སྲིད་པ་དམུ་བཅོས།
ཀྱེ། སྣང་ཞིང་སྲིད་པས་བསྡུས་པ་ཡི། །འཆི་བདག་གཤིན་རྗེ་མ་མོ་དང་། །གཟའ་ཀླུ་རྒྱལ་བཙན་གནོད་སྦྱིན་སྲིན། །ལྷ་བདུད་དམུ་ཐེའུ་དམ་སྲི་སོགས། །བདག་དང་རྒྱུ་སྦྱོར་ཡོན་བདག་གི །ཚེ་རྐུ་སྲོག་འཕྲོག་དཔལ་ལ་གནོད། །དོན་ལ་བར་དུ་གཅོད་པ་ཡི། །ལན་ཆགས་རྐྱེན་བགེགས་བྱེད་རྣམས་ལ། །མཐུན་པའི་ཡས་སྟག་འདི་འབུལ་ལོ། །བདག་དང་རྒྱུ་སྦྱོར་ཡོན་བདག་རྣམས། །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོགས། །གནོད་འཚེ་གདུག་རྩུབ་མ་བྱེད་པར། །ཞི་དང་བྱམས་པའི་སེམས་ཀྱིས་སུ། །ཚེ་བསྲིང་དཔལ་བསྐྱེད་འབྱོར་པ་སྤེལ། །རྟག་ཏུ་བཀྲ་ཤིས་བདེ་ལེགས་མཛོད། །ལོ་ཟླ་ཞག་དུས་སྤར་སྨེ་དང་། །གཟའ་སྐར་ས་བདག་ཕྱོགས་དུས་ཀྱི། །སྐག་དང་ཉམས་ང་ལངས་པ་ཀུན། །མདོས་གླུད་འདི་ཡིས་བསྒྱུར་དུ་གསོལ། །མགོན་སྐྱབས་ལྷ་ལ་མཆོད་པ་འབུལ། །ལྷ་སྲུང་ཐུགས་དམ་བསྐང་གྱུར་ཅིག །འབྱུང་བ་འཁྲུགས་པ་སོར་ཆུད་ཅིང་། །སྣང་སྲིད་ཞི་བ་ཆེན་པོར་བཅོས། །ལན་ཆགས་རྐྱེན་བགེགས་བྱེད་པ་ཡི། །གནོད་བྱེད་འདྲེ་གདོན་འབྱུང་པོ་ལ། །རང་རང་ཡིད་མཐུན་མདོས་ཀྱིས་བརྔན། །མཁོ་དགུར་དགྱེས་
ཤིང་ཚིམ་གྱུར་ཅིག །བུ་ལོན་ལན་ཆགས་བྱང་གྱུར་ཅིག །ཤ་མཁོན་སྡིག་སྒྲིབ་དག་གྱུར་ཅིག །དུས་མིན་འཆི་བ་ཐམས་ཅད་བཟློག །དུས་ལ་བབ་ཀྱང་ཚེ་སྲིངས་ཤིག །མི་ཡི་ན་ཚ་རྐྱེན་ངན་བཟློག །ཕྱུགས་ཀྱི་གོད་ཁ་དབུལ་སྲི་བཟློག །འདོད་དོན་བསམ་པའི་བར་ཆད་བཟློག །མི་མཐུན་འགལ་རྐྱེན་ཐམས་ཅད་བཟློག །བཟློག་གོ་མདོས་གླུད་འདི་ཡིས་བཟློག །བསྒྱུར་རོ་དཀོན་མཆོག་བདེན་པས་བསྒྱུར། །རྟེན་འབྲེལ་ཟབ་མོའི་མདོས་གླུད་འདིས། མི་བཟློག་པ་ནི་གང་ཡང་མེད། །བཟློག་ཅིག་བསྒྱུར་ཅིག་ས་མ་ཡ། །འཆི་བསླུའི་འཕྱོང་མི་ཕམ་པས་བྲིས་པ་དགེ། མདོས་གཞུང་འཕྱོང་བཅས་བཀྲ་ཤིས་འཁྱིལ་སྒོ་ལྟར། མཇུག་ཏུ་ཚེ་འགུགས་བླ་འགུགས་རྒྱས་པར་བྱ། །འཆི་མེད་ཚེ་སྒྲུབ་དེས་ནི་བདུད་ལས་རྒྱལ། །མེ་བྱ་ཟླ་བ་བཅུ་པའི་ཚེས་བརྒྱད་ལའོ། །མངྒ་ལཾ། །
