་བརྒྱ་ཕྲག་གཅིག༔ ཅེས་དང་། ཡང་དེ་ལས། ལས་ལྡན་ཆོས་ཀྱི་བདག་པོ་དང་༔ འཆུག་མེད་རྟེན་འབྲེལ་འགྲིག་གྱུར་ན༔ མཛད་པ་ཕྲིན་ལས་མཐར་ཕྱིན་ཅིང་༔ ཕན་དང་བདེ་བ་དཔག་མེད་འབྱུང་༔ འགྲོ་དོན་ལྷག་མ་ཀོང་ཁམས་དང་༔ དབུ་རུའི་ཕྱོགས་རྣམས་ཀུན་ལ་དར༔ ཁྱད་པར་གཡོ་རུ་གཙང་མའི་སར༔ འདི་ཉིད་འཆད་ཅིང་སྒྲུབ་པའི་སྡེ༔ ཚོམ་བུ་གཅིག་ཏུ་འདུས་པ་དག༔ བརྩོན་པས་བསྒྲུབ་ན་འགྲུབ་འགྱུར་ཞིང་༔ མ་འོངས་བསྟན་པ་ཆེར་འཕེལ་ཏེ༔ བོད་ཀྱི་བདེ་སྐྱིད་གོང་དུ་སྤེལ༔ ཞེས་སོགས་རྒྱ་ཆེར་གསུངས་ཤིང་། དེ་ལྟར་སྐལ་ལྡན་ཆོས་ཀྱི་བདག་པོར་རྡོ་རྗེའི་ཚིག་གིས་ལུང་བསྟན་པའི་དོན་རྣམས་ཀྱང་། གབ་རྒྱ་ཅན་ལས། ང་དང་ཁྱོད་བར་འཕྲིན་པ་གཞན་མེད་པས༔ གདུང་ཤུགས་གསོལ་བ་ཐོབ་ཅིག་ལུང་སྟོན་འགྱུར༔ ཞེས་གསུངས་པ་ལྟར། དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་ཨོ་རྒྱན་གྱི་སློབ་དཔོན་ཆེན་པོ་པདྨ་ཀཱ་རའི་ཡེ་ཤེས་ཀྱི་སྐུས་བླང་དོར་གྱི་གནས་རྣམས་དངོས་སུ་འདོམས་

― MLP003_Page_0263 ―

^{[མ་དཔེ་གཟིགས་ན་འདིར་གནོན།]}

[Full Size]

པ་བཞིན་རྗེ་གཏེར་ཆེན་བླ་མ་དམ་པ་ཉིད་ཀྱི་འདི་དང་འདིའོ་ཞེས་ངོས་འཛིན་པར་མཛད་པ་ལས། རང་བློར་ངེས་པ་རྣམས་སོ་སོའི་མཚན་ནས་སྨོས་པ་སྐབས་སུ་བབས་ནའང་ཡི་གེའི་འཇིགས་པས། འདིར་ཞལ་སློབ་ཏུ་གྱུར་པ་ཡོངས་ལ་གྲགས་ཆེ་བ་འགའ་ཞིག་སྨོས་ན། གཙོ་བོར་ཇི་སྙེད་མཁྱེན་པའི་ཡེ་ཤེས་ཀྱིས་ཤེས་བྱའི་དཀྱིལ་འཁོར་མ་ལུས་པ་མཁྱེན་ཅིང་། ཇི་ལྟ་མཁྱེན་པའི་ཡེ་ཤེས་ཀྱིས་ཤེས་བྱ་ཐམས་ཅད་ཀྱི་མཚན་ཉིད་སྒྲིབ་བྲལ་དུ་གཟིགས་པའི་ཀུན་མཁྱེན་རྒྱལ་མཆོག་ལྔ་པ་ཆེན་པོས་སྨིན་གྲོལ་གདམས་པའི་བདུད་རྩི་མཐའ་ཡས་པ་ཞིག་དགྱེས་པ་ཆེན་པོས་གསན་ཏེ། མི་ཕྱེད་པའི་ཐུགས་ཀྱི་དྭངས་བ་ཆེན་པོས་གསུང་གི་ཆ་ཤས་ཕྲ་མོ་རེ་ཙམ་ལའང་ཚད་མར་འཛིན་པའི་སྒོ་ནས་ཏི་ཤྲཱིར་བཀུར་བའི་བསྟོད་སྔགས་ཆེན་པོ་མཛད་ལ། དེས་མཚོན་ཏེ་གོང་གི་ཁྲི་ལ་མངའ་དབང་བསྐུར་བ་གོང་ཞབས་རྒྱ་ཕེབས་དང་། ས་སྐྱ་པ་གདན་ས་གོང་མ་བདག་ཆེན་ངག་དབང་ཀུན་དགའ་བཀྲ་ཤིས། འོག་མ་རྩེ་གདོང་ཁྲི་ཆེན་བསོད་ནམས་བསྟན་འཛིན་དང་བདག་ཆེན་རྒྱན་པ་ཁུ་དབོན་གསུམ། ལྷ་གཟིགས་ཕག་མོ་གྲུབ་པ་བློ་བཟང་མཁྱེན་བརྩེའི་དབང་ཕྱུག་ཡབ་སྲས། སྟག་ལུང་ཞབས་དྲུང་རྣམ་རྒྱལ་ལེགས་གྲུབ་དང་། བཀྲ་ཤིས་ཆོས་རྒྱལ་ཁུ་དབོན། མ་ཐང་ངག་གི་དབང་ཕྱུགའབྲི་གུང་པ་དཀོན་མཆོག་ཆོས་གྲགས། ཆབ་མདོ་འཕགས་པ་ལྷ་སྐུ་ཕྲེང་ལྔ་པ་རྒྱལ་བ་རྒྱ་མཚོ། སྒམ་པོ་སྤྲུལ་པའི་སྐུ་བཟང་པོ་རྡོ་རྗེ་དང་། དེའི་སྤྲུལ་པའི་སྐུ་འབྲུག་པ་མི་ཕམ་དབང་པོ་སྟེ་བླ་ཆེན་འགྲན་ཟླ་དང་བྲལ་བ་རྣམས་དང་། མི་དབང་ཆོས་ཀྱི་རྒྱལ་པོ་དཔལ་ལྡན་སངས་རྒྱས་རྒྱ་མཚོས་མཚོན་གངས་ལྗོངས་ཁྲིམས་ཀྱི་བདག་པོ་སྡེ་སྲིད་ན་རིམ་བཞི། སྐྱིད་ཤོད་ཞབས་དྲུང་རྡོ་རྗེ་རྣམ་རྒྱལ། ཁྲི་དཔོན་སྣ་དཀར་རྩེ་པ་དང་། གླིང་པ། ལྷ་རྒྱ་རི་པ། བྱ་ས་ཁྲི་དབོན། ཐོན་པ་མདོ་མཁར་པ་སོགས་དཔོན་ཆེན་དང་དཔོན་སྐྱ་སྟེ་མི་ཆེན། བསྟན་པ་གསལ་བར་མཛད་པའི་བཤེས་གཉེན་སྐུའི་སྲས་ཞབས་དྲུང་སྐུ་མཆེད་རྣམས་དང་། གསུང་གི་སྲས་སུ་འབྲེལ་བ་རིག་འཛིན་མཆོག་གི་སྤྲུལ་པའི་སྐུ་ཀུན་བཟང་པདྨ་ཕྲིན་ལས། ཐུགས་སྲས་སྤྲུལ་པའི་སྐུ་བསྟན་འཛིན་འགྱུར་མེད་སྐུ་ཕྲེང་སྔ་རྟིང་། གསུང་སྤྲུལ་ཀུན་བཟང་རྡོ་རྗེ།

― MLP003_Page_0264 ―

^{[མ་དཔེ་གཟིགས་ན་འདིར་གནོན།]}

[Full Size]

ཟུར་ཆེན་སྤྲུལ་སྐུ་ཀུན་དགའ་བསོད་ནམས། ཉང་སྟོན་བློ་མཆོག་རིག་པའི་རྡོ་རྗེ། རྒྱ་སྟོན་འོད་གསལ་རང་གྲོལ། དེའི་སྤྲུལ་སྐུ་ལྕེ་སྟོན་ངག་དབང་ཀུན་བཟང་རང་གྲོལ། དཔལ་རི་སྤྲུལ་སྐུ་ངག་དབང་ཀུན་བཟང་པདྨ། ཐང་འབྲོག་སྤྲུལ་སྐུ་ཀུན་བཟང་ལེགས་གྲུབ་པདྨ་བཞད་པའི་རྡོ་རྗེ། བྲེས་སྤྲུལ་སྐུ་ཆོས་ཀྱི་དབང་ཕྱུག་རྡོ་རྗེ་འཛིན་པ། བོན་ལུང་པ་ལེགས་ལྡན་ཚུལ་ཁྲིམས། མེ་རག་བླ་མ་པདྨ་འཕྲིན་ལས་དབང་ཕྱུགཟུར་ཡང་འུག་གི་ཞབས་དྲུང་། འབྲོ་སྒྲོལ་མ་པ། གཏེར་ཁ་གོང་འོག་གི་གདུང་བརྒྱུད། ཀོང་པོ་དང་རོང་པ་རྫོགས་ཆེན་སྤྲུལ་སྐུ། མདོ་ཁམས་པ་པདྨ་རིག་འཛིན། ཀཿཐོག་རྒྱལ་སྲས་པ། བླ་མ་ཁྱབ་བདལ། བ་ཟལ་བླ་མ་ཡེ་ཤེས་སོགས་ད་ལྟའི་དུས་ཀྱི་རྙིང་མའི་བསྟན་འཛིན་ཕལ་མོ་ཆེ་ཞལ་སློབ་ཏུ་མ་གྱུར་པ་མེད་ལ། གཞན་ཡང་ངམ་རིང་མཁན་ཆེན་ཆག་པ་ཆོས་འཕེལ། ཕ་བོང་ཁ་པ་འཇམ་དབྱངས་གྲགས་པ་དང་། ཞལ་སྔ་ནས་ངག་དབང་བསྟན་འཛིན། དེ་མོ་སྤྲུལ་པའི་སྐུ། རྟ་ཚག་རྗེ་དྲུང་། དཱ་ལི་ཧོ་ཐོག་ཐུ་ངག་དབང་བཤད་སྒྲུབ་རྒྱ་མཚོ། སྤྱན་ཡས་མཁན་པོ་ཆོས་པ་སྐུ་སྐྱེ། གླིང་སྟོད་ཁྲི་ཆེན་ཉི་ཐང་སྤྲུལ་སྐུ། བྱམས་གླིང་མཁན་པོ་ངག་དབང་ཤེས་རབ། ར་སྒྲེང་མཁན་པོ་བློ་བཟང་ཆོས་གྲགས། རི་བོ་བདེ་ཆེན་མཁན་པོ་ངག་དབང་དཀོན་མཆོགཆབ་ནག་མཁན་པོ་ངག་དབང་བློ་གསལ་མཆོག་གྲུབ། རྒྱལ་མཁན་པོ་ངག་དབང་དཔལ་མགོན་སོགས་དགེ་ལུགས། ཞྭ་ལུ་མཁན་ཆེན་རིན་ཆེན་བསོད་ནམས་མཆོག་གྲུབ་དང་། འཇམ་དབྱངས་བསྟན་འཛིན། མཉྫུ་ཤྲཱི་སྟེ་མཁན་ཐོག་གསུམ། གནས་གསར་རྗེ་དབོན་བློ་གསལ་མཆོག་ལྡན་སྐུ་མཆེད། ངོར་མཁན་ཆེན་ཐར་རྩེ་པ་དང་། མི་ཉག་པ་ཚུལ་ཁྲིམས་དཔལ་བཟང་། གྲྭ་ཐང་མཁན་པོ་ངག་དབང་བསྟན་འཛིན་ཕུན་ཚོགས་ཁུ་དབོན། སྐྱེ་ཆུ་མཁན་པོ་ངག་དབང་འཇམ་དཔལ། གནས་འཛི་བླ་མ་བྱམས་པ་ཕུན་ཚོགས་རྣམ་རྒྱལ། རྨོར་ཆེན་ཀུན་དགའ་ལྷུན་གྲུབ། སྐྱེད་ཚལ་གོང་གི་མཁན་རབས་གསུམ་དང་འོག་གི་གཉིས། གསེར་མདོག་ཅན་མཁན་པོ་སོགས་ས་ལུགས། ཡོངས་འཛིན་ཀུན་དགའ་ལྷུན་འགྲུབ་སྐུ་ཕྲེང་སྔ་རྟིང་། དྲེའུ་ལྷས་སྤྲུལ་པའི་སྐུ་མངའ་རིས་རྒྱལ་སྲས་པ། བདག་པོ་སྤྲུལ་སྐུ། ཁམས་པ་སྤྲུལ་སྐུ། བསམ་གཏན་རྫོང་སྤྲུལ་སྐུ་སོགས་

― MLP003_Page_0265 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲུག་ལུགས། ཏྲེ་བོ་སྤྲུལ་པའི་སྐུ་བློ་བཟང་ཆོས་དབང་། རྒྱལ་སྲས་རིན་ཆེན་གྲུབ་མཆོགལྷ་ཕུ་སྤྲུལ་སྐུ་མཆེད་སོགས་ཀར་ལུགས། སྦྱོ་ར་འཇིགས་མེད་གྲུབ་པ་ཡབ་སྲས། བསམ་སྡིངས་པ་བདེ་ཆེན་ཕྲིན་ལས་མཚོ་མོ། མངོན་དགའ་རྗེ་དབོན་ནམ་མཁའ། དིང་རི་བ་བློ་གྲོས་བརྟན་པ་སོགས་བོ་ལུགས། ཀུན་སྤང་ལྷ་བཙུན་རྡོ་རྗེ། གྲུབ་པའི་དབང་ཕྱུག་བློ་གྲོས་རྒྱ་མཚོ། བྱ་རྒོད་པ་ཆོས་སྐྱོང་རྒྱལ་མཚན། རྩེ་ཆེན་འཁྲུལ་ཞིག་རིག་འཛིན་རྣམ་རྒྱལ། ཆོས་སྐུ་ཀློང་ཡངས་འོད་གསལ། གྲུབ་རྒྱ་དགེ་སློང་གྲུབ་དབང་འགྱུར་མེད་ཀློང་གྲོལ་སོགས་ནང་ལ་མཆོག་ཏུ་གཞོལ་བའི་བྱ་བཏང་རྣལ་འབྱོར་གྱི་དབང་ཕྱུག་སྟེ། མདོར་ན་བདག་ཉིད་མཉམ་རྗེས་ཁོར་ཡུག་གི་ཏིང་ངེ་འཛིན་འོད་གསལ་ཡེ་ཤེས་ཀྱི་ཐུགས་ལས་ནམ་ཡང་མི་གཡོ་བཞིན་ཏུ་བཤད་སྒྲུབ་ཀྱི་ཕྲིན་ལས། དབུས་གཙང་ཁམས་ཀོང་ལྷོ་མོན་མངའ་རིས་སོགས་ནས་དད་འདུས་ཀྱི་སྐལ་ལྡན་མཆོག་དམན་མཐའ་ཡས་པ་རྣམས་སོ་སོའི་ཇོ་དང་འཚམས་པའི་དབང་ཁྲིད་བཤད་ལུང་ཡོངས་སུ་རྫོགས་པ་དང་། དབང་རྐྱང་ལུང་རྐྱང་ཙམ་གྱི་ཆོས་སྒོ་དུ་མས་ཀྱང་བསྟན་པ་གསལ་བར་མཛད་ཅིང་། དེར་མ་ཟད་ཞལ་མཐོང་བ་དང་། གསུང་གི་ཆ་ཤས་ཐོས་པ་དང་། ཟང་ཟིང་ཙམ་གྱིས་བསྙེན་བཀུར་བ། འཕྲལ་གྱི་བྱ་བ་རིགས་པ་དང་མི་རིགས་པའི་བསླབ་བྱའི་གནས་འདོམས་པར་མཛད་པའི་གདུལ་བྱར་ཇར་གྱུར་ཟིན་དང་། སླད་ནས་འབྱུང་འགྱུར་ཐམས་ཅད་ཀྱང་རྗེ་ཉིད་ཀྱི་སྨོན་ལམ་གྱི་མཐུས་དཔལ་རི་པདྨ་འོད་ཀྱི་ཞིང་ཁམས་སུ་རིག་འཛིན་གྱི་གྲལ་དུ་འགྱུར་ངེས་པ་ཡིན་ཏེ། གབ་རྒྱ་ཅན་གྱི་ལུང་བྱང་ལས། འདི་འདྲའི་སྐྱེས་བུ་འབྲེལ་ཚད་དོན་དང་ལྡན༔ བཟང་ངན་འབྲེལ་ཚད་དཔལ་རིའི་ཞིང་དུ་འཁྲིད༔ ཅེས་གསུངས་པ་ཡིན་ནོ། །བྱ་བ་ལས་ཀྱི་འཁོར་ལོའི་ཕྲིན་ལས་ཀྱང་། ལྷ་མིའི་གཙུག་རྒྱན་གོང་ཞབས་ཡས་ཕྱིན་གྱིས་གནས་གཞིའི་ས་ཡུལ་ལྷ་འབངས་དང་བཅས་པས་མཚོན་མཁོ་དགུའི་ཡོ་བྱད་བླ་ན་མེད་པ་ལྷུག་པར་སྩལ་བ་དང་། དད་ཅན་རྣམས་ཀྱིས་ཕུལ་བའི་དངོས་པོ་རྣམས་སྲི་ཚགས་དང་གསོག་རུམ་གྱིས་མཛོད་ཕུག་མའི་སྒོ་ལྕགས་མི་སྡོམ་ཞིང་བར་མ་དོར་ཆུད་མི་འཛའ་བར་

― MLP003_Page_0266 ―

^{[མ་དཔེ་གཟིགས་ན་འདིར་གནོན།]}

[Full Size]

བསོད་ནམས་ཀྱི་རྒྱུར་འགྱུར་བའི་ཆེད་དུ་སྡོམ་པ་གསུམ་གྱིས་རྒྱུད་བསྡམས་ཤིང་བཤད་སྒྲུབ་ཀྱི་བྱ་བས་དུས་འདའ་བའི་འདུས་སྡེ་ཨོ་རྒྱན་སྨིན་གྲོལ་གླིང་གི་དགེ་འདུན་ཐོག་མར་བཞི་བཅུ་སྐོར་ཚུགས་པ་ལས། དེང་སང་སུམ་བརྒྱར་ཉེ་བ་གསར་དུ་བསྡུ་བར་མཛད་ནས། དུས་བཞིའི་འཆད་ཉན་གྱི་ཆོས་གྲྭ་དང་། དཀྱིལ་འཁོར་དུ་མའི་སྒྲུབ་མཆོད། གཞི་གསུམ་གྱི་ཕྱག་བཞེས་རྣམས་ཀྱི་སྲོལ་བཟང་པོ་བཏོད་པ་ལས། ཕོག་ཇ་ཚུལ་སོགས་རུང་བའི་རྙེད་བཀུར་གྱིས་མི་བྲེལ་བར་རྒྱུན་ཆགས་པ་དང་། དུས་བཞིའི་སྒྲུབ་མཆོད་སོ་སོའི་འཕར་མའི་བསྙེན་བཀུར་ཕུལ་དུ་བྱུང་བ་དེ་དག་གི་མཆོད་པའི་རྫས་དང་། སྔགས་ཀྱི་ཕྱག་བཞེས་ཀྱི་ཡོ་བྱད་རྒྱུ་བཟང་ཞིང་བཀོད་པས་འཕགས་པ་དུ་མ། གནས་མལ་གྱི་གཙུག་ལག་ཁང་ཀ་བ་བརྒྱད་ཅུ་གྱ་བཞིའི་ཁྱོན་ཐོག་རིམ་གསུམ་པ་རྩེ་མོར་གསེར་གྱི་གཉྫི་ར་ལྔ་དང་། ལི་མ་ལྷ་ཁང་གི་སྟེང་དུ་གཉིས། ཕྱི་རོལ་འཁོར་ས་བྲང་ཁང་དང་བཅས་པ། དེའི་བྱང་ངོས་སུ་བླ་བྲང་ཆོས་འཁོར་ལྷུན་པོ་ལྟེ་བ་ཀ་བ་ལྔ་བཅུའི་ཁྱོན་ཐོག་རིམ་གསུམ་པ་འཕྱུར་བུའི་རྩེར་གསེར་གྱི་རྒྱ་ཕིབས། གཉྫི་ར་དང་བཅས་པ་མདུན་གྱི་ལན་ཀན་ལ་གསེར་གྱི་རྒྱལ་མཚན་གཉིས་བསྒྲེངས་ཤིང་། ཕྱི་རོལ་དུ་མིག་རྩེ་རིས་ཀྱི་ཁང་བྲན་དུ་མས་མཛེས་པ། དེ་གཉིས་ཀྱི་བར་དུ་སྒྲུབ་མཆོད་ཁང་པ་གསང་སྔགས་ཕོ་བྲང་ཀ་བ་བཞི་བཅུ་ཞེ་བརྒྱད་ཀྱི་ཁྱོན་ཐོག་རིམ་གཉིས་པ་རྩེ་མོར་གསེར་གྱི་གཉྫི་ར་དང་། ཟུར་བཞིར་གཡུ་ཆུའི་གཉྫི་ར་བཞིས་བརྒྱན་པ། དེ་རྣམས་སུ་བཞུགས་པའི་སྐུ་རྟེན་སྨན་འདམ་ལ་འབུར་དུ་བྱས་པ་དང་། རིན་པོ་ཆེ་ལ་བརྡུང་པའམ་ལུགས་སུ་བླུགས་པ། ཙནྡན་ལ་བརྐོས་པའི་སྐུ་དང་། ལྡེབ་རིས་ཀྱི་སྣང་བརྙན་ཚར་དུ་དངར་བ། གཞན་ཡང་བྲིས་ཐང་མང་པོ་དང་། བཟང་གོས་ལས་གྲུབ་པའི་ཐུབ་དབང་གནས་བརྟན་བཅུ་དྲུག་དང་། གུ་རུ་མཚན་བརྒྱད་ཀྱི་ཡོལ་ཐང་། ཨོ་རྒྱན་སངས་རྒྱས་གཉིས་པའི་གོས་ཐང་ཆེན་མོ་སོགས་སྐུའི་རྟེན་གསར་བཞེངས་བགྲང་བ་ལས་འདས་པ་དང་། གསུང་གི་རྟེན་གསེར་དངུལ་དང་སྐྱ་པོད་ཀྱི་བཀའ་འགྱུར་གཉིས་ཀྱིས་མཚོན་གླེགས་བམ་གསར་བཞེངས་བདུན་བརྒྱར་ཉེ་བ་དང་། བཀའ་བསྟན་གྱི་གཞུང་འགྲེལ། ཞལ་འདོན་སྐོར་གྱི་ཆོག་ཕྲིན།

― MLP003_Page_0267 ―

^{[མ་དཔེ་གཟིགས་ན་འདིར་གནོན།]}

[Full Size]

རྣམ་ཐར་རིག་གནས་སོགས་ཀྱི་པར་མང་པོ། ཐུགས་རྟེན་སྐུ་འབུམ་མཐོང་གྲོལ་ཆེན་མོ་བཀྲ་ཤིས་པའི་སྒོ་འཕར་མང་པོ་ཅན་རྩ་བ་ས་འཛིན་གྱི་ཟུར་གཅིག་ནས་ཅིག་ཤོས་ཀྱི་ངོས་རེའི་རྒྱར་འདོམ་བཅུ་གཅིགགློ་འབུར་གྱི་ཐད་ཀའི་ཕྱོགས་ནས་ཕྱོགས་ཀྱི་རྒྱར་འདོམ་ཕྱེད་བཅུ་གཉིས། རྩ་བ་ནས་རྩེ་མོའི་གཉྫི་རའི་བར་གྱི་དཔངས་ལ་ཐོག་ཚད་བཅུ་གཅིག་པ། ནང་ལྷུན་པོའི་ཁོངས་སེང་ལྟར་ཡངས་པ་ལ་བྱམས་ཁང་སོགས་ལྷ་ཁང་རིམ་པ་བཞི། ཕྱིའི་ཁོར་ཡུག་གྲུ་བཞིའི་ཕྱོགས་རེར་འདོམ་ཉི་ཤུ་རྩ་བཞིས་བསྐོར་བའི་ཕྱོགས་དང་ཟུར་བཞི་ལ། མདུན་ངོས་ཕྱི་སྒོའི་གློར་ཆོས་ཁྲིའི་ཐོག་གཡུ་ཕིབས་ཀྱི་སྟེང་གསེར་གྱི་འཁོར་ལོ་གདུགས་ཀྱིས་ཕུབ་པའི་གཡས་གཡོན་དུ་རི་དྭགས་དང་བཅས་པ། ཕྱོགས་མཚམས་གཞན་རྣམས་སུ་བྱང་ཆེན་ལ་སོགས་པའི་མཆོད་རྟེན་ལྷག་མ་བདུན་དང་། དེའི་ཕྱི་རོལ་མདུན་ངོས་སུ་ཆོས་བཟང་བདེ་ཡངས་དང་བཅས་པ་སྟེ། དེ་རྣམས་སུ་རྟེན་གསུམ་གསར་བཞེངས་ཀྱི་སྟེང་། ཡུལ་ཕྱོགས་གཞན་ནས་བསོད་ནམས་ཀྱི་ཞིང་དུ་སྤྱན་འདྲོངས་པའི་རྒྱ་ལི་དང་རྒྱ་ནག་མ་བོད་ལྷ་སོགས་སྐུ་རྟེན་མཐའ་ཡས་པ་དང་། མཚལ་པར་མ་དང་སྐྱ་པོད་གཉིས་གཉིས་ཏེ་བཀའ་འགྱུར་བཞིས་མཚོན་པའི་ཡུམ་རྒྱས་འབྲིང་ལ་སོགས་པའི་བཀའ་པོད་མང་པོ། བསྟན་འགྱུར་ཚར་གཉིས། མདོ་སྔགས་གསར་རྙིང་རིས་མེད་ཀྱི་གླེགས་བམ་གཙུག་ལག་ཁང་གི་དཔེ་མཛོད་ལྷོ་བྱང་དང་། བླ་བྲང་གི་ཕྱག་དཔེ་ནང་མའི་སྐོར་སོགས་གསུང་རྟེན་བསམ་གྱིས་མི་ཁྱབ་པ། དངུལ་གྱི་བདེ་གཤེགས་མཆོད་རྟེན་བརྒྱད་སོགས་ཐུགས་རྟེན་མང་པོ། དེ་ཐམས་ཅད་ཀྱི་སྤྱན་སྔར་ངོ་བོ་བཟང་ཞིང་བཀོད་པ་ཕུལ་དུ་བྱུང་བའི་གནམ་རྒྱན་དང་སྤྱན་གཟིགས་སོགས་རྒྱན་དུ་མས་བཀླུབས་ཤིང་མཆོད་རྫས་མང་པོས་ཡོངས་སུ་གཏམས་པས་འགྲོ་བ་མཐའ་དག་གི་བསོད་ནམས་ཀྱི་ཞིང་དམ་པར་མངོན་པར་འདུ་མཛད་པ་སྟེ། དེ་ལྟར་གཏོང་བ་ཕུན་སུམ་ཚོགས་པ་ལ་ཆེས་གོམས་པས་རིས་མེད་པའི་མཆོད་སྦྱིན་གྱི་ཡུལ་རྣམས་ལ་ཚོགས་གཉིས་ཀྱི་རྒྱུར་ལྷུག་པར་གཏོང་བ་སོགས་བསྟན་འགྲོའི་ཕན་བདེ་རྒྱས་པར་མཛད་པའི་དགེ་བའི་ལས་རླབས་པོ་ཆེ་བདག་གིར་བཞེས་པ་ནི་ངོ་མཚར་རྨད་དུ་བྱུང་བའི་ཕྲིན་ལས་སོ། །

རང་གི་གདུལ་བྱ་རྣམས་སྨིན་གྲོལ་ལ་འགོད་པའི་ཕྲིན་ལས་རྒྱ་ཆེ་རྒྱུན་མི་ཆད་པའི་ཚུལ།

― MLP003_Page_0268 ―

^{[མ་དཔེ་གཟིགས་ན་འདིར་གནོན།]}

[Full Size]

༈ ལྔ་པ་རང་གི་གདུལ་བྱ་རྣམས་སྨིན་གྲོལ་ལ་འགོད་པའི་ཕྲིན་ལས་རྒྱ་ཆེ་རྒྱུན་མི་ཆད་པའི་ཚུལ་ནི། གདུལ་བར་བྱ་བའི་ཡུལ་མཁའ་ཁྱབ་ཀྱི་སེམས་ཅན་མ་ལུས་ཤིང་ལུས་པ་མེད་པ་ཐམས་ཅད་ལ་གང་གི་ཐུགས་རྗེས་གཟིགས་པའི་ཚུལ་ཡང་གདུལ་བྱ་དང་འདུལ་བྱེད་དུ་འབྲེལ་ནས་དོན་མཛད་པ་ཡིན་ཏེ། དེ་ཅིའི་ཕྱིར་ཞེ་ན། རང་ཉིད་སྒྲིབ་གཉིས་བག་ཆགས་དང་བཅས་པ་རྣམ་པར་དག་པས་ཞི་བའི་དབྱིངས་སུ་བླ་ན་མེད་པའི་གོ་འཕང་བརྙེས་ཀྱང་། ཇི་སྙེད་མཁྱེན་པའི་ཡེ་ཤེས་ཀྱིས་གདུལ་བར་བྱ་བའི་ཡུལ་ས་ལེར་གཟིགས་ནས། མེད་སྣང་འཁོར་བའི་སྡུག་བསྔལ་ལ་སྤྱོད་པའི་འགྲོ་བ་རྣམས་བརྩེ་བ་ཐུགས་རྗེ་ཆེན་པོའི་ཡུལ་དུ་དགོངས་ཏེ། རང་རང་གི་སྐལ་བ་དང་འཚམས་པར་འདུལ་བར་མཛད་པའི་ཐབས་མཁས་ཀྱི་ཕྲིན་ལས་འབད་རྩོལ་མེད་པར་ངང་གིས་འབྱུང་བ་ཉིད་དེ། སྒྱུ་འཕྲུལ་རྩ་རྒྱུད་གསང་བའི་སྙིང་པོ་ལས། ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་གསུངས། དེའི་ཕྱིར་བདག་ཅག་གི་དཔལ་ལྡན་བླ་མ་དམ་པ་འདིས་ཀྱང་བསྟན་འགྲོའི་དོན་རླབས་པོ་ཆེ་མཛད་བཞིན་པར་ད་ལྟ་དགུང་ལོ་དྲུག་ཅུ་རེ་བརྒྱད་ཀྱི་ཐོག་ཏུ་ཕེབས་ཏེ། ད་དུང་ཡང་འཕགས་པ་རྣམས་བསམ་གྱིས་མི་ཁྱབ་པའི་རྫུ་འཕྲུལ་ལ་དབང་འབྱོར་བའི་ཕྱིར། ནམ་མཁས་གར་ཁྱབ་ཀྱི་སེམས་ཅན་ཐམས་ཅད་བདག་ཉིད་ཆེན་པོའི་གོ་འཕང་མཆོག་ལ་འགོད་པའི་ཕྲིན་ལས་རྒྱ་ཆེ་རྒྱུན་མི་ཆད་པ་དེ་སྲིད་དུ། གཟུགས་ཀྱི་སྐུ་འདི་ཉིད་ཀྱང་བདེ་ལྡན་གྱི་ཞིང་གི་མགོན་པོ་ལྟར་གཡོ་མེད་དུ་བཞུགས་ནས། གདུལ་བྱ་འཁོར་དུ་མ་འདུས་པ་རྣམས་སྡུད་པ་དང་། བསྡུས་པ་རྣམས་སྨིན་པ་དང་། སྨིན་པ་རྣམས་གྲོལ་བ་དང་། གྲོལ་བ་རྣམས་མཐར་ཕྱིན་པའི་ལམ་ལ་འགོད་པའི་ཕྲིན་ལས་འཁོར་བ་མ་སྟོང་གི་བར་ཇི་སྲིད་པ་དེ་སྲིད་དུ་མཛད་པ་གདོན་མི་ཟ་ཞིང་། དེ་ལས་མ་གཡོས་བཞིན་དུ་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པར་སྣང་བས་ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པར་ཁྱབ་པའི་ཕྲིན་ལས་ཀྱིས་འདུལ་བར་མཛད་པ་ལས། ཞིང་འདིའི་གདུལ་བྱའི་ཆ་ཤས་འགའ་ཞིག་ལ་

― MLP003_Page_0269 ―

^{[མ་དཔེ་གཟིགས་ན་འདིར་གནོན།]}

[Full Size]

མཐུན་པར་འཇུག་པའི་དབང་དུ་བྱས་ཏེ། སླད་མའི་ཆར་ཡང་སྐུའི་བཀོད་པ་གསུམ་དུས་གཅིག་ཏུ་བསྟན་ནས་འགྲོ་བའི་དོན་མཛད་པར་འགྱུར་པའང་། རང་གཏེར་ཤ་འུག་གཏེར་བྱོན་གྱི་ལུང་བྱང་ལས། ཚེ་མཇུག་དམ་གཙང་ཡོན་བདག་དང་༔ གསང་སྤྱོད་རྟེན་འབྲེལ་འཛོམ་པ་ན༔ རི་བོ་རྩེ་ལྔའི་ཟབ་གཏེར་འདོན༔ མཐའ་དམག་ལོ་བརྒྱའི་བར་དུ་བཟློག༔ རྐྱེན་གྱིས་གཡེལ་ན་ཕྱི་མའི་དུས༔ འགྲོ་འདུལ་རྣལ་འབྱོར་བརྟུལ་ཞུགས་སྤྱོད༔ སྔ་མའི་ལས་སད་སྐལ་བ་ཅན༔ དེ་ཡིས་བཏོན་ནས་འགྲོ་ཕན་བྱེད༔ ཅེས་དང་། སྐྱེ་སྲིད་ཕྱི་མ་བོད་ཡུལ་འདིར༔ རྒྱལ་པོའི་ཚུལ་གྱིས་སྲིད་སྡེ་སྐྱོང་༔ ཆོས་ཀྱི་ཁྲིམས་འཛིན་ཐབས་ཀྱིས་འདུལ༔ གཅིག་ནི་ཨོ་རྒྱན་ཛ་ག་ཊར༔ གྲུབ་ཐོབ་ཀུན་བཟང་སྤྱོད་པ་ཅན༔ འབྲེལ་ཚད་དོན་དང་ལྡན་པར་སྐྱེ༔ ཞེས་གསུངས་པ་ལྟར་རྒྱ་ནག་རི་བོ་རྩེ་ལྔར་གཏེར་ཆེན་རྡོ་རྗེ་གླིང་པའི་གཏེར་ཞབས་ཡོད་པ་དེ་སྐུ་ཚེ་འདི་ཉིད་ལ་ཟབ་མོའི་རྟེན་འབྲེལ་འགྲིག་སྟེ་བཞེས་ཐུབ་ན་བོད་ཡུལ་འདིར་ལོ་བརྒྱའི་བར་དུ་མཐའ་དམག་གི་འཇིགས་པ་མི་འབྱུང་བས་དུས་བདེ་བར་འགྱུར་ལ། གལ་ཏེ་བཞེས་མ་ཐུབ་ན། འདིའི་འོག་ཏུ་ཟབ་གཏེར་དེ་འདོན་པ་པོའི་གཏེར་སྟོན་གྱི་སྐྱེ་སྲིད་གཅིག་བཟུང་སྟེ། དེས་བཏོན་ནས་འགྲོ་བའི་དོན་མཛད་པར་འགྱུར་ཞིང་། དེའི་ཚེ་སྐུའི་བཀོད་པ་གཉིས་པ་ནི། བོད་ཀྱི་ཡུལ་འདིར་རྒྱལ་པོའི་ཚུལ་བཟུང་ནས་བཀའ་ཁྲིམས་བཙན་པོས་བོད་ཁམས་བདེ་བར་སྐྱོང་ཞིང་། བསྟན་པ་རིན་པོ་སྔར་མཆོད་དེ་དར་ཞིང་རྒྱས་པར་མཛད་ལ། སྐུའི་བཀོད་པ་གསུམ་པ་ནི། ནུབ་ཕྱོགས་ཨོ་ཌཱི་ཡ་ནའི་ཡུལ་ཛ་ག་ཊར་གྲུབ་པ་བརྙེས་པའི་རྣལ་འབྱོར་པའི་ཚུལ་བཟུང་སྟེ་རིམ་གཉིས་ཀྱི་ཡེ་ཤེས་ལ་བརྟན་པ་ཆེར་ཐོབ་པས། ཡུལ་གྱི་རྐྱེན་སྣ་ཚོགས་ཀྱིས་ཉམས་མྱོང་མི་འགྲིབ་པར་འཕེལ་བའི་གྲོགས་བྱེད་ཅིང་། དངོས་གྲུབ་དང་ནུས་པའི་ཁྱད་པར་མང་པོ་ཐོབ་ནས་གཞན་དོན་ཚར་གཅོད་རྗེས་འཛིན་ལ་རང་དབང་འབྱོར་བས། གང་ཤར་གྱི་ཡུལ་མི་འགོག་པར་ཅི་དགར་ལོངས་སྤྱོད་པ་ཀུན་ཏུ་བཟང་པོའི་སྤྱོད་པ་ཁྱད་པར་ཅན་གྱི་སྒོ་ནས་འབྲེལ་ཚད་ཟུང་འཇུག་གི་ལམ་ལ་སྦྱོར་བའི་ཕྲིན་ལས་ཀྱི་དོན་མཛད་པའོ། །ཡང་དེ་ལས། དེ་ནས་རེས་འགའ་པད་འབྱུང་ངའི༔ ཐུགས་ཀྱི་ཀློང་དུ་

― MLP003_Page_0270 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་མེད་ཐིམ༔ རེས་འགའ་སྤྲུལ་པའི་འོད་ཟེར་ནི༔ གང་འདུལ་མོས་པའི་དཔལ་དུ་འཆར༔ ཞེས་གསུངས་པ་ལྟར། གདུལ་བྱའི་ཡུལ་ལ་འདུལ་བྱེད་སྣང་ནུས་ཀྱི་དཀར་པོ་རྣམ་པར་འཕེལ་བའི་བསོད་ནམས་མེད་ན། འདུལ་བྱེད་ཀྱི་སྐུའི་བཀོད་པའང་སྤྲུལ་གཞིའི་ཐུགས་ཀྱི་ཀློང་དུ་རང་ཐིམ་པ་ཆོས་ཉིད་དེ། ཆུ་སྣོད་མེད་ན་ཆུ་ཟླའི་གཟུགས་བརྙན་ཟླ་བའི་ངང་དུ་ཐིམ་ནས་མི་སྣང་བ་བཞིན་ནོ། །གདུལ་བྱའི་བསོད་ནམས་དང་། འདུལ་བྱེད་ཀྱི་ཐུགས་རྗེ་གཉིས་འཛོམ་པ་ན་གདུལ་བྱའི་ཡུལ་ཇི་སྙེད་པ་དེ་སྙེད་དུ་གང་འདུལ་གྱི་སྐུའི་བཀོད་པ་མཐའ་ཡས་པ་དུས་མཉམ་དུ་བསྟན་ནས་དོན་མཛད་དེ། ནམ་མཁའི་ཟླ་བ་གཅིག་ཉིད་ཀྱི་རྣམ་པ་ཆུ་སྣོད་མང་པོར་དུས་སྔ་ཕྱི་མེད་པར་སྣང་བ་བཞིན་ནོ། །དེ་ལྟར་ཡང་ཕལ་པོ་ཆེ་ལས། ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང་། །ཟླ་བ་གཉིས་སུ་གྱུར་པ་མེད། །དེ་བཞིན་ཆགས་མེད་མཁྱེན་ལྡན་རྣམས། །ཆགས་མེད་རྣམ་པར་འཚང་རྒྱ་བར། །ཞིང་རྣམས་ཀུན་ལ་རབ་ཏུ་སྣང་། །སངས་རྒྱས་ལ་ནི་གཉིས་སྣང་མེད། །ཅེས་གསུངས་པ་ལྟར་རོ། །མ་འོངས་པ་ན་སངས་རྒྱས་ཀྱི་ཞིང་ཁམས་པདྨས་བརྒྱན་པ་ཞེས་བྱ་བར་རྣམ་རོལ་མཐའ་ཡས་ཞེས་བྱ་བའི་དེ་བཞིན་གཤེགས་པར་འཚང་རྒྱ་བར་འགྱུར་ཞིང་། དེའི་ཚེ་ད་ལྟའི་དུས་ཀྱི་འབྲེལ་ཐོབ་ཀྱི་གདུལ་བྱ་མ་ལུས་པ་རྒྱལ་བ་དེའི་སྲས་ཀྱི་ཐོག་མར་སྐྱེས་ཏེ། མི་སྐྱེ་བའི་ཆོས་ལ་བཟོད་པ་ཐོབ་པས་ཏིང་ངེ་འཛིན་གསུམ་མངོན་དུ་བྱས་ནས་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་ཏེ། རྡོ་རྗེ་གླིང་པའི་ཞལ་ཆེམས་ལས། ཡར་འབྲོག་དབུས་གཡོར་སྡེ་གཉིས་ཀྱི། །མཚམས་སུ་བདག་ནི་སྐྱེ་བ་ལེན། །འགྲོ་འདུལ་ཞེས་གྲགས་རྒྱལ་བའི་སྲས། །རྫུ་འཕྲུལ་མངོན་ཤེས་ལྡན་པ་འབྱུང་། །ཞེས་དང་། དེ་དུས་ལུས་ངག་ཡིད་གསུམ་གྱི། །འབྲེལ་བ་གང་ལྟར་ཐོགས་པ་རྣམས། །རིགས་དྲུག་འཁོར་བ་དོང་སྤྲུགས་ནས། །པདྨས་བརྒྱན་པའི་ཞིང་ཁམས་སུ། །ཁོ་བོ་བླ་ན་མེད་པ་ཡི། །རྣམ་རོལ་མཐའ་ཡས་མགོན་པོ་ཆེར། །ཡང་དག་མངོན་འཚང་རྒྱ་བའི་ཚེ། །སྲས་འཁོར་རྒྱ་མཚོའི་ཐོག་མར་སྐྱེ། །སྐྱེ་མེད་ཆོས་ལ་བཟོད་ཐོབ་ནས། །དཔའ་འགྲོ་སྒྱུ་མ་རྡོ་རྗེ་ལྟའི། །ཏིང་འཛིན་རྣམ་

― MLP003_Page_0271 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་མངོན་གྱུར་གྱི། །བྱང་ཆུབ་མཆོག་ལུང་དེ་རུ་ཐོབ། །ཅེས་སོ། །དེ་ཡང་མི་སྐྱེ་བའི་ཆོས་ལ་བཟོད་པ་ཐོབ་པའི་ས་མཚམས་གཉིས་བཤད་ཀྱང་། འདི་ནི་དཔའ་བར་འགྲོ་བ་དང་། སྒྱུ་མ་ལྟ་བུ་དང་། རྡོ་རྗེ་ལྟ་བུའི་ཏིང་ངེ་འཛིན་ལ་སོགས་ཏེ་ཏིང་ངེ་འཛིན་བརྒྱ་སྟོང་མངོན་དུ་བྱས་ནས་ས་བརྒྱད་པར་མི་སྐྱེ་བའི་ཆོས་ལ་བཟོད་པ་ཐོབ་པར་བཤད་པ་དང་འབྱོར་ཏེ། འོ་སྐོལ་གྱི་སྟོན་པ་བྲམ་ཟེའི་ཁྱེའུ་སྤྲིན་དུ་གྱུར་པའི་ཚེ། མར་མེ་མཛད་ལ་ཨུཏྤལ་ལྔ་གཏོར་ཏེ། རལ་པ་གདན་དུ་བཏིང་ནས་མཆོད་པས་མ་འོངས་པའི་དུས་སུ་ཤཱཀྱ་ཐུབ་པར་འཚང་རྒྱ་བར་ལུང་བསྟན་པ་དང་། དགའ་ཆེས་ཏེ་ཏཱ་ལ་བདུན་སྲིད་དུ་འཕགས་ནས་ཏིང་ངེ་འཛིན་བརྒྱ་སྟོང་མངོན་དུ་བྱས་ཏེ། ས་བརྒྱད་པ་བརྙེས་པར་བཤད་པ་བཞིན་ནོ། །དེ་ལྟར་ཡང་ཇི་སྐད་དུ། སངས་རྒྱས་མར་མེ་མཛད་ལ་ཨུཏྤལ་ལྔས། །གཏོར་ཏེ་རལ་པ་སྟན་དུ་བཏིང་བྱས་པས། །མི་སྐྱེའི་ཆོས་ལ་བཟོད་པ་ཐོབ་གྱུར་ནས། །ཤཱཀྱའི་རྒྱལ་པོར་འགྱུར་ཞེས་ང་ལུང་བསྟན། །ཞེས་དང་། ལུང་ལས་ཀྱང་། གང་ཚེ་མར་མེ་མཛད་ཀྱིས་ང་། །ལུང་བསྟན་གྱུར་པ་དེ་ཡི་ཚེ། །ས་བརྒྱད་པ་ནི་ཐོབ་གྱུར་ཏེ། །དབང་བཅུ་དག་ཀྱང་ཐོབ་པར་གྱུར། །ཞེས་གསུངས་པའི་ཕྱིར་རོ། །དེ་ནས་སྐལ་བཟང་གི་སངས་རྒྱས་དགུ་བརྒྱ་དང་དགུ་བཅུ་རྩ་དགུ་འདས་པའི་འོག་ཏུ་དེ་བཞིན་གཤེགས་པ་རྣམ་པར་སྣང་མཛད་དམ་མོས་པ་ཞེས་བྱ་བར་འཚང་རྒྱ་བའི་ཚུལ་སྟོན་ཏེ། དེ་བཞིན་གཤེགས་པ་དགུ་བརྒྱ་དགུ་བཅུ་རྩ་དགུ་པོ་རྣམས་ཀྱི་སྐུ་ཚེའི་ཚད་དང་ཉན་ཐོས་ཀྱི་དགེ་འདུན་ཇི་སྙེད་པ་དེ་སྙེད་དུ་གྱུར་ནས་ཆོས་ཀྱི་འཁོར་ལོ་བསྐོར་བའི་ཚེ། དེ་རྣམས་འདུས་པ་དང་པོར་སྐྱེས་ཏེ་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པ་འཚང་རྒྱ་བར་འགྱུར་ཏེ། རང་གཏེར་ཤ་འུག་གཏེར་བྱོན་གྱི་ལུང་བྱང་དེའི་འཕྲོས་ལས། ཐ་མར་སྐལ་བཟང་སངས་རྒྱས་ནི༔ མོས་པ་ཞེས་བྱར་མངོན་འཚང་རྒྱ༔ ད་ལྟའི་འབྲེལ་ཐོགས་སྐལ་ལྡན་ཀུན༔ འདུས་པ་དང་པོར་སྐྱེ་བར་འགྱུར༔ ཞེས་དང་། རྡོར་གླིང་གི་ཞལ་ཆེམས་ལས་ཀྱང་། མཐར་ཐུག་རྣམ་འདྲེན་མོས་པའི་ཚེ། །ཀུན་ཀྱང་ཕྱོགས་བཅུའི་ཞིང་ཁམས་སུ། །སངས་རྒྱས་མཆོག་ཐོབ་འཁོར་དོང་སྤྲུགས། །ཞེས་གསུངས་སོ། །མདོར་ན་མང་དུ་སྨོས་པས་ཅི་ཞིག་བྱ་སྟེ། བདག་

― MLP003_Page_0272 ―

^{[མ་དཔེ་གཟིགས་ན་འདིར་གནོན།]}

[Full Size]

ཉིད་ཆེན་པོ་འདི་ནི། ད་ལྟ་སློབ་པ་ལམ་པའི་གནས་སྐབས་སུ་གསང་བའི་བདག་པོ་ཕྱག་ན་རྡོ་རྗེའི་སྤྲུལ་པའི་སྐུར་བསྟན་པས། ས་བཅུ་པའི་བྱང་སེམས་སུ་བཤད་པ་ནི། ཐ་སྙད་རྣམ་འཇོག་གི་དབང་དུ་བྱས་པ་སྟེ། ངེས་དོན་ཡིན་ལུགས་ཀྱི་དབང་དུ་བྱས་ནས། གཉིས་མེད་རྣམ་རྒྱལ་ལས། ཕྱག་ན་རྡོ་རྗེ་ནི་དེ་བཞིན་གཤེགས་པ་ཀུན་ཏུ་བཟང་པོ་ཡིན་ལ་རྡོ་རྗེ་འཆང་ཆེན་པོ་ཡང་དེ་ཉིད་ལས་གཞན་མ་ཡིན་པར་རིག་པར་བྱ་སྟེ། ཞེས་དང་། བདེ་འདུས་ཀྱི་ལོ་རྒྱུས་བཻ་རོ་ཙ་ནས་མཛད་པ་ལས་ཀྱང་། སྟོན་པ་ཀུན་ཏུ་བཟང་པོ་ཉིད་དང་ཐུགས་གཉིས་སུ་མེད་པ་བྱང་ཆུབ་སེམས་དཔའ་རྡོ་རྗེ་ཆོས་ཞེས་ཀྱང་བྱ༔ རྡོ་རྗེ་སེམས་དཔའ་ཞེས་ཀྱང་བྱ༔ ལག་ན་རྡོ་རྗེ་ཞེས་ཀྱང་བྱ༔ རྡོ་རྗེ་དྲག་པོ་རྩལ་ཞེས་ཀྱང་བྱ༔ ཞེས་སོགས་གསུངས་ཤིང་། གསང་བ་གྲུབ་པ་ལས་ཀྱང་། རྒྱུད་འཆད་པ་དེ་ཐུགས་རྡོ་རྗེ། །འཆད་པ་པོ་དེ་སྡུད་པའང་དེ། །ཞེས་སྟོན་སྡུད་དབྱེར་མེད་དུ་བཤད་པ་ལྟར། ཕྱག་ན་རྡོ་རྗེ་ནི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་སྟོན་པ་རྡོ་རྗེ་འཆང་ཆེན་པོ་ཉིད་ཡིན་པར་གསུངས་པའི་ཕྱིར། དེས་གང་འདུལ་གྱི་སྐུའི་བཀོད་པ་བསྟན་པའང་སངས་རྒྱས་འཕགས་པའི་སྤྲུལ་པའི་སྐུར་གདོན་མི་ཟ་ཞིང་། རྒྱུ་མཚན་དེས་བདག་ཉིད་ཆེན་པོ་འདིའི་ཕྲིན་ལས་ཀྱི་མཐའ་ཡང་འདི་ཙམ་མོ་ཞེས་གཞལ་དུ་མེད་དེ། སྤྱི་མདོ་དགོངས་པ་འདུས་པའི་གླེང་གཞིར། དེ་བཞིན་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས་གསང་བའི་བདག་པོ་རྡོ་རྗེ་འཛིན་པ་ཆེན་པོ། ཇི་སྐད་དུ་རྣམ་པར་བགྲོ་བའི་སྐྱེས་བུ། སྨྲ་བའི་སེང་གེ་དེ། འདི་ལྟར་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་ན་འཁོད་ཅིང་། སེམས་ཅན་གྱི་རིགས་ཐ་དད་པ་ནའང་བཞུགས་ཏེ། བསམ་གྱིས་མི་ཁྱབ། བསམ་དུ་མེད་པའི་ཆོས། དཔག་ཏུ་མེད་པའི་རྒྱལ་བ་ཀུན་གྱིས་བསྔགས་པའི་འདུ་འབྲལ་མེད་པའི་གཟུངས། ཐམས་ཅད་རིག་པ་གསང་སྔགས་ཀྱི་ངོ་བོ་ཇི་སྙེད་པའི་ཇི་བཞིན་པ། ཆོས་ཐམས་ཅད་ཀྱི་མེ་ལོང་དེ་ཉིད་མི་འགལ་བར་ཉན་ཅིང་། མ་ནོར་བར་སྟོན་ཏེ། རྣམ་པར་བགྲོ་བ་ནི་འདི་ལྟ་སྟེ། ཞེས་གསུངས་པའི། དེ་བཞིན་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས། ཞེས་པས་གསང་བདག་ཉིད་སྟོན་པ་རིགས་

