བཅུད་ལེན་གྱི་ཆ་ལག་རིན་ཆེན་ཟ་མ་ཏོག
བཅུད་ལེན་གྱི་ཆ་ལག་རིན་ཆེན་ཟ་མ་ཏོག་བཞུགས་སོ། །
ན་མོ་གུ་རུ་པདྨ་མཉྫུ་ཤྲཱི་བཛྲ་ཏིཀྵྞ་ཡ། འདིར་བཅུད་ལེན་ལག་ཏུ་བསྟར་བའི་ཚུལ་ནི། དང་པོ་ཐོ་རངས་མལ་ནས་ལངས་ཏེ་ལུས་བསྲངས་ལ་ང་རོ་བསལ། རང་འཇམ་དཔལ་གསལ་ལ་བདུད་རྩིའི་བཅུད་བསྡུ་ཞིང་སྙིང་གི་དཔྱིད་སྤེལ་བའི་དམིགས་པ་བཅས་རིལ་བུ་བཟའ། རླུང་ཁུགས་ཅི་རིགས་བཟུང་། སླར་འོད་གསལ་དུ་བསྡུས་པའི་ངང་ནས་རང་མཱ་མ་ཀིར་དཀྲོང་བསྐྱེད་དམིགས་པ་བཅས་མཱ་ཀིའི་སྔགས་ཅི་རིགས་བཟླ། མཐར་ཕྱོགས་བཅུའི་རྒྱལ་བ་སྲས་དང་བཅས་པས་བདག་གི་ལུས་རྡོ་རྗེར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་ལ་གནས་གསུམ་འབྲུ་གསུམ་དཀར་དམར་མཐིང་གསུམ་གྱི་རྒྱས་བཏབ་སྟེ་མཱ་ཀིའི་ཕྱག་རྒྱ་གནས་གསུམ་བཞག །ན་མཿཙནྜ་དང་ཧཱུྃ་བཛྲ་བིད་སྭཱ་ཧཱ། ཞེས་བརྗོད་པས་སྒོ་གསུམ་རྡོ་རྗེར་གྱུར་པར་བསམ། སྐད་ཅིག་གིས་འོད་གསལ་དུ་བསྡུ། སླར་སྐད་ཅིག་གིས་སངས་རྒྱས་སྤྱན་མའི་སྐུར་བསྐྱེད་ཐུགས་ཀའི་སྔགས་ཀྱི་འོད་ཟེར་འཕྲོ་འདུ་དང་། སྤྱི་བོར་ཨོཾ་ལས་བདུད་རྩི་བསྡུ་འབེབས་དམིགས་པ་བཅས་སྤྱན་མའི་སྔགས་བཟླ་ཞིང་མཐར་ཟླ་བ་ཨོཾ་བཅས་བདུད་རྩིར་ཞུ་བས་ཚངས་བུག་ནས་རང་ལུས་གང་། ལྕགས་ལ་གསེར་འགྱུར་རྩིས་ཐེབས་པ་ལྟར་ལུས་དངས་མར་གྱུར་པར་བསམས་ལ་སྔགས་ཅུང་ཟད་བཟླ། དེ་ནས་ནམ་མཁའ་ཟས་སུ་ཟ་བའི་
དམིགས་པས་རླུང་ཁུག་ཇི་མང་བཟུང་། དེ་ནས་སྤྲོ་ན་དམ་རྫས་གནས་གང་ཡིན་བྱུགས་ལ་དབྱངས་གསལ་རྟེན་སྙིང་བཟླ། ལྷ་བསྡུ་ཞིང་སྨོན་ལམ་བཀྲ་ཤིས་བྱ་བ་ནི་ཐུན་དང་པོའི་བྱ་བའོ། །དེ་ནས་སྤྱོད་ལམ་ཐམས་ཅད་དུ་བདེ་བ་ལམ་ཁྱེར་དང་། བཟའ་བཏུང་ཅི་ཟ་བདུད་རྩིར་སྔགས་དམིགས་ཀྱིས་བརླབས། སྔགས་ནི་བདུད་རྩིའི་སྙིང་པོ་བཅུ་དྲུག་པའོ། །གཉུག་མའི་རིག་ངོ་བསྐྱང་བ་དང་སྒྱུ་མ་ལྟ་བུའི་རྩལ་སྦྱོང་ཀུན་ཏུ་བྱ་སྟེ་ཉིན་རིང་ཐུན་བར་མའི་ཆ་ལའོ། །འདི་སྐབས་སུའང་ནམ་བདེར་རིལ་བུ་བཟའ་ཞིང་སྙིང་གའི་དཔྱིད་སྤེལ་བ་དང་བཅུད་བསྡུ་ནམ་མཁའི་བཅུད་ལེན་སོགས་གང་མོས་གང་འཐད་བྱ། སྲོད་ལ་རང་གོས་དཀར་མོར་གསལ་ལ་དམིགས་པ་བཅས་དེའི་སྔགས་ཅི་རིགས་བཟླ། ཐུན་མཐར་འབར་འཛག་བསྒོམ་པ་ནི། ལུས་ཀྱི་སྟོང་ར་དང་རྩ་གསུམ་འཁོར་ལོ་བཞི་གསལ། རླུང་རོ་བསལ། རླུང་རྔུབ་པ་དང་མཉམ་དུ་འཁོར་འདས་ཀྱི་དངས་བཅུད་དང་ཁྱད་པར་བཀྲག་དང་བདེ་བ་ཐམས་ཅད་འོད་དམར་སེར་བདེ་བ་ཆེན་པོའི་རྣམ་པར་རང་གི་སྣ་བུག་ནས་ཞུགས། ལྟེ་འོག་སོར་བཞིར་གནས་པའི་ཨ་ཤད་ལ་ཐིམ་པས་རླུང་གིས་མེ་སྦར་བ་ལྟར་རིམ་གྱིས་འབར་ཏེ་མེ་ལྕེ་གློག་གི་ཟེར་མ་ལྟ་བུ་ཡར་དབུ་མའི་ལམ་དུ་བྱུང་། སྙིང་གར་བླ་མའི་ངོ་བོ་ཨཱོཾཿདམར་པོ་ལ་ཕོག་པས་
བདེ་དྲོད་ཆེར་གཡོས། མེ་ལྕེ་གྱེན་དུ་འབར་བས་སྤྱི་བོར་ཟླ་དཀྱིལ་ལ་གནས་པའི་ཧཾ་མགོ་ཐུར་བསྟན་ལ་རེག་པས་བདེ་བ་འབར་ཞིང་། དེ་ལས་བདུད་རྩི་དཀར་པོའི་རྒྱུན་མར་བབས། གཏུམ་མོའི་མེ་ཡི་གཞི་ཨ་ཤད་ལ་རེག་པ་ཙམ་ནས་མེ་ལ་མར་ཁུ་བྲན་པ་ལྟར་མེ་ཇེ་ཆེར་འབར། དེས་བདུད་རྩི་ཡང་ཆེར་ཞུ་སྟེ་བདེ་དྲོད་ཇེ་ཆེར་འབར། འོད་ཟེར་དཀར་དམར་འདྲེས་པས་རྩ་གནས་ཐམས་ཅད་དུ་བ་སྤུའི་མཐར་ཐུག་པར་ཁྱབ་པས། ལུས་ཀྱི་སྙིགས་མའི་ཆ་སྦྱངས། དངས་མའི་བདུད་རྩིས་ལྕགས་ལ་གསེར་འགྱུར་གྱི་རྩིས་ཐེབས་པ་ལྟར། ལུས་ཐམས་ཅད་དངས་མར་བསྒྱུར་བའི་རྩ་གནས་ཐམས་ཅད་བདེ་བ་ཆེན་པོ་འཆི་མེད་ཡེ་ཤེས་ཀྱི་བདུད་རྩིས་གཏམས་པའི་རང་བཞིན་འོད་དང་བཀྲག་མདངས་འབར་ཏེ་རྡོ་རྗེའི་ཚེ་དང་ལང་ཚོ་གྲུབ་པར་བསམས་ལ་སྦྱོར་བ་བཞི་ལྡན་གྱི་རླུང་ཅི་རིགས་བཟུང་ན། འདི་ཁོ་ནས་ཀྱང་རགས་ལུས་དངས་མར་འགྱུར་བའི་སྒྲོལ་མ་རླུང་གི་བཅུད་ལེན་འགྲུབ་པར་འགྱུར་རོ། །ཐུན་མཐར་ལུས་ཀྱང་ཇེ་དངས་ཇེ་དངས་འོད་ཀྱི་རང་བཞིན་ནམ་མཁའ་དང་འདྲེས་པར་བསམས་ལ་མཉམ་པ་ཉིད་ཀྱི་ངང་དུ་ཅི་གནས་སུ་བཞག་པས་རྒྱས་གདབ། དེ་ནས་མཚན་མོའི་དུས་སུ་འོད་གསལ་གྱི་གདམས་པ་སྤྱི་ལྟར་ཉམས་ལེན་བྱུང་ན་ལེགས། བརྒྱུད་པའི་རིག་འཛིན་ལ་གསོལ་འདེབས། ལྷ་
