རྡོ་རྗེ་སེམས་དཔའི་ཞི་བའི་སྲེག་བླུག་བཀྲ་ཤིས་དཔལ་འབར།
རྡོ་རྗེ་སེམས་དཔའི་ཞི་བའི་སྲེག་བླུག་བཀྲ་ཤིས་དཔལ་འབར་བཞུགས་སོ། །
ཐབ་ཟླུམ་པོ་དཀར་བ་ཆེ་ཆུང་གང་རུང་ཚད་ལྡན་བྱས་ལ་མེ་ཏོག་དཀར་པོའི་ཚོམ་བུ་བཀོད། སྲེག་རྫས་མར་ཁུ་དང་། བལ་བུ་སེ་བ་སོགས་ཤིང་དཀར་པོ་དྲི་བཟང་གི་ཡམ་ཤིང་། སྡིག་སྒྲིབ་ཞི་བར་ཏིལ། བགེགས་ཞི་བར་ཡུངས་ཀར། ནད་ཞི་བར་གྲོ་སོགས་ཞི་བར་འོས་པའི་རྫས་དང་མེ་ཏོག་དཀར་པོ་སོགས་གང་འབྱོར་དང་། ཆུ་གཉིས་སོགས་མཆོད་རྫས་བཤམས། བསང་སྦྱང་བྱས་ལ། ཨོཾ་ཨཱཿཧཱུྃ་ཧོཿས་བྱིན་གྱིས་བརླབས། ཨོཾ། རྫས་རྣམས་ཡིད་བཞིན་འདོད་རྒུར་གྱུར་པ་ཡི། །ཞི་བའི་ལས་ཀུན་འགྲུབ་པའི་རིན་པོ་ཆེ། །ཀུན་དུ་བཟང་པོའི་མཆོད་སྤྲིན་རབ་འབྱམས་ཀྱིས། །དཔག་ཡས་ནམ་མཁའི་ཁམས་ཀུན་གང་བར་གྱུར། །ཅེས་བསམ་ལ། བཀྲ་ཤིས་པའི་ས་ནས་མེ་སྦར། ཨོཾ་བུདྡྷ་ཛྭ་ལ་རཾཿ ཞེས་བརྗོད་ཅིང་།
ཧཱུྃཿཞེས་རླུང་གཡབ་ཀྱིས་སྦར། ཨོཾ་བཛྲ་ཨ་མྲྀ་ཏེ་ཧཱུྃ་ཕཊཿ ཅེས་པས་ཐབ་བསང་། ཨོཾ་སརྦ་བི་ཤུདྡྷོ་ཨཱཿ ཞེས་པས་སྦྱང་ལ། སྟོང་པའི་ངང་ལས་བྷྲཱུཾ་ཡིག་ཡོངས་གྱུར་པ། །མཚན་ཉིད་ཡོངས་རྫོགས་ཟླ་འདྲ་ཞི་བའི་ཐབ། །ཡངས་ཤིང་རྒྱ་ཆེ་གསལ་ཞིང་མཛེས་པའི་ནང་། །རཾ་ལས་འབར་བའི་མེ་དཔུང་ཆེན་པོའི་དབུས། །རབ་དཀར་པདྨ་ཟླ་བའི་གདན་སྟེང་ན། །མེ་ལྷ་དཀར་པོ་ཞལ་གཅིག་ཕྱག་གཉིས་པ། །ལྷ་ཡི་དྲང་སྲོང་གཞོན་ནུའི་ཆ་བྱད་མཛེས། །ཕྱག་གཉིས་བགྲང་ཕྲེང་དང་ནི་གུནྡྷེ་བསྣམས། །ཞབས་གཉིས་རྡོ་རྗེའི་སྐྱིལ་མོ་ཀྲུང་བཅས་ཏེ། །ཤིན་ཏུ་ཞི་ཞིང་དང་བའི་ཚུལ་གྱིས་བཞུགས། །བདག་མདུན་
ཐུགས་ཀའི་འོད་ཀྱིས་ཤར་ལྷོ་ནས། །ཡེ་ཤེས་མེ་ལྷ་སྤྱན་དྲངས་ས་མཱ་ཛཿ ཀྱཻཿ ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེག་བླུགས་མཆོད་པ་བཞེས་སླད་དུ། །འབར་བའི་གནས་འདིར་གཤེགས་སུ་གསོལ། །ཨོཾ་ཨགྣི་དེ་བ་ཨཱ་ཀརྵ་ཡ་ཛཿ ཞེས་པས་སྤྱན་དྲངས། ཨོཾ་བཛྲ་ས་མ་ཡ་སྟྭཾ། གྱིས་གཉིས་སུ་མེད་པར་གྱུར། ཨོཾ་ཨགྣི་དེ་བ་ཨརྒྷཾ་སོགས་ཀྱིས་མཆོད། ཨོཾ་ཨགྣི་དེ་བ་ན་མོ་ན་མ་མིཿ ཞེས་པས་འདུད། མེ་ལྷ་ཞི་ཞིང་དང་བའི་ཞལ། །རཾ་ལས་འོད་ཟེར་སྦུ་གུ་ཡིས། །མར་ཁུའི་བཅུད་དྲངས་གསོལ་བས་དགྱེས། །ཅི་བཅོལ་ཕྲིན་ལས་སྒྲུབ་པར་བསམ། །ཨོཾ་ཨགྣ་ཡེ་སྭཱ་ཧཱཿ ཞེས་པའི་སྔགས་ཀྱིས་མར་ཁུ་ཕུལ་ཞིང་། དཔལ་ལྡན་མེ་ལྷའི་རྒྱལ་པོ་ཡིས། །སྲེག་བླུག་མཆོད་པ་འདི་བཞེས་ལ། །ཞི་དང་ཤིས་པའི་ཕྲིན་ལས་ཀུན། །ཐོགས་མེད་གྲུབ་པར་མཛད་དུ་གསོལ། །ཞེས་འདོད་དོན་བཅོལ། ཡམ་ཤིང་། ཨོཾ་བོ་དྷི་བྲིཀྵ་ཡ་སྭཱ་ཧཱ། ཞེས་པས་ཕུལ་ཞིང་། དཔལ་ལྡན་མེ་ལྷའི་སོགས་འདོད་གསོལ་སྦྱར། ཞི་བའི་སྲེག་རྫས་གཞན་ཀུན་ལ། ཨོཾ་ཨགྣ་ཡེ་ཨཱ་དཱི་བྱ་དཱི་བྱཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧབྱ་ཀབྱ་བ་ཧ་ན་ཡ་ཆེ་གེ་མོའི་ནད་སོགས་གང་འདོད་ཤཱནྟིཾ་ཀུ་རུ་སྭཱ་ཧཱཿ ཞེས་ཅི་རིགས་ཕུལ་ཞིང་འདོད་གསོལ་བྱ། དེ་ནས་མེ་ཏོག་དཀར་པོ་ཐབ་ཏུ་
དོར་ལ། ན་མོ། དཔལ་ལྡན་མེ་ལྷ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་སྲེག་རྫས་ཐམས་ཅད་ལྷའི་ཞལ་དུ་བསྟབ་པ་དང་བདག་གམ་རྒྱུ་འབྱོར་ཆེ་གེ་མོའི་མི་མཐུན་པའི་ཕྱོགས་ཐམས་ཅད་ཞི་བའི་ཕྲིན་ལས་མཐར་ཕྱིན་པར་མཛད་དུ་གསོལ། ཞེས་བྱས་ལ། ཨོཾ་བཛྲ་ཛྭ་ལ་རཾ། ཞེས་བརྗོད་ཅིང་མར་ཁུ་ཐིགས་གཅིག་ཐབ་ཏུ་བླུགས་པས། མེ་ལྷ་འབར་བའི་རྣམ་པར་གྱུར་པ་ཡི། །ཆོས་དབྱིངས་སྤྲོས་པ་བྲལ་བའི་ཡེ་ཤེས་ཀྱི། །མེ་ལྕེ་དཀར་གསལ་འབར་ཞིང་འཁྱིལ་བའི་ཀློང་། །འོད་གསལ་ཞི་བ་ཆེན་པོའི་ཕོ་བྲང་དུ། །སྣང་སྟོང་གཉིས་སུ་མེད་པའི་ཡེ་ཤེས་སྐུ། །དཔལ་ལྡན་རྡོ་རྗེ་སེམས་དཔའི་ལྷ་ཚོགས་ཀུན། །རྡོ་རྗེ་རིགས་ཀྱི་ཡུམ་ཆེན་མཱ་མ་ཀི། །སྐུ་མདོག་ཕྱག་མཚན་རྒྱན་དང་ཆ་ལུགས་རྣམས། །སོགས་གང་འདོད་ཁ་བསྒྱུར་བྱ། ༧ མ་འདྲེས་ཡོངས་རྫོགས་ཆུ་ཟླའི་ཚུལ་དུ་གསལ། །ཡེ་ཤེས་ལྔ་ཡི་དབང་བསྐུར་ཡོངས་སུ་རྫོགས། །གནས་གསུམ་འབྲུ་གསུམ་ཡི་གེའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་བསྟིམ། །ལྕགས་ཀྱུའི་ཕྱག་རྒྱ་བཅས་རྩ་སྔགས་གསུམ་མམ་བདུན་གྱི་ཤམ་དུ། བཛྲ་ས་མཱ་ཛཿ ཞེས་པས་སྤྱན་དྲངས། ཛཿཧཱུྃ་བྃ་ཧོཿས་བསྟིམ། ཕྱི་ནང་གསང་མཆོད་ཚིགས་བཅད་དམ་སྔགས་ཅི་རིགས་པས་ཕུལ་ལ།
མི་རྟོག་རྡོ་རྗེ་མས་བསྟོད། ལྷ་རྣམས་ཞི་ཞིང་དང་བའི་ཉམས་གྱིས་ནི། །འོད་ཟེར་དཀར་པོས་སྣང་སྲིད་ཀུན་ཁྱབ་པས། །སྲིད་ཞིའི་རྒུད་པ་ཞི་བར་མཛད་པའི་ཀློང་། །མཁའ་ཁྱབ་སྲས་བཅས་རྒྱལ་བའི་ཚོགས་རྣམས་ཀུན། །ཏིལ་གྱི་གོང་བུ་བཞིན་དུ་མངོན་བཞུགས་ཏེ། །རབ་དཀའ་ཟླ་བ་ལ་གནས་བསྒྲུབ་བྱ་ལ། །དེ་བཞིན་གཤེགས་པ་ཀུན་གྱིས་དགོངས་པ་མཛད། །ཡུམ་རྣམས་རིན་ཆེན་བུམ་པའི་བདུད་རྩིས་བཀྲུ། །སེམས་དཔའ་སེམས་མས་བཀྲ་ཤིས་མེ་ཏོག་འཐོར། །ཁྲོ་བོའི་ཚོགས་ཀྱིས་བགེགས་ཀུན་ཞི་བར་མཛད། །ཀུན་ཀྱང་ཞི་བ་ཆེན་པོའི་ཕྲིན་ལས་ཀྱིས། །བཀྲ་ཤིས་དགེ་ལེགས་སྩོལ་བའི་རྣམ་པར་བཞུགས། །ཅུང་ཟད་འཛུམ་པར་ལྗགས་སྟེང་རཾ་ཡིག་ལས། །འོད་ཀྱི་སྦུ་གུས་བདུད་རྩི་གསོལ་བར་གྱུར། །ཨོཾ་བཛྲ་ས་ཏྭ་ཧཱུྃ། ཨོཾ་ཨགྣ་ཡེ་སྭཱ་ཧཱ། ཞེས་པས་མར་ཁུ་ཕུལ། ཡམ་ཤིང་རྩ་སྔགས་ལ་བོ་དྷི་སྦྱར་བས་ཕུལ་སོ་སོའི་མཐར། ཨོཾ། དཔལ་ལྡན་རྡོ་རྗེ་སེམས་དཔའི་ལྷ་ཚོགས་ཀྱིས། །བཀྲ་ཤིས་མཆོག་གི་མཆོད་པ་འདི་བཞེས་ལ། །རབ་འབྱམས་ཞི་བའི་ཕྲིན་ལས་མ་ལུས་པ། །ཐོགས་མེད་ཡིད་བཞིན་འགྲུབ་པར་མཛད་དུ་གསོལ། །ཞེས་འདོད་གསོལ་སྦྱར། དེ་ནས་ཞི་བའི་སྲེག་རྫས་ཀུན་རྩ་སྔགས་དང་ཞི་ཤམ་སྦྱར་བས་ཕུལ་ལ་སྐབས་སྐབས་སུ་འདོད་གསོལ་སྦྱར། མཐར་མཆོད་བསྟོད་ཡིག་བརྒྱའི་རྗེས། མདུན་གྱི་ལྷ་གཞལ་ཡས་ཁང་དང་བཅས་པ་འོད་ཟེར་དཀར་པོའི་རྣམ་པས་