― MLP003_Page_0273 ―

^{[མ་དཔེ་གཟིགས་ན་འདིར་གནོན།]}

[Full Size]

དྲུག་པ་དང་གཉིས་སུ་མེད་པར་བསྟན་ཅིང་། ཇི་སྐད་དུ་རྣམ་པར་བགྲོ་བའི་སྐྱེས་བུ། ཞེས་པ་མན་ཆད་ཀྱིས་སངས་རྒྱས་ཀྱི་ཞིང་ཁམས་རབ་འབྱམས་མཐའ་ཡས་པར་རང་རང་གི་སྟོན་པ་ལས་ཆོས་སེམས་ཉིད་འོད་གསལ་བའི་ཟུང་འཇུག་སྔགས་ཀྱི་ངོ་བོ་དེ་ཁོ་ན་ཉིད་ཉན་པ་དང་། རང་གི་ཉེ་བའི་འཁོར་གདུལ་བྱ་དག་པ་རྣམས་ལ་སྟོན་པར་བྱེད་ཅིང་། དེར་མ་ཟད་སྤྲུལ་པ་སྐུ་ཡོངས་སུ་མྱ་ངན་ལས་འདས་པའི་འཁོར་དག་མ་དག་གི་གདུལ་བྱ་རྣམས་ལའང་། ཆོས་ཉིད་མ་བཅོས་པའི་དོན་ཉིད་རྣམ་པར་བགྲོ་བའི་མཛད་པ་རྣམས་དུས་གཅིག་ལ་སོ་སོར་མ་འདྲེས་པར་ཐ་དད་དུ་སྟོན་ཞིང་འབད་མེད་ལྷུན་གྲུབ་ཏུ་སྣང་བར་མཛད་པའི་རྫུ་འཕྲུལ་གྱི་ཆོ་འཕྲུལ་བསམ་གྱིས་མི་ཁྱབ་པ་ལ་མངའ་དབང་འབྱོར་བའི་ཕྱིར་རོ། །དེ་ལྟ་ནའང་རིགས་བསྡུས་ན། འགྲོ་བ་རྣམས་ངན་སོང་དུ་སྐྱེ་འགྱུར་གྱི་རྒྱུ་ལས་ཉོན་སྤོང་བྱེད་ཀྱི་གདམས་པ་བསྟན་པས་དེ་ལས་བཟློག་ནས་གནས་སྐབས་ཀྱི་བདེ་བ་ལྷ་དང་མིའི་རྟེན་ལ་བཀོད་ཅིང་། དད་པ་དང་ངེས་འབྱུང་གི་བློ་བཟང་པོ་རྒྱུད་ལ་སྐྱེད་པར་མཛད་པ་ནི་གདུལ་བྱ་ལམ་གྱི་རྟེན་ལ་འགོད་པའི་ཕྲིན་ལས་དང་། མཐར་ཐུག་གི་ཕན་པ་ཐར་པའི་ལམ་ལ་དངོས་སུ་དྲངས་ཏེ། སྤངས་རྟོགས་ཀྱི་ཡོན་ཏན་གོང་ནས་གོང་དུ་བཀོད་པའི་མཐར། མཐའ་གཉིས་ལ་མི་གནས་པའི་མྱང་འདས་མཆོག་ལ་སྦྱོར་བར་མཛད་པ་ནི། གདུལ་བྱ་ལམ་དང་ལམ་གྱི་འབྲས་བུ་ལ་འགོད་པའི་ཕྲིན་ལས་ཏེ། དེ་གསུམ་ཡང་རང་སྣང་དག་པའི་སྐུ་ལས་མ་གཡོས་བཞིན་ཏུ་ཚད་མེད་ཐུགས་རྗེའི་རོལ་པ་མ་འགགས་པས་གང་ལ་གང་འདུལ་གྱི་སྤྲུལ་པའི་བཀོད་པ་སྣ་ཚོགས་ཀྱིས། གདུལ་བྱའི་ཁམས་དང་། དེ་འདུལ་བའི་ཐབས་དང་། དེའི་གཉེན་པོ་སོགས་མཁྱེན་ནས་འདུལ་པའི་ཕྲིན་ལས་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་ལ་ཁྱབ་པས་རྒྱ་ཆེ་བ་དང་། དུས་འཁོར་བ་ཇི་སྲིད་བར་དེ་སྲིད་དུ་རྒྱུན་མི་ཆད་པར་འབྱུང་བས་རྟག་པ་དང་། འདུལ་བའི་དུས་ལ་བབས་པ་ན་འབད་རྩོལ་མེད་པར་འཇུག་པ་ལྷུན་གྱིས་གྲུབ་པའི་ཕྲིན་ལས་རྣམས་སུ་འདུ་བ་ཡིན་ཏེ། རྒྱུད་སྔ་མ་ལས། དེ་ལྟར་ནམ་མཁའི་མཐའ་ཀླས་ཀྱི། །འགྲོ་ལ་རྟག་པར་ལྷུན་གྲུབ་པས། །ཐོགས་མེད་བློ་ལྡན་དེ་ཡིས་ནི། །སེམས་ཅན་དོན་ནི་ཡང་

― MLP003_Page_0274 ―

^{[མ་དཔེ་གཟིགས་ན་འདིར་གནོན།]}

[Full Size]

དག་འཇུག །ཅེས་གསུངས་པ་བཞིན་ནོ། །གདོད་མའི་དབྱིངས་སུ་རང་རིག་ཡེ་ཤེས་རྣམ་པར་གྲོལ་བས་མགོན་ཁྱོད་ངེས་པར་རྫོགས་སངས་རྒྱས། །ལ་ལར་ས་བཅུའི་བྱང་སེམས་ཚུལ་གྱིས་རྒྱལ་བ་ཀུན་གྱི་བཀའ་ཡི་སྡུད་བྱེད་གསང་བ་འཛིན། །གཞན་དུ་ཞི་ཁྲོའི་རྣམ་འགྱུར་དུ་མས་གྲངས་མེད་དཀྱིལ་འཁོར་སྤྲོ་བསྡུའི་བདག་ཉིད་རྡོ་རྗེ་སེམས། །གང་འདིར་སྲིད་གསུམ་འགྲོ་བའི་བླ་མ་ཆོས་ཀྱི་དབང་ཕྱུག་ཆོས་ཀྱི་རྒྱལ་པོ་གཏེར་བདག་གླིང་། །དེ་ཡི་གསང་གསུམ་ངོ་མཚར་ཡོན་ཏན་མཐའ་ཡས་ནམ་མཁའི་རྗེས་འགྲོ་བར། །སྦྲང་བུས་གཤོག་རྩེས་བགྲོད་འདོད་ཇི་བཞིན་དེང་འདིར་དད་པའི་གླེགས་བུ་ལ། །རྣམ་པར་བཀོད་པའི་སྙན་འགྱུར་རོལ་སྒེག་རྨད་བྱུང་རི་མོ་གསར་པ་འདིས། །སྐལ་བཟང་མིག་ལ་ཀུན་དགའི་དགའ་སྟོན་ཡ་མཚན་བརྒྱ་ཕྲག་ཅིར་ཡང་སྟོན། །ཕུལ་བྱུང་མཛད་པའི་གཏམ་གྱི་སྙན་གྲགས་དབྱངས། །ཚངས་པའི་འཇིག་རྟེན་དུ་ཡང་གསལ་མོད་ཀྱི། །འོན་ཀྱང་ཞིང་འདིའི་སྐལ་བཟང་རྣ་བའི་རྒྱན། །མཛེས་བྱེད་ཨུཏྤལ་ཕྲེང་བར་འགྱུར་སྙམ་སྤེལ། །རྒྱལ་རྣམས་མཁྱེན་པའི་མེ་ལོང་གཙང་མའི་ངོས། །ཤེས་བྱའི་ཆོས་ཀུན་མ་འདྲེས་རབ་གསལ་ན། །འདི་ཙམ་ཞིག་ལ་ངོ་མཚར་གནས་བྱེད་པ། །བདག་བློ་བྱིས་པའི་རང་ཚུལ་མཚོན་མིན་ནམ། །མགོན་ཁྱོད་རྣམ་ཐར་དཔག་ཡས་ཆུ་གཏེར་ཆེ། །དད་པའི་རྔ་ཡབ་རྩེ་མོས་བགྲང་བྱས་པ། །འདི་ལ་རྒྱལ་བ་སྲས་བཅས་དགྱེས་པའི་མཐུས། །ཀུན་མཁྱེན་ཡེ་ཤེས་རྒྱ་མཚོར་དེང་འཇུག་འགྱུར། །དེང་བདག་རྒ་བའི་སྒྲོག་གིས་དམ་བཅིངས་ཀྱང་། །ཤེས་རབ་ཅང་ཤེས་དད་པའི་སྲབ་ཀྱིས་གཅུན། །བརྩོན་འགྲུས་ལྕག་གིས་རྣམ་གྲོལ་ཐང་ཡངས་ལ། །བསྐུལ་བས་ཚོགས་གཉིས་འགྲོས་རྩལ་ཅི་ཡང་འབྱོར། །དེ་ལྟར་འབད་པའི་དགེ་འདིས་མཐའ་ཡས་འགྲོ། །སྐྱེ་ཞིང་སྐྱེ་བར་ཁྱོད་ཀྱིས་རྗེས་བཟུང་ནས། །ཟབ་རྒྱས་ཆོས་ཀྱི་བདུད་རྩི་ངོམས་མེད་དུ། །འཐུང་ལས་འགྲོ་སྒྲོལ་དེད་དཔོན་ཉིད་གྱུར་ཅིག །རང་རིག་སྐྱེ་འགག་གཉིས་འཛིན་ལས་གྲོལ་བས། །མི་འགྱུར་འཆི་མེད་རྡོ་རྗེའི་སྐུ་བརྙེས་ལྟར། །ཞིང་འདིའི་བསྟན་འགྲོའི་ཕན་བདེའི་ཉེར་འཚོ་རུ། །གཟུགས་སྐུ་རི་དབང་ལྟ་བུར་བརྟན་པར་གསོལ། །རྣམ་དག་འོག་མིན་

― MLP003_Page_0275 ―

^{[མ་དཔེ་གཟིགས་ན་འདིར་གནོན།]}

[Full Size]

ས་འདིར་འཕོས་པའམ། །གངས་རིའི་ཁྲོད་ཀྱི་ཨོ༵་རྒྱ༵ན་ཌཱཀྐིའི་ཞིང་། །སྨི༵ན་གྲོ༵ལ་ཆོས་སྒྲ་སྒྲོག་པའི་གླི༵ང་གང་འདིའི། །ཆོས་སྲིད་རིང་ལུགས་བླ་ནས་བླར་འཕེལ་ཤོག །ལྷག་བསམ་སྙིང་སྟོབས་ཕུལ་བྱུང་དར་ཆེན་འཕྱར། །དད་འདུན་བརྩོན་འགྲུས་མཐུན་པའི་རླུང་གིས་བསྐུལ། །བཤད་སྒྲུབ་གྲུ་གཟིངས་བཤམས་ནས་སྐྱེ་རྒུ་ཀུན། །འཇིགས་རུང་འཁོར་བའི་མཚོ་ལས་སྒྲོལ་བར་ཤོག །ལུས་བསྐྱེད་མ་དང་ཕན་འདོགས་སློབ་དཔོན་སོགས། །དྷརྨ་ཤྲཱི་འབྲེལ་བར་བཅས་པ་ཀུན། །སྐྱེ་བར་མགོན་ཁྱོད་ཐུགས་རྗེའི་གྲིབ་བསིལ་དུ། །བདེ་བར་ངལ་གསོ་སྲིད་ཞིའི་གདུང་སེལ་ཤོག །ཚེ་རབས་ཀུན་ཏུ་སྙིང་སྟོབས་རླབས་པོ་ཆེས། །རྗེ་བཙུན་བླ་མའི་ཕྲིན་ལས་ཀུན་བསྒྲུབས་ནས། །ཐེག་མཆོག་རྨད་བྱུང་བླ་མའི་ལམ་བཟང་གིས། །དཔལ་ལྡན་བླ་མའི་གོ་འཕང་མངོན་འགྱུར་ཤོག །གང་ཁྱོད་པདྨས་བརྒྱན་པའི་ཞིང་ཁམས་སུ། །རྣམ་རོལ་མཐའ་ཡས་མགོན་པོར་སངས་རྒྱས་ཚེ། །མི་སྐྱེའི་ཆོས་ལ་བཟོད་ཐོབ་ས་བརྒྱད་པ། །ནོན་ནས་བྱང་ཆུབ་ལུང་བསྟན་མཆོག་ཐོབ་ཤོག །ནམ་ཞིག་བདེ་གཤེགས་མོས་པའི་སྣང་བྱེད་འོད། །རྡོ་རྗེ་གདན་གྱི་སྤོ་ལ་བརྡལ་བའི་དུས། །མངོན་སུམ་ཞལ་བལྟ་ཆོས་སྨྲའི་ཐོག་མ་རུ། །གྱུར་ནས་བླ་མེད་བྱང་ཆུབ་ཐོབ་པར་ཤོག །གང་འདིར་སུ་ཞིག་ཡིད་རབ་དད་བྱེད་དམ། །ཀློག་གམ་འཛིན་ནམ་ཐེ་ཚོམ་བྱེད་ཀྱང་རུང་། །དེ་དག་ཀུན་ལ་མགོན་ཁྱོད་བརྩེ་ཆེན་གྱིས། །ཡེ་ཤེས་གཟིགས་པ་རྟག་ཏུ་འཇུག་པར་ཤོག །ཐུབ་བསྟན་བླ་ན་བཀུར་བའི་མི་བདག་རྣམས། །ཆབ་སྲིད་སྐུ་དཔལ་ཡར་ངོ་ལྟར་འཕེལ་ཞིང་། །འཇིག་རྟེན་ཁམས་ཀུན་ནད་མུག་འཁྲུག་རྩོད་ཞི། །དགའ་སྐྱིད་བདེ་བའི་དཔལ་ལ་སྤྱོད་པར་ཤོག །ངོ་བོ་ཀ་དག་ཀུན་ཁྱབ་འགྱུར་མེད་མཁའ་དབྱིངས་སུ། །རང་བཞིན་གསལ་མདངས་ལྷུན་གྲུབ་ཞི་ཁྲོའི་ཆུ་འཛིན་འཁྲིགས། །ཐུགས་རྗེ་མ་འགག་བྱིན་རླབས་འདོད་དགུར་འཇོ་བའི་ཆར། །བསྙིལ་བའི་བཀྲ་ཤིས་ཕྱོགས་དུས་ཀུན་དུ་ཁྱབ་པར་ཤོག །ཅེས་དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་རིགས་དང་དཀྱིལ་འཁོར་ཀུན་གྱི་ཁྱབ་བདག་དཔལ་ལྡན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་རྨད་བྱུང་ངོ་མཚར་བའི་རྟོགས་པ་བརྗོད་པ་ཡོན་ཏན་མཐའ་ཡས་རྣམ་པར་བཀོད་པའི་རོལ་

― MLP003_Page_0276 ―

^{[མ་དཔེ་གཟིགས་ན་འདིར་གནོན།]}

[Full Size]

མོ་ཞེས་བྱ་བ་འདིའང་། འཇིག་རྟེན་དབང་ཕྱུག་འཕགས་པ་རྒྱལ་བ་རྒྱ་མཚོའི་ཐུགས་ཀྱི་སྲས་མཆོག་ངག་དབང་མཆོག་གི་སྤྲུལ་པའི་སྐུ་ངག་དབང་འགྱུར་མེད་ཆོས་དཔལ་ཐུབ་བསྟན་མཆོག་གྲུབ་བཟང་པོའི་སྡེའི་ཞལ་སྔ་ནས་དང་། ལུགས་གཉིས་ཀྱི་མཁྱེན་དཔྱོད་ཡངས་པ་ཕྱག་མཛོད་རྗེ་དབོན་ཕུན་ཚོགས་དབང་འཛིན་གཉིས་ཀྱིས་གནང་སྐྱེས་ཕུལ་དུ་བྱུང་བ་དང་བཅས་གསུང་གིས་བསྐུལ་བ་ལྟར། རྗེ་བཙུན་བླ་མ་དམ་པ་མཆོག་གི་རིགས་ཀྱི་གཅུང་དུ་སྐྱེས་ཤིང་དམ་པའི་ཆོས་ཀྱི་བཀའ་དྲིན་ཆེན་པོས་རྗེས་སུ་བསྐྱངས་པའི་སྐལ་བ་ཅན། སྨྱོས་ཀྱི་དགེ་སློང་རྒན་པོ་དྷརྨ་ཤྲཱིས་རྣམ་རྒྱལ་ཞེས་པ་ཆུ་མོ་སྦྲུལ་གྱི་ལོ་རྒྱལ་ཟླ་བའི་ཡར་ངོའི་ཚེས་བཞི་རེས་གཟའ་ལེགས་ལྡན་པ་ཝ་སངས་རྒྱུ་སྐར་མོན་གྲུ་དང་རྩེ་བའི་དངོས་གྲུབ་སྦྱོར་བ་ལ་བཤད་སྒྲུབ་ཀྱི་ཆུ་བོ་འདུ་བའི་རྒྱལ་བསྟན་རིན་པོ་ཆེའི་འབྱུང་གནས་གངས་རིའི་ཁྲོད་ཀྱི་པདྨ་འོད་འོག་མིན་ཨོ་རྒྱན་སྨིན་གྲོལ་གླིང་གི་གཙུག་ལག་ཁང་གི་ཡང་ཐོག་འཆི་མེད་འོད་སྣང་དུ་གྲུབ་པར་སུག་ལས་སུ་སྦྱར་བ་ལས། གླེགས་བམ་གཉིས་པར་སྤེལ་བའི་ཡི་གེ་པ་ནི་ཆོས་མཛད་དགེ་སློང་འགྱུར་མེད་མཆོག་གྲུབ་ཀྱིས་བགྱིས་པའོ། །འདིས་ཀྱང་མཐའ་ཡས་པའི་སེམས་ཅན་ཐམས་ཅད་ཀྱི་སྙིང་ལ་དཔལ་ལྡན་བླ་མའི་བྱིན་རླབས་ཞུགས་ནས་བྱང་ཆེན་གྱི་སྤྱོད་པ་རླབས་པོ་ཆེ་ལ་སྤྱད་དེ་སྲིད་ཞིའི་འཆིང་བ་ལས་རྣམ་པར་གྲོལ་བའི་རྒྱུར་གྱུར་ཅིག། །།

གཏེར་ཆེན་ཆོས་ཀྱི་རྒྱལ་པོའི་མྱ་ངན་འདས་བྱུང་གི་གཏམ་ཨུཏྤ་ལའི་འཕྲེང་བ།

― MLP003_Page_0277 ―

^{[མ་དཔེ་གཟིགས་ན་འདིར་གནོན།]}

[Full Size]

གཏེར་ཆེན་ཆོས་ཀྱི་རྒྱལ་པོའི་མྱ་ངན་འདས་བྱུང་གི་གཏམ་ཨུཏྤ་ལའི་འཕྲེང་བ་ཞེས་བྱ་བ་བཞུགས་སོ། །ལོ་ཆེན་དྷརྨ་ཤྲཱི།

― MLP003_Page_0278 ―

^{[མ་དཔེ་གཟིགས་ན་འདིར་གནོན།]}

[Full Size]

གཏེར་ཆེན་ཆོས་ཀྱི་རྒྱལ་པོའི་མྱ་ངན་འདས་བྱུང་གི་གཏམ་ཨུཏྤ་ལའི་འཕྲེང་བ་ཞེས་བྱ་བ་བཞུགས་སོ། །བཀའ་དྲིན་མཉམ་མེད་གཏེར་ཆེན་ཆོས་ཀྱི་རྒྱལ་པོའི་ནང་གི་རྟོགས་བརྗོད་ཀྱི་ཁ་སྐོང་མྱ་ངན་འདས་བྱུང་གི་གཏམ་ཨུཏྤ་ལའི་ཕྲེང་བ་ཞེས་བྱ་བ། རྗེ་བཙུན་དམ་པ་དེ་ཉིད་ཀྱི་ཞབས་ལ་གུས་པས་ཕྱག་འཚལ་ལོ། །འཇིག་རྟེན་གསུམ་མགོན་སྐྱོབ་པ་ཐུགས་རྗེ་ཅན། །ཡོན་ཏན་རྒྱ་མཚོའི་མངའ་བདག་གཏེར་ཆེན་རྗེ། །ཞིང་འདིར་རྒྱལ་བསྟན་སྙིང་པོ་གསལ་མཛད་ནས། །གདོད་མའི་དབྱིངས་སུ་གཤེགས་ལ་ཕྱག་འཚལ་ལོ། །ཞི་བ་ཕྱོགས་གཅིག་མ་ཡིན་ཐབས་མཁས་ཀྱིས། །གདུལ་བྱ་རྟག་འཛིན་ཅན་རྣམས་འདུལ་བའི་ཕྱིར། །ངོ་མཚར་བཀོད་པའི་ཆོ་འཕྲུལ་དུ་མ་ཡིས། །གཟུགས་སྐུ་འོད་གསལ་ཆོས་སྐུའི་ཀློང་དུ་བསྡུས། །གདུང་ཚབ་ཐུགས་ཀྱི་སྲས་སུ་དབང་བསྐུར་ཞིང་། །འདས་རྗེས་གདམས་པས་གདུལ་བྱ་རྗེས་བཟུང་ནས། །ཕྱི་མཐའ་གཟིགས་པའི་བླང་དོར་ལུང་བསྟན་བཅས། །བརྩེ་བས་འདོམས་པར་མཛད་ལ་གུས་ཕྱག་འཚལ། །དེ་ལྟའི་མྱ་ངན་འདས་བྱུང་གཏམ། །ངོ་མཚར་ཨུཏྤལ་ཕྲེང་བར་བརྒྱུས། །སྐལ་བཟང་དད་པའི་རྣ་བ་ཡི། །མཛེས་བྱེད་རྒྱན་དུ་འདི་ལོངས་ཤིག །འདིར་བདག་ཅག་རྣམས་ཀྱི་སྐྱབས་མགོན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པའམ་རིག་འཛིན་འགྱུར་མེད་རྡོ་རྗེ་འཇིགས་བྲལ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེ་ཞེས་ལྷ་དང་མིའི་འཇིག་རྟེན་དུ་མཚན་ཡོངས་སུ་གྲགས་པ་འདི་ཉིད་དགུང་ལོ་དྲུག་ཅུ་རེ་བརྒྱད་བཞེས་པ་ཆུ་མོ་སྦྲུལ་ལོ་ཡན་ཆད་ཀྱི་རྣམ་པར་ཐར་

― MLP003_Page_0279 ―

^{[མ་དཔེ་གཟིགས་ན་འདིར་གནོན།]}

[Full Size]

པ་རྣམས་བརྗོད་ཟིན་ནས། དེ་འཕྲོས་ཤིང་རྟའི་ལོ་ཤར་མཚམས་ཞི་བའི་དབྱིངས་སུ་གཟུགས་སྐུའི་བཀོད་པ་བསྡུས་པའི་མཛད་པ་ཐ་མའི་རབས་རྣམས་ཅུང་ཟད་ཅིག་གླེང་ན། སྤྱིར་རང་གཏེར་གྱི་ལུང་བྱང་ལས་དགུང་ལོའི་ཚད་བདུན་ཅུ་དོན་བརྒྱད་དང་དོན་བདུན་འདམ་ཁ་ལྟ་བུར་གསུངས་པ་འཁྲུངས་ལོ་བྱའམ་ཁྱི་གང་རིགས་སུ་སྣང་བའི་ཁྱད་པར་རམ། རྣམ་པ་གཅིག་ཏུ་ན་ལོ་འགོའི་འཛིན་ལུགས་སོགས་ཀྱིས་ཀྱང་མཐའ་ཅིག་ཏུ་མ་ངེས་ལ། དེ་ལྟ་ནའང་སྐུ་ཚེའི་འཕྲང་དགུ་ཡོད་པར་བཤད་པ་ལས། བར་གཅོད་དམ་སྲིའི་རྐྱེན་གྱིས་བསྒྲིབས་པ་ན༔ ཚེ་འཕྲང་ལྔ་ལས་ཚེ་ཚད་འཁྱོལ་བ་དཀའ༔ ཞེས་འབྱུང་བ་ལྟར་ཤིན་ཏུ་གཉན་པའི་སྐུ་ཚེའི་འཕྲང་ལྔ་པ་དེ། དགུང་ལོ་དྲུག་ཅུ་རེ་གཅིག་བཞེས་པ་མེ་ཕོ་ཁྱིའི་ལོ་དེ་ཡིན་པར་སྣང་ཡང་དུས་ཀྱི་འགྱུར་བའི་སྤྱི་ཆགས་དང་། ནང་གི་ཆགས་སྡང་ལ་བརྟེན་པའི་ཟིང་རྩི་ཕྲན་བུའི་སྒོས་ཆག་ལས་སྐུ་རིམ་གྱིས་རྒྱབ་འཁྱོར་བ་ལྟ་བུས་སྐུ་ཚེའི་བར་ཆད་དུ་མ་གྱུར་ཅིང་། དེ་རྗེས་ས་ཕོ་བྱི་བའི་ལོ་འབྲུམ་འཛེམ་གྱི་སྐུ་མཚམས་ལ་བཞུགས་སྐབས་ཐོ་རེངས་ཁའི་མནལ་ལམ་དུ། བུད་མེད་གཞོན་ནུ་མ་ཞིག་ནམ་མཁའི་དབྱིངས་སུ་འཕུར་བཞིན་དུ། སྟེང་རླུང་ནོན་པར་མ་བྱས་ན། །སྒྲ་གཅན་རེངས་པར་མི་འགྱུར་རམ། །ཞེས་སོགས་ཀྱི་ཚིགས་བཅད་འདོན་པའི་སྒྲ་གསན་པ། ནངས་པར་གཟིམས་ཁྲི་ལས་སྐུ་བཞེངས་དུས་འདི་ལྟར་བྱུང་ཞེས་ཞམ་རིང་པར་བཀའ་གནང་ཡང་རྐང་པ་གཉིས་པོ་དེ་མ་གཏོགས་བརྗེད་ནས་བློར་མ་གསལ་འདུག་ཅིང་། དེ་ནས་བཟུང་སྟེ་སྐུའི་སྲོག་མཐུར་གྱི་རླུང་འདྲེས་པ་སྟོབས་སུ་གྱུར་ནས་གྱེན་དུ་འཁོར་བས་སྐུ་འཕོ་བའི་མཚན་མ་གསལ་བར། རྡོར་བཟླས་དང་བུམ་ཅན་གྱི་རླུང་སྦྱོར་ཐུགས་ཉམས་སུ་བསྟར་བས་གེགས་ལས་གྲོལ་བ་ཞིག་བྱུང་བའང་སྐུ་ཚེའི་འཕྲང་ཨེ་ཡིན་སྙམ། དེ་གོང་ཤིང་སྤྲེལ་ཟླ་བ་དགུ་པའི་ཚེས་བརྒྱད་ཀྱི་ནུབ་བྲག་ཐོག་པ་བསོད་ནམས་བཟང་པོའི་སྐུས། དྲག་པོ་འདས་ནས་བརྩིས་པ་ལས། །འཁྲུལ་པའི་སྣང་བ་ལོག་པའི་མདངས། །མེ་ལོང་གསལ་བའི་གཟུགས་བཞིན་འཆར། །ཞེས་པའི་ལུང་བསྟན་གསུངས་པ་དེ། ཤིང་སྤྲེལ་ནས་ལོ་བཅུ་གཅིག་པའི་ངོ་འདས་པ་ཤིང་རྟ་འདི་དང་འགྲིགས་པས་སྐུ་ཚེའི་འཕྲང་དྲུག་པའམ་བདུན་པ་

― MLP003_Page_0280 ―

^{[མ་དཔེ་གཟིགས་ན་འདིར་གནོན།]}

[Full Size]

གང་རིགས་སུ་གསལ་ཞིང་། དེར་མ་ཟད་མེ་ཁྱིའི་ལོ་ནས་བཟུང་གཏེར་ལུང་ལས་བཤད་པའི་སྐུ་ཚེའི་ཚད་བཞིན་ཞབས་པད་བརྟན་པར་བཞུགས་དགོས་པའི་གསོལ་འདེབས་ཞུ་མི་བྱུང་བ་རྣམས་ལའང་། རྟེན་འབྲེལ་གྱི་སྣ་འགའ་ཞིག་ལོག་པས་རང་སྐལ་གྱི་གཏེར་ཁ་གསུམ་དང་རྡོར་གླིང་གི་གཏེར་ཞབས་རི་བོ་རྩེ་ལྔའི་ཟབ་གཏེར་རྣམས་མ་ཐོན་པ་སོགས་ཀྱིས་ཚེ་ཚད་ཀྱང་དེ་འདྲ་སྡོད་པ་ཅི་ལ་འོང་ཞེས་ཞལ་གྱིས་མི་བཞེས་པ་དང་། ལར་རྟེན་འབྲེལ་གཞན་དབང་དུ་མ་ཐལ་ན་རྨི་ལམ་གྱི་མཚན་མ་བརྟན་པོ་ལ། གཏེར་ལུང་ནས་བཤད་པའི་ཚེ་ཚད་ཀྱི་སྟེང་དུ་ལོ་གཉིས་ཀྱི་འཕར་ཁ་ཡོང་རྒྱུ་འདྲ་ཞིག་ཡོད་ཀྱང་ངེས་ཏིག་ཅི་ཡོད་གསུངས། སྤྱིར་དུས་ལ་མ་ཐོགས་མ་ཆགས་པའི་ཡེ་ཤེས་ཀྱི་གཟིགས་པ་གསལ་ལེར་མངའ་བས། སྔར་དགེ་སློང་བསྟན་འཛིན་སྐྱེས་མཆོག་གིས་བྱང་འདྲེན་གྱི་ལས་ཚན་དགོངས་པ་ནན་གྱིས་ཞུས་སྐབས། གཏེར་བྱོན་ཨ་ཐམ་མ་གཅིག་དང་སྲབ་ཐེར་བུབས་ཀྱི་གནང་སྦྱིན་བཅས། ངེད་རང་ཁམས་བཟང་རིན་ལས་ཚན་གྱི་དགོངས་པ་ཞུ་རེ་མ་བྱེད། དེ་ནས་རྣམ་པ་ཤར་ཡོང་གསུངས་འདུག་པ་ལྟར་འདི་ལོ་རྗེ་ཉིད་དབོ་ཟླར་དག་ཞིང་དུ་གཤེགས་ནས་མི་རིང་བར་སྣྲོན་ཟླའི་མཇུག་ཏུ་ཁོང་པ་འདས་སོང་བ་དང་། ཆུ་འབྲུག་ལོར་བདག་བར་ཁམས་སུ་འགྲོ་དུས་གསུང་བརྟག་ཞུས་པར་ལོ་གཅིག་གི་ཁོངས་སུ་འདི་གར་འབྱོར་བ་ཡོང་ཐུབ་ན། དེ་བར་གཞིས་བྱེས་གཉིས་ཀར་ཉེར་འཚེ་མེད་ཅེས་བཀའ་སྩལ་ཅིང་། དེ་རྟིང་བྱང་མི་གཞུངས་སུ་རྗེས་བསྙགས་ཀྱི་བཀའ་ཤོག་ཕེབས་པར་ཡང་ལོ་གཅིག་ཁོངས་སུ་ཡར་འབྱོར་རྩིས་གཞན་དབང་དུ་མ་ཐལ་བ་གྱིས་ཤིག་པའི་བཀའ་ལུང་བཞིན། ཡར་འབྱོར་བསྟུན་རྒྱལ་ཟླའི་འགོ་ནས་རང་ནད་ཀྱིས་མནར་ཏེ་མལ་དུ་ལྷུངས་པ་དང་། སྔ་ལོ་འབུར་བཟོ་དབུ་མཛད་མགོན་པོ་འགྲོ་གདོང་འོག་མིན་ཡང་རྩེའི་རྗེ་ཉིད་རང་གི་སྐུའི་ཞལ་སྐྱིན་བཟོ་བཅོས་དང་། སྒྲུབ་སྡེ་བསམ་གཏན་རྩེའི་ཚོགས་དབུའི་ཉིད་ཀྱི་སྐུ་བཞེངས་པར་ཤིན་ཏུ་མཉེས་པས་དེང་སང་ཡང་ངེད་རང་གི་འདྲ་སྐུ་ལེགས་པོ་ཞིག་བཞེངས་དགོས་ཡོད་པས་སེམས་ལ་ཞོགས་ཕེབས་པ་ལྟར། འདི་གར་ཕྱིས་དབུ་མཛད་འཛོམ་ཕྲུག་གིས་སྐུ་འདྲའི་བཟོ་ཚུགས་སྐབས་ཁོང་རང་གདུང་མཇལ་དང་

― MLP003_Page_0281 ―

^{[མ་དཔེ་གཟིགས་ན་འདིར་གནོན།]}

[Full Size]

སྦྲགས་སྔར་གྱི་བསླབ་སྟོན་ཡོད་ཚུལ་བཅས་འབྱོར་བ་དང་། འོག་མིན་ཡང་རྩེའི་རྒྱ་ཕེབས་སྒྲིག་དུས་གཟུངས་འབུལ་ལ་ཕེབས་སྐབས་ཤིང་བཟོ་བ་དབུ་མཛད་བཀྲ་ཤིས་གླིང་པར་མཆོད་རྟེན་གྱི་ཤིང་བཟོ་དཀའ་སླ་ཅི་འདྲ་ཡོང་ཕེབས་པར། དཀའ་ལས་ཆེ་བ་རང་མི་འོང་ཞུས་སོང་བར་དེང་སང་མཆོད་རྟེན་གྱི་ཤིང་བཟོ་ལེགས་པོ་ཞིག་བྱེད་དགོས་ཡོད་པས་ཐུགས་ལ་ཞོགས་ཕེབས་པ་དང་། ཡང་འདི་ལོ་བདག་གིས་ཀེག་མྱུལ་གྱི་གཉན་ཆ་བཅས་སྤྱི་སྒོས་གང་སར་ཆག་སྒོ་ཡོད་མེད་ཞུས་པར། འདི་ལོ་མཁན་རིན་པོ་ཆེ་རང་ལ་སྒོས་ཆག་མི་འདུག་རུང་སྨིན་གྲོལ་གླིང་སྤྱི་ལ་ཆག་ཆེ་བ་འདུག་ཚུལ་ཕེབས་པ་སོགས་ངེས་པའི་གཏན་ཚིགས་མང་པོ་དང་། ཁྱད་པར་ཆུ་མོ་སྦྲུལ་ལོ་ཤར་བ་ནས་བརྩམས་ཏེ་ཞིང་ཁམས་ཕྱི་མར་ཐུགས་ཆེས་སྤྲོ་བས་འཕྲལ་ཡུན་བླང་དོར་གྱི་གནས་ལ་གདམས་པའི་ཞལ་ཏ་བརྒྱུད་མར་སྩལ་འདུག་པ་དང་། ཤ་འུག་གཏེར་བྱོན་གྱི་མཁའ་འགྲོའི་ཆོས་སྐོར་ཡང་ཤོག་སེར་ལས་འབེབས་པར་མཛད་ནས་བཀའ་བབས་ཆོས་ཀྱི་བདག་པོ་ལ་གཏད་རྒྱ་དང་བཅས་སྩལ་ཅིང་། བཀའ་བརྒྱད་བདེ་འདུས་ཀྱི་སྒྲུབ་ཁོག་སྟག་ལོར་བཀའ་རྩོམ་གནང་འཕྲོ་ལུས་པའང་འདི་ལོ་བསྡུ་བར་མཛད་ནས་དེའི་སྦྱར་བྱང་གནང་དུས་སྒྲུབ་ཁོག་གྲུབ་པར་བྱས་ཡོད་པས་སླར་ངའི་ལོ་མཆོད་དེ་ལ་བཀའ་བརྒྱད་ཀྱི་སྒྲུབ་ཆེན་ཞིག་ཚུགས་པ་གྱིས་གསུངས། གྲྭ་ཚང་གི་དགེ་བསྐོས་འཕོ་དུས་ཀྱི་བཅའ་ཡིག་ལྗགས་སྒྲོག་གནང་བའི་ཚེའང་། མགུལ་ཆམ་གྱིས་ཅུང་ཟད་སྐུ་མ་བདེ་བས་གཅུང་རྗེ་དབོན་ཕྱག་མཛོད་སོགས་ཞམ་རིང་པ་རྣམས་ཀྱིས་སྐུ་འཁྲུགས་དོགས་པས་ད་རེས་ལྗགས་སྒྲོག་མ་གནང་ན་ཞུས་སོང་ཡང་ད་ལམ་མ་ཀློག་ན་མི་འོང་གསུང་། དོན་ཚན་བསྡུས་པའི་ལྗགས་ཀློག་དང་གནད་ཆེ་སར་ཞིབ་བཀྲོལ་གྱིས་གདམས་པའི་མཇུག་ཏུ། དགེ་འདུན་ཐམས་ཅད་ཐུགས་མཐུན་ཞིང་བཙུན་ཚུགས་བཟང་བས་གཞི་བཟུང་། ཐོས་བསམ་སྒོམ་གསུམ་གྱིས་རྒྱུད་སྦྱངས་ཏེ་ཅི་བྱས་ཆོས་དང་མཐུན་པར་མཛོད། ཁ་ཆེམས་ཀྱང་དེ་ལས་ལབ་རྒྱུ་མེད་དོ་གསུང་། དེ་བཞིན་དུ་སྡེ་པ་བྱ་པ་ཡུམ་སྲས་རྣམས་སྦྲུལ་ལོའི་འགོར་ཕེབས་པའི་ཞབས་བརྟན་སོགས་རྒྱས་པར་ཕུལ་ཏེ་ཡུམ་སྲས་སྔོན་དུ་ཐེགས། ལྕམ་ཀུན་དགའ་དཔལ་

― MLP003_Page_0282 ―

^{[མ་དཔེ་གཟིགས་ན་འདིར་གནོན།]}

[Full Size]

འཛོམ་རེ་ཞིག་བཞུགས་པ་ཟླ་བ་ལྔ་པའི་ནང་དུ་ཐོན་གདོང་། བླང་དོར་གྱི་ཞལ་འཁོས་དཔྱིས་ཕྱིན་པ་སྩལ་ཏེ་ད་ཕྱིན་ཆད་འཕྲད་པ་ཞིག་མི་འོངས་བས་ཁ་ཆེམས་ཡིན་གྱིས་སེམས་ལ་ཞོག་འཚེང་མ་སོང་ན་ཨ་ཁུ་ལགས་ཀྱིས་ད་དུང་སྐྱོར་ཅིག་གསུང་། ཆུ་སྦྲུལ་ཟླ་བ་གསུམ་པའི་ནང་དུ་རྣམ་སྤྲུལ་རིན་པོ་ཆེ་ཡབ་སྲས་ཕེབས་དུས་ཀྱང་ཐུགས་སྲས་སྤྲུལ་པའི་སྐུ་གསན་སྦྱོང་ལ་སྔར་ནས་ཕེབས་འདུན་དེ་བཞིན་ལ། ད་རེས་བཞུགས་ན་དབང་ལུང་འབུལ་གང་ཐུབ་བྱེད་ཅེས་བཀའ་ཕེབས་གནང་འདུག་ནའང་དགོན་ལག་སོ་སོའི་ངོ་བསྟུན་གྱིས་ཕེབས་དགོས་སྟབས་ཁྲིགས་སུ་མ་ཁེལ། དེ་རྟིང་ཆུ་སྦྲུལ་ཟླ་བ་བཅུ་པའི་མཇུག་ཏུ་རྣམ་སྤྲུལ་རིན་པོ་ཆེ་མོན་སྒང་སྟེང་དུ་ཕེབས་རྒྱུར། དེ་དང་བསྟུན་ནས་ཐུགས་སྲས་རིན་པོ་ཆེ་ཡང་འདིར་ཕེབས་རྩིས་ཀྱི་ཞུ་ཡིག་འབྱོར་བར་ད་ཆ་ཆོས་བཀའ་འབུལ་ཐུབ་པ་ཞིག་མི་ཡོང་འདུག་པས་མ་ཕེབས་པ་འགབ་ཅེས་པ་བཀའ་ལན་སྩལ་སོང་ཞིང་། དེ་དུས་ནུབ་ཅིག་འོད་གསལ་གྱི་གཟིགས་སྣང་ལ་བྱ་ཡུལ་དུ་ཐེགས་པའི་ལྕམ་ཀུན་དགའ་དཔལ་འཛོམ་དེ་རྒྱན་ཆའི་རིགས་མེད་པར་སྐྲ་རྒྱབ་བསྙིལ་དར་དམར་གྱིས་བསྡམས་པའི་རྣམ་པར་སྐུ་དྲུང་དུ་འོངས་ནས། དར་དཀར་རིང་པོ་ཞིག་ཕྱག་ཏུ་ཕུལ་བྱུང་བ་བཞེས་པ་ན། དེའི་སྣེ་མོ་གཞན་ཕྱོགས་མོ་རང་གིས་ཟིན་བཞིན་པས་འཐེན་ཏེ་སྐུ་ཕར་འདྲེན་པ་ལྟ་བུ་ཞིག་བྱུང་གསུང་བ་ལ་ཞམ་རིང་པས་མནལ་ལྟས་དེ་འདྲ་ལེགས་པོ་མིན་འདྲ་ཞུས་པར་མི་ལེགས་པ་མིན་མཁའ་སྤྱོད་མས་ལམ་སྣ་འདྲེན་པ་ཡིན་འདུག་གསུང་། ཡང་ལོ་དེ་གའི་ཟླ་བ་བཅུ་གཅིག་པའི་ནང་དུ་ནུབ་ཅིགལྷ་ལྕམ་ས་ལེའི་ཡང་སྲིད་སྔ་མ་དེ་གོས་རྒྱན་རང་ཆས་ལ་ཕུ་རུང་གཡོན་པ་ཕུད་ཅིང་གཟི་བྱིན་མཚུངས་པ་མེད་པའི་རྣམ་པར་ཐལ་གྱིས་འོངས་ནས་རྗེ་ཉིད་རང་ཕྱག་དཔེ་ཁང་གི་སྒོ་རྩ་རྒྱུན་དུ་བཞུགས་ས་དེ་གར་བཞུགས་འདུག་པ་ལ་བཏུད་ནས། ད་རེས་སྲོག་མཐུར་གྱི་རླུང་རེངས་པས་སྐུ་མ་བདེ་བ་དེ་ལ་བྱུག་པ་ཞིག་ཕུལ་ན་ཁྱད་ཆེ་ཞེས་སྐུ་རིལ་པོར་ཞུན་མར་གྱིས་བཀུས་སོང་བའི་མཚན་ལམ་བྱུང་བ་དང་། དེ་སྐབས་ནུབ་མོ་ཁ་ཤས་མཚན་ལ་ཐུགས་ཚིག་ཉམས་ཀྱིས་མནལ་ཆག་པ་ཞིག་བྱུང་བར། གསོལ་དཔོན་གྱིས་སྔ་སོར་དེ་འདྲ་བྱུང་དུས་གཞུང་ལ་རྒྱར་མི་ཤིས་པ་

― MLP003_Page_0283 ―

^{[མ་དཔེ་གཟིགས་ན་འདིར་གནོན།]}

[Full Size]

རེ་ངེས་པར་འོང་གི་འདུག་ད་རེས་འདི་ཡང་སྤྱི་སྒོས་གང་རུང་ལ་གནོད་པའི་ལྟས་ཤིག་མིན་ལས་ཆེ་ཞུས་པར་དེ་འདྲའི་ངེས་པ་རང་མེད་དམ་གསུངས། ཟླ་བ་དེ་གའི་ཚེས་བཅུའི་ཉིན་སྐུ་ཞང་ཆིབས་དཔོན་གྱི་ཐང་སྐུའི་རྒྱབ་གཟུངས་གནང་སྐབས། རྗེ་དབོན་ཕྱག་མཛོད་ཀྱིས་ཕྱག་རྗེས་གནང་དགོས་གཞན་འདྲ་ཡང་འདུག་པས་སླར་ལྡེབས་སུ་གནང་ན་ཡོང་འདྲ་ཞུས་པར། ད་རེས་རང་བྱེད་སླར་རྒྱག་ལོང་ཡོང་བའི་ངེས་པ་མེད་པས་ལུས་ན་ཨ་བར་འདོད་པ་མ་རྫོགས་པ་འོང་གསུང་བ་དང་། དེ་དུས་གཅུང་རྗེ་དབོན་སྐུ་བསྙུན་མུས་ལ་ཉིན་ཞིག་བཀའ་ལས་འཕྲོད་བསྟེན་ལ་འབད་དགོས། གཟུགས་མ་ཐང་ན་མགྱོགས་མྱུར་བྱ་བ་རྒྱ་ཆེན་བྱེད་དགོས་པ་ཞིག་འོང་བ་འདུག་གསུངས། འཕྲོད་བསྟེན་གང་འགབ་ཞུས་པར། རིན་ཆེན་རིལ་བུ་དང་སྦྱོངས་ཤིག་བྱས་ན་འཕྲོད་ཅེས་སྩལ་བ་ལྟར་བསྒྲུབས་པས་མྱུར་དུ་དྭངས་པར་བཀའ་ལས་ད་རེས་ནད་ལས་གྲོལ་བ་དེས་བློ་བདེ་གཞན་ཁོང་ཁུ་དབོན་རྣམས་ལ་ཐུགས་བསུན་འོང་བར་འདུག་གསུང་། ཟླ་བ་བཅུ་གཉིས་པའི་ཚེས་བཅོ་བརྒྱད་ཀྱི་ཉིན་དེ་རིང་ཀུན་མཁྱེན་ཆོས་རྗེའི་དུས་མཆོད་ཡིན་པས་ངེད་རང་ཚོ་གཙུག་ལག་ཁང་གི་གནས་རྟེན་རྣམས་ལ་མཆོད་འབུལ་དུ་འགྲོ་ཞེས་ཕེབས་ཏེ། སྙན་ཤལ་མཆོད་འབུལ་དང་སྨོན་ལམ་རྒྱས་པར་གནང་ཞིང་། འདུ་ཁང་དུ་རྒྱལ་མཚན་སོགས་སྤྱན་གཟིགས་སྩལ་ནས་ཐམས་ཅད་ལ་ཐུགས་བརྩེ་བའི་སྤྱན་རས་ཀྱི་བཙའ་བས་གཟིགས་པ་ཞིབ་པར་གནང་། དེ་ཞོར་ལི་མ་ལྷ་ཁང་དུའང་ཕེབས་ནས་རྟེན་སོ་སོའི་རྒྱུ་དབྱིབས་སོགས་ཀྱི་རྟེན་བཤད་རྒྱས་པར་གནང་ཞིང་ཕེབས་ཁར་གཅུང་ཕྱག་མཛོད་ལ་ལི་མ་ཟེར་བ་འདི་དང་འདི་རྣམས་སླར་བརྗེ་ཐུབ་པ་ཞིག་མཛོད་ཅེས་སྩལ། ཉི་ཤུའི་ཉིན་ཞབས་དྲུང་གཅུང་རིན་པོ་ཆེར་ལོ་མཇུག་དུས་རིམ་ན་ནིང་བཞིན་འདི་ལོ་ཡང་ཁྱོད་རང་གིས་བསྐུལ། སང་ཕོད་ནས་ཅི་འདྲ་བྱེད་ཁྱོད་རང་གིས་ཤེས་གསུངས། ཉེར་གཉིས་ཀྱི་ཉིན་དེ་རིང་ཡབ་རྗེའི་དུས་དྲན་གྱི་མཆོད་པ་ཡིན་པས་གསང་སྔགས་ཕོ་བྲང་དུ་མཆོད་འབུལ་ལ་འགྲོ་ཞེས་ཕེབས་ནས་ཕྱེ་འཕུར་བཞི་དང་འཕན་རིང་གཉིས་དཀར་དཔྱད་སོགས་མཆོད་ཆ་མཚར་བ་འདྲའང་འབུལ་བར་མཛད་ཅིང་ཞལ་རས་ལྷ་ཁང་གི་མཆོད་སྟེགས་ཀྱང་ཡར་སྤོ་

― MLP003_Page_0284 ―

^{[མ་དཔེ་གཟིགས་ན་འདིར་གནོན།]}

[Full Size]

