དྲག་པོ་དམིགས་བསལ་སྲེག་བླུག
དྲག་པོ་དམིགས་བསལ་སྲེག་བླུག་ལ། །མར་ཁུ་ཁྲག་དང་སྦྱར་བའི་སྐྱེམ། །ཤ་རུས་ཟག་རྫས་ལིངྒ་ལ། །དགྲ་བགེགས་དགུག་བསྟིམ་དྲག་ཏུ་བྱ། །བསྒྲལ་བའི་ཕྲིན་ལས་ཅི་རིགས་རྗེས། །རྩ་སྔགས་ལ་ནི་ཨོཾ་ཨཱཿཧཱུྃ། །སྦྱར་བས་འདི་ལྟར་བྱིན་གྱིས་བརླབ། །ཧཱུྃཿ དམ་ཉམས་དགྲ་བགེགས་བསྒྲལ་བ་ལས་བྱུང་བའི། །ཕྱི་ནང་ཉེར་སྤྱོད་སྨན་རག་གཏོར་མ་སོགས། །དྲག་པོའི་མཆོད་རྫས་ནམ་མཁའི་དབྱིངས་ཁྱབ་པ། །བདེ་སྟོང་ཡེ་ཤེས་ཆེན་པོའི་རང་བཞིན་གྱུར། །རྃཿ ཞེས་མེ་སྦར། ཧཱུྃཿ ཨེ་ལས་འཇིགས་རུང་དྲག་པོའི་གཞལ་ཡས་སུ། །མི་བཟད་བསྐལ་པའི་མེ་དཔུང་འབར་བའི་དབུས། །རཾ་ལས་དྲག་པོའི་མེ་ལྷ་གཏུམ་རྔམ་འབར། །སྤྱན་དྲངས་བསྟིམས་ལ་དགྱེས་པའི་མཆོད་པ་འབུལ། །མར་ཁུ། ཨོཾ་ཨགྣེ་ཡེ་དགྲ་བགེགས་ཆེ་གེ་མོ་མཱ་ར་ཡ་སོགས་འོག་གི་ཤམ་སྦྱར། སྲེག་རྫས་ཀྱང་སྔགས་དེས་དབུལ། འདོད་གསོལ་བྱ། མེ་ལྷ་འབར་བའི་རྣམ་པར་གྱུར་པ་ཡི། །གདུག་རྩུབ་དམར་ནག་འཁྱིལ་པའི་ཀློང་ཡངས་སུ། །དཔལ་ཆེན་ཁྲག་འཐུང་ཁྲོ་རྒྱལ་གཤིན་རྗེའི་གཤེད། །རབ་འབར་ཁྲོས་འཁྲུག་རྔམ་པའི་ཚུལ་དུ་བཞུགས། །དམ་ཉམས་དགྲ་བགེགས་བསྒྲལ་བའི་ཕུང་པོ་དང་། །དམ་རྫས་བདུད་རྩི་འབར་བའི་མཆོད་པ་འདི། །འཇམ་དཔལ་གཤིན་རྗེ་གཤེད་ཀྱི་ཞལ་དུ་བསྟབ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །ཨེ་མྱགས་ཡ་
རྔུབ་མུག་ཤག་ཀ་དུནཿ དགྲ་བགེགས་ཆེ་གེ་མོ་མཱ་ར་ཡ་ཧཱུྃ་ཕཊཿ ཛྭ་ལ་རཾ་ཁ་རཾ་ཁཱ་ཧིཿ ཞེས་པས་མར་ཁུ་དང་སྲེག་རྫས་རྣམས་འབུལ། ལས་རྗེས་གོང་གི་ཞི་སོགས་སྐབས་དང་འདྲའོ། །བསྐྲད་དབྱེ་སོགས་ལ་རང་རང་གི་རྫས་དང་དམིགས་བསལ་འདུས་བྱས་ལ། དམ་རྫས་བདུད་རྩི་ཞེས་པའི་ཚབ་ཏུ། དྲག་པོར་རྫས་མཆོག་འབར་བའི་མཆོད་པ་འདི། །འཇམ་དཔལ་གཤིན་རྗེ་གཤེད་པོ་ཁྱོད་ལ་འབུལ། །ཞེས་ཁ་བསྒྱུར་ཏེ་རྩ་སྔགས་ལ་ལས་སོ་སོའི་སྔགས་ཤམ་བཏགས་ཏེ་ཕུལ་ལོ། །རྒྱུད་དང་བཀའ་གཏེར་གྱི་མན་ངག་བཞིན་ཟིལ་གནོན་དགྱེས་པ་རྩལ་གྱིས་བྲིས་པ་མངྒ་ལཾ།། །།