རང་ངམ་བསྒྲུབ་བྱ་ལ་ཐིམ། མེ་ལྷ་སྔར་བཞིན་སྐུ་ཡོངས་སུ་རྫོགས་པའི་རྣམ་པར་གྱུར། མེ་ལྷ་ཞི་ཞིང་སོགས་སྲེག་རྫས་སྔར་བཞིན་ཕུལ། མཐར་མཆོད་ཅིང་བསྟོད་ལ་ཡིག་བརྒྱས་བཤགས། ཨོཾ་བཛྲ་མུཿ ཡེ་ཤེས་པ་གཤེགས་དམ་ཚིག་པ་རང་ལ་ཐིམ་པར་གྱུར། ཞེས་བརྗོད་ཅིང་བསམ་ལ་ལས་མཇུག་གཞུང་བཞིན་བྱའོ། །འདི་ནི་མི་མཐུན་བར་ཆད་ཀུན་ཞི་ནས། །ཤིན་ཏུ་བཀྲ་ཤིས་བྱེད་པའི་ཆོ་ག་སྟེ། །རྒྱུད་སྡེའི་དགོངས་པ་བཞིན་དུ་བྲིས་པ་ཡིན། །དགེ་བས་འགྲོ་ཀུན་རྣམ་གྲོལ་མཆོག་ཐོབ་ཤོག །ཅེས་པའང་སྒྲུབ་ཁང་བདུད་ལས་རྣམ་རྒྱལ་གླིང་དུ་རབ་ཚེས་དགའ་བ་ཆུ་འབྲུག་ལོའི་མཆུ་ཟླའི་ཉེར་བཞི་ལ་འཇམ་དཔལ་དགྱེས་པས་བྲིས་པ་མཆོག་ཏུ་བཀྲ་ཤིས་སོ།། ༈ །།ཆེ་མཆོག་གི་རྒྱས་པའི་སྲེག་བླུག་ཡིད་བཞིན་ནོར་བུ་ནི། ཐབ་ཁུང་སེར་པོ་གྲུ་བཞི་ཁྲུ་གང་པ་སོགས་ཚད་ལྡན་ལ་འབྲས་བུའམ་མེ་ཏོག་སེར་པོའི་ཚོམ་བུ་བཀོད། སྲེག་རྫས་མར་ཁུ་སེར་པོ་དང། འོ་མ་ཅན་དང་ལོ་འབྲས་ལྡན་པའི་ཤིང་གི་ཡམ་ཤིང་། ཚེ་རྒྱས་པར་དུརྦ་བསོད་ནམས་རྒྱས་པར་འབྲས། ལོངས་སྤྱོད་རྒྱས་པར་ཟས་མཆོག་སོགས་རྒྱས་པའི་སྲེག་རྫས་སུ་འོས་པ་དང་འབྲས་བུ་དང་མེ་ཏོག་སེར་པོ་སོགས་གང་འབྱོར་དང་། ཕྱི་ནང་གི་མཆོད་པ་བཤམས་བསང་སྦྱང་བྱ། ཨོཾ་ཨཱཿཧཱུྃ་ཧོཿ ཞེས་བཟླས་པས། ཨོཾ། རྫས་རྣམས་ཡིད་བཞིན་ནོར་བུ་དཔག་བསམ་ཤིང་། །གྲུབ་པའི་དམ་རྫས་གཏེར་བུམ་བདུད་རྩི་སོགས། །རྒྱས་པའི་ལས་ཀུན་འགྲུབ་པའི་རིན་པོ་ཆེ། །ཡེ་ཤེས་སྒྱུ་འཕྲུལ་དྲྭ་བའི་རོལ་མོར་གྱུར༔ ཞེས་བྱིན་གྱིས་བརླབས། འབྱོར་ལྡན་གྱི་ལག་ནས་སམ་མེ་ཤེལ་
སོགས་ཀྱིས་མེ་སྦར་ལ། ཨོཾ་རཏྣ་ཛྭ་ལ་རཾཿ ཞེས་བརྗོད། ཧཱུཾ༔ ཞེས་རླུང་གཡབ་ཀྱིས་གཡབ། ཨོཾ་བཛྲ་ཨ་མྲྀ་ཏ་ཧཱུཾ་ཕཊ། ཀྱིས་ཐབ་བསང་། ཨོཾ་སརྦ་བི་ཤུདྡྷེ་ཨཱཿ ཞེས་པས་སྦྱངས་ལ། སྟོང་པའི་ངང་ལས་བྷྲཱུྃ་ཡིག་ཡོངས་གྱུར་པ། །མཚན་ཉིད་ཡོངས་རྫོགས་གྲུ་བཞི་རྒྱས་པའི་ཐབ། །ཡངས་ཤིང་རྒྱ་ཆེ་གསལ་ཞིང་མཛེས་པའི་ནང་། །རྃ་ལས་འབར་བའི་མེ་དཔུང་ཆེན་པོའི་དབུས། །གསེར་མདོག་པདྨ་ཟླ་བའི་གདན་སྟེང་ན། །མེ་ལྷ་སེར་པོ་ཞལ་གཅིག་ཕྱག་གཉིས་པ། །ལྷ་ཡི་དྲང་སྲོང་གཞོན་ནུའི་ཆ་བྱད་མཛེས། །ནོར་བུའི་ཕྲེང་བ་དང་ནི་གུནྡྷེ་བསྣམས། །རིན་ཆེན་ཁྲི་ལ་བཟང་པོའི་འདུག་སྟངས་ཀྱིས། །ཤིན་ཏུ་དགྱེས་ཤིང་ཚིམ་པའི་ཚུལ་གྱིས་བཞུགས། །བདག་མདུན་ཐུགས་ཀའི་འོད་ཀྱིས་ཤར་ལྷོ་ནས། །ཡེ་ཤེས་མེ་ལྷ་སྤྱན་དྲངས་ས་མཱ་ཛཿ ཀྱཻ༔ ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུགས་མཆོད་པ་བཞེས་སླད་དུ། །འབར་བའི་གནས་འདིར་གཤེགས་སུ་གསོལ། །ཨོཾ་ཨགྣི་དེ་བ་ཨཱ་ཀརྴ་ཡ་ཛཿ ཞེས་པས་སྤྱན་དྲངས། ཨོཾ་བཛྲ་ས་མ་ཡ་སྟྭཾ༔ ཞེས་བརྗོད་པས་གཉིས་སུ་མེད་པར་གྱུར་པ་ལ། ཨོཾ་ཨགྣི་དེ་བ་ཨརྒྷཾ་སོགས་ཕྱི་ནང་གི་མཆོད་པ་འབུལ། ཨོཾ་ཨགྣི་དེ་བ་ན་མོ་ན་མ་མི༔ ཞེས་པས་ཕྱག་བྱ། མེ་ལྷའི་རྒྱས་ཤིང་ཚིམ་པའི་ཞལ། །རཾ་ལས་རིན་ཆེན་སྦུ་གུ་ཡིས། །མར་ཁུས་བཅུད་དྲངས་གསོལ་བས་མཉེས། །ཅི་བཅོལ་ཕྲིན་ལས་སྒྲུབ་པར་བསམ། །ཨོཾ་
ཨགྣ་ཡེ་སྭཱ་ཧཱ། ཞེས་པའི་སྔགས་ཀྱིས་མར་ཁུ་ཕུལ་ཞིང་། དཔལ་ལྡན་མེ་ལྷའི་རྒྱལ་པོ་ཡིས། །བསྲེག་བླུག་མཆོད་པ་འདི་བཞེས་ལ། །རྨད་བྱུང་རྒྱས་པའི་ཕྲིན་ལས་ཀུན། །ཐོགས་མེད་གྲུབ་པར་མཛད་དུ་གསོལ། །ཞེས་འདོད་དོན་གསོལ། །ཡམ་ཤིང་། ཨོཾ་བོ་དྷི་བྲིཀྵ་ཡེ་སྭཱ་ཧཱ། ཞེས་པས་འབུལ་ཞིང་། དཔལ་ལྡན་མེ་ལྷའི་སོགས་འདོད་གསོལ་སྦྱར། རྒྱས་པའི་སྲེག་རྫས་དངོས་གཞི་ལ། ཨོཾ་ཨགྣ་ཡེ་ཨཱ་དཱི་བྱ་དཱི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧབྱ་ཀབྱ་བ་ཧ་ན་ཡ། ཆེ་གེ་མོའི་ཚེ་སོགས་གང་འདོད་པ་པུཥྚིཾ་ཀུ་རུ་ཨོཾ། ཞེས་པས་ཅི་འདོད་ཕུལ་ཞིང་འདོད་གསོལ་སྔར་ལྟར་བྱ། དེ་ནས་མེ་ཏོག་སེར་པོ་ཐབ་ཏུ་དོར་ལ། ན་མོ། དཔལ་ལྡན་མེ་ལྷ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་སྲེག་རྫས་ཐམས་ཅད་ལྷའི་ཞལ་དུ་བསྟབས་པ་དང་། བདག་དང་སྦྱིན་པའི་བདག་པོ་འདི་དག གི་འདོད་པའི་དོན་ཐམས་ཅད་འཕེལ་ཞིང་རྒྱས་པའི་ཕྲིན་ལས་ཕུན་སུམ་ཚོགས་པ་འགྲུབ་པར་མཛད་དུ་གསོལ། ཞེས་བྱས་ལ། ཨོཾ་བཛྲ་ཛྭ་ལ་རྃ༔ ཞེས་བརྗོད་ཅིང་མར་ཁུ་ཐིགས་གཅིག་ཐབ་ཏུ་བླུགས་པས། མེ་ལྷ་འབར་བའི་རྣམ་པར་གྱུར་པ་ཡི། །ཐམས་ཅད་མཉམ་པ་ཉིད་ཀྱི་ཡེ་ཤེས་ཀྱི། །མེ་ལྕེ་སེར་གསལ་འབར་ཞིང་འཁྱིལ་བའི་ཀློང་། །འདོད་དགུ་ལྷུན་གྲུབ་རིན་ཆེན་ཕོ་བྲང་དུ། །བདེ་སྟོང་གཉིས་སུ་མེད་པའི་ཡེ་ཤེས་སྐུ། །དཔལ་ཆེན་ཆེ་མཆོག་
