འཇམ་དཔལ་ཁྲོ་ཆུ་དུག་གདོང་ནག་པོའི་རྒྱུན་ཁྱེར་མངོན་རྟོགས་ཁྲོ་ཆུ་ཁོལ་མ།
འཇམ་དཔལ་ཁྲོ་ཆུ་དུག་གདོང་ནག་པོའི་རྒྱུན་ཁྱེར་མངོན་རྟོགས་ཁྲོ་ཆུ་ཁོལ་མ་བཞུགས་སོ། །
ན་མོ་མཉྫུ་ཤྲཱི་ཡེ། འདིར་འཇམ་དཔལ་ཁྲོ་ཆུ་དུག་གདོང་ནག་པོའི་རྣལ་འབྱོར་ལ་འཇུག་པར་འདོད་པས། ཐོག་མར་སྐྱབས་སུ་འགྲོ་བ་ནི། ཧཱུྃ༔ དུས་འདི་ནས་བཟུང་བྱང་ཆུབ་སྙིང་པོའི་བར༔ བླ་མ་མཆོག་དང་དཀོན་མཆོག་གསུམ་པོ་དང་༔ གཤིན་རྗེ་གཤེད་པོའི་དཀྱིལ་འཁོར་ལྷ་ཚོགས་ལ༔ ལུས་ངག་ཡིད་གསུམ་གུས་པས་སྐྱབས་སུ་མཆི༔ སེམས་བསྐྱེད་པ་ནི། སྣང་གྲགས་ཆོས་རྣམས་རང་བཞིན་མེད་པ་ལ༔ དེ་ལྟར་མ་རྟོགས་སེམས་ཅན་སྙིང་རེ་རྗེ༔ དེ་ཕྱིར་བདག་ནི་གཤིན་རྗེ་གཤེད་གྱུར་ནས༔ དེ་རྣམས་སངས་རྒྱས་ས་ལ་འགོད་པར་བྱ༔ བགེགས་བསྐྲད་པ་ནི། ཧཱུྃ༔ ང་ནི་དཔལ་ལྡན་གཤིན་རྗེ་གཤེད༔
ཁྲོས་པའི་ཐུགས་ཀྱི་འཕྲོ་འདུ་ལས༔ ལས་ཀྱི་གཤིན་རྗེ་ནམ་མཁའ་གང་༔ སྤྲུལ་པའི་ཁྲོ་བོས་བར་སྣང་གང་༔ སྲས་ཀྱི་ཁྲོ་ཆུང་ས་གཞི་གཏམས༔ དགྲ་བགེགས་འབྱུང་པོ་ཚར་གཅོད་ཅིག༔ ཨོཾ་ཡ་མནྟ་ཀ་ཡ་མ་ར་ཙ་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧུར་ཐུམ་རྦད་ཡ༔ སྲུང་འཁོར་བསྒོམ་པ་ནི༔ ཧཱུྃ༔ སྟེང་འོག་ཕྱོགས་མཚམས་རྡོ་རྗེ་རལ་གྲི་དང་༔ ཐོད་པ་དུག་དང་ཁྲོ་ཆུ་མེ་དཔུང་སོགས༔ མི་ཤིག་སྲུང་བའི་རྡོ་རྗེ་རབ་འབར་བས༔ དགྲ་བགེགས་འབྱུང་པོ་ཐམས་ཅད་མཚམས་ཆོད་ཅིག༔ རྩ་སྔགས་དང་། བཛྲ་རཀྴ་རཀྴ་ཧཱུྃ་བྷྲཱུྃ༔ ཞེས་བརྗོད། རྒྱས་པར་སྲུང་འཁོར་ཆེན་པོ་ལྟར་ཡིད་ཀྱིས་གསལ་
