རྟ་མགྲིན་ཡང་གསང་གི་ཕྲིན་ལས་དབང་དྲག་འབར་བ།
རྟ་མགྲིན་ཡང་གསང་གི་ཕྲིན་ལས་དབང་དྲག་འབར་བ་བཞུགས་སོ། །
བླ་མ་དང་དབང་ཆེན་ཁྲོ་བོའི་རྒྱལ་པོ་ལ་ཕྱག་འཚལ་ལོ། །འདིར་རྟ་མགྲིན་ཡང་གསང་གི་རྒྱུན་ཁྱེར་ཉམས་སུ་བླང་བར་འདོད་པས་ཐོག་མར་མདུན་དུ་སྐྱབས་ཡུལ་གསལ་བཏབ་ལ། ཧོ༔ རྡོ་རྗེ་སློབ་དཔོན་སངས་རྒྱས་དཔལ། སོགས་བརྒྱད་རྣམ་དག་བྱ། དེ་ནས་མཚམས་བཅད་ནི། ཧཱུྃ༔ དཔལ་ཆེན་མི་བཟད་དཀྱིལ་འཁོར་ནས༔ འབར་བའི་ཁྲོ་བོ་མེ་དཔུང་འབར༔གདུག་པའི་མཚོན་ཆ་སྣ་ཚོགས་བསྣམས༔ བགེགས་དང་ལོག་འདྲེན་རྡུལ་དུ་རློག༔ དབང་ཆེན་མེ་དཔུང་དམར་ནག་འབར༔ བསྐལ་པ་དུས་མཐའི་མེ་ལྟ་བུ༔དབང་དྲག་མཚོན་ཆ་བྲག་ལྟར་གཏམས༔ གང་ལ་བབ་ཀྱང་གཅོད་ཅིང་སྒྲོལཿ དབང་ཆེན་ཁྲོ་བོ་མི་བཟད་རྔམ༔ སྲིད་པའི་ཡེ་ཤེས་འཁོར་ལོ་འཁྲིགས༔ དབང་ཆེན་
མཚམས་ལས་གང་འདའ་བར༔ རྡུལ་ཕྲན་བཞིན་དུ་བརླག་པར་གྱིས༔ ཨོཾ་རཾ་ཀྲོ་ཏ་རཀྵ་བཛྲ་ཛྭ་ལ་རེཾ་ཏིཀྵྞ་བི་ཤྭ་ཛྭ་ལ་རཾ་ཕཊ་རཾ་རཾ༔ དེ་ནས་མཆོད་པ་རྣམས། རྃ་ཡྃ་ཁྃ་གིས་སྦྱང་ཞིང་། ཨོཾ་ཨཱཿཧཱུྃ་ཧོས་བྱིན་གྱིས་བརླབས། དངོས་གཞི་དཀྱིལ་འཁོར་བསྐྱེད་པ་ནི། ཧཱུྃ༔ ཆོས་དབྱིངས་ནམ་མཁའི་ཀློང་ཡངས་ནས༔ ཆོས་རྣམས་སྣ་ཚོགས་རང་ཤར་བ༔ རང་བཞིན་མེད་པ་ཆུ་ཟླ་འདྲ༔ ཐུགས་རྗེ་ཆེན་པོ་ཀུན་ལ་ཁྱབ༔ སྙིང་པོ་ཡེ་ཤེས་ཧཱུྃ་གི་དབྱིབས༔ ཆེན་པོ་ལྔ་ཡི་སྙིང་པོ་ལྔ༔ འབྱུང་བ་ལྔ་ཡི་དྭངས་མ་ཆགས༔ ཡེ་ཤེས་འབར་བའི་གཞལ་ཡས་ཁང་༔ ཆོས་ཀྱི་དབྱིངས་ཀྱི་གནས་ཆེན་པོ༔ དབུས་ན་གྲུ་གསུམ་ཟླ་གམ་གསུམ༔ ཕྱི་རོལ་འཁོར་ལོ་རྩིབས་
བཞི་པ༔ ཐོད་པ་སྐམ་རློན་ཕྲེང་བ་ཟླུམ༔ གྲུ་ཆད་སྒོ་བཞི་རྒྱན་དང་ལྡན༔ ཕྱི་ནང་མེད་པ་ཡོངས་སུ་གསལ༔ དབུས་ཀྱི་གྲུ་གསུམ་བདུད་ནག་གདན༔ པདྨ་ཉི་མ་འོད་དུ་འབར༔ མེ་དཔུང་འབར་བའི་ཀློང་དཀྱིལ་ན༔ པདྨ་ཁྲག་འཐུང་རྟ་མཆོག་དཔལ༔ སྐུ་མདོག་དམར་ནག་ཆེན་པོ་ལ༔ དབུ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་ལྗང་དབུས་དམར་ནག༔ དབུ་སྐྲ་ཁམ་ནག་གྱེན་དུ་འཁྱིལ༔ དབུ་ལ་ཐོད་སྐམ་ལྔ་ཡིས་བརྒྱན༔ གཙུག་ན་རྟ་མགོ་ལྗང་གུ་འཚེར༔ སྐུ་སྟོད་ཞིང་ཆེན་གླང་ཆེན་མནབས༔ སྐུ་སྨད་སྟག་ལྤགས་ཐོད་རློན་ཕྲེང་༔ རིགས་བཞི་སྦྲུལ་བརྒྱན་ཆས་རྣམས་རྫོགས༔ སྤྱན་གསུམ་ཞལ་བསྒྲད་མཆེ་བ་གཙིགས༔ སྨིན་མ་སྨ་ར་ཨག་ཚོམ་སེར༔ པདྨ་ལྕགས་ཀྱུ་བེ་ཅོན་གཡས༔ བྷན་དམར་ཞགས་པ་རལ་གྲི་གཡོན༔ ཞབས་བཞི་བརྐྱང་བསྐུམ་ཚུལ་དུ་བཞུགས༔ གཡོན་ན་ཡུམ་ཆེན་ཁྲོ་མོ་ནི༔ པདྨ་གར་གྱི་དབང་ཕྱུག་མ༔ སྐུ་མདོག་སྔོ་ནག་དུར་ཁྲོད་ཆས༔ དབུ་རལ་ནག་པོ་རིན་ཆེན་སྤྲས༔ ཁྲོ་ཚུལ་སྤྱན་གསུམ་མཆེ་བ་གཙིགས༔ གཡས་འཁྱུད་གཡོན་པ་དུང་དམར་སྟོབ༔ ཤར་གྱི་རྩིབས་ལ་དྲི་ཟའི་གདན༔ རྡོ་རྗེ་དབང་ཆེན་ཁྲོས་པ་དཀར༔ རྡོ་རྗེ་ཐོད་དབྱུག་ཕྱག་ན་བསྣམས༔ ལྷོ་
ཡི་རྩིབས་ལ་གྲུལ་བུམ་གདན༔ རིན་ཆེན་དབང་ཆེན་ཁྲོས་པ་སྔོ༔ རིན་ཆེན་ལྕགས་ཀྱུ་ཕྱག་ན་བསྣམས༔ ནུབ་ཀྱི་རྩིབས་ལ་ཀླུ་དབང་ལྡན༔ པདྨ་དབང་ཆེན་ཁྲོས་པ་དམར༔པདྨ་ཞགས་པ་ཕྱག་ན་བསྣམས༔ བྱང་གི་རྩིབས་ལ་གནོད་སྦྱིན་གདན༔ ཕྲིན་ལས་དབང་ཆེན་ཁྲོས་པ་ལྗང་༔ རལ་གྲི་ཁ་ཊྭཱྃ་ཕྱག་ན་བསྣམས༔ བཞི་ཀའང་ཞལ་གཅིག་ཕྱག་གཉིས་པ༔ ཆས་བརྒྱད་མེ་དཔུང་ཀློང་ན་བཞུགས༔ སྒོ་བཞིར་སྒོ་མ་བཞི་པོ་ནི༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ དཀར་སེར་དམར་ལྗང་དུར་ཁྲོད་བརྒྱན༔ དབང་ཆེན་ཡང་གསང་ཁྲོས་པའི་ལྷ༔ མ་འདྲེས་ཡོངས་སུ་རྫོགས་པར་གསལ༔ བྱིན་རླབས་དབང་བསྐུར་ཡོངས་སུ་རྫོགསཿ གནས་གསུམ་འབྲུ་གསུམ་འོད་ཟེར་གྱིས༔ ཡེ་ཤེས་ལྷ་ཚོགས་སྤྱན་དྲངས་གྱུར༔ དེ་ནས་སྤྱན་འདྲེན་པ་ནི༔ ཧཱུྃ༔ ཆོས་ཀྱི་དབྱིངས་ལས་སྐུ་བཞེངས་པ༔ དབང་ཆེན་ཁྲོས་པའི་རྒྱལ་པོ་བཞེངས༔ དབུས་ཀྱི་ཡེ་ཤེས་གཞལ་ཡས་ནས༔ པདྨ་རྟ་མཆོག་གཤེགས་སུ་གསོལ༔ ཡུམ་ཆེན་ཁྲོ་མོ་གཤེགས་སུ་གསོལ༔ ཕྱོགས་བཞིའི་འཁོར་ལོའི་རྩིབས་སྟེང་ནས༔ སྤྲུལ་པའི་ཁྲོ་བོ་གཤེགས་སུ་གསོལ༔ སྒོ་བཞི་གནས་ཀྱི་གཞལ་ཡས་ནས༔ སྒོ་མ་བཞི་རྣམས་གཤེགས་སུ་གསོལ༔ ས་མ་ཡ་ཛ༔
ཨེ་ཧྱེ་ཧི་བྷ་ག་ཝན་མ་ཧཱ་ཀ་རུ་ཎི་ཀ་བཛྲ་དྷཱ་ཏུ་ས་པ་རི་ཝཱ་ར་ཛཿཧཱུྃ་བྃ་ཧོཿ ས་མ་ཡ་སྟྭཾ༔ བཞུགས་སུ་གསོལ་བ་ནི༔ ཧཱུྃ༔ དམ་ཚིག་དབང་ཆེན་དཀྱིལ་འཁོར་འདིར༔ ཡེ་ཤེས་ཁྲོ་བོ་མི་བཟད་པ༔ དབང་ཆེན་དཀྱིལ་འཁོར་ལྷ་ཚོགས་རྣམས༔ དགྱེས་ཤིང་བརྟན་པར་བཞུགས་སུ་གསོལ༔ ས་མ་ཡ་ཏིཥྛ་ལྷན༔ ཕྱག་འཚལ་བ་ནི༔ ཧྲཱིཿདཔལ་ཆེན་ཁྲོ་བོ་མི་བཟད་པ༔ རྟ་མཆོག་དཔལ་ལ་ཕྱག་འཚལ་ལོ༔ ཁྲོ་མོ་ཡུམ་ལ་ཕྱག་འཚལ་ལོ༔ སྤྲུལ་པའི་སྐུ་ལ་ཕྱག་འཚལ་ལོ༔ སྒོ་སྲུང་བཞི་ལ་ཕྱག་འཚལ་ལོ༔ ཨ་ཏི་པུ་ཧོ་པྲ་ཏི་ཛ་ཧོ༔ མཆོད་པ་འབུལ་བ་ལ༔ འདོད་ཡོན་གྱི་མཆོད་པའི་དང་པོ་ཉེར་སྤྱོད་ནི། ཧཱུྃ༔བདུག་སྤོས་སྣང་གསལ་ཞུག་ཏོག་སྒྲ༔ ཞལ་ཟས་དྲི་ཆབ་འདི་རྣམས་ཀྱང་༔ པདྨ་དབང་ཆེན་དཀྱིལ་འཁོར་ལྷར༔ མཆོད་པ་འབུལ་ལོ་བཞེས་སུ་གསོལ༔ ཨོཾ་ན་མཿསརྦ་ཏ་ཐཱ་ག་ཏ་མ་ཧཱ་པདྨེ་ཤྭ་ར་ས་པ་རི་ཝཱ་ར་ཨརྒྷཾ་དྷུ་པེ་པུཥྤེ་ཨཱ་ལོ་ཀེ་གནྡྷེ་ནེ་ཝི་དྱ་ཤཔྡ་པཱུ་ཙ་མེ་གྷ་ས་མུ་དྲ་རཏྣ་ས་མ་ཡེ་ཧཱུྃ༔ འདོད་ཡོན་ལྔ་ཡི་མཆོད་པ་ནི༔ ཧཱུྃ༔ གཟུགས་ཀྱི་ལྷ་མོ་སྐུ་མདོག་དཀར༔ གཟུགས་ཀྱི་ལོངས་སྤྱོད་སྣ་ཚོགས་འཛིན༔དབང་ཆེན་ཁྲོ་བོའི་སྤྱན་ལ་འབུལ༔ ཨ་ལ་ལ་སྟེ་དགྱེས་པར་མཛོད༔ སྒྲ་ཡི་ལྷ་མོ་སྐུ་མདོག་སྔོ༔ སྒྲ་ཡི་ལོངས་སྤྱོད་སྣ་ཚོགས་འཛིན༔ དབང་ཆེན་ཁྲོ་བོའི་སྙན་ལ་འབུལ༔ ཨ་ལ་ལ་ཏེ་དགྱེས་
པར་མཛོད༔ དྲི་ཡི་ལྷ་མོ་སྐུ་མདོག་སེར༔ དྲི་ཡི་ལོངས་སྤྱོད་སྣ་ཚོགས་འཛིན༔ དབང་ཆེན་ཁྲོ་བོའི་ཤངས་ལ་འབུལ༔ ཨ་ལ་ལ་སྟེ་དགྱེས་པར་མཛོད༔ རོ་ཡི་ལྷ་མོ་སྐུ་མདོག་དམར༔ རོ་ཡི་ལོངས་སྤྱོད་སྣ་ཚོགས་འཛིན༔ དབང་ཆེན་ཁྲོ་བོའི་ལྗགས་ལ་འབུལ༔ ཨ་ལ་ལ་སྟེ་དགྱེས་པར་མཛོད༔ རེག་བྱའི་ལྷ་མོ་སྐུ་མདོག་ལྗང་༔ རེག་བྱའི་ལོངས་སྤྱོད་སྣ་ཚོགས་འཛིན༔ དབང་ཆེན་ཁྲོ་བོའི་སྐུ་ལ་འབུལ༔ ཨ་ལ་ལ་སྟེ་དགྱེས་པར་མཛོད༔ ཨོཾ་རཱུ་པ་ཤཔྟ་གནྡྷེ་ར་ས་སྤརྴེ་པཱུ་ཙ་ཧོ༔ ནང་སྨན་རཀ་གཏོར་གསུམ་མཆོད་པའི་དང་པོ་སྨན་མཆོད་ནི༔ ཧཱུྃ༔ རང་བྱུང་གདོད་ནས་རྣམ་པར་དག༔ རྩ་བརྒྱད་སྟོང་ལ་སྦྱར་བའི་སྨན༔ ཡེ་ཤེས་ལྔ་རྫོགས་གྲུབ་པའི་རྫས༔ འཆི་མེད་བདུད་རྩི་ར་ས་ཡན༔ དམ་རྫས་མཆོག་གི་མཆོད་པ་འདི༔ པདྨ་དབང་ཆེན་དཀྱིལ་འཁོར་ལ༔ བདག་གི་དད་པས་འབུལ་ལགས་ཀྱིས༔ བཞེས་ཏེ་འཕྲུལ་གྱི་དངོས་གྲུབ་སྩོལ༔ མ་ཧཱ་པཉྩ་ཨ་མྲྀ་ཏ་པཱུ་ཙ་ཁཱ་ཧི་ཁཱ་ཧི༔ སྤྲོ་ན་རྩ་བརྒྱུད་བླ་མ་དང་ཡི་དམ་དཀྱིལ་འཁོར་སོ་སོ་ནས་འབུལ་ལོ། །བདུད་རྩིའི་དངོས་གྲུབ་བསྡུ་བ༔ ཧཱུྃ༔ ཡེ་ཤེས་ཁྲོ་བོ་དབང་ཆེན་གྱི༔ སྐུ་གསུང་ཐུགས་ཀྱི་དངོས་གྲུབ་མཆོག༔ རྣལ་འབྱོར་ལུས་ངག་ཡིད་ལ་ཐིམ༔ གཉིས་མེད་གྱུར་ནས་བརྟན་པ་ཆེ༔ ཨོཾ་