ཡོན་ཏན་ལྷ་ཚོགས་རྣམས། །ཡང་ན། དཔལ་ལྡན་ནོར་གྱི་དབང་ཕྱུག་ཛམྦྷ་ལ། །སྐུ་མདོག་ཕྱག་མཚན་རྒྱན་དང་ཆ་ལུགས་རྣམས། །ཞེས་སོགས་གང་འདོད་ཁ་སྒྱུར་ཤེས་པར་བྱ། མ་འདྲེས་ཡོངས་རྫོགས་ཆུ་ཟླའི་ཚུལ་དུ་གསལ། །ཡེ་ཤེས་ལྔ་ཡི་དབང་མཆོག་ཡོངས་སུ་རྫོགས། །གནས་གསུམ་འབྲུ་གསུམ་ཡི་གེའི་འོད་ཟེར་གྱིས། །དབྱིངས་ནས་ཡེ་ཤེས་སྤྱན་དྲངས་གཉིས་མེད་གྱུར། །རྩ་སྔགས་ཀྱི་མཐར་བཛྲ་ས་མཱ་ཛཿ བཏགས་པ་གསུམ་མམ་བདུན་གྱིས་སྤྱན་དྲངས། ཛཿཧཱུཾ་བཾ་ཧོཿ གཉིས་སུ་མེད་པར་བསྟིམ། མཆོད་བསྟོད་བྱ། ལྷ་རྣམས་དགྱེས་ཤིང་ཚིམ་པའི་ཉམས་ཀྱིས་ནི། །འོད་ཟེར་སེར་པོས་སྣང་སྲིད་ཀུན་ཁྱབ་པས། །སྲིད་ཞིའི་ལེགས་ཚོགས་རྒྱས་པར་མཛད་པའི་ཀློང་། །མཁའ་ཁྱབ་སྲས་བཅས་རྒྱལ་བའི་ཚོགས་རྣམས་ཀུན། །བདེ་སྟོང་སྦྱོར་བའི་བྱང་སེམས་བདུད་རྩིའི་རྒྱུན། །ཡིད་བཞིན་འདོད་རྒུར་འཆར་བའི་ཆར་ཆེན་པོས། །གསེར་མདོག་ཟླ་བ་ལ་གནས་བསྒྲུབ་བྱ་ཡི། །ཕུན་ཚོགས་དཔལ་ཡོན་སྤེལ་བའི་རྣམ་པར་བཞུགས། །དགྱེས་ཤིང་བཞད་པའི་ལྗགས་སྟེང་རྃ་སེར་ལས། །འོད་ཀྱི་སྦུ་གུས་བདུད་རྩི་གསོལ་བར་གྱུར། །ཨོཾ་བཛྲ་ཀྲོ་དྷ་མ་ཧཱ་ཤྲི་ཧེ་རུ་ཀ་ཧཱུྃ་ཕཊཿ ཨོཾ་ཨགྣ་ཡེ་སྭཱ་ཧཱ། ཞེས་པས་མར་ཁུ་ཕུལ། ཡམ་ཤིང་རྩ་སྔགས་ལ་བོ་དྷི་སྦྱར་བས་ཕུལ། སོ་སོའི་མཐར། ཨོཾ། དཔལ་ཆེན་ཆེ་མཆོག་ཡོན་ཏན་ལྷ་ཚོགས་ཀྱིས། །སྣང་
སྲིད་བདེ་ཆེན་བདུད་རྩིའི་མཆོད་པ་བཞེས། །རྨད་བྱུང་རྒྱས་པའི་ཕྲིན་ལས་མ་ལུས་པ། །ཕུན་ཚོགས་ཡིད་བཞིན་འགྲུབ་པར་མཛད་དུ་གསོལ། །ཞེས་འདོད་གསོལ་སྦྱར། རྒྱས་པའི་སྲེག་རྫས་ཀུན་རྩ་སྔགས་དང་གང་འདོད་རྒྱས་པའི་སྔགས་ཀྱི་ཤམ་བུ་སྦྱར་བས་ཕུལ་ལ་སྐབས་སྐབས་སུ་འདོད་གསོལ་སྦྱར། མཐར་མཆོད་བསྟོད་ཡིག་བརྒྱའི་རྗེས་སུ། མདུན་གྱི་ལྷ་གཞལ་ཡས་ཁང་དང་བཅས་པ་འོད་ཟེར་སེར་པོས་རྣམ་པས་རང་ངམ་བསྒྲུབ་བྱ་ལ་ཐིམ། མེ་ལྷ་སྔར་བཞིན་སྐུ་ཡོངས་སུ་རྫོགས་པའི་རྣམ་པར་གྱུར་པ་ལ། མེ་ལྷ་དགྱེས་ཤིང་སོགས་སྲེས་རྫས་རྣམས་སྔར་བཞིན་ཕུལ། མཐར་མཆོད་ཅིང་བསྟོད་པས་ཡིག་བརྒྱས་བཤགས། ཨོཾ་བཛྲ་མུཿ ཡེ་ཤེས་པ་གཤེགས་དམ་ཚིག་པ་རང་ལ་ཐིམ་པར་གྱུར། ལས་འཇུག་གཞུང་ལྟར་གྲུབ་བོ། །གཞན་ཡང་རང་གང་འདོད་པའི་ལྷ་གཙོ་རྐྱང་ངམ་འཁོར་དང་བཅས་པའི་གསལ་འདེབས་གོང་གི་ཚིག་རིས་དང་སྔགས་སྒྱུར་ཚུལ་རྒྱས་བསྡུས་གང་འོས་སུ་ཤེས་པར་བྱའོ། །འདི་ནི་སྲིད་དང་ཞི་བའི་ལེགས་ཚོགས་ཀུན། །གོང་ནས་གོང་དུ་འཕེལ་ཞིང་རྒྱས་པའི་ཐབས། །རྒྱུད་སྡེའི་དགོངས་པ་བཞིན་དུ་བསྟན་པ་སྟེ། །དགེ་བས་དོན་ཀུན་ཡིད་བཞིན་འབྱོར་གྱུར་ཅིག །ཅེས་པའང་རབ་ཚེས་ཆུ་འབྲུག་མཆུ་ཟླའི་ཚེས་ཉེར་བཞིར་འཇམ་དཔལ་དགྱེས་པའི་རྡོ་རྗེས་སྒྲུབ་ཁང་བདུད་ལས་རྣམ་རྒྱལ་གླིང་དུ་སྦྱར་བ་འདིས་འགྲོ་ཀུན་དཔལ་ཆེན་པོའི་གོ་འཕང་ཐོབ་པར་གྱུར་ཅིག མངྒ་ལཾ།། །།
༈ པདྨ་དབང་ཆེན་གྱི་སྲེག་བླུག་སྣང་སྲིད་དབང་སྡུད་ནི། ཟླ་གམ་དབང་གི་ཐབ་ཁུང་ཁྲུ་གང་ངམ། མཐོ་གང་ཆག་གང་གང་རུང་ཚད་ལྡན་བྱས་ལ། མེ་ཏོག་དམར་པོའི་ཚོམ་བུ་བཀོད། མདོག་དམར་ཐའི་མར་ཁུ་དང་། སེང་ལྡེང་སོགས་ཀྱི་ཡམ་ཤིང་དམར་པོ་ལྕགས་ཀྱུའི་རྣམ་པ་ཅན། སྦོམ་ཕྲ་རིང་ཐུང་ཐབ་དང་འཚམས་པ་དང་། རུ་རྟ་སོགས་རྫས་ཤིང་ཐོག་ཟས་སྣ་སོགས་དང་བདུན་དང་། གཞན་ཡང་ལུག་རུ་དང་གླང་སྣ་དམར་པོ་སོགས་མེ་ཏོག་དམར་པོ་དང་མངར་སྐྱུར་ལན་ཚ་སོགས་དབང་གི་སྲེག་རྫས་ཅི་འབྱོར་པ་རྫས་སྤུངས་སུ་བཤམས། ཆུ་གཉིས་ཕྱི་ལྔ་ནང་གསུམ་གྱི་མཆོད་པ་བཤམས་ལ་བདག་བསྐྱེད་བྱས་ནས། ཞེས་གཞན་ལ་བསྒྱུར། རཾ་ཡཾ་ཁཾཿ གིས་མཆོད་པ་བསང་། ཨོཾ་ཨཱཿཧཱུྃ་ཧོས་བྱིན་གྱིས་བརླབ། ཧྲཱིཿ འཁོར་འདས་བརྟན་གཡོའི་དྭངས་བཅུད་མ་ལུས་པ། །ཡོངས་འདུས་དབང་གི་རྫས་མཆོག་རིན་པོ་ཆེ། །བདེ་སྟོང་ཡེ་ཤེས་ཆེན་པོའི་རོལ་མོ་ནི། །རབ་འབྱམས་ནམ་མཁའི་ཁམས་ཀུན་ཁྱབ་པར་གྱུར། །ཅེས་བྱིན་གྱིས་བརླབས་ལ། སྨད་འཚོང་དང་། གཞོན་ནུ་མཛེས་པ་དང་། མི་དབང་ཆེ་བ་སོགས་ཀྱི་ལག་ནས་མེ་སྦར་ལ། ཨོཾ་པདྨ་ཛྭ་ལ་རྃ། ཞེས་བརྗོད་ཅིང་། ཧཱུྃཿ ཞེས་རླུང་གཡབ་ཀྱིས་གཡབ། ཐབ་ཨོཾ་ཨ་མྲྀ་ཏེ་ཧཱུྃ་ཕཊཿ ཅེས་པས་བསང་། ཨོཾ་སརྦ་བི་ཤུད་དྷོ་ཨཱ༔ ཞེས་པས་སྦྱངས་ལ། སྟོང་པའི་ངང་ལས་བྷྲུྃ་ཡིག་ཡོངས་གྱུར་པ། །མཚན་ཉིད་ཡོངས་རྫོགས་ཟླ་གམ་དབང་གི་ཐབ། །ཡངས་ཤིང་རྒྱ་ཆེ་གསལ་ཞིང་མཛེས་པའི་ནང་། །རྃ་ལས་འབར་བའི་མེ་དཔུང་ཆེན་
པོའི་དབུས། །རབ་དམར་ཆུ་སྐྱེས་ཉི་མའི་གདན་སྟེང་ན། །མེ་ལྷ་དམར་པོ་ཞལ་གཅིག་ཕྱག་གཉིས་པ། །ལྷ་ཡི་དྲང་སྲོང་གཞོན་ནུའི་ཆ་བྱད་མཛེས། །ལྕགས་ཀྱུ་ཞགས་འཛིན་པདྨའི་སྐྱིལ་ཀྲུང་ཅན། །ཤིན་ཏུ་ཡིད་འོང་བདེ་བའི་གཟི་བྱིན་འབར། །དགྱེས་ཤིང་ཆགས་པའི་ཚུལ་གྱིས་བཞུགས་པར་གྱུར། །བདག་མདུན་ཐུགས་ཀའི་འོད་ཀྱིས་ཤར་ལྷོ་ནས། །ཡེ་ཤེས་མེ་ལྷ་སྤྱན་དྲངས་ས་མཱ་ཛཿ ཀྱཻ༔ ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེག་བླུག་མཆོད་པ་བཞེས་སླད་དུ། །འབར་བའི་གནས་འདིར་གཤེགས་སུ་གསོལ། །ཨོཾ་ཨགྣི་དེ་བ་ཨཱ་ཀརྵ་ཡ་ཛཿ ཞེས་པས་སྤྱན་དྲངས། ཨོཾ་བཛྲ་ས་མ་ཡ་སྟྭཾ། གྱིས་གཉིས་སུ་མེད་པར་གྱུར། ཨོཾ་ཨགྣི་དེ་བ་ཨརྒྷཾ་སོགས་ཀྱིས་ཕྱི་མཆོད་དང་། མ་ཧཱ་པཉྩ་སོགས་ནང་མཆོད་འབུལ། ཨོཾ་ཨགྣི་དེ་བ་ན་མོ་ན་མ་མིཿ ཞེས་པས་འདུད་ཅིང་བསྟོད། མེ་ལྷ་ཆགས་ཤིང་འཛུམ་པའི་ཞལ། །རཾ་ལས་འོད་ཟེར་སྦུ་གུ་ཡིས། །མར་ཁུའི་བཅུད་དྲངས་གསོལ་བས་དགྱེས། །ཅི་བཅོལ་ཕྲིན་ལས་སྒྲུབ་པར་བསམ། །ཨོཾ་ཨགྣ་ཡེ་སྭཱ་ཧཱ། ཞེས་པའི་སྔགས་ཀྱིས་མར་ཁུ་ཕུལ་ཞིང་། དཔལ་ལྡན་མེ་ལྷའི་རྒྱལ་པོ་ཡིས། །སྲེག་བླུག་མཆོད་པ་འདི་བཞེས་ལ། །རབ་འབྱམས་དབང་གི་ཕྲིན་ལས་ཀུན། །ཐོགས་མེད་གྲུབ་པར་མཛད་དུ་གསོལ། །ཞེས་འདོད་