བའི་ཞལ་འཁོས་གནང་། མཆོད་འབུལ་དང་སྨོན་ལམ་ཡང་རྒྱས་པར་མཛད། དེ་ཞོར་བླ་བྲང་གི་གཙང་ཁང་དུའང་ཕེབས་ཏེ། འདི་ལ་ཡང་མཆོད་ཆས་འགའ་ཞིག་འབུལ་བ་དང་མཆོད་སྒྲིག་གི་བཀོད་པ་བཟོ་དགོས་འདུག་སྟེ། སླར་དངུལ་གདུང་སྒྲིག་པ་དང་མཉམ་དུ་བྱས་ན་ཡོང་བ་འདུག་གསུང་ཞིང་། ཀ་བ་བཞི་པོའི་ཁྱོན་ལ་ཞབས་འཆག་མཛད་དེ་ནུབ་ཀྱི་ཀ་བ་ནང་མའི་ཀ་གདོང་དེ་ལ་སྐུ་བརྟེན་ཏེ་བཞེངས་བཞིན་པ་ལས། ངའི་གདུང་འབུམ་དེ་བཟོ་ཁྱད་ཐོན་པའི་མཚར་ལ་ཆུང་བ་ཞིག་བྱེད་ན་ཀུན་བཟང་ཕོ་བྲང་གི་ཀ་བ་བཞིའི་བར་དང་། སྐུ་ཚད་ཆེ་བ་ཞིག་འགྲུབ་ན་བཞུགས་ས་འདི་རང་འོས་པ་འདུག་པས་དེ་ག་ཐུགས་ལ་ཞོག་གསུང་བ་དང་། དེར་མ་ཟད་འདི་ལོ་གཙུག་ལག་ཁང་གི་གཟིམས་ཆུང་ཀུན་བཟང་ཡང་རྩེའི་གཏོར་གཞི་རྣམས་ཀྱང་ངེད་རང་ཡོད་དུས་མ་སྤོས་ན་ཕྱིས་ཁྱེད་རྣམས་ཀྱིས་སྤོ་མི་ནུས་པས། སྔགས་པའི་གཏོར་མ་དམ་ཚིག་ཡོད་མེད་ཐམས་ཅད་ལ་སྟོན་པ་འདི་མི་ལེགས་པ་འདུག་གསུངས་ནས་སྐུ་རྟེན་དང་གཏོར་མ་རྣམས་བསིལ་བ་ཚལ་དུ་སྤོས་པའི་ཤུལ་དུ་ད་ལྟའི་མཆོད་གཤོམ་འདི་ཉིད་སྒྲིག་པར་མཛད་ནས། དེར་ཞབས་དྲུང་གཅུང་རིན་པོ་ཆེའི་བཞུགས་ས་སྤོ་བའི་ཞལ་འཁོས་དང་། ཞབས་དྲུང་རིན་ཆེན་རྣམ་རྒྱལ་ལ་སྒྲ་རྩིས་ཀྱི་ཡོན་ཏན་མཐར་ཕྱིན་པ་ཞིག་གི་སློབ་སྦྱོང་གྱིས་ཞེས་འཆི་མེད་འོད་སྣང་དུ་ངེད་ཀྱི་རྩར་སྐྱེལ་བ་གནང་། ཡང་ནངས་ཞོགས་ཤིག་བཞེངས་འཕྲལ་ཤར་མར་དབང་ཁང་དུ་ཕེབས་ནས་ཐོག་མར་འཕྱོང་རྩེའི་མྱོས་སྲུང་ནས་དར་ཅིག་གཟིགས་རྗེས། བཞུགས་ཁྲིའི་མདུན་ཐད་ཀྱི་གུང་དེར་ཕེབས་ཏེ་མ་འོངས་པ་འདྲ་བྱུང་ན་ནང་འདི་རང་འཁོས་སུ་ཕེབས་པ་ཡོང་བ་འདུག་ཅེས་གསུང་། ཉེར་གསུམ་ནས་ལོ་མཇུག་དུས་རིམ་གྱི་ཚོགས་དབུར་ཞབས་བསྐྱོད་དེ་རྒྱུན་གྱི་གདབ་ལས་དང་ཉེར་བརྒྱད་ཀྱི་གདབ་ལས་རྒྱས་པའི་ཆས་ཞུགས་ཀྱང་སྔར་རྒྱུན་བཞིན་མཛད་པར། གདབ་ལས་རྒྱས་པའི་ཉིན་རླུང་འཚུབ་དྲག་པོ་གློ་བུར་དུ་ལངས་པ་དང་། གནམ་གང་གཏོར་སྐྱོང་གི་ཉིན་ཞིང་སྐྱོང་མ་མོའི་འཆམས་སྐུ་ཞལ་བུག་ལ་ཁད་ཀྱི་པྲ་རྟགས་ཀྱང་ངན། དེ་དུས་ཉེར་གསུམ་གྱི་ཉིན་བཞུགས་ཁྲི་ནས་བཞུགས་སྟན་ཁ་གང་མ་མཐུག་པ་གཉིས་འབེབས་པར་མཛད་ནས་

― MLP003_Page_0285 ―

^{[མ་དཔེ་གཟིགས་ན་འདིར་གནོན།]}

[Full Size]

སྲབ་མོ་ཞིག་འདིང་བ་གནང་སོང་བར། རྗེ་དབོན་ཕྱག་མཛོད་ཀྱིས་བཞུགས་སྟན་དམའ་རུ་གནང་བ་རྟེན་འབྲེལ་ལ་གནོད་པ་འདྲ་ཞུ་བར་བཀའ་ལས། ང་རང་སྡོད་ཡུན་དེ་ཙམ་ཡིན་ད་ཆ་འདི་ཙམ་བྱས་ན་བདེ་བ་འདྲ་གསུངས། དེ་ནས་ཤིང་རྟ་གནམ་ལོ་གསར་ཚེས་ཀྱི་དུས་སྟོན་ཚོགས་དབུར་ཡང་སྔར་རྒྱུན་ལྟར་ཕེབས་པ་ལ་དགེ་བཤེས་རྙིང་པ་རྣམས་དང་ཞབས་དྲུང་གདུང་བརྒྱུད་སྐུ་མཆེད་ཀྱི་ཞབས་ཕྱིར་གཞིས་རང་དུ་སློབ་སྦྱོང་བྱས་པའི་བློ་གསར་རྣམས་ཀྱིས་ཀྱང་ཚོགས་ལངས་བགྲོ་གླེང་གི་མཆོད་འབུལ་ཞུས་པ་ལ་ལུང་རིགས་ཀྱི་འགྲོ་ཕྱོགས་ལེགས་པར་བྱུང་ཞེས་མཉེས། ཚེས་གཉིས་ཀྱི་བླ་བྲང་གི་བཞུགས་གྲལ་ཡང་སྔར་འཁྱུད་བཞིན་གནང་བར་སྔ་དགོང་སྐུ་ལ་མཆོད་རྒྱུའི་འགན་སྦྱར་འདོན་པ་གནང་སྐབས། ད་ལམ་རྒྱལ་བ་གོང་མས་གནང་བའི་འགན་སྦྱར་འདི་རྟེན་འབྲེལ་གྱི་ཁྱད་གྱོན་དགོས་གསུངས། ཚེས་གསུམ་ལ་ལྕགས་ལའི་མི་སྣ་སོགས་ལ་ཚེ་དབང་དང་གུ་དྲག་གི་དབང་། རྩེ་ལེ་དཔོན་སློབ་དང་དབུར་སྟོན་དཔོན་དྲུང་སོགས་ལ་ཐུགས་ཐིག་གི་ཁྲིད་ཁ་ཚུགས་ཤིང་། ཕྱི་དྲོ་མགོན་ཁང་སྦུབས་ཀྱི་དུས་གསོལ་ལ་ཕེབས་པའི་ཚེ་རྔ་སྦུག་མཛད་དེ་བསྐང་གསོ་ལྗགས་སྐུལ་གནང་ཞིང་། མཇུག་གི་བཀྲ་ཤིས་ཀྱི་སྐབས་བཀྲ་ཤིས་དེ་མཁན་རིན་པོ་ཆེའམ་བུ་ཆུང་བགྲེས་པ་གང་རིགས་ཀྱིས་བསྐུལ་ཞེས་ཕྱག་ཆོལ་དེ་ངེད་ལ་གནང་བྱུང་བ་གདུང་བརྒྱུད་རིན་པོ་ཆེར་ཕུལ་བ་ལྟར་བཀྲ་ཤིས་བསྐུལ་བ་གནང་ཞིང་། དེ་ནས་ཕེབས་ཞོར་ལ་གསང་སྔགས་ཕོ་བྲང་དུ་དགེ་སློང་ཕུན་ཚོགས་ཀྱི་འདད་ཀྱི་གྲལ་དབུར་ཞབས་བསྐྱོད་པར། ལྗགས་བསྔོ་གསུང་འཕང་དམའ་བར་འདུག་པས་ཐམས་ཅད་སྐུ་ལྟེམ་པ་མིན་ནམ་སྙམ་བློ་འཁོལ་བར་བྱེད་པ་ན་ཆམ་པའི་རྣམ་པ་ཞིག་ཡིན་པ་འདྲ་གསུངས། ཚེས་ལྔའི་ཉིན་ཞབས་དྲུང་གཅུང་དང་ཕྱག་མཛོད་ནས་མགུལ་ཆམ་གྱི་རྣམ་པ་ཞིག་བཞེས་འདུག་པ་འཁྲུགས་དོགས་པས་རབ་གནས་གནང་རྒྱུ་དེ། ཟླ་བ་གཉིས་པའི་ཚེས་བཅོ་ལྔ་ཙམ་ལ་སྐུ་གཟུགས་ཀྱི་བབས་ལ་གཟིགས་ནས་འགྱང་ན་འགབ་འདྲ་ཞུས་པར། བཀའ་ལས་རབ་གནས་དུས་ཐོག་དེ་གར་གྲ་འགྲིག་ལ་བཀྲ་ཤིས་པ་ཞིག་བྱེད། བར་ཆད་འོང་བས་ཕྱིར་འགྱངས་པ་ལ་དགོས་པ་མེད་གསུངས། དེ་ལ་

― MLP003_Page_0286 ―

^{[མ་དཔེ་གཟིགས་ན་འདིར་གནོན།]}

[Full Size]

གནས་བྱའི་རྟེན་ནི་ཆུ་འབྲུག་གི་ལོ་གསར་བཞེངས་གནང་བའི་རྒྱལ་བའི་བཀའ་འགྱུར་རོ་ཅོག་དང་བསྟན་འགྱུར་གྱི་ཞལ་བསྲོ། ཆུ་སྦྲུལ་ལོ་བཞེངས་པའི་ཨོ་རྒྱན་སངས་རྒྱས་གཉིས་པའི་གོས་ཐང་ཆེན་མོ་དང་བླ་བྲང་རྩེའི་རྒྱ་ཕིབས་སྐུ་འབུམ་གྱི་བྲེའི་བྱ་འདབས་སོགས་རྟེན་འགངས་ཆེ་བ་མང་ཞིག་གྲུབ་པའི་རབ་གནས་གནང་བཞེད་ལ། ཟླ་བ་དགུ་པའི་ཚེས་བཅུ་གཅིག་གི་ཉིན་སྐུ་ཞབས་སུ་ངེད་རང་ཁུ་དབོན་ཐམས་ཅད་ཞལ་འཛོམ་པར། གཅུང་རྗེ་དབོན་གྱིས་རབ་གནས་གནང་རྒྱུ་དགུན་ཐོག་འདིར་འགྲུབ་ན་བསམས་པས་དེ་རིང་གཟའ་སྐར་གཟིགས་ནས་དུས་ཐིངས་པས་བཀའ་གྲོས་གནང་བ་ཞུ་གསུང་བར། རྗེའི་བཀའ་ལས་ཟླ་བ་བཅུ་པར་ཉི་མ་ལྷོ་བགྲོད་ཀྱི་དུས་དང་བཅུ་གཅིག་པར་དགུན་ཆོས་དུས་མ་བཅས་ལོ་མཇུག་གྲོལ་ཙམ་ལ་བྱས་ན་སྐབས་སུ་བབས་པ་འདྲ་ཕེབས་པ་ལྟར། ཞབས་དྲུང་སྐུ་མཆེད་དང་བདག་གིས་གཟའ་སྐར་བརྩིས་པས་ཟླ་བ་དང་པོའི་ཚེས་དགུ་ལ་རབ་གནས་ཀྱི་སྟ་གོན་དང་བཅུ་ལ་དངོས་གཞིའི་གཟའ་སྐར་ཉན་པ་ཙམ་འདུག་ཚུལ་ཞུས་པས། ཆོ་འཕྲུལ་གྱི་དུས་ཆེན་དང་ཡར་ངོ་ཚེས་བཅུའི་ཉིན་མཁའ་འགྲོ་འདུ་བའི་དུས་གནད་འགྲིགས་པ་བཅས་དེ་རང་ལེགས་པ་ཡོང་འདུག་ཅིང་རང་རེ་ལ་ལྟོས་པའི་འཇིག་རྟེན་དང་འབྲེལ་བའི་ཉེ་བ་དང་ཆོས་ཕྱོགས་ཀྱིས་འབྲེལ་བའི་སློབ་རིགས་མང་གཤིས་ཐམས་ཅད་སུན་གཙེར་ཆུང་ཁྱད་ཀྱིས། དེ་ཉིན་བུ་ཆུང་རྒན་པ་ངེད་རང་གི་ཁྲི་ཐོག་ཏུ་བསྐོ་བཞག་བྱས་ནས་རབ་གནས་ཀྱི་སློབ་དཔོན་བྱེད་དུ་བཅུགབུ་ཆུང་གཞོན་པས་ཆོ་ག་བསྐུལ་བའི་དབུ་མཛད་བྱོས། ངེད་རང་རྒད་པོ་གསུམ་ད་རེས་ཟོ་བདེར་ལྟད་མོ་བལྟ་བ་ཡིན་གསུང་བར། གཅུང་རྗེ་དབོན་གྱིས། སྤྱིར་གཏེར་ལུང་གིས་བསྟན་པ་ལྟར་ཞབས་དྲུང་བགྲེས་པ་བཞུགས་ཁྲིར་ཕེབས་པ་འོས་བབས་ལགས་ནའང་། ད་ལྟ་ཞབས་པད་བརྟན་རིང་སྐུ་ཚེའི་རྟེན་འབྲེལ་ལའང་གནོད་པར་དོགས་ཤིང་། ཁྱད་པར་གྲྭ་སློབ་ཐམས་ཅད་སེམས་ཕམ་པ་ཞིག་ཡོང་འདུག་པས་རེ་ཞིག་ཁྲི་འདོན་མི་འགབ་པའི་སྙན་འབུལ་ནན་ཆགས་ཞུ་བ་གནང་སོང་བའི་རྗེས་མཐུད་དུ། བདག་ཅག་དེར་འཁོད་ཐམས་ཅད་ཀྱིས་ཀྱང་ཕྱི་མཐའ་གཟིགས་པའི་བསླབ་སྟོན་ཡིན་པ་མ་ཤེས་པར་མགྲིན་གཅིག་ལྟ་བུས་

― MLP003_Page_0287 ―

^{[མ་དཔེ་གཟིགས་ན་འདིར་གནོན།]}

[Full Size]

ཞུས་པས། འོ་ན་ད་རེས་འདོད་པ་བཞིན་བྱས་པས་ཆོག་ཅེས་བཀའ་ཁྲོལ། ཚེས་བརྒྱད་ཀྱི་སྔ་དྲོ་གྲྭ་ཚང་གི་གྲྭ་པ་རིན་ཆེན་སྒང་པས་ཞབས་པད་བརྟན་པའི་གསོལ་འདེབས་སྒྲུབ་ཅིང་། བདག་གིས་སྨེ་བརྩེགས་ཀྱི་བྱབ་ཁྲུས་དང་ཁ་འབར་མའི་འཆི་བསླུའི་སྐུ་རིམ་ཞུས། དེ་ཉིན་རབ་གནས་ཀྱི་བཞུགས་སྟན་འདིང་སྐབས་ངེད་རང་ཕ་བུ་མཆེད་རྣམས་སྡེབས་འཛོམ་འདི་འདྲ་ཕྱིན་ཆད་དཀའ་བས་བུ་ཆུང་རིན་ཆེན་རྣམ་རྒྱལ་ཡང་ད་རེས་ཚོགས་སུ་སྡོད་ཆུག་ཅེས་གནང་བ་ལྟར་བཞུགས་སྟན་བཏིང་། དེ་ནུབ་ཞབས་དྲུང་སྐུ་བགྲེས་པས་རབ་གནས་མཆོད་བསྒྲིགས་ཀྱི་ཞལ་འཁོས་ལ་གསང་སྔགས་ཕོ་བྲང་དུ་ཐེགས་པ་ཕྱིར་ཕེབས་ཀྱིས་རྗེ་ཉིད་ཀུན་བཟང་ཕོ་བྲང་གི་གཟིམས་གུར་དུ་བཞུགས་པའི་སྤྱན་སྔར་སྐུའི་འཚམས་དྲི་ཞུས་ནས་ཕེབས་གདོང་། ཐུགས་འཁོལ་མི་དགོས་བུ་ཆུང་རང་ངའི་ལོ་ཚོད་ཙམ་མ་སླེབས་ཀྱི་བར་ངས་སྡོད་དོ་གསུང་བ་ལ་བཀའ་དྲིན་ཆེ་ཞེས་ཞུ་བ་གནང་། སྒྲིན་པོའི་བློ་ཅན་འགའ་ཞིག་གི་བསམ་པར་དེ་འདྲའི་བར་རང་བཞུགས་པ་ཅི་ལ་སྲིད་པས་གསུང་དེའི་དོན་གདུང་བརྒྱུད་རིན་པོ་ཆེ་ལའང་སྐུ་ཚེའི་ཚད་དེ་ཙམ་ཡོང་རྒྱུ་དང་། དེ་སྲིད་དུ་ཐུགས་རྗེ་ཡེ་ཤེས་ཀྱི་འཇུག་པ་ལས་ནམ་ཡང་མི་གཡེལ་བར་གཟིགས་པའི་བྱིན་གྱིས་རློབ་པའི་བཀའ་བཞེས་བཟང་པོ་ཡིན་པ་འདྲ་ཞེས་གླེང་བ་བྱུང་། དེ་ནས་ཚེས་དགུའི་ཉིན་གྲྭ་ཚང་འདུས་ཚོགས་ཀྱིས་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་དཀྱིལ་འཁོར་དང་འབྲེལ་བའི་རབ་གནས་ཀྱི་སྟ་གོན་དང་། ཚེས་བཅུའི་ཉིན་དངོས་གཞིའི་གསུང་ཆོག་མཛད་པའི་སློབ་དཔོན་དུ་ཕེབས་ཤིང་ཞལ་འདོན་རྣམས་ཞབས་དྲུང་གཅུང་གིས་བསྐུལ་བ་གནང་། དེ་དུས་མངའ་དབུལ་གྱི་རྒྱས་པའི་སྲེག་བླུགས་འབུལ་བའི་ཚེ་རྗེ་ཉིད་ཁྲི་ཐོག་ཏུ་བཞུགས་བཞིན་པ་ནས། དེའི་སྐུ་མདུན་དུ་དཀྱིལ་འཁོར་ལ་ཕྱོགས་པར་ཞབས་དྲུང་སྐུ་བགྲེས་པ་འཁོར་ལོ་སྒྱུར་བའི་ཆས་ཞུགས་ཀྱིས་བཞུགས་ཏེ་སྦྱིན་སྲེག་གི་སློབ་དཔོན་མཛད་ཅིང་། ཐབ་ཀྱི་མཐར་ཞབས་དྲུང་གཅུང་གིས་གར་དཔོན་མཛད་པའི་གར་པ་སུམ་ཅུས་བསྐོར་ཏེ། སུམྦྷའི་གླུ་གར་གྱིས་བགེགས་བསལ་རྗེས་སྒེག་སོགས་བཞི་དང་རབ་ཏུ་དགའ་བའི་གླུ་སྔོན་འགྲོའི་བཞི་བསྣོལ་དང་སུ་ར་ཏྭ་བཅུ་དྲུག་གི་གླུ་

― MLP003_Page_0288 ―

^{[མ་དཔེ་གཟིགས་ན་འདིར་གནོན།]}

[Full Size]

གར་ས་ཏྭ་འགྲོས་ཀྱིས་བསྡུ་བ་དང་བཅས་པས་མཆོད་རྗེས། ཐབ་དེར་ཙཱ་རུ་བསྒྲུབས་ཏེ་འབུལ་བ་དང་ཞབས་དྲུང་སྐུ་བགྲེས་པས་དབུས་སྣམ་སྦྱར་ཅན་གྱི་སེར་སྦྲེངས་ཚར་དུ་དངར་བས་གནས་བྱའི་རྟེན་གང་དང་གང་དུ་བཞུགས་པའི་གནས་སོ་སོར་མེ་ཏོག་འཐོར་བར་ཕེབས་དུས་ནམ་མཁའ་དྭངས་པ་ལ་འཇའ་འོད་ཀྱི་དྲ་བས་ཁྱབ་པ་སོགས་ངོ་མཚར་བའི་ལྟས་དང་། དེ་བཞིན་བགེགས་སྐྲོད་དང་ཁ་སྐོང་གི་ཞི་བའི་སྦྱིན་སྲེག་གི་སློབ་དཔོན་ཡང་ཞབས་དྲུང་གཅེན་གྱིས་མཛད་ཅིང་། ཡོན་བདག་བགོ་བའི་དུས་རྗེ་ཉིད་ཀྱིས་ཞལ་བཀོད་མཛད་དེ་གཅུང་རྗེ་དབོན་གྱི་བཞུགས་སྟན་ཡང་རྒྱུན་ལས་དཔངས་བསྟོད་ཅིང་གནང་སྐྱེས་བཟང་པོའང་སྩལ་ནས། ཕུན་སུམ་ཚོགས་པ་མངའ་བ་སོགས་དཀོན་མཆོག་གསུམ་གྱི་བཀྲ་ཤིས་ལ་འབྲུ་འགྲེལ་མཛད་པས་གླེང་བསླངས་ཏེ་སྙན་འཇེབས་ལུང་རིགས་ཀྱི་དཔུང་དང་ལྡན་པའི་ཡོན་བསྒོའི་གསུང་བཤད་རྒྱས་པར་གནང་ཐོགརྡོ་རྗེ་སློབ་དཔོན་གྱི་ཡོན་ཏན་སོགས་ལས་བརྩམས་ཏེ་ཞབས་དྲུང་སྐུ་མཆེད་དང་བདག་ཅག་འདུས་པར་བཅས་པ་ལ་ཡང་བསྔགས་བརྗོད་ཀྱིས་གཟེངས་བསྟོད་ངོས། ལྗགས་བསྔོ་ཤིན་ཏུ་རྒྱས་པར་མཛད་པས་རྣམ་དཔྱོད་དང་ལྡན་པ་ཐམས་ཅད་ཀྱི་ཡིད་རང་དབང་མེད་པར་འཕྲོག་པར་གྱུར། དེའི་ཚེ་རབ་གནས་ཀྱི་ཞབས་ཏོག་རྣམས་ཕྱག་མཛོད་ནས་སྩལ་ཏེ་བསྔོ་རྟེན་ཕྱག་འགྱེད་སྣེ་བཞག་སྟོན་མོ་བཅས་ཕུལ་དུ་བྱུང་བས་མཆོད་ཅིང་། གྲྭ་ཚང་སྤྱི་སོ་སྐུ་ཉེ་ནང་བཟན་སོགས་ཀྱིས་ལེགས་འབུལ་ཡང་རྒྱས་པར་སྟོབ། གསུང་ཆོག་གྲོལ་ནས་བླ་བྲང་དུ་ཕེབས་དུས་ཨོ་རྒྱན་གྱི་གོས་ཐང་ཆེན་མོ་སོགས་རྟེན་རྣམས་དང་དཀྱིལ་འཁོར་གྱི་བཅས་གཤོམས་རྣམས་ལ་གཟིགས་ཏེ། ངེད་ཆོ་གའི་བཅས་གཤོམས་དང་འདོན་ཆ་ལ་རུ་ང་བས་ཡིད་ཚིམ་པ་རང་དཀའ་བ་ཞིག་ཡོང་གི་ཡོད་རུང་། ད་རེས་བུ་ཆུང་རྒན་པས་ཞལ་འཁོས་མཛད་པ་ལྟར་བཅའ་སྒྲིག་རྣམས་ཀྱང་ཡིད་དུ་འབབ་པ་དང་། བུ་ཆུང་གཞོན་པའི་འདོན་པ་སྐུལ་ལུགས་གྲྭ་ཚང་གི་ཚོགས་ཀྱི་དང་ཚུགས་སྐད་གྲ་ཕྱག་རྒྱ་རོལ་མོ་སོགས་དང་། ལག་བདེ་བ་རྣམས་ཀྱི་གཏོང་སྒོ་འགྲིམ་པའི་བྱ་བྱེད་སོགས་ཐམས་ཅད་གྲ་འགྲིག་ཅིང་ཡིད་དུ་འཐད་པ་བྱུང་བས་བློ་ཁ་རྫོགས་ཞེས་ཤིན་ཏུ་མཉེས་པ་

― MLP003_Page_0289 ―

^{[མ་དཔེ་གཟིགས་ན་འདིར་གནོན།]}

[Full Size]

དང་བཅས་ཏེ་བླ་བྲང་དུ་ཕེབས། དེའི་སང་ཉིན་གྲྭ་ཕྱི་ནང་གི་ལྷ་འབངས་རྣམས་ཀྱིས་བྲོ་གཞས་ཀྱི་གཟིགས་འབུལ་ཞུས་པར་སྔར་ཡིན་ན་རྩེད་སྣ་ལ་གཟིགས་པར་མི་མཉེས་ནའང་། དེ་ཉིན་ངེད་རང་དཔོན་སློབ་ཐམས་ཅད་གཟིགས་པར་མ་ཐེགས་ན་ཁོང་ཚོ་བློ་ཁ་མི་རྫོགས་པ་ཡོང་འགྲོ་གསུངས་ཏེ། རྣམ་གྲོལ་ཡང་རྩེའི་འཕྱོང་རྩེའི་མྱོས་བསྲུང་ནང་ནས་ཡུན་རིང་གཟིགས་ཤིང་ཕྱག་ནས་ཀྱང་འཐོར། དེ་དུས་སྐུ་བད་ལྟ་བུའི་སྔར་གྱི་བསྙུན་རོ་འཕར་བར་བརྟེན་སྐུ་ཅུང་ཟད་མ་བདེ་བ་ལ་བཅུ་གཉིས་ཀྱི་ཉིན་གཟིམས་གུར་དུ་བདག་གིས་མཁའ་འགྲོ་གྲིབ་སེལ་དང་བཅོ་བརྒྱད་ལ་ཡང་ཐིག་གི་སྐུ་འཆི་བསླུ་ཕུལ། དཔོན་ཚང་ཆོས་མཛད་ཀྱིས་གསོལ་སྨན་ཕུལ་བ་སྐུ་ལ་འཇུག་པའི་འཕྲོད་ངོས་ལྗགས་སྐྱུགས་ཕེབས་པའང་ཆད། འོན་ཀྱང་ཚེས་བཅུའི་ནུབ་ནས་བཟུང་ཕྱག་རྩ་ལ་སྡོད་འཐེངས་གསལ་བར་འགྱུར་ཁྱད་ཐོན་པ་མ་བྱུང་བས་སྨན་པའང་བློ་འཚབ་པ་ཙམ་འདུག་པ་ནས་སྐུ་རིམ་ཅི་འདྲ་བསྒྲུབ་པ་འགབ་ཀྱི་བསླབ་སྟོན་ཕྱག་མཛོད་ནས་ཞུ་བ་མཛད་པར། ན་རག་དོང་སྤྲུགས་དང་སྦྱར་བའི་སྐོང་བརྒྱ་ཞིག་དང་སྨན་བླའི་མདོ་ཆོག་ཅིག་བྱས་ན་ཡོང་ཕེབས་པ་ལྟར། འཕགས་པ་ལྷ་ཁང་གི་ཞལ་རས་ཁང་དུ་གྲྭ་པ་ཞལ་གྲངས་ཀྱིས་སྐོང་བརྒྱ་དང་རྒྱལ་གླིང་ཚོགས་སུ་སྨན་བླའི་ཆོ་ག་གནང་བའི་ཡོ་བྱད་རྫོང་སྟ་གནང་ཞིང་། གཞན་ཡང་གྲྭ་ཕྱི་ནང་ཡར་འཕྱོང་རྣམས་ཀྱི་དགོན་ཆེ་ཕྲར་མང་བཀོལ་དང་། འདི་གར་གྲྭ་པ་བསྙེན་སོང་བརྒྱད་ཀྱིས་སྐུ་ཚེ་སྒྲུབ་པའི་མཚམས་བཅད། ཞལ་གྲངས་ཀྱིས་འཆར་ཀ་དང་ཚོགས་ཆེན་གྱི་ཡང་བཟློགགྲ་ཏོག་གསེར་གསུམ་གྱི་ཆོས་འདོན་གསུང་མི་འཆགམ་ཇོ་འགས་འབྱུང་བཞི་གཏོར་མ། བདག་གིས་དགོང་རེ་བཞིན་མཁའ་འགྲོའི་མེ་མཆོད་དང་སྔ་དྲོ་ཞབས་དྲུང་རིན་པོ་ཆེའི་ཞབས་ཕྱིར་བསྡད་ནས་གར་དབང་ཚེ་དཔག་མེད་ཀྱི་སྒོ་ནས་སྐུ་ཚེའི་སྒྲུབ་པ། དུས་ཅི་རིགས་པར་སྐུ་གླུད་བྱབ་ཁྲུས་སྐུ་འཆི་བསླུ་སོགས་སྐུ་རིམ་སྣ་མ་འགགས་པར་རིམ་གྱིས་བསྒྲུབས། དེ་དག་གི་ཚེ་རེས་སྐུ་དབུགས་ཅུང་ཟད་མི་བདེ་སྙམ་པ་ལ་སྤྱན་ཟིམ་མེ་བཞུགས་པ་ཡང་ཡང་བྱུང་བར་སྨན་པས་མནལ་མིན་ནམ་ཞུ་བ་ལ། གཉིད་མེད་ངེད་རང་གི་རྒྱུན་གྱི་དགེ་སྦྱོར་རྡོ་རྗེའི་བཟླས་པ་དེ་བྱེད་པ་ཡིན་

― MLP003_Page_0290 ―

^{[མ་དཔེ་གཟིགས་ན་འདིར་གནོན།]}

[Full Size]

གསུངས། བཅུ་དགུའི་སྲོད་འཁོར་ངེས་དོ་ཉིན་གྱི་ས་བདག་རྫོགས་མཚམས་སུ་བདག་དང་ཞབས་དྲུང་གཅུང་གཙུག་ལག་ཁང་ནས་འབོད་མི་གནང་བ་ལྟར་ཕྱིན་པས། ད་ལྟ་རླུང་གི་རྣམ་པས་མི་བདེ་བ་ཆེར་སོང་གསུང་ཞིང་དེ་ནུབ་ཞབས་དྲུང་སྐུ་མཆེད་བདག་ཅག་སྤུན་ལྕམ་དྲུང་གསོལ་དཔོན་བཅས་སྐུ་མདུན་དུ་ཡོད་པར་ཕྱི་མཐའ་གཟིགས་པའི་བསླབ་སྟོན་ཐམས་ཅད་ལྷུག་པར་སྩལ། ཁྱད་པར་སྐྱེ་བ་འདིའི་ཕྱི་མ་ལ་ལུས་ཀྱི་བཀོད་པ་གཉིས་འོང་བར་བཤད་ཀྱང་གཅིག་ཨོ་རྒྱན་གྱི་ཡུལ་དང་། ཅིག་ཤོས་བོད་ཀྱི་རྒྱལ་པོའི་ཚུལ་དུ་འོང་རྒྱུར་སྣང་ཡང་ཡུལ་གྱིས་བསྐལ་ནས་ཁྱེད་རང་རྣམས་ལ་གནས་སྐབས་སུ་ཕན་ཐོགས་པ་ཞིག་དཀའ། རི་བོ་རྩེ་ལྔའི་གཏེར་འདོན་པ་པོ་ད་ལྟའི་ལས་འཕྲོ་སད་པ་ཞིག་འོང་བར་བཤད་ཀྱང་འཕྲལ་དུ་འོང་བའི་ངེས་པ་མེད། དེས་ན་སྐྱེ་བའི་ཨང་ཉན་བྱས་གཞན་འདྲ་བས་ངའི་ཁྲི་ཐོག་ཏུ་བུ་ཆུང་རྒན་པ་དང་ཇོ་ལགས་ཀྱི་ཁྲིར་བུ་ཆུང་ལེགས་གྲུབ་བཞུགས་སུ་ཆུགབུ་ཆུང་མཆེད་ཀྱང་བསླབ་ཤེས་ཀྱི་ཡོན་ཏན་དང་ཐོས་རྒྱ་སོགས་ཕ་ལས་ལྷག་པ་ཡོད་པས་རང་ལ་ལྟོས་པ་རྣམས་ཀྱི་ཁོང་སྐུ་མཆེད་ལ་རེ་གནས་གྱིས། ཁུ་དབོན་མཆེད་ཐམས་ཅད་ཀྱིས་ཀྱང་བཤད་སྒྲུབ་ཀྱི་བསྟན་པའི་བྱ་བ་རླབས་པོ་ཆེ་ལ་སྙིང་སྟོབས་བསྐྱེད་པའི་འབད་རྩོལ་འདོན་དགོས་པ་ཡིན་པས། ཁོང་གཉིས་ཀྱི་རོགས་མཁན་རིན་པོ་ཆེས་མཛོད་ལ་གྲྭ་ཚང་གི་དུས་བཞིའི་ཆོས་གྲྭའི་འཆད་ཉན་དང་སྒྲུབ་མཆོད་ཀྱི་ཆོ་གའི་ཕྱག་ལེན་ཕྲ་ཞིབ་གཏན་ལ་ཕེབས་པ་འདི་རྣམས་ཞན་དུ་མི་འགྲོ་བའི་འཁོས་ཁྱབ་དང་། གཙོ་བོར་རྒྱུད་ཀྱི་བཤད་པ་མི་ཆག་པ་ལ་བརྩོན་པ་འདོན། དེའི་སྟེང་དུ་དོན་གཉེར་གྱི་བློ་གསར་བྱུང་ན། ད་ལོ་བཤད་པའི་ཕར་ཕྱིན་གྱི་མཇུག་སྐྱོངས། དེ་དང་འདུལ་བ་ལ་སྡོམ་གསུམ་ལེའུ་གཉིས་པ་ཙམ་གྱིས་རྐང་ཟུངས། འཁོས་ཀས་ལྕོགས་པ་བྱུང་ན་མངོན་པའི་བཤད་པ་ཞིག་ཀྱང་སླར་ཨེ་ཚུགས་ལྟོས། གཞན་ལམ་རིམ་དང་བཀའ་བརྒྱད་ལ་ཡིག་ཆ་ཞིག་བྱེད་ཐུབ་པ་བྱུང་ན་ཕན་སླེབས་ཆེ་བ་ཡོང་འདུག་པས་བློར་གཅགས་པ་གྱིས། ལུགས་གཉིས་ཀྱི་སྡེའི་འཛིན་སྐྱོང་གང་ཅི་ཕྱག་མཛོད་ནས་བཀོད་པས་ཁྱབ་པ་སྔར་མུས་བཞིན་སོགས་མདོར་ན་ཁྱེད་རང་ཁུ་དབོན་རྣམས་གཞན་དབང་དུ་མ་ཐལ་བར་

― MLP003_Page_0291 ―

^{[མ་དཔེ་གཟིགས་ན་འདིར་གནོན།]}

[Full Size]

འདུན་མ་གཅིག་ཏུ་བསྒྲིལ་ནས་གཅིག་གིས་གཅིག་ལ་བློ་ཕབས་སྙིང་ཐོག་ཏུ་སྙིང་བཞག་ནས་བློ་མཐུན་གྲོས་གཅིག་ཏུ་བྱས་ངོས། གྲྭ་བུ་སློབ་གཡོག་འཁོར་བཅས་པ་ངོ་སྐྱ་སྣུམ་མེད་པར་གང་ལ་གང་འཚམས་ཀྱིས་སྐྱོང་ལུགས་བྱས་པས་ཕྱིར་ནོན་ཆེ། ནང་དུ་གཡེང་གཟེབ་ཆུང་ལ་བཀྲ་ཤིས་པ་ཞིག་འོང་བས་ཐུགས་ལ་ཞོགབླ་བྲང་ལ་ཡང་ནག་ཁྲིམས་ཆང་ཁྲིམས་ཀྱི་བཅའ་བ་དམ་པར་སྡོམས། ལྕམ་དྲུང་གིས་ཀྱང་ད་ལྟའི་ལུགས་བཞིན་ལས་ཀྱི་འགོ་བྱེད་དགོས་སོགས་ལ་ཧུར་བསྐྱེད་ངོས་བློ་ཆོས་ཕྱོགས་སུ་གང་འགྱུར་གྱིས་དགེ་སྦྱོང་ལ་འབད་པ་ཐོན། གཉེར་པ་དང་གསོལ་དཔོན་གྱིས་རེ་ཞིག་དགོངས་པ་མ་ཞུ་བར་ཁུ་དབོན་རྣམས་ཀྱི་ཞབས་ཕྱིར་སྔར་བཞིན་འགྱུར་བ་གྱིས། དོ་ནུབ་གཉེར་པ་ལ་སྐད་མ་ཐོང་པས་ཁྱེད་རྣམས་ཀྱིས་སྐྱོར་བས་འཐུས་གསུང་བ་ལ་བདག་ཅག་དེར་འཁོད་ཐམས་ཅད་སེམས་མྱ་ངན་གྱིས་བཙན་ཐབས་སུ་ནོན་པས། མགྲིན་པ་འགགས་པ་ལྟ་བུས་གསོལ་འདེབས་འབྲེལ་ཆགས་པ་ཞིག་མ་ཐོན་རུང་བློ་རྩེ་གཅིག་པས། འཕགས་ཆེན་རྣམས་སྒྱུ་མ་ལྟ་བུའི་ཏིང་ངེ་འཛིན་ལ་མངའ་དབང་འབྱོར་བའི་ཕྱིར་ཐུགས་འདུན་གང་གཏད་འགྲུབ་པ་ཆོས་ཉིད་ལགས་པས་སྤྱིར་སེམས་ཅན་ཐམས་ཅད་སྒོས་བདག་ཅག་གདུལ་བྱར་གྱུར་པ་རྣམས། ཡང་སྒོས་ཞབས་དྲུང་གདུང་བརྒྱུད་སྐུ་མཆེད་ཀྱི་དབུས་ཆོས་སྲས་འདུས་པའི་སྡེ་དང་བཅས་པ་རྣམས་ལ་ཐུགས་བརྩེ་བའི་སྤྱན་རས་ཀྱིས་གཟིགས་ནས། ཞི་བ་ལ་ཐུགས་མི་གཞོལ་བར་ཞབས་པད་བརྟན་པའི་ཐུགས་འདུན་གྱིས་ཐུགས་སྣ་རིང་དགོས་ཞེས་ནན་གྱིས་ཞུས་པར། དལ་དུས་ལབ་པ་དེ་བྲེལ་དུས་སུ་ཕན་པ་ཡིན་པས་ཐུགས་ལ་ཞོགད་སོ་སོའི་གནས་སུ་གཟིམས་པ་ལ་ཐེགས་གསུངས། དེའི་སང་ཉིན་གསོལ་ཚིགས་གྲོལ་བསྟུན་ཁྱེད་རང་ཁུ་དབོན་རྣམས་གུང་ཐུན་གྱི་གསོལ་འདེབས་མཛོད། དེ་ཟིན་པ་དང་ངེད་རང་རྣམས་དབང་ཁང་དུ་སྡོད་ས་སྤོ་བ་ཡིན་གསུངས་ནས། དབང་ཁང་གི་ཀ་དར་གཉིས་པ་ནུབ་མའི་མདུན་དུ་གཟིམས་ཁྲི་བཤམས་པ་ལ་ཕེབས་པར། བདག་གིས་ཐུགས་རྗེ་ཆེན་པོའི་འཆི་བསླུ་ཕུལ། ཉེར་གཅིག་གི་ཉིན་གྲྭ་ཚང་ཚོགས་ཆེན་གྱིས་ཚེ་ཆོག་དང་འབྲེལ་བའི་ཞབས་བརྟན་དང་ངེད་ཀྱིས་སྔ་ཉིན་བཞིན་

― MLP003_Page_0292 ―

^{[མ་དཔེ་གཟིགས་ན་འདིར་གནོན།]}

[Full Size]

གར་དབང་ཚེ་དཔག་མེད་དང་འབྲེལ་བའི་འཆི་བདག་ཟློག་བྱེད་ཀྱི་ཆོ་ག་དང་ཚེ་དབང་བརྟན་བཞུགས་ཀྱི་ཚུལ་དུ་ཕུལ། དེ་ནས་བརྩམས་ཏེ་གྲྭ་པ་སྒེར་ཁག་རྣམས་ཀྱིས་ཀྱང་རང་རང་གི་འབྱོར་པ་དང་བསྟུན་ཏེ་སོ་སོའམ་སྡེབས་མཐུན་གྱིས་མང་ཇའམ་ཉུང་ཇའི་ཐོག་འབུལ་བ་གང་ལྕོགས་ཀྱིས་གཟིམས་ཆུང་འགག་ཏུ་བརྟན་བཞུགས་གསོལ་འདེབས་བསྒྲུབས་ཤིང་། གཞན་ཡང་དཔོན་སློབ་དཔལ་མགོན་ལགས། འདུམ་པོ། ཕུན་རབ། ནང་བཟན། གྲྭ་ཕྱི་ནང་གི་མི་སེར་སོགས་ཀྱིས་ཞབས་བརྟན་རིམ་པར་ཕུལ་བ་ལའང་། ཁྱེད་རྣམས་ངེད་རང་སྡོད་པ་ལ་འདུན་པ་རྩེ་གཅིག་པས་གསོལ་བ་འདེབས་པ་དེ་བྱིན་རླབས་ཀྱི་འཇུག་པ་འདྲེན་པ་ལ་གནད་ཆེ་བས་ཡི་རངས། གཞན་ན་སོ་མཐར་སླེབས་པས་ཤིང་ཐོག་སྨིན་པའི་འབྲས་བུ་ལྟར་སྡོད་པ་དཀའ་ཞིང་འཕྲལ་དང་ཡུན་གྱི་བླང་དོར་གྱི་གནས་ལ་ཁ་ཏ་བརྒྱུད་མར་བྱས་པ་དེ་ཡིན་ཞེས་གསུང་ཞིང་སྐུ་རིམ་ཞུས་པ་ལའང་ཐུགས་སུན་སྣང་གིས་ད་ཐུགས་རྗེ་ཆེན་པོའི་འཆི་བསླུ་དེའང་མང་པོ་མ་བྱེད་ཆོ་ག་དེ་ཞུད་འགྲོ་བར་འདུག་ཅེས་ཡང་ཡང་གསུངས། ཉེར་ལྔའི་ཞོགས་སྐུ་ཤིན་ཏུ་དྭངས་པས་མདང་རྡོ་རྗེ་རབ་བརྟན་མའི་ལོ་རྒྱུས་སོགས་ལ་བརྟེན་པའི་རྨི་ལམ་མཚར་ཆེ་བ་ཞིག་བྱུང་བས་འཆར་ཀའི་གཏོར་བཟློག་དེ་ལའང་མོ་སྣ་ཕོས་དྲངས་ན་བྱད་ཁ་ཞིག་འདུག་པ་འདི་ཕྱིར་བཟློག་པས་སླད་ཀྱི་བསྟན་སྲིད་ལ་ཕན་པར་འགྱུར་གསུངས་ཏེ། གཤིན་རྗེ་བརྒྱད་ཀྱི་རྗེས་སུ་མ་མོ་བརྒྱད་མཐུད་པའི་སྔགས་ཀྱི་བཟླ་ཐབས་དང་སྐུལ་ལུགས་དེ་གཉིས་ཀྱི་མཐུན་རྫས་འདུ་བྱ་ཚུལ་སོགས་གཟིགས་སྣང་ལ་ཇི་ལྟར་ལུང་བསྟན་བྱུང་བ་བཞིན་བྱེད་དུ་འཇུག་པ་གནང་། ཉེར་དྲུག་གི་ཕྱི་དྲོ་ཉི་མ་བཞི་ཆ་ལུས་པ་ཙམ་གྱི་དུས་ནམ་མཁའ་དྭངས་པ་ལ་འཇའ་དཀར་གྱི་སྡོང་པོ་ཀུ་ཤའི་ཆུན་པོ་ལྟ་བུ་འབྲས་ཀྱི་སྤྱི་ལྡེ་ནས་ཤར་རིའི་ཆོས་སྡིངས་ཀྱི་འགོའི་བར་སླེབས་པས་གང་ཞིང་འབྲས་ཕུ་ཕྱོགས་ཀྱི་རི་རྩེ་ནས་འཇའ་ཚོན་སྣ་ལྔ་ཤིན་ཏུ་བཀྲ་བ་དང་། དེ་ནུབ་མཚན་ལམ་དུ་ལྷ་ོནུབ་མཚམས་ཀྱི་རྩིག་ཟུར་གྱི་རྩིག་ཁུང་ཞིག་གི་ནང་དུ་གསེར་གྱི་བུམ་པ་བདུད་རྩིས་གང་བ་ཞིག་འདུག་པ་ལས་བཞེས་པ་ན་སྙན་དུ་འདི་རྒྱུད་བླ་མའི་བུམ་ཆུ་ཡིན་ཟེར་བ་ཞིག་བྱུང་བ་ལེགས་སམ་གསུངས། དེ་

― MLP003_Page_0293 ―

^{[མ་དཔེ་གཟིགས་ན་འདིར་གནོན།]}

[Full Size]

དག་གི་དུས་སྒྲིན་པོའི་བློ་ཅན་འགས་བརྟག་གཞི་བཅུག་པར་ཐོ་རེངས་ཤར་ཕྱོགས་ནས་སྐར་མ་མཇུག་ཕོད་ཅན་ཤར་བ་དང་མཚན་མོ་གནམ་ལ་དགུ་ཚིགས་ཀྱང་མི་འདུག་ཅིང་། ཉིན་མོ་སྤྲིན་ཁུག་གི་རྣམ་པའང་མང་པོ་འོང་གི་འདུག་པ་ཅི་ཡིན་ནམ་ཞེས་བློ་འཁྱོག་པར་བྱེད། དེར་མ་ཟད་ཆུ་བོ་རི། ཤེལ་བྲགསྣེའུ་གདོང་། གོང་པོ་རི། གནམ་ལྕགས་བྲག་རྣམས་སུ་སྡིགས་དང་ས་གཡོས་སོགས་ཀྱི་ལྟས་ཞག་གྲངས་བསྟུད་མར་བྱུང་ཞེས་ཐོས། དགོང་ཇ་ཁར་ངེད་ཁུ་དབོན་གྱིས་སྐུ་རིམ་གྱི་མདེའུ་ཁ་བསྒྱུར་བའི་ཆོག་ཁྲིགས་ལ་རྣམ་གྲོལ་ཡང་རྩེར་ཕེབས། དེ་བར་གཅུང་རྗེ་དབོན་དང་གསོལ་དཔོན་གཉིས་ལ་བཀའ་ལུང་ཕེབས་འདུག་པར་ངེད་རང་ན་སོ་མཐར་སོན་ཡིན་གཤིས་ཚེ་ལ་ལོང་ཡོད་དཀའ་ཞིང་བསམ་པའི་ལྷག་ལུས་པར། རྡོ་རྗེ་བྲག་ཞབས་དྲུང་རིན་པོ་ཆེ་རང་ཕྱོགས་བསྟན་འཛིན་གྱི་གཙོ་བོ་ཡིན་པས་དགོན་པར་སྐོར་ཙམ་ཞིག་གདན་འདྲོངས་ན་བསམ། སྔ་ཕྱིར་སྙན་འབུལ་དང་ཁྱད་པར་གོང་ཞབས་ཁྲ་འབྲུག་ཏུ་མཇལ་བར་ཕྱིན་སྐབས་མགྱོགས་འཁོར་གྱིས་གྲབས་བྱས་ནས། བསམ་ཡས་ནས་ཕེབས་ཞོར་དུ་སྤྱན་འདྲེན་ནན་ཆགས་ཞུས་ཀྱང་གདན་འདྲོངས་པ་ཞིག་མ་བྱུང་བས་ད་ཆ་དེ་བས་ཀྱང་སྤྱན་ཅི་ལ་འདྲོངས། རྣམ་སྤྲུལ་རིན་པོ་ཆེའང་རང་ཕྱོགས་ལ་ཐུགས་བློས་བརྗིད་འགེལ་ཡིན་རུང་ད་ལྟ་མོན་དུ་བཞུགས་པའི་སྐབས་ཡིན་ཨང་ཞེས་ཕེབས། དེར་གཅུང་གིས་ད་བབས་གང་ལ་བལྟས་ཀྱང་བློ་འཚབ་པས་ཁ་སང་ཞབས་དྲུང་རིན་པོ་ཆེ་ཁྲི་འདོན་གྱི་བསླབ་སྟོན་ཕེབས་པ་ཕྱི་མཐའ་གཟིགས་པའི་གསུང་ཡིན་འདུག་རུང་། རང་བློར་མ་ཤོང་བས་གཤོལ་འདེབས་ཞུས་པ་ཕྱིས་ཀྱི་རྟེན་འབྲེལ་ལ་གནོད་པ་མེད་ལས་ཆེ་ཞུས་པར་རྟེན་འབྲེལ་ལ་གནོད་པའི་ཁོལ་ཆ་མི་དགོས་པས་ཧ་ཅང་འགྱངས་ཆེ་མེད་པའི་སྐབས་སྦྱར་གྱི་དུས་ཚེས་ལེགས་པ་ཞིག་ལ་ཁྲི་འདོན་གྱི་རྟེན་འབྲེལ་བསྒྲིག་པས་ཆོགགྲྭ་ཚང་འདི་ཡང་ཕྱིས་སྐོར་སྒྲིག་རྣམ་གཞག་གཙང་ཞིང་སྔགས་ཀྱི་ལག་ལེན་བྱང་འདྲོངས་པ་བཤད་སྒྲུབ་ཀྱི་བགྱི་བ་ཆོས་མཐུན་གྱི་མིག་ལྟོས་དགའ་མོ་འདུག་པ་བཞིན། འདི་ཉིད་རང་རེའི་ལག་རྗེས་ཀྱང་ཆེ་ཤོས་ཡིན་པས་བསྟན་རྒྱུན་རྙེད་བཀུར་དང་བཅས་པ་ཞན་དུ་མི་འགྲོ་བའི་གོང་འཕེལ་ལ་ཐམས་ཅད་