དང་མཁའ་འགྲོར་ཚོགས་བསྐང་དང་བཤགས་པ། སྨན་སྲུང་ལ་གཏོར་འབུལ་རྣམས་སྐབས་སུ་བྱ། བསོད་ནམས་ཀྱི་ཚོགས་ཅི་རིགས་བསགས། ཉིན་རེའི་བྱ་བ་འདི་ཁོ་ན་ལྟར་ཉིན་རེ་བཞིན་དུ་མ་ཆགས་པར་བརྩོན་པས་ཉམས་སུ་བླངས་ན་འགྲུབ་བོ་ས་མ་ཡཿ བཅུད་ལེན་གྱི་རྒྱབ་སྐྱོར་དུ་ཚེ་སྒྲུབ་པ་དང་ཚོགས་བསགས་པ་གལ་ཆེ་བས། དེ་ནི་གཞན་དུ་བརྩོན་པས་བསྒྲུབ་དགོས་ལ། རྒྱུན་དང་དུས་སུ་ཚེ་སྒྲུབ་ཁྱད་པར་བ་བྱེད་ན། ཐོ་རངས་ལག་རིས་མི་མཐོང་ཙམ་ན་མལ་ནས་ལངས་ཏེ། རང་ན་བཟའ་དཀར་མོར་གསལ་ལ་དེའི་སྔགས་བརྒྱ་རྩ་བརྒྱད་བཟླས། སྤྱི་བོར་པད་ཟླའི་གདན་ལ་ཚེ་དཔག་མེད་དམར་པོ་མཉམ་བཞག་གིས་བུམ་པ་བསྣམས་པ་ལོངས་སྐུའི་ཆས་ཅན་གསལ། དེའི་གཡས་སུ་ཉི་མ་དང་། གཡོན་དུ་ཟླ་གདན་ལ་ཉི་མ་དང་ཟླ་བའི་ལྷ་མོ་མདའ་དར་བུམ་པ་འཛིན་པ་གཉིས་ཀྱིས་འཁོར་འདས་ཀྱི་ཚེ་བཅུད་བཀྲག་མདངས་བསྡུས་ཏེ་ཚེ་དཔག་མེད་ཀྱི་ཕྱག་གི་བུམ་པར་བླུགས་པས་གང་ནས་བདག་གི་སྤྱི་བོར་བབ་པས་ལུས་གང་། ཚེའི་བར་ཆད་ཐམས་ཅད་ཞི། འཆི་མེད་རིག་འཛིན་གྲུབ་པར་བསམས་ལ། ཨ་མཱ་ར་ཎི་བརྒྱ་རྩ་བརྒྱད་བཟླས། མཐར་སྤྱི་བོའི་ལྷ་གཙོ་འཁོར་བདེ་བ་ཆེན་པོ་འཆི་མེད་ཡེ་ཤེས་ཀྱི་བདུད་རྩིར་ཞུ་བ་རང་ལ་ཐིམ་པས་
གཞོམ་གཞིག་བྲལ་བ་ནམ་མཁའ་ལྟ་བུའི་ཚེ་ཐོབ་པར་བསམས་ལ་ཚེ་གཟུངས་ཅི་འགྲུབ་བཟླ། དེས་ཚེའི་རིག་འཛིན་དང་རྡོ་རྗེའི་ལང་ཚོ་གྲུབ་པར་འགྱུར་རོ། །དམིགས་བཟླས་ཀྱི་ཆ་ལག་ཟབ་མོ་ཨྠྀིཿབཅུད་ཀྱིས་ལེན་པའི་སྨན་གྱི་རྒྱལ་པོ་དམ་པ་གཞུང་དུ་བསྟན་པ་སུམ་ཅུའི་གྲངས་ལྡན་དེ་ཡིན་ལ་བྷྲིང་གི་རཱ་ཛ་སོགས་བསྣན་ཀྱང་ཆོག །དེར་ནི་སྦྱར་ཚད་གཞུང་བཞིན་ལ། རང་གི་ནད་ཁམས་ཚ་གྲང་དང་བསྟུན་ཏེ་གང་འཕྲོད་པའི་ཆ་ཡིས་སྤར་འཕྲི་བློ་གྲོས་དང་ལྡན་པས་ཤེས་པར་བྱ། གཞན་ཡང་རྡོ་བཅུད། ཆུ་བཅུད་མེ་ཏོག་གི་བཅུད་སོགས་བཅུད་ལེན་སྣ་ཚོགས་ཐོར་བུ་བ་གང་འདོད་ལ་བརྟེན་ཀྱང་རུང་། བཅུད་ལེན་སྨན་མར་དུ་བྱས་ན་ལུས་ཟུངས་ངན་པ་རླུང་ཁམས་ཅན་སོགས་ལ་འཕྲོད། སྨན་མར་དུ་བྱས་ནས་ཟ་ཚེ་ཆང་ལེགས་པ་ཅུང་ཟད་རེ་བཏུང་ན་སྨན་ནུས་རྩར་འཁྲིད་པས་བཟང་གསུངས། བཅུད་ཀྱིས་ལེན་པའི་སྨན་བརྟེན་པ་ལ། སྣོད་དུ་བཅུད་བླུགས་པའི་སྔ་རོལ་བཀྲུ་བཤལ་བྱེད་པ་དང་། གོས་ལ་ཚོན་གཏོང་བའི་སྔོན་དུ་དྲི་མ་བཀྲུ་བ་ལྟར། ནད་ཡོད་ན་སྦྱོང་འཇམ་པོ་ཨ་རུ་མཆུ་སྙུང་དང་བ་རུ་སྐྱུ་རུ་རྒྱམ་ཚྭ་པི་པི་ལིང་། བཅའ་སྒ་ཤུ་དག་ཡུང་བ་བྱི་ཏང་ཀཿ །བུ་རམ་རྣམས་བ་ཡི་ཆུ་དང་སྦྱར་བས་སྦྱོང་བཏང་། རྒྱུན་པར་ཡང་སྟོན་དུས་སོགས་སྐབས་སྐབས་སུ་འཇམ་སྦྱོང་དེ་ལ་སོགས་པས་ནད་