དོན་བཅོལ། ཡམ་ཤིང་ཨོཾ་བོ་དྷི་བྲིཀྵཱ་ཡེ་སྭཱ་ཧཱ། ཞེས་པས་ཕུལ་ཞིང་། དཔལ་ལྡན་མེ་ལྷའི་སོགས་འདོད་གསོལ་སྦྱར། དབང་གི་སྲེག་རྫས་ཀུན་ལ། ཨོཾ་ཨགྣ་ཡེ་ཨཱ་དཱི་བྱ་དཱི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧབྱ་ཀབྱ་བ་ཧ་ན་ཡ་ཆེ་གེ་མོའམ་སརྦ་ལོ་ཀ་ཝ་ཤཾ་ཀུ་རུ་ཧོ༔ ཞེས་ཅི་རིགས་ཕུལ་ཞིང་འདོད་གསོལ་བྱ། དེ་ནས་མེ་ཏོག་དམར་པོ་ཐབ་ཏུ་དོར་ལ། ན་མོ། དཔལ་ལྡན་མེ་ལྷ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་སྲེག་རྫས་ཐམས་ཅད་ལྷའི་ཞལ་དུ་བསྟབ་པ་དང་། རབ་འབྱམས་དབང་གི་ཕྲིན་ལས་ཐམས་ཅད་ཇི་ལྟར་བསམ་པ་བཞིན་དུ་མྱུར་བ་ཉིད་དུ་ཐོགས་པ་མེད་པར་གྲུབ་པར་མཛད་དུ་གསོལ། ཞེས་བྱས་ལ། ཨོཾ་བཛྲ་ཛྭ་ལ་རཾཿ ཞེས་བརྗོད་ཅིང་མར་ཁུ་ཐིགས་གཅིག་ཐབ་ཏུ་བླུགས་པས། མེ་ལྷ་འབར་བའི་རྣམ་པར་གྱུར་པ་ཡི། །སོ་སོ་ཀུན་དུ་རྟོག་པའི་ཡེ་ཤེས་ཀྱི། །མེ་ལྕེ་དམར་གསལ་འབར་ཞིང་འཁྱིལ་བའི་ཀློང་། །བདེ་ཆེན་འབར་བ་དབང་གི་ཕོ་བྲང་དུ། །བདེ་སྟོང་གཉིས་སུ་མེད་པའི་ཡེ་ཤེས་སྐུ། །བདེ་མཆོག་པདྨ་དབང་གི་ལྷ་ཚོགས་ཀུན། །མ་འདྲེས་ཡོངས་རྫོགས་ཆུ་ཟླའི་ཚུལ་དུ་གསལ། །གནས་གསུམ་འབྲུ་གསུམ་ཡི་གེའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་བསྟིམ། །ལྕགས་ཀྱུའི་ཕྱག་རྒྱ་བཅས་ལ་རྩ་སྔགས་གཞན་ལ་ལྷ་
སྔགས་ཁ་བསྒྱུར་བས་འཐུས་སོ། །གསུམ་མམ་བདུན་གྱི་མཐར། བཛྲ་ས་མཱ་ཛཿ ཞེས་པས་སྤྱན་དྲངས། ཛཿཧཱུྃ་བྃ་ཧོས་བསྟིམ། ཕྱི་ནང་གསང་མཆོད་རྣམས་ཚིགས་བཅད་དམ་སྔགས་ཅི་རིག་པས་ཕུལ་ལ། ཧྲཱིཿ རྒྱལ་བ་ཀུན་གྱི་ཆོས་སྐུ་སོགས་བསྟོད་པ་བྱ། ལྷ་རྣམས་དགྱེས་ཤིང་ཆགས་པའི་ཉམས་ཀྱིས་ནི། །འོད་དམར་ལྕགས་ཀྱུས་སྣང་སྲིད་ཀུན་ཁྱབ་པས། །བདེ་སྟོང་ངང་དུ་བཞུ་ཞིང་དྭང་མའི་བཅུད། །དབང་མེད་འཕྲོག་པར་མཛད་པའི་རྣམ་པར་བཞུགས། །ཅུང་ཟད་འཛུམ་པའི་ལྗགས་སྟེང་རཾ་ཡིག་ལས། །འོད་ཀྱི་སྦུ་གུས་བདུད་རྩི་གསོལ་བར་གྱུར། །ཧྲཱིཿབཛྲ་ཀྲོ་དྷ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊཿ ཨོཾ་ཨགྣེ་ཡ་སྭཱ་ཧཱཿ ཞེས་པས་མར་ཁུ་ཕུལ། ཡམ་ཤིང་ནི་རྩ་སྔགས་ལ་བོ་དྷི་སྦྱར་བས་ཕུལ། སོ་སོའི་མཐར། ཧྲཱིཿ བདེ་ཆེན་པདྨ་དབང་གི་ལྷ་ཚོགས་ཀྱིས། །བདེ་སྟོང་དབང་གི་མཆོད་པ་འདི་བཞེས་ལ། །རབ་འབྱམས་དབང་གི་ཕྲིན་ལས་མ་ལུས་པ། །ཐོགས་མེད་ཡིད་བཞིན་གྲུབ་པར་མཛད་དུ་གསོལ། །ཞེས་འདོད་གསོལ་སྦྱར། དེ་ནས་དབང་གི་སྲེག་རྫས་ཐམས་ཅད། ཨོཾ་ཧྲཱི་ཧྲཱིཿཔདྨ་ཏ་ཀྲིཏ་ཝ་ཤཾ་ཀུ་རུ་ཧྲཱིཿསོགས་ཀྱིས་ཕུལ་ལ་སྐབས་སུ་འདོད་གསོལ་སྦྱར། མཐར་མཆོད་ཅིང་བསྟོད་ལ་ཡིག་བརྒྱ་བཟླ། མདུན་གྱི་ལྷ་གཞལ་ཡས་ཁང་དང་བཅས་པ་འོད་དུ་དམར་ལྟེམ་གྱིས་ཞུ་ནས་རང་ལ་ཐིམ། མེ་ལྷ་སྔར་བཞིན་སྐུ་ཡོངས་སུ་རྫོགས་
པའི་རྣམ་པར་གྱུར། མེ་ལྷ་ཆགས་ཤིང་སོགས་སྲེག་རྫས་སྔར་བཞིན་ཕུལ། མཐར་མཆོད་ཅིང་བསྟོད་ལ་ཡིག་བརྒྱས་བཤགས། ཨོཾ་བཛྲ་མུཿ ཡེ་ཤེས་པ་གཤེགས་དམ་ཚིག་པ་རང་ལ་ཐིམ་པར་གྱུར། ཞེས་བརྗོད་ཅིང་བསམ་ལ་ལས་འཇུག་གཞུང་བཞིན་བྱའོ། །འདི་ནི་འཁོར་འདས་ཀུན་གྱི་དྭང་བཅུད་རྣམས། །ཁབ་ལེན་རྡོ་ཡིས་ལྕགས་བཞིན་དབང་མེད་དུ། །འགུགས་པ་རིགས་སྔགས་རྡོ་རྗེའི་ལྕགས་ཀྱུ་ཡི། །ཆོ་ག་རྨད་དུ་བྱུང་བ་ཉིད་ཡིན་ནོ། །ས་མ་ཡཱ། གཞན་ལ་མི་སྤེལ་རང་གི་འདོད་དོན་སྒྲུབས། །དམ་ལྡན་ཆོས་བཞིན་སྐྱོང་ན་བཀའ་རྒྱ་ཡིས། །བཏབ་ལ་དཀར་པོའི་ཆོས་ཀྱི་རྐྱེན་དུ་སྤེལ། །དེས་ཀྱང་ཤིན་ཏུ་དམ་པར་གསང་སྟེ་སྤྱད། །ཨཱིྀཿ འདི་རབ་ཚེས་ཆུ་ལུག་ཟླ་༡ཚེས་༡༨གཟའ་༡སྐར་༡༢བཟང་པོའི་འགྲུབ་སྦྱོར་ལ་མི་ཕམ་རྣམ་པར་རྒྱལ་བས་བསམ་འགྲུབ་ཀེའུ་ཚང་དུ་དཔལ་རྟ་མཆོག་རོལ་པའི་བསྙེན་མཚམས་ཀྱི་གུང་ཐུན་ལ་མྱུར་བར་བྲིས་པ་མཆོག་ཏུ་དགེ་ཞིང་བཀྲ་ཤིས་པ་ལགས་སོཿ ༈ ཡ་མཱནྟ་ཀའི་སྲེག་བླུག་དྲག་པོའི་མེ་ཆེན་རང་འབར་བཞུགས་སོ། །དུས་རྩུབ་པའི་ཆ་ལ་མངོན་སྤྱོད་ཀྱི་ཐབ་གྲུ་གསུམ་གྲི་གུག་གི་ཕྲེང་བས་མཚན་པར་མེ་ཏོག་ནག་པོའི་ཚོམ་བུ་བཀོད་ལ་དྲག་པོའི་ཐུད་ཤིང་བརྩིགས། དེར་ཕྱི་ནང་གི་མཆོད་པ་དང་། ཁྲག་དང་བསྲེས་པའི་མར་ཁུ། ཚེར་མ་སོགས་ཀྱི་ཡམ་ཤིང་། དུག་སྣ་དང་། ལྕགས་ཕྱེ་རྡོ་ཕྱེ་ཡུངས་ཀར་ནག་སྐེ་ཚེ་ཤངས་ཙེ་ཤ་ཁྲག་སོགས་ཀྱི་རྒྱུ་ལས་གྲུབ་པའི་དགྲ་བགེགས་ཀྱི་ལིང་ག་མིང་ཡིག་ལྡན་པའམ། དམར་གཏོར་བདུན་ནམ་ཉེར་གཅིག་སོགས་བཤམས། རང་གཤིན་རྗེ་གཤེད་ཀྱི་བདག་བསྐྱེད་ལ་གནས་
