གཏེར་སྲུང་ཆེན་པོའི་མཆོད་ཐབས།
བཀའ་རྫོགས་པ་ཆེན་པོ་རྩ་གསུམ་གསང་བ་སྙིང་ཐིགས་ལས༔ གཏེར་སྲུང་མཆོད་ཐབས་བཞུགས་སོ༔ རྩ་བ་གསུམ་ལ་ཕྱག་འཚལ་ལོ༔ རྩ་གསུམ་གསང་བ་སྙིང་ཐིགས་ཀྱི༔ ཆོས་ལ་སྤྱོད་པའི་སྐལ་ལྡན་གྱི༔ སྲུང་མ་མཆོད་ཐབས་འདི་ལྟར་བྱ༔ སྨྱུག་རྒོད་མགུལ་དུ་དར་ཚོན་དང་༔ སྟག་གཟིག་རས་མོ་མེ་ལོང་དང་༔ སྲུང་མ་ཉིད་ཀྱི་ཙཀ་ལི་བཏགས༔ ཕུད་རྒོད་དམར་གཏོར་རྒྱན་ལྡན་བཤམས༔ བསང་སྦྱང་སྤེལ་ཞིང་བྱིན་གྱིས་བརླབས༔ གསང་འདུས་ལྷ་ཡི་བསྐྱེད་རིམ་བསྒོམ༔ མདུན་དུ་སྲུང་མ་འཁོར་བཅས་གསལ༔ རོལ་མོ་འཁྲོལ་ཞིང་སྤོས་དཀར་བདུག༔ སྙན་པའི་དབྱངས་ཀྱིས་འདི་སྐད་དོ༔ ཧཱུྃ༔ བཀའ་ཡི་སྲུང་མ་དམ་ཚིག་ཅན༔ འདིར་གཤེགས་བརྒྱན་གྱི་མཆོད་པ་བཞེས༔ དམ་བཅས་བཞིན་དུ་འཕྲིན་ལས་མཛོད༔ བདག་ཉིད་པད་མ་ཐོད་ཕྲེང་གིས༔ གསང་བ་གསུམ་གྱི་དཀྱིལ་འཁོར་དུ༔ དམ་ཚིག་ཕོག་པ་དུས་འདིར་དགོངས༔ རྒྱལ་བ་ཐོད་དཀར་གཉེན་གྱི་གཙོ༔ མཆེད་ཟླ་བརྒྱད་ལ་གཉེན་འཁོར་འབུམ༔ སངས་རྒྱས་བསྟན་པའི་བྱ་ར་བ༔ རྡོ་རྗེ་ཐེག་པའི་སྲུང་མ་མཆོག༔ ཀུན་ཀྱང་ཞལ་གཅིག་ཕྱག་གཉིས་པ༔ སྐུ་མདོག་དམར་པོ་ལེ་བརྒན་གསོལ༔ ཕྱག་ན་དར་མདུང་ཞགས་པ་བསྣམས༔ ལ་ཐོད་རྒོད་སྒྲོ་ལྡེམས་སེ་ལྡེམ༔ ཞལ་ནས་བཤུད་འདེབས་ཨམ་གཙིགས་བསྡམས༔ སྤྱན་གསུམ་བར་སྣང་གློག་ལྟར་འཁྱུག༔ སྨ་ར་སྨིན་མ་མེ་འོད་འཕྲོ༔ ནད་ཀྱི་ན་བུན་བསེ་དྲི་འཐུལ༔ ཆིབས་སུ་རྐྱང་རྒོད་ཞུར་པོ་བཅིབས༔ སྟག་རལ་གཟིག་ཤུབས་བསེ་ཕུབ་བརྒྱན༔ རང་འདྲའི་སྤྲུལ་པ་མང་པོས་བསྐོར༔ ཅེ་སྤྱང་བདུད་ཚོགས་ཕོ་ཉར་འགྱེད༔ དམ་ཚིག་ཉམས་པའི་བླ་ལ་འཇབ༔ ཀླུ་བཙན་ས་བདག་བྲན་དུ་བཀོལ༔ དགྲ་བོར་འཕུང་གསུམ་གཡབ་མོས་འདེབས༔ རྒྱལ་འགོང་རྣམས་དང་སྡོང་ཟླ་འདེབས༔ སྨྱོ་འབོག་བརྒྱལ་ནད་ཐོག་ལྟར་འབེབས༔ ཁྱོད་ནི་དཔལ་གྱི་ཕོ་ཉ་སྟེ༔ ཁྱོད་ནི་བཀའ་ཡི་སྲུང་མ་མཆོག༔ ཕུད་མཆོད་གཏོར་མ་འདི་བཞེས་ལ༔ དྲག་ཏུ་བསྐྱོད་ལ་མྱུར་དུ་རྒྱུག༔ དགྲ་བོ་མི་དཔའ་རྟ་མགྱོགས་ཀྱི༔ དཔུང་པ་ཆོག་ལ་རྒྱུས་པ་ཆིངས༔ གོ་ཁྲབ་བཤུས་ལ་མཚོན་ཆ་ཕྲོག༔ སྲོག་རྩ་ཆོད་ལ་སྙིང་ཁྲག་འཐུང་༔ དཔའ་གཏུམ་འཁྲུག་པའི་ང་རོ་ཡིས༔ དགྲ་བོའི་རྣམ་ཤེས་རྟེན་དང་ཕྲོལ༔ རྣོ་ངར་ལྡན་པའི་མཚོན་ཆ་ཡིས༔ དགྲ་བོའི་དོན་སྙིང་ཚལ་པར་ཁོས༔ ཕོ་ཉ་སྤྲུལ་པ་ཡང་སྤྲུལ་གྱིས༔ དགྲ་བོའི་ཤ་ཁྲག་དོན་སྙིང་རོལ༔ འུར་འུར་ཆུམ་ཆུམ་ལས་ལ་བྷྱོ༔ བཀའ་ལས་མ་འདའ་དམ་ཚིག་ཅན༔ དམ་ལས་མ་འདའ་དགེ་བསྙེན་ཆེ༔ གནས་རྣམས་སྲུངས་ཤིག་ཞིང་སྐྱོང་མགོན༔ གཏེར་རྣམས་འཚོས་ཤིག་བྱ་ར་བ༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་ཕུད་མཆོད་གཏོར་མ་དབུལ༔ འདི་ལྟར་བརྩམས་པའི་རྣལ་འབྱོར་ལ༔ འགོ་ཞིང་སྡོང་གྲོགས་བྱེད་པ་དང་༔ ཀ་ཅ་དཀོར་སྲུང་དམ་གཙང་བས༔ གསོལ་མཆོད་དུས་གཏོར་ཆག་མེད་གྱིས༔ ཁྱད་པར་ཆོས་འདིའི་སྲུང་མ་སྟེ༔ སུ་ཡིས་ཉམས་སུ་བླངས་པ་ལ༔ མགོན་སྐྱོབ་སྡོང་གྲོགས་ངེས་པར་བྱེད༔ གནས་འདིའི་སྲུང་མ་འདི་ཁོ་ན༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ཨྀཐི༔ ས་མ་ཡཱ༔ རྒྱ་རྒྱ་རྒྱ༔ རྟོགས་ལྡན་འཁྲུལ་སྣང་རང་གྲོལ་རྩལ་གྱིས་ཁམས་སྲིང་མོ་རྫོང་ནས་སྟག་ལོ་ལ་གདན་དྲངས་ཤིང་སླར་ཆགས་རུ་ཕུག་ནག་ཏུ་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ།། །།