བླ་མ་གསང་བ་འདུས་པའི་བསྙེན་ཡིག་བདེ་ཆེན་ལམ་བཟང་།

བླ་མ་གསང་བ་འདུས་པའི་བསྙེན་ཡིག་བདེ་ཆེན་ལམ་བཟང་ཞེས་བྱ་བ་བཞུགས་སོ། །གུ་རུ་དྷེ་ཝ་ཌཱ་ཀི་ནི་ཡེ། བྱིན་རླབས་གཞན་ལ་མི་ལྟོས་བླ་མ་དང་། །དངོས་གྲུབ་དུས་ལས་ཡོལ་མེད་ཡི་དམ་ལྷ། །འཕྲིན་ལས་ཐོགས་རྡུགས་མེད་པ་མཁའ་འགྲོ་སོགས། །ཐ་དད་མ་ཡིན་པད་འབྱུང་ངོ་བོར་འདུད། །སྣང་གསུམ་མ་དག་གྲོང་ཁྱེར་ལྕགས་ཀྱི་ཁམས། །རིམ་གཉིས་ལམ་བཟང་གྲུབ་པའི་དངུལ་ཆུ་ཡིས། །ཡེ་ཤེས་དག་པའི་གསེར་དུ་སྒྱུར་བྱེད་པའི། །ཐབས་ཚུལ་མན་ངག་བསྙེན་ཡིག་འདི་ན་སྤྲོ། །དེའང་བླ་མ་གསང་བ་འདུས་པའི་བསྙེན་སྒྲུབ་ཉམས་སུ་བསྟར་བར་བྱ་བ་ལ། །སྔོན་འགྲོ་དང་དངོས་གཞི་རྗེས་དང་ཕན་ཡོན་ནོ། །དང་པོ་རྟེན་གྱི་གང་ཟག་འཁོར་བ་ལས་ཡིད་ངེས་པར་འབྱུང་བའི་བསམ་པས་རང་ལས་གཞན་གཅེས་པར་འཛིན་ཅིང་ཐེག་པ་མཆོག་ལ་ཡིད་རྟོན་པ། བླ་མ་མཚན་ཉིད་དང་ལྡན་པ་ལས་དབང་བཞི་རྫོགས་པར་ཐོབ་ཅིང་དམ་ཚིག་ལ་གནས་པ། སྒྲུབ་པའི་མན་ངག་ལ་མཁས་པ། བརྩོན་འགྲུས་ཕུན་སུམ་ཚོགས་པས་བསྒྲུབ་ནུས་པ་སྟེ། །དངོས་གྲུབ་སྒྲུབ་པའི་ཆོ་ག་ལྔ་རྒྱུད་ལ་རྫོགས་ཤིང་།བར་ཆད་མེད་ཅིང་ཡིད་མཐུན་གྱི་གནས་དང་གྲོགས་དང་འཚོ་བའི་ཡོ་བྱད་དངོས་གྲུབ་ཀྱི་རྫས་དང་དམ་ཚིག་གི་རྟེན་རྫས་སོགས་སྒྲུབ་པའི་མཐུན་རྐྱེན་གྱི་ཡོ་བྱད་ལྔ་དང་ལྡན་ཅིང་། ཀ་དག་དང་ལྷུན་གྲུབ་ཀྱི་གནས་ལུགས་ལ་མྱོང་བ་དང་ལྡན་པ་ཞིག་གམ། དེ་དག་གི་གོ་དོན་ཕྱིན་ཅི་མ་ལོག་པ་ཞིག་ནི་སྒྲུབ་པའི་ངོ་བོ་ཡིན་པས་གལ་ཆེའོ། །གང་དུ་བྱ་བའི་གནས་དེར་སྐུ་གསུང་ཐུགས་ཀྱི་རྟེན་དང་སྤྱན་གཟིགས་སོགས་མཛེས་པར་བཤམས་ལ། སྒྲུབ་གཞུང་རྩ་བ་ལས། གནས་ཁང་དང་བསྟུན་སྟེགས་བུ་བཟོ༔ བདུད་རྩི་དྲི་བཟང་ཆག་ཆག་གདབ༔ ཚངས་ཐིག་ལ་སོགས་ཐིག་ནས་དྲངས༔ དབུས་མཐིང་ཤར་དཀར་ལྷོ་སེར་ཞིང་༔ ནུབ་དམར་བྱང་ལྗང་མཛེས་ཚོན་བྱ༔ སྒོ་གྲུ་རྟ་བབས་ཕྱོགས་མདོག་དང་༔ སྤྱི་མཐུན་པད་རྡོར་དུར་ཁྲོད་མེ༔ མཛེས་པར་ཚོན་རྩིས་ལེགས་པར་བསྒྱུར༔ ཞེས་སྟེགས་བུ་འགྲུབ་ན་རྡུལ་ཚོན་གྱི་བྱ་བ་དང་། དེ་ལྟར་མ་འགྲུབ་ཀྱང་། ལས་གཞུང་ལས། དབང་དང་སྒྲུབ་པ་ཚོགས་འཁོར་སོགས༔ འཕྲིན་ལས་རང་གཞུང་དཀྱིལ་འཁོར་ལྟར༔ ཡང་ན་རྡུལ་ཚོན་རས་བྲིས་སམ༔ འབྲུ་ཚོམ་ལྷ་གྲངས་མཉམ་པར་བཀོད༔ ཅེས་གསུངས་པས། རས་བྲིས་སམ་དེ་ཡང་མེད་ན་འབྲུ་ཚོམ་གྱིས་རུང་བ་ཙམ་དང་། སྒྲུབ་རྫས་ནི་དབུས་སུ་མཚན་བཟང་ཐོད་པའི་ནང་༔ བླ་མ་ཡབ་ཡུམ་བྱང་སེམས་དང་༔ སྨན་སྒྲུབ་བཏབ་པའི་བདུད་རྩི་བཤམས༔ མེ་ལོང་སིན་དྷུ་ར་ཡིས་བྱུག༔ ཆོས་འབྱུང་ཧ་རི་ནི་ས་དང་༔ སྒྲུབ་བསྙེན་ཡི་གེ་དབུ་ཅན་བྲི༔ ཐོད་པ་བདུད་རྩིི་ཁ་བཀབ་ཅིང་༔ དཀར་དམར་དར་གྱི་གུར་ཡང་ཕུབ༔ ཅེས་པས། མེ་ལོང་ལ་ཆང་དང་སིན་དྷུ་རས་བྱུག་ལ་སྔགས་འབྲུ་རྣམས་མགོ་ཕྱིར་བསྟན་དུ་བྲིས་ལ། ཐོད་པའི་ཁར་སྔགས་རྣམས་ཁ་ཡར་བལྟ་བར་བཀབ། དར་དམར་དང་དེ་སྟེང་དཀར་པོས་གཡོགས་པའམ་གུར་དུ་ཕུབ། དེ་སྟེང་མཉྫུའིི་ཁྲིའུ་ཁར༔ དཔལ་གྱི་གཏོར་མ་བརྗིད་ལྡན་བཤམས༔ གསང་བ་འདུས་པའི་ཙཀ་ལི་གཟུགས༔ མཐིང་ནག་དར་གྱི་གུར་ཡང་ཕུབ༔ ཅེས་སྒྲུབ་པའི་གཏོར་མ་རིན་ཆེན་འབར་བ་གཡས་གཡོན་དང་རྒྱབ་ཏུ་གཤོག་པ་གཏོད་པ་སྨུག་རྩིས་བྱུག་པ་པད་འདབ་བཞི་དང་པད་ཚབ་གྱིས་མཛེས་པ་རྩེ་ལ་ཉི་ཟླ་ནོར་བུ་དང་པ་ཊ་མེ་རི་ཤིང་ལོ་པདྨ་དབུས་སུ་ཐུགས་སྲོག་ཧཱུྃ་སོགས་རྒྱན་སྤྲོས་མཛེས་པ་དང་ལྡན་པ། ཙཀ་ལི་དར་མཐིང་གི་གུར་ཅན་བཙུགས། གོང་གི་བདུད་རྩི་དང་སྒྲུབ་གཏོར་ལ་སྒྲུབ་རྫས་ཀྱི་ཕབས་རྒྱུན་ཀྱང་འདེབས་པར་བྱའོ། ཐ་མར་ཕྱི་ནང་མཆོད་པ་བཤམས༔ བཀའ་སྲུང་གཏོར་མ་བྱང་དུ་འགོད༔ ཚེ་ཡི་མདའ་དར་ནུབ་ན་བཞག༔ ཅེས་པས་སྒྲུབ་གཏོར་གྱི་མདུན་དུ། མཆོད་གཏོར་རིན་ཆེན་འབར་བ་དབྱིབས་དང་རྒྱན་སོགས་སྒྲུབ་གཏོར་དང་འདྲ་བའི་མཐའ་སྐོར་རིམ་པ་དང་པོ་ལ། མདུན་དུ་ཡུམ་གྱི་གཏོར་མ་ཟུར་གཉིས་པ་དང་ཟླུམ་གཏོར་བཅུས་བསྐོར། དེའི་ཕྱི་རིམ་ལ་དབང་ཆེན་རིགས་བཞིར་དཔལ་གཏོར་གཙོ་བོ་དང་འདྲ་བ་བཞི་དང་མཁའ་འགྲོའི་གཏོར་མ་དེ་དང་དབྱིབས་མཚུངས་བཞིས་བསྐོར། དེའི་ཕྱི་རིམ་ལ་སྒོ་མ་བཞིར་ཟླུམ་གཏོར་བཞི། མདུན་དུ་ཚེ་བུམ་མཐའ་སྐོར་དུ་མཐེབ་ཀྱུ་སུམ་བརྩེགས་སྨུག་ཙི་དང་རྒྱན་གྱིས་མཛེས་པ་བཟའ་བཅའ་གང་འཛོམ་གྱིས་མཐའ་སྐོར། དེའི་གཡས་སུ་བདུད་རྩི་ཛ་གད་དང་སྦྱར་བ། གཡོན་དུ་རཀྟའི་ཕབ་ལྡན་ཁྲག་གཙང་སོགས་ཀ་པཱ་ལར་བཤམས། དེ་མཐར་ཕྱི་མཆོད་རྣམས་དང་། བྱང་ཕྱོགས་སུ། བཀའ་སྲུང་གི་གཏོར་མ་ཟུར་གསུམ་གཡས་བཅུས་འཁོར་རང་འདྲ་བརྒྱད། གཏེར་སྲུང་གི་གཏོར་མ་ཟུར་གསུམ་གཙོ་འཁོར་དགུ །གཉིས་ཀ་ལ་མཐེབ་ཀྱུ་དང་ཤ་སྣ་སྙིང་དང་ལིང་སོགས་ཀྱིས་བརྒྱན་པ་འགོད། གཉིས་འཛིན་གྱི་སྙེམ་ཐག་ནང་ནས་ཆོད་ན་མི་དགོས་ཀྱང་། དེ་ལྟར་མིན་པའི་ལས་དང་པོ་པའི་རིགས་ལ་སྒྲུབ་ཁོག་གང་རུང་ནས་བླངས་ཏེ་སྒོ་བྱང་དང་ཐོ་ལ་སོགས་པ་ས་ཡུལ་གནས་སྐབས་དང་བསྟུན་པའམ་སྟབས་གང་བདེར་བྱ་ཞིང་། དེ་ལྟར་བྱ་ན་སྐབས་འདིར་རམ། འོག་ཏུ་མཚམས་གཅོད་ཀྱི་གོང་དུ་བྱས་ཀྱང་ཆོག །དེ་ནས་སྟན་བདེ་བ་ལ་འཁོད་ནས་ཐུན་མོང་སྔོན་འགྲོས་རྒྱུད་སྦྱངས་རྣམས་ཁྲིད་ཡིག་བདེ་གཤེགས་སྤྱི་ལམ་ལྟར་ཚིག་ཕྱིར་སེམས་གཞོལ་བར་བྱ། ཕྱི་རྒྱུད་པ་ལ་དཀར་དམར་གྱི་གཏོར་མ་དང་། ནག་ཕྱོགས་བགེགས་རིགས་ལ་གླུད་གཏོར་བསྔོ་བཀའ་བསྒོ་ཞིང་བགེགས་བསྐྲད། མཚམས་གཅོད་དང་མཆོད་པ་བྱིན་གྱིས་བརླབ་བོ། གཉིས་པ་དངོས་གཞི་ནི། ཐུན་བཞིར་བྱེད་པའི་དགོང་ཐུན་ནས་འཇུག་པ་ཡིན་ཏེ། རྣལ་འབྱོར་བདེ་བའི་གདན་ལ་འདུག༔ ལས་ཀྱི་གཞུང་བསྲང་བདག་དང་མདུན༔ ཆོས་སྐུ་མི་འགྱུར་གསང་བ་འདུས༔ ལྷ་དང་དཀྱིལ་འཁོར་གཞལ་ཡས་ཁང་༔ མ་བཅོས་རང་སེམས་རོལ་པ་ལས༔ ལས་བྱང་ལྟ་བུར་བསྐྱེད་རིམ་གསལ༔ སྤྱན་འདྲེན་བཞུགས་གསོལ་ཕྱག་འཚལ་མཆོད༔ བསྟོད་པ་ལ་སོགས་བརྗོད་པའི་མཐར༔ འཛབ་དགོངས་ཚིག་དོན་དམིགས་པ་སྒྱུར༔ རྩ་གསུམ་བསྙེན་པའི་འཛབ་དབྱངས་སྒྲོགས༔ ལྟ་བ་གདེང་བསྐྱེད་ཉམས་རྟོགས་སྤར༔ ཞེས་པས། གྱེར་སྒོམ་གྱི་རིམ་པ་འཛབ་ལ་ཐུག་པའི་བར་གཞུང་ཚིག་ལྟར་དུ་ཁྲེགས་ཆོད་དང་ཐོད་རྒལ་ཟུང་འཇུག་གི་དགོངས་པ་ཡང་དག་པའི་ངང་ནས་ཕྱི་སྣོད་གཞལ་ཡས་ནང་བཅུད་ལྷ་དང་ལྷ་མོ་འཁོར་འདས་སྐུ་གསུམ་ཆོས་དབྱིངས་ཀྱི་རོལ་པའི་ངང་ནས། རང་ཉིད་བླ་མ་གསང་བ་འདུས་པ་ཡབ་ཡུམ་དུ་གསལ་བའི་དབུས་སུ་རྩ་གསུམ་དང་འཁོར་ལོ་ལྔའི་རྩ་འདབ་དང་བཅས་པ་གསལ་བའི་དབུས་རྣམས་སུ་རིམ་བཞིན་སྤྱི་བོར་ཀུན་བཟང་ཡབ་ཡུམ། མགྲིན་པར་རྡོར་སེམས་ཡབ་ཡུམ། ཐུགས་ཀར་དགའ་རབ་རྡོ་རྗེ་ཡབ་ཡུམ། ལྟེ་བར་ཤྲཱི་སེདྷ་ཡབ་ཡུམ། གསང་གནས་སུ་རྩ་བའི་བླ་མ་ཡབ་ཡུམ། དེ་རྣམས་ལས་དགའ་རབ་ཤྲཱི་སེང་རྩ་བའི་བླ་མ་གསུམ་རྣལ་འབྱོར་བའི་ཆ་ལུགས་སུ་གསལ་བ་དང་། ཕྱི་རོལ་དུ་དབང་ཆེན་རིགས་བཞི་ཡབ་ཡུམ་གཞལ་ཡས་ཁང་གི་སྒོ་བཞིར་སྒོ་མ་བཞི་དང་བཅས་པ་བདག་བསྐྱེད་དང་། དེའི་རྩལ་ལས་ཤར་བ་མེ་ལོང་ནང་གི་གཟུགས་བརྙན་ལྟར་མདུན་བསྐྱེད་སྒྲུབ་རྫས་རྣམས་རྟེན་བརྟེན་པ་དང་བཅས་པ་གོང་ལྟར་མཚུངས་པར་བསྒོམ་པའི་བདག་མདུན་གཙོ་འཁོར་རྣམས་ཀྱི་ཐུགས་ཀར་ཉི་གདན་གྱི་སྟེང་དུ་ཧཱུྃ་ཡིག་མཐིང་ནག་གི་མཐར། ཨཱོཾ་ཨཱཿཧཱུྃ་བཛྲ་གུ་རུ་ཧ་རི་ནི་ས་ཧྱ་གྷྲི་ཝ་ར་ཙ་ཧྲི་ཡ་སརྦ་སིདྡྷི་ཧཱུྃ་ཕཊ༔ ཅེས་རྩ་གསུམ་འདུས་པའི་སྙིང་པོ་མཐིང་མདོག་ཅན་སྔགས་འབྲུ་རྣམས་བརྟེན་པའི་འོད་ཀྱི་ཕྲེང་ཐག་དམར་པོ་སྔགས་གཡས་བསྐོར་དང་འཕྲེང་ཐག་གཡོན་དུ་འཁོར་བས་ཡབ་ཡུམ་ཐམས་ཅད་ཟག་མེད་བདེ་སྟོང་གི་ཡེ་ཤེས་རབ་ཏུ་རྒྱས་པའི་རང་མདངས་འོད་ཟེར་དུ་འཁྲིགས་པ་མདུན་བསྐྱེད་ཀྱི་ལྷ་ཚོགས་རྣམས་ལ་ཕོག སྙོམས་འཇུག་མཛད་པས་བདེ་གསལ་རྣམ་པར་མི་རྟོག་པའི་ཡེ་ཤེས་ཀྱི་རང་མདངས་འོད་ཟེར་ཁ་དོག་སྣ་ཚོགས་པ་འཁོར་འདས་ཐམས་ཅད་དུ་ཁྱབ་ཅིང་། ཐུགས་རྗེ་བྱིན་རླབས་ནུས་མཐུ་ཚེ་བསོད་དཔལ་འབྱོར་ཐམས་ཅད་ཐིག་ལེ་ཐིག་ཕྲན་དབྱིངས་དང་ལུག་རྒྱུད་འོད་དང་འོད་ཟེར་སྣ་ཚོགས་ཀྱི་རྣམ་པར་བསྡུས་ནས ། བདག་མདུན་གྱི་ལྷ་ཚོགས་རྣམས་ལ་རྒྱ་མཚོ་ཆེན་པོར་ཆར་བབ་པ་ལྟར་སིབ་སིབ་ཐིམ་པས། ཆོས་ཉིད་མངོན་སུམ་གྱི་སྣང་བ་དང་། ཉམས་སྣང་གོང་དུ་འཕེལ་བའི་སྣང་བ་དང་། རིག་པ་ཚད་ལ་ཕེབས་པའི་སྣང་བ་དང་། ཆོས་ཉིད་ཟད་པའི་སྣང་བ་རྣམ་པ་བཞིའི་རྟོགས་པ་མངོན་དུ་གྱུར་ནས་གདོད་མའི་མགོན་མཆོག་ཆོས་སྐུ་གསང་བ་འདུས་པ་དང་གཉིས་སུ་མེད་པའི་འབྲས་བུ ། སྐད་ཅིག་ཉིད་ལ་མངོན་དུ་གྱུར་པའི་ཏིང་ངེ་འཛིན་ལས་མི་འདའ་བར་ལྷ་སྔགས་ཡེ་ཤེས་ཀྱི་ཕྱག་རྒྱས་ཡུལ་དང་ཡུལ་ཅན་ཐམས་ཅད་ཆོས་ཉིད་ཀྱི་རོལ་པ་ལས་མི་འདའ་བར་ཉམས་སུ་བླང་ངོ་། །ཐུན་མགོ་དང་ཐུན་མཇུག་ཏུ་དབྱངས་གསལ་སོགས་བསྙེན་ཡིག་གཞན་ལྟར་བྱས་ན་ལེགས། །ཐུན་གྱི་མཐར་མཆོད་བསྟོད་བྱེད་པ་ནི། ཧཱུྃ་སྣོད་བཅུད་གཟུགས་སྒྲ་ནས། ཁ་རཾ་ཁཱ་ཧིའི་བར་དང་། ཧཱུྃ་ཡན་ལག་བརྒྱད་ལྡན་ནས། ཛྙཱ་ན་ཌཱ་ཀིའི་སྐུ་ལ་ཕྱག་འཚལ་བསྟོད༔ ཞེས་པས་སོ། ལྷར་གསལ་བ་དེ་ཀའི་ངང་ནས་འདི་ཉིད་ཀྱི་བཀའ་གཏེར་སྲུང་དང་རང་གི་མོས་པའི་གཏོར་འབུལ་དགོས་རིགས་ཀྱང་བྱའོ། །ཉིན་ཞག་ཕྲུག་གཅིག་ལ་ཐུན་བཞི་དང་ཐུན་གཉིས་མ་གང་ཡིན་ཀྱང་ཐུན་རྗེས་མའི་རྣམ་པ་དོད་ཕྱིར་སྲོད་ཐུན་གྱི་མཐར་གཏོར་འབུལ་དང་ཚོགས་བསྐང་སྨད་ལས་རྣམས་མཛད་པ་སྔར་གྱི་ཕྱག་ལེན་འགའ་དང་། ཁུངས་ལྡན་གྱི་བསྙེན་ཡིག་འགར་དེ་ལྟར་ཡོད་ཀྱང་དགོང་ཐུན་འདིར་སྟབས་བདེ་བར་སྣང་བས། ཚོགས་བསྐང་སྨད་ལས་གཏོར་བྲོ་དང་བཅས་པ་བྱའོ། །དེའང་བསྐྱེད་རྫོགས་ལ་བརྟན་པ་ཐོབ་པས་ནི་བསྐྱེད་པ་དེ་ཉིད་རྫོགས་པར་ཤེས་པས་སྣང་སྟོང་སྒྱུ་མའི་ངང་ལ་མཉམ་པར་བཞག་ཅིང་རྡོ་རྗེ་གསུམ་གྱི་རོལ་པར་བསྐྱང་ངོ་། སྦྱངས་པ་དམན་པ་གསར་བུ་བས་མདུན་བསྐྱེད་རྟེན་བརྟེན་པ་དང་བཅས་པ་བསྡུས་ནས་བདག་བསྐྱེད་ཀྱི་ཐུགས་ཀར་ཐིམ། སྣོད་བཅུད་ཐམས་ཅད་འོད་དུ་ཞུ་གཞལ་ཡས་ཁང་ལ་ཐིམ། དེ་འཁོར་རྣམས་ལ། དེ་གཙོ་བོ་ཡུམ་ལ། །དེ་ཡབ་ལ་གནས་ལྔའི་ལྷ་རྣམས་དེ་དང་དེར་འོད་དུ་ཐིམ། གཙོ་བོ་ཡང་སྐུའི་སྟོད་སྨད་ནས་མེ་ལོང་ལ་ཧ་བཏབ་པ་ཡལ་བ་ལྟར་ཐུགས་ཀའི་ཧཱུྃ་ལ། དེ་ཡང་གྱེན་རྫོགས་སུ་ན་དཱའི་བར་དུ་བསྡུས་ནས་ཀ་དག་གི་ངང་དུ་བཞག །དེ་ལས་ལྡང་བ་ན་སྐད་ཅིག་གིས་གཙོ་བོ་ཡབ་ཡུམ་དུ་གསལ་ནས་དགེ་བ་བསྔོ་བའི་ཚིགས་གང་རུང་དང་། བཀྲ་ཤིས་བརྗོད་པ་སོགས་བྱས་ནས།བཟའ་བཏུང་སོགས་མཆོད་པའི་ཚུལ་དུ་ལོངས་སྤྱོད། དེས་དགོང་ཐུན་ཚར། དེ་ནས་སྲོད་ཀྱི་ཐུན་ལ། མཚམས་གཅོད་ནས་བཟུང་བཟླས་པའི་བར་དང་དམིགས་རིམ་ཐུན་མཐར་མཆོད་བསྟོད་སྔར་བཞིན་བྱས་ནས། མདུན་བསྐྱེད་བདག་བསྐྱེད་ལ་བསྡུ་བ་དང་། བདག་བསྐྱེད་ཀྱང་གཙོ་བོར་བསྡུས། དེ་ཡང་མཚན་མེད་འོད་གསལ་ཀྱི་ངང་ནས་གཉིད་དུ་འགྲོ་ཁར་རླུང་འཇུག་པ་ཨཱོཾ། །གནས་པ་ཨཱ༔ འབྱིན་པ་ཧཱུྃ་དུ་དམིགས་ཏེ་གཉིད་ལོག་པས་རླུང་རིག་རྩའི་འཕར་གྲངས་རྡོ་རྗེའི་བཟླས་པར་འགྱུར་རོ། སང་ཞོགས་ཐོར་ཐུན་གྱི་ཆར་བབ་པ་ན། མདུན་གྱི་ནམ་མཁར་དཔའ་བོ་དང་རྣལ་འབྱོར་མ་རྣམས་ཀྱིས་ཌཱ་མ་རུ་དང་དྲིལ་བུའི་སྒྲས་སད་པར་བསྐུལ་ནས། གཉིད་ལས་ལྡང་བ་ན་སྣང་བ་ཐམས་ཅད་ལྷར་བསྒོམ་ཞིང་། དེ་འཕྲོས་ཐུན་མོང་གི་སྔོན་འགྲོ་རྣམས་ཀྱིས་རྒྱུད་སྦྱངས་ནས། གཏོར་མ་ཆ་གཉིས་ནི་རྒྱུན་དུ་མ་གྲུབ་ཀྱང་མི་འགལ་སྙམ་མོད། འགྲུབ་ན་ཕན་ཡོན་ཆེའོ། ཉ་སྟོང་བརྒྱད་གསུམ་ཡར་མར་གྱི་ཚེས་བཅུ་སོགས་དུས་ཁྱད་པར་ཅན་རྣམས་ལ་ནི་ངེས་པར་གཏོང་ངོ་། དེ་ནས་བཀའ་བསྒོ་བ་དང་། བགེགས་གཏོར་མེད་དུས་མཚམས་གཅོད་ནས་འཇུག་གོ །མཆོད་པ་བྱིན་རླབས་ལ། སྨན་གཏོར་གཉིས་ལ་རླུང་མེ་ཐོད་སྒྱེད་ཀྱི་སྟེང་དུ་ཀ་པཱ་ལར་ཤ་ལྔ་བདུད་རྩི་ལྔར་རིགས་ལྔ་ཡབ་ཡུམ་གྱི་ས་བོན་ལས་འཕྲོས་པའི་འོད་ཀྱིས་འཁོར་འདས་ཀྱི་བཅུད་ཐམས་ཅད་བསྡུས་ནས་ཐིམ་པ་ཡོངས་སུ་གྱུར་པ་ལས་རིགས་ལྔ་ཡུབ་ཡུམ་བཅུར་གྱུར་བ་སྙོམས་འཇུག་གི་སྦྱོར་མཚམས་ནས་བདུད་རྩིའི་རྒྱུན་བབ་ཅིང་ལྷ་རྣམས་ཀྱང་འོད་དུ་ཞུ་ནས་ཐིམ་པས་བདུད་རྩིའི་རྒྱ་མཚོར་གྱུར་པར་བསམ། གཏོར་མ་ཡང་ཤ་ལྔ་བདུད་རྩི་ལྔ་སོགས་གཏོར་རྫས་ཀྱི་དངོས་པོ་མ་ཚང་བ་མེད་པ་འདོད་ཡོན་གྱི་ལྷ་མོའི་སྤྲིན་འཕྲོ་བར་བསམ། རཀྟའི་སྣོད་ཡངས་ཤིང་རྒྱ་ཆེ་བར་ར་ཡིག་དམར་པོ་ལས་བྱུང་བའི་རྡོ་རྗེ། སྒེག་མོ་དམར་མོ་གྲི་ཐོད་ཅན་གྱི་མཁའ་གསང་ནས་རཀྟའི་རྒྱུན་བབ་པས་དམར་གྱི་རྒྱ་མཚོ་རྦ་རླབས་འཕྱོ་བར་ལྷ་མོ་ཡང་འོད་དུ་ཞུ་ནས་ཐིམ་པར་བསམ། ཕྱི་མཆོད་དང་གསང་བའི་མཆོད་པ་ཐམས་ཅད་ཆོས་ཉིད་ཀྱི་རང་རྩལ་འགག་པ་མེད་པ་ལས་མཆོད་སྤྲིན་གྱི་རོལ་པ་འབྱམས་ཀླས་པར་མོས། སྨན་རཀ་གཏོར་གསུམ་གྱི་སྔགས་བདུན་ནམ་གསུམ་རེ། ཕྱི་མཆོད་དང་གསང་མཆོད་ནི་ཚར་རེའོ། དེ་ནས་དངོས་གཞི་ལ། ཁྲེགས་ཆོད་དང་ཐོད་རྒལ་གྱི་ཉམས་མྱོང་དང་ལྡན་པར་རྟོག་ཚོགས་ཐམས་ཅད་སྐུ་དང་ཞིང་ཁམས་ཆོས་ཉིད་ལྟ་སྒོམ་གྱི་རོལ་པར་ཤར་བ་ལ་བློས་བྱས་ཀྱི་བསྐྱེད་རིམ་མ་དགོས་ཀྱང་དེ་ལྟར་མིན་པའི་ལས་དང་པོ་པའི་རིགས་ལ་ཅུང་ཟད་ཙམ་ཞིག་གོ་བདེར་འགོད་པ་ལ། འདི་ལྟར་སྣང་བའི་ཆོས་ཐམས་ཅད་སྟོང་ཉིད་སྤྲོས་བྲལ་རང་བྱུང་གི་ཡེ་ཤེས་ཆེན་པོ་བསམ་བརྗོད་བྲལ་བའི་ངང་དུ་མཉམ་པར་འཇོག་པ་ནི་སྣང་བ་ལ་རང་རྒྱུད་དུ་ཞེན་པ་བཟློག་ཕྱིར་དེ་བཞིན་ཉིད་ཀྱི་ཏིང་ངེ་འཛིན་དང་། ཆོས་ཐམས་ཅད་ཀྱི་གནས་ལུགས་དེ་ལྟར་ཡིན་པ་ལ་མ་རྟོགས་པའི་སེམས་ཅན་རྣམས་འཛིན་མེད་སྒྱུ་མ་ལྟ་བུའི་སྙིང་རྗེ་ཆེན་པོ་མཁའ་ཁྱབ་ཏུ་བསྒོམ་པ་ནི་སྟོང་པ་ཕྱོགས་གཅིག་མཐའ་ལ་ཞེན་པ་བཟློག་ཕྱིར་ཀུན་ཏུ་སྣང་བའི་ཏིང་ངེ་འཛིན། སྟོང་ཉིད་དང་སྙིང་རྗེ་དབྱེར་མེད་རང་རིག་གི་ངོ་བོ་ཧཱུྃ་མཐིང་ནག་གཟི་བརྗིད་དང་ལྡན་པར་བསྒོམ་པ་ནི་སྣང་སྟོང་ཐ་དད་དུ་ཞེན་པ་བཟློག་ཕྱིར་རྒྱུའི་ཏིང་ངེ་འཛིན། །དེ་ལས་འབྱུང་ལྔའི་ས་བོན་འཕྲོས་པས་ནམ་མཁའ་རླུང་ཆུ་ཀེང་རུས་ཀྱི་རི་རབ་ཕྱོགས་མཚམས་ཀུན་ཏུ་བསྐལ་བའི་མེ་དཔུང་འབར་བ། དེའི་ནང་དུ་རིམ་པ་ཡེ་ཤེས་ཀྱི་མེ་ཁ་དོག་ལྔ་ལྡན་གྱི་ར་བ། དེ་ནང་རྡོ་རྗེའི་ཕྲེང་བ། དུར་ཁྲོད་བརྒྱད། པདྨའི་མུ་ཁྱུད་ཀྱིས་བསྐོར་བའི་དབུས་སུ་བྷྲཱུཾ་ལས་གཞལ་ཡས་ཁང་སྒོ་གྲུ་རྟ་བབ་མཚན་ཉིད་རྒྱན་བཀོད་ཐམས་ཅད་མ་འདྲེས་ཡོངས་རྫོགས་སུ་གསལ་བའི་དབུས་སུ་པདྨ་དང་ཟླ་བ་ཉི་མའི་སྟེང་དུ་རྒྱུའི་ས་བོན་དེ་ཉིད་རྡོ་རྗེ་རྩེ་ལྔ་པ་ཧཱུྃ་གིས་མཚན་པར་གནས་འགྱུར་ཏེ་ཡོངས་དུ་གྱུར་པ་ལས། རང་ཉིད་བླ་མ་གསང་བ་འདུས་པ་གཞུང་ལྟར་གསལ་བ་སྟེ་ཆོ་ག་གསུམ་གྱིས་བསྐྱེད་པའི་གནས་ལྔ་དང་གཙོ་བོའི་ཕྱི་རོལ་དུ་བསྒོམ་བྱའི་ལྷ་རྣམས་བདག་མདུན་གོང་དུ་བཤད་པ་ལྟར་རོ། དེ་དག་ལ་རང་བཞིན་ཆོས་ཀྱི་དབྱིངས་ནས་ཡེ་ཤེས་སེམས་དཔའི་ཚུལ་དུ་སྤྱན་དྲངས་ཤིང་གཉིས་མེད་དུ་བསྟིམ་ནས་འཕྲུལ་དགའི་ཕྱག་དང་། འདོད་ཡོན་གྱི་ལྷ་མོ་བསམ་གྱིས་མི་ཁྱབ་པ་སྤྲོས་ཏེ་མཆོད་པའི་སྤྲིན་དང་། ནང་མཆོད་སྨན་གཏོར་རཀྟ། བདེ་སྟོང་དགའ་བཞིའི་ཡེ་ཤེས་ཀྱི་མཆོད་པ་དང་བསྟོད་པ་འཛབ་གྱི་དགོངས་པ་གོང་དུ་བཤད་པ་ལྟར་དང་། བྱིན་རླབས་སྤྱི་ལྟར་བྱས་པའི་བགྲང་ཕྲེང་གཡོན་པའི་མཐེབ་སྲིན་གྱིས་ལྟེ་བའི་ཐད་ཙམ་དུ་བགྲང་ཞིང་བཟླས་པའི་སྐྱོན་རྣམས་སྤང་དགོས་ཏེ། ཡེ་ཤེས་རྔམས་པ་གློག་གི་འཁོར་ལོ་ལས། སྒྲ་ཆེ་མ་ཡིན་ཆུང་བ་མིན། །མགྱོགས་པ་མ་ཡིན་བུལ་བ་མིན། དྲག་པར་མ་ཡིན་ཞན་པར་མིན། །ཡིག་འབྲུ་ཡན་ལག་ཉ མས་པར་མིན། །ཡེངས་དང་ཕྱལ་སོགས་བར་ཆད་པ། །རྒྱུ་བའི་བསམ་པ་སྤངས་པ་ད ང་། ཞེས་གསུངས་པ་ལྟར་སྐྱོན་བྲལ་དུ་བྱ་ཞིང་། བྱིང་རྒོད་ལ་སོགས་པ་བསལ་ཕྱིར་སྐབས་སྐབས་འཛབ་དབྱངས་སུ་བྱའོ། དེ་ལྟར་ཐ་མལ་གྱི་རྟོག་པ་འོག་འགྱུའི་ངང་དུ་མ་ཤོར་བ་ལྷའི་གསལ་སྣང་ལ་ནན་ཏན་བྱེད་དགོས་ཏེ། ཇི་སྐད་དུ། གལ་ཏེ་ཏིང་འཛིན་འདི་མེད་ན། རྒྱ་མཚོའི་འཇིངས་ཀྱི་ཕ་བོང་ལྟར། བསྐལ་བར་ལམ་ལ་འབད་བྱས་ཀྱང་། དོན་མེད་སྙིང་པོ་སྐམ་པ་ཡིན། ཞེས་དང་གསང་སྙིང་ལས ། སྔགས་དང་ཕྱག་རྒྱ་རབ་བརྟན་ན། དངོས་གྲུབ་ཡ་མཚན་ཆེན་པོར་འགྱུར། ཞེས་པས་བསྙེན་པ་འཕྲེང་སྐོར་རེའི་མཚམས་སུ་གསལ་འདེབས་སྐྱོར་རེ་བྱ། གཞན་ཡང་བསྙེན་སྒྲུབ་ཀྱི་སྤང་བླང་ཕྲ་ཞིབ་བསྙེན་ཡིག་གཞན་ལས་ཤེས་པར་བྱ་ཞིང་། མདོར་ན་ལྷ་དང་བླ་མ་རང་སེམས་ཐ་དད་མ་ཡིན་པའི་ངང་ནས་དད་པ་དང་། འཁོར་བ་ལ་སྐྱོ་ཤས་དང་ངེས་འབྱུང་སྙིང་རྗེ། གཞན་རྐྱེན་གྱིས་མི་འཕྲོགས་པར་མཐའ་གཅིག་ཏུ་ཚུགས་པའི་ཞེ་བཅད་དང་ལྡན་པས་མ་གྲུབ་གྱི་བར་དུ་སྟན་འདི་ལས་ལྡང་བ་དང་། གནས་འདི་ལས་འགྲོ་བར་མི་བྱའོ་སྙམ་པའི་དམ་བཅའ་ཇི་ལྟར་ནོས་པ་མཐར་ཕྱིན་པར་བྱ་ཞིང་། བཟང་དྲེད་ངན་དྲེད་ལ་སོགས་པ་དང་བྱ་བ་གཞན་ལ་མི་བརྩོན། རྟགས་དང་མཚན་མ་བཟང་ངན་ལ་དགའ་བྲོད་དང་རློམ་སེམས་མི་དགའ་བའི་འདུ་ཤེས་དང་། རྟགས་མཚན་གང་ཡང་མ་བྱུང་བས་སྐྱིད་ལུག་པ་དང་། ངས་མི་འགྲུབ་སྙམ་དུ་བདག་ཉིད་བརྙས་པའི་ལེ་ལོ་དང་། སོས་དལ་དང་དུས་སུ་མི་སྒྲུབ་ཅིང་ལུས་ངག་སྙོམ་ལས་སུ་ལུས་པ་དང་། སྔགས་དང་ཏིང་ངེ་འཛིན་ལ་སོགས་པ་ཡིན་ནམ་མ་ཡིན་འབྲས་བུ་འབྱུང་ངམ་མི་འབྱུང་སྙམ་པ་ལ་སོགས་པའི་ཐེ་ཚོམ་དང་། ཡིད་གཉིས་མེད་པར་ཡིན་ངེས་སྙམ་པ་གཏིང་ཚུགས་པའི་བློས་བསྒྲུབ་པར་བྱའོ། །སྐབས་སུ་ལས་བཞིའི་ཤམ་བུ་སྦྱར༔ དམིགས་པའི་སྤྲོ་བསྡུ་སྤྱི་འགྲོས་བྱ༔ ཞེས་པས་དུས་ཚོད་དང་སྦྱར་ཏེ། ཐོར་ཐུན་ལ་ཞི་བ། ཉིན་གུང་ལ་རྒྱས་པ། དགོང་མོ་ལ་དབང་། སྲོད་ལ་དྲག་པོ། སྔགས་དང་དམིགས་པ་ནི། བདག་མདུན་སྣོད་བཅུད་སྔགས་འཕྲེང་དང་བཅས་པ་དཀར་པོར་བསྒྱུར་བ་ལས། འོད་ཟེར་དཀར་པོ་ཟླ་བ་ལྟར་འཕྲོས་པས་རང་གཞན་སེམས་ཅན་ཐམས་ཅད་ཀྱི་ལས་ཉོན་གྱི་སྡིག་སྒྲིབ་ནད་གདོན་བར་ཆད་འཇིགས་པ་བརྒྱད་དང་དམ་ཚིག་ཉམས་ཆག་རྟོག་སྒྲིབ་ཐམས་ཅད་བྱང་ཞིང་དག་པར་བསམ་ཞིང་། སྒྲུབ་བསྙེན་གྱི་མཇུག་ཏུ། ཉམས་ཆག་རྟོག་སྒྲིབ་ཤནྟིང་ཀུ་རུ་ཡེ་སྭཱ་ཧཱ༔ ཞེས་སྦྱར་བ་ཉེར་གཅིག་ལས་མ་ཉུང་བ་བཟླས། དེ་བཞིན་དུ་སྔགས་འཕྲེང་འོད་ཟེར་སེར་པོ་གསེར་གྱི་བ་དག་འཛིངས་པ་ལྟ་བུ་འཕྲོས་པས་རང་ཉིད་ཀྱི་ཚེ་བསོད་དཔལ་འབྱོར་འདོད་དགུའི་ཡོན་ཏན། སྣང་ཉམས་ཀྱི་འཆར་སྒོ་ནམ་མཁའི་མཐའ་དང་མཉམ་པར་འཕེལ་བར་བསམས་ལ། ཉམས་སྣང་གོང་འཕེལ་པུཥྟིང་ཀུ་རུ་ཡེ་སྭཱ་ཧཱ༔ ཞེས་སྦྱར། སྔགས་ཕྲེང་འོད་ཟེར་དམར་པོ་མེའི་མདོག་ལྟ་བུས་ཟག་བཅས་ཟག་མེད་ཀྱི་ཚོགས་ཐམས་ཅད་དང་། དབྱིངས་རིག་ཚད་ལ་ཕེབས་པའི་སྐུ་དང་ཞིང་ཁམས་མཁྱེན་པའི་ཡེ་ཤེས་ཤེས་རབ་དང་ཏིང་ངེ་འཛིན་བསམ་གྱིས་མི་ཁྱབ་པ་ལ་དབང་བསྒྱུར་བར་བསམས་ལ། རིག་པ་ཚད་ཕེབས་ཝ་ཤང་ཀུ་རུ་ཡེ་སྭཱ་ཧཱ༔ སྦྱར། སྔགས་འཕྲེང་འོད་ཟེར་ལྗང་གུ་དང་མཐིང་ནག་ཚ་ཞིང་རྩུབ་པའི་རྣམ་པ་འཕྲོས་པས། གཉིས་འཛིན་འཁྲུལ་བའི་གདོན་བགེགས་ས་དང་ལམ་གྱི་གེགས་བྱེད་དུ་ཤར་བ་ཐམས་ཅད་དབྱིངས་སུ་བསྒྲལ་བར་མོས་ལ་། རེ་དོགས་གཉིས་འཛིན་མཱ་ར་ཡ་ཕཊ། ཅེས་སྦྱར་རོ། ཐོར་ཐུན་དེ་ཀའི་མཇུག་ཏུ་མཆོད་བསྟོད་བྱས་ལ། སྐབས་སུ་ཚེ་ཡི་སྔགས་དམིགས་བསྒྱུར༔ ཚེ་འགུགས་ཐུགས་དམ་གནད་ནས་བསྐུལ༔ ཞེས་གསུངས་པས། ཐུན་བཞི་ཀ་ལ་མ་བྱུང་ཡང་། ཐོར་ཐུན་དང་ལྔ་ཐུན་གཉིས་ལ་ངེས་པར་སྦྱོར། དེའི་དམིགས་པ་ནི། གཞལ་ཡས་ཁང་གི་སྒོ་སྐྱོང་རིགས་བཞིའི་མཁའ་འགྲོའི་སྐུ་ལས་རང་འདྲའི་སྤྲུལ་པ་ཉི་ཁྲི་ཆིག་སྟོང་སྲིད་དང་ཞི་བའི་དབྱིངས་ཐམས་ཅད་ཁྱབ་པར་འཕྲོས་པས། འབྱུང་བ་ཆེན་པོ་ལྔའི་བཅུད་དང་དངས་མ་འཁོར་འདས་ཀྱི་ཚེ་བསོད་དཔལ་འབྱོར་ཐམས་ཅད་དང་། རང་གི་བླ་ཚེ་ཆད་ཉམས་གཟུགས་མེད་ཀྱིས་བརྐུས་དང་འཕྲོགས་པ་ལ་སོགས་པ་ཐམས་ཅད་འོད་ཟེར་ཁ་དོག་སྣ་ཚོགས་པ་དང་། ཡི་གེ་ཨ་ནྲི་ཧཱུྃ་གི་རྣམ་པར་བསྡུས་ནས་རང་ལ་ཐིམ་པས་འཇིག་རྟེན་དང་འཇིག་རྟེན་ལས་འདས་པའི་ལམ་མཆོག་ཡོངས་སུ་རྫོགས་པ་ཚེའི་རིག་འཛིན་མངོན་དུ་གྱུར་པར་བསམས་ལ། སྒྲུབ་བསྙེན་གྱི་འཇུག་ཏུ་ཨཱོཾ་ཚེ་བྷྲཱུཾ་ཧྲཱིཿསྭཱ་ཧཱ། སྦྱར་བ་མང་ཉུང་རང་གི་འདོད་པ་ལྟར་བཟླས་ནས་མདའ་དར་གཡབ་ཅིང་། ཧཱུྃ་ཤར་ཕྱོགས་ཤེལ་གྱི་གཞལ་ཡས་ནས༔ ཞེས་པ་ནས། ཡེ་ཤེས་ཚེ་ཡི་དངོས་གྲུབ་སྩོལ༔ རྩ་བསྙེན་མཇུག་ཏུ་ཚེ་བྷྲཱུཾ་ཀ་ཡ་སིདྡྷི་ཨཱོཾ༔ དེ་བཞིན་དུ་ཚེ་བྷྲཱུཾ་གྱི་མཐར་ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱི༔ ཞེས་སྦྱར་ཞིང་ཚེ་འགུགས་དང་རྒྱུན་གྱི་དངོས་གྲུབ་ལེན་པ་ཟུང་འཇུག་གོ །སྔར་གྱི་ཕྱག་སྲོལ་ལྟ་བུ་དེང་སང་དར་བ་ལ་ཚེ་བསྙེན་དང་མཆོད་བསྟོད་འདི་སྐོར་ལ་གཏེར་གསར་བྱིངས་དང་ཅུང་མི་འདྲ་བ་ཞིག་འདུག་ཅིང་། ད་ལམ་གྱི་འདི་གཏེར་གཞུང་གི་ཚིག་དོན་ལྟར་བཀོད་པ་ཡིན། དེ་ནས་ཉེར་བསྡུ་བྱས་ནས་ལྷར་ལྡངས་ཏེ་དགེ་བ་བསྔོ་ཞིང་ཤིས་པ་བརྗོད། དེས་ཐོར་ཐུན་ནོ། །དེ་ནས་སྔ་ཐུན་ལ་མཚམས་གཅོད་ནས་བཟུང་ཐུན་བསྡུ་བའི་བར་ཐོར་ཐུན་ལྟར་རོ། །དེ་ནས་དགོང་ཐུན་དང་སྲོད་ཐུན་ཁ་སང་ལྟར་རོ། །བསྙེན་པ་འགྲོ་ཁྱད་ཀྱི་ཐུན་གཉིས་མ་བྱེད་ན་འཇུག་པའི་ཉིན་ཐུན་གཅིག་དང་། དེ་རྗེས་ཐོ་རེངས་ནས་ཉིན་གུང་བར་ཐུན་གཅིག ཉིན་ཕྱེད་ཡོལ་ནས་སྲོད་འཁོར་བར་ཐུན་གཅིག་ཡིན་ཀྱང་བཟའ་བཏུང་སོགས་སྤྱོད་ལམ་གྱི་རིམ་པ་རང་དབང་འདུས་དཀའ་བས། ཐུན་གྱི་རྣམ་དབྱེ་ཕྱེད་པ་ལ་ཐུན་བཞིའི་ཁྲིགས་འདི་ལེགས་པར་སྣང་ངོ་། །ཐུན་མཚམས་གང་རུང་ཞིག་ཏུ་དགེ་སྦྱོར་ཆགས་མེད་བྱེད་དགོས་རིགས་ཡོད་ན་དེར་བྱ། ཐུན་འགོ་རྣམས་སུ་མཆོད་པ་ཁ་གསོ། དེ་ལྟར་སྒྲུབ་པའི་དུས་གྲངས་རྟགས་གསུམ་གྱི་རིམ་པ་ནི། དུས་ཀྱི་རྒྱལ་པོ་སྤྲེལ་ཟླ་ལ༔ སྨྲ་བ་བཅད་དེ་འབུམ་ཚོ་གསུམ༔ བཟླས་ཤིང་བསྒྲུབ་པའི་སྐལ་ལྡན་དེ༔ པདྨ་བདག་དང་སྐལ་བ་མཉམ༔ ཞེས་གྲངས་བསྙེན་འབུམ་ཚོ་གསུམ་ལ་ཁ་སྐོང་ཁྲི་ཚོ་གསུམ་དང་། རྟགས་ནི། དེ་ལྟར་སྒྲུབ་པའི་སྐལ་ལྡན་ལ༔ དངོས་དང་ཉམས་སམ་རྨི་ལམ་དུ༔ ཞལ་མཇལ་རྩ་གསུམ་ལུང་བསྟན་དང་༔ ཆོས་འཆད་གདམས་པ་འབོགས་པ་ཡོད༔ གཞན་ཡང་བཟང་ལྟས་དགེ་བའི་ལས༔ གྱེན་ལ་འགྲོ་དང་ཉི་ཟླ་ཤར༔ གྲུ་ཟམ་ཆུ་བོ་ལས་བསྒྲལ་དང་༔ རྣག་ཁྲག་ཟགས་དང་རོལ་མོ་འཁྲོལ༔ གོས་གསར་གོན་དང་ཁྲབ་རྨོག་གྱོན༔ ཁྲིར་འདུག་ཆོས་འཆད་ཁྲོམ་དབང་བསྐུར༔ བུད་མེད་བཟང་མོས་ཟས་སྟེར་དང་༔ ལྡེར་བཟོ་བཅོམ་དང་ལྷ་ཁང་བཤིགས༔ གཏེར་རྙེད་མཁར་འཕུར་རིན་ཆེན་རྙེད༔ དེ་སོགས་དགེ་བའི་ལྟས་མང་ཡོང་༔ དེ་ཚེ་རྟོག་པ་མི་བསྐྱིལ་བར༔ སྟོང་ཉིད་བློ་འདས་དོན་ལ་བལྟ༔ སྒྲུབ་པའི་ལྟས་རྣམས་ལོག་པ་དང་༔ སྙིང་མི་དགའ་ཞིང་ཡིད་མི་འོང་༔ མི་འདོད་པ་ཡི་ལྟས་བྱུང་ན༔ ཚེ་ལ་བར་གཅོད་ཡོད་པའི་རྟགས༔ སླར་ཡང་སྒྲུབ་པ་སྐྱོར་བ་དང་༔ ཚེ་སྒྲུབ་ལ་སོགས་ནན་ཏན་བྱ༔ རྣམ་རྟོག་འཛིན་པའི་ཁུ་འཕྲིག་གཅོད༔ གང་ཤར་ཆོས་ཉིད་རོལ་པར་འཁྱེར༔ མ་བཅོས་རང་མདངས་ས་ལེར་བསྐྱང་༔ མི་དམིགས་བློ་འདས་ཁྱམ་མེར་བསྐྱང་༔ བརྗོད་མེད་ལྷན་སྐྱེས་ཡེ་རེར་བསྐྱང་༔ ཞེས་གསུངས་པ་ལྟར་རོ། གསུམ་པ་རྗེས་ཀྱི་རིམ་པ་ནི། བསྙེན་གྲངས་ཐེམས་ནས་སྒྲུབ་རྫས་ལས༔ དབང་བཞི་ལེན་ཅིང་དངོས་གྲུབ་ཞུ༔ ལས་བྱང་བཞིན་དུ་རྗེས་བསྐྱང་ཞིང་༔ སྒྲུབ་རྫས་དམ་མེད་མི་ལ་སྦ༔ ཞེས་བསྙེན་སྒྲུབ་རྫོགས་པའི་དགོང་ཐུན་དང་སྲོད་ཐུན་ལ། དམིགས་པའི་ཁྱད་པར་བདག་མདུན་ལས་འོད་ཟེར་བསམ་གྱིས་མི་ཁྱབ་པ་ཕྱོགས་བཅུའི་ཞིང་རབ་འབྱམས་རྣམས་སུ་འཕྲོས་པས་ཕྱོགས་དུས་ཀྱི་རྒྱལ་བ་ཐམས་ཅད་ཀྱི་ཐུགས་རྗེ་བྱིན་རླབས། མཁྱེན་བརྩེ་ནུས་མཐུ་སོགས་དང་བརྟན་གཡོའི་བཅུད་དང་དྭངས་མ། ལེགས་ཚོགས་ཀྱི་ཡོན་ཏན་ཐམས་ཅད་འོད་ཟེར་ཁ་དོག་སྣ་ཚོགས་ཀྱི་རྣམ་པར་ཐོགས་མེད་དུ་བསྡུས་ནས་མདུན་བསྐྱེད་ལ་ཐིམ་པའི་དམིགས་པ་གཙོ་ཆེར་བྱ། ནང་པར་ཐོར་ཐུན་ལ། སྨན་རཀ་གཏོར་གསུམ་གསར་དུ་བརྗེ་བ་དང་གལ་ཏེ་མ་གྲུབ་ཀྱང་ཁ་གསོ་ཞིང་ཕྱི་མཆོད་ལ་སོགས་པ་གཟབ་རྒྱས་སུ་བྱ། བཟའ་བཅའ་བཏུང་བའི་བྱེ་བྲག་ཚོགས་འཁོར་ཀྱང་འབྱོར་ཚད་བཤམས༔ ཐུན་མོང་གི་སྔོན་འགྲོ་དང་གཏོར་མ་ཆ་གཉིས་བཏང་ཞིང་ལས་གཞུང་བཟླས་པའི་སྐབས་སུ་མདུན་བསྐྱེད་སྒྲུབ་རྫས་ལས་དངོས་གྲུབ་བསྡུ་བའི་དམིགས་པ་དང་། བཅས་རྩ་བསྙེན་མཇུག་ཏུ་ཀ་ཡ་ཝ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཞེས་བཏགས་པ་ཅི་ནུས་སུ་བཟླས། སྐབས་དེར་ཞི་བའི་ལས་ཤམ་མི་དགོས། མཆོད་བསྟོད་དང་ཚེ་བསྙེན་ཚེ་འགུགས་བསྲུང་མའི་འཕྲིན་ལས་དང་། ཚོགས་བྱིན་རླབས་ཕུད་འབུལ་བསྐང་བ་བརྗོད་མེད་དོན་གྱི་བཤགས་པ་སོགས་བཤགས་ཚིག་སྣ་ཚོགས་ཀྱིས་རྒྱུད་བསྐུལ། ཐ་མ་བསྒྲལ་བསྟབ་དང་བཅས་པ་གྲུབ་ནས་སྐྱ་རེངས་དང་པོ་ཤར་དུས་ལ་བསྟུན་ཏེ་སྒྲུབ་རྫས་ལས་དབང་བཞི་ལེན་པ་ནི། ཧཱུྃ་བདེ་མཆོག་བདེ་སྦྱོར་ནམ་མཁའི་དཀྱིལ་ཡངས་ནས༔ རྒྱལ་བའི་དཀྱིལ་འཁོར་སྲས་བཅས་ཐུགས་དམ་ཅན༔ བཛྲ་གུ་རུ་པདྨ་ཐོད་ཕྲེང་གི༔ སྐུ་གསུང་ཐུགས་དང་ཉམས་སྦྱོར་དངོས་གྲུབ་མཆོག༔ བུམ་པ་བཟང་པོ་དཔག་བསམ་ནོར་བུའི་ཚུལ༔ ད་ལྟ་ཉིད་དུ་བདག་ལ་སྩལ་དུ་གསོལ༔ འགྱུར་མེད་སྐུ་ཡི་དངོས་གྲུབ་སྩལ་དུ་གསོལ༔ འགག་མེད་གསུང་གི་དངོས་གྲུབ་སྩལ་དུ་གསོལ༔ འཁྲུལ་མེད་ཐུགས་ཀྱི་དངོས་གྲུབ་སྩལ་དུ་གསོལ༔ ཡོན་ཏན་རེ་སྐོང་དངོས་གྲུབ་སྩལ་དུ་གསོལ༔ འཕྲིན་ལས་འགྲོ་འདུལ་དངོས་གྲུབ་སྩལ་དུ་གསོལ༔ འཆི་མེད་ཚེ་ཡི་དངོས་གྲུབ་སྩལ་དུ་གསོལ༔ ཟད་མེད་ནོར་གྱི་དངོས་གྲུབ་སྩལ་དུ་གསོལ༔ ཐུན་མོང་ཡིད་བཞིན་དངོས་གྲུབ་སྩལ་དུ་གསོལ༔ བླ་མེད་མཆོག་གི་དངོས་གྲུབ་སྩལ་དུ་གསོལ༔ ཨཱོཾ་ཨཱཿཧཱུྃ་བཛྲ་གུ་རུ་ཧ་རི་ནི་ས་ཧྱ་གྷྲཱི་ཝ་ར་ཙ་ཧྲི་ཡ་སརྦ་སིདྡྷི་ཧཱུྃ་ཕཊ༔ ཀཱ་ཡ་སིདྡྷི་ཨཱོཾ༔ ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱི༔ སྒྲུབ་གཏོར་སྤྱི་བོ་མགྲིན་པ་སྙིང་ག་ལྟེ་བ་རྣམས་སུ་གཏུགས་ཏེ། ལྷ་ཚོགས་རྣམས་ཀྱི་སྐུ་ལས་འོད་ཟེར་དཀར་པོ་འཕྲོས། རང་གི་ལུས་ལ་ཐིམ་པས་སྐུའི་དབང་ཐོབ་ལུས་ཀྱི་སྡིག་སྒྲིབ་དག་འབྲས་བུ་སྤྲུལ་པའི་སྐུ་ཐོབ། གསུང་ལས་འོད་ཟེར་དམར་པོ་འཕྲོས། རང་གི་ངག་ལ་ཐིམ་གསུང་གི་དབང་ཐོབ། ངག་གི་སྡིག་སྒྲིབ་དག་འབྲས་བུ་ལོངས་སྐུ་ཐོབ། ཐུགས་ལས་འོད་ཟེར་མཐིང་ག་འཕྲོས། རང་གི་ཡིད་ལ་ཐིམ། ཐུགས་ཀྱི་དབང་ཐོབ། སེམས་ཀྱི་སྡིག་སྒྲིབ་དག་ཆོས་ཀྱི་སྐུ་ཐོབ་པར་བསམས། དེ་ནས་ལྷ་ཚོགས་ཐམས་ཅད་འོད་དུ་ཞུ་ནས་རང་ལ་ཐིམ་པས་དབང་བཞི་པ་ཐོབ། ཤེས་བྱའི་སྒྲིབ་པ་དག མཆོག་གི་དངོས་གྲུབ་ཐོབ་པར་བསམས་ལ། གཏོར་ཟན་དང་། བདུད་རྩི་ཆུང་ཟད་མྱོང་། སིནྡྷུ་རའི་ཡིག་འབྲུ་རྣམས་སྲིན་ལག་གིས་མགྲིན་པར་བྱུགས། ཚོགས་ཀྱི་བཟའ་བཏུང་ལ་སོགས་པར་ཡང་ལོངས་སྤྱོད། ལྷག་གཏོར་དང་ཐུགས་དམ་བསྐུལ་བ། བཀའ་སྲུང་གི་གཏོར་མ་འབུལ་ཞིང་ཆད་ཐོ་བསྟན་སྐྱོང་རྟ་བྲོ་དང་བཅས་པ་སོང་ནས། བསྡུ་ཆོག་ལ་རྣམ་དབྱེ་ཕྱེད་པར་འདོད་ན་མདུན་བསྐྱེད་དཀྱིལ་འཁོར་རྡུལ་ཚོན་རས་བྲིས་གང་ཡིན་ཀྱང་དམ་དབྱེ་སོ་སོར་ཕྱེས་ནས་རྡུལ་ཚོན་ཡིན་ན་ཡེ་ཤེས་གཤེགས། རས་བྲིས་དང་སྐུ་གཟུགས་སོགས་ལ་ཡེ་ཤེས་པ་བརྟན་པར་བཞུགས། དམ་ཚིག་པ་བདག་གི་ཐུགས་ཀར་བསྡུ། བདག་ཉིད་ཉེར་བསྡུ་ལྷར་ལངས་ནས་ལྷ་དང་དཀྱིལ་འཁོར་ལྷུན་གྲུབ་སྟེ༔ ཞེས་སོགས་ཀྱི་ཚིག་དོན་ལ་མཉམ་པར་འཇོག་པ་ལས་བདག་བསྐྱེད་ཀྱི་ཡེ་ཤེས་པ་ནི་ནམ་ཡང་གཤེགས་མི་རུང་ཤིང་། རྒྱུན་གྱི་སྤྱོད་ལམ་སྣང་གྲགས་རིག་གསུམ་རྡོ་རྗེ་གསུམ་གྱི་ངང་ནས་དགེ་བ་བསྔོ་ཞིང་བཀྲ་ཤིས་བརྗོད། སྒོ་བྱང་ལ་གཏོར་འབུལ་སོགས་བྱས་ནས་བསྡུ་ཞིང་མཚམས་རིམ་པར་གྲོལ། ཞག་གཉིས་གསུམ་ལ་སོགས་པར་གནས་སྲུང་ཞིང་འབྱོར་ན་བསྙེན་པའི་ཁ་སྐོང་ཞི་བའི་སྦྱིན་སྲེག་ཀྱང་གྲུབ་ན་ཤིན་ཏུ་ལེགས། སྒྲུབ་རྫས་དམ་མེད་ལ་གསང་ཞིང་ལས་ཀྱི་རྗེས་མི་མངོན་པ་བྱ། བཞི་པ་ཕན་ཡོན་ནི། ཕྱོགས་བཅུའི་ཞིང་དུ་འདས་མ་འོང་ད་ལྟ་དང་མ་ངེས་པ་ཆོས་ཉིད་ཀྱི་དུས་ཏེ་དུས་བཞིའི་རྒྱལ་པ་སྲས་དང་བཅས་པ་ཐམས་ཅད་ཀྱི་འབྱུང་གནས་ནི་བླ་མ་ལ་རག་ལས་ཏེ། འཁོར་འདས་ཐམས་ཅད་བླ་མའི་རང་བཞིན་དུ་ཤར་བ་དང་། དེ་ཉིད་རང་རྒྱུད་ལ་ངོ་སྤྲོད་མཁན་གྱི་བླ་མ་རྡོ་རྗེ་སློབ་དཔོན་དང་གུ་རུ་པདྨ་འབྱུང་གནས་དེ་རྣམས། རང་རིག་ཐིག་ལེ་ཉག་གཅིག་གི་ཀློང་དུ་གཅིག་དང་དུ་བྲལ་གྱི་ངང་དུ་འབྱམས་སུ་ཀླས་པ་ཉིད་དེ། དེ་ལྟར་ངེས་ནས་བསྒྲུབས་པས་རྩ་གསུམ་རྒྱལ་བ་རབ་འབྱམས་ཐམས་ཅད་ཀུན་གོ་གཅིག་ཆོད་དུ་བསྒྲུབ་མེད་སྒྲུབ་པའི་མཆོག་དམ་པའོ། དེ་ཡང་སྤྱིར་བླ་མ་མཆོད་བཀུར་བསྒྲུབས་པའི་ཕན་ཡོན་ཚད་ལས་འདས་པ་སྟེ་བརྗོད་ཀྱིས་མི་ལངས་ཤིང་། མདོ་ཙམ་དུ། དཔལ་སྡོམ་པ་འབྱུང་བའི་རྒྱུད་ལས། མཆོད་པ་ཐམས་ཅད་ཡོངས་སྤང་ལ། །བླ་མ་མཆོད་པ་ཡང་དག་བརྩམས། །དེ་མཉེས་བས་ནི་ཀུན་མཁྱེན་པའི། །ཡེ་ཤེས་མཆོག་དེ་ཐོབ་པར་འགྱུར། ཞེས་དང་། ཁ་སྦྱོར་ཐིག་ལེའི་རྒྱུད་ལས། སངས་རྒྱས་གངྒའི་ཀླུང་གི་བྱེ་མ་སྙེད། །གདུགས་དང་རྒྱལ་མཚན་ལ་སོགས་བས། །ཁྱད་པར་མཆོད་བཀུར་བྱས་པ་བས། །བླ་མའི་བ་སྤུའི་ཁུང་གཅིག་ལ། །མཆོད་པ་བྱས་པ་བསོད་ནམས་ཆེ། ཞེས་སོ། དེ་ཡང་དད་པ་དང་བརྩོན་འགྲུས་དང་། ཏིང་ངེ་འཛིན་གྱིས་མཉེས་པར་བྱས་པའི་ཕན་ཡོན་ནི། འཁོར་ལོ་ཆུབ་པ་རོལ་པའི་རྒྱུད་ལས། ཡོན་ཏན་ནང་ནས་དད་པ་མཆོག །སྟོང་གསུམ་གང་བའི་སངས་རྒྱས་ལ། །མཆོད་པ་ཐམས་ཅད་ཡོངས་སྤང་ལ། །བླ་མ་མཆོད་པ་ཡང་དག་བརྩམས། །དེ་མཉེས་བས་ནི་ཀུན་མཁྱེན་པའི། །ཡེ་ཤེས་མཆོག་དེ་ཐོབ་པར་འགྱུར། ཞེས་དང་། དེ་ཉིད་ལས། བསྐྱེད་རིམ་བསྐལ་པ་གསུམ་བསྒོམ་ལས། །བླ་མ་མཉེས་པའི་བསོད་ནམས་ནི། །དཔག་གིས་ལངས་བ་མ་ཡིན་ནོ། ཞེས་དང་། ཤེས་རབ་མཆོག་གི་བླ་མ་ལ། །རང་གིས་མཉེས་པར་བྱས་པ་ནི། །སངས་རྒྱས་རྣམས་ཀྱིས་གསུངས་པའི་ཆོས། །བསྐལ་པ་བརྒྱ་ཕྲག་མང་པོར་ཡང་། །སུ་ཡིས་བཀླགས་ཤིས་བརྗོད་པ་ལས། །བསོད་ནམས་འབུམ་ཕྲག་བསམ་ཡས་སོ། ཞེས་སོ། བྱེ་བྲག་སྒྲུབ་པ་འདི་ཉིད་ཀྱི་ཕན་ཡོན་ཀྱང་། གཞུང་ལས། འདི་ལྟར་བརྩོན་པའི་རྣལ་འབྱོར་ལ༔ ལུས་ལ་རླུང་ཕོག་འགྲོ་བ་ཡང་༔ གྲོལ་འགྱུར་འདི་ལ་ཐེ་ཚོམ་མེད༔ དཔའ་བོ་མཁའ་འགྲོ་གྲིབ་བཞིན་འགྲོག༔ ཆོས་སྐྱོང་སྲུང་མས་སྡོངས་གྲོགས་བྱེད༔ ལྷ་འདྲེ་མི་གསུམ་དབང་དུ་འདུ༔ ཟས་ནོར་ལོངས་སྤྱོད་ཆར་ལྟར་འབེབས༔ སྐྱེ་བ་པདྨའི་དྲུང་དུ་འོང་༔ དེ་ཕྱིར་གཅེས་སོ་ཉམས་སུ་ལོངས༔ ཞེས་དང་། བླ་མ་དགོངས་འདུས་རྩ་གསུམ་དྲིལ་སྒྲུབ་ལས་ཀྱང་། ང་ཡི་རྗེས་འཇུག་སྐལ་ལྡན་ལས་ཅན་ཀུན༔ བླ་མ་སྒྲུབ་དང་ཡི་དམ་གང་གི་རིགས༔ མཁའ་འགྲོ་ལ་སོགས་ཇི་ལྟར་སྒྲུབ་འདོད་ཀྱང་༔ ངོ་བོ་ང་ལ་རྣམ་པ་གཞན་གྱི་གཟུགས༔ སྐུ་མདོག་ཕྱག་མཚན་སྟངས་སྟབས་ལ་སོགས་པར༔ བསྒྲུབས་པར་གྱུར་ན་གང་འདོད་འགྲུབ་འགྱུར་ཞིང་༔ ཇི་ལྟར་འདོད་པའི་དངོས་གྲུབ་སྩོལ་བར་ནུས༔ དེ་ཚེ་ཐེ་ཚོམ་ཡིད་གཉིས་སྤོངས་ལ་སྒྲུབས༔ ཅེས་དང་། གུ་རུ་ཆོས་དབང་གི་གཏེར་བྱོན་བླ་མ་གསང་འདུས་ལས༔ དབང་ཆེན་སྤྲེལ་ཟླའི་ཚེས་བཅུ་དང་།དུས་ཀྱི་ཚེས་བཅུ་ཐམས་ཅད་ལ༔ སྤྲུལ་པ་འཛམ་གླིང་ཁྱབ་པར་འགྱེད༔ མཆོག་ཐུན་དངོས་གྲུབ་ང་ཡིས་སྟེར༔ མི་ཚེ་བླ་མའི་སྒྲུབ་པ་ལ༔ བསྐྱལ་ན་ཚེ་ཡི་དུས་བྱས་ཚེ༔ ཨོ་རྒྱན་ང་ཡི་ཐུགས་ཀར་ཐིམ༔ ཞེས་དང་། ཨོ་རྒྱན་པདྨ་བདག་ཉིད་ལ༔ མོས་པ་དྲག་པོས་གུས་པ་དང་༔ དུང་དུང་གདུང་སེམས་དྲག་པོ་ཡིས༔ གསོལ་བ་དྲག་པོ་བཏབ་པའི་ཚེ༔ ང་ཉིད་དེ་ཡི་དྲུང་དུ་འབྱོན༔ ཞེས་དང་། ང་བསྒྲུབ་སངས་རྒྱས་ཐམས་ཅད་འགྲུབ༔ ང་མཐོང་སངས་རྒྱས་ཐམས་ཅད་མཐོང་༔ ང་ནི་བདེ་གཤེགས་འདུས་པ་ཡིན༔ ཞེས་སོགས་རྒྱ་ཆེར་གསུངས་པ་ལྟར་ངེས་ཤེས་བསྐྱེད་ལ་བརྩོན་པས་ཉམས་སུ་བླངས་ན་གནས་སྐབས་དང་མཐར་ཐུག་གི་ལེགས་ཚོགས་རླབས་ཆེན་འབྱུང་བར་འགྱུར་རོ། དཔལ་ལྡན་རྩ་གསུམ་འཁོར་ལོའི་ཕྱག་རྒྱ་ཡིས། །ཕྱི་ནང་སྣོད་བཅུད་མ་དག་འཁྲུལ་པའི་ཚོགས། སྐུ་དང་ཡེ་ཤེས་རོལ་པར་རྒྱས་འདེབས་པའི། །ལས་བཟང་འདི་ནི་སྐལ་ལྡན་འཇུག་ངོགས་ཡིན། །དེ་ལྟར་བླ་མ་གསང་བ་འདུས་པའི་བསྙེན་ཡིག་འདི་ནི་ཨངྐི་ར་ཞེས་ཆུ་ཕོ་སྤྲེའུའི་ལོར་སྤྲེལ་ཟླར་འདི་ཉིད་ཀྱི་སྒྲུབ་པ་བྱེད་མཁན་འགའ་ཞིག་འབད་རྩོལ་བགྱིས་དུས་བསྙེན་ཡིག་ཞིག་དགོས་ཞེས་དགེ་སློང་སྐལ་བཟང་བྱང་ཆུབ་ཀྱིས་ནན་ཏན་ཡང་ཡང་བསྐུལ་བ་དང་བསྒྲུབ་མི་རྣམས་ལ་ཕན་ཕྱིར་སྙམ་ནས་པདྨ་ཐེག་མཆོག་བསྟན་པའི་རྒྱལ་མཚན་གྱིས་སྦྱར་བའི་དགེ་བས་མཁའ་མཉམ་ལུས་ཅན་ཀུན་ཀྱང་གདོད་མའི་མགོན་མཆོག་ཆོས་སྐུ་གསང་བ་འདུས་པའི་གོ་འཕང་དམ་པ་ཐོབ་པའི་རྒྱུར་གྱུར་ཅིག །