བཏབ༔ དངོས་གཞི་ལྷ་བསྐྱེད་པ་ནི༔ ཧཱུྃཿ ཆོས་ཀུན་མི་དམིགས་སྟོང་པའི་ངང་ཉིད་ལས༔ ཞིང་འདི་གཤིན་རྗེ་རོལ་པའི་དུར་ཁྲོད་ཆེ༔ བསྐལ་པའི་མེ་འབར་རཀྟའི་རྦ་ཀློང་འཁྱིལ༔ ཚ་གྲང་རབ་འཁྲུགས་འཇིགས་རུང་སྒྲ་ཆེན་སྒྲོགས༔ སྟེང་ཕྱོགས་རལ་གྲིའི་གུར་ཁང་ལྡེམས་སེ་ལྡེམ། འོག་ཕྱོགས་སྤུ་གྲིའི་ས་གཞི་རྣོ་ཞིང་གཟིང་༔ བར་སྣང་མཚོན་ཆ་སྣ་ཚོགས་བུ་ཡུག་འཚུབ༔ ཕྱོགས་ཀུན་ལྕགས་སྲེག་ཁྲོ་ཆུ་མེ་འབར་བའི་༔ རླབ་འཁྲིགས་དུག་རླང་མི་བཟད་སྔོ་དམར་འཕྱུར༔ དུར་ཁྲོད་ཆེན་པོ་བརྒྱད་ཀྱི་བསྐོར་བའི་དབུས༔ དུག་རྫས་ལས་གྲུབ་གནམ་ལྕགས་རྡོ་རྗེའི་མཁར༔ ཟླུམ་པོ་སྟེང་འོག་ཕྱོགས་མཚམས་བར་མེད་པ༔ ཕྱི་རོལ་དུ་ནི་མེ་དཔུང་དུག་རླང་གིས༔ དགྲ་བགེགས་བསྲེགས་ཤིང་མྱོས་པའི་གུར་ཁང་དབུས༔ ཨེཿལས་ཆོས་འབྱུང་དམར་ནག་བསྣོལ་བའི་དཀྱིལ༔ སྣ་ཚོགས་མཚོན་ཆ་དྲེགས་པ་རུ་ཏྲ་དང་༔ བྱད་མ་ལྷ་སྲུང་བཅས་པ་སྤུང་པའི་སྟེང་༔ མ་ཧེ་བརྒྱད་ཀྱིས་བཏེགས་པའི་རིན་ཆེན་ཁྲི༔ པདྨ་ཟླ་བ་ཉི་མའི་གདན་སྟེང་ན༔ སྐད་ཅིག་རྫུས་སྐྱེས་རང་རིག་གསལ་སྟོང་དངོས༔ འཇམ་དཔལ་གཤིན་རྗེ་ཁྲོ་ཆུ་དུག་གདོང་ནི༔ དམར་ནག་རབ་ཁྲོས་རྡོ་རྗེ་སྲིན་པོའི་གཟུགས༔ ཞལ་གསུམ་ཕྱག་དྲུག་བརྔམ་ཞིང་འཇིགས་པའི་
སྐུ༔ གཡས་གསུམ་རྡོ་རྗེའི་དགྲ་སྟྭ་བསྣམས་པ་ཡིས༔ དམ་ཉམས་མ་ལུས་སྐྱེ་རྒྱུད་གཅོད་པར་བྱེད༔ གཡོན་གསུམ་དགྲ་བགེགས་གློ་སྙིང་ཞལ་དུ་གསོལ༔ གཡས་ཞལ་ལྗང་ནག་རབ་ཏུ་ཁྲོས་པ་ཡིས༔ སྲིད་པ་ཕོ་རྒྱུད་ཐམས་ཅད་ཟིལ་གྱིས་གནོན༔ གཡོན་ཞལ་དམར་ནག་རབ་ཏུ་བརྗིད་པ་ཡིས༔ སྲིད་པ་མོ་རྒྱུད་ཐམས་ཅད་དབང་དུ་སྡུད༔ དབུས་ཞལ་མཐིང་ནག་རབ་ཏུ་རྔམས་པ་ཡིས༔ སྲིད་པ་གསུམ་ཡང་རྡུལ་དུ་རློག་པར་བྱེད༔ གནོད་བྱེད་དགྲ་བགེགས་བྱད་མ་ཞལ་དུ་གསོལ༔ ཞལ་གསུམ་ཞག་དང་ཁྲག་གི་རྒྱུན་འཛག་ཅིང་༔ ལྗགས་གསུམ་འདྲིལ་ཞིང་བསྐལ་པའི་གློག་ལྟར་འཁྱུག༔ མཆེ་བ་བཅུ་གཉིས་གངས་རི་ལྟ་བུར་གཙིགས༔ སྤྱན་དགུ་དམར་ཟླུམ་ཁྲག་མཚོ་ལྟ་བུར་འཁྱིལ༔ ཤངས་ནས་བསྐལ་པའི་རླུང་ཆེན་ནག་པོ་འཚུབ༔ སྙན་ནས་བསྐལ་པའི་འབྲུག་སྟོང་ལྡིར་ཞིང་སྒྲོགས༔ ཞལ་ནས་དུག་གི་སེར་ཆེན་ཐོག་འབེབ་པ༔ སྨིན་མ་ཨག་ཚོམ་མེ་ལྟར་འབར་བ་ཡི༔ ཁྲོ་གཉེར་སྤྲིན་ཚོགས་དཔྲལ་བའི་མཛོད་སྤུར་བསྡུས༔ ཁམས་ནག་རལ་པ་ཟུར་གསུམ་གྱེན་དུ་གཟིངས༔ ཐོད་སྐམ་སྦྲུལ་གྱི་ཕྲེང་བས་རྣམ་པར་བརྒྱན༔ རལ་པའི་གསེབ་ན་དུག་ལྕགས་ཁྲོ་ཆུ་ཡི༔
མཆོད་རྟེན་གསུམ་ནང་དབུས་སུ་གཤིན་རྗེ་གཤེད༔ གཡས་སུ་རྟ་མགྲིན་གཡོན་དུ་ཕྱག་རྡོར་ལ། ཡང་ན་བྱ་ཁྱུང་མཆན། དུས་གསུམ་རྒྱལ་བ་སྲས་བཅས་བསྐོར་བས་བརྒྱན༔ གཤོག་པ་སྤུ་གྲི་འབར་བ་རབ་གདེངས་ཤིང་༔ གཤོག་གཡོན་རལ་གྲི་འབར་བ་བརྐྱང་མཛད་པ༔ གླང་ཆེན་ཞིང་ལྤགས་མགོ་ཕྲེང་སྦྲུལ་རྒྱན་དང་༔ ཐལ་ཆེན་ཚོམ་བུ་རཀྟའི་ཐིག་ལེས་སྤྲས༔ རྐེད་མཚམས་ཆུ་སྲིན་རྔམས་ཞལ་འཇིགས་པ་ལ༔ ཞེ་སྡང་གདུག་པའི་སྦྲུལ་ཆུན་རྣམ་པར་བརྒྱན༔ སྐུ་སྨད་ཁྲོ་ཆུ་འབར་བའི་ཕུར་པ་ཡིས༔ དམ་ཚིག་ཉམས་པའི་སྙིང་ལ་གཟིར་བར་བྱེད༔ རང་འདྲའི་ཁྲོ་ཆུང་དཔག་ཏུ་མེད་པ་འཕྲོ༔ སྐུ་ལ་དུག་གི་མེ་རི་དམར་ནག་འབར༔ དབུ་ནི་མི་མངོན་ནམ་མཁའི་དབྱིངས་སུ་སླེབས༔ ཞབས་གཉིས་དམྱལ་ཁམས་རྡོ་རྗེ་གདན་ལ་གནས༔ ཉི་ཟླ་གཟའ་སྐར་ལྟེ་བའི་ཐད་འཆར་ཞིང་༔ སྲིད་གསུམ་མ་ལུས་ལྟོ་བར་གསལ་བའོ༔ ཡུམ་བསྐྱེད་ནི། ཡུམ་ཆེན་དུནྟིང་ནག་མོ་འཇིགས་པའི་གཟུགསཿ ཞལ་གཅིག་ཕྱག་བཞི་སྤྱན་གསུམ་མཆེ་གཙིགས་མ༔ གཡས་གཉིས་རལ་གྲི་དང་ནི་ལྕགས་ཀྱུ་འཛིན༔ གཡོན་གཉིས་ཐོད་ཁྲག་སྟོབས་ཤིང་ལྕགས་སྒྲོག་བསྣམས༔ རང་འོད་ལས་སྐྱེས་གཉིས་མེད་སྦས་པའི་ཚུལ༔ ཞབས་
གཉིས་ཡབ་ཀྱི་རྐེད་པར་འཁྲིལ་བར་མཛད༔ མདུན་དུ་སྐུ་ཡི་སྤྲུལ་པ་འཆི་བདག་ནག༔ གཡས་སུ་གསུང་གི་སྤྲུལ་པ་ཚེ་བདག་དམར༔ གཡོན་དུ་ཐུགས་ཀྱི་སྤྲུལ་པ་སྲོག་བདག་མཐིང་༔ ཡོན་ཏན་བཻ་ཝ་ས་ཏྭ་ཁམས་ནག་གཡས༔ གཡོན་ཟུར་ཕྲིན་ལས་ཟ་བ་ལྗང་དམར་ཏེ༔ ལྔ་ག་ཞལ་གཅིག་ཕྱག་གཉིས་འཇིགས་པའི་གཟུགས༔ ཕྱག་ན་དགྲ་སྟྭ་དང་ནི་ཙིཏྟ་བསྣམས༔ རྒྱབ་ཏུ་སྐུ་གསུང་ཐུགས་ཡོན་ཕྲིན་ལས་ལྔ༔ དབྱེར་མེད་སྤྲུལ་པ་ཡ་མ་ར་ཙ་ནི༔ མཐིང་ནག་ཞལ་གསུམ་ཕྱག་དྲུག་རབ་འཇིགས་སྐུཿ རྩ་ཞལ་ཆུ་སྲིན་རབ་ཏུ་རྔམ་པ་ཡིཿ ཡ་འགལ་གནམ་དང་མ་མགལ་ས་ལ་བགྲད༔ གཡས་པ་སེང་ཞལ་རྔམས་ཤིང་ཁྲོ་ལ་འགྱིང་༔ གཡོན་པ་ཕག་ཞལ་གཏུམ་རྔམ་མཐུར་དུ་བགྲད༔ གཡས་ཀྱི་ཕྱག་གསུམ་རལ་གྲི་འབར་པ་གདེངས༔ གཡོན་གསུམ་ཞགས་པས་དམ་ཉམས་འཆིང་བར་མཛད༔ སྤྲུལ་པ་དྲུག་པོའི་སྐུ་སྐེད་ཆུ་སྲིན་གྱིས༔ རྔམ་ཞལ་སྦྲུལ་ཆུན་གྱིས་བརྒྱན་ལས་འཐོན་པའི་ཿ སྐུ་སྨད་ཁྲོ་ཆུའི་ཕུར་པ་རྣོ་ངར་ལྡན༔ དམ་ཉམས་སྡིག་ཅན་རྣམས་ཀྱི་སྙིང་ལ་གཟིར༔ རང་འདྲའི་སྤྲུལ་པ་དཔག་ཏུ་མེད་འཕྲོ་ཞིང་༔ གླང་ཆེན་