ཨཱཿཧཱུྃ༔ ཞེས་བདུད་རྩི་མྱོང་། རཀྟའི་མཆོད་པ་ནི༔ ཧཱུྃ༔ སྣ་ཚོགས་ཁྲག་གི་མཚོ་འཁྱིལ་པའི༔ རཀྟ་དམར་གྱི་མཆོད་པ་འདི༔ པདྨ་དབང་ཆེན་དཀྱིལ་འཁོར་ལ༔ མཆོད་པར་འབུལ་ལོ་བཞེས་སུ་གསོལ༔ མ་ཧཱ་རཀྟ་ཁ་རཾ་ཁཱ་ཧི༔ གཏོར་མའི་མཆོད་པ་ནི༔ ཧཱུྃ༔ ཁྱད་པར་འདོད་ཡོན་མཆོད་པའི་མཆོག༔ ཤ་ཁྲག་ཀེང་རུས་གཏོར་མ་ཡིས༔ ཁྲོ་རྒྱལ་དབང་ཆེན་ཐུགས་དམ་བསྐང་༔ ཡུམ་ཆེན་ཁྲོ་མོའི་ཐུགས་དམ་བསྐང་༔ སྤྲུལ་པ་རིགས་བཞིའི་ཐུགས་དམ་བསྐང་༔ སྒོ་མ་བཞི་ཡི་ཐུགས་དམ་བསྐང་༔ མ་ཧཱ་བ་ལིངྟ་ཁ་རཾ་ཁཱ་ཧི༔ གསང་བ་སྦྱོར་སྒྲོལ་གྱི་མཆོད་པའི་དང་པོ་སྦྱོར་མཆོད་ནི། ཧཱུྃ༔ གསང་བ་ཐབས་དང་ཤེས་རབ་ལས༔ པདྨ་ནོར་བུ་མཉམ་སྦྱར་ནས༔ དགྱེས་པ་ཆེན་པོའི་བདེ་ཆེན་དང་༔ བྱང་ཆུབ་སེམས་ཀྱི་མཆོད་པ་འདི༔ པདྨ་དབང་ཆེན་དཀྱིལ་འཁོར་ལ༔ མཆོད་པར་འབུལ་ལོ་བཞེས་སུ་གསོལ༔ མ་ཧཱ་སུ་ཁ་བོ་དྷི་ཙིཏྟ་སྭཱ་ཧཱཿ སྒྲོལ་མཆོད་ནི། ཧཱུྃ༔ ཞིང་གྱུར་ཐམས་ཅད་རང་བཞིན་བསྒྲལ༔ ཤ་ཁྲག་སྲོག་དབུགས་མཆོད་པ་འདི༔ པདྨ་དབང་ཆེན་དཀྱིལ་འཁོར་ལ༔ མཆོད་པར་འབུལ་ལོ་ཁ་རཾ་ཁཱ་ཧི༔ མ་ཧཱ་མཱཾ་ས་རཀྟ་ཙིཏྟ་གོ་རོ་ཙ་ན་བ་སུ་ཏ་ཀེང་ནི་རི་ཏི་བ་ལིཏྟ་ཁཱ་ཧི་བྷི་བྷ་ཧོ༔ བསྟོད་པ་ནི༔ ཧྲཱིཿ རྒྱལ་བ་ཀུན་གྱི་ཆོས་སྐུ་པདྨའི་གདུང་༔
ཆོས་རྗེ་འོད་དཔག་མེད་པ་རྡོ་རྗེ་ཆོས༔ སྤྱན་རས་གཟིགས་སྤྲུལ་ཧྲཱིཿལས་རྔམ་ཆེན་སྐུ༔ རྟ་མགྲིན་རྟ་སྐད་བཞད་ལ་ཕྱག་འཚལ་བསྟོད༔ པདྨ་གར་དབང་ཡུམ་ལ་ཕྱག་འཚལ་བསྟོད༔ རིགས་བཞིའི་ཁྲོ་རྒྱལ་རྣམས་ལ་ཕྱག་འཚལ་བསྟོད༔ སྒོ་སྐྱོང་ཁྲོ་མོ་བཞི་ལ་ཕྱག་འཚལ་བསྟོད༔ དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད༔ བཟླས་པ་ནི༔ཧྲཱིཿབདག་ཉིད་ཁྲོ་རྒྱལ་རྟ་མཆོག་དཔལ༔ ཐུགས་ཀར་པདྨ་འདབ་བརྒྱད་ཀྱི༔ གེ་སར་ལ་ནི་སྙིང་པོ་ཧྲཱི༔ འདབ་མ་བརྒྱད་ལ་སྔགས་ཀྱིས་བསྐོར༔ འོད་འཕྲོས་བདེ་གཤེགས་རྣམས་ལ་ཐིམ༔ ཕྱི་ནང་གསང་བའི་མཆོད་པ་འབུལ༔ སྐུ་གསུང་ཐུགས་ཀྱི་སྙིང་པོ་བསྡུས༔ སེམས་ཅན་སྒོ་གསུམ་སྒྲིབ་པ་སྦྱངས༔ ཧྲཱིཿབཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ༔ ཅེས་དང་༔ ཡུམ་གྱི་སྙིང་པོཿཨོཾ་མ་ཧཱ་ཀྲོ་ཏཱི་ཤྭ་རི་ཧཱུྃ་ཕཊ༔ གཞན་ཡང་རིགས་བཞི་དང་སྒོ་མའི་སྙིང་པོའང་སྤྲོ་ན་བཟླ༔ མཐར་ཛབ་བསྟོད་ནི༔ ཧཱུྃཿ པདྨ་རིགས་ཀྱི་ཁྲོ་རྒྱལ་མཆོག །དཔལ་ཆེན་པདྨ་ཧེ་རུ་ཀ༔ མི་བཟད་ཁྲོ་རྒྱལ་རྟ་མཆོག་དཔལ༔ དབང་དྲག་སྟོབས་ཆེན་རྔམ་ཆེན་གཏུམ༔ སྐུ་མདོག་དམར་ནག་བརྗིད་ཅིང་འགྱིང་༔ དབུ་གསུམ་རྣམ་ཐར་གསུམ་ཡང་སྟོན༔ ཕྱག་དྲུག་རྒྱུད་དྲུག་རྩད་ནས་གཅོད༔ ཞབས་བཞི་འཁོར་བའི་
ཆོས་བཞི་སྒྲོལ༔ དུར་ཁྲོད་ཆས་བརྒྱད་སྐུ་ལ་རྫོགས༔ རྟ་མགོ་ལྗང་ཀུ་རྟ་སྐད་འཚེར༔ མེ་དཔུང་འབར་བའི་ཀློང་ན་བཞུགས༔ རྔམ་པའི་ང་རོ་འབྲུག་ལྟར་སྒྲོགས༔ དྲེགས་པ་ཕོ་མོ་དབང་དུ་སྡུད༔དབང་ཆེན་སྐུ་ལ་ཕྱག་འཚལ་བསྟོད༔ དངོས་གྲུབ་བླང་བ་ནི། ཧཱུྃ༔ ཁྲོ་རྒྱལ་རྔམ་པ་རྟ་མཆོག་དཔལ༔ དཔལ་གྱི་སྐུ་གསུང་ཐུགས་མཆོག་ལས༔ མཆོག་གི་དངོས་གྲུབ་ཡེ་ཤེས་དབྱིག༔ དུས་འདིར་རྣལ་འབྱོར་བདག་ལ་སྩོལ༔ ཨོཾ་པདྨ་ཏ་ཀྲྀ་ཏ་པདྨ་ཤྭ་རི་མ་ཧཱ་ཀྲོ་ཏ་ཧ་ཡ་གྲཱི་ཝ་མ་མ་ཏྲ་ཀྨོ་དུན་ཏིང་ཧྲིཾ་ཧྲིཾ་ཧཱུྃ་ཛཿཞེས་སྒྲུབ་སྔགས་དང་། ཨོཾ་པདྨ་ཀྲོ་དྷ་ཀཱ་ཡ་ཝ་ཀ་ཙིཏྟ་སིདྡྷི་ཨ་ལ་ལ་ཧོ༔ དེ་ནས་ཚོགས་ཀྱི་མཆོད་པ་ལ་ཤ་ཆང་སོགས་ཇི་འབྱོར་འདུ་བྱས་ལ༔ ཨོཾ་སརྦ་བི་ཤུདྡྷོ྅ཧ྄ཾཿ སྦྱངས། ཨོཾ་མ་ཧཱ་རཏྣ་ཀཱ་མ་ལ་དྷེ་བི་ཤུདྡྷེ་ཧཱུྃ་གིས་བྱིན་གྱིས་བརླབ་ཞིང་༔ ཨོཾ་ཨཱཿཧཱུྃ་ཧ་ཧོ་ཧྲཱིས་སྤེལ་ལ། སྤྱན་འདྲེན་ནི། ཧཱུྃ༔ རང་བཞིན་རྣམ་དག་ངང་ཉིད་ལས༔ སྤྲུལ་པའི་ཁྲོ་བོ་མི་བཟད་པ༔ པདྨ་དབང་ཆེན་དཀྱིལ་འཁོར་ལྷ༔ ལོངས་སྤྱོད་ཚོགས་ལ་གཤེགས་སུ་གསོལ༔ བཛྲ་ས་མཱ་ཛ་པདྨ་ཀ་མ་ལ་ཡེ་སཏྭཾ་ཧཱུྃཿ གདན་ཕུལ། དེ་ནས་དང་པོ་མཆོད་པ། ཧཱུྃ༔ བླ་མེད་མཆོག་གི་མཆོད་པ་དམ་པ་འདི༔ ཡེ་ཤེས་ལྔ་ཡི་འོད་ཟེར་རྣམ་པར་འཕྲོ༔ འདོད་པའི་ཡོན་ཏན་ལྔ་ཡིས་རབ་བརྒྱན་ཏེ༔ དམ་ཚིག་བཞིན་དུ་ཅི་བདེར་བཞེས་སུ་གསོལ༔
ཧཱུྃ༔ མཛེས་སྡུག་གཟུགས་ཀྱི་མཆོད་པ་འདིཿ དབང་ཆེན་དཀྱིལ་འཁོར་སྤྱན་ལ་འབུལ༔ སྤྱན་གྱི་ཐུགས་དམ་སྐོང་གྱུར་ཅིག༔ གཟུགས་ཀྱི་མཆོད་པ་བཞེས་སུ་གསོལ༔ སྙན་པ་སྒྲ་ཡི་མཆོད་པ་འདི༔ དབང་ཆེན་དཀྱིལ་འཁོར་སྙན་ལ་འབུལ༔ སྙན་གྱི་ཐུགས་དམ་སྐོང་གྱུར་ཅིག༔ སྒྲ་ཡི་མཆོད་པ་བཞེས་སུ་གསོལ༔ དྲི་ཞིམ་ངད་ཀྱི་མཆོད་པ་འདི༔ དབང་ཆེན་དཀྱིལ་འཁོར་ཤངས་ལ་འབུལ༔ ཤངས་ཀྱི་ཐུགས་དམ་སྐོང་གྱུར་ཅིག༔ དྲི་ཡི་མཆོད་པ་བཞེས་སུ་གསོལ༔ ཞལ་ཟས་རོ་ཡི་མཆོད་པ་འདི༔ དབང་ཆེན་དཀྱིལ་འཁོར་ལྗགས་ལ་འབུལ༔ ལྗགས་ཀྱི་ཐུགས་དམ་སྐོང་གྱུར་ཅིག༔ རོ་ཡི་མཆོད་པ་བཞེས་སུ་གསོལ༔ འཇམ་པ་རེག་བྱའི་མཆོད་པ་འདི༔ དབང་ཆེན་དཀྱིལ་འཁོར་སྐུ་ལ་འབུལ༔ སྐུ་ཡི་ཐུགས་དམ་སྐོང་གྱུར་ཅིག༔ རེག་བྱའི་མཆོད་པ་བཞེས་སུ་གསོལ༔ བདེ་སྟོང་ཆོས་ཀྱི་མཆོད་པ་འདི༔ དབང་ཆེན་དཀྱིལ་འཁོར་ཐུགས་ལ་འབུལ༔ ཐུགས་ཀྱི་ཐུགས་དམ་སྐོང་གྱུར་ཅིག༔ ཆོས་ཀྱི་མཆོད་པ་བཞེས་སུ་གསོལ༔ མ་ཧཱ་ག་ཎ་ཙཀྲ་པཱུ་ཙ་ཁ་ཧི༔ བར་པ་བཤགས་པ། ཧཱུྃ༔ བདག་ཅག་མ་རིག་ཉོན་མོངས་སེམས་ཅན་གྱིས༔ བག་མེད་ཚུལ་གྱིས་དམ་
ལས་འགལ་གྱུར་ཏེ༔ པདྨ་དབང་ཆེན་དཀྱིལ་འཁོར་ལྷ་ཚོགས་ཀྱི༔ ཐུགས་དང་འགལ་བའི་ལས་ནི་ཅི་བགྱིས་པ༔ ཐུགས་རྗེ་མངའ་བའི་ལྷ་ལ་བཟོད་པར་གསོལ༔ བཟོད་པར་བཞེས་ནས་འཕྲུལ་གྱི་དངོས་གྲུབ་སྩོལ༔ ཨོཾ་པདྨ་ཤྲཱི་ཧེ་རུ་ཀ་ས་མ༔ སོགས་ཡིག་བརྒྱ་བཟླ༔ ཐ་མ་བསྒྲལ་བ་ནི༔ རྟེན་ལ༔ ནྲྀ་ཏྲི་བཛྲ་ཨངྒུ་ཤ་ཛཿ ཛཿཧཱུྃ་བྃ་ཧོ༔ ཞེས་བཀུག་ལ༔ ཧཱུྃ༔ སྤྲུལ་པའི་ཁྲོ་བོ་འབར་བ་ཡིས༔ ཞིང་བཅུ་མ་ལུས་ཐམས་ཅད་དང་༔ འཁོར་བའི་ཉོན་མོངས་རྒྱ་དྲལ་ནས༔ དུག་ལྔ་དབྱིངས་སུ་བསྒྲལ་བར་བྱའོ༔ ནྲྀ་ཏྲི་མཱ་ར་ཡ་ཕཊཿ ཅེས་བསྒྲལ་ནས༔ བསྟབ་པ་ནི༔ ཧཱུྃ༔ ཤ་ཁྲག་རུས་པ་ནང་ཁྲོལ་མཁྲིས༔ འདོད་ཆགས་ཞེ་སྡང་གཏི་མུག་དང་༔ ང་རྒྱལ་ཕྲག་དོག་མཆོད་པ་འབུལ༔ སྐུ་གསུང་ཐུགས་དང་ཡོན་ཏན་དང་༔ ཕྲིན་ལས་དངོས་པོར་བཞེས་སུ་གསོལ༔ མ་ཧཱ་མཾ་ས་རཀྟ་ཀིང་ནི་རི་ཏི་ཁ་རཾ་ཁཱ་ཧི༔ གཞན་ཡང་བསྟན་སྲུང་གིང་ལྔ་གཟའ་གདོང་བེག་རྩེ་མཆོད་པ་སོགས་སྤྱི་ལྟར་བྱའོ༔ དེ་ནས་ཚོགས་ལ་རོལ་ཞིང་ལྷག་མ༔ ཨོཾ་ཨཱཿཧཱུྃ་གིས་བྱིན་གྱིས་རླབས་ནས༔ དབང་གི་རྟ་སྐད་ཀྱི་རོལ་པས་མ་མོ་མཁའ་འགྲོ་འབོད་བ་ནི༔ ཨེ་ཨ་ར་ལི་ཧྲཱིཾ་ཛཿཞེས་དབང་དུ་བསྡུས་ལ། ཨོཾ་ཨུཥྩི་ཊ་བ་ལིངྟ་ཁཱ་ཧེས་གཏོར་མ་བསྔོ་ཞིང་རྒྱས་པར་ལྷག་ཆོག་དང་༔ རྟ་བྲོ་འདོད་ན་ཟུར་དུ་ཤེས་པར་བྱའོ༔ དེ་ནས་དཀྱིལ་