འདོན་པ་གལ་ཆེ། བཅུད་ལེན་གྱིས་བོགས་འདོན་རླུང་སྦྱོར་ཡིན་པས་དེ་ལ་ནམ་ནམ་སྐབས་སྐབས་ནན་ཏན་བྱ་ཁྱད་པར་ནམ་མཁའི་བཅུད་ལེན་ལན་མཁོམས་སུ་འབད། རགས་ཟས་སྤང་ན་ཆུ་བཟང་པོ་སྣ་ཚོགས་བསྡུས་ཏེ་སུམ་གཉིས་གདུས་ནས་ཞག་ཏུ་མ་ལོན་པ་ལ་མཱ་མ་ཀིའི་སྔགས་དམིགས་ཀྱིས་ཆུ་བཅུད་བསྡུས་ཏེ་ཆུའི་བཅུད་ལེན་བྱ་བ་དང་འབྲེལ་ན་ཞག་བདུན་ཕྲག་རེ་ཟུང་ནས་ལུས་ཀྱི་སྲིན་བུ་ཀུན་དག་ཅིང་བཅུད་འགྲུབ་བོ། །ཚེ་སྒྲུབ་པ་ནི་ཤིན་ཏུ་གལ་ཆེ་ལ་དེ་ནི་དམིགས་བསལ་ཏེ་སྒྲུབ་རྒྱུ་བྱུང་ན་ལེགས། དེ་མིན་ཡང་འདིའི་སྐབས་ཀྱི་རིགས་ཀྱི་འཁོར་ལོས་བསྒྱུར་མ་མཱ་ཀི་སོགས་ཀྱི་སྔགས་བཟླས་པས་ཀྱང་ཚེ་སྒྲུབ་མཆོག་ཏུ་འགྱུར། དུས་བཟང་སོགས་སྐབས་སུ་རྩ་གསུམ་ལ་ཚོགས་གཏོར་རྒྱ་ཆེན་པོས་བསྐང་བཤགས་བྱ་ཞིང་བཅུད་ལེན་གྲུབ་པའི་གསོལ་བ་ནན་ཏན་བཏབ། བཅུད་ལེན་གྱི་བཀའ་སྲུང་གཏོར་མས་བསྐང་ཞིང་ཕྲིན་ལས་བཅོལ། སྦྱིན་སྲེག་སོགས་ཐབས་ཟབ་མོ་སྣ་ཚོགས་ལ་འབད་པ་དང་། མཎྜལ་འབུལ་བ་དང་། སྲོག་བསླུ་དང་། རྣམ་རྒྱལ་དང་ཚེ་གཟུངས་སོགས་གཟུངས་ཁྱད་པར་ཅན་བཟླ་བ་དང་། ཕྱག་སྐོར་དང་སཱཙྪ་གདབ་པ། འབྱུང་པོ་ལ་གཏོར་མ་བསྔོ་བ། སྦྱིན་གཏོང་སོགས་མདོར་ན་བསོད་ནམས་ཀྱི་དཔུང་རྒྱ་ཆེན་པོ་
བསགས་པར་བྱ་སྟེ། སྙིགས་དུས་བསོད་ནམས་དམན་པས་སྔགས་ཀྱི་དངོས་གྲུབ་ཐོབ་དཀའ་བ་རྣམས་ཀྱིས་ཀྱང་བསོད་ནམས་རླབས་པོ་ཆེ་བསྒྲུབ་པར་བྱས་ན་ཚེགས་མེད་པར་འགྲུབ་བོ། །སྨན་རྣམས་སྔགས་དམིགས་ཀྱིས་རྟགས་ཐོན་དུ་སྒྲུབ་པ་གལ་ཆེ། དེ་ནས་རྒྱུན་དུ་བརྩོན་པ་ཆུ་བོའི་རྒྱུན་བཞིན་འབད་དགོས་ཀྱི་ཡ་མ་ཡེང་གིས་ཇི་བཞིན་པ་འགྲུབ་དཀའ། བཅུད་ལེན་གྲུབ་མི་གྲུབ་ལུས་ཁམས་དང་ཉམས་དང་རྨི་ལྟས་སོགས་ལ་དཔགས་ནས་མི་འགྲུབ་པའི་གེགས་བསལ་ཕྱིར་སྒྲིབ་སྦྱོང་ཚོགས་བསགས་བྱ་ཞིང་། བརྩོན་པ་རྒྱ་ཆེར་བརྟེན་ན་སྐལ་བ་དང་མཐུན་པའི་དངོས་གྲུབ་མི་འགྲུབ་པ་ནི་མི་སྲིད་དོ། །ཁམས་འཆིང་ནུས་པ་དང་རྟེན་སྔགས་པ་ཡིན་ན། ཕྱག་རྒྱ་མ་རིགས་བཟང་གཞོན་ནུ་བརྟེན་པ་ལམ་གྱི་གྲོགས་སུ་བཟང་། ཁྱད་པར་ལོ་བཅུ་གཅིག་མ་བཅུད་ལེན་གྱི་རིགས་མ་ཡིན་པས། དེའི་པདྨར་ཁམས་ཕབ་པ་རླུང་སྟོབས་སམ། རང་གིས་ལྕེས་བླངས་ལ་བཟའ་བ་དང་། དེའི་ལུས་ལ་རེག་པ་སོགས་ཀྱིས་བདེ་བ་སྤེལ་བའི་གྲོགས་སུ་བསྟེན། ཚངས་སྤྱོད་ཡིན་ན་བཅུད་ལེན་ཚུལ་བཞིན་བསྒྲུབ་པ་ཕྱག་རྒྱ་ལ་ངེས་པར་བརྟེན་དགོས་པ་མིན་གྱི་རྫས་སྔགས་སོགས་ཀྱི་ནུས་པ་ཁོ་ནས་ཀྱང་འགྲུབ་བོ། །ལར་བཅུད་ལེན་གྱི་སྨན་རང་ཉིད་ལམ་དུ་སློང་ན་དེ་གཅིག་པུས་ནད་
ཀུན་ཞི་ཞིང་སླར་མི་སྐྱེ་བར་བྱེད་པ་སོགས་ཡོན་ཏན་ཀུན་འདི་གཅིག་པུས་སྒྲུབ་ནུས་ལམ་དུ་ལང་ནས་གེགས་ཆུང་། དང་པོར་ཤིན་ཏུ་གསང་སྟེ་གཞན་ལ་མི་བཤད་པར་བསྒྲུབ་པར་བྱ། སྙིགས་དུས་ཀྱི་སྐྱེ་བོ་ཟ་འདོད་འགུལ་འཚེར་ལྟ་བུས་སྨན་རྣམས་བསགས་བསྡུ་དང་རྒྱུན་བརྟེན་ཙམ་ཡང་མི་གྲུབ་པས་བཅུད་ལེན་ཚུལ་བཞིན་སྒྲུབ་མཁན་ཉུང་བ་མ་གཏོགས། སྨན་དང་སྔགས་སོགས་ཇི་སྐད་བཤད་པ་ལྟར་བརྩོན་འགྲུས་རྒྱུན་ཆད་མེད་པས་ཐབས་ཀྱི་བྱ་བ་མཐར་དབྱུང་ན་འབྲས་བུ་ངེས་པར་འབྱུང་ངོ་། །སྤྱོད་ལམ་གྱི་སྤང་བླང་གཞུང་ལྟར་དང་། ཟས་སོགས་ནད་ཁམས་དང་བསྟུན་ཏེ་གཟབ་པར་བྱ། འདིའི་ཡན་ལག་ཏུ་མིག་གསལ་བ་གསལ་བྱེད་སོ་གསུམ་མ་ཚད་ལྡན་དང་། སོ་ཡི་བཅུད་ལེན་སྦྱོར་སྡེ་ཟུར་དུ་ཡོད་པ་དང་། སྐྲ་གནག་པའི་རྫས་སོགས་ཀྱང་བརྟེན་པར་བྱས་ན་རུང་། བཅུད་ལེན་ཉིད་ཀྱི་ནུས་པས་དབང་པོ་གསལ་བ་དང་། སོ་སླར་སྐྱེ་བ་དང་། སྐྲ་དཀར་པོའང་ནག་པོར་འགྱུར་མོད་ཀྱི་བཅུད་མ་གྲུབ་པའི་གོང་དུ་ཡན་ལག་གི་ཕན་སྤྱད་རྣམས་ཀྱང་ཤེས་པར་བྱའོ། །ཕོ་ཅོང་བཟང་པོ་སོལ་མེར་བསྲེགས་བཅུ་གང་གི་ཆུར་སྦྱང་བའི་ཆུ་དེས་བསྐུ་བྱུག་བྱས་ན། སོ་དམ། ལུས་རྡོ་རྗེར་འགྱུར། ཚེ་ཉི་ཟླ་དང་མཉམ། མདངས་རྨ་བྱ་འདྲ། ལུས་སྟོབས་ཆེ།