པས། རྫས་རྣམས་ལ་དགྲ་བགེགས་དགུག་བསྟིམ་དྲག་པོ་བྱ་བ་དང་། ཨེ་མྱགས་ཡ་རྔུབས་མུག་ཤག་ཀ་དུན༔ དགྲ་བགེགས་བྱད་མ་ཐམས་ཅད་ཀྱི་བླ་སྲོག་རྣམ་ཤེས་གཟུགས་ཕུང་དང་བཅས་པ་ཨཱ་ཀཱརྵ་ཡ་ཧཱུྃ་ཛཿ ཞེས་བཀུག་ལ། དགྲ་བགེགས་ཀྱི་སྙིང་ནང་དུ་ཁོ་རང་གི་ལས་ངན་བསམ་སྦྱོར་ངན་པའི་ངོ་བོ་གནམ་ལྕགས་ཀྱི་ཙཀྲ་རྩིབས་བརྒྱད་པ་རྣོ་བའི་དབལ་དང་ལྡན་པ་གཡོན་དུ་འཁོར་བས་གཟུགས་ཕུང་དམར་ཆིལ་གྱིས་གཏུབས། འབྱུང་བ་དང་རྣམ་ཤེས་ཀྱི་དངས་མ་རྣམས་རང་གི་ཐུགས་ཀར་རུས་སྦལ་གྱི་སྲོག་ཡིག་ལ་ཐིམ་པས་བདག་ཉིད་གཟི་བརྗིད་དང་ལྡན་པར་གྱུར། ཨེ་མྱགས་ཡ་རྔུབས་མུག་ཤག་ཀ་དུན༔ དགྲ་བགེགས་བྱད་མའི་སྙིང་ལ་མཱ་ར་ཡ་རྦད༔ ཅེས་བཟླའོ། །དེ་ནས་མཆོད་རྫས་བྱིན་གྱིས་བརླབ་པ་ནི། ཨོཾ་ཨཱཿཧཱུྃ་ཧོཿ དམ་ཉམས་དགྲ་བགེགས་བསྒྲལ་བ་ལས་བྱུང་བའིཿ དྲག་པོའི་མཆོད་རྫས་རྣམ་པ་ཐམས་ཅད་པ། །ཡེ་ཤེས་སྒྱུ་འཕྲུལ་དྲྭ་བའི་རོལ་མོ་ནི། །རབ་འབྱམས་ནམ་མཁའི་ཁམས་ཀུན་གང་བར་གྱུར། །ཤན་པ་གདོལ་པ་སྡིག་སྤྱོད་ཀྱི་ལག་ནས་མེ་སྦར་ལ། ཧཱུྃ་ཀརྨ་ཛྭ་ལ་རཾཿ ཞེས་བརྗོད། ཧཱུྃ། ཞེས་བརྗོད་ལ་རླུང་གཡབ་ཀྱིས་མེ་སྦར། ཨོཾ་ཡ་མཱནྟ་ཀྲྀཏ་ཧཱུྃ་ཕཊཿ ཅེས་པས་ཐབ་བསང་། ཨོཾ་སརྦ་བི་ཤུདྡྷེ་ཨཱཿ ཞེས་པས་སྦྱངས་ལ། སྟོང་པའི་ངང་ལས་བྷྲཱུྃ་ཡིག་ཡོངས་གྱུར་པ། །མཚན་ཉིད་ཡོངས་རྫོགས་དྲག་པོ་མེ་ཡི་ཐབ། །ཡངས་
ཤིང་རྒྱ་ཆེ་འཇིགས་སུ་རུང་བའི་ནང་། །རྃ་ལས་བསྐལ་པའི་མེ་དཔུང་འབར་བའི་དབུས། །པད་ཉི་དགྲ་བགེགས་བསྣོལ་བའི་ཁྲི་སྟེང་ན། །མེ་ལྷ་དྲང་སྲོང་ཁྲོས་པ་སྐུ་མདོག་ནག །དུར་ཁྲོད་ཆས་ཅན་ར་སྐྱེས་གདན་ལ་བཞུགས། །ཕྱག་གཡས་གྲི་གུག་གཡོན་པས་ལྕགས་ཀྱུ་བསྣམས། །འཇའ་འོད་མེ་དང་དུག་གི་ན་བུན་འཐུལ། །ཁྲོས་ཤིང་རྔམ་པའི་ཚུལ་གྱིས་བཞུགས་པར་གྱུར། །བདག་མདུན་ཐུགས་ཀའི་འོད་ཀྱིས་ཤར་ལྷོ་ནས། །ཡེ་ཤེས་མེ་ལྷ་སྤྱན་དྲངས་ས་མཱ་ཛཿ ཀྱཻཿ ཚུར་གཤེགས་ཚུར་གཤེགས་འབྱུང་པོ་ཆེཿ མེ་ལྷའི་རྒྱལ་པོ་དྲང་སྲོང་མཆོག །སྲེག་བླུག་མཆོད་པ་བཞེས་སླད་དུ། །འབར་བའི་གནས་འདིར་གཤེགས་སུ་གསོལ། །ཨོཾ་ཨགྣི་དྲྀ་ཥི་ཀྲོ་དྷ་རཱ་ཛ་ཨ་ཀརྵ་ཡ་ཛ༔ ཞེས་སྤྱན་དྲངས། ཨོཾ་བཛྲ་ས་མཱ་ཡ་སྟྭཾཿ གྱིས་གཉིས་སུ་མེད་པར་གྱུར། ཨོཾ་ཨགྣི་ཀྲོ་དྷ་ཨརྒྷཾ་སོགས་ཕྱི་ནང་གི་མཆོད་པས་མཆོད། ཨོཾ་ཨགྣི་ཀྲོ་དྷ་ན་མོ་ན་མ་མིཿ ཞེས་པས་ཕྱག་འཚལ། མེ་ལྷ་ཁྲོས་ཤིང་རྔམ་པ་ཡི། །རྃ་ལས་འོད་ཟེར་སྦུ་གུ་ཡིས། །མར་ཁུའི་བཅུད་དྲངས་གསོལ་བས་དགྱེས། །ཅི་བཅོལ་ཕྲིན་ལས་སྒྲུབ་པར་བསམ། །ཨོཾ་ཨགྣ་ཡེ་ཀྲོ་དྷ་ཧཱུྃ་ཕཊ༔ ཅེས་པས་མར་ཁུ་འབུལ་ཞིང་མཐར། །མེ་ལྷ་དྲང་སྲོང་ཁྲོས་པ་ཡིས། །སྲེག་བླུག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་
ལས་ཀུན། །ཐོགས་པ་མེད་པར་གྲུབ་པར་མཛོད། །ཅེས་འདོད་དོན་གསོལ། ཡམ་ཤིང་གོང་སྔགས་ལ། ཨོཾ་བོ་དྷི་བྲིཀྵ་ཡ་སྭཱ་ཧཱ། ཞེས་པས་འབུལ། འདོད་གསོལ་སྦྱར། དྲག་པོའི་རྫས་དངོས་རྣམས་ཨོཾ་ཨགྣ་ཡེ་ཀྲོ་དྷ་ཨཱ་དཱི་བྱ་དཱི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧ་བྱ་ཀ་བྱ་བ་ཧ་ན་ཡ་དགྲ་བགེགས་ཐམས་ཅད་མཱ་ར་ཡ་ཧཱུྃ་ཕཊ༔ ཅེས་ཅི་རིགས་ཕུལ་འདོད་དོན་གསོལ། དེ་ནས་མེ་ཏོག་ནག་པོ་ཐབ་ཏུ་འཐོར་ལ། ན་མོ། དཔལ་ལྡན་མེ་ལྷ་དྲང་སྲོང་ཁྲོས་པའི་རྒྱལ་པོ་ཁྱོད་ཀྱིས་དམོད་པའི་ལས་ཐམས་ཅད་བྱེད་པས་མེ་ཉིད་འབར་བ་ཆེན་པོ་ཡེ་ཤེས་ཀྱི་མེར་བྱིན་གྱིས་བརླབ་ནས་སྲེག་རྫས་ཐམས་ཅད་ལྷའི་ཞལ་དུ་སྟོབ་པ་དང་། རྣལ་འབྱོར་པ་བདག་གི་ཡིད་ལ་གང་བརྣག་པ་དང་དམོད་པ་ཙམ་གྱིས་དགྲ་བགེགས་ཐམས་ཅད་ཐལ་བར་བརླག་པ་མངོན་སྤྱོད་དྲག་པོའི་ཕྲིན་ལས་མཐར་ཕྱིན་པར་མཛད་དུ་གསོལ། ཞེས་བྱས་ལ། ཨོཾ་བཛྲ་ཛྭ་ལ་རཾ༔ ཞེས་བརྗོད་མར་ཁུ་ཐིགས་གཅིག་ཐབ་ཏུ་བླུག་པས། མེ་ལྷ་འབར་བའི་རྣམ་པར་གྱུར་པ་ཡི། །འཇོམས་མཛད་བྱ་བ་གྲུབ་པའི་ཡེ་ཤེས་ཀྱི། །མེ་ལྕེ་དམར་ནག་འབར་ཞིང་འཁྱིལ་བའི་ཀློང་། །ཆོས་དབྱིངས་དྲག་པོ་ཨེ་ཡི་གཞལ་ཡས་སུ། །རྒྱལ་ཀུན་ཡེ་ཤེས་རྡོ་རྗེ་ཁྲོས་པའི་སྐུ། །ཁྲོ་རྒྱལ་འཇམ་དཔལ་གཤིན་རྗེ་གཤེད་ཀྱི་ལྷ། །མ་འདྲེས་ཡོངས་རྫོགས་ཆུ་ཟླའི་ཚུལ་དུ་གསལ། །ཡེ་ཤེས་ལྔ་ཡི་དབང་བསྐུར་ཡོངས་སུ་རྫོགས། །
གནས་གསུམ་འབྲུ་གསུམ་ཡི་གེའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་བསྟིམ། །རྩ་སྔགས་ལ། བཛྲ་ས་མཱ་ཛཿ གདགས་པས་སྤྱན་དྲངས། ཛཿཧཱུྃ་བྃ་ཧོས་བསྟིམ། ཡ་མཱནྟ་ཀ་ལ་ཕྱི་ནང་གསང་བའི་མཆོད་པ་བཏགས་པས་མཆོད། གཏུམ་ཆེན་རབ་འབར་མས་བསྟོད། ལྷ་རྣམས་ཁྲོས་ཤིང་རྔམ་པའི་ཉམས་ཀྱིས་ནི། །མཐིང་ནག་དྲག་པོའི་འོད་ཀྱིས་ཕྱོགས་ཀུན་ཁྱབ། །སྣ་ཚོགས་ཁྲོ་བོའི་སྤྲིན་དང་མཚོན་ཆར་གྱིས། །གང་ལ་དམིགས་པའི་དགྲ་བགེགས་བརླག་བྱེད་པ། །མངོན་སྤྱོད་དྲག་པོའི་ཕྲིན་ལས་མཛད་པར་བཞུགས། །ཁྲོས་ཤིང་གདངས་པའི་ལྗགས་སྟེང་རཾ་ནག་པོའི། །འོད་ཀྱི་སྦུ་གུས་བདུད་རྩི་གསོལ་བར་གྱུར། །ཨེ་མྱགས་ཡ་རྔུབས་མུག་ཤག་ཀ་དུན། ཨོཾ་ཨགྣ་ཡེ་ཀྲོ་དྷ་ཧཱུྃ་ཕཊཿ ཅེས་པས་མར་ཁུ་ཕུལ། ཡམ་ཤིང་སྔགས་ལ་བོ་དྷི་སྦྱར་བས་ཕུལ་ལ་སོ་སོའི་མཐར། ཧཱུྃ། ཡེ་ཤེས་ཀློང་ཡངས་འཁྱིལ་བའི་ཐབ་ཁུང་དུ། །འཇམ་དཔལ་གཤིན་རྗེ་གཤེད་ཀྱི་ལྷ་ཚོགས་ལ། །དམ་ཉམས་དགྲ་བགེགས་བསྒྲལ་བའི་ཕུང་པོ་དང་། །དམ་རྫས་བདུད་རྩི་འབར་བའི་མཆོད་པ་འབུལ། །རིག་འཛིན་རྣལ་འབྱོར་བདག་ཅག་འཁོར་བཅས་ལ། །བསམ་སྦྱོར་ངན་པ་དགྲ་བགེགས་བྱད་མའི་རིགས། །གང་ལ་དམིགས་པའི་ལྔ་ཕུང་ཐལ་བར་རློག །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །དྲག་པོའི་སྲེག་རྫས་ཀུན།