འཁོར་བསྡུ་ཞིང་ལྷར་ལྡངས་ལ་བྱ་ཁྱུང་གི་ཕྱག་རྒྱ་བཅའ་ཞིང་གནས་ལྔར་བཞག་ལ༔ ཧ་ཡ་གྲཱི་བ་ཧྲཱིཿ གབ༔ པད་མོ་དྷ་ར་ཧྲཱིཿགབ༔ པདྨ་བྷནྡྷ་ཧྲཱིཿགབ༔ ཙནྡྲ་རཀྵ་ཧྲཱིཿགབ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་པས་རང་བསྲུང་བའི་གོ་ཆ་བགོ་ཞིང་༔ དགེ་བ་བསྔོ་བ་ནི༔ དགེ་བ་འདི་ཡིས་བདག་སོགས་སེམས་ཅན་རྣམས༔ པདྨ་རྒྱལ་པོའི་གོ་འཕང་མཆོག་ཐོབ་ནས༔ མ་རིག་ལྡོང་བའི་སྐྱེ་ཚོགས་ཐམས་ཅད་ལ༔ རོལ་པའི་རྟ་སྐད་ཕྱོགས་བཅུར་སྒྲོགས་པར་ཤོག༔ ཅེས་དང་སྨོན་ལམ་བཀྲ་ཤིས་ཅི་རིགས་པས་དགེ་ལེགས་ཀྱི་སྣང་བས་ཀུན་ཏུ་ཁྱབ་པར་བྱའོ༔ ཞེས་པའང་ཡང་གསང་ཁྲོས་པའི་རྒྱུད་ཀྱི་རྡོ་རྗེའི་ཚིག་རྣམས་སོར་བཞག་ལ་ཆོ་གའི་འགྲོས་སུ་མཚམས་སྦྱར་བའི་རྒྱུན་ཁྱེར་སྤྲོས་མེད་སྙིང་པོའི་ཉམས་ལེན་གྱི་ཚུལ་དུ་རིག་འཛིན་པདྨའི་རྗེས་འཇུག་འཇམ་དཔལ་དགྱེས་པས་ཆུ་རྟ་ལོའི་རྒྱལ་ཟླའི་དམར་ཕྱོགས་ཀྱི་ཚེས་ལྔ་ཉི་མ་མེ་བཞིའི་འགྲུབ་སྦྱོར་བཟང་པོ་ལ་གྲུབ་པར་བགྱིས་པ་འདིས་འགྲོ་བ་ཀུན་གྱིས་དཔལ་དབང་ཆེན་ཁྲོ་བོའི་རྒྱལ་པོའི་གོ་འཕང་རིན་པོ་ཆེ་འགྲུབ་པར་གྱུར་ཅིག༔ མངྒ་ལཾ༔ ༈ རྟ་མགྲིན་ཡང་ཕྱུངས་ནག་པོའི་རྒྱུན་ཁྱེར་གནམ་ལྕགས་རལ་གྲི་བཞུགས། འདིར་རྟ་མགྲིན་ནག་པོའི་རྒྱུན་ཁྱེར་ཉམས་སུ་བླང་བར་འདོད་པས། སྐྱབས་སེམས་ཚོགས་བསགས་སྔོན་དུ་བཏང་ནས། དངོས་གཞི་ཏིང་ངེ་འཛིན་བསྒོམ་པ་ནི། ཨོཾ་བཛྲ་ཀྲོ་ཏ་ཧ་ཡ་གྲཱི་བ་ཧཱུྃ་ཕཊ༔ ཅེས་རྩ་
སྔགས་ལན་གཅིག་བརྗོད་པ་ཡིས། སྐད་ཅིག་དྲན་རྫོགས་ཏིང་འཛིན་གྱིས༔ གྲུ་གསུམ་མཐིང་ནག་དཀྱིལ་འཁོར་དུ༔ བདག་ཉིད་ཁྲོ་བོ་རྟ་མགྲིན་སྐུ༔ མཐིང་ནག་ཞལ་གཅིག་ཕྱག་གཉིས་པ༔ སྤྱན་གསུམ་མཆེ་བ་རབ་ཏུ་གཙིགས༔ ཕྱག་གཡས་སྒྲོལ་བྱེད་རལ་གྲི་ཡིས༔ དགྲ་བགེགས་མགོ་ལུས་དུམ་བུར་ཕྲལ༔ གཡོན་པས་འཛིན་བྱེད་ལྕགས་ཀྱུ་བསྣམས༔ དགྲ་བགེགས་མ་ལུས་སྲོག་སྙིང་འདྲེན༔ ཞབས་གཉིས་དགྲ་བགེགས་བསྣོལ་མར་མནན༔ སྐུ་ལ་དར་ནག་བེར་ཆེན་གསོལ༔ དབུ་གཙུག་རྟ་མགོ་ལྗང་གུ་གདེངས༔ རྟ་སྐད་དྲག་པོ་ནམ་མཁར་འཚེར༔ཁམས་གསུམ་མ་ལུས་དབང་དུ་སྡུད༔ སྲིད་གསུམ་མ་ལུས་ཟིལ་གྱིས་གནོན༔ སྐུ་སྟོད་ཞིང་ལྤགས་གཡང་གཞི་དང་༔ སྐུ་སྨད་སྟག་གི་ཤམ་ཐབས་གསོལ༔ ཐོད་སྐམ་ལྔ་ཡིས་དབུ་ལ་བརྒྱན༔ ཐོད་རློན་ལྔ་བཅུའི་དོ་ཤལ་བྱས༔ བ་སྤུ་མེ་ཡི་ཚྭ་ཚྭ་འཕྲོས༔ བསྐལ་པའི་མེ་དཔུང་ཀློང་ན་བཞུགས༔ དབུ་སྐྲ་གནམ་ལྕགས་རལ་པ་ཅན༔ རལ་པ་བསིགས་པའི་སྐྲ་གསེབ་ནས༔ ཁྲོ་ཆུང་དཔག་མེད་ཕྱིར་འཕྲོས་པས༔ དགྲ་བགེགས་ཐམས་ཅད་ཚར་བཅད་དེ༔ ཚུར་འདུས་ཁྲོ་བོའི་གུར་དུ་གྱུར༔ དེ་ཡང་བསྲུང་བ་བཟློག་པ་དང་༔ བསད་པའི་ལས་མཛད་ཁྲོ་
བོ་ནི༔ རིམ་པ་གསུམ་གྱི་ཚུལ་དུ་སྒོམ༔ བདག་ཉིད་དམ་ཚིག་སེམས་དཔའ་ཡི༔ ཐུགས་ཀར་ཡེ་ཤེས་སེམས་དཔའ་ནི༔ ཉི་མའི་གདན་ལ་ཧཱུྃ་མཐིང་ནག༔ གཟི་བརྗིད་ལྡན་པའི་མཐའ་སྐོར་དུ༔ རྩ་སྔགས་གཡས་སུ་འཁོར་བར་བསམ༔ འོད་ཟེར་སྤྲོ་བསྡུའི་ཏིང་འཛིན་གྱིས༔ སྣོད་བཅུད་དངོས་པོ་ཐམས་ཅད་ཀུན༔ མེ་རི་ཁྲོ་བོའི་རང་བཞིན་ལས༔གནོད་བྱེད་མིང་ཡང་མེད་པར་གྱུར༔ ཞེས་བསམ་ལ་སྔགས་བཟླའོ། །དེ་ཡང་གཞུང་ལས༔ སེམས་ཉིད་འོད་གསལ་སྐྱེ་མེད་འདི༔ ཡེ་ནས་རང་བཞིན་ལྷ་ཡི་སྐུ༔ དམ་ཚིག་ཡེ་ཤེས་གཉིས་མེད་ལ༔ བསྐྱེད་བསྟིམ་རྒྱས་གདབ་མི་འཚལ་སྟེ༔ དྲན་པ་ཙམ་གྱིས་རྫོགས་པ་ཉིད༔ ལྟ་བ་གྱད་ཀྱི་ལྷ་ཞེས་བྱ༔ རྡོ་རྗེ་ལྟ་བུའི་ཏིང་འཛིན་ནི༔ བསྲུང་བ་ཀུན་གྱི་མཆོག་ཡིན་ནོ༔ ཞེས་གསུངས་པ་ལྟར་ངེས་པར་བྱ་བ་ནི། རྡོ་རྗེ་ལྟ་བུའི་ཏིང་འཛིན་གྱི་རིམ་པའོ། །གཉིས་པ་གནམ་ལྕགས་ལྟ་བུའི་སྔགས་ནི། ཨོཾ་བཛྲ་ཀྲོ་དྷ་ཧ་ཡ་གྲི་བ་ཧཱུྃ་ཕཊ༔ ཡཀྴ་ནག་པོ་ནྲྀ་ཏྲི་ཧུར་ཐུཾ་ཛ༔ གནོད་བྱེད་མཱ་ར་ཡ་སྲོག་ལ་རྦད་རྦད༔ སྙིང་ལ་རྦད་རྦད༔ རྩ་ལ་རྦད་རྦད༔ ཁྲག་ལ་རྦད་རྦད༔ ཤ་ལ་རྦད་རྦད༔ རུས་པ་ལ་རྦད་རྦད༔ ཀླད་པ་ལ་རྦད་རྦད༔ ཡིག་ལ་རྦད་རྦད༔ ཙིཏྟ་ཟུང་ཟུང་༔ ཙིཏྟ་རྨུགས་རྨུགས༔ ཙིཏྟ་ཕྱུང་ཕྱུང་༔ ཙིཏྟ་གཏུབ་གཏུབ༔ ཙིཏྟ་