མིག་གིས་ཚངས་གནས་ཀྱང་མཐོང་། སྐྲ་དཀར་གཉེར་མ་མི་འབྱུང་། རོ་ཙ་བ་སོགས་གཞན་ཡང་ཡོན་ཏན་བསམ་གྱིས་མི་ཁྱབ་ཅེས་དུས་འཁོར་གྱི་མན་ངག་སྟེ་རྡོ་རྗེ་ཆུའི་གདམས་པ་ཞེས་བྱ་བའོ། །བདུད་རྩི་རིན་པོ་ཆེ་འཁྲུངས་པའི་རྒྱུད་ལས། རུ་དྲའི་རྡུལ་ལས་འཁྲུངས་པའི་དངུལ་རྡོ་དཀར་སྔོ་མདངས་ལྡན་དེ་ཨ་རུ་ར་དང་སྦྱར་བ་ཁོང་དུ་ཟ་ཞིང་། ཕྱི་ནས་ལུས་ཆུས་བཀྲུས་ཏེ་བྱུགས་ན། ལུས་མི་འཇིགས་པའི་བདུད་རྩི་ཡིན་ཏེ་ལུས་རྡོ་རྗེར་འགྱུར། ཤི་བའི་རོ་ལའང་འདི་བྱུགས་ན་སེམས་མེད་ཀྱང་གཟི་བྱིན་མི་འཆོར་བར་བསྐལ་པར་བརྟན་པར་འགྱུར་རོ། །ཞེས་དང་། ཡང་འབྲུག་རུས་ཞིབ་བཏགས་སྣུམ་སྦྱར་ཏེ་ན་ཚ་ཡོད་སར་བྱུགས་ན་ལུས་ཟུངས་མི་འཆོར། ཁོང་དུ་བཏང་ན་རུས་པ་སྲ་བའི་སྨན་ཡིན་གསུངས། ཡང་ཐལ་ཀ་རྡོ་རྗེ་ཟོས་ན་རུས་པ་རྡོ་རྗེ་ལྟར་མཁྲེགས་པར་འགྱུར་ཞེས་གསུངས་པས་གོང་གི་རྡོ་རྗེ་ཆུ་དང་དངུལ་རྡོ་ཨ་རུ་ཐལ་རྡོར་འབྲུག་རུས་བཅས་སྦྱར་བ་ཁོང་དུའང་ཅུང་ཟད་བཏང་། སྣུམ་དང་སྦྱར་ཏེ་ལུས་ལ་བྱུགས་ན་ལུས་སྲ་ཞིང་མདངས་མི་འཆོར་བའི་བཅུད་ལེན་དུ་འགྱུར་རོ། །དེས་ན་འདི་ལུས་གནད་སོ་སོར་ཚེས་ཀྱི་དབང་གིས་འཕོ་བའི་ཡི་གེ་དང་ཡང་སྦྱར་ལ་ཕྱི་ནས་བྱུགས། ཁོང་དུའང་ཟའོ། །གེགས་བསལ་བ་ནི། བཀའ་བརྒྱད་ཀྱི་གཞུང་སོགས་ལས། སྲོག་
རྩའི་སྲིན་མགོ་ལྗང་དང་མགོ་ཁྲ་གཉིས་ཀྱིས་སྲིན་བུའི་རིགས་ཐམས་ཅད་བསྐྱེད། ལུས་ཟུངས་ཐམས་ཅད་བརླག་པར་བྱེད་པས། སྲིན་དེ་གཉིས་མ་ཐུལ་ན་བཅུད་ལེན་གྱི་ནུས་པ་ཇི་བཞིན་འབྱིན་དཀའ་བས། ཐབས་ལ་ཐེ་ཚོམ་ཟ་བར་འགྱུར་ཕྱིར་དེ་འདོན་པའི་ཐབས་ལ། སྟོན་འབྲིང་པོའི་ཚེས་བརྒྱད་དམ་བཅུར། སྲིན་བུ་ཀེ་ཀེ་རུ། སྡིག་སྲིན། རྩི་བོ་ཆེ། ཤིང་ཀུན། གླད་པ། གནའ་བ་སོགས། སྦྲང་། སྒོག་སྐྱ་རྣམས་ཤ་བའི་རྒྱུ་མ་བཙོས་ཁུར་སྦྱར་ལ། ལྟོ་སྟོངས་དུས་བཏང་བས་སྲིན་དེ་གཉིས་ཆུ་ལམ་དུ་རྩ་དར་སྐུད་ཙམ་དུ་ཆུ་དང་སྦྲགས་ནས་ཐོན་འོང་། དེས་མ་ཐོན་ན་ཞག་ལྔ་ཙམ་ནས་རྩ་གང་ན་སར་གཏར་བས་ཁྲག་འོ་མ་ལྟ་བུར་བྱུང་ན་ཐོན་པ་ཡིན། དེས་ཀྱང་ཐོན་དཀའ་ན། སྡོམ། སྡིག་པའི་འབུ་ཤུན། མི་ར་ཕག་གསུམ་གྱི་ཚིལ། བཟང་དྲུག །ཚྭ་སྣ་ཚོགས་ཚད་རྣམས་རིལ་བུར་བྱས། ལྟོ་སྟོངས་ལ་བཏང་བས་འབྱིན་ནོ། །ཁྲག་གཏར་ལ་བལྟའོ། །ཞེས་དང་། སྤྱིར་བདུད་རྩིའི་དཀའ་ཐུབ་ལོ་དགུར་བྱས་ན་སྲིན་དེ་རང་ཐོན་དུ་འགྲོ། དེ་ཡང་ཟླ་བ་དྲུག་ལ་བྱས་པས་རྗེས་སུ་འཐོན་ནོ། །ཞེས་གསུངས། སྲིན་ལྡངས་ཆེ་ན་རྩ་བ་འོད་ལྡན་གྱི་བཅུད་ལེན་དེ་ལ། ཨོཾ་ཨཱཿཧཱུྃ། རྩ་གཏི་རྩོག་ཏི་སྙིང་ལ་རུ་དེ་སོད་སྭཱ་ཧཱ།