ཀོ་རློན་མི་ལྤགས་གཡང་གཞི་གསོལ༔ སྐུ་ལས་དུག་གི་མེ་རི་དམར་ནག་འབར༔ རབ་འབར་ཁྲོ་བོའི་རྒྱན་གྱིས་སྐུ་ལ་བརྒྱན༔ དུག་རླུང་མེ་རི་འཁྱིལ་པའི་ཀློང་ན་བཞུགས༔ གཙོ་བོའི་ཕྱི་རོལ་ཉི་དང་འོད་ཟེར་བཞིན༔ མ་བསྐྱེད་པར་ཡང་ལྷུན་གྱིས་གྲུབ་པའི་འཁོར༔ གཤེད་ཆེན་སྡེ་བཞི་དགྲ་སྟྭ་ཙིཏྟ་བསྣམས༔ མོན་པ་སྡེ་བཞི་མི་སྙིང་རལ་གྲི་འཛིན༔ བདུད་པོ་སྡེ་བཞི་ཞགས་པ་མདའ་གཞུ་འཛིན༔ འཆི་བདག་བཅུ་གཉིས་ཁྲམ་ཤིང་ཙིཏྟ་བསྣམས༔ ཕོ་གཤེད་སུམ་བརྒྱ་དྲུག་ཅུ་བདུད་མདའ་གཟེར༔ མོ་གཤེད་སུམ་བརྒྱ་དྲུག་ཅུའི་གཞུ་འཛིན་ཅིང་༔ སྒོ་བ་དྲེགས་པ་སྡེ་བཞི་གྲི་ཐོད་འཛིན༔ སྲོག་གཅོད་རུ་ཏྲ་སྡེ་བཞི་བདུད་མདའ་གཟེར༔ བྱ་ནག་བདུན་གྱིས་དགྲ་བོའི་ཤ་ལ་ཟ༔ ཁྱི་ནག་བདུན་གྱིས་དགྲ་བོའི་ཁྲག་ལ་འཐུང་༔ སྦྲུལ་ནག་བདུན་གྱིས་དགྲ་བོའི་ཁོང་སྙིང་འདོན༔ སྡིག་པ་བདུན་གྱིས་བྱད་མའི་ཤ་ཁྲག་རོལ༔ རུས་སྦལ་བདུན་གྱིས་འབྱུང་ལྔའི་བཀྲག་མདངས་འཕྲོག༔ ཕག་རྒོད་བདུན་གྱིས་གནོད་བྱེད་ཀླུ་གཉན་ཟ༔ མོན་པ་སྡེ་དྲུག་མོན་མོ་སྡེ་དྲུག་སོགས༔ དགྲ་ལ་ཆོ་འཕྲུལ་ལྟས་ངན་སྣ་ཚོགས་གཏོད༔ སྣང་སྲིད་དྲེགས་པ་གཤིན་རྗེའི་འཁོར་ཚོགས་ནི༔ བསམ་གྱིས་མི་
ཁྱབ་ཉི་ཟེར་རྡུལ་ལྟར་འཁྲིགས༔ ཀུན་ཀྱང་ཤ་ལ་དགའ་ཞིང་ཁྲག་ལ་འཐུང་༔ སྙིང་རྗེ་མེད་པ་ཁྲོ་ལ་གཏུམ་པའི་ཚུལ༔ མདོག་ནག་གཟུགས་འཇིགས་བཞིན་བསྡུས་མི་སྡུག་པ༔ སྨ་ར་འབར་ཞིང་སྐྲ་གཟེང་མིག་དམར་བགྲད༔ ཁ་གདང་མཆེ་གཙིགས་གདུག་པའི་མཚོན་ཆ་ཐོགས༔ གཤིན་རྗེ་སྲིན་པོ་བདུད་བཙན་མ་མོའི་ཚུལ༔ སྐུ་ལ་འཇིགས་པའི་རྒྱན་ཆ་སྣ་ཚོགས་གསོལ༔ འོད་ཟེར་མེ་སྟག་རླུང་ནག་འཚུབ་ཅིང་འཁྱིལ༔ ས་གཅིག་མི་གནས་སྲིད་གསུམ་ཀུན་ཏུ་ཉུལ༔ འཇིགས་པའི་གཟུགས་དང་དྲག་པོའི་ང་རོ་ཡིས༔ སྐྱེ་འགྲོ་དབང་སྡུད་དགྲ་བགེགས་བར་ཆད་སྲུང་༔ སྤྱན་གྱིས་གཙོ་ལ་བལྟ་ཞིང་ཅི་བཅོལ་བསྒྲུབ༔ གང་དུ་མངག་པ་ཙམ་གྱིས་གློག་བཞིན་གཡོ༔ སྒྲུབ་པ་པོ་ལ་དགོས་འདོད་ཀུན་སྟེར་བའི་༔ དམ་ཅན་རྒྱ་མཚོ་སྤྲིན་ཕུང་བཞིན་དུ་གཏིབས༔ གཞན་ཡང་སྟེང་ན་བཀའ་བརྒྱུད་བླ་མ་དང་༔ བར་གྱི་ཆ་ལ་ཡི་དམ་ཞི་ཁྲོའི་ཚོགས༔ འོག་གི་ཆ་ལ་མཁའ་འགྲོ་ཆོས་སྐྱོང་བཅས༔ སྒྲུབ་པོའི་མཐུ་སྐྱེད་བྱིན་རླབས་འོད་དུ་འབར༔ ཀུན་གྱི་གནས་གསུམ་འབྲུ་གསུམ་མཚན་པ་དང་༔ ཐུགས་སྲོག་ཧཱུྃ་དང་ཡཿཡིག་འོད་ཟེར་གྱིས༔ ལྷོ་ཕྱོགས་རིམ་པ་བདུན་གྱི་ས་འོག་ཏུ༔
ཚ་གྲང་འཁྲུགས་པ་གཤིན་རྗེའི་ཞིང་ཁམས་ནས༔ གཤིན་རྗེ་ནག་པོ་བཀའ་སྡོད་སྤྲུལ་པ་བཅས༔ དུས་ཀྱི་སྤྲིན་ལྟར་གནམ་ས་བར་སྣང་ཀུན༔ འགེངས་པ་སྐད་ཅིག་ཉིད་ལ་སྤྱན་དྲངས་ཏེ། དམ་ཚིག་པ་དང་གཉིས་སུ་མེད་པར་གྱུར༔ ཞེས་བྱས་ལ་རྒྱས་པར་ལས་བྱང་གཞུང་གི །ཧཱུྃ༔ འོག་མིན་ཆོས་དབྱིངས་ཕོ་བྲང་ན༔ སྤྱན་འདྲེན་ནས་བསྟོད་པའི་བར་བྱ། ཡང་ན་ཚེ་བདག་གི་རྒྱུན་ཁྱེར་གྱི་གཞུང་ལྟར་བྱ། བསྡུ་ན་མཆོད་བསྟོད་བསྡུས་པའམ། མིན་ཀྱང་རུང་སྟེ་དེ་ལྟ་བུའི་ལྷ་ཡི་གསལ་སྣང་ལ་སེམས་བཟུང་ཞིང་ང་རྒྱལ་དང་དག་དྲན་བཅས། བཟླས་པའི་རྣལ་འབྱོར་ལ་འཇུག་པ་ནི། གཙོ་བོའི་ཐུགས་ཀར་པདྨ་ཟླ་ཉིའི་དབུས༔ གནམ་ལྕགས་རྡོ་རྗེ་རྩེ་དགུ་གྱེན་འབྲེང་པའི་༔ ལྟེ་བ་མཐིང་ནག་འབར་ཀློང་ཐུགས་སྲོག་ཧཱུྃ༔ ཁོང་སེང་ཡཿཡིག་དམར་ནག་བཅས་པའི་མཐར༔ རྩ་བའི་སྔགས་ཀྱིས་བསྐོར་བའི་འོད་ཟེར་གྱིས༔ འཕགས་པ་མཆོད་ཅིང་འགྲོ་བའི་སྒྲིབ་གཉིས་སྦྱངས༔ དགྲ་བགེགས་ཚར་བཅད་སྣང་སྲིད་མ་ལུས་པ༔ འཇམ་དཔལ་གཤིན་རྗེ་གཤེད་ཀྱི་ལྷ་ཚོགས་སུ༔ སད་པས་གཞོམ་མེད་རྡོ་རྗེའི་སྔགས་སྒྲ་འུར༔ བྱིན་རླབས་དངས་བཅུད་རང་ལ་འདུས་པ་ཡིས༔ སྒོ་གསུམ་མི་ཤིག་རྡོ་རྗེའི་རང་བཞིན་གྱུར༔ ཅེས་དམིགས་ལ། དུ་ཏྲི་ཡ་མ་ར་ཙཱ༔ ས་མ་རཀྴ༔ ཀྲོ་ཏ་པ་
ཙ་ལ༔ ཀཱ་ལ་རཱུ་པ༔ ཨ་ཀྲོ་རཱ་ཙ༔ ཡ་མ་ར་ཛཿས་མ་ཡ་ཛ་ཛ༔ ཅེས་གསང་སྔགས་སོ་གསུམ་པ་ཅི་ནུས་བཟླ། རྒྱས་པར་བསྙེན་དམིགས་རྣམས་དང་བསྲུང་བའི་དམིགས་པའི་རིམ་པ་ཡིད་ལ་ངེས་པར་བྱས་ཏེ་གསལ་འདེབས་ཤིང་སྔགས་བཟླས་ཏེ། ཐུན་མཐར་ཐུན་གཏོར་བཏང་བ་སོགས་ཆོ་གའི་ཡན་ལག་དང་། སྨད་ལས་གདབ་པ་སོགས་རྒྱས་བསྡུས་ཇི་ལྟར་རིགས་པ་སྦྱར་བར་བྱ། མཐར་ཐུན་བསྡུས་ཤིང་ལྷར་ལྡང་བ་དང་དགེ་བསྔོ་ཤེས་བརྗོད་བྱའོ། །ཆོག་བསྒྲིགས་ཕལ་ཆེར་དོན་གྱི་དམིགས་པ་ཙམ། །གཅིག་ཀྱང་ཚིག་རྣམས་རང་རྩོམ་ཁོ་ནར་སྣང་། །འདི་ནི་གཏེར་གཞུང་ལས་བྱང་སྙིང་པོའི་གཞུང་། །ལྷུག་པ་ཕལ་ཆེར་ཚིག་བཅད་བྱས་པ་སྟེ། །རིག་འཛིན་རྣམས་ཀྱི་ལུང་དང་རྡོ་རྗེའི་ཚིག །མན་ངག་གནད་ལྡན་བྱིན་རླབས་མཚུངས་མེད་ཕྱིར། །ཚུལ་བཞིན་བསྒྲུབས་ལ་དངོས་གྲུབ་གཉིས་ཀྱིས་རྒྱུན། །ནམ་མཁའི་མཐར་ཐུག་འཛད་པ་མེད་པར་འབེབས། །ཞེས་པའང་མི་ཕམ་རྣམ་པར་རྒྱལ་བའམ་འཇམ་དཔལ་དགྱེས་པའི་རྡོ་རྗེའི་རབ་ཚེས་ཐམས་ཅད་འདུལ་ཅེས་པའི་སྨིན་དྲུག་ཟླ་བའི་ཡར་ཚེས་ལྔ་ལ་སྒྲུབ་ཁང་བདུད་ལས་རྣམ་རྒྱལ་དུ་ཤར་མར་བྲིས་པ་འདིས་རྣལ་འབྱོར་སྒྲུབ་པ་པོ་རྣམས་བདུད་ཀྱི་གཡུལ་ལས་རྒྱལ་ཞིང་མཆོག་ཐུན་གྱི་དངོས་གྲུབ་མ་ལུས་པ་མྱུར་དུ་འགྲུབ་པར་གྱུར་ཅིག །སརྦ་མངྒ་ལཾ།། །།