མྱོགས་མྱོགས༔ ཙིཏྟ་ཐུམ་རིལ༔ ཡཱ་ཡཱ༔ བྷྱོ་བྷྱོ༔ སྲོག་རྩ་ཆོད་ཆོད༔ སྙིང་རྩ་ཕྱུང་ཕྱུང་༔ ཁཾ་ཁཾ༔ ལཾ་ལཾ༔ ཚལ་པར་རྦད་རྦད༔ དུམ་བུར་རྦུད་རྦུད༔ ཐུམ་མྱོག་བཾ་རིལ༔ མཱ་ར་ཡ་རྦད་སོད༔ རཾ་རཾ་ཛྭ་ལ་རཾ༔ ཨུ་ཙ་ཏ་ཡ་ཕཊ༔ ཅེས་པ་སྟེ་དེ་ཡང་། ཧྱ་གྲཱི་ཝའི་ཡི་གེ་བཅུ༔ རྟ་མགྲིན་རྩ་བའི་སྔགས་སུ་བསྟན༔ ཡཀྴ་ནག་པོ་མན་ཆད་ནི༔ ལས་སྔགས་གནམ་ལྕགས་སྤུ་གྲི་ཡིན༔ ནྲྀ་ཏྲི་དགྲ་དང་བགེགས་ཀྱི་སྲོག༔ ཧུར་ཐུམ་ཛ་ནི་འགུགས་པའི་སྔགས༔ གནོད་བྱེད་གང་ཡིན་མིང་གི་ཐེམས༔ མཱ་ར་ཡ་ནི་བསད་པའོ༔ རྦད་ཚོ་བརྒྱད་པོ་སྲོག་གི་སྔགས༔ ཡང་ན་རལ་གྲིའི་ལས་སུ་འདོད༔ ཙིཏྟ་ཟུང་ནས་བྷྱོ་ཡི་བར༔ ཡིག་འབྲུ་རྩ་བརྒྱད་བསད་པའི་སྔགས༔ ཡང་ན་ལྕགས་ཀྱུའི་ལས་སུ་འདོད༔ སྲོག་རྩ་ཆོད་ནས་རྦད་སོད་བར༔ ཡིག་འབྲུ་ཉི་ཤུ་རྩ་དགུ་ནི༔ ཐུན་མོང་བསད་པའི་སྔགས་སུ་འདོད༔ ཛྭ་ལ་རཾ་གྱིས་བསྲེག་པར་བྱེད༔ ཨུ་ཙ་ཏ་ཡིས་བསྲེག་ཅིང་གཏོར༔ ཕཊ་ཀྱིས་ཐམས་ཅད་འཇོམས་པར་བྱེད༔ འདི་ཡིས་མི་ཐུལ་གང་ཡང་མེད༔ དཔེར་ན་གནམ་ལྕགས་སྤུ་གྲི་འདྲ༔ རྣོ་བའི་ཚད་ནི་མེ་ལྟ་བུ༔ མྱུར་བའི་ཚད་ནི་གློག་ལྟ་བུ༔ རྒོད་པའི་ཚད་ནི་ཐོག་ལྟ་བུ༔ གཏུམ་པའི་ཚད་ནི་རྦབ་ལྟ་བུ༔ དགྲ་དང་བགེགས་དང་བྱད་མ་དང་༔ནད་ཀྱི་རིགས་དང་གདོན་གྱི་རིགས༔ གཉན་རིགས་ལྷོག་པ་ཐབ་ཀྱི་རིགས༔ མཛེ་དང་ཤུ་འབྲུམ་སྐྲང་ལྷོག་དང་༔ སྨྱོ་འབོག་བརྒྱལ་ནད་ལ་སོགས་པ༔ གང་དང་གང་ལ་བཏབ་པ་དེ༔ མེ་དང་རྩྭ་སྦུར་དཔེ་བཞིན་དུ༔ བསྲེགས་
ཤིང་རབ་ཏུ་བསྲེག་པར་བྱེད༔ རླུང་དང་ཐལ་མའི་དཔེ་བཞིན་དུ༔ གཏོར་ཞིང་རབ་ཏུ་གཏོར་བར་བྱེད༔ དྲག་སྔགས་བསྟན་པ་མང་ཡོད་ཀྱང་༔ རྣོ་མྱུར་བསྟན་པ་འདི་ལས་མེད༔ འདི་ལ་རིགས་ནི་འགའ་ཡོད་ཀྱང་༔ སྔགས་འགྲིགས་ཚང་བ་འདི་ལས་མེད༔ འདི་ལ་བསྙེན་སྒྲུབ་ལས་སྦྱོར་གསུམ༔ བསྙེན་པའི་དུས་སུ་རྩ་སྔགས་བཟླ༔ བསྒྲུབ་པའི་དུས་སུ་ལས་སྔགས་གདགས༔ ལས་སྦྱོར་ལས་སྔགས་རྐྱང་པར་བཟླ༔བསྙེན་སྔགས་བུང་བ་ཚང་ཚོལ་བཞིན༔ བསྒྲུབ་སྔགས་མེ་དཔུང་འབར་བ་འདྲ༔ ལས་སྔགས་སེང་ཆེན་འབེབ་འདྲར་བཟླ༔ སྔགས་ཀྱི་གནད་ལ་གསུམ་ཡིན་ཏེ༔ མགལ་མེ་འཁོར་བ་ལྟ་བུ་དང་༔ བ་ཐག་ཁྲིད་པ་ལྟ་བུ་དང་༔ མེ་སྒྱོགས་འཕང་བ་ལྟ་བུའོ༔ ཞེས་གསུངས་པ་ལྟར་ངེས་པར་བྱའོ། །ཁྲོ་ཆུ་ལྟ་བུའི་རྫས་ཀྱིས་བསྲུང་བ་ནི༔ བྱུགས་བདུག་སྲུང་བའི་རྫས་རྣམས་གཞུང་བཞིན་བསགས་ལ་བསྡུ་སྒྲུབ་བྱ་བའོ། །རྫས་སྔགས་ཏིང་འཛིན་གསུམ་པོ་དེ་ནི། ཚུར་ལ་གང་གིས་མི་ཚུགས་པ་གོ་ཆ་ལྟ་བུའི་མན་ངག་སྦྱིན་ལ། ཕར་ལ་གང་ཡང་མི་བཏང་བའི་མཚོན་ཆ་ལྟ་བུའི་མན་ངག་ནི་དྲག་སྔགས་ལས་ལ་སྦྱང་ནས་དགྲ་གདོན་ཐལ་བར་བརླག་པ་མངོན་སྤྱོད་གཙོ་བོར་གྱུར་པའི་ཕྲིན་ལས་རབ་འབྱམས་སྒྲུབ་པ་སྟེ་གཞུང་ལས་ཤེས་པར་བྱའོ། །འདི་ལྟ་བུའི་ལྷ་མཆོག་ཁྱད་པར་ཅན་ནི་དུས་སྙིགས་མར་བར་ཆད་འཚེ་བ་རླུང་ལྟར་གཡོ་བའི་ཚེ་གཉེན་པོ་སྟོབས་ཀྱི་ལྷ་ཁྱད་པར་ཅན་ཡིན་ཞིང་། བཀྲ་ཤིས་ཤིང་རྒྱུད་འཇམ་པ་སྡེ་བརྒྱད་རང་