སྲིད་པ་དམུ་བཅོས་ནི། རིན་ཆེན་སྣོད་དུ་བཤོས་བུ་སྨུག་པོ་རྩེ་རྒྱལ་འཁོར་བརྒྱད་ལྡན། དཀར་མངར་ཤ་ཁྲག་དར་ཕན། དམུ་བྱ་ཕུག་རོན་སོགས་གཟུགས་འགྲོས་སྣ་ཚོགས་དང་། སྐྱེམས་ཕུད་བཤམས་ལ། ཧཱུྃ། རང་བཞིན་དབྱིངས་ནས་མ་གཡོས་ཀྱང་། །རྣམ་རོལ་འགག་མེད་དྲེགས་པའི་ཚུལ། །སྲིད་པ་དམུ་ཡི་སྡེ་ཚོགས་རྣམས། །ཚུར་བྱོན་མཐུན་པའི་རྫས་ཀྱིས་མཆོད། །དམུ་རྗེ་བཙན་པོ་དྲེགས་པའི་ཚོགས། །སྲིད་པ་དམུ་ཡི་སྡེ་དཔོན་ཡིན། །གང་ལས་བསྐྱེད་ཅིང་གང་ལ་བསྡུ། །སྲོག་སྙིང་མུན་མུན་ག་བ་ཛ། །སྤྲུལ་པ་མུན་ནག་དམུ་བྱ་བཏང་། །ཤ་ཁྲག་གཏོར་མ་འདི་བཞེས་ལ། །དགྲ་ལ་དིག་ལྐུག་དམུ་རྫིང་ཐོང་། །དམུ་རྗེ་ཁྱོད་ཀྱི་ཆ་ལུགས་ནི། །སྐུ་མདོག་ནག་པོ་ཆར་སྤྲིན་མདོག །དར་ནག་བེར་ཆེན་སྐུ་ལ་གསོལ། །གཡས་པ་ཤང་ལང་གཡོན་མདའ་གཞུ། །ཆིབས་སུ་དམུ་རྟ་མཆོང་རྒོད་ཆིབས། །འཁོར་དུ་དམུ་ཡི་སྡེ་ཚོགས་བསྐོར། །རྡོ་རྗེ་འཆང་དབང་གསང་བའི་བདག །པད་འབྱུང་རྩ་བརྒྱུད་བླ་མ་ཡིས། །ཇི་ལྟར་བཀའ་བསྒོས་དམ་བཞག་བཞིན། །པདྨའི་བཀའ་བརྒྱུད་འཛིན་པ་བདག །ཁྱེད་ལ་ཕ་བཞིན་རེ་ལགས་ན། །དམ་ཚིག་དབང་གིས་བུ་བཞིན་སྐྱོངས། །སྨན་རག་གཏོར་མ་མཐུན་རྫས་ཀྱིས། །མཆོད་ཅིང་
བསྟོད་དོ་ཐུགས་དམ་བསྐང་། །ཉམས་ཆག་འགལ་བ་ཅི་མཆིས་པ། །སྙིང་ནས་འགྱོད་པས་མཐོལ་ལོ་བཤགས། །བདག་ལ་སྔོན་ལས་ཕྲལ་རྐྱེན་གྱིས། །དམུ་ཡི་བཀའ་ཆད་གནོད་འཚེའི་རིགས། །གང་བྱུང་དེང་ནས་མེད་པར་མཛོད། །གདུག་པ་དམུ་ཡི་གདོན་ཚོགས་ཀྱིས། །བཟུང་བ་ཐོང་ལ་འཆིང་བ་ཁྲོལ། །བསྡམས་པ་གློད་ལ་མནན་པ་ཁྱོགས། །གདུག་གཙུབ་གནོད་པ་ཡོངས་ཞི་ནས། །ནད་ཀྱི་མདའ་ཕྱུངས་ཚེར་མ་དྲོངས། །གདོན་དང་གནོད་པ་ཕྱིར་ལ་བསྡུས། །དིག་ལྐུག་མྱོས་འཐིབ་དམུ་རྫིང་དང་། །སྲིན་དང་སྙོམས་ལས་གྲིབ་གདོན་རིགས། །དམུ་བདག་ཁྱེད་ཀྱིས་ཞི་བར་མཛོད། །ཚེ་རིང་བ་དང་ནད་མེད་དང་། །དཔལ་འབྱོར་འཕེལ་ཞིང་ཕྱ་གཡང་བཀྲག །བདེ་སྐྱིད་ཕུན་སུམ་ཚོགས་པ་ཡི། །དམུ་གཡང་དངོས་གྲུབ་སྩལ་དུ་གསོལ། །ཨོཾ་མུན་མུན་ག་བ་ཛཿས་པ་རི་ཝ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། །མ་མ་སརྦ་རོ་ག་ཤནྟིཾ་ཀུ་རུ་སྭཱ་ཧཱ། ཨ་ཤིག་ཤིག་ཕྱུང་ཕྱུང་ཁྲོལ་ཁྲོལ་སྭཱ་ཧཱ། མ་མ་སརྦ་སིདྡྷི་ཧཱུྃ། ཤིང་ལུག་ཟླ་བ་བཞི་པའི་ཚེས་བཅུ་དྲུག་ལ་དགོས་དབང་གིས་ཞེ་ཆེན་དུ་བྲིས་པ་དགེ།