― MLP003_Page_0294 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་འབད་པ་འདོན་དགོས་གསུངས། ཡང་ཞིང་ཁམས་གཞན་དུ་དགོངས་གཏད་ཤོལ་ཐབས་མེད་པ་ལགས་ཚེ་སྐུ་གདུང་གི་ཞབས་ཏོག་བྱེད་ལུགས། གསང་རྒྱ་དགོས་མི་དགོས་རྗེས་འཇུག་རྣམས་ཀྱི་ཕྱག་མཆོད་ཀྱི་རྟེན་དུ་སྐུ་གདུང་རིལ་བོར་བཞུགས་པ་རང་བློ་བག་དྲོ་པ་ཡོང་འདུག་པ་ཇི་ལྟར་དང་། ནང་རྟེན་ཕྱི་རྟེན་སོགས་ཀྱི་བྱ་ལུགས་ཀྱང་ཇི་ལྟར་བྱས་པས་ཡོང་ཞུས་པར། བཀའ་ལས་དག་པའི་ཞིང་དུ་ཐལ་ལེར་འགྲོ་བ་ཡིན་གྱིས་ཐུགས་དམ་ལས་གྲོལ་མ་གྲོལ་གྱི་རེ་དོགས་བྱེད་མི་དགོས་པས་པུར་ཆས་འཕྲལ་དུ་བྱས་ཆོག་ཅིང་། བྱེད་མི་གསོལ་དཔོན་གྱི་རོགས་དགེ་སློང་ཀུན་བློ་དང་དགེ་སློང་རབ་བརྟན་གྱིས་བྱས་ན་ཡོང་། ཁྱེད་རང་རྣམས་ཀྱི་ལས་ཀའི་བབས་ལ་བལྟས་པའི་གྲ་འགྲིག་ཁྱད་ཞག་བཞི་ལྔ་ཞིག་གསང་བ་ལས་གསང་རྒྱ་ཆེ་བ་མི་དགོས། པུར་ཡང་རྟེན་འབྲེལ་ཐམས་ཅད་འགྲིག་ཚེ་རིལ་པོར་བཞག་ན་བོད་སྤྱིའི་བདེ་ཐབས་ལ་ཕན་པར་བཤད་ཀྱང་། རྟེན་འབྲེལ་འགའ་རེ་གཞན་འགྱུར་ཅི་རིགས་བྱུང་བས་མཚོན་ད་ཆ་བཞག་མ་བཞག་ལ་ཁྱད་པར་མེད་པས་བསྲེག་སྦྱངས་བྱས་པ་རང་ཤུལ་གཙང་བ་ཡོང་བ་སྔར་ལབ་པ་ལས་འགྱུར་བ་མེད་པས་མཁན་རིན་པོ་ཆེས་ཀུན་བཟང་ཕོ་བྲང་གི་ད་ལྟ་ཕྱིང་གུར་ཕུབ་ས་འདིར་གནང་བ་ཞུ། ནང་རྟེན་དད་ཅན་རྣམས་ཀྱི་གདུང་བ་སེལ་ཕྱིར་འདྲ་སྐུ་ལུས་ཚད་དང་མཉམ་པ་ཞིག་ཀུན་བཟང་ཕོ་བྲང་གི་རྒྱ་ཁྲིའི་སྟེང་དུ་ཞོགདེ་ལས་ཆུང་ཙམ་གཉིས་བཟོས་པའི་གཅིག་མལ་སྒྲོམ་དང་གཅིག་གཟིམས་ཆུང་མགོན་ཁང་གི་གདན་གྱི་སྟེང་དུ་བཞག་པའི་མདུན་དུ་བུ་ཆུང་བགྲེས་པ་གཏོར་བསྔོ་བྱེད་པའི་སྟན་དེ་ཞལ་ལྷོ་གཟིགས་དང་གཟིམས་ས་མལ་སྒྲོམ་གྱི་མཇུག་ཏུ་བྱས་པའི་ནུབ་ཏུ་དབུ་སྔས་གཏོད། ཕ་བུ་མི་འབྲལ་བའི་རྟེན་འབྲེལ་ཡོད། དེ་ཕྱིན་མདོའི་གདན་དང་དབང་ཁང་འདུ་ཁང་སོགས་ཀྱི་ཁྲི་ལ་བུ་ཆུང་རང་བཞུགས་སུ་གསོལ། ཕྱི་རྟེན་དངུལ་གདུང་ཆེ་ཆུང་ཇི་ལྟར་འགྲུབ་ཀྱི་བབས་ལ་བལྟས་པའི་བཞུགས་ས་སྔར་ཁ་ཏ་བྱས་པ་ལྟར་མཛོད། ཅེས་སོགས་སྤྱི་སྒོས་ཀྱི་བྱ་བྱེད་ཐམས་ཅད་ཞལ་ཏ་དཔྱིས་ཕྱིན་པ་ལྷུག་པར་སྩལ་ཅིང་། དེ་དག་གི་ཚེ་སྐུ་ལ་བསྙུན་གྱི་གཞི་མེད་པ་ལྟ་བུས་བསླབ་སྟོན་ཐམས་ཅད་ལ་བདེ་དོག་མི་དགོས་པར་སྣང་།

― MLP003_Page_0295 ―

^{[མ་དཔེ་གཟིགས་ན་འདིར་གནོན།]}

[Full Size]

ཉེར་བདུན་གྱི་ཞོགས་ཐོག་མར་མནལ་གྱི་རྣམ་པ་ལྟར་ཟིམ་མེ་བཞུགས་མུས་ལ་སྨན་པས་མནལ་མིན་ནམ་སྙམ་སྟེ་ཆབ་ཀྱི་གཟེགས་མ་གཏོར་བས། སྐུ་ཧར་གྱིས་བསྲངས་ཏེ་སྤྱན་བར་སྣང་ལ་ཆེ་རེ་གཟིགས་ནས་ཕཊ་དྲག་པོ་ཞིག་གནང་ཞིང་། དེ་ཉིན་ནས་བཟུང་དབུ་གཙུག་གི་སྐུ་རྩ་རྒྱང་ནས་མཐོང་བར་ཉ་འཁྲབ་པ་ལྟར་ལྷོག་ལྷོག་འཕར་བ་ཀུན་གྱི་སྤྱོད་ཡུལ་དུ་བསྟན། ཉེར་བརྒྱད་ཀྱི་ཉི་མ་བརྒྱད་ཆ་ཙམ་ལུས་དུས་བཀའ་ལས་ཁ་སང་ནས་ཐུར་སེལ་གྱི་རླུང་རྣམས་སྲོག་དང་རོ་གཅིག་ཏུ་འདྲེས་པ་ལུས་ཀྱི་ནང་ན་ཡར་འཁོར་ཞིང་འགྲོ་བ་ལ་ཐོག་མར་ཡིད་མི་བདེ་ཉམས་ལ་སྤྱི་བོར་སོན་པ་དང་སྣང་རིག་ཐམས་ཅད་བདེ་ཆམ་གྱིས་འགྲོ་ཞིང་། དེའི་རྩལ་སྣང་སྟོང་གཟུགས་ཞི་ཁྲོའི་ལྷའི་རོལ་པར་ཡང་འཆར། དེར་མ་ཟད་ད་ལྟ་སྣང་ཡུལ་ཐམས་ཅད་མཐིང་ཞུན་ལྟར་དྭངས་པ་ལ་རིག་པ་འདྲེས་ནས་ཡུལ་རིག་སོ་སོར་མི་ཕྱེད་པ་ལྟར་སྣང་གསུང་བ་ལ་བདག་གིས་དེ་དུས་ཞམ་རིང་པ་རྣམས་ཀྱིས་ཞབས་ཏོག་གི་བྱ་བྱེད་ཞུ་བ་སོགས་ཇི་ལྟ་བུར་སྣང་ཞུས་པས། དེ་འདྲ་མེ་ལོང་ལ་གཟུགས་བརྙན་ཤར་བ་ལྟར་མ་འགགས་པར་སྣང་སྟེ་སྣང་བས་སྟོང་པ་མ་སྒྲིབ་སྟོང་པས་སྣང་བ་མ་བཀག་ཟུང་འཇུག་གི་རྟེན་འབྲེལ་ཚོགས་པའི་སྣང་བར་སྣང་དུས་ཉིད་ན་ཅིར་ཡང་མ་གྲུབ་པས་ཡ་མཚན་གསུང་། དེ་ནས་སྐུ་ལ་བཅངས་པའི་བཏགས་གྲོལ་རྒྱུད་དྲུག་གི་གླེགས་བམ་འདོན་པར་མཛད་ནས་སྐུའི་གནས་སོ་སོར་རེག་པས་དབང་བཞི་བཞེས་རྗེས་ཐམས་ཅད་ལ་བྱིན་རླབས་མཛད་ནས་ངེད་ཀྱི་ལག་ཏུ་སྩལ། དེ་རྗེས་བཀའ་ལས། རང་རེའི་གྲྭ་པ་ཕལ་ཆེར་སྔགས་ཀྱི་ལག་ལེན་བྱང་འདྲོངས་ཤིང་བཤད་པའི་གོ་བ་ཡོད་པའང་མང་དུ་སྣང་མོད། སྒྲུབ་པའི་ཉམས་རྟོགས་ཀྱིས་བརྒྱན་པ་ཧ་ཅང་མི་མང་བ་འདུན་རྩོལ་ཞན་སྐྱོན་ཡིན་འདུག་པས་སྐྱོ་ཤས་ངེས་འབྱུང་དག་སྣང་རྒྱུ་འབྲས་འདོར་ལེན་སོགས་ཀྱིས་བློ་རིམ་པར་སྦྱངས་ནས། མཐར་སྙིང་ཐིག་རྣམ་གཉིས་ཀྱིས་གཙོས་སོ་སོའི་བློ་དང་འཚམས་པའི་ཟབ་ཁྲིད་ཀྱི་ཉམས་ལེན་ལ་སྦྱོར་ཐུབ་པ་ཞིག་གི་ཁྲིད་ལུགས་གྱིིས། ན་ནིང་ནས་གྲྭ་པ་དོན་གཉེར་ཅན་རགས་བསྡུས་ལ་དུས་ཁྲིད་ཅིག་འཛུགས་སམ་སྙམ་སྟེ་མ་འགྲུབ་ནའང་མཇུག་བསྐྱངས་ན་ངེད་རང་ལས་ཁྲིད་ཐོབ་པ་མི་ཉུང་ཙམ་ཡོད། སྙིང་ཐིག་ཆེན་

― MLP003_Page_0296 ―

^{[མ་དཔེ་གཟིགས་ན་འདིར་གནོན།]}

[Full Size]

པོའི་ཕྱག་འཚལ་དང་གསོལ་འདེབས་ཀྱི་གདངས་འདིའང་ཕྱིས་ཚོགས་སུ་གཏོང་སྲོལ་ཇེ་ཞན་དུ་སོང་འདུག་པ་མི་ནུབ་པར་དར་རྒྱས་ཡོང་བའི་བཀོད་པ་གྱིས་གསུང་། དེ་ནུབ་ནས་བཟུང་བླ་བྲང་གི་ཕྱི་ལ་རྗེས་མི་ཟིན་པའི་སྐོར་བ་བྱེད་མཁན་ཡོད་པ་འདྲ་བ་དང་སིལ་སྙན་པི་ཝཾ་གླིང་བུ་ལྟ་བུའི་སྒྲ་སྙན་དིར་དིར་ཆེད་དུ་ཉན་ན་མི་གསལ་ལ་མ་བརྟགས་པའི་ཚེ་ལྷང་ལྷང་གྲགས་པ་བྱུང་། ཉེར་དགུའི་ནུབ་གཅུང་རྗེ་དབོན་སྐུ་དྲུང་དུ་བཞུགས་པ་ལ་གསུང་ཡང་ཡང་གནང་ཞིང་ཁྱད་པར་ཐོ་རེངས་དུས་ད་བྲག་ཐོག་པའི་གཟིམས་ཁང་དུ་སླེབས་བྱུང་། ལུས་སེམས་གཉིས་ཀ་བདེ། ན་ཟུག་སོགས་གང་ཡང་མི་འདུག་གསུངས། ཡང་གཅུང་གི་ཕྱག་ལ་བཅངས་ནས་ནང་གསང་གི་ཞལ་ཏ་འདྲ་ཡང་ཕེབས། གནམ་གང་གི་ཚ་རྟིང་ཁར་སྟན་ལས་བཞེངས་ཏེ་ཞབས་སྟན་བཏིང་བའི་ཁར་གསོལ་དཔོན་གྱིས་ཕྱག་ནས་བརྟེན་ཏེ་གོམ་པ་སུམ་ཅུ་འགྲོ་དགོས་ཡོད་ཅེས་ཤར་ལ་ཞལ་ཕྱོགས་ཏེ་བདེ་དོག་མེད་པར་ཕེབས་སོང་བ་ཕྱིས་ཀྱི་རྟེན་འབྲེལ་ཞིག་ལ་དགོངས་སམ་སྙམ། དེ་ཉིན་ཆང་ཁྱིམ་གྱི་ཞུས་ལན་དུ་ཕྱི་མཐའ་གཟིགས་པའི་ཞལ་ཆེམས་དང་བཅས་ལྗགས་སྤོད་གནང་ཞིང་། ཤ་ཛ་ལི་སོགས་སྐུ་རླུང་ལ་ཕན་པའི་སྨན་སྦྱོར་ལས་སྐུ་སེར་ལ་གནོད་དོགས་པས་སྤོས་རེང་ཁ་ཆེ་མ་སོགས་རྐང་རེ་ཙམ་སྤར་བ་མེད་ཀྱང་དགོང་ཇ་ཁ་ཙམ་ནས་ག་བུར་དང་གུར་གུམ་གྱི་དྲི་བསུང་འདྲ་ལ་མིན་པའི་དྲི་ངད་ཕལ་གྱིས་མཚོན་པར་མི་ནུས་པའི་དྲི་བཟང་པོ་འཐུལ་བ་བཞུགས་སའི་ནང་ལྟ་ཅི་སྨོས། གསལ་ཡང་དང་རྣམ་གྲོལ་ཡང་རྩེ་སོགས་སུ་ཡང་ཚོར་བ་བྱུང་ཞིང་། ཞབས་དྲུང་དུ་འདུག་ཚེ་རེས་གདུང་ཤུགས་ཀྱིས་དྲངས་ཏེ་ཀུན་རྟོག་ཐམས་ཅད་རང་འགག་གིས་རྣམ་པར་མི་རྟོག་པའི་ངང་ལ་གནས་པའི་བྱིན་རླབས་ཀྱང་རང་ཤུགས་ཀྱིས་འཆར་བ་བྱུང་། ཚེས་གཅིག་གི་སྔ་དྲོ་ཚ་རྟིང་ཁ་ཙམ་ནས་གཟིམས་ཁྲིའང་མཐོངས་ཀའི་ཐད་ཀར་ཐེན་ཏེ་བཞུགས་པ་ལ། ཡུན་རིང་པོའི་བར་ནམ་མཁའ་ལ་སྤྱན་གྱི་ལྟ་སྟངས་ཁོ་ན་དང་ཇེ་ཞིག་ན་ཕྱག་གཡས་པ་དེང་མཛད་ནས། བུད་མེད་གོས་དམར་ཅན་རུས་པའི་རྒྱན་ཆ་སྐྱ་ཆབ་བེ་བ་དཔྲལ་བར་སིནྡྷུ་རའི་ཐིག་ལེ་བྱས་པ་མང་པོ་འདུགསིནྡྷུ་རའི་ཆར་ཡང་འབབ། མེ་ཏོག་ཁ་དོག་སྣ་ཚོགས་ཀྱིས་ཀྱང་

― MLP003_Page_0297 ―

^{[མ་དཔེ་གཟིགས་ན་འདིར་གནོན།]}

[Full Size]

ནམ་མཁའ་ཐམས་ཅད་ཁེངས་འདུག་གསུང་། ཡང་དར་ཅིག་ན་ད་མཁའ་སྤྱོད་དུ་འགྲོ། ཁྱེད་རང་རྣམས་ཀྱང་མཁའ་སྤྱོད་དུ་འགྲོ་བའི་འདུན་པ་གྱིས་གསུང་། ཕྱག་གིས་ཌཱ་མ་རུ་འཁྲོལ་བའི་སྟངས་ཀ་དང་སྐུའི་གནས་རྣམས་སུ་སིནྡྷུ་རའི་ཐིག་ལེ་མཛད་པའི་བརྡའ་ཡང་གནང་། ཡང་ཕྱི་དྲོ་སིནྡྷུ་རའི་དཀྱིལ་འཁོར་དཀྱིལ་འཁོར་གསུང་། དེར་གསོལ་དཔོན་གྱིས་མེ་ལོང་ལ་བྲིས་པའི་སིནྡྷུ་རའི་དཀྱིལ་འཁོར་དེ་བླངས་ནས་ཕུལ་སོང་བ་གཟིགས་པ་ཙམ་ལས་ཅང་མི་གསུང་། དར་ཅིག་ན་བུམ་པ་ཐོང་གསུང་། དབང་གི་མཆོད་སྟེགས་ཁ་ནས་བུམ་པ་བླངས་ཏེ་ཕུལ་བ་སྐུའི་གནས་རྣམས་སུ་རེག་པ་རེ་མཛད་ཅིང་གུར་གུམ་གྱིས་ཆར་ཡང་འབབ་ཀྱིན་འདུག་གསུང་། ཡང་མནལ་གྱི་རྣམ་པ་ལྟ་བུར་སྤྱན་ཟིལ་མེ་བཞུགས་འདུག་པར། དཔོན་ཚང་ཆོས་མཛད་ཀྱིས་གཏེར་བྱོན་གྱི་པདྨ་གུ་རུའི་སྐུ་དེ་སྤྱན་ལམ་དུ་ཕབ་ནས་འདིའི་བཞུགས་ཁང་གི་བཟོ་ལེགས་པོ་ཨེ་བྱུང་ཞུས་སོང་བར། དགའ་མོ་བྱུང་འདུག་ཅེས་ཅུང་ཟད་བཞད། དེ་ནུབ་ཕྱི་རོལ་ཏུ་ཡོད་པ་རྣམས་ཀྱིས་བར་སྣང་ཐམས་ཅད་འཇའ་ཚོན་གྱི་དབྱིབས་རྣམ་པ་ཐ་དད་པ་དུ་མས་གང་ཞིང་། བླ་བྲང་གི་ལྷོ་ནུབ་ཀྱི་ཟུར་དེར་ཆར་རྐང་འདྲ་བའི་འཇའ་དཀར་ཆུ་འབབ་པའི་རྣམ་པ་དལ་ལེར་ཚུགས་པ་མཐོང་བའང་བྱུང་འདུག་སྟེ། བསུན་མ་རྣམས་ཀྱིས་སྤྱན་འདྲེན་པའི་མཆོད་ཡོན་སྦྲེང་བ་ཨེ་ཡིན་སྙམ། དེ་ནས་ནམ་ཕྱེད་ལ་ཟིན་པར་ཉེ་བ་ན་ཡར་བཞེངས་ཏེ་ཞལ་སྐྱེམས་གསོལ། དེ་རྗེས་ཅུང་ཟད་མནལ་དང་འདྲེས་པ་ལྟ་བུའི་མུ་ནས་གསུང་སྤོད་ཀྱིས། སྣང་གྲག་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་པར་འབྱམས་ཀླས་པས། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག །ཅེས་འགྱུར་མེད་རྡོ་རྗེས་བྲིས་པའོ། །ཞེས་པ་བྲིས་གསུངས་ཏེ་འདི་གསུང་གི་བདུད་རྩི་དངོས་སུ་སྩལ་བའི་ཐ་མ་ཡིན། ནངས་པར་སྔ་བར་ཡིག་ཆས་བླངས་ཏེ་ཞབས་དྲུང་རིན་པོ་ཆེས་ཕྱག་བྲིས་སུ་བཏབ། དེ་ཡང་སྤྱིར་སྐུ་བད་ཀྱི་བསྙུན་རོས་ལྗགས་སྐྱུགས་ཕེབས་པ་སོགས་སྐུ་ཟོས་མི་བདེ་བའང་གསོལ་སྨན་གྱི་འཕྲོད་ངོ་བརྟས་པ་ལྟ་བུས་བདེ་མུས་སུ་སོང་བར་མ་ཟད། སྐུ་

― MLP003_Page_0298 ―

^{[མ་དཔེ་གཟིགས་ན་འདིར་གནོན།]}

[Full Size]

ཤེད་ཆུང་བ་ཙམ་མ་གཏོགས་སྐུའི་གཟི་བྱིན་དང་ཐུགས་རིག་མི་གསལ་བའི་རྣམ་པ་ཅི་ཡང་མེད་པ་བཅས་ཉེར་དྲུག་ཕན་ཆད་ལ་ཕྱི་མཐའ་གཟིགས་པའི་བསླབ་སྟོན་ཕེབས་བཞིན་པ་ཡིན་ཡང་། བདག་ཅག་ཚུར་མཐོང་གི་བློའི་རེ་བར་གསོལ་བ་ཐེབས་པ་ཞིག་ཨེ་ཡོང་སྙམ་པས་གསོལ་སྨན་འབུལ་བ་དང་སྐུ་རིམ་གྱི་ཞབས་ཏོགཉིན་པར་གཅུང་རྗེ་དབོན། གསོལ་དཔོན། དཔོན་ཚང་ཆོས་མཛད། མཚན་མོ་དེ་སྟེང་གཉེར་པ་ཆོས་མཛད་རྣམས་དང་། ཉིན་རེ་བཞིན་ལྕམ་དྲུང་བཅས་པས་སྐུ་དྲུང་དུ་འཁོད་ནས་ཐུན་རེས་ཀྱི་ཞབས་ཏོག་ལ་འབད། མཆོད་དཔོན། ཆོས་མཛད་དོན་ལྡན། མཐུ་སྟོབས་རྣམས་ཀྱིས་འཕྲལ་དགོས་ཀྱི་རྐང་བདེ་བྱས། བདག་ཅག་ཁུ་དབོན་རྣམས་ཀྱིས་མཚན་མོ་རྣམ་གྲོལ་ཡང་རྩེར་བཞུགས། སྔ་དགོངས་གནས་ཅི་བདེར་སྐུ་རིམ་གྱི་ཁྱད་པར་གང་ལ་གང་འཚམས་དང་། ཉིན་མོ་སྐུ་མདུན་དུ་བསྒྲུབ་འོས་སོགས་སྲི་ཞུ་ལ་འབད་དུ་ཟིན་ཀྱང་། གདུལ་བྱ་མ་དག་པ་འདུལ་བ་དང་ལས་ཚུལ་བསམ་གྱིས་མི་ཁྱབ་པ་སྟོན་པའི་ཆེད་དུ་སྐུ་ཁམས་ལ་ཡར་བསྐྱེད་མ་བྱུང་སྟེ། རྒྱུད་བླ་མ་ལས། ཡང་དག་ཇི་བཞིན་མཐོང་བའི་ཕྱིར། །སྐྱེ་སོགས་རྣམས་ལས་འདས་གྱུར་ཀྱང་། །སྙིང་རྗེའི་བདག་ཉིད་སྐྱེ་བ་དང་། །རྒ་དང་ན་དང་འཆི་བར་སྟོན། །ཞེས་གསུངས་པ་ལྟར་མི་འགྱུར་རྡོ་རྗེའི་སྐུ་བརྙེས་པས་ལས་ཀྱི་ན་འཆི་སོགས་མི་མངའ་ཡང་། ཐབས་ལ་མཁས་པའི་སྙིང་རྗེ་ཆེན་པོས་གདུལ་བྱ་འདུལ་བའི་ཡུལ་ལ་མཐུན་པར་འཇུག་པའི་ལས་ཚུལ་ཡང་སྒོ་སྣ་ཚོགས་པ་སྟོན་པར་མཛད་པ་ཆོས་ཉིད་པས། ཉེར་བདུན་བརྒྱད་ནས་སྐུ་ཤེད་ཇེ་ཆུང་གིས་སྐུ་ཉམས་ཞན་དུ་སོང་བས་གསོལ་བ་ཐེབས་པའི་རེ་བ་ཟད་དེ། གནམ་གང་གི་ནུབ་མོ་ནས་བདག་ཅག་ཁུ་དབོན་རྣམས་ཀྱིས་ཀྱང་སྐུ་དྲུང་དུ་གསོལ་བ་འདེབས་བཞིན་དུ་བཞུགས། དེ་ནས་ཚེས་གཉིས་ཀྱི་སྔ་དྲོ་ནམ་མཁའ་བཻ་ཌཱུཪྱ་ལྟར་དྭངས་པ་ལ་རླུང་ཕྲ་མོ་ཙམ་ཡང་མི་ལྡང་ཞིང་འཇའ་ཚོན་སྣ་ལྔ་རྨ་བྱའི་མཇུག་སྒྲོ་བཀྲམ་པ་ལྟ་བུ་དང་། གུར་དང་གདུགས་ཕུབ་པ་ལྟ་བུ་དང་བ་དན་དཔྱངས་པ་འདྲ་བ་སོགས་ཀྱིས་ནམ་མཁའ་ཁེངས་ཀྱང་། ཉི་མའི་འོད་ཟེར་མི་སྒྲིབ་པར་གསལ་བའི་ཕྱིའི་རྟགས་ངོ་མཚར་བ་ཀུན་གྱི་སྤྱོད་ཡུལ་དུ་བསྟན་པ་དང་ལྷན་ཅིག་

― MLP003_Page_0299 ―

^{[མ་དཔེ་གཟིགས་ན་འདིར་གནོན།]}

[Full Size]

ཉི་མ་ཁ་འདལ་ཙམ་གྱི་དུས་ལ། རྟག་འཛིན་ཅན་རྣམས་ཡང་དག་པའི་ལམ་ལ་བསྐུལ་ཞིང་སྐུའི་རྣམ་པ་དེ་ཉིད་ཀྱིས་འདུལ་བར་བྱ་བའི་ཕྲིན་ལས་ཀྱང་དེ་ཙམ་དུ་དགོངས་ནས། མངོན་པར་བྱང་ཆུབ་པ་བསམ་གྱིས་མི་ཁྱབ་པའི་རྣམ་ཐར་བཞི་ལྡན་གྱི་ཡེ་ཤེས་འོད་གསལ་ཆོས་སྐུ་ཀ་དག་ཆེན་པོའི་ཀློང་དུ་གཟུགས་སྐུའི་བཀོད་པ་བསྡུས་ཏེ། ཐོག་མ་དང་དབུས་མཐའ་བྲལ་བའི་གཤིས་བདེ་བ་ཆེན་པོ་སྒྲིབ་པ་ཐམས་ཅད་དང་བྲལ་བའི་དབྱིངས་སུ་མྱ་ངན་ལས་འདའ་བའི་ཚུལ་བསྟན་ནས། ཆོས་ཀྱི་སྐུ་རིས་ཡོངས་སུ་མ་ཆད་པར་བཞུགས་པ་ལས་མ་གཡོས་བཞིན་དུ་ལྷུན་གྲུབ་སྐུ་དང་ཡེ་ཤེས་ཀྱི་རྩལ་སྣང་འགག་མེད་ལོངས་སྤྱོད་རྫོགས་པ་དང་སྤྲུལ་པའི་སྐུའི་རྣམ་པར་བཞེངས་ཏེ། དག་པ་དང་མ་དག་པའི་གདུལ་བྱའི་མོས་པ་དང་སྐལ་བའི་ཁྱད་པར་ཇི་ལྟ་བ་དང་མཐུན་པར་འཇུག་པ་ལས། རེ་ཞིག་མཁའ་སྤྱོད་དུ་གཤེགས་པར་ཞལ་གྱིས་བཞེས་པ་ལྟར་ན། ལྷན་སྐྱེས་ཀྱི་བདེ་ཆེན་མངོན་དུ་གྱུར་པའི་སྐྱེས་མཆོག་རྣམས་ཞིང་ཁམས་གཞན་དུ་འཕོ་བའི་ཚེ། རྣལ་འབྱོར་མ་ཀུན་སྤྱོད་ཀྱི་རྒྱུད་ལས། ཁྲག་འཐུང་ལ་སོགས་རྣལ་འབྱོར་མ། །མེ་ཏོག་སྣ་ཚོགས་ལག་ན་ཐོགས། །རྒྱལ་མཚན་བ་དན་སྣ་ཚོགས་དང་། །སིལ་སྙན་སྒྲ་ནི་སྣ་ཚོགས་དང་། །གླུ་ཡི་མཆོད་པ་སྣ་ཚོགས་ཀྱིས། །འཆི་བ་ཞེས་བྱ་རྣམ་རྟོག་སྟེ། །མཁའ་སྤྱོད་གནས་སུ་འཁྲིད་པར་བྱེད། །ཅེས་པ་ཧེ་རུ་ཀ་སོགས་དཔའ་བོ་དང་རྣལ་འབྱོར་མ་རྣམས་ཀྱིས་མཆོད་རྫས་སྣ་ཚོགས་པའི་བཀུར་སྟི་དང་བཅས་པས་བསུས་ཏེ་མཁའ་སྤྱོད་དུ་སྤྱན་འདྲེན་པར་བཤད་ཅིང་། དེ་ལ་མཁའ་སྤྱོད་ཅེས་པའི་དོན་ནི་འོད་གསལ་བདེ་སྟོང་དབྱེར་མེད་པའི་ཡེ་ཤེས་ཆོས་སྐུ་དང་རྗེས་སུ་མཐུན་པ་དེ་ལ་ནམ་མཁའ་ཞེས་བྱ་དེར་སྤྱོད་པ་ནི་དེ་ཐོབ་པའི་དོན་ཏེ། སྒྱུ་མ་བདེ་མཆོག་ལས། ཌཱ་ནི་ནམ་མཁར་འགྲོ་མ་ཞེས། །སྐད་ཀྱི་བྱིངས་ལས་མངོན་པར་བརྟགས། །ནམ་མཁའ་ཀུན་ཏུ་སྤྱོད་གྲུབ་པ། །མཁའ་འགྲོ་མ་ཞེས་རབ་ཏུ་གྲགས། །ཞེས་གསུངས་ཤིང་། དེ་འདྲ་དེ་ལ་མཁའ་སྤྱོད་ཀྱི་དངོས་གྲུབ་བརྙེས་ཟིན་ནས་ཀྱང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཐུན་གསུམ་དུ་མཆོད་པར་མཛད་དེ། འཇམ་དཔལ་ཞལ་ལུང་ལས། སངས་རྒྱས་བྱང་ཆུབ་སེམས་དཔའ་དང་། །

― MLP003_Page_0300 ―

^{[མ་དཔེ་གཟིགས་ན་འདིར་གནོན།]}

[Full Size]

རིག་པའི་ལྷ་དང་ཁྲོ་བོ་སོགས། །མེ་ཏོག་ལ་སོགས་མཆོད་པར་བཅས། །ཞག་གཅིག་སྐྱ་རེངས་དང་པོ་དང་། །ཕྱེད་ནི་དྲོས་པའི་དུས་ཉིད་དང་། །ཆལ་ཆིལ་མཚམས་སུ་ནམ་མཁའ་ལས། །མཆོད་པ་བྱས་ནས་བསྔགས་བརྗོད་ཅིང་། །རང་གི་ཞིང་དུ་འགྲོ་བར་འགྱུར། །ཞེས་གསུངས། དེར་མ་ཟད་ཉི་སྒྲོལ་བྱེད་ཀྱི་ལོ་དབྱུག་ཟླའི་ཡར་ཚེས་བརྒྱད་ཀྱི་གཟིགས་སྣང་ལྟར་ན། འདི་ནས་པདྨས་བརྒྱན་པ་ཞེས་བྱ་བའི་སངས་རྒྱས་ཀྱི་ཞིང་དུ་དེ་བཞིན་གཤེགས་པ་རྣམ་རོལ་མཐའ་ཡས་ཞེས་བྱ་བར་འཚང་རྒྱ་བའི་མཛད་པ་སྟོན་པ་དང་། ཡང་མྱོས་ལྡན་གྱི་ལོ་རྒྱལ་ཟླའི་གནམ་སྟོང་གི་ནུབ་མོའི་གཟིགས་སྣང་ལ་ཞིང་སྐྱོང་གི་མཁའ་འགྲོ་མ་རྣམས་ཀྱི་ངོར་རྔ་ཡབ་གླིང་དུ་ཕེབས་པར་ཞལ་བཞེས་མཛད་པ་ལྟར་ན། ཞིང་དེར་རིག་པ་འཛིན་པའི་ཡེ་ཤེས་ཀྱི་སྐུའི་རྣམ་པར་རོལ་པའི་ཚུལ་གྱིས་ཌཱཀྐི་མ་རྣམས་ཀྱི་ཚོགས་དཔོན་དུ་གཤེགས་པར་སྣང་ལ། གཞན་ཡང་གཏེར་ལུང་ནས་ཨོ་ཌཱི་ཡ་ནའི་ཡུལ་ཛ་ག་ཊར་འདོད་ཡོན་སྣ་ཚོགས་དང་བདེ་སྡུག་ཐམས་ཅད་ལ་རོ་མཉམ་པར་སྤྱོད་པ་ཤིན་ཏུ་སྤྲོས་མེད་ཀུན་ཏུ་བཟང་པོའི་སྤྱོད་པས་དོན་མཛད་པ་གྲུབ་ཐོབ་ཀྱི་ཚུལ་དང་། བོད་ཀྱི་ཡུལ་འདིར་ཡང་རྒྱལ་པོ་ཞིག་དང་གཏེར་སྟོན་གྱི་སྐྱེ་སྲིད་འཛིན་པའི་ཚུལ་སྟོན་པ་སོགས་ཆུ་ཟླ་ལྟར་སྐུའི་བཀོད་པ་མཐའ་ཡས་པ་ཅིག་ཅར་སྣང་ནས་དོན་མཛད་པ་ནི། འཕགས་ཆེན་རྣམས་ཀྱི་ཡེ་ཤེས་སྒྱུ་མའི་རྣམ་ཐར་འགག་པ་མེད་པའི་ཆོ་འཕྲུལ་དུ་སྣང་བའི་ཕྱིར། བདག་ཅག་ཚུར་མཐོང་རྣམས་ཀྱི་བློས་ཇི་ལྟར་གཞལ་ནུས་ཏེ་མཐའ་བྲལ་གྱི་ནམ་མཁའ་ཁབ་མིག་ཏུ་ཚུད་མི་ཚུད་བལྟ་བ་དང་འདྲའོ། །དེ་ལྟར་ཆོས་ཀྱིས་དབྱིངས་སུ་སྙོམས་པར་ཞུགས་པའི་ཚུལ་བསྟན་ནས་ཀྱང་སྐུ་གདུང་རིན་པོ་ཆེའི་བཞུགས་སྟངས་ཅུང་ཟད་མཉེལ་སྟབས་ལས་ཞབས་སེམས་སྐྱིལ། ཕྱག་གཡོན་དཀུར་བརྟེན་གྱི་མཉམ་བཞགཕྱག་གཡས་སྙན་གྱི་ཐད་ཀར་སེ་གོལ་གྱི་བརྡའ་ཐབས་མཛད་པ་ལྟ་བུ་ལས་སྐུ་སྟོད་ཀྱི་རྩ་རིས་རྣམས་ཤིན་ཏུ་གསལ་ཞིང་ཆེར་རྒྱས་ལ་གཞོན་ཤ་ཆགས་པའི་བྱི་བྱད་གཟི་འོད་ལྷག་པར་འབར་བ་དང་། དབུ་གཙུག་ཆེར་འཕགས་པ་ལས་ཟླ་བའི་ཟིལ་པ་རླངས་པ་དང་བཅས་ཏེ་ཁོལ་ཞིང་ལུད་པ་སོགས་ཡེ་ཤེས་གོང་འཕོའི་རྟགས་མངོན་

― MLP003_Page_0301 ―

^{[མ་དཔེ་གཟིགས་ན་འདིར་གནོན།]}

[Full Size]

དུ་བསྟན་པས་ཐམས་ཅད་ངོ་མཚར་བར་གྱུར། དེའི་ཚེ་བདག་ཅག་སྐུ་དྲུང་དུ་འཁོད་པ་རྣམས་ནི་རེ་ཞིག་མྱ་ངན་གྱི་གདུང་བས་བླང་དོར་གྱི་གནས་མེད། རྟོག་དཔྱོད་ཀྱི་གོ་སྐབས་དང་བྲལ། ཅི་བྱ་གཏོལ་མེད་པས་ལོང་བ་ཐང་དཀྱིལ་དུ་བོར་བ་ལྟར་གྱུར། དེ་ནས་རང་བློ་དང་འཚམས་པར་བསྟན་པའི་གང་འདུལ་གཟུགས་སྐུའི་ཞལ་དཀྱིལ་མཐོང་བ་དང་གསུང་གི་བདུད་རྩི་མྱོང་བའི་སྐལ་པ་ཟད་པས་མནར་ཏེ་ཉམས་ཐག་པར་གྱུར་ཀྱང་། དོན་དམ་པར་གང་ཐུགས་རིས་མེད་ཀུན་ཁྱབ་ཀྱི་ཡེ་ཤེས་རང་རིག་དང་འདུ་འབྲལ་མེད་པར་ཡིད་ཆེས་ཀྱིས་གཏན་ལ་ཕབ་ནས། དུས་གསུམ་གྱི་རྒྱལ་བ་ཀུན་དང་རྣམ་དབྱེར་མེད་པའི་ཕྲིན་ལས་ཉིད་གདུལ་བྱའི་ཡུལ་ལ་ངང་གིས་འཇུག་པར་གསོལ་བ་བཏབ་ཅིང་ཐུགས་དམ་བསྐུལ་ནས། བླ་མ་དམ་པའི་བྱིན་རླབས་རང་ལ་བསྡུ་བའི་རླུང་སྦྱོར་དང་ཏིང་ངེ་འཛིན་གྱི་དམིགས་པ་ལ་མཉམ་པར་འཇོག་ལོ་ཙམ་བྱས་ཤིང་། དེ་དུས་སྐུ་རིམ་གྱི་མང་བསྐོལ་བའི་སྐད་ཆས་ཐུགས་འཁོལ་ཏེ་རྡོ་རྗེ་བྲག་རིག་འཛིན་སྤྲུལ་པའི་སྐུའི་སྐུ་ཞབས་ནས་བརྟན་བཞུགས་འབུལ་མི་ཆེད་མངགས་ཀྱིས་གནང་བར་གསང་ཁོག་ནས་གནས་ཚུལ་དྲང་པོའི་ཞུ་ལན་དང་བཅས་མགྱོགས་བསྔོ་རྟེན་ཡང་ཕུལ། ཚེས་གསུམ་གྱི་སྔ་དྲོ་ནམ་མཁའ་གཡའ་དག་ཅིང་ཚ་རྟིང་ཁ་ནས་འཇའ་དཀར་གྱི་སྡོང་པོ་ཀུ་ཤའི་ཆུན་པོ་འདྲ་བས་བར་སྣང་ཁྱབ་པར་བྲེས་པ་ལས་མེ་ཏོག་གི་ཆར་མཁའ་ལ་ལྡིང་ཞིང་ཉི་མའི་འོད་ཟེར་གྱི་ཐད་ན་འཇའ་སྤྲིན་ཁ་དོག་སྣ་ལྔས་འཚུབས་པའང་བྱུང་། དེ་ཉིན་ཞབས་དྲུང་རིན་པོ་ཆེས་གསང་བ་ཡེ་ཤེས་ཀྱི་མཁའ་འགྲོའི་གསུང་ཆོག་དང་འབྲེལ་བར་མཆོད་འབུལ་གསོལ་འདེབས་དང་། བདག་གིས་ཀྱང་མཁའ་འགྲོའི་ཕྱི་ནང་གི་གཏོར་མ་དང་ཆ་གསུམ་གཏོར་མ་སྔོན་དུ་འགྲོ་བས་བླ་མའི་རྣལ་འབྱོར་དང་འབྲེལ་བར་མཆོད་འབུལ་ཐུགས་རྒྱུད་བསྐུལ་བ་རྣམས་བསྒྲུབས། སྐུ་གདུང་གི་ཞབས་ཏོག་ཕྲལ་དུ་བྱས་ཆོག་པའི་བཀའ་ལུང་ཡོད་ནའང་རེ་ཞིག་སྔར་བཞིན་བཞུགས་སུ་གསོལ་བ་ལས། ཞབས་དྲུང་གདུང་བརྒྱུད་རིན་པོ་ཆེས་དབུས་ཁུ་དབོན་རྣམས་ཀྱིས་སྐུ་གདུང་རིན་པོ་ཆེ་གར་དབང་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྐུར་བསྐྱེད་པའི་གཙུག་ཏོར་ཐུགས་ཀ་ལྟེ་གསང་ཕྱག་ཞབས་ཀྱི་

― MLP003_Page_0302 ―

^{[མ་དཔེ་གཟིགས་ན་འདིར་གནོན།]}

[Full Size]

ཚིགས་བཞི་བཅས་པར་ནང་སྒྲུབ་ལྟར་ལུས་དཀྱིལ་གྱི་ལྷ་རྣམས་གསལ་བཏབ་ཅིང་། སོ་སོའི་རྩ་སྔགས་ཤམ་བུ་ཅན་གསེར་གྱིས་བྲིས་པའི་གདགས་ཡིག་ཀྱང་ཕུལ་ཏེ་དཀྱིལ་འཁོར་གྱི་ངོ་བོར་བསྒྲུབས་པ་ལ། བླ་མའི་ཐུགས་གཉིས་མེད་ཀྱི་ཡེ་ཤེས་སྤྱན་དྲངས་ཏེ་བསྟིམ་ནས་མཆོད་རྗེས། གསོལ་དཔོན་གྱི་རོགས་དགེ་སློང་གཉིས་ཀྱིས་བྱས་ཏེ་དྲིལ་སྦྱངས་ཞུ་བའི་ཐོག་མར་སྐུ་ཁྲུས་གསོལ་ཏེ་ག་བུར་དང་གུརྒུམ་སོགས་དྲི་བཟང་པོས་ཁྱབ་པར་བྱུགས། དེ་ནས་ནང་ཚས་དར་དཀར་སྲིད་དུ་རིང་བའི་ཕྱིར་གན་གོས་དམར་པོ་ཡུག་དང་ཀ་ཤི་ཀའི་རས་ཀྱི་ན་བཟའ་དྲི་བཟང་གིས་སྦགས་པས་གྲིལ་བ་ཟ་མ་ཏོག་ཏུ་བཞུགས་སུ་གསོལ་བའི་ནང་སྐོར་ཐམས་ཅད་དྲི་བཟང་གི་ཕུར་མས་གཏམས། ཕྱི་རོལ་ནས་སྟོད་གཡོགས་སྨད་གཡོགས་སོགས་དར་གྱི་ཆས་གོས་དང་དབུ་རྒྱན་སོགས་རིན་པོ་ཆེའི་རྒྱན་གྱིས་བརྒྱན་ཏེ་ལྷའི་ཆས་སུ་བཅུག་ཏེ་ཁྲི་ལ་བཀོད་པའི་སྤྱན་སྔར་རྡོར་དྲིལ་བུམ་ཐོད་སོགས་དམ་ཚིག་གི་ཡོ་བྱད་དང་ཞལ་དཀར་སོགས་སྐུའི་ཉེར་སྤྱད། མཆོད་པའི་བྱེ་བྲག་བཟང་ཞིང་རྒྱས་པ་བཀོད་ལེགས་པར་བཤམས་ཏེ་ཚེས་བཞིའི་སྔ་དྲོ་གསང་རྒྱ་བཀྲོལ་ཞིང་། དེ་དུས་ནམ་མཁའ་ལ་འཇའ་སྤྲིན་གྱི་ཚོམ་བུའི་རྣམ་པ་ཆེས་བཀྲ་བའང་བྱུང་། དེ་ནས་བཟུང་ཉིན་རེ་བཞིན་སྐུའི་སྲས་མཆེད་རྣམས་ཀྱིས་ཕྱག་མཆོད་གསོལ་འདེབས་སུ་ཕེབས་ཤིང་། སྐུ་གདུང་གི་དྲུང་དུ་གྲྭ་ཚང་གི་བླ་དཔོན་བགྲེས་པ་དགེ་བཤེས་སོགས་བདག་ཅག་རགས་བསྡུས་བཅོ་བརྒྱད་ཀྱིས་བླ་མ་ཞི་བ་དང་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཆོ་གའདུ་ཁང་དུ་གྲྭ་གཙང་ཡོངས་རྫོགས་ཀྱིས་བླ་མ་ཞི་བ་དང་ན་རག་དོང་སྤྲུགས་ཀྱི་ཆོ་ག་དང་འབྲེལ་བར་ཆོག་ཁག་སོ་སོས་མཆོད་འབུལ་གསོལ་འདེབས་དབང་བླང་བ་སོགས་གདུང་མཆོད་ཟླ་གཅིག་ཞག་ལྔའི་བར་དང་། སྐུ་ཚིགས་ཀྱི་དུས་མཆོད་རྣམས་ལ་ཚོགས་ཡས་མས་སོགས་གྲྭ་ཕྱི་ནང་གི་དགོན་ཆེ་ཕྲ་ཐམས་ཅད་དང་མོན་མཁར་ཕྱུག་དགོན་རྣམས་སོ་སོའི་དགེ་འདུན་དུང་རྒྱག་བླ་སློབ་བཅས་པ་སྤྱན་དྲངས་ཤིང་གང་ཕེབས་སོ་སོར་བསྙེན་བཀུར་གྱ་ནོམ་པ་དང་། ནག་ཟླའི་བཅུ་གསུམ་གྱི་ཉིན་སྐུ་འདད་དངོས་གཞིར་གྲྭ་ཚང་གི་རྗེས་འབྲེལ་དུ་གྲྭ་ཕྱི་ནང་མོན་མཁར་བཅས་པའི་རང་ཞབས་

― MLP003_Page_0303 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་དགོན་ཆེ་ཕྲ་ཚང་མ་བསྡུས་པའི་སེར་ཚོགས་ལ་ཚ་བ་མང་ཇ་གྲལ་འགྱེད་སྣེ་བཞག་སྤྱི་རྫས་སྦྱོར་འཇགས་གྲལ་དབུས་གཙོས་པའི་འབུལ་ཐོབ་རྣམས་ལ་བསྔོ་རྟེན། མི་སེར་དུད་ཆེ་ཆུང་ཐམས་ཅད་དང་འབྲེལ་ཅན་གྱི་སྐུ་ཉེ་ཡོན་བདག་སློང་མོ་བ་སོགས་སྐྱེ་བོའི་ཚོགས་ལ་བཟའ་བཏུང་འགྱེད་དང་བཅས་པའི་སྦྱིན་གཏོང་རྣམས་བཟང་ཞིང་ཕུལ་དུ་བྱུང་བ། གཞན་ཡང་གདན་ས་ཆེན་པོ་སེར་འབྲས་དགེ་གསུམ་ལ་མང་ཇ་དང་ཇ་འགྱེད། ལྷ་ལྡན་ཚོགས་མཆོད་ཆེན་མོ། གསང་ཕུ་དབྱར་ཆོས། གཉལ་སྡེ་དྲུག་ཤོ་པོ་མཁར་སྟེང་དུ་ཚོགས་པ་རྣམས་དང་གྲྭ་ཕྱི་ནང་ཡར་འཕྱོངས་ཀྱི་དགོན་ཆེ་ཕྲ་སོགས་དབུས་གཡོར་གྱི་འདུས་སྡེ་ཕལ་མོ་ཆེར་མང་བཀོལ། རྡོ་རྗེ་བྲག་དང་གུ་རུ་ལྷ་ཁང་སོགས་རང་དང་ཆོས་སྲིད་ཅི་རིགས་པས་འབྲེལ་བའི་ལྷོ་དབུས་གཙང་དྭགས་ཀོང་སོགས་ཀྱི་དགོན་སྡེ་འགའ་ལ་ཚ་གྲའམ་མང་ཇ་སྦྱོར་སྦྲེལ་གང་ལ་གང་འོས་དང་བསྟུན་ཏེ་འགྱེད་དོད་དང་རང་ཞབས་རྣམས་ལ་ལྷག་པོར་སྤྱི་རྫས་ཀྱི་སྦྱོར་འཇགས། གངས་ཅན་གྱི་ལྷ་གཅིག་གོང་ཞབས་ཡས་ཕྱིན་དང་། པཎ་ཆེན་མཆོག་གི་སྤྲུལ་སྐུ། བླ་ཆེན་ས་འབྲི། ཀརྨ་པ་ཡབ་སྲས། སྒམ་འབྲུགརྡོ་རྗེ་བྲག་རིག་འཛིན་སྤྲུལ་པའི་སྐུ། རྣམ་སྤྲུལ་རིན་པོ་ཆེ་ཡབ་སྲས་སོགས་གྲུབ་མཐའ་རིས་སུ་མ་ཆད་པའི་བླ་མ་སློབ་དཔོན་ཆེ་ཕྲ་ཐམས་ཅད་ལ་བསྔོ་རྟེན་བཟང་ཞིང་དཔངས་མཐོ་བ་གང་ལ་གང་འཚམས་སུ་ཕུལ་ཞིང་། ནག་ཟླའི་ཚེས་དགུ་ལ་གདུང་ཆོག་གི་མཆོད་འབུལ་བསྡུས་ཤིང་བཅུ་ལ་ཞབས་དྲུང་རིན་པོ་ཆེས་སྐུ་གདུང་གི་སྤྱན་སྔར་རྣལ་འབྱོར་མའི་གསུང་ཆོག་རྒྱས་པར་གནང་། བཅོ་ལྔ་དང་བཅུ་དགུའི་ཉིན་སྐུ་གདུང་གི་སྤྱན་སྔ་དང་འདུ་ཁང་དུ་ཚོགས་ཆེན་གྱི་གསུང་ཆོག་གདུང་མཆོད་ཀྱི་སྐབས་བཞིན་དང་། བཅུ་དགུའི་སྔ་དྲོ་ཞབས་དྲུང་རིན་པོ་ཆེས་མཁའ་འགྲོ་མའི་གཏོར་མ་གནང་ངོས་ཉི་མ་ཕྱེད་ཡོལ་ཙམ་ལ་ཞབས་དྲུང་ཁུ་དབོན་སོགས་ཞབས་རིམ་ནང་འཁོར་རྣམས་ཀྱིས་སེར་སྦྲེངས་ཀྱི་བཀུར་སྟི་དང་བཅས་སྐུ་གདུང་རིན་པོ་ཆེ་ཞུགས་ཀྱིས་སྦྱོང་བའི་སླད་དུ་གཟིམས་ཆུང་ཀུན་བཟང་ཕོ་བྲང་གི་མཐོངས་སུ་དོ་ལི་ལ་སྤྱན་དྲངས་པ་ན། སྐུ་གདུང་བཏེག་པའི་མོད་ལ་ས་འདི་སྒོས་སུ་ཅུང་ཟད་ཙམ་གཡོས་ཤིང་ནམ་མཁའ་དྭངས་པར་འཇའ་