ཤུགས་ཀྱིས་འཁོར་བས་རྣོ་ཞིང་མྱུར་བ། རྟ་མགྲིན་གྱི་སྒྲུབ་ཐབས་བྱེ་བ་ས་ཡ་མཆིས་ཤིང་། དེ་དག་ཕལ་ཆེར་མཆོག་གི་དོན་དང་། ལ་ལ་བར་ཆད་སེལ་བ། ལ་ལ་བསྟན་པ་སྲུང་བ། ལ་ལ་དྲེགས་པ་གཙུན་པ། ལ་ལ་དྲེགས་པ་འདུལ་བའི་དོན་དུ་གསུངས་པ་ཀུན་གྱི་དགོངས་པ་ཆིག་ཏུ་དྲིལ་བ་འདི་ནི་གསང་སྔགས་རིག་སྔགས་གཟུངས་སྔགས་དྲག་སྔགས་ཀུན་གྱི་རྣོ་སོ་བྱ་སླ་ཚེགས་ཆུང་དོན་ཆེ་བ་འདི་ཤིན་ཏུ་ཟབ་པར་གདམས་པ་ཡིན་ནོ་ཞེས་གུ་རུ་རིན་པོ་ཆེས་གསུངས་སོ། །ཉང་གཏེར་སྒྲུབ་ཐབས་གནམ་ལྕགས་རལ་གྲིའི་གཞུང་རྡོ་རྗེའི་ཚིག་སོར་བཞག་སྟེ་གོ་རིམ་བསྒྲིགས་ཤིང་མཚམས་སྦྱོར་ཕྲན་བུ་བཅས་པདྨ་བཞད་པ་རྩལ་ལམ་མི་ཕམ་རྣམ་རྒྱལ་དུ་འབོད་པས་མེ་ཕག་མགོ་ཟླའི་ཚེས་མཁའ་མིག་གྲངས་ལ་བྲིས་པ་འདིས་སྒྲུབ་པོ་རྣམས་ཀྱིས་དངོས་གྲུབ་ཐམས་ཅད་ཐོབ་པར་གྱུར་ཅིག། མངྒ་ལཾ།། ༈ །རྟ་མགྲིན་གཏོར་འབུལ་ནི༔ བནྡྷ་རིན་ཆེན་སྣོད་མཆོག་ཏུ༔ ཤ་ཆང་འབྲས་ཆན་ལ་སོགས་པ༔ ཅི་འབྱོར་བ་ཡི་གཏོར་མ་བཤམས༔ བདག་ཉིད་ལྷ་ཡི་ང་རྒྱལ་གྱིས༔ ཡི་གེ་གསུམ་གྱི་བྱིན་གྱིས་རླབས༔ ལྷ་ཚོགས་མདུན་དུ་སྤྱན་དྲངས་ལ༔ སྔགས་འདིས་ལན་གསུམ་འབུལ་བར་བྱ༔ ཞེས་པས་ཨོཾ་བརྗོད་པས་སྟོང་པར་བསམ༔ ཨཱཿབརྗོད་པས་གཏོར་སྣོད་ཡངས་ཤིང་རྒྱ་ཆེ་བར་བསམ༔ ཧཱུྃ་བརྗོད་པས་གཏོར་མ་དགྲ་བགེགས་ཀྱི་ཤ་ཁྲག་ལ༔ ངོ་བོ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར༔ ཨོཾ་
ཨཱཿཧཱུྃ་ལན་གསུམ། དེ་ནས་སྐད་ཅིག་གིས་གྲུ་གསུམ་མཐིང་ནག་འབར་བའི་དཀྱིལ་འཁོར་དུ་དཔལ་རྟ་མགྲིན་ནག་པོ་འཁོར་དྲེགས་པ་སྡེ་བརྒྱད་ཀྱི་ཚོགས་དང་བཅས་པ་བྱོན་པར་བསམ། ཁྲོ་བོའི་རྒྱལ་པོའི་ལྗགས་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་གྱུར༔ ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧཱུྃ་ཕཊ༔ ཡཀྴ་ནག་པོ་དགྲ་བགེགས་མཱ་ར་ཡཿ མཱཾ་ས་རཀྟ་ཙིཏྟ་གོ་རོ་ཙ་ན་བ་སུ་ཏ་ཀེཾ་ནི་རི་ཏི་བ་ལིཾ་ཏ་ཁ་རཾ་ཁཱ་ཧི༔ ཧཱུྃ༔ ཐུགས་རྗེ་ཆེན་པོ་འཕགས་པ་སྤྱན་རས་གཟིགས༔ ཐུགས་རྗེའི་དབང་གིས་ཁྲོ་རྒྱལ་སྐུར་བསྟན་པ༔ གར་གྱི་དབང་ཕྱུག་ཁྲོ་བོ་ཀུན་གྱི་རྗེ༔ ཡེ་ཤེས་སྤྲུལ་པའི་ཁྲོ་ཚོགས་འཁོར་དང་བཅས༔ བཀའ་ཡི་ཕོ་ཉ་དྲེགས་པ་སྡེ་བརྒྱད་ཚོགས༔ སྔོན་གྱི་ཁས་བླངས་དམ་བཅས་ཇི་བཞིན་དུ༔ ཐུགས་དམ་དབང་གིས་གཏོར་མ་འདི་བཞེས་ལ༔ དམ་ཚིག་དབང་གིས་རྣལ་འབྱོར་བདག་ཅག་སྐྱོངས༔ བྱང་ཆུབ་ལམ་གྱི་བར་ཆད་སེལ་བ་དང་༔ བསྟན་པ་བཤིག་པའི་དགྲ་དང་བགེགས་ལ་སོགས༔ བདུད་དང་ལོག་པར་འདྲེན་པ་ཐམས་ཅད་ལ༔ མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད༔ ཅེས་བྱ། ནན་ཆེན་ཆོས་སྐྱོང་ལྟར་རྦད་ཅིང་བསྐུལ་བ། ཧཱུྃ༔ བསྐུལ་ལོ་ཡཀྴ་མཐུ་བོ་ཆེ༔ རྦད་དོ་དྲེགས་པ་སྡེ་བརྒྱད་ཚོགས༔ མ་གཡེལ་
སྲུང་མ་དམ་ཚིག་ཅན༔ དམ་རྫས་གཏོར་མ་འདི་བཞེས་ལ༔ སངས་རྒྱས་བསྟན་པ་ཁྱོད་ཀྱིས་སྲུངས༔ དཀོན་མཆོག་དབུ་འཕང་ཁྱོད་ཀྱིས་བསྟོད༔ རྣལ་འབྱོར་སྐུ་ཚེ་ཁྱོད་ཀྱིས་སྲིང་༔ ཡོན་བདག་བར་ཆད་ཁྱོད་ཀྱིས་སོལཿ སྡང་བའི་དགྲ་ལ་རྟགས་ཕྱུངས་ཤིག༔ གནོད་པའི་བགེགས་ལ་ལས་མཛོད་ཅིག༔ དུས་ལ་བབ་པོ་ས་མ་ཡ༔ བཅོལ་པའི་ཕྲིན་ལས་འགྲུབ་པར་མཛོད༔ ཅེས་བྱའོ། །ཉང་གི་གཏེར་ཁ་ནས་བཏུས་པའོ། །མངྒ་ལཾ།། ༈ །།།རྟ་སྐད་ཐེངས་གསུམ་གྱི་དགོངས་པའི་སྒོ་ནས་གཏོར་འབུལ་བཞུགས། ཧཱུྃ༔ བཅོམ་ལྡན་དཔལ་ཆེན་རྟ་མཆོག་རོལ་པའི་སྐུ། །སྐུ་མདོག་དམར་ནག་ཐམས་ཅད་དབང་དུ་སྡུད། །རྟ་སྐད་འཚེར་བས་དྲེགས་པ་ལས་ལ་གཏོང་། །ཕྱག་མཚན་མཚོན་ཆས་གདུག་པ་ཐལ་བར་རློག །དུར་ཁྲོད་རྒྱན་ཆས་མཁའ་འགྲོ་དམ་ལ་སྡུད། །ཞབས་ཀྱི་དོར་སྟབས་དགྲ་བགེགས་དམ་སྲི་གཟིར། །ཁམས་གསུམ་དབང་སྡུད་རྟ་མཆོག་སྐུ་ལ་བསྟོད། །ཨོཾ་པདྨ་མ་ཧཱ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ༔ རྫོང་འཕྲང་ལས་སོ། །ཧཱུྃ། སྣང་སྲིད་ཟིལ་གནོན་པདྨ་དབང་གི་ལྷའི། །དཔལ་གྱི་རྟ་སྐད་དང་པོ་བསྒྲགས་པ་ཡིས། །འཁོར་འདས་དབྱེར་མེད་མཉམ་པའི་དགོངས་པར་བརྡལ། །རྟ་སྐད་གཉིས་
