ཞིང་སྐྱོང་རྒྱལ་བ་ཐོད་དཀར་གྱི་མངའ་གསོལ་ཕྲིན་ལས་དཔལ་འབར།
ཞིང་སྐྱོང་རྒྱལ་བ་ཐོད་དཀར་གྱི་མངའ་གསོལ་ཕྲིན་ལས་དཔལ་འབར་ནི། གཏོར་མཆོད་རྣམས་ལ་སྨན་རག་སྦྲེང་སྟེ། །ཧཱུྃ། ཆོས་ཉིད་དབྱིངས་སུ་ངོ་བོ་རོ་གཅིག་ཀྱང་། །འཇིག་རྟེན་དྲེགས་པ་འདུལ་ཕྱིར་རྟ་གདོང་དཔལ། །མི་བཟད་བཙན་རྗེ་གཉན་ཆེན་རྒྱལ་ཐོད་ནི། །དེང་འདིར་མཆོད་པའི་གནས་འདིར་སྐུ་བསྐྱོད་ཅིག ། ཧཱུྃ། སྐུ་གསུམ་སངས་རྒྱས་རྣམས་ཀྱིས་དབང་བསྐུར་རྟགས། །ལ་ཐོད་རྒོད་འཕྲུ་གསུམ་མཚོན་དབུ་ལ་གསོལ། །དབང་ཆེན་པདྨ་ལ་སོགས་ཁྲོ་བོ་ཡིས། །འབར་ཁྲོ་གར་དགུའི་ཉམས་ལྡན་མངའ་གསོལ་བ། །ཞལ་གཅིག་ཁྲོ་འཛུམ་དབང་གི་གཟི་འོད་འབར། །དེ་བཞིན་རྣལ་འབྱོར་བདག་གིས་མངའ་གསོལ་ལོ། །སྲིད་གསུམ་དྲེགས་པ་ཡོངས་ཀྱིས་མངའ་གསོལ་བ། །ཕྱག་གཡས་མདུང་དར་གཡོན་པས་ཞགས་པ་དང་། །སྐུ་ལ་བསེ་ཁྲབ་རུ་མཚོན་འཁོར་གསུམ་གསོལ། །ཞབས་གཉིས་སག་ལྷམ་བཙན་རྟ་དམར་པོ་ཆིབས། །སྟོང་གསུམ་ཡུད་ཙམ་གྱིས་བསྐོར་རྫུ་འཕྲུལ་ཅན། །དེ་བཞིན་རྣལ་འབྱོར་བདག་གིས་མངའ་གསོལ་ལོ། །ལྷ་ཀླུ་གཉན་བཙན་རྣམས་ཀྱིས་མངའ་གསོལ་བ། །གཞལ་ཡས་ཕོ་བྲང་བཀོད་ལེགས་རྔམ་བརྗིད་འབར། །སྤྲུལ་པ་ཡང་སྤྲུལ་འཁོར་ཚོགས་སྣ་ཚོགས་ཀྱིས། །གནས་ཡུལ་གསུམ་ལ་དབང་བསྒྱུར་མཐུ་བོ་ཆེ། །གནས་གཏེར་སྲུང་བར་ཁས་བླངས་དམ་ཚིག་ཅན། །དེ་བཞིན་རྣལ་འབྱོར་བདག་གིས་མངའ་གསོལ་ལོ། སྐུ་རྟེན་གསང་རྟེན་དར་མཚོན་གོ་མཚོན་དང་། སྟག་གཟིག་པགས་པ་ལ་སོགས་སྤྱན་གཟིགས་ཚོགས། །ཕྱི་ནང་གསང་མཆོད་བྷ་ལིང་གཏོར་མ་དང་། །ཇ་ཆང་ཕུད་ཀྱི་གསེར་སྐྱེམས་རོལ་པའི་མཚོ། །རྐང་གཉིས་མི་ཡི་ལོངས་སྤྱོད་སྣ་ཚོགས་ཀྱིས། །ཐུགས་དམ་དགྱེས་སྐོང་མངའ་གསོལ་དབུ་འཕང་བསྟོད། །ཉེས་བྱས་འགལ་འཁྲུལ་གྱུར་རྣམས་བཟོད་པར་བཞེས། །བཅོལ་པའི་ཕྲིན་ལས་རྣམ་བཞི་ལྷུན་གྲུབ་མཛོད། །ཅེས་འདི་ལྟར་མངའ་གསོལ་དོན་ཚང་ཞིག་དགོས་ཞེས་མགྲོན་གཉེར་འཇིགས་མེད་བསྟན་སྐྱོང་ངོར། སྲུང་མ་ཉིད་ཀྱི་གནས་རིའི་ལྷ་མདུན་སྲིང་རྫོང་ཕ་བོང་གུར་འདྲའི་ཉེ་ཞོལ་དུ་དགོང་མོ་དབང་གི་དུས་སུ་ལྷུག་རྩོམ་བགྱིས་པར་གནས་སྲུང་ཉིད་དགྱེས་པའི་མཚན་མ་བྱུང་བ་དངོས་གསལ་ལྟར་ལ་གསོལ་མཆོད་གཟབ་རྒྱས་སྐབས་དང་མགོན་ཁང་ལྟ་བུར་རྒྱུན་འདོན་བགྱིས་ན་ལེགས་འདྲ་སྙམ་པར་འཇིགས་མེད་ཆོས་དབྱིངས་རྡོ་རྗེས་ཤར་མར་བཀོད་པ་དགེ། །།