― MLP003_Page_0304 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྲིན་སྲབ་མོའི་ཚོམ་བུ་བཀྲམ་པ་ལས་མེ་ཏོག་གི་ཆར་ཐོ་རེ་བ་བབས། དེ་དུས་སྐུ་གདུང་སྔར་ལས་ལྡབ་འཕར་ལྟ་བུའི་ལྕིད་དང་ལྡན་ཞིང་ཞལ་ཕྱེ་སྐབས་སྐུ་སྟོད་དང་དབུ་གཙུག་ཤིན་ཏུ་རྒྱས་པ་དང་། གཞིས་ནས་སྐུ་གདུང་རིན་པོ་ཆེ་བཞུགས་ཀྱི་བར་དེ་སྲིད་ཉིན་རེ་བཞིན་བརྒྱ་མཆོད་དང་མར་མེ་ཉིན་མཚན་འཁྱོང་པ་ཉི་ཤུ་ཙམ་རྒྱུན་སྦར་ཡིན་རུང་། རུལ་དྲི་མི་སྡུག་པའི་རྣམ་པ་མེད་པར་དྲི་བསུང་བཟང་པོ་འཕྲོ་བའི་རྣམ་པར་སྣང་། དེ་ནུབ་བདག་གིས་ལས་སློབ་ཞུས་ཏེ་ཞབས་དྲུང་ཁུ་དབོན་གྱི་ཞབས་ཕྱིར་གདུང་མཆོད་པ་རྣམས་ཀྱིས་ཐུགས་རྗེ་ཆེན་པོའི་མཆོག་གི་བསྲེག་བླུགས་ཀྱི་ཆོ་གས་མྱང་འདས་མཆོད་རྟེན་གྱི་རྣམ་པའི་ཐབ་ཁུང་དུ། ཙནྡན་དཀར་དམར་དང་ཨ་ཀ་རུ་འབའ་ཞིག་ཤ་ཐག་གི་འབར་བྱེད་དུ་ཞུགས་སུ་སྦྱངས་པར་བུད་ཤིང་མཛུབ་མོའི་སྦོམ་ཕྲ་ཙམ་པ་གཅིག་རྗེས་གཅིག་མཐུད་ཀྱི་རྒྱུན་མ་ཆད་ཙམ་ཕུལ་བ་ལས། བུད་ཤིང་ལ་ལྟོས་མེད་ཀྱི་རང་འབར་ལྟ་བུས་སྐུ་གདུང་ཞུགས་དཀར་གསལ་གཡས་འཁྱིལ་དུ་འབར་བ་དང་འདྲེས་པའི་ངང་ལ་ཡུངས་ཀྱིས་དག་པའི་ཤུལ་དུ་དབུ་ཐོད་རིལ་པོར་བཞུགས་ཤིང་། ཐུགས་མ་རྨས་པར་ཞབས་དྲུང་བགྲེས་པའི་སྐུ་མདུན་དུ་མེ་སྒོ་ནས་རྒྱང་མར་ཕེབས། མེ་ཕུལ་མ་ཐག་དུད་ཁུང་ལས་དུ་བ་འོད་དཀར་པོའི་ཚུལ་ཅན་མདུང་ཚུགས་སུ་ཐོན་པའི་རྩེ་ལས། འོད་དཀར་གསལ་གྱི་གོང་བུ་སྙིམ་པ་ཙམ་ཞིག་མཐའ་མི་མངོན་པར་སོང་སྟེ་ཤར་ཕྱོགས་ཀྱི་ནམ་མཁའ་ལ་ཁྲིག་གིས་འདྲེས་པ་ཕྱི་རོལ་ན་གནས་པ་མང་པོས་མཐོང་བ་དང་། ནམ་མཁའ་ཡང་ཐོག་མར་ཆུ་འཛིན་གྱིས་ཁྱབ་པ་ལས་གློག་དང་འབྲུག་སྒྲ་ཆེན་པོ་སྒྲོག་པ་དང་ལྷན་ཅིག་ཆར་ཟིམ་ཐིགས་པ་རེ་གཉིས་བབས་རྗེས་ནམ་མཁའ་འཕྲལ་དུ་གཡའ་དག་པས་ངོ་མཚར་བར་གྱུར་ཅིང་། དེ་ནུབ་སྐོར་ལམ་གྱི་ཕྱི་ནང་། བླ་བྲང་གི་བདེ་ཡངས་དང་བར་ཁྱམས། གསལ་ཡངས་སོགས་སྟེང་ཤོད་ཐམས་ཅད་དད་ཅན་གྱི་འདུས་པ་ཕྱག་དང་སྐོར་བ་བྱེད་པས་ཁེངས་ཤིང་། ཀུན་བཟང་ཕོ་བྲང་དུ་བརྒྱ་མཆོད་ཚར་དྲུག་དང་ཚོམ་ཆེན་དུ་གྲྭ་ཚང་ཡོངས་རྫོགས་ཀྱིས་གསོལ་འདེབས་གནང་བར་ཚར་གསུམ། དེས་མཚོན་མཆོད་ཁང་སོ་སོར་དང་བར་ཁྱམས་བདེ་ཡངས་བཅས་པར་མཆོད་པ་བཤམས་པའི་མར་མེའི་འོད་

― MLP003_Page_0305 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་ནམ་མཁའི་མདངས་འགྱུར་བ་ཙམ་དང་། དེར་མ་ཟད་སྐུ་གདུང་རིན་པོ་ཆེ་བཞུགས་ཀྱི་བར་དེ་སྲིད་དུ་སྤྱན་སྔར་ཉིན་རེ་བཞིན་ཡང་བརྒྱ་མཆོད་གཉིས་གསུམ་ཙམ་མམ་ཐ་ནའང་རེ་རེ་མ་ཆག་པ་དང་། སྐུ་ཚིགས་སོ་སོར་འཕར་མ་དང་བཅས་བཟང་ཞིང་བསྟར་ཆགས་པས་མཆོད་ཅིང་། ཞག་བདུན་གྱི་བར་གདུང་ཁང་ཞལ་མ་ཕྱེ་བར་ཉིན་རེ་བཞིན་དུ་མཆོད་པ་དང་གསོལ་འདེབས་མཛད། ཉི་ཤུའི་ཞོགས་ཉི་ཤར་ཙམ་ན་ས་ཆེན་པོ་འདི་ཆེས་ཆེར་གཡོས་བས་མཚོན་དེ་ཉིན་ས་གཡོས་ལན་གསུམ་ཙམ་བསྟུད་མར་བྱུང་ཞིང་། དེའི་མུར་ནམ་མཁའ་ཐམས་ཅད་འཇའ་སྤྲིན་གྱི་སྡོང་པོ་སྣ་ཚོགས་ཀྱིས་ཁེངས་པ་ལས་འཇའ་ཚོན་གཡུང་དྲུང་དང་མཆོད་རྫས་ཀྱི་རྣམ་པའི་དབྱིབས་དོད་པའང་ཅི་རིགས་བྱུང་། ཉེར་ལྔའི་སྔ་དྲོ་ཞབས་དྲུང་རིན་པོ་ཆེས་གར་དབང་བདེ་གཤེགས་ཀུན་འདུས་ཀྱི་གསུང་ཆོག་དང་འབྲེལ་བར་ཚོགས་མཆོད་དང་། བདག་ཅག་ཁུ་དབོན་ཞམ་རིང་ནང་འཁོར་བཅས་པས་མཆོད་འབུལ་གསོལ་འདེབས་བྱས་ཏེ་གདུང་ཞལ་ཕྱེ་བས། དབུ་ཐོད་ལ་ཞུགས་ཀྱིས་མ་སྨས་པ་ཚངས་བུག་ཧ་རེ་བ་ལས་བདུད་རྩིའི་དྭངས་མ་ཁོལ་བའི་རྣམ་པར་འདུག་པ་མ་གཏོགས་དེ་ལྷག་གདུང་རུས་ཕལ་ཆེར་ཌཱ་ཀིས་སྤྱན་དྲངས་པ་ལྟ་བུས་སྙིམ་པ་གསུམ་ཙམ་དང་བུད་ཤིང་ཡང་ཆེར་མ་དགོས་པས་གདུང་ཐལ་ཡང་དེ་ཙམ་དུ་ཟད་ཅིང་། ཕྱག་ཞབས་ཀྱི་རྐང་ངར་སོགས་རགས་པའི་གདུང་རྣམས་ཤས་ཆེར་དེ་དུས་ནས་གདུང་ལོག་ལྟ་བུས་རིན་པོ་ཆེ་ལྟར་མཁྲེགས་ཤིང་ལྕིད་དང་ལྡན་ལ། ལ་ལ་དག་ཁ་དོག་ཀྱང་གཡང་ཏྲེའུ་འདྲ་བ་དང་ཕལ་ཆེར་གྱིས་ལྕགས་ཆོད་པའི་རྣམ་པ་ཅན། གདུང་ཕྲན་འགའ་རེ་མེས་མ་རྨས་ཤིང་གདུང་རིགས་ལྔ་དང་ལྷ་སྐུ་ཡིག་འབྲུའི་རྣམ་པ་གདུལ་བྱའི་མོས་སྣང་ལྟར་གསལ་བས་དད་པའི་ས་བོན་ཡོངས་སུ་རྒྱས་པར་གྱུར་ཅིང་། གྲྭ་ཚང་ཡོངས་རྫོགས་ཀྱིས་གདུང་མཇལ་མཆོད་འབུལ་དུ་ལན་བཞི་ཕེབས་པའི་དང་པོ་དབོ་ཟླའི་ཚེས་ལྔའི་སྔ་དྲོ་གསོལ་འདེབས་མཛད་པས་ཤིན་ཏུ་དད་པའི་གདུང་ཤུགས་ཀྱིས་བྱིན་རླབས་ལྷོངས་ཏེ་སྐལ་ལྡན་མང་པོར་བྱིན་ཕེབས་པས་ཉམས་འུར་ཞིང་འཕར་བ་དང་། ལན་གཉིས་པ་ཉེར་ལྔའི་ཉིན་གསོལ་འདེབས་གནང་དུས་ནམ་མཁའ་དྭངས་ཤིང་འཇའ་

― MLP003_Page_0306 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོན་གྱི་དྲ་བ་དང་འཇའི་སྡོང་པོས་གང་བ། ཡང་ཉེར་བརྒྱད་ཀྱི་སྐུ་ཚིགས་འཕར་མའི་གསུང་ཆོག་དུས་ཞོགས་པ་ཚ་རྟིང་སྔ་ཕྱོགས་ཙམ་ལ་འདབ་མ་དྲུག་པ་ཤས་ཆེ་བའི་མེ་ཏོག་གི་ཆར་ལྟེ་བ་ཟླུམ་པོ་ལ་ཁབ་ཀྱིས་ཕུག་པ་ལྟ་བུའི་བུག་པ་ཧ་རེ་ཡོད་པ་ཁ་བ་འཚུབ་པ་ལྟར་ཆེར་བབས་ཤིང་། དེར་མ་ཟད་སྐུ་ཚིགས་དང་མཆོད་འབུལ་གསོལ་འདེབས་ཀྱི་དུས་རྣམས་ལ་ནམ་མཁའ་དྭངས་པ་དང་། རེས་འཇའ་ཚོན་ནམ་འཇའ་དཀར་གྱི་སྡོང་པོ་དང་། མེ་ཏོག་གི་ཆར་ཡང་འདབ་མ་དྲུག་པ་དང་ལྔ་པ་བརྒྱད་པ། ཁ་ཅིག་འཁོར་ལོའི་རྩིབས་ཀྱི་རྣམ་པ་ལྟ་བུ་ལ་སོགས་པ་ལན་མང་དུ་བབས་པ་ཀུན་གྱི་མཐུན་སྣང་དུ་གྲུབ་པ་དང་། ནག་ཟླའི་ཚེས་བཅོ་བརྒྱད་ཀྱི་ཉིན་རྣམ་སྤྲུལ་རིན་པོ་ཆེས་གདུང་མཇལ་དང་འབྲེལ་བར་མཆོད་འབུལ་བ་རྣམས་ལ་བསྔོ་རྟེན་ཕྱག་འགྱེད་དང་བཅས། ལྷན་ཅིག་ཏུ་མཆོད་འབུལ་གསོལ་འདེབས་གནང་བའི་ཁྲུས་གསོལ་གྱི་སྐབས་འབྲུག་སྒྲ་དང་བཅས་ཏེ་འཇམ་ཆར་ཅུང་ཟད་བབས་པ་ལས་ནམ་མཁའ་འཕྲལ་དུ་དྭངས་ཤིང་འཇའ་སྤྲིན་གྱིས་ཁེངས། ནག་ཟླའི་ཉེར་དྲུག་ལ་ཞབས་དྲུང་སྐུ་མཆེད་རྣམས་ཀྱིས་བསམ་ཡས་རི་མཐིལ་གྱི་གནས་རྣམས་ལ་མཆོད་འབུལ་དུ་ངོས་ཕེབས་གནང་དུས་ཀྱང་མཁན་པོའི་གདུང་འབུམ་གྱི་ཐད་དུ་འཇའ་སྤྲིན་གྱི་གུར་ཕུབ་པ། མཆིམས་ཕུའི་ཟེ་བསྐོར་སྐབས་ཕྱོགས་ཐམས་ཅད་སྨིག་གདང་གིས་འཁྲིགས་པ་ལས་བློན་པོ་མགུལ་གྱི་ཐད་སོར་དྭངས་པ། གསང་ཕུག་གི་ཉེ་སྐོར་དུ་མེ་ཏོག་གི་ཆར་འདབ་མ་ལྔ་པ་ཤས་ཆེ་བ་བབས་པ་སོགས་ངོ་མཚར་བའི་རྟགས་མང་པོ་མངོན་དུ་སྣང་ཞིང་དེ་བསྟུན་ཁྲ་འབྲུག་ཤེལ་བྲག་སོགས་དང་དེ་གོང་བདུན་ཚིགས་དང་པོའི་ནང་དུ་ལྷ་སར་ཡང་མཆོད་འབུལ་བྱེད་མི་ཆེད་དུ་མངགས། དེ་ནས་ས་ག་ཟླ་བའི་ཡར་ངོའི་ཚེས་བཅུ་ཉིས་བརྩེགས་ཀྱི་རྟིང་མ་ཕུར་བུ་དང་དབོ་འཛོམ་པའི་ཕུན་ཚོགས་སྦྱོར་བའི་ཉི་ཕྱེད་ཕྱི་ཆ་བདུད་རྩི་ཐུན་མཚམས་དང་བརྟན་པ་སེང་གེའི་དུས་སྦྱོར་ཐོགཆོས་བཟང་བདེ་ཡངས་སུ་ཞབས་དྲུང་རིན་པོ་ཆེས་མཁའ་འགྲོའི་ཆོ་གའི་སྒོ་ནས་གདུང་འབུམ་གྱི་ས་ཆོག་གནང་ཞིང་རྨང་འདིངས་སྐབས་འཇའ་སྤྲིན་སྣ་ལྔ་ངོ་མཚར་བ་དང་། བགེགས་སྐྲོད་དུས་རླུང་དྲག་པོའི་ཚུབ་འཁོར་ལངས་པ་ཡང་བྱུང་ཞིང་།

― MLP003_Page_0307 ―

^{[མ་དཔེ་གཟིགས་ན་འདིར་གནོན།]}

[Full Size]

དེ་ཉིན་དངུལ་གདུང་གི་སྐུ་རྒྱུ་རྣམས་དང་བཟོ་བོ་ལག་ཆ་དང་བཅས་པ་བྱིན་གྱིས་བརླབས་པས་སྐར་འཛིན་ཙམ་དང་། ཉེར་དགུ་ལ་ས་འབུམ་གྱི་བུམ་རྟེན་དུ་བདག་གིས་གཙུག་ཏོར་དྲི་མེད་ཀྱི་དཀྱིལ་ཆོག་དང་། དེའི་སྟེང་དུ་སྣྲོན་ཟླའི་ཚེས་གཅིག་ལ་འོད་ཟེར་དྲི་མེད་ཀྱི་སྟ་གོན་དང་གཉིས་ལ་དཀྱིལ་འཁོར་བཞུགས་སུ་གསོལ་ནས་སྲོག་ཤིང་འཛུགས་པའི་ཆོ་ག་རྣམས་སྒྲུབ་སྐབས་ཀྱང་འཇའ་སྤྲིན་སོགས་ལྟས་ངོ་མཚར་བ་བྱུང་ཞིང་གཟུངས་རྣམས་ཀྱང་རིམ་པར་འབུལ་བར་མཛད། ཟླ་བ་དྲུག་པའི་ཚེས་གཉིས་ལ་ཞབས་དྲུང་སྐུ་མཆེད་ཀྱིས་དབུས་བདག་ཅག་བགྲེས་པ་དབུ་ཆེ་དགེ་བཤེས་བཅས་རགས་བསྡུས་ཉི་ཤུ་རྩ་དྲུག་ཙམ་གྱིས་ཀུན་བཟང་ཕོ་བྲང་དུ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་དཀྱིལ་འཁོར་དང་འབྲེལ་བར། ནང་རྟེན་གཟིམས་མལ་འདྲ་སྐུ་རིན་པོ་ཆེ་རྣམས་ལ་རབ་གནས་ཀྱི་ཆོ་ག་རྒྱས་པ་མཛད་དུས་སྔ་དྲོ་ནམ་མཁའ་དྭངས་པ་ལ་འཇའ་སྤྲིན་གྱི་སྡོང་པོས་གང་བ་དང་ཁྱད་པར་ཡེ་ཤེས་པ་སྤྱན་འདྲེན་གྱི་དུས་ཙམ་ན་གཟིམས་ཆུང་ཀུན་བཟང་ཕོ་བྲང་གི་སྐུ་བརྙན་བཞུགས་པའི་ཐད་ཀར་འཇའ་མདུང་ཚུགས་ཀྱི་རྣམ་པ་དང་། གཞན་ཡང་སྐུ་བརྙན་ཉིད་སྤྱན་འབྱེད་འཛུམ་དང་ཞལ་གྱི་མཆུ་སྒྲོས་གཡོ་བའི་ཚུལ་དངོས་སུ་གསལ་བ་དང་། ཉི་མ་ཕྱེད་ཡོལ་ནས་འབྲུག་སྒྲ་གྲག་ཅིང་ཆར་རྒྱུན་ཇ་ཡུན་གཅིག་ཙམ་གྱི་བར་བབས་པའི་ཁྲོད་དུ་ཡང་མེ་ཏོག་གི་ཆར་བསྙོན་མེད་ཐོ་རེ་བ་བྱུང་ཞིང་། དགེ་མཚན་དེས་ཞིང་པ་རྣམས་ཀྱང་རབ་ཏུ་དགའ་བར་གྱུར། འདི་དག་གི་ཚེ་ཕྱི་རྟེན་དངུལ་གདུང་རིན་པོ་ཆེ་དང་གསུང་འབུམ་གྱི་གླེགས་བམ་སོགས་བཞེངས་པའི་བཟོ་གྲྭ་ཚུགས་བཞིན་པ་དང་། གྲྭ་ཚང་དུ་ཟླ་བ་ངོ་རེ་བཞིན་གྱི་སྐུ་མཆོད་ཐོག་བླ་མ་ཞི་བ་དང་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཆོ་གའི་རྒྱུན་འཛུགས་པར་མཛད་ཅིང་། སླད་མར་ལོ་དུས་ཀྱི་སྐུ་མཆོད་ལ་བཀའ་ཆེམས་ལྟར་བཀའ་བརྒྱད་བདེ་གཤེགས་འདུས་པའི་སྒྲུབ་ཆེན་གྱི་ཕྱག་སྲོལ་བསྟན་པ་ནམ་གནས་བར་འཛུགས་པར་འགྱུར་བ་སོགས་དགོངས་པ་སྐོང་བའི་ཐབས་ཚུལ་ལེགས་སྤྱད་ཀྱི་བྱ་བ་ཕུལ་དུ་ཕྱིན་པ་བསྒྲུབས་ཤིང་བསྒྲུབ་པར་འགྱུར་བ་ཐམས་ཅད་ཀྱི་ཐུགས་ཁུར་འགན་བཞེས་གང་ཅི་གཙོ་བོར་བླ་མ་ལ་གུས་ཤིང་གཏོང་བ་

― MLP003_Page_0308 ―

^{[མ་དཔེ་གཟིགས་ན་འདིར་གནོན།]}

[Full Size]

ལ་གོམས་པའི་སྙིང་སྟོབས་མངའ་བ་གཅུང་རྗེ་དབོན་ཕྱག་མཛོད་ཀྱིས་ཞབས་དྲུང་རིན་པོ་ཆེ་སྐུ་མཆེད་ཀྱི་དགོངས་པ་དང་བསྟུན་གྱིན་བཀའི་འཁོར་ལོས་ཁྱབ་པར་མཛད། གཉེར་པ་ཆོས་མཛད་དང་གསོལ་དཔོན་དཔལ་འབྱོར་སོགས་ཉེ་འཁོར་ནང་མ་རྣམས་ཀྱིས་བཀའ་སྩལ་རྗེས་སྒྲུབ་ཀྱི་ཁུར་བླངས། ཡིད་གཞུངས་ཤིང་མི་ངལ་བའི་སྦྱོར་བ་ལ་བརྩོན་པའི་ལས་བྱེད་པ་རྣམས་ཀྱིས་ལག་བསྟར་ཏེ་ཀ་ཐེག་གདུང་ཐེག་ལྟ་བུའི་རྟེན་འབྱུང་གིས་དགོངས་རྫོགས་སྒྲུབ་པའི་བགྱི་བ་ཐམས་ཅད་གྲ་འགྲིག་ཅིང་ཕུན་སུམ་ཚོགས་པར་གྱུར། དེ་དག་གི་ཚེ་གཞུང་ས་མཆོག་དང་བཀྲ་ཤིས་ལྷུན་པོ་ནས་གདུང་འབུལ་གྱི་གནང་སྦྱིན་དངོས་སྤྱད་བཟང་ཞིང་དཔངས་མཐོ་བ་གནང་བས་མཚོན། ཕྱོགས་ཀྱི་བླ་མ་ཆེ་ཆུང་དཔོན་སྐྱ་དྲུང་ནང་གྲྭ་པའི་སྤྱི་གཉེར་སོགས་མཆོག་དམན་སྤྱི་དང་། སྒོས་རྗེ་བཙུན་དམ་པ་དེ་ཉིད་ཀྱི་བཀའ་དྲིན་ཆེན་པོས་རྗེས་སུ་བསྐྱངས་པའི་བུ་ཆེན་དགེ་བའི་བཤེས་གཉེན་སོགས་གྲྭ་སློབ། སྐུའི་ཉེ་དུ་ཡོན་བདག་དད་ཅན་རྣམས་ཀྱིས་སྙན་ཤལ་མཆོད་རྫས་གདུང་འབུལ་ཞལ་འདེགས་སྐུ་ཚིགས་གསོལ་བ། ཕྱིར་བཞུགས་རྣམས་ལ་བསྙེལ་ཇ་འབུལ་བ་སོགས་སྒོ་དུ་མ་ནས་མཐུན་རྐྱེན་ཐམས་ཅད་ཚོགས་པ་ལ་བརྟེན་ཏེ་དགོངས་པ་ཡོངས་སུ་རྫོགས་པའི་ཐབས་སྔ་ན་མེད་པ་གྲུབ་ཅིང་། ཁྱད་པར་དུའང་སྐུ་གསུང་ཐུགས་ཀྱི་སྲས་ཞབས་དྲུང་རིན་པོ་ཆེ་སྐུ་མཆེད་དང་། གསུང་གི་སྲས་ཞལ་སློབ་དགེ་བའི་བཤེས་གཉེན་འདུས་པའི་སྡེ་མ་ལག་དང་བཅས་པ་རྣམས་ཀྱིས། བསྟན་པ་རིན་པོ་ཆེའི་རིང་ལུགས་ཀྱི་སྲོལ་བཤད་སྒྲུབ་ཀྱི་བྱ་བ་རྒྱ་ཆེན་པོ་ལས་མི་གཡེལ་བས་བདག་ཉིད་ཆེན་པོ་དེའི་ཐུགས་དགོངས་ཁྱད་པར་ཅན་ཡོངས་སུ་རྫོགས་པར་འགྱུར་བ་གདོན་མི་ཟ་བ་སྟེ། མདོར་ན་དེ་དག་ཐམས་ཅད་ཀྱང་རྗེ་བཙུན་ཆོས་ཀྱི་རྒྱལ་པོ་དེ་ཉིད་ཀྱི་ཐུགས་རྗེ་དང་སྨོན་ལམ་རླབས་པོ་ཆེས་བྱིན་གྱིས་བརླབས་པའི་མཐུ་ཁོ་ན་ལས་གྲུབ་པ་ཡིན་ནོ། །སྒྱུ་མའི་རྣམ་ཐར་འོད་གསལ་ཆོས་སྐུའི་མཁར་གཤེགས་ནས། །ལོངས་སྤྱོད་རྫོགས་དང་སྤྲུལ་པའི་ཟློས་གར་རྨད་བྱུང་གིས། །མཐའ་ཡས་འགྲོ་བའི་རེ་སྐོང་དཔལ་ལྡན་རིགས་

― MLP003_Page_0309 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་གྱི། །འཁོར་ལོ་སྒྱུར་དབང་གཏེར་ཆེན་བླ་མར་སླར་ཡང་འདུད། །རབ་འབྱམས་རྒྱལ་བའི་དཀྱིལ་འཁོར་སྒྱུ་འཕྲུལ་རྡོ་རྗེའི་སྐུ། །གསུང་གསང་གཞོམ་མེད་སྒྲ་སྐད་རྒྱ་མཚོའི་རྗེས་སུ་འཇུག །རྣམ་པར་མི་རྟོག་མཉམ་ཉིད་བདེ་ཆེན་ཡེ་ཤེས་ཐུགས། །དབྱེར་མེད་ཁྱབ་བདག་འགྲོ་བའི་བླ་མས་འདིར་དགོངས་ཤིག །ཡུལ་དང་དུས་ལ་ཆགས་ཐོགས་མི་མངའ་བར། །སྒྲིབ་མེད་གསལ་ལེར་མཁྱེན་པ་མགོན་ཁྱོད་ཀྱིས། བདག་ཅག་རེ་ལྟོས་བཅས་པའི་བུ་སློབ་རྣམས། །སྐྱབས་མེད་ཉམ་ཐག་གྱུར་འདི་གཟིགས་ལགས་སམ། །རྗེ་བཙུན་མཁྱེན་བརྩེའི་ཉིན་བྱེད་མཁའ་དབྱིངས་གཤེགས། །ལོག་སྨྲ་འབྱུང་པོའི་བྱ་ཚོགས་ཅི་དགར་སྤྱོད། །བླང་དོར་གནས་བྲལ་མི་ཤེས་མུན་པའི་ཀློང་། །ལྷུངས་གྱུར་བདག་ཅག་ཅི་བྱའི་གཏོལ་དང་བྲལ། །བསྟན་འགྲོའི་ཕན་བདེ་རྒྱས་བཞེད་ཐུགས་མངའ་བའི། །མཁྱེན་བརྩེ་ནུས་པར་ལྡན་ཁྱོད་ཅི་བདེར་གཤེགས། །དེང་བདག་བསྟན་པ་འཛིན་འདོད་སེམས་དགེ་ཡང་། །ཉམ་ཆུང་ནུས་པ་དམན་པས་ཇི་ལྟར་བགྱི། །ཚེ་རབས་ཀུན་ཏུ་བདག་སོགས་གདུལ་བྱ་རྣམས། །ཁྱོད་སྐུའི་གྲིབ་མ་བཞིན་དུ་རྗེས་འགྲོ་བས། །ཞབས་པད་གུས་བསྟེན་གསུང་གི་བདུད་རྩིའི་བཅུད། །ངོམས་མེད་འཐུང་བའི་སྐལ་བཟང་མྱུར་ཐོབ་ཤོག །ཁྱད་པར་མགོན་ཁྱོད་རྡོ་རྗེ་གདན་གྱི་སྤོར། །དེ་བཞིན་གཤེགས་པ་མོས་པའི་སྐུར་བཞེངས་ཚེ། །འདུས་པའི་ཐོག་མར་སྐྱེས་ནས་ཆོས་སྨྲ་བའི། །མཆོག་གྱུར་འགྲོ་སྒྲོལ་དེད་དཔོན་ཉིད་འགྱུར་ཤོག །དེ་ལྟར་ནང་གི་རྣམ་ཐར་སྔར་བརྩམས་ཀྱི་ཁ་སྐོང་དུ་བརྗོད་པ་མྱ་ངན་འདས་བྱུང་གི་གཏམ་ཨུཏྤ་ལའི་ཕྲེང་བ་ཞེས་བྱ་བ་འདི་ཡང་རྗེ་བླ་མ་དམ་པའི་རིགས་དང་ཆོས་ཀྱི་སྲས་ཞབས་དྲུང་རིན་པོ་ཆེ་ཁུ་དབོན་དང་ལ་མོ་ཆོས་སྐྱོང་ཆེན་པོའི་སྐུ་རྟེན་མཁྱེན་བརྩེའི་དབང་ཕྱུག་ཆོས་རྗེ་རིན་པོ་ཆེའི་བཀའ་སྩལ་ཕེབས་པ་དང་། ཁྱད་པར་འགྲོ་བའི་བླ་མ་དཀྱིལ་འཁོར་རྒྱ་མཚོའི་མངའ་བདག་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུའི་བཀའ་ལུང་ལྕི་བའི་ཅོད་པཎ་དད་པའི་གཙུག་གིས་མཆོད་ཅིང་། གཞན་ཡང་བསྟན་པའི་གསལ་བྱེད་སྤྲུལ་པའི་སྐུ་ཀུན་བཟང་ལེགས་གྲུབ་པདྨ་བཞད་པའི་རྡོ་རྗེ། རྒྱལ་མཁན་ཟུར་བཤེས་གཉེན་ངག་དབང་དཔལ་མགོན། གྲུབ་པའི་དབང་ཕྱུག་འགྱུར་

― MLP003_Page_0310 ―

^{[མ་དཔེ་གཟིགས་ན་འདིར་གནོན།]}

[Full Size]

མེད་ཀློང་གྲོལ། རྒྱལ་སྐོར་སྡེ་པ་ཨོ་རྒྱན་ཚེ་བརྟན་ཕུན་ཚོགས། ཕོ་ལྷ་བ་སྡེ་པ་འགྱུར་མེད་མཆོག་གྲུབ། གྲྭ་ལྔ་དོན་ཀུན་གྲུབ་པ། དགེ་སློང་འགྱུར་མེད་ཆོས་དབྱིངས་ཕུན་ཚོགས་སོགས་མཆོག་གི་ལམ་མཁན་དགེ་བའི་བཤེས་གཉེན་ལ་མོས་པ་སྙིང་པོར་མཛད་པའི་སྐལ་བཟང་མང་པོའི་གསུང་གིས་བསྐུལ་བའི་ངོར་རྗེ་བཙུན་དམ་པ་དེ་ཉིད་ཀྱི་བཀའ་དྲིན་ཆེན་པོས་འཚོ་བའི་སྨྱོས་ཀྱི་དགེ་སློང་རྨོངས་པ་དྷརྨ་ཤྲཱིས་རྒྱལ་བའི་ལོ་ཆུ་སྟོད་ཟླ་བའི་ཡར་ངོའི་ཚེས་བཅུ་མཁའ་འགྲོ་འདུ་བའི་ཚེས་དགེ་བར་བཤད་སྒྲུབ་ཀྱི་ཆོས་གྲྭ་ཆེན་པོ་འོག་མིན་ཨོ་རྒྱན་སྨིན་གྲོལ་གླིང་གི་གཙུག་ལག་ཁང་དུ་སྦྱར་བའོ། །འདིས་ཀྱང་སེམས་ཅན་ཐམས་ཅད་ཀྱི་རྒྱུད་ལ་བླ་མ་དམ་པའི་བྱིན་རླབས་རྗེས་སུ་འཇུག་པའི་རྒྱུར་གྱུར་ཅིག། །།

དྷརྨ་ཤྲཱི་རང་ཉིད་ཀྱི་ཆོས་དང་རྗེས་སུ་འབྲེལ་བའི་སྤྱོད་པ་ལས་བརྩམས་པའི་ལོ་རྒྱུས་བདེན་གཏམ་རྣ་བའི་བདུད་རྩི།

རིགས་ཀྱི་ནུས་པ་ཉིད་དཀར་པོའི་ལས་ཀྱི་ཟད་ཚུལ།

― MLP003_Page_0311 ―

^{[མ་དཔེ་གཟིགས་ན་འདིར་གནོན།]}

[Full Size]

དྷརྨ་ཤྲཱི་རང་ཉིད་ཀྱི་ཆོས་དང་རྗེས་སུ་འབྲེལ་བའི་སྤྱོད་པ་ལས་བརྩམས་པའི་ལོ་རྒྱུས་བདེན་གཏམ་རྣ་བའི་བདུད་རྩི། ལོ་ཧེན་དྷརྨ་ཤྲཱི།

― MLP003_Page_0312 ―

^{[མ་དཔེ་གཟིགས་ན་འདིར་གནོན།]}

[Full Size]

དྷརྨ་ཤྲཱི་རང་ཉིད་ཀྱི་ཆོས་དང་རྗེས་སུ་འབྲེལ་བའི་སྤྱོད་པ་ལས་བརྩམས་པའི་ལོ་རྒྱུས་བདེན་གཏམ་རྣ་བའི་བདུད་རྩི་ཞེས་བྱ་བ་བཞུགས་སོ། །
ༀ་སྭ་སྟི། རང་ཉིད་ཀྱི་ཆོས་དང་རྗེས་སུ་འབྲེལ་བའི་སྤྱོད་པ་ལས་བརྩམས་པའི་ལོ་རྒྱུས་བདེན་གཏམ་རྣ་བའི་བདུད་རྩི་ཞེས་བྱ་བ། སྐྱབས་གནས་ཀུན་འདུས་ཀྱི་ངོ་བོ་རྗེ་བཙུན་བླ་མ་དམ་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །རབ་འབྱམས་རྒྱལ་བ་ཀུན་གྱི་ཡེ་ཤེས་དང་། །ཐ་དད་མ་དམིགས་གཅིག་ཆོག་ཆོས་ཀྱི་རྗེ། །གཏེར་ཆེན་བླ་མ་འགྱུར་མེད་རྡོ་རྗེའི་ཞབས། །དད་བརྒྱའི་གཙུག་གི་པདྨོས་རྟག་ཏུ་མཆོད། །གང་ཐུགས་འགྱུར་མེད་ཀུན་ཁྱབ་རྡོ་རྗེའི་ཁམས། །མཐའ་དག་དངོས་ཀུན་རྗེས་ཞུགས་ཆོས་ཀྱི་སྐུའི། །རྣམ་ཐར་རང་རིག་ངོ་བོར་དབྱེར་མེད་པའི། །བདེ་ཆེན་མཉམ་ཉིད་རྟོགས་པའི་བཀའ་དྲིན་སྩོལ། །ཚུར་མཐོང་བདག་འདྲའི་བླུན་རྨོངས་སྤྱོད་ཚུལ་རྣམས། །ཀུན་གྱིས་གཏན་ལ་ཕེབས་མོད་བཟང་པོའི་གཏམ། །མེད་ལ་སྒྲོ་བཏགས་བརྗོད་པའང་དགོས་མེད་ཕྱིར། །འདི་བརྗོད་དུས་དང་བློ་གྲོས་གྲོན་པའི་རྒྱུ། །འོན་ཀྱང་གདོད་མའི་གཤིས་ལུགས་རང་རིག་དབྱིངས། །རྣམ་འགྱུར་དུ་མའི་འཆར་སྒོ་མ་འགགས་ཀྱང་། །དེ་དོན་རྟོགས་པའི་བློ་ངོར་མཁའ་ལམ་ངོས། །ཆུ་འཛིན་དེངས་བཞིན་གཉིས་འཛིན་གཟེབ་ལས་གྲོལ། །དེ་ཕྱིར་རང་གསལ་གཏད་མེད་འགྱུ་བའི་སེམས། །བློ་ཆུང་རེ་དོགས་གོ་རར་མ་བཅུག་པར། །རང་ཚུལ་བདེན་གཏམ་དམ་པའི་གསུང་གི་ངོར། །འཛེམས་མེད་སྨྲའོ་རྣ་བའི་བདུད་རྩིར་ལོངས། །དེ་ལ་འདིར་རང་གི་རྣམ་ཐར་རང་རྒྱུས་ཀྱི་སྒོ་ནས་ཅུང་ཟད་གླེང་བ་ལ། རིགས་ཀྱི་ནུས་པ་ཉིད་དཀར་པོའི་ལས་ཀྱིས་སད་ཚུལ། དེ་ལྟར་སད་པ་ལས་ལུས་རྟེན་འདི་བཙས་ནས་ན་

― MLP003_Page_0313 ―

^{[མ་དཔེ་གཟིགས་ན་འདིར་གནོན།]}

[Full Size]

ཚོད་འཕེལ་ཚུལ། བསྟན་པ་ལ་ཞུགས་ནས་ཐོས་བསམ་གྱིས་རྒྱུད་སྦྱང་ཚུལ། ཇི་ལྟར་ཐོས་པའི་དོན་ཉམས་སུ་བླངས་ཚུལ། རང་ནུས་དང་སྦྱར་བའི་གཞན་དོན་ཆ་ཙམ་སྒྲུབ་ཚུལ། ལྷག་པའི་བསམ་པས་དོན་གཉིས་འགྲུབ་འགྱུར་ལ་སྨོན་ལམ་ཇི་ལྟར་བཏབ་ཚུལ་དང་དྲུག་ལས། དང་པོ་ནི། རང་གི་སེམས་ཉིད་གདོད་མའི་གཤིས་ལུགས་རང་བཞིན་གྱིས་རྣམ་པར་དག་པ་གསེར་བཟང་པོའི་ཁམས་ལྟ་བུ་དེའི་སྟེང་ན། ཐེག་པ་གསུམ་གྱི་རིགས་ཀྱི་ནུས་པ་ཡོད་པ་ལས། ཐེག་པ་ཆེན་པོའི་རིགས་ཀྱི་ནུས་པ་དེ། ཚེ་རབས་སྔ་མར་རྣམ་དཀར་གྱི་ལས་ལ་ཅུང་ཟད་སྦྱངས་ཤིང་སྨོན་ལམ་གྱི་སེམས་པ་ཅུང་ཟད་ཡོད་པས་སད་དེ། སྐྱེ་སྲིད་འདིར་ཡེ་ཤེས་ཀྱི་སྐུ་ཅན་རྗེ་བཙུན་བླ་མ་བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྒྱལ་པོ་དང་། སྡོམ་བརྩོན་མཁས་པ་ཆེན་པོ་རྒྱལ་བའི་སྲས་པོ་སྟེ། བླ་མ་དམ་པ་སྐུ་མཆེད་ཀྱི་རིགས་ཀྱི་གཅུང་དུ་སྐྱེས་པས་ཆུང་ངུ་ནས་དམ་པའི་ཆོས་དང་མཇལ་བའི་སྐལ་བཟང་ཐོབ། དེ་ཡང་རྗེ་བླ་མའི་གཏེར་ལུང་ལས། གཡུ་སྒྲའི་སྤྲུལ་པ་བློ་ལྡན་དྷརྨའི་མིང༔ ཞེས་དང་། རྒྱལ་མོ་གཡུ་སྒྲའི་སྤྲུལ་པ་ནི༔ མེ་ཁམས་ཤྲཱི་ལས་ཀྱི་མིང༔ ཞེས་འབྱུང་བ་ལྟར་དྷརྨ་ཤྲཱིའི་མིང་དང་། སྨྱོས་ཀྱི་རུས་ཁམས་ཇི་མེ་ཡིན་པར་མ་ཟད། ལོ་སྙིང་རྟའི་སྲོག་ཁམས་ཀྱང་མེ་ཡིན་པས་སྦྱར་དུ་རུང་བ་ལྟར། གཏེར་འབྱུང་ལོ་རྒྱུས་སུ། རྗེ་བླ་མ་ཉིད་ཀྱིས་ངོས་འཛིན་པར་མཛད་པའི་སྐལ་བཟང་ཐོབ་པ་ནི། སྤྲུལ་པ་དངོས་ཡིན་པར་དཀའ་ཡང་། རྒྱུད་བྱིན་གྱིས་བརླབས་པ་ཙམ་ལ་དགོངས་པར་མངོན་ཞིང་། དེ་ལྟར་བརླབས་པའི་ཡུལ་ཡང་དཀར་པོའི་རིགས་སད་པ་ཞིག་དགོས་པ་ལས། དེའི་རྟགས་སྔ་མའི་བག་ཆགས་བཟང་བར་མཚོན་པ་ནི། རང་ལོ་གཉིས་གསུམ་ཙམ་གྱི་ཚེ། ལུས་གནད་ལྟ་སྟངས་བྱེད་པ་སོགས་བསམ་གཏན་པའི་བག་ཆགས་འདྲ་བ་ཡོད་ཟེར་ཡང་རང་གིས་མ་དྲན། བྱིས་པའི་དུས་དྲན་པ་རྙེད་ཙམ་ནས་བཟུང་། སྤྱིར་སྐྱེས་བུ་དམ་པའི་རིགས་དང་། བྲེ་བྲག་ཀརྨ་པ་ཡབ་སྲས་ལ་བཅོས་མིན་གྱི་དད་པ་རང་ཤུགས་ཀྱིས་འཆར་བ་དང་། ཕྱིས་རྩ་རྒྱུད་གསང་སྙིང་ལ་ཐོས་བསམ་བྱེད་དུས་རོག་པའི་ཡིག་ཆ་འདྲ་མཐོང་བ་ལས་གོ་བའི་སྣེ་རྙེད་པ་ཞིག་བྱུང་བ་ལ་དཔགས་ན། དེ་དག་གི་སློབ་རིགས་ཆོས་ལ་བག་
ཆགས་ཅུང་ཟད་བཞག་པ་ཞིག་ཨེ་ཡིན་སྙམ། གང་ལྟར་ཡང་ཆོས་རིགས་སུ་སྐྱེས་པ་ལ་བརྟེན་བྱིས་པའི་དུས་ནས་ཀྱང་། དད་པ་དང་སྙིང་རྗེ་དང་ངེས་འབྱུང་སོགས་ཆེ་རབ་ཡོད་ཅིང་། འཇིག་རྟེན་གྱི་བྱ་བ་ལ་བློ་མི་འཇུག་པས་ཚེ་འདི་བལྟོས་ཀྱི་དངོས་ཞེན་རང་བཞིན་གྱིས་སྲབ་པ་འདི་ནི་དཀར་པོའི་ལས་ཀྱིས་རིགས་སད་པའི་རྟགས་སུ་མཚོན་ནུས་པ་ཡིན་ནོ། །

ལུས་རྟེན་འདི་བཙས་ནས་ན་ཚོད་འཕེལ་ཚུལ།

― MLP003_Page_0314 ―

^{[མ་དཔེ་གཟིགས་ན་འདིར་གནོན།]}

[Full Size]

གཉིས་པ་ལུས་རྟེན་འདི་བཙས་ནས་ན་ཚོད་འཕེལ་ཚུལ་ནི། ཁོ་བོ་ཅག་གི་རུས་ནི་སྔགས་རུས་ཏེ་མཐིང་མ་སྨྱོས་ཞིག་ཆེན་པོའི་རིགས་བརྒྱུད་ཡིན། ལུས་འདི་བསྐྱེད་པའི་ཕ་མ་ནི། གནུབས་ཆེན་གྱི་ཡང་སྲིད་ཡབ་རྗེ་སྨྱོས་སྟོན་གསང་བདག་ཆེན་པོ་ཕྲིན་ལས་ལྷུན་གྲུབ་དང་། ཤེལ་དཀར་རྡོ་རྗེ་མཚོའི་སྤྲུལ་པ་མ་བཙུན་རྗེ་རིགས་ལྷ་འཛིན་དབྱངས་ཅན་སྒྲོལ་མ་སྟེ། ཡབ་ཡུམ་དེ་གཉིས་ལས་རྗེ་བླ་མ་དམ་པ་སྐུ་མཆེད་ཀྱིས་གཙོས་པའི་སྲས་ལྔ་དང་། སྲས་མོ་གཉིས་ཏེ། སྲས་ལྕམ་སྲིང་བདུན་འཁྲུངས་པ་ལས་བདག་ལྔ་པ་ཡིན། དེ་ཡང་ཤིང་ཕོ་རྟའི་ལོ་ལ་ཡུལ་གཡོར་པོ་གྲྭ་ནང་གི་ལུང་པའི་ས་ཚིགས། སྔགས་ཀྱི་སྡེ་དགོན་དར་རྒྱས་ཆོས་གླིང་ཞེས་བྱ་བར་སྐྱེས། མིང་རྒྱུ་སྐར་གྱི་རྟེན་འབྲེལ་ལས། ལེགས་པ་དོན་གྲུབ་ཏུ་བཏགས། ལོ་ངོ་གསུམ་ཙམ་ལ་སླེབས་དུས་བུ་རྫིའི་གདོལ་སྤྱོད་ཀྱི་གྲིབ་ཕོག་སྟེ་ལྕེ་མི་བདེ་བ་འདི་བྱུང་། ལྕགས་ཕོ་བྱི་བའི་བར་ཕལ་ཆེར་རང་གི་གཞིས་དགོན་པ་དང་། རེས་ཞང་པོའི་ཁྱིམ་འདུམ་པོ་གཉིས་སུ་བསྡད། སྐབས་ཤིག་མ་རིན་པོ་ཆེའི་ཨ་ནེའི་རྩར་ཁྲབ་མོར་ཡང་ཕྱིན། ལོ་བརྒྱད་པ་ལ་གཅེན་རྒྱལ་བའི་སྲས་པོའི་ཞབས་ཕྱིར་དཀྲིས་ཏེ་དགུན་དཔྱིད་གཉིས་འཕྱོངས་རྒྱས་དཔལ་རི་དང་། དབྱར་དབུས་རིའི་གནས་ཆེན་མཆིམས་ཕུར་བསྡད། དེ་དུས་མ་རིན་པོ་ཆེ་བསམ་ཡས་སུ་ཕེབས་པ་དང་ལྷན་ཅིག་བསམ་ཡས་རི་མཐིལ་གྱི་གནས་རྟེན་ངོ་མཚར་བ་རྣམས་མཇལ་ཞིང་སྨོན་ལམ་བཏབ། མ་ཕྱིར་ཐེགས་རྗེས་གཅེན་དང་དགེ་སློང་ལེགས་པ་གཉིས་ཀྱི་རྩར་ཀློག་སྦྱང་ལ་སྦྱང་ལོ་བྱས། གཞིས་ནས་ཀེག་མལ་གྱི་རིམ་གྲོར་མིང་བསྒྱུར་དགོས་པའི་བཀའ་འཕྲིན་བྱུང་བ་ལྟར། སྤྲུལ་སྐུ་ཕྲིན་ལས་རྣམ་རྒྱལ་གཅེན་གྱི་ཞབས་བསྙུན་སྐོར་དུ་ཕེབས་དུས། ཀ་བཅུ་ཚེ་མཆོག་གིས། ད་རེས་རྟེན་འབྲེལ་འགྲིག མིང་སྤྲུལ་སྐུ་རིན་པོ་ཆེ་ལ་ཞུས་པ་

― MLP003_Page_0315 ―

^{[མ་དཔེ་གཟིགས་ན་འདིར་གནོན།]}

[Full Size]

འཐད་ཅེས་བསྐུལ་བ་ལྟར། མིང་ཞུས་པས་པདྨ་ཕྲིན་ལས་རྒྱལ་མཚན་ཞེས་སྩལ། གཅེན་འཕྱོངས་རྒྱས་སུ་ཕྱིར་ཕེབས་ཀྱི་ཞབས་ཕྱིར་བསམ་ཡས་མཐིལ་གྱི་བར་འོངས་ནས་རྟ་མགྲིན་གླིང་དུ་གསུང་སྤྲུལ་རིན་པོ་ཆེ་ཡབ་སྲས་མཇལ། དེ་ནས་ངེད་ཀྱིས་ཟུར་མཁར་གྱི་ཀོ་བ་བཏོན། རྟ་བསུ་མ་སླེབས་པས་གྲྭ་ཕྱི་ཚོང་འདུས་སུ་ཞག་གཉིས་བསྡད་དེ་གཞིས་སུ་འབྱོར། དེ་དུས་རྗེ་བླ་མ་དམ་པའང་གཙང་རོང་བོན་ལུང་ནས་ཕྱིར་ཕེབས་གྲུབ་འདུགཨ་མ་ཡབ་སྲས་ལྷན་ཅིག་ཏུ་བཞུགས་པ་མཇལ་ཞིང་། གསུང་སྤྲུལ་རིན་པོ་ཆེ་ཕྱིར་ལམ་གྲྭ་བརྒྱུད་ཁྲབ་མོ་ཞོལ་ཁྲོད་དུ་བཞུགས་འདུག་པའི་སར། གཙུག་ཕུད་ཕུལ་ཏེ་མིང་ཨོ་རྒྱན་གྲགས་པ་བཟང་པོ་ཞེས་སྩལ། ཆབ་ཟེ་གཤེགས་སར་ཕྱིན་ནས་དད་པ་ཆེན་པོས་ཙན་ནེར་གསང་ཆབ་ཞུས་ཏེ་མང་དུ་འཐུང་། རང་ལོ་དགུར་སླེབས་པ་ཆུ་སྟག་དབོ་ཟླའི་ཉེར་གཉིས་ལ་ཡབ་རྗེ་གསང་བདག་ཆེན་པོ་ཡེ་ཤེས་གོང་འཕོའི་རྟགས་ངོ་མཚར་བ་དང་བཅས་ཏེ་དག་པའི་ཞིང་དུ་གཤེགས་པའི་གདུང་མཆོད་ཀྱི་ཚེ་སྐུ་གདུང་རིན་པོ་ཆེའི་དྲུང་དུ་ཡང་ཡང་ཕྱིན་ཏེ་ཕྱག་མང་པོ་བཙལ་ཅིང་གསོལ་བ་བཏབ་པས་བྱིན་རླབས་ཞུགས་པ་ཡིན་པ་འདྲ། ནུབ་ཅིག་ཡབ་རྗེ་བར་སྣང་ལ་ཡེར་གྱིས་གཤེགས་པའི་སྐུའི་ཐུ་བ་ལ་འཇུས་པས་རང་ཡང་བར་སྣང་ལ་ཧད་ཀྱིས་བཏེགས་པ་དང་ལྷན་ཅིག་གཉིད་སད་པ་ཞིག་བྱུང་། དེ་ལྟར་ཡབ་རྗེ་རིག་འཛིན་ཆེན་པོ་དང་འགྲོགས་ཡུན་ལོ་དགུའི་ངོ་མཐོང་ཙམ་ལས་མ་བྱུང་བས་སྐུ་གཤེགས་རྟིང་ནས། གཅེན་རིག་འཛིན་གཏེར་སྟོན་ཆེན་པོས་འཇིག་རྟེན་ཕྱོགས་ནས་ཕའི་དོད་དང་། ཆོས་ཕྱོགས་ནས་བཀའ་དྲིན་གསུམ་ལྡན་གྱི་བླ་མ་མཛད་ནས་བརྩེ་བ་ཆེན་པོའི་སྤྱན་རས་ཀྱི་བཙའ་བས་རྗེས་སུ་བཟུང་སྟེ་ལེགས་པར་བསྐྱངས། གཅེན་རྒྱལ་བའི་སྲས་པོ་དང་མ་རིན་པོ་ཆེ་ནས་ཀྱང་ཆུང་དུས་ནས་བློ་ངན་ལང་དུ་མ་བཏང་བར་ཆོས་སྒོར་འདྲེན་པའི་མཐུན་རྐྱེན་སྦྱར་བས། མགྲིན་པ་ཐེག་པ་ནས་ཆོས་ལ་མོས་པ་ཐོབ་ཅིང་། བསམ་པ་རྙེད་པ་ནས་བཟུང་སྟེ་དམ་པའི་ཆོས་ལ་ངང་གིས་འཇུག་ཏུ་ཡོད་པའི་སྐལ་བ་ཐོབ་པས་འཚེངས་པ་ཡིན་ནོ། །

