འཇམ་དཔལ་དབྱངས་ཀྱི་སྒྲུབ་ཐབས་དང་འབྲེལ་བའི་སྨོན་ལམ་བྱིན་རླབས་སྤྲིན་ཆེན།
འཇམ་དཔལ་དབྱངས་ཀྱི་སྒྲུབ་ཐབས་དང་འབྲེལ་བའི་སྨོན་ལམ་བྱིན་རླབས་སྤྲིན་ཆེན་ཞེས་བྱ་བ་བཞུགས་སོ། །འདི་བསྒྲུབ་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེ་ཡིས་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །སྒྱུ་མ་ཆུ་ཟླ་འཇའ་ཡི་ཚུལ་བཞིན་དུ། །ཕྱོགས་དུས་རྒྱལ་བའི་མཁྱེན་རབ་འཇམ་པའི་དབྱངས། །སྣང་སྟོང་སྒྱུ་འཕྲུལ་དྲྭ་བའི་ཏིང་འཛིན་ལ། །རྩེ་གཅིག་བསྒོམ་དང་བཟླས་པའི་བསོད་ནམས་གང་། །ཟླ་འོད་ཀུན་ད་ལྟ་བུར་རབ་དཀར་བ། །མཆོག་ཏུ་དག་པ་གང་ཞིག་ཐོབ་པ་དེས། །བདག་དང་འགྲོ་ཀུན་ཐེག་མཆོག་ལམ་བཟང་ནས། །རྒྱལ་བ་སྐུ་བཞིའི་གོ་འཕང་འགྲུབ་གྱུར་ཅིག །མཚན་ཉིད་ཀུན་ལྡན་རྡོ་རྗེའི་བླ་མ་ལས། །སྨིན་བྱེད་དབང་གིས་བདག་རྒྱུད་ཡོངས་སྨིན་ཞིང་། །རྣམ་དག་དམ་ཚིག་སྡོམ་པར་ལེགས་གནས་ནས། །རིམ་གཉིས་ཟབ་མོའི་ལམ་ལ་འཇུག་པར་ཤོག །མཚན་དཔེའི་སྣང་བ་བརྒྱ་པས་མཐའ་ཡས་ཞིང་། །རབ་གསལ་དམར་སེར་འོད་ཀྱི་དྲྭ་བ་ཅན། །དྲན་པས་མཆོག་གི་བདེ་སྟེར་ཡིད་འོང་སྐུའི། །གསལ་སྣང་ཏིང་འཛིན་ཚད་དུ་ཕྱིན་པར་ཤོག །རིག་པའི་རྒྱལ་པོ་གསང་སྔགས་ཡི་གེ་བརྒྱད། །རྒྱུ་སྐར་ཕྲེང་བས་བསྐོར་བའི་ཟླ་རྒྱས་བཞིན། །སྙིང་གི་ཆུ་སྐྱེས་དབུས་སུ་རྣམ་བསམ་པས། །སྡོམས་པའི་གཏེར་
ཆེན་བརྒྱད་པོ་གྲོལ་གྱུར་ཅིག །སྲིད་ཞིའི་གཟུངས་དང་སྤོབས་པ་བློ་གྲོས་སྟོབས། །རབ་གསལ་ཨཱ་ལི་ཀཱ་ལིའི་རྡུལ་ཕྲན་གྱི། །རྣམ་པ་འོད་ལྔ་འབར་བའི་འཕྲོ་འདུ་ཡིས། །བརྟན་གཡོའི་དྭངས་བཅུད་རང་དབང་བྱེད་གྱུར་ཅིག །སྙིང་ག་རིན་ཆེན་དཔལ་གྱི་བེའུའི་ཁྱོན། །སྔགས་མཆོག་མར་མེ་འབར་བའི་སྣང་བ་ཡིས། །ཐོགས་མེད་ལེགས་བཤད་རྩོམ་པའི་བློ་གྲོས་མཐུ། །སྲིད་པ་གསུམ་ན་མཚུངས་པ་མེད་གྱུར་ཅིག །རོ་འཛིན་མཐེ་བོང་འབར་བའི་རལ་གྲི་ལ། །རྣམ་བཀོད་རིག་སྔགས་རྒྱལ་པོའི་འཁྲུལ་འཁོར་གྱིས། །ཕས་རྒོལ་སྨྲ་བ་ངན་པའི་དྲྭ་བ་ཀུན། །གཅོད་པ་སྨྲ་བའི་སེང་གེར་གྲུབ་གྱུར་ཅིག །མགྲིན་པ་བཀྲ་ཤིས་གཡས་སུ་འཁྱིལ་བའི་དུང་། །རྒྱལ་ཀུན་གསུང་གི་རྡོ་རྗེ་དབྱངས་གསལ་གཟུགས། །འོད་འབར་རང་སྒྲ་སྒྲོགས་པས་ཡོངས་གང་བས། །ལེགས་བཤད་ཆོས་ཆར་འབེབས་པའི་མཐུ་གྲུབ་ཤོག །ལུས་གནས་ཤེས་རབ་ཡི་གེའི་རང་གཟུགས་ནི། །རབ་དམར་བདེ་སྟོང་ཆགས་པ་རྡོ་རྗེའི་མདས། །སྲིད་ཞིའི་དྭངས་བཅུད་དབང་མེད་འཕྲོག་པ་སོགས། །རབ་འབྱམས་ཕྲིན་ལས་ཐོགས་མེད་གྲུབ་པར་ཤོག །གང་སྣང་སྣང་སྟོང་སྐུ་ཡི་དཀྱིལ་འཁོར་དུ། །ངེས་ཤེས་ལྟ་བའི་དོན་བཞིན་བསྒོམ་པའི་སྟོབས། །མཐར་ཕྱིན་སྣང་སྲིད་ལྷ་སྐུའི་རྣལ་འབྱོར་གྱིས། །ཐ་མལ་སྣང་ཞེན་དྲི་མ་དག་པར་
ཤོག །ཡེ་ཤེས་སྐུ་ཡི་བདག་ཉིད་རིག་པའི་ལྷ། །གྲུབ་པ་བཞི་ལྡན་སྔགས་ཀྱི་ཚུལ་ཤར་བས། །རྩ་གནས་ཡི་གེའི་འཁོར་ལོ་བྱིན་བརླབས་ནས། །རླུང་སྔགས་དབྱེར་མེད་རྡོ་རྗེའི་གསུང་གྲུབ་ཤོག །སྲོག་གི་རྩོལ་བ་བདེ་སྟོང་དྷཱུ་ཏི་རུ། །མི་ཤིགས་སྔགས་ཀྱི་ཐིག་ལེར་ཡོངས་བསྡམ་པས། །གཞིར་གནས་བདེ་བའི་ཐིག་ལེ་གསོས་འདེབས་ཤིང་། །ཟབ་དོན་སྔགས་ཀྱི་མཐུ་བྱིན་འཇུག་པར་ཤོག །དབྱིངས་ཀྱི་རང་གཟུགས་རབ་འབར་ཙཎྚ་ལིས། །བདེ་བའི་ཧཾ་ཡིག་རི་བོང་འཛིན་པའི་རྒྱུན། །རབ་བསྐུལ་སྔགས་ཀྱི་མར་མེ་སྙིང་དབུས་སུ། །བདེ་ཆེན་འོད་བརྒྱའི་ཉམས་སུ་འབར་བར་ཤོག །སྣ་ཚོགས་་ཀུན་རྟོག་བསྐྱེད་པ་གཡོ་བའི་རླུང་། །ཇི་སྙེད་རྩ་ལ་གནས་པ་འཕོ་བའི་ཆ། །བདེ་ཆེན་དྭངས་མའི་སྔགས་སུ་གནས་འགྱུར་ཏེ། །གཞོམ་མེད་སྔགས་ཀྱི་རྒྱལ་པོ་གྲུབ་པར་ཤོག །ཇི་སྙེད་བརྗོད་པ་ཀུན་ཀྱང་མི་ཤིགས་པའི། །རྡོ་རྗེ་སྔགས་ཀྱི་གདངས་དང་རོ་མཉམ་པས། །གྲགས་སྟོང་སྐྱེ་བ་མེད་པ་རིག་པའི་སྒྲ། །རྒྱལ་ཀུན་གསུང་གི་དེ་ཉིད་འགྲུབ་པར་ཤོག །བདེ་ཆེན་དགའ་བ་མཆོག་གི་ཡེ་ཤེས་ནི། །མཐོང་བས་འདྲེན་བྱེད་རྡོ་རྗེ་དབྱངས་ཅན་མ། །ཞིང་སྔགས་ལྷན་སྐྱེས་ཕོ་ཉའི་རྣམ་པ་ཡིས། །འོད་གསལ་བདེ་བའི་དེ་ཉིད་སྦྱིན་གྱུར་ཅིག །བཅུ་དྲུག་དགའ་
བའི་ཆ་རྫོགས་རི་བོང་འཛིན། །ཆུ་སྐྱེས་མཆོག་གི་དབུས་ན་ལེགས་གནས་པ། །བདེ་སྟོང་མཉམ་པར་སྦྱོར་བ་སྔགས་ཀྱི་རྒྱས། །མ་ལུས་ཆོས་ཀུན་དབྱིངས་སུ་སྡོམ་གྱུར་ཅིག །ཀུན་ཏུ་རྟོག་པའི་སེམས་དང་བཞོན་པའི་རླུང་། །ཕྲ་ཞིང་ཕྲ་བའི་འཕོ་བ་འཕོ་མེད་དུ། །ཡོངས་ཐིམ་གཉུག་མ་དོན་གྱི་འོད་གསལ་ངང་། །སྒྲིབ་བྲལ་ལྷན་ཅིག་སྐྱེས་པ་མངོན་གྱུར་ཅིག །སྣང་སྲིད་གདོད་ནས་བདེ་བ་ཆེན་པོ་ལ། །རྗེས་མཐུན་བདེ་བ་སྔགས་ཀྱི་ལྟ་སྤྱོད་ཀྱིས། །གང་སྣང་བདེ་བར་ཤར་བའི་རྣལ་འབྱོར་མཐུས། །མིག་འཕྲུལ་ལྟ་བུར་བདེ་མྱུར་གྲོལ་གྱུར་ཅིག །ཀུན་ཁྱབ་བདེ་བའི་གནས་ནི་རྣམ་སྤངས་ནས། །ཀུན་རྨོངས་འཁོར་བར་འཕྱན་པའི་འགྲོ་ཚོགས་ལ། །ཀུན་ཕན་སྒྱུ་འཕྲུལ་དྲྭ་བ་ཆེན་པོའི་སྤྲིན། །ཀུན་ནས་འགོགས་མེད་ངང་གིས་གསལ་གྱུར་ཅིག །བཞིན་ལེགས་ཡེ་ཤེས་སྐུ་ཡི་མཚན་དཔེ་ནི། །སྣང་སྟོང་འཇའ་ཚོན་ཆུ་ཟླའི་ངང་ཚུལ་ཅན། །རབ་འབྱམས་དཀྱིལ་འཁོར་འཁོར་ལོའི་ཁྱབ་བདག་ཏུ། །ལྷུན་གྱིས་གྲུབ་པའི་དཔལ་ལ་རོལ་གྱུར་ཅིག །མ་ལུས་ཆོས་ཀུན་དེ་ཡི་རང་སྣང་ལས། །རང་གི་དངོས་པོ་རྣམ་སྤང་བདེ་བ་ཆེ། །བདེ་བའི་བདག་ཉིད་སྟོང་པར་དབྱེར་མེད་དཔྱིད། །བདེ་སྟོང་འཇམ་པའི་རྡོ་རྗེར་མངོན་གྱུར་ཅིག །རང་སེམས་གདོད་ནས་སྟོང་པའི་སྤྲོས་བྲལ་དང་། །དབྱེར་མེད་རིག་གདངས་ལྷུན་གྱིས་གྲུབ་པའི་ངང་། །
འཁོར་འདས་ཆོས་ཀུན་མཉམ་པ་ཉིད་གྱུར་པ། །གནས་ལུགས་གཞི་ཡི་འཇམ་དཔལ་རྟོགས་པར་ཤོག །སྟོང་དང་སྙིང་རྗེ་དབྱིངས་དང་རིག་པའི་ཆ། །མཉམ་སྦྱོར་ལམ་གྱི་ཡེ་ཤེས་རྨད་བྱུང་གང་། །མཐའ་གཉིས་མུན་པ་འགོགས་པའི་ངང་ཚུལ་ཅན། །བགྲོད་པ་ལམ་གྱི་འཇམ་དཔལ་བསྟེན་པར་ཤོག །ཁྱད་པར་བདེན་གཉིས་དབྱེར་མེད་རིག་དབྱིངས་སུ། །རྨད་བྱུང་སྐུ་གསུམ་རང་སྣང་འོད་གསལ་སྤྲིན། །ཤེས་རབ་རང་བྱུང་སྒྲོན་མེའི་སྣང་བ་ཡིས། །གཟུང་འཛིན་སྒྲིབ་པའི་མུན་པ་འཇོམས་གྱུར་ཅིག །སྒྲིབ་གཉིས་ས་བོན་དྲུང་ནས་ཕྱུངས་པ་ཡི། །ཆོས་ཀུན་མཉམ་པ་ཉིད་ཀྱི་ཡེ་ཤེས་སྐུ། །བླ་ན་མེད་པའི་ཡོན་ཏན་ཀུན་གྱི་གཏེར། །མཐར་ཐུག་འབྲས་བུའི་འཇམ་དཔལ་ཐོབ་པར་ཤོག །དེ་ལྟར་ལེགས་པར་སྨོན་ལ་འཇམ་པའི་དབྱངས། །རྩ་གསུམ་རྒྱ་མཚོའི་འཁོར་གྱིས་བསྐོར་བ་དང་། །རྒྱུད་གསུམ་སྲུང་མ་དྲེགས་པའི་ཚོགས་བཅས་ཀྱིས། །འགྲུབ་པའི་དགེ་མཚན་ཤིས་པའི་དཔལ་སྩོལ་ཅིག །བཀྲ་ཤིས་འཆི་མེད་གྲུབ་པའི་དགའ་ཚལ་དུ། །བཀྲ་ཤིས་སྟོན་འཁོར་ཕུན་ཚོགས་འདུས་པའི་དུས། །བཀྲ་ཤིས་གསང་ཆེན་ཆོས་རྔ་བརྡུང་བའི་ཚེ། །བཀྲ་ཤིས་མཚན་ཅན་དམ་པས་བསྐུལ་བ་ལས། །འཇམ་པའི་དབྱངས་ཀྱི་སྨོན་ལམ་ལམ་རིམ་དང་། །མཐུན་པར་སྦྱར་བ་བྱིན་རླབས་སྤྲིན་ཆེན་འདི། །འཇམ་དབྱངས་རྣམ་པར་རྒྱལ་བའི་རིག་ཁམས་ལས། །རྣམ་པར་སྤྲོས་གང་དགེ་ཞིང་ཤིས་གྱུར་ཅིག །