པས་སྣང་སྲིད་ཐམས་ཅད་ཀུན། །ཤ་རི་ཁྲག་མཚོ་རུས་པའི་རི་རབ་ལ། །མ་མོ་མཁའ་འགྲོ་དགྱེས་ཤིང་རྟག་ཏུ་རོལ། །དབང་གི་རྟ་སྐད་གསུམ་པས་བསྐུལ་བ་ཡིས། །སྣང་སྲིད་མ་མོ་མཁའ་འགྲོའི་ཚོགས་རྣམས་ཀུན། །འགྱིང་གླུ་དང་བཅས་ཡུད་ཀྱིས་བཀུག་ནས་སུ། །རྣལ་འབྱོར་དགོས་པའི་ལས་ལ་བསྐུལ་ཞིང་སྒྲུབ། །དབང་ཆེན་དཔལ་གྱི་རྡོ་རྗེའི་བཀའ་བཞིན་དུ། །མ་སྲིང་མཁའ་འགྲོ་དམ་ཅན་རྒྱ་མཚོ་ཡིས། །དམ་རྫས་བདུད་རྩིའི་གཏོར་མ་འདི་བཞེས་ལ། །ཇི་ལྟར་འདོད་པའི་ཕྲིན་ལས་མྱུར་དུ་སྒྲུབ། །མ་མ་ཌཱ་ཀཱི་ནི་བ་ལིངྟ་ཁཱ་ཧི། ཞེས་བཀའ་བརྒྱད་རྫོང་འཕྲང་གི་ཛབ་བསྟོད་ལ་རྟ་སྐད་ཐེངས་གསུམ་གྱི་དགོངས་པ་སྦྱར་བའི་མ་མོ་མཁའ་འགྲོའི་གཏོར་འབུལ་འདི་ནི་ཕྲིན་ལས་ཐམས་ཅད་འགྲུབ་པའི་སླད་དུ་པདྨ་བཞད་པ་རྩལ་གྱིས་བྲིས་པ་དགེའོ། ༈ །རྟ་མགྲིན་ཡང་གསང་གི་བཀའ་སྲུང་རྣམས་ཀྱི་གཏོར་འབུལ་བསྡུས་པ་ནི། གཏོར་མ་དང་སྐྱེམས་ཕུད་སོགས་ཇི་འབྱོར་བའི་མཆོད་པ་བཤམས་ལ། རྃ་ཡྃ་ཁྃ་གིས་སྦྱངས། ཨོཾ་ཨཱཿཧཱུྃ་ཧོ། བྱིན་གྱིས་བརླབས་ལ། ཧྲཱིཿ དབང་ཆེན་ཐུགས་ལས་སྤྲུལ་པའི་དམ་ཚིག་ཅན། །སྲོག་བདག་འོད་རྒྱལ་ཚངས་པ་དུང་ཐོད་དང་། །རྡོ་རྗེ་ལེགས་པ་བདུད་པོ་རི་ནག་སྤུངས། །ཡམ་ཤུད་དམར་པོ་གཟའ་གདོང་ལྕམ་དྲལ་དང་། །བེག་
ཙེ་ལྕམ་སྲིང་འཁོར་དང་བཅས་པ་རྣམས། །གར་བཞུགས་གནས་ནས་འདིར་གཤེགས་དགྱེས་པར་བཞུགས། །ཨོཾ་པཉྩ་ཀིང་ཀ་ར་རཱ་ཧུ་ལ་རཀྨོ་པྲ་ཎ་ཨཱཏྨ་ན་ས་པ་རི་ཝཱ་ར་བཛྲ་ས་མཱ་ཛཿ ཨརྒྷཾ་སོགས་ནས། ཤཔྡ་པྲ་ཏིཙྪ་ཧོཿ ཨོཾ་ཁ་ཁ་ཁཱ་ཧི་ཁཱ་ཧི། རཱ་ཛ་སྲོག་ལ་ཧྲཱི༔ ཨ་ཤུག་མེ་ཧྲི་སྲོག་ལ་ཛཿ ཙ་པ་ལ་ཨ་ཤུག་ཙ་ཏྲི་ལིང་ཛཿབཛྲ་སཱ་དྷུ་ཏྲཱི༔ ཧྲཱི་དུན་དུན། ཤུ་ལ་གྲཱི་ཝ༔ རཱ་ཧུ་ལ་བཛྲ་རཀྴ་མ་ར་ཙ་ཤ་དྷ་ཡ༔ རཀྨོ་པྲ་ཎ་ཨཱཏྨ་ས་པ་རི་ཝཱ་ར༔ ཨི་དམ་པ་ལིང་གྷྲིཧྣ་ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪ་ནྟུ། ཡ་ཐཻ་བཾ་ཡ་ཐཻཥྚཾ་ཉྫ་ཐ་ཛི་གྷ་ཐ་བི་པ་ཐ་མ་ཏི་པྲ་མ་ཐ་མ་མ་སརྦ་ཀརྟ་ཡ་སད་སུ་ཁཾ། བི་ཤུདྡྷེ་ས་ཧ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ༔ ལན་གསུམ་གྱིས་གཏོར་མ་འབུལ། མཐར། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧེས་སྨན་རཀ་ཕུལ་ལ། ཧཱུྃ། དབང་ཆེན་བཀའ་སྡོད་གིང་ཆེན་སྡེ་ལྔ་དང་། །གཟའ་གདོང་ལྕམ་དྲལ་བེག་ཙེ་ལྕམ་སྲིང་རྣམས། །མ་ལུས་སངས་རྒྱས་བསྟན་པ་བསྲུང་མཛད་ཅིང་། །ཟས་སུ་དགྲ་བོའི་ཤ་ཁྲག་ཚོགས་རྣམས་ཟ། །དམ་ཉམས་དགྲ་བགེགས་རྩད་ནས་གཅོད་མཛད་པའི། །དྲེགས་པ་མཐུ་རྩལ་ཅན་ལ་ཕྱག་འཚལ་བསྟོད། །ཕྱི་ནང་གསང་བའི་མཆོད་པ་འདི་
བཞེས་ལ། །རྨད་བྱུང་རོལ་པའི་དངོས་གྲུབ་སྩོལ་དུ་གསོལ། །ཞེས་བརྗོད་ཅིང་ཕྲིན་ལས་བཅོལ་བས་ཅི་བསམ་ཡིད་བཞིན་དུ་འགྲུབ་པར་འགྱུར་རོ། །ཞེས་པའང་ཆུ་རྟ་ཟླ་བ་བཅུ་གཉིས་པའི་ཚེས་ཉེར་གཉིས་ལ་མི་ཕམ་རྣམ་པར་རྒྱལ་བས་ཡིག་རྙིང་ལས་བཏུས་ཏེ་བྲིས་པ་དགེའོ། །སརྦ་མངྒ་ལཾ། །