བསྟན་པ་ལ་བཞུགས་ནས་ཐོས་བསམ་གྱིས་རྒྱུད་སྦྱངས་ཚུལ།

― MLP003_Page_0316 ―

^{[མ་དཔེ་གཟིགས་ན་འདིར་གནོན།]}

[Full Size]

གསུམ་པ་བསྟན་པ་ལ་བཞུགས་ནས་ཐོས་བསམ་གྱིས་རྒྱུད་སྦྱངས་ཚུལ་ནི། རང་ལོ་བཅུ་གསུམ་པ་ལ་ལུས་བསྒྱུར་ཅིང་། རྗེ་གཏེར་ཆེན་བླ་མ་ལ་གཙུག་ཕུད་ཕུལ་ཏེ། མིང་བསྟན་འཛིན་འཇམ་དབྱངས་དབང་པོ་ཞེས་སྩལ། སྐྱབས་གསུམ་འཛིན་པའི་དགེ་བསྙེན་གྱི་སྡོམ་པའང་ཐོབ། བཅོ་ལྔ་པ་ལ་གཅེན་རྒྱལ་སྲས་རིན་པོ་ཆེ་དང་མཉམ་དུ་རྐང་འགྲོས་ཀྱིས་ཆུ་ཤུར་བརྒྱུད་ཕོ་བྲང་ཆེན་པོར་ཕྱིན། དེ་དུས་རྗེ་བླ་མ་ཉིད་གོང་ས་ཐམས་ཅད་མཁྱེན་པ་ལྔ་པ་ཆེན་པོས་ཏི་ཤྲཱིར་བཞེས་ནས་ཆོས་བཀའ་འབུལ་བའི་སྐབས་ན་འདུག་པས་ཞབས་ཕྱིར་བསྡད་ཅིང་། རྗེ་ཐམས་ཅད་མཁྱེན་པ་ལྔ་པ་ཆེན་པོ་ལས་རབ་ཏུ་བྱུང་སྟེ། མིང་ངག་དབང་ཆོས་དཔལ་ཞེས་སྩལ་ཅིང་དགེ་ཚུལ་གྱི་སྡོམ་པ་དང་། རང་ལོ་ཉི་ཤུ་པ་ཆུ་གླང་ལོར་སླར་ཡང་ཕོ་བྲང་ཆེན་པོར་ཕྱིན་ཏེ་བསྙེན་རྫོགས་ཞུས། ཕྱིས་གོང་མའི་ལུང་གིས་སྔ་འགྱུར་གྱི་བསྟན་པའི་འབྲེལ་དང་བཅས་སྨད་འདུལ་བའི་སྡོམ་རྒྱུན་རྣམ་པར་དག་པ་ཁ་རབ་ཞལ་སྔ་ནས་ལ་བཞུགས་ཤིང་། ཁོང་འདུལ་བའི་ངང་ཚུགས་ཀྱང་བཟང་བས་དེར་བསྐྱར་སྒྲུབ་གྱིས་ཞེས་བསྐུལ་བ་ལྟར། རང་ལོ་ཉེར་བདུན་པ་ལྕགས་སྤྲེལ་ལོ་ནག་ཟླའི་ཚེས་བཅུ་གསུམ་གྱི་ཉི་མ་བརྒྱད་ཆ་ལུས་པ་གྲིབ་ཚོད་སྐྱེས་བུ་གཅིག་དང་རྐང་པ་གཉིས་ཀྱི་དུས་སུ་རྗེ་བླ་མ་ཐམས་ཅད་མཁྱེན་པའི་མཚན་དཔེའི་སྣང་བས་ཁྱབ་པའི་གནས་དབུ་རུ་གྲུ་འཛིན་གྱི་ཕོ་བྲང་ཆེན་པོར། དོན་གྱི་སླད་དུ་མཚན་ནས་སྨོས་ན་མཁན་ཆེན་དཀོན་མཆོག་བསྟན་འཛིན་ལས་དད་པའི་དགེ་འདུན་གྲངས་ཚང་བའི་དབུས་སུ་ཚིགས་གསུམ་བར་མ་ཆད་པའི་ཆོ་གས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས། མེ་ཡོས་ནག་ཟླའི་ནང་དུ་རྗེ་གཏེར་ཆེན་བླ་མ་ལས། བྱང་སྡོམ་བཀའ་སྲོལ་གསུམ་གྱི་སྨོན་འཇུག་སེམས་བསྐྱེད་དང་། རང་ལོ་བཅུ་གཉིས་པ་ཤིང་སྦྲུལ་ཟླ་བ་བདུན་པའི་ཉེར་ལྔ་ལ་རྡུལ་ཚོན་གྱི་དཀྱིལ་འཁོར་དུ་རིག་འཛིན་ཐུགས་ཐིག་གི་དབང་ནོད་པས་རྒྱུད་སྨིན་པར་བྱས་ཏེ། རྗེས་སུ་ཐོབ་པའི་སོ་བྱང་གི་སྡོམ་པ་གཉིས་པོ་དེ་ཡང་སྔགས་སྡོམ་ལས་ཕྱེ་བའི་དེ་དང་དེའི་སྡོམ་པའི་ངོ་བོར་སྐྱེས་པས་སྡོམ་པ་གསུམ་གྱིས་རང་རྒྱུད་བསྡམས་པ་ཡིན་ལ། དེ་ཡང་རང་ཉིད་མའི་པང་དུ་འཚོ་བའི་དུས་ནས་ཡབ་རྗེའི་བཀའ་དགོངས་པད་གླིང་གི་དབང་ཕལ་མོ་ཆེ་སོགས་དབང་བཀའ་མང་དུ་ཐོབ་པར་མཛད་

― MLP003_Page_0317 ―

^{[མ་དཔེ་གཟིགས་ན་འདིར་གནོན།]}

[Full Size]

འདུག་ཀྱང་། བླ་མ་དམ་པའི་སྔགས་རྒྱ་ཏིང་ངེ་འཛིན་གྱི་ནུས་པས་བྱིན་གྱིས་བརླབས་པའི་རྟེན་འབྲེལ་རང་རྒྱུད་ལ་བསྒྲིགས་ནའང་། རང་ན་གཞོན་ཞིང་འདུན་པ་ཞན་པའི་དབང་གིས་བརྡའ་དོན་འཕྲོད་དཀའ་བ་ནས། ལུས་རྟེན་འདི་ལ་བརྡའ་དོན་འཕྲོད་པའི་དབང་གིས་རྒྱུད་སྨིན་པར་བྱས་པ་ནི་ཐུགས་ཐིག་གི་དབང་འདི་ཉིད་ཡིན་པས་འདི་ལྟར་སྨོས་པ་སྟེ། དེ་དུས་བུམ་ནང་དུ་མེ་ཏོག་ལྷུངས་པ་མྱུ་གུ་སྡོང་པོ་སྙེ་མའི་བར་དུ་སྨིན་པ་དང་མེ་ཏོག་གི་ཆར་བབས་ཤིང་། སྙན་པའི་སྒྲ་ལྡིར་བ་སོགས་ངོ་མཚར་བའི་རྟགས་ཀྱང་མངོན་དུ་སྣང་བར་མཛད། དེ་ནུབ་རང་གི་རྨི་ལམ་དུའང་གོས་དཀར་པོ་གྱོན་ཏེ་བུ་མོ་རྒྱན་ཅན་མང་པོ་དང་འགྲོགས་ནས་རི་བོ་ཆེན་པོའི་ངོས་ལ་འཛེགས་ཤིང་ཉི་མའི་དཀྱིལ་འཁོར་ཤར་བ་རྨིས་སོ། །དེ་ལྟར་བསྟན་པའི་སྒོར་ཞུགས་ཏེ། སྡོམ་པ་གསུམ་གྱིས་རྒྱུད་ལེགས་པར་བསྡམས་ནས། དེ་རྣམས་ཀྱི་སྔ་ཕྱི་ཅི་རིགས་པར་ཐོས་བསམ་གྱིས་རྒྱུད་སྦྱངས་ཚུལ་ནི། ཡབ་རྗེ་སྐུ་གཤེགས་རྟིང་ལོ་གཉིས་གསུམ་ཙམ་གྱི་བར་གཅེན་བླ་མ་དམ་པ་སྐུ་མཆེད་དང་མ་རིན་པོ་ཆེ་རྣམས་ཕལ་ཆེར་ཕྱོགས་ཐེགས་འབའ་ཞིག་གིས་གཞིས་སུ་བཞུགས་མ་ཁོམ་པས། དེ་བར་མའི་ཞལ་ཏ་མ་བསམ་འགྲུབ་ཆོས་འཛོམ་གྱིས་བསྐུལ་ཏེ། ངག་བསླབས་ཀྱིས་གསོལ་འདེབས་ལེའུ་བདུན་མ་སོགས་དགོན་པའི་འདོན་ཆོས་ཀྱི་སྐོར་དང་། གསོལ་དཔོན་མཆོག་གྱུར་ལས་ཡི་གེའི་འབྲི་ཀློགདབུ་མཛད་བསྟན་འཛིན་ཐོས་བསམ་གྱིས་ནམ་ཁོམ་དཔེ་རྒྱུགས་བསྡེབས་ལེན་གྱིས་རང་ལུགས་ཀྱི་ཆོག་འཕྲིན་རྣམས་བློ་ལ་ཆུབ་པར་བྱས། དགོན་པའི་དགུན་གྱི་མཚམས་བསྒྲིགས་གཅིག་གི་ཐོགརང་གི་བལྟ་དཔེར་པད་གླིང་བླ་མའི་ལས་བྱང་མ་བུ་དང་། མཁས་མཆོག་གི་དཔེར་མགོན་པོ་སྡེ་བརྒྱད་ཀྱི་བསྐང་གསོ་ཆེན་མོ་སོགས་དཔེ་ཆ་ཁ་ཤས་དང་། གསོལ་དཔོན་མཆོག་གྱུར་གྱི་དབང་ཕྱུག་ཉེར་བརྒྱད་ཀྱི་ཙཀླི་རྣམས་བྲིས། དེ་ཡང་ཆུང་དུས་ནས་ཤེས་རིག་མི་བཀྲ་ཞིང་ངག་མི་བདེ་བ་འདི་ཡོད་པས། ཡོན་ཏན་མཁན་ཡོང་བའི་རེ་ཆེན་པོ་ཞིག་མེད་ཀྱང་། སྔོན་གྱི་ལས་འཕྲོས་མཚམས་སྦྱར་ནས་སྟེས་འགྲིགས་པ་ལྟ་བུས། རང་ལོ་བཅུ་གཉིས་པ་ལ་མེས་པོ་ནོར་བུ་དར་རྒྱས་ཀྱིས་མཚམས་སྦྱར་ཏེ། མངའ་

― MLP003_Page_0318 ―

^{[མ་དཔེ་གཟིགས་ན་འདིར་གནོན།]}

[Full Size]

རིས་གུང་ཐང་གི་མཁས་པ་ཆེན་པོ་བཤེས་གཉེན་རྣམ་རྒྱལ་དགོན་པར་ཕེབས་ནས། གཅེན་བླ་མ་དམ་པ་སྐུ་མཆེད་ཀྱིས་སྒྲ་རིག་སྙན་ངག་སོགས་གཞུང་ལུགས་མང་པོའི་གསན་པ་མཛད་པའི་དུས་སུ། བདག་གིས་ཀྱང་ཀ་ལཱ་པའི་མཚམས་སྦྱོར་ལྔའི་རི་མོ་ཙམ་དང་། བོད་ཡིག་སྐྱར་སློབ་བྱས་པས། གཅེན་རྒྱལ་སྲས་རིན་པོ་ཆེས་ཕྲལ་ཕྲལ་གྱི་ཞལ་ཏ་དང་ཕྱག་འབེབས་སོགས་བསྐུལ་ལྕག་གནང་བས་ཡི་གེ་ཚུགས་མ་དང་ཤར་བྲིས་གཉིས་ཀ་བྱང་བར་ཤེས། དེའི་ཕྱི་ལོ་གུང་ཐང་པཎ་ཆེན་སླར་ཡང་ཕེབས་པ་ཀ་ལཱ་པའི་བཤད་པ་དང་ས་རིས་ཞུས་ནས། ཡོངས་རྫོགས་ཀྱི་རི་མོའི་རྒྱུགས་བློ་ཐོག་ནས་གཙང་དག་བསྡེབས་འབུལ་བྱས་པ་ཚར་བའི་ཉིན། དེ་རིང་ཉི་ཤུ་དྲུག་ཡིན་པས་ས་པཎ་བལྟམས་པའི་དུས་ཆེན་དང་མ་བསྒྲིགས་འགྲིག་པའི་རྟེན་འབྲེལ་ཡང་བཟང་། ད་དུས་ཀྱི་སྒྲ་པ་མིང་ཆེ་ཆེ་མོ་འདི་པ་ཚོའི་སྒྲ་ཡོངས་རྫོགས་ལས་འུ་ཅག་གི་མཚམས་སྦྱོར་ཡང་དགའ་བར་ཡོད་པས། ད་མཇུག་བསྐྱངས་ཏེ་མ་བརྗེད་པར་མཛོད་ཅིག་གསུངས་དགྱེས་དགྱེས་མཛད། དེ་རྗེས་སྡེབ་སྦྱོར་གྱི་བཤད་པ་དང་། ཞ་ལུ་ལོ་ཆེན་གྱི་ཀ་ལཱ་པའི་སྤྱི་ཊཱིཀ་གཉིས་ཀྱི་ལུང་། ལཉྩ་ན་དང་ཝརྟུའི་ཡི་གེ་སོགས་ཡིག་སྣ་འགའ་རེའི་ཕྱག་ཁྲིད། རྟིང་སོར་བཟང་ཡུལ་གྲོང་གསར་དུ་སུམ་རྟགས་ཀྱི་བཤད་པའང་ཞུས་ཏེ་བརྡའ་སྤྲོད་ཡན་ལག་དང་བཅས་པ་ལ་བྱང་བར་སྦྱངས། བཅུ་དགུ་པ་ལ་འདུམ་པོར་མེས་རྩིས་རིག་པ་ཆེན་པོ་དོན་གྲུབ་དབང་རྒྱལ་གྱི་དྲུང་དུ་ཟླ་བ་བཞི་བསྡད་དེ། དགུ་མཐའི་བསྒྱུར་བགོད་ནས་བརྩམས་ཞལ་ལུང་མ་བུ་ཚང་མའི་སྐར་རྩིས་རྣམས་ཉིན་རངས་པོ་ས་རིས། མཚན་ལ་དྲི་བའི་ཕྲ་གཅོད་དང་། ཞུན་མར་ལ་བརྟེན་ནས་དཔེ་འབྲི་བ་སོགས་སྣང་མུན་ཁོར་ཡུག་ཏུ་འབད་པར་བྱས། སློབ་དཔོན་སྤྱན་འགྲིབས་པས་ཐོག་མར་ས་རིས་ཀྱི་བསྒྱུར་བགོད་རྣམས་དཀའ་ཚེགས་ཆེ་བ་བྱུང་ནའང་། སློབ་དཔོན་ཉིད་འཆད་མཁས་པ་དང་། རང་གི་འདུན་རྩོལ་དྲག་པོ་འཛོམ་པ་ལྟ་བུས་སྐར་རྩིས་ལ་བློ་ལེགས་པར་འབྱོངས། དེ་ཞོར་དབྱངས་འཆར་གྱི་བཤད་པ་རགས་ཙམ་དང་འཁོར་ལོའི་ངོ་སྤྲོད། འབྱུང་རྩིས་ཀྱི་རྡེའུ་འགྲེམ་པ་རྣམས་བསླབས་ཤིང་། གཅེན་རྒྱལ་སྲས་རིན་པོ་ཆེ་ལས་ཀྱང་རྩིས་ཀྱི་གོ་བའི་ཕྲ་གཅོད་དང་། རྒྱ་སྟོན་ཀརྨ་

― MLP003_Page_0319 ―

^{[མ་དཔེ་གཟིགས་ན་འདིར་གནོན།]}

[Full Size]

ཀུན་མཁྱེན་ལ་དུས་འཁོར་འཇིག་རྟེན་བསྟན་ལེ་ལས་རགས་ཙམ་དང་། རྩིས་ཀུན་བསྡུས་པའི་བཤད་པ། སྡེབ་སྦྱོར་གྱི་ངོ་མཚར་བའི་སྦྱོར་བ་རྣམས་ཞུས། ཕྱིས་གྲ་ཕྱིར་སྟག་ལུང་པ་གྲུབ་ཆེན་ངག་དབང་གཟུངས་མཆོག་ལས་དབྱངས་ཅན་བྱཱ་ཀ་ར་ཎའི་ས་རིས། ཙནྡྲ་པའི་ཡི་གེའི་བསྡུ་བ་དང་ཏིང་མཐའ་སོགས་ལ་ཞིབ་བཤད་དང་། གཞུང་སྤྱི་ལའང་བཤད་པ་ཡམ་ཙམ་ཞིགསྡེབ་སྦྱོར་གྱི་ཡང་བའི་བྱ་བ་རྣམས་ཉན། རྗེ་གཏེར་ཆེན་བླ་མའི་དྲུང་དུ་སྙན་ངག་མེ་ལོང་གི་བཤད་པ་ཞུས་ཤིང་ལེའུ་གསུམ་ཀའི་རྩོམ་རྒྱུགས་ཀྱང་ཕུལ། དེ་ལ་སྤྱིར་རང་ལོ་བཅུ་བཞི་པ་ནས་དར་གླིང་དུ་བན་གཙང་བ་བརྒྱད་གྲྭ་ཞིག་དང་། དེ་རྟིང་བཅུ་བདུན་པའི་ཐོག་འོག་མིན་ཨོ་རྒྱན་སྨིན་གྲོལ་གླིང་གི་གྲྭ་གཙང་གསར་དུ་ཚུགས་སྐབས་གྲྭ་ཁྱུར་ཞུགས་ཏེ། གྲྭ་སའི་འདོན་ཆོས་སྐོར་གྱི་དཔེ་འཛིན་དང་། གར་ཐིག་དབྱངས་གསུམ་གྱི་ཕྱག་བཞེས་རྣམས་བྱང་བར་སྦྱངས་ཤིང་དེ་དག་གི་དུས་སྐབས་ཅི་རིགས་པར་སྤོས་ཁང་པ་རིན་ཆེན་རྒྱལ་མཚན་གྱིས་མཛད་པའི་ཤེར་ཕྱིན་གྱི་འགྲེལ་རྐང་དང་དོན་བདུན་ཅུའི་བཤད་པ། ས་པཎ་གྱི་སྡོམ་གསུམ་རབ་དབྱེ། བླ་མ་རྒྱལ་བའི་དགེ་སློང་གི་བསླབ་བྱ་རྣམས་བློ་ལ་ཟིན་ཞིང་། གཅེན་རྒྱལ་བའི་སྲས་པོ་ལས་འདུལ་བའི་ལག་ལེན་དང་བརྡའ་ཆད་རྣམས་སྒྲིན་པོའི་བློས་མཉན་ནས་ཆུབ་པར་བྱས། རང་ལོ་ཉི་ཤུ་པ་ལ་གྲྭ་གཙང་གི་དགེ་སྐོས་ལས་སྣེ་དང་། ཉེར་གཅིག་པ་ཤིང་སྟག་གི་ལོར་རྒྱལ་སྲས་རིན་པོ་ཆེ་སྐུ་གཤེགས་པས། དེ་ཕྱིན་ནས་གྲྭ་གཙང་གི་རྒྱུན་ཚོགས་དང་སྐུ་རིམ་སོགས་ཀྱི་སློབ་དཔོན་བྱེད་དགོས་བྱུང་བས། སྔ་དགོང་དང་ནུབ་མོའི་ཆོས་གྲྭ་འགྲིམ་པ་དང་། ཚོགས་འདུས་སོགས་དགེ་འདུན་རྣམས་དང་ལྷན་ཅིག་དབང་པོ་འདུལ་བའི་སྤྱོད་ལམ་བསྟུན་པ་ཙམ་ལས། བསླབ་གཉེར་རུས་འཐོན་མ་བྱུང་བར་ཡུན་རིང་འདས། རང་ལོ་ཉེར་བདུན་པའི་ཐོག་རྗེ་བླ་མ་ཤ་འུག་གི་གཏེར་སྒྲུབ་ལ་བཞུགས་པ་ལས། ནང་མཚམས་གྲོལ་བའི་བག་གསེང་གི་ཁོག་ཏུ་གྲྭ་གཙང་གི་རྒན་འགོ་རྣམས་བོས་ནས་ཞལ་ཏ་ཕེབས་པར། འདོན་ཆོས་དང་སྔགས་ཀྱི་ལག་ལེན་བྱང་འགྲོངས་པ་ཙམ་གྱིས་ཆོག་ཤེས་པར་བྱས་ནས་གར་ཡང་མི་ཕྱིན་པས། མདོ་སྔགས་ཀྱི་གཞུང་ལུགས་རྣམས་རང་བློས་ཐེག་

― MLP003_Page_0320 ―

^{[མ་དཔེ་གཟིགས་ན་འདིར་གནོན།]}

[Full Size]

ཚད་དང་སྦྱར་བའི་ཐོས་བསམ་རེ་བྱེད་དགོས་ཞེས་བཀའ་སྩལ་བ་ལ་བརྟེན། སེམས་ཉིད་ངལ་གསོའི་གཞུང་བློ་ལ་ཟིན་ཏེ། འགྲེལ་པ་ལ་བལྟ་རྟོག་ཞིབ་མོར་བཅུག་ཅིང་། འདུལ་བའི་སྤྱི་དོན་ལུང་རིགས་གཏེར་མཛོད་ལས། ཐོབ་བྱ་སོ་ཐར། མ་ཐོབ་པ་འཐོབ་པར་བྱེད་པའི་གཞི་དང་། སྡེ་ལྔའི་བསླབ་བྱ། གཞི་གསུམ་གྱི་བཤད་པ་རྣམས་ཧོར་བཏོན་གྱིས་བློ་ལ་ཟིན་ནས། བསམ་པས་བསྐྱངས་པས་གོ་བ་ཐལ་ཐོལ་སྐྱེས་ཤིང་། དེས་བློ་སྤྲོ་བར་གྱུར་པས། ད་ནི་རང་གི་འདུན་བྱུས་ཐམས་ཅད་ཐོས་བསམ་སྒོམ་གསུམ་ལ་བསྒྲིལ་བ་མ་གཏོགས་གཞན་གནས་སྐབས་ཀྱི་འདུ་འཛིའི་བྱ་བ་གང་ལའང་སྙིང་པོ་མི་འདུག་སྙམ་པའི་དད་འདུན་ཅུང་ཟད་སྐྱེས་ཏེ། རྗེ་བླ་མ་དམ་པ་ཕོ་བྲང་ཆེན་པོར་བཞུགས་པ་ལ་སྙན་ངག་གི་ཞུ་ཡིག་ཚིགས་བཅད་དང་བཅས་པས་ཀློག་པའི་གྲྭ་སར་འགྲོ་བ་དང་། གཞིས་རང་དུ་ཐོས་བསམ་བྱེད་པ་གང་རུང་ངམ། ཡང་ན་སྒོམ་ལ་ཆིག་སྒྲིལ་བྱེད་པ་སྟེ། དོན་ཚན་གསུམ་པོ་གང་ལ་འབད་ན་ཕན་སླེབས་ཆེ་ཞེས་ལུང་བསྟན་ཞུས་པའི་ལན་དུ་འདི་སྐད་ཅེས་སྩལ་ཏེ། ངག་ལ་དབང་བ་སྐད་གཉིས་སྨྲ་བའི་སྡེ། །ཆོས་ཚུལ་རྒྱ་མཚོའི་དཔལ་ལ་ལོངས་སྤྱོད་པའི། །སྐལ་བཟང་དེ་ཡི་དྲི་ལན་གསོང་པོའི་གཏམ། །བརྗོད་པ་གང་འདི་ཐུགས་ཀྱི་བུམ་པར་བསྟིམ། །དེང་དུས་སྐྱེ་བོ་ཕལ་ཆེར་འདོད་ཡོན་ལ། །སྲེད་པས་ཐོས་བསམ་སྒོམ་པ་རིང་དོར་ནས། །ལོག་འཚོའི་འདམ་བུར་དགའ་བས་རོལ་ན་ཡང་། །མཁས་ཁྱོད་འདམ་སྐྱེས་པདྨོ་ཇི་བཞིན་ངེས། །རྒྱལ་བས་གསུངས་པའི་ཆོས་ཚུལ་ཇི་སྙེད་དོན། །རང་བློས་ཐེག་ན་སྟོབས་སུ་མ་གྱུར་པ། །མེད་མོད་འོན་ཀྱང་ཐེ་ཚོམ་དྲྭ་བའི་གཟེབ། །དམ་པོར་ཡིད་གཉིས་ནེ་ཙོ་ཆུད་པ་བཞིན། །དེང་དུས་སྔ་འགྱུར་བསྟན་པའི་བྱིན་རླབས་རྒྱུན། །ཉམས་པ་མེད་ཀྱང་བཤད་པའི་དགའ་སྟོན་ལ། །སྤྱོད་ནུས་ཐུན་མཚམས་ཉིན་བྱེད་ལྟར་གྱུར་པ། །སྙིང་སྟོབས་ཟླ་བའི་འོད་ཀྱིས་གསལ་བྱའི་དུས། །དེ་ཕྱིར་བསླུ་མེད་དཀོན་མཆོག་རྣམ་གསུམ་ལ། །བརྟག་པ་ཕུལ་བར་སྙིང་སྟོབས་བསྐྱེད་པའི་དོན། །གེགས་མེད་འགྲུབ་པའི་མཚན་མ་བཟང་མཐོང་བས། །སྨོན་པའི་གནས་རྣམས་བསྒྲུབ་ལ་བརྩོན་པར་མཛོད། །སྔ་འགྱུར་ལམ་གྱི་བསྐྱེད་བཟླས་རིམ་པ་རྣམས། །

― MLP003_Page_0321 ―

^{[མ་དཔེ་གཟིགས་ན་འདིར་གནོན།]}

[Full Size]

ཆག་མེད་བར་ཆད་ཞི་ཕྱིར་འབད་པ་གང་། །ད་ལྟ་ཉིད་བཞིན་གཡེལ་བ་མེད་པ་ནས། །རིམ་གྲོའི་རྣམ་པ་ཕྱིས་གསལ་བཞིན་དུ་སྒྲུབས། །ཐོས་པའི་རྩ་བ་ཆོས་མངོན་མཛོད་ཉིད་དང་། །སྒྱུ་འཕྲུལ་རྩ་རྒྱུད་གསང་བ་སྙིང་པོ་ལ། །རྩ་པོད་བྱས་ནས་ཤེས་བྱ་གཞན་ལ་ཡང་། །འབད་པས་བསྒྲུབས་ན་མཁས་པའི་གནས་ཐོབ་འགྱུར། །དེ་མཐུས་སྔ་འགྱུར་བསྟན་པའི་བཤད་སྒྲུབ་ཉི། །རབ་འབྱམས་ཕན་བདེའི་མཁའ་ལ་རྟག་འཆར་བའི། །རྣམ་དཔྱོད་ཤིང་རྟ་ཆེན་པོ་ཁྱོད་ལས་གཞན། །རེ་བ་མེད་པས་ཐེ་ཚོམ་མི་བྱའོ། །རིམ་གྲོར་དཀོན་མཆོག་མཆོད་ཅིང་བསྐང་བཤགས་དང་། །ཆོས་སྲུང་རྣམས་ལ་གསོལ་མཆོད་གུ་རུ་ཡི། །གསོལ་འདེབས་བསམ་པ་ལྷུན་གྲུབ་སྟོང་ཚོ་བསགས། །དེ་ཡིས་བཀྲ་ཤིས་བསམ་དོན་ཐམས་ཅད་འགྲུབ། །ཅེས་གནང་བའི་རིམ་གྲོ་རྣམས་ཚེས་བཅོ་ལྔའི་དུས་བཟང་ཐོག་གྲྭ་གཙང་ལ་མང་ཇ་སྤོང་དག་བཅས་བསྒྲུབས་ཤིང་། རང་ཉིད་ཀྱིས་ཀྱང་བདུན་ཕྲག་གཉིས་ཀྱི་བར་མཚམས་དམ་པར་བཅད་ནས་བསགས་རྟིང་། རྗེ་གཏེར་ཆེན་ཆོས་ཀྱི་རྒྱལ་པོའི་དྲུང་དུ་སྙིང་པོའི་འགྲེལ་པ་སྤར་ཁབ་དང་། གཡུང་ཊཱིཀ་སྦྱར་བའི་སྟེང་ནས་གསུང་བཤད་ཞུས་ཏེ། གཡུང་ཊཱིཀ་བློ་འཛིན་དང་བསྟུན་བྱ་བ་གཞན་ཁྱད་དུ་བསད་དེ། གལ་ཆེ་ཤོས་བསམ་པའི་ཤེས་རབ་ལ་བྱས་ནས་ལེགས་པར་བརྟགས་པས། རང་ཤེས་རབ་ཀྱི་རྩལ་ཆུང་ཞིང་རིག་པ་རྟུལ་ཡང་། བླ་མ་དམ་པའི་བྱིན་རླབས་ཀྱི་འཕོ་བ་དང་ལེགས་བཤད་ཀྱི་གསུང་གིས་རང་རྒྱུད་མི་ཤེས་པའི་མདུད་པ་བཀྲོལ་ཏེ་རིང་པོར་མ་ཐོགས་པར་རྒྱུད་ཀྱི་དངོས་སྦས་ཀྱི་དོན་ཐམས་ཅད་ཨི་ཐི་བ་ལོངས་པའི་གོ་བ་རྙེད་ཅིང་། ཆོས་མངོན་པ་མཛོད་ཀྱི་བཤད་པ་ནི་གཞུང་ལུགས་རབ་འབྱམས་སྨྲ་བ་སངས་རྒྱས་ཆོས་དར་ལས་གཞུང་བརྒྱ་པའི་ཊཱི་ཀའི་ཐོག་ནས་ཚར་གཅིག་ཉན་ནའང་། བྱེ་མདོའི་ཆོས་སྐད་འདི་ཀློག་པའི་གྲྭ་ས་རྣམས་སུའང་ཧ་ཅང་དར་ཆུང་བས་འབེལ་གཏམ་སྨྲ་བ་ཉུང་བ་བཅས་རྩ་པོད་ཀྱིས་བློ་ལ་སིམ་པ་ཐོབ་པ་ཞིག་མ་བྱུང་ཡང་བག་ཆགས་འཇོག་བྱེད་ཙམ་དང་། དེ་བཞིན་དུ་སྔ་ཕྱི་ཅི་རིགས་པར་ལུང་རིགས་གཏེར་མཛོད་དང་རྒྱ་མཚོའི་སྟེང་ནས་འདུལ་བ་དང་ཕར་ཕྱིན་གྱི་བཤད་པའང་ཡམ་ཙམ་ཞིག་ཉན་ཏེ། བསམ་པའི་རྟོག་དཔྱོད་

― MLP003_Page_0322 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱིས་ལེགས་པར་བསྐྱངས་པས་གོ་བའི་ཕྱོགས་འགོ་ཐིངས་པ་ཙམ་བྱས། དེ་གོང་དུ་གུང་ཐང་པཎ་ཆེན་ལས་དབུ་མའི་སྟོང་ཐུན་དང་། འདུལ་བ་སུམ་བརྒྱ་པའི་བཤད་པ། མཁས་གྲུབ་ཆོས་སྐྱོང་རྒྱལ་མཚན་ལས་རང་འགྲེལ་གྱི་སྟེང་ནས་ཟབ་མོ་ནང་དོན་གྱི་བཤད་པ་རྣམས་ཐོས། ཁྱད་པར་རྗེ་བླ་མ་དམ་པའི་དྲུང་དུ་ཀུན་མཁྱེན་དྲི་མེད་འོད་ཟེར་དང་། ཟུར་པ་ཡབ་སྲས། རོང་ཟོམ་ཆེན་པོ་ལ་སོགས་པའི་གསུང་རབ་རྣམས་རེ་རེ་ནས་བཤད་པ་ཐུན་དུ་བཅུག་སྟེ་ཉན་པ་མ་བྱུང་ཡང་། དཀའ་གནས་རྣམས་ལ་དྲི་བའི་ཕྲ་གཅོད་དང་། རྒྱུན་དུ་རང་བཞིན་གྱི་གསུང་སྒྲོས་ཙམ་ཡང་གདམས་པར་འབེབས་པའི་གནད་ཀྱིས་འབེལ་གཏམ་མང་དུ་ཐོས་པས་རྒྱུད་གྲོལ་ཏེ་ཐོས་བསམ་གང་བྱས་ཁ་ཕྱིར་བལྟས་སུ་མ་སོང་བར་རྒྱུད་ཐོག་ཏུ་བསྒྲིལ་ཐུབ་པའི་བཀའ་དྲིན་ཐོབ་པ་ཡིན་ནོ། །ད་ནི་རྒྱལ་བའི་བཀའ་དང་དགོངས་འགྲེལ་གྱི་བསྟན་བཅོས་སྨིན་གྲོལ་གྱི་ལམ་སྟོན་པའི་མན་ངག་དུ་མའི་བཀའ་ལུང་ཇི་ལྟར་ཐོབ་པའི་ཚུལ་ནི། གཙོ་བོར་བཀའ་དྲིན་འགྲན་ཟླ་དང་བྲལ་བ་རྗེ་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་ཞབས་པད་རྟག་ཏུ་སྤྱི་བོར་བསྙེན་ཏེ་ལེགས་པར་ཐོབ་པ་ལ། སྔ་འགྱུར་བཀའ་མ་མདོ་སྒྱུ་སེམས་གསུམ། སེམས་ཕྱོགས་ལའང་སེམས་ཀློང་མན་ངག་གི་སྡེ་གསུམ། དེ་དག་དང་རྗེས་འབྲེལ་དོང་སྤྲུགས་སོགས་རྒྱུད་སྡེའི་སྐོར་གྱི་དབང་བཀའ་བཤད་ལུང་། མན་ངག་གི་བཀའ་བརྒྱུད་ལུགས་ཐ་དད་པ་དུ་མ་དང་བཅས་པ་རྒྱུན་བཞུགས་སོ་ཅོག་ལྟ་བུ་དང་། སྒྲུབ་སྡེ་ལའང་། སྤྱི་བཀའ་དང་། སྒོས་བཀའ་ཡང་ཕུར་གཤིན་རྗེ་གཤེད་ཀྱི་སྐོར་སོ་སོ་ལའང་ནང་གསེས་ཀྱི་ཁྱད་པར་དུ་མ་དང་བཅས་པ། གཏེར་མའི་སྐོར་ལ། རྗེ་ཉིད་ཀྱི་གཏེར་གསར་ཡོངས་རྫོགས། གཞན་ཡང་གྲུབ་ཐོབ་དངོས་གྲུབ། ལྡང་མ། ལྕེ་བཙུན། ཞང་ཁྲོམ། གནུབས་ཆུང་། ཉང་། ཆོས་དབང་། ལས་འབྲེལ་རྩལ། གླིང་པ་བཅུ་གཉིས། དྲི་མེད་གསུམ། བྱང་གཏེར་སྔ་ཕྱི་སོགས་གྲགས་ཆེ་བའི་གཏེར་སྟོན་མང་པོ་ཞིག་གི་གཏེར་ཆོས་བླ་རྫོགས་ཐུགས་གསུམ། བཀའ་བརྒྱད་སྤྱི་སྒོས་ཀྱི་སྐོར་མཐའ་ཡས་པ་དང་། ཀུན་མཁྱེན་ལྔ་པ་ཆེན་པོའི་རྒྱ་ཅན་གྱིས་མཚོན་ཟབ་མོ་དག་སྣང་

― MLP003_Page_0323 ―

^{[མ་དཔེ་གཟིགས་ན་འདིར་གནོན།]}

[Full Size]

གི་སྐོར་སོགས་སྔ་འགྱུར་གསང་སྔགས་རྙིང་མའི་ལུགས་ཀྱི་དབང་ལུང་མང་པོ་དང་། མན་ངག་གི་བཀའ་ཅི་རིགས་བཅས་པ། དེ་ཐམས་ཅད་ཀྱི་རྩ་བར་གྱུར་པ་སྙིང་མ་རྒྱུད་འབུམ་གྱི་ལུང་ཡོངས་རྫོགས། གསར་མའི་སྐོར་ཡང་། དགྱེས་རྡོར། ཀུན་རིགམི་འཁྲུགས་པ་སོགས་ཀྱི་དབང་རྗེས་གནང་མང་པོ་དང་། ནཱ་རོ་མཁའ་སྤྱོད་ཀྱིས་མཚོན་པའི་དབང་ལུང་མན་ངག་ཚང་བ་སོགས་མང་པོ་ཞིག་དང་། མདོའི་སྐོར་ལའང་། སྲོལ་གཉིས་ཀྱི་སེམས་བསྐྱེད་གདམས་ངག་དང་བཅས་པ་དང་། བྱང་སའི་ལུང་ལ་སོགས་པ། མདོ་སྔགས་སྤྱིའི་བཤད་ཆོས། ཀུན་མཁྱེན་ཀློང་ཆེན་པའི་བསྟན་བཅོས་སོགས་རྒྱ་བོད་ཀྱི་གཞུང་མན་ངག་མང་པོའི་བཀའ་ལུང་ཡང་བཀའ་དྲིན་དུ་ཐོབ་ཅིང་། གཞན་ཡང་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུར་དུས་འཁོར་ཡོངས་རྫོགས་ཀྱི་དབང་དང་། སྒྱུ་འཕྲུལ་ཞི་ཁྲོའི་དབང་། བླ་མ་གསང་འདུས་ཀྱི་རྩ་དབང་དང་། གཟའ་དབང་སོགས། དཔལ་ས་སྐྱ་པ་བདག་ཆེན་ཀུན་དགའ་བཀྲ་ཤིས་ལས། ཡང་དག་འཁོན་ལུགས་ཀྱི་དབང་དང་། སྡོམ་རིག་གི་ལུང་སོགས། རྒྱལ་སྲས་པདྨ་འགྱུར་མེད་རྒྱ་མཚོར་མཉམ་སྦྱོར་རིགས་བསྡུས་ཀྱི་དབང་དང་། བྱང་ཆུབ་ལམ་རིམ་གྱི་ཁྲིད། དིང་རི་ཀུན་སྤངས་པ་བློ་གྲོས་བརྟན་པ་ལས་ཞི་བྱེད་སྔ་ཕྱི་བར་གསུམ་ཁ་འཐོར་དང་བཅས་པའི་དབང་ལུང་ཁྲིད་གསུམ་ཡོངས་རྫོགས་དང་། བོ་དོང་པའི་སྦས་དོན། མཁས་གྲུབ་ཆོས་སྐྱོང་རྒྱལ་མཚན་ལས་ཤངས་ལུགས་ཀྱི་དབང་ལུང་མན་ངག་ཚང་མ་དང་། གསར་མ་བླ་མེད་རྒྱུད་འབུམ། རཏྣ་བྷ་དྲ་ནས་བརྒྱུད་པའི་དུས་འཁོར་གྱི་དབང་གོང་མ་དང་། སྦྱོར་དྲུག་གི་ཤར་ཁྲིད། ཤེས་རབ་ལྷ་དྲུག་གི་རྗེས་གནང་། སྤྱན་རས་གཟིགས་དཔལ་མོ་ལུགས་དང་ཡི་གེ་དྲུག་མ། གཅོད་ཡུལ། བཀའ་ཚོམས། ཡང་ཚོམས། ཉིང་ཚོམས། ལེ་ལགཟབ་དོན་སྐོར་སོགས། མུས་ཐ་གོང་པ་གྲུབ་པའི་དབང་ཕྱུག་བློ་གྲོས་རྒྱ་མཚོ་ལས་དུས་འཁོར་གྱི་དབང་ཡོངས་རྫོགས་དང་སྦྱོར་དྲུག་སོར་བསམ་གྱི་སྨིན་ཁྲིད། སྦྱོར་དྲུག་ཤངས་ལུགས་ཀྱི་ཁྲིད་ཡིག་གི་སྐོར། ཇོ་ལུགས་འཇིགས་བྱེད་ཀྱི་དབང་སོགས་དབང་རྗེས་གནང་དང་ལུང་མང་པོ། མཁས་བཙུན་ངག་དབང་བསྟན་འཛིན་ལས་རྡོ་རྗེ་ཕྲེང་བའི་དབང་སོགས། རྡོ་རྗེ་འཛིན་པ་ཀུན་དགའ་

― MLP003_Page_0324 ―

^{[མ་དཔེ་གཟིགས་ན་འདིར་གནོན།]}

[Full Size]

བསྟན་པ་དར་རྒྱས་ལས་གསང་བདེ་འཇིགས་གསུམ། རྔོག་ལུགས་ཀྱི་གུར་རིགས་བསྡུས་གདན་བཞི། མ་ཧཱ་མ་ཡཱ་རྣམས་དང་། གཟུངས་གྲྭ་ལྔ། གཟའ་ཡུམ་རྣམས་ཀྱི་དབང་། དམར་པོ་སྐོར་གསུམ་དང་། གུར་ཞལ་གྱི་རྗེས་གནང་། བཤེས་གཉེན་བྱམས་པ་ཕུན་ཚོགས་རྣམ་རྒྱལ་ལས། སྤྱན་རས་གཟིགས་སེང་གེ་སྒྲ། ཕྱག་རྡོར་ཨུ་ཙཪྱ། བསྲུང་བའི་མཁར། གཏུམ་ཆུང་ཁྲ་ཐོགས། གྲྭ་པའི་གཏུམ་ཆུང་དམར་པོ། འགྲོ་བཟང་ལུགས་རྣམ་སྲས་དཀར་པོ་ཚེ་འཛིན། སྤྱན་རས་གཟིགས་དཔལ་མོ་ལུགས། གུར་ཞལ་རྣམས་ཀྱི་རྗེས་གནང་། སྡོམ་བཙུན་ཀུན་དགའ་དར་རྒྱས་ལས། འདུལ་བ་མེ་ཏོག་ཕྲེང་རྒྱུད། སུམ་བརྒྱ་པ་རྩ་འགྲེལ། དབུ་མའི་རིགས་ཚོགས་སྐོར། སྡོམ་པ་ཉི་ཤུ་པ། བླ་མ་ལྔ་བཅུ་པ། ཇོ་བོའི་ཆོས་ཆུང་བརྒྱ་རྩ་རྣམས་ཀྱི་ལུང་། ལུང་དང་རིགས་པའི་དབང་ཕྱུག་སངས་རྒྱས་ཆོས་དར་ལས། དབུ་མ་རྩ་འཇུག་བཞི་གསུམ། རྣམ་འགྲེལ། འདུལ་བ་མདོ་རྩ་བ། མངོན་པ་མཛོད། འགྲེལ་ཆུང་དོན་གསལ། ས་པཎ་གྱི་ཐུབ་པ་དགོངས་གསལ། ལུང་རིགས་གཏེར་མཛོད་རྣམས་ཀྱི་ལུང་། སྐྱི་ཀུན་དགའ་བསྟན་གསལ་ལས་སྒྱུ་འཕྲུལ་ཕྲ་མོའི་སྐོར་མང་པོ་དང་། ཟུར་ཚོ་སྟོད་ལུགས་པའི་སྒྱུ་འཕྲུལ་གྱི་ཡིག་ཆ་འགའི་ལུང་། གྲུབ་ཆེན་ཀུན་བཟང་ཆོས་རྒྱལ་ལས་རོག་གི་མཚོན་དཔེ། གྲུབ་པའི་དབང་ཕྱུག་དམ་པ་ཀློང་ཡངས་འོད་གསལ་ལས་རོག་ཕུར་སོགས། འབྲས་བུ་གླིང་པ་ངག་དབང་ཨོ་རྒྱན་ལས་མཉམ་སྦྱོར་རིགས་བསྡུས་ཀྱི་དབང་། ཞྭ་ལུ་བྱང་མ་པ་རིན་ཆེན་བཟང་པོར་དྲི་མེད་རྣམ་གཉིས་ཀྱི་དབང་ལུང་། ཐུགས་སྲས་སྤྲུལ་པའི་སྐུར་ཚེ་ཁྲིད་རྡོར་ཕྲེང་གི་དབང་རྒྱས་པ། གུ་དྲག་དང་རྟ་མགྲིན་ཡང་གསང་བླ་མེད་ཀྱི་དབང་། བཀའ་འགྱུར་བ་གྲུབ་པ་རྡོ་རྗེ་ལ་འདུལ་བ་ལུང་། བསྐལ་བཟང་། བརྒྱད་སྟོང་པ། ངེས་དོན་གྱི་མདོ་ཕྲན་སོགས་དང་། བྱམས་ཆོས་སྡེ་ལྔ། སྤྱོད་འཇུག་ལ་སོགས་པ་ཉེར་མཁོ་མང་པོའི་ལུང་། འབྲི་གུང་སྤྲུལ་པའི་སྐུར་སྒྲ་མི་སྙན་པའི་ཚེ་དབང་། ཏྲེ་བོ་སྤྲུལ་པའི་སྐུ་ཆོས་ཀྱི་དབང་པོར་ཀར་ལུགས་ཀྱི་ཕྱག་ཆེན་ལྷན་ཅིག་སྐྱེས་སྦྱོར་གྱི་ཁྲིད་དང་། དབང་ཕྱུག་རྡོ་རྗེས་མཛད་པའི་ཁྲིད་ཡིག་རྒྱས་པ་དང་། པེ་ཧར་གྱི་སྒྲུབ་ཐབས་སྤྲིན་ནག་འཁྲིགས་པའི་ལུང་། དཔའ་བོ་སྤྲུལ་པའི་
སྐུར་ཕྱག་ཆེན་ཡི་གེ་བཞི་པའི་དོན་ཚིགས་བཅད་མའི་ལུང་རྣམས་ཞུས་ཤིང་། དེ་དག་ཀྱང་དུས་གང་གི་ཚེ་བཤེས་གཉེན་གང་ལས་ཆོས་བཀའ་གང་དང་གང་ཐོབ་པའི་ཐོ་བྱང་གི་ཡི་གེ་ལོགས་སུ་ཡོད་པས་འདིར་རྒྱས་པར་མ་སྤྲོས་སོ། །

ཇི་ལྟར་ཐོབ་པའི་དོན་ཉམས་སུ་ཅུང་ཟད་བླངས་ཚུལ།

― MLP003_Page_0325 ―

^{[མ་དཔེ་གཟིགས་ན་འདིར་གནོན།]}

[Full Size]

