དྲེགས་པའི་སྡེ་དཔོན་སུམ་ཅུའི་གསོལ་བྱང་རྒྱུད་ནས་བཏུས་པ་ཕྲིན་ལས་མྱུར་འགྲུབ།
དྲེགས་པའི་སྡེ་དཔོན་སུམ་ཅུའི་གསོལ་བྱང་རྒྱུད་ནས་བཏུས་པ་ཕྲིན་ལས་མྱུར་འགྲུབ་བཞུགས། །
གཏོར་མ་བྱིན་གྱིས་བརླབས་ཤིང་འདི་སྐད་དོ། །ཧཱུྃ། ཐུགས་རྗེ་རྣམ་དག་དབྱིངས་ཀྱི་དཀྱིལ་འཁོར་ནས། །ཆོས་སྐུ་སྟོང་ཉིད་དབྱིངས་ལས་མ་གཡོས་ཀྱང་། །འཇིག་རྟེན་དྲེགས་པའི་ཚོགས་རྣམས་གདུལ་བའི་ཕྱིར། །ཁྲོ་ཆེན་དཔའ་གཏུམ་འཇིགས་བྱེད་སྐུར་བསྟན་པ། །ཐུགས་དམ་དགྱེས་བསྐུལ་གསང་བའི་ཡུམ་དང་བཅས། །མ་རྟོགས་ཤུགས་ཀྱིས་འདུལ་ཕྱིར་གཤེགས་སུ་གསོལ། །དྲེགས་པའི་དབང་ཕྱུག་འཇིག་རྟེན་ལྷ་ཡི་གཙོ། །འདོད་པའི་ལྷ་མོ་བདེ་ཆེན་འབྱུང་གནས་མ། །འཁོར་ཚོགས་དྲག་ཤུལ་མཐུ་སྟོབས་དཔུང་གི་བདག །ཁྲོ་གཏུམ་གདུག་པའི་རྩལ་འཆང་དཔལ་དང་ལྡན། །རྡོ་རྗེ་འཆང་བའི་བཀའ་བཞིན་རྗེས་སུ་
སྒྲུབ། །དམ་ཚིག་ཆེར་དགོངས་གནས་འདིར་གཤེགས་སུ་གསོལ། །ཨཱོཾ་བཛྲ་སརྦ་དུཥྚ་ན་ཨཥྚ་ན་ཡ་ཨེ་ཛཿབྷྱོ། ཨ་གངྕ་ཡ་ས་མ་ཡ་ཧྲིཾ་ཧྲིཾཿདུར་ཁྲོད་གསང་བ་མཆོག་གི་དཀྱིལ་འཁོར་འདིར། །ལྷ་ཆེན་ཉི་ཟླ་པདྨའི་གདན་སྟེང་དུ། །བཅོམ་ལྡན་ཁྲོ་རྒྱལ་རྔམས་བརྗིད་འབར་བའི་སྐུ། །ཡབ་ཡུམ་དགྱེས་པར་རོལ་ཞིང་བཞུགས་སུ་གསོལ། །སྣང་སྲིད་དྲེགས་པ་མ་ལུས་སྡེ་དཔོན་གཙོ། །འདོད་ཁམས་བདག་པོ་དགྱེས་མཛད་ཡུམ་དང་བཅས། །ལྷ་སྲིན་ཚོགས་ཀྱི་གཙོ་ཆེན་འཁོར་དང་བཅས། །ཕྲིན་ལས་མཐུན་པའི་གདན་ལ་བཞུགས་སུ་གསོལ། །བཛྲ་སརྦ་དུཥྚན་ཨཥྚ་ན་ཡ་ཨེ་ཛཿབྷྱོ། ས་མ་ཡ་ཏིཥྛ་བཛྲ་ཛཿཧཱུྃ་བྃ་ཧོཿ
དུས་གསུམ་སངས་རྒྱས་ཐུགས་ཀྱི་སྙིང་པོ་མཆོག །ཆོས་ཀྱི་སྐུ་ལས་གཟུགས་སྐུ་འགྲོ་དོན་སྤྲུལ། །ཆེ་བཙན་འགྲན་ཟླ་མེད་པ་ཁྲོ་བོའི་རྗེ། །དབང་སྡུད་ཡུམ་དང་བཅས་ལ་ཕྱག་འཚལ་ལོ། །ཕྱོགས་བཅུའི་རྒྱལ་བ་མ་ལུས་སྲས་དང་བཅས། །དམ་ཆོས་བསྟན་པའི་ཚུལ་སྲུང་འཇིག་རྟེན་མགོན། །ཞིང་བཅུ་སྒྲོལ་མཛད་ཕྲིན་ལས་དྲག་ཤུལ་ཅན། །སྡེ་དཔོན་སུམ་ཅུའི་ཚོགས་ལ་ཕྱག་འཚལ་ལོ། །བཛྲ་སརྦ་དུཥྚཱན་ཨཥྚ་ན་ཡ་ཨེ་ཛཿབྷྱོ། ན་མཿཨཱ་རལླི་ཧོ། དཔལ་ཆེན་དྲེགས་པ་ཀུན་འདུལ་ཡབ་ཡུམ་ལ། །སྐུ་གསུང་ཐུགས་མཉེས་མཆོད་པ་འབུལ་བ་ནི། །གདུགས་དང་རྒྱལ་མཚན་བ་དན་བླ་རེ་དང་། །ཕྲེང་བ་ཕྱེ་མ་ལྡ་ལྡི་ཟ་ར་ཚགས། །བདུག་སྤོས་མེ་ཏོག་མར་མེ་ཞབས་བསིལ་དང་། །གཟུགས་མཛེས་སྒྲ་སྙན་དྲི་ཞིམ་རོ་བྲོ་དང་། །རེག་འཇམ་འདོད་ཡོན་མ་ལུས་ཇི་སྙེད་པ། །འཕགས་པའི་ཐུན་མོང་མཆོད་ཚོགས་བཞེས་སུ་གསོལ། །ཁྱད་པར་གསང་བའི་མཆོད་པ་འབུལ་བ་ནི། །དུག་གསུམ་གནས་སུ་སྦྱོང་བའི་ཤ་ཁྲག་རུས། །དུག་ལྔ་སྨན་དུ་སྒྲུབ་པའི་དམ་ཚིག་རྫས། །སྟོབས་མཆོག་ནུས་པ་བ་ལིང་མཆོད་པའི་དངོས། །ཐུགས་རྗེ་མཐུན་པའི་ངང་གིས་བཞེས་སུ་གསོལ། །དཔལ་ཆེན་ཡབ་ཡུམ་བཀའ་བཞིན་རྗེས་
བསྒྲུབ་པའི། །དབང་ཕྱུག་ཆེན་པོ་ཡབ་ཡུམ་མངའ་བདག་རྗེ། །འཇིག་རྟེན་འདས་ཀྱང་འཁོར་བའི་ཆ་ལུགས་འཛིན། །བཀའ་ཡི་བསྟན་སྲུང་སྡེ་དཔོན་སུམ་ཅུ་ལ། །འདོད་པའི་ཡོན་ཏན་མཆོད་ཅིང་སྦྱིན་པ་ནི། །དཀར་དམར་སེར་ལྗང་ལ་སོགས་མདོག །ཟླུམ་པོ་གྲུ་བཞི་ལ་སོགས་དབྱིབས། །ཆེ་ཆུང་སྦོམ་ཕྲ་རིང་ཐུང་ཚད། །མཛེས་དང་མི་མཛེས་སྡུག་མི་སྡུག །འབྱུང་བ་རྟེན་འབྲེལ་རོལ་མོའི་སྒྲ། །གླུ་ཚིག་བསྟོད་དབྱངས་སྙན་པའི་ཚིག །སྤོས་སྨན་བདུད་རྩི་མེ་ཏོག་དྲི། །བསྲེག་གསུར་བམ་སུང་དྲི་དང་ངད། །ཁ་མངར་ཚ་སྐྱུར་བསྐ་བ་དང་། །ལན་ཚྭ་སྤོད་དང་བྱི་ཀུ་དང་། །འཇམ་རྩུབ་བསིལ་ཡང་ཚ་དང་དྲོ། །སོ་སོའི་ཡོན་ཏན་ཚོགས་དང་བཅས། །འདོད་དགུར་འབུལ་གྱིས་བཞེས་སུ་གསོལ། །བདུད་རྩི་ལྔ་དང་ཤ་ལྔ་དང་། །དོན་སྙིང་ལྔ་དང་འབྱུང་བ་ལྔ། །དབང་པོ་ལྔ་དང་ཡུལ་ལྔ་དང་། །ཕུང་པོ་ལྔ་དང་ནང་རོལ་ལྔ། །འཚེ་ཞིང་གནོད་དང་བར་དུ་གཅོད། །གདུག་པར་སེམས་ཞིང་ལོག་པར་ལྟ། །མི་མཐུན་ཕྱོགས་ལྔར་བཅས་པ་རྣམས། །སོ་སོར་འབུལ་གྱིས་བཞེས་སུ་གསོལ། །བཛྲ་སརྦ་དུཥྚཱན་ཨཥྚ་ན་ཡ་ཨེ་ཛཿབྷྱོཿ མ་ཧཱ་བ་ལིངྟ་ཨ་མྲྀ་ཏ་སུ་ཀ་ཏ་མཾ་ས་རཀྟ་པི་པ་ཐ་བ་སུ་ཏ་ས་མ་ཐ། ཨི་དཾ་གྲྀཧྞནྟུ་ས་མ་
དུ་ཁ་ཁ་ཁཱ་ཧི་ཁཱ་ཧི། བཅོམ་ལྡན་དཔལ་ཆེན་དྲེགས་པ་ཀུན་འདུལ་དང་། །ཡུམ་ཆེན་ཁམས་གསུམ་སྤྱི་འདུལ་འཁོར་བཅས་ཀྱི། །སྐུ་མཆོག་འགྱུར་མེད་མེ་ལོང་གཟུགས་བརྙན་བཞིན། །གསལ་ཞིང་རྟོག་མེད་སྣང་ལ་མ་འགགས་པ། །སྐུ་ལྔ་ལྷུན་གྲུབ་རྫོགས་པའི་དངོས་གྲུབ་སྩོལ། །གསུང་མཆོག་འགགས་མེད་བྲག་ཆ་སྒྲ་བརྙན་བཞིན། །སྙན་དང་མི་སྙན་གྲགས་སྟོང་ཚངས་པའི་གསུང་། །གསུང་དབྱངས་ནམ་མཁའི་མཐའ་ཁྱབ་དངོས་གྲུབ་སྩོལ། །ཐུགས་མཆོག་སྤྲོས་བྲལ་བསམ་འདས་ཆོས་ཀྱི་དབྱིངས། །མི་རྟོག་བདེ་ཆེན་ཐབས་དང་ཤེས་རབ་དང་། །རྩོལ་མེད་མི་གཡོ་མཆོག་གི་དངོས་གྲུབ་སྩོལ། །ཡོན་ཏན་བརྗོད་ཀྱིས་མི་ལང་སྣ་ཚོགས་ཏེ། །འདས་དང་མ་འདས་མཆོག་དང་ཐུན་མོང་གི །གྲུབ་པ་བརྒྱད་དང་མཐར་ཐུག་དངོས་གྲུབ་སྩོལ། །འཇིགས་པ་བརྒྱད་སོགས་ཞི་དང་འབྱོར་པ་རྒྱས། །ལོག་ལྟ་མོས་པའི་ཚུལ་གྱིས་དབང་སྡུད་ཅིང་། །མངོན་སྤྱོད་དགྲ་བགེགས་འདུལ་བའི་དངོས་གྲུབ་སྩོལ། །བཛྲ་སརྦ་དུཥྚཱན་ཨཥྚ་ནཱ་ཡ་ཀཱ་ཡ་སིདྡྷི་ཝཱཀ་སིདྡྷི་ཙིཏྟ་སིདྡྷི་གུ་ཎ་སིདྡྷི་སརྦ་སིདྡྷི་ཧཱུྃ་ཧཱུྃ་ཧཱུྃ། ཞེས་མཆོད་བསྟོད་གྲུབ་པ་རྩ་བའི་རྒྱུད་ནས་ཁོལ་དུ་ཕྱུངས་པའོ།། ༈ །སྡེ་དཔོན་གསོལ་བསྡུས་ཕྲིན་ལས་ཀུན་འགྲུབ་བཞུགས། ཧཱུྃ། ངང་ཉིད་
