བཀའ་བརྒྱད་འདོན་འགྲིགས།
འདིར་བཀའ་བརྒྱད་འདོན་འགྲིགས་ལ། ཐོག་མར་ཚིག་བདུན། བརྒྱུད་འདེབས་ནས་དཀྱུས་ལྟར་བཏང་། ཕྱག་རྒྱའི་མངོན་རྟོགས་རྒྱས་པ་གྱེར་ན། དབུས་ཀྱི་ཕྱོགས་ཀྱི་དཀྱིལ་འཁོར་ཆེན་པོ་རུ། མ་བཅོས་རྫོགས་པའི་སོགས་ཡོངས་རྫོགས། རྗེས་སུ། ཧཱུྃ། དཀྱིལ་འཁོར་ཕྱི་ཡི་བར་ཁྱམས་སོགས། བཟླས་པའི་བར་དུ་བཏང་། བཟླས་དམིགས་ནི། དཀྱིལ་འཁོར་གྱི་ལྷ་རྣམས་སྣང་ལ་སོགས་ནས། དེ་ལྟ་བུའི་དགོངས་པ་དང་ལྡན་པས། ཛབ་བསྐུལ། ཧཱུྃ། གསང་བའི་དཀྱིལ་འཁོར་སོགས་ཀྱིས་སོ་སོའི་བཟླས་པ་ཅི་ལྕོགས་བྱ། བཀའ་སྡོད་དང་སྤྱི་དྲིལ་དང་སྟོབས་འདུས་ཀྱང་ཅུང་ཟད་བཟླ། མཐར་ཚེ་སྒྲུབ་དམིགས་པ་ཆེ་མཆོག་གི་སྔགས་ཤམ་ཚེ་སྙིང་སྦྱར་བ་བཟླ། དབྱངས་གསལ་རྟེན་སྙིང་གིས་ཁ་བསྐང་ལ་མཆོད་བསྟོད་བྱ། དེ་ནས་གསོལ་ཁ་བཏང་། ཚོགས་བྱིན་བརླབ་ནས་མཆོད་བསྒྲལ་བཤགས་གསུམ་བྱ། དེ་ནས་བསྐང་བ། སྤྲོ་ན་མདངས་སྐོང་ཆེན་པོ། ཧཱུྃ། ཤར་ནས་བཛྲ་ཨཀྵོ་སོགས་དང་། སྤྲོ་ན་བཤགས་པ་གང་རིགས་བྱ། དེ་ནས་སྨད་ལས་ཀྱི། ཨོཾ་བཛྲ་མནྜ་ལ་ཧཱུྃ་སོགས། ཞལ་བསྟབ་བར་དཀྱུས་ལྟར་བཏང་། དེ་ནས་བཟློག་དམིགས་བཅས་བཟློག་སྔགས་ཅི་རིགས་བཟླ། མཐར་བདེན་དམོད་ཐལ་སྡེབ་བྱ། དེ་ནས་ལིངྒ་བསྒྲལ་བའི་དུམ་བུ་གཏོར་ཆུང་
བཅས་སྐབས་སུ་འབུལ་ཞིང་། ཧཱུཾ། ཞི་བ་དབྱིངས་ཀྱི་སོགས་ནས་རྒྱས་ན་སྨེད་ཆེན་འདོན། རིམ་བཞིན་གྱེར། དཔལ་དགུ་སོ་སོའི་བཟློག་པ་ལ་བཟློག་བྱང་སྤྲོ་ན་དོན་བདུན་གཞུང་གི་ཡིག་ཆུང་བཞིན། སྤྲད་ལ་སོ་སོའི་སྔགས་ལ་བཟློག་ཤམ་བཏགས་ཏེ་འདོན། ཁྱུང་བཟློག་འདོན། བཟློག་པ་འགྲེས་བྱང་རྒྱས་བསྡུས་ཅི་རིགས་བསགས་ན་དེ་ལྟར་བྱ། རྗེས་སུ་ཐུན་གཏོར་བཏང་ལ་ཚོགས་དྲངས། ལྷག་མ་བསྔོ། གསོལ་ཁ་མཆོད། དེ་ནས་ཆད་བརྟན་སོགས་བཀྲ་ཤིས་ཀྱི་བར་དུ་དཀྱུས་ལྟར་བཏང་ངོ་། ༈ །ཟོར་འཕེན་ཉིན་བཟློག་པ་གྲུབ་རྗེས་ཟོར་ལམ་དབྱེ་བའི་གསེར་སྐྱེམས་ཕྱི་རོལ་དུ་མཆོད་ལ། ནང་དུ་མཆོད་བསྟོད་ནོངས་བཤགས་རྗེས་ཟོར་བསྐུལ་བཞེངས་ཏེ་ཟོར་སྒྲུབ་བྱ། ཐུན་གཏོར་དང་ཆད་ཐོ་ལ་དགུག་བསྟིམ་དྲག་པོ་བྱས་ཏེ་དམག་ལྟོའི་ཚུལ་དུ་འབུལ། གནས་ལྕགས་ཐོག་མདའ་འདོན་ན་འདིར་བྱ། ཁྲོ་ཆུའི་དུག་ཁྲག་གཏོར་འབུལ་བྱ་ན་འདིར་བྱ། དེ་ཀུན་ཟོར་རྩར་འབུལ། དེ་ནས་ལྷག་མ་བཏང་ལ་སྣོད་གཞན་དུ་བཞག །གཏོར་ཚུགས་ལམ་ནང་དུ་ཟ་ལམ་བཏང་། དེ་ནས་བསྐུལ་པ་རྒྱས་བསྡུས་ཅི་རིགས་རྗེས་ཟོར་འཕེན་པ། ཧཱུཾ། གཟུ་དང་དཔང་དུ་སོགས་དང་། ཧཱུཾ་ང་ནི་དཔལ་ཆེན་མས་འཕང་། དམོད་བཅོལ་སྤྲོ་ན་བྱ། དེ་རྗེས་བཟློག་བྱང་འདོན། མཚམས་བཅད། ནང་དུ་ལོག་སྟེ་སྒོ་ཁར་བརྟན་མ་བསྐྱང་། བྲོ་བརྡུང་། ནང་དུ་ཚེ་འགུགས་དང་མཆོད་བསྟོད་ནོངས་བཤགས་རྗེས་དངོས་གྲུབ་བླངས་ལ། གསོལ་ཁ་མཆོད་ནས་བསྡུ་ལྡང་བཀྲ་ཤིས་བྱའོ། །མི་ཕམ་པས་སོ་དགེ། མངྒ་ལཾ། །