བཞི་པ་ཇི་ལྟར་ཐོབ་པའི་དོན་ཉམས་སུ་ཅུང་ཟད་བླངས་ཚུལ་ནི། སྤྱིར་ཐོས་བསམ་གྱིས་སྒྲོ་འདོགས་བཅད་པའི་དོན་རྣམས་བླང་དོར་གྱི་སྒོ་ནས་བསྒྲུབ་ཅིང་ཉམས་སུ་ལེན་པ་ཡིན་པ་ལྟར། འཁོར་བའི་ཉེས་དམིགས་བསམ་ཞིང་མི་རྟག་འཆི་བ་དྲན་པའི་སྐྱོ་ཤས་ཀྱིས་བསྐུལ་ཏེ། དཀོན་མཆོག་ཀུན་འདུས་བླ་མ་དམ་པ་ལ་སེམས་རྙོག་པ་མེད་པར་དྭངས་བའི་དད་པ་དང་། ལས་འབྲས་མི་བསླུ་བར་ཡིད་ཆེས་ཀྱི་དད་པ་དང་། གཞན་དོན་དུ་བླ་མེད་བྱང་ཆུབ་ཐོབ་འདོད་སྐོམ་པ་ཆུ་ལ་གདུངས་པ་ལྟ་བུ་འདོད་པའི་དད་པ་སྟེ། དེ་ལྟར་དད་པ་གསུམ་གྱིས་ཡིད་དམ་པའི་ཆོས་ལ་འདུན་པའི་སྒོ་ནས། བསམ་པའི་གོ་གྱོན་ཞིང་། སྦྱོར་བས་དགེ་བ་སྒྲུབ་པ་ལ་འཇུག་པའི་བརྩོན་འགྲུས་དང་། དགེ་བའི་སེམས་ཀྱིས་དམིགས་ཡུལ་དང་། བླང་དོར་མི་བརྗེད་པའི་དྲན་པ་དང་། དམིགས་ཡུལ་ལས་གཞན་དུ་མི་ཡེངས་པའི་ཏིང་ངེ་འཛིན་དང་། ཆོས་ཐམས་ཅད་སྒྱུ་མ་ལྟ་བུར་ཤེས་པའི་ཤེས་རབ་རྣམས་ཅི་ཚང་གིས་ཉམས་སུ་ལེན་པ་ལ་སྤྲོ་བ་བརྟས་པར་བགྱིས་ཤིང་། ཁྱད་པར་རང་ལོ་ཉེར་བདུན་པ་ལྕགས་སྤྲེའི་ལོ་ལ་ཏྲེ་བོ་སྤྲུལ་པའི་སྐུ་དང་མཉམ་དུ་རྗེ་བླ་མ་དམ་པ་ལས་རིག་འཛིན་ཐུགས་ཐིག་གི་བཀའ་ཁྲིད་ཞུས་ཏེ་ལེགས་པར་བསྒོམས་པས་རྣམ་རྟོག་རི་གཟར་གྱི་འབབ་ཆུ་ལྟ་བུས་སྒོམ་རང་མི་སྐྱེ་བ་འདྲ་སྙམ་པའི་གུ་དོག་གི་བློ་ཙབ་ཙུབ་ཅི་དྲག་ལངས་པར་གྱུར་པ། ཕྱིས་བལྟས་ན་རྣམ་རྟོག་ངོ་ཤེས་ཀྱི་ཉམས་ཀྱི་སྣེ་ཟིན་པ་འདྲའང་ངོ་སྤྲོད་ཀྱི་ཞལ་ཏ་ཞུ་ནུས་པ་མ་བྱུང་། དེ་རྟིང་ཤིང་ཕོ་བྱི་བའི་ལོ་བྱ་རྒོད་པ་ཆོས་སྐྱོང་རྒྱལ་མཚན་ལས་ནི་གུ་ཆོས་དྲུག་གི་ཁྲིད་དང་། དིང་རི་བ་བློ་གྲོས་བརྟན་པར་ཞི་བྱེད་བཀའ་བབས་གསུམ་གྱི་ཁྲིད་ཚང་མ་དང་། ཁྱད་པར་སོ་ཁྲིད་དང་ལམ་ལྔའི་ནང་ནས་ཚོགས་ལམ་གྱི་ཁྲིད་ཉམས་ཁྲིད་དུ་བསྐྱངས་ལོ་བྱས། མེ་སྟག་ལོར་ཆོས་སྐྱོང་རྒྱལ་མཚན་སླར་ཡང་དགོན་པར་ཕེབས་པར་ཕྱག་རྒྱ་ཆེན་པོ་གའུ་མའི་ཁྲིད་

― MLP003_Page_0326 ―

^{[མ་དཔེ་གཟིགས་ན་འདིར་གནོན།]}

[Full Size]

ཞུས་ནས་འབད་པ་ཆེན་པོས་མཚམས་བཅད་དེ་སྒོམ་པས་ཞི་གནས་ཀྱི་ཉམས་ཅུང་ཟད་སྐྱེས། ལོ་དེ་ཁའི་མཇུག་ཏུ་ཆོས་སྐྱོང་རྒྱལ་མཚན་དང་མཉམ་དུ་རྗེ་བླ་མ་དམ་པའི་དྲུང་དུ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཁྲིད་མ་བུ་ཚང་མ་ཞུས་ཤིང་། ཁྱད་པར་རྩ་ཁྲིད་ལ་སྙིང་རུས་བསྐྱེད་ནས་སྒོམ་པས་རྫོགས་རིམ་རྡོ་རྗེའི་ལུས་ལ་གནད་དུ་བསྣུན་པའི་བྱེད་བཅིངས་ཀྱིས་རྩ་རླུང་ཐིག་ལེ་དབུ་མར་དྭངས་པའི་ལག་རྗེས་སྟོང་གཟུགས་ཀྱི་རྣམ་པ་བདེ་སྟོང་གི་རོལ་མོར་འཆར་བར་བཤད་པ་ལྟར། མི་གཡོ་གསུམ་ལྡན་གྱིས་བཙན་ཐབས་ཀྱི་གནད་ལ་བརྟེན་ནས་ཅི་རིགས་ཤར་ཞིང་། རྣམ་ཀུན་མཆོག་ལྡན་གྱི་སྟོང་གཟུགས་རང་རིག་དང་དབྱེར་མེད་དུ་རྟོགས་པའི་ཉམས་མྱོང་གིས་ཡིད་ལ་སིམ་པ་ཐོབ་པ་ཞིག་མ་མཆིས་རུང་། རྫོགས་རིམ་གྱི་གནད་རང་རིག་ཀ་དག་གི་གཤིས་ལུགས་འགྱུར་མེད་སྤྲོས་བྲལ་དང་། དེའི་རྩལ་སྣང་ཆོས་ཀུན་རིས་མེད་སྒྱུ་མ་ལྟ་བུའི་རོལ་པར་མ་འགགས་པས་དོན་ལ་སྣང་རིག་ངོས་བཟུང་དང་བྲལ་བ་ལ་གོ་བའི་ངེས་ཤེས་བརྟན་པོ་རྙེད་དེ། སྣང་བ་རང་ག་མའི་བདེན་ཞེན་གྱི་འཁྲི་བ་དམ་སྒྲིམ་མེ་བ་ལ་ནན་བརྩིར་བྱེད་དགོས་པ་རང་མ་མཆིས་ཙམ་དང་། སྒྱུ་འདྲའི་འཁོར་བར་སྒྱུ་མ་ལྟ་བུའི་སྡུག་བསྔལ་ལ་སྤྱོད་པའི་སེམས་ཅན་རྣམས་ལ། དེས་དྲངས་པའི་དམིགས་མེད་ཀྱི་སྙིང་རྗེའི་འཆར་སྒོ་ཡང་རྐྱེན་ལ་བརྟེན་ནས་ཡད་ཡུད་འཆར་འཆར་འདྲ་བ་སོགས་སྣང་ཡང་། གོ་བ་ཙམ་ལས་ཉམས་མྱོང་དང་རྟོགས་པས་ཕུ་ཐག་ཆོད་པ་ཞིག་དཀའ་བར་མཆིས་ཀྱང་ལྟ་སྒོམ་སྤྱོད་གསུམ་འབྲས་བུ་བླ་ན་མེད་པའི་བྱང་ཆུབ་ཀྱི་རྒྱུར་འགྲོ་མི་འགྲོའི་གནད་ཀྱི་བླང་དོར་གྱི་ཚུལ་ཅུང་ཟད་ངེས་སོ། །ཕྱིས་སུའང་རྗེ་བླ་མ་དམ་པ་ལས། སྙིང་ཐིག་རྣམ་གཉིས་དང་། ཀུན་བཟང་དགོངས་འདུས། ཨ་ཏི་ཟབ་དོན་སྙིང་པོ། རྡོར་སེམས་ཀྱི་ཁྲིད་མ་བུ། ཀློང་སྡེ་རྡོ་རྗེ་ཟམ་པ། མདོ་སྒྱུ། དོང་སྤྲུགས། ཁྲོས་ནགགཅོད་ཁྲིད་སོགས་བཀའ་གཏེར་གྱི་ཟབ་ཁྲིད་མང་དུ་ནོད་ཅིང་། རེ་རེ་ནས་ཉམས་ལེན་ལ་བརྩོན་པ་བྱེད་ལོ་བྱས་པས་རང་བློ་དང་འཚམས་པར་བོགས་ཅུང་ཟད་ན་འཕར་ཞིང་སྐྱེས་ལ། དེ་ལས་གཞན་དུ་གྲུབ་པའི་དབང་ཕྱུག་བློ་གྲོས་རྒྱལ་མཚན་ལས་སྦྱོར་དྲུག་གི་སོར་སྡུད་ཉིན་མཚན་གྱི་རྣལ་འབྱོར་

― MLP003_Page_0327 ―

^{[མ་དཔེ་གཟིགས་ན་འདིར་གནོན།]}

[Full Size]

ཙམ་ཞིག་ཉམས་ཁྲིད་དུ་ཐོབ་ཅིང་། དམ་པོ་འདེབས་པའང་ལག་ལེན་དུ་བཏབ་མོད། འཆར་སྒོ་རང་ནི་རྩལ་ཧ་ཅང་ཆེ་བ་མ་བྱུང་། གང་ལྟར་ཡང་རང་སྙིང་རུས་ཆུང་བས་སྒོམ་དང་གང་ཟག་ཡ་བྲལ་དུ་སོང་བ་མ་གཏོགས། བླ་མ་དམ་པ་རྣམས་ཀྱི་བཀའ་དྲིན་གྱིས་ཟབ་ལམ་གྱི་གནད་རྣམས་ཉམས་འོག་ཏུ་ཆུབ་པའི་ངེས་ཤེས་ཅུང་ཟད་ཐོབ་པ་ཡིན་ནོ། །དེ་བཞིན་དུ་རྒྱལ་བས་གསུངས་པའི་ཆོ་ག་བཞིན་དུ་རང་འབྲས་ཀྱི་ཁྱད་པར་སྔགས་མཐུའི་ནུས་པ་དང་། ངོ་བོ་ཞུ་བདེའི་བདེ་སྟོང་གི་རང་བཞིན། བྱེད་ལས་དག་རྫོགས་སྨིན་གསུམ་ཚང་བ་སྟེ། ཁྱད་པར་བཞི་ལྡན་གྱི་བསྐྱེད་རིམ་གྱི་གནད་ལའང་གོ་བ་ཙམ་སྐྱེས་པ་ལྟར་མོས་སྒོམ་གྱིས་སློབ་ལོ་བགྱིས་ཤིང་། དེའི་ཐུན་མཚམས་ཀྱི་རྣལ་འབྱོར་དང་འབྲེལ་བའི་བཟླས་བརྗོད་ཀྱང་། ཤིང་ཕོ་ཁྱིའི་ལོར་མཁའ་སྤྱོད་བདེ་ཆེན་གླིང་དུ་མཚམས་ཟླ་བ་ལྔ་ལྷག་ཙམ་ཞིག་བཅད་དེ། བདེ་གཤེགས་ཀུན་འདུས་ཀྱི་ཕྱི་ནང་གསང་གསུམ་གྱི་བསྙེན་སྒྲུབ་སྨིན་པར་བྱས་ཤིང་། དེ་ནས་བཟུང་སྟེ་ཕྱི་སྒྲུབ་ཀྱི་རྒྱུན་བཟླས་ཀྱང་སྟོང་ཕྲག་རེ་མ་ཆག་པར་བགྱིས་པས་ཁྱོན་བསྡོམས་ཀྱི་གྲངས་སྔོན་འགྲོའི་སྐྱབས་འགྲོ་བདུན་ཁྲི། སེམས་བསྐྱེད་དྲུག་ཁྲི་དགུ་སྟོང་། ཡིག་བརྒྱ་ཉིས་འབུམ་དྲུག་སྟོང་ལྔ་བརྒྱ། མཎྜལ་བདུན་ཁྲི་དགུ་བརྒྱ། ཡན་ལག་བདུན་པ་དང་གསོལ་འདེབས་དྲུག་ཁྲི་བཞི་སྟོང་དགུ་བརྒྱ་རྣམས་དང་། ཡིག་བཅུའི་ངག་བཟླས་བྱེ་བ་བརྒྱད། ས་ཡ་དྲུགའབུམ་ཚོ་བརྒྱད་ཁ་ལོངས་པ་དང་བཅས་པ། ཡིད་བཟླས་ལྔ་ཁྲི་སུམ་སྟོང་བརྒལ་ཙམ། རྟ་ཡུམ་གཉིས་རེ་རེར་བརྒྱད་འབུམ་ཆིག་ཁྲི། འཁོར་སྔགས་ཉིས་འབུམ་ཉི་ཁྲི། བྱིན་བསྡུ་དྲུག་ཁྲི་དགུ་སྟོང་། ཕྱི་སྒྲུབ་དང་སྦྱར་བའི་རྡོར་བཟླས་ཉིས་འབུམ་བརྒྱད་ཁྲི་བདུན་སྟོང་རྣམས་བཟླས། དེ་བཞིན་དུ་ཐུགས་ཐིག་གི་སྔོན་འགྲོའི་ཡིག་བརྒྱ་དྲུག་ཁྲི་ལྔ་སྟོང་ལྷག་ཙམ་དང་། ཕྱི་སྒྲུབ་ཀྱི་བཟླས་པ་ས་ཡ་གཅིག་བཞི་འབུམ་དྲུག་ཁྲི་དགུ་སྟོང་། སྒྱུ་འཕྲུལ་ཞི་བ་ཕྱག་རྒྱ་གཅིག་པའི་ཡབ་ཡུམ་གྱི་སྔགས་སོ་སོ་དྲུག་ཁྲི་ཉིས་སྟོང་དང་། སྤྱི་སྔགས་དྲུག་ཁྲི་ལྔ་སྟོང་། འདུས་པ་མདོའི་སྤྱི་སྔགས་ཆིག་འབུམ་དྲུག་ཁྲི། མ་ཏི་ལུགས་ཀྱི་འཇམ་དཀར་ལ་ལྔ་འབུམ་བཞི་ཁྲི། རྟ་ནག་ལྕགས་རལ་ཅན་ལ་འབུམ་ཕྲག་བཅུ་གསུམ་ལྷག་བཅས། ཉང་གི་ཁྲོས་

― MLP003_Page_0328 ―

^{[མ་དཔེ་གཟིགས་ན་འདིར་གནོན།]}

[Full Size]

ནག་ལ་འབུམ་ཕྲག་གསུམ། ཕག་དཀར་ཤེས་རབ་གསལ་བྱེད་ལ་འབུམ་ཚོ་ལྔ། དབྱངས་ཅན་མ་དཀར་མོར་སུམ་འབུམ། ན་རག་དོང་སྤྲུགས་ཀྱི་ཡིག་བརྒྱ་ཆིག་ཁྲི། བཀའ་བརྒྱད་གཙོ་དགུ་དང་ཤངས་ལུགས་རྒྱུད་སྡེ་ལྔ་ལའང་འབྲེལ་པ་ཙམ་རེ་བཟླས་ཏེ། དེ་རྣམས་ཤིང་བྱ་ཡན་ཆད་ལས་ཕྱིས་རྣམ་གཡེང་གིས་ཆག་ཅིང་། ད་ལྟའི་ཆུ་སྦྲུལ་ཟླ་བ་དྲུག་པའི་ཚེས་བཅུ་ཡན་ལ་ཆག་མེད་བཟླས་པའི་གྲངས། ཐུགས་རྗེ་ཆེན་པོ་སྔར་སོང་བ་ལྟར་དང་། གཞན་ཡང་གར་དབང་ཚེ་དཔག་མེད་ཀྱི་ཕྱི་སྒྲུབ་ཀྱི་བཟླས་པ་སུམ་འབུམ་སུམ་ཁྲི། ཚེ་དཔག་མེད་ཡང་སྙིང་ཀུན་འདུས་ཀྱི་བཟླས་པ་ས་ཡ་གཅིག་དང་བཞི་ཁྲི། བླ་མ་དྲག་པོར་སུམ་འབུམ་ཁ་ལོངས་བཅས། རྡོར་སེམས་ཀྱི་ཡིག་དྲུག་སུམ་འབུམ་དང་ཡིག་བརྒྱ་དྲུག་ཁྲི། ཞི་བྱེད་ཚོགས་ལམ་གྱི་བཟླས་པ་ས་ཡ་གཅིག་དང་ཆིག་འབུམ། དཀའ་ཐུབ་ཉིས་འབུམ། རྗེས་དང་རོ་སྙོམས་གཉིས་ལ་ཆིག་འབུམ་རེ། བྱ་བྲལ་ལ་བརྒྱད་ཁྲི་ཙམ་ཞིག་དང་། གཤིན་རྗེ་འཇོམས་བྱེད་ཀྱི་སྔགས་ཚན་བཞི་ཡང་འབྲེལ་པ་ཙམ་ཞིག་བཟླས་པ་སོགས་ཟླ་སྦྲེལ་གྱི་མཚམས་དང་། རྒྱུན་བཟླས་ཆག་མེད་སྲོལ་དུ་བཅུག་སྟེ་དཀར་པོའི་ལས་ཀྱི་བག་ཆགས་ཀུན་གཞི་ལ་ཅུང་ཟད་བཞགགཞན་ཡང་ཡོས་ལོའི་ནང་དུ་རླུང་འཐེམས་པའི་འཆི་ལྟས་གསལ་བར་རྡོར་བཟླས་འབུམ་ཕྲག་གསུམ་བཟླས་པས་སོར་ཆུད་པར་གྱུར་ཅིང་། ཤིང་བྱ་ལོར་བདེ་གཤེགས་ཀུན་འདུས་ཀྱི་ཁྲིད་མཚམས་དང་སྦྱར་ནས་རྡོར་བཟླས་ཆིག་འབུམ་བདུན་ཁྲི་དགུ་སྟོང་ཙམ་བཟླས་པ་ལའང་རྟགས་མཚན་ལེགས་པར་གཏོགས་པ་ཙམ་བྱུང་ངོ་། །ཉིན་ཞག་ཕྲུགས་རེར་ཐུན་དྲུག་གསོལ་འདེབས། ཞོགས་པར་ཆུ་སྦྱིན། ཛམ་ལྷ། དཀར་ཆ་བཞི། བརྒྱ་རྩ། འབྱུང་བཞི། ཆ་གསུམ། གཞི་བདག་དང་། བརྟན་གཏོར། ཁ་འབར་མ་དཀར་མོའི་གཏོར་མ་རྣམས་དང་། དེ་རྗེས་དབུ་མ་ལུགས་ཀྱི་སེམས་བསྐྱེད་དང་སྔགས་སྡོམ་བཟུང་ཞིང་། རྣམ་འཇོམས་ལྟུང་བཤགས་སོགས་ཁ་ཏོན་ཅི་རིགས་དང་། རེས་ཚེ་མདོ་སྒྲོགས་པ་སོགས་བྱས་རྗེས་ཉིན་པར་ལྟ་རྟོགརྩོམ་པ། འཆད་ཉན་སོགས་ཆོས་སྤྱོད་ཅི་འགྲུབ། སྔ་དགོང་ཆག་མེད་ཀྱི་རྒྱུན་བཟླས་རྣམས་དང་། རླུང་སྦྱོར་སོགས་དུས་གནད་དམིགས་སུ་གང་འགྲོའི་དགེ་སྦྱོར། མཚན་

― MLP003_Page_0329 ―

^{[མ་དཔེ་གཟིགས་ན་འདིར་གནོན།]}

[Full Size]

མོ་དམ་ཅན་སྤྱི་གཏོར་རྗེས་འབྲང་དང་བཅས་པའི་སྟེང་། སྒོས་སུ་དྲག་པོ་སྡེ་ལྔ། སྔགས་སྲུང་མ། ལྷ་ཆེན། དུར་ཁྲོད་མ་མོ་རྣམས་ཀྱི་གཏོར་ཆོགགཞན་ཡང་ཕྱག་དྲུག་པ། ཨ་གྷོ་ར། ཤ་ཟ་ཁ་མོ་ཆེ། བརྟན་མ། མཁའ་འགྲོ་སྤྱི་གཏོར་བཅས་གཏོར་བསྔོའི་རིམ་པ་དང་དཀར་འགྱེད་དང་འཆི་བསླུའི་དམིགས་པ་རེ། ནངས་ནུབ་ཉལ་ལྡང་གི་རྣལ་འབྱོར་མཚན་བཅས་མཚན་མེད་གང་བདེ་རེ་ལ་བསྒྲིགས་སུ་ཆུབ་པ་བགྱིས་སོ། །མདོར་ན་མཉམ་གཞག་རྣམ་པར་མི་རྟོག་པའི་ཡེ་ཤེས་རང་བཞིན་བབས་ཀྱི་བསམ་གཏན་གྱི་ངང་ལ་འཇོག་ལོ་ཙམ་དང་། དེ་ལྟར་མ་རྟོགས་པ་ལ་དམིགས་མེད་ཀྱི་སྙིང་རྗེ་ཆེན་པོའི་རྩལ་སྣང་ལྷ་སྐུར་ལངས་ཏེ། རེས་འགའ་དེའི་ངང་ལ་འཇོག་པ་རྣམས་ཅི་རིགས་སུ་སྒོམ་ཞིང་། རྗེས་ཤེས་ཀྱི་གནས་སྐབས་ཀུན་ཏུ་ཤེས་བཞིན་གྱི་དྲན་པས་ཅི་སླེབས་ཀྱིས། གཙོ་བོར་སྐྱབས་གནས་ཀུན་འདུས་ཀྱི་ངོ་བོ་བླ་མ་དམ་པར་རེ་ལྟོས་བཅས་ནས་ཐུགས་ཅི་ཟིན་དང་ཅི་མཉེས་ལྷུར་ལེན་པས་བཀའ་ལུང་ལས་ནམ་དུའང་མི་འགོངས་པའི་ཞེ་དམ་དང་། བསམ་བྱུང་གི་ཡོན་ཏན་སྔར་ཤེས་རྣམས་གོང་དུ་འགྱུར་ཅི་ཐོན་གྱི་འབད་རྩོལ་ནན་ཆགས་དང་། སྔར་འདྲིས་ཀྱི་མི་ལ་གཞུང་བཟང་གིས་མི་བྱོལ་ཞིང་། ཕྱིས་ནས་གསར་འགྲོགས་ཀྱི་ངོ་ཤེས་མང་པོ་མི་འཚོལ་བ་དང་། རང་གཞན་གྱི་གྲུབ་མཐའ་དང་བཤེས་གཉེན་ཀུན་ལ་དག་སྣང་སྦྱོང་ཅི་ཐུབ་ལས་ཕྱོགས་རིས་ཀྱི་ཆགས་སྡང་མི་བྱ་བ་དང་། ཚེ་འདི་ལྟས་ཀྱི་སྣང་བ་ལ་ཧ་ཅང་དངོས་ཞེན་ཆེ་བ་མི་བྱེད་པའི་ཞེ་དམ་གྱིས། ས་འདིར་དུས་རྟག་པར་བཟོ་གྲྭ་མི་ཆག་པ་སོགས་རྐྱེན་འཛོམ་ཡང་། རི་མོ་ཙཀླི་རེ་ཙམ་ཡང་འབྲིར་བསྐུལ་བ་སོགས་ཉེར་མཁོའི་བཟོ་ཕྲན་མི་འཆོལ་བར་གང་བྱུང་ཙམ་གྱིས་ཆོག་ཚོད་ཟིན་པར་བྱ་བ་དང་། གྲྭ་རིགས་ཡོན་བདག་ཀུན་ལ་ཉེ་འགྱང་གི་ཕྱོགས་རིས་སྤངས་ཏེ་དབུ་མའི་ལམ་ལ་གནས་པ་དང་། སྒེར་ལྟོས་ཀྱི་གང་ཟག་ཉི་ཚེའི་དོན་ལ་ཇུ་གལ་གྱི་གཤགས་དང་བཞི་སྡེ་བསྙེན་རྫོགས་བཤད་པ་བྱེད་པའི་ཞུ་སྣེ་སྦྱོར་བ་སོགས་བྱ་བྱེད་མང་པོ་ལ་མི་འཇུག་པ་དང་། དགེ་འདུན་སྤྱི་དང་འབྲེལ་པའི་སློབ་གྲྭ་སྒྲིག་གནོན་སོགས་ལ་རང་ནུས་པ་ཞན་པས་ཤོགས་འཐོན་པ་དཀའ་ཡང་ལྷག་བསམ་བཟང་པོས་ཁ་བཅོས་འགྲོ་བ་ཐམས་ཅད་ལ་བསྐུལ་
ནས་རང་ནུས་གང་འཐོན་བྱེད་པ་དང་། གཞིས་བྱེས་ཀྱི་བསྔོ་རྟེན་དང་འབུལ་བ་སོགས་གཉེར་ཕྱག་གང་དུ་འགྲོ་བའི་དམིགས་གང་ཡིན་དེར་བློ་གཙང་གིས་སྟོབ་སྟེ། རང་ལེ་ལོ་ཅན་ལ་བུ་ལོན་དུ་འགྱུར་བའི་ཉེས་ཆེན་ལས་བསྲུངས་བར་བྱས་ཤིང་། དེ་ལྟར་བྱས་པས་ཤིང་ཁྱིའི་ལོ་ཙམ་ནས་བཟུང་ཞར་བྱུང་གི་ཡོ་བྱད་ཀྱང་འབད་མེད་དུ་འདུ་བ་བྱུང་སྟེ། ལྷའི་བུའི་བདུད་ཀྱི་མགོ་སྐོར་མ་ཡིན་པར་མཆོག་གསུམ་གྱི་ཐུགས་རྗེ་ལས་བྱུང་བ་ཡིན་ན་འཚེངས་པར་སྣང་ངོ་། །

རང་ནུས་དང་སྦྱར་བའི་གཞན་དོན་ཆ་ཙམ་བསྒྲུབས་ཚུལ།

― MLP003_Page_0330 ―

^{[མ་དཔེ་གཟིགས་ན་འདིར་གནོན།]}

[Full Size]

ལྔ་པ་རང་ནུས་དང་སྦྱར་བའི་གཞན་དོན་ཆ་ཙམ་བསྒྲུབས་ཚུལ་ནི། བསྟན་པ་སྤྱི་དང་། བྱེ་བྲག་སྔ་འགྱུར་རྡོ་རྗེ་ཐེག་པ། ཡང་སྒོས་རྗེ་གཏེར་ཆེན་བླ་མའི་བཤད་སྒྲུབ་ཀྱི་བསྟན་པ་རིན་པོ་ཆེ་འདི་ཉིད་སྒོ་ཐམས་ཅད་ནས་ཕྱོགས་ཀུན་ཏུ་དར་ཞིང་རྒྱས་པར་གྱུར་ན་ཅི་མ་རུང་སྙམ་པའི་ལྷག་བསམ་གྱི་སྙིང་སྟོབས་ཕྲག་པར་ཁྱེར་ཏེ། འཆད་ཉན་གྱི་གཟུགས་བརྙན་རང་ནུས་གང་ཐོན་གྱིས་བྱེད་ལོ་བགྱིས་པར། སྒྲ་ཀ་ལཱ་པའི་མིང་ལེ་ཡན་གྱི་ས་རིས་དང་པོར་དགེ་སློང་ཐར་པ་གླིང་པ་དང་། དེ་རྗེས་བཤེས་གཉེན་ཆག་པ་ཆོས་འཕེལ་དང་། དགེ་སློང་ཨོ་རྒྱན་དཔལ་འབྱོར་ལ་བཤད་ཅིང་། ཕྱིས་ས་རིས་ཡོངས་རྫོགས་དང་། སྙན་ངག་སྡེབ་སྦྱོར་གྱི་བཤད་པ་རྣམས་ཞབས་དྲུང་རིན་པོ་ཆེ་ལ་ཕུལ་བ་ལས་ཀྱང་མང་དུ་མཆེད་པ་དང་དབྱངས་ཅན་བྱཱ་ཀ་ར་ཎ་ནི་ཞབས་དྲུང་སྐུ་མཆེད་སོགས་ཀྱི་དབུས་ཚར་ལྔ་ཙམ་བཤད། རྩིས་ཀྱི་ས་རིས་ཐུན་དུ་བཅུག་ནས་རང་གིས་དངོས་སུ་བསླབས་པ་མེད་ཀྱང་། སྔར་ཤེས་ཟིན་ལ་འཕྲལ་གྱི་འབེལ་གཏམ་དང་མཐའ་དཔྱོད་ཀྱིས་བློ་ཁ་ཕྱེ་སྟེ་བརྒྱུད་ནས་ཕན་པར་བྱུང་བས་ཐ་སྙད་ཀྱི་རིག་གནས་རྣམས་ལའང་གཞན་དོན་གྱི་འབྲེལ་པ་ཙམ་བཞག་ཅིང་། གཙོ་བོར་མཁན་པོའི་གཡར་ཁྲལ་བླངས་པས་སྡོམ་པ་བགྱིས་པའི་སྡོམ་ཕྲུག་གི་གྲངས་ནི། དགེ་སློང་བཞི་བརྒྱ་དང་ཞེ་བདུན། དགེ་ཚུལ་ཆིག་སྟོང་བཞི་བརྒྱ་གོ་བརྒྱད་དུ་ལོངས་པ་དང་། གྲྭ་གཙང་གི་དབྱར་དགུན་གྱི་ཆོས་ཐོག་གཉིས་ལ་ལྕགས་འབྲུག་ནས་བརྩམས་ཏེ་ཞབས་དྲུང་སྐུ་མཆེད་དང་། ཕྱོགས་ཀྱི་བླ་ཁག་མང་པོ། གྲྭ་གཙང་གི་གྲྭ་པ་དོན་གཉེར་ཅན་འདུས་པ་དྲུག་ཅུ་སྐོར་

― MLP003_Page_0331 ―

^{[མ་དཔེ་གཟིགས་ན་འདིར་གནོན།]}

[Full Size]

རེ་ལ་སྙིང་པོའི་རྒྱུད་ཀྱི་བཤད་པ་ཆག་མེད་ཀྱིས་བློ་གསར་རྣམས་ལ་ཐོས་བྱུང་གི་ཤེས་རབ་བསྐྱེད་པར་བྱས་ཤིང་། གཞན་ཡང་སོ་སོའི་བློ་དང་འཚམས་པའི་སྡོམ་གསུམ་རྣམ་ངེས། ཕར་ཕྱིན་འདུལ་བ་སོགས་གཞུང་མང་པོའི་བཤད་པ་ཐོར་རེ་བ་དང་། སྔ་ཕྱིར་གསུང་སྤྲུལ་རིན་པོ་ཆེ་ངག་དབང་ཀུན་བཟང་རྡོ་རྗེ། དཔལ་རི་སྤྲུལ་པའི་སྐུ། ཐང་འབྲོག་སྤྲུལ་པའི་སྐུ། ཟང་ལ་མཁར་སྤྲུལ་པའི་སྐུ། བོན་ལུང་སྤྲུལ་པའི་སྐུ། རོང་པ་རྫོགས་ཆེན་སྤྲུལ་པའི་སྐུ་རྣམས་དང་། རྣ་བོ་གདུང་བརྒྱུད་སོགས་ཀྱིས་མཚོན་གཞིས་བྱེས་ཀྱི་དོན་གཉེར་ཅན་མང་པོ་ལ་སྒྱུ་འཕྲུལ་ཞི་ཁྲོའི་དབང་ཚར་བརྒྱད། མདོ་དབང་ཚར་གསུམ། བདེ་འདུས་ཀྱི་དབང་ཆེན་ཚར་གཅིག་དང་། རྣལ་འབྱོར་རྒྱུན་དབང་ཚར་བཞི། གསང་རྫོགས་ཚར་གསུམ། ཨ་དོན་ཚར་བཞི། དོང་སྤྲུགས་ཚར་ལྔ། རྡོར་གླིང་། རཏྣ་གླིང་པ། པད་གླིང་གི་གཏེར་ཆོས་སོགས་བཀའ་གཏེར་གྱི་དབང་། རྗེས་གནང་མང་པོ་དང་། བཀླགས་ལུང་མན་ངག་གི་ཁྲིད་འབོགས་པ་སོགས་གང་ལ་གང་འཚམས་ཀྱི་ཆོས་འཆད་པ་དང་། གསར་མ་ལས་ཀྱང་། དུས་འཁོར་གྱི་དབང་ཡོངས་རྫོགས། ཤངས་ལུགས་རྒྱུད་སྡེ་ལྔ་སོགས་ཀྱི་དབང་བཀའ་ཆེ་ཆུང་དང་ཁྲིད་ཆེན་ལྔ་སོགས་དབང་དང་རྗེས་གནང་ཟབ་ཁྲིད་ལུང་དང་བཅས་པ་མང་དུ་བྱས་ཤིང་། བྱེས་སུའང་ཕྱི་ལོ་གྲོམ་པ་དཔལ་གྱི་ས་སྐྱར་ཕྱིན་ཏེ། བདག་ཆེན་འཇམ་པའི་དབྱངས་ངག་དབང་ཀུན་དགའ་བཀྲ་ཤིས་ཀྱི་ཞབས་དྲུང་དུ། གཏེར་གསར་ཡོངས་རྫོགས་ཀྱི་དབང་ལུང་དང་། ཐུགས་རྗེ་ཆེན་པོའི་སྨིན་ཁྲིད། ཕུར་པ་སྤུ་གྲིའི་དབང་། གཡུ་ཐོག་སྙིང་ཐིག་གི་དབང་ལུང་། ཐུགས་སྒྲུབ་ཀྱི་དབང་། ཚེ་དབང་ལུང་ལུགས། ལོཀྟྲིའི་རྗེས་གནང་། གནོད་སྦྱིན་གྱི་སྲོག་གཏད་སོགས་ཆོས་སྐྱེས་མང་པོ་དང་བྱད་འགྲོལ་རྣམས་ཕུལ་ཞིང་། དེ་དུས་ཡར་ལམ་ཡར་འབྲོག་གླིང་དུ་ཞབས་དྲུང་ཡབ་སྲས་ལ་ཚེ་གུར་རྟ་མགྲིན་ལོཀྟྲི་རྣམས་ཀྱི་དབང་དང་། མར་ལམ་རུ་ལག་རྒྱང་དུ་བླ་མ་ཟ་ལུང་པ། ཆུ་མིག་པ། སྐྱི་སྟོན་པ། བསམ་གཏན། འབྲས་ཁུད་པ་རྣམས་ལ་གཏེར་གསར་བླ་མ་ཞི་དྲག་རྡོར་སེམས་ཨ་དོན་རྣམས་ཀྱི་དབང་། ཕུན་ཚོགས་གླིང་དུ་དགེ་སློང་འབྱུང་གནས་ལ་ཕྱག་དྲུག་པ་དང་དམག་ཟོར་མའི་རྗེས་གནང་། གཞིས་ཀ་

― MLP003_Page_0332 ―

^{[མ་དཔེ་གཟིགས་ན་འདིར་གནོན།]}

[Full Size]

རྩེར་སྨོན་གྲུབ་ནས་ལ་ཚེ་གུར་རྟ་མགྲིན་རྣམས་ཀྱི་དབང་དང་། བྱད་འགྲོལ། གསང་སྔགས་གླིང་གདུང་རྒྱུད་མཆེད་ལ་དོང་སྤྲུགས་པདྨ་བརྒྱ་ལྡན་གྱི་དབང་དང་། དཔོན་སློབ་ཐུན་མོང་ལ་ཚེ་དབང་། འུ་ཡུག་ཏུ་བསམ་དར་ནས་ལ་ཚེ་གུར་དང་། ཞང་བློན་གྱི་རྗེས་གནང་། ཡུལ་པར་ཁྲོམ་དབང་། སྟག་སྣར་ཏྲེ་བོ་སྤྲུལ་པའི་སྐུ་ལ་སྒྱུ་འཕྲུལ་ཞི་ཁྲོ་དང་། སེམས་སྡེ་ཨ་དོན་གྱི་དབང་། ལྷ་ཆེན་གྱི་སྲོག་གཏད། ཐུགས་རྗེ་ཆེན་པོའི་ཁྲིད་ཡིག་གི་ལུང་དང་ཤར་ཁྲིད་བཅས་ཕུལ། གཞན་ཡང་སྔ་ཕྱིར་ལྷོ་བྲག་བན་པ་བསམ་འགྲུབ་དགོན་དུ་དོང་སྤྲུགས་ཀྱི་དབང་དང་ཚེ་གུར། རྟ་ནག་ལྕགས་རལ་ཅན་རྣམས་ཀྱི་དབང་། དགེ་ཡེར་ཁྲོམ་དབང་དང་ཚེ་གུར། མདོ་མཁར་དུ་ཚེ་གུར་རྟ་མགྲིན། དྭགས་པོ་རྩེ་ལེར་གུར་དྲགདྲེགས་འདུལ། ཚེ་རྟ་རྣམས་ཀྱི་དབང་རྗེས་གནང་དང་བྱད་འགྲོལ། གདོན་འགྲོལ། འཆི་བསླུ་སོགས་མང་པོ་དང་། ཟངས་རིར་ཨོ་རྒྱན་གླིང་གྲྭ་ཚང་གི་ཚོགས་སུ་ན་རག་དོང་སྤྲུགས། བཀའ་བརྒྱད་གསང་རྫོགས། ཕུར་པ་སྤུ་གྲི། དྲེགས་འདུལ་རྣམས་ཀྱི་དབང་། རྣམ་སྲས། དུར་ཁྲོད་བདག་མོ། རྒྱལ་པོ་རྣམས་ཀྱི་སྲོག་གཏད། པད་གླིང་གཏེར་ཆོས་ཚང་མའི་ལུང་དང་། བླ་མའི་ལས་བྱང་གི་ལྷ་ཁྲིད། ཁྲོ་འཆར་འཇོམས་བྱེད་ཀྱི་དབང་། ཕྱ་ཕྲིན་མདོས་བཅུ་སོགས་ཆོག་ཕྲན་མང་པོའི་ལུང་རྣམས་བྱས། གཞིས་སུ་རང་གི་མ་རིན་པོ་ཆེ་ལ་རྗེ་བླ་མའི་བཀའ་བཞིན་ཕྱག་ཆེན་གའུ་མའི་ཉམས་ཁྲིད་ཤིན་ཏུ་སྨིན་པ་དང་། ཐུགས་རྗེ་ཆེན་པོ་ཡི་གེ་དྲུག་པའི་ལྷ་ཁྲིད་རྣམས་ཕུལ་ཞིང་། སྐུ་གཤེགས་རྟིང་གདུང་མཆོད་དུ་བསྡད་ནས་སྒྲིབ་སྦྱོང་གི་ཆོ་ག་གནད་དུ་གང་འགྲོ་ཞུས། ན་ནིང་ཆུ་འབྲུག་གི་ལོ་ལ་མདོ་ཁམས་ཀྱི་སའི་ཐིག་ལེ་ཆབ་མདོ་བྱམས་པ་གླིང་དུ་ཕྱིན་ཏེ། འཇིག་རྟེན་དབང་ཕྱུག་འཕགས་པ་རྒྱལ་བ་རྒྱ་མཚོའི་ཞལ་སྔ་ནས་དང་། ཞབས་ཕྱིར་སྤྲུལ་སྐུ་རྣམ་གཉིས་བཅས་པར། གཏེར་གསར་ཐུགས་རྗེ་ཆེན་པོའི་རྩ་དབང་དང་ཚེ་དབང་། ཐུགས་ཐིག་གི་རྩ་དབང་། འཆི་མེད་ཡང་སྙིང་ཀུན་འདུས་ཀྱི་ཚེ་དབང་བརྒྱ་རྩ། རྡོར་སེམས། གུར་དྲགའཇོམས་བྱེད་རྣམས་ཀྱི་དབང་། གཏེར་རྙིང་ལས་གསང་འདུས་ཟླུམ་པོ་བཞི་དབང་། ཉང་གི་དྲག་དམར་ཆེ་བ། ཕྱག་རྡོར་དྲེགས་འདུལ་གྱི་དབང་ཆེ་ཆུང་། ཕྱག་

― MLP003_Page_0333 ―

^{[མ་དཔེ་གཟིགས་ན་འདིར་གནོན།]}

[Full Size]

རྡོར་གསང་སྒྲུབ། ཁང་བརྩེགས། རྟ་མགྲིན་གསང་སྒྲུབ། ལོཀྟྲི། ནཱ་ག་རཀྴ། ན་རཀ་དོང་སྤྲུགས། ཞི་ཁྲོ་ཁྲོམ་དཀྲུགས་ལུགས་རྣམས་ཀྱི་དབང་དང་རྗེས་གནང་། མཁའ་འགྲོ་བསུན་བཟློག་དང་གྲིབ་སེལ། བྱད་འགྲོལ། གཟའ་ཀླུའི་གདོན་འགྲོལ། ཐུགས་རྗེ་ཆེན་པོ་དང་ཡང་ཐིག་གི་འཆི་བསླུ་སོགས་སྐུ་རིམ་ཡང་མང་དུ་བསྒྲུབས། ཐུགས་ཀྱི་སྲས་ངག་དབང་མཆོག་གི་སྤྲུལ་པའི་སྐུ་ལའང་གཏེར་གསར་སྐོར་གྱི་དབང་ལུང་ཁྲིད་དང་བཅས་པ་ཡོངས་རྫོགས་དང་། རཏྣ་གླིང་པའི་ཕུར་པ་དང་། ཟབ་ལམ་གསང་འདུས་མ་གཏོགས་པའི་ཆོས་སྐོར་ཆ་ཚང་། འཇིགས་བྱེད་ལྷ་བཅུ་གསུམ་མའི་དབང་དང་རྟོག་བདུན་གྱི་ལུང་། ནཱ་རོ་མཁའ་སྤྱོད་མའི་བྱིན་རླབས། རྣལ་འབྱོར་བཅུ་གཅིག་དང་རྩ་དབུ་མའི་ཁྲིད། ཆོས་སྐོར་ཚང་མའི་ལུང་། ཐུགས་རྗེ་ཆེན་པོ་རྒྱལ་པོ་ལུགས་ཀྱི་དབང་ཁྲིད། དཔལ་མོ་ལུགས་ཀྱི་རྗེས་གནང་དང་། སྨྱུང་གནས་ལག་ལེན། བླ་མ་གསང་འདུས་ཀྱི་རྩ་དབང་དང་། ཕུར་པ་སྤུ་གྲི་དང་། གཡུ་ཐོག་སྙིང་ཐིག་གི་དབང་ལེ་ཚན་རྣམས་ཕུལ་ཞིང་། ཕྱག་མཛོད་རྗེ་དབོན་རིན་པོ་ཆེར་ཡང་ཐུགས་རྗེ་ཆེན་པོ། བླ་མ་ཞི་དྲགཚེ་རྟ། ལོཀྟྲི་རྣམས་ཀྱི་དབང་རྗེས་གནང་དང་། བྱད་འགྲོལ། འཆི་བསླུ། དབོན་པོ་རྣམ་གཉིས་སོགས་ཞབས་རིམ་ནང་མ་མང་པོར་ཐུགས་ཐིག་གི་དབང་ལུང་ཁྲིད་དང་བཅས་པ། ཚེ་གུར་ཕྱག་རྡོར། གླིང་པ་དང་ནང་མའི་གྲྭ་རིགས་མང་པོར། བླ་མ་ཞི་དྲགཚེ་རྟ། ཕྱག་རྡོར། ཚེ་དབང་མདའ་འཕེལ་མ་རྣམས་ཀྱི་དབང་དང་། སེམས་བསྐྱེད། སྨན་བླའི་རྗེས་གནང་། ཚེ་དཔག་མེད་དྭངས་མ་བཅུད་འདྲེན་གྱི་དབང་། འཁོར་བ་དབྱིངས་གྲོལ་དང་སྦྱོར་དྲུག་གི་ཁྲིད་སོགས། སྡེ་དགེའི་བླ་མ་རབ་འབྱམས་པ། གོ་འཇོ་རྩེ་རོང་སོགས་ནས་ལྷགས་པའི་དོན་གཉེར་ཅན་གྱི་དཔོན་སློབ་མང་པོར་གཏེར་གསར་ཐུགས་ཐིགཐུགས་རྗེ་ཆེན་པོའི་རྩ་དབང་། རྡོར་སེམས། ཚེ་གུར་རྣམས་ཀྱི་དབང་དང་། དགེ་ཚུལ་སློང་གི་སྡོམ་པ། ཐུགས་ཐིག་གི་ཁྲིད་ལ་སོགས་ཏེ་ཆོས་སྦྱིན་རྒྱ་ཆེར་བྱས་པས་རང་ལུགས་ཀྱི་བསྟན་པ་ཤར་ཕྱོགས་སུ་དར་བའི་ལུང་བསྟན་གྱི་དོན་བཞིན་མངོན་དུ་གྱུར་པས་བསྟན་པ་ལ་བྱ་བ་ཅུང་ཟད་བྱས་སམ་སྙམ་དུ་ཡི་རངས་བར་གྱུར་ལ། ཕྱིས་རྒྱལ་བ་འཕགས་པ་ལྷའི་དགོངས་པའི་

― MLP003_Page_0334 ―

^{[མ་དཔེ་གཟིགས་ན་འདིར་གནོན།]}

[Full Size]

གཏད་མཚམས་ལྟར་ངག་དབང་མཆོག་གི་སྤྲུལ་པའི་སྐུ་དང་ཕྱག་མཛོད་རྗེ་དབོན་རིན་པོ་ཆེས་བདག་རྐྱེན་མཛད་ནས་ཕྱོགས་དེར་རང་བསྟན་འཕེལ་རྒྱས་ཀྱི་བཀའ་ལུང་བཟང་པོ་བྱུང་བའང་རྡོའི་རི་མོ་བཞིན་འགྱུར་བ་མེད་པར་གོར་མ་ཆག་གོ། དེ་དུས་ཡར་མར་གྱི་ལམ་ཞོར་དུ། ལ་མོར་མར་ལམ་ཆོས་རྗེ་སྐུ་རྟེན་པ་ནང་འཁོར་ཞབས་ཕྱིར་བཅས་པར་དཀོན་མཆོག་སྤྱི་འདུས་ཀྱི་དབང་དང་། ཞལ་ངོ་རྣམས་ལ་ཚེ་དབང་། ཡར་ལམ་ཞལ་ངོ་ཡབ་ཡུམ་སྲས་བཅས་ལ་ཚེ་གུར་གྱི་དབང་། མར་ལམ་ལྷ་སར་བླ་མ་བྱ་བྲལ་བ་རིན་པོ་ཆེ་ལ་ཚེ་དབང་། སྐུ་ཞབས་གྲྭ་ཚང་གི་གྲྭ་པ་ངག་དབང་དོན་གྲུབ་ལ་དགེ་སློང་གི་སྡོམ་པ། ཡར་རེས་སྟག་ཤག་གི་ཞལ་ངོ་ཕན་ཚུན་རྣམས་ལ་ཐུགས་རྗེ་ཆེན་པོའི་རྩ་དབང་དང་བྱད་འགྲོལ། བསྙེན་གནས་པ་དང་སྨན་བླ་བ་རྣམས་ལ་ཚེ་དབང་། སྨྱུང་གནས་ཀྱི་དམིགས་པ་དང་བཟླས་ལུང་། དར་མོ་ནས་ལ་ཚེ་གུར་དང་བྱད་འགྲོལ་སོགས་བགྱིས་སོ། །ཡང་བསྟན་པ་ཡུན་རིང་དུ་གནས་པར་འདོད་པའི་ལྷག་བསམ་གྱིས་རྩོམ་པ་ཐན་ཐུན་བགྱིས་པའང་སྒྱུ་འཕྲུལ་རྩ་རྒྱུད་གསང་སྙིང་ལ་འགྲེལ་པ་གསང་བདག་དགོངས་རྒྱན། སྤྱི་དོན་གསང་བདག་ཞལ་ལུང་། དཀྱིལ་འཁོར་བློས་བསླངས་ཀྱི་རྣམ་བཞག་གསལ་སྒྲོན་རྩ་འགྲེལ། མདོ་དབང་སྐོར་ལ། རྣམ་བཤད་རྒྱུད་ལུང་མན་ངག་གི་གནད་གསལ་བྱེད་སྒྲོན་མེ། ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ། རྒྱུད་དང་མན་ངག་གི་ལུགས་གཅིག་ཏུ་དྲིལ་བའི་དབང་ཆོག་རྡོ་རྗེའི་ཐེམ་སྐས། སྒྲུབ་ཁོག་རིན་ཆེན་འོད་ཀྱི་སྣང་བ། ཟུར་འདེབས་དཔག་བསམ་སྙེ་མ། ཙཀླིའི་ཐོ་ཡིག་གསལ་བའི་མེ་ལོང་། རྒྱུད་ལུང་ལ་བརྟེན་པའི་ལས་བཞིའི་སྦྱིན་སྲེག་གི་ངག་འདོན་འདོད་སྟེར་དབང་རྒྱལ། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྒྲུབ་ཐབས་རྣམ་བཤད་དེ་ཁོ་ན་ཉིད་སྣང་བའི་འོད། ཐུགས་རྗེ་ཆེན་པོའི་རྩ་ཁྲིད་ཀྱི་རྣམ་བཤད་རི་ཆོས་མཐར་ཐུག་ཟབ་དོན་གསལ་བའི་ཉི་མ། སྡོམ་གསུམ་རྣམ་ངེས་ཀྱི་འགྲེལ་པ་ལེགས་བཤད་ངོ་མཚར་དཔག་བསམ་སྙེ་མ། ཕྱག་རྡོར་བདུད་སྡེ་ཕྱེར་འཐག་གི་ལས་བྱང་རྣམ་ངེས་ཚིག་ཉུང་དོན་རྒྱས། དྲི་མེད་རྣམ་གཉིས་ཀྱི་མཆོད་

― MLP003_Page_0335 ―

^{[མ་དཔེ་གཟིགས་ན་འདིར་གནོན།]}

[Full Size]

