ནམ་མཁའ་དང་གཟའ་སྐར་ལ་སོགས་པའི་རབ་བྱེད།

ལྷ་ལམ་སྤྲིན་ལམ་རྒྱུ་སྐར་ལམ། །ཀུན་གསལ་ཆུ་མཐོང་ལྷའི་རྫིང་རིང༌། །གནམ་དགུང་ཀུན་ཁྱབ་ནམ་མཁའི་མིང༌། །ཆུ་འཛིན་སྒྲ་ལྡན་ཚ་ཟེར་འཇོམས། །ཆུ་ཁུར་མཁའ་གླང་སྤྲིན་གྱི་མིང༌། །འཇུག་པ་བརྒྱ་པ་གཞི་སྔོན་སྐྱེས། །ལུས་ཕྲ་བདེ་འཐུང་གློག་གི་མིང༌། །སྤྲིན་གྱི་སྒྲ་དང་དབྱར་སྐྱེས་རྔ། །སྒྲ་བརྒྱ་པ་རྣམས་འབྲུག་སྐད་མིང༌། །མེ་ཆར་གནམ་ལྕགས་སྤྲིན་གྱི་འོད། །རི་འཇོམས་ལྕེ་འབབ་ཐོག་གི་མིང༌། །སྐྱིན་ཐང་སྤྲིན་རུས་ལོ་ཐོག་གཤེད། །རྡོ་ཆར་ཆུ་མཁྲེགས་སེར་བའི་མིང༌། །གྲུ་ཆར་སྦྲང་ཆར་སྤྲིན་བཅུད་དང༌། །སྤྲིན་གྱི་མེ་ཏོག་ཆར་པའི་མིང༌། །རླུང་གི་རྒྱལ་མཚན་རྒན་པོའི་ཐིག །ང་འཁྱོག་གཞུ་རིས་བརྒྱ་བྱིན་གཞུ། །སོས་ཀ་བཞད་རྣམས་འཇའ་ཚོན་མིང༌། །མདོང་སེལ་བུམ་སྐྱེས་ཆུ་ལྷའི་བུ། །ཨ་གསྡ་རྣམས་རི་བྱིའི་མིང༌། །མཐོ་རིས་སྣང་བྱེད་མུན་པ་ཅན། །སྲིད་གསུམ་རྣམ་རྒྱལ་རཱ་ཧུ་ལ། །སེང་གེའི་བུ་མོ་སྒྲ་གཅན་མིང༌། །བཅུ་གཉིས་བདག་པོ་འོད་སྟོང་ལྡན། །ནམ་མཁའི་ནོར་བུ་པད་མའི་གཉེན། །རྟ་བདུན་བདག་པོ་རྟ་ལྗང་ཅན། །སྣང་བྱེད་མེ་ཟླུམ་ཉི་མའི་མིང༌། །བརླ་མེད་འོད་སྲུང་ཁྱུང་སྔོན་སྐྱེས། །ཉི་མའི་ཁ་ལོ་སྐྱ་རེངས་མིང༌། །བདེ་འབྱུང་གཙུག་རྒྱན་རི་བོང་འཛིན། །རྒྱུ་སྐར་རྒྱལ་པོ་ཀུ་མུད་གཉེན། །གཉིས་སྐྱེས་རྒྱལ་པོ་བསིལ་སྦྱིན་མཁན། །འོད་དཀར་ཅན་དང་བཅུ་དྲུག་ཆ། །ཆ་གཏེར་ཀུན་ཕན་ཟླ་བའི་མིང༌། །ས་སྐྱེས་འོད་ཟེར་དགུ་པ་དང༌། །བཀྲ་ཤིས་ཞེས་པ་མིག་དམར་མིང༌། །གསལ་ལྡན་ཟླ་བུ་སྣར་མ་སྐྱེས། །གསེར་ལྡན་ལུས་གཅིག་ལྷག་པའི་མིང༌། །བློ་ལྡན་དབྱངས་བདག་མེ་བཞི་སྐྱེས། །ལྷ་ཡི་བླ་མ་ཕུར་བུའི་མིང༌། །ཁུ་བ་དཀར་པོ་ངན་སྤོང་བུ། །ལྷ་མིན་བླ་མ་པ་སངས་མིང༌། །འོད་ཟེར་བདུན་པ་གོས་སྔོན་ཅན། །ཚངས་སྐྱེས་ཉི་བུ་སྤེན་པའི་མིང༌། །ནམ་མཁའ་དང་གཟའ་སྐར་ལ་སོགས་པའི་རབ་ཏུ་བྱེད་པའོ།། །།