ཨེ་མྱགས་འབྲུ་བརྒྱད་དང་དགྲ་བགེགས་ཨ་མུ་ཀ་མཱ་ར་ཡ་ཧཱུྃ་ཕཊ། ཛྭ་ལ་རཾ་ཁཱ་རཾ་ཁཱ་ཧེས་འབུལ། སྐབས་སུ་འདོད་གསོལ་སྦྱར། མཐར་མཆོད་བསྟོད། ཡིག་བརྒྱའི་རྗེས། བཛྲ་མུཿ ཞེས་པས་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་འབར་བའི་མེ་དང་གཉིས་མེད་དུ་གྱུར་པའི་དབུས་སུ་མེ་ལྷ་སྔར་ལྟར་གསལ་བར་བསྐྱེད་ལ། མར་ཁུ་ཡམ་ཤིང་སྲེག་རྫས་སྔར་ལྟར་འབུལ། མཐར་མཆོད་ཅིང་བསྟོད་ལ་ཡིག་བརྒྱས་བཤགས། བཛྲ་མུས་ཡེ་ཤེས་པ་གཤེགས། དམ་ཚིག་པ་མི་དམིགས་པར་བསམ། ལས་འཇུག་གཞུང་ལྟར་བསྡུའོ། །འདི་ནི་གང་ལ་དམིགས་པའི་དགྲ་དང་བགེགས། །རྡོ་རྗེའི་མེ་ཡིས་སྦུར་མ་བཞིན་བརླག་པའི། །མངོན་སྤྱོད་དྲག་པོའི་སྲེག་བླུག་དམ་པ་སྟེ། །རྒྱུད་དང་མན་ངག་དགོངས་པ་བཞིན་དུ་སྤེལ། །ས་མ་ཡཱ། འདི་ནི་རབ་ཚེས་རྒྱལ་བ་ཤིང་རྟའི་ལོའི་ས་ག་ཟླ་བའི་དཀར་ཕྱོགས་ཀྱི་བཟང་པོ་དང་པོར་སྒྲུབ་ཁང་པདྨ་བདེ་ལྡན་དུ་འཇམ་དཔལ་རྡོ་རྗེས་སྦྱར་བ་གྲུབ་པར་གྱུར་ཅིག མངྒ་ལཾ།། ༈ །།དང་ལ་ཡང་དག་ལ་བརྟེན་པའི་མཆོག་གི་སྲེག་བླུག་ཡེ་ཤེས་སྣང་བ་མཁའ་ཁྱབ་བཞུགས་སོ། །མཆོག་གི་ཐབ་ཁུང་ཟླུམ་པོ་པདྨ་རྒྱས་པ་ལྟ་བུའི་རྣམ་པ་རྡོ་རྗེའི་ཕྲེང་བས་བསྐོར་བ་ལ་མེ་ཏོག་སྔོན་པོ་སོགས་ཀྱི་ཚོམ་བུ་བཀོད། དེར་ཕྱི་ནང་གི་མཆོད་པ་དང་། སྲེག་རྫས་དྲི་བཟང་པོའི་ཡམ་ཤིང་། བདུད་རྩི་ལྔ་དང་བསྲེས་པའི་མར་ཁུ། ཤ་ལྔ་བདུད་རྩི་ལྔ་གཙོ་བོར་གྱུར་པའི་མཆོད་རྫས་སྣ་ཚོགས་ཀྱི་རིལ་བུ་བཤམས་ལ། ཨོཾ་ཨཱཿཧཱུྃ་ཧོས་བྱིན་གྱིས་བརླབས་
ལ། ཧོ། རྫས་རྣམས་བདེ་སྟོང་ཡེ་ཤེས་ཆེན་པོའི་འཕྲུལ། །མཆོག་གི་ལས་ཀུན་འགྲུབ་པའི་རིན་པོ་ཆེ། །ཀུན་ཏུ་བཟང་པོའི་མཆོད་སྤྲིན་རབ་འབྱམས་ཀྱིས། །མུ་མེད་ནམ་མཁའི་ཁམས་ཀུན་གང་བར་གྱུར། །ཞེས་བསམ་ལ། གྲུབ་པའི་གང་ཟག་གམ་སྔགས་བཙུན་བཟང་པོ་སོགས་ཀྱི་ལག་ནས་མེ་སྦར་ལ། ཨོཾ་བཛྲ་ཛྭ་ལ་རཾ། ཞེས་བརྗོད། ཧཱུྃ། ཞེས་རླུང་གཡབ་ཀྱིས་སྦར། ཨོཾ་བཛྲ་ཨ་མྲྀ་ཏེ་ཧཱུྃ་ཕཊ༔ ཅེས་པས་ཐབ་བསང་། ཨོཾ་སརྦ་བི་ཤུདྡྷོ་ཨཱ༔ ཞེས་སྦྱང་། སྟོང་པའི་ངང་ལས་བྷཱུྃ་ཡིག་ཡོངས་གྱུར་ལས། །པདྨའི་དབྱིབས་འདྲ་མཚན་རྫོགས་མཆོག་གི་ཐབ། །ཡངས་ཤིང་རྒྱ་ཆེ་གསལ་ཞིང་མཛེས་པའི་ནང་། །རཾ་ལས་འབར་བའི་མེ་དཔུང་ཆེན་པོའི་དབུས། །རབ་དཀར་པདྨ་ཟླ་བའི་གདན་སྟེང་ན། །མེ་ལྷ་དཀར་པོ་ཞལ་གཅིག་ཕྱག་གཉིས་པ། །གྲུབ་པའི་དྲང་སྲོང་གཞོན་ནུའི་ཆ་བྱད་མཛེས། །ཕྱག་གཡས་མཆོག་སྦྱིན་གཡོན་པས་གུནྡྷེ་བསྣམས། །ཞབས་གཉིས་རྡོ་རྗེའི་སྐྱིལ་མོ་ཀྲུང་བཅས་ཏེ། །ཆོས་ཀུན་མཉམ་པར་གཟིགས་པའི་ཚུལ་གྱིས་བཞུགས། །བདག་མདུན་ཐུགས་ཀའི་འོད་ཀྱིས་ཤར་ལྷོ་ནས། །ཡེ་ཤེས་མེ་ལྷ་སྤྱན་དྲངས་ས་མཱ་ཛཿ ཀྱཻཿ ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུག་མཆོད་པ་བཞེས་སླད་དུ། །འབར་བའི་གནས་འདིར་གཤེགས་སུ་
གསོལ། །ཨོཾ་ཨགྣི་དེ་བ་ཨཱ་ཀརྵ་ཡ་ཛཿ ཞེས་པས་སྤྱན་དྲངས། བཛྲ་ས་མ་ཡ་སྟྭཾ་གྱིས་གཉིས་སུ་མེད་པར་གྱུར། ཨོཾ་ཨགྣི་དེ་བ་ཨརྒྷཾ་སོགས་ཤབྟ་མ་ཧཱ་པཉྩ་ཨ་མྲྀ་ཏ་རཀྟ་བ་ལིམ་ཧཱ་སུ་ཁ་པཱུ་ཛ་ཧོཿ ཞེས་མཆོད། ཨོཾ་ཨགྣི་དེ་བ་ན་མོ་ན་མ་མིཿ ཞེས་པས་ཕྱག་བྱ། མེ་ལྷ་དགྱེས་ཤིང་དྭངས་བའི་ཞལ། །རཾ་ལས་འོད་ཟེར་སྦུ་གུ་ཡིས། །མར་ཁུའི་བཅུད་དྲངས་གསོལ་བས་དགྱེས། །ཅི་བཅོལ་ཕྲིན་ལས་སྒྲུབ་པར་བསམ། །ཨོཾ་ཨགྣ་ནེ་ཡེ་སྭཱ་ཧཱཿ ཞེས་པས་མར་ཁུ་འབུལ་ཞིང་། དཔལ་ལྡན་མེ་ལྷའི་རྒྱལ་པོ་ཡིས། །སྲེག་བླུག་མཆོད་པ་འདི་བཞེས་ལ། །བདེ་ཆེན་མཆོག་གི་ཕྲིན་ལས་ཀུན། །ཐོགས་མེད་གྲུབ་པར་མཛད་དུ་གསོལ། །ཞེས་འདོད་དོན་ལ་གསོལ་བ་གདབ། ཡམ་ཤིང་། ཨོཾ་བོ་དྷི་བྲིཀྵ་ཡ་སྭཱ་ཧཱ། ཞེས་པས་ཕུལ་ཞིང་། གོང་གི་འདོད་གསོལ་སྦྱར། སྲེག་རྫས་གཞན་ཀུན། ཨོཾ་ཨགྣ་ཡེ་ཨཱ་དཱི་བྱ་དཱི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧབྱ་ཀབྱ་བ་ཧ་ན་ཡ་པ་ར་མ་སིདྡྷི་ཨ་ལ་ལ་ཧོ། ཞེས་ཅི་རིགས་ཕུལ་ཞིང་འདོད་གསོལ་བྱ། དེ་ནས་མེ་ཏོག་ཐབ་དུ་འཐོར་ལ། ན་མོ། དཔལ་ལྡན་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་སྲེག་རྫས་ཐམས་ཅད་ལྷའི་ཞལ་དུ་སྟོབ་པ་དང་རྣལ་འབྱོར་པ་བདག་གིས་ལམ་གྱི་ཡོན་ཏན་མྱུར་དུ་རྫོགས་ནས་མཆོག་གི་དངོས་