ཞེས་ཅི་མང་བཟླས་ལ་བརྟེན་པས་སེལ། སྨན་ལ་བཏབ་པ་མིན་ཡང་སྔགས་བུངས་བསྐྱེད་དེ་བཟླས་པའི་སྔགས་ཆུས་ཀྱང་སེལ་ལོ། །གཞན་ཡང་ཕྲལ་གྱི་ནད་གང་ལངས་བ་སོ་སོའི་གཉེན་པོའི་སྨན་གྱིས་ཞི་བར་བྱ། གདོན་དང་བསྡོང་བའི་ནད་རྣམས་སྔགས་ཀྱིས་གཞིལ། མདོར་ན་བཅུད་ལེན་གྱི་བར་ཆད་དུ་གྱུར་པའི་ནད་སོགས་ནི་ཐབས་གང་ལ་གང་བསྔགས་པས་ཞི་བར་བྱའོ། །གང་ཞིག་བཅུད་ལེན་གྲུབ་པར་འདོད་ན་བརྩོན་འགྲུས་མི་འདོར་བ་ཁོ་ན་ཞལ་གདམས་སོ། །བདུད་རྩི་བདེ་བ་ཆེན་པོ་ལ། །རྩེ་གཅིག་གུས་པས་ཕྱག་འཚལ་ནས། །བཅུད་ལེན་སྒྲུབ་པའི་སྐལ་བཟང་ལ། །གནད་ཀྱི་ངེས་པ་བརྗོད་ཀྱིས་ཉོན། །བདེ་ཆེན་ཐིག་ལེ་རང་ལ་གནས། །རྟག་ཏུ་བྲི་གང་བྲལ་བར་བཞུགས། །ཐབས་ཀྱིས་ལེགས་པར་གསོས་བཏབ་ན། །ཡེ་ཤེས་དངས་མ་སྟོབས་གྱུར་ཚེ། །ལྕགས་ལ་གསེར་འགྱུར་རྩི་བཞིན་དུ། །རགས་ལུས་མི་ཤིགས་རྡོ་རྗེར་འགྱུར། །འགྱུར་བ་ཅན་གྱི་ཕུང་པོ་རྣམས། །མི་འགྱུར་དངས་མ་དེ་ལ་བརྟེན། །རགས་ལུས་འཕོ་ཞིང་འཇིགས་པ་ནའང་། །དངས་མའི་ཐིག་ལེར་འགྱུར་བ་མེད། །དེ་བས་ཇི་ལྟར་རྒས་འཁོགས་ཀྱང་། །ཐབས་དང་ལྡན་པས་ལེགས་བརྩོན་ན། །གཞོམ་མེད་བདུད་རྩི་བཅུད་ཀྱིས་ལེན། །མི་འགྲུབ་པ་ནི་གཅིག་མི་སྲིད། །ནད་ཀྱང་
འདི་ཡི་ཟིལ་གྱིས་གནོན། །ཚེ་ཡང་འདི་ཡིས་བསྲིང་ཞིང་འཕེལ། །ཉམས་དང་རྟོགས་པ་འདི་ཡིས་འཆར། །དཔལ་དང་བསོད་ནམས་འདི་ཡིས་བསྐྱེད། །སྣང་སེམས་འདོད་དགུ་འདིས་དབང་བྱེད། །བདེ་ཆེན་ཌཱ་ཀི་འདི་ཡིས་འགུགས། །མདོར་ན་ཡོན་ཏན་ཀུན་འགྲུབ་སྟེ། །འདི་ཉིད་གཅིག་པུ་ཀུན་གྱི་མཆོག །རྫས་ཀྱིས་རགས་པའི་དངས་མ་འཕེལ། །དེ་ཡིས་ཕྲ་བའང་སྟོབས་ལྡན་བྱེད། །སྔགས་ཀྱིས་ཕྲ་རགས་གཉིས་ཀ་གསོ། །རླུང་དང་དམིགས་པས་ཕྲ་བ་སད། །དེ་ཡིས་རགས་པའི་དངས་མའང་འཕེལ། །གསུམ་ཀ་ཚོགས་པར་གྱུར་པ་ན། །གཅིག་གྲོགས་གཅིག་གིས་བྱས་ནས་སུ། །མྱུར་དུ་འགྲུབ་པར་གདོན་མི་ཟ། །དངས