ཆོས་ཀྱི་དབྱིངས་ལས་མ་གཡོས་ཀྱང་། །འཇིགས་བྱེད་འབར་བའི་ཚུལ་དུ་སྐུར་བཞེངས་པ། །བཅོམ་ལྡན་དྲེགས་པ་ཀུན་འདུལ་ཡབ་ཡུམ་གྱི། །བཀའ་དང་འཁོར་ན་གནས་པའི་མཐུ་བོ་ཆེ། །དྲེགས་པའི་སྡེ་དཔོན་སུམ་ཅུ་འཁོར་དང་བཅས། །ཁྲོ་གཏུམ་གདུག་པའི་རྩལ་འཆང་དཔལ་དང་ལྡན། །རྡོ་རྗེ་འཆང་གི་བཀའ་བཞིན་རྗེས་སུ་སྒྲུབ། །དམ་ཚིག་ཆེར་དགོངས་གནས་འདིར་གཤེགས་སུ་གསོལ། །འབར་བའི་གདན་ལ་དགྱེས་པར་བཞུགས་ནས་ཀྱང་། །གུས་པས་མཆོད་བསྟོད་བཅོལ་བའི་ཕྲིན་ལས་མཛོད། །དབང་ཕྱུག་ཆེན་པོ་ཨུ་མ་དེ་བཱི་དང་། །ཡ་མ་རཱ་ཛ་ཟ་བྱེད་ནག་མོ་ཡུམ། །གཤིན་རྗེ་བྲང་དཀར་བདུད་མོ་རེ་མ་ཏི། །སྲིན་པོ་གློག་ཕྲེང་སྦལ་མགོ་ཁྲག་མིག་མ། །གནོད་སྦྱིན་ཡཀྴ་ནག་པོ་མོན་མོ་ནག །གཟའ་བདུད་གནམ་སྨན་ཐོག་གི་བུ་ཡུགས་མ། །ཀླུ་བདུད་མགོ་དགུ་ཀླུ་མོ་ཡཀྴ་ནག །ནོར་བུ་བཟང་པོ་གནམ་ཐེལ་དཀར་པོ་དང་། །གུ་རུམ་རྩེ་དང་མ་མོ་སྲིད་རྒྱལ་མ། །ཨེ་ཀ་ཛཱ་ཊི་ནག་མོ་མགྱོགས་བྱེད་མ། །བན་ཆེན་བདུད་འདུལ་སྲོག་ཟན་དམར་པོ་དང་། །བཙན་འགོང་དམར་པོ་བི་ནཱ་ཡ་ཀ་དང་། །ཀཱ་ལ་ནག་པོ་ནག་པོ་བཀྲག་མེད་དང་། །སྲོག་བདག་ཚངས་པ་རྒྱལ་པོ་པེ་ཧར་དང་། །སྐུ་ལྷ་གསང་བ་མགོན་པོ་ནག་པོ་སྟེ། །དྲེགས་པའི་སྡེ་དཔོན་ཆེན་
པོ་སུམ་ཅུ་ནི། །འཁོར་དང་ཡང་འཁོར་སྤྲུལ་པ་རྡུལ་སྙེད་བཅས། །དམ་རྫས་བདུད་རྩིའི་གཏོར་མ་འདི་བཞེས་ལ། །བརྒྱུད་གསུམ་བླ་མས་བཀའ་བསྒོས་དམ་བཞག་བཞིན། །བསྟན་དང་བསྟན་འཛིན་སྐྱོང་ཞིང་སྤེལ་བ་དང་། །ཐོགས་མེད་ཕྲིན་ལས་རྣམ་བཞིའི་སྟོབས་འབར་ཞིང་། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །བཛྲ་ཙཎྚ་སརྦ་དུཥྚཱན་ཨེ་ཛཿབྷྱོ༔ མ་ཧཱ་དེ་བ་ཨུ་མ་དེ་བཱི་ཡ་མ་རཱ་ཛ་ཡ་མ་དུན་ཏིང་དུ་ཁྲག་དུན་ཏིང་རཀྴ་རཀྨོ་ཡཀྴ་ཡཀྨོ་རཱ་ཧུ་ལ་ཨ་སེ་ལ་ནཱ་ག་རཱ་ཛ་ནཱ་ག་ཀྲོ་ཏཱི་ཤྭ་རི་དེ་བ་ཏྲི་པ་ཤ་ལིང་། ཏིག་སྣ་འདྲེ་རུཾ། མ་མ་རུ་ལུ་ཨེ་ཀ་ཛཱ་ཊི་ཌཱ་ཀི་ནཱི་རུ་དྲ་ཨ་བི་ཤུ་ཧཾ་ཤཾ་བི་ནཱ་ཡ་ཀ་ཏིརྠི་ཀ་མུན་མུན་གིང་ཀ་ར་རཱ་ཙ་བཛྲ་སཱ་དྷུ་མ་ཧཱ་ཀཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁཱ་ཧི། མ་ཧཱ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། མ་མ་སརྦ་ཀརྨ་སིདྡྷི་མྨེ་པྲ་ཡཙྪ་ཏུ་ཧོཿ ཟིལ་གནོན་དགྱེས་པ་རྩལ་གྱིས་མཆོད་བསྟོད་གྲུབ་པ་རྩ་བའི་རྒྱུད་ལས་བཏུས་པ་སྟེ། གསོལ་མཆོད་ལ་བརྩོན་ན་ཕྲིན་ལས་རྣམ་པ་བཞིའི་སྟོབས་ངང་གིས་རྒྱས་པར་ལུང་ལས་གསུངས་པས་ཐེ་ཚོམ་མེད་དོ། །བཛྲ་ས་མ་ཡ༔ ༈ སྔགས་བདག་དྲེགས་པའི་གསོལ་བྱང་དྲག་པོའི་ཐོག་འབེབས་བཞུགས། ཤ་ཁྲག་གིས་བརྒྱན་པའི་གཏོར་མ་བཤམས་ཤིང་བྱིན་གྱིས་བརླབས་ལ་འདི་སྐད་དོ། །ཧཱུྃ། ཐབས་ཤེས་སྟོང་གསལ་ཆོས་སྐུའི་དཀྱིལ་འཁོར་ནས། །ཡེ་ཤེས་
སྟོབས་ལྡན་ཡབ་ཡུམ་གཤེགས་སུ་གསོལ། །གྲུ་གསུམ་ཨེ་ཡི་དལ་ལ་བཞུགས་སུ་གསོལ། །སྡེ་བརྒྱད་དམག་དཔོན་གཟའ་བདུད་གཤེགས་སུ་གསོལ། །འཆི་བདག་སྲོག་ལེན་ཡབ་ཡུམ་གཤེགས་སུ་གསོལ། །ལས་མཁན་མོན་པ་རྣམ་གསུམ་གཤེགས་སུ་གསོལ། །ནམ་མཁའི་མཐའ་དང་མཉམ་པའི་ཞིང་ཁམས་ནས། །མཐུ་ཆེན་སྔགས་ཀྱི་བདག་པོ་དྲེགས་པའི་ཚོགས། །ཅི་བགྱིའི་བཀའ་ཉན་དྲེགས་པ་གཤེགས་སུ་གསོལ། །ཏི་ར་རོ་ཡི་གདན་ལ་བཞུགས་སུ་གསོལ། །ལུས་ངག་ཡིད་གསུམ་དད་པས་ཕྱག་འཚལ་ལོ། །མཛེས་པའི་གཞལ་ཡས་ཀ་པཱ་ལ་ཡི་ནང་། །ཕྱི་ནང་གསང་བའི་མཆོད་པ་མ་ལུས་སྦྱར། །ཤ་ཁྲག་དམར་དང་སྙིང་སྣས་རབ་ཏུ་བརྒྱན། །ཆང་ཕུད་ཨ་མྲྀ་ཏ་དང་རཀྟས་བྲན། །སྣོད་དང་བཅུད་ལྡན་མཐུན་པའི་མཆོད་པ་འབུལ། །ལྷ་མཆོག་སྟོབས་ལྡན་ཡབ་ཡུམ་མཉེས་གྱུར་ཅིག །བཀའ་སྲུང་དྲེགས་པའི་ཚོགས་རྣམས་ཚིམ་གྱུར་ཅིག །འཆི་བདག་ནག་པོ་འཆི་བདག་ནག་མོ་ཡུམ། །མེ་ཡི་ཁ་ངས་ནག་མོ་ཁྲག་འཛག་མ། །སྲིན་པོ་གསོད་བྱེད་སྲིན་མོ་གསོད་བྱེད་མ། །གང་བ་བཟང་པོ་ཤ་ཟ་རལ་གཅིག་ཡུམ། །མ་ཧཱ་དེ་བ་ཐར་པ་ནག་པོ་དང་། །དམུ་རྗེ་བཙན་པོ་མུ་སྟེགས་ཀཱ་ལ་ནག །
གཟའ་བདུད་རཱ་ཧུ་ཀླུ་རྒྱལ་སོག་མ་མེད། །ལི་བྱིན་ཧར་ལེགས་ཁུ་ལེ་ལག་དགུ་དང་། །རྡོ་རྗེ་ལེགས་པ་ཡམ་ཤུད་དམར་པོ་བཅས། །སྔགས་བདག་དྲེགས་པ་ཆེན་པོ་བཅོ་བརྒྱད་ནི། །འཁོར་དང་བཀའ་ཉན་སྤྲུལ་པ་ཡང་སྤྲུལ་བཅས། །སྣང་སྲིད་མཐུ་ཆེན་དྲེགས་པ་མ་ལུས་ལ། །དམ་རྫས་བདུད་རྩིའི་གཏོར་མ་འདི་འབུལ་གྱིས། །དགྱེས་པར་བཞེས་ཤིང་རོལ་པར་མཛད་ནས་ཀྱང་། །བརྒྱུད་གསུམ་བླ་མའི་སྤྱན་སྔར་དམ་བཅས་ལྟར། །བསྟན་པའི་དབུ་འཕང་སྨད་པའི་དམ་ཉམས་ལ། །ཕུང་བྱེད་དྲག་པོ་སྔགས་ཀྱི་མཐུ་ནུས་ཕོབ། །གནོད་པའི་དགྲ་བགེགས་ཐལ་བའི་རྡུལ་དུ་རློག །ཇི་ལྟར་བཅོལ་བའི་ཕྲིན་ལས་མ་ལུས་པ། །ཐོགས་མེད་ཡིད་བཞིན་འགྲུབ་པར་མཛད་དུ་གསོལ། །བཛྲ་སརྦ་དུཥྚཱ་ན་ཡ་མ་མ་མ་རུ་ལུ་དུ་ཁྲག་དུནྟིང་རཀྴ་རཀྨོ་ཡཀྴ་ཡཀྨོ་དེ་བ་རུ་དྲ་མུན་མུན་ཏིརྟི་ཀ་རཱ་ཧུ་ལ་ནཱ་ག་རཱ་ཙ་ཧཾ་ཤཾ་བཛྲ་སཱ་དྷུ་ཤུ་ལ་ས་པ་རི་ཝཱ་ར་མ་ཧཱ་བ་ལིངྟ་ཨ་མྲྀ་ཏ་རཀྟ་ཁཱ་ཧི་ཁཱ་ཧི་སརྦ་སིདྡྷི་ཧཱུཾ་སྭཱ་ཧཱ། ཞེས་པའང་རྡོ་རྗེ་གཙུག་ལག་གི་རྒྱུད་ནས་ཁོལ་དུ་ཕྱུངས་པ་སྟེ། །ཚུལ་འདི་ལ་བརྩོན་པས་ཕྲིན་ལས་དྲག་པོའི་སྟོབས་མཆོག་ཏུ་རྒྱས་པར་ལུང་ལས་བསྔགས་པས་དེ་ལྟར་ངེས་པར་བྱའོ། །ཞེས་ཟིལ་གནོན་དགྱེས་པ་རྩལ་གྱིས་སོ། །མངྒ་ལཾ། །ས་མ་ཡ༔ གསང་རྒྱ༔ སྦས་རྒྱ༔