གྲུབ་དམ་པ་ཐོབ་བར་མཛད་དུ་གསོལ། ཞེས་བྱས་ལ། ཨོཾ་བཛྲ་ཛྙཱ་ན་ཛྭ་ལ་རཾ། ཞེས་བརྗོད་ཅིང་མར་ཁུ་ཐིགས་གཅིག་ཐབ་ཏུ་བླུགས་པས། མེ་ལྷ་འབར་བའི་རྣམ་པར་གྱུར་པ་ཡི། །བདེ་བ་ཆེན་པོ་རང་བྱུང་ཡེ་ཤེས་ཀྱི། །མེ་ལྕེ་སྣ་ལྔ་འབར་ཞིང་འཁྱིལ་བའི་ཀློང་། །འོད་གསལ་བདེ་ཆེན་འབར་བའི་ཕོ་བྲང་དུ། །གཉིས་མེད་ཡེ་ཤེས་ཕྱག་རྒྱའི་སྐུར་སྣང་བ། །ཐུགས་མཆོག་ཡང་དག་གྲུབ་པའི་ལྷ་ཚོགས་རྣམས། །མ་འདྲེས་ཡོངས་རྫོགས་ཆུ་ཟླའི་ཚུལ་དུ་གསལ། །ཡེ་ཤེས་ལྔ་ཡི་དབང་བསྐུར་ཡོངས་སུ་རྫོགས། །གནས་གསུམ་འབྲུ་གསུམ་ཡི་གེའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་གྱུར། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། བཛྲ་ས་མཱ་ཛཿ བདུན་ནམ་གསུམ་གྱིས་སྤྱན་དྲང་། ཛཿཧཱུྃ་བྃ་ཧོས་བསྟིམ། ཨོཾ་ཤྲཱི་ཧེ་རུ་ཀ་ས་པ་རི་ཝ་ར་ཨརྒྷཾ་སོགས་གོང་ལྟར་མཆོད། ཡང་དག་གྲུབ་པ་གཅིག་པུ་ནི། །སངས་རྒྱས་བདེ་ཆེན་ཀུན་འདུས་པ། །མཁའ་འགྲོ་སྒྱུ་མ་བདེ་མཆོག་བདེ། །ཕྱག་འཚལ་ཧེ་རུ་ཀ་དཔལ་ལའོ། །ཞེས་པས་བསྟོད། ལྷ་རྣམས་བདེ་བ་ཆེན་པོའི་གཟི་བྱིན་གྱིས། །ཡེ་ཤེས་འོད་ཟེར་སྣང་སྲིད་ཀུན་ཁྱབ་པས། །སྣོད་བཅུད་རྣམ་དག་མཉམ་པའི་དབྱིངས་ཉིད་དུ། །ཡོངས་གྲུབ་མཆོག་གི་ཕྲིན་ལས་མཛད་པར་བཞུགས། །དགྱེས་མཉམ་རོལ་པའི་ལྗགས་སྟེང་རཾ་ཡིག་ལས། །འོད་ཀྱི་སྦུ་གུས་བདུད་རྩི་གསོལ་བར་གྱུར། །
ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨོཾ་ཨགྣ་ཡེ་སྭཱ་ཧཱཿ ཞེས་པས་མར་ཁུ་ཕུལ། ཡམ་ཤིང་རྩ་སྔགས་ལ་བོ་དྷི་སྦྱར་བས་ཕུལ། སོ་སོའི་མཐར། ཧོཿ ཐུགས་མཆོག་ཡང་དག་གྲུབ་པའི་ལྷ་ཚོགས་ཀྱིས། །སྣང་སྲིད་རྣམ་དག་བདུད་རྩིའི་མཆོད་པ་བཞེས། །ས་དང་ལམ་གྱི་ཡོན་ཏན་མྱུར་རྫོགས་ནས། །མཐར་ཐུག་མཆོག་གི་དངོས་གྲུབ་ཐོབ་པར་མཛོད། །ཅེས་འདོད་གསོལ་སྦྱར། སྲེག་རྫས་རྣམས་རྩ་སྔགས་དང་། མ་ཧཱ་སུ་ཁ་ཛྙཱ་ན་སིདྡྷི་ཧཱུྃ། ཞེས་ཤམ་བཏགས་པས་ཇི་མང་ཕུལ་ལ་སྐབས་སུ་འདོད་གསོལ་སྦྱར། མཐར་མཆོད་བསྟོད་ཡིག་བརྒྱའི་རྗེས། མདུན་གྱི་ལྷ་གཞལ་ཡས་ཁང་དང་བཅས་པ་འོད་ཟེར་མཐིང་གའི་རྣམ་པར་སྙིང་གི་སྙིང་གའི་མི་ཤིགས་པའི་ཐིག་ལེ་ལ་ཐིམ་པར་གྱུར། མེ་ལྷ་སྔར་བཞིན་གསལ་ལ། མེ་ལྷ་དགྱེས་ཤིང་སོགས་སྲེག་རྫས་སྔར་ལྟར་ཕུལ། མཐར་མཆོད་བསྟོད་ཡིག་བརྒྱ་དང་། བཛྲ་མུས་ཡེ་ཤེས་པ་གཤེགས་དམ་ཚིག་པ་རང་ལ་ཐིམ་པས་གཞུང་བསྡུའོ། །འདི་ནི་ས་དང་ལམ་གྱི་མངོན་རྟོགས་འཕེལ། །ཡང་དག་གྲུབ་པ་མཆོག་གི་དངོས་གྲུབ་ཐོབ། །དེ་ཕྱིར་རྒྱུད་དང་ལུང་གི་དགོངས་པ་བཞིན། །བསྡེབས་པས་འགྲོ་ཀུན་སངས་རྒྱས་ཉིད་ཐོབ་ཤོག །ཅེས་པའང་རབ་ཚེས་རྒྱལ་བ་ཤིང་རྟའི་ས་ག་ཟླ་བའི་དཀར་ཕྱོགས་ཀྱི་བཟང་པོ་དང་པོར་སྒྲུབ་ཁང་པདྨ་བདེ་ལྡན་དུ་འཇམ་དཔལ་རྡོ་རྗེས་སྦྱར་བ་མཆོག་ཏུ་གྲུབ་པར་གྱུར་ཅིག་མངྒ་ལཾ།། ༈ །།རྡོ་རྗེ་གཞོན་ནུའི་ལས་ཐམས་ཅད་པའི་སྲེག་བླུག་
དོན་ཀུན་གྲུབ་པ་ནི། ལས་ཐམས་ཅད་པའི་ཐབ་ཁུང་ཟུར་བརྒྱད་པདྨ་རྒྱས་པའི་རྣམ་པ་ལྟ་བུ་གྲུ་གང་ངམ་མཐོ་གང་སོགས་ཆེ་ཆུང་གང་མོས་བྱས་ལ་མེ་ཏོག་གི་ཚོམ་བུ་བཀོད། མངར་གསུམ་དང་སྦྱར་བའི་མར་ཁུ་དང་། ཤིང་བཟང་པོའི་ཡམ་ཤིང་། ཞི་བའི་འབྲས་དང་ཏིལ། རྒྱས་པའི་ཞོ་ཟན་དང་མེ་ཏོག་སེར་པོ། དབང་གི་ལན་ཚ་དམར་པོ་དང་མངར་རིགས། དྲག་པོའི་ཡུངས་ཀར་དང་དུག་ཁྲག་ལིངྒ་སོགས་གཙོར་གྱུར་སྲེག་རྫས་སུ་གྱུར་ཚད་དང་མཆོད་པ་ཇི་འབྱོར་བཤམས། རྃ་ཡཾ་ཁཾཿགིས་མཆོད་པ་བསང་། ཨོཾ་ཨཱཿཧཱུྃ་ཧོས་བྱིན་གྱིས་བརླབས་ལ། ཧཱུྃ། བདེ་སྟོང་ཡེ་ཤེས་མཆོག་གི་རོལ་པ་ལས། །གང་སྣང་འདོད་ཡོན་རྒྱན་གྱི་འཁོར་ལོ་ཆེ། །ལས་ཀུན་སྒྲུབ་བྱེད་ལྷ་རྫས་མཆོད་སྤྲིན་གྱིས། །རབ་འབྱམས་ནམ་མཁའི་ཁམས་ཀུན་གང་བར་གྱུར། །ཞེས་བསམ་ལ། ནུས་ལྡན་ནམ་གཞོན་ནུ་ཕོ་མོ་མིང་བཀྲ་ལེགས་པའམ་ཡིད་དང་མཐུན་པས་མེ་སྦར། ཨོཾ་བཛྲ་སརྦ་བིདྱ་ཨ་མོ་གྷ་ཛྭ་ལ་རཾ་ཞེས་བརྗོད། ཧཱུྃ་ཞེས་རླུང་གཡབ་ཀྱིས་སྦར། ཨོཾ་བཛྲ་ཨ་མྲྀ་ཏེ་ཧཱུྃ་ཕཊ༔ ཞེས་པས་ཐབ་བསང་། ཨོཾ་སརྦ་དྷརྨ་བུ་ཤུདྡྷེ་ཨཱཿཞེས་སྦྱང་། སྟོང་པའི་ངང་ལས་བྷྲཱུྃ་ཡིག་ཡོངས་གྱུར་པ། །མཚན་ཉིད་ཡོངས་རྫོགས་ལས་ཀུན་གྲུབ་པའི་ཐབ། །ཡངས་ཤིང་རྒྱ་ཆེ་གསལ་ཞིང་མཛེས་པའི་ནང་། །རཾ་ལས་འབར་བའི་མེ་དཔུང་ཆེན་པོའི་དབུས། །མེ་ལྷ་ལྗང་གུ་ཞལ་གཅིག་ཕྱག་གཉིས་པ། །ཞི་མ་ཁྲོ་ཚུལ་ལྷ་ཡི་ཆ་བྱད་མཛེས། །ཕྱག་གཡས་
མཆོག་སྦྱིན་གཡོན་པས་བགྲང་ཕྲེང་བསྣམས། །ཞབས་གཉིས་ཕྱེད་སྐྱིལ་སྣ་ཚོགས་འོད་ཟེར་འཕྲོ། །ཞི་ཆགས་ཁྲོ་བོའི་ཉམས་ཀྱིས་བཞུགས་པར་གྱུར། །བདག་མདུན་ཐུགས་ཀའི་འོད་ཀྱིས་ཤར་ལྷོ་ནས། །ཡེ་ཤེས་མེ་ལྷ་སྤྱན་དྲངས་ས་མཱ་ཛཿ ཀྱཻཿ ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུག་མཆོད་པ་བཞེས་སླད་དུ། །འབར་བའི་གནས་འདིར་གཤེགས་སུ་གསོལ། །ཨོཾ་ཨགྣི་དེ་བ་ཨ་ཀརྵ་ཡ་ཛཿ ཞེས་པས་སྤྱན་དྲངས། བཛྲ་ས་མ་ཡ་སྟྭཾ། གྱིས་གཉིས་སུ་མེད་པར་གྱུར། ཨོཾ་ཨགྣི་དེ་བ་ཨརྒྷཾ་སོགས་ནས་ཤབྟ་མ་ཧཱ་པཉྩ་ཨ་མྲྀ་ཏ་རཀྟ་བ་ལིངྟ་མ་ཧཱ་སུ་ཁ་པཱུ་ཛ་ཧོཿ ཞེས་མཆོད། ཨོཾ་ཨགྣི་དེ་བ་ན་མོ་ན་མ་མི༔ ཞེས་པས་ཕྱག་བྱ། མེ་ལྷ་དགྱེས་ཤིང་བཞད་པའི་ཞལ། །རཾ་ལས་འོད་ཟེར་སྦུ་གུ་ཡིས། །མར་ཁུའི་བཅུད་དྲངས་གསོལ་བས་མཉེས། །ཅི་བཅོལ་ཕྲིན་ལས་སྒྲུབ་པར་བསམ། །ཨོཾ་ཨགྣེ་ཡེ་སྭཱ་ཧཱ། ཞེས་པས་མར་ཁུ་འབུལ་ཞིང་། དཔལ་ལྡན་མེ་ལྷའི་རྒྱལ་པོ་ཡིས། །སྲེག་བླུག་མཆོད་པ་འདི་བཞེས་ལ། །རབ་འབྱམས་ཕྲིན་ལས་མ་ལུས་པ། །ཐོགས་མེད་འགྲུབ་པར་མཛད་དུ་གསོལ། །ཞེས་འདོད་དོན་ལ་གསོལ་བ་གདབ། ཡམ་ཤིང་། ཨོཾ་བོ་དྷི་བྲིཀྵ་ཡ་སྭཱ་ཧཱ། ཞེས་པས་ཕུལ་ཞིང་གོང་གི་འདོད་གསོལ་སྦྱར། སྲེག་རྫས་གཞན་ཀུན། ཨོཾ་ཨགྣེ་ཡེ་ཨཱ་