་མའི་དངས་མ་མཐར་ཐུག་པ། །མི་ཤིགས་གཉུག་མའི་ཐིག་ལེ་ཡིན། །ཕྲ་རབ་རྡུལ་གྱི་ཆོས་ལས་འདས། །ཕྲ་མོའི་ས་བོན་ཟག་མེད་འདིར། །འཕོ་འགྱུར་མེད་ཀྱང་འགྱུར་བཅས་ཀྱི། །སྣང་ངོར་མངོན་དང་མི་མངོན་ལས། །འདུས་མ་བྱས་དབྱིངས་དེ་ལ་ཡང་། །འགྲིབ་དང་སྟོབས་གྱུར་འཕེལ་ཞེས་བརྗོད། །དེ་ཕྱིར་ཐབས་ཀྱིས་དེ་ལ་འཇུག །ཅུང་ཟད་ཉམས་སུ་བླངས་བྱས་ཀྱང་། །དེ་དང་འཚམས་པའི་ཡོན་ཏན་འབྱུང་། །རིམ་པས་འབད་ན་རགས་པའི་ལུས། །དངས་མ་ཉིད་དུ་གནས་གྱུར་ཏེ། །རྟག་བརྟན་བསྒྲེས་
རྒུད་བྲལ་བ་ཡི། །རྡོ་རྗེའི་ཚེ་དང་ལང་ཚོ་འགྲུབ། །ས་མ་ཡཱ། འདི་ནི་མཁའ་འགྲོའི་གསང་བའི་གདམས་པའོ། །འདིར་སྨྲས་པ། ཨེ་མ། རྒྱུད་ལུང་མན་ངག་རྣམས་ཀྱི་ཟབ་མོའི་བཅུད། །རིག་པའི་གསང་ནས་འགོག་པ་མེད་པར་ཤར། །མེ་ཏོག་ཚོགས་ཀྱི་སྦྲང་རྩིས་ཇི་བཞིན་དུ། །སྐལ་བཟང་ཤེས་རབ་བུང་བ་བདག་དགའ་འོ། །བདུད་རྩི་བུམ་བཟང་བདུད་རྩི་གྲུབ་པ་དང་། །རིན་ཆེན་ཟ་མ་ཏོག་བཅས་རྩེ་མོའི་གྲངས། །ར་ས་ཡཱ་ནའི་མན་ངག་རླབས་པོ་ཆེ། །ཡན་ལག་ཐོར་བུའི་འཁོར་དང་བཅས་པའོ། །འདིར་བསྟན་སྔགས་དམིགས་སྨན་གྱི་གདམས་པ་ཡི། །ཕྱོགས་རེ་ཉམས་སུ་བླངས་ཀྱང་བརྩོན་ལྡན་ན། །རྡོ་རྗེའི་བཅུད་ལེན་འགྲུབ་པར་རྒྱལ་བས་གདམས། །བཅུད་ལེན་མན་ངག་ཀུན་གྱི་བཅུད་བསྡུས་པ། །མ་བྱུང་མི་འབྱུང་འབྱུང་བར་དཀའ་བ་འདི། །ཐབས་ཀྱི་མན་ངག་རྒྱལ་པོ་ཡིན་ངེས་ཀྱི། །ཐབས་མཆོག་ནོར་བུའི་གཏེར་ཁ་མཐོང་བའི་ཚེ། །བརྩོན་པ་ཅི་བྱེད་སྐྱེས་བུ་ཁྱོད་ལ་རག །རིག་པའི་རྩལ་ལས་མ་བྲིས་ཐབས་མེད་བྱུང་། །རང་བཟོ་མ་ཡིན་རྒྱལ་གསུང་དཔང་དུ་བཞག །འདྲ་རྩོམ་མ་ཡིན་ལྷ་ཡི་བྱིན་རླབས་ཡིན། །དོན་མེད་མ་ཡིན་དོན་ཆེན་གཏེར་དང་ལྡན། །གཞན་ཕན་བློ་དང་བླ་མ་ལྷ་ཡི་མཐུ། །རྟེན་ཅིང་འབྲེལ་བའི་སྟོབས་ལས་འདི་བྱུང་ཕྱིར། །སྐལ་
བཟང་བརྩོན་ལྡན་ལུས་སྲོག་བླ་མའི་ཕྱིར། །གཏོང་བར་ནུས་པ་དེ་དག་རྣམས་ཀྱིས་འགྲུབ། །རབ་ཚེས་མེ་སྤྲེལ་ཁྲུམས་ཟླའི་ཆུ་གཏེར་ཚེས་ལ་འཆི་མེད་མཆོག་གྲུབ་གླིང་དུ་རྣལ་འབྱོར་པ་འཇམ་དཔལ་དགྱེས་པ་དབང་གི་རྡོ་རྗེས་སྤེལ་བ་དགེ་ལེགས་འཕེལ་ལོ།། །།