རྟེན་བཞེངས་ཆོག་བཀླགས་པས་འགྲུབ་པ། བཟང་སྤྱོད་སྨོན་ལམ་གྱི་འགྲེལ་པ། སྡེབ་སྦྱོར་གྱི་འགྲེལ་པ་དོན་གསལ་མེ་ལོང་། སྐར་རྩིས་ཉིན་བྱེད་སྣང་བ་རྩ་འགྲེལ་སྔ་རྩོམ་དང་། ཕྱི་རྩོམ་རྩ་བར་དབྲི་བསྣན་གྱིས་རྩོམ་སྐྱོར་དང་། དཀའ་འགྲེལ་གཞུང་དོན་སྙིང་པོ་ལེགས་པར་འདྲེན་པའི་རྟ་བདུན། ལག་ལེན་ལྷན་ཐབས་ངོ་མཚར་ཕྲེང་བ། སྤྱི་དོན་ལེགས་བཤད་ཡོངས་འདུའི་སྙེ་མ། དབྱངས་འཆར་གྱི་མཆན་འགྲེལ་རྒྱུ་སྐར་ཕྲེང་བ། འབྱུང་རྩིས་ཟླ་བའི་འོད་ཟེར། གཏེར་ཆེན་ཆོས་ཀྱི་རྒྱལ་པོའི་ཕྱིའི་རྣམ་ཐར་དད་པའི་ཤིང་རྟ་གླེགས་བམ་དང་པོ་དང་གཉིས་པ། ནང་གི་རྣམ་ཐར་ཡོན་ཏན་མཐའ་ཡས་རྣམ་པར་བཀོད་པའི་རོལ་མོ། བྱ་རྒོད་པ་མཁས་གྲུབ་དང་དིང་རི་བའི་རྣམ་ཐར། སོ་ཐར་སྡོམ་རྒྱུན་གྱི་རྣམ་ཐར་ཉུང་གསལ་སྒྲོན་མེ། འདུལ་བའི་ལས་ཆོག་རིན་ཆེན་ཐེམ་སྐས། གཞི་གསུམ་གྱི་ཆོ་ག་ཐར་གླིང་དུ་བགྲོད་པའི་གྲུ་ཆེན། སྐུ་འབུམ་མཐོང་གྲོལ་ཆེན་མོའི་དཀར་ཆག་ཡིད་ཆེས་ཀྱི་ངེས་པ་སྟེར་བྱེད། ཐུགས་རྗེ་ཆེན་པོའི་བློས་བསླངས་དཀར་ཆག་ངོ་མཚར་ཡོངས་འདུའི་འཁྲི་ཤིང་། འཆད་ཉན་བྱེད་ཚུལ་གྱི་ཡི་གེ་མདོར་བསྡུས། འབེལ་གཏམ་ལེ་ཚན། གཏམ་བསྔོ་དང་། རབ་གནས་ཀྱི་སྟོང་ཐུན། ཆོ་ག་དང་མན་ངག་གི་ཡི་གེའི་སྐོར་ལ། ཕྱིའི་ཆོས་སྤྱོད་ཐར་ལམ་རབ་གསལ། ནང་གི་ཆོས་སྤྱོད་བྱང་ཆེན་སྤྱོད་པའི་སྒྲོན་མེ། ཉང་གཏེར་ཁྲོས་ནག་གི་ཆོ་ག་མཁའ་སྤྱོད་དུ་བགྲོད་པའི་བདེ་ལམ། བཀའ་བརྒྱད་བདེ་འདུས་ཀྱི་བསྙེན་ཡིག་རིན་ཆེན་སྒྲོན་མེ། ཕུར་པ་སྤུ་གྲིའི་བསྙེན་ཡིག་རིན་ཆེན་སྙེ་མ། རཏྣའི་དྲག་དམར་གྱི་བསྙེན་ཡིག་ཉུང་གསལ་སྒྲོན་མེ། བི་མ་སྙིང་ཐིག་ཁྲིད་དམིགས་བརྗེད་བྱང་བདུད་རྩིའི་ཐིགས་པ། གཅོད་ཀྱི་ཁྲིད་ཡིག་ཟབ་དོན་སྙིང་པོར་དྲིལ་བ། ཐུགས་རྗེ་ཆེན་པོ་རྒྱལ་པོ་ལུགས་ཀྱི་སྐུ་གསུམ་སྙིང་པོའི་དོན་ཁྲིད་ཀྱི་ཁྲིད་ཡིགཉང་གཏེར་ཁྲོས་ནག་གི་ཁྲིད་ཡིག་ཟབ་དོན་གསལ་བ། ཐུགས་ཐིག་ཀ་དག་གི་ཁྲིད་ཡིག་དྲི་མེད་སྣང་བ། ངོ་སྤྲོད་ཀྱི་རྩ་ཐོ་དྲི་མེད་རབ་གསལ། དབང་གི་མཚམས་སྦྱོར་དྲི་མེད་འོད། ཚེ་དབང་གི་མཚམས་སྦྱོར་ངག་འདོན་གསལ་བདེར་སྤེལ་བ། རྡོར་སེམས་ཀྱི་ཁྲིད་ཡིག་རབ་གསལ་སྣང་བ། ཁྱད་པར་གྱི་རྫོགས་རིམ་སྣང་བཞིའི་མན་ངག་གི་ཁྲིད་ཡིག་མངོན་གསུམ་འོད་གསལ་
འཁོར་ལོ། རྨི་ལམ་གྱི་ཁྲིད་ཡིག་ཉིང་འཁྲུལ་རང་གྲོལ། གཅོད་ཀྱི་ཁྲིད་ཡིག་འཁྲུལ་རྟོག་དབྱིངས་གྲོལ། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྤྲོས་བཅས་བུམ་དབང་གི་མཚམས་སྦྱོར་སྐལ་ལྡན་ཀུན་དགའ། གནས་ལུང་གི་ཆོ་གའི་ངག་འདོན། བསྙེན་ཡིག་གི་ཟུར་འདེབས་བསྐྱུད་བྱང་། རྩ་ཁྲིད་ཀྱི་ཁྲིད་ཡིག་སྒོམ་དོན་གསལ་བའི་མེ་ལོང་། གཏུམ་མོའི་ཁྲིད་ཡིག་ཟབ་གནད་གསལ་སྒྲོན། འཁྲུལ་འཁོར་གྱི་རྩ་ཚིག་འཆི་མེད་བཅུད་སྟེར། ཨ་ཏིའི་ལམ་རིམ་སྙིང་པོའི་མཆན་འགྲེལ། ཕག་མོ་ཟབ་རྒྱའི་འཁྲུལ་འཁོར་གྱི་རྩ་ཚིག་འགྲེལ་པ། ཞི་བྱེད་བཀའ་བབ་གསུམ་གྱི་དབང་ཆོག་དང་ཁྲིད་ཡིག་ཆ་ཚང་། གསར་སྙིང་སྤྱི་འགྲོའི་དབང་བཤད་རྣམས་སོ། །ལག་ལེན་གྱི་སྐོར་ལ། ཁྲག་འཐུང་ཁྲོ་བོའི་རྩ་འཆམས་ཀྱི་བརྗེད་བྱང་ཀུན་བཟང་རྣམ་པར་རྩེན་པའི་རོལ་མོ། མཆོད་གར་གྱི་བརྗེད་བྱང་མཆོད་སྤྲིན་རྣམ་པར་སྤྲོ་བའི་རོལ་མོ་དང་། གླུ་ཡིག་རབ་གསལ་སྣང་བ། གཞན་ཡང་བཀའ་བརྒྱད་ཕུར་པ་འཇོམས་བྱེད་བླ་མ་གསང་འདུས་ཀྱི་དབྱངས་ཡིག་བྱང་བུ་སོགས་ཉེར་མཁོའི་ཟིན་བྲིས་ཕྲན་བུ་མང་པོ་ཡོད་ཀྱང་འདིར་མ་སྨྲོས་ལ། བཀའ་བརྒྱད་བདེ་འདུས་དང་སྒྱུ་འཕྲུལ་ལམ་རིམ་གཉིས་ལ་སྤྱི་མ་ཊཱིཀ་རེ་རྩོམ་པའི་དམ་བཅའི་རི་མོ་ཡིད་ལ་གཅགས་རུང་། ད་རང་མི་འགྲུབ་པ་འདྲའོ། །

ལྷག་པའི་བསམ་པས་དོན་གཉིས་འགྲུབ་འགྱུར་ལ་སྨོན་ལམ་ཇི་ལྟར་བཏབ་ཚུལ།

― MLP003_Page_0336 ―

^{[མ་དཔེ་གཟིགས་ན་འདིར་གནོན།]}

[Full Size]

དྲུག་པ་ལྷག་པའི་བསམ་པས་དོན་གཉིས་འགྲུབ་འགྱུར་ལ་སྨོན་ལམ་ཇི་ལྟར་བཏབ་ཚུལ་ནི། དེ་ལྟར་རང་ནུས་དང་སྦྱར་བའི་འཆད་བརྩམས་ཀྱིས་གཞན་ཕན་རྣམས་དཀར་གྱི་བྱ་བ་ཆ་ཙམ་འགྲུབ་པ་ལྟར། སླད་མའི་ཆར་ཡང་ཚེ་མཇུག་འདི་དང་ཕྱི་མའི་སྐྱེས་རབས་ཀྱི་ཕྲེང་བར་དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་གཏེར་ཆེན་ཆོས་ཀྱི་རྒྱལ་པོ་རིགས་བདག་ཏུ་མི་འབྲལ་ཞིང་ཟབ་དོན་མན་ངག་གི་བདུད་རྩི་ངོམས་པ་མེད་པར་འཐུངས་པས་རང་རྒྱུད་གྲོལ་ཏེ། གཞན་ཕན་ཕྲིན་ལས་རྒྱ་ཆེ་ལ་རྒྱུན་མི་ཆད་པར་དཔག་བསམ་གྱི་ཤིང་དང་། བུམ་པ་བཟང་པོ་དང་། ཡིད་བཞིན་གྱི་ནོར་བུ་རིན་པོ་ཆེ་ལྟར་འབད་རྩོལ་མེད་པར་ལྷུན་གྱིས་གྲུབ་པས། ཐུབ་བསྟན་སྤྱི་དང་། བྱེ་བྲག་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་འགྲོ་བའི་མཆོད་སྡོང་དུ་མི་ནུབ་པའི་ཉི་མ་དང་མི་འགྲིབ་པའི་ཟླ་བ་ལྟར་འཛིན་སྐྱོང་

― MLP003_Page_0337 ―

^{[མ་དཔེ་གཟིགས་ན་འདིར་གནོན།]}

[Full Size]

སྤེལ་གསུམ་གྱི་བྱ་བ་རླབས་པོ་ཆེས་སྲིད་མཐའི་བར་དུ་དར་ཞིང་རྒྱས་པར་བྱེད་ནུས་པའི་སྐྱེས་བུ་མཐུ་ལྡན་དུ་སྨོན་པ། དེ་ཁོ་ན་ཉིད་དུ་འགྲུབ་པར་བྱིན་གྱི་རློབ་ཏུ་གསོལ་ལོ། །ཞེས་སྨོན་ལམ་བཏབ་པ་ལྟར་ཆོས་ཐམས་ཅད་སྨོན་ལམ་གྱིས་མཐའ་བསྒྱུར་བའི་ཕྱིར་གདོན་མི་ཟ་བར་འགྲུབ་སྟེ། འཇམ་དཔལ་གྱི་ཞིང་གི་ཡོན་ཏན་བཀོད་པ་ལས། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་ནི་དེ་བཞིན་ཉིད་དུ་འགྲུབ། །ཅེས་གསུངས་ཤིང་། པུཎྜ་རི་ཀའི་རྒྱུད་ལས། གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཟུང་། །ཞེས་པ་ལྟ་བུའི་སྙིང་སྟོབས་ཀྱིས་དམ་ཆོས་མ་ལུས་པ་ཡོངས་སུ་འཛིན་པར་བསྔོས་པར་གྱུར་ན་ནི། སྨོན་ལམ་ཐམས་ཅད་ཀྱང་རྒྱ་མཚོ་ཆེན་པོར་ཆུ་ཀླུང་ཇི་སྙེད་འཇུག་པ་ལྟར་འདུ་བར་བཞེད་དེ། བཟང་པོ་སྤྱོད་པའི་མདོ་ལས། རྒྱལ་བ་ཀུན་གྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྦྱོང་བ་ཡང་། །མ་འོངས་བསྐལ་པ་ཀུན་ཏུ་སྤྱོད་པར་ཤོག །ཅེས་གསུངས་པ་བཞིན་ནོ། །ངག་ཚིག་བདེན་པའི་གཏམ་གྱི་འབབ་སྟེགས་ལས། །རྣ་བའི་དབང་པོ་སྙན་འཇེབས་བདུད་རྩིའི་ཀླུང་། །ཆོས་གྲོགས་ན་ཚོད་མཐུན་དཔང་བློ་མཚོ་ལ། །འབབ་པས་ཡིད་ཆེས་དགའ་བའི་དཔལ་ཐོབ་འགྱུར། །༡གང་འདིར་མཁས་རྣམས་སྤྱན་རས་མི་གཡོ་ཞིང་། །བླུན་རྣམས་བྲག་ཆ་བཞིན་ལས་རྟོག་དཔྱོད་བྲལ། །གཟུར་གནས་རྒྱུས་ཡོད་བློ་ངོར་བདེན་གཏམ་སྟེ། །ཕྱོགས་ཞེན་རུས་ཅན་རྣ་བའི་བདུད་རྩིར་མྱོང་། །༢མཁས་རྨོངས་ཀུན་གྱི་སྙིང་ལ་ཐུན་མོང་དུ། །འབབ་པའི་གཏམ་གྱི་སྦྱོར་བ་སུས་འཆད་ནུས། །དེ་ཕྱིར་རེ་དོགས་འཆིང་བ་ལས་གྲོལ་བས། །དམ་པའི་གསུང་ངོར་མ་བཅོས་ལྷུག་པར་སྨྲས། །༣དག་སྣང་ཅན་ལ་ཁྱི་སོར་རིང་བསྲེལ་བཞིན། །འདི་ལས་རྣམ་དཀར་དགེ་འབྲས་འབྱུང་སྲིད་ན། །མཐའ་ཡས་ལུས་ཅན་ཡོངས་ལ་ཁྱབ་པར་བསྔོ། །ཀུན་ཀྱང་བྱང་ཆེན་སྤྱོད་མཆོག་མཐར་ཕྱིན་ཤོག །༤ཅེས་པ་འདི་ཡང་མཉམ་པ་མེད་པའི་བཀའ་དྲིན་ཅན་རྗེ་བླ་མ་དམ་པ་མཆོག་གི་བཀའ་ལུང་སྤྱི་བོར་ཕེབས་པ་ལྟར། དགེ་

― MLP003_Page_0338 ―

^{[མ་དཔེ་གཟིགས་ན་འདིར་གནོན།]}

[Full Size]

སློང་བློ་གསལ་རྒྱ་མཚོས་དར་དཀར་སྲིད་དུ་རིང་བ་དང་བཅས་གསུང་ལ་ཞབས་འཐུད་ཀྱིས་བསྐུལ་བ་དང་། ཉེ་བར་གནས་པ་དགེ་སློང་ཀུན་བློས་ཀྱང་ཡང་ཡང་གསོས་བཏབ་ཅིང་། ཁྱད་པར་རྒྱལ་བ་འཕགས་པ་ལྷའི་ཐུགས་ཀྱི་སྲས་ངག་དབང་མཆོག་གི་སྤྲུལ་པའི་སྐུའི་ཞལ་སྔ་ནས་དངུལ་སྲང་གསུམ་དང་བྱམས་པ་ཁ་བཏགས་ཀྱི་གནང་སྦྱིན་དང་བཅས་ཏེ་གསུང་གིས་བསྐུལ་བའི་ངོར་མདོ་ཁམས་ཀྱི་སའི་ཐིག་ལེ་ཆབ་མདོ་བྱམས་པ་གླིང་དུ་དབུ་བཙུགས་པ་ལས་འཕྲོས་ཅུང་ཟད་ལུས་པ། ཕྱིས་རྗེ་བླ་མ་དམ་པས་ཀྱང་གསར་བརྩམས་མདོ་དབང་རྣམས་བཤད་ཀྱི་དཔེ་རྡོ་རྗེ་བྲག་རིག་འཛིན་སྤྲུལ་པའི་སྐུའི་སྤྱན་སྔར་འབུལ་བར་མཛད་པ་ལ་ཤིན་ཏུ་དགྱེས་པའི་གཟིགས་པ་རྣམ་པར་དག་པས། རང་ཉིད་ཀྱི་རྣམ་ཐར་ཞིག་ཀྱང་རྩོམ་པར་རིགས་ཞེས་བཀའ་ལམ་དུ་སྩལ་འདུག་པ་ལྟར། རང་ལོ་དྲུག་ཅུ་པ་ཆུ་སྦྲུལ་ཧོར་ཟླ་དྲུག་པའི་ཚེས་བཅུ་གཅིག་ལྷག་པ་ལྷ་མཚམས་ཀྱི་འགྲུབ་སྦྱོར་འཛོམ་པའི་ཉིན་གྱི་ཉི་ཤར་ཕྱི་ཆ་བདུད་རྩི་ཐུན་མཚམས་ཀྱི་སྦྱོར་བའི་ཐོག་དགེ་སློང་རྨོངས་པ་དྷརྨ་ཤྲཱིས་རང་གནས་འཆི་མེད་འོད་སྣང་དུ་གྲུབ་པར་སྦྱར་བའི་ཡི་གེ་པ་ནི་ལེགས་གླིང་ཆོས་མཛད་དགེ་སློང་འགྱུར་མེད་མཆོག་གྲུབ་ཀྱིས་བགྱིས་པ་དགེ་ལེགས་འཕེལ། སརྦ་མངྒ་ལཾ།

མཁན་ཆེན་བླ་མ་མཆོག་གི་གཟིགས་སྣང་།

― MLP003_Page_0339 ―

^{[མ་དཔེ་གཟིགས་ན་འདིར་གནོན།]}

[Full Size]

མཁན་ཆེན་བླ་མ་མཆོག་གི་གཟིགས་སྣང་བཞུགས་སོ། །
ཤིང་རྟ་ལོ་ཁྲུམས་ཟླར་གར་དབང་ཚེ་དཔག་མེད་ཀྱི་བསྙེན་མཚམས་ཟླ་གཅིག་བགྱིས་དུས་ཀྱི་རྨི་ལམ་མཚར་འདྲ་སྙམ་པ་རྣམས་ཟིན་ཐོར་བཀོད་པ་ལ། ཟླ་བ་བརྒྱད་པའི་ཚེས་བཞིའི་ནམ་སྨད་ཐོར་ཐུན་ལ་ལྡང་ཉེའི་དུས། དར་གླིང་འདོད་རྒུ་གླིང་གི་སྐར་ཁུང་སུམ་རལ་མའི་འཁྲིས་དེར། ཨ་མ་དྲུང་གིས་བདག་རང་ལ་རྒྱ་ནག་གི་སྒམ་ཆེ་ཆུང་དྲེལ་སྒམ་ཙམ་པ་སྒོ་ལྕགས་བཅུག་པ་ཞིག་གནང་ནས། འདི་གཡུ་སྒྲ་སྙིང་པོའི་ཕྱག་སྒམ་ཡིན་པར་འདུག །ངས་ཞེན་རང་གིས་ཉོས་པ་ཡིན་པས་ཁྱེད་རང་གི་གཟིམས་ཆུང་དུ་སྒྲིག་པ་ཞུ་གསུངས་བར། སེམས་ལ་གཏོར་སྟེགས་ཀྱི་དོམ་སྒམ་གོག་པོ་དེ་བརྗེས་ན་ཡོང་འདྲ་སྙམ་པ་ལ། ཁ་ནས་ང་ལ་འདིར་འཇུག་རྒྱུའི་ཆས་མེད་ཀྱང་དེ་ག་ཞུ་ཞེས་བདག་གིར་བྱས་པ་རྨིས། ཚེས་དགུའི་གྲྭ་ཚང་གི་ཚེས་བཅུ་ཡིན། དགོང་ཐུན་ཚུགས་པའི་འགོའི་སྐྱབས་ཡུལ་གྱིས་དྲན་པ་གསོས་པའི་ཚེ་རྗེ་བླ་མ་དམ་པ་དྲན་པའི་གདུང་ཤུགས་བཟོད་མེད་དུ་འབར་བ་དེ་ག་ཇེ་རྒྱས་སུ་སོང་བའི་བཟླས་པ་ཚུགས་ནས་འཕྲེང་སྐོར་གསུམ་ཙམ་སླེབས་དུས་གདུང་ཤུགས་ཀྱི་དད་པ་ནོན་ཐབས་མེད་པའི་ངང་ལ། སྒྲུབ་རྫས་ཀྱི་སྟེང་གི་བར་སྣང་ལ་རྗེ་བླ་མ་སྟན་མེད་འཇའ་འོད་ཀྱི་གུར་ཁྱིམ་ཉིས་རིམ་གྱི་ནང་དུ་སྐུ་ངོ་བོ་ཁྲུ་གང་ཙམ་པ་ཕྱག་གཡོན་མཉམ་བཞགགཡས་པ་ས་གནོན་མཉམ་བཞག་གང་ཡིན་ད་ལྟ་རྣམ་པ་བློར་མི་གསལ། ཞབས་སྐྱིལ་ཀྲུང་ཅན་ཆེས་གསལ་བ་ལྷག་གིས་ཤར་བ་ལ་མོས་གདུང་གི་སེམས་འདྲེས་པ་ལྟ་བུའི་མི་རྟོག་པའི་ངང་དུ་ཐིམ་སོང་བ་དང་སྣང་བ་དེ་ཡལ། ཆུ་བུར་གྱི་མིག་གི་སྒོར་ཡེ་ཤེས་ཀྱི་སྐུ་ཅན་མཇལ་བ་དེས་དར་ཅིག་གཟིགས་པས་མོས་པས་དྲངས་པའི་བཟང་རྟོག་གི་མཐུ་བརྟས་པའི་ཉམས་ཙམ་དུ་ཟད་དོ། །

― MLP003_Page_0340 ―

^{[མ་དཔེ་གཟིགས་ན་འདིར་གནོན།]}

[Full Size]

ཡང་ཚེས་བཅུ་གཅིག་ནུབ་ཁང་པ་ཉི་འོད་རྒྱ་མཐོངས་ཅན་སྒམ་སྐོར་ཡོད་པ་ཞིག་གི་འཁྲིས་སུ་༧ཞབས་དྲུང་སྐུ་བགྲེས་པ་འགན་ཕྱར་ངུར་སྨྲིག་ཅིག་བསྣམས་ནས་མཉེས་སྟབས་ཀྱིས་རབ་གནས་ཀྱི་ཆོ་གའི་སྡོམ་ཚིག་སྔར་ཐོས་མ་མྱོང་པ་ཞིག་ཞལ་འདོན་དུ་གནང་། དེའི་སྐུའི་གཡས་འཁྲིས་དེར། བྱང་འདྲེན་པ་ཡིན་གྱུ་བའི་བཙུན་པ་ཞི་དུལ་ཅན་བྱད་ཨ་ཇོ་རྫོང་དཔོན་སློབ་འདྲ་བ་ནང་གཟན་ལེ་སྣ་ངུར་སྨྲིག་དང་། ཕྱི་གོས་ངུར་གྱི་ཕྱར་བུ་གྱོན་པ་ཞིག་སྤྱོད་ལམ་བསྟུན་པའི་འདུག་སྟངས་ཀྱིས་འདུག་པར་བདག་གིས་སྡོམ་ཚིག་དེ་གང་ཡིན་ཞུས་པར་བྱང་འདྲེན་པ་ཡིན་གྱུ་བ་དེས། ཞབས་དྲུང་རིན་པོ་ཆེ་ཐུགས་རབ་རྩལ་ཆེ་དྲགས་པས། ད་གདུང་འབུམ་གྱི་རབ་གནས་གནང་རྩིས་ལ་སྡོམ་ཚིག་འདིས་སྲོག་བཟུང་ནས་ཆོ་ག་ཕྲལ་ཕྲལ་གསར་བཟོས་ཀྱིས་གནང་གི་ཡིན་འདུག་ཅིང་། ཕྱག་ནས་འཐོར་བར་སྐུ་ཞབས་དེ་ཉིད་རང་ཕེབས་རྒྱུ་ཡིན་འདུག་ལགས་ཟེར་བ་ལ། རང་ཡང་མཇལ་འོང་སྙམ་དགའ་ཚོར་བྱེད་པ་རྨིས། ཚེས་བཅུ་གཉིས་ཀྱི་ནུབ་ཞབས་དྲུང་སྐུ་མཆེད་དང་། ཨ་ཁུ་ལགས་བཅས་ང་རང་གི་མཚམས་ནང་དུ་ཕེབས་ནས་གཉེན་གཤིན་པའི་གསུང་འཕྲོས་མང་པོ་དང་། བཀྲ་ཤིས་རྫས་བརྒྱད་དངུལ་ལས་བཟོས་པ་དེ་འདྲ་བསྣམས་ནས་འདུག་པ་ལ་ལྟད་མོ་བལྟ། ཚེས་བཅུ་བཞིའི་ནུབ་ལུང་པ་ཤར་ནས་ཁ་ལྷོ་ནུབ་ཕྱོགས་སུ་བལྟ་བའི་ལུང་པའི་དབུས་དེར། རི་བོ་ནས་ཕུང་སྒྱུར་བ་ལྟ་བུ། དབྱིབས་དུང་གཡས་འཁྱིལ་གྱི་རྣམ་པ་ཤིན་ཏུ་དོད་པ། དེ་ག་ནས་བརྒྱུད་ཁྲིད་པའི། གཡས་ཀྱི་རི་ལོགས་དེར་ནགས་ཚལ་ལྗོན་ཤིང་གིས་བརྒྱན་པའི་རི་སྤོས་ཤིག་གི་སྟེང་སྔར་གྱི་དགོན་པ་བྱུང་ཤུལ་དེར་ངེད་རང་སླེབ་ནས་འདི་སྔར་ཀློང་ཆེན་པའི་དགོན་ཤུལ་ཡིན་གྱུ་བས། དེར་དགོན་པ་ཞིག་འདེབས་རྩིས་དང་། དེ་ཡང་གྲྭ་གཤོག་པའི་གྲྭ་པ་ལྟ་བུ་མི་བྱེད། རི་སྤོས་སྟེང་འདིར་འདུ་ཁང་ཞིག་དང་། དེའི་གཡོན་ལོགས་སུ་བླ་བྲང་ཐོག་གཅིག་མ་ར་མ་སྟེང་ཤོད་ཡོད་པ། མཐའ་མ་མཚམས་སྤྱིལ་ཆུང་ངུས་བསྐོར་བ་མཚམས་གྲྭའི་ཐུགས་དམ་བྱེད་མི་ཁོ་ན་སྡོད་ཆོག་པ་ཞིག་བྱེད་ཟེར། དེ་དུས་ཉི་མའི་དཀྱིལ་འཁོར་ནམ་མཁའི་དགུང་དུ་ཡོད་པ་ཤིན་ཏུ་གསལ། ཚེས་བཅོ་ལྔའི་ནུབ་ཁང་པ་ར་མ་སྟེང་ཤོད་ནག་ཡུག་ཡོད་པ་ཞིག་

― MLP003_Page_0341 ―

^{[མ་དཔེ་གཟིགས་ན་འདིར་གནོན།]}

[Full Size]

གི་སྟེང་དུ་རང་བསྡད། མཐིལ་དེར་མཆོད་དཔོན་རྒན་བུ་འདུག་པར། མཆོད་རྟེན་གྱི་གཟུངས་དྲིལ་ལ་དཔོན་སློབ་ཐ་གོང་པས་ཀྱང་རབ་གནས་གནང་གི་ཡིན་འདུག་པས་ལོང་ལ་ཕུལ་བྱས་པར། ང་ལ་ལོང་མེད། རབ་གནས་ཀྱི་གཏོར་མ་ཁྱད་ཐོན་སྔར་བཟོ་མ་མྱོང་བ་ཞིག་བཟོ་དགོས་པ་ཡོད་ཟེར། དེར་ང་རང་གིས་ལེན་དུ་ཕྱིན་པ་གཏོར་ཆ་དམར་པོ་ཞིག་ཏུ་གཟུངས་དྲིལ་ཆུང་ངུ་མང་པོས་གང་བ་ཁྱེར་ནས། ཐོག་མར་སྐུ་ཞབས་སུ་བསླབ་སྟོན་ཞུ་དགོས་སྙམ། སྐས་གཉིས་འཛེགས་ཏེ་སོང་། བཟང་ཡུལ་གྱི་ཚོམས་ཆེན་འགག་འདྲ་བའི་བར་ཁྱམས་ཀྱི་ཕུགས་སུ་ཁང་པ་ཀ་བཞི་མ་ལེགས་པ། ལྷོར་མཆོད་རྩེ་ཡོད་པ་ཞིག་གི་མདུན་དུ་ཁྲིའི་བཀོད་པ་ཡ་མཚན་པའི་ཁར་རྗེ་བླ་མ་བཞུགས་པའི་སྐུ་མདུན་དུ་བུད་མེད་སྐྲ་ཆེན་མ་དང་དཔྲལ་ཚེར་ཅན་རེ་གཉིས་ལས་བྱིངས་སྐྲ་རྒྱབ་བསྙིལ་དར་དམར་གྱིས་བསྡམས་པ་མང་པོས་བསྐོར་ཏེ་གུས་འདུད་ཀྱིས་འདུག་པར་སྲོལ་གཉིས་ཀ་དང་ཆོ་གའི་བབས་མི་འདྲ་བའི་སེམས་བསྐྱེད་ཅིག་འབོགས་པ་གནང་བ་ང་རང་གིས་ཀྱང་ཉན། ཁྱད་པར་སེམས་བསྐྱེད་དངོས་གཞིའི་སྐབས། སེམས་ཅན་ཐམས་ཅད་ཚེ་རབས་ཀྱི་ཕ་མ་ཡིན་པའི་བྱམས་སྙིང་རྗེས་དྲངས་པའི་བྱང་སེམས་ཀྱི་ཀུན་སློང་གསལ་འདེབས་ངོས། བརྗོད་པ་གསུམ་རེ་རེ་བཞིན་གྱི་མཚམས་སྦྱོར་དུ། ཕར་གྱུར་པའི་སེམས་ཅན་ཐམས་ཅད་ཚད་མེད་པའི་དོན་དུ། མར་གྱུར་པའི་སེམས་ཅན་ཐམས་ཅད་ཚད་མེད་པའི་དོན་དུ། ཕ་མ་གཉིས་ཀར་གྱུར་པའི་སེམས་ཅན་ཚད་མེད་པའི་དོན་དུ་ཞེས་སོགས་དང་། མཐར་བསྔོ་སྨོན་བཅས་གནང་བ་གྲུབ་སོང་བ་དང་། བདག་གིས་གཟུངས་འདི་རྣམས་ཐ་གོང་བར་ཕུལ་ཆོག་གམ་ཞུས་སོང་བར། ཕུལ་ཤོག་གསུང་པ་ལྟར། བདག་རང་སྐས་ཤིག་བབས་པའི་དཀར་ཕུབ་ཅིག་ཏུ་སླེབས་པ་དང་། ད་ལྟའི་མཆོད་དཔོན་འདུག་པ་འབུལ་དུ་བཏང་སོང་། རང་གི་བསམ་པར། ད་རེས་ཀྱི་སེམས་བསྐྱེད་དེ་ལུགས་གང་ཡིན་ཞུ་བ་མ་བྱུང་། ད་མཇལ་མི་ཡོང་སྙམ་བློ་སྐྱོ་བར་བྱེད། ཚེས་བཅོ་བརྒྱད་ཀྱི་ནུབ་གཙུག་ལག་ཁང་རྡོ་སྐས་རིང་པོ་འཛེག་དགོས་པ་ཞིག་གི་སྟེང་ནས་དུང་བུས་བྱུང་བ་ཚོགས་སུ་འགྲོ་སྙམ་ཕྱིན་པ་ན། མི་བྱིས་པ་སྦད་མགོ་ཅན། ཞིག་གིས་དོ་ནུབ་གཟིམས་པའང་འདི་

― MLP003_Page_0342 ―

^{[མ་དཔེ་གཟིགས་ན་འདིར་གནོན།]}

[Full Size]

གར་གནང་དགོས་ཀྱི་ཡིན་འདུག་ཟེར་བས། འོ་ན་འཁྱགས་ཡོང་ཟེར་གཟན་བླངས་ནས་ཉིས་བརྩེགས་གྱོན་ནས་སོང་བར། རྡོ་སྐས་འཛེག་དུས་ཆས་རིལ་གྲིལ་བ་ཞིག་སྐྱུར་བྱུང་བར། ལ་འུར་མགོ་ལ་ཕོག །སུའི་ཡིན་ནམ་ཟེར་བར། དགེ་སློང་པད་བསོད་ཀྱི་ཡིན་འདུག་ཅེས་བྱིས་པ་དེས་ཟེར་དེ་ནས་རང་ནང་དུ་སོང་བ་འདུ་ཁང་ཟླུམ་པོའི་ཚོམས་འདྲ་བ་ཀ་བ་བཅུ་གཉིས་ཙམ་ཞིག་གི་དབུས་སུ་རས་བྲིས་ཀྱི་དཀྱིལ་འཁོར་ལྟེ་བ་པད་འདབ་བཞིར་བདེ་མཆོག་ལྷ་ལྔ་བཀོད་པ་ཞིག་བཀྲམ་པར་མཆོད་པ་བག་གྲོ། དེའི་མདུན་གཡས་གྲལ་དུ་བྱང་འདྲེན་པ་སོགས་ངེད་རང་གི་གྲྭ་པ་ཡིན་གྱུ་བ་མང་པོ་ཚོགས། གཡོན་གྱི་འགོར་ཤིང་ཁྲིར་སྟེང་རང་བསྡད་པར་ཐམས་ཅད་ཀྱིས་གྲལ་ཕྱག་གུས་པས་བཙལ་ཏེ་ཚོགས་སོང་། དེར་བདག་གིས་དཀྱིལ་འཁོར་འདི་སུའི་ཡིན་བྱས་སོང་བར། བྱང་འདྲེན་པས་འདི་ཁྱོད་རང་གི་སྐྱེ་བ་སྔ་མའི་དཀྱིལ་འཁོར་ཡིན་འདུགདེར་ཡང་མ་ཟད་མཐའ་ཕྱིའི་སྒམ་སོགས་ཆས་འདི་ཐམས་ཅད་དེ་དུས་ཀྱི་ཡིན་འདུག་ཟེར། ང་རང་གི་བསམ་པར་སྔར་མཚལ་ཡང་དགོན་དུ་སྐྱེས་དུས་ཀྱི་ཆས་ཡིན་པ་འདྲ་སྙམ་བྱེད། ཚེས་ཉི་ཤུའི་ནུབ་དགེ་སློང་ཀུན་བློ་དང་ཚེ་དབང་རྡོ་རྗེ་སོགས་བྱེས་སོང་རྣམས་ཀྱི་རྨི་ལམ་དང་། དེ་རྗེས་བླ་མ་དམ་པས་སྒམ་ཞིག་ལ་ཞབས་སྟེགས་བྱམས་བཞུགས་ཀྱིས་བཞུགས་པའི་དྲུང་དུ། ཞབས་དྲུང་ཁུ་དབོན་རྣམས་དང་ལྕམ་དྲུང་། ངེད་རང་རྣམས་འདུག་པར་བཀའ་ལས་རྒྱུ་འབྲས་འདོར་ལེན་གྱི་བསླབ་བྱ་མང་པོ་དང་། ཁྱད་པར་སྔར་གྱི་བླ་མ་རྣམས་ཀྱི་གསུང་རྒྱུན་ལ། བདེ་འདུས་ཀྱི་རྣལ་འབྱོར་རྒྱུན་དབང་འདིར་ཁྲོ་དབང་རྒྱས་པའི་ཚིག་དོན་བསྡུས་པ་ལྟ་བུའི་དོན་དབང་ཡིན་གསུང་ཡང་། དེར་མ་ངེས་ཏེ། ཁྲོ་དབང་རྒྱས་པ་ནི་སྒྲུབ་སྡེ་རང་ལུགས་གཙོར་སྟོན་གྱི་དབང་ཐུན་མོང་མིན་པ་དང་། རྣལ་འབྱོར་རྒྱུན་དབང་སྒྲུབ་སྡེར་རྒྱུད་སྡེའི་དབང་དང་བབས་འདྲའི་ལུགས་གཙོར་སྟོན་ཡིན་པས་ཐུན་མོང་པ་ཙམ་དུ་ཟད་དོ་ཞེས་གསུངས། རྨི་ལམ་འཁྲུལ་སྣང་ལ་ངེས་བཟུང་དཀའ་ཡང་། དེ་གའི་བཀའ་སྲོལ་བཟུང་ནས་བཤད་ན་ལེགས་པོ་འོང་རྒྱུར་འདུག་པས་རྨི་ལམ་ཞེས་ཀྱང་བརྙས་པར་མི་བྱའོ། །ཚེས་ཉེར་གཅིག་གི་ནུབ། སྟོད་ཁམས་བྱ་རོག་ལྟ་བུའི་ལུང་པའི་ཆུ་གཞུང་

― MLP003_Page_0343 ―

^{[མ་དཔེ་གཟིགས་ན་འདིར་གནོན།]}

[Full Size]

ཞིག་ཏུ་མི་མང་པོ་འདུག་པས་རང་ལ་བལྟ། རང་ཉིད་རྨི་ལམ་ལ་གར་ཡང་བསྒྱུར་དུ་བཏུབ་སྙམ་པས་རི་ཕར་ཚུར་ལ་ཕར་འཕུར་ཚུར་འཕུར་གྱི་འཕུར་ཏེ་འགྲོ་བ། འཕྲེད་མཐུར་ལ་འཕུར་བ་བདེ་ཞིང་། གྱེན་དུ་ས་ལས་ཅུང་འཕགས་ནས་མ་གཏོགས་གནམ་འཕང་གཅོད་དཀའ་བ་དང་། ལན་ཅིག་རང་ལུས་བྲག་གཅིག་གི་སྟེང་དུ་བབས་པ་ན་བྲག་ལ་ཐིམ་སོང་བ་དང་། ཡང་དེ་ལས་ཐོན་ཏེ་འཕུར་བ་རྨིས། ཚེས་ཉེར་ལྔ་ལ་དགེ་སློང་བློ་གསལ་རྒྱ་མཚོ་འོངས་ནས། གུང་རུ་བའི་ཁང་པ་ལ་ཆུ་ཤོར་སོང་ཟེར། གནོད་པ་ཆེ་བ་རང་མ་བྱུང་ངམ་བྱས་པས། དཀའ་མོ་བྱུང་ཟེར། རང་གི་བསམ་བློར་ན་ནིང་གྲོ་བོ་ལུང་ལ་གནོད་ཆེ་བའི་ཚོད་ན། ཁྲ་ཚང་ཁང་རྙིང་ཡིན་པས་གནོད་རང་ཡོད་དམ་སྙམ་བྱེད། དེ་ལས་ཕྱིན་པ་ན། ལྷ་སའི་ཀགྣི་སྒོ་བཞི་འདྲ་བ་ཞིག་གི་འོག་ཏུ་མཛེ་མོ་གདོང་འཐབ་ཤུས་གང་བ་ཞིག་འདུག་པ་དེས། རང་ལ་གུས་པ་དང་བཅས་པས་ངེད་ཀྱི་ནད་འདི་ལ་ལྗགས་སྔགས་ཤིག་ཞུ། ངའི་འདི་ལ་ཕན་ན་མང་པོ་ཞིག་གི་ནད་དྲགས་འགྲོ་བ་ཡོད་ཟེར། ང་རང་ཞེ་འཇིགས་སེ་བའི་ངང་ནས་ནཱ་ག་རཀྴའི་སྔགས་བགྲང་ཞིང་སྔགས་ཆབ་འདེབས་པ་རྨིས། ཚེས་ཉེར་བདུན་ལ་རང་ལུས་གཞན་ལས་ཡང་ཟོར་ཆེ་བས་ཟླུམ་པོའི་སེར་མཐོ་བསྐོར་སའི་ས་ཁྱོན་ལ་བདེ་དོག་མེད་པར་འགྲོ་ཞིང་། ལུང་གཞུང་དེ་ན་ཡོད་པའི་རྡོ་རྩེག་གིས་བརྩིགས་པའི་ཆུ་ཡུར་ལ་ཆུ་དྲངས་འདུག་པར། གང་ཡིན་དྲིས་པས། འདི་ཐུགས་ཐིག་གི་འཁོར་ལོའི་ཆུ་ཡིན། རྒྱུན་ཆད་མེད་པ་འབབ་པས་ཆུ་བརྟན། འདིའི་ཆུ་རྒྱུད་དུ་ཆུ་བཏགས་ཀྱི་འཁོར་ལོ་འཛུགས་སྙམ་ཡང་ཅུང་ཟད་མི་འཁོར་བ་འདྲ་ཟེར། ཚེས་ཉེར་བརྒྱད་ལ་འདུ་ཁང་བཀོད་པས་མཛེས་པའི་ཁོར་ཡུག་ཏུ་ཀ་དར་ཅིག་དོར་བའི་མཚམས་སུ་བླ་སྐུ་མཚར་བ་ཕྲེང་ཚར། དེའི་དབུས་སུ་ཁྲི་བཀོད་པ་མཚར་བར་རྗེ་བླ་མ་བཞུགས། དེའི་མདུན་དུ་གྲལ་གཡས་གཡོན་ལ་གྲྭ་པ་ཚོགས་པར་རོལ་ཆ་གྲ་འགྲིག་ཅན། དེར་བྱམས་གླིང་མཁན་པོའི་བསྔོ་རྟེན་ཡིན་ཁུལ་གྱི་བླ་ཆས་དང་གྲྭ་ཆས་མང་པོ་ཕུལ་བ། བདག་རང་གིས་མགྲོན་གཉེར་བྱས་ནས་ལེན། འབུལ་མི་དྲག་ཤོས་མི་སྐྱ་དེ་གཡོན་ཟུར་དུ་སྟག་གདན་ལ་བཞག་སོང་བར། རྗེས་ཨེམ་ཆིས་དགུང་ལོ་དུ་ལོན་གནང་སོང་བར། ལན་གང་ཡང་ཕུལ་

― MLP003_Page_0344 ―

^{[མ་དཔེ་གཟིགས་ན་འདིར་གནོན།]}

[Full Size]

མ་སོང་། འབུལ་བ་ཁྱེར་མི་དོན་གྲུབ་བློ་གསལ་ཡང་འདུག །དེའི་མ་དེ་ཡིན་གྱུ་བའི་བཙུན་མ་ཞིག་གིས། འདི་ཁྱི་དེའི་བསྔོ་རྟེན་ཡིན་ད་ཁྱི་རང་བྱས་ན་མི་ཡོང་བ་འདྲ་ཟེར་བསྔོ་བ་ནི་མ་གནང་། ཡང་རང་དེ་ལས་ཕྱིན་པས། གཙུག་ལག་ཁང་གི་གཡོན་ལོགས་འདིར། སྔར་ས་སྐྱའི་བླ་བྲང་ད་ལྟ་རང་རེའི་ཡིན་གྱུ་བའི་ཁང་བཟང་དམར་པོ་བད་སོགས་ལེགས་པ་མཐོ་དམའ་གཙང་ཁང་དབུ་རྩེ་དང་འདྲ་བ་ཞིག་གི་མདུན་དུ་སླེབས་པ་དང་གཉིད་སད། ཡང་ཚེས་ཉེར་དགུའི་ནུབ། ངེད་རང་ལ་རྟ་ཁ་ཤས་བཅས་རྟ་ལ་བཞོན་ནས་འགྲོ་བར། ཞིང་ཚིགས་གཅིག་ཏུ་རྟ་ཐབས་ནས་ཇ་བཏུངས། དེ་ནས་རྟ་བཞོན་རྩིས་ལ་རང་གི་རྟ་ཤོར། གཉལ་པ་ཆོས་འཕེལ་སོགས་ཀྱིས་འཛིན་ཕྱིར་རྒྱུགས་ཀྱང་མ་ཟིན། རོགས་ངོ་ཤེས་པ་ཨོ་རྒྱན་གྲགས་པ། གཞན་ངོ་མི་ཤེས་པ་མང་པོ་རྟ་བཞོན་ནས་གཙུག་ལག་ཁང་གི་ལྷོ་འདི་ཡིན་གྱུ་བར་ཆུ་གཙང་པོ་ལྟ་བུ་ཆེན་པོ་ཞིག་འདུག་པ་བརྒལ་ནས་སོང་། རང་ཕྱིར་ལོག་སྟེ་ཁང་པ་དཀར་ཕིབས་ཡོད་པ་ཞིག་ཏུ་སླེབས་པ་དེའི་ཐོག་གི་ཁར་རྗེ་བླ་མའི་ཞབས་ཕྱིར་བླ་མ་རྩེ་ལེ་བ་དང་། ལེགས་གླིང་རྒྱན་རྒྱན་ལགས་སོགས་མང་པོ་དང་བཅས་ཐོག་དབུས་སུ་གསེར་གྱི་གཉྫི་ར་དང་། ཟུར་བཞིར་རྒྱལ་མཚན་འཛུགས་པ་གནང་། བླ་མ་རྩེ་ལེ་བས་རང་ལ་གཉགས་ཀྱིས་མཛད་པའི་སྒྲ་ཊིག་ཡིན་ཞེས་དཔེ་ཆ་མདའ་ཚད་མ་དང་། པུསྟི་ཞིག་བྱིན་ཏེ། འདིར་ཡང་དཔེ་ཆ་ཁྱད་ཅན་མང་པོ་ཡོད་ཟེར། ཡང་ཚེས་སུམ་ཅུ་ལ། དཔོན་སློབ་བྱ་རྒོད་པ་ཡིན་གྱུ་བའི་དགེ་སློང་ཆོས་གོས་གསུམ་པ་ཞི་དུལ་ཅན་དང་སྔགས་ཀྱི་གཞི་ལམ་འབྲས་གསུམ་དང་། ཁྱད་པར་རྡོ་རྗེའི་ལུས་ལས་བརྩམས་པའི་འབེལ་གཏམ་མཚར་བ་མང་པོ་དང་། མི་གཞན་གཉིས་འོངས་ཏེ་བསྔོ་རྟེན་འབུལ་བར་སྔར་བློ་ལ་མེད་པའི་བསྔོ་བ་རྒྱས་པ་ཞིག་བྱས། དེ་ལས་བྱིས་པ་སྐྱེ་མཆེད་མཚར་བ་ཞིག་སྔར་རང་དང་འདྲིས་ཅན་ཡིན་གྱུ་བས་རང་གི་གདན་གཤམ་དུ་བསྡད་ནས་གཉེན་གཤིན་པས་སྐད་ཆ་བྱེད་པ་རྨིས། ཚེས་གཅིག་གི་ནུབ་མོའི་རྨི་ལམ་མཚར་བ་ཞིག་བྱུང་སྟེ་བརྗེད། ཤིང་ལུག་ཟླ་བ་བཅུ་པའི་ནང་དུ་ནུབ་གཅིག་གི་རྨི་ལམ་དུ། རང་གསང་སྔགས་ཕོ་བྲང་གི་ཞལ་རས་ལྷ་ཁང་འདྲ་བ་ལ་ཅུང་ཟད་དེ་ལས་ས་ཁུལ་ཡངས་པ་ཞིག་གི་ད་

― MLP003_Page_0345 ―

^{[མ་དཔེ་གཟིགས་ན་འདིར་གནོན།]}

[Full Size]

ལྟའི་ཀུན་བཟང་གི་སྐུ་ཡོད་ས་དེར། ཚེ་དཔག་མེད་ཀྱི་སྐུ་ཀུན་བཟང་དེ་ལས་སྐུ་ཚད་ཆེ་བ་ཞིག་གི་མདུན་དུ་རང་སྟན་ཁ་གང་མ་བརྩེགས་པ་ལ་བསྡད་འདུག་པར་བླ་མ་ཞིག་ཡིན་གྱུ་བའི་བནྡེ་ན་གཞོན་ཞི་དུལ་ཅན་འཁོར་ཁ་ཤས་ཡོད་པ་ཞིག་གིས་ཆོས་ཡོན་ཡིན་གྱུ་བའི་འབུལ་བ་མང་པོ་བཏོན་པ་ལ། དགེ་སློང་གིས་བླ་མ་དེ་ལ་མཎྜལ་ཞིག་གཏད་སོང་བ་ལ། དེ་གར་དབྱངས་ཅན་ཆོས་འཛོམ་སྔར་གྱི་དེ་ལས་མཛེས་ཉམས་གཞོན་ཤ་ཆགས་པའི་རྣམ་པས་ཐལ་གྱིས་འོངས་ནས་ཕྱག་བྱས་བླ་མའི་མདུན་ནས་མཎྜལ་དེ་བླངས་ནས་མོ་རང་གིས་བྱང་དྲངས་ནས་མཎྜལ་རྒྱས་པར་ཕུལ། དེ་གར་དངུལ་གྱི་ཊཱཾ་ཀའི་དབྱིབས་འདྲ་བ་ལ་ཁ་དོག་དམར་སེར་ཅན་གྱི་དོང་ཙེ་བདུན་མཎྜལ་གྱི་སྟེང་དུ་བཞག་སོང་བར། དེ་ལ་བརྟག་དཔྱད་ཀྱི་མཚན་མ་ཡོད་དམ་སྙམ་པ་བྱེད། དེ་ལ་ཆོས་ཤིག་ཅི་འཆད་དམ་སྙམ་པའི་མུར། རང་ཉེ་བའི་ཚེ་དཔག་མེད་ཀྱི་སྐུ་དེའི་སྐུ་གཟུགས་ཤེལ་ལྟར་དྭངས་པ་ལ་ཡི་གེའི་རྣམ་པ་མེ་ལོང་གི་གཟུགས་བརྙན་ལྟར་ཤར་བ་ཞིག་འདུག་པ་དེ་ཀློག་པའི་ཚུལ་གྱིས་ཆོས་བཤད་སོང་བས། ཡི་གེ་དེ་རྣམས་མཚན་བརྒྱ་སོགས་ཚེ་གཟུངས་བློ་ལ་སྔར་ཡོད་པ་དང་སྔར་མེད་མང་པོ་འདུགཆོས་འབྲེལ་དེ་བྱས་རྗེས་ཐམས་ཅད་གུས་པས་ཕྱག་བྱས་ནས་སོང་། ང་རང་གིས་དོང་རྩེ་ལ་གྲངས་བྱས་ནས་འདི་ཚེའི་མཚན་མ་ཨེ་ཡིན་སྙམ་བྱེད་པ་རྨིས་པས། གལ་ཏེ་རྨི་ལམ་དེ་ལ་ངེས་པ་ཡོད་པ་ཞིག་ཡིན་ན། སྔར་ཤིང་སྤྲེལ་མས་ཚེ་ཚད་ལོ་བཅུ་བཞི་བསྟན་པ་ཁྱི་ལོས་རྫོགས་ཀྱི་ཡིན་པ་དེའི་སྟེང་དུ་བསྣོན་རྒྱུ་ཡིན་ན་ནི་རྟ་སྦྲུལ་ཙམ་ལའམ། རྨི་ལམ་བྱུང་ཆ་ནས་བརྩིས་ན་སྟག་ཡོས་ཙམ་གྱི་བར་ཨེ་ཡིན་སྙམ་ཡང་། འཁྲུལ་པའི་རྨི་ལྟས་ལ་དེ་འདྲའི་ངེས་པ་རང་ཨེ་ཡོང་ངམ། འདི་ནི་ཐུགས་དམ་གནང་བའི་ཟླ་གཅིག་གི་རིང་གཟིགས་སྣང་བྱུང་བ་ཕྱག་ཐོར་གནང་བ་ཡིན་གྱི་གཞན་དུ་ན་ཡོན་ཏན་སྦས་ཚུལ་ཁེངས་སྐྱུང་དབང་གིས་མ་བཀོད་མོད་དོན་དུ་འཕགས་ཆེན་གྱི་དག་པའི་གཟིགས་སྣང་ལ་ཚད་བཟུང་མི་ནུས་པར་ཤེས་དགོས་སོ།། །