དཱི་བྱ་དཱི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧ་བྱ་ཀབྱ་བ་ཧ་ན་ཡ་སརྦ་ཀརྨ་སིདྡྷི་ཧཱུྃ་ཧཱུྃ༔ ཞེས་ཅི་རིགས་ཕུལ་ཏེ་འདོད་གསོལ་བྱ། དེ་ནས་མེ་ཏོག་སྣ་ཚོགས་ཐབ་ཏུ་དོར་ལ། ན་མོ། དཔལ་ལྡན་མེ་ལྷ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་སྲེག་རྫས་ཐམས་ཅད་ལྷའི་ཞལ་དུ་སྟོབ་པ་དང་། ཞི་སོགས་རབ་འབྱམས་ལས་ཀྱི་ཚོགས་གང་འདོད་པ་ཐམས་ཅད་ཐོགས་མེད་དུ་འགྲུབ་པར་མཛད་དུ་གསོལ། ཞེས་བྱས་ལ། ཨོཾ་བཛྲ་ཛྙཱ་ན་ཛྭ་ལ་རཾ༔ ཞེས་བརྗོད་ཅིང་མར་ཁུ་ཐིགས་གཅིག་ཐབ་ཏུ་བླུགས་པས། མེ་ལྷ་འབར་བའི་རྣམ་པར་གྱུར་པ་ཡི། །ཡེ་ཤེས་སྒྱུ་འཕྲུལ་དྲྭ་བའི་རང་བཞིན་གྱི། །མེ་ལྕེ་ཁ་དོག་སྣ་ཚོགས་འཁྲུགས་བའི་ཀློང་། །དོན་ཀུན་གྲུབ་པ་དཔལ་གྱི་ཕོ་བྲང་དུ། །སྲས་བཅས་རྒྱལ་བ་ཀུན་གྱི་ཕྲིན་ལས་ལྷ། །དཔལ་ཆེན་རྡོ་རྗེ་གཞོན་ནུའི་ལྷ་ཚོགས་རྣམས། །མ་འདྲེས་ཡོངས་རྫོགས་ཆུ་ཟླའི་ཚུལ་དུ་གསལ། །ཡེ་ཤེས་ལྔ་ཡི་དབང་བསྐུར་ཡོངས་སུ་རྫོགས། །གནས་གསུམ་འབྲུ་གསུམ་ཡི་གེའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་གྱུར། །ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊཿ བཛྲ་ས་མཱ་ཛཿ བདུན་ནམ་གསུམ་གྱིས་སྤྱན་དྲངས། ཛཿཧཱུྃ་བཾ་ཧོཿས་བསྟིམ། ཨོཾ་བཛྲ་ཀུ་མ་ར་ས་པ་རི་ཝ་ར་ཨརྒྷཾ་སོགས་གོང་ལྟར་མཆོད། ཧཱུྃཿ བསྐལ་པ་མེ་ལྟར་སོགས་ཀྱིས་
བསྟོད། ལྷ་རྣམས་དགྱེས་བཞད་རོལ་པའི་ཉམས་ཀྱིས་ནི། །སྣ་ཚོགས་འོད་ཟེར་དྲྭ་བ་འཁྲུགས་པ་ཡིས། །ཞི་སོགས་རབ་འབྱམས་ཕྲིན་ལས་མ་ལུས་པ། །ཐོགས་མེད་གྲུབ་པར་མཛད་པའི་རྣམ་པར་བཞུགས། །དགྱེས་བཞད་ཞལ་གྱི་ལྗགས་སྟེང་རཾ་ཡིག་ལས། །འོད་ཀྱི་སྦུ་གུས་བདུད་རྩི་གསོལ་བས་དགྱེས། །ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨོཾ་ཨགྣེ་ཡེ་སྭཱ་ཧཱ། ཞེས་པས་མར་ཁུ་ཕུལ། ཡམ་ཤིང་རྩ་སྔགས་དང་བོ་དྷི་སྦྱར་བས་འབུལ། སོ་སོའི་མཐར། ཧཱུྃ༔ ཕྲིན་ལས་རྡོ་རྗེ་ཕུར་པའི་ལྷ་ཚོགས་ཀྱིས། །ཀུན་བཟང་སྒྱུ་འཕྲུལ་དྲྭ་བའི་མཆོད་པ་བཞེས། །རབ་འབྱམས་ཕྲིན་ལས་སྣ་ཚོགས་གང་འདོད་པ། །ཐོགས་མེད་ཡིད་བཞིན་འགྲུབ་པར་མཛད་དུ་གསོལ། །ཞེས་འདོད་གསོལ་སྦྱར། སྲེག་རྫས་རྣམས་རྩ་སྔགས་དང་། ཤནྟིཾ་པུཥྚིཾ་ཝ་ཤཾ་མ་ར་ཡ་སརྦ་ཀརྨ་ཨ་མོ་གྷ་སིདྡྷི་ཕ་ལ་ཧཱུྃ་ཧཱུྃ་གིས་འབུལ། སྐབས་སུ་འདོད་གསོལ་སྦྱར། མཐར་མཆོད་བསྟོད་ཡིག་བརྒྱའི་རྗེས། མདུན་གྱི་ལྷ་གཞལ་ཡས་ཁང་དང་བཅས་པ་འོད་ཟེར་སྣ་ཚོགས་པའི་རྣམ་པས་རང་ལ་ཐིམ། མེ་ལྷ་སྔར་བཞིན་གསལ། མེ་ལྷ་དགྱེས་ཤིང་སོགས་སྲེག་རྫས་སྔར་ལྟར་འབུལ། མཐར་མཆོད་བསྟོད་ཡིག་བརྒྱའི་རྗེས། བཛྲ་མུས་ཡེ་ཤེས་པ་གཤེགས། དམ་ཚིག་པ་རང་ལ་བསྟིམས་ཏེ་ལས་གཞུགས་བསྡུའོ། །འདི་ནི་ཇི་ལྟར་འདོད་པའི་ཕྲིན་ལས་ཀུན། །ཐོགས་མེད་འགྲུབ་
པར་བྱེད་པའི་ཐབས་མཆོག་སྟེ། །རྒྱུད་དང་མན་ངག་རྣམས་ཀྱི་དགོངས་པ་བཞིན། །བསྡེབ་པས་འགྲོ་ཀུན་ལས་རབ་འགྲུབ་གྱུར་ཅིག །རབ་ཚེས་གསེར་འཕྱང་མེ་བྱའི་ཟླ་བ་གསུམ་པའི་ཚེས་གསུམ་ལ་སྒྲུབ་ཁང་འཆི་མེད་མཆོག་གྲུབ་གླིང་དུ་འཇམ་དཔལ་རྡོ་རྗེས་སྦྱར་བ་དགེ་ལེགས་སུ་གྱུར་ཅིག མངྒ་ལཾ།། ༈ །།ལས་ཐམས་ཅད་པའི་སྦྱིན་སྲེག་ཙིནྟ་མ་ཎི་བཞུགས་སོ། །༁ྃ༔ ལས་དང་མཐུན་པའི་བུད་ཤིང་བརྩིགས། །མར་དང་སྲེག་རྫས་གང་རུང་བཤམས། །ཨོཾ་ཨ་ར་པ་ཙ་ན་དྷཱིཿ ན་མོ་རཏྣ་ཏྲ་ཡཱ་ཡ། ཨོཾ་ཡེ་དྷརྨཱ་སོགས་སྭཱ་ཧཱ། རྫས་རྣམས་ཡིད་བཞིན་ནོར་བུ་དཔག་བསམ་ཤིང་། །གྲུབ་པའི་དམ་རྫས་གཏེར་བུམ་བདུད་རྩི་སོགས། །རབ་འབྱམས་ལས་ཀུན་འགྲུབ་པའི་རིན་པོ་ཆེ། །ཡེ་ཤེས་སྒྱུ་འཕྲུལ་དྲྭ་བའི་རོལ་མོར་གྱུར། །རཾཿཞེས་མེ་སྦར། བྷྲཱུྃ་ལས་རིན་ཆེན་གཞལ་མེད་ཉམས་དགའ་བར། །བཀྲ་ཤིས་ལྷ་རྫས་བུད་ཤིང་བརྩེགས་པ་རུ། །འབར་བའི་མེ་དབུས་རཾ་ལས་མེ་ཡི་ལྷ། །གསལ་ཞིང་བསྟིམ་ལ་དགྱེས་པའི་མཆོད་པ་འབུལ། །མར་ཁུ། ཨོཾ་ཨགྣི་ཡེ་སྭཱ་ཧཱ། སྲེག་རྫས་དག་ཀྱང་སྔགས་དེས་འབུལ། གང་ཡིན་ལས་ཀྱི་འདོད་གསོལ་བྱ། མེ་ལྷ་འབར་བའི་རྣམ་པར་གྱུར་པ་ཡི། །ཡེ་ཤེས་མེ་ལྕེ་འོད་རབ་གསལ་བའི་དབུས། །པད་ཟླའི་སྟེང་ན་འཇམ་པའི་རྡོ་རྗེ་ནི། །དམར་སེར་རལ་པོད་མདའ་གཞུ་འཛིན་ཅིང་འགྱིང་། །དར་དང་མེ་ཏོག་རིན་ཆེན་རྒྱན་གྱིས་
མཛེས། །ཞབས་གཉིས་རྡོར་སྐྱིལ་ཡེ་ཤེས་འོད་ཟེར་འབར། །ཟག་མེད་བདུད་རྩིའི་བཅུད་དྲངས་གསོལ་བས་མཉེས། །དངོས་གྲུབ་ཐོགས་མེད་དཔལ་གྱི་སྲེག་རྫས་ཀུན། །དག་མཉམ་ཡེ་ཤེས་ཆེན་པོར་འབུལ་གྱིས་བཞེས། །བདག་ལ་ཐུགས་རྗེས་བྱིན་གྱིས་བརླབ་ཏུ་གསོལ། །མར་ཁུ་རྩ་སྔགས་ཨགྣིས་དབུལ། སྲེག་རྫས་ཨ་ར་པ་ཙས་ཕུལ། སྐབས་སུ་དབྱངས་གསལ་རྟེན་སྙིང་གཤམས། ཁ་སྐྱུར་འདོད་གསོལ་གང་རིགས་བྱ། མཐར་ནི་མཆོད་བསྟོད་ཡིག་བརྒྱ་བཟླ། །ལྷ་ཉིད་རང་ཐིམ་མེ་ལྷ་གསལ། །ཞལ་སྐྱེམ་སྲེག་རྫས་ཕུལ་ནས་སུ། །ཡེ་ཤེས་པ་གཤེགས་དམ་ཚིག་པ། །རང་བསྟིམ་དགེ་བསྔོ་ཤིས་བརྗོད་བྱའོ། །ཞེས་པའང་རང་ཚེས་ཤིང་ཕག་ཟླ་༡༠ཚེས་༡༠ལ་དྷཱིས་སྤེལ་བ་མངྒ་ལཾ།། །།