སྤུ་ཆེན་གུ་རུའི་གསང་བའི་ཕུག་པའི་ལམ་ཡིག
སྤུ་ཆེན་གུ་རུའི་གསང་བའི་ཕུག་པའི་ལམ་ཡིག་བཞུགས༔ གུ་རུ་རིན་པོ་ཆེའི་སྐུ་ལ་ཕྱག་འཚལ་ཞིང་སྐྱབས་སུ་མཆིའོ༔ དེ་ཡང་གནས་ཆེན་པོ་མཁའ་འགྲོ་འབུམ་དེལ་གྱི་ཆོས་ཁྲི་སེང་གེ་འགྱིང་བསྣོལ་གྱི་སྟེང་དུ་གྷུ་རུ་རིན་པོ་ཆེ་ལ་བདག་བུད་མེད་ཡེ་ཤེས་མཚོ་རྒྱལ་གྱིས་འདི་སྐད་ཞུས་སོ༔ དུས་གསུམ་མཁྱེན་པའི་སློབ་དཔོན་ཆེན་པོ་ལགས༔ སྤུ་ཆེན་གུ་རུའི་གསང་ཕུག་གི་ལམ་ཡིག་གནས་ཀྱི་བཞུགས་བྱང་མཇལ་བའི་ཕན་ཡོན་རྣམས་བདག་ལ་གསུང་དུ་གསོལ༔ ཞེས་ཞུས་པས་གུ་རུ་རིན་པོ་ཆེའི་ཞལ་ནས་འདི་སྐད་གསུངས་སོ༔ མཚོ་རྒྱལ་གུས་པས་ཉོན་ལ་ཡི་གེར་ཐོབ་ཅིག༔ གནས་ཆེན་པོ་དེའི་ལམ་ཡིག་ནི༔ ལུང་པ་ཕུ་བྱང་དུ་བསྟན་ཞིང་མདའ་ཤར་ལྷོར་བསྟན་པའི་ལུང་པ་གྲི་ཀྱོག་འདྲ་བའི་མདོ་ནས་མིག་རྒྱང་གང་གྱེན་དུ་གཡས་ལ་བལྟས་པ་ན༔ བྲག་དེའུ་ལྕོག་འུག་པའི་མགོ་འདྲ་བ་ཞིག་ཡོད༔ མཁའ་འགྲོ་འུག་གདོང་མ་སྒོ་སྲུང་དུ་བཞུགས་པ་ཡིན་པས་བསང་དང་གཏོར་མ་གཏོང་༔ འབྲུ་སྣ་མཆོད་ཅིང་བར་ཆད་སེལ་བའི་སྨོན་ལམ་འདེབས༔ དེ་ནས་ཁ་བྱང་དུ་བལྟས་པའི་དཔག་ཚད་ཀྱི་ལམ་ལ་འགག་སྲིན་པོའི་གྲེ་བ་འདྲ་བ་བརྒལ་བ་ན་འོམ་བུ་དང་ཤུག་པ་ལ་སོགས་ཤིང་སྣ་མང་པོ་སྤུངས་པ་ལྟར་དུ་ཡོད་པས་དེ་ན་ཇོ་བོ་རྫོང་བྲག་བདུད་གྱི་ཚུལ་ལ་བསྟན་མ་བཅུ་གཉིས་གནས་ཀྱི་བཀའ་སྲུང་ལ་བཞུགས་པ་ཡིན་པས་བསང་དང་ཤ་སྣ་ཁྲག་སྣ་འབྲུ་སྣ་རྣམས་ཀྱིས་མཆོད༔ རྐྱེན་ངན་བར་ཆད་སེལ་བའི་གསོལ་བ་གདབ༔ དེའི་ལོགས་ན་ཕ་བོང་དཀར་པོ་མཎྜལ་འདྲ་བ་ལ་ཨོ་རྒྱན་ངའི་ཞབས་རྗེས་ཡོད༔ ཡང་ཕ་བོང་དཀར་པོ་ཞིག་ལ་མཁའ་འགྲོ སྡེ་ལྔ་རང་བྱོན་ཡོད༔ ཡང་ཕ་བོང་དཀར་པོ་ཞིག་ལ་སྒྲོན་མ་དཀར་མོ་རང་བྱོན་ཡོད་པས་དེ་རྣམས་ལ་ཕྱག་འཚལ་དངོས་གྲུབ་ཞུ་སྟེ་འགྲོའོ༔ དེ་ནས་མིག་རྒྱང་གང་གི་ས་ནས་རྒྱང་གྲགས་གཅིག་ཁ་ནུབ་ཏུ་བལྟས་ཏེ་བརྒལ་བ་ན་གཡས་གཡོན་གྱི་རི་སྐྱིལ་ཀྲུང་བཅས་པ་འདྲ་བའི་སྟེང་དུ་ཕྱིན་པ་དང་ཉམས་དྭངས་ལ་ཤེས་པ་གསལ་སེང་ངེ་འགྲོ་བའི་ལུང་པ་ཕུ་ནུབ་བྱང་ལ་བསྟན་པ༔ མདའ་ཤར་ལྷོར་ཕྱོགས་པ་རྩི་ཤིང་སྣ་ཚོགས་སྤྲིན་ལྟར་གཏིབས་ཅིང་སྤྲ་སྤྲེ་དང་སྟག་གཟིག་དོམ་དྲེད་སོགས་གྱ་གྱུ་ལང་ལིང་དུ་འཁྱུག་པ༔ བྱ་ཚོགས་མང་པོས་སྐད་སྙན་སྒྲོག་པ་ཞིག་ཡོད་པའི་གཡས་ཀྱི་བྲག་སྦྲུལ་འཁྱུག་པ་འདྲ་བའི་སྣ་ན་ཕུག་པ་ཤིན་ཏུ་ཆེ་བ་ཞིག་ཡོད་པ་དེ་ནི་རྡོ་རྗེ་ཕག་མོའི་གསང་ཕུག་ཞེས་བྱ་སྟེ༔ གཡས་ཀྱི་ཆ་ལ་ཕ་བརྒྱུད་ཀྱི་ལྷ་ཚོགས་གཡོན་གྱི་ཆ་ལ་མ་བརྒྱུད་ཀྱི་ལྷ་ཚོགས་ཕུགས་ནས་ཞལ་ཕྱིར་གྱུ་བ་ལ་ཞི་ཁྲོ་དམ་པ་རིགས་བརྒྱ་རྣམས་རང་བྱོན་དུ་བཞུགས༔ ཕུག་པའི་ནང་གི་སྒོ་གདོང་ལ་རིགས་གསུམ་གྱི་མགོན་པོ་གྷནྡྷོ་ལའི་ཕོ་བྲང་གི་དབྱིབས་ཅན་གྱི་ནང་དུ་འབུར་དོད་ལ་གསལ་བར་བཞུགས་པས་ཚོགས་ཀྱི་འཁོར་ལོ་བསྐོར་ཞིང་གསོལ་བ་ཐོབ་དང་མཆོག་ཐུན་མོང་གི་དངོས་གྲུབ་འཐོབ༔ དེའི་གཡས་ཕྱོགས་བྲག་མདའ་སྒྲོ་འདྲ་བ་ན་བར་དོའི་འཕྲང་ཡོད་པ་བརྒལ་ཞིང་སེམས་ཅན་ཐམས་ཅད་བར་དོ་ལས་སྒྲོལ་བའི་སྨོན་ལམ་འདེབས༔ གཡོན་ཕྱོགས་ཀྱི་ཕུག་པ་ཆུང་ལ་ཁ་ནག་པ་ཞིག་ཡོད་པ་དེ་ན་མཚོ་རྒྱལ་གྱིས་བཀའ་རྫོགས་པ་ཆེན་པོའི་མུན་འཁྲིད་བསྒོམས་པའི་གནས་ཡིན་པས༔ དེའི་ནང་དུ་འཛུལ་བས་བར་དོ་མུན་ནག་གི་འཇིགས་པ་ལས་སྒྲོལ༔ དེ་ནས་གྱེན་དུ་མིག་རྒྱང་གང་བརྒལ་བའི་ས་ན་སྤུ་ཆེན་གུ་རུའི་གསང་ཕུག་ཞེས་བྱ་བའི་ཕུགས་ན་གཞོགས་གཡས་པའི་ས་ལ་བྲག་དོང་དུ་ལག་པ་བརྐྱངས་པས་ཆུ་ཡོད་པ་དེ་ནི༔ བདག་པདྨས་ཚེ་བསྒྲུབས་པའི་ཚེ་ཆུ་ཡིན་པས་འཐུངས་ན་ཚེའི་བར་ཆད་ཞི་ཞིང་དེའི་སྟེང་ན་ཚེ་དཔག་མེད་ཡབ་ཡུམ་རང་བྱོན་དུ་བཞུགས༔ ཕུག་པའི་གཡས་གཡོན་དུ་སྒྲུབ་པ་བཀའ་བརྒྱད་ཀྱི་ལྷ་ཚོགས་རང་བྱོན་ལ་བཞུགས༔ སྒོ་ཐོད་ཀྱི་ངོས་ལ་གྲུབ་ཆེན་བརྒྱད་ཅུ་རང་བྱོན་དུ་བཞུགས༔ ཡར་འགྲོ་བའི་སྒོ་འགྲམ་གཡས་ལ་ཤེལ་གྱི་མཆོད་རྟེན་བང་རིམ་བརྒྱ་པ་རམ་ཟླའི་བཅོ་ལྔ་ལ་ལྷ་དབང་བརྒྱ་བྱིན་དང་དབང་ཕྱུག་ཆེན་པོ་རྣམས་ཀྱིས་ཁྲུས་གསོལ་ཞིང་ཕྱག་བྱེད་པའི་གནས་མཐོང་བ་ཙམ་གྱིས་ངན་སོང་གི་སྐྱེ་སྒོ་ཆོད་པ་ཐུགས་རྗེ་ཆེན་པོ་ལ་ཉེ་སྲས་བརྒྱད་ཀྱིས་བསྐོར་བའི་ཕོ་བྲང་ཞིག་ཡོད༔ གཡོན་ཕྱོགས་ལ་བྱང་ཆུབ་ཆེན་པོའི་མཆོད་རྟེན་བཞུགས༔ སྒྲུབ་ཕུག་འདི་ནི་པདྨ་འབྱུང་གནས་བདག་གིས་ཚེའི་སྒྲུབ་པ་ཞག་བདུན་བྱས་པས་ལྷ་ཚོགས་དེ་དག་ཞལ་གཟིགས་ཤིང་སྒྲུབ་གནས་འདི་ལ་ཐིམ་པ་ཡིན་པས་མ་འོངས་ཀྱི་སྐལ་ལྡན་ཕོ་མོ་རྣམས་ཀྱིས་གསོལ་བ་བཏབ་ན༔ མཆོག་ཐུན་མོང་གི་ཡོན་ཏན་ཐམས་ཅད་ཡིད་བཞིན་གྱི་ནོར་བུ་ལ་གསོལ་བཏབ་པ་ལྟར་འགྲུབ་པར་འགྱུར་རོ༔ སྒྲུབ་ཕུག་དེའི་གཡས་ཀྱི་བྲག་གི་རྩེ་མོ་ན་བྱ་སྐྱིབས་ཀྱི་རྣམ་པའི་གནམ་ཕུག་ཅིག་ཡོད་པ་ནི༔ བདག་པདྨ་འབྱུང་གནས་ཀྱིས་རྫོགས་པ་ཆེན་པོ་ཐོད་རྒལ་བསྒོམས་པའི་གནས་ཡིན་པས་ཕུང་པོ་ལྷག་མེད་འགྲུབ་པའི་གསོལ་བ་འདེབས༔ དེའི་བྲག་རྩ་ན་ཕུག་པ་ནོར་བུའི་དབྱིབས་ཅན་ཞིག་ཡོད་པ་ནི༔ བདག་གིས་མུན་ཁྲིད་བསྒོམས་པའི་སྒྲུབ་ཕུག་ཡིན་པས་ཞི་ཁྲོའི་ལྷ་ཚོགས་ཐམས་ཅད་རང་བྱོན་དུ་ཡོད༔ ནང་དུ་སོང་ཞིང་གསོལ་བ་བཏབ་ན་བར་དོའི་འཇིགས་སྐྲག་མི་འབྱུང་ཞིང་དམ་པ་རིགས་བརྒྱའི་ལྷ་ཚོགས་བར་དོར་ངོས་ཟིན་ཅིང་ལམ་སྣ་འདྲེན་པར་འགྱུར་རོ༔ སྒྲུབ་ཕུག་ཆེན་མོའི་གཡས་ནས་བྲག་འཕྲང་ལ་བརྒལ་ཏེ་སོང་བ་ན་རྒྱབ་ཏུ་ཨོ་རྒྱན་ང་ཡི་སྒྲུབ་ཆུ་ཡོད༔ ཀླུ་པདྨ་དཀར་པོ་བདག་པོ་ལ་བསྐོས་ཡོད་པས་ཐབ་གཞོབ་དང་དམར་སོགས་མི་བཏང་ཞིང་རྣལ་འབྱོར་བ་རྣམས་ཀྱི་འཐུང་ཆུར་བྱའོ༔ ནང་དུ་བཏུངས་ན་སྡིག་སྒྲིབ་ཐམས་ཅད་འདག་པར་འགྱུར་རོ༔ གནས་འདི་ལ་ཨོ་རྒྱན་ང་ཡི་གཏེར་ཁ་གསུམ་ཡོད༔ དེ་ནས་གྱེན་དུ་མིག་རྒྱང་གང་ལྷོ་ནུབ་ཏུ་འཛེགས་པས་ཡེ་ཤེས་མཚོ་རྒྱལ་གྱི་སྒྲུབ་ཕུག་བྲག་ནོར་བུ་འདྲ་བའི་ངོས་ལ་ཡོད༔ དེའི་ནང་དུ་གུ་རུ་མཚན་བརྒྱད་རང་བྱོན་ཡོད༔ མཚོ་རྒྱལ་གྱིས་མཚན་བརྒྱད་བསྒྲུབས་པའི་ཕུག་པ་ཡིན༔ གསོལ་བ་བཏབ་ན་མཚན་བརྒྱད་མཇལ་བ་དང་ཕན་ཡོན་མཉམ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་མ་འོངས་དུས་ཀྱི་སྐལ་ལྡན་རྣམས༔ སྒྲུབ་པའི་གནས་མཆོག་དམ་པ་འདི་ཉིད་དུ༔ ལན་རེ་མཇལ་བས་དངོས་གྲུབ་སྣ་རེ་འཐོབ༔ སྡིག་སྒྲིབ་འབྱང་ཞིང་བར་ཆད་རྐྱེན་རྣམས་སེལ༔ ཚོགས་འཁོར་བསྐོར་བ་ཆུད་ཟོས་སོང་རེ་ཀན༔ གནས་འབྲེལ་བྱས་རྣམས་བར་དོ་མེད་པར་གྲོལ༔ ལོ་གསུམ་སྒྲུབ་ན་མཁའ་སྤྱོད་གནས་སུ་འགྲོ༔ ཅེས་གསུངས་པ་རྣམས་བདག་བུད་མེད་ཡེ་ཤེས་མཚོ་རྒྱལ་གྱིས་མཁའ་འགྲོའི་བརྡ་ཡིག་ཏུ་བཏབ་སྟེ་ཁམས་སྲིང་མོ་རྫོང་གི་གནས་ལ་རིན་པོ་ཆེའི་གཏེར་དུ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཁམས་སྲིང་མོ་རྫོང་ནས་ཤིང་ཕོ་སྟག་གི་ལོ་ལ་སྤྱན་དྲངས་ཤིང་ཤོག་སེར་ལས་བསྒྱུར་བ་འདིས་ཀྱང་འགྲོ་བ་སེམས་ཅན་ཐམས་ཅད་ལ་ཕན་ཐོག་པར་ཤོག